CLOSE WINDOW

D1715
བོད་ཡིག

de kho na nyid kyi man ngag rdzogs so// //paN+Di ta pa ra he ta dang / lo tsA ba nag tsho tshul khrims rgyal mtshan gyis bsgyur ba'o// @##/ /rgya gar skad du/ ta ta twa kA ri kA u pa de sha br-it+ti nA ma/ bod skad du/ de kho na nyid kyi tshig le'ur byas pa'i man ngag gi 'grel pa zhes bya ba/dpal rdo rje sems dpa' la phyag 'tshal lo/ /gang zhig snying gi pad+ma'i lte ba la gnas pa/ /mar me 'bar ba phra ba lta zhing mi bskyod sems/ /yul la mi 'jug khams gsum thams cad gnyis med 'byung //chos dbyings yang dag nyid la phyag 'tshal bdag mchog go/ /gang zhig ces pa chos kyi dbyings so/ /phyag 'tshal chos kyi dbyings yang dag pa'i mtha' la'o/ /gang zhig chos kyi dbyings ni khams gsum thams cad gnyis med du 'byung ba'i yang dag pa'i mtha'o//yul la mi 'jug de la phyag 'tshal te/ /snying ga'i pad+ma'i lte ba la gnas pa/ /zhes pa/ snying ni snying la'o/ /pad+ma ni pad+ma 'dab ma bzhi pa'o/ /kha dog dmar po 'byung ba bzhi'i rang bzhin ni/ lte ba'i dbus su zla ba nyi ma'i mchog gnas pa'o/ /'byung ba chen po bzhi'i rang bzhin de la zla ba sa dang chu'i rang bzhin nyi ma dang rlung gi rang bzhin no//de ltar lte ba'i dbus su gnas pa de bcom ldan 'das chos kyi dbyings de bzhin nyid yang dag pa'i mtha'o/ /mar me 'bar ba zhes pa gnyis su med pa 'bar ba rab tu mthong bar song ba'o/ / ci 'dir gsungs pa phra bar lta zhing zhes pa/ phra ba ni bcom ldan 'das te shin tu phra bas kyang ches phra ba'i rdo rje chos kyi dbyings tshul gcig pa'o/ /lta zhing zhes pa pad+ma'i rtsa ba lta bur gsal bar ro/ /mi bskyod sems pa zhes pa des sems rtse gcig pa'i rgyun du 'bab pa rtag tu bya'o//ci 'dir gsungs pa khams gsum zhes pa 'dod pa dang gzugs dang gzugs med pa dag gnyis su med par song ba yang dag par bsdus pa mnyam pa nyid kyi tshul gcig dang / thams cad nam mkha'i rnam par rab tu mthong ba'i don to/ /gong du brjod pa'i bsam gtan gyi yid rang gi tshul gcig pa yang dag par bsdus pa 'di'o//yang dag pa brjod par byas te/ 'gro ba'i don de kho na nyid gcig pu 'di gnyis su med pa nyid song ba kha cig cung zad spros pa med par mar me 'bar ba de las yon tan 'di 'byung ba'o/ /bcom ldan 'das chos kyi dbyings la phyag 'tshal te/zhes pa nyid la phyag 'tshal nas ci byed na 'di gsungs pa/ nang du gzhug pa dbang po thams cad g.yo ba'i rta/ /ye shes ma lus rgyal ba mnyam 'byung khams gsum la/ /phan pa bskyed pa rab tu 'byung ba thob pa 'di/ /'byung ba rtag tu nam mkha' dri ma med pa'i dpal//zhes pa'o/ /nang du gzhug pa zhes pa rnam par g.yeng bar 'gro ba'i spangs pa brjod pa'o/ /ye shes yang dag pa'i mtha' mthong ba'i spyan 'byung ba'o/ /rang 'byung gi rnal 'byor dri ma med pa'i dpal 'di shes pa de/ dpa' bo mchog gang yin pa'i dbang po de nam mkha'i rnam par 'byung ba'i rnal 'byor gang yin pa'o//nang du zhes pa'i phyi rol du g.yeng ba thams cad kyi sems nang du gzhug pas 'phro ba'i g.yo thams cad bcings pa ni sde drug gi dbang po'i rta'o/ /rang gi yul 'dod pa'i sems 'di ni byed pa bcings pa'i rnal 'byor bya ba'i skyil mo krung ngo //de nas phyis dri ma dang bral bar 'byung ngo / /ye shes gang 'byung