CLOSE WINDOW

D1794
བོད་ཡིག

@##/ /rgya gar skad du/ pra dIp+ta na nA ma TI kA / bod skad du/ sgron ma gsal ba zhes bya ba'i 'grel bshad/ byang chub sems dpa' sems dpa' chen po 'phags pa spyan ras gzigs dbang phyug la phyag 'tshal lo/ /chos rnams rang bzhin med las sgyu ma'i skur bstan nas//thugs rje chen po'i stobs kyis sems can khams rnams ma lus pa'i/ /don rnams yongs su grub pa'i yid bzhin nor bu dang 'dra bas/ /mngon par byang chub mchog brnyes de la rtag tu dang bas phyag 'tshal lo/ /dri med mtha' yas dngos grub kun brnyes de la phyag 'tshal te/stong pa nyid kyi don rnams mngon gyur thogs med la phyag 'tshal/ 'das dang ma byon dus rnams kun du khyab pa khyod la phyag 'tshal lo/ /rlung dang sngags dang sems la sogs pa kun mkhyen khyod la phyag 'tshal lo//sems can gang dag rgyal ba yis gsungs legs pa'i don la rab rmongs pa/ /de gsal phyir ni zla ba grags pas sgron ma gsal ba'i rgya cher 'grel pa mdzad/ /sems can blo dman kha cig don de nyid la rmongs gyur pas/ /nyi ma snang ba la sogs thun mong khyad par rgya cher 'grel ba brtsams//'dod rgyal dbang gis legs pa'i don gsungs legs par gsal byas kyang / /rmongs pa'i dbang gis rgyud don nus pa ma mthong de phyir 'di la dga' ba mchog skyes nas/ /blo dman don du bdag gis cung zad bshad par bya/ /'di ni mi mkhas gang zhig gis//sngon du bstan bcos ma rnyed par / /gang yin pa ni phyis rnyed pa/ /gang yin de ni ya mtshan te/ /de 'dir bdag gis rnam par dbye/ /gang yang blo dman rnams kyi phyir/ /mkhas pas bstan bcos mi rtsom par/ /nyon mongs dra bas bcings pa yis//bstan bcos mtha' dag gang rtsom yang / /sdig pa 'ba' zhig bsod nams med/ /de phyir mkhas pas spang bar bya/ /bstan bcos rtsom pa'i mkhan po yis/ /rgyal ba'i bka' ni 'byung khungs su/ /rnam par bzhag pas de las ni/ /dran dang ngo tsha shes pa dang / /khrel yod pa dang shes rab dang //dad dang mos pa la sogs la/ /sems las byung ba dge ba'i chos/ /gang gis sngon du song ba yis/ /bstan bcos mi rtsom gyur kyang bla'i/ /bsod nams 'ba' zhig sdig pa med/ /gang gis 'dod chags khong khro dang / /de bzhin nga rgyal la sogs pa//nyon mongs mi dge sngon song nas/ /rgyal ba'i bka' rnams ma lus pa'i/ /rjes su 'brangs te rab bshad kyang / /sa bon mi dge'i dbang gyur pas/ /mthong ba'i chos la dmyal tshogs bsreg /de bas bstan bcos rtsom pa yis/ /dge ba'i chos 'di sngon song nas//gang yin bstan bcos brtsam par bya/ /shes rab zhan par gyur pa yis/ /bstan bcos gang zhig brtsams gyur kyang / /de yis don byed nus ma yin/ /dper na long ba gang zhig gis/ /gzhan gyi long khrid mi nus pa/ /de bzhin de yang de bzhin no/ /gang tshe bstan bcos rtsom pa yang //sgra dang don rnams gtan la 'bebs/ /phyi rol bstan bcos legs par mkhas/ /grub pa'i mtha' rnams kun la mkhas/ / sngags dang rdzas dang sman rnams dang / /thun mong gso ba la sogs la/ /rab tu mkhas par gyur pa dang / /gzhan gyi bstan bcos sun 'byin gyi //sbyor ba la ni shin tu mkhas/ /dge ba'i chos kyis rnam par brgyan/ /de yis bstan bcos brtsam par bya/ /yang na byang chub sems dpa' 'am/ /thugs rje'i stobs kyis sprul pa yi/ /sangs rgyas 'jig rten lhar snang ste/ /de yis brtsam bya ma gtogs pa/ /gzhan gyis brtsams pa don med 'gyur//de bzhin gshegs pa thams cad kyi sku dang gsung dang thugs kyi gsang ba bsdus pa 'di ci'i phyir gsungs she na/ /'di ltar rigs thams cad gzung bar bya ba dang / rigs mchog tu gyur pa gzung bar bya ba'i phyir te/ de bzhin gshegs pa thams cad kyi gsang ba 'dus pa'i dkyil 'khor 'dir mtshams med pa lnga la sogs pa byas pa yang bla na med pa'i mchog thob par 'gyur ro zhes gsungs pa'i phyir dang /gsang ba'i don 'di ni thams cad kyi thun mong ma yin no zhes 'byung ba'i phyir ro/ /gal te/ rigs thams cad ces bya ba ni rigs chad pa la sogs pa yang smos pa yin nam/gal te de lta yin na ni bcom ldan 'das kyis bden pa bzhi dang / pha rol tu phyin pa la sogs pa gsungs pa don med par 'gyur ro zhe na ma yin te/ rigs mchog tu 'gyur ba'i phyir ro/ /de lta na ni rigs mchog tu gyur pa 'dul ba dang / rigs thams cad pa 'dul ba gcig gis gcig spangs pa ma yin nam zhe na/ma yin te/ chos kyi phung po brgyad khri bzhi stong gi snod yin pa'i phyir ro zhe'o/ /de lta na ni theg pa mchog tu mi 'gyur gyi theg pa thams cad par 'gyur ro zhe na ma yin te/ theg pa ni gnyis dang gsum du yod pa ma yin no//de ci'i phyir zhe na/ de bzhin gshegs pa thams cad kyi sku dang gsung dang thugs gsang ba las mi 'da' la sems can thams cad kyang de'i rang bzhin can yin pa'i phyir ro/ /de lta na ni bcom ldan 'das kyis bden pa bzhi'i chos kyi 'khor lo la sogs pa gsungs pa don yod par 'gyur te snga ma bzhin no zhe na/ma yin te/ sems can thams cad kyang rang rang gi rigs la gnas pa'i phyir ro/ /rigs zhes bya ba 'di yang rkyen las byung ba'am/ chos nyid kyis yin zhes rtog grang na/ rkyen las byung ba ni ma yin te/ rkyen thams cad dang ldan pa'i phyir ro/ /de lta na ni rigs nges par mi 'gyur gyi/rigs ma nges par ni 'gyur ro zhe na/ rang gi rigs kyi bskyed pa'i phyir ro/ /rang gi chos kyis bskyed pa zhes bya ba 'di yang sa bon thams cad kyis gcig bskyed dam/ sa bon gcig gis thams cad bskyed ce na/ sa bon thams cad gcig gis bskyed pa ni ma yin te/ rkyen ma nges par 'gyur ba nyid dang / thams cad las thams cad skye bar 'gyur ba dang / rkyen can don med pa nyid du yang 'gyur ro zhe na/ ma yin te/ 'dir ni sa bon thams cad rkyen thams cad kyis gsos 'debs pa nyid kyi phyir ro/ /gsos 'debs pa zhes bya ba 'di yang sa bon nyid rkyen gzhan gyi dbang du 'gyur ba ni ma yin te/gong ma'i skyon nyid du 'gyur ro/ /lung las de bzhin gshegs pa gsang ba mchog gi phyir/ sa bon rnams ni gcig tu 'gyur/ /zhes 'byung ba'i phyir chos nyid kyis thams cad yod pa ma yin no zhe na/ 'di las dang po pa 'am/ sa la gnas pa yin/ sa la gnas pa'i dbang du ni 'dod pa yin te/gnod pa cung zad kyang med do/ /phyogs phyi ma ltar na ni 'jug par yang mi 'gyur na/ rigs gcig pa ltar gyur pa lta smos kyang ci dgos/ 'on kyang sa la gnas pa thams cad kyang gsad pa'i mchog la gnas pa'am/ so so rang rang gi lam la gnas she na/dang po ltar ni ma yin te/ dus kyis gnod pa'i phyir ro/ /phyogs phyi ma ltar na ni rang gi tshig gis gnod pa'i phyir ro/ /de ci'i phyir zhe na/ tshig gi blang dor med pa'i byang chub sgrub pa'am/ bskal pa grangs med pa gsum gyis 'grub pa nyid kyi phyir ro/ /thams cad gsang ba mchog la gnas//zhes bya ba dang / rang gi lam la gnas zhes pa yang gcig gis gcig spangs pa'i phyir ro/ /de bas na 'di ni blang bar bya ba nyid do zhe na ma yin te/ sa la gnas pa rnams ni thams cad kyang bskyed pa'i rim pa nyams su len pa'i phyir dang de bzhin gshegs pa thams cad kyi gsang ba chen por lung bstan pa'i phyir ro//de lta na ni theg pa'i bye brag med par 'gyur ro zhe na ma yin te gnyis pa yod pa'i phyir ro/ /gnyis zhes bya ba 'di yang gsum dang gnyis kyi bye brag gis yin no/ /theg pa chen po mdo sde'i rjes su zhugs pa rnams ni don dam pa chos nyid mngon du gyur nas snang ba sgyu ma tsam dang /rtsol ba dang bcas pa lha dang lha mo'i dkyil 'khor du bsal ba'o/ /gsang ba 'dus pa'i dkyil 'khor la gnas pa rnams ni don dam pa'i bden pa dang / yang dag pa'i kun rdzob 'ba' zhig la nye bar longs spyod pa'i phyir ro/ / dngos por snang ba sgyu ma tsam 'di ci yang dag pa'i kun rdzob pa'am/ log pa'i kun rdzob ces rtog grang na/ re zhig yang dag pa'i kun rdzob ni ma yin te/ zlas gsal ba'i phyir ro/ /log pa'i kun rdzob ni ma yin te/ thams cad las mthun par snang ba'i phyir ro/ /dngos po lha'i dkyil 'khor du snang ba zhes bya ba 'di yang log pa'i kun rdzob ni ma yin te khas ma blangs pa'i phyir ro//yang dag pa'i kun rdzob kyang ma yin te/ thams cad la mthun par snang ba ma yin pa'i phyir ro/ /de bas 'di blang bar bya ba ma yin no zhe na ma yin te/ dngos por snang ba sgyu ma tsam 'di dman pa la yang dag pa'i kun rdzob tu snang na ni mi 'dod pa med do thams cad la yang dag pa'i kun rdzob tu snang zhes bya ba'i nges pa ci zhig yod/log pa'i kun rdzob ces bya ba ni 'khrul pa nyid do/ /'di ltar 'khrul pa zhes bya ba yang / rtog pa dang dbang po med pa ni yang dag par yang snang ngo //dngos po lha'i sar snang ba ni de lta ma yin te/ ma 'khrul pa'i dngos po yod pa'i phyir dang / rtog pa'i dus na der snang ba nyid kyi phyir ro/ /gang gis gang la gnas pa de nyid don la mi slu bar byed pa ni yang dag pa'i kun rdzob ste/ dper na du ba las me dpog pa bzhin no/ /log pa'i kun rdzob ni rtog pa'i dus na mi gnas pa'i phyir don la slu bar byed pa ste thag pa la sprul bzhin no//bskyed pa'i rim pa 'di yang phrad par byed pa'i phyir dang / mi slu bar byed pa'i phyir yang dag pa'i kun rdzob tu 'gyur ro 'khrul pa'i shes pa dang / ma 'khrul pa'i shes pa ni slu bar byed pa dang mi byed pas gcig gis gcig spangs pa'i phyir 'gal bar gnas pa'o//de bas na mdo sde'i rjes su zhugs pa'i byang chub sems dpa' rnams ni don dam pa'i bden pa dang / yang dag pa'i kun rdzob dang log pa'i kun rdzob gsum la nye bar gnas pa'o/ /sngags kyi sgor zhugs pa'i byang chub sems dpa' rnams ni/don dam pa'i bden pa dang / yang dag pa'i kun rdzob 'ba' zhig la nye bar spyod pa'i phyir/ de bas na theg pa gnyis su yang 'gyur ro/ /dus kyis gsal ba yang ma yin te/ slob pa dang mi slob pa'i bye brag gis yin no/ /rang gi tshig gis gsal ba yang ma yin te/gnyis nyid yod pa'i phyir ro/ /de bas na 'di ni blang bar bya ba nyid do/ /dgos pa med pa yang ma yin te/ sems can 'dod chags can la sogs pa 'dul bar byed pa nyid kyi phyir ro/ /sems can 'dod chags can rnams ni 'dod chags chen po'i chos kyi rjes su 'jug pa'i phyir de bzhin gshegs pa rnams kyis 'dod chags kyi sgo nas chos ston to//sems can zhe sdang can rnams ni zhe sdang chen po'i chos kyi rjes su 'jug pa'i phyir de bzhin gshegs pa rnams kyis zhe sdang gi sgo nas chos ston to/ /sems can gti mug can rnams ni gti mug chen po'i chos kyi rjes su 'jug pa'i phyir de bzhin gshegs pa rnams kyis gti mug chen po'i sgo nas chos ston to//sems can nga rgyal can rnams ni nga rgyal chen po'i chos kyi rjes su 'jug pa'i phyir de bzhin gshegs pa rnams kyis nga rgyal gyi sgo nas chos ston to/ /sems can phrag dog can rnams ni phrag dog chen po'i chos kyi rjes su 'jug pa'i phyir de bzhin gshegs pa rnams kyis phrag dog gi sgo nas chos ston to//de la sogs pa rmad du byung ba'i spyod pa chen pos sems can thams cad kyi don byed pa'i phyir dgos pa chen po dang ldan pas rgyud chen po'o/ /de lta bu'i rmad du byung ba'i rgyud 'di ni spyod pa chen po dang /dus chen po la sogs pa dang ldan pa'i phyir rgyud chen po zhes bya'o/ /'di'i brjod par bya ba ni gang dgos pa ni gang dgos pa'i dgos pa ni gang / 'brel pa ni gang zhe na/ de bzhin gshegs pa thams cad kyi gsang ba 'dus pa lam 'bras bu dang bcas pa ni 'di ni brjod par bya ba'o//lam 'bras bu dang bcas pa ji lta bu'i 'bras bu rnam par rtog pa ni dgos pa'o/ /rjod par byed pa dang dgos pa ni gang la gang zhig rag las par 'gyur ba de'i phyir rag las pa'i 'brel par 'gyur ro/ /bdag gi don dang gzhan gyi don phun sum tshogs par byed pa ni dgos pa'i dgos pa'o//yang na lam la gnas par byed pa ni dgos pa yin la/ des 'bras bu thob pa ni dgos pa'i phyir na dgos pa'o/ /yang na thun mong dang mchog gi dngos grub dang bdag dang gzhan gyi don rnam pa gnyis po dgos pa dang dgos pa'i dgos par go rims bzhin du sbyar ro//brjod par bya ba de nyid la sogs pa rgyas par bstan pa'i phyir/ dpal ldan rgyud rgyal zhes bya ba la sogs pa smos te/ de la dpal ni dpal te/ dpal rdo rje 'chang chen po'o/ /dpal de dang ldan pas na dpal ldan te/de bzhin gshegs pa btsun mo'i tshogs dang rnam par rol pa'o/ /de nyid thabs shes rab gnyis su med pa'i snyoms par zhugs pa'i rgyud do/ /rgyud de nyid rgyal po ste rnal 'byor rgyud kyi shin tu gsal bar rnam phye zhes bshad pa'i phyir ro/ /sems can thams cad kyang de lta bu'i chos dang ldan par 'gyur ro zhe na/mtha' drug gi ni 'ching bas bcings/ /zhes bya ba la sogs pa smos te/ 'dir mtha' rnam pa drug ni 'dod chags dang / khong khro dang nga rgyal dang / lta ba dang / the tshom dang / ma rig pa dang rnam pa drug go/ /'di ni mtha' ste/'khor ba'i g.yang sa dang nye ba nyid kyi phyir ro/ /mtha' yang yin drug kyang yin pas 'di ni mtha' drug go/ /mtha' drug kyang yin pa de ni 'ching bas bcings pa yang yin pas mtha' drug gi 'ching bas bcings pa'o/ /des cir 'gyur zhe na/ rgyal por ma gyur zhes pa ni dman par gyur zhes pa'o//de bas na mchog tu ma gyur pa de ni dman par gyur pa'o/ /gang dman par gyur pa de ni rmad du byung ba'i spyod pa la mi gnas pa'o/ /gang rmad du byung ba'i spyod pa la mi gnas pa de ni rmad du byung ba'i spyod yul ma yin no/ /gang rmad du byung ba'i spyod yul ma yin pa de ni de'i 'bras bu can ma yin no//gang de'i 'bras bu can ma yin pa de ni log pa'i 'bras bu dang ldan par 'gyur ro/ /mdo dag las kyang / sems dpa' chen po ma rig pa las ni 'du byed 'byung ngo / /'du byed las ni rnam par shes pa 'byung ngo / /rnam par shes pa las ni ming dang gzugs 'byung ngo //ming dang gzugs las ni skye mched drug 'byung ngo / /skye mched drug las ni reg pa 'byung ngo / /reg pa las ni tshor ba 'byung ngo / /tshor ba las ni srid pa la sogs pa 'byung ba dang / gzhan las kyang / sems dpa' chen po de bzhin gshegs pa btsun mo la nye bar longs spyod pa ni rmad du byung ba'i spyod pa'o//sems can log sred can rnams ni 'dod chags dang zhe sdang la sogs pas de bzhin gshegs pa'i spyod pa la mi gnas te/ sems can 'di dag ni nyon mongs pa'i mtha' la gnas pa'i phyir ro/ /kye ma sems can 'di dag ni rab tu brlag go//kun du brlag go/ /kun du rab tu brlag go/ /'di dag ni 'khor ba'i chos nye bar len pa'o/ /'di dag ni nyon mongs pa lhur len pa'o/ /sems can 'di dag ni rmad du byung ba'i spyod pa spangs pa'o/ /sems can 'di dag ni de bzhin gshegs pa'i dngos grub thams cad spangs pa'o zhes 'byung ba'i phyir ro//mtha' drug gi 'ching bas bcings pa'i phyir thams cad kyi spyod yul ma yin nam zhe na/ ma yin te/ de'i phyir rgyal sras yul gyur zhes bya ba smos te/ rgyal ba ni sangs rgyas te rdo rje 'chang chen po la sogs pa'o/ /rgyal ba'i sras ni rgyal ba'i sras te byams pa la sogs pa'o//de rnams kyi yul du gyur zhes pa 'dis ni 'khor ba pa'i yul ma yin zhes sbyar ro/ /yul du gyur zhes pa ni de rnams kyis nye bar longs spyod du yod ces pa'o/ /gang la spyod ce na/ dpal ldan rgyud rgyal zhes bya ba de nyid bshad pa/ rgyal ba'i 'dus pa gang yin zhes bya ba smos te/rgyal ba'i 'dus pa ni rgyal ba 'dus pa ste/ de bzhin gshegs pa btsun mo'i tshogs dang nye bar sbyor ba'o/ /de nyid sems can thams cad kyi yul du ma gyur pa ci'i phyir zhe na/ sangs rgyas kun gyis rgyas btab ces smos te/ sangs rgyas kun ni rdo rje 'chang chen po la sogs pas so//des rgyas btab ces pa ni thams cad la sbas pa zhes pa'o/ /de dag gi don yang don 'di skad du ston par 'gyur te/ de bzhin gshegs pa rnams kyi spyod pa rmad du byung ba gnyis su med pa'i thabs kyi sbyor ba 'di ni nyan thos dang rang sangs rgyas la sogs pa rnams kyi thun mong ma yin pa shin tu gsang bar dgongs so//gal te gsang ba zhig yin na/ thams cad nas thams cad du rtog pa med par 'gyur ro zhe na/ ma yin pa'i phyir klu sgrub las rnyed pa zhes smos te/ legs par lung bstan pa'i byang chub sems dpa' klu sgrub las rnyed pa bshad ces sbyar ro//yang na dpal ldan rgyud rgyal gyi dpal ni sku rnam pa gsum mo/ /dpal de thob pa'i thabs gang la yod pa de ni dpal ldan te/ bskyed pa'i rim pa dang rdzogs pa'i rim pa'o/ /rim pa rnam pa gnyis gtso bor ston pa'i rgyud ni rgyud rgyal te/ de bzhin gshegs pa thams cad kyi gsang ba 'dus pa'o//yang na dpal ldan ni de bzhin gshegs pa rnams so/ /de dang gang ldan pa ni dpal ldan te rdo rje 'chang chen po'o/ /de nyid kyis gsungs pa 'di nyid ni rgyud kyi rgyal po yin zhes sbyar ro/ /yang na dpal ldan yang yin rgyud kyang yin pas na dpal ldan rgyud rgyal te/gang la bsod nams dang ye shes kyi tshogs thob par byed pa'i thabs yod pa de la de skad ces bya'o/ /de nyid ni rnal 'byor gyi rgyud kyis shin tu gsal bar rnam phye ste/ gang la ting nge 'dzin gtso bor ston par byed pa'i rgyud ni rnal 'byor gyi rgyud do/ /gang zhe na/de bzhin gshegs pa la byams pa la sogs pas zhus pa'i rgyud ye shes rdo rje kun las btus pa la sogs pa'o/ /des gsal bar byed pa ni des gsal bar bshad pa ste/ sgra dang don thams cad rgyas par byas she'o / /de bzhin gshegs pa thams cad kyi gsang ba 'dus pa la rnal 'byor gyi rgyud kyis rgyas par byed pa ci'i phyir zhe na/mtha' drug gi ni 'ching bas bcings/ /zhes bya ba smos te/ gang la mtha' drug gi 'ching ba yod pa de la de skad ces bya'o/ /gal te mtha' drug gi 'ching bas bcings kyang nye bar gdags pa mi bya'o zhe na/ blo dman pa rnams kyis rtogs par byed par 'gyur te/de'i phyir rgyal sras yul gyur zhes bya ba smos so/ /rgyal ba'i yul du gyur zhes pas ni rdo rje 'chang chen po la sogs pas rtogs par bya ba yin par bstan to/ /rgyal ba'i sras kyi yul du gyur/ /zhes pas ni byams pa la sogs pa byang chub sems dpa' rnams kyis rtogs par bya ba yin par bstan to//rgyas sras yul gyur zhes bya ba 'di ni rgyal sras kyi yul du gyur pa kho na'o zhes bya ba ni ma yin gyi/ rgyal ba'i sras kho na'i yul du gyur zhes pa'o/ /'dis ni gzhan dang ldan pa rnam par bcad pa'o/ /mtha' drug gi ni 'ching bas bcings/ / zhes bya ba 'di ni nye bar mtshon pa'i tshig ste/ bshad pa bzhi yi 'ching bas bcings/ /zhes bya ba la sogs pa yang shes par bya'o/ /de dag gis bcings pa yang gang yin zhe na/ rgyal ba'i 'dus gang yin zhes bya ba smos te/ de bzhin gshegs pa thams cad kyi gsang ba 'dus pa mtha' drug gi 'ching bas bcings zhes sbyar ro//rgyal ba'i 'dus pa yang sgra'i rnam pa bcings sam/ don gyi rnam pa bcings zhes rtog grang na/ sgra'i rnam pa ma yin pa'i phyir/ rim gnyis gnas kyis rgyas btab de ni zhes bya ba smos te/ bskyed pa'i rim pa dang / rdzogs pa'i rim pa gnyis kyis rgyas btab ce'o//de bzhin gshegs pa rnams kyis rgyas btab ces pa yang mi gdug sems dang bcas pa 'am/ snyom las dang bcas pa yin zhes rtog grang na/ phyogs gnyi ga ni blang bar bya ba ma yin pa'i phyir re zhig bsal lo/ /de nyid thams cad kyis rtogs pa ma yin no zhe na/klu sgrub las rnyed pa zhes smos te/ de bzhin gshegs pa thams cad kyi gsang ba 'dus pa gang yin pa de sus kyang rnyed par ma gyur pa slob dpon klu sgrub las rnyed ces sbyar ro/ /'di dag gi don ni 'di skad du ston par 'gyur te/ snod dang snod ma yin pa rnam par phye nas snod ma yin pa la gsang ba'i don du mtha' drug gi 'ching bas bcings pa'o//gang mtha' drug gi 'ching bas bcings pa de ni rgyal ba'i sras kyi yul du 'gyur ro/ /gang rgyal ba'i sras kyi yul du gyur pa de ni tshogs dang slob ma'i gang zag gis rnyed pa ma yin par 'gyur ro//gang tshogs dang slob mas rnyed par ma gyur pa de ni rnal 'byor gyi rgyud dang / byang chub sems dpa'i sprul pa las rnyed par 'gyur ro/ /gang rnal 'byor gyi rgyud dang / byang chub sems dpa' sprul pa las rnyed pa de ni kun dang thun mong ma yin pa'i phyir ro/ /kun dang thun mong ma yin pa'i phyir rigs dbye bar 'gyur ro//rnal 'byor gyi rgyud kyang ji ltar bshad ce na/ de bzhin gshegs pa thams cad ni phyi dang nang gi mngon par byang chub pa'i sgo nas mngon par rdzogs par sangs rgyas pas de bzhin gshegs pa'i gsang ba 'dus pa las kyang mngon par byang chub pa ston par 'gyur ro//de bzhin gshegs pa'i gsang ba 'dus pa'i mngon par byang chub pa de nyid phyi dang nang gi dbye bas rgyu'i mngon par byang chub pa dang / lam dang / 'bras bu dang / dpe la sogs pa'i zab pa dang rmad du byung ba'i mngon par byang chub pa legs par bstan par bya ba'i phyir mngon par byang chub pa'i rgyud gsungs so//de bzhin gshegs pa rnams ni nges pa'i don du byang chub kyi sems la brten te/ sangs rgyas pas rgyud kyi rgyal po las kyang de nyid bstod pas de nyid gsal bar bstan par bya ba'i phyir lha mo bzhis zhus pa byang chub kyi sems kyi rgyud gsungs so//de bzhin gshegs pa thams cad ni sprul pa'i sku las mi 'da' la/ sprul pa'i sku'i de kho na nyid dang chos 'grub par byed pa'i thabs sbyor ba yan lag drug ni gsang ba 'dus pa nas nye bar bstan to/ /de gsal bar ston pa'i phyir byams pas zhus pa'i rgyud phyi ma gsungs so//de bzhin gshegs pa rnams ni bshad pa'i tshul rnam pa bzhi las mi 'da' la/ de gsal bar bya ba'i don du gsang ba'i rgyud rdo rje phreng ba gsungs so/ /de bzhin gshegs pa rnams ni thugs rje chen po'i stobs kyis sems can la chos ston pa las mi 'da' la/ de gsal bar byed pa'i rgyud ni dpal phyag na rdo rjes zhus pa ye shes rdo rje kun las btus pa'i rgyud gsungs so//de bzhin gshegs pa rnams ni rmad du byung ba'i spyod pa las mi 'da' la/ de gsal bar byed pa'i rgyud ni spyod pa mchog gi rgyud gsungs so/ /de bzhin gshegs pa rnams ni thob pa dang rtsol ba dngos grub rnam pa gnyis las mi 'da' la/de gsal bar byed pa'i rgyud ni dngos grub ston par byed pa zhes bya ba'i rgyud gsungs so/ /de bzhin gshegs pa rnams ni dbang dang dam tshig las mi 'da' la/ de gsal bar byed pa'i rgyud ni dam tshig gi de kho na nyid nye bar 'byed pa'i rgyud gsungs so//de bzhin gshegs pa rnams ni bskyed pa'i rim pa dang lha'i rnal 'byor gyi rdzogs pa'i rim pa las mi 'da' la/ de gsal bar byed pa'i rgyud ni rdo rje rnon po'i rgyud gsungs so/ /de bas na de bzhin gshegs pa thams cad kyi sku dang gsung dang thugs gsang ba 'dus pa ni rnal 'byor gyi rgyud rnams kyis shin tu rgyas btab pa/shin tu zab pa/ shin tu rmad du byung ba/ shin tu rtogs par dka' ba/ sangs rgyas dang byang chub sems dpa' thams cad kyis kyang rnyed par dka' bas mchog tu dam par gyur pa rnams kyi spyod yul du gyur pa yin pa'i phyir dad pa'i rjes su 'brang ba dang /chos kyi rjes su 'brang ba rnams kyis rnal 'byor gyi rgyud dang / byang chub sems dpa' byams pa'i TI kA dang / byang chub sems dpa' pad+ma'i man ngag la brten te rtogs par bya'o/ /de ltar bshad par dam bca' ba bstan nas/ da ni de kho na nyid kyi don mdor bsdus te bstan par bya'o//de'i phyir/ gsang sngags sku ni rab tu sgrub par byed/ /ces bya ba la sogs pa smos te/ sku sgrub par byed pa ni bskyed pa'i rim pa yin la/ sngags sgrub par byed pa ni rim pa dang po yin pas de la de skad ces bya'o/ /rim pa zhes bya ba ni gnyi ga la sbyar bar bya'o//'dis ni bskyed pa'i rim pa yang gzung bar bya'o/ /rim pa dang po zhes smos pa ma yin nam/ de ci'i phyir gnyi ga la dang po zhes brjod ce na 'di ni rdzogs pa'i rim pa 'ba' zhig gi dbang du byas pa yin gyi/ bskyed pa'i rim pa dang thun mong du ni ma yin no/ /rim pa dang po zhes bya ba 'di yang gang zhig ce na/'di ni rdo rje bzlas pa nyid do/ /rim pa gnyis pa brjod pa'i phyir/ sems la dmigs pa tsam zhig ni/ /rim pa gnyis pa zhes brjod do/ /zhes pa sems la dmigs pas na/ sems la dmigs pa ste/ gang gi sems yul du byas pas na/sems la dmigs pa'o/ /rim pa gnyis pa zhes pa ni/ rdo rje bzlas pa la ltos pa'i rim pa gnyis so/ /tsam zhes pa ni dgag pa smos pa ste/ sems la dmigs pa tsam zhig rim pa gnyis pa yin gyi/ gzhan ni ma yin no/ /de nas rim pa gsum pa bstan pa'i phyir/kun rdzob bden pa bstan pa ni/ /yid dang rim pa gsum pa'o/ /zhes pa gang rgyu rkyen gyis bskyed pa brdzun par snang ba ni kun rdzob ste/ kun rdzob de'i dbang du byas nas bden pas na bden pa'o/ /rim pa gnyis pa la ltos nas 'di rim pa gsum pa'o/ /'dis ni cig car gyis 'byung ba'i sgyu ma lta bu'i sku gzung ngo //de nas rim pa bzhi pa bstan pa'i phyir/ kun rdzob bden pa dag pa ni/ /rim pa bzhi pa zhes brjod do/ /zhes pa ril por 'dzin pa dang / rjes su gzhig pa'i stobs kyis sgyu ma lta bu'i sku rang bzhin gyis rnam par dag pa 'di ni 'od gsal ba ste/ rim pa bzhi pa'o/ /rim pa bzhi pa'i dus su ni bden pa rnam pa gnyis kyi tshul du gnas pa ste/ 'di ltar mnyam par gzhag pa ni don dam pa'i bden pa'o/ /de'i rjes las thob pa'i sku ni kun rdzob kyi bden pa'o/ /de nas rim pa lnga pa bstan pa'i phyir/ bden pa gnyis sbyor gang yin pa/ /zung 'jug ces bya lnga pa ste//zhes bya ba smos te/ don dam pa'i bden pa dang / kun rdzob kyi bden pa rnam pa gnyis su dbyer med par rtogs pa 'di ni zung du 'jug pa ste rim pa lnga pa'o/ /de nas sgrub thabs kyi che ba bstan pa'i phyir/ 'di ni sgrub pa'i thabs kyi mchog /ces pa bskyed pa'i rim pa dang / rdzogs pa'i rim pa 'di ni sgrub thabs thams cad kyi mchog yin te/ ci'i phyir zhe na/ dngos grub gnyis kyi rgyur gyur pa'i phyir ro/ /rgyud kun gyi ni don bsdus pa'o/ /zhes pa/ de bzhin gshegs pa thams cad kyi rgyud ni lam dang 'bras bu gnyis las mi 'da' la/ bskyed pa dang rdzogs pa'i rim pa 'di yang lam dang 'bras bu gnyis dang ldan pa'i phyir rgyud kyi don bsdus pa'o//yang na rgyud ni de bzhin gshegs pa thams cad kyi gsang ba 'dus pa'o/ /de'i yan lag ni lha mo bzhis zhus pa la sogs pa'o/ /de'i don mdor bsdus pa ni lam 'bras bu dang bcas pa'o/ / lam ni rnam pa gnyis te smin pa dang grol bar byed pa'i lam mo/ /smin par byed pa'i lam ni rnam pa bzhi ste/ bum pa'i dbang dang / gsang ba'i dbang dang / shes rab ye shes kyi dbang dang / dbang bzhi pa'o/ /grol bar byed pa'i lam ni rnam pa bzhi ste / de kho na nyid kyi ting nge 'dzin dang grogs spyod pa'o//de kho na nyid kyi ting nge 'dzin la gnyis te/ bskyed pa'i rim pa dang / rdzogs pa'i rim pa'o/ /rdzogs pa'i rim pa la rnam pa lnga ste/ rdo rje bzlas pa la sogs pa'o/ /spyod pa ni rnam pa gsum ste/ spros pa dang