CLOSE WINDOW

D1506
བོད་ཡིག

/ rdo rje slob dpon ngag gi dbang phyug dang / A tsA r+ya mar pa chos kyi dbang phyug gis bsgyur ba'o// @##/ /rgya gar skad du/ sa ha dza tat+t+wa A lo ka /bod skad du/ /lhan cig skyes pa'i de kho na nyid snang ba/dpal rdo rje sems dpa' la phyag 'tshal lo/ /kun spyod mngon par 'byung brjod sogs/ /rgyu rnams kun du sbas pa yi/ /zab mo'i de nyid gsang ches pa/ /bla ma'i drin gyis rtogs pas bshad/ /brtag dka' rtog ge'i yul min zhing / /zab mo spros pa nyer zhi ba/ / lkugs pa yi ni rmi lam dang / /gzhon nus myong ba'i bde ba ltar/ /tshig gis mtshon min rang rig pa/ /ser sna med sogs tshul bzhi yis/ /bla ma nye bar bsten pa yi/ /drin thob shes rab ye shes kyi/ /skad cig gsum par gang skyes pa/ /don mtshungs mtshon pas dper nyid de/ / khyim gnas bu ga'i nam mkha' dang / /dmus long glang chen yan lag ltar/ /don mthong ma yin 'bras zan gyi/ /spags pa'i bu ram ro bzhin no/ /cha shas dang ni rdzogs pa dang / /sgrib bcas sgrib pa dang bral ba'i/ /dbye ba las ni rnam rmongs pas/ /chos ma thag dang gang ba yi//zla ba sprin gyis bsgribs pa dang / /gsal ba'i bye brag ma shes so/ /de lta na yang der myong ba/ /bla ma'i gsung gis legs mtshon te/ /rgyud du yang dag goms pa las/ /dang ba'i chu la zla ba dang / /mig dag pa la gzugs bzhin du/ /gsal bar 'gyur gyi yid ches gyis/ / dngos po sna tshogs snang 'di rnams/ /sems las phyi rol 'gyur med kyang / /rang rig bag chags dbang byas nas/ /yul dang dbang por snang ba'i sems/ /dbang po'i lam na rjes 'gro bas/ /yul rnams la ni mngon zhugs te/ /chags sogs nyon mongs rgyur gyur pa/ /las kyi shing rta'i 'khor lo ltar//yun ring srid par yang dang yang / /sdug bsngal dang bcas rnam par 'khor/ /nang du yang dag 'jog pa yi/ /thabs kyis de las rnam bzlog nas/ /rlung bral mar me lta bu yi/ /rnal 'byor rgyun du goms byas nas/ /ma rnyog lteng ka'i chu bzhin du/ /rang gi de nyid gsal mthong 'gyur//shin tu bzhin bzangs mig yangs ma/ /gzugs bzang lang tsho phun tshogs pa/ /khro med rjes su brtse ba dang / /dad dang thos sogs yon tan can/ /sgrub las gzhan du mi blta zhing / /skal bzang byed pa 'ching ba yi/ /sbyor ba la ni rab goms pa/ /mi mo dngos grub sa gzhi yin//de dang lhan cig dben par gnas/ /stobs bzang myos byed bcas bza' zhing / /blta ba dang ni rig pa dang / /'khyud dang ma mchu'i ro myangs pas/ /rjes su chags par 'gyur ba ni/ /mtshan ma'i dbye bas gsal rtogs bya/ /chags pa chen pos rab rgyas rtsa//'tshir dang zlos pa'i sbyor ba yis/ /mngon sum lce yi thur mas drangs/ /nor bu'i nang du legs chud pas/ /mun pa la ni mar me ltar/ /gsal bar nges kyis gzhan du min/ /de nyid du ni ye shes mchog /sdom bya thun nam nyin gcig gam/ /zla phyed zla gcig khyud kor dang //bskal pa bskal pa stong dag tu/ /de goms pa las mi 'gyur ba'i/ /ye shes dam pa 'thob par 'gyur/ /der ni legs 'du'i dam tshig rdzas/ /rlung gi stobs kyis thob pa'am/ /dman pa'i sems kyis dor min pas/ /phyi rol nas ni lces blang bya/ /bla ma'i drin thob dga' ba yis//sems kyi zab mo'i de kho na/ /legs bkod gang 'dis 'gro ba rnams/ /gnyug ma'i lam gyi bgrod grub shog /dpal 'khor lo sdom pa'i lhan cig skyes pa'i de kho na nyid snang ba slob dpon ku sa li pas mdzad pa rdzogs so// //

CLOSE WINDOW