CLOSE WINDOW

D1418
བོད་ཡིག

@##/ /rgya gar skad du/ shrI ra ha s+yanA lin+ya nA maTI kA/ bod skad du/ dpal gsang chen pad+ma zhes bya ba'i rgya cher 'grel pa/ dpal rdo rje sems dpa' la phyag 'tshal lo/ /dri med blo yi 'od zer gyis/ /slob ma mchog gi pad kha 'byed/ /khams gsum ma lus mtha' yas la/ / ye shes sgron ma rab tu gsal/ /thams cad phyogs su de nyid nyid/ /mchog la dbang po rgyal gyur cig /gang gis nyid kyi mgur las rin chen rgyud kyi phreng / /man ngag dang ldan gzhan gyi gzhung la sogs pa byin/ /de yis lha yul brgya byin dang 'dra dbang phyug bdag /re zhig gzhan gyi mdun du bdag la 'jigs pa med//'on kyang gcig pu'i rin chen rdo rje zhabs kyi mchog /bla la bdag 'jigs nyi ma shar ba'i zla ba bzhin/ /gzhan kun mkha' gnas yin yang de dag skar ma ste/ /dge ba'am mi dge gang zhig des ni smras mod kyang / /de lta mod kyi ci zhig rmad byung bdag gis byas/ / gang mkhas rnams kyis rmi lam du yang rnyed par dka'/ /gsang chen shin tu gzhon nu yi ni pad+ma'i mtshan/ /mdzes pa dga' bcu drug gis lhag par blo ldan ma/ /dpal dang ldan pa skyed tshal le'u gang zhig las/ /snying po'i ut+pal gang ba bdag gis dang po 'dren/ /gzhan yang de rang la ni dbang bskur don phyir te/ /longs spyod de dag bdag gis longs spyod rigs pa bshad/de la dang po brjod pa dang / brjod par bya ba dang / 'brel pa dang / dgos pa dang /de'i dgos pa de ltar ni nges par smra bar bya'o/ /ci'i phyir zhe na/ 'dis bstan bcos la snying po shes so/ /'di ni bstan bcos la gcig bu bdag gis byas pa min lo//'on kyang gcig nas gcig gi bla ma'i dang po'i rim pas 'ongs pa'o/ /de la gang zhig sna tshogs mchog gis skyes la sogs pa nas brtsams nas/ /dpal ldan sdom pa'i skyed mos tshal/ /zhes bya ba'i mthar thug pa yan chad ni brjod pa/ de las gang zhig 'dren pa ut+pal gang ba ni brjod par bya ba/ yang na ut+pa la gang ba ni brjod pa/ dpal ldan sdom pa'i skyes mos tshal brjod par bya/ de dag mnyam par sbyor ba las gnyis su med pa'i rang bzhin sbyor ba'i mtshan nyid ces bya ba ni 'brel pa/ ut+pal dang gnyis kyi dbang bskur dus su gang zhig bla na med pa'i mchod pa'i tshogs de ni dgos pa/ mchod pa'i tshogs kyi sprin 'phro ba'i dus su 'khrul pa med pa'i sems kyis gnyis su med pa spros pa dang bral ba'i bde ba chen po'i rgyal po mchog dang chad pa'i dbus su chos thams cad stong pa nyid kyi rang bzhin bdag stong pa nyid kyi rang bzhin bsams te nyams su myong ba'i ro las gang zhig 'bras bu rnyed pa de ni dgos pa'i dgos pa zhes bya ba'i don to//gang zhig sna tshogs mchog gis skyes me tog dang bcas 'byung ba'i rang bzhin dri ma med/ /rin chen la sogs chu las skyes pa ge sar dang bcas dri yi sbrang rtsi 'dzag pa yis/ /yang dag ldan pa don dam pa yi bde ba skyed byed dpal ldan sdom pa'i skyed mos tshal//e yi rnam pa'i byad gzugs kha sbyar nang yod gsang ba'i gzhi de la ni bdag phyag 'tshal/ gang zhig sna tshogs mchog gis skyes zhes bya ba la sogs pa la/ phyi'i don gyis a shwad+tha dang 'ba' ta dang tsam pa ka dang nA ga ge sar la sogs pa 'jig rten la mchog tu grags so/ /nang gi don gyis sa zhes bya ba ni gnas kyi gtso bo dbus kyi gnas der 'byung ba skye ba'i shing rnams so//de yang ci 'dra ba/ me tog dang bcas pa me'o se ba'i 'bras bu sbyin pa zhes bya ba'i don to/ /gzhan yang ji lta bu 'byung ba'i rang bzhin dri ma med pa/ 'byung ba'i sgra ni sa dang chu dang me dang rlung ngo / /sra ba dang gsher ba dang tshab dang yang ba zhes bya ba ni de rnams kyi mtshan nyid do//dri ma med ces bya ba ni gcig dang du ma'i rang bzhin dang bral ba'o/ /nyi rdul gyi tshogs kyi phyir gcig pa'o/ /gcig bu med pa'i phyir du ma yang med do/ /gcig dang du ma dang bral ba'i phyir ci yang gzung ba med do/ /gzung ba med pas 'dzin pa yang med do//gzung ba dang 'dzin pa med pa'i phyir thams cad stong pa nyid kyi rang bzhin no/ /gal te gzhan dag stong pa nyid kyi rang bzhin yin na ji ltar sbyin pa la sogs pa bsod nams kyi tshogs so/ /des thar pa yang chad par 'gyur ro zhes smra na de la bshad par bya'o/ /khyed kyi thar pa ji ltar dngos po'i mtshan nyid dam dngos po med pa'i mtshan nyid/gang dngos po'i mtshan nyid ni bcos ma'o/ /gang zhig dngos po med pa'i mtshan nyid de ni thar pa zhes ji ltar 'brel/ thar pa ni rang bzhin ye shes kyi mtshan nyid lo/ /gal te dngos po dang dngos po med pa dang bral ba yin te/ de sbyin pa la sogs pa bsod nams las skye ba ma yin no//skye ba med pa la chad par ji ltar 'brel/ skye ba la chad pa yod de ji ltar bum pa bzhin no/ /de ltar yin na bsod nams kyi tshogs la dgos pa med ces gang zhig rtog pa de la sel ba'i don smra'o/ /de'i phyir sbyin pa la sogs pa'i bsod nams kyi tshogs dgos pa med/ gal te med na yang btang snyoms su 'dug gam ci/bsod nams kyi tshogs kyi rang bzhin ye shes kyi mtshan nyid thar pa rnyed kyi skye ba ma yin no/ /ji ltar gang gis gang la ri bong can gyi cha gcig sor mo la sogs pas ston gyi des bskyed dam ci/ de lta'i rigs pas thar pa yang de bzhin no/ /de bzhin du bla ma'i zhal snga nas dpal rdzogs pa'i bsgom pa'i rim pa las/de ltar thar pa bcos ma min/ /rang bzhin ye shes mtshan nyid do/ /gang phyir bsod nams kyis ni rnyed/ /bsod nams las ni skye ba min/ /zhes gsungs so/ /da ni gang zhig sna tshogs mchog gis skyes zhes bya ba la sogs pa la/phyogs gzhan bshad pa yod pa de gsal bar ston to/ sna tshogs zhes bya ba ni sprul pa dar chos dang longs spyod dang bde ba chen po la sogs pa'o/ /mchog ces bya ba ni bde ba la lam gyi phyir/ sa zhes bya ba ni bde ba chen po'i 'khor lo'i snying po'i rten gyi phyir/ yang na sprul pa'i lte brten gyi phyir/skyes zhes bya ba ni der 'byung ba rtsa'i bdag nyid kyi shing rnams so/ /me tog dang bcas zhes bya ba ni bdud rtsi khengs pa zhes bya ba'i don to/ /'byung ba'i rang bzhin dri ma med ces bya ba la/ 'byung ba ni don dam par de la rang bzhin gang yin pa de dag kun brtags la sogs pa dang bral ba/dri ma med ces bya ba ni gzung ba dang 'dzin pa rnam par spangs pa'o/ yang na nam mkha'i rang gi ngo bo zhes bya ba'i don to/ /rin chen la sogs zhes bya ba ni pad+ma rA ga bzhin du kha dog gang la yod pa de ni pad+ma rA ga zhes 'dab ma drug cu rtsa bzhi pa'i chu skyes so/ /sogs pa'i sgras lte ba dang ge sar dang ldan pa 'dir lte ba ni 'dab ma brgyad pa/ge sar gyi sgra ni rtsa phra mo'i rnam pa'i 'dab ma gsum pa/ yang na 'dab ma gsum pa'i rnam pa la gang lte ba ni rin chen/ sogs pa'i sgra ni de'i nang na yod pa glo bur ba ha'i rnam pa'o/ /chu las skyes pa zhes bya ba la/ chu ni byang chub kyi sems/ de las skyes ba 'byung ba me tog rnams so//de yang ci 'dra bar 'gyur ba tshul dang thig le'i rnam pa can gzhan yang ci 'dra ba ge sar dang bcas pa/ ge sar gyi sgra ni mthu chen po'i sbrang rtsi zhes bya ba'i don to/ /dri'i sbrang rtsi 'dzag ces bya ba la/ dri'i sbrang rtsi ni byang chub kyi sems/ 'dzag pa ni 'bab pa/ byang chub gyi sems bdud rtsi chu las skye na yang byang chub kyi sems 'dzag go//ci'i phyir zhe na/ rgyu dang 'bras bu mnyam pa'i phyir zhes dgongs pa'o/ /de bzhin du yang dpal gsang ba 'dus pa las/ 'bras bus rgyu ni rgyas btab cing / /rgyu yis 'bras bu rgyas btab bo/ /zhes gsungs so/ / yang na dri ni dga' ba sbrang rtsi ni mchog gi dga' ba/ 'dzag pa ni chad pa'i dga' ba'o/ /da ni skyed tshal gyi rang gi ngo bo bshad de/ yang dag ldan pa ni zhes bya ba la sogs pa la/ yang dag ldan pa ni mnyam par sbyor ba'o/ /de yang gang gis gang la drug cu rtsa bzhi sang brgyad pa dang gsum pa la sogs pa'i lhan cig dpal sdom pa'i skyed mos tshal la'o//dpal gyi sgra ni mchod pa'i tshig /yang na dpal ni gnyis su med pa'i ye shes/ sdom pa ni bde ba chen po'i rang bzhin skyed mos tshal na bde ba chen po la ngal so ba'i gnas yang na rol pa'i gnas/ de'i phyir don dam pa'i bde bskyed par byed pa'o//don dam pa ni mtshan ma med pa gnyis su med pa sku dang bral ba zab pa skye ba med pa 'gags pa med pa brjod du med pa nam mkha' dang 'dra zhes pa'o/ /bde ba ni de'i nyams su myong ba'i ro/ /skyed byed ces bya ba ni mtshan ma med pa la sogs pa las nyams su myong ba'i ro 'byung bar byed pa'i don to//e yi rnam pa'i byed pa gzugs/ /zhes bya ba la sogs pa la/ e'i rnam pa'i sgra ni chos kyi 'byung gnas/ chos rnams 'byung bas na chos kyi 'byung gnas/ de nyid shes rab kyi b+ha ga'o/ /de yang kha sbyar gyi byad gzugs te/ de la ji ltar kha sbyar gur gyi rgyud las mtshan nyid gsungs pa de bzhin du 'dir bdag gis gsal bar bshad de/snum pa sra ba 'jam pa a shwat+tha'i 'dab ma'i rnam pa mtho ba yangs pa dkar ba dri ma med pa rlon pa phra mo'i spu'i myu gu can gyi snying po chu ba dri zhim pa/ steng gi spu'i phreng ba lte ba las 'das nas dbu brgyan pa shin tu yid 'phrog pa nya gang ba 'dra ba zhes pa'i don to//de la yan lag thams cad reg pas slob dpon gyi dbang ngo / /gsang ba'i don gyis 'di la rang gi ngo bo bshad de/ kha sbyar zhes bya ba la sogs pa la/ gang zhig shes rab thabs gnyis kyi rdo rje dang pad+ma 'dus pa de ni kha sbyar ro/ /yang na de dag gi 'byung ba'i bdud rtsi 'dus pas kha sbyar ro//de bzhin du dpal rig pa chen po'i rgyud kyi le'u dang po las/ mchog gi dga' ba rgyas pa las/ /dbang po gnyis kyi rin chen rtser/ /byang chub sems kyi bdud rtsi 'byung / /dga' mo 'dus pa'i phyir kha sbyar/ /zhes gsungs so/ /yang na gang zhig byang chub kyi sems bde pa'i gzhi de ni kha sbyar ro//de bzhin du dpal gsang ba 'dus pa las/ /gang lha'i e yi byad gzugs ni/ /dbus su baM gyis rnam par brgyan/ /bde ba thams cad kyi ni gzhi/ /sangs rgyas rin po che yi snod/ /ces gsungs so/ /nang yod ces bya ba la nang gi sgra ni kha sbyar gyi rnam pa la snying po'o//de yang shin tu 'jam pa phra ba mi zad pa nam mkha' dang 'dra ba'o/ /yod pa ni de'i nang na gnas pa zhes bya ba'i don to/ /gsang ba'i gzhi zhes bya ba la sogs pa la/ gsang ba ni gzhan min mchog gi dga' ba/ gzhi ni byang chub kyi sems so/ /de la dgos pa ni 'di yin te/ gang zhig gsang ba'i mchog gi dga' ba dang gzhi byang chub kyi sems gnyis su med pa'i bde ba chen po'i rgyal po rang bzhin de la bdag phyag 'tshal zhes bya ba'i don to//da ni gsang ba'i dbang gi don bshad de/ /'di ltar rab 'od skyed tshal las/ /mchod pa'i don du ut+pal gang / /reg byar gnas pa bung gzugs la//yid 'phrog bdag gis bzor bgyid do/ /'di ltar zhes bya ba ni sngar bshad pa'i don to/ /rab 'od ces bya ba ni bde ba chen por grags pa'i sdom pa/ skyed tshal ni dga' ba thams cad shar ba'i gnas/ yang na khong du chud pa'i gnas so/ /mchod pa'i don du ut+pal gang / /zhes bya ba ni rang la byin gyis brlab pa'i gang zhig srub dang bsrub thabs de ni mchod pa'o//de'i dus su gang mchog gi dga' ba thob pa de ni don des gang zhig khengs pa de ni ut+pal gang ba/ ut+pala'i sgra ni gsang ba'i rdo rje zhes bya ba'i don to/ /reg byar gnas pa bung gzugs la/ /zhes bya ba la/ reg bya ni pad+ma/de gang la yod pa de ni pad+ma can/ bcom ldan mo dam tshig gi yan lag mo de la 'khyud pas bzhugs pa bung ba'i gzugs dpal sdom pa rje btsun de la bla na med pa'i mchod pa'i don du ut+pal gang ba bzor bgyid ces 'brel lo/ /ji ltar bzor bgyid pa de'i don bshad de/ phag mo'i gzugs su las kyi phyag rgya byin gyis brlabs nas phan tshun byang chub kyi sems kyi me tog yan lag la gdags te/phyi nas yang shin tu bstan pa'i yid kyis 'khrul pa med pa'i lta bas gsang ba'i gzhi skyed tshal las dri med byang chub kyi sems dga' ba la sogs pa dang bcas pa'i me tog drangs te/kun du gang bar byas nas rjes su rang gi ga pur gyis byug bzor byas zhes bya ba'i don to/ /yid 'phrog ces bya ba la/ yid ni byang chub kyi sems/ 'phrog pa ni gzung ba/ de'i dus su dga' ba dang bcas pa'i dang po'i chu bo thabs kyi bya gdong ma'i gnas su bzhag ste/slob dpon gyi dbang thob pa la rnam par snang mdzad kyi gzugs su byin gyis brlabs te kha'i pad+ma la 'bab par bya'o/ /des kyang e ma'o zhes myang bar bya'o/ /de'i dus su bde ba chen po dang chos gnyis kyi dbus su sbom po mtha' ltag gis dba' rlabs gnyis mnan par bya btsir bar bya zhes bya ba'i don to//da ni phya gdong ma la thabs kyi gnas bshad de/ gang zhig chu gsum gyi rnam pa rin po che'i rgyal mtshan de ni chos kyi rgyal po 'byung gnas shes rab kyi mtshan/ de la gang gdu bu'i gnas