CLOSE WINDOW

D1540
བོད་ཡིག

@##/ /rgya gar skad du/ /u lo tsa tuSh+Ta yaTI kA nA ma/ bod skad du/ sgron ma bzhi'i TI kA zhes bya ba/ dpal rdo rje mkha' 'gro la phyag 'tshal lo/ /zla ba rdo rje rim las 'das/ /rdzogs pa'i rim pa sngon 'gro ba/ /bde mchog sdom pa'i bdag nyid can/ /sbyor bdag mgon la bdag phyag 'tshal//de dang gnyis med skal ldan ma/ /sprul pa chos dang longs spyod la/ /gnas pa'i dngos rnams 'joms mdzad ma/ /phag mo de la'ang bdag phyag 'tshal/ /sangs rgyas bstan pa'i snying po ni/ /ston byed snying rje'i bdag nyid can/ /grol byed rab tu zhi ba yis//bla ma'i zhabs la bdag phyag 'tshal/ /rnal 'byor rnal 'byor ma rgyud las/ /man ngag shin tu rnyed dka' ba/ /nag po zhabs kyis bsdus byas nas/ /sgron ma bzhi po mdzad pa yin/ /brda' yi skad rnams du ma yis/ /rang byung rnams kyis rtogs par dka'/ /rmongs pa rnams kyis slob dpon du//gzung bas nyams pa dag gis ni/ /phyin ci log pa'i chos bstan pas/ /gzhan rnams la yang nyams par byed/ /de lta'i skyon ni bsal bya'i phyir/ /las kyi rdo rje bdag gis ni/ /tshig re'i sna tshogs don gsal ba'i/ /rmongs pa bsal byed TI kA brtsam//de la dang por brjod pa la sogs pa smra bar bya ba yin te/ gang phyir rigs pa'i rjes su 'brang ba rnams brjod pa la sogs ma gtogs par 'jug par mi 'gyur bas/ /de'i phyir sgron ma bzhi zhes bya ba'i rab tu byed pa ni brjod par byed pa'o/ /sngags dang rgyud dang ye shes dang gsang ba'i lam bstan pa ni brjod par bya'o//de dag gi 'brel ba bstan te/ /brjod pa dang brjod par bya ba'i phyir ro/ /'dod chags la sogs pa'i nyon mongs pa shas che ba'i skye dgu rnams 'dul ba ni dgos pa'o/ /rtsod pa'i dus su yang myur du byang chub thob pa'i thabs bstan pa ni dgos pa'i dgos pa'o//brjod pa dang brjod par bya ba la sogs pa gleng gzhi'i tshig la brten te/ /bsgrub par bya ba'i rten du gyur pa'i phyag rgya bzhis btab pa'i bcom ldan 'das ye shes lnga dang / /sku gsum gyi bdag nyid can gyi spyi dang rang gi mtshan nyid/ /nye bar dmigs pa'i brda gnas kyi khyad par rab tu bstan pas//thabs dang thabs las byung ba'i bsgom pa'i dngos po'i sgo nas kyang / /gnas la sogs pa'i phun sum tshogs pa dang / /sems la dmigs pa thim pa'i rgyur gyur pa/ /rdo rje bzlas pa'i rim pa/ /sngags kyi sgron ma'i sgra'i bye brag gis/ /slob dpon gyis dran par byed de/ / ji ltar zhe na/ /i ni las kyi phyag rgya'o zhes bya ba smos te/ /de la las gtsor gyur ba'i phyag rgya ni las kyi phyag rgya ste/ /rang gi lus bshad do/ /chos kyi phyag rgya zhes bya ba ni/ yi ge a yin te/ chos thams cad kyi dngos por gyur pa'i phyir ro/ /phyag rgya chen po zhes bya ba ni/ /tsaN+Da lI yin te//lhan cig skyes pa'i bde ba 'byung ba'i rtags yin pa'i phyir ro/ /dam tshig gi phyag rgya zhes bya ba ni/ /srog dang rtsol ba'i rlung gi sbyor bas nus pa'i phyir ro/ /slar yang nang gi bshad pa ni/ /las kyi phyag rgya la sogs pas 'khor lo bzhi bshad do/ /ji skad du/ /a ni sa yi khams yin te//las kyi phyag rgya sangs rgyas spyan/ /thugs rje che zhing thabs che ba/ /sna tshogs gzugs can skyed byed ma/ /'dab ma drug cu rtsa bzhi pa/ /sprul pa'i 'khor lor yang dag gnas/ /zhes bya ba la sogs pa gsungs so/ /gsang ba'i bshad pa yang / /las kyi phyag rgya zhes bya ba ni pad+ma'i rtsa a wa d+hU tI'o//chos kyi phyag rgya zhes bya ba ni/ /byang chub kyi sems kyis byin gyis brlabs pa'i rdo rje'i a wa d+hU tI'o/ /phyag rgya chen po zhes bya ba ni/ /de dag las bde ba nyams su myong ba'o/ /dam tshig gi phyag rgya zhes bya ba ni/ /la la nA dang / ra sa nA dag gis gzung zhing 'dzin par bya ba'i don to//gsang ba'i gsang ba la yang / /las kyi phyag rgya zhes bya ba ni/ /mdog dmar po ste de nyid de'i gtso bor gyur pa'i phyir ro/ /chos kyi phyag rgya zhes bya ba ni/ /dkar ba yin te/ /chos nyid la des rgyas btab pa'i phyir ro/ /phyag rgya chen po zhes bya ba ni/ /dpe'i tshul can bzhi pa lhan cig skyes pa bstan te//dam pa'i don chen po la des rgyas btab pa'i phyir ro/ /dam tshig gi phyag rgya zhes bya ba ni/ /tshul khrims 'chal pa spangs pa las dam tshig grub pa'i phyir ro/ /de ltar phyag rgya bzhi'i mtshan nyid bshad nas/ /sdud pa po'i tshig gi 'brel ba bstan par bya ba'i phyir ro//e waM ma yA shro ta/ /zhes tshig gi 'brel bas/ /'di dag bdag gis thos zhes/ /thabs dang shes rab kyi ngo bo/ /ro gcig pa'i bdag nyid bdag gis myong zhes bstan par bya ba'i phyir/ /e ni shes rab po zhes bya ba smos te/ /yi ge e'i rnam pa shes rab kyi b+ha ga bshad de/ rnam par rtog pa nyon mongs pa thams cad bcom pa'i phyir ro/ /ji skad du/ /gang du gtso bo yang dag gnas/ /de ni b+ha gar gsungs pa yin/ /ji srid lus la gnas pa ni/ /de srid las dang las min 'gyur/ /zhes 'byung ngo / /yang na e ni shes rab ces bya ba ni/ /chos kyi dbyings kyi yi ge a'o//shes rab kyi ye shes kyi me'i rgyu yin pa'i phyir shes rab tu bshad do/ /yang na chu skyes kyi dbus su rtsa gsum gyi dbyibs kyi tshul can yi ge e shes rab yin te/ gsang ba gsum nye bar dmigs pa'i gnas la btags pa'i phyir ro/ /yang bshad pa ni yi ge e zhes bya ba ni/ bde ba chen po'i rang bzhin can chos nyid bshad do/ /lus dang ngag dang yid gsum de la ma tshang bas te ko na ste shes rab nyid do/ /rnam par rtog pa thams cad kyi gzhi ma yin pa'i khungs gsungs te/ /ji skad du/ /gang zhig rnam rtog kun gyi gzhi min tshig gi gzhi ma yin/ /de ni shes rab pha rol phyin mar de bzhin gshegs pas gsungs//zhes 'byung ngo / /wa ni thabs so zhes bya ba la/ /yi ge wa ni chu'i sa bon te/ thabs su bstan te/ tshim par byed pa nyid kyis dngos po skyed par byed pa'i phyir ro/ /yang na yi ge wa'i rdzas bde ba chen po'i 'khor lo'i lte ba na gnas pa'i yi ge ha bshad do//bsregs pa rnams gso bar byed pa'i phyir ro/ /ji skad du/ /sangs rgyas rdo rje 'dzin pad+ma/ /rdo rje nyi ma khams gsum dag /rgyas btab rmongs pa thams cad ni/ /thal bar 'gyur ba'ang gso bar byed/ /ces 'byung ngo / /slar yang bshad pa/ /wa zhes bya ba ni/ /yi ge hUM las byung ba'i rdo rje ste skyes bu'i rtags so//de nyid thabs kyi yan lag yin pas na thabs su bsten te/ /ma ning la 'dod chags kyi byang chub med pa'i phyir ro/ /slar yang bshad pa/ /wa zhes bya ba ni rdo rje dang chu skyes dkrugs pa'i dus su rtsa thams cad wa ma na'i phyir ro/ /wa ste thig le'i gzugs can thabs su bshad de//de ni rkyen gyi stobs kyis nye bar 'ongs pa'i phyir ro/ /de ltar e waM gyi rdzas shes rab dang thabs gnyis su med pa'i bsgrub bya nyid du bstan to/ /ji skad du/ /yi ge e ni shes rab ste/ /de bzhin wa ni thabs su bshad/ /thig le mi shigs de nyid de/ /de las 'gro ba gsum po skyes//zhes 'byung ngo / /bsgrub bya goms pa'i gnas bstan par bya ba'i phyir/ sprul ba'i 'khor dang zhes bya ba smos te/ /dbang chen gyi dkyil 'khor thams cad kyi gzhir gyur pa'o/ /dngos po thams cad de las skyes pas na sprul pa ste lte ba'i gnas so/ /chos kyi 'khor lo zhes bya ba ni//phung po dang khams la sogs pa mngon par gsal bar byed pa'i rgyu ste/ /chu yi dkyil 'khor khu ba'i tshul can snying ga'i gnas so/ /longs spyod kyi 'khor lo zhes bya ba ni/ /me'i dkyil 'khor te/ /dro ba nyid kyis rdzas swom pa la gnas pa'i ro drug gi longs spyod pa'i rgyur 'gyur bas na longs spyod de//mgrin pa'i gnas so/ /bde ba chen po'i 'khor lo zhes bya ba ni/ /rlung gi dkyil 'khor te/ /g.yo ba dang 'gul ba la sogs pa'i rgyu yin pas bde ba chen po'i 'khor lo spyi bo'i gnas zhes bya ba'i don to/ /ji skad du/ /sprul pa chos dang longs spyod dang / /bde ba chen po de bzhin te//skye gnas snying ga mgrin spyi bor/ /sku gsum po ni rnam par gnas/ /sems can ma lus pa rnams kyi/ /gang du skye ba rab tu brjod/ /de ni sprul ba'i 'khor lo ste/ /gang phyir sprul pa gnas brtan pa'i/ /chos ni sems kyi rang gzugs can/ /chos kyi sku ni snying gar gnas//ro yi gzugs can drug rnams la/ /longs spyod pas na longs spyod bshad/ /mgrin par longs spyod 'khor lo ste/ /bde ba chen po spyi bo nas/ /zhes rgyud kyi tshig 'di las nyan thos kyi sde ba 'dus par shes par bya'o/ /yang bshad pa/ /gzhi tsam gyi mngon par zhen pa spangs te/gzhi can rnams gtso bo nyid kyi 'khor lo nyid du// bshad par bya ste/ /de la sprul pa'i 'khor lo zhes bya ba ni/ brjod du med pa'i yi ge a las/ /ngag gi 'gyur ba thams cad sprul pa'i 'khor lor sprul zhing skyes pa na yi ge e nyid sprul pa'i 'khor lo ste/ /rgyu la 'bras bu'i ming btags pa'i phyir ro//chos kyi 'khor lo zhes bya ba ni/ /de'i 'bras bur gyur pa phung po lnga'i tshig rnam par dag pa'i mtshan nyid can yi ge hUM bshad do/ /longs spyod kyi 'khor lo zhes bya ba ni/ /'dod pa'i yon tan la dmigs par byed pa'i yi ge oM mo/ /yul can la yul gyi ming btags pa'i phyir ro//bde ba chen po'i 'khor lo zhes bya ba ni/ /rang rig pa'i bde ba chen po'i rgyur gyur pa/ mgo med mi shigs pa thur tu blta ba yi ge ha'o/ /de nyid khyab par byed pa yin pas na/ /'khor lor bstan te/ ji skad du/ 'khor lo shugs chen mkha' dbyings zhes//yul la sogs pa rnam sbyong byed/ /ces dgyes pa'i rdo rje las 'byung ngo / /yang bshad pa/ /sprul pa'i 'khor lo zhes bya ba ni/ shes rab bo/ /sangs rgyas la sogs pa thams cad skyed par byed pa yin pa'i phyir ro/ /de nyid 'khor lor bstan te/ dmigs pa dang bcas pa'i shes rab kyi phyogs su las kyi phyag rgya la sogs pa'i rnam par so sor snang ba'i phyir ro//chos kyi 'khor lo zhes bya ba ni/ thabs kyi ngo bo nyid/ zhal dang phyag dang sku mdog dang dbyibs kyi bdag nyid he ru ka'i rnam pa yin te/ dngos po'i mtshan nyid yin pa'i phyir ro/ /de nyid 'khor lor bstan pa ni//de bzhin gshegs pa thams cad kyi bdag nyid yin pa'i phyir ro/ /longs spyod kyi 'khor lo zhes bya ba ni/ thabs dang shes rab snyoms par zhugs pa las/ tha mal pa'i nga rgyal log pa las longs spyod pa ste/ /'khyud pa dang tsum+ba na la sogs pas/ de bzhin gshegs pa thams cad rjes su chags par byed pa'o//de nyid mang bas na 'khor lor bshad do/ /bde ba chen po'i 'khor lo zhes bya ba ni/ /rol pa'i dus su man ngag gi rjes su 'brang ba las/ /rnam par mi rtog pa'i bde ba chen po thob pa'o/ /rnam pa sna tshogs la khyab par byed pas na de nyid 'khor lor bshad do//ji skad du/ 'gro kun bde bas khyab pa yi/ /zhes 'byung ngo / /yang bshad pa ni/ sprul po'i 'khor lo zhes bya ba ni/ pad+ma'i dbus na gnas pa'i rtsa'i 'khor lo'o/ /rdo rje dbyings kyi dbang phyug ma la sogs pa lha mo'i ngo bo nyid yin pa'i phyir ro/ /chos kyi 'khor lo zhes bya ba ni/chos ni 'od dpag tu med pa ste shu kra'o/ /de 'dzin pas na chos kyi 'khor lo ste/ rdo rje'i chang gzungs na gnas pa'i rtsa'i 'khor lo'o/ /de bzhin gshegs pa'i ngo bo nyid yin pa'i don to/ /longs spyod kyi 'khor lo zhes bya ba ni/ rtsa'i 'khor lo gnyis ka 'dus pa las//de bzhin gshegs pa dang lha mo dag gi longs spyod pa ste/ 'jig rten las 'das pa'i phyir ro/ /de nyid ro gcig pa yin pas 'khor lor bshad do/ /bde ba chen po'i 'khor lo zhes bya ba ni/ /de la mthar thug pa'i rnal 'byor pas 'bras bu thob par bya ba'i don to/ /de ltar 'khor lo bzhi bshad nas//sngags kyi sgron ma'i gnas skabs su/ /rlung gi de kho na nyid sngon du 'gro bas dag rnam pa bzhi gnas bzhi la rnam par bkod nas/ /rdo rje bzlas pa'i rim pas rnam par dben pa bstan par bya ba'i phyir/ A li dang kA li ni g.yas dang g.yon pa'o zhes bya ba smos te/A li ni snang ba'i ye shes te g.yon na zla ba'i ngo bo nyid do/ /kA li ni snang ba mched pa'i ye shes te/ g.yas na nyi ma'i ngo bo nyid do/ /ye shes de gnyis kyis ting nge 'dzin la rjes su 'jug cing sems ni rtsa dbus ma la 'jug par bya ste/ snang ba thob pa'i ye shes kyi ting nge 'dzin la gnas shing //'od gsal ba'i thig le tsam snying gar dmigs te/ /de'i g.yas pa'i cha'i sgo las rlung spros te/ steng gi sna'i bug pa g.yas pa nas bcu gnyis kyi mtha'i bar du phyir zhing / /slar yang g.yon pa nas khugs te/ dbus su gnas par bsam par bya'o/ /de ltar yang dang yang du goms shing rlung la dbang thob pas rlung gi de kho na nyid bstan to//ji skad du/ srog ni rgyu ba'i tshad ma ni/ /lan gnyis goms pa'i go 'phang gis/ /dgod pa de ltar byed 'gyur na/ /'jig rten mgon po'i sku 'drar 'gyur/ /zhes rigs kyi spyan ras gzigs kyi lnga pa las 'byung ngo //de la mchog gi ngag ni ma skyes pa'o/ /mthong bar gyur pa ni 'jug pa'o/ /khong na gnas pa ni thig le'i gzugs can no/ /tha snyad kyi ngag ni phyir song ba'o/ /yang bshad pa/ /A li dang kA li ni g.yas dang g.yon pa zhes bya ba las/ A li dang kA li'i gzugs can srog dang rtsol ba'o//lte ba'i 'og nas brtsams te/ /steng gi sna'i bug pa gnyis nas/ /mda'i shugs bzhin du nges par 'byung zhing 'jug pa'o/ /de'i phyir rnal 'byor pas/ /thung ba dang ring ba'i bye brag gis gnas pa'i/ /A li dang kA li A I zhes bya ba la sogs pas/slob dpon gyis bstan pa de dag ngag rnam pa bzhi'i ngo bo nyid du 'khor lo bzhi la rta rgod bzhin du bcing bar bya'o zhes dgongs so/ /gsang ba'i bshad pa ni/ /A li dang kA li zhes bya ba ni/ A li ni bung ba'o/ /de dang cha mthun pas rdo rje bstan te/ bde ba chen po'i pad+ma ze'u 'bru'i snying po len par byed pa'i phyir ro//de nyid g.yon pa smos pa ni wa zhes bya ba smos pa ste/ rdo rje ste byang chub kyi sems so/ /ma zhes bya ba ni ma hA ste bde ba chen po bstan te/ gnyi ga'i bdag nyid yin pa'i phyir ro/ /kA li zhes bya ba ni/ pad+mar brten te/ rdo rje za bar byed pa'i phyir ro//de nyid g.yas pa zhes bya ba ni/ /dak+She Na