CLOSE WINDOW

D1406
བོད་ཡིག

@##/ /rgya gar skad du/ shrI tsakra saM ba ra mU la tan+t+ra pany+tsi kA/ bod skad du/ dpal 'khor lo sdom pa'i rtsa ba'i rgyud kyi dka' 'grel/ bcom ldan 'das 'jam pa'i rdo rje la phyag 'tshal lo/ /bcom ldan 'das dpal rdo rje mkha' 'gro la phyag 'tshal lo/ /dngos po kun gyi rang bzhin mchog /dngos kun 'jig pa 'jig mdzad pa/ /dngos po kun ni mi snang zhing / /dngos po kun ni zil gnon pa/ /mkha' mtshungs don dang dri med mkha'/ /dpal chen de la phyag 'tshal te/ /bde mchog 'khor lo'i rgyud kyi ni/ /dka' 'grel bdag gis bri bar bya/rgyud 'di las/ dang po 'di skad bdag gis thos pa zhes bya ba la sogs pa sdud pa pos gleng ma bslang ba yin zhes dang por brgal ba la/ de'i lan gdab pa'i phyir 'di skad du/ bcom ldan 'das ni mi gnas pa'i mya ngan las 'das pa yin par rab tu bstan pa yin no zhes zer te/de nyid kyi phyir/ thams cad bdag nyid rtag tu bzhugs/ /zhes smos pa yin no/ /gzhan dag ni nam mkha' dang mnyam pa'i rtsa ba'i rgyud stong phrag brgya pa las btus pa yin pas/ rtsa ba'i rgyud las 'di skad ces bya ba la sogs pa dang por smos pa yin la/ 'di ni de'i rgyud phyi ma yin pas ma smos pa ma yin no//de ni rgyud gzhan dag dang 'dres par 'gyur ba'i don gyi bye brag 'byed pa'i phyir bla ma yin no zhes gsungs pa yin no/ /gzhan dag ni bstan du med pa'i chos nyid kyis bstan par bya ba dang ston pa po gcig tu bstan pa yin te/ rgyud 'di la ni sangs rgyas bcom ldan 'das yin no zhes gsungs pa'i phyir ro//de la dang po re zhig rjod pa dang / brjod par bya ba dang / /'brel ba dang / dgos pa dang / dgos pa'i dgos pa yod par mthong nas chos kyi rjes su 'brang zhing rtog pa sngon du gtong ba rnams kyang 'jug par 'gyur te/de bas na de nyid ni de nas zhes bya ba la sogs pa nas brtsams te/ dpal he ru ka mngon par brjod pa zhes bya ba la sogs pa'i bar gyis gzhung bkod pas bshad pa yin te/ de la brjod pa ni 'khor lo bde mchog ces bya ba'o/ /des gang brjod par bya ba dpal he ru ka dang /rdo rje phag mo la sogs pa'i rgyud kyi lus ni brjod par bya ba yin la/ brjod par bya ba dang rjod par byed pa'i mtshan nyid ni 'brel pa yin no zhes la la dag 'dod la/ gzhan dag ni thabs dang thabs las byung ba'i dngos po'i mtshan nyid ni 'brel pa yin no zhes zer ro//bcom ldan 'das kyis gdul bya'i skye bo 'jug par mdzad pa'i phyir dkyil 'khor du 'jug pa la sogs pa nas gsang dbang bskur ba'i bar ni dgos pa yin la/ de'i 'og tu dus phyis des 'bras bu thob pa ni dgos pa'i dgos pa yin no/ /de nas zhes bya ba la sogs pa'i tshig gi phrad kyi tshogs kyis rgyud phyi ma nyid du nges par byed pa yin no//de yang de nas zhes bya bas ni de ma thag pa ste/ nam mkha' dang mnyam pa'i rgyud kyi rjes thogs nyid la 'og nas bshad pa 'di bshad par bya'o zhes bya ba dang sbyar ro/ /de'i phyir zhes bya ba ni rim pa dang rgyu'i don te/de'i 'og tu zhes gsal ba nyid du smras pa'o/ /da nas kyi sgra smos pa ni bkra shis pa'i don te/ bkra shis pa la sogs pa bstan bcos kyi dang por tshig tu brjod pa ni nyan pa po rnams kyi bgegs bsal bar bya ba yin pa'am/ /dbang du byed pa'i don yin no//de bas na snga ma'i rang bzhin la ltos nas/ /bkra shis pa'am dbang byed yin/ /smras yin de nas de phyir sgra/ /bstan bcos go rims rgyu yin no/ /zhes so/ /'o na bshad pa de ci zhig yin zhe na/ gsang ba zhes bya ba gsungs te/ gsang ba ni sba bar bya ba ste/nyan thos la sogs pa gzhan dag la bstan par bya ba ma yin pa'i phyir ro/ /yang na thabs dang shes rab gcig tu byas pas bsgrub par bya ba gang yin pa de ni gsang ba'o/ /yang na rdo rje dang pad+ma dang byang chub kyi sems de gsum po 'di dag ni gsang ba ste/ ra ni rdo rje zhes byar bshad//yi ge ha ni pad+mar bshad/ /de dag gnyis kyi sa bon ni/ /s+ya zhes bya bar bshad pa yin/ /zhes gsungs pa yin te/ yi ge ra ni rdo rje rtse mo 'dra ba'i phyir ro/ /ha ni 'dab chags kyi mchu 'dra ba'i phyir ro/ /sa dang ya kun du sbyor ba ni gnyi ga'i sa bon gyi gzugs can yin pa'i phyir ro//de yang sa yan du sra ba na zhes bya ba'i yi ge'i tha ma gzung ba'i phyir te/ de ni don dam pa'o/ /ji ltar bshad par bya ba gsal bar bstan pa ni mdor bsdus pa ste zhes gsungs pa yin te/ nam mkha' dang mnyam pa'i rgyud las ni shin tu rgyas par smos pa yin no zhes bya bar dgongs so//don de nyid gsal bar bstan pa ni rgyas pa min zhes bya ba gsungs pa yin no/ /yang na mdor bsdus pa ma yin gyi rgyas pa zhes bya bar sbyar ro/ /'dir dgos pa ni 'di yin te/ nam mkha' dang mnyam pa'i rgyud ni gzhung rgyas pa yin la//'dir ni don rgyas pa yin no zhes bya ba ste/ khams gsum pa'i bdag nyid du 'khor lo gsum bshad par bya ba yin no/ /da ni tshig bzhis gsang ba nyid kyi khyad par bstan par bya ste/ dpal gyi sgra ni mchod pa'i tshig go/ /he ru ka zhes bya ba ni rgyud 'dir bcom ldan 'das bdag po'i mtshan te/dpal gtso bor gyur pa'i he ru ka ni dpal he ru ka'o/ /de'i yang dag sbyor ba ni bcom ldan 'das yum rdo rje phag mo dang lhan cig ro gcig pa'i tshul gyis kun du 'khyud pa'o/ /khams gsum pa'i bdag nyid du bcom ldan 'das he ru ka zhes bya ba yi ge gsum gyis ston pa nyid yin no//chos thams cad ni rgyu dang bral ba'o/ /chos thams cad ni rtog pa dang bral ba'o/ /chos thams cad ni gang na yang mi gnas pa'o zhes pa ni mi dmigs pa'i yi ge gsum gyi bdag nyid yin no/ /yang na dpal he ru ka zhes bya ba ni khyad par du bya ba'i tshig yin la/gsang ba zhes bya ba ni khyad par du byed pa'i tshig yin te/ de nyid kyis ni 'dod pa'i don kun sgrub par byed pa yin no zhes bcom ldan 'das kyis khyad par du gsungs pa yin te/ thams cad kyi 'dod pa ni 'dod pa kun te de nyid ni don de dgos pa'o/ /de'i sgrub par byed pa ni bcom ldan 'das te de bas na de'o//yang na 'dod pa yang yin la kun yang yin pas 'dod pa kun no zhes bye brag tu mtshams sbyar bar bya'o/ /phyi ma las kyang phyi ma ste/ zhes bya ba la bstan par bya ba dang ston pa po khyad par med pa yin pas rgyud phyi ma 'dus pa la sogs pa yin gyi//de las kyang gong mar gyur pa ste/ mkha' 'gro ma yi dra ba'i sdom/ /zhes bya ba la/ mkha' 'gro ma ni 'khor lo gsum la gnas pa rnams so/ /de'i dra ba zhes bya ba ni tshogs so/ /de'i sdom pa ni bsgrubs shing sbas pa zhes bya ba'i don to/ /mkha' 'gro ma ni mkha' la 'gro ba ste/nam mkhar 'gro zhing rgyu ba zhes bya ba'i don to/ /yang na mkha' 'gro ma rnams ni nam mkha' la rgyu ba'i ngang tshul can yin pa'am phyi rol du 'gro ba las bzlog pas dra ba ltar 'dir sdom pa yin pas na mkha' 'gro ma'i dra ba'i sdom pa zhes bya ba yin no/ /de bas na de brjod byar sbyar ro//da ni bcom ldan 'das dpal he ru ka bdag po nyid kyi bdag nyid chen po yin par bstan cing dang po 'di'i gnas bstan pa ni gsang ba zhes bya ba yin te/ gsang ba'i sgra ni 'dir 'khor lo gsum la gnas pa'i mkha' 'gro ma thams cad yin par bstan pa ste/gsang zhing bzang ba'i gsang ba der ro gcig cing tshul gcig pa nyid kyis nam mkha'i khams thams cad khyab pa ste/ bcom ldan 'das dpal he ru ka rdo rje phag mo la sogs pa dang yang dag par ldan pa'i bzhugs gnas so/ /de ji lta bu zhe na/ mchog gi zhes bya ba gsungs pa yin te/mchog ni dam pa ste/ 'jig rten dang 'jig rten las 'das pa'i ye shes kyi gzhi yin pas na gtso bo dang / bla ma dang / bla na med pa yin no/ /gzhan yang ji ltar zhe na/ dgyes pa zhes bya ba gsungs te/ bla na med pa'i mchod pa'i rol pa'i bya bas nyams dga' ba nyid yin pa'i phyir dgyes pa'o//da ni 'khor phun sum tshogs pa la don gzhan ma yin par gsungs pa ni/ /thams cad bdag nyid rtag tu bzhugs/ /zhes bya ba ni gsungs pa yin te/ khams gsum pa thams cad kyi bdag nyid can 'khor lo gsum du bzhugs pa'i bdag nyid kyi sku'am rang gi ngo bo'o//der rtag tu zhes bya ba gang du nam yang ma bral ba'i ngo bo nyid du ston to/ /bzhugs zhes bya ba ni khams gsum gcig pa nyid kyis mi 'jigs pa'i rang bzhin nyid du bstan pa yin no/ /da ni ston pa phun sum tshogs pa nyid bstan pa'i phyir//mkha' 'gro kun dngos sems dpa' ni/ /zhes bya ba gsungs pa yin te/ mkha' 'gro'i sgra ni nye bar mtshon pa tsam yin te/ mkha' 'gro dang mkha' 'gro ma thams cad kyi dngos po yin par shes par bya ste/ rang bzhin nam rgyud kyi ngo bo nyid du gyur pa ste/gcig tu 'dres par gyur pa zhes bya ba'i don to/ /sems can thams cad kyi don mdzad par spyod pas na sems dpa' yin pa'am/ mchog tu brtan pa'i yon tan dang ldan pas na sems dpa'o/ /mi phyed pas na rdo rje ste/ rdo rje ye shes kyis sems can thams cad kyi don mdzad pas na rdo rje sems dpa' zhes bya ba'am/lha chen po dang / khyab 'jug dang tshangs pa la sogs pas mi bskyod pa gang yin pa de ni rdo rje sems dpa'o/ /yang na thabs dang shes rab kyi ngo bo yin pa'i phyir ram/ /bdag dang gzhan gyi don phun sum tshogs pa thabs dang ldan pa nyid kyis khyad par 'phags pa'o//bla na med pa'i mchod par 'os shing mchog tu bde ba ni yid bde ba'i ngo bo yin pas na mchog tu bde ba ni bcom ldan 'das nyid de/ bde ba'i sgrar brjod do/ /bdag dang gzhan gyi don phun sum tshogs pa gsungs pa ci 'di dag lha dang gzhan gyi khyad par yin nam zhes rtog par byed pa la/de gsal bar bya ba'i phyir/ 'di ni zhes bya ba la sogs pa gsungs pa yin te/ ni zhes bya ba ni nges par gzung ba'o/ rang nyid 'khrungs pas na rang byung ste gzhan las byung ba ma yin no zhes bya ba'i don to/ /de yang / sems can kun gyi sems gang ni/brtan pa'i phyir na sems dpar bshad/ /mnyam par gzhag pas ting 'dzin te/ /nges pa las ni rdo rjer gyur/ /sems dpar byin brlabs sbyor ba yis/ /slar yang rdo rje sems dpar gyur/ /zhes ji skad gsungs pa lta bu ste/ de yang gang gis kyang ma byas pas na rang byung zhes bshad do//skal ba phun sum tshogs pas na bcom ldan no/ /yang na bdud bzhi la sogs pa bcom pas na bcom ldan zhes bya ba 'am/ 'dod chags la sogs pa nyon mongs pa bcom pas na bcom ldan no/ /yang na dbang phyug la sogs pa'i yon tan drug dang ldan pas na bcom ldan te/de yang / dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa ste/ /drug po de la ldan zhes bya/ /zhes smos pa yin no/ /dpa' bo zhes bya ba ni dpa' bo 'di zhes sbyar te/ dpa' bo nyid la sbyar ba gzhan dang ldan pa rnam par bcad pa'i don yin te/dper na srid sgrub nyid gzhu 'dzin pa yin gyi/ gzhan ni ma yin no zhes bya ba lta bu'o/ /yang na dpa' bo nyi shu rtsa bzhi'i bdag nyid can yin pas na gzhan ma yin pa nyid du gsungs te/ de nyid kyis na/ /mkha' 'gro dra ba'i sdom pa yin//zhes bya ste/ bcom ldan 'das so/ /da ni 'khor lo mnyam pa'i bcom ldan 'das de'i bskyed pa'i rim pa bstan par bya ba'i phyir/ sgra yi tshul las nges 'byung zhing / /zhes bya ba nas/ rgyud las gsungs pa mnyan par gyis/ /zhes bya ba'i bar du gsungs pa yin te/de yang bla ma'i man ngag las mdor bsdus nas bstan par bya ste/ de'i rim pa ni 'di yin no/ /dang por re zhig yid dang rjes su mthun pa'i gnas su 'dug la bdud rtsi lnga'i ri lu khar bcug ste/ sngags pa lho phyogs su mngon par bltas te/ shin tu 'jigs su rung ba'i dur khrod chen po'i sa gzhi sprul la//sems can thams cad la phan pa dang bde bar bya ba'i phyir dpal he ru kar gyur par bya'o zhes lan gsum brjod la/ skad cig gis yi ge hUM las bskyed pa 'chad par 'gyur ba'i rang gi lha mo dang yang dag par ldan pa'i phyag rgya chen po'i gzugs su sprul te/A li dang kA li lan gsum brjod la he ru ka zhes bya ba'i yi ge gsum/ spyi bo dang / lkog ma dang / snying gar rim pa bzhin bkod do/ /chos thams cad ni rgyu dang bral ba'o zhes bya ba dang / chos thams cad ni rtog pa dang bral ba'o zhes bya ba dang / chos thams cad ni gang na yang mi gnas so zhes bya bar rang gi bdag nyid dang /de bzhin du phyi rol gyi brtan pa dang g.yo ba'i dngos po rnams mi snang bar bya'o/ /de nas sngon gyi smon lam gyi dbang gis oM AHhUM zhes bya ba'i yi ge gsum nam mkha'i phyogs su steng dang 'og gi rim par nye bar dmigs la/hUM yongs su gyur pa las rdo rje/ rdo rje de'i lte bar hUM gnas pa las byung ba'i yi ge'i 'od zer de lta bus khor yug gi mthar thug pa'i bar gyi nam mkha'i khams thams cad khyab ste/ sems can thams cad kyi don byed pa la 'jug pa'i lcags kyu'i rnam pa can 'od zer rnams kyis slar yang yi ge gsum po der zhugs la/oM yang AHla zhugs/ AHyang rdo rje la zhugs pa'i rim gyis rdo rje rtse mo la sogs pa nas rdo rje'i lte bar ro/ /rdo rje'i lte ba yang yi ge hUM la'o/ /U ni ha la'o/ /ha ni mgo la'o/ /mgo bo yang zla ba phyed pa'i rnam pa la'o//de