CLOSE WINDOW

D1754
བོད་ཡིག

@##/ /rgya gar skad du/ shrI ma hA kA la maN+Da la bi d+hi nA ma/ bod skad du/ dpal nag po chen po'i dkyil 'khor gyi cho ga zhes bya ba/ dpal nag po chen po la phyag 'tshal lo/ /gang zhig lus ni grangs med pa yi/ /sna tshogs rnams su sprul par mdzad nas/ /'jig rten pa yi don rnams phyed phyir//de bas nag po chen por skyabs mchi/ /dpal ldan nag po chen po'i rgyud kyi/ /bya ba'i cho ga rim pa bzhin du/ /gzhung de nyung bar bsdus pa las ni/ /cho ga rdzogs par shes par bya phyir/ /rgyud gzhan dag tu bshad pa ltar du/ /cho ga blangs nas sdeb pa'i ming ni/ /dngos grub rin chen 'byung gnas zhes bya'i//bdag gi dkyil 'khor cho ga de bsgrags/ /'dir 'khor ba thog ma med pa nas ma rig pa la sogs pa'i tha gus shes rab bcings pa/ dka' ba spyad na 'khor ba'i rgya mtsho spang bar nus pas/ steng dang 'og tu 'gro ba'i lus can rnams la/ dbang bskur bar 'dod pa la sogs pa rnams kyi don du tshogs gnyis las yang dag par dad pa dang ldan pa/mang du thos pa/ gsang sngags la gnas pa/ brtan pa/ ser sna dang bral ba/ brtson 'grus dang snying rje dang ldan pa'i slob dpon gyis gdul bya yang dag par gdon pa'i bsam pa dang bcas te/ rim pa ji lta ba bzhin sngon du bsnyen pa bya ba la sogs pa'i cho ga bya ba ni/de yang slob ma dbang bskur ba la sogs pa'am/ rang ngam gzhan gyi dngos grub sgrub pa la sogs pa'am/ sems can gyi don chen po mthong ba rnams kyi don du dkyil 'khor bri ba la/ tshogs sogs la sogs shes pas sngon du/ /bsnyen pas bgegs rnams brlag par bya ba//thams cad mkhyen pa'i lam shes pa yis/ /bsnyen med dngos grub med pa'i phyir ro/ /de phyir bsdad la gnyid spangs nas ni/ /rim bzang de nyid shes pa de yis/ /lha yi 'khor lo bsgom par bya ste/ /dal gyur de sngags rgyun du brjod do/ /'khor lo'i gtso bo 'bum du bzlas nas//rang nyid lha la yang ni 'bum bzlas/ /'khor rnams la ni khri phrag re re/ /sngon 'gro'i bsnyen par 'di la brjod do/ /lha bskyed pa dang sngags rnams kyi rim pa ni mngon rtogs ltar bya ste/ mangs kyis dogs pas 'dir ma spros so/ /de ltar sngon du bsnyen pa'i dus su rnal 'byor pa dkyil 'khor gyi lha gsal bar 'dod pas 'khor lo la brtan par gnas te/'khor lo'i gnang ba byin pa'am ma byin pas slob ma gzung ba la sogs pa bya'o/ /'di ni sngon du bya ba'i cho ga ste bsnyen pa'o/ /de nas ston zla tha chungs dang dgun zla tha chungs la sogs pa rnams la/ dge ba'i dus tshod shes par byas pa dang /lan gnyis sam gsum du slob mas gsol ba gdab po/ /dkyil 'khor bri bar 'dod pa de'i tshogs pa ma tshang bar gyur na/ de'i tshe de dag gi lte ba'i nyi ma'i steng gi hUM gi 'od zer gyis snying ga'i kaM yongs su gyur pa las sdig pa kha dog nag po gos dang bral ba/gzugs ngan pa/ mtshan ma 'phyang ba/ skra gyen du 'greng ba/ sha za lha bu cig sna bug nas byung ste/ hUM snying gar 'phros pas rdo rje hUM mdzad du gyur nas de phyir phyung la/ oM suM b+ha naM suM b+ha hUM hUM phaT/ oM gr-ih+Na gr-ih+Na hUM hUM phaT/ oM gr-ih+NA pa ya gr-ih+NA pa ya hUM hUM phaT/ oM A na ya ho b+ha ga bAn bid+yA rA dza che ge mo'i sarba pA paM nA sha ya hUM hUM phaT swA hA zhes brjod cing /lag pa'i rdo rje'i 'od zer gyis phyir thon pa'i sdig pa stong par gyur par bsam mo/ /oM AHshaM ka re shan+ti ka re g+huT+Ta g+huT+Ti ni/ g+hA ta ya g+hA ta ya/ g+huT+Ti ni/ oM gr-ih+Na gr-ih+Na hUM hUM phaT/ che ge mo rak+Sha swAhA hUM zhes brjod de yang dag par bsrungs la bdud rtsi kha sbyor gyi sngags kyang bzlas so//de ltar byas na de la bgegs mi 'jug cing tshogs pa che yang tshegs med par tshang par 'gyur ro/ /'di ni slob ma gzung ba'i cho ga'o// //de nas dge ba'i nyi ma'i thun la sogs pa'i bye brag las snga dro'i dus su nye bar longs spyod pa'i rdzas rnams bsogs la/bya ba la mkhas pa'i grogs dang bcas pas dkyil 'khor gtso bo dang bcas pa'i sbyor ba la legs par gnas te/ shar la sogs pa'i phyogs rnams kyi skyon spangs la/ tshong 'dus sam/ grong khyer ram/ grong ngam/ skyed mos tshal lam lha khang ngam/ khang pa rnams las gang yid dang mthun pa'i byang shar mtshams su shar dang byang gzhol ba'i dkyil 'khor gyi sa gzhi legs par bcas la dri la sogs pas byugs te/dkyil 'khor gyi lha legs par mchod nas/ gtor ma gtang ba dang nam mkha' la bzhugs su gsol lo/ /de na gnas pa'i zhing skyong la sogs pa rnams la gtor ma dang /mchod pa la sogs pa bya ba ni/ 'di na gnas pa'i lha klu gang dag rnams/ /gnod sbyin srin po rnams sam gzhan dag la/ /sa gzhi de nyid bdag ni zhu ba yis/ /dkyil 'khor bzhengs pa'i don du de stsol cig /ces pa la sogs pa lan gsum dang bcas pa ste/ rmi lam la sogs par de rnams kyis gnang ba dang mi gnang bar go bar byas nas/las thams cad pa'i sngags zlos bzhin pas nyungs kar dang chu dang thal bas bsangs la/ der rdo rje skyil mo krung bcas te sa'i lha mo la zhabs bsil dang zhal bsil ar+g+ha dang mchod pa rnams sngon du song bas/ skyob pa la sogs pa lan gsum brjod pas snyan gsan phab pa dang /de ltar bgyi'o zhes pa smra bzhin pa de yid kyis nam mkha' la bteg la/ phyis sa gzhi de la bgegs med par byas nas gtor ma byin pa dang / sa bdag klu'i lto bar rab 'bring tha ma'i dbye bas lte ba rked pa pus mo nub pa tsam pa'i sa brko bar bya'o/ / 'di ni sa brko ba'i cho ga'o/ /de nas thal ba la sogs pa bsal te/ dri zhim pa'i chus gtor la legs par bkang ba dang / hUM zhes pa dang las thams cad pa'i sngags zlos shing dri'i chu de nyid du gtor zhing bcag go/ /khru phyed pa sa gzhi mnyam pa cung zad rus sbal gyi rgyab 'dra ba yid tsam shar dang byang du gzhol ba'i sa stegs bca'o//gzhan yang / ro yi skyon ni ma lus pa/ /gdon par nus par ma gyur na/ /lag pa gzhag la sngags bzlas te/ /de las dag pa gzhan yod min/ /khang bzangs rdo stegs grub thob 'brog /lha khang la sogs rgya mtsho'i 'gram/ /sngon du bcas pa'i gnas de rnams/ / ma sbyangs pas na dag pa'o/ /de la oM b+hu khi zhes pas nam mkhar bya ba'o/ /hUM laM hUM zhes pas rdo rje'i rang bzhin du bsams la/ oM me di nI badzra b+ha ba ban+d+ha hUM gis lag pa sa la bzhag la byin gyis brlabs te/ sa gzhi de nyid la gtor ma dang zhabs bsil la sogs pa sbyin pa dang / oM AHhUM zhes brjod nas nam mkha' la bteg pa'i lha rnams spyan drang ngo / /'di ni sa sbyang ba gnyis kyi bye brag gi cho ga'o// //de nas dkyil 'khor gyi steng du bsdad la rdo rje dril bu dang bcas te/ dpal nag po chen po'i rnal 'byor dang ldan pas spos kyi snod bzung la/ hUM las rdo rje'i lce dang ldan pas/phyogs kun du ni gnas pa yi/ /sangs rgyas rnams la bdag bltas nas/ /'dir ni rdo rje che ge bdag /dkyil 'khor chen po bzhengs lags pas/ /spyon cig sangs rgyas la sogs rnams/ /'dir ni dngos grub gnang bar zhu/ /zhes pas sangs rgyas la sogs pa rnams la snyan gsan phab nas/mchod pa dang / nam mkha'i khams dang mnyam pa'i rnam par snang mdzad la sogs pa rnams kyis bdag nyid la gnang ba byin par bsams te/ de nas dkyil 'khor gyi 'khor lo'i spro ba la sogs pa sngon du song bas bsgoms pa'i dkyil 'khor de/rdo rje khu tshur gnyis bcas te/ /mdzub mo gnyis brkyang ba'i rtse mo sprad nas thur du phyogs pas spyi gtsug tu gzung la/ oM badzra u tiSh+Tha zhes pa brjod pas nam mkhar bteg ste skyil krung bshig nas/ shar du kha phyogs rkang pa gshibs te langs pa dang / spyi gtsug tu thal mo sbyar nas de bzhin gshegs pa rnams la phyag btsal lo//ma rig pa'i mun pas bsgribs