CLOSE WINDOW

D1653
བོད་ཡིག

@##/ /rgya gar skad du/ bud+d+ha ka pA la tan+t+ra tata twa pany+tsi kA tsan+d+ri ka nA ma/ bod skad du/ sangs rgyas thod pa'i rgyud kyi dka' 'grel de kho na nyid kyi zla ba zhes bya ba/ sangs rgyas la phyag 'tshal lo/ /dngos po kun gyi rang bzhin te/ /lhan cig skyes pa'i rang bzhin dang //tshig dang bral ba sgra brnyan 'dra/ /rdo rje sems dpa' de la 'dud/ /shin tu zab pa'i rang bzhin can/ /sangs rgyas thod pa'i rgyud kyis ni/ /kun nas bsdus pa'i tshig rnams kyis/ /ji ltar dran pa rnam par bshad/ /'di skad bdag gis zhes bya ba la sogs pa la/bdag gis thos pa ni bdag gis 'di skad thos pa ste/ dkyil 'khor chen po 'dus pa'i dus su bcom ldan 'das kyis bshad pa phyag na rdo rjes thos pa la bya'o/ /dus ji tsam zhe na/ dus gcig tu ste/ dus zhes bya ba ni bsam gyis mi khyab pa'i dus te/gang gi dus na bdag gis yid bsam pa gzhan du yengs par ma gyur pas so zhes bya ba'i don to/ /dus zhes bya ba ni 'khor ba na rnam pa gsum yin te bde ba'i dus dang / sdug bsngal gyi dus dang / bsam du med pa'i dus so/ / de lus rab tu sdug bsngal bar mngon du gyur pa'i gnas skabs na gang cung zhig thos shing go ba de phyis ji bzhin pa de dran par 'gyur na ma yin pa de kho na ste yid sdug bsngal bar mngon du gyur pa'i phyir na'o/ /yid shin tu bde bar tshogs pa mngon du gyur pa'i gnas skabs de'i tshe yang zhes pa gzhan dag ji ltar dran par gyur pa yin te ma yin no//de'i phyir na de dag gnyis po'i gnas skabs dang / gang rnam par bral ba'i skad cig ma de ma thag pa'i gzhan pa de nyid la ji lta ba'i rtogs pa'i dran pa skye'o/ /de nyid dus gcig ces pa la bsam pa gnyis po dag med pa'i dus te/don gyi dngos po thams cad du 'gro ba'i sems dang / rnam par bral ba'i sdud pa po bdag gis bcom ldan 'das kyis gsungs pa gang yin pa de'i rang bzhin 'di skad du bdag smra'o zhes sdud par byed pa'i dgongs pa'o/ /'o na sems bsam pa thams cad dang rnam par bral ba'i dus gang zhig ce na/thos pa la sogs pa'i mtshan nyid yang dag par rig par gyur pa de ma 'ongs pa'i dus na dran pa skye ba'i gnas skabs su ji ltar 'gyur/ ji srid du dran pa zhes bya ba ni bsam pa'i chos yin pas bsam pa med pa'i dran pa skye bar srid pa ma yin no//de'i phyir na dus gcig na zhes pa bsam gyis mi khyab pa'i dus su ji ltar 'thad ce na/ 'di la brjod par bya ste bsam gyis mi khyab pa zhes bya ba ni 'jig rten pa'i las gzung bar bya bas dus gang zhig tu nges par rab tu gnas pa'i dngos po la yid 'du byed pa las ma gtogs pa'i gzhan tshig dang don rnams la bsam pa med pa yin no//de ltar dngos po'i don rnams nges pa gang yin pa la yid nan tan du gyur pa gang na/ dngos po'i don mang po rnams su gnas gang gi tshe yid der gnas par gyur pa de'i tshe dngos po gcig pur ji ltar gyur pa'i yang dag par rig cing dran pa skye ba ma yin no//de'i phyir na bsam gyis mi khyab pa'i dus ni nges pa'i dngos por nges par yongs su 'dzin pa'i dus kyi yid la gzung gi bsam gyis mi khyab pa don dam pa la dgongs pa ni ma yin te/gang de'i dus na ni gzung ba dang 'dzin pa la sogs par rig pa thams cad rab tu zhig pa dang / de la rang dang gzhan du yang dag par rig pa dang rab tu bral ba'i phyir na dran pa la sogs pa yang dag par 'byung bar gyur pa ji lta bu zhig de bzhin gshegs pa thams cad ces bya ba la sogs pa ni de bzhin gshegs pa thams cad kyi sku dang /gsung dang thugs kyi rang bzhin gyi yi ge laM gyi dkyil 'khor chen po'i dbus su zhes pa 'byung ba chen po'i dkyil 'khor gyi dbus su bcom ldan 'das bzhugs te/ 'di dag bshad pa yin no//de bzhin gshegs pa thams cad ces bya ba la sogs pa ni de dag dang lhan cig sdud pa po bdag gis mngon sum du thos pa de brjod par byas na/ de dag dang lhan cig pa'i dus su ci yang rung ba 'ga' zhig brjod pa na 'jig rten pa rnams bden pa dang yid ches pa yin no//des na de'i 'khor na de bzhin gshegs pa thams cad bzhugs pa dang de bzhin du mA ma kI la sogs pa'i rdo rje rnal 'byor ma rnams kyang bzhugs shing de bzhin du 'phags pa kun dga' bo la sogs pa de dag dkyil 'khor na bzhugs pa yin no/ / de la 'phags pa zhes bya ba sdig pa las 'phags pas na 'phags pa ste/ sdig pa mi dge ba rnams tshar bcad do zhes pa ji srid pa'o/ /de bzhin du byang chub sems dpa' 'jig rten dbang phyug la sogs pa byang chub sems dpa'i 'khor bye ba phrag brgyad cu dang thabs cig tu bzhugs pa na/de la sangs rgyas bcom ldan 'das kyis chos kyi de kho na nyid ces bya ba 'di skad du bshad pa de bdag gi sems rtse gcig pas rtogs par byas pa de dag nyid bdag gis brjod par bya'o zhes pa'o/ /byang chub sems dpa' zhes bya ba ni byang chub la gang gi sems sems dpa' de gang yin pa 'di ni byang chub sems dpa'o zhes bya'o//de nas bcom ldan 'das kyis gzhan yang chos kyi de kho na nyid dus ji tsam zhig tu bka' stsal pa de brjod pa/ de nas zhes bya ba la sogs pa gsungs te/ de nas zhes bya ba ni de ma thag par ro//bcom ldan 'das ni 'bras bu'i rdo rje 'dzin pa chen po'o/ /rdo rje'i go 'phang chen pos shes par bya ba ni rol rtsed mdzad pa'o/ /bshad pas zhes bya ba ni de lta bur ro/ /gang lta bur zhe na/ btsun mo'i b+ha gar yongs su zhu bar gyur to zhes bya ba'i don 'di'o//de bzhin gshegs pa thams cad kyi sku dang / gsung dang / thugs rdo rje btsun mo'i b+ha gar mchog tu bde ba'i go 'phang la gnas pas na bcom ldan 'das der bzhugs pa zhes bya'o/ /b+ha ga la zhes bya ba ni nyon mongs pa'i bag chags thams cad yongs su 'joms pa'i gnas yin pas na'o//mchog tu dga' ba'i ro khong du chud par byed pa'i phyir na de bzhin gshegs pa rnams nyid btsun mo'i rang bzhin du gnas pa yin no/ /yul gyi bag chags kyis sems can rnams kyi sems yongs su nyon mongs par gnas pa dag rjes su gzung ba'i don du/gsang sngags kyi tshul 'di dag bcom ldan 'das kyis khyad par du yang bstan pa yin no/ /de'i phyir na btsun mo'i b+ha ga'i ngo bor rnam par 'phrul par mdzad pa ni/ 'dod chags chen po'i rjes su zhugs pa nyid kyis/ yul la chags pas bsreg pa'i sems can de rnams yang dag par gdon par bya ba'i phyir 'di nyid mchog tu bstan to zhes bya'o//de'i phyir na yul de rnams kyis mchog gi de kho na nyid kyi ye shes bskyed pa la/ byang chub sems dpa' rnams kyis 'jigs par mi bya ste/ de rnams la mos pa dang bral ba ni/dge ba ma yin pa'i phyir dang / de rnams de bzhin gshegs pa'i rang bzhin mchog tu rnam par dag pa nyid kyi phyir na'o/ /de'i phyir na gang gi yul rnams rang bzhin nyid kyis rjes su 'brel pa'i sems can rnams la de nyid kyi chos ston par/ bcom ldan 'das kyang thugs rje chen po rab tu 'jug go//yang na yul rnams nyid ni 'khor ba'i rgyu nyid yin no/ /de'i phyir na/ 'di rnams kyi de kho na nyid rang bzhin gyi ro yongs su shes na yang de yod pa'i shes pa'i phyir na/ de mya ngan las 'das pa'i yang rgyu yin no//de'i phyir na yang / de rnams rang bzhin ji lta bar nyams su myong bar byas na zhes so/ /de skad du yang / srid pa nyid ni yongs shes na/ /mya ngan las 'das zhes byar brjod/ /ces so/ /gang dang gang nyid bcings par byung ba/ de dang de yang bde ba chen por 'byung ba ste/dper na me yis tshig pa la me la bsros pa nyid sman gyi mchog yin gyi gzhan ni ma yin no/ /de bzhin du yul rnams la brten pas tshig pa'i sems can 'di rnams kyang yul rnams la/ ro myong ba bor nas byang chub chen po la rab tu gnas par nus pa ma yin no//de nyid kyis na btsun mo'i b+ha ga la mchog tu mya ngan las 'das par gyur/ bcom ldan 'das chos ston par mdzad pa yin no/ /de bzhin gshegs pa thams cad kyi gtso bo la zhes bya ba ni de bzhin gshegs pa thams cad pas bcom ldan 'das la blta ba ste/gang zhig bdun pa yin pa de bzhin na yang drug pa nyid du blta ba yin te/ drug pa dang bdun pa dag pa ni gnas skabs 'gar dbyer med pa yin pas so/ /yongs su zhu ba'i rgyu gsungs pa/ rdo rje dang pad+ma zhes bya ba la sogs pa ste/rdo rje dang pad+ma mnyam par sbyar bas btsun mo'i b+ha ga der bcom ldan 'das zhu nas bzhugs pa yin no/ /zhu ba zhes bya ba ni bde ba chen po'i gnas skabs su gnas pa tsam mo/ /de lta bur bcom ldan 'das bde ba chen po'i ngo bor snyoms par zhugs par yongs su snang ba na byang chub sems dpa' la sogs pa rnams ngo mtshar rmad du gyur pa yin par blta'o//nga mya ngan las 'das pa mthong ste zhes bya ba la sogs pa ni byang chub sems dpa' la sogs pa rnams dam pa skyes par gyur na ni de kho na nyid kyi mchog rab tu gsal bar rab tu 'byed par mdzad pas so//gcig la gcig bgros pa zhes bya ba ni bcom ldan 'das 'di mchog gi chos ci 'dra ba zhig ston zhig gu zhes pa'o/ /de nas de ltar byang chub sems dpa' la sogs pa rnams ngo mtshar gyi rnam par gyur par snang ba na phyag na rdo rje chos nyid rab tu gsal bar bya ba'i don du bcom ldan 'das yul rnal 'byor ma ri mo can gyi sde la zhus pa'i tshig lha mo zhes bya ba la sogs pa gsungs te/sems can rnams bsgral bar bya ba'i phyir/ shin tu mchog tu gyur pa'i thabs gzhan 'ga' zhig yod de/de bas na bcom ldan 'das de lta bu'i ting nge 'dzin la snyoms par zhugs nas gnas so/ /thabs gzhan pa gang gis sems can bsod nams dman pa rnams kyang mthu dang dngos grub thob par 'gyur te/ de'i don du de lta bu 'di bcom ldan 'das kyi khyad par can gyi rgyud gzhan dag dang /gzhan na'ang 'chad par mdzad pa yin no/ /'o na rnal 'byor pa'i rgyud rnams dang / rnal 'byor ma'i rgyud rnams dang / pha rol tu phyin pa'i tshul rnams ci bcom ldan 'das kyis ma bstan nam/ 'di dag gi de kho na nyid yongs su shes pa las sems can rnams dngos grub dang /rdzu 'phrul thob par mi 'gyur zhing / gang yang gzhan las khyad par du 'di sems can rnams kyi dngos grub chen por 'gyur bar ston cing 'chad ce na/ 'di la gsungs pa rnal 'byor ma'i rgyud nyid bye ba phrag drug dang zhes bya ba la sogs pa ste/'di'i don ni gang yang bcom ldan 'das kyis rnal 'byor pha'i rgyud la sogs pa mang po gzhan dag bstan pa der yang dngos grub dang rdzu 'phrul rnams bstan cing brjod pa nyid do/ /gzhan yang gang de rnams kyi sngags rnams gsungs pa gang yin pa dag kyang dngos grub rnams stsol ba yin no//de ltar bshad mod kyi yang bshad pa'i de kho na nyid las khyad par nyid ni de rnams su ji srid pa'i sngags rnams gsungs pa las/ de rnams kha cig tu ni 'bum bzlas pas so/ /kha cig tu ni bye ba bzlas pas so//la lar ni 'bum phrag lnga dang bcu bzlas pas dngos grub kyi char 'gyur ro zhes pa ste/ des rgyud gzhan pa de rnams su sems can rnams nyon mongs par 'gyur ba yin la/ yang 'dir ni de kho na nyid rab tu gsal ba 'di bklags pa tsam gyis dngos grub tu 'gyur ba yin na ni/gang gis 'dir sngags rnams thams cad bklags pas 'grub par 'gyur ro zhes pa de'i dgongs pa ni 'di lta ste/ rgyud kyi yang dang por ni sngags rnams gtso bo yin te dngos grub dang nus mthu rnams su byed pa ni/ sngags rnams kyi yin pa'i phyir na'o//de'i phyir sngags rnams dngos grub myur du ster ba yin pa'i phyir na/ rgyud gzhan pa de rnams kyang mchog tu blang bar bya ba yin no/ /de nyid kyang rgyud kha cig las ni zhes bya ba la sogs pas ston to/ /de nyid ni bye bar bzlas pa zhes bya ba la sogs pa rgyu yin pas ston par gsungs so//sems can bsod nams dman pa zhes bya ba la sogs pa la bsod nams dman pas ni bye bar bzlas so zhes bya bar nye bar gnas so/ /brtson 'grus chung ba rnams la ni 'bum du bzlas so/ / bsod nams kyi snod can bsgom pa la 'bad pa la ni khri phrag gcig gis so/ /da ni 'di rgyud gzhan rnams las ji lta ba bzhin du khyad par du gyur pa de nyid rab tu gsal bar bya ba'i phyir/ sems can 'dod chags kyis bcings pa zhes bya ba la sogs pa gsungs te/ sems can 'dod chags kyis bcings pa rnams kyi sems ni sngags zlos par byed par nus pa ma yin te/ shin tu 'dod chags la mngon du phyogs pa'i phyir ro/ /de bzhin du sems can 'on pa dang / lkugs pa'i rigs rnams kyi bzlas pa byed pa'i nus pa med pa nyid de/de rnams la yi ge gsal por brjod pa dang / grangs nges par gzhag pa med pa'i phyir na'o/ /sngags brjod lugs ni shin tu myur ba ma yin/ shin tu dal ba ma yin/ shin tu thung ba ma yin/ shin tu ring ba yang ma yin par sngags bzlas pa cung zhig thos tsam du brjod par gsungs so//de bzhin du shin tu yang sems thim par gyur na/ yid kyis kyang sngags kyi bzlas pa bya ba ma yin no/ /de ltar na yang ji ltar phan tshun 'dus shing tshogs pa ni zlos pa dang / de bzhin du yang sems skyo zhing zhum pas der bzlas pas ni bskal pa bye ba brgyar bzlas pa bye ba phrag brgya byas kyang 'grub par 'gyur ba ma yin te/gus pa'i sems dang / rtse gcig pa'i sems med pa'i phyir na'o/ /de'i phyir na rgyud gang rnams su bye bar bzlas pa la sogs pas 'grub par gsungs pa de rnams su de rnams 'grub par ji ltar 'gyur/'on pa la sogs pa rgyud 'dir ni sngags lan cig bzlas pa tsam gyis kyang dngos grub tu 'gyur ba'o/ /des na gang yang 'dod chags kyis shin tu bcings pa dag sngags mang du bzlas pa la mngon par spro ba med pa rnams kyang 'grub par 'gyur ba yang de bzhin du sngags gsal por brjod pa la sogs pa 'dir ni rgyu yin pa las 'dis ni lkugs pa la sogs pa yang dngos grub kyi snod du 'gyur ba dang /sngags rnams med kyang sgom pa dang rab tu sbyor ba tsam las kyang 'dir dngos grub kyi snod du phun sum tshogs par 'gyur ba dang /nus pa med pa dang / 'dod pa med pa de rnams kyis kyang sngags bzlas na thams cad 'grub bo/ /gzhan yang dman pa'i sems dang ldan pa la sogs pa yang 'dir dngos grub kyi rgyu'i dngos po yin no/ /des na sems can gyi phung po thams cad yang dag par bsdu ba'i phyir/rgyud gzhan rnams las sangs rgyas thod pa'i rgyud 'di phul du byung ba yin no/ /'o na ni bcom ldan 'das kyis rgyud gzhan dang gzhan rnams yang dag par gsungs pa ma yin te/ ji srid du rgyud 'dir sems can thams cad mchog tu yang dag par bsdus nas dngos grub myur bar 'grub par brjod pa de'i phyir na/rgyud gzhan pa rnams yang dag pa ma yin par rab tu gsal bar 'gyur ro zhe na/ de ni ma yin te/ rgyud de rnams yang dag pa ma yin par gnas pa ni ma yin te/ de 'dra ba'i de kho na nyid rnams bstan pa ni snod du gyur pa'i sems can rnams la rgyud de rnams bstan pa'i phyir ro//gang zhig sangs rgyas thod pa'i rgyud kyi mtshan nyid bstan pa'i snod kyi sems can de rnams la yang 'di nyid bstan pa'i phyir te/ sems can de dag thams cad ni bstan pa thams cad kyi snod du skye ba ma yin pas dman pa dang /'bring dang mchog gi rim pas sems bye brag las lhag pa'i bsod nams dang bsod nams med pa'i khyad par las so/ /phyag na rdo rje'i tshig de dag nyid thos nas rnal 'byor ma ri mo can gyi sde bdag nyid sngags kyi don de nyid nyams su myong bar 'dod nas bcom ldan 'das kyi zhal du reg pa dang bcas pas lta zhing bzhugs pa de nyid ston pa de skad du thos nas rnal 'byor ma ri mo can gyi sdes zhes bya ba la sogs pa gsungs pa la/chags pa'i lta ba ni bcom ldan 'das la rjes su chags pas mchod pa mdzad pa yin no//mchod pa de byas nas ji ltar re ba'i don 