CLOSE WINDOW

D1792
བོད་ཡིག

/ @##/ /rgya gar skad du/ pra dA+e po d+yo ta na bi sa ma pany+tsi kA nA ma/ bod skad du/ sgron ma gsal bar byed pa'i dka' ba btus pa'i 'grel ba zhes bya ba/ sangs rgyas la phyag 'tshal lo/ /de la rim pa gnyis po zhes bya ba ni bskyed pa dang rdzogs pa'i rim pa gnyis pa'o//ji srid ces bya ba ni D+had d+ha ya ra la rnams lan gnyis su bklags pa dang bcas pa'i ka tshogs rnams so/ /i tha zhes bya ba de'i don ni a tshogs rnams su shes par bya'o/ /de nyid ni lus la sogs pa 'dzin pa shes rab dang thabs kyi rang bzhin gyis gzung ba'o//'dul ba'i sdom par ldan mthong ba/ /zhes bya ba ni dge slong la sogs pa'i sdom pa can du gdul byas mthong ba'o/ /'bras bu 'dod pas zhes bya ba ni skye bo gdul ba can gyi dgos pa la bya ste/ kun rdzob kyi 'bras bu'o/ /snying po sbas pa 'di la yod ces bya ba ni 'dod chags la sogs pa'i rang bzhin ji lta ba bzhin du yongs su shes pas grol bar 'gyur te/de ston par byed pa/ 'dod chags chos ni rab ston dang / /zhes pa gsungs so/ /ma zhes bya ba ni chos rnams rab tu mang po thob pa'o/ /lhag par zhes bya ba ni lhag par gzung ba'o//bum pa'i ras bal sa bon 'dra/ /zhes bya ba ni bum pa chung ngu ras bal gyi sa bon gyis gang bar byas pa bangs nas shin tu 'phel na slar mi thon pa ltar gsal bar ston mi nus pa'o/ /blo kha mi 'bye la zhes bya ba ni shes rab brtan pa la sogs pas snying stong pa'o//nyan zhes bya ba ni thos pa dri ma med pa'o/ /rgyud gcig pa ni zung du 'jug pas chos kyi de kho na nyid bshad par bya ste las dang po pa la bshad pa dang / spros pa med pa'i rnal 'byor bshad pa'o/ /bshad pa rnam pa gnyis bya'o zhes bya ba ni tshogs pa la bshad pa dang / slob ma la bshad pa'o//de rnams kyis zhes bya ba ni rgyan drug po rnams kyis bden pa gnyis po ni tshig nges par byed pa'o/ /de ni rgyan bdun pa ste/ des zung du 'jug pa mthar thug pa sgrub pa'o/ /'di skad bdag gi zhes bya ba la sogs pas ni/ gleng gzhi ston pa yin no/ /rim pa zhes bya ba ni 'dir rim pa lnga pa'o//bshad tshul rnam pa bzhi po ni tshig gi don dang / spyi'i don dang / sbas pa dang / mthar thug pa ste/ bcu po tsam gyis spyod pa dor bar bya ste/ ji lta ba'i bde bar mi 'gyur ba dang / 'jig rten na sdug bsngal gyi rgyu mi dge ba bcu po ni ltung bar byed pas so//de la rab tu ma chags par gyur pa dang mi dge ba bcu po bcom pa yang dag pa'i skye ba len no/ /cha gnyis pa ni yi ge AHring po'o/ /dgu pas brjod pa ni yi ge o yin no/ /dang ni bsdu ba ste yi ge aM dang AH'o/ /sum cu pa dang bcu pa ni yi ge ha yin no/ /lnga pa'i sa bon ni yi ge u yin no//cha gnyis pa la lnga pa drug pa'i sa bon du byas pas phye na der 'gyur ro/ /khong par spros zhes bya ba ni chos kyi 'byung gnas su rnam par spros pa'o/ /e ni shes rab ces bya ba ni blo dang snang ba'i shes pa'o/ /snang ba mched pa rang nyid ni rig chen no/ /rtsa ba ni snang ba nye bar thob pa'i rgyu ste/thog ma'i dus so/ /de dag kyang slar bzlog pas ji lta ba bzhin du snang ba'i 'bras bu gnyis por sbyar bas rnam par shes pa gnyis pa blta bar bya'o/ /rtag tu 'gro la gnas par 'gyur/ /zhes bya ba ni srog rtag tu gnas pa'o/ /gzugs dang chu dang gzugs las tshor ba'o//tshor ba'i phung po dang ldan pa ni rlung ngo / /rol pas zhes bya ba ni 'joms pa'o/ /rnam par rol zhes bya ba ni rnam par sprul bar bya'o/ /rnam par 'phrul zhes bya ba ni sprul bar byed pa'o/ /rdo rje gsum po dam tshig mchog /ces bya ba ni b+ha ga'o/ /ye shes de bzhin gshegs pa kun//zhes bya ba nas/ 'gro snying rnam dag ces bya ba ni b+ha ga'i khyad par ro/ /nam mkha'i skabs 'di nyid ces bya ba ni chos kyi 'byung gnas te/ rang bzhin rnams rang bzhin med pa gnas gzhir gyur pa shes rab kyi b+ha ga'o/ /sems can thams cad dpal rdo rje sems dpa' bzhugs pas bcug nas rdo rje sems dpa' nyid thob pa'o zhes bya ba la/sems can thams cad ni byang chub sems dpa' thams cad do/ /dpal rdo rje sems dpa' bzhugs zhes bya ba ni dbang bskur ba'i ye shes byin pas so/ /bcug pas zhes bya ba ni gnyis su med pa'i sems su 'jug pas bde ba dang yid bde ba thob par gyur pa'o//thabs kyi ye shes shar bas so/ /zhes bya ba ni snang ba'i ye shes shar bas so zhes bya ba'i don to/ /sems dpa' gsum gyi mthar thug pa zhes bya ba ni dam tshig sems dpa' dang / ye shes sems dpa' dang /ting nge 'dzin sems dpa'i mthar thug pa'o/ /nyon mongs pa lnga zhes bya ba ni 'dod chags dang / zhe sdang dang / gti mug dang / nga rgyal dang / phrag dog go/ /rdo rje lta bu'i ting nge 'dzin ni zung du 'jug pa'o/ /khams phra ba ni rlung gi khams so/ /des thabs kyi ye shes gzhom du med pa'i thig le drangs pa'i gleng gzhi dang po'o//btsun mo dang 'khor gyi nang nas nges par byung bar gyur pa ni gleng gzhi gnyis pa'o/ /rab tu byung ba ni gleng gzhi gsum pa'o/ /rdo rje'i gdan la rdo rje lta bu'i ting nge 'dzin gyis zhugs pa ni gleng gzhi bzhi pa'o/ /de ni gleng gzhi'i dbye ba rnams so//rdo rje la sogs bzung ba ni/ /zhes bya ba'i chos kyi 'khor lo rab tu bskor ba la bya ba yin no/ /b+ha ga la bzhugs so zhes bya ba la sogs pas ni dang por phyi rol gyi dkyil 'khor gyi gzugs la sogs pa'i 'khor rnams nyid kyi sku la rab tu bcug pas mig la sogs pa rnams la thim nas longs spyod rdzogs pa'i skur gnas pa las byang chub kyi sems mchog tu dga' ba'i rang bzhin du gyur nas/yum gyi skye gnas su byung ba ni b+ha ga la bzhugs so zhes bya ba'i don yin no/ /de nas ni nur nur po/ /de nas mer mer po la sogs pa'o//de nas zla ba bcu la sogs pa'i rim pas mig la sogs pa'i dbang po thams cad yongs su rdzogs par 'gyur ro/ /de nas skye gnas kyi sgo khyad par can nas/ phyi rol du gshegs te yul dang yul can gyi gzugs la