gsungs pas ye shes ma lus sogs pa kun nas rgyal ba las rgyal ba'i sangs rgyas bcom ldan 'das 'byung ba'o/ /mnyam 'byung ni skad 'byung ba lhung bzed ltar 'byung ba'i gnas pa 'di gsungs pa 'byung ba'o//de bzhin gshegs pa thams cad kyi ye shes bskyed pa/ gzhan ma yin pa'i mchog rgyal ba'o/ /de'i rigs khams gsum pa'o/ /khams gsum pa 'di dag thams cad bskyed pa'i rgyu 'byung ba rnams so/ /gsung gi ngo bo ye shes su byed pa 'di'i don yin no//'di na 'byung ba gzugs phra ba de 'byung ba'o/ /sgom pa po nam mkha'i de nyid dri ma med pa'i dpal lo/ /bzang po gang zhig de kho na nyid gsum pa'o/ /rnam par rtog pa bsdus nas 'dzin pa de nyid gnyis kyi tshul gyis 'gro bar mthong ba gang brjod pa'o/ /rmongs pa chen po'i rnam par rtog pas 'khor bar ltung ba'o//rnam par mi rtog pa'i ting nge 'dzin la gnas pa de/ nam mkha'i rnam par mthong ba 'di rnam par mi rtog pa'o/ /sangs rgyas rjes dran rnal 'byor pas/ /chos rjes dran pa'i sgom pa pos/ /chos rjes dran pa'i rnal 'byor gyis/ /chos sku'i rang bzhin 'byung ba'o//ci brjod pa des bcom ldan 'das bsgom pa 'di gsungs so/ /sangs rgyas rjes su dran zhes pa la sogs pa ni/ gzung ba dang 'dzin pa'i rnam par rtog pa 'phel ba 'di ltar sangs rgyas kyi ngo bo rdo rje rnal 'byor ma bzhi'i tshul gyis rang bzhin de'i dbus na chos kyi dbyings kyi bcom ldan 'das so//de'i grogs rnal 'byor pa 'di'i sgyu ma rnal 'byor ji skad gsungs pa ni/ chos rjes su dran pa'i sgom pa pos zhes pa chos 'di bcom ldan 'das pad+ma'i lte ba'i dbus su gnas pa/ gong du brjod pa de dag bsgom pa ni/de nas rnal 'byor pas chos kyi dbyings yang dag par bskyed la nam mkha'i rnal 'byor par rab tu 'byung bar song ba'i chos sku 'byung ba'o/ /de'i don ni 'di'i pad+ma'i steng du thig le bzhi rnams lha mo bzhi rdzogs pa'o/ /lte ba'i thig le las bcom ldan 'das rdzogs par ro//rang gi yi dam gyi lha bsam par bya'o/ /de'i thugs kar pad+ma'i lte ba la chos kyi dbyings bsam mo/ /gnas pa de bul ba bul bar khad kyis rim gyis ji ltar rnal 'byor bsgom pa goms par bya'o/ /de nyid zhi ba'i rnam par 'jug pa zhugs pa gang du rtsa gnyis 'gog pa de dag gis 'gog pa'i rnam par rang bzhin med pa nyid goms par bya ba 'di de brjod pa/gong nas gong du khad kyis rim par rang bzhin med pa nyid 'byung ba'o/ /man ngag 'dis zhi ba gcig pu'i bde ba thob par ro/ /dbus su mar me'i rnam par shes/ /ye shes mchog gi rtog pa yi//rgyun du 'bar bsgom rtag par ni/ /'bar ba de la the tshom med/ /ces pas dbus su mar me la sogs pa 'di dbus kyi mar me 'di bskyed pa mthong ste/ dbus kyi mar me rnam par shes pa'am/ sems dang yid shes gang gsungs pa de rnam par shes pa 'di'i rnam grangs so//de ni dbus su mar me'i rnam par shes pa snying ga'i pad+ma'i ge sar gyi dbus su song ba bsgom pa'i yid g.yo ba med pa'o/ /chos kyi dbyings ye shes 'byung ba'i phyir gsungs pa'o/ /mchog gi rtogs pa de kho na nyid kyi dpe 'di nyid rgyun du mi g.yo bar rnal 'byor bsgom pa bsam par bya'o//de dag bsgom pa goms par rgyun chad med pa'i tshul du bsgom pa'i yid nyid do/ /de lta bas na byed pa 'bar ba 'di snying gi mar me don 'di'o/ /bum pa can gyi byed par gnas pa'am myur