CLOSE WINDOW

D1625
བོད་ཡིག

bod kyi lo tsA ba 'gos lhas btsas kyis bsgyur ba'o// @##/ /rgya gar skad du/ ma hA mA yA nA ma pany+tsa kI / bod skad du/ /sgyu ma chen mo zhes bya ba'i dka' 'grel/ dpal rdo rje sems dpa' la phyag 'tshal lo/ /de nas zhes bya ba la sogs pa la/ 'di skad bdag gis zhes ci'i phyir ma gsungs she na/ mi gnas pa'i mya ngan las 'das pa ste/ ma lus pa'i sbyor ba de las yongs su mya ngan las 'das pa byung bas sam/ phyi ma'i dus su 'di skad bdag gis thos pa'i dus gcig na zhes bya ba'i sdud par byed pa dngos po med pa'i phyir ro//gzhan du ni sdud par byed pas 'dul bar byed pa'i sems can gyi dbang du dgongs pa'i phyir 'di skad bdag gis zhes bya ba la sogs pas sdud par byed pa bstan pa med pa'i phyir ram rtsa ba'i rgyud stong phrag bcu gnyis pa las 'di phyogs gcig tu gyur pas so/ / gzhan yang rdo rje zhes bya ba ni rgyu dang 'bras bu'i ngo bo me long lta bu'i ye shes la sogs pa lnga po rnams so/ /de nyid gsungs pa/ rgyu lnga zhes bya rig pa yang / /rdo rje zhes ni mngon par brjod/ /dai bai ha yas yi 'gro ba la/ /sangs rgyas rnams kyis 'dir skad kyi/ /dbyings rnam par dag pa ni/thams cad nam mkha' la spyod par grub pa'i phyir mkha' 'gro ma zhes bya bar grub pa'am/ skad kyi dbyings 'di las dang por bstan pa na/ a shi hi zhes bya bas ar byas shing / kwipa zhes pas ka dang / ni ma tu zhes bya bas phyi ba dang / rin me dang di ba zhes bya ba dag gis mkha' 'gro mar grub pa ste/de nyid kyi phyir ye shes mchog gi bdag nyid can rdo rje mkha' 'gro mar 'grub pa rnams mi dmigs pa nyid kyi phyir nam mkhar bzhugs so/ /gsang ba zhes bya bas ni sku dang gsung dang thugs gsum du mngon par brjod de/mngon sum du bdag nyid rig pa nyid kyis gzhan du nam mkha' spyod yul ma yin pa'i phyir gsang ba'o/ /rang dang gzhan gyi don dang ldan pa'i phyir dbang phyug go/ /'dus pa'i rgyud las gsungs pa/ lnga dang rigs brgya rnam gsum ni/ /sku gsung thugs kyi gsang bar brjod//de nyid kyi phyir rigs brgya ni/ /sku dang gsung dang thugs kyi bdag nyid can bcom ldan 'das rdo rje mkha' 'gro ni 'dir ston pa po dang / sangs rgyas kyi mkha' 'gro ma ni gzhan sgyu ma chen mo zhes bya ba'i mtshan dang ldan pa ni sdud par byed pa ste/ gang bshad pa/ /lha mo nga ni bden par gsungs//zhes bya ba la sogs pa'o/ /de nyid kyi phyir bcom ldan 'das 'dir brjod par bya ste/ de thob par bya ba'i phyir mngon par rtogs pa'i rim pa'i theg pas de yang de'i sgras brjod par bya ste/ de rtogs par byed pa'ang sbyar/ sgra'i tshogs chen dam pa'i gsang ba yi//zhes bya ba rnyed par 'gyur te/ de nyid kyi phyir rgyud du gsungs te/ bcom ldan 'das kyis rgyas par mdzad pa dang go bar mdzad pa ni/ bcom ldan 'das thob pa'i rgyur mngon par rtogs pa'i rim pa 'di byas so zhes bya ba'i sgra ni rab tu grub pa'i tshig go/ /gsang ba'i rnam par 'grel par 'dod pas brjod par bya ste/gang gis zhes bya ba la sogs pa la/ gang gis zhes bya ba ni/ chos kyi dbyings kyi rang bzhin gyis so/ /khyab ces bya ba ni de'i bdag nyid de/ gang gi phyir sems can dang snod kyi 'jig rten chos kyi dbyings las rnam par mi 'byung ba'i chos yod pa ma yin no zhes rig pas dngos po rnams las stong pa nyid gzhan pa yang ma yin zhing dngos po yod pa yang ma yin no//de 'dul ba'am de'i rang gi rgyu nyid kyang brjod par bya ste/ rdo rje mkha' 'gro ma la sogs pa lha mo bzhi po de rnams kyis bskyed pa'o//tshangs pa zhes bya ba ni gnyis su med pa'i ye shes kyi bdag nyid can rdo rje mkha' 'gro ma'o/ /sogs pa'i sgras ni sangs rgyas kyi mkha' 'gro ma la sogs pa'o/ /mthu chen zhes bya ba ni/ dngos grub dang rdzu 'phrul chen po rang dang gzhan gyi dngos grub yin pa'i phyir ro//de gang zhe na de'i dam pa'i gsang ba zhes bya ba brjod pa de rnams kyis zhes