CLOSE WINDOW

D1657
བོད་ཡིག

slob dpon sa ra ha ba'i zhal snga nas mdzad pa rdzogs so// //ga ya d+ha ra dang / gyi jo zla ba'i 'od zer gyis bsgyur cing zhus te gtan la phab pa'o// // @##/ /rgya gar skad du/ shrI bud+d+ha ka pA la maN+Dal kra ma pa d+yo ta na nA ma bi d+hiH/bod skad du/ dpal sangs rgyas thod pa zhes bya ba'i dkyil 'khor gyi cho ga'i rim pa gsal ba zhes bya ba/ dpal sangs rgyas thod pa la phyag 'tshal lo/ /dpal ldan khrag 'thung rgyal po che/ /nyi shu rtsa bzhi dra ba'i sdom/ /dngos kun rang bzhin 'gro ba skyob//sna tshogs sde la phyag 'tshal te/ /sangs rgyas thod pa'i dkyil 'khor mchog /ji ltar rgyud gzhan cho ga mthong / /bla ma brgyud rim las 'ongs pa/ /bdag gis gsal bar bshad par bya/ /bla ma mtshan nyid bzang ldan pa/ /brtan zhing dul la blo gros ldan/ / bzod ldan drang la g.yo sgyu med/ /sngags dang rgyud kyi sbyor shes pas/ /legs par brtags pas slob ma'i phyir/ /dkyil 'khor bri ba'i las bya'o/ /de yang slob ma blo chen po/ /shin tu dang ba'i sems dang ldan/ /'dod med dbang po dul ba dang / /chags dang chags bral rnam par spangs//sems can don la rab tu brtson/ /gti mug zhe sdang phrag dog spangs/ /sangs rgyas kun gyis byin gyis brlabs/ /de rnams la ni de nyid bshad/ /slob ma de ni yongs su gzung / /da ni dngos grub ma lus pa'i/ /sgrub byed cho ga bshad par bya/ /lha rnams mgu bar ma byas na//bdag nyid nges par sun 'byin 'gyur/ /dur khrod la sogs gnas dag tu/ /dpal ldan khrag 'thung sogs 'khor lo/ /rab tu mnyes par bya ba'i phyir/ /mdzes pa'i maN+Dal legs byas te/ /chu la sogs pa'i rnam lnga dang / /ba byung mar sogs legs par byugs/ / 'byor pa'i yo byad [(]chogs [,]tshogs [)]gyur pas/ /rgyud las gsungs pa'i tshul bzhin du/ /bskyed pa'i tshul gnas bla ma yis/ /dkyil 'khor bdag po bzlas pa ni/ /bsod nams che 'bring chung ba dag /bye ba 'bum dang khris 'grub 'gyur/ /'khor rnams gtso bo'i yan lag phyir//tha dad par ni bzlas mi bya/ /gal te mtshan ma mthong gyur na/ /bzlas pa'i 'phro yang bshol bas 'grub/ /lha yi byin brlabs ldan gyur pas/ /dkyil 'khor mchog ni bri ba'i phyir/ /ri dang phug dang tshang tshing ngam/ /yang na dur khrod dag gi ni/ /gdod nas grub pa'i gnas su'am//'on te rgya mtsho'i 'gram dag tu/ /phyi yi dkyil 'khor legs bri'i phyir/ /yid 'ong gnas dang legs pa'i sar/ /bcos ma'i maN+Dal legs par brtsigs/ /dri dang ba sogs bdud rtsis bran/ /grangs mnyam lha yi gnas bkod de/ /der ni yid 'ong me tog dgram//khrag 'thung 'khor lo rdzogs bskyed cing / /skye sogs nus pa ye shes lha/ /dgug sogs byas te dbang bskur nas/ /mchod bstod mthar ni gsol ba gdab/ /sangs rgyas thams cad bdag la dgongs/ /khyed rnams mchod pa'i phyir dang ni/ / slob ma rnams la phan pa yis/ /sangs rgyas thod pa zhes bya ba'i/ /dkyil 'khor bzang po bri bar 'tshal/ /bdag la byin brlabs gnang bar mdzod/ /de ltar gsol ba gdab byas nas/ /mchod dang gtor ma nyer ldan pas/ /lha mo mdzes dga' bskul ba'i phyir/ /sngon byung sangs rgyas tshul ji bzhin//lag pa sa la brab byas pas/ /sa 'og 'thon pa'i lha mo ni/ /gser mdog zhi ba'i rang bzhin can/ /rin chen mdzes pa'i rgyan cha can/ /gser gyi bum 'dzin ci bgyi zhes/ /de la mchod yon rkang bkru sogs/ /mchod dang gtor mas mnyes par bya/ / gzi brjid can gyis 'di skad smra/ /skyob pa sangs rgyas thams cad kyi/ /spyod pa'i tshul dang khyad par gyi/ /sa dang pha rol phyin pa la/ /lha mo khyod ni dpang du gyur/ /shAkya seng ge skyob pa yis/ /ji ltar bdud kyi sde bcom pa/ /de bzhin bdag gis bdud sde las/ /rgyal bar byas te dkyil 'khor bri//de skad lan gsum brjod nas ni/ /dga' ba'i mdangs kyis lha mo yang / /khyod ni slob dpon yin pas na/ /dkyil 'khor mchog gi las gyis shig /zer nas sa la thim par mdzad/ /de nas phyogs skyong rnams dag la/ /tshul bzhin gtor ma byin nas ni/ /sa phyogs gnas pa'i lha dang klu//gnod sbyin dri za lha ma yin/ /gang dag rdzu 'phrul che ldan pa/ /rdo rje spyan dang snyan mnga' ba/ /bdag ming che ge zhes bya bas/ /bde gshegs rnams la mchod pa dang / /sems can kun la phan pa'i phyir/ /dge ba'i sa phyogs 'di nyid du/ /dkyil 'khor dam pa cher 'byung ba//sangs rgyas thod pa rgyud rgyal gyi/ /dkyil 'khor chen po'i las byed pas/ /khyod kyis bar chad ma byed par/ /dge ba'i grogs po nyid du mdzod/ /lan gsum gsol ba 'debs pa ni/ /sa blang cho ga mdzes pa yin/ /de'i 'og mgul rgyan rna cha sogs/ /thal ba'i gos dang rgyan char ldan//dpal ldan khrag 'thung rgyal chen po/ /sa gzhi'i dbus su 'dug nas ni/ /rnal 'byor go rims rdzogs par bya/ /de tshe mkha' 'gro ma bzhi yi/ /gnas la gnas pa'i rnal 'byor pas/ /mchod cing bstod pas mnyes byas nas/ /dkyil 'khor kun gyi gtso bo ni//sdig pa ma lus zad byed pa'i/ /sangs rgyas thod pa'i dkyil 'khor ni/ /mgon po chen pos bshad du gsol/ /gsol ba'i tshig de mkhyen nas su/ /snying rje 'gro la bltas nas ni/ /bgegs ni bskrad pa'i cho ga bya/ /khrag 'thung nga rgyal ldan pa yi/ /mig tu ma dang Ta las ni//nyi ma zla ba gsal bsgoms la/ /mig 'bras hUM las gyur pa yi/ /rdo rje mthing nag bsgom par bya/ /rkang pa gnyis su AH las ni/ /sna tshogs rdo rje 'bar ba bsam/ /rdo rje lta ba'i mig 'bras las/ /khro tshogs spros pas bgegs bsal zhing / /rkang 'gros rdo rje re ba sprul//rdo rje gsor zhing dril bu dkrol/ /dbang ldan mtshams su song nas ni/ /nyon cig bgegs tshogs ma lus kun/ /lha dang lha min gsang ba pa/ /gnod par gyur pa'i bgegs tshogs rnams/ /sangs rgyas thod pa'i rnal 'byor gtso/ /bde chen ye shes las byung ba/ / de ni he ru ka dpal dngos/ /bka' yi 'khor lo rab sbyor byed/ /gal te bka' las 'das gyur na/ /rdo rje rab tu 'bar ba yis/ /mgo ni tshal pa brgyar 'gas shing / /'jig par 'gyur ba gdon mi za/ /de bas gzhan du 'gro bar gyis/ /zhes brjod bgegs la bka' bsgos nas//dbang ldan phyogs nas brtsams nas ni/ /g.yas skor lan gsum bgrod bya ba/ /bskal pa'i me bzhin 'od zer can/ /rkang pa'i 'og nas byung nas su/ /gdug pa rnams ni bsregs gyur pas/ /phan tshun 'byer bar gyur par bsam/ /g.yas dang g.yon du bskor ba dang //'khyud dang ku tsa pa yi dang / /b+ha ra ti dang sa ti ki /pre te ka shi kya la sogs/ /chags bcas tshul gyis sbyor bas ni/ /rol pas rab tu 'phyang ba dang / /rol pa'i gom stabs bcas pa'am/ /gom pa brgyad pas gar bya'o/ /rkang pa bskyod dang lag pa bskyod/ /smin ma 'degs dang rab dgas 'brang //cung zad ngo tsha'i zur mig dang / /brla rgyas lta na 'dud pa dang / /mig g.yas