du ye shes kyi gtum mos 'gog pa'i rnal 'byor 'di brjod pa/'byung rngub 'gog pa'i 'bar ba'i bsam gtan 'dis/ de nyid med pa kun nas byed pa la the tshom ma byed cig /thams cad mkhyen pa'i gsung ji lta ba yin no/ /snying la rtag tu gnas pa yis/ /yi ge rnams med thig le gcig /de nyid bsgom pa'i skyes bu de/ /ye shes bskyed pa mchog gi gnas//zhes pa la snying la zhes pa/ snying gi pad+ma'i ge sar gyi dbus su phra ba'i thig le rdo rje'i rang bzhin du gnas pa/ dus thams cad du brtan par gnas pa ci yang med pa rnams/ rang gi ngo bo med pa yi ge med pa/ g.yo ba med pa/ rang gi rnam par shes pa nang du gnas pa'i rang bzhin no//nam mkha'i rnam par rab tu snang ba de nyid 'di'i rnam par bsgom pa ste ye shes skye ba'o/ /ci nyan thos la sogs pas mi rtogs pa de/ mchog tu rnam par mi rtog pa de bzhin gshegs pa'o/ /gnas 'dir rdo rje mkha' 'gro ma/ /snying rje'i sems kyis rol cing gnas//gnas 'dir sangs rgyas thams cad dang / /byang chub sems dpa' 'gro ba gsum/ /zhes pa ni/ phyag 'tshal ba sngon du byas nas/ tshigs su bcad pa lnga'i de kho na nyid du bstan pa'o/ /da ni phyi rol gyi mchod pas g.yengs par 'gyur bas de spangs par gsungs te/'di ni de'i snying ga'i pad+ma'i ge sar gyi dbus su rdo rje mkha' 'gro ma la sogs pa dang bcom ldan 'das so/ /rtog pa'i dra ba rnams bsal ba/ /snying rje chen po'i rigs kyis gnas/ /gnas 'dir sangs rgyas thams cad dang / /sems kyi rang bzhin de nyid mkha' 'gro ma'o//de ni rig pa gang zhig rtog pa'i sangs rgyas thams cad ces pa rnam par snang mdzad la sogs pa'o/ /byang chub sems dpa' zhes pa byams pa la sogs pa'o/ /byang chub ni rnam par mi rtog pa'i ye shes so/ /sems gang la mos pa 'di dag de nyid du gsung gis gsungs pa'o//byang chub med cing ming med pa/ /gzung ba dang 'dzin pa'i mtshan nyid kyi rtog pa las grol ba'i ye shes kyi sems ni 'di byang chub dran pa 'di'o/ /gcig min pa'i 'gro ba gsum byung ba ni/ de gsungs pa 'gro ba gsum ste de'i rnam par snang zhes pa 'byung ba'o/ / 'di ltar khams gsum 'di thams cad sems kyis byas pas 'byung ba'o/ /phyi rol dang nang gi 'gro ba'i bdag nyid med par rab tu snang ba'o/ /rgyal ba'i sras po'i rnam par khams gsum pa 'di rnal 'byor 'byung ba gong du gsungs pa'o/ /de dag thams cad mchod pa 'di smon lam//de rnams mar me de nyid rtag tu 'dir/ /mchod pa de 'dir rgyal ba thams cad dang / /zhes pa la sogs pa gang zhig nges pa'i rang bzhin thig le'i rgyal po'i mchod pa des/ dus thams cad du sangs rgyas dang byang chub sems dpa' thams cad mchod pa'o/ / gzhan gyi don gyi phyi rol gyi mchod pa spangs la/ de nyid rnal 'byor pa g.yeng ba de dag gong du brjod pa 'di dag phra ba'i rdo rje mgon po bcom ldan 'das snang ba'o/ /rnam par blta zhing rab tu blta ba'i gnyis su med pa'i lha mchod pa'o/ /ci phyi rol gyi mchod pa g.yeng bar byed pa'o/ / nang gi bdag nyid rnal 'byor la/ /rdo rje rnal 'byor 'byung bar 'gyur/ /de nas rdo rje mchod 'byung ba/ /mchod pa lnga yi rnal 'byor gyis/ /'di dag mchod pa med par nang gi bdag nyid 'di brjod pa bdag nyid rdo rje rnal 'byor brjod de/ thabs dang shes rab snyoms 'jug pa 'di gsungs pa/dman pa'i bsam pa 'di