CLOSE WINDOW

D1520
བོད་ཡིག

dpal ye shes rdo rjes bsgyur ba rdzogs so// @##/ /rgya gar skad du/ shrI tsakra sam+ba ra sto t+t+ra nA ma/ bod skad du/ dpal 'khor lo sdom pa'i bstod pa zhes bya ba/ bcom ldan 'das he ru ka la phyag 'tshal lo/ /hUM/ chos nyid dbyings las bzhengs pa'i sku mchog ni//nyon mongs rnam dag ye shes sku brnyes shing / /dus mtha'i me dpung lta bu'i klong dkyil nas/ /ri rab chu skyes nyi ma'i gdan steng na/ /zhal gcig phyag gnyis dpa' bo chen po'i sku/ /zhabs gnyis brkyang bskum 'jigs byed dus mtshan mnan/ / sku mdog mthing ga mkha' ltar dag pa'i 'od/ /gcer bu glang chen stag gi sham thabs can/ /zhal gdangs tshems gtsigs hUM gi 'brug sgra sgrogs/ /dpral ba'i khro gnyer spyan gsum glog ltar 'khyug /ral pa'i thor tshugs zla phyed rdo rje dang / /thod pa nor bu mi bskyod rtags kyis mdzes//sgeg pa dpa' ba 'jigs su rung ba dang / /rgod dang gshe dang rngam pa'i ngang tshul can/ /snying rje zhi dang rmad du byung ba'i nyams/ /gar gyi rnam 'phrul nam mkha' khyab par ston/ /'khor lo rna cha mgul rgyan gdub skor dang / /ske rags thal chen tshangs pa'i skud pa can//mi mgo'i do shal rdo rje dril bu 'khyud/ /dpal ldan he ru ka la phyag 'tshal lo/ /gnyis med tshul gyis bcom ldan 'das ma yang / /sku mdog dmar mo gcer bu skra grol zhing / /phyag rgya lnga dang rdo rje thod pa 'khyud/ /phung po khams dang skye mched rang bzhin la/ / ma lus rgyal ba'i rigs rnams yongs su rdzogs/ /srid pa rnam dag sku yi yan lag la/ /nyi shu rtsa bzhi yul gyis rnam par brgyan/ /khyod ni khams kyi rang bzhin dpa' bo dang / /rtsa yi rang bzhin dpa' mo nyi shu bzhi/ /bye ba'i grangs snyed ma lus 'khor bcas kun/ /gnas dang nye gnas zhing dang nye zhing sogs//sa bcu'i gnas su gnyis med dgyes par rol/ /bde chen longs spyod rdzogs la rnam rol zhing / /rnam dag skye mched las kyang 'khor lo bzhi/ /lus kyi rnam dag rang bzhin gzhal yas khang / /rnam shes brgyad las sprul ba'i dur khrod brgyad//dngos dang dngos min rang bzhin bcom ldan 'das/ /kun gyi bdag nyid rnal 'byor dbang phyug gtso/ /ma lus gcig tu 'dus pa'i skur gyur pa/ /dpal ldan khrag 'thung khyod la phyag 'tshal lo/ /khyod kyi 'od zer glog tsam mthong ba las/ /ngo mtshar 'dzin pa'i yid kyis bdag bstod na//mkha' dang mnyam pa'i 'gro ba ma lus kun/ /mgon po khyod kyis thugs rjes gzung du gsol/ /dam tshig brtul zhugs spyod pa'i rnal 'byor la/ /brtse ba'i thugs kyis bu bzhin dgongs nas kyang / /bar chad bdud dpung zhi bar mdzad du gsol/ /dur khrod la sogs gnas su srog dor nas//khyod kyi rnal 'byor rtag tu brtson pa la/ /ye shes yar ngo'i zla ltar 'phel ba dang / /dngos grub tshul bzhin 'grub par mdzad du gsol/ /sangs rgyas phrin las byed pa'i rnal 'byor la/ /mkhyen pa nyi 'od lta bur rab rgyas te/ /yon tan gzi brjid chen po bskyed du gsol/

CLOSE WINDOW