CLOSE WINDOW

D1606
བོད་ཡིག

@##/ /rgya gar skad du/ pI ThA di nir+N+Na ya/ bod skad du/ gnas la sogs pa gtan la dbab pa/ dpal kye'i rdo rje la phyag 'tshal lo/ /dpal ldan rdo rje rnal 'byor ma'i/ /zhabs pad dang por rab btud nas/ /gnas sogs gtan la dbab pa ni/ /mdor bsdus gsal bar bdag gis bri//de la bcom ldan 'das kyis brtag pa gnyis pa las/ gnas dang nye ba'i gnas dang ni/ /zhing dang nye ba'i zhing nyid dang / /'dun rtog nye ba'i 'dun rtog dang / /'du ba de bzhin nye 'du ba/ /'thung gcod nye ba'i 'thung gcod nyid/ /dur khrod nye ba'i dur khrod de/ /'di rnams sa ni bcu gnyis so//sa bcu'i dbang phyug mgon po'o/ /'di rnams gzhan gyis brjod mi bya/ /zhes gsungs so/ /de la gnas zhes pa la sogs pas mdor bstan gsungs so/ /'di rnams zhes pas gnas la sogs pa rnams rab tu dga' ba la sogs pa rnams te/ mos pas spyod pa'i sa dang lhan cig bcu gnyis so//sangs rgyas dang byang chub sems dpa' rnams kyi ye shes kyi gnas skabs kyi khyad par ni sa rnams te sangs rgyas dang byang chub sems dpa' rnams kyis rab tu bsgoms pas lhag par rtogs pa'i phyir ro/ /de nyid kyi phyir gsungs pa/ sa bcu'i dbang phyug byang chub sems dpa' ste/ /mgon po ni sangs rgyas so//'di rnams gnas la sogs pa rnams kyis brjod par bya yi gnas la sogs pa las tha dad pa gzhan gyis ma yin no/ /gang gi phyir nang gtso bor gyur pas gnas la sogs par gzhag go/ /de la sa dang po rab tu dga' ba ni gnas te/ thog ma med pa'i dus nas ma mthong ba'i de kho na nyid mthong ba'i phyir rab tu dga' ba mang ba'i phyir dang ting nge 'dzin dang mngon par shes pa la sogs pa rnams dang sbyin pa'i pha rol tu phyin pas sems can tshad med pa yang dag par tshim par byed pa'i rten du gyur pa'i phyir ro//sa dri ma med pa ni/ gnas dang nye bas na nye ba'i gnas te/ tshul khrims kyi pha rol tu phyin pa rab kyi mthar phyin pas dge ba bcu rnam par dag pa'i phyir dang /ting nge 'dzin dang mngon par shes pa la sogs pa'i dbang du gyur pa'i phyir ro/ /gnas dang nye ba'i gnas dag phan tshun phan gdags bya dang 'dogs byed kyi 'brel pa'i sgo nas nye ba yin gyi/ yul dang dus ches nye bas ni ma yin no/ /gang gi phyir/ rgyu dang 'bras bu nye bar byed pa ni 'bras bu skyed par byed pa'i nus pa nyid kyis tha snyad kyi spyod yul nyid kun 'byung ba'i phyir ro/ /phyi rol du gnas dang nye ba'i gnas dag phan 'dogs pa ni brtan pa rnal 'byor ma rnams phan tshun phan 'dogs pa'i nye bar spyod pa nyid las so//de bzhin du zhing dang nye ba'i zhing la sogs par yang rtogs par bya'o/ /sa 'od byed pa ni zhing ste bzod pa'i pha rol tu phyin pa rab kyi mthar phyin pas/ ting nge 'dzin nyams pa med pa la brten pa dang / chos chen po'i snang ba bskyed pa dang / mngon par shes pa la sogs pa rab kyi mthar phyin pa'i phyir ro/ /sa 'od 'phro ba ni/ nye ba'i zhing ste brtson 'grus kyi pha rol tu phyin pa gtso bor gyur pas nyon mongs pa'i bud shing bsreg par bya ba'i phyir/ ye shes kyi me lce 'phro bar gyur pas byang chub kyi chos kyi snang ba bskyed pa'i phyir ro//sa shin tu sbyang dka' ba ni 'dun rtog ste/ 'dun pas don du gnyer bas rang dang gzhan gyi don bsgrub pa'i phyir dang / rtog pa nyid kyis de ltar byed pas rnam par rtog pa'o/ /gang gi phyir shin tu sbyang dka' ba'i sa la byang chub sems dpa' bsam gtan gyi pha rol tu phyin pa phul du byung bas/rdzu 'phrul chen pos thabs sna tshogs pa'i sbyor bas kyang sems can yongs su smin par byed cing / de nyid sems can yongs su smin pa la mngon par brtson pa dang / sangs rgyas 'byung ba'i rjes su song ba'i sems kyi rgyud phyir mi ldog pa'i dge ba'i rtsa ba rab tu sbyor bas/khyad par can gyi chos tshol ba la mngon par brtson par byed do/ /sa mngon du gyur pa ni nye ba'i 'dun rtog ste shes rab kyi pha rol tu phyin