CLOSE WINDOW

D1495
བོད་ཡིག

/ @##/ /rgya gar skad du/ badzra A sa na badzra gI ti br-it+ti/ bod skad du/ rdo rje gdan gyi rdo rje'i glu'i 'grel pa/ 'jam dpal gzhon nur gyur pa la phyag 'tshal lo/ /skye la sogs pa'i rba rlabs 'khrigs/ /srid pa'i sdug bsngal sel mdzad cing / / thugs rjes yid bzhin nor ltar re skong ba/ /rje btsun sgrol ma de la phyag 'tshal lo/ /chu yi nang gi zla ba ltar/ /gar dgu'i nyams dang ldan pa sta/ /ston pa'i gtso bo khrag 'thung dpal/ /dpa' bo'i rgyal pos rtag tu skyong gyur cig /'khrul 'khor mi bzad dbang gis rtag tu 'khor//mig bral lam nor rnams la phan pa'i phyir/ /nges don zab mo brgyud pa'i rim/ /bla ma'i lung bzhin bri bar bya/ /dpal ldan rdo rje gdan spor sangs rgyas dang / /zhes bya ba la sogs pas mchod par brjod pa yin te/ de'i yul ni gnyis te/ dkon mchog gsum dang /de'i rgyu bla ma'o/ /de la sangs rgyas smos pas lam chos dkon mchog dang / rten dge 'dun dkon mchog shugs kyis shes par bya'o/ /de ni rgyu 'bras dang rten gyi rang bzhin yin pa'i phyir/ de'i rag las sa bla ma yin pas de'i phyir/ bla ma rdo rje 'dzin dngos bdag nyid can//zhes bya ste/ rang bzhin la tha dad pa med ba dang de'i rgyu yin pa'i phyir ro/ /zab pa'i don ldan glu 'di ston 'gyur ba/ /yon tan kun rdzogs zhes bya ba ste lhan cig skyes pa'i don gsal ba de ni rgya mtsho ltar zab la/ de'i don rnal du mtshon pas glu zhes bya'o/ / yon tan kun rdzogs zhes bya ba la bla ma'i yon tan bshad pa ma lus pa rdzogs pa dang / de la rang bzhin gyis sangs rgyas kyi yon tan rdzogs pas de skad ces bya'o/ /de'i phyir dam pa ste de la mchod par brjod pa'o/ /da ni gzhung bshad pa'i phyir/ lus ni rnam bskams zhes bya ba la sogs pa gsungs te/de la ldog pa dang 'jug pa'i dbang gis gnyis te/ lus rnam par bskams pa dang sems nyon mongs pa'i rgyu phyi rol pa'i brtul zhugs te me ldang sten pa la sogs pa'o/ /chos 'di pas bya ba 'dir de dang 'dra ba'i byed pa sbyangs pa'i yon tan bcu gnyis la sogs pa'o//gzhan yang ting nge 'dzin dang mi mthun pa thams cad do/ /de lta bu'i lhag pa'i byed pa spangs nas 'jug pa ni lhan cig skyes pa 'od gsal ba'i rang bzhin de legs par mtshon cing nyams su blangs na/ des ni 'gro kun rang bzhin rnam dag par//dpal ldan rdo rje'i gdan las sangs rgyas gyur/ /zhes bya'o/ /de la dag pa la gnyis te/ rang bzhin gyis dag pa 'gro ba kun gyi thun mong ba de shes rab dang / snying rjes legs par sbyangs pas dri ma dag pa'i gnas skabs so/ /bar gyi sgras ni dri ma med pa'i dag pa'o//'jug pa dang ldog pa'i sgra'i don mdor bstan nas/ /da ni dpe'i sgo nas rgyas par bstan pa'i phyir/ mdzes ma mchog ldan zhes bya ba la sogs pa gsungs te/ de la dpe bzhi ste mdzes ma dang / chu bo dang / byang chub kyi shing dang rdo rje'o/ /de la dpe dang po ni mtshon bya mtshon byed kyi brda'i dpe'o//gnyis pa ni chu bo ltar rgyun ma chad pa dang / mtha' gnyis la mi gnas pa'i dpe'o/ /gsum pa ni sbyangs pas gsal ba'i dpe'o/ /bzhi pa ni yon tan gyi dpe'o/ /mdzes ma mchog ldan khyer nas rab tu myur bsgrubs pas/ /zhes bya ba/ mtshon byed brda'i bdag med ma'i dbang du byas nas mdzes ma ni lus so/ /mchog ni ngag dang sems so/ /de gsum gyi yon tan dang ldan pa'o/ /khyer ba ni dben pa la