CLOSE WINDOW

D1636
བོད་ཡིག

sangs rgyas mkha' 'gro ma'i sgrub thabs slob dpon chen po nag po pas mdzad pa rdzogs so// @##/ /rgya gar skad du/ ma hA mA yA maN+Dal kra ma pra d+yau nA ma bi d+hiH/ bod skad du/ sgyu 'phrul chen mo'i dkyil 'khor gyi cho ga'i rim pa gsal ba zhes bya ba/ dpal rdo rje mkha' 'gro ma la phyag 'tshal lo/ /ye shes lnga dang sku gsum gyi/ /rang bzhin he ru ka dpal gtso/ /mkha' 'gro ma dang bcas pa dang / /bla ma dam pa la btud de/ /gces pa bsdus pa'i rgyud dag las/ /rim pa gsal ba ma mthong bas/ /bla ma dam pa'i drin gyis ni/ /rim pa gsal ba bdag gis bshad//slob dpon mtshan nyid bzang ldan zhing / /sgyu 'phrul chen mo'i rgyud dag tu/ /dbang bskur dam tshig ldan pa yis/ /gzhan dag gus pas gsol 'debs sam/ /rang gi don du 'dod pa yis/ /slob ma mtshan nyid bzang ldan la/ /rnal 'byor nus ba dri byas la//nges par tshig tu smra gyur na/ /de la sbyar ba'i las bya'o/ /dur khrod la sogs 'jigs gnas sam/ /bas mtha'i gnas sam nyams dga' bar/ /rtog bral sems can gdon pa yi/ /bsam pas rgyud las 'byung ba bzhin/ /bskyed pa'i tshul gnas slob dpon gyis//de yi bdag po 'bum bzlas shing / /lhag ma rnams la khri khri'o/ /de nas lha yis gnang ba'am/ /mtshan ma bzang dang ldan gyur na/ /des ni dkyil 'khor bri ba'i phyir/ /dben pa'i gnas sam dur khrod dam/ /sngon byas pa'am yid 'ong sar/ /de dbus maN+Dal byas 'og tu//chu la sogs pa'i rnam lnga dang / /dbugs dbyung sogs pas skyong nu la bya/ /der ni sil ma'i phyogs bkram la/ /lhag gnas 'khor lo rdzogs bskyed la/ /de la khe yig sogs pa dang / /ye shes dgug la kyo sogs kyis/ /dgug sogs byas te dbang bskur la/ /mchod bstod rdzogs byas bdag nyid kyis//de la gsol ba gdab par bya/ /bde gshegs thams cad bdag la dgongs/ /khyed rnams mchod pa'i phyir dang ni/ /slob ma rnams la phan phyir du/ /sgyu 'phrul chen mo zhes bya yi/ /dkyil 'khor bzang po bri bar 'tshal/ /bdag la byin brlabs gnang bar mdzod//de skad lan gsum gsol btab la/ /de nas bdag nyid he ru ka'i/ /gzugs su bdag nyid gnas nas su/ /mchod dang gtor mar ldan pa yis/ /lha mo mdzes ma bskul ba'i phyir/ /sngon gyi rgyal ba'i mdzad spyod dang / /lag pa sa la lan gsum brdab/ /rdo rje sa yi lha mo ni//btso ma gser gyi mdog 'dra la/ /mdzes pa'i rgyan dang ldan pa la/ /gser gyi bum thogs ci bgyi smra/ /de la mchod yon sngon 'gro bas/ /mchod pa kun gyis mchod byas la/ /skyob pa sangs rgyas thams cad kyi/ /spyod pa'i tshul dang khyad par gyis/ /sa dang pha rol phyin pa la//lha mo khyod ni dbang du gyur/ /skyob pa shAkya seng ge yis/ /ji ltar bdud kyi sde bcom ltar/ /de bzhin bdag gis bdud sde las/ /rgyal bar byas te dkyil 'khor bri/ /de ltar lan gsum brjod rjes la/ /dga' ba'i mdangs kyis lha mo des/ /khyod ni slob dpon mchog yin gyi//dkyil 'khor gyi ni las gyis shig /zer zhing sa la thim par bsam/ /de rjes phyogs skyong rnam dag la/ /gtor ma tshul bzhin byin nas ni/ /sa phyogs 'dir gnas lha dang klu/ /gnod sbyin dri za lha ma yin/ /gang dag rdzu 'phrul cher ldan pa//rdo rje'i spyan dang snyan mnga' ba/ /bdag ming 'di zhes bya ba yis/ /bde gshegs rnams la mchod pa dang / /sems can kun la phan pa'i phyir/ /dge ba'i sa phyogs 'di nyid du/ /dkyil 'khor dam pa cher 'gyur la/ /sgyu 'phrul chen mo'i rgyud kyi rgyal/ /dkyil 'khor chen po'i las byed par/ /khyed kyis bar chad ma byed par//dge ba'i grogs po nyid du mdzod/ /de ltar lan gsum gsol 'debs pa/ /sa bslang ba yi cho ga'o/ /de nas sa phyogs de nyid du/ /me yi las las byung ba ltar/ /tshar gcod zhi ba'i las bya'o/ /de nas dus kyi bye brag gis/ /lto 'phye'i rim pa shes pa yis//g.yas skor lto nas brko bar bya/ /de na ro bsal mgal dum dang / /gyo mo rus dang re ba bsal/ /sa de ma 'chi bcu phyed dang / /dri zhim chu la hUM bzlas dgang / /der ni tshad ldan dkyil 'khor la/ /shar dang byang du gzhol sogs bya/ /ba yi lci bas ba ko tsam/ /byugs te dri ma chu dang ni/ / ga bur tsan+dan dam pa dang / /me tog sna tshogs bkram pa dang / /hUM bzhi yis ni sa sbyang ba'o/ /de nas thal gos la sogs pa'i/ /rang gi rgyan ldan slob dpon gyis/ /rdo rje dril bu dang ldan pas/ /hUM dang khams zhes bya ba yi/ /rnam dag nam mkhar bsams nas ni/ /hUM gi sngags kyis gser