CLOSE WINDOW

D1537
བོད་ཡིག

/rgya gar gyi mkhan po mkhas pa su ma ti'i spyan sngar dge slong pradz+nyA kIrtis bsgyur ba'o// //[]@##/ /rgya gar skad du/ shrI tsa kra sam+ba ra ho mo pa yi ka/ bod skad du/ dpal bde mchog 'khor lo'i sbyin sreg gi cho ga /bcom ldan 'das dpal rdo rje mkha' 'gro la phyag 'tshal lo/ /sngo ser dmar po margata ljang gu'i sku 'chang spyan gsum can/ /dbang chen la sogs phyogs bzhi'i zhal mnga' shes rab dmar spyan gsum/ /phyag gnyis bgegs kyi lpags 'dzin rdo rje dril bu gnyis na 'chang //phyag gzhan phyag mtshan brgyad po 'dzin pa bde ba'i mchog gis srungs/ /thog mar bde mchog 'khor lo yi/ /rnal 'byor ma yi rgyud las ni/ /sems can rnams la phan gdags phyir/ /sbyin sreg rim pa bdag gis bshad//dkyil 'khor dag ni sgrub dus su/ /sbyin sreg gis ni tshim par bya/ /gsang sngags ma bzlas mi 'grub la/ /sbyin sreg ma byas 'bras mi 'byin/ /las rnams thams cad rab bsgrub phyir/ /sbyin sreg las rnams brtsam par bya/ /sbyin sreg las rnams med pa las//dngos grub 'byung bar mi 'gyur ro/ /de bas 'dir ni sngags pa yis/ /brtson pas sbyin sreg las rnams bya/ /bla med nang dang phyi yi ste/ /sbyin sreg dag ni gsum du 'dod/ /gzhan dag zhi ba la sogs pa/ /sbyin sreg dag ni bzhi ru 'dod/ /de la bla na med pa dang por brjod par bya ste/rnam rtog med pa'i sems nyid ni/ /thab khung dgra yi mtshan ma dag /rnam dben me yi dbus su ni/ /gzugs la sogs pa'i phung po lnga/ /sems las byung ba ma lus pa'i/ /yam shing dag gi sreg blugs bya/ /gzugs la sogs pa'i 'byung ba rnams/ / yam shing du ni rab grags yin/ /pad+ma thab khung yin par bshad/ /rdo rje blugs gzar yin par grags/ /rtag tu sa bon sreg blugs kyis/ /bla med gnas ni thob par 'gyur/ /bla med rjes su sbyor ba yis/ /phung po la sogs bud shing bsreg /ye shes me ni skye 'gyur bas/ / phyi rol bsregs pa bdag med yin/ /dz+nyA na pA da pas bshad pa/ /sbyin sreg cho ga'i phyi rim pa/ /sems dang sems byung dag yin te/ /phung po la sogs bud shing bsreg /ye shes 'bar ba bla med 'dod/ /sems kyis ci tsam bsam pa dag /phyi rol sbyin sreg yin par 'dod/ ye shes me la phung po yi/ /yam shing bsreg pa bla med yin/ /de nas yang nang gi brjod par bya ste/ nyon mongs ser ba zhi byed cing / /ting nge 'dzin ni rgyas byed phyir/ /rang gi lha yi sbyor bas bdag /ji lta bar ni sems kyis bya/ /skye ba'i las las rnam grol zhing / /tshe ni yang dag 'phel ba'i phyir//ci 'dod sreg blugs las bya ba/ /nang gi sbyin sreg dag tu bshad/ /ji ltar dus bzhi'i rim pa yis/ /sbyin sreg bzhi yang rab tu bshad/ /zhi ba dang ni rgyas pa dang / /dbang dang mngon spyod shes par bya/ /sdig pa 'jig phyir zhi ba ste/ /bsod nams yongs 'dzin rgyas pa yin//chags pa bsgom phyir dbang 'gyur te/ /rtog pa zad phyir gsod pa yin/ /de nas yang phyi'i bshad