gar ni byed 'gyur zhing / /kha yi pad+ma'i 'dzum dang bcas/ /cung zad dmar ba'i mche ba 'chang / /kun da ltar dkar so yi phreng / /dpal ldan khrag 'thung rnal 'byor che/ / sems can dgrol ba rmad du byung / /de la sogs pa'i gar gyis ni/ /bgegs kun ma lus bskrad par bya/ /hUM bzhi la sogs gsang sngags kyis/ /phur bu bskyed pa'i cho ga bya/ /oM badzra kI li kI la ya/ byin gyis brlabs pa bzlas rdzogs nas/ /g+ha g+ha la sogs sngags kyis gdab//rdo rje'i ra ba dra ba sprul/ /dkyil 'khor gyi ni sa yi cha/ /mnyes dang yang dag ldan gyur pa/ /bgegs rnams bsal ba'i cho ga'o/ /sangs rgyas thod pa'i rnal 'byor gyis/ /lag pa sa la phab byas te/ /hUM khaM zhes ni brjod pa yis/ /rnam dag nam mkha' bsams nas ni//hUM la~M sngags kyis gser gyi ni/ /sa gzhi rdo rjer ldan par bsam/ /oM me di nI badzrI b+ha ba ban+d+ha hUM/ rnyed pa'i sa phyogs de nyid du/ /zhi dang drag po me yi las/ /yang dag sel bar byas nas ni/ /las kyi khyad par mkhas pa yis/ /lto 'phye'i rim pa shes byas la/ /g.yas skor lto nas brko bar bya//gseg ma mgal dum gyo mo dang / /phub ma rus pa ro rnams bsal/ /sa de mi 'chi bcu phyed dang / /dri zhim chu la hUM bzlas dgang / /tshad ldan 'thas par bcags steng du/ /chu sogs ba lang las byung dang / /bdud rtsi lnga yis snyoms par byug /mkha' 'gro ma rnams mnyes par 'gyur//shar dang byang du gzhol bas ni/ /sngags rnams kyi ni dngos grub 'gyur/ /dbus su mtho bas rgyal srid dam/ /rig pa 'dzin pa'i gnas dag thob/ /byang du mtho bas 'chi 'gyur ram/ /nor rnams 'jig par 'gyur ba skyed/ /ji skad bshad pa'i shar mtho bas//myur du rigs rnams zad par byed/ /dbus su dma' ba'i rang bzhin gang / /sgrub pa po ni 'joms dang ldan/ /mtshan nyid gsal bar shes par dpyad/ /de ltar 'dus byas sa de la/ /sangs rgyas thod pa'i rnal 'byor gyis/ /bdud rtsi lnga yi chus bran zhing / / oM hUM d+h+ri hUM khaM hUM tiSh+Tha tiSh+Tha badzra sa ma ya a d+hiSh+Tha ya te/ zhes brjod sa de stong par bsgom/ /sa sbyang dus su 'byung chen la/ /gtor ma rab tu sbyin par bya/ /oM he ru ka badzra sa ma yA d+hi/ sarba duSh+TA na sa ma ya mu dra/ pra b+hany+dza ka hUM/ ru lu ru lu b+h+yo hUM hUM phaT/ de nas legs sbyang dri zhim chu/ /bdud rtsi lnga ldan byugs pa'i sar//thig le bri zhing me tog dgod/ /khrag 'thung rgyal po la sogs pa/ /nyi shu rtsa lnga'i 'khor lo bskyed/ /oM heM la sogs go bgo zhing / /gnas gsum byin gyis brlabs rjes su/ /ye shes 'khor los byin brlabs nas/ /dbang bskur rgyas gdab rim bya ba//mchod dang bdud rtsis tshim bya zhing / /bstod pas mgon po mnyes byas la/ /btud de gsol ba gdab par bya/ /gnyis med ye shes las byung ba'i/ /khyab bdag dngos kun bdag cag nyid/ /ston pa'i gtso bo khrag 'thung dpal/ /sna tshogs sde mar yang dag ldan//phyogs mtshams rnams kyi mkha' 'gro ma/ /rig pa'i lha mo rdzu 'phrul can/ /byang chub sems dpa' la sogs kun/ /ma lus bdag la dgongs su gsol/ /slob ma rnams la phan pa dang / /khyed rnams la yang mchod pa'i phyir/ /rdo rje can bdag 'di zhes pa/ /nang par dkyil 'khor 'dri bar 'tshal//rjes su brtse bar nyer dgongs te/ /kun gyis byin gyis brlab tu gsol/ /lan gsum gsol ba gdab rjes su/ /dri zhim me tog phreng ldan dang / /thod pa bdud rtsi lnga ldan pas/ /dpal ldan khrag 'thung la sogs kun/ / bdug spos la sogs legs phul nas/ /de 'og rang gi dbugs dbyung ba/ /cho gas brtul zhugs kun bya'o/ /lha la gsol gdab cho ga'o/ /de 'og gser dngul la sogs rin chen las byung ba'i/ /zhabs phra lto che mgrin ring mchu phra nyi shu drug /dri zhim dkar rtsis byugs shing nag nog ra ri med//pad+ma'i lte bar rang rang mtshan ma rnams kyis mtshan/ /ras dkar zung res bum pa'i mgul du bcing bar bya/ /chu ni 'o ma bsres pa chang dang bcas pa dang / /rin chen rnam pa lnga gzhug cing / /bum pa kun nas 'bru lnga dang / /sman dang bdud rtsi sha lngar bcas/ /rnam par rgyal ba'i nang bcug ste//a mra'i lcug mas dgab par bya/ /bgegs bskrad bum pa byin brlabs nas/ /de rjes slob dpon blo chen gyis/ /sangs rgyas thod pa'i sbyor dang ldan/ /bum pa'i nang du bsgom bya ba/ /pad+ma'i steng du nyi ma ste/ /de steng ro yis yang dag mnan/ / de steng ye shes lnga las byung / /gtso bo yab yum bsgom par bya/ /de nas bum pa gzhan dag tu/ /yud tsam gyis ni lha mo rnams/ /rab tu gsal bar bskyed par bya/ /las kun byed pa'i bum pa la/ /sna tshogs rdo rjes mtshan byas nas/ /cho ga gsum gyis bdud rtsi 'khyil//bskyed pa'i cho ga rdzogs par bya/ /dkyil 'khor tshul du bkod byas la/ /go cha bgos dang gnas gsum brlab/ /dgug sogs dbang bskur legs zin nas/ /thod pa'i mchod yon sngon 'gro bas/ /spos sogs lha bshos dag gi bar/ /lha yi grangs dang mnyam par dbul//nang dang gsang bar bcas pas kyang / /bum pa'i lha rnams mnyes par bya/ /de bzhin sngar gsungs lha tshogs la'ang / /mchod pa'i cho ga rab tu bya/ /de 'og bzlas pa dbul bya ba/ /rnam par rgyal ba'i bum pa la/ /snying po dag gis mnyes par bya/ / de las gzhan pa rnams la ni/ /nyi ma'i snying po rab tu sbyar/ /las kun byed pa rang sngags so/ /gsol gdab gzhan dang mtshungs par bya/ /de ltar cho ga'i tshul dag ni/ /bum pa lhag par gnas pa'o/ /de nas slob ma'i gtso bo sogs/ /lhag gnas mchod par bya ba'i phyir/ / sngar bshad mtshan nyid dang ldan tshogs/ /lus gtsang gos gtsang gyon pa dang / /me tog snyim pa rab bkang nas/ /mdzes pa'i maN+Dal phul rjes su/ /'dod pa'i gsol gdab gus par brjod/ /dga' chen khyod bdag ston pa po/ /slob dpon khyod ni dgongs su gsol/ / byang chub sems dpa'i tshul bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems kyang bdag la stsol/ /sangs rgyas chos dang dge 'dun te/ /skyabs gsum dag kyang bdag la stsol/ /thar pa chen po'i grong mchog tu//mgon po bdag ni 'jug par 'tshal/ /de ltar gsol 'debs slob ma rnams/ /rang snying 'od kyis bur byas la/ /tshig ni 'di skad bsgrag par bya/ /bu tshur theg pa chen po la/ /khyod ni tshul chen snod yin te/ /gsang sngags spyod pa'i cho ga ni/ /khyod la yang dag bshad par bya//rdzogs pa'i sangs rgyas gang 'das dang / /de bzhin gang dag ma byon pa/ /de ltar byung ba'i rdzogs sangs rgyas/ /'gro la phan phyir bzhugs pa kun/ /de dag kun gyis gsang sngags kyi/ /cho ga bzang po 'di mkhyen nas/ /dpa' bo byang chub shing drung du/ / thams cad mkhyen pa tshad med brnyes/ /gsang sngags spyod pa mnyam med de/ /skyob pa dpal ldan he ru kas/ /bdud sde shin tu mi bzad pa/ /dpung chen dag kyang de yis bcom/ /de