sogs par ro/ /der rab tu sgrub myur du sgrub ces bya'o/ /bas zhes bya ba ni de ltar bsgrubs pas sa ha dza 'od gsal nyams su myong zhes bya'o//ji ltar myong ba 'og nas bshad par bya'o/ /mtshon bya'i bdag med ma de ni mdzes mchog ni 'od gsal dang sa ha dza'o/ /ldan pa ni zag med kyi yon tan dang ldan pa'o/ /de ltar da gnyis zung 'jug tu rab tu myur du bsgrubs pas 'bras bu ma hA ma dra 'thob ces bya'o//dpe gnyis pa ni/ nai rany+dza na'i 'gram du bde bar 'jug pas 'dus/ /zhes bya ba la/ nai rany+dza na la chos gnyis te/ rgyun ma chad pa dang / 'gram gnyis nas maM 'bab pa'o/ /de bzhin du rnal 'byor pas da pes mtshon pa'i don la rgyun ma chad pa dang / rtag chad gnyis kyi mthar ma ltung bar dmigs par bya'o/ /lam de dka' bas 'jug pa ma yin pas bde bar 'jug ces bya'o/ /'dus pa ni gnyis te/ rdo rje dang pad+ma dang dbyings dang rigs pa 'dus pa'i tshul gyis bsgrub pa'o/ /dpe gsum pa'i dbang du byas nas/ byang chub shing rtsar rdo rje gdan bzhugs nas//zhes bya ba la byang chub kyi shing la chos lnga ste/ rtsa ba dang / sdong po dang / lo ma dang / me tog dang / 'bras bu'o/ /de bzhin du rnal 'byor pas kyang rtsa ba dang 'dra ba'i shes rab dang / sdong po dang 'dra ba'i dad pa dang / lo ma dang 'dra ba'i brtson 'grus dang /me tog dang 'dra ba'i dran pa dang / 'bras bu dang 'dra ba'i ting nge 'dzin gyis dbang byas la sgrub pa'o/ /de lta bu'i rnal 'byor pa de gang na gnas kyang rdo rje'i gdan la bzhugs pa zhes bya'o/ /dpe bzhi pa'i don bstan pa'i phyir/ rdo rje dper byas ting nge 'dzin la gnas//zhes bya ba la sogs pa la/ rdo rje la chos gnyis te/ mi phyed pa dang 'byed pa'o/ /de bzhin du rnal 'byor pas kyang dbang po lnga ldan gyi sgo nas nyon mongs pa dang / shes bya dang / snyoms par 'jug pa'i sgrib pa gsum gyis mi phyed la phar 'byed pa'i tshul gyis sgrub pa'o//ting 'dzin bla na med pa'i lam 'dis kye/ /zhes bya ba ni lhan cig skyes pa 'od gsal ba dbang po lngas dbang byas pa'i lam 'dis so/ /kye zhes bos te gdams pa'o/ /bdud bzhi'i 'jigs pa chen po gang de bcom/ /zhes pa ni lhan cig skyes pa 'od gsal ba skyes pa'i stobs kyis las dang nyon mongs pa'i skye ba la sogs pa'i bdud de dang de'i 'jug pa rnams nam mkha' dag pa'i ngos ltar mthong bas so//da ni dpe dang po'i mtshon bya don gyi bdag med ma rgyas par bstan pa'i phyir/ gzugs ni ma spangs zhes bya ba la sogs pa la rU pa zhes bya ba gzugs dang rang bzhin gnyis la 'jug pa las swA'i rkyen byin na swA ni rU pa ste sems 'od gsal ba bdag med pa'o//ma spangs lhan cig rnam rol bas zhes pa ni/ de lta bu'i bdag med ma dang rig pa gnyis su med par rnam par rol pa'o/ /rang bzhin bdag med la sogs pa'i tshig gnyis ni go sla'o//mtshan nyid dang phan yon bstan pa'i phyir/ chags med zhi bas nyon mongs med gang gis/ /zhes bya ba la chags med ni 'jig rten pa'i sems brgya drug cu'o/ /zhi bas ni de rnams 'byung 'jug chad pa'o/ /nyon mongs med gang gis ni mtshon pa tsam ste/sgrib pa gsum dang bral ba'i ye shes 'od gsal ba gang gis skye ba dang 'chi ba'i srid pa'i 'khrul pa bcad pa'o/ /bcad pa tsam yin nam zhe na/ 'khrul pa med pa'i zag med kyi yon tan ma lus pa len pa'i phyir/ 'khrul med bde ba chen po len cing ster/ zhes bya'o/ /de'i mtshan nyid rgyas par bstan par bya ba'i phyir/ de la kha dog dbyibs dang tshad kyang med/ /ces bya ba la sogs pa la/ 'dir don ni 'di yin te/ mtshon byed kyi bdag med ma las kyi phyag rgya'i dbang du byas nas/ kha dog dang dbyibs legs pa mig gi dkyus ring ba la sogs pa dang phra sbom tshad mnyam pa dang /byed pa dam tshig gi 'khor lo drug dang / bde ba mngon du 'dod pa dang / de la brten nas sems bde ba'i rnam par skye ba'i skye ba dang / sngags dang chos la sogs pa'i nga rgyal yod pa de la brten nas sems rlung rtsa dbu mar bcug nas sems bde ba'i rnam par brlabs pas brtan por gyur nas/mtshon bya'i bdag med ma 'od gsal bar bsgoms pas de'i mtshan nyid ni/ kha dog med pa'i mtshan nyid la sogs pa dgu ste/ kha dog med pa dang / dbyibs med pa dang / tshad med pa dang / byed pa med pa dang /'dod pa med pa dang / skye ba med pa dang / nga rgyal med pa dang / 'gro 'ong med pa dang / bdag gzhan med pa'i mtshan nyid can no/ /de lta bu'i mtshan nyid can de dang sems tha dad mad par 'gyur ba'i dpe ni/ nam mkha'i ngo bo yang dag ji lta bar/ /zhes bya ba gsungs te/nam mkha' rnam par dag pa'i dkyil ltar snang ba'o/ /de gang gi yul yin zhe na/ rnal 'byor thub mchog ma lus rnam par rol/ /zhes bya ba la sogs pa la/ rnal 'byor pa thub pas sangs rgyas kyi sras bla ma dam pa nye bar bsten pa tshogs bsags pa skal pa dang ldan pa rnams kyis shes rab kyi mig gis yul du mthong zhing /dbang po bzhis nges pa'i tshul gyis rol pa'o/ /de'i phyir de ni btsun mo bdag med ma zhes bya'o/ /de lta bu'i rang bzhin bdag med ma de dang rol pas/ las dang nyon mongs pa'i skye ba la sogs pa rtsad nas gcod pa yang yin la/rang bzhin gyis 'gog pa mngon du bya rgyu yang yin mod kyi/ 'on kyang byams pa dang snying rjes 'phangs pa'i byang chub kyi sems kyis rang gi rgyud la zag med kyi yon tan ma lus pa rdzogs par ma byas/ sems can yongs su smin par ma byas/ sangs rgyas kyi zhing yongs su dag par ma byas par bar mdor yang dag pa'i mtha' mngon du byas na nyan thos dang rang rgyal bar ltung bas/de'i phyir bzod pa de dang ldan bzhin du dge ba'i chos mtha' dag rdzogs par bya dgos par bstan pa'i phyir/ chags med byams dang snying rje las byung ba/ /byang chub smon pa'i sems ni legs brtan byed//ces pa la chags pa med pa ni sgyu ma mkhan ltar rang bzhin shes pas ma zhen pa'o/ /byams pa dang snying rjes 'phangs pa'i byang chub kyi sems ni go bar zad do/ /de la 'dir rim pa ni 'di yin te/ rnal 'byor bas thog mar mal nas langs nas/thog ma med pa nas yid kyi rang bzhin gyi lus la bdag dang bdag gir ma grub bzhin du der brtags pas rtog par bltas pa'i dbang gis rtog pa'i rgyun la sdug bsngal gyi me 'bar ba rnams la bltas te/ skye ba'i brgyud pa la grangs med pas sems can 'di gcig gis kyang ma lta bu byas pa'i grangs mi chod pas 'khor ba mtha' dag na gnas pa'i 'gro ba rnams gdon pa'i bsam pas dang por byams pa dang snying rje yid la bya/de nas de rnams kyi ched du dpal he ru ka 'dod pa'i smon pa byang chub kyi sems brtan par bya/ de nas chos thams cad sems rlung gi rnam 'phrul yin pa'i phyir/sems las gzhan pa'i don med par bsams la/ rlung sems tsam la lha'i skung bsam pa ni bdag byin gyis brlab pa kun