CLOSE WINDOW

D1652
བོད་ཡིག

@##/ /rgya gar skad du/ shrI bud+d+ha ka pA li tan+t+ra s+ya pany+tsi kA dz+nyA na ba ti nA ma/ bod skad du/ dpal sangs rgyas thod pa'i rgyud kyi dka' 'grel ye shes ldan pa zhes bya ba/ dpal he ru ka la phyag 'tshal lo/ /bsgrub bya phra gzugs mchog tu bde 'byung dga' ba bcu drug ster byed ma//mdun nang thig le'i steng sgra yongs shes sems dngos rang bzhin te/ /rang gi dga' ba'i rten gzugs yon tan sdud pa byang chub tshogs snying po/ /dngos dang dngos med rang bzhin srid pa'i 'jigs sel sna tshogs sde phyag 'tshal/ /sna tshogs sde mas bshad pa yi//sangs rgyas thod pa yi ni rgyud/ /ji ltar bla mas bshad pa dang / /ji ltar rgyud gzhan dag mthong ba/ /de ltar cung zad bdag gis bshad/ /de la re zhig rjod pa dang / brjod par bya ba dang / dgos pa dang / dgos pa'i yang dgos pa ston te/ rjod par byed pa ni rgyud do//brjod par bya ba ni rgyud kyi don to/ /dgos pa ni lha'i rnal 'byor mngon du byed pa'o/ /dgos pa'i yang dgos pa ni sems can gyi don gyis bya ba byed pa'o/ /gal te yang bcom ldan 'das nyid ston pa po la sogs pa'i gzugs su bzhugs mod kyi/ 'on kyang bdag nyid bcom ldan 'das ma'i gzugs su logs su bstan to/ de nas bcom ldan 'das ma las phyag na rdo rjes thos so/ /rgyud sdud par bzhed nas der 'di skad ces bya ba gsungs pa ni/ sdud par byed pa'i tshig go/ /thos pa zhes bya ba ni rnam pa 'di ltar bcom ldan 'das ma las bdag gis thos zhes sbyar ro//'di skad bdag gis zhes pa la/ e ni sar gsungs te/ de ni spyan ma'i rang bzhin no/ /waM ni chur gsungs te/ de ni mA ma kI'i rang bzhin no/ /ma ni mer gsungs te/ de ni gos dkar mo'i rang bzhin no/ /yA ni rlung du gsungs te/de ni sgrol ma'i rang bzhin no/ /yi ge bzhi ni phyag rgya bzhir yang dag par bshad do/ /stong pa nyid kyi rang bzhin gyis 'gro ba rgyas 'debs pas na phyag rgya'o/ /bdag gis thos zhes bya ba la/ rna ba'i rnam par shes pas thos pa ni ma yin no/ /'o na ci zhe na/dus gcig gi tshe na'o/ /dus gcig na zhes pa la/ dus ni rnam pa gsum ste/ bde ba'i dus dang / sdug bsngal gyi dus dang / bsam gyis mi khyab pa'i dus nyid do/ /'jug pa'i rlung ni bde ba'i dus so/ /'byung ba'i rlung ni sdug bsngal gyi dus so//'di dag gnyis med par son pa'i rang bzhin ni bsam gyis mi khyab par son pa'i dus so/ /bcom ldan 'das zhes pa la skal ba phun sum tshogs pa'i phyir na bcom ldan no/ /bdud bzhi bcom pa'i phyir yang bcom ldan no/ /'di la bcom pa yod pas na bcom ldan 'das zhes gsungs so//de bzhin gshegs pa thams cad kyi sku dang gsung dang thugs rdo rje zhes bya ba la thams cad kyang yin la de bzhin gshegs pa yang yin pas na de bzhin gshegs pa thams cad do/ /de rnams kyi sku dang gsung dang thugs nyid rdo rje ste mi shes pa'i ri gcod pas rdo rje'o//mi shes pa ni phung po dang khams dang skye mched rnams mi shes pa ste/ shes bya'i sgrib pa zhes bya ba'i tha tshig go/ /rdo rje ni gnyis su med pa'i ye shes te shes rab kyi gzugs zhes bya ba'i tha tshig go/ /dkyil 'khor chen po rgyan dang ldan pa'i dbus su zhes bya ba la/dkyil 'khor chen po yang yin la/ rgyan dang ldan pa yang yin pas na dkyil 'khor chen po rgyan dang ldan pa ste/ de nyid dkyil 'khor ro/ /dkyil ni snying po'o/ /'khor ni de len pa ste snying po len zhes pa'o/ /de'i dbus su dang po bcom ldan 'das yongs su mya ngan las 'das zhes 'chad par 'gyur ba dang sbyar ro//khyad par ji lta bu zhig ce na gsungs pa/ de bzhin gshegs pa thams cad ces bya ba ni phung po lnga'i rang bzhin rnam par snang mdzad la sogs pa'i sangs rgyas lnga'o/ / rnal 'byor ma zhes bya ba ni/ gshin rje mche ba ma la sogs pa rnams so/ /bzhugs zhes bya ba ni de rnams kyis brgyan zhes bya ba'i tha tshig go/ /gnas der 'khor gsungs pa/ 'phags pa kun dga' bo la sogs pa 'dod chags dang bral ba'i dge 'dun rnams kyis bcom ldan 'das yongs su bskor zhes pa'o//'dod chags dang bral ba 'ba' zhig tu ma zad do zhes pa de gsungs pa/ 'phags pa spyan ras gzigs dbang phyug la sogs pa zhes pa ni 'phags pa spyan ras gzigs dbang phyug la sogs pa'i byang chub sems dpa' chen po rnams kyis yongs su bskor zhes bya ba'i tha tshig go//byang chub sems dpa' bye ba phrag brgyad cu dang yang thabs cig tu bzhugs so zhes bya ba ni/ bye ba phrag brgyad cu'i grangs su bgrangs pa dang zhes bya ba'i tha tshig go/ /byang chub sems dpa'i brtson 'grus dang ldan pa gang dag yin pa de dag ni byang chub sems dpa'o//thabs cig tu bzhugs zhes pa ni/ dkyil 'khor de'i dbus su byang chub sems dpa' rnams dang lhan cig tu bzhugs zhes bya ba'i tha tshig go/ /rnam pa gang gis bcom ldan 'das yongs su mya ngan las 'das pa de nyid gsungs pa/de nas zhes pa ni/ de'i rjes thogs su zhes pa'o/ /a ni thig le'i gzugs so/ /tha ni bcom ldan 'das gang gi thugs thig ler gnas pa'o/ /de nyid kyi khyad par ji lta bu yin snyam pa la rdo rje'i tshig gis zhes bya ba gsungs te/rdo rje ni gnyis su med pa'i ye shes shes rab kyi ngo bo ste sprul pa'i 'khor lo la gnas pa'o/ /de'i tshig ni chos kyi 'khor lo la gnas pa'i thabs kyi rang bzhin no/ /'di dag gnyis su med par gyur pa'i rang bzhin ni bcom ldan 'das so/ /rdo rje chen po'i gnas su zhes bya ba ni rdo rje 'chang chen po'i go 'phang gi gnas te/des na chos kyi 'khor lo dang sprul pa'i 'khor lo dang lhan cig tu gyur pa'o/ /khyad par ji lta bu zhe na/ rgyud thams cad dang sngags yang dag par bshad ces bya ba gsungs te/ rgyud thams cad kyi sgras ni 'dus pa la sogs pa gzung ngo //sngags ni a dang hUM la sogs pa'o/ /de dag gi gnas su yang dag par bshad pa ni bde ba chen po zhes bya ba'i tha tshig go/ /des na khyad par ji lta bu dang ldan pa'i bcom ldan 'das zhu bar gyur snyam pa la/ de bzhin gshegs pa thams cad kyi bdag po zhes smos te/ rdo rje 'chang ngo / /de ltar yang / dpal ldan sangs rgyas kun gyi bdag /rdo rje 'chang chen go 'phang ste/ /sangs rgyas kun gyi thabs byung ba/ /de nyid chos rnams chos nyid do/ /zhes gsungs te/sangs rgyas thams cad skyed par byed pa zhes bya ba'i tha tshig go/ /rdo rje dang pad+ma yang dag par sbyor bas zhes bya ba ni/ rdo rje pad+mar bsnun pa de'i sbyor bas yang dag par bde ba'o/ /btsun mo'i b+ha gar zhes bya ba ni/ spyan ma la sogs pa'i btsun mo'i b+ha gar ro//yongs su mya ngan las 'das zhes bya ba ni byang chub kyi sems kyi gzugs su zhu bar gyur zhes bya ba'i tha tshig go/ /yongs su ni kun du'o/ /mya ngan las 'das pa ni rnam par rtog pa las nges par byung ba ste/ de ni chos kyi sku'i rang bzhin zhes bya ba'i tha tshig go/ / de yongs su mya ngan las 'da' ba mthong nas zhes bya ba ni/ chos kyi sku de gzigs nas zhes bya ba'i don to/ /byang chub sems dpa' thams cad ces pa ni/ byang chub sems dpa' 'ang yin la/ thams cad kyang yin pas na byang chub sems dpa' thams cad de mig la sogs pa'i dbang po drug go//rnal 'byor ma thams cad ces bya ba ni thabs dang shes rab kyi bdag nyid kyi sbyor ba rang bzhin med pa'i shes rab gang yin pa dang / thabs kyi dngos po'i mtshan nyid ces bya ba'i tha tshig ste/ gang dag la de dag yod pa de ni rnal 'byor ma ste/rtsa thams cad kyi rang bzhin no/ /rmad du gyur te zhes pa ni/ ngo mtshar du gyur zhes pa'i tha tshig go/ /gcig la gcig lta zhing zhes pa ni/ byang chub sems dpa' dang rnal 'byor ma rnams phan tshun du lta zhes bya ba'i don to/ /ci zhig smra zhe na/e ma'o zhes gsungs te/ e ni shes rab yin la/ ma ni thabs su gsungs te/ 'o ni gang gi phyir zhes bya ba'i don to/ /bcom ldan 'das zhes bya ba ni thabs dang shes rab kyi bdag nyid kyi sbyor ba'i ting nge 'dzin zhes bya ba'i tha tshig go/ /de bzhin gshegs pa thams cad kyi bdag po zhes bya ba ni de bzhin gshegs pa thams cad kyi bdag nyid rdo rje 'chang ngo //dkyil 'khor chen po rgyan dang ldan pa'i dbus su zhes bya ba la/ 'dod chags dang bral ba'i dge 'dun dang / byang chub sems dpa' du ma dang / de bzhin gshegs pa thams cad dang /rnal 'byor ma'i tshogs kyis brgyan pa gang yin pa'i dkyil 'khor de ni dkyil 'khor chen po rgyan dang ldan pa'i dkyil 'khor te/ de'i dbus kyi gnas su'o/ /ji ltar yongs su mya ngan las 'das zhes bya ba ni/ ji ltar chos skur gyur zhes bya ba'i tha tshig go//sna tshogs sde ma la som nyi 'di zhus te/ de nas zhes pa ni de ma thag tu zhes pa'i tha tshig go/ /rnal 'byor ma sna tshogs sde ma zhes bya ba ni gsang bar gnas pa'i rtsa ste/ de'i sna tshogs ni ngo mtshar byed pa'o/ /sde ni bde ba chen po'i ye shes te/de nyid theg pa chen po'o/ /gnyi ga'i sbyor ba dang ldan pa ni/ rnal 'byor mar brjod de de nyid lha mo'o/ /byang chub sems dpa' sems dpa' chen po phyag na rdo rjes 'di skad ces gsol to zhes pa la/ rdo rje ni gnyis su med pa'i ye shes te/ de'i phyag gang la yod pa de ni phyag na rdo rje'o//byang chub sems dpa'i brtson 'grus gang la yod pa de ni byang chub sems dpa'o/ /sems dpa' yang yin pas na sems dpa' chen po'o/ /sems dpa'i ni rnam pa gnyis su gsungs te/ skal ba bzang po dang skal ba ngan pa'o//'di skad ces gsol to zhes pa ni/ 'di skad du zhus te zhes bya ba'i tha tshig go/ /ci zhig smras snyam pa la gsungs pa lha mo zhes pa ni bod pa'o/ /bsod nams dman pa zhes pa ni yid 'dul ba med pas na bsod nams dman pa ste/ bsod nams dman pa dang ldan pa'i sems can rnams so//nus pa la zhon par 'gyur ba zhes pa la/ nus pa ni rnam pa mang po'o/ /de la zhon pa ni sems kyis btsugs pa yin par bzhed do/ /thabs cung zad mchis sam zhes pa ni thabs cung zad mchis sam zhes pa'i 'dod pa ste/lha mo la zhus pa'o/ /gsungs pa rnal 'byor gyi rgyud la ni bye ba phrag drug nyid do/ /bye ba ni rnal 'byor gyi rgyud rnam pa drug la'o/ /rnal 'byor ma'i rgyud la ni bye ba phrag bcu drug nyid do zhes pa ni rnal 'byor ma'i rgyud rnam pa bcu drug la'o//mdo sde so so la ni bye ba phrag brgyad cu'o zhes pa la/ mdo sde so so la rnam pa brgyad cu'o/ /pha rol tu phyin pa'i theg pa la ni bye ba bsgos pa'i 'bum phrag lnga'o zhes pa ni pha rol tu phyin pa'i theg pa rnam pa lnga'o/ /gzhung rgyas pa'i 'jigs pas rgyas par ma bris so//'di dag thams cad ces pa ni rnal 'byor dang rnal 'byor ma'i rgyud dang / mdo sde dang / pha rol tu phyin pa'i theg pa rnams so/ /thub pa'i dbang po zhes bya ba ni de bzhin gshegs pa'i bdag po'o/ /gsungs zhes pa ni bshad ces pa'o/ /sngags zhes pa ni yid skyob par gyur pas na sngags so//dang zhes pa ni gang gi phyir zhes pa'i don to/ /bral na zhes pa ni ma rtogs par zhes pa'i don to/ /rgyud kyi nus pa mi snang ste zhes pa la/ rgyud bklags pa tsam la ni nus pa dang stobs med ces bya ba'i tha tshig go/ / de ltar yang gsungs pa/ lus kyis bklags par mi 'gyur zhing / /ngag gis bklags par cir 'gyur gyis/ /gso dpyad bklags pa tsam gyis ni/ /nad pa rnams ni ji ltar 'gyur/ /zhes gsungs so/ /da ni rnal 'byor pa tha ma dang 'bring dang mchog rnams kyi bzlas pa bstan par bya ste/rgyud la lar zhes pa ni rgyud kha cig tu'o/ /ci nas zhes pa ni rnam pa kun nas so/ /sngags bye ba bzlas zhes pa la rnal 'byor pa tha mas ni/ sngags bye ba bzlas par gsungs zhes pa'i tha tshig go/ /bsod nams 'bring po rnams kyis ni sngags 'bum bzlas zhes pa ni bsod nams 'bring po'i rnal 'byor pa dang bar mas 'bum bzlas par gsungs te myur bar zhes pa ni mgyogs par zhes pa'i don to//gang gsungs zhes pa ni gang bshad pa'o/ /bsod nams che bas zhes bya ba la bsod nams che ba'i rnal 'byor mchog gis ni khri bzlas par bshad do//de ltar yang bshad pa/ rdzogs ldan dus su yi ge 'bum bzlas te/ /gnyis ldan dus su sngags pas 'bum phrag gnyis/ /gsum ldan dus su 'bum phrag gsum du 'gyur/ /bye ba phrag gsum 'bum bzhi rtsod dus sbyar//zhes gsungs so/ /rdo rje can chen po zhes pa ni rdo rje 'chang chen po'o/ /rnam pa de lta bur bcom ldan 'das kyis sngags kyi bzlas pa gsungs so/ /'khor gyi nang du phyag na rdo rje la sogs pa byang chub sems dpa' rnams dang / gshin rje mche ba ma la sogs pa'i rnal 'byor ma rnams phan tshun gleng bar byed do//bsod nams chung ba'i sems can rnams zhes pa ni bsod nams dman pa rnams so/ /bye ba bzlas par gsungs zhes pa ni/ bye ba bzlas par bcom ldan 'das kyis gsungs so/ /sems can rtsol ba chung ba rnams kyis zhes bya ba la/nyung ngus mgu ba'i sems can rnams kyi bzlas pa ni 'bum du 'gyur ro/ /bsgom pa la zhon pa'i sems can rnams kyis ni zhes pa la/ de kho na nyid kyi bsgom pa la zhon par nus pa de kho na nyid kyis sems brlan pa de rnams kyi bzlas pa khrir 'gyur ro//'dod chags la zhugs pa'i sems can rnams zhes pa ni 'dod chags dang zhe sdang la sogs pa dang mtshungs par ldan pa zhes bya ba'i tha tshig go/ /sngags kyi bzlas pa ji ltar lags zhes bye ba la/ de dag gi sngags kyi bzlas pa'i grangs med ces pa'o//blun pa dang lkugs pa'i rigs can rnams kyi zhes pa ni rmongs pa dang dag pa'i rigs can zhes pa'i tha tshig go/ /grangs ji ltar lags zhes pa la/ sems can de rnams kyi sngags kyi bzlas pa la grangs med ces pa'i tha tshig go//shin tu dmigs pa'i sngags kyi bzlas pa zhes bya ba ni bsgom pa la gcig tu brtson pa ni sngags kyi bzlas pa dgos pa med de/ sngags kyi bzlas pa bas bsam gtan bsod nams ches 'phel bar 'gyur ro/ /'di ltar phan tshun smra bas zhes pa la sogs pa ni go sla'o//dman pa'i sems kyis zhes pa ni sngags 'dis dngos grub 'thob bam mi thob ces rnam pa de lta bur gal te byed na'o/ /bskal pa skar ma lta bu bye bar yang zhes pa ni/ ji ltar ji srid du nam mkha' la skar ma gnas pa de srid kyi bskal pa'i grangs su yang dngos grub med ces bya ba'i tha tshig go//de ltar yang / thams cad du ni sprul pa'i sku/ /nyan thos la sogs pa yis mthong / /byang chub sems dpa' rdzogs longs spyod/ /de bzhin chos sku sangs rgyas kyis/ /zhes gsungs so/ / de lta bas na bcom ldan 'das de nyid na bzhugs pa de bzhin gshegs pa dang rnal 'byor ma 'ba' zhig gis mthong ngo / /de ltar thos nas zhes pa la/ /e yi cha byad bzang po gang / /dbus su waM gyis rnam par brgyan/ /bde ba thams cad kyi ni gzhi/ /sangs rgyas rin chen za ma tog /ces so/ /de'i dbus su 'dzag pa ni/ 'dir sru shra ba Na'i skad kyi dbyings kyi sbyor ba las so/ /des cir 'gyur zhe na/ gang gi tshe na byang chub kyi sems 'dzag pa de'i tshe thams cad mkhyen par 'gyur zhes sbyar ro/ /rnal 'byor ma sna tshogs sde ma zhes pa ni gsang ba na gnas pa'i rtsa'o//de'i sna tshogs ni ngo mtshar byed pa ste/ rtsa thams cad kyi tshogs 'dus pa zhes pa'i tha tshig go/ /de'i bde ba chen po nyams su myong ba ni rnal 'byor ma'o zhes brjod par bya'o/ /thabs dang bral ba'i rnal 'byor ma ni med de/de ltar yang / ma mo mi yi gzugs kyis te/ /mkha' 'gro ma ni 'gro dang tshul/ /rnal 'byor ma ni thabs dang ldan/ /dkyil 'khor las ni rtag tu spro/ /zhes gsungs so/ /de nyid kyi phyir sna tshogs sde ma la bcom ldan 'das 'khyud de bzhugs so//bcom ldan 'das kyi zhal la zhes bya ba ni/ zhal dbu ma bde ba chen po'i rang bzhin no/ /lta bar byed ces bya ba ni/ nyams su myong bar byed ces bya ba'i tha tshig go/ /zur mig dang bcas pa la sogs pa ni go sla'o/ /bdud kyi dpung rab tu bcom mo zhes pa la/bdud ni dbang po la sogs pa ste/ de rnams kyi rnam par rtog pa'i tshogs bcom mo zhes bya ba'i tha tshig go/ /slar yang khyad par ji lta bu zhig dang ldan zhe na/ gsungs pa de ltar bzhugs pa'i lha mo zhes pa la/ de ltar gsang ba chen po'i gnas sprul pa'i 'khor lo dang / chos kyi 'khor lor rol pa ni lha mo'o//des cir 'gyur zhe na/ thabs dang shes rab dag yang dag par 'dus pas bde ba myong bar 'gyur ro/ /rgyud thams cad kyi bdag po zhes pa la/ rgyud kyang yin la thams cad kyang yin pas rgyud thams cad de 'dus pa la sogs pa'o/ /de rnams kyi bdag po dbang phyug ni sna tshogs sde ma'o//yang na rgyud thams cad kyi sgras ni a la sogs pa'i dbyangs yig bcu drug longs spyod ni gnas pa gzung ste/ des na rgyud thams cad kyi sgras longs spyod kyi 'khor lo yang dag par bshad do/ /rgyud thams cad kyi bdag po ni bde ba chen po'i 'khor lo'o//de'i dbang phyug ni gtum mor yang dag par bshad do/ /'di dag gis ni sngags kyi de nyid rab tu bshad pa yin no/ /gzigs pa tsam gyis zhes pa ni gtum mo bsgoms pas sngags 'grub par 'gyur ro zhes gsungs so/ /bcom ldan 'das kyi dbu las sngags byung ngo zhes pa ni byang chub kyi sems kyi sa bon no//lus skyong bas na thod pa'o/ /kaM ste yul skyong bas na thod pa'o/ /kaM ni bde ba skyong ba ste/ byang chub kyi sems kyi sa bon mi shigs pa haM ngo / /de'i gnas nas sngags byung bar 'dod do/ /las rnams bzhir ni rnam gzhag pas//mi shigs pa yi gzugs rnams bzhi/ /lus 'di kha dog rnam bzhi yis/ /las rnam bzhi ni rab tu sgrub/ /ces so/ /slar yang / A li kA li rab sbyor bas/ /de yi sa bon yang dag btu/ /smin dbus gnas kyi thig le yi//sa bon ye shes can gyis bsgom/ /zhes gsungs so/ /de nyid kyi phyir sngags thams cad kyi gnas mi shigs pa'i yum mo/ /gnas der sems btags pa'i sngags spros pas/ dngos grub thob po zhes sbyar ro/ /sngags gang yin zhe na de nyid gsungs pa/oM bud+d+ha zhes bya ba la sogs pa'i sngags rkang pa brgyad pa'o/ /byung zhes pa ni song ba'o/ /gang du song zhe na de nyid gsungs pas rim pa bdun gyi 'og tu chud pa zhes bya ba ni/ ri mo bdun po de la thim par gyur pa ste/ de ni ka la sogs pa'i rang bzhin no//de nyid las sngags 'phro zhing de nyid du thim mo/ /klu rnams bcom par byas zhes bya ba la/ klu rnams zhes bya ba la sogs pa ni sgra ji bzhin no/ /yul dang dbang po dang rnam par shes pa bcom zhing brlag par byas zhes pa'i tha tshig go/ /slar 'ongs te zhes pa ni slar ri mo de la 'ongs pa ste zhugs zhes bya ba'i tha tshig go//sna tshogs sde ma zhes pa ni a wa d+hU tI'i nang du chud pa'o/ /zhal zhes pa ni rang bzhin gyis phra ba'i gnas su rlung gi rab tu dbye bas sngags zhugs par bsam par bya'o/ /pad+ma'i nang nas byung nas zhes pa ni/ pad+ma'i nang du chud pa'i thig le las byung zhing 'thon to zhes pa'i tha tshig go//slar thod par zhugs zhes pa la thod pa ste/ mi shigs pa'i rtsar phra ba'i dngos po zhugs par bsam par bya'o/ /yang na sna tshogs sde ma la sogs pa ni sgra ji bzhin du shes par bya'o/ /rdul byung zhes pa ni/rtsa stong phrag bdun cu rtsa gnyis las byang chub kyi sems 'phro bar 'gyur ba'o/ /nor rgyas la sogs pa'i klu zhes pa ni go bar sla'o/ /de ltar yang / bde chen 'khor lo las ni brgyad/ /longs spyod 'khor lo las de bzhin/ /chos kyi 'khor lo las ni bzhi/ / de bzhin sprul pa las bcu gnyis/ /zhes gsungs so/ /de ltar rtsa sum cu rtsa gnyis las byang chub kyi sems thams cad 'bab bo/ /de ltar yang / gang tshe byang chub sems kyis ni/ /rtsa 'di dag ni gang gyur pas/ /de yi rjes su sangs rgyas dang / /rdo rje 'chang ba nyid thob 'gyur//zhes gsungs so/ /rnal 'byor ma sna tshogs sde ma la kha phyogs te zhes pa ni rnal 'byor ma chen po'i mdun du kha bltas pa'o/ /klu thams cad ces bya ba ni/ nor rgyas la sogs pa'o/ /zhus pa zhes pa ni yang dag par gsol ba'o/ /snying na gnas pa'i rtsa brgyad po de rnams ni klu brgyad kyi rang bzhin no//dbus kyi thig le'i gzugs ni sna tshogs sde ma dang ldan pa'i bcom ldan 'das so zhes bya ba'i tha tshig go/ /lha mo bka' ci zhig stsol zhes te/ lha mo sna tshogs sde ma bka' stsol cig ces pa'o/ /sangs rgyas nyams su myong ba zhes pa la sangs rgyas ni phung po lnga ste/de rnams kyi rjes su ni phyis 'byung ba'o/ /des na gang nyams su myong bar 'gyur ba de gyis shig pa'o/ /de ltar thos pa tsam zhes pa ni/ e waM yang dag par sbyor ba ste/ byang chub kyi sems spros pa tsam gyis so/ /gnas gang du zhe na/dkyil 'khor chen po'i rgyan dang ldan pa'i dbus su ste 'khor lo bzhi'i dbus su'o/ /gang las zhe na/ bcom ldan 'das las te/ bcom ldan 'das thig le'i gzugs su snang ba las zhes pa'i don to/ /thod pa kha phye ste zhes pa la thod pa ni bshad zin to//A li kA li'i rang bzhin gyi thod pa kha phye zhing gsang zhes pa'i tha tshig go/ /glegs bam zhes pa ni chos thams cad gcig tu bsdus pa'o/ /yang na glegs bam ni byang chub sems te/ pU n-i pU li ra'i gnas te spyi bo'o/ /ke ni bde ba'o/ / ta ni de rgyas par byed pa ste/ des ni thig le'i gzugs mi shigs pa'i yid lta bu ni glegs bam mo/ /byung po zhes pa ni spros pa'i tha tshig go/ /nam mkha' las sgra byung ngo zhes pa la/ nam mkha' ni chos kyi 'byung gnas so/ /sgra ni sgra tsam ste/ rdo rje dang pad+ma yang dag par sbyor ba las byung ba rdo rje zhes pa'i bar du'o//glegs bam byung ba'i dus su nam mkha' la lha rnams kyis rol mo'i sgra sna tshogs sgrogs par byed do/ /lha mo sna tshogs sde ma zung / /zhes pa la lha mo ni bod pa ste/ kye lha mo glegs bam zung zhes pa'i don to//sems can kun la phan 'dogs ma/ /zhes pa ni sems can thams cad la phan par mdzad ma zhes pa'i don to/ /rgyud 'di rgyal po chen po ste/ /zhes pa ni 'dus pa la sogs pa'i rgyud rnams kyi nang na rgyal po ste gtso bo'o zhes pa'i tha tshig go/ /rgyud kyi khyad par ji lta bu zhe na/de nyid gsungs pa/ rnal 'byor ma yi gong na med/ /ces pa ni/ spyan ma la sogs pa'i ngag gi lam las 'das pa'i rang bzhin no/ /rgyud kyi mtshan ci zhe na/ sangs rgyas thod pa'o/ /sangs rgyas ni rdo rjer gsungs la/ thod pa ni pad+mar bshad de/chos kyi 'byung gnas zhes pa'i don to/ /de nyid kyi phyir thabs dang shes rab kyi rgyud ces pa'i tha tshig go/ /de ltar thos nas zhes pa ni shes rab dang thabs kyi rang bzhin gyi byang chub kyi sems spros pa'o/ /sna tshogs sde ma zhes bya ba la sna tshogs ni ngo mtshar ro/ /sde ni bde ba chen po zhes pa'i tha tshig go//des cir 'gyur zhe na glegs bam yang dag par bzung ste zhes pa la/ pU ni pU li ra'o/ /kaM ni su ka ste mi shigs pa'o/ /ta ni rgyas par byed pa ste/ byang chub sems kyi glegs bam yang dag par bzung ste/ 'gro ba gang yin pa de ni sna tshogs sde ma zhes pa'i tha tshig go//phyag na rdo rje la nye bar gtong zhes pa la rdo rje ni mi phyed pa'o/ /de'i phyag gang la yod pa de ni phyag na rdo rje'o/ /de'i drung du song ste/ nye bar gtong zhes pa'i tha tshig go/ /ci'i phyir 'gro zhe na phyag na rdo rje la gsang ba'i dbang sbyin pa'i don du zhes bya ba'i tha