par bya ste/ rgyud so so la slob dpon tha dad pas sbyin sreg gi cho ga ji bzhin bshad pa las 'di ni rnal 'byor ma'i rgyud la brten te/ bdag gis 'khor lo sdom pa'i man ngag cung zad tsam brjod par bya'o//de la thab khung ni/ /sems can dbye bas mtha' yas te/ /rigs kyi dbye bas lnga ru 'gyur/ /las kyi dbye bas bzhi ru 'gyur/ /thab khung rnams ni de ltar bshad/ /zhi ba la ni zlum la dkar/ /rgyas la dbang chen ser po ste/ / dbang la dmar po gru gsum pa/ /mngon spyod zla ba phyed pa yin/ /khru gang tshad las brtsams nas ni/ /khru ni bcu drug pa yi bar/ /de yi phyed du brkos nas ni/ /rang gi tshad du bya ba yin/ /khru gang tsam gyi thab khung la sor bzhi bor bar kha khyer sor bzhis bstod/ khru phyed brkos la de bzhin du thams cad la'ang bltas te kun kyang rang gi kha khyer du bya'o//thab khung gi nang du rdo rje dang zangs gri bri'o/ /phyogs bzhir kha T+wAM ga dang de bzhin gshegs pa'i phyag mtshan rnams bri/ kha khyer la pad+ma'i steng du zangs gri'i phreng ba/ thab kyi phyi rol du zur bzhi pa la sgo bzhi ba dkyil 'khor gyi thig gdab ste/'khor lo gsum byin gyis brlabs la/ sgo bzhi dang ldan pa dur khrod brgyad dang bcas pa ji ltar 'khor lo gsum gyi dkyil 'khor gyi phyag mtshan bzhin du 'dir yang de ltar blta'o/ /shar gyi sgo la sogs par lcags kyu la sogs pas mtshan par bya'o//phyi'i dkyil 'khor la pad+ma nags kyi lcug ma dang / phreng ba dang ni spyi blugs dang / /ri dgas pags pa mdung rtse gsum/ /zla ba phyed pa rgyal mtshan dang / /ral pa'i tshogs dang mig dang ni/ /'khor lo dung dang dbyug to dang / /ral gri phub dang mdung dang ni/ / dril bu ba dan rma bya dang / /ra skyes lnga lnga byas nas ni/ /shar phyogs snam bu dag la bri/ /de ltar thab khung thams cad byas nas las dang rjes su mthun pa'i kha khyer bya'o/ /zhi ba la rdo rjes mtshan pa'am 'khor los mtshan pa'o/ /rgyas pa la ni rin po ches mtshan pa/ dbang la ni pad+mas mtshan pa/drag po la ni rtse gsum pas mtshan pa ste/ 'di ltar las dang rjes su mthun par rang rang gi mtshan mas mtshan pa'i kha khyer bya'o/ /shar du zhi ba bya bar bshad/ /lho phyogs su ni rgyas pa ste/ /dbang gi las ni nub tu bya/ /bsad pa byang du bya ba yin/ /ji ltar las dang rjes mthun pa'i//rdul tshon gyis ni rdzogs par bri/ /yang na me tog dag kyang rung / /thab khung dag ni de ltar bya/ /yam shing bud shing rdzas la sogs/ /mtshan nyid me yi rtags rnams ni/ /gzhan du rgya cher bshad pas na/ /'dir ni bdag gis ma bsgrags so/ /man ngag gcig pu'i rim pa dag /rnal 'byor rgyud las grags pa rnams/ /mdor bsdus nas ni nges par yang / /ji tsam nus pa bshad par bya/ /de nas rdo rje slob dpon gyis lus khrus byas te dri zhim pos bdugs la/ gur gum dang / tsan+dan dang / thal ba bsres pas lus byugs te ji skad bshad pa'i rgyan bgo bar