de ni sangs rgyas rin po che'i snod/ de'i steng gi rin chen yal ga'i nang gi rtsa bar mdud pa'i dra ba'i bar du thabs kyi ut+pala'i rdo rje/de dag gi dbus su rten gyi gzugs kyis rgyas pa'i srog gi rtsa bya gdong ma shin tu 'jam pa dri ma med pa bsil ba dpe med myong ba'i rang bzhin sgur mo'i rnam pa gzugs kyis sa'i myu gu bzhin 'byung ba'o/ /shes rab la yang de bzhin no//'on kyang nang gi tshangs pa'i snying po'i nang na cung zad gsal ba'i gzugs so/ /de'i phyir 'og nas bshad pa ye shes kyi dbang la dang po re zhig shes rab dgos so/ /dus thams cad du ma yin zhes bya ba'i don to/ /da ni ut+pal gang ba'i mtshan nyid bshad de/ dad pa'i zhal 'khri shing rtsa ba//dbyug pa rgyu ni bzhi yin no/ /reg bya'i rtsa brgyad 'dab ma ste/ 'pho ba nang gi ge sar ro/ /zhes bya ba la/ dad pa ni tshangs pa ste haM gi rnam pa 'byung ba'i don gyi phyir/ sa ni byang chub kyi sems kyi mtshan nyid can bde ba de'i phyir dang pa ni tshangs pa'o/ /yang na dad pa'i steng na gnas pa tshangs pa/ zhes 'jig rten na grags so/ /zhal zhes bya ba ni de la mgo bo bzhi yod pa'o/ /'khri shing ni rtsa'o/ /de la dgongs pa 'di yin te/ tshangs pa'i zhal bzhi 'khri shing gi rnam pa'i rtsa'o/ /de'i bdag nyid kyi ut+pala'i rtsa ba zhes bya ba'i don to/ /yang na tshangs pa zhes bya ba ni phung po'i rnam par shes pa/des 'khri shing gi rnam pa'i rtsa bzhi shin tu khengs zhes bya ba'i don to/ /de bzhin du yang sdom pa'i rgya mtsho'i rgyud las/ tshangs pa phung po'i rnam par shes/ /khrag ni khyab 'jug rab tu grags/ /ri yi chu ni lha chen po/ /rtsa yi snying po'i nang na yod/ ces gsungs so/ /dbyug pa zhes bya ba ni sdong bu'o//de yang srog mar grags pa/ yang na drug cu rtsa bzhi 'dus pa'i bdag nyid kyi'o/ /rgyu zhes bya ba ni skad cig ma bzhi/ rnam pa sna tshogs dang / rnam par smin pa dang / rnam par 'joms pa dang / rnam pa'i mtshan nyid ces rim pa'o/ /yang na skad cig rgyur grags pa can rtsa ba'o//rtsa ba las 'bras bu'o/ /'bras bu ni 'dir dga' ba'i mtshan nyid can sdong bu dang bcas pa'i ut+pal zhes bya ba'i don to/ /reg bya'i rtsa brgyad 'dab ma zhes bya ba ni sprul pa'i 'khor lor rtsa kha cig reg bya'i gzugs/ kha cig reg bya dang bral ba'i gzugs reg bya dang bral ba ni zur gsum du gnas pa srog ma dang ldan pa reg bya'i gzugs 'dab ma brgyad la gnas pa'o//de la rim pa ni 'di'o/ /snum pa yangs pa rlabs chen ma/ /ro ldan rtsub pa stobs ma dang / /yan lag med zhu rnam gsal ni/ /lu rgyud rnam pa zlum po'i tshul/ /dga' ba'i longs spyod dus su ni//sprul bzhin du ni gdengs ka byed/ de phyir reg bya zhes su grags/ /de ltar min na nges mi rnyed/ /sdom pa rgya mtsho'i mtshan nyid 'di/ /rdo rje mgon pos bde ster ni/ /zhes gsungs so/ /gang zhig reg bya'i gzugs de ni a sho ka'i 'dab ma'i rnam pa bzhin thams cad khyab nas bdud rtsi 'dzag ces bdag gi dgongs pa'o//'pho ba nang gi ge sar zhes bya ba la/ 'pho ba ni gnas nas gnas su 'gro ba/ /yang na phrad pa ni 'pho ba'o/ /de la mdor bsdus pa'i rim pa bshad de/ tshes gcig gi chu tshod gcig gi bar du byang chub kyi sems 'od kyi dga' ba'i thig le'i gnas su srog phrad pa las 'od kyi srog ces bya ba dang po'o//tshes gnyis pa la chu tshod gnyis kyi bar du stobs kyi gnas su nye bar phrad pa las nye ba'i stobs zhes bya ba ni gnyis pa'o/ /tshes gsum pa la chu tshod gsum gyi bar du sprin gyi gnas su phrad pa las mnyam pa'i sprin zhes bya ba ni gsum pa'o//tshes bzhi la chu tshod bzhi'i bar du tshul gyi gnas gyen du 'gro ba phrad pa las gyen du 'gro ba'i tshul zhes bya ba ni bzhi pa'o/ /tshes lnga la chu tshod lnga'i bar du dbugs dbyung ba'i gnas su thur du 'gro ba phrad pa las dbugs 'byung thur du 'gro zhes bya ba ni lnga pa'o//tshes drug pa la chu tshod drug gi bar du ut+pala'i gnas su 'jigs pa phrad pa las ut+pal 'jigs pa zhes bya ba ni drug pa'o/ /tshes bdun la chu tshod bdun gyi bar du 'og ka'i gnas su khyab byed phrad pa las 'og ka la'i khyab byed ces bya ba ni bdun pa/ tshes brgyad pa la chu tshod brgyad kyi bar du yid kyi gnas su gzhi phrad pa las yid gzhi zhes bya ba ni brgyad pa/tshes dgu pa la chu tshod dgu'i bar du snying po'i gnas su lhod pa phrad pa las snying po'i lhod pa zhes bya ba ni dgu pa/ tshes bcu pa la chu tshod bcu'i bar du zla ba'i gnas su mtha' phrad pa las zla ba'i mtha' zhes bya ba ni bcu pa/tshes bcu gcig pa la chu tshod bcu gcig gi bar du nyi ma'i gnas su khrung khrung phrad pa las nyi ma khrung khrung zhes bya ba ni bcu gcig pa/ tshes bcu gnyis la chu tshod bcu gnyis kyi bar du drag po'i gnas su kuM d+ha phrad pa las drag po kuM d+ha zhes bya ba ni bcu gnyis pa/ tshes bcu gsum pa la chu tshod bcu gsum gyi bar du mchog gi gnas su mi rem pa phrad pa las mchog mi rem pa zhes bya ba ni bcu gsum pa/tshes bcu bzhi la chu tshod bcu bzhi'i bar du sgra'i gnas su byed pa phrad pa las sgra'i byed pa zhes bya ba ni bcu bzhi pa'o/ /tshes bco lnga la chu tshod bco lnga'i bar du ro'i gnas su 'on pa phrad pa las ro 'on pa zhes bya ba ni bco lnga pa/tshes bcu drug la chu tshod bcu drug gi bar du thog gi gnas su gsal ba phrad pa las thog gsal zhes bya ba ni bcu drug pa'o/ /de rnams la gnas spyi bo dang dpral ba dang smin dbus dang / sna dang rkan dang gling bu'i rtse mo dang dbus dang tha ma dang snying ga dang /lte ba dang mdoms dang rdo rje'i rtsa ba dang ske dang gdu bu dang tshangs pa'i gzhi dang rin chen sgo'o/ /'di ni 'pho ba bcu drug gi ngo bo rlung las 'dren pa ge sar gyi nang gi don bla ma'i gdams ngag las shes par 'dir bshad do/ /rnam pa gsum gyi gzugs su grags//lte ba nam mkha' bzhin du'o/ /snang ba gsum gyi me tog gis/ /lte ba yan chad shin tu khengs/ /zhes bya ba la/ rnam pa gsum gyi sgra ni thig le gsum char yaM gi rang bzhin ha'i rnam pa gzugs zhes bya ba ni sa chu me rlung gzugs dri ro reg bya zhes bya ba'o/ /lte ba ni reg bya'i dril bu/nam mkha' bzhin zhes bya ba ni rten med pa/ yang na nang stong pa'o/ /de la dgongs pa ni 'di'o/ /thig le gsum char yaM gi rang bzhin rnam pa gsum pa gzugs brgyad dang ldan pa gang zhig ye shes kyi me'i lte ba de ni nang gi reg bya sbyin pa zhes bya ba'i don to/ /snang ba gsum gyi me tog ces bya ba ni snang ba dang snang ba mched pa dang snang ba thob pa ste de nyid me tog rnams te/de ji lta bu zhe na/ zla ba nyi ma me dang 'dra ba de'i rang bzhin du gyur pa'am/ zla ba ni khu ba/ nyi ma ni khrag /me ni mthu/ yang na ro zhes bya ba'i don to/ /lte ba yan chad shin tu khengs/ /zhes bya ba ni de rnams kyis yongs su gang zhes bya ba'i don to//yang na zla ba la sogs pa rtag tu 'dzag ces dgongs pa'o/ /gzhan min gzugs ni 'od rab nyid/ /reg bya yis ni shin tu bsil/ /dri ni yid 'phrog yang ba ni/ /mchog gi dga' ba sbyin pa'o/ /zhes bya ba la/ gzugs zhes bya ba ni 'od rab/ de ni reg bya'i lte ba dang ldan pa'i ut+pal/ 'od rab ni rin po che'i gdu bu'i nang na ma zhu ba'i thig le gsum gyi bdag nyid byang chub kyi sems nyi ma shar ba/ yang na bde ba'i bdud rtsi'i gzugs mthar 'gro ba la nyi ma'i 'od kyis bkug ste sngar gyi bzhag ces bya ba'i don to/ /gzhan min zhes pa ni nges pa'i don/reg bya yis ni shin tu bsil/ /zhes bya ba ni ji bzhin pa'i don to/ /yang na reg bya ni ba spu langs pa shin tu'i sgra ni yun ring pa'i dus/ rtsa'i sgra ni 'dus pa'i don gyi phyir ro/ /bsil ba ni de'i dus su bde ba chen po ha'i rnam pa 'don pa/ yang na 'dod chags kyi me'i tsha ba zhi ba de yang rang gis nyams su myong ba'i rang bzhin gyi phyir dgongs pa'o//dri ni yid 'phrog ces bya ba ni dri ni zhu ba'i rang bzhin byang chub kyi sems yid ces bya ba ni rlung / 'phrog pa ni 'dzin pa/ de la dgongs pa ni 'di yin te/ bla ma'i man ngag la ye shes kyi rlung gis bkug ste dri 'dzin tsam gyis rin chen khar slebs na yang byang chub kyi sems gyen du 'gro zhes bya ba'i don to//yang na gyen du khyab pa'i phyir ro/ /gyen du'i sgra ni snying ga'i gnas nas ro'i gnas man chad do/ /mchog gi dga' ba sbyin par bya/ /zhes bya ba la mchog gi dga' ba ni gzung ba skad cig dang rol sogs pa bral ba'i rang bzhin ngo bo'o//yang na reg par bya ba dang reg par byed pa dang bral ba'i phyir mchog gi dga' ba'o/ /de nyid sbyin pa zhes bya ba'i don to/ /slob dpon longs spyod rdo rjes mdzad pa gsang chen pad+ma zhes bya ba'i nges pa dang po'o// //de nas gsang ba bshad bya ba/ /shes rab ye shes rim pa mchog /thob pa rang gi ngo bor grags/ /rgyas par ma yin mdor bsdus pa/ /zhes bya ba la/ de nas zhes bya ba ni phyi nas te dbang bskur ba'i 'og tu stong phrag phyed dang bzhis mtshan gyi bla ma'i yang bla ma sdom pa'i go rims kyi shes rab rang la byin gyi rlabs kyis mchod par byas te shes rab ye shes kyi dbang sbyin par bya zhes bya ba ni de nas kyi don to/yang na legs dgyes chen po'i dam tshig rol pa'i skabs su bcom ldan 'das mas bcom ldan 'das la shes rab ye shes kyi dbang gi don zhus te/ de na re nam mkha' dang mnyam pa brgyad stong pa'i rgyud las drangs pa sdom pa phyi ma zhes bshad do//de skad zer ba yang rigs pa ma yin no/ /des na phyi ma phyi ma'i yang phyi ma zhes bya ba'i tshigs bcad la yid ma ches so/ /bcom ldan 'das kyis gsungs pa la yid mi ches pa de dmyal bar 'gro bar 'gyur ro/ /gal te don khyad par gyi phyir dgongs pa yin na de yang rigs ba ma yin no//don ni rim pas mtshar ba ma yin lo/ /sa bon las myu gu la sogs pa bzhin lo/ /ji ltar ye shes thig le'i rgyud las rtsa ba brtag pa phyi ma'i yang phyi ma bshad pa snying po 'bras bu zhes rim pas gsungs so/ /nam mkha' dang mnyam pa yang de bzhin no/ /yang na de nas kyi sgra ni nu ma me thab sra ba tsan+dan rlon pa'i dris khyab pa gsang ba'i chu skyes kyi snying po rdo rje'i me tog gi mchod pas kun du mchod par byas te/rjes su mnyam par 'byung ba'i thig le gnyis 'dus ma'o/ /de'i phyir gsang ba'o/ /yang na nyan thos la sogs pas rnyed par dka' ba'i phyir gsang ba'o/ / yang na thig le gnyis kyi 'dus pa las gang zhig nyams su myong ba'i ro de ni gsang ba'o/ /yang na shes rab thabs la sogs pa las mtshan ma'i ye shes las byung ba rten brten pa byin gyis rlabs char yang thig le'i tshul dga' ba skad cig ro sbyor ba thabs bsam gtan la sogs pa dang bral ba gang yin pa de ni gsang ba'o//bshad ces bya ba de ni de ltar gyur pa la mchog zab pa'i don gyis don gsal bar byed pa'o/ /yang na don ni gzhan mi byed pa/ yang na bshad ces bya ba ni byas pas so/ /don dam pa la bshad pa yod pa de lta bu ma yin no/ /'on kyang kun rdzob kyi rang bzhin yod do//yang na mtshan gyi bla ma las sdom pa'i gsang ba'i bla ma las bshad ces bya ba'i don to/ /mtshan ni pad+ma'o/ /bla ma ni lte ba/ sdom pa ni rdo rje'o/ /gsang ba ni byang chub kyi sems/ bla ma ni gyen du/ bshad ces bya ba ni blugs pa/ yang na thim pa/ de la man ngag ni 'di yin te/mtshan gyi bla ma'i pad+ma'i lte ba'i dbus nas gnyis kyi gsang ba'i byang chub kyi sems sdom pa'i rdo rje la snying ga nas rim pas ro'i gnas yan chad rang rig par byas te rjes su 'dren gyen du 'pho bar byas zhes bya ba'i don to/ /de bzhin du nang gi sbyin sreg gi le'u las/ gnyis kyis mchog ni dgug par bya//de lta'i rjes la nges pa ni/ /zhes gsungs so/ /de bzhin du klu sgrub snying po'i zhal snga nas/ de bzhin gshegs pa'i snang ba la/ mchog gi rjes la snang ba ni/ snang ba mched sogs dang bral ba/ /gang nas 'ongs pa de rang 'gro/ /'gro ba'i phyir na 'od rab bo//zhes gsungs so/ /dpal bla ma chen po'i zhal snga nas nang gi pad+ma las/ rang bzhin gyis ni 'od rab sku/ /rdzas kyi mchog ni rtog pa med/ /'on kyang chags pa'i dri mas khyab/ /gyen du brtan pas dri ma med/ /ces gsungs so/ /'go ba dang gyen du brtan pa rigs pa bi gzhung yin no//de lta ma yin na ji ltar tshangs pa'i spyod pa dang ldan pas rdo rje 'dzin pa'i sa zhes gsung ngo / /de'i phyir klu sgrub snying po'i zhal snga la sogs pa gang zhig 'dzin pa de ni rigs pa yin no/ /de lta ma yin na tha mal pa dang tha mal pa ma yin pa la khyad par med par 'gyur ro/ /gyen du don mi shes pas bla mas gsungs pa la yid ches par bya'o//de bzhin du slob dpon nag pos/ lung las yid ni ches pa ste/ de bzhin bla ma la yid ches/ rang gi yid ni ches pa dang / de bzhin bla ma la yid ches/ thams cad yid ches kyi nang na/ /bla ma gtan tshigs yin par 'gyur//zhes gsungs so/ /gyen du ni mtha' dang bral ba mtha' la sogs pa'i nang du shar ba'o/ /de bzhin du sdom pa'i rgya mtsho las/ /mchog gi rdzas ni gsang ba che/ /rang bzhin dga' ba 'pho ba med/ /mtha' sogs dang bral gyen du'i gnas/ /a shwad tha bzhin mi zad pa/ /zhes gsungs so//thog nas thog ma thog ma tha/ /mtha' dang thog mas gyen po bral/ /'di lta'i rdo rje rkang pa dgyes/ /gang shes pa de mkhas pa yin/ /rgyud ni du ma shes na yang / /de lta min na phyugs dang mtshungs/ /de ni dpal dbang thig le las/ /drangs nas rab tu gsal ba'o/ /da ni de nas gsang ba bshad bya ba//zhes bya ba'i tshigs bcad 'di la gang zhig phyogs gzhan bshad pa yod pa de gsal bar bstan te/ a thA ta ra ha s+yaM wak+Shu zhes bya ba ni rgyud thams cad kyi snying po/ yang na don thams cad 'dus pa de'i phyir 'di yan lag thams cad kyi don bshad par bya'o/ / a zhes bya ba ni rnam par shes pa dang po'i skye ba med pa'i phyir nam mkha'i rang bzhin/ nam mkha'i rang bzhin gyi phyir ngo bo thams cad kyi mchog ngo bo thams cad kyi mchog gi phyir don chen po/ /don chen po'i phyir yi ge mchog yi ge'i mchog gi phyir srog chen po/ srog chen po'i phyir 'byung ba med pa/'byung ba med na yang thams cad skye ba'i rgyu/ rgyu'i phyir gnyis su dbye ba'i don byed do/ /kun gzhi rnam par shes pa la gnas byed pa'i phyir rnam pa thams cad kyi rang bzhin dngos po'i rgyur grags pa dran pa sbyin no/ /rgyu yongs su smin pa'i 'bras bu rnam pa sna tshogs grags pa longs spyod ston par byed do//de'i dus su bde ba chen po'i tshangs pa'i gzhi ni yod pa'i byang chub kyi sems pa spu langs pa'i mtshan mas smin ma'i 'khor lor dbang byed do/ /de ni a'i rnam pa'i don nyid do/ /da ni thA'i rnam pa'i don bshad de/ thA zhes bya ba'i mthar ro/ / yangs pa'i rang bzhin gyi phyir/ yang na khyab par byed pa'i phyir/ yang na yang dag par bde bskyed par byed pa'i phyir ro/ /de yang gnyis su dbye ba'i don bde de/ rnam pa thams cad kyi rang bzhin gyi ngo bo yongs su shes pas rnam par smin pa'i ngo bo nyid kyi dga' ba skyed par byed do/ /snang ba 'byung ba'i rgyu yang sbyin/de'i skabs su smin ma'i 'khor lo la yod pa'i byang chub kyi sems rdul gyi mtshan ma las longs spyod 'khor lor longs spyod myong bar byed do/ /de ni thA'i rnam pa'i don to/ /da ni ta'i rnam pa'i don bshad te/ ta zhes bya bab ni snang ba'o/ /chu bo thams cad dang bral ba'i phyir/yang na bsil ba'i 'od zer rab 'od kyi ngo bo nyid kyi phyir/ yang na gti mug gi mun nag bcom pa'i phyir ro/ /de yang gnyis su dbye ba'i don byed de/ dngos po thams cad kyi rang bzhin chad pa la rnam par 'joms pa la chos brtan par byed do/ /sbyor ba la gsal ba'i rgyu yang sbyin no//de'i dus su longs spyod 'khor lo na yod pa'i byang chub kyi sems kyi dga' ba'i mchi ma'i mtshan mas chos kyi 'khor lor brlag par 'gyur to/ de ni ta'i rnam pa'i don te/ /da ni ra'i rnam pa'i don bshad de/ ra zhes bya ba ni sbyor ba'o/ /nyi ma'i mtshan nyid kyi thabs kyi rdo rje'i rnam pa'i phyir/yang na dga' bar byed pa'i phyir/ re zhig nyi ma'i mtshan nyid thabs su grags pa ra'i rnam pa med pa yin na de ji ltar ri bong 'dzin las 'byung ba/ yang na grub pa/ ri bong 'dzin la 'byung ba med pas shes rab kyi mngal gyi pad+ma'i lte ba'i gnas su sbyor ba med par 'gyur ro//sbyor ba med pa 'chad par 'gyur ro/ /chad pas bde ba chen po'i thob pa med do/ /ma thob pas rang bzhin ye shes kyi mtshan nyid thar pa shin tu ring bar 'gyur ro/ /de bas na sbyor ba ni 'di gtso ba'i don no/ /de yang gnyis su dbye ba'i don byed de/ shes rab ma'i pad+ma'i nang na yod pa'i byang chub kyi sems nyi ma'i 'od shin tu tsha ba thabs kyi gzugs kyis 'dzin pa'i don byed do//da ni thabs las byung ba'i gzugs kyis ri bong 'dzin dkar po'i 'od sla ba'i rnam pa'i mtshan nyid kyi ngo bo gtong phod byed do/ /rnam par dpyod pa la rgyu yang sbyin no/ /de'i skabs su dgod pa'i mtshan mas chos kyi 'khor lo na yod pa'i byang chub kyi sems lte ba'i dbus su dbang byed do//de ni ra'i rnam pa'i don to/ /da ni ha'i rnam pa'i don bshad de/ ha zhes bya ba ni ye shes so/ /bde ba thams cad kyi rten gyi phyir/ yang na glo bur gyi phyir/ yang na rtag tu 'byung ba'i phyir ro//de yang gnyis su dbye ba'i don byed de/ /nyi ma'i mtshan nyid can dga' ba'i ngo bo byang chub sems steng na ro'i nang na 'dzin par byed/ ri bong can gyi mtshan nyid srog ma'i 'og tu nang du 'dzin par byed de/ dbus su nyid kyi rten med pa'i gnyis su med pa'i mtshan nyid kyis rol par byed do/ /de'i dus su kha dog 'gyur ba'i rtags las lte ba na yod pa'i byang chub kyi sems rdo rje ut+pala'i rtsa bar longs spyod myong bar byed do//de ni ha'i rnam pa'i don no/ /da ni s+ya'i rnam pa'i don bshad de/ /s+ya'i rnam pa ni dngos po'o/ /rnam pa thams cad ston pa'i phyir/ yang na 'bab pa'i phyir ro/ / de yang gnyis su dbye ba'i don byed de/ nyi ma'i mtshan nyid can steng na mi snang bar byed/ ri bong can dkar po'i 'od zer chad pa'i bdag nyid cung zad kyang cung zad btung ba btung snyoms kyi ye shes la rgyu yang sbyin no/ /de'i skabs su dran pa med pa'i rtags las rdo rje'i pad+ma'i rtsa ba na yod pa'i byang chub kyi sems rin po che'i snye ma'i sker brlag par 'gyur ro//de ni s+ya'i rnam pa'i don to/ /da ni wa'i rnam pa'i don bshad de/ wa'i rnam pa ni rten no/ /rnam pa dang bral ba yin yang bde ba thams cad kyi gzhi'o/ /gzhi'i phyir bde ba thams cad kyi skye ba'i rgyu'o/ /de yang gnyis su dbye ba'i don byed de/ ma 'ongs pa'i chad pa'i dga' ba la btang snyoms byed do/ /rnam par 'byed pa la yang sgyu sbyin no/ /de'i skabs su mi g.yo ba'i lta ba'i mtshan mas rin po che'i snye ma'i ske na yod pa'i byang chub kyi sems nang gi dpral bar longs spyod myong bar byed de/ /de ni wa'i rnam pa'i don no/ /da ni k+She'i rnam pa'i don bshad de/k+She'i rnam pa zhes bya ba ni rnam par 'byed pa'o/ /yongs su 'gro ba la sogs pa dang bral ba'i phyir ro/ /yang na bag chags dang bcas pa'i bden pa'i 'dzin pa bcom pa'i phyir/ yang na gzhan gyi gnas na yod pa shin tu zab pa'i bde ba dgug pa'i phyir ro/ /de yang gnyis su dbye ba'i don byed de/ma rig pa'i sprin gyis khyab pa 'od nyi ma stong la lam dag par byed do/ /yang dag 'od rab kyi rgyu yang sbyin no/ /de'i dus su skad 'gag pa'i rtags las skye med 'gag med nam mkha' bzhin/ rmad du byung ba sku med gting ring zab pa dri ma med dpe med brjod med mtshan ma med pa nyams su myong ba'i ngo bo thog ma dbus tha ma med pa bde ba chen po'i rnam par grags pa'i dpal la rang bzhin dga' ba'i rgyal po thams cad la dbang byed pa'o//re zhig skad 'gag pa la sogs pa'i mtshan ma 'byung ba med na ji ltar rang bzhin dga' ba ye shes pa chen po rnyed/ de bas 'dir mtshan ma la sogs pa dang po gtso bo'i dgos pa'o//gang gi phyir zhe na/ mtshan ma las ni yid ches pa skye bar 'gyur ro/ /yang dag par ye shes skye ba'i rgyu bdag la yod/ mtshan ma la sogs pa ni yang dag pa'i ye shes ma yin no/ /mtshan ma tsam yin no/ /ji ltar nye ba na me yod kyang du ba med na mi shes so/ /de ltar rang bzhin dga' ba lus kyi nang na yod na yang mtshan ma la sogs pa med na mi shes mi rnyed ces bya ba'i don to//da ni/ de nas gsang ba bshad bya ba/ /zhes bya ba'i tshigs bcad kyi don byed thams cad kyi mthar thug pa gsang sngags kyi dngos grub brnyes pa kha che'i slob dpon dpal rin chen rdo rje'i zhabs kyi bka' drin gyis 'dir bdag gis mdor bsdus te bshad de/tshig mangs pas 'jigs pa'i phyir thams cad bdag gis ma bshad do/ /gang gi phyir zhe na/ rtsod pa'i dus kyi phyir sems can tshe thung ba dang / shes rab chung ba'i don gyi phyir zhes bya'o/ /da ni shes rab ye shes kyi rim pa las yang dag pa'i don bshad de/shes rab ye shes rim pa mchog /ces bya ba la/ shes rab la ye shes ni shes rab ye shes/ yang na shes rab las gang zhig ye shes de ni shes rab ye shes so/ /shes rab ni 'dir gnyis su dbye ste/ rnam pa dang bcas pa dang / rnam pa med pa/ rnam pa dang bcas pa ni sngar bstan pa'i mtshan nyid dang ldan pa'o//rnam pa med pa ni phyag rgya chen po'i rang bzhin no/ /ye shes ni 'dir thabs te/ de yang gnyis su dbye'o/ /ye shes su grags pa dang / ye shes las byung bar grags pa'o/ /gang zhig shes rab ma las mtshan ma dang bcas pa'i bde ba shes pa de ni ye shes su grags pa/rang 'od las byung ba mtshan ma dang bral ba'i bde ba nyams su myong ba shes pa de ni ye shes las byung bar grags pa'o/ /rim pa zhes bya ba ni gnas/ de yang gang la tha ma la sogs pa'i gang zag la tha ma'i sgra ni tsan+dan gyi gang zag tsam gzung ba'i phyir ji lta ba'i tsan+dan la skad cig tsam dri yod pa'o//de la snying ga'i bsam gtan gyi gnas la sogs pa'i sgra ni 'bring rab kyi rab bo/ /'bring ni pad+ma dkar po'i gang zag yang dang yang don bshad pas cung zad 'dzin pa ji ltar pad+ma chu'i nang na yod na yang chu ma 'dzin/ shin tu 'joms pas cung zad 'dzin no//de la lte ba'i snying por ro/ /rab ni ut+pala'i gang zag de la bstan pa tsam gyis don blo la 'dzin pa de nam yang brjed pa por bar mi byed pa ji ltar ut+pal skams na yang dri dang yang mi 'bral/ de la rgyal mtshan gyi rtsa bar rab kyi rab ni rin po che'i gang zag thams cad nyid kyis shes gzhan ma la yang gsal ba snang bar byed de/ji ltar rin po che bcos ma ma yin pa'i phyir nyid kyis snang bar byed par 'gyur/ de la rin chen gter de'i phyir mchog go/ /ci'i phyir zhe na/ gzhan rnams kyis rnyed par dka' ba'i phyir ro/ /ci'i phyir rnyed par dka' zhe na/ rten gzhi med pa'i phyir ro/ /yang na spros pa dang bral ba'i phyir/de bas na rin po che'i gang zag la zhes bstan pa rin po che'i gang zag nyid mi bskyod pa ste/ bskyod pa med pas mi bskyod pa/ bskyod pa ni rang gi gnas nas 'pho ba/ gang la bskyod pa med pa de ni mi bskyod pa'o/ /'jig rten gyi khams gzhan na de bzhin gshegs pa mi bskyod pa zhes bya ba ni med do//'dis ni shes rab ye shes la bskyed rim rdzogs rim zhes bshad do/ /bskyod pa ni rlabs dang bcas pa/ rdzogs pa ni de rang gi bdag nyid/ 'on kyang 'pho ba dang bral ba'o/ /yang na bskyed pa ni mtshan gyi bla ma la sogs pa'o/ / rdzogs pa ni mkha' 'gro ma dra ba'i sdom pa'o/ /yang na bskyed pa ni skad cig ro dga' ba la sogs pa/ rdzogs pa ni rang bzhin dga' ba'o/ /thob pa zhes bya ba la/ thob pa ni 'pho ba med pa'i bde ba nyams su myong ba/ rang gi ngo bor grags zhes bya ba ni nyams su myong ba sbyin pas spros pa thams cad dang bral ba'i ye shes rnyed pa'o//rgyas par ma yin mdor bsdus pa/ /zhes bya ba la/ mdor bsdus pa ni bsdus pa ste gsum dang bral ba zhes dgongs pa'o/ /rgyas par ma yin zhes bya ba ni gsum pa nyid du nges pa'o/ /yang na mdor bsdus min 'on kyang rgyas par ro zhes sbyar ro/ /de la don ni 'di yin te/sgrub pa'i dus su dga' ba skad cig ro mtshan ma la sogs pa rgyas pa las mdor bsdus pa min zhes dgongs pa'o/ /grub nas nyams su myong ba'i ros rgyas pa zhes bya ba'i don to/ /yang na mdor bsdus min zhes mtshan gyi bla ma/ rgyas par min zhes bya ba ni 'khor lo sdom pa/yang na mdor bsdus min phag mo/ /rgyas par ma yin bcom ldan 'das/ /zhes brda'i tshig go/ /dpal ldan he ru ka yi sbyor/ /'dod pa thams cad don grub byed/ /sgo nga las skyes sku dang bral/ /phyi ma las kyang phyi ma ste/ /zhes bya ba la/ dpal ldan he ru ka zhes bya ba ni rgyu la sogs pa dang bral ba/sbyor zhes bya ba ni kun rdzob kyi ye shes la mnyam par 'khyud pa/ yang na bde ba chen po la dus gcig tu shar ba/ yang na rgyas pa dang mdor bsdus pa de dag dang bral ba'i nyams su myong ba'i ros khyab pa/ 'dod pa thams cad don 'grub ces bya ba la 'dod pa thams cad ni 'dod pa thams cad dga' ba bco lnga'o//de rnams kyi don ni bcu drug pa/ de la grub byed ces bya ba ni bcom ldan 'das/ de bas na de'i 'dod pa thams cad don grub byed ces bya'o/ /sgo nga las skyes sku dang bral/ /zhes bya ba la/ sgo nga'i sgra ni thig le de las skyes pa ni 'byung ba/ yang na rdzogs pa zhes bya ba'i don to//sku dang bral zhes bya ba la/ sku ni phung po la sogs pa'i mtshan ma'i rten gyi rnam pa can de dang bral ba/ yang na rnam pa dang bral na yang ye shes sbyin pa/ yang na sgo nga ni nam mkha'i rang bzhin bde ba chen po rdzogs pa'i phyir rang 'byung / de las skye ba der shar ba zhes bya ba'i don to//phyi ma las kyang phyi ma ste/ /zhes bya ba la/ phyi ma'i sgra ni rtag tu shar