yang thig ler ro/ /thig le yang sgra la'o/ /sgra yang sgra tsam la zhugs la/ /sgra tsam gyis dmigs pa yang spangs par bzhag la/ snod kyi 'jig rten rnam par dag par bya ba'i phyir/ ya ra wa la las rlung dang / me dang / chu dang / gser gyi dkyil 'khor la sogs pa bskyed la/de'i steng du yi ge ka las rus sbal lam thod pa/ de'i steng du a las sna tshogs rdo rje/ de'i steng du paM las pad+ma 'dab ma brgyad pa/ /de'i steng du suM las ri rab zur bzhi pa/ rin po che sna bzhi'i rang bzhin can/ de'i steng du yang pad+ma'i lte ba la A li kA li yongs su gyur pa zla ba dang nyi ma'i dkyil 'khor bsams la/nam mkha'i phyogs su gnas pa'i sgra tsam las yi ge hUM rim bzhin du zla ba'i dkyil 'khor bsams la/ de yongs su gyur pa las bcom ldan 'das rdo rje phag mo dang yang dag par ldan pa/ phyag bcu gnyis pa/ dang po'i phyag gnyis na rdo rje dang dril bu dang ldan pas lha mo la yang dag par 'khyud pa/ phyag gnyis kyis glang po'i pags pa khrag 'dzag pa'i gos rgyab tu 'dzin par mdzad pa/ g.yas kyi gsum pa dang / bzhi pa dang / lnga pa dang / drug pa na rtse gsum pa dang /dgra sta dang / gri gug dang / Da ma ru bsnams pa/ g.yon gyi bzhin kha T+wA ga dang / thod pa dang / zhags pa dang / tshangs pa'i mgo bo bsnams pa/ phyag rgya drug dang ldan pa/ ral ba'i cod pan gyis brgyan pa/ spyi bor sna tshogs rdo rjes mtshan pa/ g.yon phyogs su zla ba phyed pa'i bye brag dang ldan pa/thod pa lngas mchog tu mdzes pa/ rdo rje'i phreng ba can/ spyan gsum pa/ zhal dang po dang sku mdog thams cad char sprin gyi mdog can/ zhal g.yon ljang gu/ zhal rgyab dmar po/ zhal g.yas pa ser po/ A li dang kA li yongs su gyur pa mi mgo'i phreng ba'i mchod phyir thogs mnga' ba/stag gi pags pa 'phral du bshus pa'i sham thabs bsnams pa/ g.yas brkyang bas 'byung po'i bdag po mnan pa/ pad ma'i lte ba la bzhugs pa'o/ /'dab ma la gnas pa'i lha mo bzhis yongs su bskor zhing 'khor lo gsum gyi dbus na bzhugs pa/rdo rje phag mo ni thal ba med pa/ phyag rgya lnga dang ldan pa ste/ rus pa'i ska rags la sogs pas brgyan pa gcer bu skra grol ba'o/ /rdo rje thogs pa'i phyag g.yas pa gyen du brkyang bas mgul nas 'khyud pa/ mi'i khrag gis gang ba'i rgyu ma 'chang ba/ zhal gnyis pa phyag g.yon pa na ka pA la bsnams pa/g.yon brkyang bas bzhugs pa'o/ /khyad par gzhan dag ni rgya cher gzhan dag las shes par bya'o/ /nges 'byung ba zhes bya ba ni/ sgra'i tshul las byung ba dang gzhi mthun pas lnga pa'i tshig gis bstan pas dbang gnyis kyis sbyor ba las byung zhes bya ba'i don to//de bas na nam mkha'i phyogs la gnas pa'i sgra las gang gi phyir nges 'byung zhing zhes bya ba'i tshig mang po smos pa ni sgra gcig las 'khor lo gsum dang ldan pa'i dpa' bo dang mkha' 'gro ma thams cad 'byung ba yin no zhes shes par bya ba yin pa'i phyir ro//ji lta bu zhe na/ dam tshig spyod pa'i spyod yul yin/ /zhes gsungs te/ dam tshig ni rnam pa gnyis te/ bsrung bar bya ba dang / bza' bar bya ba'o/ /de dag gi spyod pa ni kun du spyod par 'jug pa'o/ /de nyid ni spyod yul te/ yul du gyur pa gang yin pa de la de skad ces bya'o//yang na dam tshig ni lha mo rnams te de rnams kyi spyod pa yin la/ de'i yul ni spyod yul te dpa' bo rnams so/ /gang gi phyir de nyid kyis na/ sbyor nyid cho ga'i ye shes ni/ /rgyud las gsungs pa mnyan par gyis/ /zhes bya bar sbyar ro/ /'jig rten gsum du rnyed dka' ba//zhes bya ba ni don ji bzhin nyid de/ mtho ris dang / mi yul dang / sa 'og rnams su zhes bya ba'i bar du'o/ /yang na 'jig rten gsum po dag na dpa' bo la sogs pa'i 'jig rten gang yin pa de rnams kyi ye shes zhes bya bar sbyar ro/ /thog ma dbus mthar yang dag gnas//zhes bya ba ni/ thugs dang / gsung dang / sku la rnam par gnas pa 'am/ /yang na lha thams cad ro gcig pa nyid kyis cho ga'i ye shes gsungs pa yin no/ /shes rab thabs kyi kun sbyor ba/ /zhes bya ba la/ shes rab ni rdo rje phag mo la sogs pa mkha' 'gro ma thams cad do//thabs ni bcom ldan 'das la sogs pa'i dpa' bo thams cad de/ de dang lhan cig tu kun du sbyor ba'i cho ga'i ye shes gang yin pa de la de skad ces bya'o/ /ji bzhin zhes bya ba la ji ltar sngags bzlas pa dang / bsam gtan la sogs pa dang ldan pa de bzhin du'o//sbyor nyid ces bya ba ni de lta bu'i cho ga'i ye shes 'ba' zhig tu ma zad kyi rnal 'byor pa yang ston te/ ji ltar nam mkha' dang mnyam pa'i rgyud las gsungs pa de thams cad rgyud 'dir mnyan par gyis zhes sbyar ro/ /de nyid kyis na rnyed par dka'/ /zhes gsungs pa yin no//sogs pa'i sgras ni dkyil 'khor dang / sbyin sreg dang / phyi rol gyi sman la sogs pa'i yo byad rnams bsdu'o/ /sbyor ba'i sgras ni dbang du bya ba la sogs pa'i dbang du byas nas so so'i sbyor ba gsungs pa de yin par bshad do/ /mnyan par gyis zhes bya ba ni la la dag bcom ldan 'das nyid kyis yum rje btsun ma la gsungs pa yin no zhes 'dod do//gzhan dag ni gnyis ka gsung gcig tu 'di ltar gcig pa nyid yin no zhes zer ro/ /gzhan dag ni bcom ldan 'das ma yum ni bcom ldan 'das la ston par mdzad pa yin te/de nyid kyis na mchod pa bzhi pos bcom ldan dpa' bo chen po zhes bos pa yin no/ /da ni srub pa dang srubs pa'i rim pa'i mthar thug pa 'byin pa'i gnas skabs su bla na med pa'i mchod pa'i cho ga bstan pa'i phyir/ dbugs 'byin zhes bya ba la sogs pa smos te/bar ma zhes bya ba ni pad+ma la bya la/ dbugs 'byin pa'i mchog ni ro 'dzin 'jog pa'o/ /de ji lta bu zhe na/ dri chu dang bcas pas kyang zhes bya ste/ byang chub kyi sems dang bcas pas sam zhes bya ba'i don to/ /dus su zhes bya ba ni 'byung ba'i gnas skabs kyi dus so/ / khyad par du zhes bya ba ni rdo rje dang pad+ma 'dus pa'i khyad par 'di zhes bya ba'i bar du'o/ /rigs ldan zhes bya ba ni rgyud kyi dam tshig gi skad de/ rdo rje phag mo'i rang bzhin can gyi phyi'i lha mo la mchod pa bya ste/ ji ltar yang dag par mgu ba skye bar 'gyur ba de ltar bya'o zhes bya ba'i don to/ / yang zhes bya ba ni gang gi phyir gyi don to/ /pho nyar lhan cig skyes dngos grub/ /mchog dang 'bring dang tha ma ste/ de bas yid nang chud pa yis/ /'dod pa'i dngos grub bsgrub par bya/ /zhes bya ba yin no/ /de'i dgongs pa ni 'di yin te/ phyi'i lha mo 'khor lo gsum mngon sum du gnas pa la thams cad kyis kun du dga' ba'i yid du byas pa yin no//rang rdzas thig le zhes bya ba nas/ bsam gtan gyis kyang 'grub par 'gyur/ /zhes bya ba'i bar du don sgra ji bzhin pa nyid yin pas go sla ba kho na yin no/ /shin tu mnyam gzhag sgrub pa pos/ /zhes bya ba ni rnam pa thams cad du sgrub pa pos rnal 'byor la yid goms par bya'o zhes bya ba'i don to//dam tshig ni lha mo ste/ rtag tu bskyang bar bya ba ni 'tshe ba med pas na dus thams cad du zhes bya ba'i don to/ /dam tshig nyams pas dkyil 'khor du/ /dbang bskur dngos grub thob mi 'gyur//zhes bya ba la/ /dam tshig gi sgra ni bsrung bar bya ba dang / bza' bar bya ba ste nyams pas so/ /dam tshig gi lha mo rnams dang / de'i rjes su 'gro ba'i rnal 'byor ma rnams te nyams pas so/ /dbang bskur ba ni nye bar mtshon pa tsam mo/ /lhag ma rnams ni go sla'o/ / da ni sbrang rtsi zhes bya ba la sogs pas bdud rtsi lnga gsungs pa yin te/ sbrang rtsi ni sa bon no/ /mtshal ni khrag go/ /ga pur bcas ni sha chen dang bcas pa'o/ /yang dmar zhes smos pa ni gci ba'o/ /tsan+dan ni bshang ba ste/ yang tsan+dan dmar po zhes zlas dbye ba'o/ /de dag dang sbyar ba zhes mtshams sbyar ba'o//tshogs kyi nang du zhes bya ba ni 'khor lo gsum gyi dbus su'o/ /yang na sbyor ba gcig 'dzin pa'i dbus su'o/ /bzhugs pa ni nyams su len pa zhes bya ba'i don to/ /ni zhes bya ba ni sbyor ba gzhan rnam par bcad pa'o/ /thams cad kyang yin la rdo rje yang yin pas thams cad rdo rje ste/sangs rgyas bcom ldan 'das so/ /de rnams kyi mtshan ma ni mtshan mar gyur ba'i dam tshig go/ /mtshan ma'i sgra ni pad+ma'i snod de dung chen po zhes bya ba'i bar ro/ /de 'dzin pas na/ thams cad rdo rje'i mtshan ma 'dzin/ / zhes bya'o/ /'di dag ni bdud rtsi lnga'i khyad par ro/ /sbom po mtha' ltag rtse sbyar bas/ /zhes bya ba ni mthe bo dang srin lag dag gis myang bar bya ba'o zhes sbyar ro/ /rnal 'byor rig pa zhes bya ba ni lha'i rnal 'byor dang ldan pa'i sngags pas zhes bya ba'i don to/ /zhi ba'i btung ba zhes bya ba ni zhi ba'i btung ba las 'di dman pa ma yin te/de lta mod kyi ji ltar bram ze dag mchod sbyin gyi dus su shin tu dag byed du btung ba de la len par byed de/ rnal 'byor rig pa zhes bya bar dgongs te/ de lta bu'i sngags pas dngos grub thob par 'gyur ro//rtag pa zhes bya ba ni go sla ba nyid do/ /mchod pa bzhi zhes bya ba ni/ phyi dang / gsang ba dang / yid dang / nang gi bdag nyid can gyi mchod pa'o/ /yang na phyag rgya chen po dang / dam tshig gi phyag rgya dang / chos kyi phyag rgya dang / las kyi phyag rgya ste/ bzhi po de dag gis mchod pa ni mchod pa bzhi'o//de bzhin du/ dbang gnyis snyoms par 'jug pa yi/ /zhes bya ba ni mnyam pa nyid du gyur ba'o/ /dpa' bo zhes bya ba ni bcom ldan 'das la bod pa'o/ /de nyid 'dzin zhes bya ba ni rnal 'byor spyod pa'o/ /yang na de kho na nyid ni gzhan ma yin pa nyid do/ /de nas 'khor lo gsum 'dzin pa thams cad kyis lhan cig tu ro gcig par 'dzin pas lha dang mi'i bde ba gcig tu bsdu ba byas pas so//rdo rje ni bcom ldan 'das te de 'dzin par mdzad pas na rdo rje 'dzin te rnal 'byor spyod pa'o/ /bcu drug char yang mi phod do/ /zhes bya ba de lta bu'i rnal 'byor pa rnams kyi bde ba'i cha gcig kyang rnal 'byor gzhan 'dzin pa dag gis char yang mi phod cing thob par mi 'gyur ro zhes bya ba'i don to//le'u dang po'o// //da ni dkyil 'khor bri ba'i gnas bstan pa'i phyir/ de la lci ba ma lhung bas/ /zhes bya ba la sogs pa gsungs pa yin te/dur khrod du ni kun spyod cing / /zhes bya ba ni gang du dkyil 'khor 'dri ba der dur khrod chen po lta bur bsgom par bya'o zhes bya ba'i don to/ /ro bsregs sol ba zhes bya ba la sogs pas ni tshon gyi bya ba gsungs pa yin no/ /mtshan nyid thams cad ldan zhes bya ba ni slob dpon gyi mtshan nyid dang ldan zhes bya ba'i don to//yang dag shes shing zhes bya ba ni so sor snang ba skyes par gyur pa'o/ /rgyud ces bya ba ni rgyud kyi don mtha' dag la mkhas pa'o/ /yang na rdo rje dang pad+ma 'dus par ldan pa'i gsang ba'i dbang bskur ba'i dus dang ldan pa'o//dpal ldan khrag 'thung gsang sngags shes/ /zhes bya ba ni sngon du bsnyen pa byas pa dang / the tshom med pa khro ba med pa zhes bya ba la sogs pa'i slob dpon gyi mtshan nyid bshad pa dang ldan pa'o/ /thod pa'i zhes bya ba la sogs pas ni yan lag tu bya ba'i rtags ni spyi'i khyad par du 'gyur ro zhes bya ba'i tshul gyis ni phyag rgya drug dang ldan pa'i phyag rgya chen por ston to//dum gcig spyi bor brgyan pa dang / /zhes bya ba 'dis ni thod pa'i phreng ba yod par ston to/ /'di nyid kyis ni dum bu gcig pa'i thod pa mchog nyid du bshad do/ /rgyud thams cad du phyag rgya chen po'i mtshan nyid la sogs pa 'khrug pa'i tshul gyis ston la//de ni bla ma'i man ngag gis go rims ji lta ba bzhin du yongs su rdzogs par spyad par bya'o/ /de nyid kyis na blo dang ldan pa bdag nyid dpal he ru kar byas nas gsungs pa yin la de'i 'og tu ni/ dpal ldan he ru ka dran bya//zhes bya ba ni dkyil 'khor rnam par dgod pa kun du spyad par bya'o zhes bya ba'i don to/ /de nyid kyis na/ 'khor lo 'di ni snying gar dgod/ /ces gsungs pa yin no/ /de ltar bdag nyid go bgos nas/ /zhes bya ba ni rang gi lus la 'di ltar go bgo'o/ / ra ba rnams ni phyogs su dgod/ /ces bya ba ni/ A li kA li'i dam tshig brjod pa'i rjes thogs la/ zhe sdang gi ra ba dang / 'dod chags kyi ra ba dang / gti mug gi ra ba rnams dgod par bya'o/ /phyis khang pa brtsegs pa la sogs pa rdzogs pa'i dus ni rdo rje'i ra ba dang / pad+ma'i ra ba dang / 'khor lo'i ra ba dgod par bya'o zhes bya bar dgongs so//de ltar go bgos par gyur nas/ 'og tu 'ang mtshon cha dgod par bya/ /zhes bya ba la/ sa 'og gi mthar thug gi bar du sa gzhi rdo rje'i rang bzhin du brtan par bya'o/ /'khor lo'i bdag nyid mtshon cha mnyam/ /zhes bya ba ni 'khor lor gnas pa dang / de bzhin du bdag nyid mtshon cha'i dra bas go bgo bar bya'o//steng du mda'i dra ba zhes bya ba la/ mda'i dra ba ni rdo rje'i steng du ste/ de lta bu'i mda'i dra ba steng du dgod par bya'o/ /yang bdag nyid ces bya ba ni ye shes sems dpa' zhugs pa'i 'og tu gzhal yas khang nang du bzhag la dra ba la sogs pa nye bar bstan par