sogs par sprul pa ni 'khor phun sum tshogs par gyur pa yin no//'di lta ste zhes bya ba la sogs pa gsungs pa'i don ni btsun mo dang ldan par bzhugs pa ni dam tshig gi phyag rgya'o/ /sngags kyi yi ge ni chos kyi phyag rgya'o/ /mtshan thams cad dang ldan pa ni phyag rgya chen po'o/ /des 'gro ba'i don byed pa ni las kyi phyag rgya'o//chos ston pa'i dus na phyag rgya de dag dang ldan pa po phyag gnyis pa la sogs pa'i rim pas srung ba'i 'khor lo mdun du dran par mdzad pa dang / de nas lha sum cu rtsa gnyis kyi bdag nyid 'khor phun sum tshogs pa dang ldan par gyur nas/ bud med phun sum tshogs pa la mchod pa mdzad pa'i tshul gyis gdul bya 'dod chags can rnams kyi ting nge 'dzin bstan to//lha de rnams so so'i gdan dang ldan pa'i gnas gzhal yas khang brtsegs pa bstan pa'i phyir/ de nas zhes bya ba la sogs pa gsungs so/ /de nas dkyil 'khor pa rnams nyid kyi snying ga la sogs pa'i phung po la sogs pa'i ngo bor zhugs te 'od gsal bar gnas pa la/oM shu n+ya tA zhes bya ba'i sngags kyi byin gyis brlab po/ /de'i de ma thag par nyi ma dang / zla ba dang pad+ma dang / yi ge gsum dang / de dag zhu ba'i zla ba la sems can rnams zhugs pa la/ oM d+har+m+mA d+hA tu swa b+hA wa zhes pa la sogs pa'i rim pas rdo rje 'dzin pa sems dpa' gsum gyi mthar thug pa'i bar du bsam par bya'o//de nas nam mkha'i dbyings ni thams cad ces bya ba la sogs pas ni rigs lnga dang ldan pa'i shes rab kyi pad+mar byang chub kyi sems spros pas gang ba'o/ /sems can thams cad ces bya ba ni sangs rgyas dang byang chub sems dpa' rnams te/rdo rje 'dzin pa'i dkyil 'khor pa rnams kyi dbye ba dang yid bde ba thob par gyur pa'o/ /de nas zhes bya ba la sogs pas ni phyung nas rjes su zhugs pas zhal gsum pa'i rnam pa lta bu la sogs par rdo rje 'dzin pa'i gzugs su snang bar gyur to//de nas sems can rnams kyi skal ba ji lta ba bzhin du mkhyen nas ston pa'i rim pa ji lta bur bshad pa bzhin du ston pa yin no/ /de nas zhes bya ba la sogs pas ni bla ma la slob ma rnams kyis gsol ba btab nas blangs nas 'bras bu nges pas na bslab pa de la gnas par bya ba'i phyir/de bzhin gshegs pa rdo rje 'dzin pa nyid la nyid gsol ba 'debs par bstan pa yin no/ /sgron ma gsal bar byed pa'i le'u dang po'i dka' ba btus te bshad pa'o// //rgyu dang 'bras bu'i nye bar gdags pa zhes bya ba'i sku dang gsung dang thugs rnams kyi rang gi ngo bo dbyer mi phyed pa'i byang chub kyi sems gang yin pa de ni rgyu yin la/des rdo rje 'dzin pa mchog la nye bar spyod pa ni 'bras bu'o/ /sog las zhes bya ba ni rlung las zhon pa'i rnam par shes pa rmi lam lta bur snang ba'o/ /khams gsum gyi rnam par gnas pa ni/ khams gsum pa de nyid rlung rmi lam lta bur gnas pa ste/gnas pa zhes pa 'di nyid kyang khams gsum par skyes pa'o/ /mchog ces bya ba ni dam pa ste srid pa bar ma do'i mtshan nyid dang 'dra ba'o/ /gcig tu zhes pa ni rlung dang rnam par shes pa gcig tu 'dus pa'o/ /myur du zhes pa ni sems tsam du'o//mthong ba ni der mthong ba'o/ /bdag nyid ces pa ni rnal 'byor par blta'o/ /de dag nyid ni rang byin gyis brlab pa'i gnas te/ gzugs la sogs pa nas yid kyi mthar thug pa de bzhin gshegs pa drug por byin gyis brlab pa la sogs pa bstan te/ /brtan pa dang g.yo ba zhes bya ba la sogs pas ni stong pa nyid kho nar bsgom pa'i mu stegs can la sogs pa'i tshul 'gegs pa yin no//de yang / bsgom par bya ba sgom pa med/ /ces bya ba la sogs pa'o/ /de gang yod par bsgom zhes bya ba'i rnam pa de lta bu nyid kyis yod dang med par bsgom pa dag ma yin par dpyad pa'o//steng 'og ces pa la sogs pa las ni nyan thos bye brag tu smra ba'i bsgom pa 'gegs pa ste/ de yang gzhan las smras pa/ nam mkha' gnyis po 'gegs pa dang / /dus gsum rtag pa 'dus ma byas/ /zhes pa'i tshul lo/ /gang yang rgyu dang 'bras bu zhes pa la sogs pas ni mdo sde pa'i spyi'i don bsgom pa 'gegs pa yin no//phung po la sogs pa zhes bya ba la sogs pas ni rnam par shes pa tsam du smra ba'i gzhung gi bsgom lugs 'gegs pa yin no/ /kun rdzob kyi bden pa bzlog par bya ba'i phyir zhes bya ba la sogs pas ni kun rdzob tu snang ba der bsgom pa 'gegs pa yin no//bden pa gnyis lta bur zhes pa la sogs pas ni don dam pa'i bden pa dang / kun rdzob kyi bden pa la mngon par zhen nas bsgom pa 'gegs par byed pa yin no/ /mthar thug pa'i don gyis ni bsgom pa ma nor ba yin par bstan te/rang bzhin dga' ba dang rang bzhin gyis 'od gsal bar rab tu gnas pa yin no/ /sgron ma gsal bar byed pa'i le'u gnyis pa'i dka' ba btus te bshad pa'o// //gnas ji lta ba bzhin du zhes pa ni dbus dang shar la sogs pa'i gnas rnams so/ /sku gsung thugs kyis mtshan pa zhes pa ni sku rdo rje rnam par snang mdzad kyis dkyil 'khor ba rnams la yang mtshan pa ste/gtsor byas pa'i rang bzhin 'dis ni thugs dang gsung rnams la yang go bar bya'o/ /rdo rje gsum po rnam pa re re la yang nang phan tshun du ldan par gsal bar bstan pa'i phyir ro/ / rnam par snang mdzad thugs rje che/ /sku gsung thugs kyi mtshan ma 'am/ /zhes gsungs pa la/ oM shU n+ya tA dz+nyA na zhes bya ba la sogs pa ni rigs drug dang / rigs gsum dang / mthar rigs gcig tu thug par bstan to/ /bzhi bzhi yi ni sbyor ba yis/ /zhes pa la sogs pa ni dkyil 'khor re re zhing yang dkyil 'khor bzhi bzhi'i rang bzhin yin pa la bya'o//gos dkar la sogs pa'i rang bzhin de ni lha ste rnam par shes pa'o/ /sgron ma gsal bar byed pa zhes bya ba'i le'u gsum pa'i dka' ba btus pa'i bshad pa'o// //cho ga zhes pa la sogs pa ni gtor ma dang sbyin sreg la sogs pa'i cho ga nyi shu po rnams so//'di ni dgug pa'i bdag nyid mchog /ces bya ba ni phung po lnga dang 'byung ba bzhi'i bdag nyid de/ de lta bu'i thig skud kyis