gyi ni//sa gzhi rdo rje dang ldan bsam/ /me dI'i sngags kyis byin brlab pa'o/ /de nas bdag nyid he ru kar/ /bskyed pa'i cho ga'i tshul rdzogs pas/ /bsam pa'am dngos su mkha' 'gro ma/ /gzhi'i gnas la gnas pa yi/ /phyi nang mchod pas mnyes byas la/ / rang bzhin rnam dag ces bya ba/ /sogs pas bstod de gsol ba ni/ /dkyil 'khor gtso bo kun gyi dngos/ /sdig pa thams cad zad byed pa/ /sgyu 'phrul chen mo'i dkyil 'khor ni/ /mgon po chen po bshad du gsol/ /gsol ba'i tshig de mkhyen nas su/ / sdug bsngal can la gzigs nas ni/ /khro bo'i ngi rgyal ldan pa yis/ /mig tu ma dang Ta yig las/ /nyi ma zla ba gsal bsams la/ /mig 'bras hUM las gyur ba yi/ /rdo rje nag po bsam par bya/ /rkang pa gnyis su aHlas ni/ /sna tshogs rdo rje 'bar ba bsam/ /rdo rje lte ba'i mig 'bras la//khro tshogs spros pas bgegs bskrad la/ /rkang pas rdo rje rab 'bar sprul/ /rdo rje dril ldan 'gying bag gis/ /dbang ldan mtshams su song nas ni/ /hUM song shig bgegs tshogs ma lus kun/ /lha dang lha min gsang ba po/ /bgegs kyi tshogs chen ma lus kun/ / gnod par byed pa'i bgegs tshogs rnams/ /sgyu 'phrul chen mo'i bdag nyid gtso/ /bde chen ye shes las byung ba'i/ /nga ni dpal ldan rdo rje'i dngos/ /bka' yi 'khor lor rab sbyor byed/ /gal te bka' las 'das gyur na/ /rdo rje rab tu 'bar ba yis/ /mgo bo tshal pa brgyar 'gas shing //zhi bar 'gyur bar gdon mi za/ /de bas gzhan du 'gro bar gyis/ /zhes pas bgegs rnams bskrad bya ba/ /rol pa'i gom stabs brgyad pas bskor/ /rkang pa bskyod dang lag pa bskyod/ /smin ma 'degs sogs gar gyis ni/ /gdug pa'i tshogs ni bskrad byas la//hUM las bskyed pa'i phur bu ni/ /oM badzra kI la ya zhes pa ni/ /de yis byin brlabs bzlas rdzogs nas/ /g+ha g+ha la sogs sngags kyis gdab/ /de nas ra ba dra ba bya/ /sa srung ba'i cho ga'o/ /de nas dri zhim chu dang ni/ /mi 'chi bcu phyed byugs pa'i sar/ /thig le'i steng du me tog bzhag /der ni chu skyes bsams steng du/ /nyi ma'i dkyil 'khor steng du ni/ /rang rang sa bon gyur pa las/ /lha yi 'khor lo bsam par bya/ /mgon po dgug la sogs byas nas/ /Tik+ka dzaH/ Tik+ka hUM/ Tik+ka baM/ Tik+ka hoHrnam bzhis/ /dkyil 'khor rnam gnyis bsdus pa las//prok+Sha NAM dang ar+g+haM sogs/ /gzhan yang rdo rje mkha' 'gro rnams/ /mchod nas bstod de gsol ba ni/ /he ru ka dpal bcom ldan 'das/ /sangs rgyas mkha' 'gro ma dang ldan/ /phyogs bzhi'i mkha' 'gro ma rnams dang / /rig pa'i lha mo rdzu 'phrul can/ /byang chub sems dpa' la sogs kun//thams cad bdag la dgongs su gsol/ /slob ma rnams la phan gdags dang / /khyed la yang ni mchod pa'i phyir/ /bdag gis sdig pa 'jig byed pa'i/ /nang par dkyil 'khor bri lags na/ /rjes su brtse bar dgongs nas ni/ /byin gyis brlab par mdzad du gsol//der ni phyi nang mchod pas mchod/ /dkyil 'khor gyi ni lha rnams kun/ /lhag par gnas pa'i cho ga'o/ /de nas gser la sogs pa yi/ /rin chen rgyu las byung ba yi/ /lto che mgrin pa ring ba dang / /mchu 'phyang nag po ra ri med/ /dri zhim sa dkar gyis byugs nas//rang dang rang gi mtshan ma gdab/ /rnam rgyal las ni thams cad do/ /sna tshogs rdo rje las kyi lha/ /kha dog mthun pa'i ras zung re/ /bum pa'i mgul du bcing bar bya/ /tsu ta la sogs shing dag ni/ /lo ma me tog dang ldan pas/ /'dis ni bum pa'i kha brgyan no/ / chu dang ldan pa'i bum pa ru/ /byang chub sems kyi rtags su ni/ /sha ta bri ha ti dang ni/ /a pa ra dang tsan+dan dang / /ut+pal ka N+Ta ka ri dang / /ha sa de ba dag gzhug go/ /so ba 'bras dang ma sha sran/ /nas dang til dang gro rnams ni/ /thugs kyi rang bzhin 'di dag go/ /shel dang dngul dang mu tig dang //byu ru dung dang rnam lnga yi/ /lha rnams kun mdog rtags su'o/ /nyi ma zla ba chu dang sman/ /dri dang rnam pa lnga gzhug go/ /de nas dkar ba'i ras steng du/ /me tog bkram la bum pa der/ /gzhag ste byin gyis brlabs pa ni/ /bum pa'i rang bzhin dag bsam ste//bruM las mtshan nyid bzang ldan bskyed/ /de yi nang du chu skyes ni/ /nyi ma dang ldan sa bon las/ /rnam rgyal dag tu thams cad bskyed/ /gzhan yang rang rang sa bon las/ /sku bskyed cho ga thams cad kyang / /sngon ltar byas te bzlas pa yi/ /stobs kyis byang chub sems kyi chus/ / gang ba lhag par gnas pa'o/ /slob ma bsrung dang ldan pa yis/ /me tog phreng 'dzin slob ma ni/ /yid gzhungs spro chen byas pa gzo/ /rigs btsun nga rgyal med pa dang / /gzugs dang lang tsho kha dog ldan/ /gsang pa'i don la mngon brtson na/ /gzugs ngan yon tan med pa dang //de las gzhan pa'ang gzhug par bya/ /lus bkrus gtsang ma'i gos bgos la/ /snyim pa me tog gis bkang nas/ /dga' chen khyod bdag ston pa bas/ /slob dpon khyod ni dgongs su gsol/ /byang chub chen po'i tshul bstan pa/ /mgon po chen po bdag phyag 'tshal//dam tshig de nyid bdag la stsol/ /byang chub sems kyang bdag la stsol/ /sangs rgyas chos dang dge 'dun te/ /skyabs gsum dag kyang bdag la stsol/ /thar pa chen po'i grong mchog tu/ /mgon po chen po bdag 'jug mdzod/ /de ltar gsol ba gsum btab ste//'di skad ces ni brjod par bya/ /bu tshur theg pa chen po la/ /khyod ni tshul can snod yin te/ gsang sngags spyod tshul cho ga ni/ /khyod la yang dag bstan par bya/ /sangs rgyas dus gsum las 'das pa/ /sku gsung thugs kyi rdo rje can/ / mnyam nyid ye shes thob pa ni/ /rdo rje sngags rab bsgom pa'o/ /gsang sngags sbyor ba mnyam med de/ /he ru ka dpal skyob pa yis/ /bdud sde shin tu mi bzad pa'i/ /dpung chen dag kyang de yis bcom/ /de bas kun mkhyen thob bya'i phyir/ /bu yis blo gros 'di gyis shig /de nas slob ma cho ga 'dis//sdig pa bshags sogs bya ba ste/ /bdag gis sdig pa bgyis pa dang / /bgyid du stsal dang yi rang ba/ /sangs rgyas spyan sngar bdag gis su/ /ma lus so sor bshags par bgyi/ /sangs rgyas byang chub sems dpa' dang / /rang rgyal dgra bcom 'gro rnams kyi/ / tshogs la bdag ni yi rang ngo / /sgyu 'phrul gtso bo yab yum dang / /mkha' 'gro ma dang bcas pa dang / /chos mchog la yang skyabs su mchi/ /dus gsum bde gshegs thams cad dang / /byang chub sems dpa' thams cad kyis/ /byang chub sems mchog bskyed pa ltar/ /de bzhin bdag gis sems bskyed do//'gro ba'i mgon po bdag la dgongs/ /ma lus bzhugs pa'i bde gshegs rnams/ /'di nyid nas bzung sangs rgyas par/ /bla med bdag la gzigs par mdzod/ /sangs rgyas rnal 'byor sdom pa la/ /tshul khrims kyi ni bslab pa dang / / dge ba'i chos rnams sdud pa dang / /sems can don byed tshul khrims gsum/ /bdag gis brtan por gzung bar bgyi/ /sangs rgyas chos dang dge 'dun te/ /bla na med pa'i dkon mchog gsum/ /sangs rgyas rnal 'byor sdom pa ni/ /yang dag nyid du gzung bar bgyi/ rdo rje'i rigs mchog chen po la/ /rdo rje dril bu phyag rgya yang / /yang dag nyid du gzung bar bgyi/ /slob dpon dag kyang gzung bar bgyi/ /rin chen rigs mchog chen po yi/ /dam tshig yid du 'ong ba la/ /nyin re bzhin du lan drug tu/ /sbyin pa rnam bzhi rtag tu sbyin//byang chub chen po las byung ba'i/ /pad+ma'i rigs mchog dag pa la/ /phyi nang gsang ba'i theg pa gsum/ /dam pa'i chos kyang gzung bar bya/ /las kyi rigs mchog chen po la/ /sdom pa thams cad ldan par ni/ /yang dag nyid du gzung bar bgyi/ / mchod pa'i las kyang ci nus bgyi/ /gnyis su med pa'i tshangs spyod dang / /rang gi dam tshig bsrung bar bgyi/ /bdag gis dge ba'i las rnams kyis/ /sangs rgyas myur du bsgrub bya ste/ /sems can 'khor ba'i rgya mtsho las/ /bla med gnas su bsgral bar bgyi/ /zhes pa gus pas smra ba dang //de nyid gsum zlos slob dpon gyis/ /rdo rje khu tshur dri yi chus/ /snying mgrin spyi bor thig le la/ /hUM la sogs pa'i yig gsum las/ /rdo rje la sogs rnam gsum ni/ /rang rang yi ges mtshan pa ni/ /go rims bzhin du bsam par bya/ /yig gsum 'od kyis bkug bstim nas//mchod pa'i las su byas pa la/ /me tog spyi bor mdun du spos/ /dri dang mar me snying gar ro/ /sna tshogs mkha' 'gro reg pa yis/ /btab ste rang rang sngags kyis so/ /de nas a shwat+tha sogs las/ /sor bcu gnyis kyi tshad dag las/ / skyon med me tog rtse ldan sbyin/ /des kyang shar ram byang bltas pas/ /mi smra bar ni bca' zin nas/ /ba ko tsam ni byugs pa ru/ /so shing mdun ni drang por dor/ /de tshe bdag dang steng lta na/ /dngos grub mchog tu de bshad de/ /phyogs su kha bltas dngos grub 'bring //mtshams su bltas na 'jig rten pa'i/ /zhi sogs las brgyad de las 'grub/ /so shing brgya la thur bltas na/ /das par sa 'og dngos grub thob/ /de nas skyor chu blud bya ba/ /oM hrIHbi shud+d+haHsarba d+harmAHpA paM ni sh+tsa s+ya saM sho d+ha ya sarba bi ka lbAn