bya'o//stag gi pags pa bgos shing phyag rgya lngas brgyan te/ na ra'i rus pa'i rgyan dang ldan pas sems can gyi don rtag tu bya'o/ /phyi rol zlog tshul 'chad pa ni/ /de ni zhi sogs las rnams la/ /thugs ni zhi bar shes par bya/ /nyi mas gdungs pa'i rgya mtsho che//gangs ltar nang grang phyi rol tsha/ /thugs rje chen po khro bo yi/ /de bzhin 'gro ba tshul 'dis srungs/ /de lta bu'i las dang rjes su mthun par gos kyi bye brag bgo bar bya'o/ /de ni sgrub pa po'i las so/ /de nas rang gi lha'i nga rgyal bskyed de/ /ji skad bshad pa'i las dang rjes su mthun pa'i gzugs su byas la zhal bzhi pa dang sku gsung thugs kyi gsang sngags dang /de bzhin gsal byed rak+Sha rak+Sha dang / /hUM gsum phaT ni brjod par bya/ /gsang sngags de las khro bo la sogs pa spros te/ bgegs kyi tshogs thams cad bsregs par byas nas thal ba dang / bgegs rnams bsregs te phyogs bcur byer bar bsam mo/ /de bzhin du g.yas brkyang ba la sogs pa'i stang stabs kyang bya'o/ /de ltar bgegs kyi tshogs rnams phur bu dang / rdo rje dra ba dang / ra ba la sogs pas thab khung gi than kor bgegs med par byas te/ thab khung byin gyis brlab par shes par bya ste/yi ge hUM ngam rang gi lha'i tshogs kyi yi ge gang yang rung ba las dang rjes su mthun pa las thab khung bskyed la/ de'i dbus kyi lta ba la yi ge re pha 'bar ba yongs su gyur pa las gru gsum par byas shing bsgoms la/ de'i grwa gsum la oM AH hUM yi ge gsum gyis 'dod pa dang gzugs dang gzugs med pa'i khams gsum sa 'og dang /sa bla dang / mtho ris kyi gzugs pad+ma dang / 'khor lo dang / rdo rje gsum la sa bon bskyed de/ dbus su re pha 'bar ba yongs su gyur ba mthong ba dang / mtshan ma'i yi ge gsum dang re pha yongs su gyur pa las 'bar ba'i dbus su chu'i dkyil 'khor gnas pa la/khams gsum gyi bdag po dpal khrag 'thung rnam par spros te zhi ba'i don du pA pa ka'i me bsgoms la zhi ba'i gzugs can dkar po zhal gcig pa phyag bzhi pa spyan gsum pa ral ba'i cod pan can phyag g.yas pa gnyis na dbyug to dang mi 'jigs pa'i phyag rgya 'dzin pa/g.yon pa na bgrang phreng dang / spyi blugs 'dzin pa/ rgyan dang gos dkar po bsnams pa/ mchod phyir thogs 'chang ba/ lus thams cad la bdud rtsi dkar po'i rgyun 'bab pa/ ral pa la mkha' 'gro ma gnas par bsgom mo//de bzhin du rgyas pa la khyad par yang mdog ser po gos ser po'i rgyan can dbang chen gyi dkyil 'khor la gnas pa/ ye shes kyi mes sems can thams cad la mchog stsol ba/ stobs dang / mdog dang / dpal rdzogs par mdzad pa/lA ma cod pan du bsgom mo/ /rim pa gzhan yang dbang dang dgug pa la 'dod pa'i me mdog dmar po me'i dkyil 'khor la gnas pa/ de gos dmar pos brgyan pa/ khaN+Da ro ha cod pan la gnas pa/ khyad par du g.yas g.yon gnyis la lcags kyu dang zhags pa 'dzin pa/ gzhan ni snga ma bzhin no/ /bsad pa la rlung