tshig go//sems can kun la bde 'bab pa/ /zhes pa ni sems can thams cad la bde ba 'bab par byed pas na/ sems can kun la bde 'bab pa/ /zhes pa'i don to/ /dngos grub kun zhes pa ni dngos grub thams cad ster zhes pa'i don to/ /gang dag gi zhe na rnal 'byor ma rnams kyi zhes smos te/rnal 'byor pa rnams la zhes bya bar sbyar bar bya'o/ /'bras bu myur du ste zhes pa la byang chub kyi sems de nyid kyis phyag rgya chen po'i dngos grub ster bar 'gyur ba'o/ /mnan dang spar dang ye shes che/ /zhes pa la mnan pa'i sgra ni shes rab kyi pad+ma'o//spar ba'i sgra ni rdo rje zhes pa'i don to/ /rdo rje dang pad+ma dag la skyes pa'i ye shes gang yin pa de ni ye shes chen po ste/ lhan cig skyes pa'i rang bzhin zhes pa'i tha tshig go/ /ye shes de'i khyad par ji lta bu zhe na/ gong na med pa zhes pa ste/ ngag gi lam gyi spyod yul las 'das pa'o//rnyed par dka' zhes pa ni rtsa bskyod pa las shes par bya'o/ /'di dag gis ni rang rig pa tsam bstan to/ /de ltar yang / rtag tu 'dod pa bstan bya zhing / /chu yi mchog kyang btung bar bya/ /chos bsten chos min spang bar bya/ / 'di ni pho mo'i brtul zhugs so/ /zhes gsungs so/ /nyan thos la sogs pas dka' ba spyad kyang ming tsam yang mi rnyed do zhes bya ba'i tha tshig go/ /gsang ba zhes pa la gsang ba'i sgras ni chos kyi dbyings kyi tshul gyis khyab par byed cing de bzhin gshegs pa thams cad de las byung bas na gsang ba ste/nyan thos la sogs pa'i spyod yul ma yin pas na gsang ba'o/ /mchog ces bya ba ni phul du byung ba'i ye shes dam pa'i phul lo/ /nyams dga' zhes bya ba ni dga' ba la sbyor bas nyams dga'o/ /lus kun la ni rnam par gnas/ /zhes pa ni lus can thams cad kyi snying gi dbus na bde ba chen po'i gzugs kyi rnam par gnas par 'gyur ba'o//de'i las gang yin zhe na/ de nyid gsungs pa nam mkha'i lding la sogs pa'i las bcu gnyis su 'gyur ro/ /sna tshogs sngags rim ji bzhin dang / /zhes pa ni rnam pa sna tshogs pa'i bag chags las yid skyo bar byed pas sna tshogs sngags zhes pa'i don to//rim ji bzhin zhes pa ni sngags kyi go rims ji lta ba bzhin 'byung zhes pa'i tha tshig go/ /ji bzhin rnal 'byor ma skyes dang / /zhes pa la/ rnal 'byor ma ni gshin rje mche ba ma la sogs pa'o//de rnams kyi ji ltar 'byung ba ni go rims ji lta ba bzhin du phyogs dang mtshams su bskyed ces pa'i tha tshig go/ /dpal chen he ru ka'i zhes pa la/ he ni rgyu sogs spangs pa'o/ /ru ni gzugs bcom pa'i don to/ /ka ni gang du'ang mi gnas pa ste/ A li kA li mnyam par sbyor ba'i byang chub kyi sems bde ba chen po'i rang bzhin ni dpa' bo chen po dpal he ru ka zhes pa'i don to//dang ni sdud pa'o/ /bskyed pa dang ni gnas rgyu dang / /zhes pa ni mngon par byang chub pa lngas he ru ka bskyed cing bzhengs pa zhes pa'i don to/ /de'i gnas pa'i rang bzhin de nyid rgyu ste bla na med pa yang dag par rdzogs pa'i byang chub kyi rgyu dang 'bras bu zhes pa'i tha tshig go//dngos dang dngos med ces pa la/ bcom ldan 'das ni dngos po'i ngo bo ste/ dngos po med pa'i ngo bo yang de'o/ /rnam pa kun gyi mchog dang ldan pa stong pa nyid kyi mtshan nyid ces pa'i tha tshig go//de ltar yang dpal gsang ba 'dus pa las/ dngos po thams cad dang bral zhing / /phung po khams dang skye mched dang / /gzung dang 'dzin pa rnam spangs pa/ /chos bdag med pa mnyam nyid pa/ / rang sems gdod nas ma skyes pa/ /stong pa nyid kyi rang bzhin no/ /zhes gsungs so/ /lang kar gshegs pa las kyang / ji ltar byis pas rnam brtags pa'i/ /phyi yi don ni yod pa min/ /'dod chags kyis ni sbags pa'i sems/ /don du snang ba rab tu skye/ /zhes gsungs so//de ltar na dngos po med pa'i rang bzhin bcom ldan 'das zhes pa'i tha tshig go/ /spros med ces pa ni spros pa dang bral ba'i phyir na spros pa med pa'o/ /srid par spyod cing gos pa med/ /ces pa ni/ srid pa'i 'khor bar spyod par byed pas na srid par spyod pa'o/ / dgongs pas bshad pa zhes pa nas ral gri zhes pa'i mthar thug pa'i las bco brgyad por 'gyur ba de ji ltar bsgrub par bya zhe na gsungs pa/ sangs rgyas thod pa'i sbyor ba yis/ /zhes pa la/ sangs rgyas ni rdo rjer gsungs la thod pa ni pad+ma nyid do/ /de dag gi sbyor ba'i bsam gtan gyis 'grub par 'dod pa'o//mi snang ba zhes pa ni lha dang mi rnams kyis mi mthong ba'i don to/ /sna tshogs rdzu 'phrul rnam 'phrul dang / /zhes pa la/ sna tshogs rdzu 'phrul ni sna tshogs pa'i cho 'phrul te rnam pa sna tshogs pa byed par 'gyur ba'o/ /rang gi gzugs su bsgyur ba dang /zhes pa la rang gi gzugs kyi rang bzhin bsgyur zhing gzhan gyi gzugs su byed pa ste/ gzugs sna tshogs par sprul par byed pa'o/ /gzhan gyi lus la gzhug sogs dang / /zhes pa la/ gzhan gyi lus ni gzhan gyi khog pa ste der 'jug par byed pa'o//sogs pa'i sgras ni gong du 'pho ba zhes pa'i tha tshig go/ /las kyi tshogs ni gzhung rgyas pa'i 'jigs pas ma bris te/ gdan bzhi pa dang rdo rje mkha' 'gro'i rgyud dag las bla ma'i man ngag gis shes par bya'o/ /sangs rgyas bye bas rab gsungs pa/ / zhes pa la sangs rgyas bye ba ni rdo rje 'chang la sogs pa'o/ /rab gsungs pa ni lhan cig skyes pa'i gzugs can gtum mo bsgom pa'o/ /sangs rgyas bu mo zhes pa ni sangs rgyas dang rdo rje 'chang bu mo lhan cig skyes pa'i gzugs can ma ste/ bu mo de yang mchog chen mo'o/ /khros pa tsam gyis 'gugs byed na//zhes pa ni/ chags pa'i sbyor bas gtum mo sbar te/ byang chub kyi sems 'dzag pa ni 'gugs pa yin no/ /sangs rgyas bu mo zhes pa ni sprul pa'i 'khor lo'i a bsgom pa'o/ /sangs rgyas bye bas zhes pa la ko Ti ni rtse mo ste chos kyi 'khor lo'i thig le'i gzugs phra mo'o//sangs rgyas zhes pa ni de bzhin gshegs pa'i sa bon rnams so/ /rab srung zhes pa ni yongs su bskor zhes pa'i the tshig go/ /chos dang sprul pa dag bsgom pas gong du 'pho ba dang / gzhan gyi lus la 'jug par byed ces sbyar ro/ /gzhan dag smos lta ci zhig dgos//zhes pa la/ gzhan ni sprul pa dang chos dag las gzhan pa'i longs spyod kyi 'khor lo cha bcu drug dang ldan par bshad do/ /smos lta ci zhig dgos zhes pa ni mchog rab kyi haM ngo / /'khor lo gang la yod pa'i 'khor lo de ni bde ba chen por gsungs so//'khor lo bzhi bsgoms pas sems brtan par gyur na sangs rgyas thod par gang gsungs pa de thams cad 'grub ces bya ba'i don to/ /de ltar yang / sa gnyis dag la sems byed pa/ /'di ni grol bar rab tu grags/ /zhes gsungs so/ / mig 'phrul zhes bya ba la sogs pa ni go sla'o/ /'dod pa lnga ni bsten bzhin pas/ /zhes pa la/ 'dod pa lnga dbang po lngas bsten par bya zhing nyams su myong bar bya'o/ /de gang yin zhe na/ gzugs dang sgra la sogs pa'o/ /de rnams 'dod par bya bas na 'dod pa ste/des rnal 'byor ba 'grub pa yin no/ /'jigs shing 'joms pa'i rtsod chen po/ /zhes bya ba la sogs pa ni go sla'o/ /'dzag byed cing zhes bya ba ni/ bud med rnams las 'dzag par gsungs so/ /de ltar yang / khro bo'i mdzub mo'i rtse mo la//bdud rtsi'i yi ge bsams pa dang / /lte ba bya gdong mdzub rtse la/ /sbyor ba gsum po bsams nas ni/ /mdzub mo de yis bsgul bya zhing / /yang dag man ngag bsgom par bya/ /zhes gsungs so/ /sangs rgyas thod pa zhes pa la sangs rgyas thod pa'i rgyud 'ba' zhig tu gsungs kyi rgyud gzhan du ni ma gsungs so//rdo rje mgon po zhes pa la rdo rje ni gnyis su med pa'i ye shes te shes rab kyi rang bzhin no/ /mgon po ni thabs so/ /de gnyis kyis na thabs dang shes rab bo/ /bsam gtan 'di nyid kyis khams bco brgyad rnam par dag pa'i sbyor ba bco brgyad 'grub ste/sbyor ba bco brgyad po de nyid gsungs pa/ sha li ka'i sbyor bas zhes pa la/ klu dgug pa'i don du ri skegs mngag 'dab ces pa'i tha tshig go/ /rig pa 'dzin pa ni dug bsal ba'i don du rig pa 'dzin pa'i skyes bu'i gzugs su sprul zhes pa'i tha tshig go//rgyan po zhes bya ba ni cho lo rtse bas dug sel ba'o/ /rnga brdung zhes pa ni rnga brdung bzhin pas dug sel ba'o/ /bud med 'brog ces pa ni dug gis zin pa'i skyes bu'i chung ma phrogs pas dug gis zin pa'i skyes bu langs par 'gyur ba'o/ /shing bsnun pa zhes pa ni ka ra bI ra'i lcug ma la mngon par bsngags te/des mgo bo dang rkang pa'i mthar thug par reg par bya ba'o/ /dang ni sdud pa'o/ /zhags pas 'ching ba zhes pa ni/ thag pa zhags pa'i rnam pa lta bus mgrin par bcings te dgug par bya'o/ /khu byug ces pa ni/ khu byug gi sgra bton pas dug gis zin pa sangs par 'gyur ba'o//pad+ma 'byed pa zhes pa ni longs spyod kyi 'khor lo'i rtsa gnyis mnan pas dug sel ba'o/ /stag byed ces pa ni stag gi rnam pa'i tsham rngam bya ba'o/ /chu zhes pa ni chus dug sel ba'o/ /dung zhes pa ni dung chus bkang ste dug gis zin pa'i spyi bor blugs pa'o//thod lo kor 'phrog ces pa ni thod lo kor gyis dug gis zin pa'i ming bris na dug sel bar byed ces sbyar ro/ /skyug pa zhes pa ni dug slon pa'i tshul du byed pa'o/ /ras g.yogs zhes pa ni ras yug chen gyis dug gis zin pa g.yogs na dug sel to//thal lcag brdab ces pa ni dug gis zin pa la thal lcag drag tu brdab pa'o/ /yig gsum zhes pa ni/ ha hoH hrIH ste yi ge 'bru gsum mo/ /'dis dug sel bar byed do/ /bsam gtan gyi ni gtam zhes pa ni dkar po'i bsgom pa'i gtam gyis dug nyams par byed pa'o//'di rnams kyis ni dgug par bya/ /zhes pa ni/ sbyor ba bco brgyad po 'di rnams kyis dug sel bar byed do/ /rdo rje mgon po zhes pa ni rdo rje 'chang chen po byang chub kyi sems kyi rang bzhin no/ /de nas zhes pa ni rgyu des na nang gi rnal 'byor gsungs pa'o//rab bshad ces pa ni gang gi tshig yin zhe na/ sna tshogs sde ma'o/ /de ni sna tshogs sde mas gsungs so/ /ci zhig gsungs she na/ mchog gi ye shes pa ste/ ye shes kyi rol zhing rtse bas na mchog gi ye shes so/ /des na rab bshad ces pa dang sbyar ro//b+ha ga'i dbus su rnam par bzhugs/ /zhes pa ni/ e'i cha byad kyi sprul pa'i 'khor lor a thung ngu'i rnam par gnas pa ste/ ka la sogs pa sde bdun gyi ri mo'i rnam pas yongs su bskor ba'o/ /bde ba chen po ster byed pa/ /zhes bya ba ni/ gnas der bsgoms pa tsam gyis bde ba chen po ster byed par 'gyur ba'o//'di nyid du ni kun gnas kyang / /zhes pa ni nam mkha' lding dang / dngul chu dang / bcud kyis len la sogs pa der bsgoms pa tsam gyis grub kyi gzhan du ni ma yin no/ /dkyil 'khor bzang po zhes pa la dkyil ni snying po'o//'khor ni len pa ste dkyil 'khor ro/ /mdzes par byed pas na bzang po ste mchog ces pa'i tha tshig go/ /slob ma dbang bskur zhes pa la gnas de nyid du slob ma dbang bskur ba sbyin par bya ste/ bla ma'i man ngag las khong du chud par bya zhes pa'i tha tshig go//he ru ka dpa' bo zhes pa ni dbang bskur ba'i rjes thogs su bla mas bstan pa ste/ gnas de nyid du he ru ka bsgom par bya zhes sbyar ro/ /khyad par ji lta bu'i he ru ka bsgom zhe na/ gsungs pa/ nyi shu rtsa bzhi'i dbang gtso bo/ /zhes pa ni nyi shu rtsa bzhi'i rang bzhin gyi lha mo rnams kyis bskor ba'i bcom ldan 'das bsgom par bya zhes sbyar ro//der ni nam mkha' lding 'jigs pa/ /zhes bya ba la sogs pa ni go sla'o/ /phyag rgya chen po grags chen po/ /zhes pa ni/ a thung ngu'i rang bzhin phyag rgya chen po'i don du grags pa dang ldan par 'gyur ba'o//dngos grub kun gyi 'dod byed ma/ /zhes pa ni 'dod pa dang ldan pa la sangs rgyas nyid 'grub par 'gyur ba'o/ /dbang bskur ba'i don du phyag rgya'i tshogs gsungs pa la/ ma zhes pa ni/ dang po shes rab ma mthong ba las dga' ba tsam skye bas na ma'o//tsha mo zhes pa ni rdo rje dang pad+ma'i 'jug pas mchog tu dga' ba'i rnam par dbye ba ston pas na tsha mo'o/ /sring mo zhes pa ni thabs rnam pa sna tshogs pas pad+mar rten par byed pas na sring mo'o/ /bu mo zhes pa ni/ gnas bco brgyad nas lhan cig skyes pa 'tsho bas na bu mo'o//bud med rab brtan ma zhes pa ni/ mchog tu dga' ba'i dus su ngo mtshar chung ba'i dus med de yang dag pa'i bde bsgrub pa'i don gyis na/ mchog tu gyur pa ste/ rig ma bzhi dang mnyam par sbyor bas bde ba nyid bsgrub par bya zhes pa'i tha tshig go//'gro ba drug ces pa ni/ 'gro ba drug tu 'jug pa rnams kyis bde ba nyid sgrub mod kyi/ 'on kyang byis pa rnams kyi ni zag pa dang bcas pa'o/ /'phags pa rnams kyi ni zag pa med pa'o/ /'on kyang bde ba 'ba' zhig sgrub kyi gzhan ni med do/ / de bas na sgrub thabs du ma'i rjes su 'brangs te/ bde ba'i don nyid bsgrub par bya'o/ /'on kyang byis pa rnams kyi ni ji srid du bde ba de srid du rang bzhin gyis rnam par dag pa nyid yin no/ /de ltar yang / bde ba yis ni bde ba bsgrub/ /rgyu bde bas ni 'bras bu bde/ / zhes gsungs so/ /'khor ba mya ngan 'das pa nyid/ /ces pa ni/ 'khor ba dang mya ngan las 'das pa rnal 'byor pas dbyer med par nye bar spyad par blta bar bya'o/ /gal te tha dad par byas na nyes pa ci yod ce na/ bde ba med pa dang dngos grub med par 'gyur ba'o/ / 'char dang nub pa zhes pa ni/ byang chub kyi sems 'char ba'i tshe dbang po thams cad nub par 'gyur ba'o/ /sems can kun la bde ba 'bab/ /ces pa ni/ sems can thams cad la bde ba ster ba'i sna tshogs sde ma de ni rtsa yin no/ /sna tshogs sde ma btang ste/ gang de kho na nyid la re ba ni ci yang 'grub pa med do//de ltar yang / blo dman byis pas rang gi lus btang na/ /de ni 'dod pas gzugs brnyan tshol bar 'gyur/ /ljon shing 'bras bu smin pa bor nas ni/ /de ni sa bon rgyud khrid dus la sdod/ /ces gsungs so/ /glegs bam zhes bya ba la sogs pa ni go sla'o//sangs rgyas zhes bya ba ni gnyis su med pa'i ye shes te/ rdo rje dang pad+ma'i sbyor bas mtshon par bya'o/ /sangs rgyas rdo rje zhes pa la/ rdo rje ni gnyis su med pa'i ye shes so/ /sangs rgyas ni thabs kyi rang bzhin te gnyis su med pa'i ye shes kyi rang bzhin bsgom par bya zhes pa'i don to//thod pa gru gsum yang dag byung / /zhes pa la/ lus skyong bas thod pa'o/ /grong skyong bas na yang thod pa'o/ /bde ba chen po'i 'khor lo gru gsum pa las yang dag par byung bas na gru gsum yang dag byung ngo / /sbyor ba zhes pa ni thabs dang shes rab kyi bdag nyid kyi sbyor ba bsgom par bya zhes pa'i tha tshig go//gnas gang du bsgom par bya zhe na/ de nyid gsang bar gnas pa'i rtsa/ /zhes gsungs te/ gsang ba'i sprul pa'i 'khor lor gnas pa'i rtsa'o/ /de'i khyad par ji lta bu zhe na/dbyangs yig lnga pa klu dbang lta bu'o/ /de ni sgra tsam gyi rang bzhin no zhes pa'i tha tshig go/ /de'i sna tshogs zhes pa ni mtshon par bya ba'i gnas der rnam par rtog pa las sems skyob pas na sna tshogs so/ /ngo mtshar byed ces pa ni dngos grub sna tshogs pa sgrub par byed pa'i thabs kyis 'jig rten pa ngo mtshar byed ces pa'i tha tshig go//sde ni bde chen ye shes so/ /zhes pa ni rtsa stong phrag bdun cu rtsa gnyis kyi sde'i tshogs las bde ba chen po'i ye shes nyams su myong ba zhes pa'i tha tshig go/ /'di nyid theg pa chen po ste//zhes pa ni theg pa yang yin la chen po yang yin pas na theg pa chen po ste/ rnam pa bdun zhes pa'i tha tshig go/ /rnam pa bdun ni don rnam pa bdun te/ brgyad pa'i mtshan nyid ni brjod par mi nus pa'o/ /rnal 'byor ma yi rtsa las byung / /zhes pa ni/ rtsa yi rang bzhin rnal 'byor ma//zhes pa'i tha tshig go/ /de ni rmad byung chen po ste/ /zhes pa ni gnas der byung ba'i byang chub kyi sems ni che ba'i mchog ces pa'i don to/ /sangs rgyas zhes pa la sogs pa ni go sla'o/ /de nyid he ru ka dpa' bo/ /zhes pa la he ru ka'i sgras yi ge gsum gyi bdag nyid sku gsung thugs so//dpa' bo ni 'dod chags la sogs pa dang bral ba zhes pa'i don to/ /'khor ba'i 'jigs las sgrol byed pa/ /zhes pa ni 'khor ba'i 'jigs pa las sgrol bar byed pa bcom ldan 'das he ru ka'o zhes pa'i tha tshig go//sangs rgyas thod pa'i sbyor ba zhes pa ni/ rdo rje dang pad+ma yang dag par sbyor bas he ru ka'i rang bzhin lhan cig skyes pa bsgom par bya zhes pa'i tha tshig go/ /sangs rgyas kun gyi bde 'bab pa/ /zhes pa la/ sangs rgyas kyi sgra ni mig la sogs pa ste/ de dag thams cad sangs rgyas kyi rang bzhin rtag tu bde ba 'bab pa'o//rnal 'byor chen mo sna tshogs sde/ /zhes pa la/ rnal 'byor ma sna tshogs sde ni a'i rang bzhin no/ /khyad par ji lta bu dang ldan pa zhig ce na/ ta dang pa sbyar ba'i yi ge ni ma yin gyi/ ta dang ra sbyar ba'i yi ge a zhes pa'i tha tshig go//ta'i sgra ni byang chub kyi sems so/ /ra ni chags pa'i rang bzhin te/ de nyid kyis na khrag dang khu ba'i rang bzhin no zhes pa'i tha tshig go/ /de ni thod pa'i dkyil 'khor la/ /zhes pa la/ thod pa ni sprul pa'i 'khor lo'o/ /de nyid dkyil 'khor de dkyil ni snying po'o//'khor ni len pa ste dkyil 'khor ro/ /sngags dang rgyud ni rnam par gnas/ /zhes pa ni yid skyob par gyur pa'i phyir na sngags so/ /des sems rnam par rtog pa las skyob par byed pas na rgyud do/ /sngags dang rgyud mtha' dag gi don rnam par gnas pa ste/ rnam pa sna tshogs pa gnas zhes pa'i tha tshig go//de ye shes bzang po zhes pa ni shes pas ye shes so/ /mdzes pas na bzang po'o/ /de nyid kyis ni ye shes bzang po mchog ces pa'i tha tshig go/ /lhan cig skyes pa dag las byung / /zhes pa ni rdo rje dang pad+ma yang dag par sbyar ba las lhan cig skyes pa'i dga' ba skyes pa'o//dag pa las byung bas na dag byung ngo / /der ni rig pa'i dbang lnga dang / /zhes pa ni/ sprul pa'i mdud par thig le la 'od zer lnga yod pa de ni dbang lnga'i rang bzhin no/ /sangs rgyas bdun gyi mtshan can te/ / zhes pa ni gnas der sangs rgyas bdun gyi rang bzhin gyi ri mo bdun gyis bskor ba'o/ /ri mo bdun po phra ba'i rang bzhin 'bar ba'i bsgom pa gsungs pa/ gang gi tshe rlung 'byung ba de'i tshe ri mo bdun 'byung bar bsam par bya'o/ /gang gi tshe 'jug pa de'i tshe thig le phra mo la rang gi sems 'jug par bsgom par bya'o//de nyid dbang bskur zhes pa'i tha tshig go/ /bsgom bzhin pas na bskyed pa'i ye shes gang yin pa de ni lhan cig skyes par gsungs te/ dbang bskur ba bdun zhes pa'i tha tshig go/ /yang sangs rgyas bdun gyi mtshan can zhes pa ni/sangs rgyas bdun ni rnam par gzigs dang / gtsug tor can la sogs pa ste bsam gtan 'dis sangs rgyas bdun 'grub ces pa'i tha tshig go/ /sna tshogs sbyor dang zhes pa ni/ dngos grub kyi sgrub thabs la sogs pa'i sbyor ba sna tshogs pa 'grub pa'i tha tshig go//tshe 'phel zhes pa ni tshe 'phel ba'i sbyor ba gsungs pa/ gang gi tshe rlung 'jug pa de'i tshe a'o/ /gang gi tshe rlung 'byung ba de'i tshe hUM bsam par bya'o/ /'di ni thabs dang shes rab kyi bzlas pa ste/ des tshe 'phel gyi gzhan du ni ma yin no/ / sangs rgyas thod pa'i sbyor ba yis/ /zhes pa ni rdo rje dang pad+ma yang dag par sbyor bas thams cad sgrub ste/ gzhan du ni ma yin no/ /man ngag lam las gang shes pa/ /zhes pa la/ 'dis lung 'bogs par byed pas na man ngag go/ /tshol bas na lam mo/ / gang shes pa zhes pa ni/ khyod kyis gang gsungs pa de thams cad shes par bya zhes pa'o/ /de nyid gsungs pa/ bla ma'i drin las zhes pa la/ bla ma ni rgyud dang sngags ston par byed pas na ston pa'o/ /de'i drin gyis de kho na nyid shes par bya zhes pa'i tha tshig go/ /sangs rgyas thod pa'i rgyud chen po//zhes pa la thabs dang shes rab kyi bdag nyid kyi rnal 'byor ni sangs rgyas thod pa zhes brjod do/ /rgyud kyang yin la chen po yang yin pas na rgyud chen po'o/ /rnal 'byor ma'i gong na med pa zhes pa ni rnal 'byor ma rtsa'i rang bzhin rnams kyi gong na med pa ste/ngag gi lam gyi spyod yul las 'das pa zhes pa'i tha tshig go/ /gsang ba zhes pa ni thabs kyi rang bzhin no/ /shin tu gsang ba zhes pa ni shes rab kyi rang bzhin no/ /dngos grub thams cad ces pa ni/ sangs rgyas thod pa'i sbyor bas dngos grub thams cad ster gyi gzhan du ni ma yin no//ye shes gtan la dbab pa zhes pa la shes pas na ye shes so/ /le'u gang la ye shes gtan la dbab pa yod pa'i le'u de ni ye shes gtan la dbab pa'i le'u'o/ /thod pa kha bye ba las zhes pa la/ thod pa ni bde ba chen po'i 'khor lo'o//kha phye ba zhes pa ni gsang ba zhes pa'i tha tshig go/ /glegs bam byung zhes pa ni/ yang dag par byung zhes pa'i tha tshig go/ /le'u zhes pa la sgrib g.yogs gcod pas na le'u'o/ /slob dpon chen po sa ra ha pas mdzad pa'i dka' 'grel ye shes ldan pa las le'u dang po'i bshad pa'o// //de nas zhes pa ni dngos grub thams cad gtan la dbab pa'i rjes thogs su thal ba'i sbyor ba dang / las sna tshogs gtan la 'bebs pa'i sngags kyi le'u gsungs so/ /ji bzhin gsungs pa zhes pa ni sangs rgyas thod pa'i rtsa ba'i rgyud stong phrag bcu gnyis po las ji lta ba bzhin btus pa'i sngags rnam pa nyi shu po de sngags kyi le'u las 'chad par 'gyur ro//mkha' 'gro ma mo 'byung po rnams/ /zhes pa la/ mkha' 'gro ni mkha' 'gro ma la sogs pa'i rnal 'byor ma bzhi 'grub pa'o//ma mo zhes pa ni thabs dang 'brel pa'i ma mo zhes bstan to/ /'byung po zhes pa ni zhi byed la sogs pa 'grub pa'o/ /dad pa brtan pas zhes pa ni rgyud 'di la dad pa brtan pa gang yin pa de ni dad pa brtan pa'o/ /rgyu des na sngags kyi le'u nyon cig ces sbyar bar bya'o//oM bud+d+ha ka pA li ni zhes pa la sogs pa ni go sla'o/ /oM haM zhes pa la sogs pa ni gnas bdun gyi go cha'i sngags so/ /de'i gnas gsungs pa snying ga dang / dpral ba dang / spyi gtsug dang / dpung pa gnyis dang / mig gnyis dang / gsang ba dang / yan lag thams cad kyi gnas su rnal 'byor pa bdag nyid kyis sngags 'dis go cha bya'o/ /go cha'i sngags kyi rjes thogs su dkyil 'khor spyan drang ngo / /de'i rjes thogs su gshegs su gsol lo/ /de'i rjes thogs su gtor ma gtong ngo / / gtor ma gang zhe na/ 'byung po thams cad la'o/ /da ni mi snang bar byed pa gsungs pa/ 'bras sA lu blangs te zhes pa ni/ 'bras dmar po chus lugs so/ /'o mas zhes pa ni ba dkar mo'i 'o mas bkrus zhes pa'i don to/ /gzhon nu ma zhes pa ni nu ma ma mnyes shing pad+ma ma nyams pa gang yin pa de ni/gzhon nu ma ste des 'bras btags par bya'o/ /ji ltar bya zhe na/ de nyid gsungs pa shin tu zhib par btags zhes pa ni 'bras phye mar byas la ras bal gyis btsag par bya ste/ des ni phye ma zhib mor 'gyur ro/ /btags pa 'di las phyag bzhi pa'i khrag 'thung byas te/g.yas na ral gri dang thod pa'o/ /g.yon na cang te'u dang kha T+wAM ga'o/ /rnam pa he ru ka bya'o/ /ro bsregs pa'i sol ba'i phye mas zhes pa ni dur khrod kyi sol ba'i phye ma'o/ /rdo rje gtsug ces pa ni/ dang po khrag dang ldan pa dang snyoms par zhugs pa las byung ba'i byang chub kyi sems gang yin pa de ni rdo rje gtsug ces bya'o//rdo rje gtsug de dang dur khrod kyi sol ba'i phye ma mnye bar bya'o/ /sangs rgyas thod pa'i rnal 'byor pa zhes pa ni he ru ka'i rnal 'byor byas te/ rdo rje dang pad+mo'i yang dag pa'i sbyor ba las/oM ma hA badzra he ru ka zer ba la zhes pa la sogs pa'i sngags bzlas par bya'o/ /chu zhes pa ni nang gi chu ste lan bdun mngon par bsngags la he ru ka'i gzugs brnyan bkru bar bya'o/ /bla ma dang sangs rgyas mchod par byas te gdong bkrus na ji skad gsungs pa bzhin du 'gyur ro//de'i rjes thogs su thal ba'i rab tu sbyor ba gsungs pa/ gzugs brnyan de nyid la shing 'ba' bo las so phug cing shing 'ba' bo la shun phrags bshus pa skam po dang / tshangs pa rdo rje zhes pa'i dri chen skam po dang lhan cig bsreg ste dur khrod kyi me rab tu sbar ba la gzugs brnyan de thal bar bya'o//de nas thal ba de kham phor so ma btang ba la nyi ma bzhi gzhag par bya'o/ /de nas pad+ma'i snod du nyi ma lngar gzhag go/ /de nas zhag dgur sngags kyi bzlas pa bya'o/ /sngags gsungs pa/ oM bud+d+ha ka pA li ni zhes pa la sogs sngags rkang pa lnga pa'o//kham phor so ma btang ba dang / pad+ma dag gi man ngag gsungs pa/ gnyis ka la yang pad+ma 'dab ma bzhi pa bris te/ dbus su ni sna tshogs sde ma'i sngags bri'o/ /'dab ma rnams la ni gzhan gyi sngags bri'o/ /de ltar byas nas thal ba gzhag par bya'o/ / de nas sngags bzlas par bya'o/ /rdo rje gtsug gis zhes pa ni/ rang 'byung dang bsres pa'i byang chub kyi sems dang thal bar bsres te/ lus byug par bya'o/ /de'i lus la mtshon cha phog na yang mi tshugs shing dgra thams cad kyi mgo chad par 'gyur ro/ /skyes bu de la 'gal bar spyod pa tsam gyis longs spyod pa la sogs par 'gyur ro zhes sbyar ro//mar khu bzang pos zhes pa ni/ 'phyang ba'i skyes bu'i mar khu dang / thal ba lhan cig sbyar bas mig la byugs na ji skad gsungs pa bzhin du 'gyur ro/ /gang ci yang rung ba zhes pa la sogs pa ni go sla'o//rdzas su bya bar gsungs pa thal ba dang zha nye'i phye ma dang / rdo rje'i gtsug lhan cig tu cha mnyam par byas la/ de nas khab len gyi lcags kyi phye ma dang / gser gyi phye ma cha mnyam pa yang bsre'o/ /rdo rje mchu'i khu ba zhes pa ni shin tu gnag pa'i phag gi khrag go//zangs ma'i snod ces pa ni snod der nyi ma bdun du gzhag par bya'o/ /mkhris pa chen pos zhes pa ni mi'i mkhris pas mnye bar bya zhes bya ba'i tha tshig go/ /rta'i khrag dang zhes pa ni snod de nyid du nyi ma gsum du mnye bar bya'o/ /lcags kyi snod du zhes pa ni/khab len gyi lcags kyi snod du gzhag par bya ba'o/ /me'i nang du bcug na gser dang dngul du 'gyur ro zhes pa ni/ zangs ma ni gser du 'gyur ro/ /lcags ni dngul du 'gyur ro zhes sbyar ro/ /srang gcig kyang srang stong gi zhes pa la sogs pa ni go sla'o/ /gsang ba 'dus pa la sogs pa'i rnal 'byor gyi rgyud du gang gsungs pa'i sbyor ba des ni 'grub par mi 'gyur ro//rnal 'byor ma'i rgyud du ni gdon mi za ba kho nar 'grub par 'gyur te gzhan du ma yin no/ /glegs bam la ma bris zhes pa ni/ glegs bam bklags pas shes par mi 'gyur gyi bla ma'i drin las shes par bya zhes pa'i don te/bla ma'i drin las shes par bya/ /zhes pa la/ dang po dga' ba ni bla ma'o/ /bla mas dngos grub ces pa ni mchog tu dga' ba ste mchog tu grub pa'i gnas skabs zhes pa'o/ /bla mas thar zhes pa ni dga' bral te rnam pa sna tshogs pas thar zhes pa'i bar du'o//bla ma ston pa zhes bya ba ni lhan cig skyes pa'i dga' ba de nyid ston pa'o/ /ltas blta ba'i don du bu mo zhes pa la sogs pa ni go sla'o/ /bdug spos lngas zhes pa ni go ku da ha na ste sha lnga'i spos kyis bdug par bya'o//bu mo la 'bab ces pa la sogs pa ni go sla'o/ /ral gri'i dngos grub gsungs pa grub don gyi 'bras bu zhes pa ni yungs kar dkar po ste/ bu mo'i thod par bskyed de smin pa'i yungs kar 'di dang / oM bud+d+ha ka pA li ni zhes pa la sogs pa'i sngags bsnyen pa 'bum byas la/yungs kar dang lhan cig bu mo'i gdong la sngags des bsnun par bya'o/ /bsnun ma thag tu sngags kyi mthus ral gri'i dngos grub ji ltar gsungs pa 'grub par 'gyur ro/ /sangs rgyas thod pa'i rnal 'byor pas zhes bya ba la sogs pa ni go sla'o//ri lu'i sgrub pa gsungs pa/ de'i thal ba zhes pa ni de'i thal ba yang dag par blangs pa'o/ /lcags gsum zhes pa ni nyi ma dang zla ba dang byin za ste/ zangs ma dang dngul dang gser rnams rim pa bzhin du dkri bar bya'o/ /de'i tshad gsang ba'i mdzod las/gser dang zla ba zangs ma rnams/ /rig byed gsum bzhi ma sha'i tshad/ /ra ti bdun gsum lnga lhag pas/ /rim pa bzhin du ri lu bcings/ /zhes gsungs so/ /rim pa 'dis dkris na ri lu'i dngos grub 'grub par 'gyur te/ gzhan du ni ma yin no/ /sum cu pa yang 'khor zhes pa la sogs pas che ba'i bdag nyid gsungs pa yin no//thal ba'i sbyor ba 'di dag ni/ /sangs rgyas kyis kyang rnyed par dka'/ /zhes pa ni gang gi phyir sangs rgyas rnams kyis kyang rnyed par dka' na/ gzhan dag gis lta smos kyang ci yod ces pa'i don to//oM bud+d+ha ka pA li dzaH zhes pa la sogs pa 'di ni dbang du byed pa'i sngags so/ /sna tshogs sde ma mdog dmar po bsgom par bya'o/ /oM ma hA ka pA li badzra zhes pa la sogs pa'i sngags kyis skrod par byed do/ /las dang rjes su mthun pa'i sna tshogs sde ma bsgom par bya'o zhes pa'i tha tshig go//sangs rgyas thod pa zhes pa la/ sangs rgyas ni rdo rje'o/ /thod pa ni pad+ma ste/ 'di dag ni rgyud do/ /rgyud kyang yin la chen po yang yin pas na rgyud chen po'o/ /rnal 'byor ma rnams zhes pa ni gshin rje mche ba ma la sogs pa'o/ /gong na med pa zhes pa ni ngag gi lam gyi yul las 'das pa'o//gsang ba'i yang shin tu gsang ba zhes pa la gsang ba ni 'dus pa la sogs pa'o/ /de bas kyang gsang ba ni sangs rgyas thod pa'i rgyud do/ /thal ba'i sbyor ba zhes pa ni thal ba'i sbyor ba bshad pa'o/ / lam sna tshogs gtan la dbab pa zhes pa ni rnam pa sna tshogs pa'i las kyi tshogs so/ /le'u gang la sngags yod pa de ni sngags kyi le'u'o/ /gcig la ltos pas na gnyis pa'o/ /las kyi tshogs du ma'i rjes su lha'i le'u bshad par bya'o/ /de nas zhes pa ni de ma thag tu'o//byang chub sems dpa' sems dpa' chen po phyag na rdo rjes rnal 'byor ma sna tshogs sde ma la 'di skad ces gsol to zhes pa'i don to/ /sangs rgyas kun gyi rab sbas pa/ /zhes pa ni rdo rje sems dpa' la sogs pa'i lha rnams kyis skal ba med pa'i sems can la ma gsungs pa'o//de ni 'bad de zhes pa ni kye ma lha mo nang gi don yang dag pa'i sbyor bas gsal bar mdzod ces pa'i don to/ /ci zhig gsal bar mdzad ce na/ de nyid gsungs pa lha'i le'u zhes pa ste/ he ru ka la sogs pa'i lha rnams bskyed pa'i le'u'o/ / ji lta bu zhes pa ni ji lta bur 'gyur zhes pa'o/ /gang du zhe na/ sangs rgyas thod pa zhes pa ste/ sangs rgyas kyi sgra ni he ru ka'o/ /thod pa ni lha mo'o/ /rnal 'byor ma zhes pa ni thabs dang shes rab dag ji ltar bsgom par 'gyur zhes pa'o/ /rgyud du lha rnams du zhig gsungs//zhes pa ni rgyud 'dir lha'i grangs du zhig gsungs zhes pa'i tha tshig go/ /gzugs ji lta bu zhes pa ni/ lha de rnams kyi mdog dang phyag la sogs pa ji lta bu lags zhes pa'i don to/ /gus pas zhes pa ni zhe sa dang bcas shing gus pa dang bcas pas nyan par 'tshal zhes sbyar ro//gsungs pa zhes pa la a ni lha mo'o/ /ha zhes pa ni he ru ka'o/ /'di dag gi sbyor ba de nyid sbyor ba yin no/ /da ni sna tshogs sde ma'i dkyil 'khor gsungs pa/ raM las nyi ma zhes pa ni bdag dang 'gro ba thams cad stong pa nyid du bsgoms nas byang chub kyi tshogs kyi don du sems tsam du gnas te/de'i snang ba'i raM yongs su gyur pa las nyi ma'i dkyil 'khor de'i steng du hUM ngo / /de nyid phung po lnga'i bdag nyid rnal 'byor ma'i sems so/ /de yongs su gyur pa las rdo rje'i lte bar hUM ngo / /nag po bsreg pa'i bdag ces pa la/ rdo rje de las byung ba'i 'od zer me dang 'od mnyam par 'bar ba'o/ /'od zer de nyid las srung ba'i 'khor lo bsgom par bya'o/ /mtshams bcings zhes pa ni phyogs bcur bcing bar bya'o/ /ra ba zhes pa ni rdo rje'i ra bar bsam pa'o/ /dra ba zhes pa ni nam mkha' gur gyi rnam par bkab pa bdag nyid kyis bsam par bya'o//mtshams bcing ba ni thugs so/ /ra ba ni gsung ngo / /dra ba ni sku ste sku gsung thugs kyi rang bzhin gyi srung ba'i 'khor lo'o/ /rdo rje nag po zhes pa ni hUM dang ldan pa'i rdo rje las rdo rje'i sa gzhi bsgom zhes pa'i tha tshig go//rdo rje sa gzhi'i dbus chud pa/ /zhes pa la/ lhan cig skyes pa'i rdo rje sa gzhi ni sprul pa'i 'khor lo ste/ gnas der gnas pas na/ de'i sa gzhi zhes pa'i don to/ /e yi rnam pa'i bdag nyid che/ /zhes pa la/ e'i cha byad che ba'i bdag nyid ni e'i gnas te/sems can thams cad kyi che ba'i bdag nyid ni bdag nyid che ste de nyid 'tsho ba'i rang bzhin zhes pa'i tha tshig go/ /gru gsum zhes pa ni chos kyi 'byung gnas gru gsum zhes pa'i don te/ chos kyi 'byung gnas de nyid khams gsum pa'i rang bzhin zhes pa'i tha tshig go//yi ge laM gyur pa yis ni/ /dkyil 'khor gru bzhi rab ser ba/ /zhes pa ni yi ge laM yongs su gyur pa las sa'i dkyil 'khor gru bzhi la rdo rjes mtshan pa ste/ de nyid chos kyi 'khor lo'i rang bzhin no zhes pa'i don to/ /de'i dbus gnas zhes pa ni chos kyi 'khor lo'i dbus kyi steng du longs spyod kyi 'khor lo bcud kyi rten gyi rang bzhin chu'i dkyil 'khor ro zhes pa'i tha tshig go//oM las byung ba'i 'khor lo ni oM yongs su gyur pa las longs spyod kyi 'khor lo'o/ /'khor lo'i dbus su yi ge oM bsam mo/ /rtsa rnams kun gyi rang bzhin can//zhes pa ni 'khor lo bzhi'i rtsa rnams la gnas pa lhan cig skyes pa'i rang bzhin zhes pa'i don to/ /rnal 'byor ma ni rnam par bzhugs/ /zhes pa ni rtsa sum cu rtsa gnyis las byang chub kyi sems 'bab pa de rnams ni/ bde ba chen po'i rang bzhin te/ der gnas zhes pa'i tha tshig go//de ltar yang / rab tu dga' ba'i nam mkha' las/ /bde chen 'khor lo las ni brgyad/ /de bzhin longs spyod 'khor lo'i brgyad/ /chos kyi 'khor lo las ni bzhi/ /sprul pa'i 'khor lo las bcu gnyis/ /rtsa 'di dag ni bde chen dngos//rtag tu byang chub sems 'bab 'gyur/ /zhes gsungs so/ /rtsa ni bcu drug la brgyan pa/ /zhes pa ni longs spyod kyi 'khor lo la oM bcud kyi rten gyi rang bzhin du 'dug pa dang / a la sogs pa'i rang bzhin bcu drug po de rnams kyis brgyan zhes pa'i tha tshig go//de nyid 'pho ba bcu drug gi rang bzhin no/ /bde ba chen po 'khor lo'i rtsa sum cu rtsa gnyis ni chu tshod sum cu rtsa gnyis kyi rang bzhin no/ /sprul pa'i 'khor lo la ni dbyug tshod drug cu rtsa bzhi'i rang bzhin no/ /chos kyi 'khor lo la ni thun brgyad kyi rang bzhin no/ /des na rtsa brgya nyi shu'o zhes pa ni 'khor lo bzhi'i rtsa rnams ni brgya dang nyi shu'o//de nas lus dang ngag dang sems kyis bsgres na sum brgya drug cur 'gyur ro/ /des ni lo gcig gi zhag gi grangs kyang gzung ngo / /sprul pa drug cu rtsa bzhi'i 'dab/ /ces pa ni rlung gi 'pho ba phra ba'i rang bzhin gyis dbyug tshod bzhi brtsir med pa dor bas drug cu'o//sum brgya drug cu bsgres pa'i drug cu la ni stong phrag nyi shu rtsa gcig dang drug brgyar 'gyur ro/ /'dis lo gcig gi dbyug tshod dang zhag gcig gi dbugs kyang shes par bya'o/ /rdo rje sku yi bdag nyid che/ /zhes pa la rdo rje ni de bzhin gshegs pa rnams te/de'i bdag nyid kyi sku'o/ /sku de la rtsa 'di dag gnas pa yin zhes pa'i don to/ /de yi dbus gnas sa bon ni/ /zhes pa ni/ der 'khor lo bzhi'i ngo bo 'byung ba chen po bzhi'i sa bon gnas zhes pa'o/ /ci zhe na/ baM dkar yi ge las byung ba//zhes pa ni baM yongs su gyur pa las chu'i dkyil 'khor zlum po bum pas mtshan pa zhes pa'i tha tshig go/ /baM de nyid chos kyi 'khor lo dang 'dra ba'o/ /sa'i dkyil 'khor ni sngon du gsungs so/ /rtsa rnams thams cad chu yi ni/ /dkyil 'khor la ni thim par 'gyur//zhes pa ni bla ma'i man ngag las rlung gi bsgom pa'i rtsa thams cad kyi rang bzhin chos kyi 'khor lo la thim par 'gyur ro/ /de lta mod kyi der sems spre'u lta bu bla ma'i man ngag gis bcing bar bya'o/ /slar yang bsam par bya ba ni sprul pa'i 'khor lo'i 'og gi char me'i dkyil 'khor bsam par bya'o//raM dmar las byung me'i dkyil 'khor/ /zhes pa ni raM yongs su gyur pa las me'i dkyil 'khor gru gsum mdog dmar po 'bar ba bdun gyis mtshan pa bsam par bya zhes pa'i tha tshig go/ /rab tu 'bar bzhin pa yi ni//rtsa yi 'khor lo yang dag blta/ /zhes pa ni/ rtsa'i 'khor lo'i mdud pa'i gnas na sde brgyad kyis brgyan pa'i a me ltar 'bar bzhin pa de blta zhing bsgom zhes pa'i tha tshig go/ /yaM gyur rlung gi dkyil 'khor ni/ /zhes pa ni/ me'i 'og tu yaM yongs su gyur pa'i rlung gi dkyil 'khor ba dan gnyis kyis mtshan pa'o//rtsa rnams rab tu g.yo ba'i gzugs/ /zhes pa ni/ rtsa'i 'khor lo thams cad nas byang chub kyi sems rlung gis bskyod pas de dang mthun pa'i rang bzhin lhan cig skyes pa bskyed pa'o/ /der byang chub kyi sems g.yos nas rlung la thim par gyur te/'khor lo'i bsgom pas rang rig par 'gyur zhes pa'i tha tshig go/ /de dag thams cad thim 'gyur ba/ /zhes pa ni phung po dang / khams dang / skye mched thams cad der thim par 'gyur ba'o/ /de yi dbus gnas rnal 'byor pa/ /zhes pa ni de la rnal 'byor pa rang gis sems brtags shing der gnas zhes pa'i tha tshig go//de ltar yang gdan bzhi pa las/ sa gnyis dag ni bsam pa yis/ /grol bar 'gyur gyi gzhan du min/ /chos dang sprul pa bsgom pa yis/ /rnal 'byor pa ni grol bar 'gyur/ /zhes gsungs so/ /de ltar yang / zla ba nyi mas brgyan pa yi/ /thabs dang shes rab 'di dag bsgom/ /zhes gsungs pa ste/ chos kyi 'khor lo'i hUM kha thur du phyogs pa de la gnas pa zla ba phyed pa'i 'od zer gyis a la gnas pa'i thig le'i ri mo gyen du phyogs pa la rig par bya ste/ rlung gis 'gro ba dang 'ong ba dag gis 'phyang bzhin pa bsam par bya'o//phyis ni der phra ba'i ngo bos thim par 'gyur ro/ /rlung gi bsgom pas ni 'di'i rang bzhin khong du chud par bya'o/ /de nas zla ba bsam par bya/ /zhes pa ni/ a la sogs pa'i dbyangs yig bcu gnyis nyis skor du byas pa las zla ba'i dkyil 'khor du bsgom ste/de ni me long lta bu'i ye shes kyi rang bzhin no/ /zla ba'i steng du nyi ma zhes pa ni/ ka la sogs pa'i yi ge sum cu rtsa bzhi la ya ra la wa Da D+ha bsnan pas bzhi bcur 'gyur la/ de nyis skor du byas pa'i brgyad cu ni nyi ma'i dkyil 'khor du 'gyur te/ de ni mnyam pa nyid kyi ye shes kyi rang bzhin no//de yis dbus chud sa bon ni/ /zhes pa ni de dag gi dbus su a dang hUM shes rab dang thabs kyi bdag nyid gnas pa ste/ de ni so sor rtog pa'i ye shes kyi rang bzhin no/ /yi ge ka yis ha brgyan te/ /zhes pa ni yi ge ka nyi ma'i dkyil 'khor gyi rang bzhin de la ha thim par gyur pa'o//yang na ka yis rnam brgyan pa/ /zhes pa ni/ kaM bde ba chen pos mi shigs pa'i ha mgo bo stong pas brgyan zhes pa'i tha tshig go/ /ka ni ha la thim par 'gyur/ /zhes pa ni/ ka shes rab kyi rang bzhin dang / a thabs kyi rang bzhin thim par 'gyur ba'o//des cir 'gyur zhe na/ a hUM dbyer med par 'gyur ba'o/ /gug skyed dang bral ba'i ha ni shes rab kyi rang bzhin no/ /hUM ni thabs kyi rang bzhin no/ /des ni thabs dang shes rab gcig tu 'gyur ro/ /mi phyed pa'i ha zhes pa ni/ gug skyed dang bral ba'i sgra'i rang bzhin dang /dbyangs yig drug pa gcig tu gyur pa 'ba' zhig tu 'gyur te/ hUM de yang thabs dang shes rab kyi bdag nyid do/ /hUM las byung ba'i 'od zer rnams/ /zhes pa ni hUM de las byung ba'i 'od zer te/ de bzhin gshegs pa lnga'i bdag nyid/ /rlung lnga'i rang bzhin de rnams kyis bde ba chen po'i 'khor lo bskul bas bdud rtsi 'dzag pa'o//ba mo lta bu'i ri bong can/ /zhes pa la ri bong can ni zla ba ste/ de ni 'jug pa'i rlung ngo / /ba mo zhes pa ni nyi ma ste/ de ni 'byung ba'i rlung ngo / /de dag gcig tu gyur pa'i rnal 'byor de ni bsam gtan du brjod do//nyi mar lhan cig zhu gyur cing / /zhes pa la/ nyi ma ni chags pa dang / chags pa dang bral ba dag gcig tu gyur pa'i chags pa tsam 'ba' zhig nyi ma nyid du blta ste/ khrag dang khu ba'i mdog tu snang ba'o/ /de nyid ni nyi ma ste/ ye shes kyi rang bzhin gyis nga rgyal la sogs pa'i sdig pa bsregs pa'o//yang ni hUM byung 'od zer zhes pa ni khrag dang khu ba'i rang bzhin gyi thig le hUM du bsgom ste/ de'i 'od zer rnams 'gro ba dang 'ong ba sems kyis bsam par bya'o/ /rtsa yi 'khor lo thams cad la/ /zhes pa ni khams bco brgyad gnas pa'i rtsa las 'dzag pa'o//'dzag pa des thig le'i nang du chud pa'i hUM bkru bar bya'o/ /bkrus pas cir 'gyur zhe na/ bde ba chen po'i ye shes skye ste/ de nyid mtshan sum cu rtsa gnyis kyi yon tan dang ldan zhing dpe byad brgyad cus brgyan pa'i he ru ka sna tshogs su snang ba sna tshogs sde mas 'khyud par 'gyur ro//de ni bskyed pa'i rim pa gsungs pa/ zla ba dang nyi ma'i dbus su hUM bsam/ hUM gyur pa las rdo rje de'i lte ba la yang hUM ngo / /sa bon rdo rje las byung ba/ /zhes pa ni/ sa bon hUM dang rdo rje dag gcig tu gyur pa las byung zhing bskyed pa'o/ /gang gi zhe na dpa' bo ste bcom ldan 'das dpa' bo de'i'o//'dod chags la sogs pa'i nyon mongs pa dang bral bas na dpa' bo'o/ /he ru ka mdog sngon po zhes pa la/ he ni chos thams cad kyi rgyu dang bral ba'o/ /ru ni gzugs kyi bkod pa dang bral ba'o/ /ka ni chos thams cad gang na yang mi gnas pa'o//ha ni thabs so/ /e ni shes rab ste/ de'i bdag nyid la he'i sgrar gsungs so/ /ra ni khu ba'o/ /u ni khrag gi rang bzhin no/ /ra ni khu ba'o/ /u ni bde ba'o/ /'di dag ni khu ba dang bde ba ste/ thabs dang shes rab kyi bdag nyid do/ /he ni dam tshig sems dpa'o//ru ni ye shes sems dpa'o/ /ka ni bde ba chen po'i ye shes skyed pa'o/ /e ni las kyi phyag rgya'o/ /ha ni chos kyi phyag rgya'o/ /ra ni dam tshig gi phyag rgya'o/ /u ni sgra'i rang bzhin phyag rgya chen po'o/ /ka ni phyag rgya 'di rnams la bcom ldan 'das bde ba'i gzugs su bzhugs pa'o//bcom ldan 'das de ni bla ma'i man ngag las khong du chud par bya'o zhes bya ba'i don to/ /zhal gcig pa la phyag bzhi pa/ /zhes pa ni bcom ldan 'das kyi gzugs can dang / bcom ldan 'das ma ste/ thabs dang shes rab dbyer med pa'i gzugs so//rdo rje sems dpa' ji lta ba de ltar rdo rje dbyings kyi dbang phyug ma'o/ /gtso bo hUM zhes 'don pa zhes pa la sogs pa ni go sla'o/ /dpa' bo 'khor ba sgrol byed pa/ /zhes pa ni de ltar rnal 'byor pas dpa' bo bsgoms nas 'khor ba las sgrol bar 'gyur ro//ji ltar 'khor ba las sgrol bar byed ce na/ de nyid gsungs pa/ byang chub sa bon rang bzhin zhes pa ste/ phra ba'i hUM bsgoms pas bde ba chen po skye ba'o/ /lhag ma ni go sla'o/ /kha dog dmar mo zhes pa la sna tshogs sde ma ni dmar mo'o/ /he ru ka ni nag po ste gnyi ga snyoms par zhugs pa'o//ji ltar pad+ma dmar po la bung ba gnas pa de ltar bcom ldan 'das blta bar bya'o/ /zhal ni shin tu rnam 'gyur ba/ /zhes pa ni zhal nas khrag 'dzag pa'o/ /sna tshogs sde ma yang phyag bzhi pa ste g.yas na cang te'u dang gri gug /g.yon na kha T+wAM ga dang thod pa'o//phyag gnyis pa'i phyogs la sna tshogs sde ma gri gug dang thod pa bsnams pa bsgom par bya'o/ /rang gi lus skyes 'od zer gyis/ /zhes pa ni lus dang lhan cig par yod pa lus bcas te a dang hUM ngo / /de dag gi 'od zer gyis 'gro ba dang 'ong bar byed do/ / rtsa yi 'khor lo bskul bar bya/ /zhes pa ni sprul pa'i 'khor lo la gnas pa'i a'i 'od zer gyis chos dang longs spyod dang bde ba chen po yang dag par bskul pas bdud rtsi 'dzag pa'o/ /bdud rtsi des chos kyi 'khor lo'i sa bon bkrus pa tsam gyis chos kyi 'khor lo la gnas pa'i rtsa brgyad po rang bzhin gyis rnal 'byor ma brgyad bskyed nas/phyi rol du phyung ste he ru ka mchod par byed do/ /brgyad po bu mo rnams kyi mchog/ /ces pa ni chos kyi 'khor lo'i rang bzhin gyi bu mo mchog rab ces pa'i don to/ /mchod pa sna tshogs 'dzin pa yis//zhes pa ni/ ri dgas kyis mtshan ma la sogs pa mchod pa rnam pa brgyad 'dzin par byed pas na mchod pa brgyad do/ /rnal 'byor ma de rnams gang zhe na/ rdo rje mche ba ma la sogs pa'o/ /rdo rje mgon po'i shar gnas pa/ /zhes pa ni/ he ru ka'i shar phyogs na gnas pa'o//rdo rje mche ba mi ni khrag gis bkang ba'i thod pa bsnams pa'o/ /gzi brjid chen mo gsol bar mdzad/ /ces pa la/ gzi brjid ni khrag gi rang bzhin te/ phyag gnyis kyis khrag gis gang ba'i thod pa bsnams te gsol ba ni tshim pa zhes pa'i don to//rdo rje pho nya cang te'u brdung / /zhes pa ni rdo rje pho nya ma dbang ldan gyi phyogs su gnas shing / phyag g.yas dang g.yon pas cang te'u brdung ba'o/ /rdo rje gdong ma dri snod dang / /zhes pa ni/ rdo rje gdong ma me'i phyogs su gnas shing phyag gnyis na dri'i snod bsnams pa ste/dri chen gyi snod bsnams pa'o/ /rdo rje can ma mchod yon snod/ /ces pa ni/ rdo rje can ma bden bral gyi phyogs su gnas shing mchod yon gyi snod bdud rtsis bkang ba phyag gnyis kyis 'dzin pa'o/ /rdo rje gtsigs ma zhes pa ni lho phyogs su gnas shing phyag gnyis kyis rnga brdung ba'o//rlung du rdo rje lte ba ma/ /zhes pa la rdo rje lte ba ma ni/ rlung gi phyogs su gnas shing ri bong can gyi snod de byang chub kyi sems kyi snod bsnams pa'o/ /nub tu rdo rje 'jigs ma'o/ /zhes pa ni rdo rje 'jigs ma nub kyi phyogs su gnas shing ce spyang gi sha 'dzin pa'o//byang du rdo rje 'dod chags ma/ /zhes pa ni byang gi phyogs su gnas nas chags pa chen po la rjes su chags pas he ru ka mchod pa'o/ /rnal 'byor ma 'di dag ni byang chub kyi sems kyi rgyu ba la gnas par dgongs so/ /dri zhim lnga dang me tog spos/ /zhes pa la/dri zhim ni bdud rtsi lnga'o/ /me tog ni bud med kyi rdul gyi me tog go/ /spos ni gtum mo'i 'od zer gyi spos so/ /'di dag gis ni bcom ldan 'das bde ba chen po mi shigs pa'i rang bzhin mchod do/ /dpa' bo rdzogs par mthong nas ni/ /zhes pa ni dkyil 'khor rdzogs nas nang gi rtsa'i 'khor lo bsgom par bya'o//ci'i phyir zhe na dbang bskur ba'i phyir ro/ /'khor lo de'i rtsa stong pa'i gnas su sprul zhes pa'i tha tshig ste/ der gnas pa'i mdud pa'i nang du 'od zer gyi gzugs 'khyil par gyur par bsam par bya'o/ /'od zer des byang chub kyi sems 'dzag par 'gyur te 'dzag pa des rnal 'byor ma rnam