bas kun mkhyen thob bya'i phyir/ /bu yis blo gros 'di gyis shig /gong nas gong gi sdom pa ni//bu khyod kyis ni bsrung bya ste/ /grol ba'i rgyu ni de las gzhan/ /thabs ni gang yang yod ma yin/ /mkha' 'gro'i yan lag las byung ba'i/ /bshags pa la sogs slob ma la/ /byang chub thob pa'i don gyi phyir/ /cho ga thams cad tshogs par spyad/ /bdag gis sdig pa bgyis pa dang //bgyid du stsal dang yi rang dang / /sangs rgyas spyan sngar mchis nas ni/ /ma lus so sor bshags par bgyi/ /sangs rgyas byang chub sems dpa' dang / /rang rgyal dgra bcom 'gro rnams kyi/ /bsgom dang bzlas brjod bsod nams rnams//tshogs dag la ni yi rang ngo / /sangs rgyas chos dang dge 'dun la/ /rtag tu bdag ni skyabs su mchi/ /sangs rgyas thod pa mkha' 'gro ma/ /'khor lo gsum gyi bdag nyid can/ /kun la rtag tu skyabs su mchi/ /dpa' bo dpa' mo dbang lha mo/ /byang chub sems dpa'i bdag nyid che//khyad par du yang slob dpon la/ /rtag tu bdag ni skyabs su mchi/ /dpal ldan khrag 'thung dpa' bo dang / /rnal 'byor ma dang snang mdzad sogs/ /byang chub sems dpa' dpag med sogs/ /thams cad bdag la dgongs su gsol/ /che ge dus 'di nas bzung nas//ji srid gnyis med la gnas par/ /de yi tshangs spyod gnyis med pa/ /byang chub mchog sems bskyed par bgyi/ /bdag gi dge ba'i las rnams kyis/ /sangs rgyas myur du bsgrub byas te/ /sems can 'khor ba'i rgya mtsho las/ /bla med gnas su bsgral bar bgyi//yud tsam slob ma lhar byas nas/ /gnas gsum thig le bkod pa'i sar/ /rdo rjes mtshan pa'i 'bru gsum bsgom/ /sku gsung thugs kyi mtshan mar gyur/ /de dkyil 'bru gsum nus mchog gis/ /bkug bstim lha ru gsal byas la/ /spyi bor me tog mdun du spos//dri dang mar me snying gar te/ /lha bshos zhal du snyan la sgra'o/ /u dum+bA ra a shwad sogs/ /sor bcu gnyis kyi tshad tsam la/ /skyon [(]bal [,]bral [)]me tog rtser bcings sbyin/ /shar ram byang du kha bltas te/ /mi smra bar ni so shing bca'/ /ba ko tsam lci byugs pa'i sar//so shing mdun ni drang por dor/ de tshe rang la blta ba dang / /rtse mo gyen du 'greng gyur na/ /dngos grub mchog tu de bshad do/ /mtshams dang byang du bltas pa na/ /'jig rten pa yi dngos grub thob/ /de bzhin gzhan du kha bltas na/ /dngos grub 'bring po nyid du 'gyur//so shing bor ba brgya zhig la/ /gal te thur du kha bltas na/ /de ni nges par sa 'og gi/ /dngos grub dag la the tshom med/ /oM hrIHla sogs gsang sngags kyis/ /skyor mo bsdams pa'i chu blud bya/ /'jig rten du ni kun mkhyen kyang / /u dum+bA' ri me tog ltar/ / brgya lam na ni res 'ga' zhig /'byung 'gyur yang ni mi 'byung ngo / /gsang sngags spyod pa'i tshul 'di ni/ /de bas kyang ni rnyed dka' ste/ /gang gis sems can mnyam med don/ /bla na med par byed nus pa/ /gnyis med zab mo'i spyod tshul 'dis/ /sems can sangs rgyas thob byed pa'o//dang po bskal pa grangs med nas/ /bsags pa'i sdig pa gang dang gang / /de kun zad par 'gyur ba ni/ /zab mo'i dkyil 'khor mthong bas so/ /de rjes 'bru gsum sngags mchog gis/ /ku sha byin gyis brlab byas te/ /sngas dang stan du gding bar bya//gtso bo'i snying po rab bzlas pa'i/ /srad bu dmar la mdud pa gsum/ /bya ste dpung pa g.yon par bcing / /seng ge'i nyal stangs bstan byas te/ /ku sha'i stan la khyod nyol la/ /nang par bzhin bzangs rnams longs shig /sang gi nang par khyod rnams kyis//dpal ldan sangs rgyas thod pa yi/ /grong khyer chen po mthong zhes brjod/ /de nas rang snying sa bon las/ /sngags zhugs mdun du lha rnams sprul/ /phyi nang bdag nyid can gyis kyang / /dpal ldan khrag 'thung la sogs pa'i/ /'khor lo rnams ni rab tu mchod/ /'byung po rnams kyang mgu bar bya//nang par gyi ni dus dag tu/ /rmi lam mtshan ma dri bar bya/ /des kyang mtshan ma gang mthong rnams/ /'dzem pa med par smra bar bya/ /gal te bzang na dngos grub bsten/ /ngan na bgegs rnams bzlog par bya/ /slob ma lhag gnas cho ga'o/ /de ltar lhag par gnas byas nas//shes rab can gyis nang par du/ /thig dag gdab par bya ba'i phyir/ /slob dpon mtshan nyid sngar gsungs pas/ /thod pa las byas spyi bor 'chang / /yan lag thal bas rnam par byugs/ /lus la phyag rgya drug la sogs/ /kha T+wAM ga ni lag na thogs/ / brgya phyed phring bas rnam par brgyan/ /he ru ka dpal rang byas te/ /'khor la bltas pas snying gar dgod/ /bdag nyid gsal bar go gyon cing / /sngags dang phyag rgyas brgyan nas ni/ /dngos grub mchog ni stsol ba yi/ /dkyil 'khor 'jigs pa bri bar bya/ / ga mi ta ka la sogs pas/ /na ra ru d+hi ras spangs pas/ /shes rab dkyil 'khor nyis 'gyur sogs/ /tshad ldan srad bu bkal byas nas/ /khrag 'thung grong khyer nyams dga' ba/ /ji srid mtho lnga nas brtsams nas/ /bcu gnyis bcu drug mthar thug par/ /rnal 'byor dbang phyug dam pa yi//shes rab can gyis thig gdab ste/ /srad bu kha dog sna lnga ru/ /rnam par phye ste btsos nas ni/ /thod pa'i snod gzhag dag mos pas/ /sa bon las byung rigs lngar bskyed/ /dpal ldan khrag 'thung la sogs kun/ /spyan drangs nas ni de ru gzhug /sangs rgyas kun gyi mkha' 'gro ma//gtso bo'i sngags dang gnyis med pas/ /pad+ma'i snod la legs gzhag cing / /rang byung me tog dag gis mchod/ /ye shes sku bskyed byas nas su/ /mkhas pas thig ni gdab bya ba/ /sngon chad cho ga mthong ba yis/ /ye shes thig skud gdab bya'i phyir//bla mas khu tshur gyis bzung zhing / /gcig ni mtha' ru shi Sha yis/ /dbugs 'byin 'gro bar bsams nas su/ /thig gnyis dag ni legs par bsgril/ /gnyis su med pa'i gsang sngags kyis/ /bsgril nas thig ni der bya'o/ /dz+dza dz+dza zhes pas legs btang zhing //blo ldan rgyab nas 'greng bar bya/ /dang po byang dang lho yi ni/ /sgo dbus ji bzhin gnas nas su/ /lho ru mngon par phyogs nas su/ /de bzhin nam mkha'i thig gdab bo/ /nub dang shar nas gnyis pa gdab/ /oM badzra sa ma ya sU tra mA ti kra ma hUM/ de rjes g.yon pa'i khu tshur gyis//lte ba'i phyogs su bzung nas kyang / /shar du bltas nas 'gro mgon gyis/ /sa la tshangs pa'i thig gnyis gdab/ /thig skud dag ni 'debs pa'i tshe/ /'jig rten khams ni ma lus pa'i/ /sangs rgyas la sogs 'gro ba'i don/ /khyed kyi dus ni yin zhes bskul//bla ma nyid dam grogs mchog gis/ /g.yon nas bskor ba shin tu brtson/ /rlung dang dbang ldan phyogs gnas dang / /me dang bden bral khar gnas te/ /bla mas mtshams su thig gnyis gdab/ /byang nas mngon par bltas nas ni/ /bden bral du ni srad bu spring / / me yi phyogs su gnas pa dang / /dbang ldan phyogs su gnas pa yis/ /shar gyi thig ni gang yin pa/ /brtul