ba'i phyir rab mchog go/ /rang 'byung gi phyir de las kyang phyi ma zhes bya ba ni mchog gi nam mkha'i rang bzhin/ yang na phyi ma las zhes bya ba ni mchog gi dga' ba'i nyi ma'i ye shes las byung ba'i grags pa 'od rab rang bzhin dga' ba phyi ma zhes shes rab dpal gyi dgongs pa'o//kyang gi sgra ni nges pa'i don to/ /yang na phyi ma las kyang zhes bya ba ni mtshan gyi bla ma las dpal ldan pa phyi ma gsang ba chen po'i ye shes sbyin pa'i phyir ro/ /des ni he ru ka la rnam pa thams cad kyi ye shes bshad ces sbyar ro//da ni shes rab ye shes kyi dbang sbyin pa'i don gyi ji bzhin rang gi ngo bo bshad de/ bde ba thams cad kyi ni rten/ /mkha' 'gro ma yi dra ba'i sdom/ /gsang ba mchog gi dgyes pa ni/ /dus gsum ye shes bral ba yi/ /zhes bya ba la/ sngar bshad pa'i dbang bskur ba thob mtshan dang ldan pa'i shes rab khong du chud par byas te/skyabs sbyin phyi'i 'dod chags kyi bag chags kyi nyon mongs pa gcad pa'i phyir nang gi reg bya nyams su myong ba'i don du rab kyi bla ma la lag pa'i pad+mar byin nas bla mas 'di skad smra bar bya'o/ /kye sems dpa' chen po bde ba thams cad kyi rten rtsa ba'i dra ba'i sdom pa'i dgyes pa la dus gsum dang bral ba'i gnas su bdag gi tshig gis nang gi lta bas ye shes chen po bsnyen par gyis/bsnyen pa tsam gyi dpe med mchog gi dga' ba'i rten khyod kyis rnyed do/ /yang de rang gi don gsal bar bshad de/rten zhes bya ba ni mchog gi dga' ba'i sa/ de gang la bde ba thams cad la/ bde ba thams cad kyi sgras ni bde ba chen po zhes dgongs pa'o/ /de yang ye shes las byung ba'i skabs su ye shes kyi mkha' 'gro ma'o/ /mkha' 'gro ma zhes bya ba ni mkha' la 'gro bas mkha' 'gro ma/ yang na dngos po thams cad btsir ba'i phyir mkha' 'gro ma/ yang na reg par dga' ba'i phyir mkha' 'gro ma'i sgra ni rtsa'o/ /de rnams kyi dra ba ni tshogs/ yang na 'dus pa de nyid sdom pa'o/ /yang na saM zhes bya ba ni bde ba/ bA ra zhes bya ba ni gtso bo/ /de nyid sdom pas bsdus pas sdom pa zhes bya ba'i don to//yang na sdom pa ni sbas pa/ yang na gzung ba/ yang na spyod pa zhes dgongs pa'o/ /da ni de la gnas phun sum tshogs pa bshad de/ gsang ba zhes bya ba la/ gsang ba ni drug cu rtsa bzhi'i 'dab mar khong du chud pa/ mchog ces bya ba ni 'dab ma brgyad pa 'dzin pa/dgyes pa zhes bya ba ni 'dab ma gsum par spyod pa'o/ /yang na gsang ba'i dga' ba ni spros pa/ mchog ces bya ba ni mchog gi dga' bas gzung ba/ dgyes pa zhes bya ba ni chad pa'i dga' bas sbas pa'o/ /yang na gsang ba mchog gi dgyes pa zhes bya ba ni de kho na nyid gsum gyi bdag nyid rang bzhin dga' ba des de ru de rang spyod par bya zhes bya ba'i don to//spyod pa tsam gyis ni nyid rdzogs par 'gyur zhes dgongs pa'o/ /de yang ji lta bur 'gyur zhe na/ bshad pa/ dus gsum ye shes dang bral ba/ /dus gsum zhes bya ba ni dga' ba gsum/ ye shes ni de la rtsom pa/bral ba ni des spangs pa/ yang na dus gsum ni 'gog pa dang 'dod pa dang dpyid/ ye shes ni de rnams dag pa'i sbyor ba/ bral ba ni des 'das pa'o/ /yang na dus gsum ni slar longs spyod dbang gi bdag nyid kyi byang chub kyi sems/ ye shes ni de'i rten/ bral ba ni don ji lta ba'o//yang na des spangs pa/ gang gi phyir zhe na/ rang bzhin dga' ba ni kun rdzob kyi gzugs bzung ba tsam gyis yang dag par mi rnyed do/ /gang gi tshe nyams su myong ba med pa de'i tshe mtshan ma dang bcas pa'i ye shes nyams su myong ba las rnam pa dang bral ba'o/ /ji ltar shin tu lang tshol bab pa'i gzhon nu ma skyes pa'i sbyor ba med pas legs dgyes la bde ba mi shes so//de ltar rnal 'byor ba yang nyams su myong ba mi shes pas rang bzhin dga' ba bde ba chen po'i rgyal po mi rnyed do/ /de bas 'dzin pa'i bdud rtsi la yang nyams su myong ba dgos so//de lta ma yin na thos pa dang bsam pa dang bsgom pa la sogs pa'i ye shes don med par 'gyur ro/ /da ni nyams su myong ba la rig pa'i cha tsam bshad de/ rang dga' nyams su myong ba'i dgos/ /thams cad bdag nyid rtag tu bzhugs/ /mkha' 'gro ma yid ma tshig sems//rdor sems mchog gi bde ba'o/ /zhes bya ba la/ rab dga' zhes bya ba ni phyi'i rten dang bde ba la sogs pa las ma skyes pa'o/ /rang gi rdzogs pa ji ltar nam mkha'o/ /nyams su myong ba zhes bya ba ni ro thams cad thim pa ji ltar bye ma'i nang du chu'o/ /dngos po zhes bya ba ni gnas dang /yang na 'byung ba/ ji ltar 'byung ba de'i don bshad de/ rang 'od rig ma dang lhan cig byang chub kyi sems 'byung bar byas nas rnam pa dang bcas pa'i nang du gzhag ste tshangs pa'i rus pa'i dbyug pa'i rtse mo stong nyi ma bye ba'i 'od dang mnyam pa'i tshul rnam par bsams te/de'i rtse mo'i gtsag bus dbus kyi gnas 'bigs par bya'o/ /phug pa tsam gyis dpe med ro'i nyams su myong ba skye'o/ /skyes pa tsam gyis yang dag pa'i shes rab ye shes thob pa des rnyed do/ /de'i phyir thams cad bdag nyid rtag tu bzhugs zhes nyid mchog gi dbang phyug gis gsungs so//de yang gang / mkha' 'gro ma yi dam ma tshig sems/ /mkha' 'gro ma zhes bya ba ni rdo rje phag mo'o/ /de la dam tshig ni bde ba chen po'o/ /bde ba chen po la brten sems dpa' dpal he ru ka mgon po'o/ /yang na sems dpa'i sgra ni snying po'o/ /snying po'i ni dngos po thams cad kyi rang gi ngo bo'o//rdor sems mchog gi bde ba'o zhes bya ba la/ rdo rje ni mi shigs pa/ yang na rang bzhin rlung gi ngo bo/ yang na sems dpa'i sgra ni nam mkha'i rang bzhin/ mchog ni gzung ba dang 'dzin pa spangs na yang nyams su myong ba shin tu bsal ba'i ngo bo//bde ba ni nang gi reg bya ba lta ba tsam gyis dpe med ro skye bar byed pa'o/ /yang na sbyin pa zhes bya ba'i don te/ da ni de la rang dang gzhan gyi phun sum tshogs pa bshad de/ de ni rang byung bcom ldan 'das/ /dpa' bo mkha' 'gro ma sdom pa/ /tshul gyi ngo bo las byung grangs//de bzhin du ni gshegs pa'o/ /zhes bya ba la/ de ni zhes bya ba nang gi reg bya sbyin bdag /rang byung ni gzhan mas byas pa'i phyir dgongs pa'o/ /gzhan ma'i sgra ni dga' ba la sogs pa/ de'i nang na bzhugs na yang de las ma skyes pa/ de'i phyir rang 'byung ngo / / de nyid skal ba dang ldan pa'i phyir bcom ldan 'das/ yang na nyon mongs pa'i bdud gti mug nyid bcom pa'i phyir bcom ldan 'das/ yang na srid pa dang mya ngan las 'das par 'dzin pa bcom pa'i phyir/ bcom ldan 'das/ yang na gnas pa dang skye ba dang / 'jig par byed pa'i nga rgyal bcom pa'i phyir bcom ldan 'das/yang can chos kyi dbyings nam mkha' bzhin du kun dga' ba'i gnas su bzhugs pa'i phyir bcom ldan 'das so/ /bzhugs shing khyab 'jug dang lha chen po dang tshangs pa dang dbang po dang nye ba'i dbang po la sogs pas 'bad pas btsal yang ma rnyed pa'i phyir dpa' bo'o//yang na sems can thams cad la phan pa'i rgyu'i phyir srid pa'i rgya mtsho'i nang na bzhugs na yang chags pa la sogs pa'i chus mi gos pa de bas na dpa' bo'o/ /srid pa'i sgra ni phung po lnga'o/ /yang na mkha' 'gro ma'i sdom pa'o/ /ji ltar mkha' 'gro ma'i sdom pa srid pa yin zhes pa de la don smra'o//mkha' 'gro ma'i sgra ni dang po'i bdud rtsi las skye ba/ sdom pa ni byang chub kyi sems kyi rang bzhin gyi rnam par shes pa/ rnam par shes pa las rlung / rlung las me/ me las chu/ chu las sa/ sa las phung po/phung po las skye mched/ skye mched las ye shes rang bzhin/ de la rim pa 'di yin te/ chags pa/ 'jigs pa/ mi dga' ba/ zhi ba dang / nga rgyal/ snying rje/ so sor rtog pa/ bdag /yid/ srid pa/ rnam par rtog pa/ rig /rig byed/ ngo tsha/ mi dge ba/ mtshan nyid dang bral ba/len pa/ 'dus pa/ bkres pa/ skom pa/ mi bkres pa/ nad de ni snang ba mched pa'i gnas la rgyu sbyin sems kyi rang bzhin nyi shu rtsa gnyis/ da ni snang ba thob pa'i rgyu sbyin las byung ba'i nyi shu rtsa bzhi bshad de/ chags pa dang bral ba/ khro ba/ ma rungs pa/ sa ha sa ma/nga rgyal/ gti mug /brtan pa/ stobs/ phyi/ bsal ba/ dben pa/ ma yin pa/ 'phrog pa/ byed pa/ rtsal/ brtson 'grus/ ngo tsha med pa/ skul pa/ ya mtshan du gyur pa/ drag po/ /dbul ba/ rgod pa/ gya gyu/ sgeg pa'o/ /dran pa med pa/ 'khrul pa g.yo ba/ le lo/ mi dga' ba/ mi smra ba/ the tshom/ gnas med pa/ de ni 'od rab kyi gnas la rgyu sbyin ma rig pa'i rang bzhin brgyad do/ /de lta bu sems dang sems las byung ba dang / ma rig pa'i snang ba gsum gyi bdag nyid lnga bcu rtsa bzhi'i grangs bcom ldan 'das kyis sdom pa'i rgya mtsho las rgyas par bshad de/'dir mdor bsdus pas ming tsam brdar byas so/ /sems dang sems las byung ba dang ma rig pa dang snang ba gsum tha ma 'bring rab bye brag tu brgya rtsa brgyad grangs mtshan mo dang nyin mo ngal mi so bas srid pa dang mya ngan las 'das pa'i rgyur gyur pa'i don du yang dang yang bskor zhes 'brel lo//de lta bu snang ba gsum gyi bdag nyid tha ma dang 'bring la sogs pa mtshan mo dang nyin mo/ mtshan mo ni dus gsum du grags pa ma rig pa dang stobs chen zhes bya ba shin tu 'phel/ des 'dzin pa dang por bstan pa'i rang bzhin rim pas sems pas sems can gyi khams tshor zhes bya ba'i don to//rnam par shes pa'i rlung / rlung dang ldan pa ma rig pa'i rten te/ mtshan mo dang nyin mo'i bar du drug brgya lhag pa'i stong phrag nyi shu rtsa gcig srog gi grangs spyod cing so so'i dngos pos bzhi po la sngar ji ltar 'ong ba de bzhin du thim/ ji ltar thim pa de'i don bshad de//dang po sa ni chu la 'gro/ /chu ni me la 'gro ba'o/ /me ni rlung la rjes su ste/ /rlung ni rnam par shes pa 'jug /de las yang las kyi rlung gis bskul bas bar mdo'i gzugs kyis sems can gyi don du 'khor ba len/ de ni mdor bsdus pas srid par skye ba bstan to//da ni dpal he ru ka la kun rdzob dang don dam pa gnyis su med pa'i rang gi ngo bor snang ba shar ba bshad de/ 'byung ba tshul gyi ngo bo las/ /zhes bya ba ni mchog gi gsang ba'i man ngag gi don de la grub pa thob pa'i bla ma'i man ngag med par yi ge'i sgra'i nga rgyal gyis kha cig 'di skad smra'o//'byung ba zhes bya ba ni dbang po gnyis kyi sbyor bas de las nam mkha'i snyoms pas 'khor lo gsum du 'gyur ba'o/ /kha cig na re hUM phaT kyi rnam pa las kha cig na re rlung dang me'i sbyor ba las/ kha cig na re tshangs pa'i bzhi rkan rgyas pa las/ kha cig na re smin ma'i 'khor lo'i steng 'og yangs pas dbus kyi phra mo'i bu ga'i thig les 'bigs pa/kha cig na re ye shes rdzogs pas/ kha cig na re ye shes ma rdzogs pas 'byung ba la sogs pa'i don bshad do/ /des ji ltar bsgoms pa rnams dngos grub thob/ 'on kyang sgom pa rnams dngos grub mi 'grub ste slar la bstan bcos byed pa yang dmyal bar 'gro'o//bshad par byed pa la ni skyon med do/ /de bas mi shes pa'i phyir mi smra bde bdud rtsi'o/ /bdag kyang ye shes pas der nga rgyal mi byed do/ /'on kyang 'dir gtan tshigs yod do/ /rgyal po chen po'i rgyal po mchog gi dbang phyug phyag rgya chen po'i dngos grub thob pa rdo rje chen po'i gnas u rgyan du skyes pa nyid dpal he ru ka'i rje btsun dpal in+d+ra b+hU ti mgon po de'i mngon sum du grub pa thob pa da ltar bzhugs pa a bad+hU tI zhabs kyis pad+ma de las rig byed thams cad kyi mthar thug pa gsang sngags grub pa brnyes pa kha che'i slob dpon dpal rin chen rdo rje'i zhal snga nas gang zhig rnyed pa de ni rmad du byung ba dpe med pa'i lam de'i zhal snga nas bdag la bka' drin gnang /bdag gis kyang gzhan ma yin par bzung / phyi nas de nyid bdag rang dga' ba'i don gyi phyir/ yang na rang gi skal ba dang ldan pa'i slob ma la khong du chud par bya ba'i phyir dris pa zhes 'brel te/gang zhig byung ba la sogs pa'i don de ni rdzogs pa'i rim pa'o/ /de yang gnyis su dbyer yod de/ gnas kyi bdag nyid dang / de bzhin du 'bras bu'i bdag nyid/ rdzogs pa'i rim pa la gnyis kyi byed brag med kyang de lta mod kyi rnyed pa'i don du nyams su myong ba'i gnas skyon med par 'gyur ro//de bas bla ma'i man ngag las 'dir cung zad dgongs pa smra'o/ /'byung ba zhes bya ba ni rin po che'i gtsug gtor char yang dang thig le sbyar bas snying gar tshul gyi ngo bo/ tshul gyi ngo bo las rin chen gter thams cad mtshan gyis rgyas pa tshul tsam gyi rang bzhin ye shes kyi sku'o//de ni gnas kyi bdag nyid do/ /da ni 'bras bu'i bdag nyid bshad do/ 'byung ba ni 'chad pa/ tshul ni dga' ba/ 'byung ba tshul 'chad pa'i dga' ba/ ngo bo las zhes bya ba ni sdom pas/ sdom pa'i sgra ni bsdus par grags pa srid pa mchog gi dga' ba'o//de las rang 'byung bcom ldan 'das dpa' bo mkha' 'gro ma'i sdom pa rang bzhin dga' ba bde ba chen po'i rgyal