CLOSE WINDOW

D1623
བོད་ཡིག

yang dag ye shes dang ldan 'gyur// @##/ /rgya gar skad du/ gu Na wa t+yaM shrI ma hAmA yA TI kA bod skad du/ dpal sgyu 'phrul chen mo'i 'grel pa yon tan ldan pa/ dkon mchog gsum la phyag 'tshal lo/ /dpal rdo rje sems dpa' la phyag 'tshal lo/ /bcom ldan 'das 'jig rten dbang phyug la phyag 'tshal lo//gang gis lon tan rnams kyi don phyir rigs rnams dang / /lha mo rnams dang rigs kyi gtso bo'i skur mdzad cing / /sku yi mtshan ma rjes 'gro de nyid gcig pu yi/ /rdo rje 'dzin pa zhi ba'i don du nges bsten bya/ /gang zhig tshig tshogs rab tu mang po dpal ldan sgyu 'phrul chen mo'i rgyud//mdo don ma lus yongs su shes pa'i skye bo ding sang 'ga' tsam srid/ /de bas thos ldan gsal zhing dag pa'i skye bo rnams kyis de yi ni/ /tshig don so sor shes pa rnyed par bya phyir bdag gis 'grel pa 'di/ /skye bo'i 'dod pa tha dad rnams la gzigs nas ni//bde bar gshegs pas byang chub lam ni sna tshogs gsungs/ /'dod ldan mang du rang nyid 'jug pa srid pas na/ /rnam 'grel yon tan ldan 'di bya bar 'os pa yin/ /de nas zhes bya ba la sogs pa la/ /rgyud 'di ni rang gi rgyud ma yin no//'o na ci zhe na/ rgyud gzhan dang 'grel pa ste/ /de bas na de nas zhes bya ba'i don rgyud 'di rgyud snga ma la ltos pa'i rjes thogs yin par gsal bar byed do/ /de nyid kyi phyir 'di'i dang por 'di skad bdag gis thos pa la sogs gleng gzhi'i tshig phrad sbyar bar ma mdzad de/ snga ma nyid la sbyar ba'i phyir/ dper na dpal rdo rje rtse mo la sogs pa'i rgyud bzhin no/ /de nas zhes bya ba'i sgras gang gi phyir mdor bsdus pa la dga' ba rnams 'di nyid kyis myur du byang chub bsgrub pa'i phyir te/ /de nas rab tu bshad par bya/ /zhes bya ba dang sbyar te/ /rab tu rnam par phye ste bshad pa ni rab tu bshad par bya ba'o//rgyud ces bya ba ni rab tu rgyas pa ste/ rgyu'i rgyud dang / 'bras bu'i rgyud dang / thabs kyi rgyud de rnam pa gsum mo/ /de la rang bzhin gyis 'od gsal ba thog ma dang tha ma med pa'i byang chub kyi sems de ni rgyud de sa bon no/ / de gang gi sa bon zhe na/ byang chub kyi ste/ yang dag par rdzogs pa'i byang chub kyi'o/ /de nyid ni bla na med pa'i 'bras bu yin pa'i phyir 'bras bu'o/ /de yang rang bzhin gyis 'od gsal ba'i sems glo bur gyi sgrib pa thams cad zad pas rnam par dag pa'i mtshan nyid sangs rgyas rnams kyi chos sku ste/longs spyod rdzogs pa dang / sprul pa'i skus bsdus pa'i yon tan mtha' yas pa sangs rgyas kyi chos rnams kyi rten du 'gyur ba zhes bya ba'i don to/ /de nyid ni sangs rgyas rnams kyi byang chub chos kyi sku ste/ rdo rje 'dzin pa chen po'i go 'phang ngo //rgyu de las de'i 'bras bu rdzogs par byed pa ni thabs te/ de yang pha rol tu phyin pa'i theg pa chen po la ni byang chub sems dpa' rnams kyis bskal pa grangs med pa gsum du sgrub pa'i lam 'khor dang bcas pa'o/ /gsang sngags kyi theg pa la ni byang chub kyi lam ni shin tu rgya chen po de nyid mdor bsdus pa'i rang bzhin shin tu myur ba dang /shin tu bde bar byang chub sgrub pa'i thabs dkyil 'khor gyi 'khor lo la sogs pa'i lam 'khor dang bcas pa'o/ /rgyu dang / 'bras bu dang / thabs de dag gi dbang du byas nas gang bstan pa de dag ni rgyas pa ste go rims bzhin du rgyu'i rgyud dang /'bras bu'i rgyud dang / thabs kyi rgyud de/ rgyud rnam pa gsum po 'di dag rab tu bshad par bya'o/ /'o na rgyud de'i ming ci zhe na/ mchog tu gsang ba zhes pa'i sgra ni zad par mi 'gyur ba dang / grags pa la 'jug pa ste/mchog tu gsang ba zhes bya ba'i ming can du grags pa zhes bya ba'i don to/ /gang rnams kyis mchog tu gsang ba yin zhe na/ rdo rje mkha' 'gro ma rnams kyis/ /zhes bya ba gsungs te/ 'di ni rdo rje mkha' 'gro ma ma lus pa rnams kyi mchog tu gsang ba'i rgyud ces bya ba'i bar du mchod pa'i don dang sbyar bar bya'o//mkha' 'gro ma zhes bya ba la/ /de ni nam mkha' la 'gro ba ste/ e ar byas nas d+ha gsum pa'i don du sbyar bas D+has nam mkha' la 'gro ba zhes bya ba'i don to/ /a ka a ga ni gya gyur 'gro ba'o/ /'dir thams cad du 'gro ba ni gya gyur 'gro ba'o//DAs gya gyur 'gro ba'i ngang tshul gang rnams la yod pa de dag ni nam mkha' la 'gro ba rnams te/ rdzu 'phrul gyis bye ba phrag brgya stong gi skus cig car thams cad du 'gro ba mi rnams zhes bya ba'i don to/ /de skad du yang / /de ni nam mkhar 'gro ma zhes/ /khams las 'dir ni rnam par brtag /nam mkha' kun du rgyu grub pas/ /mkha' 'gro ma zhes brdar btags so/ /zhes gsungs so/ /rdo rje'i sgra smos pa ni phyi rol gyi mkha' 'gro ma rnam par gcad pa'i don to/ /rdo rje yang yin la mkha' 'gro ma yang yin pas rdo rje mkha' 'gro ma rnams te/spros pa med pa'i ye shes las byung ba zhes bya ba'i don to/ /de rnams ji lta bu zhig yin zhe na/ /gsang ba'i dbang phyug ma zhes gsungs te/ 'dir rigs ldan ni gsang ba yin la/ de rnams de la 'byin pa dang yang dag par sdud par byed pas na dbang phyug ma'o//de la de bzhin gshegs pa'i rigs kyi dbang mo ni sangs rgyas mkha' 'gro ma'o/ /rdo rje'i rigs kyi ni rdo rje mkha' 'gro ma'o/ /nor bu'i rigs kyi ni rin chen mkha' 'gro ma'o/ /pad+ma'i rigs kyi ni pad+ma mkha' 'gro ma'o/ /las kyi rigs kyi dbang mo'i ni sna tshogs mkha' 'gro ma'o//de rnams kyi yang dbang mo ni sgyu 'phrul chen mo ste/ gang gi phyir 'di ni gsang ba las kyang shin tu gsang ba yin pa de'i phyir/ mchog tu gsang ba'o/ /de rjod par byed pa'i tshig la yang de skad ces bya ste/ rol snyed ma phrogs pa'i snyan ngag bzhin no/ / ming 'di nyid kyi don bstan par bzhed nas/ gang zhig ces bya ba la sogs pa gsungs te/ tshangs pa zhes bya ba la/ b+harma ni ta ste rgan po yin la/ ma na ni rkyen yin te/ yi ge rnam par bsgyur ba'i nges pa'i tshig tu byas pas tshangs par 'gyur te/ 'dir 'jig rten thams cad kyi bla mar gyur bas thams cad las rgan pas na tshangs pa ste/longs spyod rdzogs pa dang / sprul pa'i skus bsdus pa'i de bzhin gshegs pa rnams so/ /de rnams kyi sgo nga ni skye gnas te/ chos kyi sku zhes bya ba'i don to/ /yang na khyad par du gyur pa'i thar pa ni tshangs pa yin la//sku nyid kyi skye gnas yin pa'i phyir sgo nga yang yin pas tshangs sgong ste chos kyi sku'o/ /'dir sangs rgyas kyi zhing yongs su dag pa rnams kyi sems can gyi 'jig rten rnams ni rgyu ba'o/ /de rnams kyi snod kyi 'jig rten gang yin pa de ni 'dir mi rgyu ba'o//de rnams dang lhan cig 'jug pas na/ rgyu mi rgyu bcas tshangs sgo nga ste/ de dag la gang gis khyab pa zhes bya bar 'brel te/ ma lus zhes bya ba ni de bzhin gshegs pa thams cad kyis de dag kun la zhes bya ba'i don to/ /de ltar ji ltar tshangs pa'i sgo nga la des khyab ce na/gang gi phyir sangs rgyas thams cad kyi tshangs pa'i sgo nga ste/de'i rang bzhin yin pa'i phyir ro/ /ci'i phyir rgyu mi rgyu ba'i 'jig rten la des khyab pa ce na/ de las byung ba'i phyir ro/ /de nyid bstan pa'i phyir/ lha mo thams cad ces bya ba la sogs pa gsungs te/lha mo thams cad ni rigs lnga'i mkha' 'gro ma rnams so/ /tshangs pa la sogs pa ni de bzhin gshegs pa lnga rnams te/ rigs de dag mtha' yas pa de rnams skyed par byed pa ni rgyur gyur ba'i phyir ro/ /bdag nyid che zhes bya ba ni mthu che ba'o/ /de su zhig ce na sgyu 'phrul chen mo zhes bya ba gsungs te/sgyu 'phrul chen po'i sgras ni bcom ldan 'das rdo rje 'dzin pa mchog tu gsang ba'i sku bcom ldan 'das dpal he ru ka bstan to/ /dbang phyug che zhes bya ba la/ gang gi phyir tshangs pa la sogs pa 'byin par byed pas de dag ni dbang phyug yin la/de dag kyang 'dis 'byin par byed pas na 'di ni dbang phyug che'o/ /gang gi phyir dbang phyug chen mo yin pa de'i phyir/ de rnams kyis ni gsang chen 'di/ /zhes gsungs te/ de rnams zhes bya ba ni rdo rje mkha' 'gro ma rnams so/ /gsang chen ni mchog tu gsang ba'o/ / 'di zhes bya ba ni sgyu 'phrul chen mo'o/ /'de ltar rgya chen po la ltos nas phra ba'i rang bzhin ni gsang bar brjod do/ /de nyid kyi phyir rigs rnams las rigs kyi bdag po lnga ni gsang ba yin te rigs rnams de'i bdag nyid yin pa'i phyir ro/ /yang mkha' 'gro ma lnga ni gsang ba de las kyang gsang bar gyur pa'o//'di ltar rang rang gi rigs la khyab pa'i rigs kyi dbang po rnams ni gsal pa'i mtshan nyid de/ dngos po'i cha gtso bor byas pas na de dag ni rigs pa'o/ /mkha' 'gro ma rnams ni gsal ba de nyid kyis stong pa'i mtshan nyid de/ /dngos po med pa'i cha gtso bor byas nas de dag ni de bas phra pa'o//de bas na gsang ba las kyang shin tu gsang bar gyur pa rnams kyi yang gsang ba ni sgyu ma chen mo ste 'di ltar rigs so so'i chos nyid kyi mtshan nyid ni rgya che ba yin la/ /'di ni lnga char gyi chos nyid mnyam pa nyid thun mong ba ste/ des na 'di ni gsang ba de rnams kyi yang gsang chen no/ /de rjod par byed pa'i rgyud la yang gsang chen zhes brjod do/ /gsang chen zhes brjod mod/ /yang ci'i phyir sgyu 'phrul chen mo yin zhe na/ de'i phyir sgyu 'phrul chen mo zhes bya ba la sogs pa gsungs te/ gang gi phyir de ni drag mo chen po ste/mchog tu rnam par 'tshe ba'i phyir ro/ /gang las she na/ gang gi phyir/ 'byung ba yang dag sdud mdzad ma'o/ /ma rig pa las byung bas na 'byung ba ste/ sangs rgyas kyi byang chub la sgrib pa thams cad do/ /de yang dag par sdud pa ni de 'jig par mdzad pa de/de bcom pas na thar pa'i mchog tu gyur pa'o/ /'di snyam du rnam par 'tshe ba ni ma yin la/ i ar byas pas mar gyur te/ D+Sha rkyen du sbyar bas yang 'dren par byed de/ des na mA yA zhes bya bar dgongs so/ /rnam pa gzhan gsungs pa/ gang gis zhes bya ba dang / 'jig rten gsum zhes bya ba ni sangs rgyas kyis zhes yongs su dag pa'o//rgyu mi rgyur bcas zhes bya ba ni snga ma bzhin no/ /khyab pa zhes bya ba ni de las byung ba ste/ gang gi phyir rgyu mi rgyur bcas pa rnams chos kyi sku'i rgyu mthun pa yin pa'i phyir ro/ /'di snyam du nges par sprul pa ni sgyu ma ste/ ma'i mA la Na'i rkyen sbyar bas ya drangs pas mA yAr 'gyur bar dgongs so/ /rnam pa gzhan gsungs pa de nas de yis zhes bya ba la sogs pa la/ de nas zhes bya ba ni gzhan te rnam pa gzhan zhes bya ba'i don to/ /de yis zhes bya ba ni he ru ka'i gzugs can gyi sgyu 'phrul chen mos so//bsdus zhes bya ba dang / 'jig rten gsum po zhes bya ba ni dbang phyug chen po la sogs pa rnams gzigs pas bsgyel te thal bar mdzad pa'o/ /yang zhes bya ba phyi nas so/ /spro'o zhes bya ba ni de dag nyid kyis zhe sdang med par mdzad nas rgyal mtshan chen po'i dril bu'i sgra rnams