zhes bya ba'o/ /de la da ni da na ste me'i ngo bo nyid do/ /k+She zhes bya ba ni chos kyi dbyings su skul bar byed pa'o/ /pa ni skul bar byed pa'i don skad kyi dbyings las 'byung ngo / /Na zhes bya ba ni dgag pa'i don to/ /des na tha mal pa'i rnam par rtog pa dgag pa'o//ji skad du/ A li kA li brda yis ni/ /bung ba chu skyes ngo bo nyid/ /der ni snying po myang byas nas/ /dpyod pa med par thim par 'gyur/ /zhes bshad pa'i rgyud las 'byung ngo / /gsang ba'i gsang ba la yang / /A li ni shu kra'o/ /kA li ni mtshal chen te zla ba dang nyi ma'i ngo bo nyid yin pa'i phyir ro//g.yon pa dang g.yas pa zhes bya ba ni g.yon pa dang g.yas pa'i rtsa la gnas pa thabs dang shes rab snyoms par zhugs pas/ /de dag 'dres par gyur pas/ /chos kyi dbyings kyi ye shes rtogs par 'gyur zhes rtogs par bya'o/ /ji skad du/ skye gnas dbus na rtsa gnyis te//g.yon dang g.yas su yang dag gnas/ /g.yon par shu kra zhes bya ste/ /g.yas su de nyid khrag nyid do/ /gnyis ka 'dres par sa gcig gyur/ /chos kyi dbyings kyi 'dus pa'o/ /zhes lha mo bzhis zhus pa'i rgyud las 'byung ngo / /a I zhes bya ba la sogs pa bshad zin to//a ka tsa Ta zhes bya ba la sogs pas g.yul dkrugs pa'i sngags bstan to/ /nang gi bshad pa yang / /a ka tsa Ta ta pa ya sha zhes sde tshan brgyad kyi dbus na gnas pa'i yi ge a gsung gi rdo rje'i rang bzhin can dngos grub brgyad kyi rgyu yin par shes par bya'o/ / yang gsang ba'i bshad pa ni/ a ka tsa Ta zhes bya ba la sogs pa la/ shes rab 'char ba'i dus su rnam par shes pa'i tshogs brgyad gnas gyur pas dur khrod brgyad kyi mtshan nyid bstan to/ /ji skad du/ rnam shes brgyad po rnam dag pas/ /dur khrod brgyad kyis yongs su bskor/ / gsang ba'i gsang ba la yang / /a ka tsa Ta zhes bya ba la sogs pa ni/ /re ler ge'i rnal 'byor las 'byung ba dang / oM traM hraM khaM hUM lAM mAM pAM tAM/ chos kyi 'khor lo la zhes bya ba ni/ phung po dang khams la sogs pa'i chos du ma rnams/ rgyur bsdus pa'am spros pa yongs su spang bar bya ba'i phyir/hUM gcig pu dgod par bya ba'i don to/ /nang gi bshad pa la/ rnam par snang mdzad la sogs pa'i de bzhin gshegs pa lnga dang / lha mo bzhi'i sa bon bzhi phung po dang khams rnam par dag par bya ba'i phyir chos kyi 'khor lo la dgod ces bya ba bstan to/ /gsang ba'i bshad pa ni/shes rab dang 'brel ba'i dus su oM traM zhes bya ba la sogs pa'i rdzas phung po 'byung ba'i rtsa'i 'khor lo zhes bya ba ni/ /rtsa dbus ma la bkod nas bsgom zhes bya ba'i don to/ /gsang ba'i gsang ba bshad pa ni/ /oM traM zhes bya ba la sogs pa'i yi ge dgus po la dang kak+ko la'i dus su de bzhin gshegs pa dang lha mo nye bar dmigs pa de kho na dgod pa'o//chos kyi 'khor lo zhes bya ba ni chos nyid la sbyar bar bya ste/ /de bzhin gshegs pa rnams kyang yi ge'i ngo bo yin pa'i phyir ro/ /k+Sha ra ni g.yo ba'o/ /a ni dgag pa'i don to/ mi g.yo zhing mi shigs pas na a k+Sha ra ste/de bzhin nyid bstan to/ /ji srid du/ bo la kak+ko la'i sbyor ba las/ /reg pas sra ba'i bag chags ni/ /sra ba gti mug chos kyi bdag /gti mug rnam par snang mdzad 'dod/ /ces bya ba la sogs pa 'byung ngo / /slar yang de nyid du gsungs pa/ bo la kak+ko la'i sbyor bas/ /de las sa ni skya bar 'gyur/ /zhes bya ba la sogs pa'i tshig las khams kyi lha mo bzhi shes par bya'o/ /sprul pa'i 'khor lo la ni a zhes bya ba ni sngags thams cad kyi skye ba'i rgyu yin pa'i phyir sprul pa'i 'khor lo'i lte bar bsgom par bya'o/ / oM A I a U A/ longs spyod kyi 'khor lo la zhes bya ba ni/ /longs spyod kyi 'khor lo la ni/ /dkyil du oM gtso bo ste/ 'jug pa'i rlung gi mtshan nyid/ /'byung ba las gyur lha mo sa bon gyis bskor ba de'i ro nyams su myong bas brjod du med pa'i mtshan nyid gsung gi rdo rje ste thabs su bshad do//bde ba chen po'i 'khor lo la ni haM ngo zhes bya ba ni/ byang chub kyi sems ngo bo nyid sems kyi zla ba/ srid pa dang mya ngan las 'das pa'i rgyur gyur pa'i yi ge ha'i gzugs su bsgom par bya ba yin te/ bde ba chen po'i brjod pa'i ngo bo yin pa'i phyir ro/ /de gang du bsgom zhe na//bde ba chen po'i 'khor lor zhes pa ni/ /spyi bor bsgom zhes bya ba'i don to/ /da ni rlung gi de kho na nyid sgom par byed pa'i rnal 'byor pa la/ /dus ma yin pa'i 'chi ba bzlog pa bstan par bya ba'i phyir ro/ /steng dang 'og tu srung ba zhes bya ba ni/ ra dang k+Sha zhes yi ge gnyis po srung ba'i don du dgod par bya'o//steng du zhes bya ba ni/ dung 'bud ma'i steng du yi ge re pha'o/ /'og tu zhes bya ba ni/ dung 'bud ma'i 'og gi cha ru yi ge k+Sha'o/ /de ltar rdo rje mkha' 'gro dang / rdo rje mkha' 'gro ma gnyis kyi sa bon zla ba dang nyi ma'o zhes bya ba ni/ thabs dang shes rab mig lta bu gnyis kyis bsrung zhing byar bya'o//de bzhin du yang steng gi tshangs pa'i sgo zhes bya ba yi ge gnyis kyis bsrung bar bya'o/ /de ci'i phyir zhe na/ steng dang 'og gi sgo gnyis gnad phye ba zhes bya ba smos te/ 'chi ba'i dus sam/ /gzhan gyi 'khrul 'khor gyi dus su steng ngam 'og gi sgo gnyis phye nas srog 'byung bar 'gyur bas de'i phyir na/gnad kyi sgo phye ba zhes bstan pas/ de bsrung bar bya zhes dgongs so/ /sgo bsrung ba'i rjes la srog dang rtsol ba dang rlung rgyu ba'i gnas dang / grangs dang / ngo bo dang / de kho na nyid rab tu bstan par bya ba'i phyir//'gro ba dang 'ong ba ni rnal 'byor rnam pa bzhi zhes bya ba smos te/ 'gro ba dang 'ong ba ni 'byung ba dang 'jug pa'i mtshan nyid can gyi rlung gnyis sna'i rtse mor yungs kar gyi tshad tsam du bsams la rlung gi de kho na nyid la goms par bya'o/ /ji skad du/ sna rtser yungs kar zhes bya ba/srog dang rtsol ba brtag pa'o/ /zhes 'byung ngo / /de nyid kyi 'byung ba bzhi'i ngo bo nyid kyis rnal 'byor bzhi rig par bya'o/ /yang bshad pa/ snying ga'i dbus kyi rtsa'i phyogs bzhi'i nang du rlung gi tshogs thig le'i gzugs su bsgoms te/ de'i g.yas pa'i cha las srog gi rlung 'byung zhing 'jug pa dang rngub pa dang /thim par 'gyur zhes rlung lnga'i de kho na nyid la goms par bya'o/ /ji skad du/ sems can kun gyi srog 'gyur ba/ /rlung zhes bya ba las kun byed/ /'di ni rnam shes bzhon pa ste/ /lnga yi bdag nyid bcu yang yin/ /zhes 'byung bas so/ / yang bshad pa/ sprul pa'i 'khor lo'i lte bar chud pa yi ge a'i g.yas pa'i las srog bslang ste/ steng gi sna'i bu ga g.yas pa nas phyir spros te/ snga ma bzhin du thim par bya zhes dgongs so/ /gsang ba'i gsang ba ni/ thabs dang shes rab snyoms par zhugs pa las byang chub kyi sems kyi thig le//gsang ba'i sna'i rtse mor spros te/ rlung gi de kho na nyid la goms par bya'o/ /ji skad du/ ye shes lnga yi rang bzhin dbugs/ /'byung ba lnga yi ngo bo nyid/ /gong bu'i gzugs su phyung nas ni/ pad+ma'i sna rtser brtag par bya/ /zhes bya ba la sogs pa shes par bya'o//rgyu ba'i rlung bzhi'i ming bstan par bya ba'i phyir/ /myur ba dang / rlangs pa dang / rnam par bcings pa dang / zhi ba'o zhes bya ba smos te/ myur ba ni 'byung ba'i rlung ngo / /rlangs pa ni 'jug pa'i rlung ngo / /rnam par bcings pa ni gnas pa'i mtshan nyid do/ /zhi ba ni rim gyis thim zhing 'gog par gyur pa lnga pa zhes bya ba'i don to//de lta bu rlung gi de kho na nyid la dmigs te ji bzhin bshad pa'i gnas mi 'dor zhing / /rlung la dbang ba thob nas las kyi rab 'byam dang rjes su mthun pa'i kha dog gis/ /'byung ba dang / 'jug pa la sogs pa dag gis 'gro ba'i don bya'o//gnas dang grangs so sor bstan par bya ba'i phyir/ /steng dang 'og dang logs drang po dag go zhes bya ba smos te/ /steng ni thig le'i spyi bo'i phyogs so/ /logs ni g.yon pa dang g.yas pa dag go/ /drang po zhes bya ba ni/ dbus kyi chang gzungs kyi gnas so/ / 'og ces bya ba ni 'og gi cha'o/ /de ltar sa dang chu dang me dang rlung dang nam mkha' zhes bya ba'i gnas lnga/ /de dang 'brel pa'i phung po lnga'i rgyur gyur pa/ de bzhin gshegs pa lnga'i ngo bo nyid srog dang rtsol ba dang mnyam pa dang / khyab pa dang / gling bzhir gyur pa dang / gyen du rgyu ba'i yan lag gi rlung dang bcas par nges par byung nas las gnyis gnyis byed par 'gyur zhes bstan to//ji skad du/ steng gi sna las nges 'byung zhing / /g.yas dang g.yon dang gnyi ga dang / /dal ba dang ni rnam bzhir 'gyur/ /nang gi dus ni yin par bshad/ /'gro snying lte ba gsang pad+mar/ /'gro ba dang ni 'ong ba bstan//thun ni phyed phyed dus dag tu/ /go rims ji bzhin gnas par bstan/ /g.yas pa nas ni 'byung ba'i 'od/ /me yi dkyil 'khor nyid yin te/ /gsal zhing kha dog dmar ba ni/ /pad+ma'i mgon po'i rgyu ba'o/ /g.yon pa nas ni 'byung ba'i 'od/ /rlung gi dkyil 'khor la gnas pa/ljang ser dag tu snang ba ste/ /las kyi mgon po'i rgyu ba'o/ /gnyi ga la ni 'byung ba'i 'od/ /kha dog ser po gsal ba che/ /dbang chen dkyil 'khor nyid yin te/ /rin chen mgon po'i rgyu ba'o/ /dal zhing dman par rgyu ba ni/ /dkar zhing kun da zla ba mtshungs//chu yi dkyil 'khor nyid yin te/ /rdo rje mgon po'i rgyu ba'o/ /lus kun la ni gnas pa'i rlung / /bya ba kun la 'jug byed pa/ /'di ni rnam snang rang bzhin te/ /shi ba'i lus las 'byung bar 'gyur/ /rlung gi de nyid gsal ba 'di/ /ye shes lnga yi ngo bo nyid/ /rnal 'byor nus pa'i yul min zhing //rtog ge pa yis mi shes so/ /de ltar rlung gi de kho na nyid kyi rjes su 'brang zhing / /sngags kyi de kho na nyid dang / rdo rje bzlas pa goms par bya/ /zhes slob dpon gyis mtshon par mdzad de/ /rlung gi de kho na nyid dang / /sngags kyi de kho na nyid sngon du 'gro ba'i rdo rje bzlas pa'i man ngag gi rim pa bstan par bya ste//de yang rlung 'jug pa dang / gnas pa dang / ldang ba'i mtshan nyid can/ /gsum po sku dang gsung dang thugs kyi ngo bor bsdus la/ /yi ge gsum gyi sngags su bsgom pa'am/ rang dad pa'i lha'i sngags kyi phreng bar sbyar na/ don rtogs pa la sogs pa'i yan lag dang /nye ba'i yan lag dang / nying lag rnams kyis ma nyams pa'i rdo rje bzlas pa nyi khri chig stong drug brgya nyin dang mtshan du dkyil 'khor bzhi'i grangs kyis/ gos dkar la sogs pa'i rang bzhin du shes par bya'o/ /ji skad du/ don rtogs pa yi bzlas pa ni//ngo bo nyid med yid 'ong bas/ /dus gsum sangs rgyas rtogs pas na/ /rdo rje bzlas par de bshad do/ /slong mo za zhing mi bzla ste/ /ma blangs pa la chags mi bya/ /'dod pa kun la longs spyod cing / /sngags kyi yan lag bzla bar bya/ /gos dkar la sogs bzlas bshad pa//brgya phrag gnyis dang nyi shu lnga/ /bzhi po legs par bsgres nas ni/ /sbyor bzhi bsdus pas brgya phrag dgu/ /dgu brgya dag tu gang bstan pa/ /nyi shu rtsa bzhi'i rim gyis ni/ /de ni so sor 'byung ba las/ /nyi khri chig stong drug brgya'o/ /zhes 'byung bas so/ /de ltar sems la dmigs pa thob par byed pa rdo rje bzlas pas//phyi'i bzlas pa g.yeng ba can bkag nas/ /gzhan bskyed pa'i rim pa spros pa can gyis bsgom pa/ /dngos po'i khyad par dgag par bstan par bya ba'i phyir/ /ting nge 'dzin gsum zhes bya ba smos te/ sngon du bshad pa'i drung gi de kho na nyid du ting nge 'dzin gsum po yang dag par bsdus te/ji ltar zhe na/ dang po'i sbyor ba zhes bya ba smos te/ sna'i rtse mor srog dang rtsol ba dag gong bu'i gzugs su bsgom pa ni dang po'i sbyor ba'o/ /dkyil 'khor rgyal ba mchog gi ting nge 'dzin zhes bya ba ni/ /snying gar rtsa lnga'i 'khor lo'i dbus su thig le lnga bsams nas/chos kyi dbyings kyi ye shes 'bar bar 'gyur/ /zhes dkyil 'khor gyi mtshan nyid bstan/ /thig le thams cad nye bar bsdus pas/ /rang rig pa'i ye shes 'bar ba'i dus su/ /mtshan ma mthong ba ni/ /las kyi rgyal ba mchog gi ting nge 'dzin bstan to//slar yang bshad pa/ dang po'i sbyor ba zhes bya ba la/ 'khor lo bzhi bsgom mo/ /dkyil 'khor rgyal ba mchog gi ting nge 'dzin zhes bya ba ni/ 'khor lo'i dbus su de bzhin gshegs pa dang / lha mo rnams kyi sa bon bkod pa'o//las kyi rgyal ba mchog gi ting nge 'dzin zhes bya ba ni/ mkha' 'gro ma spro bar bya ba ste/ phung po dang khams dang skye mched la sogs pa snang ba med par bya'o/ /gsang ba'i bshad pa la yang / /dang po'i sbyor ba zhes bya ba ni/ /rdo rje dang pad+ma byin gyis brlab pa'o/ /dkyil 'khor rgyal ba mchog gi ting nge 'dzin zhes bya ba ni/b+ha ga'i dbus su rtsa lnga'i 'khor lo la dmigs te/ bdud rtsi lnga'i 'khor lo ngo bo nyid du spro ba'o/ /las kyi rgyal ba mchog gi ting nge 'dzin zhes bya ba ni/ rtsa lnga'i sbubs las thig le gcig tu 'gugs te 'dzin pa'o/ / gsang ba'i gsang ba bshad pa ni/ dang po'i sbyor ba zhes bya ba la/ srub dang bsrub bya'i sbyor ba'o/ /dkyil 'khor rgyal ba mchog gi ting nge 'dzin zhes bya ba ni/ byang chub kyi thig le las sangs rgyas thams cad 'du shes yongs su shes pa'o/ /las kyi rgyal ba mchog gi ting nge 'dzin zhes pa ni/rdo rje las kyi pha rol tu phyin pas rang rig pa'i bde ba myong ba'o/ /bskyed pa'i rim pa'i bsgom pa bkag nas/ da ni phyi'i rab tu gnas pa dang / bsnyen pa la sogs pa dang / 'bras bu la sogs pa nang gi bdag nyid du 'dus pa'i phyir/ 'di ltar spyan drang ba dang zhes bya ba ni/ 'jug pa'i rlung gis sangs rgyas thams cad me long lta bu'i ye shes la 'dus pa'i phyir ro/ /gshegs su gsol ba zhes bya ba ni/ ldang ba'i rlung gi sangs rgyas thams cad kyi rang bzhin shin tu rnam par dag pa nyid du 'gro ba rnams so sor snang ba'i phyir ro/ /bzhugs su gsol ba zhes bya ba ni/gnas pa'i rlung gis sangs rgyas thams cad mngon du so sor kun du rtog pa'i ngo bo nyid du rab tu gnas pa ni bzhugs su gsol ba zhes bya ba'i don to/ /de la rab tu gnas pa'i 'bras bu zhes bya'o/ /rim gyis rim gyis rlung rnam par zhi zhing thim par gyur pa ni/ /bla na med pa'i dngos grub nyid du shes par bya zhes dgongs so//ji skad du/ /'jug pa yis ni spyan drangs te/ /myur ba yis ni gshegs su gsol/ /gnas pa yis ni bzhugs su gsol/ /rnam bzhi bla med dngos grub bo/ /zhes 'byung ngo / /slar yang bshad pa/ spyan drangs pa zhes bya ba la/ rdo rje mkha' 'gro ma bskul ba'o/ /gshegs su gsol zhes bya ba ni/ /'jig rten gyi khams mtha' yas su spro ba'o/ /bzhugs su gsol ba zhes bya ba ni/ spu ri'i yi ge la 'jug pa ste/ rab tu gnas par shes par bya'o/ /rang rig tsam du ngal so pa ni bla na med pa'i dngos grub bo/ / gsang ba'i bshad pa ni/ spyan drangs ba zhes bya ba la shes rab la 'khyud pa'o/ /gshegs su gsol ba zhes bya ba ni/ dga' bral gyi gnas skabs su sangs rgyas kyi gzugs su spro ba'o/ /de'i gong bu thig le 'dzin pa ni rab tu gnas par shes par bya'o/ /dpe lhan cig skyes pa grub pa ni rab tu gnas pa'i 'bras bu rtogs par bya'o//yang bshad pa spyan drangs pa zhes bya ba ni/ 'dod chags chen po'i ting nge 'dzin la gnas te/ 'dod chags thams cad dgug pa'o/ /gshegs su gsol ba zhes bya ba ni de bzhin gshegs pa dang lha mo dang khro bo'i gzugs su spro ba'o//gshegs su gsol ba zhes bya ba ni/ khu ba'i thig le'i ngo bo nyid du bsams pa ni rab tu gnas pa shes par bya'o/ /de la gshegs su gsol ba ni bzhugs su gsol ba'i go rims bzlog nas shes par bya'o/ /spyan drangs ma thag par rab tu gnas pa'i phyir ro/ /des na gshegs su gsol ba'i rjes la yang lha mo dang khro bo'i gzugs kyis sems can thams cad kyi re ba sna tshogs yongs su skong ba ni rab tu gnas pa'i 'bras bur shes par bya'o//bsnyen sgrub kyi yan lag bzhi po yang nang gi don du bshad par bya ste/ /bsnyen pa zhes bya ba ni/ /tshig snyan pa rnams kyang shes rab ma mnyes par byed pa'o//nye bar sgrub pa zhes bya ba ni/ /de la dmigs te rnal 'byor dang bsgoms pas rangs pa bskyed pa'o/ /sgrub pa zhes bya ba ni/ yongs su tsum+ba na dang 'o ma 'dzin pa la reg pa'o/ /sgrub pa chen po zhes bya ba ni/ de'i snang bas dga' chen gyi sbyor ba'o//ji skad du/ rtsom pas rgyas pa'i rol byed mas/ /skyes pa gzhan ni phyis mi 'dod/ /bsgoms pas mnyes pa'i rol byed mas/ /rnal 'byor pa gzhan 'dod mi 'gyur/ /zhes 'byung ngo / /slar yang bshad pa bsnyen pa zhes bya ba la/ sngon du bshad pa'i phyag rgya'i b+ha ga'i g.yon phyogs na gnas pa'i sha shi na di mig gi phyag rgyas dgug pa'o//'dod chags chen po'i de kho na nyid bskul ba la bsnyen par bshad do/ /nye bar sgrub pa zhes bya ba ni/ dzi hwa 'jug pa'o/ /sgrub pa zhes bya ba ni/ gnam lcags dang 'dam skyes phrad pa'o/ /sgrub pa chen po zhes bya ba ni/dga' ba dam pa'o/ /ji skad du/ cung zad sor mos bskul bar bya/ /slar yang lce yi gtsag bu yis/ /bde ba dam pa rab rgyu ba'i/ /rtsa de shin tu rgyas par 'gyur/ /zhes 'byung ngo / /yang gsungs pa/ gang yang rung ba thob gyur nas/ /lang tsho ro yis rab rgyas pa//rjes su mthun zhing g.yo sgyu med/ /bsnyen pa'i tshig gis ma nyes byas pa/ /yongs su brtsams dang a d+har myang / /de la sogs pa'i las rnams kyis/ /rig ma dben par mnyes byas te/ /de nas yid 'byung sad par bya/ /mdzub mo gung mos mnan byas te/ /btsir zhing lte bar drang bar bya//grang min reg pa rnyed pa ru/ /rnyed pas de bzhin dgyes par 'gyur/ /zhes 'gro ba rab tu 'byed pa las 'byung ngo / /de la yang gsungs pa/ bsnyen pa zhes bya ba la sogs pa la/ bsgrub bya sgrub byed sbyor ba yis/ /gang phyir bsnyen pa zhes brjod do/ /rdo rje pad+ma mnyam sbyor ni//de nyid nye bar sgrub par 'dod/ /yi ge hUM dang phaT bcas ni/ /bsgrub pa bskyod par gsungs pa yin/ /rang bde zhi ba rang ngo bo/ /bsgrub pa chen po yin par 'dod/ /ces gsang ba 'dus pa las gsungs so/ /gsang ba'i gsang bar bshad pa ni/ /bsnyen pa zhes bya ba la/ phyag rgya chen po'i dbang bskur ba'i dus su ni/ bde ba chen po'i ye shes dran pa'o/ /de'i stobs kyis bo la'i nang du 'jug pa ni nye bar sgrub pa'o/ /rdo rje skye mched ni sgrub pa'o/ /de nyid 'dzin pa ni sgrub pa chen po'o/ /bo la'i bde ba phyag rgya che/ /rdo rje'i skye mched thabs su bshad/ /nang gi snyoms par 'jug pa 'dis//phyi yi gnyis gnyis ma bstan to/ /zhes dgyes pa'i rdo rje las 'byung ngo / /rnal 'byor gyi 'bras bu bstan par bya ba'i phyir/ 'bras bu bzhi zhes bya ba smos te/ rgyu mthun pa ni lte ba chags pa'i kun gzhi rnam par shes pa ste/ mi gsal bar bstan te/ snga ma dang phyi ma'i bag chags rnams mi gsal ba'i phyir ro/ /rnam par smin pa zhes bya ba ni/ yid kyi rnam par shes pa snying gar gsal ba yin te/ gsal bar nyams su myong ba ni/ rnam par smin pa'i mtshan nyid yin pa'i phyir ro/ /skyes bu byed pa zhes bya ba ni/ mgrin par sgo lnga'i rnam par shes pa'i rtsol bas 'dod pa'i yon tan longs spyod bsgrubs pa ni/skyes bu byed pa'i 'bras bu bstan te/ bza' ba po dang / bza' ba'i mtshan nyid yin pa'i phyir ro/ /dbang gi 'bras bu zhes bya ba ni/ spyi bor chags pa'i yid kyi rnam par shes pas tshogs kyi skye mched du shin tu dbang byed pas na/yid kyi rnam par shes pa ni dbang gi 'bras bu'o/ /de ltar 'khor ba'i 'bras bu bstan nas/ da ni byang chub pa'i gnas skabs su/ thar pa'i 'bras bu rnam pa bzhi/ slob dpon gyi ngag las 'di ltar rtogs par bya ste/ sprul pa'i 'khor lor zag pa med pa sa bon gyi tshul can yi ge a la dmigs te/'od gsal ba'i ye shes ni rgyu mthun pa'i 'bras bu bstan to/ /rgyu rnam par dag pa las/ 'bras bu rnam par dag pa skye bar 'gyur zhes dgongs so/ /de nyid lta ba bdag tu 'dzin pa la sogs pa'i nyon mongs pa chos kyi 'khor lor bsreg par bya ste/ye shes kyi snang ba'i khyad par nyid kyis rnam par smin pa 'bras bur bshad do/ /'dod pa'i yon tan lnga gnas su gyur pa'i mtshan nyid can/ bya ba nan tan grub pa'i ye shes kyis/ sems can ma lus pa'i don byas nas/ longs spyod kyi 'khor lor dag gi spros pa thams cad las log par/brjod pa'i ngo bo med pa nyid du gnas pa ni skyes bu byed pa'i 'bras bu'o/ /ji skad du/ yang dag pa'i shes pa sngon du 'gro ba ni/ skyes bu med pa'i don thams cad grub par byed pa zhes bya ba la sogs pa 'byung ngo / /sngon du bshad pa'i 'od gsal ba'i ye shes 'bar bar gyur pas/ bde ba chen po'i 'khor lo la gnas pa'i 'dod chags kyi dri ma'i ri bong 'dzin pa zag pa dang bcas pa so sor rtog pa'i ye shes kyi mes bsregs te/zag pa med pa'i byang chub kyi sems kyi mtshan nyid ni/ dri ma med pa'i 'bras bu'am dbang gi 'bras bu zhes bya ste/ rnal 'byor gyi dngos grub kyi 'bras bur shes par bya'o//gsang ba'i bshad pa la yang / sngags kyi theg pa 'dir dbang po gnyis la sogs pa'i bde ba la brten te/ bde ba chen po thob pa ni rgyu mthun pa'i 'bras bu ste/ bde ba las bde ba 'byung ba'i phyir te/ yongs su rdzogs pa'i rnal 'byor ba la de nyid longs spyod du gyur pas ni/rnam par smin pa'i 'bras bu'o/ /de'i mi mthun pa'i phyogs spong ba ni/ skyes bu byed pa'i 'bras bu ste/ mi mthun pa'i phyogs las rgyal ba ni/ skyes bu byed pa'i 'bras bu yin zhes rigs pa'o/ /de bas na mtha' med pa'i bde ba la gnas pa ni/ dri ma med pa'i 'bras bu ste/ rtog pa med pa'i phyir/ dgra dang rtsod pa'i dri ma bkrus pa'i skyes bu ltar ro/ /gsang ba'i gsang ba bshad pa ni/ shes rab dang 'brel pas byang chub kyi sa bon zag pa ni/ rgyu mthun pa'i 'bras bu ste/ spyan du zag par byed pa'i don/ /zhes skad cig dbyings las 'byung ba'i phyir ro//rnam par smin pa'i 'bras bu zhes bya ba ni/ thig le thams cad gcig tu gyur pa'o/ /yang yongs su smin pa'i 'bras bu ni/ ro sna tshogs log pa las/ rang gi rigs dang mthun pa'i ro gcig tu smos pa ltar zhes bya ba ni/ rnal 'byor gyi stobs kyis bsrung ba ste/bsrung ba la nus pa dang ldan pa ni/ skyes bu byed pa'i mtshan nyid yin pa'i phyir ro/ /de bas cha de kho na nyid bsrungs pas de kho na nyid ma yin pa las 'byung ba'i nyon mongs pa'i bag chags kyi dri ma med pas na/ dri ma med pa'i 'bras bu zhes bshad do/ /'bras bu rnams re re la yang gnas skabs kyi dbye bas/rnam pa bzhi bstan par bya ba'i phyir/ dbye ba bzhi ni zhes bya ba smos te/ dbye ba dag gang zhe na/ dman pa dang / bar ma dang / lhag pa dang / lhag pa'i lhag pa'o zhes bya ba smos te/ mngon par 'dod pa'i don la dmigs pa'i dus su/ mi gsal ba dang /gsal ba dang / rab tu gsal ba dang / shin tu gsal ba'i dbye bas/ bsgrub bya rim gyis mngon du gyur te/ dper na a mra la sogs pa'i 'bras bu rnams rim gyis smin par 'gyur gyis/ cig car du ni ma yin no/ /de bzhin du 'dir sangs rgyas nyid du bsgrub pa la yang shes par bya'o//gang gi phyir rnam par rtog pa'i nyon mongs pa rnams dang po kho nar/ lhag pa'i bye brag gis so sor snang ba'i phyir ro/ /des dman pa'i yang dman pa'i gnyen pos/ rnam par 'jig par 'gyur zhes rigs pa'o/ /rnam par ma dag pa dang / rnam par dag pa'i skad cig ma bstan par bya ba'i phyir/skad cig ma bzhi zhes bya ba smos te/ gang gis dus kyi khyad par nye bar mtshon par byed pas/ nyon mongs pa zad par byed pa dag skad cig mar bshad do/ /de dag gang zhe na/ rnam pa sna tshogs pa dang / rnam par smin pa dang / rnam par 'joms pa dang /mtshan nyid las 'das pa'o zhes bya ba ma smos so/ /shes rab dang 'brel pa'i dus su/ 'khyud pa dang / /tsum+ba na la sogs pa'i so sor snang ba sna tshogs kyis/ dga' ba rab tu skyes pa'i mtshan nyid ni/ rnam pa sna tshogs pa'i skad cig ma ste/ gzugs la sogs pa'i yul rnam pa sna tshogs la dmigs par byed pa'i phyir ro//rnam par smin pa zhes bya ba ni/ de las gzhan pa bde ba'i ye shes myong ba'i mtshan nyid can/ dman par dga' ba skyed par byed pa des lhag pa zhes bya ba'i don to/ /rnam par 'joms pa zhes bya ba ni/ dga' ba dang bral ba'i nye bar mtshon par byed pa'i mtshan nyid can/gzung ba dang / 'dzin pa nyid kyis/ bdag gis bde ba 'di myong ngo zhes nges par 'dzin pa'o/ /mtshan nyid las 'das pa zhes bya ba ni/ gsum po de dag spangs pa las/ 'dod chags dang 'dod chags dang bral ba las 'das shing / gsum po mi dmigs pa'i mtshan nyid can mi gnas pa'i mya ngan las 'das pa'i ngo bo nyid/ mi mthun pa'i phyogs kyi skyon thams cad spangs pa/ rang rig pa'i bde ba chen po lhan cig skyes pa'i mtshan nyid can dper gyur pa bzhi pa rtogs par bya'o/ /ji skad du/ rnam pa sna tshogs du mar bshad//'khyud dang tsum+ba la sogs pa'o/ /rnam par smin pa de las gzhan/ /bde ba'i ye shes myong ba'o/ /rnam par 'joms pa nges 'dzin pa/ /bdag gis bde ba myong ba'o/ /mtshan nyid las 'das gsum las gzhan/ /chags dang chags bral rnam par spangs//zhes dgyes pa'i rdo rje las 'byung ngo / /nye bar mtshon pa bstan nas/ mtshon par bya ba bstan par bya ba'i phyir/ dga' ba ni bzhi zhes bya ba smos te/ dga' ba ni rangs pa ste/ bde bas byin gyis brlabs pa'i yid do/ /de yang rnam pa bzhi ste/ dga' ba dang / dam par dga' ba dang /dga' ba dang bral ba dang / lhan cig skyes pa'i dga' ba'o/ /'dod pa'i dga' ba dang po dang / dga' ba'i dga' ba gnyis pa dang / 'bar ba'i dga' ba gsum pa dang / 'phrul ba'i dga' ba bzhi pa'o/ /dkrugs pa dang / yid 'byung 'ong ba dang / khu bar gyur pa dang / thig le grol pa'o/ /de'i rjes su bde mchog ces man ngag go//ji skad du/ 'dod pa'i dga' ba dkrugs pa'i yi ge bzhi yi rnal 'byor gcig yin te/ /gang bas nus pa byung ba'i dam par dga' bar gyur pa yin gnyis gnyis/ /'bar ba'i thig le gang bar dga' ba bral ba gsum pa ste/ /'phrul ba'i dga' ba gnyid log mtshan nyid lhan cig skyes pa'o//zhes dus kyi 'khor lo'i dbang bskur 'byung ba las gsungs pa'o/ /slar yang bshad pa ni/ gang ba'i chu skyes nas ni mgrin pa'i bar du dga' ba'o/ /snying gar dam par dga' ba'o/ /lte bar dga' bral lo/ /gsang ba'i chu skyes su lhan cig skyes pa'o//ji skad du/ shu kra 'ong ba dga' ba ste/ /gtsug tor gang ba'i pad+ma nas ni mgrin pa'i bar/ /snying gar dam dga' dga' bral de nas gyur/ /lte bar sna tshogs rol mo yis ni gang tshe gsang ba'i pad+mar chud/ /gsang ba nas ni nor bu'i bar/ /lhan cig skyes dga' mi 'pho ba'o//byis pa lang tsho rgan po dang / /bzhi pa skye dgu'i bdag po ste/ /shes rab yan lag reg pa las/ /khu ba'i byang chub sems bde ba/ /de nyid chu 'dzin dbang bskur te/ /gang phyir byis pa'i bde thob pa'i/ /zhes slob dpon gyi dbang ngo / /phyag rgya lta ba las skyes pa'i/ /yul gyi bde ba khyad par can//rang rig bde la brten gyur pa/ /lang tsho'i yi ge bde bar bshad/ /ces gsang ba'i dbang ngo / /gsang ba brdabs pa la sogs pa'i/ /gnam lcags gtso mor zag bde ba/ /shes rab ye shes dbang bskur ba/ /gang phyir rgan po zag la gnas/ /phyag rgya chen po'i rjes chags las//bde ba rgyu mthun gang skyes pa/ /ye shes chen po'i dbang bskur te/ /gang phyir rgyu mthun la gnas pa'o/ /de nyid skye dgu'i bdag ces bya/ /skyob pa rnams ni skyed byed pa/ /zhes gsungs so/ /sad pa la sogs pa dus kyi 'khor lo las gsungs pa de la 'jug par bya ste/sad dang rmi lam shin tu gnyid log gnas skabs bzhi pa dang / /lus gnas dbus kun thim 'gyur yul la mi g.yor 'gyur/ /shes rab 'brel bas byang chub sems ni khu bas skad cig ye shes gnas/ /sprul pa la sogs rim gyis nges par 'byung / /sems kyi rdo rje rnam bzhir bshad//ces 'byung ngo // //da ni sgom pa po'i yid ches par byed cing the tshom spang bar bya ba'i phyir/ tshad ma bzhi bstan par bya ste/ tshad ma bzhi ni zhes bya ba la/ de la bdag gi tshad ma ni rang dad pa'i lhar bsgom pa la the tshom med pa'o/ /dus kyi tshad ma zhes bya ba ni/ srog dang rtsol ba'i 'pho ba'i dus yongs su shes pa'o//ye