pa mngon du gyur pa'i ngo bos 'dun rtog dang ldan pas phul du byung ba'i lam dang ldan pa'i phyir ro/ /ring du song ba'i sa ni 'du ba ste 'dus shing 'dres par gyur pas na/'di ni thabs kyi pha rol tu phyin pa rab tu gyur pa'i phyir ro/ /tshad med pa bzhi dang bsam gtan dang rnam par thar pa dang ting nge 'dzin dang snyoms par 'jug pa dang mngon par shes pa la sogs pa rnams la/ mtshan ma dang rtsol ba med par 'dre ba'i phyir ro//mi g.yo ba'i sa ni nye ba'i 'du ba ste bsam gtan gyi pha rol tu phyin pa'i 'bras bu yang dag par 'byor pas/ mtshan ma dang rtsol ba med par byams pa la sogs pas sems can dang snod kyi zhing yongs su dag cing g.yo ba med pa nyid kyis rab tu 'jug pa'i phyir ro//sa legs pa'i blo gros ni dur khrod de bdag med pa nyid kyi dur khrod dang mtshungs pa'i phyir dang / stobs kyi pha rol tu phyin pa nyid kyis byang chub sems dpa' chos thams cad bdag med pa chos kyi dbyings lhag par rtogs pa nyid sems can rnams kyi lhag par rtogs par bya ba'i phyir ston pa dang /'khor bar rtsol ba med par sems can gyi don dang / yang dag par rdzogs pa'i byang chub sgrub par byed pa'o/ /chos kyi sprin gyi sa ni nye ba'i dur khrod de ye shes kyi pha rol tu phyin pa nyid kyis chos thams cad rang bzhin med pa lhag par rtogs pa ston pas phul du byung zhing rab kyi mthar phyin pa grub pas sprin chen po bzhin du chos kyi char gyis sems can rnams yang dag par tshim par byed pa'i phyir ro//de skad du yang kha sbyor thig le las/ gnas ni rab tu dga' ba'i sa/ /de bzhin nye gnas dri ma med/ /zhing ni 'od byed shes par bya//'od 'phro ba ni nye ba'i zhing / /'dun rtog mngon du gyur pa ste/ /nye ba'i 'dun rtog sbyang dka' ba'o/ /'du ba ring du song ba ste/ /nye ba'i 'du ba mi g.yo ba/ /dur khrod legs pa'i blo gros te/ /nye ba'i dur khrod chos kyi sprin/ /pha rol phyin bcu sa rnams te/ /rnal 'byor ma yi kla klo'i skad//pu yig la sogs gang gsungs pa/ /phyi dang nang du rnam bsam bya/ /zhes gsungs so/ /sa 'di rnams kyang byang chub kyi sems kyi rab tu skye ba de dang der sa bcu gnyis kyi rang bzhin rgyu dang 'bras bu nyid kyis 'thung gcod dang nye ba'i 'thung gcod la sogs par bzhag pa'i dbang las rtogs par bya'o zhes gsungs so//de nyid kyi phyir sdom par dkyil 'khor dang lus la yang 'thung gcod dang nye ba'i 'thung gcod dag ma bstan to/ /b+ha wa b+ha Tar ni dur khrod dang nye ba'i dur khrod nang du 'dus pa nyid kyis sa dag tu 'gal lo/ /saM pu Tar legs pa'i blo gros dang chos kyi sprin dag dur khrod dang nye ba'i dur khrod nyid du rnam par gzhag go//de la pI nga btung ba la'o 'thung bar byed do zhes pas las la kwe pa ste pIH'o/ /lu nA ti dge ba sgrub par byed do zhes pas la wa'o/ /nyon mongs pa'i phung po 'thung zhing gcod par byed pas na 'thung gcod de/'dis ni rab tu dga' ba la sogs pa'i sa bskyed pa'i rim pas nyon mongs pa spong bar byed do/ /bag chags dang bcas pa'i sgrib pa lhag ma ma lus pa spangs pa ni sa bcu gnyis pa kun du 'od sangs rgyas kyis nye ba'i 'thung gcod do/ /de ltar ni 'bras bu mtshungs pas pha rol tu phyin pa bcu'i rang bzhin byang chub kyi rang gi ngo bo rnams las bcu gnyis kyis ji ltar rigs par rnal 'byor ma rnams kyi rten du rnam par gzhag par bya'o//kla klo'i skad ces pa brda'i skad kyis so/ /phal cher ni phyi rol gyi 'thung gcod dang gnas la sogs pa nye ba'i 'thung gcod kyi mthar thug pa rim pa ji lta ba bzhin mos pas spyod pa la sogs pa'i dbang phyug gi rnal 'byor ma rnams 'byung ngo //de skad du dpal rdo rje mkha' 'gro'i rgyud las/ yul dang yul du mngon byung ba/ /ye shes ldan pa'i rang skye gnas/ /mkha' 'gro ma rnams der bshad pa/ /rdo rje'i dkyil 'khor gtso mo'o//zhes bshad do/ /de'i phyir de'i rten byed pa'i grangs la sogs pa rnams