gi dkyil 'khor la gnas pa mdog nag po 'jigs pa spyan zlum po/ /hUM gi sa bon las skyes pa gos dang rgyan nag po mi rus kyi phreng bas brgyan pa/ za byed 'bar ba lta bus 'bar ba'i dbu skra gyen du brdzes pa/ gzugs can ma'i cod pan can/ g.yas na ral gri 'dzin pa 'jigs byed chen po nag po 'bar ba las bya rgod dang khwa la sogs pas nam mkha' khyab par bkug ste/ gang dang gang bya ba de zos par bsgom mo/ /rlung gi mes ni bsad pa la sogs pa'i las bya'o/ /me lha'i mtshan nyid do/ /de la zhi ba la ni 'o ma can gyi shing las byung ba'i me 'am/rgyun bzhag gi me'am/ bram ze 'am tha mal pa'i mes bya'o/ /rgyas pa la ni rgyal po dang / blon po dang / dgon pa dang / rgyal rigs kyi khyim nas byung ba'i mes bya'o/ /dbang la ni smad 'tshong ma dang / rje'u rigs kyi khyim nas byung ba'i mes bya'o/ /dgug pa la ni gar mkhan dang /rol mo mkhan dang / lam du bus pa'i mes bya'o/ /gsod pa la ni rdo las byung ba'i me'am/ gdol pa'i khyim nas byung ba'i mes bya'o/ /thams cad kyang dur khrod kyi me dang / dur khrod kyi sol bar ldan par bya'o/ /me'i mtshan nyid do/ /de nas mchod yon snod gnyis ni//ma chag sdug cing mdzes pa dang / /chang ngam yang na sbyar ba'i chang / /me tog ldan pas dgang bar bya/ /de la bdud rtsi lnga po yis/ /gnyi gar yang ni blugs par bya/ /yi ge bdun pa gcig pu dang / /gnyis pa gnod mdzes rgyal po dag /gcig ni brgya rtsa brgyad pa ste//gnyis pa dag ni bzhi cha yin/ /gnas la legs par bzhag nas su/ /gos kyis bkab ste mchod par bya/ /mchod yon gyi snod kyi cho ga'o/ /sbyin sreg yo byad thams cad kun/ /bdag gi g.yas su dgod par bya/ /rdo rje de bzhin dril bu dang / /mchod yon snod ni g.yon du gzhag /dgang gzar dang ni blugs gzar dang / /mar ni mdun du gzhag par bya/ /thams cad kyang ni bsangs nas gzhag /'di ni rdzas kyi gzhag pa'o/ /de nas phyi rol gyi me blangs la gnod mdzes kyi rgyal po'i gsang sngags kyis ku sha blangs la de'i rgyus lan gsum bsangs la//rtsa skam po gtsang ma dang bcas pas dag par byas te/ bdud rtsi lnga bsres nas thab khung du bzhag ste/ oM te ru ka ma hA badzra dz+wa la dz+wa la hUM hUM/ gsang sngags 'di dang bcas pas rlung yab kyis g.yab ste thab tu me sbar ro/ /de'i dbus su dam tshig sems dpa'i me sngar bshad pa'i rnam par bsams te/ye shes sems dpa'i me sngags dang bcas pa'i phyag rgya 'dis spyan drangs te/ lag pa g.yas pa mi 'jigs par byas la/ mthe bong srin lag gi tshigs la bkug pa'i thabs kyis spyan drang ngo / /e h+ye hi ma hA b+hU ta de ba r-i Shi dri dza sat+ta ma gr-i hI twa/a hU ti ma hA rA smin n+sa n+si hi to b+ha ba/ oM he ru ka ma hA badzra pA ba ka /ag+na ye ma ma shIn+taM ku ru swA hA/ zhi ba'i'o/ /oM he ru ka ma hA badzra ma he n+d+ra ag+na ye ma ma puSh+TiM ku ru bau ShaT/ rgyas pa'i'o/ /oM he ru ka ma hA badzra