bya ba ni/ rdo rje mkha' 'gro ma rnams kyi'o/ /'di zhes bya ba ni blo la bzhag nas sgom pa'o/ /sgyu ma chen po zhes bya ba ni thig le'i gzugs dkar zhing phra ba'o/ /dbang phyug che zhes bya ba ni dbang phyug chen po'i rgyu'i phyir ro//sgyu ma chen po zhes bya ba ni mig 'phrul chen po'i dngos po ltar stong pa nyid la rnam pa sna tshogs pa snang ba'i sgyu ma'i phyir ro/ /drag mo chen mo zhes bya ba ni bdud bzhi 'joms pa'i phyir ro/ /'byung po sdud par mdzad pa mo/ / zhes bya ba ni spro ba dang sdud par byed pa'i phyir ro/ /khyab ces bya ba ni phyogs thams cad du dus gcig tu sems can gyi don mdzad pa'i phyir ro/ /de nyid gsungs pa/ rgya cher rnam par rol pa las/ /sangs rgyas kyis ni khyab par brjod/ /ce'o/ /'jig rten gsum zhes bya ba ni 'dod pa dang gzugs dang gzugs med pa'i khams nyid de de nyid gsal bar bya ba rgyu dang mi rgyu zhes bya ba'o//'dis ni sdud par byed pa zhes bya ba ni mi snang bar byed pa'o/ /'byin par byed ces bya ba ni sprul par byed pa'o/ /bskyed pa gsal bar gsungs pa/ gsang ba'i zhes bya ba ni rdo rje rnal 'byor ma'o//yum zhes bya ba ni skyed mar byed ma ste/ gang zhig 'di ni sgyu ma chen mo'o/ /gsungs zhes bya ba ni rnam par bshad pa'o/ /'jig rten gsum bsgrub cing zhes bya ba ni khams gsum 'dzin cing 'byung ba'i phyir ro/ /rig ma zhes bya ba ni/ rang rig pa'i bdag nyid kyi phyir ro//'dod pa thams cad rab sbyin ma/ /zhes bya ba ni rang dang gzhan gyi 'dod pa'i 'bras bu thams cad rab tu ster ba'i phyir ro/ /thos pa med pa tsam gyi phyir gsungs pa/ rnam par shes zhes bya ba ni/ bye brag med par shes pa ste/ bsgom pas mngon sum du byed pa'o/ /ma rig pa la sogs pa'i mi mthun pa'i phyogs kyis rig pa'o//sgrub pos dbang phyug ces bya ba ni/ sgrub pa po'i bdag po'i rgyu'i phyir ro/ /de nyid gsungs pa/ khams gsum ma lus pa las ni/ /'chi ba dang ni 'tsho ba nyid/ /skad cig tsam gyis byed par 'gyur/ /bsal bar nus par the tshom med//'jig rten gsum gyi rnam par 'grel pa gsungs pa/ lha dang zhes bya ba la sogs pa ni go sla'o/ /sgrub pos zhes bya ba ni/ /sgrub pa pos 'grub par 'gyur ro/ /tshig rkang rnam par 'grel pa gsungs pa/ /dbang du byed ces bya ba ni gus par 'gyur pa'o/ / 'byung po rnams zhes bya ba ni bskyed pa brten par byed pa'o/ /chu skyes zhes bya ba ni chu srin la sogs pa rnams so/ /thang skyes zhes bya ba ni mi la sogs pa rnams so/ /rnal 'byor ma zhes bya ba ni thabs dang shes rab kyi rang bzhin no/ /de nyid gsungs pa/ thabs dang shes rab snyoms 'jug pa//rnal 'byor zhes byar mngon par brjod// /rnal 'byor ma mo zhes bya ba ni sgrub pa po'i rim pas rnal 'byor de'i bdag po 'byung ba'i phyir/ 'jig rten gsum gyis bsgrub par brjod do/ /khams gsum dag ni ma lus pa/ /zhes bya ba ni thams cad 'grub par 'gyur ba'o/ /sgyu ma rnam 'phrul pa zhes bya bas kyang sbyor bas 'grub par 'gyur te/rnam pa sna tshogs rmad du byung ba sgyu ma'i rnam par 'phrul pa'i gar gyis skye bo rjes su gzung ba'i don du bstan par bya'o/ /rol pa rnam par mdzad pa gsungs so zhes brjod do/ /de nyid gsungs pa/ 'phrog pa zhes bya ba la sogs pa'o//de rnams kyis nye ba'i longs spyod dang / rang gi rigs la mngon sum du byed pa'o/ /lha mchog la skyes zhes bya ba ni/ nye bar mtshon pa ste/ lha dang lha ma yin la sogs pa'i bu mo bkug nas rig pa'i brtul zhugs la sogs pa'i dus su spyod pa'o/ /rnal 'byor ni rab tu mang por byed pa ste sgyu ma chen mo'o//mig 'phrul byed ma zhes bya ba ni sgyu ma'i don du bshad pa'o/ /rmongs par byed pa zhes bya ba ni rgyal bar byed pa'o/ /rengs par byed pa ni g.yo ba med par byed pa'o/ /gsang ba ni bstan pa dang dkon mchog gsum la gnod pa byed pa'o/ / skrod pa ni gnas nas skrod pa'o/ /sogs pa zhes bya ba'i sgras ni/ nye bar 'tshe ba'i rims