dang / pul+lI ra mA la ya la sogs pa rnams byed pa'i brang la sogs pa rnams dang / nye ba'i sa rnams kyang mos pas spyod pa la sogs pa'i sa rnams su lhag par mos par bya'o/ /zhib tu na phyi'i 'dzin pa bslu bar mos pa'i ji ltar sems can dman pa la sogs pa rnams phyi rol gyi yul du zhen pa rags pa bsal ba'i phyir/phyi'i 'thung gcod gnas la sogs pa rnams mos pa spyod pa la sogs pa'i sar mos par bstan to/ /de'i phyir 'di thams cad dgongs pa'i skad kyis pu yig la sogs zhes bya ba la sogs pa gsungs te/pu yig la sogs pa ni pul+lI ra mA la ya la sogs pa'i phyi rol gyi gnas 'chad par 'gyur ba khang pa brtsegs pa'i sa gzhi dang / nang du lus kyi byang chub kyi sems so/ /da ni gnas la sogs pa mdor bstan par brtag pa gnyis pa nyid du nges par bstan pa//gnas ni dzA lan+d+ha rar bshad/ /de bzhin o Di yA na nyid/ /gnas ni pUr+N+Na gi ri nyid/ /de bzhin kA ma rU pa yang / /nye gnas mA la wa ru brjod/ /sin+d+hu na ga ra nyid dang / /zhing ni mum+mu ni ru bshad/ /zhing ni byed pa'i brang nyid do/ / de wI ko Ta de bzhin zhing / /zhing ni lcags pa'i brang nyid do/ /nye zhing ku lu tA ru brjod/ /de bzhin arbu da yang ngo / /go dA wa rI gangs kyi ri/ /nye ba'i zhing ni mdor bsdus pa'o/ /'dun rtog ha ri ke la dang / /lan tshwa'i rgya mtsho'i nang son pa'o/ /lam+bA ka dang kAny+tsi ka/ /de bzhin yul 'khor bzang po'o//nye ba'i 'dun rtog ka ling+ga/ /'di rnams ldan pa gling nyid do/ /nye ba'i 'dun rtog kang+ga Na/ /mdor bsdus pas ni mngon par brjod/ /'thung gcod grong gi mtha' dang ni/ /na ga ra yang 'thung gcod do/ /tsa ri tra dang ko sa la/ /'bigs byed gzhon nu ma yi grong / /nye ba'i 'thung gcod de dang nye//rdo rje snying po snying rje che/ /dur khrod yi dwags 'dus pa dang / /rgya mtsho'i 'gram yang dur khrod do/ /skyed tshal rdzing bu'i 'gram nyid ni/ /nye ba'i dur khrod nges par brjod/ /ces gsungs so/ /de la pol+la gi ri ni pUr+N+Na gi ri'o/ /de yang kol+la gi ri dang pul+lI ra mA la ya dang mA la wa dang /rdo rje'i gnas zhes pa rnams rnam grangs so/ /kha sbyor thig le las/ gnas ni kol+la gi ri nyid/ /de bzhin arbu da yang ngo / /zhes bshad pa ma yin nam/ arbu da gnas su yang bstan pa 'dir nye ba'i zhing du brjod/ /de bzhin du kA ma rU pa 'dir gnas nyid du bstan/phyag rgya chen po thig le'i rgyud du yang / gnas dzA lan+d+ha ra dang o Di ya na dang pUr+N+Na gi ri dang kA ma rU pa yang ngo zhes so/ /sam+pu Tar ni/ de bzhin kA ma rU par brjod/ /o tre zhing nyid du yang brjod/ /gnas nyid la sogs par rnam par gzhag pa yang thig le dang / rdo rje mkha' 'gro phal cher mtshungs pa nyid do//de ci ltar mi 'gal zhe na/ gnas dang nye ba'i zhing dag tsha grang dang dngos po dang dngos med bzhin du phan tshun 'gal ba ni ma yin te/ gcig la yang ming sna tshogs ji ltar mi 'gal zhes so/ /'dir na ga ra dang / pA Ta li pu Ta dang / mA la wa sogs gsum ni nye ba'i zhing du gsungs so//sam+pu Ta las ni/ nye gnas go dA wa rer brjod/ /rA me shwa ra'ang de bzhin no/ /de wI ko Ta de bzhin bshad/ /mA la wa yang de bzhin brjod/ /ces so/ /phyag rgya chen po thig le las ni/ /nye ba'i zhing ni mA la wa/ /na ga ra dang sin+d+hu dang //sid+ha la yang de bzhin no/ /de wI koT+Ta ba'i mchog sbyin/ /'dir ni zhing dang nye bas bstan/ /'dir yang de ma thag tu brjod pa nyid yang dag par brjod do/ /mum+mu ni zhes pa mum+mu ni'i yul lo/ /byed pa'i brang zhes pa ka ra Ni wa Da zhing bzhi nges par bstan no//phyag rgya chen po thig le las ni/ zhing mum+mu ni dang de wI ko Ta yang ngo / /sam+pu Tar ni sngar bshad pa gnyis so/ /sngar bzhin de ltar arbu da yang zhes pa arbu da ra'i rtse mo'o/ /phyag rgya chen po thig ler yang / nye ba'i zhing ku la tA dang arbu da zhes pa gnyis bshad do//sam+pu Tar ni nye ba'i