zhugs can gyis cho gas gdab/ /phyogs skor la sogs dbye shes pas/ /kun gyi thig ni thams cad kyang / /bla ma'i man ngag rim thob pas/ /bla ma mkhas pas thig gdab po//bla ma mer gnas bden bral dang / /bla ma rlung dang dbang ldan du/ /gnas byas lho byang thig gdab po/ /ra ba me ri bor byas pa'i/ /cha ldan bcu drug rab dbye bya/ /dang po drug ni nang dor nas/ /gnyis gsum bdun pa bzhi bzhir dbye/ /bzhi pa de bzhin lnga dang brgyad/ / dbus ma dor ba'i cho ga bya/ /gtso bo'i pho brang cha chen gcig /lte ba ze'u 'bru ldan par gdab/ /pad+ma rim gsum 'dab ma brgyad/ /cha chen gsum gyi sa yin te/ /cha phran gsum gsum pad+ma ste/ /cha phreng re re rdo rje'i phreng / /sgo ni 'khor lo'i brgyad cha ste/ /khyams ni de yi phyed du bya//sgo khyud dag ni sgo yi tshad/ /tshon sna lnga yang de yi phyed/ /rin chen pha gu tshon gyi tshad/ /nyis 'gyur dra ba dra phyed yin/ /sgo yi sum 'gyur rta babs te/ /ba dan dril bu 'od zer gyis/ /brgyan par thams cad thig gdab cing / /gdugs dang 'khor lo ri dgas bcas/ / phyogs su rdo rje rgya gram mdzes/ /phyi rgya ra ba me ri ste/ /brgyad du ma gtogs cha chen gcig /rim gnyis thig ni gdab par bya/ /dang po dkar rtsi thig sogs las/ /rim bzhin thig gdab nges par bya/ /de steng ye shes thig btab pas/ /kun nas yongs su brkyang bar bya//rdul tshon sngon po ro bsregs pa'i/ /sol ba nag pos bya ba yin/ /rdul tshon dmar po dur khrod kyi/ /so phag las ni bya bar bshad/ /de bzhin rdul tshon ljang gu ni/ /nim pa'i 'dab ma dag las so/ /rdul tshon dkar po'i rgyu dag ni/ /mi rus phye ma dag las so/ /rdul tshon ser po'i rgyu dag ni//yung ba'i phye ma dag las bya'o/ /de ltar rdul tshon lnga rnams kyis/ /mkhas pas dkyil 'khor bri bar bya/ /de ltar dur khrod sa rnams ni/ /dbang phyug chen po'i rgyan yin phyir/ /lnga po lngar ni rab sprul bya/ /ye shes thig gi cho ga bzhin/ /bskyed pa'i lha sogs rgyas par bya//sems dag nang par langs nas ni/ /dkyil 'khor las ni rab tu brtsam/ /'di ni chos dbyings dag pa ste/ /sems can khams ni rab grol byed/ /sangs rgyas thod pa rgyal chen po/ /de bzhin gshegs pa kun gyi gnas/ /nyes pa ma lus rab zhi ba'i//tshon [(]kyi [,]gyi [)]las la yang dag 'jug /slob dpon gyis ni dang por ni/ /g.yon pa'i khu tshur sar gzhag ste/ /dbang ldan mtshams nas brtsams nas su/ /ri mo lnga pa rgyab tu bri/ /tshon dang 'dri ba'i las byed pa/ /dam tshig sdom pa ldan par sbyin/ /mthe'u chung dang mthe bo'i dpangs//drangs te mtho bar yang dag bri/ /g.yas su bskor zhing rgyun mi bcad/ /sngo zhing dkar ba ser ba dang / /pad+ma rA ga ma rgad bzhin/ /rab tu bsgrims te bri bar bya/ /phyi nas kun du slob mas so/ /gal te ri mo mi mnyam zhing / /yo zhing dma' dang chad pa yang / / ri mo dma' bas mi 'grub cing / /yon pos gdung ba skyed par byed/ /chad pas slob dpon slob ma dag /gnyis ka 'chi bar shes par bya/ /de phyir mtshan ldan ri mo ni/ /mtshan nyid kun gyis legs par mtshan/ /pho brang rim gsum zlum po la/ /rdo rje gsum gyis yongs su bskor//phyi rol gru bzhi lham pa la/ /sgo bzhir rta babs rnams kyis brgyan/ /ba dan rnam pa bzhi yis brgyan/ /dra ba dra ba phyed pas spras/ /phyi rol kha khyer dag pa dang / /rin chen pha gur yang dag ldan/ /pad+ma nyi shu rtsa lnga yi/ /gdan rnams kyis ni shin tu mdzes/ /de la rim pa dang po ni//'dab brgyad sna tshogs lte bar bcas/ /pad+ma'i lte ba sngon po bri/ /dkar ser dmar zhing gnag pa ste/ /shar dang byang phyogs phyogs kyi rdul/ /mtshams bzhir mdzes pa'i kha dog can/ /bdud rtsis gang ba'i thod pas mdzes/ /rdo rje phreng ba sngon pos brgyan//de 'og rim pa gnyis pa ni/ /'khor lo rtsibs brgyad dmar po la/ /rtsibs mchan ljang gus yang dag bri/ /pad+ma dmar po'i phreng bas brgyan/ /rim gsum pa yi 'khor lo ni/ /rtsibs brgyad kha dog dkar po la/ /rtsibs mchan kha dog nag po bri/ /de yang rdo rje ra bas brgyan//dkar ba'i tshon gyis legs pa'o/ /sgo bzhir rigs kyi rim ji bzhin/ /sgo ma bzhi ni nges par gnas/ /pho brang dbus kyi lte ba la/ /ro steng rdo rje nag po dang / /gri gug dmar po legs par dgod/ /pad 'dab 'khor lo rnams kyi steng / /nyi ma'i dkyil 'khor la gnas pa'i//gri gug lha mo'i mdog bzhin bri/ /sgo bzhi rnams su 'ang de bzhin no/ /de dag tshon gyi cho ga'o/ /de ltar yid 'ong sna tshogs pa'i/ /lha rnams gzhal yas khang mdzes pa/ /de skad gsungs pa rdzogs par bya/ /sna tshogs gos dang rgyal mtshan dang / /bla re la sogs bre ba dang / / spos dang me tog la sogs pa'i/ /mchod pa'i rgyan gyis rnam par brgyan/ /rgyan cha che ldan bla ma yis/ /rang gi rnal 'byor rdzogs byas la/ /bde ba chen po ster byed pa'i/ /khrag 'thung rgyal po'i dkyil 'khor mchog /rdul tshon bris pa'i khang pa la/ /mtshan nyid ldan pa bskyed par bya/ / pad+ma nyi ma nyi shu lnga/ /gdan rnams shin tu mdzes pa la/ /de yi dbus chud sa bon ni/ /yi ge hUM gi rang bzhin sngo/ /skad cig tsam gyis he ru ka /sku mdog sngon po grags chen po/ /g.yas na gri gug cang te'u 'dzin/ /g.yon na thod pa kha T+wAM ga /skyil krung phyed pa'i 'jigs chen po/ /zhal gyi mche ba cung zad gtsigs//ral pa'i cod pan gyis brgyan zhing / /sangs rgyas thod pa'i cod pan can/ /dbu la sna tshogs rdo rjes mtshan/ /zla ba phyed pa 'dzin pa'i lha/ /sku la thal ba'i rdul gyis byugs/ /dpa' bo phyag bzhi phyag mtshan 'chang / /shin tu hUM sgrogs 'jigs byed pa//gar gyi stabs kyis rnam par bzhugs/ /mgo bo rlon pa'i phreng ba can/ /mchod phyir thogs pa'i phreng ba 'chang / /thod pa gti mug rnam dag pa'i/ /phreng ba brgyus pas brgyan pa'i lha/ /mgul do dang ni 'khor lo dang / /rkang gdub dang ni dpung rgyan dang / /gdu bu rked pa'i ske rags dang //dpa' bo rna cha mchog gis brgyan/ /'di 'dra'i gzugs can gtso bo ni/ /hUM zhes bzlas pa byed par bsgom/ /de las byung ba'i rnal 'byor ma/ /nyi shu rtsa bzhi'i bdag nyid rnams/ /sku mdog sna tshogs grags chen mo/ /shin tu 'jigs pa'i gzugs can ma//zhal gcig phyag ni thod pa 'chang / /g.yas pa na ni gri gug 'dzin/ /so so yi ni ming ji bzhin/ /rab tu gsal bar bshad par bya/ /rim pa dang po'i phyogs bzhi ni/ /phreng bzangs ma dang 'dod can ma/ /'jigs ma dang ni thub dka' ma/ /mtshams su thod pas yang dag brgyan//rim gnyis gsung gi 'khor lo la/ /bde ba'i ske rags can dang ni/ /gzugs can 'byung gnas rnam rgyal ma/ /shar sogs phyogs bzhir g.yon rim gnas/ /thod can ma dang mtshon chen ma/ /rgyud byed ma dang gsod byed ma/ /dbang ldan mtshams sogs g.yas