shes kyi tshad ma zhes bya ba ni/ dus de nyid du rnam par mi rtog pa'i ye shes skye ba'o/ /rlung gi tshad ma zhes bya ba ni/ snying gar rlung thams cad 'gog pa'o/ /nang gi bshad pa ni/ yi ge a dang ha la dmigs te/ bdag so sor rtog par byed pa'i mtshan nyid ni bdag gi tshad ma'o//de dag gcig tu gyur par shes pa ni dus kyi tshad ma'o/ /ro gcig pa las skyes pa ni ye shes kyi tshad ma'o/ /de nyid du srog dang rtsol ba 'gog par gyur pa ni rlung gi tshad ma'o/ /gsang ba'i bshad pa la yang / byang chub kyi sems kyi thig le/ zla ba ltar 'od gsal ba nyid du mthong ba ni bdag gi tshad ma'o//de mthong bas ba spu ldang ba la sogs pa'i gnas ni dus kyi tshad ma'o/ /'di nyid kyis bdag la nges par ye shes skye bar 'gyur ro zhes ye shes kyi tshad ma'o/ /ting nge 'dzin gyi dus su srog dang rtsol ba'i rlung la dbang thob pa ni/ /rlung gi tshad ma'o//gsang ba'i gsang ba bshad pa ni/ yi ge a dang ha mi dmigs pa ni/ bdag gi tshad ma'o//thabs shes rab kyi bde ba mnyam pa ni/ dus kyi tshad ma'o/ /de nyid nges par 'dzin pa ni/ ye shes kyi tshad ma'o/ /rnam par rtog pa'i rlung gis mi bskyod pa ni/ rlung gi tshad ma'o/ /tshad ma de dag gis de kho na nyid rnam par dag pa rtogs par byed pa yin te/ dper na me dang chu dang / shing wa Ta'i lo ma la sogs pas/ dag dang ma dag pa'i skyes bu brtag pa/ 'jig rten pa la rab tu grub pa bzhin no/ /de bzhin du 'dir yang rnal 'byor pas/ rang gi sems brtag par bya zhes tshad ma'i don to//ji skad du/ slob dpon nyid kyis kyang gsungs te/ yid ches bzhi pos gzung bar bya/ /zhes bya ba la sogs pa'o/ /da ni rnal 'byor pa la spyi bo pa'i gnas bstan par bya ba'i phyir/ gdan bzhi ni zhes bya ba smos te/ bdag gi gdan zhes bya ba ni/dpa' bo dang dpa' mo rnams kyi gzhir 'gyur ba'i rnal 'byor pa'i lus so/ /ji skad du/ nyi shu rtsa bzhi'i dbye ba yis/ /gnas sogs 'di nyid la gnas te/ /zhes bya ba la sogs pa de kho na nyid kyi man ngag las 'byung ngo / /ji ltar bdag gi lus la dpa' bo dang dpa' mo rnams gnas pa de bzhin du/gzhan gyi lus la yang shes par byas nas/ dbyer med par spyod pa ni/ gzhan gyi gdan zhes bshad do/ /de ltar gdan gnyis po'i ngo bo shes nas/ rnal 'byor gyi stobs kyis pha rol po'i yul du 'jug pa ni/ rnal 'byor gyi gdan no/ /ji skad du/sems dang sems min mnyam sbyor ba/ /sems kyis sems min nges par mthong / /sems ni sems la thim 'gyur na/ /lus can kun la 'jug par 'gyur/ /zhes rigs kyi spyan ras gzigs kyi lnga bcu pa las gsungs so/ /de kho na nyid kyi gdan ni/ gnyis su med pa'i snang ba tsam la gnas pa'o//nang gi bshad pa ni/ bdag gi gdan zhes bya ba ni/ sprul pa la sogs pa'i 'khor lo bzhi bsregs te phyir 'byung ba'o/ /gzhan gyi gdan zhes bya ba ni/ sangs rgyas thams cad kyi thugs ka na gnas pa ye shes kyi bdud rtsi blang ba'o/ /slar yang log ste rang gi lus tshim par bya ba ni/rnal 'byor gyi gdan te zag pa med pa'i ye shes dang ldan pa'i phyir ro/ /de'i rjes la bdag nyid sangs rgyas thams cad kyi ro gcig gi ngo bor shes nas gnas pa ni/ de kho na nyid kyi gdan no/ /slar yang bshad pa/ bdag gi gdan zhes bya ba la/ de bzhin gshegs pa thams cad kyi ngo bo nyid bdag yin zhes nges par byas te gnas pa'o//gzhan gyi gdan zhes bya ba ni/ phyag rgya gcig pas phyag rgya thams cad lhag par mos pa'o/ /rnal 'byor gyi gdan zhes bya ba ni/ thabs dang shes rab gnyis su med par gnas pa'o/ /de kho na nyid kyi gdan ni mnyam par ma bzhag pa'i skabs su yang rang gi ngo bo nyid mi 'dod pa'o//slar yang bshad pa/ bdag gi gdan zhes bya ba ni bo la'i gnas so/ /gzhan gyi gdan zhes bya ba ni/ kak+ko la'i nang na'o/ /rnal 'byor gyi gdan zhes bya ba ni rdo rje skyil mo krung ngo / /de kho na nyid kyi gdan zhes bya ba ni/de'i dbus kyi bo la kak+ko la'i gnas so/ /ji skad du/ bo la kak+ko la sbyor ba yis/ /rdo rje skyil mo krung bcings te/ /nor bu'i nang gnas de nyid ni/ /'gu la ka ni rmad byung che/ /zhes 'byung ngo / /bskyed pa'i rim pa nas brtsams te/ ji srid rdzogs pa'i rim pa la 'jug pa'i bar du rnal 'byor pas de kho na nyid rig par bya ba yin zhes de kho na nyid bstan par bya ba'i phyir/de kho na nyid bzhi ni zhes bya ba smos te/ de la bdag gi de kho na nyid ni/ tho rangs kyi dus su langs te/ rnal 'byor gyi bdag nyid can gyis rang gi lus dbyangs yi ge cha bcu drug / 'od gsal ba'i zla ba'i cha'i rang bzhin dag gis yongs su bkang ste/ yi ge dmar po'i ngo bo nyid du bsam par bya zhes bdag gi de kho na nyid bstan te/ bdag nyid 'od gsal ba'i ngo bo yin pa'i phyir ro/ /ji skad du/nang par langs nas sbyor bdag nyid/ /lus ni cha dang bcas te gnas/ / yan lag ma yin bstan bcos rnams/ /lus la gnas par spyad par bya/ /zhes spros pa med pa'i spyod pa gnas pa'i rnal 'byor pa la/ bskyed pa'i rim pa'i skabs su yang / bde mchog gi rgyud las bdag gi de kho na nyid gsungs so/ /dkyil 'khor gyi de kho na nyid ces bya ba ni/ / byang chub kyi phyogs kyi chos sum cu rtsa bdun gyis brgyan pa'i sems nyid do/ /ji skad du/ yid ni dkyil 'khor gsungs pa yin/ /sems nyid brtsegs pa shin tu mtho/ /zhes 'byung ngo / /sngags kyi de kho na nyid ces bya ba la/ sngags thams cad kyi mdor bsdus pa/sku gsung thugs kyi rdo rje/ brda'i tshul can yi ge gsum po bshad de/ sngags thams cad de las 'byung ba'i phyir ro/ /lha'i de kho na nyid ces bya ba ni/ lha dang lha mo thams cad ye shes lnga'i ngo bo nyid du yongs su shes pa ni lha'i de kho na nyid do/ /nang gi bshad pa la yang / bdag gi de kho na nyid ces bya ba ni/ bdag tu 'dzin pa spong ba'o/ /dkyil 'khor gyi de kho na nyid ces bya ba ni/ dbang chen la sogs pa'i dkyil 'khor bzhi lte ba nas spyi bo bar du 'khor lo bzhi'o/ /sngags kyi de kho na nyid ces bya ba ni/ dang po'i dbyangs yig las tsaN+Da li ste/ sngags kyi gzi byin gyi ngo bo yin pa'i phyir zhes dgongs pa'o/ /lha'i de kho na nyid ces bya ba la/ dkyil 'khor bzhi la gnas pa'i de bzhin gshegs pa dang lha mo'i sa bon bsregs te/ mtshan ma'i ngo bo yin pa'i phyir ro/ /gsang ba'i bshad pa la yang / bdag gi de kho na nyid ces bya ba ni/bdag gi gnyen por gyur pa/ dpal he ru ka'i nga rgyal lo/ /dkyil 'khor gyi de kho na nyid ces bya ba ni/ phyag rgya'i gnas la dran pa'o/ /ji skad du/ gnas ni shes rab b+ha gar bshad/ /ces bya ba la sogs pa 'byung ngo / /sngags kyi de kho na nyid ces bya ba ni/ srog dang rtsol ba legs par bsdams pa'o//lha'i de kho na nyid ces bya ba ni/ lha thams cad kyi rgyur gyur pa'i byang chub kyi sems spro ba'o/ /gsang ba'i gsang ba la yang / bdag gi de kho na nyid ces bya ba ni/ sangs rgyas thams cad kyi sdom pa 'gugs pa'o/ /dkyil 'khor gyi de kho na nyid ces bya ba ni/rgyal mtshan dang chu skyes kyi nor bu'i chang zung gi gnas so/ /sngags kyi de kho na nyid ces bya ba ni/ de nyid 'bar ba'i phaT kyis rengs par bya'o/ /lha'i de kho na nyid ces bya ba la/ bde ba chen po'i rang bzhin rdo rje 'chang chen po la nye bar dmigs pa'i don to/ /de kho na nyid rig pa'i rnal 'byor pa la/phyi'i byas pa'i dkyil 'khor dgag pa bstan par bya ba'i phyir/ dkyil 'khor gsum ni zhes bya ba smos te/ de la sku'i dkyil 'khor ni/ sku nyid dkyil 'khor yin pas na sku'i dkyil 'khor te/ de bzhin gshegs pa thams cad kyi phra rab kyis yongs su rdzogs pa'i mtshan nyid ces bya ba'i don to//gsung gi dkyil 'khor zhes bya ba ni/ sems can thams cad la chos kyi 'khor lo bskor ba'o/ /thugs kyi dkyil 'khor zhes bya ba ni/ rnam par mi rtog pa'i sems kyis de bzhin gshegs pa dang / so so skye bo rnams mnyam pa nyid du rtogs pas/mnyams pa'i dkyil 'khor gyi rnam pa thugs nyid dkyil 'khor du shes par bya'o/ /slar yang bshad pa/ sku'i dkyil 'khor zhes bya ba la/ 'byung ba chen po'i bdag nyid can 'khor lo bzhi'o/ /de la gnas pa'i de bzhin gshegs pa dang lha mo rnams kyi sa bon yi ge thams cad gsung gi dkyil 'khor ro//thugs kyi dkyil 'khor nyid do zhes bya ba ni/ 'das ma thag pa'i sku'i dkyil 'khor dang gsung gi dkyil 'khor thams cad 'od gsal ba'i sems bdag po sngon du 'gro ba can zhes snying po len par byed pas na/ thugs nyid dkyil 'khor du bshad do//gsang ba'i bshad pa la ni/ spyi bo nas pus mo'i bar du gnas nyi shu rtsa bzhi'i khyad par gyi mtshan nyid ni sku'i dkyil 'khor du bshad do/ /gnas kyi khyad par re re la yang 'jug pa dang / gnas pa dang / ldang ba'i rim gyis kun du spyod pa ni gsung gi dkyil 'khor/ de'i rjes la gnas nyi shu rtsa lnga pa bdun cu rtsa gsum pa zhes bya ba la sems la dmigs pa thob pa'i mtshan nyid can gyi thugs kyi dkyil 'khor yin te/ 'od gsal ba'i snying po len par byed pa'i phyir ro/ /gsang ba'i gsang ba la ni/ thabs dang shes rab snyoms par 'jug pa'i dus su cha drug skye ba'i mtshon pas/lus kyi gong du rdzogs par byed pa ni/ sku'i dkyil 'khor te/ lus kyi snying po len par byed pa'i phyir ro/ /de nyid zhes pa'i chos kyi dbyings bsdus pa'i yi ges bcings par gyur pa ni/ gsung gi dkyil 'khor du shes par bya ste/ ngag thams cad kyi snying po len par byed pa'i phyir zhes dgongs pa'o//ji skad du/ cha gnyis pa ni dgu pa nyid kyis bshad pa/ sum cu bcu pa lnga pa'i sa bon nyid/ /cha gnyis lnga pa drug pas dbye ba ni/ /'byung ba 'di ni thig ler yang dag gsungs/ /zhes lha mo bzhis zhus pa'i rgyud kyi 'grel pa las 'byung ngo //rnal 'byor gyi stobs de nyid kyis rang rig pa'i bde ba chen po nyams su myong ba ni thugs kyi dkyil 'khor du shes par bya ste/ sangs rgyas thams cad kyi sku gsung thugs kyi snying po len par byed pa'i phyir ro/ /sangs rgyas thams cad kyi sku dang gsung dang thugs grub pa/lha mo bzhis chos kyi dbyings yongs su zhus pa'i rgyud las rgyas par shes par bya'o/ /shes rab kyi dbye ba bstan par bya ba'i phyir/ /shes rab gnyis te zhes bya ba smos pa la/ spyi dang rang gi mtshan nyid la dmigs par byed pa zhes dgongs so/ /de la dmigs pa dang bcas pa zhes bya ba ni/spyi'i mtshan nyid kyi yul can no/ /dmigs pa med pa zhes bya ba ni/ chos nyid kyi rang gi mtshan nyid kyi yul can no/ /ngag gi bshad pa la ni/ las kyi phyag rgya dang ye shes kyi phyag rgya dmigs pa dang bcas pa'i zhes rab bo/ /phyag rgya chen po zhes bya ba ni/ dmigs pa med pa zhes bya ba'i don to//gsang ba'i bshad pa la ni/ spu gri'i yi ge las 'byung ba'i rdo rje mkha' 'gro ni dmigs pa dang bcas pa'i shes rab bo/ /dang po'i dbyangs yi ge ngo bo nyid ni dmigs pa med pa zhes bshad do/ /ji skad du/ dang po'i dbyangs yig rang bzhin te/ /sangs rgyas kun gyis blo zhes brtags//zhes dgyes pa'i rdo rje las gsungs so/ /gsang ba'i gsang ba la ni/ re pha'i pho nya mo dang / dbyangs kyi pho nya mo gnyis dmigs pa dang bcas pa'i shes rab ste/ mtshan ma la dmigs pa'i phyir ro/ /lhan cig skyes pa'i tsaN+Da lI ni dmigs pa med pa bstan te/kha dog dbyibs kyi mtshan ma las 'das pa'i phyir ro/ /shes rab gnyis po de nyid rim pa bzhin du/ de bzhin gshegs pa'i dbugs 'byin pa dang / rdo rje 'chang chen po'i dbugs 'byin pa de dag shes par bya'o/ /de bstan par bya ba'i phyir/ dmigs pa dang bcas pa'i shes rab ni/de bzhin gshegs pa'i dbugs 'byin pa ste/ 'khor ba'o zhes bya ba smos pa la/ dper na rigs pa'i dbang gis dbus su chu la sogs pa'i nye bar mtshon pa'i sgo nas ye shes rnam pa lnga skyes pas/ phung po lnga rnam par dag pa'i mtshan nyid rang gi de kho na yin pas de bzhin gshegs pa lnga'i nga rgyal 'dzin pas na/'khor ba kho na yin gyi mya ngan las 'das pa ni ma yin te/ spros pa'i mtshan nyid can kho na yin pa'i phyir ro/ /ji skad du/ dge ba'am ni mi dge'ang rung / /rnam rtog la ni bye brag med/ /sreg par byed pa'i me la ni/ /gzhi yi dbye bas bye brag med//tsan+dan la ni 'bar 'gyur yang / /reg pa tsam gyis sreg par byed/ /ces snang ba'i phreng ba las 'byung ngo / /dmigs pa med pa ni/ rdo rje 'chang chen po'i dbugs 'byin pa ste/ mya ngan las 'das pa'o zhes bya ba la/ slar yang phyir mi ldog pa'i dbang gi dus su de bzhin gshegs pa thams cad ro gcig pa'i ngo bo nyid/rdo rje 'chang chen po'i go 'phang mi gnas pa'i mya ngan las 'das pa'i mtshan nyid can/ 'khor ba ji srid du gnas shing / sems can ma lus pa'i don byed pa'i nus pa dang ldan pa/ phyir mi ldog pa ni rdo rje 'chang chen po'i dbugs 'byin te/de nyid mya ngan las 'das par bstan te/ phyir mi ldog pa nyid kyi phyir zhes dgongs pa'o/ /'das ma thag pa'i shes rab gnyis po sku gsum gyi yul can du shes par bya ste/ de bstan par bya ba'i phyir/ sku gsum ni chos kyi sku dang / longs spyod rdzogs pa'i sku dang / sprul ba'i sku'o zhes bya ba smos te/ dmigs pa med pa'i shes rab kyi yul ni chos kyi sku'o/ /dmigs pa dang bcas pa'i shes rab kyi yul ni longs spyod dang sprul pa'i sku yin zhes bya ba'i don to/ /slar yang bshad pa ni/ sprul pa dang / chos dang longs spyod kyi 'khor lo gsum du shes par bya'o//bde ba chen po'i 'khor lo ngo bo nyid kyi lhun gyis grub pa'i 'bras bu yin pas/ sku bzhi pa 'dir ma bstan to/ /gsang ba'i bshad pa ni/ chos kyi sku ni lhan cig skyes pa'o/ /longs spyod rdzogs pa'i sku ni zla ba rgyas pa dang 'dra'o//sprul pa'i sku zhes bya ba ni/ de las sangs rgyas spro ba'o/ /gsang ba'i gsang ba la yang / rdo rje mkha' 'gro ma la spros te/ steng du gnad kyi sgo la gnas par bya ste/ dmigs pa dang bcas pa'i phyir/ go rims bzlog ste/ sprul pa dang / longs spyod dang /chos kyi sku'i mtshan nyid can gyi byang chub kyi sems lhod par byed ces bya ba'i don to/ /ji ltar rdzogs pa'i rim pa'i rjes su 'brangs