CLOSE WINDOW

D1795
བོད་ཡིག

@##/ /rgya gar skad du/ /shrI badzra mA la ma hA yo ga tan+t+ra TI kA gab+hI rAr+tha d+hi pi ka nA ma/ bod skad du/ rnal 'byor chen po'i rgyud dpal rdo rje phreng ba'i rgya cher 'grel pa zab mo'i don gyi 'grel pa zhes bya ba/dpal rdo rje sems dpa' la phyag 'tshal lo/ /gang zhig gtum mo'i rnal 'byor chags phyir bdud rtsi'i ro la nges brten pa/ /gang zhig ma la ya rtse'i logs las lus kyi nang na tshim byed cing //gang zhig 'khor ba'i 'gro ba yongs su dag pa la ni thabs bstan mdzad/ /yum bcas rdo rje sems des khyed rnams la ni dge legs ster gyur cig /dpal ldan gsang ba 'dus nyid kyi//rdo rje phreng ba zhes bya ba'i/ /'grel pa man ngag dri med ni/ /bshad pa'i rgyud la yang dag bshad/ /'dir bcom ldan 'das rdo rje 'chang gi sprul pa'i sku dngos rgyal bu don thams cad grub pas chu bo nai rany+dzA na'i 'gram du phyin ci log gi ting nge 'dzin mkha' khyab ces bya ba la snyoms par zhugs te/'di nyid ni byang chub bo snyam du dgongs nas gnas par gyur to/ /de nas mngon par dga' ba dang /'og min dang / rin chen 'byung gnas dang / bde ba can dang / me tog ldan pa zhes bya ba'i sangs rgyas kyi zhing rnams nas byon te/ rgyal bu don thams cad grub pa de nyid la/ bsam gtan 'di ni rnam dag min//zhes bya ba la sogs pas bskul bas de nas phyin ci log gi bsam gtan de dor bar gyur to/ /de'i rjes su bar snang la de bzhin gshegs pa thams cad kyis yongs su gang bar rnam par gzigs nas/oM sarba ta thA ga ta kA ya wAka tsit+ta pra Na me na badzra ban+d+ha naM ka ro mi zhes bya ba phyag 'tshal ba dang bskor ba sngon du 'gro bas phyin ci ma log pa'i de kho na nyid kyi ngo bo'i ting nge 'dzin bstan pa'i don du bcom ldan 'das de rnams nyid la gsol ba btab par gyur to//de nas bcom ldan 'das de rnams kyis phyag rgya chen po'i dkyil 'khor sprul pa sngon du 'gro bas slob ma sta gon la gnas pa dang / byang chub tu sems bskyed pa dang / dbang bskur bzhi dang / dam tshig dang sdom pa sbyin pa sngon du 'gro bas rab tu dbye ba dang bcas pa'i dbang bskur bzhi pa rnams kyis dbang bskur nas/ting nge 'dzin gsum dang / rigs brgya rab tu dbye ba dang / rim pa lnga bstan pa'i rim pa man ngag nye bar bstan nas/de bzhin gshegs pa de rnams rang rang gi sangs rgyas kyi zhing du nye bar gshegs par gyur to/ /de nas bcom ldan 'das shAkya seng ge sngon bcom ldan 'das rnams kyis bstan pa'i man ngag gi dbang po rnon po nyid kyi phyir/ mngon du mdzad nas nam phyed na mngon par rdzogs par sangs rgyas te tho rangs kyi dus su bdud bcom par mdzad nas dga' ldan gyi gnas su gshegs te/rang gi sku'i 'byung ba chen po la sogs pa rnams las rin po che sna bdun las byas pa'i gzhal yas khang spros so/ /nyid kyi phung po lnga rnams las de bzhin gshegs pa lnga dang / sa la sogs pa'i khams rnams las spyan ma la sogs pa lhan cig spyod ma bzhi dang / mig la sogs pa drug dang / yan lag gi tshogs thams cad dang / rgyus pa dang bcas pa thams cad las ji ltar srid par gzugs rdo rje ma la sogs pa lnga byang chub sems dpa' brgyad dang bcas pa dang /rang gi sku'i yan lag dang nye ba'i yan lag bcas pa rnams las khro bo bcu spros par gyur to/ /de'i rjes su de gtso bor gyur pa'i dkyil 'khor gyi 'khor lo nam mkha'i ngos khyab pa'i bcom ldan 'das la gsol ba btab nas/ 'dod chags can gyi 'dod chags spang ba'i don du chags pa dang bral ba'i dbye bas rigs rnam pa bzhi nye bar bstan nas/gsang ba 'dus pa'i rgyud chen po stong phrag nyi shu rtsa lnga pa bstan par gyur to/ /de'i rjes su slar yang tshe dang lta ba dang nyon mongs pa dang skal ba dang sems can gyi snyigs mas khyab pa'i sems can gyi khams la gzigs te/dkyil 'khor pa de rnams la gsol ba btab pas nyung ngu'i rgyud kyi rgyal po dpal gsang ba 'dus pa zhes bya ba gzhung gi tshad brgya phrag bco brgyad pa le'u bco brgyad kyi bdag nyid can bstan par gyur to/ /de yang sdud pa po phyag na rdo rje'am 'jam dpal gyis brgyud nas mi'i 'jig rten du 'ongs so/ / de la rdzogs ldan dang gsum ldan dang gnyis ldan dang rtsod pa can gyi dus su zhal gyi gdams ngag dang / rtsa ba'i rgyud dang yan lag gi rgyud dang bshad pa'i rgyud la sogs pa la 'jug pa zhes bya ba ni kha cig smra'o/ /gzhan dag ni rtsod pa'i dus 'di nyid du sems can thams cad rjes su gzung ba'i phyir nyung ngu'i rtsa ba'i rgyud bstan pa'i de ma thag tu bcom ldan 'das kyis yan lag gi rgyud dang bshad pa'i rgyud la sogs pa bstan zhes zer ro//phyogs 'di yang 'ongs pa yin te/ rtsod pa can gyi dus su shes rab dman pa nyid kyis sems can rnams la rtsa ba'i rgyud kyi rnam par dbye ba bcom ldan 'das kyis bstan pas gdon mi za bar nye bar mkho ba nyid kyi phyir ro//bcom ldan 'das kyis rgyud bstan pa de yang 'dus par gyur pa ni cho ga lnga'i rgyud kyi sbyor ba bsdus pa ste/ 'di lta ste/ bya ba dang / spyod pa dang / rnal 'byor dang / rnal 'byor chen po dang / rnal 'byor ma'i rgyud kyi dbye bas so/ /de la 'dod chags dang zhe sdang chung zhing chung la/ gti mug che zhing che ba bram ze'i rigs su gyur pa'i sems can la brten nas/ sum cu rtsa gsum pa'i lha'i gnas su dpal sgron ma 'byung ba la sogs par bstan par khrus lan gsum byed pa dang /gos lan gsum brje ba dang / 'o ma dang thug pa za ba'i spyod pa gtso bor byed pa rnams la rigs pa'i dbang lnga po rnams gtso bor bstan pa mdzad do/ /de nas 'dod chags dang zhe sdang dag chung zhing gti mug shin tu chen por gyur pa khyab 'jug la mos pa/ rje'u'i rigs kyi rigs can gyi sems can rnams la brten nas bcom ldan 'das kyis dpal rnam par snang mdzad mngon par byang chub pa spyod pa'i rgyud bstan pas/bsnyen gnas dang 'dra ba'i thun mong ba bcu gnyis nas nyi shu rtsa bzhi'i bar du smyung ba dang khrus la sogs pa'i spyod pa gtso bor ston par byed pa sngon gyi rang dang 'dra bar dbang bskur ston par byed pa/bskyed pa'i rim pa gcig pu tsam ston par byed pa ni 'og min gyi gnas su mdzad pa'o/ /de'i rjes su gti mug 'bring dang 'dod chags dang zhe sdang 'bring gi sems can rnams la brten nas/ rgyal rigs kyi rigs can gdul ba'i don du rnam par snang mdzad chen po'i gzugs thob nas ri rab kyi rtse mor sngon gyi smon lam gyi stobs kyis seng ge'i khrir gyur pa la dam pa tog dkar po'i gnas skabs kyi lus kyis bzhugs nas/'dod chags dang zhe sdang dang gti mug dang ser snas gnon pa'i dbang po dang / dbang phyug chen po dang /ma skyes pa dang / e la bi la gdul ba'i phyir rim pa ji lta ba bzhin du rdo rje dbyings dang / khams gsum rnam par rgyal ba dang / 'gro ba 'dul ba dang / don thams cad grub pa'i dkyil 'khor zhes bya ba rtogs pa rnam pa bzhi'i bdag nyid can rgyud kyi rgyal po dpal de kho na nyid 'dus pa zhes bya ba bstan pa ni/gtso bor rdo rje slob dpon gyi dbang bskur ma lus pa ston pa bskyed pa'i rim pa'i steng du thig le'i rnal 'byor bsgom pa dang bcas pa mdzad do/ /de'i rjes su de nyid du dpal rdo rje rtse mo'i rgyud bstan par mdzad do/ /de'i rjes su dga' byed shAkya thub pa'i gzugs kyis lha'i bu nor bu'i 'od gdul ba'i don du ngan song thams cad sbyong ba'i rgyud bstan par mdzad do//de nas ri rab kyi steng du sgo glegs kyi gtsug lag khang gi nang du phyag na rdo rje'i gzugs kyis gsang ba'i bdag po phyag na rdo rje gdul ba'i don du phyag na rdo rje dbang bskur ba'i rgyud bstan par mdzad do//de nas gzhan 'phrul dbang byed du rdo rje sems dpa'i gzugs kyis bdud 'dul ba'i phyir dpal mchog chen po'i rgyud bstan par mdzad do/ /de'i rjes su 'dod chags dang zhe sdang che zhing / gti mug chung ba'i rje'u rigs kyi sems can rnams la brten nas dga' ldan gyi lha rnams la gtso bor dbang bzhi ston pa/rim pa gnyis kyis bsdus pa dang / gsang ba 'dus pa'i rgyud bstan par mdzad do/ /de'i rjes su u rgyan du nub kyi ri la bcom ldan 'das dpal rdo rje sems dpa'i gzugs kyis khro bo bcu'i sgo nas gtso bor phyogs skyong bcu 'dul ba'i phyir/rdo rje phreng ba stong phrag bcu gnyis pa dang rdo rje phreng ba nyung ngu'i rgyud gnyis bstan par mdzad do/ /de'i rjes su de bzhin gshegs pa la gsol ba 'debs pa'i bcom ldan 'das kyis dpal ldan rdo rje sems dpa'i gzugs kyis kha ba can gyi ri la mi rnams kyi nang du dpal dgongs pa lung bstan gyi rgyud bstan par mdzad do//de'i rjes su lha mo bzhis gsol ba btab pa'i bcom ldan 'das kyis ri bo 'bigs byed kyi rtse mo la dpal lha mo bzhis zhus kyi rgyud bstan par mdzad do/ /de'i rjes su gang+gA'i 'gram du dpal ye shes rdo rje kun las btus pa'i rgyud chen po dang chung ngu'i dbye bas bstan par mdzad do//de'i rjes su 'dod chags dang zhe sdang chen po'i chen po gti mug chung zhing chung ba'i gdol pa'i rigs dang 'brel pa'i sems can rnams la brten nas/ bcom ldan 'das dpal 'khor lo bde mchog chen po dang chung ngu'i rgyud kyi dbye bas rim pa gnyis gtso bor ston pa dang / gtso bor dbang bzhi ston pa dang / shes rab gtso bor gyur pa'i bshad pa'i rgyud bzhi dang bcas pa gnas gtsang ma 'phags pa'i gnas su bstan par mdzad de/ rgyud bzhi po'i gnas kyi rnam par dbye ba 'dir mi dgos pa'i phyir ma bstan to/ /de'i rjes su 'dzam bu'i gling 'di nyid du ma ga d+hAr bdud bzhi 'dul ba'i don du dpal dgyes pa'i rdo rje'i rgyud bstan pa chen po dang chung ngu'i rgyud bshad pa'i rgyud dang bcas pa bstan par mdzad de/de'i yang gnas kyi rnam par dbye ba la sogs pa mi dgos pa'i phyir 'dir ma bstan to/ /de'i phyir 'dir rgyud sde lnga'i nang nas bcom ldan 'das thugs rje chen po dang ldan pas u rgyan du nub kyi ri la rdo rje phreng ba'i rgyud chung ngu bstan par mdzad de/le'u drug cu rtsa brgyad kyi bdag nyid can dri ba dang lan brgyad cu rtsa gnyis kyi bdag nyid can bstan par mdzad do/ /'di yang brjod par bya ba'i rim pa gnyis ni gtso bo'i don to/ /de la dang po rdo rje phreng ba'i rgyud sdud pa po phyag na rdo rje'am 'jam dpal rgyud kyi don ma lus pa thugs la nye bar bzhag nas ngag dang po gleng gzhi ngag gi rnam grangs gzhan dang ldan pa 'di skad ces bya ba la sogs pa gsungs so//'di la don gsum ste/ gleng gzhi'i ngag gi dgos pa dang / gleng gzhi'i bsdus pa'i don dang de nyid kyi yan lag gi don to//de la dang po nyan pa po'i skye bo la dbugs dbyung ba bskyed pa dang / bcom ldan 'das kyi bka' yongs su bskyang ba dang / yid ches pa'i gdams ngag thob pas bdag nyid khyad par du 'phags pa'i nyan pa por ston pa nyid do/ /bsdus don zhes bya ba ni phun sum tshogs pa lnga dang ldan pa ste/de la 'di skad ces bya ba la sogs pas bstan pa'i bya ba phun sum tshogs pa'o/ /bdag gis thos pa zhes bya ba la sogs pas ni 'khor phun sum tshogs pa mdor bstan pa'o/ /dus gcig na zhes bya ba la sogs pas ni dus phun sum tshogs pa'o//bcom ldan 'das zhes bya ba la sogs pas ni ston pa po phun sum tshogs pa'o/ /de bzhin gshegs pa thams cad kyi sku dang gsung dang thugs kyi snying po rdo rje btsun mo'i b+ha ga rnams la bzhugs te zhes bya ba la sogs pas ni gnas phun sum tshogs pa gsungs so//de la yan lag gi don rnam pa gnyis te/ dang po ni bshad pa rnam pa bzhi dang / gnyis pa ni phyi dang nang gi bdag nyid kyis bshad pa'i dbye ba'o/ /de la yi ge'i don bshad pa'i skabs su phun sum tshogs pa rnam pa lngas bshad par bya ste/ de bzhin nyid dang / zla ba dang / sa bon dang / lus kyi dbye bas bcom ldan 'das rdzogs pa'i ji skad du gsungs pa'i gzhal yas khang gi nang du bzhugs pa ni/ mtha' drug gi bshad pa'i rjes su 'brangs nas shes par bya zhing rtogs par bya'o/ /de'i rjes su 'di dag gi zhe'am/ 'di dag gis zhes bya ba la sogs pa mi zad pa yongs su spangs nas 'di skad ces bya ba'i yi ge gnyis la brgya byin gyis zhus pa'i mdo'i khungs kyis e baM gi tshig /kun gyi gzhi dang pha ma ni/ /yi ge gnyis dang de bzhin bstan/ /yi ge e ni mar gyur la/ baM ni pha zhes bya bar grags/ /zhes bya ba la sogs pa'i bshad pas brjod nas/de'i rjes la bdag gis thos pa zhes gsungs so/ /sa bon ngo bos gang sprul pa/ /lha rnams kyis ni 'khor lo mchog /mchog tu dga' ba'i dus gang yin/ /dus gcig na zhes bshad pa yin/ /dbang phyug brgyad kyi bcom ldan 'das/ /bde ba chen po'i gnas la bzhugs//'di yi phung po lnga rgyal ba/ /de bzhin gshegs pa thams cad yin/ /de yi bdag nyid sku gsung thugs/ /rdo rje snying 'dir bde chen po/ /btsun mo legs sbyangs phyag rgya che/ /legs sbyangs pad+ma b+ha ga yin/ /bzhugs pa rdo rje 'dzin pa der/ /thig le'i gzugs kyis gnas pa'o//zhes bya ba la sogs pa'i spyi'i don gyi bshad pas don bstan to/ /sbas pa'i don ni le'u lnga bcu rtsa dgu pa'i rjes su 'brangs nas/ e ni shes rab dam pa ste/ /zhes bya ba la sogs pas nye bar bkod pa 'og nas 'chad par 'gyur ro/ /mthar thug pa'i don ni dgongs pa lung bstan gyi rgyud kyi rjes su 'brangs nas/rgyud ni bdag gis 'di skad thos/ /gsal ba 'ga' zhig dus yin te/ /zhes bya ba la sogs pas bshad do/ /'dir yang rgyud 'di phal cher thun mong gi rgyud kyi bshad par gyur pa nyid kyi phyir rnal 'byor chen po dang /rnal 'byor ma'i rgyud kyi rjes su 'brangs nas gleng gzhi bshad par bya ste/ de la re zhig phyi rol gyi bshad pa'i phyogs su 'di skad ces bya bas rgyud ma lus pa'i don ston par byed pa'i tshig gi phrad kyis sdud pa po'i brjod par 'dod pa la snang ba rgyud kyi don bsdu ba gsungs so//de ltar na 'di skad ces bya ba ni ji ltar sdud par gyur pa de lta bu nyid du ste/ sgro 'dogs pa dang skur pa 'debs pa dag gis ni ma yin zhes bya ba'i don to/ /bdag gis zhes bya ba ni bdag nyid gtso bor gyur pa'i 'khor de bzhin gshegs pa dang / lhan cig spyod ma dang / rjes su spyod ma dang /byang chub sems dpa' dang / /khro bo'i gzugs kyis so/ /de ltar ji ltar 'og nas 'chad par 'gyur ba de'i phyir bdag nyid gtso bor gyur pa'i 'khor gyis so/ /thos pa zhes bya ba ni rtogs pa ni ma yin no/ /rang nyid kyis mngon par rdzogs par 'tshang rgya ba'i chos bstan pa yin gyi ston pa po las thos pa sdud pa pos sdud par byed de/de bas na thos pa zhes bya ba 'dis 'og nas sdud pa po mtshon par byed do/ /dngos su ma yin pa thos pa'am gzhan du thos pa la sdud pa po tshad ma nyid du 'gyur ro/ /de'i phyir bdag gis dngos su thos pa zhes brjod pa la bdag gi bla ma dang de'i bla ma rnams las ni ma yin no zhes ston par 'gyur ro//gang gi zhe na/ de'i phyir dus gcig na zhes gsungs te/ dus gcig ni dus gcig gi tshe na 'di thos la gzhan du ni gzhan dag thos pa'o zhes bya ba 'dis sdud pa po mang du thos pa nyid du bstan to/ /yang dus gcig gi tshe zhes bya ba ni dus gcig la ste dus gzhan du 'di lta bu bstan pa med pa'i phyir/des na rgyud rnyed par dka' ba nyid gsungs so/ /yang na dus gcig gi tshe 'di thos pa ste/ gang gi tshe bcom ldan 'das kyi zhal gyi pad+ma las rgyud bstan pa'i ngag thos pa de nyid kyi tshe skad cig gcig nyid la bdag gis lhag chad med par bzung zhes bya ba'i don to//'dis ni spobs pa phun sum tshogs pa dang ldan pa nyid sdud pa po la bstan to/ /su las thos she na/ de'i phyir bcom ldan 'das zhes bya ba gsungs so/ /gang gi tshe bcom ldan 'das gnas khyad par can du bzhugs pa/ de'i tshe drung nas thos zhes bya ba'i tha tshig go//de la bdud bzhi bcom pa'am dbang phyug la sogs pa'i yon tan drug dang ldan pas na bcom ldan 'das so/ /de stong pa nyid bsgoms pas 'chi bdag gi bdud bcom mo/ /lha sum cu rtsa gnyis kyi bdag nyid can gyi dkyil 'khor gyi 'khor lo'i rnam pa rang gi lus la yongs su shes pas phung po'i bdud bcom mo//de bzhin gshegs pa lnga'i rnam pas nyon mongs pa lnga yongs su shes pas nyon mongs pa'i bdud bcom mo/ /bgegs bskrad pa'i dus na dbang po la sogs pa'i phyogs bcu'i 'jig rten skyong ba la phur bus btab pas rnam par bcom pa'i phyir lha'i bu'i bdud bcom mo//de bzhin du bcom ldan 'das la dbang phyug tshang ba ste/ bag chags dang bcas pa'i nyon mongs pa dang shes bya'i sgrib pa thams cad spangs pa'i phyir ro/ /de bzhin du bcom ldan 'das la ye shes kyang tshang ba ste/ bdag med pa nyid kyi rnam pas chos thams cad yongs su shes pa'i phyir ro//grags pa tshang ba ste/ sangs rgyas rjes su dran pa'i sgo nas thams cad du grags pa'i sgra rnyed pa'i phyir ro/ /dpal tshang ba ste rnam pa thams cad du sems can thams cad kyi don du gnyer ba'i phyir ro/ /gzugs tshang ba ste mtshungs pa med pa'i mtshan dang dpe byad rnams kyis yan lag rnam par mdzes pa'i phyir ro//'bad pa tshang ba ste sems can gcig gi ched du yang 'khor ba'i mthar thug pa med par gnas pa'i phyir ro/ /gnas gang du zhe na/ de'i phyir bcom ldan 'das de bzhin gshegs pa thams cad kyi zhes bya ba la sogs pa gsungs te/de bzhin nyid du gshegs pa dang / 'khor ba las ji ltar gshegs par byed pa de lta bu nyid du mi gnas pa'i mya ngan las 'das pa nyid du gshegs pa dang / dngos po 'ga' zhig ji ltar song ba de lta bu nyid du 'gyur bas na/ de bzhin gshegs pa rnams so/ /nam mkha'i gtos thams cad khyab par byed pas na thams cad do//thams cad kyang yin la de bzhin gshegs pa yang yin pas na de bzhin gshegs pa thams cad de/ bsdu na rigs lnga dang 'brel pa rnams so/ /de rnams kyi sku gsung thugs ni rin chen 'byung ldan dang / don yod grub pa dag ji ltar rigs par rnam par snang mdzad dang snang ba mtha' yas dag la 'dus pa'i phyir gsang ba gsum gyi rang bzhin rnams te thams cad 'dus pa'i phyir ro//de rnams kyi snying po'i ngo bo rdo rje btsun mo rnams ni spyan ma la sogs pa rnams so/ /de rnams kyi b+ha ga ni chos 'byung gi phyag rgya'i rang bzhin rnams so//de la bzhugs te zhes bya ba ni de la gnas pa'i gzhal yas khang na bzhugs par gyur pa'o/ /'di skad ston par 'gyur te stong pa nyid bsgoms pa'i rjes la rdo rje 'chang chen po yongs su gyur pa las skyes pa'i chos 'byung gi phyag rgya'i steng du yaM raM baM laM gi sa bon yongs su gyur pa las skyes pa don yod grub pa ngag gi dbang phyug dang thugs kyi dbang phyug dang rin chen 'byung ldan rig ma dang bcas pa yongs su gyur pa las rlung dang me dang chu dang sa'i dkyil 'khor gyi steng du rnam par snang mdzad yongs su gyur pa las skyes pa'i gzhal yas khang gi steng du nyi ma dang zla ba la sogs pa'i gdan gi steng du gang gi tshe bcom ldan 'das bzhugs pa de'i tshe bdag gis thos so zhes bya ba'i don to//bzhugs so zhes bya ba ni rdzu 'phrul gyi gnas pa bzhis bzhugs pa'o/ /de la rdzu 'phrul gyi gnas pa bzhi ni gang zhe na/ ston pa'i gnas pa dang / spyod lam gyi gnas pa dang / snyoms par 'jug pa'i gnas pa dang / nang du yang dag 'jog gi gnas pa zhes bya'o/ /de la gang zhig bcom ldan 'das kyi gsung gi las thams cad ni ston pa'i gnas pa'o/ /gang zhig sku'i phrin las thams cad ni spyod lam gyi gnas pa'o/ /gang zhig bsam gtan dang ting nge 'dzin la snyoms par 'jug pa la yid kyi las thams cad rang bzhin gyis mnyam par gzhag pa ste//de rnams kyi snyoms par 'jug pa'i gnas pa'o/ /gang zhig lha la sogs pa'i nye bar 'gro ba la sogs pa rnams la rang bzhin gyis rnam par dag pa'i yid kyi las de nang du yang dag 'jog gi gnas pa ste/phyi'i bshad pa'o/ /nang du e zhes bya ba ni shes rab dang / de'i mtshan ma dang / de'i rtsa ba dang / de'i rig pa'o/ /baM yig gis thabs dang / de'i rgyal mtshan dang / de'i rtsa ba dang de'i rig pa'o/ /thig les ni de dang yang dag par sbyor bas thig le'i ngo bo bde ba chen po nyams su myong ba'o//'dis kyang don dam pa'i bde ba chen po nyams su myong ba sngon du 'gro bas chos kyi sku mtshon pa'o/ /bdag gis zhes bya ba 'dis ni a haM gi ngo bos rgyud dang ye shes kyi rim pa'i ngo bo nyid kyis thig le bzhi'i ngo bos 'khor lo bzhi la longs spyod rdzogs pa'i sku mtshon pa'o/ / thos pa zhes bya ba 'dis ni 'dzag pa'i don gyis sprul pa'i sku mtshon to/ /ji skad du/ gcig ni nam mkha' dang 'dra ste/ /gzhan ni zla ba rdzogs pa 'dra/ /mkha' 'dra gang zhig 'di dag gi/ /skyob pa rnams kyi chos sku de/ /gang zhig zla ba rdzogs pa ltar/ /de nyid longs spyod rdzogs pa'i sku mtshon pa'o//dus gcig na zhes bya ba 'di ni bsam gyis mi khyab pa'i dus gsungs so/ /ji skad du/ bzang ba'i dus dang ngan pa'i dus/ /bsam gyis mi khyab dus nyid dang / /sna yi bu ga gnyis nas ni/ /'ongs pa bzang po'i dus zhes brjod/ /song ba dus ngan zhes brjod do//bsam gyis mi khyab de bzhin 'gyur/ /srog dang rtsol ba rnam spangs pa/ /'byung dang 'jug pa spangs pa dang / /'gro dang 'ong las rnam grol ba/ /dus gcig ces ni brjod pa min/ /zhes gsungs so/ /bcom ldan 'das zhes bya ba 'dis ni dga' ba gsum 'joms par byed pa'i lhan cig skyes pa brjod pa yin no//de bzhin gshegs pa thams cad ni rtsa stong phrag bdun cu rtsa gnyis sdud par byed pa'i 'khor lo bzhi'am drug rnams te/ de bzhin gshegs pa thams cad kyi rang bzhin nyid kyi phyir ro/ /de rnams kyi sku gsung thugs ni de sdud par byed pa'i rnam pa can rtsa gsum mo//de nyid ni snying po ste rtsa gsum po de'i dbang gis rtsa gzhan rnams bskyed pa'i phyir ro/ /de'i ngo bo'i rdo rje btsun mo rnams ni las dang dam tshig dang ye shes kyi phyag rgya'i ngo bo rnams so/ /de rnams kyi b+ha ga rnams ni kun rdzob tu chos 'byung gi lte ba'i gnas rnams la gang gi tshe thig le'i ngo bos gnas pa mdzad pa de'i tshe bdag gis thos zhes bya ba'i tha tshig go//nang gi bshad pa'o/ /de ltar gleng gzhi bshad nas 'khor phun sum tshogs pa rgyas par bshad pa bstan par 'dod nas/ tshad med pa zhes bya ba la sogs pa gsungs te/'di tsam nyid du gzhal bar mi nus pa nyid kyi phyir tshad med pa'o/ /phyag rgya chen po zhes bya ba ni dga' ba chen po len pas na phyag rgya chen po ste/ shin tu zab pa ma yin pa dang shin tu zab pa'i rim pas rdzogs pa'i skur brjod do/ /de'i don du mngon par rdzogs pa spros pa'i rgyud rdo rje dang zla ba la sogs pa'i rim pa dang rigs brgya'i dbye ba bsgom pa gang zhig mngon par rtogs pa de la bzhugs pa ni gnas pa gang rnams la yod pa de ni de ltar ro//dpag tu med pa rdo rje'i rigs dang / rab tu 'brel pa'i byang chub sems dpa' sngags kyi sgo nas spyad pa spyod pa ste/ byang chub ni sku gsum gyi rnam pa can la sems dpa' ni dgongs pa gang la yod pa de rnams de ltar ro//de rnams kyi bye ba ni 'bum phrag bcu'i rnam pa'o/ /de rnams kyi khrag khrig ni sa ya'i rnam pa'o/ /de'i grangs brgya stong ni 'bum mo/ /de'i grangs kyis ni rnam par bcad pa dang lhan cig tu zhes bya ba'i tha tshig go/ / ji lta bu zhe na/ de'i phyir thams cad kyang zhes bya ba gsungs te/ phyag rgya chen po'i mngon par rtogs pa zhes bya ba la/ phyag rgya chen po ni ngag 'od gsal ba'i rang bzhin rnam pa med pa sngar bshad pa'i tshig nyid kyis so/ /de'i phyir mngon par rtogs pa ni thob par byed pa'i thabs te/ rgyas par ni brgya rtsa brgyad kyis rlung gi grangs can dang bsdu na yang rlung bcu'i rnam pa'i grangs nye bar mtshon pa sngon du 'gro bas 'jug pa la sogs pa gsum gyi grangs kyis nyi khri chig stong drug brgya'i dbugs kyi ngo bo'o//de la gnas par 'gro ba gang rnams la yod pa de ni mngon du byed pa ste/ bsgom pa rab kyi mthar thug par 'gro ba'o//de la gnas pa ni de mngon du byed pa la bzhugs pa'o/ /'dis ni rdo rje bzlas pa mngon du byed pa'i byang chub sems dpa' la bstan to/ /gzhan yang ji lta bu rnams kyis shes na/ de'i phyir gnyis su med pa'i bde ba chen po zhes gsungs te/ gnyis med ni gzung 'dzin dang rnam par bral bar sems can thams cad la khyab pa bde ba chen po sems 'od gsal ba'i rnam pa de'i nyams su myong ba ni/snang ba la sogs pa ye shes gsum gyi sgo nas rig pa des dgyes pa ni khyad par can gyi bde ba'o/ /des kha 'byed pa ni rab tu rgyas pa'o/ /mchog ni khyad par 'phags pa'i ngo bo ste/zhal gyi pad+ma ni gang gis de rnams de bzhin du'o/ /'dis ni sems rnam par dben pa'i pha rol tu phyin pa rnams kyis bya ba'i tha tshig go/ /de bzhin du chos thams cad ces bya ba la sogs pas de chos rnams thams cad ni phung po la sogs pa rnams sgyu ma'i dpe bcu gnyis kyi ji lta ba bzhin ni sgyu ma'i dpe bcu gnyis kyi rnam pa nyams su myong ba ni ye shes te/de mthong ba ni mngon du byed pa'i phyir bdag byin gyis brlab pa'i rim pa'i pha rol tu phyin pa zhes bya ba'i don to/ /gzhan yang rnam par mi rtog pa'i ye shes kyi zhes bya ba la/ rnam par mi rtog pa ni phyag rgya dang ting nge 'dzin gyi rim pa dag gis rang bzhin gyis 'od gsal ba'i ye shes ni thams cad stong pa'i ngo bo nyid do//de nyid ni de kho na nyid de bag chags su gyur pa'i rang bzhin gyi tshogs spong ba'i ngo bo nyid kyi phyir phyin ci ma log pa'o/ /de la mngon du phyogs pa ni mngon du phyogs pa'i 'gyur ba rnams kyis zhes bya ba'i don to//'dis ni mngon par byang chub pa'i rim pa mthar phyin pa nyid du 'di rnams kyis bstan to/ /de bzhin du bla na med pa zhes bya ba la sogs pa la bla na med pa'i rdo rje 'chang chen po ni zung 'jug gi rnam pa/ don dam pa de mi slob pa'i phyir ro/ /de'i dam tshig ni slob pa dang mi slob pa'i ngo bo zung 'jug mngon du byed pa'i thabs te/de las mi 'da' ba'i phyir ro/ /des dbang du gyur pa ni rang dbang can te/ bdag byin gyis brlab pa dang mngon par byang chub pa'i rim pa gnyis tha mi dad pa'i ngo bo de la rab tu mkhas pa/ de mngon du byed pa rnams kyis zhes bya ba'i tha tshig go//'dis ni zung du 'jug pa'i rim pa mthar phyin pa nyid bstan to/ /de ltar 'khor phun sum tshogs pa mdor bstan par mdzad nas/ de'i rgyas par bshad pa'i yan lag gtso bo bstan par 'dod nas ji tsam gyis dkyil 'khor gyi 'khor lo yongs su rdzogs pa de tsam gyi grangs dang ldan pa'i 'khor gyi tshogs 'di lta ste zhes bya ba la sogs pa gsungs te/'dis ni mngon sum gyis yongs su bgrang ba ston par byed de/ dam tshig rdo rje dang zhes bya ba ni/ las thams cad pa nyid kyis dam tshig thams cad kyi ngo bo nyid kyi phyir dang / dam tshig nyams pa rnams la de'i rnal 'byor gyis slar dam tshig ster ba'i phyir dang /'du byed kyi phung po rnam par dag par bsgrubs pas 'da' bar mi bya ba nyid kyi phyir dam tshig rdo rje ni don yod grub pa ste des so/ /byang chub sems dpa' zhes bya ba ni byang chub ni sku gsum gyi ngo bo nyid de chos thams cad ji lta ba bzhin du rtogs pa'i phyir ro//de la sems dpa' ni dgongs pa mngon du byed pa'i 'dun pa gang la yod pa de la de skad ces bya'o/ /sems dpa' chen po zhes bya ba ni chen po ni gzhan don te/ de la sems dpa' gang la yod pa de la de skad ces bya'o/ /dam tshig gnyis pa 'dis ni bdag dang gzhan gyi don phun sum tshogs pa dang ldan pa nyid du gsungs so//zhe sdang rdo rje dang zhes bya ba la zhe sdang ni zhe sdang gi rnam par dag pa de ni de kho na nyid kyi ngo bo nyid kyi phyir ro/ /de nyid ni rdo rje stong pa nyid kyi ngo bo nyid kyi phyir ro/ /yang na rnam par shes pa'i phung po'i yul gang zhig tha mal pa'i nga rgyal gang yin pa de la zhe sdang ba'i phyir zhe sdang yin la rdo rje yang yin te/shin tu rnam par dag pa chos kyi dbyings kyi ye shes nyid kyi phyir zhe sdang rdo rje ni mi bskyod pa'o/ /'dod chags rdo rje zhes bya ba ni 'dod chags rnam par dag pa'i phyir 'dod chags kyang yin la rdo rje yang yin te/ stong pa nyid kyi ngo bo nyid kyi phyir 'dod chags rdo rje'o//yang na 'dod chags ni 'du shes kyi phung po la thog ma med pa'i tha mal pa'i rnam par rtog pa la zhen pa'o/ /de yang yin la rdo rje yang yin pas so sor kun du rtog pa'i ye shes kyi phyir 'dod chags rdo rje snang ba mtha' yas so/ /rtag pa'i rdo rje zhes bya ba la lus kyi yul gzugs kyi phung po la gang zhig rtag pa zhes 'dzin pa des de yang rdo rje yang yin te/stong pa nyid rtogs pa'i phyir rtag pa'i rdo rje ni rnam par snang mdzad do/ /yang na me long lta bu'i ye shes kyi ngo bo nyid kyis rtag tu de nyid du gnas pa'i phyir rtag pa ni rnam par snang mdzad de rdo rje yang yin te/ de'i ngo bo nyid kyi phyir rtag pa'i rdo rje'o/ / ye shes rdo rje dang zhes bya ba la/ ye shes ni mnyam pa nyid kyi ye shes so/ /ye shes kyang yin la rdo rje yang yin te tshor ba'i phung po stong pa nyid du rtogs pa'i phyir/ ye shes rdo rje ni rin chen 'byung ldan no/ /yang na nga rgyal rnam pa bdun gyis mtho ba'i mtshan nyid can gyi ye shes rdo rje yang yin te/ de la stong pa nyid nyams su myong ba'i ngo bo nyid kyi phyir ye shes rdo rje ni de nyid do//sa rdo rje dang zhes bya ba ni sra ba'i rang bzhin sa'i khams la stong pa nyid du rtogs pa'i phyir sa'i khams ni spyan ma'o/ /yang na rang gi lus la sra ba gang yin pa de ni sa ste/ de la mi dmigs pa rtogs pa'i phyir sa'i rdo rje ni de nyid do//chu rdo rje dang zhes bya ba ni gsher ba'i ngo bo chu rnams te/ de rnams kyi rdo rje ni stong pa nyid kyi ngo bo nyams su myong ba nyid kyi phyir/ de la chu rdo rje ni mA ma kI'o/ /yang na rang gi lus su gtogs pa'i khrag la sogs pa gsher ba'i rang bzhin ni chu ste/ de rnams rdo rje ni stong pa nyid nyams su myong ba'i phyir chu rdo rje ni de nyid do//me rdo rje dang zhes bya ba ni drod kyi rang bzhin ni me ste de'i rdo rje ni sngon bzhin me rdo rje gos dkar mo'o/ /yang na rang gi lus la gnas pa'i dro ba ni me ste de'i rdo rje ni sngon bzhin me rdo rje de nyid do/ /rlung rdo rje dang zhes bya ba la g.yo bar byed pa'i bdag nyid kyi phyir rlung ngo / /de'i rdo rje ni sngon bzhin mi dmigs pa rtogs pa'i phyir rlung rdo rje sgrol ma'o//yang na rang gi lus kyis bsgrub par bya ba 'gro ba dang 'ong ba la sogs pa ni rlung ngo / /de la stong pa nyid rtogs pa'i phyir rlung rdo rje ni de nyid do/ /byang chub sems dpa' sems dpa' chen po zhes bya ba ni sngon bzhin no/ /de lta bu'i gtso bor gyur pa zhes bya ba ni/de bzhin gshegs pa lnga dang lha mo bzhi gtso bor gyur pa rnams kyis so/ /dam tshig chen po'i rigs dang 'brel pa zhes bya ba la dam tshig chen po ni rdo rje 'chang chen po'o/ /de'i rigs dang 'brel pa'i zhes bya ba ni de'i rigs las yang dag par 'byung ba zhes bya ba'i don to//yang na dam tshig chen po ni don yod rdo rje'o/ /sangs rgyas thams cad kyi dam tshig gi sdom pa la sogs pa gzung ba sngon du 'gro bas rim pa gnyis la thos pa dang bsam pa dang bsgom pa rnams kyis de'i go 'phang thob pa'i phyir ro/ /de'i rigs ni rgyud sde de dang 'brel pa'i las kyi rigs la brten pas ma lus pa'i rigs la 'jug par 'dod pa'i phyir dang /las thams cad pa nyid kyi phyir ro/ /grangs ji tsam dang ldan pa zhe na/ de'i phyir byang chub sems dpa' stong phrag bdun cu rtsa gnyis dang zhes bya ba gsungs te/ rtsa stong phrag bdun cu rtsa gnyis kyi rnam par dag pas thabs shes rab kyi ngo bo nyid kyi phyir ro//byang chub sems dpa'i sgra'i don ni sngar bshad zin to/ /gzhan yang rigs chen po dang 'brel pa'i byang chub sems dpa' bye ba khrag khrig brgya stong zhes bya ba la gzhan zhes bya ba ni gzhan dag rnams so/ /rigs chen po zhes bya ba ni rdo rje 'chang chen po'i rigs so/ /de dang 'brel pa zhes bya ba ni de'i rigs can rnams so//byang chub sems dpa' zhes bya ba ni sngags kyi sgo'i spyad pa spyod pa rnams so/ /de rnams kyi dbye ba ni 'bum phrag bcu'i grangs kyis yongs su spyad pa de tsam gyis grangs kyi dbye bas dbye bar byas pa'i khrag khrig ni sa ya'o/ /brgya stong la zhes bya ba ni snga ma bzhin no//de ltar gtso bor rgyas par bshad pa bstan nas/ de'i yan lag tu gyur pa'i bshad pa brjod pa'i phyir/ 'di lta ste zhes bya ba la sogs pa gsungs te/ nam mkha' la 'gro ba zhes bya ba la sogs pa la/ nam mkha'i sgras ni rna mchog gi nang na gnas pa'i nam mkha' brjod de/der 'gro ba'i nam mkha' la 'gro ba ni sgra ste/ sgra rdo rje'i ngo bo byang chub sems dpa' zhes bya ba'i tha tshig go/ /byang chub sems dpa' zhes bya ba la sogs pa ni snga ma bzhin no/ /nam mkha' rnam par rgyas pa dang / /zhes bya ba ni/ de la nam mkha' ni nam mkha' ste sgrib pa dang bral ba'i mtshan nyid can no//de la rnam par rgyas pa ni bskyed 'gags pa'i mi mthun pa'i phyogs gang la yod pa de nam mkha' rnam par rgyas pa ste yul gzugs so/ /de nyid byang chub sems dpa'i gzugs rdo rje zhes bya ba'i don to/ /nam mkha'i dri dang zhes bya ba ni de la nam mkha' ni sna'i nam mkha'o//de nas dri'i yul bsnam pa'i phyir dri rdo rje zhes bya ba'i don to/ /nam mkha' reg pa zhes bya ba la nam mkha'i sgras ni gzugs mi dmigs pa'i rnam pa lus brjod do/ /de'i reg pas nam mkha'i reg pa ste reg rdo rje ma'i ngo bo zhes bya ba'i don to/ /mtshams rnams kyis nges par grol ba zhes bya ba la mtshams ni gzugs dang yang dag par ldan pa'i ro ste/de las nges par grol ba ni bsdus na 'gugs pa'i phyir mtshams rnams kyis nges par grol ba ni ro'o/ /de nyid ro rdo rje ma zhes bya ba'i don to/ /'dis ni rjes su spyod pa lnga rab tu bstan to//rdo rje sems dpa' dang zhes bya ba ni kun du bzang po ste/ rdo rje sems dpa' ni de'i rnam grangs yin pa'i phyir ro/ /rdo rje bstan pa snying po dang ldan pa la sems dpa' ni rang dang gzhan gyi don bya ba'i mtshan nyid bzang po ni dge ba gang la yod pa de rdo rje sems dpa'o/ /rdo rje snying po zhes bya ba ni sa'i snying pos zhes bya ba'i don to//rdo rje ni don dam par stong pa sa'i khams kyi ngo bo'o/ /de yang yin la rdo rje yang yin te rdo rje'i snying po'o/ /rdo rje'i blo gros dang zhes bya ba ni 'jam dpal gyis zhes bya ba'i don to/ /rdo rje ltar rno ba'i blo gang la yod pa de ni rdo rje blo gros so/ / phyag na rdo rje dang zhes bya ba ni rdo rje ni blang dor gyi ye shes kyi bdag nyid can lag na gang la yod de de phyag na rdo rje'o/ /rdo rje rgyal po dang zhes bya ba 'di ni rdo rje bzhin du bstan pa nyid kyis snying rje chen pos 'jig rten la phan pa'i phyir snang bas na/ rdo rje rgyal po ni 'jig rten dbang phyug go/ /rdo rje dam tshig dang zhes bya ba ni nam mkha'i snying po zhes bya ba'i tha tshig go//rdo rje stong pa nyid kyi rnam pas nam mkhar brjod do/ /de la yang dag par 'gro bas na dam tshig ste rdo rje dam tshig go/ /rdo rje chos dang zhes bya ba ni byams pa zhes bya ba'i don to/ /rdo rje dang 'dra bar yid la re ba thams cad yongs su rdzogs pa'i chos ma 'ongs pa'i dus na ston pa'i phyir rdo rje'i chos so//rdo rje longs spyod dang zhes bya ba ni sgrib pa thams cad rnam par sel ba zhes bya ba'i tha tshig go/ /rdo rje ni stong pa'i rang bzhin nyon mongs pa rnams so/ /de rnams la yang dag pa'i lam gyi rang bzhin shes rab kyis longs spyod pa na bzlog pa gang la yod pa de ni rdo rje longs spyod do//'dis ni byang chub sems dpa'i ngo bo'i 'khor gsungs so/ /rdo rje spyi bo zhes bya ba ni gtsug tor 'khor los sgyur ba zhes bya ba'i don to/ /rdo rje ltar phigs par dka' ba'i spyi bor gnas pa'i gtsug tor gang gi lag pa gnyis na yod pa de ni rdo rje spyi bo'o//rab kyi rtsal gyis rnam par gnon pa zhes bya ba ni shes rab mthar byed kyis zhes bya ba'i don to/ /de la rnam par gnon pa'i sgras ni gshin rje la brjod de/ shin tu yang yang dag pa nyid kyi phyir ro/ /de'i rnam par gnon pa ni gang gis gnon pa de rab kyi rtsal gyis rnam par gnon pa'o//rnam rtog med pa'i spyi bo zhes bya ba ni shes rab mthar byed kyis so/ /rnam rtog med pa'i sgras ni shes rab tu brjod do/ /des me ni me ste le lo 'joms par byed pa'i phyir ro/ /rnam rtog med pa'i sgra zhes bya ba ni pad+ma mthar byed do/ /gtso bor 'dod chags la sogs pa rnams kyis ma gos pa nyid kyi phyir ro//brjed ngas pa bzlog pa nyid kyi phyir rnam rtog med pa'o/ /de yang yin la sgra yang yin te/ gang gi rnam par dag pa snang ba mtha' yas kyi rigs la gnas pa'i phyir rnam rtog med pa'i sgra'o/ /rnam rtog med pa'i chos dang zhes bya ba ni bgegs mthar byed de/gtso bor phrag dog la sogs pa rnams kyis rnam par g.yeng ba'i gnyen po'i phyir rnam rtog med pa yang yin la chos kyang yin te/ bgegs la phur bus 'debs pas go cha'i ngo bo nyid kyi phyir rnam rtog med pa'i chos so/ /rnam rtog med pa'i dam tshig dang //zhes bya ba ni mi g.yo ba zhes bya ba'i don to/ /rims la sogs pa'i nad nye bar zhi bas ma dad pa la sogs pa'i rnam par rtog pa bzlog pa'i phyir rnam rtog med pa'o/ /de yang yin la dam tshig kyang yin te/ nad la sogs pa nye bar zhi bas 'da' bar bya ba ma yin pa nyid kyi phyir rnam rtog med pa'i dam tshig go//dga' ba rdo rje dang zhes bya ba ni 'dod pa'i rgyal po zhes bya ba'i don to/ /bgegs thams cad 'joms par byed pa nyid kyis le lo mi mthun pa'i phyogs spangs pas sems la dga' ba thob pas dga' ba'o/ /de yang yin la rdo rje yang yin pas dga' ba'i rdo rje'o//rab tu dga' ba'i rdo rje dang / /zhes bya ba ni dbyug pa sngon po zhes bya ba'i don to/ /'jigs pa thams cad bzlog pa'i phyir khyad par du 'phags pa'i dga' ba bskyed pas rab tu dga' ba'o/ /de yang yin la rdo rje yang yin pas stong pa nyid kyi ngo bo'i phyir rab tu dga' ba'i rdo rje'o//'dod chags rdo rje dang zhes bya ba ni stobs po che zhes bya ba'i don to/ /mkha' 'gro ma la sogs pa'i nyes pa sel bas de kho na nyid kyi 'dod chags kyi 'dod chags so/ /de yang yin la 'dod chags kyang yin pas 'dod chags rdo rje'o/ /lhan cig skyes pa'i rdo rje dang / / zhes bya ba ni gnod mdzes rgyal po zhes bya ba'i don to/ /brtan pa dang g.yo ba'i dug gsal bar byed pas lhan cig skyes pa'i ngo bo'i phyir lhan cig skyes pa'o/ /de yang yin la rdo rje yang yin pas lhan cig skyes pa'i rdo rje'o/ /gzhan yang zhes bya ba ni de'i rigs can rnams kyis so/ /dpag tu med pa zhes bya ba ni grangs kyis gzhal bar mi nus pa nyid kyi phyir ro//rdo rje'i theg pa la lhag par mos pa'i zhes bya ba la rdo rje'i theg pa ni sngags kyi theg pa'o/ /ji skad du/ dkyil 'khor tshogs dang thab khung dang / /gtor ma 'dus pa'i rim pa dang / /de nyid rnam pa bdun du grags/ / zhes gsungs so/ /de la lhag par mos pa ni dga' ba gang rnams la yod pa de ni rdo rje'i theg pa la lhag par mos pa ste de rnams kyis so/ /byang chub sems dpa' zhes bya ba la sogs pa ni sngon bzhin no/ /sngags kyi spyod pa la mos pa rnams dang thabs cig tu zhes bya ba ni lhan cig tu'o//bzhugs so zhes bya ba ni sngon gyi bya ba dang 'brel to/ /de ltar rnam pa gnyis kyis 'khor phun sum tshogs pa bstan nas/ bcom ldan 'das kyis cho 'phrul bstan pa brjod pa'i phyir 'khor snod du byas pa'i yan lag ston pa'i gnas skabs gzhan bstan pa'i phyir/ de yang zhes bya ba la sogs pa gsungs te/bcom ldan 'das zhes bya ba la bcom pa ni 'dod chags la sogs pa bcom pa nyid dang / bdud bzhi bcom pa'i phyir dang / dbang phyug la sogs pa'i yon tan dang ldan pa'i phyir bcom ldan 'das so/ /chos kyi 'khor lo shin tu bskor ba zhes bya ba na shin tu yang legs par gang gis chos kyi 'khor lo bskor ba'o//yang na bde ba'i thabs 'dod pa'i yon tan rnam pa lnga la longs spyod pa'i mtshan nyid can gyi bskor ba ni 'dod chags la sogs pa nyon mongs pa'i gnyen po'i rnam pa chos kyi 'khor lo rgyud sde rnam pa lnga bstan pa'i mtshan nyid gang gis de la de skad ces bya'o//sangs rgyas kyi mdzad pa ni shin tu mthar phyin ces bya ba ni shin tu yang legs par yongs su ni kun nas khams gsum na spyod pa'i sems can gyi dbye bas sam/ rnam pa lnga'i sems can gyi dbye bas so//mthar phyin pa ni rab kyi mthar thug pa thob par byas pa'o/ /sangs rgyas kyi mdzad pa ni gang gis gzhan gyi don byed pa'i mtshan nyid can de la de skad ces bya'o/ /bsod nams dang ye shes kyi tshogs ni shin tu rdzogs pa ste zhes bya ba ni shin tu legs par rnam pa thams cad du yongs su rdzogs pa'i bsod nams dang ye shes kyi mtshan nyid can gang gis de la de skad ces bya'o//de la phyi'i pha rol tu phyin pa gsum sbyin pa'i mtshan nyid can bsod nams so/ /bsam gtan dang shes rab kyi mtshan nyid can ni ye shes so/ /brtson 'grus ni gnyis ka'i yan lag go//'dir yang ting nge 'dzin ni gsum gyi skabs dang rim pa lnga rnams la yang ji srid par bsod nams dang ye shes kyi tshogs dag gi bshad pa bla ma'i zhal nas rtogs par bya'o/ /'khor de la zhes bya ba ni bsdus nas lha sum cu rtsa gnyis kyi dkyil 'khor gyi rnam pa can dang /rgyas par ni nam mkha'i ngo bo khyab par gnas pa'o/ /zhal 'dzum pa dang bcas pas zhes bya ba ni zhal gyi pad+ma rnam par phye ba ste/ 'chad bzhin pa'i cho 'phrul bstan pa'i dgongs pa mnga' ba'i phyir ro/ /bzhugs so zhes bya ba ni gnas par gyur pa'o/ /de ltar ston pa'i gnas skabs gzhan rab tu bstan nas 'od zer 'phros pas 'khor rnams snod du bya ba'i phyir/de nas zhes bya ba la sogs pa gsungs te/ bcom ldan 'das zhal 'dzum pa mdzad pa'i rjes thogs su'o/ /bcom ldan 'das zhes bya ba ni snga ma bzhin te/ 'od zer gyi dra ba chen po bkye ste zhes bya ba dang 'brel to//ye shes kyi rang bzhin can gyi 'od zer gyi tshogs spros par gyur zhes bya ba'i don to/ /gang las she na/ de'i phyir/ ba spu'i bu ga thams cad nas/ /zhes gsungs te/ don gyis bcom ldan 'das dang 'brel pa'i sku la gnas pa las so//ci zhig byas nas she na/ de'i phyir rdo rje phreng ba mngon par byang chub pa'i tshul zhes bya ba'i ting nge 'dzin la snyoms par zhugs nas zhes gsungs te/ de la rdo rje phreng ba gtso bo dang btags pa'i dbye bas rnam pa gnyis te/ rdo rje ni mngon par byang chub pa'i rim pas thob par bya ba'i 'od gsal ba ste/rnal 'byor chen po'i rgyud kyi dgongs pas so/ /rnal 'byor ma'i rgyud kyi dgongs pas kyang don gyi lhan cig skyes pa nyams su myong ba'o/ /gnyis ka ltar yang sa bcu gsum pa'i sa'i ngo bo ji skad du/ dang po'i las kyi sbyor ba yis/ /zhes gsungs so/ / rdo rje phreng ba ni bag chags su gtogs pa rang bzhin gyi tshogs brgya dang drug cu 'gags pas stong pa dang shin tu stong pa dang / stong pa chen po'i mtshan nyid can gyi ye shes gsum nyams su myong ba'i rgyun no/ /de nyid ni mngon par byang chub pa ste/ gcig tu chos kyi sku'i ngo bo nyid kyis rnam par rtog pa thams cad zad par byed pa'i phyir ro//de nyid ni tshul te ting nge 'dzin dang phyag rgya'i mtshan nyid can gyi thabs kyis de skad ces bya ba'i ting nge 'dzin la sems rtse gcig tu byed pa'i gnas skabs kyi khyad par la snyoms par zhugs nas so/ /gzhan gyi stong pa nyid kyi ye shes kyi rdo rje phreng ba ste/de la stong pa nyid ni gsang ba'i rdo rje'i rtsa dang pad+ma'i rtsa'o/ /ye shes de ni gnyis po yang dag par sbyar ba las thob par bya ba mchog kun rdzob kyi sems kyi rnam pa rdzas kyi thig le dang lhan cig skyes pa'o/ /de nyid ni rdo rje ste rnam par rtog pa thams cad 'bigs par byed pa'i phyir ro//de'i phreng ba ni byang chub sems kyi rgyun no/ /des thob par bya ba mngon par byang chub pa bde ba chen po'i mtshan nyid don dam pa'i bde ba'i rnam pa can no/ /de nyid ni tshul te mi slob pa'i lam la khyer bar byed pa'i thabs te de skad ces bya ba'i ting nge 'dzin la snyoms par zhugs nas zhes bya ba ni snga ma bzhin no//yang na rdo rje ni mi phyed pa'i ye shes te/ dbugs kyi rim pa mtshon par byed pa sngon du 'gro bas 'grub pa'i phyir ro/ /de'i phreng ba ni rgyun de dga' ba gsum skyed par byed pa'i rgyur 'gyur ba'o/ /de nyid ni mngon par byang chub pa ste/ rlung rnam par rgyal bas ngag gi de kho na nyid mngon du byed pa'i phyir dang /byang chub kyi sems 'dzin nus pa'i phyir ro/ /de nyid ni tshul te zhes bya ba ni sngon bzhin te/ de lta bu'i ting nge 'dzin la snyoms par zhugs nas zhes bya ba'i tha tshig go/ /ji skad du/ le'u gsum pa 'chad par 'gyur ba las//rdo rje phreng ba'i don nges pa/ /rdo rje phreng ba zhes bya'i ming / /de yang sa ni bcu gsum pa/ /dga' ba bzhi pa don gyis gnas/ /thams cad stong nyid bde chen po/ /ngag gi spyod yul kun las 'das/ /gnyis pa thams cad rnam par spangs/ /skal bzang rnal 'byor kun gyi mtha'//rnal 'byor ma yi zhal gyi yul/ /zhes gsungs pa dang / yang de nyid las/ rdo rje ye shes stong nyid dang / /rdo rje phreng ba zhes bshad do/ /stong nyid rdo rje gsang pad rtsa/ /rdo rje dbyings kyi dbang phyug mchog /ye shes mchog tu bde ba che/ /lhan cig skyes pa'i ngo mtshar ba//rdo rje de yang rnam rtog rnams/ /'byed par byed pa yongs su grags/ /phreng ba de rnams kyi yang rgyun/ /byang chub sems kyi rdo rje rnams/ /de nas gzhan yang mnyan par gyis/ /rdo rje phreng ba'i don sdom pa/ /rgyud rnams kun du sbas pa ni/ /gang yang rung la brjod mi bya//mi phyed pa ni rdo rjer gsungs/ /de ni dbugs su yongs su grags/ /phreng ba rgyun ni mi 'chad pa/ /dga' ba rab bskyed bdag nyid can/ /rlung rnams kun la 'bigs byed pa/ /rlung la 'bigs par mi nus so/ /zhes gsungs so/ /gzhan yang ci zhig byas nas she na/de phyir byang chub sems dpa'i 'khor rgya chen po rnams la gzigs nas zhes gsungs te/ grangs la sogs pa rnams kyis gzhal bar mi nus pa'i phyir rgya chen po'o/ /chen po ni rin po che dang tsan+dan la sogs pa byang chub sems dpa' rnams kyi 'khor ni tshogs kyi rnam pa'o/ / gzigs nas zhes bya ba ni bltas nas so/ /ci'i phyir 'od kyi dra ba chen po bkye zhe na/ de'i phyir de dag snod du rung bar bya ba'i phyir zhes gsungs te/ byang chub sems dpa' rnam pa lnga po rnams la'o/ /snod du rung bar bya ba'i phyir zhes bya ba ni rdo rje phreng ba'i rgyud bstan pa'i phyir/ snod du rung ba nyid bskyed pa'i don du'o/gal te yang sgrib pa spangs pa'i byang chub sems dpa' rnams la snod du bya ba nyid mi dgos pa de lta na yang ma 'ongs pa'i dus na slob dpon dang slob ma'i 'brel pa snod du rung ba bskyed pa sngon du 'gro ba brjod par 'dod pas/ de'i phyir de gtsor gyur pa'i de rnams kyi snod du rung ba nyid ni skyon du 'gyur ba ma yin no//'od zer gyi dra ba chen po des kyang zhes bya ba ni bcom ldan 'das kyi ba spu'i bu ga nas spros pa'i ye shes kyi rang bzhin 'od zer kha dog lnga pa'i tshogs kyis so/ /byang chub sems dpa' chen po de rnams la zhes bya ba ni nam mkha'i khams khyab par gnas pa rnams so//reg pas zhes bya ba ni reg pa dang ldan par gyur pa'o/ /mchog tu dga' ba rjes su thob nas zhes bya ba ni/ sku la sogs pa 'bebs par sngon du 'gro bas rengs pa dang lha chen po dang 'phags pa'i dbyangs kyi gnas skabs nyams su myong ba sngon du 'gro ba 'od gsal sngon du byas pas nyon mongs pa spong ba rjes su thob pa'o//ji lta bu dang gang dang 'brel pas yin zhe na/ de'i phyir 'di lta ste zhes bya ba gsungs te/ 'dra ba bstan pa'i phyir dpe bstan pa ni gnyis su med pa'i sbyor ba dang ldan pa'i bcom ldan 'das rdo rje 'chang ji lta ba bzhin no zhes gsungs te/phyi'i phyag rgya dang thabs snyoms par zhugs pas gzung ba dang 'dzin pa'i rnam pas stong pa'i 'od gsal mngon du byed pa'i bcom ldan 'das rnam par rtog pa 'joms par byed pa'i rdo rje 'chang chen po'i zhes bya ba'i don to/ /da nas zhes bya ba ni byang chub sems dpa' rnams kyi 'od zer gyi dra ba'i sgo nas mchog tu dga' ba thob pa'i de ma thag tu'o//byang chub sems dpa' de rnams nyid/ /ces bya ba ni nam mkha'i gtos khyab pa nyid la'o/ /de dag nyid tshim pa dang dga' ba dang / mgu ba dang zhes bya ba ni/ de la tshim pa ni rang bzhin gyi tshogs sum cu rtsa gsum spangs pas/sngags dang phyag rgya'i rim pa'i mtshan nyid kyi thabs la goms pas snang ba'i ye shes kyi bde ba 'byung ba'o/ /dga' ba zhes bya ba ni rang bzhin gyi tshogs bzhi bcu spangs pas/ snang ba chod pa'i ye shes 'byung ba'o/ /mgu ba zhes bya ba ni rang bzhin gyi tshogs bdun spangs pas snang ba nye bar thob pa'i ye shes rab tu 'byung ba'o//tshim pa dang / dga' ba dang / mgu ba ni tshim pa dang / dga' ba dang / mgu ba ste des so/ /brgyal bar gyur to zhes bya ba ni 'od gsal sngon du byas pa ma lus pa'i dbang po rnams kyi 'jug pa 'byung bar 'gyur ro/ / de ltar 'od zer spros pas 'khor snod du bya ba'i ngo bo mngon du brjod nas/ 'od zer gyi dra ba nye bar bsdu ba brjod pa'i phyir de nas yang de'i dus na zhes bya ba la sogs pa gsungs te/ bcom ldan 'das zhes bya ba ni bshad zin to/ /'od zer gyi dra ba chen po de zhes bya ba ni ye shes kyi rang bzhin gyi 'od zer gyi tshogs chen po gang gis byang chub sems dpa' rnams la reg pas mchog tu dga' ba thob par gyur pa'i 'od zer gyi dra ba chen po de'o//mdzod spur zhes bya ba ni smin ma'i dbus su'o/ /bsdus par gyur to zhes bya ba ni zhugs par gyur pa ste/ 'od zer gyi dra ba'i bya ba yongs su rdzogs pa'i phyir ro//nye bar bsdus pa de yang zhes bya ba ni/ smin mtshams kyi dbus su zhugs par byas par 'gyur ba'o/ /slar yang rdo rje'i lam nas zhes bya ba ni/ bcom ldan 'das kyi thabs kyi rdo rje'i lam nas so/ /lcags kyu'i rnam pa can gyi 'od zer chen po zhes bya ba ni ye shes kyi rang bzhin gyi lcags kyu dang 'dra ba'i 'od zer chen po'i 'od kyi ngo bo'o//nye bar spros nas zhes bya ba ni spros nas so/ /slar yang rdo rje'i lam nas gtsug tor gyi 'khor lo la zhes bya ba ni/ gzhan rnams kyis ma mthong ba'i spyi bo la'o/ /nye bar byung bar gyur pa zhes bya ba ni zhugs par gyur pa'o/ / ci zhig byas nas she na/ de'i phyir des de lta bu dag la reg nas zhes gsungs te/ des zhes bya ba ni 'od zer gyi dra ba rdo rje'i lam nas spros pas so/ /de lta bur gyur pa ni rgyal bar gyur pa'i byang chub sems dpa' rnams la'o/ /ji lta bu zhe na/ de'i phyir rdo rje'i phreng ba dang 'dra bar zhes gsungs te/ji ltar rdo rje'i phreng ba de bzhin gshegs pa lnga'i rang bzhin kha dog lnga'i 'od zer gyi phreng ba spros pa sngon du 'gro bar sdud par byed pa de bzhin du'o/ /de ltar 'od zer gyi dra ba nye bar bsdu ba bstan nas byang chub sems dpa' rnams la rang rang gi gnas su gnas par byed pa brjod pa'i phyir/ slar yang zhes bya ba gsungs te/ gtsug tor gyi 'khor lor zhugs pa'i 'od zer gyi dra ba slar yang rang gi snying ga'i lte ba'i bu ga nas spros te zhes bya ba ni rang gi snying ga'i lte ba'i bu ga ni dbus kyi gnas su pad+ma dang zla ba dang / hUM yig gis byin gyis brlabs pa des spros te/ rang gi snying ga'i dbus nas spros te/byang chub sems dpa' rnams rang rang gi gdan la zhes bya ba ni/ zla ba dang nyi ma dang pad+ma'i gdan la sogs pa dbye ba tha dad pas dbye bar byas pa rnams la bcom ldan 'das sbyor bar mdzad de rgyal ba rnams bzhugs par gyur to/ /byang chub sems dpa' ji lta bu zhe na/de'i phyir bde ba chen po zhes gsungs te/ bde ba chen po ni 'od gsal gyi rnam par rgyal ba de'i ming gzhan no/ /nyams su myong ba zhes bya ba ni rig par byed pa'o/ /ci zhig byas nas she na/ de'i phyir rdo rje'i hUM yig brjod pa zhes gsungs te/ de lta bu'i sgra brjod nas de sad par byed pa'i thabs nyid kyi phyir ro//gzhan yang bde ba chen po de nyid nyams su myong ba ste/ bcom ldan 'das kyis spros pas 'od zer gyi dra ba chen po la reg nas ji ltar mchog tu dga' ba nyams su myong bar byed cing bde ba chen po des nyon mongs pa med pas rjes su 'brel pa zhes bya ba ni 'brel pa'o//de ltar byang chub sems dpa' rnams la rang rang gi gnas su gnas pa'i gnas skabs byed pa'i mthar thug pas 'khor snod du bya ba mngon par brjod nas/ da ni snod du gyur pa'i slob ma'i bya ba'i yan lag bcom ldan 'das la bstod pa byed par rtsom pa bstan par bya ba'i phyir/ de nas de rnams zhes bya ba la sogs pa gsungs te/byang chub sems dpa' ni 'khor rnams te/ bcom ldan 'das la yang dag par bstod do zhes bya bar 'brel to/ /ston pa rdo rje 'chang chen pos bstod pas yongs su dga' bar gyur to/ /ji lta bu zhe na/ de'i phyir dga' ba'i yid can zag pa med pa'i bde ba chen po nyams su myong bas sems dga' ba skyes so//gzhan yang chu'i gting nas thon pa lta bur zhes bya ba ni/ bcom ldan 'das kyi 'od zer gyi dra ba chen po'i bdag nyid chen por shes nas so/ /ji ltar kha cig chu klung gi dbus nas langs te dga' ba dang bcas par rlom pa de dang 'dra bar ro//ci zhig byas nas she na/ de'i phyir ngo mtshar chen po zhes bya ba la sogs pa gsungs te/ bcom ldan 'das rdo rje 'chang chen po'i bdag nyid chen po'i cho 'phrul ni rdzu 'phrul gyi rnam par 'phrul pa ste/ 'od zer spro ba'i sgo nas khyad par can go 'phang ngal so ba'i ngo bo ngo mtshar chen po mthong nas so//gzhan yang shin tu mig gdangs pa ni shin tu gnas kyang mig rab tu rgyas pa'o/ /ji ltar bstod pa mdzad ce na/ de'i phyir dbyangs gcig gis zhes gsungs te/ de ltar bcom ldan 'das kyis bstod pa rtsom pa bstan nas/ da ni dngos su bstod pa brjod pa'i phyir/bcom ldan 'das zhes bya ba la sogs pa gsungs te/ lhan cig skyes pa'i dga' bas rgyas/ /zhes bya ba ni/ 'dis ni so sor sdud pa'i ngo bo nyid kyis bcom ldan 'das kyi bstod pa brjod de/ de la yul lnga po rnams la dbang po rnams kyis gzung bas lhan cig skyes pa gang zhig ni rang gi dga' ba gzung ba'i rnam pa'i bdag nyid can no//des rgyas pa ni yongs su rdzogs pa'o zhes bod pa'o/ /ci'i phyir zhe na/ de'i phyir ro gcig tu gyur pa myang ba zhes bya ba ni/ yul lnga po tha mi dad par rtogs pas myang ba ni nye bar longs spyod pa'o/ /ji skad du/ dbang po bcu po rnams kyi ni/ /rang gi 'jug gnas thams cad du/ /so sor sdud ces brjod pa ste/ /'dod pa'i so sor longs spyod pa/ /zhes gsungs so/ /bsam gtan gtan pa'i phyir/ bcom ldan 'das ro gcig ngal bso kye zhes gsungs te/ gzugs la sogs pa yid du 'ong ba la sogs pa rnam pa gsum dang ldan pa rnams de bzhin gshegs pa gsum gyi rnam pa nyid kyi ro gcig pa'i go 'phang la ngal bso ba'i phyir ro//ci ngal bso ba ste de'i bod pa la de skad ces bya'o/ /de nyid kyi phyir/ ngag gi lam gyi spyod yul 'das/ /zhes gsungs te/ yul rnam pa gsum la tha dad pa'i dmigs pa med pa'i rtog pas sgra dang rnam par rtog pa'i yul las 'das pa'i phyir ro//de ltar bsam gtan gyi sgo nas bstod pa bstan nas/ da ni srog rtsol gyi sgo nas bstan pa'i phyir/ bcom ldan 'das nyid kyis zhes bya ba la sogs pa gsungs te/ rang gi nyams myong dga' ba ni rlung dang rnam par shes pa'i ming can gyis yang dag bde ba ni dkyil 'khor bzhi 'char ba'i rim pas dbang du gyur pa nyid kyi phyir ro//'gro ba gsum po ni 'jug pa dang / gnas pa dang ldang ba'i bdag nyid can gang la yod pa de la de skad ces bya ste/ de la bod pa'o/ /de ltar srog dang rtsol ba bstan nas/'dzin pa'i sems rang bzhin gyis 'od gsal ba'i rnam pa brjod pa'i phyir/ e ma'o lhan cig skyes bdud rtsi/ /ro ston thugs rje chen po kye/ /zhes gsungs te/ e ma'o zhes bya ba ni ngo mtshar ba'o/ /lhan cig skyes pa ni ma byas pa'o/ /bdud rtsi'i ro zhes bya ba ni bdud rtsi dang 'dra bar sems 'od gsal ba'i rnam pa brjod pa'o//des gtor ba ni de mngon du byed pa'i rnam pa ste lhan cig skyes pa'i bdud rtsi'i ros gtor ba la de bod pa la yang de skad ces bya'o/ /thugs rje chen po zhes bya ba ni rang nyid kyis rtogs pa'i sems 'od gsal ba'i rnam pa skyob pa nyid bstan pa'i phyir gzhan dag la bstan pa'i thugs rje chen po'o//de ltar sems 'od gsal gyi rang bzhin 'dzin pa bstan pa'i sgo nas so/ /da ni rang byin gyis brlab pa'i rim pa bstan pa'i sgo nas rtogs pa brjod pa'i phyir bcom ldan 'das zhes bya ba la sogs pa gsungs te/ sems can thams cad ces bya ba ni gang zag rnam pa lngas bsdus pa'o//sems can don du zhes bya ba ni/ sgyu ma lta bu'i sku bstan pa la gsal ba mdzad pa la gzung bar brtson pa'o/ /rang bzhin gyis 'od gsal ba'i 'dzin pa'i sgo nas bstod pa brjod pa'i phyir/ de nyid gsum ni ro gcig pa/ / zhes bya ba la sogs pa gsungs te/ gsum po stong pa dang / shin tu stong pa dang / stong pa chen po'i rnam pa'i de kho na nyid kyi ye shes rnams kyi ro gcig pa ni thams cad stong pa'i gnas skabs la'o/ /de gcig pa ni gzhan dang thun mong ma yin pa'i phyag rgya chen po bcu gsum pas bsdus pa'o//des rab tu dbye ba ni de mngon du byas pas bag chags kyi gnas skabs can gyi rang bzhin gyi tshogs spangs pa'i phyir ro/ /zung du 'jug pa'i rnam pa rjes su dran pa bstan pa'i phyir brjod pa/ bcom ldan rnal 'byor che la dgyes/ /zhes gsungs te/ rnal 'byor yang yin la chen po yang yin pas na rnal 'byor chen po ste kun rdzob dang don dam pa'i bden pa dbyer med pa rnam pa la de dgyes pa ste/de la bod pa la de skad ces bya'o/ /mdud pa thams cad gcod mdzad pa/ /zhes bya ba la/ mdud pa thams cad ni tha dad pa'i rnam par rtog pa can gyi rnam pa can rnams la khyad par du gcod par byed pa'i phyir mdud pa thams cad gcod pa ste/de la bod pa la yang de skad ces bya'o/ /de ltar sbyor ba'i yan lag drug gi sgo nas bcom ldan 'das la bstod pa brjod nas/ de nyid kyi nye bar bsdu ba bstan pa brjod pa'i phyir/ e ma zhes bya ba ni ngo mtshar ba'o//yul lnga la nye bar dmigs pas dga' ba chen po ni dgyes pa'i khyad par ro/ /de byed pas na dga' ba chen po byed pa'o/ /de nyid kyi phyir 'gro ba skal bzang mdzes par mdzad de zhes bya ba ste/ 'gro ba ni khams gsum pa'o/ /skal bzang zhes bya ba ni yul 'dzin pa'i ngo bo'o/ /des na mdzes pa ste/rnal 'byor dang rnal 'byor ma thams cad la mkho bar byed pa'o/ /'dis ni so sor sdud pa'i nye bar bsdu ba bstan to/ /bsam gtan nye bar bsdu ba ni/ e ma'o rdo rje theg pa bde/ /zhes bya ba la sogs pa gsungs te/ rdo rje theg pa'i sgra ni sngar bshad zin to/ /rdo rje theg pa ni sngags kyi theg pa la dga' ba ni yul la yang dag par brten pa'i ngang tshul gyi bdag nyid can no//des rab tu dga' ba ni lus kyi bde ba'i mtshan nyid can no/ /mgu ba ni sems las byung ba'i bde ba sems can thams cad la ster bar byed pas rab tu dga' zhing mgu ba gsol ba'o/ /yang na dga' ba ni yul yid du 'ong ba mthong bas 'dod chags kyi rnam par dag pa ni dga' ba'o//yid du mi 'ong ba mthong bas zhe sdang gi rnam par dag pas rab tu dga' ba'o/ /bar ma'i yul mthong bas gti mug gi rnam par dag pas mgu ba ste/ de gsol ba zhes bya ba ni snga ma bzhin no/ /srog dang rtsol ba'i nye bar bsdu ba ni/e ma'o sngags ni rab rgyas pa'o/ /zhes gsungs te/ sngags ni yi ge gsum gyi rnam pa'o/ /de nyid rgyas pa ni 'jug pa la sogs pa'i rlung gsum la sbyor ba'i ngo bo'o/ /des rang byung gi go 'phang ni rang nyid la gnas pa'i dbugs kyi 'khor lo sgrub pa po la mtshon pa ste/ rang byung gi go 'phang sgrub pa po'o//yang na rang byung gi go 'phang ni 'od gsal ba'i rnam pas bsgrub pa de bzhin du sems kyi 'od gsal ba'i ngo bo 'dzin pa bstan pa'i phyir/ e ma'o shin tu zab mo'i chos/ /zhes gsungs te/ shin tu zab mo'i chos kyi ngo bo la sems 'od gsal ba nyid kyi phyir ro/ /dmigs pa med pa ston par mdzad//ces bya ba ni/ dmigs pa med pa ni 'jug pa dang nyon mongs pa can dang kun gzhi rnam par shes pa la dmigs pa dang bral ba'i don bstan pa'i phyir de ston par mdzad pa ste/ bdag byin gyis brlab pa'i ngo bo 'dzin pa nye bar bsdu ba bstan pa'i phyir/ e ma'o shin tu gsang ba gsang ba'i bdag /ces gsungs te/ gsang ba ni bskyed pa'i rim pa bsgom pas thob par bya ba'i sngags kyi ngo bo'i mtshan nyid can no/ /de las kyang gsang ba ni skad cig ma dang lugs las bzlog pa'i rim pa dag gis 'od gsal ba las rdzogs pa'i bdag byin gyis brlabs pa'i sku'o//rdo rje 'chang chen zhes bya ba ni sgyu ma'i dpe bcu gnyis kyis mtshon pa'i phyir ro/ /gtso bo zhes bya ba ni sgyu ma lta bu'i sku bstan pas gzhan gyi don bsgrub pa'i phyir ro/ /rang bzhin gyis 'od gsal ba'i ngo bo 'dzin pa nye bar bsdu ba'i phyir/ e ma'o mchog tu byang chub pa/ /zhes gsungs te/mchog ni nyan thos la sogs pa'i byang chub kyi mtshan nyid dang bral ba rdzogs pa'i byang chub ni mngon par byang chub pa'i rim par thob par bya ba'i stong pa nyid do/ /de'i tshul ni thob par byed pa'i rgyu ting nge 'dzin dang phyag rgya'i rim pa'i mtshan nyid do/ /des snang ba ni de la mos pa de 'od gsal bar byed pa'i mtshan nyid de rab tu ston par byed pa'o//zung du 'jug pa'i ngo bo rjes su dran pa nye bar bsdu ba bstan pa'i phyir/ e ma'o spros pa rnams dang bral/ /zhes gsungs te/ tha dad pa'i spros pa las rnam par grol ba nyid kyi phyir/ bden pa'i don ni gsal mdzad pa/ /zhes bya ba'o/ / bden pa'i don ni rgyu dang 'bras bu tha mi dad pa'am slob pa'am mi slob pa'i dbye ba la rab tu ston par byed pa'o/ /khyed drin gyis zhes bya ba ni ston pa po bcom ldan 'das rdo rje sems dpa'i drin gyis bdag po'i dbang gis so/ /bdag cag ces bya ba ni byang chub sems dpa' rnams so/ /rdo rje sems dpa'i go 'phang zhes bya ba ni/de bzhin gshegs pa drug po thob tu rung ba'o/ /thob pa zhes bya ba ni rtogs pa'o/ /mgon po zhes bya ba ni de la bod pa'o/ /lam log zhugs zhes bya ba ni da lta rtsod pa'i dus na shes rab dman pa nyid kyis 'dod chags dang bral ba'i theg pas myur du rnam par grol ba med pa'i phyir ro//bdag cag ces bya ba ni 'khor rnams so/ /mgon po zhes bya ba ni sngon bzhin no/ /khyed kyis zhes bya ba ni ston pa po rdo rje 'chang gis so/ /lam la zhes bya ba ni theg pa chen po sngags kyi lam spyod pa gsum pa gsum po gtso bor gyur pa rdo rje 'chang chen po'i go 'phang thob par byed pa la bkod pa'o//'jig rten mun 'thoms zhes bya ba ni rnam pa sna tshogs pa bcom ldan 'das kyi lam thos pas 'khrugs pa'i phyir ro/ /bdag cag ces bya ba ni byang chub sems dpa' rnams so/ /mgon po zhes bya ba ni sngon bzhin no/ /ye shes snang ba zhes bya ba ni/chos kyi sku'i ngo bo 'od gsal gyi thabs la'o/ /sbyor bar mdzad ces bya ba ni 'jug pa ste/ 'od zer spros pas snod nyid du byed pa'i phyir ro/ /khyod kyis zhes bya ba ni bcom ldan 'das kyis so/ /dam tshig nyi ma zhes bya ba la dam tshig ni de bzhin gshegs pa lnga ste/ nyon mongs pa lnga dang /phung po lnga rnam par sbyong ba'i rim gyis ye shes lnga'i ngo bo mngon du byed pas mi 'da' ba nyid kyi phyir ro/ /de nyid ni rdo rje ste stong pa nyid kyi ngo bo nyid kyi phyir ro/ /de rnams nyi ma dang 'dra bas na nyi ma ste/ gtso cher gsal bar mdzad pa nyid kyi phyir ro/ /phyag rgya chen po'i don zhes bya ba la/phyag rgya chen po ni mngon par byang chub pa'i rim pa'i ngo bo rnam pa med pa'o/ /de nyid ni don te 'bras bu'i ngo bo ste ston par mdzad pa ni 'od zer bkye ba nyid kyis snod du mdzad pa nyid kyi phyir ro/ /phyag 'tshal lo zhes bya ba ni sku gsum gyi bdag nyid bcom ldan 'das nyid la'o/ / bcom ldan 'das la zhes bya ba ni snga ma bzhin no/ /phyag rgya chen po brtse bdag nyid/ /ces bya ba ni/ stong pa nyid dang snying rje'i bdag nyid can 'od gsal ba dang bdag byin gyis brlabs pa dang tha mi dad pa'i sku'i rang bzhin la zhes bya ba'i don to/ /dag pa gnyis med mkha' zhes bya ba la/ dag pa ni rnam par dag pa gnyis kyis so/ /gnyis su med pa ni gzung ba dang 'dzin pa gnyis kyis stong pa'o/ /de nyid ni mkha' ste nam mkha'o/ /de la byang chub zla ba ni byang chub kyi ngo bo ri bong gi mtshan ma zhes bya ba'i don to/ /de ltar rnam pa gnyis kyis snod du gyur pa'i slob ma'i bya ba bstan nas/slar yang de'i bya ba brjod pa'i phyir de'i yan lag 'khor gyi dgongs pa shes pa sngon du 'gro bas 'dod pa'i dbang phyug bstan pa'i phyir zhes bya ba la sogs pa'i tshigs su bcad pas zhes bya ba la sogs pa gsungs te/ sngon du bstan pa'i tshigs su bcad pa bcus so//bcom ldan 'das la bstod pa byas nas zhes bya ba ni bsngags pa byas nas so/ /yid la byed pa gcig pas rang gi gdan zla ba dang nyi ma'i ngo bo rnams la 'khod nas 'brel to/ /ci zhig byas nas she na/ de'i phyir slar yang 'dus par gyur te zhes gsungs te/ bcom ldan 'das la gsol ba 'debs pa po'i dgongs pas gnas gcig tu 'du ba byas nas so//byang chub sems dpa' ji lta bu zhe na/ de'i phyir rdo rje phreng ba mngon par brjod pa zhes bya ba ni sa bcu gsum pas bsdus pa la'o/ /ji lta ba'i zhes bya ba ni rnam pa gang gis so/ /ngo bo zhes bya ba ni rang bzhin no//dri bar 'dod nas zhes bya ba ni bcom ldan 'das kyi drung du'o/ /yid la byed pa gcig pas zhes bya ba ni sems gcig pa ste/ rdo rje phreng ba'i rgyud kyi gsol ba 'debs pa la'o/ /sems gcig pa zhes bya ba ni dgongs pa mtshungs pa nyid kyi phyir ro/ /shin tu dga' ba byed pa nyid kyi gsung nyan par 'dod nas zhes bya ba ni shin tu yang dga' ba brjod pa ni nyams su myong ba'i bde ba chen po dang rjes su mthun pa'i sgra'o//de la dri bar 'dod nas don du gnyer ba la rtse gcig pa'o/ /gzhan yang 'dar ba dang ba spu ldang ba dang dbugs g.yo ba dang bcas pas zhes bya ba la/ 'dar ba ni lus thams cad g.yo ba'i rnam pa can no//ba spu ldang ba ni spu langs pa'o/ /de dbugs dbyung ba ni khyad par du 'phags pa'i ngo bo dbugs dbyung ba 'jug pa gang rnams la yod pa de la de skad ces bya'o/ gzhan yang ci zhig byas nas she na/ de'i phyir yang dang yang du bcom ldan 'das la phyag byed ces gsungs te/yang dang yang du phyag 'tshal ba la sogs pa byas nas so/ /byang chub sems dpa' zhes bya ba la/ sangs rgyas rnams dang sa'i snying po la sogs pa byang chub sems dpa' rnams so/ /rang gi stan la zhes bya ba ni snga ma bzhin no/ /sems re dogs dang bcas pas gnas so zhes bya ba ni/bcom ldan 'das las rgyud nyan pa'i don du gsol ba 'debs par byed pa'i dgongs pas de lta bur sgras brjod pa'i phyir ro/ /gnas so zhes pa ni rnam par gnas pa'o/ /bcom ldan 'das kyis zhes bya ba ni ston pa po'o/ /de rnams kyi zhes bya ba ni byang chub sems dpa' rnams kyi'o//de lta bu'i sems kyi rtog pa thugs kyis mkhyen nas zhes bya ba la/ sems kyi rnam grangs kyi mngon par shes pas byang chub sems dpa' rnams kyi dgongs pa mkhyen nas te/ phyag rgya chen po'i rnal 'byor la rjes su zhugs nas so zhes bya ba dang 'brel pa'o//phyag rgya chen po ni rang bzhin gyis 'od gsal ba'i rnam pa'o/ /de'i sbyor ba ni sbyor ba ste/ shes rab dang snyoms par zhugs pa'i mtshan nyid can no/ /de la rjes su zhugs pa ni snyoms par zhugs pa zhes bya ba'i don to/ /gzhan yang ci zhig byas nas she na/ de'i phyir slar yang zhes gsungs te/snga ma la ltos pas so/ /rdo rje phreng ba mngon par byang chub pa/ /zhes bya ba'i ting nge 'dzin la snyoms par zhugs nas zhes bya ba ni sngar bshad zin to/ /gzhan ci zhig byas nas she na/ de'i phyir/ gsang ba'i rdo rje las zhes gsungs te/ rang nyid kyi thabs kyi rdo rje gsang ba'i sbubs su nub pa las so//bcom ldan 'das kyis zhes bya ba ni/ rnam par rtog pa 'joms par byed pa'o/ /rang gi rig ma zhes bya ba ni rdo rje dbyings kyi dbang phyug ma'o/ /phyung ste zhes bya ba ni zhal gsum phyag drug pa'i ngo bos spros nas so/ /ji lta bus she na/ de'i phyir sgeg pa la sogs pa'i nyams dang ldan pa zhes bya ba la sogs pa gsungs te/de la bcom ldan 'das dang lhan cig tu snyoms par 'jug par gnas pas sgeg pa'i nyams dang ldan pa'o/ /rnam par rtog pa las mi 'jigs pa nyid kyis dpa' ba dang ldan pa'o/ /bdud rtsi'i ro myang ba nyid kyis rngam pa dang ldan pa'o//drag po'i mtshon cha 'dzin pa nyid kyis drag po dang ldan pa'o/ /nye bar zhi ba'i bzhad pa'i rnam pa nyid kyi phyir bzhad pa dang ldan pa'o/ /bgegs la sogs pa bzlog pa dang bka'i 'khor lo spro ba la yan lag gi dngos po 'gro ba'i phyir 'jigs su rung dang ldan pa'o//rang bzhin gyis thugs rje chen po'i ngo bo nyid kyi phyir snying rje ba dang ldan pa'o/ /dkyil 'khor gyi 'khor lo sar pa sar pa sprul pa la rgyur gyur pa'i phyir ngo mtshar ba dang ldan pa'o/ /don dam par rnam pa med pa nyid kyi phyir zhi ba'i nyams dang ldan pa'o/ /gzhan yang ci zhig byas nas she na/de phyir bdag nyid kyis 'dod chags dang bral ba'i gzugs spangs nas zhes gsungs te/ bdag nyid kyis zhes bya ba ni rang gis so/ /'dod chags dang bral ba'i gzugs zhes bya ba ni shAkya thub pa'i cha byad do/ /spangs nas zhes bya ba ni mi snang bar byas nas so/ /sgeg pa la sogs pa'i nyams dang ldan pa'i gzugs bzung nas zhes bya ba ni de ma thag tu bshad zin to//bcom ldan 'das ji lta bu zhe na/ de'i phyir/ rang gi rig ma la 'khyud nas/ /zhes bya ba gsungs te/ 'dod pa'i khams na gnas pa'i sems can rnams kyi ched du bcom ldan 'das ma rdo rje dbyings kyi dbang phyug ma dang lhan cig gnyis su med pa'i sbyor ba rjes su thob pa'o//de ltar 'khor rnams kyi dgongs pa yongs su shes pa sngon du 'gro bas 'dod pa'i dbang phyug bstan par mdzad nas/ da ni 'khor rnams la ngo mtshar bskyed pa bstan pa brjod pa'i phyir/ slar yang de rnams kyis zhes bya ba la sogs pa gsungs te/sngar bstan pa'i cho 'phrul la ltos pas so/ /de rnams kyis zhes bya ba ni/ 'khor na gnas pa'i byang chub sems dpa' rnams kyis so/ /de lta bu'i zhes bya ba ni 'dod chags dang bral ba'i gzugs spangs nas sgeg pa la sogs pa'i nyams dang yang dag par ldan pa'i gzugs can nyid du'o//mthong ste zhes bya ba ni rnam par gzigs nas te/ cang mi smra bar gyur nas/ de la 'khor rnams yang dag par 'khod par gyur to zhes bya ba dang 'brel to/ /ngag gis brjod par bya ba nyid du mi nus pa nyid kyi phyir ro/ /gzhan yang ji lta bu zhe na/de'i phyir ngo mtshar skyes te/ mig gdangs nas zhes gsungs te/ 'dod chags dang bral ba'i gzugs spangs pa'i ngo mtshar bas mig gdangs pa zhes bya ba'i don to/ /gang dang 'dra ba zhe na/ de'i phyir ri mor bkod pa lta bu zhes gsungs te/ji ltar rtsig pa la ri mo mkhan gyis bris pa'i skyes pa la sogs pa smra ba dang brjod par mi nus pa de bzhin du'o/ /des ni 'di skad ston par 'gyur/ bcom ldan 'das shAkya thub pa sgrib pa thams cad spangs pa ji ltar 'khor gyi dkyil 'khor 'di lta bu'i dbus su sngon gyi cha lugs yongs su dor nas 'os pa ma yin pa'i sgeg pa la sogs pa'i nyams dang yang dag par ldan pa'i gzugs yang dag par blangs nas rnam par zhugs pa zhes bya ba'o//yang na de lta bu'i gzugs bstan pa la nges par bcom ldan 'das la dgongs pa'i khyad par 'ga' zhig yod par 'gyur snyam pa'o//de ltar 'khor rnams la ngo mtshar bskyed pa bstan nas/ da ni yi ge gsum spro ba brjod par bya ba'i phyir/ de nas bcom ldan 'das zhes bya ba la sogs pa gsungs te/ de nas zhes bya ba ni 'khor rnams la ngo mtshar bskyed pa bstan ma thag pa'i rjes la'o/ /bcom ldan 'das zhes bya ba ni sngon du bshad zin to//rje btsun rdo rje'i rigs chen po'i snying po 'di gsungs zhes bya ba dang 'brel to/ /rdo rje chen po ni de bzhin gshegs pa rnams te stong pa nyid chen po'i ngo bo nyid kyi phyir ro/ /de rnams kyi rigs ni de rnams kyi rgyud do/ /de rnams kyi snying po ni skyed par byed pa'i rgyur gyur pa'o//rje btsun zhes bya ba ni sngags ma lus pa thams cad la gtso bor gyur pa nyid kyis mthu chen po dang ldan pa'i phyir ro/ /gsungs so zhes bya ba ni brjod pa'o/ /ji lta bu'i bcom ldan 'das she na/ rang gi rig mas yang dag par bskul te zhes bya ba gsungs te/ rdo rje dbyings kyi dbang phyug mas gsol ba 'debs par byed cing bskul ba'o//ci zhig byas nas she na/ de'i phyir phyag rgya chen po'i rnal 'byor nye bar bsdus nas snyoms par 'jug pa sngon du 'gro bas rang bzhin gyis 'od gsal bar zhugs pa'i mtshan nyid nyams su myong nas zhes bya ba'i don to/ /gang las she na/de'i phyir de nyid kyi sku gsung thugs rdo rje las zhes bya ba gsungs te/ mgo bo dang / mgrin pa dang snying ga'i gnas rnams la rim pa ji lta ba bzhin du'o/ /yang na nyid kyi sku las gnas brgyad du kun nas reg nas ngag gis de brjod pa'o/ /sems kyis de bskul ba'o/ /oM AHhUM zhes bya ba ni de la don gyis stong pa'i yid ni oM zhes bya ba'i don to//gdod ma nas ma skyes pa'i chos rnams AH'i rnam pa'i ngo bo la nye bar mtshon pas yang dag par rtogs pa'i phyir AHzhes bya'o/ /lus kyang yin la ngag kyang yin te/ yid kyang yin pas na hUM zhes bya'o/ /de ltar yi ge gsum spro ba bstan nas/da ni dkyil 'khor pa spro ba brjod pa'i phyir/ de nas de skad gsungs ma thag tu zhes bya ba gsungs te/ de nas zhes bya ba ni yi ge gsum brjod pa'i rjes su'o/ /'di gsungs pa tsam gyis zhes bya ba ni yi ge gsum bcom ldan 'das kyis brjod pa tsam gyis de bzhin gshegs pa thams cad dang /rig ma dang / byang chub sems dpa' dang / khro bo'i rgyal po rnams byung bar gyur to zhes bya ba dang 'brel to/ /thams cad kyang yin la de bzhin gshegs pa yang yin pas na/ de bzhin gshegs pa thams cad ni mi bskyod pa la sogs pa lnga rnams so/ /rig ma ni lhan cig spyod ma dang rjes su spyod ma'i dbye bas dgu'o//'di rnams kyis 'od gsal ba'i de kho na nyid rig par mdzad pas na rig ma'o/ /byang chub sems dpa' zhes bya ba ni sngon du bshad zin to/ /sa'i snying po la sogs pa brgyad do/ /khro bo'i rgyal po rnams zhes bya ba ni gshin rje mthar byed la sogs pa bcu rnams so//'di rnams la gnyis ldan gyi bsdu ba'o/ /phyung bar gyur to zhes bya ba ni byung bar gyur pa'o/ /gang nas she na/ de'i phyir bcom ldan 'das kyi sku las zhes gsungs te/ mchog tu sgeg pa'i nyams dang ldan pa len pa'i sku las so/ /ba spu'i bu ga thams cad nas zhes bya ba ni/bcom ldan 'das kyi sku la gnas pa'i bu ga rnams las zhes bya ba'i don to/ /phyung nas zhes bya ba ni/ nges par phyung nas so/ /bcom ldan 'das kyis zhes bya ba ni ston pa'i 'o/ /shar la sogs pa'i phyogs su zhes bya ba ni/ shar dang lho dang nub dang byang gi phyogs rnams dang /de bzhin du me dang / bden bral dang / rlung dang dbang ldan la sogs pa rnams la mdor bsdus te/ sgrub thabs su gsungs pa'i rim pas gnas par gyur pa ni bzhugs par gyur pa ste/ zla ba la sogs pa'i gdan rnams la zhes bya ba ni lhag ma'o//rgyas par bshad pa bstan pa'i phyir/ kha cig ni rnam par snang mdzad kyi rnam pa'o zhes gsungs te/ me long lta bu'i ye shes kyi ngo bo khyad par du snang bas na/ rnam par snang mdzad de de'i rnam pa zhal gsum phyag drug pa zhes bya ba'i don to/ /kha cig ni rin chen 'byung ldan gyi rnam pas so zhes bya ba ste/rin po che ni yid la re ba thams cad skong bar byed pa/ sems can rnams la mnyam pa nyid kyis phongs pa'i sdug bsngal 'joms pa gang las 'byung ba de ni rin chen 'byung ldan te/ de'i rnam pa zhes bya ba sngon bzhin no/ /kha cig ni 'od dpag tu med pa'i rnam pa'o zhes bya ba ni dpag tu med pa ni gzhal du med pa ste/'od ni so sor rtog pa'i ye shes kyi rnam pa'o/ /de gang la yod pa de la de skad ces bya'o/ /kha cig ni gnod mdzes rgyal po dang gtsug tor 'khor los sgyur ba'i bar gyi rnam pa'o zhes bya ba ni gzhan rnams kyang bar du bsdus nas gsungs pa'o//dbang po la sogs pa'i 'jig rten skyong ba 'bigs par byed pas na gnod mdzes so/ /de nyid kyi ngo bos gsal bar byed pas na gnod mdzes rgyal po'o/ /gtsug tor lag pa gnyis kyis bzung nas dkyil 'khor gyi 'khor lo'i steng du gnas pas na/ gtsug tor 'khor los sgyur ba'o//de'i rnam pa ni de'i ngo bos so zhes bya ba'i sgra ni yongs su rdzogs pa'i mtshams sbyor ro/ /de ltar rgyas par bshad pa bstan nas/ bcom ldan 'das kyi gnas skabs gzhan brjod pa'i phyir/ de nas bcom ldan 'das zhes bya ba la sogs pa gsungs te/ dkyil 'khor pa rnams rang rang gi stan la 'khod pa'i rjes la'o//bcom ldan 'das kyis bshad pa ni sngar bzhin no/ /yud tsam zhig ces bya ba ni skad cig tsam mo/ /cang mi gsung bar bzhugs so zhes bya ba ni mi smra bar ro/ /bzhugs pa ni 'chad par 'gyur ba'i sgra brjod pa'i don du'o/ /ji ltar don gsum gyis dkyil 'khor pa rnams spro ba bstan nas/da ni gsol ba 'debs pa brjod par bya ba'i phyir/ de'i yan lag tu gyur pa 'khor rnams kyi bya ba brjod pa bstan pa'i phyir/ ji snyed kyi zhes bya ba la sogs pa gsungs te/ bcom ldan 'das la 'khor gyi ngo bos gnas pa'o/ /thams cad kyis zhes bya ba ni bgrangs pa dang ma bgrangs pa'o//byang chub sems dpa' ni nam mkha'i khams khyab pa'o/ /dbyangs gcig gis zhes bya ba ni mgrin gcig gis so/ /dbyangs kyis smras pa zhes bya ba ni/ e ma'o rdo rje rigs chen po/ /zhes bya ba la sogs pa 'chad par 'gyur ba'i sgra brjod par gyur pa'o//e ma'o zhes bya ba ni ngo mtshar ba la'o/ /rdo rje rigs chen po zhes bya ba ni/ rdo rje chen po ni rdo rje 'chang ngo / /de'i rigs ni de'i rgyud do/ /de'i bod pa la yang de skad ces bya'o/ /rdo rje theg pa zhes bya ba ni sngar bshad pa'i mtshan nyid can gyi sngags kyi theg pa'o//de'i don ni rim pa gnyis la brten nas 'jig rten dang 'jig rten las 'das pa'i dngos grub bsgrub pa'o/ /de mdzad pa ni ston par byed pa'o/ /de bzhin du e ma'o zhes bya ba sngon bzhin no/ /rdo rje theg pa gsal zhes bya ba la/ rdo rje theg pa ni bshad ma thag pa'o/ /de la gsal ba ni bcom ldan 'das kyi bdag po'i rkyen gyis de bsgrub pa'i phyir dang /rnam par rtog pa'i mun pa rnams kyi gnyen po nyid du gyur pa'i phyir ro/ /chos kyi dbyings kyi don mdzad ces bya ba ni chos kyi dbyings thog ma dang tha ma med pa nyid kyi rigs so/ /de nyid ni don te thar pa 'dod pa rnams kyis don du gnyer bar bya ba'i phyir ro//de ston par mdzad pa ni spros pa sna tshogs pa'i sgo nas de nyid ston par byed pa'i phyir ro zhes lan gsum brjod nas zhes bya ba ni de lta bur gyur pa'i tshigs su bcad pa'o/ /gsum ni lan gsum du'o/ /brjod nas zhes bya ba ni smras nas so/ /rdo rje 'chang chen po de la zhes bya ba ni gang gis sngar gsungs pa'i cho 'phrul bstan pa de nyid rdo rje 'chang chen po ste/stong pa nyid chen po 'chang ba'o/ /bcom ldan 'das zhes bya ba ni/ rnam par rtog pa thams cad 'joms par byed pa'o/ /de ltar tshig gnyis po 'dis ye shes dang spangs pa phun sum tshogs pa bstan to//phyag byas nas zhes bya ba ni lus kyi dkyil 'khor phyag la sogs pa rnams kyis so/ /rang rang gi stan la zhes bya ba ni/ zla ba dang nyi ma dang pad+ma'i gdan la sogs pa rnams la'o/ /'dug par gyur to zhes bya ba ni/ bzhugs par gyur pa'o/ / de ltar 'khor rnams kyi bya ba bstan nas/ gsol ba 'debs pa rtsom pa bstan pa'i phyir/ de nas de'i tshe zhes bya ba la sogs pa gsungs te/ 'khor rnams rang rang gi stan la 'khod pa'i rjes la'o/ /skad cig thang cig yud tsam de la zhes bya ba ni/ skad cig se gol gtogs pa tsam/ /thang cig yungs kar sgril ba ste//dbugs 'byung yud tsam zhes bya'o/ /zhes bya ba'i mtshan nyid kyis te/ phyag na rdo rjes bcom ldan 'das la 'di skad ces gsol to zhes bya ba dang 'brel to/ /ci zhig byas nas she na/ de'i phyir byang chub sems dpa' sems dpa' chen po'i 'khor 'dus pa chen po de rnams mthong nas zhes bya ba gsungs te/gnas gcig tu 'dus pa gzigs nas so/ /ci lta bu zhe na/ de'i phyir rgya chen po zhes bya ba gsungs te/ grangs la sogs pa rnams kyis bcad pa med pa'i phyir ro/ /de ltar gsol ba 'debs pa la rtsom pa bstan nas/ da ni dngos su gsol ba 'debs pa brjod pa'i phyir/bcom ldan 'das zhes bya ba la sogs pa gsungs te/ ye shes gsum dang lhan cig tu gyur pa'i rang bzhin gyi tshogs spangs pa'i phyir ro/ /bcom ldan 'das de la bod pa gang yin pa de yang de skad ces brjod do/ /ye shes rdo rje nyi ma zhes bya ba la/ye shes ni ye shes lnga'i bdag nyid do/ /de'i rang bzhin gyi rdo rje ni ye shes kyi rdo rje'o/ /de nyid ni nyi ma ste de'i 'bras bu med pa'i phyir ye shes rdo rje'i nyi ma'o/ /'bras bu de nyid gsungs pa nas/ /gsang ba'i pad+ma rab rgyas pa/ /zhes bya ba ste/ gsang ba'i rnam pa'i snying ga'i pad+ma 'am/gsang ba ni snying ga mtshon pa'i pad+ma'o/ /rab tu rgyas par byed pa ni kha 'byed pa ste/ de gang la yod pa de la de skad ces bya'o/ /dam tshig chen po zhes bya ba ni/ dbang bzhi pa'i dus su dam tshig chen po lnga ster ba'i phyir ro/ /rnal 'byor dbang zhes bya ba ni/ rim pa gnyis kyi ting nge 'dzin la brten nas/rdo rje 'chang chen po'i go 'phang sgrub par byed pa'i phyir ro/ /bdag gi zhes bya ba ni phyag na rdo rje bdag gi tshig gsol ba 'debs pa'i ngo bo'o/ /gson cig ces bya ba ni/ rno ba nyid kyis so/ /thugs rje zhes bya ba ni sems can thams cad la phan pa dang / bde ba dang lhag pa'i bsam pa'i mtshan nyid can las so//tshig gi ngo bo bstan pa'i phyir/ /bskal pa bzang po'i sangs rgyas rnams/ /zhes gsungs te/ bskal pa bzang po ni/ tshe ring ba nyid dang shes rab rno ba nyid kyis rdzogs ldan gyi ngo bo ste/ dus gang la 'bras bu bzhi po yongs su rdzogs pa nyid 'grub par 'gyur ba dang /gang yang rang nyid kyis 'bum phrag nyi shu'i tshad dang ldan pa de la 'byung bas na bskal pa bzang po'o/ /rdzogs sangs rgyas zhes bya ba ni/ sngon gyi rnam par gzigs la sogs pa ste/ yongs su rdzogs pa dang chos thams cad yang dag par rtogs pa'i phyir ro/ /rdo rje'i theg pa la mngon par dad pa zhes bya ba ni sngags kyi theg pa la dad pa'o//byang chub sems dpa' zhes bya ba ni rnam par gzigs la sogs pa de nyid bcom ldan 'das rdo rje 'chang chen po la byang chub sems dpa' ni 'khor rnams nyid du gnas pa ste/ slob bzhin pa nyid kyi ngo bos gnas pa'i phyir ro/ /sems dpa' che zhes bya ba ni/sems can thams cad kyi don la dgongs pa'i phyir ro/ /'di rnams zhes bya ba ni mngon sum du ston par byed do/ /lus kyis phyag 'tshal 'khod ces bya ba ni/ ston pa la gus pas lus btud pa'o/ /lus ni gang rnams la btud pa de ni lus btud pa'o/ /snyigs ma lnga'i dus su zhes bya ba ni/tshe dang / lta ba dang / nyon mongs pa dang / bskal pa dang / sems can gyi snyigs ma'i mtshan nyid can rtsod pa'i dus kyi ming can la'o/ /da ltar yang dag 'jug pa la/ /zhes bya ba la/ yang dag 'jug pa la zhes bya ba ni/ sems can rnams kyi las kyi dbang gis 'jug pa la'o//da ltar zhes bya ba ni da ltar gyi dus so/ /ci'i don du snyigs ma lnga'i dus su gnas she na/ de'i phyir sems can rnams zhes bya ba gsungs te/ sems can zhes bya ba ni srog chags rnams so/ /bsod nams chung ba zhes bya ba ni shin tu yang dge ba'i rtsa ba chung ba'i phyir ro/ /de bzhin du/brtson 'grus chung zhing tshe thung dang / /zhes bya ba ni/ brtson 'grus chung ba ni dge ba'i las la spro ba'i mtshan nyid shas chung ba'o/ /tshe ni lo'i grangs tshad gang rnams la yod pa de rnams la de skad ces bya'o/ /lta ba ngan pa mang po dang / /zhes bya ba ni sgro 'dogs pa dang skur pa 'debs pa'i mtshan nyid can mu stegs pa la sogs pa'i lta ba'i rang bzhin log par lta ba la ltung ba'i phyir ro//dgos phyir zhes bya ba ni de'i rgyu mtshan du'o/ /de rnams kyi lta ba ngan pa bzlog pa'i gnas pa zhes bya ba dang 'brel to/ /mchog gi go 'phang zhes bya ba ni/'khor ba'i sdug bsngal bzlog pa'i mtshan nyid can gyi rdo rje 'chang chen po'i go 'phang ngo / /zhu zhes bya ba ni ston pa po'i drung nas so/ /gang gis zhes bya ba ni mchog gi go 'phang gis so/ /myur du zhes bya ba ni skye ba 'di nyid la'o/ /'khor ba las zhes bya ba ni khams gsum gyi ngo bo las so//thar pa zhes bya ba ni/ nyon mongs pa dang kun nas sbyor ba bral ba'o/ /'gyur zhes bya ba ni grol bar 'gyur ba ste/ thob par 'gyur zhes bya ba'i don to/ /ji lta bu zhe na/ de'i phyir pha rol tu phyin zhes gsungs te/ nyan thos kyi byang chub la sogs pa'i mtshan nyid dang bral ba la'o//yang na bsdus nas zhes bya ba ni 'dod pa'i yon tan lnga'i spyod pas zhes bya ba'i tha tshig go/ /ma 'ongs pa'i zhes bya ba ni/ 'byung bar gyur pa'i dus rnams la'o/ /sems can rnams zhes bya ba ni lus bzung ba rnams la'o/ /'di dag la zhes bya ba ni mngon sum du mthong bzhin pa'o//rgyal ba'i sras zhes bya ba ni byang chub sems dpa' ste/ slob bzhin pa'i rgyu mtshan du'o/ /bdud bzhi 'joms par byed pas na rgyal ba'o/ /sras rnams ni bu rnams so/ /bdag ni zhes bya ba ni phyag na rdo rje'o/ /gsol ba 'debs zhes bya ba ni zhu ba byed pa'o//'di ltar zhes bya ba ni 'chad bzhin pa'i tshul gyis so/ /gang la zhe na/ de'i phyir rdo rje 'chang chen la/ /zhes bya ba gsungs te/ rdo rje 'chang chen la zhes bya ba ni/ stong nyid chen po 'dzin pa'i ston pa po la'o/ /gtso bo zhes bya ba ni sangs rgyas lnga'i bdag po la'o/ /'o na ji ltar ma 'ongs pa'i sems can rnams kyi don nam slob bzhin pa'i sems can rnams kyi don du gsol ba 'debs pa zhe na/de'i phyir de nyid mchog ni zhes bya ba la sogs pa gsungs te/ phyag na rdo rjes so/ /de nyid mchog ni zhes bya ba ni/ rang bzhin gyis 'od gsal ba'i rnam pa phyag rgya chen po'i mtshan nyid can no//'tshal ba zhes bya ba ni rtogs pa'o/ /khyed drin gyis zhes bya ba ni/ rdo rje 'chang chen po'i bdag po'i dbang gis so/ /'gro ba'i gtso bo zhes bya ba ni bcom ldan 'das la bod pa'o/ /'gro ba ni g.yo ba'i bdag nyid can gyi khams gsum pa'i bdag po'o/ /de nyid mchog ni ji lta bu zhe na/de'i phyir gsang ba'i zhes bya ba gsungs te/ sba bar bya ba'o/ /sangs rgyas kun gyi zhes bya ba ni/ 'dod chags dang bral ba'i yang dag par rdzogs pa'i sangs rgyas rnams la'o/ /gzhan yang / rgyud rnams kun gyi don bsdus pa/ /zhes bya ba ni/ rgyud lnga po rnams sdud par byed pa'i phyir ro//'o na gal te khyod kyis de nyid mchog 'tshal na/ de'i phyir mi smra ba'i ngo bos khyod la gnas par 'os she na/ de phyir 'on kyang zhes bya ba gsungs te/ de la zhes bya ba ste/ de nyid mchog bstan pa'i mtshan nyid can gyi dpal gsang ba 'dus pa la rdo rje phreng ba mngon par rtogs pa 'dri bar 'tshal zhes bya ba dang 'brel to//rdo rje phreng bas thob par bya'i mngon par rtogs pa ni/ rdo rje phreng ba mngon par rtogs pa ste/ 'di'i don sngar bshad zin to/ /ji ltar dri bar 'dod ce na/ de'i phyir don dam par ni zhes bya ba gsungs te/ khyad par du 'phags pa'i don gyi ngo bos so/ /ji lta bu zhe na de'i rim pa gnyis ni bla na med pa zhes bya ba gsungs te/bskyed pa'i rim pa dang rdzogs pa'i rim pa'i mtshan nyid kyis bla na med pa ste/ 'di las gong du bla na med pa'i phyir ro/ /de ltar na de lta bu de nyid bstan du gsol zhes bya ba dang 'brel to/ /ji ltar zhe na de'i phyir/ rdzogs pa'i rim pa'i rnal 'byor ni/ / zhes bya ba gsungs te/ zla ba dang rdo rje la sogs pa dor ba'i ngo bo rang bzhin gyis nye bar mtshon pa'i ngo bos zhes bya ba'i don to/ /de lta bur gyur pa'i don bstan pa la/ khyod kyis bdag la bstan du gsol/ /zhes bya ba ni/ phyag na rdo rje bdag la'o/ /bstan du gsol zhes bya ba ni mdzad du gsol ba'o//mtshon pa zhes bya ba ni don gsal ba nyid kyis gsal bar byed pa'i phyir ro/ /dpal ldan 'dus pa zhes bya ba ni/ sangs rgyas thams cad 'dus pa'i bdag nyid can la ste/ de la phyi rol du rgyud bstan pa'i gnas skabs su ni rtsa ba'i 'dus pa'o/ / bskyed pa dang rdzogs pa'i rim pa dag la yang gdams ngag ji lta bar 'dus pa'i don shes par bya'o/ /dpal ni tshogs gnyis so/ /de gtso bor byas pa'i 'dus pa ni 'dus pa'o/ /de nyid ni rgyud sde dang rgyu dang 'bras bu dang thabs kyi rgyud kyi ngo bo nyid kyi phyir rgyud de/ de la de ston pa la'o//ji lta bu zhe na/ de'i phyir rnal 'byor bla na med/ /ces gsungs te/ thabs dang shes rab snyoms 'jug pas/ /rnal 'byor zhes su brjod pa yin/ /zhes bya ba'i tshig gi rnal 'byor gyi sgras ni dpal de kho na nyid 'dus pa la sogs pa la rnal 'byor gyi rgyud rnams su brjod do/ / de rnams kyi bla na med pa la rnal 'byor bla na med pa'i rgyud kyi ngo bo la zhes bya bar brjod do/ /gzhan yang ji lta bu zhe na de'i phyir/ /brgyad khri dang ni bzhi stong ngo / /brgyad khri bzhi stong ni nyon mongs pa brgyad khri bzhi stong gi gnyen por gyur pa'i phyir ro/ /chos kyi phung po zhes bya ba ni gro ga'i shun pa gcig pa la nyag ma'i tshad kyi smyu gus bris pa khur ji tsam du glang po che smyon pa dar la bab pas khur bar nus pa de tsam gyi tshad ni chos kyi phung po gcig go//des bsdus pa'i ngo bo dpal gsang ba 'dus pa la'o/ /de ltar yang bsnyen gnas kyi sdom pa'i rjes su dkon mchog gsum la skyabs su 'gro ba dang /byang chub tu sems bskyed pa dang / sangs rgyas lnga'i dam tshig dang / dbang lnga dang / rdo rje slob dpon gyi dbang mtha' dag ma lus pa dang / de skad smras nas zhes bya ba ni/ de ltar gsol ba 'debs pa rang gi ngo bos bstan nas so/ /mdun du 'dug ste zhes bya ba ni mdun du 'khod pa'i phyag na rdo rje'o//phyag ni byas nas kyang zhes bya ba ni/ bcom ldan 'das la bsnyen bkur dang gus pa sngon du 'gro bas gsol ba 'debs pa'i phyir ro/ /bcom ldan 'das zhes bya ba ni de bzhin gshegs pa'o/ /smras nas zhes bya ba ni brjod nas so/ / ji lta bu'i bcom ldan 'das she na/ de'i phyir ye shes chen po zhes gsungs te/ shes pa dang shes bya thams cad ma dmigs pa'i phyir ro/ /rdo rje sems dpa' zhes bya ba ni/ sra zhing snying po khong stong med/ /mi chod mi shigs mtshan nyid ldan/ /mi 'tshig pa dang mi nyams pa'i//stong nyid rdo rje zhes brjod do/ /de la sems dpa' ni dgongs pa gang la yod pa de la de skad ces bya'o/ /'gro ba'i bla ma zhes bya ba ni khams gsum pa'i slob dpon nyid du gyur pa'i phyir ro/ /rdo rje gsum zhes bya ba ni rdo rje gsum pa de rnams ni sku gsung thugs ro mnyam par gyur cing phan tshun dbyer mi phyed pa'i ngo bo'i don gang la yod pa de nyid la de skad ces bya'o//de nyid gsum gyi go 'phang ston/ /zhes bya ba ni/ de nyid gsum ni lus ngag yid gsum dag pa'i mtshan nyid do/ /go 'phang ni rdo rje 'chang chen po'i go 'phang ngo / /de ston pa ni gdams ngag de ston pa po'o//rnal 'byor rgyud kyi zhes bya ba ni/ dpal gsang ba 'dus pa la sogs pa rnams kyi'o/ /sbas pa'i don zhes bya ba ni mtha' drug gi don gyis gzung bar dka' ba'o/ /bstan du gsol zhes bya ba ni bshad du gsol zhes bya'o/ /'gro ba'i bla ma zhes bya ba ni khams gsum pa'i slob dpon zhes bya ba'i don to//de ltar rnam pa gsum gyis gsol ba 'debs pa bstan to/ /de tsam gyis rgyud spyi'i don bstan nas/ da ni rgyud kyi don brjod pa'i phyir de'i yan lag de la 'jug pa brjod pa ni/ bstan pa mdzad du gsol zhes bya ba gsungs te/ phyag na rdo rjes sngon du gsungs pa'i rigs pas bcom ldan 'das rdo rje 'chang chen po la rdo rje phreng ba'i rgyud bstan pa'i don du gsol ba gdab par byas nas/rdo rje yis ni khyab ces bya ba ni/ sems can thams cad kyi yul la snying rje chen pos gzhan dbang ngo / /slar yang rgyud la 'jug pa zhes bya ba ni/ rgyud ni rdo rje phreng ba'i ming can la'o//'jug pa'i phyir zhes bya ba ni 'jug pa'i rgyu mtshan du'o/ /yang zhes bya ba ni gsol ba btab pa'i rjes su'o/ /dri ba gtan la dbab ces bya ba ni/ dri ba nges par bshad par 'gyur/ /zhes bya ba'o/ /bshad par 'gyur zhes bya ba ni 'chad par 'gyur ba'o/ /de ltar de la 'jug pa bstan nas/da ni dri ba brjod pa bstan pa'i phyir/ rdo rje phreng ba'i ming ni zhes bya ba la sogs pa gsungs te/ dang po nyid du brjod par bya ba'i yul la dri ba'o/ /'dus pa ci zhig ces bya ba ni/ rgyud gang gi bshad pa'i rgyud kyi ngo bo 'di de'i yul la ni gnyis pa'o/ / cung zhig stong pa nyid ces bya ba ni rgyud de la gang zhig gtso cher gang zhig stong pa nyid kyi ngo bo bstan pa de ji lta bu yin zhes bya ba ni gsum pa'o/ /thig le'i dbye ba dang zhes bya ba ni de lta bur gyur pa'i stong pa nyid de la phyogs gcig gi rtogs par byed pa/ de ji lta bu yin zhes bya ba de'i rjes la bzhi pa'o//sgra zhes bya ba ni thig le'i dbye bas thabs gang gis 'gyur ba de'i don du sgra'i yul la dri ba lnga pa'o/ /de yang a yig gi ngo bo brjod par 'gyur ba'o/ /gsang ba dang ni zhes bya ba ni/ sgra mngon par gsal bar byed pa'i ngo bo drug pa'o//gsang ba gang zhes brjod pa zhes bya ba ni 'chad par 'gyur ba'o/ /dam tshig sdom pa zhes bya ba ni sngon du gsungs pa'i gsang ba mngon par gsal ba ni dam tshig dang sdom pa la gnas pa nyid la bya'i gzhan la ni ma yin zhes bya ba de'i don du dam tshig dang sdom pa'i yul ni dri ba bdun pa'o//de la dam tshig gnas gcig tu tsA ru'i bza' ba la sogs pa dang / rigs lnga'i dam tshig gi rnam pa'o/ /sdom pa zhes bya ba ni rang gi dam tshig gis bsrung bar bya ba'i ngo bo ste/ ji skad du 'chad par 'gyur ba las/ /de nas gzhan yang sdom pa'i don/ /de kho na nyid bshad kyis nyon//sdom pa srung bar byed pa gang / /de ni byang chub sems zhes brjod/ /ces gsungs te/ dam tshig ces bya ba ni bza' bar bya ba'i ngo bo ston par byed pa'i dri ba brgyad pa'o/ /ji skad du 'chad par 'gyur ba las/ /bza' ba ru ni bshad pa gang / /de ni bdud rtsi lngar ni brjod/ / ces gsungs te/ sgra tsam dang zhes bya ba ni dri ba lnga pa'i rgyas par bshad pa dang 'dra ba ni dgu pa'o/ /ji skad du 'chad par 'gyur ba'i/ chos kyi 'khor lo pad sbubs nas/ /sgra tsam yang dag gnas pa ni/ /zhes bya ba gsungs so/ /rlung gi de nyid ces bya ba ni/ bzhi pa'i dri ba'i rgyas par bshad pa bcu pa'i dri ba'o//ji ltar 'chad par 'gyur ba ni/ /rlung gi theg le ye shes che/ /zhes bya ba la sogs pa'o/ /bde chen ni zhes bya ba ni rdo rje phreng ba'i dri ba'i rgyas par bshad par gyur pa dri ba bcu gcig pa'o/ /ji skad 'chad par 'gyur ba yi/ /de nas gzhan yang bshad kyis nyon//bde ba chen po'i tshig gsal ba/ /rdor sems go 'phang mi phyed pa/ /rang rig pas na mchog gi mchog /kun rtog gis ni rtag stong pa/ /bde ba chen po zhes 'di brjod/ /lhan cig skyes pa'i dus su ni/ /gzung dang 'dzin pa rnam par spangs/ /zhes gsungs so//rdo rje pad+ma mnyam sbyor dang / /zhes bya ba ni thabs kyi ngo bo rjes su bsgrubs pa gang gis bde ba chen po'i rigs pa de ston par byed pa'i phyir rdo rje dang pad+ma mnyam par sbyor ba'i yul la dri ba bcu gnyis pa'o/ /ji ltar 'chad par 'gyur ba yi/ /mi phyed rdo rje zhes ni brjod/ /de dag gnyis ka yongs su grags//a yi yi ges phye ba yis/ /rnal 'byor mchog gis rtag tu rtogs/ /de yi rten ni snying pad+ma/ /'dab ma brgyad kyis rnam par brgyan/ /zhes bya ba la sogs pa gsungs so/ /sngags kyi de nyid ces bya ba ni/ dri ba bcu pa'i rlung gi de kho na nyid kyi mtshan nyid can gyi lhag mar gyur pa'i dri ba ni bcu gsum pa'o//ji skad 'chad par 'gyur ba yi/ /sku gsung thugs kyi rdo rje rnams/ /gsungs pa'i sngags kyi bzlas brjod bya/ /zhes bya ba la sogs pa gsungs so/ /rnal 'byor pa zhes bya ba ni/ rdo rje bzlas pa'i sgom pa po rnams kyi'o//rlung rnams dang ni zhes bya ba ni srog gis bsdus pa'i rlung thim pa dang / 'char ba'i rim pas rlung gi grangs dang gnas kyi yul dri ba ni bcu bzhi pa'o/ /ji skad 'chad par 'gyur ba yi/ /rlung gi mtshan nyid ji bzhin du/ /lo tshigs kyi ni mtshan nyid ni/ /mdor bsdus nas ni bshad par bya//dpal thugs las ni gang gsal ba/ /zhes gsungs so/ /de bzhin du/ gzhan yang bshad par bya yis nyon/ /srog ni thim dang 'char ba yi/ /zhes gsungs so/ /'dis ni rlung gi de kho na nyid ni lhag mar gyur pa gsungs so/ /'khor lo rnam grangs ni ji tsam gang du gnas zhes bya ba ni/gzhan gyi grub pa'i mtha' las grags pa'i 'khor lo rnams kyi grangs kyi ngo bo de la mos pa'i sems can rnams ni bzhugs pa'i phyir gtso cher bshad pa'i phyir de'i yul la dri ba ni bco lnga pa'o/ /ji skad 'chad par 'gyur ba yi//'khor lo drug la bcu drug brten/ /lus la lha yi gzhal yas gang / /ji ltar gnas la rigs par sbyor/ /mdor bsdus nas ni bshad par bya/ /zhes gsungs so/ /rnal 'byor lus la rtsa gang lags/ /zhes bya ba ni/ sngon du gsungs pa'i rtsa rnams ji tsam zhes bya ba ni gtso bo'i 'khor lo la brten nas grangs ji tsam pa de'i phyir de'i yul la dri ba bcu drug pa'o//ji ltar 'chad par 'gyur ba yi/ /rnal 'byor lus la bde chen po'i/ /'khor lo'i rtsa ni sum cu gnyis/ /byang chub sems ni gsal 'bab pa'i/ /rtsa rnams yang dag bshad par bya//zhes bya ba la sogs pa'o/ /rnam pa sna tshogs sogs skad cig /ces bya ba ni/ ji ltar rnam pa sna tshogs dang / rnam par smin pa dang / rnam par nyed pa dang / mtshan nyid dang bral ba'i skad cig ma rnams kyi rnam par dbye ba byang chub sems 'bab pa rnal 'byor pa'i lus la gnas pa/de rnams kyi nyams su myong ba bskyed pa'i rim pa gsal ba'i phyir de'i rjes la rnam pa sna tshogs pa la sogs pa'i dri ba ni bcu bdun pa'o/ /ji skad 'chad par 'gyur ba yi/ /rnam pa sna tshogs rnam par smin/ /rnam par nyed dang mtshan nyid bral//zhes bya ba la sogs pa'o/ /dga' ba dang zhes bya ba dang / dga' ba bzhi la sogs pa rnam pa sna tshogs pa la sogs pa'i skad cig ma rnams nyams su myong ba sngon du 'gro bas de rnams nyams su myong ba'i phyir/ de'i rjes la dga' ba la sogs pa'i rnam par dbye ba'i yul la dri ba ni bco brgyad pa'o//ji skad 'chad par 'gyur ba las/ /dga' ba bde ba dang po ste/ /mchog tu dga' ba gnyis pa dang / /dga' bral zhes bya gsum pa dang / /bzhi pa lhan cig skyes par bshad/ /ces bya ba la sogs pa'o/ /rdzas dang ni/ sngags dang rlung dang thig le zhes bya ba ni/dri ba bcu pa'i rlung gi de kho na nyid ces bya ba la rnal 'byor ma'i rgyud kyi rjes su 'brangs nas rnam par dbye ba bya ba'i phyir/ de'i lhag mar gyur pa thig le gsum bsgom pa'i yul la dri ba ni bcu dgu pa'o/ /ji skad 'chad par 'gyur ba las/ /rtsa rnams kun du 'bab pa dang / / byang chub sems ni brten byas pa/ /rdo rje'i rtse dang pad+ma'i rtser/ /rlung ni gzung bar bya ba ste/ /rkan la rtogs pa'i sbyor ba dang / /k+Sh+mIM sngags kyi ni sbyor ba yis/ /rnal 'byor mchog ni thob par byed/ /bde ba kun gyi gzhi yi mchog /ces bya ba la sogs pa'o/ /yi ge gsum gyi ming ci zhe na/rnal 'byor ma yi rgyud kyi rjes su 'brangs nas/ sngags kyi de kho na nyid kyi bdag nyid can gyi yi ge gsum gyi ngo bo'i ming la ci zhes bya ba de'i yul la dri ba ni nyi shu pa'o/ /ji skad 'chad par 'gyur ba las/ /yi ge gsum ni sku gsung thugs/ /snying po phye ba khyod nyon cig /de ni rnam par phye ste nyon//oM ni sku yi rdo rje yi/ /snying po nyid du yang dag bshad/ /a yi yi ge o yig dang / /ma yi yi ge zhes bya gsum/ /zhes bya ba la sogs pa gsungs so/ /de nyid gsum zhes bya ba ni/ de nyid gsum ji lta bu zhe na zhes bya bas de nyid gsum gyi yul dri ba ni nyi shu rtsa gcig pa'o//de rnams kyang bdag dang ye shes dang sngags kyi de kho na nyid rnams so/ /ji skad 'chad par 'gyur ba las/ /bdag gi de nyid rnal 'byor mchog /rdo rje sems dpa' nyid kyi rgyud/ /ces bya ba la sogs pa gsungs so/ /de bzhin sna yi rtse mo gsum/ /zhes bya ba ni/ rlung gi de kho na nyid sngar mdor bstan pa'i rten du gyur pa rdzas dang sngags dang 'od zer gyi theg le'i rten du gyur pa'i sngon du bcu pa gsungs pa'i lhag ma dri ba ni nyi shu rtsa gnyis so/ /ji skad du 'chad par 'gyur ba las/ /gsang ba snying ga gdong sna'i ming / /gsum pa'i rgyud las gsal ba ni//'khor lo gsum gyi dbye ba ni/ /rnal 'byor pa yis bsgom pa'i rim/ /zhes bya ba la sogs pa gsungs so/ /lus kyi stong nyid ye shes dang / /zhes bya ba ni/ rnal 'byor pa'i lus rtsa sna tshogs pa'i rten nyid kyi ye shes kyi rtsa dbus ma a ba d+hU tI ma byang chub kyi sems kyis rab tu gang ba'i bdag nyid can sna'i rtse mo gsum pa thig le rnam pa gsum bzung ba'i 'bras bur gyur pa ji lta bu yin zhes bya ba sna rtse gsum gyi lhag mar gyur pa dri ba nyi shu rtsa gsum pa'o//ji skad 'chad par 'gyur ba las/ /chos rnams thams cad snang ba med/ / mtshan nyid stong pa nyid du 'dod/ /ces bya ba dang / de bzhin du/ gang phyir a ba d+hU tIr zhugs/ /yang dag stong pa nyid du 'dod/ /ces bya ba dang / de bzhin du/ de la ye shes bde ba che/ /byang chub sems kyis gang ba nyid/ /ces bya ba la sogs pa gsungs so/ /lha rnams kyang ji ltar gnas zhes bya ba ni/rnal 'byor pa'i lus de nyid la lha rnams rdzogs pa'i rim pa'i rjes su 'brangs nas/ 'khor lo bzhi'i rang bzhin rtsa rnams kyi ngo bo thim pa dang / longs spyod pa dang bdag po sngon du gsungs pa'i bcu drug par/ rnal 'byor lus la rtsa rnams gang / / zhes bya ba la sogs pa'i lhag mar gyur pa dri ba ni nyi shu rtsa bzhi pa'o/ /ji skad 'chad par 'gyur ba las/ /chos dang longs spyod rdzogs pa dang / /bde ba chen po yang dag brten/ /'khor lo gzhan yang gang bshad pa/ /rim pa ji bzhin ma lus pa/ /de la rtag tu yang dag bzhugs/ / thim dang longs spyod bdag po ni/ /lha nyid mchog tu gnyis su med/ /yang dag ngo bo go 'phang brten/ /zhes gsungs so/ /de rnams kyi ming gang zhe na/ de'i phyir de rnams kyi ming ni gang zhes gsungs te/ de rnams ni lha ste ming ni ming du gyur pa'o/ /gang zhes bya ba ni sngon gyi le'u'i lhag mar gyur pa dri ba nyi shu rtsa lnga pa'o//ji skad du 'chad par 'gyur ba las/ de nas gzhan yang lha mo yi/ /de rnams kun gyi ming bshad bya/ /'khor lo bzhi yi dbye ba yis/ /rtsa yi rnam pa'i grangs kyis kyang / /las dang rdo rje de bzhin pad/ /'khor lo rnams kyi dbye ba yis/ / rigs bzhi yi ni dbye ba dang / /rtsa yi rim pas yang dag bzhugs/ /zhes gsungs so/ /gang du 'char ba dang ni nub/ /ces bya ba ni/ rtsa'i rang bzhin gyi lha de rnams kyi 'char ba ni rab tu sad pa'o/ /nub pa ni nang du thim pa'o/ /de dag ji ltar zhes sngon gyi dri ba'i lhag mar gyur pa ni dri ba nyi shu rtsa drug pa'o//ji skad du 'chad par 'gyur ba las/ /de nas gzhan yang rab bshad bya/ /'char dang nub pa'i mtshan nyid ni/ /rtsa rnams kyi ni rnal 'byor mchog /dngos grub thams cad kyi ni gnas/ /mdun na gnas pa'i yul rnams la/ /yid la byed pa der ni 'gro//dbus ni nang du 'dus pa yin/ /de tshe dbang po rab rgyas 'gyur/ /de yis de rnams rab bskul bas/ /de rnams rtsa la rim bzhin gnas/ /de yis rab tu sad byas nas/ /lha mo rang rang 'khor lo la/ /zhes bya ba la sogs pa gsungs so/ /ji ltar mgon pos dga' ba rnams//skye ba'i rim pa gsal bar gsungs/ /zhes bya ba ni/ sngon du bstan pa'i dri ba bco brgyad pa'i las dga' ba rnam par 'byed pa'i mtshan nyid can gyi lhag mar gyur pa rgyud gzhan du yang dag par bsgrags pa de'i yul la dri ba nyi shu rtsa bdun pa'o/ / ji ltar 'chad par 'gyur ba las/ /de nas gzhan yang bshad kyis nyon/ /dga' ba bskyed pa'i mtshan nyid ni/ /gang gis yang dag shes pa ni/ /rdo rje sems dpa'i go 'phang mchog /'khor lo drug gi rtsa dbu ma/ /rgyas dang slar yang bsdus pa ni/ /'khor lo bzhi dang yang dag sbyor//rtsa rnams brgyad dang nyi shu lhag /mtshams kyi cha ni rim pa yang / /rtsa ni bcu drug la yang brten/ /zhes gsungs so/ /sngar bshad rtsa rnams rtag tu ni/ /rdo rje'i lus la ji ltar rgyu/ /zhes bya ba ni/ rtsa stong phrag bdun cu rtsa gnyis gtso bor gyur pa'i rtsa de rnams na khams kyi rang bzhin ji lta bu 'bab ces de'i yul la dri ba nyi shu rtsa brgyad pa'o//ji skad du 'chad par 'gyur ba las/ /de nas gzhan yang bshad kyis nyon/ /rdo rje bstan pa'i lus kyis ni/ /rtag tu rtsa rnams kyi ni rgyun/ /nges par de nyid bshad kyis nyon/ /stong phrag nyi shu rtsa bzhi ni/ /rtsa ni rtag tu rmad byung ba//byang chub sems ni 'bab par shes/ /bde ba thams cad rab tu 'phel/ /zhes bya ba la sogs pa gsungs so/ /mtshams kyi rtsa gsum de dag ni/ /gtso bo nyid du ji ltar 'gyur/ /zhes bya ba ni rtsa stong phrag bdun cu rtsa gnyis po de rnams kyi dbus su mtshams kyi rtsa gsum rtsa ba'i rgyud chen por rgyu mtshan gang gis bstan zhes de'i yul la dri ba nyi shu dgu pa'o//ji skad 'chad par 'gyur ba las/ /de nas gzhan yang bshad kyis nyon/ /mtshams kyi rtsa ni gtso bo nyid/ /rtsa rnams sdom dang 'char ba dang / /gang gis shes nas rtag tu ni/ /zhes bya ba la sogs pa gsungs so//rlung rnams ji ltar ldang ba dang / /gtso bo de rnams ji ltar thim/ /zhes bya ba ni/ sngon du bstan pa'i dri ba bcu pa'i lan rgyas par bshad par gyur pa bskyed pa'i ngo bo 'khor bar 'khor ba'i gnas skabs su rlung rnams ji ltar thim pas ni 'jig par ji ltar 'gyur zhes de'i yul la dri ba ni sum cu pa dang sum cu rtsa gcig pa'o//ji skad du 'chad par 'gyur ba la/ /bag chags nyon mongs can gyi yid/ /rlung gi ngo bos gzugs gzhan byed/ /don ni nges par yod mi shes/ /rlung tsam gcig tu rmongs pa yis/ /zhes bya ba la sogs pa gsungs so/ /de ni mkha' 'gro mar bsdus pa//gtso bo ji ltar yang dag thob/ /ces bya ba ni/ rtsa de rnams kyi bsdu ba'i mkha' 'gro ma zhes bya ba ni rtsa'i ngo bo la dmigs pa/ sdud par byed pa ji ltar thob par bya thabs gang gis rtogs par bya zhes de'i yul la dri ba ni sum cu rtsa gnyis pa'o/ /ji skad du 'chad par 'gyur ba las//de nas gzhan yang bshad kyis nyon/ /ye shes chen po mchog chen po/ /zhes bya ba la sogs pa gsungs pa'o/ /rnam rtog rlung ni rnam 'byed pa/ /zhes bya ba ni/ ji ltar thob par 'gyur zhes bya ba ni lhag ma'o/ /rnam par rtog pa'i rlung rnams kyi grangs ni brgya rtsa brgyad kyi grangs can rnam par 'byed pa'i ngo bo sngon du gsungs pa'i bcu gsum pa'i lhag ma dri ba nyi shu rtsa gsum pa'o//gang gi phyir bskyed pa'i rim pa sgom pa sngon du 'gro bas rdo rje bzlas pa'i ngo bo bdun du bstan par bya ste/ de nas gzhan yang bshad kyis nyon/ /rnam rtog rlung ni rnam gcod pa/ /nyin dang mtshan du nges par ni//brgya dang brgyad kyis lhag par 'gyur/ /zhes bya ba la sogs pa gsungs so/ /ma ning gi bzlas pa'i gnas skabs kyi cho ga can no/ /de yang ngag gi rnam par rtog pa 'joms par byed pa'i phyir rnam par rtog pa 'char ba'o/ /rdo rje bzlas pa'i lhag mar gyur pa'i dri ba sum cu rtsa bzhi pa'o//ji skad du 'chad par 'gyur ba las/ /de nas gzhan yang bshad kyis nyon/ /rnam rtog med pa'i rlung shar ba/ /gang shes rdo rje sems dpa' ni/ /rang ngos go 'phang bzang po thob/ /rtog pa med pa'i rlung chen mo/ /gnyis pa thams cad rnam par spangs/ / dngos po kun gyi rang bzhin bdag /bsgom dang sgom pa min par bral/ /zhes bya ba la sogs pa gsungs so/ /rtsa rnams ji ltar nub pa dang / /zhes bya ba ni 'khor lo bzhi'am 'khor lo drug la gnas pa'i rtsa rnams ji ltar mi nub par 'gyur zhes nyi shu rtsa drug pa'i lhag mar 'gyur ba'i dri ba'i yul la dri ba ni sum cu rtsa lnga pa'o//ji skad du 'chad par 'gyur ba las/ /de nas bcom ldan rdo rjes gsungs/ /rtsa rnams nub pa'i rnal 'byor ni/ /de kho na nyid bshad kyis nyon/ /yul dang dbang po yang dag sbyor/ /zhes bya ba la sogs pa nas brtsams nas ji srid du/ yul rnams dngos po med pa yis//yang dag ye shes de nyid phyir/ /de ni de la longs spyod phyir/ /dngos su yul rnams dngos med phyir/ /dbang po rnams ni skye ba min/ /zhes gsungs so/ /sbyor ba drug gis ji ltar rtsom/ /zhes bya ba ni/ sngon du bstan pa'i dri bar co lnga pa las/ /gang zhig 'khor lo rnams kyi grangs//zhes bya ba ni lhag mar gyur pa sbyor ba drug gis sgom pa ji ltar rtsom zhes de'i yul la dri ba ni sum cu rtsa drug pa'o/ /ji skad du 'chad par 'gyur ba las/ /de nas gzhan yang bshad kyis nyon/ /sbyor drug go 'phang mtshan nyid ni/ /ji lta ji lta ba bzhin sbyor/ /ji ltar grangs kyi dbye ba yis//rnam pa drug po de las phyed/ /de bzhin brgyad brgyad de nas brgyad/ /brgyad gnyis brgya phrag bzhi dang ni/ /de ltar grangs kyi sbyor ba gsal/ /zhes bya ba la sogs pa gsungs so/ /dus kyi mtshan nyid ji lta bu/ /zhes bya ba ni/ bstan ma thag pa'i 'khor lo drug gi rim pas dus gsum mtshon par bya'o zhes de'i don du dus kyi mtshan nyid kyi yul la dri ba ni sum cu rtsa bdun pa'o//ji skad du 'chad par 'gyur ba las/ de nas bcom ldan rdo rjes gsungs/ /dus kyi mtshan nyid sdom pa ni/ /rnal 'byor gang gis rnam par shes/ /grangs kyi rnal 'byor bla na med//dus kyi dus tshod zhes su bshad/ /bsam dang bsam min ngo bo ni/ /bzang po'i dus dang ngan pa'i dus/ /rnam pa gnyis ni yang dag gnas/ /zhes bya ba la sogs pa gsungs so/ /gsang ba'i yang ni 'bras bu che/ /zhes bya ba ni/ bsam gyis mi khyab pa'i dus nyams su myong ba'i rjes la gsang ba'i don dang 'bras bu ji lta bu zhes de'i yul la dri ba ni sum cu rtsa brgyad pa'o//ji skad du 'chad par 'gyur ba las/ /de nas gzhan yang bshad par bya/ /gsang ba'i 'bras bu mchog nyid nyon/ /gang gis dngos grub mchog tu 'gro/ / phyag rgya chen po yang dag bsten/ /gsang ba'i sbas pa zhes ni bshad/ /rnal 'byor byis pas mi shes shing / /bzhi pa'i dbang zhes bya ba'i ming / /zhal nas zhal du brgyud rim gnas/ /mchog tu zhi ba'i ye shes che/ /kun du rtog pa thams cad spangs/ /zhes bya ba la sogs pa gsungs so//chos kyi dbyings dang zhes bya ba ni/ ji lta bu zhes bya ba'i lhag ma'o/ /gsang ba'i 'bras bu ni ming gi rnam grangs la de'i yul la dri ba sum cu rtsa dgu pa'o/ /ji skad du 'chad par 'gyur ba las/ /de nas bcom ldan rdo rjes gsungs/ /chos kyi dbyings ni go 'phang mchog /chos kun dbus na khyab pa'i mchog /chos kyi dbyings zhes de la brjod/ /kun khyab mchog tu phra ba dang / /thams cad du ni kun nas 'char/ /zhes bya ba la sogs pa gsungs so/ /de yang gtso bo dang gtso bo ma yin pa'i dbye ba rnam pa gnyis te/ de'i yul la dri ba ni bzhi bcu pa'o//rdo rje yang zhes bya ba ni de'i gnas skabs nyid kyi phyir ro/ /de yang gtso bo dang gtso bo ma yin pa'i dbye bas sngon bzhin no/ /ji skad du 'chad par 'gyur ba las/ /de nas bcom ldan rdo rje gsungs/ /rdo rje yi ni mtshan nyid mchog /de nas rnam par phye ba nyon/ /ji lta ba bzhin bshad par bya//rdo rje mi phyed ces ni gsungs/ /ye shes lnga yi bdag nyid mchog /ces bya ba la sogs pa gsungs so/ /gzhung 'di tsam gyis rnal 'byor ma'i rgyud kyi rjes nas bshad pa'i yul la dri ba'i tshogs gsungs so/ /da ni rnal 'byor chen po'i rgyud gcig pu'i bshad pa'i dbye ba dri ba'i rim pa la 'jug pa'i phyir/rigs kyi dbye ba ji lta bu zhe na/ rigs ni rgyun no/ /de rnam pa du zhes grangs kyi yul la dri ba ni bzhi bcu rtsa gcig pa'o/ /ji skad du 'chad par 'gyur ba las/ de nas bcom ldan rdo rjes gsungs/ /rigs kyi dbye ba'i don bsdus pa/ /de tshe rigs ni rnam pa lnga//rtsa ba'i rgyud ni gsal bar gsungs/ /spro ba'i sbyor ba'i dbye ba yis/ /rnal 'byor chen po'i dam tshig go/ /rgyud du grangs kyi dbye ba ni/ /gang dag de nyid gsal bar gsungs/ /zhes bya ba la sogs pa gsungs so/ /phyag rgya'i dbye ba ji tsam zhig /ces bya ba ni/thabs kyis rab tu dbye ba ni bstan zin to/ /rigs dpag tu med pa'i dbye ba dang / rigs brgya'i dbye ba dang / rigs lnga'i dbye ba ji tsam zhig ces de'i yul la dri ba gtso bo dang / gtso bo ma yin pa'i dbye bas bzhi bcu rtsa gnyis pa'o/ /ji skad du 'chad par 'gyur ba las/ /de nas bcom ldan rdo rjes gsungs//phyag rgya'i dbye ba bla na med/ /las dang chos dang dam tshig dang / /phyag rgya chen po zhes su grags/ /las rnams nges pa'i rnam smin gyis/ /'bras bu rgyas btab lta bur gnas/ /zhes bya ba la sogs pa gsungs so/ /phung po la sogs skye mched ci/ /zhes bya ba ni/ phung po dang khams dang skye mched rnams ji lta bu zhes sngar bstan pa'i rigs kyi dbye ba'i lhag mar gyur pa'i dri ba bzhi bcu rtsa gsum pa'o//ji skad du 'chad par 'gyur ba las/ de nas gzhan yang yang dag bshad/ /phung sogs skye mched mtshan nyid ni/ /dzi na dzika ni gzugs zhes bshad/ /badzra d+h+rika ni rnam shes dang //rat+na d+h+rika ni tshor bar gsungs/ /A ro lika ni 'du shes grags/ /pradz+nyA d+h+rika ni 'du byed dang / /de ltar phung por rab tu grags/ /zhes gsungs so/ /phyag rgya chen po'i ming ni ci zhig bya ba ni/ phyag rgya'i dbye ba ji tsam zhig /ces dri ba phyogs gcig pa la bzhi bcu rtsa gnyis pa'i lhag mar gyur pa phyag rgya chen po'i yul la dri ba bzhi bcu rtsa bzhi pa'o//ji skad du 'chad par 'gyur ba las/ /de nas gzhan yang bshad bya ba/ /phyag rgya chen po'i don mtshan nyid/ /rnal 'byor chen po'i 'bras bu ni/ /ye shes chen po'i don bsdus pa/ /zhes gsungs so/ /ro rnams kyi ni dbye ba dang / /zhes bya ba ni/phyag rgya chen po la 'jug pa'i dus su/ 'dar dang rdul dang ba spu langs/ /dbyangs kyi dbye ba sprug pa dang / /lugs bsgyur mchi ma thim pa dang / /snying stobs nyams ni brgyad po rnams/ /zhes gsungs so/ /de lta bur gyur pa'i sgeg pa'i nyams kyi dbye ba rnams ji lta bu zhes de'i yul la dri ba bzhi bcu rtsa lnga pa'o//ji skad 'chad par 'gyur ba las/ /de nas bcom ldan rdo rjes gsungs/ /nyams kyi mtshan nyid dbye ba ni/ /zhes bya ba nas brtsams te/ ji srid/ dga' ba rgyags pa rtsa yi cha/ /khong stong 'dar ba skye bar byed/ /ces bya ba'i bar gyis so/ / bdag gi sgra ni gang na gnas/ /zhes bya ba ni/ sngar bshad pa'i phyag rgya chen po'i mtshan nyid kyi yul la dri ba bzhi bcu rtsa bzhi pa'i lhag mar gyur pa a haM gi ngo bo de'i rnam par dag pa sgra gang na gnas zhes de'i yul la dri ba bzhi bcu rtsa drug pa'o/ /ji skad 'chad par 'gyur ba las/ /de nas bcom ldan rdo rjes gsungs//bdag ces bya ba sgra yi rten/ /gang gis yang dag shes pa yis/ /'khor ba'i 'ching bar mtshan nyid do/ /a haM 'khor par 'ching ba yi/ /de ni yongs zad grol ba yin/ /a ni dngos po kun gyi mchog /lus rnams kun la lhag par gnas/ /zhes gsungs pa dang /haM yig dngos po dang bral ba/ /lus gnas lus las ma skyes pa'o/ /dbang po las 'das mi gsal ba/ /rnam pa thams cad rnam par spangs/ /zhes bya ba la sogs pa gsungs so/ /stong nyid dbye ba bsdus pa dang / /zhes bya ba ni/ bshad ma thag pa'i phyag rgya chen po'i dri ba bzhi bcu rtsa bzhi pa'i lhag mar gyur pa/stong nyid dbye ba bsdus pa dri ba'i yul bzhi bcu rtsa bdun pa'o/ /ji skad 'chad par 'gyur ba las/ /de nas bcom ldan rdo rjes gsungs/ /stong nyid dbye ba bsdus pa ni/ /rnal 'byor pa ni gang gis shes/ /stong nyid de ni shes par 'gyur/ /mi mthun pa dang gnyen po'i phyir//stong nyid bsgom par yongs su gsungs/ /nang gi bdag nyid chos rnams ni/ /kun du rtog pa'i gnyen po dang / /phyin ci log gi rnam dag pa/ /phyi nang stong pa nyid du bshad/ /ces gsungs so/ /stong pa nyid ni gang du skye/ /zhes bya ba ni/ bshad ma thag pa'i dri ba'i lhag mar gyur pa dri ba 'di ni bzhi bcu rtsa brgyad pa'o//de yang bskyed pa'i rim pas zhal dang phyag dang dbyibs bsgom pa'i bdag nyid can no/ /ji skad du 'chad par 'gyur ba las/ de nas bcom ldan rdo rjes gsungs/ /stong pa nyid ni skye ba'i rgyu/ /zhes bya ba nas brtsams nas/ /rdo rje phreng ba de ltar bshad//srog gi rten gyi mtshan nyid do/ /sku mdog sngon po zhal gsum pa/ /spyan gsum pa la phyag rgya mchog /ces bya ba'i bar du gsungs so/ /nyin mo dang ni mtshan mo gang / /zhes bya ba ni/ de lta bu'i rnam pas rdo rje phreng ba bsgom pa la thun mtshams bzhi la 'os pa nyid kyi phyir de'i don du nyin mo dang mtshan mo'i yul la dri ba bzhi bcu rtsa dgu pa'o//ji skad du 'chad par 'gyur ba las/ de nas bcom ldan rdo rjes gsungs/ /mtshan mo nyin mo'i mtshan nyid ni/ /mtshan mo shes rab shes par bya/ /'byung ba thams cad thim nas 'gro/ /zhes bya ba nas brtsams nas/ji srid/ nyin mo slar yang thabs su bshad/ /thabs ni nyin mor gyur pa dang / /zhes bya ba'i bar du gsungs so/ /A li kA li'i brda dang ni/ /zhes bya ba ni/ sngon du gsungs pa'i stong pa nyid/ /gang du skye ba 'gyur zhes de lta bu'i rnam pas dri ba bzhi bcu rtsa brgyad pa'i lhag mar gyur pa/A li kA li'i brda ni gang / /zhes de'i yul la dri ba lnga bcu pa'o/ /ji skad du 'chad par 'gyur ba las/ de nas bcom ldan rdo rjes gsungs/ /A li kA li'i dam tshig ni/ /rgyud rnams kun du'ang gsungs pa yi/ /rgyal sras rnams la dgongs pa ni/ /'od gsal go 'phang las skyes pa//snang ba mched pa'i mtshan nyid ni/ /gsal byed sum cu rtsa gsum ldan/ /A li'i dkyil 'khor rgyas pa yi/ /snang ba mched pa'i go 'phang ni/ /snang ba las byung zad pa med/ /dbyangs ni drug cu dang ldan pa/ /A li'i 'khor lo rgyas pa yi/ /zhes gsungs so//mtshams kyi 'char ba ji lta bu/ /zhes bya ba ni/ mtshams ni/ snang ba nye bar thob pa yis/ /ngo bor shar ba ji lta bu/ /zhes de'i yul la dri ba lnga bcu rtsa gcig pa'o/ /ji skad du 'chad par 'gyur ba las/ de nas gzhan yang bshad kyis nyon/ /mtshams kyi mtshan nyid bla na med/ /snang dang mi snang bral ba'i mtshams//ye shes rdo rje las byung ba/ /gnyis 'dres pa yi dbus na gnas/ /'phags shing gos pa rnam par spangs/ /rdo rje pad+ma 'chi med skyes/ /zla ba nyi ma yang dag 'dres/ /mtha' ni yang dag mi 'gro gang / /mtshams de srid pa dag par byed//ces bya ba'i bar gyi gzhung gis rnal 'byor chen po'i rgyud gcig pu gtsor byas pa'i don gyi dbye ba bshad pa dri ba'i tshogs gsungs/ da ni gtso bo ma yin par gyur pa'i dri ba'i tshogs brjod par bya ste/ sngon du bsnyen sogs slob dpon dang / /cho ga nyi shu las dang ni/ /zhes bya ba'i rang gi ngo bo ji lta bu zhes bya ba'i lhag ma'o//dpal gsang ba 'dus pa'i rdul tshon gyi dkyil 'khor ston par byed pa'i cho ga nyi shu las bcas pa'i phrin las kyi yul la dri ba lnga bcu rtsa gnyis pa'o/ /ji skad du 'chad par 'gyur ba las/ /de nas bcom ldan rdo rjes gsungs/ /rnam pa nyi shu'i ming can no//slob dpon las su yongs su bshad/ /sngags kyi rnal 'byor legs rgyas pa/ /sngon du bsnyen pas sbyang ba dang / /de nas 'byung po bskrad pa dang / /sa bzung nyid dang sbyangs pa dang / /thig skud lhag par gnas pa dang / /bgegs bskrad shin tu gsal ba dang / /de bzhin dkyil 'khor thig gdab dang //phur bu gdab dang brdung ba dang / /bum pa byin gyis brlab pa dang / /bcom ldan 'das kyi lhag gnas dang / /khrus dang rab tu sbyangs pa dang / /mchod pa rab gnas gtor ma dang / /slob ma lhag par gnas pa dang / /me la sbyin sreg cho ga bzhin/ /dbang bskur ba dang gshegs su gsol//de ltar cho ga nyi shu las/ /gang gis de shes 'gro ba'i bla/ /zhes bya ba la sogs pa gsungs so/ /rgyu mtshan ci zhig 'bras bu'ang ci/ /zhes bya ba ni/ cho ga nyi shu las bshad pa la rgyu mtshan ni gang dang 'bras bu ni gang zhes de'i yul la dri ba lnga bcu rtsa gsum pa'o/ /ji skad du 'chad par 'gyur ba las/de nas gzhan yang bshad kyis nyon/ /de yi rgyu mtshan 'bras bu ni/ /las ni cho ga nyi shu bshad/ /dbang phyug chen po'i rgyu mtshan ci/ /de yi 'bras bu ci zhig 'gyur/ /'di ni chen po'i chen pos gsungs/ /de nas bcom ldan rdo rjes gsungs/ /las kyi rgyu mtshan 'bras bu dang //sngon