kyis slar gso bar mdzad pa'o//des cir 'gyur zhe na/ gsang ba pa rnams zhes bya ba la sogs pa gsungs te/ phyi rol rdo rje rigs kyi lha rnams ni cung zad gsang bar gyur pas na gsang ba'o/ /de rnams kyis ma ni mar gyur pa ste/ de bas na 'di ni sgyu ma'i bdag nyid ces rnam grags zhes gsungs te/ sgyu ma'i sgrub pa ni sngar bshad pa bzhin du dgongs so/ /rnam par grags pa ni rab tu grags par gyur pa'o/ /de lta bur gyur pa'i bdag nyid can yin mod des sgrub pa po rnams la ci zhig byed ce na/ de'i phyir 'jig rten gsum sgrub ces bya ba la sogs pa gsungs te/bla na med pa'i ye shes kyi rang bzhin yin pas na rig pa ste/ sgyu ma'i bdag nyid du grags pa'i rim pas sgrub pa po rnams la 'jig rten gsum po sgrub pa'o/ /'dod pa thams cad ni bsam pa thams cad de/ rig 'dzin la sogs pa'o/ /ster pa ni de dag khyad par du ster bar byed pa ste/ tshigs su bcas pa phyed po 'di ni bstan pa'o/ /'di nyid kyis nye bar bstan pa ni/ gang zhig ces bya ba nas sgyu ma'i rig pa 'di zhes bya ba'i bar yin te/ gang zhig ces bya ba ni rig pa'o/ /rnam par shes pa tsam gyis zhes bya ba ni nyams su blangs pa tsam ste/sgrub po rnams la 'grub par 'gyur/ zhes bya ba dang 'brel te/ sgrub pa'i dbang phyug ces bya ba ni sgrub pa po rnams kyi dbang phyug ste rig pa nyid do/ /ci zhig 'grub par 'gyur zhe na/ lha dang zhes bya ba la sogs pa gsungs te/lha ni brgya byin la sogs pa'o/ /nor bdag ni yi dags rdzu 'phrul can no/ /dri za ni yul 'khor skyong la sogs pa'o/ /bcas pa ni de dag dang lhan cig tu 'jug pa'o/ /sgrub po zhes bya ba ni sgrub pa po'o/ /'grub par 'gyur zhes bya ba ni dbang du gyur pa'o//dbang du 'du zhes bya ba ni dbang du gyur pa nyid do/ /'byung po ni sems can rnams so/ /chu las skyes pa ni chu srin la sogs pa'o/ /thang las skyes pa ni stag la sogs pa'o/ /de ltar re zhig phyi rol gyi 'jig rten gsum po sgrub pa nges par bsten nas 'jig rten las 'das pa'i 'jig rten gsum po sgrub pa nges par bstan pa'i phyir chos rnams zhes bya ba la sogs pa gsungs te/'dir tshig rkang dang po gnyis kyis ni rgyu'i rgyud mdor bsdus nas bstan to/ /rang byung ye shes lnga par 'gyur/ /zhes bya ba ni 'bras bu'i rgyud do/ / tshig rkang pa gsum pa dang / lnga pa dang / drug pas ni thabs kyi rgyud bstan to/ /rang bzhin ni gnyug ma'i rang bzhin no/ /'od gsal ba ni snang zhing gsal ba ste/ shin tu dri ma med pa zhes bya ba'i don to/ /de ci zhig ce na/ chos rnams te/ rang bzhin mtshan nyid 'dzin pas na chos te/dngos po'i chos thams cad do/ /de yang 'di ltar dngos po thams cad sems tsam ste/ dper na rmi lam na khang khyim dang / skyed mos tshal dang / rdzing bu dang / rta dang / glang po dang mi la sogs pa'i gzugs su sems nyid snang ba ltar sems nyid dngos po de dang de'i rnam par snang ste/sems las byung ba ni sems las gud na med pa'i phyir ro/ /de skad du yang sa bcu pa las/ khams gsum pa 'di dag ni sems tsam mo zhes gsungs la/ 'phags pa lang kar gshegs pa las kyang / ji ltar byis pas rnam brtags pa'i/ / phyi rol don ni yod min pas/ /bag chags kyis ni dkrugs pa'i sems/ /don du snang ba rab tu skye/ /zhes gsungs te/ bag chags kyis dkrugs pa ni bag chags kyis brtson zhing bslad pa'o/ /chos thams cad sems tsam yin mod/ yang de rang bzhin gyis snang zhing 'od gsal pa'i phyir yin zhe na/gdod nas zhes bya ba la sogs pa gsungs te/ gdod nas ni thog ma med pa nyid nas so/ /thog ma med pa nyid nas sgrib pa thams cad kyi dri ma med pas na dag pa'o/ /sgrib pa rnams kyi bag chags med pas na rnyog pa med pa'o/ /cing zhes bya ba ni gang gi phyir zhes bya ba'i don to//gang gi phyir gdod ma nas dag pa'i phyir rang bzhin gyis snang la rnyog pa med pa'i phyir rang bzhin gyis 'od gsal pa'o/ /'o na dri ma rnams kyang yod la de'i bag chags rnams kyang yod bzhin du ci'i phyir dag pa dang rnyog pa med ce na/ de dag gi rang bzhin de ma yin pa'i phyir te/nam mkha' la rdul dang / du ba dang / khug rna la sogs pa bzhin du dri ma rnams de la glo bur ba yin pa'i phyir ro/ /de bas na chos rnams ni rang bzhin gyis 'od gsal ba'o/ /ci ste de ltar ma gyur na 'ga' yang byang chub thob par mi 'gyur te/ sems kyi rang bzhin dri mar gyur na sems yod pa de zad par 'gyur ba mi rigs pa'i phyir ro/ /de'i phyir rang bzhin kyis 'od gsal ba'i sems nyid byang chub kyi rgyu yin la/ byang chub kyi 'bras bu yin no/ /byang chub de yang bag chags dang bcas pa'i sgrib pa thams cad zad pas sems kyi rgyud shin tu rnam par dag pa yin la/de nyid ni chos kyi sku ste/ longs spyod rdzogs pa dang sprul pa'i skus bsdus pa'i chos rnams kyi gzhi dang gnas su gyur pas na sku'o/ /de la chos kyi sku nyid kyis ni sangs rgyas bcom ldan 'das rnams rang byung ba yin te/sgrib pa thams cad zad pas rang nyid 'ba' zhig tu gyur pa ste/ rang gi rang bzhin kho na snang ngo zhes bya ba'i don to/ /sku gsum gyis ni ye shes lnga por 'gyur te/ de la de dag gi ye shes lnga ni me long lta bu'i ye shes dang / mnyam pa nyid kyi ye shes dang / so sor rtog pa'i ye shes dang / bya ba grub pa'i ye shes dang / chos kyi dbyings shin tu rnam par dag pa'i ye shes so/ /de la me long lta bu'i ye shes ni me long dri ma med pa ltar dag cing mtha' med la rtag pa ste/ ye shes bar ma gsum gyi gnas su gyur pa dang / ye shes gzhan thams cad kyi gzugs brnyan 'char ba'i gnas yin la/gzugs brnyan gang zhig shar bas de bzhin gshegs pa rnams kyis rnam pa thams cad du chos thams cad gzigs par gyur pa'o/ /mnyam pa nyid kyi ye shes ni rtag tu byams pa chen po dang snying rje chen po dang mtshungs par ldan pas sems can thams cad bdag nyid khyad par med par mkhyen pa'o//so sor rtog pa'i ye shes ni shes bya thams cad la thogs pa med pa dang / ting nge 'dzin dang / gzungs thams cad kyi gnas su gyur pas 'khor gyi dkyil 'khor du bdag nyid kyi phun sum tshogs pa thams cad ston par mdzad cing /chos kyi char chen po 'bebs par mdzad pa'o/ /ye shes gang gis de bzhin gshegs pa rnams 'jig rten gyi khams mtha' yas pa thams cad du sku dang gsung dang thugs kyi sprul pa rnams kyis mtha' yas pa'i sems can rnams kyi don mdzad pa de ni de rnams kyi bya ba grub pa'i ye shes so//ye shes gang gis de bzhin gshegs pa rnams chos thams cad kyi de bzhin nyid shin tu rnam par dag pa la gzigs pa ste/ mtshan ma'i dri ma thams cad shin tu mi snang bas de tsam du gzigs pa ste/ de ni de rnams kyi chos kyi dbyings shin tu rnam par dag pa'i ye shes so//de la ye shes dang po gsum ni longs spyod rdzogs pa'i sku'o/ /bzhi pa ni sprul pa'i sku'o/ /lnga pa ni chos kyi sku'i phyogs gcig ste/ rang byung yang yin la ye shes lnga pa yang yin pas de la de skad ces bya ste/ de bzhin gshegs pa rnams zhes bya ba'i don to/ /de las zhes bya ba ni rang bzhin gyis 'od gsal ba'i rgyu de las so//thabs brjod pa zhes bya ba ni 'bras bur gyur pa de rnams la thabs gtso bor gyur par bstan pa ste/ 'di ltar rgyu yod du zin kyang thabs ma rtogs par 'bras bur 'gyur ba ma yin te/ rgyu ni thog ma med pa'i dus can yin pas thams cad thog ma nyid nas byang chub par thal bar 'gyur ba'i phyir ro//de bas na thabs gtso bor gyur par bstan to/ /de ci zhig ce na/ rnal 'byor ma rnams zhes bya ba la sogs pa gsungs te/ rnal 'byor ma rnams ni mkha' 'gro ma lnga'o/ /sbyor ba'i ma zhes bya ba ni sgyu 'phrul chen mo'o/ / khams gsum po ni ma lus kun/ /zhes bya ba ni khams gsum pa thams cad de/ de dag las yang dag par byung ba ni rigs kyi dbang po rnams dang rigs rnams so/ /ci'i phyir de dag khams gsum pa yin zhe na/ de dag de bzhin gshegs pa rnams kyi gsang ba gsum gyi rdo rje'i khams su 'dus pa'i phyir ro//de'i phyir de dag thabs yin zhe na/ byang chub kyi snod du gyur ba'i mtshan nyid rgyu phun sum tshogs pa yod pa la 'di rnams nyid bsgom pa dang bzlas pa 'khor dang bcas pas myur du byang chub thob par byed la de thob nas kyang de dag nyid longs spyod pa dang /sprul pa'i skus bsdus pa rnams kyis gzhan rnams snod ji lta ba bzhin du byang chub rnam pa gsum thob par byed pa'i phyir ro/ /ma lus lus pa med pa zhes bya ba la/ ma lus pa ni rnal 'byor ma la sogs pa phung po gsum po de dag las phung po gcig kyang dor ba med pa'o/ / lus la med pa ni phung po gcig gis yang lha gcig kyang dor ba med pa ste/ ma lus pa yang de yin la lus pa med pa yang de yin pas de dag la de skad ces bya'o/ /grub cing zhes bya ba ni gang zhig rnam par shes pa tsam gyis sgrub pa po rnams la lam dang 'bras bu rang bzhin gyis rdzogs par gyur pa'o//ci'i phyir 'grub ce na/ sgyu mas kun la rnam par rol pa'i phyir te/ lam dang 'bras bu la sogs pa'i gnas skabs 'di dag thams cad sgyu 'phrul chen mo kho na la rag las pa'i phyir ro/ /'jig rten gsum bsgrub ces gang sngar bstan pa de'i nye bar bstan pa mdzad nas/'dod pa thams cad rab ster ba/ /zhes bya ba gang sngar bstan pa de nye bar bstan pa'i phyir/ sangs rgyas thams cad ces bya ba la sogs pa gsungs te/ sangs rgyas thams cad ni sangs rgyas rnams so/ /'phrog pa zhes bya ba ni bdag gam bdag gi don gyi phyir dgug pa'o/ /lha mchog ni lha'i gtso bo rnams te/brgya byin la sogs pa'o/ /spyod ces bya ba ni bkug nas nye bar spyod pa'o/ /rnal 'byor ni ting nge 'dzin no/ /de'i dbang phyug ni snyoms par 'jug pa dang ldang ba dag la dbang thob pa'o/ /mig 'phrul ni yod pa dang med pa'i dmag la sogs pa ji ltar rigs par sprul te ston pa dang /mi snang bar yang byed pa'o/ /rmongs pa ni brgyal ba'i gnas skabs su gyur pa'o/ /rengs pa ni mi g.yo bar byas pa'o/ /bskrad pa ni gnas nas g.yo ba'o/ /bsad pa ni dkon mchog gsum la sogs pa la shin tu gnod par byed pa rnams gzhom pa'o//sogs pa'i sgras ni yan lag nyams pa dang / rims dang / srin pos bzung ba la sogs pa bsdu'o/ /dbang ni dbang du gyur pa ste/ 'di dbang du byed pa'i las la dbang zhes bya'o/ dgug pa ni rnam pa gnyis te/ rkang pas dgug pa dang / gong bur dgag pa'o//dang po ni sa las 'ong ba'o/ /gnyis pa ni nam mkha' las 'ong pa'o/ /las rnams ni dbang dang dgug pa'i las gsum mo/ /gzhan gyi grong na gzhan gyi lus la 'jug pa'o/ sogs pa'i sgras ni gong du 'pho ba la sogs pa gzung ngo / /bya ba ni gzhan gyi grong la sogs pa la de dag nyams su blang ba'o//mi snang ba ni mi mthong par bya ba'o/ /zhe 'gras pa ni phan tshun chags pa dang ldan pa dag kyang sdang bar bya ba'o/ /rmugs pa ni lkugs pa'o/ /sa 'og 'gro ba