bcas pa dang / spros pa med pa dang / shin tu spros pa med pa'o//'bras bu ni rnam pa gnyis te/ 'bras bu gnas skabs pa dang / 'bras bu mthar thug pa'o/ /thun mong gi dngos grub 'ba' zhig pa ni 'bras bu gnas skabs pa'o/ /mchog gi dngos grub ni 'bras bu mthar thug pa'o/ /'di dag ni de bzhin gshegs pa thams cad kyi rgyud kyi don mdor bsdus pa'o//sngags dang sems dang lus dang ni/ /zhes bya ba la sogs pa ni bshad zin to/ /mdor bsdus pa zhes bya ba 'di yang 'og nas 'byung ba'i don nyid yin nam de las gzhan zhig yin zhe na/ phyogs dang po ltar ni ma yin te/ don med pa nyid kyi phyir ro//phyogs phyi ma ltar na yang rgyud 'di nyid kyi don mdor bsdus pa zhes 'byung ba'i phyir ro zhe na ma yin te/ gang zag thams cad ni rigs rnam pa gnyis te/ dbang po rnon po mgo smos pas go ba'i gang zag dang / dbang po rtul po don mtha' dag la gzhol ba'i gang zag go// re zhig dbang po rtul po don mtha' dag la gzhol ba'i dbang du ni ma yin te/ gong ma'i skyon nyid du 'gyur ba'i phyir ro/ /'di ni dbang po rnon po mgo smos pas go ba'i dbang du byas pa'o/ /de ci'i phyir zhe na/ dbang po rnon po ni de tsam gyis go bar 'gyur ba dang / don rgya chen po la 'jug par mi 'gyur ba'i phyir ro//de bas na de bzhin gshegs pa'i gsang ba 'dus pa'i don rgya cher bshad pa 'dis ni dbang po rnon po dang / dbang po rtul po'i gang zag gnyi ga gzung bar 'gyur ro/ /de dag gis ni don mdor bsdus pa bstan to/ /de nas rgyud kyi mtha'i yi ge shes par bya ba'i phyir/shes nas mtha' drug la 'jug go/ /zhes bya ba smos te/ mtha' drug la 'jug pa yin pas na mtha' drug la 'jug pa zhe'o / /mtha' drug po 'di yang gang la 'jug ce na/ de bzhin gshegs pa'i gsang ba 'dus pa'i rgyud chen po la sogs pa la 'jug go//de ci'i phyir zhe na/ de bzhin gshegs pa'i rgyud thams cad ni mtha' rnam pa drug las mi 'da'o/ /de bas na de bzhin gshegs pa'i rgyud kyi mtha'i yi ge shes par bya ste/ de yang bshad pa/ ji srid ya ra la ha'i bar/ /ka ga g+ha mtha' na dza'i mtha'//da d+ha'i mtha' dang ma mthar bcas/ /zhes pa 'di dag ni rnal 'byor gyi rgyud kyi ming gi mtha'i yi ge'o/ /'di dag ni dpal ye shes rdo rje kun las btus pa las kyang / bcom ldan 'das rnal 'byor gyi rgyud kyi ming gi mtha'i yi ge gang lags/ bcom ldan 'das kyis bka' stsal pa/byams pa rnal 'byor gyi rgyud dang / rnal 'byor chen po'i rgyud rnams kyi ming gi mtha'i yi ge ni 'di dag tsam du zad de/ a ka kha ga g+ha nga / tsa tsha dza dz+ha nya/ Ta Tha Da D+ha Na/ ta tha da d+ha na/ pa pha ba b+ha ma/ ya ra la wa/ sha Sha sa ha k+ShaHbyang chub sems dpa' sems dpa' chen po ka'i mtha' can ni sum cu rtsa gnyis so//de bzhin du ha'i mtha' can gyi bar du yang sum cu rtsa gnyis so/ /de bas na rnal 'byor dang / rnal 'byor chen po'i rgyud ni stong phrag bdun cu rtsa gnyis so/ /yang na/ ji srid ya ra la ha'i bar/ /zhes bya ba la sogs pas ni A li kA li yang gzung bar bya ste/ji skad du/ rdo rje rgyan gyi rgyud las kyang / A li kA li mnyam sbyor bas/ /'khor lo bzhi ni 'grub pa yin/ /zhes gsungs te/ 'khor lo bzhi ni A li kA li las gzhan ma yin no/ /'khor lo bzhi las ni rdo rje bzlas pa dang / sems la dmigs pa dang / sgyu ma lta bu'o/ /'od gsal ba la sogs pa 'byung bar 'gyur ro/ /gzhan las kyang / snying gi dbus na mi shigs pa/ /'bar ba mar me'i rtse ltar 'bar/ /zhes bya ba la sogs pa gsungs pa lta bu'o/ /gzhan las kyang / 'khor lo sa bon 'od zer las/ /rdo rje bzlas dang sems la dmigs//sgyu ma'i 'od gsal zung du 'jug /thams cad 'di las 'byung ba yin/ /zhes 'byung ba'i phyir/ de bas na rlung las ni rnam par shes pa 'byung ngo / /rnam par shes pa las ni nye bar len pa'i lus 'byung ngo / /de bas na nyams su len pa'i rnal 'byor pas kyang dang po ni rlung la bslab par bya'o//de nas ni rnam par shes pa la bslab par bya'o/ /rnam par shes pa las rlung la lobs par 'dod pas kyang 'khor lo rnam pa bzhi'i yi ge'i don ji lta ba bzhin du shes par bya'o/ /yi ge de dag kyang mtha' gang du 'dus she na/ de de'i rtsa ba yi ge gsum//zhes smos te/ mtha' can gyi rgyud de dang de'i rtsa ba byed ces sbyar ro/ /yi ge gsum pa'i ngo bo gang yin zhe na/ skyes bu sgra la gzhol ba rnams kyi dbang du byas te/ sa ma dza zhes pa ni 'dus pa'i ming gi yi ge'o/ /yang na sgom pa la mchog tu byas te/ de de'i rtsa ba yi ge gsum//ba zhes pa ni de bzhin gshegs pa thams cad kyi thabs kyi yi ge dang shes rab kyi yi ge'i rtsa ba ni oM AHhUM zhes pa ste/ de bzhin gshegs pa thams cad kyi gsang ba'i yi ge gsum las mi 'da'o/ /yi ge gsum de bzhin gshegs pa thams cad kyi thob par byed pa'i thabs las mi 'da' la/yi ge gsum du yang thams cad ji ltar 'du zhe na/ 'di ltar de bzhin gshegs pa thams cad kyi sku ni rdo rje gsum las mi 'da' ste/ 'di ltar yi ge oM ni sku rdo rje'o/ /AHni gsung rdo rje'o/ /hUM ni thugs rdo rje'o/ /'di ltar de bzhin gshegs pa thams cad ni sku rnam pa gsum la mi 'da' la/yi ge oM ni chos kyi sku'o/ /AHni longs spyod rdzogs pa'i sku'o/ /hUM ni sprul pa'i sku'o/ /de bzhin gshegs pa bskyed pa'i rim pa'i dbang du byas pa de bzhin no/ /de bzhin gshegs pa thams cad kyi smin par byed pa'i dbang ji ltar 'du zhe na/yi ge oM ni bum pa'i dbang ngo / /yi ge AH ni gsang ba'i dbang ngo / /hUM ni shes rab ye shes kyi dbang ngo / /de bzhin gshegs pa thams cad kyi rim pa lnga pa ji ltar 'du zhe na/ 'di ltar yi ge AHni rdo rje bzlas pa'o/ /hUM ni sems la dmigs pa dang 'od gsal ba dang /zung du 'jug pa'o/ /oM ni sgyu ma lta bu'i sku'o/ /rdo rje bzlas pa 'ba' zhig gi dbang du byas te/ yi ge gsum ni 'di ltar 'byung ba dang / 'jug pa dang gnas pa gsum du yi ge gsum ni ci rigs su sbyar ro/ /sems la dmigs pa 'ba' zhig gi dbang du byas pa'i yi ge gsum ni snang ba dang /snang ba mched pa dang / snang ba thob pa'i ye shes so/ /yi ge gsum dang ci rigs su sbyar ro/ /sgyu ma lta bu'i sku 'ba' zhig gi dbang du byas pa'i yi ge gsum ni sku sgyu ma lta bu dang / gsung sgyu ma lta bu dang / thugs sgyu ma lta bu'i yi ge gsum dang go rims su sbyar ro//'od gsal 'ba' zhig gi dbang du byas pa'i yi ge gsum ni 'od gsal ba'i ye shes dang / 'od gsal ba dang cha 'dra ba'i ye shes dang / kun rdzob kyi bden pa yi ge gsum dang go rims su sbyar ro/ /zung du 'jug pa 'ba' zhig pa'i dbang du byas pa'i yi ge gsum ni rtsol ba dang bcas pa dang rtsol ba med pa dang shin tu rtsol ba med pa gsum dang go rims su sbyar ro//yang na spros pa dang bcas pa dang / spros pa med pa dang / shin tu spros pa med pa'i go rims su sbyar ro/ / de bas na de bzhin gshegs pa'i chos thams cad kyi rtsa ba ni yi ge gsum mo//de bzhin gshegs pa thams cad kyi don gyi rnam pa ji lta ba bzhin du sgra'i rnam pa la yang de bzhin te/ de bzhin gshegs pa thams cad kyi sgra'i tshogs ni ngag gi lam nas 'byung ba yin la/ de yang lhan cig tu dbugs dang gnas pa yin te/'byung ba las 'byung ba'i sgra dang / 'jug pa las 'jug pa'i sgra dang / gnas pa las gnas pa'i sgra ni yi ge gsum las byung ba'i sgra'o/ /gzhan las kyang / a ni yig 'bru kun gyi mchog /don chen yi ge dam pa yin/ /khong nas 'byung ba skye ba med//tshig tu brjod pa spangs pa ste/ /brjod pa kun gyi rgyu yi mchog /tshig kun rab tu gsal bar byed/ /ces 'byung ba dang / /gsang ba thig le'i rgyud las/ /sgra rnams yi ge las byung ste/ /yi ge yi ge gsum las byung / /de phyir sgra rnams thams cad kyi/ / rgyu ni yi ge gsum du 'dus/ /zhes 'byung ba lta bu'o/ /de bzhin gshegs pa thams cad kyi gsang ba 'dus pa dang / de bzhin gshegs pa thams cad kyi yi ge rnam pa gsum ni gnyis su med cing gnyis su byar med so so ma yin tha mi dad do/ /de bas na yi ge la 'dus pa ji bzhin du de bzhin gshegs pa'i gsang ba 'dus pa la yang 'dus par shes par bya'o//de nyid bshad pa/ thub pa chen pos chos phung po/ /brgyad khri bzhi stong gsungs pa yin/ / zhes bya ba smos te/ de bzhin gshegs pa thams cad kyis nyon mongs pa brgyad khri bzhi stong gi gnyen por chos kyi phung po brgyad khri bzhi stong gsungs te de dag gi snod 'dus pa 'di gang yin zhe na/de bzhin gshegs pa thams cad ni dam tshig gi sgo nas sangs rgyas la dam tshig dang sdom pa thams cad ni lus dang ngag 'dul bar byed pas 'dul ba zhes bya ste/ gzhan las/bzhi dang spyi dang khyad par gyi/ /dam tshig mchog ni rmad po che/ /sdom pa gsum la rab gnas pa/ /'dul ba'i sdom pa kun gyi mchog /ces 'byung ba'i phyir ro/ /mdo sde dang mngon pa la yang de bzhin te/ 'di dag de bzhin gshegs pa thams cad kyi gsang ba chen po mdor bsdus pa gsungs pas/dpal ldan 'dus 'di snod yin te/ /zhes bya'o/ /de bas 'dis ni rgyud kyi che ba yang bstan par bya ste mchog yin zhes sbyar ro/ /gzhung nyung ba la don mang ba zhes pa ni gzhung gi tshogs phra mo tsam gyis de bzhin gshegs pa'i bka' mtha' dag gi don rnyed par 'gyur ba'i phyir de la de skad ces bya'o//'di dag gis ni rgyud kyi che ba yang bstan par rig par bya'o/ /de nas rgyu rnyed par dka' ba bstan pa'i phyir/ 'dus pa'i rgyud ni rnyed dka' zhing / /zhes bya ba la sogs pa smos te/ 'di ni sangs rgyas dang byang chub sems dpa' thams cad kyang the tshom skyed par byed pa yin na gzhan lta ci smos zhes gzhung 'di nyid las 'byung ba'i phyir ro//sangs rgyas the tshom skye ba ci'i phyir zhe na/ sangs rgyas dang byang chub sems dpa' thams cad la nam yang the tshom yod pa ma yin no//de bas na 'di dag gi don ni tshogs dang bla ma'i gang zag gsang ba 'dus pa'i dkyil 'khor du nyan pa'i skal ba dang ldan pa rnams kyang the tshom skye bar byed pa yin na/ nyan thos dang byang chub sems dpa'i rigs la sogs pa gzhan lta ci smos zhes bya ba'i don to/ / de bzhin gshegs pa'i gsang ba 'dus pa'i don rnyed par dka' ba yang ci'i phyir zhe na/ rgyan bdun rtogs par dka' bas na/ /zhes pa smos te rgyan bdun rtogs par dka' bas de'i phyir de la de skad ces bya'o/ /des cir 'gyur zhe na/ thams cad du ni rnam par 'khor/ /zhes sbyar ro //'di nyid kyang gzhung 'di nyid las bzhugs pa'i tshogs nas brtsams te/ mtha' rnam pa drug dang rnam pa bzhir bshad pa 'dis gsang ba 'dus pa'i don phyag rgyas btab pa yin la zhes smos pa'i phyir dang / bcom ldan 'das kyis dgongs pa lung bstan pa'i rgyud las/gsang ba'i bdag po don rgyas pa'i/ /tshul chen 'di ni rnyed gyur nas/ /ji bzhin don ni rnyed bzung ba/ /des na lam ngan dag tu ltung / /zhes bya ba la sogs pa bshad pa'i phyir ro/ /de nas de bzhin gshegs pa thams cad kyi gsang ba 'dus pa shes par bya ba yin par bstan pa'i phyir/de bas bla ma'i bka' drin gyis/ /'bad de rnam par shes nas ni/ /zhes pa de bzhin gshegs pa thams cad kyi gsang ba 'dus pa ni dbang dang dam tshig dang mi ldan pa la gsang ba ston par byed pa dang / slob dpon smod par byed pa dang / slob dpon gyi gdams ngag rjes su mi 'dzin pa dang nyan thos kyi rigs can dang / rang sangs rgyas kyi rigs can dang / byang chub sems dpa'i rigs can dang / rigs ma nges pa la sogs pa rnams kyis nam yang rnyed par mi 'gyur zhing / bla ma'i gdams ngag rjes su 'dzin par byed pa dang /dad pa dang dam tshig la sogs pa dang ldan pa dang / theg pa chen po'i rigs can gyi gang zag rgyu'i rgyud kyang shes par bya'o/ /de nas gzhan la chos bstan par 'dod nas bshad pa'i dbye bar bstan pa'i phyir/ sems can rjes su gzung 'dod pas/ / zhes bya ba la sogs pa smos te/ bla ma'i gdams ngag la brten nas/ de bzhin gshegs pa'i gsang ba 'dus pa'i don ji lta bu rnam par shes pa'i gang zag des ma 'ongs pa'i sems can blo dman pa rjes su gzung bar bya ba'i phyir bshad pa'i rgyud kyi rjes su 'brangs te bshad pa'i phyir/de'i rnam par dbye ba zhes bya ba smos pa'i phyir ro/ /'dis rgyan bdun bshad par dam bcas pa yang yin no/ /de nyid kyi dbye ba mdor bstan pa'i phyir/ gleng bslang ba yi grangs ni lnga/ /zhes bya ba la sogs pa smos te/ gleng bslang ba yang yin la/ lnga yang yin pas gleng bslang ba lnga'o//rigs pa yang ni rnam pa bzhi/ /zhes pa rigs pa ni 'thad pa ste/ 'thad pa'i chos rnam pa bzhi zhes pa'i tha tshig go/ /rgyas bshad mtha' ni rnam pa drug /ces pa bsdus pa'i bshad pa ni ma yin gyi/ 'dir rgyas pa'i bshad pa kho na'o/ /rgyas par bshad pa yang yin la/ /mtha' drug kyang yin pas 'dir rgyas bshad mtha' drug go//bshad pa yang ni rnam pa bzhi/ /zhes pa bshad pa ni bstan pa ste/ bstan pa'i chos rnam pa bzhi zhes bya'o/ /lnga pa'i dbye ba rnam pa gnyis/ /zhes pa'i lnga pa ni lnga pa ste grangs kyi lnga pa'o/ /de'i dbye ba gnyis ni tshogs dang / slob ma'i bye brag gis so//drug pa'i dbye ba lnga dang ldan/ /zhes pa ni tshogs kyi dang slob ma'i gnas skabs kyi dbye ba yin no/ /bdun pa'i dbye ba rnam pa gnyis te/ /zhes pa ni de bzhin gshegs pas don mtha' dag bden pa rnam pa gnyis su bstan pa'o/ /'di dag gis ni mdor bsdus pa bstan pa'o//rgyan rnams mdor bsdus pa'o zhes bstan pa 'dis ni rgyan rgyas par bstan pa ni ma yin no zhes so/ /rgyas par yang gang zhig las shes par bya zhe na/ bshad pa'i rgyud kyi rjes 'brangs nas/ /zhes bya ba la sogs pa smos te/ bshad pa'i rgyud ni lha mo bzhis zhus pa la sogs pa'o//de'i rjes su 'brangs nas bdag gis bshad ces sbyar ro/ /ci bshad ce na/ rgyan ni bdun po rnams kyi ni/ /rim pa bzhin du re re yi/ /rgyas pa dag ni bdag gis bya/ /zhes pa gleng bslang ba'i grangs rgyas pa dang / rigs pa rgyas par bshad pa dang / mtha' drug rgyas par bshad pa la sogs pa'o/ /de la dang po gleng bslang ba'i grangs rgyas par bshad pa ni rnam pa gnyis te/ dris pa dang / lan du bcas pa'o/ /dri ba bstan pa'i phyir rgyud 'di'i ming ni ci zhig yin/ /zhes bya ba la sogs pa smos te/ming med pa dang ming ma yin pa dang / ming log pa rnams bsal bar bya ba'i phyir/ rgyud 'di'i ming ni ci zhig yin zhes smos te/ dgos pa med pa dang / dgos pa ma yin pa dang / dgos pa log pa bsal ba'i phyir/ /gang gi don du 'di nyid mdzad/ /ces dgos pa dri ba'o//byed pa po med pa dang / byed pa po ma yin pa dang / byed pa po log pa bsal ba'i don du/ su zhig byed pa po zhes 'dri ba'o/ /tshad med pa dang / ma yin pa la sogs pa bsal ba'i phyir/ 'di'i tshad gang zhes tshad 'dri ba'o/ /de nyid bshad pa dang po'i lan du bstan pa'i phyir/rgyud kyi mtshan ni ming yin la/ /zhes smos te/ de bzhin gshegs pa thams cad kyi sku dang gsung dang thugs gsang ba 'dus pa zhes bya ba la sogs pa'o/ /de bzhin gshegs pa'i rgyud kyi ming ji snyed pa'o/ /de bas na gang la de dag gi rtags su 'brel te/'di'i ming gang zhig yin zhe na/ gsang ba 'dus pa zhes bya ba 'di nyid yin zhes sbyar ro/ /gsang ba 'dus pa 'di gang gi don du mdzad ces pa'i lan du/ skye bo 'dod can don du mdzad/ /ces sbyar te/ gong du bshad pa nyid dang 'og nas kyang legs par ston pa nyid kyi phyir ma bshad do//'di'i byed pa po gang zhig yin zhes pa'i lan du/ 'di'i don byed pa po rdo rje sems dpa' zhes smos te/ gang gis gang zhig byed pa de ni 'di'i byed pa po zhes sbyar ro/ /byed pa po zhes pa ni gsung ba po zhes pa'o/ /gang zhig yin zhe na/ rdo rje sems dpa' yin zhes sbyar ro//'di dag gis ni 'di skad du ston par 'gyur te/ de bzhin gshegs pa thams cad kyi gsang ba 'dus pa gsung ba po rdo rje 'chang yin zhes sbyar ro/ /'di'i tshad gang yin zhes pa'i lan du/ tshad dag kyang ni bshad bya ste/ /zhes bya ba la sogs pa smos te/ le'u dang de bzhin cho ga dang //zhes pa le'u bcu bdun yod ces pa ni le'u'i tshad do/ /le'u la ji lta ba bzhin du cho ga la yang yod do/ /'di ltar smin par byed pa'i lam gyi dbang du byas pa ni cho ga nyi shu'o/ /cho ga la tshad yod pa de bzhin du dum bu la yang tshad yod de / de bzhin gshegs pa thams cad kyi sku'i dum bu la sogs pa bcu bdun no//dum bu la ji lta ba bzhin du rim par phye ba la tshad yod de/ 'di ltar thun mong gi dbang du byas na rim pa gnyis so/ /khyad par gyi dbang du byas pa ni rim pa lnga pa ste rdo rje'i bzlas pa la sogs pa'o/ /tshad kyang yin la bzhi yang yin pas/de ni rnam pa bzhir 'gyur te/ /zhes bya ba smos te/ khyad par gyi dbang du le'u'i tshad dang cho ga'i tshad dang / dum bu'i tshad dang / rim pa'i tshad do/ /'di dag gi thun mong gi tshad kyang gang zhe na/ rnam pa gsum ste/ bsdus pa'i tshad dang / rgyas pa'i tshad dang / shin tu rgyas pa'i tshad do//bsdus pa'i tshad ni rnam pa bzhi ste/ rten gyi gang zag la sogs pa'o/ /rgyas pa'i tshad ni rnam pa lnga ste/ bsgrub par bya ba dang / sgrub par byed pa dang / thabs dang / dgos pa dang skyon no/ /shin tu rgyas pa'i dbang du ni rnam pa bdun te/ dkyil 'khor dang / sgrub pa dang / dbang dang / dam tshig dang / phrin las dang / de kho na nyid dang grogs so/ /dgos pa'ang gang zhig yin zhes pa'i lan du dgos pa yang ni bshad bya ste/ /zhes bya ba smos te/ zhi sogs bya ba'i cho ga dang / /zhes pa ni de bzhin gshegs pa'i gsang ba 'dus pa'i dkyil 'khor 'dis zhi ba'i las dang /rgyas pa la sogs pa rdo rje bzhin du 'grub par dgongs so/ /de bzhin grub pa brgyad dang ni/ /zhes pa sa 'og gi dngos grub la sogs pa 'di'i grub par dgongs so/ /'di dag gis ni thun mong gi dngos grub bstan te/ thun mong gi dngos grub ces bya ba yang gang zhig ci'i phyir bstan zhe na/dang po ni bshad zin to/ /gnyis pa la'ang lha thun mong ba nyid dang / rdzas thun mong ba zhes bya ba la sogs pa brtag grang na/ lha thun mong ba ni ma yin te/ lha re re'i khyad par gyi las yin pa'i phyir ro/ /khyad par gyi las zhes bya ba 'di yang 'di ltar zhi ba'i las la ni rnam par snang mdzad kyi sbyor bas so//rgyas pa'i las la ni rin chen 'byung ldan gyi sbyor bas so/ /dbang gi las la ni snang ba mtha' yas kyi sbyor bas so/ /drag po'i las la ni don yod grub pa'i sbyor bas so/ /las thams cad la ni rdo rje sems dpa'i sbyor bas so//de'i phyir lha thun mong ba ma yin no/ /rdzas thun mong ba yang ma yin te/ re zhig zhi ba'i rdzas ni 'o ma dang / me tog dkar po la sogs pa yin pa'i phyir ro/ /rgyas pa'i rdzas ni ba bla dang / ldong ros dang / me tog ser po la sogs pa yin pa'i phyir ro//dbang gi rdzas ni khrag dang / mtshal dang me tog dmar po la sogs pa'i sbyor bas so/ /drag po'i las ni dug dang / sol ba chen po dang / grir shi ba'i sha khrag la sogs pa'i sbyor bas so/ /de bas na rdzas thun mong ba ma yin no/ /sngags thun mong ba yang ma yin te /zhi ba la ni shAn+tiM ku ru zhes pa'i mtha' dang bcas pa'i phyir ro/ /rgyas pa la ni puSh+TiM ku ru zhes pa'i mtha' dang bcas pa'i phyir ro/ /dbang la ni ba shaM ku ru zhes pa'i mtha' dang bcas pa'i phyir ro/ /drag po la ni mA ra ye shes pa'i sngags mtha' dang bcas pa'i phyir ro//de bas na sngags thun mong ma yin no/ /yid la byed pa'i khyad par thun mong ba yang ma yin te/ zhi ba la ni byams pa yid la byed do/ /rgyas pa la ni snying rje yid la byed do/ /dbang la ni dga' ba yid la byed do/ /drag po la ni btang snyoms yid la byed do/ /spyod pa thun mong ba yang ma yin te/zhi ba la ni sbyin pa la spyod do/ /rgyas pa la ni snyan par smra ba la spyod do/ /dbang la ni don spyod la spyod do/ /drag po la ni don mthun pa la spyod do/ /de bas na 'di ni thun mong gi dngos grub ma yin no/ /gzhan yang 'di ni mchog yin zhes pa'am/ rgyu thun mong ma yin pa las grub pa'i phyir ro//lung gzhan las kyang de bzhin gshegs pa thams cad kyi mchog gi dngos grub ces bya ba ni rgyu thun mong ba ma yin pa las grub pa 'byung ngo zhes 'byung ba lta bu'o/ /rgyu thun mong ba las grub kyang mchog yin no zhes pa 'am/ rgyu thun mong ma yin pa las grub kyang thun mong yin no zhe na ni ha cang yang thal bar 'gyur ro zhes smras pa de ni ma yin te/'di ni rdzogs pa'i rim pa la smra ba ni ltos pa'i phyir ro/ /thams cad kyang kun rdzob kyi rnam pa can la brten pa'i phyir thun mong ma yin pa yang ma yin no/ /lha thun mong ma yin pa yang ma yin te/zhi ba la sogs pa so so'i las 'dre bar byed cing 'on kyang rdzogs pa'i rim pa dang / thun mong du gyur pa'i phyir de la de skad ces bya'o/ /de bas na 'di ni thun mong gi dngos grub po/ /mchog ces bya ba 'di yang gang zhig yin de nyid mi shes so zhe na/ de'i phyir sangs rgyas kyang ni mchog yin no//zhes smos te de bzhin gshegs pa thams cad kyi gsang ba mchog gi dngos grub ni chos kyi sku la sogs pa'o/ /chos kyi sku zhes bya ba 'di yang gang zhig yin zhe na/ de bzhin gshegs pa thams cad kyi don dam pa chos kyi sku ni thog ma med pa tha ma med pa/ dbus med pa/ bstan du med pa/ thogs pa med pa/ kha dog med pa/ dbyibs med pa/ grangs dang / bgrang ba dang / shes pa dang / brjod pa'i yul las 'das pa/ dngos po mtha' dag thams cad dang bral ba ste/ dkon cog brtsegs pa las kyang / 'od srungs yod ces bya ba 'di ni mtha' gcig go/ /med ces bya ba 'di ni mtha' gnyis so//rtag ces bya ba 'di ni mtha' gcig go/ /mi rtag ces bya ba 'di ni mtha' gnyis so/ /dbu ma'i lam ni dmigs su med pa'o zhes 'byung ba dang / 'dus pa chen po rin po che tog las kyang / ci ste mchis zhes bgyi na ni rtag par 'gyur/ ma mchis zhes bgyi na ni chad par 'gyur/dbu ma'i lam ni dmigs su ma mchis so zhes 'byung ba dang / gzhan dag las kyang / yod dang med pa 'di yang mtha' yin te/ /dag dang ma dag gnyis kyang mtha' ru 'gyur/ /mkhas pas mtha' gnyis rnam par spangs nas kyang / /dbus la rtog cing gnas par mi byed do//zhes 'byung ba dang / gzhung 'di nyid las kyang / dngos po med pa bsgom pa'i dngos/ /zhes bya ba la sogs pa rgya cher gsungs so/ /'di nyid ni mchog yin par yang lung gis bshad de/ chos rnams rang bzhin med pa dang / sku gsum po yi khyad par gyis/ /thun mong las ni ma grub phyir/ /'di ni mchog tu gyur pa yin/ /zhes gsungs so/ /de bas na 'di ni mchog gi dngos grub bo/ /sangs rgyas zhes smos pa ma yin nam/ rdo rje 'chang chen po la sogs pa ma yin pa chos kyi sku la sogs pa ci'i phyir mchog gi dngos grub ces grags she na/'di nyid sangs rgyas te sgrib pa rnam pa gnyis spangs pa dang / bsod nams dang ye shes kyi tshogs rgyas pa'i phyir ro/ /mchog ces bya ba 'di thun mong ma yin pa zhig ma yin nam/ 'di ci'i phyir thun mong ba la mchog ces bya zhe na/'di ni thun mong ma yin pa nyid de/ nyan thos la sogs pa dang thun mong ma yin pa nyid kyi phyir ro/ /grub pa'i mtha' gzhan dang thun mong ma yin pa ni ma yin te/ shes rab kyi pha rol tu phyin pa la sogs pa dang thun mong ba'i phyir ro/ /rigs kyis thun mong ma yin pa yang ma yin te 'di ltar rdo rje'i rigs dang /las kyi rigs kyi bar du thun mong du gyur pa'i phyir ro/ /thabs kyis thun mong ma yin pa yang ma yin te/ bskyed pa'i rim pa dang / rdzogs pa'i rim pa la sogs pa thabs thams cad pa'i 'bras bu yin pa'i phyir ro/ /bstan du med pas thun mong ma yin pa yang ma yin te/yul dang dus dang gnyis rang bzhin gyis skal ba thams cad mchog tu gyur pa'i phyir ro/ /de bas na mchog gi dngos grub ces bya ba 'di gang zhig yin/ ci'i phyir mchog gi dngos grub ces brtag ce na/ dang po ni bshad zin to/ /gnyis pa'i dbang du byas pa ni thun mong ma yin pa'i phyir te/mchog rtogs pa'i bye brag gis ma yin gyi mchog thob pa'i bye brag gis so/ /mchog thob pa zhes bya ba yang rgyu thams cad kyis thob pa ni ma yin gyi rdzogs pa'i rim pa 'ba' zhig gis nye bar thob pa'i phyir ro/ /'ba' zhig gis thob kyang thun mong yin no zhe na ni ha cang thal bar 'gyur ro//de bas na 'di ni mchog gi dngos grub nyid do/ /rgyan dang po bshad zin to// // 'di la yang ci'i phyir rgyan zhes bya zhe na/ gang la gang gis phan 'dogs pa dang / gang la gang gis mdzes par byed pa dang / gang la gang gis dga' bar byed pa de ni de'i rgyan no//rgyan zhes bya ba yang du zhig ce na/ de bzhin gshegs pa thams cad kyi rgyan ni rnam pa gnyis te rang bzhin gyi rgyan dang / gsal ba'i rgyan no/ /rgyan thams cad kyi dpe ni rnam pa gnyis te/ rang bzhin gyi rgyan gyi dpe ni bu mo bzhin mdzes pa lta bu'o//gsal ba'i rgyan ni dper na bu mo'i rin po che lta bu'o/ /'di lta ste dper na nor bu rin po ches ni bu mo'i bzhin mdzes par byed do/ /bu mo'i bzhin la phan 'dogs par byed do/ /de bzhin gshegs pa thams cad kyi gsang ba 'dus pa'i gleng bslang ba la sogs pa 'dis ni de bzhin gshegs pa thams cad kyi bshad pa la phan 'dogs par byed do//de bzhin gshegs pa thams cad kyi rgyan gyi dgos pa ni sems can rgyan la dga' ba rjes su 'jug par byed pa dang / de bzhin gshegs pa thams cad kyi bshad pa phun sum tshogs pa la phan 'dogs par byed do//gleng bslang ba ni 'das zin te zhes pa ni gleng bslang ba rnam pa lnga bshad zin zhes pa'o/ /de nas rigs pa rnam pa bzhi bshad pa bstan pa'i phyir/ rigs pa yang ni bshad par bya/ /zhes bya ba la sogs pa smos te rgyud dag dang ni zhes bya ba la sogs pa la rgyud ni gang du rtogs/gleng gzhi ni gang zhig yin/ ci'i phyir de la de skad ces bya/ thabs gang gis thob par byed ces bya ba'i don to/ /dang po'i lan bstan pa'i phyir/ mi yi skye bar 'khrungs pa ni/ /rgyud ces bya bar brjod pa yin/ /zhes pa mi'i rgyud du gtogs zhes pa'o//ci'i phyir rgyud ces bya na de nyid mi'i skye ba dang 'brel pa'i phyir de la de skad ces bya'o/ /'dis ni lha dang lha ma yin gyi rgyud du gtogs pa gsal ba yin no/ /gnyis pa'i lan bstan pa'i phyir/ btsun mo'i 'khor gyi nang nas ni/ /nges par 'byung ba gleng gzhi yin//zhes smos te khyim nas khyim med par nges par rab tu byung ba'o/ /'di la ci'i phyir thub pa chen po zhes bya zhe na/ 'di las sdom pa bstan pa ni/ /nges pa'i tshig ces brjod pa ste/ /zhes pa 'dul ba las sdom pa thams cad thub pa'i phyir thub pa chen po zhes bya'o//lung gzhan las kyang / dbang po'i sgo bsdams sdom pa rnams/ /ma lus brtsal med thub pas na/ /thub pa chen po zhes su bshad/ /ces 'byung ba lta bu'o/ /'di'i rgyu gang zhig yin zhes pa'i lan du/ /'bras bu 'dod pas chos spyod pa//de ni rgyu zhes brjod pa ste/ /zhes pa 'bras