kA ma ag+na ye ma ma a mu kaM ba shaM ku ru ho/ / dbang gi'o/ /oM he ru ka ma hA badzra kro d+ha ag+na ye dza hi kro d+hA ya hUM/ a mu ka mA ra ya hUM phaT/ mngon spyod kyi'o/ /me lha 'ongs pa dang 'thor 'thung dang nye rig bya ste bkug la dam tshig gi me la gzhug go/ /de nas mchod yon gyi snod blangs la/ bdud rtsi lnga dang bsres te thugs ka nas zhabs bsil dbul lo//oM he ru ka ma hA badzra pra wA ra sat+kA raM pra tAtsI swA hA/ de nas lag pa gnyis kyis lan gsum ar+g+ha 'di dbul te/ i ma hA ma ma ya tat+ta ma gr-ih+Na sid+d+hi m+me pra ya ts+tsha swA hA/ spyan drang ba'i cho ga'o/ /de nas 'khor lo gsum byin gyis brlab par bya ste/ oM AHhUM mgo dang / mgrin pa dang /snying ga rnams su'o/ /de nas yan lag drug tu dgod par bya'o/ /de nas rdo rje sems ma la sogs pas yid kyis dbang bskur te/ lA s+ye la sogs pa brgyad kyis yang dag par mchod de/ dar dpyangs dang phreng ba la sogs pas bcings te go bskon no/ /de nas me long dang sman la sogs pa khrus kyi yo byad dang /dril bu dkrol zhing spos dang rdzas snga ma dang bcas pa la yi ge brgya pa bzlas te khrus bya'o/ /yi ge brgya pa ni 'di lta ste/ oM he ru ka badzra sa ma ya ma nu pU la ya zhes bya'o/ /de nas mkha' 'gro ma la sogs pa bzhi'i gsang sngags dang / yi ge nyi shu rtsa gnyis kyi gsang sngags kyis btab pa'i bum pa lngas dbang bskur ro/ /zhi ba la ni mkha' 'gro ma'i gzugs can rnam par snang mdzad dbu rgyan du bsam mo/ /rgyas pa la ni lA ma'i tshul can rin chen 'byung ldan dbu rgyan du bsam mo/ /dbang la ni dum skyes ma'i tshul can snang ba mtha' yas dbu rgyan du bsam mo//bsad pa la ni gzugs can ma'i tshul can don yod grub pa dbu rgyan du bsam mo/ /me lha'i zhal dang dgang gzar dang blugs gzar gyi kha la rang gi bdag po'i sa bon gyi yi ge dgod do/ /de nas oM DA ki nI dzi na dzika swA hA/ 'dis mar la mngon par bsngags te/de bzhin du rgyas pa la yang lA ma dang rin chen 'byung ldan la sogs pa'i sngags kyis gdab bo/ /de ltar me 'bar bar shes nas thog mar blugs gzar gyis dgang blugs gsum/ oM he ru ka dz+wa la dz+wa la hUM/ sngags 'di dang bcas pas dbul lo/ /de nas me 'bar ba dang mdog dang sgra la sogs pa las bgegs med par shes nas bgegs thams cad bcing bar bya ba'i phyir phyogs bzhi nas ku sha dgram mo//oM i me ku sha shu b+ha dimA pu ta brah+ma bA bi hri na/ rat+na tra ya ra ha hr-id pr-i th+wI dzA ta gar+b+ha/ a bi g+h+nAM ma ma shAn+tiM ku rban+tu swA hA/ 'di lta bu'i rim pas rtsa ba dang bcas pa phyung ste/mdog ljang gu mtshan nyid dang ldan pa/ zhi ba dang rgyas pa la sbyar ro/ /gzhan rnams la ni mnyam por gcad par bya'o/ /me'i rim pa ni shar gyi mdun nas te/ lho ni lho yi mdun nas so/ /nub ni nub kyi mdun nas te/ /byang ni byang gi mdun nas so//me thab kyi phyogs su zhal bzhi pa'i sngags kyis