dang gdon dang nad skyed par byed pa'o/ /dbang ni rjes su chags pa'o/ /mkha' 'gro dang zhes bya ba ni nam mkha' la rgyu ba'o/ /gzhan gyi grong du zhugs pa zhes bya ba ni rnam par shes pa dang bral ba'i lus la 'jug pa'o//mi snang ba ni mi mthong ba'o/ /rnam par snang zhes bya ba ni chags pa dag mi dga' ba'o/ /lkugs pa ni smra mi shes pa'o/ /sa 'og 'gro zhes bya ba ni phyag na rdo rjes gsungs pa'i bu gar 'jug pa'o/ /rig 'dzin zhes bya ba ni ral gri la sogs pa'o/ /'khor los sgyur ba nyid ces bya ba ni/gser la sogs pa'i 'khor los so/ /rga ba dang na ba dang 'chi ba dang bral ba nyid do/ /rnal 'byor mas ni rnam par byed/ /ces bya ba ni/ 'brel par byed pa ste/ khyad par du rnam par byed pa'o/ /'dis zhes bya ba ni rig pas so/ /rig pa zhes bya bas ni thabs dang shes rab kyi bdag nyid sgyu ma lta bu'o//yi ge ni dbyangs dang gsal byed rnams so/ /sngags ni oM la sogs pa rnams so/ /de'i gzugs kyis zhes bya ba ni/ de'i rang bzhin gyis te/ thos pa dang sems pa dang / bsgom pas ting nge 'dzin skyed par byed do zhes brjod do/ /'don pa zhes bya ba la sogs pa'o//ting nge 'dzin sems rtse gcig pa'o/ /bzlas 'grub ces bya ba ni 'brel bya ba ste/ bklags pa tsam nyid kyis sdig pa dang bral bas 'dod pa'i dngos grub byed do/ /rig ma'i dngos grub ces bya ba ni/ phyag rgya chen po'i dngos grub po/ /kyang zhes bya ba'i sgras ni tshangs pa'i dngos grub dman pa ma yin pa'o//bsgom pa'i nad du spang par bya ba'i phyir gsungs pa/ brtul zhugs med cing zhes bya ba la sogs pa'o/ /ji ltar grub par 'gyur zhe na/ bde zhing rangs pas zhes gsungs so/ /shes rab ces bya ba ni chos thams cad rnam par 'byed pa'i bdag nyid can te/lha mo'i rnam par yongs su grub pa'o/ /thabs zhes bya ba ni/ snying rje chen po'i rang bzhin te/ rang gi 'dod pa'i lha'o/ /la sogs pa zhes bya ba'i sgras ni/ sdig pa bshags pa dang / bsod nams la rjes su yi rang ba dang / gsum la skyabs su 'gro ba dang /byang chub tu sems bskyed pa dang / yongs su bzung ba'o/ /dam tshig chen po'i grub pa dang / /zhes bya ba ni rin thang med pa'i dngos grub chen po ste/ phyag rgya chen po'i dngos grub po/ /sgyu ma chen mo'i rab sbyor bas/ /zhes bya ba ni/ sgyu ma lta bu'i thig le dang / sa bon gyi bsgom pa rnams kyis so//rnal 'byor gyi ni sdom pa zhes bya ba ni/ thabs dang shes rab kyi bdag nyid can gyi bde ba mchog la rjes su chags par byed pa ste/ de yang rnal 'byor gyi sdom pa bla ma'i man ngag las/ ye shes bdag nyid ces bya ba 'dis dbang la snyegs so//mchod pa lnga zhes bya ba ni/ lha bshos la sogs pa'o/ /'dod yon lnga zhes bya ba ni gzugs dang sgra dang dri la sogs pa dam pa'o/ /sgrub po'i dbang pos zhes bya ba la sogs pa ni/ bla ma dam pa dang / rigs pa dang lung dag gis shes par bya'o/ /gang gis ye shes zhes bya ba ni/bdag gis de ma thag tu gsungs pa'o/ /grub pa yis zhes bya ba ni bsgom pa'i stobs las gsal ba lta bu'o/ /shin tu zhes bya ba ni dngos po dang dngos po med pa la sogs pa'i mtha' gnyis zil gyis mnan cing bsgom pa'i mtshan nyid do/ /dngos grub ces bya ba ni dmigs pa dang bral ba ste/mi gnas pa'i mya ngan las 'das pa'i rang bzhin no/ /rtag par zhes bya ba ni rgyun brtag pas 'thob pa'o/ /yi ge dam pa'i phreng ba yis/ /zhes bya ba la sogs pa rnams kyis te/ brgyad kyi phyed kyi 'gyur gyis bskor ba'i thig le'i gzugs so/ /thig le'i rnal 'byor la sogs pas sems brtan par byas na rnam pa thams cad du nus par 'gyur ro zhes brjod do//mthong bar 'gyur zhes bya ba la sogs pa ni/ sprul pa rnam pa sna tshogs pa gang zhig sprul pas byas te brjod do/ /de bzhin gshegs pas zhes bya ba ni/sems bskyed pa'i rim pas sam dbab pa'i rim pas sangs rgyas nyid 'grub pa'o/ /dngos grub ces bya ba ni dngos grub chen po brgyad la sogs par mngon