ni lha ma yin gyi sgor 'jug pa'o/ /rig 'dzin 'khor los sgyur ba zhes bya ba la/ rig 'dzin rnams tshar bcad pa dang rjes su gzung ba'i nus pa can de ni 'khor los sgyur ba ste de'i dngos ni de nyid do/ /'chi ba med pa dang / rgas pa med pa dang / na ba med pa gsum ni go sla ste/ na ba med pa nyid dang zhes dang gi don shes par bya ste/ rmongs pa la sogs pa de dag thams cad rnal 'byor ma sgyu ma'i rigs 'di yis bya'o zhes bya ba ni lhag ma'o//sgyu ma zhes bya ba ni sgyu 'phrul chen mo ste de nyid ni rig pa'i/ /sangs rgyas kyi chos thams cad ro gcig tu sbyor bas rnal 'byor te/ rnal 'byor yang yin la sgyu ma'i rig pa yang yin pas na de skad ces bya'o/ /de ltar sangs rgyas thams cad las 'phrog pa la sogs pa'i las kyi sbyor ba kha cig ni rgyud 'di nyid las brjod pa yin la/kha cig ni rgyud gzhan gyi rjes su 'brangs te blta bar bya'o/ /gang zhig rnam par shes pa tsam gyis zhes bya ba ni nyams su blangs pa tsam mo zhes bya ba la nyams su blang ba de bstan pa'i phyir/sngags kyi zhes bya ba la sogs pa gsungs te/ sngags ni sngags kyi tshogs so/ /yi ge'i gzugs ni yi ge las skyes pa'i gzugs te/ sngags dang yi ge'i gzugs de dag gi zhes bya ba'i don to/ /rnal 'byor pa ni sgrub po rnams so/ /rnam par rol pa ni las la sogs pa grub pa'i rnam pa rtse pa'o//sngags ji ltar nyams su blang zhe na/ bklag pa dang ni bsam pa dang / /zhes gsungs te/ bklag pa ni ngag gi bzlas pa'o/ /bsam pa ni yid kyi bzlas pa'o/ /yi ge'i gzugs nyid ji ltar nyams su blang zhe na/ bsgom pa zhes bya ba la sogs pa gsungs te/bsgoms pa ni yid kyis rnam pa rgyun chags su 'jug pas lta ba'o/ /ting 'dzin zhes bya ba ni dmigs pa de nyid la sems gnas pa'o/ /bklags pa zhes bya ba la sogs pas ni ji ltar nyams su blangs pa'i 'bras bu ston pa yin te/ bklags pa zhes bya ba ni bzlas brjod do//rig pa ni sgyu 'phrul chen mo'o/ /byed pa zhes bya ba ni dgug pa la sogs pa'i las thams cad byed pa'o/ /rig pa'i sgra gnyis pas ni bsgoms pa las byung ba'i shes rab ston to/ /de yang sku'i bsgom pa rdzogs pa ste/ rang gi lha'i gzugs kyis rnam par bdag nyid gsal bar blta'o//dngos grub byed pa ni des sgrub pa po phyag rgya chen por sgrub pa'o/ /gang zhes bya ba ni las rnams kyang sgrub par byed pa ste/ phyag rgya chen po'i dngos grub ni rang gi lha'i gzugs su rdzogs par byas la rang ngam gzhan gyis mthong bar 'gyur ba'o/ /bde blag tu nyams su blang ba bstan pa'i phyir/brtul zhugs med ces bya ba la sogs pa gsungs te/ 'dir med ces bya ba'i sgras ni byed pa zhes bya ba snga ma dang sbyar te bya ba ma yin no zhes bya ba'i don to/ /brtul zhugs ni khrus gsum dang / gos gsum brje ba la sogs pa'o/ /dka' thub ni sngo tshod dang /sred za ba la sogs pa'o/ /dka' spyod ni bsten par dka' ba ste 'di ni bstan pa'o/ /'di'i nye bar bstan pa ni/ smyung ba dang / sdom pa med pa'o/ /de la smyung ba ni dus ma yin par mi za ba'o/ /sdom pa ni 'dod chags sdom par gyur cing khyim la yin na yang tshangs par spyod pa'o//rnam par shes pa lnga dang lhan cig skyes pa'i tshor ba sim pa ni bde ba'o/ /yid kyi rnam par shes pa dang lhan cig skyes pa'i sim pa ni dga' ba ste/ des sgrub pa po rnams la sgrub par 'gyur ba'o/ /bsgoms pa las byung ba ni mkha' 'gro ma chen mo dang / de'i gzugs bsgom pa'i phyi rol gyi bud med ni shes rab bo//thabs ni de la nye bar bgrod pa ste/ bdag nyid dpal he ru ka'i gzugs su bsgoms pas nye bar spyod pa'o/ /sogs pa'i sgras mchod pa rnam pa lnga dang / 'dod pa'i yon tan lnga rnams kyang gzung ngo / /de rnams kyis rtag tu ste thun mtshams rnams su'o//shes rab dang thabs kyis re zhig ji ltar na dga' ba dang bde bar 'gyur zhe na/ lte ba'i dbus gnas zhes bya ba la sogs pa gsungs te/ lte ba ni pad+ma'i lte ba'o/ /de'i dbus su gnas pa de su zhig ce na/ dpa' bo zhes bya ba la sogs pa gsungs te/ rgyun mi 'chad par brtson pa dang ldan pas na dpa' bo ste rdo rje sems dpa'o/ /de 'dir snod gang na gnas she na/ kar+Ni ka zhes bya ba la sogs pa gsungs te/ lte ba'i pad+ma'i kar+Ni ka la'o/ /gsang ba'i spyod yul na gsang zhing sba bar bya ba'i phyir spyod yul te/ nyi ma dang zla ba kha sbyar ba'i spyod snod ces bya ba'i don to//'di tsam gyis ni de gnas pa'i snod bstan nas rang bzhin bstan pa'i phyir/ sems dang zhes bya ba la sogs pa gsungs te/ sems ni rnam par shes pa'o/ /tshig gcig la yang nges par gzung bar snang ste dper na chu tsam 'thung ba la zas su chu 'thung zhes bya ba dang /rlung tsam za ba la zas su rlung za zhes bya ba lta bu'o/ /de bzhin du 'dir yang rnam par shes pa las ma gtogs pa'i gzung ba med pas sems kyi sgras sna tshogs 'di dag sems tsam mo zhes nges par gzung ngo / /sems de yang sems med pa'o//ci'i phyir sems she na/ gzung ba med pa'i phyir ro/ /ci'i phyir sems med pa zhe na/ gzung ba med pas 'dzin pa yang med pa'i phyir ro/ /gang gi phyir 'jig rten na don 'dzin pa ni rnam par shes par grags la/ rnam par shes pa nyid ni sems yin pas sems kyang de yin la sems med pa yang de yin pas na sems med pa'o//gal te 'dzin pa'i mtshan nyid kyis sems dang bral bas/ de sems med pa yin na sems gang gi mtshan nyid dang ldan pas de la sems zhes ci'i phyir bya zhe na/ sems kyi gzugs zhes bya ba gsungs te/ gsal ba'i phyir sems kyi gzugs te/ sems dang / snang ba dang / myong ba dang / yongs su gsal ba dang / lkog tu gyur pa ma yin pa zhes bya ba'i bar du ste/ rang bzhin 'di la yod pas na sems kyi gzugs te/ sems kyi gzugs kyi mtshan nyid de dang ldan pas sems zhes bya'o//'o na rnam par shes pa thams cad de lta bu nyid yin bzhin du dpa' bo la yang khyad par gyi rang bzhin ci zhig yod ce na/ ye shes zhes bya ba la sogs pa gsungs te/ rang ni gnyug ma'o/ /bzhin ni de'i ngo bo ste de'i rang bzhin no/ /'dis shes par byed pas na ye shes yin la shes par bya bas na shes bya'o//ye shes dang shes bya ni zlas dbye ba ste/ ye shes bya ba'i rang bzhin 'di la yod pas na ye shes zhes bya ba'i rang bzhin gzhag go/ /de la so so'i skye bo rnams kyi ni rang bzhin ma yin pa yang shes byar 'gyur te/ gzung ba dang 'dzin pa dag de dag gis brtags pa'i phyir te/gzung ba dang 'dzin pa'i rnam pa dngos por med bzhin du de rnams la snang ba'i phyir ro/ /gang yang med pa dang / dngos po ma yin pa de ni rnam par shes pa'i gnyug ma'i rang bzhin ma yin no/ /'o na ci zhig ce na/ 'khrul pas sgro btags pa ste/'khrul pas mtshan mar gzung ba'i phyir 'khrul pa'i mtshan ma'o zhes brjod do/ /gang dag gi rang bzhin ma yin pa'i shes byar gyur pa de rnams kyi ye shes kyang rang bzhin ma yin par 'gyur te 'di dag 'khrul pa'o/ /'di ltar 'khrul pa'i dbang gis med pa dang dngos po ma yin pa yang snang ste/de'i phyir 'khrul pa de yang de dag gi shes pa ma yin te/ snang ba'i rgyur gyur pa'i phyir ro/ /'khrul pa de ni blo yis bslad pa yin gyi blo'i gnyug ma'i rang bzhin ni ma yin te/ dri ma rnams glo bur ba yin pa'i phyir ro/ /de'i phyir rang bzhin ma yin pa yang de rnams kyi shes pa yin no//don dam pa'i byang chub kyi sems ni spros pa med pa'i ye shes kyi bdag nyid de/ spros pa ni 'khrul ba'o/ /de bas na de la spros pa thams cad med pas rang bzhin nyid de'i ye shes yin gyi 'khrul pa ni ma yin te/ spros pa'i mtshan ma thams cad de la mi snang zhing nub pa'i phyir ro//rang bzhin nyid de'i shes bya yin gyi med pa dang dngos po ma yin pa yang ni ma yin no/ /tshigs su bcad pa byed po des ni dpa' bo'i don dam pa'i byang chub sems kyi spros pa med pa'i ye shes kyi ngo bo'i rang bzhin dngos su bstan nas bde ba chen po'i ngo bo ni shugs kyis ston pa ste/spros pa med pa'i ye shes dang bde ba chen po ni lhan cig skyes pa yin pa'i phyir ro/ /de skad du rnam par mi rtog pa la 'jug pa'i gzungs las/ dam chos 'di la rgyal sras rnams/ /mi rtog bsam pas brtan gnas na/ /rim gyis rgal dka' rtog pa las//'das nas rnam par mi rtog rnyed/ /rab zhi mi g.yo rnam pa ste/ /dbang bsgyur mi mnyam mnyam pa yin/ /rnam par mi rtog bde ba ni/ /byang chub sems dpa' de las thob/ /ces gsungs te/ dam chos 'di la zhes bya ba ni theg pa chen po'o/ /rgyal sras zhes bya ba ni byang chub sems dpa' rnams so//brtan gnas zhes bya ba ni mi g.yo bar gnas pa'o/ /rnam rtog 'di ni rgal dka' ba ste/ rnam par rtog pa rnam pa bzhi'o/ /rim bzhin 'das pa ni de las 'das pa'o/ /mi rtog rnyed pa ni rnam par mi rtog cing spros pa med pa'i ye shes thob par 'gyur ba ste//de'i phyir rnam par mi rtog pa'i ye shes de nyid kyi bde ba thob par 'gyur ro/ /'dir nyon mongs pa med pas na rab tu zhi ba'o/ /nyams pa med pas ni mi g.yo ba'o/ /'jig rten dang 'jig rten las 'das pa'i bde ba thams cad las 'phags pas na dam pa'o//ji ltar 'dod pa dang ji snyed 'dod pa mngon du byed pa'i phyir dbang bsgyur ba'o/ /de las gzhan pa'i bde ba dang rigs mtshungs pas na mnyam pa'o/ /khyad par bzhi po de dag gis khyad par du 'phags pas na mi mnyam pa yang yin no/ /de lta bur gyur pa'i dpa' bo de ni bdag gis bshad par bya'o zhes bya'o//theg pa gang la grags she na/ sangs rgyas bstan pa zhes bya ba gsungs te/ theg pa gang gis sangs rgyas su 'gyur ba'i bstan pa ni sangs rgyas bstan pa ste/ theg pa chen po zhes bya ba'i don to/ /'o na sngar tshigs su bcad pa phyed kyis de bstan zin bzhin du yang bshad pas ci zhig brjod ce na/de'i phyir zab mo zhes bya ba gsungs te/ theg pa chen po las gsang sngags kyi theg pa ni zab mo ste gang gi phyir pha rol tu phyin pa'i tshul las gsang sngags kyi tshul byang chub kyi sems kyi phyag rgya'i rnam pa 'khor dang bcas pas myur ba kho nar byang chub bsgrub pa'i phyir bsgom par bya ste/mtshan nyid mi mthun pa'i phyir ro/ /de yang da dung ma gsungs te/ de bas na bshad par bya zhes gsungs so/ /de nyid A li kA li zhes bya ba la sogs pa gsungs pa ste/ de la zhes bya ba ni nyi ma dang zla ba kha sbyar ba la'o//nges par sbyar zhes bya ba ni nges par bcing ba'i phyir sbyar ba'o/ /ci zhig ce na/ ri mo ste dpa' bo de nyid las zla ba'i dbus kyi bu ga shin tu phra ba las byung ba dbyer med la gcad du med pa pad+ma'i rtsa ba'i snal ma lta bu'i 'od phra mo'i skud pa lta bu'o/ /ji ltar sbyar zhe na/ A li kA li mnyam byas zhes bya ba gsungs te/A li kA li dag mnyam pa gang la yod pa de la de skad ces bya'o/ /de la de skad ji lta bu zhe na/ mu tig gi phreng ba brgyus pa lta bur sbyar nas so/ /ji ltar mnyam par bya zhe