a pa na ya hUM/ zhes gsum brjod pas ngag sbyangs nas//'jig rten du ni kun mkhyen dag /u dum+bA ra'i me tog ltar/ /brgya lam na ni res 'ga' zhig /'byung 'gyur yang ni mi 'byung ngo / /sngags kyi spyod pa'i tshul 'di ni/ /de bas kyang rnyed dka' ba ste/ /gang gis mnyam med sems can don//bla na med pa byed nus pa/ /gnyis med zab mo'i spyod tshul 'di/ /sems can sangs rgyas thob byed pa'i/ /dang po bskal pa grangs med nas/ /bsags pa'i sdig pa gang dang gang / /de kun zad par gyur pa ni/ /zab mo'i dkyil 'khor mthong bas so/ /de nas oM AHhUM gis ni//ku sha byin brlabs de la sbyin/ /des kyang sngas dang stan bya'o/ /de nyid sngags kyis srung skud ni/ /mdud pa gsum dang ldan pa ni/ /bsrung phyir dpung pa g.yon par bcing / /des kyang seng ge'i nyal stabs kyis/ /ku sha'i stan la nyal nas su/ /nang par bzhin bzangs rnams longs shig /sang gi nang par khyod kyis ni/ /thar ba chen po'i rang bzhin gyi/ /grong khyer dam pa mthong zhes brjod/ /de nas nang par dus su ni/ /rmi lam mtshan ma dri bar bya/ /des kyang mtshan ma mthong ba rnams/ /slob dpon mdun du brjod par bya/ /mtshan ma bzang dang ldan smras na//de yi dngos grub bstan par bya/ /ngan pa mthong na bsrung ba dang / /me yi las kyis rtog pa bsal/ /lhag par gnas pa byas 'og tu/ /slob dpon mtshan nyid dang ldan pas/ /rnal 'byor byas te nang par sngags/ /sdig pa thams cad 'jig byed pa'i//dkyil 'khor dam pa bri ba'i phyir/ /dkyil 'khor nam mkhar bteg nas ni/ /de nas thig le'i las bya'o/ /na ra'i skra'am ba su tas/ /bya'am yang na ras bal las/ /khrag chen du ni sbags pa la/ /shes nas dkyil 'khor de nyis 'gyur/ /tshad byas kha dog lngar byas te//pad+ma'i snod bzhag dang mos pas/ /rgyu las byung ba'i bde gshegs lnga/ /bskyed de ye shes spyan drangs pas/ /dzaHlas nyi zla gnyis bsam pa/ /rab tu myur bar g.yo ba'i mig /mig gi rdzi ma 'dren pa ni/ /'bar ba'i lta ba dam pa ste/ /'dis ni ye shes thig dgug go//dkyil 'khor chen po'i thig gdab phyir/ /rdo rje thig ni bdag la stsol/ /mchod pa rnams ni byas nas su/ /oM a n+yo n+ya a nu ga ta sar+b+ba d+harmAHpar sA ra a nu ga ta sarba d+harmAHa t+yan+ta a nu pra biSh+Tha sar+b+ba d+harmAH/ zhes brjod thig de bsgril nas su/ /mi 'chi lnga la spangs pa dang //cho ga shes shing blo ldan pas/ /ye shes thig ni de gdab po/ /dz+dzaHdz+dza'i sgra ni btang nas su/ /des kyang rgyab nas 'gro bar bya/ /lte bar rdo rje khu tshur gyis/ /nub dang shar nas dang po ste/ /oM badzra sa ma ya sU tra mA ti kra ma hUM/ lho dang byang nas de bzhin te/ /nam mkha' yi ni thig gdab po//'og gi thig kyang de bzhin te/ /de tshe 'jig rten khams kun gyi/ /sangs rgyas la sogs 'gro don du/ /khyed kyis don ni bya dus yin/ /slob dpon me dang rlung gnas te/ /slob ma dbang ldan bden bral du/ /'dug la shar dang nub gdab po/ /de nyid gnas dang byang gi thig /byin za srin por gnas pas lho/ /de nyid gnas dang bden bral dang / /slob ma rlung dang dbang ldan du/ /gnas pas mtshams kyi thig gnyis so/ /bstan bcos mthong dang blo ldan pas/ /de ltar gsal bar dbye shes na/ /slob dpon des ni thig gdab po/ / gru bzhi pa la sgo bzhi pa/ /rta babs bzhi yis mdzes par brgyan/ /dra ba dra phyed nyi zla dang / /dril bu g.yer ka'i sgra sgrogs pa'o/ /khyams kyi nang dang sgo khyud du/ /rdo rje rin chen gyis brgyan pa'o/ /nang du chu skyes brgyad pa la/ /rdo rje phreng ba dang ldan pa'o/ /'khor lo'i brgyad cha sgo yin te//sgo khyud sgo dang 'drar shes bya/ /de yi khyams kyi tshad yin te/ /tshon sna lnga yang de bzhin phyed/ /rta babs de la mdzes pa dang / /rin chen pha gu tshon gyi chang / /nyis 'gyur dra ba dra phyed tshad/ /rta babs gdugs sogs mdzes pa la/ /dur khrod brgyad dang ldan pa'o//phyogs bcur rdo rje rgya gram mdzes/ /de ltar thig gdab nyes pa ni/ /chad na bla ma 'chi bar 'gyur/ /ring thung khyer na na bar 'gyur/ /nges par phyogs 'khrul slob ma myos/ /de bas 'bad pa thams cad du/ /thig gi las la brtson par bya/ /de nas rin chen sna lnga'am/ 'bras kyi phye ma zhib mo'am/ /yang na rus phye so phag dang / /'dab ma ljang gu sogs pa la/ /byas pa pad+ma'i snod bzhag ste/ /ye shes thig bzhin dag pa'o/ /chos dbyings 'di ni rnam par dag /sems can khams ni rab