rim bzhugs//rim gsum sku yi 'khor lo la/ /sgrol byed ma dang 'jigs ma dang / /lha mo mi pham ma bzhi ni/ /shar phyogs lugs 'jug phyogs bzhir ro/ /dge ma 'dzur byed ma dang ni/ /dus mtshan ma dang grags chen ma/ /dbang ldan mtshams sogs lugs las bzlog /mdzes sdug ma dang nor 'dzin ma/ /skal bzangs ma dang grags mthong ma/ /shar sogs sgo bzhir yang dag gnas/ /'di lta bu yi dkyil 'khor mchog /kha dog rnam pa lnga yis brgyan/ /de yi dbus gnas lha mo ni/ /he ru ka la bde ster ma/ /skyil krung phyed pa'i gar byed ma//mi yi rus pa'i phreng bas brgyan/ /lha mo 'od zer dpag dka' zhing / /skra ser gyen du 'bar ba ste/ /hUM gi bdag nyid las skyes 'jigs/ /zhal nas khrag ni 'thor byed ma/ /dkar mo nag mo ljang gu ma/ /thams cad khu ba ldan gyur ma'o/ /lha yi dkyil 'khor bskyed pa ni//nyi shu rtsa lnga'i bdag nyid gsungs/ /mdog dang phyag mtshan cha lugs ldan/ /sgrub pa'i thabs bzhin bsgom par bya/ /sngar gsungs sta gon lha rnams ni/ /snying ga nyid nas rab sprul nas/ /dkyil 'khor la ni byin gyis brlabs/ / yang ni snying ga'i sa bon gyis/ /ye shes lha rnams bkug byas te/ /dkyil 'khor lha rnams byin gyis brlabs/ /oM bud+d+ha ka pA li ni aH/ khaM graM drUM shUM/ aHaH/ hUM hUM hUM phaT/ rtsa yi 'khor lo 'dzag tshul gyis/ /dbang bskur rgyas gdab phun sum tshogs/ /ma lus pa ni 'dir bya'o//de nas me tog spos la sogs/ /lha yi grangs dang mnyam par dbul/ /de bzhin gos ni zung res mchod/ /rang byung me tog la sogs pa'i/ /bdud rtsi lngas kyang de bzhin mchod/ /thod pa bdud rtsi lngas bkang ba/ /he ru ka yis btung bar bya/ /de yis 'thungs pa tsam gyis ni//'gro ba'i bla ma bdag nyid che/ /gtso bo las gzhan tha dad gzugs/ /rnal 'byor ma kun de dang 'dra/ /'dod pa'i yon tan sna tshogs dang / /tshogs kyi sbyor ba che ldan zhing / /nam mkha' ca co'i sgras bkang nas/ /bkra shis glu yis bstod bya zhing / / bzlas pa yis kyang mgu bar bya/ /lto ba'i gnas su sbyin sreg bya/ /pad+ma'i 'dab ma brgyad ldan du/ /khrag 'thung mkha' 'gro nyi shu lnga/ /ge sar pad+ma'i lte ba la/ /bdag nyid lha yi dngos byas nas/ /sbyin sreg cho ga ldan byas na/ /sgrub mi dgos par dngos grub 'gyur/ / bza' dang bca' btung myong ba dang / /brtul zhugs can gyis ci spyod pa/ /ye shes bdud rtsi lnga nyid du/ /bsgrubs te thams cad spyad par bya/ /bdag nyid lha ni lha yi mchog /bdag nyid lha ni lha dam pa/ /rang gi gzugs la ma chags pas/ /gzugs brnyan la sogs bzhin du shes//bdag nyid sangs rgyas ma lus dang / /mkha' 'gro ma kun gnas yin te/ /de phyir rtsol ba ma lus kyis/ /bdag nyid he ru ka dpal mchod/ /bra khur la sogs bza' ba dang / /zan dron sha dang nya sha dang / /bdud rtsi lnga sogs ci 'byor pa/ /thod pa'i nang du legs gzhag ste//sbyang sogs rim gyis byin brlabs nas/ /zhing skyong rnams la gtor ma sbyin/ /mchod pa'i bya ba rdzogs gyur nas/ /slob ma gzhug pa'i cho ga yis/ /dang po nyid du slob dpon gzhug /mtshan nyid ldan pa'i slob ma'i tshogs/ /khrus byas mdzes pa'i gos gyon te//bu sdug de dag rnams kyi ni/ /gdong pa dar gyis g.yogs byas nas/ /gsol ba 'debs pa sngon du 'gro/ /sangs rgyas kun gyi rang bzhin sku/ /slob dpon la ni skyabs su mchi/ /dpa' bo rnal 'byor ma 'khor lo/ /rnal 'byor gnas la bdag phyag 'tshal//thar pa chen po'i grong mchog tu/ /mgon po bdag ni gzhug tu gsol/ /don dam smra ba'i seng ge rnal 'byor zhes bya ba/ /nyon mongs gcod pa'i don la shin tu mkhas gyur pa/ /srid pa'i nyes brgya bskyed pa'i nyon mongs gcod mdzad pa/ /rnal 'byor don dam rgyal po de nyid grub par mdzod//lan gsum du ni gsol ba gdab/ /de nas slob dpon gyis/ kye khyod su zhes smra'o/ /slob mas bdag ni rgyal ba'i sras/ /zhes smra'o/ /de bzhin gshegs pa kun gyi gnas/ /he ru ka dpal grong khyer mchog /snying po'i dkyil 'khor 'di ru ni/ / bdag gis slob ma gzhug par bgyi/ /de nas lho sgor mngon phyogs nas/ /dkyil 'khor mkha' 'gro'i tshogs dag la/ /sgo gsum dang bas phyag btsal ba/ /oM na ma te hUM/ na ma mi hUM/ na mo na maHhUM swA hA/ zhes brjod sku gsung thugs kyi ni/ /sgo nas lan gsum sngon 'gro phyag /oM sarba bI ra yo gi nI pU dzo pas+tha nA ya A t+ma nAM nir+yA ta yA mi sarba ta thA ga ta bI ra yo gi nI/At+ma ma le a b+hi tiSh+Tha swa mAM/ zhes brjod lus ni thams cad kyis/ /gus pas rab tu phyag 'tshal lo/ /de nas shar gyi sgor gnas la/ /snying ga'i g.yon du thal mo sbyar/ /oM sarba bI ra yo gi nI pU dzo pas+tha nA ya a b+hi She ka ya A t+ma nAM/nir+yA ta yA mi sarba ta thA ga ta bI ra yo gi nI At+ma ka ma ma d+hA a b+hi Shiny+tsa tu mAM/ de rjes byang gi sgor phyogs shing / /thal mo de nyid dpral bar gzhag /oM sarba bI ra yo gi nI pU dza pra brta nA ya At+ma nAM/ nir+yA ta yA mi sarba ta thA ga ta bI ra yo gi nI At+ma/ mai ma pra b+ha d+ha na mAM/de nas nub kyi sgor 'dug la/ /thal mo de nyid mgor gzhag ste/ /oM sarba bI ra yo gi nI pU dza karma At+ma nAM/ nir+yA ta yA mi sarba ta thA ga ta bI ra yo gi nI At+ma Ar+ya karma ku ru mAM/ byin gyis brlab phyir phyag bzhi 'tshal/ /de nas lho sgor 'dug nas kyang / /las ni bum pa'i chu yis gtor//slob ma'i lag pa bzung byas la/ /sangs rgyas thod pa'i sdom pa mchog /brjod de thams cad sbyin par bya/ /sangs rgyas chos dang dge 'dun te/ /dkon mchog gsum la skyabs su dong / /'di ni sangs rgyas rigs yin te/ /sdom pa brtan par gyur pa'o/ /rdo rje dril bu phyag rgya ni//blo chen khyod kyis gzung bar bgyi/ /byang chub sems gang de rdo rje/ /shes rab dril bu shes rab grags/ /slob dpon khyod kyis gzung bar bya/ /bla ma sangs rgyas kun dang mnyam/ /'di ni rdo rje rigs dag pa'i/ /dam tshig sdom pa yin par bshad/ /rin chen rigs la rtag tu ni//nyin re bzhin nam lan drug tu/ /chos dang zang zing mi 'jigs byams/ /sbyin pa rnam bzhi rab tu sbyin/ /phyi dang gsang ba'i theg pa gsum/ /dam pa'i chos kyang ma lus gzung / /'di ni pad+ma'i rigs dag pa'i/ /dam tshig yid du 'ong ba'o/ /las kyi rigs mchog chen po la//sdom pa thams cad ldan par ni/ /yang dag nyid du gzung bar bgyi/ /mchod pa'i las kyang ci nus bgyi/ /de ltar sdom pa bzung nas ni/ /me tog phreng dang bcas pa yis/ /snying gar rdo rje rab bzhag la/ /oM badzra yo ga tsit+ta ut+pA da yA mi/ oM su ra te sa ma ya s+t+waM ho sid+d+hi badzra ya thA su khaM/rnal 'byor du ni sems bskyed do/ /yongs su sbyangs pa'i bu sdug de/ /las kun byed pa'i chus gtor la/ /dkyil 'khor du ni gzhug par bya/ /oM A khaM bI ra hUM/ deng khyod dpa' bo dang rnal 