du bsnyen pa la sogs pa/ /rgyu mtshan 'jig rten dngos grub brgyad/ /ser sna la sogs bsal ba'i phyir/ /sangs rgyas mchod pa rnam bsgom nyid/ /ces bya ba la sogs pa dang / de bzhin du/ dkyil 'khor sa bon phra rab dang / /de bzhin gshegs pa thams cad mnyam/ /mchod pa nyid du 'gyur ba dang //de ltar 'bras bu 'khor lo 'jug /sangs rgyas thams cad rtag mchod na/ /las kyi sgrib pa dag par 'gyur/ /zhes gsungs so/ /mchod pa'i cho ga ji ltar gsungs/ /zhes bya ba ni/ rdzogs pa'i rim pa'i ting nge 'dzin la gnas pa'i lhag ma'o/ /cho ga nyi shu po 'di nyid kyi las kyi lhag mar gyur pa'i dri ba lnga bcu rtsa bzhi pa'o//ji skad du 'chad par 'gyur ba las/ /de nas rdo rje sems dpas gsungs/ /mchod pa'i cho ga bla na med/ /gnyis med mnyam pa'i rnal 'byor gyis/ /lus la mchod pa'i cho ga'i rim/ /rdo shing sa dang gser gyi ni/ /sku gzugs la ni phyag mi bya//rab gnas dkyil 'khor sbyin sreg dang / /de ni nam yang mi bya ste/ /rin chen rdo chu dkon mchog sogs/ /bdag nyid lnga ni rtag tu mchod/ /ces bya ba la sogs pa dang / /de bzhin du/ de ltar de dag rnam shes bya/ /rtsa rnams la yang mchod par bya/ /zhes bya ba la sogs pa gsungs so//de bzhin lha yi rang bzhin dang / /lha mo'i ming ni ji ltar gsungs/ /zhes bya ba ni/ sngon du gsungs pa'i dkyil 'khor gyi 'khor lor gnas pa'i lha mo ji lta bu zhes de'i yul la dri ba lnga bcu rtsa lnga pa'o/ /ji skad du 'chad par 'gyur ba las/ /de nas bcom ldan rdo rjes gsungs//lha rnams kyi ni mtshan nyid mchog /rnal 'byor bde ba rtogs pa rnams/ /rtsa yi dbye ba'i rang bzhin gyis/ /rtag tu lus la rtsed 'jo bya/ /de yis lha rnams su ni bshad/ /rtag tu bde ba kun gyi dga'/ /kun nas rnam par sgeg pa'i lus/ /bde ba chen po yi ni bzhi/ /lha nyid du ni yang dag brjod//ces bya ba la sogs pa gsungs te/ 'dis ni rnal 'byor chen po'i rgyud kyi rjes su 'brangs nas/ gtso bo ma yin pa'i don du bshad pa'i yul gyi dri ba'i tshogs gsungs nas/ da ni slar yang gtso bo dang gtso bo ma yin pa'i dbye bas rgyud du thog mar gsungs pa'i/ 'di skad bdag sogs ji lta bu//zhes bya ba la sogs pa gsungs te/ dpal gsang ba 'dus pa la sogs par bstan pa'i don rgyas par zhes bya ba ni de'i yul la dri ba lnga bcu rtsa drug pa'o/ /ji skad du 'chad par 'gyur ba las/ de nas bcom ldan rdo rjes gsungs/ /e baM zhes bya'i yi ge gnyis//e ni stong pa nyid du gsungs/ /de bzhin baM ni thugs rje dang / /thig le gnyis ni sbyor las byung / /e baM gnyis ni sangs rgyas rnams/ /mdor bsdus chos kyi phyag rgya ni/ /rgyal po chen po'i phyag rgya nyid/ /ces bya ba la sogs pa gsungs so/ /'di skad ces sogs dang po'i ngag /don rgyas par ni ji ltar 'gyur/ /zhes bya ba ni yi ge re re'i bshad pa'i dbye bas sbas pa'i don gyi yul la dri ba lnga bcu rtsa bdun pa'o/ /ji skad du 'chad par 'gyur ba las/ de nas gzhan yang bshad kyis nyon/ /e baM la sogs don rgyas pa/ /gong gi yang dag yongs shes pa//chos kyi de nyid yang dag rtogs/ /e ni shes rab dam pa ste/ /zhes bya ba la sogs pa gsungs so/ /nang gi bdag nyid sbyin sreg ci/ /zhes bya ba/ cho ga nyi shu pa'i las kyi skabs su sbyin sreg gsungs pa yang spyi'i sbyin sreg gi mtshan nyid dang bral ba'i nang gi bdag nyid kyi sbyin sreg ji lta bar 'gyur zhes de'i yul la dri ba lnga bcu rtsa brgyad pa'o//ji skad du 'chad par 'gyur ba las/ de nas gzhan yang bshad kyis nyon/ /nang gi bdag nyid sbyin sreg mchog /nang du rgyu ba'i 'byung ba rnams/ /gang gis tshim par gyur pa dang / /rnam rtog bag chags sa bon rnams//phung po lnga yi bud shing dang / /rnal 'byor ye shes chen po'i mes/ /rtag tu sbyin sreg rmad byung ba/ /zhes bya ba la sogs pa gsungs so/ /bdud rtsi lnga ni bza' ba dang / /zhes bya bas ni/ nang gi bdag nyid can gyi sbyin sreg bstan nas/ khyad par du 'phags pa'i dam tshig bstan pa'i phyir de'i rjes su de'i yul la dri ba lnga bcu rtsa dgu pa'o//ji skad du 'chad par 'gyur ba las/ de nas bcom ldan rdo rjes gsungs/ /bdud rtsi lnga yi bza' ba ni/ /dngos grub kun byed de nyid mchog /ji ltar rigs pa'i rim pa bzhin/ /rnam par snang mdzad mi bskyod pa/ /don yod grub pa 'od dpag med//rin chen rgyal mtshan lnga pa 'di/ /bdud rtsi lnga sgrub par 'gyur ba la tshogs kyi 'khor lo la sogs pa bya'o zhes de'i rjes su tshogs kyi 'khor lo'i yul la dri ba drug cu pa'o/ /ji skad du 'chad par 'gyur ba las/ de nas gzhan yang bshad kyis nyon/ / tshogs kyi 'khor lo'i cho ga mchog /gang gis mchod pa dngos grub ni/ /rgyal sras rnams ni gzhan du 'gro/ /rnal 'byor pa dang lhan cig tu/ /sgrub pa po phyir yang dag gnas/ /phyag rgya brda ni yongs shes shing / /de dang dam tshig la ni 'jug /ces bya ba la sogs pa dang / de bzhin du/rnal 'byor ma dang lhan cig 'dres/ /rab tu bshad kyis de nyon cig /gdug pa'i mkha' 'gro ma 'ga' zhig /sems rtog pa yi phyir 'ongs nas/ /de la de tshe smras pa yang / /sgrub pa pos ni mi bya zhing / /zhes gsungs so/ /de bzhin gsang ba'i brda dang ni/ /zhes bya ba ni/ ngag gi brda'i ngo bo gsang ba'i brda de'i yul la dri ba drug cu rtsa gcig pa'o//ji skad du 'chad par 'gyur ba las/ /de nas gzhan yang bshad kyis nyon/ /gsang ba'i tshig gi bshad pa ni/ /zhes bya ba nas brtsams te/ ji srid du/ rab tu rtog nas chang 'thungs pas/ /dpa' bo shar ni mngon par brjod/ / na lin pa tra~M thod pa dang / /zhes bya ba la sogs pa gsungs so/ /sku gsung thugs kyi rdo rje yi/ /dkyil 'khor rnams ni ji ltar gsungs/ /zhes bya ba ni/ de'i yul la dri ba sngon du gsungs pa'i cho ga nyi shu'i bar du dkyil 'khor gyi las kyi lhag mar gyur pa drug cu rtsa gnyis pa'i dri ba'o/ /ji skad du 'chad par 'gyur ba las/de nas gzhan yang bshad kyis nyon/ /sku gsung thugs kyi dkyil 'khor ni/ /sku ni mgo bor gnas pa yi/ /sum cu rtsa gnyis byang sems 'bab/ /de ni so sor rab phye bas/ /sku yi 'khor lor shes par bya/ /yi ge phyi mo'i dbye ba yis/ /gsung la gnas par rab tu shes//chags sogs bag chags dbye ba yis/ /thugs kyi 'khor lo nyid du bshad/ /ces bya ba la sogs pa gsungs so/ /sangs rgyas dam chos dge 'dun gyi/ /ming rnams bshad pa ji lta bu/ /zhes bya ba ni/ bshad ma thag pa'i sku la sogs pa'i dkyil 'khor gyi lhag mar gyur pa sangs rgyas la sogs pa dkon mchog gsum po'i nges pa'i tshig ji ltar 'gyur zhes de'i yul la dri ba drug cu rtsa gsum pa'o//ji skad du 'chad par 'gyur ba las/ de nas bcom ldan rdo rjes gsungs/ /sangs rgyas dam chos dge 'dun dang / /zhes bya ba nas bar gyi gzhung cung zad dor bas//dri med sems ni sangs rgyas 'gyur/ /chos ni gang du yang dag gsungs/ /sku ni dge 'dun zhes bya ste/ /byang chub sems dpa'i tshogs kyi gnas/ /zhes bya ba la sogs pa gsungs so/ /bla ma ston pa slob dpon dang / /rdo rje 'chang gi bshad pa ci/ /zhes bya ba ni/ sngon du gsungs pa'i dkon mchog gsum nye bar ston pa po ni bla ma ste zhes de'i yul la dri ba dang de bzhin du ston pa zhes bya ba ni slob ma la rjes su ston pa'o/ /de bzhin du slob dpon zhes bya ba ni dkyil 'khor la sogs pa'i spyod pa gzhan dag la slob par byed pas na slob dpon zhes bya'o/ /rdo rje 'chang gis zhes bya ba ni tshar gcad pa dang rjes su gzung bar nus pa'i phyir rim pa ji lta ba bzhin du bla ma dang ston pa dang slob dpon dang rdo rje 'chang gi yul la dri ba drug cu rtsa bzhi pa dang /rtsa lnga pa dang / rtsa drug pa dang / rtsa bdun pa rnams so/ /ji skad du 'chad par 'gyur ba las/ zhi ba la sogs pa la mkhas//sngags dang rnal 'byor cho ga shes/ /cho ga nyi shu'i bya ba bslab/ /de ni bla bar mngon par brjod/ /ces gsungs pa dang / de bzhin du/ nang du gsang 'dus la rab dga'/ /phyi rol nyan thos kyi spyod pa/ /de lta'i man ngag rim pa yis/ /slob ma rnams la rjes su bslabs/ / de ni ston par yongs su shes/ /ji skad smra ba de bzhin byed/ /rtogs pa rnams kyang dkyil 'khor sogs/ /don dam pa yi bya ba dang / /slar yang snang ba gsum dang ni/ /grub nas gzhan yang slob tu 'jug /rnal 'byor mchog gi spyod pa la/ /de ni slob dpon zhes bya'o/ /zhes gsungs pa dang /de bzhin du/ zab cing rgya cher yang dag ldan/ /rdo rje sems dpa' gnyis pa mchog /tshar gcod phan 'dogs pa la mkhas/ /de ni rdo rje 'chang du bshad/ /ces bya ba la sogs pa gsungs so/ /slob ma'i yon tan gang ldan na/ /rnal 'byor rgyud kyi snod du 'gyur/ /zhes bya ba ni/ ston pas bstan pa'i gnas skabs kyi gdon mi za bar slob mar yod par 'gyur gyi gzhan dbang nyid kyi phyir de'i yul la dri ba drug cu rtsa brgyad pa'o/ /rnal 'byor rgyud ces bya ba ni/ /dpal gsang ba 'dus pa la sogs pa rnams la'o/ /snod du 'gyur zhes bya ba'i don to/ /ji skad du 'chad par 'gyur ba las/dad cing bla ma la yang gus/ /rtag tu dge ba'i las la gnas/ /gnyis med rgyu yang med pa dang / /lta ba ngan pa rnam par spangs/ /lung ni mang du thos pa dang / /zhes bya ba la sogs pa dang / de bzhin du/ stong nyid snying rje dbyer med pa/ /gang la de ni nges bshad bya//gong na med pa'i spyod rab mchog /sngags dang rnal 'byor rim pa sogs/ /zhes bya ba nas brtsams te/ ji srid/ gang las rgyas bshad de ni rgyud/ /rnal 'byor chen po'i rgyud du dran/ /zhes bya ba la sogs pa'i le'u gcig gnyis kyis 'chad par 'gyur ba'o/ /de yi spyod pa dbye ba dang //zhes bya ba ni/ bla ma'i mdun du slob mas ji lta bu'i spyod pa bya zhes de'i yul la dri ba drug cu rtsa dgu pa'o/ /ji skad du 'chad par 'gyur ba las/ de nas bcom ldan rdo rjes gsungs/ /slob ma'i bya ba spyod pa ni/ /zhi ba la sogs bya ba yang / /sngags dang rnal 'byor rig pa yis//lham dang gdugs dang gtsug tor dang / /so rtsi la sogs myang ba dang / /snabs kyi gong du mchil ma sogs/ /'dor zhing rkang pa rkyong ba dang / /zhes bya ba nas brtsams te/ ji srid/ de la sogs pa'i skyon gyi tshig /bla ma'i mdun du spang bar bya/ /zhes bya ba la sogs pa'i bar du gsungs so//de yi 'bras bu ji lta bu/ /zhi ba rgyas pa dbang dang ni/ /de bzhin bsad dang bskrad pa dang / /rengs dang dbye ba nyid dang ni/ /bsgrub pa la ni mngon spyod dang / /ji ltar bsgrub par sbyor ba dang / /zhes bya ba ni/ slob mas spyod pa'i 'bras bu'i yul la dri ba bdun cu pa'o//ji skad du 'chad par 'gyur ba las/ de la sogs pa'i spyod shes nas/ /slob ma'i 'bras bu gang byung ba/ /zhi ba la sogs sbyor ba yis/ /da ni de ltar bshad par bya/ /zhes gsungs so/ /sngags kyi tshig ni ci zhig dang / /mgon po khro bo'i bzlas pa ci/ /zhes bya ba ni/ bshad ma thag pa'i zhi ba la sogs pa sgrub par byed pas sngags kyi tshig dang / de bzhin du gshin rje gshed la sogs pa'i khro bo bcu po rnams kyi bzlas pa ji lta bur 'gyur zhes de'i yul la dri ba bdun cu rtsa gcig pa'o/ /ji skad du 'chad par 'gyur ba las/ de nas gzhan yang bshad kyis nyon/ /khro bo'i bzlas pa'i mtshan nyid ni/ /gang zhig rnal 'byor dngos grub brgyad/ /thob 'gyur 'di la the tshom med/ /khro bo'i sems kyis bzlas pa ni/ /khro bo'i bzlas pa zhes byar brjod/ /ces bya ba la sogs pa dang / /de bzhin du/ na maHsa man+ta kA ya bA ka tsit+tA nAM zhes bya ba la sogs pa gsungs so//mngon shes lnga ni ji ltar thob/ /rnal 'byor rnams kyis de nyid mthong / /zhes bya ba ni/ sngon du gsungs pa'i 'bras bu nyid kyi rgyas par bshad pa dri ba mngon par shes pa lnga ji ltar thob ces de'i yul la dri ba dang / de kho na nyid mthong ba yongs su dri ba nyid kyi ngo bo rim pa ji lta ba bzhin du bdun cu rtsa gnyis pa dang /bdun cu rtsa gsum pa'o/ /ji skad du 'chad par 'gyur ba las/ de nas gzhan yang bshad bya ba/ /dngos grub thams cad bsdus pa ni/ /sangs rgyas rnams kyi ye shes mchog /mngon shes lnga sogs mtshan nyid ni//sa snying phyag na rdo rje dang / /'jam dpal sgrib pa rnam par sel/ /byams pa lnga po 'di dag kyang / /yi ge gsum dang rnam par spel/ /mig dang rna ba yid dang lus/ /rtsa yi 'khor lo byin gyis brlabs/ /mtshan gsum nyin mo de dang 'dra/ /mngon shes lnga nyid thob par byed//ces gsungs pa dang / de bzhin du/ bzhi pa yis ni dbang bskur bas/ /blo ldan de nyid mthong bar 'gyur/ /zhes gsungs so/ /skad cig gcig la mngon byang chub/ /ces bya ba ni/ ji ltar zhes 'bras bu'i yul nyid la dri ba bdun cu rtsa bzhi pa'o/ /ji skad du 'chad par 'gyur ba las/de ni skad cig mngon byang chub/ /mtshan nyid skad cig mar ni brjod/ /ces gsungs so/ /lung bstan pa dang rgas pa med/ /ces bya ba gnyis po dag gi dri ba gcig nyid do/ /'bras bu rgyas par bshad pa'i ngo bo lung bstan pa dang / rgas pa med pa'i mtshan nyid de'i yul la dri ba bdun cu rtsa lnga pa'o//ji skad du 'chad par 'gyur ba las/ rdo rje rtse mor byang sems ni/ /'dzin pas lus ni brtan pa nyid/ /de yi de nyid byang sems ni/ /rlung gi de nyid rab sbyor bas/ /rigs pas steng du byed pa yin/ /rgas pa med par the tshom med/ /ces gsungs so/ /bcud len gyi ni sbyor ba dang //zhes bya ba ni/ bstan pa'i lus la rgyu nyid kyi dri ba bdun cu rtsa drug pa'o/ /ji skad du 'chad par 'gyur ba las/ sngar bshad pa yi bdud rtsi lnga/ /'dir ni bcud kyis len du brjod pa'o/ /ces gsungs so/ /gser 'gyur sogs kyi bya ba dang / /zhes bya ba ni/ 'jig rten pa'i dngos grub kyi yul la dri ba bdun cu rtsa bdun pa'o//ji skad du 'chad par 'gyur ba las/ 'di nyid kyis ni grub par byed/ /lcags kyi gser 'gyur de bzhin no/ /zhes gsungs so/ /rdo rje'i phyag rgya dngos grub che/ /'gro ba'i bla ma ji ltar 'thob/ /ces 'jig rten las 'das pa'i dngos grub kyi yul la dri ba bdun cu rtsa brgyad pa'o//ji skad du 'chad par 'gyur ba las/ rdo rje'i phyag rgya dngos grub che/ /zung du 'jug pa thob par 'gyur/ /zhes gsungs so/ /lus kyi rang bzhin gzhal yas khang / /de yi rang bzhin ji lta bu/ /zhes bya ba ni/ phyi rol gyi gzhal yas khang spangs nas nang nyid du gzhal yas khang sangs rgyas thams cad kyi rten du ji ltar 'gyur zhes de'i yul la dri ba bdun cu rtsa dgu pa'o//ji skad du 'chad par 'gyur ba las/ lus ni gzhal yas khang du 'gyur/ /sangs rgyas kun gyi yang dag rten/ /zhes gsungs so/ /'dir ni gnas so/ /ji ltar gnas/ thim dang longs spyod bdag po sogs/ /zhes bya ba ni/ 'dir ni lus 'di nyid la gzhal yas khang gi bdag nyid gnas ni/ gnas dang nye ba'i gnas dang / zhing dang nye ba'i zhing dang / tshan+do ha dang / nye ba'i tshan+do ha dang / 'dus pa can dang nye ba'i 'dus pa can dang / dur khrod dang nye ba'i dur khrod dag gi dbye bas so//thim dang longs spyod bdag po sogs/ /zhes bya ba ni/ de'i yul la dri ba rim pa ji lta ba bzhin du brgyad cu tham pa dang / brgyad cu rtsa gcig pa'o/ /ji skad du 'chad par 'gyur ba las/ de la gnas kyi dbye ba ni/ /mdor bsdus nas ni bshad par bya/ /pul+li ra ma mgo bor shes//zhes gsungs pa dang / de bzhin du/ de nyid dang ldan shes par bya/ /thim dang longs spyod bdag po nyid/ /ces gsungs so/ /rlung ni gang gi mtshan nyid ci/ /zhes bya ba ni/ srog la sogs pa'i dbye bas rnam pa lnga'i dbye ba'i mtshan nyid de ci zhes de'i yul la dri ba ni brgyad cu rtsa gnyis pa'o//de dag 'jig par ji ltar 'gyur/ /zhes bya ba ni/ rlung de rnams kyi phan tshun nye bar mnan pas 'jig par ji ltar 'gyur zhes de'i yul la dri ba brgyad cu rtsa gcig pa dang brgyad cu rtsa gnyis pa'o/ /ji skad du 'chad par 'gyur ba las/ de nas gzhan yang bshad bya ba//rlung rnams kyi ni mtshan nyid mchog /srog gi rlung ni snying gar gnas/ /mi bskyod bye brag rigs las skyes/ /zhes gsungs pa dang / de bzhin du/ rlung gi mtshan nyid bshad pa ni/ /de las de yi 'jig par 'gyur/ /snga ma bzhin du btang bzung sogs/ /phan tshun du ni gnod par byed//ces gsungs so/ /de la sogs pa dri ba'i tshig /phyag na rdo rjes thal sbyar nas/ /zhes bya ba ni/ de la sogs pa dri ba'i tshig de ma thag par bshad pa rnams so/ /byas zhes bya ba ni byas nas so/ /phyag na rdo rje zhes bya ba ni zhu ba po'i byang chub sems dpa'o/ / thal sbyar te zhes bya ba ni/ ston pa'i yul la gus pas so/ /'gro ba'i bla ma'i mdun du gnas/ /zhes bya ba ni/ khams gsum pa'i slob dpon du gyur pa'i mdun du gnas nas so/ /lus kyis phyag byas de nas ni/ /zhes bya ba ni/ ston pa'i yul la shin tu yang rtse gcig pas 'dud pa'o//de ltar dri ba brjod pa bstan nas/ da ni dri ba brtul ba rtsom pa bshad pa'i phyir/ legs so bya ba byin nas ni/ /zhes bya ba gsungs te/ zhu ba byed pa po phyag na rdo rje la dri ba rnams mdzes pa nyid kyis byin nas so/ /'gro ba'i bla mas gsungs pa yin/ /zhes bya ba ni/ khams gsum gyi slob dpon bcom ldan 'das so//ji srid du dri ba brtul ba rtsom pa zhes bya ba'i bar gyis so/ /ngag gis zhes bya ba ni tshig gis zhes bya ba'i don to/ /ji lta bus she na/ de'i phyir/ tshangs dbyangs zab mo snyan dngags kyis/ /zhes gsungs te/ yan lag drug cu dang ldan pas zhes bya ba'i don to//lnga bdag ces bya ba ni/ sangs rgyas lnga'i bdag po bcom ldan 'das zhes bya ba'i don to/ /paN+Di ta chen po a lang+ka ka la sha de ba'i zhabs kyis mdzad pa/ dpal rdo rje phreng ba zhes bya ba rnal 'byor chen po'i rgyud kyi 'grel pa zab mo'i don gsal bar byed pa zhes bya ba las le'u dang po'i rgya cher bshad pa'o// //de ltar le'u dang pos rgyud la 'jug pa bstan nas/ da ni rgyud 'di la gang zag ji lta bu'i dbang du byas pa zhes de'i don du le'u dang po'i lhag mar gyur pa nyid kyis/ de nas zhes bya ba la sogs pa gsungs te/ de nas zhes bya ba ni/ le'u dang po'i dri ba byas pa'i rjes la'o//bcom ldan 'das zhes bya ba ni sngar bshad zin to/ /yang dag dris pa'i nges pa bshad/ /ces bya ba dang 'brel to/ /dri ba phyag na rdo rjes byas pa de ma thag par bshad pa de rnams kyi rnam par nges pa ni brtul ba'i mtshan nyid do/ /yang dag ces bya ba ni bcom ldan 'das thams cad mkhyen pa nyid kyis phyin ci ma log pa'o//rdo rje zhes bya ba ni ye shes lnga'i bdag nyid phun sum tshogs pa bstan to/ /'gro ba'i bla ma zhes bya ba ni g.yo ba'i bdag nyid kyi 'gro ba'i bla ma ste bsam pa ji lta ba bzhin du 'dul ba'i phyir te/ 'dis ni 'jig rten gsum gyi ston pa phyogs gcig pu'i phun sum tshogs pa bstan to//ci zhig byas na zhe na/ de'i phyir lag na rdo rje la bos te zhes gsungs te/ phyag na rdo rje ni zhu ba byed pa po'o/ /bos te zhes bya ba ni yang dag par bskul nas so/ /de ltar bcom ldan 'das kyi tshig la 'jug pa rang gi ngo bo bstan nas/ da ni dri ba la bsngags pa brjod par 'dod nas/snying po yi ni don bsdus pa/ /dbye bar dka' ba'i dngos po kun/ /zhes bya ba la sogs pa gsungs te/ dris pa ni khyod nyid kyi'o/ /dngos po kun zhes bya ba ni rnam pa thams cad kyis te/ khyad par du 'phags pa'i man ngag nyid kyis rtogs par byed pa'i phyir ro/ / thams cad mkhyen pa ma yin pas/ dbye bar mi nus pa nyid kyi phyir dbye bar dka' ba'o/ /ji lta bus she na/ de'i phyir/ snying po yi ni don bsdus pa/ /zhes gsungs te/ mdor bsdu na phyag rgya chen po'i ngo bo ston par byed kyi phyir dang / khyad par du rim pa gnyis ston par byed pas so/ /khyod kyis dri ba byas pa rnams//zhes bya ba ni/ zhu ba pos so/ /de nyid kyi phyir/ de la bod pa mdzad pa ni/ /rdo rje'i dbang phyug gsang chen bdag /ces gsungs te/ rdo rje'i rigs gtso bo nyid du gyur pa'i phyir rdo rje'i dbang phyug go/ /gsang ba ni gsang ba po rnams la ste/ chen po yang yin la gsang ba yang yin pas na gsang ba'i bdag po ste//lcang lo can na gnas pa'o/ /de rnams kyi dbang po ni gtso bo ste/ gsang ba'i bdag po zhes bya ba'i tha tshig go/ /yang na gsang ba chen po zla ba rdo rje'i dbang phyug ces 'byung bas so/ /de la gsang ba chen po ni shin tu yang sba bar bya ba'o//zla ba ni byang chub kyi zla ba ste/ de nyid ni rdo rje'i gnas so/ /dbang phyug dang 'dra bas na dbang phyug ste/ phyir mi spro bar dbang du byas pa'o/ /de ltar dri ba'i bsngags pa mdzad nas/ da ni thun mong ma yin pa'i gsang ba bshad par dam bca' ba bshad pa'i phyir/ bya ba spyod sogs rgyud rnams dang //zhes bya ba gsungs te/ sgrol ma 'byung ba dang / rnam par snang mdzad mngon par byang chub pa la sogs pa'o/ /sogs pa'i sgras ni rtog pa la sogs pa rnams la'o/ /rnal 'byor rgyud las gang du yang / /zhes bya ba ni/ dpal de kho na nyid bsdus pa la sogs pa'o/ / gsang ba zhes bya ba ni skal ba dang mi ldan pa la gsang bar bya ba rdo rje phreng ba dri ba bsdu ba ste/ gang du yang ma gsungs pa de ni ngas bshad par bya zhes bya ba dang 'brel to/ /mchog tu zhes bya ba ni rim pa gnyis la brten nas mchog gi go 'phang gi rgyu nyid kyi phyir ro/ /rdo rje'i dbang phyug ces bya ba ni phyag na rdo rje la bod pa'o//gzhan yang ji lta bu zhe na/ de'i phyir de nyid mchog ces gsungs te/ 'od gsal thob par bya ba'i phyir ro/ /yang dag ces bya ba ni phyin ci ma log pa nyid kyis so/ /dri ba rnam par nges par bya ba ni dri ba rnams la khyad par du nges pa'i phyir ro/ /de ltar thun mong ma yin pa'i gsang ba'i bshad pa bstan nas/da ni bcom ldan 'das la gnas khyad par du 'phags pa dang ldan pa nyid bstan pa'i phyir/ de skad gsungs zhes bya ba ni/ bcom ldan 'das ston pa po'o/ /khyod ni legs par nyon zhes bya ba ni phyag na rdo rje'o/ /thugs rjes khyab pas zhes bya ba ni sems can thams cad sdug bsngal las 'don par 'dod pa'i thugs rjes khyab pa ni thugs rjes khyab pa'o//myur du mig dag phye byas nas/ /mchog tu rmad byung ston pa'o/ /zhes bya ba la/ mig dag ces bya ba ni spyan dag ste/ phye nas zhes bya ba ni rnam par phye nas so/ /myur du zhes bya ba ni yud tsam mo//mchog tu zhes bya ba ni 'jig rten las 'das pa'i phyir ro/ /rmad du zhes bya ba ni ngo mtshar skyed par byed pa'i dngos po rab tu ston pa'i phyir mchog tu rmad du ston par mdzad pa'o/ /'di tsam gyis ni bcom ldan 'das kyi gsung la 'jug pa bstan nas/ da ni rgyud bstan pa la nye bar mkho ba'i don brjod pa'i phyir ro//de'i yan lag tu bcom ldan 'das kyi gsung la 'jug pa ni/ de nas bcom ldan 'das zhes bya ba la sogs pa gsungs te/ de nas zhes bya ba ni mig phye ba'i rjes la'o/ /the tshom thams cad gcod pa la/ /zhes bya ba ni/ the tshom thams cad sel bar byed pa'i phyir ro//ji snyed pa dang bkur sti'i don du'am zhe na/ ma yin te thugs rjes thugs brlan zhes gsungs te/ mnyes gshin pa'i mtshan nyid dang bral ba'i sems can thams cad la dmigs pa'i thugs rjes sems kyi rgyun la yang dag par khyab pa zhes bya ba'i don to/ /mchog tu gsang ba'i tshogs kyi bshad pa gsungs pa ni zhes bya ba ni/gsang ba'i don ni zab mo'i don to/ /go 'phang ni dri ba'i mtshan nyid do/ /gtan la dbab pa ni nges pa ste/ dbang bskur ba gtso bor gyur pa la'o/ /gsungs pa ni gsungs par gyur pa'o/ /de ltar bcom ldan 'das kyi gsung la 'jug pa bstan nas/dbang bskur ba'i che ba'i bdag nyid brjod par 'dod nas/ dbang bskur ba ni gtso bo ste/ /zhes bya ba gsungs te/ 'dir don gsum brjod par bya ste/ dbang bskur gyi nges pa'i tshig dang / dbang bskur rang gi ngo bo dang / de'i dgos pa zhes bya ba'o/ /de la mngon par ni mngon du phyogs pas rtog pa'i dri ma thams cad 'khrud par byed pas na dbang ngo //dbang bskur rang gi ngo bo ni/ dbang rnam pa bzhi'o/ /lha la sogs pas byin gyis brlabs pas rab tu gnas pa dang / dkyil 'khor la sogs pa la dbang thob pas lus la sogs pa rnam par dag pa thob tu rung ba ni de'i dgos pa'o//dbang bskur ba ni gtso bo ste/ /zhes bya ba ni/ dbang rnam pa bzhi gtso bor gyur pa'o/ /dngos grub thams cad ni 'jig rten dang 'jig rten las 'das pa'o/ /rtag tu gnas zhes bya ba ni/ 'grub par 'gyur zhes bya ba'i don to/ /de'i phyir zhes bya ba ni/gang gis dbang bskur gtsor byas pa'i dngos grub rnams de'i phyir ro/ /thog mar zhes bya ba ni dang po'i nyid du'o/ /yang dag ces bya ba ni phyin ci ma log pa'i ngo bos sam/ yongs su rdzogs pa'i ngo bos so/ /bshad kyis zhes bya ba ni gtso bo nyid kyi phyir dbang bskur ba nyid ces bya ba'i lhag ma'o//nyon zhes bya ba ni phyag na rdo rje nyid do/ /ji bzhin don zhes bya ba ni don las mi 'da' bar ro/ /de ltar dbang bskur ba'i che ba'i bdag nyid bstan nas/ da ni dbang bskur ba la rgyud bshad pa'i snod du brjod pa'i phyir/ thog mar zhes bya ba la sogs pa gsungs te/rgyud bshad pa'i sngon du gang gi tshe slob ma la dbang bskur bar 'gyur ba ni 'chad par 'gyur ba'i mtshan nyid dang ldan pa'i slob dpon gyis dbang bzhis dbang bskur bar 'gyur ro/ /de nas rdzogs pa'i rim pa'i snod du 'gyur zhes bya ba ni/ de ston par byed pa'i rdo rje phreng ba'i rgyud thos pa la snod du rung bar 'gyur zhes bya ba'i don to//slob ma ji lta bu zhe na/ de'i phyir/ blo ldan zhes bya ba gsungs te/ dbang rnam pa bzhi dang / dam tshig dang sdom pa 'dzin pa la mkhas pa'o/ /yang dag ces bya ba ni rgyud du bstan pa'i rigs pas so/ /rang bzhin gyis grub pa'i rim pa ni rdzogs pa'i rim pa'o//de ston par byed pa'i sbyor bas ni ting nge 'dzin de la'o/ /de ltar dbang bskur ba dang rgyud bshad pa'i snod du rung ba nyid du bstan nas/ da ni de las bzlog pa'i skyon bstan pa ni/ yang dag dbang bskur gyis dben na/ /zhes bya ba la sogs pa gsungs te/dbang rnam pa bzhi ma thob par ro/ /bla ma ni slob dpon no/ /sgrub pa pos zhes bya ba ni/ bcom ldan 'das kyi ngo bo sgom pa po yin yang ngo / /slob ma mtshungs par ni zhes bya ba ni/ mi bzad dmyal ba chen por 'gro/ /zhes bya ba dang 'brel to/ /ji lta bu zhe na/ de'i phyir/ yang dag rgyud kyi don shes kyang //zhes gsungs te/ sgro 'dogs pa dang skur pa 'debs pa spangs nas/ dpal gsang ba 'dus pa la sogs pa rgyud kyi don rim pa gnyis kyi ngo bor shes pa'i phyir ro/ /dmyal ba ji lta bu zhe na/ de'i phyir mi bzad ces bya ba gsungs te/ rnam pa sna tshogs pa bzod par dka' ba'i rgyur 'gyur ba 'jigs su rung ba'o//de ltar don rnam pa bzhis rgyud bshad pa la nye bar mkho ba'i don brjod nas/ da ni bla ma dang slob ma dag brjod pa'i phyir de'i yan lag tu bla ma'i mtshan nyid ni de'i phyir zhes bya ba la sogs pa gsungs te/ gang gi phyir dbang bskur ba med par dmyal ba skyed par byed pa'i mtshan nyid can ni skyon du 'gyur ba ste/de'i phyir bla ma zhes bya ba ni de kho na nyid bcu la mkhas pa'i slob dpon no/ /don du gnyer bas zhes bya ba ni/ yang dag par don du gnyer bas so/ /ji ltar zhe na/ de'i phyir yang dag ces gsungs te/ sgrub pa sngon du 'gro ba'i gtong ba dang gtong ba chen po la sogs pa rnams kyis so/ /ston pa zhes bya ba ni slob ma rnams la ston par byed pas so/ /de yang dbang bskur ba sbyin pa sngon du 'gro bas rgyud la sogs pa ston par byed pas so/ /'bad pas zhes bya ba ni dor bar dka' ba dngos po'i sbyin pa ste/ji skad du/ gang zhig gang gis yang dka' ba/ /de ni mchog ces bya bar brjod/ /ces bya ba la sogs pa gsungs so/ /bla ma ji lta bu zhe na/ de'i phyir dbang bskur thob cing zhes bya ba gsungs te/ mtshan nyid phun sum tshogs pa dang ldan pa'i bla ma las dbang bskur ba thob pa'o//de nyid ces bya ba ni/ de kho na nyid bcu yongs su shes pa ste/ ji skad du/ dkyil 'khor dang ni ting 'dzin phyag rgya dang / /sngags dang byed pa gdan dang bzlas pa dang / /sbyin sreg dang ni phyag rgya sngags la sbyor/ /nyer bsdu sngags las de nyid bcur ni brjod/ /ces gsungs so//blo ldan zhes bya ba ni/ shes bzhin dang ldan pa'i bdag nyid can gyi shes rab dang ldan pa'o/ /snying rje yis ni khyab ces bya ba ni/ sems can thams cad la phan pa'i las can no/ /zab cing rgya che don la mkhas/ /zhes bya ba ni/ stong pa nyid dang snying rje dag la brten nas 'khor ba dang mya ngan las 'das pa la mi gnas pa nyid la lhag par mos pa nyid kyi phyir ro//zab pa dang rgya che ba dag gis 'khor ba dang mya ngan las 'das pa dor ba blang ba med pas gos pa med pa nyid kyi phyir ro/ /gnod pa 'tshe ba rnam par spangs/ /zhes bya ba ni/ mi dge ba bcu'i las kyi lam spangs pa nyid kyi phyir ro//lus kyi yan lag rdzogs pa dang / /zhes bya ba ni/ lus kyi yan lag thams cad rdzogs pa dang / dbang po ma tshang ba la sogs pa'i skyon spangs pa nyid kyi phyir ro/ /skal bzang gang zhes bya ba ni/ ngag kun nas len pa'i phyir ro/ /mtshan dang dpe byad rnams dang ldan//zhes bya ba ni/ bla ma'i mtshan nyid gtong ba la sogs pa rnams dang ldan pa nyid kyi phyir ro/ /yang na sngon dge ba'i rtsa ba bsags pa nyid las skyes pa nyid kyi phyir dpe byad rnams dang ldan pa'o/ /dad pa la sogs pa'i dbang po dang yang dag par ldan pa nyid kyi phyir mtshan dang ldan pa'o//chags pa che la gcig tu dga'/ /zhes bya ba ni/ theg pa chen po sngags kyi spyod pa rnam pa gsum la mos pa'i phyir dang / gnas pa'i phyir ro/ /yul la phrag dog rnam par spangs/ /zhes bya ba ni/ gzugs la sogs pa la zhen pa dang bral ba'o/ /dbang gsum pa sbyin pa'i gnas skabs sam/phyag rgya'i yul la zhen pa spang ba'o/ /bag yod ces bya ba ni/ dngos po bag tsam gyi phyir khro ba med pas bag med pa'i gnas skabs thams cad spangs pa'i phyir dang / don yod grub pa'i rigs kyi dam tshig la gnas pa nyid kyi phyir ro/ /rab tu dga' ba dang zhes bya ba ni dus thams cad du dga' ba phun sum tshogs pa'i lus ngag yid gsum dang ldan pa'o//de rnams kyis bag med pa'i 'bras bu dang ldan pa nyid bstan to/ /rnal 'byor ma yi snying po skyong / /zhes bya ba ni rang bzhin gyis shin tu rtse gcig pa nyid kyis dam tshig dang sdom pa 'dzin pa ni rnal 'byor ma'i snying po skyong ba nyid kyi phyir ro//rdo rje theg pa gcig tu mos/ /zhes bya ba ni theg pa chen po sngags kyi yul la gzhan dang thun mong ma yin pa'i dad pa dang / yang dag par ldan pas phyir mi ldog pa'o/ /theg pa dman la rgyab kyis phyogs/ /zhes bya ba ni nyan thos kyi theg pa la lhag par mos pa med pa'o//de la sogs pa'i yon tan ldan/ /zhes bya ba ni sngon du gsungs pa'i yon tan dang yang dag par ldan pa'o/ /bla ma zhes bya ba ni dbang bskur ba dang / rgyud bshad pa dang / gdams ngag ston pa rnams so/ /slob mas zhes bya ba ni rin po che lta bu'i gang zag la sogs pa'o//nus dang ldan zhes bya ba ni dbang bskur ba'i don du gsol ba gdab par bya ba'o/ /de ltar bla ma'i mtshan nyid bstan nas/ da ni bla ma'i bya ba brjod pa'i phyir/ /yang dag bla ma rnyed nas ni/ /zhes bya ba ni gsungs te/ sngon gyi bsod nams kyi stobs kyis rnyed pa'o//bla ma zhes bya ba ni sngon du gsungs pa'i yon tan dang yang dag par ldan pas so/ /slob ma dag dang zhes bya ba la sogs pa dang 'brel to/ /ngag dang zhes bya ba ni bsnyen bkur la sogs pa sbyin pa sngon du 'gro bas slob dpon dang gsang ba'i dbang dag gis so/ / rtogs dang zhes bya ba ni dbang gsum sbyin pas rang nyid kyis de kho na nyid rtogs pa'i phyir ro/ /brtan byas nas zhes bya ba ni bzhi pa'i dbang bskur bas so/ /ji bzhin zhes bya ba ni rnam pa gang gis so/ /de zhes bya ba ni slob ma'o/ /ye shes ldan par 'gyur zhes bya ba ni khyad par du 'phags pa'i gdams ngag bstan pas thos pa dang bsam pa dang bsgom pa sngon du 'gro bas rnam par mi rtog pa'i ye shes mngon du byas pa'i phyir ro//de ltar bla ma'i bya ba bstan nas/ de ni slob ma brtags pa'i sgo nas phan tshun brtag pa brjod pa'i phyir/ ji ltar rin chen bdar ba dang / / zhes gsungs te/ ji ltar zhes bya ba ni rnam pa gang gis so/ /gser zhes bya ba ni sa le sbram mo/ /bdar ba zhes bya ba ni ka shi la sogs pa'i bdar la'o/ /sreg dang zhes bya ba ni sreg pa dang gnyis su bya ba la sogs pa rnams kyis brtag pa'o/ /de bzhin du ni slob ma yang / /lo ni bcu gnyis rab tu brtag /ces bya ba ni chen po'i ngo bor gyur pa/ spyod pa dang / lta ba dang / lhag mar mos pa la sogs pa'i sgo nas brtag par bya'o/ /phan tshun zhes bya ba ni phan tshun du ste/ bla mas slob ma dang slob mas bla ma zhes bya'o/ /de'i phyir zhes bya ba ni lo bcu gnyis kyis brtags pas so//dus kun du zhes bya ba ni gnas skabs thams cad du'o/ /de ltar zhes bya ba ni sngon du gsungs pa'i rigs pas brtag pa'o/ /de ltar slob ma brtag pa'i sgo nas/ phan tshun brtag par byas nas da ni ma brtags pa'i skyon brjod pa'i phyir/ gzhan du bgegs ni 'byung bar 'gyur/ /zhes bya ba la sogs pa gsungs so/ /gal te phan tshun brtag pa mi byed na de'i tshe bgegs zhes bya ba ni phyi dang nang gi bdag nyid can bgegs byed pa'i ngo bo 'byung bar 'gyur ba ni skye bar 'gyur ba'o/ /ji lta bu zhe na/ de'i phyir dngos grub 'joms zhes bya ba gsungs te/'jig rten dang 'jig rten las 'das pa'i bgegs su gyur pa'o/ /sdug bsngal ster zhes bya ba ni 'di dang pha rol du lus dang sems la sdug bsngal bskyed pa'o/ /de ltar ma brtags pa'i skyon bstan nas/ da ni dbang bskur ba'i che bdag nyid brjod pa'i phyir 'dir yang dang por dgos pa 'di lta bu la 'jug par bya ste/bla ma dang slob dpon brtags pas dbang bskur bar byas pa la slob ma ji ltar bur 'gyur zhe na/ de'i phyir dug ni sngags kyis zhes bya ba la sogs pa gsungs te/ rang bzhin gyis 'chi ba'i bdag nyid can gyi dug sngags kyis zhes bya ba ni dug ni sngags kyis so//bcom pa bzhin zhes bya ba ni nus pa nyams pas ji ltar bcud len du 'gyur bas so/ /ji lta bu zhe na/ de'i phyir sngags kyis dag byed ces bya ba gsungs te/ bya khyung gi sngags kyis rnam par dag pa ste/ dug gi bya ba mi byed pa'i phyir ro/ /de bzhin slob ma dbang sogs kyis//dag par 'gyur ba ni gtsang bar 'gyur ba ste/ dbang rnam pa bzhis rim pa ji lta ba bzhin du lus dang ngag dang yid dang ye shes kyi sgrib pa rnam par sbyangs pa'i phyir ro/ /slob ma ji lta bu zhe na/ de'i ma dag pa ni zhes bya ba gsungs te/ glo bur ba'i skyon rnams kyi rnyog pa dang bcas pa'i phyir ro//de ltar dbang bskur ba che ba'i bdag nyid bstan nas/ da ni nye bar bsdu ba'i sgo nas de nyid bstan par bya ba'i phyir brjod pa/ de'i phyir 'bad pa zhes bya ba la sogs pa gsungs te/ gang gi phyir ma dag pa'i ngo bo'i slob ma dbang bskur bas dag par bsgrub pa'i phyir/'bad pa thams cad kyis zhes bya ba ni de byin gyis brlab pa'i don du lha bskyed pa'i mtshan nyid can gyis so/ /sngags pas zhes bya ba ni dbang bskur ba'i dus na 'os pa rnams kyis so/ /slob ma zhes bya ba ni mtshan nyid dang yang dag par ldan pa'o/ /dag byas nas zhes bya ba ni slob dpon gyi dbang la sogs pa rab tu dbye ba dang bcas pa rnams kyis so//gang gis she na/ de'i phyir bla mas zhes bya ba gsungs te/ sngon du bshad pa'i mtshan nyid dang ldan pas so/ /ji ltar sbyang bar bya zhe na/ de'i phyir ji lta bu yi don/ /ces gsungs te/ g.yo sgyu med par slob ma'i yul la lhan cig skyes pas zhes bya ba'i don to//ci'i don du zhe na/ de'i dngos grub phyir ni zhes bya ba gsungs te/ 'jig rten las 'das pa'i dngos grub kyi rgyur zhes bya ba'i don to/ /de ltar rnam pa drug gis bla ma dang slob ma brtag pa brjod nas/ da ni dbang bskur ba brjod par 'dod nas/de'i yan lag la gsol ba gdab pa ni/ de nas zhes bya ba la sogs pa gsungs te/ sngags dang dbang bskur ba la sogs kyis slob ma sbyangs pa'i rjes su'o/ /phyag na rdo rjes zhes bya ba ni zhu ba po'o/ /khyod ni rdo rje sems dpa' zhes bya ba ni gang gis dbang bskur ba gtso bor byas nas dngos grub thams cad gsungs pa de'o//bde chen la zhes bya ba ni 'dod pa'i yon tan lnga la longs spyod pas khyad par du 'phags pa'i go 'phang thob pa'i phyir te/ zhus zhes bya ba dang 'brel to/ /dbang bskur ji ltar rgyud du ni/ /zhes bya ba ni rgyud ni rtsa ba'i rgyud de dpal gsang ba 'dus pa la sogs pa'o//gtso bor ni zhes bya ba ni gtso bor 'jug pas so/ /ji ltar bcom ldan 'das khyod kyis gsal bar mdzad pa'o/ /de ltar zhu ba po bstan nas/ da ni dbang bskur ba rang gi ngo bo brjod pa'i phyir/ de'i yan lag tu bcom ldan 'das kyi gsung la 'jug pa'i mtshan nyid ni gsungs zhes bya ba la sogs pa te/phyag na rdo rje de la'o/ /rdo rje sems dpa' zhes bya ba ni ston pa po drug pa rdo rje 'chang la'o/ /gsungs zhes bya ba ni brjod par gyis shig pa'o/ /ji lta bu zhe na/ de'i phyir thams cad mkhyen ces bya ba gsungs te/ dkyil 'khor dang dkyil 'khor ba'i rnam pa'am/rang bzhin gyis 'od gsal ba'i ngo bos chos thams cad yongs su shes pa'i phyir/ rgyud kyi de nyid mkhyen pas ni/ /zhes bya ba ni rgyud chen po dang nyung ngu'i rgyud dang bshad pa'i rgyud dang / yan lag gi rgyud bstan pa'i phyir/ gzhan yang / the tshom thams cad gcod mdzad pa//zhes bya ba ni nyan pa po rnams kyi rgyud la the tshom thams cad bzlog pa'i phyir ro/ /gzhan yang phyag na rdo rje zhes bya ba ni ye shes lnga'i bdag nyid can gyi rdo rje rtse lnga pa 'chang ba'o/ /don ji lta ba bzhin du zhes bya ba ni yongs su rdzogs par ston pa'i phyir ro/ /de ltar bcom ldan 'das kyi gsung la 'jug pa bstan nas/da ni zhu ba po'i thos pa la sbyar ba sngon du 'gro bas dbang bskur ba bzhi brjod pa'i phyir/ nyon zhes bya ba la sogs pa gsungs te/ phyag na rdo rje yang dag bshad kyis zhes bya ba ni shin tu gsal bar bya ba'o/ /dbang bskur ba yi dbye ba ni/ /zhes bya ba ni dbye ba ni rab tu dbye bas so//dang po'i dbang ni gtso bo ste/ /zhes bya ba ni slob dpon gyi dbang ste/ lus rnam par dag par rung ba nyid kyi phyir gtso bor gyur pa'o/ /gnyis pa gtso bo min zhes bya ba ni gsang ba'i dbang bskur ba ste/ ngag rnam par dag pa'i ngo bo nyid kyis gtso bo ma yin pa nyid kyi phyir dang /lus la brten nas ngag bskyed pa'i phyir ro/ /snyoms par 'jug pa gsum pa ste/ /zhes bya ba ni shes rab ye shes te/ phyag rgya la snyoms par 'jug pa'i sngon du 'gro bas slob ma rang gi bde ba chen po nyams su myong ba nyid kyi phyir ro/ /bzhi pa dag ni don dam mo/ / zhes bya ba ni don dam pa'i de kho na nyid ston pa'i phyir dang / don gyi lhan cig skyes pa ston pa'i phyir ro/ /de ltar mdor bstan pa bshad nas/ da ni rim pa ji lta ba bzhin du dbang rnam pa bzhi bstan pa'i phyir/ dbye ba rnam pa bcu gcig dang / /zhes bya ba gsungs te/ chu dang / cod pan dang /rdo rje dang / bdag po dang / ming dang / sngags dang / brtul zhugs dang / lung bstan pa dang / dbugs dbyung ba dang / rjes su gnang ba dang / phyir mi ldog pa'i dbye bas so/ /gtso bo zhes bya bas ni slob dpon gyi dbang ngo / /bcu gnyis pa ni gsang ba'o/ /zhes bya ba ni gsang ba'i dbang gi mtshan nyid phyi rol gyi 'bad par bya ba nyid kyi phyir dang cung zad bskyed pa'i rim pa'i nang du 'dus pa nyid kyi phyir ro//bcu gsum pa yang snyoms par 'jug /ces bya ba ni shes rab ye shes kyi mtshan nyid shes rab dang / yang dag par sbyor ba skyed pa'i phyir ro/ /bcu bzhi pa ni don dam nyid//ces bya ba ni dbang bzhi pa'i ngo bo rang bzhin gyis 'od gsal ba mngon du byas pa'am lhan cig skyes pa'i bde ba mngon du byas pa'o/ /bcu bzhi pa ni mchog gi dbang / /zhes bya ba la mchog gi dbang ni bla na med pa'o/ /dbang bskur re re sa re'o/ /zhes bya ba ni de la re zhig /dang po'i las kyi sbyor ba yis/ /sa brgyad pa ni thob par 'gyur/ /zhes bya ba'i rigs pas slob dpon dang gsang ba'i dbang dag gis sa brgyad pa thob tu rung ba brjod pa yin no/ /ji skad du/ de yi dus nas brtsams nas de ni rnam rtog bral/ /de yi mdog dang dbyibs dang ji ltar 'dod pa'i mtshan//rnam par smin pa'i lus ni bsam mi khyab pa'i ngo / /sdom pa 'byung ba de las byas pa zhes pa 'byung / /zhes gsungs so/ /de'i phyir las dang po pa'i rnal 'byor gyi ngo bo slob dpon dang gsang ba'i dbang bskur ba dag gis sa brgyad pa zhes bya ba rnam par gzhag go//shes rab ye shes kyi sa dgu pa'o/ /bzhi pa dpe'i rnam pas ni bcu pa'o/ /don gyis ni bcu gcig pa'o/ /mos pa spyod pa la ltos nas bcu gnyis pa'o/ /skye ba 'di nyid la shin tu bde ba dang / myur ba nyid du phyag rgya chen po mngon du byed pa ni bcu gsum pa'o//yang na slob dpon gyi dbang gis ni sa brgyad pa'o/ /gsang ba'i dbang gis ni rnam pa gang gi rdo rje bzlas pa la brten nas dgu pa'o/ /shes rab ye shes kyi dbang gis sems rnam par dag pa'i ngo bo nyid kyis bcu pa'o/ /rang byin gyis brlab pa yang de nyid do/ /bzhi pa nyid kyis mngon par byang chub pa'i ngo bo nyid kyis bcu gcig pa'o//mos pa spyod pa'i sa dang bcas pas ni bcu gnyis pa'o/ /zung du 'jug pa'i rim pas ni bcu gsum pa'o/ /de ltar dbang bzhi po bstan nas/ da ni dbang bzhi mtshon pa brjod pa'i phyir/ rnam pa gsum ni rgyud kyi dbang / / zhes bya ba ni slob dpon dang / gsang ba dang / shes rab ye shes kyi mtshan nyid can no/ /rnal 'byor chen po'i rgyud kyi dgongs pas stong pa dang / shin tu stong pa dang / stong pa chen po'i mtshan nyid can no/ /rnal 'byor ma'i rgyud kyi dgongs pas dga' ba dang / mchog dga' dang /dga' bral gyi dga' ba'i mtshan nyid can no/ /'dir zhes bya ba ni dbang bskur ba de la'o/ /bzhi pa 'bras bur shes par bya/ /zhes bya ba ni bzhi pas rang bzhin gyis 'od gsal ba 'am/ lhan cig skyes pa'i ngo bo'o/ /ji lta bu zhe na/ de'i phyir/ thams cad la ni khyab pa yin/ / zhes gsungs te/ slob dpon dang / gsang ba dang / shes rab ye shes gsum po rnams kyi ngo bo ni stong pa dang / shin tu stong pa dang / stong pa chen po'i ngo bo 'am/ dga' ba dang / mchog dga' dang / dga' bral gyi ngo bo'o/ /ji skad du/ yang na thams cad de nyid do/ /zhes gsungs so//ji lta bu zhe na/ de'i phyir/ dga' ba la sogs pa yi rim pa yis/ /zhes gsungs te/ de ltar dbang bzhi pa mtshon pa bstan nas/ da ni dbang bskur ba'i rjes su brjod pa'i phyir/ yar ngo'i phyogs zhes bya ba nas gsungs te/ dgun zla tha chungs la sogs pa'i zla ba drug pa ste/ji skad du/ dgun zla tha chungs dpyid zla ra/ /dpyid zla tha chungs dbyar zla ra/ /dbyar zla 'bring po nyid dang ni/ /dbyar zla tha chungs ston zlar bcas/ /zhes gsungs so/ /tshes gsum dang zhes bya ba ni lus la sogs pa gsum gyi rnam pa dag pas so/ /de bzhin tshes bcu zhes bya ba ni ji skad du/rtsa ba'i rgyud las/ bshang gci zla ba nyi ma dang / /sgra gcan dus kyi me rtse rnams/ /drug dang dga' ba bzhi pa rnams/ /nges par bcu po zhes byar grags/ /zhes gsungs so/ /slob ma las bcu'i rim pas tshe 'di nyid la mngon par byang chub pa thob par bya ba'i don du'o//tshes bcu bzhi zhes bya ba ni bsnyen pa la sogs pa'i yan lag bzhi dang / rnam pa sna tshogs la sogs pa'i skad cig ma bzhi dang / dga' ba la sogs pa bzhi'i rim gyis thabs shes rab tha mi dad pa'i de kho na nyid la bslab pa'i don du'o/ /slob ma dam pa zhes bya ba ni bla mas dbang bskur zhes bya ba dang 'brel to//tshul khrims dang ldan pa la sogs pa nyid kyis rin po che lta bu'i gang zag gi ngo bo nyid kyi phyir slob ma dam pa'o/ /gus dang ldan zhes bya ba ni bla ma dang dkon mchog gsum gyi yul la ma bcos pa'i dad pa dang ldan pa'o/ /dbang bskur zhes bya ba ni dbang bskur bar bya ba'o//cho ga bzhin zhes bya ba ni rgyud du gsungs pa'i cho gas sta gon du gnas pa dang / dngos su dbang bskur ba'i rim pas zhes bya ba'i don to/ /de yang dbang bskur ba'i cho ga'i lugs sam/ 'chad pa'i cho ga nyi shu pa'i las kyi nang du gsungs pa'i rim pas zhes bya ba'i don to//bla mas zhes bya ba ni bshad ma thag pa'i mtshan nyid dang ldan pas so/ /de ltar dbang bskur ba'i dus bstan nas/ slar yang dbang gnyis pa rgyas par bshad pa brjod pa'i phyir de'i yan lag de la nye bar mkho ba'i phyag rgya'i mtshan nyid bstan pa ni/brgyad gnyis lo lon zhes gsungs te/ bzhi pa brdar byas pa sna tshogs pa'i yan lag bzhi dang / bsnyen pa la sogs pa bzhi dang / rgyu mthun pa la sogs pa bzhi dang / dga' ba la sogs pa bzhi mngon par gsal bar byed pa'i rgyur gyur pa nyid kyi phyir ro/ /lus phra zhes bya ba ni gtso mo'i mtshan nyid dang yang dag par ldan pa nyid kyi phyir ro//ji skad du/ sngo bsangs zhes bya ba la sogs pa gsungs te/ gzugs dang skal bzang dag gis brgyan/ /zhes bya ba ni gzugs ni ma bcos pa'i lhan cig skyes pa'o/ /skal bzang zhes bya ba ni snyan par smra ba la sogs pas brgyan pa ste/nye bar mdzes pa'o/ /sngo bsangs zhes bya ba ni kha dog gis te/ mi bskyod pa'i rigs nyid kyi phyir ro/ /mig ni yangs pa dang zhes bya ba ni rgya che ba'i mig gam yangs pa'i pad+ma'i rnam pa can no/ /yang dag gus zhes bya ba ni bla ma dang sgrub pa po dang / dkon mchog gsum la sogs pa rnams la'o/ /snying rje'i bsam ldan zhes bya ba ni rtsub pa'i mtshan nyid dang bral ba nyid kyis sems can thams cad la phan pa dang bde ba 'dod pa'o/ /dbang bskur thob pa zhes bya ba ni mtshan nyid dang ldan pa'i bla ma las dbang bskur ba thob pa'o/ /ngag snyan thob ces bya ba ni bden par smra ba ste/don yod grub pa'i rigs kyi dam tshig 'dzin pa zhes bya ba'i don to/ /rnal 'byor rgyud la lhag par mos/ /zhes bya ba ni rnal 'byor chen po'i rgyud dpal gsang ba 'dus pa la lhag par mos pa'i phyir ro/ /yang na lo bcu gnyis lon zhes bya ba ni lo bcu gnyis lon pa'i dril bu'i sgras brdar byas pa ste/stong pa nyid bzhi'i rim gyis rnam par shes pa'i tshogs brgyad rnam par dag par gyur pa nyid kyi phyir ro/ /nyams dga' zhes bya ba ni sems la ting nge 'dzin rnam par mi g.yo ba skyed par byed pa'i phyir ro/ / bde bar byed pa zhes bya ba ni 'od gsal gyi bde ba mngon par gsal bar byed pa'i rgyud nyid kyi phyir ro/ /de las lhag par zhes bya ba ni bcu gnyis pa dang bcu drug pa la sogs pa las lhag pa lo nyi shu las lhag pa skal med du 'gyur ro zhes bya ba ni dbang bskur bar mi rung ba'o/ /rgyu mtshan gsungs pa/de las gong du phyag rgya chen po'i mtshan nyid can gyi dngos grub ring du byed do/ /de mngon par gsal bar byed pa'i rgyu med pa'i phyir ro/ /ji skad du/ phyogs kyi lo nas ji srid cig gi bar du rnam pa bcur 'gyur ba lta dang reg par bya bar 'gyur/ /de la 'khyud par bya dang ro dang rgya mtshor bcas pa rnams la g.yo dang brten par bya ba ste//lo ni nyi shu las lhag phyag rgyas mchog tu 'jigs par byed pa khro bo 'byung po lha min cha/ /dbang gi don ni drug dang bzhi ni mnyam pa'i bde ster de las gzhan pa rnams ni bsgom pa'i don/ /zhes gsungs so/ /de ltar dbang gnyis pa las nye bar mkho ba'i phyag rgya'i mtshan nyid bstan nas/da ni bla ma'i yon tan dbul ba brjod pa'i phyir/ lhag par yid 'ong zhes bya ba gsungs te/ rang gi srog dang 'dra ba nyid kyis yongs su dor bar mi bya ba nyid kyi phyir ro/ /bu mo zhes bya ba ni bu mo'o/ /chung ma yang zhes bya ba ni rang gi chung ma'o//bu mo 'am zhes bya ba ni sring mo'i bu mo'o/ /sring mo 'am zhes bya ba ni bdag nyid kyi sring mo'o/ /dbul bar bya zhes bya ba ni sbyin par bya ba'o/ /bla ma zhes bya ba ni dbang skur bar byed pa la'o/ /gus pa yis zhes bya ba ni mchod pa'i las la'o/ /de nas zhes bya ba ni slob dpon gyi dbang rdzogs nas gsang ba'i dbang rtsom pa'i dus su'o//'dis ni stong pa chen po bstan nas/ da ni gtong ba bstan pa'i phyir/ gser dang zhes gsungs te/ gser gyis spras pa'i lag gdub dang / rna cha dang / dpung rgyan la sogs pa'o/ /rin chen zhes bya ba ni in+d+ra nI la dang /mar ga ta dang / pad+ma rA ga la sogs pa'o/ /gos dang ni zhes bya ba ni shin tu 'jam pa'i hwa dar la sogs pa'o/ /mu tig phreng ba sna tshogs pas/ /zhes bya ba ni rags pa dang phra ba'i dbye ba tha mi dad pas so/ /mchod nas zhes bya ba ni tshim par byas nas so//de nas zhes bya ba ni mchod pa byas pa'i rjes la'o/ /bla ma'i mdun du zhes bya ba ni slob dpon gyi mdun du'o/ /slob ma des ni zhes bya ba ni gang gis gtong ba dang gtong ba chen pos bla ma la mchod pa'i slob ma des so/ /'di skad brjod ces bya ba ni 'chad bzhin pa'i gsol ba 'debs pa'i tshig rnams so//de ltar bla ma la yon dbul ba bshad nas/ da ni dbang gnyis pa'i don du gsol ba gdab pa brjod pa'i phyir/ de nas brtsams nas zhes bya ba gsungs te/ dbang bskur ba thob pa'i dus kyi rjes su'o/ /bdag ces bya ba ni slob ma'o//bran du zhes bya ba ni g.yog tu'o/ /mchod pa bzhes zhes bya ba ni bdag gis phul ba'i sngon du gsungs pa'i mchod pa'o/ /gtso bo zhes bya ba ni bla ma la bod pa'o/ /bdag ni zhes bya ba ni slob ma'o/ /de lta'i rnam pas mnyes nas ni/ /zhes bya ba ni nye bar bshad pa'i bye brag gis mnyes par bya'o//mchod par bya zhes bya ba ni shin tu yang mchod par 'os pa ste/ khyad par du 'phags pa'i zhing gi ngo bo nyid kyi phyir ro/ /bdag nyid kun gyi zhes bya ba ni gtong ba dang gtong ba chen pos phul ba nyid kyis so/ /de ltar dbang gnyis pa'i don du gsol ba gdab pa bstan nas/de gtong ba'i don du bla ma'i bya ba brjod pa'i phyir/ phyi nas zhes bya ba gsungs te/ sbyin pa la sogs pa rnams kyis tshim pa'i phyi nas phyag rgya bsten par bya zhes bya ba dang 'brel to/ /bcom ldan 'das zhes bya ba ni rnam par rtog pa thams cad 'joms pa'i phyir dang / mtshan nyid dang ldan pa'am bsam pa dang ldan pa'o//kun nas mchod nas zhes bya ba ni reg rdo rje ma'i gzugs sam/ rdo rje dbyings kyi dbang phyug ma'i gzugs su nye bar bskyed nas phyi'i mchod pa la sogs pa bya'o/ /bsten par bya zhes bya ba ni de nyid la snyoms par 'jug pas bsten par bya zhes bya ba'i don to//slob dpon gyis zhes bya ba'i lhag ma'o/ /bsten pa las ni zhes bya ba ni bde ba chen po'i sgras de bzhin gshegs pa thams cad bkug nas tshangs pa'i bu ga nas zhugs te/ nang du zhu bar bsams la rdo rje dang pad+ma yang dag pa sbyor bas skye ba gang zhig de bzhin gshegs pa thams cad kyi rnam pa'i byang chub kyi sems de slob ma'i khar dbab pa ni skal bzangs kha la ni zhes bya ba'o//ming med mthe bo sbyar ba yis/ /zhes bya ba ni rang nyid kyis kyang ming med mthe bo'o/ /ngo bo'i phyag rgyas byang chub kyi sems spyod par bya'o/ /longs spyod bya zhes bya ba ni byang chub kyi sems rnam pa gnyis longs spyod nas khyad par du byang chub kyi sems gnyis po de nyid rnam par 'byed pa'o//de las skyes pa'i ye shes ni/ /zhes bya ba ni slob dpon rang nyid kyi'o/ /rang rig pa zhes bya ba ni sgra dang rnam par rtog pa las 'das pa'i phyir ro/ /bde ba chen po zhes bya ba ni rnam par rtog pa zad par byed pa nyid kyis khyad par du 'phags pa'i bde ba'i ngo bo'o//de ltar rnam pa drug gis dbang gnyis pa rgyas par bshad pa brjod nas/ da ni dbang gsum pa rgyas par bshad pa brjod pa'i phyir/ de rjes phyag rgyas gtad par bya/ /zhes gsungs te/dbang gnyis pa'i dus su slob mas phul ba'i phyag rgya slob ma de la gang zhig dbang gnyis pa nges par sbyin pa de la bla ma dam pas phyag rgya gtad par bya'o/ /dbang gsum pa rang nyid kyis nyams su myong nas de dag thams cad rang dang 'os pa'i dam tshig dang sdom pa sbyin pa dang khas len pa sngon du 'gro bas bya'o//srog dang rtsol ba mnyam sbyor bas/ /zhes bya ba ni rlung gi de kho na nyid bsgoms pas srog dang rtsol ba rang dbang du gyur pas so/ /dga' rnams zhes bya ba ni bsgrub bya dang sgrub byed yang dag par sbyor ba'i bde ba chen pos so/ /mchod par bya zhes bya ba ni bdag nyid dang /phyag rgya dang 'brel pa'i phung po la sogs pa rnams so/ /slar yang zhes bya ba ni de'i rjes la'o/ /hUM phaT sngags ni nor bu'i sgor/ /zhes bya ba ni hUM yig las byung ba'i rdo rje dang de'i nor bu la phaT yig bkod de zhes bya ba ni bsgoms nas so zhes pa'i don to//rdo rje rab bskyod bya zhes bya ba ni ji srid rdo rje dang pad+ma 'dus byas zhes bya ba'i tha tshig go/ /skad cig de las zhes bya ba ni snyoms par 'jug pa'i gnas skabs la'o/ /dga' rnams ji lta ba bzhin du zhes bya ba ni rim pa gang gis dga' ba la sogs pa bzhi'o/ /sngon du 'byung zhes bya ba ni skyes par 'gyur ba'o//skad cig ces bya ba'i rnam pa sna tshogs pa la sogs pa'o/ /de bzhin du/ rang gis nyams su myong bar bya/ /zhes bya ba'i tha tshig go/ /de ltar dbang gsum pa rgyas par bshad pa bstan nas/ da ni dbang bzhi pa rgyas par bshad pa brjod pa'i phyir/dga' ba'i sems kyis zhes bya ba ni rab tu dga' ba'i sems kyis so/ /rdo rje slob ma zhes bya ba ni rin po che lta bu'i gang zag la'o/ /bla ma dam pa zhes bya ba ni mtshan nyid dang ldan pa'i slob dpon no/ /yang na rdo rje btsun mo'i zhal nas zhal zhes 'don to/ /rdo rje btsun mo ni ston pa po bla ma'i ngo bo'o//de'i zhal nas zhal zhes bya ba ni rdo rje btsun mo'i zhal nas slob ma'i khar zhes bya ba'i don to/ /'dis ni rang rig bde ba chen po la bsten pa'i bla ma las rtogs par bya ba nyid bstan to/ /de ltar rang gi ngo bo bstan nas/ rig pa'i brtul zhugs brjod pa'i phyir/de nas slob ma'i lag tu ni/ /zhes bya ba gsungs te/ de nas zhes bya ba ni dbang bzhi byin pa'i rjes la'o/ /de nas zhes bya ba ni sngon du gsungs pa'i phyag rgya'o/ /slob ma'i dbang bskur ba'i rnam par dag pa thob pa'i lag tu ni sbar bar bya ste/ btang nas zhes bya ba ni byin nas so//'di skad bsgo zhes bya ba dang 'brel to/ /ci zhig ce na/ de'i phyir ji ltar bya ba zhes gsungs te/ ji ltar bya ba'o/ /mchog ces bya ba ni khyad par du 'phags pa'i lhan cig skyes pa nyams su myong ba'am/ 'od gsal nyams su myong ba'o/ /pad+ma zhes bya ba ni pad+ma mchog ni chos kyi dbyings la'o//de ltar byos la zhes bya ba ni slob ma 'di dang lhan cig tu'o/ /mchog gi gdong zhes bya ba ni phyag rgya de la bod pa'o/ /mchog ni khyad par du 'phags pa ste/ lhan cig skyes pa nyams su myong ba mngon par gsal ba'i rgyur gyur la de'i gdong gang la yod pa de la de skad ces bya'o//gang phyir zhes bya ba la sogs pa la/ 'di'i snying la zhes bya ba ni pad+ma'i dbus kyi ze'u 'bru'i cha la'o/ /rdo rje dbyings kyi dbang phyug ma zhes bya ba ni myos byed kyi gdugs can gyi khong stong gi nang du'o/ /bzhugs zhes bya ba ni rang bzhin gyis gnas pa'o//rang nyid ces bya ba ni stong nyid kyi ngo bos zhes bya ba'i don to/ /thabs gzhan gyis ni zhes bya ba ni da ltar rtsod pa'i dus la phyag rgya dang yang dag par sbyor ba'i thabs spangs nas so/ /sangs rgyas nyid ces bya ba ni rdo rje 'chang nyid do/ /thob mi 'gyur zhes bya ba ni rnyed par mi 'gyur ba ste/'dod chags shas che ba'i phyir dang / sems can rnams shes rab dman pa nyid kyi phyir ro/ /rnal 'byor pa yis zhes bya ba ni dpal gsang ba 'dus pa'i rgyud kyi don sgom pa po rnams kyis so/ /de yang zhes bya ba ni rdo rje dbyings kyi dbang phyug ma'i rang bzhin can gyi nang na gnas pa'i rtsa'o//rnam pa shin tu phra zhes bya ba ni sgrib pa dang bral ba nyid kyis dmigs pa'i yul las shin tu 'das pa nyid kyi phyir ro/ /de bzhin rnal 'byor pa yis rtogs/ /zhes bya ba ni yang dag nyid kyi gdams ngag thob pa'i sgom pa po nyid kyis rtogs pa'o/ /bde ba chen po zhes bya ba ni kun rdzob dang don dam pa'i rnam pa byang chub kyi sems skyed par byed pa'o//bsten pa gyis zhes bya ba ni slob mar gyur pa khyod kyis so/ /rab tu 'chad pas zhes bya ba ni brtson 'grus kyis so/ /ji lta bu zhe na/ de'i phyir/ lhan cig skyes dga'i mtshan nyid ni/ / zhes bya ba gsungs te/ de mngon par gsal bar byed pa'i rgyu nyid kyi phyir ro/ /de ltar rig pa'i brtul zhugs brjod pa bstan nas/ da ni de'i 'thad pa brjod pa'i phyir/ dbang bskur gtso bor gyur pas na/ /zhes bya ba gsungs te/ dbang bzhi po gtso bor gyur pa'i skyes pas gang zhig gang gi phyir ro//thams cad ces bya ba ni 'jig rten las 'das pa'i dngos grub ngo bo'i 'bras bu thob par byed pa'o/ /de'i phyir phyag rgya ma thams cad spang bar mi bya ba'i dgos pa zhes bya ba'i don to/ /paN+Di ta a lang+ka ka la sha de bas mdzad pa'i rnal 'byor chen po'i rgyud dpal rdo rje phreng ba'i rgya cher 'grel pa zab mo'i don gsal bar byed pa las le'u gnyis pa'i rgya cher bshad pa'o// //de ltar le'u gnyis kyis thun mong ba'i rgyud kyi don bshad nas/ da ni thun mong ma yin pa'i rgyud kyi don brjod par bya ba'i phyir/ de'i don du rdo rje phreng ba'i dri ba gsal ba rang gi ngo bo bcom ldan 'das kyi gsung la 'jug pa ni de nas zhes bya ba la sogs pa ste/le'u gnyis pa bshad pa'i rjes la/ gzhan yang zhes bya ba ni snga ma la ltos pas so/ /rdo rje phreng ba'i don gsal ba/ /zhes bya ba dang 'brel to/ /phyag na rdo rje khyod nyon cig /ces bya ba ni thos pa la sbyar ba'o/ /de ltar bcom ldan 'das kyi gsung la 'jug pa bshad nas/ da ni gtso bo'i don gyi ngo bo brjod par bya ba'i phyir/ rdo rje phreng ba zhes bya ba'i ming zhes gsungs te/ khyod kyi dri ba dang po gsal ba'i ngo bo de yang / sa ni bcu gsum pa zhes brjod de/ kun du 'od kyi sa la brjod de/ ji ltar sngar bstan pa bzhin du'o/ /mthar thug par gyur pa 'jig rten las 'das pa'i ye shes kyis rtogs par gyur pa'i rten nyid kyi phyir ro/ /ji skad du/ sangs rgyas thams cad brten pa dang / /sa 'di nyid kyang bcu gsum pa/ /de yang btsun mo zhes brjod de//de yi chos ni b+ha gar brjod/ /ces gsungs so/ /dga' ba bzhi ni don gyi gnas/ /zhes bya ba ni rnal 'byor chen po'i rgyud kyi dgongs pas mngon par byang chub pa'i rim pa dang / zung du 'jug pa'i ngo bo ste/ rnal 'byor ma'i rgyud kyi dgongs pas dga' ba bzhi'i ngo bo don gyi lhan cig skyes pa'i dga' ba'i mtshan nyid gsang ba'i rim pa'i ming gi rnam grangs nyid kyi phyir ro//thams cad stong pa zhes bya ba ni spros pa thams cad dang bral ba nyid kyi phyir ro/ /bde ba chen po zhes bya ba ni bde ba chen po dang rgyu mthun pa nyid kyi phyir ro/ /thabs dang shes rab snyoms 'jug pas//thob pa'i phyir ni bde ba che/ /zhes gsungs so/ /gzhan yang ngag gi spyod yul las 'das zhes bya ba ni gcig tu rnal 'byor pa'i spyod yul nyid kyis ngag gi spyod yul kun las 'das pa'i phyir ro/ /gnyis po thams cad rnam par spangs/ / zhes bya ba ni gnyis su med pa nyid kyis tha dad pa'i rnam par rtog pa las yang dag par 'das pa nyid kyi phyir ro/ /ji skad du/ gang la mtshams kyi mtha' ni gzi brjid 'jig med mun nag tshogs ni ma lus gang du 'das pa dang / /ji srid nyi ma shar du skad cig 'dir ni dri ma med pa yang dag mtha' ni bshad//slob ma la ni slob dpon gtso bo rab rib rnam par bcom pas phyi rol mngon par byang chub bstan/ /nang gi bde ba thob nas ci phyir mchog gi go 'phang sangs rgyas byang chub skad cig gis thob 'gyur/ /zhes gsungs so/ /skal bzangs rnal 'byor kun sogs kyi//zhes bya ba ni rnal 'byor kun ces bya ba bskyed pa'i rim pa nas brtsams nas rdzogs pa'i rim pa'i mthar thug pa rnams kyi mtha' ni 'od gsal dang zung 'jug gi ngo bo'o/ /des skal ba bzang po ni spangs pa dang ye shes phun sum tshogs pa gnyis dang yang dag par ldan pa nyid kyi phyir ro//de bzhin du/ rnal 'byor ma yi ngag gi yul/ /zhes bya ba ni rang nyid kyis tshad ma'i spyod yul ma yin pa ste/ ye shes mkha' 'gro ma'i zhal nas brgyud nas yul du gyur pa zhes bya ba'i don to/ /de ltar rnam pa gnyis kyis gtso bo'i don bshad nas/ da ni gtso bo ma yin pa'i don kun rdzob tu lhan cig skyes pa'i ngo bo nyid brjod pa'i phyir/stong nyid ye shes rdo rje dang / /zhes bya ba gsungs te/ rdo rje phreng ba'i sgras ni stong nyid ye shes rdo rje la brjod de/ khong stong nyid stong pa nyid kyi phyir ro/ /ye shes ni lhan cig skyes pa nyams su myong ba'i phyir ro/ / rdo rje ni rnam par rtog pa 'joms pa nyid kyi phyir ro/ /de ltar mdor bstan pa bshad nas/ da ni rgyas par bshad pa bstan pa'i phyir/ stong nyid rdo rje gsang pad rtsa/ /zhes bya ba gsungs te/ rdo rje gsang ba ni thabs kyi yan lag tu gyur pa'o/ /chu skyes ni lha mo'i pad+ma'o/ /de dag gi rtsa ni nang du stong pa nyid kyi rnam pa a ba d+hU tI'o//de nyid ni rdo rje dbyings kyi dbang phyug ma ste/ khams thams cad nye bar sdud par byed pas na gtso mo'o/ /mchog ces bya ba ni sgra gcan dang dus kyi me nye bar sdud par byed pa nyid kyi phyir ro/ /'dis ni de ma thag par bstan pa'i stong pa nyid kyi rgyas par bshad pa gsungs so//ye shes rgyas par bshad pa'i phyir/ /ye shes mchog tu bde ba che/ /zhes bya ba gsungs te/ mchog ces bya ba ni sdug bsngal thams cad 'joms par byed pa nyid kyi phyir ro/ /bde ba chen po zhes bya ba ni kun rdzob dang ni don dam pa'i ngo bo tha mi dad pa'i lhan cig skyes dga' zhes bya ba ni don gyis lhan cig skyes pa'i ngo bo'o//ngo mtshar ba zhes bya ba ni ngo mtshar ba dang bcas pa rgyu'i stobs kyis mngon par gsal ba nyid kyi phyir ro/ /rdo rje'i sgra bshad pa'i phyir/ rdo rje de yang rnam rtog rnams/ /zhes gsungs te/ rang bzhin gyi tshogs brgya drug cu po rnams bcom pa nyid kyi phyir ro//yongs su grags pa ni brjod pa'o/ /de yang rnam pa gnyis kyi byang chub kyi sems kyi stobs kyis 'gyur zhes bya ba'i don to/ /phreng ba de rnams kyi yang rgyun/ /zhes bya ba ni byang chub kyi sems kyi thig le rnams so/ /gang gis she na/ de'i phyir byang chub sems kyi zhes gsungs te/kun rdzob kyi'o/ /gang dang 'brel pa zhe na/ de'i phyir rdo rje can zhes gsungs te/ rdo rje can zhes bya ba ni de bzhin gshegs pa thams cad zhu ba'i bdag nyid can rdo rje'i sku can rnams zhes bya ba'i tha tshig go/ /de ltar rnam pa gnyis kyis kun rdzob pa'i lhan cig skyes pa brjod nas/da ni rnam par rtog pa'i rlung 'byed pa nyid kyis rdo rje phreng ba'i mtshan nyid brjod pa'i phyir bshad par dam bca' ba ni/ de nas gzhan yang zhes bya ba la sogs pa gsungs te/ rgyud thams cad rnam pa gnyis kyi byang chub kyi sems kyi ngo bo rdo rje phreng ba bshad pa'i rjes la/rdo rje phreng don sdom pa ni/ bshad par bya zhes bya ba dang 'brel to/ /rdo rje phreng ba'i don ni brjod par bya ba ste/ de'i sdom pa ni bsdus pa'i ngo bo/ /ji lta bu zhe na/ de'i phyir sbas pa ni zhes gsungs te/ rgyud thams cad du sbas pa zhes bya ba ni bya ba dang spyod pa la sogs pa rnams la ste/skal ba dang mi ldan pa rnams la bstan par bya ba ma yin pa nyid kyi phyir ro/ /gang yang rung la brjod mi bya/ /zhes bya ba ni dam tshig dang mi ldan pa rnams la brjod par mi bya'o/ /de ltar bshad par dam bca' ba bshad nas/ da ni rang gi ngo bo bstan pa'i phyir/mi phyed par ni zhes bya ba la sogs pa gsungs te/ rdo rje dang 'dra ba'i phyir rdo rje'o/ /des gzhan rnams 'byed par byed cing rang nyid dbyer mi phyed pa'i phyir ro/ /de ni dbugs su yongs su grags/ /zhes bya ba ni rnal 'byor rnam pa gsum la ltos nas/ sna rtse rnam pa gsum la thig le rnam pa gsum 'dzin pa'i ngo bo nyid kyi phyir ro//rdo rje de'i rdo rje bzlas pa la brten pa'i dbugs rnams kyi phreng ba'i rgyud ni rgyud do/ /ji lta bu zhe na/ de'i phyir nges pa zhes bya ba ni phyi rol gyi lo'i nang du chu tshod kyi grangs dang / nang du nyin mtshan gyi grangs de tsam gyis rnam par bcad pa'o//dga' ba rab bskyed bdag nyid can/ /zhes bya ba ni dbugs kyi 'khor lo nyams su myong ba'i rim pas dang / phyi dang nang gi bdag nyid can gyi thabs dang shes rab snyoms par 'jug pas/ dga' bzhi skyed par byed pa'o/ /rnam rtog rlung kun 'bigs par byed/ /ces bya ba ni 'khor lo'i grangs kyis skyes pa'i dbugs ni rlung thams cad brgya rtsa brgyad kyi dbye bas phye ba rnams la 'byed pa byed pa ni/rlung dang sngags kyi de kho na nyid kyi rim pas zhes bya ba'i don to/ /de nyid kyi rlung gis 'bigs par mi nus zhes gsungs te/ de nyid gzhan gyi dbang du gyur pa med pa'i phyir ro//rlung rnams la 'bigs pa zhes bya bar brjod de/ rlung rnams ni gang zhig yin snyam du mi shes nas de'i phyir/ nyin dang mtshan mo nges par ni/ /brgya dang brgyad lhag gas 'khar yang / /zhes gsungs te/ 'dir gdams ngag ni 'di yin te/ 'dir re zhig bcom ldan 'das kyis phung po dang dbang po'i rlung gi dbye bas rdo rje'i sgo zhes bya ba rnal 'byor chen po'i rgyud las rlung bcu po gsungs pa/ji skad du/ srog dang thur sel mnyam gnas dang / /gyen rgyu khyab byed ces bya dang / /klu dang rus sbal rtsangs pa dang / /lha sbyin dang ni nor rgyal lo/ /zhes gsungs so//de ltar na khyab byed ces bya ba'i rlung bcu pa bzhag nas dgu po yod par 'gyur te/ gang gi phyir de bya ba dang bral ba dang / lus thams cad la khyab par byed pa'o/ /de bas na de las gzhan pa'i dbus su tha dad pa nyid dang / bya ba dang ldan pa nyid kyis yongs su klog pa ma yin no//ji skad du/ lus kun la ni gnas pa'i rlung / /bya ba kun la 'jug pa ni/ /'di ni rnam snang ngo bo ste/ /'chi ba'i lus la 'byung bar 'gyur/ /zhes gsungs te/ de ltar 'di spangs pa'i dbugs dgu 'chad par 'gyur ba'i 'khor lo drug gi grangs kyis nyin par lnga bcu rtsa bzhi 'byung bar 'gyur ro//mtshan mo yang de nyid de gnyis ka bsdus nas brgya rtsa brgyad du 'gyur zhes so/ /yang na rnal 'byor ma'i rgyud kyi dgongs pas de rnams nyid khyab byed kyi rlung spangs pa'i rlung dgu po sprul pa la sogs pa'i 'khor lo bzhi'i dbye bas sum cu rtsa drug tu 'gyur ro/ / de rnams kyang 'jug pa dang / gnas pa dang / ldang ba yongs su brtags pas brgya rtsa brgyad du 'gro bar 'gyur zhes gsungs so/ /gsal bar yang zhes bya ba ni 'khor lo la sogs pa'i grangs so/ /rnam rtog rang bzhin rlung rnams ni/ /zhes bya ba ni rlung gi dbang gis rnam par shes pa'i yul rnams 'dzin pas 'byung ba'i rnam rtog rang bzhin brgya rtsa brgyad kyi grangs su rlung rnams kyang de tsam ste/de dang de rnams la 'char ba rnams la 'joms pa can ni rnam par bzlog pa'o/ /de bzhin du 'dir yang gdams ngag ste/ dang po nyid du rim pa lnga la brten nas/grangs la sogs pa'i rim pa rlung gi de kho na nyid du dang thig le'i ngo bo bsgom pas/ sngags kyi de kho na nyid dag ni thun phyed phyed kyi bar du rnal 'byor rnam pa gsum la ltos nas/ thig le gsum po rim pa bzhin du nye bar mtshon par byas nas/ phyi nas 'jug pa dang ldang ba dag la rim pa de nyid kyi a yig gi rnam pas gnas pa'i rlung la nges par sbyar nas de nyid du thig le'i ngo bo bsgoms pas/rlung phra mo'i nye bar mtshon nas de nyid du bskal pa 'am bskal pa stong gi bar du gnas par bya zhes bya ba'o/ /de ltar rdo rje phreng ba'i dri ba sel ba'i ngo bo bstan nas/mi mthun pa'i phyogs brjod pa'i yan lag gi rlung rnams kyi ngo bo bstan pa'i phyir/ rlung rnams kyi ming nyon cig ces gsungs te/ ming zhes bya ba ni 'chad bzhin pa'o/ /ji lta bar zhes bya ba ni slob ma la sogs pa'i dbye bas te rnam pa dgus so//rab tu dbye bas brgya rtsa brgyad kyi grangs kyis so/ /btang bzung dang zhes bya ba ni sprul pa'i 'khor lor gnas pa'i yang dag shugs kyi rtsa la brten nas de nyid kyi nam mkha'i sgo nas btang ba ni spro ba ste/ slar yang nang nyid du gzung bas na btang bzung ste/ srog gi rlung ngo / /dung phyur zhes bya ba ni shin tu shugs kyi rtsa la brten nas a dang ri dag gis rtogs pa zhes bya ba ni dung phyur te/rlung gnyis pa thur sel gyi rlung ngo / /myos pa dang zhes bya ba ni shin tu bzang ba'i rtsa la brten nas zos pa'i dngos po mnyam par byas nas chu'i rgyun ltar gcig tu byas pa'i las nyid kyi phyir myos byed kyi rlung gi mnyam gnas kyi rlung ngo //rtogs dka' zhes bya ba ni bzang por 'gro ba'i rtsa ba la brten nas/ steng du 'gro ba sdud par byed pa'i phyir dka' bas rtogs pas na/ /rtogs dka'i rlung ni gyen rgyu'i rlung ngo / /bsil byed dang ni zhes bya ba ni stobs chen gyi rlung la brten nas rnam pa gsum gyi gzugs kyi yul la bsil byed bzhin du 'gro bar byed pas na/bsil byed bzhin gyi rlung ngo / /g.ya' ba dang zhes bya ba ni mi bzad che'i rtsa la brten nas rnam pa gsum gyi sgra'i yul la slar yang nyan par 'dod pas g.ya' ba ma bzlog pa bzhin du g.ya' ba ni rnam par rgyu ba'i rlung ngo / /ngar snabs dang zhes bya ba ni mdzes chen gyi rtsa la brten nas dri rnam gsum gyi yul la ngar snabs bzhin du yongs su ma spangs pa nyid kyis yongs su shes pa'i phyir/ngar snabs ni yang dag par rgyu ba'i rlung ngo / /sta re dang zhes bya ba ni mdun du skyes pa che ba'i rtsa la brten nas ri'i yul gsum la sta re bzhin du 'dun pa log par skyed par byed pa na sta re rab tu rgyu ba'o//zegs pa zhes bya ba ni rgyags pa'i rtags kyi rtsa la brten nas reg bya rnam pa gsum gzung nas/ yongs su ngal ba'i phyir zegs pa ni nges par rgyu ba'i rlung ngo / /dza sha zhes bya ba ni chos kyi 'khor lo'i ze'u 'bru la myur du 'jug pa'i phyir dza sha ste/srog gi rlung nyid do/ /rnam par brtsigs dang zhes bya ba ni rin chen gyi rtsa la brten nas rlung dang bshang gci rnam par brtsigs pa rnams la skyug bro ba ster bar byed pa zlog par byed pa nyid kyis rnam par brtsigs pa ni thur sel gyi rlung ngo / /myos pa'i rtsod pa zhes bya ba ni pad+ma che'i rtsa la brten nas myos pa skyed par byed pa rnams la bza' ba dang bca' ba rnams la rtsod pa dang 'dra bas na rtsod pa ste/de'i rnam par rtog pa'i mi snang bar byas pas na myos pa rtsod pa ni mnyam gnas kyi rlung ngo / /rdo rje chen po'i rtsa la brten nas gyen du 'gro bas lus myos par byed pas na 'dod myos ni gyen du rgyu ba'i rlung ngo / / chu ba zhes bya ba ni stobs po che'i rtsa la brten nas/ gzugs kyi yul 'dzin pa la chu ba dang 'dra bas na chu ba la ster bar 'gyur ba'i phyir/ chu ba ni gyen du rgyu ba'i rlung ngo / /shi shu zhes bya ba ni mgo bo che'i rtsa la brten nas sgra'i yul la shi shu ltar 'gro bas na shi shu ni rnam par rgyu ba'i rlung ngo / /sna tshogs skyed ces bya ba ni sgra chen po'i rtsa la brten nas/sna tshogs pa'i lto ba na gnas pas dri la 'byung bar byed pas na/ sna tshogs skyed pa'i rlung ni yang dag par rgyu ba'i rlung ngo / /sdud pa dang zhes bya ba ni dga' ba chen po'i rtsa la brten nas khyad par du ro'i yul la 'byung ba'i phyir sdud pa ni rab tu rgyu ba'i rlung ngo //snyems dang zhes bya ba ni myos pa che'i rtsa la brten nas reg bya'i yul la longs spyod pas rnam par snyems par byed pa'i phyir snyems par nges par rgyu ba'i rlung ngo / /Ta dang zhes bya ba ni mgrin pa'i 'og tu me'i 'khor lo gru gsum pa la dbus dang lhan cig 'dud pa brjod par 'dod pas rtsa dbu ma la brten pa'i grangs kyi mdun dang g.yon pa dang g.yas pa'i nu ma gnyis kyi rtsa la brten nas gnyis yin pas na dgur 'gyur ro//de la dbus ma la brten nas sgra Ta bzhin du 'byung ba lnga ni srog gi rlung ngo / /sgra sgrogs zhes bya ba ni dri ma med pa'i rtsa la brten nas/ aM yig gi ngo bo'i sgra 'jug pas na sgra ni mnyam gnas kyi rlung ngo //rlung lha dang zhes bya ba ni gsal ba'i rtsa la brten nas thur du sel ba'i rlung 'jug pas na rlung lha ni thur du sel ba'i rlung ngo / /gnad ni rnam 'bigs dang zhes bya ba ni rdzogs pa'i rtsa la brten nas mgo bo'i nad la sogs pa la 'jug pas na gnad rnam par 'bigs pa ni gyen du rgyu ba'i rlung ngo //me dang zhes bya ba ni slar yang dri ma med pa'i rtsa la brten pa'i rlung 'jug nas me dang 'dra bar gyen du rgyu bas mig gi dbang po la brten pa'i rlung 'jug pas na me ni gyen du rgyu ba'i rlung ngo / /ci bgyid ces bya ba ni gsal ba'i rtsa la brten nas sgra'i yul la thos pa'i bya ba la ci bgyi bas na ci bgyi ba ni rnam par rgyu ba'i rlung ngo //rtsod pa zhes bya ba ni rdzogs pa'i rtsa la brten nas dri'i yul la rgyu mtshan du rtsod pa dang 'dra bar rtsod pas na rtsod pa ni yang dag par rgyu ba'o/ /a ma ra zhes bya ba ni nu ma g.yon pa'i rtsa la brten nas/byang chub kyi sems 'o ma'i ngo bo nyid kyis 'bab pas na a ma ra rab tu rgyu ba'o/ /mchog sbyin zhes bya ba ni nu ma g.yas pa'i rtsa la brten nas lus gtso bo'i nu ma la reg pa'i yul gyi mchog sbyin pas mchog sbyin te/ nges par rgyu ba'o/ /de yang me'i 'khor lo'i dbyibs kyi ngo bo rgya chen po'i thig le las bshad pa'o//tsu ta zhes bya ba ni longs spyod kyi 'khor lo'i dbus su ze'u 'bru la gnas pa lan gsum bskor ba'i rtsa la brten nas/ srog gi rlung tsu ta bzhin du 'jug pas tsu ta'i rlung ngo / /tsin tsi ri zhes bya ba ni longs spyod kyi 'khor lo'i shar gyi 'dab ma la gnas pa longs spyod kyi rtsa la brten nas thur sel gyi rlung ring du rgyu bar byed pas na/tsin tsi ri ni thur sel gyi rlung ngo / /zla ba'i thod ces bya ba ni longs spyod ster ba'i rtsa la brten nas gyen gyi zla ba longs spyod kyi 'khor lor gnas pa'i rkan gyi ngo bo mnyam pa'i rlung bskul bas lce'i rtse mor myang bas na zla ba'i thod ni mnyam gnas kyi rlung ngo //kaM bo rtse zhes bya ba ni longs spyod kyi 'khor lor gnas shing 'jigs ma'i rtsa la brten nas gyen gyi sgor rlung 'jug par byed pas na/ kaM bo rtse ni gyen du rgyu ba'i rlung ngo / /ral pa can zhes bya ba ni gsal ba'i rtsa la brten nas gzugs kyi yul rnam pa gsum dang 'dra bar 'dzin pas na/ral pa can gyen du rgyu ba'o/ /sgra ma zhes bya ba ni thal ba'i gdong gi rtsa la brten nas ro'i sgra rnam pa gsum nyan pa la 'khrugs pa'i phyir sgra can ma rnam par rgyu ba'i rlung ngo / /keng rus ma zhes bya ba ni bkres pa'i rtsa la brten nas ka te byang chub kyi sems rnam pa gsum dang rgyu mthun pa'i yul la kaM ni bskul bar byed pa ste/keng rus ma ni yang dag par rgyu ba'o/ /rus zhes bya ba ni bcud len ro'i rtsa la brten nas sgra rnam pa gsum la bskul bas na/ rus ni rab tu rgyu ba'i rlung ngo / /'gugs dang zhes bya ba ni rgyu ma'i rtsa la reg bya rnam pa gsum gyi yul 'gugs pa'i phyir rgyu ma ni nges par rgyu ba'i rlung ngo //smin mtshams kyi dbus su gnas pa'i rlung gi 'khor lo la ltos nas brjod par bya ste/ de la yang rang nyid rtsibs drug dang ldan pa nyid kyi phyir/ smin ma gnyis dang lhan cig brgyad de dbus ma dang lhan cig dgu zhes bya bar rnam par gzhag go//sdig pa dang zhes bya ba ni dbus ma'i gnas su smin mtshams kyi ngo bos btsugs pa nyid kyi phyir sdig pa ni srog gi rlung ngo / /g.yon can zhes bya ba ni rlung chen po'i rtsa la brten nas bshad pa la sogs pa ste bshad pa la sogs pa ni thur sel gyi rlung ngo / /bsil ba zhes bya ba ni bye ba 'khyil ba'i rtsa la brten nas steng du gnas pa'i khams mnyam par byed par byed pas bsil ba'i ngo bo nyid kyi phyir bsil ba ni mnyam gnas kyi rlung ngo //mdzes par 'gro ba zhes bya ba ni mi bzad pa'i rtsa la brten nas/ tshangs pa'i bu ga'i sgo nas mdzes par 'gro ba ni g.yon nas rgyu ba'i rlung ste/mdzes par 'gro ba ni gyen du rgyu ba'i rlung ngo / /mgrin pa dang zhes bya ba ni 'dzin byed ma'i rtsa la brten nas gzugs kyi yul khyad par sbom la rags pa'i phyir la kan+d+ha ra ni gyen du rgyu ba'i rtsa'o/ /thams cad ma zhes bya ba ni rnam par mi rtog pa'i rtsa la brten nas sgra'i yul thams cad la 'khrid pas na thams cad ma ni rnam par rgyu ba'i rlung ngo //mchog ster ma zhes bya ba ni rdzogs pa'i rtsa la brten nas dri'i yul la zhen pa bskyed nas phyir mchog ster ma yang dag par rgyu ba'o/ /smyo byed dang zhes bya ba ni g.yon pa'i smin ma'i mtshams kyi rtsa la brten nas ro'i yul la longs spyod pas smyo ba bskyed pa dang 'dra bas na/smyo byed ni rab tu rgyu ba'i rlung ngo / /nga rgyal 'tsho ma zhes bya ba ni g.yas pa'i smin ma'i mtshams su gnas nas reg bya'i yul la nga rgyal skyed par byed pas na 'tsho ba dang 'dra bar 'tsho bas nga rgyal 'tsho ni nges par rgyu ba'i rlung ngo zhes bya ba ni bde ba chen po'i 'khor lo la ltos nas brjod pa'o/ /tshogs bdag ces bya ba ni bde ba chen po'i 'khor lo'i dbus kyi gnas la brten nas byang chub kyi sems khyad par du khrid par byed pas na tshogs bdag ni srog gi rlung ngo //rtsangs pa dang zhes bya ba ni rim rigs kyi rtsa la brten nas rlung dang bshang gci gtsug phud bzhin du khyer bar byed pas na rtsangs pa ni thur ser gyi rlung ngo //sa'i blo zhes bya ba ni 'dod can ma ni rtsa la brten nas gnas pa'i rang bzhin can nor thams cad las khyad par du 'phags pa tshangs pa'i bu ga la blo gros ni 'dun pa'i mtshan nyid can gang la yod pa de ni sa'i blo ma ste mnyam gnas kyi rlung ngo / /theg pa bzang dang zhes bya ba ni 'dod can ma'i rtsa la brten nas gyen du rgyu ba la shin tu theg pa bzang ba gang la yod pa de ni theg pa bzang ste gyen du rgyu ba'i rlung ngo //mchog tu skyes zhes bya ba ni srog rnam par 'dzin pa'i rtsa la brten nas gzugs 'dzin pa ste/ kun nas ni rnam pa thams cad skyes pa'i phyir mchog tu skyes pa ni gyen du rgyu ba'i rlung ngo //dri ma zhes bya ba ni zla gdung gi rtsa la brten nas dri ma med pa'i sgra 'dzin pas na dri med ni rnam par rgyu ba'i rlung ngo / /glang chen phrug ces bya ba ni zla gter gyi rtsa la brten nas glang chen phrug gu ltar dri'i yul la 'dun pa dang bcas pa'i phyir glang chen phru gu ni yang dag par rgyu ba'i rlung ngo //nyi ma dang zhes bya ba ni mdzod ma'i rtsa la brten nas ro'i yul nyi ma bzhin du gsal bar byed pas na/ nyi ma ni rab tu rgyu ba'i rlung ngo / /gsal byed dang zhes bya ba ni 'dod can ma'i rtsa la brten nas/ reg pa'i yul la gsal byed nyid kyi phyir gsal byed ni nges par rgyu ba'i rlung ngo //de ltar nyin par 'khor lo drug gi rim pas rlung rnams kyi ming bstan nas/ mtshan mo yang de'i rim pas rgyu ba brjod pa'i phyir/ nyi ma gnon zhes gsungs te/ sprul pa'i 'khor lo gnas pa'i yang dag shugs kyi rtsa la brten nas nyi ma ltar gnon pa ni rnam par gnon pas 'gro ba'i ngang tshul gang la yod pa de ni nyi ma gnon te/srog gi rlung ngo / /stobs ster zhes bya ba ni shin tu shugs kyi rtsa la brten nas rlung dang bshang gci stobs byed pa rnams 'og tu byed pa'i phyir stobs ster ni thur sel ba'i rlung ngo / /nga ro dang ni zhes bya ba ni shin tu rtsa la brten nas nga ro ltar bza' ba la sogs pa rnams mnyam par byed pas nga ro ltar ni mnyam gnas kyi rlung ngo //dus zhes bya ba ni bzang por 'gro ba'i rtsa la brten nas dus ni dus te/ gyen du rgyu ba'i phyir/ dus ni gyen du rgyu ba'i rlung ngo / /sdom pa dang ni zhes bya ba ni sdom chen gyi rtsa la brten nas gzugs kyi yul la sdom pa'i phyir sdom pa ni gyen du rgyu ba'i rlung ngo //mchongs nas 'gro ba zhes bya ba ni mi bzod che'i rtsa la brten nas sgra'i yul la mchongs nas 'gro ba ltar byed pas mchongs nas 'gro ba ni rnam par rgyu ba'i rlung ngo / /sbrang ma zhes bya ba ni mdzes chen ma'i rtsa la brten nas dri'i yul la sbrang ma ltar myang bas na sbrang ma ni yang dag par rgyu ba'i rlung ngo //bskyod pa zhes bya ba ni mdun du skyes pa che'i rtsa la brten nas/ ro'i yul la rgyu zhing 'gro bas na bskyod ma ni rab tu rgyu ba'i rlung ngo / /'phyan pa zhes bya ba ni rgyags pa'i rtags kyi rtsa la brten nas reg bya'i yul la khyi bzhin du myur bar 'gro bas na 'phyan pa ste nges par rgyu ba'i rlung ngo //chos kyi 'khor lo la dgongs nas/ bsil dang zhes bya ba gsungs te/ chos kyi 'khor lo'i dbus kyi ze'u 'bru la bsil ba'i srog gi rlung 'jug par byed pas bsil ba ni srog gi rlung ngo / /sgur po zhes bya ba ni rin chen cod pan gyi rtsa la brten nas 'og tu rgyu ba'i ngang tshul gang la yod pa ste sgur po'i rtsa ni thur du sel ba'i rlung ngo //drang po dang zhes bya ba ni pad+ma che'i rtsa la brten nas/ bza' ba dang bcas pa la sogs pa drang por mnyam par byed pas na drang po ni mnyam gnas kyi rlung ngo / /sa dang zhes bya ba ni rdo rje chen po'i rtsa la brten nas rang bzhin du gyen du rgyu bar byed pas na sa ni gyen du rgyu ba'i rlung ngo //sa la 'gro ba zhes bya ba ni stobs po che'i rtsa la brten nas gzugs kyi yul 'gro bas na/ sa la 'gro ba ni gyen du rgyu ba'i rlung ngo / /bram ze dang zhes bya ba ni mgo bo chen po'i rtsa la brten nas bram ze ltar sgra'i yul la 'gro bas na/bram ze ni rnam par rgyu ba'i rlung ngo / /rnam 'gyur gnas zhes bya ba ni sgra chen po'i rtsa la brten nas dri'i yul la gnas pa'i phyir rnam 'gyur gnas ni yang dag par rgyu ba'i rlung ngo / /ma mo'i rigs dang zhes bya ba ni dga' ba chen po'i rtsa la brten nas ma mo'i rigs ni bud med kyi tshogs 'o byed pa'i ro'i yul nyams su myong ba'i don du skyes pa'i phyir bud med kyi rigs ni rab tu rgyu ba'i rlung ngo //lce bskyod pa zhes bya ba ni myos pa che'i rtsa la brten nas reg bya'i yul la shin tu yang bskyod par byed pa'i phyir lce bskyod ma ni nges par rgyu ba'i rlung ngo //me'i 'khor lo la ltos nas nges par brjod par bya ste/ mi smra ba dang zhes bya ba ni me'i 'khor lo'i dbus la brten nas shin tu phra ba nyid kyis srog gi rlung 'jug pa'i phyir mi smra ba ni srog gi rlung ngo / /rnga sgra'i sprin zhes bya ba ni dri ma med pa'i rtsa la brten nas sprin gyi sgra ltar thur sel gyi rlung 'jug pas na rnga sgra'i sprin ni thur sel gyi rlung ngo //dga' bar byed dang zhes bya ba ni gsal ba'i rtsa la brten nas bza' ba dang bca' ba la sogs pa mnyam par byed pas lus la dga' bar byed pas na dga' bar byed pa ni mnyam gnas kyi rlung ngo / /mig yangs dang zhes bya ba ni rdzogs pa'i rtsa la brten nas gyen du 'gro bas mig yangs pa'i phyir yangs pa'i ni gyen du rgyu ba'i rlung ngo //dri ma med ces bya ba ni mdud pa brjod par 'dod pas sngar yang dri ma med pa'i rtsa la brten nas gsal ba nyid kyis dri ma med pas gzugs kyi yul mthong ba nyid kyis dri ma med pa ni gyen du rgyu ba'i rlung ngo / /'od srungs zhes bya ba ni gsal ba'i rtsa la brten nas sgra'i yul la 'od srungs ni rnam par rgyu ba'i rlung ngo //ne tso zhes bya ba ni gang ba'i rtsa la brten nas/ ne tso bzhin du dri'i yul la mnyam par byed pas ne tso ni yang dag par rgyu ba'i rlung ngo / /sna tshogs mchu dang zhes bya ba ni g.yon pa'i nu ma la brten nas/byang chub sems kyi ngo bo'i ro sna tshogs pa'o/ /rnam pa sna tshogs mchu ni rab tu rgyu ba'i rlung ngo / /mi mnyam dang zhes bya ba ni g.yas pa'i nu ma la brten nas de'i yul nyid la 'dun pa dang bcas pa ni mi mnyam pa nyid kyi phyir nges par rgyu ba'o/ /longs spyod kyi 'khor lo la ltos nas brjod par bya ste/mdzes dang zhes bya ba ni longs spyod kyi 'khor lo'i dbus kyi ze'u 'bru la mdzes pa'i srog 'jug pa nyid kyi phyir mdzes pa'i rlung bzhin du srog gi rlung nyid do/ /chos kyi srog shing zhes bya ba ni longs spyod kyi rtsa la brten nas/ rlung la sogs pa thur du khyer bas chos 'dzin pa'i nus pa dang ldan pas lus la srog shin tu gyur pa nyid kyi phyir/chos kyi srog shing ni thur du sel ba'i rlung ngo / /kun du 'gro zhes bya ba ni longs spyod gter gyi rtsa la brten nas bza' ba la sogs pa mnyam par byed pa nyid kyis yul thams cad du 'gro ba nyid kyi phyir/ kun 'gro ni mnyam gnas kyi rlung ngo / /snying stobs zhes bya ba ni skal ba dang ldan pa'i rtsa la brten nas steng du 'jug pa la snying stobs ldan pa'i phyir snying stobs gyen du 'gro ba'i rlung ngo //brtan pa dang zhes bya ba ni nyid 'gro'i rtsa la brten nas/ gzugs kyi yul la brten pa nyid kyi phyir brtan pa ni gyen du rgyu ba'i rlung ngo / /za phod ces bya ba ni gnas gsal ba'i rtsa la brten nas/sgra'i yul la za phod pa'i phyir za phod ni rnam par rgyu ba'i rlung ngo / /bong bu zhes bya ba ni skal ba'i rtsa la brten nas dri'i yul la bong bu bzhin du 'gro bas na bong bu ni yang dag par rgyu ba'i rlung ngo / /snyom las dang zhes bya ba ni bsgom pa'i rtsa la brten nas/ ro'i yul la snyom las nyid kyi phyir snyom las ni rab tu 'bab pa'i rlung ngo //kha gdangs rtsod pa can zhes bya ba ni thal ba'i gdong gi rtsa la brten nas/ reg bya'i yul la kha gdangs pa dang 'dra bas na/ kha gdangs pa ni nges pa'i rgyu ba'i rlung ngo / /rlung gi 'khor lo la ltos nas brjod par bya ste/ sgra chen zhes bya ba ni rlung gi 'khor lo'i lte ba la sgra chen po'i ngo bos 'jug pas na sgra chen po ni srog gi rlung ngo //rtsod pa can zhes bya ba ni rlung chen po'i rtsa la brten nas/ rtsub pa'i rnam par bshang gci la sogs pa 'jug pa'i phyir rtsod pa can ni thur sel gyi rlung ngo / /rtsa bran dbang byed ces bya ba ni bre ba 'khyil ba'i rtsa la brten nas/bza' ba dang bca' ba la sogs pa'i yul la sgeg pas dbang byed ni de dang mnyam par byed pa la/ gzhan dbang nyid kyi phyir rtsa bran dbang byed ni mnyam gnas kyi rlung ngo / /g.yo sgyu can zhes bya ba ni mi bzad pa'i rtsa la brten nas/ gyen du 'jug pa g.yo sgyu can dang 'dra bas na/g.yo sgyu can ni gyen du rgyu ba'i rlung ngo / /rtsal po che zhes bya ba ni 'dzin pa zhes bya ba'i rtsa la brten nas gzugs kyi yul la khyad par du rtsal che ba'i phyir rtsal po che ni gyen du rgyu ba'i rlung ngo / /rtag tu dga' zhes bya ba ni rnam rtog med pa'i rtsa la brten nas rtag tu sgra'i yul la dga' ba ni rnam par rgyu ba'o//glog phreng zhes bya ba ni gang ba'i yul la brten nas dri'i yul la glog gi phreng ba bzhin du 'jug pas glog gi phreng ba ni yang dag par rgyu ba'i rlung ngo / /so sor rgyu ba zhes bya ba ni g.yon pa'i smin ma'i rtsa la brten nas ro'i yul la so sor rgyu ba'o//rtag pa zhes bya ba ni smin ma g.yas pa'i rtsa la brten nas/ reg bya'i yul la rtag par 'jug par byed pa'i phyir/ rtag pa ni nges par rgyu ba'i rlung ngo / /bde ba chen po'i 'khor lo la ltos nas brjod par bya ste/ ral gu zhes bya ba ni bde ba chen po'i 'khor lo'i ste ba la rtsa ma lus pa thams cad kun rdzob byang chub sems kyi srog 'jug pa'i phyir/ral gu ni srog gi rlung ngo / /lce dang ni zhes bya ba ni rim pa rigs kyi rtsa la brten nas/ byang chub sems kyi khu ba thur du khyer bas lce ni thur sel gyi rlung ngo / /bde mchog ces bya ba ni 'dod pa can gyi rtsa la brten nas mgo bo nas brtsams te/lus thams cad kyi tshigs kyi mthar thug pa byang chub kyi sems kyi sgo nas lus las sems ni bde ba bde mchog tu byed pas na bde mchog ni mnyam gnas kyi rlung ngo / /u dum+WA ra zhes bya ba ni 'dod chen ma'i rtsa la brten nas tshangs pa'i bu ga'i sgo nas gyen du 'gro bar byed pas u dum+WA ra dang 'dra bas na/rnal 'byor pas brgya lam nye bar mtshon pa'i phyir/ u dum+WA ra ni gyen du rgyu ba'i rlung ngo / /blun po zhes bya ba ni srog 'dzin pa'i rtsa la brten nas gzugs kyi yul la 'dzin pas gzhan du blun po dang 'dra bas na blun po ste/blun po ni gyen du rgyu ba'i rlung ngo / /dra ba can ni pad+ma bskor/ /zhes bya ba ni zla ba btung ba'i rtsa la brten nas sgra'i tshogs kyi yul la pad+ma bskor ba bzhin du shin tu dga' bas 'jug pa'i phyir/ dra ba can ni pad+ma bskor ba ni rnam par rgyu ba'i rlung ngo / /dgra sta zhes bya ba ni zla ster gyi rtsa la brten nas/dri ba'i yul spangs nas yul gzhan la rgyu ba sta re bzhin gcod par byed pas na dgra sta ni yang dag par rgyu ba'i rlung ngo / /rma bya zhes bya ba ni mdzod kyi rtsa la brten nas/ ro'i yul la tsa Ta ka ni rma bya bzhin te/ 'dun pa dang bcas pa'i phyir rma bya ni rab tu rgyu ba'i rlung ngo / /rlung dang ni zhes bya ba ni 'dod can ma'i rtsa la brten nas 'dod chags kyi gdung ba bsil bar byed pa'i phyir rlung ni nges par rgyu ba'i rlung ngo //de ltar ming rnams zhes bya ba ni rlung rnams kyi 'khor lo'i grangs kyis nyin mtshan gcig la brgya rtsa brgyad kyi grangs kyi ming ni tha snyad du byas pa gsungs te/ bdag gis so/ /rdo rje dbang phyug ces bya ba ni phyag na rdo rje la bod pa'o//de ltar rlung rnams kyi ming bstan nas/ da ni de rnams bskyed pa la rim pa rnam par gzhag pa brjod pa'i phyir/ de'i yan lag bcom ldan 'das la gsol ba gdab pa ni/ bcom ldan rdo rje can gyis gsungs/ /zhes bya ba ste/ rlung rnams kyis zhes bya ba ni de ma thag par bshad pa'o//ji lta ba'i gnas zhes bya ba ni bskyed pa'i gnas rnams so/ /dbye ba zhes bya ba ni rgyas par ro/ /gang las zhes bya ba ni gang gi phyir gnas gang las so/ /ldang ba ni skye ba'o/ /de dag ces bya ba ni rlung rnams te/ de ma thag tu bshad pa rnams so/ /bgyid pa lags zhes bya ba ni rgya cher grangs kyi dbye bas phye ba nyid de ltar de'i don du gsol ba 'debs pa bstan nas/da ni rang gi ngo bo brjod pa'i phyir de'i don du bcom ldan 'das kyi gsung la 'jug pa ni/ bcom ldan rdo rje can gyis gsungs/ /zhes gsungs te/ sngon du bshad zin to/ /rdo rje can zhes bya ba ni stong pa nyid kyi de kho na nyid mngon du byas pa'i phyir ro//tshig gnyis po 'dis bcom ldan 'das la spangs pa dang ye shes phun sum tshogs pa bstan to/ /rlung gi zhes bya ba ni sngon du bstan pa rnams la'o/ /gnas kyi mtshan nyid ces bya ba ni gnas las skye ba'i mtshan nyid do/ /de ltar bcom ldan 'das kyi gsung la 'jug pa bstan nas/gnas kyi rang gi ngo bo brjod pa'i phyir 'khor lo drug la khyab pa'i zhes gsungs te/ drug ni sprul pa dang / chos dang / me dang / longs spyod dang / rlung dang / bde ba chen po'i 'khor lo rnams su'o/ /khyab pa'i rlung zhes bya ba ni gcig pu nyid srog gi rlung gi rang bzhin no//chos kyi 'khor lo zhes bya ba ni snying ga'i gnas su rnam par shes pa dang lhan cig go/ /rtag tu gnas zhes bya ba ni 'chi ba'i mthar thug pa'i bar du'o/ /de'i phyir 'gro ba na/ de'i phyir srog ces bya ba gsungs te/ ji skad du 'chad par 'gyur ba las/ rab tu 'gro dang srog rtsol dang / / dbang po'i sgo yi lam nas ni/ /dus rtag tu ni rab tu 'gro/ /'dir ni srog ces bya bar brjod/ /ces gsungs so/ /ji lta bu zhe na/ de phyir 'gro ba khyab ces gsungs te/ 'gro ba ni g.yo ba'i bdag nyid can gyi lus la'o/ /las kyi stobs kyis de dang der skye ba'i gnas te/skye ba len pa'i phyir ro/ /rnam rtog med par zhes bya ba ni rang bzhin gyis bems po'i ngo bo nyid kyi phyir ro/ /thun phyed na zhes bya ba ni thun phyed kyi bdag nyid can te/ chu tshod bzhi'i bdag nyid can gyi phyir ro/ /shar nas zhes bya ba ni skye bar 'gyur ba'o/ /nam mkha' mchog las zhes bya ba ni lte ba'i dbus las so//yang na 'khor ba thog ma med pa nyid kyi 'jug pa la stong pa nyid kyi rten sems kyi rgyun gyi stobs kyis skye ba'i phyir ro/ /rang bzhin zhes bya ba ni ngo bo nyid kyis so/ /rlung ni 'joms par byed ces bya ba ni rlung gzhan yongs su spangs nas gnas pa nyid kyi phyir ro//yang na rlung gi de kho na nyid bsgoms pas rlung gzhan rnams 'joms par byed pa'o/ /dgu'i rnam par rgyu zhes bya ba ni de nyid lte ba nas 'byung ba'i srog ni rlung ngo / /dgu'i rnam par zhes bya ba ni phung po dang dbang po'i dbye bas rnam pa dgur 'gyur te/khyab byed kyi rlung de nyid kyi nang du 'dus pa'i phyir ro/ /rlung de zhes bya ba ni sngon du bshad pa'i mtshan nyid can no/ /chos kyi 'khor lo rtsa'i dbye bas rnam pa dgu'o/ /de nyid kyi phyir/ thun phyed dus nas brtsams nas ni/ /zhes gsungs te/ bstan bcos las grags pa'i chu tshod bzhi'i mthar thug par zhes bya ba'i don to//'jig rten pa la ltos nas thun ni dbyu gu brgyad kyi bdag nyid can no/ /'khor lo drug las zhes bya ba ni khyab byed kyi rlung spangs nas dgu dgu'i grangs kyi ngo bos nyin mo la 'khor lo drug la lnga bcu rtsa bzhir 'gyur ro/ /mtshan mo la yang de nyid de brgya rtsa brgyad du 'gyur ro//dgu bdag nyid can zhes bya ba ni dgu dgu'i bdag nyid can no/ /thun phyed kyi mtha' nyid du zhes bya ba ni dbyu gu bzhi'i mthar thug pa'o/ /rlung rnams kyang ni ldang bar byed/ /ces bya ba ni brgya rtsa brgyad kyi grangs kyis so/ /de ltar gnas kyi ngo bo bstan nas/'chad bzhin pa'i don gyis mtshams sbyor bstan pa'i phyir/ de nyid gnas kyi dbye ba yis/ /zhes gsungs te/ de nyid ni sngon du gsungs pa'i brgya rtsa brgyad kyi grangs rnams so/ /gnas kyi dbye ba yis zhes bya ba ni yul rnams 'dzin pa la mngon du phyogs pa'i mtshan nyid kyis so//sna tshogs pa'i rtog par 'gro zhes bya ba ni yongs su ma shes pa'i gnas skabs na/ rang bzhin gyi ngo bo nyid kyis nyon mongs pa'i grangs su 'gyur ba'o/ /de ltar rnam pa gsum gyi rang gi ngo bo bstan nas/ rang bzhin rnams kyi ming brjod pa'i phyir/ de dag ming rnams bshad par bya//zhes gsungs te/ de rnams zhes bya ba ni rnam par rtog pa rnams kyi'o/ /phye nas zhes bya ba ni rnam pa gsum gyi dbye bas rgyas par ro/ /ming rnams ni tha snyad du gyur pa ste/ bshad par bya ba zhes dam bca' ba'o/ /de ltar bshad par dam bca' ba bshad nas/rang gi ngo bo brjod pa'i phyir/ 'dod chags zhe sdang zhes bya ba la sogs pa gsungs te/ yul ma thos pa la yid la 'dun pa ni chags pa'o/ /byams pa med pa'i sems ni zhe sdang ngo / /ji lta ba bzhin du gnas pa'i dngos po'i rang bzhin shes pa dang bral ba nyid kyi sems ni gti mug go//rgyags pa dang zhes bya ba ni sems la yul mthong bas mtho ba'i ngo bo ni rgyags pa'o/ /nga rgyal zhes bya ba ni rtog pa khyad par can ma thob pa la bdag gis thob po snyam pa ni nga rgyal lo/ /mngon par zhen pa zhes bya ba ni khyad par du 'phags pa'i dngos po bdag gis ji ltar thob par 'gyur snyam du sems kyi rtog pa'i rnam pa'o//phrag dog ces bya ba ni gzhan gyi phun sum tshogs pa mthong na sems la mi bzod pa nyid do/ /khro ba zhes bya ba ni khong khro ba'i dbang gis sems la gnas skabs gzhan thob pa'o/ /ser sna zhes bya ba ni dngos po mi gtong ba'i blo'o//g.yo dang zhes bya ba ni rang gi skyon sbed pa'o/ /snyom las zhes bya ba ni sems kyis mi rig pa nyid brtson 'grus kyi mi mthun pa'i phyogs kyi chos so/ /nyam nga ba zhes bya ba ni sngon byas pa'i gnod pa nyams su myong bas sems gdung ba bskyed pa'o/ / blo rgod pa zhes bya ba ni sems dmigs pa la spro ba med pa'o/ /brkam chags nyid dang ni zhes bya ba ni sems mkho ba'i yo byad la sogs pa la zhen pa'o/ /gnyid ces bya ba ni gnyid do/ /the tshom zhes bya ba ni yid la som nyi za ba'o/ /ngar 'dzin dang zhes bya ba ni bag tsam rtogs pas sems la rgod pa'i khyad par ro//dga' dang zhes bya ba ni chags pa la sogs pa dang nye bar 'brel pa'i sems la chags pa'i khyad par ro/ /chags bral zhes bya ba ni yid du mi 'ong ba'i dngos po mthong bas sems la dga' ba med pa'o/ /dregs pa zhes bya ba ni nga rgyal sngon du 'gro ba'i sems kyi khyad par ro//'chab dang zhes bya ba ni sems la gnod pa mi brjod pa'i ngang tshul lo/ /sred dang zhes bya ba ni bdag gi dngos po dang longs spyod la sogs pa la zhen pa'i khyad par ro/ /bag chags dang zhes bya ba ni sems la nyon mongs pa phra mos gos par byed pa'o//sgyu dang zhes bya ba ni gzhan slu bar byed pa'i sems kyi gnas skabs can no/ /rmongs dang zhes bya ba ni khyad par can gyi yul la the tshom dang sdug bsngal gyis khengs pa nyid do/ /'dod chen dang zhes bya ba ni longs spyod la sogs pa'i yul la reg par 'dod pa'i blo'o/ / rtsod dang zhes bya ba ni mi sdug pa'i dngos po la mkhas pa nyid do/ /rtse 'jo zhes bya ba ni sems g.yo ba med pa nyid kyi khyad par du 'phags pa'i lus ngag gi bya ba'o/ /'dun pa zhes bya ba ni yul la 'dun pa'o/ /reg dang zhes bya ba ni yid kyi rgyal srid la sogs pa'i rnam par rtog pas lus dang sems la khyad par du reg pa bskyed pa'o//kun nas gdungs pa zhes bya ba ni yid du 'ong ba mthong bas/ lus dang sems gdungs pa'i bye brag go/ /rnam 'gyur zhes bya ba ni yid mi dge ba la mngon par phyogs pas yid la 'dra ba'i skad cig ma'i bskyed pa'o/ /ma zhi ba zhes bya ba ni dbang po nye bar ma bsdams pa'o//rlom pa nyid ces bya ba ni sems la snyom las kyi khyad par gyis khyab pa nyid do/ /log pa'i nga rgyal zhes bya ba ni khyad par can gyi rtog pa ma thob pa la bdag gis thob po snyam du sems pa'o/ /'gyod dang zhes bya ba ni bdag dang bcas pa'i dge ba la phyis 'gyod pa'o//khrel yod pa zhes bya ba ni gzhan la ltos nas kha na ma tho ba rnams la 'jigs pa nyid do/ /gus pa med dang zhes bya ba ni dge ba'i las la mi gus pa'o/ /yid ches med ces bya ba ni mtho ris dang thar pa'i yul la sems mi brten pa'o/ /blo dman pa zhes bya ba ni shes rab la ma byang ba'o//ngo tsha med dang zhes bya ba ni 'dod pa sngon du song bas sems kyi rnam par 'gyur ba'o/ /brlan pa nyid ces bya ba ni sems bu dang chung ma la mnyes gshin pa'o/ /ngo tsha shes dang zhes bya ba ni bdag nyid kyi yul la brten nas/ 'jigs pa la 'jigs par 'gyur ba'o//nyon mongs pa dang yang dag par sbyor ba nyid kyis nyon mongs pa'i nang du klog pa'o/ /ngo tsha dang zhes bya ba ni bdag nyid las lhag pa'i gang zag mthong nas rang nyid la mngon pa'i nga rgyal lhod pa nyid do/ /mi ster ba dang zhes bya ba ni snying rjes mi mthun pa'i phyogs kyi chos la yang dag par spyod pa'o//mya ngan zhes bya ba ni mdza' bo dang bral ba'i sems kyi bsam pa'o/ /yid gnyis zhes bya ba ni dge ba'i las la rgyab kyis phyogs pa'o/ /rlom sems med ces bya ba ni gzhan gyis byas pa'i phan pa la bgrang ba las 'das pa la sems la zhen pa'o//bsgribs dang zhes bya ba ni mi bden pa'i dngos po la 'bad pa byed par rtsom pa'o/ /the tshom zhes bya ba ni yid kyis gnyis ka la reg pa'o/ /ngal ba zhes bya ba ni lus dang sems kyis mi spro ba'i bye brag go/ /dbang dang zhes bya ba ni 'dod chags la sogs pa gzhan dbang ngo //'khrul pa snying po stobs zhes bya ba ni gzhan la skur ba 'debs pa'i dgongs pas 'khrul pa'o/ /dogs pa zhes bya ba ni ma brtags par sprad pa'i gnod pa la gzhan gyis de byas so snyam du mngon par rlom pa'o/ /brgyal ba zhes bya ba ni lus dang sems dag gis las 'ga' zhig la yang nus pa med pa'o//thim pa dang zhes bya ba ni sems la dmigs las 'og rgyu ba'i ngang tshul nyid do/ /'khrugs pa dang zhes bya ba ni snying rjes spangs pa'i sems kyi rgyun nyid do/ /gya gyu zhes bya ba ni sems kyi chos rnams gzhan la mi ston pa'o/ /smin dang zhes bya ba ni las byas pa la yang ma byas pas phyogs pas lus dang ngag gi rnam par rig pa la spyod pa'o//rjes su dran pa zhes bya ba ni sngar nyams su myong ba'i dngos po mi brjed pas so/ /rig byed ma yin pa zhes bya ba ni dang po nyid du byas pa'i dge ba dang mi dge ba dag la phyis mi byed pa'i dus yang de lta bu'i rgyun no//bag med pa zhes bya ba ni sems la rtse gcig pa nyid ma yin pa'o/ /gnas ngan len zhes bya ba ni sngon du byas pa'i bag chags kyi dbang gis de dang de'i rnam pa sad par rung ba nyid do/ /nyam chung zhing zhes bya ba ni nyon mongs pa mang ba la sogs pas dge ba la sogs pa'i bya ba rnams la mi spro ba'o//yid mi bde ba zhes bya ba ni sems sdug bsngal gyis 'khrugs pa nyid do/ /rtog pa zhes bya ba ni rnam par rtog pa rags pa la mngon du phyogs pa'o/ /skrag dang zhes bya ba ni 'jigs pa skyed par byed pa'i dngos po mthong nas de la sems rgyab kyis phyogs pa nyid do//rmugs dang zhes bya ba ni las su mi rung ba nyid do/ /gnyid dang zhes bya ba ni snyom las kyis yongs su khyab pa nyid la gnyid la mngon du phyogs pa'i dngos po nyid do/ /brkam chags zhes bya ba ni yo byad la sogs pa yongs su mi gtong ba'i blo'o/ /rtse ba zhes bya ba yid g.yeng ba sngon du 'gro ba can lus dang ngag gi bya ba rtse ba'i ngo bo'o//khrung khrung dang zhes bya ba ni sems la bskum pa'i gnas skabs so/ /'tshe ba zhes bya ba ni srog chags rnams gsad pa la sems pa'o/ /le lo zhes bya ba ni brtson 'grus kyi mi mthun pa'i phyogs dang lhan cig spyod pa'o//g.yan pa nyid ces bya ba ni nad kyi bye brag go/ /bsam dang zhes bya ba ni nges pa'i dngos po'i yul la bsam pas mngon par phyogs pa'o/ /dpyod dang zhes bya ba ni blos rnam par dbye bar bzod pa'o/ /zhum pa dang zhes bya ba ni gzhan gyis gnod pa lan mang du byas pa la slar gnod pa ma grub pas de mthong bas sems la mi spro ba'i rnam pa'o//kun rdzob de nyid ces bya ba ni rang gis byas pa'i sdig pa ngo tsha ba'i dbang gis gzhan la sbed pa'o/ /don yod dang zhes bya ba ni las byas pa la 'bras bu dang bcas par rlom pa'o/ /ster la dga' zhes bya ba ni longs spyod chung ba nyid kyis lus dang sems bde bar mi gnas pa nyid do//dga' ba gcig pu 'dod pa zhes bya ba ni bdag nyid bde ba la 'dun pa'o/ /'jigs dang zhes bya ba ni nyams su ma myong ba'i dngos po mthong bas so/ /'dar dang zhes bya ba ni 'jigs pa skyed par byed pa rkyen gyi stobs kyis lus 'dar ba'o//phra bdag nyid ces bya ba ni shin tu chung ba nyid do/ /gsal dang zhes bya ba ni sems yang ba nyid do/ /rnam gsal zhes bya ba ni rang gi sems kyi chos rnams gzhan la ston pa'o/ /lhung 'jug pa zhes bya ba ni sbyang ba nyid kyis gzhan la dgongs nas tshig gzhan brjod pa'o//ma 'brel dang zhes bya ba ni ci yang rung ba smra ba nyid do/ /rtag pa'i de nyid dang zhes bya ba ni 'jig tshogs kyi lta bas mngon par zhen pa'o/ /dka' ba'i khur zhes bya ba ni 'dod pa che ba nyid do/ /ngoms med ces bya ba ni yang dang yang du yul la 'dun pa'o/ /gnod pa dang zhes bya ba ni gzhan la gnod pa 'jug pa'i sems so//mi gsal ba dang zhes bya ba ni dge ba chung ba la yang mngon du gyur pa med pa nyid do/ /yid du 'ong zhes bya ba ni longs spyod che ba nyid kyis dma' ba med pa nyid do/ /gnas med ces bya ba ni sems g.yo ba dang bcas pa'o/ /'dod pa zhes bya ba ni gcig tu ma thob pa'i longs spyod thob par 'dod pa'o//ngo mtshar skyes bu nyid dang ni/ /zhes bya ba ni ngar 'dzin pa nyid kyis nga rgyal dang bcas pa nyid do/ /ya mtshan zhes bya ba ni sna tshogs pa'i gtam thos pas 'di ni ci zhig yin snyam du ngo mtshar du gyur pa'o/ /chog ces bya ba ni 'dod pa'i dngos po mthong bas yid dga' ba'o//skye bo ngan pa zhes bya ba ni skye bo dam pa'i mi mthun pa'i phyogs so/ /dman pa'i de nyid ces bya ba ni ji ltar gnas pa'i ngo bo mi shes pa'i phyin ci log go/ /sdug bsngal gsum zhes bya ba ni sdug bsngal gyi sdug bsngal dang / rnam par 'gyur ba'i sdug bsngal dang / 'du byed kyi sdug bsngal gyi dbye bas so/ /yang na las dang / nyon mongs pa dang / skye ba'i sdug bsngal lo/ /srid pa la ni chags pa dang / /zhes bya ba ni khams gsum na gnas pa la sred pa'o/ /'di rnams zhes bya ba ni rang bzhin gyis ngo bo'i rnam par rtog pas gnas so/ /rtag tu zhes bya ba ni dus thams cad du'o//brgya dang brgyad lhag pa zhes bya ba ni brgya rtsa brgyad do/ /nyin dang mtshan mo zhes bya ba ni rlung bzhin du'o/ /nges pa zhes bya ba ni nges par ro/ /rang bzhin rlung gi mtshan nyid yin/ /zhes bya ba ni rnam par rtog pa'i rlung gi mtshan nyid do/ /paN+Di ta a lang+ka ka la sha de bas mdzad pa'i rnal 'byor chen po'i rgyud dpal rdo rje phreng ba'i rgya cher 'grel pa zab mo'i don gsal bar byed pa zhes bya ba las le'u gsum pa'i rgya cher bshad pa'o// //de ltar le'u gsum pas rdo rje phreng ba'i yul la dri ba gsal bar bstan nas/ da ni gsang ba 'dus pa'i yul la dri ba gsal ba brjod pa'i phyir//de'i dri ba'i lan gdab pa bshad par rtsom pa ni de nas rdo rje gsum nyi mas zhes bya ba la sogs pa gsungs te/ de nas zhes bya ba ni le'u gsum pa bshad pa'i rjes la'o/ /bcom ldan 'das rdo rje gsum gyi nyi mas gsang ba 'dus pa'i don bshad ces bya ba dang 'brel to//rdo rje gsum ni sku gsung thugs rdo rje ste/ de rnams kyi bsdu ba ni rdo rje gsum mo/ /de nyid ni rdo rje ste rdo rje gsum gyi nyi ma'o/ /mi mthun pa'i phyogs thams cad mun pa 'joms pa nyid kyi phyir rdo rje gsum gyi nyi ma ni rdo rje 'chang ngo / /ji lta bu zhe na/ de'i phyir/gsang snying pad+ma kha 'byed pa/ /zhes gsungs te/ gsang ba ni sba bar bya ba'o/ /pad+ma ni lha mo'i pad+ma ste/ de rtogs par byed pa ni rab tu sad par byed pa ste/ rdo rje las spros pa'i 'od zer gyi tshogs kyis zhes bya ba'i don to/ /ji ltar phyi rol du nyi ma shar bas mtsho skyes kha 'byed par 'gyur ro//de bzhin du bcom ldan 'das kyi nyi ma'i 'od zer rnams kyis gsang ba'i chu skyes kha 'byed par 'gyur zhes rtogs par bya'o/ /gsang ba 'dus pa ji lta bu zhe na/ de'i phyir de nyid mchog ces bya ba gsungs te/ mthar thug pa'i mi gnas pa'i mya ngan las 'das pa zung du 'jug pa'i ngo bo nyid kyi phyir ro//rdo rje nyi ma ji lta bu zhe na de'i phyir/ bde ba chen po'i go 'phang bzhugs/ /zhes gsungs te thabs dang shes rab snyoms par 'jug pas 'dod chags kyi spyod pa can gyi sems can rnams kyi yul la de ltar snang ba nyid kyi phyir ro/ /de ltar gsang ba 'dus pa'i don gyi yul la dri ba'i lan btab pa rtsom pa bshad nas dngos su de'i lan gdab pa brjod pa'i phyir/de'i yan lag rtsa ba'i 'dus pa bshad pa ni 'dus pa'i 'dres pa zhes gsungs te/ rgyud bshad pa'i dus na nam mkha'i khams de bzhin gshegs pa dang / lhan cig spyod ma dang / rjes su spyod ma dang /byang chub sems dpa' dang / khro bo'i gzugs kyis yongs su gang ba ni rtsa ba'i 'dus pa zhes brjod de/ ji skad du/ rtsa ba'i rgyud las/ 'dus pa 'dres pa zhes ni bshad/ /sangs rgyas sku ni rjod byed pa/ /zhes gsungs te/ de bzhin du bskyed pa'i rim pa la ting nge 'dzin gsum bsgom pa'i rim pa'i dkyil 'khor rdzogs pa ni 'dus pa zhes brjod do//de bzhin du ting nge 'dzin gsum gyi yan lag ni rnal 'byor dang / rjes su rnal 'byor dang / shin tu rnal 'byor dang / rnal 'byor chen po la sogs pa rnams ji ltar rigs par sangs rgyas thams cad 'dus pa'i ngo bo gsang ba 'dus pa'o don rtogs par byed pa'o//de bzhin du rim pa lngar yang thabs dang thabs las byung ba'i dbye bas gsang ba 'dus pa'i don rtogs par bya'o/ /'dres pa nga yis khyed la bshad par bya/ /zhes bya ba ni phyag na rdo rje khyod la 'chad par 'gyur ba'i rim pas zhes bya ba ni tshig gi lhag ma'o//de ltar rtsa ba'i 'dus pa bshad nas/ gnas skabs kyi 'dus pa brjod pa'i phyir/ de'i yan lag rnal 'byor ma'i rgyud kyi rjes su 'brangs nas/ gsang ba 'dus pa'i don brjod pa'i phyir/ 'khor lo bzhi rnams tha mi dad/ /ces gsungs te/ sprul pa dang / chos dang / longs spyod dang / bde ba chen po'i 'khor lo rnams dang / sngags rnams dang / lhan cig tha mi 'dus pa zhes ni gsungs/ /zhes bya ba dang 'brel to/ /de la re zhig sprul pa'i 'khor lo ni rtsa 'dab ma drug cu rtsa bzhi pa'i bdag nyid can la dbyangs yig bcu drug la thabs dang shes rab kyi dbye bas rnam pa gnyis su dbye ba byas nas dbyangs yig sum cu rtsa gnyis su 'gyur ro//ka la sogs pa gsal byed sum cu rtsa bzhi la ra dang k+Sha gnyis spangs nas sum cu gnyis gzung bar bya ste/ de rnams ni sprul pa'i 'khor lo la dgod par bya'o/ /de bzhin du chos kyi 'khor lo'i dbus su yi ge hUM yig go//'dab ma rnams la b+h+rUM AM dzr-I khaM ngo / /mtshams rnams su laM maM paM taM zhes dgod par bya'o/ /longs spyod kyi 'khor lo'i 'dab ma bcu drug la dbyangs yig bcu drug po dgod par bya'o/ /yang na nag po spyod pa pa'i bzhed kyis dbus su oM yig go//phyogs kyi rtsa 'dab ma bzhi la a i u e zhes bya'o/ /bde ba chen po'i 'khor lo rtsa 'dab ma sum cu rtsa gnyis kyi dbus la haM yig gzhom du med pa'o/ /'dab ma rnams la A li nyis 'gyur sum cu rtsa gnyis so/ /g.yon pa dang g.yas pa'i rtsa la ji ltar rigs par dbyangs bcu gnyis po rnams kha gyen du blta bas kal sogs pa'i gsal byed nyi shu rtsa bzhi pos logs gnyis la bskor ba byas nas/de rnams kyi steng du ma'i yi ge thig le'i ngo bos bsgom par bya'o/ /g.yon pa'i rtsa la g.yas pa'i rtsa'i mtshan nyid dang bral bas dgod par bya'o/ / 'og dang steng du ra dang k+Sha yig dag dgod par bya'o/ /de ltar mdor bsdus nas 'khor lo bzhi grub pa'i mtha'i rjes su 'brangs nas sngags kyi rim pa'i ngo bo bsdus pa'i don bshad do/ /de nyid gsungs pa ni cho ga bzhin zhes bya ba ste/ gdams ngag gi rjes su 'brangs nas zhes bya ba'i tha tshig go/ / 'khor lo drug pa sngags sbyor ba/ /'dus pa zhes ni brjod pa yin/ /zhes bya ba ni sngon du gsungs pa'i 'khor lo bzhi'i steng du longs spyod kyi 'khor lo'i 'og tu me'i 'khor lo gru gsum pa'i dbus su sha yig go/ /zur gsum po rnams su sha sa ha rnams so/ /grub pa'i mtha' kha cig las/ya ra la wa 'am yang na r-i l-i r-I l-I rnams te/ de rnams ni sreg pa'i sa bon nyid kyi phyir ro/ /de'i rjes su bde ba chen po'i 'khor lo'i 'og gi smin ma'i dbus su rlung gi 'khor lo'i rtsibs drug pa'i dbus su ka yig go/ /rtsibs drug po la tsa Ta ta pa ya sha rnams g.yon skor gyi rim pas dgod par bya'o//de nyid gsungs ni sngags sbyor ba/ /zhes gsungs te/ lhag ma ni snga ma bzhin no/ /'dus pa zhes bya ba ni sangs rgyas thams cad kyi sa bon bkod pa'i ngo bo'o/ /brjod pa yin zhes bya ba ni dpal bde mchog dang dgyes rdor la sogs pa rnams la zhes bya ba'i don to/ / de ltar sngags kyi rim pas 'dus pa'i don brjod nas/ rgyud kyi rim pas brjod pa'i dpa' bo rnal 'byor ma sbyor ba zhes bya ba gsungs te/ dpa' bo ni thabs te/ rnam par rtog pa rnams la mi 'jigs pa'i phyir dpa' bo nyid do/ /rnal 'byor ma ni dam tshig gi phyag rgya ste/ dpa' bo yang yin la rnal 'byor ma yang yin pas na dpa' bo rnal 'byor ma'o//de dang yang dag par sbyor ba ni 'brel pa'o/ /'dis ni rgyud kyi rim pa'i thabs phyi rol gyi thabs shes rab dang snyoms par 'jug pa'i mtshan nyid gsungs so/ /yang na dpa' bo ni g.yas pa'i rtsa ste/ thabs kyi rang bzhin nyid kyi phyir ro//rnal 'byor ma ni g.yon pa'i rtsa ste/ shes rab kyi rang bzhin nyid kyi phyir ro/ /de dag dang yang dag par sbyor ba ni phan tshun du sbyor ba'o/ /'dis ni nang gi thabs shes rab kyi snyoms par 'jug pa'i ngo bo rgyud kyi rim pa'i thabs gsungs so/ /gsang ba'i rtsa gnyis ni rdo rje dang pad+ma'i rtsa gnyis so//gang gi tshe zhes bya ba ni gang la'o/ /yang dag sbyor bas zhes bya ba ni phan tshun snyoms par 'jug pa'i ngo bos so/ /reg 'gyur ba zhes bya ba ni khams bzhi'i rnam pas so/ /de ltar yang / dang po phrad pa'i gnas skabs su sra ba'i ngo bos rig pa'o/ /de'i rjes la gsher bas nyams su myong ba gnyis pa'o//dro bar gyur pa ni gsum pa'o/ /byang chub kyi sems 'gro ba dang 'ong ba la sogs pa'am mtshan ma gnyis bskyod pa la sogs pa ni bzhi pa'o/ /de tshe zhes bya ba ni de'i dus na'o/ /nam mkha' zhes bya ba ni rnal 'byor ma dag gi lte bar gnas pa'i nam mkha' la'o//rnam rgyas nyid ces bya ba ni rgyas pa nyid du 'gyur ba'o/ /nam mkha' las ni skyes pa'i rlung / /zhes bya ba ni lte ba'i nam mkha' las so/ /las kyi rlung gi rang bzhin no/ /des zhes bya ba ni las kyi rlung gis so/ /me ni zhes bya ba ni ye shes kyi me'i rang bzhin no/ / rab tu 'bar zhes bya ba ni du ba la sogs pa'i rtags 'byung ba sngon du 'gro bas 'bar zhing gsal ba'i rnam pas bskyed par 'gyur ba'o/ /rtsa ni stong phrag bdun cu rtsa gnyis zhes bya ba ni de tsam gyi grangs kyis yongs su bcad pa'i rtsa 'khor lo bzhi'am/ 'khor lo drug tu gtogs pa rnams la'o/ /rab sad ces bya ba ni/kha cig la ni sreg pa 'byung / /kha cig tu ni lan gsum bskor/ /kha cig la ni reg pa tsam/ /kha cig la ni mdud pa 'grol/ /zhes bya ba la sogs pa'o/ /'di skad du brjod pa ston par 'gyur te/ phyi rol gyi phyag rgya dang snyoms par zhugs pas sam/nang gi bdag nyid kyi thabs shes rab dang snyoms par zhugs pas las kyi rlung gis bskul ba'i ye shes kyi me sprul pa'i 'khor lo nas a yig gi dbyug pa bcag pa sngon du 'gro bas yang dag par 'byung zhing ma lus pa'i sngags kyi tshogs mi snang bar byas nas rna ba g.yas pa dbu rgyan zhes bya ba ni rnam grangs gzhan gyi phyir byung ste/sems can thams cad kyi rgyud la yang de ltar bsgrubs nas so mtshams kyi nang na gnas pa'i rtsa'i gnas nas nang du zhugs te/ slar yang sprul pa'i gnas de nyid ngal so bar byed cing snang ba mi 'gyur te/ skra'i rtse mo brgya stong du gshegs pa'i cha'i tshad tsam gyi phyir zhes bya ba'o//de ltar rgyud kyi rim pas gsang ba 'dus pa'i don bstan nas ye shes kyi 'bras bu zhes bya ba ni/ las ni dge ba dang mi dge ba la sogs pa'o/ /de'i 'bras bu ni 'dod pa dang mi 'dod pa la sogs pa'o/ /myong zhes bya ba ni rnam par shes pa'am skyes bu'o//gzhan nyid du ni zhes bya ba ni dbang phyug la sogs rnam par shes pa rlung dang bcas pa spangs nas so/ /sa steng na ni zhes bya ba ni 'jig rten 'di na yod pa ma yin te/ de la sgrub byed kyi tshad ma med pa'i phyir dang / gnod byed kyi tshad ma yod pa'i phyir ro/ /rnam par shes pa yang rang rig pa nyid kyis sgro btags pa'i rgyu dang rgyu med pa spangs nas/'os pa'i rgyu bag chags la sogs pa la ltos nas/ khams gsum du 'khor la skyon gang yang med do/ /de ltar yongs su ma shes pa'i gnas skabs la rnam par rtog pa rab tu bskyed pa bstan nas/ de'i nye bar bsdu ba brjod pa'i phyir/ de'i phyir zhes bya ba la sogs pa gsungs te/ gang gi phyir rlung gi shing rta la zhon pa de dang de'i yul rnams kyi bag chags kyi dbang gis 'khor bar 'khor ro/ /de'i phyir/ thig le'i dbye ba go 'phang bsgom par bya/ /zhes bya ba dang 'brel to/ /ci'i phyir zhe na/ de'i phyir 'khor ba gzhom zhes bya ba gsungs te/bag chags kyi dbang gis slar skye ba bzlog pa'i don du'o/ /gsal bar zhes bya ba ni sgra'i sgo nas ma brjod kyang bla ma'i zhal 'ba' zhig gis rtogs par bya'o/ /'bad par bya zhes bya ba ni 'chad par 'gyur ba'i sngags kyi de kho na nyid sgom pa pos so/ /ma rig gzhan ni mi shes pa/ / zhes bya ba ni sngags kyi de kho na nyid la sgom pa po ste/ sngar bshad pa'i rigs pas zhes bya ba'i don to/ /ma rig gzhan ni mi shes pa/ /zhes bya ba ni rdzogs pa'i rim pa sgom pa po'i rnal 'byor pas so/ /ma rig gzhan ni zhes bya ba ni lhan cig skyes pa 'am mngon par 'dus byas pa'i ngo bo yod pa ma yin te/de'i bskyed pa'i rim pa bsgoms pas/ de spangs pa nyid kyi phyir ro/ /gal te de ltar ma yin na/ ma rig pa gzhan gang yin zhe na/ de'i phyir dbus kyi mdud pa zhes gsungs te/ snying ga'i nam mkha'i dbus su rtsa lnga lnga'i rtsa'i nang du'o/ /mdud pa zhes bya ba ni rang bzhin gyis grub pa'i 'ching ba'o//de nyid ni ma rig pa zhes brjod/ de'i stobs kyis rlung dang sems kyi rang bzhin yongs su ma shes pa nyid kyi phyir ro/ /de phye nas zhes bya ba ni sngar bshad pa dang / 'chad par 'gyur ba'i rigs pas mdud pa phye ba'i phyir ro/ /dngos grub 'gyur zhes bya ba ni rlung dang dbang can du 'gyur bas zhes bya ba'i don to//rnal 'byor zhes bya ba ni rlung gi de kho na nyid sgom pa po rnams la'o/ /rnal 'byor dngos grub ster zhes bya ba ni sems rtse gcig pa'i rgyu nyid du gyur pa'i phyir ro/ /de ltar de sdud pa bstan nas/ de'i phan yon brjod pa'i phyir/ /ye shes lnga rnams thob nas ni//zhes gsungs te/ rlung lnga po rnams la de bzhin gshegs pa lnga'i ngo bo nyid du yongs su shes pas mngon par shes pa lnga 'thob pa'o/ /gyen du rgyu ba'i rlung la sogs pa rlung lnga po rnams la/ de bzhin gshegs pa rnams dang rjes su spyod pa nyid kyis lhag par mos pas lha'i mig la sogs pa rab tu 'byung bas so//mchog tu gsal ba thob nas ni/ /zhes bya ba ni rlung gi de kho na nyid mthar phyin nas/ rdo rje bzlas pa'i go 'phang thob pas so/ /ji ltar 'dod pas bde bar gnas/ /zhes bya ba ni rang nyid kyis rgas pa'i phung po yongs su spangs nas/ mthong ba'i chos nyid la gzhan gyi grong 'jug thob pa'i phyir ro/ /de nyid kyi phyir bde ba zhes bya ba gsungs te/ ji ltar 'dod pas so/ /de ltar rnam pa bdun gyis de rgyas par bshad pa bstan nas da ni de la mkho ba'i don brjod pa'i phyir de'i yan lag phyi rol gyi nges pa spangs nas/thig le'i dbye ba'i thabs ni phreng ba mi dgos zhes bya ba la sogs pa gsungs te/ phyi rol gyi mi rus la sogs pa'i phreng ba la sogs gzung bar mi bya ste/ rang bzhin gyis grub pa'i dbugs kyi 'khor lo la nges pa'i ngo bo nyid kyis bgrangs pa grub pa'i phyir ro/ / bsam gtan mi dgos zhes bya ba ni bris sku la sems 'dzin pa la sogs pa rnams la ste/ rang nyid kyi rlung gi de kho na nyid bsgom pa la mngon du phyogs pa nyid kyi phyir ro/ /bya ba mi dgos zhes bya ba ni khrus lan gsum byed pa dang / gos lan gsum du brje ba la sogs pa'i ngo bo ste/ sngags kyi de kho na nyid kyi sgo nas rlung gi stobs kyis skyes pa'i gnyis su 'dzin pa'i rnam par rtog pa bkrus pa nyid kyi phyir ro/ /yang na bya ba mi dgos zhes bya ba ni zhi ba la sogs pa'i las bsgrub pa'i mtshan nyid can ma yin te/ phyi rol gyi rdzas spangs nas 'bad pa med pa'i phyir ro/ /ji skad du/sa yi don gyis gang ci'ang rung / /dngos grub 'dod pas bya ba nyid/ /ra la sogs pa gsum nyid kyis/ /'gro ba'i don la 'jug par bya/ /zhes gsungs so/ /'dzin mi dgos zhes bya ba ni sems kyi 'jug pa 'gog pa'i rnam pa ma yin te/ dbang po'i rgyu ba btsan thabs ma yin par mi sdom pa nyid kyi phyir ro//gal te de ltar yin na thig le ji ltar gzung bar bya zhe na/ de phyir sngags kyi de nyid gcig pu yis/ /zhes gsungs te/ 'chad bzhin pa'i bsdus pa'i hUM yig dang ho yig gi ngo bo'i rnam pas so/ /yang dag rdzogs pa'i sangs rgyas 'thob/ /ces bya ba ni thig le'i dbye ba'i mdud pa'i mtshan nyid mdud pa gcod par byed pa ste/zla ba drug tu bsgoms pas zhes bya ba'i don to/ /las chos dam tshig ces bya ba la sogs pa ni las kyi phyag rgya ni las tsam la nye bar mkho ba'i phyag rgya'o/ /chos zhes bya ba ni byang chub kyi sems 'dzin pa'i rgyur gyur pa'i phyag rgya'o/ / dam tshig phyag rgya yi zhes bya ba ni dbang bskur ba thob pa legs par 'du byed pa'o/ /de lta bur gyur pa'i phyag rgya'i dbye ba'o/ /'dir ni zhes bya ba ni thig le'i dbye ba'o/ /ma gsungs so zhes bya ba ni nye bar ma brjod pa'o/ /de la de rgyu nyid du ma gyur pa'i phyir ro/ /yang na las kyi phyag rgya ni lag pa'i phyag rgya la sogs pa 'ching ba'o//chos kyi phyag rgya ni snying ga la sogs par sngags kyi yi ge la sogs pa bsgom pa'o/ /dam tshig gi phyag rgya zhes bya ba ni rigs kyi mtshan ma la sogs pa 'dzin pa'o/ /de lta bu'i rnam pa'i phyag rgya'i dbye bas ma gsungs pa ni snga ma bzhin no/ / 'khor lo'i dbye bas ma yin zhing / /zhes bya ba ni 'dir ni thig le'i dbye bas so/ /'khor lo drug dang / 'khor lo bzhis rnam par dbye ba dang / /rtsa'i grangs dang sngags kyi grangs kyis ni ma yin no/ /de bzhin dga' ma la sogs rim/ /zhes bya ba ni phyag rgya'i rim pa de'i yan lag ma yin pa'i phyir dang /phyag rgya'i rim pa la brten nas kyang dga' ba la sogs pa'i rnam par dbye ba mtshon pa'i phyir ro/ /gal te de ltar yin na/ de rnams thams cad bkag pa la thabs ji lta bus bsgrub par bya ba de ni thig le'i dbye ba'o snyam du dgongs nas de'i phyir sngags kyi de kho na nyid kyis ni 'thob ces gsungs te/'chad bzhin pas so/ /phyag rgya chen po'i go 'phang zhes