bu ni mchog dang thun mong gi dngos grub po/ /yang na 'bras bu ni 'dir phyug pa dang / gzugs bzang ba dang / stobs dang mi 'jigs pa dang gzungs dang ting nge 'dzin dang / de la sogs pa yon tan gyi chos rnams so//de thob par byed pa'i rgyu ni sbyin pa dang / tshul khrims dang bzod pa la sogs pa'o/ /'di ni 'dod chags bral chos kyi/ /rigs pa rnam pa bzhir 'dod do/ /zhes pa 'dod chags dang ldan pa'i dbang du byas pa ni ma yin gyi/ 'dod chags dang bral ba'i dbang du byas pa'i phyir ro//de bas na 'dod rgyal gyi zhags pas zin pa rnams ni dgos pa med kyang rtsom par 'gyur gyi/ de bzhin gshegs pa thugs rje chen po dang ldan pa rnams ni sems can gyi don dang mi ldan par nam yang rtsom mi srid do/ /de bas na dgos pa thams cad ni rnam pa gnyis te/'dod chags dang bral ba rnams 'dul ba dang 'dod chags dang ldan pa rnams 'dul ba'o/ /dang po'i dbang du byas pa ni bshad zin to/ /gnyis pa'i dbang du byas nas bshad pa/ rigs lnga'i sangs rgyas bskyed pa ni/ /rgyud ces bya bar brjod pa ste//zhes pa de bzhin gshegs pa thams cad kyi bdag po rdo rje 'chang chen po yab yum gnyis su med pa'i sbyor ba las rigs rnam pa lnga la sogs pa bskyed pa 'di ni rgyud ces bya'o/ /'di la yang ci'i phyir rgyud ces brjod ce na gnyis su med pa'i sbyor ba'i dbang du ni 'brel pa'i phyir rgyud do//rigs lnga'i sangs rgyas skye ba'i dbang du ni 'byung khungs kyi phyir rgyud do/ /dper na ri las gser 'byung zhes brjod na ri gser gyi rgyud du gtogs pa lta bur rigs lnga'i sangs rgyas bskyed pas thams cad de bzhin gshegs pa'i rgyud dang / 'dod chags chen po'i chos dang ldan pa'i rgyud du gtogs par shes par bya'o//gleng gzhi yang gang zhig yin zhe na/ slar yang rigs gcig gyur pa ni/ /gleng gzhi yin par rab tu bshad/ /ces pa'o/ /de bzhin gshegs pa thams cad rigs brgya'i dbye ba la rab tu bzhugs nas slar yang rdo rje bsdu ba'i sbyor bas bsdus te/rigs gcig tu gyur pa ni gleng gzhi zhes brjod do/ /rdo rje la sogs bzung ba ni/ /nges pa'i tshig tu brjod pa ste/ /zhes pa ni rdo rje 'dzin pa'i phyir rdo rje 'chang chen po'o/ /ci'i phyir rin chen 'chang zhes bya zhe na/ yid bzhin gyi nor bu rin po che 'chang ba'i phyir rin chen 'chang zhes pa'o//'di dag gi don ni 'og nas badzra d+h+rika ces bya ba la sogs pa'i sngags kyi don bshad pa las shes par bya'o/ /'di dag gi rgyu yang gang zhig yin zhes pa'i lan du/ sgeg pa la sogs spyod pa ni/ /rgyu zhes bya bar brjod pa ste//zhes pa sgeg pa dang 'jo ba la sogs pa ni sangs rgyas thams cad kyi skye ba'i rgyur gyur zhes pa'i don to/ /rigs pa yang ni 'das zin te/ /zhes pa ni rigs rnam pa bzhi ni bshad zin to/ /rgyan ni gsum pa nyid kyang ni/ /zhes bya ba la sogs pa ni rigs pa rnam pa bzhi bshad pa'i 'og tu mtha' rnam pa drug bshad par rigs pas de bshad par bya'o//mtha' yang yin la drug kyang yin pas mtha' rnam pa drug ste/ mtha' drug gi tshig ces pa ni don ma yin zhes pa'o/ /des nges par byas pa ni de bzhin gshegs pa thams cad kyi gsang ba 'dus pa mtha' drug gis rgyas btab pa gang yin pa de ni 'dis rtogs par byed do zhes pa'i don to//mtha' drug po nyid gang yin zhe na/ drang ba dang ni nges don bcas/ /zhes bya ba smos te 'di dag la yang ci'i phyir mtha' zhes bya zhe na/ 'di ltar chos 'gal ba rnam par gnas pa'i phyir mtha' ste gang zhig yongs su gcod pa med na gang zhig rnam par gcad pa med de/de ni phan tshun spangs te gnas pa'i mtshan nyid can gyi 'gal ba yin te/ rtag pa dang mi rtag pa bzhin no/ /drang ba dang nges pa'i don rnam pa gnyis kyang yongs su gcod pa med na rnam par bcad pa med pa'i phyir 'gal ba yin no//de bas na drang ba'i don la ji lta ba bzhin du sgra ji bzhin pa la sogs pa la yang shes par bya ste/ 'di ltar drang ba'i don dang nges pa'i don rnam pa gnyis ni don gcig gis gcig spangs pa'i mtha' yin no//sgra ji bzhin pa dang ji bzhin ma yin pa rnam pa gnyis ni don la ma nges pa'i phyir sgra mtha' zhes bya'o/ /dgongs pas bshad pa dang dgongs pa ma yin pas bshad pa ni sgra dang don rnam pa gnyis gsal bar gnas pa'i phyir gnyi ga mtha' zhes sbyar ro/ /mtha' yang yin la drug kyang yin pas 'di ni mtha' rnam pa drug go//de nas mtha' drug gi rang rang gi mtshan nyid bstan pa'i phyir the tshom dang / ma rtogs pa dang log par rtog pa sel nus pa'i gang zag cig slob dpon gyi gan du 'ongs te/ 'di skad ces 'dri'o/ /drang ba'i don zhes bya ba gang zhig yin/ci phyir drang ba'i don du brtag ce na bshad pa/ /skal ngan rnams la rgyal ba yis/ /sbas te bshad pa drang ba'i don/ /zhes pa skal ba ngan pa ni skal ba ngan pa ste nyan thos kyi rigs can la sogs pa'o/ /yang na skal ba ngan pa ni rnam pa gnyis te/ dngos su skal ba ngan pa la ltos nas skal ba ngan pa'o//dngos su skal ba ngan pa ni rigs chad pa'i gang zag 'ba' zhig go/ /rigs chad pa'i zhes bya ba yang sa bon dang bral ba ni ma yin gyi/ nyon mongs pa'i spyod pa 'ba' zhig la ltos nas skal ba ngan pa ni rnam pa gnyis te/ dngos su na nyan thos la sogs pa'i phyi'i phyogs su gtogs pa dang tshogs kyi gang zag nang pa'i phyogs su gtogs pa'o/ /'di dag la yang ci'i phyir skal ba ngan pa zhes bya zhe na/ dam pa'i chos zab cing rgya che ba nyan pa'i skal ba med pa'i phyir ro/ /skal ba med pa'i phyir rigs chad pa ma yin nam/ci'i phyir ltos nas skal ba ngan pa zhes bya zhe na/ rigs chad pa zhes bya ba ni thams cad kyi 'bras bu mi thob pa gang yin pa'o/ /'ga' 'gas kyang ni mi thob pa ni ma yin no/ /de la rgyal bas gang sbas/ sba ba ci'i phyir zhe na/ de bzhin gshegs pa'i chos zab cing rgya che ba la sogs pa sbas pa ste/mthong ba tsam gyis skrag pa'i phyir ro/ /thams cad nas thams cad du bstan par bya ba ma yin nam zhe na ma yin pa'i phyir gsungs pa/ drang ba'i don ni zhes smos te/ bcom ldan 'das nyid kyis kyang bdag dang / srog dang /gso ba dang / skyes bu dang / gang zag dang / byed pa po dang / tshor ba po la sogs pa 'jig rten na yod do zhes gsungs pa dang / sems dpa' chen po ma rig pa las ni 'du byed 'byung ngo zhes gsungs pa dang rgyal ba'i sras dag 'di dag ste khams gsum pa 'di dag ni rnam par rig pa tsam mo zhes 'byung ba dang /gzhan yang chos thams cad ni rang bzhin med pa ste snang ba tsam ni ma gtogs so/ /rigs kyi bu lha'i rnal 'byor la dad par gyis shig /'di las yang dag pa'i thabs ni nam yang rnyed par 'gyur ba ma yin no zhes gsungs pa 'di ni bcom ldan 'das nyid kyis lam khyad par can dang 'bras bu khyad par can thugs la chud nas skal ba ngan pa'i sems can gang la gang gis 'dul ba de la de'i sgo nas de ltar chos ston pa 'di ni de bzhin gshegs pa thams cad kyi drang ba'i don zhes bya'o//de la nges pa'i don gang zhe na zhes dris pa dang /de'i lan du/ mchog 'dod sems can rnams kyi phyir/ /nges pa'i don yang gsungs pa yin/ /zhes mchog 'dod pa'i sems can ni skal ba bzang po zhes bya ba ste/ 'bras bu bzang po la spyod pa'i skal ba yod pa'i phyir ro//mchog ces bya ba ni mchog gi dngos grub ste de 'dod pa ni de la gces par 'dzin pa'o/ /yang na mchog 'dod pa ni 'dun pa bskyed pa ste 'dun pa ni 'dod pa'i bdag nyid yin pa'i phyir ro/ /grogs ni mos pa'o/ /dad pa dang dran pa la sogs pa yang ci rigs su 'gyur ro//mchog 'dod pa'i sems can rnams kyi phyir/ de nyid kyi don gsungs pa ni nges pa'i don zhes bya'o/ /de ci'i phyir nges pa'i don zhes bya zhe na/ lam nges pa nyid dang / 'bras bu nges pa nyid dang / mchog tu gyur pa nges pa nyid dang / rmad du byung ba nges pa nyid kyi phyir/ de la de skad ces bya'o/ /yang na nges pa'i don zhes bya ba ni byang chub tu sems bskyed nas mngon par sangs rgyas kyi bar du mi spong / mi 'dor/ sgrib pa dang / go gcod par mi byed/ bslab pa dang / dran pa la sogs pa 'phel bar byed pa gang yin pa de ni nges pa'i don zhes bya'o//dgongs pas bshad pa gang zhe na/ de bshad pa'i phyir/ mchog 'dod sems can rnams kyi phyir/ /zhes bya ba smos te/ mchog 'dod pa ni mchog 'dod pa ste/ mchog gi dngos grub 'dod ces pa'i don to/ /mchog 'dod pa yang yin la/sems can yang yin pas mchog 'dod pa'i sems can rnams te rnams zhes bya ba ni 'dir mang po la bya'o/ /de bas na mchog 'dod pa'i sems can mang po'i phyir bstan pa'o/ /mchog 'dod pa ni thun mong gi dngos grub 'dod pa ma yin zhes bya'o / / de ci'i phyir zhe na/ chos kyi de nyid rab ston pa/ /zhes smos te chos kyi de kho na nyid ni chos rnams kyi nges pa'i don to/ /de rab tu ston pa ni chos kyi de kho na nyid rab tu ston pa'o/ /ji ltar ston zhe na/ 'gal ba'i tshig gi sbyor ba yis/ /gsungs zhes pa ste bstan bcos la 'gal ba ni ma byin par len pa la sogs pa byed pa ste 'di ltar ma byin par len pa spangs pa dang /ma byin par len pa bya ba ni gcig gis gcig spangs pa'i phyir ro/ /de bas na ma byin par len pa'i stobs kyis sangs rgyas par 'gyur zhes pa ni bstan bcos dang 'gal bar 'gyur ro/ / 'gal ba'i tshig gi sbyor ba de'i de kho na nyid ston par byed pa gang yin pa 'di ni dgongs pas bshad pa ste/ 'di ci la dgongs zhes bya ba la sogs pa ni de bzhin gshegs pa thams cad kyi dgongs pa lung ston pa'i rgyud du shes par bya'o/ /'dir ni bshad par bya ba dang / bshad pa'i dgos pa dang / bshad pa'i yul dang /bshad pa'i sbyor ba dang / bshad pa'i ming tsam ston par 'gyur ro/ /'di yang gang zag ji lta bu la bshad ce na shes rab mchog tu gyur pa dang / brda la goms pa rnams so zhes pa'o/ /blo dman rnams la mi ston pa ci'i phyir zhe na/ 'di ltar lam log pa la 'jug pa'i phyir ro//'o na thams cad du thams cad ston par byed pa ma yin nam zhe na ma yin pa'i phyir ro/ /dbang po dman pa'i sems can rnams/ /zhes bya ba la sogs pa ste/ dbang po dman pa ni dad pa'i dbang po la sogs pa dman pa'o/ /'di ltar zag pa med pa'i dbang po thams cad ni sngar 'gyur te/'dir ni shes rab kyi dbang po dman zhes pa'o/ /shes rab kyi dbang po dman pa zhes pa shes rab zhan pa zhes pa'i don to/ /'di dag gis ni bshad par bya ba'i yul bstan to/ /de nas bshad pa'i dgos pa bstan pa'i phyir rtogs phyir zhes bya ba smos te/dbang po dman pa'i sems can gyis rtogs pa'i phyir dgongs pa ma yin pas bshad ces pa'o/ /bshad pa'i sbyor ba bstan pa'i phyir mchog tu gsal ba yis zhes pa smos te/ mchog tu gsal ba ni dgongs pas bshad pa ma yin pa nyid do/ / bshad par bya ba bstan pa'i phyir ro/ /de nyid nges par ston pa zhes bya ba smos te/ de nyid ces bya ba ni dkyil 'khor gyi de kho na nyid la sogs pa'o/ /de nyid ma nor bar ston pa ni nges par ston pa'o/ /bshad pa'i ming bstan pa/ ji skad ces bya ba bshad pa yin zhe na/ dgongs pa min pas bshad pa'o//zhes smos so/ /'di'i don ni de bzhin gshegs pa thams cad kyi gsang ba 'dus pa ji lta bu'i rnam par ston pas ni dgongs pa ma yin pas bshad pa'o zhes smos so/ /de nas sgra ji bzhin pa bshad par bya ste/ de'i phyir dkyil 'khor rdzogs dang rtog pa las//zhes bya ba la sogs pa smos te dkyil 'khor dang sgrub pa dang / dbang dang / dam tshig dang / phrin las zhes bya ba'o / /rtog pa ni de nyid gsal bar ston par byed pa'i rgyud do/ /de las spyod pa ji ltar gsungs/ /zhes pa ni don ji lta bar sgra yang de ltar gsungs zhes pa'o//de lta bu'i don rgyas par bshad pa gang yin pa de ni ji bzhin sgrar gsungs pa'o zhes pa'o/ /sgra ji bzhin pa ma yin pa gang zhe na/ ko Ta k+Sha la sogs pa'i sgra zhes bya ba la sogs pa gsungs te/ ko Ta k+Sha ni ko Ta k+Sha ste ko Ta ba zhes pa la sogs pa gzung ngo //'di nyid ni brda nyid do/ /brda can yang gang zhe na/ de bzhin gshegs pa thams cad kyi khyab byed kyi rlung la sogs pa'o/ /de lta bu'i bstan bcos shin tu dkon pa'i phyir/ 'jig rten bstan bcos la med cing / /zhes bya ba smos te/ 'jig rten gyi bstan bcos ni 'jig rten gyi bstan bcos te/de la gang med pa ni 'jig rten gyi bstan bcos la med pa'o/ /'jig rten dang 'jig rten las 'das pa thams cad la med pa ma yin nam/ 'di ci'i phyir 'jig rten gyi bstan bcos la med ces smos she na ma yin pa'i phyir/de bzhin gshegs pa'i brdar gyur pa/ /zhes smos te de bzhin gshegs pa kho na'i brdar gyur pa de la de skad ces bya'o/ /'jig rten bstan bcos la med cing / /zhes bya ba 'dis ni thun mong ma yin par ston to/ /de bzhin gshegs pa'i brdar gyur pa/ /zhes bya ba 'di ni gnyis te/de bzhin gshegs pa kho na'i brdar gyur pa zhes pa 'dis gzhan dang ldan pa rnam par bshad pa'o/ /de bzhin gshegs pa'i brdar gyur pa kho na'i zhes bya ba 'di ni ma 'brel pa rnam par bshad pa'o/ /'di'i ming ci zhe na/ de ni ji bzhin min par bsgrags//zhes bya ba smos te sgra ji bzhin pa la sogs pa'i phyir ji bzhin min par bsgrags zhes smos so/ /mtha' drug dbye ba bstan nas ni/ /zhes pa mtha' drug gi dbye ba ni mtha' drug gi dbye ba ste/ mtha' drug spros pa dang bcas pa bstan zhes bya ba'o/ /ni zhes bya ba ni gzhan 'dren pa'i tshig go//bshad pa'i dbye ba brjod par bya/ /zhes bya ba ni bshad pa'i dbye ba ni yi ge'i don la sogs pa'o/ /de nyid bshad pa ni rnam pa gsum ste bsdus pa'i dbye ba dang / bar mtshams kyi dbye ba dang / shin tu rgyas pa'i dbye ba'o/ /bsdus pa'i dbye ba ni tshig gi don dang zhes bya ba la sogs pa'o//bar mtshams kyi dbye ba ni/ dang po gcig pu kho na nyid/ /ces bya ba la sogs pa'o/ /shin tu rgyas pa'i dbye ba bstan pa'i phyir/ sgra tsam la ni rab gzhol ba'i/ /zhes bya ba la sogs pa smos so/ /de nyid bshad pa yi ge'i don zhes bya ba ni du zhig /ci'i phyir yi ge'i don du brtag ce na bshad pa/ sgra tsam la ni rab gzhol ba'i/ /zhes pa ni sgra 'ba' zhig la nye bar gzhol gyi de bzhin gshegs pa thams cad kyi gsang ba'i don ni ma yin no/ /phyi rol bstan bcos mkhas pa yis/ /zhes bya ba ni gzhung 'di pa ma yin pa'i phyi rol gyi bstan bcos rjes su thob pa'o//de yi bkod pa rab bstan pa/ /zhes pa ni sgra'i bkod pa nyid do/ /ji skad bya ba yin zhe na/ yi ge'i don ni yin par bshad/ ces smos te/ sgra'i bshad pa yin zhes sbyar ro/ /dang po ni bshad par bya ba'i lung bstan to//zhar la ni bshad pa'i dgos pa bstan to / /gnyis pas ni bshad pa po bstan to / /zhar la ni de'i dgos pa bstan to/ /gsum pas ni bshad pa'i thabs bstan to/ /zhar la ni de'i dgos pa bstan to/ /bzhi pas ni bshad pa'i ming bstan to/ /zhar la ni de'i dgos pa bstan to//de nas gnyis pa bstan pa'i phyir/ spyi'i don gyi zhes bya ba la sogs pa smos te/ mdo sogs la ni rab bzhugs pa'i/ /zhes smos so/ /mdo sde dang / 'dul ba dang mngon pa'i rjes su zhugs zhes pa'i tha tshig go/ /de la 'gyod pa ni theg pa chen po'i sems bskyed pa la'o//de'i 'gyod pa zlog par byed pa ni de dang mthun par ston pa'o/ /ji skad du rin po che 'bar ba'i rgyud las kyang / rigs kyi bu 'dul ba la dad par gyis shig /de bzhin gshegs pa thams cad kyi gsang ba chen po bzhi yin no zhes pa lta bu'o//bskyed pa'i rim dang ldan pa dag /ces pa ni bskyed pa'i rim pa ni bskyed pa'i rim pa nyid do/ /de dang gang ldan pa ni bskyed pa'i rim pa dang ldan pa'o/ /'di yang spyi'i yin zhes par sbyar ro/ /'di la yang ci'i phyir spyi zhes bya zhe na/ 'di ni khyab pa'i phyir spyi yin zhes pa'o//spyi'i don ni spyi'i don te khyab pa'i don to/ /de nas sbas pa'i don bshad pa/ 'dod chags chos ni rab ston pa/ /zhes bya ba la sogs pa smos te 'dod chags kyi chos ni 'dod chags kyi chos te/ 'phyang ba dang / 'khyud pa dang / 'phyang thag la sogs pa'o/ /'di nyid ni thugs las phyung ba'i phyir sbas pa'o//kun rdzob kyi bden pa ni kun rdzob kyi bden pa ste sgyu ma lta bu'i sku'o/ /ye shes gsum po ni snang ba'i ye shes la sogs pa'o/ /'di dag kyang / snying po yod pas sbas pa'o/ /zhes pa'o/ /dang pos ni dbye ba bstan to/ /gnyis pas ni nges pa'i tshig bstan to//gsum pas ni ming bstan to/ /de ltar sbas pa'i don bstan nas/ da ni mthar thug pa'i don bstan par bya ste/ de'i phyir/ 'od gsal ba ni rab ston dang / /zhes bya ba smos to/ 'od gsal ba ni 'od gsal ba ste/ don dam pa'i bden pa'o/ /zung du 'jug pa ni zung du 'jug pa ste gnyis su med pa'i don to//rnam pa gnyis ni 'od gsal ba dang / zung du 'jug pa'o/ /tha mas ni nges pa'i tshig bstan to/ /de ltar mtha'i dbye ba bstan nas da ni bshad pa'i dbye ba bstan pa'i phyir/ 'chad par nyan par 'dod pa la/ /zhes bya ba smos te 'chad par 'dod pa ni slob dpon no//nyan par 'dod pa ni slob ma'o/ /slob ma'i dbye ba la gnyis yod pas na/ dbye ba yang ni gnyis yin te/ /zhes smos so/ /de nyid gang zhe na/ tshogs la bshad pa ston pa dang / /gnyis pa slob ma la bshad pa'o/ /zhes smos te de la tshogs la bshad pa ni gang zhig yin ci'i phyir tshogs la bshad pa zhes bya zhe na/ji bzhin sgra dang zhes bya ba la sogs pa smos te/ ji bzhin pa'i sgra ni ji bzhin pa'i sgra'o/ /de bzhin du spyi'i don gyi bar ni tshogs la bshad pa'o/ /ci'i phyir zhe na/ de de'i snod du gyur pa'i phyir de la de skad ces bya'o//slob ma la bshad pa du zhig /ci'i phyir slob ma la bshad pa/ /zhes bya zhe na/ ji bzhin min sgra zhes bya ba la sogs pa smos te/ ji bzhin min pa la sogs pa rnam pa lnga po 'di ni slob ma la bshad pa'o/ /ci'i phyir zhe na/ de de'i snod yin pa'i phyir ro/ /de ltar bshad pa rnam pa gnyis bstan nas/da ni gang zag gi dbye ba bstan pa'i phyir/ rnam pa kun du nyan 'dod pa'i/ /zhes gsungs te dus dang rnam pa thams cad du nyan par 'dod pa'i gang zag ces pa'i don to/ /rigs du yod ce na/ /blo yi rnam pa dpag med las/ /gang zag rnam pa lngar 'dod do//zhes smos te/ 'di ltar rigs kyi dbang du dpag tu med de/ dpe'i dbang du rnam pa lngar 'gyur ro zhes bya ba'i don to/ /lnga po nyid gang yin sus gsungs she na/ ut+pal dang pad dkar dang / pad+ma tsan+dan rin po che'i/ /rang bzhin tha dad ming gis te/ thams cad mkhyen pas gsungs pa yin//zhes bya ba la sogs pa'o/ /de la ut+pal zhes bya ba'i gang zag ni gang zhig /ci'i phyir ut+pal gyi gang zag tu brtag ce na/ bshad pa/ de ni ma lus thos gyur la/ /'dzin pa la ni rnam par mkhas/ /zhes smos te bka' dang bstan bcos thams cad ma lus par thos pa ni ma lus par thos pa'o//'dzin pa la ni rnam par mkhas/ /zhes pa ni thos pa tsam gyis thams cad khong du chud pa'o/ /skad cig tsam gyis brjed 'gyur ba/ /zhes pa ni bla ma dang bral ba tsam gyis brjed par 'gyur ro/ /de'i ming ci zhe na/ ut+pal zhes bya ba'i gang zag go//zhes smos te/ ut+pal dang 'dra bas ut+pal lta bu'i gang zag go/ /ut+pal zhes bya ba 'di la mthun pa'i chos ci yod ce na/ ji srid du ut+pal zhes bya ba 'di ni nyi ma shar ba'i tshe na kha 'bye bar 'gyur gyi/ gang gi tshe nub par gyur pa'i dus na ni gang la 'bye bar 'gyur ba'i chos med do//pad dkar zhes bya ba'i gang zag 'di yang ci zhig yin zhe na/ gzung bya mang du thos gyur kyang / /zhes pa ni de bzhin gshegs pa'i sgra dpag tu med pa thos par gyur kyang zhes pa'o/ /ston pa yis ni nus med pa/ /zhes pa ni bsam pa dang brjod pa dang bral zhes pa'o//bum pa'i ras bal sa bon 'dra/ /zhes pa ni/ bum pa'i nang du ras bal gyi sa bon bcug pa bstan du med pa bzhin no/ /pad dkar lta bu'i gang zag go/ /zhes pa ni pad+ma dkar po la chus mi chags pa bzhin no/ /pad+ma zhes bya ba'i gang zag kyang gang zhig yin zhe na/dad dang ldan zhing snying rje shes/ /zhes pa la sogs pa ni ldan zhes bya ba kun la sbyar bar bya ste/ dad pa dang ldan pa ni 'dod pa dang / dang ba dang / yid ches pa dang / de dang gang ldan pa ni de rnams dang ma bral ba ste de nyid dang ldan pa'o/ /snying rje dang ldan pa ni snying rje chen po dang ma bral ba'o//shes rab dang ldan pa ni shes rab chen po dang ma bral ba'o/ /thos nas blo yi kha bye la/ /zhes pa ni blo rgya chen por gyur zhes pa'o/ /tshigs med 'od ma bzhin nyan pa/ /zhes pa ni tshigs pa med pa'i 'od ma gas po ltar nyan zhes pa'o/ / 'dis ni dus thams cad du nyan par byed cing sgom pa dang bshad pa la sogs pa spangs zhes sbyar ro/ /'di nyid ming ci yin zhe na/ pad+ma zhes bya ba'i gang zag go zhes smos te/ tshigs med pa ni dper na pad+ma gas pa lta bu'o zhes sbyar ro/ /tsan+dan lta bu'i gang zag ces bya ba 'di yang gang zhig yin zhe na/thos pa nyung zhing nga rgyal ldan/ /zhes bya ba la sogs pa smos te/ thos pa nyung ba ni ma thos pa'o/ /nga rgyal ldan pa ni bdag thos pa dang ldan pa yin zhes smra ba'o / /rtsa ba med par mang du smra/ /zhes pa ni nges pa'i shes pa ma skyes par sna tshogs pa smra zhes pa'i don to/ / rjes su gzung bar mi nus pa/ /zhes pa ni phyis rang gis 'dzin par mi nus pa'o/ /de nyid kyi ming ci zhe na/ tsan+dan zhes bya ba'i gang zag go zhes smra ste / tsan+dan dang 'dra bas tsan+dan lta bu'i gang zag ste / ri ma la ya'i tsan+dan lta bu'o/ /nga rgyal ldan zhes pa ni dbyar gyi dus kyi tsan+dan lta bu'o/ / zhes pa'o/ /rtsa ba med par mang du smra/ /zhes pa 'dis ni ba do la'i ri'i tsan+dan lta bu'o zhes pa'i don to/ /rjes su gzung bar mi nus pa/ /zhes pa ni tsan+dan sbrul gyi snying po can lta bu'o zhes pa'i don to/ /'di dag gis ni tsan+dan lta bu'i gang zag bstan to/ /de nas rin po che lta bu'i gang zag bstan te /tshul khrims dag cing mkhas la sgrin/ /zhes pa ni bslab pa rnam pa gsum gyi tshul khrims dang / dge ba'i chos sdud pa'i tshul khrims dang / sems can gyi don byed pa'i tshul khrims dang / 'di rnams dang ldan pa ni tshul khrims rnam par dag pa ste/ gang gi tshul khrims la skyon med pa de la de skad ces bya'o//mkhas pa ni mkhas pa ste/ gang gis gang gi bya ba thams cad la thogs pa med pa de la mkhas pa'o/ /shes rab ldan pa ni shes rab dang ldan pa ste shes rab mchog dang ma bral zhes pa'i tha tshig go/ /rgyud gcig las thos nas legs par ston pa ni yang dag pa'i gdams ngag ma nor bar thos shing de nyid dang 'brel pa'i bya ba byed pa de la de skad ces bya'o//'di nyid kyi ming ci yin zhe na/ rin chen lta bu'i gang zag go/ /zhes pa ste dper na rin po che'i bum pa lta bu'o zhes pa'i don to/ /gzhan go sla'o/ /bden gnyis rnam par nges byas te //zhes pa ni thams cad kyang don dam pa'i bden pa dang kun rdzob kyi bden par 'dus pa'o/ /'dir rgyan bdun yin pas na rgyan bdun no/ /rdzogs pa'i rim pa sgrub pa'o/ /zhes pa 'di ni zung du 'jug pa 'ba' zhig gi dbang du byas pa'o/ /bshad smra shin tu rnyed par dka'//zhes pa ste bshad pa po dang smra ba po shin tu rnyed par dka' zhes bya ba'i don to/ /rnyed par dka' ba ci'i phyir zhe na/ rnal 'byor rgyud las gzhan du min/ /zhes bya ba smos te rnal 'byor gyi rgyud kho na las rnyed kyi gzhan las rnyed pa ma yin no zhes bya ba'i don to/ /de bas rdo rje slob dpon gyis//zhes pa ni gong ma dang 'brel to/ /gleng gzhi rim pa sbyor bar bcas/ /zhes pa ni gleng bslang ba la sogs pa'o/ /rgyan rnam pa bdun bshad pa'i rigs pa'o zhes pa ni de bzhin gshegs pa thams cad kyi rgyud thams cad ni rgyan rnam pa bdun gyi 'ching ba bcings la rgyud shes par 'dod pas kyang de la bslab par bya'o zhes pa'i don to//rgyan rnam pa bdun yang yin la bshad pa'i rigs pa yang yin na de la de skad ces bya'o/ /sgron ma gsal ba zhes bya ba'i 'grel bshad las rgyan rnam pa bdun spros pa dang bcas pa'i bshad pa'o// //de ltar rgyan rnam pa bdun go rims bzhin du bshad nas/ da ni le'u bcu bdun po nyid kyis bsdus pa'i don bshad par 'dod nas da ni zhes bya ba la sogs pa'i gzhung gi tshogs gsungs te/ da ni zhes bya ba ni skabs la bab pa'i tshig go/ / le'u bcu bdun gyi bsdus pa'i don bshad par bya ste zhes bya ba la le'u bcu bdun ni le'u bcu bdun te gzhung gi tshogs kyi rim par phye ba bcu bdun yod pa de la de skad ces bya'o/ /le'u bcu bdun zhes pa ni bcu bdun kho na ste 'di dag gis ni mang ba'am nyung ba rnam par bkag pa bstan to//ci'i phyir zhe na de bzhin gshegs pa thams cad kyi gsang ba 'dus pa'i lam 'bras bu dang bcas pa ni 'di nyid kyis ston par 'gyur gyi gzhan gyis ni ma yin no/ /'on te ma yin na yang lam 'bras bu dang bcas par ston par nam yang mi 'gyur ro/ /'o na le'u dang po las ni ci zhig gang gi phyir ston zhe na/le'u dang po las ni zhes pa la sogs pa smos te/ le'u dang po ni thog ma zhes pa'i don to/ /thog ma'i rim pa zhes bya ba'i tha tshig go/ /de las ci ston zhe na rjod par byed pa dang brjod par bya ba ni sgra'i tshogs dang don gyi tshogs so/ /de'i bdag nyid kyang gang yin zhe na/bdag nyid rdo rje 'chang chen po zhes smos te brjod par bya ba'i bdag nyid kyang yin la/ rdo rje 'chang chen po yang yin pas de la de skad ces bya'o/ /de'i sprul pa'i dkyil 'khor yang gang zhig yin zhe na/ de bzhin gshegs pa thams cad kyi gsang ba 'dus pa'i lha sum cu rtsa gnyis pa'o//der nyan pa'i skal ba dang ldan pa ni tshogs kyi gang zag dang slob ma'i gang zag go/ /de la yang ci byed ce na/ rig pa'i dbang bskur ba byin nas zhes smos te/ rig pa'i dbang ni rig pa'i dbang ste/ slob ma'i rig pa'i dbang ni 'di ltar chu la sogs pa'o//yang na rig pa dang bcas pa las byung bas rig pa'i dbang ste de bzhin gshegs pa thams cad kyi gsang ba'i dbang ngo / /yang na rig pa'i lha mo dang 'brel pas rig pa'i dbang ste shes rab ye shes kyi dbang ngo / /yang na rig pa thob pas na rig pa'i dbang ste de bzhin gshegs pa thams cad kyi gsang ba'i dbang bzhi pa'o//de la dang po'i dbang ni tshogs la sbyin pa'o/ /lhag ma gsum ni slob ma'i gang zag la sbyin pa'o/ /dbang byin nas kyang ci byed ce na/ dbang dang rjes su 'brel pa'i man ngag ston pa ste/ de'i phyir drang ba dang nges pa'i don zhes bya ba la sogs pa smos te/drang ba'i don dang nges pa'i don la brtag pa ni gong du bstan pa nyid do/ /bskyed pa'i rim pa dang rdzogs pa'i rim pa'i sgrub pa'i thabs so sor ston cing zhes pa ni dbang rnam pa gnyis bskur ba'i gang zag de dang de la bskyed pa'i rim pa dang rdzogs pa'i rim pa'i sgrub pa'i thabs ma 'dres par ston to//'dir gang la bum pa'i dbang bskur ba de dang de la ni bskyed pa'i rim pa 'ba' zhig nye bar bstan to/ /gsang