CLOSE WINDOW

D1448
བོད་ཡིག

zhu chen gyi lo tsA ba dge slong rig pa gzhon nus bsgyur cing zhus te gtan la phab ba'o/ /[]@##/ /rgya gar skad du/ ba san+ta ti la ka nA ma/ bod skad du/ dpyid kyi thig le zhes bya ba/ bcom ldan 'das bde mchog 'khor lo la phyag 'tshal lo/ / mnyam dang mi mnyam bde chen sum cu rtsa bdun byang chub chen po'i phyogs bzhugs phung po chos kyi rang bzhin gnas pa rang lus rtsa yi 'khor lo gtso bo bzhi/ /dbyangs yig lngar bcas bcu gnyis dbyangs yig don gyi phyi mo gsal byed sum cu rtsa bzhis brgyan cing sku gsung thugs kyi dbye bas gnas pa'i gnas la sogs//sa bcu'i dbang phyug kun 'gro 'gro kun rang snying dbus gnas nam mkha'i ngo bo mchog zhi he ru ka dpal dam pa'i de nyid mya ngan 'das rang bzhin/ /rab gsal dpyid kyi thig le 'od 'phros 'bar ba sku gsum rgyas pa legs rtogs 'gro ba'i rang bzhin don bde stsol ba rtsa yi 'khor lo'i mgon la rab btud nas//sbyor ba'i gdan las rnam byung ba/ /phyi nang bcas pa'i tshul gyis ni/ /'khor lo bde mchog dpal rim las/ /dpyid kyi thig le bshad bya ste/ /rdo rje mkha' 'gro ma dpal grub/ /rang gi lus la rnam gnas pa//shin tu nyung bar 'dod rnams la/ /gsal bar go bar bya phyir ro/ /bcos ma'i dkyil 'khor spang byas nas/ /bcos ma'i sbyin sreg las dag dang / /bcos ma'i bsgom pa'i las dag dang / /bcos ma'i bzlas pa nyid du ni/ /de la sogs pa'i bcos ma kun/ /rang bzhin rnal 'byor tshul gyis spang //phyi rol bcos ma rab bya ba/ /rang bzhin rtogs par bya phyir te/ /rang bzhin rtogs par gyur pa na/ /rab tu bya ba byed min nyid/ /ji ltar pha rol don gnyer 'gas/ /gzings la legs par sbyor 'gyur ba/ /pha rol son nas 'dor bar 'gyur//rab tu bya ba'ang de bzhin no/ /dkyil 'khor la sogs pas gang zhig /bcos ma'i bsam pas byed pa dag /thams cad legs te mi legs min/ /de rab sbyar ba gsal ba yin/ /de ru las ni rab 'bad de/ /dngos mchog rig pa'i rgyal ba yis/ /sgra shes bya phyir bstan bcos gang //drang srong gis byed ji lta ba'o/ /de ltar las kyi rjes 'brangs pas/ /mi rnams rab bya byed pa ni/ /'bad pas nyon mongs bslang ba yis/ /rang gi sems ni rnam par 'joms/ /de nas dkyil 'khor la sogs pa'i/ /cho ga'i bya ba'i yan lag la//'bad kun rnam par 'dren min nyid/ /ngal bar byed pa 'ba' zhig yin/ /rnam min rtog la sangs rgyas min/ /rnam rtog bcas pas min de bzhin/ /shin tu rnam dag yongs shes pas/ /mkhas pa rnams ni 'gyur ba nyid/ /bya ba rang bzhin nyid du yod/ /byed pa po yang rang bzhin nyid//bya dang byed pa'i dngos po yis/ /rang bzhin nyid kyi dngos po spangs/ /dbye ba kun gyi rang bzhin ni/ /a yig yang dag rnam par gnas/ /thog mtha' med pa'i ngo bo yis/ /rin chen rnams kyi rgya mtsho bzhin/ /rtag tu 'jig rten tha snyad nyid/ /de 'gal 'jig rten pa min pa//yod pa'am ni med nyid kyi/ /rang bzhin las ni rtogs min nyid/ /'di nyid kyis ni sangs rgyas nyid/ /'di nyid kyis ni grol bar 'gyur/ /rang bzhin lam la brten nas ni/ /thams cad byed cing rnam par grol/ /dpyid kyi thig ler bcos ma'i dkyil 'khor dang sbyin sreg dang mchod sbyin dang bzlas pa dang bsgom pa la sogs pa'i cho ga'i bya ba gzung ba dang 'dzin pa'i dngos po rnam par gcod pa mtshon pa sngon du 'gro ba'i rang bzhin bshad pa rgyas par bstan pa ste dang po'o// //de nas mdor bstan pa dang rgyas par bstan pa'i ngo bo la sogs pa rgyud kyi bdag nyid kyi phung po dang khams dang skye mched kyi rang bzhin lus can gang yang rung ba rnams kyis lus kyi rang gi lha'i ngo bo ji lta bar brjod par bya'o//gzugs ni sangs rgyas rnam snang mdzad/ /rdo rje nyi ma tshor ba ste/ /'du shes pad+ma gar dbang phyug /de bzhin 'du byed rdo rje rgyal//rnam shes rdo rje sems dpa' ste/ /kun gyi ngo bo he ru ka /mig ni gti mug rdo rjer brjod/ /zhe sdang rdo rje mthong thos pa/ /de bzhin phrag dog rdo rje sna/ /kha ni 'dod chags rdo rjer brjod/ /reg la ser sna rdo rje ste/ /lnga po de dag sbom po'i lha/ /skye mched khams rnams thams cad ni//dam pa'i dbang phyug he ru ka /ltung byed ma ni sa yi khams/ /chu