bya'o zhes bya bar dgongs so//de ltar zhes bya ba la sogs pas ni dkyil 'khor bri ba la sngags pa 'jigs pa med pa nyid du ston to/ /sngags dang phyag rgyas rnam brgyan nas/ /zhes bya ba ni/ legs par bslabs shing mkhas pa'i phyi'i lha mo dang lhan cig ces bya ba'i don to//dngos grub ces bya ba la sogs pa ni go sla'o/ /de nas zhes bya ba la sogs pa ni dkyil 'khor gyi thig gdab pa la spyad par bya'o zhes bya bar dgongs so/ /mkha' 'gro ma yi dra ba mchog/ /ces bya ba ni 'khor lo gsum la gnas pa thams cad ces bya ba'i don to//mchod ces bya ba ni mchod pa bya ba'am sbyin par bya ba'o/ /de'i dbus su zhes bya ba la sogs pa ni don ji lta ba nyid yin no/ /mdangs dang ldan zhing zhes bya ba la sogs pas ni phyag rgya chen po'i mtshan nyid rgyas par bstan te/mdangs dang ldan zhes bya ba ni gzi brjid dang bcas shing shin tu 'bar ba zhes bya ba'i don to/ /lhag ma ni don ji lta ba nyid do/ /smin ma bzang po rdo rje dbyes/ /zhes bya ba la/ smin ma bzang zhing mnyam pa ni smin ma bzang po ste/ rdo rje ltar dbyes pa gang la mnga' ba de la de skad ces bya'o zhes bya bar sbyar ro//yang na dpral ba'i rdo rje phreng ba'i mthar thug pa'i bar du smin ma dbyes shing gyes pa mnga' ba zhes bya ba'i don to/ /brgya phyed phreng bas rnam par brgyan/ /zhes pa ni mi'i thod pa khrag 'dzag pa lnga bcu'i phreng bas brgyan pa zhes bya ba'i don to//de'i mdun gnas zhes bya ba la sogs pas ni rdo rje phag mo gsal bar bstan pa yin no/ /rab 'jigs 'jigs byed che la phyogs/ /zhes bya ba ni dbang phyug chen po la mngon par phyogs par bya'o zhes la la dag 'dod mod kyi/ de ni mi rigs pa nyid yin te/de'i skabs ma yin pa'i phyir dang rdo rje phag mo'i phyag rgya chen po'i gnas skabs yin pa'i phyir ro/ /de bas na don ni 'di yin te/ 'jigs byed chen po ni bcom ldan 'das te/ de la mngon par phyogs pa'i sku dang / gsung dang / thugs kun du 'khyud par mdzad pa'o//lhag ma rnams ni go sla'o/ /phyogs dang phyogs kyi mtshams rnams ni/ /zhes bya ba ni khwa gdong ma la sogs pa yang mchod par bya'o zhes bya ba'i bar du'o/ /de nas bum pa la zhes bya ba la sogs pa ni bum pa gzung ba'i mtshan nyid phyogs gcig nye bar mtshon pa tsam zhig ston pa yin te/rtsa ba nag po med cing lto ba che ba mchu 'phyang ba/ ske ring ba la sogs pa'i mtshan nyid dang ldan pa'o/ /mu tig ces bya ba la sogs pa ni rin po che sna lnga ston pa yin no/ /zangs ma ste zhes bya ba ni bum pa'i khyad par ro/ /lhag ma ni go sla'o//bum pa ma rnyed na ni dgur bya la/ rnyed na ni bum pa sum cu rtsa bdun bya ste/ lA ma la sogs pa'i bum pa bzhi dang / khwa gdong ma la sogs pa'i bum pa brgyad dang / las thams cad pa dang / rnam par rgyal ba'i bum pa ste lha thams cad la re re byas pas sum cu rtsa dgur 'gyur ro//gser dang zhes bya ba la sogs pas ci rnyed pa'i rin po che la sogs pas dkyil 'khor ci mdzes su bya'o zhes bya ba'i don to/ /grong mchog yid 'ong mchod na ni/ /'grub pa nyid du the tshom med/ /ces bya ba la sogs pa ni shin tu go sla'o/ / bdag nyid kun nas sgo'i zhal la ni zhes bya ba ni bdag nyid kyi khyad par te/ dpal he ru ka'i rang gi bdag nyid du bya ba ni bcom ldan 'das ni zhal bzhi pa yin pa'i phyir ro/ /dri chu yis ni legs par gdab/ /ces bya ba ni sngags kyis dag cing dri dang bcas pa'i rdo rje'i chus bdag nyid la legs par gtor bar bya'o zhes bya ba'i don to//mar me brgya ni dbul bar bya/ /zhes bya ba ni sgra ji bzhin pa nyid dam/ yang na rnam pa sna tshogs pa'i dpa' bo'i khyad par la bya ste/ gzhan dag las mar me lnga zhes bya ba dpa' bo lnga la bya ba'i phyir ro/ /nam mkha'i mkha' 'gro ma rnams ni//yid kyis thams cad steng du dgod/ /ces bya ba ni thugs kyi 'khor lo la gnas pa zhes bya ba'i don te/ sems ni nam mkha' la 'gro ba'i ngo bo nyid yin pa'i phyir ro/ /sa steng mkha' 'gro ma gang yin/ /dkyil 'khor kun du dgod par bya/ /zhes bya ba ni steng ni sa'i dkyil 'khor te/de la spyod pa rnams dkyil 'khor kun du zhes bya ba rnam pa thams cad du gsung gi 'khor lo gang yin pa dgod par bya'o/ /gsung gi 'khor lo ni bar na gnas pa'i phyir ro/ /yang sa'i 'og na gnas pa rnams ni don gyi dbang gis sku'i dkyil 'khor la dgod par bya'o zhes shes par bya'o//ma mo thams cad phyogs dang ni/ /zhes bya ba ni sgo bzhi po dag tu/ khwa gdong ma dang / 'ug gdong ma dang / khyi gdong ma dang / phag gdong ma ste/ bzhi po phyogs su rim pa bzhin dgod pa dang / mtshams rnams su gshin rje sreg ma dang / gshin rje pho nya mo dang gshin rje mche ba ma dang /gshin rje 'joms ma ste/ bzhi po rim pa bzhin du dgod do/ /gal te dngos grub ces bya ba la sogs pas ni mchod pa rnam pa lnga ston te/ mar me brgya yang dbul bya zhing / /zhes bya ba ni snga ma nyid du ma bshad la/ dri dang me tog ces bya ba ni mchod pa rnam pa lnga kha bskang ba'i don du gsungs pa yin no//dpal ldan zhes bya ba la sogs pa ni don ji lta ba nyid yin pa'i phyir rnam par ma phye'o/ /rab mnyam gzhag ste zhes bya ba ni mchod pa'i cho ga thams cad la rnam par dag par shes pa'i bar du'o/ /le'u gnyis pa'o// // de nas zhes bya ba la sogs pa la/ slob dpon zhes bya ba ni dkyil 'khor dang nye ba gang dag yin pa de thams cad slob dpon zhes bya ba'i don to/ /ci nus pas ni zhes bya ba la sogs pa ni bla ma la mchod pa ston to/ /dril bu la sogs pas zhes bya bas ni gtso bo las gzhan pa'i slob dpon rnams kyis bya ba'i las gsungs pa yin no//rnga brdung zhes bya ba la sogs pas ni mchod pa'i cho ga nyi shu gsungs pa yin no/ /de yi rigs ni bstan par bya/ /zhes bya ba'i bar du go sla'o/ /de'i rjes thogs la rgyud gzhan las rab tu grags pa'i cho gas dbang bskur ba thams cad rdzogs par byas nas/da ni gsang ba'i dbang bskur ba'i cho ga gtso bo nyid yin pa'i phyir mchod pa bya dgos pas de nas slob dpon zhes bya ba la sogs pas gsang ba'i dbang bskur bston pa yin no/ /rab mnyam gzhag ces bya ba ni bdag nyid dpal he ru ka'i rnal 'byor bstan par bya ba dang /de yang rdo rje phag mo'i sbyor bar bskyed la go cha chen po la sogs pa'i go bgo ba dang / slob ma yang de bzhin du byas la/ nyi ma gnyis pa la slar yang dkyil 'khor legs par mchod de/ byin gyis brlab pa la sogs pa legs par byas nas/dkyil 'khor gyi dbus sam dkyil 'khor dang nye bar khri la sogs pa'am stan bde ba la gnas la gsang ba'i dbang bskur ba brtsam par bya'o/ /phyag rgya mchog ces bya ba ni phyi rol gyi bud med sngags kyi rgyud legs par bslabs pa/ /bza' bar bya ba dang /bsrung bar bya ba la sogs pa'i dam tshig dang ldan pa/ lha'i ting nge 'dzin la legs par gnas shing sbyor ba gcig pa la bya'i/ gzhan dag la ni ma yin no/ /mtshal chen lan gsum bzlas pa yis/ /de la thig le bya ba yin/ /zhes bya ba ni sngar bshad pa'i mtshan nyid dang ldan pa'i phyir lha mo me tog dang ldan pa de dang lhan cig par bad s+ya ma na la sogs pa'i rim gyis ji ltar dga' ba bskyed par gyur pa de ltar rdo rje dang pad+mar 'dus pa'i rim gyis 'byung ba'i gnas skabs su slob ma gdong g.yogs pa la/snying po dang nye ba'i snying po dang phreng ba'i sngags brjod par byas la/ spyi bo dang / dpral ba dang / mig gnyis dang / kha dang / lkog ma dang / snying gar gnas pa'i rdo rje dang pad+mas dbang bskur byar bya zhing / slob mas kyang bdud rtsi bzhin du longs spyad par bya'o/ /de nas de'i 'og tu gdong g.yogs phye la dkyil 'khor bstan par bya'o//de nas gang gi lha'i gnas gang yin pa zhes bya ba ni gsang ba'i dbang bskur ba'i gnas so/ /der de bstan par bya zhes bya ba ni dbang bskur bar rab tu nus pa'i phyi'i lha mo bstan par bya'o/ /yang dag ces bya ba ni rnam par mi rtog pa'i yid kyis so//de nas slob mas kyang de bzhin du brtsam par bya ba yin pa'i phyir ro/ /de nas slob ma rab mnyam gzhag /rab tu btud par byas nas ni/ /g.yon nas brtsams pa'i rim pa yis/ /de nas bskor ba rab tu bya/ /dkyil 'khor dang ni bla ma la//ji bzhin cho gas phyag bya'o/ /zhes bya ba yin te/ ji ltar bla mas slob ma la gsang ba'i dbang bskur byin pa de 'dra ba'i cho gas slob mas bla ma'i phyir de nyid bsgrub par bya'o zhes dgongs so/ /de nas zhes bya ba la sogs pa ni don ji lta ba yin pa'i phyir go sla'o//de kun dpal ldan khrag 'thung gnas/ /zhes bya ba ni dpal he ru ka'i sbyor ba 'dzin pa'i rnal 'byor pa la zhes bya ba'i don to/ /le'u gsum pa'o// //de nas rnal 'byor ma rnams ni/ sa la rnam par rol ba ste/ /zhes bya ba ni 'khor lo gsum la gnas pa'i mkha' 'gro ma rnams kyi so so'i mtshan bstan pa'i phyir gsungs pa ni/brtson chen zhes bya ba la sogs pas rim pa las bzlog ste gsungs pa yin no/ /de bzhin du don thams cad la rang gi ming brjod pa'i sngags zhes bya ba la sogs pas mkha' 'gro ma dang dpa' bo nyi shu rtsa bzhi dang mkha' 'gro ma bzhi dang /khwa gdong ma la sogs pa brgyad kyi rang rang gi mtshan brjod pa la thog mar oM dang tha mar hUM hUM phaT ces sbyar na sngags sum cu rtsa drug tu 'gyur ro/ /yi ge oM ni thams cad gsal bar byed pa yin par bstan pa'i phyir ro/ /rnal 'byor mchog ni 'di mthong na/gzhan dag snying po med rtswar mtshungs/ /zhes bya ba ni shrI badzra he ru ka'i rnal 'byor 'di mthong na gzhan ni rtswa'i khyad par lta bu ste/ srin bus zos pa'i rtswa snying po med pa dang 'dra'o zhes bya ba'i don to/ /grub ces bya ba la sogs pas ni da ltar rdzogs pa'i rnal 'byor pa'i mthu rnams ston pa yin no//grub pa nyid kyis ni/ 'dod pa thams cad byed pa yin/ /zhes bya ba yin te/ mngon par 'dod pa ni don rdzogs par byed pa'i nus pa dang ldan par 'gyur ro/ /dpa' bo nyid 'gyur zhes bya ba ni 'khor lo gsum gyi dbus su chud pa'i dpa' bo ste/pha rol gnon par gyur pa yin la/ grub pa ni/ khyim du dkyil 'khor mthong ba yin/ /zhes bya ba ni dkyil 'khor gyi khang pa bris pa'i dkyil 'khor mthong ba ste/ dbang bskur ba'i cho ga rdzogs pa tsam gyis ji skad bstan pa'i yon tan 'grub par 'gyur na/ /bzlas pa dang bsgom pa la sogs pa la rtag tu goms par byed pa'i dbang gis lta smos kyang ci dgos/de'i che ba nyid bstan pa'i phyir gsungs pa ni/ de shes rtag tu bsgom pa ni/ /zhes bya ba yin no/ /dngos grub ces bya ba ni de'i 'bras bu gsungs pa yin no/ /de bzhin gshegs pas gsungs zhes bya ba ni sangs rgyas bcom ldan 'das ni phyin ci ma log par gsungs pa yin pas 'dir tshad ma nyid du gsungs pa yin no//le'u bzhi pa'o// //da ni 'dir/ sngags kyi tshig ni 'di yin te/ zhes bya ba 'dis ni bcom ldan 'das dpal he ru ka'i rtsa ba'i sngags btu ba'i cho ga bstan pa yin no//A li kA lis mnyam sbyar nas/ zhes bya bas ni dbyangs kyi yi ge ste/ sde tshan rnams kyang mi mnyam pa med cing ma tshang ba med par bri bar bya'o zhes bya ba'i don to/ /sde tshan la ni bsgyur bar bya/ /zhes bya ba ni dang por re zhig sngags kyi gsal byed kyi yi ge rnams btu bar bya'o zhes bya ba'i don to//bzhi bzhi ru ni shes bya la/ /zhes bya ba ni sngags kyi tshig rkang pa brgyad du 'gyur ba'o/ /thub pa mchog gi re mig las/ /der gnas dpa' bo btu bar bya/ /zhes bya ba ni ston pa po dang bstan pa'i tshul gcig pas dpa' bo'i sgras ni sngags la bya bar bshad do//'dod don thams cad sgrub byed pa/ /zhes bya ba ni sngags kyi mthu bstan pa yin no/ /bzhi pa'i lnga pa gang yin dang / /zhes bya ba ni yi ge na la bya'o/ /lnga pa yi ni lnga pa dang / / zhes bya ba ni ma'o/ /lnga pa yi ni bzhi pa dang / /zhes bya ba ni b+ha'o/ /dang po'i gsum pa gang yin dang / /zhes bya ba ni ga'o/ /de bzhin nyi shu rtsa dgu pa/ /zhes bya ba ni wa'o/ /bzhi pa'i dang po gang yin pa/ /zhes bya ba ni ta'o/ /mthar gnas pa yi bzhi pa dang / /zhes bya ba ni wa nyid do/ /de nyid kyi ni gnyis pa ni ra'o//sum cu pa ni sha'o/ /nyi shu rtsa drug pa ni ya'o/ /brgya phyed phyed pa ni ma'o/ /sum cu rtsa gsum pa ni ha'o/ /dang po'i dang po ni ka'o/ /mthar gnas pa yi gsum pa ni la'o/ /dang po'i gsum pa ni ga'o/ /sum cu rtsa gnyis pa ni sa'o/ /bzhi pa'i lnga pa ni na'o/ /lnga pa'i bzhi pa ni b+ha'o//mthar gnas pa yi dang po gang / /zhes bya ba ni ya'o/ /gnyis pa'i gsum pa ni dza'o/ /gsum pa'i dang po ni Ta'o/ /lnga pa'i lnga pa ni ma'o/ /dang po'i dang po ni ka'o/ /de bzhin bcu gcig pa nyid dang / /zhes bya ba ni Ta'o/ /bcu drug pa dang zhes bya ba ni ta'o/ /gsum pa'i dang po ni Ta nyid do//nyi shu rtsa drug pa ni ya'o/ /bzhi pa'i gsum pa ni da'o/ /uSh+ma'i gnyis pa ni Sha'o/ /dang po'i dang po ni ka'o/ /nyi shu rtsa bdun pa ni ra'o/ /nyi shu rtsa brgyad pa ni la'o/ /dang po'i gsum pa ni ga'o/ /lnga