pas bdud kyi byin gyis brlabs pa'i sems can rnams la nye bar dmigs te/ de rnams kyi bdud rnams brlag par bya ba'i don du/ skad cig gis rdo rje hUM mdzad kyi sku khros pas gnas pa khro gnyer dang bcas pa mche ba gtsigs pa la sogs pa dang ldan pas/mig g.yas phyogs dang g.yon phyogs su ma dang Ta las nyi ma dang zla ba'o/ /de gnyis la hUM las 'jig pa'i dus kyi me dang mtshungs pa'i mig 'bras bsams pa'i rdo rje'i lta stangs kyis phyogs thams cad kyi 'gro ba rnams la lta zhing nga rgyal bskyed pa ni/slob dpon bdag ni rdo rje 'dzin/ /rdo rje sems dpa' nyid kyang bdag /sangs rgyas rgyal po chen po bdag /bdag ni stobs chen rdo rje can/ /rje rigs rgyal po rnal 'byor bdag /bdag ni mi 'gyur phyag rdo rje/ /zhes pa brjod nas/ rkang pa'i 'og tu 'bar bzhin pa'i rdo rje bsams nas skabs su sa gzhi la rdo rje'i dbyibs bya ba ni/rdo rje gsor zhing dril bu dkrol ba dang bcas pas rdo rje'i 'gros bya ba ni/ byang shar mtshams nas g.yas skor du dkyil 'khor dang mnyam par gar bya zhing bskor ro/ /nyon cig bgegs rnams 'dus pa'i tshogs/ /lus ngag yid rnams brtan gyur pa'i//bdag ni dpal ldan rdo rje 'dzin/ /bka' yi 'khor lo rab tu bskul/ /rgyun du lus la rdor 'bar bas/ /lus po dum bu gsum du byed/ /gang dag bdag gis bka' 'das na/ /brlag 'gyur 'di ni gzhan min no/ /zhes pa lan gsum du brjod cing khro bo dpag tu med pa spros te/bgegs bskrad par bya'o/ /sa gzhi yang rdo rje'i sa gzhi la thug par hUM las rdo rje'i rang bzhin du byin gyis brlab po/ /de nas sa gzhi'i dkyil 'khor me tog la sogs pas yang dag par mchod nas lag pas sa la reg la dkyil 'khor gyi gtso bo'i sngags brgya rtsa brgyad bzlas la/dkyil 'khor gyi lha rnams bsdus la nyal lo/ /'di ni bgegs bskrad pa'i cho ga ste sa chog go/ /de ltar bgegs med par bsams nas snga bar langs te rdo rje 'dzin pa'i zhabs la spro ba'i 'gro ba rnams kyi don du skad cig gis stong par mos par byas la/raM las nyi ma'i steng du hUM las sna tshogs rdo rje la gnas pa'i hUM gi 'od zer las 'bar bzhin pa'i rdo rje rnams 'bros pas bar mtshams med pa'i rdo rje'i lcags ri dang gur dang gdugs dang bla re rnams 'bar bzhin pa bzod par dka' ba dang / sa gzhi yang sna tshogs rdo rje'i rang bzhin du bsam par bya'o/ /de'i dbus su skad cig gis rdo rje sems dpa'i gzugs kyis bdag nyid du gnas nas/ phyi nas rdo rje hUM mdzad du bsams pa'i rang gi sa bon las 'od zer 'phros pas phyogs bcu na gnas pa'i bgegs rnams bkug ste/hUM las spros pa'i khro bo de rnams kyis me tog dmar po'i phreng ba btags pa'i phur pa stod rang 'dra ba/ smad rtse mo gcig pa'i rnam pa 'jig pa'i dus kyi me dang 'dra ba lag pa g.yon pa na'o/ /g.yas pas rang gi phyag mtshan yongs su gyur pa las tho ba bzung bar bsams nas hUM ring po brjod pas 'obs su gyur par bcug ste/phyogs skyong de rnams la oM badzra kI li kI la ya sarba big+h+nAM hUM zhes pa brjod cing mgo la phur pa gdab po/ /oM badzra mung+ga ra A ko Ta ya hUM zhes brjod cing tho bas brdung bar bsam pa ni slob dpon gyis byang shar mtshams nas brtsams te dkyil 'khor gyi me ri'i phyi rim nas g.yas skor du phyogs bcur phur pa gdab par bya'o//yang na phur pa med par ji ltar bshad pa'i bsam pas phur bu gdab par bya ste/ lag pa gan rkyal thur la sbub nas/ oM badzra hUM zhes brjod cing sa la brdabs pas bgegs med par bsam mo//'di ni bgegs la phur pa gdab pa'i cho ga'o/ /de nas dkyil 'khor gyi sa'i steng du bsdad nas bcas pa'i dkyil 'khor la yi ge baM las byung ba'i sa'i lha mo bsams te/ lag pa g.yas pa'i sor mo gsum la zla ba'i steng du hUM gsum dmigs la/sa gzhi la lan gsum brdabs pa'i sgra dang hUM gi 'od zer gyis sa 'og gi ye shes sems dpa' spyan drangs pas byon nas dam tshig pa dang gcig tu gyur pa dang / zhi ba na bza' dkar po sku mdog ser po rgyan sna tshogs kyis brgyan pa/ gser gyi bum pa bzang po phyag gnyis kyis bzung ba/ zhal gcig pa mdun du bzhugs pa la ar+g+ha la sogs pas sngon du yang dag par mchod nas myur par/ skyob pa sangs rgyas thams cad kyis/ /spyod pa'i tshul gyi khyad par gyis/ /sa dang pha rol phyin pa la/ /lha mo khyod ni dpang du gyur//shAkya seng ge skyob pa yis/ /ji ltar bdud kyi sde bcom ltar/ /de bzhin bdag gis bdud sde las/ /rgyal bar byas nas dkyil 'khor bri/ /zhes pa lan gsum du brjod de lhag gnas bya'o/ /de yang de ltar bya'o/ /zer nas slar de nyid du thim par bsam mo//de nas rdo rje thal mo thur du bcings pas sa gzhi mnan te/ oM badzri b+ha ba hUM zhes pa lan gsum gyis byin gyis brlabs pas rdo rje bcings pa las 'bar bzhin pa'i yi ge hUM spros pa dang / sa gzhi rdo rje'i sa gzhir gyur par bsam pa ni/ oM badzra dr-i D+ha tiSh+Tha zhes pa lan gsum brjod de byin gyis brlab po//des ni sa gzhi bdag nyid kyi dbang du byas pa'o/ /'di ni sa'i lha mo lhag par gnas pa'i cho ga'o// //de nas dkyil 'khor gyi sa gzhi dri zhim pos byugs te me tog gi gcal du bkram nas dgongs ka'i dus su khrus byas la/ rgyan thams cad kyis brgyan pa dang dkyil 'khor gyi shar phyogs su bsdad nas kha nub tu bltas te/ dkyil 'khor gyi gtso bo'i rnal 'byor dang ldan pas tsan+dan la sogs pa'i spos byug maN+Dal byas la dam tshig gi 'khor lo bsgoms nas/ de la nam mkha' na gnas pa'i ye shes kyi dkyil 'khor spyan drangs la gzhug /mchod pa la sogs pa byas nas byang du kha bltas te/ byang shar mtshams na gnas pa'i bum pa rnams lhag gnas bya ba ni der gser la sogs pa las byas pa'i bum pa mtshan nyid dang ldan pa stong par bsams te//baM las rin po che'i bum pa bsam pa ni zhi ba dang rgyas par bya ba'i don du sa dkar pos byugs pa lha rnams kyi phyag mtshan btab par bdud rtsi lnga dang bcas pa'i dri'i chu dang / rin po che dang sman dang 'bru lnga rnams snying por gzhug shing lngas legs par brgyan/ phreng ba dang bcas pa'i mgul chings ras kha tshar ma nyams pa gnyis kyis bcings la/dri zhim po'i maN+Dal gyi steng du mdun du legs par bzhag ste/ hUM lnga bzlas shing zhi ba la sogs pa'i las kyi dbye bas skud pa kha dog lngar byas pa rnams kyis/ oM badzra shi kha re ru Ta ma Ta di shI ban+d+ha hUM zhes pa'i sngags brjod cing bskor ro//de rnams kyi nang du/ oM tap+te ma hA tap+te swA hA zhes pas ye shes kyi chu spyan drangs te skad cig gis lha'i dkyil 'khor bskyed la/ rang gi snying ga'i sa bon gyi 'od zer gyis ye shes kyi 'khor lo spyan drangs nas zhabs bsil la sogs pa phul ba dang /bum pa dang 'khor lo la zhugs pas sngon du bkang ba'i chu dang ro gcig tu bde ba chen por zhu nas byang chub sems kyi gzugs su gyur par bsam zhing / de nas gtso bo'i bum par gtso bo'i snying po brgya rtsa brgyad bzlas nas las thams cad pa'i sngags kyis me tog gsum dbul lo//de ltar bum pa gzhan rnams la yang rang rang gi sngags nyi shu rtsa gcig gam bdun gyi bar du bzlas so/ /de ltar me tog rnams dbul lo/ /sngags ni gzhan du shes par bya'o/ /de nas rnam rgyal bum pa la sogs pa me tog la sogs pas yang dag par mchod nas/las thams cad pa'i sngags kyis bsrung ba'i don du bsang gtor byas la/ 'dir dkyil 'khor gyi bya ba ma zin pa'i bar du bgegs srungs shig ces brjod nas gtor ma byin te dril bu dkrol lo//'di ni bum pa lhag par gnas pa'i cho ga'o// //de nas nub tu kha bltas te dkyil 'khor gyi sa gzhi la 'khor lo'i gtso bo la sogs pa bsgoms la zhabs bsil la sogs pa sngon du song pas yang dag par mchod pa dang bstod pa dang bdud rtsi myang ba byas nas/ pus