po'o/ /de la man ngag ni 'di yin te/ chad pa'i dga' ba mya ngan las 'das pa tshul bsdus pa las mchog gi dga' ba srid pa'i ngo bo nyid mchog gi dga' ba'i ngo bor grags pa las srid pa dang mya ngan las 'das pa dang bral ba'i rang bzhin dga' ba gzhan min rdzogs rnyed pa zhes bya ba'i don to//de lta ma yin na gcig bu bsdus pa ma yin pa chad pa'i dga' las rang bzhin dga' ba rnyed pa mi srid do//ji ltar nam mkha' la 'gegs pa'o/ /de ni 'byung ba la sogs pa mchog gi gsang ba chen po'i man ngag mi snang ba bsrung ba'i phyir bdag gi shes rab tu gsal lo/ /da ni mchog gi dbang phyug la snang ba shar ba la gshegs pa dang rang gi ngo bo la 'jug pa bshad de/de bzhin du ni gshegs pa'o/ /zhes bya ba la/ ji bzhin chad pa'i dga' ba'i sbyor ba'i tshul gyi ngo bo'i ye shes las 'ongs te 'das pa dang ma 'ongs pa gzigs nas chad pa la rnam par 'byed par byas te/ de bzhin gshegs zhes rang gi ngo bo'i nang du 'jug /ces bya ba'i don to/ / yang na chad pa rnam par 'byed pa'i sbyor ba las gshegs zhes dgongs pa'o/ /da ni mchog gi dbang phyug la rnam pa thams cad kyi chen po stong pa nyid kyi ye shes bshad de/ med pa ma yin yod pa'ang min/ /dam tshig spyod pas thob pa yin/ /nyams su myong ba'i rang ngo phyir/ 'jig rten gsum du rnyed par dka'//zhes bya ba la/ med pa ma yin zhes bya ba ni des kun rdzob kyi rnam pa'i snang ba'i brdar byas so/ /yod pa'ang min zhes bya ba ni des don dam pa'i lta ba bstan to/ /ci'i phyir zhe na/ chos thams cad la gang / stong pa nyid de ni rang bzhin/ gang rang bzhin de ni stong pa nyid de dag las ni rnam pa thams cad kyi chen po stong pa nyid kyi ye shes rten med pa'i phyir don dam par/rten dang bcas pa'i phyir kun rdzob kyi snang ba'o/ /de'i phyir/ dam tshig spyod pas thob pa min/ /zhes bya ba'i tshig gsungs so/ /yang na dam tshig ces bya ba ni rtsa/ de rnams la spyod pa ni sbyor ba/yang na kun spyod yang na reg byas 'byung ba/ yang na khong du chud pa las bdud rtsi ro 'dzag pa'o/ /thob pa ni de'i ros shes pa ji bzhin dga' ba'i ye shes chen po dpal sdom pa'i rgyal po'o/ /rang gi nyams myong rang bzhin phyir/ /zhes bya ba la sogs pa la/rang gi sgra ni bag chags la sogs pa dang bral ba'i yid kyi rnam par shes pa/ nyams su myong ba zhes bya ba la/ nyams su myong ba ni ye shes kyi ngo bos yid kyi rnam par shes pa la tshor ba/ rang bzhin zhes bya ba ni yod pa dang med pa las rnam par 'das pa/ yang na rang zhes bya ba ni las kyi phyag rgya dang bral ba'i rang bzhin nyams su myong ba/yang na rang gi sgra ni rang bzhin dga' ba/ nyams su myong ba ni de las spros pa dang bral ba'i ye shes kyi lta ba/ lta ba tsam gyis ni rang bzhin yongs su shes pa/ yongs su shes pas thams cad phyi ma yin/ phyi ma yin pas 'jig rten gsum du rnyed par dka' bas/'jig rten gsum ni 'dod pa'i khams dang gzugs kyi khams dang / gzugs med pa'i khams/ yang na 'jig rten gsum ni dga' ba gsum mo/ /rnyed par dka' ba ni mtshan ma dang bcas pa'i dga' ba la sogs pa mi thob pa'o/ / gang gi phyir zhe na/ rang gi nyams su myong ba'i rang bzhin gyi phyir zhes dgongs pa'o/ /mtshan ma dang bcas pa'i ye shes las gang rnyed pa de kun rdzob kyi gzugs so/ /mtshan ma med pas gang rnyed pa de ni don dam pa'o/ /de bzhin du shAn ta rak+Shi ta'i zhal snga nas/ srid pa dang mya ngan las 'das par bstan pa las/rten dang bcas pa'i rang bzhin dga'/ /dga' ba gsum gyi rgyu can no/ /rten dang bral ba'ang de bzhin du/ /dga' ba gsum gyis yangs pa'o/ /zhes gsungs so/ /gang zhig rten dang bcas pa dang rten dang bral ba de dag gi spangs pa de ni rang gis nyams su myong ba'i rang bzhin zhes bdag gi dgongs pa'o//da ni ye shes chen po'i bdag nyid la rten med pa la bzhugs pa bshad de/ dngos rten rnam par 'byed pa la/ /thog ma dbus dang tha mar gnas/ /srub dang bsrub thabs sbyor ba ni/ /ji bzhin gnas la sogs par bstan//zhes bya ba la/ dngos po zhes bya ba ni ye shes la 'khrul pa ma yin pa'i lta ba/ rten zhes bya ba ni ye shes las 'das pa'i ye shes las byung ba brtan pa/ de dag ma khyab pa'i phyir rnam par 'byed pa/ rim pas mi rnyed pa'i phyir de yang rten med pa'o/ / de yang don dam pa'i phyogs so/ /kun rdzob kyi phyogs la dngos po ni bde ba/ rten ni gsang ba'i pad+ma'i snying po ye shes ni snying po'i gnas su bde ba chen po nyams su myong ba/ rnam par 'byed pa ni gnyis su dbye ste/ rten gyi rnam par 'byed pa dang / de bzhin du brtan pa'i rnam par 'byed pa'o//gang zhig ye shes la ltung ba de ni rten gyi rnam par 'byed pa/ ye shes la sogs pa rnam par 'byed pa byas nas shar dang nub dang bral ba'i tshul gyi nam mkha' la gang zhig snang ba med pa de ni rten pa'i rnam par 'byed pa zhes bya ba'i don to/ /thog ma dbus dang tha mar gnas//zhes bya ba la/ thog ma'i sgra ni shar ba/ dbus ni gsal ba'i snang ba'i ngal so/ /tha ma ni mi snang ba'i ngal so/ /yang na thog ma dbus tha ma zhes bya ba ni de kho na nyid kyi bdag nyid kyi snang ba gsum/ de la rtag tu dngos po dang rten dang ye shes dang rnam par 'byed pa'i rang bzhin zhugs zhes dgongs pa'o//yang na thog ma ni ma shar ba/ tha ma ni ma nub pa/ dbus ni rten med pa'i rang bzhin bzhugs pa'o/ /da ni mchog gi dbang phyug la mthar phyin pa'i rten gyi gnas bshad de/ srub dang bsrub thabs sbyor zhes bya ba la/ srub ni thabs kyi rang bzhin srid pa/bsrub thabs ni shes rab kyi bdag nyid mya ngan las 'das pa/ sbyor ba ni de dag gi rang gi ngo bo shes nas spros pa med pa'i sems kyi ngal so ba'i rten spyod pa zhes bya ba'i don to/ /yang na srub ni ye shes/ bsrub thabs ni ye shes las 'byung ba/ sbyor ba ni de dag ro mnyam pa/ ro mnyam pa las nang gi reg bya'i lta ba phyi'i dngos po las rnyed pa med pa zhes bya ba'i don to/ /ji bzhin gnas la sogs pa bstan/ /zhes bya ba la/ ji bzhin ni spros pa dang bral ba'i sems kyis srid pa dang mya ngan las 'das pa la rten/ de bzhin gnas dang nye ba'i gnas la sogs pa ye shes la brten bya zhes dgongs pa'o//yang na gnas ni rten dang bcas pa'i bde ba chen po'o/ /sogs pa'i sgra ni rten med pa ji ltar rten dang bcas pa bstan pa de ltar de rang rten med par bya zhes bya ba'i don to/ /yang na gnas ni sprul pa'i 'khor lo de la ji ltar dang po grub pa'i rgyud las bstan pa de ltar bya zhes dgongs pa'o//ji ltar bya ba de'i don bshad de/ stong pa nyid bcu drug dang / dga' ba'i gnas mtshan ma la sogs pa rnams kyi don gyis srub dang bsrub thabs kyi sbyor ba shes rab ye shes nyams su myong ba'i 'bras bu'i ro thob pa de kho na nyid shes pas bya zhes dgongs so//de la re zhig bla ma'i man ngag las rim pa tsam bshad de/ gang zhig bde ba'i sgo nga'i lte bas brgyan pa 'dab ma brgyad kyi gsang ba chen po'i chu skyes rtsa ba'i ge sar gyis khyab pa'i gzhi de ni gnas so/ /yang na gnas ni rten gang la rtsa'i 'khor lo'i sgra ni sprul pa dang chos dang longs spyod dang bde ba chen po'i gzhi'o//yang na gnas rten ni lus so/ /des las kyi phyag rgya dang mnyam par 'khyud pas lta ba spyod cing gnyid skye'o/ /de'i dus su gang gi mig la sogs pa stong pa nyid du mthong zhes nang stong pa nyid 'di ltar tshor na de'i tshe 'dod pa'i dga' ba'i mtshan nyid mos pas spyod pa thob par 'gyur/gnas la sogs pa 'dir sa rnams kyi don gyis dga' ba la sogs pa shes par bya'o/ /gang zhig dzA lan d+ha ra la sogs pa de ni 'jig rten gyi lam gang zhig nang gi de ni khyad par can gang phyi dang nang de dag dang bral ba de ni 'jig rten las 'das pa'i lam la brten pa de ni gnas kyi bstan pa'o//da ni nye ba'i gnas kyi don bshad de/ gsang ba chen po chu skyes kyi dbus su gang byang chub kyi sems kyi rten ni nye ba'i gnas so/ /de la bdun pa las 'khor ba/ de'i dus su phyi'i gzugs la sogs pa stong pa zhes pa phyi stong pa nyid gang gi tshe de ltar shes pa de'i tshe de la 'dar ba'i dga' ba'i mtshan nyid rab tu dga' ba gang zhig byang chub kyi sems las byung ba bde ba la bskyed pa'i gnas de ni zhing /de la 'dus pa las myong ba/ de'i dus su phyi nang bde ba rnams la phyi nang bde bas stong pa zhes phyi nang stong pa nyid gang gi tshe shes pa de'i tshe 'gro ba'i dga' ba'i mtshan nyid dri ma med pa gang zhig bde ba ngal so ba'i gnas de ni nye ba'i zhing ngo //de la nu ma reg pa las skom pa/ de'i dus su steng 'og chos thams cad la gang zhig stong pa de yid stong pa zhes stong pa nyid stong pa nyid gang gi tshe de ltar tshor ba de'i tshe dga' ba'i mtshan nyid 'od byed pa/gang zhig bde ba la gzhan min 'byung ba de ni 'dun pa/ de la ma mchu'i bdud rtsi 'thung ba sbyin pa las 'dar/ de'i dus su steng 'og la sogs pa bde ba rten gyi gnas shar la sogs pa stong pa zhes chen po stong pa nyid gang gi tshe shes pa de'i tshe rgyas pa'i dga' ba'i mtshan nyid 'od 'phro ba gzhan min 'byung ba'i bde la gang zhig yongs su longs spyod las 'dod pa de ni nye ba'i 'dun pa/de la sems so btab pa las sgeg pa/ de'i dus su gang don dam pa'i bde ba mya ngan las 'das pa'i mtshan nyid de ni mya ngan las 'das pa'i mtshan nyid kyi stong pa zhes don dam pa stong pa nyid gang gi tshe de ltar shes pa de'i tshe mdung gi dga' ba'i mtshan nyid sbyang dka' ba'o//gang zhig gsang ba'i dpral ba'i steng bde ba'i bdud rtsi'i thigs pa gsum gcig tu byed pa de ni 'dus pa'o/ /de la sbyor ba las byed pa/de'i dus su gang zhig kun gyi khams kyi bdag nyid dga' ba gsum ste de rang gis stong pa nyid ces 'dus byas stong pa nyid gang gi tshe de ltar shes pa de'i tshe 'byung ba'i dga' ba'i mtshan nyid mngon sum du gyur pa bde ba'i bdud rtsi'i thigs pa gsum gcig tu byed pa tsam gyis gang bcos ma med pa'i 'dzums pa dang 'byed pa la sogs pa de ni nye ba'i 'dus pa'o//de la bskyod pa las bya rmyangs de'i dus su gang zhig 'byung ba dang gnas pa dang 'gog pa dang bral ba 'dus ma byas bde ba de re re rang gis stong pa de ni 'dus ma byas stong pa nyid gang gi tshe de ltar shes pa de'i tshe mchog gi dga' ba'i mtshan nyid ring du song ba'o//bde ba la rlabs pa dang 'byung ba'i dus su gang zhig tshor ba de ni dur khrod/ de la dam por 'khyud pa las rngam pa/ de'i dus su chags pa dang bral ba de dag rtag pa dang chad pa bcom pa de dag gnyis kyis stong pa zhes mtha' las 'das pa stong pa nyid gang gi tshe de ltar shes pa de'i tshe 'bar ba'i dga' ba'i mtshan nyid mi g.yo ba'o//bde ba la rlabs pa thob pa zhes gang zhig dran pa'i rnam par shes pa de ni nye ba'i dur khrod/ de la ske'i sgra las ba spu langs pa de'i dus su bde ba la spyod pas thog ma dang tha ma dbus kyi dngos po med pa de la yang 'gro ba med 'ong ba med pa thog ma dang tha ma dbus kyis stong pa'i phyir thog ma dang tha ma med pa stong pa nyid gang gi tshe de ltar shes pa de'i tshe thig le'i dga' ba'i mtshan nyid legs pa'i blo glos/yang dag pa'i bde ba gang zhig rnyed pa de ni ring po'o/ /de la mig gi 'o mas dga' ba'i mchi ma de'i dus su bde ba la rlabs med pa yang ma yin de'i log pa dor ba med pa ste de nyid kyis stong pa zhes dor ba med pa stong pa nyid gang gi tshe de ltar shes pa de'i tshe myos pa'i dga' ba'i mtshan nyid chos kyi sprin no//yang dag pa'i bde bas rnyed pa la gang zhig rang gi ngo bo'i dpyod pa de ni nye ba'i ring po'o//de la brang brdabs pa las tsha ba/ de'i dus su chos thams cad la gang rang bzhin de gang gis kyang ma byas/ mngon par 'dus ma byas pa rang bzhin stong pa zhes rang bzhin gyis stong pa nyid gang gi tshe de ltar shes pa de'i tshe chad pa'i dga' ba'i mtshan nyid kun du 'od/ bde ba la skyes pa chad pa gang du skyed pa de ni lam mo//de la grong khyer las dngos su chos thams cad bde ba'i rnam pa 'dus ma byas te/ de rang gis stong pa zhes chos thams cad stong pa nyid gang gi tshe de ltar shes pa de'i tshe u d+ha'i dga' ba'i mtshan nyid kun du snang ba mched pa'i 'od do//bde ba la gang zhig skye ba dang chad pa'i gnas yongs su shes pa de ni nye ba'i lam/ de la bskum pa las brten/ de'i 'dus su skad cig ro bde ba'i chos la rang rang mtshan nyid kyi ngo bo la sogs kyis stong pa zhes rang gi mtshan nyid stong pa nyid gang gi tshe de ltar shes pa de'i tshul gyi dga' ba'i mtshan nyid kun du snang ba thob pa'i 'od do//bde ba'i rgyal po la gang zhig 'gog pa de ni sbyor ba'o/ /de la mnyam par sbyor ba las ye shes/ de'i dus su 'das pa dang ma 'ongs pa dang da ltar byung ba dga' ba'i chos de ni 