na/ gang gi phyir kA li phyed mar bgos te dum bu gnyis su bgos pa kA li'i sgras bshad la de yang nga dang nya spangs te bcu drug pa gnyis su bya'o//de bas na de dag mnyam por gyur pa'i 'od kyi ri mos kha sbyar ba'i rim pa gsum du bskor bas dkri bar bya ste/ yi ge rnams klog pa'i rim pa bzhin du zla ba'i steng du brgyud de dgod do/ /de la phreng ba dbus ma la ni A li rnams so//tha ma gnyis su ni kA li phyed phyed do/ /de skad du/ bzang po'i yi ge'i phreng ba rnams/ /zhes 'og nas bstan par 'gyur la/ dpal bde mchog bla ma las kyang / yi ge ka nas ha yi bar/ /nga nya spangs nas dgod par bya/ /d+ha nas k+Sha yi bar thug par/ /phreng ba gnyis ni mnyam por bri//a la sogs par dbus gnas par/ /zla ba'i dkyil 'khor la dgod bya/ /zhes gsungs so/ /ri mo'i steng du zhes bya ba la sogs pa la/ 'od kyi ri mo gzhan shes rab kyi 'dod chags kyi me 'bar ba gang gi tshe dpa' bo la gyen du ldang ba de'i tshe de'i 'og tu 'bab par byed par 'gyur ro//'di 'dzag pa ni 'bab pa'i sgras bstan te/ rgyun 'dzag pa zhes bya ba'i don to/ /ci ste 'bab par byed pa des ci zhig 'dzag par 'gyur zhe na/ bdud rtsi zhes bya ba gsungs te/ thar pa yin pa'i phyir dang / zad pa med pa'i phyir bdud rtsi ste/ bde ba chen po'o//ji lta bu zhe na/ thigs pa'i gzugs zhes bya ba gsungs te/ bde ba chen po'i kha dog dkar po'i thig le'i gzugs kyis dpa' bo zhes bya ba'i don to/ /ji ltar 'dzag par 'gyur zhe na/ khu ba'i tshul gyis zhas bya ba gsungs te/ rnam par dag pa'i ye shes kyi ro bsil zhing bde ba zhu ba'i rang bzhin can yin pas na/khu ba dang chos mthun pa'i phyir khu ba'i sgras bstan te/ tshul des 'bab cing 'dzag pa ste/ de nyid 'dzag par 'gyur ro zhes bya ba'i don to/ /A li kA li zhes bya ba la sogs pa de dag gi ni der dpa' bo de legs par gnas pa bstan la/ ri mo steng du zhes bya ba la sogs pas ni de'i las bstan cing khu ba'i tshul gyis zhes bya ba la sogs pas ni rang bzhin gyis khyad par bstan to/ /thigs pa'i gzugs zhes bya bas ni de'i phyag rgya'i rnam pa bstan to/ /yang de ji ltar na phyag rgya'i rnam par 'gyur zhe na/ 'dir brjod par bya ste/gang zla ba ltar dkar ba'i thig le phra mo de ni sems te/ nang na gsal ba'i phyir ro/ /gang yang de tsam la sems gnas pa de ni sems tsam ste/ de las ma gtogs pa'i don gzhan mi dmigs pa'i phyir ro/ /gang yang de'i gzung ba med pas 'dzin pa med pa de ni de'i sems med pa ste/de'i phyir 'di ni stong pa'i gzugs can no/ /gang yang de'i gsal zhing bde ni sems kyi gzugs so/ /gang yang de tsam la sems gnas pas spros pa thams cad kyi mtshan ma nub pa de ni de'i ye shes zhes bya ba'i rang bzhin bdag go/ /rdo rje sems pa'i ye shes kyi phyag rgya shin tu phra ba'i rnam pa de/dpal gsang ba 'dus pa las kyang / nam mkha'i dbyings kyi dbus gnas par/ /zla ba'i dkyil 'khor bsgom par bya/ /sangs rgyas gzugs su rnam bsgoms nas/ /phra mo'i rnal 'byor bsgom par bya/ /sna yi rtse mor yungs kar bsam//'gro dang mi 'gro yungs kar la/ /gsang ba'i ye shes kyis brtags pa'i/ /ye shes gnas ni nyams dga' bsgom/ /zhes gsungs la/ dpal rdo rje bdud rtsi 'byung ba'i rgyud las kyang / phra mo'i rnal 'byor 'di bzhi dang ldan par gsungs te/rig par mi g.yo gnas nas ni/ /bdud rtsi'i bsam gtan bsam par bya/ /bdud rtsi thigs pa'i gzugs kyis ni/ /de nyid mchog gi bsam gtan bya/ /nam mkha'i dbus su zla 'dra ba'i/ /stong pa'i de nyid zhes byar brjod/ /zad med nyams med phra ba ste//rdo rje sems dpa' mi shigs pa'o/ /ge sar gsang ba'i spyod yul la/ /lte ba'i dbus gnas bzhugs pa'i lha/ /b+ha ga ling ga'i dbus gnas nas/ /khu ba'i gzugs kyis 'dzag par 'gyur/ /zhes so/ /de bas na ji ltar bklags pa'i rim pa bzhin du 'di'i rnal 'byor dang las dag bya'o//gang yang kha cig gi rgyud 'dir gnas bzhir 'khor lo bzhi bsgoms pas gtum mo sbar bas rang gi 'khor lo bzhi po bsro ba dang / de las byung ste spros nas sangs rgyas thams cad kyis 'khor lo bzhi rnams bsros te zhu ba las byung ba slar 'ong ste bde ba chen po'i 'khor lo la zhugs nas yi ge haM las bdud rtsi 'dzag par gzhan dag tu bstan pa de thams cad btus nas 'dir sbyor bar byed pa de ni rigs pa ma yin te/de dag ston pa'i tshig med pa'i phyir ro/ /rgyud thams cad ni mngon par rtogs pa sna tshogs yin pa dang / rgyud 'dir ni mngon par rtogs pa shin tu mdor bsdus pa yin pa'i yang phyir ro//gang gang zhes bya ba la sogs pas ni bya ba gzhan gsungs te/ dbang po ni mig la sogs pa'o/ /lam ni yul nyid do/ /skye bar 'gyur zhes bya ba ni thob pa ste/ dngos po gang dag mthong ba dang thos pa dang / bsnams pa dang /myang ba dang / reg pa dang / ci yang rung ba dang de dag thams cad sangs rgyas kyi rang bzhin te/ de dag ma lus pa so sor sangs rgyas kyi rang bzhin du nges par bya'o/ /ji ltar sangs rgyas kyi rang bzhin zhe na/ ngo bo nyid kyis te/ rang bzhin dang bcos ma ma yin pa zhes bya ba'i bar du ste/'di ltar thog ma dang tha ma med pa'i chos kyi dbyings ni chos thams cad kyi rang bzhin te/ chos kyi dbyings de nyid ni sangs rgyas thams cad kyi rang bzhin gyi mchog ste/ rang bzhin des 'gro ba rnams sangs rgyas thams cad kyi ngo bo yin no/ /rang bzhin 'ba' zhig gis kyang ma yin te/mchog tu gzhag pa'i rnal 'byor gyis kyang yin te/ ma smos mod kyi kyang gi sgra blta bar bya'o/ /mchog ces bya ba ni 'jig rten las 'das pa'i ye shes spros pa med pa dpa' bo zhes bya bar grags pa'o/ /des gzhag pa ni bskyed cing sprul pa ste/ dpa' bo'i rgyud mthun par 'gyur bar bya'o zhes bya ba'i don to//de'i rnal 'byor ni lhag par mos pa ste/ mig la sogs pa la gzugs la sogs pa 'di dag dpa' bo nyid kyi rgyu mthun pa yin no zhes lhag par mos par bya'o zhes bya ba'i don to/ /dam tshig chen po zhes bya ba la sogs pas ni yang bya ba gzhan gsungs te/dam tshig ni dkyil 'khor gyi lha rnams so/ /de dang bcas pa'i dkyil 'khor gyi bdag po ni dam tshig chen po'o/ /de'i dngos grub ni bskyed pa'o/ /ni zhes bya ba'i sgra ni tshig kha bskang ba'o/ /dngos grub de ni ril bu chen pos sgrub pa ste/ ril bu ni ye shes kyi thig le ste/thig le bzhi bskor ba'o/ /dbus kyi thig le ni ril bu chen po ste/ thig le bzhi bskor bskyed pa'o/ /dkyil 'khor gyi dngos grub des ci zhig bya zhe na/ sgyu 'phrul chen mo zhes bya ba la sogs pa gsungs te/ dkyil 'khor gyi bdag po dpal he ru ka ni sgyu 'phrul chen mo yin la/de'i rig pa sangs rgyas mkha' 'gro ma yang sgyu 'phrul chen mo ste/ de dag rang bzhin gcig pa'i phyir ro/ /de'i rab tu sbyor ba ni kun du 'khyud pa dang tsu m+ba na la sogs pa ste/ de'i sbyor ba dang sdom pa nyams su blang bar bya ste/ de la lte ba'i pad+ma'i ka Ni kar nyi ma dang zla ba sbyar ba'i dbus su thig le phra mo dkar po gnas pa ni sbyor ba'o//sdom pa ni bde mchog ste so sor dbugs dang rnam par bcad pa'i mthar bde ba chen po'i las bya ba ste/ ri mo'i steng du 'bar ba'i mthar/ /zhes bya ba la sogs pa'i tshigs su bcad pas gang sngar gsungs pa'o/ /ci 'di 'ba' zhig bya'am zhe na/mchod pa lnga dang zhes bya ba la sogs pa gsungs te/ bcu po 'di dag lhan cig ces bya ba'i don to/ /ye shes kyi thig le ste/ mkha' 'gro ma'i pad+ma'i nang du babs pa'i thig le de las me tog la sogs pa'i rnam pa bcu'i sprin gyis so sor khyab par rim gyis spro bar bya ste/me tog dang / bdug pa dang / mar me dang / dri dang / lha bshos rnams kyi pe nye bar spyad par bya bas na mchod pa lnga'o/ /ma thob pa rnams 'dod cing don du gnyer bar bya ba yin pas na 'dod pa'o/ /thob pa rnams yang dang yang du goms par bya zhing spyad par bya bas na yon tan te/'dod pa yang de yin la yon tan lnga yang de yin pas na 'dod pa'i yon tan te/ gya nom pa'i gzugs dang / sgra dang / dri dang / ro dang / reg bya rnams so/ /de la sdom pas ni gsang ba'i mchod pa dang / de kho na nyid kyi mchod pa bstan la lhag mas ni phyi'i mchod pa bstan to//des lha rnams mnyes par byas pa'i dbus su gsungs pa/ sgrub pa'i dbang po zhes bya ba la sogs pa la/ shes bya ba zhes bya ba ni nges par bya ba'o/ /rtag pa zhes bya ba ni phyag rgya chen po'i dngos grub ste nyams pa med pa dang / shin tu zad pa med pa'i phyir te/de thob par 'gyur ro zhes bya ba ni lhag ma'o/ /de ltar mdor bsdus pa'i phan yon dang bcas pa'i bsgom pa bstan nas/ da ni bsgom pa dang thun mong ba'i phan yon dang bcas pa'i bzlas pa bstan pa'i phyir/ gang zhig ces bya ba la sogs pa gsungs te/shes pa zhes bya ba ni rig pa'o/ /dngos grub kyis zhes bya ba ni nyams su blangs pas so/ /lha zhes bya ba ni lha rnams so/ /de rnams kyi gnas ni yul lo/ /lha mo zhes bya ba ni/ sangs rgyas mkha' 'gro ma la bod pa'o/ /ci 'di bden pa kho na yin zhe na/ bden par zhes bya ba la sogs pa gsungs te/ bden pa kho nas smra'i nam yang brdzun pa ma yin no zhes nges par gzung ba'i don to/ /'o na ye shes de'i lha de lha ni gang zhig yin/ nus pa ni ci 'dra/ rang bzhin ni gang zhig yin no/ /khyod la zhes bya ba la sogs pa gsungs te/ khyod la ngas bshad par bya zhes bya ba'o/ /'og nas byung ba dang 'brel to/ /de la lha ni gang zhig yin zhes bya ba'i lan ni sgyu 'phrul chen mo khyod dang nga zhes bya ba yin te rig pa zhes bya ba'i don to/ /mthu ri ni ci 'dra zhes bya ba'i lan ni/ 'jig rten gsum 'grub ces bya ba gsungs so//rang bzhin ni gang zhig yin zhes bya ba'i lan ni/ sgyu 'phrul chen mo rnams kyi ni bzang po zhes bya ba yin te/ bzang po zhes bya ba ni 'dir rol cing rtse bas na bzang po ste/ nyi ma dang zla ba kha sbyar ba'i b+ha ga zhes bya ba'i don to/ /de yang rnal 'byor ma rnams kyi mnyam pa nyid de/de nyid ni rnal 'byor pa rnams kyi rol pa'i gnas so/ /yi ge'i phreng ba rnams zhes bya ba ni dbyangs dang gsal byed kyi phreng ba rnam pa gsum ste/ des dkri'o zhes bya ba ni lhag ma'o/ /de'i dbus su gyur pa ni dpa' bo ste dpal he ru ka yin la/ kha sbyor de ni sangs rgyas mkha' 'gro ma yin no//gang zhig ces bya ba ni dpa' bos byin gyis brlabs pa ste/ dbyangs dang gsal byed kyi phreng ba gsum gyis brgyan pa'i nyi ma dang zla ba kha sbyar ba na gnas pa'o/ /bsam pa tsam gyis zhes bya ba ni bzlas pa tsam gyis te/ bzlas pa ji ltar bya ba ni nges par bstan pa gnyis pa las 'chad par 'gyur ro//rgyu dang mi rgyu zhes bya ba ni phyi rol gyi 'jig rten gsum mo/ /'grub ces bya ba ni dbang du 'gyur ba'o/ /ji ltar 'dod bzhin zhes bya ba ni ji ltar 'dod pa bzhin du'o/ /brten byas nas zhes bya ba ni rnal 'byor ma'o/ /su