rdzob kyi bden pa'o/ /de nas sngar gyi bde ba dang dran pa'i thabs kyis sems rlung rtsa dbu mar bcug la stong pa chen po'i ting nge 'dzin bde ba dang bcas pa bsgom par bya'o//de nas sems kyi rang bzhin la zhugs par bsams la de'i tshe de'i mtshan nyid 'od gsal ba snang ba med pa'o/ /nam mkha'i dkyil lta bu la shes rab kyi mig gis blta/dran pas ma yengs par blta/ dad pas yid ches par byas la blta/ brtson 'grus kyis 'jig rten pa'i sems med par byas la blta/ ting nge 'dzin gyis rtse gcig pa'i tshul gyis bltas pas sems kyi rang bzhin 'od gsal ba de snang ba med pa gsal ba dang ba dag par snang ba de la brten nas nges pa'i shes pa skye'o//dran pas ma yengs par blta ba'i dpe ni yungs kar brtsegs pa lag tu bskur ba'i skyes bu lta bu'o/ /dad pas yid ches pa'i dpe ni gzhon nu mas 'dod pa myong ba lta bu'o/ /brtson pa'i dpe ni rgyal po'i sgo srung ba lta bu'o//ting nge 'dzin gyi dpe ni rlung med pa'i mar me dang 'dra bar blta'o/ /shes rab kyi nges pa'i dpe ni sngar 'dris pa'i mi mthong ba bzhin no/ /dpe 'di rnams kyi gtam rgyud ni gzhung mangs pa'i 'jigs pas ma bris so/ /de ltar ji tsam sems gnas par nus pa de srid du gnas la/de nas de'i ngang la skad cig gis sgyu ma lta bu'i lha'i skur langs la dngos po thams cad chu zla lta bur sgro skur dang bral ba snang ba tsam gyi mtshan nyid du bsams la/ byams pa dang snying rje dang byang chub kyi sems kyis 'phangs pa'i dge ba'i chos thams cad chu zla ltar sgro skur dang bral ba'i tshul gyis yongs su rdzogs par bya'o//de ltar na thabs shes rab dang / snying rje dang / shes rab dbyer med pa'i tshul gyis dge ba'i chos thams cad yongs su rdzogs par bya ste de ltar ma yin na nyan thos la sogs par ltung ngo / /de'i phyir mdo las/ thabs med shes rab bral bas nyan thos nyid du ltung / /zhes pas so/ /de la thabs gang zhe na/ byang chub kyi sems kyis 'phangs nas dge ba'i chos thams cad yongs su rdzogs par byed pa dang / sems can yongs su smin par byed pa dang / sangs rgyas kyi zhing yongs su dag par byed pa'o//shes rab gang zhe na de'i zhen pa dang spros pa gcod pa'o/ /de bas na thabs de med na shes rab de mi 'byung ba'i phyir ro/ /de bzhin du theg pa chen po'i mdo gzhan las kyang / thabs kyis dge ba'i chos thams cad sdud pa yin la/ shes rab kyis 'byed pa'o zhes rgyas par gsungs so//de lta bu'i rnal 'byor pa ni mtha' gnyis la mi gnas par 'gro bas de'i phyir/ rang bzhin goms pa'i yid ni gar mi gnas/ /'di de nyid ni bla med byang chub lam/ /zhes bya'o/ /da ni shes rab kyi mig gis lta ba'i yul gzhan bstan pa'i phyir/ rab rib can ni mkha' la skra mthong smra//zhes bya ba la sogs pa la des blta ba'i yul gnyis te med pa dang yod pa'o/ /med pa mthong ba ni tshu rol mthong ba'i shes pa dang / shes bya ma lus pa ste med pa mthong ba dper na rab rib can gyi skra la sogs pa dang 'dra bar shes pa'o/ / yod pa'i rang bzhin mthong ba la gnyis te rten 'od gsal dang / brten pa zag med kyi yon tan mthong ba'o/ /'od gsal ji ltar mthong zhe na/ skye ba med pa rnam pa med par mthong bas de'i phyir/ skye med gnas med 'gro kun yang dag par/ /zhes bya'o/ /zag med kyi yon tan ji ltar mthong zhe na/sgyu ma dang rmi lam dang / mig 'phrul dang / chu zla