grol byed/ /sgyu 'phrul zhes bya rgyal po che/ /tshon gyi las ni yang dag brtsams//brtan pa'i sems kyis mnyam gzhag ste/ /g.yon pa rdo rje khu tshur bya/ /dang por rdo rje slob dpon gyis/ /dbang ldan mtshams nas bri bar bya/ /dkar dang ser dang dmar dang ljang / /sngon po 'di ni nang du 'dod/ /g.yas skor rgyun mi 'chad par bri/ /mi yo bar ni tshon bri zhing //nas gang bar la mthe chung tshad/ /sbom na nang 'debs nor 'jig phrad/ /chad na slob dpon bla ma 'chi/ /de bas 'bad par ri mo bri/ /nan tan du ni bri bar bya/ /chu skyes shar gyi 'dab ma sngo/ /lho dang nub ni ser dang dmar/ /byang ljang mtshams bzhi dkar ba la/ / ka pA la bzhi mdzes par bri/ /phyogs kyi 'dab ma bzhi po la/ /rigs kyi mtshan ma nyi ma bri/ /de rgyab rdo rje'i phreng ba gnag /de bzhin shar sogs rigs kyi ni/ /sgo yi rim pa shes par bya/ /de ni tshon gyi cho ga'o/ /de ltar rdzogs pa'i dkyil 'khor du/ /slob dpon mchog gis lus bkrus te//dri zhim pa yis lus byugs te/ /rgyan cha mchog dang ldan pa yis/ /bum pa rnams la sogs pa yi/ /rdzas rnams thogs te lan gsum bskor/ /de nas slob dpon he ru ka'i/ /nga rgyal mchog gis hUM sgrogs shing / /phyag gnyis rdo rje dril ldan pas//slob dpon nang du bzhugs nas ni/ /dbus su gnas la mnyam gzhag pas/ /yid kyis sgo bzhi dbye bar bya/ /oM badzra ut+g+ha Ta yas ma ya pra be sha ya hUM/ /de nas rnam rgyal la sogs pa/ /gnas dang go rims bzhin du dgod/ /bla re dam pa bre ba dang //sna tshogs gos dang rgyan rnams bye/ /spos dang me tog mar me ni/ /mchog gi dkyil 'khor mdzes par brgyan/ /de nas rgyan ldan bla ma yis/ /cho ga'i tshul gyis dkyil 'khor gyi/ /'khor lo rdzogs par bskyed byas la/ /se gol sgra yi sbyor pa yis//bde gshegs thams cad bsdu bar bya/ /mdun du zhal bsil mchod yon sogs/ /phul te dgug gzhug byas nas su/ /de la me tog spos sogs dang / /mchod pa'i tshogs kyis mchod pa dang / /bkra shis glu yis mchod pa dang / /tshogs kyi dga' ston bskor nas ni//slob dpon rdo rje dril 'dzin pas/ /dkyil 'khor dam pa de dag la/ /bskor ba byas la phyag 'tshal te/ /des ni sbyin sreg las bya ba/ /dkyil 'khor de yi shar phyogs su/ /dkar la zlum pa'i thab dag tu/ /'o ma can gyi shing dag las/ /bA pa ka de rab bskyed de//me yi cho ga rdzogs pa dang / /dkyil 'khor chen po tshul bzhin bskyed/ /mthar ni dgang blugs dbul byas te/ /mchod bstod rang gnas gshegs su gsol/ /slob dpon des ni rdzas lhag mas/ /byin za mchod de gshegs su gsol/ /zan dron sha dang bzar bcas dang //mi 'chi bcu phyed ldan pa yis/ /gtor ma bzang po mtshan phyed sbyin/ /de nas mchod pa rdzogs pa dang / /slob ma 'jug pa'i tshul du ni/ /dang po slob dpon 'jug par bya/ /de nas slob ma gzhug par bya'o/ /mdzes pa'i rgyan dang gos bgos te/ / gdong pa ras kyis bkab nas su/ /'di skad ces ni brjod par bya/ /sangs rgyas kun gyi rang bzhin sku/ /slob dpon mgon la skyabs su mchi/ /gtso bo mkha' 'gro mar bcas pa'i/ /lha rnams kun la phyag 'tshal lo/ /thar pa chen po'i grong mchog tu/ /mgon po bdag ni gzhug tu gsol//de nas slob dpon gyis 'di skad ces brjod do/ /de bzhin gshegs pa kun gyi gnas/ /he ru ka dpal grong khyer mchog /snying po'i dkyil 'khor 'di ru ni/ /bdag gis slob ma gzhug par bya/ /de nas dkyil 'khor lha rnams la/ /sgo gsum dad pas phyag 'tshal te//oM na mo te hUM/ na maHme hUM/ na mo na maHhUM swA hA/ de nas kyang ni shar sgo ru/ /thal sbyar sngags 'dis phyag 'tshal te/ oM badzra DA ki nI pU dzo pas+tha nA ya At+ma nAM niR+YA ta yA mi/ oM sarba ta thA ga ta ak+Sho b+h+ya a d+hi tiSh+Tha swa mAM/ de yis snying gar mi bskyod pa//de yi snying gar bcug bsam bya/ /rat+na DA ki nI pU dzo pas+tha nA ya At+ma nAM ni R+YA ta yA mi sarba ta thA ga ta rat+na saM b+ha wa a d+hi tiSh+Tha swa mAM/ dpral bar thal sbyar lho phyogs su/ /phyag 'tshal rin chen 'byung ldan no/ /de ltar nub dang byang dang ni/ /mgrin pa spyi bor phyag byas pa//snang ba mtha' yas don grub la'o/ /oM pad+ma DA ki nI pU dza pas+tha nA ya At+ma nAM niR+YA ta yA mi sarba ta thA ga ta pad+ma d+ha ra a d+hi tiSh+Tha swa mAM/ oM bi shwa DA ki nI pU dzo pas+tha nA ya At+ma nAM niR+YA ta yA mi/ sarba ta thA ga ta a mo g+ha sid+d+hi ad+hi tiSh+Tha swa mAM/ de ltar phyag bzhi byas 