mo g.yas pa sa la btsugs te/hUM las lce rdo rjer byin gyis brlabs la/ lag pa g.yas pas spos snod gzung g.yon pas dril bu dkrol zhing brjod pa/ nag chen rdo rje bcom ldan dpal/ /rig rgyal khyod la phyag 'tshal bstod/ /dkyil 'khor snying rje'i sems ldan pas//'dri bar 'dod pas mgon po kye/ /'gro ba rnams la snying rje dang / /khyed rnams la ni mchod pa'i phyir/ /da ni gus byed rje btsun la/ /bka' drin gnang phyir sbyor bar mdzod/ /gzigs shig bdag la sangs rgyas rnams/ /'gro rnams 'khor lor byed don ster/ / bzang por zhugs pa'i byang sems dang / /gzhan yang sngags kyi lha rnams dang / /lha dang 'jig rten skyong ba dang / /'byung rnams rdzogs sangs rgyas las mnyan/ /bstan mi 'jig pa'i sems can la/ /gang zhig de dag snying rje'i mchog /che ge rdo rje chen po bdag /dpal ldan nag chen dkyil 'khor bskyed/ /ris gcig 'gro rnams dag bya'i phyir/ /ji ltar nus pas mchod pa las/ /rjes su brtse ba dang ldan pas/ /bdag dang slob ma'i tshogs dag dang / /dkyil 'khor la ni 'dus pa rnams/ /ma lus par ni gzhug tu gsol//brjod cing gsol ba gdab po/ /'di ni lha lhag par gnas pa'i cho ga'o// //de nas slob dpon nyid kyis dbang bskur ba'i las kyi rdo rje dang bcas pa'i dkyil 'khor la zhugs pa rnams yang dag par mchod nas ye shes kyi thig la sogs pa'i don du dkyil 'khor nam mkhar bteg la shar du kha phyogs te/dpal nag po chen po'i rnal 'byor dang ldan pas gzhon nu mas bsgrims pa'i skud pa lnga tshan lnga la kha dog lnga yis so sor bsgyur te lag pa g.yon pa'i steng du bzhag nas/ bruM AM dzrIM khaM hUM rnams las rigs lnga rdzogs par bltas te/las thams cad pa'i mngon par rtogs pa dang ldan pa'i slob mas skud pa bzung ba'i grogs dang bcas pas dang por skud pa lnga tshan so sor re rer bsgrims la/ phyi nas de rnams gcig tu bsgrims te gzhan yang de ltar sbyar bar bya'o/ / oM AHa n+yo n+yA nu ga tAHsarba d+harmAHs+pha ra s+pha rA nu wiSh+TaHsarba d+harmAHAt+yA n+ta a nu pra wiSh+TaHsarba d+harmAHoM AHhUM zhes brjod cing bsgrims pa ni srid du dkyil 'khor nyis 'gyur la/ sboms su sgo'i nyi shu cha yod pa'i skud pa'o/ /phyi nas dri dang bdud rtsi lnga yis bsgo bas snod gtsang mar bzhag la/las thams cad pa'i sngags kyis bsangs nas/ oM badzra sa ma ya sU tra mA ti kra ma hUM zhes pa bzlas so/ /yang dkyil 'khor gyi sa gzhi la oM sarba saM sho d+ha ni hUM phaT ces pa'i sngags kyis so/ /bri bya'i dkyil 'khor nam mkha' la gnas pa la ar+g+ha dang zhabs bsil sngon du song bas yang dag par mchod nas/bstod pa dang bdud rtsi myang ba dang phyag btsal te/ sgrub pa po nag po chen po'i rnal 'byor dang ldan pa dang / byang phyogs kyi sgrub pa pos las thams cad pa'i ting nge 'dzin la gnas pa dang / bdag dang de nyid kyi mig g.yas dang g.yon du dzaHyongs su gyur pa las nyi ma dang zla ba cung zad ser ba bsams te/rdo rje 'gros kyis bcag pa ni lag pa g.yon po khu tshur bcangs pas skud pa lte bar bzung la/ dz+dzaH'am dzaHlan gsum brjod cing btang ngo / /byang gi sgrub pa pos kyang skud pa snga ma ltar bzung la dz+dzaH'am dzaHlan gsum brjod cing mdun du phyogs par gnas las dgug par bya'o//nub tu bsdad cing shar du kha blta ba dang / lho ru bsdad cing byang du kha bltas nas/ lag pa g.yas pa rdo rje dang bcas pa mtheb mdzub gnyis kyis skud pa bzung la se gol gtogs shing tshangs thig gnyis lte ba'i thad ka'i nam mkha' la btab nas gzhan yang gdab pa ni/oM badzra sa ma ya sU tra mA ti kra ma hUM oM swA aHhA zhes brjod cing gdab po/ /nam mkha'i thig ji lta ba bzhin du sa la yang tshangs thig gnyis gdab po//gzhan yang de ltar me mtshams dang rlung mtshams kyi thig dang bden bral dang dbang ldan gyi thig kyang gdab po/ /yang me mtshams su bsdad de byang du kha phyogs pas shar phyogs kyi grub thig dkyil 'khor gyi tshad du gdab po/ /rlung mtshams su bsdad de lhor kha phyogs nas nub phyogs la'o//de nyid du bsdad nas byang phyogs la yang ngo / /de nas me mtshams su gnas te nub tu kha phyogs pas lho phyogs la'o/ /dkyil 'khor gyi brgyad cha dang ldan par bya ba ni tshangs thig gi g.yas dang g.yon gnyis su cha chung gnyis gnyis sgo la'o//phyi nas rtsa ba'i phyi rol du rim pa ji ltar cha chung gcig dang gnyis pa ste/ gnyis dang bzhi rim pa bzhin thig drug la pany+tsa rA ga dang 'dod yon dang / rin chen pha gu dang / dra ba dra phyed dang / pha gu li dang / kra ma shriR+Sha rnams kyi snam bu logs la gdab po//tshangs pa'i thig nas cha chung gnyis ma gtogs pa bdun gdab po/ /ka ba'i steng du cha gnyis la rta babs bgo bar bya'o/ /yang rgyud las/ rta babs sgo yi sum 'gyur ro/ /zhes bshad pas so/ /rta babs kyi steng du tshangs thig la chos kyi 'khor lo cha chung gnyis pa'o//de'i phyi rol du sna tshogs rdo rje'i rtse mo la cha chung gnyis so/ /dkyil 'khor gyi lte bar phur pa gdab pa ste/ hUM las phur par bskyed nas/ phur pa'i sngags bzlas shing bzung la tho ba'i sngags kyis rdo rje tho bas brdungs la de la skud pa btags te/ dbang ldan mtshams nas g.yas skor du sna tshogs rdo rje'i phyi rol nas pad+ma'i ra ba'i don du re khAs bskor ro//phyi rol du cha chung gnyis dor bar pad+ma dang rdo rje'i ra ba'i bar gyi re khA'o/ /de las cha chung gnyis dor bar rdo rje'i ra ba dang / me ri'i bar gyi re khA'o/ /de'i phyi rol du me lce mnyam pa'i don du cha chung bzhi dor bas me ri'o//phyi nas rtsa ba'i thig dang tshangs thig gi bar du bskor ba ni tshangs thig nas cha chung lnga la ge sar ro/ /de las cha chung gcig la mu khyud do/ /de'i phyi rol du cha chung bcu 'dab ma'i don du'o/ /de las cha chung gcig la mu khyud do//de'i phyi rol du cha chung gcig la rdo rje'i phreng pa'o/ /de nas mi dgos pa'i thig rnams dbyi bar bya'o/ /de ltar thig gdab pa zin nas gtor ma dang mchod pa sngon du song bas/ oM AHhUM badzra muHzhes brjod de/ ye shes kyi thig nam mkha' la gnas pa'i 'khor lo snying gar bstim mo//sa tshon lnga so sor legs par gzhag go/ /'di ni dkyil 'khor gyi thig gi cho ga'o// //de nas gtor ma byin la/ sa tshon dkar po dang ser po dang dmar po dang ljang gu dang nag po rnams rin po che las byas pa'am rdo las byas pa'am/ me tog las byas pa rnams la bruM AM dzrIM khaM hUM rnams las rnam par snang mdzad la sogs par bskyed la/oM badzra tsi tra sa ma ya hUM zhes pa'i sngags brgya rtsa brgyad bzlas te/ me tog la sogs pas mchod nas snod gtsang mar bzhag pa dang / de nas dbus kyi phur pa bton te bdag nyid kyi lag pa'i rdo rje la thim par bsam mo//phur khung sa tshon lngas bkang nas dkyil 'khor gyi steng du bsdad la/ lag pa g.yon pa'i khu tshur sa la bzhag ste/ oM badzra rA ga sa ma ya oM AHhUM zhes brjod cing dbang ldan mtshams nas shar du kha phyogs te//g.yas skor du sa tshon dgye ba ni/ der phyi rol gyi re khA nas brtsams te/ nang gi re khA'i bar du sa tshon gyi rtsig pa dkar po dang ser po dang dmar po dang ljang gu dang nag po rnams bkye la/ 'dod yon gser mdog gam pad+ma rA ga'i kha dog go/ /sgo khyud rnams dang mtshams rnams su zla ba phyed pa rdo rje rin po che dang bcas pa'o//rin po che'i pha gu dmar po/ dra ba dang dra ba phyed pa nag po ba ku li dang kra ma shIR+Sha la sogs pa rnams kyi gzhi nag po/ rta babs kyi ka ba dang 'khor lo'i nang bla bres kyi 'og gi gzhi phyogs tshon no/ /rta babs kyi stegs dang /ba ra Na Da la sogs pa ji ltar mdzes par ro/ /chos kyi 'khor lo ri dgas dang bcas pa ser po'o/ /sna