ltar sgro skur dang bral ba snang ba tsam myong ba tsam gyis rang bzhin du mthong ba'o/ /de'i phyir/ mig 'phrul ji bzhin nges par yongs su snang / /zhes bya'o/ /da ni zhar la 'ongs pa'i brtags pa'i rnal 'byor dgag pa'i phyir/brtags pa'i spros pas bskyed la ma chags shig /ces bya ba la/ brtags pa'i spros pa ni thig le dang phra mo la sogs po'o/ /ma chags pa ni de la brten nas sems gnas pa phra mo yod kyang lam gyi mtshan nyid ma tshang bas byang chub kyi lam ma yin pas dgag pa'o//de nyid 'khor ba'i 'khrul 'khor gcod pa'i lam ma yin pas 'khor ba'i rgyur bstan pa ni/ sna tshogs rnam rtog las gzhan 'ching ba med/ /de la skye 'chi 'khor ba gzhan ma yin/ /zhes bya ba las srid pa'i 'khrul 'khor gcod pa'i mtshan nyid dang mi ldan pa'i thabs rnams goms su zin kyang 'khrul 'khor de nyid mi chod pas spang bar bya'o//des don goms par byed pa'i rnal 'byor pa la gdams pa bstan pa'i phyir/ rnal 'byor 'gro la bdag gis snying po smra//zhes bya ba la sogs pa la/ gang la gdams pa dang / gang gdams pa dang / tshul ji ltar gdams pa'o/ /rnal 'byor pa dang snying po'i don dang dran pa la gdams pa'o/ /gang la gdams na rnal 'byor pa rnams la'o/ /gang gdams na snying po ste 'od gsal ba'o//ji ltar gdams na dran pa la sogs pa'o/ /rnam rtog rgyu ba ni 'jig rten pa'i sems so/ /ma lta ba ni ma 'brang bar gdams pa'o/ /de ci'i phyir zhe na/ gang 'khor ba sems dang / gang gis 'khor na rlung gis dang / tshul ji ltar 'khor na 'jig rten pa'i sems rnams kyis nyin mtshan du bag chags sna tshogs gzhag pa'i dbang gis 'khor ba ste/de bas na/ 'khor bar byed pa'i rnam rtog gzhan min la/ /'khrul par byed pa'i ma rig pa gzhan min no/ /'o na ci zhe na/ sems dang rlung ngo / /'jig rten pa'i sems bshad pa ni chags sdang zhes bya ba la sogs pa ste go sla'o//shes rab la gdams pa ni/ gang gang rnam brtags zhes bya ba la sogs pa la sems dang rlung gi rnam par 'khrul pa la brten nas/ 'jig rten pa'i sems gang dang gang byung ba la shes rab kyis brtags na brdzun pa dang phyin ci log tu rtogs la/snying po'i don la nges par brtags na bde ba chen po'o/ /de bas na/ 'di lta'i ting 'dzin bde ba chen por smra/ /zhes bya ste/ 'od gsal la dbang po lngas dbang byas pa'o/ /srid pa'i 'khrul pa ma lus bcad pas skye ba dang 'chi ba'i 'jigs pa dang /nad dang gnod pa'i sdug bsngal gang yang med do/ /da ni rang bzhin ma shes na 'dod pa'i yon tan rnams la chags pas 'ching bar bstan pa'i phyir/ ri dgas smig rgyu zhes bya ba la sogs pa ste go sla'o/ /grong du longs spyod bde ba tshol zhes bya ba la sogs pas 'ching ba'i dpe bstan pa'o//da ni rang bzhin shes na grol ba'i rgyur bstan pa'i phyir/ gang zhig ngo bo shes pas gar yang 'gro med pa'i/ /ting 'dzin rol pas bsam mi khyab par spro/ /zhes pa la/ dngos po thams cad sems rlung gi rnam 'phrul du shes la de ma skyes par shes na'o//da ni mtshon byed kyi bde ba la zhen na de nyid mi mthong bar bstan pa'i phyir/ gang la yid kyi bya rgod ces bya ba la sogs pa la/ de la dpe gnyis te/ bya rgod rten pa'i shing gi dpe dang / nam mkha'i me tog la bung bas 'jib pa mthong ba'i dpe'o//dang po la gnyis te/ bcing ba dang btang ba'i dpe'o/ /bya rgod gnas pa'i shing de bya thal gyis rtsa