pa mang po rdzogs par bya zhes pa'i tha tshig go//rnal 'byor ma de rnams rgyan sna tshogs pas brgyan cing / lang tsho'i gzugs dang ldan pa/ lo bcu gnyis lon pa dbyangs kyi yi ge bcu gnyis las rdzogs pa de rnams ni sna tshogs sde ma'i sprul pa'i rang bzhin te/rgyud 'dir lo bcu gnyis lon pa'i shes rab mar gsungs so/ /byang chub sems gang bum pa bsnams/ /zhes pa ni byang chub kyi sems kyis yongs su bkang ba'i bum pa ste pad+ma bsnams shing brel ba'o/ /a mra'i lcug babs zhes pa ni rdul dang ldan pa ste/khrag dang khu ba 'dres pa des gsang ba'i dbang sbyin par bya'o/ /lo bcu gnyis ma'i rnal 'byor ma rnams la dbang gi don du gsol ba gdab bo/ /dbang med pa'i nyes pa bstan pa'i phyir/ /dbang dang bral na dngos grub med/ /ces gsungs te/dper na bu tsha med pa'i khyim/ /zhes pa la/ bu ni mig la sogs pa'i byang chub sems dpa' ste/ de ltar de rnams kyis byin gyis ma brlabs pa'i lus ni khyim ste/ de stong par khong du chud par bya'o/ /shi ma thag tu stong pa nyid/ /ces pa ni/ byang chub sems dpa' de rnams kyis byin gyis brlabs pa ni/shi nas rnal 'byor pa khyad par can du 'gro bar mi 'gyur ro/ /de bzhin dbang dang bral na ni/ /zhes pa ni dbang med na'o/ /ye shes kun gyis stong pa nyid/ /ces pa la/ ye shes kun me long lta bu'i ye shes la sogs pa'o//de rnams kyis byin gyis ma brlabs pa ni theg pa chen po yongs su shes pas stong pa'o/ /'dis ci zhig ston ce na/ mig la sogs pa byin gyis brlabs pa byas nas ye shes lnga'i bdag nyid byang chub kyi sems slob ma la sbyin par bya'o/ /de ltar yang /kha la mthe bo srin lag gis/ /rnal 'byor rig pas rtag tu myang / /zhi ba'i btung ba bzhin myangs na/ /dngos grub rtag pa thob par 'gyur/ /zhes gsungs so/ /tshigs bcad 'dis ni gsang ba'i dbang bskur ba bstan to/ /da ni shes rab ye shes dpe'i sgo nas ston te/de ltar yang / dper na pi wang sbyor kun tshogs/ /zhes bya ba la sogs pa gsungs la/ pi wang gi sgra ni a wa d+d+hU tI'o/ /de'i sbyor ba kun tshogs pa ni/ phung po dang / khams dang / skye mched thams cad kyi sbyor ba 'dus pa ni bde ba chen po'i bsam gtan du 'gyur ro//rgyud dang bral na brdung mi rung / /zhes pa ni rgyud dang ldan pa'i phyir na rgyud can no/ /byang chub kyi sems kyi rgyu ba dang bral na bde ba chen po myong bar mi rung ba ni brdung du mi rung ba'o/ /de bzhin dbang dang bral na ni/ /zhes pa ni shes rab ye shes kyi dbang dang bral na phyag rgya chen po'i dngos grub med pa'o//sngags dang bsam gtan 'grub mi 'gyur/ /zhes pa ni yid skyob pas na sngags so/ /sngags kyis ni las kyi tshogs 'grub la/ bsam gtan gyis ni phyag rgya chen po 'grub ste/ bde ba chen po'i bsam gtan med par ni dngos grub med do snyam du bsams so//rmongs pa gang zhig dbang med par/ /zhes pa ni sangs rgyas kyi de kho na nyid mi shes pa'i rmongs pa dbang med par slob ma rnams sdud par byed pa'i sems can de rnams dmyal bar 'gro bar 'gyur ro/ /bdag ni dbang bskur zhes pa ni/ bdag la dbang yod ces brdzun du smra zhing phyis slob ma la dbang bskur ba'o/ /slob mar bcas te dmyal bar 'gro/ /zhes pa ni slob dpon slob ma dang lhan cig tu mnar med pa'i dmyal bar 'gro ba'o/ /dus ji tsam gyi bar du zhe na/ de nyid gsungs pa/ ji srid sangs rgyas bzhugs kyi bar//zhes pa ni/ ji srid du sangs rgyas kyi bstan pa gnas pa'i dus de srid du dmyal bar gnas par 'gyur ro/ /de ltar shes byas rnal 'byor mas/ /zhes pa ni rnam pa de lta bu'i nyes pa mkhyen par mdzod la/ kye lha mo sna tshogs sde ma'i rang bzhin bdag la dbang bskur cig ces pa'i don to//dbang bskur zhes pa la sogs pa ni go sla'o/ /phyi nang gsang bar bcas pa yi/ /dbang bskur tsam gyis shes pa ni/ /phyi'i dbang ni thun mong gi dbang ngo / /gsang ba'i dbang ni byang chub sems kyi dbang ngo / /dbang bskur tsam gyis zhes pa ni shes rab ye shes kyi dbang rdzogs pa'i bar du'o//nam mkha' zhes pa la sogs pa ni go sla'o/ /de nas rnal 'byor ma de rnams/ /rtsa yi 'khor lo la thim pa/ /zhes pa la/ de nas kyi sgra ni dbang bskur ba'i rjes thogs su'o/ /rtsa'i 'khor lo'i mdud pa khong stong gi gnas kyi thig le la lo bcu gnyis ma'i rnal 'byor ma lha mo de dag thams cad thim par gyur pa'o//sangs rgyas thod pa'i rgyud rnal 'byor ma'i gong na med par zhes pa la/ sangs rgyas ni de bzhin gshegs pa lnga'i dbang ngo / /thod pa zhes pa ni pad+ma der gsang ba'i dbang bskur ba'o/ / rgyud ni lus la skyob pas na rgyud do/ /rnal 'byor ma zhes pa ni shes rab dang thabs kyi sbyor ba'i ting nge 'dzin dang ldan pa'i rnal 'byor ma'o/ /gong na med pa zhes pa ni ngag gi lam las 'das pa'i ye shes rang rig pa der bskyed pa zhes pa'i don to/ /khyad par ji lta bu zhe na/ de nyid gsungs pa/gsang ba'i yang shin tu gsang ba zhes pa la/ gsang ba zhes pa ni pad+ma'o/ /shin tu gsang ba zhes pa ni rdo rje'o/ /shin tu de dag gi sbyor bas bde ba bskyed pa'o/ /lha bskyed pa zhes pa ni/ le'u der lha bskyed de rdzogs par byas pa'o/ /dbang bskur ba zhes pa ni lha rnams kyis dbang bskur ba'i cho ga'o//le'u der de dag thams cad bshad pa de ni le'u gsum pa'o/ /'o ni rdzogs pa'i don to// //da ni ri skegs kyi sbyor ba dang chu'i sbyor ba'i dkyil 'khor la sogs pa bshad par bya ste/ de nas zhes pa ni lha bskyed pa dang /dbang bskur ba bstan pa'i rjes thogs su'o/ /nor rgyas la sogs pa zhes pa ni sna tshogs sde ma'i 'od zer gyis bkug pa'i klu thams cad do/ /phyag na rdo rje la phyag byas nas 'di skad ces gsol to zhes pa ni/ klu de rnams rnam pa 'di ltar smra ba'o/ /ci'i phyir na bdag cag rnams 'od zer gyis ni zhes pa la sogs pa ni/bcom ldan 'das phyag na rdo rje bdag cag la shod cig ces sbyar bar bya'o/ /de nas phyag na rdo rje gnod sbyin gyi bdag po zhes pa ni/ gnod sbyin thams cad kyi bdag po dang gtso bo phyag na rdo rje des zhes pa'i tha tshig go//rnal 'byor ma sna tshogs sde ma zhes pa la sogs pa ni/ rgyu ci'i phyir nor rgyas la sogs pa'i klu rnams 'tshal te mchis pa lags zhes pa'i tha tshig go/ /de nas sna tshogs sde ma'i snying ga'i 'od zer gyis zhes pa la sogs pa ni klu rnams kyi lus kyi nang tshim par byas nas slar sna tshogs sde ma'i thugs kar zhugs pas klu thams cad 'jigs pa med par gyur pa'o//phyag 'tshal te 'di skad ces gsol to zhes pa ni/ lha mo la phyag 'tshal te smras pa'o/ /lha mo bka' ni ci zhig stsol/ /zhes pa ni/ lha mo sna tshogs sde mas bdag cag la bka' ci stsal pa de thams cad bgyi'o zhes sbyar ro//gsungs pa zhes pa ni rnal 'byor ma sna tshogs sde mas gsungs pa'o/ /gang zhig gsungs she na/ de nyid gsungs pa/ mu stegs la sogs mkha' lding sngags/ /zhes pa la/ mu stegs zhes pa ni tshangs pa la sogs pa'i lha rnams kyi'o/ /mkha' lding sngags zhes pa ni/ mkha' lding gi rang bzhin gyi sngags so/ /ye shes las byung zhes pa ni lha de rnams kyi ye shes yang dag pa ji lta bu yin zhes pa'o/ /ji lta bu zhes pa ni ji lta bu'i bdag nyid yin zhes pa'o//dus su zin pa ji ltar yin/ /zhes pa ni dus su zin pa'i rgyu sbrul gyis zin pa 'chi'am zhes sbyar bar bya'o/ /ji ltar dug ni skye bar 'gyur/ /zhes pa ni gnas gang nas dug skye bar 'gyur zhes pa'i tha tshig go/ /slar yang sems can 'chi 'gyur ci//zhes pa ni sbrul gyis zin pa'i sems can rnams 'chi ba'i lam du ci 'gro bar 'gyur ram zhes pa'o/ /zhus pa zhes pa ni klu rnams kyis smras pa'o/ /khyab 'jug dbang phyug la sogs lha gang zhes pa la sogs pa la/ khyab 'jug ni nor lha'o/ /dbang phyug ni zhi byed do//sogs pa'i sgras ni tshangs pa dang brgya byin la sogs pa'o/ /lha gang zhes pa ni gang dag tshangs ris la sogs pa'i lha tshangs pa dang / tshangs pa'i mdun na 'don la sogs pa rnams la rnam par rtog pa'i dug yod cing / dug gis khyab pas 'chi bar 'gyur ro/ /de rnams la ni 'chi 'pho mchis//zhes pa ni 'chi zhing 'gog pa'i dus kyi mthar thug pas dug gi nyes pas gnod do zhes sbyar ro/ /de ltar dus su zin zhes smra/ /sbrul gyi dug ni sel ba med/ /ces pa ni sbrul la dug yod dam med ces pa dang / sbrul gyis zin pa 'tsho'am mi 'tsho ba dbang phyug la sogs pa smra'o zhes pa'i tha tshig go//ston pa stong nyid des gsungs pa/ /zhes pa la ston pa ni khyab 'jug dang dbang phyug la sogs pa thams cad 'dul bar byed pas na ston pa'o/ /stong nyid gsungs pa zhes pa ni chos thams cad stong pa nyid du gsungs pas na stong pa nyid du gsungs pa'o//nges pa zhes pa ni chos thams cad kyi nges pa'i don nges par byed pas na/ nges pa zhes pa'i tha tshig go/ /bcom ldan 'das rdo rje 'chang bas gsungs zhes pa ni gnyis su med pa'i ye shes kyi rdo rje 'chang bas na bcom ldan 'das rdo rje 'chang ba'o//chos rnams thams cad stong pa la/ /zhes pa la thams cad ni phung po lnga la sogs pa'i chos rnams kyi rnam par rtog pa dang bum pa dang ras dang shing rta la sogs pas stong pa de'i phyir/ sbrul gyi dug ni ji ltar yod/ /ces pa'i don to/ /gang gis 'dzin cing gang zhig 'dzin//zhes pa ni rnam pa gang gis 'dzin cing ci zhig gzung ste/ gzung ba dang 'dzin pa dang 'dzin pa po mi dmigs pa'i phyir dug gi rnam par rtog pa med do/ /ji ltar spyod ces pa la sogs pa ni go sla'o/ /'dod chags gti mug stong pa nyid/ /ces pa ni/ 'dod chags dang zhe sdang dang gti mug stong pa'o/ /'dod chags dang zhe sdang dang gti mug gsum po de rnams dug nyid du gyur pa de rnams kyang stong na dug ji ltar skye bar 'gyur zhes pa'i tha tshig go/ /grangs chen zhes pa ni sna tshogs sde ma la bod pa'o/ /yul ni stong pa nyid ces pa la yul ni phung po lnga'i lus de nyid stong pa'o//yul gyis nyes pa zhes pa ni/ yul dang dbang po dang rnam par shes pa stong pa yin na dug gi nyes pa ji ltar yod/ dug ces pa ni sems kyi rnam par rtog pa nyid dug ste/ gal te sems kyi rnam par rtog pa yod na/de'i tshe dug yod la sems kyi rnam par rtog pa dang bral na dug med ces pa'i tha tshig go/ /lha rnams yul rnams kyis ni bsgribs/ /zhes pa la lha gang dag gi rnam par rtog pa'i dra bas dkris pa de rnams kyi dug ni yul gyi nyes pa'i dug ces pa'i tha tshig go/ / yul gyi nyes pa sbyangs pa nyid/ /ces pa ni gang dag gis yul gyi nyes pa lha'i rnam pas yang dag par sbyor ba de la yul gyi nyes pas gos par mi 'gyur ro/ /ston pa longs spyod gos mi 'gyur/ /zhes pa la ston pa ni bcom ldan 'das rdo rje 'chang ba'o/ /longs spyod gos mi 'gyur zhes pa ni/gzugs la sogs pa 'dod pa'i yon tan lnga longs spyod kyang mi gos shing gos par mi 'gyur ro/ /ri skegs sbyor ba zhes pa ni/ ri skegs kyi sbyor bas dug nyams par byed pa 'og nas 'chad par 'gyur ro/ /klu rnams thams cad ces bya ba la sogs pa ni go sla'o//dus zin the tshom med par ni/ /zhes pa ni khyab 'jug dang dbang phyug la sogs pa'o/ /lha rnams dus su zin pa la the tshom med cing gdon mi za zhes pa'i don to/ /'di ltar smras te zhes pa ni klu thams cad kyis 'di lta bur smras te/ rang rang gi gnas su song zhes pa'i tha tshig go//de nas bcom ldan 'das mas zhes bya ba la sogs pa la/ de nas zhes pa ni klu'i tshig gi rjes thogs su bcom ldan 'das ma sna tshogs sde mas so/ /yul gyi nyes pa zhes pa ni yul la sogs pa'i nyes pa spangs pa'i don du sngags gsungs pa zhes sbyar ro/ / sngags gang yin zhe na/ de nyid gsungs pa/ oM shU n+ya tA dz+nyA na badzra swa b+hA wa At+ma kou0f85haM/ 'dis yul thams cad kyi nyes pa spong bar byed do/ /sngags 'di bshad pa gsungs pa/ stong dang stong min zhes pa ni stong pa nyid la stong pa ma yin pa'ang yod de/ de nyid snying rje'i rang bzhin no/ / mtha' dag ces pa ni 'bras bu mtha' dag go/ /bcas zhes pa ni dngos po mtha' dag dang thabs cig pa'o/ /sgyu ma rmi lam lta bur gcig /ces pa ni sgyu ma lta bu'i stong pa nyid dang rmi lam lta bu'i stong pa nyid de sgyu ma dang rmi lam dag dang stong pa nyid gcig tu bsgom par bya'o/ /'jig rten mtha' dag brdzun gyis bcings//zhes pa ni log pa'i shes pas 'jig rten mtha' dag bcings pa'o/ /kye lags bshes mo 'di ltar ltos/ /zhes pa la/ kye lags zhes pa ni bod pa'o/ /bshes mo zhes pa ni grogs mo zhes pa'o/ /'di ltar ltos zhes pa ni 'di ltar bur ltos shig pa'o//rnal 'byor ma grogs mo thams cad 'di lta bu'i stong pa la ltos shig pa'o/ /de nas zhes pa ni yul gyi nyes pa spong ba bstan pa'i rjes thogs su'o/ /da ni ri skegs bsgrub pa'i don du mkha' lding gi dbang bskur ba'i dkyil 'khor bstan pa'i phyir/ phyag na rdo rjes bcom ldan 'das ma'i zhabs la spyi bos gtugs te 'di skad ces gsol to zhes pa ni bcom ldan 'das ma sna tshogs sde ma'i zhabs kyi pad+ma'i rdul la phyag na rdo rjes phyag 'tshal te 'di skad ces smras zhes pa'i don to//ri skegs sbyor ba rab rnyed dka'/ /lha mo yis ni bshad du gsol//zhes pa ni kye lha mo sna tshogs sde ma ri skegs kyi sbyor bas dug nyams par byed pa bdag la bshad du gsol/ /gsungs pa zhes pa ni sna tshogs sde mas gsungs pa'o/ /dkyil 'khor med par sbyin mi bya/ /zhes pa ni dkyil 'khor med par ri skegs kyi sbyor ba rjes su sbyin par mi bya zhes pa'i don to//slob ma bsdu bar mi bya'o/ /zhes pa ni dkyil 'khor med par slob ma bsdu bar mi bya'o/ /slob ma bsdu ba'i don du lha mo'i dkyil 'khor gsungs pa/ gtso bos ji skad gsungs pa yi/ /zhes pa ni sngon gyi de bzhin gshegs pas ji ltar gsungs pa'i dkyil 'khor bshad par bya yis dkyil 'khor de nyon zhes pa'i tha tshig go//mtho lnga pa yi sa gzung ste/ zhes pa ni yul lnga rnam par dag pa'i don du mtho lnga pa'i sa tsam bzung ste/ dug gi dkyil 'khor gyi don du mtho lnga pa'i sa gzung bar bya'o//khor yug tu ni gru bzhi'o/ /zhes pa ni kun nas gru bzhi par bya zhes pa'i tha tshig go/ /de yi phyed kyi zlum po la/ /zhes pa ni gru bzhi lham pa'i phyed las zlum por bya'o/ /brgyad las 'dam skyes 'dab ma brgyad/ /ces pa ni zlum po'i phyogs brgyad dang de'i dbus su pad+ma 'dab ma brgyad pa bri bar bya zhes pa'i tha tshig go//oM hUM zhes pa nas a d+hiSh+Tha ye ta zhes pa'i bar gyi sngags ni sa sbyang ba'i sngags so/ /oM he ru ka badzra zhes pa la sogs pa ni gtor ma'i sngags so/ /oM sarba ta thA ga ta zhes pa la sogs pa'i sngags kyi mthar tha tha gnyis ni phaT phaT gnyis su 'gyur ro//sngags 'dis lan bdun du thig skud la mngon par bsngags par bya'o/ /thig skud kyi sngags so/ /gru bzhi pa zhes pa la sogs pa la sgo bzhi dang rta babs bzhi dang ldan pa'i dkyil 'khor thig gdab par bya'o//kha khyer snam bu spangs pa la/ /zhes pa ni kha khyer gru bzhi pa'i nang du snam bu ste gzungs kyi snam bu spangs pa'i dkyil 'khor ro zhes pa'i don to/ /sangs rgyas thod pa'i sbyor ba yis/ /zhes pa ni he ru ka dang sna tshogs sde ma'i rnal 'byor bya zhes pa'i don to//rdul tshon gzhan dang 'dres med pa'i/ /zhes pa ni rdul tshon gzhan dang 'dres par mi bya'o/ /rdul tshon dmar pos rdzogs par bya/ /zhes pa ni dkyil 'khor ma lus pa kha dog dmar po'i rdul tshon gyis bri bar bya zhes pa'i tha tshig go/ /der ni bum pa bzhi po rnams/ / zhes pa ni lha mo bzhi rnam par dag pa'i bum pa bzhi po rnams bya'o/ /bum par mtshan ma bri bya ba/ /zhes pa ni dang po'i bum pa la thod pa/ gnyis pa la kha T+wAM ga /gsum pa la gri gug /bzhi pa la cang te'u/ las thams cad pa'i bum pa la cang te'u/ steng du rdo rje'o/ /de ltar bum pa zhes pa la sogs pa ni go sla'o//'bru lnga zhes pa ni sran ma ma sha dang nas dang gro dang sran sngon dang til te bum pa rnams su gzhug par bya'o/ /de nas 'o ma'i snod ces pa ni bum pa'i steng du 'o ma'i snod spyad gzhag par bya'o/ /dang po stong pa nyid du bsgoms la paM yongs su gyur pa las pad+ma'o//der hUM yongs su gyur pa las rdo rje'o/ /yang rdo rje'i lte bar hUM ngo / /rdo rje dang hUM gyur pa las he ru ka sku mdog sngon po zhal gcig phyag bzhi pa g.yas na gri gug dang thod pa'o/ /g.yon na kha T+wAM ga dang rdo rje'o/ /sku la mi'i rus pas brgyan pa/ skyil krung phyed pa'i gar gyis gnas pa/gcer bu'i rang bzhin can/ zhal gyi mche ba cung zad gtsigs pa/ skra ser po gyen du 'bar ba/ dbu la thod pas brgyan pa/ sna tshogs sde mas 'khyud pa'i dpa' bo de ltar bsam par bya zhing / rnal 'byor 'di dag slob dpon gyis bya zhes pa'i tha tshig go//sa 'og bdun ni 'khrug par byed/ /ces pa ni sa rim pa bdun na gnas pa'i klu rnams 'khrug par byed pas na sa 'og bdun 'khrug par byed pa ste/ bcom ldan 'das he ru ka dpa' bo'o/ /oM hUM khaM swa zhes pa ni shar gyi 'dab ma la oM gyur pa las sna tshogs sde ma'o//lhor hUM gyur pa las 'dod can ma'o/ /nub tu khaM gyur pa las sa 'og gnas ma'o/ /byang du swa gyur pa las rab tu bzang mo'o/ /rnal 'byor ma 'di rnams ni zhal gcig phyag bzhi ma ste/ rnal 'byor ma 'di dag gi g.yas na gri gug dang thod pa'o//g.yon na kha T+wAM ga dang cang te'u'o/ /rus rgyan zhes pa la sogs pa ni go sla'o/ /blo ldan mtshams kyi 'dab bsam pa/ /zhes pa la mtshams kyi 'dab ma la gnas pa'i rnal 'byor ma thams cad ni chang 'tshong ma dang / 'byung po ma dang / bzhin bzangs ma dang /nam mkha' 'gro ma ste rnal 'byor ma 'di dag thams cad hUM gyur pa las bzhengs pa'o/ /shar gyi 'dab ma la sogs pa na gnas pa'i lha mo thams cad ni mdog sngon mo'o/ /mtshams kyi 'dab ma'i lha mo thams cad ni mdog ser mo'o/ /lha mo mdog sngon mo rnams ni gos sngon mo mnabs so//lha mo mdog ser mo rnams ni gos ser mo mnabs so/ /rnal 'byor ma thams cad ni g.yas brkyang ba'i zhabs kyis bzhugs pa'o/ /phyogs kyi 'dab ma la gnas pa'i mtshan ma ji lta ba bzhin du mtshams kyi 'dab ma la gnas pa'i mtshan ma yang de bzhin du bya'o//klu brgyad brgyan byas lha mo 'di/ /zhes pa ni nor rgyas la sogs pa'i klu brgyad kyis rnal 'byor ma brgyad brgyan par byas pa'o/ /g.yas na gri gug ces pa la sogs pa ni go sla'o//de nas rang gi snying ga'i 'od zer gyis de bzhin gshegs pa rnams spyan drangs te dkyil 'khor la gzhug par bya/ phyis ni gtor ma gtang bar bya/ /zhes pa ni de nas slob dpon gyis klu la 'o ma'i gtor ma sbyin par bya zhing bdag nyid chang btung bar bya zhes sbyar bar bya'o//sangs rgyas thod pa'i sbyor ldan pa/ /zhes pa ni bshad zin to/ /mar me bzhi ni dbul bar bya/ /zhes pa ni sbrang rtsi'i mar me dang / zhun mar gyi mar me dang / nya'i zhag gi mar me dang / dri zhim po'i mar khu'i mar me ste/ de ltar mar me bzhi dbul bar bya zhes pa'i tha tshig go//'bras bu bzhi yang dbul bar bya/ /zhes pa ni a mra'i 'bras bu dang / na ri ke'i 'bras bu dang / chu shing gi 'bras bu dang / ka pi tha'i 'bras bu ste/ 'bras bu bzhi po 'di dag dbul bar bya'o/ /de nas slob ma zhes pa la sogs pa ni go sla'o//gdan bzhugs te zhes pa ni slob dpon gdan la bzhugs pa la/ slob mas ri skegs kyi sbyor ba bsgrub pa'i don du gsol ba gdab par bya'o/ /ston pa bcom ldan 'das zhes pa nas bla ma che zhes pa'i mthar thug pa ni gsol ba 'debs pa'i tshigs bcad do//de nas slob dpon brtse ba yis/ /zhes bya ba la sogs pa la/ slob ma lhag par gnas pa'i dus su so shing sbyin par bya ba'o/ /khrag 'thung go 'phang gnas pa yi/ /zhes pa ni slob ma he ru ka'i gzugs su gnas par bsam par bya zhes sbyar ro/ /so shing gi sngags gsungs pa/oM hUM he zhes pa la sogs pa'i sngags kyis so shing sbyin par bya'o/ /lhag ma ni go sla'o/ /mgrin pa lag par zla ba bsam/ /zhes pa ni mgrin pa dang lag pa dag tu a la sogs pa gyur pa las/ /zla ba'i dkyil 'khor bsam par bya/ /zhes pa'i tha tshig go//mgrin par srung skud bcing bar bya zhing lag par me tog bcing bar bya'o/ /zla ba'i zer zhes pa la sogs pa ni go sla'o/ /slob ma'i mgor ni lag bzhag ste/ /zhes pa ni slob ma'i mgo la lag pa bzhag ste 'chad par 'gyur ba'i sngags lan bdun du gdon par bya'o//des ni slob ma lhag par gnas par 'gyur ro/ /sngags gsungs pa/ oM sarba bud+d+ha zhes pa la sogs pa nas ha ha zhes pa'i mthar thug pa'i sngags gdon par bya'o/ /sngags 'dis sangs rgyas thams cad slob ma'i lus la byin gyis brlab pa yin no//lhag par gnas pa tsam gyis ni/ /zhes pa la sogs pa ni go sla'o/ /bdag nyid chen po grags chen po/ /bum par zhugs pa tsam gyis ni/ /zhes pa ni rnal 'byor ma brgyad dang ldan pa'i he ru ka bum pa'i nang du zhu bar gyur par bsam par bya zhes pa'i tha tshig go//dung phor chus bkang ste zhes pa ni/ dung phor gyi chu la he ru ka bdag nyid zhu bas/ dung phor byin gyis brlab par bya zhes pa'i don to/ /man gzhi zhes pa ni go sla'o/ /chus gtor te zhes pa ni dkyil 'khor gyi sgor slob ma la chus gtor bar bya ste/ oM a b+hi Shiny+tsa tu zhes pa la sogs pa'i sngags kyis cod pan la gtor ro zhes sbyar ro//mig ras bsal te zhes pa ni mig gi ras phye ste/ dkyil 'khor mchod par bya ba'o/ /oM he ru ka badzra puSh+pa pra tIts+tsha hUM zhes pa ni he ru ka la me tog 'bul ba'o/ /rim pa 'dis sna tshogs sde ma nas brtsams te/ji srid nam mkhar gnas pa'i mthar thug pa la me tog dbul ba'o/ /slob ma la bstan par bya zhes pa ni/ slob ma la dkyil 'khor dang lha'i ming dang mtshan ma thams cad bstan par bya ba'o/ /dung phor blangs te chu btung bya/ /zhes pa ni dung phor chu dang bcas pa lag pa gnyis kyis yang dag par blangs te/dkyil 'khor pa'i sngags bton cing / /he ru ka'i sngags kyis dud phor gyi chu slob ma'i kha la sbyin par bya'o/ /de'i yon tan gsungs pa/ /brtan pa dang g.yo ba la sogs pa'i dug thams cad de'i lus la 'byung bar mi 'gyur ro zhes pa'i tha tshig go//brtan pa zhes pa la sogs pa ni go sla'o/ /ji srid mkha' lding rig yod par/ /zhes pa ni nam mkha' lding gi rig pa ji srid grub par bya ba med pa'i dus de srid du/ nam mkha' lding gi sbyor ba mi bya'o//sangs rgyas thod pa'i rnal 'byor pas/ /zhes pa ni ji srid du nam mkha' lding gi rig pa grub pa'i dus de srid du ni sangs rgyas thod pa'i sbyor bas bya ba'o/ /'bad rtsol bya ba min zhes pa ni ji srid du ma grub pa de srid dus su zin pa po'i drung du 'gro ba'i rtsol ba mi bya'o//dus zin 'chi ba zhes pa la sogs pa ni go sla'o/ /ngo mtshar bstan zhes pa ni grub nas ngo mtshar bstan par bya ba ste/ ri skegs kyi sbyor ba'i ngo mtshar bstan pa'o/ /sa la ma lhung ba'i lci ba blangs te zhes pa ni/ ba ser skya'i lci ba sa la ltung bar ma gyur pa bar snang nas blang bar bya ba'o//ri skegs gnyis bya zhing zhes pa ni lci ba de las ri skegs gnyis bya'o/ /snod dkar po byas te zhes pa ni 'bras btags pa'i snod dkar po byas te/ der ni ri skegs gnyis gzhag par bya'o/ /ro bsregs pa'i sol ba la gzhag par bya zhes pa ni/snod der ri skegs dang bcas pa'i ro bsregs pa'i sol ba la gzhag par bya'o/ /ro bsregs pa'i sol ba las snag tsha byas te/ dben par sngags bri zhes pa ni ka ra bI ra dkar po'i smyu gus gro ga'i 'dab ma la ro bsregs pa'i thal ba dang / 'chad par 'gyur ba'i sngags bri bar bya zhes sbyar ro//sngags gsungs pa/ oM bud+d+ha ka pA li zhes pa la sogs pa saM skr-i ta dang / phal pa bsres pa'i sngags mu ra d+hA pra na dza i'i mthar thug par bri bar bya'o/ /ri skegs kyi snying po'i sngags zhes pa ni ri skegs byas pa'i snying gar sngags 'di bris te gzhug par bya'o//yongs rdzogs sha li ka byas pas/ /zhes pa ni sngags yongs su rdzogs pa'i ri skegs bya zhes pa'i tha tshig go/ /pho dang mor ni brtag par bya/ /zhes pa ni 'di ni pho'o 'di ni mo'o zhes yongs su brtag par bya zhes pa'i tha tshig go//snag tsha yis ni bri bar bya/ /zhes pa ni snag tshas ri skegs kyi gzugs brnyan la ri mo bri zhes pa'i tha tshig go/ /mig gi mngon du mi gzhag cing / /zhes pa ni ri skegs kyi gzugs mdun du gzhag par mi bya'o/ /gang du gzhag par bya zhe na/ rgyab tu gzhag par bya zhes pa'i tha tshig go//de nas lcug ma sngags kyis mngag /ces pa ni ka ra bI ra dkar po'i lcug mas mngag cing rbad par bya zhes pa'i tha tshig go/ /mngag pa'i sngags gsungs pa/ oM haM ha zhes pa ni khyab 'jug gi sa bon zhes pa'i don to/ /oM baM zhes pa ni tshangs pa'i sa bon zhes pa'i don to//oM saM zhes pa ni zhi byed kyi sa bon zhes pa'i don to/ /sngags 'di ni sku dang gsung dang thugs kyi rang bzhin no/ /de ltar yang gsang ba'i mdzod las/ khyab 'jug sems su gsungs pa ste/ /dbang phyug 'dod pa ru ni grags/ /tshangs pa thar par gsungs pa ste//'di dag 'jig rten gsum du bshad/ /ces gsungs so/ /oM ha ha he he ho ho haM saM swA hA/ 'di lta bu yi sngags kyi mchog/ /ces pa sngags 'di lta bu ni mchog yin pa'o/ /stong gsum na yang rnyed par dka'/ /zhes pa ni stong gsum gyi stong chen po rnams su yang rnyed par dka' ba ste/sdug bsngal gyi rnyed par dgongs so/ /lan bdun mngag pa tsam gyis ni/ /zhes pa ni lan bdun du sngags bton pa tsam gyis de 'gugs par 'gyur ro/ /'gro ba 'dir ni the tshom med/ /ces pa ni ri skegs 'di dag klu'i gnas su 'gro zhes sbyar ro//mkha' lding bye ba'i stobs dang ldan/ /zhes pa ni de dag mthong nas klu thams cad kun du skrag par 'gyur ro/ /mi 'dzin pa'i sbrul gang gis ri skegs mthong ba tsam gyis long bar 'gyur ro/ /ri skegs kyi sbrul long ba bzung nas 'ong bar 'gyur ro//sbrul long ba de slob dpon gyis mthong nas ci zhig byed ce na/ sbrul long ba la bsnun zhes pa ni sbrul long ba de las dang mngag pa'i sngags kyis bsnun par bya'o/ /bsnun pa tsam gyis mig dang ldan par 'gyur ro/ /sbrul gyis zin pa shi bar mthong nas de'i lus la lan gsum du 'gro zhing 'ong bar byed de/zin pa dug med par 'gyur ro/ /dug 'phrog pa'i stong pa nyid kyi tshigs bcad gsungs pa/ stong pa dri med ces pa ni gang zhig dri ma dang bral ba de ni stong pa nyid dri ma med pa ste de nyid stong pa dri ma med pa'o//kun rang bzhin zhes pa ni mtha' dag gi rang bzhin stong pa nyid ces pa'i tha tshig go/ /chos rnams stong pa'i rang bzhin kye/ /zhes pa ni chos thams cad stong pa'i rang bzhin no zhes pa'i don to/ /gang gis 'dzin cing zhes pa ni 'dir chos thams cad stong pa nyid yin na su 'dzin te su yang mi 'dzin zhes pa'i don to//gang zhig 'dzin te zhes pa ni gang yang mi 'dzin zhes pa'i don to/ /mtha' dag sgyu ma'i rang bzhin zhes pa ni dngos po mtha' dag sgyu ma'i rang bzhin zhes pa'i tha tshig go/ /dngos po mtha' dag stong pa zhes pa ni khams gsum pa mtha' dag stong pa dang /dngos po mtha' dag stong pa nyid las chos thams cad stong pa nyid la dug gi skabs ga la yod ces pa'i tha tshig go/ /sangs rgyas thod pa'i rgyud ces bshad zin to// //nyi shu rtsa gcig ces pa la sogs pa ni go sla'o//slob dpon gyis yang dag par brtson par bya'o zhes pa ni slob dpon gyis dug gis zin pa mthong nas stong pa nyid kyi ting nge 'dzin yang dag par brtsams te bsgom zhes pa'i tha tshig go/ /de ltar zhes pa ni slob ma dbang bskur ba'i 'og tu rjes su gnang ba la sogs pa sbyin par bya ba'i don to//oM bud+d+ha ka pA li zhes pa la sogs pa ni dug bza' bar bya zhes pa'i tha tshig go/ /de nas zhes pa la sogs pa ni go sla'o/ /oM bud+d+ha ka pA li zhes pa la sogs pa ni/ dkyil 'khor gshegs su gsol ba'i sngags te/lag pa sa la bzhag nas sngags 'dis dug gi dkyil 'khor gshegs su gsol lo/ /de nas yang dag rab bshad bya/ /zhes bya ba la sogs pa ni go sla'o/ /gnas dgu rnams su mchod par bya/ /zhes pa ni he ru ka'i dkyil 'khor gyi sa gzhi dgu'i bdag nyid du gsungs pa/rdul tshon gyis bris la mchod par bya zhes pa'i tha tshig go/ /dung phor chu yis zhes pa la sogs pa ni go sla'o/ /rang gi lag pa g.yon pa la/ /zla ba yis ni khyab par bsam/ /zhes pa ni rang gi lag pa g.yon pa la zla ba'i dkyil 'khor bsgom zhes pa'i tha tshig go//bcu drug cha la yongs rdzogs pa'i/ /zhes pa ni cha drug ste/ dbyangs yig bcu drug khyab par yongs su rdzogs pa las zla ba'i dkyil 'khor bsgom zhes pa'i tha tshig go/ /dri med dge ba'i lus can te/ /zhes pa ni dri ma med cing dkar ba'i zla ba'i dkyil 'khor gyi lus te gzugs bsgom zhes sbyar ro//de'i dbus su mi shigs dge /zhes pa ni zla ba'i dkyil 'khor de'i dbus su mi shigs pa'i haM mgo dang bral ba dge ba'i mchog bsam zhes pa'i tha tshig go/ /kha dog dkar po'i lus can zhes pa ni mi shigs pa kha dog dkar po lus lag pa g.yon pa la bsgom zhes pa'i tha tshig go//lag pa des snod kyi kha mnan te zhes pa ni chu snod kyi bar nas chu blangs te/ lag pa la zla ba'i dkyil 'khor bsgoms nas/ de'i kha mnan te/ oM sarba ba sha ha re zhes pa la sogs pa'i sngags bzla zhes pa'i don to//mi shigs pa zhes pa la sogs pa ni go sla'o/ /sangs rgyas thod pa zhes pa la sogs pa ni bshad zin to// //'o'i sgra ni le'u rdzogs pa'i tshig go/ /gang zhe na sangs rgyas thod pa la sogs pa'o/ /ri skegs kyi sbyor ba dang chu'i sbyor ba'i le'u ste bzhi pa'o// //da ni bcud kyis len gyi le'u rab tu bshad par bya ste/ de nas zhes pa ni dug gi dbang bskur ba la sogs pa'i le'u bshad pa'i rjes thogs su bcud kyis len gyi le'u rab tu bshad par bya zhes sbyar ro//de bzhin gshegs pa'i snying po mchog /ces pa ni de bzhin gshegs pa lnga dang phung po lnga'i ngo bo mchog tu phul du byung ba snying por gyur pa'i bdud rtsi lnga zhes pa'i tha tshig go/ /rnal 'byor ma yi gong na med/ ces pa ni rnal 'byor ma rtsa lnga'i rang bzhin te/de rnams kyi gong na med pa'i snying po zhes pa'i tha tshig go/ /gzhon nu ma zhes pa ni lo brgyad ma'i mig las byung ba la gzhon nu ma zhes yang dag par bshad do/ /sha ri ka zhes pa ni lo bcu gnyis ma'i rtsa khong stong las yang dag par byung ba'i rdzas la sha ri ka zhes yang dag par bshad do//grub ma zhes pa ni lo bcu drug ma me tog dang ldan pa dang / kha dog sbyar ba'i sbyor ba byas pa las gang byung ba'i rdzas te/ de ni grub mar yang dag par bshad do/ /byis can ma zhes pa ni lo nyi shu ma dang po rdul dang ldan pa dang kha sbyar ba'i sbyor ba las gang byung ba'i rdzas de ni byis can mar yang dag par bshad do//thod bzangs can ma zhes pa ni lo nyi shu rtsa lnga ma'i shes rab kyi khu ba dang / thabs kyi khu ba dang / shes rab kyi snum bsregs pa'i rdzas gang yin pa de ni thod can mar yang dag par bshad do//de dag ni shes rab ma lnga'i rtsa lnga las bdud rtsi lnga yang dag par 'bab par bshad do/ /sangs rgyas lngas kyang rnyed par dka'/ /zhes pa la sangs rgyas lnga ni rnam par snang mdzad la sogs pa ste/ de rnams kyis kyang rnyed par dka' zhing dka' ches pa zhes pa'i tha tshig go//'dis ni sman lnga po rnams kyi che ba'i bdag nyid gsungs pa yin no/ /gzhon nu ma ni zla drug tu/ /zhes pa ni lo brgyad pa'i mig las byung ba ste/ mig gi chu dang dngul chu ra ti gcig pa bsres te zla ba drug tu zos na ji skad gsungs pa bzhin du 'gyur ro//de bzhin sha ri ka zla gsum/ /zhes pa ni lo bcu gnyis ma'i shes rab ma'i dang po'i rdul dang dngul chu ra ti gcig dang lhan cig tu zla ba gsum du zos na ji skad gsungs pa bzhin du 'gyur ro/ /grub ma zla ba gcig tu'o/ /zhes pa ni lo bcu drug ma mdog nag mo dang lhan cig tu yang dag pa'i sbyor ba las byung ba'i rdzas blangs te/dngul chu ra ti gcig dang lhan cig tu zla ba gcig tu bza' bar bya'o/ /byis can ma ni zla phyed gnyis/ /zhes pa ni lo nyi shu ma'i bu mo gang ma nyams shing skyes pa gzhan gyis ma spyad pa de'i nyi ma dang po las byung ba'i rdul dang de dang yang dag par sbyor ba las byung ba'i rdzas dang dngul chu ra ti gcig dang bsres pa zla ba phyed gnyis zos na ji skad gsungs pa bzhin du 'gyur ro//thod can ma yang zla bar te/ /zhes pa ni lo nyi shu rtsa lnga ma'i yang dag par sbyor ba med par pad+mar 'ongs pa'i bcud blangs la/dngul chu ra ti gcig dang bsres te zla bar zos na ji skad gsungs pa bzhin du 'gyur ro/ /'di dag thams cad zos par gyur na ji skad gsungs pa'i tsher 'gyur ro/ /bya rog ma ni bya rog gzugs/ /zhes pa ni bya rog can ma'i shes rab ma bya rog gi gzugs ltar mdog gnag pa ste/de'i rdul ni zla ba mar gyi ngo la 'byung bar 'gyur ro/ /glang po ma ni ngang pa'i gzugs/ /zhes pa ni glang po ma'i shes rab ma gang yin pa ni glang po che'am chang gi dri bro ba'o/ /ngang pa'i gzugs zhes pa ni mdog dkar po ste de'i rdul ni zla ba yar ngo la 'byung bar 'gyur ro//drod ma drod kyi gzugs can te/ /zhes pa ni drod can ma'i shes rab ni sngo bsangs te/ /drod kyi gzugs zhes pa ni thams cad du lus dro ba ste/ de'i rdul ni zla ba ngo gnyi ga la 'byung bar 'gyur ro/ /sngo bsangs dkar mo sngon mo'i mig /ces pa ni sngo bsangs dang / dkar mo dang sngon mo rnams kyi mig gi dri ma 'di dang dngul chu bsres te bza'o/ /kha sbyar sbyor ba'i dus su ni/ /zhes pa ni 'di rnams dang sbyor ba'i dus kyi tshe kha sbyar sbyor zhing dbang po gnyis snyoms par 'jug par byas nas byang chub kyi sems blangs te rdul dang bsre bar bya'o//mig las byung ba'i rdzas gang yin/ /zhes pa ni 'di rnams kyi mig gi dri ma'i sman de'i ming ni gzhon nu ma zhes pa ste/ sman de'i ming ni gzhon nu ma'i ming can no/ /'di ni bstan par som nyi med/ /ces pa ni sman des lus brlan par bya zhing tshim par bya zhes pa'i tha tshig go//de yi pad+ma las byung rdzas/ /zhes pa ni bud med rnams kyi rdul de khrag ces pa'i don to/ /rtsa yi nang na rnam par gnas/ /zhes pa ni rtsa khong stong na gnas pa'i bdud rtsi'o/ /ge sar sbas pa'i spyod yul te//zhes pa ni pad+ma'i ge sar gyi dbus na gnas pa zhes pa'i tha tshig go/ /sman de sha ri kar gsungs so/ /zhes pa ni sman de sha ri ka ra yang dag par bshad do/ /me tog ldan pa'i bud med gang / /zhes pa ni gang rdul dang ldan pa'i shes rab ma'o//kha dog nag mo rab mdzes ma/ /zhes pa ni kha dog nag mos rab tu mdzes ma'o/ /de yi kha sbyar sbyor las byung / /zhes pa ni de dang lhan cig tu kha sbyar sbyor ba ste dbang po gnyis sbyor ba las byung ba'i rdzas te sman de'i ming ni grub ma zhes pa'i tha tshig go/ /sangs rgyas thod pa'i sbyor ba yis//zhes pa ni rdo rje dang pad+ma yang dag par sbyor bar bshad pa'o/ /mi phyed nye bar spyad pa yis/ /zhes pa ni rang gi srog dang 'dra ba'i shes rab ma gang yin pa'o/ /khyad par ji lta bu zhe na gsungs pa/ rab mdzes ma nyams dang zhes pa ni skyes pa gzhan dang sbyar bar ma gyur pa de ni rab tu mdzes shing bzang zhes pa'i tha tshig go//de las dang por byung ba'i rdzas/ /zhes pa ni nyi ma dang po las byung ba'i rdzas te/ khrag dang de dang yang dag par sbyor ba las byung ba'i byang chub kyi sems dang bsres pa'i sman de ni byis pa can du yang dag par bshad do//lhan cig skyes dga' byung ba'i rdzas/ /zhes pa ni rdo rje dang pad+ma yang dag par shes pa'i sbyor ba med par chos kyi 'byung gnas su lhan cig skyes pa'i dga' ba skyes pa'i rdzas ni pad+ma'i bcud ces pa'i tha tshig go/ /mar khu dag ni bsre zhes pa ni rtsa'i bcud dang pad+ma'i bcud bsre ba yin te/sman de ni thod can ma zhes yang dag par bshad do/ /sman lnga po 'di dag ni sangs rgyas thod pa'i rgyud las gsungs so/ /zla ba nyi ma'i sbyor ba yis/ /zhes pa ni dkar mo'i rdul sna khung g.yas pa'i rlung rgyu ba na snar gzhug par bya zhing nag mo'i rdul sna khung g.yon pa'i rlung rgyu ba na snar gzhug par bya'o//sbyor bas 'di dag byas na ji ltar gsungs pa bzhin du 'dir the tshom med par 'gyur ro/ /zla bas zla bar zhes pa la/ zla ba ni byang chub kyi sems te/ sna g.yon pa'i sna khung du sbyin par bya'o/ / nyi mas nyir zhes pa ni/ shes rab ma'i sna khung g.yas par blugs par bya'o/ /de lus skra dkar gnyer ma zhi/ /zhes pa ni lus kyi ste mgo'i skra dkar zhi zhing spangs zhes pa'i tha tshig go/ /gnyer ma zhi zhes pa ni gnyer ma dang bral ba zhes pa'i tha tshig go/ / ji srid sangs rgyas bzhugs kyi bar/ /zhes pa ni ji srid sangs rgyas bzhugs pa de srid kyi bar du tshe ring bar 'gyur zhes pa'i tha tshig go/ /de yi tshe ni rgyas par 'gyur/ /zhes pa ni dus ring por tshe 'phel zhing rgyas par 'gyur zhes pa'i tha tshig go/ /dngos po gang dang gang yang rung //zhes pa la dngos po gang dang gang ste/ lcags dang zangs ma la yang rung / /rdul byugs pas dngul dang gser du 'gyur ro/ /da ni dgongs pas bshad pa yang dag par bshad par bya ste/ dgongs bshad shin tu rnyed dka' ba/ /zhes pa la dgongs pas bshad pa ni brda'i tshig ste rab tu dka' ches par 'gyur zhes sbyar ro//dri chu ye shes rdo rje ste/ /zhes pa la ye shes rdo rje zhes pa ni mi bskyod pa'i rang bzhin gyi dri chu'o/ /dri chen rdo rje bzang po nyid/ /ces pa la rdo rje bzang po zhes pa ni rnam par snang mdzad kyi rang bzhin dri chen no//khrag ni mar me rdo rje yin/ /zhes pa la mar me rdo rje ni rin chen 'byung ldan gyi rang bzhin khrag tu 'gyur ro/ /khu ba rdo rje thabs byung nyid/ /ces pa ni sangs rgyas thams cad kyi thabs las byung ba byang chub kyi sems khu ba'i rang bzhin gtso bo zhes pa'i tha tshig go//sha ni chos kyi rdo rje yin/ /zhes pa la chos kyi rdo rje ni don yod par grub pa'i rang bzhin gyi sha yin no/ /de lnga rnal 'byor ma yi mchog /ces pa ni de bzhin gshegs pa lnga'i rang bzhin ni rnal 'byor ma lnga'i bdud rtsi rtsa lnga'i rang bzhin mchog tu phul du byung ba zhes pa'i tha tshig go//ngag gi dam tshig rnyed dka' ba/ /zhes pa la ngag gi dam tshig ni tshig gi brda rnyed par dka' ba ste/ nyan thos la sogs pa'i dka' bas kyang rnyed par mi 'gyur ba'o/ /ba lang sha ni 'bar ba zhes pa la sogs pa ni go sla'o/ /de lnga rnal 'byor mchog tu gsungs//zhes pa ni go ku da ha na la sogs pa dam tshig lnga yang dag par sbyor ba'i phul ni sbyor ba'i mchog tu gsungs so/ /rnal 'byor rnal 'byor ma ldan par/ /zhes pa la rnal 'byor zhes pa ni bdud rtsi lnga'o/ /rnal 'byor ma zhes pa ni sha lnga'o//ldan zhes pa ni bdud rtsi lnga dang sha lnga po dag gcig tu byas te gang bza' ba'o/ /de'i yon tan gsungs pa/ de tshe rnam rtog de thams cad 'jig 'gyur zhes pa ni sems kyi rnam par rtog pa thams cad 'jig cing zad par 'gyur zhes pa'i tha tshig go/ / zan la bsod nams zhes bya ste/ /zhes pa la zan gyi ming ni bsod nams zhes bya'o/ /tshod ma la ni sdig pa nyid/ /ces pa ni sha'i tshod ma srog gcod pa la sogs pa med par tshod ma med de des na tshod ma'i ming ni sdig pa zhes bya'o/ /byis pa la ni 'gal ba nyid/ / ces pa ni byis pa shi ba la ni 'gal ba zhes bya'o/ /skyes pa la ni rdo rjer gsungs/ /zhes pa ni skyes pa'i rdo rje la ni rdo rje zhes bya'o/ /bud med la ni snod bzangs nyid/ /ces pa ni shes rab ma'i pad+ma'i ming ni snod bzangs zhes bya'o/ /rab chags shin tu mthong ba nyid/ / ces pa ni rab tu chags pas na rab chags te bzang po mthong bas so/ /ci zhe na pad+ma mthong bas rab tu chags pa bzang por 'gyur ro/ /'khyud pa la ni chos zhes brjod/ /ces pa ni chos 'byung gi rdo rje 'khyud pa gang yin pa de ni 'khyud pa ste chos su brjod do/ /'dri ba la ni mar me'o//zhes pa la gsal bas mar me ste/ 'dod chags kyis gsal bar byed pas na mar me'o/ /'dri ba ni rdo rje chos 'byung 'dri bas na 'dri ba la mar me zhes bya'o/ /shin tu 'dri la me zhes bya/ /zhes pa ni 'dod chags chen po'i me'i rdo rjes pad+ma la rab tu 'dri bas na shin tu 'dri zhes bya'o//'gro ba la ni phreng can ma/ /zhes pa la rdo rje pad+mar 'gro zhing song ba de ni phreng can ma zhes bya'o/ /'ong la shin tu phreng can ma/ /zhes pa ni rdo rje las byang chub kyi sems 'phro ba'i rnam pa 'ong ba de la ni shin tu phreng can ma zhes bya'o//myur ba la ni byug ces bya/ /zhes pa ni rdo rjes pad+ma la myur bar byug cing reg pa la sogs par 'gyur ba la byug pa zhes bya'o/ /bldag la lce 'og ces bya ste/ /zhes pa ni pad+ma'i 'og gi cha la lces bldags pa de la lce 'og ces bya'o/ /so la bza' ba zhes pa la sogs pa ni go sla'o//'di dag bshad do lag chen po/ /zhes pa la 'di dag ni dgongs pas bshad pa'o/ /lag chen po zhes pa ni lag na rdo rje la bod pa'o/ /shin tu phreng can ma zhes pa la sogs pa nas grags mthong ma zhes pa'i mthar thug pa'i rnal 'byor ma nyi shu rtsa bzhi dang /he ru ka dang bcas pa'i dkyil 'khor nyi shu rtsa lnga'i rnam par dag pa ni dgongs pas bshad pa'i brda'i tshig ces pa'i tha tshig go/ /'jig rten gsum zhes pa la sogs pa ni go sla'o/ /sa bcu'i nang gi sbyor ba bshad par bya ste/nyer 'dun grong mtha' lhan cig ces pa ni lus dang nye ba'i 'dun pa ni 'dod pa'i 'dun pa zhes pa'i don to/ /de gang zhe na haM ngo / /lhan cig ces pa ni/ bdud rtsi lnga'i rang bzhin gyi zla tshes dang / thig le dang har ldan pa ni haM zhes pa'i tha tshig go/ /'dus pa'i phyi rol zhes su gsungs//zhes pa ni phyi rol gyi dbang po rnams dkyil 'khor gyi gzugs kyis gang du 'dus pa zhes brjod par 'gyur ro/ /nye ba'i 'dus pa zhes pa ni sprul pa'i 'khor lor gang phung po la sogs pa thams cad 'dus pa de ni nye ba'i 'dus pa zhes bya'o/ / nang de bzhin zhes pa ni de bzhin nyid kyi chos 'byung du a'i thig le'i nang gi dbus su sems dgod pa ni nang de bzhin zhes bya'o/ /gnas la 'bras bu zhes su gsungs/ /zhes pa ni sprul pa dang / chos dang / longs spyod dang / bde ba chen po rnams la gnas su gsungs so//nye ba'i gnas la shing nyid do/ /zhes pa ni 'khor lo'i dbus su a wa d+hU tI shing gi gzugs su gnas pa ni nye ba'i gnas su dgongs so/ /grong mtha' la ni sa bon gsungs/ /zhes pa na a dang hUM dang oM dang haM rnams sa bon gyi gzugs la 'khor lo'i dbus su gnas pa la grong mtha' la ni sa bon gsungs zhes bya'o//nye ba'i grong mtha' myu gu'o/ /zhes pa ni bya gdong gi khong stong gi myu gu ni grong mtha' ste/ des na myu gu ste bya gdong la grong mtha' zhes bya'o/ /tshogs pa la ni sdong bur gsungs/ /zhes pa la sdong bu ni a wa d+hU tI ste/gnas der byang chub kyi sems kyi thig le'i tshogs 'gro ba ste/ des na tshogs pa la ni sdong bu zhes bya'o/ /gcig pu la ni 'dab mar gsungs/ /zhes pa ni bde ba chen po gcig pu nyid kyis sdig pa dang dmyal ba las skyob pas na 'dab ma ste/des na gcig pu la 'dab ma zhes bya'o/ /stong pa la ni rtsa ba'o/ /zhes pa la stong pa zhes pa ni shes rab kyi rang bzhin no/ /rtsa ba zhes pa ni mdud pa gsum gyi rtsa ba ste gzhi zhes pa'i don to/ /des na stong pa la rtsa ba zhes bya'o/ /de ltar sa bcu pa la sogs pas bshad par rig par bya'o//de ltar dgongs pas bshad ces bya ba la sogs pa ni go sla'o/ /kye lags zhes pa ni bod pa'o/ /grogs mo zhes pa ni bshes mo zhes pa'o/ /'gro kun gang zhes pa ni gang gis bde ba dang bral na 'gro ba mtha' dag la thabs med ces pa'o/ / mtha' dag dri ma med pa zhes pa ni stong pa nyid ma gtogs par bden brdzun mtha' dag ci yang ma yin no zhes pa'i don to/ /blta dang bral ba skye bo ltos/ /zhes pa ni blta bar bya ba dang bral ba la skye bo ltos shig pa ste/ 'gro ba mtha' dag gis stong pa nyid du ltos shig ces pa'i don to//gsog gsob rang bzhin brdzun slu ba/ /zhes pa ni gsog gsob kyi sngags kyi sgra dang bral na slu zhing brdzun par 'gyur zhes pa'i don to/ /pad rtsa'i grib ma lta bur ltos/ /zhes pa ni pad+ma'i rtsa ba'i grib ma la ngang pa lta ba de bzhin du lha'i rnal 'byor pa rtsa'i grib ma lta bu dang /sgyu ma lta bur bsgom par bya'o/ /blta bar bya ba gang zhe na/ de nyid gsungs pa/ dbang po lnga ni sgyu 'dra zhing / /zhes pa la dbang po lnga ni sgyu ma lta bu dang rmi lam lta bur bsgom par bya'o/ /lnga phung dag pa'i rang bzhin zhes pa ni/ phung po lnga mngon par rdzogs par sangs rgyas kyi gzhan ni sangs rgyas par 'gyur ba ma yin no zhes bya'o//rnal 'byor 'di ni bsgoms pas 'grub/ /ces pa ni phung po lnga po 'di ni rnal 'byor bsgoms pas bsam gtan gyi rang bzhin 'grub par 'gyur ro zhes pa'i don to/ /'o'i sgra ni le'u rdzogs pa'i don to//sangs rgyas thod pa'i rgyud las sman bzang po dang dgongs pas bshad pa'i le'u ste lnga pa'o// //de nas zhes pa de ni sman bzang po dang dgongs pas bshad pa'i rjes thogs su'o/ /rab bshad pa zhes pa ni bstan pa'o/ /ci zhe na dkyil 'khor 'jigs pa'o//dkyil 'khor zhes pa la dkyil ni snying po'o/ /'khor ni len pa ste/ dkyil 'khor ro/ /mchog bzang zhes pa la mchog ni snying po'o/ /bzang po ni phul du byung ba ste bshad ces sbyar ro/ /shes rab thabs kyi sgrub pa yis/ /zhes pa ni rdo rje dang pad+ma dag gi sbyor bas de kho na nyid bshad pa'o//gang gis slob ma dbang bskur bar/ /zhes pa ni gang gis slob ma bkrus shing dbang bskur zhes pa'i tha tshig go/ /shes rab pad+ma'i nang dbus su/ /zhes pa ni shes rab kyi chos 'byung gi nang du chud pa'i dkyil 'khor de'i dbus su slob ma dbang bskur zhes pa'i don to//dpag tshad bye ba'i dkyil 'khor la/ /zhes pa la/ ko Ti zhes pa ni mtha' ste mdud pa'i gnas so/ /yo dza na ni zhes pa ni der sems sbyor bar byed pas na yo dza na ni ste dpag tshad do/ /dkyil 'khor zhes pa la dkyil ni snying po'o/ /'khor ni len pa zhes pa'i don to//sum brtsegs dag pa'i bdag nyid lus/ /zhes pa ni chos 'byung khong stong dang ze'u 'brur bcas pa ni sum brtsegs te/ rnam par dag pa'i lha dang ldan/ /zhes pa'i