mchod yon gyi snod la bsngags te bsang ngo / /de nas zhal bzhi pa'i sngags sam/ khaN+Da ro he'i gsang sngags yang rung bas mda' dang tshon skud la btab ste mda' bzhi phyogs mtshams su btsugs la/ tshon sna lnga'i skud pas yongs su bskor na rdo rje'i bcing ba byas par 'gyur ro//ku sha la sogs dgram pa'i cho ga'o/ /de nas me'i las dang rjes su mthun par dngul gyi snod dam/ pad+ma'i snod gang yang rung ba mdun du bsams te yang mchod yon gyi zhabs bsil dang / 'thor 'thung byin la dgang blugs 'bul lo//de la rim pa ni 'di yin te/ pus mo gnyis kyi nang du lag pa bzhag ste/ lag pa g.yas pa rdo rje khu tshur gyis dgang gzar blangs la mthe bong dang mthe'u chung brtan par bzung ste/ sor mo lhag ma rnams yu ba'i steng du bzhag la/ mar gyis yongs su bkang ba'i dgang blugs bdun nam gsum mam gcig me lha'i sngags kyis me lha'i zhal du dbul lo//oM he ru ka ag+na ye/ a mu ka s+ya shAn+tiM ku ru swA hA/ de bzhin du thams cad la yang sbyar ro/ /de nas bsreg pa'i rim pa blta bar bya ste/ dang po dgang blugs dbul/ de nas yam shing ni 'od kyi dkyil 'khor du'o//mar khu ni zhal du'o/ /de nas til dang 'bras chan dang zho ni phyag tu'o/ /de nas ku sha dang / dUr ba'i myu gu ni spyi gtsug la'o/ /de nas nas dang / gro dang / 'bras dang / mon sran gre'u rnams ni zhal la'o/ /de bzhin du zhu ba'i rdzas la sogs pa rnams kyang de bzhin no//dri ni thugs kar ro/ /me tog dbu la'o/ /bdug spos ni 'od 'bar ba la'o/ /zhabs bsil ni zhabs la'o/ /mchod yon dang 'thor 'thung ni phyag la'o/ /mar me ni mdun du ste/ de dag ni rim pa yin no/ /de nas sdig pa bsreg pa'i phyir/ /dang po til gyi sbyin sreg bya ste/oM sarba pA paM da ha na badzrA ya swA hA/ de nas rdzas thams cad gsang sngags gcig gis bya'o/ /oM badzra a gan la ma hA b+hU ta dz+wa lA ya sarba pA paM b+ha smiM ku ru sarba big+h+nAM hUM phaT/ a mu ka s+ya shAn+tiM ku ru swA hA/ yang na oM he ru kA ya bid ma he bid+yA rA dza ya d+hi ma he swA hA'o/ /bI ra pra dzo da ya ya hUM a mu ka s+ya shAn+tiM ku ru swA hA/yang na rgyud gzhan las bshad pa/ /so so'i spyi'i sngags kyang rung ngo / /oM badzra ya dz+nyA ya swA hA/ yam shing gi'o/ /oM ag+na ye swA hA/ mar gyi'o/ /oM sarba pA paM da ha na badzrA ya 'di zhes bya ba pA paM da ha swA hA/ til dang yungs kar rnams kyi'o//oM sarba saM pa de swA hA/ zho dang zas kyi'o/ /oM a pra ti ha ta badzrA ya swA hA/ /ku sha'i'o/ /oM badzra A yu She swA hA/ dUr ba'i myu gu'i'o/ /oM ma hA be gA ya swA hA/ nas kyi'o/ /oM badzra g+hasma re swA hA/ gro'i'o/ /oM badzra bi dzA ya swA hA/ 'bru'i'o/ /oM ma hA ba lA ya swA hA/ma sha'i'o/ /oM badzra pu Sh+Ta ye swA hA/ 'bras ma grus pa'i'o/ /oM ma hA shrI ba ya ba ye swA hA/ star ka dang gla gor zho sha dang / dzA ti pha la la sogs pa rnams kyi'o/ /zhu ba'i rdzas