tshogs rdo rje'i rtse mo dang ra phyogs tshon no/ /pad+ma'i lte ba ljang gu ge sar ser po'o/ /'dab ma sna tshogs pad+ma'o/ /de'i gzhi dmar skya'o//rdo rje'i phreng ba sngon po'o/ /me rigs lnga'i kha dog go/ /rtsa ba'i thig gi nang du zur gnyis gnyis kyi phyogs bzhi/ g.yas g.yon du dkar po dang dmar po dang ser po dang ljang gu rnams su'o/ /de ltar kha dog gi rim pa shes par bya ste/ sa tshon dgye bar bya'o/ / lte ba la dpal nag po chen po phyag bcu drug pa'i mtshan ma dgod pa ni/ sna tshogs pad+ma nyi ma dang bcas pa'i steng du rdo rje rtse lnga pa kha gdengs pa'o/ /shar dang lho dang nub dang byang gi 'dab ma la gtum pa'i dbang phyug ma dang / tsartsi ka dang dus can ma dang / rigs kyi dbang phyug ma rnams kyi nyi ma la gri gug gis spras pa rnams so//mtshams rnams la thod pa'o/ /shar la sogs pa'i sgo bzhir chom rkun ma dang / ri mo can dang / dga' byed chen mo dang / dga' ba'i dbang phyug ma rnams kyi sna tshogs pad+ma nyi ma dang bcas pa'i steng du rnga ma dang spos khang dang rdo rje dril bu rnams so//phyi rol du dur khrod brgyad dgod do/ /phyi nas hUM zhes bya ba brjod nas las thams cad pa'i sngags bzlas so/ /bdud rtsi lnga dang bcas pa'i dri'i chus dkyil 'khor gyi phyi rol rnams la gtor te/ oM AHhUM badzra muHzhes pa brjod cing sa tshon lhag ma'i ye shes pa gshegs nas snod du blugs te dben pa'i gnas su gzhag go//'di ni tshon gyi cho ga'o/ /de nas sngon du lhag gnas byas pa'i bum pa rnams g.yas skor gyis dgram pa ni de rnams kyi nang nas gtso bo dang rnam rgyal gyi bum pa gnyis dkyil 'khor gyi 'khor lo la g.yas skor byas nas me ri'i phyi rol gyi shar sgor stan la bag tsam g.yas su bzhag /g.yon du rim pa bzhin du gtum pa'i dbang phyug ma dang las thams cad pa'i bum pa'i chom rkun ma ste gnyis g.yas skor byas te gzhag go//lho phyogs su g.yon du tsartsi ka dang g.yas su ri mo can no/ /nub phyogs kyi g.yon du dus can ma dang / g.yas su dga' ba chen mo'o/ /byang phyogs kyi g.yon du rigs kyi dbang phyug ma dang / g.yas su dga' ba'i dbang phyug ma'o/ /chom rkun ma la sogs pa bzhi 'ga' zhig gi mtshams su 'dod de/de ltar na mtshams bzhi'i bum pa rnams dang / mda' bzhi la dar btags pa rnams las thams cad pa'i sngags kyis gzugs so/ /'di ni bum pa dgram pa'i cho ga'o// //de nas slob dpon dri zhim pos lus la byugs te/dar gyi gos dang thod la rgyan btags pa gon la/ las thams cad pa bzlas pa'i chus dkyil 'khor bsngags pa dang / yi ge gsum dang las thams cad pa'i sngags kyis yang dag par bsrungs te rdo rje dang dril bu bzung la shar gyi sgor kha nub tu phyogs pas bsdad nas 'khor lo'i gtso bo'i rang bzhin dang ldan pas skad cig gi stong pa'i ngang las bris pa'i dkyil 'khor bsgom par bya ba'i dkyil 'khor gyi rang bzhin nges par dmigs la/legs par sbyangs pa'i phyi rol gyi phyag rgya dang snyoms par 'jug pas sam/yang na ye shes kyi phyag rgya dang snyoms par zhugs pa'i sbyor ba'i sgras 'og min nas ye shes pa spyan drangs te zhabs bsil la sogs pa sngon du song bas mchod pa dang bdag nyid la zhugs pas chags pa chen pos zhu nas rdo rje'i lam nas thon te pad+mar ye shes kyi 'khor lo'i rang bzhin du gyur pa rnams spros pas phyi rol gyi dam tshig gi 'khor lo la rim pa ji lta ba bzhin du zhugs par bsam mo//yang rang gi sa bon gyis spyan drangs pa'i lha mos dbang bskur bas gtso bo la mi bskyod pas so/ / shar la sogs pa na gnas pa'i lha mo brgyad rnams la rnam par snang mdzad la sogs pa rnams kyis go rims bzhin du rgyas gdab bo/ /phyi nas sems kyis sprul pa'i mchod pa'i lha mo spros te/ mchod la na bza' dang bla re phul te/ yi ge gsum gyis byin gyis brlabs pa'i bza' ba dang bca' ba dang bldag pa dang gzhib pa dang btung ba rnams kyis mchod pa la sogs pa dang /gser dang bu mo dang rta dang glang po dang ba lang la sogs pa rnams phul la/ gzugs rdo rje ma la sogs pa lta bu'i phyi rol gyi rnal 'byor ma bcu drug gam brgyad dam bzhi rnams kyis rang rang gi mchod pas mchod do//dril bu dkrol zhing bstod pa byas nas bdud rtsi myangs pas bde ba chen po'i ro myong bar bsam mo/ /de nas gtso bo'i sngags brgya rtsa brgyad dang 'khor rnams kyi nyi shu rtsa gcig bzlas pa dang 'og nas 'byung ba'i tshogs 'byung po rnams kyi gtor ma sbyin no//'di ni dkyil 'khor sgrub pa'i cho ga'o// //de nas slob ma rnams kyis maN+Dal byas la/ pus mo sa la btsugs te me tog dang bcas pa'i thal mo sbyar nas sngags kyi theg pa la sbyor ba rnams la 'jig rten 'di dang phyi ma bde bar bya ba'i don du ma yin par 'on kyang de bzhin gshegs pa'i sku thob par bya ba'i phyir dkyil 'khor du 'jug par 'dod pa gnyis bsgrub po snyam du shes par byas la/bla ma la kha phyogs pa de rnams zhal du zhugs te rdo rje'i lam nas pad+mar son pa rnams la 'od zer gyis shes rab dang bcas pa'i de bzhin gshegs pa rnams spyan drangs te zhu nas snga ma ltar zhugs pas dbang bskur bar bsam zhing shar gyi sgor bstan pa de ye shes dbab pa'i rjes gnang blang ngo //dpal chen khyod bdag ston pa po/ /u mas stabs cig kha sbyor khyod/ /byang chub chen pos tshul bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems kyang bdag la stsol/ /sangs rgyas chos dang dge 'dun dang //skyabs gsum dag kyang bdag la stsol/ /thar pa chen po'i grong mchog tu/ /mgon po bdag ni gzhug tu gsol/ /zhes brjod la slob ma gcig gtso bor byas te/ bu tshur theg pa chen po la/ /gsang sngags spyod pa'i tshul 'byung ba'i/ / khyod ni tshul chen snod yin pas/ /khyod la yang dag bshad par bya/ /dus gsum sangs rgyas yang dag rnams/ /sku gsung thugs kyi rdo rje can/ /dbyer med gsang sngags nus mthu yis/ /mnyam med yang dag ye shes thob/ /gsang sngags sbyor ba mnyam med pas//bdud kyi sde ni 'jigs ster ba/ /gang gis stobs chen gyis bcom nas/ /shAkya seng ge la sogs mchog /'jig rten bsam pa mkhyen pa yin/ /'khor lo bskor nas mya ngan 'das/ /de phyir bu khyod blo gros 'di/ /gyis shig thams cad mkhyen thob phyir//zhes brjod la don blang ngo / /de nas yang / dkon mchog gsum la bdag skyabs mchi/ /sdig pa thams cad so sor bshags/ /'gro ba'i dge la rjes yi rang / /sangs rgyas byang chub yid kyis gzung / /zhes pa lan gsum brjod nas/ spyi'i sdom pa bzung ba dang rdo rje slob dpon gyi sdom pa blang ba'i phyir/'khor lo phyir mi ldog pa'i dbang / /byin cig mgon po bdag brjod kyi/ /'khor lo lha yi de nyid gnyis/ /slob dpon las ni bya ba kun/ /sangs rgyas rnams kyi dam tshig la/ /gsang ba'i sdom pa dam pa rnams//sems can kun gyi don bya'i phyir/ /rtag par bdag nyid slob dpon gyur/ /de ltar bye brag gi gsol ba btab la/ /de nas sems bskyed par bya ste/ sangs rgyas dang byang chub sems dpa' thams cad bdag la dgongs su gsol/ bdag ming 'di zhes bgyi ba dus 'di nas bzung ste/ji srid byang chub kyi snying po la mchis kyi bar la/ ji ltar dus gsum mgon rnams kyis/ /byang chub tu ni nges mdzad ltar/ /byang chub sems ni bla med pa/ /dam pa bdag gis bskyed par bgyi/ /sangs rgyas rnal 'byor sdom pa la//tshul khrims kyi ni bslab pa dang / /dge ba'i chos ni sdud pa dang / /sems can don byed tshul khrims gsum/ /bdag gis brtan par gzung bar bgyi/ /sangs rgyas chos dang dge 'dun te/ /bla na med pa'i dkon mchog gsum/ /deng nas brtsams te gzung bar bgyi//rdo rje rigs mchog chen po yi/ /rdo rje dril bu phyag rgya yang / /yang dag nyid du gzung bar bgyi/ /slob dpon dag kyang