'grub par 'dod pa'o/ /'jigs ma shin tu gshe bas zhes bya ba ni de lta bu'i chos mchog gi dngos grub stsol ba'i sngags la sogs pa'i de kho na nyid de bcom ldan 'das kyis gsal por ma mdzad pa la gshe ba ste/bcom ldan 'das yum de sems can gyi don nyid la gshe ba phun sum tshogs pa'o/ /de yang 'khor ba'i sdug bsngal las yongs su bsgral ba'i phyir mchog gi sngags la sogs pa'i de kho na nyid bstan pas sems can 'di dag myur du dngos grub thob par nus par 'gyur bar bya ba la'o//'o na ni bcom ldan 'das yum de nyid rang gis ci de lta bu'i de kho na nyid mi mkhyen nam/ gang gis ni bcom ldan 'das la zhu ba mdzad pa yin zhe na/ de la brjod par bya ste/ gang gi yang dam pa'i don ni mkhyen pa ma yin pa de lta mod kyang sems can rnams rjes su gzung bar bya ba'i rgyus de lta bu'i de kho na nyid bstan pa'i don gyi spyod pa mdzad pa yin no//de lta bu'i dam tshig gi dam pa rnams kyis rang bzhin dang lhan cig tu ston par 'gyur ba ni shin tu'ang tshad ma yin par 'gro'o//de lta bu'i dam tshig nyid ni bcom ldan 'das kyis rtogs pa'i dgongs par dbu'i thod pa las sngags 'byung ba yin no/ /des de las gzigs pa tsam gyis zhes bya ba la sogs pas sngags bstan te/ oM bud+d+he/ sid+d+he zhes bya ba la sogs pa ste/sngags de nyid kyi nus mthu skad cig tsam gyis gsal bar byed pa'o/ /de lta bu'i sngags kyi mchog song bas zhes bya ba la sogs pa ni de lta bur byung ba tsam gyis sngags kyi mchog de nyid kyis sa'i 'og rim pa bdun na gnas pa'i klu thams cad phye mar byas nas slar 'ongs te/bcom ldan 'das ri mo can gyi sde'i zhal nas zhugs nas pad+ma'i nang nas byung ste/ slar yang bcom ldan 'das nyid kyi dbu'i thod par zhugs so/ /de lta bu'i rim pa 'di ni rnal 'byor pas kyang sngags 'don pa'i dus su yang bya ba yin par blta bar bya ste/ rang gi kho nas zhugs nas rdo rje'i lam nas 'byung bar 'gyur ba'i sngags bzlas pa'o//'o na yang 'di lta bu zhig yin/ gang yang sngags 'di ri mo can gyi sde'i zhal nas zhugs nas pad+mar byung ste zhes bya ba ji srid pa 'di lta bur sus yang dag par rig par ji ltar 'gyur ba dang / gang zhig zhal du zhugs nas rna ba'i nang du nges par 'gro ba zhes bya ba ni gang gi phyir sngags de srid pa ni sgra'i bdag nyid yin la/sgra de srid pa ni rna bas mnyan par bya ba yin pa gang gi tshe/ rna ba'i spyod yul du sgra de dag ma skyes te/ 'di ltar thams cad kyi bdag nyid khar rab tu zhugs pa'i phyir ro//de'i tshe ji ltar na bdag gi khar rab tu zhugs pa de rna ba gsal na ni dbang po gzhan gyis 'dzin pas dbang po'i gzung ba'i dbye ba med par 'gyur te/ gang gis na rna bas gzung bar bya ba'i sngags ro ldan gyi dbang pos gzung bar bya bar 'gyur la/de lta na ni sngon po la sogs pa yang rna bas gzung bar bya bar gnas so/ /de lta na ni dbang po'i dbye ba'i tshogs don med par 'gyur ba yin te/ dbang po gcig gis sna tshogs pa kun rtogs pa'i phyir ro/ /'di mi rtogs pa de lta na ni de bzhin du rtogs pa min no zhes bya bar rigs kyi thams cad rna bar rtogs na ni ha cang thal bar 'gyur ro//des na rna bas rtogs par byas te phyis khar zhugs nas pad+ma'i nang du byung ngo zhes bya ba la ni sun dbyung bar bya ba med do zhes pa de dag kyang bzang po ma yin la/ gang gi tshe de srid pa'i sngags kyi bdag nyid rna ba'i spyod yul du gyur pa de'i tshe sngags de nyid mchog tu rtogs par rigs na ji ltar na khyad par du zhugs te zhes bya ba la sogs par rtogs pa de'i tshe mi rigs te rna ba tsam la mngon du gnas pa'i phyir ro//gang gi tshe kha la sogs par zhugs pa yin pa de'i tshe rna bas gzung bar bya ba ma yin pa'i phyir de ji ltar de bzhin par rtogs/de nas yang rna bas gzung bar bya ba ma yin na'ang yid kyis sngags kyi bdag nyid rang rig pa yin par gyur pa yin te/ yid kyi spyod yul du ma gyur pa 'ga' yang ma yin pa'i phyir ro zhes zer na 'di yang ma grub ste/bde ba dang sdug bsngal la sogs pa'i rang bzhin nyid ni yid kyis yang dag par rig par byed pa'i phyir ro/ /sngags 'di dag ni rna ba'i dbang pos gzung bar bya ba yin na yid kyis ji ltar rtogs par byed pa yin te/ de rtogs na ni sngon po la sogs pa yang dbang po gzhan gyis gzung bar bya ba yin par 'gyur bas de rna ba'i gzung bar bya bar yang 'gyur ro//de ltar gyur pa yin na 'on pa la sogs pas kyang sgra la sogs pa rnams 'dzin par thal bar 'gyur te/ de dag la yang yid yod pa'i phyir ro//de ltar yin na ni 'on pa dang long ba la sogs pa mi srid par gnas par 'gyur ro/ /de lta na ni 'ga' zhig tu yang sngags rnams rna bas rab tu rtogs shing khong du chud pa ma yin te/ yid kyis gzung ba'i phyir na'o/ /yang na yul gyi dngos po gcig la dbang po gnyis kyis 'dzin par 'gyur ba mi srid de/sngon po la sogs pa yang rna ba'i gzung bar bya bar thal bar 'gyur ba'i phyir ro/ /de ltar yin na yang skyon du mi 'gyur te/ dbang po gnyis kyis yul gyi dngos po gcig la 'dzin par yang 'ga' zhig tu mi 'gal te/ji ltar me'i dngos po la mig gi dbang pos 'dzin pa dang / lus kyi reg par byed pa nyid do/ /de lta bu yang yid dga' bar byed pa ma yin te/ de la 'dir me'i sreg par byed pa'i rdul phra rab kyang gzhan yin la blta bar bya ba'i rdul phra rab kyang gzhan yin pa de ltar gnas so//de lta bu'i me'i dngos po la 'dir blta bar bya ba dang / reg par bya ba dag gcig par spyod cing dngos po'i don gcig tu bsdus par blta ba ni 'khrul pa kho na'o zhe na/ de la 'dir brjod par bya ste yid kyi shes pa 'di nyid kyis sngags rnams rtogs pa yin pa la ni 'dir skyon 'ga' zhig kyang yin na ma yin te/'khor ba pa'i sems can thun mong pa'i yid la skyon yod pa de ltar bcom ldan 'das yul gyi thugs gang yin pas snyan gyi dngos pos gzung bar bya ba'i sngags de 'dzin par mi nus pa ma yin gyi thun mong ba rnams kyi yid gang yin pa de ni dbang po'i dbye ba so so ba rnam par rtogs pa ma yin pa ltar/khyad par can rnams kyi yang de ltar 'gyur ba ma yin te/ de'i spyod yul thams cad yin pa'i phyir na'o/ /yang brgal ba 'di ltar sems te rang yang dag par rig pa'i mtshan nyid las ma rtogs pa'i yid gzhan pa'i rang bzhin ni 'ga' yang ma mthong ste/de 'di ltar so so yang dag par rig pa'i bdag nyid tsam gyi rang bzhin yin pa'i phyir na yid kyi khyad par 'ga' zhig kyang ma mthong ngo zhe na/ de ni ma yin te 'dir skyes bu tsam du gcig kyang thams cad kha dog ser po zhes rtogs pa ma yin te/de lta yin par gyur na ni skyes bu tsam gyis thams cad kha dog ser por grub par thal bar 'gyur ro/ /'dir yang skyes bu tsam du gcig par khyad par 'ga' yang mi dmigs na/ de ltar ji ltar gzugs kyi khyad par 'grub pa 'di ltar mthong ste/kha dog gi yid ni bstan bcos thams cad phyin ci ma log par shes pa can yin la/ kha cig gi ni de lta ma yin pa de bzhin du bcom ldan 'das kyi thugs ni ji ltar de kho na nyid thams cad mkhyen pa'i rang bzhin yin pa de ji ltar na tha mal pa'i gnas skabs su ji ltar gnas pa yin te/de la yang de'i yid ces bya ba'i sgra ni tshig mthun pa tsam mo/ /gzhan yang dbang po so so'i dbye bas yul rnams la yang ste/ srog chags kyi dbye bas dbang po'i dbye ba gzhan gyis gzung bar bya ba gzhan pa las blta ba nyid de ji ltar gdengs ka can rnams mig gis nyan pa bzhin no//de'i phyir na thams cad du mthun pa tsam gyis thun mong bar dmigs par mi blta ste/ yul dang dus dang rkyen gyi bye brag gis thams cad la khyad par yod pa'i phyir ro/ /'o na yid 'di'i khyad par ci lta bu zhig na ci lha rnams kyi khyad par gyis de bzhin du 'di'i rang bzhin