bya ba ni thig le'i dbye ba'i ngo bo'o/ /gsal zhes bya ba ni rnal 'byor gyi mngon sum la snang ba'i phyir ro zhes bya ba'i don to/ /de ltar phyi rol gyi nges pa spangs pa la thig le'i dbye ba'i thabs brjod nas/thabs las byung ba'i rnam grangs brjod pa'i phyir/ stong nyid ye shes rdo rje dang / /zhes bya ba gsungs te/ mdud pa bzlog pas rlung gnyis po ro gcig pa'i dngos po'i ngo bos rnam par rtog pa'i rlung rgyu ba bzlog nas/ stong nyid ye shes 'jug pa'i rnam par shes pa la sogs pa'i rdo rje ni yul la mngon par zhen pa bzlog pas ye shes rdo rje'o//de nyid ces bya ba ni rlung gi rang bzhin thob pas so/ /gnyis med ces bya ba ni mdud pa 'gag pas steng dang 'og tu mi mnyam pa'i rgyu ba med pa'i phyir ro/ /bde ba'i zhes bya ba ni de sgom pa rab tu gyur pa la bskal pa'am bskal pa stong gi bar du gnas pa'i phyir ro//gsang chen zhes bya ba ni bskyed pa'i rim pa'i rnal 'byor pa la ma bstan pa'i phyir ro/ /thig le'i dbye ba dang zhes bya ba ni dbugs smin ma'i dbus na gnas pa la phye ba'i phyir ro/ /rnal 'byor grub pa zhes bya ba ni sems kyi 'jug pa 'gegs pa'i thabs su gyur pa'i phyir ro//bde ba chen po zhes bya ba ni yul gyi stobs las skyes pa'i bag chags las kyi ngo bo sdug bsngal bzlog pas khams gsum gyi nying mtshams sbyor ba las bzlog pa'i phyir ro/ /ma rig sgo nga'i sbubs zhes bya ba ni ma rig pa rtsa dbu ma'i mdud pa'i ngo bo'am/lhan cig skyes pa'am/ mngon par 'du byed pa med pa'o/ /de'i sgo nga ni bstan pa'i mdud pa'i rnam pa'am tshul bzhin ma yin pa yid la byed pa'o/ /de'i 'byed pa ni sngags kyi rim pa skye/ des 'jig tshogs la lta ba'i ngo bo'i ri bo rtse mo nyi shu las byung ba ni de 'byed pa ni rnam par 'byed par byed pa zhes bya ba'i don to//phyag rgya chen po'i dngos grub dang / /zhes bya ba ni dga' ba chen po 'dzin pas ni phyag rgya chen po ste/ de'i bshad pa ni phyag rgya chen po bshad pa'o/ /de yang yin la dngos grub kyang yin pas na phyag rgya chen po'i dngos grub po/ /rab tu dbye ba zhes bya ba ni thig le'i dbye ba la sogs pa rnams kyis so//bshad ces bya ba ni bstan pa'o/ /mchog tu zhes bya ba ni rang bzhin gyis 'od gsal ba zung du 'jug pa'i thabs nyid kyi phyir ro/ /de ltar thabs las byung ba'i rnam grangs brjod pa bstan nas/ thabs la gdams ngag gis rtogs par bya ba nyid brjod pa'i phyir/de'i yan lag rang gi ngo bo brjod pa ni/ /sngags kyi de nyid sngon sbyor bas/ /zhes bya ba ni 'chad par 'gyur ba'i mtshan nyid kyi yul lo/ /rigs shing yang dag gsal ba gang / /zhes bya ba ni sngon gyi rlung gi de kho na nyid bsgom pa'i mtshan nyid can no//bla ma'i zhal nas nges rtogs 'gyur/ /zhes bya ba ni rgyud du gsungs pa'i mtshan nyid dang ldan pa'i bla ma'i zhal las byung ba'i thob par bya ba'o zhes bya ba'i don to/ /de yang ji ltar zhe na/ de'i phyir rnal 'byor ma'i bka' drin zhes bya ba gsungs te/ sngon gyi dge ba'i rtsa ba'i stobs kyis thob par bya ba'i don to//de ltar thabs la man ngag gis rtogs par bya ba nyid kyis rang gi ngo bo bstan nas/ de las bzlog pa'i phyin ci log gi skyon bstan pa bshad pa'i phyir/ man ngag med pa'i zhes bya ba la sogs pa gsungs te/ rnal 'byor ma'i brgyud pa las gsungs pa'i bla ma'i man ngag rlung gi de kho na nyid bsgom pa'i mtshan nyid spangs nas so//gang zhes bya ba ni skyes bu'o/ /bzlas pa zhes bya ba ni sngags kyi rgyal po ste/ de yis dka' ba gcig pu dang zhes bya ba dang 'brel to/ /ji lta bu zhe na/ de'i phyir blo rmongs byed ces bya ba gsungs te/ man ngag med pa ni shes rab dman pa'o//chu bsrubs zhes bya ba ni chu bsrubs pas so/ /mar ni mi 'byung ltar zhes bya ba ni mar mi thob pa ste/ dka' ba gcig pur 'gyur ro/ /de bzhin zhes bya ba ni de bzhin du'o/ /sngags bzlas kyang zhes bya ba ni sngags kyi bzlas pa byas te'o/ /man ngag dang bral zhes bya ba ni rlung gi de kho na nyid kyi man ngag gi mtshan nyid do//'bras bu'i zhes bya ba ni thig le'i dbye ba mi 'thob pa'o/ /skyes bu zhes bya ba ni sgom pa po'i 'jig rten no/ /dus ji tsam gyi bar du sngags bzlas kyang 'bras bu mi 'grub ce na/ de'i phyir ji srid skyes nas mthar zhes gsungs te/ ji srid 'tsho'i bar du zhes bya ba'i don to/ /de'i zhes bya ba ni man ngag gis gtong ba'i sngags pa'o/ /cha tsam zhes bya ba ni phyogs gcig tsam zhes bya ba'i don to/ /de ltar phyin ci log gi skyon bstan nas/ de rgyas par bshad pa brjod pa'i phyir/ rgya mtsho bzhi yi pha mtha' yi/ /sa la zhes bya ba la sogs pa gsungs te/sa yi lam nas bskor bzhin du'o/ /mi shes pa'i mi 'ga' zhig ces bya ba ni gang zag go/ /mi shes pa yi zhes bya ba ni blo rmongs pas shes rab dman pa nyid kyis so/ /lam ni gang yin mi 'dri gang / /zhes bya ba ni mngon par 'dod pa'i grong du 'gro ba'i lam gang la yang mi 'dri'o/ / lam ni gang yin mi 'dri gang / /zhes bya ba gang zhes bya ba ni skyes pa'o/ /lam zhes bya ba ni mngon par 'dod pa'i yul thob pa'i rgyur gyur pa'o/ /gang yin mi 'dri zhes bya ba ni skyes bu des ji ltar bdag nyid phyin par 'gyur te/ de ji ltar yul der mthong zhes bya ba ni mi mthong zhes bya ba'o/ /gcig tu 'gro ba'i 'bad pa de la don med par 'gyur zhes bya ba'i don to//de bzhin dka' ba cher byed pa'i/ /zhes bya ba ni 'dun pa'i dbye ba'i rgyu mtshan du dka' ba cher byed pa sngags kyi de kho na nyid bsgom pa la sogs pa byas kyang ngo / /man ngag dang bral bas zhes bya ba ni brgyud pa'i rim pa med pas so//sgrub pa po zhes bya ba ni thig le'i dbye ba thob par dka' ba'o/ /'bras bu med phyir mkhas pa dang / /zhes bya ba ni shin tu shes rab dang ldan yang man ngag bral bas so/ /sgrub pa po zhes bya ba ni thig le'i dbye ba sgom pa po'o/ /smod par byed ces bya ba ni de thob pa nyams pas smod par byed pa'o//mi zhes bya ba ni slob dpon gyi yul la'o/ /man ngag med pas dngos grub med pa'i phyir ro/ /yid la smod pa zhes bya ba ni slob dpon dang 'dra bar sems la smod pas so/ /mnar med ces bya ba ni 'bar zhing 'bar bas bsgribs pa'i dmyal ba chen po'o/ /'gro zhes bya ba ni 'gro bar 'gyur ba'o//don med ces bya ba ni dngos grub nyams pas ngan song gi rgyu rjes su bsgrubs pas 'bras bu med pa zhes bya ba'i don to/ /de ltar de'i rgyas pa bshad pa bstan nas/ gus par bslab par bya ba nyid mdor bstan pa'i phyir/ de phyir 'bad pas zhes bya ba la sogs pa gsungs te/gang gi phyir gdams ngag med par sngar bshad pa'i skyon du 'gyur ro/ /de'i phyir/ yang dag man ngag bslab par bya/ /zhes bya ba dang 'brel to/ /'bad pa thams cad kyis zhes bya ba ni lus dang srog la mi ltos pa nyid kyis so/ /yang dag ces bya ba ni sgro 'dogs pa dang skur ba 'debs pa dang bral bas phyin ci ma log pa'o//man ngag ces bya ba ni bla ma'i man ngag go/ /gus pa zhes bya ba ni khyad par can gyi yid ches pa sngon du 'gro bas dad pa skyes pas so/ /'bad par bslab par bya ste/ bla ma'i zhal nas dngos grub phyir/ /zhes bya ba la/ 'bad pas zhes bya ba ni bla ma la bsnyen bkur la sogs pa byed pa'i mtshan nyid can gyi brtson 'grus kyis so//dngos grub phyir zhes bya ba ni phyag rgya chen po'i dngos grub kyi don du'o/ /bla ma'i zhal nas zhes bya ba ni le'u gnyis par bstan pa'i mtshan nyid can la zhes bya ba'i don to/ /de ltar gus pas bslab par bya ba nyid mdor bstan pa bshad nas/'thad pa'i sngon du 'gro bas rgyas par bshad pa brjod pa'i phyir/ gang phyir zhes bya ba la sogs pa gsungs te/ /zhal nas zhal du brgyud pa ste/ snod yongs su gang ba nas snod stong par bya ba'i rigs pas so/ /brgyud pa'i rim gyis gnas pas byed/ /ces bya ba ni mar me gcig nas gcig tu brgyud pa bzhin du bar ma chad par brgyud pa'i rim pas gnas pa'i gdams ngag rang gi ngo bo'o//de'i phyir rnal 'byor ma zhes bya ba la/ rnal 'byor ma ni zhing la sogs pa las skyes pa'o/ /de'i dam pa'i zhal las zhes bya ba ni mchog gi zhal las so/ / 'di'i dam pa nyid kyi phyag rgya chen po'i dngos grub kyi yan lag gdams ngag sbyin pas so/ /bla ma'i zhal zhes bya ba ni de kho na nyid bcu yongs su shes pa'i rdo rje slob dpon gyi zhal las so/ /'bad pa yis zhes bya ba ni mchod pa dang bsnyen bkur la sogs pa bya ba sngon du 'gro bas so/ / bslab par bya zhes bya ba ni bslab par bya ba'o/ /de nyid mchog la zhes bya ba ni mchog tu gyur pa'i thig le'i dbye ba'o/ /sngags kyi man ngag ces bya ba ni sngags kyi de kho na nyid kyi man ngag go/ /zhal gyi lung zhes bya ba ni zhal nas brgyud pa'i lung ngo zhes bya ba'i don to/ /de ltar rnam pa lngas thabs man ngag gis rtogs par bya ba bstan nas de'i don nyid du zhu ba po'i bya ba bstan pa brjod pa'i phyir/de thos zhes bya ba la sogs pa gsungs te/ phyag na rdo rjes kyang zhes bya ba ni gsol ba 'debs pa po'o/ /de thos zhes bya ba ni sngar bshad pa'i don to/ /rdo rje sems dpa' zhes bya ba ni de bzhin gshegs pa drug pa'i rnam pa'o//zhus pa zhes bya ba ni yongs su dris par gyur pa'o/ /bde ba chen zhes bya ba ni rang gi phyag rgya la snyoms par zhugs shing gnyis su med pa'o/ /the tshom thams cad gcod pa la/ /zhes bya ba ni thams cad mkhyen pa nyid dang / snying rje chen pos khyab pa'i sems kyi rgyud nyid kyis de dag de'i the tshom thams cad bzlog par byas pa'i phyir ro//phyag rgya nas ni zhes bya ba ni spyi bos 'dud pa zhes bya ba'i don to/ /ci zhig zhus she na/ de'i phyir/ mchog gi de nyid bstan du gsol/ /zhes bya ba la sogs pa gsungs te/ bcom ldan zhes bya ba ni bod pa'o//mchog gi de nyid ces bya ba ni rdo rje bzlas pa'i yan lag thig le'i dbye ba'o/ /bstan du gsol zhes bya ba ni gsungs shig pa'o/ /sngags kyi rgyal po zhes bya ba ni sngags rnams ni sbrul zhes bya ba la sogs pa'i rgyal po ste gtso bo nyid kyi phyir ro/ /gang la goms pas zhes bya ba ni sngags kyi rgyal po 'chad par 'gyur ba gang la goms pa ni yang dang yang du rgyun mi 'chad par bsgoms pas so//skad cig ces bya ba ni mthong ba'i chos 'di nyid la'o/ /sngags kyi dngos grub ces bya ba ni thig le'i dbye ba'i mtshan nyid can te/ sngags kyi thob par bya ba'i dngos grub ni dngos grub ces bya ba'o//ji lta bu zhe na/ de'i phyir bla na med ces gsungs te/ bskyed pa'i rim pa'i mtshan nyid dang bral ba'i phyir ro/ /de ltar na 'di tsam gyis de nyid kyi don du gsol ba 'debs pa po'i bya ba mngon par brjod nas/ ston pa po'i bya ba bstan pa brjod pa'i phyir/de nas zhes bya ba la sogs pa gsungs te/ phyag na rdo rjes gsol ba btab pa'i rjes la'o/ /bcom ldan rdo rjes zhes bya ba ni rdo rje 'chang ngo / /gsungs zhes bya ba ni 'chad bzhin pa'i don gsungs pa'o zhes bya ba'i don to/ /sngags kyi de nyid rab gsal ba/ /zhes bya ba ni thig le'i dbye ba'i thabs sngags kyi de kho na nyid 'chad bzhin pa rnams gsal bas na de gsal ba'o//de nyid mchog tu gsang ba ni/ /zhes bya ba ni thig le'i dbye ba thabs kyi ngo bo sngags kyi de kho na nyid do/ /mchog tu zhes bya ba ni mchog gi go 'phang thob pa'i rgyu nyid kyi phyir ro/ /gang du'ang nga yis ma bshad pa//zhes bya ba ni gnas gzhan gar yang ngo / /nga yis zhes bya ba ni ston pa po rdo rje 'chang gis so/ /rgyud rnams kun du sbas byas pa/ /zhes bya ba ni bya ba la sogs pa'i rgyud rnams la'o/ /ci'i phyir zhe na/ de'i phyir/ skal ba med pa'i bsam pa'i rgyus/ /zhes gsungs te/snod ma yin pa'i sems can rnams la ma bstan pa'i phyir zhes bya ba'i don to/ /skal ba med pa'i bsam pa gang rnams la yod pa de rnams skal ba med pa'i bsam pa can te/ de rnams kyi rgyus zhes bya ba ni de rnams la brten nas zhes bya ba'i don to/ /de ni zhes bya ba ni da ltar ro//khyod kyis gsol ba btab pa'i ngor ro/ /nyon zhes bya ba ni rtse gcig par 'gyur nas so/ /bshad kyis zhes bya ba ni smra bar bya yis zhes bya ba'o/ /sngags kyi rgyal po zhes bya ba ni 'chad par 'gyur ba rnams so/ /bla na med ces bya ba ni sngags thams cad kyi gong na med pa ni yi ge gsum ste/ de las kyang bla na med pa ni hU~M yig dang ho yig gnyis kyi bdag nyid can gyi phyir zhes bya ba'i don to/ /sngags kyi spyod pas gnas rnams la/ /zhes bya ba ni sngags kyi bdag nyid can gyi spyod pa ni sngags kyi spyod pa'o/ /des gnas pa ni sngags kyi spyod pas gnas pa ste de rnams la ste/ sngags kyi theg pa sgom pa po rnams la zhes bya ba'i don to//myur du dngos grub 'gyur zhes bya ba ni myur ba nyid du thig le'i dbye ba'i dngos grub mdud pa'i rdog ma'i rnam pa can de sngon du 'gro bas zhes bya ba'i tha tshig go/ /de ltar ston pa po'i bya ba bstan nas/ sngags kyi ngo bo brjod pa'i phyir/ de'i yan lag btu ba bstan pa ni uSh+ma'i tha ma zhes bya ba la sogs pa gsungs te/ha yig ste/ drod ni sha Sha sa ha zhes bya ba'i ming gis so/ /thog mar bri zhes bya ba ni dang por bri bar bya ba ste/ de ltar na ha zhes btu ba'o/ /dbyangs yig drug pas rnam par brgyan/ /zhes bya ba ni U yig gnyis pas brgyan pa'o//sde [(]tshen [,]tshan [)]tha ma'i mtha' dang ldan/ /zhes bya ba ni sde [(]tshen [,]tshan [)]ni ka'i sde [(]tshen [,]tshan [)]la sogs pa'o/ /de rnams kyi tha ma ni pa'i sde [(]tshen [,]tshan [)]no/ /de'i tha ma'i cha ni ma yig ste/ de dang ldan pa ni cha med pa'i cha dang bcas pa'o/ /dbyangs med pa yi cha dang bcas/ /zhes bya ba ni klad kor dang bcas pa'o//de ltar hU~M zhes btu ba byas pa'o/ /gnyis pa'i yi ge btu ba bstan pa'i phyir/ uSh+ma'i mtha' la zhes bya ba gsungs te/ sngar bzhin du ha yig go/ /dbyangs yig ni/ dgu pa dang ni yang dag ldan/ /zhes bya ba ni o yig gis te/ sreg pa'i sa bon bzhi po'i grangs ma gtogs pas so//yang dag ldan zhes bya ba ni yang dag par ldan pa'o/ /de ltar na ho zhes bya bar 'gyur ro/ /tsheg drag mtha' zhes bya ba ni tsheg drag gnyis kyi mtha' ma can no/ /mchog gi sgra zhes bya ba ni mchog gi sgra 'bigs par byed pa'i phyir ro/ /sngags kyi gtso bo btu bar bya/ /zhes bya ba ni sngags thams cad kyi mchog go//de ltar de'i btu ba bstan nas de'i phan yon bstan pa brjod pa'i phyir/ de ltar yi ge gnyis kyi ming / /zhes bya ba gsungs te/ de ma thag par btus pa dag go/ /ming zhes bya ba de hU~M ho'i yi ge'i ngo bo'o/ /sngags kyi brda zhes bya ba ni srog dang thur sel gyi rlung gnyis 'byed pa'i thabs yin pa'i phyir ro//rmad byung ba zhes bya ba ni mdud pa'i dbus su hU~M yig bsgom pa dang / smin ma'i dbus su yang ho yig bsgom pa'o/ /de yang rig pas zhes bya ba'i skabs su bshad zin pa nyid kyi phyir slar mi brjod do/ /yi ge gnyis po 'di nyid sgra'i thig le'i ming byas la zhes bya ba ni thig le ni smin ma'i dbus su gnas pa'i rlung gi rnam pa'i ho yig go//sgra zhes bya ba ni snying ga'i mdud pa'i steng du hUM yig go/ /de'i ming gi brjod pa nyid kyi phyir slar mi brjod pa'o/ /ming du byas la zhes bya ba ni tha snyad du byas la zhes bya ba'i don to/ /ci'i don du zhe na/de'i phyir/ 'dzin pa thams cad spangs pa'i phyir/ /zhes bya ba gsungs te/ rlung gi sgo nas yul la mngon par zhen pa las skyes pa'i rnam par rtog pa bzlog pa'i phyir zhes bya ba'i don to/ /de bzhin du/ rlung gnyis po ni yang dag 'byed/ /ces bya ba ni srog dang thur sel gyi mtshan nyid kyi rlung gnyis kyi bar gyi mdud pa phrad pa 'jigs pa'i phyir ro//ma rig ces bya ba ni ma rig pa'i rnam pa'i rtsa'i mdud pa 'byed par byed pa ste/ sngar nye bar bkod pa'i sbyor ba nyid kyis so/ /phyag rgya chen po'i dngos grub kyis/ /zhes bya ba ni rang bzhin gyis 'od gsal ba dang / zung 'jug gi rnam pa'i dngos grub la'o//rgyu zhes bya ba ni rdo rje bzlas pa'i rim pa bsgom pa sngon du 'gro bas phyag rgya chen po mngon du byed pa'i rnam pa la mngon par phyogs pa'i phyir ro/ /mchog gi zhes bya ba ni rlung gi de kho na nyid bsgom pa'i sngon du song ba nyid kyi phyir ro/ /yi ge gnyis zhes bya ba ni bshad ma thag pa'i 'o//mchog tu zhes bya ba mdud pa 'joms pa nyid kyi phyir/ zhi ba'i zhes bya ba ni rlung gi stobs las byung ba'i rang bzhin gyi tshogs nye bar zhi ba nyid kyi phyir ro/ /'dod pa'i don kun sgrub par byed/ /ces bya ba ni 'dod pa'i dngos grub thams cad sgrub par byed pa'o/ /de ltar don rnam pa pa gnyis kyis sngags kyi de kho na nyid kyi ngo bo brjod nas dus kyi nges pa brjod pa sngon du 'gro bas gnas khyad par can du de'i bsgom pa'i nges pa brjod pa'i phyir zla ba drug ces bya ba la sogs pa gsungs te/de'i dus kyi mtha'i bar du'o/ /gang gis bzlas na zhes bya ba ni gnas gnyis yi ge gnyis bsgom pa sngon du 'gro bas so//gang gis zhes bya ba ni gang zag go/ /de thig le dang sgra'i go 'phang gsal bar byas nas rnyed ces bya ba ni lhag ma'o/ /gang ji lta bus she na/ de'i phyir man ngag thob pas zhes bya ba gsungs te/ sngar bshad pa'i don gyi rjes su 'brangs nas so//'dod pa'i don ces bya ba ni don du gnyer bas na don te/ thabs las byung ba'i ngo bo thig le'i dbye ba la sogs pa'o/ /de 'dod pas na de 'dod pa'o/ /dben pa zhes bya ba ni skye bo'i tshogs dang bral ba la'o/ /lha'i gnas zhes bya ba ni lha'i khang pa la sogs pa la'o/ /sgra yi tsher ma rnams dang bral//zhes bya ba ni byis pa dang bya'i ca co la sogs pa'i sgra rnams so/ /tsher ma ni sbrul dang stag la sogs pa rnams so/ /bral ba ni de las rnam par grol ba'o de bzhin du/ skye bo'i tshogs ni spangs pa dang / /zhes bya ba ni rigs mthun pa dang rigs mi mthun pa'i skye bo rnams dang ma 'dres pa nyid kyi phyir ro//bgegs med ces bya ba ni gdug pa can gyi 'byung po dang gdon la sogs pa rnams kyis ma khyab pa'i phyir ro/ /skal bzangs zhes bya ba ni ting nge 'dzin skyed pa'i rjes su mthun pa'i phyir ro/ /nyams dga' ba zhes bya ba ni chu dang me tog la sogs pa'i yid 'phrog pas nyams dga' ba nyid kyi phyir ro//skyed mos tshal ni zhes bya ba ni nye bar zhi ba bskyed pa la rgyur gyur pa nyid kyi phyir ro/ /bde ba che zhes bya ba ni g.yeng ba ma lus pa thams cad kyi rten med pa'i phyir ro/ /'dod pa lnga la longs spyod pas/ /zhes bya ba ni khyad par 'phags pa'i gzugs la sogs pa la brten pa'i spyod pas so//sngags kyi gtso bo grub par 'gyur/ /zhes bya ba ni de ma thag pa bshad pa'i sngags kyi yi ge gnyis so/ /de ltar don rnam pa bdun gyis de mkho bar gyur pa'i don gyi 'thad pas rang gi ngo bo brjod nas/ de bsgom pa'i don du bsam gtan gyi bye brag bstan pa brjod pa'i phyir ro//de'i yan lag bshad par dam bca' ba ni 'dir ni gzhan yang zhes bya ba la sogs pa gsungs te/ 'dir yang thig le'i dbye ba bshad par bya yis nyon/ bde ba'i phyag rgya gnas zhes bya ba dang 'brel to/ /phyag rgya zhes bya ba ni yul la gnas pa'i rnam pa khyad par ro//nyon zhes bya ba ni phyag na rdo rje la bod pa'o/ /ci tsog tsog po'i ngo bo'i phyag rgya gang gis sdug bsngal du gnas pa'am snyam nas/ de'i phyir/ bde ba dam pa yi ni gnas/ /zhes gsungs te/ dam pa ni gzhan dang thun mong ma yin pa'i gnas so/ /gang+gA'i zhes bya ba ni phyag rgya'o//sgrub pa po zhes bya ba ni thig le'i dbye ba sgom pa po'o/ /dngos grub mchog tu 'gyur zhes bya ba ni phyag rgya chen po'i yan lag tu 'gyur ba thig le'i dbye ba'i bdag nyid can no/ /phun sum tshogs gnas zhes bya ba ni 'jig rten dang 'jig rten las 'das pa'i phun sum tshogs pa'i rten zhes bya ba'i don to//de ltar bshad par dam bca' ba bshad nas/ dngos su bsam gtan rgyas par bstan pa brjod pa'i phyir/ mig gnyis zhes bya ba la sogs pa gsungs te/ sna rtse ni kun rdzob kyi sna rtse'i mtha' ma ste/ mtha' ma'i phyogs la'o/ /mig gnyis bkod nas zhes bya ba ni mig gnyis de ltar byas te//phyi rol yul rnams la mngon du mi phyogs pa'i phyir ro/ /sna yi lte ba'i tshad du gnas/ /zhes bya ba ni de tsam mthong bas so/ /bzhag byas nas zhes bya ba ni mig btsums pa nyid kyis de tsam gyi tshad du bzhag nas so/ /phrag gong mnyam la zhes bya ba ni phrag pa gnyis kyang mnyam par byas la'o//lce rkan la sbyar zhes bya ba ni mgrin pa'i khron pa'i mtshams kyi nang du bdud rtsi myong bar byed cing bzhag nas so/ /so dang mchu ni zhes bya ba ni mnyam par 'jug pa nyid kyis snga ma bzhin du bzhag nas so/ /dbugs kyi 'byung rngub ces bya ba ni 'byung dang rngub pa'o//glod nas zhes bya ba ni myur bas ma yin pa ste/ dal bus rgyu ba'o/ /de nyid kyi phyir glod nas zhes gsungs te/ rlung gzhan dang ma 'dres par rtsol ba dang bral bas so/ /cung zad cung zad ces bya ba ni 'bad pa med pa rgyu ba nyid dang / myur ba ma yin pa nyid mnyam par rgyu ba nyid kyi phyir ro//rtsol bral bas zhes bya ba ni dbugs kyi rgyu ba ji ltar mnyam par rgyu ba la 'bad pa gzhan la mi ltos pa nyid kyi phyir ro/ /ji lta ba bzhin 'byung rngub ni zhes bya ba ni de la gnas pa la mi ltos pa nyid kyi rang gi rang gis rgyu ba nyid la ngal so ba bstan par byed do/ /de la 'bad par mi bya ste//zhes bya ba la/ de la zhes bya ba ni rlung rgyu ba'i 'gro ba dang 'ong ba'i bya ba la'o/ /'bad pa zhes bya ba ni grangs la sogs pa'i ngo bo'i 'bad pa mi bya zhes bya ba ni bya ba ma yin pa'o/ /sems dpa'i skyil mo krung legs par gnas pas zhes bya ba ni rdo rje skyil mo krung la sogs pa sdug bsngal bar gnas pa yongs su spangs nas/sems dpa'i skyil krung gis bde bar gnas pa'i phyir ro/ /de ltar phyag rgya dang zhes bya ba ni bsam gtan gyi khyad par gyis gnas pa'o snyoms zhugs nas zhes bya ba ni mnyam par bzhag nas so/ /yi ge gnyis ni rtag tu bzlas/ /zhes bya ba ni srog dang thur sel gyi rlung gnyis hU~M ho zhes rdo rje mdud pa dbye ba'i thabs bsgom par bya zhes bya ba ni nyams su myang bar bya zhes bya ba'i don to//de ltar bsam gtan dngos su bstan nas/ dus nges pa'i sgo nas 'bras bu bstan pa brjod pa'i phyir/ zla drug gis zhes bya ba la sogs pa gsungs te/rnal 'byor mchog ces bya ba ni de ma thag par bshad pa'i rlung gi dkyil 'khor gyi lte bar gnas pa'i thig le'i dbye ba'i rgyu rnal 'byor mchog thob 'gyur zhes bya ba dang 'brel to/ /yang na rlung dang sngags kyi de kho na nyid las khyad par du 'phags pa'i phyir mchog go/ /sems la g.yeng ba med pa skyed pa'i phyir rnal 'byor ro//thig le'i dbye bas zhes bya ba ni dbugs kyi dbye bas so/ /bde ba chen zhes bya ba ni yul gyi stobs byung ba'i rang bzhin gyi tshogs kyi mtshan nyid sdug bsngal mi skyed pa'i phyir ro/ /the tshom med ces bya ba ni rtag tu rgyun mi 'chad par bskyed pa'i rim pa mthar phyin pa'i rnal 'byor pa rlung dang sngags kyi de kho na nyid bsgom pa'i stobs kyis zla ba drug gis nges pa kho nar thig le'i dbye ba'i 'bras bu thob par 'gyur ram mi 'gyur snyam du the tshom med pa'i phyir te yid ches pa bstan pa nyid kyis zhes bya ba'i dgongs pa'o//de ltar dus nges pa'i sgo nas 'bras bu brjod pa bstan nas/rlung gi de kho na nyid kyi sgo nas de rgyas par bshad pa brjod pa'i phyir/ steng dang 'og dang rtsa yi rgyun/ /zhes bya ba ni g.yon pa dang g.yas pa'i rtsa'i gnas su rtsa gnyis rab tu rgyu ba ni dkyil 'khor bcu gnyis kyi bdag nyid can te/dkyil 'khor re re la dbugs dgu brgya'i grangs kyis nyin mo la stong phrag bcu dang brgyad brgya'o/ /de bzhin du mtshan mo la yang ngo / /a ba d+hU tI'i gnas gsal ba zhes bya ba ni gnas pa'i rlung gi cha'i rtogs pa'i ngo bo ste/ dkyil 'khor re re zhing rkang pa dang bcas pa'i lnga bcu rtsa drug gi dbugs so sor byas nas dkyil 'khor bcu gnyis la drug brgya bdun cu rtsa lnga brtsi bar byas nas so//dang por ldang ba dang 'jug pa'i rlung gnyis la hUM dang oM gyi yi ge gnyis kyi sgo nas sems gzung bar bya ba ste/ de'i rjes la dbus ma rgyu ba gnas pa'i rlung sngar bshad pa'i grangs dang ldan pa rnams la sems yang dag par bzhag nas/de'i rjes la a yig la gzhag go/ /a yig kyang tsheg drag gnyis la mos pas so/ /tsheg drag gnyis kyang hUM dang ho yig gnyis la lhag par mos par bya'o/ /yi ge gsum po de nyid la zhugs te hUM yig kyang cha shas su brtags pas thig le smin ma'i dbus su gnas pa la rlung gi ngo bos bsdu bar bya'o zhes bya ba'i man ngag go//a ba d+hU tI'i go 'phang ji lta bu zhe na/ de'i phyir gsal ba'i zhes gsungs te/ rnal 'byor gyi mngon sum gyis rtogs pa nyid kyi phyir ro/ / rlung gi de nyid ces bya ba ni rlung gsum gyi bya ba'i bdag nyid kyi phyir ro/ /ye shes che zhes bya ba ni de skyed par byed pa'i phyir ro/ /rdo rje sems dpa' zhes bya ba ni mngon par byang chub pa dang zung du 'jug pa'i rim pa'i ngo bo'o/ /rgyu zhes bya ba ni rgyur gyur pa ste/ rdo rje bzlas pa'i bye brag gi ngo bo nyid kyi phyir ro//de ltar don rnam pa bzhis bsam gtan gyi ngo bo bstan nas/ bsam gtan gyi 'bras bu brjod pa'i phyir de'i yan lag gi gnas skabs kyi 'bras bu brjod pa ni ri lu zhes bya ba la sogs pa gsungs te/ rdo rje sems dpa'i rgyu gcig par ni ma zad kyi ji srid du 'bras bu gzhan rnams kyi yang zhes bya bas bstan par byed de/de la dang po re zhig rdo rje mkha' 'gro'i rgyud du gsungs pa'i cho gas/ byang chub sems ni cha lnga dang / /rgya mtsho las skyes gnyis 'gyur dang / /rtse mo bzhi 'gyur sbyin bya ste/ /dbang la rtag pa'i cho ga mchog /ces bya ba'i rigs pa 'dis rdzas gsum po btsal nas/de'i rjes su sum 'gyur gzhan mi bskyod pa dang / rnam snang gi khams gnyis po btsal la thod pa dum bu gcig pa gnyis kha sbyar ba'i dbus su bzhag la/ bcom ldan 'das mi bskyod rdo rje'i sngon du bsnyen pa byas nas/ de'i rjes la rmi lam du bcom ldan 'das kyis lung bstan la sogs pas mtshan ma rnyed pa'i rnal 'byor pas rlung dang me'i dkyil 'khor bsgom pa sngon du 'gro ba dang bdud rtsi lnga bskyed pa bsgom pa sngon du 'gro bas bdud rtsir bskyed nas/bcom ldan 'das spro ba'i sngags de srid du bzlas par bya ste/ ji srid thod pa kha sbyor gyi nang na gnas pa'i ri lu du ba 'byung bar byed 'bar bar byed pa de srid du bzla bar bya'o//de nas ri lu'i dngos grub thob pas de khar bcug nas ji ltar 'dod pas sangs rgyas kyi zhing nas sangs rgyas kyi zhing du 'gro bar 'gyur ba ni ri lu'i dngos grub rnam pa gcig go/ /yang na dpal gsang ba 'dus pa'i rjes su 'brangs nas/le'u bcu gnyis pa gsungs pa'i cho gas sngags nyid kyis ri lu'i dngos grub bsgrub par bya ste/ ji skad du/ oM yig ri lu bsgom byas pa/ /tsa na ka yi snying po'i tshad/ /dbus su rang lha yi ni gzugs/ /khar ni bsam zhing bsgom par bya/ / zhes gsungs te/ de'i don ni 'di yin te/ oM yig tsa na ka'i snying po'i tshad tsam gyi ri lu bsgoms te/ dbus su zhes bya ba ni ri lu'i nang du'o/ /rang gi lha'i gzugs zhes bya ba ni sa bon gyi bdag po'i gzugs su bsgoms te/ khar zhes bya ba ni mgo bo'i sgor 'jug pa'i ngo bos rnam par bsams te/bsgom par bya zhes bya ba ni yang dang yang du goms par bya'o/ /gang zhig de ltar goms par byas pa de/ /byang chub sems dpa' mnyam pa'i 'od du 'gyur/ /zhes bya ba la sogs pa'o/ /ral gri zhes bya ba ni rang 'dod pa'i lha'i nga rgyal dang ldan pas phyi rol gyi mtshan nyid bzang po'i ral gri stong pa nyid du bsgoms la de'i rjes su khaM yig yongs su gyur pa las skyes pa'i don yod grub pa phyag rgya dang bcas pa rnam par bsgom par bya ste/de dang snyoms par zhugs pas zhu bar gyur pa las byung ba'i ral gri 'od zer rnam pa lnga 'phro ba bsgoms te/ de srid du rang 'dod pa'i lha'i sngags bzla bar bya ste/ji srid du du ba la sogs pa'i mtshan ma nye bar mtshon pa sngon du 'gro bas 'bar ba'o/ /de'i rjes la lag tu gzung ste/ yid la 'dod pa bsgrub par bya/ /zhes bya ba ni ral gri'i dngos grub bo/ /ro langs dang zhes bya ba ni ro langs bslang ba'o//'di yang rgya cher ni nges par brjod pa'i rgyud bla ma'i 'grel pa zab mo'i don yid bzhin nor bu zhes bya ba las le'u nyi shu pa las rgya cher rnam par bshad pas/ de nyid las rtogs par bya'o/ /bye brag tu rnal 'byor chen po'i rgyud kyi rjes su 'brangs nas/ mi bskyod rdo rje'i nga rgyal byas te/mA ma kI la sogs pa'i sngags rnams kyis dgos pa bya'o/ /rgyal srid ces bya ba ni dmag dpung rengs pa sngon du 'gro bas pha rol po'i dgra'i phyogs nges par bcom nas/ de las gzhan pa la rgyal srid 'dzin pa'o/ /mig sman zhes bya ba ni skye ba bdun pa'i tshil bu mes bzhu ba las byung ba'i mar chen po la sdong bu bya ba sngon du 'gro bas me sbar la des thod pa'i dum bu'i rgyab kyi du ba blangs la de'i rjes su bdud rtsi lnga'i chus du ba mnyes la des mig la byug par byas na/sangs rgyas dang byang chub sems dpa' sna tshogs pa mthong bar 'gyur zhes bya ba ni mig sman gyi dngos grub bo//bcud kyis len zhes bya ba ni 'di yang le'u bcu drug pa las rang nyid kyis 'chad par 'gyur te/ rkan gyi dbus su lce sbyar ba/ /byas nas de kho na'i tshig bzla/ /sems dpa'i skyil krung bcas nas ni/ /yang dag rnal 'byor rjes dran bya/ /rdzas kyang rtag tu bsten par bya/ /de nyid lnga yi rim pa bskyed//bzlas pa rdzogs nas rtag tu ni/ /lus las byung ba dri ma med/ /lcags lnga'i rang bzhin snod du ni/ /bzhag nas ji srid nyi ma ni/ /'char ka de nas de la yang / /btsun mo'i khrag dang bde ba che/ /blugs nas rtag tu rdzas kyi mchog /bdud rtsi bdun pa'i ming can te/ /nyal kar yang ni rdzas de nyid//'thungs na tshe ni rnam par 'phel/ /sngags kyi rgyal po oM AHhUM/ /de nas lan bdun bzlas pa bya/ /lag g.yas rgyal mtshan gyis mtshan pa/ /snod bzang de la bkab nas su/ /yi ge brgya pa'i sngags kyis ni/ /lan gsum gyis ni dag par bya/ /de rjes bud med nu zho ni//rtag tu mkhur ba bkang zhing btung / /zhes bya ba la sogs pas ni dmag dpung rangs pa'o/ /sgrub pa po rang nyid rdo rje 'chang chen po'i gzugs su bsgyur nas gang yang rung ba'i khro bo'i gzugs bzung ste/ rang gi 'khor rnams la pad+ma'i khrag bzhin ser skya bsgoms la/ ri'i rgyal po ltar ri'i rgyal po ri rab kyi tshad tsam dmag gi dpung yan lag bzhi pa'i steng du bsgoms na/dgra'i dmag gi sde 'og tu zhugs par mthong ngo zhes bya ba ni dpal gsang ba 'dus pa pa le'u bcu gsum pa las gsungs so/ /rtsig pa dbye ba zhes bya ba ni rtsig pa dbye ba ste/ sngar bshad pa ltar rdo rje 'chang chen po yongs su gyur pa las khro bo gang yang rung ba'i cha lugs bzung ste/sngags pas bgegs bskrad pa'i dus su bsgom par byas pas gnod mdzes rgyal po'i bka' bsgo bas khro bo re re las khro bos byin pa'i thal lcag gis dgra bo'i rtsig pa bshig pa ni dgos pa zhes bya ba ni man ngag go//rig 'dzin gyi ni go 'phang mchog /ces bya ba ni nam mkha'i khams kyi de bzhin nyid la zla ba'i dkyil 'khor rnam par bsgoms nas/ de'i dbus su bdag nyid rnam par snang mdzad du bsgoms la/ de'i phyag tu 'khor lo rtsibs brgyad pa bsgoms na rig pa 'dzin par 'gyur ro zhes bya ba ni mdor bsdus pa'i rig pa 'dzin pa'i dngos grub bo//mchog ces bya ba ni nam mkha' la 'gro ba la sogs pas so/ /mi snang ba dang zhes bya ba ni skye ba bdun pa'i rus pa bdar ba rnams kyis tsan+dan du byas te/ sngar bshad pa'i rdo rje 'chang chen po yongs su gyur pa la/ de bzhin gshegs pa lnga po gang yang rung ba'i gzugs dang ldan pa la tsan+dan des lus la bskus te/ sngar bshad pa'i ri lu khar bcug na mi snang bar 'gyur ro zhes bya ba ni mi snang ba'i dngos grub bo/ /gter mthong ba zhes bya ba ni sngar bzhin du rdo rje 'chang chen po'i nga rgyal dang ldan pas mig la sogs pa'i skye mched rnams la sa'i snying po la sogs pa'i byang chub sems dpa' rnams bsgoms te/ma yig dang Ta yig yongs su gyur pa las zla ba dang nyi ma gnyis bsgom par byas nas 'og na gnas pa'i gter la sogs pa mthong bar 'gyur zhes bya ba ni gter mthong ba'i dngos grub bo//'dod dgur bsgyur dang zhes bya ba ni sems can de dang de'i rjes su mthun pa bdag nyid lha'i nga rgyal bsgom pa sngon du 'gro bas bsgom par bya ste/ dpung pa la sogs pa la 'ching bar byas na de dang de'i gzugs 'dzin par 'gyur ro zhes bya ba ni 'dod dgur bsgyur ba'i las kyi dngos grub bo//rkang mgyogs dang zhes bya ba ni kar+Ni ka ra la sogs pa'i sman sbyor gyi stobs kyis grub par bya ste/ ji ltar dpal dus kyi 'khor lor re'u mig gi kha sbyor gsungs pa'i skabs su bstan pa bzhin no/ /gser 'gyur zhes bya ba ni zangs la sogs pa gser la sogs par byed pa'i gser 'gyur gyi mtshan nyid do//dug las rgyal zhes bya ba ni rdo rje bya khyung bsgom pa'am/ gzhan gyis mi thub dang / gnod mdzes bsgoms pas brtan pa dang / g.yo ba'i bdag nyid can gyi dug 'joms par byed pa'o/ /me yi nang du 'jug pa dag /zhes bya ba ni me la de bzhin gshegs pa snang ba mtha' yas bsgom pa la sogs pas de'i nang du 'jug pa'o/ /sogs pa'i sgras ni chu'i steng du 'chag pa la sogs pa gzung bar bya'o/ /mngon shes lnga po'i go 'phang dang / /zhes bya ba ni mig gi skye mched la sogs pa lnga po rnams la sa'i snying po la sogs pa'i ngo bo byang chub sems dpa' bsgom pa'am/dbang po re res yul thams cad la longs spyod pa'i mtshan nyid can no/ /ye shes lnga ni thob par 'gyur/ /zhes bya ba ni me long la sogs pa rnams so/ /zab mo ma yin pa dang zab mo'i bskyed pa'i rim pa sngon du 'gro bas me long la sogs pa'i ye shes grub pa'i phyir ro//'di rnams kyi chen po nyid kyang yon tan mtha' yas pa dang ldan pa nyid kyi phyir ro/ /ji skad du/ me long ye shes ngar 'dzin med/ /yongs su ma chad rnyog pa med/ /shes bya kun la ma rmongs pa/ /de rnams la yang mngon phyogs min//zhes bya ba la sogs pa gsungs so/ /de rnams kyang khyod kyis thig le'i rnal 'byor bsgom pa'i rim pas thob par 'gyur ro/ /de ltar gnas skabs kyi 'bras bu brjod par bstan nas/ mthar thug gi 'bras bu bstan pa brjod pa'i phyir/ de nas skad cig gcig la zhes pa gsungs te/gcig ni bya ba rdzogs pa'i skad cig ma'i mtshan nyid can gyi skad cig la'o/ /byang chub ni rang bzhin gyis 'od gsal ba'i rnam pa zung du 'jug pas bsdus pa skad cig la byang chub pa'o/ /de nyid ni mtshan nyid do/ /go 'phang ni rten gyi gnas so//dka' thub spyod pa spangs nas ni/ /zhes bya ba ni zhal gsum phyag drug pa'i ngo bo dngos su 'dzin par byed pa ni spyod pa'o/ /dka' thub ni sbyangs pa'i yon tan bcu gnyis 'dzin pa'o/ /sbyangs pa yang yin la spyod pa yang yin pas dka' thub spyod pa ste/ de rnams spangs pa ni de rnams dang bral ba'o//shes rab snying rje yang dag ldan/ /zhes bya ba ni shes rab ni rang bzhin gyis 'od gsal ba'i rnams la'o/ /snying rje ni bdag la byin gyis brlabs pa'i lus te/ dmigs pa'i snying rje'i ngo bo nyid kyi phyir ro/ /shes rab kyang yin la snying rje yang yin pas na shes rab snying rje'o//de dag dang ldan pa ni tha mi dad pa ste/ shes rab snying rje yang dag par ldan pa'o/ /mchog ste blo zhes bya ba ni mchog gi shes rab dang ldan par rdzogs pa'i rim pa sgom pa po rnams kyi'o/ /bde ba che zhes bya ba ni sdug bsngal thams cad zlog par byed pa'i bdag nyid kyi zag pa med pa'i bde ba dang ldan pa nyid kyi phyir ro//de ltar don rnam pa gnyis kyis bsam gtan gyi 'bras bu bstan nas/ thabs khyad par du 'phags pa bstan pa'i phyir sbyin sreg mi dgos zhes bya ba ni thig le'i dbye ba sgom pa 'di la sbyin sreg ces bya ba ni phyi rol gyi sbyin sreg mi dgos te/ mdud pa'i dbye ba'i mtshan nyid can gyi ye shes kyi mes rnam par rtog pa thams cad la rang gi ngang gis bsreg pa nyid kyi phyir ro//des mi dgos zhes bya ba ni smyung ba dang sdom pa la sogs pa ste/ sngags kyi de kho na nyid kyi sgo nas srog dang rtsol ba nges pa'i phyir ro/ /grangs mi dgos zhes bya ba ni/ sngags la sogs pa sngon du bsnyen pa gang gi mtshan nyid can te/ dkyil 'khor bzhi 'char ba'i rim pas dbugs nyi khri chig stong drug brgya mtshon par byed pa nyid kyi phyir ro/ /bsam gtan min zhes bya ba ni bris sku la sogs pa'am bcom ldan 'das kyi yul la sems btang ba mi dgos te/sngags kyi de kho na nyid kyi sgo nas sems 'dzin pa nyid kyi phyir ro/ /'dir ni bskyed rim dbye mi dgos/ /zhes bya ba ni thig le'i dbye ba bsgom par bya ba 'di la zla ba dang rdo rje la sogs pa yongs su gyur pa las skyes pa'i lha'i rnam pa bsgom mi dgos te/ lte ba'i nam mkha' las byung ba'i rlung la 'khor lo de dang de'i dbye bas rim pa mtshon pa'i phyir ro//dka' thub sogs mi dgos zhes bya ba ni spyod pa'i brtul zhugs la sogs pa mi dgos te/ sems kyi brtul zhugs nye bar bstan pa rang bzhin gyis grub pa mtshon pa'i phyir ro/ / gcig pu yis zhes bya ba ni de dag sngon du gsungs pa'i thabs dor nas so/ /sngags kyi de kho na nyid ces bya ba nyid hU~M dang ho'i bdag nyid can gyis so/ /bla ma'i zhal nas brgyud pa dang / /zhes bya ba ni bla ma brgyud pas so/ /zla ba drug tu sngon sbyor ba/ /zhes bya ba ni dus de srid kyi bar du bsgom pas so//mchog gi go 'phang thob par 'gyur/ /zhes bya ba ni rdo rje bzlas pas 'grub pa'i yan lag tu thig le'i dbye ba thob par 'gyur ro/ /mchog ces bya ba ni bskyed pa'i rim pa'i mtshan nyid dang bral ba'o/ /rnal 'byor chen po'i rgyud dpal rdo rje phreng ba'i rgya cher 'grel pa/ /paN+Di ta a lang+ka ka la shas mdzad pa zab mo'i don gsal bar byed pa zhes bya ba las le'u drug pa'i rgya cher bshad pa'o// //de ltar le'u drug pas thig le'i dbye ba'i yul la dri ba'i lan bstan pa brjod nas/ da ni skabs su bab pa'i sgra'i yul la dri ba'i lan bstan pa brjod pa'i phyir/dri ba de'i lan bshad par rtsom pa ni/ de nas zhes bya ba la sogs pa gsungs te/ le'u drug pa'i rjes la'o/ /gzhan yang zhes bya ba ni sngar bshad pa la ltos pas tha dad pa'i phyir te/ nA da'i don bshad kyis nyon zhes bya ba dang 'brel to/ /de nyid kyis zhes bya ba ni phyin ci ma log pa'i ngo bos zhes bya ba'i don to//bla med ces bya ba ni 'di las gong na med pa'o/ /bla na med pa nyid kyang bla na med pa'i phyag rgya chen po'i rgyu gnyis kyis so/ /gang gis zhes bya ba ni sgra'i mtshan nyid kyis so/ /yongs su shes pa tsam gyis zhes bya ba ni rtogs pa tsam gyis so/ /dngos grub 'gyur zhes bya ba ni sgrub pa pos 'grub par 'gyur ba'o//tshe 'di nyid la zhes bya ba ni mthong ba'i chos la zhes bya ba'i tha tshig go/ /de ltar sgra'i yul la dri ba'i lan gdab par brtsam pa bstan nas/ dngos su bshad pa brjod pa'i phyir ro/ /sgra yang mi shigs par ni bshad/ /ces bya ba la sogs pa gsungs te/nA da byed pas na nA da ste/ a yig go/ /mi shigs go 'phang zhes bya ba ni mi shigs pa ni gzhan gyis mi phyed pa'o/ /go 'phang ni de'i ngo bo gang la yod pa de la de skad ces bya'o/ /de skad du yang a'i yi ges yi ge thams cad 'byed pa yin gyi de bzhin du yi ge a ni ka la sogs pa gzhan rnams kyis 'byed pa ma yin no//rang bzhin 'od gsal zhes bya ba ni a ta se'i me tog dang 'dra ba nyid kyis 'od gsal ba'i phyir ro/ /de yang ye shes kyi me'i ngo bo nyid do/ /gsal ba nyid ces bya ba ni lte ba'i dbus su dro ba'i ngo bos tha mal pa rnams kyis kyang nyams su myong ba nyid kyi phyir ro//rnam pa kun las rnam par grol/ /zhes bya ba ni sngags kyi ngo bo'i tshogs thams cad kyi rnam pas so/ /rnam par grol ba ni bral ba zhes bya ba'i don to/ /rgyud nyid kyi rim pa'i ngo bo nyid kyi phyir ro/ /lte ba sprul par yang dag gnas/ /zhes bya ba ni lte ba sprul pa'i 'khor lo'i gnas su lus can thams cad kyi sprul pa'i 'khor rtsa 'dab drug cu rtsa bzhi'i dbus na gnas pa'o//glog ltar phra ba'i lce can ni/ /zhes bya ba ni glog dang 'dra ba'i lce ni sbrul gyi lce'o/ /phra ba'i zhes bya ba ni gcig tu rnal 'byor pas rtogs par bya ba nyid kyi phyir ro/ /gnyis med ye shes zhes bya ba ni gnyis su snang ba thams cad nub pa'i rgyu nyid kyi phyir ro//ji skad du yang / a yig sgom pa la gnas pa'i gang zag rten dang brten pa'i ngo bo nyid kyis rtsa'i 'khor lo yongs su bgrang ba ma yin no/ /rmad byung ba zhes bya ba ni ye shes kyi me'i sgo nas rnam par rtog pa thams cad bcom pa nyid kyi phyir ro//de ltar dngos su bstan pa'i ngo bo bshad nas/ de nyid kyi gnas skabs kyi dbye ba brjod pa'i phyir ro/ /de'i yan lag ngo bo nyid kyi rtsa'i 'khor lo yongs su bgrang ba ma yin no/ /de'i yan lag rin po che rnam pa lnga bskyed par byed pa brjod pa ni tshangs pa zhes bya ba la sogs pa gsungs te/gzhan gyi grub pa'i mtha' las grags pa'i byed pa po lnga la skyed byed nyid du gsungs te/ ji skad du/ pha rol rgol ba gang la la/ /tha dad rtags kyis rnam par gnas/ /de rnams 'dir ni smad bya min/ /rdo rje sems dpa'i rnam 'phrul phyir/ /zhes gsungs so/ / tshangs pa zhes bya ba ni rang nyid kyis phyung na gzugs kyi khams na gnas pa'o/ /khyab 'jug ces bya ba ni na ra ya na'o/ /drag po zhes bya ba ni gnod byed kyi bud med rnams ngur 'jug pas na drag po ste/ dbang phyug chen po'o/ /dbang phyug gang dang zhes bya ba ni thams cad mkhyen cing thams cad byed pa grong brgyad kyi 'jal byed kyi ngo bo'o//rtag zhi ba zhes bya ba ni ye shes bya ba nus pa dang bcas pa sgyu ma'i gnas skabs las log pa sems dpa'i ngo bo'o/ /de rnams de ltar rin po che zhes bya ba ni rin po che dang 'dra bar nus pa chen po dang ldan pa'i phyir ro/ /skyed pa po zhes bya ba ni/ bcom ldan 'das rdo rje 'chang la'o/ /pha dang mas zhes bya ba ni bshad ma thag pa'i a'i yi ge nyid kyi dbang gis de las yang dag par byung ba'i rdo rje 'chang gi bdag po rkyen gyis 'jig rten du byed pa po lnga'i snang ba 'byung ba'i phyir ro/ /re zhig 'di ni phyi'i bshad pa'i phyogs so/ /gzhan ni bcom ldan 'das dpal dgyes pa rdo rje las bstan te/ji skad du/ tshangs pa myang 'das phyir sangs rgyas/ /zhugs phyir khyab 'jug ces ni brjod/ /zhi ba rtag tu dge ba'i phyir/ /thams cad bdag nyid gnas dbang phyug /bde ba dam pas de kho na/ /dga' ba rtogs phyir rnam sangs rgyas/ / zhes gsungs so/ /de bzhin du phyag rgya chen po thig le'i le'u brgyad pa las/ de nas gzhan yang bshad kyis nyon/ /rigs ni rigs lnga'i bdag nyid can/ /rigs ni mthong ba zhes byar brjod/ /thod pa ka sogs nyid du 'dod/ /ka sogs 'dir ni rtsa bar shes/ /rtsa ba rnam pa lngar ni 'dod/ /lnga yi bdag nyid de bzhin gshegs//phung po lnga yi rang bzhin skyes/ /'byung ba lnga yi ngo bor grags/ /ye shes lnga yi bdag nyid mchog /tshangs pa khyab 'jug drag po dang / /dbang phyug dang ni rtag zhi ba/ /dngos su 'di rnams skyed byed de/ /thod pa gang zhig de lnga 'dod/ /kun la khyab pa'i stong pa che//gcig pu ma skyes mi 'pho ba/ /thod pa zhes bya 'od kyi gzugs/ /thams cad rdo rje 'chang bdag nyid/ /gang du snying rje btung ba ste/ /dam tshig nyid kyang skyong ba dang / /ngan 'gro rnams las rgal ba yi/ /thod pa de ni rab tu bsngags/ /sogs pa'i sgras ni lhan cig skyes/ / ka ni gang du'ang mi gnas te/ /de nyid rdo rje'i ngo bo yis/ /chos kyi 'khor lo nyid du gnas/ /mgrin pa'i 'khor lo rtag zhi ba/ /spyi bor de yi bdag po gnas/ /drag po lte ba'i 'khor lor gnas/ /de yi 'og tu tshangs pa gnas/ /khyab 'jug rlung gi 'khor lor gnas/ /me sogs rnams la zhugs pa'i phyir//bdag ni 'khor lo thams cad la/ /bdag po yi ni rnam par gnas/ /stong pa chen po'i ngo bor grags/ /mkha' 'gro ma yis kun nas bskor/ /mkha' 'gro lnga sogs bdag po ste/ /ye shes mkha' 'gro dbang phyug mchog /ces bya ba la sogs pa gsungs so//de ltar rin po che rnam pa lnga skyed par byed pa bstan nas/ de nyid kyi don dam pa'i ngo bo nyid bstan pa brjod pa'i phyir/ yi ge med cing zhes bya ba la sogs pa gsungs te/ mes po nyid kyi phyir ro/ /gong du bud med ces bya ba ni mtshan dang dpe byad la sogs pa bskyed pa nyid kyi phyir phyi rol gyi longs spyod rdzogs pa'i sku ltar 'byung ba'i tshogs ni rnam par spangs zhes bya ba ni longs spyod rdzogs pa'i sku nyid kyi phyir zhes dga' ba'i 'od kyi phreng ba byed pa mkhan pos so//yang na yi ge med cing zhes bya ba ni chos nyid kyi ngo bo nyid kyi phyir ro/ /gong bu med cing zhes bya ba ni gong bu'i ngo bo cig tu med pa'i phyir dang /chos thams cad la khyab pa nyid kyi phyir ro/ /'byung ba'i tshogs ni rnam par spangs/ /zhes bya ba ni 'byung ba dang 'byung chung gi ngo bo'i rnam par rtog pa med pa'i phyir ro/ /de la 'byung ba ni 'khor lo drug gi ngo bo ste/ 'byung ba las 'gyur ba ni de rnams la sngags kyi yi ge la sogs pa rnams te/spros pa med pa nyid kyi phyir ro/ /cha med ces bya ba ni spro ba'i rim pas A li dang kA li mi bskyod pas so/ /cha las 'das zhes bya ba ni rnam par rtog pa'i yul ma yin pa nyid kyi phyir ro/ /skye med ces bya ba ni gdod ma nas ma skyes pa'i chos nyid kyi ngo bo nyid kyi phyir ro//zad med ces bya ba ni rang bzhin gyis rtag tu gnas pa nyid kyi phyir ro/ /chos rnams thams cad las de dang gzhan nyid du brjod du med pa nyid kyi phyir ro/ /kun 'dzin ces bya ba ni yod pa dang med pa dang dngos po dang dngos po med pa'i spros pa las 'das pa'i phyir ro//mngon zhen la sogs spangs zhes bya ba ni rjod byed kyi sgra'i mtshan nyid rnams kyis so/ /spangs zhes bya ba ni de rnams kyi yul ma yin pa nyid kyi phyir ro/ /lhag ma ni khyad par gyi chos kyi ngo bo nyid kyi phyir/ de med pas lhag ma med pa'o/ /mchog ni mchog ste zhes bya ba ni rgyud kyi rim pa'i yi ge a las shin tu mchog nyid kyi phyir ro//zhi ba ni zhes bya ba ni shin tu zhi ba'i phyir ro/ /dngos po kun gyi dbus na gnas/ /zhes bya ba ni chos rnams yongs su spangs nas mi gnas pa nyid kyi phyir ro/ /de ltar de nyid kyi don dam pa'i ngo bo nyid mngon par brjod nas/rnam shes gsum gyi skye ba bstan pa brjod pa'i phyir/ 'jug pa'i rnam shes tshogs drug gis/ /zhes bya ba la sogs pa gsungs te/ mig la sogs pa'i rnam shes drug la'o/ /khyab byed du ni yang dag gnas/ /zhes bya ba ni lte ba la gnas pa'i a'i yi ge'i ngo bo la brtan nas/'jug pa'i rnam par shes pa sad pa bskyed pa'i phyir ro/ /nyon mongs can gyi yid ces bya ba ni bdag tu lta ba dang / bdag la chags pa dang / bdag tu rmongs pa dang / bdag tu nga rgyal ba'i mtshan nyid can gyi rnam pa bzhin rtag tu 'dud pa nyid kyi phyir ro/ /sngon bzhin du khyab byed nyid du gnas pa zhes bya bar sbyar bar bya'o//gal te khyab byed yin na/ 'o na de'i skyon rnams kyis 'di nye bar bsgos par 'gyur ro snyam du dogs pa bsal ba'i phyir/ rnam rtog med cing zhes bya ba gsungs te/ nyon mongs pa can gyi yid kyi rnam par shes pa la sogs pa'i rnam par rtog pa rnams kyis ma bsgos pa'i phyir ro//de nyid kyi phyir rten med pa ste/ don dam par nyon mongs pa can gyi yid kyi rnam par shes pa la sogs pa mi 'thad pa nyid kyi phyir ro/ /de bzhin du/ kun gzhi rnam shes gsungs pa'i phyir/ /zhes bya ba ni thams cad kyi sa bon la'o/ /sad par byed ces bya ba ni rab tu sad par byed pa'o//phyi rol gyi sad par byed pa'i rkyen mi 'thad pa nyid kyi phyir ro/ /de'i bag chags sad pa la de'i rten nyid yin no/ /bems po nyid ni zhes bya ba ni dmigs pa mi rigs pa nyid kyi phyir ro/ /de ltar rnam pa gsum gyis de la gnas skabs kyi dbye ba bstan nas/ de thob pa'i rgyu bstan pa brjod pa'i phyir/mchog tu gnyid med rnal 'byor gyis/ /zhes bya ba la sogs pa gsungs te/ nang gi bdag nyid can gyi thabs dang shes rab snyoms par 'jug pa'i mtshan nyid mchog tu phyi rol gyi mtshan nyid dang bral ba'i rnal 'byor gyis thob par bya'o/ /yi ge zhes bya ba ni a yig gi ngo bo'o//bla na med ces bya ba ni bla na med pa'i go 'phang gi rgyu nyid kyi phyir ro/ /rtog med ces bya ba ni don dam par 'gro ba dang 'ong ba'i bya ba med pa'i phyir ro/ /'jigs med ces bya ba ni 'dod chags la sogs pa'i 'jigs pa las rnam par grol ba'i phyir ro/ / gsal ba dang zhes bya ba ni lte ba'i gnas su rnal 'byor pa'i ye shes gsal bar rtogs pa'i phyir ro/ /rlung gi de nyid yang dag brten/ /zhes bya ba ni las kyi rlung la brten nas thig le gsum bsgoms pa'i sgo nas rtogs par bya ba nyid kyi phyir ro/ /ho yig gis ni bskul byas nas//zhes bya ba ni smin ma'i dbus su rlung gi 'khor lo gnas pa'i yi ge ho thig le'i dbye ba ngo bos yang dag par bskul ba ste/ steng du 'gro ba bkag nas 'og tu 'gro ba'i phyir ro/ /me yi 'khor lo rnam par sbyong / /zhes bya ba ni mgrin pa'i 'og tu gnas pa'i me'i 'khor lo rab tu sad par byed pa ste/'og dang steng sprul pa dang me'i 'khor lo rab tu sad pas rtsa'i 'khor lo ma lus pa'i rnam par rtog pa 'joms pa'i phyir ro/ /de ltar de thob par byed pa'i rgyu brjod par bstan nas/ nye bar bsdu ba bshad pa'i phyir/ de ltar sgra'i tshig gi don zhes bya ba gsungs te/ le'u dang por dri ba'i ngo bo nyid kyi gsungs pa la'o//don zhes bya ba ni brjod par bya ba'i ngo bo la'o/ /bla ma'i zhal zhes bya ba ni slob dpon gyi zhal la'o/ /rnam par gnas zhes bya ba ni de'i drin gyis thob par bya ba nyid kyi phyir snyam du dgongs pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa/ zab mo'i don gsal ba zhes bya ba las le'u bdun pa'i rgya cher bshad pa'o// //de ltar le'u bdun pas sgra'i yul la dri ba'i lan brjod pa bstan nas/ da ni skabs su bab pa'i gsang ba'i yul la dri ba'i lan bstan pa brjod pa'i phyir/de'i dri ba'i lan bshad par rtsom pa ni de nas gzhan yang zhes bya ba la sogs pa gsungs te/ le'u bdun pa'i rjes la gsang ba bshad kyis nyon zhes bya ba dang 'brel to/ /ji lta bu zhe na/ de'i phyir bla na med pa zhes bya ba gsungs te/ 'di las gong na med pa'i phyir bla na med pa'o/ /de ltar gsang ba'i yul la dri ba'i lan brjod pa rtsom pa bstan nas/ dngos su gsang ba bshad pa brjod pa'i phyir/ de'i yan lag rang gi ngo bo'i dbye ba gtso bo ma yin pa'i gsang ba bstan pa'i phyir/ gsang ba b+ha ga zhes ni gsungs//zhes bya ba ste/ nyon mongs pa 'joms par byed pa'i phyir dang / dam tshig dang mi ldan pa rnams la bstan par bya ba ma yin pa nyid kyi phyir ro/ /b+ha ga chos 'byung de bzhin te/ /zhes bya ba ni phung po dang khams dang skye mched bskyed pa'i gnas nyid kyi phyir ro/ /chos rnams 'di las skyes pas na'o//bde ba chen po'i go 'phang rten/ /zhes bya ba ni kun rdzob dang don dam pa'i ngo bo byang chub kyi sems rnam pa gnyis la mngon par gsal ba'i rgyu nyid kyi phyir dang / de yang dag par rten pa'i stobs kyis de dmigs pa'i phyir ro/ /dga' ba skyed par byed pa'i rgyu//zhes bya ba ni bde ba cung zad dang / de las lhag pa dang / de dang bral ba dang / thams cad yongs su rdzogs pa'i mtshan gyi brgyud pa'i rgyu dang / dngos kyi rgyu dang / de 'jig pa dang / bde ba thams cad kyi mchog gi ngo bo dga' ba la sogs pa rnams bskyed pa'i rgyur gyur pa'o/ / ji skad du/ dga' ba'i bde ba cung zad tsam/ /mchog tu dga' ba de las lhag /dga' bral dga' ba chags pa bral/ /de nas bzhi pa bsgom par bya/ /de ltar na gtso bo ma yin pa'i gsang ba'i man ngag bstan nas/ de las bzlog pa'i bde ba'i ngo bo gsang ba'i man ngag bshad pa'i phyir/rdo rje sems dpa'i gnas zhes bya ba gsungs te/ dpe'i lhan cig skyes pa la bla ma'i gdams ngag gi dbang gis lhan cig skyes pa snyam du zhen pa byas nas rdo rje sems dpa'i don dam pa la/ phyag rgya chen po'i rnam pa'i rten ni de la brten nas de dmigs pa'i phyir ro/ /ye shes lnga yi bdag nyid ces bya ba ni sangs rgyas thams cad dang chos rnams gnas pa'i rnam pas yongs su shes pa'i phyir me long lta bu'i ye shes so//rkang med la sogs pa'i sems can rnam pa bzhi phyag rgya chen po dang khyad par med pa nyid kyis thams cad du bde ba'i rnam pa nyid kyi ye shes so/ / dus thams cad du bde ba'i rnam pa ni so sor rtog pa'i ye shes so/ /rang gis rtogs pa'i de kho na nyid gzhan rnams la yang thabs de nyid kyis de kho na nyid la spyod pa ni bya ba grub pa'i ye shes so/ /sna tshogs pa'i 'du shes bzlog pas shin tu rnam par dag pa'i chos kyi dbyings kyi rang bzhin te/ nam mkha' lnga'i bdag nyid ces bya ba'i gzhung yang yod de/ de'i phyogs la ni rtsa'i nam mkha' chos 'byung nang du gnas pa rtsa'i nam mkha' lngas 'gro bar bya ba nyid bshad par bya'o/ /gsal zhes bya ba ni lag mthil du skyu ru ra bzhag pa ltar gsal ba'i ngo bos dmigs pa'i phyir ro/ /spros pa med ces bya ba ni mi mthun pa'i phyogs zil gyis mnan pa'i phyir dang /yod pa dang med pa las shin tu 'das pa'i phyir ro/ /ye shes chen po zhes bya ba ni 'jig rten las 'das pa nyid kyi phyir ro/ /kun du rtog pa thams cad spangs/ /zhes bya ba ni lus dang ngag dang yid dang ye shes kyi rnam par rtog pa rnams kyis ma gos pa'i phyir ro//dga' bral mtha' zhes bya ba ni dga' bral ba'i mtha' nyid kyi phyir te/ 'jig rten pa'i rjes su 'brangs pas so/ /mchog tu zhes bya ba ni 'phags pa'i 'jig rten gyi rjes su 'brangs pas so/ /dga' bral dang de ma thag tu nyams su myong ba'i phyir ro//phra zhes bya ba ni rnal 'byor pas rang gis rig par bya ba nyid kyi phyir ro/ /lhan cig skyes zhes bya ba ni so so'i skye bo'i lhan cig skyes pa'i mtshan nyid dang bral ba nyid kyis rgyu rkyen las ma skyes pa nyid kyi phyir ro/ /kun bdag gnas zhes bya ba ni dga' ba gsum la khyab pa nyid kyis gnas pa'o//ji skad du/ yang na kun bdag gnas nyid de/ /yang na thams cad rnam par spangs/ /zhes gsungs so/ /dga' bral la sogs pa'i skad cig ma zhes bya ba ni dga' bral la sogs pa rnams kyis ji ltar rigs par gtso bo'i rgyu dang rgyu gcig pa'i ngo bo dang /skad cig ni rnam pa sna tshogs la sogs pa rnams dang bral ba'o/ /de'i mtshan nyid dang bral ba'i mtshan nyid can gyi phyir ro/ /phra ba zhes bya ba ni phra ba'i rnal 'byor pa rnams kyis rigs pa'i phyir ro/ /rdzogs pa'i byang chub kyi ni yid/ /ces bya ba ni don dam pa'i byang chub kyi sems so//srog la phan par 'tsho ba zhes bya ba ni srog gi dbang po'i mtshan nyid can la'o/ /de nyid kyi phyir srog ces bya ba ni/ srang mda'i 'khrul 'khor lta bur gnas/ /zhes bya ba ni rtse gsum la reg pas rtogs pa'i phyir ro/ /cha med ces bya ba ni cha bco lnga'i zla ba'i cha las 'das pa'i phyir ro//rtog pa las 'das pa zhes bya ba ni ngag gi rnam par rtog pa'i sgra'i yul ma yin pa'i phyir ro/ /stong nyid ces bya ba ni rtag tu de nyid yod pas ma bcos pa'i ngo bo nyid kyi phyir ro/ /skye med ces bya ba ni ngag gi rnam par rtog pa'i sgra'i yul ma yin pa'i phyir ro/ /zad pa med ces bya ba ni 'jig pa med pa'i phyir ro//de yang skye ba nyid med pa'i phyir zhes bya bar sbyar bar bya'o/ /de ltar don dam pa'i bde ba'i ngo bo gsang ba bstan nas/ kun rdzob kyi byang chub sems kyi ngo bo gsang ba bstan pa'i phyir/ sprul pa'i 'khor lo thim pa dang / /zhes bya ba la sogs pa gsungs te/thim pa dang zhes bya ba ni/ bde ba chen po'i 'khor lo la/ /sems kyi zla ba ltung bar gyur pa las/ de dang nye bar gnas pa'i gsang ba'i 'khor lo gnas pa'o/ /bde ba chen po'i 'khor lo skye/ /zhes bya ba ni mgo bo'i gnas nas so/ /bsam gyis mi khyab ces bya ba ni me long lta bu'i ye shes kyi ngo bo nyid kyi phyir ro//kun+da dang zla ba dag pa dang 'dra ba nyid kyis so/ /khyab ces bya ba ni khams sum cu rtsa gnyis ro mnyam pa las mnyam pa nyid kyis ngo bo nyid kyi phyir ro/ /zhi ba zhes bya ba ni rnam par rtog pa nye bar zhi bas so/ /cha bral zhes bya ba ni so sor rtog pa'i ye shes kyi bdag nyid kyi phyir bya ba grub pa'i ye shes kyi bdag nyid do//mchog ces bya ni mchog ni bde ba bskyed pa'i rgyu nyid kyi phyir ro/ /rdo rje pad+ma mnyam sbyor rtogs/ /zhes bya ba ni dbang po gnyis kyi snyoms par 'jug pa'i sbyor bas nyams su myong bar 'gyur ba'i phyir ro/ / bde ba thams cad ster zhes bya ba ni 'jig rten dang 'jig rten las 'das pa'i bde ba thob par byed pa'o/ /rlung gi de nyid 'dzin pa yis/ /zhes bya ba ni rdo rje dang pad+ma'i nam mkha' la'o/ /'dzin par byed ces bya ba ni/ bya d+h+ye'i sa bon bkod pa 'am/ sa ni rkang pas mnan byas zhes bya ba'i rim pa'am/ dngos su rlung bzung ba'i stobs kyis so/ /de nyid kyi phyir/ rlung gi de nyid rig pa yis/ /zhes bya ba la sogs pa'o/ /gang de skye ba nyams myong bas/ /zhes bya ba ni so so'i skye bo rnams dang 'phags pa rnams kyis rang gis rig par bya'o/ /gsang ba yis ni bya bar grags/ /zhes bya ba ni/ yi ge ra dang ha dag gis 'dzag pa'i phyir na gnas pa'o zhes bya bar grags so/ /de ltar don dam pa gsum gyis dngos su de brjod pa bstan nas/ nye bar bsdu ba bstan pa brjod pa'i phyir/ de nyid gsang ba yi ni mchog /ces bya ba la sogs pa gsungs te/ de ma thag par bstan pa'i rigs pas brjod pa'o//mchog ces bya ba ni nyams su myong ba'i rim pas rig par bya ba nyid kyi phyir mchog go/ /bla ma'i zhal la rnam par gnas/ /zhes bya ba ni ye shes mkha' 'gro ma'i brgyud pas bsgrub par bya'o/ /phan tshun brgyud pa'i rim pa yis/ /zhes bya ba ni bcom ldan 'das nas brtsams te/ye shes mkha' 'gro ma'i zhal gyi rim pas bla ma'i zhal gyi rim pa la gnas so/ /de nyid kyi phyir ye shes zhes gsungs te zhes bya ba ni rjes su btsal bar bya ba'o/ /bla ma dam pa'i zhal zhes bya ba ni rgyud du gsungs pa'i mtshan nyid dang ldan pa'i slob dpon gyi brgyud pas zhes bya ba'i don to//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa/ zab mo'i don gyi sgron ma zhes bya ba las le'u brgyad pa'i rgya cher bshad pa'o// //de ltar le'u brgyad pas gsang ba'i yul la dri ba'i lan bstan pa brjod nas/da ni skabs su bab pa'i sdom pa'i yul la dri ba'i lan gdab pa brjod pa dri ba de'i lan bshad par rtsom pa ni/ de nas zhes bya ba la sogs pa gsungs te/ gzhan yang zhes bya ba ni snga ma la ltos nas so/ /sdom pa'i don zhes bya ba ni sngags kyi theg pa'i sdom pa'i don bshad kyis nyon zhes bya ba dang 'brel to//de kho na nyid ces bya ba ni kun rdzob dang don dam pa'i rnam pa'i de kho na nyid la brten nas shes par bya ba'i don to/ /de ltar sdom pa'i yul la dri ba'i lan brtson pa bstan nas/ dngos su sdom pa bshad pa brjod pa de'i yan lag bsrung bar bya ba'i dam tshig bstan pa ni/sdom pa srung bar byed pa gang / /zhes bya ba ni sdom pa byed pas na sdom pa'o/ /srung bar byed pa zhes bya ba ni phyir mi spro ba'i don gyis so/ /de ni byang chub sems zhes brjod/ /ces bya ba ni kun rdzob ces bya ba'i tha tshig go/ /'o na de la ji ltar bsrung zhe na/ de'i phyir rdo rje rtse mor zhes gsungs te/thabs kyi yan lag tu gyur pa la'o/ /'dzin bzhin pa bya ba ni sngon du bshad pa'i thabs rnam pa gsum gyis mi spro bar ro/ /de ni bsrung bar zhes bya ba ni phyir mi spro ba'i bdag nyid can no/ /yongs su grags zhes bya ba ni brjod pa zhes bya ba'i don to/ /de ltar bsrung bar bya ba'i dam tshig bstan nas/de las bzlog pa'i sdom pa bstan par bya ba'i phyir/ de'i yan lag dbang po rnams kyi yul rnams la longs spyod pa spangs pa brjod pa ni/ dbang po rnams ni zhes bya ba la sogs pa gsungs te/ dbang po rnams ni mig la sogs pa rang gi grub pa'i mtha' las grags pas ngag dang /gzhan gyi grub pa'i mtha' las grags pas ngag dang / lag pa dang / rkang pa dang / gsang ba dang / bshad pa'i gnas kyi ngo bo'i las kyi dbang po rnams la'o/ /yul rnams la zhes bya ba ni gzugs la sogs pa rnams la'o/ /'jug cing gang zhes bya ba ni 'dzin pa la sogs pa'i ngo bo'o//gnas pa zhes bya ba ni ma rig pa'i stobs kyis so/ /de ni zhes bya ba'i don ni dbang po'i rgyu ba 'jug pa la'o/ /yul rnams la mi rgyu ba bya ba nyid kyis sam 'chad par 'gyur ba'i rigs pas yul dang yul can ma grub pa dang / gzugs rdo rje ma la sogs pa'i ngo bo'o//byang chub sems kyi ngo bo nyid kyis yul can dag brjod pas so/ /sdom pa ni bsdams pas bsrung ba gang yin pa de dam tshig bsrung ba la yang bshad pa yin no/ /'chad bzhin pa'i le'u nyid las zhes bya ba'i don to/ /de ltar dbang po rnams la yul rnams so//rgyu ba yongs su spang ba bstan nas/ dam tshig dang mi ldan pa'i skye bo dang lhan cig tu gnas pa yongs su spang ba bstan pa brjod pa'i phyir ro/ /gdul dka' zhes bya ba la sogs pa gsungs te/ gdul dka' zhes bya ba ni gdul bar dka' ba'am/ snying rje la sogs pa rnam par spang ba'i sems kyi rgyun rnams kyis so//de bzhin du sems can gzhan rnams dang lhan cig 'dre ba la sogs pa mi bya zhing zhes bya ba dang 'brel to/ /tshul 'chos zhes bya ba ni/ rigs dang spyod pas smad pa rnams kyis so/ /sgyu can zhes bya ba ni rigs pa dang mi rigs pa'i spyod pa las phyi rol du gyur pa mu stegs pa la sogs pa rnams dang ngo //bsam pa rtsub pa zhes bya ba ni rnam par 'tshe ba la sogs pa byed pa la rtse gcig pa'o/ /g.yo can dang zhes bya ba ni sgra tsam la g.yo ba 'dzin pa rnams so/ /dad med ces bya ba ni las dang las kyi 'bras bu yod pa yongs su dor ba'o/ / rtog ge zhes bya ba ni rtog ge skam po gcig pu la gnas pa rnams so/ /lhan cig ces bya ba ni lhan cig tu'o/ /de bzhin rtags kyis nyer 'tsho dang / /zhes bya ba ni don dam par lta ba log pa yin yang grub mtha' la 'dris par bya ba'i don du rab tu byung ba 'dzin pa'i sgyu thabs kyis gang dag dam tshig la sogs pa 'dzin par byed pa de rnams ni rtags kyis nye bar 'tsho ba'o//nyan thos zhes bya ba ni bdag gcig pu zhi ba dang / dul bar bya ba'i phyir rtse gcig pa'o/ /de bzhin du nor la brkam chags can zhes bya ba ni sems kyi rgyud la ser sna yod pa rnams kyis so/ /de kho na nyid sun 'byin cing //zhes bya ba ni thabs shes rab tha mi dad pa'i de kho na nyid bstan pa'i phyir/ thabs dang shes rab kyi bdag nyid kyi sku gzugs la sogs pa rnams la smod par byed pa rnams so/ /don dam par ni mi shes pa/ /zhes bya ba ni chos thams cad rang bzhin med pa la mos pa dang bral ba rnams kyis so//med par lta dang zhes bya ba ni kun rdzob pa snang bzhin pa'i dngos po rnams la sdang ba sel ba rnams so/ /tshul khrims 'chal zhes bya ba ni yang dang yang du dam tshig nyams pa'o/ /de lta bu la sogs pa dang lhan cig tu gtam ni smra dang zhes bya ba ni/ long gtam la sogs pa'o//mi bya zhing zhes bya ba ni sdom pa nyams par thal bas so/ /'dre ba la sogs mi bya zhing / /zhes bya ba ni snod gcig tu chang la sogs pa longs spyod par mi bya'o/ /de gcig pur ma zad kyi ji srid du/ se gol gtogs pa tsam du yang / /zhes bya ba ni skad cig tsam du yang ngo / / de dang lhan cig ces bya ba ni de ma thag tu bshad pa'i gdul dka' ba la sogs pa rnams dang lhan cig go/ /gang du yang zhes bya ba ni yul gang du yang ngo / /gnas mi bya zhes bya ba ni lhan cig gnas par mi bya'o/ /de ltar dam tshig mi ldan pa'i skye bo dang lhan cig tu gnas pa yongs su spang bar brjod nas/'gal ba'i rnal 'byor ma dang lhan cig tu gnas pa yongs su spang ba bstan pa brjod pa'i phyir/ las kyi phyag rgya zhes bya ba la sogs pa gsungs te/ las tsam pa nye bar mkho ba'i phyir ro/ /de bzhin gang zhes bya ba ni sngar bshad pa'i sems can bzhin du gal te gdul dka' ba la sogs pa'i skyon mang bas de dang lhan cig tu/dam tshig la ni 'jug mi bya/ /zhes bya ba dang 'brel to/ /gal te byis pa so so'i skye bo dang zhes bya ba ni/ byis pa ni de kho na nyid kyi yul la brda ma byang ba'i phyir ro/ /so so'i skye bo zhes bya ba ni phyi rol gyi bya ba la dga' ba nyid kyis 'phags pa'i skye bo dang / lhan cig tu gnas pa bral ba'o/ /de dang lhan cig dam tshig ni/ sa cig tu tsA ru'i bza' ba la sogs pa mi bya ba ste/ bsgrub par bya ba ma yin no/ /rnal 'byor nyams par 'gyur zhes bya ba ni rnal 'byor rnam pa gnyis nyams pa'i 'jigs pas zhes bya ba'i don to/ /de ltar 'gal ba'i rnal 'byor ma dang lhan cig gnas pa spang bar bya ba bstan nas/tshul 'chos kyi dam tshig dang ldan pa dang lhan cig gnas pa yongs su spang ba'i phyir/ gdul dka' zhes bya ba la sogs pa gsungs te/ dam tshig dang mi ldan pa dang 'gal ba rnams kyis so/ /dam tshig mthar gnas pa zhes bya ba ni bsrung bar bya ba'i dam tshig la sogs pa las phyi rol du gyur pa'o//dam tshig gi mtha' ma ring du gnas pa nyid kyi phyir dam tshig gi mthar gnas pa'o/ /snod dang phyag rgya sogs bstan dang / /zhes bya ba ni dam tshig dang mi ldan pa la thod pa dang kha T+wAM ga la sogs pa ston par byed cing bdag ni rnal 'byor pa ste/bdag ni mthu dang ldan pa zhes bya ba la sogs pa gzhan rnams 'dun pa bskyed pa'i don du'o/ /skam dang 'brel pas 'jug pa dang / /zhes bya ba ni dam tshig la sogs pa la ste/ dad pas ni ma yin no/ /lhan cig ces bya ba ni lhan cig pas so/ /dam tshig la ni 'jug mi bya//zhes bya ba ni tshogs kyi 'khor lo la sogs pa lhan cig rjes su bsgrub par mi bya'o/ /de ltar rnam pa bzhis bzlog pa'i ngo bo sdom pa bstan nas/ 'jug pa'i ngo bo'i sdom pa bstan pa la 'jug pa'i phyir snod ces bya ba la sogs pa gsungs te/ snod ni thod pa'o/ /Da ma ru zhes bya ba ni bcom ldan 'das dang 'brel pa'i'o//gri gug ces bya ba ni bcom ldan 'das ma'i phyag mtshan no/ /sngags bam dang zhes bya ba ni sngags kyi glegs bam mo/ /bgrang phreng dang zhes bya ba ni phreng ba'o/ /dam tshig med pa zhes bya ba ni dam tshig dang mi ldan pa'i skye bo spang bar bya'o//gzhan dag la zhes bya ba ni dam tshig dang mi ldan pa dang dbang ma bskur ba'o/ /gang du yang bstan par mi bya'o zhes bya ba ni bstan par mi bya ba ste/ dam tshig nyams pas 'jigs pa nyid kyi phyir ro/ /de ltar 'jug pa'i ngo bo'i sdom pa bstan nas/ gnyis ka'i ngo bo sdom pa mngon par brjod pa'i yan lag dam tshig la gnas pa'i man ngag brjod par bya ba'i phyir/dge slong sdom pa la gnas pa/ /zhes gsungs te/ dge slong zhes bya ba ni rtags tsam 'dzin pa'i dge slong ngo / /rnal 'byor spyod sogs bya ba min/ /zhes bya ba ni lhag ma'o/ /de nyid kyi phyir sdom pa la gnas pa zhes gsungs te/rang dang rjes su mthun pa so sor thar pa'i sdom pa la gnas pa'o/ /rnal 'byor ni rim pa gnyis sgom pa po rnams kyi spyod pa/ spros bcas la sogs pa gsum mo/ /de dang por gang la yod pa de rnams la de skad ces bya ba'o//bya ba dang zhes bya ba ni phyag rgya chen po thob par 'os pa rnams so/ /man ngag dang ni bstan par mi bya ba ni/ brgyud pa'i rim pas brjod pa bstan pa ni sngar bzhin mi bya ba'o/ /ras ris la sogs mi bya zhing / /zhes bya ba ni bcom ldan 'das phyag rgya chen po'i rnam par bstan par mi bya ste dgos pa med do//de ltar dam tshig la mi gnas pa la man ngag mi smra bar bya ba bstan nas/ spyod pa mi brjod par bya ba'i phyir/ gnyis pa'i yan lag bstan pa ni/ /gang gis spyod dus lhan cig tu/ /zhes bya ba la sogs pa gsungs te/ tshogs kyi 'khor lo la sogs pa byed pa'i dus su gang dang lhan cig tu tshogs kyi 'khor lor gnas pa'i dpa' bo dang dpa' mo'i mtshan nyid dang lhan cig tu'o//ji ltar zhes bya ba ni rnam pa gang zhig gi ngag gis so/ /spyod pa zhes bya ba ni tsA ru'i bza' ba la sogs pa'i mtshan nyid can no/ /yang dag spyod ces bya ba ni rang nyid kyis bya ba'o/ /bla ma la yang zhes bya ba ni dbang bskur ba dang rgyud bshad pa la'o//de zhes bya ba ni spyod pa spyad pa la sogs pa la'o/ /gzhan rnams la ni smos ci dgos/ /zhes bya ba ni dam tshig dang mi ldan pa la smra ba gtam tsam du brjod par yang mi bya'o/ /de ltar spyod pa mi smra ba nyid bstan pa brjod nas/ yul rnams la spyod pa'i stobs kyis dbang po'i rgyu ba dgag pa bstan pa'i phyir/dbang po'i yul zhes bya ba la sogs pa gsungs te/ gzugs la sogs pa'o/ /dbang po'i spyod pa zhes bya ba ni mig la sogs pa'i 'jug pa drug po rnams la'o/ /gang nas zhes bya ba ni thog ma med pa nas kyi ma rig pa'i bag chags kyi stobs kyi ngo bo nyid kyis so/ / de nas bsdams byas nas zhes bya ba ni nges pas so/ /'o na ngo bo nyid kyis dbang po rnams yul la mngon par phyogs pa de ji ltar bsdam par bya zhe na/ de'i phyir/ stong nyid gnyis med sgyu mas dpyad/ /ces bya ba gsungs te/ rten cing 'brel par 'byung ba'i gtan tshigs rnams kyis stong pa nyid dpyad par bya ste/phyi rol gyi don la phra rags la sogs pa'i brtag pas gnod pa'i phyir dang / yod pa sgrub par byed pa'i tshad ma med pa'i phyir dang / bag chags kyi stobs kyis sems tsam po snang ba nyid ni gnyis su med pa'i dpyad pa'o/ /dngos po med kyang shing dang bong ba la sogs pa bzhin du glang po che'i snang ba ltar sgyu ma la sogs pa spyad par bya ste/sogs pa'i sgras ni dri za'i grong khyer la sogs pa rnams gzung bar bya'o/ /de lta bur gyur pa'i rnam par dpyad pa ni bsdam par bya zhes bya ba dang 'brel pa'o/ /kun rdzob ces bya ba ni don dam pa dang rjes su mthun pa'i phyir ro/ / ji skad du/ de nyid khang bzangs rtse mor ni/ /'dzeg par rigs pa ma yin te/ /yang dag kun rdzob them skas ni/ /med par mos pa rnams la'o/ /zhes gsungs so/ /lhag ces bya ba ni shin tu'am yang nas yang du'o/ /de ltar yul rnams la rnam par dpyad pa'i stobs kyis dbang po'i rgyu ba rnams 'gag pa bstan nas/khyad par du 'phags pa'i dngos po la chags pa'i stobs kyis 'dun pa bzlog pa'i phyir/ shes rab ye shes dbang bskur sogs/ /zhes gsungs te/ dbang gsum pa'i dus su'o/ /nyams su myong ba'i bde ba yin/ /zhes bya ba ni dga' ba la sogs pa ston par byed pa bla ma'i drin gyis te/nyams su myong ba ni dbang po rnams bsdam par bya zhes bya ba dang 'brel to/ /bde ba yis zhes bya ba ni sdug bsngal dang bral ba'i rnam pa dag gis so/ /dran pa yis zhes bya ba ni sngon nyams su myong ba'i bde bas so/ /bde ba chen po zhes bya ba ni dran pa la mngon du phyogs par byed pas bde ba chen po reg pas rang gi rgyud la skyed par byed pa rnams kyis so//dbang po rnams zhes bya ba ni slar yang de dang 'dra ba'i dngos po yang dag par brten par bya ba'i don rnams bsgom pa zhes bya ba'i don to/ /de ltar khyad par du 'phags pa'i dngos po la chags pa'i stobs kyis 'dun pa bzlog pa bstan nas/'phags pas smad par mdzad pa'i spyod pa dgag par bya ba bstan pa'i phyir/ bdag bstod ces bya ba la sogs pa gsungs te/ bdag dang mnyam pa gzhan med pa'i phyir/ bdag la bstod pa'o/ /gzhan la smod pa zhes bya ba ni bdag las gzhan pa'i pha rol po la smod par byed pa'o//ye shes snyems sogs nges spangs pa/ /zhes bya ba ni mkhas par rlom pa la sogs pa nga rgyal bsdams pas so/ /sdom par bshad pa yis zhes bya ba ni bcom ldan 'das kyis so/ /gang gis sdom pa zhe na/ de'i phyir blo ldan zhes bya ba gsungs te/sngags kyi sgo'i spyad pa spyod pa'i rnal 'byor pa rnams zhes bya ba'i don to/ /yang dag ces bya ba ni phyin ci ma log pas so/ /rdo rje dbang phyug ces bya ba ni phyag na rdo rje la bod pa'o/ /de ltar don rnam pa lngas slar yang rnam pa gzhan gyis gnyi ga'i ngo bo'i sdom pa brjod nas/ nye bar bsdu ba'i sgo nas bzlog pa las nyes dmigs bstan pa'i phyir/de lta bu sogs zhes bya ba la sogs pa gsungs te/ bsrung ba zhes bya ba ni yongs su bskyang ba'o/ /dam tshig ces bya ba ni tshogs kyi 'khor lo la sogs pa la'o/ /rnal 'byor pa zhes bya ba ni rim pa gnyis bsgom pa po'o/ /rtag tu zhes bya ba ni dus gsum du'o//gzhan du zhes bya ba ni gal te dam tshig srung bar mi byed na/ de ltar rnal 'byor nyams par 'gyur/ /zhes bya ba ni/ dam tshig gi 'bras bu mi 'byung zhes bya ba'i don to/ /rnal 'byor ldan pa zhes bya ba ni rnal 'byor ni sems 'dzin pa'i ngo bo ste/ de dang ldan pa ni de yis so//rdo rje can zhes bya ba ni sgrub pa po'o/ /de ltar rnam pa gnyis kyis gnyi ga'i ngo bo sdom pa bstan nas/ slar yang bzlog pa'i ngo bo sdom pa bshad pa'i phyir/ bgrang phreng dang ni zhes bya ba gsungs te/ mi rus la sogs pa'i rang bzhin no/ /dbu rgyan dang zhes bya ba ni sangs rgyas lnga'i rang bzhin no//rus pa'i rang bzhin phyag rgya dang / /zhes bya ba ni 'khor lo la sogs pa drug go/ /glegs bam zhes bya ba ni rgyud la sogs pa'i pu sti'o/ /bsam gtan ras ris dang zhes bya ba ni/ /bcom ldan 'das phyag rgya chen po'i ngo bo'o/ /thod pa la sogs zhes bya ba ni thod pa dang kha T+wAM ga la sogs pa'o//rnal 'byor ma zhes bya ba ni dam tshig gi phyag rgya la'o/ /thams cad du ni zhes bya ba ni rnam pa thams cad du'o/ /dngos grub phyir zhes bya ba ni phyag rgya chen po'i dngos grub kyi mtshan nyid can zhes bya ba'i don to/ /bla ma la yang zhes bya ba ni rdo rje slob dpon la'o/ /rtag tu zhes bya ba ni dus rtag par ro//sba zhes bya ba ni sba bar bya ba'o/ /de ltar slar yang bzlog pa'i ngo bo sdom pa bstan nas/ rnam pa gzhan gyis 'jug pa'i ngo bo'i sdom pa brjod par 'dod nas/ de'i yan lag sngags kyi ngo bo la 'jug pa'i spyod pa ni/ sngags ni tshig tu brjod mi bya/ /zhes bya ba la sogs pa gsungs te/tshig tu brjod mi bya zhes bya ba ni gsal bar brjod pa'i yi ge'i ngo bos so/ /sngags ni zhes bya ba ni snying po dang nye ba'i snying po dang / spro ba la sogs pa'o/ /mchu bsgul bar yang mi mngon zhing / /zhes bya ba ni bdag gis sngags brjod par bya ba dang / bdag gis sngags shes par bya ba pha rol po rnams la go ba bskyed pa'i phyir ma yin no//gal te de ltar yin na 'o na sngags bzla bar mi bya'am zhe na/ de'i phyir cung zad mgrin pas zhes bya ba la sogs pa gsungs te/ mgrin pas brjod cing sgra yis te/ /nang du zla ba'i bdag nyid do/ /sngags kyi rgyal po zhes bya ba ni de ma thag par bshad pa'i 'o//de ltar bzla zhes bya ba ni nang du brjod pa'i bdag nyid can gyi ngo bos so/ /bzla zhes bya ba ni grangs sngon du 'gro bas zhes bya ba'i don to/ /'o na ji ltar nang du bzlas pa'i bdag nyid kyi ngo bos bsngags bzla bar bya zhing / gzhan du ni ma yin nam zhe na/ de'i phyir gsang la zhes bya ba la sogs pa gsungs te/sba ba ni phyi rol du mi brjod pas so/ /dngos grub ces bya ba ni sdig pa thams cad zad par byed pa'i bdag nyid can no/ /mtshungs pa med ces bya ba ni mu stegs la sogs pa dang thun mong ma yin pa'o/ /gang phyir zhes bya ba ni rgyu gang las so/ /de ni sdom par bshad ces bya ba ni phyi rol du gsal bar byed pa sdom pa nyid kyi phyir ro//de ltar rnam pa gnyis kyis rnam pa gzhan gyi 'jug pa'i ngo bo sdom pa bstan nas/ ma bskyangs pa'i nyes dmigs kyi yan lag snod ma yin pa la rnam pa thams cad du spang bar bya ba la bka' bsgo ba bstan pa'i phyir/ snod min nor ni chen po dang //zhes bya ba gsungs te/ sngags kyi spyod pa'i snod ma yin pa'o/ /nor ni chen po dang zhes bya ba ni nor dang 'bru la sogs pa'o/ /ldan yang zhes bya ba ni yang dag par ldan yang ngo / /rgyud la yongs su smod ces bya ba ni snod ma yin pa nyid kyi rgyu bstan pa yin te/ bstan bcos dang rgyud la smod pa nyid kyi phyir ro//spang bar bya zhes bya ba ni dor ba nyid du bya ba'o/ /'bad pa yis ni zhes bya ba ni de'i nor la 'dun pa dang chags pa spong ba'i mtshan nyid can gyis so/ /bla ma mchog ces bya ba ni nor la chags pa la rgyab kyis phyogs pa rnams kyis so/ /ci'i don du yin zhe na/ de'i phyir dngos grub phyir zhes bya ba gsungs te/ phyag rgya chen po'i dngos grub kyi don du zhes bya ba'i tha tshig go/ /de ltar snod ma yin pa rnam pa thams cad du spang ba la bka' bsgo ba bstan nas/ snod ma yin pa ston par byed pa la nyes dmigs bstan pa ni/ bza' btung gos la sogs pa dang / / zhes bya ba la sogs pa gsungs te/ btung ba dang zhes bya ba ni chang gi btung ba la sogs pa la longs spyod pa'o/ /bza' ba zhes bya ba ni phyi rol khyad par can gyi kha zas kyi ngo bo'o/ /gos la sogs pa dang zhes bya ba ni khyad par gyi dar la sogs pa'o/ /btung ba dang bza' ba la sogs pa yang yin la gos kyang yin pas na bza' btung gos la sogs pa'o//de rnams gang la yod pa de la de skad ces bya'o/ /nor ni rin po che la zhes bya ba ni nor dang 'bru la sogs pa la'o/ /de rnams la chags pa ni 'dun pa ste/ des so/ /snod min slob ma zhes bya ba ni sngags kyi theg pa'i snod min pa'o//gang zhes bya ba slob dpon no/ /smra ba zhes bya ba ni brjod pa'o/ /man ngag ces bya ba ni brgyud pa'i bye brag go/ /mchog tu rmad byung zhes bya ba ni shin tu ngo mtshar skyed par byed pa ste/ bag tsam gyis sbyor bas khyad par du 'phags pa'i go 'phang thob par byed pa'i phyir ro/ /rnal 'byor pa shes pa zhes bya ba ni rnal 'byor ni ting nge 'dzin te/de shes pa'i rnal 'byor zhes pa'o/ /tshe 'di la zhes bya ba ni mthong ba'i chos la sdug bsngal mtha' yas pa bgrod pa nyid kyi phyir ro/ /de ni zhes bya ba ni slob dpon no/ /dmyal ba zhes bya ba ni ngan song ngo / /drag po zhes bya ba ni bzod par dka' ba'o/ / rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa zab mo'i don gsal bar byed pa zhes bya ba las le'u dgu pa'i rgya cher bshad pa'o// //de ltar le'u dgu pas sdom pa'i yul la dri ba'i lan bstan nas/ da ni dam tshig gi yul la dri ba'i lan bstan pa brjod pa'i phyir/le'u bcu pa nye bar ston cing de'i yan lag tu de spong bar rtsom pa ni de nas gzhan yang zhes bya ba la sogs pa gsungs te/ le'u dgu pa bshad pa'i rjes la'o/ /gzhan yang zhes bya ba ni sngar la ltos pas so/ /nyon zhes bya ba ni phyag na rdo rje la bod pa'o//de kho na nyid ces bya ba ni don dam pa dang kun rdzob kyi ngo bos so/ /dam tshig gi don zhes bya ba ni dam tshig las 'da' bar mi bya ba nyid kyi phyir ro/ /bla na med ces bya ba ni phyi rol gyi dam tshig dang bral ba'i phyir ro/ /dam tshig dang ni bza' ba dang / /zhes bya ba ni bsrung bar bya ba'i dam tshig sngon du gsungs pa'i phyir ro//da ni zhes bya ba ni da ltar ro/ /de don zhes bya ba ni bza' bar bya ba'i dam tshig gi don to/ /bshad par bya zhes bya ba ni brjod par bya ba'o/ /de ltar dam tshig gi yul la dri ba'i lan rtsom pa bstan pa brjod nas dngos su de bshad pa bstan pa'i phyir de'i yan lag tu rang bzhin gyis grub pa'i bdud rtsi lnga'i bza' ba bstan pa ni bza' ba nyid du zhes bya ba la sogs pa gsungs te/gdon mi za bar bza' bar bya ba'o/ /bshad pa gang zhes bya ba ni de ma thag pa nyid du bshad pa'o/ /de ni bdud rtsi lngar ni brjod/ /ces bya ba ni ma la sogs pa lnga'i mtshan nyid do//rgas pa dang 'chi ba med pa'i dngos grub sgrub par byed pas na bdud rtsi'o/ /rlung gi de nyid sbyor ba yis/ /zhes bya ba ni sngon du grangs la sogs pa drug gi rim pas rlung las rgyal bar byas nas srog dang thur sel gyi stobs kyis so/ /zhu nas zhes bya ba ni rtsa rnam pa lnga po 'bab pa'i bdud rtsi lnga zhu bar byas so//ro gcig ces bya ba ni lte ba'i pad+ma'i dbus su'o/ /slar yang steng du song zhes bya ba ni gyen du song ba ste de nyid kyi rlung gi rim pas so/ /rdo rje'i lam nas zhes bya ba ni rdo rje'i lam nas so/ /'ongs nas zhes bya ba ni bkug nas so/ /gcig tu gyur pa zhes bya ba ni ro mnyam par 'gyur nas so/ / bza' ba po zhes bya ba ni bza' bar byed pa'o/ /yang na kha'i lam nas zhes gzhung kha cig las so/ /kha'i lam nas zhes bya ba ni gdong nas so/ /gcig tu byas pa zhes bya ba ni lce'i steng du phye nas bstan to/ /phyi rol gyi dam tshig gi bdud rtsi'i ngo bo'i dam tshig la kun du rtog pa nyid kyi phyir ro/ /de ltar rang bzhin gyis grub pa'i bdud rtsi lnga bsten pa bstan nas kun rdzob byang chub kyi sems kyi bza' ba'i dam tshig bshad pa'i phyir/dam tshig lus dang ngag sems kyis/ /zhes bya ba gsungs te/ de'i rnam par dag pa'i ngo bo rtsa gsum las byung ba'i ngo bo'o/ /de nyid gsum ni gang shar dang //zhes bya ba ni gtso bor gyur pa'i rtsa gsum las byung ba'i byang chub kyi sems zhes bya ba'i don to/ /de ltar 'khor lo bzhi rnams zhes bya ba ni sprul pa la sogs pa rnams la'o/ /gang zhig bde ba nyams su myong / /zhes bya ba ni kun rdzob kyi rnam pa thabs dang shes rab snyoms par 'jug pa ste/nyams su myong zhes bya ba ni rig pa'o/ /de dang ro gcig ces bya ba ni don dam gyi bde ba dang lhan cig ro gcig par gyur pa'i rtog pas so/ /rnal 'byor pa zhes bya ba ni rdzogs pa'i rim pa la mos pa'o/ /gcig tu de kho na nyid la mthar thug pa'i rim pas so/ /bza' bar bya zhes bya ba ni bza' bar bya ba'o//yang na rtag tu zhes bya ba ni dus thams cad du'o/ /spyod pa zhes bya ba ni rtsa la mthar thug pa'i sbyor bas so/ /byang chub sems ni zhes bya ba ni kun rdzob kyi rnam pa'o/ /de nyid mchog ces bya ba ni dpe dang don gyi de kho na nyid shin tu gsal ba'i rgyur gyur pa'o/ /bde ba chen po'i go 'phang gnas/ / zhes bya ba ni phyag rgya chen po'i ngo bo la brten pa'o/ /zhu ba zhes bya ba ni rnam par zhu bar byas nas so/ /rlung gi de nyid kyis zhes bya ba ni las kyi rlung gi ngo bos so/ /bza' ba ni bza' bar bya ba ste/ lha mo'i pad+mar spros pa'i zhes bya ba ni lhag ma'o/ /mnyam gzhag pas zhes bya ba ni bdud rtsi len pa'i dus su 'dod chags la sogs pas ma gos par zhes bya ba'i tha tshig go//de ltar kun rdzob byang chub kyi sems kyi bza' ba'i dam tshig bstan nas/ khyad par du 'phags pa'i snod du khyad par can gyi chang gi btung ba bstan par bya ba'i phyir/ thod par zhes bya ba la sogs pa gsungs te/thod par zhes bya ba ni ka dang po can no/ /spyi bo'i klad rgyas zhes bya ba ni rang bzhin gyis grub pa ste/ phyi rol gyi thod pa'i mtshan nyid dang bral ba'i phyir ro/ /de snod ces bya ba ni bde ba chen po'i 'khor lo'i rten spyi bo'i mtshan nyid can no/ /snod de gang gi yin zhe na/ de'i phyir rnal 'byor pa'i zhes bya ba gsungs te/phyi rol gyi rnal 'byor gyi mtshan nyid nang gi bdag nyid la gzhol ba rnams la'o/ /rtag tu zhes bya ba ni dus rtag tu'o/ /de la snying rje btung ba ni/ /zhes bya ba ni sems can gyi don la blo mi spang ba'i phyir ro/ /snying rje ni byang chub kyi sems so/ /de las zhes bya ba ni snod de la'o//de nyid kyi phyir ni/ byang chub sems ni bde ba che/ /zhes gsungs te/ kun rdzob kyi rnam pa zhes bya ba'i don to/ /btung ba zhes bya ba ni rnal 'byor pa'i shes pas nyams su myong ba zhes bya ba'i don to/ /bde ba chen po nyams su myong ba sngon du 'gro ba'i byang chub kyi sems so/ /de ltar khyad par du 'phags pa'i snod du khyad par can gyi chang gi btung ba'i dam tshig bstan nas/pad+ma'i snod las bdud rtsi myang ba'i dam tshig bstan pa'i phyir/ gsang ba'i ge sar zhes bya ba la sogs pa gsungs te/ nyams myong gi bla ma dang 'brel pa la'o/ /mchog ces bya ba ni khyad par du 'phags pa'i lhan cig skyes pa gsal bar byed pa'i rgyur gyur pa la'o//snod ces bya ba ni snod du gyur pa la'o/ /brten na bza' ba rab rtogs byed/ /ces bya ba ni de lta bur gyur pa'i sngags kyis bskul nas so/ /bdud rtsi lnga yi ngo bos 'thung / /zhes bya ba ni bdud rtsi lnga'i ngo bo'o/ /'thung zhes bya ba ni phyi rol gyi bdud rtsi'i mtshan nyid dang bral ba'i bcud kyis len to//de za ba ni zhes bya ba ni dngos su lces ro myang bar bya ba'o/ /des zhes bya ba ni pad+ma de la'o/ /rdo rje 'dzin ces bya ba ni don dam dang kun rdzob kyi rdo rje 'dzin pas na rdo rje 'dzin pa'o/ /de ltar pad+ma'i snod la bdud rtsi'i ro myang ba'i dam tshig bstan nas/dam tshig chen po lnga'i ngo bo'i dam tshig bstan pa'i phyir/ glang po zhes bya ba la sogs pa gsungs te/ glang po ltar lus che ba nyid kyi phyir rnam par snang mdzad kyi ngo bo'o/ /rta ni mgyogs par 'gro ba dang 'dra ba'i phyir/ rlung gi khams kyi rnam par dag pa'i ngo bo nyid kyis don yod grub pa'i ngo bo'o//khyi ni lce ring ba nyid kyi phyir snang ba mtha' yas kyi ngo bo'o/ /ba lang zhes bya ba ni rin chen 'byung ldan gyi ngo bo ste/ nor nyid du grags pa'i phyir ro/ /mi zhes bya ba ni skyes pa rnams la rnam par shes pa dang bcas pa nyid kyis mi bskyod pa'i ngo bo'o/ /de rnams ni byang chub sems dpa' dang bcas pa'i khrag ces gsungs te/byang chub kyi sems ni kun rdzob kyi rnam pa'o/ /dmar dang bcas zhes bya ba ni rdo rje nyi ma dang bcas pa'o/ /bsdus nas zhes bya ba ni 'bad pas thob nas bdud rtsi lnga'i cho gas bsgrub par byas pa'o/ /bza' ba ni bza' ba'o/ /de ni bdud rtsi lnga zhes brjod//ces bya ba ni dam tshig chen po lnga'i bdud rtsi zhes bya ba'i don to/ /de ltar na don rnam pa lngas bza' bar bya ba'i dam tshig brjod nas/ rnal 'byor ma'i rgyud kyi rjes su 'brang nas/ rdzogs pa'i rim pa'i ngo bo'i dam tshig brjod par bya ba'i phyir de'i yan lag tu sngags kyi rim pa la sogs pa'i mtshan nyid kyi dam tshig bstan pa/rnam rtog dang ni kun rtog gis/ /zhes bya ba ni 'khor lo drug po rnams la sngags dgod pa'i mtshan nyid rnam rtog gis brtags pa ste/ bza' bar bya zhes bya ba dang 'brel to/ /'dis ni sngags kyi rim pa bstan to/ /rgyud kyi rim pa bstan pa'i phyir/gang du zhes dogs nas/ de'i phyir stong pa nyid kyi snod ces bya ba gsungs te/ srub pa dang srub pa'i sbyor ba las skyes pa/ las kyi rlung las byung ba stong pa nyid kyi snod ni rgyud kyi rim pa'i mtshan nyid la'o/ /gsal ba zhes bya ba ni rnal 'byor mngon sum gyi rtogs pa nyid kyi phyir ro//bza' zhes bya ba ni sgrib pa med par byed pa'i phyir ro/ /rtag tu zhes bya ba ni dus gsum du'o/ /rdo rje can gyis zhes bya ba ni stong pa nyid kyi de kho na nyid mngon du byed pa'o/ /stong nyid ye shes pha rol 'gro/ /zhes bya ba ni rgyud kyi rim pa bsgom pa'i mthar phyin pas zhes bya ba'i don to//ye shes kyi rim pa ni dga' ba gsum zhes bya ba la sogs pa gsungs te/ dga' ba dang mchog dga' dang dga' bral gyi mtshan nyid can no/ /bde ba zhes bya ba ni kun rdzob kyi bde ba la khyad par byed pa nyid kyi phyir/ bsreg pa'i 'khor lo rnams gso bar byed pa nyid kyi phyir ro/ / gang la snyam du dogs nas/ de'i phyir/ gsang ba'i rim pa bstan pa ni/ /lhan skyes ye shes snod du ni/ /zhes bya ba gsungs te/ dpe dang don gyi ngo bos so/ /bza' ba zhes bya ba ni sngon bzhin no/ /rtag tu zhes bya ba ni dus rtag tu'o/ /rdo rje can zhes bya ba ni rdo rje rtse mor thon pa'i byang chub kyi sems nyid kyi phyir ro//bde ba chen po'i go 'phang gnas/ /zhes bya ba ni bde ba chen po'i go 'phang gi gnas gang la yod pa de la de skad ces bya ba'o/ /don gyi de kho na nyid gcig tu bla ma'i man ngag gis gnas pa'i phyir ro/ /de ltar rnal 'byor pa'i rgyud kyi rjes su 'brangs nas/ rdzogs pa'i rim pa'i ngo bo'i sngags kyi rim pa la sogs pa'i mtshan nyid can gyi dam tshig bstan nas/rnal 'byor chen po'i rgyud kyi rjes su 'brangs te/ rdzogs pa'i rim pa'i ngo bo'i dam tshig rdo rje bzlas pa'i ngo bo dam tshig bstan pa'i phyir/ rnam rtog rlung rnams zhes bya ba la sogs pa gsungs te/rnam rtog ni le'u gsum pa las bshad pa'i brgya rtsa brgyad kyi grangs te/ rlung rnams kyang de tsam gyi grangs can te zhes bya ba ni rnam rtog gi rlung ngo / /thams cad ces bya ba ni ma lus pa rnams te/ bza' zhes bya ba dang 'brel to/ /gang du zhe na/ de'i phyir zhi ba'i de nyid ces bya ba gsungs te/ thabs las byung ba'i rdo rje bzlas pa dag gis 'od gsal ba'i bdag nyid can la'o/ /snod bzang por zhes bya ba ni rnam par rtog pa lhung ba 'dzin pa'i bdag nyid can gyi phyir ro/ /bza' zhes bya ba ni rlung dang sngags kyi de kho na nyid ngag gis mi snang bar bya ba'o/ /rlung gi de nyid shes pas zhes bya ba ni/ thabs rjes su bsgrub pa'i bdag nyid can gyi phyir ro/ /rnam rtog med pa'i go 'phang gnas/ /zhes bya ba ni ngag rnam par dben pa'i mtshan nyid can gyi kho na nyid la rnam par gnas pa zhes bya ba'i don to/ /de ltar rdo rje bzlas pa'i dam tshig bstan nas/ sems rnam par dag pa'i ngo bo'i dam tshig bstan pa'i phyir/phyag rgya gsum dang yang dag sbyor/ /zhes bya ba la sogs pa gsungs te/ las dang chos dang dam tshig gi phyag rgya rnams kyis thob par bya'o/ /yang dag sbyor zhes bya ba ni snang ba la sogs pa'i ye shes gsum gyi bdag nyid can te/ bza' zhes bya ba dang 'brel to/ / gang du zhe na/ de'i phyir phyag rgya chen po'i snod ces bya ba zhes gsungs te/ sems 'od gsal ba'i ngo bo phyag rgya chen po'i snod la'o/ /de'i ming can la snod la zhes bya ba ni/ rang bzhin gyi tshogs la lhung ba bsrung ba'i phyir ro/ /bza' bar bya zhes bya ba ni mi snang bar bya ba'o/ /rnal 'byor de nyid shes pas zhes bya ba ni sngags kyi rim pa'i mthar phyin pa'i phyir ro//rnal 'byor ni sngags so/ /de kho na nyid la gnas gsum la de sgom pa'i ngo bo'o/ /de nyid shes zhes bya ba ni de kho na nyid shes pa'o/ /rnam par mi rtog go 'phang gnas/ /zhes bya ba ni rang bzhin gyis tshogs brgya drug po bzlog pa'i bdag nyid can la 'od gsal gyi go 'phang gnas pa'i phyir ro//de ltar sems rnam par dag pa'i ngo bo'i dam tshig brjod nas/ bdag byin gyis brlab pa'i ngo bo bstan pa'i phyir/ dngos dang dngos min sogs 'khrul pa'i/ /zhes bya ba ni yod pa dang med pa la sogs pa'i ngo bo rnam par 'khrul pa'i mtshan nyid can kun rtog dang ni yongs rtog gi phra ba dang rags pa'i ngo bo ste de'o//ye shes cher 'char snod du bza'/ /zhes bya ba dang 'brel to/ /ye shes cher 'char zhes bya ba ni 'od gsal gyi rjes la 'od zer lnga las yang dag par byung ba'i 'od zer kha dog lnga'i ye shes chen po'o//'char zhes bya ba ni de las yang dag par byung ba'i sgyu ma'i lus so/ /snod du zhes bya ba ni 'khrul pa'i spros pa thams cad rnam par bzlog pa'i bdag nyid can gzung ba'i bdag nyid kyi phyir ro/ /bza' zhes bya ba ni mi snang bar byas pa'o/ /rnam par mi rtog pa yis zhes bya ba ni chad par lta ba'i rnam par rtog pa bzlog pa'i phyir ro//de ltar bdag la byin gyis brlab pa'i ngo bo bstan nas/ mngon par byang chub pa'i rim pa'i ngo bo'i dam tshig bstan pa'i phyir/ rnam rtog dra ba'i sa bon yang / /zhes bya ba ni bag chags su gyur pa'i rang bzhin gyi tshogs kyi sa bon no/ /phung po'i bud zhing snod bzang por//zhes bya ba ni bza' zhes bya ba dang 'brel to/ /phung po ni sgyu ma lta bu'i lha'i rnam pa dang 'brel pa'o/ /de nyid ni bud shing ste/ 'od gsal ba'i ye shes kyi mes 'bar bar gyur pa nyid kyi phyir ro/ /de nyid ni snod bzang po ste der ro/ /sngags kyi de nyid rtogs pas zhes bya ba ni rnal 'byor pas so//bza' zhes bya ba ni bza' bar bya ba'o/ /ci zhig byas nas she na/ de'i phyir/ ye shes chen po'i me yis smin/ /zhes bya ba gsungs te/ ting nge 'dzin dang phyag rgya'i rim pa dag gis yang dag par skyes pa'i ye shes chen po ni stong pa la sogs pa gsum pa'o/ /de nyid ni me ste rnam par rtog pa thams cad thal ba nyid du byed pa'i phyir ro//de yis smin zhes bya ba ni yongs su smin par byas pas so/ /de ltar mngon par byang chub pa'i rim pa'i ngo bo dam tshig bstan nas/ zung du 'jug pa'i ngo bo dam tshig bstan par bya ba'i phyir/ bdud bzhi zhes bya ba la sogs pa gsungs te/ bdud bzhi ni/phung po dang / nyon mongs pa dang / 'chi bdag dang / lha'i bu'i bdud rnams so/ /khro bo chen po ni bzlog par bya ba'i thabs kyi zhe sdang ngo / /de'i stobs ni bdud la sogs pa rnams dang 'brel pa nyid do/ /rnal 'byor zhes bya ba ni zung du 'jug pa'i mthar phyin pa'o/ /bza' zhes bya ba ni mi snang bar byed pa'o//ji ltar zhe na/ de'i phyir rigs pas zhes bya ba gsungs te/ tha dad par bsgrub pa bzlog pa'i bdag nyid can gyis so/ /sgrub pa pos legs par zhes bya ba'i don to/ /rab tu mi gnas pa'i go 'phang la gnas pa'i phyir ro/ /gang du bza' bar bya zhe na/ de'i phyir snod du zhes bya ba gsungs te/gnyis su med pa'i ye shes kyi snod du'o/ /rtag tu zhes bya ba ni dus gsum du'o/ /legs par mnyam gzhag nas zhes bya ba ni chad pa'i phyogs su lhung ba med pa'i phyir mi g.yeng ba zhes bya ba'i don to/ /de ltar don rnam pa lngas rnal 'byor chen po'i rgyud kyi rjes su 'brangs nas/ rdzogs pa'i rim pa'i ngo bo'i dam tshig bstan nas/ da ni gnyis ka'i rgyud kyi rjes su 'brangs nas/ gnyis ka'i dam tshig bstan pa'i phyir/ de'i yan lag tu sngags kyi de kho na nyid kyi dam tshig bstan pa ni/ rlung dang sngags dang rdzas rnams kyis/ /zhes bya ba la sogs pa gsungs te/ rim pa ji lta ba bzhin du/ kun rdzob dang snying ga dang gsang ba'i sna rtse gsum du rlung dang / sngags dang rdzas rnams kyi zhes bya ba ni 'od zer dang / sngags dang rdzas kyi thig le'i mtshan nyid kyi thig le gsum/ mi shigs go 'phang snod du bza' bar bya/ /zhes bya ba dang 'brel to/ /mi shigs pa'i go 'phang ni a yig gi rnam pa la'o//snod du ni zhes bya ba ni snod nyid du'o/ /bza' zhes bya ba ni bza' bar bya ba'o/ /des rnam par rtog pa mi snang bar bya ba'o/ /bla na med ces bya ba ni bla na med pa rdo rje'i bzlas pa'i rgyu nyid kyi phyir ro/ /rnal 'byor pha rol 'gro zhes bya ba ni rlung dang sngags dang de kho na nyid kyi mthar phyin pa zhes bya ba'i don to//de ltar sngags kyi de kho na nyid kyi dam tshig bstan nas/ snying rje dang shes rab kyi dam tshig brjod pa'i phyir/ stong nyid ye shes zhes bya ba la sogs pa gsungs te/ stong pa nyid kyi ye shes ni 'od gsal ba'i rnam pa'o/ /snying rje'i snod kyis zhes bya ba ni/rtag tu btung ba 'thung bar bya/ /zhes bya ba dang 'brel to/ /stong pa nyid kyi rnam par rtog pa lhung bar bsrung ba'i phyir ro/ /rtag tu btung ba zhes bya ba ni stong pa nyid las langs pa'i rnam pa'o/ /ye shes chen po mnyam gzhag nas/ /zhes bya ba ni/ sgyu ma lta bu'i ting nge 'dzin gyis rnam par mi g.yeng ba'i sems zhes bya ba'i don to//de ltar snying rje dang shes rab kyi dam tshig bstan nas/ lhan cig skyes pa'i dam tshig gi ngo bo brjod pa'i phyir/ phyag rgya'i zhes bya ba la sogs pa gsungs te/ phyi rol gyi ji lta bu'i ming can zhe na/ de'i phyir dam tshig ces su bshad//ces bya ba gsungs te/ dam tshig gi phyag rgya zhes bya ba la'o/ /rdo rje pad+ma yang dag sbyor/ /zhes bya ba ni dbang po gnyis kun nas sbyor ba'i mtshan nyid can la'o/ /gang zhig de nyid mchog skyes pa/ /zhes bya ba ni dpe dang don gyi rnam pas so/ /de ni zhes bya ba ni phyag rgya de la'o/ /phyag rgya chen po zhes bya ba ni byang chub kyi sems kyi ngo bo'o//skal ldan snod la zhes bya ba ni stong pa nyid kyi de kho na nyid kyi snod do/ /'thung zhes bya ba ni longs spyad par byas nas so/ /nyams dga' ba zhes bya ba ni rol pa'i rim pas myong ba'o/ /rnal 'byor zhes bya ba ni lhan cig skyes pa sgom pa po rnams kyis so/ /bsgrub bya ba de nyid mchog ces bya ba ni don dam pa'i lhan cig skyes pa'i ngo bo'o//de nyid ces bya ba ni rtag tu de nyid kyi ngo bos gnas pa'i phyir ro/ /lhan cig skyes zhes bya ba ni rgyu dang rkyen las ma skyes pa'i phyir ro/ /nyon mongs dang bral ba zhes bya ba ni mi mthun pa'i phyogs 'joms pa'i phyir ro/ /phyag rgya chen po don bsgrub pa//zhes bya ba ni sangs rgyas kyi yon tan ma lus pa thams cad skyed par byed pa ni mchog tu dga' ba sgrub par byed pa zhes bya ba'i tha tshig go/ /de ltar gnyis ka'i rgyud kyi rjes su 'brangs nas/ gnyis ka'i dam tshig brjod nas/ de'i nye bar bsdu ba bstan pa ni/ de lta bu la sogs pa zhes bya ba gsungs te/sngon du bstan pa'i dam tshig go/ /gsungs zhes bya ba ni brjod pa'o/ /gzhan du gang yang ngas ma bshad/ /ces bya ba ni ston pa por gyur pa rdo rje 'chang bdag gis so/ /gang yang zhes bya ba ni bya ba'i rgyud la sogs pa rnams so/ /ma bshad ces bya ba ni sems can rnams snod dang mi ldan pa'i phyir ro//bla ma'i zhal nas zhes bya ba ni brgyud pa'i rim pa ma nyams pa mtshan nyid dang ldan pa bla ma'i zhal las so/ /gsal bar zhes bya ba ni the tshom med par ro/ /rdo rje sems dpa' go 'phang zhes bya ba ni de thob pa'i rgyu nyid du gyur pa'i phyir ro//mchog ces bya ba ni bla na med pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa zab mo'i don gsal bar byed pa zhes bya ba las le'u bcu pa'i rgya cher bshad pa'o// //le'u bcu pas dam tshig gi yul la dri ba'i lan bstan pa brjod nas/da ni sgra'i yul la dri ba'i lan bstan pa bshad pa'i phyir le'u bcu gcig pa bstan zhing de'i yan lag sgra'i yul la dri ba'i lan rtsom pa brjod pa'i phyir/ de nas zhes bya ba la sogs pa gsungs te/ le'u bcu pa'i rjes la'o/ /gzhan yang zhes bya ba ni sngar la ltos pas so//sgra tsam don ni brjod par bya ba dang 'brel to/ /sgra ni hU~M yig gi rnam pa ste/ de nyid gcig pu ni sgra tsam ste/ de'i don 'dir gtan la 'bebs pa ni brjod par bya ba'i nges pa'o/ /des ci zhig byed ce na/ de'i phyir zhes bya ba la sogs pa gsungs te/gang gis zhes bya ba ni sgra tsam gyis so/ /thos pa la sogs pa'i rim gyis goms pa tsam gyis so/ /'pho ba med pa'i go 'phang thob/ /ces bya ba ni skyes pa dang 'chi ba'i rgyun las yang dag par 'das pa'i phyir 'pho ba med pa'o/ /go 'phang zhes bya ba ni rab tu gnas pa'i gnas so//sngags kyi de kho na nyid kyi thabs kyis zhes bya ba ni lhag ma'o/ /de ltar sgra'i yul la dri ba'i lan rtsom pa bstan nas/ dngos su de brjod par rtsom pa ni de'i yan lag tu ngo bo bstan pa ni/ chos kyi 'khor lo pad sbubs nas/ /zhes bya ba gsungs te/ chos kyi 'khor lo ni snying ga'i gnas na gnas pa'o//de'i chu skyes ni pad+ma ste/ de'i rnam pa rtsa brgyad kyi ngo bo nyid kyi phyir ro/ /de'i sbubs zhes bya ba ni lte ba la zhes bya ba'i don to/ /yang dag gnas pa ni rang bzhin gyis grub pa'i rtsa'i dbyibs kyi ngo bo nyid kyis so/ /sgra tsam zhes bya ba ni a ta zhes bya ba ni bza' ba la'o//na ni bgegs par byed pa'o/ /bza' ba ma yin pa ni nA da ste/ de nyid gcig tu ni nA da tsam mo/ /rdul phra rab tsam gyi tshad las kyang phra ba nyid kyi phyir ro zhes bya ba ni dga' ba'i 'od kyi phreng ba byed pa'i mkhan po'o/ /yang na sgra tsam ni mchog dga'o//mchog ni mchog ste/ snang ba mched pa ltar snang ba gang la yod pa de rnams la de skad ces bya'o/ /gzhan dag ni chos kyi 'khor lo'i lte ba la gnas pa haM yig sgra tsam po cha shas su bsdus nas thig le'i mthar thug pa zhes zer ro/ /ji lta bu zhe na/ de'i phyir cha med ces bya ba gsungs te/thig le'i ngo bo la sems 'dzin pa'i dus ni cha thams cad dang bral ba'i phyir ro/ /snang ba med pa zhes bya ba ni thig le la sems 'dzin pas de bstan pa'i dus su phyi rol gyi snang ba nub pa nyid kyi phyir ro/ /gnyis su med cing zhes bya ba ni gnyis kyi ngo bo med pa'i phyir de yang bsgom bya dang / sgom byed kyi rnam par rtog pa log pas so/ /dri ma med pa zhes bya ba ni mi mthun pa'i phyogs thams cad zil gyis mnan pas nyon mongs pa'i sgrib pa la sogs pa spangs pa nyid kyi phyir ro/ /bya ba bral zhes bya ba ni byed pa po med pa'o/ /dpe las 'das pa zhes bya ba ni shin tu mtshon par dka' ba nyid kyi phyir dang //de dang 'dra ba gzhan med pa nyid kyi phyir ro/ /gzhi med ces bya ba ni gzhi ni bye brag ste/ skye ba dang / rga ba dang gnas pa la sogs pa'o/ /de med pa ni gzhi med pa'o/ /rten med pa zhes bya ba ni gzugs med pa nyid kyis rten med pa'o/ /mchog tu zhes bya ba ni bskyed pa'i rim pas thob par bya ba'i lha'i rnam pa khyad par du 'phags pa nyid do//ye shes dbang phyug ces bya ba ni stong pa nyid kyi ye shes skyed par byed pa la bdag po nyid du gyur pa'i phyir ro/ /zhi ba zhes bya ba ni rnam par rtog pa thams cad nye bar zhi ba'i ngo bo nyid kyi phyir ro/ /srog dang rtsol ba la sogs spangs//zhes bya ba ni de'i bdag po nyid kyi phyir srog la sogs pa'i rlung rgyu ba 'jug pa nyid kyis ldog pa med pa'o/ /rnal 'byor rnams kyang zhes bya ba ni rim pa gnyis bsgom pa la gnas pa rnams so/ /lha dbang phyug ces bya ba ni lha ni lha'o/ /de rnams la 'di dbang phyug tu gyur pa ni 'phrog byed la sogs pa'o//kyang zhes bya ba ni mthu chen po dang ldan pa rnams la yang de lta bu ni rnyed par dka' ba ste/ rang gi sems kyi chos nyid kyang des ma rtogs pa'i phyir ro/ /de bzhin du/ mchog tu zhes bya ba ni 'jig rten pa rnams kyi yul ma yin pa'i phyir mchog gi ngo bo'o/ /zhi ba zhes bya ba ni 'jig rten las 'das pa'i lam la gnas pa'i rnal 'byor pas rtogs par bya ba nyid kyi phyir ro//bde ba che zhes bya ba ni sems dang yang dag par ldan pa'i thog ma med pa'i dus can gyi rnam par rtog pa zlog pa'i phyir ro/ /rnam pa thams cad rnam spangs pa/ /zhes bya ba ni sngon po dang ser por snang ba la sogs pa thams cad mi snang zhing nub pa'i phyir ro//thams cad kyi ni khongs su gtogs/ /zhes bya ba ni phung po dang khams dang skye mched la sogs pa rnams la'o/ /khongs su gtogs pa ni khyab par gyur pa rnams kyis so/ /gyur pa zhes bya ba ni yang dag par gyur pa'o/ /rnam pa kun la zhes bya ba ni chos thams cad kyi ngo bo nyid kyis yang dag par gnas pa'o//ji ltar zhe na/ de'i phyir rten cing 'brel 'byung zhes gsungs te/ 'di la rten pa tsam gyis bsdus pa'o/ /des brten pa'i phyir/ chang dang chang gi ro bzhin no/ /zhes gsungs te ji ltar chang gi ro rgun 'brum la sogs pa las byung ba la khyab par gnas pa de bzhin no zhes bya ba'i don to//de ltar na 'di tsam gyis rang gi ngo bo bstan nas/ de'i thabs brjod pa'i phyir/ rang gi nyams myong rtogs pa'i gnas/ /zhes gsungs te/ rang gi bdag nyid kyi'o/ /nyams myong ni thabs la goms pa'i mtshan nyid de las rtogs pa zhes bya ba ni rang gis rtogs par bya'o//gang gis she na/ de'i phyir/ sngags kyi de nyid mchog sbyor ba/ /zhes gsungs te/ 'chad bzhin pa'i rigs pas lte ba'i dbus na gnas pa'i i'i yi ge kha sbyor thig le'i sgras brjod par bya ba'i sngags kyi de kho na nyid la sbyor ba'i rnal 'byor pas rig par bya'o zhes bya ba'i don to//gal te sngags kyi de nyid mchog la sbyor bas rig par bya ba yin na/ sngags kyi de nyid mchog ji lta bu zhe na/ de'i phyir/ sngags kyi de nyid mchog sbyor ba/ /zhes gsungs te/ mchog gi sbyor ba'i ngo bo ste/ so so'i skye bo'i shes pa'i spyod yul ma yin pa'i phyir ro//gal te de ltar yin na/ ji ltar shes par bya zhe na/ de'i phyir/ bla ma'i zhal la rnam par gnas/ /zhes bya ba gsungs te/ rgyud du bstan pa'i mtshan nyid dang ldan pa'i rdo rje slob dpon gyi zhal gyi lung las lhag par gnas zhes bya ba'i don to/ /de ltar de'i thabs ston nas/ de la nye bar mkho ba'i don gsol ba gdab pa'i yan lag gsol ba gdab pa'i phyir/de nas ston pa zhes bya ba la sogs pa gsungs te/ sngags kyi de nyid rtogs par bya ba nyid bstan pa'i rjes la phyag na rdo rje zhu ba pos so/ /ston pa zhes bya ba ni drug pa rdo rje 'chang chen po'i rnam pa bcom ldan 'das la'o/ /zhus pa ni zhes bya ba ni/yongs su zhu ba dang ldan pa/ /zhes bya ba'i don to/ /rim pa gnyis bstan pas/ phyin ci ma log pa gang zag rnam pa lnga'i rnam par 'jig rten la ston par byed pas na ston pa'o/ /bla med la zhes bya ba ni de las gzhan gong na med pa'i phyir ro/ /de yang bag chags dang bcas pa'i nyon mongs pa dang /shes bya'i sgrib pa thams cad spangs pa zhes bya ba'i don to/ /ci zhig zhus she na/ de'i phyir bcom ldan zhes bya ba la sogs pa gsungs te/ mi mthun pa'i phyogs thams cad 'joms pas na bcom ldan no/ /de la bod pa la yang de skad ces bya'o/ /zhi ba'i de nyid mkhyen zhes bya ba ni/ nyon mongs pa thams cad nye bar zhi bas na zhi ba'o//de nyid ni phyin ci ma log par ston pa'i phyir te/ de mkhyen pas na zhi ba'i de nyid mkhyen pa'o/ /de'i don la yang de skad ces bya'o/ /don dam pa'i bden pa yongs su shes pa'i phyir zhes bya ba'i dgongs pa'o/ /sngags kyi de nyid ces bya ba ni sgra tsam po'i thabs su gyur pa'o//bshad par mdzad ces pa ni ston par mdzad ces pa'i don to/ /des ci zhig byed ce na/ de'i phyir gang gis zhes gsungs te/ gang gis na sngags kyi de kho na nyid kyis so/ /rnam par shes pa tsam gyis zhes bya ba ni thos pa la sogs pa'i rim pas rtogs pa tsam gyis so/ /grub par 'gyur zhes bya ba ni sgra tsam gyi ngo bos so//de kho na nyid ces bya ba ni de kho na nyid mthong ba'i phyir ro/ /de ltar gsol ba gdab pa bstan nas/ bcom ldan 'das kyi gsung la 'jug pa bstan pa'i phyir/ de nas zhes bya ba la sogs pa gsungs te/ gsol ba btab pa'i rjes la'o/ /bcom ldan 'das zhes bya ba ni sngar bshad zin to//rdo rje zhes bya ba ni stong pa nyid kyi de kho na nyid mngon du byed pa'i phyir ro/ /gsungs zhes bya ba ni brjod cig pa'o/ /sngags kyi de nyid ces bya ba ni 'chad par 'gyur ba'i mtshan nyid can no/ /bla na med pa zhes bya ba ni spros pa med pa'i phyir ro/ /de yang yi ge a'i rnam pa nyid kyis 'chad par 'gyur ba'o//mchog dang rab mchog ces bya ba ni mchog ni sbrul la sogs pas brdar byas pa'i sngags kyi tshogs so/ /rab mchog ces bya ba ni de rnams nye bar bsdus pa'i ngo bo a yig go/ /phra ba dang zhes bya ba ni rtogs par dka' ba nyid kyis so/ /ye shes chen po zhes bya ba ni/chos nyid mngon du byed pa'i rgyu de nyid kyis so/ /bde ba chen po zhes bya ba ni bde ba chen po bskyed pa'i rgyu nyid du gyur pa'i phyir ro/ /bcom ldan 'das kyi gsung la 'jug pa bstan nas/ sngags kyi de kho na nyid bshad par dam bca' ba'i phyir/ yang dag bshad kyis zhes bya ba la sogs pa gsungs te/mnyan par gyis zhes bya ba ni/ phyag na rdo rje thos pa la sbyar ba'o/ /yang dag bshad kyis zhes bya ba ni sngags kyi de kho na nyid ces bya ba'i lhag ma'o/ /snying po las kyang snying po mchog /ces bya ba ni de ma thag tu bshad pa rnams so/ /mchog ces bya ba ni rdzogs pa'i rim pa la gnas pa'i rnal 'byor pas rtogs par bya'o//rgyud rnams kun du sbas pa rnams/ /zhes bya ba ni bya ba dang spyod pa rnams la'o/ /gsang ba'i zhes bya ba ni dam tshig dang mi ldan pa rnams la bshad pa'i snod ma yin pa'i phyir ro/ /go 'phang zhes bya ba ni 'dug pa'i gnas so/ /'pho ba med ces bya ba ni 'jigs pa las spangs pa'i phyir ro//de ltar sngags kyi de kho na nyid bstan nas/ dngos su de brjod pa'i phyir ro/ /lte ba'i 'khor lo zhes bya ba la sogs pa gsungs te/ sprul pa'i 'khor lo rtsa 'dab ma drug cu rtsa bzhi'i bdag nyid can no/ /de nyid mchog ces bya ba ni mchog gi de kho na nyid kyi ngo bo'o//yang dag gnas zhes bya ba ni yi ge'i ngo bo a'i yi ge'i dbyibs can no/ /sgra tsam du ni zhes bya ba ni thig le'i sgras brjod pa'o/ /stong pa chen po'i mthar ni thim/ /zhes bya ba ni thams cad stong pa'i rang bzhin/ rang bzhin gyis 'od gsal ba'i ngo bo ste/stong pa dang shin tu stong pa dang stong pa chen po rnams kyi mthar nye bar dmigs pa'o/ /bde ba chen po'i go 'phang gsal/ /zhes bya ba ni de la brten nas bde ba chen po'i rnam pa gnyis dmigs pa'i phyir ro/ /gsal ba zhes bya ba ni rnal 'byor pa rnams kyi lag pa'i mthil du skyu ru ra gzhag pa ltar nye bar dmigs pa nyid kyi phyir ro//gnyis med ces bya ba ni bsgom bya dang sgom pa po'i snang ba med pa'i phyir ro/ /mi 'jigs zhes bya ba ni gnyis snang ba las skyes pa'i las kyi bag chags kyi 'jigs pa med pas so/ /zhi ba dang zhes bya ba ni/ las kyi dbang gis skyes pa'i skye ba bzlog pas so//snang ba med cing zhes bya ba ni sngon po dang ser po la sogs pa'i snang ba dang bral ba'i phyir ro/ /kun rdzob med ces bya ba ni don dam pa'i byang chub kyi sems kyi ngo bo nyid kyi phyir ro/ /ting 'dzin gnyis med sbyor ba yis/ /zhes bya ba ni a yig gi ngo bo sprul pa'i 'khor lor gnas pa dang /gnyis su med pa'i sbyor ba ste/ tha mi dad par rtogs pa thabs dang shes rab snyoms par 'jug pa'i ngo bos so/ /sngags kyi de nyid ces bya ba ni a yig gi ngo bo'o/ /rab gsal ba zhes bya ba ni rab tu gsal bar byed pa zhes bya ba'i don to/ /de ltar don rnam pa bzhis de la mkho ba'i don nye bar brjod nas/byang chub kyi sems kyi ngo bo brjod pa'i phyir/ de'i yan lag mdor bstan pa ni/ thog ma med cing zhes bya ba la sogs pa gsungs te/ thog ma zhes bya ba ni skye ba'o/ /tha ma zhes bya ba ni 'jig pa'o/ /de dag med pas thog ma dang tha ma med pa ste/chos kyi dbyings sems kyi rang bzhin no/ /de nyid ni byang chub kyi sems te/ de'i phyir thog ma dang tha ma med pa ni/ rdo rje 'chang chen po'i don gyis so/ /zhi ba dang zhes bya ba ni sems las tha dad pa don brtags pa nye bar zhi ba'i phyir rnam par snang mdzad kyi don gyis so/ /dngos dang dngos med zad pa'i gtso//zhes bya ba ni chos dang chos nyid kyi mtshan ma rnams med pa'i phyir mi bskyod pa'i don gyis so/ /gtso zhes bya ba ni chos kyi dbyings tsam po'i bdag nyid dang sangs rgyas thams cad la dbye ba ma mthong ba'i phyir gtso bo ni thams cad du 'gro ba rin chen 'byung ldan gyi don gyis so/ / stong nyid snying rje dbyer med pa/ /zhes bya ba ni mtshon bya dang mtshon byed la sogs pa la rnam pa thams cad du stong pa nyid kyis yongs su dpyad pa'i phyir stong pa nyid dang tha mi dad de/ 'od dpag med kyi don gyis so/ /chos kyi dbyings tsam po'i bdag nyid kyis sna tshogs pa'i don byed pa'i phyir snying rje dang tha mi dad pa ste don yod grub pa'i don gyis so//byang chub sems kyi rang bzhin no/ /zhes bya ba ni byang chub sems kyi don 'di nyid ni/ sangs rgyas lnga rnams kyi chos nyid kyis snying la zhugs pa'i don gyis snyam du dgongs pa'o/ /de ltar mdor bstan pa bshad nas/ rgyas par bshad pa bstan pa'i phyir/ de tshe thog ma zhes bya ba la sogs pa gsungs te/mdor bstan pa'i skabs su bshad pa'i thog ma dang tha ma'i tshig ni stong nyid 'gyur zhes gsungs te/ stong pa nyid ni 'dus ma byas pa nyid kyi phyir ro/ /dmigs pa med pa'i go 'phang zhes bya ba ni/ 'dis ni zhi ba'i tshig bshad pa ste/ dmigs pa thams cad spangs pa nyid kyi phyir ro//de nyid kyi phyir zhi ba zhes bya ba gsungs te/ sems las tha dad pa'i don gyi rtog pa nye bar zhi ba'i phyir ro/ /rang bzhin med pa'i gnas zhes bya ba ni 'dis ni dngos po dang dngos po med pa zad pa'i tshig bshad do/ /chos dang chos nyid kyi rgyu mtshan nub pa nyid kyis rang bzhin bzlog pa'i phyir ro//nyams dga' zhes bya ba ni shin tu rnam par dag pa chos kyi dbyings kyi ngo bo'i phyir nyams dga' ba'o/ /rnam par rtog pa med la brten/ /zhes bya ba 'dis ni/ gtso bo'i tshig gis rgyas par bshad pa ste/ de yang chos kyi dbyings tsam gyi bdag nyid dang / sangs rgyas thams cad tha mi dad pa'i mthong bas rnam par rtog pa'i mnyam pa nyid kyi ye shes kyi rten du gyur pa nyid kyi phyir ro//mchog tu zhes bya ba ni tha dad pa'i rnam par rtog pa bzlog pas khyad par can nyid kyi phyir ro/ /stong nyid ye shes mtshungs pa med/ /ces bya ba ni 'dis ni stong pa nyid kyi tshig rgyas par bshad pa'o/ / snga ma bzhin du mtshon bya dang mtshon byed la sogs pa rnam pa thams cad du stong pa nyid kyis yongs su bcad pas/ stong pa nyid kyi ye shes so/ /de nyid ni mtshungs pa med pa ste/ phyogs gcig pa nyid med pa'i phyir ro/ /byang chub sems zhes 'di la grags/ /zhes bya bas ni/ 'dis ni snying rje tha mi dad pa zhes bya ba 'di'i rgyas par bshad pa'o/ /snga ma bzhin du chos kyi dbyings tsam gyi bdag nyid kyis sna tshogs pa'i don byed pa'i phyir byang chub kyi sems zhes 'di la grags so/ /de gzhan gyi don la brten pa nyid do snyam du dgongs pa'o/ /de ltar rgyas par bshad pa bstan nas/so sor rgyas par bshad pa bstan pa'i phyir/ yi ge hU~M las yang dag byung / /zhes bya ba gsungs te/ rdo rje 'chang chen po'i ngo bo nyid kyi phyir ro/ /rnal 'byor rtogs pa zhes bya ba ni rim pa gnyis sgom pa po'i rnal 'byor pa rnams kyis rnal 'byor pa rtogs par bya ba'i phyir ro/ /rmad byung che zhes bya ba ni 'bad pa med pa'i cho 'phrul sna tshogs ston pa nyid kyi phyir ro//'dis ni thog ma dang tha ma med pa'i tshig mdor bstan pa'i skabs su bshad pa'i don bshad pa'o/ /de nyid gsum ni ro gcig don/ /zhes bya ba ni gsum ni lus ngag yid gsum gyi de kho na nyid dang / dbang po dang yul dang rnam par shes pa'i ngo bo rnams stong pa nyid dang ro gcig pa tha mi dad pa'i ngo bo ste/de nyid don ni dgos pa 'di la yod pas na/ des na de nyid gsum ni ro gcig pa'i don zhes bya'o/ /'dis ni zhi ba zhes bya ba dang dmigs pa med pa'i tshig dang zhi ba la sogs pa rnams kyi don bshad do/ / a ba d+hU tI'i go 'phang gsal/ /zhes bya ba ni spros pa thams cad bzlog nas stong pa nyid kyi don ni a ba d+hU tI'i rnam par rtog pa'i bdag nyid can yongs su shes pa ni a ba d+hU tI'i go 'phang ngo / /gsal zhes bya ba ni rnal 'byor gyi mngon sum gyis yongs su rdzogs pa nyid kyi phyir ro/ /lhan cig skyes dga'i sbyor ba yis//zhes bya ba ni dga' ba dang mchog dga' gnyis kyi bdag nyid can dngos po'i bdag nyid dang / dga' bral dngos po'i bdag nyid can zad pa'i ngo bo lhan cig pa'i rnam pa'i de kho na nyid do/ /de dang sbyor ba ni de dang rtse gcig pa'i sbyor bas so/ /'jug pa la sogs rnam par spangs//zhes bya ba ni lhan cig skyes pa'i thabs su gyur pa 'jug pa dang gnas pa dang ldang ba spangs te/ lhan cig skyes pa thob pa la thabs su gyur pa'i rlung rnams nub pa'i phyir ro/ /'di dag gis dngos po dang dngos po'i tshig dang / rang bzhin med pa'i tshig gi don bshad do/ /bde ba chen po'i go 'phang zhes bya ba ni/khrag gi rnam pa rdo rje nyi ma'i ngo bo nyid kyis bde ba chen po skyes pa'i rgyur gyur pa nyid kyi phyir bde ba chen po'i go 'phang ngo / /zhi zhes bya ba ni de'i snang ba nye bar zhi ba'i phyir ro/ /byang chub kyi sems ni zhes bya ba ni kun rdzob kyi rnam pa'o/ /dri ma zhes bya ba ni 'dod chags la sogs pas ma gos pa ste/'dis ni gtso bo'i tshig dang rnam par mi rtog pa la brten pa'i tshig gi don gsungs so/ /sna tshogs skad cig dbyer med pa/ /zhes bya ba ni rnam pa sna tshogs pa dang / rnam par smin pa dang / rnam par nyed pa dang / mtshan nyid dang bral ba'i ngo bo skad cig ma rnams dang gnyis su med pa ste/gnyis kyis rnam par rtog pa bzlog pa'i bdag nyid can te/ de rnams la khyab pa nyid kyi phyir ro/ /brjod pa'i bdag nyid dbyangs bral ba/ /zhes bya ba ni bde ba chen po'i 'khor lo na gnas pa'i haM gi yi ge kun rdzob byang chub sems kyi bdag nyid can brjod par bya ba'i bdag nyid dang nyams su myong ba'i bdag nyid ces bya ba'i don to//'dis ni mngon du gsungs pa'i stong pa nyid dang / tha mi dad pa'i tshig stong pa nyid kyi ye shes mtshungs pa med ces bya ba'i don to/ /rtag tu gnas pa'i rgyud kyis kyang / /zhes bya ba ni nyin mtshan du kun rdzob kyi byang chub kyi sems 'bab par byed cing gnas pa zhes bya ba ni rang gi lus la'o//de nyid kyi phyir byang chub sems ni 'bab par gyur pas zhes gsungs so/ /chad pa'i phyogs spangs nas ye shes kyi rim pa'i skabs su snying rje chen po'i rdzas 'bab pa'i phyir ro/ /'dis ni snying rje dang tha mi dad pa zhes bya ba 'di dang /byang chub sems zhes 'di la grags/ /zhes bya ba 'di yi don rgyas par bshad par byas so/ /de ltar rnam pa gsum gyis byang chub sems kyi ngo bo bstan nas/ da ni thabs rjes su brjod pas rang gis rig par bya ba nyid bstan pa'i phyir/ sngags kyi rnal 'byor gyis ni 'thob/ /ces gsungs te/lte ba'i dbus na gnas pa'i a yig gi rnam pa'i sngags kyi rnal 'byor gyis so/ /'thob ces bya ba ni sgra tsam po'i ngo bo zhes bya ba'i don to/ /thig le tsam zhes bya ba ni phra ba nyid kyi phyir ro/ /skye med ces bya ba ni rgyu dang rkyen gyi stobs kyis skye ba med pa'i phyir ro/ /zhi ba'i zhes bya ba ni de'i ngo bo nye bar mtshon pas sangs rgyas kyi chos dge ba byed pa rnams mngon par 'byung ba'i phyir ro//rang rig pa zhes bya ba ni sgra dang rnam par rtog pas brjod par bya ba ma yin pa nyid kyis so so rang gis rig par bya ba'i phyir ro/ /ye shes mchog ces bya ba ni snang ba thams cad nub par gyur pas bla na med pa'i ye shes kyi ngo bo nyid kyi phyir ro//sngags kyi spyod pa spyad pas na/ /zhes bya ba ni sngags kyi spyod pa rnam pa gnyis kyis gang zhig gnas pa de rnams la de skad ces bya'o/ /de rnams ni sngags kyi sgo nas spyad pa spyod pa'i rnal 'byor pa zhes bya ba'i tha tshig go/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa/ zab mo'i don gsal bar byed pa zhes bya ba las le'u bcu gcig pa'i rgya cher bshad pa'o// //de ltar le'u bcu gcig pas sgra tsam gyi don gtan la phab nas/ da ni rlung gi de kho na nyid la dri ba'i lan bstan pa brjod pa'i phyir/le'u bcu gnyis pa nye bar ston cing / de'i yan lag gi rlung gi de kho na nyid kyi yul la dri ba'i lan rtsom pa ni/ de nas zhes bya ba la sogs pa gsungs te/ le'u bcu gcig pa bshad pa'i rjes la'o/ /rlung gi de nyid don zhes bya ba ni 'chad par 'gyur ba'i mtshan nyid do/ / nyon zhes bya ba ni phyag na rdo rje la bod pa'o/ /bshad kyis zhes bya ba ni brjod par bya yis zhes bya ba'o/ /de nyid mchog ces bya ba ni thabs sgom pa sngon du 'gro bas zhes bya ba'i don to/ /des ci zhig 'grub ce na/ de'i phyir/ myur du dngos grub thob par 'gyur/ /zhes gsungs te/ myur ba nyid du rdo rje bzlas pa 'grub par 'gyur ba'o//gang gis zhes bya ba ni rlung gi de kho na nyid kyis so/ /rnal 'byor pa yis zhes bya ba ni rnal 'byor ni ting nge 'dzin te/ gang la yod pa de rnams la de skad ces bya'o/ /rlung bsgoms na zhes bya ba ni rlung ni rnam pa lnga'am rnam pa bcu sgom par byed cing nye bar mtshon par byed pas na/de'i rlung sgom pa po ste/ de rnams so/ /de ltar rlung gi de kho na nyid kyi yul la dri ba'i lan rtsom pa bstan nas/ dngos su rlung gi de kho na nyid bstan pa brjod pa'i phyir/ de'i yan lag gi ngo bo ni rlung gi thig le zhes bya ba la sogs pa gsungs te/ rig pa'i ngang tshul can gyi phyir thig le'o//ye shes che zhes bya ba ni ye shes chen po dang lhan cig tu zha bo dang long ba bzhin du 'brel pa'i phyir ro/ /bshad bya zhes bya ba ni brjod par bya ba'o/ /rlung gi bshad pa bstan zin to/ /de kho na nyid kyi tshig bstan pa'i phyir/ de nyid tshig ni slar zhes gsungs te/ dngos grub kun gyi rgyur zhes bya ba ni 'gro ba dang 'ong ba la sogs pa byed pa dang //zhi ba la sogs pa bsgrub pa'i phyir/ ji skad du/ yaM yig don gyi gang cung zad/ /dngos grub 'dod pas thams cad bya/ /raM yig la sogs gsum gyis kyang / /'gro ba'i don la rab tu 'jug /ces gsungs te/ gsungs zhes bya ba ni brjod pa'o/ /gnyis med rnal 'byor zhes bya ba ni 'jig rten las 'das pa'i phyir dang / rlung dang / sngags dang / lha dang dkyil 'khor la sogs pa rnams la gnyis su snang ba la sogs pa'i phyir ro/ /gzhan yang mi zad tshe zhes bya ba ni zad pa med pa'i phyir ro/ /skye med ces bya ba ni skye ba med pa'i phyir ro//kun 'gro zhes bya ba ni phyi rol gyi 'byung ba chen po dang / lus kyi 'byung ba chen po rnams la thams cad du khyab