yis she na/ rdo rje rnal 'byor ma rnams kyis so//rnal 'byor bdag nyid ces bya ba ni sngags kyi lha rnams so/ /ston par byed ces bya ba ni des mthong bar byed pa'o/ /dngos grub chen mo ster bar 'gyur/ /zhes bya ba ni ral gri dang / mig sman la sogs pa'i dngos grub chen po rnam pa brgyad ster ba'o//de bzhin gshegs pa zhes bya ba la de bzhin nyid rtogs pas na de bzhin gshegs pa ste/ sangs rgyas dang byang chub sems dpa' rnams so/ /de rnams kyi dpal ni phun sum tshogs pa'o/ /sems can don byed pa zhes bya ba ni rnal 'byor pa de nyid kyis so//chang zhes bya ba ni dgug pa zhes bya bar sbyar ro/ /tshe zhes bya ba ni tsho ba'o/ /brtson 'grus ni spro ba'o/ /gzi brjid ni mthu'o/ /lha'i mig ni mig gi rnam par shes pa'o/ /rdzu 'phrul ni rdzu 'phrul gyis mngon par shes pa'o/ /zla ba 'thung ba ni bdud rtsi 'thung ba'o//nyin re zhes bya ba ni nyin gcig bzhin du 'thung ba ste/ thob par 'gyur ro zhes bya ba ni tshigs su bcad pa rangs pa'i lhag ma'o/ /tshe ring zhes bstan pa de nyid kyi nye bar bstan pa ni/ /de'i tshe ni zhes bya ba la sogs pa yin te/ de'i zhes bya ba ni rnal 'byor pa'i'o//'phel zhes bya ba ni ring du nur pa'o/ /'gyur zhes bya ba ni thob pa'o/ /bskal ba chen po'i bar du gnas pa gang la yod pa de la de skad ces bya'o/ /cho 'phrul zhes bya ba la sogs pa la/ 'dis sems can rnams kyi yid so sor 'phrog par byed pas na cho 'phrul lo//de yang rnam pa gsum ste/ rdzu 'phrul gyi cho 'phrul dang / kun brjod pa'i cho 'phrul dang / rjes su bstan pa'i cho 'phrul te/ go rims bzhin du rdzu 'phrul gyi mngon par shes pa dang / gzhan gyi sems shes pa'i mngon par shes pa dang / zag pa zad pa'i mngon par shes pa ste de dag yin no//de dag byed ces bya ba ni rnal 'byor pa'o/ /blta bas mi ngoms pa'i lus zhes bya ba ni mthong bas tshim pa med pa'i lus te/ ston par byed ces bya ba dang 'brel to/ /rang gi gzugs ni bdag nyid kyi lus so/ /yongs su brjes zhes bya ba ni gzhan gyi gzugs yongs su 'dzin pa'o//yid la bsams ma thag tu zhes bya ba ni yid la brjod ma thag tu ste/ bdag gzugs 'dir bya'o snyam pa'i rjes la'o/ /phan yon gyi sgo nas nye bar bsdu ba bstan pa'i phyir/ bklags pas zhes bya ba la sogs pa gsungs te/bklags pas 'grub pa zhes bya ba ni da ltar klog bzhin pa ste/ bzlas pa tsam gyis 'grub pa zhes bya ba'i don to/ /don yod pa zhes bya ba ni mthu dang ldan pa ste/ grub par gyur na nges par ji skad du gsungs pa'i 'bras bu ster bar byed pas na don yod pa'o/ /rig pa zhes bya kye rig pa zhes bod pa'o//khyod ces bya ba ni khyod dang mnyam pa'i rig pa gzhan la med pa'o/ /'jig rten gsum po zhes bya ba ni de bzhin gshegs pa dang / rdo rje dang pad+ma'i rigs rnams su'o/ /lung zhes bya ba ni sgrub thabs so/ /mdzes ma zhes bya ba ni bod pa'o/ /rnal 'byor ma'i dbang phyug ni thabs kyi chas so//rig ma chen mo'i zhes bya ba ni shes rab kyi cha yis so/ /de dag ci zhig ce na/ sgyu 'phrul chen mo'o/ /dngos grub ni de nyams su blangs pa'o/ /mtshan ma ni rtags te mthu rnam pa du ma'o/ /de'i don nges par bstan pa ni bshad pa'o/ /dpal sgyu 'phrul chen mo'i 'grel pa yon tan ldan pa zhes bya ba las nges par bstan pa dang po'o// //de nas de las rnal 'byor ma'i dbang phyug chen mo rnams kyi yi ge bzang po zhes bya ba yi ge bcu gnyis ni rkang pa gcig pa'i tshigs su bcad pa'o/ /de nas de las zhes bya ba la sogs pa la/ de nas zhes bya ba ni bzlas pa yongs su rdzogs par byas pa'i skabs kyi don to/ /de las zhes bya ba ni lha'i sku bsgoms pa'i rjes thogs la'o/ /rnal 'byor dbang phyug chen mo rnams kyi zhes bya ba ni bzang po zhes bya ba dang sbyar te/ bzang po zhes bya ba ni dpa' bo dang bcas pa'i dpa' bo'i smod de/lte ba'i pad+ma'i kar+Ni ka la bsam mo zhes pa ni lhag ma'o/ /'dir ci zhig bzlas par bya zhe na/ gsang ba'i zhes bya ba la sogs pa gsungs pa la/ sba bar bya bas na gsang ba ste mngon du mi 'byung ba'o/ /yang na 'dis lha'i de kho na nyid bsdus pas na gsang ba ste/ gsang ba yang de yin la yi ge yang de yin pas de la de skad ces bya'o//sbyor ba zhes bya ba ni lha'i ting nge 'dzin to/ /dngos grub ni de rdzogs pa'o/ /'bras bu ni rdzogs pa de'i rgyu mthun pa ste/ phyag rgya chen po'i dngos grub po/ /rab tu ster ba ni de nyid kyi khyad par du ster ba ste/ sbyor ba'i dngos grub kyi 'bras bu rab tu ster ba'o//bsam pa tsam gyis zhes bya ba ni sbyor ba 'di'i dngos grub ma gtogs par bzlas pa tsam gyis kyang don du gnyer ba'i mchog ste rig 'dzin la sogs pa'i mchog ste ster ba'o/ /kha sbyor gyi dbus su gsang ba'i yi ge bltas la de'i mgo bor dpa' bo gzhag ste bzlas pa bya'o zhes dgongs so//ji ltar bzlas par bya zhe na/ dang po'i yi ge zhes bya ba la sogs pa gsungs te/ dang po'i yi ge ni rab sngags te/ sngags phal cher gyi dang por mthong ba'i phyir ro/ /de'i sbyor ba ni dal bar brjod pa'o/ /dbugs btang ba ni srog steng du 'gro ba'o//bya zhes bya ba ni rnal 'byor pa'i zhes bya ba dang 'brel to/ /brgyad pa'i mtha' zhes bya ba ni yi ge ha'o/ /u dang zhes bya ba la sogs pa la/ ji ltar ha'i 'og tu U sbyar la ha'i mgor ni thig le dang bcas par bya ba ste bsdus pas hUM zhes bya bar 'gyur ro/ /ji lta bu'i dbugs gtong bar rngub pa yin zhe na/dngos dang dngos med du spangs pa/ /zhes bya ba gsungs te/ go rims bzhin du zhes bya ba ni lhag ma'o/ /de la oM gyi don ni ye shes tsam ste/ dpal gsang ba 'dus pa las/ oM ni ye shes snying po ste/ /zhes gsungs pa'i phyir ro/ /hUM gi don ni sku dang gsung dang thugs snang ba med pa nyid kyis mnyam pa nyid de/hUM ni sku gsung thugs rdo rje/ /gsum po mi phyed mnyam thob pa/ /zhes gsungs pa'i phyir ro/ /de bas na oM gyis sna tshogs 'di dag sems tsam nyid du bstan pa la bltas pas ni dngos po rnam par spangs pa'o/ / sna tshogs 'di dag sems tsam po da nyid dngos po med pa ste/ sems las ma gtogs pa'i dngos po med pa'i phyir sna tshogs pa'i sems tsam po de nyid kyang snang ba med pas mnyam pa nyid du 'jug par hUM gis ston par byed de/ /de la bltas pas ni dngos po med pa rnam par spangs pa'o/ /'o na 'dir sems tsam dang mnyam pa nyid la 'jug pa ji ltar lta zhe na/'dir man ngag ni rab sngags brjod nas dpa' bo las dbugs gtong ba ni lhan cig tu ye shes kyi 'od zer steng du rgyu bar bltas la/ de spros pas sna tshogs sangs rgyas kyi rang bzhin du byas te/ sa bon gyi yi ge brjod nas sna tshogs sangs rgyas su byas pa de dag rang gi lha'i rnam par bsgom pa ni sems tsam du blta ba'o//de nas hUM brjod pas dbugs 'jug pas na sna tshogs dpa' bo la bsdu ba ni mnyam pa nyid du 'jug pa la blta'o/ /de dag gnyi ga yang dal bus yang dang yang du ji srid dal par ma gyur gyi bar du bya ste/'dir na rgyud 'dir bzlas pa'o/ /'di tshegs med par nyams su blangs pa gsungs pa/ de la zhes bya ba la sogs pa la/ de la zhes bya ba ni bzlas pa la'o/ /brtul zhugs zhes bya ba ni mi smra ba dang / khrus dang / slong mo la sogs pa'i nges pa med pa'o/ /phreng ba sngags dang bzung ba zhes bya ba ni srog gi rlung gi'o/ /ldog par 'gyur zhes bya ba ni rgyud gzhan dag las 'byung ba 'dir mi drang zhing bzlog par bya ba'i don to/ /gzhan dang gzhan dag ces bya ba las kyang gi don la blta bar bya ste/de las gzhan pa'i las thams cad kyang bzlog par bya'o zhes bya ba'i don to/ /'o na bzlas pa ni brjod pa yin la 'dir bzlas pa 'ba' zhig brjod par bya ba yin nam/ 'on te sku dang ye shes kyang bsgom par bya zhe na/ de'i phyir sngags dang zhes bya ba la sogs pa gsungs te/de kho na nyid la dmigs pa'i ting nge 'dzin ni rnal 'byor ro/ /rnal 'byor de yang rnam pa gsum ste/ bye brag gsum mo/ /gang las she na/ gang gi phyir sngags dang / dbyibs dang / chos kyi bdag nyid kyis so/ /de la de kho na nyid gsal bar byed pa'i ngag ni sngags so//lha'i sku ni dbyibs so/ /sngags kyi don gyi ye shes ni chos so/ /ye shes rnam pa gsum gyis ni zhes bya ba ni bstan ma thag pa'i rnal 'byor rnam pa gsum gyis yin gyi brjod pa tsam gyis ni ma yin no/ /srid pa'i nyes pas goms mi 'gyur/ /zhes bya ba la/ srid pa'i nyes pa ste sdig pa la sogs pa rnams las grol bar 'gyur ro zhes bya ba'i don to/ /de ltar zhes bya ba ni rnal 'byor gsum mo/ /rgyun du zhes bya ba ni nyin re zhing ngo / /rtag tu zhes bya ba ni thun mtshams so so la'o/ /rdo rje sems dpa' zhes bya ba ni dpal he ru ka'o/ /mtshungs pa ni de dang mnyam pa'o//'ang gi sgras ni rdo rje mkha' 'gro ma rnams dang yang mnyam pa'o/ /de zhes bya ba ni rnal 'byor ma'o/ /'grub 'gyur zhes bya ba ni rdzogs par 'gyur ba ste/ de la 'dir he ru ka'am mkha' 'gro ma rnams kyi skur de'i nga rgyal gyis bsgoms la/ rab sngags dang hUM gi dbus su rtsa ba'i sngags bcug ste rim gyis dal bus brjod de sngags kyi don nyi ma dang zla ba kha sbyar ba'i nang du chud pa'i rig pa'i yi ge'i thig le la dpa' bo'i thig le gzhag ste/de las byung ba'i 'od kyis dngos po thams cad sangs rgyas kyi rang bzhin du byas nas de rnams kyis rang gi lha'i sku'i rnam par byas te/dpa' bo'i thig le las yang dag par bsdu bas sngags kyi don rig par bya'o/ /de ltar sngags dang / dbyibs dang / chos kyi rnal 'byor gyis zla ba drug tu bzlas pa byas na 'dra ba'i dngos grub thob par 'gyur ro/ /thob kyang rung ma thob kyang rung ste rig pa'i yi ge dang yang dag par rab tu ldan pas las rnams ji lta ba bzhin du yang dag par bsgrub par bya ste/de bas na rig pa'i yi ge dang de'i rab tu sbyor ba yang dag par bstan par bya ba'i phyir/ dbang po'i mdog ces bya ba la sogs pa gsungs te/ dbang po'i sgras ni lham bu chu gsher bstan to//dang po'i yi ge'i ni rab sngags so/ /de bsgoms pa ni gang gis dbug par bya ba'i don du rab tu sbyor ro/ /rig pa zhes bya ba ni rig pa dang ldan pa'i rnal 'byor pa'o/ /des zhes bya ba ni rnal 'byor pas so/ /'di zhes bya ba ni bsgrub bya'o//mod la zhes bya ba'i nye bar bstan pa ni myur du zhes bya'o/ /de dag gis 'di skad du sangs rgyas mkha' 'gro ma la sogs pa'i rnal 'byor gur gum gyi mdog lta bu byas la/ dpa' bo'i snod du gur gum gyi mdog lta bu'i rab sngags bsams te/ de'i thig ler dpa' bo bkod la rab sngags kyis dpa' bo yang dmar por bsgyur nas dpa' bo la sogs pa ri mo gnyis phyung nas 'od gcig gi rtse mor zhags pa dang gnyis pa'i rtse mor ni lcags kyu bsams te zhags pas bsgrub bya'i mgul pa bcings la lcags kyus snying gar phug ste/myur du 'gugs par bsams la skad cig gis khugs par 'gyur ro zhes