pa'i bzhi pa ni b+ha'o/ /sum cu rtsa gcig pa ni kha'o/ /bco lnga pa ni Na'o/ /nyi shu rtsa lnga pa ni ma'o//dang po'i gnyis pa ni kha'o/ /nyi shu rtsa drug pa ni ya'o/ /sum cu rtsa gnyis pa ni sa'o/ /uSh+ma'i tha ma ni ha'o/ /sum cu rtsa gnyis pa nyid ni yang sa nyid do/ /lnga pa'i bzhi pa ni b+ha nyid do/ /gnyis pa'i gsum pa ni dza'o/ /lnga pa'i bzhi pa ni b+ha'o/ /uSh+ma'i gsum pa ni sa'o/ /nyi shu rtsa bdun pa ni ra'o//an+ta s+tha'i dang po ni ya'o/ /nyi shu rtsa gcig pa ni pa'o/ /an+ta s+tha'i gnyis pa ni ra'o/ /sum cu pa ni sha'o/ /lnga pa'i dang po ni pa'o/ /uSh+ma'i dang po ni sha'o/ /de bzhin yi ge d+yA nyid dang / /zhes bya ba ni rang gi gzugs nyid bstan pas bcom ldan 'das ma'i chos kyi phyag rgya'i sa bon gsungs pa yin no//bzhi pa'i dang po ni ta'o/ /uSh+ma'i dang po ni sha'o/ /nyi shu rtsa brgyad pa ni la'o/ /dang po'i gnyis pa ni kha'o/ /gsum pa'i dang po ni Ta'o/ /dang po'i gsum pa ni ga'o/ /bzhi pa'i bzhi pa ni d+ha'o/ /an+ta s+tha'i gnyis pa ni ra'o/ /gsum pa'i lnga pa ni Na'o/ / yi ge byA rang gi gzugs su brjod pa ni bcom ldan 'das kyi chos kyi phyag rgya'i sa bon du bstan to/ /dang po'i bzhi pa ni g+ha'o/ /yi ge brgyad pa ni dza'o/ /bzhi pa'i lnga pa ni na'o/ /lnga pa'i lnga pa ni ma'o/ /dang po'i dang po ni ka'o/ /nyi shu rtsa bdun pa ni ra'o/ /bzhi pa'i bzhi pa ni d+ha'o/ / nyi shu rtsa bdun pa ni ra'o/ /nyi shu rtsa drug pa ni ya'o/ /nyi shu rtsa lnga pa ni ma'o/ /sum cu rtsa gsum pa ni ha'o/ /bzhi pa'i bzhi pa ni d+ha'o/ /lnga pa'i lnga pa ni ma'o/ /bzhi pa'i lnga pa ni na'o/ /dang po'i dang po ni ka'o/ /nyi shu rtsa bdun pa ni ra'o/ /an+ta s+tha'i bzhi pa ni wa'o/ /nyi shu rtsa gcig pa ni pa'o//uSh+ma'i gnyis pa ni Sha'o/ /de bzhin nyi shu rtsa drug pa/ /zhes bya ba ni yi ge ya'o/ /rig pa'i rgyal po zhes bya ba la rig pa ni 'khor lo gsum la gnas pa'i mkha' 'gro ma rnams te/ de rnams kyi rgyal po yin pas na rig pa'i rgyal po ste/ de'i gsang sngags zhes bya ba'i don to//sgrub pa thams cad spangs pa'o/ /zhes bya ba ni bklags pa tsam gyis 'grub par 'gyur ro zhes bya ba'i don to/ /lhag ma ni go bar zad do/ /le'u lnga pa'o// //ya tshogs brgyad pa'i sa bon dang / zhes bya ba la sogs pa ni go char gyur ba'i dpa' bo drug gi snying po btu ba yin te/ya'i tshogs las brgyad pa'i sa bon ni ha'o/ /gug skyed bcu gnyis zhes bya ba ni ma ning bton pa'i gug skyed bcu gnyis rnam par mdzes par byas pa'i sa bon ha dgod pa'o/ /ha hA hi hI hu hU he hai ho hau haM haHzhes bya ba yi ge bar ma dor byas pa zhes bya ba ni/gnyis pa dang bzhi pa dang / drug pa dang brgyad pa dang bcu pa dang bcu gnyis pa phyis pa'o/ /yan lag drug ni he ru ka/ /zhes bya ba ste/ he ru ka'i yan lag drug pa zhes bya ba'i don te/ rten dang brten pa po dbyer med pa'i tshul gyis sam/ don dam pa nyid du'o//dpa' bo drug dang mnyam sbyor ba/ /zhes bya ba ni dpa' bo drug dang mnyam par sbyor ba ni yi ge oM la sogs pa'o/ /yi ge gcig tu yang dag gnas/ /zhes bya ba ni yi ge ha'o/ /gong du yi ge oM bzhag go zhes bya ba'i don to/ /sngags de dag gang zhe na/ de'i phyir gsungs pa ni/oM na maHswA hA bau ShaT/ /hUM hUM phaT dang yang dag ldan/ /sgrub pos snying por shes par bya/ /zhes bya ba yin te/ sgrub pa pos de ltar shes par bya zhes bya ba'i don to/ /dang po'i snying ga nyid du ste/ zhes bya ba ni oM ha zhes bya ba ni rdo rje sems dpa' ste snying ga'o/ / gnyis pa spyi bor shes par bya/ /zhes bya ba ni na maHhi zhes pa rnam par snang mdzad de spyi bor ro/ /gsum pa spyi gtsug dag tu sbyar/ /zhes bya ba ni swA hA hu zhes bya ba 'di ni pad+ma gar gyi dbang phyug ste spyi gtsug tu'o/ /bzhi pa go char gyur pa yin/ /zhes bya ba ni/ bau Sha Ta he zhes bya ba ni phrag pa gnyis dpal he ru ka ste go cha'i tshul yin par shes par bya'o//lnga pa mig tu gyur pa yin/ /zhes bya ba ni hUM hUM ho zhes bya ba ni rdo rje nyi ma ste mig gnyis la'o/ /drug pa mtshon cha zhes byar 'dod/ /ces bya ba ni phaT haM zhes bya ba 'di ni rta mgrin te/ yan lag thams cad la mtshon char bya'o//le'u drug pa'o// //bcu gsum pa ni yi ge o dang sbyar ba'o/ /dbyangs yig bcu gcig yang dag ldan/ /yi ge drug pa brgyan par bya/ /zhes bya ba ni sngags kyi yi ge drug pa e dang sbyar bar bya'o/ /dbyangs kyi bzhi pa nyid dang ni/ /yi ge bdun pa nyid du sbyar/ /zhes bya ba ni sngags kyi yi ge bdun pa i dang sbyar bar bya'o//dbyangs yig bcu gcig pa nyid ni/ /mkhas pa yis ni brgyad par sbyar/ /zhes bya ba ni sngags kyi yi ge brgyad pa e dang sbyar bar bya'o zhes bya ba'i don to/ /dbyangs yig gnyis pa dang ldan par/ /yi ge dgu pa brgyan par bya/ /zhes bya ba ni sngags kyi yi ge dgu pa A dang sbyar zhes bya ba'i don to//dbyangs kyi yi ge gnyis pa nyid/ /yi ge bcu gnyis pa dang sbyar/ /zhes bya ba ni yi ge bcu gnyis pa ha dang sbyar bar bya'o zhes bya ba'i don to/ /dbyangs yig gnyis pa ldan pa ni/ /yi ge nyi shu gcig pa gzung / /yi ge bcu bzhi pa zhes bya ba ni yi ge bcu bzhi pa yi ge la dang sbyar la/yi ge de nyid a dang sbyar bar bya'o zhes bya ba'i don to/ /yi ge nyi shu pa blangs pa dbyangs kyi yi ge las gsum pa dang ldan pa'o/ /yi ge bco lnga pa na dang sbyar na/ yi ge gsum pa dbyangs dang sbyar bar bya'o zhes bya ba'i don to/ / dbyangs yig bco lngar yang dag ldan/ /bcu drug pa zhes bya ba ni yi ge bcu drug pa dang oM du sbyar bar bya'o zhes bya ba'i don to/ /dbyangs yig gsum pa ldan pa yi/ /yi ge bcu bdun pa ru 'dod/ /ces bya ba ni yi ge bcu bdun pa ni yi ge gsum pa i dang sbyar bar bya'o zhes bya ba'i don to//dbyangs yig gnyis pa nyid dang ni/ /yi ge bco brgyad pa ru sbyar/ /zhes bya ba ni go sla ba nyid yin no/ /dbyangs yig gi ni gnyis pa nyid/ /yi ge nyi shu gcig par sbyar/ /lnga pa'i lnga pa nyid dang ni/ /yi ge nyi shu gsum par sbyar/ /dbyangs yig bcu gsum pa nyid ni//yi ge nyi shu bzhi par sbyar/ /zhes bya ba 'di dag thams cad ni go sla'o/ /sde tshan dang po blangs nas ni/ /yi ge nyi shu lnga par sbyar/ /zhes bya ba la/ yi ge nyi shu lnga pa'i rtsa bar ka sbyar bar bya'o zhes bya ba'i don to/ /dbyangs yig gnyis pa dang ldan par/ /yi ge nyi shu rtsa drug 'gyur//zhes bya ba ni dbyangs kyi yi ge gnyis pa dang sbyar bar bya'o zhes bya ba'i don to/ /nyi shu brgyad pa nyid dag ni/ /yi ge bco lnga pa dang sbyar/ /zhes bya ba ni yi ge dang ngar sbyar bar bya'o zhes bya ba'i don to/ /gsum pa dang por yang dag ldan/ /'og gi cha ni me dang bcas/ / zhes bya ba ni yi ge Ta'i 'og tu ra btags pa sbyar bar bya'o/ /de bzhin dbyangs yig gnyis par sbyar/ /zhes bya ba ni Ta de yi ge A dang sbyar bar bya'o/ /yi ge nyi shu rtsa dgu pa/ /zhes bya ba ni Sha'i 'og tu sbyar bar bya'o zhes bya ba'i don to/ /lhag ma ni go sla ba nyid yin no/ /nyi ma zhes bya ba ni ra'i ming nyid yin no//lhag ma ni de nyid du go sla'o/ /mkha' 'gro'i snying ni 'joms pa yin/ /zhes bya ba ni sngags 'di bzlas pa tsam gyis thams cad 'jigs par byed cing mkha' 'gro ma la sogs pa skrag par byed pa yin no/ /oM ni dang por sbyar bar bya'o//hUM hUM phaT ni mthar sbyar ba/ /zhes bya ba ni go sla ba nyid do/ /le'u bdun pa'o// //de nas rang gi bdag nyid kyi/ /dbang po thams cad mnyam sbyar ba/ /mkha' 'gro ma yi dra ba'i sdom/ /'khor lo bde mchog yin par 'dod/ /ces bya ba ni dpal he ru ka nyid can gyi sngags 'khor lo gsum du rnam par gnas pa'i mkha' 'gro ma thams cad kyi ngo bo nyid yin no zhes bya ba'i don to//ha zhes bya ba la sogs pa ni snying po'i sngags yi ge nyi shu rtsa gnyis pa'i go rims bzlog pa'i tshul du nye bar gnas pa yin te/ oM shrI badzra he he ru ru kaM huM hUM phaT DA ki nI dza la saM pa ra swA hA/zhes bya bas shes par bya'o/ /de bzhin du rnal 'byor ma gang dag yin pa'i snying po yang go bzlog pa'i tshul gyis gsungs pa yin te/ de bas na oM haM hraM hraM hUM phaT ces bya ba yin par shes par bya'o/ /yi ge baM zhes bya ba la sogs pa'i don ni 'di yin te/baM gyi dang por ni oM sbyar bar bya ste/ yoM gi dang por ni yi ge haM ngo / /maM gyi dang por ni yi ge hreM ngo / /hriM gi dang por ni hroM ngo / /hUM gi dang por ni hUM ngo / /phaT gyi dang por ni yi ge phaT sbyar bar bya'o zhes bya ba'i don to/ /oM baM ni rdo rje phag mo ste lte ba'o/ /haM oM ni ya mi ni ste snying gar ro//hriM moM ni rmongs byed ma ste khar ro/ /hriM hriM ni g.yo byed ma ste mgo por ro/ /hUM hUM ni skrag byed ma ste spyi gtsug tu'o/ /phaT phaT ni gtum mo ste yan lag thams cad la mtshon cha'i tshul te rnal 'byor ma drug gi snying po'o/ /oM badzra bai ro tsa nI ye swA hA/ bcom ldan 'das yum gyi nye ba'i snying po'o//mkha' 'gro ma yi rig pa che/ /ma byung 'byung bar mi 'gyur ro/ /zhes bya ba ni sngags kyi bdag nyid kyi che ba gsungs pa yin no/ /sa steng na ni rin chen bzhi/ /phreng ba'i sngags ni dam pa yin/ /mkha' 'gro ma yi rig pa che/ /rig pa'i rgyal po he ru ka/ /zhes bya ba las ni dkyil 'khor te/rang dang gzhan gyis bshad pa'i rgyud kyi sngags so/ /rin chen bzhi ni sngags bzhi nyid rin chen no/ /bcom ldan 'das dang bcom ldan 'das ma'i phreng ba'i sngags dang snying po dang nye ba'i snying po dang go cha'i sngags so/ /rgyud du thams cad rmongs par bya ba'i don du ji ltar yang rung bar byas so//de don gyi dbang gis shes par bya'o/ /yang na snying po dang nye ba'i snying po dag go/ /yang na gzhan nyid kyi don to/ /bcom ldan 'das kyi rtsa ba'i sngags smos pa ni gnyug ma nyid de/ mkhas pas ni byang zhing gsal ba ste/ nus pa dang ldan zhes bya ba'i bar du'o//rnal 'byor mar bstan de thams cad byed pa'o/ /de nyid kyis na rin chen te rin po che lta bur gyur pa'i sngags kyi phreng ba ni ji ltar yid bzhin gyi nor bu rin po che ni mngon par 'dod pa ster bar byed pa ltar bcom ldan 'das dang / /yum gyi sngags kyi phreng ba yang de dang 'dra'o zhes bya bar sbyar bar bya'o//de nyid kyis na mkha' 'gro ma/ /zhes bya ba la sogs pas de'i nus mthu gsungs pa yin no/ /rig pa'i rgyal po zhes bya ba ni phreng ba'i sngags kyi ming ste rtsa ba'i sngags la bya'o/ /le'u brgyad pa'o// //de nas rtsa ba'i sngags kyi ni//las mchog go rims ji bzhin du/ /zhes bya ba ni dang por bstan pa'i sngags gang yin pa de'i las kyi sbyor ba de ni bshad par bya'o zhes bya bar sbyar ro/ /'jig rten gsum zhes bya ba la sogs pa ni go sla'o/ /lha thams cad kyi skye gnas zhes bya ba ni dngos grub gsal bar bya ba'i phyir yang smos pa yin gyi/rgyud thams cad la tshig zlos pa'i nyes pa yod pa ma yin no/ /sprin rnams 'thor bar byed pa dang / /zhes bya ba la sogs pa la/ dang por sgra ji bzhin par gzung bar bya'o/ /de'i 'og tu 'di yin te/ /rdo rje dang pad+ma yang dag par 'dus pa'i skabs su sprin rnam par 'thor bar byed pa ni mkha' 'gro rnams dbang du byed pa'o//char 'bebs par byed do zhes bya ba ni byang chub kyi sems kyi rgyun gyis so/ /zlog par byed do zhes bya ba ni 'jog par byed pa ste phyag rgya dang lhan cig gnas pa'o/ /rgya mtsho skems par byed do zhes bya ba ni ngal ba'i gnas su byed pa'o//chu bo rgyun phyogs su bzlog ste 'bab par ston to zhes bya ba ni cung zad 'byung pa 'jog par byed pa'o/ /dbang po zlog par byed do zhes bya ba ni khros na gzhan gyi dbang po mi sdod par byed do/ /sa g.yo bar byed pa ni thams cad chos 'byung ba'i nga rgyal du bya bas bskyod pa'o//shing la 'dzegs te gang du 'dod pa der 'gro bar byed do zhes bya ba ni rig pa dang lhan cig tu nam mkha' la 'gro bar byed pa'o/ /sngags thams cad 'phrog par byed pa dang zhes bya ba ni khams gsum na gang cung zad rang gi khyim na gsang ba bshad pa de thams cad 'khrul 'khor la gnas bzhin du thos so//dngos grub thams cad 'phrog par byed do zhes bya ba la/ dngos grub thams cad ni rig pa 'dzin pa dang 'brel pa ste/ de rnams phrogs nas sdud par byed pa'o/ /khrag 'dren par byed pa dang zhes bya ba ni srung ba dpag tu med pa dang ldan pa'i rgyal po yang 'gugs par byed do//slar yang gtong bar byed do zhes bya ba ni/ slar yang rang gi gnas su 'jog par byed do/ /gzugs brgya stong phrag du ma byed do zhes bya ba ni sems can ma lus pa'i don bya ba'i phyir rang gi lus thabs dang shes rab dang ldan pa las rnam pa de lta bus nam mkha' ma lus par khyab par byed pa 'byin par byed do//'dod na snang bar byed cing 'dod na mi snang bar byed do zhes bya ba la/ lha mo rnams kyi 'dod pas zhes bya ba'i don to/ /khang bzangs dang shing gi rtse mo la sogs pa phye mar byed