'byor ma thams cad kyi rigs su zhugs kyis/ ngas khyod la dpal he ru ka'i ye shes bskyed par bya ste/ye shes gang gis khyod de bzhin gshegs pa thams cad dang dpa' bo dang rnal 'byor ma rnams kyi dngos grub kyang thob par 'gyur na/ dngos grub gzhan lta ci smos/ khyod kyis dkyil 'khor ma mthong ba'i mdun du smra bar mi bya ste/ dam tshig nyams par gyur ta re/he ru ka dpal deng khyod kyis/ /snying la yang dag zhugs pa ni/ /gal te tshul 'di smras na ni/ /de ma thag tu dral te gshegs/ /rjes su mna' chu blud pa ni/ /tsan+dan dang ni ga bur bcas/ /bde 'byung me tog chu dang ldan/ /blo gros brtan pa'i slob ma la/ /mtshan ldan thod par blugs nas ni//gzi brjid can gyis 'di skad smra/ /'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs na dngos grub 'gyur/ /oM pany+tsa a mr-i ta u da ka Tha Tha Tha hUM/ deng nas brtsams te khyod kyi dpal he ru ka nga yin gyi ngas gang 'di byos shig bsgo ba de khyod kyis bya'o//khyod kyis nga la brnyas par ma byed cig /khyod mi bde ba ma spangs par dus byas nas dmyal bar gyur ta re/ de rjes slob ma'i gtso bo yis/ /dpa' bo dang ni rnal 'byor ma/ /thams cad kyis ni byin rlobs la/ /he ru ka dpal rnal 'byor ma//bdag la ye shes dbab tu gsol/ /sngar gsungs rgyan ldan bla ma yis/ /gzi ldan sbyin bcas slob ma la/ /mi 'chi bcu phyed ro ras dang / /byi brun gu gul nag po dang / /grir shi klad khrag tshil chen bcas/ /rang skra dang bcas zhib mor brdungs/ /pad+ma'i snod du rab bzhag nas//dur khrod yi dags mes gdungs la/ /gnyis med sngags kyis gcun par bya/ /dril bu'i sgra ni rab bsgrags nas/ /rang nyid 'od kyis mkha' 'gro gzhug /gal te 'bab par ma gyur na/ /slob ma'i snying gar nyi ma la/ /sangs rgyas thod pa yum bcas shing / / yungs kar tsam gyi skur bsams la/ /de yi gsang dang mkha' bskyod pas/ /'od zer dmar pos lus kun yang / /ros gang gcig gyur sngags bzlas shing / /bdug dang bsam gtan cho ga yis/ /skad cig nyid la dpa' bo dang / /mkha' 'gro 'khor bcas snying la 'jug /oM tiSh+Tha ma hA kro d+hA A we sha hUM/ oM shrI he ru kA ya/ bid ma he bid+ya rA dzA ya b+hi ma he swA hA/ mkha' 'gro bskul bas nges par 'bab/ /lce la a ni dmar bsams nas/ /gsungs shig rdo rje dge mi dge /sku gsung thugs la phebs gyur nas/ /brtan pa'i gsang sngags brjod par bya//'dir ni bsod nams ji lta bu/ /lha rnams rigs kyi rim ji bzhin/ /'di ni dngos grub gang yin pa/ /dkyil 'khor 'dir ni de bzhin shog /pra tIts+tsha dang badzra hoH/ /dkyil 'khor du ni me tog dor/ /gang rnyed de yi rigs yin te/ /dbus sogs mtshan ma shes byas la//slar yang slob ma'i mgo la bcing / /sha mig dag pa'i ltas kyi phyir/ /ci mthong dri ba'i cho ga bya/ /de nas lag pa nas bzung ste/ /mig phye dkyil 'khor bstan par bya/ /he ru ka dpal deng khyod kyi/ /mig 'byed par ni brtson par mdzad/ /phye bas thams cad mthong 'gyur te//rdo rje'i mig ni bla na med/ /oM badzra nai tra ya a pa ha ra pa Ta laM hrIH/ dkyil 'khor bzang po 'di la ltos/ /da ni dad pa rab tu bskyed/ /khyod ni rnal 'byor ma rigs skyes/ /sngags dang phyag rgyas byin gyis brlabs/ /'gro don phun sum tshogs kun dang / / dngos grub kun mkhyen mngon du 'gyur/ /dam tshig thams cad bskyang ba dang / /gsang sngags la yang brtson par gyis/ /de nas dkyil 'khor 'khor lo yi/ /lha yi sku mdog ji bzhin dang / /mtshan ma la sogs de bzhin du/ /slob ma rnams la bstan par bya/ /sna tshogs pad+ma'i dkyil steng nas//gnyis su med par legs 'khyud pa'i/ /dngos po kun gyi rang bzhin can/ /dngos grub ma lus stsol ba po/ /khrag 'thung che la bu khyod ltos/ /sna tshogs sde mas gtsor mdzad pa'i/ /phreng bzangs ma sogs lha mo lnga/ /thod pa bzhi por bcas pa yi/ / rab zab thugs kyi 'khor lo dang / /dge ba'i ske rags can la sogs/ /gsung gi rnam dag 'khor lo dang / /sgrol byed mkha' 'gro ma la sogs/ /rnam dag sku yi 'khor lo ste/ /rab dang 'bring dang tha ma can/ /mdzes sdug la sogs lha mo bzhi/ /gzugs sogs dag pa'i bdag nyid 'gyur//lha rnams de nyid mtshan ma yin/ /de nas slob ma blo ldan gyis/ /bla ma'i zhabs la phyag 'tshal te/ /yon gyi mchog chen phul nas su/ /dbang bskur don du gsol ba gdab/ /he ru ka dpal dbang sgrub pa/ /'gro ba skyob cing gzi brjid can//de ltar yon tan 'byung gnas sogs/ /de bzhin bdag la deng stsol cig /dpa' bo chen pos mi ldog pa'i/ /dbang bskur ba ni bdag la stsol/ /sems can kun gyi don gyi phyir/ /bdag ni rtag tu slob dpon bgyid/ /'jug sgo lho yi phyogs su ni/ /bdag nyid he ru ka dpal sems//pad+ma 'dab brgyad bris steng du/ /seng ge'i khri ni bsham bya ste/ /sna tshogs mdzes pa'i stan bting la/ /gnyis med blo ldan der bzhag ste/ /he ru ka dpal sprul par bya/ /gdugs dkar steng du phub nas kyang / /dpa' bo rnal 'byor ma tshogs kyis//bkra shis sgra yis legs gang ba/ /rol mo snyan dang glu dbyangs rnams/ /nam mkha' ca co yis bkang ste/ /dbang bskur ba ni 'dod pa yin/ /de la bar chod zhi ba'i phyir/ /yungs kar rnal 'byor pa yis kyang / /bzlas brjod cho ga bzhin byas la/ /gsang sngags brjod nas brdeg par bya//de 'og lag gnyis 'dab rtse yis/ /bum pa rnams bteg sngags pa yi/ /lus nang rtogs gyur dkyil 'khor la/ /cho ga'i tshul gyis dbang bskur bya/ /rnam rgyal la sogs bum pa'i chu/ /lhag ma med par bsdu byas la/ /glu blangs dril bu la sogs brdung //dpa' bo rnal 'byor ma lus kun/ /bsgoms la thams cad dbang bskur ro/ /dbang bskur rdo rje chen po ni/ /khams gsum pa yi gnas las byung / /khams gsum kun gyis phyag 'tshal ba/ /chu yi dbang bskur sbyin par bya/ /oM badzra a b+hi Shiny+tsa zhes/ /brjod de rang snying 'od las byung //rig pa'i lha mo rdzu 'phrul can/ /bdud rtsi chu yis bkru bar bya/ /dbu rgyan rin chen rgyu las byung / /dar dpyangs bcings la dbang bskur te/ /thor tshugs cod pan gyis brgyan pa/ /sangs rgyas kun gyis bsngags pa yi/ /rin chen dam pa'i dbu rgyan dang //dar dpyangs dbang bskur sbyin par bya/ /oM badzra pa TaM ka badzra a ra li hoH/ rdo rje chen po rtse dgu pa/ /de nyid ldan pa byin brlabs nas/ /sangs rgyas rdo rje'i dbang bskur bas/ /de ring khyod la dbang bskur bya/ /'di ni sangs rgyas thams cad nyid/ /shin tu grub phyir rdo rje zung //oM badzra a d+hi pa ti s+t+waM a b+hi Shiny+tsA mi/ lag tu byin la dbang bskur bya/ /thog mtha' med pa'i sems dpa' ni/ /rdo rje sems dpa' dga' ba che/ /kun du bzang po kun bdag nyid/ /rdo rje snyems tshul bdag po'i bdag /'di ni rnal 'byor ma kun gyi/ /shes rab dbyangs kyi rjes 'gror