khams gsod par byed par brjod/ /'gugs byed ma ni me yi khams/ /rlung ni gar dbang phyug mar brjod/ /nam mkha'i khams zhes brjod pa ni/ /pad+ma'i dra ba ma 'khrugs ma/ /de ltar lus can rnams kyi lus//phung po la sogs lha bdag nyid/ /bde dang sdug bsngal de bzhin las/ /nyon mongs la sogs nyer ldan pa/ /skye dang 'jig pa la gnas te/ /srid dang mya ngan 'das pa thob/ /dpyid kyi thig ler phung po dang khams dang skye mched kyi rang bzhin de bzhin gshegs pa'i sku ji lta bar gnas par rnam par snang mdzad la sogs pa lha'i ngo bor bshad pa rgyas par bstan pa ste gnyis pa'o// //de nas de bzhin gshegs pa gang yang rung ba'i sku'i sku dang gsung dang thugs su son ba tha ma dang 'bring dang mchog gi dbye bas sgo'i dbye ba brjod par bya'o//ka ba gcig pa sgo dgu pa/ /sbom po lnga yi lhag pa'i lha/ /bu ga dgu ru gyur pa'i sgo/ /rnam pa dgu ru yongs su grags/ /tha ma sku dang ldan pa'i sgo/ /sbom po lha yi sprul pa'o/ /gzhan pa'i sgo ni rnam pa bzhi/ /gsung dang ldan pa 'bring du brjod/ /me nyid dang ni rlung nyid dang //dbang chen dang ni de bzhin chu/ /'khor lo sems kyi kun spyod las/ /steng logs thad ka 'og tu gnas/ /gsum pa'i sgo ni yid dang bcas/ /zla ba nyi ma rab dbye bas/ /gzhug dang 'byung ba nyid la ni/ /sgo ni dam pa nyid yin te/ /gtso bo'i mchog gi sgo mo ni//'og dang steng du rab tu grags/ /'og gi sgo nas rnam par shes/ /steng gi sgo nas khams yin te/ /rnam snang la sogs sangs rgyas rnams/ /steng gi sgo ni g.yo zhing gnas/ /de rnams 'og tu rnam par gnas/ /steng gi sgo nas gshegs su gsol/ /spyan 'dren gshegs su gsol tshul dang //'gro 'ong rab tu gnas rnams kyis/ /dus gsum rdzogs pa'i sangs rgyas dang / /mkha' 'gro rnal 'byor ma mo rnams/ /'jug pa dang ni ldog pa dang / /yon tan skyon gyi rang bzhin dang / /bde dang sdug bsngal rang bzhin gyi/ / lhan cig skyes pa'i tshul las grub/ /dpyid kyi theg le phung po dang / /khams dang skye mched kyi bdag nyid kyi de bzhin gshegs pa'i sku'i dbye bas bshad pa rgyas par bstan pa ste gsum pa'o// //de nas de bzhin gshegs pa gang yang rung ba'i sku'i gnas la sogs pa'i sa bcu'i gnas bstan par bya'o//rtsa rnams gang zhig bu ga dgu'i/ /sgo rnams dgu la yang dag gnas/ /b+ha ga'i nang gi bcu pa ni/ /de dag rnams kyi che mchog gzhan/ /dbral ba'i gnas nas brtsams nas ni/ /haM yig 'khor lo gtan la dbab/ /sum cu rtsa gnyis nyin mtshan du/ /byang chub sems rnams 'dzag pa'o//gnas la sogs pa'i ngo bor brjod/ /phyi dang mthun par nang na gnas/ /mkha' spyod rnal 'byor ma rnams brgyad/ /sa spyod ma yang de bzhin gzhan/ /gang zhig sa 'og gnas ma ste/ /de dag thams cad legs par ni/ /gnas gzhan rab tu dbye ba yis//sku gsung thugs kyi 'khor lo gnas/ /gnas la sogs pa'i sa bcu dag /nyi shu rtsa bzhi'i dbye ba yis/ /ji ltar gnas pa'i rang bzhin gyis/ /lhan cig skyes la gnas pa dbye/ /dga' ba la sogs sa rnams su/ /'di dag nyid las yang dag bshad/ /dbang po la sogs gzugs can gyi//byang chub sems dpa' rnams kyi gnas/ /phung po la sogs khyad par gyi/ /sangs rgyas thams cad kyi ni gnas/ /sangs rgyas nyid ni rab tu 'bab/ /sangs rgyas byang chub sems rnams kyi/ /byang sems sum cu gnyis rnams kyi/ /gang tshe 'di la gang gyur pa//de tshe sangs rgyas sras bcas pa'i/ /sangs rgyas nyid ni nges par thob/ /rang lus nyid la sangs rgyas gnas/ /gzhan ni gang yang yod ma yin/ /lus las gzhan du sangs rgyas nyid/ /mi shes pa yis g.yogs pa'i lus/ /gnas dang de yi gnas dang ni/ /zhing dang de yi zhing nyid dang //tshan+do dang ni de bzhin gzhan/ /de yang nye ba'i tshan+do ha/ /de bzhin 'du ba can nyid dang / /nye ba'i 'du ba can de bzhin/ /dur khrod nye ba'i dur khrod de/ /gnas la sogs ni bcu rnams so/ /dpyid kyi thig ler de bzhin gshegs pa'i sku'i bu ga dgu dang / b+ha ga'i dbus su son pa'i rtsa'i gnas bcu la sogs pa'i sa bcu'i dbang phyug gi bshad pa rgyas par bstan pa ste bzhi pa'o// //de nas de bzhin gshegs pa gang yang rung ba'i sku'i bu ga dgu'i nang du son pa'i rtsa'i