do zhes bya ba la/ khang bzangs ni pad+ma ste sangs rgyas thams cad kyi gnas yin pa'i phyir ro//shing ni rdo rje ste skyes bu'i tshul chen po yin pa'i phyir ro/ /rtse mo rnams ni pad+ma'i sna rtse ste/ chung ngu dang bar ma dang chen po tsam gyis rdo rje dang pad+ma 'dus pa nyid du byed ces bya ba'i don to/ /dug bdud rtsir byed do zhes bya ba ni dug bdud rtsi ltar ston par byed do//bdud rtsi yang dug tu byed do zhes bya ba ni bdud rtsi dang 'dra ba'i yul rnams la yang dug dang 'dra bar byed pa ste/ tha mal pa'i gzugs kyis spyod cing chags par mi byed do zhes bya ba'i don to/ /zla ba chur byed pa dang zhes bya ba ni byang chub kyi sems 'o ma ltar 'thung ba'o//chu zla bar byed do zhes bya ba ni chu byang chub kyi sems su byas pa'i phyir zhi ba'i btung ba bzhin myong bar byed ces bya ba'i don to/ /dri thams cad 'phrog par byed ces bya ba ni/ /bdud rtsi lnga po de'i dri rnams 'phrog par byed pa'o/ /gang du 'dod pa der 'pho bar byed do zhes bya ba ni dri de gzhan dag tu bram ze la sogs pa'i zas la 'pho bar byed do//da ni sngar gyi don nyid gsal bar bya ba'i phyir/ nam mkha' lding gi gdong dang zhes bya ba la sogs pa gsungs te/ gdong gis nam mkha' lding gi rgyal po dang 'dra bar 'gro zhing song ba'o/ / 'byin par byed cing zhes bya ba ni nam mkha' lding 'gro bar byed pa ni gshog pa gnyis rkyong bar byed la/ de bzhin du zhi ba'i 'dus pas lha mo dang kun du spyod pa ste/ khas byang chub kyi sems blangs nas lha mo'i khar sbyin par bya'o zhes bya ba'i don to/ /mi mchog ces bya ba ni mi mchog gang 'di ltar spyod pa de ni 'jig rten gsum na mchog tu 'gyur ro zhes bya ba'i don to//lag mthil na yod pa'i dpal gang gis kyang 'phrog par mi 'gyur ro zhes bya ba ni de lta bu'i rnal 'byor pa la bzhed pa tsam la rag las pa'i rgyal ba thams cad kyis kyang gzhom par mi nus so zhes bya ba'i don to//rnam pa de lta bu ni zhes bya ba la sogs pa'i don ji lta ba nyid de/ rab kyi mthar thug pa kho na yin pa'i phyir ro/ /dur khrod kyi sol ba la zhes bya ba la/ 'dir man ngag brjod par bya ste/ ba ru ra'i shing gi lho phyogs su gtogs pa'i yal ga sme sha can gyis sta re la sogs pas bcad la mar gyi ngo'i bcu bzhi la mtshan mo bsregs te/bong bu'i gcin gyis bsad la sol ba de dag gi thal ba blangs te legs par bzhag nas de'i 'og tu sngags gong ma'i cho ga bzhin du byas na de'i 'bras bu mi bzlogs pa nyid du 'gyur ro/ / a ti muk+ta ka'i lcug ma la zhes bya ba la 'dir man ngag 'di yin te/ zla ba gzas zin pa'i tshe sngags 'bum bzlas pa'i sngags pas a ti muk+ta ka'i steng du 'dug pa la bsrung ba la sogs pa byas te/ bu mo gtsang mas bkal ba'i srad bu dmar po bya ste/ nub phyogs su gtogs pa'i yal ga srad bu des dkris la phyogs gcig tu sngags pa gcer bu skra grol bas zla ba gzas zin pa nas brtsams te//ma btang gi bar du yan lag de lag pa g.yon pas bzung la sngags rgyun mi 'chad pa bzla bar bya'o/ /de'i 'og tu mtshon gyis bcad la ji skad du bshad pa'i cho ga bya'o//rtse mo dang rtsa ba shes par byas na gang rtse mo de ni 'ong bar 'gyur la/ /rtsa ba ni ldog par 'gyur ro/ /lhag ma ni don ji lta ba nyid do/ /zas dang skom zhes bya ba la sogs pas ni sgrub pa pos rnyed par sla ba nyid thams cad du gsungs pa'o/ / le'u dgu pa'o// //de nas zhes bya ba la sogs pas ni sgrub pa po'i sku gsum la gnas pa nyid bshad do/ /de la man ngag ni 'di yin te/ hUM gcig pu las bskyed pa'i 'khor lo gsum la gnas pa'i skabs ni chos kyi sku'o/ /thams cad sku gcig pu la gnas pa nye bar bsdus te/ go cha chen po'i go bgos nas bzlas pa'i gnas skabs ni longs spyod rdzogs pa'i sku'o/ /de'i 'og tu snying ga'i pad+ma'i zla ba la A li kA li'i spro ba dang bsdu ba la sogs pa'i gnas skabs ni sprul pa'i sku'o/ /ye shes longs spyod thob par 'gyur/ /zhes bya ba la/ ye shes kyi longs spyod ni nye bar longs spyod pa ste/de thob par 'gyur ba'o/ /de yang dpal he ru ka dang 'dra bar 'gyur ba'i bar du'o/ /lhag ma rnams ni go sla'o/ /gsang sngags 'di zhes bya ba la sogs pas ni snying po'i sbyor ba ston to/ /de la snying po ni gces pa la bya'o/ /lhag ma rnams ni don ji lta ba nyid do//le'u bcu pa'o// //skyes bu gang zhig ces bya ba la sogs pas ni phyugs kyi mtshan nyid ston pa yin no/ /bden par smra ba dang mig mi 'dzums pa zhes bya ba ni gzhan dag gi khu ba myur du 'byung bar mi 'gyur ro zhes zer ro/ /mig yun ring por gdangs pa ni myur du mig 'dzums par mi 'gyur ro zhes zer ro//gzhan ni go sla'o/ /le'u bcu gcig pa'o// //mi ro'i rkang mthil gyi zhes bya ba la sogs pa ni mi snang ba'i sbyor ba'i dus su ri lu bya ba ston pa yin no/ /lcags gsum zhes bya ba ni/ gser dang / dngul dang / zangs la sogs pa'o/ / mdzub mo'i rtse mo dang zhes bya ba la sogs pas ni khrag 'dren pa gsungs pa yin no/ /de'i rim pa ni 'di yin te mi'i thod pa blangs la sngags pas sngon du bsnyen pa byas la skad cig gis rdo rje drag po'i sbyor bas yi ge hUM zlos pa nyid dang / rang gi sna bug g.yas pa nas khaN+Da ro ha lag na mtshon thogs pa phyung la/des gang gi ming smos pa'i gnas lnga'i rtsa sbubs su bcug pa de'i khrag gi rgyun gyis thod pa yongs su gang bar bsgom mo/ /yang gso zhing 'tsho bar bya ba'i phyir g.yon pa'i mdzub mo de nyid 'jam zhing zhi ba'i gzugs kyis bsgrub par bya ba de nyid yongs su gang bar bsgoms na bde bar gnas par 'gyur ro//mngon par bzlas te zhes bya ba la sogs pas ni klad gzer du bya ba nyid de gsal ba nyid do/ /thod pa 'o mas bkang na zhes bya ba ni gnas skabs te 'o ma'am chang gis bkang ba'o/ /gi wang ni gtso cher smos pa dag ste/ sbyor ba'i phreng ba'i khyad par thams cad don ji lta ba bzhin no//'di dag ni rnal 'byor pas nus pa thob par gyur pa yin no/ /gang gi nus pa thob par ma gyur pa de'i tshe shin tu mnyam par gzhag pas yi ge re re zhing bzlas brjod 'bum byas shing cho ga dang rjes su mthun par khaN+Da ro ha der bzhag la yid kyis mnyam par gzhag pa byas la cho ga thams cad bya'o//le'u bcu gnyis pa'o// //rang gi khrag la lan gsum bzlas nas khar bcug la phyir phyung ste thig le byas na khrag 'dren par byed do/ le'u bcu gsum pa'o// //rnal 'byor ma ni ma ma'i gzugs/ /zhes bya ba la sogs pa ni mngon par 'dod pa'i sbyor ba la dmigs pas phyugs la lta ba yin mod kyi 'on kyang bong bu'i sbyor ba'i rnal 'byor lhag par gsungs pa yin no//de la man ngag gi rim pa ni 'di yin te/ ji ltar dbang bskur ba'i don du dkyil 'khor ra bzlum por bskor ba de ltar blang bar bya'o/ /de la pad+ma 'dab ma brgyad pa'i lte ba'i dbus su A li kA li yongs su gyur pa'i yi ge hUM dang /phyogs kyi 'dab ma bzhi la snying po dang nye ba'i snying po gnyis ka dang / /mtshams kyi 'dab ma bzhi la khrag gis thod pa yongs su gang ba dang rtsibs nyi shu bzhi la khaN+Da ka pA la la sogs pa'i sngags bzhi bcu rtsa brgyad dang / rtsa ba'i thig gi nang du khwa gdong ma la sogs pa brgyad kyi sngags dang /rtsa ba'i thig gi steng du sgo bzhi'i gnas su gnod mdzes kyi tshig bzhi po rim bzhin bya ba dang / ra ba'i phyogs gnyis su rtsa ba'i sngags so/ /ra ba'i phyi rol dang sgo'i steng dang / phyi rol gyi sgo khyud la mtshams brgyad du go cha'i sngags gnyis po dang /ra ba zlum po la bcom ldan 'das yum gyi rtsa ba'i sngags dang / de'i phyi rol dang 'od zer lta bu pul+li ra ma la ya la sogs pa go cha chen po'i sa bon gyis bskor la/ 'khor lo de'i dbus su 'bras phye las byas pa'i bong bu'i gzugs brnyan byas pa bzhag ste til mar dang rgya skyegs kyi khu bas byugs la/kha nas khrag 'dzag pa'i bong bu'i sbyor brgyud las bshad pa'i rim gyis dmigs la mtshams bzhir mar me sbar te/ 'di las bshad pa'i mngon par 'dod pa'i sngags kyis sngon du bsnyen pa byas nas sngags rgyun mi 'chad zlos shing gzugs brnyan la bltas na der snang bar 'gyur te 'di ni man ngag go//de yi rim pa'i gtor ma byas/ /zhes bya ba la/ bza' bar bya zhes bya ba'i don to/ /le'u bcu bzhi pa'o// //da ni/ de nas sdom pa thams cad la/ /zhes bya ba la sogs pas yi ge'i brda ston pa yin te/ de ni don ji lta ba bzhin no/ /de la Da dang Di zhes bya ba ni skabs kyi rjod byed yin par shes par bya'o/ /lA ma yin zhes bya ba ni/ da ni lA ma'i rigs las byung ba yin zhes bya bar dgongs so/ /byin pa zhes bya ba ni khyed dang lhan cig yang dag par sbyor ba 'dod do zhes pa'o/ /le'u bco lnga pa'o// //dam tshig mchog ni dam tshig dam pa'o/ /yid ni rab tu dga' byed pa/ /dam pa rnams la sbyin par bya/ /zhes bya ba ni rang gi dam tshig brtags la lha mo rnams kyi 'dod pa'i rjes su 'jug par bya'o zhes dgongs so/ /de nas zhes bya ba la sogs pas ni lha mo rnams kyi rang gi dam tshig dang /gzhan gyi dam tshig gi mtshan nyid ston te/ 'di dag thams cad ni go sla'o/ /de'i rigs las byung ba zhes bya ba ni bde bar gshegs pa'i bstan pa la zhugs pa zhes bya ba'i don to/ /dpa' bo'i bzang rjes 'gro zhes bya ba ni dpal he ru ka'i rigs las byung ba zhes bya ba'i don to/ /dpal bo'i blo ni lha grangs dang yang dag par sbyar ba'o//de ni rdo rje'i rigs byung yin/ /zhes bya ba ni rdo rje phag mo'i rigs las byung ba'o/ /de bzhin gshegs rigs rjes 'gro yin/ /zhes bya ba ni rnam par snang mdzad kyi rigs las byung ba'o/ /de ltar bdun po ngas bshad pas/ /zhes bya ba la sogs pas ni 'di dag dang ldan pa'i sgrub pa po la 'os pa nyid du gsungs pa yin no//rigs kyi rig pa'i yi ge yang / /rigs ni drug tu gyur pa yin/ /zhes bya ba ni rigs de sgrub pa po'i rig ma zhes bya ba ste/ lha mo grogs su gyur pa de nyid ni yi ge nyid du brtags pa yin no/ /mi 'jigs pa'i ngo bo yin pa'i phyir ro//de dag rigs su gyur pa yin/ /zhes bya ba ni kha dog drug 'byung ba yin zhes bya ba la rnam pa drug tu 'gyur ba yin no zhes bya ba'i don to/ /rang gi phyag rgya zhes bya ba la sogs pa ni rigs drug gi mtshan nyid yin te/ go sla ba nyid yin no/ /le'u bcu drug pa'o// // de nas rnyed dka' rnal 'byor ma/ /de bzhin mkha' 'gro ma rnams kyi/ /zhes bya ba ni rnal 'byor ma rnams dang mkha' 'gro ma rnams kyis rnyed par dka' ba'o/ /bdud rtsi lnga rnams yang dag byung / /zhes bya ba ni bdud rtsi lnga la goms pas rnyed par sla bar 'gyur ro zhes dgongs so/ / ya mi ni la sogs pa bdun dang / gzugs can ma la sogs pa bdun gyi sku la sogs pa'i mtshan nyid spyi dang khyad par bshad pa yin te/ gang gis shes pa tsam gyis de sgrub pa po'i bsgrub par bya bar 'gyur ba'o/ /'di dag gi rigs kyi phyag rgya ni thod pa la sogs pa lnga'i ni re re ma yin zhing ji ltar 'dod pa nyid do//'khor lo ni so la'o/ /rdo rje ni skrag byed ma'o/ /le'u bcu bdun pa'o// //de nas zhes bya ba la sogs pas ni mtshan nyid kyi khyad par gzhan dag ston te de dag dang ldan pa'i rnal 'byor ma ni sgrub pa po'i bsgrub par bya bar 'gyur ro/ /le'u bco brgyad pa'o// //de nas gzhan yang bshad bya ba/ /sgrub pa po yi lA ma ni/ zhes bya ba la sogs pa ni lA ma 'ba' zhig gi mtshan nyid ston pa yin no/ /le'u bcu dgu pa'o// //de ni yan lag gi brda bstan pa'i phyir/ /de nas zhes bya ba la sogs pas ston te/ nam mkha' lding ston pa ni zhes bya ba ni gshog pa lta bur kyog par byas la//lag ngar gnyis bteg nas so/ /bskyod pa ni g.yo ba zhes bya ba'i don to/ /dkyil 'khor zhes bya ba ni dam tshig can 'dus pa zhes bya ba'i don to/ /le'u nyi shu pa'o// //de nas zhes bya ba la sogs pas ni phyag rgya dang phyag rgya'i lan ston par shes par bya'o//le'u nyi shu gcig pa'o// //gung mo zhes bya ba ni gung mo'i sor tshigs so/ /pa ti sa ni dpral ba'i steng du pa ti sa lta bu'o/ /mdung zhes bya ba ni mthe'u chung mthe bos mnan la sor mo lhag ma rnams mdung rtse lta bur bstan pa'o//mtshams ni mgo bo'i dbus kyi cha'o/ /gsang ba ni rnal 'byor ma'o/ /le'u nyi shu gnyis pa'o// //da ni de nas zhes bya ba la sogs pas mkha' 'gro ma rnams kyi dka' ba'i brda ston pa yin te/ dam tshig can gang rjes chags pa/ /zhes bya ba ni sgrub pa po gang ral gyis phyi rol gyi yan lag gi dngos po'i lha mo la thams cad du brtse bas na gzhan gyi dbang du ma gyur cing skyes bu gzhan mi shes pa ni dpa' bo de'i rnal 'byor ma yin no//sa ni sa gzhi ste/ de'i longs spyod ma lus par 'gyur zhing rgyal po la sogs pa gzhan dag ni ma yin no//gzhi ni sa gzhir byas nas su/ /rnal 'byor ma yi sdom pa mchod/ /ces bya ba la/ sa ni rang gi rgyud dang sngags legs par bslabs shing byang ba la sogs pa'i yon tan dang ldan pa'i lha mo bzhir byas la rnal 'byor ma'i sdom pa phyag rgya chen po'i sbyor bas mchod par bya'o