nas/ sku gsum bshad pa de bzhin du/ /de bzhin gshegs pa lnga'i mtshan nyid kyang bstan par bya ba'i phyir/ de bzhin gshegs pa lnga ni zhes bya ba smos te/b+h+rUM IM dzrAM khaM hUM/ zhes snying po'i 'khor lo la gnas pa'i sa bon rnams yin no/ /sngags dang sku dbyer med pa'i phyir/ slar yang bshad pa ni/ de bzhin gshegs pa lnga zhes bya ba la/ srog la sogs pa'i rlung rnam pa lnga shes par bya'o/ /gsang ba'i ni bo la'i dang kak+ko la'i sbyor bas/sra ba la sogs pa'i brdas bstan pa'i gti mug rdo rje la sogs pa'i gsang ba'i gsang ba la yang de bzhin gshegs pa lnga ni zhes bya ba ni/ byang chub kyi sems kyi thig le la gnas pa'i 'od zer lnga shes par bya'o/ /de bzhin gshegs pa lnga kho na phung po lnga yin zhes bstan par bya ba'i phyir/gzugs dang tshor ba dang zhes bya ba smos te/ de la gzugs kyi phung po ni rnam par snang mdzad do/ /tshor ba'i phung po ni rdo rje nyi ma'o/ /'du shes kyi phung po ni pad+ma gar gyi dbang phyug go/ /'du byed kyi phung po ni rdo rje rgyal po'o/ /rnam par shes pa'i phung po ni dpal he ru ka yin zhes 'dir/yul dang yul can gyi tshul du sbyar bas/ me dang shing gi rim pa ltar/ phung po rnams snang ba med par 'gyur zhes rtogs par bya'o/ /ji skad du/ bde gshegs lnga yi 'du shes ni/ /rnam par rtog pa sreg par byed/ /ces 'byung ngo / /slar yang bshad pa/zag pa dang bcas pa'i phung po lnga kho na zag pa zad pa med pa'i ngo bo yin zhes nges par bya ste/ de lnga de bzhin nyid du 'du shes 'gyur zhes dgongs pa'o/ /gsang ba'i bshad pa ni/ gzugs kyi phung po zhes bya ba phyag rgya dang 'brel ba'i dus su phyag rgya'i kha dog dang dbyibs mthong bas/'od gsal ba'i sems dang / rjes su mthun pa'i snang ba ni/ gzugs kyi phung po'i mtshan nyid can te rnam par snang mdzad do/ /gnyi ga mnyam pa'i bde ba nyams su myong ba ni/ tshor ba'i phung po'i mtshan nyid can te/ rin chen 'byung ldan no/ /'di ni shes rab dang /bdag ni thabs yin zhes yongs su shes pa ni/ 'du shes kyi phung po'i mtshan nyid can te/ 'od dpag tu med pa bshad do/ /dbang po gnyis rdo rje dang pad+mar byin gyis brlabs te/ legs par sbyangs la/ dga' bral gyi dga' ba spangs pa las/ 'jig rten las 'das pa'i 'du byed kyi phung po'i mtshan nyid can ni/don yod grub pa'o/ /de bzhin du ye shes dang shes bya ro gcig pa nyid du gyur pa ni/ rnam par shes pa'i phung po'i ngo bo nyid mi bskyod pa'o/ /gsang ba'i gsang ba la ni/ phyag rgya chen po dang mnyam par sbyor bas/ cig car du gzugs la sogs pa'i phung po mi dmigs pas/de bzhin gshegs pa lngar bdag gi dngos po rdzogs par 'gyur zhes bya ba'i don to/ /zhal dang phyag dang sku mdog dang dbyibs kyi bdag nyid/ de bzhin gshegs pa'i mngon par zhan pa dgag par bya ba'i phyir/ ye shes lnga ni zhes bya ba smos te/ 'das ma thag pa'i de bzhin gshegs pa lnga ye shes lnga'i ngo bo nyid du shes par bya'o//de gang zhe na/ me long lta bu dang zhes bya ba smos te/ de la ye shes kyi sgra kun la sbyar bar bya'o/ /ye shes gang la gzugs brnyan gzhan ma yin pa'i tshul du/ dngos po thams cad kun du snang ba de ni/ me long lta bu'i ye shes so//mnyam pa nyid ces bya ba ni/ mnyam pa'i chos kyi dngos po ni mnyam pa nyid yin te/ chos nyid gcig gis khyab pa'i phyir mi 'gal ba nyid do/ /de nyid bems po las log pa'i phyir ye shes zhes bya'o/ /so sor kun du rtog pa zhes bya ba ni/ chos de dag la chos dang chos can gyi bye brag tu so sor blta zhing ngo bo nyid rtogs pa ni so sor kun du rtog pa zhes bshad do//ye shes kyi sgra ni snga ma bzhin du'o/ /bya ba nan tan 'grub pa zhes bya ba ni/ sangs rgyas kyi mdzad pa'o/ /de la nan tan te rgyun ma chad par byed pa'o/ /de la ye shes ni de bsgrub par bya ba'i slad du sgyu ma'i skyes bu ltar sems can gyi bya ba la 'jug pa zhes bya ba'i don to//shin tu rnam par dag pa chos kyi dbyings kyi ye shes zhes bya ba ni/ chos thams cad kyi dbyings ni rgyu ste gnyis su med pa'i de bzhin nyid do/ /de nyid shin tu rnam par dag pas na shin tu rnam par dag pa ste/ye shes bzhi'i grangs kyi rnam par rtog pa las 'das pa'o/ /shin tu yang rnam par dag pa yin la/ chos kyi dbyings kyang yin pas na/ shin tu rnam par dag pa chos kyi dbyings so/ /de la dmigs par byed pa'i ye shes ni chos kyi dbyings kyi ye shes te/ yul gyi ming yul can la btags zhes bya ba dgongs pa'o//bshad ma thag pa'i ye shes lnga so sor mthong bar byed pa'i rgyur gyur/ lha mo kho na yin zhes de dag bstan par bya ba'i phyir/ lha mo bzhi zhes bya ba smos te/ spyan la sogs pa'i lha mo bzhi de bzhin gshegs pa rnams kyi btsun mo ste/ 'byung ba chen po bzhi'i ngo bo nyid las kyi phyag rgya la sogs pa ste/ de kho na nyid kyi ye shes mtshon par byed pa'o/ /ji skad du/ mtshan nyid bltas te mtshan gzhi ni/ /rnam shes ye shes yid kyis so/ /zhes 'byung ngo / /phyag rgya de rnams 'byung ba chen po las gzhan ma yin pa nyid du bstan par bya ba'i phyir//sa dang chu dang me dang nam mkha'o zhes bya ba smos te/ /de kho na nyid kyi rin po che la rgyas btab cing bkab pas na phyag rgya ste khams lnga'o/ /e waM ma yA/ zhes bya ba la sogs pas sngon du bshad do/ /nam mkha'i sgras ni chos kyi dbyings kyi dbang phyug ma lnga pa 'dir shes par bya'o//bla ma'i man ngag gi lde mig gis/ phyag rgya phye bar byas te/ de kho na nyid kyi rin po che mthong ba'i rnal 'byor pa'i lus la sangs rgyas dang byang chub sems dpa' thams cad gnas zhes bya ba'i don to/ /de bstan par bya ba'i phyir/ byang chub sems dpa' ni mig la sogs pa'i dbang po rnams so zhes bya ba smos te/sa'i snying po la sogs pa byang chub sems dpa' rnams gzhan ni ma yin te/ mig la sogs pa kho na'o/ /gnas gyur pa'i mtshan nyid can/ 'jug pa'i rnam par shes pa rnams/ 'di dag la dbang byed pas ni 'di dag dbang por bshad do/ / ji skad du/ dbang po gang dang gang lam gyur/ /de dang de yi ngo bo nyid/ /mnyam par ma bzhag sbyor ba yis/ /sangs rgyas kun gyi rang bzhin 'dzin/ /ces 'byung ngo / /de kho na nyid kyi man ngag las kyang / snying rjes thugs dkrugs rdo rje yis/ /mkha' 'gro ma rnams 'di la gnas/ / 'di nyid du ni sangs rgyas dang / /byang chub sems dpa' 'gro gsum gnas/ /de bas na sangs rgyas thams cad dang byang chub sems dpa' rnams kyi gzhir gyur pa'i lus 'di la/ gnas nyi shu rtsa bzhi'i khyad par gyis sa bcu yang 'di nyid du shes par bya'o/ /pha rol tu phyin pa'i spyod pa la spyod pa'i rnal 'byor pa bzhin du ma yin te/thabs dman pa'i phyir zhes dgongs pa'o/ /sa bcu de dag gang zhe na/ gnas dang nye ba'i gnas zhes bya ba nas/ /dur khrod dang nye ba'i dur khrod kyi bar du'o/ /ji skad du/ gnas ni rab tu dga' ba'i sa/ /de bzhin nye gnas dri ma med/ /ces bya ba la sogs pa nas/chos kyi sprin gyi bar du rtogs par bya'o/ /gnas kyi khyad par 'di dag ci'i phyir gsungs she na/ de la gnas pa'i gzhi can gyi bde ba chen po'i ye shes bdag po yin pas/ 'og nas 'chad par 'gyur pa'i gcig nas gcig tu go rims kyis rnam par mi rtog pa'i ye shes shar bas/nyon mongs pa dang shes bya'i sgrib pa thams cad rnam par dag nas/ ye shes kyi sa thob par 'gyur zhes man ngag go/ /de ltar na ji ltar tha mal pa'i rig pa bde ba nyams su myong ba tsam las shin tu thob par dka' ba'i sangs rgyas kyi sar skye bar 'gyur snyam na/ de ni ma yin te/rgyu gzhan khyad par can gyis bsgos pa'i bde ba la sogs pa las/ sa bcu'i dbang phyug dang ldan pa'i sangs rgyas nyid kyi 'bras bu khyad par can skye bar 'gyur zhes dngos po'i mtshan nyid kho na'o/ /yang na mang du smras pas ci zhig dgos/ /dbang po dman pa'i sngags pa rnams la/dam tshig nyams pa'i 'jigs pas thabs khyad par can gsungs te/ 'jig rten pa'i dpe 'di ltar smras par bya ba yin te/ gal te rdul gyis mig gi nad sos par gyur na/ mig sman gyi dgos pa gang zhig yod ces sa bcu grub pa'o/ /de yang gnas nyi shu rtsa bzhi'i dbye bar 'gyur te zhes bya ba smos te//yar kyi ngo dang mar gyi ngo / /tshes nyi shu rtsa bzhi'i mtshan nyid 'phel ba dang 'grib pa'i mtshan nyid kyis/ dus kyi grangs kyi rgyur gyur pa/ /bden pa gnyis dang / skye ba dang / 'jig pa dang / bud med dang / skyes pa'i ming can/thabs dang shes rab kyi mtshan nyid/ ma ning gi dbyangs kyi yi ge bzhi spangs pa/ zla ba'i rnam pa byang chub kyi yid gang yin pa/ phyi dang nang gi brtan pa dang g.yo ba'i tshig gi don thams cad la khyab pa/ sa dang pha rol tu phyin pa'i rgyur gyur pa/ de'i byin gyis brlabs pas/ pul+li ra ma la ya la sogs pa'i gnas nyi shu rtsa bzhi'i dbye bas/ sa rnams dbye bar 'gyur zhes dgongs pa'o/ /ji ltar dbye bar 'gyur zhe na/ smras pa/ pul+li ra ma la ya nas arbu da'i bar du gnas bzhi'i sgras brjod pa/ sa dang po dbye bar 'gyur zhes dgongs pa'o/ /go dA ba ri nas/mA la wa'i bar du nye ba'i gnas bzhi'i sgras brjod pa/ sa gnyis pa dbye bar 'gyur zhes bya ba'i don to/ /de bzhin du sa gsum pa la sogs pa'i dbye ba gnyis gnyis/ zhing dang nye ba'i zhing la sogs pa'i bye brag gis shes par bya'o/ /phyi'i gnas la sogs par 'gro ba dgag pa bstan par bya ba'i phyir//de dag rim pa bzhin du spyi bo dang spyi gtsug ces bya ba la sogs pa smos te/ sa'i mtshan nyid gnas la sogs pa 'di dag /spyi bo nas pus mo'i bar du blta bar bya zhes bya ba ni/ spyi bor gnas pa'i bde ba chen po'i rang bzhin can/ /byang chub sems kyi thig le dgug par bya ba'i phyir/blta bar bya zhes bya ba ni bsgom par bya'o/ /de dag bsgom pas cir 'gyur zhe na/ pul+li ra ma la yar dbang ngo zhes bya ba la sogs pa smos te/ re pha'i pho nya mo yang dag par bskul te/ snying gi mdud pa rnams glod par byas te/ pul+li ra ma la ya'i gnas su dbang ba ni/byang chub kyi sems kyi rgyal po mthong bas/ dga' bar byas la/ o Di ya na'i gnad kyi sgo phye nas/ nges par 'byung ste/ de bzhin gshegs pa rnams la 'jug pa'i sgo nas khugs shing / ye shes kyi bdud rtsi'i bag chags tsam blangs la/ rang gi dzA lan+d+ha ra'i gnas su longs spyod do zhes bya ba ni/de bzhin gshegs pa'i ye shes kyi bdud rtsi nyams su myong ba'i longs spyod kyi mtshan nyid dam par dga' ba skyed par byed ces bya ba'i don to/ /o Di nar thim zhes bya ba ni/ de la longs spyod ma thag tu/ lhan cig skyes pa'i bde ba chen po bsam gyis mi khyab pa skad cig rjes su myong nas/ma goms pa'i dbang gis thim pa zhes bya ba ni/ bying ba'i mtshan nyid can dga' ba dang bral ba'i dga' ba rab tu skye bar 'gyur zhes bya ba'i don to/ /de ltar gnas thams cad du dga' ba rnam pa bzhi dang / skad cig ma dang / 'bras bu la sogs pa mngon du bya'o//des na gnas nyi shu rtsa bzhi la/ rab gtum ma la sogs pa dpa' mo rnams dang / thod pa'i dum bu la sogs pa dpa' bo thams cad chos dang chos can gyi tshul du lhan cig skyes pa ngo bo nyid kyi byang chub kyi thig ler bsdus pa rnams kyi kun du spyod pa bdun cu rtsa gnyis rtogs par bya zhes man ngag go//dam tshig dang mi ldan zhing dad pa med pa la/ gang gi ston par 'gyur na/ de'i bsam pa thams cad don med par 'gyur ro/ /da ni dga' ba gsum po sku gsum las gzhan ma yin pa nyid bstan par bya ba'i phyir/ gnas 'di rnams su de bzhin gshegs pa rnams kyi zhes bya ba la sogs pa smos te/bshad ma thag pa'i/ pul+li ra ma la ya la sogs pa'i gnas te/ rang gi sku'i 'khor lo'i rtsibs rnams su/ byang chub kyi sems la gnas pa'i dpa' bo dang / dpa' mo dang / kun du spyod pa'i gnas so//de bzhin gshegs pa rnams kyi zhes bya ba ni/ dpa' bo dang dpa' mo rnams kyi lhan cig skyes pa'i bde ba chen po'i ye shes skye bar 'gyur zhes 'og nas tshig sbyar ro/ /ji ltar zhe na/ bde ba ji lta ba bzhin du zhes bya ba smos te/ bde ba ni 'dod pa'i yon tan lnga bstan pas so/ / yang na rang rgyun du gnas pa'i srog dang rtsol ba brgyud pa'i rjes su 'brang ba'o/ /go rims bzlog ste zhes bya ba ni/ go rims spangs te gsungs kyang / /'jug pa'i rim pa bzhin du shes par bya'o/ /de bas na sprul pa dang / longs spyod dang / chos kyi sku'i tshul du shes par bya ste/ de la dbang ba ni sprul pa'i sku'i ye shes te/kun rdzob kyi byang chub sems dpa' la dmigs pa'i ye shes ni/ sprul pa'i sku'i so sor snang ba skyed par byed pa'i phyir ro/ /bar med pa'i gnas skabs su longs spyod pa'i dbang gis/ longs spyod rdzogs pa'i sku'i ye shes te/ rang rig pa'i chos nyid kyi ro nyams su myong ba la longs spyod pas so//de'i rjes la don dam pa'i byang chub sems kyi mtshan nyid ngo bo nyid kyi sku ye shes lhan cig skyes pa zhes bya ba skyes par 'gyur zhes man ngag go/ /de bzhin du yang bar bcad pa la thim pa'i dbang gis chos kyi sku'i ye shes skye bar 'gyur te/dga' ba dang bral ba'i dbang gis/ /'dod chags dang bral ba'i chos nyid tsam la/ mngon par zhen pa'i phyir zhes dgongs pa'o/ /de bas na dam pa dga' ba las phyi ma dang / dga' bral gyi gong ma ste/ lhan cig skyes pa zhes bya ba/ ngo bo nyid kyi sku de kho na nyid rig pa'i rnal 'byor pas bsgom par bya'o//sku gsum gyi ye shes kyi mtshan nyid bstan pas thim pa'i sgra la slob dpon nyid kyis chos kyi sku'i don so sor bstan par bya ba'i phyir/ gnas pa ni rab tu thim pa'o zhes bya ba smos te/ de la Sh+Tha ni 'gro ba las log pa'i don zhes skad kyi dbyings las 'byung ngo //des na 'gro ba ni longs spyod pa dang / /sprul ba'i sku'i 'gro ba'i don byed pa'o/ /de las log cing thim pa ste/ 'gog pa zhes bya ba 'dis chos kyi sku'i mtshan nyid rtogs par bya'o/ /de rnams kyi gtso bo nyid kyis zhes bya ba la/ sku gsum rtogs pa'i gnas de rnams kyi nang nas/gtso bo nyid kyis zhes bya ba ni/ gnas