pa nyid kyi phyir ro/ /zhi ba dang zhes bya ba ni rlung gi stobs kyis byung ba'i rang bzhin gyi tshogs nye bar zhi ba nyid kyi phyir ro/ /khyab par byed ces bya ba ni/ ngag gi de kho na nyid kyi bdag nyid kyi phyir ro/ /lus can kun la zhes bya ba ni lus 'dzin pa rnams la'o/ /bsam gyis mi khyab ces bya ba ni 'od gsal gyi rnam pas sems kyi spyod yul las 'das pa'i phyir ro/ /stong pa zhes bya ba ni don dam par rang gi ngo bo med pas so/ /de yang rten cing 'brel par 'byung ba nyid kyi phyir ro//dri med ces bya ba ni sangs rgyas kyi rnam par yongs su shes pas dri ma med pa'o/ /thams cad bdag nyid ces bya ba ni rlung gi ngo bo thams cad du 'byung ba chen po bzhi'i dkyil 'khor rnams la'o/ /rtag tu zhes bya ba ni dus rtag par ro/ /bzhugs zhes bya ba ni rten pa'o/ / sgom pa dang bsam gtan rnal 'byor gyis zhes bya ba ni sgom pa ni lus ngag yid gsum gyi ngo bo dang / 'byung ba dang rngub pa dran pa'o/ /bsam gtan zhes bya ba ni de bzhin gshegs pa lnga'i rlung gi rang bzhin sems dpa'o/ /bsgom pa yang yin la/ bsam gtan yang yin pas na de skad ces bya'o//de dag nyid ni rnal 'byor te sbyor ba'o/ /des rtogs pas na rtogs pa'o/ /thig le rang gi ngo bo shes/ /zhes bya ba ni thig le rnam pa gsum gyi ngo bo'o/ /chos rnams gcig tu gyur pa'i gnas/ /zhes bya ba ni chos thams cad kyi phung po lnga'i mtshan nyid can no//gcig nyid gnas gang la yod pa de la de skad ces bya'o/ /ji skad du/ srog ni rnam shes phung po ste/ /thur sel tshor ba'i phung po'o/ /mnyam gnas 'du shes phung po ste/ /'du byed du grags gyen du rgyu/ /gzugs kyi phung po khyab byed 'gyur/ /phung po lnga ni rnam pa'o/ /zhes gsungs so//sngags kyi de nyid rgyu zhes bya ba ni sngags kyi de kho na nyid kyi rgyur gyur pa rnam pa bzhi po rnams rlung gi dbang gis a yig la sogs pa ma mo bskyed pa'i phyir ro/ /ji skad du/ rlung gi de nyid sngon 'gro bas/ /sngags kyi de nyid dbang du bya/ /zhes gsungs so/ /bag chags kun las rnam par grol//zhes bya ba ni bskyed pa'i rim pa rnam pa gnyis bsgoms pas/ bag chags kyi ngo bo phung po dang khams dang skye mched rnams kyi snang ba med pa'i phyir ro/ /kun mkhyen zhes bya ba ni gyen du rgyu ba la sogs pa dbang po'i rlung lnga'i stobs kyis dbang po re re la yul thams cad snang ba'i phyir ro//bde ba kun ster ba zhes bya ba ni nyon mongs pa dang las kyi dbang gis skye ba nas bzlog pa'i rgyur gyur pa'i phyir ro/ /sna yi rtse mor de nyid mchog /ces bya ba ni kun rdzob kyi sna'i rtse mor ro/ /de nyid mchog ces bya ba ni mchog gi ngo bo de nyid ni/ ngag gi 'od gsal ba'i bdag nyid la rgyur gyur pa nyid kyi phyir ro//bsam par bya zhes bya ba ni yungs kar gyi 'bras bu'i tshad tsam du bsam par bya'o/ /'od zer thig le zhes bya ba ni rlung lnga nye bar bsdus pa'i rnam pa nyid kyi phyir ro/ /ji ltar zhe na/ de'i phyir/ srog dang rtsol ba yang dag sbyor//zhes gsungs te/ srog dang rtsol ba gnyis 'jug pa dang ldang ba'i ngo bo dag la mnyam par sbyor ba rlung rnam pa lnga nye bar bsdus pa'i ngo bo de'i rtags pa yid la mngon du phyogs pa'i ngo bo de sngon du 'gro ba'o/ /gang gis bsgom par bya zhe na/ de'i phyir blo ldan zhes gsungs te/ gsum pa'i don gyi dang po ste/blo ldan gyis zhes bya ba'i don to/ /'od zer gyi thig le bsgom pa la mkhas pa'i phyir snyam du dgongs pa'o/ /gzhan yang rlung gi de kho na nyid ji lta bu zhe na/ de'i phyir ye shes lnga'i bdag nyid ces bya ba gsungs te/ skal bzang ye shes lnga'i bdag nyid can ni me long la sogs pa'i ye shes lnga'i rnam par dag pa nyams dga' ba nyid kyi phyir ro/ /sangs rgyas lnga'i mchog ni zhes bya ba ni de bzhin gshegs pa lnga'i bdag nyid kyi phyir ro/ /ji skad du/ srog ni sems kyi rdo rje ste//thur sel rin chen 'byung ldan no/ /gsung gi rdo rje gyen rgyur grags/ /mnyam bcas las kyi rdo rje 'dzin/ /khyab byed rnam par snang mdzad grags/ /sangs rgyas lnga ni rnam dag pa'o/ /zhes gsungs so/ /rin chen lnga yi sbyor ba'i gzugs//zhes bya ba ni shel dang / in+d+ra nI la dang / mar ga ta dang / pad+ma rA ga dang / gser gyi dbye ba rnams kyis so/ /ji skad du/ srog ni nag po thur sel ser po ste/ dmar po gyen rgyu nam mkha' ltar ljang ba/ /'dir ni mnyam pa zhes bya brjod pa ste//khyab byed kun+da dang mnyam 'dod/ /ces gsungs so/ /sbyor ba yis zhes bya ba ni sems kyi rgyu ba 'gog pa'i rgyur gyur pa'i phyir ro/ /'byung ba lnga yi bdag nyid mtshan/ /zhes bya ba ni srog ni chu'i khams kyi rnam par dag pa'i ngo bo'o//thur sel ni nam mkha'i khams kyi ngo bo'o/ /gyen du rgyu ba ni me'i khams kyi ngo bo'o/ /mnyam gnas ni rlung gi khams kyi rang bzhin no/ /khyab byed ni sa'i khams kyi rang bzhin no/ /ji skad du/ chu yi khams ni srog ces brjod/ / thur sel nam mkha' de bzhin te/ /gyen rgyu me nyid du ni brjod/ /mnyam gnas de bzhin du ni rlung / /khyab byed sa yi khams yin no/ /khams lnga rnam par dag pa'o/ /zhes gsungs so/ /de ltar rlung gi de kho na nyid kyi ngo bo nyid bstan nas/de sgom par byed pa'i thabs brjod par bya ba'i phyir/ /de'i yan lag lus la sogs pa'i sbyor ba ni thog ma zhes bya ba la sogs pa gsungs te/ lus kyi phyag rgya'i dngos zhes bya ba ni rnam pa gnyis kyis bskyed pa'i rim pa bsgoms pas rdo rje bzlas pa'i rten du gyur pa'i lus med kyang /mos pas gzung ba'i sgyu ma'i lus la lus kyi phyag rgya'i dngos zhes brjod do/ /ji skad du/ rdo rje'i bzlas pa 'di yis ni/ /snga ma bzhin du brten byas nas/ /sgyu ma lta bu'i ting 'dzin gyis/ /las rnams thams cad bsgrub par bya//zhes gsungs so/ /ngag gi grangs ni zlos bdag nyid/ /ces bya ba ni gcig dang gnyis dang mang po zhes bya ba'i bdag nyid can gyi sngags kyi grangs ni rlung gi de kho na nyid kyi rten gnyis pa'o/ /yid ni rnal 'byor che la dga'//zhes bya ba ni sna'i rtse mo rnam pa gsum bsgoms pas 'jug pa dang / gnas pa dang / ldang ba'i rlung rnams la'o/ /yi ge gsum dang de bzhin gshegs pa gsum gyi ngo bo yongs su shes pa ni yid la yongs su shes pa/ yid ni rnal 'byor che la dga'//zhes bya bar byas nas so/ /'di nyid ni rnal 'byor chen po ste/ de las gzhan pa'i rnal 'byor gyi mtshan nyid dang bral ba'i phyir ro/ /bsgom pa'i go 'phang mi bzad pa/ /zhes bya ba ni lus dang ngag dang yid kyi phyag rgya'i rnam pa gsum gyis rdo rje bzlas pa'i ngo bo 'dug pa'i gnas so//bsgom zhes bya ba ni goms par bya ba'o/ /mi zad pa zhes bya ba ni 'di la zad pa ni 'jig pa ste/ de med pas na mi zad pa ste/ ngag 'od gsal ba'i rnam pa gnyis kyi phyir ro/ /de ltar lus la sogs pa'i sbyor ba bstan nas 'byung ba dang 'jug pa dran pa brjod pa'i phyir/de'i yan lag mdor bstan pa ni/ bgrang ba yi ni sbyor ba yis/ /zhes bya ba la sogs pa gsungs te/ 'chad bzhin pa'i rnam pa drug gis so/ / bsgom bya zhes bya ba ni rlung gi de kho na nyid kyi ngo bo'o/ /gang gis she na/ de'i phyir rnal 'byor mchog gis zhes bya ba gsungs te/ bskyed pa'i rim pa sgom pa po'i rnal 'byor pa'i mtshan nyid dang bral ba rdzogs pa'i rim pa sgom pa la mos pa zhes bya ba'i don to//rtag ces bya ba ni thun phyed kyi dus kyi mthar thug pa'am/ thun mtshams bzhir zhes bya ba'i don to/ /de nyid kyi phyir/ bgrang bya'i grangs kyi dbugs kyis ni/ /zhes gsungs te/ bgrang bya ni grangs so/ /dbugs kyi grangs kyis zhes bya ba ni lhag pa dang chad pa'i dbugs kyi grangs spangs pa dang /'dres pa'i grangs yongs su spangs nas/ nyi khri chig stong drug brgya'i dbugs kyi grangs kyi ngo bo'o/ /de bzhin dbugs ni rnam spyod bya/ /zhes bya ba ni 'dis ni rjes su 'gro ba bshad de/ / dkyil 'khor re re las lhag ma'i dkyil 'khor gyi chas bgrangs pas dgu brgya dgu brgya'i ngo bo'i dbugs rgyu ba'i grangs kyis 'jug pa la sogs pa'i rim pas thun re re la brgya phrag nyi shu rtsa bdun gyi grangs kyi mtshan nyid can rlung ni rnam spyod pa zhes bya ba ni 'dis ni gnas bstan pa ste/rtog pa dang zhes bya ba dang 'brel to/ /dkyil 'khor re re la rtsa'i dkyil 'khor rab tu rgyu bas dbugs 'byung ba dang rngub pa'i gnas pa'i rnam par spyod pa'o/ /dus kyi dbye ba'i rtog pa dang / /zhes bya ba ni 'dis ni mtshan nyid gsungs te/gnas so sor rnam par rtog pa brgya rtsa brgyad kyi rgyu ba'i ngo bo dbye ba'i dus te des so/ /rtog pa zhes bya ba ni nye bar mtshon pa'i zhes bya ba'i don to/ /rlung rnams kyis ni zlog pa dang / /zhes bya ba ni 'dis ni ldog pa gsungs te/ rtog pa dang bcas pa'i ngo bo bzlog pas pas rtog pa med pa'i ngo bo las dang po pa'i rnal 'byor gyi ngo bos rnam par ldog pa zhes bya ba'i don to//rtog pa dang bcas spangs pa ste/ /zhes bya ba ni 'dis ni rnam par dag pa gsungs so/ /rtog pa dang bcas pa bzlog nas/rlung gi ngo bo gcig pu gnas pa la dal bas so zhes bya ba'i don to/ /de ltar rnam pa drug gis zhes bya ba ni rigs pa 'dis so/ /drug gis zhes bya ba ni rnam pa drug gis so/ /mdor bsdus zhes bya ba ni mdor bsdus pa nyid kyis so//'byung dang rngub par rjes su dran/ /zhes bya ba ni 'jug pa'i rlung ni rngub pa'o/ /'gro ba'i rlung ni 'byung ba'o/ /de dag rjes su dran pa ni nye bar mtshon pa'o/ /de ltar 'byung ba dang / rngub pa'i rjes su dran pa mdor bstan pa bshad nas/ rgyas pa bshad pa bstan pa'i phyir/ de'i yan lag bgrang ba'i ngo bo bstan pa ni/ thog mar srog dang thur sel rnams/ /zhes bya ba la sogs pa gsungs te/ dang por re zhig mos pa las byung ba'i sgyu ma'i lus la dmigs la/ srog dang thur sel chad pa dang lhag pa dang 'dres pa'i grangs yongs su dor nas so//nyi khri zhes bya ba ni stong phrag nyi shu'o/ /chig stong zhes bya ba ni stong phrag gcig go/ /brgya phrag drug ces bya ba ni drug brgya'o/ /nyin mtshan grangs ni zhes bya ba ni nyin mtshan gyi grangs kyis so/ /nges par zhes bya ba ni bcom ldan 'das kyis bstan pas the tshom bzlog pa'i phyir ro//de ltar grangs kyi ngo bo bstan nas/ dus kyi nges pa brjod pa'i phyir/ /ji srid grangs ni thob pa'i gnas/ /zhes bya ba ni de ma thag par bshad pa'i rigs pas dbugs nyi khri chig stong drug brgya'i grangs thob pa'i phyir grangs ni thob pa'o//nyin zhag nyi shu rtsa bdun du/ /zhes bya ba ni nyi ma nyi shu rtsa bdun gyis dbang po shin tu rnon po la brten nas nges par brjod pa'o/ /grangs ni rjes su sbyor ba yis/ /zhes bya ba ni de ma thag pa bstan pa'i'o/ /grangs ni zhes bya ba ni sngar bstan pa'o/ /yang dag ces bya ba ni grangs kyi skyon spangs nas so//sbyor ba yis zhes bya ba ni bya'o zhes bya ba'i don to/ /de ltar rnam pa gnyis kyis grangs kyi rgyas par bshad pa bstan nas/ rjes su 'gro ba rgyas par bshad pa'i phyir/ de'i yan lag ngo bo bstan pa ni/ de nas rjes 'gro zlos par 'gyur/ /zhes bya ba la sogs pa gsungs te/gzhu rgyud kyi rigs pa'am/ pi wang gi rgyud kyi rigs pa grangs kyi rjes la'o/ /thun tshod so sor zhes bya ba ni 'jig rten pa la rab tu grags pa'i nyin mtshan gyi dbye ba brgyad dam/ phal cher chu tshod brgyad brgyad kyi dbye ba'i ngo bo rnams la'o/ /so sor zhes bya ba ni bye brag tu so sor ro//rjes su 'gro ba zlos par 'gyur ba ste/ lus thams cad kyi rlung la zhes bya ba'i don to/ /thun re re'i tshad la zhes bya ba ni thun tshad re re la'o/ /srog dang rtsol ba la zhes bya ba ni dbugs dbyung ba dang rngub pa rnams la brtags te/ nyis stong bdun brgya'i grangs kyis zhes bya ba dang 'brel to/ / de las dkyil 'khor gyi cha gcig la rkang pa gcig dang nyis brgya'i dbugs rnams su 'gyur ro zhes bya ba ni bcom ldan 'das kyi nges pa'o/ /gang du gcig yod pa der bzhi yod do zhes bya ba ni rigs pa ste/ 'byung ba chen po bzhi'i dkyil 'khor gyi chas brtag pa la cha bzhis brtsis na/ dkyil 'khor gcig la dgu brgyar 'gyur te/de rnams kyang 'jug pa dang gnas pa dang ldang ba'i ngo bo nyid kyis sum 'gyur du byas pas brgya phrag nyi shu rtsa bdun gyi grangs kyi dbugs rnams su 'gyur ro/ /nges par ni zhes bya ba ni rang gis nyams su myong ba dang / bcom ldan 'das kyi gsung gi nges pa'o/ /gzung byed ces bya ba ni mtshon par byed pa'o//de ltar rjes su sbyor ba'i ngo bo bstan nas/ dus kyi nges par sbyor bar bya ba'i phyir/ yongs su gcod pa'i rnam pa yis/ /zhes bya ba gsungs te/ dkyil 'khor re re la brgya phrag nyi shu rtsa bdun gyi dbugs kyi grangs kyis yongs su gcod pa'i rnam pa des/ nyin zhag nyi shu rtsa bdun la/ /zhes bya ba ni sngar bshad do/ /'khor lo bzhi'i dbye bas zhes bya ba ni me dang rlung dang sa dang chu'i dbye bas so/ /nyin dang mtshan du zhes bya ba ni nyi ma la dkyil 'khor re re la so sor brgya phrag nyi shu rtsa bdun gyi grangs kyi dkyil 'khor bzhi la brgyad brgyas lhag pa'i stong phrag bcur 'gyur te/mtshan mo la yang de tsam du 'gyur ro/ /gnyis ka gcig tu bsdoms pas nyi khri chig stong drug brgyar 'gyur ro zhes bya ba ni ngag gi don to/ /de ltar rnam pa gnyis kyi rjes su sbyor ba bshad nas/ gnas rgyas par bshad pa bstan pa'i phyir/ de'i yan lag gi ngo bo brjod pa ni/de nas gnas pa'i 'bad pa yis/ /zhes bya ba la sogs pa gsungs te/ de nas zhes bya ba ni rjes su sbyor ba'i rjes la'o/ /gnas pa'i zhes bya ba ni rlung skye ba'i gnas so/ /'bad pa yis zhes bya ba ni bla ma brgyud pa'am nye bar mtshon pa'i rim pas so/ / tha dad du ni zhes bya ba ni snying ga dang / gsang ba dang / lte ba dang / mgrin pa dang lus thams cad la khyab par byed pa'i mtshan nyid can no/ /rab tu brtag pa zhes bya ba ni srog la sogs pa'i rlung lnga po mtshon par byed pa'o/ /rtsa yi 'khor lo rgyu ba yis/ /zhes bya ba ni dkyil 'khor re re la rtsa'i 'khor lo las byung ba'i rlung rgyu ba'am/'khor lo drug dang 'khor lo bzhi'i grangs kyis ji ltar le'u gsum po las bshad pa bzhin du'o/ /'byung dang rngub pa zhes bya ba ni 'jug pa dang gnas pa dang ldang ba'i bdag nyid can no/ /nges par zhes bya ba ni the tshom med par byas nas so//nges par gzung ba'i zhes bya ba ni dbye bar mtshon pa dang bya ba ste 'di me'i dkyil 'khor las byung ba'i dbugs dang / 'di ni rlung gi dkyil 'khor las byung ba'i dbugs zhes bya ba la sogs pa thun gyi dbye ba dang / thun gcig pa 'di nyid la zhes bya ba'i don to/ /de'i sbyor ba las zhes bya ba ni rlung gi sbyor ba dang /dbugs 'byung ba dang rngub pa'i sbyor bas so/ /rtsa'i 'khor lo zhes bya ba ni rlung gi rten du gyur pa'o/ /dpyad par bya zhes bya ba ni rtsa 'di las de lta bur gyur pa'i rlung 'byung ngo zhes bya ba la sogs pas rig pas so/ /de ltar gnas kyi rgyas par bshad pa'i ngo bo bstan nas dus nges pa brjod pa'i phyir/de ni 'khor lo rtsa'i dbye bas zhes bya ba gsungs te/ sprul pa la sogs pa'i 'khor lo drug gam bzhi dang / 'byung ba chen po bzhi'i dkyil 'khor de rnams la rtsa rnams ni 'chad par 'gyur ba'i ming can de ni 'khor lo'i rtsa'o/ /de rnams kyi dbye ba ni bye brag tu dbye ba'o//nyin zhag nyi shu rtsa bdun la/ /zhes bya ba ni sngar bzhin no/ /de ltar rnam pa gnyis kyis gnas rgyas par bshad nas/ mtshan nyid rgyas par bshad pa bstan pa'i phyir/ de'i yan lag gi ngo bo brjod pa ni/ de nas mtshan nyid yang dag ni/ /zhes bya ba gsungs te/ rlung 'di gcig pur ma zad kyi//'on kyang 'byung ba chen po bzhi/ /zhes bya ba'i mtshan nyid yang dag par brtag par bya ba ni mtshon par bya'o/ /ji ltar bya zhe na/ de'i phyir gnas kyi dbye bas zhes bya ba gsungs te/ gnas kyi dbye bas zhes bya ba ni gnas kyi dbye bas so/ /de nyid bstan pa ni/ gnas ni so sor rnam par brtags nas zhes gsungs te/dkyil 'khor gcig la brten pa'i rlung la'o/ /rnam rtog brgya dang brgyad ces bya ba ni le'u gsum par gsungs pa'i/ 'dod chags zhe sdang gti mug dang / /zhes bya ba la sogs pa rnams la'o/ /rlung zhes bya ba ni phyi rol gyi yul la brten nas rlung gi bzhon pa la rnam par shes pa brten nas/de rnams skyed par byed pa'i phyir/ /rnam rtog med pa'i sbyor ba mchog /ces bya ba ni don dam par rlung la zhon pa'i rnam par shes pa rang bzhin gyis rnam par dag pa la ltos nas rnam rtog med pa ste/ nyon mongs pa rnams kyis stong pa'i phyir ro//mchog ces bya ba ni rab nyid kyi nam mkha' dang mnyam pa'o/ /sbyor ba zhes bya ba ni don dam par nye bar zhi ba nyid kyi phyir ro/ /de nyid kyi phyir/ rtog pa spangs pa'i bdag nyid can/ /zhes gsungs te/ nyon mongs pa glo bur ba'i stobs kyis rang gi ngo bo las nyams pa med pa'i phyir ro/ / rtog pa ni rtog pa rnams kyis so/ /spangs pa ni rnam par dben pa'i bdag nyid can gang la yod pa rnams la de skad ces bya'o/ /dngos po kun gyi rang bzhin can/ /zhes bya ba ni rnam par shes pa nyid la de'i rnam pa nyid snang ba nyid kyi phyir ro/ /brgya dang brgyad ni lhag par rgyu/ /zhes bya ba ni rnam par rtog pa rnams yul la rgyab kyis phyogs pas zhes bya bar dgongs so//de ltar mtshan nyid kyi ngo bo rgyas par bshad nas/ dus kyi nges pa brjod par bya ba'i phyir/ 'di ni rnal 'byor zhes bya ba la sogs pa gsungs te/ sngar bshad pa'i mtshan nyid rang gi ngo bo'o/ /mchog ces bya ba ni rang bzhin gyis 'od gsal ba mtshon par byed pa'i phyir ro//yang dag ces bya ba ni phyin ci ma log pa'i ngo bos so/ /nyin zhag nyi shu rtsa bdun gyis/ /zhes bya ba ni sngar bzhin no/ /mtshan nyid bsgom pa zhes bya ba ni rlung la'o/ /rnal 'byor pas zhes bya ba ni 'byung ba dang rngub pa dran pa sgom pa po'o//ji ltar gnas pa'i zhes bya ba ni snying ga la sogs pa'i gnas so/ /ji ltar bdag ces bya ba ni ji ltar gnas pa'i ngo bo zhes bya ba'i don to/ /de ltar rnam pa gnyis kyis mtshan nyid kyi rgyas par bshad par bstan nas/ log pa'i rgyas par bshad pa bstan pa ni de'i yan lag rang gi ngo bo ni/de nas rnal 'byor log nas ni/ /zhes bya ba gsungs te/ rlung gi rnal 'byor de kho na nyid sgom pa pos log nas zhes bya ba ni brjes nas so/ /ji ltar brje bar bya zhe na/ de'i phyir/ rtog dang bcas pa'i rnal 'byor pa/ /zhes gsungs te/ rnam par rtog pa brgya rtsa brgyad kyi ngo bo zhes bya ba'i don to//las dang po pa'i rnal 'byor pa la sogs pa rnam par sbyar bas dge ba'i chos bsgoms pas de bzhin gshegs pa gsum gyi ngo bo la sbyar bar bya'o/ /de nyid kyi phyir/ rnam par rtog med rlung chen po/ /zhes gsungs te/ 'jig rten pa'i zag pa dang bcas pa'i chos la rnam par bzlog nas/'jig rten las 'das pa'i chos la sbyor bar byed pas na rnam rtog med pa'o/ /rang gi rang bzhin thob pas na rlung chen po'o/ /rtsa'i 'khor lo zhes bya ba ni me la sogs pa'i dkyil 'khor ram 'khor lo drug gam bzhi rnams la'o/ /btsal zhes bya ba ni rjes su btsal ba'o//de thob na ni zhes bya ba ni rnam par mi rtog pa'i rlung gi ngo bos thob nas so/ /log pa dang zhes bya ba ni bzlog pa brten pa'o/ /de nas zhes bya ba ni yul gyi ngo bo bzung ba las so/ /nyon mongs kun sbyor bas zhes bya ba ni rnam par rtog pa'i sbyor ba las so zhes bya ba'i don to/ / de ltar log pa rgyas par bshad pa bstan nas/ dus nges par brjod pa'i phyir/ nges pa las ni zhes bya ba gsungs te/ dge ba'i chos la rnam par sbyar bas rlung nges pa'i phyir ro/ /don dam pa zhes bya ba ni rang bzhin gyis rnam par dag pa'i ngo bos so/ /nyin zhag nyi shu rtsa bdun la/ /zhes bya ba ni sngar bzhin no//las dang po pa'i rnal 'byor pas zhes bya ba ni zab mo ma yin pa dang / shin tu zab mo'i bskyed pa'i rim pa bsgom pa'i sbyor bas so/ /log pa las zhes bya ba ni rnam par rtog pa'i rlung log pa'i mtshan nyid do/ /bsgom par bya zhes bya ba ni goms par bya ba'o/ /mkhas pas zhes bya ba ni log pas bsgom pa yongs su shes pa nyid kyi phyir ro//de ltar rnam pa gnyis kyis log pa rgyas par bshad pa bstan nas/ rnam dag rgyas par bshad pa brjod pa'i phyir/ de'i yan lag gi ngo bo bstan pa ni/ de nas rnam dag ces bya ba la sogs pa gsungs te/ log pa bstan pa'i rjes la'o//rnam dag ni yongs su dag pa'o/ /de rnams kyang zhes bya ba ni rlung rnams so/ /yang dag rnal 'byor stobs kyis ni/ /zhes bya ba ni dngos po med pa'i ngo bo bsgom pa'am/ yi ge gsum bsgom pas so/ /srog dang rtsol ba'i rnam rtog ces bya ba ni 'byung ba dang rngub pa'i dbugs kyi rnam par rtog pa rnams la'o//bkag ces bya ba ni zag pa dang bcas pa'i chos la mngon du phyogs pa las log nas zag pa med pa'i dge ba'i chos sgom pa nyid kyis so/ /kun nas zhes bya ba ni slar mi skye ba'i chos nyid kyis so/ /ji skad du/ gnod pa med pa bden pa'i don//rang bzhin gyis ni mi mthun phyogs/ /gnod pa med pa'i 'bad pas kyang / /blo la de phyogs lhung ba'i phyir/ /zhes gsungs so/ /de lta na yang / rnal 'byor ni bsgom par bya zhes bya ba ni rdo rje bzlas pa'i rim pas thob pa'i thabs su gyur pa'o/ /rlung de kho na nyid ces bya ba ni rnal 'byor pa gsum gyi dbye bas sna rtse rnam pa gsum po la thig le rnam pa gsum po 'dzin pa'i ngo bo'o//de'i rgyu ni skyed byed rnam par dag pa zhes bya ba'i don to/ /de ltar rnam dag gi rgyas par bshad pa rang gi ngo bo bstan nas/ dus nges pa brjod pa'i phyir/ gnyis med mchog gi rnal 'byor gyis/ /zhes gsungs te/rnam par rtog pa las log pa'i bdag nyid can gyis so/ /nyin zhag nyi shu rtsa bdun la/ /zhes bya ba ni snga ma bzhin no/ /de ltar don rnam pa drug gis rgyas par bshad pa bstan to/ /de ltar rnam pa gnyis kyis de bsgom pa'i thabs bstan nas/ rlung gi de kho na nyid rgyas par bshad pa brjod pa'i phyir/de'i yan lag sems rtse gcig pa'i rgyu gsungs pa/ rlung gi de kho na nyid la brten pa zhes bya ba la sogs pa gsungs te/ sngar bshad pa'i las so/ /g.yeng ba'i sems zhes bya ba ni yul la mngon du phyogs pas mnyam par ma bzhag pa'i sems kyi rgyud ni gang zag rnams kyi'o//dag par 'gyur zhes bya ba ni yongs su dag par 'gyur ba'o/ /rten ni gnas so/ /de la zhes bya ba ni gang gi phyir de lta bur gyur pa'i yon tan rlung gi de kho na nyid yod de/ de bas na rtse gcig sems kyis ni zhes bya bas ni rnam par g.yeng ba med pa'i sems kyis so//dag par 'gyur zhes bya ba ni yongs su dag par 'gyur ba'o/ /rlung gi stobs kyis bshad ma thag pa'i brgya rtsa brgyad kyi rnam par rtog pa rgyu ba log nas so/ /de kho na nyid kyis zhes bya ba ni de ma thag par bshad pa'i 'byung ba dang rngub pa'i rjes su dran pa'i mtshan nyid can no//rlung gi de nyid rnal 'byor mchog /ces bya ba ni mchog gi ngo bo rdo rje bzlas pa'i sgrub pas so/ /yang dag ces bya ba ni phyin ci ma log pa'i gdams ngag gi stobs kyis zhes bya ba'i don to/ /gsal zhes bya ba ni bsgom bzhin pa'i rab tu mthar phyin par gsal bar snang ba'i phyir ro/ / de ltar sems rtse gcig pa'i rgyu ba brjod nas/ de'i don du dpe bstan pa'i phyir/ khang bzangs byed pa bzhin du ni/ /zhes bya ba la sogs pa gsungs te/ khang pa gsar pa byed pa po la sogs pas so/ /bzhin du zhes bya ba ni ji lta ba bzhin du'o/ /thog mar zhes bya ba ni dang por ro/ / sa ni yongs su sbyong zhes bya ba ni mtho ba dang dma' ba'i skyon bzlog pa dang / zug rngu phyung bas khang bzangs 'dzin pa'i nus pa dang ldan par byed do/ /de dang zhes bya ba ni yongs su sbyangs pa'i sa'i steng du'o/ /bgegs dang bral byas la zhes bya ba ni sa'i lha dang / 'byung po la sogs pa'i bgegs nye bar zhi ba'i phyir ro//legs par dag par bya ba ni sbyin sreg dang gtor ma la sogs pas legs par dag par byas pa'o/ /khang bzangs zhes bya ba ni khang pa'o/ /skal bzang zhes bya ba ni tshad bzang po nyid kyis shin tu bkra shis pa nyid kyi phyir ro/ /nyams dga' ba zhes bya ba ni yid la bde ba skyed pa'i phyir ro//ji ltar 'dod par bya zhes bya ba ni ji ltar 'dod pa chen po dang / chung ngu'i dbye bas so zhes bya ba ni mkhas pa las byed pa la sogs pa'i sgo nas so/ /blo bzang zhes bya ba ni khang pa la sogs pa sprul pa la mkhas pa'i phyir ro/ /'dis ni dpe bstan to//don bstan pa'i phyir/ de bzhin zhes gsungs te/ legs par sbyangs pa'i sa phyogs su/ /khang bzangs byed pa bzhin du'o/ /rnal 'byor pa zhes bya ba ni/ rdzogs pa'i rim pa bsgom pa'o/ /ye shes mchog ces bya ba ni mchog gi rdo rje bzlas pa bskyed pa'i rgyur gyur pa'o/ /rlung gi de nyid ces bya ba ni sngar bshad pa dang 'chad par 'gyur ba las so//rnam par bsgom zhes bya ba ni goms par bya ba'o/ /ji ltar zhe na/ de'i phyir srog dang rtsol ba'i zhes bya ba gsungs te/ srog kyang yin la rtsol ba yang yin pas na srog dang rtsol ba'o/ /de dag dang yang dag par sbyor ba ni/rnam pa drug gis dbugs 'byung ba dang rngub pa rjes su dran pa'i mtshan nyid do/ /de sngon du 'gro bas zhes bya ba ni de sngon du song bas so/ /mnyam gzhag nas zhes bya ba ni grangs la sogs pa'i yul la shin tu yang rtse gcig par gyur pa'i phyir ro/ /rnal 'byor mchog gis zhes bya ba ni mchog gi ting nge 'dzin skyed par byed pa'i rgyur gyur pa'o//ye shes che zhes bya ba ni phyogs gcig pa'i ye shes las gnyen por gyur pa nyid kyi phyir ro/ /bsgom par bya zhes bya ba ni goms par bya'o/ /de ltar rnal 'byor rig ces bya ba ni sngon du gsungs pa'i tshul gyis so/ /rnal 'byor ni 'byung ba dang rngub pa rjes su dran pa'i mtshan nyid shes pas na rjes su dran pa'o//de ltar don bstan nas/ de'i 'bras bu brjod pa'i phyir/ thog ma zhes bya ba gsungs te/ thog ma ni dang po nyid du'o/ /rlung gi de nyid dang zhes bya ba ni rdo rje bzlas pa'i thabs su gyur pa'o/ /'gyur zhes bya ba ni 'byung ba'o/ / sngags kyi de nyid ces bya ba ni sngags kyi btu ba dang / sngags kyi don dang / sngags kyi brda dang / sngags kyi de kho na nyid kyi dbye bas rnam pa bzhi'o/ /de nas zhes bya ba ni rlung gi de kho na nyid bsgoms pa'i rjes la'o/ /gsal zhes bya ba ni 'jug pa dang gnas pa dang ldang ba'i mtshan nyid can gyi rlung gsum yi ge gsum la sbyar bas gsal ba'o//'gyur zhes bya ba ni sngar bshad pa dang 'brel pa'o/ /de ltar de'i 'bras bu bstan nas/ rlung gi de kho na nyid rgyas par bshad pa brjod par bya ba'i phyir de'i yan lag so sor rgyas par bshad pa'i ngo bo ni de la rlung gi zhes bya ba la sogs pa gsungs te/rang gi ngo bo bsgom par bya/ /zhes bya ba ni lhag ma'o/ /'od zer mchog ces bya ba ni 'od zer kha dog lnga pa'i ngo bo ste/ rlung lnga yongs su bsdus pa'i rnam pa nyid kyi phyir ro/ /kha dog lnga zhes bya ba ni de bzhin gshegs pa lnga'i kha dog dang ldan pa'i phyir ro/ /gsal ba chen po zhes bya ba ni 'od gsal ba nyid kyis gsal bar byed bzhin pa'o//de bzhin gshegs pa lnga'i rang bzhin zhes bya ba ni sngar bshad zin to/ /phung po lnga yi ngo bo nyid/ /ces bya ba ni srog ni rnam par shes pa'i phung po'o/ /thur sel ni tshor ba'i phung po'o/ /mnyam gnas ni 'du shes kyi phung po'o//gyen du rgyu ba ni 'du byed kyi phung po'o/ /khyab byed ni gzugs kyi phung po'o/ /phung po lnga ni rnam par dag pa zhes bya ba ni srog ni shin tu rnam par dag pa'i chos kyi dbyings kyi ye shes so/ /thur sel ni mnyam pa nyid kyi ye shes so/ /mnyam gnas ni so sor rtog pa'i ye shes so/ /gyen du rgyu ba ni bya ba grub pa'i ye shes so//khyab byed ni me long lta bu'i ye shes so/ /rlung lnga nyid du rgyu bar byed/ /ces bya ba ni srog la sogs pa lnga 'bab pas rlung lnga rgyu ba'o/ /mngon par byang chub pa lnga'i zhes bya ba ni/ ji skad du/ me long ye shes zla ba ste/ /zhes bya ba la sogs pa gsungs so/ /de dang 'dra ba nyid kyis rlung rnam pa lnga po rnams ye shes lnga'i rnam par dag pas rnam pa lngas mngon par byang chub par shes par bya'o//mchog gi go 'phang zhes bya ba ni rdo rje bzlas pa mngon du byed pa'i rgyur gyur pa'o/ /de ltar so sor rgyas par bshad pa bstan nas/ 'od zer gyi thig le bsgom pa'i gnas nges pa brjod pa'i phyir/ sna yi rtse mor de nyid mchog /ces gsungs te/ kun rdzob kyi sna'i rtse mor sems rtse gcig pa'i rgyur gyur pa'o/ /rlung lnga yi ni ngo bo nyid/ /ces bya ba ni de nyid bsdus pa nyid kyi phyir ro/ /rlung gi thig le zhes ni bshad/ /ces bya ba ni de las gzhan pa'i sngags rdzas kyi thig le ltos pas 'od zer gyi thig le'o/ /yang dag ces bya ba ni kun brtags ma yin pa nyid kyi phyir ro//rang bzhin gyis grub pa'o/ /gsal ba zhes bya ba ni rnal 'byor pa'i shes pa de la de ltar snang ba'i phyir ro/ /de ltar 'od zer gyi thig le bsgom pa'i gnas rgyas par bshad pa bstan nas/ rgyud gzhan rnams su ngag gcig pu bstan pa brjod pa'i phyir/sna rtser zhes bya ba la sogs pa gsungs te/ de yang de ni zhes bya ba ni 'od zer gyi thig le'o/ /rgyud gzhan rnams su zhes bya ba ni dpal gsang ba 'dus pa la sogs pa rtsa ba'i rgyud du gyur pa rnams la'o/ /gsungs pa zhes bya ba ni bdag nyid rdo rje sems dpa'i ngo bos so//sna rtse yungs kar zhes bya ba ni kun rdzob kyi sna rtser ni gdong gi sna rtse la'o/ /yungs kar de yang ni zhes bya ba ni yungs kar gyi 'bru'i tshad tsam mo/ /srog dang rtsol ba'i rtag pa zhes bya ba ni srog dang rtsol ba mtshon par byed pa'o/ /srog dang rtsol ba la gnas pas zhes bya ba ni/ srog dang rtsol ba de nyid la sangs rgyas lnga'i rang bzhin 'od zer lnga gnas pa ste/ dkyil 'khor bzhi las byung ba bzhi dang / lnga pa khyab byed kyi bdag nyid kyi 'od zer ro/ /'dis ni 'od zer gyi ngo bo'i thig le zhes bstan par 'gyur ro/ /rig pa'i ngang tshul thig le zhes bya ba'i nges tshig gis so/ / de ltar rgyud gzhan rnams su ngag bstan nas/ rlung 'jug pa'i lam brjod pa'i phyir/ steng gi sna las zhes bya ba la sogs pa gsungs te/ de'i 'od zer 'di rnams sems can gyi khams thams cad la steng gi sna las zhes bya ba gdong gi sna las rnam par rgyu ba yin no/ /ji ltar zhe na/ de'i phyir g.yon dang zhes bya ba la sogs pa gsungs te/nyi ma'i thun dang po la me'i dkyil 'khor mgrin par gnas pa las g.yas pa'i sna bug las kha dog dmar ba'i 'od zer gyis rgyu'o/ /thun gnyis pa la rlung gi dkyil 'khor lte ba la gnas pa las/ g.yon pa'i sna bug nas 'od zer sngon po'i kha dog gis rgyu'o/ / nyi ma gung gi rjes la thun gsum pa la sa'i dkyil 'khor gsang ba'i pad+ma la gnas pa las/ 'od zer kha dog ser po sna bug gnyis ka nas rgyu'o/ /thun bzhi pa la snying ga'i pad+mar gnas pa'i chu'i dkyil 'khor las 'od zer kha dog dkar po sna bug gnyis ka nas dal gyis rgyu bar byed do/ /mtshan mo la yang de bzhin du'o//'di yang dkyil 'khor so so la cha bzhi gtso bo dang gtso bo ma yin pa'i ngo bos gnas te/ de rnams la yang de nyid kyi rim pas shes par bya'o/ /de skad du yang / me'i dkyil 'khor gyi rang gi cha shar ba na/ g.yas pa'i g.yas pa las 'od zer dmar po 'byung bar 'gyur ro/ / me'i rlung gi dkyil 'khor gyi cha shar ba na g.yas pa'i g.yon pa las 'od zer ljang ser 'byung bar 'gyur ro/ /me'i sa'i cha 'char ba na g.yas pa'i gnyis ka las 'od zer ser po 'byung bar 'gyur ro/ /me chu'i cha 'char ba na g.yas pa'i gnyis ka las dal bar rgyu ba'i 'od zer dkar po 'byung bar 'gyur ro//de bzhin du gzhan rnams la yang sbyar bar bya'o/ /de nyid kyi phyir/ nang gi dus ni yin par bshad/ /ces gsungs te/ phyi rol du nyin zhag gcig la drug cu rtsa bzhi'i grangs ji lta ba bzhin du nyin zhag gcig la dbugs nyi khri chig stong drug brgya'i grangs su 'gyur ro/ /ji ltar phyi rol du dbyu gu dang /thun gyi dbye bas nyi ma dang zla bas byas pa'i dus so/ /de bzhin du nang gi bdag nyid can srog dang thur ser gyis byas pa'i dus zhes bya ba'i tha tshig go/ /de ltar rlung la 'jug pa'i lam brjod nas/ rlung gi bya ba rgyas par bstan par bya ba'i phyir/ de'i yan lag mdor bstan pa ni/lkog ma snying ga lte ba dang / /zhes bya ba gsungs te/ lkog ma'i chu skyes la me'i dkyil 'khor gyi 'od zer gnas pa yin te/ de bzhin du chu dang rlung dang sa'i 'od zer rnams snying ga dang lte ba dang gsang ba'i chu skyes rnams la gnas zhes bya ba ni gnas bstan pa'o/ /de rnams kyang 'gro ba dang 'ong ba ston te byed pa'i khams rnams la don du ma nyid kyi phyir ro//ston ces bya ba ni byed pa'i don to/ /'o na 'jug pa dang gnas pa dang ldang ba'i bdag nyid can gyi rlung rnams ji ltar 'gro ba dang 'ong ba gnyis byed par rigs she na/ 'di ni skyon med de 'gro ba dang mi 'gro ba dang 'ong ba dang zhes bya ba ni bar ma'i tshig mi snang bar byas nas/sdud pa la gnyis ldan gyi bsdu ba bya'o/ /de rnams kyi phra ba dang rags pa'i dbye bas dus kyi nges pa bstan pa'i phyir/ gnas par zhes bya ba la sogs pa gsungs te/ 'dir dbyu gu drug cu rtsa bzhis ni phal cher nyin mtshan no/ /de dang nyin mtshan gyi dbye bas thun brgyad kyi bdag nyid do//thun gyi tshad kyang dbyu gu brgyad kyi bdag nyid do/ /de'i phyir chu tshod phyed ni 'od gsal gyi skad cig ma 'jug pa la sogs pa dang bral ba 'char ba yin te/ de yang cig car ni ma yin no/ /'on kyang chu tshod phyed dang brgyad la rgyu ba'i dbugs kyi 'khor lo la cha shas kyi dbye bas yud tsam mtshon par dka' ba'i skad cig la 'jug pa yin no//de yang phra mo'i rnal 'byor pa rnams kyis mtshon pa yin gyi ma dpyad pa'i nyams dga' bar rags pa'i blo dang ldan pa rnams kyis ni ma yin no/ /'di ni re zhig rtse mo'i skad cig ma nye bar mtshon ba ni nyin mo chu tshod gnyis dang mtshan mo la yang gnyis zhes bya'o//de ltar na thun phyed kyi dus la chu tshod bzhi'i bdag nyid skye bar 'gyur ro/ /phra ba dang rags pa mthong bas dkyil 'khor bzhi 'char bas na so sor thun phyed kyi 'od zer gyi rgyu ba sna'i rtse mor gzung bar gyur pa na zhi ba la sogs pa'i rgyur 'gyur ba yin no//rnal 'byor pa rnams kyis kyang chu tshod bzhi'i bdag nyid can thun phyed kyis mtshon par byed pa dbugs kyi 'khor lo thams cad la de bzhin du dbye ba rigs par bya'o/ /gang gis thams cad 'od gsal ba'i rang bzhin shes par 'gyur zhes bya ba'i don to/ /de nyid kyi phyir go rims ji bzhin zhes bya ba gsungs te/g.yas pa la sogs pa'i dbye bas dkyil 'khor gyi rim pa zhes bya ba'i tha tshig go/ /de ltar mdor bstan pa bshad nas/ rgyas par bshad pa brjod pa'i phyir/ g.yas pa nas zhes bya ba la sogs pa gsungs te/ sna bug g.yas pa nas thun dang po las byung ba'i 'od ces bya ba ni mnyam gnas kyis rlung gtso bo'o//me yi dkyil 'khor nyid yin te/ /zhes bya ba ni me'i dkyil 'khor las byung ba'i dbugs te/ rigs par bya'o/ /bsreg bya za bas snyam du dgongs pa'o/ /kha dog dmar zhing zhes bya ba ni rang dang 'os pa'i kha dog gi phyir snang ba mtha' yas kyi cha yis so//gsal ba zhes bya ba ni rnal 'byor pa'i shes pa la gsal bar snang ba'i phyir ro/ /pad+ma mgon po zhes bya ba ni so sor rtog pa'i ye shes kyis 'dod chags la sogs pa'i yul la pad+ma ltar ma gos pa'i phyir pad+ma ni snang ba mtha' yas so//de nyid ni mgon po rang gi rigs rnams kyi bdag po nyid kyi phyir ro/ /dor zhes bya ba ni rlung dang dkyil 'khor la'o/ /lha ni byin gyis rlob par byed pa po'o/ /g.yon pa nas ni 'byung zhes bya ba ni g.yon pa'i sna bug nas thun gnyis pa la'o/ /'byung ba'i 'od ces bya ba ni rlung gyen du rgyu ba'i ngo bo'o//rlung gi dkyil 'khor zhes bya ba ni de las byung ba'i phyir ro/ /ljang ser dag tu snang ba ste/ /zhes bya ba ni don yod grub pa'i mdog gi phyir ro/ /las kyi mgon po zhes bya ba ni bya ba grub pa'i ye shes kyi ngo bo rnam par dag pa'i phyir/ las ni don yod grub pa'o/ /de nyid kyang mgon po ste/de'i rigs rnams la bdag po nyid kyi phyir ro/ /der zhes bya ba ni dkyil 'khor 'di dang / rlung la'o/ /lha zhes bya ba ni sngar bzhin no/ /gnyis ka las ni zhes bya ba ni sna'i bu ga dag las 'byung ba zhes bya ba ni/ phyir 'byung ba'o/ /'od ces bya ba ni thur sel gyi rlung gi ngo bo'o/ /mdog ser po zhes bya ba ni rin chen 'byung ldan gyi ngo bo nyid kyi phyir ro//'od chen po zhes bya ba ni 'od gsal gyi ngo bo nyid du snang ba'i phyir ro/ /dbang chen gyi ni dkyil 'khor nyid/ /ces bya ba ni sa'i dkyil 'khor ro/ /rin chen mgon po zhes bya ba ni bsam pa thams cad yongs su rdzogs par byed pa nyid kyis sbyin pa'i pha rol tu phyin pa'i ngo bo nyid kyi phyir rin chen 'byung ldan no//de nyid kyang rin po che'i rigs can rnams la bdag po nyid kyi phyir mgon po'o/ /der zhes bya ba ni dkyil 'khor dang rlung ngo / /lha zhes bya ba ni snga ma bzhin no/ /dal zhing rgyu ba zhes bya ba ni chu'i dkyil 'khor gyi ngo bo nyid kyis 'og tu 'gro ba'i ngang tshul can gyi phyir dal ba ste/ rgyun ma chad par rgyu bas dal ba'i phyir dal bar rgyu ba'o//kun du zla ba dkar dang mtshungs/ /zhes bya ba ni chu nyid dkar ba'i phyir ro/ /chu yi dkyil 'khor nyid yin te/ /zhes bya ba ni thun bzhi pa la de nas srog gi rlung 'jug pas so/ /rdo rje mgon po zhes bya ba ni rdo rje ni shin tu rnam par dag pa'i chos kyi dbyings kyi phyir mi bskyod pa'o//de nyid kyis rang gi rigs rnams kyi bdag po nyid kyi phyir mgon po'o/ /der zhes bya ba ni dkyil 'khor dang rlung dag go/ /lha zhes bya ba ni snga ma bzhin no/ /rlung lnga pa'i ngo bo nyid bstan pa'i phyir/ lus kun la gnas pa'i rlung zhes bya ba ni gang zhig lnga pa'i rlung ni khyab byed kyi rlung ste/'chi ba'i lus la 'byung bar 'gyur/ /zhes bya ba dang 'brel to/ /lus kun gyi ni zhes bya ba ni lus kyi phra ba'i rgyus pa'i tshogs la rjes su 'gro ba ste/ khyab byed nyid du gnas pa'o/ /bya ba kun la 'jug pa zhes bya ba ni rlung rnams thams cad la 'jug pa la sogs pa rnams so//de rnams la 'jug par byed pa ni 'jug pa'i rten du gyur pa'o/ /gang gi phyir rten med par brten pa la gnas pa la sogs pa'i dbye ba 'jug pa ma yin te/ snod kyi 'jig rten med par bcud kyi sems can ltar snyam du dgongs pa'o/ /yang na bya ba kun ni spyod lam gyis gnas pa la sogs pa'i ngo bo ste/de rnams la 'jug pa'o/ /rnam par snang mdzad ngo bo ste/ /zhes bya ba ni khyad par du me long lta bu'i ye shes kyi bdag nyid kyi phyir gsal bar byed pas na rnam par snang mdzad do/ /de'i ngo bo ni sa'i khams kyi rnam par dag pa dang / gzugs kyi phung po rnam par dag pas so//de la rtag tu bya ba med pa la 'chi ba'i lus las 'byung ba nyid las te/ rnam par shes pa rlung la zhon pa nyid kyi phyir ro/ /de ltar rgyas par bshad pa bstan nas/ nye bar bsdu ba'i sgo nas rlung gi de kho na nyid zab mo bstan pa ni rlung gi de nyid ces bya ba la sogs pa gsungs te/de ma thag par bshad pa rnams so/ /gsal ba zhes bya ba ni bsgom bzhin pa la rim gyis gsal bar 'gyur ba nyid kyi phyir ro/ /ye shes lnga yi rang bzhin can/ /zhes bya ba ni rlung lnga po rnams ni de bzhin gshegs pa lnga'i bdag nyid can gyi phyir ro/ /rtog ge zhes bya ba ni dmigs pa dang bcas pa'i lta ba dang ldan pa rtog ge skam po tsam la dga' ba dag gis mi rtogs zhes pa'i don to//byis pa'i yul min zhing zhes bya ba ni byis pa ni de kho na nyid la brda ma byang ba nyid kyi phyir ro/ /rnal 'byor yang yin te/ rgyun du zhugs pa'i 'bras bu mngon du byed pa la sogs pa la gnas pa'i phyir ro//byis pa yang yin la rnal 'byor yang yin pas na de skad ces bya'o/ /de rnams las de nyan thos rnams dang bskyed pa'i rim pa la gnas pa'i rnal 'byor dang ldan pa'o/ /yul min cing zhes bya ba ni spyod yul du ma gyur pa ste/ de ltar rnam pa drug gis rlung gi de kho na nyid rgyas par bshad pa gsungs so//de ltar don rnam pa lngas rlung gi de kho na nyid rgyas par bshad nas/ de'i che ba'i bdag nyid brjod pa'i phyir/ dngos grub thams cad ces bya ba la sogs pa gsungs te/ 'jig rten dang 'jig rten las 'das pa'i dngos grub kyi byed pa po nyid kyi phyir ro//de la 'jig rten pa ni zhi ba la sogs pa'i mtshan nyid can gyi dngos grub bo/ /ji skad du/ ya yig don gyis gang cung zad/ /dngos grub 'dod pas thams cad bya/ /ra yig la sogs gsum nyid kyis/ /'gro ba'i don la 'jug par bya/ /zhes gsungs so//'jig rten las 'das pa ni ngag rnam par dben pa'i mtshan nyid can te/ ji skad du/ sngags kyi de nyid gsal ba ni/ /ye shes gsum gyis rab dbye bas/ /sems tsam la ni nges par sbyar/ /gsal bar byed ces bya ba ni/ /rnal 'byor pa yi zhes pa la/ /shin tu gsal ba nyid kyi phyir ro//rnal 'byor kun gyi don sgrub pa/ /zhes bya ba ni rnal 'byor kun gyi ni/ rlung thams cad kyi sbyor bas don ni rdo rje bzlas pa'i mtshan nyid do/ /sgrub pa zhes bya ba ni rnal 'byor pa'i don thams cad sgrub par byed pas na/ rnal 'byor kun gyi don sgrub pa'o/ /yang dag de nyid go 'phang zhes bya ba ni ma ning gi bzlas pa'i ngo bo nyid kyi phyir ro//gsal zhes bya ba ni sngags kyi de kho na nyid kyi sbyor bas gsal bar byed pa nyid kyi phyir ro/ /rgyud rnams kun gyi don sdud pa/ /zhes bya ba ni rgyud rnams thams cad kyi don ni thig le'i sbyor ba la sogs pa ste/ de'i sdud pa ni/ rgyud thams cad kyi don sdud par byed pa'o//rdo rje sems dpa'i go 'phang zhes bya ba ni ngag gi 'od gsal ba nyid kyi phyir ro/ /gsal zhes bya ba ni thabs las byung ba nyid kyi phyir ro/ /rtag tu zhes bya ba ni dus gsum mo/ /thams cad bdag nyid ces bya ba ni lus thams cad dang yul la sogs pa'o/ /bzhugs zhes bya ba ni bskyed pa'i rim pa'i mtshan nyid dang bral ba nyid kyi phyir ro//de nyid ces bya ba ni phyin ci ma log pa nyid kyi phyir ro/ /shin tu phra zhes bya ba ni rdzogs pa'i rim pa la gnas pa'i rnal 'byor pa nyid yin pa'i phyir ro/ /rtogs par bya zhes bya ba ni shes par bya zhes bya'o/ /bla ma'i zhal las zhes bya ba ni mtshan nyid phun sum tshogs pa'i bla ma'i zhal las zhes bya ba'i don to//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa zab mo'i don shin tu gsal bar byed pa zhes bya ba las le'u bcu gnyis pa'i rgya cher bshad pa'o// //de ltar le'u bcu gnyis pas rlung gi de kho na nyid kyi yul la dri ba'i lan bstan nas/ da ni skabs su bab pa'i bde ba chen po'i yul la dri ba'i lan gdab pa bstan pa'i phyir/ le'u bcu gsum pa ston cing rtsom pa ni/ de nas gzhan rnams zhes bya ba la sogs pa gsungs te/ le'u bcu gnyis pa'i rjes la'o/ /gzhan rnams zhes bya ba ni sngon gyi la ltos nas dbye ba'o/ /nyon zhes bya ba ni phyag na rdo rje thos pa la sbyar ba'o/ /bde ba chen po'i go 'phang bshad par bya ba dang 'brel to/ /'chad par 'gyur ba'i mtshan nyid brjod par bya'o/ /gsal zhes bya ba ni gcig tu ltos pa med par rtogs pa bskyed pa'i phyir ro//de ltar bde ba chen po'i yul la dri ba'i rtsom pa'i lan bstan nas/ dngos grub bde ba chen po brjod pa'i phyir/ de'i yan lag mdor bstan pa gnyis ka'i rgyud kyi rjes su 'brangs nas brjod pa'i phyir ro/ /rdor sems go 'phang mi byed pa/ /zhes bya ba la sogs pa gsungs te/ye shes lnga'i ngo bo rtsa lnga'i rang bzhin can gyi rdo rje ste/ de la sems ni kun rdzob byang chub sems 'dzin pa'i bdag nyid rdo rje sems dpa' de'i ngo bo'i tshig ni sgra'am gnas te/ dbye ba tha dad pa dang bral ba'i phyir ro/ /rang rig pas na zhes bya ba ni rang gi rig par bya bas na rang rig pa ste/gzhan rnams kyi spyod yul ma yin pa'i phyir ro/ /mchog gi mchog ces bya ba ni nyams su myong ba gsal ba'i phyir ro/ /de'i phyir mchog ces bya ba ni de las 'das pa nyid kyi phyir ro/ /yang na rtog pa thams cad spangs pa'i phyir mchog go/ /de las kyang mchog ni de kho na nyid gcig pa'i ngo bo nyid kyis bde ba chen po'i ngo bo'i phyir ro//kun rtog [(]kyi [,]gi [)]rtags kyis stong pa zhes bya ba ni dngos po dang dngos po min pa dang / bde ba dang sdug bsngal gyi rnam rtog la sogs pa las 'das pa'i phyir ro/ /bde ba chen po zhes 'di brjod/ /ces bya ba ni rnal 'byor chen po'i rgyud 'di nyid du bde ba chen po zhes bya ba 'di lta bu la brjod ces bya ba'i don to//da ltar gnyis ka'i rgyud kyi rjes su 'brangs nas mdor bstan pa brjod nas/ thun mong ma yin pa'i rgyud kyi rjes su 'brangs nas/ mdor bstan pa brjod pa'i phyir/ lhan cig skyes pa'i dus ni zhes bya ba gsungs te/snyigs ma lnga'i rnyog pa can du byas pa'i rtsod pa'i dus la 'byed par byed pa nyid kyis rgyu dang rkyen las ma skyes pa'i phyir/ lhan cig skyes pa'i dus ni bsam gyis mi khyab pa'i ngo bo'o/ /des bya ba ni rdo rje sems dpa'i tshig gis bstan par bya'o/ /gzung dang 'dzin pa rnam par spangs//zhes bya ba ni yul dang dbang po rnam par spangs pa'i phyir ro/ /bde dang sdug bsngal rnam par spangs/ /zhes bya ba ni sems nye bar zhi ba'i rnam par lhag ma med pa'i mya ngan las 'das pa'i mtshan nyid can gyi bde ba'o/ /sdug bsngal ni phung po lnga'i bdag nyid can 'khor ba'i mtshan nyid do//de dag las rnam par grol ba ni bral ba'o/ /zhi ba gnyis med rnam par 'byed/ /ces bya ba ni nyan thos kyi ye shes dga' ba gnyis kyi bdag nyid can zhi ba dang / gnyis su med pa dang rang sangs rgyas kyi ye shes dga' bral gyi mtshan nyid can khyad par 'byed pas zhi ba gnyis med rnam par bral ba'o//dngos po kun gyi rang bzhin bdag /ces bya ba ni kun gyi sgras ni bde ba'i rtsa la brjod do/ /dngos po ni ye shes chen po'i ngo bo byang chub kyi sems yod pa nyid do/ /de ltar na rtsa rnams thams cad la byang chub kyi sems kyi ngo bo'i ye shes dngos po kun no/ /de'i rang bzhin ni de'i rang bzhin te/de la bde ba chen po'i rang bzhin zhes bya ba'i don to/ /bde chen zhes bya ba ni sdug bsngal thams cad nye bar zhi bar byed pa'o/ /'dir zhes bya ba ni skabs 'di la'o/ /brjod ces bya ba ni brjod par bya ba'o/ /de ltar rnam pa gnyis kyis mdor bstan pa bshad nas/ rgyas par bshad pa'i yan lag thun mong ba'i rgyud kyi rjes su 'brangs nas brjod pa'i phyir/de'i rdo rje'i tshig rgyas par bshad pa ni/ ye shes lnga'i zhes bya ba la sogs pa gsungs te/ de bzhin gshegs pa lnga'i rnam pa nyid kyi phyir ro/ /rdo rje zhes bya ba ni don dam par stong pa nyid kyi ngo bo nyid dang / kun rdzob tu sha lnga'i bdag nyid can no//de nyid kyi phyir/ sangs rgyas lnga bdag rang bzhin can/ /zhes gsungs te/ de bzhin gshegs pa rnam par snang mdzad la sogs pa'i rnam pa nyid kyi phyir ro/ /rtsa ni lnga las 'bab pa'i rgyun/ /zhes bya ba ni/ la la nA dang / ra sa nA dang / a ba d+hU tI dang / lha sbyin dang nor rgyal ni 'bab pa'i phyir ro/ /de ltar na rdo rje ye shes lnga'i dngos po zhes bya ba la sogs pas ni chos kyi sku'i ngo bo nyid bstan to/ /sangs rgyas lnga bdag rang bzhin can/ /zhes bya ba ni longs spyod rdzogs pa'i sku'i ngo bo nyid bstan to/ /rtsa ni lnga las 'bab pa'i rgyun//zhes bya ba ni sprul pa'i ngo bo nyid bstan to/ /stong nyid rdo rje go 'phang zhes bya ba ni 'di ni ye shes lnga'i bdag nyid can gyi de ma thag par gsungs pa ni/ rgyas par bshad pa mdzad de/ rtag tu de lta nyid du rnam par rtog pa thams cad 'joms par byed cing ma bcos pas na gnas pa nyid kyi phyir rdo rje go 'phang ngo //gsal zhes bya ba ni bsgom bzhin pa'i rab kyi mthar thug pa'i phyir ro/ /rang bzhin med cing zhes bya ba ni phung po khams dang skye mched la sogs pa'i rnam par rtog pa bzlog pas so/ /rnam pa med pa zhes bya ba ni gzugs can ma yin pa nyid kyi phyir ro/ /gnyis su med pa dang zhes bya ba ni gzung ba dang 'dzin pa gnyis dang rnam par bral ba nyid kyi phyir ro//tha dad spangs zhes bya ba ni bskyed pa'i rim pa bsgoms pas bsgom bya dang sgom byed kyi rnam par rtog pa med pa nyid kyi phyir ro/ /cha med ces bya ba ni sa bon gyi yi ge yongs su gyur pa las dben pa'i phyir ro//cha ni rnam par 'das zhes bya ba ni nyi ma dang zla ba'i dkyil 'khor gyi rnam par rtog pa dang bral ba nyid kyi phyir ro/ /kun du rtog pa thams cad 'joms/ /zhes bya ba ni zhal gsum phyag drug pa'i rnam pa can bsgoms pas tha mal pa dang de ma yin pa thams cad kyi rnam par rtog pa 'joms pa nyid kyi phyir ro//skye med ces bya ba ni rigs brgya'i dbye bas bsgom pa las 'das pa nyid kyi skye ba bzlog pas so/ /zad med ces bya ba ni dbugs kyi 'khor lo nyin mtshan du 'jug pas zad pa med pa'o/ /zhi ba dang zhes bya ba ni ngag gi spros pa bzhi rnam par zhi ba'i phyir ro/ /gnyis med ces bya ba ni rang bzhin dang snang ba'i rnam par rtog pa dang 'od gsal ba la spang bya dang mngon du bya ba gnyis las log pa'i phyir ro//bde ba thams cad ces bya ba ni phyag rgya'i rim pas thob par bya ba nyid kyi phyir bde ba chen po ma lus pa thams cad gsal bar byed pa'i phyir ro/ /nyon mongs kun las rnam grol ba//zhes bya ba ni sems kyi 'od gsal ba thob pa'i rjes la sgyu ma'i rang bzhin gyis lus phung po'i rnam par rtog pa las log pa'i phyir dang / bden pa'i rnam par rtog pa log pa'o/ /bde ba thams cad la 'jug pa/ /zhes bya ba ni rang bzhin gyis 'od gsal ba'i rgyu phyi dang nang gi bdag nyid can gyi mngon par byang chub pa'i rim gyis nye bar thob pa'i phyir ro//stong dang zhes bya ba ni bag chags su gyur pa sum cu rtsa gnyis kyi chags bral gyi rang bzhin gyis stong pa'i phyir ro/ /shin tu stong pa zhes bya ba ni sngar bzhin rang bzhin gyi tshogs bzhi bcu spangs pa'i bdag nyid kyi phyir ro//stong pa chen po dang zhes bya ba ni rang bzhin gyi tshogs bdun spangs pa nyid kyi phyir ro/ /mchog gi zhes bya ba ni sems kyi 'od gsal las mchog ste/ mchog tu gyur pa'o/ /thams cad stong pa zhes bya ba ni rang bzhin gyis 'od gsal ba'i rnam pa'o/ /stong pa'i gnas zhes bya ba ni zung 'jug gi bdag nyid kyi phyir ro//nam mkha' lnga'i ngo bo nyid kyi zhes bya ba ni phung po lnga stong pa nyid kyi ngo bo nyid kyi phyir ro/ /mi chod ces bya ba ni rang gi rang bzhin ni ma bcos pas mi 'dor ba'i phyir ro/ /mi phyed pa zhes bya ba ni glo bur ba'i nyon mongs pa la sogs pa rnams kyis dbye bar mi nus pa nyid kyi phyir ro//mi 'gyur ba zhes bya ba ni rnam par rtog pa rnams kyis mi gnod pa nyid kyi phyir ro/ /mi tshig pa dang zhes bya ba ni chos nyid la rtag tu de'i ngo bos gnas pa'i phyir ro/ /'bigs zhes bya ba ni nang gi bdag nyid kyi mun pa'i tshogs la gnyen por gyur pa'i phyir ro/ /mchog ces bya ba ni/ mthar thug pa'i 'bras bu'i ngo bo'o/ /'dis ni chos kyi sku'i bdag nyid can gyi rdo rje la gsungs so/ /longs spyod rdzogs pa'i sku'i ngo bo bstan pa'i phyir/ sangs rgyas lnga'i zhes bya ba la sogs pa gsungs te/ rnam par snang mdzad la sogs pa de bzhin gshegs pa rnam pa lnga'i ngo bo'o/ /ye shes mchog dang rang bzhin zhes bya ba ni me long lta bu la sogs pa ye shes lnga'i rang bzhin gyi ngo bo'o//rdo rje zhes ni brjod ces bya ba ni rdo rje'i sgras ni chos dang longs spyod rdzogs pa'i sku gnyis bstan to zhes bya ba'i don to/ /sprul pa'i sku'i ngo bo nyid brjod pa'i phyir/ snying rje ni sems can thams cad yongs su skyob par byed pa'i rnam pas sbyor ba ni snying rje sbyor bas so//de dang yang dag par sbyor ba ni 'grel pa'o/ /mchog tu zhes bya ba ni mchog gi rang bzhin no/ /bde ba zhes bya ba ni rnam pa gnyis so/ /skye ba'i zhes bya ba ni nang gi bdag nyid kyi thabs dang shes rab dang snyoms par zhugs pa'i stobs kyis dang /phyi rol gyi thabs shes rab dang snyoms par zhugs pa'i stobs kyis zhes bya ba'i don to/ /ji lta bus she na/ de'i phyir/ de nyid gsum ni ro gcig pa/ /zhes bya ba gsungs te/ lus ngag yid gsum mi dmigs pa'i rnam pa nyid kyi phyir ro/ /de nyid gsum gyi ro gcig pa ni gcig tu gyur pa ste/de nyid ni don 'di la dgos pa yod pas na/ de nyid gsum ni ro gcig pa'i don to/ /brjod bya rjod byed rnam par spangs/ /zhes bya ba ni sgra dang rnam par rtog pa rnams kyi rnam par bstan pa zhes bya ba ma yin pa nyid kyi phyir ro/ /bde chen zhes bya'i 'khor lo gnas/ / zhes bya ba ni mgo bo'i gnas su gzhom du med pa las 'byung ba'i phyir de la gnas pa'o/ /dbang po rnams kyi spyod yul min/ /zhes bya ba ni mig la sogs pa lnga'i yul ma yin pa nyid kyi phyir ro/ /mchog tu gnyis med rnal 'byor gyis/ /zhes bya ba la/ mchog ni mchog nyid kyi phyir ro/ / gnyis med ni rnam par rtog pa gnyis las log pa nyid kyi phyir ro/ /de yang yin la rnal 'byor kyang yin pas te/ rnal 'byor ni sbyor bas so/ /dga' ba bzhi yi mtshan nyid can/ /zhes bya ba ni dga' ba bzhi pa'i mtshan nyid can te/ lhan cig skyes pa'i ngo bo nyid kyi phyir ro/ /'khor lo bzhi yi rim kyis thob//ces bya ba ni sprul pa la sogs pa 'khor lo bzhi la brten nas/ sngags dang rgyud dang ye shes kyi rim pa la sogs pas thob par bya ba nyid kyi phyir ro/ /yan lag bzhi yi go 'phang gsal/ /zhes bya ba ni bsnyen pa la sogs pa yan lag bzhi'i rim gyis nyams su myong bar gyur pa'o/ / gsal zhes bya ba ni dpe'i lhan cig skyes pa la bla ma'i man ngag gi rjes su 'brangs nas bsgom par bya ba nyid kyi phyir ro/ /stong nyid lnga'i kun nas gang / /zhes bya ba ni rtsa lnga'i nam mkha' la khyab par byed pa nyid kyi phyir ro/ /stong nyid lnga'i bdag nyid kyi lam nas gang ba ni yongs su rdzogs pa'o//cha bzhi yis ni rnam par 'phel/ /zhes bya ba ni oM yig gis nor bu'i rtse mor byin gyis brlabs pa'i phyir ro/ /de'i cha bzhi yis a'i yi ge dang / oM dang thig le dang / zla tshes kyi cha'i bdag nyid can gyi phyir ro/ /oM yig kyang 'jug pa'i ngo bo nyid kyi phyir byang chub kyi sems nyid 'dzin pa'i thabs nyid bstan to//de ltar rdo rje'i tshig rgyas par bshad pa bstan nas/ sems dpa'i tshig rgyas par bshad pa'i phyir rdo rje rtse mor zhes bya ba la sogs pa gsungs te/ thabs kyi yan lag gi rtse mo la'o/ /'dzin pa ni rlung gi de kho na nyid kyi stobs kyis sam/ yi ge nye bar dgod pas gzung ba'o//sems dpa' zhes bya gtan la dbab/ /ces bya ba ni sems dpa'i sgras brjod par bya ste/ rdo rje'i rtse mor byang chub kyi sems la sems dpa' ste/ yod par gyur pa nyid kyi phyir/ /zhes bya ba'i don to/ /de ltar yang nam mkha'i cha yis gang zhes bya ba ni rtsa lnga'i ngo bo'i rdo rje dang 'brel pa'i nam mkha' lnga'i cha ni nam mkha'i ngo bo nyid do//gang zhes bya ba ni byang chub sems kyis so/ /'di ni rdo rje sems dpa' brjod/ /ces bya ba ni 'di ni zhes bya ba ni sngags kyi theg pa la ste/ rdo rje sems dpa' der brjod do/ /de ltar sems dpa'i tshig bshad nas/ de nyid la bde ba chen po'i sgras brjod par bya ba nyid bstan pa'i phyir/de nyid bde chen go 'phang ste/ /zhes bya ba la/ de nyid ces bya ba ni rdo rje sems dpa'i tshig gis bstan par bya'o/ /bde ba chen po'i go 'phang zhes bya ba ni de 'dug pa'i gnas te/ sdug bsngal thams cad las log pa'i phyir ro/ /bzhi pa'i dga' ba zhes bya ba ni dga' ba bzhi pa'i ngo bo lhan cig skyes pa zhes bya ba'i don to//kun la khyab ces bya ba ni dga' ba la sogs pa thams cad la khyab byed nyid du gnas pa'i phyir ro/ /ji skad du/ yang na kun bdag de nyid de/ /ces bya'o/ /rtsa rnams kun la khyab pa po/ /zhes bya ba ni 'khor lo bzhis bsdus pa'am rtsa stong phrag bdun cu rtsa gnyis kyi grangs kyis khyab pa rnams la'o//khyab pa ni byang chub kyi sems rnam pa gnyis kyi ngo bo nyid kyis so/ /gal te de ltar yin na/ 'o na ji ltar rtogs par bya zhe na/ de'i phyir dpa' bo rnal 'byor ma sbyor zhes bya ba gsungs te/ dpa' bo rnams rnal 'byor ma'i thabs dang shes rab dag gis sbyor ba ni 'brel pa'o//de las skyes pa'o/ /de ltar rnam pa gnyis kyis sems dpa'i tshig gi bshad pa brjod nas/ mi phyed pa'i tshig rgyas par bshad pa brjod pa'i phyir/ mi phyed ces bya ba la sogs pa gsungs te/ dbye ba dang bral ba'i phyir ro/ /de nyid ni dbye ba rnam par spangs zhes gsungs te/bdag dga' ba la sogs pa gsum spangs pa'i gnas so zhes bya ba de lta bu'i rnam pa tha dad pa'i rnam par rtog pa bzlog pa'i phyir ro/ /de'i ngo bo zhes bya ba ni dga' ba la sogs pa'i rang bzhin te/ de rnams la khyab byed nyid kyi phyir ro/ /ji skad du/ yang na thams cad kun bdag nyid/ /ces gsungs so/ /yang na de'i ngo bo ma yin pa zhes gzhung kha cig las 'byung ste/ de'i phyogs la ni/ bsnyen pa la sogs pa'i yan lag dang / rnam pa sna tshogs la sogs pa'i skad cig ma dang / dga' ba la sogs pa'i ngo bos rnam par dben pa'o//ji skad du/ yang na thams cad rnam par spangs/ /zhes gsungs so/ /de nyid de zhes bya ba ni lhan cig skyes pa'i rnam pa nyid dga' ba gsum mo zhes bya ba'i tha tshig go/ /de las phyi rol du gyur pa'i chos gzhan med pa'i phyir ro/ /ji skad du/ chos kyi dbyings las ma gtogs par//gang phyir chos ni yod ma yin/ /zhes gsungs pas so/ /de ltar mi phyed pa'i tshig bstan pa bshad nas/ rang rig gi tshig rgyas par bshad pa bstan pa'i phyir/ rang nyid tshor ba zhes bya ba la sogs pa gsungs te/ rang zhes bya ba ni shes pa gzhan gyi ma yin pa'o/ /tshor ba zhes bya ba ni nang gi ngo bo bde ba la sogs pa'i bdag nyid kyis so//rig bya bas zhes bya ba ni yang dag par sems par bya'o/ /pha rol gzhan gyi zhes bya ba ni rang gi rgyud spangs nas gzhan rnams la'o/ /spyod yul min zhes bya ba ni yul med pa'i phyir ro/ /mtshon par dka' ba zhes bya ba ni bla ma'i gdams ngag med par mtshon par mi nus pa med pa nyid kyi phyir ro//dpe des zhes bya ba ni de dang mtshungs pa gzhan med pa'i phyir ro/ /rang gi blo la zhes bya ba ni rang bzhin gyis rnam par dag pa la ltos nas/ rnal 'byor pa'i shes pa rang la gnas pa zhes bya'o/ /de spangs nas rang gi bdag nyid mi dmigs pa nyid kyi phyir ro//rang rig pa zhes bshad pa yi/ /zhes bya ba ni rgyu 'di nyid kyis so/ /gzhon nu ma yi bde ba bzhin/ /zhes bya ba ni skye gnas ma nyams pa gzhon nu ma'i bde ba ni skyes pa'i rkyen las byung ba'i bde ba rang gis rig par bya ba ni/ ngag gi spyod yul ma yin pa de bzhin du 'di yang zhes bya ba'i don to//de ltar rang rig gi tshig rgyas par bstan nas/ mchog gi tshig brjod par bya ba'i phyir/ mchog tu zhes bya ba la sogs pa gsungs te/ gsal bar nyams su myong zhes bya ba ni gsal bar snang bas na rig pa'o/ /de nyid mchog dang zhes bya ba ni/ mdor bstan pa'o/ /de nyid rgyas par bshad pa ni/ de spangs pa zhes bya ba gsungs te/ rig pa gsum po spangs pa'o/ /mchog dang zhes bya ba ni mchog ni rtog pa la sogs pa ste/ thams cad kyang yin la rtog pa yang yin te/ yod pa dang med pa dang dngos po dang dngos po med pa spros pa'i ngo bo'o//de rnams la sogs pa gang rnams la yod pa de ni rtog pa kun la sogs pa de rnams kyang yin la rtog pa yang yin te/ phra ba'i rnam par rtog pa'i rnam pa can rtog pa la sogs pa'o/ /de rnams spangs pa'i bdag nyid gang la yod pa de rtog pa kun la sogs pa'i gsal ba'i bdag nyid do//rigs pa dang rnam par rtog pa dang bral bas rnam par mi rtog pa'i rnam pa'i rang rig ces bya ba'i don to/ /de ltar mchog gi tshig bstan par bshad nas/ da ni mchog gi tshig rgyas par bshad pa brjod pa'i phyir/ de ni mchog dang zhes bya ba la sogs pa gsungs te/ de las rnam par mi rtog pa nyams su myong ba las mchog go//bde ba che zhes bya ba ni bde ba chen po'i ngo bo ste/ rtag tu lhan cig skyes pa gcig pu'i mthar thug pa'i phyir ro/ /de nyid gsum du mtshan nyid gcig /ces bya ba ni dga' ba gsum po mtshan nyid gcig pa nyid kyi phyir ro/ /lus ngag yid gsum gyi de kho na nyid kyi phyir ro//de dang bral bas de brjod de/ /zhes bya ba ni de dang zhes bya ba ni lus kyi de kho na nyid la sogs pa dang ngo bral ba ni spang ba'o/ /de brjod de zhes bya ba ni rang rig pa'i ye shes so/ /gnyis po thams cad rnam par spangs/ /zhes bya ba ni gnyis su snang ba thams cad med pa'i phyir ro//de ltar de ni mchog gi bstan pa bshad nas/ kun rtog gi stong pa'i tshig rgyas par bshad pa brjod pa'i phyir/ /dngos dang dngos med ces bya ba la sogs pa gsungs te/ de dag la sogs pa'i rnam par rtog pas bral ba'i blo'o/ /bsgom par bya zhes bya ba lhag mas kha bskang nas 'brel par bya'o//dngos dang dngos med ni yod pa dang med pa'o/ /bde ba'i bdag nyid sdug bsngal gyi rtog pa ni/ bde ba'i bdag nyid kyang yin la/ sdug bsngal gyi bdag nyid kyang yin te/ bde ba'i bdag nyid kyi sdug bsngal la dngos dang dngos med bde ba'i bdag nyid sdug bsngal lo/ /de nyid ni rnam par rtog pa ste/dngos dang dngos med bde ba'i bdag nyid sdug bsngal can no/ /'khor ba thar pa'i bdag nyid can/ /zhes bya ba ni bcings pa dang grol ba'i ngo bo'o/ /'khor ba ni lha la sogs pa'i rnam pas phung po la sogs pa rnams yongs su ma shes pa'o/ /de las bzlog pas yongs su shes pa ni thar pa'o//de'i bdag nyid gang la yod pa de la de skad ces bya'o/ /gnyis dang gnyis med rnam spyod rang bzhin dang / /zhes bya ba ni gnyis ni gnyis su rnam par rtog pa'i mtshan nyid kyis spyod pa ste/ 'di lta ste/ phung po lnga rnams la rang bzhin med par rtogs par bya ba'i don du de bzhin gshegs pa lnga la sogs pa'i rnam pa bsgom pa'o//gnyis med rnam spyod ces bya ba ni rang bzhin gyis 'od gsal ba nyid kyis chos thams cad rtogs pa'o/ /'di'i rang bzhin dang bral ba ni gnyi ga'i spyod pa nub pa'i phyir ro/ /blo ni zhes bya ba ni shes rab ste/rnal 'byor pa dang 'brel pa bsgom par bya zhes bya ba'i lhag ma'o/ /ji lta bu zhe na/ de'i phyir/ zhi ba'i rtog pa'i bdag nyid can/ /zhes gsungs te/ zhi ba ni rnam par rtog pa thams cad nye bar zhi ba'o/ /rtog pa ni ye shes so/ /de'i bdag nyid can ni rnam par rtog pa nye bar zhi ba zhes bya ba'i tha tshig go//gsungs pa'i nyon mongs gcod pa'i zhes bya ba ni ji ltar srid pa'i rim pa gnyis bsgoms pas nyon mongs pa gcod pa'i phyir ro/ /'gro ba gsum zhes bya ba ni khams gsum pa'i yul la'o/ /kun rtog dang bral ba zhes bya ba ni don dam par rnam par dag pa nyid kyi phyir ro//'dis ni kun rtog gi rtog pa stong pa'i tshig bstan pa bshad nas/ de ltar don rnam pa bdun gyis thun mong ba'i rgyud kyi rjes su 'brangs nas rgyas par bshad pa bstan nas/ thun mong ma yin pa'i rgyud kyi rjes su 'brangs nas rgyas par bshad pa brjod pa'i phyir/ de'i yan lag lhan cig skyes pa'i dus rgyas par bshad pa bstan pa ni/shes dang shes bya'i rnam rtog bral/ /zhes bya ba gsungs te/ rtogs bya dang rtogs byed kyi rnam rtog gi ngo bo rnam par spangs so/ /bde ba zhes bya ba ni lhan cig skyes pa'i mtshan nyid can no/ /rang bzhin dang zhes bya ba ni rgyu dang rkyen las skyes pa nyid kyis bcos ma med pa nyid kyi phyir ro//mthar 'gyur zhes bya ba ni dga' ba gsum gyi mtha' nyid du gnas pa'i phyir ro/ /'gro kun zhes bya ba ni de rnams la khyab par byed pa nyid kyi phyir ro/ /zhi ba'i zhes bya ba ni nyams su myong ba'i dus na/ sangs rgyas kyi yon tan ma lus pa dang 'dres shing tha mi dad pa'o//mchog gi mchog rab ces bya ba ni de dang 'dra ba gzhan med pa nyid kyi phyir ro/ /de nyid ces bya ba ni rtag tu de nyid kyi ngo bo nyid du gnas pa nyid kyi phyir ro/ /de'i dngos po ni de nyid snyam du bsams nas so/ /'gro ba'i bde ba zhes bya ba ni de'i bdag po nyid kyis 'gro ba rnams la bde ba bskyed pa na bde ba gsol ba'o//ji skad du/ de dang / nye bar gnas pa tsam gyis te/ /skyed pa yid bzhin nor bu ltar/ /ji ltar 'dod pa 'byung ba ltar/ /rtsig pa shing sogs brtan pa 'byung / /zhes gsungs so/ /ji lta bu zhe na/ de'i phyir/ rtsod pa'i dus kyi mtha' dang bral/ /zhes bya ba gsungs te/ji lta bu zhe na/ 'bum phrag lnga'i lo'i tshad kyi snyigs ma lngas gang ba'i rtsod pa'i dus na ste/ rtsod pa'i dus las log pa'i bdag nyid can no/ /de mngon du byed pas dus kyi snang ba med pa'i phyir ro/ /yang na/ dus ni rtsod pa'i dus zhes bshad/ /ces bya ba gzhung kha cig las te/de'i phyogs la ni/ rang rig pa'i ye shes nyid kyis rtsod pa'i dus te/ dus der phyi rol gyi phyag rgya'i rim pas/ de mtshon pa nyid kyi phyir ro/ /bzhi pa'i mtshan nyid skad cig can/ /zhes bya ba 'byung ste/ dga' ba la sogs pa'i rim pa bzhi pa ni lhan cig skyes pa'i rnam pa nye bar dmigs bzhin pa'o//rtog med ces bya ba ni mi mthun pa'i phyogs bcom pa'i phyir ro/ /'khrul 'khor spong la mkhas zhes bya ba ni 'khor ba ni srid pa'o/ /de nyid ni 'khrul pa ste/ rnam par 'khor ba ste/ phyin ci log gi stobs kyis bskyed pa'i phyir srid pa'i 'khrul pa'o/ /de bzlog pa ni rim pa gnyis bsgoms pas mi mthun pa'i phyogs las rgyal ba'o//de la mkhas pa ni/ lhan cig skyes pa'i dbang gis 'khrul 'khor bzlog pa'i phyir/ gzhan yang ro gcig pa bde ba chen pos myos zhes bya ba ni mnyam pa chen po'i ro ni/ tha dad pa'i rnam par rtog pa'i bdag nyid can gyis so/ /myos pa ni tha dad pa'i rnam par rtog pa med pa'i ngo bo'i bde ba'i khyad par ro//des mnyam pa'i ye shes ni/ de bzhin nyid kyis brtan pa dang g.yo ba'i rnam par rtog pa log pa'i ngo bo ni de'i mtshan nyid can de'i rang bzhin gyis dus zhes bya ba'i don to/ /bsam gyis mi khyab pa'i dus kyi ngo bo nyid kyi phyir ro/ /de ltar lhan cig skyes pa'i dga' ba'i dus rgyas par bshad nas/gzung ba dang 'dzin pa spangs pa'i tshig rgyas par bshad pa'i phyir/ gzung ba rnams ni zhes bya ba la sogs pa gsungs te/ yul can gyi shes pas snang bar gyur pa nyid kyi phyir ro/ /yul rnams zhes bya ba ni spyod yul du gyur pa'o/ /gzugs la sogs pa las zhes bya ba ni lnga'am drug las so//kun nas zhes bya ba ni mdog dang dbyibs la sogs pa ji ltar srid pa kun nas so/ /'dzin pa zhes bya ba ni gzung bya'i yul 'dzin par byed pa nyid kyi phyir ro/ /dbang po zhes bya ba ni mig la sogs pa rnams so/ /rang bzhin gyis zhes bya ba ni ngo bo nyid kyis te/de la mngon du phyogs pa nyid kyi phyir ro/ /de dang bral zhing mchog tu phra/ /zhes bya ba ni dbang po dang yul gzung ba dang 'dzin pa'i rang bzhin dag gis rnam par dben pa ste/ lhan cig skyes pa thob pa'i dus su de lta bu'i snang ba thob pa'i phyir ro/ /mchog tu zhes bya ba ni mchog gi ngo bo'o//phra zhes bya ba ni phra mo'i rnal 'byor rnams kyis rig par bya ba nyid kyi phyir ro/ /ye shes zhes bya ba ni nyams su myong ba'i bdag nyid kyi phyir ro/ /bde ba kun gyi bdag ces pa ni bla na med pa'i bde ba'i bdag nyid do/ /'khrul pa dang mchog ma yin pa dang mngon du ma gyur pa med pa'i phyir ro//de nyid kyi phyir/ sdug bsngal kun las rnam par grol/ /zhes gsungs te/ tha dad pa'i snang ba med pa'i phyir ro/ /gzung dang 'dzin pa rnam par spangs/ /zhes bya ba ni snga ma bzhin no/ /de ltar gzung ba dang 'dzin pa rnam par spangs pa'i tshig bstan nas bde ba dang sdug bsngal las rnam par grol ba'i tshig brjod pa'i phyir/bde ba sems ni zhi ba nyid/ /ces bya ba la sogs pa gsungs te/ rnam par rtog pa nye bar zhi ba'i ngo bo nyid kyi phyir ro/ /sdug bsngal gyi tshig bshad pa'i phyir/ sdug bsngal 'khor ba'i mtshan nyid des/ /zhes gsungs so/ /phung po lnga dang khams dang skye mched kyi snang ba'i bdag nyid can te/'khor ba sdug bsngal gyi phung po can zhes bya ba'i tshig gis so/ /de las rnam par grol zhes bya ba ni rnam par rtog pa nye bar zhi ba'i ngo bo'o/ /'khor ba'i mtshan nyid can gyi sdug bsngal dag las rnam par grol ba ni bral ba'o/ /'jigs pa med ces bya ba ni phyogs gcig gis 'byung ba'i mtshan nyid kyi 'jigs pa med pa'i phyir ro//ji skad du/ med pa po ni ngan 'gror 'gro/ /yod pa po ni bzang por 'gro/ /zhes gsungs so/ /de nyid gsungs pa ni/ mi gnas mya ngan 'das pa po/ /zhes bya ba ste/ shes rab kyi sgo nas 'khor ba la gnas pa med pa'i phyir ro//snying rje'i sgo nas kyang mya ngan las 'das pa'i yon tan ma dmigs pa'i phyir/ zung du 'jug pa'i rnam pas so/ /ji skad du/ shes pas srid la mi gnas dang / /snying rjes zhi la mi gnas shing / /zhes bya ba la sogs pa gsungs so/ /don de nyid ni rang nyid kyis kyang gsungs te/stong nyid ye shes chen po'i bdag /ces bya ba la sogs pa ste/ lha'i nga rgyal bsgoms pas sam/ sngags la sogs pa'i rim pa bsgoms pas chos thams cad rang bzhin med pa stong pa nyid kyi mtshan nyid can gyis ye shes chen po'i bdag nyid can nyams su myong bar 'brel pa'o/ /'khor ba'i zhes bya ba ni 'gro ba drug gi dbye ba tha dad pa'o//sdug bsngal mi 'byung zhing zhes bya ba ni sems can gyi don byed kyang de'i log par rtog pa rnams kyi ngal ba med pa nyid kyi phyir ro/ /thugs rjes dbang du mdzad pa'i phyir/ /zhes bya ba ni skye ba mtha' yas par goms par byas pas snying rje chen pos gzhan dbang du gyur pa'i phyir ro//mya ngan las 'das pa'i zhes bya ba ni rnam rtog nye bar zhi ba'i rnam pa bde ba mi bskyed pa ste/ zhi ba'i ro mi myang ba nyid kyi phyir ro/ /de ltar bde ba dang sdug bsngal las rnam par grol ba'i tshig bstan pa bshad nas/ zhi ba dang gnyis med kyi tshig rgyas par bshad pa brjod pa'i phyir//zhi ba nyan thos ye shes nyid/ /ces bya ba gsungs te/ phung po nye bar zhi ba'i mtshan nyid can lhag ma med pa'i mya ngan las 'das pa ste/ phung po'i rnam par rtog pa dang nyon mongs pa dag bral ba'i phyir ro/ /gnyis med tshogs dang bse ru'o/ /zhes bya ba ni rang sangs rgyas bse ru ltar spyod pa dang tshogs na spyod pa gzung ba'i don dang bral ba'i phyir/gnyis su med pa'o/ /de dag ces bya ba ni nyan thos dang rang sangs rgyas la sogs pa rnams kyi'o/ /bde ba dang rtog byed pa'i zhes bya ba ni de rab tu grags pa'i thabs las byung ba'i dbye ba po de spangs pa'i mtshan nyid can gyi phyir ro//de dang bral ba'i bde ba chen po zhes bya ba ni 'di ni bde ba chen po'i ngo bo zhes bya ba'i don to/ /de bshad pa'i phyir/ 'di dga' ba gnyis kyi dus zhes gsungs te/ nyan thos ye shes zhes bya ba ni zag pa'i don gyis so/ /dga' ba gnyis kyi dus ni de'i ngo bo nyid kyi phyir ro/ / gang zhig gnas skabs de la mgo bo'i 'khor lo nas lus thams cad kyi mthar thug par zag pa skyed par byed pa'o/ /de mthar zhes bya ba ni dga' ba gnyis kyi mthar ro/ /dga' bral ba zhes bya ba ni chags bral ngo bo'o/ /rang rgyal mya ngan 'das pa dang / /zhes bya bas ni/ rang rgyal mya ngan las 'das pa//zhes bya ba'i don to/ /de'i phyogs gcig la chags pa dang bral ba'i phyir ro/ /rang rgyal gyi rang bzhin byang chub kyi sems kyi mya ngan las 'das pa ni nye bar zhi ba 'jig pa'i snyam du dgongs nas su/ de lta bur gyur pa'i zhi ba ni nyan thos kyi ye shes so/ /gnyis su med pa'i ye shes ni/rang sangs rgyas kyi ye shes so/ /bde bar zhes bya ba ni byang chub kyi sems kyi ngo bo khyad par du 'byed par byed pa ni log par byed pa'o zhes bya ba'i don to/ /de ltar zhi ba dang gnyis su med pa'i tshig bstan nas/ dngos po med pa'i ngo bo nyid bdag gis tshig rgyas par bshad pa bstan pa'i phyir/dngos po bden pa zhes bya ba gsungs te/ dngos po ni yod par 'gyur ba nyid dang / yod pa nyid dang / rtag tu yod pa zhes bya ba ni rnam grangs so/ /ye shes che zhes bya ba ni rnam pa gnyis so/ /byang chub sems kyang zhes bya ba ni kun rdzob kyi ngo bo'o/ /'dzin par byed ces bya ba ni/rdo rje rtse mor rlung gi stobs/ /zhes bya ba'i don to/ /rtsa rnams kun la bde ba dang / /zhes bya ba ni lus thams cad la bde ba chen po'i rtsa de nye bar bsdus pa'i rnam pa'i rdo rje la zhes bya ba'i don to/ /bde ba chen po'i go 'phang gnas/ /zhes bya ba ni bde ba chen po'i 'khor lo de la gnas pa'i rtsa rnams zhes bya ba'i don to//de yi ngo bo bdag nyid ni/ /zhes bya ba ni bde ba chen po'i 'khor lo'i ngo bo byang chub kyi sems rnam pa gnyis kyi ngo bo'o/ /de nyid ni zhes bya ba ni khams nyams su myong ba'i ngo bo'o/ /bde ba chen po zhes ni brjod/ /ces bya ba ni/ de yi ngo bo'i sgras brjod pa/ /zhes bya ba'i don to//'dis ni dngos po rnams kyi ngo bo nyid bstan pa gsungs so/ /de ltar rnam pa gnyis kyis rgyas par bshad pa bstan nas/ de'i thabs brjod pa'i phyir/ rnal 'byor gcig pus de nyid ni/ /zhes bya ba gsungs te/ ting nge 'dzin gyi ngo bo nyid dang / thabs dang shes rab kyi bdag nyid can gyis so//rtog zhes bya ba ni yul lo/ /rtog pa'i bdag nyid rnam rtog min/ /zhes bya ba ni rtog pa nye bar zhi ba'i ngo bo nyid kyi phyir ro/ /de ltar de'i thabs bstan nas/ bcos ma'i bsgom pa mi dgos pa brjod pa'i phyir de'i yan lag gi ngo bo ni/ bsnyen gnas bzlas pa zhes bya ba la sogs pa gsungs te/bsnyen gnas kyi sdom pa'i ngo bo'i bzlas pa zhes bya ba ni dam tshig bzlas pa la sogs pa'o/ /sbyin sreg min zhes bya ba ni dam tshig gi me'i zhal du ye shes kyi me lha tshim par bya ba'o/ /bsam gtan ma yin zhes bya ba ni bskyed pa'i rim pa bsgom pas sam/ bris sku la sogs pa la de bcom ldan 'das kyi gzugs bsgom pa'o/ /bya ba ma yin zhes bya ba ni zhi ba la sogs pa'i las kyi tshogs kyis so/ /phreng ba min zhes bya ba ni mi rus la sogs pa'i'o/ /bskyed pa yi ni bsgom pas min/ /zhes bya ba ni zla ba dang rdo rje la sogs pa'i rim pas lha'i rnam pa bsgom pa'o//bde ba chen po'i go 'phang thob pa la phyi rol pa 'di rnams mi dgos pa'o/ /de ltar rang gi ngo bo bstan nas/ bla na med pa'i dbang thob pa sngon du 'gro bas de thob par bya ba nyid bstan pa'i phyir/ cung zad zhi ba'i dbang bskur gyis/ /zhes bya ba gsungs te/ zhi ba'i dbang bskur gsum pa'i dbang nyams su myong ba sngon du 'gro bas so//bla ma'i zhal nas zhes bya ba ni ston pa nyams su myong bar byed pa las so/ /rnyed ces bya ba ni 'thob pa'o/ /nyams su myong ba'i rim pa dang / gdams ngag gi rim pas rim pa ji lta ba bzhin du'o/ /rnal 'byor ma zhal kun spyod ni//zhes bya ba ni zhing la sogs pa las skyes pa rnal 'byor ma'i gdams pa las so/ /rnal 'byor ma zhal kun spyod ni/ /zhal nas zhal du thob pa'i phyir ro/ /mchog gi ye shes bde ba che/ /zhes bya ba ni bla na med pa'i ye shes so/ /bde ba che zhes bya ba ni/ sdug bsngal thams cad nye bar zhi ba'i rnam pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa zab mo'i don shin tu gsal bar byed pa zhes bya ba las le'u bcu gsum pa'i rgya cher bshad pa'o// //de ltar le'u bcu gsum pas bde ba chen po'i yul la dri ba'i lan bstan pa brjod nas/da ni skabs su bab pa'i rdo rje dang pad+ma mnyam par sbyor ba'i yul la dri ba'i lan btab pa brjod par 'dod nas le'u bcu bzhi pa nye bar ston cing de rtsom pa bstan pa ni/ de nas zhes bya ba la sogs pa gsungs te/ le'u bcu gsum pa bshad pa'i rjes la'o/ /gzhan yang zhes bya ba ni sngar la ltos nas so/ /nyon zhes bya ba ni phyag na rdo rje nyan pa la sbyar ba'o/ /rdo rje pad+ma mnyam sbyor bas/ /zhes bya ba ni rdo rje pad+ma mnyam sbyor ba 'chad par 'gyur ba'i mtshan nyid can bshad kyis zhes bya ba dang 'brel to/ / des ci zhig byed ce na/ de'i phyir gang gis zhes bya ba gsungs te/ gang gis zhes bya ba ni rdo rje pad+ma sbyor ba gang gis so/ /yang dag ces bya ba ni phyin ci ma log par byas nas so/ /dngos grub 'gyur zhes bya ba ni lhan cig skyes pa'am/ 'od gsal gyi ngo bo'o/ /tshe 'di nyid la zhes bya ba ni mthong ba'i chos nyid la'o//rnal 'byor pas zhes bya ba ni phyag rgya chen po'i bsgom pa'o/ /de ltar de rtsom pa bstan nas dngos grub rdo rje dang pad+ma mnyam par sbyor ba bshad pa'i phyir/ de'i yan lag rnal 'byor chen po'i rgyud kyi rjes su 'brangs nas rdo rje dang pad+ma mnyam par sbyor ba bshad pa ni/mi phyed rdo rje zhes ni brjod/ /ces bya ba la sogs pa gsungs te/ stong pa nyid kyi mtshan nyid de/ /gzhan sbyor bar byed pa'i phyir dang / mi phyed pa nyid kyi phyir ro/ /de ni rlung du yongs su grags/ /zhes bya ba ni rnam pa gnyis su yongs su grags te/ don dam pa dang kun rdzob kyi dbye bas so//de la don dam pa ni stong pa nyid kyi rdo rje'o/ /kun rdzob ni thabs kyi yan lag gi rnam pa'o/ /yi ge a ni phye ba yis/ /zhes bya ba ni don dam pa ni stong pa nyid kyi rnam pa'i rdo rje'o/ /a yig ni sprul pa'i 'khor lo na gnas pa'i dbye bas phyi dang nang gi bdag nyid can thabs dang shes rab snyoms par zhugs pa'i mtshan nyid can gyi thabs la brten nas/de'i dbyug pa bcag pas so/ /rtogs zhes bya ba ni de'i spyod yul lo/ /rnal 'byor mchog gi zhes bya ba ni rdzogs pa'i rim pa bsgom pa po rnams kyis so/ /rtag tu zhes bya ba ni dus thams cad du'o/ /'dis ni rdo rje tshig bshad nas/pad+ma'i tshig bshad pa'i don du de rten zhes bya ba ni stong pa nyid rang bzhin rdo rje de'i'o/ /rten zhes bya ba ni gnas pa'o/ /snying ga'i pad+ma'i zhes bya ba ni sems kyi gnas te/ stong pa nyid ni sems kyi chos nyid kyi ngo bo nyid kyi phyir ro/ /'dab ma brgyad kyis rnam par brgyan/ /zhes bya ba ni/ de'i dbyibs nyid kyi phyir ro//ming gzhan gsungs pa ni chos kyi 'khor lo zhes bya ba ste/ chos kyi 'khor lo ni snying ga'i pad+ma'o/ /bskal pa bzang zhes bya ba ni bskal pa bzang ba'i phung po dang / skye mched kyi sa bon rnams yod par gyur pa'i phyir ro/ /thams cad bdag nyid du bzhugs zhes bya ba ni lus thams cad la gnas pa'o//de ltar rten gyi ngo bo rdo rje dang pad+ma mnyam par sbyor ba brjod pas so/ /rten pa'i ngo bo bshad pa'i phyir spyod pa brjod pa ni de'i 'dab ma la skyes pa zhes bya ba gsungs te/ de'i chos kyi 'khor lo'i 'dab ma rnams la rnam shes brgyad du 'gyur ro/ /'jug pa'i rnam par shes pa dang /nyon mongs pa can gyi rnam par shes pa dang / kun gzhi'i rnam par shes pa'i rang bzhin can gyis brgyad do/ /kun rdzob bo zhes bya ba ni 'jig rten pa la snang bzhin pa'o/ /'byung zhes bya ba ni yod pa'o/ /'gro ba gsum du zhes bya ba ni 'dod pa dang / gzugs dang / gzugs med pa'i mtshan nyid can no//rnam par spyod ces bya ba ni yul la 'dzin pa'i mtshan nyid can no/ /ci zhig byas nas she na/ de'i phyir/ mig la sogs pa yang dag rten/ /zhes bya ba gsungs te/ dbang po drug po'o/ /de dag 'joms pa rlung rdo rje/ /zhes bya ba ni de dag ni snying ga'i pad+mar gnas pa'i rnam par shes pa'i ngo bo'o//'joms zhes bya ba ni mi snang bar byed pa'o/ /rlung rdo rje zhes bya ba ni rnam par shes pa'i bzhon par 'gyur ba'am/ las kyi rlung gi stobs kyis skyes pa ste/ ye shes kyi me skyes nas zhes bya ba ni lhag ma'o/ /de nyid kyi phyir bgegs mthar byed pa zhes pa ni brjod ces gsungs te/ bgegs rnams ni rnam par g.yengs par byed pa'i rnam par shes pa'i tshogs brgyad rnams so/ /mthar byed pa ni zlog par byed pa ste/ bdud rtsi 'khyil pa'i ngo bo khro bo'i gzugs dang 'dra ba'o/ /rnam shes rnams kyang zhes bya ba ni gsungs ma thag pa'i rnam shes gang de'o/ /de la zhes bya ba ni chos kyi 'khor lo'i 'dab ma rnams la'o//'jig rten skyong ba rnams su brjod/ /ces bya ba ni dbang po la sogs pa'o/ /yang na 'jig rten ni gzugs la sogs pa 'dzin pa la sogs pa skyong bar byed pas yongs su gcod par byed pas na 'jig rten skyong ba'o/ /'jig rten gsum du kun nas khyab//ces bya ba ni mtho ris dang / sa steng dang / sa 'og gi mtshan nyid can gyi rang gi lus sam 'dod pa la sogs pa'i khams kyi bde bas so/ /kun nas khyab pa ni rten nas so/ /gnas zhes bya ba ni bzhugs pa'o/ /lha rnams zhes bya ba ni lha rnams gang la 'gro ba yod pa de ni lha rnams 'gro ba ste sa'i snying po la sogs pa byang chub sems dpa'i ngo bo nyid kyi phyir ro//skyong ba yang ni thams cad kyis/ /zhes bya ba ni thams cad rnam pa thams cad kyis so/ /yul la sogs pa'i 'bras bu dang / /zhes bya ba ni gzugs la sogs pa'i yul la sogs pa 'dzin pa'i mtshan nyid can 'bras bu dang bcas pa'i 'jig rten skyong ba zhes bya ba'i don to//de la zhes bya ba ni rnam par shes pa brgyad pa'o/ /rlung gi yang dag sbyor zhes bya ba ni rlung dang 'brel pa'i snang bar byed pa'i ngo bo nyid kyi phyir ro/ /rdo rje pad+ma zhes byar brjod/ /ces bya ba ni de ma thag par bshad pa nyid kyi phyir ro//'dis ni rten gyi ngo bo de'i bshad pa gsungs so/ /da ni zung du 'jug pa'i ngo bo de'i bshad pa gsungs pa ni/ rdo rje snying rjer shes par bya ba ste/ rdo rje bzhin du sems can dang chos dang dmigs pa med pa'i dbye bas dus nam gyi tshe sems can gyi don byed pa las mi ldog pa'i phyir ro//pad+ma yang ni stong pa nyid/ /ces bya ba ni pad+ma ltar nyon mongs pa dang / nye ba'i nyon mongs pas ma gos pa nyid kyi phyir ro/ /de dag ces bya ba ni snying rje dang stong pa nyid do/ /sbyor ba zhes bya ba ni tha mi dad par bsgrub pa'o/ /mchog tu zhes bya ba ni mchog gi ngo bo'o/ /shes zhes bya ba ni rdo rje dang pad+ma mnyam par sbyor bar shes par bya zhes bya ba'i don to//de ltar zung du 'jug pa'i ngo bo de'i bshad pa brjod nas/ rjes su chags pa'i ngo bo nyid kyis de'i bshad pa bstan pa'i phyir/ rdo rje nyi ma zhes ni gsungs/ /zhes bya ba ste/ nyi ma'i ngo bo thabs kyi rdo rje'o/ /khyad par gyi sgo nas gtan tshigs bstan pa ni/'od zer tshogs kyi bdag nyid can/ /zhes gsungs te/ 'od zer kha dog lnga pa spro ba'i bdag nyid can gyi phyir ro/ /de rnams kyi zhes bya ba ni 'od zer de rnams kyi'o/ /dbye ba zhes bya ba ni rab tu sad pa'o/ /gang zhes bya ba ni pad+ma'o/ /de ni pad+ma zhes bya ba ni pad+ma'o//brjod ces bya ba ni bshad ces bya ba'i don to/ /de ni rnal 'byor zhes bya ba ni rdo rje dang pad+ma dag gi'o/ /sbyor ba zhes bya ba ni 'brel pa'i mtshan nyid can no/ /mchog tu zhes bya ba ni mchog ste/ so so'i skye bo yang dag par sbyor ba'i mtshan nyid kyi phyir ro/ /rdo rje pad+ma mnyam sbyor shes/ /zhes bya ba ni rdo rje dang pad+ma mnyam par sbyor ba shes par bya ba'i don to//de ltar don rnam pa bzhis rnal 'byor chen po'i rgyud kyi rjes su 'brangs nas rdo rje dang pad+ma mnyam par sbyor ba bshad nas/ rnal 'byor ma'i rgyud kyi rjes su 'brangs nas rdo rje dang pad+ma mnyam par sbyor ba bshad pa'i phyir/ de'i yan lag rten dang rten can gyi ngo bo nyid kyis de bshad pa'i phyir/gsungs pa/ byang chub sems ni rdo rjer 'gyur/ /zhes bya ba ste/ kun rdzob kyi rnam pa'i ste/ rdo rje'i lam nas de 'jug pa'i phyir dang de bzhin gshegs pa thams cad kyi ngo bo nyid kyi phyir ro/ /bde chen 'khor lo pad+ma'o/ /zhes bya ba ni mgo bor gnas pa'i bde ba chen po'i 'khor lo pad+ma'i dbyibs dang 'dra ba'i phyir ro//de la zhes pa ni bde ba chen po'i 'khor lo'i mtshan nyid can gyi pad+ma la'o/ /de'i zhes bya ba ni kun rdzob kyi rnam pa'i byang chub sems dpa'o/ /sbyor ba gang zhes bya ba ni 'brel pa gang zhig ngo bo nyid dang rlung gzung ba'i stobs kyis sam gyen du rgyu ba'i rim pa'i mtshan nyid can no//rmad du byung zhes bya ba ni phyir ma spros pas rgas pa dang 'chi ba med pa bsgrub pa nyid kyis ngo mtshar bskyed pa po'o/ /de ltar rten dang brten pa can gyi ngo bo bshad pa bstan nas bla ma dang slob ma'i ngo bo nyid kyi bshad pa ni bla ma'i gsung ni zhes bya ba gsungs te/rgyud du gsungs pa'i mtshan nyid dang ldan pa'i bla ma mchog gi ngag gis sangs rgyas nyid thob pa'i rgyur gyur pa rim pa gnyis ston par byed pa'i tshig go/ /de ni rdo rje brjod ces bya ba brjod de/ 'go bar mi bya ba nyid kyi phyir dang / rnam par rtog pa thams cad 'joms par byed pa nyid kyi phyir ro/ /slob ma zhes pa ni/de bzhin du rgyud du gsungs pa'i mtshan nyid can dbang bskur ba thob pa'o/ /snod ces bya ba ni snod du gyur pa'i rna ba'i dbang po ste/ gang gis bla ma'i ngag de nyid thob pa'o/ /pad+ma de'i zhes bya ba ni bla ma'i gsung thos pas slob ma'i snying gi pad+ma kha 'byed pa'o/ /de'i zhes bya ba ni bla ma'i gsung ngo //gnas de la zhes bya ba ni slob ma'i rna ba'i dbang po la gnas pa'o/ /de'i sbyor ba zhes bya ba ni de'i 'brel pa'i mtshan nyid can la'o/ /mchog rmad 'byung zhes bya ba ni bla ma'i gsung gi stobs kyis slob mas mchog tu ngo mtshar ba'i ngo bo phyag rgya chen po thob pas so/ /gsal zhes bya ba ni gsal bar byed pa'o//de ltar bla ma dang slob ma'i ngo bo nyid kyis de'i bshad pa bstan nas/ bsam gtan gyi ngo bo nyid kyis de'i bshad pa bstan pa'i phyir zhi gnas pad+ma zhes gsungs te/ rim pa gnyis kyi ngo bo nyid ni ting nge 'dzin gyi khyad par ro/ /pad+ma ltar 'dod chags la sogs pa rnams kyis ma gos pa'i phyir ro//de las lhag mthong rdo rje la/ /zhes bya ba ni bsam gtan de nyid la spyod pa ste/ /zung du 'jug pas rgyu ba nyid kyi phyir ro/ /de yang de la ma myangs pa nyid kyis snyam du dgongs pa'o/ /de nyid zhes bya ba ni zhi gnas dang lhag mthong dag go /de gnyis gcig gyur rnal 'byor ni//zhes bya ba ni rang gi ngang gis rgyu ba'o/ /sgom pa yis ni de nyid mthong / /zhes bya ba ni sgom pa ni de ma thag par gsungs pa'i zhi gnas dang lhag mthong gi bdag nyid can gyis de nyid la lus dang ngag dang yid dang ye shes rnam par dag pa'i mtshan nyid can gyi mthong ba ni thob pa zhes bya ba'i don to//de ltar bsam gtan gyi ngo bo bshad pa bstan nas/ khyad par du 'phags pa'i bla ma dang / slob ma'i ngo bo nyid kyis bshad pa'i don du/ rnal 'byor ma zhal pad+mar gnas/ /zhes bya ba gsungs te/ rnal 'byor ma ni gnas la sogs pa las skyes pa'o/ /zhal gyi pad+ma ni gdong gi pad+ma la'o//de nyid gnas zhes bya ba ni de kho na nyid ston par byed pa'i tshig gdams ngag gi mtshan nyid can ni rdo rje zhes brjod par bya ste/ 'god par bya ba ma yin pa'i phyir dang / rnam par rtog pa thams cad 'joms par byed pa nyid kyi phyir ro/ /bla na med ces bya ba ni bla na med pa'i go 'phang gi rgyur gyur pa'i phyir ro//pad+ma slob ma bzang gi kha/ /zhes bya ba ni slob ma dam pa dang sa dang snying rje dang shes rab la sogs phun sum tshogs pa dang ldan pa'i zhal ni gdong ngo / /man ngag gi don zhes bya ba ni rnal 'byor ma'i mtshan nyid can gyi bla ma dang 'brel pa can no/ /snod ces bya ba ni snod du gyur pa ste/ pad+ma ltar dga' bar bya ba nyid kyi phyir rnyog pa dang bral ba'o//snod kyi skyon rnam pa gsum dang bral ba ste/ snod nas snod du byo ba'i rnam pa zhes bya ba'i tha tshig go/ /de gnyis zhes bya ba ni bla ma dang slob ma dag go/ /rnal 'byor kun bdag nyid ces bya ba ni lhag ma ma lus par byas nas so/ /yang dag de nyid don mthong byed//ces bya ba ni nyams su myong bar byed pa'i bla ma'i drin gyis rang gi rig pa nyid kyi de kho na nyid nyams su myong ba zhes bya ba'i don to/ /de ltar don rnam pa bzhis rnal 'byor ma'i rgyud kyi rjes su 'brangs nas rdo rje dang pad+ma mnyam par sbyor ba la snyoms par 'jug pa bshad nas gnyis ka'i rgyud kyi rjes su 'brangs nas rdo rje dang pad+ma mnyam par sbyor bar byed par 'dod pas de'i yan lag tu thabs dang shes rab kyi ngo bo nyid kyi bshad pa ni/blo ldan zhes bya ba la sogs pa gsungs te/ khyad par can gyi shes rab phun sum tshogs pa dang ldan pa la'o/ /rnam rtog bral ba'i zhes bya ba ni rnam par rtog pa thams cad dang bral ba'o//rdo rje zhes bya ba ni thabs kyi yan lag gi rnam pa'o/ /ling+ga zhes ni bshad ces bya ba ni ling+ga ni 'gro ba'i don to zhes bya ba byed pa'i khams kyis so/ /blo ldan zhes bya ba ni sngags kyi theg pa'i snod du gyur pa la'o/ /rnam par mi rtog ces bya ba ni/ tshogs kyi 'khor lo la sogs pa'i dus su'o/ /b+ha ga zhes bya ba ni 'dod chags la sogs pa bcom pa nyid kyis so/ /pad+ma zhes bya ba ni de'i nang du pad+ma'i dbyibs dang ldan pa'i phyir ro/ /dam tshig gzung ba'i rnal 'byor ma/ /zhes bya ba ni dam tshig gi don du 'dzin pa ni gzung ba'o/ /de gnyis ni thabs dang shes rab kyi mtshan nyid can no//dngos gcig yang dag sbyor zhes bya ba ni lhan cig skyes pa dang 'brel pa'o/ /byang chub sems ni zhes bya ba ni kun rdzob pas so/ /gnyis med ye shes che zhes bya ba ni don mthong bar byed pa'o/ /de ltar thabs dang shes rab kyi ngo bo rdo rje dang pad+ma mnyam par sbyor ba bshad nas/rtsa dang khams kyi ngo bo nyid kyis de bshad pa'i phyir ro/ /stong phrag gnyis dang bdun cu yi/ /zhes bya ba gsungs te/ rang gi lus sam gzhan gyi lus la'o/ /rdo rje zhes ni brjod ces bya ba ni thabs kyi ngo bo nyid kyi phyir ro/ /byang chub sems ni 'bab pa'i rtsa/ /zhes bya ba ni la la nA'i ngo bo'o//pad+ma zhes ni yongs su grags/ /zhes bya ba ni byang chub sems ni pad+mar spros pa'i phyir ro/ /yang na rtsa de nyid ni pad+ma ste/ byang chub sems dang sbyor ba la yang 'dod chags kyi skyon gyis ma gos pa'i phyir ro/ /de la zhes bya ba ni byang chub kyi sems rgyu ba'i rtsa la'o/ /de rnams zhes bya ba ni stong phrag bdun cu rtsa gnyis rtsa'i grangs so//kun du sbyor ba zhes bya ba ni de dang 'brel pa'o/ /dga' ba skyed par byed pa'i rgyu/ /zhes bya ba ni phyi rol gyi thabs shes rab la snyoms par 'jug pa la brten nas zhes bya ba'i don to/ /de ltar rtsa dang khams kyi ngo bo nyid kyi bshad pa bstan nas/rten dang brten pa'i ngo bo nyid kyis de'i bshad pa ni/ rdo rje yi yang nyams dga'i stan/ /zhes gsungs te/ phyi rol gyi mngon par byang chub pa'i gnas kyi rdo rje gdan la'o/ /rim pa 'dis ni zla ba'i dkyil 'khor la sogs pa'i steng du rdo rje'i gdan no/ /nyams dga'i zhes bya ba ni phigs par dka' ba nyid dang ye shes kyi ngo bo nyid kyis so//rang nyid rdo rje pad+ma 'chang / /zhes bya ba ni rdo rje 'chang chen po'o/ /rang nyid ces bya ba ni bdag nyid kyi 'dod chags dang bcas pa dang 'dod chags dang bral ba nyid kyi pad+ma zhes brjod par bya ste/ phyi rol gyi pad+ma ltar byams pa bsgoms pas bdud la sogs pa bcom pa nyid kyi phyir dang /de las gzhan la 'dod chags la sogs pa rnams kyis ma gos pa'i phyir ro/ /de la zhes bya ba ni gdan de la'o/ /de zhes bya ba ni rdo rje 'chang chen pos so/ /mnyam sbyor ba zhes bya ba ni 'brel pa'o/ /sangs rgyas ye shes go 'phang gsal/ /zhes bya ba ni sgrib pa dang bral ba dang rang bzhin gyis 'od gsal ba'i ngo bo'o//gsal zhes bya ba ni bsgom par 'gyur ba nyid kyis gsal ba nyid kyi phyir ro/ /de ltar rten dang brten pa'i ngo bo nyid kyis de'i bshad pa bstan nas/ dbang bskur ba dang / dbang bskur bar bya ba nyid kyis de bshad pa ni/ dbang bskur mchog ni rdo rje ste/ /zhes bya ba gsungs te/dri ma mtha' dag 'khru bar byed pa'i bdag nyid can gyi phyir ro/ /mchog ni phyi rol gyi mtshan nyid dang bral ba nyid kyis mchog nyid kyi phyir mchog go/ /de nyid ni rdo rje zhes brjod de rdo rje bzhin du mi mthun pa'i phyogs 'byed par byed pa'i phyir ro/ /pad+ma slob ma dbang bskur bar bya ste/ pad+ma ltar 'dus bya ba nyid kyi phyir ro//snod bzang po zhes bya ba ni dam tshig dang sdom pa 'dzin pa'i phyir ro/ /de gnyis mchog tu yang dag sbyor/ /zhes bya ba ni dbang bskur bar bya ba dang dbang bskur bar byed pa dag la'o/ /mchog tu yang dag par sbyor ba zhes bya ba ni/ mchog tu yang dag par 'brel pa ste/ sbyang bya dang sbyong byed gnyis kyis so//yang dag ces bya ba ni phyin ci ma log pa nyid kyis so/ /de nyid kyis zhes bya ba ni ji lta ba bzhin du rtog pa'i mtshan nyid can rang bzhin gyis 'od gsal ba la'o/ /rgyu ni rgyu'o/ /de ltar dbang bskur bar bya ba dang skur bar byed pa de'i bshad pa brjod nas/ e baM rnam pa'i ngo bos de bshad pa ni/e ni pad+ma zhes gsungs te/ /zhes bya ba ni lha mo'i chu skyes la e yig gi rnam pa'i dbyibs dang ldan pa nyid kyi phyir ro/ /yi ge baM ni rdo rje nyid/ /ces bya ba ni rdo rje'i dang po sa bon nyid kyi phyir ro/ /thig le de nyid mi shigs pa/ /zhes bya ba ni rigs pa'i ngang tshul can nyid kyi phyir thig le ste/de nyid mi shigs pa zhes bya ba ni mi 'jigs pa de kho na nyid kyi rang bzhin don dam pa dang kun rdzob kyi rnam pa can no/ /de gnyis sbyor ba ngo mtshar mchog /ces bya ba ni don dam pa dang kun rdzob des so/ /sbyor ba ni 'brel pa'o/ /ngo mtshar zhes bya ba ni shin tu yang ngo mtshar skyed par byed pa ste/ 'dod chags kyi skyed pas byang chub mngon du byed pa'i phyir ro/ /de ltar don rnam pa gsum gyis rdo rje dang pad+ma mnyam par sbyor ba bstan nas/ de nye bar bsdu ba brjod pa'i phyir de ltar sbyor ba gsungs pa/ de ltar sbyor ba zhes bya ba ste/ rdo rje dang pad+ma mnyam par sbyor ba'i mtshan nyid can no/ /mchog tu zhes bya ba ni mchog gi ngo bo nyid do//shes zhes bya ba ni shes par bya'o/ /rdo rje pad don sdom pa ni/ /zhes bya ba ni rdo rje dang pad+ma gnyis ni sngags kyi theg par grags pa dag la don ni brjod par bya ba'i mtshan nyid can gyi sdom pa ni bsdus pa'i ngo bo ste/ sna tshogs pa'i ngo bo nyid kyis de'i don bshad pa'i phyir ro//bla ma'i drin gyis zhes bya ba ni rdo rje slob dpon gyi bka' drin gyis so/ /yongs su zhes bya ba ni shes par bya ba'o/ /rnal 'byor ma yi man ngag gis/ /zhes bya ba ni ye shes mkha' 'gro rnams kyi man ngag gi brgyud pas so/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u bcu bzhi pa'i rgya cher bshad pa'o// //de ltar le'u bcu bzhi pas rdo rje dang pad+ma mnyam par sbyor ba'i yul la 'dri ba'i lan brjod nas/ da ni sngags kyi de kho na nyid kyi yul la dri ba'i lan brjod pa'i phyir/le'u bco lnga pa nye bar ston cing / dang por re zhig de rtsom pa ni sngags kyi de nyid ces bya ba la sogs pa gsungs te/ 'chad par 'gyur ba'i mtshan nyid can no/ /bshad kyis zhes bya ba ni brjod par bya zhes bya ba dang 'brel to/ /khyod nyon cig ces bya ba ni phyag na rdo rje nyan pa la sbyar ba'o//ci lta bus she na/ de'i phyir ye shes mchog ces bya ba gsungs te/ rdo rje bzlas pa'i rim pa'i rgyur gyur pa gnyis kyi phyir ro/ /gang dang 'brel pa zhe na/ de'i phyir rdo rje can zhes gsungs te/ rdo rje can zhes bya ba ni/ rdo rje 'chang gi rnam pa'i rnal 'byor pa//zhes bya ba'i don to/ /des ci zhig byed ce na/ de'i phyir/ gang gis myur du dngos grub 'gyur/ /zhes gsungs te/ sngags kyi de kho na nyid gang gis so/ /dngos grub 'gyur zhes bya ba ni rdo rje'i bzlas pa'i mtshan nyid can no/ /myur du zhes bya ba ni myur ba nyid du'o/ /gang gis 'gyur zhe na/de'i phyir/ sngags kyi spyod pa rnams gnas pa/ /zhes gsungs te/ sngags kyi spyod pa ni spros bcas la sogs pa'i spyod pa'i rang bzhin rnam pa gsum gyis gnas pas na sngags kyi spyod pa rnam par gnas pa ste de rnams la'o/ /de ltar sngags kyi de kho na nyid kyi yul la dri ba'i lan rtsom pa bstan nas/dngos su de bshad pa'i phyir de'i yan lag tu sngags kyi de kho na nyid kyi mdor bstan pa ni/ sku gsung thugs kyi rdo rje rnams/ /zhes bya ba gsungs te/ rnam par snang mdzad la sogs pa de bzhin gshegs pa rnam pa gsum gyi'o/ /sngags ni zhes bya ba ni/ 'chad par 'gyur ba'i rim pas btus pa'i yi ge gsum gyi ngo bo'o/ /sbyar bar bya zhes bya ba ni 'jug pa dang / gnas pa dang / ldang ba'i mtshan nyid can gyi dbugs rnam pa gsum la'o/ /de rnams la ni yi ge gsum gyi rim pas nye bar mtshon pas so/ /yang na gang gis bzlas zhes byung ste/de la yang 'jug pa la sogs pa'i ngo bos mos par bya zhes bya ba sbyar bar bya'o/ /de yis myur du dngos grub 'gyur/ /zhes bya ba ni sngags bzla ba de la myur ba nyid du rlung gi de kho na nyid dang sngags kyi de kho na nyid dag gis ma ning gi bzlas pa'i ngo bos dngos grub tu 'gyur ba'o/ /ji lta bus she na/de'i phyir/ rlung gi de nyid pha rol phyin/ /zhes gsungs te/ le'u bcu gnyis pa bstan pa ste/ pha rol phyin ces bya ba ni pha rol tu son pa zhes bya ba'i don to/ /de ltar sngags kyi de kho na nyid kyi mdor bstan pa bshad nas/ de rgyas par bshad pa brjod pa'i phyir/ rdo rje'i phyag rgya don sdom pa//zhes bya ba gsungs te/ rdo rje ni yan lag ma nyams pa'i bzlas pa'i mtshan nyid can gyi rdo rje bzlas pas so/ /phyag rgya ni ma ning gi bzlas pa'i gnas skabs rdo rje'i phyag rgya'o/ /de'i go 'phang ni 'dug pa'i gnas te/ gnas rdo rje'i phyag rgya go 'phang ngo / /zhi zhes bya ba ni rang bzhin gyi tshogs brgya rtsa brgyad nye bar zhi bas so//phyag rgya chen po'i don sdom pa/ /zhes bya ba ni rang bzhin gyis 'od gsal ba'i rnam pa'o/ /don ni rnam par rtog pa thams cad nye bar zhi ba'i mtshan nyid can no/ /sdom pa ni bsdus pa'i ngo bo'o/ /mchog gi de nyid ces bya ba ni ngag gi de kho na nyid kyi ngo bo nyid kyi phyir ro//ye shes che zhes bya ba ni ngag gi rnam par rtog pa'i sgra'i rnam par yongs su shes pa nyid kyi phyir ro/ /sngags kyi de nyid la brten pa ni zhes bya ba ni 'chad par 'gyur ba'i mtshan nyid can brjod pa'o/ /dmigs pa med pa'i go 'phang zhes bya ba ni thams cad kyi rten rnam par rtog pa bzlog pas don dam pa'i ngo bo nyid kyi phyir ro//gsal ba zhes bya ba ni rnal 'byor pa'i shes pa la gsal bar snang bas so/ /rdo rje sems dpa' nyid kyi rgyu/ /zhes bya ba ni sngags kyi de kho na nyid la brten nas stong pa nyid kyi mtshan nyid can rdo rje sems dpa'i go 'phang thob pa nyid kyi phyir ro/ /tshig 'di nyid kyi bshad pa gsungs pa ni/sngags kyis zhes bya ba la sogs pa ste/ ye shes kyis bsdus pa'i stobs bcu dang / mi 'jigs pa la sogs pa rnal 'byor pa gsal ba nyid du nye bar song ba'o/ /de nyid kyi phyir yid skyabs pas na sngags zhes brjod do/ /lus ngag yid kyis sdom pa'o/ /zhes bya ba ni ma dag pa'i lus la sogs pa'i rnam par rtog pa spangs nas rnam par dag pa'i lus la sogs pa snang ba bskyed pa de rnams nyid la sdom pa ni bde ba mchog ces bya ba'i don to//de nyid ces bya ba ni de'i dngos po ni de nyid de phyin ci ma log pa'o/ /de skyes ye shes mchog ces bya ba ni de ma thag par bshad pa'i sngags yon tan thams cad kyis brgyan pa las gang zhig skyes pa'i yon tan ni mchog ces bya'o//ye shes mchog ni mchog gi yul dang yul can gyi rnam par rtog pa bzlog pa'i bdag nyid can no/ /de nyid kun gyi don bsdus pa/ /zhes bya ba ni kun gyi ni lus la sogs pa'i de kho na nyid zung 'jug gi mthar thug pa rnams kyi don ni brjod par bya ba'i mtshan nyid can gyis bsdus pa zhes bya ba ni bsdus par gyur pa'o//sngags kyi de kho na nyid la brten pa nyid kyi rim gyis zung 'jug gi go 'phang dngos su byas pa'i phyir ro/ /de lta bu'i sngags kyi de kho na nyid gnas gang du bsgom par bya zhe na/de'i phyir snying ga'i pad+ma mchog tu zhes gsungs te/ snying gar gnas pa'i pad+ma kha sbyar ba'i dbus su'o/ /mchog tu zhes bya ba ni hU~M yig gi rnam pa nyid kyi phyir ro/ /gsal ba zhes bya ba ni rnal 'byor pa la gsal ba'i ngo bos snang ba'i phyir ro//ye shes de nyid bla na med/ /ces bya ba la/ ye shes zhes bya ba ni rnal 'byor pa'o/ /de nyid ces bya ba ni phyin ci ma log pa'i ngo bo nyid kyis so/ /bla na med ces bya ba ni hU~M yig la cha shas su brtags pas thig le la sems 'dzin par phyag rgya chen po'i ngo bo mngon du byas pas de las gong du gzhan med pa'i phyir ro//zla drug bzlas pas zhes bya ba ni dus de srid du nye bar mtshon pas so/ /'grub par ni zhes bya ba ni sngags kyi de kho na nyid kyis thob par bya ba'o/ /'gyur te zhes bya ba ni skye bar 'gyur ba'o gzhan du ma yin no zhes bya ba ni de las gong du ni ma yin zhes bya ba'i don to//thabs dang ni zhes bya ba ni sngags kyi de kho na nyid kyi mtshan nyid 'di nyid do/ /mchog gi zhes bya ba ni dam pa'o/ /rnal 'byor zhes bya ba ni rdo rje bzlas pa'i dngos grub kyi rten du gyur pa nyid kyi phyir ro/ /rnal 'byor pa ni zhes bya ba ni sngags kyi de kho na nyid sgom pa po rnams la'o/ / yongs su grags zhes bya ba ni brjod pa'o/ /dmigs pa med pa'i tshig bshad pa'i don du dmigs med tshig ni zhes bya ba gsungs te/ gang sngon du bstan pa'i'o/ /de ni don dam par ni zhes bya ba ni a yig gi rang bzhin sngags kyi de kho na nyid do/ /brjod ces bya ba ni brjod pa'o/ /ngag gi spros pa thams cad a yig ni nang du bsdus pa'o//sbrul la sogs pa'i rim pa'i dbye bas kun rdzob tu sbrul dang / mgo med pa dang / mtha' med pa dang / btu ba'i dbye bas so/ /mi zlos pa zhes bya ba ni bzlas par mi bya ba'o/ /rlung gsum po nyid la nye bar 'brel pa'i yi ge gsum gyi ngo bo nyid kyis dbugs kyi 'khor lo mtshon par bya'o//slar yang phyi rol gyi phreng ba bzung nas ngag gis bzlas pa mi bya ste/ 'dir de skabs ma yin pa nyid kyi phyir ro/ /gal te phyi'i bzlas pa mi byed na/ 'o na ji ltar bzlas par bya zhe na/ de'i phyir gnyis su med ces bya ba gsungs te/ rlung dang sngags dang / lha dang dkyil 'khor la sogs pa rnams la ji ltar gnyis su rtogs par mi 'gyur bar de ltar zhes bya ba'i dgongs pa'o/ /gal te gnyis su med par zlos na/ ji ltar yi ge gsum gyi ngo bo nyid kyis dbye bar byed ce na/ 'on kyang zhes bya ba gsungs te/ 'jug pa dang / gnas pa dang / ldang ba'i rnam pas rlung rnams nye bar mtshon pa'i don du de nyid gsum ni lus ngag yid gsum sa bon gyi rang bzhin gyis mi phyed pa ni ro mnyam pa'o//sngags zhes bya ba ni sngags kyi de kho na nyid kyi ngo bo'o/ /don kun bsdus pa'o zhes bya ba ni thams cad ni chos kyi phung po brgyad khri bzhi stong gi don gang yin pa'i brjod par bya ba'i mtshan nyid do//de'i bsdus pa ni de bsdus pa'i bdag nyid can zhes bya ba'i don to/ /de ltar sngags kyi de nyid rgyas par bshad nas/ de'i phan yon bstan pa'i phyir/ bzlas pa'i zhes bya ba la sogs pa gsungs te/ yi ge gsum dgod pas dbugs gsum nye bar mtshon par byas nas dngos grub mtshungs pa med pa zhes bya ba dang 'brel lo//rdo rje bzlas pa'i ngo bo ni dngos grub bo/ /'gro ba ni thob par 'gyur zhes bya ba'i don to/ /ji lta bu zhe na/ mtshungs pa med pa zhes bya ba gsungs te/ bzlas pa'i rim pa'i mtshan nyid dang phral ba'i phyir ro/ /su zhig 'gro zhe na/de'i phyir/ yang dag mnyam par gzhag bzlas na/ /zhes gsungs te/ phyin ci ma log pa nyid kyi ting nge 'dzin la sems chags pa ste/ ting nge 'dzin gyi skyon drug po rnams spong bar byed pa'i 'du byed brgyad po bsgoms pas zil gyis gnon pa'i phyir ro/ /ji ltar 'gro zhe na/ de'i phyir/ rnam dag go 'phang bzang po gsal/ /zhes bya ba gsungs te/ rnam dag go 'phang ni ngag gi spros pa rnam pa bzhi bzlog pa'i bdag nyid can ngag gi 'od gsal ba'i ngo bo la shin tu gsal ba nyid ni mi gsal ba nyid las bzlog pa ji ltar 'gyur ba de ltar bzla zhes bya ba ni bya ba'i khyad par ro//gang zhes bya ba ni sgom pa po'o/ /shes zhes bya ba ni rig pa'o/ /de ni 'gro ba'i bla ma zhes bya ba ni khams gsum pa'i slob dpon du 'gyur zhes bya ba'i don to/ /de ltar rnam pa gnyis kyis sngags kyi de kho na nyid bstan nas/ de'i rab tu dbye ba bstan pa'i phyir sngags don zhes bya ba la sogs pa gsungs te/gnyis su med pa'i ye shes kyi mtshan nyid can te/ don dam pa'i byang chub kyi sems kyi ngo bo nyid kyi phyir ro/ /ji skad du 'chad par 'gyur ba las/ sngags kyi don dang ming mchog dang / /gnyis med ye shes mtshan nyid can/ /zhes gsungs te/ yid skyob par byed pas na sngags so//de'i don ni dgongs pa ste/ gnyis su med pa'i ye shes zhes bya bar byas nas so/ /sngags kyi de nyid dang zhes bya ba ni sngags ni de ma thag par gsungs pa'i rigs pas so/ /de kho na nyid ni don dam pa'i rnam pa nyid kyi rdo rje 'chang gi rnam pa ni sngags kyi de nyid do//ji skad du 'chad par 'gyur ba las/ rten pa med cing snang ba med/ /ces bya ba dang de bzhin du/ de nyid de ni don dam yang / /zhes gsungs so/ /sngags kyi man ngag ces bya ba ni gnas kyi dbye ba dang 'khor ba'i dbye bas bla ma'i drung nas sngags kyi man ngag gi mtshan nyid do/ /de nyid kyi phyir gsungs pa ni/zhal nas zhal du zhes bya ba ste/ bla ma'i zhal nas slob ma'i khar/ /zhes bya ba'i don to/ /sngags kyi nyams myong zhes bya ba ni sngags la btu ba'i rim pas so/ /nyams su myong ba ni yang dag pa'i ye shes te/ sngags kyi nyams su myong ba'o/ /mi gsal ba zhes bya ba ni phyi mo las yang dag par bsdus par gyur pa nyid kyi phyir mi gsal ba'o//gang zhes bya ba ni sgom pa po'o/ /shes zhes bya ba ni rig pa'o/ /de ni 'gro ba'i bla zhes bya ba ni 'jig rten gsum gyi mchod pa zhes bya ba'i don to/ /de ltar de'i rab tu dbye ba brjod nas/ de nye bar mkho ba'i don brjod pa'i phyir/ de'i yan lag gsol ba 'debs pa rtsom pa ni/de nas zhes bya ba la sogs pa gsungs te/ sngags kyi de kho na nyid kyi rab tu dbye ba bshad pa'i rjes la'o/ /phyag na rdo rje ni zhu ba po'o/ /rdo rje sems dpa' drug pa de bzhin gshegs pa'i rnam pa la zhus pa zhes bya ba dang 'brel to/ /ji lta bu zhe na/ de'i phyir kun mkhyen zhes gsungs te/kun mkhyen ni 'od gsal gyi ngo bo nyid kyis chos thams cad yongs su shes pa'i phyir ro/ /'gro ba'i bla ma zhes bya ba ni khams gsum pa'i slob dpon du gyur pa ste/ de dang de'i sems can gyi bsam pa'i dbang gis de dang de'i chos ston pa'i phyir ro/ /ci zhig byas nas she na/ de'i phyir yang dang yang du phyag byas nas so//ci zhig zhus she na/ de'i phyir/ sngags kyi mtshan nyid ji lta bu/ /zhes bya ba gsungs te/ phyin ci ma log pa'i ngo bos sngags ni/ yid skyob pa'i bdag nyid can gyi mtshan nyid ni nye bar mtshon pa zhes bya ba'i don to/ /de ltar gsol ba 'debs pa rtsom pa bshad nas/dngos su gsol ba 'debs pa brjod pa'i phyir/ sngags don zhes pa ci zhes bya ba gsungs te/ bcom ldan zhes pa ni bod pa'o/ /rang bzhin ci zhes bya ba ni ji lta bu'i ngo bo'o/ /rab gsal zhes bya ba ni gsal bar gyis shig pa'o/ /sngags kyi de nyid ces bya ba ni 'chad par 'gyur ba'i mtshan nyid can no//de bzhin man ngag ni zhes bya ba ni gnas kyi dbye ba la sogs pa 'chad par 'gyur ba las so/ /sngags kyi sdom don ji lta bu/ /zhes bya ba ni ji ltar sbyor ba ni ji ltar srid pa'o/ /phyi mo las don ni yi ge gsum la'o/ /sdom pa ni bsdus pa'i ngo bo sngags btu bas zhes bya ba'i tha tshig go//de ltar dngos su gsol ba 'debs pa bstan nas/ bcom ldan 'das kyi gsung la 'jug pa bshad pa'i phyir/ /de nas zhes bya ba la sogs pa gsungs te/ de nas ni gsol ba btab pa'i rjes la'o/ /rdo rje can ni rdo rje 'chang ngo / /gsungs pa zhes bya ba ni 'chad par 'gyur ba'i don brjod cig ces bya'o//bcom ldan 'das kyi don ni bshad zin to/ /rnal 'byor gsum gyi 'bras bu dag nyid ces bya ba ni gsum ni dang po'i rnal 'byor dang / dkyil 'khor rgyal po mchog dang las rgyal po mchog gi mtshan nyid can dang rigs brgya'i dbye ba'i bdag nyid can rnams kyi 'bras bu ni lus rnam par dben pa ste/de'i bdag nyid can de'i rang bzhin no/ /rdzogs pa'i rim pa'i rdo rje bzlas pa la rnal 'byor gsum po ni 'jug pa la sogs pa dang / yi ge gsum gyi ngo bo rnams kyi 'bras bu ni ngag gis bzlas pa'i mtshan nyid can te/ de'i bdag nyid ni de'i rang bzhin no//sems rnam par dben pa'i rim pa la rnal 'byor rnam pa gsum po ni/ snang ba la sogs pa rnams kyi 'bras bu ni 'od gsal ba ste/ de'i bdag nyid can no/ /sgyu ma'i lus la rnal 'byor rnam pa gsum ni/ chos dang longs spyod dang sprul pa'i ngo bo rnams te/ 'bras bu ni kun rdzob kyi bden pa rnam par dben pa'o//de bzhin du mngon par byang chub pa'i rim pa la rnal 'byor rnam pa gsum ni stong pa dang / shin tu stong pa dang / stong pa chen po'i ngo bo rnams kyi 'bras bu ni thams cad stong pa'i rang bzhin 'od gsal ba ste/ de'i bdag nyid ni de'i rang bzhin no//de bzhin du zung du 'jug pa'i rim pa la rnal 'byor rnam pa gsum ni/ rgyu dang 'bras bu dang / de gnyis su med pa'i mtshan nyid can gyi 'bras bu ni gnyis su med pa'i mtshan nyid can no/ /de'i bdag nyid ni de'i rang bzhin no/ /de ltar don rnam pa gsum gyis de la mkho ba'i don brjod nas/de so sor rgyas par bshad pa bstan pa'i phyir de'i yan lag sngags kyi don so sor rgyas par bshad pa ni/ sngags kyi don dang ming zhes bya ba gsungs so/ /mchog dang zhes bya ba ni oM yig la sogs pa rnams kyis rnam par snang mdzad la sogs pa'i lha'i don ston par byed pa'i phyir ro//gnyis med ye shes mtshan nyid can/ /zhes bya ba ni yid skyob par byed pa'i don gyis gnyis su med pa'i ye shes kyi ngo bo ste/ rang bzhin gyis 'od gsal ba'i bdag nyid can gyi zung du 'jug pa'i ngo bo nyid kyi phyir ro/ /bshad kyis nyon zhes bya ba ni bcom ldan 'das kyis gsungs te/phyag na rdo rje nyan pa la sbyar ba'o/ /bshad kyis zhes bya ba ni brjod kyis so/ /de kho na nyid ces bya ba ni don dam pa'i ngo bos so/ /ji lta bus she na/ de'i phyir snying po zhes bya ba gsungs te/ snying po ni bskyed pa'i rim pa las so/ /snying po'i don gsungs pa zhes bya ba ni/ rdzogs pa'i rim pa'i rjes su 'brangs nas spros pa dang bral ba'i phyir ngag rnam par dben par 'bras bu skyed par byed pa'o/ /gzhan yang thog ma med zhi ba/ /zhes bya ba ni skye ba dang gnas pa dang / 'jig pa med pa nyid kyi phyir ro/ /zhi ba zhes bya ba ni snang ba thams cad gcod pas so/ / dngos dang dngos med zad pa'i gtso/ /zhes bya ba ni yod pa dang med pa'i rnam par rtog pa nye bar zhi bas so/ /gtso zhes bya ba ni khyad par byas nas 'byung ba'i phyir ro/ /de yang dkar po dang / nag po'i phyogs gnyis mi 'dor ba nyid kyis gsungs so/ /stong nyid snying rje dbyer med pa/ /zhes bya ba ni ji ltar rigs pa rim pa drug la shes rab dang snying rje bdag nyid gcig pa nyid kyi phyir ro//sngags don zhes bya ba ni yid skyob par byed pa'i don gyis ni sngags so/ /de'i don ni brjod par bya ba'i ngo bo'o/ /rig pa'i mtshan nyid ni zhes bya ba ni rig pa ni sbyor ba ste/ sngags kyi sgra'i brjod par bya ba ston pa nyid kyis don dam pa'i ngo bo'o//de nyid mtshan nyid gang la yod pa de la de skad ces bya'o/ /de ltar sngags kyi don slar rgyas par bshad pa bstan nas/ sngags kyi de kho na nyid kyi slar rgyas par bshad pa brjod pa'i phyir/ sngags kyi don ni skal bzang ste/ /zhes bya ba gsungs te/'chad par 'gyur ba'i mtshan nyid can las so/ /skal bzang zhes bya ba ni gdod ma nas ma skyes pa'i chos nyid kyi ngo bo nyid kyi chos thams cad yongs su shes pa nyid kyi phyir ro/ /rdzogs pa'i rim pa'i mtshan nyid can/ /zhes bya ba ni rang bzhin gyi gdod ma nas ma skyes pa'i chos nyid mtshon par byed pa a yig gi rnam par yongs su shes pa'o//rten pa med cing zhes bya ba ni bskyed pa'i rim pa las skyes pa'i lha'i mtshan nyid can rten spangs pa nyid kyi phyir ro/ /snang ba med ces bya ba ni rdo rje bzlas pa'i rim pa la brten nas 'jug pa dang gnas pa dang ldang ba spangs pa nyid kyi phyir ro/ /rang bzhin med pa zhes bya ba ni sems rnam par dag pa'i rim pas rang bzhin dang snang ba rnams la rang bzhin med par rtogs pa'o//mchog gi mchog ces bya ba ni mchog ni snang ba la sogs pa gsum pa'i mtshan nyid las so/ /mchog ni bzhi pa'i rnam pa'o/ /med ces bya ba ni bdag byin gyis brlab pa'i rim pas rjod byed spangs pa'i phyir ro//rnam pa med pa dang zhes bya ba ni mngon par byang chub pa'i rim pas rags pa dang phra ba'i rnam pa thams cad spangs pa nyid kyi phyir ro/ /'gyur ba med pa'i zhes bya ba ni tha dad pa'i rnam par rtog pa ma lus pa thams cad med pas zung 'jug gi rnam pa nyid kyi phyir ro//chen po'i mchog ces bya ba ni mi slob pa'i lam gyi rang bzhin nyid kyis shin tu yang mchog nyid kyi phyir ro/ /gnyis pa thams cad rnam spangs pa/ /zhes bya ba ni dngos po dang dngos po med pa dang / yod pa dang med pa'i spros pa nye bar zhi bas so/ /bde ba yang dag 'phel bar byed//ces bya ba ni lus dang sems kyi bde ba dang yid bde ba'i 'dod pa med pa dag la 'phel bar byed pa'o/ /shes bya thams cad cha dang bral/ /zhes bya ba ni shes bya'i rnam par rtog pa ma lus pa rnams kyis ma gos pa'i phyir ro/ /shes bya'i rtog pa thams cad las 'das pa snyam du byas nas so//gnyis med ye shes rnal 'byor skyes/ /zhes bya ba ni sngags kyi de kho na nyid kyi mtshan nyid de chos thams cad la a yig gi chos nyid kyis rjes su 'byed pa'i phyir/ gnyis su med pa'i sbyor ba ni chos nyid kyi rnam pas skyes pa zhes bya ba'i don to/ /'dis ni sngags kyi tshig bshad do//de kho na nyid kyi tshig bshad pa ni/ de nyid de ni zhes gsungs te/ de ci'i phyir zhe na/ don dam yang zhes bya ba ste/ mchog gi ye shes kyi yul nyid kyi phyir dang / rang nyid kyang mchog yin pa'i phyir dang / mchog ni dgos pa nyid kyi phyir ro/ /de ni de bzhin zhes bya ba ni rtag tu bcos ma ma yin pa'i ngo bos gnas pa'i phyir ro//gzhan nyid min zhes bya ba ni 'khrul pa med pa'i phyir ro/ /de nyid rdo rje 'chang ba'i dngos/ /zhes bya ba ni spros pa med pa nyid kyis rdo rje 'chang gi dbugs 'dzin pa'i ngo bo nyid kyi phyir ro/ /ye shes lnga yi rang bzhin ni/ /zhes bya ba ni me long lta bu'i la sogs pa ye shes lnga'i rang bzhin no//khyab pa'i zhes bya ba ni chos kyi phung po brgyad khri bzhi stong la khyab par byed pa'o/ /kun la zhes bya ba ni don dam pa'i rang bzhin med pas chos thams cad la 'gro ba med pa'i phyir ro/ /stong pa nyid ces bya ba ni rdzas su yod pa la mngon par zhen pa bzlog pas so//nyon mongs pa thams cad rab tu 'joms zhes bya ba ni rnam par rtog pa thams cad 'joms par byed pa'i phyir ro/ /dri med ces bya ba ni khyab bya'i ngo bo chos rnams kyi skyon gyis ma gos pa nyid kyi phyir ro/ /dri bral zhes bya ba ni rang bzhin gyis rnam par dag pa'i ngo bo nyid kyis dri ma dang bral ba'o//dang ba dang zhes bya ba ni dag pa'i shel lta bu nyid kyi phyir ro/ /rang gi rtogs pa'i go 'phangs zhes bya ba ni rang ni chos kyi dbyings te/ rtogs pa ni mngon du byed pa'o/ /de'i go 'phang ni 'dug pa'i gnas so/ /mchog ces bya ba ni kun nas nyon mongs pa'i chos kyi mtshan nyid dang bral ba'i phyir ro//dang po'i sangs rgyas zhes bya ba ni rang bzhin gyis yongs su dag pa'i ngo bos gdod ma nas chos thams cad rtogs pa nyid kyi phyir ro/ /shin tu dgyes zhes bya ba ni dri ma med pa'i rnam par dag pas shin tu yang dga' ba nyid kyi phyir ro/ /rigs lnga rnams ni rgyas par byed/ / ces bya ba ni de bzhin gshegs pa'i rigs lnga rnams las sad par byed pa'i don to/ /de ltar sngags kyi de kho na nyid kyi don bstan nas/ sngags kyi man ngag so sor rgyas par bshad pa brjod pa'i phyir de'i yan lag rang gi ngo bo ni man ngag ces bya ba gsungs te/ man ngag ni sngags kyi gdams ngag go//gnas kyi bye brag gis zhes bya ba ni rtsa gsum gyi gnas kyi dbye ba dang / gnas brgyad la reg pa'i dbye bas so/ /'khor lo'i dbye bas zhes bya ba ni phyi rol gyi 'khor lo'i dbye ba dang / me la sogs pa 'khor lo bzhi'i dbye bas so/ /btu bar bya zhes bya ba ni phyi rol gyi yi ge'i ngo bos so//nang du ni 'khor lo la brten nas so/ /gnas kyi bye brag gis gsungs pa gang yin pa de rgyas par bshad pa'i don du rtsa dang snying ga mgrin pa bad kan zhes bya ba gsungs te/ gnas brgyad du yang dag par reg pa zhes bya ba'i don to/ /rtsol ba zhes bya ba ni sbyor ba'o/ /'khor lo'i dbye bas btu bar bya//zhes bya ba rgyas par bshad pa ni/ de bzhin du ni las rnams bya/ /zhes gsungs te/ de bzhin du ni las rnams bya ba ni me'i dkyil 'khor la sogs pa rnams la thun phyed phyed kyi bar du dbugs gzung bas dbang du bya ba la sogs pa'i las bsgrub par bya'o/ /zhi ba la sogs zhes bya ba ni dbang du bya ba la sogs pa'o//go rims bzhin zhes bya ba ni ji ltar srid par 'byung ba'i dkyil 'khor rnams kyi rjes su 'brangs nas so/ /dngos grub bzhin bya ba ni rdo rje'i bzlas pa'i dngos grub bo/ /ye shes de zhes bya ba ni dus gsum du gnas pa'i de bzhin gshegs pas yongs su mkhyen pa'o//ji ltar nyams su myong mtshan nyid/ /ces bya ba ni me'i dkyil 'khor la sogs pa'i dbugs rnams ni 'byung ba dang / 'jug pa dang / gnas pa'i bdag nyid can rnams kyis nyams su myong ba'i rim pa'o/ /ji ltar rang bzhin rdzogs pa ji lta bus zhes bya ba ni a yig dang haM yig gi bdag nyid can rang bzhin gyi bzlas pa rdzogs pa dang bskyed pa'i rim pa la/yi ge gsum yongs su gyur pa las de bzhin gshegs pa gsum rdzogs pa'o/ /rgyun gyi dbye ba ji bzhin du/ /zhes bya ba ni rgyun ni rnam par ma dag pa la dbye ba ni rnam par dag pa nyid skyed pa'o//rigs pa ji bzhin zhes bya ba ni dkyil 'khor re re la nyi shu rtsa lnga dang bcas pa'i nyis brgya'i grangs kyis so/ /sbyor ba ji bzhin zhes bya ba ni dkyil 'khor re re la de las gzhan pa'i dkyil 'khor gyi cha brtsis pas dbugs dgu brgya'i grangs kyis so//'bras bu ji lta ba bzhin gnas/ /zhes bya ba ni rdo rje bzlas pa'i ngo bo rnam pa bcu gcig nyi khri chig stong drug brgya'i bdag nyid can no/ /yang dag bsam gtan phyag rgya'i rim/ /zhes bya ba ni bskyed pa'i rim pa rnam pa gnyis bsgoms pas rang gi lus ma dmigs pas lhag mos kyi phyag rgya chen po'i ngo bo la sems pa'o//yang dag ces bya ba ni bden pa'i rnam par rtog pa'i gnyen po nyid kyis so/ /de nyid kyi phyir gzugs rdzogs pa zhes gsungs te/ sangs rgyas lnga la sogs pa'i dbye bas phyag rgya chen po'i rnam par rtog pa zhes bya ba'i don to//de lta bur gyur pa'i sngags kyi man ngag ces bya ba ni snga ma dang 'brel par bya'o/ /de ltar rang gi ngo bo bstan nas/ de nyid la bla ma'i gdams ngag gis thob par bya ba brjod pa'i phyir/ bla ma'i zhal la gnas zhes gsungs te/ de lta bur gyur pa'i man ngag rdo rje slob dpon gyi zhal la gnas pa'o//yang dag bslab par bya zhes bya ba ni bla mas bsnyen pa la sogs pa sngon du 'gro bas brtsal bar bya'o/ /rab tu 'bad pas zhes bya ba ni le lo la sogs pa spangs nas zhes bya ba'i don to/ /de ltar de nyid la bla ma'i gdams ngag thob par bya ba nyid bstan nas/ bla ma mnyes par bya ba brjod pa'i phyir/ gser dang zhes bya ba la sogs pa gsungs te/ gser la sogs pa rnams kyis so/ /do shal gos dang ni zhes bya ba ni shin tu 'jam pa'i reg bya can dar la sogs pa rnams kyis so/ /rin chen zhes bya ba ni in+d+ra nI la dang / ma ra ka ta dang / pad+ma rA ga la sogs pa rnams kyis so//sna tshogs yon tan mchog ces bya ba ni rang rang gi mthu'i che bas shin tu yon tan phun sum tshogs pa dang ldan pa rnams kyis so/ /bran dang zhes bya ba ni dus cung zad yongs su spyod pa rnams kyis so/ /las byed pa zhes bya ba ni ji srid 'tsho'i bar du shin tu gus par byed pa'o//grangs med pa dang zhes bya ba ni dpag tu med pas so/ /dad cing gus pa la sogs kyis/ /zhes bya ba ni mi mthun pa'i dngos po spangs pa'i ngo bo khyad par can gyi dad pa nges pa la sogs pa rnams kyis so/ /mnyes par bya zhes bya ba ni 'chad par 'gyur ba dang 'brel pa'o/ / ci zhig gis mnyes par bya zhe na/ de'i phyir ji ltar 'dod pas ster ba zhes bya ba gsungs te/ ji ltar 'dod pas slob mas mngon par 'dod pa'i don rab tu ster ba'o/ /ston pa zhes bya ba ni slob mas dbang bskur ba la sogs pa nas brtsams nas/ thos pa la sogs pa rnams kyi ston pa'o/ / bla ma zhes bya ba ni khyad par can gyi yon tan la sbyor ba dang ldan pa'o/ /sngags kyi