'og tu//slob ma de la thams cad pa'i/ /las kyi bum pa'i chu yis bkru/ /de nas shar phyogs sgor phyogs la/ /lag na me tog dang bcas pas/ /slob dpon la ni phyag byas te/ /dam tshig sdom pa 'dod pa'i phyir/ /de la gsol ba gdab par bya/ /dam tshig de nyid bdag la stsol//bdag la sdom pa rnams kyang stsol/ /byang chub mchog tu sems bskyed la/ /slob dpon chen po bdag la stsol/ /de nas rdo rje slob dpon gyis/ /slob ma de la dam tshig dbab/ /sangs rgyas chos dang dge 'dun te/ /dkon mchog gsum la skyabs su gsol//'di ni sangs rgyas rigs yid 'ong / /sdom pa brtan por gyur pa'o/ /rdo rje dril bu'i phyag rgya rnams/ /blo chen khyod kyis gzung bar bgyi/ /byang chub sems gang de rdo rje/ /shes rab dril bu zhes brjod do/ /bla ma sangs rgyas dang mnyam pas/ /slob dpon dag kyang gzung bar gyis//'di ni rdo rje'i rigs dag pa'i/ /dam tshig sdom pa yin par brjod/ /rin chen rigs la rtag tu ni/ /nyin dang mtshan mo lan gsum du/ /zad zing mi 'jigs chos dang byams/ /sbyin pa rnam bzhi rtag tu sbyin/ /phyi nang gsang ba theg pa gsum//dam pa'i chos kyang ma lus gzung / /'di ni pad+ma'i rigs dag pa'i/ /dam tshig dang ni sdom pa mchog /las kyi rigs mchog chen po la/ /sdom pa thams cad ldan par ni/ /khyod kyis yang dag gzung bar bya/ /mchod pa'i las kyang ci nus bya/ /de lta'i yon tan slob ma la//dam tshig sdom pa byin pa la/ /slob mas phyag byas sdom pa gzung / /sangs rgyas kun la phyag 'tshal lo/ /he ru ka dpal mkha' 'gror bcas/ /kun nas bdag la dgongs su gsol/ /che ge zhes bya de ring nas/ /bzung ste ji srid byang chub kyi/ / snying po la ni mchis kyi bar/ /byang chub sems ni bskyed par bgyi/ /zhes bya ba la sogs pa nas/ sems can mya ngan 'das la dgod/ /ces pas sdom pa bzung nas ni/ /oM sarba yo ga tsit+ta ut+pA da yA mi/ de ltar rnal 'byor sems bskyed la/ /me tog phreng dang bcas pa yis//rdo rje snying gar bzhag nas su/ /oM su ra te sa ma ya s+t+waM ho sid+d+hi badzra ya thA su khaM/ de ltar rnal 'byor sems bskyed nas/ /me tog phreng ldan slob ma de/ /oM A khaM bI ra hUM zhes pas/ slob ma dkyil 'khor gzhug byas nas/ /slob dpon gyis ni tshig 'di brjod/ / deng khyod he ru ka dang mkha' 'gro ma rnams kyi rigs su zhugs kyis/ ngas khyod la he ru ka'i ye shes bskyed par bya ste/ ye shes des khyod de bzhin gshegs pa thams cad dang / he ru ka dang mkha' 'gro ma'i/ /dngos grub dag kyang thob 'gyur na/ /dngos grub gzhan lta ci zhig smos//khyod kyis dkyil 'khor ma mthong ba'i/ /mdun du brjod par mi bya ste/ /dam tshig nyams par gyur ta re/ /de ni 'khor lor gzhug byas nas/ /lag gi rdo rje spyir gzhag la/ /khyod kyis su yang rung ba la/ /gal te 'di ni smras gyur na/ /khyod kyis dam tshig rdo rje yis/ /rang gi mgo bo 'gas par 'gyur//de nas bdud rtsi lnga ldan pa'i/ /pad+ma'i snod kyi dri yi chus/ /snying po bzlas te 'thung ngu gzhug /he ru ka dpal deng khyod kyi/ /snying la yang dag de ring gzhug /gal te tshul 'di smras na ni/ /de yi mod la dral te gshegs/ / badzra u da ka oM AHhUM/ de nas 'di yang brjod par bya/ /'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs na dngos grub ni/ /rdo rje bdud rtsi'i chu 'dis 'grub/ /deng nas brtsams te khyod kyis ni/ /he ru ka dpal nga yin gyi/ /nga yis bsgo ba khyod kyis gyis//khyod kyis nga la brnyas byas na/ /mi bde ma spangs dus byas nas/ /dmyal bar ltung bar gyur ta re/ /de nas slob ma'i gtso bo yis/ /de bzhin gshegs pa thams cad kyis/ /bdag la byin gyis rlob mdzod la/ /rdo rje'i ye shes dbab tu gsol/ /slob dpon rgyan cha bgos byas te//'gyings dang bcas pas slob ma la/ /bltas te rdzas kyis bdugs pa dang / /oM badzra A be sha ya AH/ zhes bya brgya rtsa brgyad du bzlas/ /dril bu'i sgra bsgrags rang snying bzlas/ /'od kyis bde gshegs bkug ste gzhug /des kyang babs par ma gyur na/ / slob ma'i snying ga'i zla ba la/ /he ru ka dpal yum bcas bsam/ /de yi rdo rje dpal bskyod pas/ /'od zer dmar pos yan lag kun/ /gang ste gcig gyur sngags bzlas na/ /gdon mi za bar 'bab par 'gyur/ /babs nas lce la yi ge AH/ /kha dog dmar po bsams nas ni//smros shig 'dod chags ches chen po/ /dpag tu med pa bde ba che/ /dge dang mi dge 'di 'dri bas/ /babs na dge dang mi dge ston/ /'das dang ma 'ongs