nyid dam/'on te gzhan rgyu las byung ba zhig gam ci zhig yin/ gal te gang gi tshe 'di rang bzhin nyid yin pa de srid ni yid kyi rang bzhin gyis gzugs yin pa de'i tshe ni thams cad kyi yang de bzhin du rang bzhin gyis khyad par gyi mngon du gnas pa'i phyir ni/yid kyi rang bzhin yin pa des na de bzhin du khyad par 'ga' yang med pa yin te/ srog chags thams cad kyi yang der mtshungs pa nyid kyi phyir ro/ /de nas yang rgyu las byung ba'i khyad par yod pa de lta na yang khyad par 'ga' yang med pa yin te/gzhan la yang rgyu dang rkyen gyi byed pa dang ldan pa'i phyir ro/ /de la rgyu yod na yang rgyu'i khyad par gyi rang bzhin ni srog chags thams cad kyis ma rtogs pa des na srog chags thams cad kyi yid khyad par can du grub pa ma yin no//'o na rgyu de kun la yod pa la rang gi ye shes skye ba'i sbyor ba ma rtogs pa gang la yang med par 'gyur la/ de ltar gyur pa yin na ni ci yod/ de'i khyad par du byed pa'i rgyu ci yis rtogs par byed/ gang gis lta ba'i khyad par de rab tu rtogs pa ni yid khyad par can du grub po zhes bya ba yang ji lta bu rang gis rang rtogs so zhes bya ba de lta bu yang med de/yod na ni de bzhin du gzhan rnams kyang de ltar rab tu rtogs par 'gyur ba'i phyir ro/ /gzhan man ngag brgyud cing brgyud pa gzhan las kyang ma yin te/ de yang ji lta ba zhe na/ rang gis rang rab tu rtogs pa ni med de yod na ni skyon brjod zin to/ /de la brgyud cing brgyud pa las rtogs par 'gyur na yang thug pa med pa'i skyon du 'gyur ro/ /de'i phyir na bcom ldan 'das kyis yid khyad par 'phags par grub pa ji ltar yin pa dang /rgyu gzhan gyis byed pa yid khyad par can du byas pa yin na/ yid bzhin du de thams cad du brtan pa ma yin par 'gyur te/ rgyu las byung ba'i bum pa la sogs pa bzhin du brtan pa'i rang bzhin ma yin par 'gyur ba'i phyir ro/ /de'i phyir na yid khyad par can du brtan pa ma yin te res 'ga' ba nyid kyi phyir ro//de'i phyir na yid khyad par can du rab tu grub pa'i dgos pa de ni 'ga' zhig tu yang grub pa ma yin no zhe na/ de la brjod par bya ste yid khyad par can 'di nyid ni rang bzhin yang yin la/ de bzhin du gzhan 'di rgyu yang yin pa 'di la gnod pa 'ga' yang med de/rgyu ni mngon par gsal bar byed pa'i rkyen tsam yin pa'i phyir dang / de bzhin du dngos po'i rang bzhin nyid kun du snang bar gnas pa'i yid nyid yin te/ 'on kyang rang rang gi bag chags kyi dri mas g.yogs pas de bzhin par snang ba yin pas des na thams cad kyi yid don gyi dngos po thams cad rab tu gsal bar 'gyur ba ma yin te/dper na ling tog gi skyon dang ldan pa'i skye ba can la me long shin tu gsal ba yin yang g.yogs pa ltar 'gyur ba yin no/ /des na rgyu yang de lta bu'i dngos po'i phyir na/de la sgrib pa'i skyon rnams sel bar byed pa nyid ma yin pas na/ de khyad par can gyi rang bzhin du skye ba ma yin la/ rgyu de'i khyad par can ni glo bur ba'i dri ma'i skyon rnams sel bar byed pa'i mtshan nyid tsam yin la/de yang kun gyis khong du chud pa ni ma yin te/ dper na yod pa yin yang mi mthong ba nyid ni khron pa zab mo'i nang na yod pa'i rdzas kun gyis mthong zhing rtogs pa ma yin pa bzhin no/ /de lta bu'i rgyu de yang bla ma brgyud cing brgyud par khong du chud par byed pa la thug pa med pa'i skyon yang 'byung ba ma yin te/thug pa med pa'i dngos po de lta bu'i skyon gyis gnod pa med de 'khor ba la thog ma med pa yin pa'i phyir ro/ /de lta bu'i phyir na ci yang de ltar min na kun kyang mi 'grub ste ji srid du 'bras dkar po'i myu gu 'di yang ji ltar skye bar 'gyur zhig na rang gi sa bon las so zhe na/de'i sa bon yang ci zhig ce na/ rang gi sa bon las so zhes bya ba yin no/ /'o na thams cad thug pa med par 'gyur ba ji ltar min te yin no/ /'o na bag chags de yang gang las skye ba zhig yin/ gang ji srid pa'i sems 'di thams cad du gsal ba'i rang bzhin yin na yang kun nas sgribs pa gang gis na tha mal pa'i sems can du gnas pa'i yid 'di lha'i dngos po ji bzhin pa ma yin na de la gang gi tshe ji srid du sems las ma gtogs pa'i logs shig pa'i rgyu las de skye ba yin na/de'i tshe de sems las ma gtogs pa'i rgyu gzhan zhig las kyang rgyu gzhan zhig yod dgos pa des na chos nyid gnyis su med par mi 'grub la/ des na yang bag chags de nyid sems nyid las skye ba yin na yang de'i tshe bag chags rnams 'ga' zhig tu yang gsal bar mi phrel bar 'gyur te/sems de dus thams cad du yod pa'i phyir na'o/ /de yang ci ste zhe na/ mi skye mi srid pa ste byed pa nus pa can rnams yod bzhin du yang bya ba rnams skye bar 'gyur ba med na ni thams cad du bya ba dang 'bras bu kun skye ba med par thal bar 'gyur ro//de'i phyir na bag chags rnams dus thams cad du skye bar 'gyur ba nyid dam yang na dus thams cad du gdod nas mi skye bar gnas par 'gyur ro zhe na/ de la bag chags skye ba gtan du med na ni de dus thams cad du skye ba med pa yin pas 'ga' zhig tu yang sems la dri mas ji ltar bsgos te rgod pa'i rgyu med pa des na yid khyad par can zhes bya ba dang /khyad par can ma yin pa zhes bya ba 'ga' yang med par 'gyur ba gang gis na mya ngan las 'das pa dang / 'khor ba zhes bye ba dang / grol ba dang mi grol ba'i sems kyi gnas skabs kun la 'jug par ji ltar 'thad/de nas yang bag chags dus thams cad du rgyu ba can yin na yang de'i tshe tha mal pa'i sems can dang 'di las gzhan pa'i khyad par du mi 'grub pa gang gis na bcings pa dang grol ba'i gnas skabs dang gzhag pa med par 'gyur ro zhe na/gang yang ye shes nyid las bag chags rnams skye ba yang 'on kyang 'khor ba la 'chel te zhen par gnas pas de las byung ba tsam gyis dus thams cad du yod par 'gyur ba'am/ med par 'gyur ba zhes bya ba'i skyon med de/ de ji srid du 'khor ba'i rjes su 'jug par gnas pa'i sems de srid nyid du ni de'i rgyun du 'byung ba'i phyir ro//de lta bu'i sems de ni 'khor ba'i ngo bor rtogs par bya bar gnas te phyin ci log gi ngo bor rab tu bsal ba'i phyir na de lta bu'i bag chags kyi bdag nyid yin no/ /des na thams cad nas thams cad du yid thun mong ba'i skyon med do//thams cad kyi yid 'khor ba las 'chel pas dus thams cad du gnas pa ma yin pa de srid du 'khor ba dang mya ngan las 'das pa'i lugs dag yod pa las kyang mod/ de mi 'dod kyang khas blang bar bya'o/ /gzhan du na ni dus thams cad nas mya ngan las 'das pa 'ba' zhig tu gnas pa'am/yang na srid pa nyid 'ba' zhig tu gnas par 'gyur ro/ /de'i phyir na 'khor ba de srid par du thams cad du yod pa nyid de de yang bag chags kyi bdag nyid can gyi sems kyi rang bzhin nyid do/ /de'i phyir na bag chags kyi bdag nyid can gyi yid 'khor ba'i rjes su mthun pa'i rang bzhin byed pa ste/de ni yid de nyid kyi rnam pa'i dngos por rtogs par bya ba la/ 'khor ba de yang thog ma med pa'i phyir na sngon du bsags pa'i lus kyi bag chags kyi stobs las mig 'phrul mkhan gyis sprul pa'i dngos po'i rnam pa bzhin du bag chags dang yongs su ldan pa'i yid gang gis 'dzin pa ni 'khor bar 'gyur ba yin la/mig 'phrul mkhan gyis sprul pa dang 'dra bar byung ba'i 'khor ba yang bsam gyis mi khyab pa yin no/ /des na 'khor bar kun du 'jug cing chags pas 'khor ba yin par khas blang ba lta los kyang mod de/bag chags kyi rang bzhin can gyi yid kun du skye ba gang yin pa de nyid ni 'khor ba zhes bya'o/ /de'i phyir na sngon gyi las kyis bskyed pa'i stobs kyis bcings pa'i yid kyis bag chags kyi rang bzhin du 'byung ba ni 'khor ba'i mtshan nyid du 'byung ba yin no//gang gi