gsungs pa'o/ /thabs dang shes rab snyoms par 'jug pa 'di dang mthun par rdo rje mi 'jigs pa'i rnal 'byor byed pa rdo rje'o/ /de gsungs pa'o/ /de nas yang rdo rje mchod pa 'di'i bdag nyid mi 'jigs pa'i ting nge 'dzin gyi mchod pa yid la byed pa ni rdo rje mkha' 'gro'o//mchod pa lnga yi rnal 'byor pa/ /myur bar sangs rgyas nyid thob bo/ /de dag rgyud du bshad pa yin/ /phyi rol mchod pa'i sems ni gzhan/ /shin tu byas pa 'di ni bcom ldan 'das kyis zung du bshad pa'i rgyal ba'i mchod pa'o/ /mchod pa lnga'i me tog la sogs pas phyi nang gi bdag nyid gong du brjod pa'i mchod pa des ni myur du sangs rgyas nyid thob pa'o//yod pa 'di dag rgyud du gsungs pa'i phyi rol du 'di bsdus pa'i rnal 'byor ro/ /nges pa'i rang bzhin sems goms bya/ /lha yi 'byung gnas bsgom pa la/ / yid kyi mchod pa chen po ste/ /sangs rgyas thams cad rab tu brtse bas dgongs/ /'di mchod pa zhes pa gzhan med pa'o/ /de nyid med pa'i ngo bo mtshan nyid ci yang med pa 'di brjod do/ /rang bzhin med pa'i ming gi sgra ni gzung ba dang 'dzin pa'i mtshan nyid ces bya ba yin/ de rang bzhin med pa'i ngo bor gnas pa de ltar goms par byas pa las/de byed par rang gi lha'i rnam par bsam par bya'o/ /de ni rang gi yid kyi mchod pa chen po yi/ de'i tshe de bzhin gshegs pa dang rdo rje rnal 'byor ma brtse bas thugs dgyes par byed pa'o/ /cis na phyi rol gyi mchod pa g.yeng bas byed pas so//bshad pa cung zad yang dag 'byung ba ni/ /rgyud du don dam min pa de nyid de/ /don dam bden pa yang dag 'byung ba 'di/ /bshad dam ma bshad 'di la ci yang med/ /bstan bcos su med par brjod pa dag gi rnal 'byor brtan par gnas pa 'di gsungs pa'o/ /yod pa 'dir bshad pa 'jig rten pa 'dul ba'i don du sangs rgyas kyi rgyud du gsungs pa'o//de nyid med par yang don med par de/ nga de nyid sangs rgyas kyi ye shes kyi rigs rgyas par mdzad pa 'di rnam par mi rtog pa nyid do/ /gnas chen nyi shu rtsa bzhi'i bye brag kun/ /zhing chen 'di dag tu ni yang dag zhugs//zhing dag tu ni 'gro bar mi bya'o/ /ngal dub las yin de ni de nyid min/ /phyi rol gyi g.yeng bas yid g.yeng ba'i bsam pa dang ldan pas mi bya'o zhes gsungs so/ /nyi shu rtsa bzhi zhes pa la sogs pas 'di nyi shu rtsa bzhi'i bye brag tu byed pa zhing bzhi'i bye brag ces pa la sogs pa dpag tu med/de'i zhing la sogs pa'i byed pa sems kyi rdo rje rnam par bzhugs pa'o/ /'di'i zhes pa nye bar mi bskor ba gsungs pa/ de skad bskor bas khams ngal dub sdug bsngal gyi bya ba 'ong bar byed pas de kho na'i rnal 'byor chen po rnams gang des ni de thob pa'o//de ma yin pa mi bden pa/ /de dag kha cig tsam yang med/ /des na de kho na yod skyes bu de/ /mi bden de dag kha cig tsam yang med/ /zhing dang nye ba'i zhing dang tshan+do rnams/ /der ni phyin pas dri ma med pa 'byung / /de nas khro ba'am grags pa 'dod pa yis/ / skyes bu zhing du 'gro bar byed pa ste/ /med de rang 'byung bcom ldan 'das kyis gsungs pa/ zhing la sogs pa bskor bas dri ma med par 'byung ngo / /de la bdag rgol ba'i sems 'di dag zhing la sogs pa dang zhing dang nye ba'i zhing gi mchog tu byed pa dri ma med pa 'byung zhes pa/rdo rje rnal 'byor ma'i dgongs pa yang dag