rang bzhin gnas la sogs pa sa bcu dang / sku dang gsung dang thugs su 'byon pa gnas gzhan gyi dbye bas yul gyi dbye ba bshad par bya'o//spyi bo mA la ya yi yul/ /de bzhin spyi gtsug dzA lan+d+har/ /de bzhin o Di ya na nyid/ /rna ba g.yas pa nyid du brjod/ /rgyab kyi logs ni arbu da/ /bzhi po gnas kyi ming yin no/ /rna ba g.yon pa'i rang bzhin can/ /de bzhin go dA ba zhes bya/ / rA me shwa ri zhes grags pas/ /smin dbus de dag mig dag la/ /de bzhin de bI ko Ta gzhan/ /lag pa'i rtsa ba mA la wa/ /de ltar nye ba'i gnas nyid ni/ /thugs kyi 'khor lo rnam par gnas/ /gnas kyi khyad par ngo bo yis/ /mkha' spyod rnams kyi yang dag bshad/ /mchan khung kA ma ru par brjod//nu ma o trer rab tu grags/ /'di dag zhing du yang dag brjod/ /lte ba tri sha ku ner 'dod/ /sna yi rtse mo ko sa lar/ /de dag nye ba'i zhing du brjod/ /kha ni ka ling+ka ru smra/ /lam+bA ka ni mgrin pa'i dbus/ /tshan+do ha zhes rnam par bshad/ /snying gar kAny+tsir brjod pa ste/ /chu so kha yi gnas nyid do//de yang nye ba'i tshan+do ha'o/ /de ltar lus gnas thams cad ni/ /gsung gi 'khor lor rnam par gnas/ /gnas kyi khyad par ngo bo yis/ /sa spyod rnams kyi yang dag bshad/ /yi dwags lha gnas rtags la ste/ /bshang lam gri ha de ba tA/ /'di dag 'du bar brjod pa'o//brla ni sau rASh+Ta ru brjod/ /gser gyi gling ni ming can du/ /rje ngar gnyis ni rnam par bshad/ /nye ba yang ni 'du ba nyid/ /sen mo na ga ra ru dran/ /sin+d+hu nges pa rkang pa'i rgyab/ /dur khrod du ni yang dag brjod/ /mthe bo mya ngam du rab smra/ /pus mo ku lu tA ru brjod/ / de dag nye ba'i dur khrod nyid/ /gnas la sogs pa sa bcu rnams/ /'di rnams rang lus skyes pa kun/ /gnas kyi dbye bas 'byed pa'o/ /phyi rol dang mthun nang nas ni/ /sangs rgyas rnams kyi sa bcu rnams/ /sku gsung thugs kyi 'khor lo la/ /nyi shu rtsa bzhir dbye ba yis//rtsa rnams kun gyi gnas dag ni/ /kun nas yang dag bshad pa yi/ /gnas 'di rnams su mkha' 'gro rnams/ rtsa yi gzugs su yang dag gnas/ /dpyid kyi thig ler gnas la sogs pa sa bcu rgyas par bstan pa'i dbye ba ste lnga pa'o// //de nas de bzhin gshegs pa gang yang rung ba'i sku'i gnas ji ltar son pa rtsa'i 'khor lo mdor bstan pa mtshon par bya'o//snying gi nang son pad+ma ni/ /'dab ma brgyad pa snying por bcas/ /de yi nang du son pa'i rtsa/ /rang gi ngo bo 'bar ba'i me/ /chu shing gi ni me tog bzhin/ /'phyang bzhin ba ni kha 'og tu'o//de yi nang gnas dpa' bo ni/ /yungs kar gyi ni sbom phra tsam/ /gzhom med hUM yig sa bon ni/ /ba mo tsam du 'dzag pa nyid/ /lus can rnams kyi snying dga' ba/ /'di ni dpyid ces bya bar bshad/ /rgod dang ma me'i ngo bo ni/ /phag mor thig ler brjod pa ste/ / las kyi rlung gis bskul pa yis/ /lte ba'i dkyil 'khor du ni 'bar/ /dpyid thob pas ni chog shes pa/ /snyoms par 'jug par rnam par gnas/ /'di ni he ru ka dpal dpa'/ /dpyid kyi thig ler brjod pa ste/ /rnal 'byor ma yi gzugs blangs nas/ /rgyu dang mi rgyu yang dag gnas//sku gsung thugs kyi dbye ba yis/ /sgo ni rnam pa gsum byung ba/ /de ni 'gro dang 'ong byed pa/ /'di ni kun gyi lus la gnas/ /lte bar a yig gzugs kyis te/ /thung ngu ru ni yongs su grags/ /snying la yang ni yi ge hUM/ /ring po cha ni gnyis dang bcas/ / mgrin par a yig gzugs kyis ni/ /cha gsum spor ba zhes su brjod/ /dpral ba ru ni haM yig 'di/ /sgra dang thig le mi shigs pa'o/ /'khor lo bzhi yis rab dbye bas/ /sa sogs 'byung ba chen po dang / /thun bzhir byin gyis brlabs nas ni/ /skad cig bzhir ni yang dag 'byung / dga' ba bzhi yi ngo bo dang / /rnal 'byor bzhi ru gzhol ba'o/ /mchog tu dga' ba'i ngo bo yis/ /bya dang byed pa'i dngos po las/ /rdo rje sems dpa'i gzugs kyis ni/ /'di ni ji ltar bde bar rol/ /'dab ma rnams ni bzhi po yang / /phyogs bzhir rnam pas gnas pa ste/ /'byung ba bzhi yi rtsa rnams ni//thugs kyi rdo rje'i gnas su gnas/ /mkha' 'gro de bzhin lA ma dang / /dum skyes ma dang gzugs can ma/ /mtshams na gnas pa'i rtsa rnams ni/ /bzhi po yang de ru son pa'o/ /bdud