lhag ma rnams ni me'i rang gi sngags rnams kyis sbyin sreg bya'o/ /u dum+WA ra'i shing gi yal ga la sogs pa lhag ma rnams la ni//oM la sogs pa nas rang rang gi ming dang / mthar swA hA dang bcas pa'i rim pas sbyin sreg bya'o/ /rdzas thams cad la bdud rtsi lnga dang bsres te sbyin sreg bya'o/ /de nas me la 'thor 'thung dang / bsang gtor la sogs pa bya ste/ /ye shes kyi me spyan drangs la/snying gnas yi ge hUM gi 'od zer gyis bskul nam mkha' las bkug ste/ lam ma lus pa'i bzhi 'jig rten las 'das pa'i ye shes kyi me ji skad bshad pa'i las kyi rgyan dang / na bza' dang / ji skad bshad pa'i mdog dang / phyag ji lta bar gnas pa'i dpal khrag 'thung gi gzugs mthong ba dang /de'i thugs kar ye shes sems dpa'i sa bon gyi 'od zer rnams dang / rang gi dam tshig gi phyag rgyas ye shes sems dpa' spyan drang ngo / /'khyud pa'i phyag rgya bcings la/ oM shrI badzra he ru ka e h+ye hi b+ha ga bA na/ i ha b+ha k+t+ya sa ma ye na tsa pany+tsa a mr-i ta ar+g+haM saM pra tI ts+tsha swa pA dzA tsa ha naM pra sid+d+hi m+me/'dis thab khung g.yas kyi drung du bltas te/ oM shrI badzra he he ru ru kaM hUM hUM phaT/ DA ki nI dzA la sam+ba ra swA hA/ zhabs bsil dang / mchod yon dang / 'thor 'thung dang / lha bshos dang / lA s+ye la sogs pas yang dag par mchod do//rtsa ba'i sngags rkang pa brgyad kyis bstod do/ /rdo rjes bcings la lcags kyu dang zhags pa dang / lcags sgrog dang / dril bu rnams kyis dgug pa dang / gzhug pa dang / bcing ba dang / dbang du bya'o/ /dr-i sh+ya dzaH hUM baM hoH/ /sa ma ya s+t+waM/ sa ma yo ho//'dis me'i dam tshig sems dpa'i zhal du thams cad kyi bdag nyid rab tu gzhug go/ /de ltar snga ma bzhin du me long gi steng du khrus byas la dbang lnga stsol te/ dar dpyang dang phreng ba bcings te/ ye shes sems dpa' rang gi thugs kar mtshan ma'i dbus su rang gi chos kyi yi ge la dkyil 'khor ma lus pa drug cu rtsa gnyis kyi lha'i rang bzhin mthong ba la yang mchod yon phul te snga ma bzhin du sbyin sreg gi yo byad thams cad bsangs te de nas dgang gzar blangs la/ji tsam blugs nus pa'i dgang blugs me lha'i zhal du dbul lo/ /de bzhin du blugs gzar gyis stong ngam brgya rtsa brgyad dam/phyed dam/ bzhi cha yang rung bsreg go/ /de nas yang dgang blugs gsum dbul te 'di ltar dkyil 'khor ma lus pa kun la bcu pa'i sbyin sreg bya'o/ /thams cad la dgang blugs dang / spos dang / dril bu'i sgra dang / yi ge brgya pa gsum mam gcig bzlas te me tog la sogs pa dag dbul lo//sbyin sreg gi yo byad lhag ma thams cad kyis snga ma bzhin du sbyin sreg bya'o/ /dbyangs skyong gi gsang sngags sam/ yi ge bdun pa'am/ rdo rje phag mo'i nye ba'i snying po'i gsang sngags gang yang rung ba 'di zhes bya ba shAn+tiM ku ru swA hA/zhes bya ba mthar gdags so/ /rgyas pa'i mthar ni puSh+TiM ku ru