tshe 'khor ba'i gnas skabs la mchog tu mi byed na de'i tshe bag chags kyi rang bzhin 'gar yang gnas pa ma yin pas yid 'od gsal bar zhes bya ba dang / 'od gsal ma yin zhes bya ba yang med pas khyad par med par 'gyur ro//de'i phyir na mig 'phrul mkhan gyis sprul pa bzhin du 'khor ba lugs su 'byung bar khas blang bar bya'o/ /gzhan yang mig 'phrul mkhan gyis sprul pa mthong ba yin zhe na/ ji srid du dri ma med pa'i dbang po bden pa'i dngos po de srid pa de lta bu'i shes pas ni de byed pa ma yin te/de byed na ni dus thams cad du bden par gyur pa yang dag par shes pa skye ba mi srid pa'i phyir ro/ /de'i phyir ni de dag kyang brdzun tsam du 'byung bar ci las skye bar 'gyur snyam du sems so zhe na/de ni sngags dang sman gyi nus mthus dbang po'i yon tan dang bral bar byas pa las so zhe'o/ /'o na dus thams cad du de lta min pa ci ste zhe na/ de bzhin du yang rab tu sbyor ba de nyid kyang dus thams cad du med pa ci ste zhe na/ de ni de'i tshe las kyi rnam par smin pa med par gyur pas de bzhin no zhe'o/ / las kyi rnam par smin pa mi mthun pa de nyid kyang gang zhig las skye bar 'gyur zhe na/ 'khor bas bsgos pa'i yid de bzhin pa'i nus mthus sprul pa yin no zhe na/ yid de nyid de lta bu'i mthu can du mi 'dra bar gang gi phyir skye zhe na srid pa'i ngo bo nyid du gnas pa'i sems ni nus mthu rnam pa sna tshogs pa dang ldan pa yin par rjes su rtogs so zhes smra'o//'dis na de nyid srid pa'i rjes su 'jug pa'i yid dang ldan pas yid thogs pa med pa nas las kyi srid par rab tu 'jug pa'i phyir las mi 'dra ba rnams kyis sprul pa'i dngos por gnas pa ni bsam gyis mi khyab par skye ba 'di la gnod pa 'ga' yang med do//des na sems de nyid bag chags kyi sprul par skye ba la 'ga' yang yod pa ma yin no/ /de lta bu'i sngags kyis mthu zhes bya ba la sogs pas ni de lta bu'i sngags de ji skad du brjod pa de'i mthu las nor rgyas la sogs pa'i klu chen po rnams 'ongs nas ri mo can gyi sde la bka' nod cing lha mo ji ltar bgyi zhes so//de nas ri mo can gyi sdes de dag la bka' bsgo ba sangs rgyas dang rjes su mthun par byos shig ces so/ /de ltar sngags kyi mthu gsungs nas rgyud kyi don ji ltar yin pa'i glegs bam phyung ba gsungs pa/de skad thos pa tsam gyis zhes bya ba la sogs pa ste/ rnal 'byor ma'i bla na med pa zhes bya ba ni rnal 'byor ma'i rgyud bla na med pa ste/ gang gi phyir 'di las mchog med pa de bas na rgyud 'di dang mtshungs pa med de/rgyud 'di ni sangs rgyas thod pa zhes bya bar brjod de/ sangs rgyas bcom ldan 'das kyi dbu'i thod pa las sngags la sogs pa rnams bton pas na de'i bdag nyid kyi rgyud la yang de skad ces bya ste/ sangs rgyas dbu'i thod pa las byung ba'i rgyud ni bya ba dang /byed par nye bar spyod do/ /bya ba dang byed pa de lta bu ni sangs rgyas thod pa zhes bya bar brjod do/ /yang na sangs rgyas zhes bya ba'i sgra ni rdo rje'i rnam grangs so/ /thod pa zhes bya ba yang gru gsum gyi ngo bo la bya bas na/ shes rab dang thabs kyi bdag nyid kyi ni sangs rgyas thod pa zhes bya bar brjod do//de nyid kyis ni glegs bam la sogs pa rnams sems can rnams rjes su gzung bar bya ba'i phyir ri mo can gyi sdes phyag na rdo rje la gtad pa yin no/ /gsang ba mchog dang zhes bya ba ni rgyud las gsungs pa'i de kho na nyid gang yin pa ste de ni mchog tu gsang ba'i yang mchog tu gsang ba 'di nyid sems can thams cad kyi lus la bzhugs pa yin no//'o na de kho na nyid kyi mchog de nyid sems can thams cad kyi yang lus la gnas pa yin na sems can thams cad kyi bde ba dang sdug bsngal la sogs pa rnams kyang gcig gi dngos por rig par 'gyur te/de'i de kho na nyid de ni don dam pa'i rang bzhin gcig pa nyid kyi phyir dang / yang sems can thams cad 'khor bar bcings pa med par yang 'gyur te/ thams cad kyi de kho na nyid kyi rang bzhin ni gcig pa nyid tsam gyi phyir dang /yang 'khor ba zhes bya ba dang mya ngan las 'das pa zhes bya bar gzhag pa'i lugs kyang med par 'gyur na/ bcom ldan 'das kyis gsungs pa 'di ji ltar 'brel zhe na/ 'di la brjod par bya ste gang thams cad kyi don dam pa de kho na nyid ni rang bzhin gcig pa kho na ste/de ltar na yang 'khor ba'i bag chags kyis yongs su gzung ba'i phyir dang / thog ma med pa'i dus na sems can rnams kyi blo rang dang gzhan du dmigs pas gzung ba'i phyir na de lta bu de gsal bar ma gyur to/ / 'dis na ji srid du 'khor ba'i gnas skabs dag tu lta ba yod pa de srid de bzhin par gyur pa'i de kho na nyid ji ltar rtogs/ 'dis ni 'di mi shes pa'i rgyu 'di'i phyir na bdag dang gzhan du yang dag par rig pa'i yid ni 'khor ba'i bcings pa yin pas bde ba dang sdug bsngal la sogs pa gcig gi dngos por yin par mang po'i so sor rig par 'gyur ba yin te/thog ma med pa'i bag chags las yongs su gyur pa'i phyir ro/ /de yang dper na zla ba ni gcig nyid yin yang so so'i mig gi skyon gyis kha cig la rnam pa sna tshogs par 'gyur ba bzhin du/de rnams kyi yang dag par rig pa yang dngos po sna tshogs su skye ba dang / chu steng dang ba mang na ni zla ba gcig po'i gzugs brnyan yang mang por dmigs par 'gyur ba de bzhin du mi shes pa yang kun du snang bar gnas pa nyid kyi phyir na rnam par bcings pa yang brdzun tsam gyis kyang sdug bsngal grub pa yin te/dper na mkha'i 'o zil la thag pa la sbrul gyi dngos por gzung ba des 'jigs pa las shin tu sdug bsngal ba mngon du nyams su myong ba yin yang de yang dag par ni sdug bsngal de sbrul nyid kyis bskyed pa ma yin no//de'i phyir na brdzun tsam gyis kyang sdug bsngal 'byung bar 'gyur te/ gang gi tshe yang de 'dra ba'i bag chags las skye ba'i 'khor ba bcom na ni de'i tshe 'ga' zhig tu yang 'khor bar bcings pa'i sdug bsngal 'byung bar mi 'gyur bas bde ba dang sdug bsngal la sogs pa yang med par 'gyur te/bdag dang gzhan du so sor rig pa dag de'i tshe nub par gyur pa'i phyir na'o/ /nam mkha' lding dang char 'bab pa dang zhes bya ba la sogs pa rgya cher gsungs pas ni dngos grub gang yang rung ba de thams cad bskyed pa'o/ / de bzhin du he ru ka'i de kho na nyid chen po de nyid 'dir bsgrub par bya bar gsungs so/ /dpa' bo chen po he ru ka /zhes bya ba la sogs pa la/ skyed dang gnas pa'i rgyu dang ni/ /zhes bya ba ni bcom ldan 'das de nyid gcig pu ste/ dper na sbrul gcig kho na res 'ga' ni kyag kyog tu 'dug /res 'ga' ni drang por 'dug kyang 'di'i ngo bo nyid ni so sor dbye bas gnas pa ma yin no/ /de bzhin du bcom ldan 'das 'di yang gcig nyid yin na yang 'khor ba'i gzugs sna tshogs su snang bar blta'o/ /de bzhin du bcom ldan 'das de nyid dngos po dang dngos po med pa'i rang bzhin du rtogs par bya'o//'o na gang gi tshe bcom ldan 'das de nyid dngos po dang dngos po med pa gnyi ga'i rang bzhin yin na 'di ko ji ltar na de gnyis su med pa'i dngos por 'byung zhig gu ste/ dngos po kun gyi rang bzhin yin pa nyid kyis na gzung ba dang 'dzin pa dag gis skyon gyi dngos po de ltar de la gnas so zhe na/'di la gsungs pa spros med dang gos med ces bya ba ste/ don dam par ni bcom ldan 'das 'di la spros pa med pas dngos po med pa'i spros pas mi rig go/ /ci ste zhe na/ gos pa med pa'i phyir te dngos po med pa'i rang bzhin ni gos pa'o//'dis ni gos pas 'di la gzung ba med de gnyis po rnams ni skyon dang bcas pa yin pa'i phyir na'o/ /ci ste de dngos po dang / dngos po med pa'i rang bzhin nyid do zhes brjod pa de ji ltar yin zhe na/ 'di la srid par spyod pa dang / zhes bya ba gsungs te/ bcom ldan 'das de'i 'khor bar kun du spyod pa'i dngos po dang / dngos po med pa'i rang bzhin gyi sgo nas de skad ces bya ba brjod de/ sems can 'khor ba la spyod par brtson pa de dag rnams la ston pa mdzad pa'i dngos po yin no bar dgongs so/ / 'o na de kho na nyid kyi ye shes de gcig pu 'khor ba'i rjes su gnas pa'i phyir na dngos po dang dngos po med pa'i rang bzhin don dam pa de gnyis kyi rang bzhin dang bral ba yin na 'di ji ltar rigs pa yin/ ji srid du bcom ldan 'das de'i rang bzhin srid pa'i rjes su 'jug par rab tu shes sam/'on te med na gang gi tshe mi shes na ni mi shes pa de ji srid du de'i tshe de'i rang bzhin gyi srid pa dngos po dang dngos po med pa'i 'gro ba kun gyi rang bzhin du rnam par gnas pa 'di yang ji lta bu zhig ste/ gang yang shes pa de sngon po'i dngos gzhi tsam du ma skyes na ni ser po'i rang bzhin du shes pa skye ba'i rig pa med pa dang /zla ba gcig pu med na gnyis kyi gzugs su des ji ltar rig par 'gyur/ de nas yang bcom ldan 'das 'di shes nas srid par 'jug na ni de'i tshe de rang rig pa'i rang bzhin gyis 'jug//de la gal te rang gi rang bzhin nyid kyis rig pas 'jug na ni srid pa 'di yang de ltar rig pas na srid pa 'di yang dngos po dang / dngos po med pa'i rang bzhin kun du so sor gsal bar ji ltar 'gyur te/ de'i rang bzhin la 'di dag lta bu'i rang bzhin dang bral ba'i phyir na/sngon po'i rang bzhin nyid du gsal ba na ser po'i dngos por blo skye srid pa med pa nyid do/ /de'i phyir na sna tshogs pa'i srid pa 'di yang ji lta ba'i rang bzhin gyis rab tu gsal bas na bcom ldan 'das 'di yang dngos po dang / dngos po med pa'i 'gro ba kun gyi rang bzhin des rab tu gsal bar mi 'gyur te de'i rang bzhin gnyis po rnams dang rnam par bral ba de'i phyir na'o//de nas yang de gzhan gyi rang bzhin du rig par 'jug go zhes smra na/ de'i tshe srid pa rnams 'dir rig par mi 'gyur te/ 'ga' zhig tu yang gzhan nyid du rig par skyes pa min te gzhan gyi rang bzhin du rig par ni de de'i ngo bo ma yin te/ji ltar bum pa'i shes pa ni snam bu'i shes par gyur pa rigs pa ma yin no zhes pa 'di dag ni brgal ba'o/ /de kho na nyid de'i rang bzhin shes pa yin pas 'di ltar srid pa ste/ 'dir shes pa'i ngo bo yin na yang 'on kyang rang gi ngo bo des de bzhin du rang ma shes pa'i rgyu yis g.yogs pas gzhan dag tu gsal bar shes pa yin no//de nyid kyi na kun rdzob ces bya ste 'khor ba la byar brjod la de yang 'dis de kho na nyid la kun nas bkab cing bsgribs pas na kun rdzob ces bya'o//gang gi tshe yang de kho na nyid 'dis nges par rig par gyur na ni rang gi rang bzhin nyid du gyur pas na de'i tshe ji ltar 'khor bar kun du 'jug /de'i phyir na gang yang gzhan gyi rang bzhin du de rig pa 'di ni log pa'i lta ba'i skyon gyi 'khor ba'o/ /de yang dper na rab rib can gyi mig gis nam mkha' dri ma med pa la yang skra shad 'dzings pa la sogs pa dang ldan par snang ba bzhin no//de la gzhan pa'i des de rab tu shes na de ji ltar shes pa yin te gang gis ni de nyid du shes pa zhes bya ba 'di don ji lta ba bzhin ma yin pas sngon du brjod pa de dag sun dbyung bar bya bar gnas pa ma yin no zhe na/min te gzhan du rab tu shes pa zhes bya ba'i de kho na nyid 'di ni rang bzhin gyis thams cad du de ltar rab tu shes pas khas blangs sam ci gang gis gzhan rab tu shes na ji ltar de'i rang bzhin rab tu shes pa ci zhes bya ba'i skyon du 'gyur ro//gal te de bzhin du gyur na ni de srid par yang ji ltar 'gyur/ de'i phyir na de ji lta ba'i rang bzhin du mi shes pas 'di srid pa'i ngo bor 'gyur te/ srid pa lugs su 'byung ba 'di dag kun kyang bag chags kyi ling tog gis lag pas byas pa bzhin du brdzun gyi rnam par kun du 'byung ngo //de lta bu de dag dang ci zhig las she na/ sngon gyi las kyi rnam par smin pa'i stobs las skye ste/ de ltar khas len pa los kyang mod de ji srid du 'khor ba'i rjes su 'jug pas yid rjes su 'jug go/ /de'i phyir na smig rgyu ba'i dngos po la chu'i rnam par shes pa ltar 'dir de kho na nyid rang bzhin srid pa'i dngos por snang ba la 'gal ba 'ga' yang yod pa ma yin no//des na de 'khor ba yin par gyur pas na des ji lta ba'i smig rgyu la sogs pa'i rang bzhin ma shes pas brdzun gyi ngo bor rtogs pa 'ga' zhig tu skye bar 'gyur ba bzhin de kho na nyid la de ji ltar rig pa yin pa zhig na ste/de ji srid du de kho na nyid rab tu gsal ba na mya ngan las 'das pa zhes bya ba yin par khas len pa lta los kyang mod kyi/ gzhan bdag gis kyang ni 'ga' zhig tu mya ngan las 'das par 'gyur ro//des na ji lta ba'i rang bzhin rab tu ma shes pas kyang de rang rig pa tsam nyid las ji bzhin pas rang rang gi mya ngan las 'das pa'i go 'phang thams cad thob par 'gyur te/ ji ltar yul na ri ke la'i gling nas 'ongs ma thag pa'i mis me 'di'i rang bzhin ni sreg par byed pa yin no zhes bya bar mi shes kyang de yang dag par rig cing myang ba na grang ba sel bar mi 'gyur ram/de'i steng du yang dag par reg na sreg par yang mi 'gyur ram ci de bzhin du bca' sga 'dra bar rig nas dug tu ma shes pas zos na kha chu 'dzag cing brgyal ba la sogs pa'i bya ba rnams byed par mi 'gyur ram ci/de'i phyir na de kho na nyid kyis rang bzhin de ji lta ba'i rang bzhin du des mi shes pas 'khor ba yin la gzhan ni rang bzhin khong du chud pas so zhes pa 'di rigs pa ma yin no zhe na/ de ni min te de kho na nyid kyi ye shes de ji lta ba bzhin du rab tu shes na yang rang rang gi dgos pas 'byung bar 'gyur ba nyid de/ci ming gi tshig de gang zhig gzhan rab tu gsal ba na gzhan po de rang rab tu gsal ba de de'i dgos par 'byung ba min nam ci 'o na de'i tshe thams cad la kho na nyid rig pa yod pas srid pa rnam par bcad mi dgos par 'gyur ro zhe na/min te de kho na nyid nyams su myong ba tsam gyis srid pa'i dngos po med pa'i mtshan nyid mya ngan las 'das par 'gyur bar brjod pa ni min te/ gang de tsam gyis ni mya ngan las 'das par sbyor bar byed pa ma yin no/ /de kho na nyid shes pas mya ngan las 'das par mi 'gyur/mi 'gyur ba gang gi tshe gang zhig gang gis 'gyur ba yin zhe na/ de kho na nyid du rig pa de nyid las so/ /ci zhig na de'i tshe yang thams cad du srid pa med par 'gyur ro zhe na/ min te ji bzhin pa'i rang bzhin du de nges par rig par ma byas pas te/ ji lta ba'i rang bzhin du rtogs pa gang gi tshe de de kho na nyid du rtogs pa de'i tshe mya ngan las 'das pa zhes bya bar gzhag par brjod kyi srid pa'i rgya mtshor zhugs pa'i sems can rnams kyis ni de'i rang bzhin ji lta ba bzhin du khong du chud pa yod pa min pa gang gis na thams cad mya ngan las 'das par ma gyur pa yin te/gnyis su med pa'i dngos po nyid la gnyis kyi rjes su zhugs pa'i phyir na de brdzun pa'i blor gnas pa ci ste min/ des na ji ltar de kho na nyid kyi rang bzhin yongs su ma rig pa'i sems can rnams la ji ltar yod par brjod/ 'o na mya ngan las 'das pa las ma rtogs pa'i de kho na nyid kyi dgos par bya ba ji lta bu zhig 'thob/gang yang de shes pa la mya ngan las 'das pa mi 'byung na gzhan zhig las dgos pa de 'byung bar gzhag gam zhe na/ min te de las gzhan pa de yang yod pa yin la thun mong ba'i dgos pa'i mtshan nyid rang rig pa'i rang bzhin zhes bya ba thams cad pa nyid kyi ye shes rang rig pa zhes bya ba thun mong ba'i dgos pa nyid sngon po dang /ser po la sogs pa'i rnam pa bye brag tu rtogs pa'i khyad par nyid do/ /des na de kho na nyid kyi ye shes rang rig pa ni dngos po dang dngos po med pa