ba'i dbang bskur ba la ni de bzhin gshegs pa thams cad kyi gsang ba'i spyod pa spros te ston to//de bzhin du rdo rje bzlas pa dang sems la dmigs pa 'ba' zhig kyang nye bar bstan to/ /de bzhin du sgyu ma lta bu'i sku yang nye bar bstan to/ /shes rab ye shes kyi dbang bskur ba la ni de bzhin gshegs pa thams cad kyi 'od gsal ba dang zung du 'jug pa 'ba' zhig nye bar bstan to//le'u dang po las de nyid ston nas gzhan dag las kyang ston zhe na/ gzhan dag las kyang ston pa bstan pa'i phyir 'og nas bshad pa zhes bya ba la sogs pa smos te/ 'og nas bshad pa ni le'u gnyis pa la sogs pa ste gong ma ma yin pa zhes pa'i tha tshig go//le'u bcu drug po ni dang po las gzhan pa'i le'u bcu drug po kho na zhes pa'i don to/ /de'i don gzhan dag kyang rnyed pa ni rdzogs pa'i rim pa dang phra mo'i ting nge 'dzin la sogs pa yang 'dir rnyed ces sbyar ro/ /de la yang 'di las gzhan pa zhig yin nam zhe na ma yin pa'i phyir/lha'i rnal 'byor rnam pa gnyis po nyid la 'jug cing zhes pa smos te/ lha'i rnal 'byor gnyis ni bskyed pa'i rim pa dang rdzogs pa'i rim pa gnyis so/ /'di la gang gis ting nge 'dzin gyi yul du byed pa de ni rnal 'byor pa'o/ /rnal 'byor rnam pa gnyis po 'di nyid kyang gang la shes shing bshad ce na/gsang ba 'dus pa'i rgyud phyi ma las gsungs so zhes sbyar ro/ /gsang ba 'dus pa'i don de nyid gzhan yin no zhe na ma yin pa'i phyir don 'di nyid ces smos te/ 'di nyid nye bar ston te gzhan ni ma yin zhes shugs kyis bstan to//ji skad bstan zhe na/ sangs rgyas rnams kyis chos bstan pa/ /zhes pa ni de bzhin gshegs pa rdo rje 'chang chen po la sogs pa rnams kyis gsungs pa'i gzhung gi tshogs rnams so/ /rim pa gnyis la yang dag gnas/ /zhes pa ni de thams cad kyang rim pa gnyis su 'dus zhes pa'i don to//rim pa gnyis nyid gang yin zhe na/ bskyed pa yi ni rim pa dang / zhes smos te bskyed pa'i rim pa ni bskyed pa'i rim pa ste/ gang gis blos bskyed pa de la de skad ces bya'o/ /bskyed pa'i rim pa zhes bya ba ni de las skyes pa'i sku'o//yang na bskyed pa'i rim pa ni lha'i rnal 'byor 'ba' zhig pa'o/ /rdzogs pa'i rim pa ni phra mo'i rnal 'byor 'ba' zhig pa'o/ /'di yang de bzhin gshegs pa thams cad kyi gsang ba'i mdzod ces bya ba las gsungs te bcom ldan 'das bskyed pa'i rim pa zhes bya ba de gang lags/bcom ldan 'das kyis bka' stsal pa/ sems dpa' chen po de bzhin gshegs pa thams cad kyi bskyed pa'i rim pa ni rten du gyur pa nyid do/ /bcom ldan 'das rten du gyur pa zhes bya ba de gang lags/ sems dpa' chen po de bzhin gshegs pa thams cad kyi gsang ba chen po'i rten du gyur pa'o//bcom ldan 'das gsang ba chen po zhes bya ba de gang lags/ de'i rten zhes bya ba de gang lags/ sems dpa' chen po de bzhin gshegs pa thams cad kyi gsang ba chen po zhes bya ba de ni nyan thos dang rang sangs rgyas la sogs pa rnams kyi yul ma yin pa tshogs kyi gang zag gi yang yul ma yin pa shin tu rmad du byung ba theg pa chen po'i rigs can gyi spyod yul du gyur pa'o//sems dpa' chen po de'i rten ni de bzhin gshegs pa thams cad kyi sprul pa'i sku shin tu rmad du byung ba'o/ / bcom ldan 'das de bzhin gshegs pa thams cad kyi bskyed pa'i rim pa zhes bya ba de gang lags/ sems dpa' chen po de bzhin gshegs pa thams cad kyi bskyed pa'i rim pa zhes bya ba ni gsang ba'i yang shin tu gsang ba phra mo'i ting nge 'dzin to zhes 'byung ba lta bu'o/ / nyid ces bya ba ni kho na zhes pa ste/ 'dir gzhan dang ldan pa rnam par gcod pa'i dbang du byas pa'o/ /rgol te 'og nas 'chad pa zhes bya ba yang 'di nyid dam 'di las gzhan zhig rtog grang na/ 'di nyid ni ma yin te grub pa la sgrub pa nyid kyi phyir don med par 'gyur ro/ /mdor bstan pa yang ma yin te ming nyid kyis thams cad mdor bstan pa'i phyir ro//rgyas par bshad pa yang ma yin te/ /ming nyid dang 'gal ba'i phyir dang / gzhung rgyas pas 'jigs pa'i phyir ro/ /'og ma dang tha dad pa yang ma yin te/ tha dad pa dang tha dad pa ma yin pa ni gcig gis gcig spangs pa'i 'gal ba yin pa'i phyir ro//de lta na yang 'gyur ro zhe na/ ha cang yang thal bar 'gyur ro/ /'on te tha mi dad na ni snga ma'i skyon du 'gyur ro/ /rgyu tha mi dad pa gcig yin no zhe na ni 'bras bu yang de ltar 'gyur ro/ /tha mi dad pas tha dad pa skyed na ni ha cang yang thal bar 'gyur ro//thams cad tha mi dad kyang yin no zhe na ni gong ma'i skyon de nyid du 'gyur ro/ /gzhan yang rgyu tha mi dad pas 'bras bu tha dad pa skyed na ni rdzogs pa'i rim pa yang don med par 'gyur ro/ /ci ste gal te nye ba'i phyir yin no zhe na de lta na ni bskyed pa'i rim pa yang blang bya ma yin par 'gyur ro//'di ltar ring bar 'gyur ba nyid dang phan mi 'dogs pa nyid dang / gnod pa sgrub pa nyid ni sbrul nag po bzhin du dor bar bya ba yin gyi nor bu bzhin blang bar bya ba ma yin no zhe na de ni ma yin te/ 'di ltar de bzhin gshegs pa thams cad kyi sku dang gsung dang thugs gsang ba chen po 'di ni mdor bstan pa dang rgyas par bstan pa gnyis la 'jug ste/de bzhin gshegs pa thams cad kyi gsang ba 'dus pa'i le'u dang po las ni mdor bstan pa 'ba' zhig nye bar bstan te/ de ci'i phyir zhe na/ de bzhin gshegs pa thams cad ni sems can gyi don chen po la rab tu 'jug pa'i phyir ro//bsdus pa 'di nyid kyis sems can gyi don du ji ltar 'gyur zhe na/ 'di ni sems can mdor bsdus pa la dga' ba'i phyir ro/ /lhag ma ni rgyas par bstan pa la dga' ba'i phyir ro/ /de bas na 'di ni dgos pa chen po dang ldan pa'i phyir blang bar bya ba nyid do zhe'o//le'u dang po bsdus pa bshad pa'o// //le'u gnyis pa las ni rdzogs pa'i rim pa 'ba' zhig nye bar ston to zhes pa ni dang po ni bshad zin la de las gzhan ni ma byung bas de nyid kyi skabs su bab ste/ de la de skad ces bya'o/ /rdzogs pa'i rim pa ni rdzogs pa'i rim pa ste/ rdzogs pa chen po dang shin tu nye ba'i rgyur gyur pa'i phyir de la de skad ces bya'o/ /yang na rdzogs pa ni rdzogs pa chen po ste de kho na nyid chos kyi sku'o/ /de'i rim pa ni rdzogs pa thob pa'i thabs kyi rim pa ste phra mo'i ting nge 'dzin to//'ba' zhig ces bya ba ni lhag med ces bya ba'i don te rdzogs pa'i rim pa 'ba' zhig nye bar ston gyi gzhan mi ston zhes bya ba'i tha tshig go/ /'dir yang rdzogs pa'i rim pa 'ba' zhig ston gyi gzhan mi ston pa ci'i phyir zhe na/ 'di ni de bzhin gshegs pa thams cad kyis tshogs kyi gang zag gi dbang du byas pa ma yin gyi slob ma 'ba' zhig gi dbang du byas pa'o//de ltar yang ci mngon zhe na/ gsang ba lung bstan pa zhes bya ba las kyang / bcom ldan 'das de bzhin gshegs pa thams cad kyi sku dang / gsung dang thugs gsang ba'i yang shin tu gsang ba mchog tu gyur pa'i dngos kyi lam du gyur pa 'di ni nyan thos kyi yul ma yin rang sangs rgyas kyi yul ma yin byang chub sems dpa'i yul ma yin no//de'i phyir de bzhin gshegs pa thams cad kyi gsang ba chen po 'di ni 'das pa'i dus su yang ma gsungs so//ma 'ongs pa'i dus su yang gsung bar mi 'gyur ro/ /de ci'i phyir zhe na/ de ni gsang ba chen po de'i snod du ma gyur pa'i phyir ro/ /de bas na de la de skad ces bya'o// // le'u gnyis pa brjod zin nas gsum pa brjod par rigs pas de'i phyir le'u gsum pa las ni zhes bya ba la sogs pa smos te/le'u gsum pa ni 'dir grangs kyis gsum pa nyid do/ /las zhes pa 'dir 'byung khungs kyi don te le'u gsum pa las yongs su gyur pa dag pa'i lha'i rnal 'byor gsal bar byed do zhes bya ba ni yongs su dag pa'i lha'i rnal 'byor gyi rtog pa rnyed do zhes bya ba'i don to//le'u gsum pa las lha'i rnal 'byor de nyid kyang rnyed pa ci'i phyir zhe na/ de bzhin gshegs pa thams cad kyi gsang ba chen po ni 'di la bsams nas gsungs pa'i phyir ro/ /yongs su dag pa'i lha'i rnal 'byor yang gang zhig yin/ de nyid mi shes so zhe na gang gis ma dag pa rnam par bcad nas gang zhig dag par gyur pa yongs su gcod pa de la de skad ces bya'o//yongs su dag pa yang yin la lha'i rnal 'byor yang yin pa'i phyir yongs su dag pa lha'i rnal 'byor te rnam par rtog pa dang bral ba'i lha la dmigs pa'i ting nge 'dzin zhes bya'o//yongs su dag pa la sogs pa 'di yang gang zhig yin te/ de nyid mi shes so zhe na spang byas yongs su dag pa ste/ bskyed pa'i rim pa'i lha'i rnal 'byor gyi ting nge 'dzin dang ldan pa de la de skad ces bya'o/ /yang na bral ba'i don gyis yongs su dag pa'i lha'i rnal 'byor te zhes bya ba ste/rnam par rtog pa rags pa dang bral ba sgyu ma lta bu'i sku la de skad ces bya'o/ /yang na nye bar longs spyod pa'i don gyis yongs su dag pa lha'i rnal 'byor zhes bya ste longs spyod rdzogs pa'i sku de la de skad ces bya'o/ /yang na sna tshogs pa dang / thogs pa med pa'i phyir yongs su dag pa lha'i rnal 'byor te de bzhin gshegs pa thams cad kyi sprul pa'i sku gang yin pa de la de skad ces bya'o/ /le'u bzhi pa las ni dbang bskur ba'i dkyil 'khor ston to zhes bya ba ni slob ma dbang bskur ba'i dkyil 'khor chen po zhes bya ba'i don to//'dir yang de bzhin gshegs pa thams cad kyi dkyil 'khor chen po ni rnam pa gnyis su 'gyur te/ de bzhin gshegs pa thams cad kyi dngos grub kyi dkyil 'khor dang / de bzhin gshegs pa thams cad kyi dbang bskur ba'i dkyil 'khor ro/ /'dir yang dbang bskur ba kho na'i dkyil 'khor ma yin gyi/dbang bskur ba kho na zhes bya ba'i don to/ /le'u lnga pa las ni rnal 'byor gyi spyod pa gsungs so zhes bya ba ni rnal 'byor gyi spyod pa ni/ rnal 'byor gyi spyod pa ste/ ting nge 'dzin gyi spyod pa gang yin pa de la de skad ces bya'o/ / rnal 'byor gyi spyod pa yang bsdus pa dang rgyas pa zhes rtog grang na/ rgyas pa 'og nas ston pa'i phyir 'di ni bsdus pa zhes bya'o/ /de gang la ston pa'i le'u ni rnal 'byor gyi spyod pa'o/ /le'u drug pa las ni zhes bya ba la sogs pa ni sku dang gsung dang thugs byin gyis rlob pa'i le'u ni sku dang gsung dang thugs byin gyis rlob pa'i le'u'o//de gang gis gsungs pa de la de skad ces bya'o/ /sku byin gyis rlob pa ni rnam pa gnyis te blangs pas byin gyis rlob pa dang thob pas byin gyis rlob pa'o/ /gsung dang thugs la yang de bzhin du sbyar bar bya'o/ /le'u bdun pa las ni le'u lnga pa'i bshad pa spyod pa spros nas ston to zhes bya ba ni le'u lnga pa las bshad pa'i spyod pa nyid spros nas ston gyi de las gzhan du bshad pa'i spyod pa ni ma yin no//de ci'i phyir zhe na/ de bzhin gshegs pa thams cad kyi mchog gi spyod pa ni le'u lnga pa las bshad pa las nam yang gzhan nas 'byung bar mi 'gyur ba'i phyir ro//le'u brgyad pa las ni gsang ba'i dbang bskur ba gsungs so zhes pa ni/ gang la byang chub sems kyi dbang bskur bar yod pa de la de skad ces bya'o/ /le'u dgu pa las ni rmad du byung ba'i lung bstan pa gsungs so zhes pa ni mchog tu gyur pa'i lung ston pa de la de skad ces bya'o//le'u bcu pa las ni mngon par 'dod pa'i dngos grub mngon du bya ba'i phyir phyi dang nang gi bdag nyid can gyi lha'i snying po bskul ba gsungs so zhes pa ni mngon par 'dod pa'i dngos grub ni blang bar bya ba'i dngos grub ste thun mong dang mchog gi dngos grub rnam pa gnyis so//de thob par byed pa'i thabs ni lha'i snying po yin pas de la de skad ces bya'o/ /le'u bcu gcig pa las ni sngags kyi sku bskyed pa dang ye shes kyi sku bskyed pa ston to zhes pa ni sngags kyi sku bskyed pa ni 'dis bskyed pa'i dbang du gsungs so/ /ye shes kyi sku bskyed pa ni longs spyod rdzogs pa'i sku'i dbang du byas pa'o//yang na sngags kyi sku bskyed pa ni bskyed pa'i rim pa'o/ /ye shes kyi sku bskyed pa ni sgyu ma lta bu'i sku'o/ /le'u gang la sngags kyi sku bskyed pa dang ye shes kyi sku bskyed pa yod pa de la de skad ces bya'o/ /le'u bcu gnyis pa las ni phyag rgya chen po yongs su gyur pa zhes pa ni phyag rgya chen po ni phyag rgya rnam pa bzhi dang ldan pa'i sku'o//de thob pa'i thabs gang la yod pa de la de skad ces bya'o/ /le'u bcu gsum pa dang bcu bzhi pa las ni las kyi tshogs rnams gsungs so zhes pa ni las kyi tshogs mang ba gang yin pa de la de skad ces bya'o//le'u bco lnga pa las ni dngos grub thams cad ni de kho na nyid rtogs pa nyid kyis 'grub par 'gyur ro zhes bstan pa'i phyir zhes pas ni de nyid kyi dgongs pa ston to/ /ci'i phyir zhe na de'i phyir zhes pa'i don to/ /de bas na dngos grub thams cad ni zhes pas thob par bya ba'i yul bstan pa'o//de kho na nyid ces pa 'dis ni thob par byed pa'i thabs bstan to/ /thabs kyang ci zhig ce na/ sgyu ma lta bu'i ting nge 'dzin zhes bya bar sbyar te de gang la ston par 'gyur ba'i ting nge 'dzin de la de skad ces bya'o/ /le'u bcu drug pa las ni le'u bzhi pa las gsungs pa'i rdul tshon gyi dkyil 'khor spros nas ston to zhes pa ni le'u bzhi pa las bshad pa de nyid bshad kyi de las gzhan pa ni ma yin no zhes pa'i don to//rdul tshon gyi dkyil 'khor zhes pa 'dis ni ma 'brel pa rnam par gcod pa'o/ / yang na le'u bzhi par ni bskyed pa'i dkyil 'khor 'ba' zhig nye bar ston to//'dir ni rdul tshon gyi dkyil 'khor dang bcas nas ston to/ /le'u bcu bdun pa las ni dam tshig dang sdom pa rab tu ston pa yin no zhes pa ni dam tshig dang sdom pa ni dam tshig dang sdom pa nyid do/ /de gang la ston pa de la de skad ces bya'o/ /'di dag gis ni de bzhin gshegs pa thams cad kyi gsang ba 'dus pa'i don mdor bsdus pa bstan to//de nas de bzhin gshegs pa thams cad kyi bshad pa mdor bsdus pa bstan pa'i phyir/ 'di skad bdag gis thos pa zhes bya ba nas b+ha ga la bzhugs so zhes pa'i bar du ni bshad pa'i tshul rnam pa bzhi dang ldan par bshad do zhes pa/yi ge dang / spyi dang / sbas pa dang / mthar thug pa rnam pa bzhir bstan to/ /'di skad ces bya ba la sogs pa la bshad pa'i tshul rnam pa bzhis bshad pa 'di yang ci sgra'i 'gros so zhe 'am nus pa zhes rtog grang na/ re zhig sgra'i 'gros so ni ma yin te/'brel pa la sogs pa yi ge'i don la tshang ba'i phyir ro/ /nus pa zhes bya ba yang sgra'i sgo nas sam don gyi sgo nas zhes rtog grang na/ re zhig sgra'i sgo nas ni ma yin te/ 'di ltar thams cad la bshad pa bzhi dang ldan par 'gyur ba'i phyir ro/ /de lta na yang ma yin no zhe na ha cang thal bar 'gyur ro//gal te de ltar ma yin na yang ji ltar der 'gyur/ de lta ma yin zhes pa'i nges par gzung ba yang ci zhig yod/ gal te don gyi sgo nas ma yin no zhe na ni 'dir brjod pa'i sgo nas sam/ de las gzhan zhig ces rtog grang na/ 'di nyid kyi yul ni ma yin te sbas pa dang mthar thug pa la sogs pa 'dis ma brjod pa'i phyir ro//'on te brjod na ni ha cang don med par 'gyur ro/ /don yod do zhes pa'i nges par gzung ba ni ci zhig yod/ rnam pa gzhan zhig brjod par gyur na ni 'di nyid kyi brjod bya ma yin par 'gyur te/ de lta na ni 'khrul par yang 'gyur ro//ji ste ma 'khrul na ni grang ba'i reg pas kyang tsha ba'i reg pa rtogs par 'gyur ro/ /de lta na ni de las byung ba'am/ de'i bdag nyid kyi 'brel par yang 'gyur ro/ /ci ste gal te na 'brel pa yin no zhe na ni de nyid 'gal bar rnam par gnas par yang mi rung ste/ me dang du ba bzhin no/ /ci ste 'gal ba yin no zhe na ni/ de lta na ni 'di la 'dug sa gcig pa la gnod pa ci zhig yod/ /gal te mi gnod pa ci zhig yod do zhe na mngon sum dang 'gal bar 'gyur ro/ /de bas na don gzhan ni brjod bya ma yin no/ /don gyi sgo nas kyang sgra la bshad par bya ba'i phyir rigs pa ma yin te gal te de lta na ni don gong du gtan la dbab par 'gyur ro//de lta yin na ni don med do de lta ma yin na ni ji ltar de las 'gyur/ ji ste gal te yin no zhe na ni ha cang yang thal bar 'gyur ro/ /don sngon du gtan la mi 'bebs na ni nam yang brjod par mi bya'o/ / de las gzhan zhig brjod do zhe na ni brjod par bya'o/ /gal te gang zag gi dbye bas yin na ni 'di nyid la rnam pa bzhir gsungs par mi rigs kyi rnam pa gzhan las gzhan du bstan pa'i phyir ro/ /gal te 'di ni yin la gzhan ni ma yin no zhes pa'i nges par gzung ba ni ci yang med do/ /ji ste yod na ni ha cang yang med par 'gyur ro//de lta yin na ni rgyas pa dang bsdus pa yang mi rigs so/ /de ci'i phyir zhe na/ don gyi rnam pa gcig la rgya che ba dang chung ba'i bye brag gis bsdus pa dang rgyas par 'gyur gyi/ don tha dad pa la ni nam yang bsdus pa dang rgyas pa mi rigs so/ /ji ste gal te yin no zhe na ni ha cang yang thal bar 'gyur ro//mi rtogs par bya ba'i phyir yin no zhe na ni/ 'di ci'i dbang po rno ba'i dbang du 'am/ gdug sems kyis smras zhes rtog grang na re zhig dang po ltar na ni ma yin te/ tshogs kyi gang zag la sogs pa gzung ba'i phyir ro/ /gzhan yang 'di nyid las/thub pa chen pos chos phung po/ /zhes bya ba la sogs pa gsungs pa'i phyir ro/ /ci ste phyi ma ltar na yang ma yin te/ de bzhin gshegs pa rnams ni thugs rje chen po'i stobs kyis 'jug pa'i phyir ro/ /gdug sems dang snying rje ni gcig gis gcig spangs pa yin pa'i phyir 'gal ba yin no//ci ste de lta na yang yin no zhe na ni ha cang yang thal bar 'gyur ro zhes bya ba 'di yang brjod par bya ste/ re zhig sgra dngos kyi nus pa'am/ dgongs nas bshad pa'i nus pa zhes rtog grang na/ sgra dngos kyi nus pa ltar na ni bden te/ de ni ma yin no/ /'di ni de bzhin gshegs pa rnams kyis dgongs nas smras pa ste 'di ci la dgongs she na/bcom ldan 'das nyid kyis kyang dang po bshad pa bzhi la dgongs nas gsungs so/ /des de ltar 'gyur ba yang ma yin te/ thugs rje chen po'i don dang ldan pa'i phyir ro/ /de lta na ni yang yin no zhe na ma yin te/gsang ba 'di ni sems can thams cad kyi thun mong du ma gyur pa'i phyir ro/ /yang na 'di ni phyi rabs pa'i gang zag slob dpon dang slob mar 'brel par bya ba'i phyir te/ 'og nas bshad pa'i phyir ro/ /bla ma la rag las pa nyid ci'i phyir zhe na/ rtsod pa'i dus na sems can thams cad 'dod rgyal gyi zhags pas zin te gzu lum la mchog tu gzhol bar 'gyur ro//gang gi tshe gzu lum la mchog tu gzhol ba de ni de bzhin gshegs pa'i bka' yang dag par myur du 'jug par 'gyur ro/ /gang zhig gang myur du zhugs pa des ni de ma thag tu de la skyo bar 'gyur ro//gang zhig gang la myur du skyo ba skye bar 'gyur ba de ni de'i bka' myur du spong bar 'gyur ro/ /gang gis gang zhig myur du spangs par gyur pa de ni bstan pa yun ring du gnas par mi byed de yun thung bar byed ces bya ba'i don to/ /de bas na de bzhin gshegs pa rnams ni slob dpon dang slob mar 'brel par bya ba dang /bstan pa yun ring du gnas par bya ba dang bstan pa brtan pa dang / gang zag rnams kyi blo zab cing rgya che bar bya ba'i phyir bshad pa bzhi la dgongs nas gsungs pa yin no/ /'di nyid ni de bzhin gshegs pa thams cad kyi gsang ba mngon par grub pa zhes bya ba'i rgyud las kyang /de bzhin gshegs pa thams cad kyi/ /gsang ba de nyid mngon grub 'di/ /bde gshegs rnams kyis bstan pa rnams/ /yun ring gnas par bya ba'i phyir/ /bshad pa'i mchog ni rab sbas te/ /bla ma las ni rtogs par bya//zhes 'byung ba dang / slob dpon gyis kyang / bla ma la brnyas sgyu can dad pa med/ /ces bya ba la sogs pa gsungs pa'i phyir ro/ /gzhan yang gsang ba chen po zhes bya ba rnal 'byor chen po'i rgyud las kyang / sems dpa' chen po 'jig rten gyi khams 'dir rtsod pa rgyas pa'i dus 'dir sems can gzu lum mkhan bla ma la sdang ba dang /chog par 'dzin pa dang / de bzhin gshegs pa'i bka' zab mo la rang 'dod du spyod pa 'byung gi de yis de bzhin gshegs pa'i bka' zab cing rgya che ba rtogs par mi nus so/ /de bas na de bzhin gshegs pa thams cad kyi gsang ba chen po 'di ni theg pa chen po'i rigs can gyi gang zag rmad du byung ba'i yul yin par 'gyur ro//de yang gang las shes she na de bzhin gshegs pa thams cad kyi gsang ba'i lung las shes par 'gyur te/ ji skad du/ de bzhin gshegs pa thams cad kyi//gsang ba chen po'i bdag nyid mchog /rab tu gsang ba yin pa'i phyir/ /thams cad kun gyis gsal ma byas/ /gang yang dus gsum sangs rgyas dang / /rnal 'byor rnal 'byor ma rnams kyis/ /gang tshe gsang ba'i don gsungs pa/ /phyi dang shin tu nang dag dang / / de bzhin bla med la dgongs nas/ /gsang ba'i don rnams gsungs pa yin/ /de las gzhan du gsungs gyur na/ /ji bzhin don du bzung ba ste/ /des na lam ngan dag tu ltung / /zhes pa la sogs pa 'byung ba lta bu'o/ /des na de bzhin gshegs pa'i gsang ba chen po 'di ni rnal 'byor gyi rgyud rnams kyis shin tu rgyas btab pa yin no zhes bstan par bya'o//gzhan yang gzhan du shes par bya'o/ /de ltar na bshad pa bsdus pa dang / don bsdus pa bshad nas/ da ni de nyid kyi don bsdus pa rgyas par bshad par bya ste/ de'i phyir rim pa 'di nyid kyis na bzhugs pa'i tshig nas brtsams te zhes bya ba smos te 'dis ni phyag rgyas btab pa yin la zhes sbyar ro//gang gis rgyas btab ce na/ rim pa 'di nyid kyis rgyas btab ces smos so/ /yang na rim pa 'di nyid kyis bshad pa'i phyir rgyas btab ces sbyar ro/ /gang rgyas btab ce na bzhugs pa'i tshig nas brtsams te rjes su yi rang ba'i bar du'o//mtha' rnam pa drug tu bshad pa dang zhes bya ba la sogs pa ni bshad zin to/ /de nyid kyis gsang ba 'dus pa'i don phyag rgyas btab ces smos pas na sgra phyag rgyas btab pa ni ma yin te/ don gsal bar ma byas zhes bya ba'i don to/ /'di dag la ma rtogs par cir 'gyur zhe na/de ma rtogs par zhes bya ba la sogs pa smos te/ de la ma rtogs pa ni gong ma nyid ma rtogs pa'o/ /'o na gang zhig la brten zhe na sgra ji bzhin pa'i bshad pa'i sgra'i don tsam la brten te zhes smos so/ /sgra ji bzhin par bshad pa ni sgra ji bzhin pa nyid de de bshad pa'i don gang yin pa de la de skad ces bya'o//de lta bu la rtog pa'i sems can gang zhig yin zhe na/ yul rnams la chags pa'i sems can rnams 'gal ba dang / shin tu rmad du byung ba'i bya ba byed pas las kyi dbang du 'gyur ro zhes pa ni yul rnams la chags pa ni yul rnams la chags pa ste/yul la zhen par gyur pa'i tha tshig go/ /yul la chags pa yang yin la sems can yang yin pas yul rnams la chags pa'i sems can de de lta bu'i gang zag gis de la de ltar rtog ces pa'i tha tshig go/ /brtags pas ci byed ce na 'gal ba dang shin tu rmad du byung ba'i bya ba byed de/'di ltar ma byin par len pa la sogs pa'i bya ba la 'jug par 'gyur ro/ /de cir 'gyur zhe na/ las kyi dbang du 'gyur te/ las de'i stobs kyis 'bras bu rtsub mo nyams su myong bar 'gyur ro zhes bya ba'i tha tshig go//'di dag gis ni 'di skad du ston par 'gyur te de bzhin gshegs pa thams cad kyi bka' dgongs pa dang bcas te bshad par ma gyur pa de'i tshe sgra ji bzhin par nges par 'dzin par 'gyur ro/ /gang gi tshe sgra ji bzhin par nges par bzung bar 'gyur ba de'i tshe yul la chags pa'i sems can 'jug par 'gyur ro//gang gi tshe yul la chags pa'i sems can zhugs par gyur pa de'i tshe/ de bzhin gshegs pa'i gdams ngag dang du mi len par 'gyur ro/ /gang gi tshe de bzhin gshegs pa'i gdams ngag dang du mi len par gyur pa de'i tshe de bzhin gshegs pa'i bka' dgongs pa can gzhan la yang sgra ji bzhin par 'dzin par 'gyur ro//gang gi tshe sgra ji bzhin par bzung ba de'i tshe 'gal ba dang rmad du byung ba'i bya ba byed par 'gyur ro/ /shin tu rmad du byung ba'i bya ba byed pa de'i tshe sems can thams cad log pa'i lam la gnas par 'gyur ro/ /sems can thams cad log pa'i lam la gnas par gyur pa de'i tshe rmad du byung ba'i bya ba byed pa'i las kyi 'bras bu smin par 'gyur ro zhes bya ba'i don to//de yang gang las shes she na/ bcom ldan 'das kyis dgongs pa lung bstan pa zhes bya ba'i rgyud las gsungs te zhes bya ba la sogs pa gsungs te/gsang ba'i bdag po zhes bya ba ni bod pa'o/ /don rgyas pa yi tshul chen 'di ni rnyed gyur nas/ /zhes pa don rgyas pa'i tshul chen po ni de bzhin gshegs pa'i gsang ba 'dus pa nyid do/ /ji bzhin don ni rnyed bzung bas/ /zhes pa ni sgra ji bzhin pa'i don rnyed pa'o//des ji ltar gzung ba zhe na/ gsang ba 'dus pa'i dgongs pa can thams cad kyang sgra ji bzhin par bzung zhes bya ba'i don to/ /des cir 'gyur zhe na/ des na lam ngan ngag tu ltung / /zhes pa ni gang bzod par dka' ba'i sdug bsngal dang ldan pa de ni lam ngan pa ste gang zhig gang du ltung ba de la de skad ces bya'o//de lta bur 'dzin par byed pa'i gang zag kyang ji lta bu yin zhe na/ mngon pa'i nga rgyal rtag dga' bas/ /zhes bya ba ni mngon pa'i nga rgyal gtong bar mi byed pa ste gang zhig gang la 'phangs par 'dzin pa de la de skad ces bya'o/ /rnal 'byor pa ni bdag ces smra//zhes pa ni rnal 'byor gyi don dang mi ldan par bdag nyid rnal 'byor pa yin zhes zer ba lta bu'o/ /chos ni g.yo yis byed par 'gyur/ /zhes pa ni ma byin par len pa dang srog gcod pa dang brdzun dang tshig 'khyal ba dang / ngag rtsub mo la sogs pas chos yongs su tshol bar byed pa de la de skad ces bya'o//des ni 'dus pa mi shes par/ /zhes pa ni de bzhin gshegs pa'i gsang ba 'dus pa'i dgongs pa la sogs pa legs par mi shes pa'o/ /dam tshig la sogs spyod byed la/ /zhes pa ni dam tshig dang sgrub pa la sogs pa nye bar spyod pa'o//gsang ba srung bar mi byed cing / /zhes pa ni/ thams cad du ni rab tu ston/ /zhes bya ba de nyid kyis bshad do/ /mngon sum sangs rgyas 'dra ba yi/ /slob dpon smod cing bkur mi byed/ /zhes pa ni bla ma'i bsrung bar bya ba'i sdom pa la phyal bar gtong ba'o/ /skad cig gis ni khong khro zhing //zhes pa ni nyes pa mthong na skad cig tsam gyis khro bar byed pa'o/ /de bzhin skad cig gis rjes chags/ /zhes pa ni bdag nyid dang rjes su mthun pa'i las byung na chags par byed pa'o/ /'di dag gis ni blo mi brtan pa bstan to / /de nas 'dod pas log par g.yem pa la sogs pa'i nyes pa bstan pa'i phyir/ma dang sring mo bu mo ste/ /zhes pa ni bdag nyid bskyed pa dang / bdag nyid dang lhan cig tu bskyed pa dang bdag gis bskyed pa'o/ /de dag gis ni bgrod pa ma yin te de bzhin gshegs pa rnams kyis rmad pa yin pa'i phyir ro//de la bgrod par byed pa gang yin pa de ni nyes pa mchog dang ldan pa yin zhes sbyar ro/ /nyes pa gzhan yang yod pa'i phyir/ /pha ma gsod cing zhes