zhes bya bar ston to//rgyal mtshan la zhen rtag tu 'gyur/ /zhes bya ba ni rgyal mtshan gyi mtshan ma ste/ de'i nus pa gang yin pa'o zhes bya bar sbyar ro/ /me long yin par shes par bya/ /zhes bya ba ni rgyun mi 'chad par me long brtags pas de'i rgyal mtshan gyis nus pa shes par bya zhing khong du chud par bya'o zhes pa'i don to//le'u nyi shu gsum pa'o// //da ni de nas zhes bya ba la sogs pas pro taM gi la sogs pa'i yi ge du ma'i brda ston to/ /sde tshan bzhi'i mtshan nyid ces bya ba ni rnal 'byor ma dang / lA ma dang / brda'i mtshan nyid bstan pa'o/ /le'u nyi shu bzhi pa'o// //rtsa ba'i sngags kyi gsang ba'i cho ga bstan pa ni de nas zhes bya ba la sogs pa'o//le'u nyi shu lnga pa'o// //rim dang rim min las bzlog pa'i/ /pho nya rnams ni yang dag gnas/ /zhes bya ba ni sngar brtson chen ma la sogs pa go bzlog ste bstan pa'i go rims bzhin du rnam par bkod do zhes bya ba'i don to//de nyid kyis na/ 'og dang steng grub rtag tu ster/ /zhes bya ba la sogs pa gsungs pa yin te/ 'og tu gnas pa rnams steng du rnam par bkod pa de'i tshe dngos grub ster bar 'gyur ro zhes bya ba'i don to/ /pho nya mo de grub kun ster/ /zhes bya ba ni pho nya de mthong ba dang thos pa las kyang dngos grub stsol bar 'gyur na/bsgrubs na lta smos kyang ci dgos zhes bya ba'i bar du'o/ /mthong dang de bzhin reg pa dang / /tsum+ba na dang rtag tu 'khyud/ /rnal 'byor gnas ni khyad par nyid/ /ji srid rnal 'byor tshogs rnams ni/ /thams cad dngos grub byed par bshad//'di'i don ni 'di yin te/ /ji srid zhing dang nye ba'i zhing la sogs pa rnal 'byor gyi gnas de na gnas pa'i pho nya mo rnams la tsum+ba na dang / rtag par 'khyud pa'i rnam pa gnyis kyis zhes bya ba'i don to/ /bde chen kun zhes bya ba la sogs pas ni rnal 'byor ma dam tshig dang ldan pa mthong nas bza' ba dang /bca' ba dang / lha bshos la sogs pa'i brda rnams bstan par bya'o/ /ma dang zhes bya ba la sogs pa la/ gang tshe sngags dang rgyud legs par lobs pa snod du rung bar mthong nas legs par rtogs par bya'o/ / de'i tshe ma lobs pa la gnyen gyi 'du shes bzlog par bya'o/ /gang zhig ces bya ba la sogs pa la/ /gang la sngags byin pa de snod dang ldan par 'gyur ba yin gyi/ /gzhan dag ni ma yin no zhes bya ba'i don to/ /de nas zhes bya ba la sogs pas ni rnal 'byor pas gang zhig spyod pa bya ba ston to//skyes pa'am zhes bya ba la sogs pa la/ skyes pa'am bud med rnal 'byor ma mthong nas g.yon pa'i cha yis dbang du byas te 'gro bar bya'o/ /khyim dang zhes bya ba la sogs pa la/ /khyim mam zhing du gnas pa shin tu ring po na gnas pa yang shes par byas la g.yon nas spyad par bya'o zhes bya ba'i don to//he ru ka las sbyor gzhan med/ /ces bya ba ni he ru ka'i rnal 'byor las mchog tu gyur pa'i rnal 'byor gzhan dag med do zhes bya ba'i don to/ /de nyid kyis na/ /slob dpon rnal 'byor ma nyid yin/ /zhes bya ba ste/ rnal 'byor de 'dzin pa'i slob dpon ni thams cad du 'gro ba'i ma mo'i gnas su gyur pa yin no zhes bya ba'i don to//rgyud 'di ru ni sgrub pa po/ /legs par gyur pa nyid yin te/ /zhes bya ba ni rgyud 'dir dbang bskur ba'i rnal 'byor pa rnams brnyas par mi bya ba'o zhes bya ba la sogs par sbyar ro/ / pho nya mo brgyad ces bya ba la sogs pa la/ mos dang dad pa 'phel byed pa/ /zhes bya ba yin no/ /dngos grub rnams kyi rgyur 'gyur ro zhes bya ba'i don to/ /de ji lta bu zhe na/ sngar bshad pa'i g.yon nas spyod pa la sogs pa'i dam tshig bsrung ba ni dang po'o/ /lha mo gzhan dang sbyar ba yi/ /'dod pa rnam par rmongs 'gyur ba//zhes bya ba ni gang 'dod pa la chags shing rnam par rtog pa dang ldan pa'i 'dod pas lha mo gzhan dang kun du sbyor bar byed pa de ni 'dod pa la chags shing rmongs pa ste/ de bas na gzhan dang sbyor ba spangs pa ni gnyis pa yin no/ /bdag dang gzhan gyi char 'byed pa med pa de ni gsum pa'o//thogs pa med pa ni bzhi pa'o/ /dam tshig spyod pa spyad pa dang / /zhes bya ba ni dam tshig ni lha mo rnams so/ /de kun spyod pa ni 'dod pa rnams so/ /de spyad pa ni bya ba ste/ de dag gang yin pa de ni/ /dam tshig spyod pa spyad pa dang / /zhes bya ba ste lnga pa'o/ /bud med dbang phyug kun du sbyor//zhes bya ba ni gnyis su med pa shin tu sbyor bas rdo rje dang pad+ma shin tu 'dus pa'i dus su dbang phyug ma nyid yin zhing / dbang phyug ma dang bral bar mi bya'i/ /'on kyang dbang phyug nyid du bya'o zhes bya ba'i don te drug pa'o/ /tshangs par spyod pa de bzhin bzhi/ /zhes bya ba ni bzhi po byang chub kyi sems 'dzag pa'i dus su tshangs par spyod pa spyad pa zhes bya ba ste bdun pa'o//khro med rgyun gyis kun du spyad/ /ces bya ba ni byang chub kyi sems len pa'i dus su sdang bar mi byed pa ste/ de ltar na dam tshig brgyad de/ 'di dag sgrub pa pos mchog dang gtso bor shes par bya'o zhes sbyar ro//rgyud kun gyi ni thun mong ste/ zhes bya ba ni gsang ba'i rgyud 'di ni rgyud thams cad kyi thun mong pa ste/ de nyid kyis na gsang ba yin pas dgongs pa rgyud gzhan du ni ma bshad do/ /de bas na/ rgyu yis gzhom par mi bya'o/ /zhes bya ba yin te/rgyu zhes bya ba ni mngon sum la sogs pa'i tshad ma rnams kyis gzhom mi bya ste zhes bya ba smad par mi bya zhes bya ba'i don to/ /yang ci zhig bya zhes/ /dad pa nyid kyis blang bya yin/ /zhes bya ba yin no/ /mig dang zhes bya ba ni don de nyid ston to/ /mthe'u chung gis bskyod ces bya ba ni dus su lha mo'i mchod pa'i dus lha mo'i sbyor ba dang ldan zhes bya ba'i don to//yang na sngags dang phyag rgya legs par bslabs pa ma rnyed na ni cig shos tha mal pa ma yin par byas la mchod par bya'o/ /pho nya mo rnams yang dag gnas/ /zhes bya ba ni/ de ltar dus de'i tshe blo dang ldan pa zhes bya ba pho nya mo thams cad dga' bar 'gyur ro zhes bya ba'i don to//mnyes byed rnam par dag pa dang / /gsal byed yon tan ldan pa'i mi'o zhes bya ba ni yon tan dang ldan pa'i mi ste rnal 'byor ma'i khyad par gsum du 'gyur te/ mnyes byed ces bya ba ni spobs pa bskyed pa'o//rnam par dag pa zhes bya ba ni nus pa skyes pa'o/ /gsal byed ces bya ba ni 'phral du gsal bar byed cing cung zad nus pa skyes pa la rang dang gzhan gsal bar byed pa'o/ /spobs pa skyes pas bstan bcos dang mi 'gal ba'o/ /yang na mnyes byed ni sngags kyi sbyor ba la goms pas lha rnams mnyes par byed pa'o//yon tan dang ldan pa ni bstan bcos kyi don shes pa'o/ /gsal byed ni sgron ma ltar sems can thams cad kyi don gyi bya ba byed nus pa'o/ /le'u nyi shu drug pa'o// //yul dang yul de rab song ba/ /pho nya'i gzugs su mtshon pa yin//zhes bya ba la rnal 'byor pa gsum po de dag kyang gzugs dang mtshan nyid phun sum tshogs pa'i pho nya yul dag ni snang ba yin zhes bya ba'i don to/ /pho nya ral gri'i so 'dra zhing / /zhes bya ba ni pho nya mo ral gri'i so ltar rtag tu mnyes par dka' ba yin no zhes bya ba'i don to//dag byed ces bya ba la sogs pa la/ sgrub pa po yis dngos grub thob/ /ces bya ba ni de rnams sgrub pa pos thob nas mngon par 'dod pa'i dngos grub thob par 'gyur ba'o/ /gzhan dag ni go sla'o/ /sgrub pa po yi pho nya gnyis//zhes bya ba ni 'jig rten dang 'jig rten las 'das pa'i dngos grub 'grub pa zhes bya ba'i don to/ /dngos grub cho ga la spyod che/ /pho nya gcig pu kho na yin/ /zhes bya ba ni dpal he ru ka'i sbyor ba gcig pa nyid yin no zhes lhag par bstan pa yin no/ /yang na dngos grub la spyod pas na la la zhig gi de nyid gcig pu rnal 'byor gyi mchog yin te//de'i tshe pho nya mo rnal 'byor ma rab tu bskul ba yin zhing dngos grub pa dang nye bar 'gyur zhes sbyar ro/ /bla ma brgyud rim gyis thob pa'i/ /dbang bskur ba ni sngags legs ldan/ /pho nya rnams su yang dag bshad//ces bya ba ni slob dpon brgyud pa'i rim pa las dbang bskur ba thob pa las sngags dang legs par ldan par gang gi tshe sgrub pa de'i tshe pho nya mo rnams su yang dag par bshad par 'gyur ro zhes bya ba'i don to/ /phyag rgya legs sbyor ngang tshul dang / zhes bya ba ni phyi'i rnal 'byor ma dang yang dag par sbyor ba'i ngang tshul can zhes bya ba'i don to//yang dag rdzogs zhes bya ba ni de tshe yongs su rdzogs par 'gyur ba'o/ /ye shes rgyu skyes zhes bya ba ni bcom ldan 'das kyi rab kyi mthar thug pa'i rgyu dang byed pa can yin te/ dpal he ru ka ni de las byung ba yin no zhes bya ba'i don to//sems kyi bdag nyid nang par langs/ /zhes bya ba la/ sems kyi bdag nyid ni phyag rgya chen po'i sbyor ba dang ldan pa mtshan mo'i mthar mal nas langs pa'o/ /gzugs kyi bya ba kun byas te/ /zhes bya ba ni lus la dpa' bo drug gi go cha la sogs pa go bskon pa'o/ /lus la shin tu mtshon cha ni//lus la gnas pas kun du spyod/ /ces bya ba ni lus thams cad la mtshon cha'i dra bas g.yogs par bya'o zhes bya ba'i don to/ /dag byed byas pa'i lus la ni/ /rtag tu sngags 'di brjod par bya/ /zhes bya ba ni de ltar rtag tu bsrung pa'i cho ga byas pa'i sngags pas sngags bzlas par bya'o//rnal 'byor gnas rnams nges ston cing / /zhes bya ba ni rnal 'byor te ting nge 'dzin to/ /gnas ni bud med de/ /de bstan cing de ltar go cha bgo par bya'o zhes bya ba'i don to/ /mtshon cha rnams ni bgom mi bya/ /zhes bya ba ni de ltar ji skad bshad pa'i mtshon cha la sogs pa las 'da' bar mi bya'o//yang na mtshon cha ltar mtshon du gyur pa'i pho nya mo yin te/ de bgom par mi bya'o/ /yang na mtshon ni rang dang gzhan gyi mtshon cha rnams so/ /dam tshig can la khro mi bya/ /zhes bya ba ni/ /rnam pa thams cad du khro bar mi bya'o zhes bya ba'i don to//mngon par brtson pas 'da' mi bya/ /zhes bya ba ni rgyud 'dir ram gzhan dag tu mngon par brtson pa de las 'da' bar mi bya'o zhes bya ba'i don to/ /de dang lhan cig tsA ru bya/ /zhes bya ba ni dam tshig can rnams dang lhan cig tu longs spyod gcig tu bya'o zhes pa'i don to//yang na sgo ni thabs te/ phyag rgya chen po 'grub pa'i thabs bya'o zhes bya ba'i don to/ /bde ba zhes bya ba ni gzhung gzhan no/ /grol ba'i don du thun bzhir bya/ /zhes bya ba ni rtag tu rnal 'byor dang ldan yang nyin dang mtshan du thun bzhir bya'o zhes bya ba'i don to/ /dam tshig spyod pa zhes bya ba la//dam tshig ni lha mo ste de dang kun du spyod pa'o/ /yang na dam tshig ni bsrung bar bya ba dang bza' bar bya ba ste spyad pa'o/ /de 'khor ci dgar grol bar 'gyur/ /zhes bya ba ni nges par 'di ltar 'khor ba'i rnal 'byor pa ni yul dang zhing du 'khor zhing bsgom pa'i rnal 'byor pa de ci dgar grol bar gyur te/ci ltar 'dod par grol bar 'gyur ro zhes bya ba'i don to/ /gnag la dga' bar rtag tu bya/ /zhes bya ba ni mtshan mo spyad par bya'o zhes bya ba'i don to/ /srog chags yan lag las byung gyon/ /zhes bya ba ni pags pa'i gos bgos zhes bya ba'i don to/ /bde ba 'dod pas bde thob 'gyur//zhes bya ba la/ /bde ba 'dod pa ste thar pa 'dod pas bde ba thob par 'gyur ba ste bskyod pas bde bar bya ba'o/ /mchod phyir thogs ni yongs spangs gtsang / /zhes bya ba ni mchod phyir thogs la sogs pa rig byed dang chos kyi bstan bcos las byung ba'i gtsang sbra yongs su spang ba'o//shrI he ru kas byin gyis brlabs/ /zhes bya ba ni dpal he ru kas byin gyis brlabs pas 'jig rten dang 'jig rten las 'das pa'i gtsang sbra la spyad par bya'o/ /phyag rgya lnga ni mgul rgyan dang gdu bu dang spyi bo'i nor bu dang / rna rgyan dang / mchod phyir thogs te lnga'o/ /dus kun du zhes bya ba ni de dang mi 'bral bar bya ba'o/ /rigs dang rigs min ngor mi blta/ /spyi gtsug la sogs bcing ba spang / /zhes bya ba ni rigs dang rigs ma yin pa'i ngo bo la rnam par dpyad par mi bya zhing / yang dang yang spyi gtsug bcing ba ste/ral pa bcing ba la sogs pa mi bya ba dang / sogs pa'i sgras ni 'jig rten pa'i spyod pa gzhan dag yongs su spang bar ston to/ /pho nya zhes bya ba la sogs pa ni go sla'o/ /le'u nyi shu bdun pa'o// //de nas mchod pa rnam dag bdag /ces bya ba ni sngar bshad pa dang lhan cig gnas shing yang dag par mchod pa ste/bla na med pa'i mchod pa'i mchog gi don byed pa'i phyir rnam par dag pa'o/ /mya ngan 'das par nges 'gro nyid/ /ces bya ba ni mchog tu dga' ba'i shin tu bde ba'i gnas skabs kyi rjes thogs la dpa' bo nyid mchod par bya'o zhes bya ba'i don to/ / sbun dang sdug pa mchod pa dang / /zhes bya ba ni dkyil 'khor gcig la sogs par zhugs pa'i rnal 'byor pa lhan cig spyod pa rnams te/ de dag dang yang lhan cig zhi ba 'dus pas gnas par bya'o/ /spun dang bu dang lhan cig tu/ /bde dang sdug bsngal kun 'byung min/ /zhes bya ba ni/ / 'jig rten pa'i