par 'dod pa sems can gyi don to/ /bcud kyis len zhes bya ba ni grub pa'i rdzas kyis so/ /las rgyas pa mdor bstan pa gsungs pa/khu ba zhes bya ba la sogs pa'o/ /gong du dgug pa zhes bya ba ni bsgrub par bya bar snang nas 'ong ba'o/ /gang gi tshe phreng ba skye ba bdun pa la sogs pa dang / skyes pa'i sha la sogs pa bkug nas grub pa'i gzi brjid gsungs pa/ tshe ring zhes bya ba ni bskal pa chen por gnas pa'o/ khro bo yi ni lus dang yang / /zhes bya ba ni mthong na mi dga' bar byed pa'o/ /cho 'phrul zhes bya ba ni 'bar ba dang bsreg pa la sogs pa'o/ /bsam pa zhes bya ba ni 'dod pa tsam gyis so/ /gzugs ni yongs su bsgyur zhes bya ba ni/ stag la sogs pa'i gzugs su'o/ /rig ma chen mo zhes bya ba ni mtshan te/shin tu bdag nyid chen mo'o/ /dbang phyug ces bya ba ni gtso mo'o/ /sgyu mche zhes bya ba ni sdig pa dang bral ba'o/ /bklags pas 'grub pa rmongs med ma/ /zhes bya ba ni 'bras bu dang bcas pa'o/ /'dis ni nga dang mtshungs pa'i rig ma ni yod pa ma yin zhes pa'o/ / nga zhes gsungs pa ni/ rdo rje mkha' 'gro ste 'gro ba rnams su 'jig rten thams cad kyi bdag po'o/ /lung ni 'di dag shes pa'o/ /khyod la bshad pa yin zhes bya ba ni sangs rgyas kyis mkha' 'gro ma la'o/ /de ma thag tu gsungs pa/ rnal 'byor gyi dbang phyug rig ma chen mo'i grub pa'i rdo rje'i dngos grub po//mtshan ma zhes bya ba ni mngon par shes pa lnga la sogs pa'o/ /de rnams kyis bstan pa zhes bya ba ni gzhung gang gis de de bzhin du gsungs pa'o/ /dang po zhes bya ba ni gnyis ba la ltos pa'o/ /de nas zhes bya ba ni dang por bstan pa'i de ma thag pa'o/ /gsang ba zhes bya ba ni/ sku dang gsung dang thugs kyi bdag nyid can gyi phyir ro/ /yi ge zhes bya ba ni/ oM la sogs pa bzlas pa ste/ chos kyi dbyings su mi 'gyur ba'i phyir ro/ /dam pa zhes bya ba ni/ mya ngan las 'das pa la sogs pa ste/ srid pa dang bral ba'i phyir ro/ /rnal 'byor dang dngos grub ces bya ba ni thabs dang shes rab kyis zag pa med pa'i dga' ba'i bdag nyid kyi rang bzhin rdzogs pa'o//de nyid gsungs pa/ /thabs dang shes rab snyoms 'jug pa/ /rnal 'byor zhes ni mngon par brjod/ /thabs dang shes rab dngos po yis/ /mtshan nyid rang bzhin med pa gang / /zhe'o/ /de nyid 'bras zhes bya ba ni/rang dang gzhan gyi don gyi dngos grub phun sum tshogs pa'i phyir ro/ /de'i sems kyis mtho ba'ang gsungs pa/ /gang gis zhes bya ba la sogs pa'o/ /mchog ces bya ba ni mngon par 'dod pa ste/ sangs rgyas kyi thabs dngos grub brgyad la sogs pa de sbyin pa de yin no//dang po'i yi ge zhes bya ba ni oM ste/ bzlas pa'i dus su spro ba'o/ /ston par byed pa'i tshul gyi phyir/ /sprul pa'i sku yi rang bzhin te/ /oM ni sku yi yi ge dang / /longs spyod rdzogs pa'i sku'i bdag nyid can gyis so/ /hUM ni thugs kyi rdo rje'i bdag nyid can te gnas su bstan pa'i dngos po la yang chos kyi sku'i/oM ni srog dang rtsol ba khyab pas bzla bar bya'o/ /dbugs ni dbyung bar bya zhes bya ba ni rnal 'byor pa 'di'i don to/ /brgyad kyi mtha' zhes bya ba ni sde tshan brgyad kyi mtha' ste ha'i rnam pa'o/ /u zhes bya ba ni 'og tu ldan pa'o/ /thig ler bcas pa zhes bya ba ni spyi bor zla ba phyed pa'o//dngos dang dngos med ces bya ba ni bsgom pa dang bral ba'i bzlas pa bya'o zhes bya ba'i don to/ /de la brtul zhugs bshad pa med/ /ces bya ba ni/ bdud rtsi'i rgyun gyis rang dang gzhan gyi cha dang bral bas gzhan nas gzhan du bzlog par 'gyur te/ dka' thub kyi bdag por 'gyur ro//de ma thag tu gsungs pa'i rnal 'byor gyi don brjod pa/ sngags dang zhes bya ba ni hUM la sogs pa'o/ /dbyibs zhes bya ba ni lha'i rnam pa'o/ /chos zhes bya ba ni chos kyi dbyings so/ /de'i bdag ces bya ba ni de'i rang bzhin te/ rnal 'byor zhes bya ba'i don to/ /yi ge'i mthar gsungs pa/ye shes zhes bya ba ni/ sems