don ston zhes bya ba ni sngags kyi don de'i man ngag gi bdag nyid ston par byed pa'o/ /mnyes par bya zhes bya ba ni bstan par bya ba'o/ /rab tu 'bad pas zhes bya ba ni de dang de'i bsam pa 'dzin pa'i ngo bo brtson 'grus kyis so//chags pa bral ba'i sems kyis zhes bya ba ni zhen pa dang bral ba'i 'dzin pa la sogs pas so/ /sems kyis zhes bya ba ni lhag pa'i bsam pas zhes bya ba'i don to/ /de ltar bsam pa rdzogs byas nas/ /zhes bya ba la de ltar zhes bya ba ni snga ma bzhin du'o/ /bsam pa rdzogs byas nas zhes bya ba ni bla ma dang 'brel pa'i sems kyis so//gang gis she na/ de'i phyir/ rnyed par dka' ba'i dngos rnams kyis/ /zhes gsungs te/ man+dA ra ba'i dngos po dbul ba'i rnam pa rnams kyis so/ /phyag byas zhes bya ba ni lus la sogs pa rnams kyis so/ /de zhes bya ba ni yang dag par bstan par byed pa'i bla ma las so//sngags zhes bya ba ni 'chad par 'gyur ba'i yi ge gsum mo/ /yang dag ces bya ba ni the tshom med pa'i blos so/ /bzung nas zhes bya ba ni blang bar byas pa'o/ /'bras bu don gnyer zhes bya ba ni phyag rgya chen po'i mtshan nyid kyi 'bras bu mngon par 'dod pa rnams kyis so//de tsam gyis bla ma mnyes par bya ba bstan to/ /de ltar don rnam pa gsum gyis sngags kyi man ngag so sor rgyas par bshad pa bstan nas/ sngags btu ba'i so sor rgyas par bshad pa brjod pa'i phyir/ de'i yan lag de btu ba'i don du rten la sogs pa bstan pa ni/mi yi rus pa'i smyu gu dang / /zhes gsungs te/ mi'i rtsib ma'i rus pa las smyu gu byas nas so/ /rin chen rab bdar ba zhes bya ba ni mu tig gi phye ma la sogs pa rnams so/ /rab bdal ba zhes bya ba ni bkram pa'o/ /sa gzhi zhes bya ba ni gzhi ma'o/ /dur khrod thal ba zhes bya ba ni ro bsregs pa'i thal ba'o//yang na zhes bya ba ni de med na'o/ /las kyi dbye bas zhes bya ba ni dur khrod kyi sol ba dang / dur khrod kyi so phag la sogs pa tshon gyi bye brag gis mngon spyod la sogs pa'i dngos grub bsgrub ces bya ba'i don to/ /de ltar de btu ba'i don du/rten la sogs pa bshad nas/ de btu ba po'i bye brag brjod pa'i phyir/ thog mar dbang bskur blangs byas nas/ /zhes bya ba gsungs te/ bla ma'i drung nas gsang ba 'dus pa'i rgyud kyi rjes su 'brangs nas dbang bzhi bzung ste/ thog ma ni sngags btu ba las dang por ro/ /dkyil 'khor la sogs mdun du byas//zhes bya ba ni rdul tshon gyi dkyil 'khor dang / thun mong ba'i dkyil 'khor bya ba la sogs pas rnam par dag pa byas pas so/ /bgegs mthar byed la zhes bya ba ni bdud rtsi 'khyil pa la'o/ /gtor ma che zhes bya ba ni gtor ma chen po ste/ chang dang sha la sogs pas rgya che ba'o//sbyin zhes bya ba ni sbyin pa la sogs pa'i rim pas de bsgrub sngon du 'gro ba byas nas so/ /lha'i khang par zhes bya ba ni lha'i khyim la sogs par ro/ /sngags btu ba zhes bya ba ni de'i rjes la 'chad par 'gyur ba'i sngags so/ /mtshungs pa med pa'i zhes bya ba ni ma btus pa'i sngags dang mtshan nyid dang bral ba nyid kyis yongs su dag pa'o//sku gsung thugs ni sgrub byed pa'o zhes bya ba ni rnam par ma dag pa'i lus la sogs pa bzlog pas lha'i rnam pa'i lus la sogs pa sgrub par byed pa zhes bya ba'i don to/ /de ltar de btu ba po'i khyad par bstan nas sngags btu ba rang gi ngo bo bshad pa'i phyir/dang po'i yi ge thog mar bri/ /zhes bya ba gsungs te/ dang por ni dbyangs yig rnams kyi dang po a yig bri bar bya'o/ /dbyangs yig lnga pa yang dag ldan/ /zhes bya ba ni dbyangs yig lnga pa u yig yang dag par ldan pa'o/ /de ltar na a'i yi ge pha rol du bya ste/ yi ge a ni or 'gyur te/ u yig mi snang bar 'gyur ro/ /de ltar na o zhes bya bar 'gyur ro/ /sde tshan mtha' ma'i mtha' can ldan/ /zhes bya ba ni/ ka la sogs pa ni sde tshan/ /lnga pa'i mtha' ma ni pa'i sde tshan no/ /de'i mtha' ma'i mtha' can ni ma'i yi ge ste/ de dang ldan pa ni klad kor dang bcas pa'o//de ltar na yi ge oM zhes bya bar 'gyur ro/ /sku yi sa bon btu bar bya/ /zhes bya ba ni rnam par snang mdzad kyi sa bon zhes bya ba'i don to/ /thog ma'i yi ge zhes bya ba ni a'i yi ge'o/ /nyis 'gyur zhes bya ba ni a'i yi ge gnyis pas bsgyur ba'o/ /mnyam pa ni mtshungs pa pha rol du bya ste/a yig dang po ni ring por 'gyur ro/ /a yig gnyis pa ni mi snang bar byas te/ a ring por 'gyur ro/ /uSh+mA na yi cha dang ldan/ /zhes bya ba ni ha'i yi ge srog med pa dang ldan pa'o/ /sngags btu bya zhes bya ba ni de ltar na A zhes bya bar 'gyur ro/ /mtshungs pa med pa'i zhes bya ba ni tsheg drag gnyis kyi gnas su dbyangs yig med pa'i yi ge ha dang ldan pa'i phyir sngags gzhan gyi mtshan nyid dang bral ba'o//gsung gi rdo rje zhes bya ba ni snang ba mtha' yas kyi'o/ /snying po zhes bya ba ni de skyed par byed pa'i sa bon no/ /mchog ces bya ba ni ngag rnam par dag pa skyed par byed pa'o/ / uSh+mA na yi mtha' cha ldan/ /zhes bya ba la/ uSh+mA na ni ha yig ste/ /de rnams ni sha Sha sa ha ste zhes bya ba'i ming gis so/ /cha dang ldan zhes bya ba ni steng du zla tshes kyi cha dang ldan par byas so/ /dbyangs yig drug pas yang dag brgyan/ /zhes bya ba ni U yig gis 'og tu byas pas so//sde tshan mtha' ma'i mtha' mar bcas/ /zhes bya ba ni ma'i yi ge klad kor dang bcas par ldan pa'o/ /thugs kyi rdo rje go 'phang zhes bya ba ni mi bskyod pa'i sa bon no/ /gsal zhes bya ba ni cha lnga pa grags pas gsal ba'o/ /de ltar sngags btu ba'i ngo bo bstan nas/ de rnam par dag pa'i sgo nas de nyid kyi che ba'i bdag nyid bshad pa'i phyir/de nyid gsum zhes bya ba gsungs te/ lus ngag yid gsum gyi de kho na nyid kyi ngo bo'i phyir ro/ /rdo rje gsum gyi dam tshig ces bya ba ni rdo rje gsum ni rnam par snang mdzad la sogs pa rnams kyi dam tshig ni thugs bskul ba'i rgyur gyur pa nyid kyi phyir ro//'jig rten gsum yang 'grub par byed/ /ces bya ba ni de skyed pa po nyid kyi phyir dang spro ba dang sdud par byed pa'i rim pas de sdud par byed pa'i phyir ro/ /rnal 'byor pa'i zhes bya ba ni rim pa gnyis bsgom pa'o/ /de nyid mchog ces bya ba ni lus ngag yid gsum rnam par dag par byed pa nyid kyi phyir ro//sngags btu ba ni zhes bya ba ni sngon du gsungs pa'i rigs pas so/ /bla na med ces bya ba ni sdig pa thams cad zad par byed pa'i rgyur gyur pa'o/ /dngos grub thams cad byed ces bya ba spel ba sngon du 'gro bas las tshogs thams cad sgrub par byed pa nyid kyi phyir ro//de nyid ces bya ba ni yi ge'i ngo bo nyid kyis snang yang chos nyid kyi ngo bo yongs su mi 'dor ba nyid kyi phyir ro/ /sngags rnams kun gyi don bsdus pa/ /zhes bya ba ni snying po dang / nye ba'i snying po dang / phreng ba dang gzungs sngags la sogs pa rnams kyi don ni gsang ba gsum gyi rang bzhin gyis sdud pa ni de'i rang bzhin te/yi ge gsum med par de rnams med pa'i phyir ro/ /sngags rnams kun gyi gnas yin no/ /zhes bya ba ni sngags rnams thams cad kyi gnas ni snga ma bzhin no/ /rgyu dang mi rgyu nyid bzhin zhes bya ba ni ji ltar rgyu ba'i bcud kyi sems can rnams dang / mi rgyu ba'i snod kyi 'jig rten no//de bzhin du yi ge gsum ni sngags thams cad kyi rten du rig par bya'o/ /dngos grub rnams kyi rnal 'byor mchog /ces bya ba ni 'jig rten las 'das pa'i sku'i dbang phyug la sogs pa'i mtshan nyid can no/ /mchog ni mchog gi rnal 'byor te/ de'i bdag po nyid kyis de rnams 'byung ba'i phyir ro//rnal 'byor ye shes zhes bya ba ni de skyed par byed pa nyid kyi phyir ro/ /bla na med ces bya ba ni gsang ba gsum gyi rang bzhin nyid kyis 'di gzhan gang na med pa'i phyir ro/ /de ltar don rnam pa bzhis sngags btu ba so sor rgyas par bshad pa bstan nas/ da ni sngags bzlas pa'i phan yon brjod pa'i phyir/ de'i yan lag mdor bstan pa ni/ man ngag ji bzhin zhes bya ba la sogs pa gsungs te/ gang zhes bya ba ni bsgom pa'o/ /man ngag ji bzhin zhes bya ba ni ji ltar bla ma'i gdams ngag go/ /zlos pa zhes bya ba ni sngon du btus pa'i sngags ni tshig gam yid kyis 'jug pa la sogs pa rnams la sbyar ba goms par byed pa ste/de yi dngos grub rgya cher 'gro/ /zhes bya ba dang 'brel to/ /ci'i phyir zlos she na/ de'i phyir dngos grub phyir ni zhes bya ba gsungs te/ 'jig rten dang 'jig rten las 'das pa'i dngos grub kyi don du'o//ji ltar zhe na/ de'i phyir lung bzhin gyis zhes bya ba gsungs te/ ji ltar rgyud du bstan pa'i cho gas so/ /de'i zhes bya ba ni rnal 'byor pa'i'o/ /rgya chen ni rgya che ba dang zab pa'i rang bzhin no/ /dngos grub ces bya ba ni sangs rgyas kyi mtshan nyid can no/ /'gro zhes bya ba ni thob par 'gyur ba'o//tshe 'di nyid la zhes bya ba ni mthong ba'i chos nyid la'o/ /sngags shes pas zhes bya ba ni sngags kyi de kho na nyid la mkhas pa'o/ /de ltar sngags bzlas pa la phan yon mdor bstan pa bshad nas/ de rgyas par bshad pa'i phyir/ ye shes chen po zhes bya ba la sogs pa gsungs te/de zhes bya ba ni rnal 'byor pa'o/ /ye shes chen po zhes bshad pa'o zhes bya ba dang 'brel to/ /gnyis su med pa'i ye shes mngon du byed pas na ye shes chen po dang ldan pa'o/ /sku gsung thugs kyi rnal 'byor skyes/ /zhes bya ba ni rnam par ma dag pa'i lus ngag yid gsum bzlog nas rnam par dag pa'i lus la sogs pa skyed par byed pa'i phyir ro//gang zhig ces bya ba ni rnal 'byor pa'o/ /sngags bzlas zhes bya ba ni yi ge gsum mo/ /mtshungs pa med ces bya ba ni rang gi ngo bo dang 'bras bu las thun mong ma yin pa'o/ /'dod pa kun la longs spyod ces bya ba ni 'dod pa'i yon tan lnga la longs spyod par byed ces bya ba'i don to//'di tsam gyis rgyas par bshad pa bstan nas/ so sor rgyas par bshad pa brjod pa'i phyir/ gang zhig ces bya ba la sogs pa gsungs te/ gang zhig ni sgrub pa po'o/ /rtag tu zhes bya ba ni dus thams cad du'o//sngags zhes bya ba ni sngar bshad pa'i yi ge gsum mo/ /'chang zhes bya ba ni 'jog pa'am brjod pa'o/ /mgur bar zhes bya ba ni des mtshon pa'i kha la'o/ /yang na mgrin pas nye bar mtshon pa'i me la sogs pa'i dkyil 'khor gyi rnam pa la 'jug pa la sogs pa'i rim pas 'chang bar byed pa'o//de kho na nyid legs par shes/ /zhes bya ba ni mdzes pa'i de kho na nyid rig pas na de kho na nyid legs par shes pa'o/ /dbugs kyi 'khor lo nye bar mtshon pa nus pa 'am/ sngags kyi de kho na nyid yongs su shes pa'o/ /rtog pa kun yang 'grub par byed/ /ces bya ba ni rnal 'byor pa 'di la rtog pa thams cad ni zhi ba la sogs pa'i bya ba thams cad 'grub par 'gyur ba'o//dkyil 'khor kun du zhugs pa dang / /zhes bya ba ni dkyil 'khor la gtso cher yi ge gsum gyi rim pas rdzogs pa'i phyir dang / thams cad du ni dam tshig shes/ /zhes bya ba ni rgyud sde rnam pa lnga la yang 'os pa'i brda yongs su shes pa'i phyir ro//'jig rten gsum po sgrub ces bya ba ni 'jig rten gsum gyi zhi ba la sogs pa thams cad sgrub par byed pa'o/ /blo bzang zhes bya ba ni sngags kyi de kho na nyid yongs su shes pas mdzes pa'i blo gang la yod pa de la de skad ces bya'o/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u bco lnga pa'i rgya cher bshad pa'o// //de ltar le'u bco lnga pas sngags kyi de kho na nyid kyi yul la dri ba'i lan btab pa bstan nas/ da ni rlung gi grangs kyi rim pa dang gnas bstan pa dri ba'i lan brjod par 'dod nas le'u bcu drug pa ston par byed cing /dang por re zhig de rtsom pa ni/ de nas zhes bya ba la sogs pa gsungs te/ le'u bco lnga pa bshad pa'i rjes la'o/ /gzhan yang zhes bya ba ni snga ma la ltos nas khyad par can nyid kyi phyir ro//nyon zhes bya ba ni phyag na rdo rje nyan pa la sbyar ba'o/ /grangs kyi rim pa zhes bya ba ni rlung rnams la 'chad par 'gyur ba'i rigs pas bshad par bya zhes bya ba dang 'brel to/ /bla na med ces bya ba ni 'di las gong na med pas na bla na med pa'o/ /de yang rags pa'i grangs nas brtsams te/ shin tu phra ba'i grangs mtshon par byed pas so/ /ji ltar gnas pa'i zhes bya ba ni 'chad bzhin pa'i rim pas srog bskyed pa la rten nas so/ /ji skad du 'chad par 'gyur ba las/ bshang lam gsang ba'i bar gnas zhes bya ba gsungs so/ /rlung rnams kyi zhes bya ba ni srog la sogs pa rnams la'o//ji lta ba bzhin du zhes bya ba ni phyin ci ma log pa'i ngo bos so/ /sngon gyi rim pas go rims su/ /zhes bya ba'i don to/ /de ltar de rtsom pa'i rang gi ngo bo bstan nas dgos pa brjod pa'i phyir/ gang gis thob pa zhes bya ba gsungs te/ rlung gi mtshan nyid yongs su shes par gyur pas so//srog ni thob par byed ces bya ba dang 'brel to/ /srog ni rdul phra rab rang gi ngo bo'o/ /skal ba bzang zhes bya ba ni mngon par zhen pa thams cad bzlog nas stong pa nyid kyi ngo bo nyid kyis zhes bya ba'i don to/ /thams cad bdag nyid gnas zhes bya ba ni lus phung po lnga'i rang bzhin la khyad par byed pa nyid kyis rnam par gnas pa'o//gang gis yang dag yongs su shes/ /zhes bya ba ni rlung gang la phra mo'i ngo bo yongs su shes pas so/ /rnal 'byor mchog ni zhes bya ba ni srog stong pa nyid kyi rnam pa'o/ /thob par byed ces bya ba ni thob par byed pa'o/ /yang dag ces bya ba ni rigs pa'i cha'i spyod pa las brtsams nas/shin tu mtshon par dka' ba'i dus kyi cha'i ngo bos phyin ci ma log pa'o/ /de ltar rnams pa gnyis kyis de brtsams pa bstan nas/ dngos su de bstan pa bshad pa'i phyir/ de'i yan lag rlung gi bla na med pa'i mtshan nyid brjod pa'i yan lag rlung gi mtshan nyid yongs su mi shes pa'i nyes dmigs ni/rlung gi mtshan nyid mi shes phyir/ /zhes gsungs te/ phra mo'i rang bzhin 'chad par 'gyur ba rlung gi mtshan nyid yongs su ma shes na/ 'jig rten gsum ni rnam par 'khor/ /zhes bya ba gsungs te/'dod pa dang / gzugs dang / gzugs med pa'i mtshan nyid can 'gro ba gzhan dang gzhan du skye bar 'gyur ba'o/ /goms pa thob pa de yang ni/ /zhes bya ba ni rlung gi rang bzhin mtshon par byed pa'o/ /goms pa zhes bya ba ni yang dang yang du mngon du phyogs par byas pas so/ /thob pa zhes bya ba ni rnyed pa'o//de yang bla ma'i kha las zhes bya ba ni bla ma ni rdo rje slob dpon no/ /de'i sbyor ba shes pa'i kha las so/ /rlung de'i mtshan nyid nye bar mtshon pa la sbyor ba ni de'i sbyor ba'o/ /de shes pas na de'i sbyor ba shes pa'o/ /de'i sbyor ba shes pa'i kha ni de'i sbyor ba shes pa'i kha ste de las so//de ltar rlung gi mtshan nyid yongs su ma shes pa'i nyes dmigs bstan nas/ de'i mtshan nyid bshad par dam bca' ba brjod pa'i phyir/ rlung gi mtshan nyid ji bzhin du/ /zhes bya ba gsungs te/ srog gi rang bzhin gyi rlung gi'o/ /mtshan nyid ces bya ba ni rang gi ngo bos mtshan pa'o//ji srid du/ lo tshigs kyi zhes bya ba ni phyi'i dus kyis bsdus pa'i lo tshigs kyi mtshan nyid do/ /bshad par bya zhes bya ba ni brjod par bya ba'o/ /mdor bsdus nas ni zhes bya ba ni mdor bsdus pas so/ /sprin gyi dbal zhes bya ba ni dang po'i sangs rgyas rdo rje phreng ba'i rgyud chen por ji ltar rgya cher bshad pas de'i rjes su 'brangs pa nyid kyis 'dir ni bsdus nas bshad par bya zhes bya ba'i don to//de ltar mtshan nyid bshad par dam bca' ba bstan nas/ dngos su de'i bshad pa ni dus ni drug ces bya ba la sogs pa gsungs te/ dpyid dang / sos ka dang / dbyar ga dang / ston dang / dgun stod dang / dgun smad kyi dbye bas so/ /mdor bsdus nas ni zhes bya ba ni mdor bsdus pas so/ /lo tshigs zhes bya ba ni lo'o/ /yongs su grags zhes bya ba ni brjod pa'o/ /gal te de ltar yin na dus drug gis lor brjod pa yin na/ 'o na dus ji lta bu yin zhe na/de yi sbyor ba gnyis ni dus yin te/ /zhes bya ba gsungs te/ nyi ma'i khyim gnyis la longs spyod pa'i mtshan nyid can gyi zla ba gnyis kyi dus so/ /dus gnyis bshad pa'i phyir ro/ /dus de nyid zhag drug cu'o zhes gsungs te/ nyin zhag drug cu ni dus zhes brjod par bya'o/ /gal te de ltar yin na nyin zhag gi tshad ji tsam du 'gyur zhe na/de'i phyir/ nyin dang mtshan du nges pa la/ /zhes bya ba gsungs te/ phal che ba'i dgongs pas mtshan mo dang nyin mo'i dbye bas nyin zhag ces bya ba'i grangs su 'gro ba'o/ /nges pa la zhes bya ba ni dbyu gu drug cu'i dgongs pas zhes bya ba'i don to//nyin mtshan gyi tshad ji tsam zhe na de'i phyir/ nyin mtshan dbyu gu drug cu'o/ /zhes bya ba gsungs te/ phyi rol du zla ba dang nyi ma'i rgyu ba brjod par 'dod pas/ phal cher ni dbyu gu drug cus nyin mtshan gyi grangs so/ /'od gsal gyi skad cig gi mtshan nyid kyis chu tshod bzhi'i grangs la mi ltos pas so//de ltar na nyin mo chu tshod sum cu tham pa dang / mtshan mo yang de ltar ro/ /'o na chu tshod kyi grangs ji lta bu zhe na/ de'i phyir/ chu tshod tsa sha ka zhes grags/ /zhes gsungs te/ re zhig phyi rol du ni chu srang drug cu la chu tshod kyi tshad de/ tsa sha ka zhes bya ba ni ming gi rnam grangs so/ / tsa sha ka'i tshad kyang ji lta bu zhe na/ de'i phyir/ 'byung dang rngub pa'i dus drug la/ /tsa sha zhes ni rab tu grags/ /zhes bya ba gsungs te/ dbugs 'byung ba dang rngub pa drug gi tsa sha zhes rab tu grags pa ni brjod pa'o/ /skad cig ma drug la ni dbugs zhes bya ba ni/ dbugs 'byung ba dang /rngub pa'i grangs kyi skad cig ma drug la'o/ /de nyid se gol gtogs pa'i tshad/ /ces bya ba ni skad cig ma'i tshad ni se gol gtogs pa tsam mo/ /se gol gtogs pa'i tshad ji tsam zhe na/ de'i phyir/ thang cig gsum la skad cig go/ /zhes gsungs te/ thang cig gsum gyi tshad ni skad cig ma'i tshad do//de yang yungs kar bskor ba tsam/ /zhes bya ba ni thang cig gi tshad ni yungs kar gyi 'bru la lag pa'i mthil lan cig bskor ba tsam mo/ /dbugs gsum la ni thang cig brjod/ /ces bya ba ni nang du 'jug pa dang / gnas pa dang 'byung ba'i ngo bo dbugs gsum gyis thang cig ces brjod do//de ni yud tsam mo zhes bya ba ni dbugs kyi tshad ni yud tsam zhes brjod do/ /thang cig gsum la mig 'dzums te/ /zhes bya ba ni gcig gi ngo bo'i dbugs kyi rang bzhin gyi yud tsam gsum gyis ni mig 'dzums pa'o/ /de yang mig ni 'dzums pa tsam//zhes bya ba ni de yang zhes bya ba ni mig btsums pa'o/ /mig 'dzums pa zhes bya ba ni mig btsums pa tsam gyi tshad do/ /gal te de ltar yin na/ mig btsums pa'i tshad ni ji tsam zhe na/ de'i phyir/ tsam gsum la ni mig btsums te/ /zhes bya ba gsungs te/tsam yang tshad ji tsam snyam du mi shes na/ de'i phyir/ tsam ni thal mo brdabs pa'o/ /zhes bya ba gsungs te/ lag pa gcig gis lag pa gzhan la brdabs pa tsam zhes bya ba'i don to/ /nang du ni tsam po ji tsam du zhe na/ de'i phyir/ bde ba 'char ba gsum la tsam/ /zhes bya ba gsungs te/rnam pa gsum gyi bde ba'i gnas skabs la tsam por 'gyur ro/ /gal te de ltar yin na/ bde ba 'char ba gsum gyi tshad ji tsam yin zhe na/ de'i phyir/ de ni thig le 'pho ba'o/ /zhes bya ba gsungs te/ mchog gi rnal 'byor ma dang yang dag par sbyor ba las thig le ni kun rdzob pa ste/lan gsum du 'pho ba de ni bde bar brjod do/ /gal te de ltar yin na/ bde ba 'char ba'i tshad ji tsam yin zhe na/ de'i phyir/ sngags pa gsum la bde bar bshad/ /ces gsungs te/ 'jig pa skye ba'i gnas gsum la bde bar bshad pa'o/ /sngar ma byung ba'i dngos po nyams su myong bas sngags pa dang bde ba dag 'dra ba'i phyir ro//'di ni g.yang sa 'jigs par brjod/ /ces bya ba ni sngags pa rang gi ngo bo ni g.yang sa 'jigs pa'o/ /ri'i rtse mo la sogs pa las ltung ba las dogs pa skad cig ma'i ngo bo'o/ /gal te de ltar yin na/'jigs pa ji lta bu'i ngo bo zhe na/ de'i phyir/ dus gsum la ni 'jigs par bshad/ /ces gsungs te/ 'das pa la sogs pa'i dus gsum gyis te/ de las ma rdzogs pa de mi dmigs pa'i phyir ro/ /phra ba ni skad cig mtshan nyid ces bya ba ni shin tu thung ba'i dus kyi cha'i rang bzhin rnal 'byor pa rnams kyis reg par bya bas so so'i skye bo'i yul ma yin zhes bya ba'i don to//dus gsum gyi ngo bo yang ji lta bu yin zhe na/ de'i phyir 'das pa dang zhes bya ba la sogs pa gsungs te/ bya ba rdzogs pa ni 'das pa'o/ /da ltar dang zhes bya ba ni brtsams pa ma rdzogs pa'i mtshan nyid do//ma 'ongs pa yi mtshan nyid do/ /zhes bya ba ni bya ba yang dag par ma thob pa zhes bya ba'o/ /gal te de ltar yin na/ 'das pa la yang rnam par gzhag pa ji lta bu yin zhe na/ de'i phyir/ 'das pa'i mtshan nyid gsum du gsungs/ /zhes bya ba ni 'das pa dang / ma 'ongs pa dang / da ltar byung ba'i chas brtags pas so/ /de ltar yang ni skad cig gsum/ /zhes bya ba ni de bzhin du zhes bya ba'i don to/ /ma 'ongs skad cig gsum du bshad/ /ces bya ba ni sngar bshad pa bzhin no/ /de nas slar yang zhes bya ba ni de'i rjes la'o/ /de ltar skad cig gsum gyi cha/ /zhes bya ba ni re re la yang cha gsum du brtags pas so//de la cha gsum zhes bya ba ni da ltar ba'i cha gsum yang sngon bzhin du gsum du byas nas/ stong pa'i ngo bo brjod du med pa rnyed pa ste/ shin tu phra ba'i yongs su gcod pa stong pa'i phyir ro/ /de ltar dngos su bshad pa brjod nas/ srog gi mthar thug pa'i grangs kyi rang gi ngo bo bshad pa'i phyir/ji srid rtog pa zhes bya ba gsungs te/ phra zhing phra ba'i cha yongs su brtags pas so/ /de srid du rtog pa stong pa zhes bya ba ni phra mo'i rnam par rtog pa'i cha rnams kyis ma bsgribs pa'i gnyis su de kho na nyid thams cad nye bar zhi ba'i rnam pa'o//thos par 'gyur zhes bya ba ni mngon sum du 'gyur ro/ /rnal 'byor mchog ni mchog gi rnal 'byor gyi ngo bo'o/ /ji lta bu zhe na/ de'i phyir srog ni gnas na zhes bya ba gsungs te/ srog gi rlung stong pa'i ngo bo la'o/ /bla na med ces bya ba ni snang ba thams cad nye bar bcad pas de la gong na gzhan med pa'i phyir ro//rnam par rtog pa'i grangs las 'das/ /zhes bya ba ni yul dang dus dang rnam pa rnams dang bral ba'i phyir ro/ /de la phyogs kyi sgras ni shar dang la sogs pa'i yul brjod do/ /dus kyi sgras ni/ dus ni ston dpyid la sogs pa dang ldan pa'o/ /rnam par rtog pa'i sgras ni rnam pa ste/de la rtog par bya ba nyid kyi phyir ro/ /de ltar na phyogs dang dus dang rtog pa rnams so/ /de rnams dang 'das pa ni stong pa zhes bya ba'i don to/ /rigs pa'i mtshan nyid spangs pa dang / /zhes bya ba ni mngon sum dang rjes su dpag pa dag gis yongs su gcad par bya ba ma yin pa'i phyir ro//de'i srog ni shar nas zhes bya ba ni srog ni skyed par byed pa'o/ /thim zhes bya ba ni de nyid la snga ma bzhin du brjod du med pa rtogs pa'i bdag nyid can no/ /de'i zhes bya ba ni srog gi rlung rnam par shes pa dang bcas pa la'o/ /gnyis med ces bya ba ni tha dad pas yongs su chad pa med pa nyid kyi phyir ro//de nyid bsdus pa zhes bya ba ni brjod du med pa'i go 'phang bsdus pa'i ngo bo'o/ /mthar thug pa'i gnas skabs su phra ba'i cha gang la yang mi dmigs pa'i phyir zhes bya ba'i don to/ /de ltar don rnam pa bzhis rlung gi bla na med pa'i mtshan nyid bstan nas/srog gi 'char ba'i rim pa brjod pa'i phyir/ de'i yan lag bshad par dam bca' ba ni/ gzhan yang bshad par bya yis nyon/ /zhes bya ba la sogs pa gsungs te/ phyag na rdo rje thos pa la sbyar ba'o/ /gzhan yang zhes bya ba ni snga ma la ltos nas khyad par du byas pa'o//srog ni thim dang 'char ba yis/ /zhes bya ba ni 'char ba ni skyed pa'o/ /thim pa ni 'jig pa'o/ /srog ni bshad par bya zhes bya ba dang 'brel pa'o/ /de ltar bshad pa dam bca' ba bstan nas/ dus kyi nges pa brjod par bya ba'i phyir/ ji srid skad cig la sogs rtogs//zhes bya ba la sogs pa gsungs te/ skad cig ni brjod du med pa'i ngo bo'o/ /brjod du med pa'i rjes la rags pa'i grangs kyi mthar thug pa'i rtog pa'am/ yod pa dang med pa'i spros pa'i rtog pa'o/ /ji srid ces bya ba ni dus ji srid kyi bar du'o/ /kun nas zhes bya ba ni rnam pa thams cad kyis so//rab tu ma zhi ba zhes bya ba ni rnam par ma log pa'am/ spong ba ma yin pa'o/ /de srid srog gi zhes bya ba ni dus de srid kyi bar du srog gi rlung gi gnas zhes bya ba ni rten no/ /rten ni shes pa ma yin te/ gang gis she na/ de'i phyir/ thar pa 'dod pa'i rnal 'byor pas//zhes gsungs te/ de ltar dus kyi nges pa brjod nas/ srog gi bskyed pa'i ngo bo nyid brjod pa'i phyir/ bshang sgo gsang ba'i zhes bya ba gsungs te/ bshang sgo yang yin la gsang ba yang yin pas na bshang sgo gsang ba'o/ /de dag gi dbus ni bar ro/ /der gnas pas na de la gnas pa'o//ming ni ma skyes zhes bya ba ni ma skyes pa zhes brjod pa ste/ skye ba dang 'jig pa spangs pa'i phyir dang / sems kyi khams ma lus pa las 'byung bar 'gyur ba ste/ 'di las ma lus pa skyes pa zhes bya ba byas nas so/ /cha chen po zhes bya ba ni cha yang yin la chen po yang yin pas na cha chen po'o//chen po'i sgras ni skye ba dang 'jig pa spangs pa nyid 'di la gsungs te/ gang yang bshang sgo dang gsang ba'i dbus su gnas pa ste/ ji ltar ma lus pa skyed par byed cing / gang gi phyir dbus ni don med pa ste/ de bas na sangs rgyas thams cad kyi rgyud phyi ma'i man ngag gis brjod par bya ste/gsang ba'i mdud pa'i gnas so/ /bshang sgo ni rdo rje'i kha'o/ /de dag gi dbus gang yin pa de ni bar te/ thams cad kyi ngo bo dang bral ba lhan cig skyes pa'i gnas zhes bya ba'i don to/ /de ltar ni ma yin te/ gang zhig 'jig rten du grags pa de'i don dang bcas par 'gyur ro//de yang rnam shes dang bral ba/ /zhes bya ba ni gang gi phyir thams cad kyi ngo bo dang bral ba'i gnas la rnam par shes pa zhes bya ba cung zad kyang yod pa ma yin no/ /rnam par shes pa med pas kyang rnam par gzhag pa ji ltar yin pa'o/ /rnam par shes pa med pa ci'i phyir thams cad stong pa'i rang bzhin ye shes med pa gang du de yod pa de thams cad rigs pas de'i bdag nyid kyis yod do//de ltar gang zhig gnyis su rtog pa spangs pa'i gnas de ye shes kyi lus las 'das pa'o/ /de nyid kyi phyir/ ye shes lus ni bdag med pa//zhes bya ba gsungs te/ de nyid ni yang dag par bdag med pa'i gnas so/ /de nyid kyi phyir na/ ye shes lus ni bdag med pa/ /zhes bya ba de ni/ cha chen po yi bdag med pa/ /zhes bya bar dgongs so/ /der ni srog ni skyes pa mchog /ces bya ba ni de mchog gi dbang phyug gi bdag med pa las mchog ni mchog tu gyur pa ste/srog gi sgras ni mchog dga' ste/ gang gi phyir thams cad gso bar byed pa'o/ /kha cig kun gzhi rnam par shes pa zhes smra'o/ /srog chags rnams kyi zhes bya ba ni gang la srog yod pa de rnams ni srog chags rnams so//mchog tu brjod ces bya ba ni bla na med pa'i don sgrub pa'o zhes bya ba ni dga' ba'i 'od zer gyi phreng ba byed pa'i mkhan po'o/ /gzhan dag ni bshang sgo gsang ba zhes bya ba ni shes rab dang 'brel pa'i dbus su gnas pa ni/ chos 'byung gi dbus su gnas pa'o/ /ming ni ma skyes zhes bya ba ni ma skyes pa zhes bya ba rnam par rtog pa thams cad kyi gnyen po nyid kyi phyir ro//cha chen po zhes bya ba ni mngal gyi rtsa'i bdag nyid can nyid kyi cha chen po'i ri bong gis mtshan pa'i ngo bo'i rten gyi phyir ro/ /de yang zhes bya ba ni chos 'byung gi rtsa'o/ /rnam shes dang bral ba zhes bya ba ni rtag tu de dang lhan cig ma 'grogs pas bems po'i rang bzhin no//ye shes lus ni zhes bya ba ni dngos po la phyi rol gyi don med kyang de'i snang ba'i rnam par shes pa'i rang bzhin no/ /yang na bar ma do'i ngo bo rnam par shes pa dang 'brel pas ye shes kyi lus can no/ /bdag med pa zhes bya ba ni lhag par gnas pa po bdag la sogs pa 'ga' zhig med pa'i phyir ro//der ni skye ba zhes bya ba ni chos 'byung gi rtsa la'o/ /srog gi mchog ces bya ba ni rnam par shes pa'i bzhon pa'i ngo bo srog gi rlung mngon du byas pa'i dge ba dang mi dge ba'i las kyi stobs kyis so/ / skyes pa zhes bya ba ni mer mer po la sogs pa'i ngo bos skyes pa zhes bya ba'i don to/ /srog chags rnams kyis zhes bya ba'i ni lus blangs pa rnams kyis so/ /mchog tu brjod ces bya ba ni de dang de'i las kyi dbang gis dam pa ma yin pa dang 'brel pa yang rang gi ngo bo mi 'dor ba'i phyir ro/ /de ltar srog 'char ba'i ngo bo bstan nas/de las kyang phung po la sogs pa bskyed pa brjod pa'i phyir ro/ /rnam par shes pa'i ngo bo rten/ /zhes bya ba gsungs te/ de nyid ni srog gi rlung bar ma do'i srid pa'i ngo bo la brten nas so/ /thog mar 'byung ba bzhi po la/ /zhes bya ba ni thog ma ni dang po'o//'byung ba bzhi po la zhes bya ba ni mer mer po'i gnas skabs la sogs pa 'byung ba chen po bzhi la'o/ /skyes pa yi ni ngo bor byed/ /ces bya ba ni rang gi ngo bo bskyed nas zhes bya ba'i don to/ /rang gi gnas su zhes bya ba ni ma skyes pa'i rtsa'i gnas la'o/ /thim zhes bya ba ni/ brgyal bar 'gyur bar zhes bya ba'i don to/ /rnam shes las ni zhes bya ba ni rim pas yongs su smin pa thob pa las so/ /rlung skye'o zhes bya ba ni phung po lnga'i bdag nyid kyi rlung gi rnam pa'o/ /de las zhes bya ba ni rlung las so/ /me ni skye bar 'gyur zhes bya ba ni dro ba'i mtshan nyid can 'byung ba'o//chu ni zhes bya ba ni gsher ba'i rang bzhin can no/ /'byung bar 'gyur zhes bya ba ni skye bar 'gyur ba'o/ /de las zhes bya ba ni chu las so/ /sa ni sa'i ngo bo sra ba'i mtshan nyid can las so/ /'byung bar 'gyur ba ni bskyed pa'o/ /de dag rnams las zhes bya ba ni 'byung ba chen po bzhi yongs su smin pa'i gnas skabs rnams las so//phung por zhes bya ba ni lnga rnams la'o/ /'byung zhes bya ba ni skye ba'o/ /de phyir zhes bya ba ni phung po lnga'i mtshan nyid can las so/ /skye mched rnams dang ni zhes bya ba ni mig la sogs pa nang gi skye mched dbang po'i rlung dang lhan cig tu gyur pa'o//de las rnam shes rang bzhin rnams/ /zhes bya ba ni de las zhes bya ba ni nang gi skye mched yul rnams kyis khyad par du byas pa las so/ /rang bzhin rnams ni ye shes gsum dang lhan cig tu 'gyur bas rang bzhin 'byung bar 'gyur te/ grangs bstan pa'i phyir brgya dang brgyad kyis lhag pa'i zhes gsungs te/sngar bshad pa bzhin no/ /rim zhes bya ba ni 'di ni mtshon par byed pa ste/ cig car yang dus 'ga' zhig gi tshe na 'byung bar 'gyur zhes bya ba'i don to/ /dga' ba'i 'od zer gyi phreng ba byed mkhan 'di skad ces smra ste/ rnam par shes pa'i ngo bo rten//zhes bya ba ni rnam par shes pa'i ngo bo stong pa nyid gsum gyi mtshan nyid do/ /gang gi phyir de la brten nas skye bar 'gyur te/ dang po ni ma rig pa'i mtshan nyid do/ /gnyis pa ni sems las byung ba'o/ /de ltar stong pa nyid gsum gyi mtshan nyid dus gsum du spyod pa'i las so//de yang snang ba gsum gyi bdag nyid can de snang ba gsum gyi bdag nyid kyi phyir dngos po kun gyi bdag nyid ni mchog dga'o/ /de bas na nang gi bdag nyid kyis 'byung ba bzhi pos srid pa'i rten ye shes rnam par 'byed par byed pa zhes bya ba sra ba la sogs pa rang gi rang bzhin du sgro btags nas rang gi gnas gsum du thim par 'gyur ro//rang gi gnas ni bdag med pa'i go 'phang zhes brjod par bya'o/ /de las zhes bya ba ni rgyu de las zhes bya ba'i don te/ lugs 'dis 'byung ba chen po la sogs pa'i rim pa'i ye shes gsum dang /rang bzhin dang snang ba skyed par 'gyur zhes rtogs par bya'o/ /de ltar don rnam pa bzhis srog las 'byung ba'i rim pa bstan nas/ de nyid kyi thim pa'i rim pa rgyas par bshad pa'i phyir/ de'i yan lag de rtsom pa ni/ ji ltar skye ba de ltar gnas/ /zhes bya ba gsungs te/'byung ba chen po dang phung po dang skye mched la sogs pa ji ltar skyes pa de ltar de nyid du zhes bya ba ni rlung gi ngo bo la'o/ /thim nas 'gro ba zhes bya ba ni nye bar sdud par 'gro ba'o/ /rang bzhin zhes bya ba ni las kyi bag chags kyi dbang gis so/ /dga' ba'i 'od zer gyi phreng ba byed pa'i mkhan po ni/ji ltar zhes bya ba ni rnam pa gang gis dang por skye ba'o/ /de ltar ni rnam pa de nyid kyis thim nas so/ /gang gi phyir de rnams la 'gro ba gzhan med de ji ltar rnam par 'gyur ba rnam par gsal ba sprin gyi sgras khyab pa'i chu 'dzin pa'i tshogs rnams kyis sprin gyi tshogs rnams ma lus pa'i nam mkha'i ngo bo la khyab nas de nyid du thim par 'gyur ba'o//rang bzhin de nyid ces bya ba ni rang nyid kyis zhes bya ba'i don to/ /de ltar de byed pa rtsom pa bshad nas/ de nyid kyis thim pa rgyas par bshad pa'i ngo bo nyid brjod pa'i phyir/ rgyags pa bskyed pa'i rlung chen po//zhes bya ba gsungs te/ zla ba dang nyi ma'i 'chi ltas byung ba'i rjes la'o/ /rgyags pa bskyed pa zhes bya ba ni thur sel gyi rlung gi ngo bo'o/ /nyon mongs yid ni skul bar byed/ /ces bya ba ni rang gi bag chags dang rnam par smin pa'i stobs kyis rnam par shes pa bskul ba ste/skye mched rnams ni sdud par byed pa zhes bya ba dang 'brel to/ /skye mched dang lhan cig par 'gyur ba'i rlung lnga por stobs chung bar byas nas/ rim gyis za bar byed ces bya ba'i don to/ /ci zhig byas nas she na/ de'i phyir/ stobs thob nas ni rnam rgyal te/ /zhes bya ba gsungs te/sdud pa'i gnas skabs su skye mched rnams nye bar sdud pa'i ngo bo stobs thob nas so/ /de las rgyags pa chu yi rlung / /zhes bya ba ni mnyam gnas kyi ngo bo'o/ /rgyags pa bskyed pa zab pa'i phyir/ /zhes bya ba ni thur sel gyi rlung gi ngo bo'o/ /zab pa'i phyir zhes bya ba ni skye mched nye bar sdud par byed pa la bya ba byas pa'o//phung po rnams kyang sdud byed nyid/ /ces bya ba ni phung po lnga po rnams so/ /rim gyis lus chen sgrogs zhes bya ba ni nus pa bcom par byas nas so/ /lus chen zhes bya ba ni lus thams cad la khyab par 'gro bas 'dod pa'i phyir ro//de las rgyags pa'i cha ni 'byung / /zhes bya ba ni gyen du rgyu ba'i rlung gi ngo bo'o/ /rgyags pa'i chu zhes bya ba ni mnyam gnas kyi ngo bo'o/ /'byung ba rnams ni bsdus nas kyang / /zhes bya ba ni sa la sogs pa rnams so/ /go rims ji lta ba bzhin du zhes bya ba ni/ rim pa gang zhig 'di nyid kyis sngar skyes pa'i rim pa de nyid kyis sdud par byed ces bya ba'i don to//de las rlung gi btang bzung 'byung / /zhes bya ba ni srog gi rlung gi ngo bo'o/ /'byung zhes bya ba ni 'chi ba'i gnas skabs su'o/ /rgyags pa'i cha ni za bar byed/ /ces bya ba ni rgyags pa'i cha ni gyen du rgyu ba'i rlung ngo //de nas kyang ni rlung mi sdud/ /ces bya ba ni 'di ni gnas pa'i gzugs kyi phung po'i rlung ngo / /khyab cing zhes bya ba ni lus kyi tshogs thams cad la khyab pa'o/ /phra ba zhes bya ba ni phra ba'i rgyus pa'i mtshams la gnas pa'o/ /sgrib par byed ces bya ba ni bar ma dor rlung dang lhan cig cung zad 'dres pa'i phyir ro//de las kyang mi zad btang bzung las zhes bya ba ni srog gi rlung gi ngo bo'o/ /drag shul zhes bya ba ni khyab byed kyi rlung za ba'i phyir ro/ /rnam shes zhes bya ba ni bar ma do'i rnam par shes pa'o/ /sgrib par byed ces bya ba ni khyab par byed ces pa'o//skad cig ces bya ba ni 'di ba'i phung po dor ba'i skad cig ma las so/ /bsgribs nas de la rnam shes kyis/ /zhes bya ba ni srog gi rlung gi bar ma do'i rnam par shes pa sgrib par byed pa'o/ /bems po song nas zhes bya ba ni sngon gyi las kyi stobs kyis sngon gyi gnas skabs ma dran pas so//brgyal bar 'gyur zhes bya ba ni dri zhim pa dang mi zhim pa'i bag chags kyi stobs kyis khyogs kyi bzhon pa lta bur zhes bya ba'i don to/ /dag pa'i cha ni sgrib par byed/ /ces bya ba ni rnal 'byor pas kyang rim pa gnyis bsgoms pa 'am/sngags dang rlung gi de kho na nyid bsgoms pa dang / 'byung ba dang rngub pa drug gi rjes su dran pa bsgoms pas so/ /dag pa'i cha zhes bya ba ni zla ba dang nyi ma'i 'brel pa'o/ /dag pa zhes bya ba ni yongs su dag pa'i sems kyi ngo bor nye bar mtshon pas so/ /ma skyes ye shes zhes bya ba ni gdod ma nas ma skyes pa'i chos nyid kyi rnam pa'o//mchog gi mchog ces bya ba ni srog gi rlung gis rnam par shes pa'i ngo bo mtshon pas so/ /de las thim par 'gyur ba'i srog ces bya ba ni rnam par shes pa dang lhan cig pa ste/ rlung gi ngo bo mtshon pas rnam par shes pa'i ngo bo nyid mtshon par byed pa'o//rnam shes dang ni mtshungs par ldan/ /zhes bya ba ni srog gi rlung rnam par shes pa'i chos nyid la sbyar ba'i phyir ro/ /de yang le'u sum cu rtsa bzhi pa sdud par byed pa'i mkha' 'gro ma'i zhes bya ba las rang nyid kyis 'chad par 'gyur te/'dir ni phyogs tsam zhig bstan pa'o/ /de ltar de nyid kyis thim pa'i rim pa rgyas par bshad pa'i ngo bo bstan nas/ nye bar bsdu ba brjod pa'i phyir/ de ltar bshad ces gsungs te/ sngon du gsungs pa'i rigs pas so/ /de nyid mchog gi rnal 'byor pa la bar ma de'i gnas skabs su de nyid sngon du 'gro ba'i ngo bo nyid kyi phyir ro//srog ni zhes bya ba ni srog gi rlung la'o/ /thim zhing 'char ba dang zhes bya ba ni yongs su ma shes pa'i gnas skabs na/ skye ba dang 'jig pa skyed pa'i ngo bo'o/ /ji lta ba bzhin zhes bya ba ni ji ltar gnas pa'i ngo bos so/ /yongs su shes zhes bya ba ni shes par bya ba'o//bla ma brgyud pa'i rim gyis 'byung / /zhes bya ba ni bla ma brgyud pa'i rim pas 'byung zhes bya ba'i don to/ /de ltar don rnam pa gsum gyis de nyid la thim pa'i rim pa rgyas par bshad pa bstan nas rdo rje'i sku sgrub pa la rigs pa brjod pa'i phyir/ de'i yan lag bshad par dam bca' ba ni/ rigs pa gzhan yang bshad par bya/ /zhes bya ba la sogs pa gsungs te/ ji ltar sngar bshad rigs pas sems can rnams 'chi bar mi 'gyur ba/ de ltar rigs pa gzhan zhes bya ba ni rnal 'byor pa la ltos nas khyad par can no/ / bshad par zhes bya ba ni brjod par bya'o/ /rdo rje'i sku ni sgrub pa'i phyir/ /zhes bya ba ni bstan pa'i lus nyid sgrub par byed pa'o/ /bcud len gyi sbyor ba'i thabs kyis zhes bya ba'i don to/ /des ci zhig bya zhe na/ de'i phyir gang gis zhes bya ba gsungs te/ rdo rje'i sku sgrub par byed pa'i rigs pas so//'chi med lus zhes bya ba ni gong du bstan pa'i lus so/ /lus mchog ni zhes bya ba ni khyad par can gyi kha dog dang dbyibs dang yang dag par ldan pa'o/ /thob pa ni rnyed pa'o/ /yon tan rnams kyi rten zhes bya ba ni gong nas gong du dge ba'i rtsa ba 'phel ba'i rgyur gyur pa nyid kyi phyir ro//yon tan rnams kyi rten zhes bya bar byas nas so/ /de ltar bshad par dam bca' ba bstan nas/ de bshad pa'i dgos pa brjod pa'i phyir/ gang phyir zhes bya ba la sogs pa gsungs te/ rtsod pa can gyi dus 'di la gang gi phyir sems can rnams tshe thung ba ni lo brgya tsam du thub pa ste/de la lo lnga bcu ni mtshan mo gnyid kyis zad par 'gyur ro/ /lo nyi shu rtsa lnga ni byis pa dang gzhon nu'i gnas skabs kyis so/ /lo nyi shu rtsa lngas kyang thos pa dang bsam pa dang bsgom pa yongs su rdzogs par mi 'gyur ro/ /de'i phyir tshe thung ba zhes bstan to//tshe thung ba'i sems can rnams kyis so/ /mi zad ces bya ba ni zad mi shes pa'o/ /thos pa dang bsam pa dang / bsgom pa rnams kyi go skabs med pa'i phyir ro/ /de'i phyir zhes bya ba ni gang gi phyir tshe thung ba rnams kyis cung zad kyang mi 'grub ste/ de'i phyir 'bad pa thams cad kyis zhes bya ba ni shin tu yang brtson 'grus drag pos so//brtan pa'i lus ni bsgrub par bya/ /zhes bya ba ni brten pa'i lus kyi thob pa la sogs pa nus pa'o/ /bsgrub par bya zhes bya ba ni bskyed par bya zhes bya ba'i don to/ /de ltar de'i bshad pa'i dgos pa bstan nas/de nyid kyi don rnams zhu ba po'i bya ba brjod pa'i phyir/ phyag byas zhes bya ba ni phyag na rdo rje zhu ba pos so/ /bcom ldan 'das zhes bya ba ni de bzhin gshegs pa drug gi ngo bo'o/ /zhus zhes bya ba ni gsol ba 'debs par byed ces bya ba'i don to/ /ci zhig byas nas she na/de'i phyir phyag byas nas ni zhes gsungs te/ lus la sogs pa'i sgo nas phyag dang bskor ba la sogs pa byas nas so/ /mgon po zhes bya ba ni sangs rgyas lnga'i gtso bo'o/ /ye shes mchog ces bya ba ni rang bzhin gyis 'od gsal ba'i rnam pa'o/ /rnal 'byor de nyid ces bya ba ni zung 'jug gi de kho na nyid do//pha rol byon zhes bya ba ni mthar thug pa thob pa zhes bya ba'i don to/ /ci zhig zhus she na/ de'i phyir/ 'chi ba med cing rigs par ni/ /zhes bya ba gsungs te/ 'chi ba med cing zhes bya ba ni gong du bstan pa'i mtshan nyid can no/ / rigs par ni zhes bya ba ni sbyor ba gang zhig go/ /ji ltar yang dag thob par 'gyur/ /zhes bya ba ni rnam pa gang gis phyin ci ma log pa nyid kyis 'gyur ro/ /de las zhus zhes bya ba ni phyi ma dang 'brel pa'o/ /rdo rje sems dpa' snying rje che/ /zhes gsungs te/ rdo rje ni stong pa nyid la sems dpa' ni dgongs pa gang la yod pa de ni rdo rje sems dpa' ste/de la bod pa gang yin pa de la de skad ces bya'o/ /snying rje che zhes bya ba ni/ snying rje chen po rnam pa gsum/ /zhes bya ba'i don to/ /de ltar bcom ldan 'das bstan du gsol zhes bya ba ni gsal bar mdzod cig pa'o//bcom ldan 'das zhes bya ba ni bod pa'o/ /de ltar de'i don nyid du zhu ba po'i bya ba brjod nas/ bcom ldan 'das kyis mdzad pa bstan pa'i phyir/ de'i yan lag bcom ldan 'das kyi gsung la 'jug pa ni de nas zhes bya ba la sogs pa gsungs te/gsol ba btab pa'i rjes la'o/ /bcom ldan 'das rdo rje zhes bya ba ni de bzhin gshegs pa drug pa'i rnam pa'o/ /de nyid bya ba kun bsgrub go 'phang ni/ /zhes bya ba dang 'brel to/ /bya ba rnams thams cad ni 'jig rten pa dang 'jig rten las 'das pa dag bskyed pa bzod pa mi nus pa'o//go 'phang zhes bya ba ni 'dug pa'i gnas so/ /brtan pa'i lus zhes bya ba ni gong du bstan pa'i ngo bo'o/ /ma pham pa zhes bya ba ni dus ma yin par 'chi ba rnams kyis pham par mi nus pa'o/ /yang dag ces bya ba ni phyin ci ma log pa'i ngo bos so//de nyid rnams nges pa zhes bya ba ni/ de nyid ni/ sangs rgyas kyi mtshan nyid can la khyad par du thos pa dang / bsam pa dang bsgom pa'i mtshan nyid can gyis rnam par nges pa zhes bya ba'i don to/ /de nyid kyi rgyu mtshan gsungs pa/ tshe ni thung ba yis zhes bya ba ste/ tshe thung ba rnams gsum gyi'o//sems can rnams ni zhes bya ba ni khams gsum gyis bsdus pa rnams so/ /bsgrub bya'i don zhes bya ba ni sangs rgyas nyid kyi mtshan nyid can no/ /sgrub mi 'gyur zhes bya ba ni tshe thung ba nyid kyis rdzogs par mi 'gyur ro/ /tshe ring ba ni 'os pa'o/ /de'i phyir zhes bya ba ni rgyu 'di las so//tshe ring ba ni gong du brtan par gnas pa'i mtshan nyid do/ /'os pa ni rung bar bya'o/ /dge ba yid ni rnal 'byor pa/ /zhes bya ba ni legs par byed pa'i sgom pa po rnams la zhes bya ba'i don to/ /de ltar bcom ldan 'das kyi gsung la 'jug pa'i rgyu mtshan dang bcas pa brjod nas/de rgyas par bshad pa brjod pa'i phyir/ de'i yan lag nang gi bdag nyid kyi rnal 'byor gyi ngo bo ni/ de la thog mar zhes bya ba gsungs te/ rgas pa med pa'i lus sgrub par byed pas thog ma ni dang po nyid du'o/ /nang gi bdag nyid sgrub ces bya ba dang 'brel to/ / phyi rol gyi rkyen la mi ltos pas nang gi bdag nyid du'o/ /blo bzang zhes bya ba ni de sgrub par byed pa la mkhas pa'o/ /rnal 'byor ji lta bu zhe na/ de'i phyir mchog ces bya ba gsungs te/ mchog ni skyes bu'i don mchog sgrub par byed pa'o/ /ji ltar zhe na/ de'i phyir/ lce ni rkan gyi dbus bzhar ba//zhes bya ba gsungs te/ rkan gyi phugs su zhugs pa'i lce byas nas so/ /de la zhes bya ba ni lce de la'o/ /tshig ces bya ba ni yi ge'i rang bzhin no/ /bzla zhes bya ba ni dgod par bya'o/ /rang gis bzlas pa'i rnam pa dang / tshig tu yang brjod par bya'o/ /ci zhig byas nas she na/de'i phyir/ sems dpa'i skyil krung bcas nas ni/ /zhes gsungs te/ bde bar gnas pa'i rgyu bcas nas so/ /yang dag rnal 'byor zhes bya ba ni sems kyi 'jug pa 'gog pa'i rnam pa'o/ /rjes dran bya zhes bya ba ni bya zhes bya ba'i don to/ /sna rtser zhes bya ba ni kun rdzob kyi sna rtser ro//dbugs ni mi 'byung ba zhes bya ba ni 'od zer gyi thig le bsgom pa'i bdag nyid can no/ /mi bya zhes bya ba ni bya ba ma yin pa'o/ /gal te de ltar yin na/ ci zhig bya zhe na/ de'i phyir/ rang gi khar ni dgag par bya/ /zhes bya ba ni rang nyid kyis so/ /rkan gyi gnas son zla ba ni//zhes bya ba ni byang chub kyi sems zla ba'i rnam pa'o/ /bzhu bar bya zhes bya ba ni lce'u chung gi sbyor bas so/ /ji ltar zhe na/ de'i phyir sngags kyi rnal 'byor zhes bya ba gsungs te/ 'chad par 'gyur ba'i sngags kyis zhes bya ba dang 'brel zhes bya ba'i don to/ /lce'u chung gi sbyor bas zhu bar byas nas so//rlung gi rnal 'byor gyis zhes bya ba ni thur sel gyi rlung 'bab pa'i sbyor bas so/ /btung zhes bya ba ni bdud rtsi myong bar bya ba'o/ /rnal 'byor mchog ces bya ba ni mchog gi sgom pa po'o/ /phyi rol gyi bza' ba la mngon par ma zhen pa zhes bya ba'i don to//rtag tu zhes bya ba ni 'chad par 'gyur ba'i dus kyi mthar thug pa zhes bya ba'i don to/ /de ltar rang gi ngo bo bstan nas/ dus kyi nges pa brjod pa'i phyir/ mtshan phyed kyi dus tshod mthar zhes bya ba gsungs te/ mtshan phyed kyi rjes la'o/ /ji srid thun gcig ces bya ba ni thun gsum pa rdzogs pa'o//mi 'pho ba zhes bya ba ni gzhan yid la mi byed pas mi brtan pa ma yin zhes bya ba'i don to/ /de srid sngags ni bzla zhes bya ba ni/ nang gi bzlas pa'i bdag nyid kyi ngo bos so/ /rnal 'byor pas zhes bya ba ni sems kyi 'jug pa 'gog pa sgom pa pos zhes bya ba'i don to//rdo rje'i lus ni byed pa po/ /zhes bya ba ni lus brtan par byed pa zhes bya ba'i don to/ /de ltar dus kyi nges pa bstan nas/ de nyid kyi don du sngags btu ba brjod pa'i phyir/ sde tshan gnyis pa'i zhes bya ba la sogs pa gsungs te/ dbyangs yig la ltos nas ka'i sde tshan pas so//gsum pa la zhes bya ba ni ga yig go/ /dbyangs can zhes bya ba ni ka yig dang bcas pa ste/ gsal byed kyi yi ge tsam po ni ma yin zhes bya ba'i don to/ /a yig yang dag ldan zhes bya ba ni tsheg drag gnyis dang bcas pa'o/ /de ltar na gaHzhes bya bar 'gyur ro/ /sngags bzlas zhes bya ba ni nang gi rang bzhin gyi tshig gam yid kyis dran par bya'o//yan lag ma nyams zhes bya ba ni rlung dang sngags tha mi dad pa zhes bya ba'i don to/ /srog ni 'gugs zhes bya ba ni byang chub kyi sems 'gugs par byed pa nyid kyi brtan pa'i lus sgrub par byed ces bya ba'i don to/ / de ltar don rnam pa gsum gyis nang gi bdag [(]kyi nyid [,]nyid kyi [)] sbyor ba bstan nas/ phyi rol gyi sbyor ba bstan pa'i phyir de'i yan lag bdud rtsi bdun bsten pa bshad pa ni/ rdzas kyang rtag tu bsten par bya/ /zhes bya ba gsungs te/ nges par bsten par bya ba'o/ /de nyid lnga pa'i rim pa bskyed/ /ces bya ba ni rtsa lnga las 'byung ba'i bdud rtsi lnga'i rang bzhin no//de kho na nyid lnga dam tshig chen po'i rang bzhin rnams kyi rim pa ste/ go rims kyis 'ongs pa ni thob pa'o/ /yang na de kho na nyid lnga ni/ glang po che dang / rta dang / khyi dang / ba lang dang / skyes pa lnga po'i sems kyi khams la sogs pa las 'byung ba'o//ji skad du/ gnyis su med pa'i zla gsang thig le las/ de nas gzhan yang bshad bya ba/ /brten pa'i lus ni sgrub byed pa/ /rtag tu thar pa don gnyer bas/ /gang gis dngos grub myur du 'grub/ /glang po'i rdzas dang rta yi rdzas/ /ba lang rdzas dang khyi yi rdzas//mi rnams kyi ni de bzhin rdzas/ /rdzas kyang de bzhin nyid du brjod/ /ces bya'o/ /yang na 'bras bu gsum dang lcags kyi phye mar bcas pa dang / rang gi dri chu dang bsres pa bskol nas/ lcags lnga'i rang bzhin gyi snod du bzhag nas sbyang ba la sogs pa sngon du 'gro bas de nyid kyi dbus su rdul dang khu ba bsres par byas nas/bdud rtsi bdun bsgrub par bya'o/ /ji skad du rgyud chen po las/ a ru ba ru ra dang bcas/ /de bzhin skyu ru ra dang ni/ /lcags kyi phye ma dang bcas pa/ /rang gi chu dang phye mar bcas/ /btsun mo'i khu ba nyams dga' ba//de bzhin khu bas kun nas ni/ /rnal 'byor dbang phyug yang dag bsgrub/ /rdo rje'i sku ni thob par 'gyur/ /zhes bya ba'o/ /de nyid kyi phyir bzlas pa rdzogs nas zhes bya ba ni bzlas pa'i mthar thug pa'o/ /rtag tu zhes bya ba ni dus thams cad du'o/ /lus las 'byung ba zhes bya ba ni rang gi lus las srog chags lnga'i yan lag las so//dri ma med pa zhes bya ba ni lcags kyi dri ma la sogs pa'i skyon dang bral ba la'o/ /lcags lnga'i rang bzhin zhes bya ba ni gser dang dngul dang zangs dang lcags dang khab len lcags rnams bsres nas byas pa'i snod du'o//gzung nas zhes bya ba ni bzhag nas so/ /dus ji srid du zhe na/ de'i phyir ji srid nyi ma 'char ka zhes bya ba gsungs te/ mtshan phyed kyi rjes la ji srid nyi ma 'char ka'i bar du'o/ /de nas zhes bya ba ni/ lcags lnga'i rang bzhin gyi snod gzhag pa'i rjes la'o/ /de la yang zhes bya ba ni snod de la'o//btsun mo'i khrag dang zhes bya ba ni bud med kyi rang byung ngo / /bde ba che zhes bya ba ni byang chub sems kyi khams dang bcas pa'o/ /blugs nas zhes bya ba ni bsre bar byas nas so/ /rtag tu zhes bya ba ni yang nas yang du'o/ /mchog ces bya ba ni phyi rol gyi rdzas kyi mtshan nyid dang bral ba'i phyir ro//bdud rtsi bdun pa zhes bya ba ni bdud rtsi lnga'i steng du rdzas gnyis dang bsres pa yis so/ /mchog ces bya ba ni bdud rtsi lnga sgrub pa'i thabs kyi cho gas bsgrub pa'i phyir ro/ /de ltar bdud rtsi lnga bsten pa brjod nas/ bsten pa'i dus bshad pa'i phyir/ nyal kar yang ni de 'thungs nas//zhes bya ba ni srod la'o/ /bdud rtsi bdun gyi ngo bo'o/ /'thungs nas zhes bya ba ni btung bar bya ba'o/ /tshe ni rnam par 'phel zhes bya ba ni yun ring por gnas pa rnam par 'phel ba'i rgyur gyur pa'o/ /de ltar bsten pa'i dus bstan nas/ sngags brjod pa'i phyir/ sngags kyi rgyal po oM A hUM/zhes bya ba gsungs te/ yi ge gsum mo/ /de las lan bdun zhes bya ba ni lan bdun byas nas so/ /bzlas pa bya zhes bya ba ni bdud rtsi bdun po sbyang ba'i don du brjod par bya'o/ /de ltar sngags brjod nas/ phyag rgya sngon du 'gro bas sbyang ba bstan pa'i phyir/ lag g.yas zhes bya ba gsungs te/ lag pa g.yas pas so/ /rgyal mtshan gyis brgyan pa zhes bya ba ni ba dan gsum gyi phyag rgya'i dbyibs dang ldan pa'o/ /de la bkab nas su zhes bya ba ni lcags lnga'i rang bzhin gyi snod la'o/ /snod bzang zhes bya ba ni rin po che'i ngo bos mdzes pa nyid kyi phyir ro//yi ge brgya pa'i zhes bya ba ni/ oM badzra sa twa sa ma ya/ ma nu pA la ya zhes bya ba la sogs pa'o/ /sngags kyis ni zhes bya ba ni yid skyob pa'i don gyi phyir ro/ /sbyang bar bya zhes bya ba ni mi gtsang ba'i rnam par rtog pa log par bya ba'o/ /lan gsum du ni zhes bya ba ni/ lan gsum du brjod pa tsam gyis zhes bya ba'i don to/ /de ltar phyag rgya sngon du 'gro bas sbyang ba brjod nas/ de'i yan lag bstan pa'i phyir/ de rjes zhes bya ba la sogs pa gsungs te/ yi ge brgya pas sbyangs pa'i rjes la'o/ /bud med gzhon nu'i nu zho ni/ /zhes bya ba ni mi mo'i nu zho'o//nu ma zhes bya ba ni nu ma las byung bar gyur pas so/ /mkhur ba bkang zhing zhes bya ba ni ji ltar kha bkang bar gyur pa na de ltar btung bar bya zhes bya'o/ /de'i zhes bya ba ni bdud rtsi bdun za ba'i dus la'o/ /de'i zhes bya ba ni mi mo'i de'i'o/ /bza' ba zhes bya ba ni bza' ba'o//sbyin pa yang zhes bya ba ni sbyin par bya'o/ /mar dang bsres pa'i zhes bya ba ni mar dang bsres pa'o/ /'bras las skyes zhes bya ba ni khyad par du 'phags pa'i bza' ba zhes bya ba'i don to/ /de ltar de'i yan lag brjod nas/ rdzas gzhan gyi nges pa bstan pa'i phyir/ ma sha dang ni kha ra dkar/ /zhes bya ba ni bye ma kha ra dkar po dang bcas pa'o/ /'jam pa zhes bya ba ni ba'i nu ma lta bu'i rgun 'bru'o/ /ra'i 'o ma dang zhes bya ba ni ra'i 'o ma'o/ /til rnams cha mnyam byas nas ni/ /zhes bya ba ni til dkar po dang cha mnyam par byas nas so/ /mos pa yis zhes bya ba ni/shin tu yang brtson 'grus drag pos so/ /nyal kar zhes bya ba ni srod la'o/ /de ni bza' dang zhes bya ba ni 'dres pa'i ngo bo bdag nyid kyis bza' bar bya'o/ /bza' bar sbyin zhes bya ba ni gzhan dag la yang ngo / /mchog ces bya ba ni sbyang ba la sogs pa'i rim pas skyed pa nyid kyi phyir ro//de ltar don rnam pa drug gis phyi rol gyi sbyor ba bstan nas/ de nye bar bsdu ba'i phyir/ de ltar rigs pa zhes bya ba gsungs te/ de ltar sngar bshad pa'i rigs pas so/ /mchog ces bya ba ni mchog go/ /shes nas zhes bya ba ni shes par bya ba'o//smra bar mi bya zhes bya ba ni brjod par bya ba ma yin pa'o/ /mi bya'o zhes bya ba ni 'gegs pa'i tshig go/ /su la zhes bya ba ni dam tshig dang mi ldan pa rnams la zhes bya ba'i don to/ /rigs pa ji lta bu zhe na/ de'i phyir/ kun la dang por 'byung ba ni/ /zhes bya ba ni thams cad ni 'jig rten pa la sogs pa'i dngos po rnams la'o//dang por ni thog ma nyid du'o/ /'byung ba ni 'byung ba'i ngang tshul can te/ de med pas ci yang mi 'grub pa nyid kyi phyir ro/ /zhi bar zhes bya ba ni 'dod chags la sogs pa mi skyed pa nyid kyis so/ /dngos grub ces bya bas ni phyag rgya chen po'i rnam pa'o//skad cig ces bya ba ni de'i mod la'o/ /rab tu ster zhes bya ba ni ster bar byed pa zhes bya ba'i don to/ /gong bu bsten pas 'jig rten dang 'jig rten las 'das pa'i dngos grub thob par byed do/ /zla ba drug tu zhes bya ba ni dus de srid kyi mthar thug par ro/ / brten pa zhes bya ba ni goms par byed pa'o/ /gang zhes bya ba ni sgrub pa po'o/ /rdo rje'i lus su zhes bya ba ni rdo rje bzhin du brtan pa'i lus la'o/ /'gyur zhes bya ba ni 'gyur ba'o/ /de ni zhes bya ba ni rnal 'byor pa'o/ /bcud kyis len dang zhes bya ba ni bdud rtsi'i ngo bo nyid kyi phyir ro/ / bcud len mchog ces bya ba ni bcud len mchog gi ngo bo'o/ /srog 'gugs pa zhes bya ba ni g.yo ba'i rnam pa'i rang gi srog dus ring por gnas pa'o/ /mchog ces bya ba ni mchog gi dngos grub thob pa'i rgyur gyur pa'o/ /brten par bya zhes bya ba ni goms par bya ba'o/ /rab tu 'bad pas zhes bya ba ni brtson 'grus drag pos so//phyag rgya che don sgrub pa pos/ /zhes bya ba ni brtan pa'i lus bsgrub pa sngon du 'gro bas zung 'jug gi rnam pa'i phyag rgya chen po tshe 'di nyid la sgrub pas so/ /de ltar 'di tsam gyis rdo rje'i lus sgrub pa la rigs pa brjod nas/ de'i 'bras bu bstan pa'i phyir/ rgas pa med cing zhes bya ba ni rgas par mi 'gyur ba'o/ /srin nad med pa zhes bya ba ni nang gi bdag nyid la phra mo'i nad las so/ /nad ces bya ba ni rags pa'i ngo bo rnams so/ /snyom las med cing zhes bya ba ni le lo med pa'o/ /lkugs pa med pa zhes bya ba ni sems kyis bsam pa'i mtshan nyid can no//ko kam zhes bya ba ni bad kan no/ /rlung mkhris sogs nad med ces bya ba ni bsal ba'o/ /nad dang zhes bya ba ni gsum 'dus pa las skyes pa'o/ /'bras kyi zhes bya ba ni phol la sogs pa'o/ /'brum bu dang zhes bya ba ni mdze'i rnam 'gyur gyi ngo bo'o/ /shu ba zhes bya ba ni bshang lam gyi nad do//g.ya' ba zhes bya ba ni g.ya' ba'o/ /'brum phran med ces bya ba ni 'brum bu phra mo med pa'o/ /mdze nad ces bya ba ni mdze rigs bco brgyad do/ /mtshan par rdol ba med ces bya ba ni bshang lam gyi nad do/ /dung dang kun+da ltar zhes bya ba ni de lta bu'i lus gang la yod pa de la de skad ces bya'o//dpal ldan zhes bya ba ni dpal ni lus kyi 'od kyi mtshan nyid gang la yod pa de la de skad ces bya'o/ /'dzam bu chu bo'i gser ltar 'bar/ /zhes bya ba ni gser mdog can gyis mdzes pa zhes bya ba'i don to/ /'gugs par byed ces bya ba ni 'gugs par byed pa'o/ / de ni zhes bya ba ni sgrub pa po'o/ /rtag tu zhes bya ba ni rgyun ma 'chad par ro/ /rig pa 'dzin pa'i bu mo mchog /ces pa ni rig pa 'dzin pa'i rigs las 'byung ba'o/ /mchog ni mdog dang dbyibs la sogs pa rnams kyis nyams dga' ba'o/ /bu mo'i zhes bya ba ni btsun mo rnams so//mdza' chen zhes bya ba ni tshe phun sum tshogs pa dang mdog phun sum tshogs pa'o/ /de ni zhes bya ba ni bcud kyis len gyi dngos grub bo/ /lha rnams te zhes bya ba ni sum cu rtsa gsum gyi gnas na gnas pa la sogs pa rnams so/ /rnal 'byor pa rnams zhes bya ba ni sngags kyi sgo'i spyad pa spyod pas gnas pa rnams so//sems par byed ces bya ba ni yid du 'ong ba'o/ /phyag bya ba dang zhes bya ba ni sems can thams cad kyi slob dpon nyid kyi phyir ro/ /mchod par 'gyur zhes bya ba ni mchod pa'i zhing nyid kyis na mchod par bya ba'o/ / bsgom par bya ba zhes bya ba ni bsgom par bya ba'o/ /rtag tu zhes bya ba ni dus thams cad du'o/ /'gyur zhes bya ba ni 'byung bar 'gyur ba'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa zab mo'i don shin tu gsal bar byed pa zhes bya ba las le'u bcu drug pa'i rgya cher bshad pa'o// //de ltar le'u bcu drug pos rnal 'byor chen po'i rgyud kyi rjes su 'brangs nas re re nas dri ba'i lan 'debs pa bstan nas/ da ni rnal 'byor ma'i rgyud kyi rjes su 'brangs nas dri ba'i lan gdab pa brjod pa'i phyir ro//rtsa la sogs pa'i rnam par dbye ba bstan nas/ rtsa dang 'khor lo'i rim pa'i gnas skabs kyi yul la 'dri ba bshad pa'i phyir/ le'u bcu bdun pa ston par byed cing de rtsom pa ni de nas zhes bya ba la sogs pa gsungs te/ le'u bcu drug pa bshad pa'i rjes la'o/ / gzhan yang nyon zhes bya ba ni sngar la ltos pas tha dad pa'o/ /rtsa rnams kyi zhes bya ba ni 'khor lo la gnas pa rnams la ste/ grangs dang gnas rnams bsdus pa nyon/ /zhes bya ba dang 'brel to/ /grangs ni bgrang ba ste/ gnas drug po rnams la bsdus pa ni/ grangs dang gnas rnams bsdus pa ste/bsdus nas brgya dang nyi shu rtsa dgu'o/ /rgyas par ni rtsa stong phrag bdun cu rtsa gnyis zhes bya ba'i don to/ /khyod nyon zhes bya ba ni bcom ldan 'das phyag na rdo rje thos pa la sbyar bar mdzad pa'o/ /de nyid kyi phyir/ 'khor lo grangs kyi dbye ba yis/ / zhes bya ba gsungs te/ 'khor lo drug po rnams kyi grangs ni rtsa'i ngo bo'i dbye bas te/ des so/ /ji bzhin zhes bya ba ni phyin ci ma log pa nyid kyis te/ man ngag dang bcas pa'i phyir ro/ /rmad du byung ba'i mchog ces bya ba ni so so'i skye bo rnams kyi spyod yul ma yin pa nyid kyi ming gi sgo nas the tshom med par rtogs pa'i phyir ro//de ltar de rtsom pa bstan nas/ dngos su rtsa'i grangs bstan pa'i phyir/ de'i yan lag bshad par dam bca' ba ni/ 'khor lo drug la zhes bya ba la sogs pa gsungs te/ bde ba chen po dang / rlung dang / longs spyod dang / me dang / chos dang / sprul pa'i 'khor lo'i dbye bas so/ /bcu drug rten zhes bya ba ni 'byung ba chen po bzhi rnams las so sor 'byung ba bzhi'i bdag nyid kyi phyir ro/ /lus la zhes bya ba ni sems can thams cad kyi lus la'o/ /lha'i gzhal yas khang zhes bya ba ni/ mtha' yas pa'i sangs rgyas dang / lha mo dang / byang chub sems dpa' dang / khro bo'i gzhi yin pa'i phyir ro/ /gnas ji bzhin zhes bya ba ni 'khor lo drug la ltos pas so/ /ji ltar rigs par bya zhes pa ni ji ltar gnas pa'i ngo bo brjod par 'dod pas so/ /bshad par bya zhes bya ba ni brjod par bya ba'o//mdor bsdus nas ni zhes bya ba ni yang dag par bsdus nas so/ /de ltar bshad par dam bca' ba bshad nas/ 'khor lo'i dbye bas rtsa rnams kyi mdor bsdus nas ming brjod par bya ba'i don du rlung gi 'khor lo gnas pa'i rtsa zhes bya ba gsungs te/ rlung gi 'khor lo zhes bya ba'o/ /'dab ma drug ni zur drug rnams su'o/ /gnas pa'i rtsa zhes bya ba ni rtsa rnams gnas pa'o/ /rlung gis mkha' la spyod ces bya ba ni logs su 'gro ba'i ngang tshul gang la yod pa nyid kyis mkha' la spyod par byed pa'o/ /rlung gis zhes bya ba ni rlung gi ngo bo nyid kyi phyir ro//'dab gsum zhes bya ba ni de'i dbyibs la'o/ /me'i 'khor lo bshad ces bya ba ni me'i 'khor lo'i ming can la'o/ /rtsa gsum zhes bya ba ni rtsa rnam pa gsum mo/ /rim bzhin 'char zhes bya ba ni 'chad par 'gyur ba'i rim pas de ma thag tu brjod par 'gyur ba'i phyir ro/ / longs spyod 'khor lo yang zhes bya ba ni ro drug la longs spyod pa'i bdag nyid can no/ /rtsa ni bcu drug tu yang zhes bya ba ni 'chad par 'gyur ba'i rigs pas so/ /yang dag brjod ces bya ba ni brjod par bya zhes bya ba'i don to/ /chos kyi 'khor lo zhes bya ba ni chos thams cad kyi rang gi mtshan nyid 'dzin par byed pa la'o//gnas pa brgyad ces bya ba ni thun brgyad kyi rnam par dag pas so/ /rtsa ni kun la khyab pa zhes bya ba ni lus thams cad la khyab pas gnas pa'i phyir ro/ /de rnams ni srog gi rtsa nyid du grags pa'i phyir ro/ /sprul pa'i 'khor lo zhes bya ba ni sems can gyi khams sprul pa'i phyir ro//drug cu rtsa bzhi zhes bya ba ni dbyu gu drug cu rtsa bzhi'i rnam par dag pas so/ /'chad par bshad ces bya ba ni brjod pa'o/ /bde ba chen po'i 'khor lo che/ /zhes bya ba ni mgo bo'i gnas kun rdzob kyi sems kyi zla ba'i rten la'o//rtsa ni sum cu rtsa gnyis so/ /zhes bya ba ni chu tshod sum cu rtsa gnyis kyi rnam par dag pa'o/ /bshad ces bya ba ni brjod pa'o/ /mdor bsdus zhes bya ba ni thams cad mdor bsdus nas so/ /rim pa yang zhes bya ba ni grangs kyi'o/ /brgya dang nyi shu rtsa dgu'o/ /zhes bya ba ni 'khor lo drug gi grangs so zhes bya ba'i don to//rtsa rnams su ni yang dag bshad/ /ces bya ba ni gsungs pa'o/ /yang dag ces bya ba ni mang ba dang nyung ba dang grangs spangs pa'i phyir ro/ /de ltar 'khor lo'i dbye ba bsdus pa bstan nas/ rgyas par bstan pa brjod pa'i phyir/ gzhan dag tu ni rgyas par yang //zhes bya ba ni rgya cher dpal nam mkha' dang mnyam pa'i rgyud las so/ /stong phrag bdun cu rtsa gnyis kyis/ /zhes bya ba ni zla ba dang / nyi ma dang / rlung rgyu ba nyid kyis so/ /ji skad du/ 'chad par 'gyur ba'i le'u sum cu pa las/ stong phrag nyi shu rtsa bzhi po'i//rtsa rnams rtag tu ngo mtshar ba'i/ /byang chub sems dpa' zhes bya ste/ /bde ba kun gyi rjes su 'jug /stong phrag nyi shu rtsa bzhi ni/ /rtsa rnams rtag tu ngo mtshar ba'i/ /khrag ni rgyu bar shes bya ste/ /nyi ma skyes pa'i bdag nyin can/ /stong phrag nyi shu rtsa bzhi ni/ /rtsa rnams rtag tu ngo mtshar ba'i//rlung ni rgyu bar shes par bya/ /rim gyis rgyas pa'i rgyud las so/ /zhes bya ba la sogs pa gsungs so/ /nges par brjod pa 'bum sder zhes bya ba ni nam mkha' dang mnyam pa'i rgyud du'o/ /brjod ces bya ba ni gsungs pa'o/ /rtsa gnas dbye bas phye nas zhes bya ba ni de dang de'i gnas kyi grangs kyis phye ba'o//yang dag ces bya ba ni phyin ci ma log pa'i ngo bos so/ /'char ba zhes bya ba ni brjod pa'o/ /de nyid du zhes bya ba ni 'di nyid du'o/ /nyung ngu'i rgyu nyid kyi phyir zhes bya ba ni nyung ngu'i rgyu nyid kyis so/ /snying po la ni snying por zhes bya ba ni snying po ni stong phrag bdun cu rtsa gnyis kyi grangs kyi ngo bo nyid las so//snying por gsungs zhes bya ba ni 'khor lo drug gi dbye bas nyi shu rtsa dgus lhag pa'i brgya'i grangs so/ /de ltar rgyas par brjod pa bstan nas/ 'khor lo'i dbye bas rtsa rnams rgyas par bshad pa ni/ smin ma'i dbus gnas zhes bya ba la sogs pa gsungs te/smin ma'i dbus gnas zhes bya ba ni rlung gi 'khor lo'i gnas so/ /rlung chen zhes bya ba ni rlung rgyu ba nyid kyis chen po yang yin la rang nyid kyang rlung gi ngo bo nyid kyi phyir rlung chen po'o/ /dbye ba 'khyil pa zhes bya ba ni a dang ra dag gis sad par byed pas na dbye ba ste/rgyab kyis phyogs so/ /de 'khyil pa ste yongs su gyur par 'gro bas na bye ba 'khyil pa'o/ /mi bzad pa zhes bya ba ni mes bskul ba'i dus su drag pa'i phyir mi bzad pa'o/ /'dzin pa zhes bya ba ni mgo bor 'phros pa'i byang chub kyi sems kyi khams la rang gi gnas su 'dzin pa'i phyir 'dzin pa'o//rtog med ces bya ba ni de nyid la 'gro ba dang 'ong ba la sogs pa las kyi dus la bdag gis las bya'o snyam du rnam par rtog pa med pa'i phyir rtog med do/ /gang po ni zhes bya ba ni ye shes kyi rim pa'i dus su byang chub kyi sems rgyun 'bab pas kun nas gang ba'i phyir gang ba'o/ / bshad pa zhes bya ba ni de lta bu'i ming gis bstan pa'o/ /bstan pas zhes bya ba ni ming gis so/ /rlung las byung zhes bya ba ni rlung gi 'khor lor son pa zhes bya ba'i don to/ /gru gsum zhes bya ba ni pad+ma'i 'dab ma gsum gyi dbyibs can la'o/ /rtsa gsum zhes bya ba ni rnam pa gsum mo/ / me'i dkyil 'khor zhes bya ba ni me'i 'khor lo'o/ /'dren pa'i 'og tu zhes bya ba ni longs spyod kyi 'khor lo'i 'og gi cha la'o/ /bshad pa yin zhes bya ba ni rab tu grags pa'o/ /dri ma bral dang zhes bya ba ni du ba la sogs pa'i dri ma med pas dri ma dang bral ba'i phyir ro/ /gsal ba dang zhes bya ba ni 'bar zhing gsal ba'i rnam pa nyid kyis gzi brjid 'bar ba dang ldan pa'i phyir ro//gang po dang ni zhes bya ba ni longs spyod kyi 'khor lo'i lam nas ro myang ba nyid kyis yongs su tshim pa'i phyir gang ba'o/ /gsum pa yin no zhes bya ba ni rnam pa gsum mo//rim pa zhes bya ba ni rtsa'i dbyibs kyi rim pas so zhes bya ba'i don to/ /sprul pa'i 'khor lo'i rtsa'i ming bstan pa'i phyir/ yang dag shugs dang zhes bya ba la sogs pa gsungs te/ yang dag par byang chub kyi sems shugs kyis 'bab pas na yang dag shugs so//shin tu shugs zhes bya ba ni de las kyang lhag par 'bab pas so/ /shin tu bzang ba dang zhes bya ba ni tshim par byed pa'i bzang ba gang la yod pa de la de skad ces bya'o/ /bzang por 'gro ba zhes bya ba ni bzang ba ni ye shes kyi me dang byang chub kyi sems 'gro ba'i phyir bzang por 'gro ba'o//stobs chen dang ni zhes bya ba ni rgyu dang ye shes kyi rim pa'i dus su byang chub kyi sems 'gro ba dang 'ong ba la stobs chen po dang ldan pa'i phyir ro/ /mi bzod che zhes bya ba ni rgyud kyi rim pa'i dus su ye shes kyi me'i rten du gyur pa nyid kyi phyir ro/ / mdzes chen zhes bya ba ni shin tu yang dus gnyis la 'dod par bya ba nyid kyi phyir ro/ /mdun du skyes pa zhes bya ba ni a'i yi ge'i ngo bo la brten nas skye ba thob pa'i phyir ro/ /rgyags pa'i rtags ni zhes byang chub kyi sems kyi mtshan nyid kyis rgyags pa'i rtags su gyur pa'i phyir ro/ / rgyags pa'i cha zhes bya ba ni rdul skyes pa'i phyir ro/ /rgyags pa'i chu dang zhes bya ba ni chu skyed par byed pa nyid kyi phyir ro/ /rgyags pa myos byed ces bya ba ni rgyags pa ni 'dod chags la sogs pas gnas skabs gzhan thob pa'i phyir ro/ /rgyags dang zhes bya ba ni byang chub kyi sems kyis myos pa'i phyir ro//rgyags pa'i rgyu mthun zhes bya ba ni kun rdzob kyi bde ba chen po'i rnam 'gyur nyid kyi phyir ro/ /rgyags pa'i rlan dang zhes bya ba ni rtag tu byang chub kyi sems kyis brlan pa'i phyir ro/ /rgyags pa 'chang ba zhes bya ba ni khu ba brtan pa 'dzin pa'i bdag nyid kyi phyir ro/ /rtsub dang zhes bya ba ni ye shes kyis mes reg bya rtsub pa'i phyir ro//mkha' 'byung zhes bya ba ni mkha' ni bde ba chen po'i nam mkha' la'o/ /'byung ba ni 'gro ba nyid kyi phyir ro/ /glang po dang zhes bya ba ni dbyibs kyis thung ba'i phyir ro/ /dbugs mi bde ba dang zhes bya ba ni blo skyed par byed pa'i phyir ro/ / g.ya' zhes bya ba ni g.ya' ba'i 'bras bu skyed par byed pa nyid kyi phyir ro/ /mkha' 'gro zhes bya ba ni rdo rje'i mkha' la gnas pa'i phyir ro/ /yan lag kha'i gdong zhes bya ba ni kha ni byang chub kyi sems so/ /yan lag ni rtags gang la yod pa de la de skad ces bya'o/ /'dab chags zhes bya ba ni de'i dbyibs nyid kyi phyir ro//za phod ces bya ba ni las mang po byed pa'i phyir ro/ /mi zad sga sgrogs zhes bya ba ni ye shes kyi me sgrib par byed pas shin tu mi zad pa'i phyir ro/ /snying po can zhes bya ba ni brtan pa'i ngo bo khrag rgyu ba'i phyir ro/ /gsod byed ma zhes bya ba ni a'i yi ge'i rjes su 'gro ba'i phyir ro//rdul ba zhes bya ba ni las kyis rlung dang yang dag par sbyor bas rdul ba nyid kyi phyir ro/ /dbyangs dang zhes bya ba ni dus gnyis la yang rang dang 'os pa'i sgra byed pa nyid kyi phyir ro/ /dbyangs skyes dang zhes bya ba ni a yig sgra thams cad kyi bdag las grub pa'i phyir ro/ /sprin zhes bya ba ni ye shes kyi me'i sngon du rtag tu bas bsgribs pa'i phyir ro//chu ba zhes bya ba ni pad+ma can bzhin du byang chub kyi sems la khyab pa nyid kyis kyang de bzhin du sems kyi khams kyi rnam par rtog pas ma gos pa nyid kyi phyir ro/ /sdong bu can dang zhes bya ba ni lte ba'i pad+ma la sdong bu'i rnam par gnas pa nyid kyi phyir ro//sngo ba zhes bya ba ni du ba'i mdog can nyid kyi phyir ro/ /yud tsam zhes bya ba ni rno ba'i phyir ro/ /yud tsam skyes zhes bya ba ni yud tsam a yig gi rnam pa las skyes pa'i phyir ro/ /rgyab tu kha bltas zhes bya ba ni 'og tu rgyu ba nyid kyi phyin ci log pa'i gdong ngo / /dbyug pa dang zhes bya ba ni dbyug pa ltar shin tu drang ba'i rnam pa nyid kyi phyir ro//dbyug snyems dang zhes bya ba ni dbyug pa ltar snyems pa drang ba'i rnam pa gang la yod pa de la de skad ces bya'o/ /rnying pa nyid dang zhes bya ba ni yang dang yang du rang dang 'os pa'i khams rgyu ba nyid kyis sra ba nyid kyi phyir ro/ /tshigs kyi lto dang zhes bya ba ni ldud pa'i dbyibs can nyid kyi phyir ro//tshigs kyi mgo bo zhes bya ba ni tshigs kyi rnam pa'i mdog dang ldan pa nyid kyi phyir ro/ /tshigs kyi tshad dang zhes bya ba ni gdu bu'i dbyibs kyi rnam pa nyid kyi phyir ro/ /pha rol gnon pa zhes bya ba ni gzhan gyi rnam pa rnam par gnon pa'i phyir ro//tshigs kyi gnas zhes bya ba ni rtsa gsum gyi mdud pa la dmigs nas gnas pa'i phyir ro/ /tshigs kyi gdong zhes bya ba ni mdud pa'i gdong ngo / /tshigs kyi 'od ces bya ba ni de bzhin du rnal 'byor pa la gsal ba'i phyir ro/ /tshigs kyis khyab pa zhes bya ba ni bar bar du mdud pas khyab pa'i phyir ro//dul bar byed pa zhes bya ba ni rlung rgyu bar byed pa nyid kyis so/ /dul 'gro zhes bya ba ni dul ba'i ngo bos rnam par rtog pa thams cad zad par byed pas de a'i yi ge la 'gro ba'i phyir ro/ /gzi brjid dang zhes bya ba ni ye shes kyi me'i snang ba la brten nas gnas pa'i phyir ro//dri med ces bya ba ni sngags sreg pa'i dus su'o/ /dul ba'i snyems pa dang zhes bya ba ni a'i yi ge dul ba'i ngo bo la brten nas nga rgyal dang ldan pa'i phyir ro/ /chun 'phyang zhes bya ba ni chun po thams cad 'phyang ba'i phyir ro/ /chun 'phyang dga' zhes bya ba ni rtsa'i bdag nyid kyi chun 'phyang gi ngo bo nyid la dga' ba'i phyir ro//chun 'phyang ma zhes bya ba ni chun 'phyang byed ces bya ba a yig dang lhan cig tu bde sdug tha mi dad pa'i phyir ro/ /sbrang bu zhes bya ba ni sems kyi khams kyi ngo bo gang la yod pa de la de skad ces bya ba'o/ /phru gu zhes bya ba ni yang de bzhin du'o//phru gu ster zhes bya ba ni phru gu'i ngo bo sems nyid gsang ba'i 'khor lo na gnas pa'i rtsa rnams la ster bas na snyam du byas nas so/ /'gro ba zhes bya ba ni rab tu 'gro bas na zhes bya ba'o/ /lo ma zhes bya ba ni lo ma'i gdong gi rnam pa yod pas na lo ma'o/ /lo ma'i mgrin pa dang zhes bya ba ni de bzhin du lo ma'i mgrin pa gang la yod pa de la de skad ces bya'o//rab mchog ma dang zhes bya ba ni sems kyi rdzas rab mchog tu byas nas so/ /rab gsal te zhes bya ba ni ye shes kyi me gsal bar byed pa nyid kyi phyir ro/ /drug cu rtsa bzhir zhes bya ba ni dbyu gu drug cu rtsa bzhi'i rnam par dag pas so//de ltar brjod ces bya ba ni sngar bshad pa'i rigs pas so/ /yang na rtsa drug cu rtsa bzhi la A li dang kA li drug cu rtsa bzhi la brten nas don brjod par bya'o/ /lte ba sprul pa'i 'khor lor gnas/ /zhes bya ba ni go sla'o/ /bdud rtsi mchog gis yongs su gang / /zhes bya ba ni byang chub sems kyis yongs su gang ba nyid kyi phyir ro//chos kyi 'khor lo'i rtsa rnams kyi ming gsungs pa ni/ rin chen cod pan zhes bya ba ste/ rin chen 'byung ldan gyi sa bon yod pa'i phyir ro/ /pad+ma che zhes bya ba ni snang ba mtha' yas kyi sa bon no/ /rdo rje chen po zhes bya ba ni don yod grub pa'i sa bon nyid kyi phyir ro//stobs po che zhes bya ba ni lus kyi sa bon yod pa'i phyir ro/ /mgo bo che zhes bya ba ni spyan ma'i sa bon yod pa'i phyir ro/ /sgra chen dang zhes bya ba ni bdag med ma'i sa bon yod pa'i phyir ro/ /nyer dga' chen po zhes bya ba ni gos dkar mo'i sa bon nyid kyi phyir ro//myos po che zhes bya ba ni sgrol ma'i sa bon yod pa'i phyir te rigs pa 'dis so/ /chos kyi 'khor lo'i nang du zhes bya ba ni dbus su'o/ /snying ga zhes bya ba ni snying ga'i gnas la'o/ /pad+mar yang dag gnas zhes bya ba ni pad+mar gnas pa zhes bya ba'i don to/ /longs spyod 'khor lo'i rtsa rnams kyi ming bstan pa'i phyir/longs spyod ma zhes bya ba la sogs pa gsungs te/ dbyangs yig bcu drug la brten pa nyid kyis rtsa bcu drug rnams kyi don shes par bya'o/ /longs spyod 'khor lor gnas zhes bya ba ni mgrin pa'i phyogs su ro drug la longs spyod pa'o//grangs ni zhes bya ba ni bgrang ba'o/ /bcu drug tu ni brjod ces bya ba ni 'pho ba bcu drug gi dbye bas zhes bya ba'i don to/ /bde ba chen po'i 'khor lo'i rtsa'i ming bstan pa'i phyir/ de steng zhes bya ba gsungs te/ de'i steng ni mgo bo la'o/ /rim rigs zhes bya ba ni a yig la brten pa'i phyir ro//dbyangs yig bcu drug rnams la thabs dang shes rab kyi dbye bas nyis 'gyur du byas nas/ de'i rjes su 'brangs nas nges tshig gis bshad par bya'o/ /man ngag gi khyad par gzhan gang zhig yod pa bla ma'i zhal las rtogs par bya ste/ de'i phyir 'dir rgya cher ma bshad do//sum cu rtsa gnyis zhes ni bshad/ /ces bya ba'i rigs pa 'dis so/ /bde ba chen po'i 'khor lo che/ /zhes bya ba ni mgo bo'i gnas la'o/ /mchog tu dga' ba ster bar byed/ /ces bya ba ni byang chub kyi sems kyi khams kyis rgyun 'dzag pas so/ / phra dang reg bya mchog tu phra/ /zhes bya ba ni phra ba ni byang chub kyi sems kyi ngo bo las shin tu yang gdung ba zhi bar byed cing reg bya bsil ba dang ldan pa'i phyir ro/ /gzung dang 'dzin pa rnam par spangs/ /zhes bya ba ni yul dang yul can gyi rnam par rtog pa med pa'i phyir ro/ /ngo bo nyid rten du gyur pa rnams kyis brten pa byang chub kyi sems 'jug pa zhes bya ba ni rnam rtog med pa'i phyir ro//rang nyid bde chen rnam pa dang / /zhes bya ba ni kun rdzob byang chub kyi sems kyi grogs yin pa'i phyir ro/ /gzhan dag la yang zhes bya ba ni rtsa gzhan rnams la yang bde ba chen po kun rdzob kyi bdag nyid can ster bar byed pa zhes bya ba'o//de ltar 'khor lo'i dbye ba rgyas par bshad pa bstan nas/ nye bar bsdu ba sngon du 'gro bas rtsa bstan pa'i dgos pa bshad pa'i phyir de'i yan lag dgos pa'i ngo bo mdor bstan pa'i phyir/ de ltar yang dag rtsa yi rim/ /zhes bya ba la sogs pa gsungs te/sngar bshad pa'i rigs pas so/ /yang dag ces bya ba ni phyin ci ma log pa'o/ /shes par bya zhes bya ba ni rtogs par bya ba'o/ /bla ma'i zhal las zhes bya ba ni ma 'ongs pa'i dus na rdo rje slob dpon gyi zhal las zhes bya ba'i don to/ /des ci zhig byed ce na/ de'i phyir rtsa'i rim med ces bya ba gsungs te/rtsa'i rim pa spangs pas so/ /bden par zhes bya ba ni brdzun pa ma lags so/ /phung po la sogs zhes bya ba ni phung po dang / khams dang / skye mched rnams la'o/ /mi 'byung zhing zhes bya ba ni skye bar mi 'gyur ba'o/ /phung po med na zhes bya ba ni gzugs la sogs pa'i phung po lnga med na'o//ye shes che zhes bya ba ni rang bzhin gyis 'od gsal ba'i rnam pa'am/ gnyis su med pa'i ye shes kyi rang bzhin no/ /thob mi 'gyur zhes bya ba ni rnyed par mi 'gyur ba'o/ /rnal 'byor pa yis zhes bya ba ni rim pa gnyis sgom pa pos so//ji skad du/ dpal dgyes pa rdo rje'i rgyud las/ lus la ye shes chen po gnas/ /kun du rtog pa thams cad spangs/ /dngos po kun la khyab pa po/ /lus gnas lus las ma skyes pa'o/ /zhes gsungs te/ de ltar dgos pa rang gi ngo bo bstan nas/ de rgyas par bshad par brjod pa'i phyir/phung po lnga ni bdag nyid lus/ /zhes gsungs te/ lus ni lus so/ /mkha' 'gro lnga ni rab tu grags/ /zhes bya ba ni rnam par snang mdzad la sogs pa de bzhin gshegs pa lnga'i rang bzhin du gsungs te/ gnas skabs lnga nyams su myong ba'i rim pas de rnams grub pa'i phyir/de nyid ces bya ba ni ye shes lnga'i bdag nyid kyi lus so/ /'byung ba'i ngo bo yis zhes bya ba ni sa la sogs pa 'byung ba chen po lnga'i ngo bos so/ /ye shes lngar ni zhes bya ba ni me long la sogs pa'i ye shes lnga'i ngo bo'o/ /rnam par gnas zhes bya ba ni dngos po la de lta nyid du gnas pa'i phyir ro//de ltar gzugs ni de bzhin gshegs pa rnam par snang mdzad kyi ngo bo nyid kyis me long lta bus ye shes kyi rang bzhin yin te/ don dam par lus ni gzugs brnyan gyi ngo bo nyid kyi phyir ro/ /tshor ba ni rin chen 'byung ldan gyi ngo bo nyid kyi phyir/ mnyam pa nyid kyi ye shes kyi rang bzhin te/tshor ba rnam pa gsum po la rnam pa gcig pas mnyam pa'i phyir/ 'du shes ni snang ba mtha' yas kyi ngo bo nyid kyi phyir/ so sor rtog pa'i ye shes kyi ngo bo ste/ gdod ma nas shi ba nyid kyis spyod pa'i phyir ro/ /'du byed ni don yod grub pa'i ngo bo nyid kyis bya ba nan tan gyi ye shes kyi ngo bo ste/mtshungs par ldan pa dang mtshungs par mi ldan pa la sogs pa dge ba'i rnam pa nyid du shes nas bya ba sems can gyi don gyi mtshan nyid bsgrub pa'i phyir ro/ /rnam par shes pa ni mi bskyod pa'i ngo bo nyid kyis shin tu rnam par dag pa chos kyi dbyings kyi ye shes kyi ngo bo ste/rang bzhin gyis stong pa nyid kyis nyon mongs pa'i rnam par rtog pa rnams kyis 'khrugs par mi nus pa nyid kyi phyir ro/ /de'i phyir zhes bya ba ni gang gi phyir lus ni ye shes lnga'i rang bzhin no/ /de'i phyir 'bad pa thams cad kyis/ /zhes bya ba ni thun mong ma yin pa'i brtson 'grus kyis so//rtsa'i 'khor lo zhes bya ba ni phung po lnga'i bdag nyid can gyi lus kyi rten du gyur pa'o/ /btsal bar bya zhes bya ba ni ye shes chen po btsal ba'i phyir rjes su bskyed par bya zhes bya ba'i don to/ /de ltar de rgyas par bshad pa bstan nas/ dpe bshad pa'i phyir/ ji ltar zhes bya ba la sogs pa gsungs te/chu'i dbus kyi zhes bya ba ni chu'i skyor ba zhes bya ba las so/ /shing zhes bya ba ni sa las skyes pa'o/ /'phel nas 'gro zhes bya ba ni sdong bu dang / yal ga dang / lcug ma dang / 'dab ma phun sum tshogs pa las/ yongs su rdzogs par 'gyur ro//rtag tu zhes bya ba ni dus shin tu ring por ro/ /de la 'bras bu sogs ldan pa/ /zhes bya ba ni shing rgyas pa'i rjes la 'bras bu sogs ldan pa me tog dang 'bras bu phun sum tshogs pa la sogs pa'o/ /ster ba 'di la the tshom med/ /ces bya ba ni the tshom med pa'i phyir ro/ /de ltar dpe bstan nas/don brjod par bya ba'i phyir/ de bzhin phung po shing zhes bya ba ni phung po lnga'i yan lag can no/ /shes bya zhes bya ba ni shing gi dpes shes par bya'o/ /rtsa yi chu yis 'phel nas ni/ /zhes bya ba ni rtsa las byung ba'i khams sum cu rtsa gnyis kyi chus 'phel ba nyid kyi phyir chu des 'phel ba ni 'phel bar byed pa'o//'phel bas zhes bya ba ni rim gyis yongs su rgyas par 'gyur ba'o/ /'bras bu ster zhes bya ba dang 'brel to/ /ji ltar zhe na/ de'i phyir thams cad mkhyen pa nyid kyi bya ba gsungs te/ yang dag ces bya ba ni phyin ci ma log pa'i gdams ngag bsgoms pas zhes bya ba'i don to//lha'i rnam pa'i ngo bo yis/ /zhes bya ba ni 'chad par 'gyur ba las so/ /rtsa rnams zhes bya ba ni 'khor lo drug gi dbye bas tha dad pa rnams la'o/ /rang bzhin gyis 'gyur zhes bya ba ni lha'i rnam pa'i ngo bos 'gyur ba'o/ /ji skad du le'u nyi shu rtsa bdun pa las/de rnams ming ni bshad bya ste/ /de las gzhan pa'i lha rnams ni/ /zhes bya ba la sogs pa gsungs te/ de ltar don rnam pa bzhis nye bar bsdu ba sngon du 'gro bas rtsa bstan pa'i dgos pa brjod pas so/ /da ni rtsa rnams bskyed pa'i rim pa brjod pa'i phyir ro/ /de'i yan lag me'i drod kyis gdungs pas byang chub kyi sems 'byung ba ni/reg bya'i rgyal mtshan gnyis phrad pas/ /zhes gsungs te/ reg bya'i sgras ni pad+ma la brjod de/ shin tu reg bya ba de nyid kyi phyir rgyal mtshan gyi ngo bo'o/ /lhag ces bya ba ni bsrung bya dang bsgrub bya'i nus pa'o/ /de tshe zhes bya ba ni de'i dus su'o//me ni yang dag 'bar zhes bya ba ni ye shes kyi me 'bar ba zhes bya ba'i don to/ /lte ba'i dbus su sprul pa'i 'khor lo dang / steng du gnas pa'i me'i 'khor lo gnyis ni 'bar ba'i rnam pa 'grub pa zhes bya ba'i don to/ /me'i 'khor lo'i dbus zhes bya ba ni longs spyod kyi 'khor lo'i 'og na gnas pa'i me'i 'khor lo'o//'khor lo mig can pad+ma rnams/ /zhes bya ba ni 'bar ba'i rnam pas ma lus par drod kyis khyab par 'gyur zhes bya ba'i don to/ /ji ltar 'gro bar 'gyur zhe na/ de'i phyir rim gyis rim gyis zhes bya ba gsungs te/ 'dis ni sngags dang rgyud kyi rim pa bshad do//de rjes brtsal zhes bya ba ni ye shes kyi mes bsregs pas mi snang ba nyid du 'gyur bas so/ /'bab de la zhes bya ba ni kun rdzob kyi rnam pa'i byang chub kyi sems de'i drod kyis gdungs pas zhes bya ba'i don to/ /bde ba che zhes bya ba ni thabs dang shes rab kyi stobs kyis grub pas rtsa sreg par byed pa'i bdag nyid do//sprul pa'i snying por yang dag thob/ /ces bya ba ni sprul pa'i 'khor lo nas gsang ba'i 'khor lo'i dbus su rim gyis thob par byas nas so/ /gcig gyur zhes bya ba ni ro gcig pa nyid kyi phyir ro/ /bsdus nas ni gong bu'i rnam par byas nas 'gro bar 'gyur zhes bya ba lhag ma'o//de ltar mes kun nas gdungs pas byang chub kyi sems kyi ngo bo bstan nas/ rtsa gsum gyi khams 'bab pa'i rim pa bstan par bya ba'i phyir rtsa gnyis zhes bya ba la sogs pa gsungs te/ rtsa gnyis ni g.yas pa dang g.yon pa'i ngo bo'o//kha'i lam zhes bya ba ni rang gi kha'i lam nas so/ /'dzag pa zhes bya ba ni 'bab pa'o/ /ci zhig ce na/ de'i phyir nyi ma zla ba'o zhes bya ba gsungs te/ /rdul dang khu ba ni nyi ma dang zla ba dag go/ /skye gnas 'khor lo'i dbus su yang / /zhes bya ba ni bsgrub par bya ba dang sgrub par byed pa gnyis phrad pa'i dus su'o//skye gnas 'khor lo ni pad+ma'i dkyil 'khor gyi dbus su rnal 'byor ma dang 'brel pa'i rtsa gnyis srang bu'i rnam par gnas pa'o/ /gnyis ka 'dus pas za ma tog gi tshul du gnas pa'o/ /gal te de ltar yin na thabs shes rab dang 'brel pa'i rtsa gsum po gang las 'byung zhe na/de'i phyir rgyu gcig tu zhes bya ba gsungs te/ rtsa dbus ma rnam par rtog pa thams cad las 'das pa'i phyir/ de las gzhan pa'i rtsa gnyis la gtso cher te/ gzhan rnams kyi yang rgyu yin no/ /shes nas zhes bya ba ni shes par bya ba'o//de nyid ces bya ba ni gtso bor gyur pa'i dbus ma'o/ /'bras bu zhes bya ba ni khrag dang khu ba 'bab pa nyid kyis 'bras bu las so/ /rnam pa gnyis zhes bya ba ni la la nA dang ra sa nA'i dbye bas so/ /g.yon pa zhes bya ba ni g.yon pa'i rtsa las so/ /zla ba rnam par 'byung zhes bya ba ni byang chub kyi sems kyi khams bskyed pa'o//g.yas pa zhes bya ba ni g.yas pa'i rtsa'o/ /nyi ma'i zhes bya ba ni khrag gi khams las byung ba zhes bya ba'i don to/ /khams gnyis po 'di nyid ni bde ba chen po rjod par byed pa ste/ don dam par bde ba chen po'i rang bzhin du 'gyur zhes bya ba'o/ / g.yas pa zhes bya ba ni g.yas pa'i rgyu bas so/ /gang tshe nyi ma ni zhes bya ba ni dus gang la nyi ma'i rang bzhin du 'gyur ro/ /de tshe khrag ces bya ba ni thabs kyi rnam pa'o/ /'gyur bde ba'o zhes bya ba ni bde ba chen por 'gyur zhes bya ba'i don to/ /de rgyu mthun par 'gyur ba nyid kyi phyir ro/ /gang tshe g.yon pa'i zla ba zhes bya ba ni g.yon pa'i rtsa ni zla ba'i rnam pa'o//gang tshe zhes bya ba ni dus gang gi tshe na'o/ /gsal zhes bya ba ni dri ma med pa'o/ /de'i tshe zhes bya ba ni dus de la'o/ /kun+da lta bu yi zhes bya ba ni kun+da'i me tog ltar dkar ba'o/ /bde ba zhes bya ba ni bde ba chen po nyid ces bya ba'i don to//de gnyis zhes bya ba ni g.yon pa dang g.yas pa'i rtsa dag go/ /khong du chud pa'i zhes bya ba ni a ba d+hU tIr gnas pa'o/ /me zhes bya ba ni dus kyi me'i rang bzhin no/ /yan lag kun la yang zhes bya ba ni yan lag thams cad la thun mong du spyi'i tshul du gnas pa ste/ khyab byed nyid du zhes bya ba ni lhag ma'o//de ltar rnam pa gnyis kyis me'i drod kyis byang chub kyi sems 'byung ba bstan nas/ bar ma dor srid pa 'jug pa brjod pa'i phyir/ sngon las zhes bya ba gsungs te/ sngon gyi las kyi stobs kyis so/ /rlung gi rnam shes ni zhes bya ba ni rlung dang bcas pa'i rnam par shes pa ste/bar ma do'i rnam par shes pa'o/ /brgya lam zhes bya ba ni shi ba'i srid pa'i rjes la rgyu mtshan med pa'i gang tshe 'gro bar 'gyur na zhes bya ba ni bar du nyi ma kha cig 'gro bar 'gyur te/ 'khor bar 'gyur ni dri zhim pa dang / dri ngan pa za zhing longs spyod pa'o/ /de tshe zhes bya ba ni dus gang gi tshe'o//pha yi kha la mtshungs par gnas/ /zhes bya ba ni 'byung bar 'gyur ba'i ma mthong nas 'byung bar 'gyur ba'i pha yang mthong ste/ 'di dang lhan cig rol par byed mi nus pa'o/ /mi nus pa zhes bya ba ni phyin ci log gi blo skyes nas pha nye bar gyur pa la yang rol pa bzlog pa'i blos kha la nye bar gnas pa'o//de'i tshe zhes bya ba ni dus de'i tshe'o/ /chags pa'i dbang du 'gyur ba zhes bya ba ni ma'i yul la 'khrig pa la dga' bar 'gyur zhes bya ba'i don to/ /ji skad du bcom ldan 'das kyis dus de'i tshe dri za la sems gnyis las sems gzhan rgyu ba yin te/'di lta ste rjes su chags pa dang lhan cig par 'gyur ba'am/ khong khro ba dang lhan cig par 'gyur ba zhes bya ba'o/ /slob dpon dbyig gnyen gyi zhal nas kyang / dbang po kun tshang thogs med ldan/ /phyir mi ldog cing dri za ba/ /phyin ci log pa'i blo gros te/ / 'gro ba'i yul la rol par 'dod/ /ces gsungs pa dang / slob dpon chos kyi grags pa'i zhal nas kyang / sems can gzhan du mi khyer ba/ /dman pa'i skye gnas 'gro ba yang / /bdag la chags dang ldan par sdug /bde ba dor ba thob 'dod pas/ /zhes gsungs so//zla mtshan ldan pa'i rtsa zhes bya ba ni dpyid kyi dus dang ldan pa ni zla ba mtshan dang ldan pa'o/ /gang tshe zhes bya ba ni dus gang gi tshe na'o/ /rtsa zhes bya ba 'byung bar 'gyur ba'i ma'o/ /me dang nyi ma 'char ba na/ /zhes bya ba ni me ni dbus ma'i rgyu ba'o/ /nyi ma ni khrag gi khams 'char ba yod pa ste 'char ba'o//de tshe zhes bya ba ni dus de'i tshe na'o/ /lhag par chags pas zhes bya ba ni khyo dang lhan cig lhag par chags pas non pa ni gzhan dbang du gyur pa'o/ /gcig tu chags pa zhes bya ba ni sa bon gtong bar 'dod par 'gyur ro/ /mchog tu zhes bya ba ni 'byung bar 'gyur ba'i sems can skye ba la cung zad rigs pa'i phyir mchog go//rdo rje pad+ma zhes bya ba ni bo la dang kak+ko la'o/ /'dres pa'i gdong zhes bya ba ni phan tshun du chags pa'i ngo bo thob pa'o/ /'jug pa zhes bya ba ni rab tu 'jug pa'o/ /pha'i kha zhes bya ba ni pha la mngon par phyogs so//rlung zhes bya ba ni las kyi rlung gis bskul ba'i bar do zhes bya ba'i don to/ /de ltar bar ma do'i srid par 'jug pa bstan nas/ sa bon 'dres pa'i ngo bos rtsa bskyed par brjod pa'i phyir/ de tshe zhes bya ba gsungs te/ dus de'i tshe'o/ /sa bon du ni zhes bya ba ni pha ma dag gi khu ba dang thigs pa'i ngo bo la'o//'gyur zhes bya ba na 'byung bar 'gyur ba'o/ /sa bon las ni zhes bya ba ni de ma thag par bshad pas bar ma do'i srid pa brgyal bar 'gyur ba las so/ /sems can zhes bya ba ni skye ba'i srid pa la rab tu zhugs pa la'o/ /'byung zhes bya ba ni 'grub pa ste/zla ba bcu la sogs pa'i rim gyis 'gyur zhes bya ba'i don to/ /de'i phyir zhes bya ba ni sa bon yongs su gyur pa las so/ /rtsa las yang dag 'char zhes bya ba ni skye ba'i sems can la rtsa 'byung bas so/ /yang dag ces bya ba ni mkhas pa'i gang zag gi dgongs pas so//'bras bu zhes bya ba ni sprul pa'i sku'i rnam pa'o/ /ngo mtshar can ni/ /rten cing 'brel par 'byung ba'i chos nyid la bsam gyis mi khyab pa'i phyir shin tu yang ngo mtshar skyed par byed pa zhes bya ba'i don to/ /skyes zhes bya ba ni 'byung bar 'gyur zhes bya ba'i don to/ / de ltar sa bon 'dres pa'i ngo bos rtsa 'byung ba brjod nas/ byang chub kyi sems mi 'chor bas rtsa rnams mi 'byung ba brjod pa'i phyir/ de nyid byang chub sems kyang ni/ /zhes bya ba gsungs te/ gnyis ka yang dag par sbyar ba las skyes pa'o/ /'dzin pa'i zhes bya ba ni sngar bshad pa'i rnam pa gsum gyis so//srog ni bsdus pa'o zhes bya ba ni srog ni byang chub kyi sems kyi rnam pa la bsdus pa ni/ nang nyid du bzhag par gyur pa'o/ /de ltar byas par gyur pa la ye shes mchog dang zhes bya ba ni lhan cig skyes pa'i rnam pa'o/ /de nyid mchog ces bya ba ni don gyis lhan cig skyes pa'i ngo bo'o//mchog tu bde zhes bya ba ni phyag rgya chen po'i ngo bo'o/ /rmad byung tshe zhes bya ba ni 'dod chags kyi spyod pa'i stobs kyis sangs rgyas nyid thob pa de ni ngo mtshar ba'o/ /thob pa ye shes zhes bya ba ni shin tu rtogs pa'o/ /ye shes rnal 'byor zhes bya ba ni gdams ngag gi ngo bo thos pa la sogs pa'i mtshan nyid kyis so//mchog tu bde ba zhes bya ba ni bcom ldan 'das kyi rgyud la mnga' ba'o/ /bla na med ces bya ba ni 'di las gong na gzhan med pa'i phyir bla na med pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u bcu bdun pa'i rgya cher bshad pa'o// //de ltar le'u bcu bdun pas rtsa'i 'khor lo'i rim pa gnas kyi yul la dri ba'i lan bstan nas/ da ni skabs su bab pa'i rnal 'byor pa'i lus la rtsa'i tshogs kyi yul la dri ba'i lan gdab pa brjod pa'i phyir le'u bco brgyad pa ston par byed cing /dang por re zhig de rtsom par bstan pa'i phyir/ de nas zhes bya ba la sogs pa gsungs te/ le'u bcu bdun pa bshad pa'i rjes la'o/ /gzhan yang zhes bya ba ni sngar la ltos pas khyad par can nyid kyi phyir ro//bshad bya zhes bya ba ni brjod par bya'o/ /rnal 'byor lus la zhes bya ba ni sgom pa po'i lus la'o/ /rim pa ji lta bzhin du rtsa rnams nges pa ni zhes bya ba dang / bde ba chen po'i 'khor lo go rims kyi rtsa rnams nges pa'o/ /yang dag ces bya ba ni phyin ci ma log pa'i ngo bos so//brgyud pa yi ni rim gyis skye/ /zhes bya ba ni gdams ngag gi brgyud pas 'ongs pa zhes bya ba'i don to/ /de ltar rtsom pa'i ngo bo bstan nas/ de nyid sba bar bya ba nyid brjod pa'i phyir/ gsal bar zhes bya ba la sogs pa gsungs te/ snod ma yin pa'i skye bo rnams la bstan par bya ba ma yin pa'o/ /ma gsungs pa zhes bya ba ni ngag tu brjod par bya ba ma yin pa'o/ /gang du yang zhes bya ba ni bya ba la sogs pa'i rgyud rnams su'o/ /gsal bar ma gsungs pa zhes bya ba ni ma bstan pa'o/ /de ci'i phyir zhe na/ skal ba med don du zhes bya ba gsungs so/ /skye bo zhes bya ba ni sems can rnams la'o/ /ji lta bu zhe na/ de'i phyir/ dad pa'i bsam pa rnams spangs pa/ /zhes bya ba gsungs te/ khyad par du 'phags pa'i bcom ldan 'das kyi gsung la yid ches pa'i ngo bo 'dod pa'i bsam pa dang rnam par spangs pa ni bral ba rnams la zhes bya ba'i don to//snyigs ma lnga zhes bya ba'i dus zhes bya ba ni tshe dang / lta ba dang / sems can dang / nyon mongs pa dang / bskal pa'i snyigs ma dang ldan pa la'o/ /snod du bya bar 'dod pa yis/ /zhes bya ba ni snod du bya ba'i bsam pas so/ /sems can myur du dngos grub don//zhes bya ba ni mthong ba'i chos 'di nyid la phyag rgya chen po'i 'bras bu thob pa'i phyir ro/ /rang byung ye shes zhes bya ba ni rkyen gzhan gyis ma byung ba'i rang rig gi ye shes so/ /rmad 'byung ba zhes bya ba ni lhun gyis grub pas sems can gyi don sgrub par byed pa'o/ / bshad par bya zhes bya ba ni tshig gi lhag ma'o/ /de ltar rnam pa gnyis kyis rtsom pa'i don brjod nas/ dngos su de bshad pa'i phyir/ de'i yan lag rten gyi ngo bo bshad pas gtso bo'i rtsa bstan pa'i phyir ro/ /rnal 'byor lus ni zhes bya ba ni sgom pa po'i lus so/ /bde ba chen po'i zhes bya ba ni bde ba chen po'i gnas skabs sngon du 'gro bas bskyed pa'i phyir dang /rang nyid kyis kyang de'i rang bzhin gyi phyir ro/ /'khor lo'i zhes bya ba ni bde ba chen po'i 'khor lo la'o/ /sum cu rtsa gnyis zhes bya ba ni grangs so/ /rmad du byung ba zhes bya ba ni gdung ba zhi bar byed pa nyid kyi phyir ro//rtsa rnams zhes bya ba ni rim rigs la sogs pa'o/ /yang dag ces bya ba ni phyin ci ma log pa'i ngo bos so/ /bshad par bya zhes bya ba ni le'u bcu bdun par bstan pa'o/ /byang chub sems 'bab ces bya ba ni kun rdzob kyi byang chub kyi sems kyi zla ba 'bab pa'o/ /gsal zhes bya ba ni gsal bar byas nas zhes bya ba'i don to//de ltar rtsa'i gtso bo bstan nas/ de rnams kyi mtshan nyid kyi sgo nas khongs su bsdu ba brjod pa'i phyir/ de rnams zhes bya ba la sogs pa gsungs te/ bde ba chen po'i 'khor lor gnas pa'i rtsa rnams so/ /bde ba chen po'i gnas zhes bya ba ni de brjod pa'i 'khor lo la'o//mtshan nyid ces bya ba ni ngo bo nyid nye bar mtshon pa'i ngo bo'o/ /bshad par bya zhes bya ba ni brjod par bya ba'o/ /da ni zhes bya ba ni da lta nyid du zhes bya ba'i don to/ /a ka tsa Ta ta pa sde tshan dang zhes bya ba ni drug gi grangs so/ / ya ra la wa sha Sha sa zhes bya ni ya'i sde tshan dang / sha'i sde tshan gyi dbye bas sde tshan gnyis te/ de ltar na brgyad do/ /rigs pas shes par bya zhes bya ba ni chos kyi phung po ma lus pa bsdus pa'i ngo bo nyid du rtogs par bya'o/ /slar yang zhes bya ba ni sde tshan brgyad po rnams so/ /bsdus nas 'gro zhes bya ba ni khongs su bsdus nas 'gro ba'o//gcig tu zhes bya ba ni a yig gi ngo bo'o/ /yi ge tsam zhes bya ba ni chos nyid mtshon par byed pa'o/ /de yang zhes bya ba ni a yig gi ngo bo'i yi ge'o/ /zhi ba zhes bya ba ni thams cad nye bar zhi ba'i ngo bo'o/ /yongs shes zhes bya ba ni de bzhin nyid dang tha mi dad pa'o//byang chub sems la zhes bya ba ni don dam pa'i gzhom du med pa'i ngo bo dang kun rdzob bo/ /thim nas 'gro zhes bya ba ni khongs su 'gro ba'i phyir ro/ /kun rtog thams cad spangs nas ni/ /zhes bya ba ni rnam par rtog pa'i gnyen po don dam pa nyid do//bde ba kun gyi gzhi zhes bya ba ni 'jig rten dang 'jig rten las 'das pa'i gnas so/ /mchog ces bya ba ni bla na med pa'o/ /shes dang shes bya'i rnam par spangs/ /zhes bya ba ni gzung dang 'dzin pa las rnam par grol ba'i phyir ro/ /rtag tu zhes bya ba ni dus gsum du yang ngo //thams cad bdag nyid ces bya ba ni lus ni thams cad du'o/ /de ltar de rnams kyis mtshan nyid kyi sgo nas khongs su bsdu ba bstan nas/ spro ba'i rim pa de rnams nyid la rang gi ngo bo'i nges pa brjod pa'i phyir/ de las 'khor lo gsum dbye ba/ /zhes bya ba gsungs te/ a ka tsa Ta ta pa ya sha'i ngo bo rtsa brgyad kyi dbye bas 'khor lo gsum la nyi shu rtsa bzhir 'gyur ro/ /de rnams kyang lus ngag yid gsum gyi dbye bas lan gsum du bgrangs pas so/ /gsum zhes bya ba ni nyi shu rtsa bzhi po'i grangs de rnams lan gsum du bgrangs pas bdun cu rtsa gnyis kyi grangs su 'gyur ro//gsal zhes bya ba ni gsal bar byas nas so/ /de ni zhes bya ba ni bdun cu rtsa gnyis so/ /stong du rab tu phye ba'ang / /zhes bya ba ni brgya phrag bcu'i grangs so/ /so sor zhes bya ba ni rtsa re re la bstan nas so/ /spro ba'i bdag nyid can zhes bya ba ni stong phrag stong phrag gi grangs kyis te/stong phrag bdun cu rtsa gnyis kyis rtsa rnams kyi grangs zhes bya ba'o/ /rlung dang mkhris pa zhes bya ba la sogs pa rnams ni rlung dang mkhris pa la sogs pa'i khams gsum gyi dbye bas sngar gsungs pa'i 'khor lo gsum la bde ba chen po'i 'khor lo spangs nas/longs spyod dang / chos dang / sprul pa'i 'khor lo'i dbye bas stong phrag bdun cu rtsa gnyis su 'gyur ro/ /rnal 'byor chen po'i rgyud kyi ni/ /zhes bya ba ni dpal gsang ba 'dus pa'i rgyud la sogs pa zhes bya ba'i don to/ /de ltar spro ba'i rim pas de rnams kyi lha'i ngo bo bstan nas/de rnams kyi lha'i ngo bo brjod pa'i phyir phyag rgya'i rnal 'byor zhes bya ba la sogs pa gsungs te/ las kyi phyag rgya'i ngo bo nyid kyi phyir ro/ /mchog dang de nyid ces bya ba ni mchog gi de kho na nyid kyi rang bzhin no/ /rtsa'i sgo nas de la dmigs pa'o/ / lha'i rim pa zhes bya ba ni lha stong phrag bdun cu rtsa gnyis kyi ngo bo'o/ /de'i mtshan nyid ni zhes bya ba ni mtshan nyid do/ /rtsa so so'i zhes bya ba ni rtsa re re'i grangs ni lha re re'i ngo bo'o/ /de nyid kyi phyir dbye ba yis/ zhes gsungs so/ /shes par bya zhes bya ba ni rtogs par bya ba'o/ /bla ma'i zhal las zhes bya ba ni mtshan nyid phun sum tshogs pa'i rdo rje slob dpon gyi zhal las te/ma 'ongs pa'i dus na zhes bya ba'i don to/ /de ltar de rnams kyi lha'i ngo bo bstan nas/ de rnams nyid kyi slar yang bsdus pa brjod pa'i phyir/ de'i yan lag rtsa'i bsdus pa ni/ de las kyang zhes bya ba ni de'i rjes su'am/stong phrag bdun cu rtsa gnyis kyi grangs so/ /sdom sbyor bar zhes bya ba ni bsdus pa'o/ /rigs pas zhes bya ba ni de ma thag par bstan pa'o/ /de ltar yang / stong phrag bdun cu rtsa gnyis ni bdun cu rtsa gnyis la 'gro ba'o/ /de rnams kyi rtsa ni sum cu rtsa gnyis la zhes bya bar byas nas so//de nyid bstan pa'i phyir phan tshun du bsten byas nas zhes gsungs te/ phan tshun du 'brel pa las so/ /de nyid bstan pa'i phyir/ rtsa sum cu rtsa gnyis la zhes gsungs te/ 'khor lo re re la 'khor lo bzhi'i grangs kyis so/ /mchog ces bya ba ni rnam par shes pa'i tshogs brgyad dang /thun brgyad kyi dbye bas so/ /gsal zhes bya ba ni bde ba chen po'i 'khor lo'i cha nyid kyi phyir gsal ba'o/ /ji skad du/ steng gi rtsa ba yal ga mgo/ /lus ni shing zhes brjod par bya/ /zhes gsungs so/ /rnal 'byor lus zhes bya ba ni sgrub pa po'i lus so//mchog ces bya ba ni mchog ste/ gzhan rnams kyang sdud par byed pa nyid kyi phyir ro/ /rtsa ni sum cu rtsa gnyis zhes bya ba ni 'khor lo bzhi'i dbye bas so/ /rmad 'byung zhes bya ba ni bsdu bar bya ba sdud par byed pa'i phyir ro/ /gal te de ltar yin na rnal 'byor pas ji ltar nye bar mtshon zhe na/de'i phyir yi ge sum cu rtsa gnyis phye bas zhes gsungs te/ dbyangs yig bcu drug thabs dang shes rab kyi dbye bas phye ba'o/ /thob ces bya ba ni thob par bya ba'o/ /rnal 'byor mchog gis zhes bya ba ni sgom pa po'i khyu mchog rnams kyis so/ /rtag tu zhes bya ba ni dus thams cad du'o//de ltar rten gyi ngo bo'i rtsa ba bshad nas/ brten pa'i dkyil 'khor gyi bshad pa brjod pa'i phyir de'i yan lag mdor bstan pa ni/ phung po 'byung ba zhes bya ba la sogs pa gsungs te/ rnam par shes pa'i phung po la sogs pa lnga'o/ /'byung ba zhes bya ba ni sa la sogs pa bzhi'o//don dang zhes bya ba ni gzugs la sogs pa'i yul lnga'o/ /dbang po'i zhes bya ba ni drug ste lus kyi tshigs thams cad dang rgyus pa'i mtshams thams cad dang bcas pa'o/ /sgo ni srung bar byed pa zhes bya ba ni dpung pa dang / nye ba'i dpung pa dang / brla dang byin pa la sogs pa'i dbye bas khro bo bcu rnams so//sum cu rtsa gnyis dbye bdag nyid/ /ces bya ba ni sum cu rtsa gnyis kyi bdag nyid can no/ /snang ba yi ni zhes bya ba ni brten pa'i rnam pa'o/ /de ltar phung po lnga la ni sangs rgyas lnga'o/ /sa la sogs pa'i khams bzhi la spyan ma la sogs pa lha mo bzhi'o//yul rnams la ni gzugs rdo rje ma la sogs pa lnga'o/ /mig la sogs pa'i dbang po lnga la sa'i snying po la sogs pa byang chub sems dpa' brgyad do/ /lus kyi yan lag dang nying lag la sogs pa la/ gshin rje gshed la sogs pa'i khro bo bcu zhes bya ba ste/sdud pas lha sum cu rtsa gnyis kyi bdag nyid kyi dkyil 'khor ro/ /mchog ces bya ba ni ye shes kyi bdag nyid kyi phyir ro/ /de ltar spro ba'i rim pas brten pa'i dkyil 'khor bstan nas/ de rgyas par bshad pa brjod pa'i phyir/ lus kyi gzhal yas khang du yang gsungs te/gzhal yas khang du mtshan nyid dang ldan pa'i rnal 'byor pa brten pa'i ngo bo nyid kyi phyir ro/ /ji skad du/ gru bzhi 'phags pa'i bden pa bzhi/ /tshangs pa'i gnas bzhi grwa rnams nyid/ /ces bya ba la sogs pa gsungs so/ /de nyid ni zhes bya ba ni gzhal yas khang gi ngo bo lus so/ / nang bzhugs pas zhes bya ba ni nang du spyod pa'o/ /de bzhin gshegs dang zhes bya ba ni sangs rgyas lnga'o/ /lha mo dang zhes bya ba ni spyan ma la sogs pa'o/ /gzugs la sogs pa zhes bya ba ni yul gyi lha mo lnga'o/ /rgyal sras zhes bya ba ni sa'i snying po la sogs pa byang chub sems dpa' brgyad do//khro bo bcu zhes bya ba ni gshin rje gshed la sogs pa'o/ /yang dag bzhugs zhes bya ba ni rang gi lus la'o/ /de nyid ces bya ba ni rnam par dag pa'i rim pas so/ /mchog ces bya ba ni mchog gi rnam pa nyid kyi phyir ro/ /de ltar don rnam pa gnyis kyis spro ba'i rim pas brten pa'i dkyil 'khor bshad par byas nas sdud pa'i rim pas de nyid bstan pa'i phyir/de'i yan lag rang gi ngo bo ni khro bo rgyal sras la zhes bya ba ni gshin rje gshed la sogs pa rnams dang / sa'i snying po la sogs pa'i byang chub sems dpa' rnams so/ /nang du mi snang bar yang zhes bya ba ni nang du sdud pa'o//'gro ba zhes bya ba ni 'gro bar 'gyur ba'o/ /khro bo dang byang chub sems dpa' dag gzhan don la khyad par med pa'i phyir ro/ /rgyal sras rnams ni lha mo rnams/ /zhes bya ba ni gzugs rdo rje ma la sogs pa'i lha mo rnams la sa'i snying po la sogs pa brgyad ni gzugs rdo rje ma la sogs pa yul gyi lha mo rnams la bsdus pas 'gro ba ste/yul can rnams ni lus kyi nang du 'dus pa'i phyir ro/ /bsdus nas ni zhes bya ba ni mdor bsdus nas so/ /sa sogs zhes bya ba ni khams kyi lha mo spyan ma la sogs pa bzhi po rnams las so//de zhes bya ba ni gzugs rdo rje ma la sogs pa rnams so/ /'gro zhes bya ba ni bsdus nas 'gro ba'o/ /'khor rnams ni gtso bo la bsdus pa'i phyir dang / lha mo nyid du mtshungs pa'i phyir ro/ /de dag ces bya ba ni khams kyi lha mo bzhi po'o/ /de bzhin gshegs pa lnga la zhes bya ba ni sangs rgyas lnga la ste/chos nyid chos rnams las tha dad pa med pa'i phyir ro/ /sku gsung thugs kyi rdo rje la/ de dag la yang zhes bya ba ni de bzhin gshegs pa lnga rnams so/ /sku la sogs pa gsum bsdus nas/ /zhes bya ba ni khongs su bsdus par 'gro ba'o//gti mug gi rigs la rin chen 'byung ldan nang du sdud pa'o/ /gti mug dang nga rgyal dag gcig pa nyid kyi phyir ro/ /'dod chags kyi rigs la las kyi rigs khongs su gtogs pa'i phyir ro/ /chags pa'i dbang gis phrag dog skye ba'i phyir ro/ /de kho na nyid mchog gcig pu de la yang ni zhes bya ba ni sku rdo rje la sogs pa gsum pa'o//gcig pu zhes bya ba ni grib ma'i rigs kyi ngo bo rdo rje 'chang chen po'i rigs la'o/ /mchog ces bya ba ni spros pa thams cad las 'das pa'o/ /de kho na nyid ces bya ba ni ma bcos pa'i rang bzhin no/ /thim nas zhes bya ba ni bsdus nas so//zhi ba zhes bya ba ni bde legs byed pa'i phyir ro/ /gzhan yang ji lta bu zhe na/ de'i phyir/ gzung ba dang / 'dzin pa rnams las grol zhes gsungs te/ snang ba dang bral ba nyid kyi phyir ro/ /bde ba thams cad kyi ni gzhi/ /zhes bya ba ni zag pa med pa'i bde ba'i rten la'o//mchog ces bya ba ni mi slob pa'i phyir bla na med pa'o/ /de yang zhes bya ba ni rdo rje 'chang gi ngo bo'o/ /nyams myong tsam las zhes bya ba ni rang gi sems kyis so/ /yi ge tsam zhes bya ba ni nyams su myong ba'i rnam pa tsam rang gi sems so/ /yi ge tsam ni a yig gi ngo bo ste/thim par 'gyur zhes bya ba dang 'brel to/ /yi ge tsam ni thig ler thim/ /zhes bya ba ni yi ge tsam ni a yig gi ngo bo'o/ /thig le zhes bya ba ni phra ba dang rig pa'i ngang tshul can brjod du med pa la'o/ /de yang zhes bya ba ni thig le'i ngo bo'o/ /sgra la zhes bya ba ni brag ca'i sgra dang 'dra ba'i rang bzhin gyis 'od gsal ba'o//thim nas 'gro zhes bya ba ni bsdus nas 'gro ba'o/ /sgra tsam zhes bya ba ni de bas kyang phra ba la'o/ /'od gsal ba la'o zhes bya ba ni spros pa thams cad dang bral ba'i stong pa nyid kyi de kho na nyid la'o/ /'od gsal go 'phang zhes bya ba ni 'od gsal gyi ngo bo'o//yang dag par zhes bya ba ni phyin ci ma log pa'i ngo bo'o/ /spro ba dang bsdus pa'i mtshan nyid do zhes bya ba ni rang gi bskyed pa dang 'jig pa'i mtshan nyid dang bral ba nyid kyis de dang de'i rnam pa nyid kyis rtogs pa'i phyir ro/ /de ltar bsdus pa'i rim pas de'i bshad pa rang gi ngo bo bstan nas/de nyid kyi ming gi rnam pa brjod pa'i phyir/ rnam par shes pa zhes bya ba gsungs te/ de nyid rang bzhin gyis 'od gsal ba'i ngo bo'o/ /de ni rang bzhin gyi rnam pas thams cad shes pa'i phyir rnam par shes pa zhes brjod do//chos kyi dbyings dang zhes bya ba ni chos rnams kyi dbyings te/ rigs shes par byas nas so/ /don dam pa dang zhes bya ba ni mchog gi ye shes kyi yul nyid kyi phyir dang / mchog gi skyes bu'i don nyid kyi phyir dang / rang nyid kyi dgos pa chen po nyid kyi phyir ro/ /bde ba che zhes bya ba ni sdug bsngal ma lus pa bzlog pas don dam pa byang chub sems kyi rnam pa'o//gzung ba dang 'dzin pa rnam par grol ba zhes bya ba ni yul dang dbang po'i snang ba med pa'i phyir ro/ /byang chub sems ni zhes bya ba ni sku gsum gyi rnam pa'i byang chub kyi yul nyid kyi phyir ro/ /dri ma med ces bya ba ni nyon mongs pa dang shes bya la sogs pa'i phyir ro//rdo rje sems dpa' zhes bya ba ni stong pa nyid kyi de kho na nyid mngon du byed pa'i rnam pa'o/ /zhi ba che zhes bya ba ni gdod ma nyid nas nye bar zhi ba nyid kyi phyir ro/ /gnyis med ye shes zhes bya ba ni de'i bdag po nyid kyi zung du 'jug pa brjod pa'i phyir ro//rmad du byung ba zhes bya ba ni 'bad rtsol med par sems can gyi don la 'jug pas so/ /dbang bskur ba bzhi pa zhes bya ba ni dbang bzhi pa'i ngo bo'o/ /bde ba dang zhes bya ba ni dpe'i sgo nas mtshon pa'o/ /bzhi pa'i dga' ba zhes bya ba ni don gyi lhan cig skyes pa'i rnam pa dga' ba bzhi'i ngo bo'o//go 'phang mchog ces bya ba ni mi slob pa'i lam gyi rnam pa nyid kyi phyir ro/ /de sogs ming gi bye brag gis/ /zhes bya ba ni ming gi dbye bas so/ /gsungs pa yin zhes bya ba ni brjod pa'o/ /go 'phang mchog ni zhes bya ba ni bcom ldan 'das kyi ngo bo'o/ /spro ba dang sdud pa'i dbye ba yis zhes bya ba ni gnyi ga'i rnam pas so//ji lta ba bzhin du zhes bya ba ni phyin ci ma log pa'i ngo bos so/ /rim pa zhes bya ba ni go rims kyis so/ /de ltar na rnam pa gnyis kyis bsdu ba'i rim pas brten pa'i dkyil 'khor bshad do/ /de ltar brten pa'i dkyil 'khor bshad nas/nye bar bsdu ba brjod pa'i phyir/ de ltar bskyed nas rdzogs pa ni/ /zhes gsungs te/ le'u 'di nyid las bstan pa'o/ /bla ma'i zhal las zhes bya ba ni slob dpon gyis shes par bya zhes bya ba'i don to/ /rang rig pa zhes bya ba ni ngag gi yul ma yin pa nyid kyi phyir rang gi rig par bya ba'o//ye shes kyi mchog ces bya ba ni bsgoms bzhin pa nyid kyis ye shes mchog gi rgyur gyur pa nyid kyi phyir ro/ /zhi ba zhes bya ba ni phyi rol gyi spros pa nye bar zhi ba nyid kyi phyir ro/ /gnyis med mtshan nyid can zhes bya ba ni tha dad pa'i snang ba nye bar chad pas gcig pa la chos kyi dbyings tsam po'i lhag ma nyid kyi phyir ro//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u bco brgyad pa'i rgya cher bshad pa'o// // de ltar le'u bco brgyad pas rnal 'byor pa'i lus la rtsa bsdus pa'i yul la dri ba'i lan gdab pa'i phyir brjod nas/ da ni sna tshogs la sogs pa skad cig gi yul la dri ba'i lan gdab pa'i phyir/ le'u bcu dgu pa nye bar ston cing de rtsom pa ni/ de nas zhes bya ba la sogs pa gsungs te/le'u bco brgyad pa bshad pa'i rjes la'o/ /gzhan yang zhes bya ba ni sngar la ltos nas tha dad pa nyid kyi phyir ro/ /sna tshogs la sogs skad cig 'gag /mtshan nyid ces bya ba dang 'brel to/ /mtshan nyid ces bya ba ni sna tshogs la sogs pa skad cig thun mong ma yin pa'i de kho na nyid 'jug par byed pa'o//brda bzhin zhes bya ba ni rang dang 'os pa'i brda'i ngo bo'o/ /yang dag ces bya ba ni phyin ci ma log pa'i ngo bos so/ /ji lta ba bzhin nyon zhes bya ba ni rtse gcig pa nyid kyis mnyan par gyis shig pa'o/ /de nyid ces bya ba ni kun rdzob dang don dam pa'i rnam pas zhes bya ba'i don to//de ltar sna tshogs pa skad cig gi yul la dri ba'i lan 'debs par rtsom pa dngos su de bshad par rtsom pa ni/ rnam pa sna tshogs zhes bya ba la sogs pa gsungs te/ rnam pa sna tshogs pa ni 'khyud pa dang 'o byed pa'i rnam pa nyid kyi phyir ro/ /rnam par smin zhes bya ba ni de'i phyin ci ma log gi ngo bo nyid kyis bde ba'i ye shes la longs spyod pa'i phyir ro//rnam par 'joms dang zhes bya ba ni bde ba mthong ba'i bdag nyid kyi phyir ro/ /mtshan nyid bral zhes bya ba ni chags pa dang chags bral spangs pa'i phyir ro/ /bzhi zhes bya ba ni rnam pa bzhis so/ / skad cig ma zhes gsungs zhes bya ba ni skad cig ma'i nyams su myong ba'i dngos po rnams kyi'o zhes bya ba ni ming ngo / /rnam par phye nas slar bshad pa/ /zhes bya ba ni rab tu dbye ba rnams kyis brjod par bya ba ste/ da ni zhes bya ba ni da ltar ro/ /rnam pa sna tshogs mngon par 'dod/ /ces bya ba ni bde ba chen po mngon par 'dod pa'o//'di man chad le'u bcu dgu pa'i mthar thug pa'i gzhung mdor te/ de'i phyir 'di gzhag pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u bcu dgu pa'i rgya cher bshad pa'o// //de ltar le'u bcu dgu pas sna tshogs la sogs pa skad cig gi yul la dri ba'i lan bstan nas/ da ni dga' ba la sogs pa'i rnam par dbye ba'i yul la dri ba'i lan brjod pa'i phyir/ le'u nyi shu pa ston par byed cing / dang por re zhig de rtsom pa bstan pa'i phyir/de nas zhes bya ba la sogs pa gsungs te/ le'u bcu dgu pa bshad pa'i rjes la'o/ /dga' ba bzhi'i mtshan nyid bshad par bya ba dang 'brel to/ /dga' ba bzhi po ni 'chad par 'gyur ba'i mtshan nyid can rnams kyi'o/ /mtshan nyid ni rang gi ngo bo 'jug par byed pa'o//ji ltar zhe na/ de'i phyir lugs 'byung zhes gsungs te/ 'khor lo bzhi'i ltos pas lugs dang mthun pa dang lugs las zlog pa dag gis so/ /ji lta ba'i zhes bya ba ni phyin ci ma log pa'i ngo bos so/ /rim pa ji bzhin zhes bya ba ni rim pa ji lta ba bzhin du'o/ /de ltar de'i rtsom pa bstan nas/dngos su de bshad pa'i yan lag 'og tu rgyu ba la brten nas/ dga' ba la sogs pa'i rnam par dbye ba bstan pa'i phyir/ dga' ba bde ba dang po ste/ /zhes gsungs te/ cung zad bde ba'i rang bzhin nyid kyis dga' ba'i ngo bo'o/ /mchog tu dga' ba gnyis pa dang / /zhes bya ba ni snga ma las lhag pa'i rang bzhin nyid kyi phyir ro//dga' bral zhes bya gsum pa dang / /zhes bya ba ni chags bral gyi bdag nyid kyi phyir ro/ /bzhi pa lhan cig skyes par bshad/ /ces bya ba ni dga' ba rnam pa gsum spangs pa nyid kyi phyir/ bcos ma ma yin pa'i ngo bo nyid kyi phyir ro/ / ji skad du/ dgyes pa rdo rje'i rgyud las/ cung zad bde ba dga' ba ste/ /mchog tu dga' ba de las lhag /dga' bral chags pa bral 'gyur te/ /bzhi pa 'di rnams dang ni bral/ /zhes gsungs so/ /de ltar mdor bstan pa bshad nas/ lugs las bzlog pa'i rim pas dga' ba la sogs pa'i rnam par dbye ba brjod pa'i phyir/sprul pa'i 'khor lo dga' ba dang / /zhes bya ba gsungs te/ dga' ba'i sgras brjod par bya ste/ byang chub kyi sems kyi rten du gyur pa nyid kyi dbus su a'i yi ge yod pa'i phyir dang / gyen du rgyu bas byang chub kyi sems khyer ba'i phyir ro/ /mchog dga' chos kyi 'khor lor gnas//zhes bya ba ni der de bzhin gshegs pa dang lha mo'i sa bon mchog gi ngo bo rnams yod pa'i phyir dang / snga ma bzhin du rgyu bas byang chub kyi sems khyer ba'i phyir ro/ /longs spyod dga' ba bral ba dang / /zhes bya ba ni ro drug la longs spyod pas de'i yul la dga' ba dang dga' bral sngar bzhin byang chub kyi sems thob pa'i phyir ro//lhan cig skyes dang bde ba che/ /zhes bya ba ni bde ba chen po'i 'khor lo'i lhan cig skyes pa'i ngo bo ste/ de la ha yig gi dbyibs mi shigs pa yod pa'i phyir dang / rang nyid kyis byang chub kyi sems dang lhan cig tu 'dres pas khyad par can gyi bde ba nyams su myong ba nyid kyi phyir ro//lugs bzlog rim pa zhes su gsungs/ /zhes bya ba ni sngon du gsungs pa'i rim pa 'dis lugs las bzlog pa'i mtshan nyid rim pa ma yin pa'i rang bzhin gsungs te/ de ltar lugs las bzlog pa'i rim pa'i dga' ba la sogs pa'i rnam par dbye ba bstan nas/ lugs las byung ba'i rim pas de'i rnam par dbye ba'i yan lag gi ngo bo bstan pa'i phyir/ de rjes lugs 'byung bshad bya ste/ /zhes gsungs te/ go rims kyi ngo bo'o/ /bde chen 'khor lo'i spyi bo la//zhes bya ba ni 'dab ma sum cu rtsa gnyis pa rlung gi 'khor lo'i mthar thug pa la'o/ /de ni dga' bar bshad pa yin/ /zhes bya ba ni ye shes kyi mes gdungs pa'i stobs kyis zhu bar byed pa'i byang chub kyi sems kyi khams de las 'pho ba'i phyir ro/ /de ni zhes bya ba ni de'i rjes la'o//longs spyod ces bya ba ni longs spyod kyi 'khor lo 'dab ma bcu drug la me'i 'khor lo'i mthar thug par mchog dga'o/ /mgrin pa las lhag pa'i gnas kyi mthar thug par cung zad yan lag thams cad la byang chub kyi sems kyis khyab pa'i phyir ro/ /dga' bral chos kyi 'khor lor gnas//zhes bya ba ni rtsa brgyad kyi ngo bo chos kyi 'khor lo ste byang chub kyi sems kyis de 'thob pas chags pa dang chags bral dag la de nyid du rig pa'i phyir ro/ /'dir yang tha mal pa'i dang rnal 'byor pa'i dga' bral gyi gnas skabs bla ma'i zhal las rtogs par bya'o/ /sprul pa'i 'khor lor lhan cig skyes/zhes bya ba ni sprul pa'i 'khor lo nas gsang ba'i bar du thob pas lhan cig skyes pa'i dga' ba'i gnas skabs rtogs par bya'o/ /de nyid la bla ma'i man ngag gi stobs kyis don gyi lhan cig skyes pa bsgoms pas shes par bya'o/ /de nyid kyi phyir gsungs pa/ nyams su myong bar byed ces bya ba ste/ khyad par du 'phags pa'i gdams ngag bsgoms pas zhes bya ba'i don to/ /de ltar lugs las 'byung ba'i rim pas de rnam par 'byed pa rang gi ngo bo bstan nas/ gnas skabs kyi dbye ba de rnam par dbye ba'i phyir lta dang 'gugs dang zhes bya ba gsungs te/rnal 'byor pha dang rnal 'byor ma'i lta ba ni mthong ba ste/ bya ba'i rnam pa dgug pa gang yin pa'i rnam pa khyad par can gyi dam tshig rtogs par byed pa gang yin pa de ni lta dang 'gugs pa'o/ /de bzhin brda zhes bya ba ni lus ngag gi ngo bo'i rnal 'byor pa rnams kyi brda'o/ /kha la 'o ni byed pa yi//zhes bya ba ni mchus mchu 'jibs par byed pa'o/ /de nyid kyi phyir kha la zhes gsungs te/ gdong gi'o/ /dga' ba'i gnas skabs zhes bya ba ni de lta bu'i ngo bo dga' ba'i gnas skabs shes par bya'o/ /ji lta bus she na/ de'i phyir/ rnam pa sna tshogs mtshan nyid do//zhes bya ba gsungs te/ 'khyud pa dang 'o byed pa la sogs pa snga ma bzhin zhes bya ba'i tha tshig go/ /ji skad du/ gsang ba 'dus pa'i rgyud phyi ma las/ sna tshogs rnam pa sna tshogs grangs/ /'khyud dang 'o byed la sogs pa/ /zhes gsungs so/ /rnal 'byor rnal 'byor ma mchog tu//zhes bya ba ni rnal 'byor dang rnal 'byor ma ni thabs dang shes rab dag gis yang dag par 'byung ba ni skye ba'o/ /skra la 'dzin pa dang zhes bya ba ni skra 'phyang ba'i rnam pa ste/ de ni gcig go/ /de bzhin zhes bya ba ni rdo rje dang pad+ma'i sbyor ba'i rnam pa ni/ gnas skabs gnyis pa'o//skad cig mchog ces bya ba ni mchog dga'i gnas skabs kyi ngo bo ni skad cig ces brjod do/ /rnam smin skad cig ces bya ba ni gnas skabs de nyid ni rnam smin skad cig go/ /rnam smin de'i phyin ci log go/ /de nyid rgyur ni rnam par shes/ /zhes bya ba ni de nyid ni lhan cig skyes pa'i rgyu'i rgyu zhes brjod par bya'o//lte ba'i dbus na rab gsal gnas/ /zhes bya ba ni las kyi rlung dang sbyar bas 'bar ba'i phyir rab gsal la'o/ /lte ba'i dbus na gnas zhes bya ba ni sprul pa'i 'khor lo'i dbus na gnas pa'o/ /gtum mo yang zhes bya ba ni gtum mo'i las byed pa'i phyir ro//rnam rtog 'joms zhes bya ba ni sngags la sogs pa'i rnam rtog 'joms pa'i phyir ro/ /ci zhig byas nas she na/ de'i phyir bde ba chen po'i 'khor lo'i zhes gsungs te/ mgo bor gnas pa'o/ /zhu bar byed pa zhes bya ba ni 'dzag par byed pa'o//mchog gi cha ni zhes bya ba ni byang chub kyi sems zla ba'i dkyil 'khor gyi ngo bo'o/ /dga' bral nyams su myong ba ni/ dga' bral nyams su myong ba'i gnas skabs zhes bya ba'i tha tshig go/ /bde ba dang kun rdzob pa rtogs pa'i ngo bo nyid kyi phyir ro/ /rnam 'joms skad cig mtshan nyid do//zhes bya ba ni ji skad du rnam 'joms mthong ba zhes brjod de/ bde ba bdag gis longs spyod do/ /zhes bya ba'o/ /de la ro gcig dngos po ni/ /zhes bya ba ni/ gtum mos gdungs pa'i byang chub kyi sems lhung ba'i de ma thag par ro/ /ro gcig par gyur pa'i byang chub kyi sems kyi khams so//rtsa ni gcig gi rgyud la brten/ /zhes bya ba ni rdo rje'i rtsa gcig las 'bab pas na/ rtsa gcig gi rgyun las 'bab pa'o/ /bde ba chen po'i go 'phang zhes bya ba ni de nyams su myong ba sngon du 'gro bas lhan cig skyes pa'i bde ba skyed pa'i phyir ro/ /zhi zhes bya ba ni mi mthun pa'i phyogs 'joms pa'i phyir ro//lhan cig skyes dga'i mtshan nyid ni/ /zhes bya ba ni ma bcos pa'i nyams su myong ba'i ngo bo'o/ /mtshan nyid dang bral skad cig ces bya ba ni de las gzhan pa'i gnas skabs gsum gyi mtshan nyid dang bral ba'i phyir ro/ /ji skad du/ mtshan nyid bral ba gsum las gzhan/ /chags dang chags bral rnam par spangs/ /zhes bya ba gsungs so/ /bde ba'i zhes bya ba ni gdams ngag gi rjes su 'brangs nas bsgom pa rab kyi mthar thug par grub pas rtag tu dga' ba'i rang bzhin gyi phyir ro/ /gsungs zhes bya ba ni brjod pa'o//mchog tu rmad du byung zhes bya ba ni 'dod chags kyi spyod pa'i stobs kyis byang chub mngon du byed pa'i rnam pa'o/ /de ltar rnam pa gnyis kyis lugs las 'byung ba'i rim pas de'i rnam par dbye ba bstan nas/ lugs las bzlog pa'i rim pas de'i rnam par dbye ba bshad pa'i phyir/rlung gi de nyid rjes 'gro bas/ /zhes bya ba gsungs te/ le'u bcu gnyis par gsungs pa'i rim pa'i rlung gi de nyid sgom pa'i rim pas so/ /de nyid ces bya ba ni byang chub kyi sems so/ /rgyun ni steng song nas zhes bya ba ni slar yang rdo rje'i lam nas/ bde ba chen po'i 'khor lo'i bar du khyer bar byed pa'o//rnal 