bshad//khyod kyis kyang ni rtag tu bcang / /byang chub mchog tu rgyal ba bzhed/ /de dus dril bu'i sgra bsgrags la/ /srid pa ngo bo nyid kyis dag /ngo bo nyid kyis dngos med byas/ /rang bzhin dag pa'i sems dpa' rnams/ /srid pa'i dam pa byed par shog /oM shrI he ru ka a d+hi pa ti s+t+waM a b+hi Shiny+tsa tiSh+Tha bI ra sa ma ya/dril bu g.yon du sbyin par bya/ /rdo rje dril bu yang dag 'khyud/ /g.yon bsnyems pa dang sgros gnon 'chang / /gnyis med gnyis med rnal 'byor bdag /phyag rgya chen por byin gyis brlabs/ /byin rlabs che ldan sngags kyis ni//sngags kyi dbang bskur sbyin par bya/ /oM shrI he ru ka a d+hi pa ti s+t+waM a b+hi Shiny+tsa maM/ shrI he ru ka nA ma a b+hi She ka te/ shrI yi sgra dang bcas pa yis/ /ming gi dbang bskur sbyin par bya/ /'di ni sangs rgyas thams cad kyi/ /he ru ka dpal phyag na gnas/ /khyod kyis kyang ni rtag tu bcang //he ru ka dpal brtul zhugs brtan/ /oM sarba ta thA ga ta sid+d+h+ya badzra sa ma ya tiSh+Tha e Sha s+t+waM d+ha rA ya mi hUM ha ha ha he hoH/ 'dis ni rdo rje'i brtul zhugs so/ /kha T+wAM Da ma ru bzang bcas/ /byin gyis brlab cing dbang bskur bya/ /he ru ka dpal kha T+wAM ga /rnal 'byor ma ni Da ma ru//rdo rje kha T+wAM rdo rjer bcas/ /dril bu sil sil sgra sgrogs shing / /tshangs pa'i skud thogs rnal 'byor bdag /kha T+wAM ga dang rnal 'byor snod/ /dpa' bo chen pos blang bar gyis/ /zhi dang rgyas dang dbang dgug dang / /sdang dang dbye dang mnan la sogs/ /bsad dang bskrad pa ma lus pa'i//las rnams de ni sgrub par gyis/ /ral gri mig sman sa 'og dang / /mchil lham de bzhin ril bu ste/ /rnal 'byor ma yi dngos grub bsgrub/ /de nas ci dgar sgrub par gyis/ /shAkya thub par bsgom byas la/ /lag g.yon gyis ni chos gos mtha'/ / g.yas kyis mi 'jigs phyag rgyar gnas/ /slob ma la ni lung bstan bya/ /he ru ka dpal rnal 'byor che/ /'khor lo ma lus rnam gnas shing / /he ru ka dpal lung bstan bzhin/ /mgrin gcig tu ni thams cad kyis/ /'di ltar nga yis lung bstan de/ /he ru ka dpal de bzhin gshegs//dngos po mchog tu grub pa'i phyir/ /srid pa'i ngan 'gro rnams las bton/ /shrI he ru ka nA ma sarba ta thA ga ta tiSh+Tha sid+d+hi sa ma ya s+t+waM b+hu r+b+hu ba swaH/ de tshe he ru ka dpal dang / /mkha' 'gro ma dang bla mar bcas/ /mgrin gcig lung ston bsam par bya/ / de rjes dbugs dbyung sbyin pa ni/ /gsang chen mchog gi dkyil 'khor du/ /mthong ba dang ni bcug pa yis/ /sdig pa kun las grol 'gyur bar/ /khyod ni shin tu de ring gnas/ /dbang ni bskur ba tsam gyis kyang / /slob ma yon tan bdag por 'gyur/ /slob dpon nyid kyi bde ba yis/ /brtan dang g.yo kun dam tshig yin//sems dag tho rangs dus langs te/ /bza' dang bsrung ba la sogs pa'i/ /sdom pa'i bdag nyid can srung ngo / /lus dang srog la mi ltos par/ /dam tshig dang ni sdom pa bsrungs/ /nyin dang mtshan mo lan gsum du/ /rtag tu bzlas la gzhol bar byos//gang tshe nyams na rnal 'byor pa/ /kha na ma tho sbom por 'gyur/ /dgun zla 'bring po nas brtsams te/ /zla ba re re bsrung ba ni/ /gnyis su med pa'i 'khor lor gnas/ /tshes bcu dus su mchod par bya/ /sha dang chang sogs gang ci'ang rung / /dpa' bo rnal 'byor ma yi tshogs//he ru ka sogs rab tu mchod/ /theg pa dman la 'dod mi bya/ /sems can don la rgyab phyogs min/ /'khor ba dag kyang yang mi spang / /mya ngan 'das la dgar mi 'gro/ /dpa' bo rnal 'byor ma kun la/ /khyod kyis brnyas par mi bya'o/ /phyag rgya bzhon pa mtshon cha dang / / mtshan ma 'gom par mi bya'o/ /dam tshig rab bsrung bsod nams kyis/ /tshe 'di nyid la 'grub par 'gyur/ /bud med thams cad mthong ba na/ /g.yon nas lan gsum bskor byas la/ /spyi bos phyag ni byas nas kyang / /lan gsum bar du gsol ba gdab/ /bdag ni ma khyod bu yin te//ji srid byang chub 'byung bar du/ /byang chub yan lag nu ma las/ /byung ba'i rang gi 'o mas skyong / /gnyis med ye shes spyod ldan pa'i/ /bslab pa blang ba sngon 'gro bas/ /tshangs par spyod pa shin tu bsrung / /dam tshig de la rtag gnas te/ /de sngon 'gro ba'i gsang ba yin//spyod dang grol ba'i gnas 'dod pa'i/ /yid la 'dod pa kun 'grub 'gyur/ /gtso bos ji ltar bka' stsal pa/ /de ltar bdag gis bgyid par 'tshal/ /de ltar yongs smin slob ma la/ /gsang ba'i dbang mchog sbyin par bya/ /dper na bu tsha med pa'i khyim/ / shi ma thag tu stong par 'gyur/ /de bzhin dbang dang bral na ni/ /ye shes kun gyis stong pa nyid/ /dbang mchog thob 'dod slob ma yis/ /sna tshogs zas dang sna tshogs skom/ /sna tshogs rol mo mchog gsungs dang / /dri zhim lnga dang me tog spos/ /'di dag la sogs bla ma mchod//mchod yon zhabs bsil de bzhin khrus/ /glu yi mchod pa rnam mang bas/ /sangs rgyas kun gyi rang bzhin che/ /'di dag gis ni bla ma mchod/ /na tshod ldan pa'i bu mo yang / /mtshan nyid ldan pa dbul bar bya/ /de nas yang dag rab bshad pa/ /dbang dus cho ga ji bzhin du/ / slob ma dad brtan gang zhig gis/ /shes rab ma la gsol ba 'debs/ /dri zhim pa yi dngos po yis/ /maN+Dal rnam pa lnga byas te/ /sangs rgyas kun gyis brgyan byas pa/ /bla ma che la gsol ba 'debs/ /shin tu dri med sems kyis ni/ /de nas 'dir ni gsol ba 'debs//'khor ba'i 'dam du bying ba bdag /dpung gnyen khyod kyis bsgral du gsol/ /bdag ni stsol chung skal dman zhing / /sangs rgyas chos ni rnam par spangs/ /kye kye ston pa bla ma che/ /mgon po khyod kyis brtse bar mdzod/ /de nas slob dpon che ldan pas/ / lha yi rnal 'byor dang ldan pas/ /sngar gsungs cho ga bzhin du ni/ /chu sogs dbang rnams bskur bar bya/ /gsang ba'i go 'phang 'di brjod bya/ /dam tshig phyag rgyar rab gsungs pa/ /yid kyi lus ni brtan phyir ro/ /gang gis lus kun brtan byed pa/ /de ni phyag rgyar rab tu grags//slob ma la ni de brjod nas/ /bdag nyid rig pa lhan cig tu/ /yid dang rjes mthun bza' dang bca'/ /btung ba la sogs rjes spyad cing / /kha la sogs par ga pur gyi/ /dri zhim mchog tu bsgos pa las/ /yid la 'phrog pa'i bgad pa dang / /sgeg dang rol sogs sngar byas te//dbang po gnyis kyi snyoms 'jug pas/ /bde dga' rgya mtsho byung gyur pas/ /zhal du bza' ba'i rdzas mchog bstab/ /rdzas de rnams ni gsol ba dang / /yid ni tshim zhing thugs dgyes phyir/ /a ti su kha zhes brjod do/ /khams gsum thabs dang shes rab gcig /bde chen gnyis med ye shes gsal/ /slob ma nus dang ldan par 'gyur/ /de ltar dbang mchog bskur byas pas/ /mgon po sa bcu dang mnyam 'gyur/ /de nas gsang dbang thob gyur pa'i/ /slob ma bzang la bla ma yis/ /shes rab la brten ye shes