zhing tri sha ku ni dang / ko sha la yang zhes bshad do/ /'dir yang ko sha la ni 'thung gcod nyid du bstan te sngar bzhin no/ /ha ri ke la la sogs pa dang / sau rASh+Ta'i mthar yang 'dun rtog bzhi'o/ /lan tshwa rgya mtsho'i nang zhes pa ha ri ke la'i khyad par ro/ / ka ling+ga la sogs pa gsum ts+tshan+do ha'o/ /gser byed pa dang ldan pa'i gling ni gser gling ste/ gser gling zhes pa'i don to/ /sam+pu Ta las ni ka ling+ga dang lam+bA ka yang 'dun rtog go/ /gser gling dang mA la ya nye ba'i 'dun rtog go/ /phyag rgya chen po thig le las ni ts+tshan+do ha ni go dA wa ri dang ha ri ke la'o//nye ba'i 'dun rtog ni gser ldan dang lam+bA ka zhes bshad do/ /rgyud 'dir ni 'du ba dang nye ba'i 'du ba ma bstan to/ /sam+pu Ta las ni/ yi dwags gnas su rab brjod pa/ /khyim gyi lha dang yul 'khor bzang / /gser gling yang ni 'du bar 'dod//yi dwags gnas ni yi dwags grong / /gri ha de wa'ang 'du ba'o/ /gzhan gnyis nye ba'i 'du ba'o/ /phyag rgya chen po thig le las ni/ 'du ba lcags pa'i brang nyid de/ /nye ba'i 'du ba gser gling ngo / /kong+ka Na dang 'bigs byed bstan/ /de la yi dwags kyi grong dang /gri ha de wa tA 'dir yang 'du ba nyid kyis legs par bsdus so/ /sau rASh+Ta dang gser gling yang 'dun rtog dang nye ba'i 'dun rtog nyid kyis bstan no/ /phyag rgya chen po thig ler yang nye ba'i 'du ba nyid kyis gang bshad pa/ kong+ka Na dang 'bigs byed de dag kyang 'dir nye ba'i 'dun rtog dang 'thung gcod nyid kyis bstan to//de'i phyir brtag pa gnyis pa las/ nye ba'i 'du bar bstan pa rgyud gzhan gyi rjes su 'brang bar bya'o/ /'thung gcod grong gi mthar gnas pa/ /'thung gcod na ga ra yang ngo / /zhes dang / grong gi mtha'i sa ni na ga ra'i mtha'i sa'o//tsa ri tra yang tsa ri tra'i gnas so/ /'bigs byed ni 'brog dgon pa'o/ /gzhon nu ma'i grong ni gzhon nu ma'i gnas so/ /sam+pu Tar ni/ byed pa'i brang dang lcags pa'i brang / /ha ri ke la 'bigs byed dang / /gzhon nu'i grong dang rnam pa lnga/ /'thung gcod du ni yang dag brjod//'dir ni 'di dag zhing du bstan to/ /ha ri ke la ni ts+tshan+do ha nyid do/ /nye ba'i 'thung gcod ni de'i mtha'i gnas so/ /'thung gcod de dang nye ba'i sa'o/ /phyag rgya chen po thig ler ni rnam pa lnga 'thung gcod dang kha che'i dkyil 'khor dang mon gyi dkyil 'khor dang nye ba'i 'thung gcod dang bal po dang ka n+yA kup+dza zhes mngon par brjod do//yi dwags 'dus pa zhes pa dur khrod kyi sa ste dur khrod do/ /rgya mtsho'i 'gram yang rdzing bu'i 'gram ring po'o/ /phyag rgya chen po thig ler yang 'dir ni dur khrod gnyis so/ /nye ba'i dur khrod ni tsa ri dang gzhon nu'i grong zhes bstan to/ /sam+pu Ta'i rgyud kyi rab tu byed pa las na ga ra dang sin+d+hu dur khrod du bstan pa ma yin na/ma ru dang ku lu tA dag nye ba'i dur khrod du bshad ce na/ lU yI zhabs kyi mngon par rtogs pa las kyang dkyil 'khor gyi 'khor lo dang lus la de bzhin kho nar rnam par gzhag go/ /sam+pu Ta'i thig le las ni/sin+d+hu na ga ra dur khrod/ /nye ba'i dur khrod yi dwags 'dus/ /de bzhin rgya mtsho'i 'gram yang ngo / /skyed tshal rdzing bu'i 'gram yang ni/ /nye ba'i dur khrod rnam par bshad/ /'di yang rgyu dang rgyud gnyis kyi don rab tu gsal ba nyid kyis gnyis ka yang dag par bsdus pas bshad par nus te/bla ma rnams kyis man ngag snye ma las/ sin+d+hu dang na ga ra dag dur khrod dang nye ba'i dur khrod nyid dang ma ru dang ku la tA dag gtso bo nyid kyis yi dwags 'dus pa dang / rgya mtsho'i 'gram dag dang skyed tshal rdzing bu'i 'gram dag dur khrod dang nye ba'i dur khrod du bshad pa yang dgongs pa can du bshad de/gang gi phyir 'di dag tu 'ga' zhig gi tshe lha dang rnal 'byor ma rnams 'dres pa de nyid kyi phyir phyi nas 'di bstan te/ gtso bor pul+lI ra mA la ya sogs pa gnas nyi shu