'byor pas ni zhes bya ba ni rlung gi de kho na nyid sgom pa pos so/ /sgrub par byed pa'i zhes bya ba ni rlung gi de kho na nyid la goms par bya ba'i phyir/ byang chub kyi sems la'o/ /de la sprul pa'i 'khor lo ni/ /zhes bya ba ni rdo rje'i rtse mo las sprul pa'i 'khor lor thob pa la'o//dga' ba zhes bya rnam par shes/ /zhes bya ba ni cung zad bde ba'i rang bzhin nyid kyi phyir ro/ /bde ba kun gyi yang dag rten/ /zhes bya ba ni 'jig rten dang 'jig rten las 'das pa'i bde ba'i rang bzhin no/ /rnam pa sna tshogs skad cig gsungs/ / zhes bya ba ni rnam pa sna tshogs pa'i bde ba la nye bar dmigs pa'i phyir ro/ /stong nyid kun gyi gzhi yi mchog /ces bya ba ni rtag tu rang bzhin gyis 'od gsal ba'i rgyu nyid kyi phyir ro/ /mchog ces bya ba ni mchog gi rang bzhin nyid kyi phyir ro/ /chos kyi 'khor lo zhes bya ba ni snying ga las so//steng zhes bya ba ni lugs las bzlog pas so/ /bsgrub bya zhes bya ba ni sngon bzhin du byang chub kyi sems dbang du gyur pa la'o/ /rnal 'byor pa'i zhes bya ba ni sngar bzhin no/ /gnas skabs zhes bya ba ni bde ba'i gnas skabs so/ /mchog dga' zhes bya ba ni de'i ming gi brjod pas bya ba nyid kyi phyir ro//rnam smin skad cig ces bya ba ni sngon gyi gnas skabs las rnam par smin pa'i phyir ro/ /longs spyod 'khor lo zhes bya ba ni steng du byed pa'i skad cig la ste/ byang chub kyi sems steng du rgyu ba'i skad cig la'o/ /gnas skabs bral ba'i dga' ba ni/ /zhes bya ba ni dga' bral gyi gnas skabs su'o//rnam nyed skad cig mtshan nyid ni/ /zhes bya ba ni longs spyod kyi 'khor lo'i byang chub kyi sems thob pa'i rnam par rtog pa khyad par du 'joms pa'i phyir mi mthun pa'i phyogs bzlog pa'i phyir ro/ /bde ba chen po'i 'khor lo che/ /zhes bya ba ni mgo bo'i gnas su'o//de thob mtshan nyid skad cig ma/ /zhes bya ba ni bde ba chen po'i 'khor lo'i zla dang lhan cig tu sems kyi thig le gyen du rgyu ba dang 'dres pa'i skad cig la'o/ /lhan cig skyes pa'i gnas skabs ni/ /zhes bya ba ni de'i ming gis brjod par gyur pa nyid kyi phyir ro/ /mtshan nyid dang bral skad cig go//zhes bya ba ni chags pa dang chags bral las grol ba nyid kyi phyir ro/ /de ltar lugs las bzlog pa'i rim pas de'i rnam par dbye ba bstan nas/ rtsa rnams kyi nam mkha' la rnal 'byor pa'i tshogs kyi nges pa brjod pa'i phyir/ de'i yan lag rang gi ngo bo bstan pa sngon du 'gro bas de rnams kyi bya ba bstan pa ni/rtsa rnams kun gyi nam mkha' che/ /zhes gsungs te/ 'khor lo bzhi rnams sam 'khor lo drug gi rtsa'i nam mkha' khong stong gi ngo bo la'o/ /rnal 'byor ma tshogs yang dag brten/ /zhes bya ba ni las dang rdo rje dang / pad+ma la sogs pa'i ming gis 'chad par 'gyur ba'i le'u nyi shu rtsa bdun pa las so//rab sad ces bya ba ni rang nyid kyi ngo bo rab tu sad pa'i phyir ro/ /de las zhes bya ba ni rab tu sad pa'i rjes la'o/ /gnas skabs mtshan nyid gcig pa zhes bya ba ni lhan cig skyes pa'i de kho na nyid thob pas khams ro mtshungs pa zhes bya ba'i don to//yul chen po ni nyams su myong / /zhes bya ba ni gnyis ka dang sbyor ba'i dbang gis lhan cig skyes pa'i rnam pa'i yul la myong bar byas nas so/ /yang na go tsa ra zhes bya ste/ go ni rdo rje ste/ de la tsa ra ni spyod pa la kun rdzob kyi byang chub sems kyi rnam pa'o/ /de nyid la 'dzin par byed pa'i phyir chen po'o//slar yang rnam 'gyur med par 'gro/ /zhes bya ba ni las dang po pa la ltos nas de skad brjod pa'o/ /las dang po pa yin pa la ltos nas de rnams la nam yang 'gyur ba med pa'o/ /rtag tu lhan cig skyes pa'i ngo bo las de rnams ma g.yos pa'i phyir ro//de ltar rang gi ngo bo bstan pa sngon du 'gro bas/ de rnams kyis bya ba brjod nas/ rnam par dag pa bshad pa'i phyir/ rab tu sad pa'i gnas skabs mtha'/ /zhes bya ba ni de ma thag par bshad pa ltar lugs su 'byung ba'i rim pas dga' ba la sogs pa bzhi dang sna tshogs la sogs pa skad cig ma bzhi'i ngo bo dang /de bzhin du lugs las bzlog pa'i rim pas kyang brgyad du gsungs so/ /stong nyid bcu drug bdag nyid can/ /zhes bya ba ni nang stong pa nyid la sogs pa ste/ grangs mtshungs pa dang mtshan nyid mtshungs pas so/ /bde chen go 'phang zhes bya ba ni lhan cig skyes pa'i ngo bo ye shes dang khyad par med pa'o//ci'i phyir zhe na/ rdo rje sems dpa'i go 'phang gnas/ /zhes bya ba ste/ don dam byang chub kyi sems kyi ngo bo nyid kyi phyir ro/ /de ltar rnam pa gnyis kyis rtsa'i nam mkha' la rnal 'byor ma'i tshogs gnas pa bstan nas/nye bar bsdu ba brjod pa'i phyir/ de ltar 'di ni dga' byed pa/ /zhes bya ba gsungs te/ de ltar zhes bya ba ni sngar bshad pa'i rigs pas so/ /dga' ba bzhi po rnams kyi rnam par dbye ba ni khyad par ro/ /gang du'ang gsal bar ma gsungs so/ /zhes bya ba ni snod dang mi ldan pa'i sems can rnams la sba bar bya ba nyid kyi phyir ro//rnal 'byor ma yi bka' drin gyis/ /zhes bya ba ni ye shes mkha' 'gro ma'i man ngag gi stobs kyis so/ /shes par bya zhes bya ba ni rtogs par bya ba'o/ /bla ma'i zhal las shes zhes bya ba ni rdo rje slob dpon gyi zhal las zhes bya ba'i don to//rnal 'byor chen po'i rgyud dpal rdo rje phreng ba'i rgya cher 'grel pa paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u nyi shu pa'i rgya cher bshad pa'o// //de ltar le'u nyi shu pas dga' ba la sogs pa'i rnam par dbye ba'i yul la dri ba'i lan brjod nas/da ni thig le gsum gyi rnam par dbye ba'i yul la dri ba'i lan brjod pa bstan pa'i phyir/ le'u nyi shu rtsa gcig pa ston par byed cing / dang por re zhig de rtsom par bstan pa ni/ de nas zhes bya ba la sogs pa gsungs te/le'u nyi shu pa bshad pa'i rjes la'o/ /gzhan yang zhes bya ba ni sngar la ltos pa dang tha dad pa nyid kyi phyir ro/ /nyon zhes bya ba ni phyag na rdo rje thos pa la sbyar ba nyid kyi phyir ro/ /thig le gsum ni bshad par bya/ /zhes bya ba dang 'brel to/ /rdzas dang sngags dang /'od kyi ngo bo nyid kyis mtshungs pa nyid kyi phyir ro/ /bla na med pa zhes bya ba ni bla na med pa'i ngag 'od gsal ba nyid kyi phyir ro/ /des ci zhig byed ce na/ de'i phyir gang gis zhes bya ba gsungs te/ thig le gsum gyis so/ /shes pa tsam gyis zhes bya ba ni thos pa la sogs pa'i rim pas khong du chud pa tsam gyis so//dngos grub 'gyur zhes bya ba ni sems bstan pa'i ngo bo'o/ /ji ltar zhe na/ de'i rnal 'byor pa'i zhes bya ba gsungs te/ rim pa gnyis sgom pa la gnas pa'o/ /de ltar de rtsom pa bstan nas/ dngos su de brjod pa'i phyir/ de'i yan lag gi thig le gsum gyi ngo bo rdzas kyi thig le bshad pa ni/rtsa rnams kun du dbab pa dang / /zhes gsungs te/ phyi rol gyi thabs shes rab snyoms pas lus su gtogs pa'i rtsa rnams thams cad la dbab pa ni gzhug pa'i phyir ro/ /byang chub sems ni zhes bya ba ni kun rdzob kyi rnam pa bde ba chen po'i gnas su zhu bar gyur nas 'byung ba ste de las so//bstan byas pa zhes bya ba ni 'chad par 'gyur ba'i rigs pas bstan par byas pa'o/ /sems de nyid las thabs shes rab kyi ngo bo sgom pa po la ltos pas so/ /rdo rje'i rtse dang pad+ma'i rtser/ /rlung ni gzung ba'i skad cig la/ /zhes bya ba ni rlung ni srog gi rlung ste/rnal 'byor mchog gis thob par byed/ /ces bya ba dang 'brel to/ /gzhan yang thabs gang gis rdzas kyi thig le gzung bar bya zhe na/ de'i phyir/ rkan la yi ge'i sbyor ba dang / /zhes gsungs te/ rkan ni chos 'byung gi dbus su shin tu ring ba'i rtsa'i ngo bo'o/ /de la sdebs pa'i sbyor ba ni shin tu dam pa nyid kyis bsdams pa'o//de'i sbyor ba ni rab tu sbyor bas so/ /k+Sh+mI sngags kyi sbyor ba yis/ /zhes bya ba ni rdo rje'i rtse mor bsgoms pas so/ /rnal 'byor zhes bya ba ni rlung gi de kho na nyid bsgoms pas so/ /thos par byed ces bya ba ni shin tu rtogs par bya ba'o//mchog ces bya ba ni sems brtan pa'i rgyur gyur pa'i ngag 'od gsal ba'o/ /rnal 'byor zhes bya ba ni ting nge 'dzin gyi khyad par ro/ /bde ba kun gyi gzhi zhes bya ba ni zag pa med pa'i bde ba'i gzhi'o/ /mchog ces bya ba ni so so'i skye bo'i mtshan nyid dang bral ba'i phyir ro/ / de ltar rdzas kyi thig le rgyas par bstan nas/ sngags kyi thig le rgyas par bshad pa brjod pa'i phyir/ chos kyi 'khor lo zhes bya ba ni snying ga'i gnas la'o/ /mchog ces bya ba ni mchog gi ngo bo ste/ sems kyi rten du gyur pa'i phyir ro/ /snying ga'i pad+ma'i lte ba la/ /zhes bya ba ni snying ga'i chu skyes kyi dbus su'o//nges pa zhes bya ba ni nges par byas nas sems kyi zhes bya ba'i lhag ma'o/ /hUM yig ces bya ba ni cha lnga pa'i rnam par sngags kyi thig le la cha shas yongs su gyur pa las de grub pa'i phyir ro/ /thams cad stong pa nyid bdag nyid/ /ces bya ba ni sems kyi khyad par la'o//rang bzhin gyis 'od gsal ba ni/ don dam par sems nyid do/ /zhi ba zhes bya ba ni rang dang gzhan gyi don phun sum tshogs pa'i rgyu nyid du gyur pa'i phyir ro/ /dngos dang dngos med rnam par grol/ /zhes bya ba ni don dam par rang bzhin med pa nyid kyi phyir/ dngos po las rnam par grol ba'o//yi ge'i ngo bo nyid kyis rnal 'byor pa'i shes pa la snang ba'i phyir/ dngos med las rnam par grol ba'o/ /ye shes lus can zhes bya ba ni ye shes kyi rang bzhin gyi lus kyis nye bar thob pa'i phyir ro/ /phyogs yul dus dang rnam par bral/ /zhes bya ba ni dngos po la yul dang dus dang rnam pa rnams kyis yongs su 'chad pa ma yin pa'o//thog ma bar dang tha ma spangs/ /zhes bya ba ni yi ge med pa'i bdag nyid kyi phyir ro/ /yi ge'i rang bzhin hU~M yig la sogs pa la thog ma dang bar ma la sogs pa tha dad par brtags pas legs pa ste/ 'di la yang de spangs pa nyid kyi phyir de bzhin du zhes bya ba'o/ /cha med ces bya ba ni cha dang bral ba nyid kyi phyir ro/ /rang gi ngo bos gnas zhes bya ba ni rang gi ngo bos gnas pa nyid kyi phyir ro/ /ngag gi dri ma yongs su spangs/ /zhes bya ba ni spros pa med pa nyid kyis ngag gi spros pa'i spyod yul ma yin pa nyid kyi phyir ro//gtan tshigs tshad ma dang bral zhes bya ba ni rtog ge pas yongs su brtags pa'i mngon sum dang rjes su dpag pa las phyi rol du 'gyur ba nyid kyi phyir gtan tshigs dang / tshad ma ngag gis spangs pa zhes bya ba byas nas so//rtog pa'i spyod yul 'das pa zhes bya ba ni rang rgyud log pa'i rnam par rtog pa las ring ba nyid du yul ma yin pa'i phyir ro/ /gnyis pa kun las rnam par grol/ /zhes bya ba ni gnyis kyi rnam par rtog pa ma lus pas ma gos pa'o/ /rtag cing zhes bya ba ni rang bzhin gyis rtag pa'o//mchog tu zhes bya ba ni gcig tu rnal 'byor pa'i yul rtogs pa nyid kyi phyir ro/ /zhi'o zhes bya ba ni de las 'bad pa med par gzhan don 'grub pa'i phyir ro/ /'di ni sngags kyi thig ler bshad/ /ces bya ba ni snying ga'i gnas su rlung lnga'i bdag nyid cha lnga pa bsgoms pas so//zhe sdang gi rigs can gyi rnal 'byor pa la ltos pas so/ /dngos grub ster zhes bya ba ni rdo rje'i bzlas pa'i mtshan nyid can gyi dngos grub ster ba'i phyir ro/ /rnal 'byor rnams kyi zhes bya ba ni rlung gi de kho na nyid sgom pa po rnams la'o/ /rtag pa'i zhes bya ba ni 'bras bu thob pa'i mthar thug pa zhes bya ba'i tha tshig go//de ltar sngags kyi thig le rgyas par bshad pa bstan nas/ 'od zer gyi thig le bstan pa'i phyir/ rlung gi thig le zhes bya ba gsungs te/ rlung lnga bsdus pa'i rim pa'o/ /rnal 'byor mchog ces bya ba ni/ sems rtse gcig pa'i rgyur gyur pa'i phyir ro/ /kha dog rnam lnga zhes bya ba ni rlung lnga po de bzhin gshegs pa lnga'i mdog can nyid kyi phyir ro/ /gsal ba che zhes bya ba ni 'bar ba'i rnam pas rnal 'byor pa'i shes pa lnga snang ba'i phyir ro/ /sna rtser zhes bya ba ni kun rdzob kyi sna rtser ro/ /sbyor ba'i rnal 'byor zhes bya ba ni sgyu ma lta bu'i ting nge 'dzin gyis so//bsgom par bya zhes bya ba ni rnal 'byor pas dmigs par bya ba nyid kyi phyir ro/ /kun nas kyang ni 'di 'dra ba'i/ /a yig sngags kyi mchog ces bya ba ni rnam pa thams cad kyi a yig gi rnam pa'o/ /de dang phyi rol pa nyid kyis de med pa nyid kyi phyir ro//bzlas par bya zhes bya ba ni rlung gi grangs nye bar thob pa la'o/ /rnal 'byor pa yis zhes bya ba ni rlung gi de kho na nyid sgom pa pos so/ /de ltar 'od zer gyi thig le bsgom pa bshad nas/ thig le gsum bsgom pa'i phan yon brjod pa'i phyir/ snga ma bzhin du zhes bya ba ni/ le'u drug par bstan pa'i thig le'i dbye ba'i phan yon byas pa'i cho gas so/ /ji skad du/ de las rkang mgyogs gser 'gyur dang ni dug las rgyal dang me yi nang du 'jug pa la sogs dang / /mngon shes lnga yi go 'phang dang ni shin tu che ba'i ye shes rnams ni khyod kyis thob par 'gyur//zhes bya ba la sogs pa gsungs so/ /ye shes lnga zhes bya ba ni me long lta bu la sogs pa'i sangs rgyas kyi ye shes lnga'o/ /mngon shes lnga yi mtshan nyid can/ /zhes bya ba ni lha'i mig la sogs pa'i ngo bo'o/ /zhi ba la sogs de bzhin bsgrub/ /ces bya ba ni 'jig rten pa'i dngos grub rnams so//ji skad du/ me dang rlung dang dbang chen dang / /chu ste so so'i dkyil 'khor du/ /thun ni phyed phyed dus su ni/ /las ni gnyis gnyis gnas par 'gyur/ /zhes gsungs so/ /thob par 'gyur zhes bya ba ni thig le gsum sgom pa po'i rnal 'byor pas so//rim pa'i mtshan nyid can zhes bya ba ni skas kyi gdang bu'i rim pa'i rigs pas 'grub pa'i phyir cig car ni ma yin zhes bya ba'i don to/ /de ltar don rnam pa bzhis thig le gsum gyi ngo bo bstan nas/ de nyid kyi rtsa gsum gyi ngo bo brjod pa'i phyir/ de'i yan lag rang gi ngo bo bstan pa'i phyir/sku gsung thugs kyi dbye ba yis/ /zhes gsungs te/ 'di ni zhes bya ba ni sngon du gsungs pa'i thig le gsum sku la sogs pa'i dbye bas la la nA dang / ra sa nA dang / a ba d+hU tI'i ngo bo gsungs so/ /de la lus la sogs pa gnyis gang la yang 'brel par bya ste/de la lus kyi rtsa ni khrag 'bab pa'o/ /ngag gi rtsa ni khu ba 'bab pa'o/ /sems kyi rtsa ni rnam par rtog pa thams cad za bar byed pas na sgra gcan 'bab pa'o/ /yang na lus kyi thig le ni gti mug gi rigs can gyi rnal 'byor pa la ltos nas 'od zer gyi thig le'i ngo bo'o/ / ngag gi thig le'i rdzas kyi thig le'i ngo bo 'dod chags kyi rigs can gyi rnal 'byor pa la ltos pas so/ /sems kyi thig le sngags kyi thig le'i ngo bo zhe sdang gi rigs can gyi rnal 'byor pa la ltos pas so/ /bsdus nas zhes bya ba ni rtsa ma lus pa bsdus nas so//slar yang dbye ba ni slar yang dbye bas sna tshogs pa'i ngo bo nyid kyis so/ /'gro zhes bya ba ni 'gro ba'o/ /so sor zhes bya ba ni so so'i rtsa'i ngo bos so/ /de yang phan tshun te/ gcig la gcig gis zhes bya ba'i don to/ /yang na slar yang dbye ba ni/ rtsa gsum gyi ngo bo nyid dang /thig le gsum gyi ngo bo nyid kyis so/ /so so ma yin par khyab par zhes bya ba'i 'dod pas so/ /phan tshun rtsa gsum la'am thig le gsum la'o/ /so so ma yin pa zhes bya ba ni tha mi dad pas so/ /khyab pa ni khyab par byed pa nyid du 'gyur zhes bya ba'i don to/ /de ltar rtsa gsum gyi ngo bo bstan nas/thig le gsum la phan tshun du thig le gsum gyi ngo bo nyid brjod pa'i phyir/ khongs su zhes bya ba gsungs te/ rdzas kyi thig le zhes bya ba ni byang chub kyi sems kyi thig le'i ngo bo la'o/ /sngags dang rlung dag gi khongs su chud pa zhes bya ba dang 'brel to//sngags dang 'od zer gyi thig le dag khongs su chud pa zhes bya ba'i don to/ /rdzas kyi thig le la hU~M yig gi rnam pa nyid kyi phyir rlung lnga'i bdag nyid kyi phyir ro/ /sngags kyi thig le zhes bya ba ni snying gar gnas pa'i hU~M yig la'o/ /de nyid mchog ces bya ba ni sems kyi sa bon nyid kyi phyir mchog gi de kho na nyid kyi bdag nyid can no//thig le gnyis ni rdzas dang 'od/ /ces bya ba ni khongs su bsdus pa zhes bya ba snga ma bzhin no/ /hUM yig rlung lnga'i bdag nyid kyi phyir dang / byang chub sems kyi ngo bo nyid kyi phyir ro/ /slar yang rlung gi thig le yang / /zhes bya ba ni 'od zer gyi thig le'o//sngags dang rdzas kyi bdag nyid can/ /zhes bya ba ni rdzas dang sngags kyi thig le dag nang du bsdus pa zhes bya ba ni snga ma bzhin no/ /de la yang sngags dang rdzas phyi rol du ma byas pa nyid kyi phyir ro/ /yang dag shes zhes bya ba ni ji ltar gnas pa'i ngo bo shes pa'o//'dir zhes bya ba ni 'jig rten 'dir ro/ /rnal 'byor pa yis zhes bya ba ni/ rlung gi de nyid sgom pa po/ /zhes bya ba'i don to/ /de ltar thig le gsum phan tshun du thig le gsum gyi ngo bo nyid bstan nas/ slar yang rtsa gsum gyi ngo bo rgyas par bstan pa brjod pa'i phyir/ zla ba nyi ma zhes bya ba la sogs pa gsungs te/ zla ba nyi ma me'i rtsa gsum po mi rgyu ba rnams la'o/ /mtshan nyid do zhes bya ba ni thig le gsum gyi ngo bo nyid kyis mtshon pa zhes bya ba'i don to/ /gsum zhes bya ba brjod de/ de la mi shes pas gsum po de nyid gang yin snyam pa la/de'i phyir la la nA zhes bya ba la sogs pa gsungs so/ /ji skad du/ dgyes pa rdo rje'i rgyud las/ shes rab ngo bo la la nA/ /ra sa nA ni thabs kyis gnas/ /a ba d+hU tI dbus ma'i yul/ /gzung dang 'dzin pa rnam par spangs/ /zhes gsungs te/ sku gsung thugs kyi rang bzhin dang / de nyid du ni zhes bya ba ni gsum nyid ni de ma thag par gsungs pa'i rigs pas de ma thag par gsungs pa'o/ /yongs su grags zhes bya ba ni brjod pa'o/ /steng dang 'og tu khyab pa nyid/ /ces bya ba ni rtsa gsum gtso bor gyur pa de rnams ni gtso bo'i rtsa rnams so/ /so sor lu gu rgyud tshul zhes bya ba ni dbus su mdud pa brjod par 'dod pas steng dang 'og gi dbye bas tha dad pa'i phyir drug nyid du 'gyur ro//ji skad du/ bshang gci zla ba nyi ma dang / /sgra gcan dus me'i rtsa rnams ni/ /drug ces bya ba la sogs pa'o/ /rtsa rnams kun la khyab nas ni/ /zhes bya ba ni de ma thag par gsungs pa'i gsungs pa de rnams nyid ni de las gzhan pa rnams la zhes bya ba'i don to//de med par de las gzhan pa rnams kyi ngo bo ma grub pa'i phyir zhes bya ba'i tha tshig go/ /yang dag rim par zhes bya ba ni bla ma'i gdams ngag la brten nas thams cad mkhyen pa'i gsung gi tshad mas so//gnas zhes bya ba ni rnam par gnas pa'o/ /de ltar slar yang rtsa gsum gyi ngo bo nyid kyis rgyas par bstan nas nye bar bsdu ba sngon du 'gro bas phan yon brjod pa'i phyir/ de ltar rnal 'byor zhes bya ba gsungs te/ sngar gsungs pa'i thig le gsum gyi ngo bo 'am rtsa gsum gyi ngo bo'o//mchog tu zhes bya ba ni mchog gi go 'phang thob par byed pa'i rgyu nyid kyi phyir ro/ /phra zhes bya ba ni sgom pa pos rig par bya ba nyid kyi phyir ro/ /shes dang shes bya rnam par spangs/ /zhes bya ba ni 'bras bu'i gnas skabs las gzung ba dang 'dzin pa rnam par spangs pa nyid kyi phyir ro//yang na shes pa ni kun rdzob byang chub sems kyi ngo bo'o zhes bya ba ni 'od zer dang sngags kyi thig le'i ngo bo ste de spangs pa'i phyir ro/ /dngos grub thams cad kyi ni gzhi/ /zhes bya ba ni 'jig rten dang 'jig rten las 'das pa'i dngos grub la brten nas so//rnal 'byor chen po zhes bya ba ni ting nge 'dzin gyi khyad par 'phags pa nyid kyi phyir ro/ /rmad byung che zhes bya ba ni rtsa dang khams kyi ngo bo'i thabs la brten nas byang chub kyi ngo bo mngon du byed pas na/ ngo mtshar bskyed pa zhes bya ba'i don to/ /de ltar don rnam pa bzhis de nyid kyi rtsa gsum gyi ngo bo nyid bstan nas bcos ma'i brtul zhugs la sogs pa yongs su dor nas/de sgom pa po la brjod pa'i phyir/ gso sbyong ma yin zhes bya ba gsungs te/ thig le gsum sgom pa po'i rnal 'byor pa la gso sbyong la sogs pa'i ngo bo mi dgos te/ mchog gi go 'phang thob pa'i phyir dang /sa dgu pa la nye bar gnas pa'i phyir ro/ /bzlas pa min zhes bya ba ni ngag gi bzlas pa la sogs pa ste/ dbugs kyi 'khor lo nyid rang bzhin gyis grub pa nye bar mtshon pa'i phyir ro/ /phreng bas ma yin zhes bya ba ni mi rus kyi phreng ba la sogs pa ma yin no//srog rtsol la rang bzhin gyis grub pa la phreng ba nyid kyi phyir ro/ /'dzin pa min zhes bya ba ni ras ris la sogs pa la sems 'dzin mi dgos te/ sna rtse rnam pa gsum thig le rnam pa gsum 'dzin pa'i phyir ro/ /grangs min zhes bya ba ni brgya rtsa brgyad dam stong la sogs pa'i ngo bo ma yin te/nyin zhag gcig la nyi khri chig stong drug brgya'i dbugs nyams su myong ba'i phyir ro/ /cha min zhes bya ba ni zla ba'i dkyil 'khor gyi ngo bo bsgoms pas sam/ yi ge bsgoms pa'i ngo bo ma yin te/ dus thams cad du cha dang bral ba'i rnam pa chos nyid la dmigs pa'i phyir ro//sbyin sreg min zhes bya ba ni zhi ba la sogs pa dang / dbye ba tha dad pa ni ma yin te/ 'od gsal gyi mes rang bzhin gyi rnam par rtog pa sreg pa'i phyir ro/ /'byin byed ces bya ba ni phyi rol pa'i grub mtha'i dgongs pas 'byung ba'i rlung gi ngo bo ni ma yin no/ / 'gengs byed kyis ni min zhes bya ba ni de nyid kyis 'jug pa'i rlung gi ngo bo dgos pa ma yin te/ 'jug pa dang gnas pa dang ldang ba gsum spangs pa'i ma ning gi bzlas pa mtshon par byed pa nyid kyi phyir ro/ /gal te de ltar yin na 'o na ji ltar thob par 'gyur zhe na/ de'i phyir gcig pus min zhes bya ba ni mchog gi gcig pus so//rnal 'byor rang rig pas 'byung ba dang rngub pa rjes su dran pas/ sgyu ma lta bu'i ting nge 'dzin la brten nas rang rig par bya'o/ /ye shes chen po'i go 'phang ni/ /zhes bya ba ni 'od gsal gyi ngo bo thig le gsum bsgom pa'i ngo bo'o//zhi zhes bya ba ni gzhan gyi don la 'bad pa med par 'grub pa'i phyir ro/ /de ltar bcos ma'i brtul zhugs la sogs pa spangs pa bstan nas/ de'i phan yon brjod pa'i phyir/ mngon par shes pa lnga dang ni/ /zhes bya ba gsungs te/ lha'i mig la sogs pa'i ngo bo'o/ /de bzhin zhes bya ba ni mngon par shes pa thob pa'i shes pa'o//ye shes lnga zhes bya ba ni me long la sogs pa rnams so/ /thob ces bya ba ni rnyed pa'o/ /mchog ces bya ba ni gcig pu'o/ /sngar bshad pa'i rnal 'byor gyi che ba'i bdag nyid kyis zhes bya ba'i don to/ /'dis ni 'jig rten las 'das pa'i dngos grub gsungs so//'jig rten las 'das pa'i dngos grub bstan pa'i phyir/ zhi sogs bya ba yang dag ni/ /zhes bya ba gsungs so/ /zhi ba la sogs pa'i las tshogs thams cad do/ /yang dag ces bya ba ni phyin ci ma log pa nyid kyis so/ /thig le gsum ni sgom pa po/ / zhes bya ba ni bshad ma thag pa'i rlung gi sgom pa po'o/ /bsgrub ces bya ba ni rim pa lnga'i rjes su 'brangs nas zhes bya ba'i don to/ /ji skad du/ rdo rje bzlas pa'i rim pa las/ /ye shes lnga yi rang bzhin dbugs/ /zhes gsungs pas so/ /de bzhin du/ rdo rje'i bzlas pa 'di yis ni/ /cho ga ji bzhin bsnyen byas nas//zhes gsungs so/ /'di gcig pu sgrub par ma zad kyi ji srid du 'di yang zhes bya ba gsungs te/ rnal 'byor mchog gi zhes bya ba ni rjes thob kyi ting nge 'dzin gyi ngo bo'o/ /stong nyid ye shes mtshan nyid ni/ ngag rnam par dben pa'i rang gi ngo bo zhes bya ba'i don to/ /de ltar rnam pa gnyis kyis bcos ma'i brtul zhugs la sogs pa spangs pa bstan nas/thig le gsum gyi rnam grangs brjod pa'i phyir/ ye shes sems dpa' zhes bya ba la sogs pa gsungs te/ thig le gsum yang dag par ming gi rnam grangs kyis ye shes sems dpa' zhes bya ba la sogs pa'i tshig gis shes par zhes bya ba dang 'brel to//de la ye shes sems dpa' ni ye shes lnga'i rang bzhin gyi 'od zer gyi thig le la'o/ /rdo rje sems dpa' zhes bya ba ni rdzas kyi thig le'o/ /'di la sems dpa' yod pa snyam du bsams nas so/ /dam tshig sems dpa' zhes bya ba ni sngags kyi thig le'o//dam tshig gi ngo bo mi bskyod pa la de'i rnam pa nyid kyi phyir ro/ /gnas dang grangs kyi dbye ba yis/ /zhes bya ba ni gnas ni sna rtse rnam pa gsum mo/ /grangs kyi dbye ba zhes bya ba ni phan tshun so so nas thig le gsum gyi ngo bo dang rtsa gsum gyi ngo bo nyid do/ /gnas dang grangs ni gnas dang grangs dag go//de'i dbye ba ni de'i rab tu dbye bas so/ /shes par bya zhes bya ba ni rtogs par bya ba'o/ /bla ma'i zhal las zhes bya ba ni ma 'ongs pa'i dus su rdo rje slob dpon gyi zhal nas zhes bya ba'i tha tshig go/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a lang+ka ka la shas mdzad pa zab mo'i don shin tu gsal bar byed pa las le'u nyi shu rtsa gcig pa'i rgya cher bshad pa'o// //de ltar le'u nyi shu rtsa gcig pas thig le gsum gyi rnam par dbye ba'i yul dri ba'i lan brjod nas da ni yi ge gsum gyi yul la dri ba'i lan brjod pa'i phyir/le'u nyi shu rtsa gnyis pa ston par byed cing / dang por re zhig de rtsom pa ni de nas zhes bya ba la sogs pa gsungs te/ le'u nyi shu rtsa gcig pa'i rjes la'o/ /gzhan yang zhes bya ba ni sngar la ltos pas tha dad pa byas pa ste/ yi ge gsum bshad par bya zhes bya ba dang 'brel to//ji ltar zhe na/ de'i phyir de nyid ces bya ba gsungs te/ yi ge re re la rnam pa gsum dbye bar byas pas zhes bya ba'i don to/ /ji lta bu zhe na/ de'i phyir go 'phang mchog ces bya ba gsungs te/ mchog ni gsang ba gsum gyi rnam pa la 'dug pa'i gnas yin pa'i phyir ro//sku zhes bya ba la sogs pa ni sku la sogs pa'i stong pa nyid kyi ngo bo gsum po rnam par snang mdzad la sogs pa rnams kyi snying po ste/ de rnams skyed par byed pa nyid kyi phyir ro/ /dam tshig bdag nyid ni zhes bya ba ni khyad par du 'phags pa'i brda'i ngo bo nyid kyi phyir dang / 'god par mi bya ba nyid kyi phyir ro//yi ge gsum ni zhes bya ba ni oM yig la sogs pa gsum mo/ /sku gsung thugs kyi snying po zhes bya ba ni ma dag pa'i sku la sogs pa gsum bzlog nas/ rnam par dag pa'i lus la sogs pa rnams la rgyud nyid kyi phyir ro/ /ji lta ba bzhin bshad ces bya ba ni ji ltar grags pa'i rgyud sde rnam pa lnga la'o//de nyid nyon cig ces bya ba ni phyag na rdo rje thos pa la sbyar ba'o/ /rnam phye zhes bya ba ni dbye bas so/ /ji lta ba bzhin zhes bya ba ni phyin ci ma log pa'i ngo bos so/ /bshad ces bya ba ni brjod par bya ba'o/ /da ni zhes bya ba ni da lta nyid du zhes bya ba'i don to//de ltar de rtsom pa bstan nas/ dngos su bshad pa brjod pa'i phyir/ de'i yan lag mdor bstan pa ni/ oM yig ces bya ba ni don gyis stong pa'i yid kyi rang bzhin no/ /sku rdo rje'i zhes bya ba ni sku stong pa nyid kyi ngo bo rnam par snang mdzad kyi rang bzhin no/ /snying po nyid du yang dag bshad//ces bya ba ni sa bon gyi ngo bor gsungs so zhes bya ba'i don to/ /de ltar mdor bstan pa bshad nas/ de nyid la rab tu dbye ba'i sgo nas rgyas par bstan pa brjod pa'i phyir/ yi ge a ni zhes bya ba la sogs pa gsungs te/ mdo ji lta ba bzhin no/ /yi ge oM ni yi ge gsum gyi ngo bo zhes bya ba'i don to//de ltar rab tu dbye ba'i sgo nas rgyas par bshad pa bstan nas/ so sor rgyas par bshad pa'i yan lag a yig la gnas brjod pa sngon du 'gro bas de'i che ba'i bdag nyid bstan pa'i phyir/ a ni chos kyi 'khor lo pad+ma zhes bya ba gsungs te/ a yig ni srog gi rlung gi rnam pa'o//chos kyi 'khor lo'i chu skyes ni pad+ma'o/ /de la brten nas rlung gi 'khor lo zhes bya ba ni smin ma'i dbus su gnas pa'i rtsibs drug pa la'o/ /khyab ces bya ba ni de'i mthar thug par khyab nas gnas pa'o/ /a yig gi rnam pa ji lta bu zhe na/ de'i phyir sgrib med ces bya ba gsungs te/ mi mthun pa'i phyogs rnams kyi zil gyis mi non pa'i phyir dri ma med pa'o/ /rlung chen po zhes bya ba ni nang gi bdag nyid can gyi rnam par shes pa'i bzhon pa nyid kyi phyir ro/ /srog ces bya ba ni srog gi ming can no/ /thams cad bsdus zhes bya ba ni rlung thams cad sdud par byed pa nyid kyi phyir ro/ /cha med ces bya ba ni zad pa dang 'phel ba'i bdag nyid can gyi cha dang bral ba'i phyir ro//cha dang bral ba zhes bya ba ni rtogs par mi nus pa'i phyir ro/ /dngos dang dngos med mtha' spangs pa/ /zhes bya ba ni don dam par rang bzhin med pa nyid kyi phyir dang / kun rdzob tu yang rang rig par bya ba nyid kyi phyir mtha' gnyis spangs pa ni bral ba'o//gzhan yang ji lta bu zhe na/ de'i phyir/ thig le 'khor lo cha la khyab/ /ces bya ba gsungs te/ bde ba chen po'i 'khor lo'i cha ni ha yig gi rnam pa la brten nas gnas pa'i phyir de la khyab pa'o/ /nam mkha'i khams ni zhes bya ba ni stong pa'i dbus su gnas pa nyid kyi phyir ro/ /yi ge mchog ces bya ba ni don dam par yi ge'i dbyibs las phyi rol tu gyur pa'i phyir ro//sngags rnams thams cad rab sad byed/ /ces bya ba ni sngags thams cad ni sbrul la sogs pa dang / snying po dang nye ba'i snying po la sogs pa rnams dang de'i don ni brjod par bya bas bsdus pa'i gzhi ni rten gyi ngo bo'o/ /a'i yi ge nyid la brten nas ma lus pa'i brjod par bya ba dang rjod par byed pa 'jug pa'i phyir ro//rab sad byed ces bya ba ni de ma thag par gsungs pa'i gdod ma nas ma skyes pa'i chos nyid kyi ngo bo nyid kyis so/ /sad par byed pa ni rtogs par byed pa'o/ /sngags thams cad gso bar byed ces bya ba ni byin gyis rlob par byed pa nyid kyi phyir ro/ / ji skad du/ de nyid phyir na mi dad de/ /sngags kyi ngo bo'i yig 'bru rnams/ /rtsa la yang ni mi nus te/ /rgyu bar byed pa rtsom pa la/ /zhes gsungs so/ /ngag gi 'khor lo rab sad byed/ /ces bya ba ni rang gi lus la gnas pa'i ngag gi 'khor lo ni longs spyod kyi 'khor lo'i bdag nyid dang / ngag gi rnam par 'gyur ba ma lus pa mtha' yas pa'i chos kyi phung po'i tshogs kyi mtshan nyid can la rab tu sad par byed pa ni/rtog pa skyed par byed pa dang / spro ba dang sdud par byed pa'o/ /dngos su lan gsum gyi ni gzhi/ /zhes bya ba ni lan gsum gyi bar du gcod pa'i rtsa gsum gyi gzhi rten du gyur pa'o/ /lan gsum gyi gzhi zhes bya ba ni byas nas so//dngos su zhes bya ba ni rnal 'byor pa'i mngon sum gyi rtogs pas so/ /'byung ba thams cad dbang du byed/ /ces bya ba ni 'byung ba thams cad ni rang gi lus su gtogs pa'i khams kyi dkyil 'khor rnams la dbang du byed pa rnams kyi de bzhin no/ /zad med ces bya ba ni a yig de nyid mi zad pa zhes bya bar brjod de/mi zad pa nyid kyi phyir ro/ /'pho ba med pa'i gnas zhes bya ba ni 'jig pa dang bral ba nyid kyi phyir ro/ /byang chub sa bon zhes bya ba ni gnyis su med pa'i ye shes kyi mtshan nyid ni byang chub kyi rgyur gyur pa nyid kyi phyir ro/ /de nyid kyi phyir bde ba che zhes bya ba ste/ de'i dus na sdug bsngal thams cad nye bar zhi ba'i phyir ro//gzugs med khams su yang dag bshad/ /ces bya ba ni a yig gi dbang gis snyoms par 'jug pa bzhi yongs su grub pa'i phyir ro/ /'khor lo bzhi yi don bsdus pa/ /zhes bya ba ni sprul pa la sogs pa'i 'khor lo bzhi'i don ni don dam pa'i rnam pa'i ngo bos bsdus pa'o/ /yang na gzugs med khams kyi bye brag 'dis brjod par bya ste/gzugs med pa'i snyoms par 'jug pa bzhi po 'khor lo bzhis bsdus pa'i phyir ro/ /de ltar a yig gi gnas brjod pa sngon du 'gro bas che ba'i bdag nyid brjod nas/ u yig la yang de brjod pa sngon du 'gro bas che ba'i bdag nyid brjod pa'i phyir ro/ / u yig longs spyod 'khor lor gnas/ /zhes gsungs te/ u yig ni sum skor gyi rtsa rjod par byed pa la cha nyid kyi phyir ro/ /me dang nyi ma dang 'dra ba'i/ /zhes bya ba ni me dang nyi ma ltar 'od gsal gyi rnam pa'o/ /me yang yin la nyi ma yang yin pas na me dang nyi ma dag go/ /de dang 'dra ba 'am mtshungs pa ga la yod pa de la de skad ces bya ba'o//mgrin pa'i mtha' nas zhes bya ba ni mgrin pa'i mtha' ma nas so/ /spyi gtsug mtha' zhes bya ba ni bde ba chen po'i 'khor lo'i mtha'i bar du zhes bya ba'i tha tshig go/ /khyab pa'i zhes bya ba ni de nas brtsams nas bde ba chen po'i 'khor lo'i mtha'i bar du gnas pa'o//ci'i phyir zhe na khyad par gyi sgo nas gtan tshigs gsungs pa ni/ gzi brjid kyi ni lus zhes bya ba ni 'bar ba'i rang bzhin nyid kyi phyir ro/ /gzugs kyi khams zhes bya ba ni ro drug gi longs spyod la lha'i rnam pa bsgoms pas rang bzhin med par shes pas 'dod pa'i 'dod chags dang bral nas gzugs kyi khams zhes bya bar brjod pa'o//gnas ris bcu bdun bdag nyid can/ /zhes bya ba ni bsam gtan bzhi la so sor lha'i gnas kyis bsdus pa nyid kyi phyir ro/ /de ltar u yig la yang che ba'i bdag nyid bstan nas ma yig la yang de brjod pa sngon du 'gro bas che ba'i bdag nyid ston zhing gsungs pa ni/bde chen 'khor lo zhes byar gnas/ /yi ge ma ni zhes bya ba ni bde ba chen po'i sa bon nyid kyi phyir ro/ /thig le tsam zhes bya ba ni byang chub kyi sems kyi thig le tsam gyi ngo bo'o/ /mtho gang tshad ni sor bcu gnyis/ /mtha' ni sor bzhi'i tshad tsam rgal/ /zhes bya ba ni ngag ste de las mtho gang tsam ni sor bcu gnyis so//rgal bar ni 'da' bar byas nas so/ /steng du gnas zhes bya ba ni sor bcu gnyis kyi tshad tsam la brten nas gnas pa zhes bya ba'i don to/ /zla ba'i gzugs dang 'dra ba yi/ /zhes bya ba ni 'od gsal ba nyid kyis yongs su gang bas zla ba'i dkyil 'khor dang 'dra ba'o/ / bde ba chen po'i go 'phang ni/ /zhes bya ba ni don dam pa'i rang bzhin gyi bde ba chen po shin tu gsal bar byed pa'i rgyur gyur pa'i phyir ro/ /zhi zhes bya ba ni ma lus pa'i lus gso bar byed pa nyid kyi phyir ro/ /rtsa rnams kun la khyab pa po/ /zhes bya ba ni lus su gtogs pa'i rtsa sum cu rtsa gnyis la khyab pa'o/ /mi phyed lus kyi go 'phang ni//zhes bya ba ni don dam par mi phyed pa'i ye shes las phyi rol du gyur pa med pa'i phyir ro/ /mi phyed go 'phang ni lus te/ de gang la yod pa zhes bya bar byas nas so/ /'dod pa'i khams zhes bshad pa yin/ /zhes bya ba ni rkang med dang rkang gnyis la sogs pa sgo nga las skyes pa'i dbye bas tha dad pa rnams la byang chub kyi sems nyid las skyes pa'i phyir ro//gnas rigs nyi shus bsdus pa'o/ /ji skad du/ dmyal ba yi dags dud 'gro dang / /mi dang lha gnas drug po ni/ /'dod pa'i khams zhes bya ba'o/ /de ltar a yig la yang de brjod pa sngon du 'gro bas che ba'i bdag nyid bstan nas yi ge gsum bsdus nas rnam par dag pa sngon du 'gro bar bya ba brjod pa'i phyir ro//de ltar zhes bya ba la sogs pa gsungs te sngon du bshad pa'i rigs pas so/ /rlung ni srog la sogs pa'i ngo bo nyid kyi phyir ro/ /khams gsum gyi zhes bya ba ni gzugs med pa la sogs pa'i dbye bas so/ /rtsa gsum ni gnas su 'dus zhes bya ba ni rtsa gsum ni la la nA la sogs pa'i tshig gis bsdus pa ste de rnam par dag pa'i ngo bo'o//rlung dang khams la sogs pa rnams dang rtsa gsum dang rlung dang khams la sogs pa'i rtsa gsum ste bsdus pa'o/ /oM yig ni brda zhes bya ba ni oM yig gi rnam pa'i yi ge zhes bya ba'i don to/ /brda shes bya zhes bya ba ni shes pa'o/ /khams gsum rnam par sad par byed//ces bya ba ni 'dod pa la sogs pa'i khams gsum sad par byed pa'o/ /rnam par snang mdzad ces bya ba ni de skyed pa'i rgyu nyid du gyur pa'i phyir ro/ /'gro gzugs rnam pa'i spro bdag nyid/ /ces bya ba ni 'gro ba ni khams gsum ste/ gzugs kyi rnam pa ni gzugs kyi phung po'i rnam pas so//spro ba'i bdag nyid ni de'i rnam par dag pa zhes bya ba'i don to/ /khams gsum gyi ngo bo ni don dam par ni stong pa nyid kyi phyir ro/ /bya ba ci zhig byed ce na/ de'i phyir/ rnam par rtog pa'i rlung gnyis ni/ /zhes bya ba gsungs te srog dang thur sel gyi bdag nyid do/ /rnam par rtog pa'i rang bzhin gyi rlung gnyis so//sna'i bu ga nas zhes bya ba ni kun rdzob kyi sna rtse'i bu ga gnyis nas so/ /yang dag spro zhes bya ba ni so so'i skye bo rnams kyis kyang dbugs dbyung ba dang 'jug pa shin tu gsal ba nyid kyis nyams su myong ba'i phyir ro/ /nyi ma zla ba gnyis zhes bya ba ni lus kyi 'og tu khrag dang khu ba dag yongs su dag par 'byung zhes bya ba'o//gnyis zhes bya ba la gnyi ga zhes bya ba ni gnyis so/ /yang dag ces bya ba ni phyin ci ma log pa nyid kyis so/ /gyen du rgyu ba'i rlung gnyis po dang / 'og tu rgyu ba'i zla ba dang / nyi ma dag la nang du rgyu ba zhes bya ba ni nang du rgyu ba'o/ /yang dag sbas pa zhes bya ba ni ji lta ba bzhin du sbas pa'i ngo bo la brten nas gnas pa'o//me ni 'bar byed ces bya ba ni me ni longs spyod kyi 'khor lo na gnas pa'i phyir ro/ /rtse mo la ni smin ma'i dbus/ /zhes bya ba ni bde ba chen po dang rlung gi 'khor lo'o/ /srog ni rlung zhes bya ba ni srog gi rang bzhin no/ /de ltar zhes bya ba ni sngar gsungs pa'i rigs pas so/ /gcig pu 'ang zhes bya ba ni oM yig gi bdag nyid do//gsum du bshad ces bya ba ni a yig dang ma yig gi ngo bo nyid kyis de ma thag par bshad pa'i cho gas so/ /so sor sku la sogs pa de kho na nyid gsum gyi bdag nyid do/ /khams gsum la khyab pa zhes bya ba ni srog gi rlung gi ngo bo nyid kyi phyir ro//zhi ba zhes bya ba ni zhi ba la sogs pa'i rgyu nyid kyi phyir ro/ /sa bon don kun bsdus pa'o/ /zhes bya ba ni ma lus pa'i sngags kyi yi ge gtso bor gyur pa'o/ /yang na skyed pa'i sa bon don rgyas pa'o zhes kha cig las 'byung ngo / /de'i phyogs la skyed pa'i sa bon sems skyed par byed pa byang chub kyi sems kyi khams so//rgyas pa'o zhes bya ba ni khams sum cu rtsa gnyis la khyab par byed pa'o zhes bya ba'i don to/ /de ltar don rnam pa bzhis so sor rgyas par bstan pa gsungs so/ /'dis ni lus kyi sa bon brjod pa'i mtshan nyid can gyi don bstan nas/ ngag gi sa bon brjod pa'i dang por mdor bstan pa ni/yi ge a ni ye shes mchog /ces bya ba gsungs te/ ngag rnam par dag pa nyid kyi phyir ro/ /gsung gi rdo rje'i snying po zhes bya ba ni snang ba mtha' yas kyi snying po nyid kyi phyir ro/ /mchog ces bya ba ni so sor rtog pa'i ye shes kyi ngo bos mchog nyid do/ /de ltar mdor bstan pa bshad nas/de nyid kyi rab tu dbye ba'i sgo nas rgyas par bshad pa brjod pa'i phyir/ a gnyis dang ni yi ge ha/ /zhes bya ba gsungs te/ tshigs su bcad pa ji lta ba bzhin no/ /ring por byas te zhes bya ba ni mnyam pa ni yi ge 'dra ba dang zhes bya ba la sogs pas gong ma'i a ring por byas te/a 'og ma phyis pas A ha zhes bya bar 'gyur ro/ /de ltar na de nyid rnam pa gsum mo/ /de ltar rgyas par bshad pa bstan nas/ so sor rgyas par bshad pa brjod pa'i phyir/ a yig dang po brjod pa sngon du 'gro bas/ de yi che ba'i bdag nyid ni/ /yi ge a ni sngar bshad zin/ /zhes bya ba ni oM gyi yi ge bshad pa'i dus na ji skad du/a yig chos kyi 'khor pad+ma/ /rlung gi 'khor lo la ni khyab/ /ces gsungs so/ /chos kyi dbyings kyi don bsdus pa/ /zhes bya ba ni chos kyi dbyings thog ma tha ma med pa'i rigs kyi don ni rang bzhin gyis rnam par dag pa'i bdag nyid do/ /de bsdus pa ni de'i khongs su gtogs zhes bya ba'o/ / srog gi rlung ni zhes bya ba ni srog gi rnam pa nyid do/ /mchog yin no zhes bya ba ni bsgoms pa'i stobs kyis rnam par dag par sbyang ba'i phyir mchog go/ /stong nyid ye shes ming can de/ /zhes bya ba ni rnam grangs kyis so/ /srog dang rtsol ba gnyis su rigs/ /zhes bya ba ni rlung gnyis so/ /de bsdus zhes bya ba ni rigs pa ste/gzung ba dang 'dzin pa dngos po'i mtshan nyid can gyis so/ /yul dang dbang po bsdus pa yi/ /zhes bya ba ni yul dang dbang po bsdus pas yul dang dbang po bsdus pa'o/ /'o na ji ltar yul dang dbang po bsdus she na/ kun gzhi dang ni nyon mongs yid/ /ces gsungs te/ phyi rol gyi don med pa la kun gzhi rnam par shes pa nyid de dang de'i bag chags kyi stobs kyis sngon po la sogs pa'i dbye bas snang ba nyid de gzung ba'i rnam pas so//nyon mongs pa can gyi yid dang / dbang po rnams la de'i snang ba'i rnam pa la brten nas 'dzin pa'i rnam pa snang ba'o/ /de la brten pa ni srog rtsol gyi lam gnyis so//de nyid kyi phyir/ gzung dang 'dzin pa'i ngo bo nyid/ /ces gsungs so/ /rnam par shes pa gcig nyid la gzung ba dang 'dzin pa dag dmigs nas rlung gnyis kyi ngo bos rab tu snang ba zhes bya ba'i don to/ /ngo bo gcig tu gyur nas ni/ /zhes bya ba ni rlung gnyis srog dang rtsol ba'i mtshan nyid can gcig tu brtags nas so//gsung gi rdo rje zhes bya ba ni snang ba mtha' yas kyi sa bon no/ /brjod pa'i tshig ces bya ba ni bskul ba'i bdag nyid do/ /de ltar a yig dang po brjod pa sngon du 'gro bas de'i che ba'i bdag nyid brjod nas/ a yig gnyis pa'i che ba ston cing gsungs pa ni/ a yig chos 'khor pad+ma las//zhes bya ba ni snying gar rtogs pa'i rlung gi rnam pa las so/ /mgrin par zhes bya ba ni longs spyod kyi 'khor lo'o/ /yi ge a nyid 'gyur zhes bya ba ni de nas de'i bar du khyab pa nyid kyi phyir ro/ /de nyid kyi phyir gsungs pa/ yi ge a nyid 'gyur zhes bya ba ste ring po nyid thob pa'o/ /de ltar a yig gnyis pa'i che ba'i bdag nyid bstan nas/ha yig gsum pa'i che ba'i bdag nyid brjod pa'i phyir gsungs pa/ srog nyid dang ni zhes bya ba ste/ spel ba zhes bya ba'i don to/ /thur sel zhes bya ba ni thul sel gyi rlung ngo / /yi ge ha yig ces bya ba ni dbyangs yig med pas so/ /kun nas ni zhes bya ba ni rnam pa thams cad kyis zhes bya ba'i don to//de ltar ha yig gsum pa'i che ba'i bdag nyid brjod nas yi ge gsum bsdu bar byas nas de nyid la rnam par dag pa sngon du 'gro ba'i bya ba bstan pa'i phyir/ mgrin pa'i dbus na gnas pa bcings/ /zhes gsungs te/ mgrin pa'i gnas zhes bya ba ni longs spyod kyi 'khor lor ro//bcings zhes bya ba ni yi ge gsum gyi dbyibs srog dang thur sel gyi ngo bor byas nas zhes bya ba'i don to/ /de ltar na a ha zhes bya ba ni rlung gi sa bon no/ /kha nas gsal bar brjod ces bya ba ni mgrin pa'i gnas nas kha'i lam la nye bar gyur pa zhes bya ba'i don to/ / ro 'bab pa dang zhes bya ba ni ro drug 'bab pa'o/ /khrung khrung zhes bya ba ni gya gyu'i dbyibs can nyid kyi chu skyar gyi rnam pa'o/ /ro skyur ba zhes bya ba ni ro la dga' ba nyid kyi phyir ro zhes bya ba na de ltar zhes bya ba ste/ le'u bcu bdun par gsungs pa'i rtsa gsum gyi dbye bas so/ /de zhes bya ba ni a yig go/ / rab tu dbye bas yi ge gsum gyi ngo bo'o/ /bkug nas rtag tu khyab par byed/ /ces bya ba ni bkug nas zhes bya ba ni de ma thag par gsungs pa'i rtsa gsum po'o/ /khyab par byed ces bya ba ni rtsa de rnams la gnas pa'o/ /rtag tu zhes bya ba ni dus thams cad du'o/ /gzugs kyi khams ni zhes bya ba ni de rnam par dag pa'i ngo bo'o//dmar chen po zhes bya ba ni snang ba mtha' yas kyi ngo bo nyid kyi phyir dmar po'i mdog can zhes bya ba'i don to/ /de ltar don rnam pa bzhis so sor rgyas par bshad pa gsungs so/ /de ltar don gsum gyi ngag gi sa bon gyi mtshan nyid kyi don bstan nas/ sems kyi sa bon brjod pa'i don du de'i yan lag mdor bstan pa ni/hU~M gi yi ge ye shes mchog /ces gsungs te/ shin tu rnam par dag pa'i chos kyi dbyings kyi ngo bo nyid kyi phyir ro/ /thugs sa bon zhes bya ba ni thugs kyi sa bon no/ /mi bskyod pa'i rgyu nyid kyi phyir ro/ /mchog ces bya ba ni gtso bo nyid kyi phyir ro/ /de ltar mdor bstan pa bshad nas/de nyid la rab tu dbye ba'i sgo nas rgyas par bstan pa ni/ ha dang de bzhin yi ge u/ /de ni yi ge ma dang gsum/ /zhes bya ba ni tshigs su bcad pa ji lta ba bzhin du'o/ /de ni gsum zhes bya ba ni hU~M yig go/ /ji lta bu zhe na/ de'i phyir/ rkang pa nas ni mgo bo'i bar/ /zhes gsungs te/ rkang pa nas brtsams te mgo bo'i mthar thug par ro//'khor lo bzhi ni don bsdus pa/ /zhes bya ba ni sprul pa la sogs pa'i 'khor lo bzhi po bsdus pa'i rang bzhin no/ /sems las ma gtogs pa'i phyi rol gyi 'khor lo bzhi po rnams ma grub pa'i phyir ro/ /de ltar de nyid kyi rab tu dbye ba'i sgo nas rgyas par bshad pa bstan nas/so sor rgyas par bshad pa brjod pa'i phyir ro/ /de'i yan lag ha yig gi gnas brjod pa sngon du 'gro bas/ de'i che ba'i bdag nyid ni/ ha ni thur sel ming can rlung / /zhes bya ba gsungs te/ thur sel gyi rlung gi ngo bo yi ge'i dbyibs kyi mtshan nyid yin no/ / bshang sgo gsang ba'i dbus na gnas/ /zhes bya ba ni de skyes pa'i rtsa nyid la brten pa nyid kyi phyir dang / bshang sgo gsang ba'i bar la gnas pa nyid kyi phyir ro/ /de ltar ha yig gi gnas brjod pa sngon du 'gro bas de'i che ba'i bdag nyid bstan nas/ u yig gnas sngon du 'gro bas de'i che ba'i bdag nyid brjod pa'i phyir/yi ge u ni gyen du rgyu ba'i zhes bya ba ni gyen du rgyu ba'i rlung gi ngo bor 'gyur ro/ /mgrin pa'i pad+ma'i dbus na gnas/ /zhes bya ba ni longs spyod kyi 'khor lo'i steng du gnas zhes bya ba'o/ /de ltar u yig gi gnas brjod pa sngon du 'gro bas/ de'i che ba'i bdag nyid gsungs so//ma yig gi gnas brjod pa sngon du 'gro bas/ de'i che ba'i bdag nyid brjod pa'i phyir/ yi ge ma ni gyen du rgyu ba'i zhes bya ba gsungs te/ srog rlung yin zhes bya ba'o/ /ji ltar zhe na/ de'i phyir rlung gi 'khor lo la zhes bya ba gsungs te/ rlung gi 'khor lor ro/ /dpral bar zhes bya ba ni smin ma'i dbus su zhes bya ba'i don to//de ltar ma yig gi gnas brjod pa sngon du 'gro bas/ de'i che ba'i bdag nyid gsungs so/ /yi ge gsum po bsdus pa'i rnam pas de nyid kyi rnam par dag pa sngon du 'gro bar byas nas/ de dag gcig gyur ces bya ba gsungs te/de ma thag par bshad pa'i yi ge gsum bsdus par byas nas so/ /snying ga la zhes bya ba ni chos kyi 'khor lo'i gnas la'o/ /thugs kyi sa bon zhes bya ba ni mi bskyod pa'i sa bon no/ /nges par phyung zhes bya ba ni phyi rol du ngag gi ngo bos zhes bya ba'i don to/ /mi bskyod snying po zhes bya ba ni de ma thag par gsungs pa'i hU~M yig go//kha dog nag ces bya ba ni rang gi rigs kyi kha dog nyid kyi phyir ro/ /gzugs med khams kyi ming can no/ /zhes bya ba ni de gcig tu phung po bzhi'i bdag nyid can sems kyi ngo bo nyid kyi phyir ro/ /de ltar don rnam pa bzhis so sor rgyas par bshad pa bstan nas/de nyid la don rnam pa gsum gyis sems kyi sa bon bstan nas/ de'i nye bar bsdu ba brjod pa'i phyir/ sku gsung thugs kyi rdo rje yi/ /zhes bya ba gsungs te/ rnam par snang mdzad la sogs pa rnams kyi'o/ /rab tu bshad ces bya ba ni brjod pa'o//snying po zhes bya ba ni yi ge gsum gyi bdag nyid do/ /de ltar don bzhis yi ge gsum bshad pa bstan nas/ de'i nang nas gtso bo'i yi ge bshad pa'i phyir/ de'i yan lag de'i don nyid zhu bar byed pa ni/ slar yang zhus zhes bya ba la sogs pa gsungs te/sngar gyi zhus pa la ltos nas so/ /thams cad mkhyen la zhes bya ba ni chos thams cad la rang gi ngo bo nyid ji lta ba bzhin mkhyen pas na thams cad mkhyen pa'o/ /phyag na rdo rjes zhes bya ba ni zhu ba po'o/ /thal sbyar nas zhes bya ba ni lag pa gnyis kyi thal mo sbyar ba'o//gus par byed pa sngon du 'gro bas yongs su zhu bar byed pa'i phyir ro/ /ci zhig zhu bar byas she na/ de'i phyir gnas kyi dbye ba zhes bya ba gsungs te/ rdo rje gsum gyi zhes bya ba ni sku rdo rje la sogs pa rnams so/ /yi ge'i don zhes bya ba ni yi ge gsum gyi mchod par brjod par bya ba'o/ / gnas kyi dbye ba zhes bya ba ni chos kyi 'khor lo la sogs pa'i mtshan nyid can gyi rten gyi dbye bas so/ /rtogs lags na zhes bya ba ni bdag gis bcom ldan 'das kyi drin gyis rtogs pa'o/ /ji lta bu zhig gtso bor gsungs she na/ de'i phyir 'di rnams zhes bya ba gsungs te/ yi ge gsum po 'di rnams kyi nang nas so//ji lta bu zhig bdag po zhe na/ de'i phyir yi ge gang gis gtso bo nyid do/ /ji lta bu zhig gtso bor gsungs she na/ de'i phyir gtso bo zhes gsungs te/ gtso bo ni bcom ldan 'das la bod pa ste/ sangs rgyas lnga'i bdag po nyid kyi phyir ro/ /de ltar de'i don nyid du zhu ba bstan nas bcom ldan 'das kyi gsung la 'jug pa sngon du 'gro bas de bshad par dam bca' ba bstan pa'i phyir bcom ldan 'das kyis slar yang gsungs zhes bya ba ste/slar yang zhes bya ba ni sngar la ltos nas so/ /bcom ldan 'das ni sngar bshad zin to/ /rdo rje 'chang ba che zhes bya ba ni rang bzhin gyis 'od gsal ba'i ngo bo rdo rje chen po 'chang ba'i phyir ro//gtso bo zhes bya ba ni khams gsum pa'i bdag po nyid thob pa'i phyir ro/ /gsang ba zhes bya ba ni sbas pa nyid kyi phyir ro/ /mchog tu zhes bya ba ni mchog nyid do/ /gsang ba yin zhes bya ba ni zab pa'o/ /sbas pa'i don ni zhes bya ba ni myur ba nyid du mi rtogs pa'i phyir ro/ / khyod dri ba zhes bya ba ni phyag na rdo rje 'dri ba la bcom ldan 'das kyis phan yon gsungs pa'o/ /rgyud rnams kun du sbas pa ni/ /zhes bya ba ni bya ba la sogs pa'i rang bzhin rnams la'o/ /mnyan par gyis zhes bya ba ni nyan pa la sbyar ba'o/ /yang dag bshad kyis zhes bya ba ni phyin ci ma log pa'i ngo bo nyid kyis gsal bar bya zhes bya ba'i don to//de ltar bcom ldan 'das kyi gsung la 'jug pas sngon du 'gro bas de bshad par rtsom pa bstan nas/ gtso bo'i ngo bo bshad pa'i phyir/ gtso bo zhes bya ba la sogs pa gsungs te/ gtso bor ni gtso bo nyid do/ /thugs kyi sa bon zhes bya ba ni hU~M gi yi ge mi bskyod pa'i sa bon nyid la'o//de nyid la thams cad kyi nang nas gtso bo nyid do/ /chos thams cad sems la rag las pa nyid kyi phyir ro/ /ji lta bu zhe na/ de'i phyir rnam par rtog med ces gsungs te/ rnam par rtog pas ma gos pa'o/ /kun gyis zhes bya ba ni rnam pa thams cad kyis kun la nyon mongs pa dang /rnam par byang ba'i gnas skabs la zhes bya ba'i don to/ /gang gi phyir gtso bo gzhan rnams ni zhes bya ba ni gang gi phyir ni gang las so/ /gzhan rnams ni zhes bya ba ni ngag dang lus kyi sa bon rnams las so/ /'grib dang de bzhin 'phrog par byed/ /ces bya ba ni rim pa ji lta ba bzhin du rnam par rtog pa dang rlung gnyis so//gang gi phyir sems kyi sa bon las brgya rtsa brgyad kyi grangs dang ldan pa'i rnam par rtog pa'i tshogs so/ /'grib dang zhes bya ba ni rang bzhin yongs su shes nas spong bar 'gyur ro/ /rlung gnyis ni srog dang thur sel gyi bdag nyid can no/ / 'phrog par byed ces bya ba ni 'byung ba dang rngub pa rjes su dran pa bsgoms pas 'phro bar byed pa ni rnam par zlog par byed pa ste/ de'i rang bzhin yongs su shes pas zhes bya ba'i don to/ /rnam pa gnyis po de dag ji lta bu zhe na/ de'i phyir/ lus kun la ni khyab par byed/ / ces bya ba gsungs te/ srog 'dzin pa thams cad la thams cad du khyab pa'o/ /sna yi bu ga dag la rgyu/ /zhes bya ba ni kun rdzob kyi sna'i bu ga gnyis kyi lam nas rgyu bar byed pa'o/ /lus la zhes bya ba ni lus nyid la'o/ /'byung bar byed ces bya ba ni de dang de'i las bsags pas so/ /rtag tu zhes bya ba ni dus rtag tu'o//gang gi stobs kyis zhes bya ba ni rnam par rtog pa'i rlung gi che ba'i bdag nyid kyi mthus so/ /yongs su ma shes pa'i gnas skabs na'o/ /'khor ba'i lam zhes bya ba ni srid pa'i lam la'o/ /'gro ba drug gi dbye bas tha dad pa la'o/ /'dir zhes bya ba ni nye bar dmigs par gyur pa'o//'khor ba'i zhes bya ba ni zo chun rgyud mo'i rigs pas 'byung bar 'gyur zhes pa'i don to/ /gsum pa zhes bya ba ni hU~M yig gi ngo bo de las gzhan pa'i gnyis brjod par 'dod nas so/ /rnal 'byor pa yis rtogs zhes bya ba ni rim pa gnyis sgom pa po rnams kyi yul lo/ /rnam rtog med pa zhes bya ba ni rnam par dag pa gnyis kyi dgongs pas kyang rnam par rtog pa dang bral ba'o//rmad byung che zhes bya ba ni de dang de'i rnam pa nyid kyis de nyid la snang ba'i phyir ro/ /rlung rnams thams cad 'gog pas na/ /zhes bya ba ni rlung bcu 'gog pa dang rnam par rtog pa brgya rtsa brgyad 'gags pas so//skye ba zhes bya ba ni skye bar 'gyur ba'o/ /gang la zhe na/ de'i phyir de nyid rtogs pa'o zhes gsungs te/ sems kyi dbang phyug gi sa bon nye bar mtshon pa rnams so/ /de ltar na don gsum gyis gtso bo'i yi ge bshad nas/ de dngos su byed pa'i thabs brjod par 'dod nas de'i yan lag 'khor lo gsum gyi ngo bo gsungs pa ni/rlung ni thams cad 'gog pa spangs/ /zhes bya ba ste/ thams cad ni brgya rtsa brgyad kyi grangs dang ldan pa'am/ bcu po rnams 'gog pa ni nye bar bsdu ba'o/ /yang dag ces bya ba ni ma 'khrul pa nyid kyis so/ /bdag gis zhes bya ba ni de bzhin gshegs pa drug pa'i rnam pa can ston pa po'o//rigs pa zhes bya ba ni thabs kyi mtshan nyid do/ /bshad ces bya ba ni brjod par gyur pa'o/ /sprul pa chos kyi 'khor lo'i dbus/ /zhes bya ba ni 'khor lo gnyis kyi dbus su'o/ /pad+ma gnyis su zhes bya ba ni pad+ma gnyis so/ /'dir ni zhes bya ba ni rnal 'byor ma'i rgyud bshad pa'i skabs su'o//gsungs zhes bya ba ni bshad pa'o/ /drug cu rtsa bzhi brgyad 'dab gnyis/ /zhes bya ba ni 'khor lo gnyis te re re bzhin pad+ma'i dbyibs nyid kyi phyir ro/ /de dag za ma tog bzhin gnas/ /zhes bya ba ni za ma tog gi tshul khrims kyi steng dang 'og tu kha sbyar ba'i rigs pas gnas pa'o//gzhan yang steng 'og ces bya ba ni steng dang 'og tu yang dag par brten nas so/ /srog dang thur sel zhes bya ba ni ji ltar srid pa'i mi bskyod pa dang / rin chen 'byung ldan gyi ngo bo rlung gnyis rgyu bar byed pa'o/ /de gnyis zhes bya ba ni gang dag za ma tog bzhin du gnas pa'o/ /rtog pa dang bcas pa zhes bya ba ni yul gyi stobs kyis rnam par rtog pa dang /rang bzhin skyed pa'i phyir ro/ /rlung zhes bya ba ni srog dang thur sel gyi rang bzhin no/ /gsungs zhes bya ba ni bstan pa'o/ /gsal bar zhes bya ba ni thams cad kyis nyams su myong bar gyur pa'i phyir ro/ /sku dang gsung gi snying po gnyis zhes bya ba ni srog dang thur sel dag go//yi ge gnyis kyi ngo bo nyid kyi phyir/ rnam par snang mdzad dang snang ba mtha' yas kyi ngo bo nyid do/ /la la nA dang ra sa nA zhes bya ba ni rtsa gnyis la brten pa nyid kyi phyir ro/ /de ltar 'khor lo gnyis kyi ngo bo bstan nas/ rtsa dbus ma'i ngo bo bshad pa'i phyir/a ba d+hU tI'i rnam par rtog pa spangs pa nyid kyi phyir ro/ /mchog gi rtsa zhes bya ba ni rtsa thams cad kyi gtso bo'o/ /de gnyis zhes bya ba ni de ma thag par bshad pa'i 'khor lo dag gi'o/ /dbus ma zhes bya ba ni bar du'o/ /mchog gi mchog ces bya ba ni mchog ni rtsa gnyis po dag las mchog ste/khyad par du 'phags pa'o/ /rlung zhes bya ba ni rlung ngo / /rnam rtog med pa zhes bya ba ni rnam par rtog pa dang ma 'dres pa'o/ /gang yin zhes bya ba ni a ba d+hU tI'o/ /rtag tu zhes bya ba ni dus thams cad du'o/ /rgyu zhing zhes bya ba ni rab tu rgyu ba'o/ /lus 'di thams cad la khyab par byed pa nyid kyis 'gro ba'i phyir kun la khyab pa'o//gang thob ces bya ba ni rnam par rtog pa'i rlung rgyu ba'i rtsa dbus ma yang dag par thob nas so/ /rnal 'byor zhes bya ba ni rdzogs pa'i rim pa sgom pa po'o/ /rtag tu ni zhes bya ba ni dus thams cad du'o/ /sems can don ni byed nus pa/ /zhes bya ba ni 'bad pa med par sems can gyi don byed nus par 'gyur zhes bya ba'i lhag ma'o//ci zhig byas nas she na/ de'i phyir/ rlung gi rang bzhin bye brag ni/ /zhes bya ba gsungs te/ rang bzhin yang yin la rlung yang yin pas na/ rlung gi rang bzhin no/ /de rnams bye brag ni dbye ba'o/ /de rnams kyi brgya dang brgyad dang rang bzhin ni brgya rtsa brgyad do//brgyal nas zhes bya ba ni le'u gsum par gsungs pa'i cho gas spangs nas so/ /gang gnas pa zhes bya ba ni rtsa dbus mar gnas par byed pa'o/ /rtag tu zhes bya ba ni dus thams cad du'o/ /rigs zhes bya ba ni sngar bshad pa'i sbyor ba'i bye brag gis so/ /mi shes pa zhes bya ba ni yul ma yin pa'o//rnal 'byor byis pa zhes bya ba ni byis pa ni rdzogs pa'i rim pa yongs su mi shes pas rnal 'byor yang yin te/ bskyed pa'i rim pa tsam bsgom pa'i phyir/ rnal 'byor byis pas so/ /yang na rigs pa mi shes pa/ /zhes bya ba dang 'brel to/ /mngon sum dang rjes su dpag pa'i rigs pa las phyi rol du gyur pa'o//skad cig gcig rdzogs mngon byang chub/ /ces bya ba ni a ba d+hU tI'i gnas skabs thob pa'i dus su skad cig gcig la bya ba rdzogs pa'i mtshan nyid can no/ /mngon par byang chub pa ni sangs rgyas nyid thob pa'o/ /de yis thob par zhes bya ba ni a ba d+hU tI'i ngo bos thob pas so//'dir zhes bya ba ni sngags kyi theg par ro/ /gsungs zhes bya ba ni brjod pa'o/ /de ni gang tshe skad cig 'thob/ /ces bya ba ni skad cig gcig gis mngon par byang chub pa'o/ /de ni skad cig ces bya ba ni skad cig gcig gis mngon pa byang chub pa 'thob pa'i mtshan nyid do/ / mchog tu gsungs zhes bya ba ni kun rdzob gcig pu bstan pa yin te/ de'i ngo bo de kho na nyid ma mthong bas brjod par mi nus pa nyid kyi phyir ro/ /de ltar rtsa dbus ma'i rang gi ngo bo bstan nas de thob par byed pa'i thabs kyi ngo bo brjod pa'i phyir/ de yang ji ltar 'thob par byed/ /ces bya ba gsungs te/ rtsa dbus ma la brten nas skad cig gcig gis mngon par byang chub pa'o//ji ltar thob par byed ces bya ba ni thabs gang gis rtogs par bya ba'o/ /rigs pa zhes bya ba ni sbyor ba'o/ /de la zhes bya ba ni de thob pa'i phyir ro/ /brjod ces bya ba ni brjod pa'o/ /rigs pa de gang yin zhe na/ de'i phyir thog mar zhes bya ba la sogs pa gsungs te/rnal 'byor chen po ni zhes bya ba ni sngags kyi theg pa'i rjes su 'brangs nas byang chub mngon du byed pa la phyogs pa'o/ /zhi gnas sgom zhes bya ba ni sems rtse gcig pa'i rgyur gyur pa'i ting nge 'dzin la goms par byed pa'o/ /blo bzang gis ni zhes bya ba ni gdams ngag ji lta ba bzhin du bsgom pa shes pa'i phyir ro//bskyed pa'i rim pa'i sbyor ba yis/ /zhes bya ba ni zla ba dang rdo rje la sogs pa'i bsgom pas so/ /phyag rgya byas nas zhes bya ba ni lha'i rnam par bskyed nas so/ /'bar ba'i zhes bya ba ni me ltar rnam par rtog pa thams cad sreg par byed pas so/ /bsdams zhes bya ba ni bsdams par byas nas so//dbang po'i sgo ni sgo dgu la/ /zhes bya ba ni rang dang 'os pa'i yul la sogs pa'i ngo bo rnams so/ /dgu'i grangs kyis zhes bya ba ni mig la sogs pa dgu'i grangs kyi dbye bas so/ /hUM bzlas pa ni mtshungs pa med/ /ces bya ba ni sems kyi bzlas pa'i rnam pa ste/ hUM gcig nyid la rnam pa gsum du 'jug pa dang /gnas pa dang ldang ba rnams la sbyar nas dbugs kyi 'khor lo mtshon par bya'o/ /de nyid kyi phyir mtshungs pa med ces gsungs te/ phyi rol gyi hUM yig gi bzlas pa'i mtshan nyid dang bral ba'i phyir ro zhes bya ba ni dbugs kyi rim pas nye bar mtshon par bya'o/ /mchog tu rgyun mi chad par bya//zhes bya ba ni nyin mtshan du nyi khri chig stong drug brgya'i dbugs kyi grangs kyis so/ /mchog ces bya ba ni ma ning gi bzlas pa'i rgyur gyur pa'i phyir ro/ /dus ji tsam du zhe na/ de'i phyir 'byung ba dang rngub pa rjes su dran pa phyi ma'i dus de tsam gyi mthar thug par ro/ /bzlas pa ni zhes bya ba ni hUM yig gi sgo nas dbugs kyi 'khor lo mtshon par byas nas so//de zhes bya ba ni zla ba'i rjes la'o/ /skad cig de la thob ces bya ba ni a ba d+hU tIr zhugs nas skad cig gcig rdzogs mngon par byang chub pa'i skad gcig ma'o/ /de ltar de thob par byed pa'i thabs kyi ngo bo bstan nas thabs bsgom pa'i lugs bstan pa'i phyir/gang phyir de ni zhes bya ba la sogs pa gsungs te/ de ni bzlas byas na zhes bya ba ni hU~M yig de 'jug pa la sogs pa rnams la sbyar bar gyur pas gang gi phyir zhes bya ba ni rgyu gang gi phyir ro/ /snying ga'i pad+ma zhes bya ba ni chos kyi 'khor lo'i pad+ma'o/ /steng bltas 'gro zhes bya ba ni za ma tog la kha phye bas steng gi phyogs su 'gro ba ste kha bkag phye bar 'gyur ro//de nyid kyi phyir 'gro zhes gsungs te/ 'gro bar 'gyur ro/ /de nas gsang ba'i pad+ma las/ /zhes bya ba ni gsang ba'i pad+ma sprul pa'i 'khor lo'i ngo bo de las so/ /phye ba zhes bya ba ni za ma tog bcings pa bzlog par brjod pa'o//rnam par rtog pa'i rlung gnyis ni/ /zhes bya ba ni srog dang thur sel gyi rlung gnyis kyi ngo bo'o/ /de nas zhes bya ba ni za ma tog kha phye ba'i rjes la/ rnam par bcad nas 'gro zhes bya ba ni steng dang 'og gi rgyu ba bzlog nas dbu mar zhugs te/ ro gcig par 'gyur zhes bya ba'i don to/ /de ltar thabs bsgom pa bstan nas thabs las byung ba thob pa'i ngo bo brjod pa'i phyir/rnam rtog med pa'i rlung chen po/ /zhes bya ba gsungs te/ a ba d+hU tI'i ngo bos gnas pa'o/ /sku gsum rdo rjes bcad nas ni/ /zhes bya ba ni rtsa gnyis kyi rgyu ba srog dang thur sel gyi bdag nyid can 'khor lo gnyis las byung ba'i lus dang ngag gi rang bzhin bcad nas so//rnam rtog med pa zhes bya ba ni rang bzhin gyis rnam par dag pa la ltos nas rnam pa gzhan du mi 'gyur ba'i phyir ro/ /bde ba ster zhes bya ba ni rdo rje bzlas pa'i ngo bo zag pa med pa'i bde ba'i ngo bo'o/ /thob ces bya ba ni rtogs pa'o/ /sngags kyi de nyid kyis ni zhes bya ba ni sngon du gsungs pa'i hUM bsgoms pas so//a ba d+hU tI'i rgyun la gnas/ /zhes bya ba ni g.yon dang g.yas pa'i rgyu ba bzlog nas dbus ma'i rgyu ba'i gnas pa nyid kyi phyir ro/ /smin dbus zhes bya ba ni rlung gi 'khor lo'i gnas so/ /rlung gis phye byas la zhes bya ba ni thig le'i ngo bo 'byed pa'o/ /'di thob ces bya ba ni dbus mar 'jug pa 'thob pa'o//thob byas dga' bas ni zhes bya ba ni dga' ba'i bye brag gi bdag nyid can no/ /mi zad pa zhes bya ba ni dga' ba rtag pas so/ /rtag tu 'char zhing zhes bya ba ni ji srid 'khor bar gnas kyi bar du'o/ /chags sogs bral zhing zhes bya ba ni rang bzhin gyi tshogs brgya rtsa brgyad bzlog pa'i bdag nyid kyi phyir ro//zhi ba zhes bya ba ni gdod ma nas zhi ba nyid kyi rang bzhin med pa'o/ /rang rig ces bya ba ni so so rang gis rig par bya ba'o/ /bde ba chen po zhes bya ba ni sdug bsngal thams cad las zlog par byed pa'o/ /de ltar don rnam pa lngas de mngon du byed pa'i thabs bstan nas/thabs las byung ba thob pa'i dus su rtags brjod pa'i phyir ro/ /mtshan ma zhes bya ba la sogs pa gsungs te/ rtags so/ /'di la zhes bya ba ni dbus ma sgom pa po'i rnal 'byor pa'i'o/ /bshad par bya zhes bya ba ni brjod par bya ba'o/ /gsang sngags grub pa'i zhes bya ba ni sngags kyi spyod pas grub pa'i phyir grub pa'o//rnal 'byor pas zhes bya ba ni sgom pa pos so/ /'dar dang zhes bya ba ni rlung gi ngo bo mngon du byed pa po dang nye ba'i phyir lus 'dar ba'o/ /rdul dang zhes bya ba ni byang chub sems kyi rnam 'gyur 'byung ba'i phyir ro/ /ba spu langs zhes bya ba ni ba spu'i rtsa ba rdul ba'o/ / rtag tu dga' ba'i bsam pa dang / /zhes bya ba ni dus thams cad du yid mi bde ba bzlog pa'o/ /gdong ni zhes bya ba ni byad kyi gdong ngo / /zangs mdog yid du 'ong zhes bya ba ni zangs dang 'dra bar 'bar bar 'gyur ba gang la yod pa de la 'di skad ces bya'o/ /kun gyis mthong nas zhes bya ba ni rnal 'byor dang rnal 'byor ma thams cad dga' ba'o//mchog tu bde ba ster bar byed pas so/ /grang dang lhag par tsha zhes bya ba ni grang dang tsha ba skyed par byed pa'o/ /des zhes bya ba ni bshad ma thag pa'i rnal 'byor pa la'o/ /gnod pa nyid du mi 'gyur ba'o zhes bya ba ni de dag gis de la dga' ba dang / gdung ba la sogs pa skye bar mi 'gyur ro//'jig rten chos dang zhes bya ba ni bstod pa dang smad pa la sogs pa brgyad do/ /de bzhin gzhan zhes bya ba ni gzhan rnams so/ /gnod pa nyid du mi 'gyur zhes bya ba ni rjes su chags pa dang khong khro ba mi bskyed pa'o/ /de la zhes bya ba ni rnal 'byor pa la'o/ /sngags kyi de nyid ni zhes bya ba ni hU~M yig gi ngo bo sngags kyi de kho na nyid sgom pa pos so//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las le'u nyi shu rtsa gnyis pa'i rgya cher bshad pa'o// // de ltar le'u nyi shu rtsa gnyis pa yi ge gsum gyi yul la dri ba'i lan bstan nas/ da ni de kho na nyid gsum gyi yul la dri ba'i lan brjod pa'i phyir/ le'u nyi shu rtsa gsum pa ston par byed cing / dang por re zhig de rtsom pa gsungs pa ni/ de nas zhes bya ba la sogs pa ste/le'u nyi shu rtsa gnyis bshad pa'i rjes la'o/ /gzhan yang zhes bya ba ni snga ma la ltos nas so/ /nyon zhes bya ba ni/ zhu ba po nyan pa la sbyar ba'o/ /de nyid gsum gyi tshig bstan bya/ /zhes bya ba dang 'brel to/ /de kho na nyid gsum pa ni/ bdag dang sngags dang ye shes kyi de kho na nyid kyi mtshan nyid can gyi tshig rnam par rjod par byed pa'i bdag nyid kyis bstan par bya zhes bya ba ni/brjod par bya ba'i don la nges par byed pa bstan par bya zhes bya ba'o/ /ji ltar zhe na/ de'i phyir bdag nyid sogs dbye bas zhes bya ba gsungs te/ sogs pa'i sgras ni sngags dang ye shes kyi de kho na nyid kyis bsdus par rig par bya'o//ji lta ba bzhin zhes bya ba ni/ phyin ci log pa'i ngo bos so/ /rim pa rnams zhes bya ba ni bdag gi de kho na nyid la sogs pa'i rim pas so zhes bya ba'i don to/ /de ltar rtsom pa bstan nas/ dngos su bshad pa brjod pa'i phyir/de'i yan lag bdag gis de kho na nyid mdor bstan pa ni bdag gi de nyid ces bya ba ste/ kun du brtags pa phung po lnga'i tshogs kyi de nyid ni ji lta ba bzhin du gnas pa'i rnam par snang mdzad la sogs pa de bzhin gshegs pa'i ngo bo bdag gis de kho na nyid ces brjod do/ /rnal 'byor mchog ces bya ba ni so so'i skye bo'i mtshan nyid dang bral ba'i phyir/bsam gtan mchog gi ngo bo'o/ /rdo rje sems dpa' nyid kyi rgyu/ /zhes bya ba ni phung po lnga rnams la de bzhin gshegs pa lnga'i ngo bo yongs su shes pas rdo rje sems dpa'i go 'phang thob pa'o/ /sangs rgyas kun gyi rang bzhin bdag/ ces bya ba ni de bzhin gshegs pa lnga'i sku gsung thugs kyi ngo bo'i bdag nyid can no/ /sangs rgyas kun gyi sku gcig pu/ /zhes bya ba ni sangs rgyas kun gyi sku gcig gang la yod pa de ni sangs rgyas kun gyi sku gcig pu'o/ /rdo rje 'chang chen po'i rnam pa nyid ces bya ba'i tha tshig go/ /kun mkhyen go 'phang zhes bya ba ni khams gsum po thams cad la sangs rgyas lnga'i ngo bos shes pa'i phyir ro//mi gsal ba zhes bya ba ni gzugs can gyi ngo bo dang bral bar bya ba'i phyir ro/ /rigs kyi dbye bas rab gsal byed/ /ces bya ba ni rtsa ba'i nyon mongs pa sbyang ba'i thabs kyis gti mug la sogs pa'i rigs kyi dbye ba gsal bar byed pa'o//rigs lnga'i rnam pa gang zhes bya ba ni rnam par snang mdzad la sogs pa'i ngo bo nyid kyis so/ /de ni phung po lnga yi mtshan nyid do/ /zhes bya ba ni phung po lnga'i ngo bo zhes bya ba'i don to/ /de ltar bdag gi de kho na nyid mdor bstan pa brjod nas/ de rgyas par bshad pa bstan pa'i phyir/gzugs kyi phung po'i rnam par dag pa ni/ phra rags la sogs dbye ba yis/ /zhes bya ba la sogs pa gsungs te/ de la rags pa ni gzugs kyi phung po ste/ phyi rol du de'i ngo bos snang ba nyid kyi phyir ro/ /phra ba ni de las gzhan pa'i tshor ba la sogs pa rnams te/ gzugs med pa nyid kyis rags pa'i snang ba med pa'i phyir ro//thogs bcas thogs med mtshan nyid can/ /zhes bya ba ni gzugs ni thogs pa dang bcas pa ste/ rang gi yul phyogs la gzhan skye ba 'gog pa'i phyir ro/ /tshor ba la sogs pa rnams ni thogs med de/ snga ma las bzlog pa'i phyir ro/ / thogs bcas dang thogs med ni thogs bcas dang thogs med dag ste/ de dag nyid ni mtshan gang la yod pa de rnams ni/ thogs bcas dang thogs med rnams so/ /'byung ba chen po bzhi yi dngos/ /zhes bya ba ni sa la sogs pa 'byung ba chen po'i bdag ste/ des bsgrub par bya ba'i phyir ro/ / gzugs kyi phung por zhes bya ba ni gzugs kyi mtshan nyid can no/ /'dir ni zhes bya ba ni sangs rgyas pa'i bstan pa la'o/ /gsungs zhes bya ba ni brjod pa'o/ /der ni rnam snang ngo bo dang / /zhes bya ba ni gzugs kyi phung po'i rang bzhin rnam par snang mdzad kyi ngo bo ste/ de nyid dang gzhan dag nyid kyis gzugs brnyan bzhin du khyad par du me long lta bu'i ye shes kyi bdag nyid kyis snang ba'i phyir ro//thams cad spro bar byed pa'i rgyu/ /zhes bya ba ste thams cad ni rang gi rigs dang 'brel pa'i lhan cig spyod ma dang / rjes su spyod ma la sogs pa spro bar byed pas na thams cad spro bar byed pa'i rgyu'o/ /de ltar gzugs kyi phung po rnam par dag pa bstan nas/tshor ba'i phung po rnam par dag pa brjod pa'i phyir/ bde dang sdug bsngal zhes bya ba gsungs te/ bde ba dang sdug bsngal lo/ /mchog tu zhes bya ba ni mchog go/ /zhi zhes bya ba ni mchog ma yin pa dang / btang snyoms kyi rnam pa'o//grang dang dro ba zhes bya ba ni de dang reg pa'i rnam pa'o/ /mchog gi mchog ces bya ba ni phra ba dang rags pa'i ngo bo'o/ /rig pa ni nyams su myong ba'o/ /gang gis zhes bya ba ni yongs su gcod pa'i rnam pa'i shes pas so/ /de ni zhes bya ba ni de lta bu'i nyams su myong ba'i ngo bo'o/ / phal cher zhes bya ba ni phal che bas so/ /tshor ba'i phung po'i mtshan nyid do/ /zhes bya ba'o/ /rin chen 'byung ldan gyi mtshan nyid do/ /bde sdug la sogs pa'i rnam pa can gyi mtshan nyid can gyi tshor ba la sogs pa'i stong pa'i ngo bo nyid kyi mnyam pa nyid kyi rtogs pa'i phyir ro/ /de bzhin gshegs pa spros bdag nyid//ces bya ba ni rang gi rigs can gyi lhan cig spyod ma dang rjes su spyod ma'i bdag nyid can no/ /de ltar tshor ba'i phung po'i rnam par dag pa bstan nas/ 'du shes kyi phung po rnam par dag pa bstan pa'i phyir/ glang po zhes bya ba la sogs pa gsungs te/ glang po zhes bya ba ni glang po che'o/ /bong bu zhes bya ba ni bong bu'o//go ma yu zhes bya ba ni ce sbyang ngo / /stag dang zhes bya ba ni sha rtu la'o/ /ri dgas zhes bya ba ni e na ya la sogs pa'o/ /phag ces bya ba ni phag la sogs pa'o/ /pha dang zhes bya ba ni skyed pa po'o/ /ma dang zhes bya ba ni skyed byed ma'o/ /pha yi spun zla la sogs pa/ /zhes bya ba ni de'i mched zla la sogs pa'o//mdza' bo zhes bya ba ni dga' ba'o/ /snag gi gnyen mtshams zhes bya ba ni nye 'brel la sogs pa'o/ /gang gis yang dag shes pa ni/ /zhes bya ba ni rang dang 'os pa'i mtshan ma 'dzin pa'i rnam pa'i shes pas so/ /de zhes bya ba ni mtshan ma 'dzin pa'i rnam pa'o/ /yang dag ces bya ba ni phyin ci ma log pa nyid kyis so//'du shes phung po'i mtshan nyid ni/ /zhes bya ba ni thun mong ma yin pa'i de kho na nyid 'jug pa po zhes bya ba'i don to/ /de bzhin gshegs pa zhes bya ba ni de bzhin nyid du gshegs pa la'o/ /'od dpag med ces bya ba ni de bzhin gshegs pa snang ba mtha' yas kyi rnam pa la'o//de ni yang dag ces bya ba ni phyin ci ma log pa'i ngo bos spro bar shes par bya'o/ /kun las zhes bya ba ni kun nas so/ /gsal zhes bya ba ni snang ba mtha' yas kyi rigs can rnams spro ba'i phyir ro/ /'gro la khyab par zhes bya ba ni khams gsum po la mtshan mar 'dzin pa la rang bzhin med pa nyid du so sor rtog pa'i phyir ro//rmad 'byung che zhes bya ba ni/ dpyod pa'i stobs kyis 'du shes kyi rnam par rtog pa bzlog pas ngo mtshar ba dang bcas pa'o/ /de ltar 'du shes phung po'i rnam par dag pa bstan nas/ /'du byed kyi phung po'i rnam par dag pa brjod pa'i phyir/ dge dang mi dge ba'i las kyi 'bras bu zhes bya ba gsungs te/dge dang mi dge ba'i las kyi 'bras bu'o/ /las zhes bya ba ni dge ba dang mi dge ba'i rang bzhin no/ /gzhan yang lung ma bstan ming zhes bya ba ni lung ma bstan pa'i rang bzhin te/ gzugs dang gzugs med la sogs pa bskyed pa'i phyir ro/ /de ni 'du byed du ni bshad/ / ces bya ba ni mtshungs par ldan pa dang mtshungs par mi ldan pa la sogs pa'i dbye bas tha dad pa rnams so/ /bshad ces bya ba ni brjod pa'o/ /don yod spro ba'i rang bzhin can/ /zhes bya ba ni bya ba grub pa'i ye shes kyi rang bzhin can te/ nyon mongs pa'i stobs kyis dge ba dang mi dge ba'i las las ldog par byas nas gcig tu sems can rnams kyi bya ba bsgrub pa'i phyir ro//de nyid kyi phyir don yod grub pa 'khor dang bcas pa la spro ba'i rang bzhin can no/ /de ltar 'du byed kyi phung po rnam par dag pa bstan nas/ rnam par shes pa'i phung po rnam par dag pa bstan pa'i phyir/ dngos dang dngos med la sogs zhes bya ba gsungs te/dngos po ni don byed nus pa'i bdag nyid can no/ /dngos med ni de las bzlog pa'o/ /dngos po dang dngos med ni dngos po dang dngos med dag go/ /de dag gi rnam par dbye ba ni/ dngos po dang dngos med kyi rnam par dbye ba'o/ /de la sogs pa gang rnams la de bzhin no//de'i ngo bo'i kun du rtog pa ni rnam par rtog pa'o/ /de 'byung ba'i bdag nyid can zhes bya ba ni/ de lta bu'i rnam par rtog pa skyed par byed pa'o/ /rnam shes zhes bya ba ni rnam par dben pa'i mtshan nyid can no/ /rnam par shes pa zhes bya ba ni shes par bya ba'o/ /mi bskyod spro ba'i bdag nyid can//zhes bya ba ni rnam par rtog pa'i nyon mongs pa rnams kyis phrog par mi nus pa nyid kyis shin tu rnam par dag pa'i chos kyi dbyings kyi ye shes rang bzhin nyid kyi phyir ro/ /de ltar rnam par shes pa'i phung po lnga rnam par dag pa nye bar bsdu ba bstan pa'i phyir/ de ltar phung po yongs shes na//zhes bya ba gsungs te sngon du gsungs pa'i rigs pas phung po lnga rnams la sangs rgyas lnga nyid du yongs su shes pa'o/ /shes na zhes bya ba ni shes par bya ba'o/ /lung dang rigs pa'i shes pa skye/ /zhes bya ba ni rigs pa ni sngags kyi theg par grags pa'o/ /lung ni bye brag smra ba'i lugs su grags pa ste/de dag gis 'char ba ni brjod pa zhes bya ba'i don to/ /de ltar phung po rnam pa lnga'i rnam par dag pa nye bar bsdu ba bstan nas/ spro ba'i sngags brjod pa'i phyir/ dzi na dzika ces bya ba ni/ rgyal ba'i ngang tshul can ni rgyal ba ste bdud rnams so/ /de rnams rtsibs bcu gnyis pa'i chos kyi 'khor los rgyal bar byed pas na/dzi na dzika go/ /drang ba'i don to/ /rdo rje lta bu'i ting nge 'dzin gyis bdud bzhi 'joms pa'i phyir ro/ /dzi na dzika ste nges pa'i don to/ /rat+na d+h+rika ces bya ba ni/ re ba thams cad yongs su rdzogs par byed pa'i rin po che 'dzin par byed pas na rat+na d+h+r-ika go//drang ba'i don to/ /yang dag pa'i mtha' rin po che 'dzin pas na rat+na d+h+rika ste/ nges pa'i don to/ /A ro l-ika dang zhes bya ba ni/ A ni kun nas so/ /ro ni 'khor ba las so/ /l-ika ces bya ba ni/ 'gro bas ni A ro l-ika go/ /drang ba'i don to/ /a ra o zhes bya ba ni/ ye shes gsum gyis 'od gsal du 'gro bas na A ro l-ika ste/nges pa'i don to/ /pradz+nyA d+h+r-ika ces bya ba ni/ so sor 'byed pa'i mtshan nyid can gyi shes rab 'dzin pas na pradz+nyA d+h+r-ika go/ /drang ba'i don to/ /shes rab ni zla ba'i snang ba la sogs pa ste/ de 'dzin pas na pradz+nya d+h+r-ika ste/ nges pa'i don to//badzra d+h+r-ika ces bya ba ni/ rnam pa lngas mngon par byang chub pa mtshon par byed pas ni/ badzra dz+nyAd+h+r-ika go/ /drang ba'i don to/ /bden pa gnyis kyi bdag nyid kyis rdo rje 'dzin par byed pas na badzra d+h+r-ika go/ /nges pa'i don to/ /de ltar sngags zhes bya ba ni rnam par snang mdzad la sogs pa lnga po rnams kyi'o/ / yid skyo ba'i don gyi spro ba'i sngags kyi rang bzhin rnams so/ /rim bzhin zhes bya ba ni gzugs kyi phung po la sogs rnam par dag pa'i rim pas so/ /shes zhes bya ba ni shes par bya ba'o/ /rigs pa zhes bya ba ni rigs pas dkyil 'khor rgyal mchog gi dus su spro ba'i rigs pa dang bzlas pa rnam pa gnyis byed pa'i dus su rang dang mthun pa'i rigs pas so zhes bya ba'i don to//de ltar don rnam pa bdun gyis phung po'i dbye ba bstan nas/ khams kyi dbye ba bstan pa'i phyir/ /de'i yan lag mdor bstan pa ni/ spyan la sogs pa bzhi po gang / /zhes bya ba ni lhan cig spyod ma bzhi'i rang bzhin no/ /de ni khams su yongs su brtag /ces bya ba ni sa la sogs pa'i khams bzhi'i ngo bo nyid kyis brtags pa'o/ /de ltar mdor bstan pa bshad na/ rgyas par bshad pa brjod pa'i phyir/ de'i yan lag sa'i khams kyi rnam par dag pa bstan pa'i phyir/ sra ba la sogs bzhir phye bas/ /zhes bya ba la sogs pa gsungs te/sra ba'i ngo bos mtshan nyid la brten nas/ sa yi khams su yongs su brtag /ces bya ba ni rang gi lus la gnas pa'i rus pa la sogs pa sra ba'i ngo bor yongs su brtag pa'o/ /bzhir phye bas te/ re re yang 'byung ba bzhi'i bdag nyid kyi phyir ro/ /gti mug dag la mngon par brjod//ces bya ba ni gti mug rnam par dag pa rnam par snang mdzad la dga' ba gang la yod pa de snyam du bsams nas so/ /de ni spyan du zhes bya ba ni sa'i khams la cha shas kyi rang bzhin med pa nyid kyi snang ba'i phyir ro/ /grags zhes bya ba ni yongs su grags pa nyid do/ /de ltar sa'i khams kyi rnam par dag pa bstan nas/chu'i khams kyi rnam par dag pa brjod pa'i phyir/ zhu ba zhes bya ba la sogs pa gsungs te/ zhu ba ni 'jam pa'i ngo bo nyid kyi phyir ro/ /gcin mchi khu ba sogs zhes bya ba ni gci ba dang / mig chu dang / gtso bo'i sa bon la sogs pa'o/ /rdzas kyi bye brag gang rten la//zhes bya ba ni khrag la sogs pa'i dbye bas tha dad pa'o/ /chu'i khams su rnam par shes/ /zhes bya ba ni 'jig rten pa'i rjes su 'brangs nas so/ /chu'i khams su rnam par rtog pa la bdag gi de nyid yongs su zad par byed pa'i phyir mA ma kI ste/ de'i spro ba'i bdag nyid ni de'i rnam pa zhes bya ba'i don to//de ltar chu'i khams kyi rnam par dag pa bstan nas/ me'i khams kyi rnam par dag pa brjod pa'i phyir/ dro ba zhes bya ba la sogs pa gsungs te/ rang gi lus la dro ba'i rnam pa'o/ /bza' btung smin pa dang zhes bya ba ni thun mong ba'i rdzas smin pa dang /bza' ba la sogs pa nang gi'o/ /gzi brjid 'phrog pa'i me yi mtshan nyid can/ /zhes bya ba ni gzi brjid 'phrog pa'i me'i mtshan nyid tsha bar byed pa'o/ /me yi khams su shes par bya/ /zhes bya ba ni me'i khams zhes 'jig rten pa la grags pa'o/ /gos dkar spro ba'i bdag nyid can//zhes bya ba ni me'i khams su rtog pa mi snang bar byed pa'i phyir gos dkar mo'o/ /spro ba'i bdag nyid can zhes bya ba ni de ltar rnam par dag pa'i ngo bo zhes bya ba'i don to/ /de ltar me'i khams kyi rnam par dag pa bstan nas/ rlung gi khams kyi rnam par dag pa brjod pa'i phyir/ 'byung dang rngub pa rab tu 'phel//zhes bya ba gsungs te rang gi lus la srog dang thur sel rab tu 'jug pa'o/ rlung rnams kyi ni dam tshig mchog /ces bya ba ni phung po'i rlung dang dbang po'i rlung rnams kyi bcu'i bdag nyid do/ /dam tshig ces bya ba ni rang dang 'os pa'i bya ba'o/ /mchog ces bya ba ni phung po la sogs pa 'dzin pa la bdag nyid can gyi phyir mchog go//brkyang ba dang brkum pa'i bdag nyid can no/ /'og dang steng du byed pa dang ni zhes bya ba ni steng dang 'og tu 'byung ba dang 'jug pa'o/ /de ni rlung gi khams su shes/ /zhes bya ba ni de'i ming ni grags pa'o/ /sgrol ma spro ba'i bdag nyid can//zhes bya ba ni rlung gi khams kyi rnam par rtog pa las sgrol bar byed pas na sgrol ma'i rang bzhin zhes bya ba'i don to/ /de ltar rlung gi khams kyi rnam par dag pa bstan nas/ khams bzhi po nye bar bsdu ba'i phyir/ de ltar 'byung ba bzhi po yang / /zhes bya ba gsungs te de ltar sngon du gsungs pa'i rigs pas so//'byung ba bzhi po yang zhes bya ba ni 'byung ba chen po bzhi po'o/ /rnam par shes pa zhes bya ba ni shes par bya ba'o/ /rnal 'byor zhes bya ba ni spyan ma la sogs pa lha mo bzhi'i rnal 'byor gyis so/ /mchog nyid ces bya ba ni lha mo'i rang bzhin nyid kyi mchog go/ /de ltar khams bzhi po nye bar bsdu ba bstan nas/spro ba'i sngags brjod pa bshad pa'i phyir/ mo ha ra ti zhes bya ba la sogs pa gsungs te/ mo ha ra ni rnam par snang mdzad do/ /de la dga' ba gang la yod pa de la de skad ces bya'o/ /drang ba'i don to/ /gti mug rnam par dag pas 'od gsal la dga' ba gang la yod pa de ni rA ga ra ti te/nges pa'i don to/ /dwe Sha ra ti zhes bya ba ni dwe sha ni mi bskyod pa'o/ /de la dga' ba gang la yod pa de ni/ dwe Sha ra ti ste/ drang ba'i don to/ /zhe sdang gi rnam par dag pa 'od gsal la dga' ba gang la yod pa de ni dwe Sha ra ti'o/ /nges pa'i don to/ /rA ga ra ti zhes bya ba la rA ga ni snang ba mtha' yas so//de la dga' ba gang la yod pa de ni/ rA ga ra ti ste/ drang ba'i don to/ /chags pa ni chags pa rnam par dag pa 'od gsal la dga' ba gang la yod pa de ni rA ga ra ti ste/ nges pa'i don to/ /badzra ra ti zhes bya ba ni badzra ni don yod grub pa ste/ de la dga' ba gang la yod pa de ni badzra ra ti'o/ /drang ba'i don to//rdo rje ni de dang 'dra bar bstan pa la sogs pa'i mtshan nyid dang ldan pa la dga' ba gang la yod pa de ni badzra ra ti ste/ nges pa'i don to/ /de lta'i rim gyis zhes bya ba ni sa la sogs pa'i khams bzhi po'i go rims kyis so/ /sngags rnams ni zhes bya ba ni spro ba'i sngags rnams so/ /dngos grub ces bya ba ni/rnal 'byor pa chen po'i rgyud du grags pa'o/ /de rnams zhes bya ba ni khams kyi lha mo de rnams kyi'o/ /cho ga yi zhes bya ba ni sngar bzhin du dkyil 'khor rgyal mchog gi dus su byang chub sems kyi ngo bo'i yi ge spros pa dang bzlas pa gnyis kyi rjes su 'brangs nas zhes bya ba'i don to/ /de ltar don rnam pa drug gis rgyas par bstan pa bshad zin to//'di tsam gyis rab tu dbye ba dang bcas pa'i khams kyi rab tu dbye ba bstan nas/ yul gyi dbye ba brjod pa'i phyir/ de'i yan lag mdor bstan pas ni/ gzugs la sogs pa yul gyi tshogs/ /zhes bya ba la sogs pa gsungs te/ nang gi mig la sogs pa rnams kyi yul du gyur pa rnam pa lnga'o//lha mo'i gzugs kyi mtshan nyid du/ /zhes bya ba ni 'chad par 'gyur ba'i rigs pa gzugs rdo rje ma la sogs pa ngo bo'i phyir ro/ /rnam par shes pa zhes bya ba ni shes pa'o/ /rnal 'byor mchog gi zhes bya ba ni byang chub sems dpa'i rang bzhin dbang po rnams la yul gzugs rdo rje ma la sogs pa'i mtshan nyid can dang /lhan cig tu ro mnyam pa'i rtogs pa'i ngo bo nyid kyi phyir ro/ /stong nyid gcig pu rgyu gcig pu/ /zhes bya ba ni 'od gsal gcig pu nyid la rgyu ste/ rgyur gyur pa zhes bya ba'i don to/ /gnyis ka dang snyoms par zhugs pas thams cad stong pa'i go 'phang mngon du byed pa'o//de ltar mdor bstan pa bshad nas/ rgyas par bshad pa brjod pa'i phyir/ de'i yan lag gzugs kyi rnam par dag pa ni/ sngo ser la sogs dbye ba dang / /zhes bya ba gsungs te/ sngon po dang / ser po dang / dmar po dang / dkar po la sogs pa'i dbye bas so//ring dang thung ba'i rnam pa yis/ /zhes bya ba ni mtho ba dang / dma' ba dang / ring ba dang / thung ba dang / zlum pa dang / mnyam pa dang / mi mnyam pa'i dbyibs kyi ngo bos so/ /gzugs shes bya zhes bya ba ni gzugs shes par bya zhes bya ba'i lhag ma'o/ /lha mo de gzugs rdo rje ma//zhes bya ba ni gzugs kyi yul la rnam par rtog pa la stong pa nyid du lhung ba'i phyir ro/ /gzung dang 'dzin pa'i rang bzhin can/ /zhes bya ba ni gzung ba ni bshad ma thag pa'i gzugs la 'dzin pa'i ngo bo stong pa nyid kyi rnam pa 'dzin pa'i phyir ro/ /de ltar gzugs kyi rnam par dag pa bstan nas/ sgra yi rnam par dag pa bstan pa'i phyir/ /'khar rnga zhes bya ba la sogs pa gsungs te/ 'khar rnga ni ting ting shags la sogs pa'o/ /sil snyan ni rdza rnga la sogs pa las skyes pa'i rol mo'o/ /sbubs stong pa zhes bya ba ni/ /gling bu la sogs pa las skyes pa'o/ /de bzhin zhes bya ba ni pi wang la sogs pa las skyes pa'o//rnga snyan zhes bya ba ni de las gzhan pa'i rol mo'i cha las byung ba'o/ /bstod dang smad sogs zhes bya ba ni bstod pa dang smad pa la sogs pa'i sgra dag go/ /sgra'i rdo rje mar zhes bya ba ni sgra rdo rje ma'i rang bzhin du shes par bya'o/ /gzung ba'i rang bzhin zhes bya ba ni rna ba'i dbang po'i rnam par dag pa phyag na rdo rje gzung bar bya ba'i phyir ro//mchog ces bya ba ni tha mal pa'i rnam par rtog pa spangs pa'i phyir ro/ /rnam par shes pa zhes bya ba ni yul dbang po rnam par rtog pa log pa'i bdag nyid can la'o/ /sad par byed ces bya ba ni/ /'od gsal ba'i rang bzhin rtogs pas so/ / de ltar sgra'i rnam par dag pa bstan nas/ dri'i rnam par dag pa brjod pa'i phyir/ dri zhes bya ba gsungs te/ sna'i dbang po'i yul du gyur pa'o/ /ngan pa zhes bya ba ni dri nga ba'i ngo bo ste/ yid du mi 'ong ba'i phyir ro/ /dri bzangs zhes bya ba ni dri zhim pa ste/ sngar las bzlog pa'i phyir ro/ /sbyar ba zhes bya ba ni dri sna tshogs pa 'dres par byas pa las byung ba'o//mchog rnams zhes bya ba ni gzhan no/ /dri'i rdo rje mar zhes bya ba ni dri'i rnam par rtog pa stong pa nyid du byed pa'o/ /gzung ba'i rnam pa zhes bya ba ni sna'i dbang po nam mkha'i snying po'i rnam par dag pa la yul nyid du gyur pa'i phyir ro/ /cher 'bar zhes bya ba ni tha mal pa'i rim par rtog pa'i gnyen po nyid kyis khyad par du 'phags pa'i bde ba ster ba'i phyir ro//de ltar dri'i rnam par dag pa bstan nas/ ro'i rnam par dag pa brjod pa'i phyir/ ro drug ces bya ba gsungs te/ kha ba dang skyur ba la sogs pa'i dbye bas so/ /mchog ces bya ba ni lce'i dbang po tshim par byed pa nyid kyi phyir ro/ / ldan pa ni zhes bya ba ni lha'i rnam pa'i ngo bo bsgom pa'i rang bzhin no/ /lan tshwa skyur sogs dbye ba yis/ /zhes bya ba ni kha ba dang / skyur ba dang / lan tshwa ba dang / bska ba'i rab tu dbye ba las so/ /ro rdo rje ma zhes bya ba ni ro'i rnam par rtog pa stong pa nyid du byed pa'i phyir ro/ /gzung ba'i rnam pa'o zhes bya ba ni lce'i dbang po'i 'jig rten dbang phyug gi rnam par dag pa'o//gzugs kyi yul nyid du gyur pa'i phyir ro/ /kun nas zhes bya ba ni kun ni gzugs la sogs pa'i rnam pa'o/ /'dir dbang po re re yang yul sna tshogs pa snang ba'i phyir ro/ /de ltar ro'i rnam par dag pa bstan nas/ reg bya'i rnam par dag pa brjod pa'i phyir ro//'jam dang rtsub pa'i dbye ba yis/ /zhes bya ba ni 'jam dang rtsub pa la sogs pa'i dbye ba yis so/ /reg pa shes par bya zhes bya ba ni/ reg pa shes par bya ba ste/ /ji ltar zhe na/ de'i phyir rnam par dbye bas zhes bya ba ste/ ji skad du/ reg bya bcu gcig bdag nyid do/ /zhes bya ba'o/ /de nyid ces bya ba ni reg pa'o//reg bya'i rnam par rtog pa stong pa nyid du byed pas so/ /gzung ba'i rnam pa zhes bya ba ni/ lus kyi dbang po ni/ sgrib pa thams cad rnam par sel ba rnam par dag pa'i yul du gyur pa nyid kyi phyir ro/ /rang gi gtso bo la zhes bya ba ni dbus kyi gtso bo'i rnam pa mi bskyod pa la rang nyid gzung ba'i rnam pa ste/de dang 'khyud pa nyid kyi phyir/ /zhes bya ba'i don to/ /ji skad du/ mdor byas las/ rdo rje sems dpa' dang 'khyud pa reg bya rdo rje ma ni gnas zhes bya ba'o/ /de ltar rnam pa gnyis rab tu dbye ba dang bcas pa dag gis yul gyi rab tu dbye ba brjod nas/ nang gi bdag nyid kyi skye mched kyi dbye ba brjod par bya ba'i phyir/de'i yan lag mdor bstan pa/ rnam par shes pa'i tshogs brgyad ni/ /zhes bya ba la sogs pa gsungs te/ rnam par shes pa'i tshogs drug dang / nyon mongs pa can gyi yid kyi rnam par shes pa dang / kun gzhi'i rnam par shes pa dbye bas so//brten pa'i zhes bya ba ni 'chad par 'gyur ba'i mig la sogs pa brgyad po rnams kyi brtan pa ste/ rten zhes bya ba'i don to/ /de nyid kyi phyir/ mig la sogs pa dbang po la/ /zhes bya ba ni brgyad la brten pa'o/ /de la brten nas rnam par shes pa tshogs brgyad kyi dngos po bskyed pa'i phyir ro/ / byang chub sems dpa' bskyed du zhes bya ba ni sa'i snying po dang por byas nas/ kun du bzang po'i mthar thug pa rgyal ba'i sras kyi ngo bo rnams su shes par bya'o/ /de'i rnam par dag pa la brten nas phyin ci ma log pa'i dngos po'i rim pa zhes bya ba ni mig la sogs pa'i rim pas zhes bya ba'i don to/ /de ltar mdor bstan pa bshad nas/rgyas par brjod pa brjod par bya ba'i phyir/ de'i yan lag mig gi dbang po rnam par dag pa ni/ mig gnyis sa yi snying por gsungs/ /zhes gsungs te mig gnyis ni byang chub sems dpa' sa'i snying po'i rang bzhin no/ /de'i yul sa la sogs pa'i 'byung ba chen po skyed par byed cing /rnam par rtog pa'i mtshan nyid du rtogs pa'i phyir/ byang chub sems dpa' zhes bya ba ni/ byang chub ni sku gsum gyi ngo bo ste/ de la sems dpa' 'di la yod pas na de skad ces bya'o/ /rmad du che zhes bya ba ni sna tshogs pa'i thabs kyis gzhan gyi don bsgrub pa'i phyir ro/ /gzugs la sogs pa ci rigs par//zhes bya ba ni/ gzugs la sogs pa'i yul lnga rnams la yang kun nas ci rigs par ro/ /gzhan yang / rang gi ngo bo spro bar byed/ /ces bya ba ni rang nyid kyi ngo bo ma skyes pa'i rnam pa la spro ba byed pa'o/ /de ltar mig gi dbang po rnam par dag pa bstan nas/ rna ba'i dbang po rnam par dag par bya ba'i phyir/sgra'i rnam pa zhes bya ba la sogs pa gsungs te/ sgra'i rnam pa pi wang la sogs pa'i dbye bas/ tha dad pa rnams kyi sgra'i rnam pa kun bcad pas/ tha mal pa'i rnam par rtog pa yongs su zin pa'i rnam pa'o/ /de nyid ni dbye ba ste/ khyad par la de dang de'i rnam par rtog pa'i gnyen po'i phyir ro//de yongs su bsgoms pas rnam par dpyad pa'o/ /phyag na rdo rje zhes bya ba ni sgra'i rnam par rtog pa la phyag na rdo rje'i ngo bo nyid kyis stong pa nyid du rtogs pa'i phyir ro/ /yang dag bshad ces bya ba ni brjod pa'o/ /sgra yi rnam shes mtshan nyid ni/ /zhes bya ba ni sgra la gdod ma nas skye ba med pa nyid kyis shes pas na/de'i mtshan nyid can no/ /de ltar rna ba'i dbang po'i rnam par dag pa bstan nas/ sna'i dbang po'i rnam par dag pa bstan pa'i phyir/ dri'i bye brag rnam par rtog pa zhes bya ba gsungs te/ dri rnam pa bzhi'i rnam par rtog pa ni/ rtog pa'i ngo bo rab tu dbye ba gang yin pa de la kun nas stong pa nyid kyi ngo bo nyid kyis sgom pa po'o//nam mkha'i snying po zhes bya ba ni dri'i rnam par rtog pa stong pa nyid kyis 'dzin pa'i phyir ro/ /shes zhes bya ba ni shes par bya ba'o/ /sna yi rnam shes mtshan nyid ni/ /zhes bya ba ni dri 'dzin par byed pa'i sna la gdod ma nas skye ba med par shes pas de'i ye shes kyi mtshan nyid do//de ltar sna'i dbang po'i rnam par dag pa bstan nas/ lce'i dbang po'i rnam par dag pa brjod pa'i phyir/ ro yi bye brag la rtog pa/ /zhes bya ba gsungs te/ ro rnam pa drug gi bye brag la rnam par rtog pa'i ngo bo ste/ de'i rab tu dbye ba ni/ rab tu dbye ba'i rnam pa'o/ /de la kun nas stong pa nyid kyi rnam pas bsgom pa'o//'jig rten dbang phyug tu ni zhes bya ba ni/ 'jig rten na gnas pa'i ro'i rab tu dbye ba la stong pa nyid rtogs pa las/ rang dga' nyid thob pa'i phyir 'jig rten dbang phyug go/ /shes zhes bya ba ni shes par bya ba'o/ /lce'i rnam shes mtshan nyid ni/ lce'i yul dang bcas pa la stong pa nyid du shes pas de'i rnam par shes pa'i mtshan nyid do/ /de ltar lce'i dbang po'i rnam par dag pa bstan nas/ lus kyi dbang po'i rnam par dag pa brjod pa'i phyir/ reg bya'i bye brag la spyod pa/ /zhes bya ba gsungs te/ rnam pa bcu gcig gi bdag nyid kyi rab tu dbye ba'o//de'i kun nas stong pa nyid kyi rnam pas bsgoms pas sgom pa'o/ /sgrib pa thams cad rnam sel zhes bya ba ni/ reg pa'i stobs kyis skyes pa'i sgrib pa thams cad ni 'dod chags pa'i nyon mongs pa rnams rnam par sel bar byed pa ni/ dus de tsam du bzlas pa'i phyir sgrib pa thams cad rnam par sel ba'o//reg bya'i rnam shes mtshan nyid ni/ /zhes bya ba ni reg pa la gdod ma nas skyes pa nyid kyi rnam par shes pa ste/ de'i mtshan nyid gang la yod pa de la de skad ces bya'o/ /de ltar lus kyi dbang po'i rnam par dag pa bstan nas/ yid kyi dbang po'i rnam par dag pa brjod pa'i phyir/yid kyi bye brag la spyod pa/ /zhes bya ba gsungs te/ yid kyi bye brag la ltos nas/ rdzas bdun gyi bdag nyid chos kyi skye mched kyi mtshan nyid dang / yul can la ltos nas sna tshogs pa'i rnam par rtog pa'i mtshan nyid kyi rtog pa gang yin pa de ni rnam par rtog pa'i rang bzhin no/ /de'i rab tu dbye ba ni khyad par ro//de la kun nas ni ma lus pa la stong pa nyid kyi rnam pa bsgoms pas de sgom pa po'o/ /yid kyi rnam shes zhes gsungs pa/ /zhes bya ba ni/ 'jig rten pa la grags pa gang yin pa de ni 'jam dpal zhes brjod pa yin zhe na/ de'i rang bzhin med pa shes pa'i phyir ro/ /de ltar yid kyi dbang po rnam par dag pa bstan nas/lus kyi dbang po'i lhag mar gyur pa rgyus pa kun gyi rnam par dag pa brjod pa'i phyir/ rgyus pa kun la nges par sbyar/ /zhes bya ba gsungs te/ lus su gtogs pa'i rgyus pa kun las nges par sbyor ba'i bye brag ni/ yang dag par sbyor ba'i khyad par la'o/ /yongs su zhes bya ba ni kun nas so//sgom pa po zhes bya ba ni rang bzhin med pa sgom pa po'o/ /byams pa nyid du yongs su shes/ /zhes bya ba ni rgyus pa kun la rang bzhin med pa nyid du yongs su shes pas dga' ba khyad par can bskyed pa nyid kyi phyir ro/ /bag chags rtog pa'i bdag nyid can/ /zhes bya ba ni nyon mongs pa can gyi yid kyi rnam par shes pa rnam par dag par byed pa'i phyir ro zhes bya ba'i don to//de ltar lus kyi dbang po'i lhag mar gyur pa rgyus pa kun las nges par sbyor ba rnam par dag pa bstan nas/ lus thams cad tshigs su rnam par dag pa bstan pa'i phyir/ rtsa rnams so so'i bdag nyid can//zhes bya ba gsungs te/ rang gi lus su gtogs pa'i rtsa rnams thams cad kyi rab tu dbye ba'i bdag nyid ni khyad par can gyi bdag nyid can no/ /bde ba kun gyi gzhi zhes bya ba ni/ rtsa ba'i rnam par rtog pa bzlog nas/ 'jig rten las 'das pa'i bde ba kun la brten nas so/ /mchog ces bya ba ni gdong la sogs pa'i dbyibs can nyid kyis rnam par dben pa'i phyir ro//dngos po kun gyi rang bzhin bdag /ces bya ba ni dngos po thams cad kyi ngo bo'i bdag nyid gang la yod pa de la de skad ces bya'o/ /de kho na nyid kyi rnam pa kun gzhi rnam par shes pa rnam par dag pa'i bdag nyid can kun tu bzang por grags pa'i phyir ro//kun du bzang por zhes bya ba ni kun ni rtsa rnams kyi rtog pa la dben pas tha dad pa'i phyir ro/ /bzang po ni dge ba gang rnams yod pa de rnams zhes bya bar byas nas so/ /'di ni zhes bya ba ni rnam pa 'di nyid kyis ming du byed pa'i phyir ro/ /de ltar don rnam pa brgyad kyis rgyas par bshad pa bstan nas/nye bar bsdu ba'i phyir brjod pa ni/ de ltar rnam shes tshogs brgyad sogs/ /zhes bya ba ni mig la sogs pa rnam par shes pa'i tshogs brgyad rnam par dag pa'i ngo bo'o/ /yang dag de nyid ces bya ba ni nang gi skye mched rnam par dag pa'i ngo bo nyid kyi phyir ro/ /bla na med ces bya ba ni bla na med pa lus rnam par dben pa'i mtshan nyid can gyi de kho na nyid kyi rgyu nyid du gyur pa'i phyir ro//mig sogs dbang po rnam shes ni/ /zhes bya ba ni mig la sogs pa'i dbang po drug po rnams lus kyi dbang po'i khyad par du gyur pa gnyis po dag ni/ nyon mongs pa can gyi rnam par shes pa dang / kun gzhi rnam par shes pa'i mtshan nyid can gnyis po dag gi rnam par dag pa'i ngo bo nyid bgrangs nas rnam par shes pa'i tshogs brgyad du 'gyur ro//gzugs sogs mthong ba'i mtshan nyid ni/ /zhes bya ba ni gzugs la sogs pa drug po dang / rgyus pa thams cad dang / yan lag gi tshogs thams cad kyi mtshan nyid can gyi lus kyi dbang po'i yul bye brag tu gyur pa rnams so//mthong ba'i mtshan nyid can zhes bya ba ni/ mthong ba la sogs pa'i mtshan nyid ces bya ba'i don to/ /de ltar rnam pa gsum gyis nang gi bdag nyid kyi skye mched kyi dbye ba bstan nas/ yan lag nyid kyi dbye ba brjod pa'i phyir de'i yan lag gi mdor bstan pa ni/rje ngar dpung pa zhes bya ba la sogs pa gsungs te/ g.yon pa dang g.yas pa'i pus mo gnyis rim pa ji lta ba bzhin du dbyug pa sngon po dang / stobs po che gnyis kyi gnas so/ /dpung pa zhes bya ba ni dpung pa g.yon pa dang g.yas pa ni gshin rje mthar byed dang shes rab mthar byed gnyis kyi gnas so//phrag pa dag ces bya ba ni g.yas pa dang g.yon pa'i phrag pa gnyis ni mi g.yo ba dang / 'dod pa'i rgyal po gnyis kyi gnas so/ /steng dang 'og ces bya ba ni mgo bo dang / rkang pa'i mthil gnyis ni gtsug tor 'khor los sgyur ba dang / gnod mdzes rgyal po gnyis kyi gnas so//bug pa'i sgo zhes bya ba 'dis ni kha dang rdo rje'i lam dag bsdus pa'o/ /'di yang pad+ma mthar byed dang bgegs mthar byed gnyis kyi gnas so/ /ji skad du mdor byas las/ lag pa g.yas par gshin rje gshed/ /gzhan gyis mi thub g.yon pa la/ /kha la rta mgrin bsgom bya ste/rdo rje la ni bdud rtsi 'khyil/ /dpung pa g.yas par mi g.yo ba/ /'dod pa'i rgyal po g.yon pa la/ /dbyug pa sngon po cher 'bar ba/ /pus mo g.yas pa la ni bsam/ /pus mo g.yon par stobs po che/ /mgo la gtsug tor 'khor los sgyur/ /rkang pa gnyis la dgod pa ni/ gnod mdzes rgyal po bsam par bya/ /zhes bya ba la sogs pa gsungs so/ /de lta bur gyur pa'i gnas la thams cad ces bya ba ni/ lus thams cad la khyab par gnas te/ khro bo'i ngo bo nyid kyi phyir ro/ /shes pa bcu yi mtshan nyid ni/ /zhes bya ba ni sdug bsngal shes pa dang / kun 'byung shes pa dang /'gog pa shes pa dang / lam shes pa dang / zad pa shes pa dang / mi skye ba shes pa dang / chos shes pa dang / rjes su shes pa dang / yongs su rgyal ba shes pa'o/ /de la gang zhig sdug bsngal skye ba med par shes pa ni dang po'o/ /gang zhig kun 'byung spang byar shes pa de ni gnyis pa'o/ /gang zhig sdug bsngal 'gog pa shes pa ni gsum pa'o//gang zhig lam la lam du shes pa de ni bzhi pa'o/ /gang zhig 'dod chags dang zhe sdang dang / gti mug zad pa shes pa de ni lnga pa'o/ /gang zhig srid par 'gro ba mi skye ba shes pa de ni drug pa'o/ /gang zhig phung po lnga rnams la chos nye bar gcod pa shes pa de ni bdun pa'o//gang zhig mi rtag pa zhes bya ba la sogs pa shes pa de ni brgyad pa'o/ /gang zhig sems can pha rol po rnams dang gang zag gzhan rnams la sems nyid kyis sems shes pa de ni dgu pa'o/ /gang zhig sgrub pa shes pa dang yongs su zad pa shes pa de ni bcu pa'o/ /yongs su shes pa zhes bya ba ni/sngon du gsungs pa'i rtog pa'i bdag nyid can gyi rnam par dpyad pas zhes bya ba'i don to/ /de ltar mdor bstan pa bshad nas khro bo'i sngags kyi sgo nas rgyas par bshad pa brjod pa'i phyir/ gshin rje mthar byed ces bya ba gsungs te/ gshin rje mthar byed do/ /gshin rje ni dmyal ba'o/ /de la khro ba chen pos ting nge 'dzin gyi mthar byed pas na de skad ces bya'o//drang ba'i don to/ /gshin rje ni ma rig pa'o/ /de la 'od gsal gyi ngo bos mthar byed pas na de skad ces bya ste/ nges pa'i don to/ /shes rab mthar byed ces bya ba ni shes rab mthar byed do/ /shes rab rnam par bcad pas nyon mongs pa mthar byed pas na de skad ces bya ste/drang ba'i don to/ /'jug pa'i rnam par shes pa yongs su 'gyur ba'i bdag nyid kyi phyir shes rab bo/ /de la 'od gsal ba zhugs pas mthar byed pa'i phyir shes rab mthar byed do/ /nges pa'i don to/ /pad+ma mthar byed ces bya ba ni pad+ma mthar byed do/ /chu yis mi gos pa'i pad+ma ltar nyon mongs pas ma gos par gyur pas de rnams mthar byed pas na de skad ces bya ste/drang ba'i don to/ /pad+ma ni skye gnas so/ /mthar ni dbus te/ de la bde ba byed pas na pad+ma mthar byed de/ nges pa'i don to/ /de'i rjes la bgegs mthar byed ces bya ba ni/ bgegs mthar byed do/ / bgegs rnams 'joms par byed pas na bgegs mthar byed de/ /drang ba'i don to/ /bgegs ni khams rnams so/ /de rnams la thabs kyi ye shes 'chang bas mthar byed pas na de skad ces bya'o/ /nges pa'i don to/ /'dod pa'i rgyal po zhes bya ba ni/ 'dod pa ni gdug pa can rnams 'ching ba la zhes bya ba'i byed pa khams kyi sbyor ba la gdug pa can rnams 'ching bar byed pa nyid kyis rgyal po ni gsal bar byed pas na 'dod pa'i rgyal po'o//de bzhin mi g.yo ba zhes bya ba ni/ bgegs kyis mi g.yo ba nyid kyi phyir ro/ /stobs po cha zhes bya ba ni/ bgegs la sogs pa bzlog pas stobs chen po dang ldan pa'i phyir ro//dbyug pa sngon po zhes bya ba ni/ dbyug pa sngon pos gdug pa can gyi sems can thams cad skrag par byed pa gang la yod pa de la de skad ces bya'o/ /gnod mdzes zhes bya ba ni bgegs rnams thams cad nges par 'joms pas gnod mdzes te/ de'i ngo bos gsal bas na gnod mdzes rgyal po'o//gtsug tor 'khor los sgyur zhes bya ba ni gtsug tor mgor byas te nam mkha' la spyod pa'i bgegs rnams bzlog pa sngon du 'gro bas 'khor ni dkyil 'khor gyi 'khor lo'i steng gi cha la bsgyur ba'i ngang tshul ga la yod pa de ni/ gtsug tor 'khor los sgyur ba'o//de ltar de rnams zhes bya ba ni khro bo bcu'o/ /gnas dbye ba zhes bya ba ni/ de ma thag par bshad pa'i dpung pa dang nye ba'i dpung pa la sogs pa'i dbye bas so/ /rdo rje gsum gyis yongs su gsal/ /zhes bya ba ni gsang ba gsum gyi ngo bo mi bskyod pa'am rdo rje 'chang chen po las yongs su gsal ba ni skyes pa'o//rang nyid kyis rdo rje gsum gyi sku la sogs pa'i dbye bas yongs su gsal ba ni de'i ngo bo zhes bya ba'i tha tshig go/ /ngo bo gcig tu gyur nas ni/ /zhes bya ba ni rang gi lus la gcig pa nyid thob pa'o/ /yang dag ces bya ba ni phyin ci ma log pa'i ngo bos so/ /de kho na nyid brten zhes bya ba ni lus rnam par dben pa'i mtshan nyid de kho na nyid kyi phyogs gcig la brten pa zhes bya ba'i don to//de ltar bdag gi de kho na nyid kyis rgyas par bshad pa bstan nas/ nye bar bsdu ba brjod pa'i phyir/ /bdag gi de nyid ces bya ba gsungs te/ sngon du gsungs pa'i rigs pas bdag nyid kyi lus la phung po dang khams la sogs pa'i dbye ba tha dad pa'i de kho na nyid ni dkyil 'khor gyi 'khor lo'i rnam pa nyid kyis yongs su shes pa'o//cho ga bzhin zhes bya ba ni rgyud rgyas pa'i rim pas so/ /shes bya zhes pa ni shes par bya ba'o/ /bla ma'i zhal las zhes bya ba ni/ ma 'ongs pa'i dus na rdo rje slob dpon gyi zhal las zhes bya ba'i don to//de ltar dbye ba dang bcas pa'i don rnam pa gsum gyi bdag gi de kho na nyid brjod nas/ sngags kyi de kho na nyid bstan pa'i phyir/ de'i yan lag gi ngo bo bshad pa ni/ sngags kyi de nyid ces gsungs te/ sngags ni sbrul la sogs pa rnams kyi de nyid ni a yig gi rnam pa nyid do//rnal 'byor mchog ces bya ba ni spros pa dang bral ba'i phyir mchog gi ting nge 'dzin gyi rnam pa'o/ /ye shes chen po zhes bya ba ni 'od gsal yongs su shes pa'i phyir ro/ /legs rgyas pa zhes bya ba ni khyab par byed pa nyid kyi phyir ro/ /skye med ces bya ba ni skye ba med pas so/ /zag med ces bya ba ni 'jig pa med pa'i phyir ro//mi gsal dang zhes bya ba ni thams cad la khyab par byed pa yin yang de ltar snang ba med pa'i phyir ro/ /'gyur ba med cing zhes bya ba ni rnam par rtog pa rnams kyis mi 'gyur ba'i phyir ro/ /sgrib pa med ces bya ba ni nyon mongs pa'i sgrib pa spangs nas so/ /gnyis med ces bya ba ni gnyis su med pa'i phyir ro//'jig med ces bya ba ni 'dod chags la sogs pa'i 'jigs pa med pas so/ /zhi ba dang zhes bya ba ni dang po nyid nas nye bar zhi ba'i phyir ro/ /bde ba chen po'i go 'phang zhes bya ba ni sdug bsngal thams cad bzlog pas so/ /mchog ces bya ba ni 'jig rten las 'das pa'i phyir ro//de ltar sngags kyi de kho na nyid kyi ngo bo bstan nas/ rab tu dbye ba brjod pa'i phyir/ sbrul dang / btu dang zhes bya ba la sogs pa gsungs te/ mgo dang mjug ma yod pa'i phyir sbrul dang 'dra bas na sbrul lo/ /btu zhes bya ba ni gnyis ka yang med par 'gyur ba nyid kyi phyir ro/ /mtha' med dang zhes bya ba ni mgo yod kyang mjug ma med pa nyid kyi phyir ro//mgo med ces bya ba ni mjug ma yod kyang mgo med pa nyid kyi phyir ro/ /mtshan nyid bstan pa'i phyir/ oM zhes bya ba la sogs pa gsungs te/ oM yig dang po can no/ /hUM dang swA hA'i mtha' zhes bya ba ni/ yongs su rdzogs pa nyid kyis sbrul//zhes bya ba mngon par brjod ces bya ba ni/ de dang 'dra ba nyid kyis mgo dang mjug ma dag yod par chos mthun pas oM yig dang swA hA'i yi ge dag yod pa'i phyir ro/ /rang ming ngo bo brjod pa ni/ /zhes bya ba ni rang ni bdag dang 'brel pa'i ming brjod pa'i rnam pa ste/ de'i mtshan nyid do//btus pa'i mtshan nyid ming can no/ /zhes bya ba ni mgo dang mjug ma dag med pa'i phyir/ Tak+ki hUM dzaHbya ba lta bu'o/ /oM dang po zhes bya ba ni/ oM yig dang po nyid du yod pa'i phyir ro/ /gang zhig sngags zhes bya ba ni gang zhig de lta bur gyur pa'o/ /swA hA'i yi ge rnam par spangs/ /zhes bya ba ni mjug ma dang 'dra ba de med pa'i phyir ro//mtha' med ces bya ba'i ming can no zhes bya ba ni mtha' med pa nyid kyi phyir ro/ /bla ma'i zhal gyi rim las byung / /zhes bya ba ni slob dpon gyi zhal gyi brgyud pa las byung zhes bya ba'i don to/ /swA hA'i mtha' can zhes bya ba ni/ mjug ma dang 'dra ba'i swA hA'i yi ge yod pa'i phyir ro//oM med pa zhes bya ba ni oM yig dang bral ba'o/ /mgo med ces bya ba ni de dang 'dra bar mgo bo bcad pa'i phyir ro/ /bshad pa yin no zhes bya ba ni brjod pa'o/ /de ltar rab tu dbye ba bshad nas nye bar bsdu ba brjod pa'i phyir/ de ltar zhes bya ba ni sngar gsungs pa'i rigs pas so//mtshan nyid ces bya ba ni thun mong ma yin pa'i ngo bo 'jug par byed pa'i ngo bos so/ /shes nas ni zhes bya ba ni shes par bya ba'o/ /sngags kyi de nyid ces bya ba ni de ma thag par gsungs pa rnams so/ /bla na med ces bya ba ni a yig gi ngo bo nyid kyis rtogs pa'i phyir ro//'di yi zhes bya ba ni sngags kyi de kho na nyid do/ /rgya chen don zhes bya ba ni brjod par bya ba la sogs pa spros pa'i bdag nyid can no/ /shes bya zhes bya ba ni shes par bya ba'o/ /rtsa ba'i rgyud kyi rjes su 'brangs nas zhes bya ba ni dpal gsang ba 'dus pa'i le'u dang por gsungs pa'i rigs pas zhes bya ba'i don to//de ltar don rnam pa gsum gyi sngags kyi de kho na nyid bshad nas/ ye shes kyi de kho na nyid brjod pa'i phyir/ de'i yan lag spyi'i ngo bo bstan pa ni/ ye shes de nyid ces bya ba gsungs te/ 'bras bur gyur pa'i zung 'jug gi rnam pa ste/ kun rdzob dang don dam pa ro gcig par gyur pa nyid kyi phyir ro//rnal 'byor mchog ces bya ba ni mthar thug pa nyid kyi phyir ro/ /gnyis pa thams cad rnam par spangs/ /zhes bya ba ni tha dad pa'i rnam par rtog pa ma lus pa bzlog pa'i bdag nyid kyi phyir ro/ /dbang po thams cad mnyam par sbyor/ /zhes bya ba ni so sor sdud pa'i mtshan nyid kyi phyir ro//ji skad du/ dbang po bcu po rnam nyid ni/ /rang gi 'byung gnas thams cad las/ /so sor sdud pa zhes ni brjod/ /'dod pa so sor sdud pa'o/ /zhes bya ba lta bu'o/ /dbang po thams cad ni lnga ste/ de rnams yul rnams dang lhan cig tu mnyam par sbyor ba ni 'brel pa'o//dngos po thams cad gcig pa'i lus/ /zhes bya ba ni dngos po thams cad la gcig pa nyid do/ /ro mnyam pa nyid kyi lus gang la yod pa de la de skad ces bya'o/ /des ni bsam gtan gyi ngo bo nyid bstan te/ yul rnam pa gsum la de bzhin gshegs pa gsum gyi rnam pa gdod ma nas skye ba med pa nyid du shes pa'i phyir ro//ngag gi rnam rtog kun spangs pa/ /zhes bya ba ni srog dang rtsol ba'i ngo bo ste ngag gi rtog pa thams cad las 'das pa snyam du byas nas so/ /snang ba kun gyi ngo bo nyid/ /ces bya ba ni snang ba la sogs pa'i ye shes gsum gyi rim gyis sems 'od gsal ba'i rnam pa can no//'dis ni sems 'od gsal ba'i ngo bo 'dzin pa gsungs so/ /bdag byin brlabs pa'i rang bzhin can/ /zhes bya ba ni sgyu ma lta bu'i ting nge 'dzin gyi bdag nyid can gyi phyir/ 'dis ni rjes su dran pa'i yan lag gsungs so/ /kun la khyab pa zhes bya ba ni/stong pa gsum gyi rang bzhin can chos rnams thams cad la khyab pa'o/ /'dis ni rang bzhin gyis 'od gsal ba'i rnam pa 'dzin pa gnyis pa'i ngo bo gsungs so/ /rmad du byung zhes bya ba ni 'bad pa med par sems can gyi don grub pas so/ /rang rig pa'i zhes bya ba ni/ mtha' gnyis su ma ltung ba rang rig par bya ba nyid kyis zung 'jug gi rnam pa'o//'dis ni ting nge 'dzin gyis bsdus pa bstan to/ /rnal 'byor mchog ces bya ba ni/ bla na med pa'i phyir ro/ /skad cig bzhi pa'i mtshan nyid can/ /zhes bya ba ni don gyi lhan cig skyes pa'i ngo bo'o/ /cha bral zhes bya ba ni/cha thams cad dang bral ba'i phyir ro/ /de yang kun rdzob byang chub kyi sems dang bral ba nyid kyis shes par bya'o/ /kun 'gro zhes bya ba ni dga' ba la sogs pa gsum la khyab pa nyid kyi phyir ro/ /phra mo'i zhes bya ba ni phra mo'i rnal 'byor pa rnams kyis rtogs par bya ba'o/ /yul ma yin zhes bya ba ni spyod yul du ma gyur pa'o//rnal 'byor byis pas zhes bya ba ni las dang po pa'i bskyed pa'i rim pa sgom pa pos so/ /kun rdzob kyis ni yongs su shes pa ni/ /zhes bya ba ni sgra dang rnam par rtog pa rnams kyis brjod par bya ba ma yin pa nyid kyi phyir ro/ /don dam rang gi ngo bo ni/ / zhes bya ba ni gcig tu mthar phyin pa'i rnal 'byor pa rnams kyis reg par bya ba nyid kyi phyir ro/ /de ltar spyir rang gi ngo bo bstan nas/ khongs su bsdus pa'i sgo nas khyad par du rang gi ngo bo brjod pa'i phyir/ rdzogs pa'i rim pa'i dbye ba dang / /zhes bya ba ni rnam pa gnyis kyi rdzogs pa'i rim pa'i ngo bo'o//sngags kyi de nyid ces bya ba ni de ma thag par gsungs pa'i'o/ /rab 'jug gsal zhes bya ba ni gsungs pa'o/ /oM ni zhes bya ba ni yi ge oM mo/ /de nyid thig le nang du thim/ /zhes bya ba ni oM yig gi thig le nang du 'dus pa'o/ /yang dag ces bya ba ni spros pa med pa'i ngo bo nyid la brten nas so//rnam par bsgom zhes bya ba ni sgom pa'o/ /thig le zhes bya ba ni oM yig dang 'brel pa'i'o/ /yi ge aHla zhes bya ba ni/ ngag gi sa bon la'o/ /thim zhes bya ba ni nang du 'dus pa ste/ lus la brten nas ngag skye ba'i phyir dang / lus la yang rags pa dang phra ba'i ngo bo can gyi ngag la thim pa'i phyir ro//a yig ces bya ba ni rang nyid kyis ngag gi dbang phyug gi sa bon no/ /ha yig ces bya ba ni rang gi cha'i ngo bo tsheg drag gnyis kyi ngo bo la'o/ /de la ltos nas de spros pa med pa'i phyir ro/ /ha yig ces bya ba ni/ ha yig dang 'brel pa cha shas kyi ngo bo'o//yi ge hUM la zhes bya ba ni sems kyi dbang phyug gi sa bon la'o/ /ha yang zhes bya ba ni sems kyi dbang phyug gi sa bon gyi cha shas so/ /yi ge u ni zhes bya ba ni hUM yig gi cha shas la'o/ /thim zhes bya ba ni nang du 'dus nas 'gro ba'o/ /yi ge ha yang zhes bya ba ni/ u yig gi nang du 'dus par byed pa'o/ /yi ge ma yang zhes bya ba ni yi ge hUM yig gi thig le la'o/ /yi ge ma yang zhes bya ba ni thig le'i bdag nyid do/ /thig le tsam zhes bya ba ni/ hUM yig gi thig le brjod par bya ba ma yin pa'i ngo bo la'o/ /thig le yang ni sgra la thim/ /zhes bya ba ni brag ca dang 'dra ba'i sgra la'o//yang dag thim zhes bya ba ni nang du thim pa'o/ /sgra yang zhes bya ba ni brag ca'i ngo bo'i sgra'o/ /sgra tsam la na'o zhes bya ba ni/ sgra rdzogs pa'i ngo bo'i stong pa la'o/ /sgra tsam mchog gi nam mkha' la/ /zhes bya ba ni mchog gi nam mkha' la'o/ /de yang zhes bya ba ni mchog gi nam mkha' 'o//'gro zhes bya ba ni 'gro ba'o/ /'od gsal zhes bya ba ni rang bzhin gyis 'od gsal ba la'o/ /'od gsal go 'phang zhes bya ba ni rang bzhin gyis 'od gsal ba'i rnam pa'i 'dug pa'i gnas so/ /gsal por ni zhes bya ba ni rang bzhin gyis rnam par dag pa'o//shin tu rnam par dag ces bya ba ni dri ma med pa'i rnam par dag pa dang ldan pa'o/ /chos dbyings te zhes bya ba ni chos thams cad rang bzhin gyi ngo bo'o/ /gnyis su med pa zhes bya ba ni tha dad pa'i rnam par rtog pa med pa'i phyir ro/ /ye shes mchog ces bya ba ni ye shes med pa'i ngo bo nyid kyi phyir ro//rab tu sad cing zhes bya ba ni lam gyi stobs kyis rnam par dag pa'i phyir ro/ /rtag tu 'char zhes bya ba ni rang bzhin gyis rtogs pa'i phyir ro/ /ngag gi spyod pa rnams dang bral/ /zhes bya ba ni sgra dang rnam par rtog pa'i yul ma yin pa nyid kyis so/ /gnyis pa thams cad rnam par spangs//zhes bya ba ni tha dad pa'i rnam par rtog pa med pa'i phyir ro/ /phung po lnga ni gcig pu'i gzhi/ /zhes bya ba ni de bzhin gshegs pa lnga'i bdag nyid kyi phyir de la brten pa'o/ /'byung ba lnga ni yang dag brtan/ /zhes bya ba ni sa la sogs pa'i khams kyi ngo bo nyid kyi phyir ro/ /rnam shes brgyad kyi ngo bor 'gyur//zhes bya ba ni de'i rang bzhin ni snga ma bzhin no/ /phyi yi yul drug bsdus pa ni/ /zhes bya ba ni gzugs la sogs pa'i yul nyid kyi phyir ro/ /rlung bcu shes pa zhes bya ba ni rlung bcu'i bdag nyid kyi phyir ro/ /shes pa'i mtshan nyid ces bya ba ni shes pa gsum gyi mtshan nyid do//thams cad bsdus pa zhes bya ba ni rim pa thams cad bsdus pa'i ngo bo'o/ /de ltar nang du bsdus pa'i sgo nas khyad par du sngags kyi de kho na nyid kyi ngo bo bstan nas/ de rtogs pa po'i phan yon brjod pa'i phyir/ kun nas spro ba'i rnal 'byor gyis/ /zhes gsungs te/bskyed pa'i rim pa'i rjes la rdzogs pa'i rim pa mthar thug pa kun nas spro ba'i rnal 'byor gyis/ rang dang gzhan gyi don gyi mtshan nyid kyis so/ /gang gis zhes bya ba ni sngags kyi de kho na nyid sgom pa po'i rnal 'byor pas so/ /srid pa gsum zhes bya ba ni khams gsum po la'o//bzhugs nas zhes bya ba ni spyod pa byed pa'o/ /dngos grub kun byed ces bya ba ni 'jig rten pa dang 'jig rten las 'das pa'i dngos grub byed pa'o/ /dpal dang ldan zhes bya ba ni tshogs gnyis yang dag par rdzogs pa'i phyir ro/ /bskal pa bzang po kun 'phel ba//zhes bya ba ni bskal pa bzang po thams cad nyon mongs pa rnams kyi gzhan dbang du ma gyur pa'i mtshan nyid can la 'phel bar byed pas na kun 'phel ba ste/ thams cad du ngag 'dzin pa'i phyir ro/ /rdo rje de ni zhes bya ba ni 'di nyid rdo rje 'chang gi ngo bo ste/ stong pa nyid kyi de kho na nyid mngon du byed pa'i phyir ro/ /rdo rje sems zhes bya ba ni rnal 'byor gyi rgyud la ltos nas so/ /rdo rje 'jigs byed ces bya ba ni/ rdo rje ltar rnam par rtogs pas mi 'jigs pa'i phyir ro/ /dbang phyug dang zhes bya ba ni thams cad du rang dga' nyid thob pa'i phyir ro/ / he ru ka dang zhes bya ba ni rnal 'byor ma'i rgyud la ltos nas rnam par thar pa'i sgo gsum gyi ngo bo nyid kyi phyir ro/ /ji skad du/ he ni rgyu sogs rnam par spangs/ /zhes bya ba la sogs pa gsungs so/ /dus kyi 'khor lo dang zhes bya ba ni/ ka yig rgyu ni zhi ba ste/ /la yig 'di la stobs dang ldan//rtsa yig sems kyi g.yo ba nyid/ /kra yig gis ni rim par bcing / /zhes gsungs so/ /dang po'i sangs rgyas zhes bya ba ni dang po nyid nas rang bzhin gyis rnam par dag pas sangs rgyas pa nyid kyi phyir ro/ /thub pa che zhes bya ba ni lus la sogs pa thub pa dang ldan pa'i phyir thub pa'o//nyan thos la sogs pa'i mtshan nyid dang bral ba'i phyir chen po'o/ /kun du bzang po zhes bya ba ni kun nas bzang ba 'di las 'byung bas na kun du bzang po'o/ /de yang rnam par dag pa gnyis dang ldan pa'i phyir dang / phun sum tshogs pa gnyis dang ldan pa'i phyir ro//'jam dpal dang zhes bya ba ni 'jam pa ni yid du 'ong ba ste/ dpal ni phun sum tshogs pa 'di la yod pa snyam du byas nas so/ /ji lta bu zhe na/ de'i phyir/ sna tshogs spro ba'i bdag nyid can/ /zhes bya ba gsungs te/ de dang de'i sems can gyi bsam pa'i rjes su 'brangs nas/de'i rnam pa'i gzugs yongs su spro ba'i bdag nyid can gyi phyir ro/ /sna tshogs pa rnams rnam par grol/ /zhes bya ba ni dngos po la rnam pa med pa nyid kyis rnam pa med pas so/ /sna tshogs yon tan tshogs kyi gzhi/ /zhes bya ba ni stobs dang mi 'jigs pa la sogs pa sangs rgyas kyi yon tan dang yang dag par ldan pa'o//kun nas spro ba'i rnal 'byor ni/ /zhes bya ba ni rnam pa thams cad du gzugs kyi sku spro ba'i sbyor bas so/ /rnal 'byor chen po zhes bya ba ni/ rang gi ngo bo las ma g.yos pa'i phyir ro/ /dri ma med ces bya ba ni gzhan gyi don 'grub pas so//de rtogs pa po'i phan yon bstan nas nye bar bsdu ba brjod pa'i phyir ye shes de nyid ces bya ba la sogs pa gsungs te/ de ma thag par bshad pa rnams so/ /gsal ba zhes bya ba ni rnal 'byor mngon sum gyi yul yin pa'i phyir ro/ /shes bya min zhes bya ba ni/ /so so'i skye bo rnams kyis yongs su shes par mi nus pa nyid kyi phyir ro//gnas pa med ces bya ba ni/ rten gyi dben pa'o/ /chos kyi dbyings 'gro ba zhes bya ba ni/ de'i dbang gis de lta bu'i ye shes bskyed pa'i phyir ro/ /bskyed dang rdzogs pa'i mtshan nyid dang / /zhes bya ba ni rim pa gnyis kyi khyad par gyi phyir ro//skra'i rtse mo brgyad stong 'dra/ /zhes bya ba ni shin tu yang phra bas so/ /shin tu gsal zhing zhes bya ba ni shin tu yang gsal bas so/ /'od gsal ba zhes bya ba ni rnam par dag pa'i mthar phyin pas so/ /bla ma'i zhal las zhes bya ba ni slob dpon gyi zhal las so//shes bya zhes bya ba ni yongs su shes par bya ba'o/ /lung dang rig pa'i dbye ba yis/ /zhes bya ba ni sngags kyi theg pa dang rjes su mthun pa'i rigs pa dang / lung ni rgyud sde lnga la sogs pa'i bdag nyid kyis so/ /dbye bas shes zhes bya ba ni de'i rab tu dbye bas zhes bya ba'i don to//de ltar don rnam pa bzhis ye shes kyi de kho na nyid gsungs so/ /de ltar de kho na nyid gsum bstan nas/ de'i nye bar bsdus pa brjod pa'i phyir/ de ltar de nyid gsum dang dam tshig ces bya ba la sogs pa gsungs te/ bdag gi de kho na nyid la sogs pa'i ngo ngo bo ste/ye shes mchog ces bya ba ni bskyed pa'i rim pa'i rjes la rim pa lnga po sdud par byed pa nyid kyi phyir ro/ /gsang ba ni zhes bya ba ni snod ma yin pa rnams la sba bar bya ba'i phyir/ bzhi pa ye shes mtshan nyid do/ /zhes pa ni lhan cig skyes pa'i rnam pa nyid kyi phyir dang /mtshan nyid dang bral ba'i skad cig ma'i ngo bo nyid kyi phyir ro/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u nyi shu rtsa gsum pa'i rgya cher bshad pa'o// // de ltar le'u nyi shu rtsa gsum pas de kho na nyid gsum gyi yul la dri ba'i lan gdab pa bstan nas/ da ni sna'i rtse mo gsum gyi yul la dri ba'i lan brjod pa'i phyir le'u nyi shu rtsa bzhi pa nye bar ston cing / dang por de rtsom pa gsungs pa ni/ de nas zhes bya ba la sogs pa gsungs te/ le'u nyi shu rtsa gsum pa bshad pa'i rjes la'o//gzhan yang zhes bya ba ni snga ma la ltos pas tha dad pa nyid kyi phyir ro/ /nyon zhes bya ba ni phyag na rdo rje nyan pa la sbyar ba'o/ /sna rtse gsum gyi mtshan nyid ces bya ba la/ sna rtse gsum ni gsang ba dang / snying ga dang / kha'i dbye bas tha dad pa'i mtshan nyid ni/thun mong ma yin pa'i de kho na nyid 'jog par byed pa'o/ /bshad kyis zhes bya ba ni brjod par bya yis zhes pa'o/ /de ltar de'i rtsom pa bstan nas/ dngos su bstan pa brjod pa'i phyir/ /de'i yan lag sna rtse gsum/ /bstan pas gsungs pa ni/ gsang ba snying ga gdong sna'i ming //zhes bya ba ste/ des brjod par bya ba'o/ /gsum pa rgyud las zhes bya ba ni/ rtsa