lus kyi dkyil 'khor rnams kyi gnas ji lta ba bzhin du yang dag par blta bar bya'o/ /rnam pa lnga'i zhes bya ba la sogs pa ni ye shes lnga rnams kyi rang bzhin gyis mi bskyod pa la sogs pa dbus la sogs par bkod pa yin par ston no//dbyibs kyi mchod pa zhes pa dang / rnam pa gsum zhes pa ni 'jug pa dang ldang ba dang / gnas pa'i rim gyis so/ /skad cig ces bya ba la sogs pa ni snang ba rnams kyi rang bzhin gyi skad cig gi dus las stong pa bcu drug tu phye ba'o//zhi ba'i chos ni shin tu phra ba'i khams sems can gyi yongs su shes par byas pa rnam par shes pa'i rang bzhin snying rje chen po'i bdag nyid de zhi bar nges par sbyangs pa'o/ /mdangs bzangs 'od ni yin par gsungs//zhes pa ni de dag nyid la bya bar gsungs so/ /rten 'brel zhes pa ni rten cing 'brel par 'byung ba rnams so/ /dri ni lus la bya'o/ /sgron ma gsal bar byed pa'i le'u bzhi pa'i dka' ba btus pa'i bshad pa'o// //de zhi gnas las byung zhes bya ba zung du 'jug par gyur pa las byung ba'o//ma dang sring mo bu mo zhes bya ba ni ma dang sring mo ltar rjes su phan par 'dod ma'o/ /snying la gnas pa'i lha mo che/ /zhes bya ba ni nang gi phyag rgya chen po'o/ / mnyes par byas kyang zhes bya ba ni phyi rol gyi phyag rgya la'o/ /gnas pa'i zhes bya ba ni gang 'gog pa'i ting nge 'dzin la gnas pa'i byang chub sems dpa' rnams 'gog pa'i ting nge 'dzin la gnas pa de'i tshe rang gi khams phra mo'i 'od zer rnam par shes pa la reg pas byang chub sems dpa' rnams la nges par gyur nas zung 'jug tu gnas pa la bya'o//sgron ma gsal bar byed pa'i le'u lnga pa'i dka' ba btus pa'i bshad pa'o// //sngags bstan pas zhes bya ba ni mdo tsam du bstan par byas pa'o/ /yang de gsal bar byed pa gsungs pa/ rdo rje gsum po zhes bya ba la sogs pa ste/ rdo rje gsum ni rang gi lus la sdud pa dang / gzhan gyi sku la spros pas mnyes par byed pa'i bkod pa rnam pa gsum ste/de rnams kyis de bzhin gshegs pa rnams la mtshan pa'o/ /de dag nyid kyang de bzhin gshegs pa'o/ /oM zhes bya ba la sogs pa la dang por ni sku gcig yin no/ /yon tan gsum ni de bzhin gshegs pa gsum ste thugs rdo rje dang mi gnyis par ldan pa'o//de ltar gsungs pa'ang rigs drug gi bdag nyid can gyi ste/ de ltar sbyar bar bshad do/ / dus su bshad ces bya ba ni rdo rje 'chang chen po'o/ /bdag po'i chos can gcig pu las/ /zhes bya ba ni yid dang lhan cig tu skyes pa'i spyod yul du gyur pa'i dkyil 'khor bar gyur pa'o//gnyi ga'i 'khor lo rjes su mnyes pa zhes bya ba ni phyi nang gi bdag nyid can gyi 'khor lo'o/ /bshad ma thag pa'i cho ga zhes bya ba ni lus la sogs pa'i byin gyis brlab pa'i cho ga ste/ de nyid kyi rjes su chags pa la sogs pa byas nas/ gnyis pa rdzogs pa'i rim pa la gnas pa'o//rdo rje bzhi po ni rnal 'byor bzhi pa'o/ /phra mo'i sbyor ba kun du brtsams/ /zhes bya ba la sogs pa la sbyor ba ni 'od gsal ba'o/ /'od gsal ba de'i de ma thag par ni pad+ma dang zla ba dang yi ge gsum la sogs pa'i rim pas longs spyod rdzogs pa'i skur bskyed pa'o //rang gi rdo rje'i bu gar zhes bya ba ni nor bu'i bu gar byang chub kyi sems bsgom par bya'o/ /yum ni shes rab ma ste de'i pad+ma'i nang gi sna rtser thig le rdo rjer nas 'bru tsam la sogs pa rnams bsam pa'o/ /'gro nyal za ba tsam gyi spyod pa zhes bya ba ni zas za ba tsam dang / nyal ba tsam dang /bshad du 'gro ba tsam las ma gtogs par ting nge 'dzin la dmigs pa 'ba' zhig gzhan du mi gnas pa'o/ /yang dag sngags kyi gsang ba zhes pa ni gsungs ma thag pa'i sngags kyi de kho na nyid do/ /rnal 'byor pa rnams kyi gsang ba brtag pa'o/ /skad cig ces bya ba la sogs pa'i sgras ni rang bzhin gyis 'od gsal ba 'ba' zhig ston no//sngags pa zhes bya ba ni rdo rje sems dpa'o/ /sgron ma gsal bar byed pa'i le'u drug pa'i dka' ba btus pa'i bshad pa'o// //yan lag drug ces bya ba ni ji skad du bshad pa'i bskyed pa'i rim pa dang / rdzogs pa'i rim pa dag gis ji lta ba'i sems kyi yul rnams la gnas pa'o/ /'dod pa ni 'dzin pa'i rnam pa'o/ /mig la sogs pa zhes bya ba ni ji lta bu'i mig la sogs pa'i rnam par shes pa rnams kyis yul rnams blangs nas yid kyi rnam par shes pa dang lhan cig tu yul mchog tu gyur pa la sogs pa rnams la bde ba tsam gyis yul du rnam par byed do//de bzhin du rnal 'byor pas kyang yongs su mi spang ba nyid du longs spyad par bya'o/ /yid du 'ong ba ni mchog tu gyur pa'o/ /yid du mi 'ong ba ni rnam par dman pa dag go/ /lung du ma bstan pa ni gnyi ga ma yin pa'o/ /khro bo ni thabs kyi ye shes so zhes bya ba ni khams phra mo dang 'dres pa'i ye shes so//rlung la dga' ba zhes bya ba ni yi ge hUM gi'o/ /rkan gyi pad+ma de dag kyang ldan par bya'o zhes bya ba ni ya rkan gyi lce'u chung dang ngo / /chos dang don dang spobs pa so so yang dag par rig pa zhes bya ba ni chos dang don ni blos rnam par spro bar bya ba'o / / spobs pa so so yang dag par rig pa ni rigs lnga la sogs pa so so'i rim par rigs brgya rnams su nye bar mtshon te spro bar bya'o/ /rang bzhin brgyad cu dang ldan pa rnams zhes pa ni spyi ma lus pa rnams so/ /mthong ba'i chos la zhes bya ba ni chos rtogs pa na'o/ /sgron ma gsal bar byed pa'i le'u bdun pa'i dka' ba btus pa'i bshad pa'o// //lha nyi shu rtsa lnga po zhes bya ba ni rang bzhin gyis rnam par dag pa'i lha nyi shu rtsa lnga po rnams so/ /bdag po las gzhan pa zhes bya ba ni rigs gzhan du skyes pa yang brtag pa'o/ /sgron ma gsal bar byed pa'i le'u brgyad pa'i dka' ba btus pa'i bshad pa'o// //nam mkha' bzhi ni stong pa bzhi'i bdag nyid do/ /yang na 'byung ba bzhi dang / phyag rgya bzhi'i bdag nyid kyis so/ /gzhan du na zhes bya ba la sogs pa ni sems can rnams gdul ba'i don du bya ba las gzhan du rang dgar