sna tshogs pa'i gzugs kyis yod pa nyid do//de'i dgos pa khyad par can ni/ mya ngan las 'das pa'i mtshan de don gyi rang bzhin pa khyad par du rtogs pa yin pa 'di la the tshom med do/ /'o na ci mya ngan las 'das pa'i rang bzhin rang rig pa'i min pa gang gis na rang rig pa'i mtshan nyid kyi dgos pa las 'di khyad par du so sor brjod pa de bzhin du yin na ni brgya la lan 'ga' zhig na'ang mya ngan las 'das pa ni rtogs pa'i bdag nyid du mi 'gyur te rang rig pa'i rang bzhin med pa'i phyir te/rang rig pa'i las gzhan pa gang zhig tu yang de ji ltar rig par byed pa 'di ci rigs des na bum pa la sogs pa yang rang bzhin gyis rig pa med de bems po tsam gyis gsal bar skye ba med pa nyid dam ci mya ngan las 'das pa 'di yang de bzhin yin no zhe na/min te mig dang rna ba dang yid la byed pa dang yul rnams kyi rkyen gyis bum pa'i rnam pa'i shes pa yang dag par skyes nas rig pa las bum par rig go shes so zhes zer yang de nyid bems po yin pa'i phyir na/gzhan dag byed pa'i dngos po'i gsal ba med pa de bzhin du mya ngan las 'das pa yang yin no zhe na/ min te de ni ye shes kyi rang bzhin nyid kyi phyir ye shes kyi bdag nyid la yang ye shes gzhan zhig gis shes par byed pa ni rigs pa ma yin te/de la yang gzhan pa'i ye shes zhig dgos la/ de la yang gzhan pa zhig dgos pas thug pa med pa'i skyon du gnas so/ /de nas yang gal te mya ngan las 'das pa yang ye shes kyi rang bzhin no zhes zer na/ci da ni mya ngan las 'das pa yang bems po'i bdag nyid du smra'am de lta bu bdag nyid yin par smra'o zhe na/ 'o na bum pa la sogs pa'i bdag nyid thams cad kyang mya ngan las 'das pa yin par 'gyur ro//de ltar gyur na ni 'gro ba thams cad 'bad pa mi dgos par yongs su grol bar 'gyur te/ bum pa la sogs pa thams cad kyang de lta bu nyid kyi rang bzhin du gnas pa dang / bems po'i rang bzhin nyid kyis na/ bum pa la sogs pa dang / mya ngan las 'das pa ni khyad par 'ga' yang yod pa ma yin pa'i phyir ro/ /de nas yang mya ngan las 'das pa ye shes kyi rang bzhin yin na yang srid pa'i dngos po dus thams cad du ye med pa'i skyon du gnas pa nyid de sngon po la sogs pa'i shes pa rnams de bzhin par dus thams cad du yod pa ste/ye shes nyid yin pa ni sngon po la sogs pa'i shes pa dang / mya ngan las 'das pa'i shes pa dag la 'ga' zhig dang khyad par du 'jug pa med pas na'o zhe na'o/ /min te mya ngan las 'das pa'i ye shes ni de kho na nyid kyi ye shes las skye bar 'gyur gyi ye shes min pa skye mi srid pa dang /shes pa'i bya ba shes pa ma yin pa ni shin tu mi rigs te rgyu'i bye brag gis bye brag tu byas na 'bras bu bye brag tu dbye ba yin te/ ji ltar skud pa nag po btags pa las snam bu dkar por gyur srid pa ni med pa dang / 'ji ba las snod du byas na zangs kyi snod du 'gyur ba med pa des na de kho na nyid kyi ye shes kyi dgos pa rang rig pa'i mtshan nyid dang /de las gzhan yang khyad par can gyi mya ngan las 'das pa'i mtshan nyid ji lta ba'i rang bzhin khong du chud pa'o zhes gzhag par bya ba 'di dag ji ltar yin zhe na/ 'di la smras pa de kho na nyid kyi ye shes kyi dgos pa rang rig pa las mya ngan las 'das pa'i mtshan nyid kyi dgos pa 'di rang rig pa ma yin pa'i rang bzhin gzhan du 'gyur bar skye ba med pa nyid do//ci rang rig pa las gzhan pa na rang rig pa ma yin par 'gyur ba yin pas 'gal lo zhe na/min te mya ngan las 'das pa'i mtshan nyid kyi dgos pa de nyid kyi rang rig pa yin pa kho na'o/ /'di ji lta bu zhig na/ rang rig pa'i dgos pa dang zhes dbye bar yod pa de dang / gzhan pa'i dgos pa 'di yang rang rig pa yin par khas blangs pa 'dis ni gnyis su dbye ba 'gal lo zhe na/min te rang rig pa zhes bya ba tsam gyis thams cad rang rig pa zhes bya ba'i dngos po gcig tu 'gyur ba ma yin te/ rang rang gi dbye bas so sor phyed pa'i phyir na sngon po dang ser po la sogs pa'i rang rig pa'i shes pa tsam gyis rang rang gi ngo bo de gcig tu 'gyur ba ma yin no//de'i phyir na de kho na nyid kyi ye shes kyi dgos pa mya ngan las 'das pa'i mtshan nyid ni rang rig pa tsam thun mong ba de las dbye bar gnas pa nyid do/ /des rang rig pa tsam gyis srid pa'i dngos po yang thams cad du rab tu dbye bar gnas pa nyid do/ /des na mya ngan las 'das pa khong du chud pa yang rang rig pa'i rang bzhin gyi phyir na yod pa nyid do//de kho na nyid kyi rang bzhin ji lta ba bzhin du rtogs pa las mya ngan las 'das par 'gyur ba yin no zhes smra na/ ci 'dod pa tsam gyis rab tu smra bar byed pa 'dir 'gyur te/ de kho na nyid ces pa dang /mya ngan las 'das pa zhes bya ba dang / grol ba zhes bya ba la sogs pa ji srid pa de dag ni ming gi rnam grangs tsam yin na bya ba dang byed pa gnyis su gzhag pa de dag gis rab tu smras pa de ji ltar legs pa yin zhe na/ gang yang don dam pa la ni khyad par med pa de bzhin na yang kun rdzob la brten nas kun rdzob tsam du gzhag pa'i rtog pa nyid bya ba dang byed pa la sogs par dbye ba thams cad kun rdzob tsam du gnas kyi don dam pa la ni bya ba dang byed pa zhes bya ba la sogs pa gnyis su dbye ba rnams 'ga' yang med de/bka' las blo gros chen po chos thams cad ni skye ba med pa ste bden pa dang bden pa min pa gnyis kar ma skyes pa'o zhes gsungs so//de'i phyir na bag chags dang rnam par bral ba las ji lta ba bzhin gyi de kho na nyid kyi ye shes la yang dag par rig pa'i de ma thag par mya ngan las 'das pa los kyang mos te sa bon des de bzhin du kun rdzob tsam du byas pa la bya'o//de yang ji ltar rab tu dga' ba las 'drangs par 'gyur ro zhes pa'i kun rdzob tu grub pa de'i rab tu dga' ba dang 'drangs pa dag ni mya ngan las 'das pa gzhan na 'ga' yang med kyang de ltar grub pa yin no//'o na mya ngan las 'das pa'i sngon du rtogs pa nyid ji ltar skye zhe na/ de la smras pa/ rang rig pa'i rang bzhin no zhe na/ min te rang rig pa 'di gang gis dgos pas ye shes kyi rang bzhin gang de srid pa 'dir 'di'i rang bzhin ston cig /rig pa'i rang bzhin de mi shes par 'gyur te/ji ltar bum pa'i mgrin pa la sogs pa rnams mi shes par bum pa shes so zhes bya bar mi 'gyur bas 'di'i rang bzhin dngos po can zhig tu dmigs par 'gyur ba'am/ 'on te dngos po med pa can zhig tu dmigs par 'gyur ba ston cig /de la dngos po'i phyogs su gnas na ni gcig dang du ma'i rang bzhin dang rnam par bral ba'i sbyor bas de kho na nyid kyang rab tu mi gnas pa kho nar 'gyur ro//dngos po med par rjes su gnas na yang dngos po med pa ni dngos po sngon du 'gro ba yin pa'i phyir na/ dngos po nyid de ltar med pas dngos po med pa'i rang bzhin ji ltar yod par ston/de nas gnyis ka'i rang bzhin rnam par bral ba zhes bya ba de de kho na nyid yin par ston no zhe na/ de ltar na yang rig pa dang ldan pa'i dngos po des na ye shes de skye ba dang ldan pa'i phyir na dmigs pa dang bcas pa'i rang bzhin gyis na dngos po nyid du gyur pas thams cad du bya ba dang byed pa'i dngos po can gyi mtshan nyid yin no//de nas yang ye shes 'di la skye ba med de de nyid rang rig pa'i rang bzhin gyi phyir ro zhe na/ de ltar na de ni ye shes 'di bya ba rnams ci yang mi bskyed na ni de ji ltar yod pa ma yin te/nus pa thams cad dang bral ba'i phyir mo gsham gyi bu bzhin na rig pa yin par ji ltar 'gyur te/ des na mya ngan las 'das pa de nus pa thams cad dang rnam par bral ba kho na'i stong pa nyid kyi rang bzhin du 'gyur ro/ /de lta bu yin bzhin du yang de la rang rig de nges par yod pa yin na ni ye shes de bya ba