gtso bo las mi 'da' bar nges par 'byung ba'i lam nas zhes bya ba'i don to/ /lam de bstan par bya ba'i phyir/ o Di nar gnad kyi sgo phye ba zhes bya ba smos pa la/ 'phur ba'i lam nas 'gro ba yin gyi/ mya ngan las 'das pa'i lam nas 'gro bar mi rigs zhes dgongs pa'o//rdo rje mkha' 'gro mas bskul ba dang zhes bya ba la/ sngags kyi sgron me'i skabs 'dir/ rdo rje mkha' 'gro ma ni re pa'i pho nya mo bskul ba'i bsgom pa gtso bo yin gyi/ dbyangs kyi pho nya mo'i bsgom pa gtsor ma bstan te/ dang po goms pa'i dus su dman pa'i ye shes skye ba'i phyir ro//rdo rje mkha' 'gro mas bskul bas ci dgos she na/ dzA lan+d+ha rar bde ba chen po'i ye shes dang / phrad cing 'du bas zhes bya ba smos pa'o/ /de bzhin gshegs pa rnams kyi ye shes kyi bdud rtsi blangs la/ dzA lan+d+ha rar zhes bya ba ni/ rang rig mi shigs pa'i yi ge'i gam du phyin nas/dga' bar byas la/ zla ba rgyas pa ltar bltas te/ bde ba chen po'i ye shes la nye bar dmigs shing / 'khyud pa la sogs pa'i bya ba brtsam par bya zhes mtshon to/ /de'i rjes su de bzhin gshegs pa'i chos thams cad yang dag par brjod cing snang ba'o zhes bya ba smos pa la/de bzhin gshegs pa'i thugs yang dag pa'i ye shes kyi bdud rtsi blangs pa'i rjes la/ de bzhin gshegs pa'i chos thams cad ces bya ba ni/ stobs dang mi 'jigs pa la sogs pa'o/ /de rnams yang dag par brjod cing snang ba ni/ rang gi lus la zag pa med pa'i ye shes kyis byin gyis brlabs pas/stobs dang mi 'jigs pa la sogs pa/ de bzhin gshegs pa'i chos thams cad skyes par 'gyur ro/ /de bas na rnal 'byor pa la de bzhin gshegs pa'i chos dang 'brel bas/ /dkyil 'khor la sogs pa'i bsod nams dang / ye shes kyi rgyur gyur pa//dge ba'i bya ba thams cad 'bad pa med par gyur pa zhes bya ba bstan par bya ba'i phyir ron/ /'di nyid du dkyil 'khor ba dang / sbyin sreg dang / mchod sbyin dang / bzla ba dang / bsam gtan bya ba dang / 'dzin pa dang / rdul tshon dgye ba zhes bya ba la sogs pa bstan te/ zhes sngags kyi rim pa'o zhes bya ba smos te/ 'di nyid du zhes bya ba ni/ /rnal 'byor ba'i lus la'o/ /dkyil 'khor pa zhes bya ba ni/ dpal he ru ka ste rab gtum mo la sogs pa'i dpa' mo rnams dang / thod pa'i dum bu la sogs pa dpa' bo dag /pul+li ra ma la ya la sogs par spyi bo nas brtsams te/pus mo'i bar du gnas zhes dgongs pa'o/ /sbyin sreg ces bya ba ni/ kun rdzob kyi byang chub yid kyi dgang blugs don dam pa'i ye shes me la bsregs pas so/ /mchod sbyin zhes bya ba ni/ bla na med pa'i mchod pa'o/ /de kho na nyid la blta bar bya ba'i phyir/ snyoms par zhugs pa zhes bya ba'i don to//ji skad du/ 'di la rtag par gang lta ba/ /de nyid rgyal bas mchod par gsungs/ /zhes 'byung ngo / /bzla ba'i zhes bya ba ni/ A li dang kA li g.yas dang g.yon pa zhes bya bas/ rdo rje bzlas pa sngon du bshad zin to/ /bsam gtan zhes bya ba ni/de kho na nyid gcig pu la mthar thug pa yod do/ /bsam par bya ba ni de kho na nyid mthong ba'i thabs la dmigs pa'o/ /'dzin pa zhes bya ba ni/ dbang po mi 'phro ba'o/ /rdul tshon la sogs pa zhes bya ba ni/ byang chub kyi sems kyi rdul tshon gyis 'khor lo bzhi gso ba'o/ /yang na b+ha ga'i dkyil 'khor bri ba'o//sogs pa'i sgras ni rab tu gnas pa dang / spyan drang ba dang / gshegs su gsol ba la sogs pa spros pa/ rlung gi de kho na la bsdus pa'o/ /yang na dzA lan+d+ha ra rang bde ba chen po'i ye shes dang phrad pas/ rang rig pa de nyid du thams cad bsdus te/ rang bzhin gyis dge ba'i ngo bo nyid yin pa'i phyir ro/ /ji skad du/ sngags bzlas sbyin sreg dka' thub de nyid de/ /mdor bsdus rang rig sems nyid gcig pur gsungs/ /zhes 'byung bas so/ /sngags kyi sgron ma zhes bya ba ni/ sngags kyi sgron ma'i tshig sbas pa de phye ba ni sgron mar bshad pa'o//de la bsgrub bya mngon du byed pas na sngags so/ /gzhan yang yid skyob par byed pas na sngags so/ /A li kA li zung ni sngags kyi rgyu yin pas sngags su yang bshad do/ /de las bsdus pa'i yi ge gsum mam/ rang dad pa'i lha'i snying po dang / sngags kyi de kho na nyid ngo bo sde tshan gyi yi ge AHdang /hUM dang / oM dang / ha dang / de bzhin gshegs pa dang / lha mo'i sa bon rnams/ sngags kyi sgras ma bstan to/ /ji skad du/ sngags ni 'gugs byed ces bya ste/ /bsgrub bya rnams ni mngon du byed/ /A li kA li sngags yin te/ /de las btus pa'ang sngags su gsungs//zhes gsungs so/ /las kyi rdo rje smras pa'i TI kA las/ sngags kyi sgron ma ste dang po'o// //da ni rgyud kyi sgron ma bshad par bya ste/ de la rgyud ni rnam pa gsum ste/'jig rten pa'i pha ma'i rgyud dang / 'jig rten las 'das pa'i thabs dang shes rab kyi rgyud dang /bla na med pa'i de bzhin gshegs pa'i rgyud do/ /de la pha dang ma'i sbyor bas bde ba'i rten cing 'brel ba la brten te/ 'gro ba'i rgyud brtsam zhing gang gis bskyed pa de ni rgyud te/ 'dod chags gtsor gyur pa'i sems zhes dgongs so/ /ji skad du/ pha dang ma yi bde shugs kyis//skad cig de la khams gsum skyes/ /zhes bya ba la sogs pa 'byung ngo / /slar yang de nyid 'jig rten las 'das pa'i thabs dang shes rab khyad par can gyi rten cing 'brel pa la brten te/ bla ma dam pa'i man ngag gi stobs kyis brtsam zhing sbyangs pas na rgyud de/ sangs rgyas skyed par byed pa'i nus pa dang ldan pa/'dod chags kyi rdul dang bral ba'i rdo rje sems dpa'i mtshan nyid can gyi yid do/ /ji skad du/ 'dod chags las ni 'jig rten skye/ /'dod chags nyid kyis 'jig par 'gyur/ /rdo rje'i 'dod chags yongs shes nas/ /yid ni rdo rje sems dpar 'gyur//zhes 'byung ngo / /de ni 'bras bur gyur pa'i de bzhin gshegs pa'i rgyud de/ rigs lnga'i sngon du 'gro ba rdo rje 'chang chen po'i ye shes drug pa gang gis rtsom pa/ de ni mi gnas pa'i mya ngan las 'das pa'i mtshan nyid/ brgya byin gyi gzhu dang mtshungs pa/ bdag byin gyis rlob ces bya ba'i mtshan nyid kyi rnam grangs can/sna tshogs gnyis su med pa'i ngo bo nyid/ dag pa'i 'jig rten pa'i ye shes kyi rang bzhin longs spyod rdzogs pa'i sku 'chad par 'gyur ba'i sgron ma gsum pa nas bstan par bya na/ sems la dmigs pa thob pa sngon du 'gro ba can shes par bya'o/ / de la sems la dmigs pa thob pa dang po bstan par bya ste/ bla ma dam pa las dbang bskur ba thob pa'i rnal 'byor bas/ sems la dmigs pa thob pa'i rgyur gyur pa/ gtum mo sbar bar bya ba yin te/ thabs dang shes rab khyad par can gyi 'dod chags kyi rgyud la brten cing / srub shing las me bzhin du ye shes bskyed par byas la/zag pa dang bcas pa'i pha ma'i rgyud las 'byung ba'i phung po dang / khams la sogs pa bsregs te snang ba'i ye shes thob nas/ phyir 'byung zhing de bzhin gshegs pa'i sku la rab tu zhugs te/ gnyis su snang ba bsregs la/ snang ba mched pa'i ye shes thob nas/de bzhin gshegs pa'i sku de nyid rnam par rtog pa thams cad med pa'i ngo bo nyid la/ rim gyi rim gyis nam mkha' la glog ltar 'char ba dang / nub pa bstan nas/ snang ba thob pa ye shes la sems la dmigs pa thob pa'i mtshan nyid can la gnas par bya zhes gdams ngag go//ji skad du/ snang ba'i phreng ba las/ nub nas slar yang shar ba ste/ /gnyis pa gnyis med go 'phang la'o/ /zhes 'byung ngo / /don de nyid so sor bstan par bya ba'i phyir/ slob dpon gyis 'di gsungs te/ srub dang bsrung bya'i sbyor ba las/ las kyi rlung gis bskyod pa'i ye shes kyi me zhes bya ba la sogs pa ni/ de la bsrung par bya ba ni shes rab bo/ /srub par byed pa ni thabs so/ /de dag gi sbyor ba ni snyoms par zhugs pa'o/ /de las ye shes kyi me zhes bya ba ni a las langs pa'i shes rab kyi me bstan te/ rnam par rtog pa'i bud shing sreg par byed pa'i ngo bo yin pa'i phyir ro//'dir zhes bya ba ni lus 'di nyid la/ ji ltar 'bar bar 'gyur zhe na/ las kyi rlung gi bskyod pa zhes bya ba smos te/ las kyi rlung ni srog dang rtsol ba'o/ /yang na 'khyud pa dang / tsum+ba na la sogs pa'i las so/ /de nyid rlung yin te/ ye shes kyi me skul bar byed pa'i phyir ro/ /des bskul nas lte ba'i dkyil 'khor du zhes bya ba ni/ sprul pa'i 'khor lo'i lte ba'am/ rdo rje nor bu'i chang gzungs su du bar gyur pa zhes bya ba ni/ dbyangs kyi pho nya mo'am/ lhan cig skyes pa'i pho nya mo/ /dang po bskyed bzhin pa'i dus su/ dud par 'gyur zhing me'i rtags bzhin du rnal 'byor pa la/ 'dar ba dang rdul ba la sogs pa'i gzugs su skye ba'am/ du ba dang smig rgyu la sogs pa'i mtshan ma'i gzugs su snang zhing 'bar bar 'gyur ro/ /mtshan ma mthong ba'i rjes la mngon du 'gyur zhes bya ba'i don to/ /skyes nas ci byed ce na/de'i 'od kyis dam tshig gi 'khor lor gnas pa'i zhes bya ba la sogs pa smos te/ de'i 'ong ni ye shes kyi me'i nus pas so/ /dam tshig gi 'khor lo zhes bya ba ni/ phung po lnga de bzhin gshegs pa lnga las mi 'da' bas na dam tshig go/ /de rnams kyi gzhir gyur pa'i 'khor lo ni dam tshig gi 'khor lo ste/chos kyi 'khor lo'o/ /de la gnas pa'i de bzhin gshegs pa rigs lngar bsdus pa de dag bsregs te zhes bya ba ni/ snang ba med par byas nas so/ /de'i rjes su longs spyod kyi 'khor lor chud pa zhes bya ba la sogs pa ni/ ro rnam pa drug la yang dag par gzugs rdo rje ma la sogs pa'i ngo bo nyid kyis longs spyod pas na longs spyod do//de'i gzhir gyur pa'i 'khor lo longs spyod kyi 'khor lo ste/ mgrin pa'i 'khor lo'o/ /der chud pa'i thabs zhes bya ba ni/ spyan la sogs pas yongs su bskor ba'i bzang ba po zhes bya ba'i sems thabs su bstan te/ longs spyod la brten pa'i thabs kyis de kho na nyid grub pa'i phyir ro/ /ji skad du/ dka' thub dam bcas drag po yis/ /bsten pas grub par mi 'gyur te/ /'dod yon longs spyod lnga yis ni/ /bsten na myur du 'grub par 'gyur/ /zhes gsungs pa'o/ /lan gsum bskor te zhes bya ba la/thabs ma gtogs par byang chub med ces bkur sti'i phyir lan gsum thabs de las bskor zhes dgongs pa'o/ /bskor te de'i rjes su ci byed ce na/ mdzod spur gnas pa'i zhes bya ba smos te/ smin ma'i mtshams su phyin nas cung zad gnas par byas la/ snang ba'i ye shes thob par byas nas/gnad kyi sgo o Di ya na zhes bya ba nas smos pa ni/ rna ba g.yas pa ni o Di zhes bya ba'o/ /gang gi phyir 'phur zhing 'gro ba'i lam yin zhes dgongs so/ /nges par 'byung zhing zhes bya ba ni/ phyir 'gro bar bya'o/ /ngag tu 'gro zhe na/ phyogs bcu'i 'jig rten gyi khams na bzhugs pa'i zhes bya ba la sogs pa smos te/mtha' yas pa'i 'jig rten gyi khams na bzhugs pa'o/ /rang rang gi ngo bo de bzhin gshegs pa rnams kyi thugs dang 'brel ba'i spyi gtsug gi khung bu gser gyi sgo dzA lan+d+ha rang zhes bya ba nas 'jug par bya zhes tshig gi 'brel ba'o/ /de la thugs kyi bar du khyab pa'i spyi gtsug gi khung bu ni/dbus kyi rtsa'i steng gi sgo'i rtse mo nas zhes bya ba'i don to/ /gser gyi sgo nas zhes bya ba ni/ zil pa'i thigs pa dang mtshungs pa'i ye shes kyi gnas yin zhes brda'i myong ngo / /dzA lan+d+ha ra zhes bya ba ni/ de nyid kyi ming gi rnam grangs yin te/ rtsa stong phrag bdun cu rtsa gnyis kyi dra ba'i 'byung gnas yin pa'i phyir zhes dgongs so//sgo de nas khugs te ci byas she na/ snga ma bzhin du dam tshig gi 'khor lo bsreg ste zhes bya ba smos pa la/ snga ma bzhin du zhes bya ba ni/ sngar bstan pa'i rang gi lus la gnas pa'i de bzhin gshegs pa dang /lha mo'i 'khor lo bsregs pa bzhin du/ kun du brtags pa'i de bzhin gshegs pa'i sku la gnas pa yang / /dam tshig gi 'khor lo sreg par byed pa ni/ phyi'i de bzhin gshegs pa'i mngon par zhen pa bsregs te/ snang ba mchod pa'i ye shes thob nas/ de'i rjes su rim gyis yongs su rdzogs pa'i mtshan nyid can snang ba thob pa'i ye shes tsam la/de bzhin gshegs pa'i thugs kar ngal bso bar bya'o/ /ji ltar zhe na/ gsungs pa/ 'gro ba dang 'jug par byed cing zhes bya ba la sogs pa smos te/ de bzhin gshegs pa'i thugs kar ngal bso ba'i dus su/dang por cung zad g.yo zhing nges par 'byung ste/ mgrin pa dang spyi bo'i bar du phyin nas/ slar yang log ste/ stong pa nyid kyi dbyings su 'jug cing mi mthong zhing mi snang ste/ de ci'i phyir zhe na/ de la gsungs pa/ skra'i rtse mo brgya stong du gshags pa'i tshad kyi phyir ro zhes gtan tshigs so//'dis ni gzugs can gyi rdzas kyi ngo bo med par bshad do zhes rgyud kyi sgron ma zhes bya ba ni/ gong du bshad pa'i rigs pas so/ /rgyud kyi sgron ma'i brda'i sgras/ sems la dmigs pa thob pa'i rim pa bstan to zhes las kyi rdo rjes mdzad pa'i sgron ma bzhi'i TI kA las/rgyud kyi sgron ma ste gnyis pa rdzogs so// //da ni yid kyi rang bzhin gyi sku sgyu ma lta bu'i ting nge 'dzin gyi mtshan nyid can bdag byin gyis brlab pa'i rim pa las gsungs pa'i rjes su dpag pa'i kun rdzob kyi bden pa'i mtshan nyid can/ rnal 'byor ma'i rgyud las gang gsungs pa de bstan par bya ba'i phyir/de'i rjes su de bzhin gshegs pa rnams kyi thugs ka na gnas pa'i zhes bya ba la sogs pa smos te/ de bzhin gshegs pa thams cad kyi thugs ka na gnas pa zhes bya ba ni/ stong pa nyid du yongs su thim pa'o/ /dam tshig gi 'khor lo zhes bya ba ni/ snying rje'i mtshan nyid can no//dmigs te zhes bya ba ni sngon gyi smon lam gyi stobs kyis mngon du bya'o/ /chos kyi dbyings kyi ye shes bdud rtsi blangs te zhes bya ba ni/ de la chos kyi dbyings kyi phung po dang / khams dang skye mched la sogs pa de rnams kyi dbyings ni/ mngon par gsal bar byed pa'i rgyu'i ye shes so//de nyid bdud rtsi zhes bya ba ni/ sems can gyi don du 'khor ba ji srid kyi bar du gnas shing / skye ba dang rga ba dang 'chi ba 'phrog par byed pa'i mtshan nyid do/ /blangs te zhes bya ba ni/ ye shes kyi bdud rtsi de shes rab kyis