rtsi lnga 'bab pa de ni/ /mchod pa'i ngo bor gnas pa ste/ /de yi gzugs nyid dngos po yis//mchod pa bzhi zhes rnam par bshad/ /lus can snying gi nang du ni/ /sna rnam lnga ni rnam par gnas/ /sku gsung thugs kyi 'khor lo la/ /nyi shu rtsa bzhir yang dag brjod/ /gnas sogs dbye ba la brten te/ /gnas dang gnas la rnam par gnas/ /spyi bor yang dag 'byung ba yi//rtsa rnams spyi bor skyes zhes dran/ /de yi nang na 'dren pa ni/ /rdul dang snying stobs mun pa'i tshul/ /pul+lIr rab gtum ma zhes dran/ /so dang sen mo 'bab par dran/ /dzA lan+dA rar gtum mig ma/ /de bzhin skra dang ba spu 'bab/ /o Di ya na gnas chen por/ / 'dod ldan ma ni rnam par gnas/ /g.yas pa'i gnas la brten nas ni/ /pags pa'i dri ma 'dzin la gnas/ /arbu tar ni sna chen mo/ /mkha' 'gro ma ni sha zan bsam/ /gnas kyi 'dren pa mkha' 'gro ma/ /gnas bzhi ru ni yang dag bshad/ /gang zhig chu rgyus 'bab pa'i sa/ /go dA ba ri rnam dag gnas//de ni sra ba'i tshul gyis gnas/ /dpa' bo'i blo gros ma zhes bshad/ /rA me shwa ri'i rtsa gang zhig /de ni mi'u thung ma zhes grags/ /rus pa'i phreng ba rnam gnas pa/ /sra ba yi ni dngos pos gnas/ /lha mo'i mkhar du'ang gang zhig rtsa/ /'jam lus lang ka'i dbang phyug ma//de ni rtag tu mchin pa 'bab/ /kun gyi lus ni rtag par gnas/ /mA la bar ni shing krim ma/ /rgyal ba'i dbang phyug snying la gnas/ /mkha' 'gro 'jig rten ma mo rnams/ /nye ba'i gnas su yang dag bshad/ /thugs kyi 'khor lo mkha' spyod ma/ /gnas dang nye gnas yang dag gnas//mi 'bab pa yi rtsa gang zhig /'dod pa'i gzugs su rnam par gnas/ /gzugs ni mthong bar 'dod pa ste/ /e ra wa ti zhes byar bshad/ /o Ter mkhris pa 'bab pa'i rtsa/ /'jigs byed chen mo ru ni brjod/ /mkha' 'gro rnal 'byor ma mo dag /'di dag zhing du yang dag bshad/ /tri sha ku ner yang dag byung / /rlung gi shugs ma 'gro bar bcas/ /chang 'thung ma ni ko sa lar/ /rgyu ma'i phreng ba 'khrug lha rdzas/ /mkha' 'gro rnal 'byor ma mo dag /nye ba'i zhing du yang dag bshad/ /ljang lha ma ni ka ling gar/ /logs su yang dag gnas pa'o//ltor gnas shin tu bzang mor nges/ /lam+pA kar ni yongs su grags/ /mkha' 'gro rnal 'byor ma mo dag /tshan+do har ni rnam bshad pa'o/ /rta rnam ni kany+tsir gnas/ /bshang ba rtag tu 'bab ba'o/ /hi mA la yar bya gdong ma/ /mtshams mtha'i dbus su son pa ste//mkha' 'gro rnal 'byor ma mo dag /nye ba'i tshan+do ha zhes bshad/ /gsung gi 'khor lo yang dag bshad/ /sa spyod pho nya rnam gnas pa'o/ /yi dags lha gnas yang dag gnas/ /'khor lo'i shugs ma bad kan can/ /gang zhig rtag tu rnag 'bab pa/ / khyim gyi lhar ni yang dag gnas/ /mkha' 'gro dam pa'i dbang phyug ma/ /dum skyes ma zhes rnam par bshad/ /mkha' 'gro rnal 'byor ma mo dag /'du pa can du yang dag bshad/ /sau rASh+Ta ni dmar pos mnan/ /chang 'tshong ma ni mkha' 'gror 'dod/ /rdul ni 'bab par 'gyur ba'i rtsa//gser gling du ni yang dag gnas/ /shin tu bzang lugs yang dag 'khrug /de yi 'khor lo go cha 'dod/ /mkha' 'gro rnal 'byor ma mo dag /nye ba'i 'du ba can rab smras/ /na gar shin tu dpa' mo zhes/ /tshal can sbom po'i lus can ma/ /sin+d+hur stobs chen ma zhes bya//mya ngam gyi ni mchi ma 'bab/ /mkha' 'gro rnal 'byor ma mo dag /'di dag dur khrod yang dag 'bab/ /mchil ma skam po 'bab pa gang / /mya ngan 'khor los sgyur ma'o/ /ku lu tAr ni brtson chen mo/ /byis pa'i sna bas ni 'bab pa'o/ /mkha' 'gro rnal 'byor ma mo dag /nye ba'i dur khrod yang dag gnas/ /sku yi 'khor lor mkha' 'gro ma/ /phyi rol sa 'og gnas pa'o/ /gong gi ngag ldan sgo la ni/ /mkha' 'gro ma ni rnam pa bzhi/ /de yi grwa yi char gnas pa/ /gzhan ma de bzhin rnam par gnas/ /rtsa yi sgo ru bya gdong ma//gnyis pa la ni 'ug gdong ma/ /gsum pa la ni khyi gdong ma/ /bzhi pa la ni phag gdong ma/ /grwa ru gshin rje brtan ma dang / /de bzhin gshin rje pho nya ma/ /de ma thag tu 'jigs chen ma/ /gshin rje mche ba gtsigs mar bshad/ /gshin rje 'joms ma 'jigs byed ma/ / bzhi par yang ni yang dag bshad/ /rdo rje mkha' 'gro ma 'di rnams/ /rtsa