bstan par bya'o//yi ge gnyis pa zhes bya ba ni dbyangs kyi yi ge gnyis pa ste A'o/ /de dang ldan pa ni de'i mgo bor gzhag pa'i dpa' bo'o/ /des bsam pa ni rang gi lha'i rnal 'byor pas bsgrub bya'i rdul phra rab rnams mdog dmar por bsgyur ba'o//rnam par bsgom pa zhes bya ba ni bsgrub bya rnam pa du ma ste gang 'dod pa'o/ /de dag thams cad ces bya ba ni bsgrub bya'o/ /sa gsum zhes bya ba la sogs pa la/ 'dir yang dang yang zhes bya ba'i don blta bar bya ste/ 'jig rten gsum po ma lus pa yang dam du 'gyur na/srog chags brgya dang stong lta smos kyang ci dgos zhes bya ba'i don to/ /'di dag gis kyang 'di skad du lha drug gi nang nas gang yang rung ba'i rnal 'byor dza ba'i ku su ma ltar dmar ba byas la/ yi ge A dza ba'i ku su ma ltar dmar ba kha sbyor du bkod de/ de'i mgo bor dpa' bo bkod la de nyid kyis mdog bsgyur te/de nyid kyi 'od zer gyis bsgrub bya'i rdul phra rab rnams btsos la rkang pa'i drung du 'gyel bar bsgoms te dbang du gyur par bsams na des na thams cad dbang du 'gyur ro zhes bstan pa yin no/ /tshangs pa zhes bya ba la sogs pa la/ 'dod dbang phyug ces bya ba ni bdud do//mi zad pas na yi ge ste thugs rdo rje'o/ /de'i gsang ba'i yi ge'i yang yi ge'o/ /gzhung kha cig las ni ye shes yi ge zhes 'byung ste/ ye shes ni dpa' bo ste de'i yi ge'o/ /gnyis ka ltar na yang yi ge hUM la bya'o/ /de yang dgug pa la ni dza ba'i ku sum ltar dmar ba'o//des bskul ba ni sbad cing gtong ba'o/ /ji ltar bskul bar bya zhe na/ dgug pa'i cho ga dang po'i sbyor bas so/ /gzhan dag ni hUM gis dbugs nang du gzhug pas dgug go zhes zer ro/ /kha cig na re rgyud 'di la dpa' bo las byung ba'i 'od glang po che'i sna lta bus dgug pa'i sbyor ba bya'o zhes zer ro//gong bur dgug pa'i mchog gsungs pa/ yi ge a dang zhes bya ba la sogs pa gsungs te/ a dang yi ge ni zlas dbye ba'o/ /de dag dang yang dag par ldan pa ni a'am yi ge hUM dang yang dag par ldan pa'i sgrub pa po zhes bya ba'i don to/ rnam pa gsum pa dang sbyor ba ni sbyor ba rnam pa gsum mo/ /sku gsung thugs la legs gnas pa/ /zhes bya ba ni bsgrub par bya ba'i lus dang / mgrin pa dang / snying ga dag tu gnas pa'o/ /des kyang 'di skad du lha drug gi nang nas dza ba'i ku su ma lta bu gang yang rung ba'i rnal 'byor byas la/kha sbyor gyi nang du A'am yi ge hUM gi mgo dang thig ler dpa' bo bkod la yaM las bskyed pa'i rlung gi dkyil 'khor la bsgrub bya bskyon te/ dpa' bo'i 'od zer gyi ri mo dmar po gnyis kyis rtse mo'i zhags pa dang lcags kyu dag gi go rims bzhin du mgrin pa bcings pa dang /snying ga phug ste bar snang las myur du 'gugs par bsams na skad cig gis khugs par 'gyur ro zhes bstan pa yin no/ /yi ge khe zhes bya ba la sogs pa la/ de dag gis kyang 'di skad du yi ge khe las sku mdog dkar po zhal bzhi la phyag na thod pa bsnams pa chags pa'i bdag nyid de sems chags pa dang ldan par bsgoms la/khe'i mgo bor bkod pa'i dpa' bo las 'od zer sbu gu'i gzugs can bsgrub bya'i gsang bar zhugs te khu bas bkang nas thod par drangs par bsams na skad cig gis khu ba khugs par 'gyur ro zhes ston to/ /yi ge tsi zhes bya ba la sogs pa la/yi ge tsi thung ngu las mdog ser po 'od zer ser po dang ldan pa rta'i zhal can bsams la/ yi ge tsa'i mgo bor gnas pa'i dpa' bo'i 'od glang po che'i sna lta bus chang snod chang gis bkang nas drangs te snod gang bar bsams na skad cig gis gang bar 'gyur ro zhes ston to//yi ge ra zhes bya ba la sogs pas kyang yi ge ra las mdog dmar po phyag bzhi la ce spyang gi zhal bzhi dang ldan pa gzi brjid che zhing khro ba'i bdag nyid can du bsgoms la/ snga ma bzhin du 'od zer srin po pad+ma'i gzugs lta bur spros pas bsgrub bya'i lus las khrag 'dren bzhin par bsgoms na snga ma bzhin du 'gyur ro//de ltar rig pa'i yi ge drug gi skabs su rang gi lha'i rnal 'byor gyi yan lag drug la dgod pa yang bstan pa'i phyir/ yi ge drug dang zhes bya ba la sogs pa gsungs te/ yi ge drug dang bstan ma thag pa'i rig pa'i yi ge drug go//de dang yang dag ldan zhes bya ba ni nges sbyar bya zhes bya ba dang sbyar te/ rang gi lha'i lus la zhes bya ba ni lhag ma'o/ /gang du ldan pa yin zhe na/ gnas drug tu zhes bya ba gsungs te/ yan lag drug tu zhes bya ba'i don to/ /de lta bus ni rdo rje rnal 'byor ma rnams 'grub par 'gyur gyi gzhan du ni ma yin no//de la rdo rje ni dpal he ru ka'o/ /rnal 'byor ma ni mkha' 'gro ma lnga rnams so/ /yang na rnal 'byor ni dpal he ru ka'o/ /mkha' 'gro ma'i bde mchog ni rnal 'byor ma de rnams dang lhan cig tu spyod pa las byung ba'i bde ba'i mchog dang ldan pas so//gnas drug po bstan pa de nye bar bstan pa'i phyir mig gnyis zhes bya ba la sogs pa gsungs te/ yid ces bya ba ni snying ga'o/ /dang gi sgras ni lce dang lus kyang gzung ngo / /rnal 'byor rnam pa gzhan gsungs pa/ seng ge zhes bya ba la sogs pa la/seng ge ni dpa' bo'o/ /de'i rnam par rol pa gang la yod pa de la de skad ces bya'o/ /phyag rgya ni nyi ma dang zla ba kha sbyar bar bya'o/ /bcing bar bya ba ni yi ge'i phreng ba gsum gyis sngar bstan pa bzhin du bcings par bsam pa'o/ /rnal 'byor pas zhes bya ba ni lha mo bzhis yongs su bskor ba'i dpal he ru ka'i rnal 'byor la gnas pa'o//srog dang rtsol ba ni dbugs dbyung ba dang 'jug pa'o/ /bsdams nas su zhes bya ba ni rim gyis shin tu phra bar byas pas shin tu gnas par 'gyur ro/ /bsgoms na zhes bya ba ni zla ba'i bu ga nas dpa' bo de nyid la blta bzhin pas bsgom pa'o//skad cig de la 'bar zhes bya ba ni dpa' bo la sems brtan pa las ye shes kyi me lce ldang zhing 'bar ba ste snang bar byed do zhes bya ba'i don to/ /ji skad du slebs par 'bar zhes bya/ 'og min zhes bya ba la sogs pa gsungs te sa 'og dang /sa steng dang / bar snang dang / bsam gtan dang po dang / gnyis pa dang / gsum pa dang / bzhi pa rnams yang dag par bsdus pas ni 'jig rten bdun no/ /bsam gtan gsum po ni so sor re re yin la/ bsam gtan bzhi pa la gnas gzhan brgyad pa ni 'og min te/de nyid kyi phyir gsungs pa'i 'og min gnas kyi mthar thug pa zhes so/ /de la rgyu ba ni sems can no/ /gzhal med khang la sogs pa'i gnas ni mi rgyu ba'o/ /da ni dpa' bo de sems can thams cad kyi snang bzhin du mthong bar bstan par bzhed nas/ thams cad kyi ni zhes bya ba la sogs pa gsungs te/thams cad kyi ni sems zhes pa ste sems can thams cad do/ /de bsgoms nas zhes bya ba ni 'dris par byas pa ste/ rang gi sems nyid de dang de dag tu snang ba'i phyir ro/ /de ni rtogs pa ma yin no zhes bya ba ni de kho na nyid mthong ba ma yin te/byis pa rnams la de'i yang dag pa ma yin pa'i ngo bo snang ba'i phyir ro/ /'gro ba'i rol pa zhes bya ba ni sna tshogs su rol pa ste/ de dang de'i rnam pa gnyis su brtag pa'i phyir ro/ /rnam par 'jig ces bya ba ni gal te kun gyis rtog na ni 'gro ba'i rol pa dang po nyid nas zhig par 'gyur na da ltar gyi bar du de ltar ni ma yin no//gang gi phyir de lta bu yin pa'i phyir ye shes 'di gsang zhing zhes bya ba gsungs te/ ye shes ni gnyis su med pa'i de kho na nyid dpa' bo zhes bya ba'o/ /gsang ba zhes bya ba ni byis pa rnams la sbas pa'o//gang gis she na/ yang dag pa yin pa'i ngo bo ma mthong ba'i 'khrul pa rnams kyis so/ /ye shes de ci 'dra zhe na/ mi gsal yi ge med pa zhes gsungs te/ ngag gi yul las 'das pa'i phyir na mi gsal ba'o/ /yid kyis brjod pa'i yul ma yin pa'i phyir yi ge med pa'o//'o na de'i don dam pa de sus shes na/ sangs rgyas zhes bya ba la sogs pa gsungs te/ hi zhes bya ba ni rim pa bzhin du sbyar bas nges par gzung ba'i don te/ de bzhin gshegs pa nyid kyis zhes bya ba'i don to/ /'o na de bzhin gshegs pa rnams kyis kyang rang bzhin de phyis gzigs na ni gzhan gyis kyang de mthong bar 'gyur la/ci ste rdo rje rnal 'byor gyi kha na las pa yin na yang rnal 'byor des gzhan dag gis kyang de mthong bar 'gyur ro zhe na/ de'i phyir rnal 'byor zhes bya ba la sogs pa gsungs te/ gcig kho nar g.yo ba med pa'i phyir gnyid dang chos mthun pas na gnyid do//'di ni rnal 'byor yang yin la gnyid kyang yin pas rnal 'byor gnyid do/ /yang dag par ldan pa ni mnga'o/ /de nyid nye bar bstan pa ni/ gong bur zhes bya ba la sogs pa yin te/ gzugs zhes bya ba ni chos thams cad kyi rang bzhin no/ /gcig ces bya ba ni snang ba med cing gsal ba tsam du ro gcig pa'o//gong bu zhes bya ba ni de dag nyid shin tu bsdus pa ste/ yungs kar ltar phra ba'i thig le tsam gyi gong bur phra mor byas pa'o/ /de dag gis ni dpa' bo'i phyag rgya gzugs su bsgrub pa bstan to/ /der song ba'i yid ces bya ba ni gong bu de la sems gnas pa'o//de dag gis rnal 'byor gyi gnyid kyi don bstan to/ /rnam pa de lta bu'i rnal 'byor rdzogs par byed pa'i dam tshig bstan pa'i phyir/ sgo dgu las zhes bya ba la sogs pa gsungs te/ rnam bsgoms la zhes bya ba ni lhag par mos par zhes bya ba'i don to/ / gang zhig la lhag par mos par bya zhe na/ sgo dgu las byung ba'i rdzas la'o/ /ci zhig tu mos she na/ bdag nyid ces bya ba gsungs te/ rtag pa dang mi bskyod pa dang / rin chen dbang dang / 'jig rten dbang dang / gdon mi za ba'i rang bzhin gyi sangs rgyas rnams kyi bdag nyid du'o//rang bzhin med pa zhes bya ba ni gzung ba dang 'dzin par mi snang bas so/ /blo ldan pa zhes bya ba ni gsal ba tsam la gnas pa'i blo can no/ /rnam par mi rtog pa zhes bya ba ni dogs pa med pas so/ /bza' zhes bya ba ni rnam par rtog pa bza' ba'i phyir spyad pa'o/ /mthe bong zhes bya ba la sogs pa la/sgo ru yid bzhin nor bu zhes bya ba ni mthe bong dang srin lag gi rtse mo yid bzhin gyi nor bu gyur pa zhes bya ba'i don to/ /de bas na de nyid kyis des bza'o zhes bya bar dgongs so/ /nam zhe na/ bdud rtsi zhes bya ba la sogs pa gsungs te/ gang gi tshe 'og nas byung ba'i chogs de dag thams cad bdud rtsir byas pa de'i tshe zhes bya ba'i don to//des cir 'gyur zhe na/ rtag pa'i dngos grub ces bya ba la sogs pa gsungs so/ /rnal 'byor ma'i rig pa chen mo zhes bya ba ni bshad zin to/ /de'i sbyor ba ni nyi ma dang zla ba kha sbyar ba'i thig le'i rnal 'byor ro//de seng ge rnam par rol pa la sogs pa'i bye brag gang dag gis nges par byed pa de ni gtan la phab ste bstan pa ni brjod pa'o/ /dpal sgyu 'phrul chen mo'i 'grel pa yon tan ldan pa las nges par bstan pa gnyis pa'o// //de nas zhes bya ba la sogs pa la/rdzas gzhan zhes bya ba ni bstan ma thag pa'i rdzas dgu las gzhan pa'o/ /tshogs zhes bya ba ni tshogs las tha