rtse gcig pas bskul bas snying ga'i mthar gsungs so/ /a thung ngus mtshon pa'i lcags kyu dang zhags pa'i lag pa dang bcas pa'i lha phyag gnyis pa spros nas zhags pas mgrin pa bcings shing / lcags kyus snying phug cing rlung gi dkyil 'khor la zhon par bsgrub par bya ba'i lus par snang nas 'gugs par bsams na 'ong bar 'gyur ro/ /sbyor ba gsum zhes bya ba ni rlung gi dkyil 'khor dang / zhags pa dang lcags kyu'i sbyor ba dang / sku la sogs pa yang dag par gnas pa'o//gsung zhes bya ba ni mgrin pa'o/ /khu ba dgug pa gsungs pa/ khe zhes bya ba ni/ sbu gu'i dbyibs su sgra dkar po khe yis byin gyis brlabs la kha nas phyung nas bsgrub bya'i gsang bar zhugs te/ dbugs dbyung bas ni gzhug pa dang / /rngub pas ni bkug nas snod nas snod du gzhag pa'am btung bar bya'o//chags pa'i bdag ces bya ba ni lus dang ngag dang yid kyis shin tu chags pa'o/ /zhal bzhi dang thod pa'i phyag gis zhes bya ba lha'i rnal 'byor gyis dgug go/ /chang dgug pa gsungs pa tsi yig ser po rta'i gdong gi lha'i rnal 'byor pas/tsi yig mtshan ma'i sbu gus dgug par bya'o/ /khrag dgug pa gsungs pa/ ce sbyang gi dbyibs kyi gdong gi lha'i rnal 'byor pa kha dog dmar po khros pas snying gnas pad+ma'i dbyibs kyi skras re phas byin gyis brlab pa kha nas bton te/ bsgrub bya'i lus phug nas khrag dag par bya'o//yan lag drug gi dgod pa gsungs pa/ kha dog drug dang zhes bya ba la sogs pa ni/ yi ge 'di rnams kha dog drug dang mnyam par ldan pa'o/ /drug gi gnas su zhes bya ba ni/ dpral pa dang mgrin pa dang / mig dang / rna ba dang / sna dang / snying ga rnams su'o//rjes su bsngags pas gsungs pa 'grub/ /ces bya ba ni/ de nyid brjod par 'gyur ro/ /dang po'i yi ge zhes bya ba ni oM ste sngags thams cad kyi dang por nges par phyag 'tshal bar gyur pa'i phyir ro/ /dbang po'i mdog ces bya ba ni/ dbang po sbas pa'i srog chags lta bu'am 'bar ba'i me lta bu'o//yi ge gnyis pa zhes bya ba ni a ste/ dbyangs kyi nang du gnyis pa'i phyir dang man ngag las tsheg drag gnyis kyi dbang du byed pa'i phyir ro/ /ban+du'i me tog lta bu'i a thung ngus lhag par dbang du byed pa'i phyogs gcig gi phyir ro/ /dgug pa'i mthar gsungs pa khe'i yig 'bru nyid dkar po'o//tsi thung ngu ni ser po'o/ /re pa ni me'i kha dog nyid do/ /yi ge 'di rnams las rgyas pa lhag par byed pa las ni kha dog gi khyad par ro/ /yan lag drug dgod pa'i dus su ni oM 'ba' zhig dkar po ste/ gzhan dag ni ji skad gsungs pa'i kha dog nyid do//oM ni dkar po'o/ /dbang po'i mdog mnyam ldan pa'i/ /zhes bya ba'i dbang po'i kha dog dang mnyam par ldan pa'i zhes brjod pa'i gzhung yod par blta bar bya ste/ dbang po ni zla ba ste/ kha dog dag pa'i phyir dkar po'o/ /gzhan dag dbang po dang mnyam par ldan pa zhes yan lag dang nying lag gis mdor bsdus nas zur gyis ston par byed do//in+d+ra nI la'i kha dog nyid ni mngon spyod kyi lhag par byed pa la bsngags so/ /bzlas pa'i dus su yi ge gsum po thams cad dkar po nyid do/ /thig le dkar po la 'jug pa dang sbyor ba las byung ba'o//de ltar sngags rnams kyi kha dog gi rim pa'i gzhung gzhan nas gzhan du 'ong ba bshad par bya ste/ bdag gi bla ma'i gzhung gsungs pa/ mig dang dpral ba dang mgrin pa la sogs par bsgom pa gang gi tshe sems pa gsungs pa/ seng ge lta bur rnam par rol pas gang gis nyon mongs pa'i ri dgas gzhom pa'i phyir lkugs par byed pa de de bzhin du sku dang gsung dang thugs phyag rgyas btab pa'i phyir phyag rgya che'o//'dod pa'i lha'i rnam pa'o/ /bcing bar bya zhes bya ba ni/ mi g.yo bar bya ba'o/ /rnal 'byor mas zhes bya ba ni/sems rtse gcig pas so/ /sngags dang dbyibs dang chos kyi rang bzhin gnyis su med par gyur pa'o/ /las rgyas pa'i kha bskor ba gsungs pa/ srog dang rtsol ba legs sbyar ba/ /zhes bya ba ni dbugs 'byin