dang byed pa la sogs pa can du khas blangs dgos so//de dag de ltar gyur na sngar gyi bzhin du dngos por dmigs pa'i skyon du 'gyur te dngos po ni bya ba dang byed pa'i mtshan nyid can yin pa'i phyir ro/ /de nas de bzhin du gnyis kyi rnam pa dang rnam par bral ba'i rang bzhin gyi phyir na/de kho na nyid de la de bzhin pa'i rang bzhin du rig pa yang med pa des na ye shes bya ba dang byed pa la sogs pa can gyi dngos por dmigs pa'i skyon du gnas pa ji tsam yod ce na/ de ltar na yang de bzhin pa'i rig pa'i dngos po med pa'i phyir na/de de'i mya ngan las 'das pa ji lta bu zhig yod de/ mya ngan las 'das par yang so sor rig pa med pa'i skyon du 'gyur ro zhe na/ min te ci ston cing brjod pa med ces te/ de med pas rang rig pa'i rang bzhin yang zhig ste med dam/ ji ltar lkugs pa la sogs pas ro mchog myangs pa na ston par mi nus pa'i dngos po las ro myong ba med dam ci/nus pa rnam pa mang gsungs pa/ /zhes bya ba la sogs pa ni rgyud gzhan dag las rgyud 'di nyid khyad par du 'phags par gsungs pa yin te/ rgyud 'dir gang gsungs pa'i sngags la sogs pa'i de kho na nyid ni thos pa tsam gyis 'grub par brjod de/lan cig brjod pa de nyid kyis dngos grub stsol bar mdzad pa dang / 'dir sngon du bsnyen pa yang mi dgos shing de bzhin du bzlas pa 'bum la sogs pa med par yang 'grub bo//sku gzugs dag ni dgas pa dang / /zhes bya ba la sogs pa ni rnal 'byor pas nus mthu rnam pa sna tshogs pa'i rang bzhin brjod pas sems can rnams gzhug par bya bar brjod do/ /de'i phyir na sku gzugs dgas pa la sogs pa ni de las gzhan pa thun mong ma yin pa mthong bas gdul dka' ba'i sems can rnams 'dul bar 'gyur la/des chos bstan pa'i snod du 'gyur ro/ /rang gi gzugs ni bsgyur ba nyid/ /ces bya ba ni so so'i ming gzugs bor nas seng ge dang stag mo la sogs pa'i gzugs su byed pa'o//gzhan gyi grong du 'jug ces bya ba ni rang gi lus yongs su bor nas gzhan gyi lus kyi nang du rang gi rnam par shes pa 'jug par byed pa ste/ de dag la sogs pa'i nus pa thams cad byed par nus pa ni sangs rgyas thod pa'i rnal 'byor pa yin no/ /de nas gzhan yang bshad bya zhes bya ba la sogs pa ni dug bsal ba dang /nus mthu 'phral du dbyung ba 'dir brjod cing ston to/ /de nas sbyor ba bco brgyad gsungs zhes bya ba ni zos te myos par bslad par bya ba gsungs pa/ sa li ka yi sbyor ba dang / /zhes bya ba la sogs pa ste gang gi tshe dus zos te myos par gyur pa de'i tshe ji skad du gsungs pa'i sa li ka la sogs pa'i sbyor ba rnams sngags pas bya ba yin no//de nas rab tu sbyor ba byas ma thag tu zos pa rnams 'tsho'o/ /rig pa 'dzin pa ni 'bras btags pa las rig pa 'dzin pa gnyis bya ba yin no/ /rgyan po 'gyed dang zhes bya ba ni gang du zos pa 'di yod pa de la bsam gtan dang ldan pa'i sngags pas rgyan po rtse bar byas pa las de nas zos pa 'di 'tsho bar 'gyur ro//de nas rnga brdungs pa'i sbyor ba yis te de dag la sogs pa'i rab tu sbyor ba bco brgyad po sngags pas bya'o/ / mchog gi ye shes he ru ka'i dngos po de rab tu gsal bar gsungs pa/ de nas gzhan yang rab bshad pa/ /ci bzhin de nyid ye shes mchog /ces bya ba la sogs pa ste/ lhan cig skyes pa'i dga' ba'i rang bzhin gyi ye shes gang yin pa de shes rab kyi pad+ma'i rtsa'i nang na khu ba'i gzugs kyis rgyu ba'i gnas pa de yin mod kyang sems can 'di dag thams cad ni ma rig pa'i mun pas g.yogs pas dmigs pa dang bcas par gyur pa'i rang bzhin des de lta bur bzung bas 'khor bar bcings par gyur pa yin no//de nyid shes rab kyi pad+mar lhan cig skyes pa'i ye shes de bzhin pa'i cho gas yang dag par rig pa las dkyil 'khor gyi 'khor lo'i lha rnams tshogs par nyams su myong bar bya ba ste/de nyid du de bzhin par dmigs pa med pa'i ye shes kyi mchog yang dag par rig pa las bcud kyis len la sogs pa thams cad du 'gyur te/dngos grub thams cad kyi gtso bo ni ye shes de nyid yin pa'i phyir ro/ /de lta bu grub pa'i ye shes kyis gang byin gyis brlabs pa de nyid ni dngos grub kyi gnas su gyur pa yin gyi de las gzhan pa'i sngags dang sman la sogs pa'i sbyor ba de la mi ltos te de thams cad de'i bdag nyid yin pa'i phyir ro zhes dgongs so//sbyor ba gsang bar gnas pa'i rtsa/ /zhes bya ba la sogs pa ni ri mo can gyi sde'i de kho na nyid ji lta bu yin pa dris pa las ri mo can gyi sde'i rang bzhin ji ltar yin pa brjod pa ste/ gsang bar gnas pa'i rtsa zhes bya ba ni rtsa de dag ni bde ba mchog gi rgyu des ri mo can nas mdzes ma zhes bya ba ste ngo mtshar ba'o//bde ba'i rang bzhin gyi ye shes ni sde ma zhes bya bar brjod do/ /de lta bu'i bde ba chen po'i ye shes kyi dngos po rtsa'i rgyu las yang dag par byung ba de ni ri mo can gyi sde zhes bya bar brjod do//de nyid kyang theg pa chen po yin pa gsal bar mdzad pa gsungs pa/ 'di de nyid ni theg pa chen po zhes bya ba la sogs pa ste/ 'byung gnas rtsa ni rnal 'byor ma/ /zhes bya ba ni 'byung gnas kyi rtsa gang dag dga' ba chen po'i ye shes su gnas pa ni ri mo can gyi rang bzhin te de nyid ni theg pa chen po zhes bya ba yin par brjod do//de'i phyir na de nyid ni mchog gi ye shes te dngos grub kun gyi sgrub thabs yin no zhes gsal bar mdzad do/ /'di dag ni rnal 'byor ma'i rgyud bla na med pa sangs rgyas thod pa zhes bya ba rgyud kyi rgyal po'i le'u dang po'i 'grel pa slob dpon mkhas pa chen po pad+ma rdo rje zhes bya ba dngos grub chen po brnyes pas mdzad pa'o// //da ni sngags kyi dngos grub gsungs pa/ de nas yang dag rab bshad pa/ /zhes bya ba la sogs pa ste/rnal 'byor ma rnams grub par byed pa'i spos la sogs pa sbyin pa'i sngags de srid pa gsungs pa/ oM bud+d+ha ka pA li ni zhes bya ba la sogs pa'o/ /oM hAM haiM zhes bya ba la sogs pa ni go cha'i sngags te/ snying ga dang / mtshog ma dang /spyi gtsug dang / phrag pa dang / mig dag dang / yan lag thams cad la rim pa ji lta ba bzhin du 'di rnams kyis go cha bya'o/ /oM bud+d+ha ka pA li ni A khaM zhes bya ba la sogs pa ni rnal 'byor ma ri mo can gyi sde spyan drangs pa'i ste/ yang dag par byon ni byin gyis rlob pa'i phyir ro//de nas gtor ma dang mchod pa la sogs pa byas zin nas slar yang gshegs su gsol ba'i sngags gzhan dag gsungs pa/ oM ma hA ka pA la badzri Ni zhes bya ba la sogs pa'o/ /de lta bu dag gis ni rnal 'byor ma dngos grub thams cad stsol bar 'gyur ro//de ni mi snang bar byed pa'i rab tu sbyor ba gsungs te/ sbyor ba gang gis rnal 'byor pa lha dang lha ma yin dang mi rnams kyis kyang mi mthong ba'i rab tu sbyor ba de nyid gsungs pa/ 'bras dkar po blangs te zhes bya ba la sogs pa'o/ /de la 'bras dkar po bu mo gzhon nu mas zhib mor btags pa byas pa las gzugs brnyan ni gzhon nu mas btags ma thag tu rang nyid kyis gzugs brnyan bya'o//gzugs brnyan de yang gdong pa gcig pa lag pa bzhi pa bya'o/ /de'i lag pa'i mtshon cha gsungs pa/ kha T+wAM ga dang zhes bya ba la sogs pa'o//rdo rje las byung ba zhes bya ba mi bskyod pa'o/ /ji skad du gsungs pa de dag nyid cho ga bzhin du blangs te rnal 'byor pas brgya rtsa brgyad du sngags kyi bzlas pa bya'o/ /bzlas par bya ba'i sngags kyang gsungs pa/ oM ma hA badzre zhes bya ba la sogs pa'o//de nas chu la lan bdun yongs su bzlas nas gzugs brnyan la bsku'o/ /de'i lhag mas rang gi kha bkrus na mi mthong bar 'gyur te/ de nas de lta bus rnal 'byor pa sna tshogs su rol pa drung nyid na byed kyang gang gis kyang mi mthong ngo / /de nas 'o mas rang gi kha gdong bkrus na slar mthong bar yang 'gyur ro/