par 'byung ba 'di ngo mtshar che'o/ /de nas gang la bskor bas stobs nyams par byed pa'i bya ba/ khyim mang po'i bya ba gang g.yeng ba'i sems gnyis med par zhi ba la sogs pa'i ming gi grags pa thob kyi bzang po ma yin par 'byung ba'o//bdag gi gong du de nyid de/ /sems can mos pa'i sems kyi rnal 'byor pa/ /bsam gtan mchog las bde ba gzhan na med/ /de bas 'di ltar bsam gtan las bya'o/ /stobs kyis de dag bskor bas brjod du med pa dri ma med pa mthong zhing myong ba de don dam par yang med pa'o/bsam gtan zhes pa 'di bsam gtan gyi sems rtse gcig pa de las byung ba'i bde ba gzhan ci yang med de/ de nyid bsam gtan gyi bya ba nyin mtshan du bya'o/ /khams dub de dag bskor ba ni/ /phyi rol pa yi rnal 'byor yin/ /de nas phyi rol spang bar bya/ /gnas bya rnal 'byor rol pa yis//dub pa zhes pa de dag phyi rol pa mngon par gnas pas khams dub nges par ster bar 'gro ba'i phyi rol gyi bya ba phar la spang ngo / /de kho na nyid kyi rnal 'byor pa rnam par gnas pa rnal 'byor rol pa'i bde ba'o/ /mthong ba rdo rje rnal 'byor ma/ /rnam par dag pa'i ye shes spyan//skal ldan rnal 'byor rab tu brtan/ /snying rje chen po'i sems kyis so/ /brtse ba'i dbang gis gnas pa 'di la bsam gtan pas mthong ba 'dis bskor ba'i bya ba med pa'o/ /de yis mchog gi dngos grub dag /ji ltar 'dod pa ster ba 'grub/ /ye shes chags bral rnal 'byor pa//bsgrub pa rab tu nges pa 'dis/ /de dag ci yi ngo bor mthong / /zhes pa bcom ldan 'das rdo rje ma brtse ba'i dbang gis bden pa mchog gi dngos grub ye shes ji ltar 'dod pa 'byung ba'i rnal 'byor pa'o/ /gzhan yang ral gri la sogs pa ji ltar mngon par 'dod pa gang yin pa ye shes bsgrub pa thams cad rab tu byed pa'o//sna tshogs 'bad pas yang dag ldan/ /brtul zhugs spyod pa cung zad tsam/ /de nyid byas pa brtul zhugs gnas/ /gang gang rab tu spyod pa bya/ /ye shes chags bral bsgrub pa yis/ /ci brtul zhugs kyi spyod pa 'di btang snyoms 'di zhes pa/sna tshogs zhes pa 'di rab tu byed pa'i theg pa'i lus g.yeng ba'i spyod pa mi brjod de/ 'di ltar rgyun du gnas pas bskor bar mi bya'o/ /de kho na nyid kyi brtul zhugs spyod pa'i rnal 'byor pa'o/ /bcom ldan 'das kyis bzang po'i dbang du brtul zhugs kyi spyod pa gsungs pa'o//gang gang rab tu spyod pa byas/ /bza' ba brtan pa brtul zhugs can/ /bsam gtan bza' ba yid bskyed pa/ /smyon pa'i spyod pa brtul zhugs can/ /med par ston pa'i rgyud du ji ltar bza' ba la gnas pas 'di la ci bya zhes brjod do/ /gang gang zhes pa rab tu bza' ba'am rab tu bza' ba min/bslangs pa'am ma bslangs pa'am/ mos pas byin pa'am/ mos pa med pas byin pa'am/ bza' bar gnas pa bza' ba'i bya ba bya/ /brtul zhugs can gyis brtul zhugs so/ /bstan bcos nas bzung ba'i spyod pa'i brtul zhugs kyi sdom pa mi bya'o//nyin mtshan du bsam gtan gyi bza' ba 'di bza' ba'o/ /nges par 'byung ba brtan par smyon pa'i rnam pas gnas par bya'o/ /gzhan gyi drung du 'gro ba g.yeng ba'i ngo bo'o/ /de ltar gcer bus gcer bu min/ /gang dang gang yid de dang des/ /rang gi lta sgom byed pa rnams//de kho na nyid rnam par bsam/ /mgo la sogs pa'i slong mo g.yeng ba'i spyod pa brtul zhugs kyi gtam la rtog pa'i rtsa ba byed