mi dad pa'i phyir so so re re zhing yang tshogs kyi sgras bstan to/ /thams cad mkhyen pa nyid 'bras bu yin pas na thams cad mkhyen pa'i 'bras bu'o//gang zhig ces bya ba ni rdzas kyi tshogs rnams so/ /'byung po'i ma ni rdo rje mkha' 'gro ma rnams so/ /chen por yang dag ldan pa ni yon tan che bas brgyan pa ste/ sha chen po'o/ /de bzhin zhes bya ba ni yang dag par bsdu ba'o/ /lhan cig ma yin zhes bya ba ni so sor ro/ / bsgos zhes bya ba ni byug pa ste/ sha lnga po so so zhing bdud rtsi lnga lngas bsgo ba'o/ /dus ji snyed cig tu zhu zhe na/ nyi ma bdun du zhes bya ba gsungs te/ mar ngo'i nyi shu gsum nas nyi shu dgu'i bar du'o/ /sbyar byas nas zhes bya ba ni de ltar byas pa'i 'og tu sbyar nas so/ /ce spyang gi dbus su gzhag la zhes bya ba ni 'byung po'i mtshan mo ce spyang gi yan lag mchog tu gzhag pa'o//de la zhes bya ba ni de ltar bsgos pa dang gzhag pa'i rdzas las so/ /yungs kar gyi 'bras bu'i tshad tsam zhes bya ba ni yungs kar gyi tshad tsam mo/ /ci las byas she na/ lnga po dag ces bya ba gsungs te/sha lnga po dag las so/ /rgyud 'dir gsungs kyi zhes bya ba la/ tshad ni nye bar mtshon pa ste cho ga yang gzung bar bya'o/ /de bas na tshad la sogs pa 'dir rdzogs pa gsungs so/ /kun tu sbas zhes bya ba ni rgyud gzhan du thams cad rdzogs par gsungs pa'o/ / ci'i phyir zhe na/ 'bras bu chen po zhes bya ba la sogs pa gsungs te/ rtogs nas zhes bya ba ni 'bras bu chen por shes par bya ste/ phung po lnga po ye shes lngas bsgos shing ce spyang gi yan lag mchog kha sbyor gyi snod du gnas pa'i dpa' bo dang mnyam par rtogs pas so/ /de nas zhes bya ba la sogs pa la/de nas zhes bya ba ni de'i 'og tu'o/ /rgyud 'dir sgrub pa'i thabs 'byung ba zhes bya ba ni/ sgrub pa'i thabs kyi lam gang gis bcom ldan 'das dkyil 'khor dang bcas pa sgrub cing mnyes par byed par gyur pa'i skabs zhes bya ba'i don to/ /pad+ma bsam bya ba zhes bya ba ni byang chub kyi sems snang ba med par bsgoms pas 'gro ba rnams nam mkha' ltar mnyam pa nyid du byas te/rdo rje'i rang bzhin gyi sa gzhi bsams nas phyogs mtshams rnams su 'jigs par byed pa'i dur khrod brgyad bltas la/ de'i dbus su khang bu brtsegs pa'i nang du chud pa'i pad+ma 'dab ma brgyad pa'am bzhi pa bsam pa'o//kha dog dmar po kun 'od ces bya ba ni mdog dmar zhing 'od dmar po dang bcas pa'o/ /yid kyis zhes bya ba ni dpa' bor grags pa ste/ shin tu rnam par dag pa'i yid kyi thig le pad+ma'i kar+Ni kar gnas pa las phyogs bzhi'i 'dab ma rnams su yang spros pas mtshan pa'o//lha mo bzhi dang yang dag ldan/ /zhes bya ba ni shar phyogs la sogs pa'i 'dab ma rnams kyi thig le rnams las go rims bzhin du rdo rje dang / nor bu dang / pad+ma dang / las kyi rigs kyi dbang po mtha' yas pa'i rigs dang bcas par so sor mtha' yas pa'i phyogs su spros te de dag bsdus pa las byung ba'i rdo rje dang /rin po che dang / pad+ma dang / sna tshogs mkha' 'gro ma rnams 'dab ma de rnams kyi gdan la bkod pa'o/ /sangs rgyas gzugs kyis nyer brgyan pa/ /zhes bya ba la sogs pa la/sangs rgyas ni rdo rje 'dzin pa'o/ /gzugs ni dpal he ru ka'i sku ste/ de dkyil 'khor gyi bdag por gyur pas nye bar brgyan pa'o/ /de yang lha mo de rnams kyis rtsa ba'i yid kyis thig le la 'og nas 'byung ba'i glus bskul bar gyur pas sa bon gnyis kyi rnam par gyur pa la de las rigs lnga'i dbang po de'i rigs rnams phyogs mtshams rnams su khyab par spros te/de rnams yang dag par bsdus pa'i sa bon gnyis po yongs su gyur pa las sangs rgyas mkha' 'gro mas yongs su 'khyud pa'i dpal he ru kas nye bar brgyan pa'o/ /sangs rgyas kyi gzugs ci 'dra ba zhig gis she na/shar du zhes bya ba la sogs pa gsungs te/ zhal bzhi zhes bya ba ni phyogs bzhir bstan pa'i zhal bzhi'o/ /phyag bzhi dang spyan gsum ni go sla'o/ /zhal gang gi mdog gang yin pa bstan pa'i phyir/ shar du zhes bya ba la sogs pa gsungs te/shar phyogs kyi zhal ni ut+pal sngon po'i mdog go/ /lho phyogs kyi zhal ni ser po'o/ /nub phyogs kyi zhal ni dkar zhing dmar ba'o/ /byang phyogs kyi zhal ni ljang gu ste/ rtsa ba'i zhal gyi mdog gang yin pa de nyid sku mdog kyang yin no zhes bya ba ni rab tu grags pa nyid do/ / 'bar ba'i phreng bas 'khrigs pa zhes bya ba la/ 'jig pa'i dus kyi me lce'i phreng ba lta bu'i 'od kyis kun du 'khrigs pa gang la yod pa de la de skad ces bya'o/ /phyag g.yon na zhes bya ba la sogs pa ni lha mo rnams kyi mtshan ma gsungs pa ste/ 'di'i phyag g.yon na kha TAM ga dang dril bu yod pas na phyag g.yon na kha T+wAM ga dang dril bu'o//de bzhin du rdo rje dang thod pa rnams zhes bya ba la/ rdo rje dang thod pa dag 'di'i phyag g.yas na mnga' bas na de skad ces bya'o/ /shar phyogs zhes bya ba ni shar phyogs kyi 'dab ma'i'o/ /lha mo zhes bya ba ni byang phyogs la sogs pa'i bar du yang sbyar bar bya'o//'dir dang por dpal rdo rje mkha' 'gro ma nas bzung ste/ byang phyogs kyi bar du go rims bzhin du rin chen mkha' 'gro ma dang / pad+ma mkha' 'gro ma dang / sna tshogs mkha' 'gro ma rnams yin no/ /lho phyogs zhes bya ba la sogs pa la/ mdung rtse gsum dang /rin po che dang / ba dan dang / ce spyang rnams 'di'i phyag na mnga' bas de skad ces bya'o/ /nub phyogs zhes bya ba la sogs pas kyang gzhu dang / mda' dang / sna tshogs pad+ma dang / thod pa can bstan to/ /byang phyogs zhes bya ba la sogs pa'i don kyang ral gri dang /zhags pa dang / rnge'u chung dang / thod pa rnams 'di'i phyag na mnga' bas na de skad ces bya'o/ /de dag kyang / 'bar ba'i phreng bas 'khrigs pa dang / /zhal bzhi phyag bzhi spyan gsum mdzes/ /zhes bya bar sbyar te/ gtso bo dang rjes su mthun pa'i 'khor yin pa'i phyir ro//de nyid kyi phyir de dag gi mdog bcom ldan 'das kyi zhal gyi rjes su 'brel par bya ste/ shar phyogs kyi ni sngon mo'o/ /lho phyogs kyi ni ser mo'o/ /nub phyogs kyi ni dkar zhing dmar po'o/ /byang phyogs kyi ni sngo bsangs ma yin la zhal gyi mdog kyang de bzhin no//'on kyang rtsa ba'i zhal ni sku mdog dang mthun pa yin la/ bcom ldan 'das kyi zhal gyi gnas su ni zhal sngon po dgod par bya'o/ /bcom ldan 'das kyis gnas dang mtshan ma gsungs pa/ sku zhes bya ba la sogs pa gsungs pa/ sku gsung thugs kyi rdo rje ni dpal he ru ka ste de bsam pa'o//de'i zhes bya ba ni pad+ma dmar po'o/ /dbus su zhes bya ba ni kar+Ni ka la'o/ /thod pa zhes bya ba la sogs pa la/ de'i phyag tu zhes bya ba ni lhag ma'o/ /dpal he ru ka ji lta ba bzhin du sangs rgyas mkha' 'gro ma yang de bzhin te/ /'on kyang sku mdog dmar zhing de dang zhal sbyor ba phyag gnyis kyis mgrin pa nas 'khyud pa'o//dam tshig ma gtogs par dngos grub 'grub par mi 'gyur bas dam tshig slar bshad pa'i phyir/ dang po'i sngags dang zhes bya ba la sogs pa gsungs te/ dang po sngags ni rab sngags so/ /de dang yang dag ldan ni rdzas 'bar bar 'gyur zhes bya ba dang 'brel to//bsgoms nas zhes bya ba ni man ngag ste/ ji lta ba bzhin du bsgoms par gyur na'o/ /rdzas zhes bya ba ni dam tshig gi rdzas so/ /bsgrub na zhes bya ba ni bskyed pa'o/ /ji lta bur bskyed ce na/ dngos grub 'bras bu ster zhes bya ba gsungs so/ /de skad du yang dpal gsang ba 'dus pa las kyang /sngags rnams kun gyi yi ge oM/ /bsgoms na skad cig de la 'bar/ /zhes gsungs so/ /'bar ba'i phan yon gsungs pa/ rnal 'byor zhes bya ba la sogs pa la/ rnal 'byor ni rnal 'byor pa ste/ 'dis 'byor pa dang rnal 'byor ma grub par gyur pa dag yod do zhes skye bo rnams kyi yid ches pa 'jug par 'gyur te/'bar bas mthu dang ldan pa'i dpe ston par byed do zhes bya ba'i don to/ /mi snang ba la sogs pa'i dngos grub kyi mthu gsungs pa thams cad kyis ni zhes bya ba la sogs pa la/ stong phrag gcig tu snang bar 'gyur//zhes bya ba ni gling bzhi pa stong gi 'jig rten gyi khams ni stong phrag gcig go/ /de gcig tu snang ba ni bdag por gyur ba dang / gzhan gyi don byed par gyur pa'o/ /grub pa kun las zhes bya ba ni rig pa 'dzin pa la sogs pa la ste bu mo zhes bya ba dang 'brel to/ /rdo rje'i gnas zhes bya ba ni sangs rgyas de dag nyid kyi ste sangs rgyas rnams kyi zhing ngo //yang dag gnas zhes bya ba ni de dag nyid kyi 'khor ro/ /bcas pa ni rdo rje'i gnas de dang / yang dag gnas de dag dang lhan cig tu'o/ /rdo rje'i mig ni rdo rje'i spyan gyis te/ lha'i mig gi mngon par shes pas zhes bya ba'i don to//lag tu zhes bya ba la sogs pa ni rang gi lag mthil du bzhag pa'i skyu ru ra gcig ji lta ba bzhin du zhes bya ba'i don to/ /zhing zhes bya ba ni sangs rgyas kyi zhing ste/ der gnas pa'i sems can rnams zhes bya ba'i don to/ /sku zhes bya ba la sogs pa la/ sku'i thugs ni dbang po'i rnam par shes pa rnams so//gsung thugs ni yid kyi rnam par shes pa ste/ brjod pa dang bcas pa'i phyir ro/ /mtshan nyid ni de rnams kyi rang bzhin no/ /mkhyen zhes bya ba ni yid kyis rtogs pa'o/ /ji ltar rtogs shes na/ kun gyi bdag nyid kyis te dngos po kun gyi bdag nyid kyis so//de ci zhig ce na/ sems zhes bya ba la sogs pa gsungs te/ sems kyis gar zhes bya ba ni rdo rje'i sems te/ gzhan gyi sems [(]shas [,]shes [)]pa'i mngon par shes pa zhes bya ba'i don to/ /ji ltar rtogs she na/ kun gyi bdag nyid kyis te rnal 'byor gyi rgyud la bdag nyid rang gi lha'i rnam par bsgom pa'o//'di la de las byung ba yod pas na de skad ces bya'o/ /dam tshig gi rdzas sgrub pa cung zad cig gsungs nas de'i cho ga gzhan bstan pa'i phyir yi ge zhes bya ba la sogs pa gsungs te/ de ru zhes bya ba ni dam tshig sbyar ba la'o/ /sngags zhes bya ba ni yi ge gsum gyi sngags so//go bzlog pa zhes bya ba ni gong du yi ge rnams kyis sbyor ba rim pa las bzlog pa ste/ hUM AHoM zhes bya ba'o/ /rnam bsgom zhes bya ba ni ji skad du/ dpal gsang ba 'dus pa las/ rdo rje hUM las byung ba ru/ /bar snang gnas su chud par bsam/ / pad+mo AHlas byung ba ni/ /de yi 'og tu bsgom byas la/ /bdud rtsi oM gyis mtshan pa ni/ /de yi nang du gzhag par bya/ /zhes gsungs so/ /rdo rje chu zhes bya ba ni chang ngo / /byin gyis brlab pa'i don du brjod pa'i sngags bstan par bya ba'i phyir/ brgyad kyi mtha' zhes bya ba la sogs pa gsungs te/yi ge brgyad kyi mtha' ni ha'o/ /ldan pa zhes bya ba ni u dang zhes bya ba dang 'brel to/ /mtha' ni kun gyi rjes la'o/ /kun du brjod ces bya ba ni dal bar bzlas pa'o/ /gsang ba zhes bya ba ni dam tshig gi rdzas so/ /nye bar brtags zhes bya ba ni mngon du yongs su brtags pa'o//'di ltar zhes bya ba