rtsa bzhi'i nang du 'dus pa pul+lI ra mA la ya la sogs pa'i yul du bram ze la sogs pa'i skye gnas su skyes pa'i dkyil 'khor pa'i lha rnams kyang ngo zhes so//de'i phyir bde mchog gi rab tu byed pa la/ phyi dang nang du yang gnas la sogs pa'i rnam par gzhag pa mtshon par byed do/ /de bzhin rgyud gzhan rnams las kyang gnas la sogs pa phyi dang nang dang gzhan du yang rnam par gzhag go//ri gi A ral+li'i rgyud las kyang / shar gyi lus 'phags 'dzam bu gling / /nub kyi ba glang spyod dang ni/ /byang gi sgra mi snyan yang gnas/ /gnas bzhir lha mo bzhi rnams te/ /ri rab rtse mor ri gi gnas/ /zhes gsungs so/ /thams cad du bshad ces pa nges pa'i rnam pa'i ngo bor blta bar bya'o//gzhan yang gdul bya dang rjes su mthun par brtse ba'i rang bzhin gyis bcom ldan 'das kyi sku bstan pa ni rnam pa sna tshogs so/ /gdul bya yang chung ngu dang 'bring dang chen po'i chung ngu dang chen po'i 'bring dang chen po'i chen po'i dbye bas so//de la chung ngu'i dbang du byas nas phyi'i gnas la sogs pa bstan pa de bzhin du yang / dri ma med pa'i 'od las gsungs pa/ 'dir thun mong gi yul du 'khyam par bya ba'i don du dzA lan+d+ha ra la sogs pa rnams gnas la sogs pa nyid du gsungs so/ /de yang thams cad du khyab par byed par mi 'gyur te/bram ze dang rgyal rigs dang rje rigs dang dmangs rigs rnams kyi khyim du skyes pa'i rdo rje mkha' 'gro rnams grong khyer gcig na yang gnas pas/ bod dang rgya nag la sogs pa'i yul na yang gnas la sogs pa yod do/ /de rnams kyang bsdus pa'i rgyud kyi nang nas bstan to//rgyud rgyas pa'i nang du ni yul thams cad dang grong khyer thams cad du gnas la sogs pa bshad do/ /'bring gi dbang du byas nas kyang gzhal yas khang gi sa la gnas la sogs pa dkyil 'khor pa'i lha mo rnams su rnam par gzhag go//dper na dpal sdom pa'i dkyil 'khor du rdo rje phreng ba sngon pos bskor ba'i rtsibs brgyad sngon por dang po thugs kyi 'khor lo'i shar dang byang dang / nub dang lho'i rtsibs rnams la/ pul+lI ra mA la ya/ dzA lan+d+ha ra/ o Di ya Na/ arbu da gnas kyi rang bzhin rnams su/ rab gtum ma/ gtum mig ma/ 'od ldan ma/ sna chen ma rnams so/ /me dang / bden bral dang / rlung dang / dbang ldan rnams su go dA wa rI/ rA me shwa ra/ de wI ko Ta/ mA la wa ste nye ba'i gnas kyi bdag nyid rnams su/ dpa' bo'i blo can ma dang / mi'u thung ma dang / lang+ka'i dbang phyug ma dang /shing grib ma rnams so/ /pad+ma dmar po'i phreng bas yongs su bskor ba rtsibs brgyad dmar po gnyis pa gsung gi 'khor lo'i shar dang byang kA ma rU pa dang o twe ste/ zhing dag tu sa srung ma dang / 'jigs byed chen mo dag go/ /nub dang lho tri sha ku ni dang ko sha ku ni dang ko sha la nye ba'i zhing dag tu rlung shugs ma dang /chang 'thung ma dag go/ /me dang / bden bral/ ka ling+ga dang / lam+pA ka ts+tshan+do ha dag tu/ sngo bsangs lha mo dang / shin tu bzang mo dag go/ /rlung dang dbang ldan kAny+tsI dang / hi mA la ya nye ba'i 'dun rtog dag tu/ rta'i rna ba ma dang / mkha' 'gro gdong ma dag go/ /rdo rje phreng ba dkar pos yongs su bskor ba rtsibs brgyad dkar po gsum pa sku'i 'khor lo'i shar dang byang /pre ta pu rI dang / gri ha de wa tA 'du ba dag tu/ 'khor lo'i shugs ma can dang / dum skyes ma dag go/ /nub dang lho sau rASh+Ta ra dang / gser gling nye ba'i 'du ba dag tu/ chang 'tshong ma dang / 'khor lo'i go cha ma dag go//me dang bden bral na ga ra dang / sin+d+hu dur khrod dag tu shin tu dpa' mo dang / stobs chen ma dag go/ /rlung dang dbang ldan ma ru dang / ku la tA nye ba'i dur khrod dag tu 'khor los sgyur ma dang / brtson 'grus chen mo dag go/ /rab gtum ma la sogs pa'i lha mo 'di rnams kyang rang rang gi rten gyi 'khor lo dang kha dog mtshungs pa zhal gcig spyan gsum ma/gdong mche ba gtsigs