ba bsrul/ mchus shun pa bshus pas lo ma dang me tog mi skye ba de bzhin du rnal 'byor pas sems rlung 'dres nas sems bde ba'i rnam par skyes pa la der zhen na me tog dang 'dra ba'i 'od gsal mi mthong la/lo ma dang 'dra ba'i zung 'jug gi sku mi mthong ba'o/ /de'i phyir/ gang la yid kyi bya rgod rten cing gnas pa'i shing / /de la bde ba'i me tog lo ma skye ba med/ /ces bya'o/ /'o na de gnyis gang gis mthong zhe na/ sems rlung bcings pa dang 'jig rten pa'i sems bsad pas 'od gsal mthong la/btang bas zung 'jug mthong ba'o/ /nges par yid kyis bya rgod bcings bsad na/ /zhes pa ni 'od gsal pa'i dang du sems rlung bcing ba dang bsad pa'o/ /des cir 'gyur zhe na/ 'khrul 'khor 'chad de/g.yo zhing 'gyur bas ma legs byed par gang zhig 'gyur/ /zhes bya ba la rlung gis g.yo zhing sems brgya drug cur 'gyur pa bcad pas ma legs byed pa ste/ dge mi dge'i bag chags 'jog par ji ltar 'gyur te mi 'gyur ro/ /bya rgod bcings pa las btang na sha khrag 'thung bas bkres pa med pa dang 'dra bar yid kyi lus chu zla ltar gnas pa de shes rab kyis gnyis su mthong ba'i phyogs bcom pas de nyid grogs yin no//snang ba'i dngos po gang chu zla ltar shes pa'i rnal 'byor pa de la gnas gar yang gzung 'dzin gyis gnod pa'i 'bad pa byed pa med do//de bas na 'od gsal stong nyid brtan par bya ba las 'khrul pa spang du med pa'i phyir/ stong nyid brtan gyis 'khrul pa spang du med/ /ces bya'o/ /'khrul pas 'ching spangs sems par ma byed cig /ces bya ba ni 'od gsal bas sa ha dza'i rnal 'byor ma rtogs par 'khrul pa'i rnal 'byor gang gis kyang 'jig rten pa'i sems 'ching ba yod pa ma yin pa'i phyir ro//gang gang las byung de ni nges ltos la/ /mi rtog ting nge 'dzin gyis de gsal gyis/ /zhes bya ba la 'jig rten pa'i sems gang dang gang byung ba de shes rab kyi mig gis ltos la gsal bar gyis zhes bya/gang gis shes na mi rtog ting nge 'dzin gyis te mi rtog pa shes rab dang / ting nge 'dzin dngos su smos la gsum shugs kyis shes par bya ste dbang po lnga ldan gyis gsal ba'o/ /mjug bsdu ba'i tshul gyis gdams pa ni/rnam rtog dri ma chen po ma lus khrus/ /nam mkha'i me tog dang 'dra dngos po mnyam par rtogs/ /zhes bya ba ni/ rtog pa'i dri ma 'khrul ba la 'khrul pa'i dngos po nam mkha'i me tog dang 'dra bar shes rab kyis brtags pa dang shes shing goms par bya ba'i lam de zung 'jug tu mnyam par brtag par bya'o//dpe gnyis pa ldog pa'i dbang du byas nas/ nges sbyangs bag chags bral bas rnal 'byor ma mthong ba/ /nam mkha'i me tog bung bas 'jib pa mthong ba 'dra/ /zhes bya ba ni/ mtshon byed kyi bde ba de la sems nges par sbyangs pas 'jig rten pa'i sems rnams rgyu ba'i bag chags dang bral yang rnal 'byor te/dbyings dang rig pa gnyis med ma mthong ba ni rlung sems rang bzhin la ma bcug par tshor ba bde bas kun nas dkris pa dang bcas pa la zhe na pa ni nam mkha'i me tog la bung bas 'jib pa mthong ba dang 'dra ba'i phyir ro//'o na mtshon byed du bshad pa ci zhe na/ de ni nyes pa med de mdzub mos zla ba mtshon pa dang 'dra bar/ rlung sems bde ba'i rnam par brlabs nas brtan pa dang / rlung sems rang bzhin la gzhug dgos pa'i phyir ro/ /de nyid la zhen na don dam pa la slu ba dang 'khrul pa zhes bya ste ltos pas gzhag pa'i