bya ba la sogs pa gsungs te pha ma gsod pa ni pha ma gsod pas te/ pha ma la ngan sems kyis tshon rdeg pa gang yin pa de la de skad ces bya'o//srog chags gzhan yang gsod par byed/ ces pa ni 'jig rten gyi srog chags rags pa dang phra ba la sogs pa gsod pa gang yin pa de la de skad ces bya'o/ /de bzhin brdzun gyi tshig smra zhing / /zhes pa ni gang zhig bden par smra ba spangs pa'o/ / khyad par du yang rku bar byed/ /ces pa ni gang gis ma byin par len par byed pa de la de skad ces bya'o/ /gzhan gyi chung ma'i thad 'gro zhing / /zhes pa ni gzhan gyi chung ma la nye bar sbyor ba'o/ /smad pa gzhan yang byed par 'gyur/ /zhes pa ni bstan bcos las smad pa'i bya ba gzhan thams cad lhur len par 'gyur zhes pa'i don to//de nyid ye shes 'byung ba yi/ /dam tshig rnams ni des mi shes/ /zhes pa ni gsang ba chen po mchog gi dam tshig rgyas pa de nyid kyis mi shes zhes pa'i don to/ /nyes pa cung zad tsam la yang / /mngon spyod dag ni byed par 'gyur/ / zhes pa ni nyes pa phra mo tsam la yang drag po'i las rtsom zhes pa'i don to/ /rtag tu phyi rol bstan bcos dga'/ /zhes pa ni gzhung 'di pa ma yin pa'i bstan bcos la gzhol ba gang yin pa de la de skad ces bya'o/ /rang gi dam tshig yongs spangs te/ /zhes pa ni rang gi dam tshig mi bsrung ba'o//lcags kyu med pa bzhin du spyod/ /ces pa ni thabs dang bral ba nyid do/ /sngags dang phyag rgya'i sbyor ba yi / /'tsho ba dag ni nges sgrub byed/ /ces pa ni sngags dang phyag rgyas rang gi 'tsho ba yongs su tshol ba de la de skad ces bya'o/ /gang du rnyed pa thob 'gyur bar//dam pa'i chos ni 'chang bar 'gyur/ /zhes pa ni yul du shes pa dang mi ldan zhing rnyed pa nye bar thob par 'gyur bar dam pa'i chos 'chad par 'gyur zhes bya ba'i don to/ /des cir 'gyur zhe na/ sngags pa rnams ni 'grub mi 'gyur/ /zhes smos te de lta bu'i gang zag gis sngags dang phyag rgya'i dngos grub 'grub pa med kyi mnar med pa'i sdug bsngal chen po skyed ces pa'i don to//de ci'i phyir zhe na/ rnal 'byor rab sbyor dman pa'i phyir/ /zhes smos te/ rab tu sbyor ba dman pa ni rab tu sbyor ba zhan pa zhes pa'i don to/ /de rnams gzung bar bya ba'i phyir//zhes pa ni de rnams kyi ngan 'gro'i srid pa dgag pa'i phyir zhes pa'i don to/ /gsang ba dgongs pas bshad pa yin/ /zhes bya ba ni bshad zin to/ /'dis ni bsdus pa'i don bstan to zhes pa ni 'di nyid kyis bsdus pa'i don yin gyi rgyas par bshad pa ni ma yin no/ /gang zhig gang du gang gi phyir bstan pa yin zhe na/de bzhin gshegs pa'i gsang ba 'dus pa'i don mtha' dag dang / de bzhin gshegs pa'i gsang ba 'dus pa'i bshad pa mtha' dag bsdus pa'i don 'di nyid kyis bsdus pa'i phyir de la de skad ces bya'o/ /'dis kyang bsdus pa la dga' ba rnams 'di tsam gyis tshim par 'gyur zhes bya ba'i don to//de ltar bsdus pa'i don bstan nas zhes pa ni rgyas par bstan par bshad par 'dod pas de skad ces bya'o/ /da ni zhes bya ba ni skabs la bab pa'i tshig go/ /yan lag gi don rnam par dbye ba'i phyir zhes pa ni rtsa ba'i don ma yin pa'i phyir de skad ces bya'o//rgyud la 'jug par bya ste zhes pa ni rgyud nyid bshad par bya zhes bya ba'i don to/ /'di skad bdag gis thos pa zhes bya ba 'di yang gang gis gang la bstan zhe na/ 'dir sdud par byed pa zhes bya ba la sogs pa smos te sdud par byed pa ni sdud par byed pa ste de bzhin gshegs pa'i rgyud thob par byed ces pa'i don to//thos par byed pa po gang yin zhe na/ 'phags pa phyag na rdo rje zhes pa ste dgongs pa thams cad 'byung bar byed pa'i rdo rje thogs pa gang yin pa de la de skad ces bya'o/ /des ji skad du thos pa thugs la bzhag nas zhes pa ni lhag pa dang chad pa la sogs pa'i nyes pa dang bral bar byas nas zhes pa'i don to//des ci byed ce na/ gdul bya rnams la bstan pa'i phyir/ /zhes smos te rang gi gdul bya smin pa dang grol bar byed pa'i phyir de la de skad ces bya'o/ /'di skad bdag gis thos pa zhes bya ba la sogs pa gsungs pa yin te zhes bya ba ni sdud pa po rang gi tshig legs par ston pa yin te/'di skad thos zhes bya bar sbyar ro/ /'di skad ces bya ba 'di yang / ji skad ces bya ba'i tshig yin no zhe na/ de'i phyir 'di skad ces bya ba ni rgyud kyi don ma lus par ston pa'i tshig gi phrad do zhes smos te 'dis ni bshad par bya ba'i chos phun sum tshogs pa bstan to//de yang 'di zhes bya ba yang nye ba mngon sum pa'i tshig go/ /'di zhes bya ba yang gang yin zhe na/ gsal ba de'i zhes bya ba nas rjes su yi rang ngo zhes bya ba'i bar du'o/ /de bas na 'di skad ces bya ba 'di ni rgyud kyi don thams cad rjod par byed pa'i sa bon can no//gang gis thos she na bdag gis thos zhes bya bar sbyar te/ bdag gis thos zhes bya bas ni sdud pa po phun sum tshogs pa ston te/ bdag nyid kyis mngon sum du thos zhes bya ba ni bdag nyid kyis nye bar thos zhes bya ba'i tha tshig go//'di skad thos zhes pa 'dis ni ma thos pa dang / gzhan thos pa rnams bsal ba yin no/ /bdag gis thos zhes bya bas ni ma thos pa dang gcig nas gcig tu brgyud de thos pa dang rtogs pa bsal lo/ /dus gcig na thos zhes pa smos pas ni dus thams cad du thos pa dang thams cad du ma thos pa bsal lo//'di dag gi sgra'i sbyor ba yang gzhan dag ni ma thos kyi 'di kho na skad thos zhes pa dang / 'ongs pa dang / rtogs pa ni ma yin te bdag gis thos zhes pa dang thams cad du ma thos pa dang thams cad du thos pa ni ma yin gyi dus gcig kho nar de thos zhes bya'o //dus phun sum tshogs pa de nyid rgyas par bshad pa dus gcig gi tshe na 'di na 'di thos la gzhan du ni gzhan thos pa'o zhes pa ni gsang ba 'dus pa de bzhin gshegs pa thams cad kyis gsungs pa'i dus su ni 'di thos kyi/ pha rol tu phyin pa la sogs pa gsungs pa'i dus su ni gzhan thos she'o //de nyid rnyed dka' bar bstan pa yang / gzhan dag tu ni 'di ma thos pa'o zhes pa ste / gzhan du ni 'di nam yang thos par mi 'gyur ba'o/ /de ci'i phyir zhe na/ bcu bdun par gsang ba'i snod du ma gyur pa nyid kyis bstan to/ /blo rno ba ni skad cig ma gcig la'o zhes pas ston to//skad cig la sogs pas ni yud tsam la sogs pa ma yin par bstan to/ /gang las gang du zhes bya ba la sogs pa ni 'og nas ston te/ ston pa phun sum tshogs pa ni ston pa phun sum tshogs pa ste yon tan chen po dang ldan pa'i ston pa gang yin pa de la de skad ces bya'o//yon tan gang zhig dang ldan zhe na/ skal ba phun sum tshogs pa zhes bya ba la sogs pa ste/ phun sum tshogs pa ni yang dag pa'i don gyi skal ba chen po dang ldan pa ste/ mdo dag las de bzhin gshegs pa ni sgrib pa ma lus par bcom pa'i phyir skal ba chen po dang ldan pa'o zhe'o//gzhan yang gang gis tshogs chen po yongs su bsags pa ni skal ba chen po dang ldan pa'o/ /skal ba chen po ni thams cad de/ skal ba ma lus pa'i bdag nyid can no/ /mi mthun pa'i phyogs ma lus par bcom pa ni sa thams cad la sgrib pa yang dag pa'i ye shes kyis spangs pa'o//gzhan yang 'di dag gis ni mi slob pa'i zung du 'jug pa bstan to/ /de lta bu'i ston pa des gnas gang du gsungs she na bshad pa/ de bzhin nyid ni de bzhin nyid de spros pa dang bral zhing rtog pa thams cad las nye bar grol ba'o/ /der gshegs pa ni de las grol ba ste/rtog pa thams cad yongs su spangs pa de nyid mngon sum du gyur pa dang lhun gyis grub pa zhes bya ba'i bar du'o/ /de bzhin gshegs pa yang yin la thams cad kyang yin pa ni spros pa'i mtha' gnyis bsal ba ste/ grangs dang grangs can gzhan la thal ba yongs su bsal ba gang yin pa'o//bdag nyid ces pa ni rang bzhin nam ngo bo nyid do zhes pa'i don to/ /sku dang gsung dang thugs kyi snying po ni yongs su 'dzin pa zhes bya ba'o/ /de'i btsun mo ni des bsten pa ste/ gzhal yas khang gi rnam pa nyid yongs su gsal ba'o//der gnas pa ni de nyid la bsten pa nyid do/ /de bzhin nyid dang zhes bya ba la sogs pas ni gang gi dus su yongs su snang ba nyid de/ rnam grangs des na ma 'ongs pa'i rnal 'byor pa rnams kyis kyang ji skad 'chad par 'gyur ba'i gzhal yas khang du mos pa'i dkyil 'khor dang yongs su bsdu ba'i cho ga dang /rnal 'byor gsum bsgom par bya'o zhes bya ba'i don to/ /yi ge'i don ni sgra tsam la gzhol ba'i dbang du byas te 'di'i tshe zhes bya ba la sogs pa bya ba bshad pa gong ma nyid do/ /tshogs la bshad pa yang de nyid de zab mo'i don ma yin pa nyid do//de bas na bshad pa'i sgra'i dbang du bya ste yi ge'i don to/ /bskyed pa'i rnal 'byor gyi dbang du byas te tshogs la bshad pa'o/ /gang zhig la gang zhig gis gang du ji ltar gnas par 'gyur ba dang / gang gis gang gi spyod yul du gang bstan pa de la de skad ces bya'o//gzhan yang gang gis gang zhig gtan la 'bebs par 'gyur ba dang / gang gis gang zhig nyams su len par byed pa dang / gang dang gang gis yul du byas pa de la de skad ces bya'o/ /de ni rdzogs pa'i don to/ /gang gis gang gi rnam par bshad pa yongs su rdzogs par gyur pa de la de skad ces bya'o//de nas spyi'i don bshad par 'dod nas smras pa zhes bya ba la sogs pa smos so/ /gang la gang gis gang du gang gi phyir zhe na/ sgra'i tshogs 'di yongs su rgol ba smra bar 'gyur ro/ /gang du zhes pa'i lan du 'di lta ste/ yi ge'i don bshad pa yongs su rdzogs pa'i skabs 'dir smras pa/dgongs pa gang gis na sdud par byed pas gsung rab kyi mgor zhes bya ba la sogs pa smos te/ 'di dag gi don yang sdud pa pos gsung rab kyi slad du 'di skad ces bstan pa kho na la dgongs pa ci zhig yod par 'gyur/ bcom ldan 'das kyis ci la dgongs te gsungs/ gal te rgyud kyi don mtha' dag bsdus par 'dod pa'am de las gzhan du 'gyur zhes pa rgal ba'i don to/ /de'i lan du gong ma ltar gyur na cir 'gyur zhe na ma nges par 'gyur te/ 'di dag bdag gis she'am / 'di'am 'di rnams 'di tsam bdag gis thos zhes pas kyang rgyud kyi don ma lus par yongs su rdzogs par ston par 'gyur te der 'gyur ro//gang gis gang zhig gang la nus pa des kyang de'i don yongs su rdzogs par 'gyur na ni kho na zhes bya ba gzhan dang ldan pa rnam par gcod pa rtogs par 'gyur ba med pa nyid do zhes bya ba'i don to//gang gis gang zhig gang la yongs su ma spangs pa de ni de'i bya ba yongs su rdzogs par 'gyur ro zhe na smras pa zhes pa de ni lan ston par 'gyur ba ste/ gang yang gang zhig yongs su ma spangs pa de ni de'i nyes par 'gyur ba ma yin te de ci'i phyir zhe na/de bzhin gshegs pa thams cad kyi brdar gyur pa ni rgyud kyi ston pa po thams cad kyi brdar gyur pa nyid de/ brda gang zhig ston pa'i brda yin zhe na/ shes rab dang thabs ston pa nyid do/ /yi ge gnyis su gyur pa 'di kho nas brdar ston par byed kyi gzhan gyis ni nam yang rnyed par 'gyur ba ma yin zhes bya ba'i don to//gsung rab kyi dang por zhes bya ba ni gang zhig gang gis ston nus pa de'i phyir de la de skad ces bya'o/ /gang gis de yongs su shes par 'gyur ba des ni de dang de dag yongs su shes par 'gyur ba nyid do zhes bya ba'i don to/ /gzhan yang gang gis de nyid bstan par 'gyur ba de ni de'i gzhung lugs yongs su rdzogs pa ma yin te ci'i phyir zhe na/sdud pa po med par 'gyur ba'i phyir te/ 'di skad ces bya ba 'di sdud pa po'i tshig sgra ji bzhin pa ma yin par 'gyur te/ de lta na sdud pa po med do zhes bya ba'i don to/ / des cir 'gyur zhe na bdag gis zhes bya ba la sogs pa'i tshig 'brel pa med par 'gyur te de ci'i phyir zhe na/ 'di skad ces bya ba ni brdar gyur pa nyid yin la bdag gis zhes bya ba ni sdud pa po rang gi ming brjod pas tha dad par 'gyur ro/ /ci'i phyir zhe na/ gang la gang zhig yod pa de la de dang bral bar 'gyur ba'i phyir gcig gis gcig spangs par 'gyur ba yin no//des na sdud pa po med par 'gyur ro zhe na/ sdud pa po med par thal bar 'grub pa 'di ni thal ba ma yin pa nyid de gsang ba 'dus pa'i don 'dir sdud pa po ni med do/ /'o na zhes bya ba ni mgu ba ma yin pa'i tshig brjod pa nyid do//btsun pa kun dga' bo la sogs pa 'jig rten na sdud pa por ci'i phyir grags zhes pa ni lnga sde bzang po la sogs pa gang zhig gis gang zhig yongs su bzung ba dang sdud pa gzigs pa mngon sum dang 'gal bar 'gyur ro/ /gang zhig gang gis yongs su 'dri ba med na de yang med par 'gyur bas de rjes su dpag pa dang yang 'gal bar 'gyur ro//gsungs pa lan la sogs pa gang zhig snang ba dang / gang zhig yongs su brjod pa dang / gang dang yongs su mthun par gyur pa de'i phyir de dag dang 'gal bar 'gyur ro//des na sdud pa po yod par snang ba nyid de/ 'dod pa 'di thams cad yongs su bshig pa yin no zhes skyon brjod pa dang skyon yongs su spang ba'i phyir slob dpon gyis gang la yongs su legs par smras pa de dang 'gal ba la sogs pa'i nyes pa 'di snang ba'am nges pa'i don du 'gyur//snang ba la ni nam yang mi 'dod pa ma yin pas nyes pa med pa nyid do/ /phyi ma ltar na ni mi 'dod pa nyid de kun dga' bo ni 'dir byang chub sems dpa' kun du bzang po nyid de phyag na rdo rje yin la zhes pa ni phyi dang nang gi sdud pa po gnyis su med par bstan to//rdo rje 'chang chen po yang de nyid las gzhan ma yin te zhes pa ni gang gis rdo rje 'chang chen po dang sdud pa po tha dad du dbye ba med pa nyid do/ /des na sdud pa po dang stan pa ni gang gis gang zhig yongs su 'dzin pa de yang de nyid do/ /gal te tha dad du gnas na cir 'gyur zhe na/mdo sde la sogs pa ni mdo sde dang 'dul ba dang mngon pa'o/ /chos kyi phung po brgyad khri bzhi stong ni bshad zin to/ /de bzhin gshegs pa las phyag na rdo rjes lhag chad med par lan gcig gis thos shing 'dzin par ga la nus zhes pa ni mi srid par bstan to/ /'di ltar rdzogs pa'i sangs rgyas ma yin pa ni mthar phyin pa'i sa la mi gnas par gyur pa de ni gang gis rtog pa ma spangs so// rtog pa thams cad spangs par ma gyur pa de ni mthar phyin pa'i lam la mi gnas so/ /gang gis rtog pa thams cad ma spang ba de ni thogs pa med pa'i shes rab dang mi ldan no/ / thogs pa med pa'i shes rab kyang rtog pa spangs pa las 'byung bar rig par bya'o/ /thogs pa med pa'i shes rab med pas ni chos kyi phung po brgyad khri bzhi stong lhag chad med par lan gcig gis 'dzin par mi nus so/ /de ci'i phyir zhe na/ chos kyi phung po brgyad khri bzhi stong yongs su 'dzin pa ni thogs pa med pa'i shes rab med na med pa'i phyir ro zhes 'byung bas sdud pa po ni rdzogs pa'i sangs rgyas las tha dad du mi 'jug go//de yang gang las shes she na/ bcom ldan 'das kyis kyang 'di nyid du thun mong ma yin pa'i gsang ba zhes bya ba rnal 'byor chen po'i rgyud las gsungs zhes smos so//ji skad gsungs she na 'di lta ste zhes pa ni yongs su ston pa'i don to/ /'jam dpal ni zas gtsang mar gyur to zhes bya ba ni gang la gang gis 'dul ba de la der bstan zhes pa'i don to/ /'jig rten dbang phyug ni lha mo sgyu 'phrul du gyur to zhes bya ba ni lha mo chen mo sgyu 'phrul ni 'jig rten dbang phyug go//gzhan yang gang gi phyir lha mo chen mo sgyu 'phrul nyid kyis gang du yongs su 'dul ba de'i phyir de la de bstan to/ /bstan pa 'di dag gang zhig gang gis ji ltar yongs su snang ba de ltar gnas pa ni med do/ /de ci'i phyir zhe na/ thams cad ro gcig pa'i rang bzhin can nyid kyi phyir ro//rigs pa 'dis ni zhes pa ni mi slu bar byed pa'i tshad ma de lta bu yod pa'i phyir ro zhes so / /'o na de ltar bstan pa la dgos pa ci yod ce na/ las dang po pa'i sems can rnams 'jug par bya ba'i phyir zhes pa ni las dang po pa ni 'jig rten pa dang mthun pa'i chos la 'jug par 'gyur ro//'jig rten na ni rgyal po dang / 'khor dang zhu ba po la sogs pa snang bar bya ba dang mi mthun par ston to/ /bcom ldan 'das kyis kyang sdud pa po la sogs pa yongs su bstan pa nyid do/ /gzhan yang gang gi phyir ston pa dang sdud pa po la sogs pa ma bstan na med par yongs su rtogs par 'gyur ro//gang la gang med pa de ni 'jig rten pa'i bya ba dang mi mthun par bstan to/ /gang zhig gang dang mi mthun pa de la ni gang zag dad pa'i rjes su 'brang ba rnams yongs su tshol bar byed do/ /gang zhig gang yongs su tshol bar byed pa des ni srid par 'dzin pa yongs su spangs par 'gyur ro//gang zhig gang gis yongs su spangs pa des ni de'i don la som nyi za bar 'gyur ro/ /gang la gang gis ji ltar sems pa des ni skur ba 'debs par 'gyur ro/ /gang la gang gis gang zhig byas pa des ni ngan song gsum po yongs su blang bar 'gyur te/ gsang ba'i bdag po don rgyas pa'i zhes bya ba la sogs pa'i tshigs su bcad pa du ma dag gis kyang legs par bstan pa yin te/de'i phyir sangs rgyas kyi rol mo ji skad du bshad pa 'di bstan pa yin no/ /de yang gang las shes she na gser 'od dam pa las/ sangs rgyas mya ngan mi 'da' zhing / /zhes bya ba la sogs pa gsungs te sangs rgyas mya ngan mi 'da' ba ni rtag pa chen po'i bdag nyid can du gyur pa'i phyir ro//chos kyang nub par mi 'gyur te/ /zhes pa ni sems can la snang ba 'ba' zhig tu zad kyis nges par chos nub pa med par 'gyur zhes bya ba'i tha tshig go/ /'o na gang gi phyir 'byung zhe na/sems can rnams ni gdul ba'i phyir/ /byung nas mya ngan 'da' bar ston/ /zhes pa ni dus nye bar len pa nyid de gang gi phyir sems can sgrib pa thams cad dang ldan zhing blo ma smin par gyur pa dag gi phyir dang po 'byung ba dang / mdzad pa mthar phyin pa la sogs pa nas yongs su mya ngan las 'da' ba'i bar du yongs su rdzogs par bya ba'i phyir kun du snang bar gyur to//de bas na zhes pa ni rigs pa de'i phyir zhes pa'o/ /brgya byin gyis gsol ba zhes pa ni 'di skad ces bya ba la sogs pa'i yi ge gnyis yongs su ma shes nas dris pa'o/ /ci'i phyir 'di skad ces bya ba'i zhes pa ni 'di skad ces bya ba 'di ci'i phyir smos zhes pa'o//gang gi phyir dang po rab tu sbyar zhes pa ni bka' dag la dang por sbyar ba la dgongs pa ci zhig yod ces pa'o/ /gang 'di bde gshegs gsung yin nam/ /zhes pa ni gang gis bdag gis zhes bya ba dang ma 'brel pa'i nyes pa gzigs pa'o//nyan thos kyi bshad pa yin nam ci zhes pa ni bka' ma yin pa'i nyes pa brjod pa'o/ /gzhan ni go sla'o/ /'di nas mar ni yi ge gnyis chos thams cad kyi rgyu'am sa bon du bstan pa nyid de/ de la chos kyi phung po brgyad khri zhes bya ba ni bshad zin to//de gang gi gzhi yi ge gnyis yin pa ci'i phyir zhe na yi ge e ni zhes bya ba la sogs pa gsungs te/ 'dis rim pa dang po'i bslab pa bzhi bstan te/ e ni mar gyur la 'dis ni bud med mtshon par byed pa nyid de/ gang gi phyir gang gis gang la gang zhig byed par 'gyur ba de'i phyir de la de skad ces bya'o//ba ni pha zhes bya bar grags/ /zhes bya ba ni ba zhes bya ba pha mtshon par byed pa nyid kyi phyir ro/ /thig le der ni sbyor ba nyid/ /ces pa ni gang zhig gang dang gang du 'brel par 'gyur ba de'i phyir de la de skad ces bya'o/ /'di dag gis ni 'di skad du ston par 'gyur te/gang gis sems can skye ba dang mthun par lha'i sku rim gyis 'byung ba yab dang yum gnyis su med par ston pa'i bdag nyid do/ /yang na/ e ni pad+ma bzhin du gsungs/ /zhes pa ni pad+ma dang 'dra ba'i chos yongs su gnas par 'gyur bas de la de skad ces bya'o/ /ba ni rdo rje nyid yin no zhes pa ni rdo rje yongs su bstan pa'i brda gang la yod pa de la de skad ces bya'o//thig le de ni sa bon te/ /zhes pa ni gang la byang chub sems kyi sa bon yod pa de la de skad ces bya'o des cir 'gyur zhe na/ de las 'gro ba gsum po skye/ /zhes pa ni gang las gang gi stobs kyis sems can thams cad yongs su skye bar 'gyur ba de la de skad ces bya'o//de dag gis ni 'di skad du ston par 'gyur te/ gang zhig gis sems can skye ba'i rim pa dang mthun par lha yab yum snyoms par zhugs pa las rang gis sprul pa'i dkyil 'khor rgyal po mchog yongs su skye bar 'gyur ba gang yin pa de la de skad ces bya'o//e ni shes rab nyid 'gyur la/ /zhes pa ni rlung nyid do/ /ba ni rab dga'i bdag po'o / /zhes pa ni rnam pa shes pa nyid do/ /thig le mi shigs de nyid do/ / zhes pa ni 'gro ba thams cad kyi snying gi dbus na rlung mi shigs rgyal po a thung ngu'i ngo bor snang ba'o/ /de las yi ge gnyis kyang skye / / zhes pa ni A li kA li'i sde tshan gyi yi ge rnams 'byung bas te gang la gang gis ji ltar yongs su byed pa de la de skad ces bya'o/ /de bas na 'di dag gis ni yi ge gnyis po pho dang mor gyur te/ gang du skye ba dang yi ge gnyis pho mo'i mtshan mar gyur pas sems can rnams rang gi sa bon las skye ba dang /yi ge gnyis kyi brda de dag gis bskyed pa gtso bo yab yum dang dkyil 'khor rgyal mchog gang gis yongs su rdzogs pa dang / gang gis yi ge las sgra'i tshogs 'byung zhing 'di las chos kyi phung po brgyad khri bzhi stong la sogs pa 'byung ba'i phyir yi ge gnyis ni bzhi dang pha ma nyid do//des cir 'gyur zhe na/ chos kyi phyag rgya ni gang gis gang zhig yongs su shes pa dang / brjod par rung ba nyid do/ /de gang yin zhe na yi ge gnyis te e baM zhes bya ba'i don to/ /de'i de nyid brda'i don yongs su shes pa gang dang gang yin pa'o//des ni sems can thams cad la/ /chos kyi 'khor lo skor byed 'gyur/ /zhes pa ste de'i don yang gang yin/ yi ge gnyis shes pa des ni yi ge'i brda'i rnam par shes par 'gyur ro/ /gang gis yi ge brda'i rnam par shes pa des ni yi ge'i de kho na nyid shes par 'gyur ro//gang gis yi ge'i de kho na nyid shes pa de ni sangs rgyas kyi chos yongs su shes par 'gyur ro/ /des ni chos thams cad kyi ston pa phun sum tshogs pa shes pa bstan pa yin no/ /de las gzhan du gyur pa'i skyon bstan pa'i phyir/ 'gro ba gang gis zhes bya ba la sogs pa smos te/yi ge gnyis ni e baM zhes pa'o/ /mi shes pa ni yi ge'i de kho na nyid mi shes pa'o/ /rtag tu 'don pa ni brjod pa'o/ /cir 'gyur zhe na/ de ni sangs rgyas chos rnams kyi/ /sbyor spangs phyi rol dka' thub bzhin/ /grol bar mi 'gyur zhes bya ba lhag ma'o/ /'di dag gis ni 'di skad ston par 'gyur te/gang gis yi ge gnyis ma mthong bar brda la spyod par mi 'gyur ro/ /gang gis brda rnam par spyad par ma byas par ni brda rnam par shes par mi 'gyur ro/ /gang gis brda ma shes par ni yi ge'i de kho na nyid shes par mi 'gyur ro/ /gang gis yi ge'i de kho na nyid shes par ma gyur par ni chos thams cad kyi de kho na nyid shes par mi 'gyur ro//gang gis gang du gang zhig shes pa ma gyur pa des ni sgra la 'jug par mi 'gyur ro/ /gang gis gang zhig gang la ji ltar gyur pa des ni bsam gtan gyi sbyor ba spangs par 'gyur ro/ /gang gis bsam gtan gyi sbyor ba spangs pa des ni thams cad mkhyen pa de kho na nyid kyi don yongs su thob par mi 'gyur te phyi rol pa'i dka' thub pa gzhan du 'gyur ba bzhin no//gzhan yang 'di skad du/ sems dpa' chen po gzhan yang byang chub sems dpa' chen pos de kho na nyid kyi sbyor ba dang bral na ni bdag nyid yongs su grol bar mi 'gyur ro//gang gis gang yongs su grol bar ma gyur pa des ni sems can thams cad 'khor ba'i rgya mtsho las grol bar mi nus so/ /sems dpa' chen po rnam grangs des na byang chub sems dpa' sems dpa' chen pos de kho na nyid dang bral bar mi bya'o/ / zhes 'byung ba lta bu'o/ /gzhan dag las kyang rigs kyi bu 'am rigs kyi bu mo la la bdag dang gzhan gyi don thams cad yongs su rdzogs par 'dod pas ma nor ba'i de kho na nyid dang / gzhan ma yin pa'i de kho na nyid dang / chos nyid dang chos kyi dbyings nyid dang / chos gnas pa nyid dang / chos skyon med pa nyid dang /yang dag pa'i mtha' dang / bsam gyis mi khyab pa'i dbyings nyid la bslab par bya'o/ /de ci'i phyir zhe na/ 'di ltar gang gis tshogs yongs su rdzogs par 'dod pa dang / bdag dang gzhan la phan 'dogs par 'dod pa'i gang zag gis lam 'di la ma brten par nam yang thob par mi 'gyur ba'i phyir ro zhes bya ba la sogs pa rgyas par gsungs so//de bas na 'di ni byang chub sems dpa' rnams kyis lam 'di la gnas par bya'o/ /e waM yig gnyis sgyu ma la/ /zhes pa ni ji skad du bshad pa'i phyir ro/ /thams cad mkhyen pa 'dir zhugs pas zhes pa ni thams cad mkhyen pa thob pa'i rgyu'i gtso bo yin pa'i phyir ro//de bas na zhes pa'i don ni go bar zad do/ /bdag gis zhes pa la sogs pa ni 'chang bar 'gyur ba'o/ /rdo rje'i tshig ni rdo rje 'chang chen po'i tshig yin pa dang / rtogs par dka' ba nyid kyi phyir de skad ces bya'o//bshad pa'i rgyud las bstan pa nyid la 'jug pa ni rtsa ba'i rgyud las gsal bar ma gsungs pa'i phyir ro/ /'khor lo sprul pa'i ngo bo la/ /zhes pa ni lha'i 'khor lo gtso bo dang 'khor gyi dkyil 'khor lta bu'o/ /bdag gis thos pa zhes gsungs te/ zhes pa ni gang gis drang ba'i don du yin gyi nges pa'i don du ma yin zhes bya ba'i tha tshig go//sa bon las ni gang sprul pa/ /zhes pa ni gang gis sa bon gyis bskyed pa nyid kyi phyir de skad ces bya'o/ /lha rnams kyi ni 'khor lo mchog /ces pa ni 'di dag gis yon tan phun sum tshogs pa dang /'dis 'dod chags can la sogs pa'i sems can yongs su 'dul ba'i phyir ro/ /mchog tu dga' ba ni snyoms par zhugs pa'i bde ba gang la yod pa de'i dus la dus gcig ces bshad pa'i phyir ro/ /dbang phyug brgyad kyis bcom ldan 'das/ /zhes pa ni dbang phyug che dang gzugs bzang ba dang grags pa dang dpal la sogs pa'i yon tan gang la yod pa de la de skad ces bya'o//khyad par ji lta bu zhig dang ldan pa'i bcom ldan 'das yin zhe na/ bde ba chen po'i bdag nyid can/ /zhes pa ni gang zhig bde ba chen po'i ngo bo nyid du gyur pa gang yin pa de la de skad ces bya'o//de bzhin gshegs pa thams cad ces bya ba ji lta bu yin zhe na/ 'di yi phung po lnga rgyal ba/ /de bzhin gshegs pa thams cad yin/ /zhes pa phung po lnga nyid sangs rgyas te/ /mdor na phung po lnga rnams ni/ /sangs lngar ni rab tu grags//zhes bya ba la sogs pa rgyas par gzhung 'di nyid las gsungs pa'i phyir ro/ /sku dang gsung dang thugs zhes bya ba yang ji lta bu yin zhe na/ de'i bdag nyid de/ gang zhig gang du tha dad du dbyer med pa de'i phyir de la de skad ces bya'o/ /rdo rje zhes bya ba yang gang zhig yin zhe na thugs te 'dir bde ba chen po zhes bya ba bde ba chen po rab tu mi rtog pa'i bdag nyid can gang yin pa ste/gang zhig gang gis gang du