pa/ dpral bar rdo rje'i phreng bas mtshan pa/ skra grol ba/ phyag gnyis kyi g.yon pas khrag gis gang ba'i thod pa/ g.yas pas gdug pa sdigs par byed cing gri gug 'dzin pa/gcer bu g.yas brkyang gi stabs kyis gnas pa/ phyag rgya lnga 'dzin cing / 'dzag pa'i mgo bo'i phreng ba can du bsam par bya'o/ /chen po'i chung ngu'i dbang du byas nas lus la gnas la sogs pa bstan te/ dper na sdom pa'i dkyil 'khor bzhin no/ / pu dzA o a go rA de mA kA o tI ko ka la kA hi/ pre gr-i sau su nA si ma ku spyi bo pul+lI ra mA la yar rab gtum ma'o/ /spyi gtsug dzA lan+d+ha rar gtum mig ma'o/ /rna ba g.yas pa o Di ya nar 'od ldan ma'o/ /ltag pa arbu dar sna chen ma ste gnas so/ /rna ba g.yon pa go dA wa rIr dpa' bo'i blo can ma'o//smin ma'i dbus rA me shwa rir mi'u thung ma'o/ /mig gnyis de wI ko Tar lang+ka'i dbang phyug ma'o/ /phrag pa gnyis mA la war shing grib ma ste nye ba'i gnas so/ /mchan khung gnyis kA ma rU par sa srung ma'o/ /nu ma zung o trer 'jigs byed chen mo ste zhing ngo / / lte ba tri sha ku nir rlung shugs ma'o/ /sna rtse ko sa lar chang 'thung ma ste nye ba'i zhing ngo / /kha ka ling+gar sngo bsangs lha mo'o/ /mgrin pa lam+pA kar shin tu bzang mo ste 'dun rtog go/ /snying kAny+tsir ra rta'i rna ba ma'o/ /mdoms par hi mA la yar bya gdong ma ste nye ba'i 'dun rtog go/ /mtshan ma pre ta pu rir 'khor lo'i shugs can ma'o//bshang lam gri ha de war dum skyes ma ste 'du ba'o/ /brla gnyis sau rASh+Tar chang 'tshong ma'o/ /byin pa gnyis gser gling du 'khor lo'i go cha ma ste nye ba'i 'du ba'o/ /sor mo na ga rar shin tu dpa' mo'o/ /rkang pa'i bol sin+d+hu ra stobs chen ma ste dur khrod do//mthe bong ma rur 'khor los sgyur ma'o/ /pus mo gnyis ku lu tAr brtson 'grus chen mo ste nye ba'i dur khrod do/ /'di la 'di ni man ngag yin te/ puM dzAM zhes pa la sogs pa thams cad rjes su nga ro dang bcas pa nges pa nyid do/ /puM yi ge la sogs pa'i yi ge yongs su gyur pa las 'khor lo'i rtsibs rnams kyi stong pa'i nang du gnas la sogs pa'i gnas rnams spyi bo la sogs pa rnams su blta bar bya'o//gnas la sogs pa de rnams su de de'i gnas su son pa'i rtsa rnams de dang de'i lha'i gzugs kyis yongs su gyur pa rnam par gzhag ste bsgom par bya'o//dper na phyi rol du gnas la sogs pa dang nye bar gnas pa'i chu klung gi chu yis gso bar byed pa de bzhin du/ lus la yang rtsa rnams kyis sen mo la sogs pa gso bar byed do zhes pa mtshungs pa nyid do/ /chen po'i 'bring gi dbang du byas nas bskyed pa'i rim pas sa bon gyi yi ge la sogs pa med par yang /lus la ji ltar gnas pa'i spyi bo la sogs pa gnas la sogs pa de dang der son pa rtsa'i rang bzhin rnams rdo rje lha mo rnams so zhes lhag par mos pa'i don du rnam par gzhag go/ /chen po'i chen po'i dbang du byas nas bskyed pa'i gnas kho na nang ste/stong pa nyid dang snying rje dbyer med pa byang chub kyi sems lus la sogs pa so sor snang ba'i rang bzhin gnas pa sa dang pha rol tu phyin pa'i bdag nyid do/ /dkyil 'khor gyi 'khor lo bdag la bsre ba de'i dbang du byas nas gsungs te/ ye shes chen po rang lus gnas//rtog pa thams cad yang dag spangs/ /zhes dang / sa bcu'i dbang phyug mgon po ste/ /'di rnams gzhan gyi brjod mi bya/ /zhes so/ /dpal ldan mngon par brjod pa phyi ma'i rgyud du yang gsungs pa/ 'di nyid mkha' 'gro ma kun gyi/ /nges par gnas pa snying brtser ldan//'di nyid rdzogs sangs rgyas kun dang / /byang chub sems dpa'o 'gro ba gsum/ /nyi shu rtsa bzhi'i dbye ba yis/ /gnas sogs nyid du yang dag gnas/ /de'i phyir/ de nyid ldan na der 'khyams pas/ /ngal bar 'gyur gyi dgos pa med/ /gal te de nyid med gyur na/ / de rnams bskor bas cung zad min/ /gal te de nyid ldan gyur na/ /de rnams bskor yang ci zhig dgos/ /phyi rol rnal 'byor pa de rnams/ /bskor bas khams rnams zad par 'gyur/ /de phyir phyi rol rnam spangs nas/ /rnal 'byor rol pas gnas par bya/ /rnam dag ye shes spyan ldan pa'i//rdo rje rnal 'byor ma rnams kyis/ /dpal ldan rnal 'byor can rnams la/ /ring nas thugs rje'i thugs kyis gzigs/ /dngos grub mchog ni bzhi rnams kyang / /de rnams la ni ci 'dod stsol/ /des na rje btsun ye shes ni/ /rab tu 'bad pas bsgrub par bya/ / sna tshogs rtsol ba dang ldan pa/ /spyod pa'i brtul zhugs su ni brjod/ /spyod pa'i brtul zhugs 'di nyid ni/ /brtul zhugs de nyid dga' bas bya/ /rnam pa gang des byas nas ni/ /zas dang gnas kyi brtul zhugs ldan/ /bsam gtan zas mchog gyur pa yi/ /smyo med sems kyis gnas par bya//gcer bu'am gal te gcer bu min// gang der ji ltar de bzhin du/ /rang gi lhag pa'i lha dmigs nas/ /de nyid gcig tu rnam par bsam/ /zla drug tsam gyis de nyid ni/ /lkugs par gyur kyang dbang du 'gyur/ /rnal 'byor che dang rnal 'byor ma'i//gzugs kyis de la gsal bar byed/ /ye shes gsal ba mchog mthong nas/ /rnal 'byor can rnams nye bar gnas/ /ji ltar pad mtsho nyams dga' bar/ /ngang pa'i tshogs ni 'jug pa bzhin/ /dpal ldan rdo rje 'dzin pa ni/ /'di la mngon gyur the tshom med//mig 'phrul bzhin du 'jig rten du/ /sems can kun don byed pa po/ /de ltar bdag dang sems can don/ /dag pa'i sems kyis byed pa nyid/ /ces gsungs so/ /de nyid kyi phyir/ chung ngu la sogs pa rnams la/ gnas la sogs pa bstan pa yang / drang ba'i don to/ / rab tu dga' ba la sogs pa'i rang bzhin nyid gnas la sogs pa ni nges pa'i don to/ /gang yang phyi rol dang dkyil 'khor gyi 'khor lo dang / lus la yang rab tu dga' ba la sogs pa'i rnam par gzhag pa de'ang drang ba'i don to/ /ci ltar de dang der lhag par mos pa las de dang de 'jig rten las 'das pa'i sar gsal bar 'gyur ba'i phyir 'bad par byed do zhes pa ste spros pas chog go//da ni sum+pu Ta'i thig le la sogs pa'i rgyud las gsungs pa'i rnal 'byor ma rnams kyi phal cher 'du ba'i gnas dang shing la sogs pa la gnas pa brjod par bya ste/de la/ bi ra dzar ni tsU ta'i shing / /'du gnas lha mo aM bi ka/ /zhing skyong a na la zhes bya/ /kong+ga Nar ni zla 'khri shing / /zhes bstan nges par bsam par bya/ /tsa ri trar shing ka rany+dza/ /lha mo ka rany+dzar gnas ma/ /zhing skyong dril bu chen po'o//de bI koT+Thar b+ha Ta'i shing / /lha mo kar+Na mo TI'o/ /ha ri ke lar a ru ra'i shing / /o Di ya nar mya ngan med shing / /gang der lha mo gsang ba ma/ /zhing skyong stobs po che zhes bya/ /dzA lan+d+ha rar gser shing ste/ /gang der lha mo gtum mo ste/ / zhing skyong dza ne tA zhes bya/ /sam+pu Ta yi thig le las/ /bi ra dza sogs nye bar mtshon/ /rdo rje mkha' 'gro la sogs pa'i rgyud las gsungs pa'i gnas rnams so/ /de la purna gi ri dang / /ri yi rtse mo 'du ba'i gnas/ /gang der lha mo dpal chen mo/ / zhing skyong me yi gdong pa can/ /mchog ldan du ni tA la'i shing / /gang der lha mo bde byed ma/ /zhing skyong gyen du skra brdzes pa'o/ /dmar ser grong du shing ral can/ /gang der lha mo dmar ser ma/ /zhing skyong byin pa chen po'o/ /e lA'i grong du a ya ta na/ / gang der lha mo bong gnas ma/ /zhing skyong glang po'i rna ba'o/ /kha che'i ri yi rtse mo ni/ /gang der lha mo go kar+N+Na/ /zhing skyong byin pa'i rtsa can no/ /mya ngam gyi ni gnas chen po/ /gang der lha mo kra ma NI/ /zhing skyong gtsigs bzhes bya'o/ /skya bo'i bu yi sba yi dong / /gang der lha mo ro langs ma//zhing skyong byin spu can yin no/ /bu ram shing 'phel grong gi gnas/ /gang der lha mo tsA muN+DI/ /zhing skyong bum pa can zhes bya/ /rgyal byed khang pa brtsegs pa ni/ /gang der lha mo rab dngas ma/ /zhing skyong ral pa gsum pa'o/ /priSh+NA'i grong gi gnas khyad par//gang der lha mo glog gdong ma/ /zhing skyong dril bu'i