sbun dang bu la sogs pa dang lhan cig tu ye shes dang phyag rgya chen po la sogs pa dang / sngags dang phyag rgya dag kyang bstan par mi bya'o zhes bya ba'i don to/ /dag byed zas la spyod pa ni/ /rtag tu dam tshig spyod par 'gyur/ /zhes bya ba ni zas la spyod pas dam tshig spyod pa byas par 'gyur te/de yis dag par 'gyur ro zhes bya ba'i don to/ /gsang sngags su la'ang sbyin mi bya/ /zhes bya ba ni sgra ji bzhin pa nyid yin no/ /pho nya mo zhen rtag thar pa/ /zhes bya ba ni rab tu dga' ba'i gnas skabs su phyi rol gyi rnal 'byor pa la go cha chen po la sogs pas go bskon par bya'o zhes bya ba'i don to//'da' ba yis kyang longs spyod bya/ /zhes bya ba ni gal te shin tu legs par bslabs pa med na skal pa bzang por gyur pa de legs par sbyangs la longs spyad par bya'o/ /skye gnas dman la dga' gnas pa/ /bsnyen bkur nyid ni bya ba min//zhes bya ba la skye gnas ni bram ze la sogs pa'i rigs te de gzung bar mi bya'o/ /de ci'i phyir zhe na/ sbyor ba mchog gi snod ma yin pas de la gus par mi bya'o zhes bya ba'i don to/ /ma dang zhes bya ba la sogs pa la/ /gang yang dag pa'i sbyor bas rjes su mthun par bya'o//gzhan na de dag dka' thub zad par 'gyur ro zhes bya ba'i don to/ /mchog dang tha ma lhan cig 'gugs/ /zhes bya ba ni zhi ba'i 'gugs pas zas la spyod na dam tshig gi spyod pa byas par 'gyur zhing de las dag par 'gyur zhes bya ba'i don te the tshom mi bya'o/ /de ltar rdzas ni rnam nges yin//zhes bya ba ni don dam pa nyid kyis nges pa yin zhes bya ba'i don to/ /'jig rten zhes bya ba la sogs pa don ji lta ba nyid do/ /lan cig zas la spyod par byed/ /ces bya ba ni dam tshig spyod pa rnams dang / zas lhan cig spyod na sngags pas dngos grub thob par 'gyur ro zhes bya ba'i don to//lhag ma ni don ji lta ba nyid do/ /ba lang sha dang zhes bya ba la sogs pa ni bstan pa la shin tu gnod par byed pa gzhan dag rnam par gzhig pa ston to/ /de'i rim pa ni 'di yin te/ sbyin sreg gi thal ba las byung ba'i thal pas me thab gru gsum pa byas la/ drag po'i sbyin sreg gi yo byad kyi rdzas dang / de las bshad pa'i cho ga yungs mar tsha ba la sogs pa dang sbyar nas khaN+Da ro ha g.yas pa'i sna bug nas zhugs te bshad pa nas byung bar bsams la/ rdo rje lcags kyu dang gri gug lag na thogs pas bsgrub par bya ba gcer bu rnam par myos par gyur pa bkug pa de nyid dum bu dum bur gtubs par bsams la/ba lang sha la sogs pa ji ltar brjod pa ji ltar rnyed pa'i sha bsgrub par bya ba de'i sha yin par bsams la/ khro bo chen po dang ldan pa'i nga rgyal gyis che ge mo mA ra ya zhes bya ba dang spel ba'i rtsa ba'i sngags kyis sbyin sreg bya'o//sna tshogs pa zhes bya ba ni rma bya'am khyim bya la sogs pa gsung ngo / /de bzhin dpa' bo rnams kyi zas/ /sngags dang phyag rgyar yang dag ldan/ /zhes bya ba ni sngags dang phyag rgya'i rang bzhin gyi sngags dang / rgyud legs par bslabs pas phyi rol gyi bud med dang yang dag par ldan zhing bcas pa'i zas de ni dpa' bo rnams kyis rab tu bsngags par 'gyur ro zhes dgongs so//sprul pa zhes bya ba ni byang chub kyi sems nyid kyi gnas skabs so/ /gzhan dag ni go sla'o/ /de'i pho nya ni lha mo'o/ /bzang po ni mchog go/ / brtson pa ni le lo med pa'o/ /lhan cig ldan pa ni gzhan du mi 'gro ba'o/ /de lta bu ni dngos grub kyi skal ba can du 'gyur ro/ /ma chags dga' ba'i longs spyod rdzogs/ /zhes bya ba ni tha mal pa'i gzugs kyis dga' ba'i kun du sbyor ba'i nyon mongs par dmigs par mi bya'o zhes bya ba'i don to//rnal 'byor rdzas kyi rnam 'byed nyid/ /ces bya ba la/ rnal 'byor ni ting nge 'dzin to/ /rdzas ni bsrung bar bya ba'o/ /de'i rnam par 'byed pa ni bye brag 'byed pa'o/ /yang na rnal 'byor ni 'brel pa'o/ /rdzas ni 'brel pa can te/ de'i rnam par dbye ba nyid do//ma yin zhes bya ba ni tshig gi lhag ma'o/ /bla ma'i man ngag la dga' zhing / /zhes bya ba ni bla ma la brgyud pa'i rim pa ma nyams pas so/ /de yi don ni mchog tu mtshungs/ /zhes bya ba ni de ltar ji skad gsungs pa'i don la spyod pa ni dpal he ru ka dang mtshungs par 'gyur ba'o//le'u nyi shu brgyad pa'o// //spun ni dpa' bo rnams so/ /pha ni shrI he ru ka'o/ /bdag po nyid du skad cig mthong / /zhes bya ba ni bdag po kho nar skad cig gis mthong ngo zhes bya ba'i don to/ /lce sbom zhes bya ba ni mtshan nyid dang ldan pa'i dngos grub thams cad kyi spyi thun mong du 'gyur ro zhes bya ba'i don to//dran pa dang ni yang dag ldan/ /zhes bya ba ni bdud rtsi lnga'i mtshan nyid dang ldan pa'o/ /pho nya la sogs gnas dang bcas/ /zhes bya ba ni rgyun mi 'chad par bslabs pas pho nya dang ldan pa'o/ /sogs pa'i sgras ni bsrung bar bya ba dang /bza' bar bya ba bsdu ba'o/ /gnas dang bcas pa ni sngags de'i bsngags pa dang bcas pa'o/ /mkha' 'gro ma mchog nyi shu bzhi/ /spyod dang grol ba'i 'bras rab ster/ /zhes bya ba ni mkha' 'gro ma'i gtso bo nyi shu rtsa bzhi ni spyod pa dang grol ba'i 'bras bu rab tu ster bar 'gyur ro//lhag ma rnams ni go sla'o/ /ji srid dro ba zhes bya ba la sogs pa ni mtshon pa ste/ ting nge 'dzin la rnam pa thams cad du shin tu dmigs pa'i sbyor bas mtshan nyid ji lta ba bzhin du drod dang / rtse mo dang / bzod pa dang / 'jig rten pa'i chos kyi mchog ji lta ba bzhin du 'byung bar rtogs par bya ste/dro bar bya zhes bya ba ni rnal 'byor gyi stobs kyis so/ /'dod pa'i don kun zhes bya ba la sogs pa ni go sla'o/ /le'u nyi shu dgu pa'o// //de nas zhes bya ba la sogs pas ni gnod mdzes kyi sngags btub ston te/de nas rdza rnga'i bcing bya ste/ /zhes bya bas rdza rnga lta bu'i dbyibs las re'u mig bzhi bcu rtsa dgur bya'o zhes bya ba'i don to/ /re'u mig gsum pa ni nang gi re'u mig bzhi la ltos nas de skad smras pa yin no/ /de la uSh+ma'i gsum pa yi ge sa'o/ /de bas na/ rim bzhin 'byung dang rim min pas//dbyangs dang yi ge sgrub pa pos/ /zhes bya ba smos so/ /re'u mig lnga pa yis zhes bya ba ni yi ge u'o/ /nyi shu rtsa lnga pa zhes bya ba ni ka nas brtsams te nyi shu lnga pa'o/ /nyi shu rtsa bzhi pa zhes bya ba nas yang de bzhin no/ /sum cu rtsa drug pa zhes bya ba ni a nas brtsams te bgrang ba'o//re'u mig gsum pa zhes bya ba yang de bzhin no/ /de bzhin du sum cu rtsa gnyis pa zhes bya ba ni ka nas brtsams pa'o/ /re'u mig lnga pa zhes bya ba ni yi ge u'o/ /nyi shu lnga pa zhes bya ba ni ka nas brtsams pa'o/ /nyi shu bzhi pa zhes bya ba yang de bzhin no//sum cu rtsa gsum pa zhes bya ba ni ka nas brtsams pa'o/ /bco lnga pa zhes bya ba ni a nas brtsams pa'o/ /lnga pa zhes bya ba ni dbyangs kyi yi ge lnga pa'o/ /nyi shu rtsa gnyis pa ni ka nas brtsams pa'o/ /nyi shu rtsa bdun pa zhes bya ba ni a nas brtsams pa ste/ sngags 'di dag ni tshig dang po yin no//a nas brtsams pa'i yi ge ga ni bcu dgu pa yin no/ /me'i bu ni yi ge ra'o/ /re'u mig gsum pa ni yi ge i'o/ /ya tshan zhes bya ba la sogs pa ni go sla'o/ /sum cu rtsa drug pa zhes bya ba ni snga ma bzhin te yi ge na'o/ /slar yang zhes bya ba ni yi ge gnyis po dag nyid de dang sbyar ba'o//rang byung zhes bya ba ni yi ge ha'o/ /re'u mig lnga pa zhes bya ba ni dbyangs kyi re'u mig lnga pa'o/ /bin du zhes bya ba ni thig le'o/ /lhag ma ni snga ma bzhin te tshig gnyis pa'o/ /bcu dgu pa ni snga ma bzhin te ga'o/ /nyi shu rtsa bdun pa ni ka nas brtsams pa'o//gsum pa ni dbyangs yig gi yi ge gsum pa'o/ /sum cu rtsa gsum pa'i snga ma yi ge ha'o/ /re'u mig gnyis pa ni yi ge A'o/ /nyi shu pa ni ka nas brtsams pa ste na nyid de/ de nyid ni ra dang ha'i dbang gis na de Nar 'gyur te gr-i ha'i sgra'i 'og tu gnas pa'i na ni Nar 'gyur ro//nyi shu rtsa gcig pa ni ka nas brtsams pa ste pa'o/ /nyi shu rtsa drug pa ni ka nas brtsams pa ste ya'o/ /lan gnyis bzlas pa zhes bya ba ni lan gnyis zlos shing goms par bya ba ste snga ma bzhin no/ /re'u mig lugs las bzlog pa'i tshul gyi dang por yi ge ha'o/ /bzhi pa ni i ste/de'i mtha' ni u'o/ /lhag ma ni snga ma bzhin no/ /da ni tshig bzhi pa btu ba gsungs pa ni re'u mig gnyis pa zhes bya ba la sogs pa yin te/ dbyangs kyi yi ge dang po'i re'u mig nas brtsams pa a'o/ /sum cu rtsa drug pa ni a nas brtsams pa'o/ /nyi shu rtsa drug pa ni ka nas brtsams pa'o//sum cu gsum pa zhes bya ba ni ka nas brtsams pa'o/ /de bzhin du bcu gsum pa ni dbyangs kyi yi ge bcu gsum pa'o/ /re'u mig bcu pa ni ha la sogs pa nas go bzlog pa'i tshul gyis brtsis pa'i yi ge b+ha ni re'u mig bcu pa'o/ /bcu dgu pa ni a nas brtsams pa'o//gnyis pa zhes bya ba ni re'u mig gnyis las dbyangs kyi yi ge'i re'u mig gnyis pa'o/ /thig le zhes bya ba ni sa steng nas a nu swa ra dang ldan pa'o/ /chu zhes bya ba ni yi ge b+ha'o/ /brgyad pa ni yi ge dza'o/ /me yi bu yis khyad par dbye/ /zhes bya ba ni yi ge ras bye brag 'byed pa'o//lhag ma ni go sla'o/ /de dag ni rtsa ba'i sngags so/ /khro bo bzhi dang yang dag ldan/ /zhes bya ba ni sngags kyi tshig bzhis mtshan ma smos pa'i khro bo bzhi bshad pa yin no/ /sku brgyad dang ni bcas pa ru/ /zhes bya ba ni sa la sogs pa gzugs brgyad kyi tshul du sngags 'di gnas pa'i phyir ro//'di ni rnyed pa tsam gyis kyang / /zhes bya ba ni sngags des tshar bcad pa de 'ching bar 'gyur ba'o/ /le'u sum cu pa'o// //sha chen zhes bya ba ni sngar bzhin du sbyin sreg bya'o/ /zangs ma'i gtsug phud can zhes bya ba ni khyim bya'o/ /dpa' bo thod pa'i phreng ba can//zla ba phyed pas rgyan du byas/ /zhes bya ba ni bcom ldan 'das kyi sku'i cha byad sngar ma bshad pa ni bshad pa yin no/ /brda ni lnga po bstan pa dag /ces bya ba 'dir brda'i sgra ni rdo rje phag mo la sogs pa lha mo lnga la bya ba yin te/ ral ba dang cod pan brgyan pa'i thod pa chen po lnga lha mo lngar bstan cing bsgom par bya'o zhes bya ba'i don to//sgrub pa po'i lag g.yon gyis/ /zhes bya ba ni bza' ba dang bca' ba gang ci yang rung ba de thams cad kyang dam tshig can la ster ba na sgrub pa pos lag pa g.yon pas sbyin par bya'o zhes bya ba'i don to/ /lhag ma ni go sla'o//rdo rje sems dpa' zhes bya ba la sogs pas ni lag pa'i mchod pa ston to/ /rdo rje sems dpa' mthe bor bzhugs/ /zhes bya ba la/ bzhugs zhes bya ba thams cad la sbyar ro/ /ta la ni mdzub mo ste rnam par snang mdzad do/ /gu ra be zhes bya ba ni gung mo'o//pad+ma gar zhes bya ba ni pad+ma gar gyi dbang phyug go/ /da ra zhes bya ba ni srin lag go/ /dpa' bo zhes bya ba ni dpal he ru ka'o/ /ta nu zhes bya ba ni mthe'u chung ngo / /mi zad ces bya ba ni de'i khyad par ro/ /nam mkha'i snying po zhes bya ba ni rdo rje nyi ma'o/ /sen mo zhes bya ba ni sor mo thams cad kyi sen mo'i bar na gnas pa'i rta mgrin no//g.yon pa las byung rgyu yin no/ /zhes bya ba ni 'di dag ni lag pa g.yon par bstan cing lha gnas pa'i rgyu yin no/ /lag mthil zhes bya ba la lag mthil du pad+ma 'dab ma lnga pa bsams la/ pad+ma'i ge sar la pho nya mo rnams las rdo rje phag mo'o//mdun du ya ma ni/ g.yon du mo ha ni/ rgyab tu sany+tsa ri ni/ /g.yas su skrag byed ma'o/ /tsaN+Di ka ni snyoms par 'jug pa la spro ba ste/ rang bdag nyid bsam pa gcig pa'o/ /rgyab tu shin tu nges byas te/ /zhes bya ba ni/ lag pa'i mthil du sngags kyi sa bon gyis rdo rje sems dpa' la sogs pa dang / rdo rje phag mo la sogs pa lha mo rnams dgod par bstan mod kyi/ /'on kyang lag pa'i rgyab tu me long gi nang du gzugs brnyan snang ba ltar nges par bsam par bya'o zhes bya ba'i don to/ /de nyid kyis na mkhas pas rgyab tu bskyed ces bshad pa yin no//sgrub pa pos brda rnam pa lnga bstan par bya ba las/ /lnga zhes bya ba smos pa ni 'dir lag pa'i mchod pa'i skabs su brda lnga zhes bya ba ni dri chen dang dri chu la sogs pa'o/ /spyan la sogs pa smos pa ni mkha' 'gro ma la sogs pa bzhi la bya'o//stong pa ni nam mkha'i dbyings so/ /dbus su zhes bya ba yang de nyid do/ /de ltar brda yis dpa' bo rnams/ /zhes bya ba ni lag pa'i mchod pa la dung chen po la gnas pa'i rdzas kyis dpa' bo 'khor lo sdom pa brda yis mchod par bya'o/ /de nas zas la spyad par bya'o//'di ltar byas pas dpa' bo thams cad dang mnyam par sbyor ba mkha' 'gro dra ba'i bde mchog tu 'gyur ro/ /le'u sum cu gcig pa'o// //phyugs dgug pa ni sgrub pa pos sngar gyi cho gas byed de/ /phyugs zhes bya ba la sogs pa gsungs pa la/ /sen mo lnga rnams ni khyi dang /byi la dang / ri bong la sogs pa rnams te/ sen mo lnga'i rigs so/ /rigs rnams kyis zhes bya ba la/ rgyal rigs la sogs pa'i rigs bzhi rnams kyi nang nas bsngags pa ni phyugs so/ /dpa' bo