pa dang bsdam pa'o/ /skad cig ces bya ba ni yi ge la sogs pa sems pa ni'o//'bar zhes bya ba ni drod dang du ba la sogs pa'i rim pas 'bar ba'o/ /da ni rnal 'byor gyi ring por shes pa gsungs pa/ 'og min zhes bya ba dang 'jig rten bdun zhes bya ba ni/ 'dod pa'i lha rnam pa drug dang 'og min gyi bar du rnam pa bcu bdun te/gzugs kyi khams su gcig tu bya bar brjod do/ /rgyu dang mi rgyu zhes bya ba ni gzhan yang g.yo ba dang mi g.yo ba ste brtan pa dang 'gro ba'o/ /rnal 'byor ma'i bza' ba'i khyad par gsungs pa/ sgo dgu las ni byung ba'i rdzas/ /zhes bya ba ni mig dang rna ba dang /sna dang / kha dang nye ba'i gnas rnams las byung ba'i tshe rnams so/ /blo ldan zhes bya ba ni dri ma med pa'i shes rab po/ /de nyid gsungs pa/ bshang gci bza' bar bya ba'i don/ /de 'di sgrub pa skal bar ldan/ /zhe'o/ /rang bzhin med pa yis/ /zhes pa ni rang dang gzhan du brjod du med pa'i dngos po ni rang bzhin gyis gcig dang du ma dang bral ba'i phyir ro//gsang ba'i dbang la snyeg pa'i phyir/ /mthe bong srin lag dag gis khar/ /zhes gsungs te/ gang gis zhes bya ba ni ma bshad do/ /rnam rtog med pas zhes bya ba ni sngags kyi lus kyis brtags pas so//de nyid gsungs pa/ sngags kyi don gyis rnam rtog ni/ /rnam par rtog pa med pa'i blo/ /zhe'o/ /yid bzhin nor bu zhes bya ba ni/ mngon par 'dod pa'i don sbyin par 'dod pa'i phyir ro/ /ji ltar 'gyur zhe na myang bar bya bar gsungs pa/ bdud rtsi'i bdag nyid las byung bas//zhes bya ba ni/ bsam gtan gyis yang dag par grub pa'i byang chub bo/ /brtag pa zhes bya ba ni 'khor ba ji srid par rgyun mi 'chad pa'o/ /sha lnga gsungs pa/ phyi ma rdzas kyi tshogs rnams zhes bya ba ni de'i rdzas kyi phung po'o/ /kun mkhyen 'bras bu zhes bya ba ni sangs rgyas nyid do//sbyin pa po zhes bya ba ni/ gzhan nas gzhan la sogs pa'i tha snyad do/ /zos pa zhes bya ba ni lus bde ba dang ldan par gyur pa dang / sems bde ba dang ldan pa'i ting nge 'dzin du 'gyur pa dang / sems bde ba dang ldan pa'i ting nge 'dzin du 'gyur ba dang / sems mnyam par gzhag par gzhag pas ji ltar 'byung ba rab tu shes par 'gyur ro//'byung po ma mo zhes bya ba ni/ rdo rje rnal 'byor ma'o/ /ma chen po zhes bya ba ni dri ma chen po dang ldan pa yang ye shes lnga'i bdag nyid kyi phyir ro/ /de bzhin du brjod pa ril bu brgyad du bya ba gsungs pa/ bcu bzhi pa zhes gsungs te/ 'chol ba'i rim pas brgyad pa dang por byas nas bcu bzhi pa ji srid du nyi ma bdun du 'gyur ro//lhan cig nye bar zhes bya ba ni sgo dgu las byung ba'i rdzas dang nye ba nyid do/ /lnga zhes bya ba ni/ gsungs ma thag pa'i sha lnga po rnams nyid do/ /'dis ni de nyid brjod par 'gyur ro/ /brgyad par son pa'i glang po che la sogs pa'i sha rnams blangs nas sgo dgu las byung ba dang /mnyes te ce sbyang shi ba'i lus kyi nang du bcug ste/ nyi ma bdun du gzhag par bya'o/ /de nas bcu bzhi pa la btus te/ btags nas yungs kar gyi 'bras bu'i tshad tsam du ril bu byas te me la sogs pa'i cho gas skams te myang par bya'o//sangs rgyas zhes bya ba ni/ sangs rgyas kyis so/ /sbas pa zhes bya ba ni gsang ba'o/ /'bras chen mo zhes bya ba ni 'bras bu chen po'i rgyu'i phyir ro/ /gzhan gyi rgyud du ma gsungs so/ /zhes bya ba ni rgyud 'dir brjod pa'o/ /bsgom pa'i rim pa gsungs pa/ de nas zhes bya ba ni bsgrub par bya ba'o//'di zhes bya ba ni sgrub pa po'o/ /bsgom pa'i rim pa de nyid yid kyis zhes bya ba la sogs pa gsungs so/ /kha cig na re pad+ma dmar po 'dab ma bzhi pa zhes zer ro/ /gzhan dag na re 'dab ma brgyad pa zhes zer ro/ /bsgom pa'i dkyil 'khor du 'dab ma bzhi pa'o/ /ri mo'i dkyil 'khor la ni 'dab ma brgyad pa'o//der nyi ma'i dkyil 'khor la thig le dkar po lnga'o/ /phyogs bzhir zla ba las byung ba'i lha mo bzhi dang ldan pas phyis glu