ston gyur na/ /brgya pa'i sngags kyis brtan byas nas/ /de nas slob dpon 'di skad brjod/ /'dir ni bsod nams ji lta bar//rigs kyi rim bzhin 'di yi lha/ /'dis ni dngos grub gang yin dang / /rigs ni gang gi snod du 'gyur/ /'di yi bsod nams gang yin las/ /dkyil 'khor du ni de bzhin 'gyur/ /slob mas me tog phreng ba de/ /pra tIts+tsha badzra hoHzhes pas/ / dkyil 'khor du ni me tog dor/ /lha de rang la 'grub pa'i phyir/ /me tog de yis mgo la bcings/ /de nas slob ma'i lag pa la/ /bzung nas de yi mig dbye bya/ /he ru ka dpal deng khyod kyis/ /mig dbye bar ni brtson par mdzad/ /mig ni thams cad dbye mdzad de//rdo rje'i mig ni bla na med/ /oM badzra ni trA ya ho ha ra pa Ta laM hrIH/ zhes pas gdong g.yogs bkrol nas ni/ /dkyil 'khor bzang po 'di la ltos/ /da ni dad pa rab tu bskyed/ /khyod ni rnal 'byor ma rig skyes/ /sngags dang phyag rgyas byin gyis brlabs/ /'gro ba'i phun sum tshogs pa kun//dngos grub kun khyod mngon du 'gyur/ /dam tshig thams cad bskyang ba dang / /gsang sngags la yang brtson par gyis/ /zhes brjod me tog lhung ba'i lha/ /gtso bo de la bstan par bya/ /dkyil 'khor de yi lha nyid kyang / /nan tan du ni de la bstan/ / de nas slob ma dang ldan pas/ /bla ma'i zhabs la phyag 'tshal te/ /mchod yon dam pa phul nas su/ /dbang bskur don du gsol btab bya/ /he ru ka dpal dbang bskur ba/ /'gro ba skyob phyir rdo rje can/ /de ltar yon tan 'byung gnas sogs/ /de bzhin bdag la deng stsol cig /dpa' bo chen pos mi ldog pa'i/ /dbang bskur ba ni bdag la stsol/ /sems can kun gyi don gyi phyir/ /bdag ni rtag tu slob dpon bgyi/ /de skad gtso la gsol btab nas/ /de nas 'jug pa'i sgo ru ni/ /pad+ma 'dab ma brgyad bris la/ /steng du seng ge'i khri bshams te/ / sna tshogs mdzes pa'i gdan bting nas/ /gnyis med blo ldan der bzhag ste/ /he ru ka dpal der sprul ba/ /gdugs dkar slob ma'i steng bzung nas/ /'bad de mchod pa ci nus mchod/ /de nas me tog chu sogs pa'i/ /dbang ni dam pa blang ba'i phyir/ /dbang bskur bar chod zhi ba'i phyir//yungs kar bsngags te bgegs bzlog la/ /slob mas khrus byas rgyan bzang bgo /khrir gzhag snyim pa'i me tog ni/ /dkyil 'khor la ni gtor bar bya/ /oM phra tIts+tsha hoHzhes brjod la/ /me tog blangs te slob ma yi/ /mgo la bcings te sngags 'di brjod//oM d+harmA kuN+Da a b+hi Shiny+tsa zhes brjod do/ /de nas dang po slob dpon gyis/ /rnam rgyal bum pa la sogs nas/ /chu rnams thod par bsdus nas ni/ /glu blang dril bu sogs sgra bsgrags/ /oM badzra a b+hi Shiny+tsa zhes/ /bzlas te rang nyid 'od kyis ni/ /rig pa'i lha mo dam pa rnams/ / bdud rtsi'i chu yis bag chags bkru/ /chu yi dbang bskur dam pa'o/ /lugs blugs thang ka 'bum bris pa/ /gser sogs byas pa'i dbu rgyan la/ /rin chen 'byung ldan der bcug nas/ /dbu rgyan dam pa de bskon te/ /dar dpyangs bcings la 'di brjod do/ /thor gtsug cod pan gyis brgyan pa//bde gshegs kun gyis bsngags pa yi/ /rin chen dbu rgyan dam pa dang / /dar dpyangs dbang bskur sbyin par bya/ /oM badzra pa da ka badzra A ra li ho/ /dbu rgyan dbang mchog dam pa'o/ /rin chen rgyu yi rdo rje la/ /snang ba mtha' yas der bcug la/ / lag tu gtod tshe 'di skad brjod/ /sangs rgyas rdo rje'i dbang bskur bas/ /de ring khyod la dbang bskur bya/ /'di ni sangs rgyas thams cad kyi/ /shin tu bsgrub phyir rdo rje gzung / /oMbadzra a d+hi pa ti s+t+waM/ a b+hi Shiny+dzA mi/ lag tu rdo rje'i dbang bskur ro/ /dril bu don yod dpal bcug ste//lag g.yon gtod tshe 'di skad brjod/ /'di ltar sangs rgyas thams cad kyi/ /shes rab dbyangs kyi rjes 'gror bshad/ /khyod kyis kyang ni rtag tu bcad/ /byang chub mchog tu rgyal ba bzhed/ /de tshe dril bu'i sgra sgrogs so/ /srid pa ngo bo nyid kyis dag / ngo bo nyid kyis dngos med byas/ /rang bzhin dag pa'i sems dpa' ni/ /mchog gi srid pa byed par 'gyur/ /oM shrI he ru ka a d+hi pa ti s+t+waM/ a b+hi Shiny+tsa tiSh+Tha pI ra sa ma ya/ zhes brjod g.yon du dril bu'o/ /phyag rgya che dang ldan pa la/ /sngags kyis dbang bskur ming gdags te//oM shrI he ru ka a d+hi pa ti s+t+waM/ a b+hi Shiny+tsa mi/ shrI he ru ka nA ma/ a b+hi She ka ta kye deng dpal ldan ming dbang ngo / /de nas rdo rje brtul zhugs te/ /'di ni sangs rgyas thams cad nyid/ /he ru ka