'das pa dang ma 'ongs pa dang da ltar byung bas mi rnyed pas zhes mi dmigs pa stong pa nyid gang gi tshe da ltar shes pa de'i tshe ye shes kyi gnyis kyi dga' ba'i mtshan nyid yang dag pa'i 'od rab bo//bde ba'i rgyal po la 'gog pa'i skabs su gang zhig ye shes kyis nyams su myong ba nye ba'i sbyor ba/ de la ha'i rnam pa'i 'don pas rnam par 'byed pas//de'i dus su 'dus pa'i dga' ba'i bde ba'i chos la rang bzhin med pa rten cing 'brel bar 'byung ba'i phyir 'dus pa 'dus pa'i mtshan nyid kyis stong pa zhes dngos po med pa stong pa nyid gang gi tshe de ltar shes pa de'i rang bzhin dga' ba'i mtshan nyid brjod du med pa'i bde ba chen po'i sa'o//de ni srub dang bsrub thabs mnyam par sbyor bas bskyed rim rdzogs rim gnyis kyi gnas la sogs pa'i don zhes bshad do/ /yang na gcig pu bskyed pa'i rim pas srub pa ni pad+ma bsrub thabs rdo rjes/ yang na bsrub thabs rtsa srub ni byang chub kyi sems/de dag mnyam par sbyor ba'i gang mchog gi dga' ba la de ni gnas la sogs pa'i don shes nas/ srub dang bsrub thabs spyad par bya/ /zhes bya ba'i don to/ /da ni sngags kyi bsgom pa mnyam par sbyor ba las bde ba'i rgyal po la shar ba'i snang ba bshad de/ de bzhin sngags dang ldan par bya/sngags spangs pas ni mi 'grub po/ /sbyor nyid cho ga'i ye shes ni/ /rgyud las gsungs pa mnyan par gyis/ /zhes bya ba/ de bzhin zhes bya ba la sogs pa la de bzhin gyi sgra ni 'khrul pa med pa'i sems kyis bya'o/ /yang na ji ltar gnas la sogs pa'i don gyis srub dang bsrub thabs kyi sbyor ba las spros pa dang bral ba'i ye shes la khong du chud pa sngags dang ldan pa'i yang de bzhin no//ci'i phyir zhe na/ sngags ni dga' ba la sogs pa la/ srog tu gyur pa rgyur gyur pa de dang ldan pa bde ba chen po la 'bras bu 'byung ngo / /'byung ba'i sgra ni thob pa'o/ / sngags zhes bya ba ni legs dgyes chen po'i bde ba'i dus su glo bur du sgra 'don pa/ ldan pa ni rang 'od shes rab dang bcas pa/ sngags spangs pa zhes bya ba ni de la rnam pa dang bcas pa dang / dngos po la sogs pas btang snyoms las sngags kyi 'bras bu 'grub bo/ /yang na sngags ni rang bzhin dga' ba/spangs pa ni chad pa'i dga' ba/ mi [(]bgrub [,]'grub [)]pa ni don ji lta ba bzhin no/ /de la man ngag ni 'di yin te/ chad pa'i dga' ba spangs pas gzhan min rang bzhin dga' ba mi rnyed de/ ji ltar me tog med par dri mi rnyed/ /ces bya ba ni bdag gi dgongs pa'o//yang na sngags ni yid/ de yang bde ba'i bdag nyid/ bde ba'i sgra ni rtag tu ma ning gi rtags/ yang na ye shes kyi dgongs pa ma ning rtags kyis nges par bstan pa'o/ /yang na sngags ni bde ba chen po la khong du chud pa/ spangs pa ni 'dzums pa/ mi 'grub pa ni mi rnyed pa/ de la dgongs pa ni 'di yin te/bde ba chen po yang dag par khong du chud pas 'dzums pa'i dngos po chung ba mi 'gro zhes bya ba'i don to/ /da ni ye shes dang ye shes las byung ba gnyis su med pa'i sbyor ba bshad de/ sbyor ba nyid cho ga'i ye shes zhes bya ba la sbyor ba ni mnyam par sbyor ba shes rab thabs yang dag par 'khyud pa nyid ces bya ba ni rgyu/cho ga zhes bya ba ni don/ ye shes ni rgyu dang don gnyis las shar ba ye shes byung bar grags pa 'bras bu'o/ /yang na sbyor ba ni srid pa nyid ni mya ngan las 'das pa/ cho ga ni de dag gnyis su med pa/ ye shes ni gnyis su med pa la rten med pa'i tshul lo//rgyud las gsungs pa mnyan par gyis/ /zhes bya ba ni de ltar bu'i/ sbyor ba'i cho ga'i ye shes gang zhig rgyud las gsungs pa de nyon cig ces 'brel ba'o/ /rgyud ces bya ba ni rim pa/ yang na lam/ yang na gsum dang bral ba'i gsum gyi bdag nyid/ yang na brtan pa dang nges par brtan par grags pa/yang na ye shes dang ye shes las byung bar grags pa/ yang na thabs dang thabs las byung ba'i mtshan nyid/ yang na rgyud kyi sgra ni gzhan gsang ba 'dus pa la sogs pa rnal 'byor bla ma'i rgyud rnams gsal te dpal nam mkha' dang mnyam pa'i rgyud gcig pu la sbyor ba'i ye shes 'jig rten las 'das pa'i thabs kyi don gyis gsungs pa/phyi nas yang sdom pa la bla na med pa'i thabs kyi don gyis nyon cig ces dgongs pa'o/ /nyid bcom ldan 'das kyis de skad gsungs so/ /yang na rgyud ni ye shes kyi skabs su 'dar ba dang rngul ba la sogs pa yongs su smin pa gsungs pa zhes bya ba ni de'i dus su rnam pa dang bcas pa'i bde ba yongs su bor ba/yang na ma smin pa'i bsam gtan la las kyi phyag rgya med pa'i byang chub kyi sems spro ba der rang len pa de la 'gog pa'am gzung ba'am de nyon cig ces bya ba'i don to//da ni spros pa dang bral ba'i ye shes kyi rang bzhin du grags pa mchod pa'i nges bstan bshad de/ 'bring dang mchog dang dbugs dbyung ni/ /dri yi chu dang ldan pa yis/ /rig ma rtag tu mchod byas te/ /rnal 'byor pas dus khyad par gyis//zhes bya ba la/ 'bring ni srog /mchog ces bya ba ni nye ba/ dbugs 'byung zhes bya ba ni mnyam pa/ dri chu ni ma zhu ba'i nyi ma'o/ /'od kyi bdud rtsi bcas pa ni yang dag par tshor ba/ des 'bring gi dus su rig ma tshangs pa'i gzhi dbral bar rnam par snang mdzad kyis mchod par byas/mchog gi dus su tshangs pa'i gzhi'i sker snang ba mtha' yas kyis mchod par bya/ dbugs dbyung ba'i skabs su tshangs pa'i gzhi'i snying gar mi bskyod pas mchod par bya/ /da ni mchod pa'i tshogs yongs su rdzogs nas rjes su bsam gtan sbyor ba'i mchod pa chen po'i tshogs bshad de/'bring zhes bya ba ni 'dzin ma/ mchog ces bya ba ni rtog byed ma/ dbugs dbyung zhes bya ba ni rtog myong ma/ dri zhes bya ba ni pad+ma/ chu ni byang chub kyi sems so/ /de la man ngag ni 'di yin te/ pad+ma'i gnas ro ma 'dzin pa'i dbus su gang zhig a bad+hU tI bzhugs pa de ni bde ba'i bdud rtsi dang ldan pa'i up+tal gyis rdo rje'i dus su rnal 'byor pas dpa' bo'i sems kyis dus khyad par shes nas rigs rdo rje phag mo'i gzugs mchod par bya zhes dgongs so//yang na rig ma zhes bya ba ni rtsa ba'i rten rtsa'i dbang phyug ma/ mchod par bya zhes bya ba ni shes rab ye shes kyi dbang bskur dus su bla ma'i man ngag las bde ba chen po rang gis rig par byas te/bya gdong ma'i nam mkhar rkan gyi nang du ro mi 'jug par byas nas rtsa bzhi thob pa'i ro myong ba skad cig gis mngon par dus su nyams su myong nas de'i rjes su kun rdzob dang don dam pa gnyis su med pa'i rang gi ngo bos tshim par bya zhes dgongs so//yang na ko zhes bya ba ni bskor ba gsum gyi rnam pa dur khrod kyi pad+ma gnas pa/ le zhes bya ba ni mtshan ma'i rnam pa lte ba/ ka zhes bya ba ni 'dod pa/ byang chub ni sems kyi ro'o/ /mchod pa ni kun du longs spyod de la man ngag 'di yin te/bskor ba gsum gyi rnam pa dur khrod kyi gnas su yod pa'i pad+ma mtshan ma'i rnam pa'i lte ba'i nang na yod pa'i byang chub sems su grags pa'i ros mchod par bya ba'i don to/ /rtag tu zhes bya ba ni don ji lta ba bzhin no/ /yang na nang gi rtags/ rnal 'byor pas zhes bya ba ni nyams su myong ba thim pa/yang na phyi'i yul la sogs pa'i 'khrul pa med pa'i yid/ dus zhes bya ba ni spros pa'i skabs/ khyad par gyis zhes bya ba ni spros pa dang bral ba las bde ba thams cad la spyod pa/ de la don ni 'di yin te/ nang gi rtags las rnal 'byor bas phyi'i yul la sogs pas ma 'khrul pa nyams su myong ba la thim pa/spros pa'i skabs su gang gi tshe spros pa dang bral ba'i sems kyis spros pa'i mchod pa byed pa de'i tshe bla na med pa'i mchod pa'i 'bras bu mchog gi dga' ba khyab/ yang na grub/ ci'i phyir zhe na/ nyams su myong ba la thim pa'i phyi rol du spros pa gnod par mi 'gyur/ji ltar yang dag par bya khyung du ma dug za na yang de la cung zad kyang gnod par mi 'gyur/ de ltar byang chub kyi sems spro ba dug za ba dang mnyam yang de lta mod kyi nyams su myong ba'i byin gyi rlabs kyis mi gnod skyon mi byed ces bya ba'i don to/ / da ni bla na med pa'i mchod pa sgrub pa bshad de/ pho nyas lhan cig skyes pa grub/ /tha ma mchog dang bar ma ste/ /nang du 'gro ba'i yid kyis ni/ /'dod pa'i dngos grub grub par byed/ /ces bya ba la/ pho nya'i don la du ma'i lugs yod de/ de la mdor bsdus don gyi gnyis su dbye ba gsal bar bshad de/pho nya'i sgra ni nam mkha' la spyod pa dang / sa la spyod pa dang sa 'og na spyod pa'o/ /ya'i sgra ni de rnams kyi gzugs bde ba sbyin pa dpa' bo'o/ /lhan cig skyes zhes bya ba ni rdo rje phag mo de dang lhan cig bcom ldan 'das srub dang bsrub thabs chen po'i gnas su bzhugs shing thabs dang bcas pa'i nam mkha' la spyod pa la sogs pa grub rdzogs zhes bya ba'i don to//ji ltar rdzogs pa de'i don bstan te/ tha ma mchog dang bar ma zhes bya ba la/ tha ma ni gti mug gi mtshan nyid rlag pa can/ bar ma ni 'dod chags kyi mtshan nyid longs spyod can/ mchog ni zhe sdang gi mtshan nyid dbang can dbang la sogs pa'i don gyis rdzogs pa zhes bya ba'i don to//ji ltar rang gis rdzogs pa zhes gzhan gyi yang de bzhin don byed do/ /ji ltar byed pa de'i don bshad de/ nang du 'gro ba'i yid kyis ni/ /'dod pa'i dngos grub grub par byed/ /ces bya ba la/ nang gi sgra ni bya gdong ma'i rnam pa sangs rgyas rin po che'i snod/'gro ba ni nang du thim pa/ ci zhig kun rdzob dang don dam pa gnyis su med pa'i byang chub kyi sems/ yid kyis zhes bya ba la/ yid kyis las kyi phyag rgya rdo rje phag mo'i gzugs su byin gyis brlabs te bla na med pa'i mchod pa bya zhes bya ba'i don to//'dod pa zhes bya ba ni/ ye shes chen po thob pa'i 'dun pa/ dngos grub ni thob pa la rgyu/ yang na yid ches ba/ grub par byed ces bya ba ni yang dag par gzung ba'o/ /da ni pho nya la sogs pa'i don gnas kyi bye brag gis gsal bar bshad de/ pho nya'i sgra ni me/ ya'i sgra ni rlung / lhan cig skyes zhes bya ba ni byang chub kyi sems las/ 'grub pa ni rdzogs zhes bya ba'i don to/ /ji bzhin rdzogs pa de'i don bshad de/ tha ma mchog dang bar ma ste/ /zhes bya ba la/ tha ma ni me 'bar ma/ mchog ni zla 'bab ma/ bar ma ni nyi 'bab ma/ yang tha ma ni mngal gyi dbus su 'og gi cha la khu ba 'bab pa/mchog ni steng gi cha la rang byung 'bar ma/ bar ma ni dbus kyi cha la khu ba dang rang byung gnyis las byung ba sbrang rtsi chen po 'bab pa/ yang na tha ma ni mngal gyi g.yon gyi phyogs nas zla ba 'bab pa/ mchog ni g.yas phyogs nas nyi ma 'bab pa/ bar ma ni zla ba dang nyi ma gnyis za bar byed pa rA hu la'i mtshan nyid ni me'i rang bzhin no//yang na tha ma ni ma 'ongs pa/ mchog ni 'das pa/ bar ma ni de dag skye bar byed pa rdzogs par byed pa zhes bya ba'i don to/ /ji ltar rdzogs pa de'i don dpal rig pa chen po'i rgyud kyi rim pas bshad de/ mnyam pa'i dga' ba las mchog shar//me tog dang ldan bzhi pa'i tshe/ /dang po bska ba rnam par smin/ /zlum po'i rnam pa'i rang bzhin can/ /'bab pa yi ni dus tshod du/ /rlung gis zhig par byed yin te/ /de ni du mar byed par gyur/ /reg bya'i rtsa ni skye ba'o/ /da ni de rnams la dgongs pa bshad de/ye shes gnyis kyi snang ba chen po'i dam tshig spyod pa las reg bya byed/ reg bya las nang na yod pa'i byang chub kyi sems gyes pa'i yid kyis 'dod pa'i dngos grub 'grub par byed do/ /ji ltar 'grub pa de'i don bshad de/ nang gi sgra ni bde ba chen po'i 'khor lo/ de yang gnyis su dbye bar gnas te/rgyu'i bdag nyid dang / de bzhin du 'bras bu'i bdag nyid/ rgyu'i bdag nyid spyi bo'i gnas/ 'bras bu'i bdag nyid gsang ba'i lte ba'i snying po/ /'gro zhes bya ba ni de'i dbus su yan lag du ma dang ldan pa'i bde ba chen po khong du chud par byed pa gzhon nu'i pad+ma'i sdong bu'i skud pa 'dra ba ye shes kyi phyag rgya gnas gnyis kyi rtsa bar bsten nas bzhugs so/yid kyis zhes bya ba la/ yid ni byang chub kyi sems/ de la srub dang bsrub thabs chen po'i mnyam sbyor dus su rdo rje'i rtse mos reg pa tsam gyis reg bya'i pad+ma byang chub sems kyis khyab par byed do//'dod pa'i dngos grub grub par byed/ /ces bya ba la/ 'dod pa ni rang bzhin dga' ba/ dngos grub ni thob pa/ grub par byed ces bya ba ni gzhan min rang bzhin nyams su myong ba la nang du thim par byed/ de yang yang dag par shes rab ye shes kyi dbang thob pa rnal 'byor gyi dbang po la/ma thob pa la de bzhin du ma yin no/ /mi byed na nye bar brtags pa tsam thams cad la byed/ 'on kyang rang gi skyon gyis mi shes so/ /de yang yongs su ma smin pa'i yid kyis 'dus byas kyi de bzhin du yang 'dir dpe smra'o/ /don dam pa'i 'phel gtam thos pa la gang zhig de'i rigs dga' ba grub par 'gyur ro//ji ltar nyi ma'i 'od zer phrad pa las shin tu smin pa'i pad+ma kha bye ba nyi