phyir ro//'o na ci zhe na/ rjes su 'gro ba'i sgo nas bstan pa ni nges sbyangs zhes bya ba la sogs pa la/ de ltar rlung sems bde ba'i rnam par nges par sbyangs pas 'jig rten pa'i sems brgya drug cus stong pa'i stong pa chen po de bla ma dam pa dang /sangs rgyas kyi tshig bzhin du thams cad stong pa 'od gsal du bcug la bsgom/ spyod pa rnam par dag pa ste de las sgyu ma lta bu'i lha'i skur langs la lha'i sku de yang chu zla ltar shes pa'i tshul gyis dge ba'i chos thams cad rdzogs par bya'o/ /'o na thams cad stong pa 'od gsal 'ba' zhig goms par bya ba las spros pas ci byed ce na/spros pa ltar snang yang 'jig rten pa rnams kyi spros pa'i gnas pa dang 'gal ba zhes bya'o/ /de ni nam mkha'i me tog la bung bas 'jib pa dang 'dra ba'i phyag rgya dang / bdag gzhan du lta ba'i 'khrul pa 'od gsal gyis sbyong ba'o//'od gsal du ji ltar bsgom zhe na/ 'jig rten spros la rdo rje phab nas ni/ /zhes bya ba ni snod bcud thams cad 'od gsal du bzhu la tshul bsdu'o/ /'jig 'dzin ngo tsha a wa d+hU tI sa spongs/ /zhes bya ba ni rlung sems dang bcas pa rtsa dbu mar bcug la 'od gsal bsgom pa'o//dpe bzhi pa'i mjug bsdu ba'i phyir/ byang chub smon pa zhes bya ste bshad zin to/ /snying rje dang shes rab gnyis med du nges par sbyang ba 'dir theg pa chen po'i lam thams cad 'dus pa'i phyir ro/ /de lta bu'i lam de ni mkha' 'gro ma'i dmod sngags dang 'dra ba de gang las rnyed ce na bla ma las te de med na de mi 'byung ba'i phyir ro//de'i phyir/ rnal 'byor ma nyams myong na rnal 'byor par 'gyur pas/ /zhes bya ba ni/ snying rje dang shes rab dang / dbyings dang rig pa gnyis med du bsgoms pa la bya la de bla ma la rag las te/dper na gzhon nu ma'i bde ba skyes pa la rag las pa dang 'dra'o/ /de bas bla ma dam pa'i thabs gang gis srid pa'i 'khrul pa de tshe 'di la gcod pas de'i lung las gces par bya ba ci yang med do/ /de'i phyir bdag la legs su 'dod pa'i mkhas pa rnams kyis dam pa bsten par bya'o//snying rjes gzhan phan zhes pa ni go sla'o/ /da ni gzhung nye bar bsdu ba'i phyir/ yi ge shrI gnyis med ye shes te/ /zhes bya ba la sogs pa ni/ lam de'i mjug sdud de/ bden pa gnyis kyi mtshan nyid dang /de gnyis su med pa zung 'jug ston pa ste/ de'i ming gi rnam grangs don dam pa'i he ru ka dang / rdo rje sems dpa' dang / bden pa gnyis kyi tshul la gnas pa zhes bya ba la sogs pa'o/ /chos tshul zab mo rgya mtsho lta bu 'di/ /gzhan la phan pa'i bsam pas bris pa yin/'di la nyes par gyur pa de dag kun/ /'phags dang mkha' 'gro rnams kyis bzod par mdzod/ /tha ma'i dus su gyur pa na/ /tshe thung nad mang longs spyod dman/ /rkyen ngan bar chad mang ba yis/ /yun ring gnas pa'i mthu med pas/ /tshig rjes bcad par mi nus kyis//bshes gnyen dam pa bsten bya ste/ /shin tu brtson pa'i sems ldan pas/ /g.yang sa rab tu dran bya ste/ /gzhan dag grol bar bya ba'i phyir/ /snying po'i don 'di bkrol ba yin/ /brtse bas 'di bkrol bsod nams kyis/ /lam dman zhugs pa'i 'gro ba rnams//dam pa'i lam la gnas par shog /rdo rje'i glu'i don gsal bar byed pa mkhas pa chen po dI paM ka ra shrI dz+nyA nas mdzad pa rdzogs so// //paN+Di ta de nyid dang / dge slong tshul khrims rgyal bas bsgyur te gtan la phab pa'o// //

CLOSE WINDOW