yis bskul ma thag tu/ dbus su thig le las byung ba hUM las skyes pa'i rdo rje mkha' 'gro'o/ /sangs rgyas gzugs brnyan nye bar mdzes/ / zhes bya ba ni/ bcom ldan 'das zhal bzhi pa'o/ /sku mdog gsungs pa/ shar du zhes bya ba la sogs pa ni/ lha mo rnams kyang zhal bzhi pa dang sku mdog ser po la sogs pa'o/ /'di rnams kyi rtsa ba'i zhal ser po la sogs pa de'i gnas su sngon por blta bar bya'o/ /phyag bzhi pa dang spyan gsum pa'o//lha mo'i mtshan ma rnams gsungs pa/ g.yon na zhes bya ba la sogs pa ni lha mo bskyed ma thag tu bcom ldan 'das bskyed pa'o/ /gang gis bcom ldan 'das bskyed pa dang dus mnyam pa nyid du lha mo rnams skyed par byed pa de rnams kyi gzhung bdag gis sun dbyung bar bya ste/gang gi phyir/ lha mo bzhi dang mnyam ldan zhing / /sangs rgyas gzugs brnyan nye bar mdzes/ /zhes gzhung 'dir lha mo bzhi dang por gsungs nas/ phyis kyang bcom ldan 'das so/ /lha mo rnams kyi mtshon cha la sogs pa dang /phyogs la sogs pa dang por gsungs nas/ phyis bcom ldan 'das 'dis mtshon pa'i phyir/ lha mo'i glus yang dag par bskul ma thag tu/ phyis bcom ldan 'das kyi bskyed pa ste/ rgyud gzhan dang mtshungs pa ni ma yin no/ /'di'i gtan tshigs brjod pa gang gi phyir tha dad par gyur pa 'di nyid de nas yang 'od zer can la sogs pa'i rgyud du blta bar bya ste/lha mo gzhan dag nyi ma'i gtso mo rnams bskyed pa'i 'od zer gyis bskul bas phyis dbus su bzhugs pa'i bcom ldan 'das gtso mo bskyed do zhe'o/ /dang po'i sngags dang zhes bya ba ni oM ste/ yi ge drug po rnams kyis gnas drug po rnams su ldan par bsgom par bya'o/ /'bar zhes bya ba ni spro ba dang sdud par byed pa yin no/ /de ltar gyur pa'i lha'i rnal 'byor pas sgrub pa thams cad la nus par 'gyur ro zhes brjod do/ /de ltar zhes bya ba ni rdzas te ril bu la sogs pa'o/ / grub ces bya ba ni phyag rgya chen po'i dngos grub po/ /de'i 'bras bu ni gzhan gyi don te sgyu ma thams cad rnam par mdzad pa'o/ /de rab sbyin zhes bya ba ni de grub pa'i phyir ro/ /dman pa ma yin pa'i dngos grub sgrub pa'i sngags pa gsungs pa mi snang ba zhes bya ba ni mi mthong bar gsungs so//bzlog pa zhes bya ba ni yi ge gsum gyi rnal 'byor ro/ /de la zhes bya ba ni rdo rje chu dang yang dag par ldan pa'i ril bu hUM gis byin gyis brlabs pa'i a las skyes pa'i thod par bzhag la phyi nas oM bsgom par bya'o/ /mngon par bsngags pa'i don du sngags btu ba gsungs pa/brgyad ces bya ba 'di ni mtha'i yi ge'o/ /kun zhes bya ba 'di lha mo bzhi'i 'khor los sgyur ba'i rnal 'byor gyis dang po'i yi ge ste oM mo/ /a ni 'dir ma gsungs so/ /de'i don gsungs pa gsum zhes bya ba la sogs pa ni a dbus su bcug pa ste/gsum du 'gyur zhes bya ba'i don to/ /'dis ni de gsungs pa yin no/ /rlung gi dkyil 'khor la sogs pa'i steng du a las skyes pa'i pad+ma'i snod du bzhag pa'i rdzas hUM dang bcas bsams nas/ /'og nas rlung gi dkyil 'khor dang / 'bar bas sdig pa bsregs te/ye shes kyi bdud rtsi'i rang bzhin can du byas nas/ steng du oM gyi 'od zer gyis spyan drangs pa'i rgyal ba'i tshogs ro mnyam par byas te/ oM a guh+ya b+ha shas b+ha shes haM zhes mngon par bsngags nas lce li rdo rje'i sbu gu'i 'od zer gyis bkug nas bza' bar bya'o/ /rnal 'byor gyi sdom pa gsungs pa gsal bar bka' stsal pa/brgyad ces bya ba la sogs pa ni hUM rnam par sprul pa'i gsang ba'i rdo rje'o/ /dang po'i yi ge sbyor ba yis/ /zhes bya ba ni/ oM gyis sprul pa'i nor bu'o/ /hrIHdang zhes bya ba ni/ hrIHyis sprul pa'i lha mo'i pad+ma'i/ /yi ge mtha' ru sbyar nas ni//zhes bya ba ni rdo rje'i bu gar phaT nang du bcug pa'o/ /sa bon lnga ni rab tu sbyar/ /zhes bya ba ni rigs lnga'i cha dang ldan par ro/ /yi ge rnam par bsgom par bya bas ni bruM las byung ba'i lte bar ser po'o/ /de ltar sbyor ba shes par bya/ /zhes