srog gcod pa la sogs pa byed na/ dmyal ba mnar med par ltung bar nges so/ /de nas skad cig de nyid la zhes pa ni sngar phye ba des snang ba gsal bar gyur pa na'o/ /dus kyi tshad ni dus de dag tu bsam pa shin tu bskyed pa'o/ /spyan la sogs pa zhes pa ni bzhi po las gang 'dod pa cig bkug la rang gi rigs kyis bon gyis rdzogs par byas te/ye shes sems dpa' dang / ting nge 'dzin sems dpa' dang ldan par bya zhing rigs lnga po rnams kyis gang bar byas nas dkyil 'khor ba rnams gos dkar mo la sogs pa'i bud med kyi gzugs kyis bcug la/ sngon du rjes su chags par byas nas sna tshogs pa'i dga' bas gdul bya sna tshogs pa'i don bya ba yin no//sngags kyi ming ni yi ge gsum la sogs pa'o/ /sngags kyi don ni yi ge gsum po rnams kyis sngags kyi don brjod pa'o/ /sngags spel ba ni zhi ba la sogs pa'i don dang sngags spel ba ste/ /swA hA la sogs pa dang rab tu sbyar te sngags rnams rab tu brjod pa'o//rdo rje tshig sgra spangs pa ni rdo rje bzlas pa'o/ /go [(]rims [,]rim [)#]ni rim pa lnga po rnams so/ /sku dang gsung dang thugs kyi nus pa ni shes rab dang ye shes kyi rang bzhin no/ / bdag po la sogs pa sems dpa' gsum zhes bya ba ni dam tshig sems dpa' dang ye shes sems dpa' dang ting nge 'dzin sems dpa'i bdag nyid can gyi dkyil 'khor ba rnams kyi'o//gnod mdzes rgyal po zhes pa ni gnod mdzes kyi rgyal pos kyang bkug ste bskul ba'o/ /'di ni bdag gi'i zhes pa la 'di ni zhes pa la 'di ni zhes pa ni rnal 'byor pa'o/ /bdag cag gi zhes bya ba ni sems can rnams kyi'o//pha'o zhes bya ba ni rnal 'byor pa bdag ste/ bdag nyid tshogs dang bcas pa la sems can gyi tshogs rnam pa mang po rnams gces par 'dzin par mngon du bsam par bya'o/ /gang yin zhe na zhes pa la sogs pa ni lha'i sku gnyis po mchog dang dam pa yin par ston to//sgron ma gsal bar byed pa zhes bya ba'i le'u bcu pa'i dka' ba btus pa'i bshad pa'o// //le'u dang po las zhes bya ba ni byang chub kyi sems rdo rje de bzhin gshegs pa la sogs pa las rdzogs pa'i rim pa ston to/ /de nas 'di gsungs ma thag tu zhes pa la sogs pa ni bskyed pa'i rim pa ston to//mtshan ma gsum zhes bya ba ni nyi ma dang zla ba dang pad+ma rnams gcig tu gyur pas snying gar ye shes sems dpa' zhal gcig phyag gnyis pa 'khor lo dang dril bu 'dzin pa dang / de'i thugs kar yi ge oM bsgom pa la bya'o/ /de ltar 'od dpag tu med pa la sogs pa rnams kyi sbyor ba yang bsgom par bya'o//dran pa gcig pa'i ting nge 'dzin/ /zhes bya ba ni rnam par snang mdzad la sogs pa'i rnal 'byor pas srung ba'i 'khor lo la sogs pa'i rim gyis rdo rje 'dzin pa'i bdag nyid lha sum cu rtsa gnyis po skad cig tsam gyi rnam par bsam mo/ / de nas oM shU n+ya tA la sogs pa'i sngags kyi rim gyis rnam par snang mdzad la sogs pa 'khor lo lta bur bsam par bya'o/ /de bzhin du byang chub sems dpa' rnams kyi rim pa sgrub thabs kyi yang rjes su chags pas gdon pa la sogs pa bsgom par bya ba yin no/ /de bzhin du thams cad bskyed la zhes bya ba ni hUM las skyes pa'i nyi ma dang //a las skyes pa'i pad+ma dang / de las skyes pa'i yi ge gsum po bskyed pa'o/ /gzugs kyi phung po la sogs pa rnams dang zhes bya ba ni gzugs kyi phung po la sogs pa la byang chub sems dpa' rnams zhugs te/ 'od gsal bar gyur pa ni mchod pa yin no//dang por mig gi sbubs zhes bya ba ni mig gi rdog ma la sogs pa stong par byas nas 'od gsal bar gnas pa la/ yi ge th+liM la sogs pa las skyes pa'i sa'i snying po la sogs pa bsam par bya'o/ /rdo rje ut+pal zhes bya ba ni gsang ba'i rdo rje nyid ut+pala'i sgrar brjod do//de bzhin gshegs pa'i bkod pas kyang bskyed par bya'o zhes bya ba ni/ rnam par snang mdzad kyi rnal 'byor pas rang gi mig gi gnas su rnam par snang mdzad dam sa'i snying po dgod par bya'o/ /de bzhin du 'og nas bshad pa'i mi bskyod pa la sogs pa rnams kyi rnal 'byor pas kyang rna ba la sogs pa la mi bskyod pa la sogs pa bsam par bya'o//sku gsum po oM zhes bya ba ni gzugs dman pa dang 'bring dang mchog rnams bsgrub par bzung ba'o/ /sgron ma gsal bar byed pa'i le'u bcu gcig pa'i dka' ba btus pa'i bshad pa'o// //de ltar lam zhes bya ba ni dbang po la sogs pa'i rab tu 'jug pa rnams ji lta ba bzhin du rnam par dag pa'o//rim pa gnyis kyi zhes bya ba ni byang chub kyi sems rdo rje'i kun rdzob dang don dam pa ste/ rnal 'byor pa'i bskyed pa'i rim pa dang rdzogs pa'i rim pa'o/ /phyag rgya chen po yongs su gyur pa ni de'i 'bras bu ste//'jig rten dang 'jig rten las 'das pa'i dngos grub bo/ /dang por rnam par snang mdzad kyi zhes bya ba la sogs pa ni dang por rnam par snang mdzad kyi rnal 'byor du byas la de nas mdun gyi bar snang du yi ge oM gyi 'khor lo ji srid du drod skyes par gyur pa de srid du drod skyes par gyur pa de srid du bsgom mo//de nas lag pas blangs na 'grub par 'gyur ro/ /de ltar mi bskyod pa la sogs pa'i rnal 'byor pas kyang rdo rje la sogs pa mngon du gyur pa'i bar du bsgoms nas lag pas blangs na 'grub par 'gyur te/ mig yangs zhes pa 'og nas 'byung ba'i 'bras bu rnams dang 'brel te //de ltar ri lu'i dngos grub rnams kyang blta bar bya'o/ /mgo bo'i sgor zhes bya ba ni spyi bo'i steng gi steng ste der ri lu mngon du gyur par byas la tshangs pa'i sgo de nyid du rab tu zhugs par bsgoms na 'grub bo/ /rab tu mnyam pa'i cha lugs 'dzin pa ni rang gi lha'i sbyor ba dang mthun par brjod pa'o//yul gzhan dag ces bya ba ni 'dod chags kyi yul lo/ /lus dang ngag dang yid kyi zhes bya ba ni sku la sogs pa'i lcags kyus de bzhin gshegs pa rnams drangs nas nang du bcug ste/ rnal 'byor pa'i rin po che lta bu'i gang zag rnams kyi bsgrub bya dgug pa'i don to//de nyid kyi sbyor ba bstan par bya ba'i phyir zhes bya ba la sogs