ni 'og nas ston pa'i cho gas so/ /rnal 'byor ma kun sbyor ba yis/ /zhes bya ba ni rnal 'byor ma lnga'i nang nas gang yang rung ba'i sbyor bas so/ /sngags ji lta bu zhe na/ dbang po'i zhes bya ba la sogs pa gsungs te/ dang po'i yi ge ni oM ste/de dang yang dag par ldan pa ni dbang po nyid du sbyar ba'o/ /rdo rje can gyis grub 'dod na/ /zhes bya ba ni rdo rje 'dzin pa'i dngos grub 'dod na'o/ /lan bdun zhes bya ba ni go sla'o/ /rnal 'byor pa ni rnal 'byor can no/ /ci ste byin gyis rlob pa'i sngags 'di yi ge du zhig ce na/yi ge gsum mtha' zhes bya ba la sogs pa gsungs so/ /'o na yi ge gnyis ni sngar gsungs na yi ge gsum pa'i gnas ni gang / ngo bo ni gang zhig /mtha' ru tsa dang zhes bya ba la sogs pa bstan pa'i yi ge dag dang nye bar te/ dbus su zhes bya ba'i don to/ /tsa ni bsdu ba'o//tsa dang 'brel ba'i a ni gsum pa'o/ /bstan pa'i sbyor ba dang sdom pa'i cho ga bstan par bya ba'i phyir/ /brgyad pa'i mtha' zhes bya ba la sogs pa gsungs te/ sde tshan brgyad kyi mthar gnas pa ni ha zhes bya ba'i don to/ /ji lta bur zhe na/ U dang thig ler yang dag ldan no//mchog tu gyur ba'i gnas zhes bya ba ni rdo rje 'dzin pa'i sa bon du gyur pas so/ /yi ge zhes bya ba la/ /mi 'gyur ba ni rdo rje ste des de bskyed par bya ba'o/ /ji ltar zhe na/ dang po'i sngags dang yang dag par ldan te/ de'i nor bu rab sngags kyis bskyed par bya'o zhes bya ba'i don to/ / hrIHzhes bya ba yang dag ldan/ /zhes bya ba la/ yi ge hrIHyis pad 'dab brgyad par bskyed la yang dag par sbyor zhes bya ba 'og nas 'byung ba dang 'brel lo/ /gang dang zhe na/ a yi mtha' zhes bya ba la/ a'i mtha' ni gshegs su gsol ba ste/ de dang ldan pa'i yi ge as de'i nor bu bskyed par bya'o zhes bya ba'i don to//sa bon lngas ni rab tu dgang / /zhes bya ba ni oM hUM swA A hAHzhes bya ba'i sa bon rnams kyi shes rab kyi lus kyi mgo dang nu ma'i dbus lte ba dang gsang ba dang brla gnyis su sbyar bar bya zhes ba dang 'brel to/ /yi ge yis bya ba la 'dis mi 'dzag pas na yi ge ste phaT do//rnam bsgoms te zhes bya ba ni de dang sbyar ba ste/ rdo rje'i sgor zhes bya ba ni lhag ma'o/ /rab tu rgyas par bya zhes bya ba ni rdo rje dang sbyar bas so/ /de ltar sbyor ba kun shes bya/ /zhes bya ba ni sbyor ba thob nas te/ bsgom par bya'o zhes bya ba ni lhag ma'o//de nas zhes bya ba la sogs pa la/ rdo rje rnal 'byor ma rnams kyi dgongs pa ni gang de rnams kyis yongs su gzung ba'i grub pa'i mtha'o/ /rdo rje ni bde ba chen po'o/ /de sad par byed pa'i glu ni rdo rje'i glu'o/ /srid pa zhes bya ba ni sku dang gsung dang thugs te/byung bas na srid pa'o/ /shin tu zhes bya ba ni an ta ni 'jig pa'o/ /de las 'das pas na an ta ste 'jig pa med pa'o/ /shin tu yang de yin la dngos kyang de yin pas na shin tu dngos grub ste sgrub pa ni de'i thabs so/ /ha le zhes bya ba la sogs pa la/ 'dir tshigs su bcad pa rkang pa bzhi pa gnyis te/'di ltar tshigs su bcad pa phyed pa gnyis pa gang yin pa de nyid phyed pa bzhi pa yang yin te/ 'dus par bya ba'i phyir ha le si ha zhes bya ba ni/ kye grogs po zhes bya ba'o/ /bi a si a ka ma la zhes bya ba ni pad+ma bye bar gyur to zhes pa'o//ba po hi u pa dze zhes bya ba la/ rdo rje ni byang chub kyi sems chen po ste pad+ma'i kar+Ni ka la gnas pa'i ye shes kyi thig le'i gzugs sam/ dpal he ru ka'i gzugs su bskyed cing rdzogs par gyur pa'o/ /rab tu sad pa ni gdung bar gyur pa'o/ /ci'i phyir gdung 'gyur zhe na/a la la la la ho zhes bya ba gsungs te/ dang po'i ya dang mtha' ma'i ho la bzhi po dag ni shin tu rmad du gyur pa'i ba'i bde ba chen po 'di'i don du 'jug pa'i phyir ro/ /de skad du yang / dpal sangs rgyas thams cad dang mnyam par sbyor ba las/ e ma'o bde mchog rmad byung ba/a la la la la ho zhes brjod ces gsungs so/ /de bas na ci zhig bya zhe na/ ma hA su he na zhes bya ba la sogs pa la bde ba chen po ni rdo rje 'dzin pa'o/ /i na ni bdag po'o/ /bde ba chen po yang yin la i na yang yin pas na bde ba chen po yin te/mgon po bde ba chen po zhes bya ba'i don to/ /a ra hi u zhes bya ba ni mnyes par byas pa ste/ bdag cag gis zhes bya bar shes par bya'o/ /gi ste zhes bya ba ni gar gyis so/ /ra bi zhes bya ba la sogs pa la/ pa phu li u ka ma lu zhes bya ba ni pad+mo rnam par gsang ba'o//gang gis she na/ ma hA su he na zhes bya ba gsungs te/ bde ba chen po ste rdo rje de nyid kyis so/ /ci 'dra zhe na/ nyi ma lta bu'i 'od 'di la yod pas ra bi ka ra ne na zhes bya ste/ ji ltar nyi ma'i 'od kyis pad+ma'i kha 'byed pa de bzhin du bde ba chen po'i rgyu mthun pa'i 'od zer rnams kyis zhes bya bar dgongs so//a la la la la ho zhes bya ba la sogs pa ni yang bskyar la blang ste don ni de nyid do/ /glu 'di gnas skabs gnyis pa bstan par bzhed nas/ de nas zhes bya ba la sogs pa gsungs te/ de nas zhes bya ba ni lha mo bzhi bskyed pa'i 'og tu'o/ / 'dir ni glu tsam gyis zhes bya ba ni glu 'ba' zhig gis bskul bas so/ /ci'i don du zhe na/ rdo rje 'dzin pa chen po ste/ /mgon po bde ba chen po'i phyir ro/ /rdo rje mkha' 'gro ma rnams zhes bya ba ni rdo rje mkha' 'gro ma rnams kyi'o/ /gar zhes bya ba ni de dag gis gar kyang byas pa'o/ /rdo rje sems dpa' zhes bya ba ni glu dang gar gyis sad par byas pa'i thig le yongs su gyur pa las skyes pa'i dpal he ru ka gzhag pa ste/kar+N-i ka'i nyi ma'i dkyil 'khor la phyed krung gis bzhugs su gsol ba'o/ /'di ni blang ba'i gnas skabs so/ /mchod pa'i dus kyi gnas skabs gnyis pa bstan pa'i phyir/'di yis zhes bya ba la sogs pa gsungs te/ 'di yis zhes bya ba ni rdo rje'i glu dang gar gyis so/ /sbyor ba'i dngos grub 'gyur ba nyid/ /ces bya ba ni mchod pa'i phan yon no/ /rtag tu gus pa dang ldan pas bsgom pa'i mchog ces bya ba ni rgyun mi 'chad pas dus ring po rab tu sbyar zhing bsgom pa'o//dus bzhir rab tu sbyor ba yis/ /zhes bya ba ni rnal 'byor dang mchod pa'i dus so/ /gsang ba'i mchod pa bstan pa'i phyir/ rgyan rnams thams cad ces bya ba la sogs pa gsungs te/ bu mo gzhug par bya'o zhes bya ba ni lhag ma'o//rdo rje'i sku dang / rdo rje'i gsung dang / rdo rje'i thugs dag ni sku gsum mchog go/ /de lta bas na sku gsum mchog ster ba ste/ rdo rje sems dpa'o/ /ji ltar zhes bya ba ni ji lta ba bzhin du dngos grub thob par 'gyur ba'o/ /rab tu snang bar byed ces bya ba ni rang bzhin 'od kyis so//'dir 'da' bar bya ba ma yin pa'i dam tshig gnyis bstan pa'i phyir/ /dbang po gnyis ni zhes bya ba la sogs pa gsungs te/ rdzas zhes bya ba la/ bza'o zhes bya ba ni lhag ma'o/ /sangs rgyas kyi byang chub nyid go 'phang yin te rab tu gnas pa'o/ / lhag ma ni 'di nyid kyi bshad pa ste/ nye bar 'tshe ba thams cad dang bral bas na zhi ba ste/ nges par legs pa zhes bya ba'i don to/ /nyan thos dang rang sangs rgyas dag la yang 'di lta bu'i zhi ba yod pas de nyid ces bya ba ni de las khyad par du byed de/ spros pa thams cad dang bral ba'i ye shes zhes bya ba'i don to//byang chub sems dpa' rnams la yang de lta bu'i ye shes yod mod kyi/ da ni sangs rgyas kyi ye shes kyi bla ma dang bcas pa yin pas de las bye brag tu bya ba'i phyir bla na med pa zhes bya ba gsungs te/ 'di las bla mar gyur pa med pas na bla na med pa'o/ /'dir tshigs bcad du 'gyur ba zhes bya ba ni ji skad du gsungs pa'i rgyud kyi don bsdu ba'i tshigs su bcad pa'o//gzugs rnams zhes bya ba ni lha rnams kyi sku mdog dang dbyibs rnams so/ /phyag rgya zhes bya ba ni phyag rgyas btab pa'o/ /yan lag drug tu dgod pa dang / rdo rje pad+mo sbyor ba la sogs pa'o//de bzhin mtshan ma zhes bya ba ni thod pa dang kha T+wAM ga la sogs pa'o/ /rdzas rnams ni dam tshig gi rdzas rnams so/ /bsam gtan zhes bya ba la/ bsam par bya bas na bsam gtan te/ bzlas pa zhes bya ba'i don to/ /bsgom pa zhes bya ba ni dkyil 'khor gyi 'khor lo la sogs pa'i ting nge 'dzin to//cho ga'i thabs sna tshogs ni las rgyas pa la sogs pa ste/ dman pa'i dngos grub la sogs pa'o/ /bstan pa ni de dag thams cad bshad pa'o/ /'di dag thams cad ci'i phyir byas she na/ lha mo'i zhes bya ba la sogs pa gsungs te/lha mo ni sgyu 'phrul chen mo'o/ /de'i yid la 'dod pa ni thugs su byon pa gang yin pa ste/ de'i phyir bstan pa'o/ /rgyud yongs su 'dzin pa'i phan yon bstan pa'i phyir/ gang gi khyim du zhes bya ba la sogs pa'i tshigs su bcad pa gsungs te/ gang gi khyim ni gang zhig gi khyim du'o//rgyud ni sgyu 'phrul chen mo zhes grags pa'o/ /rtag tu gnas shing zhes bya ba ni rtag par gnas pa'o/ /'chang ba zhes bya ba ni 'dzin pa'o/ /klog pa ni gus par 'don pa'o/ /rnam pa bsgom pa ni ting nge 'dzin du byed pa'o/ /bgegs ni bgegs rnams so/ / rdo rje rnal 'byor ma yang de yin la chen mo yang de dag yin no/ /dgongs pa ni de dag gis yongs su bzung ba'i grub pa'i mtha' ste/ rnal 'byor ma'i rgyud mtha' dag ces bya ba'i don to/ /gsang ba ni de'i snying pa'o/ /de ci zhig ce na/ gsang ba chen po zhes bya ba ste/ rgyud kyi dang po ni mchog tu gsang ba zhes gsungs pa la/mthar ni gsang ba chen po'o zhes bya ba'i rnam grangs gzhan gyis gsungs pa yin te/ sgyu 'phrul chen mo zhes bya bar grags pa'i rgyud do/ /nye bar spyod pa dang bcas pa zhes bya ba la/ bsgrub bya sgrub pa'i thabs kyi cho ga ni nye bar spyod pa dang bcas pa'o//de dang lhan cig tu 'jug pa ni nye bar spyod pa dang bcas pa ste/ /des stong pa ma yin pa zhes bya ba'i don to/ /rdzogs pa ni de mthar thug pa'o/ /de ltar bdag gis sgyu 'phrul chen mo'i rgyud kyi 'grel pa yon tan ldan byas pas/ yongs su rdzogs pa'i ri bong can ltar mdzes pa'i bsod nams thob pa gang yin pas//rgyal ba rnams kyi bdag nyid gcig po rdo rje 'dzin pa nyid du bdag gyur nas/ /de yis skye bo rnams kyi sdug bsngal mi bzad ma lus zad pa rnyed par shog /rin chen 'byung gnas de ni rdzogs pa'i sangs rgyas sras bcas rnams kyis nges par byin brlabs pas//de yi sku gsung thugs kyi 'jug pa rnams ni nges par 'gro ba rnams la phan phyir yin/ /sgyu 'phrul chen mo zhes bya'i rgyud mchog tshig don rtogs dkar sbyar bas dka' ba gang yin pa'i/ /'grel pa yon tan ldan pa 'di ni mu tig phreng ltar skye bo'i snying ni 'gugs byed yin//dpal sgyu 'phrul chen mo'i 'grel pa yon tan ldan pa las nges par bstan pa gsum pa'o// //dpal sgyu 'phrul chen mo'i 'grel pa yon tan ldan pa zhes bya ba slob dpon paN+Di ta chen po dpal rin chen 'byung gnas zhi ba'i zhal snga nas mdzad pa rdzogs so/

CLOSE WINDOW