yi gzugs kyis yang dag bshad/ /thugs kyi rdo rje rnal 'byor ma/ /sum cu rtsa bdun du ni brjod/ /'di rnams shes rab pha rol phyin/ /lus la yang dag rnam par gnas/ /dpyid kyi thig ler de bzhin gshegs pa'i skur son pa'i rtsa sum cu rtsa bdun gyi 'khor lo rnam par gzhag pa rgyas par bstan pa ste drug pa'o// //de nas de bzhin gshegs pa gang yang rung ba'i rtsa'i 'khor lo/ byang chub kyi phyogs kyi chos sum cu rtsa bdun rnam par dag pa bshad par bya'o//lus dran pa nye bar gzhag pa mkha' 'gro ma'o/ /tshor ba dran pa nye bar gzhag pa lA ma'o/ /chos dran pa nye bar gzhag pa dum skyes ma'o/ /sems dran pa nye bar gzhag pa gzugs can ma'o/ /'dun pa'i rdzu 'phrul gyi rkang ba rab gtum ma'o/ /brtson 'grus kyi rdzu 'phrul gyi rkang pa gtum mig ma'o//dpyod pa'i rdzu 'phrul gyi rkang pa 'od ldan ma'o/ /sems kyi rdzu 'phrul gyi rkang pa sna chen ma'o/ /dad pa'i dbang po dpa' bo'i blo gros ma'o/ /brtson 'grus kyi dbang bo mi'u thung ma'o/ /dran pa'i dbang po lang+ka'i dbang phyug ma'o//ting nga 'dzin gyi dbang po shing grib ma'o/ /shes rab kyi dbang po sa srungs ma'o/ /dad pa'i stobs ni 'jigs byed chen mo'o/ /brtson 'grus kyi stobs ni rlung shugs ma'o/ /dran pa'i stobs ni chang 'thung ma'o/ /ting nge 'dzin gyi stobs ni ljang lha ma'o/ /shes rab kyi stobs ni shin tu bzang mo'o//ting nge 'dzin yang dag byang chub kyi yan lag ni rta rna ma'o/ /brtson 'grus yang dag byang chub kyi yan lag ni mkha' 'gro gdong ma'o/ /dga' ba yang dag byang chub kyi yan lag ni 'khor los sgyur ma'o/ /shin tu sbyangs pa yang dag byang chub kyi yan lag ni dum skyes ma'o//chos rnam par 'byed pa yang dag byang chub kyi yan lag ni chang 'tshong ma'o/ /dran pa yang dag byang chub kyi yan lag ni 'khor lo'i go cha ma'o/ /btang snyoms yang dag byang chub kyi yan lag ni shin tu dpa' mo'o/ /yang dag pa'i lta ba stobs chen ma'o//yang dag pa'i rtog pa 'khor los sgyur ba'o/ /yang dag pa'i ngag brtson chen ma'o/ /yang dag pa'i las kyi mtha' bya gdong ma'o/ /yang dag pa'i 'tsho ba 'ug gdong ma'o/ /yang dag pa'i rtsol ba khyi gdong ma'o/ /yang dag pa'i dran pa phag gdong ma'o/ / yang dag pa'i ting nge 'dzin ni dpal he ru ka'o/ /dge ba'i chos ma skyes pa bskyed pa ya ma dA D+hI'o/ /dge ba'i chos skyes pa rnams yang dag par bsrung ba ni ya ma dU tI'o/ /mi dge ba'i chos ma skyes pa rnams mi skyed ba ni ya ma daM TI ni'o/ /mi dge ba'i chos skyes pa rnams spong ba ya ma ma thA ni yin no//de dag byang chub kyi phyogs kyi chos sum cu rtsa bdun rnam par dag pa lus su son pa'i rtsa thams cad lha'i kha dog dang phyag mtshan dang dbyibs la brten te rnam par gnas pa'o/ /dpyid kyi thig ler rtsa'i 'khor lo dang bcas pa'i byang chub kyi phyogs kyi chos sum cu rtsa bdun rnam par dag pa bshad [(]ba [,]pa [)]rgyas par bstan pa ste bdun pa'o// //de nas de bzhin gshegs pa gang yang rung ba'i sku'i dkyil 'khor dang / gnod sbyin dang / mchod sbyin dang / bzlas pa dang / bsgom pa la sogs pa'i cho ga'i bya ba phyi rol dang mthun par nang gi ngo bos yang dag par rab tu bshad par bya'o//byang chub chen po'i phyogs chos ni/ /sum cu rtsa bdun gnas mtshan nyid/ /he ru ka sogs lha rnams ni/ /rtsa yi gzugs su yang dag gnas/ /lus kyi dkyil 'khor nyams dga' ba'i/ /sgo bzhi ji ltar brjod pa'o/ /rang gi yan lag las byung brgyad//dga' ba de dag 'dzin cing gnas/ /dngos po kun gyi kun nas ni/ /gru bzhi ru ni rab tu brjod/ /sku gsung thugs kyi ngo bo yis/ /'khor lo gsum gyi bdag nyid brjod/ /ri bo mgo yi ze'u 'bru la/ /b+hai raM pa sogs rim ji ltar/ /bla ma'i dus tshigs rim nyid kyis//de la dkyil 'khor rdzogs pa ste/ /rkang pa'i 'og tu gnas pa'i rlung / /b+hai raM ba gzhi'i rnam par gnas/ /sum mdo'i phyogs su gnas pa ni/ /gru gsum 'bar ba de bzhin no/ /zlum po'i rnam pa'i gzugs kyis ni/ /chu ni lto ba ru ni gnas/ /snying ga ru ni sa nyid ni/ /kun nas gru bzhi pa yin no//keng rus dbyug pa'i gzugs can ni/ /ri rab ri rgyal de bzhin du/ /mgo de'i cha la yang dag