pa ni rlung gi dkyil 'khor las phab la dbang chen la gzhag par bya'o/ /skye bo skal ba dang ldan pa zhes bya ba ni rnal 'byor pas gzhan gyi don du bya'o/ /gzhan dag tu zhes bya ba ni gdug pa can gyi sems can la'o//thun mong ma yin pa zhes bya ba ni spyod yul ma yin pa'o/ /rgyas gdab par bya'o zhes bya ba ni snyoms par 'jug par bya'o zhes bya ba'i don to/ /lag par gnas pa zhes bya ba ni bsgrub par bya ba bkug la lag pas bzung ste/ bzlas pa'i sngags kyi yi ge de la dbang du bya ba la sogs pa'i sngags bzlas shing bsam gtan bya ba'o//sgrar grag pa zin pa dang zhes bya ba ni sems can gyi 'byung bas bskyed pa'o/ /ma zin pa ni rnga dang shing la sogs pa'i sgra'o/ /gnyi ga ni sems dang sems med pas byas pa'i sgra'o/ /'bras bu'i phyogs gcig po zhes bya ba ni tha mal pa'i dngos grub bo//de nas sa'i cha la sogs pa zhes bya ba ni gzhal yang khang brtsegs pa la sogs pa'o/ /rgyu dang 'bras bu zhes bya ba ni snga ma snga ma ni rgyu yin la phyi ma phyi ma ni 'bras bu yin no/ /bdag po rdo rje 'chang chen po zhes bya ba ni mi bskyod pa'o/ /gsang ba gsum zhes bya ba ni yul dang dbang po dang rnam par shes pa ste/dman pa dang 'bring po dang / mchog gi dbye bas dbang po'i rnam par shes pas yul rnams 'dzin to/ /de la rim pa bzhin du rab tu sbyar nas mtshan ma rnams rab tu skye ste/ mtshan ma dbang po rnams yang dag par skye bar 'gyur ro//rdo rje'i lam ni 'od gsal ba nas so/ /thabs dang shes rab snyoms par 'jug pa zhes bya ba ni bden pa gnyis gcig tu gyur pa'o/ /sgron ma gsal bar byed pa'i le'u bcu gnyis pa'i dka' ba btus pa'i bshad pa'o// //rim pa gnyis ni ma rdzogs pa dang rdzogs pa'i rim pa dag la bslab pa'o//ma gnang ba'i mngon spyod ces bya ba ni sems can gyi don spangs pa'i dbang phyug chen po la sogs pa'i dbang dang mngon spyod la sogs pa'o/ /spyod pa ni las de dag spyod par mdzad pa bskyed pa'o/ /nye bar len pa'i phyag rgya chen po'i sku la nye bar len pa zhes bya ste yi ge gsum pa'o//de smras pa ni sprul pa'i sku nye bar len pa'o zhes pa ste/ phyag rgya chen po'i skur sbyar bas rdo rje bzlas par bya'o zhes bya ba'i don to/ /sangs rgyas rnams kyi zhes bya ba ni mi bskyod pa la sogs pa'i sangs rgyas gzhan rnams kyang ste/ der yi ge gsum gyis sangs rgyas kyi skur bskyed pa la sangs rgyas spyan la sogs pa spros nas snyoms par 'jug pa la sogs pa khyad par can gyi mtshan nyid kyis phan tshun du mchod par bya'o//yang sangs rgyas kyi zhes bya ba ni mi bskyod pa la sogs pa'i sangs rgyas kyi phyag rgya chen po'i sku rnams so//rang gi lus dang ngag dang yid kyi nang na gnas pa'i bkod pa'i mchod pas sku gsung thugs la mchod pa ni bla na yod pa'i mchod par 'gyur ro/ /de ltar dbang po rab dang ldan pa zhes bya ba ni dbang po rab dang ldan pa yi ni dus gcig tu spros par brjod do/ /yang na zhes bya ba ni rim pas spros la mchod pa bya'o zhes ston pa yin no//ye shes kyi khyad par gyis zhes bya ba ni rlung dang rnam par shes pa sgyu ma'i rang bzhin can gyis so/ /sku rdo rje zhes bya ba la sogs pa ni yi ge gsum rnam par dag pa'i sgo nas rdo rje bzlas par bya ba brjod pa yin no/ /don gyi rjes 'gro zhes bya ba la sogs pa ni gsal lo//lus te zhes bya ba ni rnam par dag pa gang gis gshin rje gshed la sogs pa skyes pa dang bud med kyi mtshan nyid can du bya ba'o/ /ma rig pa'o zhes bya ba ni stong pa chen po'o/ /des don du gnyer zhing gsal ba ni hUM gis bsgrub bya sbar bar bya ba'o/ /'di nyid kyi cho ga zhes bya ba ni dkyil 'khor par gyur pas zhi ba la sogs pa bya'o //kha sbyar dbye ba zhes bya ba ni bsgrub bya'i mig la sogs pa lus la bcug la las rnams bya ba'o/ /rnam par snang mdzad yongs su gyur pa las zhes bya ba ni rnam par snang mdzad kyi rnal 'byor pas rnam par snang mdzad las skyes pa'i rdo rje sems dpa' sbyor ba dang ldan pa mngon spyod bya ba yin no//phun sum tshogs pa ni bskyed pa'o/ /bdag ni zhes bya ba ni bdag de bzhin gshegs pa che ge mo'i zhes nga rgyal dang ldan par bya'o/ /bsgrub bya'i lus rang gi gzhir gyur pa zhes bya ba ni bzhi pa'i bsgrub bya'i bdag nyid stong par bsam pa'o//nam mkha'i dbyings kyi dbus te zhes bya ba ni rdo rje sems dpa'i shes rab kyi chos 'byung ba la'o/ /der yi ge oM bltas la rdo rje sems dpa' nang du bcug nas bdag nyid bsgoms te/ bdag nyid kyi snying gar bsgrub bya dgod par bya ba'o/ /de'i mdun du ste zhes bya ba ni snang ba mtha' yas kyi mdun du ste/byang na gnas pa'i don yod grub pa'o/ /de dag la zhes bya ba ni mi bskyod pa dang snang ba mtha' yas dag gi gtso bo don yod grub pa ste/ de mi bskyod pa las byung ba'i don yod grub pa'o/ /de'i snying gar 'dod pa dgod de/zla ba dang rdo rje la sogs pa la ltos pa med pa ni zla ba dang nyi ma dang sa bon la sogs pa la mi ltos par zung du 'jug pas bskyed pa la bshad do/ /sgron ma gsal bar byed pa'i le'u bcu gsum pa'i dka' ba btus pa'i bshad pa'o// //sngags rnam pa bzhi'i zhes bya ba ni sbrul la sogs pa'i sngags bzlas pas drag po'i las dang rims la sogs pa zhi bar bya ba'i las so//snying ga'i phyogs su zhes bya ba ni swA hA sngon du song ba'i che ge mo A kAR+Sha ya hri zhes bya ba'i sngags dang spel ba bris te snying gar gzhug pa'o/ /nyi ma'i dkyil 'khor gnyis kyi dbus su tshud par byas la zhes pa ni bsgrub bya sems dpa' gsum gyi bdag nyid du bsgoms te/de'i ting nge 'dzin gyi sems dpa'i 'od zer gyis bsgrub bya bkru bar bya bar bsam mo/ /lag mthil gnyis su zhes bya ba la sogs pa ni gsal lo/ /de'i de kho na nyid ni gzhan du mi 'gyur ba nyid ces bya ba ni rdzas dang bzlas brjod la ltos pa med par bsam gtan tsam gyis 'grub pa la bya'o//sangs rgyas ni ston pa'o zhes bya ba ni rdo rje 'dzin