sgra can no/ /sa pA ri'i shing shAl+ma lI/ /gang der lha mo me gdong ma/ /zhing skyong lha ni chen po'o/ /'o ma can gyi shing shA la/ /gang der lha mo 'jig rten yum/ /sgyu ma'i grong gi shA kho Ta/ /gang der lha mo 'od ldan ma//zhing skyong 'jigs sde zhes bya'o/ /e kA mU ka'i A mra ni/ /gang der lha mo lus srul ma/ /zhing skyong brtul zhugs chen po'o/ /rgyal po'i khab kyi gnas khyad par/ /gang der lha mo rna rgud ma/ /zhing skyong dril chung sgra can no/ /bod kyi brag gi rtse mo ni//gang der lha mo lhan skyes ma/ /zhing skyong longs spyod can zhes bya/ /mA la ba yi sbrang rtsi'i shing / /gang der lha mo dbang bskur ma/ /zhing skyong skyes pa'i dbang phyug go/ /de dang de yi gnas rnams su/ /rdo rje rnal 'byor ma rnams 'du/ /rnal 'byor can 'dus rjes su 'dzin//zhes so/ /de bzhin du rdo rje mkha' 'gro'i rgyud du yang / zhing 'di rnams su bu mo gang / /dpa' bo rnams la grub sbyin ma/ /rtag tu ri yi 'gram dag tu/ /mtshan mo rab tu 'du bar byed/ /mkha' spyod rnams su rnyed dka' ba/ /dngos grub yangs pa sbyin par byed/ / sgrub pa po la las rnams kun/ /the tshom med par 'grub par byed/ /ces gsungs so/ /ri'i 'gram zhes pa ni sgrub pa po'i phyir du'o/ /mkha' spyod rnams su zhes pa'i don to/ /de ltar chung ngu rnams phyi'i gnas la sogs par yang dag par song ste de dang der song nas de dang der gnas pa'i lha mo dang zhing skyong rnams mchod pa dang gtor ma dang nye bar spyod pa la sogs pa rnams kyis yongs su mnyes par byas te gnas de dang der gnas pa'i rdo rje btsun mo rnams/bsam gtan dang / gtor ma dang / mchod pa dang / sngags bzlas pa dang / bskor ba la sogs pa rnams kyis kun nas mgu bar bya'o//gang rnal 'byor pa 'bring po rnams kyis phyi'i gnas la sogs pa bskor ba las phyir phyogs te dkyil 'khor gyi 'khor lo bsgom pa la mngon par 'jug par byed do/ /gang yang chen po'i chung ngu rnams dkyil 'khor gyi 'khor los sgom pa la mi ltos par/rang gi lus nyid kyi spyi bo la sogs pa rnams su rang rang gi yi ge dang po yongs su gyur pa las/ gnas la sogs pa de dang der gnas pa'i rtsa de dang der lha'i gzugs su bsgom pa la mngon par dga' bar byed do/ /gang yang chen po'i 'bring rnams sa bon gyi yi ge la ltos pa med pa nyid du bskyed pa'i rim pas spyi bo la sogs pa'i gnas rnams su/de dang der gnas pa'i rtsa rnams rdo rje lha mo de dang der lhag par mos te/ bsgom pa la dga' bar byed do//gang yang blo gros chen po rnams/ bskyed pa'i rim pa la gnas te rang gi sems kho na/ lus dang longs spyod la sogs par so sor snang ba stong pa nyid dang snying rje ro gcig pa'i gnas la sogs pa'i rang bzhin/ sa dang pha rol tu phyin pa'i bdag nyid dkyil 'khor gyi 'khor lo ma tshang ba med pa sgom par byed do//bshad pa'i rim pa de thams cad kyis dkyil 'khor nyid gnas la sogs pa de dang der gnas pa'i rdo rje lha mo rnams kyi rang bzhin du brtags te/ de dang der bsgom pa goms par bya'o//zhes 'di thams cad bde bas bsgrub par bya'o/ /ji ltar rigs par kho bo yis/ /bla ma'i man ngag gis bsdus te/ /gnas sogs mdor bsdus pa yi ni/ /gtan la dbab pa skyon med byas/ /gnas sogs gtan la dbab pa 'di bkod las//dge ba zla mdzes ltar mtho gang thob pa'i/ /bsod nams de yis skye ba mtha' dag ni/ /gnas sogs de nyid mthar phyin sangs rgyas gyur/ /gnas la sogs pa gtan la dbab pa rnam par grags pa'i paN+Di ta gnas brtan shAkya rak+Shi ta'i zhabs kyis mdzad pa 'di rdzogs so// //zhes pa 'di nyid 'gro ba mtha' dag gi rnam par 'dren pa lha dang bcas pa'i skye dgu'i gtsug rgyan dam pa spyan snga rin po che'i bka' bzhin gnam lha brgyad gangs kyi ra bas bskor ba'i dbus/ri 'brang rgyas kyi ngogs dpal bde chen yangs pa can gyi gtsug lag khang du/ zha lu lo tsA ba dge slong d+harma pA las bsgyur ba'o// //

CLOSE WINDOW