gzung bar bgyi/ /rin chen rigs mchog chen po yi/ /dam tshig yid du 'ong ba la/ /nyin re bzhin du dus drug tu//sbyin pa rnam bzhi rab tu sbyin/ /byang chub chen po las byung ba'i/ /pad+ma'i rigs can dag pa la/ /phyi nang gsang ba theg pa gsum/ /dam pa'i chos ni gzung bar bgyi/ /las kyi rigs mchog chen po yi/ /sdom pa thams cad ldan pa ni/ /yang dag nyid du gzung bar bgyi//mchod pa'i las kyang ci nus bgyi/ /byang chub sems ni bla med pa/ /dam pa bdag gis bskyed bgyis nas/ /sems can kun gyi don gyi phyir/ /bdag gis sdom pa ma lus gzung / /ma grol ba rnams dgrol bar bgyi/ /ma bsgral ba rnams bsgral bar bgyi//dbugs ma phyin pa dbugs dbyung zhing / /sems can mya ngan 'das la dgod/ /de ltar brjod nas las thams cad pa'i sngags kyis byin gyis brlabs la/ de'i snying ga dang mgrin pa dang spyi bo rnams su rdo rje pad+ma 'khor lo rnams kyi steng du hUM AHoM rnams bsams pa/de rnams brjod cing snying ga dang mgrin pa dang spyi bo rnams su rdo rje dang bcas pa'i dri chu lag pa g.yas pas reg ste/ me tog mgo la bdug spos dang mar me mdun du dri chab thugs la bshos gtsang phyag tu phul nas/ byang chub kyi shing la sogs pa las byas pa'i so shing sor bcu gnyis pa me tog dang ldan pa slob ma la sbyin no//de nas maN+Dal ba'i ko ba tsam pa'i gru bzhi pa la/ shar ram byang du kha phyogs nas so shing sos bzung la der dor ro/ /de'i shar dang byang dang nub dang lho dang steng dang 'og rnams la rim pa ji lta ba bzhin zhi ba dang mngon spyod dang dbang dang rgyas pa dang /rig pa 'dzin pa dang sa 'og gi dngos grub rnams so/ /maN+Dal gyi phyi rol du song na dngos grub mi 'byung ngo / /de nas baM las byung ba'i chur bskyed la zhabs bsil sbyin no/ /yang oM hrIHbi shud+d+ha d+harma sarba pA phaM naM tsas+ya bi shod+ha ya sarba bi kalpA nA pa nA ya hUM zhes brjod cing dri'i chu khyor ba gsum blud do//de nas bsdad pa de la hUM gis byin gyis brlabs pa'i ku sha stan dang / d+hiHyis byin gyis brlabs pa'i ku sha sngas su byin nas/ de rnams kyi lus dang mnyam pa'i skud pa dmar po sum sgril byas pa la hUM gis byin gyis brlabs te las thams cad pa'i sngags bzlas shing mdud pa gsum byas la/de'i lag pa g.yas pa'i dpung pa'am g.yon pa'i mkhrig ma la btags pa dang / legs par bsrungs la gzengs bstod pa ni/ 'jig rten du ni kun mkhyen rnams//u dum+WA ra'i me tog bzhin/ /brgya lam na ni res 'ga' zhig /'byung bar 'gyur ram 'byung mi 'gyur/ /gsang sngags spyod pa'i tshul 'byung ba/ /de bas kyang ni dkon pa ste/ /gang gi mnyam med sems can don/ /mya ngan mi 'da' byed par nus//bskal pa bye ba du ma ru/ /sdig pa bgyis par gyur pa gang / /de kun dkyil 'khor 'di 'dra ba/ /mthong bas 'byung bar 'gyur lags na/ /grags pa mtha' yas sngags spyod pa'i/ /tshul la gnas na smos ci 'tshal/ /skyob pa'i gsang sngags bzlas na ni//go 'phang bla na med par 'gyur/ /gang dag spyod pa mchog 'di la/ /blo gros shin tu mi g.yo ba/ /de dag gi ni ngan 'gro'i rgyu/ /sdug bsngal thams cad rab tu gcod/ /bdag nyid chen po khyed rnams kyis/ /rnyed pa mnyam med di ring rnyed/ /gang phyir rgyal ba sras bcas pa//bdag nyid chen po kun gyis ni/ /bstan pa 'di la khyed rnams kun/ /yongs su bzung ste skye bzhin pa/ /de phyir khyed rnams theg chen la/ /sang ni rab tu skye bar bya/ /theg pa chen po cher 'byung ba'i/ /lam mchog 'di ni dpal dang ldan/ /khyed rnams der ni 'gro bas na//rang byung skal ba chen po la/ /'jig rten thams cad mkhyen pa yi/ /de bzhin gshegs pa rnams su 'gyur/ /zhes brjod de bshad la yang dag par bsrungs te/ nang par snga bar rmi lam zlos shig ces brjod nas ku sha dang bcas par seng ge ltar nyal du gzhug go//de nas rang nyid dkyil 'khor du zhugs la srung ba'i don du las thams cad pa'i sngags bzlas so/ /'di ni slob ma lhag par gnas pa'i cho ga'o// //de nas nang par snga bar gtor ma btang la dkyil 'khor nas thon pa dang / / slob ma rnams la rmi lam dris te/ ri las lhung ba la sogs pa'i mi dge ba'i rmi lam byung na las thams cad pa'i sngags kyis bsrungs la dkyil 'khor du 'jug pa'i dus su slob mas gsol ba btab pa dang / 'jug pa ni bskor ba byed cing 'khor lo'i gtso bo'i ting nge 'dzin dang ldan pas/slob ma gzhug pa'i cho ga bzhin du 'khor lo'i gtso bo slob dpon du bsams la/ des byin pa rnams la phyis bskur ba'i dbang thams cad la rim pa ji lta bar rdo rje slob dpon gyi bya ba byas te rjes gnang thob pa dang / slob ma gzhug pa'i phyir bden pa'i byin rlabs byas te/chos rnams gzugs brnyan dang mtshungs pa/ /gsal dag dri med rnyog spangs pa'i/ /gzung du med cing brjod bral ba/ /rgyu dang las las byung ba ste/ /de bzhin de nyid las byung ba/ /'di ltar bden pas dkyil 'khor la/ /gzugs brnyan gsal bar slob ma rnams//sdig pa bral kun thams cad ltos/ /zhes brjod do/ /'di ni rdo rje slob dpon 'jug pa'i cho ga'o// //de nas lhag gnas byas pa'i slob ma rnams khrus byas te/ dri zhim po la sogs pas lus la bsgos pa dang / yol ba'i phyi rol du rnam par snang mdzad du bskyed nas las thams cad pa'i sngags bzlas shing dar dmar po 'am ser pos/oM tsak+Shu ban+d+ha bar ma na ya hUM zhes pa'i sngags kyis mig ras bcing ngo / /A khaM wI ra hUM zhes pa brjod de me tog blangs nas yon dbul lo/ /las thams cad pa'i chus bsangs la/de'i lus yi ge gsum gyis 'od zer du gyur par bsams te/ yi ge gsum brjod cing dkyil 'khor gyi shar du gnas pa de las kyi rdo rjes bzung la/ dkyil 'khor 'jug pa bri ba ni/ /bde chen dga' khyod su yin gyi/ /des brjod pa/ bde chen skal bzang bdag lags so//de nas oM sarba yo ga tsit+taM u pA da yA mi zhes brjod byang chub tu sems bskyed la me tog dang ldan pa'i rdo rje snying gar bzhag la/ oM su ra te sa ma ya s+t+waM hoHsid+d+hi badzra ya thA su khaM zhes brjod de/ deng khyod de bzhin gshegs pa thams cad kyi byin gyis brlabs kyis de bzhin gshegs pa thams cad kyi mchog tu gsang ba'i dkyil 'khor 'di/dkyil 'khor ma mthong ba rnams dang dad pa dang mi ldan pa rnams la smra bar ma byed cig ces pa dang / hUM dzaHhUM zhes brjod cing dgug pa ni A khaM bI ra hUM zhes pas yol ba'i nang du bcug nas dkyil 'khor gyi shar sgor bzung la/deng khyod de bzhin gshegs pa thams cad kyi rigs su zhugs pas deng ngas khyod rdo rje ye shes bskyed de/ ye shes bskyed pas khyod kyis de bzhin gshegs pa thams cad kyi dngos grub kyang thob na dngos grub gzhan smos ci 'tshal/dkyil 'khor ma mthong ba rnams kyi sngon du smras na dam tshig nyams nas 'bras bu mi 'byung ngo zhes brjod la/ mgor rdo rje bzung la dril bu dkrol zhing / 'di khyod dam tshig rdo rje ste/ /gal te khyod 'di gang dag la/ /smras na mgo bo 'gas par 'gyur/ /de ltar go bar byas te snying gar rdo rje bzung la/oM rdo rje sems dpa' deng khyod kyi/ /snying la yang dag zhugs pa ste/ /gal te tshul 'di smra gyur na/ /de ma thag tu dral te gshegs/ /zhes pa'i bka' byin la/ rnam rgyal bum pa'i steng gi chu blangs la de la sbyin pa ni/ 'di ni khyod kyi dmyal ba'i chu//dam tshig 'das na bsreg par 'gyur/ /dam tshig bsrungs na dngos grub ni/ /rdo rje bdud rtsi'i chu 'dis thob/ /ces brjod de mna' chu blud do/ /deng nas brtsams te khyod kyi phyag na rdo rje nga yin pas ngas khyod la gang bsgo ba de khyod kyis bya dgos so/ / gal te khyod kyis nga la brnyas pa byas na 'jigs pa chen po ma spangs par dus byas nas shi nas dmyal bar ltung bar 'gyur ro/ /'di ni dam tshig gi chu