gnas/ /'dam skyes 'dab ma sum cu gnyis/ /dbyangs dang gsal byed yan lag drug /sum cu rtsa gnyis byang chub sems/ /pad+ma'i dbus su son pa gang / /zla ba'i dkyil 'khor zhes bya bar//mgo yi nang du klad pa ni/ /gnas pa gang ni de la brjod/ /de yi nang du haM yig ni/ /thig le'i gzugs te mi shigs pa/ /'jig rten kun gyi rtsa ba de/ /brtan dang g.yo ba'i bdag nyid ni/ /gsal dang mi gsal gzugs kyis ni/ /de ni sa bon ngo bor gnas/ / lus can thams cad rnams kyi gzugs/ /de las dang po nas bskyed pa'o/ /bdud rtsi'i gzugs kyis 'dzag pa ni/ /nyin dang mtshan du rnam par gnas/ /de nyid kyis ni sgra 'byed cing / /me ni dga' bar byed pa ste/ /de yi dkyil 'khor rdzogs par ni/ /'gyur ba nyid du the tshom med/ / dngos po rnams kyi snying po mchog /de nyid snying khung zhes brjod do/ /de ni 'dzin cing len pas na/ /lus can dkyil 'khor du ni 'dod/ /rtsa chen sum cu rtsa bdun gyi/ /'khor lo'i dkyil 'khor du 'dod do/ /byang chub sems ni rin po che/ /snying po de nyid kyang dkyil 'khor/ /phyi rol nang gi ngo bor ni//sna tshogs khyab cing rnam par gnas/ /phyi rol gzugs dang sgra la sogs/ /dbang po drug po 'jug pa'o/ /nang gi khu ba la sogs pa/ /grub pa'i rdzas ni rnam par gnas/ /phyi rol bcas pa'i nang nyid kyis/ /rdo rje can gyi byang chub sems/ /sbom dang phra ba'i rang bzhin gyis//'gro ba'i gnyen gyi rang bzhin can/ /sangs rgyas byang chub sems rnams kyis/ /dam tshig don ni skyes pa yin/ /skye ba 'di la sangs rgyas nyid/ /dkyil 'khor 'di las thob par 'gyur/ /nyan thos rnams dang sangs rgyas dang / /rang rgyal rnams dang de bzhin de//tshangs la sogs pa'i lha rnams ni/ /dkyil 'khor 'di las bskyed pa yin/ /shes rab me ni cher 'bar ba/ /nang gi chu ba la sogs dang / /de bzhin phyi yi gzugs sogs pa'i/ /sreg rdzas rnams kyis sbyin sreg bya/ /skye mched drug dang khams rnams dang //phung po rnams kyi khyad par las/ /de rnams lha yi gzugs can te/ /mkha' 'gro ma rnams de bzhin du/ /de rnams der ni mchod pa'i phyir/ /mchod sbyin mchod par yang dag bshad/ /spyi bo yang ni thod pa nyid/ /sreg rdzas snod du bshad pa ste/ /blugs gzar ro ma nyid du bshad//snying gi 'khor lo brkyang ma'i bdag /de ni dgang gzar yang dag brjod/ /thab khung lte ba'i dkyil 'khor ni/ /las kyi rlung gis bskyod pa'o/ /tshangs pa'i me ni sum mdor gnas/ /sgra ni sngags zhes brjod pa ste/ /bzlas pa bskor bar gyur pa yin/ /dkyil 'khor gnyis med rnal 'byor gyis//so sor snang ba bsgom pa yin/ /lhan cig skyes pa'i ngo bo 'di/ /rgyal ba rnams kyi dkyil 'khor sogs/ /dkyil 'khor bdag po'i gzugs kyis ni/ /sems kyi rgyal po slob dpon gyi/ /de la sogs pa ji skad gsungs/ /thams cad 'dir ni rtogs par bya/ / dpyid kyi thig ler dkyil 'khor dang sbyin sreg dang mchod pa dang bzlas pa dang / bsgom pa la sogs pa'i cho ga'i bya ba gtan la dbab pa rgyas par bstan pa ste brgyad pa'o// //de nas de bzhin gshegs pa'i sku'i gsang sngags thams cad btu ba'i 'khor lo brjod par bya'o//dkyil 'khor gru gsum nyams dga' bar/ /rdo rje A ral+li zhes gsungs/ /chos kyi 'byung gnas zhes byar bshad/ /btsun mo'i b+ha ga zhes bya ste/ /de yi nang son pad+ma ni/ /'dab brgyad snying po dang bcas pa/ /de la A li kA li 'dres/ /sde tshan brgyad po rnam par gnas//sngags kyi gzugs kyis lus can gyis/ /las kyi tshogs ni byed pa yin/ /yi ge rnams ni lnga bcu nyid/ /rig byed g.yogs pas gang dag gnas/ /sngags rnams nyid dang rgyud rnams dang / /phyi rol tshul gyi bstan bcos 'di/ /de dag nyid kyi rang bzhin te/ /'di las gzhan du cung zad med//a ka tsa Ta pa ya sha sde dga' ba/ /lnga bcu rnams ni yang dag par ni bsten pa ste/ /rdo rje A ral+li yi pad+mar gnas pa rnams/ /'dab ma brgyad pa so sor phyogs dang mtshams su gnas/ /de yi dbus kyi ze'u 'bru la/ /dam pa'i dbang phyug yod pa ste/ / sde tshan brgyad po nyid kyis kyang / /yi ge dam par bskor ba'o/ /a ni yig 'bru kun gyi mchog /don chen yi ge dam pa ste/ /lus can rnams kyi sngags kun ni/ /de nyid las ni byung ba'o/ /gang zhig