ma la 'dir de tsam rnam par rtog pa med do/ /de bzhin du bde ba chen po khong du chud par byed pa shes rab kyi pha rol tu phyin pa la gang du yang rnam par rtog pa med do/ /'on kyang rang gi skyon dang yon tan las 'bras bu skye'o//de la shes rab kyi pha rol tu phyin pa la sogs pa ni rgyu'o/ /da ni bla na med pa'i mchod pa'i dngos grub grub pa la 'bras bu bshad de/ rang rdzas thig le sangs rgyas dang / /byang chub sems dpa' mchod par bya/ /mthong ba reg pa gnyis dang ni/ / thos pa dang ni dran pa yis/ /zhes bya ba la/ rang rdzas zhes bya ba ni rdo rje rin chen gdu bu/ rdzas ni zhu ba'i gzugs byang chub kyi sems/ thig le ni zlum po'i rnam pa/ yang na grangs kyi tshad/ sangs rgyas zhes bya ba ni phung po/ /byang chub sems dpa'i skye mched dang / khams/ mchod par bya zhes bya ba ni rjed par bya ba/ de la dgongs pa ni 'di yin te/ ye shes gnyis kyi snang ba chen po'i dam tshig spyod pas 'byung ba bde ba'i bdud rtsi rdo rje rin chen skye'i gdu bu'i nang du myong bar byas te bco lnga dga' ba'i thig le'i grangs su phung po skye mched khams kyi rang bzhin gyen du blta bas khyab par bya zhes bya ba'i don to//yang na rang zhes bya ba ni bde ba'i gnas/ rdzas ni 'gro ba/ yang na spros pa/ de la don ni 'di yin te/ gang zhig bde ba'i spros pa'i gnas de ni tshangs pa'i ye shes kyi dpral ba/ thig le ni gzhan gyi gnas gzhan gyi sgra ni tshangs pa'i ye shes dpral ba'i sgo nga'i lte ba zhes bya ba'i don to//sangs rgyas zhes bya ba ni rgyas pa'i 'dab ma gsum gyi rtsa bar mchog gi dga' ba'i gnas rnams/ byang chub sems dpa' ni sgur mo'i rnam pa'i rtsa bar mngon par dga' ba gzhan gyi gnas rnams/ de lta bu'i gnas mchog bzhugs pa la/mchod pas bsod nams dang ye shes kyi tshogs 'phel bar 'gyur zhes dgongs pa'o/ /bsod nams kyi sgra ni mtshan ma dang bcas pa'i mngon par dga' ba/ ye shes kyi sgra ni mtshan ma dang bral ba'i mtshan nyid chad pa'i dga' ba de dag gnyis su med pa'i rang bzhin ngo bos gang zhig rang bzhin de ni spros pa thams cad dang bral ba'i glo bur gting ring zab pa rgya mtsho'i rang bzhin dga' ba'o//de la mthong bas reg pas thos pa dran pas nyams su myong ba'i sa'i 'bras bu thob par 'gyur zhes bya ba'i don to/ /yang na mthong bas dga' ba/ reg pas mchog gi dga' ba/ thos pas chad pa'i dga' ba/dran pas rang bzhin dga' ba thob pa'i rnal 'byor gyi dbang phyug /khyab 'jug /lha chen/ tshangs pa/ brgya byin/ nye ba'i dbang po/ drag po/ skye ba'i mchog /nyi ma/ zla ba/ sangs rgyas/ byang chub sems dpa' de kun gyis mchod bkur 'gyur/ phyag bkur 'gyur ro/ /da ni bla na med pa'i mchod pa'i 'bras bu la ji bzhin don gyi yon tan bshad de/sdig pa kun las grol 'gyur ba/ de bzhin du ni the tshom med/ /rnal 'byor pa nyid bsod nams mchog /dag byed sdig pa 'jig par byed/ /ces bya ba la/ grol ba zhes bya ba ni rnam par 'byed pa/ thams cad kyi sgra ni dngos po/ / sdig pa ces bya ba ni zad pa/ de bzhin du zhes bya ba ni mi zad pa/ the tshom med ces bya ba ni don ji lta ba bzhin no/ /de la dgongs pa ni 'di yin te/ zad pa'i bdag nyid kyi dngos po rnams rnam par 'byed par byas nas mi zad pa'i bde ba chen po'i gnas gsal bar byed/ yang na 'dug sa sbyin par bya'o//gnas rnyed pa tsam gyis ye shes lnga 'byung bar 'gyur ro/ /rnal 'byor pa nyid dang / mchog dang / bsod nams dang / dag byed dang / sdig pa 'jig pa dang / rnal 'byor pa nyid ces bya ba ni me long lta bu'i ye shes/ mchog ces bya ba ni mnyam pa nyid kyi ye shes/ bsod nams ni so sor rtog pa'i ye shes/dag byed ni bya ba grub pa'i ye shes/ sdig pa 'jig par byed ces bya ba ni chos kyi dbyings rnam par dag pa'i ye shes/ yang na bde ba chen po'i gnas shes pa tsam gyis shes rab ye shes/ bza' ba ni gsang ba/ sogs pa'i sgra ni slob dpon de la don ni 'di yin te/ nyan thos kyi theg pas gnas pa la slob dpon dang gsang ba shes rab ye shes la sogs pa 'bad pas mi sbyin no//de bzhin du yang sdom pa'i rgya mtsho las/ /gang zhig dge slong tshul gnas dang / /gang zhig theg chen rgol ba dang / /de rnams mkhas pas dbang la sogs/ /nam yang sbyin par mi bya'o/ / zhes gsungs so/ /dkyil 'khor nang du dbang bskur min/ /zhes pa la/ nyan thos kyi theg pas gnas pa chos gos 'dzin pa rnams dkyil 'khor gyi nang du dbang bskur thog ma'i don shes nas yang dag pas slob dpon gyi mi sbyin zhes lung ngo / /da ni dam tshig nyams pa las phyogs gzhan bshad pa yod de/de gsal bar bya'o/ /nyams pa zhes bya ba ni 'bigs pa/ dam tshig ces bya ba ni lha mo'i bdag nyid kyi rtsa/ na zhes bya ba ni tshul/ dbang bskur zhes bya ba ni dkyil 'khor du 'jug pa/ de la don ni 'di yin te/ lha mo'i bdag nyid rtsa tshul gyis 'bigs nas dkyil 'khor du 'jug pa/bkug nas dkyil 'khor gyi nang du gzhug par bya'o/ /yang dag par 'jug par byed pas rnal 'byor pa bskal ba bye ba brgya yis kyang grub pa gang yang mi rnyed pa de tshe 'dis bla ma'i bka' drin gyis rnyed de/ de yang brtson 'grus che ba yin/ brtson 'grus chung na yang nyams pa la sogs pa'i don spyod pas phra mo'i dngos grub brgyad 'dir the tshom med par rnyed do//da ni bdud rtsi lnga'i cho ga bshad de/ sbrang rtsi khrag dang ga bur bcas/ /dmar dang tsan+dan gyis legs sbyar/ /tshogs kyi dbus su bzhag pa ni/ /thams cad rdo rje'i mtshan ma 'dzin/ /zhes bya ba la/sbrang rtsi zhes bya ba ni gci ba/ khrag ces bya ba ni don ji lta ba bzhin no/ /ga bur bcas pa ni byang chub kyi sems dang ldan pa/ de la don ni 'di yin te/ dang po me tog dang ldan pa'i gzhon nu ma thabs dang lhan cig gang zhig dga' ba mnyam par 'byung ba de ni ga bur dang bcas par bshad do/ /yang dmar zhes smos pa ni sha chen po//tsan+dan ni dri chen po/ /legs sbyar zhes bya ba ni des ro mnyam par byas zhes bya ba'i don to/ /yang na sbrang rtsi zhes bya ba ni byang chub sems kyi rang bzhin zla ba'o/ /khrag ces bya ba ni de rang rnam par smin pa las mchog gi dga'i ngo bo nyi ma/ ga pur bcas zhes bya ba ni nur nur ba'i dngos por gyur pa/yang na ro mnyam pa'i gzugs kyis shar ba/ dmar dang tsan+dan gyis legs sbyar/ /zhes bya ba la/ dmar gyi sgra ni phag mo/ 'dod chags chen pos shin tu chags pa'i phyir/ tsan+dan ni dpal he ru ka dag pa'i dkar ba dri ma med pa'i phyir/ legs sbyar ni dpal he ru ka dang phag mo'i nga rgyal gyis bde ba chen po'i reg bya nyams su myong ba'i don gyi phyir byang chub kyi sems bla ma'i man ngag las gzung bar bya'o//byang chub kyi sems spangs pas bde ba chen po'i reg bya nyams su myong ba skye bar mi 'gyur zhes bya ba'i don to/ /tshogs kyi nang du bzhag pa ni/ /zhes bya ba la/ tshogs ni ut+pala'i 'khor lo/ dbus zhes bya ba ni de'i snying po/ bzhag pa zhes bya ba ni don ji lta ba bzhin no/ /yang na snying po gnas nas mi g.yo bar bya zhes bya ba'i don to/ /thams cad rdo rje'i mtshan ma 'dzin/ /zhes bya ba la/ thams cad kyi sgra ni rtsa ba rdo rje'i mtshan ma zhes bya ba ni sdud pa'i mtha'i/ 'dzin zhes bya ba gzung ba/ de la don ni 'di yin te/ rdo rje'i rtsa ba nas sdud pa'i mtha' man chad byang chub kyi sems kyi rang bzhin dga' ba rten pa'i don du gzung bar bya'o/ /yang na thams cad kyi sgra ni gsang ba/ rdo rje'i sgra ni dam tshig ma/ gsang ba'i dam tshig ma de dag mtshan ma ni rtags/ spyod pa'am rol par 'gyur zhes bya ba'i don to//de la dgongs pa ni 'di yin te/ reg bya dang rgyal mtshan gnyis las byung ba mngon par grags pa zla ba ye shes kyi lta bas byin gyis brlabs te spros pa dang bral ba'i rang bzhin gyi ro gcig pur byas nas gnyis su med pas myong bar byas te/ myong ba tsam gyis ni rang gi ngo bo rnyed par 'gyur zhes dgongs so//da ni myong ba'i cho ga bshad de/ sbom po mtha' ltag kha gnyis kyis/ /mnyam sbyor shes pas rtag tu myang / /zla ba'i btung ba bzhin myong bas/ /dngos grub rtag pa thob par 'gyur/ /zhes bya ba la sogs pa ni don ji lta ba bzhin no//yang na sbom po ni rdo rje'i nor bu/ tha ltag ni chu skyes [(]gyi [,]kyi [)]gtsag bu/ yang na tha ltag ni rtog med ma/ sbom po ni rtsab/ de dag gis kha la myong gzung blang zhes bya ba'i don to/ /mnyam sbyor shes pas zhes bya ba la/ mnyam sbyor gyi sgra ni sku gsung thugs mi g.yo bar gnas pa/ yang na mnyam sbyor ni ye shes dngos po dang dngos po ma yin par 'dzin pa spangs pa sems byung ba/yang na sems dang sems las byung ba de dag gnyis su med pas rang bzhin med pa'i rang bzhin yongs su shes pa/ rtag tu zhes bya ba ni don ji lta ba bzhin no/ /yang na 'gro ba gnas pa gnyid log pa sad pa zas zos pa ma zos pa legs dgyes la sogs longs spyod la rgyun ma chad pa rang gi ngo bo yongs su shes pa rang gis nyams su myong ba'i dga' ba mdzes pa'i rnam pas rnal 'byor pa nyid thob/mchog thob/ bsod nams thob/ dag byed thob/ sdig pa 'jig pa thob/de'i phyir de bzhin du ni the tshom med ces nyid mchog gi dbang phyug gis gsungs so/ /da ni bde ba chen po'i ngo bo nyid la sgrub pa bshad de/ bzlas pa tsam gyis 'grub pa ni/ /bsam gtan gyis dang bzlas pas so/ /dam tshig rtag tu bskyang ba ni/ /sgrub pa g.yo ba med pas so/ / zhes bya ba la/ 'grub pa zhes bya ba ni mnyam par gzhag pa'i sgrub pa'i dbang po las bzlas pa tsam la sogs pas bde ba chen po'i rgyal po la reg bya rnyed/ yang na ye shes lnga mngon du gyur par byed pas nyams su myong ba shes pa la bde ba'i rang bzhin la snang ba mthong / bzlas pa tsam gyis zhes bya ba ni/ kun du myong ba bsam gtan gyis/ /zhes bya ba ni rnam par dpyod pas/ bzlas pas zhes bya ba ni ye shes kyis/ de la dgongs pa ni 'di yin te/ /spros pa dang bcas pa'i bde ba chen po la kun du myong ba'i rnam par dpyod pa'i ye shes kyis thob bo/ /spros pa dang bral ba bsam gtan gyis ma yin la/bzlas pas kyang ma yin no/ /'on kyang bzlas pa tsam gyis zhes bya ba'i don to/ /tsam gyi sgra ni lta ba tsam ji ltar lta ba tsam de'i don bshad de/ ji ltar dris pa la sogs pa ma yin pas nam mkha' la sprin med 'od stong lta ba tsam gyis mthong ba de ltar bzlas pa dang bsam gtan la sogs pa ma yin pas spros pa thams cad las rnam par grol ba bla ma'i bka' drin las nyams su myong ba lta bas tshangs pa'i bzhi'i nam mkha'i dbus su 'od stong rang bzhin dga' ba mthong ba rnyed pa zhes bya ba'i don to//da ni de la thob pa don gyi thabs bshad de/rang bzhin dga' ba 'od stong la rnyed pa'i don du dam tshig spyod pa'i skyong ba bya ba thabs nyid mchog gi dbang phyug gis gsungs so/ /dam tshig rtag tu skyong ba ni/ /zhes bya ba la/ dam tshig ni 'dir gnyis su dbye ba bsrung ba dang bza' ba/ dur khrod chen po'i dbus su bab pa skye ba gsum pa tshes mar ngo'i brgyad pa la sogs pas grub par byas pa skal ldan ma yin pa la mi sbyin zhes bsrung ba'o//skal ldan la sbyin par bya zhes bza' ba de ni nges pa'i don to/ /da ni drang ba'i don la don gsal bar bya'o/ /dur khrod ni gsang ba'i sna la rtsa ba'i nang / gang gi phyir zhe na/ byang chub kyi sems shin tu rol tshim par byed pa'i phyir zhes pa'i don to//de la dbus ni snying po de ru 'bab/ ci zhig /skye ba gsum pa/ lan gsum skye ba'i byang chub sems 'bab pa ni rin po che'i gtsug tor nang na ma nyams pa/ de yang tshes mar ngo'i brgyad pa la grub par byas pa mar ngo'i sgra ni mtshan mo//de rang rtog med ma/ brgyad pa zhes bya ba ni 'dab ma brgyad pa'i pad+ma/ sogs pa'i sgra ni 'dab ma gsum pa de ru grub par byas pa de'i nang gi lte ba'i dbus su rang gis len zhes bya ba'i don to/ /de ni bsrung ba'i don no/ /da ni bza' ba'i don bshad de/ bza' ba ni spros pa dang bral bar byed pa/yang na dngos po dang dngos po med par 'dzin pa spangs pa'i ye shes kyi lta bas mtshan nyid dang bral ba'i rang gi ngo bos nyams su myong / de bzhin du yang dpal sdom pa'i rgya mtsho las/ dngos dang dngos min 'dzin spangs pas/ /mtshan nyid dang bral rang ngo bos/ /skal ldan mo gang nyams su myong //de ni gzhan min bza' ba'o/ /zhes gsungs so/ /de ltar gyur pa'i bsrung ba dang bza' bskal ldan ma yin pa la mi sbyin zhes bya ba'o/ /de la dgongs pa ni 'di yin te/ skal ldan ma yin pa chad pa de la mi sbyin pa ni mchog gi dga' ba'i gnas su bsrung ba zhes bya ba'i don to/ de lta bu'i don gyi dgongs pa shes nas dam tshig la sogs pa bsrung bar bya zhes bdag gi dgongs pa'o//grub pa g.yo ba med pas so/ /zhes bya ba'i don ji lta ba bzhin no/ /yang grub pa ni chad pa'i dga' ba gang zhig dang po mi bde bskyed par byed de