pa la sogs pa'i phyag rgya rnam pa gnyis po'i sbyor ba can dag ste/ bskyed pa dang rdzogs pa'i rim pa rnam pa gnyis po can no/ / las [(]gyi [,]kyi [)]tshogs la mkhas pa rnams kyang zhes bya ba ni rgyud gzhan gyi las kyi tshogs rnams mthong zhing byed pa la mkhas pa rnams kyang ngo / /mi'i rus pa zhes bya ba la sogs pa la mi'i rus pa'i phung po ni rnam par snang mdzad kyi'o/ /seng ldeng gi phur pa ni snang ba mtha' yas kyi'o/ / lcags kyi phur pa ni mi bskyod pa'i'o/ /tsan+dan la sogs pa'i phur pa ni don yod grub pa dang / rin chen 'byung ldan gyi'o/ /gnas las nyams par 'gyur ba ni gnas 'dor ba'o/ /de bzhin du ngag mnan pa dang sems mnan pa yang bya ba yin no/ /yang na gsang ba 'grub par 'gyur ro/ /sgron ma gsal bar byed pa'i le'u bcu bzhi pa'i dka' ba btus pa'i bshad pa'o// //dkyil 'khor gyi dbus su zhes bya ba ni mi bskyod pa'i rnal 'byor pas shes rab ma dang rigs lnga dang ldan par byas te gnas pa'o/ /'khyud par byas pa ni dkyil 'khor gyi dbus su rol par bya ba'o/ /nub nas zhes bya ba ni thun tshod dag 'das nas zla ba 'char ba'i dus te/nam phyed kyi dus su dbang bskur ba thob par bya ba'o/ /'grub ces bya ba ni nyi ma 'char ba'i dus su ste/ phyi rol gyi snang ba la sogs pa'i ye shes kyi snod du gyur pa'o/ /rang bzhin gyis 'od gsal bar sngon du 'gro bas zhes bya ba ni 'od gsal ba mdun du dran par byas nas/thabs dang shes rab snyoms par zhugs te snang ba la sogs pa nang gi bdag nyid can rnams yang dag par bsam par bya ba'o/ /nyi ma ni snang ba nye bar thob pa'o/ /'di spel ba ni brtan par byed pa yin no zhes bya ba ni swA hA sngon du 'gro ba'i che ge mo s+t+waM b+ha ya phaT ces pa'o/ /dam tshig chen po'i khro bo zhes pa ni gshin rje mthar byed do//sgrub po gzhan las len pa zhes pa la sgrub po ni dgug pa shes pa'i slob dpon las kyang ngo / /gnod pa 'di gcod par 'dod pa yi zhes bya ba ni rnam par snang mdzad dang rdo rje 'dzin pa nas khro bo'i rnal 'byor pa gang yang rung ba'i bar gyis de zlog par byed na tshe zad cing gtugs par 'gyur ba yin no//las de brtsams pa nas zhes bya ba ni bgegs bya ba'i las brtsams nas so/ /i daM di ba ya zhes bya ba ni gser la sogs pa byin cig hri swA hA zhes bya ba'o/ /rlung la sogs pa zhes bya ba ni rlung gi dkyil 'khor la sogs pa'o/ /gal te bag med pas byung bar gyur na de'i tshe mche ba'i phyag rgya zhes pa la/phyag rgya ni mche ba tshar gcod pa'i phyag rgya ste rta mgrin no/ /de'i sbyor bas bgegs kyi las rnams med par bya'o/ /de ltar ma byas na bya ba rnams mi 'grub ste/ de'i tshe dkyil 'khor la sogs pa rnams 'jig cing gcod par 'gyur ro/ /phaT ni gsod pa'o zhes bya ba ni phaT che ge mo mA ra ya phaT ces pa'o//'di ni gsod pa'i sngags te zhi ba la sogs pa'i sngags la yang tha mar gsad pa'i sngags byin na gang gi tshe yi ge phaT de/ de'i tshe gsod pa'i don gyi bya ba byed do/ /ye shes kyi rim pa zhes bya ba ni ye shes sems dpa' bcug pa'i rim pas rdo rje mi bskyod par bsgoms nas/ spyan la sogs pa'i lha mo bzhi po rnams bton to// dkyil 'khor lnga'i bdag nyid du skad cig gis bskyed la rnal 'byor par bsgom par bya'o/ /sngags dang phyag rgyas legs par brlabs pa'i bud med bzhi zhes bya ba la sogs pas ni rig pa'i brtul zhugs kho na bshad pa yin no/ /rang gi snying ga'i pad+mo la sogs pa zhes bya ba la sogs pa ni pad+ma'i steng du ye shes sems dpa'o//de'i steng du yi ge hUM gnas par bsgoms te/ de nyid dkyil 'khor gyi bdag po rdo rje 'chang dang mi phyed par lhag par mos par byas la de nas gang yang rung bar byas nas/ ye shes sems dpa' dgug par bya ste/ nang gi bdag nyid kyis 'bad par bya'o/ / de yang sems dpa' las skyes pa'i sna tshogs rdo rje la gnas pa 'og nas 'chad pa'i zhal gyi pad+ma bzhad bag can du gyur pa'i zhal dang ldan par bsgom par bya'o zhes bya ba'i don to/ /da ni phyag rgya gcig dang zhes bya ba ni rdo rje sems dpa' 'ba' zhig gi rnal 'byor gyi phyag rgya gcig tsam zhig dang lhan cig tu rig pa'i brtul zhugs dpyad par bya ba'o //dza ni dza ra yu ste bud med kyi sha ma'o/ /su ni su bar+Na ste gser ti ni tam pa ste zangs ma'o/ /ru ni ru pa na ru ste de dag gis bkri bar brjod do/ /nus pa bskyed pa'i phyir dang zhes bya ba ni mthu chen po bskyed pa'i phyir na'o/ /de ltar mngon du byas pa la spyod pa'i zhes bya ba ni skyil mo krung bcas pa'o/ /yang dag par bskul la thabs kyi ye shes 'byung bar byas na zhes bya ba ni sems snying rje'i rang bzhin can ye shes sems dpa' bskyed de bsgom par byas nas yi ge bzhi po snod la gsal por bsam shing blta'o//gsung gi rdo rje snying ga'i phyogs su babs nas zhes bya ba ni gsung gi rdo rje'i 'od zer thugs rdo rje la babs te bskul bas so//'di lta bur bsgrub bya dang por bsams nas zhes bya ba ni bsgrub bya thob pa la sogs pa dang ldan pa'i mi bskyod par bsams pa'i bsgrub bya des thob pa la sogs pas rang sangs rgyas la sogs pa la rab tu bsnun par blta'o/ /de nas bsgrub bya de'i mig la sogs pa rang gi sa'i snying po la sogs pa la bcug la bsgrub bya de bsgrub par bya'o//yi ge hri'i 'od zer gyis zhes bya ba ni kha na gnas pa'i yi ge khaM de'i steng gi nang rol dpral ba'i thad kar yi ge hri bltas la de'i 'od zer gyis dug rnams drangs te bris pa'i sbrul gyi dpral bar zhugs nas/ kha na gnas pa'i yi ge khaM gi nang du dug de 'ong bar bsam mo/ / bsgrub par bya bas mnyes par bya ba zhes bya ba ni bsgrub bya'i rang gi yi dam gyi lha ste de phur bus gdab po/ /snod kyi snying gar gnas pa zhes bya ba ni bsgrub bya gang yin pa'i lus spo la dug spo bar byas pa la de nas snying gar ro/ /yi ge hUM zhes bya ba ni sngar gyi sku rdo rje'i rang bzhin yi ge oM gyis dug gso bar bya ba dang