yongs su mkhyen par 'gyur ba de la de skad ces bya'o/ /btsun mo zhes bya ba yang gang yin zhe na legs sbyangs phyag rgya ste zhes bya ba smos te/ rang bzhin gyis legs par sbyangs pa ni rtags mchog dang ldan pa'o//rnyed pas legs par sbyangs pa ni nan gyis len pa la sogs pa dang bral ba'o/ /bsam pas legs par sbyangs pa ni chags pa dang bral ba dang rnam par 'tshe ba dang bral ba zhes bya ba la sogs pa'i bar du'o/ /thabs kyis legs par sbyangs pa ni gang gis gsang ba bdag nyid legs par rnyed pa'o//sngags dang rgyud kyis legs par sbyangs pa ni gang gi bdag nyid de las gzhan du nye bar byas pa'o/ /kun du tshogs pas legs par sbyangs pa ni dad pa la sogs pa dang ldan pa'o/ /legs par sbyangs pa zhes bya ba yang gang zhig yin zhe na/legs par sbyangs pa ni 'dir skyon med pa nyid de/ gang gis gang du nye bar gnas pa de'i phyir de la de skad ces bya'o/ /b+ha ga zhes bya ba yang gang yin zhe na/ legs sbyangs pad+ma b+ha ga yin/ /zhes pa btsun mo dam par gyur pa gang yin pa de'i pad+ma ste yongs su dag par gyur pa dang gang du kun du gnas par 'gyur ba dang /nye bar 'joms par 'gyur ba gang yin pa de la de skad ces bya'o/ /bzhugs so zhes bya ba'i tha tshig gi don ji ltar gzhag ce na/ bzhugs pa rdo rje 'dzin pa der/ /thig le'i gzugs kyis gnas pa'o/ /zhes gsungs te rdo rje 'dzin pa yang thig le'i gzugs nyid do//'di skad du ston te/ gang gis thabs dang shes rab gnyis su med par snyoms par zhugs te/ byang chub kyi sems btsun mo'i b+ha ga la gnas pa'o/ /yang na gang gis gang zhig gang dang gang du 'grub pa'i phyir de la de skad ces bya'o/ /'di dag gis nye bar bshad pa 'dir bshad pa ni spyi'i don gyi skabs 'dir zhes bya'o//cha gnyis pa ni dgu pa nyid kyis bshad/ /ces bya ba la sogs pa la/ cha gnyis pa ni/ a dang u'o/ /dgu pa ni o'o/ /'di dag la gang gis yi ge dang ldan pa ni oM zhes bya bar 'gyur ro/ /sum cu pa ni da'o//bcu pa ni ha ste gang gis gang gi don du gnas pa nyid do/ /yang na sum cu pa ni k+Sha ste/ cha gnyis po ni k+Sha'o/ /dgu pa ni de nyid do/ /bcu pa ni la'o/ /lnga pa ni ha'o/ /cha gnyis pa ni a A zhes pa ste/ des de ltar 'gyur ro/ /drug pa ni U ste/ gang la gang gis nye bar mdzes pa'o//bcom ldan 'das kyis kyang zab pa dang mi zab pa gnyis la dgongs nas gsungs par rig par bya'o/ /gang gis 'di dang bcas pa dang ldan pa las 'dir gcig gzung bar bya'o/ /'di dag la yang ci'i phyir spyi zhes bya zhe na/ gong du bshad pa bzhin du rig par bya'o//sbas pa'i don du bshad pa rgyas par 'dod nas gsungs pa/ lung gis bshad pa zhes pa ni rigs pa dang bral zhing rtog ge pa rnams kyi yul ma yin pa'i phyir ro/ /e ni shes rab dam pa ste/ /zhes pa ni e ni shes rab snang ba'i mtshan nyid do/ /'di ci'i phyir bshad snyam pa la/gang gis sems la dmigs pa la sogs pa gang zhig yongs su gsal bar bya ba'i phyir ro/ /gang yang sbas pa gsum po nyid 'dis rtogs par bya ba'i phyir yang 'di dag rgyas par 'chad par 'gyur ro/ /de bas na gang gis gang gi don du gang zhig byed pa des ni de'i de dag yongs su rdzogs par 'gyur ro//bdag nyid dam pa yongs su rdzogs par 'dod pa des kyang 'di la brten nas 'di dag yongs su rdzogs par 'gyur ro/ / snang ba'i bral tshul dang rang bzhin gang zhe na/ 'dod chags bral sogs zhes pa 'dod chags bral ba dang 'dod chags dang bral ba bar ma dang /shin tu 'dod chags dang bral ba dang / gang yid kyis 'gro ba dang 'ong ba dang / mya ngan dang mya ngan bar ma dang / shin tu mya ngan du gyur pa dang / zhi ba dang rnam par rtog pa dang / 'jigs pa dang 'jigs pa bar ma dang / shin tu 'jigs pa dang /sred pa dang / sred pa bar ma dang / shin tu sred pa dang / nye bar len pa dang / mi dge ba dang / bkres pa dang / skom pa dang / tshor ba dang / tshor ba bar ma dang / shin tu tshor ba dang / rig pa po dang / rig pa dang / rig pa 'dzin pa'i gzhi dang / so sor rtog pa dang /ngo tsha shes pa dang / snying rje ba dang / snying brtse ba dang / brtse ba bar ma dang / shin tu brtse ba dang / dogs pa dang bcas pa dang / sdud pa dang / phrag dog ste 'di dag ni snang ba'i rang bzhin no/ /de yang gang zhe na/ 'dod chags dang bral ba ni yid du 'ong ba mthong ba la ma chags pa'o//bar ma la sogs pa ni ci rigs pa'o/ /yid kyis 'gro ba dang 'ong ba gang yin zhe na/ 'gro ba dang 'ong ba la sems rnam par g.yo ba'o/ /mya ngan gang zhe na/ sdug pa dang bral bar gyur nas sems shin tu gdung ba'o/ /'di yang ci rigs su sbyar ro/ /zhi ba gang zhe na/sems g.yeng ba dang bral ba'o/ /rnam par rtog pa gang zhe na sems pa dang shes rab rtsing ba'o/ /'jigs pa gang zhe na yid du mi 'ong ba dang phrad nas sems skrag pa'o/ /'di la yang ci rigs su sbyar ro/ /srid pa gang zhe na/ phan 'dogs pa dang yid du 'ong ba la zhen pa'i bde ba'i tshor ba las byung ba'o//'di yang yul gyi bye brag las ci rigs su sbyar ro/ /nye bar len pa gang zhe na/ gzhan gyi nor dang yo byad la sogs pa gang yid kyis len pa ste sred pa las byung ba'o/ /mi dge ba gang zhe na 'dod chags la sogs pa dang / de dang mtshungs par ldan pa'i lus ngag gi las so//bkres pa gang zhe na rgyud pas zas 'dod pa'o/ /skom pa gang zhe na/ yongs su gdung bas skom 'dod pa'o/ /tshor ba gang zhe na/ bde ba dang sdug bsngal ba dang gnyi ga dang bral ba'i rnam pa yongs su myong ba'o/ /rig pa po gang zhe na/ gang gis gang gi rnam pa 'dzin pa'i shes pa'o//rig pa 'dzin pa gang zhe na gang zhig gang gis brten zhing gang la dmigs pa'o/ /gzhi gang zhe na yul gyi dngos po nyid do/ /so sor rtog pa gang zhe na rigs pa dang mi rigs pa gang du 'tshol ba dang 'das pa ste spyod pa nyid do/ /ngo tsha shes pa gang zhe na bdag gam chos kyi dbang du byas te kha na ma tho ba 'dzem pa'o//snying rje gang zhe na gang zhig gang gis rnam pa dang bral bar 'dod pa'o/ /brtse ba gang zhe na gang zhig gang dang bral nas de dang phrad par 'dod pa'o/ /dogs pa dang bcas pa gang zhe na/ sems nges par mi gnas pa'o/ /sdud pa gang zhe na gzhan gyi gang dag yongs su sdud pa'o//ser sna gang zhe na rang gi yid du 'ong ba blos yongs su 'dzin pa'o/ /rang bzhin 'di dag snang ba las 'byung ste sems can thams cad gang du ji ltar gnas pa'i rtsa bar bstan pa'o/ /'di dag yongs su shes pas kyang gang zhig yongs su 'dre ba med pa'i bsam gtan yongs su rdzogs par 'gyur bar dgongs so//de nas snang ba mched pa bstan par bya ste/ de la snang ba mched pa'i mtshan nyid gang zhe na/ 'od ma 'greng ba ltar mdzes shing zhes bya ba la sogs pa smos te 'od ma 'greng ba ni 'od ma 'greng ba ste/gang la 'od ma 'greng ba dang 'dra ba'i chos yod pa de la de skad ces bya'o/ /chags la sogs pa rab bskyed ldan/ /zhes pa ni chags pa la sogs pa bskyed pa ste gang la gang zhig 'byung bar 'gyur ba de la de skad ces bya'o/ /'di lta ste chags pa dang / chags pa bar ma dang / kun du chags pa dang /dga' ba dang / dga' ba bar ma dang / kun du dga' ba dang / rangs pa dang / rangs pa bar ma dang / kun du rangs pa dang / ngo mtshar dang dgod pa dang / tshim pa dang / 'khyud pa dang / 'o byed pa dang / 'dzin pa dang / brtan pa dang / brtson pa dang / khengs pa dang / bya ba dang / dbrog pa dang / stobs dang / spro ba dang / dga' ba la sbyor ba dang / dga' ba la sbyor ba bar ma dang / shin tu dga' ba la sbyor ba dang / drag pa dang / rnam par sgeg pa dang / 'gras pa dang / dge ba dang / tshig gsal ba dang / bden pa dang / mi bden pa dang /nges pa dang / nye bar mi len pa dang / sbyin pa po dang / skul ba dang / dpa' ba dang / ngo tsha med pa dang / zin pa dang / gdug pa dang / mi srun pa dang / gya gyu che ba ste mtshan nyid bzhi bcu po 'di dag ni snang ba mched pa'i rang bzhin no/ /'di dag gis bskyed pa dang gang gis yongs su gnon pa 'di ni snang ba mched pa yin par shes par bya'o//de la 'dod pa la chags pa gang zhe na/ ma thob pa'i yul la yid kun du chags pa'o/ /chags pa gang zhe na/ ma bskal pa'i yul la yid kun du chags pa'o/ /dga' ba gang zhe na/ yid du 'ong ba'i rnam pas sems khengs pa'o//rangs pa gang zhe na/ gang dga' bas ches dga' ba'o/ /mgu ba gang zhe na/ thob pa'i bye brag la ltos nas bdag po la yongs su bstod pa'o/ /ngo mtshar gang zhe na/ mi spyod pa la mngon du byas pas ya mtshan du gyur pa'o/ /dgod pa gang zhe na/gang gis gang zhig la gnas par mi byed cing sems gzhan du 'phro ba'o/ /tshim pa ni tshor ba bde ba gzhan du bstan nas so/ /'khyud pa ni yid du 'ong ba'i yul la sems kyis kun du zhen pa'o/ /gzhan ni go sla'o/ /brtan pa gang zhe na nges pa rnyed de mi g.yo ba'o/ /brtson 'grus gang zhe na le lo dang bral ba'o//nga rgyal gang zhe na/ mtho bar sems pa'o/ /bya ba gang zhe na gang zhig yongs su 'grub par bya'o/ /dbrog pa gang zhe na gzhan gyis bdag gir byas pa len pa'o/ /stobs gang zhe na/ gyad dang g.yul 'gyed pa'o/ /spro ba gang zhe na dga' ba 'ba' zhig yul du byas nas brtson 'grus drag po dang ldan pa ste/go cha la sogs pa yongs su rdzogs pa'i sems pa 'bras bu dang bcas pa'o/ /dga' ba la sbyor ba gang zhe na/ dregs pa las byung ba'i sems pas mi dge ba la sogs pa la sbyor ba'i sems pa 'bras bu dang bcas pa'o//zhe 'gras pa gang zhe na/ rtsod pa'i rgyu med par 'dod pa'i dbang gis dam pa dang dam pa mchog dang / dman pa la sogs pa la kun du rtsod par sems pa'o/ /sgeg pa gang zhe na/ gang gis 'dod chags kyi yul lam zhe sdang gi yul thob par bya ba dang phrad par bya ba dang / kun du nyams par bya ba'i phyir tshul 'chos pa'o//zhe 'gras pa gang zhe na gang gis gang zhig dang rtsod pa sngon du song ba'am/ phyis 'byung ba'i bsam pa dang bcas te sems shing sems la mdud par 'dzin pas 'khon du 'dzin pa nyid do/ /dge ba gang zhe na ma chags pa dang snying rje la sogs pa dang mtshungs pa'i sems kyis bslang ba'i lus dang ngag gi las te gang nyes pa gang zhig dang bral bar 'gyur ro//tshig gsal ba gang zhe na/ lce la nyes pa med cing lus yongs su dar bas ched du smras pa'o/ /bden pa gang zhe na dngos po dang mthun pa'i tshig tu brjod pa'o//mi bden pa gang zhe na/ dngos po dang mi mthun par smra ba'o/ /nges pa gang zhe na som nyi rnam par spangs pa'i sems pa dang de'i las so/ /nye bar mi len pa gang zhe na/ dngos po thams cad bdag gir byed par mi 'dod pa'o/ /sbyin pa po gang zhe na gang gis rang gi sdug pa dang mi sdug pa thams cad yongs su gtong zhing 'dzin pa med pa'o//skul ba gang zhe na le lo can dag la kun du spro ba skyed pa'o/ /dpa' ba gang zhe na gang gis gang zhig pham par byed pa dang der sems pa 'jigs pa dang bral ba'o/ /ngo tsha med pa gang zhe na rigs dang chos yongs su spangs te tshul bzhin ma yin pa'i las byed pa'o//sgyu gang zhe na/ gzhan slu ba'o/ /gdug pa gang zhe na/ nyon mongs pas nyes pa mi brjod pa'o/ /mi srun pa gang zhe na bshags kyang mi nyan pa'o/ /gya gyu che ba gang zhe na gang gis g.yo byed pa'o/ /g.yo yang de'i gnas skabs nyid do//gang 'di dag la yang gang gis sems pa'i bye brag dang yul gyi bye brag gis dman pa dang / bar ma dang chen po la sogs pa gzhag par bya'o/ /gang gis de dang ldan pa des kyang der 'gyur ba de'i phyir de la de skad ces bya'o/ /de'i ming ni thabs zhes bya ba ste gang zhig gang la ltos pa de dang gang zhig mthun par snang ba de la de skad ces bya'o//snang ba mched pa zhes bya ba yang rang bzhin gyis yongs su mched par 'gyur ba ste/ gang zhig gang la gang dang lhan cig tu gnas par 'gyur ba nyid do/ /yang na rang bzhin 'khrul pa rags par snang ba ste/gang zhig kun du gang la gang du 'byung ba de la de skad ces bya'o/ /yang na rlung gis kun du bskyod pa nyid de/ gang zhig gang gi rlung gis gang la gang kun du mched par 'gyur ba de la de skad ces bya'o/ / de nas snang ba thob pa'i don bshad pa/ /rig chen rang nyid rtsa ba ste//zhes pa gang gis gang zhig yongs su rig par 'gyur ba ste de las bzlog pa ni ma rig pa'o/ /gang zhig gang dang mthun par 'gyur ba de la de skad ces bya'o/ /bdag nyid gang la gang du gnas par 'gyur ba de la de skad ces bya'o/ /snang ba ni khol bur g.yo'o/ /snang ba mched pa ni kun du rgyas so//thob pa ni log pa nyid do/ /ma rig pa las 'di 'byung 'gyur/ /zhes pa ni chags pa bar ma dang brjed ngas pa dang / 'khrul pa dang / mi smra ba dang / skyo ba dang / le lo dang / the tshom dag ste gang zhig 'di las byung ba de'i phyir de la de skad ces bya'o/ /de la chags pa bar ma gang zhe na//gang gis chags pa med pa yang ma yin la chags pa chen po yang ma yin pa nyid de dman pa'i chags pa'o/ /brjed ngas pa gang zhe na sems kun du 'khrugs pas don du mi gnyer ba nyid dang / kun du gang gis dran pa nyams par gyur pa nyid de ma 'dris pa dang /rab tu sun pa las byung ba nyid do/ /'khrul pa gang zhe na gang gis sems rnam pa gzhan la gzhan du 'di 'dzin pa la sogs pa ste gang gis gang dang mi mthun par 'dzin pa ste/ gang gis dogs pa dang bcas pa la sogs pa las byung ba'o/ /mi smra ba gang zhe na/ ngag gi las spangs pa ste tha snyad rnams rab tu spangs pa nyid do//skyo ba gang zhe na gang gis gang la kun du 'khyud pa la sogs pa ste/ skyo ba nyid skyo bas de dag gis chos dang bral ba nyid do/ /le lo gang zhe na gang gis don med pa'i las sngon du song bas gang la gang du gnas par 'gyur ba la sogs pa mi byed pa ste go cha med pa dang /sbyor ba dang bral ba dang / kun du 'god pa dang mi 'jug pa dang ldog pa la sogs pa'i chos dang bral ba'o/ /the tshom gang zhe na/ lam dang 'bras bu la sogs pa la gang yid gnyis za ba ste grub pa med pa dang spangs pa med pa dang thob pa med pa dang / myur du bla na med pa'i gang zag la brten nas yin nam ma yin du snyam sems pa la sogs pa'i sems gnyis su gyur pa nyid do//'di dag yongs su 'phel ba dang 'grib par byed pa'o/ /de ci'i phyir zhe na/ gang gis de dag 'phel ba dang 'grib par nus pa de'i phyir de la de skad ces bya'o/ / de nas snang ba gsum gyi go rims gtan la dbab par bya ba'i phyir/gang yang rnam shes gsum dang po/ /zhes bya ba la sogs pa smos te/ rnam par shes pa gsum gyi dang po ni de'i ming can snang ba'o/ /gnyis pa snang ba mched pa ste/ /zhes bya ba ni snang ba mched pa ni snang ba la ltos nas gnyis pa'o//de ni stong pa cher 'gro la/ /zhes pa ni snang ba thob pa nyid do/ /gnyis sngon du 'gro ba'o/ /de yang 'od gsal bar 'gro'o/ /zhes pa ni des thams cad stong pa 'od gsal ba thob par 'gyur ro/ /'di dag gi go rims kyang slob pa'i go rims dang rang bzhin 'byung ba'i go rims dang mthar phyin pa'i go rims so //de la slob pa'i go rims gang zhe na gang zhig rim gyis slob par 'gyur ba ste/ 'di ltar 'phong gi slob dpon nam slob ma mkhas pa dag ni thog mar ba lang gi ko ba la slob par byed do/ /gang gi tshe ba lang gi ko ba la lobs pa de'i tshe shing leb la slob par byed do zhes bya ba la sogs pa rgyas par gsungs pa'i phyir ro//'di ni slob pa'i go rims nyid do/ /rang bzhin 'byung ba'i go rims ni ma bcos par yod pa'i chos te 'di ltar rlung las ni rnam par shes pa zhes bya ba'i bshad pa/ blo gros chen po shing a mra'i 'bras bu ni rim gyis skye'i cig car ni ma yin no zhes bya ba 'di dang /gzhan yang / bskyed pa'i rim la legs gnas shing / /rdzogs pa'i rim pa 'dod rnams la/ /thabs 'di rdzogs pa'i sangs rgyas kyis/ /skas kyi rim pa lta bur gsungs/ /zhes bya ba la sogs pa'i sgra'i rjes su 'brangs te gsungs pa shes par bya'o//'od gsal ba las ni snang ba thob pa 'byung ngo zhes bya ba la sogs pas ni mthar phyin pa'i go rims bstan to/ /de bas na gang gis gang zhig legs par rtogs par 'dod pa dang myur du rtogs par 'dod pa dang / thabs sla ba rtogs par 'dod pas ni ji skad du gsungs pa dang bshad pa'i go rims la mkhas par bya'o//de bas na snang ba gsum pa 'dis ni sems can thams cad 'phel ba dang 'grib par byed do zhes bya ba rtogs par bya ba'i phyir/ snang ba gsum gyi mtshan nyid can/ /zhes bya ba la sogs pa gsungs te/ de la snang ba'i mtshan nyid gang zhe na rnam pa med pa'i rang bzhin rang rig pa lus dang ngag med pa ste/ji ltar ston ka'i dus su nam mkha' dri ma med pa la zla ba'i 'od zer gyis rab tu snang zhing kun du snang ba dang / khyab par byed pa de bzhin du rang bzhin gyis gsal ba'i rnam pa dngos po ma lus pa thams cad la dmigs pas na/snang ba ste / don dam pa byang chub kyi sems shes rab kyi snang ba stong pa dang po ste/ oM zhes bya ba'i ngag gi sgo la brten nas rang gi sa bon ston par byed pa ste/ mos pa dman pa'i sems can rnams kyis de bzhin gshegs pas dgongs te gsungs pa rtogs par mi 'gyur bas zla ba'i dkyil 'khor gyi gzugs so zhes dmigs par byed cing pad+ma'am bud med kyi gzugs la sogs pas yongs su gsal bar brjod pa 'jug par 'gyur ro//snang ba mched pa'i mtshan nyid ji lta bu zhe na gzung ba dang 'dzin pa dang bral ba lus dang ngag med pa ste/dper na ston ka'i dus su nyi ma'i 'od zer gyis khyab pa bzhin du shin tu gsal zhing dri ma med pa'i ngo bo nyid du dngos po ma lus pa dmigs pa byang chub kyi sems kun du bzang po'i rim pa gnyis pa shin tu stong pa'i mtshan nyid can/ AH zhes bya ba'i ngag gi sgo la rten par byed pa'i sa bon bstan par bya ba'i rgyu ste/mos pa chung ba'i sems can rnams kyis de bzhin gshegs pas dgongs te gsungs pa rtogs par mi 'gyur bas nyi ma'i dkyil 'khor la brten nas dmigs par byed cing rdo rje rtse lnga pa'am rin po che 'am/ nyin mo 'am/ g.yas pa zhes bya ste sra ba'i rnam pa dang / kun du rgyas pa'i rnam pa ni sems las byung ba kun rdzob kyi gzugs so/ /snang ba thob pa'i mtshan nyid gang zhe na nam mkha'i mtshan nyid dngos po thams cad dang bral ba lus dang ngag med pa ste/ ji ltar mtshams kyi smag la bab pa ngo bo khyab pa bzhin du phra zhing bdag med pa snang ba med pa kun du nye bar snang ba med pa ste srog dang rtsol ba mi rgyu bas sems med pa mi g.yo ba/AH zhes bya ba ngag gi sa bon la brten pa'i sgo yongs su grub pa blun pa/ zhen pa gang gis gang la g.yo ba med pa ma rig pa 'di ni snang ba thob pa zhes bya'o/ /'di dag gis las ci byed ce na/ /sems can khams ni ma lus pa'i//rang bzhin rtsa ba nyid yin no/ /zhes pa/ sems can thams cad yongs su skye ba dang kun du 'chi ba la sogs pa byed pa ste/ byams pa'i gsung gis ji lta bur yongs su bshad pa lta bu'o/ /des na yul 'di dag la ni shes pas so sor nges par 'dzin te de'i rlung gis nye bar blangs pa nyid do zhes bya ba 'di bstan la/de ni re re'i don snang ba/ /zhes pa ni gzugs dang sgra la sogs pas shes pa so sor nges par 'gyur ro/ /de bas na zhes bya ba la sogs par snang ba'o/ /gang gi stobs kyis 'byung zhe na/ de ni re re'i don snang ba/ /rlung gis blangs nas 'dzin byed la//zhes pa rlung gis shes pa kun du g.yo bar 'gyur ro/ /shes pas ni yul 'dzin par 'gyur ro/ /rlung dang rnam shes ni rlung dang rnam shes te lhan cig tu 'byung zhing mtshungs par ldan pa'i phyir de la de skad ces bya'o/ /de gang la gnas she na/ rlung dang ldan pa'i rnam shes ni/ / rtag tu 'gro la gnas par 'gyur/ /zhes pa ste rlung dang shes pa gnyis ni 'gro ba thams cad la gnas par 'gyur ro zhes bya ba'i don to/ /de dag gi don ni 'di skad du ston to/ /shes pa bems po'i ngo bo las log cing rang rig pa ni sems can thams cad la rang bzhin gyis gnas te kun du g.yo ba dang rab tu 'khrul pa'i bya ba byed par 'gyur ba med do//gang zhig tu 'di dag rlung gis bskul nas mig la sogs pa la brten te gzugs la sogs pa la dmigs nas so sor rnam par rig par 'gyur ro/ /gang rnam par rig pa de ni gtso bo yin par 'gyur ro/ /gang gtso bo yin pa de ni nges par gzung ba nyid dang ldan par 'gyur ro//gang nges par gzung ba gnyis ldan pa de ni nges pa'i shes pa myur du skye bar 'gyur ro/ /de bas na gang dang gang ldan pa de la de dang des gang du nges par rtogs pa de ni dka' ba ma yin te bshad par bya'o/ / sems de las kyang / rang bzhin ji ltar 'byung bar 'gyur/ /zhes nye bar rtog pa gang dag la rab tu gsal bar bshad pa/ e 'di ni rlung khams chen po ste zhes pa khams phra bar gyur pa nyid do/ /rnam shes gsum gyi bzhon pa yin/ /zhes pa snang ba la sogs pa'i shes pa'i bzhon par gyur pa nyid do//de yi rang bzhin rtag tu ni/ /ji lta ji ltar 'gro bar 'gyur/ /zhes pa shes pa po la yul la dmigs pa las rang bzhin de dang de'i rnam pa ma lus pa dus thams cad du 'byung bar 'gyur ro/ /ji skad du bcom ldan 'das kyis ye shes rdo rje kun las btus pa zhes bya ba las gsungs te/de nas byang chub sems dpa' sems dpa' chen po byams pa stan las langs te/ bcom ldan 'das kyi zhabs la spyi bos phyag 'tshal nas bcom ldan 'das la 'di skad ces gsol to/ /e ma'o ston pa rnam par shes pa gsum po rtogs par dka' ba mchog tu rtogs par dka' ba ste/rnam par shes pa gsum gyi dbye ba bstan du gsol/ bcom ldan 'das kyis bka' stsal pa/ rnam par shes pa ni 'od gsal ba las 'byung ngo / /de ni sems dang yid ces bya ste kun nas nyon mongs pa dang rnam par byang ba dang de'i bdag nyid can gyi chos thams cad kyi rtsa ba yin no//de las bdag dang gzhan du rtog pa 'byung bar 'gyur ro/ /rnam par shes pa de rlung la zhon te rlung las ni me'o/ /me las ni chu'o/ /chu las ni sa'o/ /de dag las ni phung po lnga dang / skye mched drug dang / dbang po lnga rnams te de dag thams cad ni rlung dang 'dres par 'gyur ro zhes bya ba la sogs pa rgyas par gsungs so//de nas ye shes kyi phung po lnga yang nye bar thob par bya ba'i phyir/ 'di ni phung po lnga rnams su/ /zhes bya ba la sogs pa smos te phung po lnga nyid kyang sems las 'byung bar bstan to/ /de yang gang zhe na gzugs tshor ba zhes bya ba la sogs pa smos te/gzugs ni gzugs kyi phung po ste gzhig cing gzhom du rung ba la sogs pa'i phyir ro/ /tshor ba ni myong ba'o/ /'du shes ni mtshan mar 'dzin pa nyid do/ /'du byed ni mngon par 'du byed pa nyid do/ /rnam par shes pa ni rnam par shes pa'i phung po ste dmigs pa so sor rnam par rig pa'i phyir ro//'di dag gis ni sems nyid gzugs su snang ba nyid du bstan to/ /gal te de lta na ni gzugs med pa las ni gzugs su snang bas rgyu'i byed pa dang / 'bras bu'i byed pa gzhan du nye bar sbyar bar 'gyur ro/ /'di gnyis ni ngo bo gcig pa yang ma yin te/gzugs dang gzugs med pa gcig gis gcig spangs pa yin pa'i phyir ro/ /'brel pa yod par nges pa med de/ gang gis gang gi dus na rag las par 'gyur ba dang med na mi 'byung ba 'gyur ba'i nges pa med do zhe na ma yin te/ rnam par shes pa 'pho ba'i mdo las 'di nyid rgyas par gsungs te/bzang skyong dper na/ rlung gi khams gzugs can ma yin pa yang bstan du yod cing gzung du med pa las gzugs su snang ngo / /de la bstan du yod pa ni shing 'gul zhing g.yo ba dang sgra 'ur 'ur po'i skad 'byin pa dang / grang ba dang dro ba'i reg pas tshor ba skyed pa yin yang rkang lag dang gdong dang mig la sogs par dmigs par mi 'gyur te/sngo bsangs dang dkar ba dang / dmar ba zhes bya ba la sogs pa'i kha dog yongs su gsal ba mi dmigs so/ /bzang skyod de bzhin du rnam par shes pa'i khams 'di yang gzugs su mi dmigs shing gzugs su snang bar mi 'gyur te 'on kyang gang la gnas kyang 'byung bar 'gyur ro//de bas na khyod kyi bye brag de dag gis rnam par shes pa'i khams rtogs par bya'o zhes bya ba la sogs pa gsungs so/ /de'i phyir rlung dang rnam par shes pa gzugs med pas rnam pa gsum mar gyi nang du mar bcug pa dang 'dra bar 'dres par gyur nas 'jig rten dang 'jig rten las 'das pa'i bya ba thams cad rdzogs par byed do//gzhan yang / rang rig tsam gyi ye shes ni/ /nam mkha' 'dra bar mtshan nyid med/ /'on kyang de la dbye ba yod//mtshan mo nyin mo mtshams bdag nyid/ /snang ba dang ni snang ba mched/ /de bzhin snang ba thob pa de/ /sems ni rnam pa gsum du bshad/ /de yi gzhi ni bshad par bya/ /phra ba'i gzugs can rlung dang ni/ /ye shes dag ni 'dres 'gyur pa / /dbang po'i lam nas byung nas ni//yul rnams la ni dmigs par byed/ /gang tshe snang ba ldan gyur pa/ /rlung ni bzhon par gyur pa yin/ /de tshe rang bzhin de thams cad/ /ma lus lus pa med par 'byung / /rlung ni gang dang gang du gnas/ /de dang de ni rang bzhin 'byung / /zhes bya ba la sogs pa rgya cher gsungs so//gzhung gzhan dag las kyang rnam par shes pa 'dis ni ji srid du lus skye bar byed/ 'chi bar byed cing nying mtshams sbyor bar byed kyi / /rnam par shes pa la ni skye ba dang 'chi ba yod pa ma yin no zhes bya ba la sogs pa rgya cher gsungs so/ /de nas ye shes lnga'i mtshan nyid rgyas par bshad par bya ste de'i phyir/mnyam nyid so sor rtog pa dang / /zhes bya ba la sogs pa gsungs te/ de la mnyam pa nyid ces bya ba ni rkang med dang / rkang gnyis dang rkang bzhi dang / rkang mangs dang / 'jig rten gyi chos brgyad la sogs pa rang bzhin gyi sems tsam dang rang bzhin med par gcig par rtogs pas ni mnyam pa nyid do//gang gis gang gi de nyid yongs su shes par gyur pa de ni de'i ye shes yin pa'i phyir de la de skad ces bya'o/ /gang gi phung po dang khams dang skye mched dang / rten cing 'brel par 'byung ba dang / phyi dang nang gi chos thams cad so sor rnam par phye ste rnam par brtags na thams cad sangs rgyas kyi rang bzhin no//chos thams cad kyi cha shas ni 'di dag go zhes pad+ma'i 'dab ma ltar so sor rtog pa ste gang la gang gis chos yod par gyur pa gang dang gang yin pa de dang de'i ji ltar gyur pa shes pa de la de skad ces bya'o//bya ba grub pas na bya ba grub pa nyid de/ bdag dang gzhan gyi bya ba lus dang ngag dang yid kyi las yongs su rdzogs par gyur pa nyid gang la gang gis ji ltar yongs su byed pa de la de skad ces bya'o/ /me long ni me long lta bu'i ye shes te/ phyi dang nang gi chos thams cad me long gi gzugs brnyan snang ba bzhin du snang ba ste/chos gang zhig gang gis ji ltar yongs su shes par gyur pa de la de skad ces bya'o/ /chos