rang phyi nas zhu bar 'gyur bas bde ba skye bar byed do/ /ji ltar 'bras bu gsum la sogs pa btung ba dang bza' bas dang po mi bde bar 'gyur ba'i yongs su smin pas de rang bdud rtsi'i don byed do//de lta bu'i rigs pas chad pa'i dga' ba yang de bzhin no/ /g.yo ba med pas zhes bya ba ni shin tu brtan pa'i dngos por gyur pa/ yang na shor ba shi ba'i skabs su 'du shes kyi ye shes/yang na bsrung ba la sogs pa'i dam tshig la nyams su myong ba'i lta ba'o/ /da ni dam tshig la spyod pa la sogs pa'i 'bras bu bshad de/ dam tshig nyams pa las ni 'dir/ /dkyil 'khor nang du dbang bskur min/ /rnal 'byor bas rten dngos grub ni/ /bskal ba bye ba brgya yis kyang //zhes bya ba la/ dam tshig nyams pa las ni sngags la sogs pa 'grub pa yang min/ dkyil 'khor gyi grub pa yang min/ dam tshig dbang bskur grub pa yang min/ bskal pa bye ba brgya yis kyang / /grub pa'i dbang pos rnyed pa zhes dgongs so/ /yang na nyams pa ni nyan thos kyi theg pas gnas pa la gsang ba'i don bshad pa la yang gnas gcig pa/dam tshig ni bsrung ba dang / bza' ba la sogs pa'i don gsal bar byed pa/ bsrung ba ni bdag yin par bya'o/ /zla ba'i btung ba bzhin myong pas/ /zhes bya ba la/ zla ba ni dus gcig tu shar ba'i bdud rtsi/btung ba ni sna tshogs skad cig dang ro'i rdzas grub par byas pa de ni zla ba'i btung ba/ bzhin zhes bya ba ni dpe'o/ /ji ltar bram ze mchod sbyin gyi dus su dngos po ma yin pa'i gzugs bdud rtsi bzhin dag phyir len te/ 'on kyang bde ba chen po'i 'bras bu sbyin pa mnyam sbyor zhes pas mi len cing / mnyam sbyor shes pa de ni mnyam sbyor shes pa'o/ /des reg bya khong du chud par byed pa la reg bya'i kha'i nang gi rkan gyi gnas su dpa' bo dang rnal 'byor ma las dgod pa byas nas gyen du blta bas gzung bar bya'o/ /myong bas zhes bya ba ni spros pa dang bcas pa'i gzugs rlung la sogs pa 'gog pas bzung ste rjes su gcig pa dang du ma'i rang bzhin gyis rnam par dpyad nas spros pa dang bral ba'i ye shes shes nas nang gi reg bya nyams su myong ba'o//dngos grub rtag pa thob par 'gyur/ /zhes bya ba la/ dngos grub ni rnam pa thams cad kyi rang bzhin shes rab/ thob pa ni skye bar byed pa/ rtag pa zhes bya ba ni chad pa dang bral ba'o/ /de la don ni 'di yin te/ dus gcig shar ba'i byang chub kyi sems nyams su myong ba tsam gyis rnam pa thams cad kyi rang bzhin can shes rab chad pa dang bral ba'i dgos pa byed/ yang na dpe med pa'i 'bras bu sbyin no/ /da ni bdud rtsi lnga'i 'bras bu bshad de//de ni bdud rtsi lnga yin 'gyur/ /dngos grub thams cad rab byed pa/ /mchod bzhi de bzhin rnal 'byor pa/ /mnyam par 'khyud pa de nyid 'dzin/ /zhes bya ba la/ de ni bdud rtsi lnga de ni gnyis su med pa'i mchod pa'i skabs su dpyad par bya'o/ /yang na lnga'i sgra ni de bzhin gshegs pa lnga'o/ /bdud rtsi zhes bya ba ni de rnams kyi ngo bo'o//de la don ni 'di yin te/ de bzhin gshegs pa lnga'i byin gyis rlabs kyi rang gi ngo bos gang zhig gnyis su med pa'i mchod pa'i dam tshig spyod pa de ni dngos grub thams cad rab tu byed do/ /dngos grub thams cad rab tu byed/ /ces bya ba ni nye bar brtags pa tsam ste/ 'on kyang phyag rgya chen po'i dngos grub kyang rab tu byed ces bya ba'i don to//mchod bzhi zhes bya ba ni sngags dam tshig ye shes de kho na nyid ces so/ /yang na las chos dam tshig phyag rgya chen po bzhi'o/ /dbang po gnyis su med pa'i sbyor ba'i dus su mngon par dga' bas khong du chud pa/ yang na skad cig bzhi'i bar du tshangs pa'i rkan gnyis phrad pa las ye shes me'i sbyor thabs kyis bdud rtsi myong ba de ni mchod bzhi'o//de bzhin zhes bya ba ni ji ltar shes rab ye shes kyi dbang bskur ba'i dus su rnal 'byor pa/ mnyam par 'khyud pa de nyid 'dzin/ /dam tshig gi yang de bzhin no/ /de kho na nyid ni bzhi pa/ de skabs su yang phung po'i rnam par shes pa'i rin po che gzung bar bya'o//de ci'i phyir zhe na/ kun rdzob kyi gzugs rten med pa'i don dam pa rnyed par mi 'gyur ro/ /rnyed pa'i sgra ni gsal ba ste/ de skye ba ma yin no/ /kun rdzob kyi gzugs kyi rten reg khams mi dgos pa'i brgyad pa'i dang po gnyis pa khong du chud pa las 'od zer 'byung bar byed pas zhes bya bar dgongs so//da ni de la rnyed pa'i don du snying po'i mchog gi thabs bshad de/ gang gi thabs kyis rnyed tsam gyis sangs rgyas/ yang na rdo rje 'dzin par 'gyur ro/ /lha dang mi yi bde ba ni/ rdo rje mthe'u chung gi nang / /'dus byas gnyig shes pa yis/ /bcu drug char yang mi phod do//zhes bya ba la/ lha'i dang mi'i dang lha mi'i dang / lha'i sgra ni shes rab/ mi'i sgra ni thabs/ de dag lha mi shes rab thabs gnyis las gang zhig 'byung ba de ni bde ba'o/ /yang na bde ba zhes bya ba ni bzhir dbye ba'i byang chub kyi sems so/ /rdo rje mthe'u chung gi ni nang / /zhes bya ba la/ rdo rje mthe'u chung ste gsang ba'i rin po che'i snye ma'o//nang zhes bya ba ni de'i tshangs pa'i rkan/ 'dus byas zhes bya ba ni gang zhig bzhir dbye ba'i bde ba chen po'i reg bya'i rgyal po gsang ba'i lte ba'i gzhi'i nang na 'bab pa de la 'dus par byed gcig tu byed pa ni 'dus byas zhes bya ba'i don to/ /yang na lha'i zhes bya ba ni mchog gi dga' ba/mi'i zhes bya ba ni chad pa'i dga' ba/ /de dag gi dbus su yod pa gang zhig ye shes de ni bde ba/ de bla ma'i man ngag las dang rang gi bsod nams kyi stobs kyis 'dus byas ro gcig tu byas nas spros pa dang bral ba'i ye shes kyi snang ba'i lta bas mchog dang chad pa shes pas rdo rje mthe'u chung rin po che'i snye ma'i nang du gzung bar bya/nyams su myong bar bya ba zhes bya ba'i don to/ /nyams su myong ba tsam gyis A li kA li shes rab thabs mnyam par 'khyud pa srub dang bsrub thabs phyag rgya sngags rim pa gsang ba'i gzhi sangs rgyas rin po che'i snod skad cig ro dga' ba bdud rtsi rtsa rlabs longs spyod dbang rten dang brten pa ye shes snang ba shar ba nub pa 'pho ba thig le'i tshul la sogs pa mtshan ma dang bcas pa mi dmigs pas brjod du med pa nam mkha' bzhin bde ba chen po'i ye shes rang rdzogs pa mthong thob ces bya ba'i don to//bcu drug char yang mi phod do/ /zhes bya ba la/de lta bur gyur pa las gzhan gyi ye shes la sogs pa cha bcu drug gi cha gcig kyang 'dzin pa mi phod mi thob ces bya ba'i don to/ /yang na char yang zhes bya ba ni dus/ yang na sbyor/ de yang gang gis gang la de smra'o/ /mchog gi mtshan nyid srid pa'i lhan cig chad pa'i mtshan nyid mya ngan las 'das pa la'o//mi phod ces bya ba ni mi srid pa/ bcu drug ces bya ba ni don ji lta ba bzhin no/ /yang na skye ba dang 'jig pa dang bral ba'i phyir ro/ /de la man ngag ni 'di yin te/ srid pa dang mya ngan las 'das pa'i mtshan nyid mchog dang chad pa'i sbyor ba las skye ba dang 'jig pa dang bral ba'i ye shes chen po la cha bcu drug gi cha gcig kyang thob pa mi phod mi srid ces bya ba'i don to//ji ltar nam mkha' gang ba'i zla ba la'o/ /da ni dkyil 'khor gyi don bshad de/ ri yi gting ring phug tu ni/ /rgya mtsho chen po'i chu ngogs su/ /dang po'i grub pa dur khrod la/ /de ru dkyil 'khor bri bar bya/ /zhes bya ba la/ ri zhes bya ba ni mtshog ma/ gting ring ni snying po//phug ces bya ba ni de'i dbus/ de yang stong phrag bdun cu rtsa gnyis kyi rtsa'i dra ba dang ldan pa/ ri yang sna tshogs shing gis mdzes pa/ sna tshogs dri ma med pa'i shwa'i chu bab pa/ mchog ma ri'i phug kyang sna tshogs dri ma med pa'i chu 'bab pa'i byang chub kyi sems kyi bdud rtsi'i chu 'bab pa'o/ /rgya mtsho chen po'i chu ngogs su//zhes bya ba la/ chen po gang yin pa de rgya mtsho/ rgya mtsho chen po de'i ngogs ni rgya mtsho chen po'i de'i ngogs/ gsang ba'i lte ba'i gnas de'i rgya mtsho chen po'i ngogs gsang ba'i gnas su thig la sogs la gdab par bya'o/ /thig la sogs pa gdab pa'i sgra ni bde ba'i zhes dang / ldan pa'i zhes rtsa'i kun spyod/de yang srog dang rtsol ba mnyam par gzhag pas so/ /dang po grub pa dur khrod la/ /zhes bya ba la/ dang po'i sgra ni thog ma med pa/ gang la thog ma med pa de ni thog ma med pa/ grub pa zhes bya ba ni ma bcos pa rang byung ba/ yang na dang po grub pa zhes bya ba ni gzhan min spros pa dang bral ba'i ye shes de'i phyir rang byung /ji zhig /'dod chags dang zhe sdang dang gti mug gi rnam par rtog pa sreg par byed pa'i dur khrod do/ /de ru dkyil 'khor bri bar bya/ /zhes bya ba la/ de ru zhes bya ba ni 'das ma thag pa smras pa'i gnas su/ dkyil 'khor zhes bya ba ni kun rdzob kyi byang chub kyi sems/ 'dri bar bya zhes bya ba gsang ba'i rdo rje phreng ba'i dang du bzor bya bkram par bya zhes bya ba'i don to//da ni dang po grub pa'i dur khrod ces bya ba la sogs pa'i tshigs bcad la gang zhig gsang ba'i bshad pa yod pa de gsal bar bstan te/ dang po'i sgra ni ro ma/ 'dzin ma/ 'phrog ma/ grub ces bya ba rtog ma med ma/ dur khrod ces bya ba ni de rnams kyi srog / de yangs dang chu dang me dang rlung dang bral ba/ de ru zhes bya ba ni nam mkha'/ dkyil 'khor zhes bya ba ni rang bzhin ye shes/ bri ba zhes bya ba ni mchog gi dbang phyug /de la don ni 'di yin te/ 'dzin ma la sogs pa rtog med rang bzhin gyi rlung srog dur khrod chen po'i nam mkhar ye shes kyi ngo bo'i dkyil 'khor gyi dbus su mchog gi dbang phyug bsgom par bya'o//yang na dang po grub pa'i dur khrod ces bya ba ni rang bzhin dga' ba/ de ru zhes bya ba ni gang rang bzhin gyi rlung gi gnas/ dkyil 'khor zhes bya ba ni gzhan min/ bri bar bya zhes bya ba ni reg par bya'o/ /de la dgongs pa ni 'di yin te/ rang bzhin gyi rlung gi gnas su de rang dang ldan pa rang bzhin dga' ba'i dur khrod chen po'i nang gi reg byas nyams su myong bar bya'o//nyams su myong ba tsam gyis spros pa dang bral ba'i rang bzhin dga' ba grub thob ces bya ba'i don to/ /de ltar gyur pa'i rang bzhin gyi bdag nyid dang po grub pa'i dur khrod chen po'i dkyil 'khor gyi dbus su skyes bu'i mtshan sum cu rtsa gnyis dang ldan pa/dpe byad brgyad cus sku brgyan pa/ rmad du byung ba rnam pa thams cad kyi gcig pu bde ba chen po'i rang bzhin gyi ngo bo dam tshig chen po'i yan lag mas 'khyud pa dpal 'khor lo sdom pa'i 'khor los sgyur ba'i rgyal bo rje btsun rnam par bzhugs so//'gyel kyang nyi mas skam mi 'gyur/ /chus kyang rul ba ma yin no/ /de ltar ya mtshan gzugs grags pa/ /ut+pal gang ba bdag gis byas/ /zhes bya ba la/ 'gyel zhes bya ba ni rang gi gnas nyams pa/ rang gi gnas kyi sgra ni tshangs pa'i mtsho/ /kyang gi sgra ni nges pa'i don to//nyi ma zhes bya ba ni mchog /skam mi 'gyur zhes bya ba ni don ji bzhin no/ /yang na rang gi ngo bo las nyams par mi byed/ rang gi dbang mi byed ces bya ba'i don to/ /de la man ngag ni 'di yin te/ /gsang ba'i rdo rje grags pa/ ut+pal gang ba/ rang gi gnas tshangs pa'i mtsho las 'gyel kyang khu ba'i spro ba thub kyang mchog gi nyi ma'i tsha bas skam par mi byed/rang gi ngo bo las gzhan du mi 'gyur zhes bya ba'i don to/ /chus kyang rul pa ma yin no/ /zhes bya ba ni rang gi mtshan nyid las gzhan du mi 'gyur/ log par mi bgyid ces bya ba'i don to/ /chus zhes bya ba ni zhu ba'i mtshan nyid chad pas/ de la dgongs pa ni 'di yin te/ chu'i nang na 'gyel kyang chu'i rang bzhin du gyur kyang /de lta mod kyi zhu ba'i mtshan nyid chad pas rul par mi byed/ rang gi mtshan nyid las gzhan du mi 'gyur zhes bya ba'i don to/ /gang gi phyir zhe na/ rang bzhin dga' ba'i nyams su myong ba'i ro yis shin tu khengs pas/ phyi zhes bya ba'i dgongs pa'o/ /de'i phyir/ de ltar ya mtshan gzugs grags pa//ut+pal gang ba bdag gis byas/ /zhes bya ba'i tshigs bcad bstan pa'o/ /bdag gis zhes bya ba ni slob dpon shes rab dpal gyis zhes bya ba'i don to/ /'di dag brgyad gnyis lo ldan ma/ /'brel pa la sogs ut+pal spyan/ /gzhan gyi snying ga 'bigs kho na/ /'dus pa nu ma mda' dang 'dra//lte ba rked pa zla bzhin dgyes/ /dbus sogs dam tshig rmad du byung / /sku smad la sogs pa yi mchog /man ngag pad+ma ldan pa'o/ /thos pas sdig pa 'jig par byed/ /lta bas dga' ba 'phel bar mdzad/ /reg byas ye shes skye bar byed/ /spyod pas thar ba sbyin pa'o/ /bsod nams can du skal ldan gang / /su zhig mkhas chen rab mchog gang //de la de 'dra bdag skyes gzhan/ /bdag nyid tshig gis sbyin par bya/ /rgya gar kha che'i mkhan po longs spyod rdo rjes mdzad pa gsang chen pad+ma zhes bya ba las nges bstan gnyis pa rdzogs so// //paN+Di ta de nyid kyis bsgyur cing gtan la phab pa'o// //

CLOSE WINDOW