tha tshig go/ /'khor ba'i 'jigs pa las skyob pa/ /zhes pa la 'jigs pa ni 'jigs par byed pa ste/'khor ba las sgrol bar byed pas na skyob pa'o/ /dkyil 'khor de yi dbus gnas par/ /zhes pa ni de'i dkyil 'khor de'i sar gnas te/ lha'i de kho na nyid lhan cig skyes pa'i ye shes ston pa'o/ /mkhas pas slob ma bzang dbang bskur/ /zhes pa ni bla ma la gus pa'i slob ma la der dbang bskur zhes pa'i tha tshig go//phyi'i dkyil 'khor bya ba min/ /zhes pa la phyi'i dkyil 'khor byas pa ni byang chub las ring bar 'gyur zhes pa'i don to/ /ji ltar zhe na dkyil 'khor rdul tshon gyis bri bar byas nas slar 'jig par byas pas so/ / lha rnams bshig pa tsam gyis ni/ /sdig pa chen po skye bar 'gyur/ /zhes gsungs pa de'i phyir/ phyi'i dkyil 'khor mi bya zhing nang gi dkyil 'khor du dbang bskur bar bya zhes pa'i tha tshig go/ /de ltar yang / lus kyi de nyid mi shes pa'i/ /rnal 'byor phyi yi sbyor dga' ba/ /chos kyi phung po brgyad khri dang //bzhi stong la ni 'bras bu med/ /ces gsungs so/ /de nyid kyis na nang gi rnal 'byor ni mchog tu 'gyur ro/ /gang gis spyan drangs shing zhes pa ni gang gis spyan drangs pa'i de bzhin gshegs pa de nyid lus la gnas pa yin no/ /gang gis gshegs su gsol zhes pa ni yang de nyid nang na gnas pa yin no//gang na'ang bzhugs pa ma yin no/ /zhes pa ni gnas gang na'ang mi gnas te rang gi sems nyid la gnas zhes pa'i tha tshig go/ /lo bcu gnyis pa'i bu mo zhes pa ni dbyangs yig bcu gnyis kyi rang bzhin gyi shes rab ma lo bcu gnyis ma'o//ka ni bde ba'o/ /n+ya ni 'dren pa ste dga' ba la sogs pa rim bzhin du skyed par byed pas na ka n+ya ste bu mo'o/ /tshul khrims ma nyams pa zhes pa nas dul zhes pa'i bar gyi yon tan bcu gnyis dang ldan pa ni de bzhin gshegs pa rnams kyis bstod ces pa'i tha tshig go//de nas zhes pa ni go sla'o/ /de rnams la ni de nyid bshad/ /ces pa ni slob ma gus pa de rnams la de kho na nyid bshad cing bstan zhes pa'i tha tshig go/ /gsang ba phyi yi lnga dang ni/ /zhes pa la gsang ba ni gsang ba'i dbang ngo / /lnga ni phyi'i dbang zhes pa'i tha tshig go//bdun dang bcu bzhi bshad pa dang / /zhes pa la bdun ni dbang bdun te slob dpon gyi dbang zhes pa'i don to/ /bcu bzhi zhes pa ni de kho na nyid bcu bzhi rnam par dag pa'i dbang mtha' dag go/ /gnyi ga gcig tu 'dus pa zhes pa la gnyi ga ni shes rab dang ye shes so//'dus pa zhes pa ni bsres na bcu bzhir 'gyur zhes pa'i don to/ /gang du de kho na nyid bshad snyam pa la de nyid gsungs pa/ gsang ba'i de nyid bshad par bya/ /zhes pa la gsang ba ni bde ba chen po'i gnas so/ /der de kho na nyid bshad cing bstan zhes pa'o//su la zhe na/ slob ma la zhes pa'i don to/ /kha cig gi gsung gis ni gsang ba'i sprul pa'i 'khor lo'i mdud pa mtshon par bya bar bshad do/ /de yang / bzhi mdo mtshan gcig chu bo'i 'gram/ /der ni ri khrod gnas byas pa/ /gdong lnga pa ni gzung mi nus//glang chen mchog kyang ring bar bsam/ /zhes gsungs pa dang / yang / gang du yid rlung rgyu med pas/ /nyi ma'i 'od zer 'jug pa med/ /bla mas bshad pa'i man ngag gis/ /der ni sgrub po'i sems ngal bsos/ /zhes gsungs so//slob ma legs dang ldan zhes pa la sogs pa ni go sla'o/ /slob mas gsol ba gdab pa'i tshigs bcad gsungs pa/ 'khor ba zhes bya ba la sogs pa nas mgon po zhes pa'i mthar thug pa ni gsol ba 'debs pa'i tshigs bcad do/ /de ltar zhes bya ba la sogs pa ni go sla'o//man ngag 'di yi cha dag ni/ /glegs bam rnams las spyod yul min/ /zhes pa la de kho na nyid 'di ni glegs bam la mi bri'o/ /'o na gang las she na/ bla ma'i kha las shes par bya/ /zhes pa'i tha tshig go/ /dkyil 'khor gang la gang gis brgyan/ /zhes pa ni dkyil 'khor gang la lha gang gis brgyan te/bcom ldan 'das kyi thugs kyi rang bzhin gyis brgyan zhes pa'i tha tshig go/ /de nyid kyis na phyi'i dkyil 'khor bri bar mi bya'o/ /mtshan ma'i don gzhan gar bkod kye/ /zhes pa la mtshan ma ni rdo rje la sogs pa'o/ / don gzhan zhes pa ni don gzhan du 'gyur ba'o/ /gar bkod ces pa ni gnas gang du bkod ces pa'i tha tshig go/ /kye zhes pa ni bod pa'o/ /su yis sangs rgyas spyan drangs kyi/ /zhes pa la su yis zhes pa ni gang gis zhes pa'i don to/ /sangs rgyas spyan drangs zhes pa ni sangs rgyas kyi sku ste/sangs rgyas kyi lus spyan drangs pa'o/ /gang gis spyan drangs zhe na/ sems kyis zhes pa'i tha tshig go/ /'gro ba brdzun dra'i som nyir lhung / /zhes pa ni brdzun gyi dra ba ste/ mig 'phrul lta bu la 'gro ba rnams the tshom skyes pa'o//de nyid kyis na sems can brdzun zhing mig 'phrul lta bu'o/ /de lta bu mthong nas 'gro ba rnams the tshom skyes zhes pa'i don to/ /mtha' dag stong pa gos med kye/ /zhes pa ni mtha' dag stong pa la dri mas sbags pa dang bral bas na gos pa med pa'o/ /kye zhes pa ni bod pa'o//des na thams cad stong pa nyid dri ma med pa'i rang bzhin zhes pa'i tha tshig go/ /chu nang zla ba ci 'dra ba/ /zhes pa ni chu'i nang gi zla ba ci 'dra ba de ltar dkyil 'khor gyi 'khor lo zhes pa'i don to/ /de 'dra'i dkyil 'khor pad dbus zhes pa ni de dang 'dra ba pad+ma'i dkyil 'khor la gnas pa ste/chos kyi 'byung gnas kyi nang du chud pa'i chu'i zla ba lta bu ste/ he ru ka'i dkyil 'khor zhes pa'i don to/ /kye lags rnal 'byor ma tshogs ltos/ /zhes pa ni pad+ma'i nang der rtsa'i gzugs kyi rnal 'byor ma'i tshogs ltos zhes pa'i don to/ / de ni he ru ka gcig dang zhes pa ni de he ru ka gcig pus blta ba ste gnas der he ru ka gcig pu 'ba' zhig byang chub kyi sems kyi rang bzhin du blta zhes pa'i tha tshig go/ /thams cad skyed par byed ces pa ni/ thams cad skyed pa'i gnas zhes pa'i tha tshig go/ /'gro kun rmi lam slu ba zhes pa ni ji ltar rmi lam du bud med bzang mo dang sbyor ba mthong ba de ltar thams cad blta bar bya ste/'gro ba mtha' dag rmi lam gyis slu zhes pa'i don to/ /gti mug las ni bskyed pa ltos/ /zhes pa ni gti mug las skyes pa ltos shig pa ste/ gti mug las rnam par rtog pa thams cad bskyed ces pa'i tha tshig go//ltos zhes pa ni phyag na rdo rje la sna tshogs sde mas bod pa'o/ /sangs rgyas thod pa zhes pa ni bshad zin to/ /dkyil 'khor 'jigs pa zhes pa ni rnam par rtog pa 'jigs par byed pa'i dkyil 'khor 'dir dbang bskur bar bya ba ste/ de'i le'u ni drug pa'o// //da ni phyi'i dkyil 'khor bri bar bya ste/ de nas zhes pa ni dbang bskur ba'i dkyil 'khor bstan pa'i rjes thogs su'o/ /lha bskyed pa'i dkyil 'khor bstan par bya zhes sbyar ro/ /ri'i phug dang tshang tshing ngam/ /zhes pa la bde ba chen po mi g.yo ba'i bdag nyid kyis na ri'o//dman pa'i sems can rnams kyis gting dpag par mi nus pas na phug go/ /bdud rtsi'i khung bur gyur pas na tshang tshing ngo / /yang na dur khrod dang ni zhes pa ni sems can thams cad kyi rgyud mnyam pa nyid du lhag par gnas zhes pa'i don to//gdod nas grub pa zhes pa ni rtag tu grub pa'i yongs su rdzogs pa 'char ba dang nub pa dang bral ba rtag tu nam mkha' dang mnyam pa bde ba chen po'i rnam pa gang du nyams su myong ba de'i rang bzhin du bya zhes sbyar ro/ /rgya mtsho'i 'gram zhes pa ni de dang yang dag par sbyor ba'i shes rab ma'i chu skyes ni rgya mtsho'i 'gram mo//shes rab ma gcig gi chos 'byung la yang yon tan lnga dang ldan par gsungs so/ /yang na shes rab ma yang lngar gsungs te/ de gang zhe na/ de nyid bshad pa/ ri phug ces pa ni lo bcu gcig ma'o/ /tshang tshing zhes pa ni lo bcu gnyis ma'o//dur khrod ces pa ni lo bcu drug ma'o/ /gdod nas grub pa zhes pa ni lo nyi shu ma'o/ /rgya mtsho'i 'gram zhes pa ni lo nyi shu rtsa lnga ma'o/ /lo bcu gcig ma ni bcud kyis len pa sgrub pa la'o/ /lo bcu gnyis ma ni shin tu chags pa'i dam tshig gi don du bstan to//lo bcu drug ma dang sngags la goms par bya'o/ /lo nyi shu ma dang nam mkha' la 'gro ba sgrub bo/ /lo nyi shu rtsa lnga ma ni dbang bskur ba'i don du'o zhes pa 'di dag thams cad bshad do/ /phyi'i dkyil 'khor zhes pa la sogs pa ni go sla'o//pho brang rim gsum zlum po la/ /zhes pa ni gzhal yas khang gi nang du rim pa gsum pa rdo rje'i phreng bas zlum por bskor ba'i 'khor lo bri zhes pa'i tha tshig go/ /rdo rje gsum gyis yongs su bskor/ /zhes pa ni rtse gsum pa'i rdo rje nag pos bskor zhes pa'i tha tshig go//phyi rol gru bzhi lham pa zhes pa ni rdo rje phreng ba'i phyi rol du gru bzhi lham pa zhes pa'i don to/ /sgo bzhi zhes pa la sogs pa ni go sla'o/ /pad+ma nyi ma nyi shu lnga'i zhes pa ni 'khor lo'i dbus su nyi ma'i gdan lnga'o/ /de'i phyi rol du yang nyi ma'i gdan brgyad do//sgo bzhir nyi ma'i gdan bzhi dgod do/ /de'i dbus chud sa bon ni/ /zhes pa ni 'khor lo'i dbus kyi nyi ma'i steng du hUM bsam pa ste/ bcom ldan 'das he ru ka'i sa bon hUM dang phreng bzangs ma la sogs pa'i lha mo rnams sgo nga las skye ba'i rim pas ka la sogs pa'i nyi shu rtsa bzhi sa bon du 'gyur zhes pa'i tha tshig go//skad cig tsam gyis zhes pa la skad cig ste/ myur bar rdzus te skye ba'i rim pas bcom ldan 'das bskyed pa'i tshe lha thams cad bskyed par 'gyur zhes pa'i don to/ /bcom ldan 'das kyi phyag mtshan gsungs pa/g.yas na cang te'u dang gri gug go/ /g.yon na kha T+wAM ga dang thod pa ste/ zhal gcig phyag bzhir 'gyur zhes pa'i tha tshig go/ /skyil krung phyed pa zhes pa la sogs pa'i yon tan nyi shu rtsa bzhi dang ldan pa'i bcom ldan 'das bsgom zhes pa'i don to/ / rnal 'byor ma nyi shu rtsa bzhi ni sku mdog sngon mo shin tu 'jigs pa'i gzugs can thams cad zhal gcig phyag gnyis ma'o/ /thod pa 'chang zhes pa ni rnal 'byor ma 'di rnams kyi g.yon na thod pa g.yas na gri gug man ngag las shes par bya'o/ /de ni rnal 'byor ma rnams kyi ming rab tu bshad de phreng bzangs ma dang /'dod can ma dang / 'jigs pa ma dang / thub dka' ma rnams ni bcom ldan 'das kyi phyogs bzhir gnas pa'i rnal 'byor ma bzhi'o/ /dge ba'i ska rags can ma dang / gzugs can ma dang / rnam rgyal ma dang / 'byung gnas ma dang / thod pa can ma dang / mtsho chen ma dang / byed pa ma dang / bsod nams ma ste/ rnal 'byor ma 'di rnams ni rim pa gnyis pa'i phyogs dang mtshams su gnas pa'o/ /sgrol byed ma dang / 'jigs ma dang / mthong ma dang / mi pham ma dang / dge ma dang / 'gyur med ma dang / dus mtshan ma dang / grags chen ma rnams ni rim pa gsum par phyogs dang mtshams su gnas pa'o/ /mdzes sdug ma dang / nor 'dzin ma dang / skal bzang ma dang / grags mthong ma rnams ni sgo na gnas pa'i rnal 'byor ma'o/ /de yi dbus gnas rnal 'byor ma//he ru ka la bde ster ma/ /zhes pa la sna tshogs sde ma de ni g.yon na thod pa 'dzin cing g.yas na gri gug 'chang ba ste he ru ka dang 'dra ba'o/ /lhag ma ni go sla'o/ /zhal nas khrag ni 'thor byed ma/ /zhes pa ni bcom ldan 'das kyi gzugs can bcom ldan 'das ma zhes pa'i don to//dkar mo zhes pa ni dbus kyi 'dab ma la gnas pa'i rnal 'byor ma bzhi ni dkar mo zhes pa'i tha tshig go/ /rim pa gnyis pa na gnas pa thams cad ni mdog sngon po zhes pa'i don to/ /ljang gu zhes pa ni sgo na gnas pa'i rnal 'byor ma bzhi ni mdog ljang gu'o zhes pa'i tha tshig go//thams cad khu bar ldan gyur ma/ /zhes pa la rnal 'byor ma de rnams shin tu chags pas khu ba dang ldan par 'gyur zhes pa'i tha tshig go/ /lha'i dkyil 'khor bskyed pa ni/ /zhes pa la sogs pa ni go sla'o/ /gtso bo las gzhan tha dad gzugs//zhes pa ni he ru ka dang nye ba na gnas pa'i rnal 'byor ma rnams ni mdog dkar mo zhes pa'i tha tshig go/ /rnal 'byor ma kun de dang 'dra/ /zhes pa ni rim pa gnyis pa na gnas pa'i rnal 'byor ma rnams mdog nag mo ste gtso bo'i mdog dang 'dra zhes pa'i tha tshig go//de ltar he ru ka mgon pos/ /rnal 'byor ma kun spyad par bya/ /zhes pa ni phreng bzangs ma la sogs pa thams cad spyad cing dga' bar byas pas nyi ma'i dkyil 'khor gyi steng du zhu ba'i gzugs te/ byang chub kyi sems kyi gzugs su gnas zhes pa'i tha tshig go//'dis ni mngal nas skye ba'i rim pa gsungs so/ /sgo nga las skye ba dang mngal nas skye ba dag la ni glus bskul ba yod la/ rdzus skyes la ni glus bskul ba med ces pa'i tha tshig go/ /de ni zhu bar mthong nas ni/ /sgo yi rnal 'byor ma yis bskul//zhes pa la sgo'i rnal 'byor ma zhes pa ni sgo bzhi na gnas pa'i rnal 'byor ma rnams so/ /de la shar gyi sgo na gnas pa'i rnal 'byor ma mdzes sdug mas bskul ba'i glu gsungs pa/ ji ste 'jig rten snyan mnan na/ /zhes pa ni ci'i phyir 'jig rten pa rnams kyi don du snyan gsan phab na zhes pa'i don to//ci'i phyir khyod ni mi dgyes gyur/ /zhes pa ni ci'i phyir mi dgyes par gyur zhes pa'i tha tshig go/ /gal te khyod bdag tshig gsan na/ /zhes pa ni gal te khyod bdag gi tshig gsan par bzhed na zhes pa'i don to/ /mi dgyes gyur pa mtha' dag thong //zhes pa ni mi dgyes par gyur pa mtha' dag thong zhes pa'i don to/ /'di ni shar na gnas pa'i mdzes sdug ma'i glu'o/ /srid 'jigs skye bo kun lhung bas/ /zhes pa ni srid pa'i 'jigs par skye bo mtha' dag lhung zhes pa'i tha tshig go/ / stong pa'i thugs ni ma mdzad par/ /zhes pa ni stong pa nyid kyi thugs ma mdzad ces pa'i don to/ /nyid kyi dgongs pa kun bsgrub kye/ /zhes pa ni khyed nyid kyis bya ba thams cad sgrubs shig grogs po kye zhes pa'i don to/ /rnal 'byor ma yi grogs po bzhengs/ /zhes pa ni rnal 'byor ma rnams kyi bshes gnyen bzhengs shig ces pa'i don to//lho sgo na gnas pa'i nor 'dzin ma'i glu'o/ /gal te sngon gtso tshig gsan na/ /zhes pa ni gal te sngon gyi bdag po bdag gi tshig gsan na zhes pa'i don to/ /'bras bu yal bar ma dor cig / ces pa ni 'bras bu la lhod par ma mdzad cig ces pa'i don to/ /khyod mi snang na 'gro ba yi/ /zhes pa ni khyod mi snang zhing nub par gyur na 'gro ba mtha' dag nub par 'gyur zhes pa'i don to/ /skye bo mtha' dag gdung bas non/ /zhes pa ni 'gro ba mtha' dag mi dga' ba'i gdung bas non zhes pa'i don to//nub sgo na gnas pa'i skal bzang ma'i glu'o/ /log pa'i nga rgyal ma mdzad par/ /zhes pa ni log pa'i nga rgyal ma mdzad kye grogs po zhes pa'i don to/ /stong pa'i rang bzhin spangs nas ni/ /zhes pa ni stong pa nyid kyi rang bzhin mthong zhes pa'i don to//khyod kyis dngos med kun thong la/ /zhes pa ni khyod kyis dngos po med pa kun thong la dngos po'i rang bzhin long zhes pa'i don to/ /rnal 'byor ma yi tshogs la spyod/ /ces pa ni rnal 'byor ma'i khyu thams cad la spyod ces pa'i don to/ /byang sgo na gnas pa'i grags mthong ma'i glu'o//byams pa dang snying rje dang dga' ba dang btang snyoms kyi rang bzhin rnal 'byor ma de rnams kyis yang dag par bskul ma thag tu khu ba'i gzugs las bzhengs zhes pa'i don to/ /'jigs pa'i 'khor ba sgrol byed pa/ /zhes pa la 'jigs pa ni 'jigs par byed pa ste/'khor ba las sems can rnams sgrol bar byed pas na/ 'khor ba'i 'jigs las sgrol byed pa/ /zhes bya ba'i tha tshig go/ /dkyil 'khor gyi 'khor lo bsgom pa'i le'u ste bdun pa'o// //da ni sbyin sreg gi dkyil 'khor bshad par bya ste/de nas zhes pa ni bsgom pa'i dkyil 'khor bshad pa'i rjes thogs su sbyin sreg bshad ces sbyar ro/ /zhi ba dang ni rgyas pa dang / de bzhin dbang dang mngon spyod do/ /zhes pa ni zhi ba la ni lha dkar po sbyar ro/ /rgyas pa la ni lha ser po sbyar ro/ /dbang la ni lha dmar po'o//mngon spyod la ni lha nag po ste/ las dang rjes su mthun pa'i kha dog bya zhes pa'i don to/ /sbyin sreg rnam pa bzhir gsungs so/ /zhes pa la ni zhi ba la sogs pa'i sbyin sreg bzhi ni sangs rgyas thod pa'i rgyud du gsungs so/ /shing gi sbyin sreg mi bya zhing / /zhes pa ni rgyud gzhan las gsungs pa'i u dum bA ra dang pa la sha la sogs pas sbyin sreg mi bya zhes pa'i tha tshig go//'bru la sogs pas kyang mi bya/ /zhes sbyar ro/ /me tog gis ni sbyin sreg bya/ /zhes pa ni bud med kyi rdul gyi me tog gis lus la sbyin sreg bya zhes pa'i don to//me tog lnga po mchog chen dang / /zhes pa ni bram ze la sogs pa'i rigs kyi shes rab ma lnga'i rdul blangs la sbyin sreg bya'o/ /de nyid mchog ste bzang por 'gyur ro/ /'o mas yang dag ldan par bya/ /zhes pa ni rdul dang ldan pa'i shes rab ma dang snyoms par zhugs te byang chub kyi sems 'o ma dang bsres pas lus kyi thab khung du bsreg ces pa'i tha tshig go//da ni zhi ba la sogs pa'i sbyin sreg bstan par bya ste/ zhi ba'i thab khung gru bzhi pa/ /zhes pa la sogs pa ni go sla'o/ /e waM ma yA mchog chen gyi//zhes pa ni e ni spyan ma'o/ /waM ni mA ma kI'o/ /ma ni gos dkar mo'o/ /yA ni sgrol ma'o/ /spyan ma ni bram ze'i bu mo'o/ /mA ma kI ni g.yung mo'o/ /gos dkar mo ni gar mkhan ma'o/ /sgrol ma ni khrus mkhan ma ste/ 'di rnams kyi chos 'byung gi gnas kyi ze'u 'bru'i dbus su phung po la sogs pa bsreg par bya'o//mchog chen ni mchog tu bzang ba'i sbyin sreg yin zhes pa'i don to/ /gsungs zhes pa ni rdo rje 'chang gis gsungs zhes pa'i tha tshig go/ /rtsa gsum 'jigs pa'i rdo rje zhes pa la sogs pa ni go sla'o//me'i lha zhes pa la oM sarba de ba zhes pa la sogs pa'i sngags lan bdun brjod pas me lha spyan drang ngo / /me lha spyan drang ba'i sngags so/ /sangs rgyas thod pa'i sbyor ba yis/ /zhes pa ni sangs rgyas thod pa'i sbyor bas me lha spyan drang zhes pa'i don to//sangs rgyas kun gyis byin brlabs shing / /zhes pa la sogs pa ni go sla'o/ /de nas blo ldan sbyin sreg bya/ /zhes pa ni shes rab can gyi rnal 'byor pas sbyin sreg bya zhes pa'i tha tshig go/ /der ni sol ba gzhug bya ba/ /a shwad+tha dang n+ya gro dang / zhes bya ba la sogs pa ni go sla'o/ /pad+ma ni pad+ma'o/ /ut+pa la ni ut+pa la'o/ /ku mu da dmar po zhes pa ni ut+pa la dmar po'o/ /dri zhim zhes pa ni dri zhim pa'i me tog dmar po ste phyi'i me tog lnga po 'di dag bsreg ces pa'i don to/ /ka ra bI ra gzhan nyis 'gyur//zhes pa ni ka ra bI ra'i me tog nyis 'gyur kha sbyar bar byas te bsreg ces sbyar ro/ /yang na pad+ma la sogs pa'i tshad gang yin pa de'i nyis 'gyur gyi ka ra bI ra bsreg ces pa'i don to/ /zhi bar gsungs zhes pa ni de bzhin gshegs pa'i sbyin sreg 'dis zhi bar gsungs pa'o//oM pad+ma rA dza zhes bya ba la sogs pa ni pad+ma bsreg pa'i sngags so/ /ut+pal 'o mas sbyin sreg bya/ /zhes pa ni ut+pa la dang 'o ma bsres la sbyin sreg bya zhes pa'i don to/ /oM g+ha g+ha g+hA ta ya g+hA ta ya zhes bya ba la sogs pa ni me tog ku mu ta la sogs pa bsreg pa'i sngags so//dri zhim pa'i tsan+dan bsreg pa'i sngags gsungs pa/ oM d+harme d+harma rA dza zhes pa la sogs pa'o/ /ka ra bI ra dri zhim dmar/ /zhes pa ni sngags 'dis me tog ka ra bI ra dang dri zhim pa'i mar khu bsres zhes pa'i don to/ /'di'i sngags gsungs pa/ oM ka li su ka li zhes pa la sogs pa'o//me tog re re re re la/ /zhes pa ni sngags lan re bzlas pa'i me tog re re bsreg ces pa'i don to/ /me ni 'o mas zhi bar bya/ /zhes pa ni sbyin sreg rdzogs nas me 'o mas gsad par bya zhes pa'i tha tshig go/ /de nas zhes pa la sogs pa ni go sla'o/ / kha dog ser po rnam par bsam/ /zhes pa ni rdul tshon ser pos thab khung zlum po mdog bsgyur zhes pa'i don to/ /bdag nyid he ru ka rnam pa/ /zhes pa ni bdag nyid he ru ka ser po'i gzugs su bsgom zhes sbyar ro/ /rgyas pa'i don du shing lnga'i yam shing bsreg ces gsungs te/gang zhe na/ a mra la sogs pa'i shing lnga'o/ /sor bcu gnyis kyi tshad tsam du zhes pa ni slob dpon nyid kyi sor bcu gnyis kyi tshad kyi yam shing gzung bar bya'o/ /ma gas zhes pa ni rma med pa'o/ /ma skams zhes pa ni rlan dang bcas pa'o/ /ma bcad ces pa ni rtse mo ma nyams pa'o//bu ga can zhes pa ni srog chags kyis zos pa'i bu ga can te de rnams spang bar bya zhes pa'i don to/ /de'i dbus su zhes pa la sogs pa ni go sla'o/ /rgyas pa'i sngags gsungs pa/ oM ga ga zhes pa la sogs pa'o/ /sngags 'dis rgyas pa'i sbyin sreg bya zhes pa'i tha tshig go//phyi nas ser po chus zhi bya/ /zhes pa ni sbyin sreg zin nas chu ser pos me gsad par bya zhes pa'i don to/ /rgyas pa'i sbyin sreg go/ /dbang du bya ba'i sbyin sreg mchog /ces pa ni dbang du byed pa'i sbyin sreg mchog tu gces pa rab tu bshad ces sbyar ro//thab khung gru gsum dmar po la/ /zhes pa ni thab khung gru gsum pa la rdul tshon dmar pos mtha' dag g.yogs zhes pa'i don to/ /zabs dang rgyar ni sor mo brgyad/ /ces pa ni 'og gi zabs su sor brgyad brko ba'o//steng gi cha ste rgyar sor brgyad kyi tshad du bya ba'i don to/ /de dbus pad+ma 'dab brgyad dmar/ /zhes pa ni thab khung de'i dbus su pad+ma 'dab ma brgyad pa mdog dmar ba bri zhes pa'i tha tshig go/ /zla ba dmar la sogs pas brgyan/ /zhes pa ni zla ba dmar po'i 'od zer gyis brgyan pa'o//sogs pa'i sgras ni thab khung mtha' dag brgyan zhes sbyar ro/ /grwa zhes pa la sogs pa ni go sla'o/ /bdag nyid he ru ka zhes pa la sogs pa la/ he ru ka sku mdog dmar po phyag gnyis pa/ g.yas na rdo rje dmar po g.yon na khrag gis bkang ba'i thod pa bsnams pa bsam par bya'o//a sho ka yi yam shing dang / /zhes pa ni a sho ka'i yam shing sor brgyad pa go ro tsa na dang bcas pas dbang gi sbyin sreg bya zhes pa'i don to/ /dbang gi sbyin sreg gi sngags gsungs pa/ oM a sho ka ni zhes pa la sogs pa'o//nyin bdun sbyin sreg byas tsam gyis/ /zhes pa ni nyi ma bdun du sbyin sreg byas pas ji skad gsungs pa bzhin du 'gyur ro/ /chu dmar po yis me zhi bya/ /zhes pa ni tsan+dan dmar po bsres pa'i chus gsad par bya zhes pa'i tha tshig go/ /mngon spyod dang ni bsad pa mchog /ces pa la mngon spyod ni nad la sogs pa'i nye bar 'tsho ba'o/ /bsad pa ni gdon mi za bar gsod pa ji lta ba de rab tu bshad par bya zhes sbyar ro/ /zabs dang rgyar ni khru gang tshad/ /ces pa la 'og gi char ni khru gang gi tshad tsam brko ba'o//steng gi rgyar yang khru gang gi tshad tsam gzhag par bya'o/ /mdog ljang gu zhes bya ba ni rdul tshon ljang gus thab khung brgyan par bya'o/ /grwa grwa ru ni rdo rje bri/ /zhes pa ni thab khung gi grwa dang grwa ru rdo rje bri bar bya zhes pa'i don to/ /dbus kyi sa gzhi stong par bya'o zhes pa ni dbus kyi stong pa la ci yang mi bri zhes pa'i don to//sha lngas sbyin sreg bya zhes pa la sha lnga ni go ku da ha na ste de rnams kyis mngon spyod dang bsad pa dag la sbyin sreg bya'o/ /sbyin sreg gi sngags gsungs pa/ oM mA ra ya mA ra ya zhes pa la sogs pa'o/ /bdag nyid he ru ka zhes pa