pa 'di gsungs pa/ bya ba'i rgyud la sogs par gcer bu la sogs pa spang ba dang / ci ltar drung du gnas pa'i rgyud 'dir gsungs pa'o//bzhi mdo la sogs par gang dang gang du gnas pa'i de la skyil krung bza' bas/ nyin mtshan dus thams cad du bzlas pas de gang gis lus dka' ba 'di'o/ /de dang de la sogs pa ngang gis gnas kyang yang dag par spong ba bzhi'i de nyid bsgom par bya'o/ /zla drug rim pas bden pa la//lkugs pa lta bur rab tu gnas/ /rnal 'byor chen po mar me 'bar/ /rtog pa mang po 'di yis ci zhig bya/ /ye shes dang rnam par shes pa 'di gsungs so/ /zla drug ces pa la sogs par bden par zla drug gis sangs rgyas kyi dngos grub bo/ / ci'i phyir 'gro ba dang 'grogs par dka' ba 'di gsungs pa mi smra ba la sogs pa dngos po'i dbang du byas pa mi smra ba'i brtul zhugs 'dis/ rnal 'byor chen po 'bar bas rdo rje mkha' 'gro ma drung du byon dus bzang por byed do/ /ye shes mchog 'bar des mthong nas/ /rnal 'byor ma des g.yog byed do//ji ltar pad+ma bzang po la/ /ngang pa dga' ba gral du gnas/ /ye shes pa la sogs pa ye shes de rnam par rtog pa thams cad spangs pa'i rnam pas 'bar ba'i snang gsal de bzang po de la gsal zhing snang ngo / /ji ltar pad+ma 'byung ba la rgyas pa la ngang pa gral du 'jug pa ltar mkha' 'gro'o//dpal ldan rdo rje 'dzin yang dag /the tshom med par 'byung bar 'gyur/ /gzugs brnyan lta bu'i 'jig rten 'di/ /sems can kun gyi don byed pa'o/ /dpal ldan la sogs pa 'dis 'bras bu bstan te/ dpal legs par rtogs pa'o//'di ni bdag gis sems can gyi don du/ dag pa'i sems can rnams kyis gang byas pa/ /'di dag snying rje cung zad tsam gyis ni/ /gang brjod des ni 'byung 'gyur ba'i/ /nges par bzung ba'i dgongs pa brjod pa'o/ /'di dag la sogs pa bde bar rtogs pa'o/ / de nyid sbas pa bdag gis rgyas ma byas/ /bla ma'i drin bzung yang dag mtha' la mos/ /sems bzang ba yi dge ba bsags stobs kyis/ /rgyas ma byas zhes pa la sogs pa de ci ga snyam na/ de nyid med pa'i de kho na nyid ma brjod kyi/ sbas pa'i don bla ma'i drin gyis sems can bzung ba'o//bshes gnyen mi 'gyur rjes yi rang / /de kho na nyid man ngag bris/ /dge ba bdag gis gang thob 'di yis sems can gyi/ /snying po sgom mchog spyod bzang myur du dga'/ /ma 'ongs pa na mi brtan pa la gsol ba 'debs 'di brjod/ /sems kyis bsags pa zhes pa ni bsags pa'i sems ni dus ring por dge ba 'phel ba'i rnal 'byor pa'i lam byas pa'o//de dag thob par gnas pa 'di yis sems kyis rlabs 'phel ba 'di ltar byas pa sred cing zhes pas grub pa thob pa'o/ /myong ba gang yin pa byung ba brtan pa mi rtog pa byed pa 'di la yid la byed pa bzang po 'di thams cad du thams cad rlabs byed pa'o//de kho na nyid kyi man ngag yang dag par bris pa'i bdag gi bsod nams 'phel ba des 'jig rten thams cad la de kho na nyid kyi rin po che ltar gsal ba rab tu 'byung bar gyur cig /de kho na nyid kyi man ngag bris pa'i bsod nams gang des thob pa 'di brjod pa'o//de kho na nyid 'di zhes pa la sogs pa legs par go ba rdzogs so// //de kho na nyid kyi man ngag mkhas pa chen po slob dpon chen po slob dpon su dza ya shrI b+ha dra'i zhabs kyis mdzad pa'o/ /rgya gar gyi mkhas pa rin dpal gyi zhabs la gtugs pa/