ba'i rgyud dpal gsang ba 'dus pa las so/ /gsal ba ni zhes bya ba ni bcom ldan 'das kyis bstan pa'o/ /'khor lo gsum gyi dbye ba yis/ /zhes bya ba ni/ sprul pa dang / chos dang /longs spyod rdzogs pa la nye bar gnas pa'i 'khor lo gsum gyi dbye bas so/ /rnal 'byor pa yis zhes bya ba ni/ rlung gi de kho na nyid sgom pa po rnams kyi'o/ /bsgom pa'i rim pa zhes bya ba ni/ rlung gi de kho na nyid bsgom pa'i rim pa'o/ /de ltar sna rtse gsum gyi yul la dri ba mdor bstan nas/de rgyas par bshad pa bstan pa'i phyir gsang ba'i sna rtse brjod pa'i yan lag rdzas kyi thig le bsgom pa ni/ shin tu chags pa'i zhes bya ba la sogs pa gsungs te/ shin tu chags pa ni shin tu chags pa ste chags pa chen po'o/ /de kun nas non pa gang la yod pa de la de skad ces bya ste/de rnams kyi'o/ /bde ba ster zhes bya ba ni bde ba thob par byed pa ste/ bde ba chen po kun nas skye/ /zhes bya ba dang 'brel to/ /ji ltar zhe na/ rlung gi de nyid sbyor ba yis/ /zhes bya ba gsungs te/ srog dang rtsol ba'i rlung gi sbyor ba dag gis so/ /rtsa yi 'khor lo sad par byed//ces bya ba ni rtsa'i 'khor lo ni rang gi lus la gnas pa'o/ /sad par byed pa ni yongs su shes pa'i rgyus so/ /kun nas skye zhes bya ba ni/ thabs shes rab sbyor ba'i stobs kyis kun nas skye ba'o/ /bde ba chen po zhes bya ba ni/ byang chub sems kyi ngo bo'o/ /ji ltar zhe na/ khams rnams ro gcig gyur nas ni//zhes gsungs te/ khams sum cu rtsa gnyis ro mnyam pa nyid kyis so/ /dgug ces bya ba ni rlung gi de kho na nyid kyi stobs kyis bzung nas so/ /gzhug ces bya ba ni gzhug pa'o/ /cho ga bzhin du bya zhes bya ba ni rlung gi de kho na nyid kyi cho gas so/ /gzung zhes bya ba ni gzung bar bya ba'o//rdo rje'i rtse mor zhes bya ba ni rdo rje'i rtse mor ro/ /byang chub sems ni zhes bya ba ni kun rdzob kyi rnam pa'o/ /bde ba chen po zhes bya ba ni bde ba chen po dang rgyu mthun pa'i phyir ro/ /lhan skyes skad cig mtshan nyid ni/ /zhes bya ba ni dpe'i lhan cig skyes pa'i mtshan nyid can no//ye shes lnga'i rang bzhin zhes bya ba ni/ las kyi thig le la dag pa'i zla ba dang kun+da lta bu'i gzugs ni me long lta bu'i ye shes so/ /khams sum cu rtsa gnyis dang ro mnyam pa ni/ mnyam pa nyid kyi ye shes so/ /de nyid la bde ba nyams su myong ba'i ngo bo nyid ni/ so sor rtog pa'i ye shes so//de las spro ba dang / bsdu ba'i rim pas bya ba rdzogs pa ni bya ba grub pa'i ye shes so/ /rang bzhin gyis stong pa nyid kyis shin tu rnam par dag pa'i chos kyi dbyings kyi ye shes so/ /bde zhes bya ba ni nyams su myong ba'i chos nyid kyi phyir ro/ /kun du rtog pa thams cad spangs/ /zhes bya ba ni mi mthun pa'i phyogs dang rnam par bral ba'i phyir ro//rdzas thig le zhes bya ba ni byang chub sems kyi thig le'i ngo bo nyid kyi phyir ro/ /gsang ba'i sna rtser zhes bya ba ni/ rdo rje'i rtse'am pad+ma'i sna rtser yang rung ste/ de'i mthar zhes bya ba ni de'i mtha' mar ro/ /yang dag gzung ba'i bdag nyid can//zhes bya ba ni gzung ba'i ngo bo'o/ /rnal 'byor mchog ces bya ba ni/ mchog gi rnal 'byor gyi rgyur gyur pa nyid kyi phyir ro/ /chags chen sems ni gcig pu yis/ /zhes bya ba ni shin tu yang 'dod chags shas che ba rnams kyi zhes bya ba'i don to/ /chags pa chen po'i yul la sems gcig pu gang rnams la yod pa de la de skad ces bya'o//de ltar rdzas kyi thig le bsgom pa bstan nas/ gsang ba'i sna rtse'i ngo bo bshad pa'i phyir/ pad 'dab drug cu rtsa bzhi la/ /zhes bya ba gsungs te/ de rtsa rnams kyi dbyibs nyid kyi phyir ro/ /pad+ma zhes bya ba ni de'i rnam pa nyid kyi phyir ro//rtsa'i 'khor lo zhes bya ba ni yang dag shugs la sogs pa'i mtshan nyid kyi phyir ro/ /rtsa yi 'khor lo ji skad 'byung / /zhes bya ba ni le'u bcu bdun pa las/ ji skad du bstan pa'o/ /de yi lte ba sna rtser bshad/ /ces bya ba ni sprul pa'i 'khor lo'i dbus kyi lte ba dang / de dang nye bar gsang ba'i 'khor lor gnas pa'i rdo rje dang pad+ma'i rtsa'i lte ba'o//sna rtser bshad ces bya ba ni gsang ba'i sna rtser brjod pa'o/ /de nyid kyi phyir gsang ba zhes bya ba gsungs te/ gsang ba'i ming can no/ /bde ba thams cad ster bar byed pa'o/ /de ltar rnam pa gnyis kyis gsang ba'i sna rtser bshad nas/snying ga'i sna rtser ngo bo bshad pa ni/ snying ga'i sna rtser zhes bya ba la sogs pa gsungs so/ /chos kyi 'khor lo zhes bya ba ni rang gi mtshan nyid 'dzin par byed pa'i bdag nyid can la'o/ /snying ga'i zhes bya ba ni snying ga'i gnas su'o/ /pad+ma 'dab brgyad ces bya ba ni/ pad+ma 'dab ma brgyad pa'i rnam pa la'o/ /lte ba zhes bya ba ni dbus su ge sar dang bcas pa'o/ /sna yi rtse mo snying ga ste/ /zhes bya ba ni snying ga'i sna rtser ro/ /gang la zhe na/ de'i phyir zhe sdang nyid kyi sems ni zhes bya ba gsungs te/ zhe sdang gi rigs can rnams kyi'o/ /de la zhes bya ba ni snying ga'i sna rtse de la'o//sngags ni zhes bya ba ni sprin gyi sgra'i ngo bo la'o/ /rdo rje 'chang zhes bya ba ni/ rdo rje 'chang chen po'o/ /yang dag spro bar byed pa'i rgyu ni/ skyed par byed pa'i rgyu'o/ /ngag gi rtog pa kun spangs pa/ /zhes bya ba ni ngag gi spros pa thams cad kyi yul las 'das pa nyid kyi phyir ro/ / mchog gi ye shes zhes bya ba ni/ mchog gi ye shes dag 'od gsal ba'i rnam pa'i rgyur gyur pa'i phyir ro/ /rmad 'byung che zhes bya ba ni/ /de nyid las ngag gi spros pa thams cad 'jug pa'i phyir ro/ /phra ba'i zhes bya ba ni phra mo'i rnal 'byor gyi yul yin pa'i phyir ro/ /rtag tu 'char zhes bya ba ni chos nyid kyi ngo bos rtag tu yod pa'i phyir ro//nA da ni zhes bya ba ni a yig gi rnam pa'o/ /rnam rtog med pa'i zhes bya ba ni cha lnga pa'i ngo bo'i rnam par rtog pa med pa'i phyir ro/ /bde ba che zhes bya ba ni der sems 'dzin pas rnam par g.yeng ba'i ngo bo sdug bsngal bzlog pa'i phyir ro/ /bsgom bzhin zhes bya ba ni de ma thag par gsungs pa'i sngags kyi thig le sgom par byed cing ngo //rnal 'byor mchog ces bya ba ni bskyed pa'i rim pa sgom pa po la ltos nas mchog nyid kyi phyir ro/ /rigs pas zhes bya ba ni 'byung ba dang 'jug pa'i rjes su bstan pa'i ngo bos so/ /man ngag thob pas zhes bya ba ni man ngag yang dag par rtogs pa'o//bde bar zhes bya ba ni bde bar byas nas so/ /rgyal zhe sdang zhes bya ba ni nyon mongs pa zhe sdang kun du rgyu ba'i gnas skabs can no/ /dbang byas na zhes bya ba ni zhe sdang rnam par dag pa'i ngo bo nyid kyis bdag nyid la gzhan dbang du byas nas so//myur du zhes bya ba ni myur ba'o/ /thig le ji lta bu zhe na/ de'i phyir/ zhi ba'i de nyid rgyu gcig ni/ /zhes bya ba gsungs te zhi ba'i rnam par rtog pa'i rlung gi rang bzhin rnams dang ma bsres pa'i de kho nyid ni 'od gsal ba'i rnam pa la rgyu gcig pa de nyid de thig le'i dbang gis de la mngon par phyogs pa'i phyir zhes bya ba'i don to//de ltar rnam pa gnyis kyis sngags kyi thig le bsgom pa bshad nas/ da ni kun rdzob kyi sna rtse brjod pa'i yan lag gi rang gi ngo bo bstan pa'i phyir/ nyi ma zla ba me dang gsum/ /zhes bya ba gsungs te la la nA dang ra sa nA dang / a wa d+hU tI'i ngo bo ste/khams gsum po 'bab par byed pa'i phyir ro/ /lan gsum gyis ni dbus nas khyab/ /ces bya ba ni rtsa gsum gyi dbus su chud pa'o/ /gdong gi sna ni zhes bya ba ni kun rdzob kyi sna rtse'o zhes byar zhes bya ba ni brjod pa'o/ /rlung rnams gnas kyi mtshan nyid dang //zhes bya ba ni rlung rnams ni lnga'am bcu'i gnas kyi mtshan nyid gang la yod pa de la de skad ces bya'o/ /de ltar rang gi ngo bo bstan nas/ de nyid du 'od zer gyi thig le bsgom pa mdor bshad pa'i phyir/ de la gnas pa'i bya ba gsungs te/ de la zhes bya ba ni kun rdzob kyi sna rtse de la'o//ye shes che zhes bya ba la ye shes che ba ni rdo rje'i bzlas pa sgrub par byed pa nyid kyi phyir ro/ /thig le che zhes bya ba ni 'od zer gyi thig le'o/ /gti mug gis gnon yid ces bya ba ni mi shes pas dkrugs pa'i sems kyi rgyun dang ldan pa'i rnal 'byor pa'o/ /bsam gtan zhes bya ba ni bsgom par bya ba'o//gti mug mchog las rgyal zhes bya ba ni mi shes pa 'bigs par byed pa'o/ /mchog ces bya ba ni gti mug ste/ nyon mongs pa thams cad skyed par byed pa'i rgyur gyur pa'i phyir ro/ /ji skad du/ gti mug skyon rnams kyi ni rgyu/ /de nyid phyir na mngon par brjod//gzhan du 'jig tshogs lta ba ni/ /de spangs pas ni spangs pa'o/ /zhes bya ba gsungs pa lta bu'o/ /gzhan yang ji lta bu zhe na/ de'i phyir dngos po thams cad rnam par smad/ /ces gsungs te/ dngos po thams cad ni phyi dang nang gi bdag nyid can rnams la bye brag tu smod par byed pa ste/de'i dbang gis dngos po thams cad kyi rang bzhin mi shes pa'i phyir ro/ /de ltar de nyid las 'od zer gyi thig le bsgom pa mdor bstan nas/ de rgyas par bshad pa brjod pa'i phyir/ ye shes lnga yi bdag nyid gsal/ /zhes bya ba gsungs te/ de'i bdag nyid can 'od zer gyi thig le ste/rlung lnga po rnams ni de bzhin gshegs pa lnga'i bdag nyid kyi phyir ro/ /sangs rgyas lnga ni bsten pa yi/ /zhes bya ba ni de la srog gi rlung ni mi bskyod pa'i rang bzhin no/ /thur sel ni rin chen 'byung ldan gyi rang bzhin no/ /mnyam gnas ni snang ba mtha' yas kyi rang bzhin no//gyen du rgyu ba ni don yon grub pa'i rang bzhin no/ /khyab byed ni lus thams cad kyi tshogs la gnas pa nyid kyis rnam par snang mdzad kyi rang bzhin no/ /rten ni de'i rang bzhin gyi phyir ro/ /mchog ces bya ba ni dag 'od gsal ba'i rgyur gyur pa'o/ /de ni 'od zer thig le tsam//zhes bya ba ni de'i ming gis de brjod pa'i phyir ro/ gdong gi sna rtser yang dag brten/ /zhes bya ba ni kun rdzob kyi sna rtse la brten nas gnas pa'i phyir ro/ /bsgom par bya zhes bya ba ni sna'i rtse mor 'dzin par byed pa'o/ /rnal 'byor mchog ni zhes bya ba ni/ /rdo rje bzlas pa'i rgyud nyid du gyur pa'i phyir ro//gti mug rgya mtsho las ni rgal/ /zhes bya ba ni gti mug gi rgya mtsho mi snang bar byed pa zhes bya ba'i don to/ /de ltar de rgyas par bshad pa bstan nas/ /de nyid kyi ming brjod pa'i phyir/ /dam tshig sems dpa' zhes bya ba la sogs pa gsungs te/ / de ni zhes bya ba ni 'od zer gyi thig le la'o/ /dam tshig sems dpa' zhes bya ba ni ming ngo / /yang dag pa'am kun nas son pa ni 'gro ba'i rang bzhin rlung rnam pa lnga la sems dpa' yod pas dam tshig sems dpa' 'o/ /ming can du zhes bya ba ni ming ngo / /yang dag ces bya ba ni/ rdzogs pa'i rim pa'i rang bzhin nyid du phyin ci ma log pa nyid kyis so//dam tshig sems dpa' ji lta bu zhe na/ de'i phyir/ sangs rgyas kun gyi dam tshig ni/ /zhes bya ba gsungs te/ /de bzhin gshegs pa kun gyi'o/ /ye shes lnga yi bdag nyid can/ /zhes bya ba ni me long lta bu la sogs pa'i ye shes lnga'i bdag nyid can te//don la de rlung rnam pa lnga'i bdag nyid can gyi phyir snyam du dgongs pa'o/ /rigs pa zhes bya ba ni 'od zer gyi thig le'i rang bzhin can no/ /rnal 'byor mkhas pa zhes bya ba ni/ /kun rdzob kyi sna rtser 'od zer gyi thig le 'dzin par nus rnams kyi'o/ /gti mug mun pa rnam par 'joms//zhes bya ba ni mi shes ba'i mun nag 'joms pa ste/ /rlung rang gi ngo bo nye bar mtshon pas ngag bzhin med pa'i shes pa nyid kyi phyir ro/ /kun du rtog pa thams cad bral/ /zhes bya ba ni ngag gi spros pa thams cad mi snang bar byed pa nyid kyi phyir ro/ /kun mkhyen rtog pa'i mtshan nyid ni/ /zhes bya ba la kun mkhyen rtog pa ni thams cad mkhyen pa'i ye shes te de'i mtshan nyid gang la yod pa de la de skad ces bya ste/phra mo'i rnal 'byor rnams kyis rig par bya ba'i phyir ro/ /de ltar de nyid kyi ming brjod pa bstan nas/ da ni 'od zer gyi thig le 'jug pa'i sgo nas brjod pa'i phyir/ de'i yan lag mdor bstan pa ni/sna yi bu ga las byung zhing / /zhes bya ba gsungs te/ gdong gi sna'i bu ga dag las rlung 'byung ba'o/ /sangs rgyas lnga yi rigs gnas pa/ /zhes bya ba ni rlung lnga po rnams ni de bzhin gshegs pa lnga'i rnam pa nyid kyi phyir ro/ /rlung lnga steng du yang dag rgyu/ /zhes bya ba ni rlung lnga po rnams steng gi sna'i sgo nas kun du rgyu ba nyid kyi phyir ro//lus la spyod par zhes bya ba ni lus la'o/ /rtag tu 'gyur zhes bya ba ni dus thams cad du ste/ rlung lus la brten pa nyid kyi phyir ro/ /kun rdzob snar ni rgyu ba yin/ /zhes bya ba ni gdong gi sna las 'byung bas so/ /sgo de las ni zhes bya ba ni gdong gi sna'i bu ga las so//de zhes bya ba ni rlung ngo / /rnam par 'byung zhes bya ba ni skye ba'o/ /de ltar mdor bstan nas/ da ni rgyas par bshad pa brjod pa'i phyir/ g.yon dang g.yas dang gnyis ka dang / /zhes bya ba la sogs pa gsungs te/ g.yas pa dang g.yon pa dang gnyis ka dang nyid las dal bar rgyu ba'i dbye bas rlung gi rgyu ba de rnams bzhi ste/thun dang po la sogs la ltos nas zhes bya ba'i don to/ /de ltar yang thun dang po las me'i dkyil 'khor gyi rlung sna bug g.yas pa nas 'byung bar 'gyur te/ thun gnyis pa la rlung gi dkyil 'khor sna bug g.yon pa las/thun gsum pa las sa'i dkyil 'khor gnyis nas 'byung bar 'gyur te/ thun bzhi pa la gnyis ka dag las chu'i dkyil 'khor nas dal bar gyur pas 'bab bo/ /mtshan mo la yang de bzhin no/ /'dir yang dkyil 'khor re re nas/ dkyil 'khor bzhi'i cha cha'i grangs kyi sna bug re re nas g.yas pa la sogs pa'i dbye bas tha dad pa nyid du rtogs par bya'o//g.yas pa nas ni 'byung ba yi/ /zhes bya ba ni g.yas pa'i sna bug nas 'byung ba nyid kyi phyir ro/ /khams zhes bya ba ni rlung ngo / /me yi dkyil 'khor nyid yin te/ /zhes bya ba ni me'i dkyil 'khor ro//kha dog dmar po zhes bya ba ni/ de bzhin gshegs pa snang ba mtha' yas kyi rnam par dag pa'i rang bzhin nyid kyi phyir ro/ /gsal ba 'di zhes bya ba ni/ rnal 'byor shes pa nyid du snang ba'i phyir ro/ /pad+ma mgon po zhes bya ba ni/ pad+ma bzhin du 'dod chags la sogs pas ma gos pa nyid kyi phyir pad+ma'o//de nyid ni rang gi rigs rnams kyi bdag po nyid kyi phyir pad+ma mgon po'o/ /rgyu ba'o zhes bya ba ni snang ba mtha' yas nyid gyen du rgyu ba'i rnam pas rgyu ba'o/ /g.yon pa nas ni zhes bya ba ni/ g.yon pa'i sna'i bu ga nas so/ /'byung ba'i zhes bya ba ni skyes pa'i 'o//khams zhes bya ba ni mnyam gnas kyi rlung gi rnam pa'o/ /rlung gi dkyil 'khor dang / rten pa zhes bya ba ni rlung gi dkyil 'khor las skyes pa nyid kyi phyir ro/ /ljang ser dag tu snang ba ste/ /zhes bya ba ni/ ljang gu'i mdog can no/ /las kyi mgon po'i zhes bya ba ni don yod grub pa'o/ /rgyu ba'o zhes bya ba ni rlung gi rnam par zhes bya ba'i tha tshig go//gnyis ka las ni zhes bya ba ni sna'i bu ga gnyis ka las so/ /'byung ba'i zhes bya ba ni skye ba'o/ /khams zhes bya ba ni mnyam gnas kyi rlung gi rnam pa'o/ /gser gyi mdog tu snang ba ste/ /zhes bya ba ni kha dog ser po'o/ / dbang chen gyi dkyil 'khor nyid ces bya ba ni/ sa'i dkyil 'khor ro/ /rin chen mgon po rnams zhes bya ba ni/ bsam pa thams cad rdzogs par byed pa rin chen 'byung ldan no/ /rgyu ba'o zhes bya ba ni de'i rnam pa nyid kyis zhes bya ba'i don to/ /dal zhing rgyu ba med ces bya ba ni/ chu'i dkyil 'khor las byung ba nyid kyi phyir ro//dal zhing rgyu ba zhes bya ba ni/ chu la steng du 'gro ba med pa'i phyir ro/ /chu'i dkyil 'khor te zhes bya ba ni chu'i dkyil 'khor nyid do/ /dag pa'i shel ltar snang ba ni/ /zhes bya ba ni mdog nyid kyis te dri ma med pa'i phyir ro/ /rdo rje mgon po zhes bya ba ni mi bskyod pa ste/rdo rje bzhin du stong pa nyid la bstan pa'i phyir ro/ /mgon po yang yin te rang gi rigs rnams kyi bdag po nyid kyi phyir ro/ /de'i rnam pa nyid kyis de nyid du 'bab pa'i phyir ro/ /khams kun las ni zhes bya ba ni rlung bzhi'i rang bzhin no/ /yang dag 'byung zhes bya ba ni/ brten nas so/ /rten dang brten pa'i 'dzin pa ni/ /zhes bya ba ni rten la bzhi po 'dzin pa nyid kyi phyir ro/ /rten dang brten pa'i 'dzin pa ste khyab byed kyi rlung ngo / /rnam par snang mdzad rang bzhin te/ /zhes bya ba ni gzugs la khyab par byed pa nyid kyis rnam par snang bas so/ /'chi ba'i mtha' ni zhes bya ba ni/rtag tu de'i las med pas 'chi ba'i dus su phyir 'byung ba nyid de'i bya ba zhes bya ba'i don to/ /de ltar rgyas par bshad pa bstan nas/ da ni dkyil 'khor bzhi'i rim pas nang gi bzlas pa brjod pa'i phyir/ dkyil 'khor bzhi po 'di dag ni/ /zhes bya ba la sogs pa gsungs te/me la sogs pa'i dkyil 'khor bzhi'i rim pas/ 'byung ba'i dbugs kyi 'khor lo zlos/ /zhes bya ba ni yi ge gsum sbyar ba sngon du 'gro bas/ nye bar mtshon par bya'o/ /rtag tu zhes bya ba ni nyin mtshan rtag tu'o/ /mnyam par bzhag nas zhes bya ba ni/ sgyu ma lta bu'i ting nge 'dzin la gnas pas so//nyin mtshan zhes bya ba ni thun brgyad kyi dbye bas so/ /rtag tu zlos zhes bya ba ni rlung gi 'khor lo de nyid do/ /sngags pas zhes bya ba ni rdzogs pa'i rim pa la gnas pas so/ /bzlas pa'i grangs kyis ni zhes bya ba ni nyi khri chig stong drug brgya'i grangs kyis so/ / de ltar dkyil 'khor bzhi'i rim pas nang gi bzlas brjod nas/ da ni 'od zer gyi thig le nye bar bsdu ba'i sgo nas las tshogs brjod pa'i phyir/ de ltar rlung gi sna rtser ni/ /zhes bya ba la sogs pa gsungs te/ rlung lnga po bsdus pa'i rnam pa'o/ /sna rtser ni zhes bya ba ni kun rdzob kyi sna'i rtse mor ro/kha dog lnga par zhes bya ba ni rigs lnga'i rang bzhin gyi kha dog nyid kyi phyir ro/ /rnam par bsgom zhes bya ba ni yungs kar gyi 'bras bu tsam nyid kyis so/ /gnyis med mchog gi rnal 'byor gyis/ /zhes bya ba ni sngags dang rlung dang dkyil 'khor dang / lha rnams kyis gnyis su med pa'i rnal 'byor gyis te/tha mi dad pa rtogs pa nyid kyis so/ /'od zer tshogs ni zhes bya ba ni rlung lnga'i rang bzhin no/ /'bar ba che zhes bya ba ni shin tu yang 'od gsal ba nyid kyi phyir ro/ /de yis zhes bya ba ni 'od zer gyi thig les zhi ba la sogs pa'i las kyi tshogs bsgrub par bya'o/ /ji ltar zhe na/de'i phyir rnal 'byor pas zhes bya ba gsungs te/ thun mtshams phyed phyed kyi dus 'dzin pa'i bdag nyid can gyi dkyil 'khor gyi rim pa'i sbyor bas zhes bya ba'i don to/ /ji skad du/ me dang rlung dang dbang chen dang / /chu dang dkyil 'khor so so la/ /thun ni phyed phyed dus su ni/ /las ni gnyis gnyis rab tu gnas//zhes gsungs so/ /de ltar don rnam pa bzhis 'od zer gyi thig le 'jug pa'i sgo nas gsungs so/ /de ltar rab tu dbye ba'i sgo nas rgyas par bshad pa bstan nas/ da ni de nyid kyi yul de sgom pa po'i yul la dri ba'i lan bstan pa'i phyir/ de'i yan lag gsol ba 'debs pa ni/de nas zhes bya ba la sogs pa gsungs te/ nye bar bsdu ba'i sgo nas las tshogs brjod pa'i rjes la'o/ /phyag na rdo rjes zhes bya ba ni gsol ba 'debs pa po'o/ /rdo rje sems dpa' zhes bya ba ni/ ston pa po drug pa rdo rje 'chang gi rnam pa'o/ /gsungs pa ni 'chang bzhin pa'i don gyi lhag ma'o//'gro ba'i bla ma zhes bya ba ni/ khams gsum pa'i slob dpon nyid du gyur pa'i phyir ro/ /ci zhig gsungs she na de'i phyir thig le gsum gyi zhes gsungs te/ rdzas dang sngags dang 'od zer gyi thig le'i ngo bo'o/ /yongs su shes zhes bya ba ni/bcom ldan 'das kyi drin gyis so/ /thig le gsum ni shes zin te/ /sna yi rtse mo gsum dang ldan/ /zhes bya ba ni/ gsang ba dang snying ga dang gdong gi sna'i rtse mo gsum dang bcas pa ste/ 'di dag gi rten du gyur pa'o/ /'di la cung zad ces bya ba ni thig le gsum gyi bsgom pa dang / sna'i rtse mo gsum gyi bsgom pa la'o/ /bdag la zhes bya ba ni phyag na rdo rje bdag la'o/ /the tshom zhes bya ba ni yid gnyis so/ /srid mthar mdzad kyis bsal bar mdzad/ /ces bya ba ni de the tshom ste bcom ldan 'das kyis bsal bar mdzod cig pa'o/ /srid pa ni 'khor ba ste/ de mthar byed pa ni dgra ste/'khor ba rtsad nas gcod pa'i phyir ro/ /the tshom rang gi ngo bo gsungs pa ni/ rdzas dang sngags dang zhes bya ba la sogs pa'o/ /thig le gsum gyis sgom pa po/ /rnal 'byor pa gcig nyid dam ni/ /yang na rnal 'byor so sor bsgom/ /zhes bya ba ni rnal 'byor pa so so yin nam zhes bya ba'o//de ltar gsol ba 'debs pa bstan nas/ de ni bcom ldan 'das kyi bka' la 'jug pa'i sngon du 'gro bas sgom pa po gsum gyi nges pa bstan pa'i phyir/ de nas zhes bya ba la sogs pa gsungs te dri ba byas pa'i rjes la'o/ /bcom ldan 'das rdo rje zhes bya ba ni/rdo rje 'chang chen po ste/ gsungs zhes bya ba dang 'brel to/ /ji lta bu zhe na/ de'i phyir the tshom kun gcod ces gsungs te/ the tshom thams cad ni som nyi'o/ /de rnams gcod pa ni 'joms pa ste/ zlog par byed pa zhes bya ba'i don to/ /gtso bo zhes bya ba ni sangs rgyas lnga'i gtso bo nyid kyi phyir ro//ci gsungs she na/ de'i phyir yun rings zhes bya ba gsungs te/ dus shin tu ring ba'o/ /chags chen dbang song ba zhes bya ba ni shin tu chags pa chen po'i dbang du song bas so/ /srid pa gsum du zhes bya ba ni khams gsum po la'o/ /gang zhig ces bya ba ni sems can rnams so//skyo ba zhes bya ba ni kun nas ngal ba'o/ /de dag 'gro ba'i don du zhes bya ba ni/ 'dod chags kyi rigs can gyi sems can de rnams la rang dang 'os pa'i spyod pa'i thabs kyis grol ba'i don du ste/ 'dod chags nye bar zhi ba'i phyir ro/ /rdzas kyi thig le'i zhes bya ba ni byang chub sems kyi thig le'i ngo bo'o//gsungs pa yin zhes bya ba ni brjod pa'o/ /zhe sdang chen po'i zhes bya ba ni zhe sdang ni shin tu che ba'o/ /dbang song bas zhes bya ba ni gzhan dbang ngo / ming gang zhe na/ sems can rnams so/ /de nyid kyi phyir mi srun pa'i lus zhes gsungs te/zhe sdang gi dbang gis mi srun pa'i lus gang la yod pa de la de skad ces bya'o/ /de rnams zhes bya ba ni sems can zhe sdang gi spyod pa can rnams la'o/ /myur du zhes bya ba ni myur ba nyid du'o/ /grol don du zhes bya ba ni zhe sdang las ston pa'i phyir ro/ /sngags kyi thig le zhes bya ba ni/snying ga'i sna rtse la hUM yig gi rnam pa'o/ /gsungs pa yin zhes bya ba ni brjod pa'o/ /gti mug chen pos zhes bya ba ni mi shes pa chen pos so/ /kun nas 'khrul zhes bya ba ni phyin ci log pas so/ /skyo ba zhes bya ba ni yid yongs su ngal bas so/ /gang zhes bya ba ni sems can rnams so//srid pa'i rgya mtsho 'di zhes bya ba ni/ 'khor ba'i rgya mtsho las so/ /de rnams zhes bya ba ni gti mug chen pos sems kyi rgyud mnan pa rnams kyi'o/ /myur bar zhes bya ba ni 'bras bu myur ba nyid du'o/ /dngos grub ces bya ba ni rdo rje bzlas pa'i ngo bo'o/ /thob phyir zhes bya ba ni myur ba'i 'bras bu can gyi dngos grub thob pa'i phyir ro//ye shes mtshan nyid ni zhes bya ba ni/ mi shes pa bcom pas ye shes kyi ngo bo'o/ /rlung gi thig ler zhes bya ba ni 'od zer gyi thig le'o/ /gsungs pa yin zhes bya ba ni brjod pa'o/ /ji lta bu zhe na/ de'i phyir/yang dag de nyid spro ba ni/ /zhes bya ba gsungs te/ phyin ci ma log pa'i ngo bos de nyid spro ba'i bdag nyid ces bya ba'i don to/ /de ltar bcom ldan 'das kyi gsungs la 'jug pa sngon du 'gro bas sgom pa po gsum gyi nges pa bstan nas/ da ni sna rtse gsum gyi nye bar bsdu ba brjod pa'i phyir/rang gi ngo bo brjod pa ni/ de ltar thig le gsum gyi nye bar bsdu ba brjod pa'i phyir/ rang gi ngo bo brjod pa ni/ /de ltar thig le gsum zhes gsungs te/ de ma thag par bshad pa'o/ /yang dag ces bya ba ni phyin ci ma log pa'i ngo bos so/ /sbyor ba ji lta bzhin zhes bya ba ni ji ltar rlung gi sbyor ba'o//bsam pa ji bzhin zhes bya ba ni/ 'dod chags kyi rigs can la sogs pa la ltos pas so/ /tshe 'di nyid la zhes bya ba ni mthong ba'i chos nyid la'o/ /grub don du zhes bya ba ni/ rlung gi de kho na nyid la pha rol tu son pa'i phyir ro/ /sgrib pa thams cad dag pa'i phyir//zhes bya ba ni gsungs zhes bya ba'i lhag ma'o/ /sgrib pa thams cad ni lus dang ngag rnam par dben pa'i mi mthun pa'i phyogs su gyur pa rnams la dag pa'i phyir ni nye bar zhi ba'i phyir zhes bya ba'i don to/ /de ltar nye bar bsdu ba rang gi ngo bo bstan nas/ de ni bsgom pa'i gnas kyi nges pa brjod pa'i phyir/rtse gcig pa yi sems kyis ni/ /zhes bya ba gsungs te/ rnam par mi g.yeng ba'i sems kyis so/ /nyams dga'i gnas zhes bya ba ni/ nyams dga' ba'i sa phyogs su'o/ /ye shes bsdus pa zhes bya ba ni/ ye shes lnga bskyed pa dang rjes su mthun pa ste/dngos grub thams cad bsdus pa ni/ /'bad pa yis ni bsgrub par bya/ /zhes bya ba dang 'brel to/ /gzhan yang ji lta bu zhe na/ de'i phyir/ me tog 'bras bu chu yis brgyan/ /zhes bya ba gsungs te/ mi g.yeng zhing shin tu nyams dga' ba'i phyir ro//dben pa zhes bya ba ni skye bo med pa'o/ /ri'i rtser zhes bya ba ni sa 'dzin gyi rtse mo la'o/ bsgrub par bya zhes bya ba ni bsgom par bya ba'o/ /'bad pa yis ni zhes bya ba ni/ brtson 'grus kyis so/ /dngos grub thams cad bsdus pa ni/ /zhes bya ba ni dngos grub thams cad ni zhi ba la sogs pa rnams kyi'o//bsdus pa ni sdud par byed pa'i rnam pa ste/ thig le gsum gyi zhes bya ba'i don to/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las le'u nyi shu rtsa bzhi pa'i rgya cher bshad pa'o// //de ltar le'u nyi shu rtsa bzhi pas sna rtse gsum gyi yul la dris pa'i lan bstan nas/ da ni stong pa nyid kyi ye shes kyi yul la dri ba'i lan brjod pa'i phyir/ le'u nyi shu rtsa lnga pa nye bar dgod cing / dang por re zhig rtsom par bshad pa ni/ de nas zhes bya ba la sogs pa gsungs te/ le'u nyi shu rtsa bzhi pa bshad pa'i rjes la'o/ /gzhan yang zhes bya ba ni/ snga ma la ltos nas tha dad pa nyid kyi phyir ro/ /nyon zhes bya ba ni sdud pa po nyan pa la sbyar ba'o/ /stong nyid ye shes mtshan nyid ni/ /zhes bya ba ni bshad kyis zhes bya ba dang 'brel pa'o//ji lta bu zhe na/ de'i phyir lus la gnas pa zhes bya ba gsungs te/ de la brten nas de dmigs pa'i phyir ro/ /ji skad du/ lus la ye shes chen po gnas/ /kun du rtog pa thams cad spangs/ /zhes gsungs so/ /de nyid mchog ces bya ba ni/ mchog ste de kho na nyid mthar thug pa'i rnam pa'o//rtag tu zhes bya ba ni dus thams cad du'o/ /thams cad bdag nyid ces bya ba ni/ rtsa'i tshogs ma lus pa'i bdag nyid can gyi lus la'o/ /de ltar de rtsom pa bstan nas/ dngos su bshad pa de bstan pa brjod pa'i phyir/ de'i yan lag rab tu phye nas/tshig gnyis bshad pa'i yan lag mdor bstan pa bshad pa'i phyir/ chos rnams thams cad ces bya ba la sogs pa gsungs te/ chos thams cad ni shes pa dang shes bya bsdus pa'o/ /snang med mtshan nyid ni zhes bya ba ni/ mi dmigs pa'i rnam pa'o/ /stong pa nyid ces bya ba ni/ chos nyid la 'dod do/ /de la ye shes zhes bya ba ni stong pa nyid de la'o/ /bde ba che zhes bya ba ni bde ba chen po rang gi ngo bo ste/ sdug bsngal thams cad nye bar zhi bas so/ /'od gsal ba ni rnam dag pas/ zhes bya ba ni dam tshig gi phyag rgya'i dbang gis 'od gsal la nye bar dmigs pas/ de'i sbyong bar byed pa zhes bya ba'i don to/ /de ltar mdor bstan pa bshad nas/ de'i rgyas par bshad pa bstan pa de'i yan lag stong pa nyid kyi tshig bshad pa'i phyir/ gang phyir a wa d+hU tIr zhugs/ /zhes bya ba gsungs te/ le'u nyi shu rtsa gnyis pa'i rjes su 'brangs nas/ a wa d+hU tIr rnam par mi rtog pa'i rlung zhugs pa la stong pa nyid ces brjod do//ji ltar zhe na/ de'i phyir yang dag ces bya ba gsungs te/ phyin ci ma log pa'i ngo bos so/ /chos rnams zhes bya ba ni/ snga ma bzhin du shes pa dang shes bya'i mtshan nyid can no/ /rnam rtog snang ba zhes bya ba ni rnam par rtog pa'i rang bzhin no//kun rtog thams cad gcod par byed/ /ces bya ba ni chos thams cad kyi yul la rnam par rtog pa ma lus pa gcod pa ste/ rnam par bzlog pa'o/ /rnam rtog rlung gi ngal bso bar/ /zhes bya ba ni rnam par rtog pa ni rang bzhin brgya rtsa brgyad kyi ngo bo dang / rlung rnams kyang de tsam gyi grangs gcod pa'o//ngal bso bar zhes bya ba ni/ de'i dbang gis 'khor bar rnam par grol ba las yang bzlog pa'i gnas so/ /stong pa nyid du zhes bya ba ni a wa d+hU tI'i ngo bo'o/ /de ni bshad ces bya ba ni/ de ltar bur gyur pa brjod ces bya ba'i don to/ /de ltar stong pa nyid kyi tshig gi bshad pa byas nas/da ni de'i sangs rgyas kyi zhing gi ngo bo nyid kyis rgyas par bshad pa bstan pa'i phyir/ 'di nyid do zhes bya ba la sogs pa gsungs te/ stong pa nyid ni a wa d+hU tI'i ngo bo'o/ /'jig rten khams ni zhes bya ba ni/ sangs rgyas kyi zhing gi ngo bo'i gnas kyi khyad par ro//'di nyid do zhes bya ba ni 'gyur zhes bya ba'o/ /gang gi zhe na/ de'i phyir mi bskyod pa zhes bya ba gsungs te/ thugs kyi rdo rje ste/ nyon mongs pa'i rnam par rtog pa rnams kyis bskyod par mi nus pa'i phyir ro/ /ji lta bu zhe na/ de'i phyir gtso bo chen po zhes bya ba gsungs te/chen po ni sems can gyi khams la gtso bo ste mnga' bdag go/ /der ni zhes bya ba ni/ a wa d+hU tI'i ngo bo'i stong pa nyid la'o/ /rtag tu zhes bya ba ni dus thams cad du'o/ /bzhugs pa'i sa zhes bya ba ni rten no/ /'di la zhes bya ba ni bcom ldan 'das mi bskyod pa'o/ /ji lta bu zhe na/de'i phyir/ srog gi ye shes ming can de/ /zhes gsungs te/ 'od gsal ba'i rlung gi ngo bo ste/ srog gi ye shes zhes bya ba ni ming gang la yod pa de la de skad ces bya'o/ /gzhan yang gzugs med ces bya ba ni/ zhal dang phyag dang mdog dang dbyibs dang bral ba la'o/ /drag po chen po zhes bya ba ni/rnam par rtog pa'i rlung thams cad zad par byed pa'i phyir ro/ /gzhan yang / zhi ba'i 'dzin pa'i mtshan nyid can/ /zhes bya ba ni zhi ba ni rnam rtog gi rlung nye bar zhi ba'o/ /'dzin pa ni mi dmigs pa'i rnam pa nyid kyis 'dzin pa'o/ /de nyid ni bdag nyid can gyi ngo bo gang la yod pa de la de skad ces bya'o//de ltar de nyid la sangs rgyas kyi zhing gi ngo bo nyid kyis rgyas par bshad pa bstan nas/ da ni ye shes kyi tshig rgyas par bstan pa'i phyir/ ye shes zhes bya ba la sogs pa gsungs te/ de nyid ces bya ba ni stong pa nyid de ni/ a wa d+hU tI'i ngo bo la'o/ /bde chen zhes bya ba ni/don dam pa'i bde ba chen po'i ngo bo nyid dang / byang chub sems kyis gang ba nyid/ /ces bya ba ni kun rdzob pa'i byang chub sems kyi zla bas gang ba nyid do/ /bde chen go 'phang zhes bya ba ni/ ye shes kyi khyad par te/ bde ba chen po rnam pa gnyis kyi rten nyid kyi phyir ro/ /de nyid ces bya ba ni/ bden pa gnyis kyi de kho na nyid kyi phyir ro/ /ye shes zhes bya ba ni nyams su myong ba'i bdag nyid kyi phyir ro/ /byang chub sems zhes bya ba ni/ spyir byang chub kyi sems kyi ngo bo zhes bya ba'i don to/ /de ltar don rnam pa gsum gyis rgyas par bshad pa bstan to/ /da ni de ltar rnam pa gnyis kyis dbye ba dang / bcas pa dag gis rab tu phye ste/ tshig gnyis kyis bshad pa brjod nas/ bsdus te tshig gnyis kyis bshad pa'i yan lag nye bar bsdu ba'i sgo nas stong pa nyid kyi ngo bo nyid bstan pa'i phyir/ de la sogs pa zhes bya ba gsungs te/ de ma thag par bstan pa'i bde ba chen po'i tshig de kho na nyid la sogs pa rnams kyis so//ming gi sgras zhes bya ba ni ming gi rnam grangs rnams kyis so/ /brjod bya zhes bya ba ni rab tu bstan par bya'o/ /gcig pu zhes bya ba ni gnyis su med pa'o/ /bde ba che zhes bya ba ni sdug bsngal thams cad bzlog pa'i bdag nyid can byang chub kyi sems rnam pa gnyis so/ /dngos po gcig dang ldan pa nyid//ces bya ba ni rtsa dbus ma dang lhan cig tu ro gcig par gyur pa'o/ /yang na tshig gnyis po gcig tu gyur pa'i stong nyid ye shes zhes bya ba ni brjod ces bya ba ste/ de'i ming gis bstan par bya'o zhes bya ba'i don to/ /de ltar nye bar bsdu ba'i sgo nas/ stong pa nyid kyi ye shes kyi ngo bo nyid bstan nas/stong pa nyid kho na la sangs rgyas kyi zhing gi ngo bo bstan pa'i phyir/ bde ba can zhes de la bshad/ /ces gsungs te/ de ni stong pa nyid do/ /bde ba can zhes bya ba ni 'jig rten gyi khams la brjod do/ /ji lta bu zhe na/ de'i phyir/ dam pa'i bde ba kun gyi gzhi/ /zhes gsungs te/dam pa'i bde ba zhes bya ba ni/ zag pa med pa'i bde ba chen po'o/ /thob pa'i gzhi zhes bya ba ni thob pa'i mtshan nyid can no/ /de ltar de nyid la sangs rgyas kyi zhing gi ngo bo nyid bstan nas/ da ni nges pa'i tshig bshad pa'i phyir/ ngag de bde bar gnas pa ni/ /zhes bya ba la sogs pa gsungs te/stong pa nyid kyi rtsa dbus ma'i rnam pa gang la'o/ /bde bar zhes bya ba ni bde ba'i rnam pa nyid sdug bsngal mtha' dag bzlog pa'i rnam pas so/ /gnas pa zhes bya ba ni gnas pa'o/ /gang de zhes bya ba ni gnas gang la'o/ /de ni bde ba can zhes brjod/ /ces bya ba ni bde bar gnas pa'i phyir zhes bya ba'i don to//de ltar de'i nges tshig bstan nas/ de ni bcom ldan 'das rang gi ngo bo bshad pa'i phyir/ tshe dpag med kyi zhing khams yin/ /zhes bya ba gsungs te/ de bzhin gshegs pa snang ba mtha' yas kyi ming can no/ /zhing khams ni gnas so/ /bde ba thams cad gzhi yi mchog ces bya ba ni 'jig rten las 'das pa'i bde ba ma lus pa thams cad do//mchog ces bya ba ni de bzhin gshegs pa mchog gi rten yin pa'i phyir ro/ /de ltar bcom ldan 'das kyi ngo bo bstan nas/ da ni de'i nges tshig bshad pa'i phyir/ tshe dpag med kyi zhes bya ba la sogs pa gsungs te/tshe dpag med ni gzhal du med pa'o/ /byang chub sems ni zhes bya ba ni kun rdzob kyi'o/ /gang de zhes bya ba ni byang chub kyi sems kyi thig le gang las so/ /de las byung zhes bya ba ni skyes pa'o/ /'od ces bya ba ni 'od zer rnams so/ /de'i phyir zhes bya ba ni rgyu des so/ /'od dpag med ces bya ba ni de'i ming gis so//shes zhes bya ba ni shes par bya ba'o/ /bde ba kun gyi gzhi zhes bya ba ni snga ma bzhin du 'jig rten las 'das pa'i bde ba ma lus pa'i rten no/ /mchog ces bya ba ni zhal dang phyag dang dbyibs spangs pa'i phyir ro/ /de ltar don rnam pa lngas bsdus nas/ tshigs gnyis bshad pa'i yan lag gi ngo bo bstan nas/da ni khyad par du 'phags pa'i thabs shes rab kyi ngo bo nyid kyis stong pa nyid dang ye shes kyi tshig bshad pa brjod pa'i phyir/ stong nyid ces bya ba la sogs pa gsungs te/ rdo rje dbyings kyi dbang phyug ces bya ba ni rdo rje dbyings kyi dbang phyug ma rdo rje 'chang chen po'i yum mo//ye shes rdo rje dbang phyug dang / /zhes bya ba ni rdo rje 'chang chen po'i ngo bo'o/ /rdo rje la dbang phyug pas na rdo rje'i dbang phyug go/ /de dag nyid ces bya ba ni rdo rje 'chang chen po dang / rdo rje dbyings kyi dbang phyug ma dag la'o/ /sbyor ba zhes bya ba ni ro gcig pa'i rnam par snyoms par 'jug pa'i mtshan nyid can no//stong nyid ye shes zhes ni brjod/ /ces bya ba ni stong pa nyid dang ye shes kyi tshig gis bstan pa yin te/ zung 'jug nyid kyi phyir ro/ /de ltar khyad par du 'phags pa'i thabs dang shes rab kyi ngo bo nyid kyis stong pa nyid dang ye shes kyi tshig gi byed pa brjod nas/ da ni thun mong pa'i thabs dang shes rab kyi rtsa gnyis kyi ngo bo nyid kyis de'i bshad pa bstan pa'i phyir/shes rab zhes bya ba la sogs pa gsungs te/ shes rab ni dam tshig gi phyag rgya'i ngo bo'o/ /pad+ma zhes bya ba ni pad+ma la'o/ /la la nA zhes bya ba ni de'i ming can gyi rtsa'o/ /zla mtshan nyi ma 'bab pa can/ / zhes bya ba ni zla mtshan gyi khams kyi ngo bo'i nyi ma 'bab pa ste/ 'bab pa can zhes bya ba ni 'jug par byed pa'o/ /de yang stong par zhes bya ba ni rtsa de stong pa nyid kyi sgras brjod par bya ste/ shes rab kyi ngo bo nyid kyi phyir dang / rtsa'i ngo bo nyid kyi phyir ro/ /ji lta bu zhe na/ de'i phyir/ gnyis pa thams cad rnam par spangs//zhes gsungs te/ bdag ni khrag gi khams 'bab par byed pa zhes bya ba 'di lta bu'i rtogs pa gnyis med pa'i phyir ro/ /thabs ni rdo rje zhes bya ba ni thabs ni khyad par can gyi rnal 'byor pa'i'o/ /rdo rje zhes bya ba ni de'i ming can no/ /ra sa nA zhes bya ba ni de rjod par byed pa'i rtsa'o//zla ba shu kra rab tu 'bab/ /ces bya ba ni zla ba ni cha thams cad yongs su rdzogs pa'o/ /shu kra zhes bya ba ni kun rdzob byang chub kyi sems kyi rnam pa'o/ /rab tu 'bab ces bya ba ni 'jug par byed ces bya ba'i don to/ /ye shes gsungs zhes bya ba ni ye shes kyi sgra nyid kyis gsungs pa ste/ khyad par can gyi nyams su myong ba nyid kyi phyir ro//mchog ces bya ba ni khyad par du 'phags pa'o/ /bde ba chen po'i go 'phang zhes bya ba ni/ /don dam pa'i ngo bo bde ba chen po'i gzhi'am gnas su gyur pa zhes bya ba'i don to/ /de gnyis zhes bya ba ni thabs dang shes rab kyi ngo bo dag la'o/ /sbyor ba zhes bya ba ni 'brel pa'o//mchog tu zhes bya ba ni so so'i skye bo'i mtshan nyid dang bral ba'o/ /shes pa stong nyid ye shes zhes bya ba ni/ de lta bur gyur pa nyid kyis shes par bya ba zhes bya ba'i don to/ /mi zad pa zhes bya ba ni phyir mi spro ba'i don nyid kyi phyir ro/ /de ltar thun mong ba'i thabs dang shes rab kyi rtsa gnyis kyi ngo bo nyid kyis de'i bshad pa brjod nas/de nyid la tshes bco lnga'i ngo bo nyid bstan pa'i phyir zla ba nya yang zhes bya ba la sogs pa gsungs te/ tshes bco lnga rdzogs pa'o/ /de nyid yin zhes bya ba ni stong pa nyid kyi ngo bo'o/ /shes zhes bya ba ni shes par bya ba'o/ /rnal 'byor pa'i zhal las zhes bya ba ni ye shes mkha' 'gro ma'i rgyud las so//tshes bco lnga pa bzhin du zla ba'i cha thams cad yongs su rdzogs pa nyid kyi phyir snyam du dgongs pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las le'u nyi shu rtsa lnga pa'i rgya cher bshad pa'o// //de ltar le'u nyi shu rtsa lnga pas/ stong nyid ye shes kyi yul la dri ba'i lan bstan nas/ da ni rang bzhin gyi lha'i rnam par dbye ba'i yan lag lus la lha'i ye shes kyi mtshan nyid kyi yul la dri ba'i lan bstan pa brjod pa'i phyir/le'u nyi shu rtsa drug pa nye bar dgod cing dang por re zhig bshad par dam bca' ba ni/ de nas zhes bya ba la sogs pa gsungs te/ snga ma bzhin no/ /lus ni stong pa nyid kyi gnas/ /zhes bya ba dang sbyar ro/ /rang dang gzhan dang 'bral ba'i lus ni stong pa nyid kyi gnas te/lha'i gnas bshad kyis zhes bya ba'o/ /des ci byed ce na/ de'i phyir lus ni zhes gsungs te/ lus ni lus so/ /gang gis zhes bya ba ni stong pa nyid kyi gnas nyid kyis so/ /lha rnams kun gyi pho brang zhes bya ba ni/ de nas yang dag bshad kyis zhes bya ba snga ma dang 'brel to//lha rnams kun gyi zhes bya ba la/ lha rnams kun ni dkyil 'khor gyi 'khor lo'i ngo bo'o/ /gnas ni gzhi'o/ /mchog ces bya ba ni tha mal pa'i rnam par rtog pa spangs nas khyad par can gyi ngo bo zhes bya ba'i don to/ /de ltar de rtsom pa bstan nas/ da ni de dngos su bshad pa brjod pa'i phyir/de'i yan lag lus la 'khor lo'i dbye bas lha'i rnam par dbye ba bstan pa'i phyir/ longs spyod ces bya ba la sogs pa gsungs te/ longs spyod la sogs pa 'khor lo bzhi'i bdag nyid can de'i rten ni lus la'o/ /'khor lo gzhan yang gang bshad pa/ /zhes bya ba ni bzhi po'o//rim pa ji bzhin zhes bya ba ni/ sprul pa la sogs pa'i dbye bas so/ /ma lus pa zhes bya ba ni 'khor lo drug gi brjod par 'dod pas so/ /de la zhes bya ba ni 'khor lo de rnams la'o/ /rtag tu yang dag zhugs zhes bya ba ni/ dus thams cad du gnas pa'i lha zhes bya ba dang 'brel to//ji ltar zhe na/ de'i phyir yang dag ces gsungs te/ phyin ci ma log pa'i ngo bos so/ /thim dang longs spyod bdag po ni/ /zhes bya ba ni rtsa re re la gnas nyi shu rtsa bzhi po rnams la byang chub kyi sems rgyu ba rnam pa gsum gyis zhes bya ba'i don to/ /lha nyid ces bya ba ni/ rnam par mi rtog pa'i bdag nyid rig pa'i rang bzhin no//ji lta bu zhe na/ de'i phyir mchog tu gnyis su med ces bya ba gsungs te/ mchog ni so so'i skye bo'i mtshan nyid dang bral ba'o/ /gnyis su snang ba zlog pa'i ngo bo'o/ /des yang dag che zhes bya ba ni/ /phyin ci ma log pa'i ngo bos so/ /dngos po'i go 'phang ni/rang bzhin med pa'i mtshan nyid can gyi rten pa'i gzhi gang rnams la yod pa de la de skad ces bya ste/ rten dang brten pa'i rnam rtog dang bral ba'i phyir ro/ /de ltar lus las 'khor lo'i dbye bas lha'i rnam par dbye ba bstan nas/ da ni dkyil 'khor gyi 'khor lo'i rnam pas de'i rnam par dbye ba bshad pa'i phyir/phung po lnga'i ngo bo nyid kyis de'i rnam par dbye ba brjod pa ni/ ye shes chen po'i go 'phang zhes bya ba gsungs te/ ye shes chen po ni rang bzhin gyis 'od gsal ba'i rnam pa'o/ /go 'phang ni gzhir gyur pa nyid kyi phyir ye shes chen po'i go 'phang ste/ rdo rje 'chang chen po'i ngo bo phung po ma lus pa'i rnam par dag pa'i phyir grib ma'i rigs kyi ngo bo'o//dang por zhes bya ba ni thog mar te gtso bo nyid kyi phyir ro/ /bde ba chen po yang dag bsten/ /zhes bya ba ni rin chen 'byung ldan gyi ngo bo nyid kyi tshor ba rnam par dag pa'i ngo bo nyid kyis bde ba chen po bstan no/ /zhe sdang che dang zhes bya ba ni/nyon mongs pa dang zhe sdang gi gnyen po nyid kyis mi bskyod pa'i ngo bo'o/ /gti mug che zhes bya ba ni/ gti mug rnam par dag pa'i ngo bo rnam par snang mdzad kyi rnam pa'o/ /phrag dog che dang zhes bya ba ni/ nyon mongs pa phrag dog gi rnam par dag pa'i ngo bo don yod grub pa'o/ /'dod chags dngos kyi zhes bya ba ni/'dod chags kyi rnam par dag pa'i ngo bo snang ba mtha' yas so/ /khro bo che dang zhes bya ba ni/ rnam par rtog pa thams cad 'joms par byed pa'i ngo bo nyid kyis te/ thams cad nyid ni de ma thag par bstan pa rnams so/ /rnam pa'i mchog ces bya ba ni/ ye shes kyi rang bzhin nyid kyis mchog nyid kyi phyir ro//'khor ba'i mdud pa nges gcod pa/ /zhes bya ba ni 'khor ba'i 'ching ba rnam par gcod pa'o/ /'khor ba nyid 'ching ba ste/ de nges par gcod pa'o/ /de ltar phung po lnga'i ngo bo nyid kyis sangs rgyas lnga'i ngo bo nyid bstan nas/ da ni khams rnam par dag pa'i ngo bo nyid bstan pa'i phyir/sa dang chu dang de bzhin me/ /zhes bya ba la sogs pa gsungs te/ 'byung ba chen po lnga'i rnam par dag pas/ spyan ma la sogs pa'i ngo bo zhes bya bar shes par bya'o/ /de ltar khams kyi rnam par dag pa bstan nas/ yul gyi rnam par dag pa bstan pa'i phyir/gzugs dang zhes bya ba la sogs pa gsungs te/ gzugs la sogs pa lnga po ni/ gzugs rdo rje ma la sogs pa lnga po'i ngo bo nyid kyis so/ /rnam par dag pa'i zhes bya ba ni/ yul lnga rnam par dag pa'o/ /de ltar yul gyi rnam par dag pa bstan nas/ da ni nang gi skye mched rnam par dag pa bstan pa'i phyir/mig bzangs dang zhes bya ba la sogs pa gsungs te/ mig la sogs pa'i rnam shes lnga'o/ /rnam shes chos dang ni zhes bya ba 'dis drug pa nyid kyi rnam shes kyang bsdu'o/ /kun gzhi nyon mongs can gyi yid/ /ces bya ba 'dis ni yan lag thams cad kyi tshigs dang rgyus pa thams cad kyi tshigs kyi ngo bo kun gzhi dang /nyon mongs pa can gyi yid gnyis gsungs te/ brgyad po 'di rnams la sa'i snying po la sogs pa byang chub sems dpa' brgyad kyi rnam par dag pa gsungs te/ de ltar nang gi skye mched kyi rnam par dag pa bstan nas/ da ni khro bo nyid kyi bstan pa'i phyir ro/ / dad dang zhes bya ba la sogs pa gsungs te/ dus gang gi tshe/ 'jig rten dang 'jig rten las 'das pa'i ting nge 'dzin la snyoms par zhugs pa rnams thob par bya'o snyam pa de lta bu'i 'dun pa ni dad pa'o/ /de nyid ni dbang po ste/ 'jig rten las 'das pa'i dge ba'i chos kyi bdag po nyid yin pa'i phyir ro/ / brtson 'grus zhes bya ba ni/ de nyid la sbyor ba'i bdag por gyur pa'i phyir ro/ /dran pa la sogs pa rnams brjed ngas pa med pa dang / rnam par g.yeng ba med par so sor 'byed pa'i bdag po nyid du rig par bya'o/ /de rnams nyid mi mthun pa'i phyogs kyi yid la byed pa zil gyis gnon pa stobs kyi ming la brten pa zhes bya ba de'i phyir/de rnams nyid gshin rje gshed la sogs pa khro bcu brjod pa yin no/ /de rnams nyid ni lha'i ngo bo nyid do/ /shes rab stobs ni bla na med/ /ces bya ba ni bla na med pa ni 'jig rten las 'das pa'i mthong ba'i lam gyi rgyur gyur pa nyid kyi phyir ro/ /'di rnams ni dbang po dang stobs kyis bsdus pa'i chos bcu po sbyor ba'i lam la drod dang rtse mo dang bzod pa dang 'jig rten chos mchog gi gnas skabs su skye ba yin no//ji bzhin gnas pa yongs su shes/ /zhes bya ba ni lus la gnas kyi dbye bas mgo la sogs pa dbye ba yongs su shes pa ni yongs su shes par bya ba rnams so//lus zhes bya ba ni rang gi lus la'o/ /lha ru zhes bya ba ni sum cu rtsa gnyis kyi bdag nyid can gyi dkyil 'khor pa'i rnam pa'o/ /dran zhes bya ba ni brjod pa yin zhes bya ba'o/ /de ltar don rnam pa lngas dkyil 'khor gyi 'khor lo'i rnam par dbye ba bstan nas/ de ni de nyid la sngags la sogs pa brjod pa'i sgo nas mchod par bya ba nyid bstan pa'i phyir/sngon bzhin zhes bya ba la sogs pa gsungs te/ le'u nyi shu rtsa gsum par bstan pa'i cho gas so/ /ming gi dbye bas rnam par zhes bya ba ni rnam par snang mdzad la sogs pa nas gnod mdzes kyi mthar thug pa'i ming gi dbye bas so//sngags kyi dbye ba'i zhes bya ba ni badzri d+h+r-i ka la sogs pa'i mtshan nyid can gyis so/ /rim pa yis zhes bya ba ni de bzhin gshegs pa dang lhan cig spyod ma dang / rjes su spyod ma dang / byang chub sems dpa' dang / khro bo'i go rims rnams kyis so/ /sngags dgod pa yi rnal 'byor gyis//zhes bya ba ni oM yig dang hUM yig gi mtshan nyid can du rnal 'byor gyis dus su bstan pa'i cho ga bzhin du sngags dgod pa'i rnal 'byor gyis so/ /rim bzhin gnas kyi dbye ba yis/ /zhes bya ba ni gnas kyi rab tu dbye bas so/ /man ngag gis zhes bya ba ni brgyud pa'i rim pa'i ngo bos so/ / rnam nges bya zhes bya ba ni nges par byas nas so/ /yang dag ces bya ba ni phyin ci ma log pa'i ngo bos so/ /gnas kyi dbye ba dang zhes bya ba ni rang gi lus la mgo bo dang lte ba dang mgrin pa dang gsang ba dang snying ga'i rab tu dbye bas so/ /mchod par bya zhes bya ba ni brjod par bya ba'o/ /rab tu 'bad de zhes bya ba ni brtson 'grus kyis so//'dod pa lnga la longs spyod cing / /zhes bya ba ni gzugs la sogs pa'i yul lnga la nye bar longs spyod pas so/ /lha mo zhes bya ba ni mi bskyod pa la sogs pa sum cu rtsa gnyis kyi dkyil 'khor bdag nyid do/ /rnal 'byor pas zhes bya ba ni bskyed pa'i rim pa dang rdzogs pa'i rim pa sgom pa po rnams kyis so//rtag tu zhes bya ba ni rgyun mi 'chad par ro/ /bdag la byin rlab pas rim de nyid/ /ces bya ba ni sgyu ma lta bu'i ting nge 'dzin la gnas pa rnams kyis zhes bya ba'i don to/ /de ltar da nyid la sngags la sogs pa brjod pa'i sgo nas mchod pa bsten nas/da ni phyi rol gyi lha la mchod pa dgag pa bstan pa'i phyir ro/ /phyi rol lha la phyag mi bya/ /zhes bya ba la sogs pa gsungs te/ bcos ma nyid kyi phyir ro/ /rdo shing sa yi rang bzhin gyis/ /zhes bya ba ni go sla'o/ /de ltar rang gi ngo bo bstan nas da ni de'i rgyu mtshan bstan pa'i phyir/bdag la byin rlabs sgrib pa med/ /ces gsungs te/ sgyu ma lta bu'i ting nge 'dzin ni ma gtogs pa las so/ /gzhan zhes bya ba ni tha dad pa'o/ /de kho na nyid ces bya ba ni mchod bya'i ngo bo'o/ /srid pa gsum na zhes bya ba ni 'dod pa la sogs pa'o/ /sa gsum gyi mtshan nyid can no/ /med ces bya ba ni yod pa ma yin pa'o//bdag la byin gyis brlabs pa nyid la 'dis mchod bya nyid du brjod do/ /byang chub sems dpa' sa bcu'i dbang phyug sngags kyi sgo'i spyad pa spyod pa po rnams la brten nas 'di brjod pa yin te/ gzhan du na rgyang pan pa ltar med pa por blta ba nyid kyis dge ba'i rtsa ba chad par 'gyur ro//rjes su 'gro ba'i sgo nas de nyid ces bya ba gsungs te/ rang byin gyis brlabs pa'i ngo bo'o/ /rnal 'byor mchog ces bya ba ni khyad par can gyi mchod pa'i snod do/ /bdag la byin rlab pa zhes bya ba ni sgyu ma lta bu'i ting nge 'dzin gyi mchog nyid can no/ /rnyog pa med ces bya ni bden pa'i rnam par rtog pa rnams kyis ma gos pa'o//de ltar de'i rgyu mtshan brjod nas/ da ni phyi rol gyi sngags kyi bzlas pa la sogs pa dgag pa'i phyir/ phyi yi dngos po mi bgrong ste/ /zhes bya ba la sogs pa gsungs te/ bris sku la sogs pa lha'i gzugs la dmigs pa de brtan pa'i don du/phyi rol gyi dngos po sbyin sreg la sogs pa byed pa'i dus su bgrang bar mi bya'o/ /yang na phyi rol gyi dngos po lha'i rnam pa dngos po mnyam du mi bgrang ba ni/ sems la dngos po nyid kyis mi bya'o/ /sngags dang phyag rgya'i rim pa la sogs zhes bya ba ni de yang ston bzhin du bgrang bar mi bya'o//dngos po nyid du dgag par mi bya ste/ de bcos ma nyid kyi phyir ro/ /de ltar phyi rol gyi sngags kyi bzlas pa la sogs pa dgag pa bstan nas/ da ni rang byin gyis brlabs pa'i gdams ngag la gdon mi za bar btsal bar bya ba nyid brjod pa'i phyir/ byin gyis brlab par bya zhes gsungs te/bdag byin gyis brlabs pa'i mtshan nyid btsal bar bya'o zhes bya ba dang 'brel to/ /gang las she na/ de'i phyir de nyid thob pa'i rnal 'byor dang rnal 'byor ma las zhes gsungs te/ de nyid thob pa'i rnal 'byor dang rnal 'byor ma'i zhal las shes par bya zhes bya ba'i don to/ /ji lta bu zhe na/de'i phyir mchog ces gsungs te/ bden pa la mngon par zhen pa'i gnyen po nyid yin pa'i phyir ro/ /'bad pas zhes bya ba ni brtson 'grus brtan pas so/ /gzhan yang ji lta bus byin gyis brlab ce na/ de'i phyir bdag byin rlabs thob pa'i mtshan nyid do zhes bya ba gsungs te/ sgyu ma lta bu'i ting nge 'dzin ni thob pa'i mtshan nyid can zhes bya ba'i don to//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa zab mo'i don shin tu gsal bar byed pa zhes bya ba las/ le'u nyi shu rtsa drug pa'i rgya cher bshad pa'o// //de ltar le'u nyi shu rtsa drug pas/lus la lha zhes pa'i mtshan nyid kyi yul la dri ba'i lan bstan nas/ da ni lha'i 'khor lo'i yul la dri ba'i lan brjod pa'i phyir/ le'u nyi shu rtsa bdun pa nye bar 'god cing / dang por re zhig de rtsom pa ni/ de rnams kun gyi ming zhes bya ba la sogs pa gsungs te/ de rnams zhes bya ba ni lus la gnas pa rnams pa'o//ming zhes bya ba ni ming gi ngo bo rnams so/ /bshad par bya zhes bya ba ni brjod par bya ba'o/ /lha mo yis zhes bya ba ni rigs lngas bsdus pa 'chad par 'gyur ba rnams so/ /de nas gzhan yang zhes bya ba ni le'u nyi shu rtsa drug pa'i rjes la'o/ /ji ltar zhe na/ de'i phyir/ 'khor lo bzhi yi dbye ba yis/ /zhes bya ba gsungs te/ sprul pa la sogs pa'i 'khor lo bzhi'i rab tu dbye bas so/ /rtsa yi rnam pa'i grangs kyi ni/ /zhes bya ba ni rtsa rnams ni drug cu rtsa bzhi dang / brgyad dang bcu drug dang sum cu rtsa gnyis kyi ngo bo rnams kyi'o/ /grangs kyis ni zhes bya ba ni grangs kyi rim pas so//de ltar de'i rtsom pa bstan nas/ de ni de'i 'khor lo dngos su bshad pa brjod pa'i phyir/ de'i yan lag rigs rnam pa lnga'i rnam par gzhag pa ni las dang zhes bya ba la sogs pa gsungs te/ las kyi sgras ni bya ba grub pa'i ye shes rnam par dag pa'i ngo bo don yod grub pa'i rigs so//rdo rje'i sgras ni shin tu rnam par dag pa'i chos kyi dbyings kyi rang bzhin mi bskyod pa'i rigs so/ /de bzhin pad ces bya ba ni so sor rtog pa'i ye shes kyi rang bzhin snang ba mtha' yas kyi rigs so/ /'khor lo rnams kyi zhes bya ba 'dis ni 'khor lo'i sgras ni/me long lta bu'i ye shes kyi ngo bo rnam par snang mdzad kyi rigs so/ /dbye ba yis zhes bya ba ni de'i rab tu dbye bas so/ /rigs bzhi yi ni dbye ba yis/ /zhes bya ba ni don yod grub pa la sogs pa rigs bzhi'i dbye bas so/ /rtsa'i zhes bya ba ni 'khor lo bzhir rtogs pa rnams so/ / yang dag gnas zhes bya ba ni rim pas gnas pa'o/ /gal te de ltar yin na rigs bzhi dang 'khor lo bzhi'i dbye bas gsungs te/ rigs lnga pa gang du gsungs she na/ de'i phyir rigs ni lnga pa yang zhes bya ba gsungs te/ rigs lnga pa zhes bya ba ni rin chen 'byung ldan gyi rigs so/ /'dir ni zhes bya ba ni 'khor lo bzhi pa rnams la'o//thams cad kyi ni khongs na 'dod/ /ces bya ba ni 'khor lo bzhi po yang zhes bya ba'i don to/ /de gang yin zhe na/ de'i phyir/ tshor ba nyams su myong ba'i dngos/ /zhes gsungs te/ bde ba la sogs pa'i tshor ba nyams su myong ba'i rnam pa ste/ tshor ba thams cad la mnyam pa nyid kyis rin chen 'byung ldan gyi ngo bo ste/bsod nams kyi tshogs med par sangs rgyas bzhi po 'byung ba mi 'thad pa'i phyir ro/ /rin chen 'byung ldan gyi rigs ni bsod nams kyi bdag nyid can te/ sbyin pa'i pha rol tu phyin pa rnam par dag pa nyid kyi phyir ro/ /de nyid kyi phyir/de nyid mchog tu rtogs par byed/ /ces bya ba gsungs so/ /bsod nams kyi tshogs la brten nas/ de nyid kyi mchog la shes rab kyi pha rol tu phyin pa'i rnam pa mi dmigs pa'i bdag nyid can du rtogs pa'i phyir ro/ /yang na rigs lnga pa zhes bya ba ni rin chen 'byung ldan gyi rnam pa nyid do//'dir ni zhes bya ba ni sngon bzhin 'khor lo bzhi po la'o/ /thams cad kyi khongs na 'dod ces bya ba ni rten yin pa'i phyir 'khor lo bzhi po rnams la yang khyab par byed pa'o/ /tshor ba nyams su myong ba zhes bya ba ni tshor ba ma lus pa nye bar sdud pa'i ngo bo nyams su myong ba'i rnam pa don dam pa'i byang chub kyi sems kyi ngo bo'o//de nyid mchog tu rtogs par byed/ /ces bya ba ni rgyu gnyis bzlog pa'i bdag nyid do zhes bya ba'i don to/ /de ltar rigs lnga'i rnam par gzhag pa bstan nas/ 'khor lo bzhi po'i lha brjod pa'i phyir de'i yan lag tu sprul pa'i 'khor lo lha brjod pa mdor bstan pa'i phyir/sprul pa'i 'khor lo zhes bya ba la sogs pa gsungs te/ las kyi rigs las skyes zhes bya ba ni don yod grub pa'i rigs can te/ bsgrub bya dang sgrub byed kyi mtshan nyid can las kyi ngo bo nyid kyi phyir ro/ /lha mo zhes bya ba ni 'chad bzhin pa rnams so/ /'di dag gnas zhes bya ba ni rigs pa 'dis ni de ma thag par bshad par bya ba rnams so//rig ma gtum mo dpa' bo dang / /zhes bya ba la sogs pa ste/ 'di rnams la yang ye shes kyi me'i ngo bo nyid kyis ji ltar srid par don brjod par bya'o/ /lhag ma rnams ni mdo ji lta ba bzhin no/ /de ltar mdor bstan pa bshad nas/da ni rgyas par bstan pa bshad pa'i phyir/ rtag tu brgyad brgyad spel ba'i grangs/ /zhes bya ba gsungs te/ lha mo drug cu rtsa bzhi'i dbye bas zhes bya ba'i don to/ /de ltar rgyas par bshad pa bstan nas/ da ni zhal dang phyag la sogs pa'i rnam par gzhag pa bshad pa'i phyir/ zhal gsum zhes bya ba la sogs pa gsungs te/lus ngag yid gsum rnam par dag pas so/ /phyag drug gis ni 'bar zhes bya ba ni yan lag drug gi rnam par dag pas so/ /rigs kyi phyag rgya'i dbye ba yis/ /zhes bya ba ni rang gi bdag po'i rigs kyi phyag rgya'i dbye bas kha dog lnga'i rang bzhin gyis so/ / phyag mtshan rnams kyis zhes bya ba ni phyag mtshan rnams kyi'o/ /yang dag brgyan zhes bya ba ni rnam par klubs pa'o/ /de nyid kyi phyir g.yas zhes bya ba gsungs te/ g.yas zhes bya ba ni g.yas pa'i sna tshogs rdo rje'o/ /de ma thag par gsungs pa'i tshor ba la sogs pa'i lha rnams ni'o/ /g.yon pa 'gying pa ut+pal//zhes bya ba ni 'gying ba'i ut+pa la'o/ /g.yas na 'khor lo rin chen dang / /zhes bya ba ni gnyis pa dang gsum pa'i g.yas pa na'o/ /de bzhin ral gri chos 'byung ni/ /g.yon gyi phyag gnyis pa na 'gyur/ /zhes bya ba la g.yon gyi phyag gnyis la'o//'gyur zhes bya ba ni yod pa'o/ /'di rnams kyi yang rim pa ji lta ba bzhin du gzhan gyi don byed pa nyid dang 'dod chags la sogs pas ma gos pa nyid dang / bsam pa ji lta bar chos kyi 'khor lo bskor ba nyid dang / bsam pa thams cad rdzogs par byed pa nyid dang / nyon mongs pa gcod par byed pa dang /lam la gnas par byed pa nyid dang / bde ba chen po nyams su myong bar byed pa'i ngo bo nyid kyi phyir rnam par dag pa bshad par bya'o/ /gzhan yang / sems dpa'i skyil krung gis legs bzhugs/ /zhes bya ba ni kun rdzob dang don dam pa rnam par dag pa'i tha mi dad pas so/ / spyan gsum pa zhes bya ba ni rtsa gsum gyi rnam par dag pa'am/ srid pa gsum yongs su shes pas so/ /zhal ni ljang gu zhes bya ba ni don yod grub pa'i rigs nyid kyi phyir ro/ /don yod grub pas cod pan can/ /zhes bya ba ni rang gi rigs nyid kyi phyir ro/ /bsgom par bya ba ni yi ge drug cu rtsa bzhi yongs su gyur pa las bsgom par bya ba'o//zhal rnams bzhad pa zhes bya ba ni nye bar zhi ba'i ngo bo gcig pa'i phyir dang / kun rdzob kyi chos la rnam par blta bar ngo mtshar ba dang bcas pa'i phyir ro/ /bde ba thams cad 'phel bar mdzad/ /ces bya ba ni bde ba chen po la dga' ba'i phyir ro/ /de ltar zhal dang phyag la sogs pa'i rnam par gzhag pa bstan nas/da ni sngags btu ba'i sgo nas mchod pa bya ba nyid bshad pa ni/ rang gi ming gi dbye ba yis/ /zhes bya ba gsungs te/ rang gi ming gi be d+ha ni dang tsaN+Di ka la sogs pa'i ngo bos so/ /yi ge gsum dang zhes bya ba ni/ oM AHhUM gi yi ge'i bdag nyid can gyis so//rnam par spel zhes bya ba ni thog ma dang bar dang tha ma rnams su'o/ /de ltar na/ oM bed+ha ni AHhUM zhes bya ba la sogs par 'gyur ro/ /sngags kyis kyang ni yang dag mchod/ /ces bya ba ni de ma thag par btus pas so/ /yang dag par zhes bya ba ni zhen pa med pa'i sbyor bas so//mchod ces bya ba ni brjod par bya'o/ /'dod pa de nyid rab gsal mdzad/ /ces bya ba ni 'dod pa'i sgo gzugs la sogs par nye bar longs spyod pa'i mtshan nyid kyis de kho na nyid ni sangs rgyas kyi mtshan nyid can la'o/ /rab gsal mdzad ces bya ba ni skyed par byed par mdzad pa'o/ /de ltar don rnam pa bzhis sprul pa'i 'khor lo'i lha rnams bstan nas/da ni chos kyi 'khor lo'i lha rnams brjod pa'i phyir/ de'i yan lag mdor bstan pa ni/ chos kyi 'khor lo zhes bya ba la sogs pa gsungs te/ snying ga'i gnas su'o/ /rtsa brgyad dbus zhes bya ba ni brgya rtsa brgyad po rnams ni rin po che la sogs pa rnams kyi nang du'o//lha mo 'di dag ces bya ba ni 'chad bzhin pa'i rigs pas so/ /yang dag bzhugs zhes bya ba ni rnam par gnas pa'o/ /de ltar mdor bstan pa bshad nas/ da ni rgyas par bshad pa bstan pa'i phyir/ rdo rje dbyings kyi dbang phyug ces bya ba gsungs te/ phung po dang khams kyi rnam par rtog pa spong bar byed pa po dang bstan nas so sor nges pa'i tshig tu bya ste/gzhan rnams ni mdo ji lta ba bzhin no/ /shes par bya zhes bya ba ni sngon du bsten pa'i rigs pas bsten par bya'o/ /chos kyi 'khor lo zhes bya ba ni snying ga'i gnas su'o/ /dgu bdag nyid ces bya ba ni rtsa dgu'i bdag nyid can la dbus kyi lte ba'i ze'u 'bru brjod par 'dod pas so//de ltar rgyas par bshad pa bstan nas/ da ni zhal dang phyag la sogs pa'i rnam par gzhag pa brjod pa'i phyir/ zhal gsum zhes bya ba la sogs pa gsungs te/ sngon bzhin du'o/ /rdo rje 'khor lo zhes bya ba la sogs pa ste/g.yas pa'i phyag rnams la phyag mtshan gsum 'dzin par byed pa ste/ blang dor gnyis kyi ye shes dang chos kyi 'khor lo bskor ba dang / bsam pa thams cad yongs su rdzogs par byed pa'i rnam par dag pas so/ /g.yon pa rnams la ral gri dang pad+ma dang dril bu rnams te/rim pa ji lta ba bzhin du nyon mongs pa gcod par byed pa nyid dang / 'dod chags la sogs pa'i skyon gyis ma gos pa nyid dang / shes rab kyi pha rol tu phyin pa rnam par dag pas so/ /'dzin pa zhes bya ba ni mdzes pa'o/ /bla na med ces bya ba ni bla na med pa'i de kho na nyid mngon du byed pa'i rgyur gyur pa'i phyir ro//spyan gsum pa zhes bya ba ni rtsa gsum pa'am srid pa gsum yongs su shes pas so/ /zhal thams cad dang yan lag gis te/ byams pa'i rnam par dag pas so/ /zhal gyi mche ba cung zad gtsigs/ /zhes bya ba ni sgeg pa'i khro bo nyid kyi phyir ro//de ltar zhal dang phyag gi dbye ba'i rnam par gzhag pa bstan nas/ da ni sngags btu ba'i sgo nas mchod par bya ba nyid ni/ rang ming zhes bya ba la sogs pa gsungs te/ badzra d+hA twI shwa ri la sogs pa'o/ /yi ge gsum dang bcas zhes bya ba ni yi ge gsum dang ldan pa'i thog ma bar dang tha ma rnams la'o//de ltar oM badzra d+hA twI shwa ri hUM zhes bya ba la sogs par 'gyur ro/ /sngags kyis zhes bya ba ni de lta bu'o/ /de dag ces bya ba ni rdo rje dbyings kyi dbang phyug ma la sogs pa rnams brgyad do/ /rab tu mchod ces bya ba ni mi dmigs pa'i rnam pas so/ /de ltar don rnam pa bzhis chos kyi 'khor lo'i lha brjod pa bstan nas/da ni longs spyod kyi 'khor lo la de brjod pa'i phyir/ mdor bstan pa ni longs spyod ces bya ba la sogs pa gsungs te/ 'dab ma bcu drug la zhes bya ba ni de'i grangs can gyi rtsa'i bdag nyid can rnams la'o/ /pad+ma'i dbus na zhes bya ba ni rtsa'i pad+ma'i dbus su'o//lha rnams gnas zhes bya ba ni 'chad bzhin pa'i pad+ma'i sgrol ma la sogs pa rnams so/ /de ltar mdor bstan pa bshad nas/ da ni rgyas par bshad pa brjod pa'i phyir/ pad+ma'i sgrol ma dang zhes bya ba la sogs pa gsungs te/ dbyangs yig mnyam pa dang yi ge dang 'dra ba dang / thung ngu dang ring po dang /ming can dang mtshams kyi yi ge dang / thig le dang tsheg drag dang ro drug dang de mi dmigs pa'i ngo bo nyid kyis nges pa'i tshig rim pa ji lta ba bzhin du brjod par bya'o/ /de ltar 'di ni yang dag bshad/ /ces bya ba ni pad+ma'i sgrol ma la sogs pa gsungs pa rnams so/ /de ltar rgyas par bshad pa bstan nas/zhal dang phyag la sogs pa'i rnam par gzhag pa ni zhal gsum zhes bya ba la sogs pa gsungs te/ snga ma bzhin no/ /g.yas ni pad+ma zhes bya ba ni gsum po la rim pa ji lta ba bzhin du 'dod chags la sogs pa'i rnam par dag pa dang / chos kyi 'khor lo rab tu bskor ba dang /ye shes lnga'i rnam par dag pa gsungs so/ /g.yon nas ral gri zhes bya ba ni nyon mongs pa gcod par byed pa'i lam rnam par dag pa dang / shes rab kyi pha rol tu phyin pa dang re ba thams cad yongs su rdzogs par byed pa nyid kyis so/ /pad+ma dmar po yi ni mdog /ces bya ba ni mdog dmar po ste snang ba mtha' yas kyi rigs nyid kyi phyir te shin tu 'bar ba nyid kyi phyir ro//sems dpa'i skyil mo krung gis zhes bya ba'i don ni bshad zin to/ /nyi ma'i dkyil 'khor zhes bya ba ni rnam par rtog pa'i gnyen po nyid kyis sred par byed pa nyid kyi phyir ro/ /de ltar zhal dang phyag la sogs pa'i rnam par gzhag pa bstan nas/da ni sngags btu ba'i sgo nas mchod pa'i nges pa brjod pa'i phyir rang ming zhes bya ba la sogs pa gsungs te/ rang gi ming dang pad+ma tA ra zhes bya ba la sogs pa'o/ /'di rnams sngags ni bla na med/ /ces bya ba ni thog ma bar dang tha ma rnams la yi ge gsum pa'o//de ltar na pad+ma tA ra AHhUM zhes bya bar 'gyur ro/ /de ltar don rnam pa bzhis longs spyod kyi 'khor lo'i lha mo bstan nas/ da ni bde ba chen po'i 'khor lo de'i mdor bstan pa bshad pa'i phyir/ bde ba chen po'i 'khor lo cher/ /zhes bya ba gsungs te/ mgo bo la'o//pad 'dab sum cu rtsa gnyis la/ /zhes bya ba ni 'dab ma sum cu rtsa gnyis pa can la'o/ /lha mo rnams ni bzhugs zhes bya ba ni 'khor lo'i shugs can ma la sogs pa rnams so/ /rtag tu zhes bya ba ni dus thams cad du'o/ /rab tu sad pa zhes bya ba ni snying ga 'byed par byed pa'o/ / khams 'bab pa can zhes bya ba ni byang chub kyi sems 'dzag pa can no/ /de ltar mdor bstan pa bshad nas/ da ni rgyas par bshad pa brjod pa'i phyir/ 'khor lo'i shugs can ma zhes bya ba gsungs te/ 'khor lo ni dkyil 'khor gyi 'khor lo'i dbus so/ /gtso bo nyid kyi shugs gang la yod pa de la de skad ces bya'o//'dis ni mdor bsdus nas dkyil 'khor gyi 'khor lo rnam par nges pa'i tshig tu bya'o/ /lhag ma ni mdo ji lta ba bzhin no/ /de ltar sa yi dbus nas shar/ /zhes bya ba la de rnams ni rim pa'i rigs la sogs pa rnams kyi nang du'o/ /shar ba ni brjod pa'o/ /de ltar rgyas par bshad pa bstan nas/zhal dang phyag gi rnam par gzhag pa ni/ slar yang lha mo zhal gsum dang / /zhes bya ba gsungs te/ snga ma bzhin no/ /bde ba 'phel ba can zhes bya ba ni bde ba chen po kha 'byed pa nyid kyi phyir ro/ /zla ba'i dkyil 'khor la ni bzhugs/ /zhes bya ba ni byang chub sems kyi zla ba la'o//pad+ma dkar po'i mdog can zhes bya ba ni rnam par snang mdzad kyi rigs nyid kyi phyir ro/ /zhi ba'i zhal zhes bya ba ni nye bar zhi ba'i rnam pa ste/ gti mug gi rnam par dag pas so/ /spyan gsum pa zhes bya ba ni snga ma bzhin du'o/ /'khor lo lcags kyu rdo rje'i rim/ /zhes bya ba ni chos kyi 'khor lo bskor ba dang /sems can gyi don bya ba la dgug pa dang / ye shes lnga'i rnam par dag pa rim pa ji lta ba bzhin no/ /g.yas pa zhes bya ba ni g.yas pa'i gsum po rnams la'o/ /bsnams pa ni zhes bya ba ni 'dzin pa'o/ /de bzhin g.yon pa'i phyag gsum la/ /zhes bya ba ni pad+ma zhags pa rin po che bsnams so//pad+ma dang zhags pa dang yid bzhin gyi nor bu rnams ni/ 'dod chags la sogs pas ma gos pa dang / snying rje chen po dang / bsam pa thams cad yongs su rdzogs par byed pa'i rnam par dag pa'o/ /'chang zhes bya ba ni sgeg pa dang bcas par mdzad nas so//sgeg pa zhes bya ba ni sgeg pa'i nyams gtso bor mdzad nas so/ /rnam par snang mdzad ces bya ba ni rang gi bdag po'o/ /spyi bor 'chang zhes bya ba ni spyi bor 'dzin pa ste/ rgyas gdab pa'i don du'o/ /pad+ma dkar po 'dra ba'i 'od/ /ces bya ba ni 'od dkar po'o/ /de ltar zhal dang phyag la sogs pa'i rnam par gzhag pa bstan nas/da ni sngags btu ba'i sgo nas mchod pa'i nges pa brjod pa'i phyir/ rang gi ming yang zhes bya ba la sogs pa gsungs te/ tsakra be ga la sogs pa ste/ yi ge gsum nyid ces bya ba ni thog ma dang bar dang tha mar ro/ /de ltar na oM tsakra be ge AHhUM zhes bya bar 'gyur ro//'di dag sngags ni zhes bya ba ni de ma thag par bstan pa'i lhag ma rnams kyi'o/ /go rims bzhin zhes bya ba ni rim pas zhes bya ba'i don to/ /rab tu gsal zhes bya ba ni pad+mar mdzad pa'o/ /de nyid mchog ni zhes bya ba ni lha'i snying po nyid kyi phyir ro/ /ska zhes bya ba la sogs pa ni/ sku la sogs pa gsum po rnam par dag pa'i ngo bo rnams kyi sdom pa ni/bde ba mchog ces bya ba'i don to/ /de ltar don rnam pa bzhis bde ba chen po'i 'khor lo brjod pa bstan nas/ da ni nye bar bsdu ba'i sgo nas de'i mchod pa'i nges pa brjod pa'i phyir de'i yan lag gi ngo bo ni/ de lta bu yi gsang ba'i mchog /ces bya ba gsungs te/ 'khor lo bzhi po lha rnams dgod pa ste/ dam tshig dang mi ldan pa rnams la sba bar bya ba nyid kyi phyir ro/ /lha mo rnams kyi de nyid ces bya ba ni 'od gsal ba nyid kyi ngo bo'o/ /mchog ces bya ba ni ye shes kyi rang bzhin nyid kyi phyir ro/ /gnyid log nas zhes bya ba ni rtsa rnams kyi nang du mi gsal bas gnas pa'o//rtag tu lus kyis zhes bya ba ni dus thams cad du lus la'o/ /'dod pa lnga yi longs spyod bstan/ /mchod pa nyid kyis zhes bya ba ni khyad par du 'phags pa'i gzugs la sogs pa'i yul gyi mchod pa byas nas so/ /rdo rje sems dpa'i go 'phang mchog /mnyes nas slar yang gsol bar byed/ /ces bya ba dang 'brel to/ /gzhan yang ci zhig byas nas she na/ de'i phyir mnyes par byas nas zhes bya ba gsungs te/ yul rnams bstan par bya ba nyid kyis so/ /de nyid kyi phyir/ rdo rje pad+ma'i bde bas myos/ /zhes gsungs te/dbang po gnyis yang dag par sbyar bas so/ /mnyes nas zhes bya ba ni mchog tu dga' ba nyid kyi phyir ro/ /gsol bar byed ces bya ba ni ster bar byed pa'o/ /rdo rje sems dpa'i go 'phang zhes bya ba ni rdo rje 'chang chen po'i ngo bo'o/ /mchog ces bya ba ni bla na med pa nyid kyi phyir ro/ / de ltar yang dag par rang gi ngo bo bstan nas/ da ni de'i mchod pa po 'jig rten pa'i dngos grub 'grub par brjod pa'i phyir/ de'i zhi sogs zhes bya ba gsungs te/ zhi ba dang rgyas pa la sogs pa'i las rnams so/ /de'i zhes bya ba ni 'khor lo bzhi po rnams la lha'i rnam pa sgom pa la'o/ / 'grub 'gyur zhes bya ba ni 'grub par 'gyur ba'o/ /'di la the tshom med ces bya ba ni bcom ldan 'das kyis gnang ba'i phyir zhes bya ba'i don to/ /de ltar de mchod pa las 'jig rten pa'i dngos grub 'grub par 'gyur ba bstan nas/ da ni lha'i 'khor lo la bla ma'i man ngag las/ rtogs par bya ba nyid kyi phyir/bsam gtan rnal 'byor sogs spyod dang / /zhes bya ba gsungs te/ ting nge 'dzin gyi rnal 'byor gyi rtogs pa rdo rje dang zla ba la sogs pa'i ngo bo'o/ /sngags dang dbyibs sogs zhes bya ba ni sa bon gyi yi ge bsgom pa la sogs pa'i bya ba mi dgos pa'o/ /rdzogs pa'i rim pa de lta bur gyur pa'i skabs med pa'i phyir ro//mchog tu cung zad ni bla ma'i lung la ste/ rdo rje slob dpon gyi gnang ba las so/ /yang dag bskyed ces bya ba ni/ /lha'i 'khor lo yul can gyi/ /yongs su shes pa 'byung bar 'gyur/ /zhes bya ba'i don to/ /de'i phyir zhes bya ba la sogs pa ni/ gang gi phyir bla ma'i zhal las de'i yul la yongs su shes pa skye ba de'i phyir ro/ /rdo rje slob dpon ni de kho na nyid bcu yongs su shes pa ste/ thos pa la sogs pa'i lam la gnas pa'o/ /'bad pas zhes bya ba ni rnyed pa dang bskur sti la sogs pa'i byed pa khyad par can gyi brtson 'grus kyis so/ /mnyes bya zhes bya ba ni mnyes par bya ba'o//dngos po thams cad ces bya ba ni mkho ba'i yo byad thams cad kyis so/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u nyi shu rtsa bdun pa'i rgya cher bshad pa'o// //de ltar le'u nyi shu rtsa bdun pas lha'i 'khor lo'i yul la dri ba'i lan bstan nas/ da ni rtsa rnams 'char ba dang nub pa'i yul la dri ba'i lan bstan pa'i phyir/ le'u nyi shu rtsa brgyad pa nye bar dgod cing dang por re zhig de'i rtsom pa ni/ de nas zhes bya ba la sogs pa gsungs te/le'u nyi shu rtsa bdun pa bshad pa'i rjes la'o/ /gzhan yang zhes bya ba ni snga ma bzhin no/ /rtsa rnams kyis ni zhes bya ba ni 'khor lo bzhir gtogs pa thams cad kyis so/ /'char dang nub pa'i mtshan nyid ni/ /bshad par bya zhes bya ba dang 'brel to/ /mchog ces bya ba ni bskyed pa'i rim pa la ltos nas/mtshan nyid kyi phyir ro/ /rnal 'byor zhes bya ba ni sems mnyam par gzhag pa dang / rjes su mthun pa'i phyir ro/ /dngos grub thams cad kyi ni gnas/ /zhes bya ba ni 'jig rten dang 'jig rten las 'das pa'i dngos grub ma lus pa thams cad kyi gzhi yin pa'i phyir gnas so/ / de ltar de rtsom pa bstan nas/ da ni dngos su bshad pa'i phyir de'i yan lag rtsa rnams kyi 'char ba'i rgyu rang gi ngo bo ni/ mdun na gnas pa'i zhes bya ba la sogs pa gsungs te/ nye ba'i yul na gnas pa'o/ /yul rnams las zhes bya ba ni/ sngon po la sogs pa'i ngo bo las so/ /yid la byed pa zhes bya ba ni de ma thag pa'i rkyen gyi ngo bo las so//der ni 'gro zhes bya ba ni yul la mngon par phyog pa las so/ /dbugs ni nang du bsdus pa las/ /zhes bya ba ni rlung rnam par shes pa dang yang dag par ldan pa'o/ /nang du bsdus zhes bya ba ni tshogs pa'i nang du zhugs pas so/ /'byung ba zhes bya ba ni skye bar 'gyur ba'o//dbang po zhes bya ba ni yul 'dzin par byed pa'i mig la sogs pa rnams so/ /de yis zhes bya ba ni mig la sogs pa'i dbang po rnams kyis so/ /rab tu sad ces bya ba ni yang dag par sad par byed pa'o/ /de rnams zhes bya ba ni 'khor lo bzhir gnas pa'i rtsa rnams kyi'o//rim pa bzhin gnas zhes bya ba ni ji ltar gnas pa'i ngo bos gnas pa'o/ /de ltar rang gi ngo bo bstan nas/ da ni de'i 'char ba la lha mo 'char ba brjod pa'i phyir/ rab sad ces bya ba la sogs pa gsungs te/ rtsa rnams ni sngar bshad pa'i rigs pas rab tu sad pa las so/ /rab sad lha mo zhes bya ba ni rtsa'i nang du gtogs pa'i rig ma la sogs pa rnams so//rang rang 'khor lo zhes bya ba ni rang rang gi sprul pa la sogs pa'i 'khor lo las so/ /de ni 'char ba'i rim par gsungs/ /zhes bya ba ni de ma thag par gsungs pa'i rigs pas bshad pa'o/ /de ltar rnam pa gnyis kyis rtsa rnams kyi 'char ba'i rgyu bstan nas/da ni de rnams kyi nub pa'i rgyu bstan par bya ba'i phyir/ de'i yan lag tu/ rang gi ngo bo nub pa yang ni zhes bya ba la sogs pa gsungs te/ rtsa rnams kyis rab tu sad pa ma yin pa'i gnas skabs so/ /bshad par bya zhes bya ba ni brjod par bya ba'o/ /yul rnams kyang ni dngos po med//ces bya ba ni sngon po la sogs pa'i ring ba nyid kyis so/ /yid la byed pas zhes bya ba ni sngon po la sogs pa'i yul can las so/ /gzhan du song zhes bya ba ni yul gzhan la mngon par phyogs pas so/ /bag chags rnams ni zhes bya ba ni chags pa dang chags bral gyi ngo bo las so/ / sad pa dang zhes bya ba ni bskum pa med pa'o/ /rtsa rnams zhes bya ba ni 'khor lor gtogs pa rnams so/ /'char bar mi 'gyur zhes bya ba ni nub pa nyid du 'gyur zhes bya ba'i don to/ /de ltar rang gi ngo bo bshad nas/ da ni nub pa la lha rnams nub pa bstan pa'i phyir/ lha rnams yang dag ces bya ba la sogs pa gsungs te/rtsa la yang dag par gnas pa'i rnams la'o/ /yang dag sad pa ni zhes bya ba ni rab tu sad pa'o/ /de'i phyir ni zhes bya ba ni rtsa rnams rab tu sad pa las so/ /mi 'gyur nyid ces bya ba ni 'byung bar mi 'gyur ba zhes bya ba'i don to/ /de ltar rnam pa gnyis kyis de rnams nyid la nub pa'i rgyu bstan nas/de sad pas lha rnams sad par 'gyur bar brjod pa'i phyir/ de'i yan lag tu lha mo rnams sad pa'i rgyu ni/ snying gi dbus gnas zhes bya ba la sogs pa gsungs te/ snying ga'i nang du ngo bo nyid kyis gnas pa'o/ /gang zhe na/ de'i phyir/ sangs rgyas nyi ma gsal ba'i 'od//ces bya ba gsungs te/ rang bzhin gyis rnam par dag pa la ltos nas sangs rgyas nyi ma'o/ /gsal ba'i 'od ces bya ba ni 'chad bzhin pa'i rim pas/ 'od zer gyi tshogs spro ba'i ngo bo dang / rang bzhin gyis 'od gsal ba'i rnam pa can no/ /gzung dang zhes bya ba ni sangs rgyas nyi ma de gzung dang 'dzin pa'i ngo bo ni yul dang yul can gyi ngo bo rnams so//'od zer bcu gnyis te zhes bya ba ni zla ba bcu gnyis kyi rnam pa dag pas gnas pa zhes bya ba'i lhag ma'o/ /de rnams gang zhe na/ de'i phyir 'od 'phel zhes bya ba la sogs pa gsungs te/ mig ni dbang po la brten pa'o/ /'od 'phel zhes bya ba ni 'od gsal te rna ba'i dbang po la brten pa'o//'bar ma zhes bya ba ni gzi brjid dang ldan ma ste/ snang ba'i dbang po la brten pa'o/ /gsal ba zhes bya ba ni mun pa 'joms par byed pa ste/ lce'i dbang po la brten pa'o/ /'od ces bya ba ni 'od kyi ngo bo ste lus kyi dbang po la brten pa'o/ /dmar mo zhes bya ba ni dmar ba mig gsal ba ste/yid kyi dbang po la brten pa'o/ /de rnams ji lta bu zhe na/ de'i phyir/ phyi rol gzugs la sogs 'dzin pa/ /zhes bya ba gsungs te/ phyi rol gyi gzugs la sogs pa drug po 'dzin par byed pa'o/ /de nyid kyi phyir mig la sogs pa la brten nas zhes gsungs te/ dbang po drug la brten nas zhes bya ba'i don to//'od zer byed ces bya ba ni yul gzugs la brten pa'i de nyid gsal ba'i rang bzhin no/ /'od zer zhes bya ba ni sgra la brten pa'o/ /snang ba zhes bya ba ni dri la brten pa'o/ /'dod ma zhes bya ba ni ro la brten pa'o/ /'od zer zhes bya ba ni reg bya la brten pa'o//nyi ma zhes bya ba ni chos la brten pa ste/ 'di ni nyi ma'o snyam du byas nas so/ /'di rnams ni/ phyi rol gzugs sogs rnam pa'o/ /zhes bya ba ni yul drug la brten pa'o/ /drug po 'di dag 'od du 'dod/ /ces bya ba ni yul gyis bsdus pa gzung ba'i ngo bo'o/ /'dod ces bya ba ni brjod pa'o/ /de ltar lha mo rnams sad pa'i rgyu brjod nas/de sad par byed pa la lha mo rnams sad pa rang gi ngo bo brjod pa'i phyir ro/ /lha mo rnams gang shar ba la/ /zhes bya ba la sogs pa gsungs te/ rtsa'i 'khor lor gnas pa rnams kyi'o/ /gang las she na/ de'i phyir/ ye shes nyi ma 'char ba yin/ /zhes gsungs te/ 'od zer bcu gnyis kyi grogs dang ldan pa'i snying gar gnas pa'i/ sangs rgyas nyi ma sad pa las/ /zhes bya ba'i don to/ /de dag yang dag nub pa ni/ /zhes bya ba ni lha rnams la'o/ /yang dag ces bya ba ni phyin ci ma log pa'o/ /de'i zhes bya ba ni sangs rgyas kyi nyi ma la'o/ /nub pa'o zhes bya ba ni dbang po dang yul gyi snying po kun du spyod pa la/ mi gnas pa las 'byung bar 'gyur//zhes bya ba'i don to/ /ji lta bu zhe na/ de'i phyir mchog tu zhes gsungs te/ khyad par du 'phags pa'i go 'phang gi rgyur gyur pa'o/ /de ltar rang gi ngo bo bstan nas/ da ni 'char ba dang nub pa spangs pas de kho na nyid yongs su shes pa bstan pa'i phyir/ 'char ba nub pa rnams 'chad pa/ /zhes bya ba gsungs te/phyogs gnyis po la 'chad pa'o/ /go 'phang mchog tu shes par bya/ /zhes bya ba ni rang bzhin gyi 'od gsal ba'i rnam pa'o/ /phyogs gnyis chad pa yang chos kyi dbyings kyi de kho na nyid bsgoms pas 'byung zhes bya ba'i don to/ /ji lta bu zhe na/ de'i phyir legs par sad ces bya ba gsungs te/ phyogs gnyis spangs pas bskum pa dang rnam par dben pa'i phyir ro/ /rnal 'byor chen po zhes bya ba ni de las gzhan pa bskyed pa'i rim pa la sogs pa'i rnal 'byor gyi mtshan nyid dang bral ba'i phyir ro/ /sangs rgyas nyi ma sdom pa'o/ /zhes bya ba ni de nyid kyi ngo bos so/ /sdom pa ni bsdus pa'i phyir ro/ / de ltar don rnam pa gsum gyis de sad pa la lha mo rnams sad pa bstan nas/ da ni 'char ba dang nub pa dag la/ rgyud gzhan las shes par bya ba dag bstan par bya ba'i phyir/ 'di ni rnal 'byor zhes bya ba la sogs pa gsungs te/ sngon du bstan pa'i rigs pas so/ /rnal 'byor zhes bya ba ni lha mo rnams kyi rnal 'byor de nyid mchog ces bya ba ni/de'i rgyur gyur pa'i phyir ro/ /'char dang nub pa'i mtshan nyid do/ /zhes bya ba ni de ma thag par bshad pa rnams so/ /rdo rje gsal ba'i rjes 'brangs nas/ /zhes bya ba ni rdo rje gsal ba zhes bya ba ni rnal 'byor chen po'i rgyud kyi rjes su 'brangs nas so//shes par bya zhes bya ba ni shes par bya ba'o/ /bla ma'i zhal las zhes bya ba ni ma 'ongs pa'i dus na rdo rje slob dpon gyi zhabs kyi zhal las so/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba/le'u nyi shu rtsa brgyad pa'i rgya cher bshad pa'o// //de ltar le'u nyi shu rtsa brgyad pas rtsa rnams kyi 'char ba dang nub pa'i rnal 'byor gyi yul la dri ba'i lan bstan nas/ da ni skabs su bab pa'i dga' ba bskyed pa'i mtshan nyid can gyi yul la dri ba'i lan bstan pa'i phyir/ le'u nyi shu rtsa dgu pa nye bar 'god cing / dang por re zhig de rtsom pa ni/ de nas zhes bya ba la sogs pa gsungs pa ste/ le'u nyi shu rtsa brgyad pas bshad pa'i rjes la'o/ /gzhan yang zhes bya ba ni snga ma bzhin du'o/ /nyon zhes bya ba ni phyag na rdo rje nyan pa la sbyar ba'o/ /dga' ba bskyed pa'i mtshan nyid ni/ / zhes bya ba ni bshad kyis zhes bya ba dang 'brel to/ /des ci zhig bya zhe na/ de'i phyir gang gis zhes bya ba gsungs te/ dga' ba bskyed pa'i mtshan nyid kyis so/ /yang dag shes pa'i zhes bya ba ni phyin ci ma log pa'i ngo bos so/ /rdo rje sems dpa'i go 'phang mchog /ces bya ba ni de bzhin gshegs pa drug pa'i ngo bo'o//mchog ces bya ba ni bla na med pa'i phyir ro/ /de ltar de'i rtsom pa bstan nas/ da ni de'i dngos grub bshad pa brjod pa'i phyir de'i yan lag gi rten du gyur pa'i mtshams kyi bzhi po la dga' ba bzhi po rnam par gzhag pa'i phyir ro/ /'khor lo drug gi rtsa pad+ma/ /zhes gsungs te/ sprul pa dang / chos dang / longs spyod dang / rlung dang / bde ba chen po'i mtshan nyid can gyi rtsa'i rang bzhin gyi pad+ma drug po rnams la'o/ /rgyas dang zhes bya ba ni rgya cher 'khor lo drug po rnams so/ /slar yang bsdus pa ni zhes bya ba ni 'khor lo drug po bsdus pas kyang 'khor lo bzhi dang yang dag par sbyor ba ni/sprul pa dang / chos dang / longs spyod dang bde ba chen po'i 'khor lo'i ngo bo ste/ me'i 'khor lo ni bde ba chen po'i 'khor lo'i nang du 'dus so/ /rtsa rnams brgyad dang nyi shu lhag /ces bya ba ni 'khor lo bzhi po rnams ni drug cu rtsa bzhi dang / brgyad dang / bcu drug dang / sum cu rtsa gnyis kyi grangs kyis so//rtsa ni drug cu la yang brten/ /zhes bya ba ni rten du gyur pa'i 'khor lo bzhi po rnams so/ /thun mtshams bzhi po rnam par dag pa'i ngo bo ni mtshams kyi rtsa'o/ /rim pa yang zhes bya ba ni 'khor lo bzhi la rtsa bzhi po go rims kyis so/ /bzhi zhes bya ba ni mtshams kyi rtsa'o/ /khyab ces bya ba ni lus thams cad la khyab par byas te/gnas pa'i phyir ro/ /rtag tu zhes bya ba ni 'chi ba'i dus kyi bar du'o/ /de rnams zhes bya ba ni dga' ba dag dang ldan zhes bya ba ni dga' ba bzhi'i sbyor bas so/ /de rnams la ni khyab ces bya ba ni dga' ba bzhi la sogs pa rnams so/ /de rnams zhes bya ba ni thun mtshams kyi rtsa bzhi po rnams kyis so//pad+ma'i snal ma lta bu yis/ /zhes bya ba ni ji ltar pad+ma snal ma'i rgyus pa rnams kyis khyab par byed pa de bzhin du dga' ba la sogs pa rnams kyi mtshams kyi rtsa de rnams la khyab par byed pa'o/ /de ltar brten pa'i ngo bo mtshams kyi rtsa bzhi po la dga' ba bzhi'i rnam par gzhag pa brten nas/de rnams nyid la 'khor lo so so la snal ma rnam pa bzhi'i ngo bo bstan pa'i phyir/ chu khams khongs su chud pa can/ /zhes bya ba la sogs pa gsungs te/ chu khams khongs su chud pa can/ /de ni de yis khyab pas so/ /bde ba chen po zhes bya ba ni byang chub sems kyi ngo bo bde ba chen po ster bar byed pas so//bde ba chen pos phan par byed/ /ces bya ba ni bde ba chen po ni rnam pa gnyis te/ yang dag par gso bar byed pa'i phyir ro/ /'khor lo so so'i dbye ba ni/ /zhes bya ba ni dga' ba la sogs pa bzhi'i dbye bas so/ /dga' ba rnam pa bzhi po ji ltar zhe na/ de'i phyir longs spyod bzhi po zhes bya ba la sogs pa gsungs te/bzhi po rnams kyi longs spyod do/ /dga' ba bzhi po la sogs pa'i gnas skabs rnams la nye bar longs spyod pa'o/ /yi ge ha zhes bya ba ni bde ba chen po'i 'khor lo gnas pa'i phyir byang chub kyi sems kyi zla ba'i rnam pa'o/ /cha shas zhes bya ba ni cha shas so/ / shin tu phra ba'i zhes bya ba ni byang chub sems kyi thig le'i rnam pa'o/ /gnas zhes bya ba ni rnam par gnas pa'o/ /rtag tu zhes bya ba ni dus thams cad du'o/ /ji lta bu zhe na/ de'i phyir/ rten gyi tshul du khyab pas gnas/ /zhes gsungs te/ khyab par byed pa ste lus thams cad la khyab pa'i phyir ro/ /ji ltar zhe na/rim pa bzhi yi dbye ba las/ /zhes gsungs te/ dga' ba'i rim pa'i dbye ba'am/ /rim gyi dbye ba'i phyir ro/ /de ltar de rnams nyid la 'khor lo re rer rnam pa bzhi'i dngos po bstan nas/ da ni de'i rab tu dbye ba brjod pa'i phyir rim pa zhes bya ba gsungs te/ 'khor lo bzhi'i rim pas so//yang na dga' ba re re la lus dang ngag dang yid dang ye shes bzhi'i dbye bas rnam pa bcu drug pa nyid do/ /de nyid bstan pa'i phyir rim pa bcu drug dbye bas shes bya ba gsungs te/ ji lta bu zhe na/ de'i phyir spro ba'i bdag nyid ces bya ba gsungs te/ rgyas pa'i ngo bo nyid kyis spros pa dang bcas pa'i phyir ro//rmad 'byung ba'o zhes bya ba ni de kho na nyid la yang rab tu dbye ba'i rnam par bzhag pas/ shin tu yang ngo mtshar ba dang bcas pa'o/ /ro gcig pa yi go 'phang thob/ /ces bya ba ni bde ba chen po nyams su myong bas mi mthun pa'i phyogs bcom pa gnyis su med pa nyid thob pa ste/ don gyi lhan cig skyes pa'i dus tshod la'o//rim gyis so sor nyams myong bas/ /zhes bya ba ni dga' ba la sogs pas nyams su myong ba'i rim pas cung zad tsam gyi bde ba dang de las lhag pa dang / chags bral dang / mtshan nyid thams cad dang bral ba'i bde ba'i dbye bas tha dad pa zhes bya ba'i don to/ /de ltar de'i rab tu dbye ba bstan nas/da ni dpe'i sgo nas 'bras bu'i ngo bo brjod pa'i phyir/ sna tshogs chu yi sbyor ba las/ /zhes bya ba gsungs te/ chu'i sbyor ba sna tshogs pa'o/ /rgya mtsho'i chu bzhin no zhes bya ba ni rgya mtshor gnas pa'i chu bzhin du'o/ /rim gyis zhes bya ba ni nyams su myong ba'i rim pa la brten nas so/ /dus kyi 'khor lo zhes bya ba ni nang gi dus nye bar mtshon pas so//sbyor ba bzhi zhes bya ba ni dga' ba bzhi'i ngo bo nyid kyi phyir ro/ /dga' ba bzhi'i zhes bya ba ni lhan cig skyes pa'i dga' ba'o/ /de la brjod ces bya ba ni brjod par bya'o/ /de ltar dpe'i sgo nas 'bras bu'i ngo bo bstan nas/ da ni de nyid la gdams ngag gi sgo nas thob par bya ba brjod pa'i phyir/rnal 'byor ma zhal brgyud las zhes bya ba gsungs te/ ye shes mkha' 'gro ma'i zhal gyis kun du spyod pa las so/ /go 'phang mchog ni thob par 'gyur/ /zhes bya ba ni lhan cig skyes pa'i ngo bo zhes bya ba'i don to/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u nyi shu rtsa dgu pa'i rgya cher bshad pa'o// //de ltar le'u nyi shu rtsa dgu pas dga' ba rnams bskyed pa'i mtshan nyid kyi yul la dri ba'i lan bstan nas/ da ni rtsa rnams kyis nges par rab tu 'bab pa'i mtshan nyid brjod pa'i yul la dri ba'i lan brjod pa'i phyir/le'u sum cu pa nye bar 'god cing dang por re zhig de rtsom pa ni/ de nas zhes bya ba la sogs pa ste/ le'u nyi shu rtsa dgu pa bshad pa'i rjes la'o/ /rtsa rnams kyi rgyud bshad kyis nyon/ /zhes bya ba dang 'brel to/ /des zhes bya ba ni khrag dang khu ba dang / rlung rnams 'bab pa'i phyir ro/ /de nyid kyis nyon zhes bya ba ni phyag na rdo rje thos pa las sbyor ba ste/ ji ltar gnas pa'i ngo bo nyid kyi phyir ro/ /gang gis she na/ de'i phyir rdo rje brtan pa'i lus kyis zhes bya ba gsungs te/ rdo rje bzhin du brtan pa ni sra ba'o/ /de lta bu'i lus gang rnams la yod pa de rnams la de skad ces bya ste/rdzogs pa'i rim pa la gnas pa'i/ /sgom pa po rnams la zhes bya ba'i don to/ /de ltar de rtsom pa bstan nas/ da ni de dngos su bshad pa brjod pa'i phyir/ /de'i yan lag sdud par byed rtsa rnams brjod pa sngon du 'gro bas khams 'bab pa'i rim pa bstan pa'i phyir/ stong phrag nyi shu rtsa bzhi ni//zhes bya ba gsungs te/ rtsa rnams lus thams cad la gnas pa rnams kyi'o/ /rtag tu zhes bya ba ni 'chi ba'i dus kyi bar du dus thams cad du'o/ /rmad 'byung ba zhes bya ba ni rang dang 'os pa'i khams 'bab par byed pas na gnas ngo mtshar ba dang bcas pa'o/ /byang chub sems ni 'bab ces bya ba ni/ kun rdzob pa'i sems 'bab par byed pa rnams so/ /bde ba thams cad rab tu 'phel/ /zhes bya ba ni rjes su 'jug pa rnams so/ /bde ba thams cad ni gtso bo ma yin pa'i khams kyi ngo bo rnams kyi rjes su 'jug pa ni 'jug par byed pa'o/ /stong phrag nyi shu rtsa bzhi ni/ /khrag 'bab par ni shes par bya//zhes bya ba ni snga ma bzhin no/ /khrag 'bab pa ni zhes bya ba ni nyi ma 'bab pa'o/ /nyi ma 'byung ba'i bdag nyid can/ /zhes bya ba ni rdul 'bab pa'o/ /rtag tu rmad du 'byung ba'i rtsa/ /zhes bya ba la sogs pa ni snga ma bzhin no/ /rlung rgyu bar ni shes par bya/ /zhes bya ba ni rlung 'bab pa'o//rim bzhin zhes bya ba ni rlung rgyu ba'i rim pas so/ /rgya chen rgyud las zhes bya ba ni nam mkha' dang mnyam pa'i rgyud kyi rjes su 'brangs pa 'am/ rdo rje phreng ba'i rgyud chen po'i rjes su 'brangs nas so/ /de ltar sdud par byed pa'i rtsa rnams brjod pa sngon du 'gro bas de'i khams 'bab pa bstan nas/ da ni sdud par byed pa'i rtsa brjod pa'i phyir/ lus kyi zhes bya ba la sogs pa gsungs te/ lus kyi zhes bya ba ni rang dang gzhan gyi lus la'o/ /gnas kyi dbye ba yis zhes bya ba ni/ gnas dang nye ba'i gnas la sogs pa nyi shu rtsa bzhi'i dbye bas so/ /nyi shu rtsa bzhi zhes bya ba ni mi phyed ma la sogs pa'i ming can no//de ni zhes bya ba ni stong phrag bdun cu rtsa gnyis kyi rtsa rnams so/ /brjod ces bya ba ni gsungs pa'o/ /stong phrag bdun cu rtsa gnyis kyi grangs can gyi rtsa rnams ni nyi shu rtsa bzhi po rnams kyis bsdus pa'i phyir ro/ /de ltar sdud par byed pa'i rtsa rnams bstan nas/ da ni rgya cher brjod pa la lugs brjod pa'i phyir/thim dang longs spyod bdag po nyid/ /ces bya ba la sogs pa gsungs te/ byang chub sems kyi zla ba'i kun du spyod pa gsum la brten nas/ de rnams nyid sdud par byed pa nyi shu rtsa bzhi'o/ /bdun cu rtsa gnyis brjod ces bya ba ni thim pa dang longs spyod pa dang / bdag po nyid gsum gyi nyi shu rtsa bzhi'i rtsa rnams kyi grangs kyis bdun cu rtsa gnyis kyi grangs 'byung ba las so/ /re rer 'ang 'khor ni stong stong ngo / /zhes bya ba ni rtsa re re yang rgyas par ni 'khor ni stong ste stong gi grangs so/ /rigs brgya'i dbye ba gnas la sogs pa bcus bsgyur na/ re re la stong phrag gi grangs su shes par bya'o//de ltar rgya cher brjod pa'i lugs bstan nas/ da ni nye bar bsdu ba'i lugs brjod par bya ba'i phyir/ gtso bo yang ni bsdus pa las/ /zhes bya ba gsungs te/ slar yang bsdus nas 'gro ba dang / /zhes bya ba dang 'brel to/ /thim pa longs spyod bdag por dor/ zhes bya ba ni bdun cu rtsa gnyis kyi grangs rnams la sum 'gyur gyi grangs phri bas so/ /gnas rnams kyi ni grangs su 'gyur/ /zhes bya ba ni gnas dang nye ba'i gnas la sogs pa nyi shu rtsa bzhi pa'i grangs rnams kyis so/ /slar yang bsdus nas 'gro ba ni/ /zhes bya ba ni bdun cu rtsa gnyis pa'i nang du 'dus par 'gyur ro//grangs rnams ji tsam zhe na/ de'i phyir/ gsum dang rnam brgyad dbye ba yis/ /zhes bya ba gsungs te/ nyi shu rtsa bzhi'i grangs can gyi rtsa rnams la zhes bya ba'i don to/ /rnam pa brgyad pa la rnam pa gsum gyis grangs su byas na snyam du dgongs pa'o/ /de rnams kyang phra mo phra mo'i cha shas kyis bsdus pas na/'dus par 'gyur ro snyam du bstan pa'i phyir rtsa dang zhes bya ba la sogs pa gsungs te/ nyi shu rtsa bzhi'i grangs so/ /nyin mtshan dbye ba yis zhes bya ba ni nyin mtshan gcig la phal cher chu tshod sum cu rtsa gnyis kyi bdag nyid can la 'dus par 'gyur ro//de yang thun brgyad pa'o/ /de yang skad cig la zhes bya ba'i tha tshig go/ /nang du 'gro bar shes par bya/ zhes pa ni shes par bya ba'o/ /bdun cu rtsa gnyis dang / nyi shu rtsa bzhi dang / chu tshod sum cu rtsa gnyis dang / thun brgyad dang / skad cig ma gcig gi rab tu dbye bas gong nas gong du bsdus nas 'gro bar 'gyur ro//de ltar don rnam pa bzhis rtsa'i mdor bstan pa bshad nas/ da ni de rgyas par bshad pa'i phyir/ de'i yan lag rtsa gsum gyi khams 'bab pa'i rim pa bstan pa'i phyir/ g.yon pa byang chub zla ba 'bab/ /ces gsungs te/ g.yon pa zhes bya ba ni g.yon pa'i cha la'o//kun rdzob kyi sems kyi zla ba 'bab pa'o/ /g.yas pa khrag dang nyi ma 'bab/ /ces bya ba ni g.yas pa'i cha la nyi ma'i rang bzhin gyi khrag 'bab pa'o/ /shes bya dbus su rlung rgyu bas/ /zhes bya ba ni dbus kyi gnas su rnam par mi rtog pa'i rlung dang dus kyi me 'bab pa'o/ / gdams ngag las kyang rtsa gsum po dbus kyi mdud pa brjod par 'dod pas drug tu 'gyur ro/ /de rnams kyang steng 'og gi dbye bas khams drug 'bab par byed pa'o/ /ji skad du/ bshang gci zla ba nyi ma dang / /sgra gcan dus kyi me rtsa rnams/ /drug ces bya ba la sogs pa'o//ming bstan pa'i phyir/ la la nA dang ra sa nA/ a wa d+hU tI zhes bya ba gsungs te/ 'dir ni mdo ji lta ba bzhin no/ /de ltar rtsa gsum po la khams 'bab pa'i rim pa bstan nas/ da ni de rnams kyi spro ba'i rim pa brjod pa'i phyir/ de rnams zhes bya ba la sogs pa gsungs te/ rtsa gsum po rnams so//spro ba'i sbyor ba yis zhes bya ba ni rgyas pa'i sbyor bas so/ /brgyad ces bya ba ni rtsa brgyad kyi ngo bo'o/ /ci'i phyir zhe na/ rim gyis thun brgyad ces bya ba gsungs te/ thun brgyad kyi rim pas zhes bya ba'i don to/ /re re yang zhes bya ba ni nyi shu rtsa bzhir 'gro zhes bya ba dang 'brel to/ /re re yang thun brgyad kyi grangs so//ji ltar zhe na/ de'i phyir gsum po zhes bya ba gsungs te/ gsum gyis bsgyur ba'o/ /ji skad ston par 'gyur te/ gang zhig rtsa gsum po 'di thun brgyad po'i grangs kyis rgyud du 'gro ba de rnams nyid la gsum gyis bsgyur bas nyi shu rtsa bzhir 'gyur ro/ /slar yang zhes bya ba ni de'i rjes la slar yang /thim dang longs spyod bdag po'i phyir/ /zhes bya ba ni de ma thag par bstan pa'i nyi shu rtsa bzhi byang chub sems kyi kun du spyod pa'i rim pa gsum gyis bsgyur bas bdun cu rtsa gnyis kyi grangs su 'gyur ro/ /de nyid kyi phyir/ rim gyis grangs ni bdun cu gnyis/ /zhes bya ba gsungs te/de ma thag par bstan pa'i grangs kyi rim pas so/ /slar yang de zhes bya ba ni bdun cu rtsa gnyis so/ /de spro ba yi sbyor ba yis/ /zhes bya ba ni rgya chen po'i sbyor bas so/ /re re stong stong dbye ba yis/ /zhes bya ba ni stong phrag gi grangs nyid du 'gyur ba'o/ /nges par grangs nyid 'gyur ba ni//zhes bya ba ni stong stong gis bsgyur bas bdun cu rtsa gnyis stong phrag bdun cu rtsa gnyis kyi grangs su 'gyur ro/ /de ltar de rnams nyid kyi spro ba'i rim pa bstan nas/ da ni gsum po slar yang gcig gi khongs su bsdu ba brjod pa'i phyir/ gtso bo zhes bya ba gsungs te/ gtso bo gsum ni/la la nA dang / ra sa nA dang / a wa d+hU tI'o/ /sbyor bas zhes bya ba ni g.yas pa dang g.yon pa'i rlung rgyu ba dbus mar 'jug pa'i sbyor bas so/ /gcig pa nyid du 'gro zhes bya ba ni rtsa dbus ma'i ngo bor 'gro bar 'gyur zhes bya ba'i don to/ /de ltar gsum po gcig gi khongs su bsdu ba bstan nas/da ni rtsa dbus ma'i ngo bo brjod pa'i phyir/ shes par dka' zhes bya ba la sogs pa gsungs te/ las dang po pa'i rnal 'byor pa rnams la mtshon par dka' ba nyid kyi phyir ro/ /phra ba de ni zhes bya ba ni skra'i rtse mo'i mthar thug pa nyid kyi phyir ro/ /dang po las kyi rnal 'byor pas/ /zhes bya ba ni bskyed pa'i rim pa sgom pa po'i rnal 'byor pas zhes bya ba'i don to//bsam gyis mi khyab ces bya ba ni sems kyi spyod yul las 'das pa nyid kyi phyir ro/ /mchog tu zhes bya ba ni spros pa med pa nyid kyi phyir ro/ /thig le nA da rnam par spangs/ /zhes bya ba ni rdzas dang brag ca'i sgra spangs pas so//bde ba kun gyi gzhi zhes bya ba ni zag pa med pa'i bde ba la brten pa'o/ /gsang ba zhes bya ba ni zab mo'o/ /srog gi rten gyi mtshan nyid dang / /zhes bya ba ni srog gi rlung gi rten nyid kyi phyir ro/ /nag po'i rtsar ni rnam par bshad/ /ces bya ba ni mi dmigs pa'i ngo bo nyid kyi phyir ro/ /rdo rje dbyings kyi dbang phyug dang //zhes bya ba ni rdo rje 'chang chen po'i shes rab kyi ngo bo nyid kyi phyir ro/ /de ltar rtsa dbus ma'i ngo bo bstan nas/ da ni de la man ngag gis rtogs par bya ba nyid brjod pa'i phyir/ rnal 'byor ma'i zhal nas zhes bya ba gsungs te/ ye shes mkha' 'gro ma'i zhal gyi gdams ngag gis rtogs par bya'o//ro gcig go 'phang bdag nyid can/ /zhes bya ba ni tha dad pa'i rnam par rtog pa bzlog nas gnyis su med pa'i ye shes kyi ngo bo nyid kyi phyir ro/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/le'u sum cu pa'i rgya cher bshad pa'o// //de ltar le'u sum cu pas rtsa rnams kyi nges par 'bab pa'i mtshan nyid yul la dri ba'i lan brjod nas/ da ni mtshams kyi rtsa gsum gyi yul la dri ba'i lan brjod pa'i phyir/ le'u sum cu rtsa gcig pa nye bar 'god cing re zhig dang por de'i rtsom pa bstan pa'i phyir/de nas zhes bya ba la sogs pa gsungs te/ le'u sum cu pa bshad pa'i rjes la'o/ /gzhan yang zhes bya ba ni snga ma bzhin no/ /mtshams kyi rtsa ni gtso bo nyid bshad kyis nyon zhes bya ba dang 'brel to/ / des ci zhig bya zhe na/ de'i phyir gang gis zhes bya ba la sogs pa gsungs te/ rtsa gsum po gang las so/ /rtsa rnams sdom dang 'char ba dang / /zhes bya ba la sdom pa ni bsdus pa'o/ /'char ba ni skye ba'o/ /sdom pa yang yin la 'char ba yang yin pas na sdom pa dang 'char ba'o/ /rtag tu zhes bya ba ni dus thams cad du'o//de ltar de'i rtsom pa bstan nas/ da ni dngos su bstan pa bshad pa'i phyir/ sdom pa mdor bstan pa'i yan lag rang gi ngo bo bstan pa ni/ mchog tu zhes bya ba la sogs pa gsungs te/ rtsa rnams kyi spros pa bzlog pa'i bdag nyid can gyis so/ /mchog tu dga' ba nyams myong zhes bya ba ni so so rang gis rig par bya ba nyams su myong ba'i bdag nyid can byang chub kyi sems kyi ngo bo'o//lha yi ye shes gsal bar byed/ /ces bya ba ni 'jig rten las 'das pa'i lhan cig skyes pa gsal ba'i ngo bo nyid kyi bdag nyid can no/ /gsal ba'i sngags su yang dag par sbyor zhes bya ba ni gsal ba ni thams cad kyi gtso bo hUM yig la yang dag par sbyar ba ni/rlung gsum po la cha shas su yongs su rtogs pas 'brel pa'i phyir ro/ /lha yi rnal 'byor don nges pa/ /zhes bya ba ni rnam par rtog pa'i rlung 'byed pas lha ni 'jig rten las 'das pa'o/ /rnal 'byor gyi don ni don dam pa'i de kho na nyid nges par 'byed pa'o//de nyid gsum sbyor zhes bya ba ni lus la sogs pa rnam par dag pa'i ngo bo nyid kyis so/ /dri ma med ces bya ba ni rnam par mi rtog pa'i rlung gi rang bzhin nyid kyi phyir ro/ /rdo rje gsum don gcig tu sdom/ /zhes bya ba ni sku rdo rje la sogs pa rnams kyi don gcig pa ni don gcig pa ste/rdo rje 'chang chen po'i ngo bo'o/ /de'i sdom pa ni sdud pa'i rang bzhin no/ /'jig rten gsum du khyab cing zhes bya ba ni khams gsum la khyab pa nyid kyi phyir ro/ /phra zhes bya ba ni phra mo'i rnal 'byor pa rnams kyis rtogs par bya ba nyid kyi phyir ro//lus kun la ni yang dag brten/ /zhes bya ba ni lus thams cad la khyab par byed pa'i phyir ro/ /ye shes sems dpa' zhes bya ba ni rnal 'byor pa gcig pu'i spyod yul nyid kyis longs spyod rdzogs pa'i ngo bo nyid kyi phyir ro/ /rdo rje sems zhes bya ba ni chos kyi sku'i ngo bo nyid kyi phyir ro/ / dam tshig sems dpa' ste zhes bya ba ni sprul pa'i sku'i ngo bo nyid kyi phyir ro/ /gang phyir bde zhes bya ba ni rnam pa gnyis kyis bde ba chen po'i rang bzhin no/ /rnal 'byor mchog tu shes par bya/ /zhes bya ba ni bla na med pa'i ting nge 'dzin gyi ngo bo'o/ /khyab pa'i zhes bya ba ni rang bzhin gyis rnam par dag pa la ltos nas so//de nyid ces bya ba ni don dam pa nyid kyis phyin ci ma log pa'i phyir ro/ /rmad 'byung ba zhes bya ba ni 'bad pa med pas sems can gyi don byed pa'i phyir ro/ /mchog dang rab mchog ces bya ba ni dga' ba la sogs pa gsum las so/ /rab mchog ni lhan cig skyes pa'i ngo bo nyid kyi phyir ro//phra zhes bya ba ni skra'i rtse mo bye ba brgya'i cha'i tshad tsam gyi phyir ro/ /rang 'byung ye shes zhes bya ba ni rgyu dang rkyen gyis 'byung ba med pa'i phyir ro/ /mi zad pa zhes bya ba ni skye 'jig dang bral ba'i phyir ro/ /de ltar sdom pa mdor bstan pa'i ngo bo bstan nas/ da ni rtsa ba'i rtsa bstan pa'i phyir/sum cu rtsa gnyis byang chub 'bab/ /ces bya ba gsungs te/ so dang sen mo la sogs pa byang chub kyi sems sum cu rtsa gnyis po rnams la'o/ /'bab ces bya ba ni 'dzag par byed pa'o/ /rtsa ni zhes bya ba ni rtsa'o/ /thams cad mchog tu zhes bya ba ni rtsa stong phrag bdun cu rtsa gnyis kyi ngo bo rnams so//gsal zhes bya ba ni rnal 'byor pa'i shes pa la de snang ba'i phyir ro/ /bde ba chen po'i 'khor lo gnas/ /zhes bya ba ni mgo bor gnas pa'o/ /rtsa zhes bya ba ni de las gzhan pa'i rtsa rnams lus thams cad la khyab pa'i phyir ro/ /gang du zhe na/ de'i phyir cha rnams kun bdag nyid//ces bya ba gsungs te/ rtsa'i tshogs ma lus pa lus la zhes bya ba'i don to/ /de ltar rnam pa gnyis kyis sdom pa mdor bstan pa bshad nas/ da ni mtshams kyi rtsa rnams rgyas par bstan pa'i phyir/ de'i yan lag rang gi ngo bo ni/ de'i dbus na zhes bya ba la sogs pa gsungs te/rtsa rnams sum cu rtsa gnyis kyi grangs can gyi dbus na'o/ /rtsa gsum ste zhes bya ba ni gsum mo/ /gtso bor yang ni yang dag bshad/ /ces bya ba ni gtso bor brjod do/ /ji lta bu zhe na/ de'i phyir/ zla ba nyi ma me rgyu ba/ /zhes gsungs te/ khu ba dang khrag dang dus kyi me 'bab pa'o/ /'byung ba thams cad la ni khyab/ /ces bya ba ni 'byung ba chen po bzhi'i ngo bo 'khor lo bzhi la khyab par byed pa ste/ de rnams med par de rnams mi 'byung ba'i phyir ro/ /de ltar rang gi ngo bo bstan nas/ de nyid la dpe bstan pa'i phyir/ ji ltar shing rtsa zhes bya ba la sogs pa gsungs te/sa las skyes pa la'o/ /sa la gnas pa zhes bya ba ni sa'i nang du gnas pa'i rtsa ba rnams so/ /cung zad ces bya ba ni cung zad tsam gyi ngo bo'o/ /gnas zhes bya ba ni bstan par byas nas so/ /sdong bu yal ga kha phye ba/ /sogs pa yis ni kun la khyab//ces bya ba ni rnam pa thams cad du'o/ /de ltar dpe brjod nas/ da ni don bstan pa'i phyir/ de bzhin zhes bya ba la sogs pa gsungs te/ de bzhin zhes bya ba ni shing gi rtsa ba ltar ro/ /skyes bu zhes bya ba ni mi'o/ /mgor gnas pa/ rtsa gsum la ni zhes bya ba ni mgo bo la gnas pa'i la la nA la sogs pa gsum mo//rnyog pa med ces bya ba ni phan tshun brgyud pas khams rnams ma 'dres pa'i phyir dang / rlung gi rgyu ba yang dus bzang po'i rigs pas 'bab pa'i phyir ro/ /phung po khams sogs tshogs la khyab/ /ces bya ba ni phal cher de'i bdag nyid can gyi lus la'o//mchog dang mchog rab ces bya ba ni gzhan du gyur pa'i rtsa stong phrag bdun cu rtsa gnyis kyi grangs can las so/ /mchog ces bya ba ni rtsa gsum gyi ngo bo nyid kyi mchog tu gyur pa'o/ /de ltar don rnam pa gsum gyis mtshams kyi rtsa gsum rgyas par bshad pa bstan nas/de ni de'i rnam par dag pa brjod pa'i phyir/ de'i yan lag rang gi ngo bo ni/ rnam par thar pa'i sgo gsum dngos/ /zhes bya ba la sogs pa gsungs te/ de ma thag par bstan pa'i rtsa gsum po stong pa nyid dang / mtshan ma med pa dang / smon pa med pa'i rang bzhin te/rtsa gsum pa'i ngo bo la dmigs nas rnam par thar pa'i sgo gsum 'grub pa'i phyir ro/ /de kho na nyid gsum sdom pa/ /zhes bya ba la de kho na nyid gsum gyi gnas kyi go 'phang ni/ bsdus pa'i ngo bo ste/ bdag dang sngags dang ye shes kyi de kho na nyid kyi phyir dang sku la sogs pa de kho na nyid gsum gyi ngo bo nyid kyi phyir ro//'dod chags zhe sdang gti mug dang / rang gi mtshan nyid dbye ba gsum/ /zhes bya ba ni rang bzhin dang bcas pa rnam par ma dag pa'i shes pa gsum gyis 'gag pa'i bdag nyid kyi phyir ro/ /mtshams kyang ni zhes bya ba ni mtshan mo dang nyin mo dang /mtshams kyi dbye bas so/ /dam tshig mtshan nyid rnam pa gsum/ /zhes bya ba ni dus kyi mtshan nyid de/ mtshams la sogs pa rnams ji ltar rigs par snang ba la sogs pa ye shes gsum gyi ngo bor shes par bya'o/ /sangs rgyas dam chos dge 'dun ni/ / zhes bya ba ni ma rig pa'i gnyid las sad pa'i phyir dang / blo kha 'byed pa'i phyir dang / chos rnams thams cad ji lta ba bzhin du rtogs pas sangs rgyas so/ /rang gi mtshan nyid 'dzin par byed pas na chos so/ /dam pa ni 'phags pa rnams kyi chos te/ dam pa'i chos so/ /dge 'dun ni gang zag zung bzhi la sogs pa'i ngo bo nyid kyis sdud pa'i rnam pa can nyid kyi phyir dge 'dun no//sdom pa gsum gyi mtshan nyid do/ /zhes bya ba ni de bzhin gshegs pa'i rigs la sdom pa'i mtshan nyid de/ de yongs su ma dor ba'i phyir ro/ /stong nyid ye shes rdo rje ni/ / zhes bya ba ni shes pa dang shes byas bsdus pa'i chos thams cad kyi stong pa nyid do/ /ye shes zhes bya ba ni ngo bo de nyid kyis stong pa nyid yongs su shes pa'i phyir ro/ /rdo rje zhes bya ba ni mi mthun pa'i phyogs las rgyal bas bstan pa'i phyir ro/ /gsum gyi de nyid mtshan nyid do/ / zhes bya ba ni rtsa gsum gyi ngo bo'i de kho na nyid kyi mtshan nyid do/ /rgyu dang 'bras bu nyer mkho ni/ /zhes bya ba ni rgyu dang 'bras bu gzhan la phan 'dogs pa phun sum tshogs pa'i ngo bos rnal 'byor gsum gyi rnam par dag pa'i mtshan nyid de/ de la 'bras bu ni zung du 'jug pa'i rnam pa'o//rgyu ni bskyed pa'i rim pa la sogs pa'o/ /de dag gis lhun gyis grub pa'i sems can gyi don du gzhan la phan pa'i phun sum tshogs pa ste/ de rnam par dag pa'i mtshan nyid do/ /rlung dang mkhris pa zhes bya ba la sogs pa ni/ mdo ji lta ba bzhin no//khams btus pa zhes bya ba ni khams thams cad bsdus pa'i don gyis so/ /'dod pa zhes bya ba la sogs pa ni gnas nyi shu dang / bcu bdun dang / snyoms par 'jug pa bzhi'i ngo bos khams gsum gyi mtshan nyid can no/ /de nyid kyi phyir/ 'jig rten gsum gyi mtshan nyid do//zhes gsungs te/ 'khor ba'i 'jig rten pa'i mtshan nyid rnam par dag pa'i mtshan nyid can no/ /de ltar de'i rnam par dag pa'i ngo bo bstan nas/ da ni de rnams kyi rgyu dang 'bras bu'i dngos po'i rim pa brjod pa'i phyir/ rtsa ba gsum dang zhes bya ba gsungs te/ de ma thag par gsungs pa'i rtsa gsum po rtsa ba ste/gtso bor gyur pa'i phyir ro/ /'bras bu gcig ces bya ba ni de las gzhan pa'i rtsa gnyis po rgyu ba nye bar mtshon pas gcig ni dbus ma a wa d+hU tI'i 'bras bu ste/ de'i rim pas de la nye bar dmigs pa'i phyir ro/ /rim bzhin zhes bya ba ni rim pa la brten nas so//chos kyi 'khor lor son zhes bya ba ni snying ga'i pad+ma la gnas pa'i sems kyi gnas nyid kyi phyir ro/ /sprul pa zhes bya ba ni lte ba sprul pa'i 'khor lo'o/ /de gsum zhes bya ba ni la la nA sogs gsum mo/ /gsal zhes bya ba ni gsum po nyid kyi rnal 'byor gyi mngon sum la snang ba'i phyir ro//ji ltar zhe na/ de'i phyir sku zhes bya ba la sogs pa gsungs te/ khrag 'bab pa nyid dang / khu ba 'bab pa nyid dang me 'bab pa nyid kyis rim pa ji lta bar lus la sogs pa rnam par dag pa zhes bya ba'i tha tshig go/ /de ltar de rnams nyid kyi rgyu dang 'bras bu'i ngo bo'i rim pa bstan nas/da ni de'i nyes pa 'char ba na/ /'chi ba 'byung ba brjod pa'i phyir/ /gang tshe de la nad sbyor ba/ /zhes bya ba la sogs pa gsungs te/ nad ni 'dus pa la sogs pa'o/ /de la zhes bya ba ni lus la'o/ /gang tshe zhes bya ba ni dus gang la'o//de rnams la zhes bya ba ni rtsa gsum po la'o/ /de tshe zhes bya ba ni lus de la'o/ /gzas 'dzin mtshan nyid do zhes bya ba ni phyi rol gyi zla ba la sgra gcan gyis 'dzin pa ltar 'chi ltas kyi rtags 'byung ba'i phyir ro/ /cung zad nad ces bya ba ni yongs su ma rdzogs pa'i ngo bo'o/ / gang tshe zhes bya ba ni dus gang la'o/ /'gro zhes bya ba ni de rnams kyis 'gro ba'o/ /de tshe zhes bya ba ni dus der ro/ /phyed 'dzin mtshan nyid do zhes bya ba ni phyi rol gyi zla ba la sogs pa la sgra gcan gyis phyed bsgribs pa ltar 'chi rtags yongs su rdzogs pa mi skyed pa'i phyir ro/ / srog gi zhes bya ba ni 'chi ba'i dus su 'byung ba'i srog gi rlung gis so/ /bcom na zhes bya ba ni kun nas gdungs pa'o/ /gang phyir zhes bya ba ni dus gang gi tshe zhes bya bar shes par bya'o/ /de nyid tshe na zhes bya ba ni dus de nyid kyi tshe na'o/ /'chi ba'i mtshan nyid yin zhes bya ba ni srog gi dbang po 'gag par byed pa nyid kyis zhes bya ba'i don to//de ltar nyes pa 'char ba la 'chi ba 'byung ba bstan nas/ da ni nye bar bsdu ba sngon du 'gro bas man ngag gis rtogs par bya ba nyid bstan pa'i phyir/ rtsa'i gtso bo zhes bya ba la sogs pa gsungs te/ skye ba dang 'chi ba dang thar pa'i gnas skabs so//gsum pa zhes bya ba ni rtsa gsum gyi'o/ /gtso bo nyid du nges zhes bya ba ni gtso bo nyid du yongs su shes pa'o/ /rgyas par zhes bya ba ni rgya che bar ro/ /rnal 'byor ma 'khor lo zhes bya ba ni gnas la sogs pa las skyes pa'i rnal 'byor ma'i tshogs kyi drung nas so//rnal 'byor pa yis zhes bya ba ni rdzogs pa'i rim pa la gnas pa rnams kyis so/ /gsal por zhes bya ba ni gsal bar byas nas so/ /shes zhes bya ba ni shes par bya ba'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/zab mo'i don shin tu gsal bar byed pa zhes bya ba las le'u sum cu rtsa gcig pa'i rgya cher bshad pa'o// //de ltar le'u sum cu rtsa gcig pas mtshams kyi rtsa gsum gyi yul la dri ba'i lan brjod nas/ da ni rlung la sogs pa'i rnam par dbye ba bstan pa'i phyir dang /rlung skyed pa'i yul la dri ba'i lan bstan pa'i phyir/ le'u sum cu rtsa gnyis pa nye bar 'god cing / dang por re zhig de la rtsom pa ni de nas zhes bya ba la sogs pa gsungs te/ le'u sum cu rtsa gcig pa bshad pa'i rjes la'o/ / gzhan yang zhes bya ba snga ma bzhin no/ /rlung gi mtshan nyid ni zhes bya ba ni rlung rnams kyi bskyed pa'i mtshan nyid de bshad kyis nyon zhes bya ba dang 'brel to/ /des ci zhig byed ce na/ de'i phyir/ ji ltar dngos su yang dag ces bya ba gsungs te/ gang gi phyir rlung rnams bskyed pas so//dngos zhes bya ba ni mngon sum nyid du'o/ /dus ni zhes bya ba ni phyi rol gyi zla ba dang nyi ma la sogs rgyu ba'i mtshan nyid can dang / nang gi bdag nyid can gyi dbugs dbyung ba dang 'jug pa'i mtshan nyid can la'o/ /yongs su slu byed yin zhes bya ba ni de las bzlog pa'i rnam pa'o/ / yang dag shes zhes bya ba snga ma dang 'brel to/ /de ltar de rtsom pa bstan nas/ da ni de dngos su bstan pa'i phyir/ de'i yan lag bar do'i srid pa'i rnam shes 'jug pa ni/ bag chags nyon mongs can gyi yid/ /ces bya ba la sogs pa gsungs te/ bag chags kyi sgras ni kun gzhi rnam par shes pa dang /nyon mongs pa can gyi yid gnyis so/ /rlung gi ngo bos zhes bya ba ni srog dang thur sel gyi rlung dang bcas pa'o/ /gzugs gzhan byed ces bya ba ni dbang po tshang ba nyid kyi phyir ro/ /don ni nges par yod mi shes/ /zhes bya ba ni rang gi las kyi dbang gi nges pas gang de don ni/sngon po la sogs pa rnams la ste/ yongs su shes pa ni shes pa'o/ /des mi shes pa ni khyogs kyi bzhon pa ltar mya ngan la sogs pas bsgribs pa'i phyir ro/ /rlung tsam zhes bya ba ni grib ma lta bu nyid kyis mtshan nyid kyi gzugs dang bral ba'i phyir ro//bkug nas ni zhes bya ba ni yang dag par bkug nas so/ /kun gzhi'i rnam shes zhes bya ba ni bag chags kyi rten sprul pa gnyid log pa lta bu'o/ /bag chags nang du rnam par spyod/ /ces bya ba ni rnam pa sna tshogs pa'i bag chags rnams kyi nang du rgyu ba'o//cig car zhes bya ba ni dus mnyam pa'o/ /rlung dang rnam shes gnyis zhes bya ba ni srog rtsol gyi rlung dang kun gzhi'i rnam shes so/ /bag chags dang 'dres zhes bya ba ni rang gi dge ba dang mi dge ba'i bag chags kyi dbang gis so/ /rim pa las zhes bya ba ni 'chi ba'i srid pa 'gog pa'i rim pas so//rang gi bag chags bsgom pa yis/ /zhes bya ba ni rang gi lhan cig skyes pa'i bag chags rnam smin las so/ /de nas zla mtshan dus su ni/ /zhes bya ba ni 'byung bar gyur pa'i mngal rang byung gi me tog 'byung ba'i tshe na'o/ / 'jug pa ni zhes bya ba ni rab tu 'jug pa na'o/ /de dag na zhes bya ba ni/ rlung dang rnam par shes pa dag /ces bya ba'i don to/ /gang du zhe na/ de'i phyir mngal gyi rtsa la zhes bya ba gsungs te/ cha dang 'brel pa'i ma skyes pa/ /zhes bya ba'i ming can la'o/ /de zhes bya ba ni de'i rjes la'o//khu ba khrag zhu thig les zhes bya ba ni khu ba dang khrag gi rang bzhin zhu ba'i thig le rnams kyis so/ /'dres pa yis ni rnam shes skye/ /zhes bya ba ni bar do'i rnam par shes pa'o/ /dpe bstan pa'i phyir/ ji ltar chang ros myos pa bzhin/ /zhes bya ba gsungs te/ji ltar chang gi ro la myang ba rnam par ma phye bar gyur pas gnas pa de bzhin du kun gzhi'i rnam par shes pa mngal gyi rtsa la 'jug pa zhes bya ba'i don to/ /rnam par shes pa skye bar 'gyur/ /zhes bya ba ni sngar bstan pa nyid las nyon mongs can yid ces bya ba dang 'brel to/ / ji lta bu zhe na/ de'i phyir/ rnam shes kyis ni bag chags 'dzin/ /zhes bya ba gsungs te/ sa bon gyi ngo bo 'dzin par byed do/ /de rnams kyang bde ba dang sdug bsngal gyi ngo bo zhes bya ba'i don to/ /srog rlung nyid ces bya ba ni srog gi rlung dang bcas pa las kyi ngo bo nyid ni ngo bo nyid do//rtag tu zhes bya ba ni dus thams cad du'o/ /yang dag 'gro bar 'gyur zhes bya ba ni nyams su myong bar 'gyur zhes bya ba'i don to/ /de ltar bar ma do'i srid pa'i rnam par shes pa 'jug pa bstan nas/ da ni sems can gyi khams bskyed pa bstan pa'i phyir de'i yan lag zla ba dang po'i gnas skabs brjod pa'i phyir/nya'i rnam pa lta bu'o zhes bya ba gsungs te/ lta ba gzhan pa'i grub mtha' brjod par 'dod nas 'di skad brjod pa yin te/ gang gi phyir de rnams kyis 'dod pa la sna tshogs pa'i gzugs kyi bdag nyid gcig pa nyid la gnas skabs bcu brjod pa yin te/ji skad du/ nya dang rus sbal phag pa dang / /mi yi seng ge mi'u thung dang / /ra ma gnyis dang nag pa dang / /sangs rgyas skal gyi zhes pa bcu/ /zhes bya ba ste/ 'di'i 'dod pas nya'i rnam pa lta bur zhes bya ba gsungs so/ /pha ma dag gi khu ba khrag gi thig les mnan pa gang gi tshe bar ma do'i srid pa de'i tshe zla ba dang po la mer mer po dang nur nur po'i gnas skabs grub pas nya'i rnam pa lta bur 'gyur ba ni thog ma'i gnas skabs la'o//'pho ba'i dus su ni zhes bya ba ni nyi ma khyim dang por 'pho ba'i gnas skabs ltar ro//spyod pa zhes bya ba ni de'i gnas skabs rnams so/ /gang gi phyir phyi rol du nyi ma la lo gcig gi nang du zla ba bcu gnyis la khyim bcu gnyis la longs spyod pa zla ba re re la mthong ba de bzhin du nang gi dus la yang zhes bya ba'i don to/ /de ltar dang po'i gnas skabs bstan nas/da ni gnyis pa'i gnas skabs brjod pa'i phyir 'pho ba gnyis pa'i dus su zhes bya ba gsungs te/ zla ba gnyis pa la zhes bya ba'i don to/ slar yang khrag dang 'dres nas ni/ /zhes bya ba ni ma'i rang byung gis bsdus pa'o/ /slar yang srog ces bya ba ni srog gi rlung ngo / / dbye ba gnyis su 'gro zhes bya ba ni dbye ba gnyis su 'gro ste/ ji ltar zhe na/ de'i phyir/ steng dang 'og gi dbye ba yis/ /zhes bya ba gsungs te/ snying gi steng 'og gi dbye bas so/ /thur sel rlung gi 'gro 'ong las/ /zhes bya ba ni thur sel gyi mtshan nyid can gyi rlung ngo / /'gro 'ong las zhes bya ba ni khyad par du 'brel pa las so//rus sbal rnam par 'dzin par 'gyur/ /zhes bya ba ni rus sbal lta bu'i dbyibs 'dzin pa zhes bya ba'i don to/ /de ltar gnyis pa'i gnas skabs bstan nas/ da ni gsum pa'i gnas skabs brjod pa'i phyir/ de nas 'pho ba gsum pa la//zhes gsungs te/ zla ba gsum pa la'o/ /khrag dang khu ba'i gzugs can no/ /zhes bya ba ni khams gnyis 'phel bar 'gyur bas so/ /thur du sel ba'i rlung zhes bya ba ni thur du 'bab pa'i ngo bo rnams kyis so/ /skabs nas zhes bya ba ni de rus sbal gyi rnam pa bskams pa'i gnas skabs sgrub par byed pa'o//mnyam pa'i zhes bya ba ni de'i ming can gyi rlung ngo / /rlung ni 'byung zhes bya ba ni 'byung bar 'gyur ba'o/ /rim pas zhes bya ba ni thur du sel ba'i rim pas zhes bya ba'i don to/ /des kyang zhes bya ba ni mnyam pa'i rlung gis so/ / steng du bltas nas ni gnas zhes bya ba ni steng du 'jug pa'i gdong can no/ phag rgod ces bya ba ni phag rgod kyi dbyibs can no/ /der zhes bya ba ni mngal gyi rtsa'i nang du'o/ /'dzin par 'gyur zhes bya ba ni 'dzin par byed pa'o/ /de ltar gnas skabs gsum pa bstan nas/ da ni bzhi pa'i gnas skabs brjod pa'i phyir/slar yang 'pho ba bzhi pa la/ /zhes bya ba gsungs te/ zla ba bzhi pa la'o/ /khrag dang khu bas bsgos pa ni/ /zhes bya ba ni slar yang pha dang ma las byung ba dag gis so/ /mnyam du rgyu ba'i rlung 'gyur nas/ /zhes bya ba ni de'i ming can gyis bkug pa'o//'og tu kha bltas nas ni 'gro/ /zhes bya ba ni steng du gnas pa yongs su dor nas 'og tu kha bltas nas 'gro ba'o/ /rim pas zhes bya ba ni gong nas gong du yongs su smin pa la brten nas so/ /seng ge'i rnam pa yis kyang ni/ /zhes bya ba ni mi yi seng ge de'i dbyibs can no//mnyam du zhes bya ba ni mnyam du gnas kyi rlung ngo / /gyen du rgyu zhes bya ba ni gyen du rgya ba'i rlung ngo / /rim pas zhes bya ba ni yongs su smin pa la brten nas so/ /de ltar gnas skabs bzhi pa bstan nas/ da ni lnga pa'i gnas skabs brjod pa'i phyir/de nas 'pho ba lnga pa la/ /zhes bya ba gsungs te/ zla ba lnga pa la'o/ /khrag dang khu bas 'phel nas ni/ /zhes bya ba ni khrag dang khu ba dag gis myos pa lta bu'o/ /gyen du rgyu ba'i rlung gis bkug nas ni/ /zhes bya ba ni gzhan gyis dbang du byas pa'o/ / ming dang gzugs zhes bya ba ni gzugs med pa'i phung po bzhi'i gnas skabs so/ /gzugs zhes bya ba ni gzugs kyi ngo bo nyid 'gro bar gyur pa'o/ /gzhung la la dag las/ mi'u thung gi rnam pas 'gro/ /zhes kyang 'byung ngo / /de'i phyogs la mi'u thung gi dbyibs nyid do//gyen rgyu'i rlung gis khyab byed spro/ /zhes bya ba ni gyen du rgyu ba'i rlung gis khyab byed spro bar byed pa'o/ /gang gis 'gul dang g.yo bar 'gyur/ /zhes bya ba ni gyen du rgyu ba'i rlung gang las 'gul ba dang g.yo bar 'gyur ro/ /phung po lnga ni rdzogs pa na/ /zhes bya ba ni sngon du gsungs pa'i rlung lnga'i rim pas gzugs la sogs pa phung po lnga'i ngo bo nyid do//gsungs zhes bya ba ni brjod pa'o/ /de ltar gnas skabs lnga pa bstan nas/ da ni gnas skabs drug pa brjod pa'i phyir/ de las slar/ 'pho ba drug pa'i dus tshod la/ /zhes bya ba gsungs te/zla ba drug pa la'o/ /sa yi khams dang mig gnyis dang / /zhes bya ba ni sa'i khams kyis ni mig gnyis spro bar byed do/ /khyab byed ces bya ba ni khyab byed kyi rlung ngo / /rlung gis rlung spro zhes bya ba ni gyen du rgyu ba'i rnam pa mig gi dbang po la brten pa'o/ /spro ba zhes bya ba ni skyed par byed pa'o//ji lta bu zhe na/ de'i phyir dngos po 'phel ba zhes bya ba gsungs te/ dngos po ni gzugs la sogs pa'i yul la'o/ /'phel bar byed pa ni mngon pa'i nga rgyal dang bcas pa'o/ /de ltar gnas skabs drug pa bstan nas/ da ni gnas skabs bdun pa brjod par bya ba'i phyir/de nas 'pho ba bdun pa la/ /zhes bya ba gsungs te/ zla ba bdun pa la'o/ /chu'i khams dang zhes bya ba ni lus sar pa la gnas pa'o/ /klu zhes bya ba'i rlung spro bar byed pa zhes bya ba ni rus sbal skyed par byed pa'o/ /chu'i khams ji lta bu zhe na/ de'i phyir rna bug dong ces bya ba gsungs te/rna ba'i sgo nas sgra rig par byed pa'o/ /rus sbal ji lta bu zhe na/ de'i phyir gnyis su med par spyod pa zhes bya ba gsungs te/ bdag dang lhan cig tu gnyis su med par spyod pa'o/ /de ltar gnas skabs bdun pa bstan nas/ da ni brgyad pa'i gnas skabs brjod par bya ba'i phyir/de nas 'pho ba brgyad pa la/ /zhes bya ba gsungs te/ zla ba brgyad pa la'o/ /me dang zhes bya ba ni lus sar pa la gnas pa'i me'i khams so/ /sna'i bu ga rig byed ces bya ba ni sna'i sgo nas dri rig pa'o/ /rtsangs rlung zhes bya ba ni mnyam gnas kyi rlung ngo //rus sbal rlung gis zhes bya ba ni khyad par du 'phags pa'i rlung gi ngo bo'o/ /rang gis rang bzhin shes