ni/bdag nyid sku mdog nag po'i he ru kar bsgom par bya zhes pa'i don to/ /lhag ma ni go sla'o/ /phaT mdzad 'jigs shing 'jigs par mdzad/ /ces pa ni phaT kyi sgra 'jigs par byed pa sbyin sreg gi dus su bya zhes pa'i don to/ /ha ha zhes kyang sbyar ro//ljang gu'i chu yis me zhi bya/ /zhes pa ni chu ljang gus me gsad par bya zhes pa'i tha tshig go/ /gang gis bsreg ces pa ni su yis bsreg ces pa'i don to/ /gang zhig bsreg ces pa ni ci zhig bsreg ces pa'i don to/ /gang gi zhi ba zhes pa ni su'i zhi ba zhes pa'i don to/ / gang zhi ba zhes pa ni ci zhig zhi zhes pa'i don to/ /gang gis rnam rtog kun bcom pa/ /zhes pa ni gang gis rnam par rtog pa kun bcom pa de la sbyin sreg gis ci zhig bya zhes pa'i don to/ /de'i dam tshig tsam gyis thams cad 'grub snyam du dgongs so/ /de yis sems ni mgu bar byed//ces pa ni phyi'i sbyin sreg brdzun pas sems mgu bar mi 'gyur te/ nang gi sbyin sreg nyid gtso bo zhes pa'i don to/ /sangs rgyas thod pa zhes bya ba la sogs pa ni bshad zin to/ /sbyin sreg gi cho ga zhes pa ni sbyin sreg gi cho ga'i sgrub pa'o/ /de rjod par byed pa'i le'u ste brgyad pa'o// //da ni spyod pa'i le'u rab tu bshad par bya ste/ de nas zhes pa ni sbyin sreg gi cho ga'i le'u bshad pa'i rjes thogs su'o/ /rnal 'byor gang gis spyod kun byed/ /ces pa ni rnal 'byor pa gang gis spyod pas 'khor ba'i pha rol du 'gro bar byed pa zhes pa'i don to//bud med shin tu mchog gyur dang / /zhes pa la spyod pa'i khyad par ji lta bu zhe na bud med de/ bu mo mchog tu phul du byung ba dang zhes pa'i don to/ /dngos grub brgyad dang yang dag ldan/ /zhes pa ni gang gi tshe rnal 'byor pa yon tan gyi dbang phyug brgyad dang ldan pa de'i tshe/spyod pa yang dag par brtsam par bya zhes pa'i tha tshig go/ /sems can dngos grub gang 'dod pa/ /de de dngos grub rtag tu ster/ /zhes pa ni sems can gang dag gis dngos grub gang dang gang blangs pa de dang de rnal 'byor pa des ster bar 'gyur ro//lag pas thod pa zhes pa la sogs pa ni/ lag pas thod pa 'dzin pa gcer bu skra grol ba 'khyam par bya'o/ /rgyan rnams kun las rnam grol zhing / /zhes pa ni rnam par rtog pa thams cad spangs pa'o/ /nam mkha' dang ni mtshungs gyur pa//zhes pa ni gang nam mkha' dang 'dra zhing mtshungs par 'gro ba de ni nam mkha' dang mtshungs par gyur pa ste chos kyi dbyings kyi rang bzhin zhes pa'i don to/ /shes rab can gyi khyim du slong mo zhes pa la sogs pa ni go sla'o/ /bsdus pa'i don gsungs pa/ gang du der zhes pa ni gnas gang yin pa der rnal 'byor pa spyod pas gnas par bya'o/ /ji ltar de ltar zhes pa ni ji lta ba de lta bu'i rnam pas gdon mi za bar 'khor ba'i pha rol du 'gro zhes pa'i don to/ /gang gis de yis sangs rgyas te/ /zhes pa ni rnam pa gang gis te de yis sangs rgyas su 'gyur zhes pa'i don to//rang gi rnam rtog dag gis nyams/ /zhes pa ni rang gi rnam par rtog pa sems nyams pa des na skye ba 'di la sangs rgyas su mi 'gyur zhes pa'i don to/ /mtha' dag rang bzhin rnam par dag /ces pa ni thams cad kyi rang bzhin rnam par dag pa'o//de gang zhe na phung po la sogs pa'o/ /de'i tshe skye ba 'di la sangs rgyas su 'gyur zhes pa'i tha tshig go/ /sangs rgyas thod pa zhes bya ba la sogs pa ni bshad zin to/ /spyod pa rjod par byed pa'i le'u ste dgu pa'o// //da ni sman bzang po dang mo gsham bu dang ldan pa'i le'u rab tu bshad par bya ste/de nas zhes pa ni spyod pa'i le'u bshad pa'i rjes thogs su'o/ /gser du nges par byed pa'i le'u zhes pa ni gser gyi las kyis le'ur nges shing gdon mi za bar 'gyur zhes pa'i tha tshig go/ /slob dpon las ni rab dang bas//zhes pa la sogs pa ni go sla'o/ /'di ni phyi yi sman yin te/ /zhes pa ni 'di ni phyi'i sman rnams ni ma yin gyi 'on kyang nang gi sman yin no zhes pa'i don to/ /shun lpags lo ma ma yin zhing / /zhes pa ni shun lpags dang / lo ma'i sman rnams kyi las ma yin zhes pa'i don to//dngul chu bcud len ma yin te/ /zhes pa ni dngul chu dang bcud kyis len gyi las ma yin zhes pa'i don to/ /mu zi lhang tsher ma yin zhing / /zhes pa ni ji ltar mu zi dang lhang tsher ba dag gis 'ju ba'i las ma yin zhes pa'i don to/ /lcags dang zha nye zangs ma min//zhes pa ni rdo khab len gyi lcags dang zha nye dang zangs ma rnams kyi las ma yin zhes pa'i don to/ /'di lta bu'i tshig thos nas zhes bya ba la sogs pa la phyag na rdo rjes sna tshogs sde ma'i zhabs la phyag 'tshal nas ci zhig smras she na/ de nyid gsungs pa/ lha mo legs so zhes ni smra//zhes pa ni kye lha mo legs so legs so zhes brjod pa'i don to/ /sman gyi mchog ni gang yin zhes pa ni sman de dag gang yin zhes pa'i don to/ /dngos grub kyang ni ji lta bu/ /zhes pa'i dngos grub kyang ji lta bu yin zhes pa'i don to/ /lha mo chen mo khyod kyis gsungs//zhes bya ba la sogs pa ni go sla'o/ /phyag na rdo rjes dris pa'i rjes thogs su bka' stsal pa zhes pa ni bcom ldan 'das sna tshogs sde mas gsungs te bka' stsal pa zhes pa'i don to/ /khyim 'di nyid du gnas pa yi/ /zhes pa ni lus 'di la gnas pa'i sman no//sman chen po yis 'grub ces pa ni 'di nyid du gnas pa'i sman chen pos 'grub par 'gyur zhes pa'i don to/ /de yang snod bzang mchog ces pa ni rab tu bzang ba'i snod mchog ste/ snying po la sman gnas zhes pa'i don to/ /byis pa rmongs pas mi shes so//zhes pa la byis pa ni so so'i skye bo'o/ /mi shes pa ni rmongs pas shes pa ma yin zhes pa'i don to/ /lhag ma ni go sla'o/ /snod bzang la ni gnas pa'i bcud/ /ces pa ni khyad par can gyi snod pad+ma la gnas pa'i bcud de mi shes zhes pa'i don to//gnas gang na gnas she na/ de'i gnas gsungs pa/ ze'u 'bru gsang ba'i spyod yul te/ /zhes pa la pad+ma'i ze'u 'bru gab pa ni de'i yul te gnas der 'dug ces pa'i don to/ /ro bcud rtsa yi nang gnas pa/ /zhes pa ni chos kyi 'byung gnas kyi nang gi g.yas logs na 'dug pa'i rtsa ni ro bcud ma ste/de'i nang gi bcud la yang ro bcud ces bya ste de ni sman gyi mchog go/ /sman des lcags gser du 'gyur ro/ /gcig gis zhes pa la sogs pa ni go sla'o/ /rab 'byor zhes pa ni yang dag pa'i sbyor ba gang gis lcags gser du 'gyur ba de bshad ces sbyar ro//me tog ldan pa'i bud med gang / /zhes pa ni gang gi tshe bu mo de khrag dang ldan pa de'i tshe sman du 'gyur ro/ /bud med de gang zhe na/ de nyid gsungs pa/ gzhon nu kha dog nag mo ste/ /zhes pa ni gzhon nu ma gang kha dog nag mo lo bcu drug ma'i khrag gi rdul de ni sman gyi mchog tu bstan zhes pa'i tha tshig go//rgyud 'di thos dang ldan zhes pa nas btsog med ma zhes pa'i mthar thug pa'i yon tan bdun dang ldan pa bka' la sogs pa'i shes rab kyi rang bzhin zhes pa'i tha tshig go//'di lta bu'i bud med ces pa la sogs pa ni go sla'o/ /skyes bu shin tu chags che zhing / /myur du byang chub sems 'bab pa/ /zhes pa ni skyes pa gang gcig tu chags pa dang ldan pa pad+ma la reg pa tsam gyis byang chub kyi sems 'tshor bar 'gyur ba'i skyes pa ni phyag rgya'i dngos grub kyi snod du mi 'gyur ro zhes pa'i tha tshig go//der ni me tog ldan bud med/ /gser gyi sbyor ba zhes pa ni gang gi tshe mdog nag mo'i bu mo'i me tog ste khrag dang ldan pa de'i tshe gser du byed pa yang dag par brtsam par bya zhes pa'i don to/ /gser gyi las gsungs pa/grub pa'i bcud kyis byugs pa yis/ /zhes pa la grub pa'i bcud de khrag gis byugs pa'i dkar dmar 'dres pa'i zla ba'i dkyil 'khor bsgom par bya'o/ /der ni sa bon yi ge d+hI/ /zhes pa ni zla ba de la yi ge d+hI'o/ /khyad par ji lta bu zhe na/sngon du ri yi rgyal pos brgyan/ /zhes pa ni dang po zla ba'i dbus su yi ge suM/ suM gyi dbus su yi ge hrIHbsam par bya'o/ /de nas me tog dang ldan pa'i shes rab ma dang snyoms par 'jug par bya'o/ /zangs ma'i dngos grub srang gcig bcas/ /zhes pa ni zangs ma srang gcig zlum por byas la bu mo'i g.yas logs su gzhag par bya'o//de nas rdo rje dang pad+ma yang dag par sbyar bar bya'o/ /lhag ma ni go sla'o/ /ri rab zla ba sa bon rgyal/ /zhu gyur the tshom med pa yin/ /zhes pa ni snying ga'i zla ba dang suM gyi sa bon dang d+hI'i sa bon gsum gcig tu byang chub kyi sems kyi gzugs su zhu ba chos 'byung du 'dzag cing 'bab pa'i don to//de nas zangs ma'i ri lu de yang dag par blangs te me'i nang du bcug na gser du 'gyur bar som nyi med do/ /snod bzang der ni ngal bsos pa/ /zhes pa la sogs pa ni go sla'o/ / de'i yon tan gsungs pa/ de yi ma sha gcig gis ni/ /srang brgya ru ni 'gyur ba yin/ /zhes pa la sogs pa ste 'di la dad par bya'o/ /blo gros chen po thos ldan pa/ /zhes pa ni rnal 'byor pa blo gros chen po thos pa dang ldan pa gal te ma dad par byed na de'i tshe dmyal bar 'gro bar 'gyur te dus ji srid kyi bar du dmyal bar gnas she na/ji srid sangs rgyas bzhugs kyi bar/ /zhes sbyar ro/ /chos phung brgyad khri bzhi stong zhes pa la sogs pa ni go sla'o/ /ji srid sangs rgyas ye shes yod/ /ces pa ni ji srid sangs rgyas kyi ye shes yod pa de srid kyi dus su 'tsho'o zhes pa'i don to//mi ni bskal pa bye bar 'tsho/ /zhes pa ni de'i rdul dang dngul chu 'o ma se gcig dang lhan cig byang chub sems dang bsres pa zla ba drug gi bar du gal te zos na zhes pa'i don to/ /da ni mo gsham gyi bu byed pa gsungs pa/de nas zhes pa la sogs pa la/ yang dag sbyor bas bkrus tsam gyis/ /zhes pa ni rdo rje dang pad+ma'i sbyor ba dang spyan ma la sogs pas bkrus par bsgoms na skad cig de la bu dang ldan par 'gyur zhes pa'i tha tshig go/ /sngon gyi gtso bos ji ltar gsungs/ / zhes pa ni sngon gyi de bzhin gshegs pa rnams kyis ji ltar khrus kyi cho ga gsungs pa/ de ltar bdag gis khrus kyi cho ga rab tu bshad ces pa'i don to/ /kha dog lnga'i rdul tshon zhes pa la sogs pa ni go sla'o/ /dkyil 'khor 'jigs pa bri zhes pa ni he ru ka'i dkyil 'khor lha dgu'i bdag nyid bri bar bya zhes pa'i don to//der ni bum pa lto che ba/ /zlum po bzhi ni bri bar bya/ /zhes pa ni mtshan nyid thams cad rdzogs pa'i bum pa bzhi bzung ste/ bum pa chus bkang zhing ras kyis dkri ba'i don to/ /rang gi khrag ces pa ni srin lag gi khrag gis bri zhes pa'i don to//mtshan bri zhes pa ni bum pa bzhi la sngon du gsungs pa'i mtshan ma bri zhes pa'i don to/ /bud med mo gsham zhes pa la sogs pa ni go sla'o/ /nag po'i dmar po 'jigs chen po/ /zhes pa la nag po ni bcom ldan 'das so/ / dmar po ni bcom ldan 'das ma'o/ /'jigs chen po zhes pa ni rus pa'i rgyan dang ldan par bsgom zhes pa'i don to/ /lhag ma ni go sla'o/ /zhal gcig pa la phyag bzhi pa/ /zhes pa ni sngon du gsungs pa'i drug gi dkyil 'khor gyi mtshan ma dang ldan pa bsgom pa ste/ bum pa'i nang du rnal 'byor ma bzhi dang ldan pa bum pa'i chu la zhu bar bsam pa'i don to/ /de nas ral gri 'dzin pa'i skyes pa bzhi zhes pa ni mo gsham gyi khrus kyi dus su ral gri 'dzin pa'i skyes bu bzhi gzhag par bya zhes pa'i don to/ /ral gris nam mkhar bsnun cing mo gsham khrus kyi dus su skyes bu de rnams kyis nam mkha' ste steng du ral gris gcod par byed pa ste/bum pa re res 'khrud pa'i dus su skyes pa re res ral gris nam mkha' gcod par byed ces pa'i don to/ /sangs rgyas thod pa'i sbyor ba yi/ /zhes pa ni sangs rgyas thod pa'i bsam gtan gyi bud med mo gsham gdon mi za bar bu dang ldan par 'gyur zhes pa'i don to//sangs rgyas thod pa'i zhes pa la sogs pa ni bshad zin to/ /sman bzang po dang mo gsham gyi khrus kyi cho ga rjod par byed pa'i le'u ste bcu pa'o// //da ni mkha' lding dang rig pa 'dzin pa'i le'u rab tu bshad par bya ste/de nas zhes pa ni sman bzang po la sogs pa bshad pa'i rjes thogs su'o/ /sngon du gsungs pa'i cho ga yis/ /zhes pa ni le'u bzhi par gsungs pa'i cho gas lha dgu'i bdag nyid kyi dkyil 'khor bri zhes pa'i tha tshig go/ / blo [(]lhan [,]ldan [)]he ru ka dang ni/ /kun nas rnal 'byor ma brgyad bskyed/ /ces pa ni gshin rje mche ba ma la sogs pa'i rnal 'byor ma brgyad dang ldan pa bskyed par bya'o/ /phyogs kyi rnal 'byor ma dkar zhing / /zhes pa ni phyogs na gnas pa'i rnal 'byor ma rnams ni mdog dkar mo'o/ / mtshams kyi dmar mo nyid yin no/ /zhes pa la mtshams na gnas pa'i rnal 'byor ma rnams ni mdog dmar mor bsgom zhes pa'i tha tshig go/ /sngon du gsungs pa'i cho ga yis/ /zhes pa ni le'u bzhi par gsungs pa'i cho ga'i bya ba thams cad bya ba'o/ /bum pa rnam pa bzhi po la//zhes pa la sogs pa ni go sla'o/ /'bras btags rang bzhin zhes pa ni 'bras su chu blugs 'jam zhing zhib par btags par byas la/ btags pa de las rig pa 'dzin pa gnyis bya ba'i don to/ /de yi lag par ral gri sbyin/ /zhes pa ni de'i lag par 'bras btags pa'i rang bzhin las byas pa'i ral gri sbyin par bya'o//de'i snying gar sngags bris pa gzhug ces pa'i tha tshig go/ /mar khu chen po'i snag tsha dang / /zhes pa ni mi'i mar khu las byas pa'i snag tshas gro ga'i 'dab ma la sngags bris te rig pa 'dzin pa'i snying gar gzhug ces pa'i tha tshig go//sngags gsungs pa/ oM bud+d+ha ka pA li zhes pa la sogs pa'o/ /lan bdun bar du spyan drang ngo / /zhes pa ni 'chad bzhin pa'i sngags dang / ka ra bI ra dkar po'i lcug mas spyan drang zhing dgug ces pa'i don to/ /spyan drang ba'i sngags gsungs pa/ oM bud+d+ha ka pA li ni g+ha Ta g+ha Ta zhes pa la sogs pa'o//lan bdun sngags pa tsam gyis ni/ /zhes pa ni sngags 'dis bskul ma thag tu rig pa 'dzin pa gnyis bar snang du 'gro bar dgongs so/ /gcig ni dum bu dum bur ni/ /sa la lhung bar 'gyur ba yin/ /zhes pa ni rig pa 'dzin pa gnyis bar snang la 'thabs pas rig pa 'dzin pa gcig dum bu dum bur gyur nas dus su zin pa'i steng du lhung ngo //lhung ma thag tu dus su zin pa ldang bar 'dir som nyi mi bya'o/ /pad bteg la sogs bco lnga po/ /glegs bam la ni bri ma byas//zhes pa ni longs spyod kyi pad+ma mnan pa la sogs pa sbyor ba bco lnga po rnams glegs bam ste sangs rgyas thod pa'i rgyud du ma bris te/ 'on kyang bla ma'i man ngag las shes par bya zhes pa'i don to/ /sangs rgyas thod pa zhes pa la sogs pa ni bshad zin to/ /rig pa 'dzin pa'i sbyor ba'i man ngag rjod par byed pa'i le'u ste bcu gcig pa'o// //da ni sngags sna tshogs kyi rab tu sbyor ba'i le'u bshad par bya ste/ de nas zhes pa ni rig pa 'dzin pa'i sbyor ba'i man ngag bshad pa'i rjes thogs su'o/ /de nas phyag na rdo rjes rnal 'byor ma sna tshogs sde ma la phyag 'tshal te 'di skad ces gsol to zhes pa ni/phyag na rdo rjes sna tshogs sde ma la phyag byas te 'di skad ces smras zhes pa'i don to/ /ci zhig smras she na/ de nyid gsungs pa/ rnal 'byor ma yi gtsor gyur pa/ /zhes pa la sogs pa ni go sla'o/ / rgyud 'dir khyod kyis gang gsungs pa/ /zhes pa ni sangs rgyas thod pa'i rgyud 'dir sna tshogs sde ma khyod kyis gang gsungs pa'i rab tu sbyor ba zhes pa'i don to/ /sangs rgyas kun gyis ma bshad do/ /zhes pa la sangs rgyas kun te rnam par snang mdzad la sogs pa rnams kyis ma gsungs shing ma bshad ces pa'i don to//e ma'o sems can don la brtson/ /zhes pa la e ma'o zhes pa ni ngo mtshar ba'o/ /sems can rnams kyi don ched che bas na brtson zhes sbyar ro/ /e ma'o sangs rgyas kun bskyed ma/ /zhes pa la e ma'o zhes pa ni bshad zin to/ / de bzhin gshegs pa thams cad skyed par byed pas na sangs rgyas kun skyed ma zhes pa'i don to/ /e ma'o phyag rgya che la brtson/ /zhes pa ni phyag rgya chen po la nan tan che zhing dad pa dang ldan pa rnams la dngos grub ster ba'i don to/ /lha mo gsum zhes pa ni kye lha mo sngags kyi rab tu sbyor ba gsungs zhes pa'i tha tshig go//dang po'i le'ur gang gang gsungs/ /zhes pa ni dang po'i le'ur rnam 'phrul sna tshogs gsungs pa de thams cad kyi lha mos gsungs zhes pa'i tha tshig go/ /'di lta bu yi tshig gsan nas/ /zhes pa la sogs pa ni go sla'o//gsungs pa zhes pa ni sna tshogs sde mas gsungs pa'o/ /rgyal mtshan 'chang ba blang byas la/ /de yi sha yang blang bya zhing / /zhes pa ni bar snang na 'phyang ba'i sha dang rus pa blang bar bya'o/ /ro'i phyogs gang gi sha dang rus pa blang zhe na/ de nyid gsungs pa/ rked cha'i zhes pa ste rked pa'i sum mdo'i phyogs kyi sha dang rus pa blangs pa'i don to/ /rked pa'i rus pa blangs nas ci zhig bya zhe na/ de nyid gsungs pa/ thab khung du ni bya zhes pa ni rus pa des thab khung gi gzugs su bya zhes pa'i don to/ /de yi thod pa'i rjes bzung ste/ /zhes pa ni ro'i thod pa blangs te thod pa der sdong bu gzugs par bya'o//de yi mar khus bkang bya zhing / /zhes pa ni rked pa'i cha'i sha blangs pa btsos te mar khu bya'o/ /mar khu 'dis sdong bu btsugs pa'i thod pa dag dgang zhes pa'i don to/ /thab khung gru gsum steng du gzhag /ces pa ni rked pa'i cha'i rus pa las byas pa'i thab khung gru gsum gyi dbus su thod pa gzhag par bya zhes pa'i don to/ /gzhan yang du ba 'bebs pa zhes pa ni de'i steng du thod pa bzhag la du ba dbab ces sbyar ro/ /sangs rgyas thod pa'i rnal 'byor pas/ /zhes pa ni sangs rgyas thod pa'i sbyor ba 'dzin pa'i rnal 'byor pas phyis sngags bzla bar bya'o//sngags gsungs pa/ oM bud+d+ha ka pA li ni ha ra ha ra/ zhes pa la sogs pa'o/ /'di lta'i sngags zhes pa la sogs pa ni go sla'o/ /rol rtsed phreng ba btung bar bya/ /zhes pa ni chos kyi 'byung gnas su babs pa'i byang chub kyi sems pad+ma las btung zhes pa'i don to//gang gi pad+ma las she na/ de nyid gsungs pa/ bu mo lo ni bcu drug ma/ /zhes pa ni lo bcu drug lon pa'i tshad kyi bu mo'o/ /lang tsho'i gzugs la brtse ba can/ /zhes pa ni gzhon nu lang tsho la bab pa mdzes shing snying rje dang ldan pa'o//de ni rnal 'byor pa yis spyad/ /ces pa ni bu mo gcer bur byas la gnyis kyis gnyis sbyor 'dod pa spyad cing hi hi'i sngags gdon par bya'o/ /rol rtsed phreng ba btung bar bya'o/ /zhes pa ni de'i pad+ma la lces yang dang yang du blangs zhes pa'i don to//snyoms par 'jug pa'i dus su du ba lag pa g.yon par gzhag ste/ de nas yang dag par sbyor bar bya'o/ /pad+ma las byung rdzas gang zhig /ces pa ni pad+ma de las byung ba'i rdzas zhes pa'i tha tshig ste/ chos kyi 'byung gnas kyi nang nas byung ba'i zhes sbyar ro//de nyid kyis ni du ba mnye/ /zhes pa ni pad+ma las byung ba des du ba mnye zhes pa'i don to/ /ming med mthe bos me tog sbyin/ /zhes pa la ming med pa ni pad+ma'o/ /mthe bo ni rdo rje ste de dag gis me tog gi rdul dang byang chub kyi sems bsregs pa'i mig sman gyi nang du blugs par bya zhes pa'i don to//ri lu brgya rtsa brgyad bya zhes pa ni 'di las ri lu brgya rtsa brgyad byas te/ ri lu re re la sngags brgya rtsa brgyad mngon par bsngags zhes sbyar ro/ /sngags gsungs pa/ oM bud+d+ha ka pA li ni traM hri hUM phaT/ sngags 'dis mngon par bsngags so//'jig rten gsum na rnyed dka' zhing / /zhes pa la sogs pa ni go sla'o/ /srin lag gi ni sor mo yis/ /zhes pa ni srin lag kyang yin la sor mo yang yin pas na srin lag gi sor mo ste des so/ /mig la du ba byugs tsam gyis/ /zhes pa ni mig la du ba byugs pa tsam gyis chad par 'gyur ba'i yon tan dang ldan par 'gyur zhes pa'i don to//lag pa g.yon pas zhes pa la sogs pa ni go sla'o/ /mdzub mo byugs pa tsam gyis zhes pa ni de'i yon tan 'chad bzhin pa dang ldan par 'gyur zhes bya ba'i tha tshig go//gung mo byugs pa tsam gyis ni/ /zhes pa ni gung mo dbu mas mig la byugs pa 'og nas 'byung ba'i ngo mtshar byed do/ /mthe bong gi ni dud pa yis/ /bdag nyid chen po byugs tsam gyis/ /zhes pa ni mthe bos mig la byugs pa tsam gyis khang bzangs la sogs pa phye mar byed pa'i don to//mthe chung gis ni mig byugs na/ /zhes pa ni mthe chung gi sor mos byugs pa tsam gyis 'chad par 'gyur ba'i mi snang ba la sogs pa'i yon tan du 'gyur ro/ /bya rog ces pa la sogs pa ni go sla'o/ /sbyor ba glegs bam la ma bris/ / zhes pa ni yang dag pa'i sbyor ba glegs bam las shes pa ma yin no/ /'o na gang las shes she na/ de nyid gsungs pa/ bla ma'i zhal las shes par bya/ /zhes pa ni bla ma'i zhal gyi man ngag gis shes par bya zhes pa'i don to/ /de nas zhes pa ni mig sman bshad pa'i rjes thogs su'o//sngags dang rus pa'i sbyor ba rab tu bshad par bya ste/ sngags dang rus pa'i sbyor ba yis/ /rtag tu sna tshogs las byed do/ /zhes pa ni sngags dang ldan pa'i rus pas rab 'byam sna tshogs pa rtag tu ste/ dus thams cad du byed ces pa'i tha tshig go/ /de ltar glang po che'i rus pa dang /oM bud+d+ha ka pA li ni hri hUM zhes pas gsad par bya'o/ /rta'i rus pa dang / oM bud+d+ha ka pA li ni khaM hri hUM phaT/ ces pas bskrad par bya'o/ /de ltar glang po che'i rus pas zhes pa nas hUM phaT/ ces pa'i bar du rus pa bcu bzhi dang / sngags bcu bzhis las bcu bzhi byed ces pa'i don to//le'us bsdus pa'i don gsungs pa/ sems gcig dri med me long bzhin/ /zhes pa ni sems gcig nyid dri ma med pa'i me long bzhin du blta ba ste/ de bas na sems nyid la sogs pa 'di rnams kyi rgyur gyur zhes pa'i tha tshig go//gang bsams de yang gzugs brnyan dang / /zhes pa ni gang bsams pa de yang gzugs brnyan lta bu ste/ gang gzugs brnyan gyi rnam pa de lta bu'i lha'i sbyor bas gang bsams pa de thams cad 'grub par 'gyur zhes pa'i don to/ /rmi lam lta bu shes mod kyi//zhes pa ni 'gro ba mtha' dag rmi lam dang sgyu ma lta bu zhes pa'i don to/ /'on kyang rnam par rtog pas bzung / /zhes pa ni 'on kyang rnam par rtog pas 'jig rten pa bzung zhes pa'i tha tshig go/ /sangs rgyas thod pa zhes pa la sogs pa ni bshad zin to/ / sngags kyi rab tu sbyor ba zhes pa ni mig sman gyi las kyi tshogs la sogs pa bsdus pa'o/ /gang du de rjod par byed pa'i le'u ni bcu gnyis pa'o// //da ni rnam par dag pa'i le'u rab tu bshad par bya ste/ de nas zhes pa ni mig sman dang / sngags kyi las kyi tshogs bstan pa'i rjes thogs su'o/ /rnam dag le'u rab rnyed dka'/ /zhes pa ni de bzhin nyid du rnam par dag pa'i le'u de rab tu rnyed par dka' ba ste/ nyan thos la sogs pas dka' ba ste kyang mi rnyed pa zhes pa'i don to/ /ne ne mo dang tsha mo dang / /ma dang bu mo chung ma nyid//ces pa ni shes rab ma 'di dag lnga ste/ rnal 'byor ma mchog lnga lus las 'byung zhes pa'i don to/ /shes rab can gyis 'di ltar spyad/ /ces pa ni rnal 'byor ma 'di rnams rdo rje dang pad+ma'i yang dag pa'i sbyor bas spyad cing bsten par bya'o/ /des cir 'gyur zhe na/de nyid gsungs pa/ gal te phyag rgya