sbyin pa'o/ /de nas mtshan nyid thams cad dang ldan pa lhag par gnas pa thob pa'i slob ma skad cig gis stong par btang nas/AHlas 'od dpag med du bskyed la de bzhin gshegs pa thams cad kyis byin gyis rlobs shig /rdo rje sems dpa' bdag la dbab par gyur cig ces pa brjod du bcug la/ de'i snying gar laM las sa'i dkyil 'khor ser po gru bzhi pa rdo rjes mtshan pa'i steng du nyi ma las hUM nag po spyi bor hUM baM las chu'i dkyil 'khor dkar po zlum po bum pas mtshan pa'i steng du zla ba la hUM dkar po/mgrin par yaM las rlung gi dkyil 'khor nag po gzhu'i dbyibs lta bu ba dan dang bcas pa la/ zla ba'i steng du AHdmar po rnams dmigs te/rkang pa'i 'og tu rlung gi dkyil 'khor gyis sbar ba ni raM las me'i dkyil 'khor dmar po zur gsum pa 'od zer 'phro bzhin pa la gnas pa/ dz+haiM dmar pos slob ma steng du bskyod par bsam pa ni bdug spos kyis bdugs pa dang dril bu dkrol bzhin pas/A be+e sha ya s+t+waM b+ha ya ra ra ra ra/ tsa la ya tsa la ya/ hUM ha dz+hai AHzhes pa'i sngags brjod cing bsam gtan dang ldan pas dbab par bya'o/ /'bebs pa'i dus su de'i lce las AHdmar po bsams te/ smros shig rdo rje bu khyod kye zhes brjod pas des dge ba dang mi dge ba nges par smra'o//de nas phab pa'i lha rang gi sa bon las bsdus pa slob ma'i mgo la rdo rje bzung ste/ hUM ha A dz+haiM muHzhes pas gshegs su gsol lo/ /'di ni dbab pa'i cho ga'o// //de nas slob ma dkyil 'khor la kha phyogs te gnas pa la mig sngar ci snang dris pa dang /des smras pa'i kha dog gi bye brag gis dngos grub kyi bye brag shes par byas la bden pa'i byin rlabs bya ba ni/ 'di 'dra'i dkyil 'khor 'di nyid la/ /nga yis slob ma gzhug par bya/ /lha rnams rigs ni rim pa yis/ /'di yis dngos grub ji lta bar//rang gi rigs ni gang yin pa/ /bsod nams ji bzhin de yis thob/ /ji ltar bsod nams bsags pa yis/ /de ltar dkyil 'khor 'di las 'byung / /zhes pa 'di ni dkyil 'khor la mig ras dang bcas te 'jug pa'i cho ga'o// //de nas snga ma'i me tog gi phreng ba la pra tIts+tsha badzra hoHzhes brjod cing dkyil 'khor la dor te/re khA lnga'i nang la me tog babs pa'i sa yis de'i rigs shes par bya ba ni gal te/ gtso bo'i smin phrag gam/ mgo bo'am spyi gtsug rnams su phog na phyag rgya chen po dang mig gam kha la sogs pa ro stod du phog na mchog dang /rked par phog na 'bring dang / ro smad du phog na tha ma'i dngos grub thob pa'o/ /de lta bu la sogs par go bar bya'o/ /'di ni me tog dor ba'i rim pa'o/ /de nas mig gnyis la oM gnyis bsams la/ khyod ni di ring rdor sems kyis/ /mig 'byed par ni brtson pa ste//rdo rje mig ni bla na med/ /khyod kyi mig rnams dbye bar bya/ /zhes brjod la mig ras bshu ba'o/ /de nas/ rdo rje kye khyod dkyil 'khor ltos/ /zhes brjod la dkyil 'khor bstan te slob ma dkyil 'khor du gzhug go/ /phyi nas chu'i dbang gi don du bla ma la ji ltar 'byor pa'i yon phul te/pus mo sa la btsugs nas thal mo sbyar la/ /byang chub rdo rjes sangs rgyas la/ /ji ltar byin pas bsnyen bkur ltar/ /bdag kyang bskyab pa'i don du ni/ /nam mkha' rdor sogs bdag la byin/ /zhes brjod la gsol ba gdab pa'o//de nas bla mas phyogs bcu'i de bzhin gshegs pa grangs med pa dang / rig pa'i lha mo rnams yang dag par mchod nas gsol ba btab pas phyag rgya dang bcas pa de rnams chags pa chen pos zhu nas tshangs pa'i bu ga nas zhugs te//rdo rje'i lam nas thon pa des lha mo'i pad+mar slob ma mi bskyod pa'i gzugs su zhal nas zhugs pa la dbang bskur nas/ yang zhal ras la sogs pa snga ma ltar pad+ma nas phyung ste/ nam mkha' la gshegs pa ni spyan ma la sogs pa'i rig ma dang bcas pa rnams kyis bum pa dkar po byang sems kyis gang ba bzung nas/pad+ma nas phyung ba'i slob ma dbang bskur bar 'dod pa de la gzugs rdo rje ma la sogs pas bkra shis kyi glu len cing dbang bskur bar bsam zhing rnam rgyal la sogs pa'i bum pa bsnams nas/nyung zad re thod pa'am las thams cad pa'i bum par gzung ste/ mi bskyod pa'i rang bzhin bdud rtsi'i chus dbang bskur ba ni/ dbang bskur ba ni rdo rje che/ /khams gsum pa yis phyag byas pa/ /byin cig sangs rgyas thams cad kyi/ / gsang ba gsum gyi skye gnas rnams/ /oM AHbadzro da ka a b+hi Shiny+tsa hUM su ra ta s+t+waM a haM zhes brjod cing dbang bskur ro/ /'di ni chu'i dbang bskur ba'i cho ga'o// //de nas slob ma de nyid rin chen 'byung ldan du bsams la/ gser ram ras la sogs pa las byas pa'i cod pan de'i mgo la bzhag ste sngar gyi/dbang bskur ba ni rdo rje che/ /zhes pa la sogs pa'i tshigs bcad dang / oM AHbadzra mu ku Ta a b+hi Shiny+tsa hUM zhes brjod do/ /'di ni cod pan gyi dbang bskur ba'i cho ga'o// //de nas de nyid dang rdo rje gnyis ka 'od dpag med du bsams la/ sangs rgyas kun gyi rdor 'chang las//kun gyis kyang ni de bzung ltar/ /di ring khyod ni dbang bskur te/ /rdo rje dngos grub bzang thob phyir/ /zhes brjod cing rdo rje snying ga dang / mgrin pa dang spyi bor bzhag la lag pa g.yas par gtad do/ /'di ni rdo rje'i dbang bskur ba'i cho ga'o// //de nas de nyid dang dril bu gnyis don yod grub par bsams la de'i lag pa g.yon du gtad pa dang /rdo rje dang dril bu ldan pa'i lag pas 'khyud pa'i phyag rgya bya ste/ oM badzra i d+hi pa ti s+t+waM a b+hi Shiny+tsA mi tiSh+Tha badzra sa ma ya s+t+waM zhes brjod do/ /'di ni dril bu'i dbang bskur ba'i cho ga'o// //de nas de nyid rnam par snang mdzad du bsams la/ spyi bor rdo rje dang dril bu mnyam par bzung la/ oM badzra sa ma ya s+t+waM a b+hi Shiny+tsA mi badzra nA ma a b+hi She ka ta zhes pa dang / zhe sdang rdo rje sems dpa' la/ /zhes pa la sogs pa'am/ me tog lhung ba'i rigs kyi ming gdags shing rnam par snang mdzad kyi rang bzhin du dbang bskur ro//'di ni ming gi dbang bskur ba'i cho ga'o// //bdag gi thugs rje'i gnas yin pas/ /rdo rje slob dpon dbang bdag kye/ /bdag gzhan gnyis ka'i don gyi phyir/ /bdag la khyod kyi bka' drin stsol/ / zhes pa bla mas slob ma la gsol ba 'debs su gzhug cing hUM las rdo rje sems dpar bskyed la/ /thog mtha' med pa'i sems dpa' ni/ /rdo rje sems dpa' dga' ba che/ /kun tu bzang po kun bdag nyid/ /rdo rje bsnyems tshul bdag po'i bdag//'di ni de bzhin gshegs pa thams cad kyi sngon du 'gro ba'i de kho nar bshad de rdo rje'i dam tshig go//de nas yi ge aHlas dril bur bskyed la/ /'di ni sangs rgyas thams cad kyi/ /dril bu'i dbang gis rjes 'gror bshad/ /khyod kyis kyang ni rtag tu bcang / /byang chub mchog tu rgyal ba bzhed//de ltar brjod cing de kho nas blang ngo / /de nas slob mas 'di ltar brjod cing / /srid pa ngo bo nyid kyis dag /ngo bo nyid kyis dngos byas pa/ /rang bzhin dag pa'i sems dpa' ni/ /srid pa dam pa byed par 'gyur/ /des dkrol bar bya'o/ /'di ni dril bu'i dam tshig go//de nas/ phyag rgya'i dam tshig bshad bya ste/ /yid kyi rang bzhin brtan byas la/ /lus kyang thams cad brtan byas pas/ /de ni phyag rgyar bshad pa'o/ /de ltar ye shes phyag rgya byin gyis brlabs pas/ 'dod pa thams cad la nye bar longs spyod pa dang / dngos grub thams cad grub par gyur cig par mos la/ye shes kyi phyag rgya dang kha sbyor gyi rim par byin gyis brlabs te/ 'khyud pa'i tshul dbyer med par bya ba ni phyag rgya'i dam tshig ste/ 'di ni dam tshig gsum gyi cho ga'o// //de nas dam tshig gsum blang ba de nyid rdo rje sems dpa'i dbang bskur bar bsams la/chu'i dbang gi skabs su bshad pa'i cho ga brjod nas/ oM AHsarba ta thA ga ta a b+hi She ka ta sa ma ya