bau ShaT/ /dbang gi mthar hoH/ bsad pa'i mthar phaT/ /yang dri zhim po las byung ba ci yang rung ste/ thams cad bdag gi kha zas la sogs pa 'byor ba'i don du sbyin sreg bya'o/ /de ltar mngon par 'dod pa'i sbyin sreg byas la dngos grub kyi phyir rgyud las bshad pa'i rdzas rnams kyis sbyin sreg bya'o//ba lang sha dang rta sha dang / shwa na'i sha dang khyim bya dag /dkyil 'khor gru gsum byas nas ni/ /sangs rgyas nyid kyang nges par 'jig /mi ldog phreng ba'i gsang sngags kyis/ /zhi ba la sogs las rnams bya//rdo rje phag mo'i sngags gnyis kyis/ /dgug pa la sogs bya ba yin/ /de nas ji ltar 'dod pa'i sbyin sreg byas pa'i mthar/ /oM hrIHha ha hUM hUM phaT/ nye ba'i snying po 'di gsum mam bdun nam nyi shu rtsa gcig mar gyi sreg blugs kyis sngar la/ / mchod yon dang zhabs bsil dang 'thor 'thung dang dril bu rol mo snga ma bzhin du dbul lo/ /dgang blugs kyi mthar bde legs dang / rol mo dang bkra shis pa'i tshigs su bcas pa 'bul lo/ /de nas bstod pa bya ste/ mngon par 'dod pa'i dngos grub stsol la bzod par gsol te rdo rje bcing ba'i phyag rgya bcings la/oM he ru ka muH 'dis steng du 'grol te/ oM khyed kyis sems can don kun mdzad/ /ces bya ba la sogs pa brjod do/ /de nas oM kha kha khA hi zhes bya ba'i gsang sngags kyis nya dang / sha dang / chang dang / zan drin la sogs pas yongs su gang ba'i gtor ma sbyin no//me'i dbus nas ye shes sems dpa' chos kyi dbyings su gyur te gshegs su gsol lo/ /de nas me lha la mchod yon la sogs pa phul te/ /sbyin sreg gi yo byad kyi lhag ma rnams kyang sbyin sreg bya'o/ /sreg blugs kyi mthar bsgrub bya bzung la dgang blugs dbul lo//mchod yon dang zhabs bsil dang bsang gtor yang bya/ sgrub pa po mngon par 'dod pa'i dngos grub kyang gsol te/ oM ag+na ye yA hi yA hi swA r+tha ny+tsa wA pa rA r+tha ny+tsa/ sA d+hi taM gats+tsha ha bya b+hu ka ces bya'o/ /spyan drang ba'i phyag rgya las mthe bong phyir bskyed pa'i tshul gyis sprul ba'i me 'bar ba'i gzugs can du blta ba de gshegs su gsol te/rang gi lha'i nga rgyal dang ldan pas phyogs skyong rnams la gtor ma sbyin no/ /rje btsun gyi yi ge brgya pa yang lan bdun gyi bar du bzlas brjod bya'o/ /oM badzra kI li kI la ya/ zhes bya bas phyogs kyi phur bu dang mda' rnams phyung la/las thams cad pa'i chu 'o ma dang bcas pa la khaN+Da ro ha'i rig sngags kyis btab ste khrus byas la gzhag go/ /de nas lan gsum bskor ba byas te/ glu dang gar la sogs pa bdun bya zhing ji ltar bde bar gnas par bya'o/ /dpal sdom rnal 'byor ma'i rgyud las//sbyin sreg rim pa byung ba 'dis/ /rnal 'byor pa ni rtag dga' ba'i/ /dngos grub myur du thob par shog /dpal he ru ka'i ming gi rgyud las dpal bde mchog 'khor lo'i sbyin sreg gi cho ga grub pa'i slob dpon chen po nag po zhabs kyis mdzad pa rdzogs so/

CLOSE WINDOW