kyi dbyings ni chos kyi dbyings kyi ye shes te lus dang ngag dang yid kyi sgrib pa dag cing las dang nyon mongs pa las grol te/dge ba dang mi dge ba'i bag chags phra rgyas ma lus pa thams cad spangs nas gnas pa ni chos kyi dbyings spros pa thams cad dang bral ba'i ye shes te/ 'di dag gi don ni sems nyid thog ma la sogs pa dang bral yang ye shes su yang 'gyur ba ste gong du brjod pa'i lung nyid bzhin no//de nas sems de nyid skye mched kyi ngo bor yang 'gyur ro zhes bya ba de nyid bstan pa'i phyir/ yid kyi skye mched nyid dang ni/ /zhes bya ba la sogs pa smos te chos la dmigs pa dang / bdag dang gzhan gyi yul rig pa dang / spyi dang bye brag la sogs pa rig par byed pa ni yid kyi skye mched de dus gcig pa nyid do//mig dang zhes bya ba la sogs pa ni yul gcig pa nyid de rang gi yul la dmigs pa dang / rang gi mtshan nyid rig pa la sogs pa'o/ /de'i sems la dmigs pa ni gnas pa'i rlung la dbang thob nas 'byung ngo / /gang gis gnas pa ni gang zhig gang du byas pa de la rag las par 'gyur ro zhes bstan pa'i phyir/gang yang khams gsum sems can rnams/ /zhes bya ba la sogs pa gsungs te/ theg pa chen po'i rigs can no/ /srog dang rtsol ba ni srog dang rtsol ba ste rtsa ba dang yan lag gi rlung ngo / /'di la brten nas ci byed ce na/gsang sngags rgyal po ste/ rdo rje bzlas pa zhes bya ba'i don to/ /'di dag ni 'og nas/ /sna yi rtse mor yungs kar bsam/ /zhes bya ba la sogs pas kyang ston la/ 'di dag rgyas par ni bshad pa'i rgyud las gsungs te/ sangs rgyas lnga yi rigs gnas pa//sna rtse'i bu ga las byung zhing / /rlung lnga steng du yang dag rgyu/ /lus la rtag tu spyod par 'gyur/ /kun rdzob snar ni spyod par ni/ /sgo de las ni rnam par 'byung / /g.yon dang g.yas dang gnyi ga dang / /dal bar rgyu dang rnam pa bzhi/ /zhes bya ba la sogs pa gsungs te 'di dag gis rgyas par shes par bya'o//'og nas so sor sdud dang zhes bya ba la sogs pa'i skabs su yang 'chad par 'gyur ro/ /mi shes bsam gtan klog pa spangs/ /zhes pa 'dis ni slong mo za zhing mi bzlas te zhes bya ba la sogs pa bstan to/ /'dir ni sgom pa'i rten dang thabs spang bar bya ba tsam zhig dngos su bstan la/yon tan dang las dang 'bras bu shugs nyid kyis bstan pas de las gzhan gyi spros pa dang bcas pa'i bshad pa thams cad ni shugs kyis 'dir shes par bya'o/ /rgyas par ni 'og nas shes par bya'o/ /de nas dge ba dang mi dge ba'i las dang 'bras bu sems las 'byung ngo zhes bstan pa'i phyir/'byung ba 'di las zhes bya ba la sogs pa gsungs te 'byung ba ni snang ba gsum rkyen dang bcas pa'o/ /rang bzhin ni bshad zin to/ /dge dang mi dge ba'i las zhes pa ni 'di las dge ba dang mi dge ba'i las byung zhe'o//de las skye ba 'byung ba yin/ zhes bya ba ni bzang po dang ngan pa dang 'dod pa dang mi 'dod pa la sogs pa 'byung bar 'gyur zhes pa'o/ /'di dag rgyas par ni bcom ldan 'das kyis rdo rje gtsug tor gyi rgyud las gsungs te bcom ldan 'das kyis bka' stsal pa gsang ba'i bdag po nyon cig /lus kyi nyes par spyod pa ni rnam pa gsum mo/ /ngag gi nyes par spyod pa ni rnam pa bzhi'o/ /yid kyi nyes par spyod pa ni rnam pa gsum ste de dag gis sems can dmyal bar ltung bar 'gyur ro/ /phyag na rdo rjes gsol ba lus kyi nyes par spyod pa dang ngag gi nyes par spyod pa dang /yid kyi nyes par spyod pa ni du zhig mchis/ bcom ldan 'das kyis bshad du gsol/ /bde bar gshegs pas bshad du gsol/ /bcom ldan 'das kyis bka' stsal pa/ gsang ba'i bdag po nyes par spyod pa de nyid ni tha mal pa rnams te/de la pha ma dang bla mar gyur pa la sogs pa gsod pa dang / brdeg par spyod pa ni nyes par spyod pa lci ba'o/ /srog gcod pa la sogs pa mi dge ba'i las kyi lam rnams ni nyes par spyod pa tha mal pa'o zhes bya ba la sogs pa rgyas par gsungs so/ / de nas phung po lnga ni yongs su dag pa'i rigs lngar bskyed pa'i rim par 'gyur la/ de dag sgyu ma'i dpe bcu gnyis kyis nye bar mtshon pas sgyu ma lta bu'i skur 'gyur ro zhes bstan pa'i phyir/ 'gro bar 'byung ba'i phung po yang / /zhes bya ba la sogs pa smos te/ /'gro bar 'byung ba'i phung po ni gzugs la sogs pa'o//sangs rgyas lnga yi bdag nyid de/ /zhes bya ba ni rnam par snang mdzad la sogs pa sangs rgyas kyi rang bzhin te/ mdor na phung po lnga rnams ni/ /zhes bya ba la sogs pas rgyas par bstan to/ /mngon par byang chub pa rnam pa lnga ni sa bon yongs su rdzogs par 'dod pas zla ba la sogs pa yongs su sgrub pa'o//ming gis bskul ba ni ming gis bskul ba ste rang gi rkyen gyis bskul ba'o/ /yang na ming gis bskul ba ni se gol gyi sgras bslangs te gang gis de kho na nyid gsal ba yongs su rdzogs par 'gyur ba'o/ /de nas sa la sogs pa 'byung ba lnga po 'di dag ni spyan ma la sogs pa yul gyi rang bzhin no zhes bstan par bya ba'i phyir/rlung dang me dang chu dang sa/ /zhes bya ba la sogs pa smos te phyi dang nang gi sra ba'i dngos por gyur pa dang / rten par byed pa'i sa ni spyan ma'i rang bzhin no/ /gsher ba dang sdud par byed pa'i chu ni mA ma kI'i rang bzhin no//tsha ba dang smin par byed pa'i rang bzhin me ni gos dkar mo'i rang bzhin no/ /yang zhing g.yo ba'i rlung ni sgrol ma'i rang bzhin no/ /ye shes bdag nyid spyan gsum ni/ gang la gang du ji ltar gnas pa de dang de la de skad ces bya'o/ /lhag mas ni yon tan bstan pa nyid do//de nas sku dang gsung dang thugs byin gyis brlab pa bstan par bya'o zhes bya ba 'byung bas de bshad pa'i phyir/ thams cad de bzhin gshegs pa'i lus/ /zhes bya ba la sogs pa smos te/ de bzhin gshegs pa thams cad ni rdo rje 'chang chen po la sogs pa ste/ de'i lus ji ltar bya zhe na/ phyag rgya bzhis ni rgyas btab cing / /zhes bya ba ni chos dang las dang dam tshig dang phyag rgya chen pos thob par bya ba'o/ /mig la sogs pa'i bdag nyid der/ /zhes bya ba ni mig dang rna ba la sogs pa'i nang la sogs pa'o/ /ci bya zhe na sa snying la sogs rab tu brtag /ces pa ste mig la sogs par sa'i snying po la sogs pa bsgom par bya'o zhes bya ba'i don to/ /de nas bdud thams cad dang bar du gcod pa thams cad spang bar bya ba'i phyir lus 'di ni khro bo bdud thams cad nges par 'joms pa'o zhes bstan par 'gyur bas rol ba'i dga' ba ni rol pa'i dga' ba ste snyoms par 'jug pa'i bdag nyid can no//khro bo'i rgyal po ni khro bo'i rgyal po ste/ gang zhig gang las gang du gyur pa de la de skad ces bya'o/ /de nyid ni stobs chen te gdug pa thams cad 'dul ba'i stobs chen po dang ldan pa gang yin pa de la de skad ces bya'o//dgod pa'i gnas bstan pa gsungs pa/ /de ni phyogs mtshams ngo bo ru/ /dpung pa yan lag rnams su brtag /ces pa ni phyi rol gyi phyogs dang mtshams kyi ngo bo dang nang gi dpung pa la sogs par gang gis sgom par gyur pa de la de skad ces bya'o/ / 'di dag gis ni sprul pa'i dkyil 'khor sbyor ba gsum yang gsungs la/ sbyor ba gcig kyang gsungs so/ /'di dag rgyas par ni/ /sems kyis gzhan ni mi bsam par/ /sems dpa' chen pos mnyan par gyis/ /rdo rje slob dpon lus 'di la/ /rgyal ba'i sku ni rim bzhin gnas//dang po sku yi rdo rje ni/ /zhes bya ba 'og nas 'chad do/ /yang 'di skad du/ gang gi phyir sprul pa'i sku gsang ba 'di dngos su tha dad pa'am/ tha mi dad pa'am bstan nas snang ngam 'on te ma bstan na snang de las cir 'byung / gal te tha dad na ni gcig pa nyid du bshad par mi 'gyur/gang zhig gang las gyur pa de yang 'di las ma gyur pa med pa dang 'gal bar gnas pa dang rnam par bshad pa mi rigs so zhes pa de gsal bar bshad pa'i phyir/ /de dang de yi rigs byung ba/ /zhes bya ba la sogs pa smos te/ de dang de ni rdo rje'i rigs la sogs pa ste gang dang gang zhe na lha dang lha mo ste/rigs can rnams smin pa dang grol bar bya ba'i phyir snang zhe'o/ /'di dag gis kyang 'di skad du ston par 'gyur te / gang gi phyir de bzhin gshegs pa thams cad ni thugs rje dang smon lam gyi dbang gis sems can gyi don du mi 'gyur ba nam yang mi mdzad la/sangs rgyas kyi rol mo 'dis kyang sems can thams cad smin cing grol bar 'gyur bas na de la de bstan to zhe'o/ /'di dag gis ni lha'i sku sna tshogs par snang ba drang ba'i don yin zhes pa'o/ /'o na nges pa'i don gang yin ji ltar mthong zhe na/ gnyis su med cing dbyer med pa rang bzhin gyis 'od gsal ba yin no zhes rtogs par bya ba'i phyir/ de bas gnyis med mthong ba yi/ /zhes bya ba la sogs pa smos te de bas na zhes pa ni tshigs su bcad pa gong ma gtan tshigs nyid yin par bstan to/ /gnyis med mthong ba ni gnyis med mthong ba ste gang gis 'od gsal ba mthong ba'o//des cir 'gyur zhe na/ ye shes gsum mthong phyir zhes pa snang ba gsum gyi de bzhin nyid gang du mthong bar 'gyur ba de la de skad ces bya'o/ /'di dag gis ni de kho na nyid gang yin pa 'di nyid nges pa'i don yin la blang bar bya ba yang yin pas thabs gzhan gyis kyang rnyed pa ma yin par bstan to//'o na ci rnyed par 'gyur zhe na/ snang ba la sogs pas rnyed par 'gyur ba'i phyir/ dman dang bar ma mchog dang ni/ /dam pa'i yul la gzhag par bya/ /zhes pa snang ba dang snang ba mched pa dang / snang ba thob pa la gnas par bya zhes pa'i don to//de nas langs pa'i dus su spyod lam la mi gnas na yongs su grol bar mi 'gyur bas mthong ba la sogs pa 'di gang dang gang du brtag ce na/ de bstan pa'i phyir dbang po rang nyid ces bya ba la sogs pa smos te/ mig gi dbang po la sogs pa gang zhig gzugs la sogs pa gang dag la dmigs par gyur pa ste/de ci ltar bya zhe na/ dbang po gang dang gang spyod yul/ de de snang ba can nyid tsam / /zhes pa gzugs la sogs pa 'di dag sems kyi snang ba tsam yin gyi phyi rol na ni ma yin no/ /de ci'i phyir zhe na/yul gcig la 'dod pa'i dbang gis tha dad du gnas pa'i phyir ro/ /yang yul 'di dag ni sems tsam nyid yin te/ yod pa ma yin pa la don du snang ba nyid de rab rib can gyi shes pa bzhin no zhes pa dang / ji ltar byis pas rnam brtags pa'i/ /phyi rol don ni yod ma yin//bag chags kyis ni dkrugs pa'i sems/ /don du snang bar rab tu 'byung / /zhes pa la sogs pa'i lung dang rigs pa dag gis phyi rol gyi chos thams cad sems tsam nyid du bstan pa ni gong du bshad pa nyid do/ /de bas na phyag na rdo rjes bshad pa/ thabs kyi rgyud du ni shes rab kyi rgyud shes par bya'o/ /shes rab kyi rgyud du ni thabs kyi rgyud shes par bya ba la sogs pa gsungs pas 'di ni 'di ltar shes par bya'o/ /de bas na bdag nyid kyi spyod lam 'di ni bstan par 'gyur bas kun rtog la sogs pa nye bar dgag par dgongs so/ /de ni dbang pos gzugs la sogs pa'i zhen pa bzlog nas bdag nyid tshim par bya'o zhes 'byung bas de bstan par bya ba'i phyir gsungs pa/dbang po de de'i lam nas ni/ /zhes bya ba dbang po la brten nas gzugs yongs su mthong bar gyur pa'o/ /cir 'gyur zhe na/ sgrub pa pos ni yul thob pa//zhes pa/ sgrub pa po bdag nyid kyis lha dang lha mor byas pa de ni yul la dbang thob par gyur pa'o / /de ji ltar bya zhe na/ de nas de rnams ma lus par/ /tshim par bya phyir dbul bar bya / /zhes pa gang gis bdag nyid phyag rgya chen por yongs su rdzogs par bya ste bdag nyid la kun du dbul zhes pa'i don to//de dag gi don yang 'di skad du ston par 'gyur te/ gang gis rang nyid lha'i cho ga yongs su rdzogs par bya ste/ rnal 'byor ma dang thams cad kun du gang gis legs par gnas nas la la ni gzugs kyi lha mor gyur te bdag nyid kun du mnyes par gyur to//la la ni sgra'i lha mor gyur te bdag nyid kun du mnyes par gyur to/ /la la ni dri'i lha mor gyur te bdag nyid kun du mnyes par gyur to/ /la la ni ro'i lha mor gyur te bdag nyid kun du mnyes par gyur to/ /la la ni reg bya'i lha mor gyur te bdag nyid kun du mnyes par gyur to//la la ni snyoms par zhugs pa'i yum du gyur te bdag nyid kun du mnyes par gyur to/ /'di dag gi dus su yang rol pa sna tshogs kyi glu dang rol mo sna tshogs kyi gar dang / rol pa sna tshogs kyis 'phyang ba dang / rol pa sna tshogs kyis sgeg pa dang / rol pa sna tshogs kyis rtse ba la sogs pa la kun du spyod pa yongs su spyod do/ / da ni sku gsum yang bshad par bya ste/ chos kyi sku la sogs pa 'di gcig pa'am tha dad par 'gyur / de las cir 'gyur gal te gcig pa yin na ni snang ba nyid dang 'gal bar 'gyur la/ tha dad na ni rigs pas 'khrugs so zhe na ma yin pa'i phyir/sku gsum dag ni zhes pa chos kyi sku dang longs spyod rdzogs pa'i sku dang sprul pa'i sku'o/ /tha dad na ni 'gal bar gnas so/ /de sus bstan zhe na/ skyob pas bstan te sems can tha dad pa la gzhol ba'i dbang du bya ste bcom ldan 'das kyis sku gsum tha dad par bstan to zhes bya ba drang ba'i don to//'o na nges pa'i don du ji ltar bstan zhe na/ rdzogs pa'i rim gyi sbyor ba yis/ /zhes pa ni chos kyi sku la sogs pa'i zung 'jug slob pa'i rim pas so/ /cir 'gyur zhe na/ gcig tu yang ni 'gyur ba yin/ /zhes pa dbyer med do zhes pa ste/ gang zhig gang dang gang du gnyis su med cing gnyis su dbyer med pa'i rang bzhin can gang yin pa de la de skad ces bya'o//gang zhig sangs rgyas sku'i mtshan nyid/ /ces pa ni sgyu ma lta bu'i sku'o/ /kun rdzob kyi bden pa ni snang ba tsam du mi slu ba ste rim pa gsum pa'o/ /de nyid rdzogs pa'i sbyor gyur pas//zhes pa ni ril por 'dzin pa dang rjes su gzhig pa'i sbyor bas so/ /cir 'gyur zhe na/ 'od gsal pas ni rnam par dag /ces pa/ gcig dang du ma dang bral bar gyur zhes pa'o/ /'dis ni sgyu ma lta bu de nyid 'od gsal bar 'gyur ba bstan to/ /de nas gang gis snang ba 'di nyid yongs su dag pas lha dang lha mor 'gyur ro zhes bstan pa'i phyir/tshig gi lam gyi yul 'di nyid/ /ces bya ba la sogs pa smos te/ tshig gi lam ni tshig gi brjod pa'i yul te snod dang bcud kyi 'jig rten no/ /gtso bo ni yab rnams so/ /gtso mo ni shes rab nyid de de'i skur snang ba gang yin pa de la de skad ces bya'o//sems can kun la phan bya'i phyir/ /zhes pa ni sems can rnams byang chub la sogs pa'i lam la dgod pa'o/ /'ja' tshon bzhin du snang ba yin/ /zhes pa ni phyogs gcig gi dpe nye bar bsgrubs pa'o/ /de nas sems gsum gyi ming gi rnam grangs bstan pa ni//sems dang sems 'byung ma rig pa/ /zhes bya ba la sogs pa gsungs te 'di dag ni shes pa gsal ba'i bye brag gis rnam par gnas par 'gyur ba'o/ /shes rab thabs dang zhes bya bas ni byed pa la ltos te rnam par gzhag go//stong dang zhes bya ba brjod pa bshad par bya ba'i phyir/ rang bzhin snang ba dbye shes nas/ /zhes bya ba la sogs pa smos te/ rang bzhin ni 'khrul ba nyid de gang zhig gang dang bral ba'i dus na 'byung ba de la de skad ces bya'o snang ba ni bshad zin to/ /de shes nas ci byed ce na/ de nas spyod pa rab tu bya/ /zhes pa gang zhig gang gis dus su gnas pa de la de skad ces bya'o/ /de cir 'gyur zhe na/ las kyi lus ni yongs spangs nas/ /zhes pa ni tha mal pa'i lus spangs pa'o/ /rdo rje'i sku ni rdo rje 'chang chen po'i sku ste/ gang gis gang la gnas na gang zhig gang du 'gyur ba de la de skad ces bya'o//da ni gang zhig gang gis dus su ji ltar bya zhe na/ thugs la 'jig rten pa rnams kyi/ /don spyod bzhag nas zhes pa sems can thams cad kyi don bya'o zhes bsam par bya'o/ /ji ltar bya zhe na/ de bzhin gshegs pa kun rdzob tu/ / sku sprul nas zhes stong pa nyid kyi ngang la snang ba la sogs pa rim gyis lha'i skur ldang ba'o/ /ji lta ji ltar 'dod la spyod/ /ces pa ni 'dod pa'i yon tan lnga la ji ltar 'dod pa bzhin spyod pa'o/ /de cir 'gyur zhe na/ yid bzhin nor bu mchog bzhin du/ /zhes pa ni dpe bstan pa'o//'dod pa thams cad ster bar 'gyur/ /zhes pa ni rang gang 'dod pa'i yon tan thams cad 'byung ba'o/ /sangs rgyas rnams kyi phun tshogs kyang / /zhes pa ni sangs rgyas kyi yon tan ma lus pa'o/ /stobs kyi blangs nas spyod par 'gyur/ /zhes pa ni gong dang 'brel pa nyid do//da ni gang zhig gis spyod pa la bslab pa'i cho ga ji ltar bya/ de las cir 'gyur zhe na/ rnal 'byor dbang po gang gang 'dod/ /ces pa ni gzugs la sogs pa'o/ /de de thogs pa med par bya/ /zhes pa ni dgag par mi bya zhes pa'o/ /cir 'gyur zhe na/ mnyam par ma bzhag rnal 'byor pa//rtag tu mnyam par 'jog par 'gyur/ /zhes pa ni de'i yon tan bstan to/ /'di yang kha cig 'di skad cas kyi ma 'di ci gang gis gang la gnas pa de'i der 'gyur ba zhig gam/ de las gzhan pas kyang 'gyur/ dang po ltar na ni gang zhig byed pa gang zhig kyang byed par 'gyur bas des kyang de ltar 'gyur ro//de las gzhan du ni 'di la yang gnod par 'gyur ro/ /phyi ma ltar na yang rang gi 'dod pa las gzhan du gyur pa nyid do zhe na 'di yang gong du bstan pa nyid do/ /chags pa la dga' ba'i rnal 'byor pa gang zhig gis gang du ji ltar gnas par ji ltar 'gyur zhe na/rdo rje pad+mo mnyam sbyor bas/ /zhes bya ni pho dang mo'i dbang po gnyis snyoms par 'jug pa'i phyir ro/ /ye shes gsum gyi cha rig pa/ /zhes bya ba ni rang bzhin med pa'i skye ba dang 'gag pa'i bye brag gi ye shes gsum rig pa'o/ /blo la gos dang ma gos pa// zhes pa ni gzung ba dang 'dzin pa'o/ /der ni bde bar rtag tu gnas/ /zhes pa ni bde ba nyid la gnas pa'o zhe'o/ /'di dag gi don yang gang gis rang gi bdag nyid kun du gnas par gyur nas gang du gang dang 'brel par byas nas kun du bde ba'i rnam pa can gyi sems dang po ni de'i skur pa la gzung ngo //der ni dang po 'phel bar 'gyur ro/ /de nas ni 'gag par 'gyur ro/ /sa pi ti'i gnas su ni rang gi rnam grangs la dang po ni 'phel bar 'gyur ro/ /de nas ni 'gag par 'gyur ro/ /de nas ni smad pa'i gnas su ni dang po ni 'phel bar 'gyur ro/ /de nas ni 'gag par 'gyur ro//gang gis gang ni log pa'i dus su yang 'di dag ni sbyor ba rab tu gnas par 'gyur ro/ /sgyu ma lta bu'i ting nge 'dzin ni bshad zin to/ /dngos bdag kun la rnam par rol/ /zhes pa ni snyoms par 'jug pa'o/ /sangs rgyas mdzad pa ni 'og nas ston te spyan mar 'gyur ro zhes bya ba la sogs pa dang dus so zhes bya ba la sogs pas bstan to//gtan la dbab pa'i bzhi la gnas/ /zhes pa ni bsam gtan la gnas pa'o/ /rnal 'byor lhag pa'i rnal 'byor dang / /zhes pa la sogs pa la ting nge 'dzin gang gis bskyed pa dang rdzogs pa'i rim pa rgyan dang bcas pa la rtse gcig pa'o//des cir 'gyur zhe na/ rnal 'byor chen por rang nyid 'gyur ro/ /rdo rje can ni gtso bo la sogs pa'o/ /mkha' 'gro ni mkha' 'gro ma'o/ /gang yang rnal 'byor de rang nyid/ /ces pa ni gang rdo rje can la sogs pa yang de nyid do zhes pas tha dad pa ma yin par bstan to//kun rdzob kyi bden pa la gang zhig gis gnas pas cir 'gyur zhe na/ bkag pa dag kyang byed pas na/ /zhes pa ni rtog pa'i dra ba dang bral ba'i phyir ro/ /bya dang bya min rnam spangs te/ /zhes pa ni phung po la sogs pa blang dor gyi chos spangs pa'o/ / de ltar shes pas cir 'gyur zhe na/ pad+ma la ni 'dam gyis bzhin/ /ngo bo nyid shes gos mi 'gyur/ /zhes pa ni chos thams cad kyi rang bzhin shes pas 'khor ba'i nyes pas mi gos zhes pa'o/ /yon tan brgyad ni dbang dang ldan pa la sogs pa'o/ /sems can thams cad rigs 'gyur zhing //zhes pa ni de lta bu'i chos dang ldan pa'i phyir ro/ /'jig rten khams rnams ma lus par/ /bdag nyid ye shes lus kyis spyod/ /ces pa ni de lta bu'i nus pa dang ldan pa'i phyir de la de skad ces bya'o/ /gtso bo gang du spyod 'gyur ba/ /zhes pa ni gtso bo gang dang gang du gnas pa'o//de yi khyim ni nam mkha' nyid/ /ces pa ni gang gis stong pa nyid kyi ngang la gnas pa'i phyir ro/ /bde ba chen po'i yul du byed pa ni bde ba chen po'i ting nge 'dzin to/ /rtag tu dgyes pa ni rtag tu dgyes pa ste/ rang bzhin gyis dga' zhes pa'i don to/ /'di la snang ba dbye ba la//zhes pa ni thun mtshams nyin mo mtshan mo yi/ /zhes pa ste gang gi mtshams la sogs par rang gi ye shes skye ba de la de skad ces bya'o/ /sna tshogs pa yi tha snyad dag /'jig rten pas ni yongs brtags pa/ /zhes pa ni bdag la sogs pa dang sa la sogs par brtags pa'o//lam gsum gyi ni dbye ba yis/ /ye shes gsum du rab tu 'gyur/ /zhes pa ni gang gis lam gsum la brten pas 'gag pa dang skye bar 'gyur zhes pa'o/ /skye dang gnas dang zhes bya ba'i don ni bshad zin to/ /dgod dang rtsed mo byed pa dang / /zhes bya ba la sogs pa 'di dag kyang spros pa dang bcas pa la sogs pa'i spyod pa ste bcom ldan 'das kyis kyang sangs rgyas thams cad dang mnyam par sbyor ba zhes pa las ji skad du gsungs pa bzhin no//bdag byin brlab chen ma gtogs pa/ /zhes bya ba la sogs pa'i tshig 'di dag gi don yang bdag byin gyis brlab pa med na nam yang 'bras bu dam pa mi 'thob ces bya ba'i don to//gzhan yang e/ zhes bya ba ni bdag go/ /baM ni bskyed pa'o/ /ma ni rtsa bo/ /ya ni dang po'o / /shru ni rtsa bo/ /taM ni gnas pa'o/ /e ni 'gro ba'o/ /ka ni skye ba'o/ /smin ni 'byung ba'o/ /sa ni de nyid de rig pa'o/ /ma ni 'byung ba'o/ /ye ni spong ba'o//b+ha ni 'byung ba'o/ /ga ni 'gro ba'o/ /bAn ni ster ba'o/ /sa ni btab pa'o/ /rba ni rtag pa'o/ /ta ni ston pa'o/ / thA ni gzhag pa'o/ /ga ni lhag ma 'gog pa'o/ /ta ni 'bul ba'o/ /kA ni gyur pa'o/ /ya ni dag pa'o/ /bA ka ni snang ba'o/ /tsi ta ni brjod pa'o/ /ta ni thob pa'o/ /hr-i ni spyod pa'o/ /da ni ster ba'o/ /ya ni gzhag pa'o//ba ni gnas pa'o/ /dzre ni rol pa'o/ /yo ni 'gyur ba'o/ /Shi ta ni mi 'gyur ba'o/ /b+ha ni spyod pa'o/ /ge ni dgos pa'o/ /Shu ni mthor ba'o/ /bi ni 'byung ba'o/ /dza ni 'phrul pa'o/ /ha ni spyod pa'o/ /ra ni med pa'o/ /'di dag kyang sgra'i rnam pa la ma rmongs pas gang gi dus su sgra gtan la phab nas phyis don gzhan du gtan la 'bebs pa'i dus su gang gang la zhes bya ba la sogs pa de de la zhes bya ba la sogs pas kun du gtan la dbab par bya'o//'di dag gis ni sbas pa'i don bstan to/ /yang lung gis bshad pa zhes pa ni mthar thug pa'i don bshad par 'dod pas so/ / de ci'i phyir zhe na/ gang gis gang du brtag par bya ba dang bral bar bya ba'i phyir/ rgyud ni 'di skad bdag gis thos/ /zhes pa ni spros pa thams cad dang bral ba'i de kho na nyid do/ /gsal ba 'ga' zhig dus yin te/ /zhes pa ni gang gis gang zhig yongs su gsal bar gyur pa de la de skad ces bya'o/ /rdo rje gsang ba ni sems gsum nyid de/slob ma'i lugs su 'byung ba'o/ /rdo rje dam tshig ni gsang ba gsum lugs las bzlog pa dang ldan pa nyid de/ ye shes nyid de de bzhin gshegs pas na ye shes de bzhin gshegs pa'o/ /ye shes phun tshogs bsam mi khyab/ /ces pa ni sangs rgyas kyi yon tan dpag tu med pa'o//yod med gnyi ga las 'das pa/ /zhes pa ni gang gis gang zhig spangs par gyur pa de'i phyir de la rag las par gyur pa'i chos de yang yongs su spangs pa'o/ /de la gnas med gnas pa ni gnas dang gnas pa'i rtog pa dang bral ba'o/ /nam mkha'i rang bzhin ni 'dus ma byas pa ste chos thams cad kyi de bzhin nyid do//thams cad mkhyen pa ni sangs rgyas te de'i ye shes ni sangs rgyas kyi ye shes so/ /des 'di yul du byed pa ni sgom pa'o/ /bzhugs pa zhes bya ba yang ji lta bu yin zhe na/ 'gro snying rnam dag ste chos thams cad kyi de bzhin nyid la bzhugs pa ni gnas par mdzad pa'o//de bas na bzhugs zhes bya ba la sogs pa'i tha snyad thams cad kyang don dam pa la 'jug par bya ba yin gyi don dam par brjod pa'i phyir ni ma yin no zhes bshad do/ /gzhan gong du bshad pa'o/ /de ltar zhes bya ba ni de'i phyir te/ 'di skad ces bya ba la sogs pa ni gang gis ji ltar yongs su bstan pa'i phyir zhes pa'o//zhugs pa'i tshig nyid kyis zhes bya ba ni tha ma smos pa nyid do/ /rgyud ma lus pa'i dgongs pa bstan pa ni rgyud ma lus pa'i don bstan pas te 'dis mjug bsdu ba bstan to/ /de'i 'og tu zhes bya ba la sogs pas ni 'di nyid kyi yan lag bstan par bya'o//'khor phun sum tshogs pa yang grangs ji lta tsam zhe na/ brjod kyis mi lang ba zhes bya'o/ /de bshad pa bgrang ba las 'das pa ni bgrang du med pa'o/ /gang zhig kun du bsam gyis mi khyab par gyur pa de la de skad ces bya'o/ /'o na lan gnyis smos pas ci zhig byed ce na/ gzugs dang yon tan zhes bya ba la sogs pa smos te 'di dag dpag tu med pa'o/ /des ni byed ce na/ gang gis gang zhig kun du snang bar gyur pa de la de skad ces bya'o/ /gzhan ni go sla'o/ /de nas gang gis gang zhig yongs su rdzogs par bstan pa ni/ gang gis lha'i 'khor lo yongs su rdzogs pa ste de nyid do//dam tshig rdo rje zhes bya ba gang zhig yin zhe na don yod par grub pa'o zhes gang zhig yongs su grub pa de la de skad ces bya'o/ /'o na sgrib pa rnam par sel ba la ci'i phyir dam tshig rdo rje'i sgrar brjod ce na/ 'dir de'i rigs dang ldan pa zhes bya ba la sogs pa smos te/ 'dir don yod grub pa'i rigs dang ldan pa gang yin pa de la de skad ces bya'o//de bas na gcig ni dngos su brjod pa nyid do/ /gcig ni btags nas bstan pa nyid do/ /rigs gzhan yang de bzhin du shes par bya'o/ /'di dag gis ni byang chub sems dpa'i 'khor bstan to/ /byang chub sems dpa'i 'khor kho na las ma gsungs sam zhe na ma yin pa'i phyir/byang chub sems dpa'i tshogs 'ba' zhig dang lhan cig bzhugs par ma zad kyi zhes bya ba la sogs pa smos te/ 'o na gang dang bzhugs she na/ de bzhin gshegs pa rnams dang yang lhan cig tu bzhugs pa ste bgrang ba las 'das zhes bya ba lhag ma rnams so/ /gzhan ni go sla'o/ / rdo rje 'chang chen po nyid kyi yan lag gi cha shas su gyur pa zhes pa ni 'khor thams cad gtso bo las tha dad du 'jug par mi 'gyur te/ gang gi phyir gang zhig gang las tha dad du med par 'gyur ba de'i phyir de la de skad ces bya'o/ /gang las shes she na/ 'di nyid las zhes pa gsang ba 'dus pa'o//mdor na zhes bya ba la sogs pa bshad zin to/ /de bas na zhes pa ni de'i phyir zhes pa'o/ /bcom ldan 'das de nyid kyi zhes pa ni rdo rje 'chang chen po zhes bya ba'i don to/ /rang gi sku'i dkyil 'khor spros nas zhes pa ni rang gi 'khor yongs su rdzogs pa'o/ /des ci byed ce na/ dkyil 'khor 'khor lo lta bus 'dul ba'i skye bo rnams dga' bar bya ba'i phyir zhes pa'o//gzhal yas khang gi dbus su bzhugs/ /zhes pa ni go bar mdzad do/ /de ltar zhes pa ni mjug bsdu ba'i tha tshig go/ /da ni zhes bya ba la sogs