spo ba de bzhin du 'dir yang thugs rdo rje'i rang bzhin yi ge hUM gis bya bar brjod do//rkang pa'i 'og ni snying ga'i dbus dang rkang mthil gyi dbus so/ /de ltar sdud pa'i tshul gyis zhes bya ba ni de lta bur thams cad 'dis gcig tu bsdus par byas te/ skyugs par blta bar bya'o/ /hri bsgoms nas zhes bya ba ni 'dab ma rnams la gnas pa'i yi ge hri'i 'od zer gyis dug rnams mnyes shing bsdus nas drangs te/yi ge a las zhugs pas yi ge a rgyas par gyur pas bsdus nas sa la btab par bya'o/ /mtshan ma dang bcas pas zhes bya ba ni sngags la mchog tu gzhol bas skyes pa dang bud med la sogs pa mthong ba'o//mtshan ma med pa zhes bya ba ni 'jig rten las 'das pa'i dngos grub kyi mtshan ma ste nang la mchog tu gzhol bas byang chub ye shes mchog ces bya ba la sogs pa mthong bar 'gyur ro/ /dga' ba lnga zhes bya ba ni dbang po lnga po dga' zhing bde ba'o//sgron ma gsal bar byed pa'i le'u bco lnga pa'i dka' ba btus pa'i bshad pa'o// //'ba' zhig tu bris shing gzhag par bya'o zhes bya ba ni bdag po phyag rgya dang ldan par dbus su gzhag la gzhan mi bskyod pa la sogs pa ni shar la sogs pa'i phyogs su phyag rgya yangs par bri'o zhes bya ba'i don to//pad+mas brgyan pa bris la zhes bya ba ni pad+ma'i dkyil 'khor zla ba'i dbyibs lta bur pad+ma'i phreng bas brgyan pa ste/ lha de kho na nyid kyi phyir lha'i bdag nyid kyi de kho na nyid du bya'o/ /sngags la mchog tu gzhol ba ste des ni zhes bya ba ni 'phags pa de kho na nyid bsdus pa las gsungs pa'i tshul shes pas rnal 'byor tsam bskyed pa yin yang gsang ba 'dus pa dang mtshungs par bya ba ni ma yin no//yang dbang po gnyis kyi sbyor ba zhes bya ba ni ji lta ba'i phyi rol gyi me la lhag ma la sogs pa'i sreg rdzas rnams phyi'i sbyin sreg byed pa de bzhin du snyoms par 'jug pa'i sbyor bas kyang nang gi bdag nyid kyi sbyor bas nang gi sbyin sreg bya ste/dbab pa'i rdo rjes zhes bya ba ni 'od dpag med kyi rang gi ngo bos phab la gzung ngo / /'di yis ni sngon du brjod pa'i dbab pa'i cho ga gsal bar byed do/ /dbab pa byas nas mi bskyod pa la sogs pas bsgrub bya'i lus dang ngag dang yid la byin gyis brlab par mdzad do/ /a khaM bi ra hUM zhes bya ba 'dis ni slob ma dkyil 'khor du gzhug par bya'o//sangs rgyas kun gyi zhes bya ba ni rdul tshon gyi dkyil 'khor la bsgrub pa byas nas nang gi mchod pa bya ba ston to/ /yungs kar zhes bya ba ni de bzhin gshegs pa thams cad kyi rjes su chags pa sngon du 'gro ba'i gsang ba'i dbang bskur ba brjod pa yin no/ / yang na zhes bya ba la sogs pa ni lha mo rnams kyis dbang bskur ba ni slob ma la bsam par bya'o/ /slob dpon thams cad kyi zhes bya ba la sogs pa ni thugs kyi dkyil 'khor la sogs par dbang lnga pa la sogs pa'i dbang bla mas bskur bar bya'o/ /de yang dbang bskur ba chen po zhes bya ba la sogs pa'i tshigs su bcad pa 'don cing sbyin no//shes rab dang ldan pa ni mA ma kI la sogs pa dang snyoms par 'jug pa'i sbyor ba dang ldan pa la'o/ /dam tshig dang sdom pa 'dzin pa zhes bya ba la sogs pa ni sngags dang bsgom pa la sogs pa la dngos grub bsgrub pa'i don to/ /ji ltar 'dod pa smra ba'i slob ma la rjes su gnang pa sbyin par bya ba ni bsam pa shes par byas la sbyin par bya'o zhes bya ba yin no//khu ba zhes bya ba la sogs pa ni gsang ba'i dbang bskur ba la sogs pa sbyin par bya ba yin par ston to/ /gnod sbyin gyi gtso bo ni phyag na rdo rje'o/ /bsgrub byar gyur pa'i gdug pa rnams zhes bya ba ni nyan thos kyi lta ba can du sun 'byin pa'i blo can rnams la nus mthu gsal por gyur pa'i rnal 'byor pas brtan par bya ba'o//rdo rje chen po bsgom zhing zhes bya ba la rdo rje ni rdo rje sems dpa'o/ /bsgom pa ni de zhu ba las byung ba'i yi ge tsuM ste/ de las skyes pa'i rdo rje chen po ni skul byed ma bsam par bya ba yin no/ /skul byed ma zhes bya ba ni gdug pa can gyi lus dang ngag dang yid la 'joms shing 'joms par byed pa ste/lus ngag yid ces bya ba ni bzhi pa'i tshig mang po bar blta bar bya'o/ /don ni 'di yin te gdug pa can rnams kyi lus dang ngag dang yid rnams 'joms so zhes pa'i don to/ /rdo rje bdud rtsi chu zhes bya ba ni byang chub kyi sems kyi rang bzhin du bsams te/ spyi gtsug tu sbyin par bya'o/ /sgron ma gsal bar byed pa'i le'u bcu drug pa'i dka' ba btus pa'i bshad pa'o// //cho 'phrul zhes bya ba la sogs pa ni bcom ldan 'das kyis shing a mra la sogs par sprul nas mdzad pa bstan pa ji bzhin du rang sangs rgyas kyang lus nye bar sprul nas gdul bya de dag sems rangs par byed par 'dod do//de lta bu nyid ni bcom ldan 'das kyi mdzad pa ste/ de nyid sku rdo rje la gnas pa'i dam tshig yin la/ de nyid kyi rang sangs rgyas kyi rigs can rnal 'byor pas kyang de dang rjes su mthun pa'i chos bstan par bya'o/ /de bzhin du nyan thos la sogs pa'i dam tshig gis kyang de'i rigs can la de dang 'tsham pa'i chos nyid nye bar bstan par bya'o//de bzhin du dbang phyug chen po'i go 'phang thob par 'dod pa'i 'dod chags can rnams la 'dod chags bsten pa'i sgo nas chos ston par byed pa ni de'i tha tshig go/ /de bzhin du khyab 'jug gi go 'phang 'thob par 'dod pa la yang thams cad stong pa nyi tshe ba zhes bya ba'i chos ston pa ste de dag ni sku rdo rje la sogs pa'i rang bzhin no//gnod sbyin mo la sogs pa'i dam tshig ni sha la sogs pa bza' ba dang sems khro ba la sogs pa dang ldan par byas pas gnod sbyin mo la sogs pa bsgrubs pas gzhan dag dang de dag nyid du bcas pa yang dag pa'i lam la gzud do //gnas kyi mtshan nyid ces bya ba ni rang rang gi phyag rgya dang sngags kyi gzung ma 'khyud de gsad pa la sogs pa'i las rnams bya'o/ /rdo rje las byung ba ni 'od gsal ba'o zhes bya ba ni dngos po rnams 'od gsal ba'i rang