blangs la/ de'i bdag nyid du gyur nas/ sngar bshad pa'i sgo nas zhes bya ba ni/de bzhin gshegs pa'i gtsug tor gyi gnas las/ mngon par 'byung ba ni phyir 'byung la/ 'o ma'i rgyun ltar zhes bya ba ni/ sngar bshad pa'i shes rab me'i gzugs can de nyid/ 'o ma'i rgyun lta bur brtags pa ni/ byang chub kyi sems kyi bdud rtsi'i tshul du 'ong zhing /sgo de nyid du zhes bya ba ni/ sngon du bshad pa'i de bzhin gshegs pa'i 'jug pas so/ /de bzhin du/ rang gi spyi bor zhugs te/ so'i zam pa'i nang du chud pa'i bug pa nas zhes bya ba ni/ bde ba chen po'i 'khor lo'i rtsa dbu ma'i sgo nas/ longs spyod kyi 'khor lor zhugs shing yul la longs spyod pa'i bde ba bskyed nas/cung zad 'gro bar ngal bsos te/ sngar bsregs pa'i de bzhin gshegs pa rnams la zhes bya ba ni/ de nyid du song zhing mi snang bar gyur pa rnams la'o/ /dga' ba skyed cing zhes bya ba ni/ dag pa 'jig rten pa'i ye shes kyi bdud rtsis mngon par gsal bar byed ces bya ba'i don to//de lta bu'i byin gyis rlob pa'i mtshan nyid can/ dbang po'i gzhu dang mtshungs pa'i sku bskyed par byas nas/ kun rdzob kyi byang chub sems kyi tshul du/ lte ba'i dkyil 'khor du gnas pa yin zhes bya ba la/ brtan par 'gyur ro/ / sprul pa'i 'khor lo'i lte bar/ rdo rje nor bu'i chang gzungs kyi dbus su gnas par 'gyur zhes dgongs pa'o/ /de lta bu'i rnal 'byor pa la yang dang yang du goms par bya ba'i phyir/ de las kyang nges 'byung ste zhes bya ba la sogs pa smos te/ sngon du bshad pa bzhin du thams cad shes bya ye shes kyi sgron ma ste/dag pa 'jig rten pa'i ye shes kyi rang bzhin can/ bdag la byin gyis brlab pa'i rim pa gsum pa bstan to zhes las kyi rdo rjes mdzad pa'i sgron ma bzhi'i TI kA las ye shes kyi sgron ma ste gsum pa rdzogs so// //da ni kun rdzob kyi bden pa yang dag pa'i mthas sbyar bar bya ba'i phyir/gsang ba'i sgron ma'i brdas mngon par byang chub pa'i rim pa bstan par bya ba'i phyir/ slob dpon gyis 'di ltar gsungs pa ste/ da ni sngags dang rgyud dang ye shes spangs pa zhes bya ba smos pa la/ ngag dang sems dang lus rnam par dben pa don dam pa'i bden pa/rang bzhin gyis 'od gsal ba/ thabs las byung ba'i de kho na nyid do/ /ji ltar mtshon par bya zhes sgo 'gags pa zhes bya ba smos te/ shes rab kyi dbang bskur ba'i dus su/ bla ma dam pa'i man ngag las/ phyi dang gsang ba'i sgo 'gags pa'i dus su/'gro ba dang 'ong ba las nges par grol zhing zhes bya ba ni/ rnam par rtog pa'i rlung gis bskyod du med pa'i bde ba chen po'i de kho na nyid nye bar mtshan par 'gyur zhes bya ba'i don to/ /phung po dang khams dang skye mched dang glal ba yul las nges par log pa zhes bya ba la/ don dam pa'i byang chub kyi sems kyi mtshan nyid kyi gnas skabs su/phung po la sogs pa der mi dmigs pa'i phyir zhes bya ba'i don to/ /de lta bu'i de kho na nyid dpe gang gis shes par bya zhe na/ mun nag 'thibs pa la zla ba'i nor bu ltar 'od gsal ba zhes bya ba smos te/ mun nag thibs po ni gnam stong gi dus so//skal ba'i zla ba ni zla ba'o/ /de'i mtha' ni tsan+d+ra kAn+ta ste/ rang bzhin med pa'i cha'o/ /de nyid nor bu dang 'dra bas na nor bu ste/ rang gis 'od gsal ba nyid yin pa'i phyir ro/ /de bzhin du rang bzhin gyis 'od gsal ba de kho na nyid bzhi pa don dam pa'i byang chub kyi sems ni zla ba'i nor bus rtogs par bya zhes man ngag go//de bas na/ rdul dang bral ba stong pa nyid/ /ces bya ba smos te/ 'dod chags kyi tshul la gnas pas kyang 'dod chags kyi rdul gyis ma gos pa'o/ /stong pa zhes bya ba ni rang bzhin dang / snang ba dang / stong pa nyid gsum gyis rnam par dag pas/thams cad stong pa yin zhes bya ba'i don to/ /mtshan ma med pa zhes bya ba ni/ mtshan ma dang bcas pa'i sgom pa spangs pa'i phyir ro/ /yang na de la mtshan ma gzhan med pa yin te/ rang min pa'i phyir ro/ /de yang gzhan gyi mtshan ma ma yin te/ 'gyur ba med pa'i phyir ro//smon pa med pa zhes bya ba ni/ smon lam med pas kyang sgrub pa'i phyir/ ye shes zhes bya ba ni/ mi shes pa las log pa'i phyir ro/ /rang dang gzhan gyis rtogs pa spangs pa zhes bya ba ni/ gnyis su med pa yin pa'i phyir ro/ /mchog tu zhi ba zhes bya ba ni/ pa zhes bya bas don dam pa'i bden pa ston to//de bzhin du raM gyis kyang dam pa de nyid la me dang 'dra ba'i ngo bo nyid bstan te/ phung po dang khams dang skye mched kyi bud shing sreg par byed pa'i ngo bo yin pa'i phyir ro/ /zhi ba zhes bya ba ni shAn+tiM ste/ yi ge shes pa'i bde ba shes par bya'o/ /an+ta'i sgras kyang dpe las byung ba'i don gyis bde ba lhun gyis grub pa'i mtshan nyid can/de kho na nyid lnga pa bstan to/ /ji skad du/ de nyid lnga pa rdzogs pa yin/ /rim gyis lhan cig skyes mi zad/ /ces gsungs so/ /chags pa dang chags bral 'dres par gyur pa zhes bya ba la/ dga' ba la sogs pa'i sems kyis nye bar mtshon pa'i 'khor ba dang mya ngan las 'das pa ro gcig gi ngo bo nyid/mi gnas pa'i mya ngan las 'das pa'i mtshan nyid ces bya ba'i don to/ /ji skad du/ dgyes pa'i rdo rje las kyang gsungs pa/ de la thog ma tha ma bar med cing / /de ni srid pa ma yin mya ngan las 'das min//gang zhig bde ba chen po de ni gzhan min bdag tu gyur pa'ang min/ /zhes gsungs so/ /mar la mar blugs pa lta bur 'gyur ba zhes pa ni/ ye shes dang shes bya dbyer med pa'i phyir ro/ /yang na bsgom par bya ba dang sgom pa po mi dmigs pa'i phyir ro/ /ji skad du/ bde ba dam pa de la ni//bsgom bya sgom pa po yang med/ /lus med bzung ba dang ni de bzhin nyid kyang med/ /sha med khrag med bshang ba med cing gci ba'ang med gyur pa/ /rlabs med lhan cig skyes pa de ni sna tshogs ngo mtshar yin/ /zhes dgyes pa'i rdo rje las gsungs so/ /mya ngan las 'das shing zhes bya ba la/rnam par rtog pa bag chags bcas par 'gags pa'i phyir ro/ /bdag med pa zhes bya ba ni/ sgyu ma dang mtshungs pa'i sku la'ang mngon par zhen pa med pa'i phyir ro/ /de ltar mtshan gzhir gyur pa'i thabs las 'byung ba so sor bstan nas/ de'i mtshon par byed pa'i ngo bo nyid thabs bstan par bya ba'i phyir/ byang chub kyi sems zhes bya ba smos te/ byang chub kyi sems ni kun rdzob kyi thig le'o/ /de nyid lhan cig skyes pa'i bde ba chen po'i gzhir gyur pa/ shes rab kyi sbyar bas bskyed cing gsungs la/ mtshan nyid dang mtshan gzhi'i sbyor bas ngo bo nyid kyi sku bzhi pa zhes bya ba/rdo rje 'chang chen po'i go 'phang goms par bya zhes dgongs pa'o/ /de gang du goms she na/ 'dod chags can gyi ngo bo'i phyir/ mtshon par byed pa'i gnas bstan par bya ba'i phyir/ btsun mo'i b+ha ga bde ba can/ /zhes bya bar bzhugs so zhes bya ba smos pa la/btsun mo ni phyag rgya'o/ /de yang rnam pa gsum ste/ las kyi phyag rgya dang / ye shes kyi phyag rgya dang / phyag rgya chen po'o/ /de rnams kyi b+ha ga ni rtags te/ de kho na nyid nye bar dmigs pa'i gnas mchog go/ /ji skad du/ gnas ni shes rab b+ha gar bshad//khams rnams kun gyi mchog gyur pa'o/ /zhes 'byung ngo / /de bas na b+ha ga de bde ba can zhes bya ba smos pa las/ 'jig rten dang 'jig rten las 'das pa'i bde ba gang la yod pa de ni bde ba can de la bzhugs zhes tshig sbyar ro/ /gzhan yang ji lta bu zhe na/ bzhugs gnas su zhes bya ba smos pa ni/bde ba chen po'i rang bzhin can gyi rdo rje 'chang chen po'i spyod lam gyi gnas/ b+ha ga yin pas der bzhugs zhes 'brel pa'o/ /gang gi phyir bcom ldan 'das kyi bzhugs gnas yin pas de'i phyir de nyid du 'tshol bar bya ba zhes dgongs pa'o/ /las kyi phyag rgya dang /ye shes kyi phyag rgya'i rnal 'byor pa rnams la mtshon pa'i gnas bstan nas/ nga ni phyag rgya chen po pa'i rnal 'byor pa la/ gleng gzhi'i tshig las gsungs pa'i/ btsun mo'i b+ha ga'i khyad par gyi sgo nas/ mtshan nyid dang mtshan gzhi'i gsan rab rab tu bstan par bya ba'i phyir/de bzhin gshegs pa thams cad ces bya ba ni/ phung po la sogs pa'o zhes bya ba smos pa la/ phung po dang khams la sogs pa de bzhin nyid kyi ngo bo nyid yin pas/ /de bzhin gshegs pa nyid du bshad/ ji skad du/ dpal ldan de bzhin gshegs zhes pa/ /de bzhin du yang 'ongs pa ste//des tshig sbyor ba 'di yis ni/ /de bzhin gshegs zhes brjod pa yin/ /zhes gsungs so/ /de rnams kyi sku dang gsung dang thugs ni zhes bya ba la/ phung po la sogs pa'i rang bzhin can gyi de bzhin gshegs pa rnams kyi sku dang gsung dang thugs ni/ skye gnas dang / snying ga dang / mgrin pa'i thig le'o/ /de'i brda'i bstan par bya ba'i phyir/ /oM AHhUM/ yi ge rnams zhes bya ba smos te/ zag pa med pa'i bde ba chen po'i bar ma chad pa'i rgyu yin pa'i phyir zhes dgongs pa'o/ /de rnams kyi rdo rjes ni zhes bya ba la/ spyi bor gnas pa'i ye shes kyi thig le bzhi pa zhes bya ba'i don to//ji skad du/ sku gsum yongs su shes pa ni/ /bde chen 'khor lo yang dag bshad/ /ces bya ba 'byung ngo / /byang chub kyi sems te zhes bya ba la/ de nyid don dam pa'i cha la brten te/ rnam grangs su bshad do/ /shu kra zhes bya ba la/ de nyid kyi kun rdzob kyi cha la brten te/ming gi rnam grangs bstan te/ de med na mi 'byung ba'i phyir ro/ /de'i btsun mo zhes bya ba ni/ de bzhin gshegs pas brdas gsungs pa'i rol byed ma'i sgras chos nyid kyi mtshan nyid bde ba chen po ste/ btsun mo nyid du shes par bya'o/ /mi la sogs pa'i mo'i gzugs so zhes bya ba la/de la dgongs pa ni/ las kyi phyag rgya dang / ye shes kyi phyag rgya la mngon par zhen pa can/ dbang po dman pa dang / bar pa rnams 'jug par bya ba'i phyir gsungs pa yin gyi/ dbang po rno ba'i phyag rgya chen po'i rnal 'byor ba rnams la ma yin zhes dgongs pa'o//de'i b+ha ga ni zhes bya ba la/ don dam pa'i bden pa'i mtshan nyid can gyi/ rol byed ma zhes bya ba'i gnas phyag rgya chen po'o/ /de'i b+ha ga zhes bya ba ni lus dang ngag dang yid kyi rnam par rtog pa'i nyon mongs pa gsum ma tshang ba'i gnas so/ /der bzhugs so zhes tshig sbyor bsam pa'i bye brag gi phyag rgya du ma yin pas/b+ha ga rnams la bzhugs so zhes byed pa'i tshig mang po'i mtha' can du bstan to zhes bya ba ni/ /don 'di las don gzhan med ces dgongs pa'o/ /ji skad du/ shu kra'i rnam pa bcom ldan 'das/ / de bde rol byed ma ru bshad/ /ces dgyes pa'i rdo rje las byung ngo / /gang tshe rang bzhin gyis 'od gsal ba'i bcom ldan 'das te/ b+ha ga la bzhugs pa de'i tshe/ bdag gis thos zhes sdud pa pos bstan par bya ba'i phyir zhes gsungs te/ e waM zhes bya ba 'dis/ thabs dang shes rab gnyis su med pa'i de kho na nyid 'di'i gsal ba/sangs rgyas thams cad kyi rin po che'i 'byung gnas su gyur par mtshon to/ /don 'di nyid slob dpon nyid kyis kyang / /rgyud kyi tshig la brten te/ dran par bya ba'i phyir gsungs pa/ /e yi rnam pa lha yi gang / /zhes bya ba la sogs pa la/phyag rgya chen po'i phyogs su sngon du bshad pa'i don kho na shes par bya'o/ /gzhan du na ni zur gsum gyi rnam pa kho na'o/ /lha'i zhes bya ba ni/ rol pa'i gnas sam/ 'od gsal ba ye shes mtshon par byed pa'o/ /yang na lha'i zhes bya ba ni/ mi la sogs pa'i mo'i zur gsum legs par sbyangs pa zhes bya ba'i don to//dbus su waM gis rnam par brgyan/ /ces bya ba las/ phyogs dang po las ni thabs su gyur ba'i byang chub kyi yid kyis brgyan cing mdzes pa ste ldan pa'i don to/ /phyogs gnyis pa la yang / yi ge waM zhes bya ba ni rdo rje skyes bu'i rtags kyis brgyan cing //legs par mdzes shing zhes bya ba'i don to/ /gang nga zhes bya ba ni/ gtan tshigs kyi don to/ /gang gi phyir yi ge e ni thabs dang shes rab kyi bdag nyid yin pa de'i phyir na 'di gsum ste/ /bde ba kun gyi gnas yin te/ /sangs rgyas rin chen za ma tog /ces bya ba ni/bde ba kun ni dga' ba la sogs pa thams cad 'jig rten dang 'jig rten las 'das pa bzhi bzhi'o/ /de rnams kyi gnas ni rtogs par byed pa'i brda'o/ /de la gsum gsum ni 'jig rten pa'i'o/ /re re ni 'jig rten las 'das pa'o/ /de ltar na rang bzhin brtags pa 'dis dgongs pa gang yod ce na/de la dgongs pa ni 'di yin te/ 'dor bar bya ba dang / blang bar bya ba'i sgom pa'i dngos po yongs su shes pas/ /byang chub thob par 'gyur zhes dgongs pa'o/ /sangs rgyas rin chen za ma tog /ces bya ba la/ gang+gA'i klung gi bye ma snyed sangs rgyas rin po che rnams kyi/za ma tog ces bya ba ni snod yin te/ 'byung gnas dang thim pa'i sa zhes dgongs pa'o/ /de ci'i phyir zhe na/ sangs rgyas thams cad 'od gsal ba'i ngo bo nyid du 'dus pa'i phyir ro/ /yang na 'od gsal ba'i don dam pa las/ /sngon cad kyi smon lam gyi dbang gis/sems can rjes su gzung bar bya ba'i phyir/ sangs rgyas rin po che rnams/ rin po che'i za ma tog phye ba ltar snang ba'i phyir ro/ /de ni gleng gzhi'i tshig las sdud pa pos ston pa phun sum tshogs pa la sogs pa gang gsungs pa/ de dag slob dpon nyid kyis bsten par bya ba'i phyir//de dag sprul pa'i lus zhes bya ba la sogs pa smos pa la/ de la thos zhes bya ba la tshig sbyar ro/ /de zhes bya ba ni/ bstan pa'i snying por gyur pa thabs dang shes rab gnyis su med pa'i de kho na nyid do/ /bdag gis zhes bya ba ni/ 'khor phun sum tshogs pa lag na rdo rje bdag gis so//de la sprul pa'i sku zhes bya ba smos te/ /bcom ldan 'das rdo rje 'chang chen po'i phyag rgya chen po yongs su gyur pa'i gzugs kyis zhes bya ba'i don to/ /de lta bu'i bdag gis thos pa zhes bya ba ni/ nyams su myong zhes bya ba'i don to/ /gang las thos she na/ longs spyod rdzogs pa'i sku las zhes bya ba smos te/gang gi tshe ston pa bcom ldan 'das kyis sprul pa bdag cag rnams la byin gyis brlab pa mdzad pa'i phyir/ /longs spyod rdzogs pa'i sku la bzhugs pa ste/ zla ba rgyas pa dang 'dra ba'i