ral gri dang ni mig sman rkang pa byug pa ri lu sa 'og gnod sbyin ma'o/ /'jig rten gsum gyi khongs su gtogs pa'i mdo rgyud rtogs gnas las kyi rjes 'gro dngos grub dang //gang zhig thams cad du ni rdzu 'phrul che ba rang gi gnas 'dod dam pa lnga ldan pa/ /de dag sde tshan brgyad kyi nang son dbyangs mchog sde tshan bdag nyid nas ni 'byung bar byed/ /ngag gi rab 'byams gang gang zhig /skye bo rnams kyis rtogs byed pa/ /de dag thams cad sngags kyi gzugs/ /de nyid las ni rab tu skye/ /sgra ni sngags zhes smras pa ste/ /lus can rnams ni thams cad kyi/ /sna tshogs 'dun pa gnas chen las/ /chos kyi ral+li rnam par 'byung / /dngos grub don du rnam gnas pa'i//sngags ni 'ga' yang nges pa med/ /ma skyes pa yi rang bzhin ni/ /sngags kyi sde tshan dbang phyug mchog /dpyid kyi thig ler sngags btu ba rgyas par bstan pa ste dgu pa'o// //de nas de bzhin gshegs pa gang yang rung ba'i sku'i chos dang longs spyod rdzogs pa dang sprul pa'i sku gsum gyi gzugs kyi bde ba chen po'i ye shes rab tu bshad par bya'o//spyi bo lte bar gnas 'khor lo/ /e yi cha byad yang dag gnas/ /snying ga mgrin pa legs gnas pa/ /baM yig 'dra bar 'dod pa'o/ /lte ba'i nang gnas pad+ma ni/ /'dab ma drug cu rtsa bzhir gnas//pad+ma 'dab ma sum cu gnyis/ /spyi bo'i nang du rnam par gnas/ /mgrin pa'i nang du son pa yang / /pad+ma 'dab ma bcu drug go/ /de bzhin du ni snying nyid du/ /pad+ma 'dab ma brgyad du brjod/ /'dab ma drug cu rtsa bzhi 'di/ /sprul pa ru ni yongs su grags//pad+ma chen po 'dab brgyad par/ /chos kyi sku ni rab tu grags/ /bcu drug 'dab ma longs spyod pa'o/ /de bzhin 'dab ma sum cu gnyis/ /bde chen ye shes chen po ru/ /kun nas rnam par gnas pa'o/ /sprul pa de la dbus su ni/ /sde tshan brgyad po rnams kyis bskor/ / yig 'bru rnams kyi gzugs mchog ni/ /a ni yi ge dam pa yin/ /chos kyi 'khor lo dam par grags/ /hUM yig gzhom du med par 'dod/ /dbyangs yig lnga dang yang dag ldan/ /ya ra la was rnam par brgyan/ /longs spyod 'khor lo'i dbus gnas pa/ /o ni yig 'bru gsal bar byed//cha ni bzhi po rnams kyis kyang / /kun nas yongs su bskor ba yin/ /bde chen 'khor lo chen po la/ /haM yig thig le'i gzugs can no/ /zla ba nyi mar rab grags pa'i/ /g.yon dang gnas pa'i ngos su ni/ /mgrin pa nas brtsams g.yon pa'i rtsa/ /longs spyod rdzogs pa'i sku can ma//lte ba'i ngos su ngal bso zhing / /'og tu kha blta chad 'bab ma/ /lte ba nas te rtsa gang zhig /de bzhin steng du kha blta 'bab/ /mgrin pa'i nang du ngal bso zhing / /kha ba 'bab par rab tu grags/ /chang ni zla ba zhes bshad do/ /khrag ni nyi ma zhes brjod do/ /sgo gnyis yang dag gnas pa ste//'og dang steng du yang dag brten/ /'di dag zla ba nyi ma ste/ /rtsa gnyis gnyis su yang dag 'jug /dpa' bo mkha' 'gro ma rnams kyi/ /'gro dang 'ong ba rnams kyi rgyun/ /nub pa dang ni 'char ba'i don/ /gnyid log sad pa dag tu gnas/ /g.yon dang g.yas pa'i ngos su ni//dbyangs yig bcu gnyis yang dag gnas/ /steng du kha bltas legs par bshad/ /yi ge a la sogs pas bskor/ /'og tu kha bltas legs gnas pa/ /ka la sogs pa nges par sbyar/ /yi ge k+Sha dang yang dag ldan/ /'og gi char yang dkris pa'o//gang tshe mgrin par 'dod chen gyi/ /gzugs ni zla bar gnas pa na/ /sangs rgyas rnams ni dam pa'i sku/ /de tshe longs spyod rdzogs par bshad/ /gang tshe rdo rje'i rtser gnas pa/ /de rtse de yang sna rtse ru'o/ /gang tshe longs spyod rdzogs pa'i sku/ /nub par gyur pa de yi tshe/ / b+ha ga'i nang du phyin de yang / /yungs kar tsam du rnam brjod pa/ /nyi ma'i gzugs su yang dag bshad/ /sprul pa'i skur ni brjod pa ste/ /sangs rgyas byang chub sems dpa' rnams/ /de yis bskyed cing 'phro ba'o/ /pad+ma gar gyi dbang phyug rgyal/ /pad+ma 'byed pa'i 'byor pa can/ / sprul pa yi ni sku yi gzugs/ /nyi ma der ni nub pa gang / /de yi rdzogs sangs sems zhes bya/ /gong bur gyur pas rnyog pa med/ /'khor ba'i lam du rnam gcod cing / /spros pa nyer zhi zhi ba ste/ /gnyis med mchog tu dga' ba'o/ /rdo rje sems dpa'i