pas ni 'dod chags chen po'i spyod pa yongs su rdzogs par bstan par bya ba'i phyir ro/ / 'dod chags kyis 'dod chags rab tu spang bar bya ba'i phyir zhes bya ba la sogs pa ni bshad zin to/ /bshad ma thag pa ni gong du bshad pa nyid do/ /rang gi sa bon gyi 'od zer gyi lcags kyus drangs zhes pa ni snying ga nas phyung ste slar bsdu bas bsdus zhes pa'i don to/ /'di yang gang gi phyir gang zhig la byung nas gang du gnas par 'gyur ba de la de skad ces bya'o//de nas ci byed ce na bcom ldan 'das mchog tu dga' ba'i bde bas tshim par bya ba'i phyir zhes pa ni gang gi bde bas gang zhig gang du gnas par 'gyur ba de la de skad ces bya'o/ /de ci'i phyir zhe na/ gnas skabs snga ma ni sangs rgyas dang byang chub sems dpa'i dkyil 'khor te gang gis de yongs su spangs pa de la de skad ces bya'o//'o na gang du 'gyur zhe na/ lha'i bu mo'i gzugs su mngon par sprul nas zhes pa ni gang gis lha'i bu mo gang dang 'dra bar kun du mdzes par gyur pa gang yin pa de la de skad ces bya'o/ /lha'i bu mo'i gzugs snang ba yang gang dang gang yin zhe na sa'i khams ni sangs rgyas spyan lta bu'o zhes pa ni sa rdo rje las tha dad du gnas pa'o//'dir sa'i khams nyid sangs rgyas spyan lta bu'o zhes pa ni gang zhig gang las tha dad du gyur pa'o/ /yang na 'dir sa'i khams ni sangs rgyas spyan nyid ces pa ni gang zhig dang 'brel pa de la de skad ces ces bya'o//gzhan yang de bzhin no/ /'dod chags kyang yin la chen po yang yin pas gang zhig nyon mongs pa dang bral ba gang yin pa'i chos nyid do/ /'dod chags dang bral ba la sogs pa yang gang yin zhe na nyon mongs pa dang bral ba'o/ /gzhan go sla'o/ /gzhan yang gang zhig phyi rol gyi de bzhin gshegs pa'i 'khor de dag tu dmigs zhes pa la sogs pa'i don ni/gang gis gang zhig gang du 'dzin pa de dang de spang bar bya ba'i phyir zhes pa'o/ /bdag nyid sangs rgyas thams cad de/ /zhes pa ni rdo rje 'chang chen po dang sangs rgyas thams cad tha dad du med ces pa'o/ /rgyal sras thams cad nyid kyang yin/ / zhes pa ni byang chub sems dpa'i bdag por gyur pa yang yin zhes pa ste tha dad du med pa yin no/ /nges pa ni ma nor ba'o/ /da ni de nas zhes bya ba la sogs pa'i dgos pa bshad pa'i phyir/ da ni rgyud 'di la zhes bya ba la sogs pa gsungs te/ sems gtso bo yin pa ni ting nge 'dzin gtso bo yin pa'i phyir ro/ / mi bskyod pa ni thugs kyi ngo bo'i phyir ro/ /'di skad du ston to/ /sems snang ba dang bcas pa gang gi ting nge 'dzin gyi yan lag gis sbyangs pas thob pa de ni de'i rigs te de bas na de gtso bor gyur pa nyid do/ /de bzhin gshegs pa zhes bya ba la sogs pa'i don ni gang gis chos kyi 'byung gnas kyi nang du b+h+rUM la sogs pa'i de bzhin gshegs pa'i gzhal yas khang phyi dang nang shin tu gsal ba ji ltar smos pa'i rgyan thams cad dang ldan pa shin tu mdzes pa blta na sdug pa'i ngo bo nyid do zhes bstan to//de lta bu'i gzhal yas khang gi dbus su lhag par mos pa lha lnga'i rnam par bsgoms te slar rang la gzhug go/ /lung las kyang / pad+ma 'dab ma bzhir ldan pa'i/ /rigs lnga bskyed pa yang dag bsgom/ /zhe'o/ /nges pa'i don du bshad pa / rnam par shes pa'i bdag nyid can/ /zhes pa ni de'i ngo bo nyid dag pas der gyur pa'o/ /gzugs kyi phung po la sogs pa rnam par shes pa'i bar du ste 'di ltar phung po dang / khams dang skye mched thams cad rang gi shes pa'i rang bzhin te/de nyid ye nas spros pa dang bral zhing ma skyes pa'i rang bzhin thogs pa med pas sangs rgyas thams cad kyis bsten par bya ba'i phyir btsun mo'o/ /yongs su dag phyir gsal ba'o/ /'od zer thams cad kyi rang bzhin pas na sna tshogs kun du rgyas so/ /de bzhin gshegs pa thams cad kyi rang bzhin pas na de'i ngo bo nyid do//snang ba las byung ba dang / de'i rang bzhin pas na gsal ba la sogs pa ste/ 'dis chos thams cad kyi de bzhin nyid kyi ye shes kyi skur bshad nas/ de nas sems can thams cad dang byang chub sems dpa' la ji skad du bshad pa'i sku nyid gsal bar snang bar 'gyur ro zhes bya ba'i don to//nam mkha' kun ni don dam pa'i de bzhin nyid do/ /de'i ngang la rdo rje sems dpa' rab tu bzhugs pa ni yang dag pa'i ye shes kyi yul dang bral ba'i tshul du byas pa'o/ /don 'di nyid ni bskyed pa'i rim pa nyid do/ /de gsal bar bya ba ni bstan pa dang bshad pa'i rim pas so/ /'das pa dang zhes bya ba la sogs pa bshad pa'i don ni gang gis dus gsum gyi sangs rgyas thams cad 'dus pa'i bdag nyid can rdo rje sems dpa' sa bon la sogs pa'i gzugs kyis skye ba dang sdud pa'i tshul bstan pa nyid do//rdo rje 'chang chen po zhes bya ba la sogs pa 'dis ni de'i dgos pa bstan to/ ma 'ongs pa'i gang zag gis bskyed pa'i rim pa bsgoms na zhes bya ba nyid do//rdo rje sems dpa' dang 'dra bar 'gyur bar dgongs so/ /phung po la sogs pa ni yul dang dbang po thams cad do/ /kun rdzob byang chub sems ni khu ba ste zag pa med pa'i bde ba skyed pa'i phyir ro/ /gcig tu mdzad pa ni des mi rtog pa'i ye shes skyed pa'i phyir ro//de nyid bshad pa/ nam mkha'i dbyings zhes bya ba la sogs pa la/ rtsa phran stong phrag bdun cu rtsa gnyis ni byang chub kyi sems kyi sa bon gnas pa'i rtsa ste/ de rlung la sogs pa'i rim pas byang chub kyi sems phab pas zag pa med pa'i bde ba yongs su rgyas par 'gyur ro/ / dbang po gnyis ni rdo rje dang pad+ma ste skye ba la dbang ba'i phyir ro/ /des cir 'gyur zhe na/ 'dod chags chen po'i me ste gang la sems chen po dang ting nge 'dzin du ldan pa yod pa de la de skad ces bya'o/ /mchog tu dga' ba ni nyon mongs pa dang bral ba'i dga' ba'o/ /'di ni dbang po gnyis sbyor ba'i snang ba gsum mo//don dam pa'i bden pas gcig tu mdzad pa ni spros pa thams cad dang bral ba'i ye shes kyi rang bzhin med par gyur pa'o/ /stong pa nyid gsum ni gong du bshad pa'o/ /thams cad stong pa ni mthar thug pa nyid do/ /de ltar lhag par mos pas zhes bya ba ni drang ba dang spyi'i don du bshad pa yin gyi thams cad kyi ni ma yin no//yongs su dag pa dang yongs su ma dag pa ni slob pa dang mi slob pa dang / shes bya'i sgrib pa mtha' dag spangs pa dang ma spangs pa'i phyir ro/ /de la gtso bo ni yongs su dag pa'o/ /lhag ma ni yongs su dag pa dang ma dag pa nyid do/ /yi ge gsum ni oM AHhUM gsum mo//de nyid ni 'da' bar mi bya ba ni yongs su blang bar bya ba nyid do/ /de las byung ba ni yi ge gsum las byung ba ste rigs drug pa'o/ /rnal 'byor bzhi ni rnal 'byor dang / lhag pa'i rnal 'byor dang / rnal 'byor chen po dang / de kho na nyid kyi rnal 'byor te bshad zin to/ /'di dag gi don yang thog mar srung ba'i 'khor lo sngon du 'gro bas stong pa nyid kyi ngang las rten gyi dkyil 'khor gzhal yas khang dang bcas pa gsal bar byas nas/de nas mos pas rang bzhin gyi dkyil 'khor gsal bar byas pa ste slar stong pa nyid du byas pa las nyi ma dang zla ba dang pad+ma dang / oM AHhUM zhes pa ni gsal bar bsam mo//de nas de dag zla ba'i dkyil 'khor la 'dus te de la dmigs par bya'o/ /de yongs su gyur pa las dang po'i mgon po zla ba lta bu bsams te/ der mi bskyod pa bzhugs pas zhal gsum pa'i rdo rje sems dpa' bsams la/ 'og nas 'byung ba'i rim pas rdo rje sems dpa'i lus la lha thams cad kyi yi ge dgod par bya'o//de nas nam mkha' la sangs rgyas thams cad bltas te lha mo so sos mchod pa sngon du 'gro bas gsol ba btab pas ji skad du 'og nas 'byung ba'i cho gas gnas gsum byin gyis brlab par bya'o/ /de nas legs par sbyangs pa'i shes rab ma dang gnyis su med par snyoms par 'jug pa cho ga 'dis 'og nas ston pa'i dkyil 'khor spros te sems can gyi don byas nas slar 'dus nas rang gi dkyil 'khor la dmigs te brtan par bya'o//de nas/ sna yi rtse mor yungs kar bsam/ /zhes bya ba la sogs pa'i rim pa 'dis phra mo'i ting nge 'dzin sna'i rtse mor brtan par bya'o/ / gzhan yang 'od du zhu ba bslang ba dang zas la sogs pa legs par bza' ba dang / lha'i 'khor lo la bstod pa zhes bya ba la sogs pa'i yan lag thams cad yongs su rdzogs par bya'o/ /'od gsal ba ni sangs rgyas thams cad kyis 'da' bar bya ba ma yin pa ste chos kyi sku'o/ /de las byung ba ni rdo rje 'chang chen po ste/ci'i phyir zhe na/ mkhas brtson zhes bya ba la sogs pa ste/ mkhas pa che ba dang / brtson pa che ba dang / rtsom pa che ba zhes pa ste/ 'di dag gis rang dang gzhan gyi don phun sum tshogs pa bstan to/ /gzhan ni go sla'o/ /the tshom skye bar byed pa zhes bya ba la sogs pa rigs pa 'di bla ma las byung gi gzhan du rtog ge pas nam yang rnyed par mi 'gyur zhes nges par ston par byed do zhe'o//de rnams 'byung ba'i dam tshig ni de skyed par byed pa'i zhes bya ba ni dam las mi 'da' ba nyid do/ /dbang po gnyis zhes bya ba la sogs pas ni gsang ba'i dbang bskur bstan to/ /gdul bya'i skye bo ni slob pa yang ma yin mi slob pa yang ma yin pa'o//sku rnam pa gnyis ni longs spyod rdzogs dang sprul pa'i sku'o/ /yang dag par ston pa ni sku dang gsung gi chos ston pa ste des smin pa dang grol bar byed pas de la de skad ces bya'o/ /ye shes nyid ces pa ni gzhan dang ldan pa rnam par gcod pa'o/ /sems can rnams kyi rgyud la zhes bya bas ni gsal bar bya ba'i yul bstan to//mi bskyod pa ni gsal bar byed pa'o/ /rnam par shes pa gsum gyi snang ba zhes pa ni shes pa'i snang ba nyid do/ /don dam pa'i bden pa ni yang dag pa'i shes pa dang ldan pa la bden pas so/ /brjod du med pas ni de'i mtshan nyid bstan to/ /rnam pa ma lus pa zil gyis mnan pas ni de'i las bstan to//rang bzhin gyis 'od gsal ba'i ting nge 'dzin ni chos kyi sku ste de las chu las nya'i tshul du rang gi skur bzhengs pa'o/ /des ci byed ce na/ nyon mongs pa lngas khyab pa'i zhes pa la sogs pa ni spyir snying rje'i yul du bstan to/ /de lta na yang ci'i phyir snying rje skye zhe na/ nyon mongs pa'i rang bzhin ni ye nas rnam par dag pa ste de yongs su shes pa nyid ni byang chub yin la de'i ngo bo nyid ni bdag yin no zhes pa 'dis ni nyon mongs pa dang rdo rje 'chang dang /de bzhin gshegs pa ni gnyis su med cing gnyis su dbyer med do zhes dgongs pa nyid do/ /bye brag tu bstan pa/ nyon mongs pa zhe sdang ni sems khong du 'khrugs pa ste/de dang gang ldan pa de la de skad ces bya'o/ /de sbyang ba ni yongs su dag par bya ba'i phyir ro/ /zhe sdang zhes pa'i bshad pa thugs rje chen po'i thabs kyi khro ba ni thugs rje chen pos sprul pa'o/ /de yang rab tu khros pa'i chos dang ldan pas ni zhe sdang ste/ gang la zhe sdang dang 'dra ba'i chos yod pa'i phyir de la de skad ces bya'o//de'i rigs ni de'i rigs su skyed pa'o/ /'dod pa'i 'bras bu skyed pa ni sngags dang mthun pa'i lus skyed pa'o/ /ji ltar skye zhe na/ sku dang zhes bya ba la sogs pa'i bshad pa snyoms par zhugs pa zhes pa ni yab yum sbyor ba las te mngal nas skyes pa'i tshul can no//badzra d+h+r-ika ces pas ni dbyung ba'i sngags bstan to/ /de'i don ci zhe na rdo rje 'chang zhes pa'o/ /de nyid bshad pa / mngon par byang chub pa ni bskyed pa'i rim pa'i sa bon la sogs pa'o/ /de mtshon pa'i rdo rje rtse lnga pa gang gis 'dzin pa de la de skad ces bya'o/ /bden pa gnyis ni don dam pa dang kun rdzob ste gnyis su med pa ni spros pa thams cad dang bral ba'o//de nyid rdo rje ste rnam par rtog pa'i ri bo gcod pa ste/ de gang dang ldan pa de la de skad ces bya'o/ /de spros nas phyi rol gyi sems can thams cad kyi zhe sdang rnam par sbyangs te/ slar log nas gtso bo'i mdun du bzhugs so zhes bya'o//ji lta bu'i rnam par bzhugs she na/ mi bskyod pa'i phyag rgya chen po'i ngo bor bzhugs so zhe'o/ /de ltar sbyor ba dang po ni ting nge 'dzin dang po nyid do/ /sems can rmongs pa ni rgyu dang 'bras bu dang de kho na nyid kyi don mi shes pa'o/ /de sbyang ba ni de'i nyes pa sel ba'o/ /gzhan ni go sla'o/ /dbyung ba'i sngags ni dzi na dzika ces pa'o//rdo rje lta bu'i ting nge 'dzin ni skad cig ma gcig gis sgrib pa thams cad dang bral bar byed pa'i ting nge 'dzin to/ /kun rdzob kyi byang chub sems ni bshad zin to/ /'di ni gzhan du yang ste/ gang gi ting nge 'dzin gyis gang shes pa'i ting nge 'dzin gyis de yang shes pa nyid do/ /yang dag pa'i mtha' ni de bzhin nyid de de ye shes gang gis yul du byas pa de la de skad ces bya'o//nor gyis dregs pa ni nor la dga' bar byed pa'o/ /khengs pa ni nga rgyal chen po nyid dang ldan par gyur pa nyid do/ /sbyin pas 'dul ba ni nor bu rin po che'i sprin gyis nga rgyal rab tu zhi bar byed pa'o/ /nga rgyal rnam par dag pa'i gnas la yang dag gzhag pa ni des nga rgyal gyi rang bzhin dang bral ba'i don dam pa'o//gzhan ni go sla'o/ /'dod chags ni 'khrig pa dang yul la chags pa'o/ /de yang gang gis spong zhe na bcom ldan 'das 'od dpag tu med pa'i rnal 'byor te/ ting nge 'dzin gang gis de yul du byas pa de la de skad ces bya'o/ / gang gis de lta bu'i rang bzhin yongs su shes par bya ba'i phyir gsungs so zhes sbyar ro//'dod chags chen po yang gang yin zhe na/ mchog tu dga' bas te / dri ma med pa'i dga' ba'o/ /de'i rgyu ni de 'phel bar byed pa'i rgyu ste khu ba byang chub kyi sems so/ /de las byung ba ni rgyu de las skyes pa ste/ 'od dpag tu med pa'o//nges pa'i don du gang yin zhe na 'od gsal ba ste stong pa nyid do/ /de las byung ba ni sems can de lta bu gdul ba'i don du de'i skur sprul pa'o/ /so sor rtog pa'i ye shes ni chos thams cad ma 'dres par mkhyen pa gang la yod pa de la de skad ces bya'o/ /de la chags pa ni de yang dag par nges pa'i tshul du 'dzin pa'o//'khor ba ma lus par 'joms pa ni gang gis 'khor ba ma lus pa'i rtog pa 'joms pa'o/ /gzhan yang de bzhin no/ /don yod pa grub pa ni ci'i phyir zhe na bya ba grub pa'i zhes bya ba la sogs pas bstan to/ /'od gsal ba la ci'i phyir zhe na mtshan ma med pa'i 'bras bu ster ba ste de la dmigs pas de 'grub pa'i phyir ro//phrag dog ni gzhan gyi yon tan la sems khong nas 'khrugs pa ste/ gang gis de dang ldan pa'i sems can 'dul bar byed pa de'i phyir de la de skad ces bya'o/ /khams phra ba ni lte ba la gnas pa'i rlung ste/ des thabs kyi ye shes byang chub kyi sems bkug nas mchog tu dga' ba skyed pa ste de las byung ba'i phyir ro//rab tu rnam par 'byed pa ni rtog pa dang dpyod pa dang / nges par 'byed pa ste/ rgyu de las byung ba'i phyir ro/ /'dzin pa ni de dang ldan pa'o/ /zla ba ni byang chub kyi sems so/ /rlung gis 'dzin pa ni de mi gtong ba'o/ /gdul bya ni khams gsum gyi sems can no/ /de'i mngon par 'dod pa ni de'i blang bar bya ba'o/ /zag pa med pa'i bde ba chen po ni chos kyi sku'o//rigs 'di rnams zhes pa ni 'og nas ston to/ /phung po 'di dag ni gzugs la sogs pa ste de nyid don dam par sangs rgyas dang ngo bo gcig pa'i tshul gyis so/ /de lta bu'i dbus su ma yin nam snyam pa la/ rdzogs pa'i byang chub rkyen du byung / /zhes pa ni 'di la brten nas bla na med pa'i byang chub sgrub pa nyid do//de'i phyir ni tha dad do zhe na/ de bzhin nyid du gnyis med pa/ /zhes don dam par gnyis su med cing dbyer med pa'o/ /yang rnam par snang mdzad ces bya ba la sogs pa'i don ni/ rdzogs sangs rgyas ni chags pa bral/ /'dod chags can la de nyid do/ /zhes pa lta bu'o//mA ma kI ni 'khrig pa yi/ /reg byas mnyes par byed pa'i phyir/ /'da' bar bya ba ma yin no/ /zhes bstan par 'gyur ro/ /zhe sdang ni mi bskyod pa ste zhe sdang can gyis 'gro ba 'dul bar byed pa'i phyir ro/ /de dga' ba ni de mnyes par byed pa'i tshul gyis so/ /zhe sdang rnam par dag pa ni de bzhin nyid de rgyu dang ngo bo la sogs pa ma grub pa'i phyir ro//de la dga' ba ni de dang dbyer med pa'i tshul gyis te yang dag pa'i ye shes so/ /bcom ldan 'das rdo rje 'chang chen po de nyid ces bya ba la sogs pa'i don ni de dag kyang rdo rje 'chang gis sems can gyi don du de ltar bstan gyi don dam par ni ma yin no zhe'o//gzhan la yang de ltar shes par bya'o/ /sku dang gsung dang thugs mi rtag pa ni skad cig gnyis pa la sogs par mi gnas pa'o/ /slu ba ni rtag par sems pa la'o/ /chos thams cad stong pa ni ji ltar brtag pa dang bral ba'o/ /slu ba ni yod par 'dzin pa'i gang zag la'o/ /snang ba gsum ni bshad zin to//slar yang dngos po med par byas pa ni 'od gsal ba'i ngang du ste de nyid yod par 'dzin pa ni gang zag la'o/ /phung po la sogs pa ni sbyang bar bya'o / /ril por 'dzin pa la sogs pa ni sbyor ba'i thabs so/ /de thams cad dbye ba med par gyur pa ni de'i 'bras bu'o/ /'di ni thams cad rang gis brtags pas slu ba ste/bden par gyur pa'i don mthong bas/ /dman la bden par gyur pa slu/ /zhes 'byung ba lta bu'o/ /gzhan ni snga ma bzhin no/ /gshin rje ni dmyal ba'i srung ma dang bcas pa ste de na dbang che bar snang ba'i phyir ro/ /khro bo chen po ni de dag 'jigs par snang ba'o/ /mthar thug mdzad cing 'jigs pa ni gtum po'i las kyi don chen po dang ldan par byed pa'o//rmongs pa'i mun pa nyid ma rig pa ste dman par gyur pa'i phyir sdug bsngal sna tshogs nyams su myong bar byed pas gshin rje'o/ /don dam pa'i bden pas mthar thug par mdzad pa ni rang bzhin gyis bag chags dang bcas te rtsad nas gdon pa'i phyir ro/ /de bzhin gshegs pa thams cad kyi mngon par byang chub pa yang gang zhe na rin chen 'byung ldan no//'od gsal ba ni mngon par byang chub pa las byung ba dang / de'i ngo bo nyid kyi phyir ro/ /de nyid ni mi phyed pas rdo rje'o/ /rnam par rtog pa'i bdag nyid can ni yid kyi rnam par shes pa dang mtshungs par ldan pa'o/ /de 'od gsal bar 'jug pa ni stong pa nyid du byas pa'o//rdo rje'i dam tshig ni gang zhig des gang bsnyengs par bya zhe na rdo rje ni de bzhin gshegs pa'i khro bo'i tshul can te des gdug pa can slob dpon la sdang ba la sogs pa bsregs pa ni don chen po dang ldan par bya ba'i phyir ro/ /yang bye brag bsdu ba ste/ rdo rje dam tshig nyid sreg pa'o//'od dpag tu med pa ni chos rin po che ste chos thams cad kyi 'byung gnas su gyur pa'i phyir ro/ /rta mgrin yang 'od dpag tu med pa ste de'i rigs su gyur pa'i phyir ro/ /'od gsal ba ni chos rin po che ste chos thams cad kyi de bzhin nyid kyi phyir ro/ /rta mgrin yang de las byung ba'i phyir de skad ces bya'o/ /nyon mongs pa rnams kyis ma gos pa ni de'i rang bzhin yin pa'i phyir ro//de nyid 'jigs par mdzad pa ni de dang lhan cig par 'gal ba'i phyir ro/ /pad+ma ni skye gnas so zhes pa la sogs pa'i don ni rdo rje pad+ma snyoms par zhugs pas byang chub sems phab ste des bde ba dang bde ba dam pa skye bar 'gyur ro zhes pa'i don to//rnam par dag pa'i gnas ni rnam par dag par byed pa'i rten te gang yin zhe na 'od gsal ba'o/ /bgegs ni bi nA ya ga la sogs pa ste de mthar byed pa ni thabs gang gi sgo nas don chen po ldan par byed pa'i phyir de la de skad ces bya'o/ /des pa'i don du bgegs zhes bya ba gang zhig ce na/ bgegs ni khams bzhi po ste/sa dang chu dang me dang rlung rang gi lus kyis bsdus pa'o/ /de la yang ci'i phyir zhe na/ de dag 'phel ba dang 'grib pas lus gzir bar byed pa'i phyir ro/ /thabs kyi ye shes shar bas rnam par 'jig pa ni gang gis lus kyi rgyun las byang chub sems phab ste de'i nyes pa dang bral bar byas pa nyid do//'di la kha cig gis 'di skad ces de bzhin gshegs pa'i gtso bo dang 'khor gyi rnam par snang ba 'di tha dad pa'am gcig pa'am de las gzhan du 'gyur zhes rtog drang na/ re zhig dang por tha dad pa ni ma yin te so sor ma 'dres par rnam par snang ba'i phyir dang gang gis rag las de'i dbang gis 'gyur ro zhes bya bar yang mi nus te/dur dang dkar po lta bu'o/ /rang gi blo dang 'gyur ba yang ma yin te brtags pa ma yin pa'i phyir ro/ /gal te yin no zhe na yang blang bar bya ba ma yin pa nyid do/ /phyogs nges par 'grub par mi 'gyur te de nyid kyi phyir tha dad pa ni ma yin no/ /gal te gcig pa nyid do zhe na yang shin tu rigs pa ma yin te/kha dog dang gnas la sogs pa tha dad pa'i phyir ro/ /gal te gnas gcig pas gcig pa nyid do zhe na yang rigs pa ma yin te/ thams cad sa'i dkyil 'khor gcig la brten pa nyid kyi phyir ro/ /gal te lus 'dra bas gcig pa nyid do zhe na yang ma yin te gang gis mi rnams kyi lus 'dra bas gcig pa ma grub pa bzhin no//gal te ye shes gcig pa nyid kyis gcig pa nyid do zhe na yang ma yin te mi rtag pa dang mi rtag pa can yang shin tu gcig par 'gyur ro/ /gal te rig pa tsam du 'dod pa'o zhe na yang ma yin te sangs rgyas dang byang chub sems dpa' dang so so'i skye bo'i bar la sogs pa zag pa med pa'i sa bon dang bcas pas bsdus pa'i phyir thams cad kyang ngo //gal te shes pa tha dad du gyur pas yin no zhe na so so rang gi rig pas brtags na dbyer med pa'i phyir ro/ / yang snga ma'i sa na 'jug pa nyid do zhe na yang ma yin te/ rang gi gdul bya'i dbang gis sna tshogs par snang ba'i phyir ro/ /de bas na 'dir yang sangs rgyas thams cad dbyer med kyang rang gi gdul bya'i dbang gis sna tshogs par snang ba'i phyir ro//gal te de lta na/ gcig par 'gyur ro zhe na de ni 'dod pa ste/ de'i rang bzhin gyi phyir dus thams cad du gcig pa nyid kyi phyir ro/ /de ltar na sems can gyi 'dod pas byung ba'i phyir dus thams cad du 'dod pas ji lta ba bzhin du 'byung bar 'gyur ro//gal te ni rang gi rnam par rtog pas bsgribs pa'i phyir mi snang ngo / /'dod pa la rag las pa'i dngos po ni mi snang bar mi 'gyur te gang gi phyir rang gi 'dod pa tsam gtso bor byed pa'i phyir ro/ /gal te rang gi 'dod pa gtso bor mi byed na ni tha dad pas snang bar mi 'gyur te bkab pa'i phyir ro/ /gal te sgrib pas mi snang na sgrib pa dang bral ba'i dus na tha dad pa mi snang ste de ni med pa'i phyir ro//gang gi phyir sems can gyi mos pa 'ba' zhig las ma yin te smon lam chen po'i 'phen pas kyang snang ngo / /de bas na gnyis tshogs na 'gyur gyi gzhan du ni ma yin no/ /yang ci tha dad par 'gyur ba'i smon lam 'grub pa ci'i phyir zhe na/ tha dad pa'i sems can yongs su smin par bya ba'i phyir te 'di ltar tha dad pa'i sems can rnams la mthun pa dang mi mthun pa gcig gis don byed pa ni 'gal ba'i phyir ro//gal te de lta na rgyu gnyis las grub pa'i phyir gcig las sna tshogs su ni snang na/ gang gi phyir shes pa sna tshogs par gyur pa nyid de gal te de ltar ma gyur na thams cad mkhyen pa grub par mi 'gyur ro zhe na ma yin te/gang gi phyir de'i rgyu tshogs pa de tsam gyis shes bya thams cad mkhyen pa'i tshul du snang gi don dam par ni ma yin te sgyu ma'i rta la sogs pa bzhin no/ /gal te de lta na ni nga ni zag pa zad do/ /da ni chos thams cad kyi don yongs su shes pa'o zhes bya ba la sogs pa 'di legs par gnas par mi 'gyur ro zhe na/de ni dgongs pa ste/ 'dir chos thams cad kyi de kho na nyid kyi don ji lta ba bzhin la dgongs pa'o/ /gal te mtshan ma thams cad mkhyen na cir 'gyur zhe na/ mtshan ma ni thog ma med pa'i las kyis bsgrubs pas 'khrul pa'i phyir la/ 'khrul pa'i yul la dmigs pa'i phyir 'khrul ba'i yul can gyi shes par 'gyur gyi ye shes ni ma yin no//gal te de nyid ye shes so zhe na gang gi phyir ji ltar gnas pa'i don shes pas ye shes zhes bya ba ni / de gang gis 'grub par 'gyur ro/ /de ni so sor rtog pa'i ye shes so zhe na/ de ni longs spyod rdzogs pa'i sku'i shes pa nyid sprul pa zhes bya bar yang mi 'gyur te me long lta bu'i ye shes dang bral ba'i phyir ro//de ni de la yang mtshungs so/ / de bas na 'dir 'khor gyi snang ba ma gtogs pa gzhan ma yin no/ /gal te longs spyod rdzogs pa'i sku sgrub pa nyid de/ sprul pa'i las bye brag tu bya ba'i phyir ro zhe na ma yin te snga ma'i skyon nyid do/ / gal te 'khrul pa ni 'khrul par ma 'khrul pa ni ma 'khrul par mkhyen na ji ltar 'khrul/ mtshan ma la dmigs pa'am mtshan mar snang ba de mi 'khrul pa ma yin pa de brjod dgos so/ /gal te gzugs dang sems so zhe na/ gzugs ltar snang ba'i sa bon las byung ba'i phyir legs par bshad par 'gyur ro//'di ltar chos 'di dag las kyi 'khrul 'khor gyis byung ba ste de nyid las sna tshogs par snang pa'i phyir ro/ /gal te sna tshogs pa de gcig pa'i rang bzhin yin no zhe na/ de ltar snang bar gyur pa'i shes pa snang ba nyid las mngon sum dang ldan pa'i skyes bu sa bon sna tshogs pa nyid do//dge ba'i las kyis bsgrubs so zhe na thams cad dge ba'i las dang ldan pa nyid du 'gyur bas ci'i phyir 'og ma mi snang ngo / /gal te shes pa nyid do zhe na/ tha dad pa'am tha dad pa ma yin par 'gyur/ de ni gcig gis gcig spangs pa'i phyir/ de las gzhan pa brjod par mi nus so/ /gang gi phyir de dag rgyu dang 'bras bu'i rang bzhin du ma grub na ni gcig yod pa med na med pa mi 'grub pa'i phyir ro//gzhan yang don dam par gnyis su 'gyur ba 'di yang ma bzlog par 'gyur ba nyid do/ /de bas na rdzogs pa'i sangs rgyas thams cad chos thams cad zil gyis gnon pa rdo rje zhes bya ba'i ting nge 'dzin la snyoms par zhugs te gzugs mi dmigs/gzugs kyi mtshan ma mi dmigs/ rnam par shes pa'i bar du mi dmigs rnam par shes pa'i bar gyi mtshan mar mi dmigs so zhes bya ba la sogs pa dang gzhan yang sangs rgyas thams cad ni don dam par ye shes gcig pa ma yin pa med do/ /chos thams cad kyi de kho na nyid thugs su chud pa'i phyir ro zhes 'byung ba 'di legs par bshad pa yin no//de bas na gang gis snang ba chos thams cad spros pa med pa'i ting nge 'dzin la gnas bzhin du smon lam chen po'i mthus sems can gyi snang ba la sku gcig dang du ma dang / gsung dang thugs sna tshogs pa nyid kyang rdo rje 'chang chen po'i ye shes kyi snang ba tsam du blta'o// gzhan ni go sla'o/ /rdo rje slob dpon lus 'di la/ /zhes bya ba la sogs pas ni sbyor ba dang po'i lus kyi dkyil 'khor nyid du brjod pa ste gang gis rang gi gnas su lha so so'i yi ge bsam par bya ba la sogs pa'o// gang gis blo dman don du rgyud chen 'grel/ / legs brtsams de las gsal bar ma gyur pa/ /de 'dir bdag gis cung zad legs par bkrol/ /dman pa rnams kyi don du blta bar gyis/ /sgron ma gsal bar byed pa zhes bya ba'i 'grel bshad/ slob dpon Ar+ya de bas mdzad pa rdzogs so// //