par byed/ /ces bya ba ni rang gis rang bzhin dri'i mtshan nyid shes par byed pa ni rtogs par byed pa'o/ /rus sbal rlung gis spro bar byed/ /ces bya ba ni rnam par rgyu ba'i rlung ngo //de ltar gnas skabs brgyad pa bstan nas/ da ni gnas skabs dgu pa brjod pa'i phyir/ de nas zhes bya ba la sogs pa gsungs te/ 'pho ba dgu pa la zhes bya ba la/ rim pa zhes bya ba ni yongs su smin pa'i rim pa'o/ /rlung gi khams kyi ro gang de rtogs par byed pa'o//lha sbyin zhes bya ba ni rab tu rgyu ba'o/ /rlung zhes bya ba ni rlung ste/ rtsangs rlung spro zhes bya ba dang 'brel to/ /rlung chen pos zhes bya ba ni sna'i rnam par shes pa dang lhan cig pa'o/ /kun 'gro zhes bya ba ni dri'i bye brag thams cad kyis rnam par yongs su spyod pa'o//de ltar gnas skabs dgu pa bstan nas/ da ni gnas skabs bcu pa brjod par bya ba'i phyir/ dgu'i dbus gnas zhes bya ba gsungs te/ de rjes 'pho ba bcu pa la/ /zhes bya ba ni zla ba bcu pa la'o/ /sngar bstan pa'i phung po lnga'i rlung gi steng du klu la sogs pa dbang po bzhi'i rten rlung bzhi'i grangs kyis dgur 'gyur ro//de rnams kyi dbus su son pa'o/ /khams zhes bya ba ni rlung gi rnam pa'o/ /phra zhing thogs med mtshan nyid can/ /zhes bya ba ni so so skye bo'i spyod yul ma yin pa nyid kyis thogs pa med pa'i mtshan nyid do/ /rtsa dang zhes bya ba ni lus su gtogs pa'i rtsa'i nang du'o//sgo ni dgu po rgyas par byed/ /ces bya ba ni rgyus pa rnams ni lus kyi nang du gtogs pa'i lus kyi sgo dgu po rgyas par byed pa ni/ sad par byed pa'o/ /lus kyi sgo ni tshor ba dang zhes bya ba ni lus kyi dbang po sad par byed pa'o/ /mchog gi zhes bya ba ni mchog nyid du byas nas so//gcig tu reg bya'i mtshan nyid 'dzin/ /zhes bya ba ni reg bya 'dzin pa'i rnam pa'o/ /nor rgyal zhes bya ba ni nges par rgyu ba'i ngo bo'o/ /rlung zhes bya ba ni rlung ngo / /rlung kun sdud pa'i mtshan nyid can/ /zhes bya ba ni rlung rnams sdud pa'i ngo bo'o//rab sad ces bya ba ni rim pas dbang po'i lam nas 'byung ba'i ngang tshul can no/ /mchog gi nam mkha' la zhes bya ba ni don dam par stong pa nyid kyis so/ /yang dag gnas zhes bya ba ni de nyid la'o/ /'od gsal bzang po'i zhes bya ba ni shin tu yang 'od gsal ba'i rnam pa'o//de ltar don rnam pa bcus sems can gyi khams bskyed pa bstan nas/ da ni sprul pa'i sku'i ngo bo brjod pa'i phyir/ shes pa bcu zhes bya ba la sogs pa gsungs te/ sdug bsngal shes pa dang / kun 'byung shes pa dang / 'gog pa shes pa dang / lam shes pa dang /zad pa shes pa dang / mi skye ba shes pa dang / chos shes pa dang / rjes su 'gro ba shes pa dang / yang dag par rig pa shes pa dang / yongs su dris pa shes pa zhes bya ba'o/ /sangs pa rnams kyi zhes bya ba ni lam bsgoms pa'i sgo nas gti mug gi sgrib pa bzlog pa rnams kyi'o//de lta bu nyid ces bya ba ni de ma thag par bstan pa'i zla ba bcu po sems kyi khams bskyed pa'i rgyur gyur pa'o/ /bshad par bya zhes bya ba ni brjod par bya ba'o/ /sa bcu zhes bya ba ni rab tu dga' ba la sogs pa'o/ /'pho ba bcu ni zhes bya ba ni sprul pa la rnam pa bcu'i gnas skabs skyed par byed pa'o//rnam par shes zhes bya ba ni shes par bya ba'o/ /bcu zhes bya ba ni grangs kyis so/ /rigs pa yis ni zhes bya ba ni gong nas gong du ye shes 'phel ba'i sbyor bas so/ /ma ni shes rab pha rol phyin/ /ces bya ba ni skyed par mdzad ma ste/ rnam par rtog pa 'joms par byed pa'i rnam pa'o/ /chen por zhes bya ba ni chen po nyid do/ /brjod ces bya ba ni gsungs pa'o/ /byis pa zhes bya ba ni de ma thag par skyes pa'o/ /yang dag rdzogs sangs rgyas zhes bya ba ni rnam par rtog pa med pa nyid kyi phyir ro/ /thams cad mkhyen zhing zhes bya ba ni rang bzhin gyis rnam par dag pa'am/sngon po dang ser po'i rnam pa yongs su shes pas so/ /thams cad gzigs zhes bya ba ni dngos po thams cad dbang po drug gis mthong bas so/ /mgo'i skra ni bregs pa dang / /zhes bya ba ni rang bzhin gyis ni dge slong la tshur shog mi dgos pa'o//phru ma'i chos gos yongs su bgos/ /zhes bya ba ni mi mnyam pa'i dus su 'byung bar 'gyur bas/ phru ma'i ming gis dmar po yongs su bgos pa'o/ /thal mo sbyor zhes bya ba ni rang bzhin gyis de lta bu'i dbyibs su 'dug par gyur pa'o/ / dpal dang ldan pas zhes bya ba ni gzi brjid dang ldan pa ste/ rang dang 'os pa'i bsod nams dang ye shes kyi tshogs kyi stobs kyis grub pa'i phyir ro/ /sa la zhes bya ba ni sa nyid la'o/ /gtugs pa'i phyag ces bya ba ni de lta bu'i rnam pa nyid kyis phyir 'byung ba'i phyir ro//mtshan ni sum cu rtsa gnyis 'dzin/ /zhes bya ba ni rang dang 'os pa'i mtshan 'dzin par byed pas so/ /rab sad byed ces bya ba ni dus ring po nyid du lhan cig skyes pa'i ngo bo bsgoms pas rab tu sad pa'i phyir ro/ /ye shes chen po thob pa dang / /zhes bya ba ni dngos po la rang gi mtshan nyid snang bas kyang gcig tu stong pa nyid yongs su shes pa'o//'du byed las ni grol ba dang / zhes bya ba ni dge ba dang mi dge ba'i 'du byed pa las grol ba nyid kyi phyir ro/ /rnam rtog med ces bya ba ni rnam par rtog pa med pa'o/ /dpa' bo chen po zhes bya ba ni nyon mongs pas mi 'jigs pa ste/phra mo'i spyod pa med pa'i phyir ro/ /skyed byed sha ni 'jigs pa dang / /zhes bya ba ni rang bzhin gyis sha chen 'jib pas dam tshig la gnas pa'o/ /bdud rtsi lnga ni zhes bya ba ni mngal gyi rtsa'i nang du gnas par byed pa nyid kyis bdud rtsi lnga po myong bar byed cing de la rtse gcig pas so//seng ge bzhin du spyod ces bya ba ni the tshom med pas so/ /spyod ces bya ba ni gnas par byed pa'o/ /rnal 'byor zhes bya ba ni rdzogs pa'i rim pa la sgom pa po'o/ /rtog pa thams cad rnam par spangs/ /zhes bya ba ni rnam par rtog pa'i tshogs ma lus pa dang bral ba'o//de ltar de nyid kyi sprul pa'i sku bstan nas/ da ni nye bar bsdu ba'i sgo bstan nas sba bar bya ba brjod pa'i phyir/ 'di nyid mchog tu gsang ba ste/ /zhes bya ba gsungs te/ de ma thag par bstan pa rnams te/ snod ma yin pa rnams la sba bar bya ba'o/ / mchog tu zhes bya ba ni khyad par du 'phags pa la mos pas khyad par du 'phags pa'i 'bras bu'i ngo bo'o/ /gang du yang ni ma gsungs so/ /zhes bya ba ni bya ba'i rgyud la sogs pa rnams la snod du ma gyur pa'i sems can rnams la mi bstan pa'o/ /rlung skyed pa yi nges pa ni/ /zhes bya ba ni zla ba bcu pa'i rim pas rlung bcu skyed par byed pa'i mtshan nyid do//shes zhes bya ba ni shes par bya ba'o/ /bla ma brgyud pa las zhes bya ba ni rgyud du gsungs pa'i mtshan nyid dang / yang dag par ldan pa'i rdo rje slob dpon gyi zhal las so/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las le'u sum cu rtsa gnyis pa'i rgya cher bshad pa'o// //de ltar le'u sum cu rtsa gnyis pas rlung rnams skyed pa'i yul la dri ba'i lan gdab pa bstan nas/ da ni de rnams nyid kyi nub pa'i yul la dri ba'i lan brjod pa'i phyir/le'u sum cu rtsa gsum pa nye bar dgod cing dang por re zhig de'i rtsom pa ni/ de nas zhes bya ba la sogs pa gsungs te/ le'u sum cu rtsa gnyis po'i rjes la'o/ /gzhan yang zhes bya ba ni snga ma bzhin no/ /rlung rnams zhes bya ba ni bcu'o//nub pa ni 'jig pa ste bshad par bya zhes bya ba dang 'brel pa'o/ /mchog tu zhes bya ba ni ji ltar gnas pa'i rang bzhin yongs su shes pas na mchog go/ /de ci zhig bya zhe na/ de'i phyir gang gis zhes bya ba gsungs te/ rlung rnams nub par gyur pas so/ /yongs su shes pa tsam gyis ni//zhes bya ba ni thos pa la sogs pa'i rim gyis shes pa tsam gyis so/ /'chi ba'i skad cig mtshan nyid ni/ /zhes bya ba ni 'chi ltas yongs su shes pas so/ /yang dag ces bya ba ni phyin ci ma log pa'i ngo bos so/ /de ltar de rtsom pa bstan nas/ da ni dngos su bshad pa brjod pa'i phyir/de'i yan lag rang gi ngo bo bshad pa ni/ phan tshun du ni zhes bya ba ni phan tshun no/ /yang dag sdud ces bya ba ni nye bar sdud pa'o/ /rim ltar zhes bya ba ni lo dang zla ba dang nyin zhag gi rim pas so/ /skye ba'i zhes bya ba ni rlung rnams la le'u sum cu rtsa gnyis pa las bshad pa'i tshogs so//thim par 'gyur zhes bya ba ni 'jig par 'gyur ba'o/ /rlung rnams zhes bya ba ni bcu po rnams kyi phan tshun du'o/ /'gro bar 'gyur zhes bya ba ni skye bar 'gyur ba'o/ /yang dag ces bya ba ni nges par byas nas so/ /'char dang nub pa'i nyin mtshan du//zhes bya ba ni ji ltar phyi rol du nyi ma'am/ zla ba 'char ba yod par gyur na slar yang nub par 'gyur ba de bzhin du'o/ /de ltar mdor bstan pa bshad nas/ da ni rgyas par bshad pa brjod pa'i phyir/ de'i yan lag dbang po'i rlung sdud pa bstan pa ni/ lo bcu lon na ni zhes bya ba la sogs pa gsungs te/nang gi dus kyis bsdus pa rnams kyis te/ phyi rol gyi lo gcig gi nang du nyin zhag gis bsdus pa'i phyir ro/ /de lta bur gyur pa'i lo bcus so/ /thog mar 'gro zhes bya ba ni dang po nyid du 'gro ba ni 'das pa rnams kyis so/ /nor las rgyal ba zhes bya ba ni nges par rgyu ba'i mtshan nyid do//rgyags las myos pa'i zhes bya ba ni khrag dang sha 'phel ba'i rgyur gyur pa'o/ /zos te zhes bya ba ni rang gis bya ba byed mi nus pa sgrub par byed pa'o/ /ci zhig byas nas she na/ de'i phyir skyes na zhes bya ba gsungs te/ de'i nus pa 'joms pa la nus zhes bya ba'i tha tshig go//rgyags las myos pa yang gzhan ni ma yin te/ thur sel gyi rlung zhes bya ba'i don to/ /ji ltar zhe na/ de'i phyir sgra gcan zla ba bzhin/ /zhes bya ba gsungs te/ ji ltar phyi rol du zla ba sgra gcan gyis za ba de bzhin du zhes bya ba'i don to/ / de nas zhes bya ba ni de'i rjes su'o/ /gzhan gyi lo bcur zhes bya ba ni de rnams kyis so/ /phyin pa zhes bya ba ni 'das pa'o/ /rgyags chu rlung ni yang dag skye/ /zhes bya ba ni khu ba dang tshil 'phel bar byed pa ste/ mnyam gnas kyi ming gi rnam grangs so/ /lha sbyin zhes bya ba'i rlung ni za zhes bya ba ni rab tu rgyu ba'i ngo bo'o//rlung ni rlung ngo / /snga ma bzhin zhes bya ba ni rgyags pas myos pa na nor las rgyal sdud pa bzhin du'o/ /rim pa zhes bya ba ni lo bcu'i rim pas so/ /gzhan yang lo bcur phyin pa ni zhes bya ba ni snga ma bzhin du'o/ /rgyags pa'i chu rlung skye bar 'gyur//zhes bya ba ni 'byung bar 'gyur ba'o/ /me dang rlung 'phel bar byed pa ste/ gyen du rgyu ba'i rnam pa'o/ /ji lta bu zhe na/ de'i phyir rtsangs pa zhes bya ba'i/ /zhes bya ba gsungs te/ kun nas 'bab pa ni ming can no/ /za zhes bya ba ni rang gi don byed pa la nus pa 'jig par byed pa'o//de nas zhes bya ba ni de'i rjes la'o/ /gzhan yang zhes bya ba ni lo rnams kyis so/ /lo bcur phyin ces bya ba ni son pa rnams kyis so/ /yang dag skyes pa'i rim pa yis/ /btang bzung zhes bya ba ni srog gi rlung ngo / /rlung ni chen po yis zhes bya ba ni rlung thams cad kyi gtso bor gyur pas so//rus sbal rlung ni za bar byed/ /ces bya ba ni rnam par rgyu ba'i rlung la nus pa 'jig par byed pa'o/ /de nas zhes bya ba ni rus sbal gyi rlung btang bzung gis zos pa'i rjes la'o/ /klu'i zhes bya ba ni gyen du rgyu ba'i rlung ngo / /btang bzung zhes bya ba ni srog gi rlung ngo //stobs dang gzi brjid mtshungs pa'i phyir/ /zhes bya ba ni mtshungs pa ni 'dra ba'o/ /rlung gi bya ba byed pa la stobs ni nus pa'o/ /gzi brjid ni rang dang 'os pa'i nus pa byed pa'i mtshan nyid gang la de skad ces bya'o/ /dus gzhan lo bcur phyin pa na/ /zhes bya ba ni lo bcu'i mthar thug pa'i bar du'o//gang gis kyang zhes bya ba ni gnyi ga'i nang nas gcig gis so/ /gang la zhes bya ba ni snga ma bzhin du btang bzung ngam klu la'o/ /gnod par byed pa ni nus te zhes bya ba dang 'brel to/ /phan tshun du sdud par byed pa'i rnam pas 'ching bar byed mi nus so//ci'i phyir zhe na/ de'i phyir/ stobs dang nus pa mtshungs pa'i phyir/ zhes gsungs te/ stobs dang nus pa dag mtshungs pa'i phyir ro/ /gzhan du zhes bya ba ni lo bcus so/ /phyin pa'i zhes bya ba ni 'das pa'o/ /btang bzung zhes bya ba ni srog gi rlung ngo / /stobs chen thabs zhes bya ba ni sngon gyi las kyi stobs shin tu chen po klu'i rlung gis nye bar sdud pa la nus pa thob nas so//klu'i zhes bya ba ni gyen du rgyu ba'i rlung gi rang bzhin no/ /za zhes pa ni rang gi bya ba byed pa la nus pa zlog par byed pa'o/ /rim gyis zhes bya ba ni 'grib pa dang shin tu 'grib pa la sogs pa'i rim gyis so//de ltar dbang po'i rlung nye bar bsdu ba bstan nas/ da ni phung po'i rlung nye bar bsdu ba bstan pa'i phyir/ de nas gzhan zhes bya ba gsungs te/ lo bcus so/ /phyin zhes bya ba ni 'das pas so/ /khrag dang sha ni rnam par 'phel/ /rgyags shing myos pa'i zhes bya ba ni thur sel zhes bya ba'i gzhan gyi ming can no//btang bzung zhes bya ba ni srog gi rlung ste/ za bar byed ces bya ba dang 'brel to/ /ci zhig byas nas she na/ de'i phyir mnyam par mnan na zhes bya ba gsungs te/ rang gi bya ba byed pa'i las bkug nas so/ /de nas zhes bya ba ni de'i rjes la'o//lo bcu pa phyin pa ni 'das pa'o/ /btang bzung nyid/ rgyags shing myos pas mnyam par gnas/ /zhes bya ba ni ming gzhan can no/ /za bar byed ces bya ba ni nye bar sdud par byed pa'o/ /ci zhig byas nas she na/ de'i phyir thob nas ni zhes bya ba gsungs te/ snga ma bzhin du mnan nas so//myos pa ji lta bu zhe na/ de'i phyir/ khrag dang tshil ni rnam par 'phel/ /zhes bya ba gsungs te/ khrag dang tshil rnam par 'phel bar byed pa'o/ /rlung chen po zhes bya ba ni rlung thams cad kyi gtso bor byed pa'o/ /ci zhig byed cing zhe na/ de'i phyir rtsa chu rnam par 'phel zhes bya ba gsungs te/bad kan la sogs 'byung ba'i ngang tshul can no/ /de nas zhes bya ba ni de'i rjes la'o/ /bcu pa gzhan phyin pa'i zhes bya ba ni 'das pas so/ /btang bzung nyid ces bya ba ni srog gi rlung ngo / /myos pa'i dus zhes bya ba ni gyen du rgyu ba'i rlung ste za bar byed ces bya ba dang 'brel to//btang bzung ji lta bu zhe na/ de'i phyir stobs rgyal zhes bya ba gsungs te/ rang gi nus pas nga rgyal dang bcas pa lta bur zhes bya ba'i don to/ /myos pa'i dus ji lta bu zhe na/ de'i phyir/ rlung dang me ni 'phel bar byed/ /ces bya ba gsungs te/ lus la gnas pa'i rlung dang me 'phel bar byed pa'o//rnam par 'gyur zhes bya ba ni lus la ltas ngan pa skyed par byed pa'i phyir ro/ /chen po zhes bya ba ni srog gi dbang po 'gag par byed pa'i phyir ro/ /longs spyod nga rgyal bcas zhes bya ba ni rlung thams cad nye bar bsdu ba'i rnam pas de nga rgyal dang bcas pa'o//de nas lo bcu gzhan lon na/ /zhes bya ba ni los so/ /rang gi lus rgyas lci bar 'gyur/ /zhes bya ba ni khyab byed kyi rlung 'gro bar byed pa nyid kyis so/ /g.yo ba med pa ni khyab byed kyi yul lci ba ni nye bar sdud pa brtson pa'o/ /ldog cing zhes bya ba ni rang gi lus la ldog par 'dod pas te/rim gyis 'grib par 'gyur zhes bya ba dang 'brel to/ /rnam par shes pa rim gyis 'grib par byed ces bya ba'i dgongs pa'o/ /ci zhig byas nas she na/ de'i phyir chu dang me ni 'dres pas na/ zhes bya ba gsungs te/ lus la gnas pa'i chu la/ rlung zhes bya ba ni rlung ste de thob nas so//de nas lo bcu gzhan du phyin/ /ces bya ba ni 'das pa la'o/ /rtsa ba dang bcas zhes bya ba ni rnam pa thams cad kyis so/ /med par 'gyur zhes bya ba ni 'jig par 'gyur ba ste/ rang gi lus dor nas bar do'i srid pa 'dzin par byed do/ /ji ltar zhe na/ de'i phyir/chu shing 'bras bu ji bzhin du/ /zhes bya ba gsungs te/ chen po zhes bya ba ni rlung zhes bya ba dang de ni thams cad sdud par byed pa'i phyir ro/ /las kyi rnam smin zad pa yis/ /zhes bya ba ni las kyi rnam smin la nye bar longs spyod pa mthar thug pa'i tshe na'o/ /de ltar rnam pa gnyis kyis nub pa'i ngo bo bstan nas/da ni nye bar bsdu ba brjod pa'i phyir/ de lta'i rim pa zhes bya ba gsungs te/ de ltar sngar bstan pa'i rim pas so/ /zla ba bcu'am yang na nyi ma bcu ste go sla'o/ /tshe ni nyung ngu byas nas zhes bya ba ni tshe thung ngu rnams kyi'o/ /'chi bar shes par bya zhes bya ba ni shes par bya ba'o//srog zad par ni zhes bya ba ni srog gi dbang po 'gag pas so/ /de ltar de'i nye bar bsdu ba bshad nas/ da ni de nyid rgyu gzhan las shes par bya ba brjod pa'i phyir/ mkha' 'gro ma bsdus rgyud las ni/ /zhes bya ba gsungs te/ de brjod par byed pa'i rnal 'byor pa'i rgyud las so//shes par bya zhes bya ba ni rlung rnams nub par gyur pa'o/ /shin tu rgyas par zhes bya ba ni shin tu yang rgyas pa las so/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/le'u sum cu rtsa gsum pa'i rgya cher bshad pa'o// //de ltar le'u sum cu rtsa gsum pas rlung rnams kyi nub pa'i yul la dri ba'i lan brjod nas/ da ni bsdu ba'i mkha' 'gro ma'i rnal 'byor gyi yul la dri ba'i lan gdab pa brjod pa'i phyir/le'u sum cu rtsa bzhi pa nye bar 'god cing dang por re zhig de'i rtsom pa ni/ de nas zhes bya ba la sogs pa gsungs te/ le'u sum cu rtsa gsum pa bstan pa'i rjes la'o/ /gzhan yang zhes bya ba ni snga ma bzhin du'o/ /bsdus pa'i mkha' 'gro'i rnal 'byor bshad/ /ces bya ba dang 'brel to//ma lus pa'i mkha' 'gro'i rnam par rtog pa bsdus pa'i mkha' 'gro ma ste/ rgyud kyi rim pa'i ngo bo zhes bya ba'i don to/ /de'i sbyor ba ni sbyor ba ste de'o/ /ji lta bu zhe na/ de'i phyir mchog gi ye shes te zhes bya ba gsungs te/ mngon par zhen pa med pa'i rnam pa mi dmigs pa'i rgyur gyur pa'i phyir ro//chen po'i chen po zhes bya ba ni rnam par rtog pa thams cad zad par byed pa nyid kyis shin tu yang mchog go/ /snying pos snying po'i don bsdus pa/ /zhes bya ba ni snying pos ni bskyed pa'i rim pa'o/ /snying po'i don bsdus pa zhes bya ba ni rdzogs pa'i rim pa'i rnam pa'o//de ltar de'i rtsom pa bstan nas/ da ni de'i dngos su bshad pa brjod pa'i phyir/ de'i yan lag tu bsdus pa'i mkha' 'gro ma'i nges pa'i tshig bstan pa ni/ mkha' 'gro rnams zhes bya ba la sogs pa gsungs te/ DA ki ni nam mkha' la 'gro bas/ /sangs rgyas dbyings su rab tu grags//mkha' spyod kun gyi dngos grub ni/ /mkha' 'gro zhes bya rab tu brjod/ /ces bya ba'i rigs pas so/ /mkha' 'gro rnams sdud pa zhes bya ba ni chos kyi 'khor lor gnas pa'i sangs rgyas lnga'i sa bon sdud par byed pa ni mi snang bar byed pas gang de'i phyir bsdus pa'i mkha' 'gror brjod de rigs pa'i ngo bo la brjod do//ji lta bus she na/ de'i phyir/ lte ba'i dbus na rtag bzhugs pa/ /zhes bya ba gsungs te/ lte ba'i dbus na zhes bya ba ni sprul pa'i 'khor lor gnas pa'i a yig shad kyi rnam pa bcom pa'i stobs kyis rdzogs pa'i phyir ro/ / rtag tu zhes bya ba ni dus thams cad du'o/ /nyi ma stong dang mtshungs pa'i 'od/ /ces bya ba ni nyi ma stong dang mtshungs pa'i 'od gang la yod pa de la de skad ces bya ste/ shin tu yang 'bar ba'i ngo bo nyid kyi phyir ro/ /ye shes chen po'i me 'byung ba/ /zhes bya ba ni thabs dang shes rab snyoms par zhugs pa las byung ba'i me ni ye shes kyi ngo bos so//'byung ba ni skyes pa'o/ /kun rtog thams cad 'joms par byed/ /ces bya ba ni rnam par rtog pa'i tshogs ma lus pa sdud par byed pa'i rnam pa'o/ /de ltar nges pa'i tshig bshad nas/ da ni bya ba bstan pa'i phyir/ 'char bas zhes bya ba la sogs pa gsungs te/'char bas zhes bya ba ni skyes par gyur pa'o/ /phung po'i rnam rtog ni zhes bya ba ni phung po lnga'i rnam par rtog pa sangs rgyas lnga'i sa bon gyi bdag nyid can la'o/ /bsreg byas zhes bya ba ni mi snang bar byed pa'o/ /bar chad med pa'i zhes bya ba ni/ yang dang yang du'o/ /lus zhes bya ba ni lus so/ /de rjes khams kyi rnam rtog ni/ /zhes bya ba ni lha mo bzhi'i sa bon gyi ngo bo'o/ /bsdus nas slar yang zhes bya ba ni mi snang bar byed pa ste/ snga ma ltar lus nyid do/ /rang bzhin gyis zhes bya ba ni dngos po las so/ /gzung dang 'dzin pa'i rnam rtog ni//zhes bya ba ni sprul pa'i 'khor lor gnas pa'i skabs kyi rnam par rtog pa dang / longs spyod kyi 'khor lor gnas pa'i de'i rnam par rtog pa'o/ /yang na gzung dang 'dzin pa'i rnam rtog ni/ g.yon pa dang g.yas pa'i rtsa gnyis la sngags dgod pa'i mtshan nyid do//rang bzhin de ni slar yang sdud par byed/ /ces bya ba ni dngos po la mi snang bar byed pa'o/ /de tsam gyis ni gnyis ka yang bdag med pa'i rnam pa nyid 'di la bstan to/ /phye leb bzhin zhes bya ba ni phye ma leb lta bu'o/ /gang las de ltar zhes bya ba ni sdud pa'i mkha' 'gro ma gang la'o//'ching ba thams cad sreg par byed/ /ces bya ba ni rnam par rtog pa thams cad do/ /de ltar bya ba bstan nas/ da ni de'i thabs brjod par bya ba'i phyir/ rlung gi de nyid mngon sbyor bas/ /zhes bya ba ni le'u bcu gnyis pa gsungs pa'i las kyi rlung gi ngo bos so/ /sngags kyi gzugs kyi rim pa yis//zhes bya ba ni bskyed pa'i rim pa bsgom pa sngon du 'gro bas so/ /rnam par rtog pa tsam yang ni/ /zhes bya ba ni phra mo'i rnam par rtog pa tsam gyis so/ /sreg pa tsam du zhes bya ba ni mi snang bar byed pa'o/ /the tshom med ces bya ba ni don 'di la the tshom med pa nyid de man ngag la dbang du gyur pa tshad ma'i phyir ro//de ltar de'i thabs bshad nas/ da ni rgyud gzhan las shes par bya ba bstan pa'i phyir/ mkha' 'gro ma sdud rgyud las ni/ /zhes bya ba gsungs te/ de'i ming can gyi rnal 'byor ma'i rgyud las so/ /shes na zhes bya ba ni shes par bya ba'o/ / rnal 'byor cho ga'i rim pa yis/ /zhes bya ba ni mkha' 'gro ma sdud pa'i rnal 'byor gyi cho ga'i lugs kyis zhes bya ba'i don to/ /rnal 'byor goms pas zhes bya ba ni rdzogs pa'i rim par gsungs pa'i zhi gnas dang lhag mthong bsgom pas so/ /bgrod ces bya ba ni spyod yul lo/ / mkha' 'gro ye shes rgyas pa ni/ /zhes bya ba ni sdud pa'i mkha' 'gro ma'i ye shes so/ /rgyas par ni zhes bya ba ni ma lus pa'i ngo bo'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/le'u sum cu rtsa bzhi pa'i rgya cher bshad pa'o// //de ltar le'u sum cu rtsa bzhi pas mkha' 'gro ma sdud pa'i yul la dri ba'i lan bshad nas/ da ni rnam par rtog pa'i rlung gis rnam par gcod pa'i mtshan nyid kyi yul la dri ba'i lan bstan pa'i phyir/ le'u sum cu rtsa lnga pa nye bar 'god cing dang por re zhig de'i rtsom pa ni/de nas zhes bya ba la sogs pa gsungs te/ le'u sum cu rtsa bzhi pa bshad pa'i rjes la'o/ /gzhan yang zhes bya ba ni snga ma bzhin du'o/ /rnam rtog rlung gis rnam gcod pa/ /zhes bya ba ni rnam rtog brgya rtsa brgyad kyi grangs dang / de tsam gyi grangs kyi rlung rnams kyis gcod pa zhes bya ba ni rnam par gcod pa'o//nyon zhes bya ba ni thos pa la sbyar ba'o/ /bshad kyis zhes bya ba ni brjod par zhal gyis bzhes pa'o/ /de ltar de'i rtsom pa bshad nas/ da ni de'i dngos su bshad pa brjod pa'i phyir/ rnam rtog gi rlung gis rnam par gcod pa'i yan lag mi mthun pa'i phyogs brjod pa'i sgo nas de'i ngo bo bstan pa ni/nyin dang mtshan du zhes bya ba la sogs pa gsungs so/ /nges par ni/ brgya dang brgyad kyis zhes bya ba ni rnam par rtog pa dang rlung rnams so/ /rgyu zhes bya ba ni 'bab pa'o/ /rlung rnams de rnams rnam rtog ni//zhes bya ba ni le'u gsum par gsungs pa'i btang bzung ba la sogs pa rnams kyi'o/ /de rnams dang rnam rtog ni zhes bya ba ni rlung gi stobs kyis skyes pa'i 'dod chags la sogs pa'i rnam par rtog pa rnams la'o/ /rnam par gcod pa zhes bya ba ni rnam par bzlog pa'o/ /skye zhes bya ba ni 'byung ba'o//gang phyir zhes bya ba ni rnal 'byor gang las so/ /rnal 'byor de ni zhes bya ba ni de ni rnal 'byor te de'i rang bzhin can gyi ting nge 'dzin gyi khyad par ro/ /mchog tu zhes bya ba ni 'jig rten las 'das pa nyid kyi phyir ro/ /zhi ba zhes bya ba ni so so'i skye bo'i rnam par rtog pa zhi bas so/ / thams cad stong pa'i ngo bo nyid/ /ces bya ba ni rim gnyis bsgom pa'i stobs kyis rang bzhin gyis 'od gsal ba'i de kho na nyid kyi rgyur gyur pa'i phyir ro/ /de ltar mi mthun pa'i phyogs brjod pa'i sgo nas de'i ngo bo bshad nas/ da ni de'i gnyen po'i phyogs kyi rnal 'byor brjod pa'i phyir/ thog mar re zhig bya ba la sogs pa gsungs te/dbang bskur ba thob nas rgyud thos pa dang bsam pa'i rjes la'o/ /rnal 'byor drug ces bya ba ni bskyed pa'i rim pa gtso bor gyur pa'i 'chad bzhin pa'i rigs pas so/ /bsgrub ces bya ba ni goms par bya ba'o/ /de la rnal 'byor drug ni dang po'i rnal 'byor dang /rnal 'byor dang / rjes su rnal 'byor dang / shin tu rnal 'byor gyi grangs kyis rnam pa bzhir rnam par bzhag nas/ de'i steng du dkyil 'khor rgyal po mchog dang / las rgyal po mchog ces bya ba dag gis rnam pa drug go/ /rnal 'byor rig pas zhes bya ba ni bskyed pa'i rim pa'i ting nge 'dzin ni yongs su shes pa'o//rnal 'byor rig pas snyam du dgongs nas so/ /mchog tu zhes bya ba ni lus rnam par dben pa'i mtshan nyid can gyi de kho na nyid la rgyur gyur pa'i phyir ro/ /de nas zhes bya ba ni rnal 'byor drug bsgom pa'i rjes la'o/ /dbyangs med yi ge ha zhes bya ba ni gzhom du med pa'i mtshan nyid can la'o//bzlas par bya zhes bya ba ni de la yi ge gsum gzhug pa la sogs pa rnams la rnam par sbyar nas/ nyin dang mtshan du dbugs kyi 'khor lo'i bar mtshon par bya ba'o/ /ji lta bu zhe na/ de'i phyir shin tu rgya cher zhes bya ba gsungs te/nyi khri chig stong drug brgya'i grangs kyi ngo bo nyid kyi phyir ro/ /de ltar de'i gnyen por gyur pa'i rnal 'byor bstan nas/ da ni de sgom po po'i yon tan bshad pa'i phyir/ gang phyir zhes bya ba la sogs pa gsungs te/ dbyangs med pa'i yi ge ha'i ngo bo las so/ /mdud pa 'joms shing zhes bya ba ni rtsa gsum gyi mdud pa bzlog pa'o//shes shing zhes bya ba ni nyams su myong bar bya ba'o/ /bde ba ster bar byed ces bya ba ni rnam par rtog pa dang rlung rnams bzlog pas bde ba thob par byed ces bya ba'o/ /de nyid kyi phyir de yis zhes bya ba la sogs pa gsungs te/ de yis zhes bya ba ni mdud pa 'joms pa des so//rnam rtog thams cad ni zhes bya ba ni ngag gi 'od gsal mi mthun pa'i phyogs su gyur pa rnams la'o/ /rnam dpyod 'gyur zhes bya ba ni rtsa ba dang bcas pa 'byin par 'gyur ro/ /skad cig la ni zhes bya ba ni mdud pa 'joms pa'i skad cig la'o/ /de ltar don rnam pa gsum gyis rnam par rtog pa dang rlung rnams gcod pa bstan nas/da ni de rnam par gcod pa la thabs brjod pa'i don du de'i yan lag bskyed pa'i rim pa bstan pa'i phyir/ rnal 'byor zhes bya ba la sogs pa gsungs te/ yan lag bzhi pa dang po'i rnal 'byor zhes bya ba'i don to/ / 'dir ni mdor bstan pa ste/ bco lnga yin zhes bya ba la sogs pas so/ /khyad par med pa rnam pa bco lnga po ste/ khyad par du ni rnam pa gnyis so/ /'khor dang lus kyi dbye bas so/ /de la 'khor ni rnam pa bcu ste/ rang gi sems la so sor rtog pa dang / dran pa nye bar gzhag pa'i rnam par dag pa dang /mchod pa bzhi dang tshangs pa'i gnas bzhi bsgom pa dang / gnas khyad par du 'phags pa la dmigs pa dang / bgegs bskrad pa dang / stong pa nyid bsgom pa dang / ye shes kyi sa gzhi bsgom pa dang / gzhal yas khang bsgom pa dang / mos pa'i dkyil 'khor bsgom pa zhes bya'o//lus la lnga ste/ don dam pa'i dkyil 'khor bsgom pa dang / stong pa nyid kyi sngags byin gyis brlab pa sngon du 'gro bas/ ye shes rgya mtsho las ldang ba dang / gdan gyi rnam par dbye bas bar do'i srid pa rnam par dag pa dang / chos kyi dbyings kyi de kho na nyid bsgom pa dang sngags kyis bstan par bya ba'o//de ltar na dang po'i rnal 'byor bsgom pa ni/ rnam pa bco lngas bya'o/ /bcu bdun rjes su rnal 'byor sogs/ /zhes bya ba ni rjes su rnal 'byor dang / shin tu rnal 'byor dang / rnal 'byor chen po'i dbye bas so/ /bsgom par bya zhes bya ba ni zhe sdang rdo rje bsgom pa'i don du goms par bya'o//de la rjes su rnal 'byor ni/ /rnam pa lngas mngon par byang chub pa'i rim pas dkyil 'khor gyi gtso bo rdzogs pa'i yan lag nyid kyi phyir gcig nyid do/ /shin tu rnal 'byor la rnam pa bzhi ste/ phung po dang / khams dang /skye mched dang / de'i yan lag byin gyis brlab pa'i dbye bas so/ /rnal 'byor chen po la drug ste/ lus ngag yid gsum byin gyis brlab pa dang / dam tshig dang / ye shes dang / ting nge 'dzin ni sems dpa' bsgom pa'i dbye bas so/ /rnal 'byor chen po'i yan lag bsgrub pa chen po la rnam pa bzhi ste/phyag rgya'i dbye ba dang / de 'du bya ba dang / rdo rje dang / pad+ma mnyam par sbyor ba sngon du 'gro bas de 'du bya ba dang / rjes su chags pa'i sngags brjod pa'i sgo dbye bas so/ /sgrub pa la gsum ste/ sgrub pa'i phan yon brjod pa dang / bde ba chen po'i mchod pa dang /mchod pa'i sngags kyis bstan par bya ba'o/ /de ltar yang dag par bsdus pas bcu bdun no/ /'dis ni dang po'i rnal 'byor gyi ting nge 'dzin ni bsdus pa bstan to/ /de nas dkyil 'khor rgyal mchog go/ /rnal 'byor mchog la dbye ba lnga/ /zhes bya ba ni de bzhin gshegs pa dang /lhan cig spyod ma dang / byang chub sems dpa' dang / khro bo'i spro ba'i dbye bas so/ /mchog la zhes bya ba ni lus rang bzhin med par rtogs par byed pa'i phyir ro/ /de las kyang zhes bya ba ni dkyil 'khor rgyal po mchog gi bsgoms pa'i rjes la'o/ /de las kyang ni las rgyal mchog / rnal 'byor dbye ba bcu gnyis po/ /zhes bya ba ni phra mo'i rnal 'byor dang / bzlas pa rnam pa gnyis dang / bya ba byas nas zhu ba dang / lha mo bzhis yang dag par bskul ba dang / ldang ba dang / bzhengs nas de bzhin gshegs pa lngas bstod pa dang / dkyil 'khor gyi 'khor lo nye bar bsdu ba dang /sgong skyes kyi rim pas rdo rje sems dpa' bskyed pa dang / lus gso ba'i cho ga dang / bdud rtsi myang ba dang / phyi rol gyi bza' ba'i cho ga dang / gshegs su gsol ba nas nyal ba'o/ /de nyid dbye ba bzhi bcu dgu/ /zhes bya ba ni sngon du bstan pa'i yan lag ma lus pa'i grangs kyis so//bskyed pa'i rim pa bsdus pa'o zhes bya ba ni ting nge 'dzin gsum gyi bdag nyid can no/ /de ltar bskyed pa'i rim pa bsgom pa bstan nas/ da ni rdo rje'i bzlas pa brjod pa'i phyir/ de'i yan lag rang gi ngo bo bstan pa ni/ mngon sum byed pa'i zhes bya ba la sogs pa gsungs te/ spyir bskyed pa'i rim pa'o//don gyis na shin tu zab pa yang gzung bar bya'o/ /de nas zhes bya ba ni de'i rjes la'o/ /rnal 'byor pa zhes bya ba ni sngags kyi theg pa sgom pa po'o/ /rdo rje bzlas rim zhes bya ba ni rdo rje ltar dbyer mi phyed pa'i rlung gi 'khor lo tsam gyis bsgrub par bya ba'i bzlas pa ni rdo rje'i bzlas pa'o//de nyid ni rim pa ste/ go rims bzhin du slob pa'o/ /mchog ces bya ba ni ngag 'od gsal ba'i rgyur gyur pa'o/ /rdzogs pa'i rim pa'i rnal 'byor bdag /ces bya ba ni rang bzhin gyis grub pa'i rim pa bsgom pa'i bdag nyid can no/ /rnam par rtog pa zhes bya ba ni rang bzhin brgya rtsa brgyad kyi ngo bo rnams la'o//'joms byed pa zhes bya ba ni khyad par du klog par byed pa'i bdag nyid can no/ /cho ga bzhin bsgom zhes bya ba ni dkyil 'khor bzhi 'char ba'i rim pas goms par bya'o/ /rnal 'byor pa zhes bya ba ni rlung dang sngags kyi de kho na nyid sgom pa po'o/ /phra ba'i de nyid ces bya ba ni ma ning gi bzlas pa'i ngo bo'o//bla na med ces bya ba ni 'jig rten las 'das pa nyid kyi phyir ro/ /sngon bzhin bsgoms zhes bya ba ni rlung dang sngags kyi de nyid bsgom pa dang 'byung 'jug rjes su dran pa'i bsgoms pas so/ /blo dang ldan pas zhes bya ba ni rdzogs pa'i rim pa bsgom pa la mkhas pa'o//srid pa'i 'ching ba gcod par byed/ /ces bya ba ni rnam rtog gi rlung 'joms par byed pa'o/ /ye shes che zhes bya ba ni/ /rang bzhin gyis 'od gsal bas brgyud pas rgyur gyur pa'i phyir ro/ /rnal 'byor chen po zhes bya ba ni bskyed pa'i rim pa'i rnal 'byor las khyad par du 'phags pa'i phyir ro//de nyid chen po zhes bya ba ni ngag 'od gsal ba'i ngo bo nyid kyi phyir ro/ /rmad byung che zhes bya ba ni gzhan don gyi rgyur gyur pa'i phyir ro/ /de ltar rang gi ngo bo bstan nas/ da ni che ba'i bdag nyid brjod pa'i phyir/ nges par bsgoms pas zhes bya ba gsungs te/ rlung gi ngo bo nges pas goms par bya'o//yang dag ni zhes bya ba ni chad pa dang lhag pas bgrang ba las bzlog pas phyin ci ma log pa'i ngo bos so/ /rnam rtog rlung ni gcod par byed/ /ces bya ba ni rnam par rtog pa ni rlung gi stobs kyis skyes pa'i rang bzhin rnams dang / rlung rnams ni btang bzung la sogs pa rnams kyis gcod par byed pa'o//don gyi rjes 'gro bzlas pa yis/ /zhes bya ba ni gang zhig 'di 'jug pa dang gnas pa dang ldang ba'i bdag nyid can gyi rlung gsum po nyin mtshan du zo chun rgyud mo'i rigs pas nyi khri chig stong drug brgya'i grangs kyis 'jug par byed pa de rnams kyi don gyi rjes su 'gro ba ni/ci rigs par rjes su mthun pa yongs su shes pa ni bzlas pa ste des so/ /dngos med ces bya ba ni rten cing 'brel par 'byung ba'i phyir rang bzhin dang bral ba'o/ /ngo bo gcig pa dang zhes bya ba ni de'i ngo bo gcig pas so/ /stong nyid goms la lan mang dang / /zhes bya ba ni de dang de'i sgo nas stong pa nyid la goms pas so//nges par bya ba ni phyir mi ldog pa'i sa la gnas pa'i phyir ro/ /bstan par sgom pa po zhes bya ba ni rlung bsgoms pas brtson 'grus drag po dang ldan pa'o/ /sgrub po zhes bya ba ni rdo rje bzlas pa'i rim pa sgom pa po'o/ /bsgoms byas na zhes bya ba ni goms par byed pa'o//yang dag ces bya ba ni phyin ci ma log pa'i ngo bos so/ /rdo rje'i bzlas zhes bya ba ni phyi rol gyi bzlas pa'i mtshan nyid dang bral ba mi phyed pa'i bzlas pa'o/ /mchog ces bya ba ni sems rtse gcig pa'i rgyur gyur pa'i phyir ro/ /rim zhes bya ba ni rim gyis 'jug pa la slob pa'i phyir ro//de ltar de'i che ba'i bdag nyid bstan nas/ da ni de'i 'bras bu brjod pa'i rim bzhin zhes bya ba ni go rims bzhin du'o/ /de yis zhes bya ba ni rdo rje bzlas pa'i bsgoms pas so/ /yongs su shes zhes bya ba ni ma ning bzlas pa'i rnam pas so/ /thob 'gyur zhes bya ba ni yang dag par thob pa'o//the tshom med ces bya ba ni bcom ldan 'das kyis bstan pa nyid kyi the tshom med pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u sum cu rtsa lnga pa'i rgya cher bshad pa'o// //de ltar le'u sum cu rtsa lnga pa/ rnam par rtog pa dang rlung gcod pa'i yul la dri ba'i lan bstan nas/ da ni rnam pa med pa'i rlung gi mtshan nyid kyi yul la dri ba'i lan brjod pa'i phyir/ dang por re zhig de rtsom pa ni/ de nas zhes bya ba la sogs pa gsungs te/sum cu rtsa lnga pa bshad pa'i rjes la'o/ /gzhan yang zhes bya ba ni snga ma bzhin du'o/ /rnam rtog med pa'i rlung shar ba/ /zhes bya ba dang 'brel to/ /rnam par rtog pa med pa ni/ /rnam rtog spangs pa de kho na nyid gang las 'byung ba de rnam rtog med par skye ba ste/mchog ces bya ba ni mchog tu rang bzhin gyis 'od gsal ba'i rnam pa'i de kho na nyid mngon du byed pa'i rgyu yin pa'i phyir ro/ /des ci zhig byed ce na/ de'i phyir gang zhes bya ba gsungs te/ rnam par mi rtog pa'i de kho na nyid gang la'o/ /shes zhes bya ba ni thos pa dang bsam pa dang bsgom pa'i stobs kyis shin tu rtogs pa la ste/rdo rje sems dpa' go 'phang thob/ /ces bya ba dang 'brel to/ /rdo rje sems dpa' ni zung du 'jug pa'i rim pa'i bdag nyid can gyi rang gi ngo bo ni/ rang bzhin gyis 'jug pa'i mtshan nyid do/ /'thob pa ni rtogs pa zhes bya ba'i don to//de ltar de rtsom pa bstan nas/ da ni dngos su bshad pa brjod pa'i phyir/ de'i yan lag rnam rtog med pa'i rlung shar ba rang gi ngo bo bstan pa ni/ rtogs pa med pa'i zhes bya ba gsungs te/ ma ning gi bzlas pa'i ngo bo'o/ /rlung chen po zhes bya ba ni rang gi ngo bo rnyed pas so//gnyis pa thams cad rnam par spangs/ /zhes bya ba ni rnam rtog gi rlung dang bral ba'i phyir ro/ /dngos po kun gyi rang bzhin bdag /ces bya ba ni rnam par rtog pa dang rlung la khyab par byed pa'i phyir ro/ /bsgom dang bsgom min go 'phang bral/ /zhes bya ba ni 'dug pa dang gnas pa ldang ba spangs pa'i phyir ro//ye shes che zhes bya ba ni 'od gsal ba'i ngo bo nyid kyi phyir ro/ /rnal 'byor chen po zhes bya ba ni bskyed pa'i rim pa'i rnal 'byor dang bral ba'i phyir ro/ /dpe med ces bya ba ni bag chags dang bral bas so/ /dri ma med pa dang zhes bya ba ni rigs pa'i nyon mongs pa dang bral ba'i phyir ro//phra ba'i cha kun dbus na gnas/ /zhes bya ba ni phra ba'i cha thams cad kyi mthar gnas pas na de la de skad ces bya ste/ a wa d+hU tI'i ngo bo nyid kyi phyir ro/ /thig le nA da rnam par spangs/ /zhes bya ba ni rlung dang chos kyi 'khor lor gnas pa'i thig le nA da dag dang bral ba'o/ /kun la khyab cing zhes bya ba ni rtsa'i 'khor lo la khyab par byed pa nyid kyis so//zhi ba dang zhes bya ba ni de dang bral ba'i rnam rtog gis ma gos pa dang sems 'od gsal ba'i ngo bo nyid kyi phyir ro/ /bdag byin gyis brlabs pa'i mtshan nyid ces bya ba ni sgyu ma lta bu'i ting nge 'dzin gyi ngo bo nyid kyi phyir ro/ /gzung dang 'dzin pa rnam spangs pa//zhes bya ba ni ril por 'dzin pa dang rjes su gzhig pa'i rim pas gzung ba dang 'dzin pa mi snang bar byed pas so/ /bag chags rnam rtog rnam par spangs/ /zhes bya ba ni phra ba'i rang bzhin bzlog pa'i phyir ro/ tshigs mdud pa las zhes bya ba ni rtsa'i mdud pa'o/ /cha yis stong zhes bya ba ni byang chub sems kyi cha yis so//bsgom dang zhes bya ba ni lhan cig skyes pa'i ngo bo mngon du byed pa'i thabs so/ /bsgom bya zhes bya ba ni dpe'i lhan cig skyes pa'o/ /rnam par spangs pa zhes bya ba ni rnam par bral ba'o/ /tshigs dang mdud pa dang cha dang lam dang bsgom pa dang bsgom bya ni/tshigs mdud pa la cha yi lam/ /sgom dang bsgom bya rnam par spangs/ /zhes bya ba'o/ /thig le nA da rnam par spangs/ /zhes bya ba la thig le ni byang chub kyi sems kyi thig le'o/ /nA da ni de'i dus la bab pa'i bde ba chen po'i sgra'o/ /go 'phang ni rten no/ /de rnams 'das pa ni rnam par spangs pa te/thabs yin pa'i phyir ro/ /thabs kyang gzings dang 'dra ba nyid kyis dor bya'i phyir ro/ /stong nyid ye shes mtshan nyid do/ /zhes bya ba ni stong pa nyid chen po bco brgyad kyi bdag nyid can gyi 'od gsal ba'i de kho na nyid yongs su shes pa'i rang bzhin can ni/ sngags dang phyag rgya zhes bya ba la/ sngags ni bskyed pa'i sa bon la sogs pa'am snying po dang / nye ba'i snying po'o/ /phyag rgya ni lag pa'i phyag rgya'am/ dam tshig gi phyag rgya'o/ /de bzhin rnam pa zhes bya ba ni de dag gis bsgrub pa'i rnam pa ni/ lha'i gzugs kyi mtshan nyid do/ /de'i ngo bo'i cha ni rnam par rtog pa bskyed pa'i rim pa'i ngo bo ste/de'i dbye ba rnam par spangs pa ni/ de dang bral ba'o/ /de ltar rnam rtog med pa'i rlung 'char ba'i ngo bo bstan nas/ da ni de nyid la rgyud gzhan la ma bstan pa'i rim pas thabs brjod pa'i phyir/ bya ba spyod pa'i zhes bya ba la sogs pa gsungs te/lan gsum du khrus dang gos lan gsum du brje ba bstan pa gtso bor gyur pa'i bya ba'i rgyud las so/ /brdungs pa dang lugs su blugs pa'i zhal dang phyag la sogs pa 'dzin pas rdo rje sems dpa' la sogs pa'i ngo bo 'dzin pa ston par byed pa ni spyod pa'i rgyud do/ /zhal gsum phyag drug la sogs pa'i gzugs 'dzin pa 'khor los sgyur ba la sogs pa'i gzugs grub pa ston par byed pa ni rnal 'byor gyi rgyud do//rgyud rnams la yang ma gsungs so/ /zhes bya ba ni de lta bu la mos pa'i sems can rnams la de'i yul la mi mos pa'i phyir ro/ /rnal 'byor chen po'i rgyud chen po//zhes bya ba ni rim pa gnyis ston par mdzad pa'i dpal gsang ba 'dus pa la sogs pa'o/ /bshad par bya zhes bya ba ni brjod pa'o/ /dam tshig ces bya ba ni rnam par mi rtog pa rang gi ngo bo'o/ /mchog ces bya ba ni mchog gi skyes bu'i don to/ /thog ma nyid du bshad par rigs//zhes bya ba ni rtsa dbus mar 'jug pa'i dus su hUM yig bzlas pa'i mtshan nyid do/ /man ngag gi rim pa mi 'dor bas so/ /ji bzhin cho ga zhes bya ba ni rgya cher le'u nyi shu rtsa gnyis par bstan pa'i cho ga'o/ /de ltar de nyid la rgyud gzhan rnams la bstan pa'i rim pas thabs bstan nas/da ni de nyid la bla ma'i gdams ngag gis thob par bya ba brjod pa'i phyir/ de nyid rig pa'i rjes 'gro shes/ /zhes bya ba gsungs te/ sngar bstan pa'i rim pas so/ /shes zhes bya ba ni shes par bya ba'o/ /bla ma brgyud pas shes zhes bya ba ni rdo rje slob dpon gyi zhal las so//go 'phang mchog ces bya ba ni mchog gi go 'phang thob pa'i rgyur gyur pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u sum cu rtsa drug pa'i rgya cher bshad pa'o// // de ltar le'u sum cu rtsa drug pa rnam par rtog pa med pa'i rlung gi mtshan nyid kyi yul la dri ba'i lan bstan nas/ da ni rtsa rnams nub pa'i rnal 'byor gyi yul la dri ba'i lan brjod pa'i phyir/ le'u sum cu rtsa bdun pa nye bar 'god cing / dang por re zhig de'i rtsom pa bstan pa ni/ de nas zhes bya ba la sogs pa gsungs te/le'u sum cu rtsa drug pa bshad pa'i rjes la'o/ /bcom ldan rdo rje zhes bya ba ni de bzhin gshegs pa drug pa rdo rje 'chang gi rnam pa'o/ /rtsa rnams nub pa'i rnal 'byor ni/ /yang dag sbyor ba bshad kyis nyon/ /zhes bya ba dang 'brel to/ /de kho na nyid ces bya ba ni don dam par ro/ / rdo rje can ji lta bu zhe na/ de'i phyir/ the tshom thams cad gcod pa po/ /zhes bya ba ste/ the tshom thams cad zlog par byed pa'o/ /nyon zhes bya ba ni phyag na rdo rje nyan pa la sbyar ba'o/ /de ltar de rtsom pa bstan nas/ da ni dngos su bshad pa brjod pa'i phyir/ de'i yan lag rtsa rnams kyi bskyed pa rjes su 'gro ba'i rim pa bstan pa ni/yul dang dbang po yang dag sbyor/ /zhes bya ba gsungs te/ dmigs pa dang bdag po'i rkyen dang 'brel pa las so/ /rtsa rnams zhes bya ba ni rig pa'i rang bzhin 'khor lo bzhir gtogs pa rnams la'o/ /'char bar 'gyur zhes bya ba ni rab tu sad pa las so/ / 'char nas sngon bzhin zhes bya ba ni yid la byed pa dang rlung dang yang dag par sbyor ba las skyes pa ni/ rab tu sad par gyur nas so/ /skye ba'i rim pa bla na med/ /ces bya bar sbyar ro/ /de nas gzhan pa bskyed pa'i nus pa'i ngo bo 'byung bar 'gyur ro/ /bla na med ces bya ba ni 'khor ba'i chos la 'jug pa'i gong na med pa'i phyir ro//kun rtog skye ba zhes bya ba ni rang bzhin gyis tshogs bskyed pa'o/ /de'i phyir zhes bya ba ni skye ba'i rim pa dbang po dang yul yang dag par sbyor ba'i ngo bos so/ /de nyid kyi phyir brgya dang brgyad kyis zhes bya ba gsungs te/ le'u gsum pa gsungs pa'i cho gas so/ /rim zhes bya ba ni rim pa ji lta bar zhes bya ba'i don to//de las byung ba'i las kyi stobs kyis zhes bya ba'i tshig go/ /de las skye dang zhes bya ba ni brgya dang brgyad kyi rang bzhin gyi tshogs las dang bcas pa las so/ /skye dang zhes bya ba ni 'gro ba drug gi 'khor ba pa'o/ /na rga zhes bya ba ni phung po yongs su smin pa dang / nad rnams la skye ba sngon du 'gro ba nyid kyi phyir ro/ /'chi ba zhes bya ba ni 'chi ba'o/ /slar yang ldog par 'gyur zhes bya ba ni slar yang srid pa gzhan du skye ba 'dzin par byed ces bya ba'i don to/ /de ltar rtsa rnams bskyed pa'i yul la rjes su 'gro ba bsten nas/ da ni ldog pa'i rim pa brjod pa'i phyir/yul rnams zhes bya ba la sogs pa gsungs te/ sngon po la sogs pa'o/ /yul rnams dngos po med pa yis/ /zhes bya ba ni don dam par rang bzhin gyis dben pa yang dag par shes pas so/ /de nyid kyi zhes bya ba ni gcig dang du ma la sogs pa'i rigs pa rnams kyis so/ /dpyod pa'i phyir zhes bya ba ni rnam par dpyod pa'o//gang gi tshe zhes bya ba ni dus gang gi tshe'o/ /de las shes zhes bya ba ni sngon po la sogs pa'i yul rnams la'o/ /de tshe zhes bya ba ni don dam pa la tshe'o/ /dngos med shes zhes bya ba ni rang gi med par shes pa yin no/ /yul rnams med pa yi zhes bya ba ni de ma thag par bstan pa'i rnam par dpyad pas so//dngos su zhes bya ba ni mngon sum nyid du'o/ /dbang po rnams ni zhes bya ba ni mig la sogs pa drug pa'o/ /skye ba min zhes bya ba ni dngos med ni skye ba med pa zhes bya ba'i don to/ /de nas zhes bya ba ni de'i rjes nyid la'o/ /gnyis gnyis yang dag sbyor zhes bya ba ni dbang po dang yul yang dag par sbyor ba'i mtshan nyid can la'o//dngos dang zhes bya ba ni rang bzhin la'o/ /dngos med stong nyid ces bya ba ni dngos po med pa'i phyir khyad par du gtso bo de gnyis la stong pa nyid ces bya ba'i don to/ /de nas zhes bya ba ni dbang po dang yul yang dag par sbyor ba med pas so//rtsa rnams zhes bya ba ni rtsa rnams la'o/ /nub 'gyur te zhes bya ba ni mi 'chad par 'gyur ba'o/ /ji lta bu zhe na/ de'i phyir/ 'khor lo'i rim pa la ni brten/ /zhes bya ba gsungs te/ sprul pa'i 'khor lo'i rim pas gnas/ /zhes bya ba'i don to//de rnams shes zhes bya ba ni 'khor lo bzhi po'i rtsa rnams so/ /nub pa las ni zhes bya ba ni mi 'char bas so/ /zhi zhes bya ba ni sad pa med pa'o/ /stong phrag bdun cu rtsa brgyad ni/ /zhes bya ba ni 'khor lo bzhir gtogs pa'i rtsa rnams kyi bdag po'i dbang gis de rnams yang dag par bskyed pa'o//kun kyang rtsa yi 'khor los sgyur/ /zhes bya ba ni byang chub sems kyi cha la khyab par byed pa'o/ /de ltar rjes su ldog pa'i rim pa bstan nas da ni de rnams kyi 'char ba'i rgyu'i yul la rnam par dpyod pa'i phyir/ stong nyid rnal 'byor bsgoms pa las/ /zhes bya ba gsungs te/chos thams cad rang bzhin med pa'i mtshan nyid bsgom pa'i sbyor ba ni/ goms pa'i sbyor bas so/ /yul rnams kyi ni zhes bya ba ni gzugs la sogs pa rnams la'o/ /ngo bo nyid ces bya ba ni lhan cig skyes pa ma bcos pa'i ngo bo'o/ /shes pa zhes bya ba ni shes par byed pa'o//nges pa nyid du zhes bya ba ni rnam pa 'dis nges pa'o/ /rigs pa rdo rje zhes bya ba ni rten cing 'brel par 'byung ba la sogs pa gtan tshigs chen po lnga'i ngo bo'o/ /rdo rje ltar 'jig tshogs la lta ba thams cad ri'i rtse mo ltar 'joms pa ni/ rnam par nye bar byed pa ni/ dngos po la mngon par zhen pa'o//'joms par byed pa ni zlog par byed pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u sum cu rtsa bdun pa'i rgya cher bshad pa'o// //de ltar le'u sum cu rtsa bdun pas rtsa rnams nub pa'i yul la dri ba'i lan bstan nas/da ni 'khor lo drug gi sbyor ba'i bsgom pa'i yul la dri ba'i lan brjod pa'i phyir/ le'u sum cu rtsa brgyad pa nye bar ston cing / dang por re zhig de'i rtsom pa ni/ de nas zhes bya ba la sogs pa gsungs te/ le'u sum cu rtsa bdun pa bshad pa'i rjes la'o//gzhan yang zhes bya ba ni snga ma bzhin du'o/ /sbyor drug go 'phang mtshan nyid do/ /zhes bya ba dang 'brel to/ /sbyor ba drug gi go 'phang dang / /'khor lo rnams kyi ngo bo'i mtshan nyid ni/ phyin ci ma log pa'i ngo bos rnam par bshad kyis zhes bya ba ste bshad kyis nyon zhes bya ba dang 'brel to//ji ltar zhe na/ de'i phyir ji lta ba bzhin zhes bya ba gsungs te/ phyin ci ma log pa'i ngo bos so/ /ji ltar sbyor zhes bya ba ni go rims yongs su spangs pas so/ /ji ltar 'dod pa'i yan lag rten/ /zhes bya ba ni ji ltar 'dod pas 'gro ba'i rten no/ /yang na ji ltar grangs kyi dbye ba yis//zhes bya ba 'byung ste/ de'i phyogs la ni 'khor lo drug ni dbye bas zhes bya ba bshad par bya'o/ /de ltar de'i rtsom pa bstan nas/ da ni dngos su bshad pa brjod pa'i phyir/ de'i yan lag 'khor lo drug mdor bstan pa ni rtsibs drug po zhes bya ba la sogs pa gsungs so//de'i dbyibs can gyi rlung gi 'khor lo'o/ /de las phyed ces bya ba ni rlung gi 'khor lo las phyed ni/ rtsibs gsum pa me'i 'khor lo'o/ /de bzhin brgyad po brgyad ces bya ba ni brgyad po brgyad ni rtsa 'dab ma drug cu rtsa bzhi'i dbyibs can ni sprul pa'i 'khor lo'o/ /de nas brgyad ces bya ba ni chos kyi 'khor lo ste rtsa brgyad kyi dbyibs can no//brgyad gnyis zhes bya ba ni 'dab ma bcu drug gi bdag nyid can longs spyod kyi 'khor lo'o/ /brgya phrag bzhi dang ni zhes bya ba ni rtsa sum cu rtsa gnyis kyi bdag nyid can gyi bde ba chen po'i 'khor lo'o/ /grangs kyi sbyor ba zhes bya ba ni 'khor lo drug gi grangs kyi ngo bo'o//de ltar gsal zhes bya ba ni cho ga 'dir gsal ba'o/ /de ltar 'khor lo drug mdor bstan nas/ da ni de rgyas par bshad pa brjod pa'i phyir/ de'i yan lag rlung gi 'khor lo rgyas par bshad pa ni/ zla ba phyed pa'i cha lta bu zhes bya ba gsungs te/ zla ba phyed pa'i rnam pa'o//cha zhes bya ba ni byang chub kyi sems kyi ngo bo la'o/ /rlung gi 'khor lo zhes bya ba ni smin mtshams kyi dbus su gnas pa'o/ /ji lta bu zhe na/ de'i phyir stong nyid ces bya ba gsungs te/ don dam par dngos po las rang bzhin med pa'i phyir ro/ /phyed pa'ang ma yin zhes bya ba ni lus la khyab pa nyid kyi phyir ro//rdzogs pa min zhes bya ba ni phyed pa'i ngo bo nyid kyi phyir ro/ /chu yi zla ba lta bur snang / /zhes bya ba ni ji ltar chu'i nang du zla ba med pa rdzogs pa nyid dang bral ba de bzhin du zhes bya ba'i tha tshig go/ /gzhan yang sgyu ma chen po zhes bya ba ni de lta bu nyid ma yin yang de ltar snang ba'i phyir ro//'gro ba'i ma zhes bya ba ni byang chub kyi sems nyid las ji ltar srid par 'gro ba bskyed pa'i phyir ro/ /thams cad ces bya ba ni lus la'o/ /rten pa'i mtshan nyid ni zhes bya ba ni rten pa'i ngo bo'o/ /rlung gi 'khor lo zhes bya ba ni smin ma'i dbus su gtogs pa'i rtsibs drug pa la'o//srog ces bya ba ni srog gi rang bzhin no/ /ye shes can rnams kyi yang zhes bya ba ni rdzogs pa'i rim pa la gnas pa rnams kyi'o/ /spyod yul min zhes bya ba ni spyod yul ma yin pa'o/ /de ltar rlung gi 'khor lo rgyas par bshad pa bstan nas/ da ni me'i 'khor lo rgyas par bshad pa brjod pa'i phyir/me'i 'khor lo zhes bya ba gsungs te/ longs spyod kyi 'khor lo'i 'og tu'o/ /stong nyid ces bya ba ni rang bzhin gyis khong stong du yod pa'i phyir ro/ /nang du zhes bya ba ni dbus so/ /thig le'i ngo bo zhes bya ba ni haM yig las byung ba'i phyir ro/ / yi ge kun la zhes bya ba ni sngags thams cad la yi ge dang por gyur pa'i phyir ro/ /kun du 'gro zhes bya ba ni 'byung ba chen po'i 'khor lo ma lus pa khyab par byed pa'i phyir ro/ /kun du khyab ces bya ba ni dro bar gyur pa nyid kyis lus thams cad la khyab pa'o/ /rang 'byung zhes bya ba ni ma bcos pa'i ngo bos me yod pa'i phyir ro//bde ba yang dag 'phel bar byed/ /ces bya ba ni bde ba chen po rnam pa gnyis 'phel bar byed pa'o/ /dbyangs dang gsal byed rnam par spangs/ /zhes bya ba ni spros pa med pa nyid kyi phyir ro/ /'jig rten gsum ni zhes bya ba ni mtho ris dang mi yul dang sa 'og gi ming can gyi lus la'o//ma lus pa zhes bya ba ni 'khor dang bcas pa rnams so/ /gcig tu byas zhes bya ba ni gtso bo'i rgyu'o/ /skyed par byed ces bya ba ni de'i bdag po nyid kyis de las gzhan pa'i lus bskyed pa'i phyir ro/ /de ltar me'i 'khor lo rgyas par bshad pa bstan nas/da ni sprul pa'i 'khor lo rgyas par bshad pa brjod pa'i phyir/ mi shigs nA da'i zhes bya ba la sogs pa gsungs te/ nA da zhes bya ba ni a yig gi rnam pa ste/ brag ca dang 'dra ba nyid kyi phyir ro/ /mi shigs go 'phang zhes bya ba ni mi 'jig pa nyid kyi phyir ro/ / rnam pa thams cad rnam par spangs/ /zhes bya ba ni gzung ba dang 'dzin pa las dben pa'i phyir ro/ /sbrul glog lce ltar g.yo ba'i lus/ /zhes bya ba ni glog dang 'dra ba nyid kyi phyir ro/ /tshangs pa la sogs zhes bya ba ni sku'i rdo rje la sogs pa rnams kyi'o/ /mes po dang zhes bya ba ni skyed par byed pas so//ji skad du/ tshangs pa sku yi rdo rjer 'gyur/ /gsung gi rdo rje dbang phyug che/ /thugs ni rdo rje 'dzin rgyal nyid/ /de nyid khyab 'jug rdzu 'phrul che/ /zhes bya ba gsungs so/ /yi ge min zhes bya ba ni yi ge'i dbyibs dang bral ba'i phyir ro/ /g.yo ba min zhes bya ba ni brtan pas mi 'jig pa'i phyir ro//'byung ba'i tshogs ni rnam par spangs/ /zhes bya ba ni sa la sogs pa'i khams yongs su spangs pa'i ngo bo ste gzugs med pa'i phyir ro/ /grangs med ces bya ba ni dbyangs dang gsal byed kyi grangs dang bral ba'i phyir ro/ /zad med ces bya ba ni 'jig pa med pa'i phyir ro//skye ba med ces bya ba ni skye ba med pa'i phyir ro/ /lte ba sprul pa'i 'khor lor gnas/ /zhes bya ba ni kun rdzob tu lte ba'i gnas sprul pa'i 'khor lo'i dbus su gnas pa'o/ /de ltar sprul pa'i 'khor lo rgyas par bshad pa bstan nas/ da ni chos kyi 'khor lo rgyas par bshad pa brjod pa'i phyir/ chos kyi 'khor lo'i dbus gnas pa/ /zhes bya ba gsungs te/ hUM yig gi rnam pa'o/ /sgra tsam zhes bya ba ni brag ca dang 'dra ba'o/ /dri ma dang bral ba zhes bya ba ni nyon mongs pa'i dri ma dang bral ba'i phyir ro/ /cha bral zhes bya ba ni rnam par rtog pa med pa'i phyir ro//rnam pa med pa dang zhes bya ba ni gnyis su snang ba med pa'i phyir ro/ /dpe med ces bya ba ni bag chags dang bral ba'i phyir ro/ /gnas pa med pa zhes bya ba ni rten dang brten pa'i rnam par rtog pa nye bar zhi ba'i phyir ro/ /g.yo med pa zhes bya ba ni byed pa po med pa'i phyir ro//dpe las 'das zhes bya ba ni de dang 'dra ba gzhan med pa'i phyir ro/ /srog dang rtsol ba rnam par spangs/ /zhes bya ba ni rlung 'gags pa'i ngo bo nyid kyi phyir ro/ /ye shes mchog ces bya ba ni rang bzhin gyis 'od gsal ba'i rnam pa'o/ / lha'i dbang phyug ces bya ba ni lha rnams kyi bdag por gyur pa'i tshangs pa la sogs pa rnams la yang ngo / /rnyed par dka' zhes bya ba ni rnyed par dka' ba'o/ /de ltar chos kyi 'khor lo'i rgyas par bshad pa bstan nas/ da ni longs spyod kyi 'khor lo rgyas par bshad pa brjod pa'i phyir/ longs spyod ces bya ba la sogs pa gsungs te/ mchog tu zhes bya ba ni oM yig gi rnam pa nyid kyis so/ /longs spyod 'khor lor gnas zhes bya ba ni mgrin pa'i dkyil 'khor du gnas pa'o/ /rnam pa mchog ces bya ba ni spros pa med pa'i phyir ro/ /'chi ba med pa'i zhes bya ba ni byang chub kyi sems kyi ngo bo las skyed par byed pa'i rgyur gyur pa'i phyir ro//mchog tu zhes bya ba ni lus la'o/ /khongs su chud par gyur pa zhes bya ba ni khongs su chud par gyur pas nang du son par gyur pa'o/ /rnam pa kun gyi zhes bya ba ni rnam pa thams cad du'o/ /yang dag bzhugs zhes bya ba ni gnas pa'o//rten cing 'brel 'byung rang bzhin gyis/ /zhes bya ba ni rgyu dang rkyen ni rang bzhin gyis so/ /chang gi ro yis myos pa bzhin/ /zhes bya ba ni ji ltar chang gi ros myos pa khongs su gtogs pa de bzhin du zhes bya ba'i don to/ /de ltar longs spyod kyi 'khor lo rgyas par bshad pa bstan nas/da ni bde ba chen po'i 'khor lo rgyas par bshad pa brjod pa'i phyir ro/ /mchog gi dang po zhes bya ba la sogs pa gsungs te/ ha yig de byang chub kyi sems kyi ngo bo nyid kyi phyir ro/ /ma lus pa dngos po kun gyi zhes bya ba ni lus las 'byung ba rnams la'o//nang na gnas zhes bya ba ni de nyid ni lus thams cad la khyab pas so/ /mtshan nyid med ces bya ba ni so so'i skye bo rnams kyi yul ma yin pa nyid kyi phyir ro/ /mtshan nyid 'das zhes bya ba ni ha yig gi rnam pa dang de nyid a yig dang bral bas brjod par bya ba nyid kyi phyir ro//mtshan nyid thams cad rnam par spangs/ /zhes bya ba ni dbyangs dang gsal byed dang bral ba'i phyir ro/ /brjod du med ces bya ba ni de'i dbang gis 'byung ba'i lhan cig skyes pa'i bde ba la ngag gi spyod yul las 'das pa nyid kyi phyir ro/ /mi 'jig ces bya ba ni 'jig pa med pa'o//zhi ba zhes bya ba ni gdod ma nas zhi ba nyid kyi phyir dang / rnam par rtog pa nye bar zhi ba nyid kyi phyir ro/ /rang nyid nyams myong rang ngo bo/ /zhes bya ba ni so so rang gi rig pa nyid kyi phyir ro/ /rang gis nyams su myong ba'i ngo bo gang la yod pa de la de skad ces bya'o//bde ba chen po 'khor lor gnas/ /zhes bya ba ni mgo bo la gnas pa'o/ /thob ces bya ba ni rtog par bya ba'o/ /bla ma'i zhal zhes bya ba ni thos pa dang bsam pa la sogs pa'i dbang gis rdo rje slob dpon gyi zhal las so/ /de ltar don rnam pa lngas de rgyas par bshad pa bstan nas/da ni de'i bde ba nye bar bsdu ba brjod pa'i phyir/ de ltar zhes bya ba la sogs pa gsungs te/ sngar bstan pa rnams so/ /ye shes che zhes bya ba ni 'khor lo drug nye bar mtshon pa sngon du 'gro bas ye shes chen po bskyed pa'i phyir ro/ /rang gi ngo bo rnam shes drug /ces bya ba ni me long lta bu la sogs pa'i ye shes lnga'i steng du de dmigs pa'i ye shes dang bcas pa'i phyir ro/ /steng dang 'og tu sbyor zhes bya ba ni rang gi lus la steng dang 'og tu gnas pa'i dbyibs kyis so/ /rnal 'byor zhes bya ba ni phan tshun du 'brel pa'i rnam pa can no/ / 'di rnams zhes bya ba ni 'khor lo drug pa la'o/ /rab tu grags zhes bya ba ni brjod pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u sum cu rtsa brgyad pa'i rgya cher bshad pa'o// //de ltar le'u sum cu rtsa brgyad pas 'khor lo drug gi bsgom pa'i yul la dri ba'i lan bstan pa brjod nas/ /da ni dus kyi yul la dri ba'i lan bstan pa'i phyir/ le'u sum cu rtsa dgu pa nye bar 'god cing / dang por re zhig de'i rtsom pa bstan pa ni/de nas zhes bya ba la sogs pa gsungs te/ le'u sum cu rtsa brgyad pa bshad pa'i rjes la'o/ /gzhan yang zhes bya ba ni snga ma bzhin du brjod pa'o/ /bcom ldan 'das rdo rjes zhes bya ba ni drug pa rdo rje 'chang gi rnam pa de bzhin gshegs pa'o/ /dus kyi mtshan nyid sdom pa ni//zhes bya ba la dus ni phyi dang nang gi bdag nyid can la'o/ /mtshan nyid sdom pa ni mtshan nyid bsdu ba'o/ /des ci zhig byed ce na/ de'i phyir rnal 'byor gang gis zhes bya ba gsungs te/ rdzogs pa'i rim pa sgom pa po'i rnal 'byor rnams so/ /gang gis zhes bya ba ni dus kyi mtshan nyid kyis so//grangs kyi rnal 'byor rnam par shes/ /zhes bya ba ni de lta bu'i bshad par bya ba'o/ /grangs kyi rnal 'byor ni rlung gi grangs kyi rnal 'byor ro/ /bla na med ces bya ba ni 'di las gong na gzhan med pa'i phyir ro/ /bsam gyis mi khyab pa'i dus brjod par 'dod pas de ltar brjod pa'o//de ltar rtsom pa bstan nas/ da ni de dngos su bshad pa brjod pa'i phyir/ de'i yan lag dus kyi rab tu dbye ba ni/ /dus ni dus tshod ces ni bshad/ /zhes bya ba la sogs pa gsungs te/ dus ni zla ba dang nyi ma rgyu bar byed pa'i dus te/dus kyi rnam grangs nyid kyi phyir ro/ /de yang bsams dang bsam min ngo bo ni/ /zhes bya ba gsungs te/ rnal 'byor pa rnams kyis nyams su myang bar bya ba nyid kyi phyir ro/ /dus bzang dang ni zhes pa ni phyi rol gyi dus bzang po dang 'dra ba nyid kyi phyir ro/ /dus ngan dang zhes bya ba yang de lta bu nyid do//rnam pa gnyis ni kun du gnas/ /zhes bya ba ni rnam pa gnyis kyi phyi rol dang bstan rnams las kyang ngo / /gnas zhes bya ba ni rnam par gnas pa'o/ /de ltar dus kyi rab tu dbye ba bstan nas/ da ni de'i mtshan nyid brjod pa'i phyir ro//de'i yan lag nang gi dus gnyis kyi mtshan nyid ni/ sna'i bu ga gnyis nas 'bab pa'i rgyun gyis so/ /srog dang rtsol ba gnyis zhes bya ba ni 'byung ba dang 'jug pa'i dbugs gnyis so/ /mnyam pa zhes bya ba ni g.yas pa dang g.yon pa'i rgyu ba ma 'dres pas so/ /'bab ces bya ba ni rab tu 'bab pa'o//gang du zhes bya ba ni gnas skabs gang la'o/ /dus bzang zhes bya ba ni 'chi ltas med pas dus bzang po dang chos mthun pas de ltar brjod pa yin no/ /dus ngan de las bzlog pa'o/ /zhes bya ba ni srog dang rtsol ba'i rlung 'dres pas zhes bya ba'i don to//de ltar nang gi dus gnyis kyi mtshan nyid bstan nas/ da ni phyi'i dus gnyis kyi mtshan nyid brjod pa'i phyir/ de lta bu'i zhes bya ba la sogs pa gsungs te/ da ltar gyi dus ni dus bzang por brjod de/ 'bad pa med pas bde bas gnas pa'i phyir ro/ /'das pa'i dus ni dus ngan no//zhes bya ba ni 'das pa'i zhes bya ba'i don to/ /de ltar phyi'i dus gnyis kyi mtshan nyid bshad pa bstan nas/ da ni dga' ba la sogs pa'i dgongs pas de'i mtshan nyid brjod pa'i phyir/ dus ngan zhes bya ba la sogs pa gsungs te/ mchog dga' las gzhan pa yin zhes bya ba ni mchog dga' las gzhan pa ni dga' bral gyi ngo bo ste/de'i dus su bde ba dang bral ba'i phyir ro/ /dus bzang po mchog ste zhes bya ba ni mchog dga' las mngon sum nyid du ste/ byang chub kyi sems yan lag thams cad kyi mtshams khyab pas 'bras bu mang po bri ba'i phyir ro//de ltar dga' ba la sogs pa'i dgongs pas de'i mtshan nyid bstan nas/ da ni phyi rol gyi dus gnyis kyi mtshan nyid slar yang rdzogs pa dang ni zhes bya ba la sogs pas so/ /dus dang po gsum ni nyi shu dang bco lnga dang 'bum phrag bcu'i lo'i tshad dang 'bras bu gsum sgrub par byed pas na/dus bzang po zhes brjod pa yin te/ tshe dang 'bras bu la sogs pa phun sum tshogs pa ni shin tu yang mang ba'i phyir ro/ /rtsod dus ni ngan pa ste zhes bya ba ni snyigs ma lngas bsgribs pa'i phyir dang / tshe thung ba nyid kyi phyir ro/ /de ltar zhes bya ba ni rnam pa de lta bus so//dus mtshan nyid ces bya ba ni phyi rol gyi ngo bo la'o/ /gsungs pa zhes bya ba ni brjod pa'o/ /de ltar don rnam pa bzhis mdor bshad nas/ da ni rgyas par bshad pa brjod pa'i phyir/ de'i yan lag dga' ba la sogs pa'i dgongs pas dus gnyis kyi ngo bo bstan pa'i phyir/dga' ba dang mchog tu dga' ba dang zhes bya ba gsungs te/ cung zad tsam gyis bde ba dang / /de las lhag pa'i ngo bo brgyud pa'i rgyud dang dngos kyi rgyu'i ngo bo'o/ /lhan cig skyes pa zhes bya ba ni dpe'i ngo bo la'o/ /dus bzang ste zhes bya ba ni gsum po de rnams dus bzang po'i sgras brjod par bya ba ste/gong nas gong du bde ba 'phel ba 'bras bu dang bcas pa'i phyir ro/ /bral dgar bshad pa dus ngan ni/ /bde ba nyams pa'i ngo bo nyid dang / chags bral gyi bdag nyid can nyid dang / rtog pa dang bcas pa'i phyir ro/ /de ltar zhes bya ba ni de ma thag par bstan pa'i cho gas so//dus kyi zhes bya ba ni dga' ba la sogs pa'i ngo bo la'o/ /mtshan nyid ces bya ba ni thun mong ma yin pa'i de kho na nyid kyi rnam par gzhag pa zhes bya ba'i don to/ /de ltar dga' ba la sogs pa'i 'dod pas/ dus gnyis kyi rang gi ngo bo bstan nas/da ni dbugs gsum gyi rjes su 'brangs nas/ de'i ngo bo bshad pa brjod pa'i phyir/ 'jug pa dang ni gnas pa'i dus/ /zhes bya ba la sogs pa gsungs te/ bzang por ni zhes bya ba ni dus bzang po'o/ /yongs su grags zhes bya ba ni brjod pa ste lus kyi nang du dbugs sdud par byed pa'i phyir ro//ldang ba yang ni dus ngan po/ /zhes bya ba ni dbugs rnams phyir 'byung bas so/ /de ltar zhes bya ba ni dbugs gsum la ltos nas so/ /dus kyi mtshan nyid do zhes bya ba ni dus gnyis kyi mtshan nyid do/ /de ltar mdor bstan pa dang rgyas par bshad pa dag gis de'i mtshan nyid brjod nas/da ni bsam gyis mi khyab pa'i dus kyi mtshan nyid bstan pa'i phyir/ de'i yan lag byang chub kyi sems gnyis kyi rjes su 'brangs nas bsam gyis mi khyab pa'i dus kyi ngo bo ni/ dus ni zhes bya ba la sogs pa gsungs te/ kun nas 'gro ba'o/ /khams rnams thams cad de zhes bya ba ni so dang sen mo la sogs pa'i byang chub kyi sems kyi rnam 'gyur rnams la'o/ /mnyam pa'i ro'i go 'phang zhes bya ba ni khams rnams thams cad kyi yul la tha dad pa'i rnam par rtog pa bcom pa'o/ /mchog ces bya ba ni lhan cig skyes pa'i rgyur gyur pas so//ye shes rnam shes rnam par spangs/ /zhes bya ba ni ye shes ni dpe'i lhan cig skyes pa'i mtshan nyid do/ /rnam shes ni don gyi lhan cig skyes pa'i mtshan nyid do/ /de dag dang bral ba ni rnam par spangs pa'o/ /dus gcig ces bya ba ni bsam gyis mi khyab pa'i dus kyi rang bzhin no//zhes ni brjod pa yin zhes bya ba ni gsungs pa'o/ /de ltar byang chub kyi sems rnam pa gnyis kyi rjes su 'brangs nas/ bsam gyis mi khyab pa'i dus kyi ngo bo bstan nas/ bzhi pa'i 'dod pas de'i ngo bo brjod pa'i phyir/ dngos dang dngos med dga' ba la sogs pa gsungs te/dngos dang dngos med ni dga' ba dang mchog dga' gnyis te/ cung zad bde ba'i rnam pa nyid kyis dngos po'i phyir dang / lhan cig skyes pa'i dus su dngos med nyid do/ /de'i ngo bo'i cha las ni/ /rnam par rtog pa'o/ /'das pa ni bral ba'o/ /bzhi pa skad cig mtshan nyid ni//zhes bya ba ni lhan cig skyes pa'i rnam pa'o/ /brjod bya rjod byed las grol ba/ /zhes bya ba ni dga' bral dang bral ba'i phyir dang / dga' bral ni rtog pa dang bcas pa'i phyir ro/ /dus gcig ces bya ba ni snga ma bzhin du bsam gyis mi khyab pa'i dus so//de ltar bzhi pa'i 'dod pas rang gi ngo bo bstan nas/ da ni phyag rgya chen po'i ngo bos de'i ngo bo brjod pa'i phyir/ chags dang chags bral nges grol ba/ /zhes bya ba gsungs te/ stong pa dang shin tu stong pa dag dang bral ba'i phyir ro/ /chags dang chags bral dag las nges par grol ba snyam du dgongs nas so//bde ba chen po'i go 'phang spangs/ /zhes bya ba ni stong pa chen po dang bral ba'i phyir ro/ /phyag rgya chen po'i mtshan nyid can gyi gzhi ni rten te/ thams cad stong pa'i ngo bo nyid kyi phyir ro/ /dus gcig ces ni brjod pa yin//zhes bya ba ni bsam gyis mi khyab pa'i dus so/ /de ltar don rnam pa gsum gyis bsam gyis mi khyab pa'i mtshan nyid brjod nas/ da ni de'i nye bar bsdu ba bstan pa'i phyir/ mtshan nyid med ces bya ba gsungs te/ so so'i skye bo'i spyod yul ma yin pa'i phyir ro//mtshan nyid 'das zhes bya ba ni nye bar mtshon pa po med pa'i phyir ro/ /grangs kyi rnal 'byor rnam par spangs/ /zhes bya ba ni gcig dang mang po nyid kyis grangs nus pa'i phyir dang / rnal 'byor ni ting nge 'dzin gyi bye brag go/ /de dag gi rnam par spangs pa ni dor ba'o/ / de nyid dus su zhes bya ba ni don dam pa'i ngo bo ngas bshad de zhes bya ba ni/ drug pa rdo rje 'chang gi rnam pa'i bcom ldan 'das kyis so/ /shes par bya ba ni shes par bya ba'o/ /bla ma'i zhal las zhes bya ba ni rdo rje slob dpon gyi zhal las so/ /rnal 'byor chen po dpal rdo rje phreng ba'i rgya cher 'grel pa las/paN+Di ta a laM ka ka la shas mdzad pa'i/ zab mo'i don shin tu gsal bar byed pa zhes bya ba las/ le'u sum cu rtsa dgu pa'i rgya cher bshad pa'o// //de ltar le'u sum cu rtsa dgu pas dus kyi yul la dri ba'i lan brjod nas/ da ni gsang ba'i 'bras bu'i yul la dri ba'i lan bstan pa'i phyir/le'u bzhi bcu pa nye bar 'god cing / dang por re zhig de'i rtsom pa bshad pa ni/ de nas zhes bya ba la sogs pa gsungs te/ le'u sum cu rtsa dgu pa bshad pa'i rjes la'o/ /gzhan yang zhes bya ba ni sngar bstan pa bzhin du'o//gsang ba'i 'bras bu zhes bya ba ni zung du 'jug pa'i rnam pa'o/ /mchog nyid ces bya ba ni bla na med pa nyid kyi phyir ro/ /des ci zhig byed ce na/ de'i phyir gang gis zhes bya ba la sogs pa gsungs te/ gsang ba'i 'bras bu'o/ /dngos grub ces bya ba ni phyag rgya chen po'i dngos grub bo//mchog tu zhes bya ba ni gong na med pa'o/ /'gro zhes bya ba ni 'gro bar 'gyur ba'o/ /rnal 'byor pa rnams zhes bya ba ni lhag ma'o/ /phyag rgya chen po yang dag rten/ /zhes bya ba ni 'jig rten las 'das pa'i phyag rgya chen po'i rten no/ /de ltar de'i rtsom pa bstan nas/da ni de'i dngos su bshad pa brjod pa'i phyir/ de'i yan lag gsang ba rang gi dngos grub ni/ gsang ba sbas pa zhes ni bshad/ /ces bya ba gsungs te zab mo'o/ /rnal 'byor pas mi shes shing zhes bya ba ni las dang po pa'i rnal 'byor pa bskyed pa'i rim pa sgom pa po rnams kyi yul la ma yin pa'o//bzhi pa'i dbang zhes bya ba'i ming / /zhes bya ba ni zhal nas zhal du brgyud pa'i rim pas gnas pa'o/ /mchog gi ye shes zhes bya ba ni lhan cig skyes pa'i ye shes so/ /zhi ba zhes bya ba ni nyon mongs pa dang shes bya'i sgrib pa'i gnyen po nyid kyi phyir ro//kun du rtog pa thams cad spangs/ /zhes bya ba ni bdag dang gzhan gyi rnam par rtog pa med pa'i phyir ro/ /de ltar gsang ba'i ngo bo bstan nas/ 'bras bu'i ngo bo phyag rgya chen po'i ngo bo brjod pa'i phyir/ phyag rgya chen po zhes bya ba la sogs pa gsungs te/dga' ba chen po ster bar byed pas na phyag rgya chen po zhes bya ba'o/ /dngos grub che zhes bya ba ni 'jig rten las 'das pa'i dngos grub nyid kyi phyir ro/ /rnal 'byor chen po'i don bsdus pa/ /zhes bya ba ni rdo rje lta bu'i ting nge 'dzin gyi ngo bo nyid kyis zung du 'jug pa nyid kyi phyir ro//rnal 'byor pa'i don rgya chen po bsdus pa'i ngo bo'o/ /rnal 'byor ma yi zhal las rtogs/ /zhes bya ba ni ye shes kyi mkha' 'gro ma'i rgyud las rtogs par bya ba nyid kyi phyir ro/ /mchog tu zhes bya ba ni khyad du 'phags pa'i ngo bo nyid kyi phyir dang /'jig rten las 'das pa'i ngo bo nyid kyi phyir ro/ /mchog tu rmad 'byung zhes bya ba ni gzhan gyi don byed pa nyid kyi phyir ro/ /rnam pa chen po'i yon tan zhes bya ba la/ chen po ni lha'i rnam pa ste/ der yang dag 'bebs pa ni 'bebs pa'i bdag nyid do/ / de nyid chen po yon tan ldan/ /zhes bya ba ni de kho na nyid chen po ma ning gi bzlas pa'i ngo bo'i yon tan gyis ngag 'od gsal ba'i rnam pas so/ /ldan pa zhes bya ba ni rjes su 'gro ba'i ngo bo zhes bya ba'i don to/ /mchog gi nam mkha' gnas zhes bya ba ni sems rnam par dag pa'i ngo bo nyid kyi phyir ro//phra ba'i zhes bya ba ni rang bzhin brgya drug cu po zhes bya ba 'gags pa nyid kyi phyir ro/ /rdo rje sems dpa' rang ngo bo/ /zhes bya ba ni bdag byin gyis brlab pa'i ngo bo nyid kyi phyir ro/ /bde ba thams cad 'phel bar byed/ /ces bya ba ni bde ba ni 'jig rten las 'das pa'o//'phel bar byed ces bya ba ni yongs su rdzogs par byed pa ste/ mngon par byang chub pa'i ngo bo'i rim pa nyid kyi phyir ro/ /bde ba chen po'i go 'phang gnas/ /zhes bya ba ni stong pa chen po'i ngo bo nyid kyi phyir ro/ /shes dang shes bya rnam par bral//zhes bya ba ni rtag chad gnyis rnam par grol ba'i phyir ro/ /bsgom dang bsgom bya rnam par spangs/ /zhes bya ba ni tha dad pa'i rnam par rtog pa med pa'i phyir ro/ /sngags dang rgyud kyi bya bas stong / /zhes bya ba ni sngags ni sa bon gyi yi ge rnams so//rgyud ni zla ba'i dkyil 'khor la sogs pa'i bsgom pa'o/ /de'i ngo bo'i bya bas stong pa ste/ bskyed pa'i rim pa'i mtshan nyid dang bral ba'i phyir ro/ /kun du rtog pa thams cad spangs/ /zhes bya ba ni kun du rtog pa thams cad rlung gi rang bzhin gyis so//spangs pa ni rnam par bral ba ste/ rdo rje'i bzlas pa'i rim pa las khyad par du 'phags pa nyid kyi phyir ro/ /dngos po kun gyi go 'phang rgal/ /zhes bya ba la/ dngos po kun ni snang ba la sogs pa rnams so/ /de rnams kyi go 'phang ni gnas te rang bzhin gyi tshogs kyi ngo bo la de las rgal ba ni/bral bas te sems rnam par dag pa'i rim pas khyad par du 'phags pa'i phyir ro/ /'jig rten gsum gyi rnam par spangs/ /zhes bya ba ni 'jig rten gsum ni sgyu ma'i rang bzhin gyis rnam par rtog pa dang bral ba'o/ /bdag byin gyis brlab pa'i rim pa dang bral ba'i phyir ro//chags dang chags bral rnam par spangs/ /zhes bya ba ni phyag rgya dang ting nge 'dzin gyi rim pa dang bral ba nyid kyi phyir chags bral rnam par spangs pa'o/ /dam tshig chen po la gnas pa/ /zhes bya ba la/ dam tshig chen po ni zung du 'jug pa'i rnam pa ste/de la gnas pa'o/ /'jig rten gsum zhes bya ba ni khams gsum po rnams so/ /ma lus pa zhes bya ba ni thams cad do/ /gcig ces bya ba ni thun mong ma yin pa ste/ de'i rnam par rtog pa rnams kyis ma 'dres pa nyid kyi phyir ro/ /rgyu zhes bya ba ni rgyu'o//dngos grub de kho na nyid ces bya ba ni 'jig rten dang 'jig rten las 'das pa'i dngos grub kyi mtshan nyid can la'o/ /de ltar 'bras bu'i ngo bos phyag rgya chen po'i ngo bo bstan nas/ da ni gsang ba dang 'bras bu nye bar bsdu ba brjod pa'i phyir/ de ltar zhes bya ba la sogs pa gsungs te/de ltar zhes bya ba ni sngar bshad pa'i rigs pas so/ /gsang ba'i 'bras bu zhes bya ba ni zung du 'jug pa'i rnam pa'o/ /gsal zhes bya ba ni rnal 'byor pa'i mngon sum du snang ba'i phyir ro/ /gang du yang zhes bya ba ni bya ba'i rgyud la sogs pa'o/ / ma gsungs zhes bya ba ni ma bstan pa'o/ /ye shes mchog ces bya ba ni 'bras bu'i ngo bo nyid kyi mchog nyid kyi phyir ro/ /rnal 'byor mchog ces bya ba ni mchog tu gyur pa'i ting nge 'dzin gyi rnam pa'o/ /shes zhes bya ba ni shes par bya ba'o/ /rnal 'byor ma'i zhes bya ba ni ye shes mkha' 'gro'i man ngag las zhes bya ba'i don to//rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a lang+ka ka la shas mdzad pa/ zab mo'i don shin tu gsal bar byed pa zhes bya ba las/ le'u bzhi bcu pa'i rgya cher bshad pa'o// //de ltar le'u bzhi bcu pas gsang ba'i 'bras bu'i yul la dri ba'i lan brjod nas/ da ni chos kyi dbyings kyi yul la dri ba'i lan bstan pa'i phyir/ le'u bzhi bcu rtsa gcig pa nye bar 'god cing / dang por re zhig de'i rtsom pa bstan pa ni/ de nas zhes bya ba la sogs pa gsungs te/le'u bzhi bcu pa bshad pa'i rjes la'o/ /bcom ldan 'das rdo rjes zhes bya ba ni rdo rje 'chang chen po'o/ /chos kyi dbyings kyi mchog ces bya ba dang 'brel to/ /ji lta bu zhe na/ de'i phyir mchog ces bya ba gsungs te/ chos thams cad las khyad par du 'phags pa'i phyir ro/ /de ltar de rtsom pa bstan nas/ da ni de dngos su bshad pa brjod pa'i phyir/ de'i yan lag chos kyi dbyings kyi tshig gi nges pa'i tshig gsungs te/ chos kun dbus nas khyab pa'i khams/ /zhes bya ba la/kun ni phung po dang khams dang skye mched la sogs pa'am/ shes pa dang shes byas bsdus pa rnams so/ /dbus nas zhes bya ba ni nang du son pa ste/ ji ltar gnas pa'i ngo bo gang yin pa de ni/ chos kun dbus su son pa'o/ /khams zhes bya ba ni rang gi mtshan nyid 'dzin pas so//chos kyi dbyings zhes de la brjod/ /ces bya ba ni brjod pa'o/ /de ltar chos kyi dbyings kyi tshig gi nges pa'i tshig brjod nas/ da ni de'i don mdor bstan pa'i sgo nas/ chos kyi tshig bshad pa ni/ kun khyab ces bya ba la sogs pa gsungs te/ chos ma lus pa la khyab pa'i phyir ro//shin tu phra ba zhes bya ba ni 'phags pa'i spyod yul nyid kyi phyir ro/ /kun khyab ces bya ba ni khyab bya'i ngo bos thams cad du khyab pa'i phyir ro/ /kun du 'char ba dang zhes bya ba ni dus thams cad du lhan cig skyes pa'i ngo bo gnas pa'o/ / phung po lnga nyid ces bya ba ni gzugs dang tshor ba la sogs pa'o/ /'byung ba bzhi zhes bya ba ni sa la sogs pa'i khams bzhi po'o/ /yul dang zhes bya ba ni gzugs la sogs pa rnams so/ /skye mched ces bya ba ni nang gi bdag nyid can mig la sogs pa rnams so//rnam shes zhes bya ba ni mig gi rnam par shes pa la sogs pa'o/ /yang dag ldan zhes bya ba ni de rnams dang ldan pa thams cad chos kun zhes bya bar brjod pa'o/ /bshad ces bya ba ni bstan pa'o/ /gsang ba'i dbang phyug gi zhes bya ba ni gsang ba ni gsang ba pa rnams kyi'o//dbang phyug ni gtso bo ste/ gsang ba'i bdag po'o/ /de nyid ni/ de rnams la gzhan dbang ba med pas na dbang phyug ste/ de'i bod pa la de skad ces bya'o/ /de ltar de'i don mdor bstan pa'i sgo nas chos kyi tshig bshad pa brjod nas/ da ni dbyings kyi tshig bstan pa'i phyir/de rnams zhes bya ba la sogs pa gsungs te/ de rnams ni de ma thag par bstan pa'i phung po la sogs pa rnams so/ /dbus na gnas zhes bya ba ni khyab byed nyid kyis dbus na gnas pa'o/ /khams zhes bya ba ni rang gi mtshan nyid 'dzin pas so/ / khyab cing zhes bya ba ni spros pa med pa'i bdag nyid kyis khyab bya rnams la gnas pa'i phyir ro/ /spyod yul ma yin te zhes bya ba ni so so'i skye bo'i blo'i spyod yul ma yin pa nyid kyi phyir ro/ /de ltar dbyings kyi tshig bshad pa bstan nas/ da ni dpe'i sgo nas bshad pa brjod pa'i phyir/ji ltar til la til mar dang / /zhes bya ba la sogs pa gsungs te/ ji ltar til 'bru'i nang na mar nag gnas pa'o/ /ji ltar shing la me bzhin du/ /zhes bya ba ni gtsub stan dang gtsub shing gi nang na me gnas pa'o/ /de bzhin zhes bya ba ni til 'bru la sogs pa'i nang du gnas pa'i til mar la sogs pa bzhin du'o//chos rnams thams cad la zhes bya ba ni phung po dang khams dang skye mched la sogs pa'i mtshan nyid rnams la'o/ /khyab byed brjod ces bya ba ni brjod ces bya ba'i don to/ /kyang zhes bya ba ni rjes su gnas pa la'o//de ltar don rnam pa bzhis chos kyi dbyings mdor bstan pa bshad nas/ da ni rgyas par bshad pa brjod pa'i phyir/ de'i yan lag rang gi ngo bo'i sgo nas/ shes par bya ba ma yin pa nyid ni/ nam mkha' bzhin du'o/ /dri ma med ces bya ba ni nyon mongs pa las dben pa'i phyir ro//chos kun gyi gzhi zhes bya ba ni shes pa dang shes byas bsdus pa'i chos ma lus pa rnams kyi rten to/ /mchog ces bya ba ni bla na med pa'i phyir ro/ /gal te de ltar yin na/ ci'i phyir de ltar mi snang zhe na/ de'i phyir gzung dang 'dzin pa'i zhes bya ba gsungs te/yul dang yul can gyi ngo bos so/ /kun rtog gi zhes bya ba ni rnam rtog rnams kyis so/ /khyab kyang zhes bya ba ni bye brag tu khyab pa'o/ /mthong ba ma yin zhes bya ba ni ji ltar gnas pa'i ngo bos shes pa ma yin te/ glo bur ba'i dri mas g.yogs pa'i phyir ro//stong nyid ye shes rnal 'byor gyis/ /zhes bya ba ni gzung ba dang 'dzin pa'i gnyen por gyur pa'i stong pa nyid kyi ye shes lus rnam par dben pa'i mtshan nyid de/ de'i rnal 'byor gyis zhes bya ba ni de dang 'brel pas so/ /rnal 'byor pa yis zhes bya ba ni rim pa gnyis sgom pa po rnams kyis so//mthong zhes bya ba ni bsgom pa'i rab mthar thug pa 'jug pa'i shes rab la gsal bar snang ba'i phyir ro/ /de ltar rang gi ngo bo'i sgo nas shes par bya ba dang shes par bya ba ma yin pa nyid bstan nas/ da ni don dam pa nyid kyis de brjod par bya ba'i phyir/chos dbyings zhes bya ba gsungs te/ chos dbyings zhes bya ba ni snga ma bzhin du'o/ /b+ha ga zhes bya ba ni nyon mongs pa thams cad 'joms pa'i phyir ro/ /bshad ces bya ba ni brjod pa'o/ /b+ha ga de yang rin chen za ma tog ste/ mi mthun pa'i phyogs spangs pas sangs rgyas kyi chos thams cad dang ldan pa'i phyir ro//rin chen rnams kyi za ma tog ni rten no snyam du bsams nas so/ /dbang phyug la sogs yon tan zhes bya ba ni/ dbang phyug dang ni gzugs bzang dang / /dpal dang grags dang skal ba bzang //ye shes phun sum tshogs pa ste/ /drug po 'di la skal zhes brjod/ /ces gsungs so/ /gang gi phyir zhes bya ba ni rgyu mtshan gyis so/ /ldan pa zhes bya ba ni yang dag par ldan pa'o/ /de'i phyir b+ha ga ni brjod ces bya ba ni rgyu mtshan des na b+ha ga'i sgras brjod pa'o//de ltar don dam pa nyid kyis de'i bshad pa brjod nas/ da ni kun rdzob pa'i ngo bos de'i bshad pa bstan pa'i phyir/ b+ha ga chos rnams kun zhes bshad/ /ces gsungs te/ chos ni phung po la sogs pa'i mtshan nyid can rnams skyed pa'i phyir te/ b+ha ga ni chos 'byung ngo //dbyings ni sems zhes bya ba ni kun rdzob kyi rdzas kyi rang bzhin no/ /khams gsum po ni 'gro ba'o/ /zhes bya ba ni ji ltar srid pa'o/ /rgyu ni rgyu'o/ /b+ha ga zhes byar bshad ces bya ba ni chos 'byung gi sgras brjod pa'o/ /de ltar kun rdzob pa'i ngo bos de'i bshad pa brjod nas/da ni nye bar bsdu ba'i sgo nas brjod du med pa nyid bstan pa'i phyir/ chos dbyings 'di ni zhes bya ba la sogs pa gsungs te/ de ma thag par bstan pa rnams so/ /rnam par dag pa gnyis kyi ngo bo nyid kyi phyir ro/ /'gyur ba med pa'i zhes bya ba ni rtag tu de nyid du yod pa'i phyir ro//rang bzhin can zhes bya ba ni rang gi ngo bo ma bcos pas zhes bya ba'i don to/ /yang dag sbyor dngos kyis zhes bya ba ni chos thams cad la yang dag par sbyor ba'i ngo bo ni 'brel pa'i ngo bo ste/ de nyid dang gzhan dag gis brjod du med pa'i mtshan nyid kyis so//chu zla bzhin du zhes bya ba ni chu bo chu klung la sogs pa'i chu la'o/ /zla ba zhes bya ba ni zla ba bzhin du'o/ /gnas zhes bya ba ni rnam par gnas pa'o/ /de ltar nye bar bsdu ba'i sgo nas brjod du med pa bstan nas/ da ni de nyid la rnal 'byor pa rnams kyis rtogs par bya ba nyid brjod pa'i phyir/don dam gcig pu de nyid shes/ /zhes bya ba gsungs te/ don dam gcig pu de nyid shes/ /zhes pa ni de ltar zhes bya ba dang 'brel to/ /don dam pa'i de kho na nyid ni rang bzhin gyis 'od gsal ba'i ngo bo ste/ de la gnas pa'i rnal 'byor pa rnams kyis so//lag mthil skyu ru ra bzhag bzhin/ /de ltar snang zhes bya ba ni lag pa'i mthil du gnas pa'i skyu ru ra ltar snang ba'o/ /mchog gi de nyid ces bya ba ni mchog tu gyur pa'i chos kyi dbyings so/ /rang rig ces bya ba ni so so rang gis rig par bya ba'o//shin tu dri ma med ces bya ba ni rnam par dag pa gnyis dang ldan pa'i phyir ro/ /dngos dang dngos med zad nas ni/ /zhes bya ba ni rtag pa dang chad pa'i lta ba spangs pa'i phyir ro/ /rtag tu zhes bya ba ni dus thams cad du'o/ /mthong zhing zhes bya ba ni shin tu rtogs pa'o//de nyid mthong zhes bya ba ni sngags kyi sgo nas spyod pa la gnas pa'i 'phags pa rnams kyis zhes bya ba'i don to/ /de ltar don rnam pa lngas rgyas par bshad pa bstan nas/ da ni nye bar bsdu ba ni/ chos kyi dbyings kyi tshig gsal ba/ /zhes bya ba gsungs te/chos kyi dbyings kyi tshig ces bya ba ni sgra'i ngo bo'o/ /gsal zhes bya ba ni don gyi rnam par dbye bas gsal ba nyid kyi phyir ro/ /de ltar bshad ces bya ba ni sngar bshad pa'i rig pas bshad pa'o/ /shin tu rgyas par zhes bya ba ni/ sna tshogs pa'i ngo bo nyid kyis rgyas par bshad pa'i phyir ro//gzung dang 'dzin pa'i 'brel pa ni/ /zhes bya ba ni yul dang yul can gyi ngo bo'i mtshan nyid can dang 'brel pa bzlog pas so/ /shes par zhes bya ba ni shes par bya ba'o/ /rmad du byung zhes bya ba ni 'bad pa med par sems can gyi don la 'jug pa'i rgyu nyid kyis so//ngo mtshar ba dang bcas pa zhes bya ba'i don to/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u bzhi bcu rtsa gcig pa'i rgya cher bshad pa'o// //de ltar le'u bzhi bcu rtsa gcig pas chos kyi dbyings kyi tshig gi yul la dri ba'i lan bstan nas/ da ni rdo rje'i tshig gi bshad pa'i yul la dri ba'i lan brjod pa'i phyir/ le'u bzhi bcu rtsa gnyis pa nye bar 'god par byed cing / dang por re zhig de'i rtsom pa ni/ de nas zhes bya ba la sogs pa gsungs te/ le'u bzhi bcu rtsa gcig pa bshad pa'i rjes la'o/ /bcom ldan rdo rjes rdo rje'i mtshan nyid gsungs/ /zhes bya ba dang 'brel to/ /mchog ces bya ba ni de bzhin gshegs pa lnga'i ngo bo nyid kyi phyir dang /ye shes lnga'i rang bzhin nyid kyi phyir ro/ /de ni zhes bya ba ni rdo rje'i mtshan nyid do/ /nyon zhes bya ba ni phyag na rdo rje nyan pa la sbyar ba'o/ /bsdus nas zhes bya ba ni mdor bsdus nas so/ /ji lta ba bzhin zhes bya ba ni phyin ci ma log pa'i ngo bos so/ /bshad par bya zhes bya ba ni 'chad bzhin pa'i rim pas bstan pa'o//de ltar de rtsom pa bstan nas/ da ni de'i dngos su bshad pa brjod pa'i phyir/ de'i yan lag mdor bstan pa'i sgo nas/ rang gi ngo bo ni rdo rje mi phyed ces bya ba la sogs pa gsungs te/ rnam par rtog pa'i nyon mongs pas dbye bar mi nus pa'i phyir dang //phyi rol gyi rdo rje dang 'dra ba nyid kyi phyir ro/ /rdo rje zhes ni gsungs zhes bya ba ni rdo rje sgras bstan pa'o/ /ye shes lnga yi bdag nyid can/ /zhes bya ba ni me long lta bu la sogs pa ye shes rnam pa lnga'i ngo bo nyid do/ /mchog ces bya ba ni rnam par ma dag pa'i rnam par gnas 'gyur ba'i phyir ro//rtsa lnga nam mkha' la ni thim/ /zhes bya ba ni la la nA dang ra sa nA dang a wa d+hU tI dang lha sbyin dang nor rgyal gyi mtshan nyid can gyi rtsa lnga'i nam mkha' la thim pa ni de'i bdag nyid can no/ /stong pa lnga'i rang bzhin zhes bya ba ni stong pa dang shin tu stong pa chen po thams cad stong pa de dag spangs pa'i dngos po'i ngo bo nyid kyi phyir ro//sa dang zhes bya ba la sogs pa gsungs te/ 'byung ba chen po lnga'i rnam par rtog pa'i rnam par dag pa'i ngo bo nyid kyi phyir ro/ /nam mkha' lnga yi cha yi gzugs//zhes bya ba ni rtsa lnga'i nam mkha' la'o/ /cha'i gzugs zhes bya ba ni rdzas lnga'i ngo bo'o/ /shes par bya zhes bya ba ni shes par bya ba'o/ /bla ma'i zhal las zhes bya ba ni slob dpon gyi zhal las so/ /de ltar rnam par dag pa'i sgo nas/ rang gi ngo bo bstan nas/da ni de skyed pa'i sa bon rgyas par bshad pa'i phyir brjod pa/ yaM raM zhes bya ba la sogs pa gsungs te/ /'byung ba chen po lnga skyed par byed pa'i sa bon lngas so/ /brjod pa'i zhes bya ba ni brjod par byas pa rnams kyis so/ /rtsa lnga yongs su shes zhes bya ba ni rdo rje'i rten du gyur par shes par bya'o//'bad pa yis ni zhes bya ba ni brtson 'grus kyis so/ /rdo rje skyed pa'i mtshan nyid ni/ /zhes bya ba ni skyed pa'i sa bon zhes bya ba'i don to/ /de ltar skyed par byed pa'i sa bon brjod nas/ da ni bya ba'i sgo nas khams kyi ngo bo nyid ni/nor bu'i lte bar zhes bya ba la sogs pa gsungs te/ nang du chos 'byung gi rnam pa la'o/ /phyi ni pad+ma 'dab ma brgyad pa'i ngo bo rdo rje'i dbyibs can la'o/ /dbus gnas pa zhes bya ba ni gsang ba'i sna rtse'i nang du gnas pa'i phyir ro/ /thig ler bshad ces bya ba ni byang chub kyi sems kyi thig le'i ngo bo'o//'gro ba spangs zhes bya ba ni 'dzin pa'i stobs kyis 'gro ba dang mi 'gro ba dang bral ba'i phyir ro/ /dam tshig gnas su rtogs bya ba/ /zhes bya ba ni dam tshig ni phyi rol pa'i phyag rgya dang ro mnyam pa'i rtog pa'i mtshan nyid la gnas pas na dam tshig la gnas pa rnams so//de rnams kyis rtogs par bya ba'i yul lo/ /gzhan yang bdud rtsi mchog ni/ rab tu gang zhes bya ba ni byang chub kyi sems kyis rab tu gang ba nyid kyi phyir ro/ /bdud rtsi mchog gis gang ba snyam du bsams nas/rnam pa kun ldan zhes bya ba ni rtsa lnga'i ngo bo nyid kyis dbyibs kyi rnam pa yin pa'i phyir ro/ /rnam pa med ces bya ba ni don dam par rang bzhin med pa nyid kyi rnam pa la sogs pa mi 'thad pa'i phyir ro/ /de ni rdo rje rab tu grags/ /zhes bya ba ni brjod ces bya ba'i don to//de ltar don rnam pa gsum gyis rdo rje'i mtshan nyid mdor bstan nas/ de ni rgyas par bshad pa brjod pa'i phyir ro/ /de'i yan lag tu ye shes lnga'i ngo bo nyid ni/ me long mnyam pa nyid ces bya ba la sogs pa gsungs te/ chos thams cad gzugs brnyan ltar yongs su shes pas me long lta bu'i ye shes so//sems can rkang med dang rkang gnyis la sogs pa rnams mnyam pa nyid du shes pas mnyam pa nyid kyi ye shes so/ /rang bzhin med par dpyod pas chos rnams las so sor rtog pa'i ye shes so/ /bya ba nan tan zhes bya ba ni bya ba grub pa'i ye shes te/sems can thams cad la 'bad pa med par bya ba 'jug pa'i phyir ro/ /rnam par dag pa chos kyi dbyings/ /zhes bya ba ni rnam par dag pa gnyis dang yang dag par ldan pa'i chos kyi dbyings yongs su shes pas so/ / ye shes lnga'i rang bzhin zhes bya ba ni sangs rgyas lnga'i rang bzhin gyis so/ /de'i ngo bor zhes bya ba ni ye shes lnga'i ngo bor ro/ /yongs su shes zhes bya ba ni shes par bya ba'o/ /rdo rje zhes bya ba ni mi phyed pa'i phyir ro/ /rang gis nyams myong zhes bya ba ni rnal 'byor pa'i sems so//mchog ces bya ba ni khyad par du 'phags pa'i de kho na nyid yongs su shes pa'i rnam pa'o/ /de ltar ye shes lnga'i ngo bo bstan nas/ da ni don dam pa'i ngo bo nyid brjod pa'i phyir/ nam mkha' che zhes bya ba gsungs te/ mchog gi nam mkha'i rtogs pa ste/ dri ma med pa'i phyir dang / mtha' yas pa'i phyir dang / glo bur ba'i nyes pas dben pa'i phyir ro/ /zhi ba dang zhes bya ba ni sgrib pa gnyis dang bral ba'i phyir ro/ /rtog pa med cing zhes bya ba ni rim pa gnyis bsgom pa'i mtshan nyid kyi rnam par rtog pa bzlog pa'i phyir ro/ /nad med pa zhes bya ba ni skye ba dang rga ba dang gnas pa dang mi rtag pa dang bral ba'i phyir ro//rdo rje sems dpa'i yang dag gzhi/ /zhes bya ba ni rang bzhin gyis 'od gsal ba'i rnam pa rdo rje 'chang chen po'i rten no/ /yang dag ces bya ba ni phyin ci ma log pa'i ngo bos so/ /shes par bya zhes bya ba ni shes par bya ba'o//bla ma'i zhal las zhes bya ba ni slob dpon gyi zhal las zhes bya ba'i don to/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u bzhi bcu rtsa gnyis pa'i rgya cher bshad pa'o// //de ltar le'u bzhi bcu rtsa gnyis pas rdo rje'i tshig bshad pa'i yul la dri ba'i lan bstan nas/ da ni rigs kyi dbye ba la sogs pa'i yul la dri ba'i lan brjod pa'i phyir/ le'u bzhi bcu rtsa gsum pa nye bar 'god cing //dang por re zhig de'i rtsom pa ni de nas zhes bya ba la sogs pa gsungs te/ le'u bzhi bcu rtsa gnyis pa bshad pa'i rjes la'o/ /bcom ldan 'das rdo rje rigs kyi dbye ba'i don bsdus pa gsungs zhes bya ba dang 'brel to/ /rigs rnams kyi dbye ba ni/ rigs kyi dbye ba'o//de'i don ni rigs kyi dbye ba'i don to/ /de ltar de rtsom pa bstan nas/ da ni de dngos su bshad pa brjod pa'i phyir/ mdor bstan pa'i yan lag spro ba'i rim pas rigs kyi dbye ba brjod pa ni/ rigs ni rnam pa lnga zhes bya ba gsungs te/ nyon mongs pa lngas khyab pa'i sems can gyi khams sbyor bar byed pa'i phyir/rnam par snang mdzad la sogs pa'i rigs lnga'i ngo bo'o/ /rtsa ba'i rgyud du zhes bya ba ni dpal gsang ba 'dus pa'i rgyud la'o/ /gsal bar zhes bya ba ni bdag gis bshad pa'o/ /spro ba'i zhes bya ba ni rigs lnga po de nyid la spro ba'i sbyor ba'i dbye ba'i rgyus so//grangs ni dbye ba yis zhes bya ba ni mtha' yas shing nam mkha' ltar khyab par byed pa ste/ rtsa'i gsang ba 'dus pas bsdus pa zhes bya ba'i don to/ /de ltar spro ba'i rim pas rigs kyi dbye ba mdor bstan pa bshad nas/ da ni bsdu ba'i rim pas de'i dbye ba mdor bstan pa brjod pa'i phyir/rnal 'byor chen po'i zhes bya ba la sogs pa gsungs te/ bye ba'i grangs can gyi rigs so/ /rnal 'byor chen po'i dam tshig ni/ /zhes bya ba ni rnal 'byor chen po'i dam tshig gang la spong ba de la de skad ces bya ba'o/ /rim pa gnyis ston par byed pa'i spyod pa gsum gtso bor byed pa la'o//rgyud du zhes bya ba ni rgyu dang 'bras bu'i dang thabs kyi dbye bas rgyud kyi rnam pa la'o/ /yang dag ces bya ba ni phyin ci ma log pa'i rnam pas so/ /gsal bar zhes bya ba ni gsal bar byas nas so/ /rigs kyi dbye ba brgyar ni gsungs/ /zhes bya ba ni rigs kyi dbye ba brgya'i mtshan nyid can te/ji skad du/ phung po khams dang dbang po'i don/ /yid ni so so so sor te/ /rnam pa lnga yi dbye ba yis/ /rigs ni rnam pa brgya ru phye/ /zhes gsungs so/ /yang na zhes bya ba ni rnam par rtog pa la'o/ /gsungs zhes bya ba ni brjod pa'o/ /de nyid las ni bsdus nas kyang / /zhes bya ba ni grangs ni dbye bas tha dad pa la zhes bya ba'i don to//de nyid kyi phyir/ sna tshogs spro ba'i rnal 'byor gyis/ /zhes bya ba gsungs te/ rnam pa sna tshogs pa'i sems can gyi bsam pa'i dbang gis so/ /spro ba'i rnal 'byor gyis zhes bya ba ni sbyor bas so/ /rdo rje sems dpa'i zhes bya ba ni de bzhin gshegs pa drug pa rdo rje 'chang gi rnam pa'o//brjod ces bya ba ni bsgrags pa'o/ /gang gis de yi rnam par mthong / /zhes bya ba ni sngon po dang ser po la sogs pa'i gzugs kyis so/ /'dir zhes bya ba ni khams gsum pa 'dir ro/ /de nyid ni rdo rje sems dpa' 'o/ /sna tshogs nor bu ji bzhin no/ /zhes bya ba ni ji ltar shel la sogs pa'i nor bu'i khyad par de dang de'i rnam par snang bas sna tshogs par mthong ngo //de bzhin du bcom ldan 'das 'dir yang sems can de dang de la mos pa'i khyad par gyis/ rang bzhin gyis rnam par dag kyang sna tshogs pa'i rnam pa nyid kyis gzhan rnams la mthong ba'i spyod yul du gyur snyam du shes so//de ltar rnam pa gnyis kyi dbye ba mdor bstan pa bshad nas/ da ni de'i rgyas par brjod pa'i phyir/ de'i yan lag gi rgyu mtshan brjod pa sngon du 'gro bas spro ba'i rim pa rgyas par bshad pa ni/ sems can mos pa sna tshogs dang / /zhes bya ba gsungs te/ bsam pa sna tshogs pa dang ldan pa'i phyir ro//sems can zhes bya ba ni khams gsum na spyod pa rnams so/ /sna tshogs bsam pa'i bye brag gis/ /zhes bya ba ni chags pa la sogs pa'i dbye bas tha dad pa'o/ /sna tshogs pa'i rang bzhin gyi bsam pa sna tshogs su bsams nas so/ /sna tshogs nyon mongs kyis mnan nas/ /zhes bya ba ni sna tshogs pa'i 'dod chags zhe sdang la sogs pas khyab pa'o//de rnams grol ba'i phyir zhes bya ba ni thar pa thob pa'i don du'o/ /'gro ba'i bla mas zhes bya ba ni khams gsum pa'i slob dpon du gyur pa'i bcom ldan 'das kyis grol ba'i phyir 'jug pa'o/ /gang gis de zhes bya ba ni gzhan rnams kyi rjes su mthun par gyur pa'i thabs kyi bye brag gis so//de yis ni zhes bya ba ni rgyu de yis te/ sems can rnams kyi mos pa la sogs pa mtha' yas so/ /sna tshogs spro ba'i ngo bo nyid/ /ces bya ba ni rnam pa sna tshogs pa'i rigs kyi dbye ba gsungs pas so/ /de nyid kyi phyir/ grangs med dbye ba'i dbye ba yis/ /zhes bya ba gsungs te/ bgrang ba las 'das pa'i phyir ro/ /don dam pa zhes bya ba ni don dam par ro/ /rigs kyi dbye ba nyid ces bya ba ni mtha' yas pa'i rigs kyi ngo bo nyid do/ /gsungs pa'i zhes bya ba ni bstan pa'o/ /rgyud gzhan rnams su zhes bya ba ni dpal rnal 'byor chen po la sogs pa rnams la'o//sems can bsam pa'i bye brag gis/ /zhes bya ba ni sems can de dang de'i bsam pa'i dbang gis so/ /de ltar rgyu mtshan brjod pa sngon du 'gro bas spro ba'i rim pas/ de rgyas par bshad pa bstan nas/ da ni sdud pa'i rim pa de rgyas par bshad pa brjod pa'i phyir/ de ni bsdus nas zhes bya ba gsungs te/bye ba mtha' yas par bsdus pa'o/ /bye bar 'gyur zhes bya ba ni bye ba 'bum phrag gi tshad kyis te/ du ma gcig gis bsdus pa'i phyir ro/ /stong phrag bdun cu rtsa gnyis kyi/ /rtsa yi 'khor lo'i rim pas so/ /zhes bya ba ni bye ba'i grangs kyis rang gi lus la gnas pa'i rtsa'i 'khor lo'i rim pa'i rjes su 'brangs nas stong phrag bdun cu rtsa gnyis kyi dbye ba'i rim pa bsdus par 'gyur ro//de las stong phrag sum cu rtsa drug ces bya ba ni stong phrag bdun cu rtsa gnyis kyi ngo bo'i rigs kyang stong phrag sum cu rtsa drug ni/ stong phrag sum cu rtsa gnyis kyi bdag nyid can gyi nang du sdud par 'gyur te/stong phrag bdun cu rtsa gnyis kyi phyed yin pa'i phyir ro/ /de las zhes bya ba ni stong phrag sum cu rtsa drug gi rigs bsdus pa las so/ /stong phrag nyi shu rtsa bzhir 'gyur/ /zhes bya ba'i lhag ma'o/ /ci'i phyir zhe na/ lus kyi rdzas dang gnas sogs ni/ /zhes bya ba gsungs te/ lus ni rang gzhan gyi rgyud kyi lus la'o//rdzas dang zhes bya ba ni so dang sen mo la sogs pa'i rang bzhin can no/ /gnas sogs ni zhes bya ba ni pul+lI ra mA la ya la sogs pa rnams kyi rim pa'i dbye ba ste/ rdzas dang gnas sogs pa rnams la grangs nyi shu rtsa bzhi po nyid kyi phyir ro/ /de las zhes bya ba ni stong phrag nyi shu rtsa bzhi las so//brgya yis mchog tu gang zhes bya ba ni gcig nyid brgya phrag ste/ sngon du gsungs pa'i rigs brgya'i dbye bas so/ /stong phrag nyi shu rtsa bzhi po rigs brgya'i dbye ba'i khongs su 'dus pa'i phyir ro/ /mchog tu zhes bya ba ni spros pa med pa'i phyir ro/ /bdun cu rtsa gnyis zhes bya ba ni brgya phrag la yang bdun cu rtsa gnyis gtsor byas pa'i rtsa'i grangs kyi rigs bdun cu rtsa gnyis so//de rjes drug cu rtsa bzhi zhes bya ba ni bdun cu rtsa gnyis kyi grangs kyi rigs la drug cu rtsa bzhi'i grangs kyi dkyil 'khor pa rnam par dag pas dpal bde mchog gi dkyil 'khor gyi rjes su 'brangs nas so/ /drug cu rtsa bzhi po de las kyang sum cu rtsa drug gi nang du 'dus par 'gyur ro//'khor lo gsum la gnas pa'i thabs dang shes rab gcig tu brjod par 'dod pas sum cu rtsa drug tu 'gyur ro/ /nyi shu rtsa bzhi de las kyang / /zhes bya ba ni sum cu rtsa drug gi dkyil 'khor pa rnams bsdus pa ni/ nyi shu rtsa bzhi'i rtsa rnams la ste/'khor lo gsum gyi ngo bo nyid kyi phyir dang / gnas la sogs pa'i ngo bo nyid kyi phyir ro/ /de las kyang ni bcu gsum dang / /zhes bya ba ni bcom ldan 'das lha bcu gsum gyi bdag nyid can gyi dkyil 'khor gyi 'khor lo rnam par dag pas so/ /dgu yang ngo zhes bya ba ni bcu gsum gyi bdag nyid can la dgus bsdus pa'i phyir te/ye shes kyi 'khor lo bum pa dang bcas pa rnam par dag pas so/ /de las lnga dang zhes bya ba ni ye shes kyi 'khor lo gcig pu la ltos nas so/ /de'i phyir gsum zhes bya ba ni lnga po de yang la la nA la sogs pa'i ngo bo gsum mo/ /gsum yang zhes bya ba ni gsum po de la yang a wa d+hU tI'i gcig pu la bsdus na'o//rdzogs pa'i rim pa'i sbyor ba yis/ /zhes bya ba ni shin tu zab mo'i rang bzhin gyis so/ /'gro zhes bya ba ni 'gro ba'o/ /gzhan dang gzhan du bsdus nas zhes bya ba ni phan tshun du bsdus pas so/ /de yang zhes bya ba ni de yang gcig gi rnam pa'o/ /'od gsal go 'phang la'o zhes bya ba ni rang bzhin gyis 'od gsal ba'i khongs su 'gro ba'o//rnam rtog med pa'i zhes pa ni thams cad du ngo bo gcig pa'i phyir ro/ /bde ba che zhes bya ba ni sdug bsngal mtha' dag bzlog pa'i phyir ro/ /gnyis med ye shes zhes bya ba ni gzung 'dzin dang bral ba'i phyir ro/ /dri ma med ces bya ba ni dri ma thams cad dang bral ba'i phyir ro//chos kyi dbyings kyi bdag nyid mchog /ces bya ba ni thams cad du 'gro ba'i phyir ro/ /mchog ces bya ba ni gong na med pa'i phyir ro/ /rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ zab mo'i don shin tu gsal bar byed pa zhes bya ba las/ le'u bzhi bcu rtsa gsum pa'i rgya cher bshad pa'o// //de ltar le'u bzhi bcu rtsa gsum pas/ rigs kyi dbye ba'i yul la dri ba'i lan brjod nas/ da ni phyag rgya'i dbye ba'i nges pa'i tshig gi yul la dri ba'i lan bstan pa'i phyir/ le'u bzhi bcu rtsa bzhi pa nye bar 'god cing / dang por re zhig de rtsom pa ni de nas zhes bya ba la sogs pa gsungs te/ le'u bzhi bcu rtsa gsum pa bshad pa'i rjes la'o/ /bcom ldan 'das rdo rje zhes bya ba ni rdo rje 'chang chen po'o/ /phyag rgya'i dbye ba mngon par brjod/ /ces bya ba dang 'brel to/ / phyag rgya rnams ni las kyi phyag rgya la sogs pa rnams so/ /dbye ba ni rab tu dbye ba'o/ /bla na med ces bya ba ni bla na med pa'i lhan cig skyes pa'i rgyur gyur pa'i phyir ro/ /chos dang zhes bya ba la sogs pa ni/ las kyi phyag rgya la sogs pa'i dbye bas rnam pa bzhi zhes bya ba'i don to/ /de ltar de rtsom pa bshad nas/da ni dngos su bshad pa brjod pa'i phyir/ de'i yan lag phyi rol gyi rjes su 'brangs nas/ phyag rgya'i dbye ba las kyi phyag rgya'i mtshan nyid ni/ las dang zhes bya ba gsungs te/ las ni dge ba dang mi dge ba dang / lung du ma bstan pa rnams so/ /rnam smin nges pa yis zhes bya ba ni rang dang 'os pa'i bde 'gro dang ngan 'gro la sogs pa skyed par byed pa'o//'bras bus zhes bya ba ni bde sdug la sogs pa nyams su myong ba'i mtshan nyid do/ /rgyas btab lta bur gnas zhes bya ba ni rten cing 'brel par 'byung ba'i tshogs pa bsam gyis mi khyab pa'i phyir te/ spyod yul las 'das pa'i phyir ro//de nyid kyi phyir/ gang yang 'dir ni las gang gis/ /zhes bya ba la sogs pa gsungs te/ las ni dge ba dang mi dge ba la sogs pa'o/ /'dir ni zhes bya ba ni 'jig rten 'di la'o/ /las zhes bya ba ni bya ba'i rang bzhin la'o/ /gang yang zhes bya ba ni rgyu dang rjes su mthun pa de yon tan no//ji lta ba bzhin zhes bya ba ni dge dang mi dge'i bdag nyid can la'o/ /rgyas btab nas zhes bya ba ni gang gi phyir de bas na/ las kyi phyag rgyas mngon par brjod/ /ces bya ba'i don to/ /de ltar las kyi phyag rgya'i mtshan nyid bstan nas/ da ni chos kyi phyag rgya'i mtshan nyid brjod pa'i phyir/chos rnams zhes bya ba la sogs pa gsungs te/ rang dang gzhan rnams kyi brjod pa shes pa dang / shes byas bsdus pa rnams kyi'o/ /rang bzhin med pa nyid/ rang bzhin gyis zhes bya ba ni rang bzhin gyis dben pa nyid kyi mtshan nyid do//rgyas btab nas zhes bya ba ni so so'i skye bo'i spyod yul ma yin pa nyid kyi phyir ro/ /gnas zhes bya ba ni rnam par gnas pa'o/ /rgyu mtshan des ni chos kyi phyag rgya'i mtshan nyid bstan nas/ da ni dam tshig gi phyag rgya'i mtshan nyid brjod pa'i phyir/ dam tshig ces bya ba la sogs pa gsungs te/dam tshig ni gzhan gyi don byed pa'i mtshan nyid can no/ /rgyal sras rnams zhes bya ba ni byang chub sems dpa' rnams rgyas btab nas zhes bya ba ni/ bsam gyis mi khyab pa'i phyir ro/ /smon lam gyi stobs kyis lhun gyis grub pa'i phyir ro/ /ji ltar zhe na/ de'i phyir rang gi yon tan rten/ /zhes bya ba gsungs te/rang gi yon tan snying rje chen po'i mtshan nyid kyi rten rnams kyis so/ /stong dang snying rje mi phyed pa/ /zhes bya ba ni mi dmigs pa'i ngo bo shes rab snying rje'i rang bzhin gyis so/ /sangs rgyas zhing ni rnam sbyang ba/ /zhes bya ba ni mthon dman gyi snang ba zlog pas shel dang in+d+ra nI la dang / ma ra ka ta la sogs pa'i ngo bo sangs rgyas kyi zhing rnam par dag pa'o//de bzhin gshegs pa zhes bya ba ni yang dag par rdzogs pa'i sangs rgyas rnams kyi ste/ ji ltar 'khor ba las gshegs pa de bzhin du de bzhin gshegs pa'am de bzhin nyid du 'gro bas na/ de bzhin gshegs pa ste/ de rnams kyi'o/ /dam tshig ces bya ba ni snying rje dang shes rab kyi dbye ba'o//yongs su dag par mdzad pa'i las/ /zhes bya ba la/ rnam par dag pa rnam gnyis kyi yongs su'i las shes bya ba ste/ yongs su ni kun nas las su rung ba nyid du byed pa'o/ /de ltar dam tshig gi phyag rgya'i ngo bor bstan nas/ da ni phyag rgya chen po'i mtshan nyid bstan pa'i phyir/de'i rang bzhin med ces bya ba gsungs te/ de'i zhes bya ba ni phyag rgya chen po'o/ /dus thams cad du ma byas pa'i ngo bo nyid du yod pa'i phyir te/ dga' ba chen mo ster bar byed pas na snyam du bsams nas so/ /da ni brjod ces bya ba ni bshad ces bya ba'i don to//de ltar don rnam pa bzhis phyi rol gyi rjes su 'brangs nas/ phyag rgya'i dbye ba bstan nas da ni gsang ba'i rjes su 'brangs nas/ de'i dbye ba brjod pa'i phyir/ de'i yan lag tu las kyi phyag rgya'i mtshan nyid ni/ las kyi phyag rgya yongs su shes na zhes bya ba gsungs te/ phyi rol gyi 'brel pa tsam la nye bar mkho ba las kyi phyag rgya'i yongs su shes pa zhes bya ba ni kun nas rnam par shes pa'i rnam pa'o/ /sngags pa zhes bya ba ni sgom pa po'o/ /las rung thob pa skye zhes bya ba ni lhan cig skyes pa'i yul la las su rung ba nyid bskyed pa'i phyir zhes bya ba'i don to/ / yang na/ sngags kyis las su rung ba'i blo/ /zhes 'byung ste/ de'i phyogs la ni sngags ni oM yig la sogs pa rnams kyis so/ /las rung zhes bya ba ni lhan cig skyes pa nyams su myong ba sngon du 'gro bas so/ /blo zhes bya ba ni byang chub kyi sems phyir mi 'dor ba'i blo'o/ /gzhan yang shes rab dbang bskur na//zhes bya ba ni dbang gsum pas dbang bskur ba'i dus na'o/ /slob dpon zhes bya ba ni dbang bskur ster ba po rnams kyi ste/ 'jig rten dang 'jig rten las 'das pa'i spyod pa spyad pas so/ /ji ltar dpes mtshon mtshan nyid ni/ /zhes bya ba ni don gyis lhan cig skyes pa mngon du bya ba'i phyir/dpe'i mtshan nyid ni dpe'i mtshan nyid skyes pa nye bar mtshon pa'i rgyur gyur pa'o/ /ci'i don du yin zhe na/ de'i phyir/ rdo rje sems dpa' rab dngos don/ /zhes bya ba gsungs te/ rdo rje ni stong pa nyid kyi de kho na nyid la sems dpa' gang la yod pa de rdo rje sems dpa' 'o/ /de'i ngo bo ste de'i don gang yin pa ni thog ma dang tha ma med pa'i bde ba chen po'i bdag nyid can no//de gsal ba'i phyir ni sems can rnams la bstan pa'i don du'o/ /snying rje'i bsam pas zhes bya ba ni snying rje chen po sems kyi rgyud la khyab pa rnams kyis te/ gsal bar mdzad ces bya ba ni lhag ma'o/ /de ltar las kyi phyag rgya'i mtshan nyid bstan nas/ da ni chos kyi phyag rgya'i mtshan nyid bstan pa'i phyir/de las zhes bya ba gsungs te/ rdo rje'i bsam pa dang ldan pa'i bcom ldan 'das las so/ /de las shes pa thob nas ni/ /zhes bya ba ni las kyi phyag rgya'i rnam par nges pa shes nas so/ /chos nyid nam mkha' zhes bya ba ni de kho nyid kyi nam mkha'a'o/ /nges pa zhes bya ba ni nges par 'byed pa ste/de dang lhan cig snyoms par zhugs pa chos nyid nyams su myong ba zhes bya ba'i nges pa'o/ /ji ltar nges par byed ce na/ de'i phyir de ltar de nyid ces bya ba gsungs te/ de lta bur gyur pa'i de kho na nyid kyi ngo bo'o/ /de nyid ye shes ni zhes bya ba ni de la dmigs pa yod pas nyams su myong ba'o//de ltar rnal 'byor ma mtshan nyid/ /ces bya ba ni de lta bur gyur pa'i rnal 'byor ma de kho na nyid gsal bar byed pa'o/ /de ltar chos kyi phyag rgya'i mtshan nyid bstan nas/ da ni dam tshig gi phyag rgya brjod pa'i phyir/ dam tshig rtse gcig ces bya ba la sogs pa gsungs te/ bsrung bar bya ba dang bza' bar bya ba'i dam tshig la dus rtag tu gnas par dga' ba'o/ /mkhas zhes bya ba ni sngags dang rgyud la mkhas pa'o/ /rlung gi de nyid pha rol son/ /zhes bya ba ni rlung gi stobs kyis sems 'dzin pa la sogs pa nus pa'o/ /bslab pa zhes bya ba ni nye bar mtshon par byas pa'o/ / dpal ldan 'dus pa'i don zhes bya ba ni rnal 'byor chen po'i rgyud la sogs pa rnams la'o/ /ngag 'jam zhes bya ba ni 'jam pa'i dbyangs so/ /thun mong ma yin mtshan nyid ces bya ba ni thun mong du bud med kyi skye bo'i mtshan nyid dang mi ldan pa'i phyir ro/ /mig yangs pa yi bu mo rnyed/ /ces bya ba ni rjes su bstan nas so//mig yangs ma zhes bya ba ni mig yangs pa gang la yod pa'am/ yangs pa'i mig gi pad+ma'i spyan gang la yod pa de la de skad ces bya'o/ /gzugs dang lang tshos rnam par brgyan/ /zhes bya ba ni lang tsho dang lo grangs kyi yon tan dang ldan pa'o/ /ji ltar sbyor ba mngon rtogs par//zhes bya ba ni ji lta bu'i rnal 'byor gyis so/ /mngon par zhes bya ba ni kun nas so/ /rtogs pa zhes bya ba ni 'od gsal ba'i de kho na nyid thob par byed pa'o/ /phyag rgya zhes bya ba ni de ma thag par brjod pa rnams so/ /lhan cig ces bya ba ni mnyam par ro/ /sgrub par byed ces bya ba ni goms par byed pa'o//de ltar dam tshig gi phyag rgya'i mtshan nyid bstan nas/ da ni phyag rgya chen po'i mtshan nyid brjod pa'i phyir/ de nyid ces bya ba gsungs te/ rtogs par byed pa'o/ /de nyid ces bya ba ni dam tshig gi phyag rgya'o/ /de nyid ces bya ba ni 'od gsal ba'i ngo bo'o//phyag rgya chen po'i don mtshan nyid/ /ces bya ba ni bde ba thams cad 'phel bar byed pa'i bdag nyid can no/ /de nyid ces bya ba ni rtag tu phyin ci ma log pa'i ngo bo yod pa'i phyir ro/ /bde chen go 'phang ni zhes bya ba ni lhan cig skyes pa'i ngo bo nyid kyi phyir ro/ /kun du rtog pa thams cad spangs//zhes bya ba ni dga' ba la sogs pa gsum gyi mtshan nyid dang bral ba'i phyir ro/ /stong nyid ye shes zhes bya ba ni chos nyid nyams su myong ba'i ngo bo nyid kyi phyir ro/ /dri ma med ces bya ba ni sgrib pa gnyis dang bral ba'i phyir ro/ /chos kyi dbyings kyi go 'phang zhes bya ba ni chos kyi dbyings rab kyi mthar thug pa 'gro bas gnas so//gsal zhes bya ba ni rnal 'byor pa'i rgyud la gsal ba nyid du snang ba'i phyir ro/ /de ltar don rnam pa bzhis gsang ba'i rjes su 'brangs nas/ de'i dbye ba brjod pa'o/ /de ltar rnam pa gnyis thun mong ba'i phyag rgya'i dbye ba bstan nas/da ni rim pa gzhan gyis de brjod pa'i phyir/ de'i yan lag bshad par dam bca' ba ni/ de nas gzhan yang zhes bya ba la sogs pa ste/ sngon la ltos pas tha dad pa'i rim pa gzhan gyis so/ /phyag rgya'i dbye ba zhes bya ba ni 'chad bzhin pa'i mtshan nyid do/ /bshad bya ba zhes bya ba ni brjod par bya zhes bya ba'i don to//bla na med ces bya ba ni bla na med pa'i de kho na nyid kyi rgyur gyur pa'i phyir ro/ /de ltar bshad par dam bca' ba bstan nas/ grangs kyi cho ga brjod pa'i phyir/ rigs dang zhes bya ba la sogs pa gsungs te/ rigs ni drug ste/ pha rol tu phyin pa sbyin pa la sogs pa yang de bzhin no//rigs kyang yin la pha rol tu phyin pa yang yin pas na/ rigs kyi pha rol tu phyin pa'o/ /de rnams kyi dbye ba ni khyad par ro/ /phyag rgya drug tu zhes bya ba ni 'chad bzhin pa las so/ /yang dag bshad ces bya ba ni brjod pa'o/ /de ltar grangs kyi cho ga brjod nas/da ni de rnams sngags kyi sgo nas mchod par bya ba ni/ yaM raM zhes bya ba la sogs pa gsungs te/ lha mo rnams zhes bya ba ni 'chad bzhin pa'i gtum mo la sogs pa rnams la'o/ /rim pa las zhes bya ba ni 'chad par 'gyur ba'i rim pas so/ /bya zhes bya ba ni bya ba'o/ /mchod par bya zhes bya ba ni khyad par du 'phags pa'i nye bar mkho ba la sogs pa'o//rtag tu zhes bya ba ni tshogs kyi 'khor lo la sogs pa la dus rtag tu'o/ /gang du zhe na/ de'i phyir/ mchod pa'i rim pa ro gcig pas/ /zhes bya ba gsungs te/ mchod bya dang mchod byed dang mchod pa rnams la tha dad pa'i blo dor bas so//mchod pa la ro gcig pa'i rim pa ni/ mchod pa'i rim par ro/ /gcig pa ste de las so/ /de ltar de rnams kyi sngags kyi sgo nas mchod pa bstan nas/ da ni phyag rgya'i ngo bo nyid brjod pa'i phyir/ gdol pa mo zhes bya ba la sogs pa gsungs te/ khrus mkhan mo zhes bya ba ni khrus byed pa mo'o//sme sha can zhes bya ba ni rab tu grags pa nyid do/ /gar mkhan ma zhes bya ba ni gar gyi rigs las byung ba/ gar gyi las la 'jug pa'o/ /ro bsreg ma zhes bya ba ni ro bsreg ma'o/ /gnyis skyes mo zhes bya ba ni bram ze'i rigs las byung ba ma'o/ /rnal 'byor pas zhes bya ba ni lhan cig skyes pa sgom pa po rnams kyi'o//bsgrub rgyu'i don du zhes bya ba ni phyag rgya chen po'i mtshan nyid can gyi dngos grub bsgrub pa'i don du'o/ /gnas par bya ba ni btsun mo'i gzugs kyis gzhan don bya ba'i phyir rol par byed pa'o/ /gang du zhe na/ de'i phyir bdag nyid rol cing zhes bya ba gsungs te/rang nyid rol pas so/ /de ltar phyag rgya'i ngo bo bstan nas/ da ni de rnams kyi dbye ba brjod pa'i phyir/ gtum mo rdo rje'i rigs las skyes/ /zhes bya ba gsungs te/ rdo rje'i rigs ni mi bskyod pa'i rigs te/ reg par bya ba ma yin pa'i phyir dang / shin tu yang rtsub pa'i phyir ro//khrus mkhan rin chen rigs las skyes/ /zhes bya ba ni khrus mkhan ma ni dus rtag tu gos dri ma can 'khru bas/ dkar po'i rigs la dga' ba ste/ rin chen 'byung ldan yang sbyin pa'i pha rol tu phyin pa la 'jug pas/ dkar po'i las la 'jug la/ de dang chos mthun pas rin po che'i rigs las byung bar shes par bya'o//gdol pa pad+ma'i rigs las skyes/ /zhes bya ba ni de ni nga rgyal med pa nyid kyis bzod pa'i ngang tshul nyid kyi phyir dus rtag tu bzod pa'i ngang tshul can yin te/ de bas na pad+ma bzhin du pad+ma 'dam gyi skyon gyis ma gos pa dang 'dra ba ni/ pad+ma'i rigs las skyes pa'o//gar mkhan las kyi rigs zhes bya ba ni gar ni yan lag thams cad kyis bsgrub pa nyid kyi las thams cad nyid dang chos mthun pa'i phyir ro/ /ro bsreg ma ni 'khor lo'i rigs/ /zhes bya ba ni lus kyi chos nyid rtogs pa'i rgyur gyur pa nyid kyis rnam par snang mdzad kyi rigs so//ye shes phyag rgya gnyis skyes mo/ /zhes bya ba ni khyad par du 'phags pa'i ye shes skyed par byed pas bram ze mo'o/ /rdo rje sems dpa'i rigs su shes/ /zhes bya ba ni de'i dbang gis rdo rje ltar sra ba'i 'od gsal gyi ye shes skyed par byed pas so/ /'di ni zhes bya ba ni de ma thag par bstan pa'o//'di ni rigs ni drug tu 'gyur/ /zhes bya ba ni rdo rje 'chang chen po'i rigs dang lhan cig tu rigs lnga las byung ba'i phyir ro/ /de ltar de rnams nyid kyi rigs kyi dbye ba bstan nas/ de rnams nyid kyi ma la sogs pa'i ngo bo bstan par bya ba'i phyir ro/ /bram ze mo ni ma yin te//zhes bya ba la sogs pa gsungs te/ de'i dbang gis lhan cig skyes pa'i mtshan nyid mngon par 'phel bas/ rnal 'byor pa la phan par 'dod pa'i phyir ro/ /khrus mkhan mo ni sring mor brjod/ /ces bya ba ni dkar po'i chos rnam par 'phel bas de nyid la rjes su mthun pa dang bcas pa'i phyir ro/ /gar mkhan mo ni bu mor shes//zhes bya ba ni de kho na nyid kyi yul la gnyen po'i rgyu'i phyir ro/ /sme sha can ni chung mar rab tu grags/ /zhes bya ba ni rnam par rtog pa thams cad kyi gnyen po de kho na nyid nyams su myong bar byed pa nyid kyis thams cad du bde ba'i rgyu nyid kyi phyir ro/ /ro bsreg ma ni mna' ma ste/ /zhes bya ba ni de dang snyoms par zhugs pas lus mi dmigs pa'i chos nyid nyams su myong bas so//sgyug mo gdol pa mo zhes bya ba ni gtum mo'i las byed pas skyed byed ma'i ngo bo nyid kyi phyir ro/ /shes rab thabs kyi cho ga yis/ /zhes bya ba ni dbang po gnyis kyi sbyor bas so/ /mchod par bya zhes bya ba ni tshim par bya ba'o//de rnams zhes bya ba ni rnal 'byor ma drug go/ /rnam rtog med pas zhes bya ba ni bde ba chen po nyams su myong ba'am/ tha dad pa'i rtog pa spangs pa nyid kyis so/ /rgyu mtshan gang gis mchod par byed ce na/ de'i phyir rnam rtog med 'gyur na/ /zhes bya ba gsungs te/ rgyu gang gi phyir dngos grub ni phyag rgya chen po'i dngos grub rnam rtog med par 'gyur na/de rnams kyi drin gyis so/ /de'i phyir thams cad du mchod par bya snyam du dgongs pa'o/ /de ltar de rnams nyid ma la sogs pa brda'i ngo bo nyid kyis bstan nas/ da ni ma la sogs pa'i rnam par dag pa brjod pa'i phyir/ sems ni ma nyid gyur na ni//zhes bya ba la sogs pa gsungs te/ sems kyi dbang nyid kyis yongs su shes pa dang ma shes pa'i gnas skabs su kun nas nyon mongs pa dang rnam par byang ba grub pa'i phyir ro/ /sring mo dag tu yang dag bshad/ /ces bya ba ni de kho na nyid bstan pa dang rjes su mthun pa'i phyir ro/ /lus ni bu mor shes par bya/ / zhes bya ba ni mngon par zhen pa'i gzhi yin pa'i phyir ro/ /shes par bya zhes bya ba ni shes par bya ba'o/ /srog ni chung mar zhes bya ba ni shin tu yang mdza' ba'i phyir ro/ /rab tu gsal zhes bya ba ni brjod pa'o/ /mna' ma de bzhin thur sel rlung / /zhes bya ba ni rang gi chung ma la ltos nas/ cung zad phyi rol du gyur pa'i phyir ro//dbus ma'i zhes bya ba ni gnas pa'i rlung gi rnam pa'o/ /sgyug mor shes zhes bya ba ni shin tu yang phan pa skyed pa'i phyir ro/ /de ltar sems la sogs pa'i rnam par dag pa bstan nas/ da ni rtsa'i sgo nas de'i rnam par dag pa brjod pa'i phyir/ ma ni rgyags pa'i rtsa yi cha/ /zhes bya ba gsungs te/ mgo bor gnas pa'i zla ba'i khams la brten pa yin pa'i phyir ro/ /sangs rgyas rin chen za ma tog /ces bya ba ni de'i dbang gis 'dod chags kyi rigs can gyi rnal 'byor pa la/ sangs rgyas kyi chos thams cad bskyed pa'i phyir ro/ /sring mo khu ba 'bab pa'i rtsa/ /zhes bya ba ni b+ha ga la brten nas de sad pa'i phyir ro//spyi bo'i gnas na yang dag gnas/ /zhes bya ba ni de nas brtsams nas lus thams cad khyab pa nyid kyi phyir ro/ /bu mo khrag sbyin rgyu ba'i rtsa/ /zhes bya ba ni gang zhig khrag 'bab pa'i rtsa de ni bu mo zhes bya ba ste/ khrag 'bab pa'i ngang tshul can nyid kyi phyir ro/ /spyi bo phyed phyed lhag par gnas/ /zhes bya ba ni steng dang 'og gi dbye bas bshad pa dang /khrag 'bab pa'i phyir ro/ /ji skad du/ bshang gci zla ba nyi ma dang / /sgra gcan dus kyi me yi rtsa/ /zhes gsungs so/ /mna' ma mchil ma 'bab pa'i rtsa/ /zhes bya ba ni chu ngan 'bab pa'i rdo rje dang 'brel pa'i phyir ro/ /gnyis kyi zhes bya ba ni rtsa g.yas pa dang g.yon pa dag la'o//dbus na spyod ces bya ba ni dbus na gnas pa'o/ /mna' ma mchil ma 'bab pa'i rtsa/ /zhes bya ba ni ro drug la spyod pa'i rnam pa oM yig la nye bar gnas pa'i phyir ro/ /mgrin pa'i gnas su zhes bya ba ni longs spyod kyi 'khor lo'i gnas su'o/ /lhag par gnas zhes bya ba ni gnas pa'o/ /rnal 'byor chen po'i rgyud dpal rdo rje phreng ba'i rgya cher 'grel pa/paN+Di ta a laM ka ka la shas mdzad pa zab mo'i don shin tu gsal bar byed pa zhes bya ba las/ le'u bzhi bcu rtsa bzhi pa'i rgya cher bshad pa'o// //de ltar rtsa'i sgo nas de'i rnam par dag pa bstan nas/ da ni 'byung ba chen po'i sgo nas de'i rnam par dag pa brjod pa'i phyir/ma nis nyid bya ba la sogs pa gsungs te/ ma lus pa'i 'byung ba chen po bskyed pa'i rgyur gyur pa'i phyir ro/ /chu yi khams ni sring mor brjod/ /ces bya ba ni chu ni gnyen po'i ngo bo nyid kyis sring mo dang chos mthun pa'i phyir ro/ /ma ni bu mor shes par bya/ / zhes bya ba ni sring mos gzi brjid 'phel ba'i rgyu yin pa'i phyir dang / sha'i drod kyis de 'phel ba'i phyir ro/ /chu ni chung mar rab tu grags/ /zhes bya ba ni de'i dbang gis byang chub sems kyi khams g.yo ba'i phyir ro/ /mna' ma nam mkha' nyid du bshad/ /ces bya ba ni spun ni lhan cig skyes pa'i mtshan nyid can nam mkha' lta bu shes rab kyi stobs kyis bsgrub pa'i phyir ro//sgyug mo nam mkha' skabs 'byed ces bya ba ni mchog gi nam mkha'i ngo bo'o/ /de ltar 'byung ba chen po'i sgo nas/ de'i rnam par dag pa bstan nas/ da ni ro drug gi sgo nas de'i rnam par dag pa brjod pa'i phyir/ mngar bar gyur pas zhes bya ba la sogs pa gsungs te/mngar ba'i ro ni ma mor brjod de/ dal bu'i yul la mnyen pas 'jam pa'i phyir ro/ /skyur ba sring mo nyid du brjod/ /ces bya ba ni bad kan la sogs pa sel bar byed pas rjes su mthun pa'i phyir ro/ /kha ba rang gi bu mo dang / /zhes bya ba ni mnyen pa 'phel ba'i rgyu dang 'dra ba'i phyir ro/ /lan tshwa chung mar yongs su grags//zhes bya ba ni lan tshwa chung ma bzhin du shin tu mdza' ba dang / rjes su mthun pa 'dra bas so/ /bska ba sgyug mor shes par bya/ /zhes bya ba ni dri ma'i gnyen po'i phyogs 'dod pa'i phyir ro/ /tshwa ba mna' mar shes par bya/ /zhes bya ba ni rlung gi gnyen po nyid kyi bde ba bskyed pa'i rgyur gyur pa'i phyir ro//de ltar ro drug gi sgo nas/ de'i rnam par dag pa bstan nas/ de ni de rnams kyi khyad par can gyi mchod par brjod pa'i phyir/ 'di dag ces bya ba la sogs pa gsungs te/ ma la sogs pa'i brda 'di rnams kyis brjod pa'o/ /yang ji lta ba bzhin ma la sogs pa'i mtshan nyid kyi don ston par byed pa ni ma yin no//dngos grub 'dod pas bsten par bya/ rnal 'byor chen po'i rgyud dpal rdo rje phreng ba'i rgya cher 'grel pa/ paN+Di ta a laM ka ka la shas mdzad pa/ le'u bzhi bcu rtsa lnga pa'i phyed bar du stengs pa lo tsA bas bsgyur ba'o// //