dpal phyag na bsnams/ /khyod kyis kyang ni rtag tu bcad/ /he ru ka dpal brtul zhugs brtan//oM sar+b+ba ta thA ga ta sid+d+hi badzra sa ma ya tiSh+Tha e Sha s+t+waM/ d+ha ra ya mi hi hi hi hi hUM/ zhes brjod pa ni dril bu dang 'brel ba'i brtul zhugs sbyin pa'o/ /de ltar rdzogs pas gsang ba yi/ /dbang mchog snod gyur slob ma la/ /slob dpon mdun du slob ma de/ /pad+ma zla bar bzhugs bsams la//gsang ba'i dbang phyir gsol ba gdab/ /gsang ba'i dbang bskur chen po la/ /gtso bo gsang ba bdag la stsol/ /de ltar brjod rjes slob dpon gyis/ /lha yi rnal 'byor dang ldan pas/ /sngon bzhin chu la sogs pa yi/ /dbang rnams rdzogs nas slob dpon gyis//gsang ba'i go 'phang 'di brjod do/ /dam tshig phyag rgya rab gsungs pa/ /yid kyi lus ni brtan phyir ro/ /gang gi lus kun brtan byed pa/ /sa yi phyag rgyar rab tu grags/ /de skad slob ma la smras nas/ /rang dang rig ma lhan cig tu/ /yid dang rjes mthun bza' dang bca'//btung ba la sogs rjes su bya/ /kha la sogs pa ga pur gyis/ /dri zhim mchog tu bsgos pa dang / /yid 'phrog pa yi dga' ba dang / /sgeg dang rol sogs sngar byas te/ /kye ma gnyen mchog sogs pa yis/ /lha mos bdag la bskul ba dang / /dbang po gnyis ni snyoms 'jug bya//dga' ba'i bde ba 'byung ba dang / /nam mkhar gnas pa'i bde gshegs rnams/ /bkra shis glu la sogs pa yis/ /yid la yang dag bskul bsams te/ /dbang bskur rdo rje chen po ni/ /khams gsum kun gyis phyag byas pa/ /gsang gsum gnas las byung ba ni//sangs rgyas kun gyis byin pa yin/ /de skad brjod nas nor bu dbyung / /mthe bong srin lag gnyis kyis khar/ /bde gshegs zhu ba'i rang bzhin gyi/ /byang chub sems de slob dpon gyis/ /dri dang bcas pas slob mar sbyin/ /des kyang a ho su kha zhes/ / brjod de dga' bas de btung ngo / /khams gsum thabs dang shes rab gcig /bde chen gnyis med ye shes gsal/ /gsal byas slob ma nus ldan 'gyur/ /gsang ba'i slob dpon dbang bskur ro/ /de nas cho ga'i rim pa 'dis/ /rjes gnang dbang bskur sbyin bya ste/ / rtsa ba'i dkyil 'khor phyi rol du/ /sngon bzhin dkyil 'khor rdzogs byas te/ /de dbus slob dpon rang nyid ni/ /sgyu 'phrul chen po'i ting 'dzin gnas/ /slob ma bzang pos slob dpon la/ /gus pas yon phul mchod byas la/ /phyag rgyas dbang po gnyis sbyor bas//dkyil 'khor gyi ni 'khor lo kun/ /spro dang bsdu ba'i tshul bstan pa/ /dbang bskur 'dod phyir gsol ba gdab/ /rang bzhin slob dpon go 'phang che/ /skal ba chen po bdag la stsol/ /bde gshegs rnams kyi dbang bskur ni/ /sangs rgyas byang chub rab bsgrub pa/ /de ni sems can dpag med don//brtul zhugs mchog ni khyod drin gyis/ /ji ltar 'dul bzhin bdag bgyid do/ /de ltar gsol ba btab rjes la/ /rdo rje slob dpon dam pa la/ /snyoms 'jug ting 'dzin btang nas ni/ /slob ma 'dod lha'i ngo bor bskyed/ /rang lus 'khor lo rnam spros nas/ / rdo rje mkha' 'gro la sogs pa/ /lag pa'i lo mas bum pa ni/ /bdud rtsi'i chu dang bkra shis glus/ /dbang ni bskur bar bsam par bya/ /rnam rgyal bum pa la sogs pas/ /sngon bzhin chu la sogs pa nas/ /gsang ba'i dbang gi bar dag gis/ /cho ga rdzogs rjes shes rab la/ /brten pa'i ye shes sbyin bya ste//sngon bzhin slob ma rang stan la/ /bzhag ste gus bcas 'di brjod do/ /mdzes pa 'di ni gzung ba dang / /brten par bde gshegs kun gyis brtag /'di ni gzungs ma yid dga' ma/ /khyod kyis rtag tu brjod par bya/ /de skad smras la slob dpon gyis/ /phyag rgya dam pa byin brlabs te//slob ma de la gtad par bya/ /des ni dngos po thams cad kyi/ /slob dpon nyid du de 'gyur ro/ /de nas slob ma stan bde la/ /thabs dang shes rab snyoms 'jug pa'i/ /bsam gtan gnas dang phyi dang nang / /gsang la sogs pas mchod bya ste/ /mchod pa gzugs dang sgra sogs kun//dmigs med sbyor ba rang bzhin no/ /mnyam pa nyid du mos par bya'o/ /de nas gser gyi thur ma yis/ /mig sman byug pa'i tshul du ni/ /mig ni dbye bar bya ba'o/ /oM badzra ni trA pa ha ra ba Ta laM hrIH/ ji ltar mig mkhan rgyal po yis/ /'jig rten rab rib bsal ba ltar//bu khyod kyis ni mi shes pa'i/ /rab rib rgyal ba rnams kyis bsal/ /de nas me long bstan rjes la/ /chos kyi mtshan nyid brjod par bya'o/ /chos rnams gzugs brnyan dag dang mtshungs/ /dag cing gsal la rnyog pa med/ /gzung du med cing brjod du med/

CLOSE WINDOW