byang chub kyi sems kyi thig ler bzhugs shing / 'od gsal ba sprin med pa'i nam mkha' dang mtshungs pa'i ngo bo nyid kyis bzhugs shing gnas pa de'i tshe//bdag gis bcom ldan 'das de las thos shing zhes bya ba ni/ rtogs so zhes dgongs pa'o/ /ji skad du/ gcig ni nam mkha' dang mtshungs pa/ /cig shos zla ba rgyas 'dra'i 'od/ /nam mkha' dang mtshungs gang yin pa//de nyid skyob pa'i chos skur 'dod/ /ces 'byung ngo / /de ltar zhes bya ba ni sngon du bshad pa'i don nye bar sdud par mdzad de/ /de bzhin gshegs pa thams cad kyi sku dang gsung dang thugs kyi rdo rje btsun mo'i b+ha ga la bcom ldan 'das bzhugs so zhes gsungs pa'o//sdud pa pos khyad par can gyis nyams su myong ba'i mtshan nyid kyi skad cig ma gang gleng gzhi'i tshig las so sor bstan pa/ de slob dpon gyis bshad par bya ba'i phyir/ /'di gsungs te/ de ni byang chub kyi sems gang bzhugs pa zhes bya ba ni/ byang chub kyi sems kyi tshul du rdo rje 'dzin pa gang bzhugs pa de las/dus gcig na zhes bya ba ni/ mngon par byang chub pa'i skad cig ma'i dus su/ bdag gis thos zhes snga ma bzhin du tshig gi 'brel pa shes par bya'o/ /ji skad du/ snang ba mtshan mo'i cha ste gsal ba nyi ma'i 'od zer 'gyed pa snang ba mched pa yin//mtshams ni snang ba thob pa rang gi rang bzhin rnams dang rtag tu ldan pa yin/ /mtshan mo ma yin mtshan min nyin min gang zhig rang bzhin rnams dang bral/ /de ni byang chub skad cig bla ma dam pas gsungs pa'i rnal 'byor spyod yul yin/ /zhes gsungs so//skad cig ma de nyid rnal 'byor ma'i rgyud kyi rim pas/ slob dpon nyid kyis ston par mdzad de/ dus gcig ces bya ba ni/ /dpyid kyi dus gcig tu ste zhes bya ba la/ dgongs pa'i tshig 'di yin te/ des na skal ba dang ldan pa'i khyad par can gyi dus/ /mngon par shes pa la sogs pa'i me tog 'byung du rung ba//rang 'byung me tog 'byung ba'i dus su mtshon par bya ba yin te/ bde ba nyams pa'i ngo bo yin pa'i phyir ro/ /de yang gang gis mtshon par bya ba yin zhe na/ sna'i bug pa g.yas pa dang g.yon pa'i rlung 'gags pa'i tshe zhes bya ba'i don to zhes bya ba la/ phyag rgya dang mnyam par sbyor ba'i dbang gis/ /srog dang rtsol ba 'gog pa las mtshon par bya'o zhes bya ba'i don to zhes bya ba la/ /'dis ni khyad par shes par bya ste/ des ni g.yas dang g.yon pa zhes bya ba la sogs pas/ /'gro ba dang 'ong ba'i mtshan nyid can 'dod chags dang bral ba'i ngo bo nyid/dus bzangs dang dus ngan dag bshad do/ /'gog pa zhes bya ba 'dis kyang bsam gyis mi khyab pa'i dus shes par bya'o/ /ji skad du/ dus ni dam tshig brjod pa ste/ /dus de rnam pa gsum du 'dod/ /bzang dus dang ni ngan dus dang / /bsam gyis mi khyab dus de bzhin/sna yi bug pa kha sbyar las/ /'ong ba dus bzangs rab tu grags/ /song ba nyid ni dus ngan te/ /de yi bar gyi dus gcig grags/ /grogs med gcig pur gyur pa ste/ /dus de bsam gyis mi khyab pa'o/ /srog dang rtsol ba rnam spangs pa/ /de bzhin 'byung rngub dag las 'das//'gro 'ongs dag las nges par grol/ /de ni dus gcig ces brjod do/ /zhes grags so/ /chags pa ma yin chags bral min/ /dbu mar yang ni dmigs mi 'gyur/ /chags dang chags bral dag gis ni/ /'dres par gyur pa mi shigs pa'o/ /mar la mar ni 'dres pa bzhin//gcig tu gyur pa rnyog pa med/ /de bzhin chags dang chags bral gyis/ /ro gcig skad cig gcig tu gsungs/ /'gog pa dang ni 'dod pa dang / /dpyid kyi dus ni de bzhin te/ /dus gsum mnyam par sbyor ba las/ /de ni dus gcig ces brjod do/ /zla ba dang ni nyi ma dag /de bzhin shar ba nub pa dang / /snying stobs rdul dang mun pa dag /gang tshe log par gyur pa las/ /byang chub sems ni brtan gyur na/ /de nyid ro gcig skad cig yin/ /de 'dra'i dus gcig de la ni/ /bcom ldan de ni yang dag bzhugs/ /zhes bshad pa'i rgyud las 'byung ngo //kye lha dang mi rnams dus de la rdo rje 'dzin pas/ /bdag gis thos pa'i de kho na nyid nyon cig /gang phyir de bzhin gshegs pa yongs su mya ngan las 'das pas/ khyed cag rnams la bdag kho na ston pa yin gyi gzhan ma yin no/ /khyed cag rnams kyang skal pa dang ldan pa'i skyes bu rnams la/phyis ston par 'gyur zhes lung gi man ngag gcig nas gcig tu ma nyams pa'i de kho na nyid 'grub ces sdud pa po byang chub sems dpa' rnams kyi/ bdag gis thos zhes tshig gi dgos pa mkhas pas shes par bya'o/ /de ni sngon du bshad pa'i srog dang rtsol ba nyid kho na/ 'khor ba dang mya ngan las 'das pa'i rgyu yin zhes dran par bya ba'i phyir/ slob dpon gyis 'di gsungs te/ ji skad du/ chos rnams thams cad rgyu las byung / /zhes bya ba la sogs pa las/ /chos rnams zhes bya ba ni/ phung po dang khams dang skye mched kyi mtshan nyid de/ rang bzhin dang snang ba'i ngo bo nyid sems dang sems las byung ba'o/ /rgyu las byung zhes bya ba ni/ /rten cing 'brel ba las 'byung ba'o/ /de rgyu zhes bya ba ni/ /gtso bor 'gyur ba'i rgyu ste/ /khams phra ba'o/ /ji skad du/ rlung ni phra ba'i gzugs dang ni/ /shes dang yang ni 'dres gyur nas/ / dbang po'i lam nas 'byung 'gyur zhing / /yul rnams la ni dmigs par byed/ /gang tshe snang bar ldan gyur na/ /rlung ni bzhon pa nyid gyur nas/ /de tshe rang bzhin de dag kun/ /lus med pa rnams ga la 'jig /ces gsungs so/ /de bzhin gshegs pas gsungs zhes bya ba ni/thams cad mkhyen pas bstan to/ /de rnams kyi 'gog pa gang yin pa de yang gsungs zhes tshig lhag ma sbyar ro/ /chos de rnams kyi 'gog pa ni don dam pa'i bden pa ste/ /'od gsal ba'o/ /de yang rang bzhin dang / snang ba dang / stong pa nyid gsum rnam par dag pas thar pa'i don du so sor bstan ces bya ba'i don to/ji skad du/ stong pa gsum gyi rnam dag gang / /'od gsal bar ni de bshad do/ /ye shes gsum po rnam dag pa/ /thams cad stong pa'i gnas su bshad/ /ye shes dag nas de nyid dang / /thams cad mkhyen pa bla na med/ /snang ba med cing 'gyur ba med//gnyis med mchog tu zhi ba ste/ /de ni yod min med min zhing / /ngag gi spyod yul las 'das pa/ /de bas 'od gsal dag pa las/ /ye shes gsum po 'byung 'gyur te/ /sum cu rtsa gnyis mtshan 'chang zhing / /dpe byad brgyad cu yang dag ldan/ / rnam pa thams cad kun ldan pa/ /thams cad mkhyen pa de las 'gyur/ /zhes gsungs so/ /dge sbyong chen pos 'di skad gsungs/ /zhes bya ba la/ 'di skad ces bya ba ni/ de bzhin gshegs pas gsungs pa'i rten cing 'brel par 'byung ba'i tshigs su bcad pa'i don to/ /de smra bar byed pas na/'di skad gsungs zhes bya'o/ /de gang zhe na/ dge sbyong chen po zhes bya ba smos te/ sdud pa po 'phags pa dge sbyong kun dga' bo'o/ /tshig de nyid kyang gang gis smras she na/ shA ri'i bu dang / rdo rje'i theg pa las kyang phyag na rdo rjes so/ /de ni shin tu rnam par dag pa'i blo can rnams la srid pa dang mya ngan las 'das pa dag /dbyer med pa nyid du so sor bstan par bya ba'i phyir/ /srid pa rang bzhin gyis dag pa/ /zhes bya ba la sogs pa smos te/ de la srid pa ni rnam pa gsum ste/ skye ba'i srid pa dang / 'chi ba'i srid pa dang / bar ma de'i srid pa'o/ /de dag ngo bo nyid kyis dag pa yin te/don dam pas khyab pa'i phyir ro/ /de la 'chi ba'i srid pa ni 'od gsal ba la 'jug pa'i mtshan nyid can te/ chos kyi sku yin te/ phung po la sogs pa mtshon pa'i phyir ro/ /srid pa bar ma do ni 'ja' tshon dang mtshungs pa longs spyod rdzogs pa'i sku yin te/ 'od gsal ba las dang por skyes pa'i phyir ro/ /skye ba'i srid pa ni sprul pa'i sku'i mtshan nyid yin te/ 'gro ba'i don byed pa'i phyir ro/ /ji skad du/ ji ltar phyi rol de bzhin nang / /zhes gsungs so/ /de ji ltar shes par bya zhe na/ rang bzhin gyis ni srid bral byas/ /zhes bya ba smos te/ rang bzhin zhes bya ba ni/ /chos thams cad kyi rang gzugs so/ /des srid pa srid bral bya zhes bya ba ni/ srid pa'i ming tsam yang med par byas zhes bya ba'i don to/ /ngo bo nyid kyis zhes der chos can du ma yin pas/ /chos nyid kyang mang po'i tshig gi mtha' can du shes par bya'o/ /ji ltar na 'khor ba nyid mya ngan las 'das pa dbyer med pa bzhin du//dgyes pa'i rdo rje las kyang gsungs te/ rnam dag yid ldan rnams la ni/ /'khor ba nyid ni mya ngan 'das/ /zhes bya ba la sogs pa gsungs so/ /rim pa lnga pa las kyang / /sems gang gis ni byas pa rnams/ / 'khor bar bcings par gyur pa ste/ /sems de nyid kyis rnal 'byor pa/ /bde bar gshegs pa'i gnas su 'gro/ /zhes gsungs so/ /gzhan yang snang ba'i phreng ba las kyang / /srid gsum mthar byed kyis ni srid pa gsungs pa ste/ mdor bsdus pa ni sems kyi rtog pa tsam/ /snying gnas de ni gal te rnams spangs na//skye ba'i nying mtshams sbyor ba'i 'ching ba las grol 'gyur/ /zhes slob dpon zla ba pa'i zhabs kyis gsungs so/ /de ltar na rang rig pa'i 'od gsal ba rang bzhin gyis yongs su rnam par dag pa/ /'gro ba 'di dag sangs rgyas kyi rang bzhin du shes nas//rnal 'byor pas thar pa'i yul du ring ba'i 'du shes bskyed par mi bya zhes bstan par bya ba'i phyir/ /da ltar byung ba'i ngo bo nyid la ring ba'i 'du shes spang bar bya'o zhes bya ba smos te/ da ltar byung ba ni de ltar gnas pa ste/ 'das pa dang ma 'ongs pa ni ma yin no/ /de lta bu'i ngo bo nyid de kho na nyid gang la yod pa de la de skad ces bya'o//yang na skad cig ma re re la 'byung zhing gnas pas na/ da ltar byung ba'i ngo bo ste/ dus thams cad du mi 'gyur zhing don dam pa'i bden pa ste chos kyi dbyings so/ /de la ni ring ba'i 'du shes spang bar bya'o zhes bya ba ni/ /de kho na nyid rig pas bskal ba grangs med pa gsum gyis byang chub thob par 'gyur zhes ring ba'i 'du shes bya ba ma yin no//snang ba'i phreng ba las kyang / /rnal 'byor rig pas thar ba la/ ring ba'i 'du shes bya ba min/ /stong pa nyid kun brtags pa yi/ /tshul gyis mthong yang bdag nyid grol/ /zhes slob dpon la ba pas gsungs so zhes//gsang ba'i sgron ma zhes bya ba la/ /sdud pa pos mngon par byang chub pa'i rim pa brgyud pa'i rim pa'i sgo nas/ gsang ba ston par byed pa'i tshig phye ba ni sgron ma ste rdzogs so zhes tshig sbyar ro// //de'i rjes su rab tu byed pa'i mkhan po slob dpon nyid kyis gsungs te/chos kyi phung po brgyad khri bzhi stong zhes bya ba la sogs pa la/ sgron ma lta bu bzhi bo 'di mdor bsdus te mtshon par byas zhes tshig sbyar ro/ /de la man ngag dran par bya ba'i phyir/ slob dpon gyis mtshon par bya ba yin gyis/ /rgyas par ma bshad do/ /dgongs pa ni gang gi phyir gang shes rab rno ba de dag gis//bdag gi slob ma'i rgyud kyi rjes su 'brang zhing shes par 'gyur te/ gang yang blo dman zhing slob dpon gyi man ngag gi rgyud kyi rim pa dang bral ba/ rab byung de rnams la gsang bar bya ba'i phyir/ /slob dpon gyis rgyas par ma bshad cing 'grel ba ma mdzad do//gang gis phyir 'grel pa tsam la brten te/ dgongs pa med pa'i bshad pas/ rang nyams pa de rnams kyis gzhan rnams la yang phyin ci log pa'i lam ston pas/ nyams par byed ces dgongs na ste/ slob dpon gyis sgron ma bzhi po 'di mdor bsdus te mtshon pa tsam mdzad do zhes dgongs pa'o//de lta na ci rang bzos bstan bcos 'di mdzad ce na/ de bzhin gshegs pa'i gsung rab las zhes bya ba smos te/ de bzhin gshegs pa'i gsung rab kho na 'di yin gyis/ /bdag gi ni ma yin no/ /'on te bdag gis btus zhes slob dpon nyid kyi lung gi rjes su 'brang ba nyid shes par bya'o//de ltar na de bzhin gshegs pa'i gsung rab las gang btus she na/ chos kyi phung po brgyad khri bzhi stong zhes bya ba smos te/ de la dgongs pa 'di yin te/ chos kyi phung po brgyad khri bzhi stong las brjod par bya ba'i de kho na nyid gang gsungs pa/ de nyid gzhung re re las sems can gyi dbyings gsungs pa ste/de'i rjes su 'brang zhing mdor bsdus pa'i man ngag sgron ma bzhi zhes bya ba bsdus/ ji skad du/ chos phung brgyad khri bzhi stong las/ /thub pa chen pos gsungs pa dag /snying po las ni snying po mchog /mngon par byang chub mtshan nyid do//zhes gsungs so/ /de la gal te gang zhig 'dir smra na ci'i phyir 'dus pa'i rim pas 'di bshad ce na/ de ni skyon med de/ gang gi phyir rgyud kyis rgyud gzhan rtogs par bya zhes bshad pa'i rgyud las gsungs pa'i phyir ro/ /de lta yin na ci'i phyir/ /mngon par byang chub pa'i 'og tu/zung du 'jug pa'i rim pa ma bstan ce na/ de la yang 'gal ba med de gang gi phyir bden pa gnyis la ma 'dus pa'i bsgrub bya gzhan med pas so/ /gal te yod na don ni 'di nyid las gzhan ma yin no/ /de ci'i phyir zhe na/ sgyu ma'i ting nge 'dzin dang / 'od gsal ba dag la zung du 'jug pa zhes ming tsam btags so//de bas na las dang po ba'i dus su kho na kun rdzob dang don dam pa la dbyer med pa'i tshul zhes nas 'jug pa'i rnal 'byor pas zung du 'jug pa zhes bya ba'i 'bras bu lhun gyis grub pa yin pas 'dir ma bstan to/ /de ltar na zung du 'jug pa dang rjes su mthun pa'i spyod pa yang ci'i phyir ma bstan ce na//de la 'dir smra ba yin te/ /rnal 'byor ma'i bla ma'i rgyud 'di la dbang bskur thob pa'i sgrub pa pos dus de nyid du gnyis su med pa'i spyod pa la nges pa skyes pa'i phyir ro/ /des ni sgron ma bzhi pos yin gyi lnga ni ma yin no zhes dgongs pa'o//man ngag tshig tsam rmongs pa yin/ /gang gis rtogs par mi 'gyur na/ /mtshams med las kyi 'jigs pas ni/ /de yis bskur bar bya ba min/ /bdag gis bla ma dam pa las/ /yang dag legs par 'di thos te/ /don 'di dran par bya ba'i phyir/ /ci nus par ni bshad par byas//'di la nyes pa yod gyur na/ /dam pa rnams kyis bzod par rigs/ /rmongs pa gsal byed TI kA 'di/ /tshig don ma lus ston byed pa/ /brtsams te bsod nams gang bsags pa/ /de yis 'jig rten grol bar shog /slob dpon nag pos mdzad pa'i/ /

CLOSE WINDOW