kyi//dbang bskur bzang po sbyin pa'i phyir/ /dkyil 'khor bzang po'i phyi rol du/ /sngar bzhin dkyil 'khor rdzogs bsgoms la/ /de yi dbus gnas bla ma ni/ /sangs rgyas thod pa'i rnal 'byor can/ /me tog la sogs mchod pa dang / /chang la sogs pa'i dga' ston gyis/ / mchod cing bstod pas mnyes byas la/ /yon mchog dam pa phul nas ni/ /bla ma che la gsol 'debs pa/ /bla ma lha mo dgyes mthong nas/ /tshig 'di dag ni smra bar byed/ /rnam par rtog pa mang po yis/ /g.yogs pa'i bag chags rab ldan pa/ /'khor ba'i 'dam du bying ba bdag /mdzes ma khyod kyis skyob par mdzod/ /grags chen snying rje ldan pa yi/ /lha mo des ni zhi bar mdzod/ /gsol ba btab rjes bla ma che/ /rang gi rnal 'byor rdzogs byas nas/ /dpa' bo rdzogs par mthong nas ni/ /rtsa yi 'khor lo las ni 'dzag /'dzag pa de las rnal 'byor ma//rnam mang brtse ba cher ldan pa/ /bde gshegs kun gyis byin brlabs ma/ /sna tshogs rgyan gyis rnam par klubs/ /sna tshogs pa yi na bza' mnabs/ /gzugs ni lang tsho gzhon pas brgyan/ /lo ni bcu dang gnyis lon pa/ /phyag g.yas byang chub sems gang ba'i//bum pa a mra'i lcug bcas bsnams/ /zhal ni rab bzhad dang ba yis/ /he ru ka ni rgyal gyur cig /rgyal bar gyur cig ces smras pas/ /chu sogs bum pa gsang ba dag /dbang bskur ces su shes rab kyi/ /dbang ni rab tu bskur bar bya/ /dper na pi wang sbyor kun tshogs//rgyud dang bral na brdung mi rung / /de bzhin dbang dang bral na ni/ /sngags dang bsam gtan 'grub mi 'gyur/ /lo bcu gnyis pa'i bu mo ni/ /tshul khrims ma nyams chags chung bas/ /thos dang ldan zhing grags chen mo/ /nad med snying rje dang ldan pa/ /sems can don la gcig nan tan//dgod cing pad+ma'i spyan dang ldan/ /zla ba'i cha 'dra gdong mdzes ma/ /mu cor mi smra brtan zhing dul/ /shes rab pad+ma'i nang dbus su/ /dpag tshad bye ba'i dkyil 'khor la/ /sum brtsegs dag pa'i bdag nyid lus/ /'khor ba'i 'jigs pa las skyob pa/ /dkyil 'khor de yi dbus gnas pa//mkhas pas slob ma bzang dbang bskur/ /gal te byang chub bla med 'dod/ /phyi yi dkyil 'khor bya ba min/ /lha rnams bshig pa tsam gyis ni/ /sdig pa chen po skye bar 'gyur/ /de nas rdul tshon tsam gyis ni/ /de bzhin lha rnams dag mi 'gyur/ /rdo rje 'khor lo rin chen dang //de bzhin pad+ma ral gri nyid/ /byas nas slar yang 'chad byed pa/ /skyes bu tha shal dmyal bar 'gro/ /gang gis sangs rgyas spyan 'dren zhing / /gang gis gshegs su gsol ba yin/ /rdo rje sems dpa' byon pa dang / /de bzhin gshegs pa byon pa rnams/ /gang na'ang bzhugs pa ma yin te//dri ma med cing dag pa'i lus/ /gang gis spyan drangs gshegs su gsol/ /de nyid kyis na brtag med na/ /de bzhin gshegs pa rnams phyag bya/ /mdzes pa'i phyag rgya byin brlabs nas/ /slob ma bzang ldan de la gtad/ /gang gis shes rab ma mnyes pa//sangs rgyas thams cad kyis ni mchod/ /'di nyid la ni sangs rgyas bzhugs/ /gzhan gang dngos grub gtso bo dang / /snying rje ldan pa gzhan gang zhig /mkha' 'gro ma kun de la bzhugs/ /gsang ba phyi yi lnga dang ni/ /bdun dang bcu bzhir bshad pa dang / / gnyis ka gcig tu 'dus pa'o/ /gsang ba'i de nyid bshad par bya/ /de 'og slob ma stan bzang la/ /thabs dang shes rab snyoms 'jug pas/ /dga' ba la sogs bskyed byas nas/ /rnal 'byor dam pa mtshon par bya/ /gang du dbang po 'gags gyur pa/ /bdag rtog rang bzhin nyams pa ste//kye de lhan cig skyes gyur pa/ /bla ma'i zhal sngar gsal bar zhus/ /lhan cig skyes pa rtogs gyur pa/ /gsang ba'i de nyid bshad par bya/ /gang zhig 'char dus dbang po dang / /yul mnyam nub gyur de la phyag 'tshal lo/ /mkhas pa rnams kyis snying sbas su sad pa//phyis ni mngon dga' rgyal ba'i mdzes sku gcig /rmongs pa gang zhig dbang med par/ /bdag ni dbang bskur zhes smra ba/ /ji srid sangs rgyas bzhugs kyi bar/ /slob mar bcas te dmyal bar 'gro/ /slob ma legs par ldan pa dang / /brtse ldan sems gzhan med pa yi//gser ni 'bum phrag bcu drug dang / /sa gzhi yul 'khor ldan pa dang / /glang po bud med dam pa dang / /ral gri 'khor lo rta dang ni/ /yongs 'dren skyes bu rin chen rnams/ /sbyor dang ldan pa'i sems kyis ni/ /de ni bla mar dbul bar bya/ /der ni rgyan rnams thams cad dang //lhab lhub rgyan rnams dbul bar bya/ /dad pa brtan pa'i sems kyis ni/ /de nas bdud rtsi dbul bar bya/ /sna tshogs zas dang sna tshogs btung / /de yi mdun du dbul bar bya/ /mtshams med lnga ni byed pa dang / /rmongs gang ma rungs las byed dang //skye ba dman gyur 'gro ba rnams/ /rdul tshogs mthong bas grol bar 'gyur/ /dkyil 'khor dag tu mngon zhugs pas/ /gtsang ma'i gnas su skye bar 'gyur/ /shin tu sbyor ba'i sems kyis ni/ /skye 'dir dngos grub ma thob kyang / /skye gzhan srid par dngos grub 'gyur//dbang bskur yang dag sbyin ldan na/ /skye dang skye bar dngos grub 'gyur/ /de yi skye ba bdun la ni/ /ma bsgrubs par yang dngos grub thob/ /gang yang bsgom pa dang ldan zhing / /gal te dam tshig sdom la gnas/ /skye 'dir las dbang gang ma grub/ /re zhig dam tshig nyams pa la//dngos grub thob pa lta zhog gi /mi yi skye ba'ang rnyed par dka'/ /gang yang bla ma brgyud pa yi/ /rim 'ong de nyid rig pa yi/ /sgrub pa po yis 'grub snyam dgongs/ /rdo rje dril 'dzin slob ma'i mgor/ /bla mas gdugs phub bkra shis brjod/ /lan gsum dkyil 'khor bskor byas te//shar nas phyag byas sa la ni/ /bde gshegs rnal 'byor ma tshogs la/ /bza' btung la sogs dga' ba yi/ /rol pa phul la smon lam gdab/ /de nas ci bder gshegs su gsol/ /tshon rtsi la sogs dngos po kun/ /tho rangs dus su bsdu byas la//gser sogs bum pa'i nang du ni/ /bcug nas chu bo chen por dor/ /bum pa thams cad bsdus nas kyang / /chu bo che la bkru bar bya/ /de nas bdud rtsi lnga sogs dang / /sbyar ba'i sa ni byug par bya/ /de nas zhi ba'i sbyin sreg ni/ /me yi phrin las tshul bzhin du/ /bdag dang slob ma'i tshogs rnams la//sdig pa zhi ba'i sbyin sreg bya/ /rigs mthun mdza' sdug bcas pa rnams/ /snod ldan skye bo 'dus pa kun/ /bkra shis glu dang rdo rje dril/ /mkha' 'gro mnyes phyir rol par bya/ /sangs rgyas thod pa'i rgyud 'di ru/ /bum pa'i dbang ni gsal mod kyang / / gsang ba mdzod sogs rjes 'brangs nas/ /dkyil 'khor cho ga bdag gis byas/ /dge ba 'di yis 'gro ba rnams/ /sgrib pa'i tshogs dag spang byas nas/ /ye shes ldan pa'i sa gnas su/ /mi ldog par ni 'gro bar shog /dpal sangs rgyas thod pa'i dkyil 'khor gyi cho ga'i rim pa gsal ba zhes bya ba dngos grub kyi mchog brnyes pa'i slob dpon sa ra ha'i zhal snga nas mdzad pa rdzogs so/