bya ba ni snyoms par 'jug par byas pa'o/ / glu 'dis rdo rje'i gar nyid kyis rdo rje sems dpa' zhes bya ba ni he ru ka'o/ /gzhug par bya ba ni rdo rje'i lte ba'i dbus su bsgom par bya'o/ /thabs dang shes rab snyoms 'jug pas/ /rnal 'byor zhes byar mngon par brjod/ /rnal 'byor dngos grub ces bya ba ni/ thabs dang shes rab kyi bdag nyid can gyi dngos grub bo//thun tshod bzhir ni sbyor ba yis/ /bsgom pa mchog gi zhes bya ba ni/ dam par byas pas rgyun du yun ring po dang rab tu ldan pa ni bsgom pa'i mchog go/ /'dod pa'i yon tan lngas gang zhing / /zhes bya ba ni mchod pa lnga yis brgyan pa ste gsungs ma thag pa'i dngos grub 'thob bo//de cir 'gyur zhe na/ de ltar sku gsum mchog sbyin pa/ /zhes gsungs te/ chos dang longs spyod rdzogs pa dang sprul pa'i sku'i bdag nyid can mchog sbyin pa ni sems can thams cad la mngon par 'dod pa'i don sbyin pa ste/ ji ltar rdzogs pa'i sangs rgyas gzhan du 'dir 'gyur ro zhes bya ba'i don to/ /dngos grub ces bya ba ni 'od gsal bar gsungs so/ /dpag tshad ces bya ba la sogs pa ni mnyam par sbyor ba bsgoms pa'i mthar bdud rtsi myang bar bya'o zhes gsungs pa'o/ /sgo dgu zhes bya ba 'di'i 'bras bu gsungs so//dge ba de nyid ces bya ba ni dus gsum du nye bar 'tshe ba dang bral ba ste yang dag pa'i don gyi phyir ro/ /bla med ces bya ba sgyu ma lta bur rang dang gzhan gyi lhag pa'i lha'i rnam pa'i phyir ro/ /grub par zhes bya ba la sogs pa ni/ zag pa med pa'i bde ba chen po'i rang bzhin gyi phyir ro//rgyud kyi bsdus pa'i don la snyeg pa'i phyir/ gzugs dang zhes bya ba la sogs pa ni/ dbang po sbas pa la sogs pa'i kha dog go/ /phyag rgya zhes bya ba ni lha'i rnal 'byor ro/ /mtshan ma zhes bya ba ni/ thod pa la sogs pa'o/ /rdzas zhes bya ba ni bdud rtsi lnga la sogs pa'o//bsam gtan ni dgug pa la sogs pa'i las rnams so/ /sgom pa zhes bya ba ni mngon par rtogs pa'i rim pa'o/ /rnam pa sna tshogs thabs zhes pa dang / lha mo zhes bya ba ni lha mo rnams so/ /yid la 'dod pa zhes bya ba ni/ /ral gri la sogs pa dang phyag rgya chen po'i dngos grub kyi mthar thug pa rnams so//rgyud kyi che ba'i bdag nyid gsungs pa/ gang gis zhes bya ba la sogs pa 'di ni glegs bam gyi bdag nyid can no/ /'dzin dang zhes bya ba ni/ khong du chud par byed pa'o/ /klog cing zhes bya ba ni glegs bam mthong ba las so//sgom byed ces bya ba ni thun tshod bzhi'i rim pas so/ /'dir kha cig na re bcom ldan 'das ni snyoms par 'jug pa med pa zhes zer ro/ /'di'i don ni yang dag pa ma yin pa'i snyoms par 'jug pa zhes bya bar snyegs te/ 'dir nges par mngon sum du tshig rkang yod de/ gang zhig gang du gsungs pa/thabs dang shes rab sogs sbyor bas/ rtag tu zhes bya ba ni de bzhin du de ltar mnyam par sbyor bar shes par bya zhing / rigs lnga'i cha dang ldan pa nyid rtogs par byas nas gsungs pa ste/ de bzhin du rnal 'byor gyi dngos grub tu 'gyur ba'i phyir/ thabs dang shes rab kyi bdag nyid can gyi rnal 'byor gsungs so//de nas gzhan yang dbang po gnyis rab tu sbyor ba gsungs pa zhes bya ba la sogs pa'ang / mthong ba yin mod kyi snyoms par 'jug pa nyid ni/ bdag gis mchog tu dga' ba'i bdag nyid can gyi byang chub sgrub pa dang / snyoms par 'jug pa ma gtogs pa'i mchog tu dga' ba'i bdag nyid can gyi mtshon par grub par byed par nus na/dgod pa dang blta ba 'dod chags kyi mtshan nyid mchog tu dga' bas bdag gis mtshon pa yin gyis gzhan du ni ma yin no/ /gang gi phyir yin mod kyi de las bdag gis de la gnas nas rnam par bsgom pa gnyis gnyis snyoms par 'jug pa'i gnas su 'jug ste/bdag gis mtshon cha rab tu mnyam par sbyor bas nges par mtshon par bya'o/ /dpal sgyu ma chen mo zhes bya ba'i dka' 'grel/ /slob dpon mkhas pa chen po dpal rgyan gyi zhal snga nas mdzad pa rdzogs so/

CLOSE WINDOW