shri ye hUM swA hA zhes brjod cing dgug go/ /de nas mi bskyod pa dbu la bsams te/ oM su pra tiSh+Tha badzre swA hA zhes pa'i sngags kyis byin gyis brlabs la/de la me tog la sogs pa dbul lo/ /de nas bsdus la dkyil 'khor gyi de nyid dang rnam par dag par bshad do/ /dkyil 'khor gyi ni pad+mar bshad/ /yid kyi dkyil 'khor ngo mtshar che/ /gzhal yas khang ni shes pa ste/ / sems kyi yar la langs phyir ro/ /phung po lnga po bsdus pa yis/ /sangs rgyas lnga ru rab tu bsgrags/ /zhes pa la sogs pa slob dpon gyi rim pa'o/ /de nas dpal nag po chen po'i snying po'i sngags gsum mam brgya rtsa brgyad bzlas la/ nga yis byin pa'i bcom ldan 'das//'di la nye bar gnas par gyis/ /zhes brjod la sbyin no/ /slob mas kyang 'di ltar brjod do/ /nga yis blang bya rje btsun kyi/ /bdag la nye bar gnas gyur cig /ces pa lan gsum brjod de blang ba sngags kyi rjes gnang ngo / /de nas gser ram dngul las byas pa'i snod du mar dang sbrang rtsi'i mig sman bzung la/gser gyi thur mas slob ma'i mig la braM bsams te/ oM badzra nai tra a pa ha ra pa Ta laM hrIHzhes brjod cing dbye'o/ /'di ni mig sman gyi rim pa'o/ /de nas aHbrjod cing me long bzung nas slob ma la bstan pa ni/ chos rnams gzugs brnyan lta bu ste//dag cing gsal la 'dres pa med/ /gzung du med cing brjod du med/ /rgyu dang las las kun tu 'byung / /me long lta bur rdor sems khyod/ /dag cing gsal la 'dres med par/ /sangs rgyas kun gyi rje bo de/ /bu khyod snying la yang dag gnas/ / ngo bo nyid kyi gnas med par/ /de ltar chos 'di shes gyis la/ /sems can don ni mnyam med gyis/ /skyob pa'i thugs las byung ba'o/ /zhes brjod pa ni me long gi dbang bskur ba'o/ /de nas yi ge hoHlas gzhur bskyed la de nyid gtad pa ni/ de bzhin gshegs pa thams cad la//'di yis bde ba bskyed par gyis/ /zhes pas so/ /slob mas kyang ni brjod pa/ /de bzhin gshegs pa thams cad phyir/ /de yis bde ba bskyed par bgyi/ /zhes pa dang bcas pas bgegs thams cad la bsnun par bsam zhing phyogs bzhi dang steng dang 'og tu mda' dang bcas pas bsnun no//'di ni mda' gzhus bsnun pa'i rim pa'o/ /de nas yol ba la sogs par dben par byas la/ gzhon nu ma dam tshig dang ldan pa'i phyag rgya gsang ba'i dbang gi don du bla ma la phul la/ slob mas thal mo sbyar te bla ma rdo rje 'dzin par bsams la//khyod kyi zhabs kyi bka' drin gyis/ /bdag gis bla med byed pa thob/ /de phyir gsang ba'i dbang bskur la/ /mgon po nyid kyis gzung du gsol/ /zhes pa brjod la gsol ba gdab pa'o/ /de nas bla mas gtso bo'i nga rgyal byas la/ des lha mo'i gzugs su bskyed nas rdo rje dang pad+ma byin gyis brlabs pa sngon du song bas snyoms par zhugs te/lhan cig skyes pa brtan par byas nas/ mthe bong dang srin lag gis byang sems bzung ste gsung rdo rje'i gzugs su slob ma'i khar dbab po/ /de nas kyang kye ma bde'o zhes brjod la btung ngo / /de nas phyag rgya langs te pad+ma'i bcud kyi thig le de'i khar dbab po//des kyang de ltar btung bar bya'o/ /'di ni gsang ba'i dam tshig gi cho ga'o// //de nas de nyid dam gzhan dam tshig dang sdom pa gzugs dang lang tsho dang ldan pa btsal la/ byang chub rdo rjes sangs rgyas la//zhes pa la sogs pas slob mas gsol ba btab pa la/ /'di ni khyod kyis gang 'dod bzung / /sangs rgyas rab brtags brten pa ste/ /'khor lo'i rim pa rab sbyor bas/ /rdo rje'i lus gnas byang sems de/ /nor bu gnas la sems pa'o/ /bde ba dam pa'i dam tshig myong //zhes brjod la gtad do/ /des kyang gur gum la sogs pa'i dri yis byugs te gos spangs nas pad+ma bstan cing / /kye ma nga yi pad+ma la/ /bde ba thams cad dang ldan pa/ /gang gis cho gas brten pa yis/ /de ni nga la gnas pas na/ /pad+ma la ni ji bzhin spyod//sangs rgyas rnams ni mchod sogs phyir/ /bde chen rgyal po'i bdag nyid ni/ /gang zhig 'di las dus kun bstan/ /b+hany+dza mo k+Sha hoHzhes brjod do/ /des kyang rang dang phyag rgya gnyis lha dang lha mor bskyed la/ hUM gnyis las pad+ma dang rdo rje gnyis so//ge sar dang bum pa gnyis AHdang oM las so/ /rdo rje'i bu gar phaT ser po bsams te/ rdo rje dbyibs kyi dbang phyug rtsa/ /g.yon gyi b+ha ga'i g.yon na gnas/ /mdzub mo cung zad bskyed par bya/ /shes nas de ni bla tshig blang / /oM sarba ta thA ga ta a nu rA ga Na badzra swa b+hA ba At+ma kou0f85haM zhes pas bde ba'i don du'o//shes rab dang sbyar dpal dang bcas/ /de nyid yang dag mtshon par byed/ /rdo rje'i lus gnas byang sems te/ /nor bur gnas la sems pa'o/ /de ltar bsam zhing yang dag par bzung nas dkyil 'khor gyis btang ba pad+ma nas lces blangs la de kho nar bltas te/dam tshig gi rang bzhin du btung bar bya'o/ /'di ni shes rab ye shes kyi dbang gi cho ga'o// //de nas tshig dbang bzhi pa byin pa dang / shes rab ye shes kyi dus su byang chub sems kyi myu gu skyes pa des bsgoms pas sgrib pa dang bral ba ni chos thams cad bsam du med pa phyag rgya chen po'i sku rdo rje 'dzin pa chen po'i rang bzhin ni dbang bzhi pa'i sku'i ngo bo'o//'di ni dbang bzhi pa'i cho ga'o// //de nas de'i lag pa slob ma'i lag par gtad la/ de phyir sangs rgyas dngos bya ste/ /thabs gzhan gyis ni sangs rgyas med//'gro ba 'di yis dag byed pas/ /de phyir rnam par sbyor ba 'di/ /khyod kyis nam yang 'bral ma byed/ /'di de sangs rgyas thams cad kyi/ /rig pa'i brtul zhugs bla med pas/ /rmongs pas rim 'di 'gal byed na/ /dngos grub dam pa de la med/ /ces brjod pa 'di ni rig pa brtul zhugs sbyin pa'i cho ga'o// //de nas slob ma rdo rje sems dpar bskyed pa de/ /'di ni sangs rgyas thams cad bsdus/ /rdo rje sems dpa'i phyag na gnas/ /khyod kyis kyang ni rgyun bzung na/ /phyag na rdo rje'i brtul zhugs brtan/ /zhes pa dang / oM sarba ta thA ga ta sid+d+hi badzra sa ma ya tiSh+Tha e Sha s+t+waM d+hA ra ya mi/badzra satwa hIHhi hi hi hi hUM zhes brjod cing blang ba 'di ni rdo rje'i brtul zhugs sbyin pa'i cho ga'o// //de nas snying po'i sngags kyis kha T+wAM ga dang / Da ma ru dang / thod pa la sogs pa rnams la [(]len [,]lan [)]gsum bzlas te/ kha T+wAM Da ma ru thod pa rnams//rdor sems phyag rgya 'di yin pas/ /gtad pas 'di bzung dpa' bo kye/ /phyi dang nang du brtan gyur cig /ces pa brjod cing bzung ba dang / rnal 'byor gyi bye brag gis phyag mtshan gyi bye brag dang / 'khor lo la sogs pa'i rgyan rnams kyang sbyin no/ /'di ni spyod pa'i brtul zhugs sbyin pa'i cho ga'o// //de nas de bzhin gshegs pa'i spyod pa byas la lag pa g.yon pas snying gar chos gos kyi mtha' ma bzung ste g.yas pa mi 'jigs pa'i phyag rgya byas nas/ 'khor ba yang dag gzhom pa'i phyir/ /ngan 'gro'i gnas nas bton nas ni/ /de bzhin gshegs pa rdor sems su//'dir ni khyod la ngas lung bstan/ /he a mo ka badzra ta thA ga te sid+h+ya sa ma ya s+t+waM b+hur+b+hu wa swaHzhes pa'i sngags dang bcas pas lung bstan pa ste/ me tog gar bab pa'i de bzhin gshegs pa'i sku la de ltar lung bstan pa ni/ de bzhin gshegs pa thams cad kyis yang dag par rdzogs pa'i sangs rgyas su lung bstan pa de ltar dad pa bskyed do//'di ni lung bstan pa'i cho ga'o// //de nas slob ma la dung dang dril bu dang pusti rnams gtad pa de la/ /deng nas brtsams te mgrin gcig tu/ /kun tu khyab par byas nas ni//chos kyi dung ni bla med pa'i/ /'khor lo chen po bskor bar bgyi/ /zhes brjod cing spyi'i rjes su gnang ba byin la/ lhag pa'i rjes gnang sbyin pa'i phyir rim pa bzhin du rnam par snang mdzad la sogs par slob ma bskyed la/ 'jig rten khams