bzhin 'od gsal bar bskyed par bya'o//chos ni mi dge ba bcu spangs pa'o/ /chos ma yin pa ni mi dge ba bcu po'o/ /blang dor la ltos pa med par nyams su len pa ni 'od gsal ba'o/ /de nyams su blangs pas rnal 'byor pa mi gnas pa'i mya ngan las 'das par 'gyur ro/ /dgos pa'i dbang gis zhes bya ba ni sangs rgyas la sogs pa la lus dang ngag tsam gyis phyag 'tshal zhing lus ngag tsam gyis phyag bya ba yin no//phyi rol gyi bcud kyis len gang yin pa de la ltos pa med pa zhes bya ba ni ting nge 'dzin gyis lus bstan par byed pa'i cho ga ston to/ /bdud rtsi zhes bya ba ni rdo rje sems dpa' las bdud rtsi 'dzag pa'i rang bzhin dbu rgyan gyis gnas te/spyi gtsug tu gnas par bsam par bya'o/ /rdo rje phra mo ni lce ste lce de'i rtse mo kha la reg pa las sems mnyam par gzhag par 'gyur ro/ /rnal 'byor thams cad ces bya ba ni kun rdzob dang don dam pa'i bdag nyid can gyi rdo rje 'dzin pa ste/ bdag dang khams gsum po der mnyam par longs spyod par bya'o//nyon mongs pa can ma yin pa ni mngon sum du byed pa'i thabs kyi sbyor ba rigs pa'o/ /som nyir gyur pa ni de'i shes rab yid gnyis zos nas phan tshun du gros su 'gro bar byed do zhes bya ba'i don to/ /sku rdo rje'i rgyur gyur pa zhes bya ba ni phyag rgya chen po'i rgyur gyur pa la bya'o//spyi bor rdo rje zhes bya ba ni rdo rje rtse lnga pa'o/ /de yongs su gyur pa las rdo rjes nye bar mtshan pa'i rdo rje sems dpa'o/ /rdo rje sems dpa' de yongs su gyur pa las mi bskyod pa la sogs par bsgom par bya'o/ /rim pa 'di nyid dang zhes bya ba ni rdo rje sems dpa' yongs su gyur pa las mi bskyod pa la sogs par gyur pa ji lta ba bzhin du mi bskyod pa la sogs par gyur pas kyang 'jam dpal la sogs pa rnams su gyur te //rdo rje dbyings kyi dbang phyug ma ni shes rab ma'i rang bzhin no/ /phyi rol gyi lha la zhes bya ba ni mi bskyod pa la sogs pa'o/ /de rnams las mngon par zhen par byed pa'i lag pa'i phyag rgya mi bcing ba'o//dregs pa dang gdugs ni mi'i sna'o/ /rdzogs pa dang zla ba ni de'i nang gi rtsa zlum po'i rnam par dag go/ /rus sbal mgrin ni de'i nang na rtsa pad+ma'i rnam pa lta bur gnas pa'o/ /lta ba de bzlog par bya ba'i phyir zhes bya ba ni tha mal ba'i lta ba la sogs pa rnam par dag pa'o/ /slob dpon de zhes bya ba ni 'dus pa ston pa po ste/de bzhin gshegs pa'i sprul pa'i gzugs de la rab tu mchod cing sku la sogs pas byin gyis rlob pa dang / de bzhin gshegs pa rnams kyis rjes su gnang ba stsol ba dang bla na med pa'i yang bla na med pa'i dbang bskur bas na byang chub kyi sems rdo rje slob dpon no/ /de nyid kyi zung du 'jug pa'i bdag nyid yin pas na rdo rje 'dzin chen po dang shin tu rnam par dag pa chos kyi dbyings kyi ngo bo mi bskyod pa'o//gsang ba lnga'i zhes bya ba ni de bzhin gshegs pa lnga'i bdag nyid slob dpon gyi lus la mchod pa'i spyi kun bya'o/ /rang gi snying ga'i pad+ma la zhes bya ba ni shin tu spros pa med pa shes par 'dod pa la sngon du dkyil 'khor sprul nas yi ge gsum dang srog dang stsol bas byang chub kyi sems nges par phab ste/slob ma'i spyi bor blugs la de nas yang dag pa'i bden pa'i ngo bor slob ma bsams nas chu la sogs pa'i rim pas dbang bskur ba sbyin par bya'o/ /nam mkha'i dbyings zhes bya ba la sogs pa ni spros pa dang bcas pa shes par 'dod pa'i don ston pa yin no//de'i 'og tu zhes bya ba la sogs pa ni snga ma bzhin no/ /rab tu sbyangs pa 'gro ba zhes bya ba ni shin tu yang spros pa med pa 'dod pa la de lta bur bya ba yin no/ /rang gi lus zhes bya ba ni thog mar rnal 'byor pa rang gi lus kyi sha dang rus pa la sogs pa 'od gsal bar blta bar bya'o//de nas hUM tri khaM zhes bya ba la sogs pas rdo rje mkha' 'gro skyed par byed pa yin no/ /bu ni sangs rgyas rnams so/ /tsha bo ni byang chub sems dpa' rnams so/ /pad+ma dang rdo rje yang sbyar bas don skye bar byed par shes par bya'o/ /sa ni spyan ma ste shes rab kyi dngos por rol par bya'o//'di lta ste zhes bya ba la sogs pa ni yi ge oM las byung ba'i 'khor lo'i dbus su bsgrub bya 'od zer ser po dang ldan par bzhag la/ /de'i steng du yang 'khor lo gnas par bsams te dug med par bya'o/ /ser po lta bur bya ba ni mnan pa'i dus su ni thams cad ser por bsgom par bya'o/ / mchod yon gyi shing ni shing de'i 'bras bu'i nang na pad+mo'i bal te de bsgril la pad+ma'i skud pas dkris pa'o/ /nang gi mngon par byang chub pa ni snang ba la sogs pa'o/ /shes rab kyi rab rib kyi zhes bya ba ni de kho na nyid rtogs pas sems zhu bar gyur pa'o/ /drug pa'i bdag nyid ni rdo rje 'dzin pa'o/ /snyoms par zhugs pa'i bdag A li kA li zhes bya ba ni g.yas dang g.yon pa'i rtsa'o//nam mkha'i gtos zhes bya ba la sogs pas ni mngon par rtogs pa'i rim pas bstan pa yin par brjod do/ /'di'i don ni rdo rje sems dpa' chur zhu ba'i 'od zer gyis sems can thams cad la reg pas de bzhin gshegs pa'i ye shes thob par byas pa'i sa bsgul ba'i de ma thag par kun bzhengs par gyur te/de bzhin gshegs pa rdo rje 'dzin pa'i spyod pa la bcom ldan 'das nyams su bstar nas bzhugs pa na ngo mtshar du che'o zhes bya ba la sogs pa brjod pa yin no/ /de ltar bstan pa mdzad nas gsung gi rdo rje la bstod par mdzad pa rdo rje chos zhes bya ba la sogs pa ston to//rdo rje chos zhes bya ba'i tshig ni phyag na rdo rje la bya ba yin no/ /sgron ma gsal bar byed pa'i le'u bcu bdun pa'i dka' ba btus pa'i bshad pa'o// //slob dpon legs ldan byed kyis mdzad pa sgron ma gsal bar byed pa'i rdo rje'i tshig gi dka' ba btus te bshad pa zhes bya ba rdzogs so// //rgya gar gyi mkhan po rgyal ba mchog gi zhal snga nas dang / /bod kyi lo tsA ba dge slong dpal shAkya brtson 'grus kyis mnyan nas bsgyur zhing zhus te gtan la phab pa// //