che 'dod na/ /zhes pa ni gal te rnal 'byor pa phyag rgya chen po'i 'dod pa dang ldan pa de'i tshe shes rab ma lnga po 'di dag 'dod par bya zhing nye bar longs spyod par dgongs so/ /g.yung mo dang ni gar mkhan ma/ /khrus mkhan ma dang gtum mo yis//bu mo ko ba byed mar gsungs/ /zhes pa ni rnal 'byor ma lnga po 'di rnams phyag rgya chen po 'dod pas spyad par bya zhes pa'i don to/ /blo dang ldan pas 'di dag spyad/ /ces pa ni blo dang ldan pa'i rnal 'byor pas 'dod pa spyad cing bsten zhes bya ba'i don to//de lnga rnal 'byor ma yi mchog /ces pa ni rnal 'byor lnga po 'di dag ni mchog ste phul du byung zhing phyag rgya chen po sgrub pa la gong du gyur zhes pa'i don to/ /ma dag pa yi sems sbyang phyir/ /zhes pa ni ma dag pa'i sems te/ rnal 'byor pa'i sems sbyang ba'i don du bstan pa'o//mig ni sring mor 'gyur ba ste/ /zhes pa ni mig gi rang bzhin sring mor 'gyur ba'o/ /rna ba tsha mo nyid yin no/ /zhes pa ni rna ba'i rang bzhin tsha mor 'gyur ba'o/ /sna ni ma ru 'gyur ba ste/ /zhes pa la sna'i rang bzhin ni mar 'gyur ba'o/ /lce ni bu mo nyid yin no//zhes pa la lce'i rang bzhin ni bu mor 'gyur ba'o/ /yid ni chung mar 'gyur ba ste/ /zhes pa la yid kyi rang bzhin ni chung mar 'gyur ba'o/ /lha mo lnga po de rnams mchog /ces pa ni rnal 'byor ma lnga po rnams ni 'dod pa'i yon tan lnga'i rang bzhin te/ gong ma zhes pa'i don to//phyag rgya chen po rab ster ma/ /zhes pa ni rnal 'byor mas phyag rgya chen po rab tu ster zhes pa'i don to/ /gti mug gar mkhan nyid du 'gyur/ /zhes pa ni gti mug gi rang bzhin gar mkhan mar 'gyur ba'o/ /zhe sdang g.yung mo nyid yin no/ /zhes pa ni zhe sdang gi rang bzhin g.yung mor 'gyur ba'o//'dod chags khrus mkhan ma yin te/ /zhes pa ni 'dod chags kyi rang bzhin khrus mkhan mar 'gyur ba'o/ /nga rgyal gtum mo nyid yin no/ /zhes pa ni nga rgyal gyi rang bzhin gtum mor 'gyur ba'o/ /phrag dog ko ba byed pa'o//zhes pa ni phrag dog gi rang bzhin ko ba byed mar 'gyur ba'o/ /gzugs las gti mug skye ba ste/ /zhes pa la mig ni gti mug rnam par dag par 'gyur ba'o/ /sgra las zhe sdang skye ba yin/ /zhes pa ni sgra las zhe sdang skye bar 'gyur ba'o/ /dri las longs spyod pas 'dod chags zhes pa la sogs pa ni go sla'o//shin tu sbyor ba'i sems kyis ni/ /zhes pa ni shin tu gcig tu bsam gtan la sems pa'i rnal 'byor pa'o/ /skye 'dir dngos grub ma thob kyang / /zhes pa ni gal te mi'i skye ba 'dir phyag rgya chen po'i dngos grub ma thob kyang ngo / de'i tshe cir 'gyur zhe na/ de nyid gsungs pa/ skye gzhan srid par dngos grub 'gyur/ /zhes smos te/ 'di las gzhan pa'i skye ba la gdon mi za bar phyag rgya chen po'i dngos grub 'thob ces pa'i don to/ /de ltar yang gsang ba'i mdzod las/ dbang bskur yang dag sbyin ldan na//skye dang skye bar dbang bskur 'gyur/ /de yi skye ba bdun la ni/ /ma bsgoms par ni dngos grub thob/ /gang yang bsgom pa dang ldan zhing / /gal te dam tshig sdom la gnas/ /skye 'dir las dbang gis ma grub/ /skye ba gzhan du dngos grub 'thob/ /re zhig dam tshig sdom mi gnas//dngos grub thob pa lta zhog gi/ /mi yi skye ba'ang rnyed par dka'/ /gang yang bla ma brgyud pa yi/ /rim 'ongs de nyid rig pa yi/ /sgrub po de yis bsgrub snyam dgongs/ /zhes gsungs so/ /dag pa'i sems kyis blta mi bya//zhes pa ni gang gis sems dag pa lhan cig skyes pa'i ye shes kyis dkar po dang / ljang gu dang / nag po'i mdog tu mi blta zhing mi brtag pa'i don to/ /'o na ji ltar blta zhe na/ lhan cig skyes pa'i bde ba'i rnam pa thams cad blta zhes pa'i don to/ / de ltar yang / rab tu dga' ba'i nam mkha' las/ /tsan+dan me tog bud med bzang / /mthong bas gang tshe 'dzag 'gyur ba/ /de tshe dga' bar yang dag bshad/ /sems can kun la rnam par gnas/ /sems can de dag kun gyi sems/ /dpag dka' skad cig nyid las shes//zhes gsungs so/ /lhag ma ni go sla'o/ /yid kyis gnyi ga spyad pas bde/ /zhes pa ni dngos po dang dngos po med pa gnyis ka spyad pas bde ba'i rang bzhin thob ces pa'i don to/ /der ni dpyad pa yod pa yin/ /zhes pa ni bde ba chen po yang dag par byung ba la dpyad pa yod pa ma yin no zhes pa'i don to//dngos po la ni dngos med yod/ /ces pa ni chos thams cad kyi dngos po la dngos po med pa stong pa nyid yod ces pa'i don to/ /dngos med la yod dngos po nyid/ /ces pa ni dngos po med pa stong pa nyid la dngos po yod ces pa'i don to//dngos dang dngos med gnyi ga stong / /zhes pa ni dngos po yang stong la dngos po med pa yang stong pa nyid de/ gnyi ga stong pa nyid du bsgom/ /zhes pa'i don to/ /'di dag sems kyi dag pa nyid/ /ces pa ni 'di dag thams cad sems kyi dag par dgongs so//de nas gzhan yang rab bshad pa/ /phyi yi lus ni sbyang phyir ro/ /zhes pa ni rgyu des phyi'i lus kyi mchog sbyang ba la rab tu bshad ces sbyar ro/ /lha dang ldan pa'i snying rje ste/ /zhes pa ni shes rab ma mthong ba tsam gyis snying rjer 'gyur ro//'khyud pa byams par 'gyur ba'o/ /zhes pa ni shes rab ma la 'khyud pa gang yin pa de ni byams par bstan zhes pa'i don to/ /drud pa'i sbyor ba'i bdag nyid ni/ /zhes pa ni rdo rje dang pad+ma yang dag par drud pa las dga' bar 'gyur zhes pa'i don to/ /gnyis ka 'dus las gang 'dzag pa//zhes pa ni shes rab dang thabs gnyis ka las byang chub kyi sems kyi bdag nyid 'dzag pa de ni btang snyoms su gsungs so/ /de ltar dngos po'i sbyor ldan pa/ /ji ltar 'dod chags kyis 'ching 'gyur/ /zhes pa'i don to/ /mthong ba las ni sdug bsngal skye//zhes pa ni shes rab ma mthong ba las 'dod chags kyi sdug bsngal skye zhes pa'i don to/ /'khyud las 'bras bu cung zad tsam/ /zhes pa ni 'khyud pa las cung zad dga' ba'i 'bras bu 'byung zhes pa'i don to/ /drud pa las ni dga' ba skye/ /zhes pa ni rdo rje dang /pad+ma yang dag par drud pa las mchog tu dga' ba skye zhes pa'i don to/ /kun gyi mtha' mar dga' bral ba/ /zhes pa ni thams cad kyi tha mar dga' ba shor zhing dga' bral skye zhes pa'i don to/ /lhag ma ni go sla'o/ /de kun bshang dang gci sogs su/ /zhes pa ni gang bza' ba dang btung ba de thams cad bshang ba dang gci ba la sogs par rnal 'byor rig pas rtag tu ste/dus thams cad du brtag ces pa'i don to/ /lhag ma ni go sla'o/ /nyed dang 'tshir ba nyid kyis ni/ /zhes pa ni nu ma nyed cing sub pa ste de la sogs pa'i bya bas phyag rgya chen por yang dag par bskyed ces pa'i don to//rnal 'byor ma lnga zhes pa ni rnal 'byor ma lnga'i rtsa lnga'o/ /sangs rgyas kyi dpal zhes pa ni phyag rgya chen po zhes pa'i don to/ /phyag rgya che ster byed pa ni/ /zhes pa ni khyad par du ster bar byed pa zhes pa'i don to/ / rnal 'byor pa yis de mchod na/ /zhes pa ni rnal 'byor pa yis shes rab ma lnga po de rnams bstan na zhes pa'i don to/ /'dod pa rnams kyis gos mi 'gyur/ /zhes pa ni spyod bzhin pa'am bsten bzhin pa na srid pa'i nyes pas gos par mi 'gyur zhes pa'i don to/ /phrag dog la sogs dri mas kyang //zhes pa ni phrag dog la sogs pa'i nyon mongs pa skyes kyang bsam gtan dang ldan pa la nyes pas gos par mi 'gyur ro/ /ji ltar yang 'gro ba mtha' dag brdzun dang sgyu ma lta bu yin na ji ltar nyes pa rnams kyis gos zhes pa'i tha tshig go//rnal 'byor pa yi mchog de nyid/ /ces bya ba ni rnal 'byor pa bsgom pa po nyid mchog tu phul du byung ba'i de kho na nyid shes pa'o zhes pa'i don to/ /srid pa'i nyes pas gos mi 'gyur/ /zhes pa la srid pa ste 'khor ba thog ma med pa'i rnam par rtog pa'i nyes pa rnams kyis mi gos shing mi reg ces pa'i don to//le'u'i bsdus pa'i don gyi tshigs su bcad pa gsungs pa/ ji srid kha ma byed mi gsor/ /zhes pa ni ji srid du pad+ma kha ma bye ba de srid du rdo rje gsor bar mi bya'o zhes pa'i don to/ /sangs rgyas sku srid sdig dang bral//zhes pa ni sangs rgyas kyi sku ji srid pa ste/ 'khor ba'i sdig pa'i dri ma dang bral zhes pa'i don to/ /byang chub sems ni 'dzag med pa/ /zhes pa ni byang chub kyi sems 'dzag par mi 'gyur ba'o/ /des cir 'gyur zhe na/ de nyid gsungs pa/gang de phun sum tshogs pa'i shing / /zhes pa ni byang chub kyi sems gang mi 'dzag pa'i phun sum tshogs pa'i shing ni rdo rje mkhrang zhes pa'i bar du'o/ /sangs rgyas thod pa zhes pa la sogs pa ni bshad zin to/ /le'u gang du sems rnam par dag pa rjod par byed pa'i le'u ni sems rnam par dag pa'i le'u zhes bya ba ste bcu gsum pa'o// //da ni sna tshogs sde ma'i le'u rab tu bshad par bya ste/ de nas zhes pa ni sems rnam par dag pa bshad pa'i rjes thogs su'o/ /sangs rgyas thod pa'i rgyud kyi gleng gzhi'i le'u rab tu bshad ces sbyar ro//de ltar phyag na rdo rje la sogs pa'i byang chub sems dpa' rnams zhes pa ni phyag na rdo rje la sogs pa'i byang chub sems dpa' rnams dang zhes pa'i don to/ /ri rab kyi rdul phra rab snyed dang mtshungs pa'i rnal 'byor ma rnams zhes pa ni ri rab lhun po'i rdul phra rab dang mtshungs pa ste/de nyid kyi rdul phra rab kyi rdul dang mtshungs pa'i sbyor ba rnams zhes pa'i don to/ /spyan gdangs shing mgu ba'i sems kyis zhes pa'i mig phye zhing sems dga' ba'i rnal 'byor ma rnams zhes pa'i don to/ /sna tshogs sde ma la btud de//bstod pa zhes pa ni/ rnal 'byor ma de rnams bcom ldan 'das sna tshogs sde ma la bstod par byed ces pa'i don to/ /e ma'o bcom ldan 'das lha mo/ /zhes pa la e ma'o zhes pa ni ngo mtshar ba'o/ /bcom ldan 'das lha mo zhes pa ni bcom pa dang ldan pa'i lha mo zhes pa'i don to//sangs rgyas thams cad skyed byed ma/ /zhes pa ni sangs rgyas thams cad ni rnam par snang mdzad la sogs pa ste/ de rnams skyed par byed pas na skyed byed ma'o/ /dpal dang grags pa che zhing 'jigs//zhes pa ni phyag rgya chen po'i dpal gyis byis pa'i rigs can rnams 'jigs par byed pas na grags pa chen po dang ldan pa'o/ /sems can kun la phan byed ma/ /zhes pa ni sems can gyi don thams cad la phan par byed ces pa'i don to/ /lha mo snying rje cher ldan ma//zhes pa ni lha mo snying rje chen po dang yang dag par ldan pa zhes pa'i don to/ /phyag rgya chen po blo chen ma/ /zhes pa ni stong pa nyid chen po'i rang bzhin gyis de bzhin gshegs pa rnams rgyas 'debs pas phyag rgya chen po'o/ /don chen 'bras bu ston mdzad ma//zhes pa la don chen po dngos grub chen po'o/ /de'i 'bras bu bde ba chen po'i ye shes ston par mdzad pas na/ ston mdzad ma'o/ /sangs rgyas thod pa yi ni rgyud/ /ces pa ni shes rab dang thabs kyi rgyud do/ /rdo rje 'chang gis sbas pa dang //zhes pa ni rdo rje 'chang bas ma gsungs pa'o zhes pa'i don to/ /sangs rgyas rnam par snang mdzad la sogs pas sems can de gang rnams la dngos grub ma gsungs pa de bcom ldan 'das mas gsungs zhes pa'i don to/ /gsungs gcig gis ni gsal mdzad de//zhes pa ni gsol ba 'debs pa'i tshig gcig gis skad cig la gsal bar mdzad ces pa'i don to/ /e ma'o snod chen lha mo khyod/ /ces pa la e ma'o zhes pa ni ngo mtshar ba'o/ /snod chen lha mo zhes pa ni gnas chen po'i ngo bo'i lha mo zhes pa'i don to//rnal 'byor ma kun 'dus mdzad ma/ /zhes pa ni rnal 'byor ma thams cad de rtsa thams cad bsdus shing bzlum pa zhes pa'i don to/ /lhag ma ni go sla'o/ /gsungs pa zhes pa ni sna tshogs sde mas gsungs pa'o/ /rnal 'byor ma ni thams cad nyon//zhes pa ni 'dod chen ma la sogs pa'i rnal 'byor ma thams cad nyon zhes sbyar ro/ /byang chub sems dpa' thams cad dang / /'dod chags bral dang bdag chen nyon/ /zhes pa la byang chub sems dpa' zhes pa ni phyag na rdo rje la sogs pa'o//'dod chags dang bral zhes pa ni nyan thos la sogs pa'o/ /bdag nyid che zhes pa ni tshangs ris la sogs pa'i lha rnams te de rnams thams cad nyon cig ces sbyar ro/ /sangs rgyas de bzhin gshegs pa nyon/ /zhes pa la sangs rgyas zhes pa ni sa bcu gcig brnyes pa'i sangs rgyas so//de bzhin gshegs pa zhes pa ni sa bcu gsum pa brnyes pa ste de rnams thams cad nyon zhes pa'i don to/ /lha dang klu dang mi ni nyon/ /zhes pa la lha ni tshangs pa la sogs pa'o/ /klu ni nor rgyas la sogs pa'o/ / mi ni mi nyid do/ /de rnams thams cad nyon cig ces sbyar ro/ /ci zhig nyan zhe na/ de nyid gsungs pa/ rgyud rgyal 'di ni bklags tsam gyis/ /zhes pa ni rgyud rgyal 'di lta ste sangs rgyas thod pa'i rgyud kyi rgyal po 'di mnyan pa dang bklags pa tsam gyis bsod nams chen por 'gyur zhes sbyar te/bris pa dang ston pa'i bsod nams la yang sangs rgyas dang byang chub sems dpa' dang lha dang klu dang mi rnams rjes su yi rang ngo zhes pa'i don to/ /phyag rgya chen po'i don du ni/ /sangs rgyas yon tan rnam pa dbul/ /zhes pa ni sangs rgyas kyi yon tan gyi rnam pa'i bsod nams 'di phyag rgya chen po'i dngos grub kyi don du dbul zhing bsngo zhes pa'i don to//sngags don zab mo rnams dang ni/ /zhes pa la sogs pa la/ gang zhig gsal byas bzod pa mdzod/ /ces pa ni bdag gis rgyud kyi rgyal po gsal bar byas pas sangs rgyas dang byang chub sems dpa' rnams bdag la bzod pa mdzod cig ces sbyar ro//de nas zhes pa ni rgyud kyi gleng gzhi bstan pa'i rjes thogs su/ sngags kyi bzlas pa rab tu bshad/ /ces sbyar ro/ /sngags kyi bzlas pa stobs po che/ /zhes bya ba ni sngags bzlas pas stobs chen por 'gyur ba'i don to//gal te dngos grub mchog 'dod na/ /zhes pa ni gal te rnal 'byor pa phyag rgya chen po'i dngos grub mchog tu phul du byung ba 'dod cing don du gnyer bar byed na zhes pa'i don to/ /sangs rgyas thod sbyor bzang po bzla/ / zhes pa'i shes rab dang thabs kyi bsam gtan gyis so/ /bzang po bzla zhes pa ni sngags kyi de kho na nyid bzang po dang ldan pa'i sngags bzla zhes pa'i don to/ /sngags gsungs pa/ oM hrIHbud+d+ha hUM ka pA li ni AH/ 'jug pa dang ldang ba dang gnas pa'i rlung la yi ge bcu gsum pa'o//'jug pa la oM/ 'byung ba la hrIHgnas pa la bud+d+ha/ bde ba la hUM nub pa la ka pA li ni/ ldang ba la AH'o/ /de ltar bzlas pa rab rnyed dka'/ /zhes pa ni rnam pa de lta bu'i sngags kyi bzlas pa'i man ngag nyan thos la sogs pas dka' bas kyang mi rnyed ces pa'i don to//sangs rgyas thod pa'i sbyor chud bzla/ /zhes pa ni sangs rgyas thod pa'i sbyor ba der sems chud pas sngags bzlas zhes pa'i don to/ /de ltar yid kyi bzlas ldan pas/ /zhes pa ni de lta bu'i bzlas pa dang ldan pa'i rnal 'byor pas dngos grub thob par the tshom med de/rnal 'byor pa de'i dngos grub tu 'gyur gyis gzhan du ni ma yin no/ /snying po'i sngags gsungs pa/ oM bud+d+ha ka pA li ni a hrI he hUM phaT/ nye ba'i snying po'i sngags gsungs pa/ oM ka pA li badzri Ni ho hUM a dur lak+She hUM phaT/ de dag snying po dang nye ba'i snying por yang dag par bshad do//de nas zhes pa ni sngags kyi de nyid bshad pa'i rjes thogs su dbang bskur ba rab tu bshad ces sbyar ro/ /slob ma dad brtan gang zhig gis/ /zhes pa ni dad pa dang ldan pa'i slob ma ste mi phyed pa'i dad pa dang ldan pa'i slob mas so//shes rab ma la gsol ba gdab/ /ces pa ni bla ma shes rab ma'i drung du gsol ba gdab par bya'o/ /ji ltar gsol ba gdab ce na/ de nyid gsungs pa/ maN+Dal rnam pa lnga byas te/ /zhes pa ni rnal 'byor ma lnga rnam par dag pa'i dkyil 'khor lnga byas la gsol ba gdab ces pa'i don to//ji lta bu'i maN+Dal bya zhe na/ dri zhim pa'i dngos po yis/ /zhes gsungs te/ dri zhim pa'i chus dkyil 'khor bya ba'i don to/ /sangs rgyas kun gyis brgyan byas pa//zhes pa ni sangs rgyas lnga rnam par dag pa'i lha mo'i dbang lnga stsol cig pa ste/ rnam par snang mdzad la sogs pa'i sangs rgyas thams cad kyis brgyan pa'i dbang lnga stsol cig ces pa'i don to/ /lha mo che la gsol ba gdab/ /ces pa ni dbang gi don du lha mo sna tshogs sde ma la gsol ba gdab ces pa'i don to//zhal du bza' ba'i rdzas mchog bstab/ /ces pa ni zas kyi mchog byang chub kyi sems kyi bza' ba dang / khrag 'dres pa pad+ma'i kha nas sbyin par bya zhes pa'i don to/ / 'dis ni lha mo'i b+ha ga'i dbang bstan to/ /gsol ba dang zhes pa ni dung phor gyi dri'i chu btung ba'am/ yang na byang chub kyi sems btung ba'o/ /'dis ni gsang ba'i dbang bstan pa'o/ /yid ni tshim zhing thugs dgyes so/ /zhes pa ni slob ma'i sems dga' bas byang chub kyi sems btung zhing tshim par bya ba'i don to//da ni shes rab ye shes kyi dbang gsungs pa/ lha mo dgyes par mthong nas ni/ /tshig 'di dag ni smra bar byed/ /ces pa'i lha mo sna tshogs sde ma'i zhal gyi pad+ma bye zhing / dgyes par mthong nas de nas slob mas tshig 'di dag smras zhes pa'i don to/ /rnam par rtog pa mang po yis/ /zhes pa nas zhi bar mdzod ces pa'i bar gyi tshigs bcad kyis sna tshogs sde ma la gsol ba gdab par bya'o/ /de nas slob mas ci zhig bya zhe na/de nyid gsungs pa/ der ni rgyan rnams thams cad dang / /lhab lhub rgyan rnams dbul bar bya/ /zhes pa ni gser dang / dngul dang / nor bus spras pa'i rgyan rnams lha mo la dbul zhing bstab par bya zhes pa'i don to/ /dad pa brtan pa'i sems kyis ni//zhes pa ni mi phyed pa'i dad pas dbul bar bya zhes sbyar ro/ /de nas bdag nyid dbul bar bya/ /zhes pa ni de'i rjes thogs su bdag nyid dang dngos po thams cad dbul bar bya zhes pa'i don to/ /sna tshogs zas zhes pa ni zan dang /sha dang tshod ma sna tshogs pa skyur ba dang mngar ba la sogs pa'o/ /sna tshogs btung zhes pa ni chang sna tshogs te bu ram gyi chang dang dgun chang dang sbrang chang la sogs pa'o/ /de yi mdun du dbul bar bya/ /zhes pa ni de'i ste/ sna tshogs sde ma'i mdun du dbul//zhes pa'i don to/ /da ni sna tshogs sde ma shes rab ma gtad pa gsungs pa/ gang gis shes rab mnyes pa zhes pa ni/ gang gis rdo rjes shes rab ma'i pad+ma mnyes pa de yis dngos grub thob par 'gyur ba'o//sangs rgyas thams cad kyis ni mchod/ /ces pa ni shes rab kyi pha rol tu phyin pa 'dis sangs rgyas thams cad de rnam par snang mdzad la sogs pas mchod cing mnyes par bya zhes pa'i don to/ /'di dang yang dag par ldan pa ni/ rnam par snang mdzad la sogs pa'i rdzogs pa'i sangs rgyas so zhes pa'i don to//'di nyid la ni sangs rgyas bzhugs/ /zhes pa ni shes rab kyi pha rol tu phyin pa 'di nyid la sangs rgyas bzhugs zhes pa'i don to/ /gzhan yang dngos grub gtso bo dang / /zhes pa ni 'di'i chos kyi 'byung gnas la dngos grub gzhan yang ste/ral gri la sogs pa thams cad 'di nyid la gnas zhes pa'i don to/ /snying rje ldan pa gzhan gang zhig /ces pa ni go sla'o/ /mkha' 'gro ma kun 'di la bzhugs/ /zhes pa ni phreng bzangs ma la sogs pa'i mkha' 'gro ma rnams shes rab ma'i pad+ma'i nang na gnas pa'i don to//mtshon pa'i gnas gsungs pa/ gang du dbang po 'gags gyur pa/ /zhes pa ni gang du dbang po rnams 'gags shing nub par gyur pa de nyid mtshon pa'i gnas so/ /bdag rtogs rang bzhin nyams pa ste//zhes pa ni gang du bdag gi rang bzhin nyams pa ste/ gang bdag gi rang bzhin nyams pa de nyid gnas su gsungs pa'o/ /kye de lhan cig skyes dgar gyur/ /zhes pa la kye zhes pa ni phyag na rdo rje la bod pa'o/ /de lhan cig skyes dgar gyur zhes pa ni de lhan cig skyes pa'i dga' ba'i rang bzhin du gyur pa'o zhes pa'i tha tshig go//lhan cig skyes pa'i dga' ba'i rang bzhin ji ltar shes par bya zhe na/ de nyid gsungs pa/ bla ma'i spyan sngar gsal bar zhus/ /zhes pa ni bla ma'i zhal sngar don gsal bar zhus shig pa ste/bla ma'i zhal snga'i drin gyis gsal bar byed cing mi mngon pa med par byed ces pa'i don to/ /de nas slob mas shes rab kyi ye shes bde ba chen po'i rnam pa nyams su myong ba de la phyag 'tshal ba gsungs pa/ de la phyag 'tshal zhes pa ni bde ba chen po de la phyag 'tshal ba ste/phyag bgyi zhes pa'i don to/ /gang zhig 'char dus tshe na dbang po dang / /zhes pa la gang zhig ste/ gang 'char ba'i dus kyi tshe'i skad cig gcig la ji ltar gyur pa de nyid gsungs pa/ dbang po dang yul mnyam par nub pa ste bde ba chen po'i ye shes 'char bas dbang po dang yul la sogs pa nub cing nyams pa zhes pa'i don to//mkhas pa rnams kyis snying sbas su sad pa/ /zhes pa la/ su sad ces pa ni byang chub kyi sems kyi sku de nyid sad kyi gzhan su'ang ma sad pa'i don to//sbas pa shes pa ni rab tu sbas pa'o/ /sad ces pa ni nyams su myong ba'o/ /gnas gang du zhe na mkhas pa'i snying gar te mkhas pa de kho na nyid ces pa rnams kyi snying gar dus thams cad du dga' ba'i gzugs kyis sad ces sbyar ro/ /phyis ni mngon dga' zhes pa ni/ye shes de nyid mngon par dga' ba zhes pa'i don to/ /su zhig mngon par dga' zhe na/ rgyal ba'i mdzes sku gcig ces bya ba smos te/ rgyal ba ste sangs rgyas kyi mdzes pa'i sku'i gzugs gcig ni byang chub kyi sems zhes pa'i don to/ / sangs rgyas thod pa zhes pa la sogs pa ni bshad zin to/ /sngags kyi bzlas pa zhes pa ni sngags kyi de kho na nyid do/ /shes rab ma la gsol ba gdab pa dang zhes pa ni go sla'o/ /rgyud thams cad kyi gleng gzhi'i le'u zhes pa ni le'u gang rgyud thams cad kyi gleng gzhi rjod par byed pa'i le'u de ni bcu bzhi pa'o// //'di gsungs nas sna tshogs sde ma la sogs pa'i rnal 'byor ma thams cad dang zhes pa la/ rgyud kyi rgyal po 'di gsungs nas zhes pa ni sna tshogs sde ma dang / gshin rje mche ba ma dang / phreng bzangs ma la sogs pa dang /phyag na rdo rje la sogs pa'i byang chub sems dpa' rnams rang rang gi gnas na ci'ang mi gsung bar bzhugs par gyur pa'o/ /rgyud ces pa ni shes rab dang thabs kyi bdag nyid do/ /rnal 'byor ma chen mos gsungs zhes pa ni rnal 'byor ma chen mo sna tshogs sde mas gsungs pa'o//ci gsungs she na/ mchog tu gsang ba'i rgyud des so/ /zhes pa ni rgyud rdzogs par rjod par byed pa'o/ /sna tshogs sde mas gsungs pa yi/ /rgyud rgyal sangs rgyas thod pa 'di/ / bdag rtogs don du dka' 'grel ni/ /rgyas pa bdag gis byas pa yin/ /bsod nams 'di yis 'jig rten rnams/ /dga' ba'i bde ba kun rnyed nas/ /ye shes ldan pa'i sa gnas su/ /thams cad du ni 'gro bar shog /sangs rgyas thod pa'i rgyud kyi dka' 'grel ye shes ldan pa zhes bya ba dngos grub brnyes pa'i slob dpon chen po sa ra ha'i zhal snga nas kyis mdzad pa rdzogs so// //rgya gar gyi mkhan po shrI gA ya d+ha ra dang / bod kyi lo tsA ba gyi jo zla ba'i 'od zer gyis bsgyur cing zhus te gtan la phab pa// //bla ma'i zhabs la gus btud gsol btab ste/ /man ngag 'grel pa'i dka' 'grel ye shes ldan/ /sgra don sdeb sbyor 'bad de bsgyur byas pas/ /'gro kun gnyis med ye shes lhun grub shog /