rnams thams cad kyi/ / sems can kun la phan phyir du/ /ji ltar 'dul bas de rnams la/ /chos kyi 'khor lo bskor bar gyis/ /zhes pa chos kyi gnas su rdo rje dang rin po che dang pad+ma dang las rnams bcug la len lngas rjes gnang sbyin no/ /'di ni rjes su gnang ba'i cho ga'o// //phyi nas yang / mgo la gdugs ni phub byas la/ /g.yas nas bskor ba byas pa dang / /sgo ru thal sbyar 'dug nas ni/ /gdugs phub nas ni rjes brjod bya/ /'di rtogs pa yi slob ma yis/ /rgyud 'dzin par ni gyur pa'o/ /zhes pa dang / de nas slob ma'i sems la gnas par brjod pa/deng nas dkyil 'khor slob dpon gyur/ /khyod kyis sngags rgyud gzung bar gyis/ /sangs rgyas byang chub sems rnams dang / /lha rnams kyang ni mnyes par 'gyur/ /zhes pa la sogs pa ni dbugs dbyung ba'i cho ga'o/ /de nas dbang bskur ba dang dbugs dbyung ba thob pas gzengs bstod pa des 'di ltar/di ring bdag ni 'bras bcas srog ldan bskyed/ bdag ni byang chub sems ldan bskyed/ /di ring sangs rgyas rigs su bskyed/ /di ring sangs rgyas sras su skyes/ /zhes brjod la/ bla ma la gus pas glang po che dang /rta dang / rin po che dang / gser dang / dngul dang / gos dang / rgyan dang / ba lang dang / ma he dang / g.yog po dang / g.yog mo dang / 'dod pa byed pa yid du 'ong ba'i bu dang chung ma la sogs pa ji ltar 'byor pa rnams dbul ba ni yon dbul ba'i cho ga'o// //gzhan yang / / sbyin sreg med na yang dag dngos grub bsgrubs kyang 'grub par mi 'gyur bas/ zhi dang rgyas sogs sgrub pa'i don du/ sbyin sreg sngon du 'gro bar bshad do zhes pa bshad pas sbyin sreg bya bar bstan pas/ yang / sems can dbye na grangs med kyang / /rigs kyi dbye na lnga ru bshad/ / las kyi dbye bas bzhi ru 'dod/ /'di ltar thab khung 'dir nges par/ /rje btsun gyis ni de ltar gsungs/ /zhes pa dang / rdo rje khro bo gsang ba mnyam par sbyor ba'i rgyud las kyang / las kyi dbye bas thab khung brgya dang bcu gsungs pa las/ zhi ba la zlum po/ rgyas pa la gru bzhi/ dbang la rdo rje'i rnam pa/ mngon spyod la zur gsum bya ba la sogs pa dang / yang zhi ba zur gsum/ mngon spyod zur gsum mam zla ba phyed pa zhes bshad pa dang / dpal dus 'khor las/ zhi ba la gzhu'i rnam pa rgyar khru phyed pa zhes pa dang / dpal sangs rgyas thod pa'i rgyud du/ zhi ba la gru bzhi/ rgyas pa la zlum po/dbang la zur gsum/ mngon spyod la zla ba phyed pa'i rnam pa rgya dang 'phangs su khru gang ngo zhes bshad pas de'i phyir zhi ba la sogs pa'i thab khung rnams so so rim pa ltar dbyibs dang / kha dog dang / mtshan ma gdab pa'i rim pa dang / sa gzhi dang / phyogs kyi bye brag dang //sbyin sreg gi dus kyi bye brag la sogs pa rgyud gzhan du bshad pa ltar 'dir yang go bar bya'o/ /gang zhig sems shin tu brtan pa'i rnal 'byor gyis snang ba dang stong pa ro gcig pa sgyu ma ltar thams cad bsams na/ 'di thams cad kyi gang 'dod pa thob pa'i rgyur 'gyur ro//des dgongs pa de lta bus gdul bya gang la mos pa rnams kyi don du de dag thams cad go bar bya ste/ gdams ngag ltar thab khung gi mtshan nyid la sogs pa sbyin sreg gi cho ga bshad pa ltar go bar bya zhing 'dir yang go bar byas la sbyin sreg bya'o/ /'di ni sbyin sreg gi cho gar bshad pa go bar bya ba'i cho ga'o// //de nas bdag nyid kyis dkyil 'khor mchod la/ slob ma la sogs pas mchod de tshogs 'khor byas pa dang / slob ma las ni yon blang bya/ /des kyang gus pas dbul ba ni/ /rin chen yid 'ong dpal mo dang / /rang lus dang ni sa gzhi dang //de la sogs pa gzhan yang dbul/ /bla ma ji ltar mnyes par byas/ /bla ma mnyes las dngos grub 'byung / /thub pas de las gzhan med bshad/ /de phyir bsod nams cis mi phyed/ /brtul zhugs brnyes par bya phyir ro/ /bla med byed pa'i slob dpon de rdo rje sems dpar rab mchog sems//de ltar sems dpas phyi nas gtor ma byin pa dang / 'khor lo la phyag byas te/ ar+g+haM la sogs pas mchod la/ dge ba'i rtsa ba bsngos par byas nas bzod gsol byas te/ oM dang bcas pa'i gshegs su gsol ba'i tshig la oM AHhUM badzra muHzhes pa dang ldan pas ye shes kyi 'khor lo gshegs su gsol nas/lag pa'i rdo rjes gtso bo la thug pa'i bar du gzhig par bya'o/ /de nas rdul tshon bum par blugs te mchod pa chen po dang stabs cig tu khyer la chu bo la sogs par dor bar bya'o/ /de nas thams cad slob dpon gyis//des phul yo byad bsdus byas te/ /nye bar longs ni spyad bya'o/ /slob ma sogs la cung zad min/ /sa gter gzhug dang rab tu gnas/ /sbyin sreg dkyil 'khor bzhes rnams yon/ /de rnams thams cad slob dpon dang / / zhes pa rdo rje 'dzin gyis gsungs/ /zhes so/ /de nas slob dpon dang / las kyi rdo rje dang rnal 'byor ma rnams la gos la sogs pas mnyes par bya'o/ /dge 'dun la chos ston dang rnal 'byor ma la tshogs 'khor dang / sdug phongs la bza' ba sbyin no/ /'di ni dkyil 'khor gshegs pa la sogs pa'i cho ga'o// //de nas 'dir thog ma dang bar dang tha ma rnams kyis bgegs nye bar zhi bar bya ba la gtor ma bya bar 'dod pa'i dpal nag po chen po'i rnal 'byor dang ldan pa'i sngags pas/ rang gi sa bon gyi 'od zer gyis dkyil 'khor gyi 'khor lo dbang po la sogs pa dang /klu rnams dang / sems can gzhan dag rnams kyang spyan drangs te/ skad cig gis dpal nag po chen po'i dkyil 'khor gyi 'khor lor bsams la/ mdun du zan dang sran chen dang nya sha dang chang la sogs pa'am/ yang na chu dang zan tsam gyis snod bkang la/yaM dang raM dang a rnams las rlung dang me dang mi mgo'i sgyed pu thod pa dang bcas par bskyed do/ /der bdud rtsi lnga dang sgron ma lnga rnams bum pa la sogs pa'i sa bon rnams kyis byin gyis brlab pa ni/ rlung g.yos pas me sbar/ me'i drod kyis yi ge la sogs pa zhu/zhu ba'i rlangs pas hUM byung / de las rdo rjes mtshan pa'i kha T+wAM gar lan gsum du bskyed cing zhu ba las bdud rtsir byin gyis brlab pa ni steng du zla ba la gnas pa'i yi ge gsum bsams te de nyid kyis gtor ma byin gyis brlabs la/ oM haHka ha ma la ni mu kha pra sA d+ha ya/pra sA d+hA ya/ ma hA kA la bud+d+ha dz+nya pra hi to si/ mA ra ya mA ra ya/ kA ra ya kA ra ya/ sarba duSh+Ta pra duSh+TA na/ gr-ih+Na gr-ih+Na/ mA ra mA ra/ kha kha khA hi khA hi/ sI g+h+raM/ da ha da ha/ pa tsa pa tsa/ hu re hu re/ maM raM hUM phaT i daM laM gra ha gra ha shrI swA hA zhes pa'i sngags kyis dbul lo/ /de yang de rnams kyi lce hUM las rdo rje rtse gcig par bsams pa'i sbu gu nas drangs te bdud rtsi myangs pas bde ba chen po nyams su myong bar byas la/zhal bsil la sogs pas yang dag par mchod nas/ brtson 'grus dang ldan pas bya ba sgrub bo/ /des 'dod pa'i don la gsol ba gdab/ / bzod gsol byas pa dang oM AHhUM badzra muHzhes brjod pas gshegs su gsol lo/ /'di ni gtor ma'i cho ga'o// //nga rgyal bya phyir ma yin rang 'dod phyir ma yin/ /gus ldan rnams kyi phyir ni nga yis 'di byas pa/ /de rnams nyid kyis 'khrul pa med par shes don du/ / cho ga'i rim pas dkyil 'khor bzhengs phyir byas pa'o/ /rtogs pa chung zhing blo dman gyur kyang don bsdus 'dis/ /rnal 'byor ma yis dngos grub mchog tu ster byed pa/ /rgyun du mchog tu bde ba bzang ster bdag nyid kyis/ /gsol gdab phyir dang snying rje can rnams bde sbyor phyir//dpal ldan nag chen mgon po yi/ /dkyil 'khor bzhengs pa'i cho ga 'di/ /byas pa'i dge ba'i rtsa ba yis/ /'jig rten rdor 'dzin thob gyur cig /dpal nag po chen po'i dkyil 'khor gyi cho ga dngos grub rin chen 'byung gnas zhes bya ba/ paN+Di ta chen po sa man+ta shrIs mdzad pa rdzogs so/