rang bzhin nyid/ /he ru ka dpal zhes bshad de//rgyud ni yon tan rang bzhin nyid/ /brgad dang bltas dang lag bcangs kyis/ /rgyu gsum du ni rnam par gnas/ /'dod chags nyid dang chags bral dag /spangs nas yon tan gnas pa'o/ /rtsa ni thams cad mnyam sbyor ba/ /mkha' 'gro ma yi dra ba sdom//gsang ba zhes bya sa yi khams/ /mchog ni de bzhin chu yin no/ /dgyes pa la ni me ru bshad/ /rlung ni thams cad bdag nyid gnas/ /rtag tu bzhugs pa zhes brjod pa/ /sangs rgyas kun bdag sdom pa'o/ /yang na me long lta bu'i tshul/ /de bzhin du yang mnyam pa nyid//so sor rtog pa shes pa dang / /de bzhin bya ba nan tan dang / /rtag tu bzhugs pa 'di rab bsrungs/ /shin tu rnam dag rang bzhin no/ /yang na rnam snang mdzad nyid dang / /de bzhin rin chen 'byung ba dang / /yang na 'od dpag med pa dang / /yang na don yod rtag bzhugs te/ / gong bu bdud rtsi lnga dngos ni/ /thig le'i gzugs te yid rang bzhin/ /shin tu rnam dag ye shes che/ /lha mo kun gyi rang bzhin nyid/ /rdo rje sems dpa' zhes bshad cing / /bde ba mchog ces brjod pa yin/ /rang byung gi ni ngo bo nyid/ /chos kyi skur ni rab tu grags/ /'di yi shes rab lhan cig skyes//der brten gzugs 'chang mi gnas pa/ /lus kyi rlung gis spar ba yis/ /lte ba'i dkyil 'khor du ni 'bar/ /de la phag mor rnam par bshad/ /dpyid kyi thig le nyid du brjod/ /skra yi rtse mo brgya stong cha/ /glog 'gyu ba dang mtshungs pa'i 'od//lha yi rnal 'byor dus su ni/ /ba spu'i khung bu'i rtse mtshungs nas/ /phyung ste phyogs rnams thams cad du/ /lha dang lha mi na sdigs mdzub byed/ /snying ga chos kyi 'khor lo dang / /longs spyod 'khor lo bsregs nas ni/ /sna yi bu ga g.yas pa nas/ /kun nas nges par byung nas ni//mdzod spu ru ni gnas pa yi/ /bu ga nas ni phyogs bcu yi/ /sangs rgyas byang chub sems dpa' yis/ /shangs kyi bu ga g.yon pa nas/ /spyi bor zhugs nas 'khor lo ni/ /yang dag bsregs nas rnam byung ste/ /sngon smras nyid kyi bu ga nas/ /spyi bo nas ni yang zhugs pas//sangs rgyas rnams ni bsregs pa las/ /slar yang dga' ba bskyed bya ste/ /lte ba'i dkyil 'khor du 'ongs nas/ /sngon bzhin du ni gnas par gyur/ /dpyid kyi thig ler chos dang longs spyod rdzogs pa dang sprul pa dang sku gsum mtshon pa sngon du 'gro ba dpal he ru ka ni/dpyid kyi rdo rje phag mo thig ler brjod pa dang / 'gro ba dang 'ong ba dang rgyud dang sngags dang ye shes dang gsang ba'i rim pa dang / sprul pa dang longs spyod rdzogs pa dang chos dang bde ba chen po'i 'khor lo pad+ma bzhi po dang / dbyangs yig bcu gnyis dang / /yi ge sum cu rtsa bzhi'i rang bzhin du dus gsum du bzhugs pa'i de bzhin gshegs pa rgyas par bstan pa ste bcu pa'o// //gang zhig ral gri dang ni mig sman rkang pa byug pa ri lus 'og gnod sbyin mo/ /'jig rten gsum gyi khongs na spyod pa'i mod rgyud rtogs gnas las kyi rjes 'gro dngos grub rnams//gang zhig thams cad du ni rdzu 'phrul che ba rang gnas 'dod pa dam pa lnga ldan pa/ /de dag thams cad dpyid kyi thig le'i rnal 'byor mthu stobs las ni byung bar bstan/ /spyod pa'i brtul zhugs pa dpal nag po zhes brjod pas/ bla ma'i man ngag shes nas rje btsun dpal he ru ka'i bka' yang mig lam du gyur pa rtogs te/dpal 'khor lo sdom pa'i man ngag las phyi rol dang mthun pa nang gi tshul las rang bzhin bsam gtan gyis gsal bar bya ste blo gros dman pas go bar bya ba'i phyir/ dpyid kyi thig le zhes bya ba'i mtshon pa ste/ rdo rje phag mo dang dpyid dpal he ru ka'i bka' lung gis bstan pa las dpyid kyi thig le zhes bya ba de brjod pa'i gzhung rdzogs so// //mkhas pa dam pa blo gros bzang / /grags pa'i zhal snga nas dang ni/ /sgra bsgyur mar pa yid gzhungs blo/ /chos kyi dbang phyug ces byas bsgyur/ /rgyud rgyal bde mchog sgrub thabs kyi//gtsug gi nor bu ba dan ta/ /zas gtsang sras po'i rigs byung la/ /grags mchog shes rab ces bya yi/ /sbyin bya'i chos yin de dgyes ni/ /'gro kun rab rib sad par shog /mya ngan gyis gdungs rims btab 'khrul pa yul la mngon phyogs rnam par nyam ngas gnas/ /

CLOSE WINDOW