ni mang po rnams gang gis bsad pa de ni phyugs dpa' bo'o//he ru kas byas pa mthong ba yang ngo / /dud 'gro rnams las dud 'gro mngal du skyes pa rnams dud 'gro 'gro ba'i phyugs te/ sbrul rin po che dang ldan pa'i phyugs so/ /phyugs 'di ni lha rnams kyi bde bsgrub par 'gyur ro/ /khwa la sogs pa ce sbyang la thug pa rnams dang /bya'i bye brag rnams sbyin sreg dang gtor ma la sbyar bar bya'o/ /sbyin sreg ni nang gi bdag nyid kyi sbyin sreg nyid do/ /da ni ro langs sgrub pa bshad pa smos pa yin te/ nag po zhes bya ba la sogs pa la/ dang po kho nar gnod mdzes kyi sngags sam rtsa ba'i sngags kyis sngon du bsnyen pa byas la/mtshan ma thob pa'i sngags pas dur khrod du ro ma smas shing nyams pa med pa btsal la nam phyed na a sha na nag po dang / mA NA nag po dang / 'bras nag po dang ldan pa'i sbyin sreg byas la/ de yang 'dzem pa med par ro'i khar zhes bya ba la/ sngags pas rang gi rnal 'byor mngon sum du byas su zin yang rang bsrung dang go cha chen po la sogs pas bsrung bdag kyang byas la/'jigs shing bag tsha ba'i 'dzem pa mi bya'o zhes bya ba'i don to/ /yi dags chen po 'jigs pa'i bdag nyid can mi sdug pa mthong na 'jigs par mi bya'o zhes bya ba'i don to//lhag ma ni go sla'o/ /lci ba'i thal ba ni thal ba'i khyad par ro/ /mgo bo skam zhes bya ba ni grags pa ste/ chag grugs med pa blangs la dung chen po bya ba'am/ yang na thod pa rus sbal gyi thod pa las bya'o/ /phyag bzhi pa la sogs pa ni bcom ldan 'das he ru ka'i phyag rgya chen po ston te/de dag thams cad ni sgrub pa'i thabs su rgya cher bstan pa yin no/ /de yi sku mdog mtshon cha 'chang / /zhes bya ba ni bcom ldan 'das de'i sku mdog dang phyag mtshan 'dzin par byed pa de la de skad ces bya ba'o/ /sku mdog sngo la phyag mtshan rdo rje 'dzin pa zhes bya ba'i don to//'dis phyag mtshan zhes bya ba spyi'i tshig smos su zin kyang phyag mtshan gyi gtso bor gyur pa yin pas rdo rje kho na la bya'o/ /de yang bcom ldan 'das mtshon cha du ma bsnams su zin kyang / rdo rje 'dzin zhes mtshan gsol ba yin no/ /phyag rgya yis ni sku la brgyan//zhes bya ba ni phyag rgya lngas brgyan pa la bya'o/ /yi dags chen po gdan du byas/ /zhes bya ba ni yi dags [(]gyi [,]kyi [)]bdag po mnan nas bzhugs pa'o/ /de bas rtag tu sgrub pa pos/ /sngags kyi lha ni shes par bsgom/ /zhes pa ni rnal 'byor chen po po la dmigs pa med par sngags bzlas pa mi bya'o zhes bya ba'i don to//lhag ma ni go sla'o/ /le'u sum cu gnyis pa'o// //med par gyur kyang bza' ba ni/ /lnga pa nyid du bya ba yin/ /zhes bya ba ni gang gi tshe rjes su mthun pa'i bdud rtsi lnga med par gyur na de'i tshe bza' ba gang dag yin pa bdud rtsi lnga bsam par bya'o zhes bya ba'i don to//lhag ma ni go sla'o/ /dpa' bo rnams kyi stan dag dang / /phyag rgya ni lhag ma'o/ /shin tu mnyam gzhag ces bya ba ni tha mal pa'i nga rgyal spangs pa'o/ /de'i 'og tu dpa' bo yi/ / dpa' bo kun du spyad par bya/ /zhes bya ba ni re zhig dang por ji skad bshad pa'i lha mo'i mchod pa phul du byung ba bsgrubs shing nyams su blangs la/ de'i 'og tu dpa' bo'i dpa' bo ste/ phyag rgya chen po la sogs pa kun du spyad par bya'o zhes bya ba'i don to/ /le'u sum cu gsum pa'o// //de nas zhes bya ba la sogs pas ni 'khor lo gsum gyi bdag nyid bya ba'am/ 'khor lo gsum mchod par bya zhes bya ba'i don to/ /cha'i rtsibs zhes bya ba ni cha'i yan lag ste/ de cha yang yin la rtsibs kyang yin pas cha'i yan lag ste/ de ni dpa' bo ste rigs la ltos nas gcig gi tshig gis bstan to//pad+ma'i lte ba zhes bya ba mang po'i tshig ni de blang bar bya ba'i gnas yin pas de la nges par sbyar bar bya'o/ /a wa d+hU tI'i gnas de bzhin/ /smin ma'i bar du nges par bzhag/ /ces bya ba ni dpral ba'i rdo rje phreng ba'i 'od zer rnams kyis a wa d+hU tI zhes bya ba rdzogs pa'i gnas su bya ba ste/de ni mi zad pa'i spyan te/ de smin ma'i bar du zhes bya ba ni dpral ba'i dbus su gzhag par bya'o zhes bya ba'i don to/ /dpa' bo 'chol pa zhes bya ba la sogs pas ni las thams cad pa'i sbyin sreg ston te/dpa' bo he ru ka'i 'dod chags dang zhe sdang 'chol bar byas shing khro bor bsgyur ba'i gnas skabs kyis 'og nas smos pa ji ltar rnyed pa'i sha yis sbyin sreg bya ba 'am/ yang na bdag nyid khro bo'i nga rgyal dang bcas pas ji snyed pa'i sha'i sbyor bas tshim par byas la/de'i 'og tu las dang rjes su mthun pa'i go mAM sa dang khrag gis sbyin sreg lnga nyid du bya'o zhes bya ba'i don to/ /'bad pas zhes bya ba ni lha'i nga rgyal gyis ma yengs par de nas sbyin sreg dgu bya ba'o/ /'bar ba'i me la zhes bya ba ni shin tu 'bar ba'i me la yam shing la sogs pa ji ltar las mthun pas 'bul ba'o//de ltar me lha'i zhal du sbyin sreg phul nas/ 'khor lo gsum dang ldan pa'i lha rnams la sbyin sreg dbul ba'i cho ga gsungs pa ni/ de nas zhes bya ba la sogs pa yin te/ kun nas 'khor lo bsam zhes bya ba ni thab kyi dbus su 'khor lo gsum po de gzhal yas khang ra ba dang bcas pa dang /rang gi sku mdog dang phyag mtshan dang bcas pa bsam par bya'o/ /de'i phyogs gcig tu gsungs pa ni dpa' bo zhes bya ba la sogs pa yin no/ /khaN+Da ro hA zhes bya ba ni rgyab kyi ngos la gnas pa'i khaN+Da ro hA de bzhin du gzhan la las dang rjes su mthun par rang gi lus las phyung ste/khaN+Da ro hA gzhan gyi phyi rol du bzhag ste/ las thams cad 'grub par bya'o zhes bya ba'i don to/ /de nyid kyi phyir/ /rang gi gzugs su mngon zhen pa/ /'khor lo'i dbus su gnas par bya/ /zhes bya ba yin no/ /'khor lo 'di dag bstan pa ni/rim pa ji bzhin bya ba yin/ /zhes bya ba ni thab 'di dag tu 'khor lo gsum gyi rim pas bya ste/ de yang zhi ba la sogs pa'i cho ga'i rim pa dang mi 'gal bar bya'o/ /rig pa'i rgya mtsho zhes bya ba ni rgyud chen po der kye dpa' bo zhes mdor bsdus te ji skad du bstan pa de 'dir gsal bar bya ba yin no//yang na rig pa'i rgya mtsho ni zhi ba'i sbyin sreg la sogs pa rgyas par bstan pa yin la/ 'dir ni mdor bsdus te bstan pa yin no/ /lhag ma ni go sla'o/ /le'u sum cu bzhi pa'o// //da ni de nas zhes bya ba la sogs pas las dang rjes su mthun par sngags brjod pa dang /bsam gtan gyi cho ga bstan pa yin te/ phan tshun sbyar ba'i gsang sngags ni/ /zhes bya ba ni gang gi tshe gdug pa tshar gcad pa'i cho ga rtsom pa de'i tshe srad bu legs par bsgril ba lta bur sngags kyi yi ge phan tshun gcig la gcig sbyar te/gnyis ka'i zhal nas cig car phyung ba ni zo chun gyi bum pa 'khor ba lta bur bsam par bya'o/ /dpa' bo zhes bya ba ni sngags kyi yi ge'o/ /'jug pa yi ni dbye ba nyid/ /ces bya ba ni zhi ba'i cho ga'o/ /rang gi kha nas nad du zhugs pa'i sngags kyi yi ge lu gu rgyud kyi phreng ba lta bu'i tshul can rdo rje'i lam nas phyung ste/slar yang pad+ma'i lam nas lha mo'i zhal du chud par byas te/ lha mo'i kha nas rang gi khar zhugs pa'i rim pa dang / gdug pa 'dul ba'i las la ni/ /rang gi kha nas lha mo'i khar/ /'jug pa'i tshul gyis bya ba ste/khyad par ni de tsam mo/ /zhi ba la lhod pa ste drag cing gtum pa ma yin pa'o/ /sa bon phreng bas de nas zin/ /zhes bya ba ni yi ge'i phreng bas phan tshun gcig la gcig sbrel ba'o/ /hUM gi mtha' ru gnas pa yin/ /zhes bya ba ni gdug pa can tshar gcad pa'i las la yi ge hUM gis thog ma dang /dbus dang / tha mar sbyar bar gyur pa'o/ /de nyid kyi phyir/ bsgrub bya 'gog par gyur na ni/ /gom pa gcig kyang mi 'gro'o/ /zhes bya ba gsungs pa yin te/ de ni go sla'o/ /kha sbyar sbyar bar gyur pa dang / /zhes bya ba ni sngags sgra la sogs par bshad pa'i tshul gyis te/yi ge oM dang po dang / yi ge oM tha mar kha sbyar du sbyar ba'i tshul gyis te/ oM lha sbyin swA hA oM zhes bya ba lta bu'o/ /rdo rje lu gu rgyud bcings pas/ /rdo rje dbye ba nyid dang ni/ /zhes bya ba ni kha sbyar ni las thams cad pa yin pa'i phyir gang gi tshe gdug pa can tshar gcad pa'i las dang ldan pa de'i tshe rdo rje zhes bya ba hUM de nyid kyis dbye zhing gzhig par bya'o zhes bya ba'i don to//de bzhin sgro yi chun po bskor/ /zhes bya ba ni ji ltar rma bya'i sgro'i chun po bskor ba na bar mtshams mi snang ba de bzhin du bar mtshams med pa kho nar bsgom par bya'o zhes bya ba'i don to//lcags kyu nyid kyis dgug pa dang / /zhes bya ba ni gang gi tshe 'gugs par 'dod pa de'i tshe/ /lo ma'i tshul du sngags spel la/ khaN+Da ro hA phyag na lcags kyu yod pas dgug par bya'o zhes bya ba'i don to/ /gtun shing gis ni dgug pa dang / zhes bya ba ni gang gi tshe brgya byin la sogs pa 'gugs shing bskyod par 'dod pa de'i tshe khaN+Da ro hA phyag na gtun shing bsnams pas dpung pa la sogs pa thams cad bkug par bya'o//rdo rje yis ni bza' bar bya/ /zhes bya ba ni bza' bar bya ba la khaN+Da ro hA rdo rje thogs pas che ge mo zo zhig ces dgug pa'i cho gas bza' bar bya'o//dbug la mda' yis sbyar bar bya/ /zhes bya ba ni dbug cing 'dar ba la ni khaN+Da ro hA phyag na mda' bsnams pa sbyar bar bya'o/ /dus min 'chi ba las rgyal nyid/ /ces bya ba ni dus ma yin par 'chi ba la ni mtshon cha 'dzin pa dang 'dra bar g.yon phyogs su kha T+wAM ga 'dzin pa'i lag pas so//mchod pa'i khyad par 'di dag thams cad kyis khaN+Da ro hA khyad par du phye ba yin no/ /thod pa'i mchod yon snod du ni/ /zhal du mchod yon nges par sbyar/ /zhes bya ba ni bdud rtsi lngas yongs su gang bas khaN+Da ro hA'i zhal du ar+g+ha phul la mtshon cha dang sbyar bar bya ste/sngags kyi yi ge phreng ba dang 'dra ba bstan par bya'o zhes bya ba'i don to/ /le'u sum cu lnga pa'o// //phyag rgya rengs pa'i las kyis ni/ /zhes bya ba ni gzhan gyi phyag rgya rengs pa la zas dang 'dra ba ste/ bza' ba'i khyad par dang 'dra ba las brtsam par bya'o/ / bsrubs pas mkha' 'gro ma sbyor la/ /snying po rnams kyis de bzhin bya/ /zhes bya ba ni mkha' 'gro ma rnams kyi snying po'i sngags kyis kyang cho ga de bzhin du bya'o/ /dpa' bo mchod pa'i cho ga zhes/ /las ni 'bad pa nyid kyis bya/ /zhes bya ba ni 'dir bshad pa'i cho ga dang pos mchod pa'i cho ga byas la/phyis las rnams brtsam par bya'o/ /rnam dbye rang dgas sngags pas ni/ /phyin ci log tu nges par sbyar/ /zhes bya ba ni de las kyi rjes su mthun par rnam par phye zhing so sor byas la sngags pas las phyin ci log tu nges par sbyar ro zhes bya ba'i don to/ / don de nyid bstan par bya ba'i phyir gsungs pa ni/ /tshar gcod pa dang zhes bya ba la sogs pa yin te/ de nyid dbye bas phye nas ni/ /rtsa yi lam du sbyar bar bya/ /zhes bya ba ni las kyi tshogs de kho na nyid kyi dbye bas phye zhing tha dad par bya ba'i sngags de rtsa ba'i lam zhes bya ba rdo rje dang pad+ma'i lam du nges par sbyar zhing bstan par bya'o zhes sbyar bar bya'o//sbyor ba yi ni don rnams la/ /'di yis rab tu sgrub byed de/ /lha dang lha min rnams dang ni/ /mi dang bcas pas myur 'grub bya/ /zhes bya ba ni sbyor ba'i don zhes bya ba phyag rgya chen po bsgrub par bya ba'i phyir gang zhig rab tu bsgrub cing legs par bstan pa'i tshul gyis bsgrub par byas na de lha dang lha ma yin dang mi rnams kyang tshar gcad pa dang /phan gdags pa'i tshul gyis myur du bsgrub par bya ba yin/ /gzhan dag lta ci smos te zhes bya bar dgongs so//le'u sum cu drug pa'o// //da ni de nas zhes bya ba la sogs pas dbang du bya ba la sogs pa'i sbyor ba ston te/ gzugs ni lus te de gnon pa ni bud med la sogs pa'i skye bo ste/ de'i cho ga ni dbang du bya ba yin la/ de bshad par bya'o zhes bya bar sbyar ro//phan tshun sbyar ba'i gsang sngags dang / /zhes bya ba ni gnyi ga'i rtsa ba'i sngags gcig tu bya ba'o/ /mkha' 'gro ma dang gcig tu sbyar/ /zhes bya ba ni don de nyid gsal bar bya ba yin no/ /de la don ni 'di yin te/ zos pa gang yin pa de slon te/ legs par bkrus la yan lag lnga'i dri ma dang bcas pas ga pur ma tshos pa dang bsres te/gnyis ka'i rtsa ba'i sngags zhag bdun gyi bar du thun bzhir byas la/ de'i 'og tu bza' ba dang btung ba la sogs pa sbyar na ji skad bshad pa bzhin du dbang du 'gyur bar gdon mi za'o/ /ser skya zhes bya ba ni kha dog ser skyar 'dug pa'o//lhag ma ni go sla'o/ /til nag ces bya ba la sogs pa yang go bar zad do/ /ba lang zhes bya ba la sogs pa la dbang du bya ba'i thabs las thams cad pa'i thab khung du gang gi ming nas smos te/ ji skad bshad pa'i sbyin sreg byas na dpa' bo la sogs pa'i lha rnams dbang du 'gyur la de ltar ma yin na ji skad bshad pa bzhin du 'gyur ro//de'i mdun du zhes bya ba ni dpal he ru ka'i spyan sngar ro/ /'am zhes bya ba'i sgras ro'i khar ro/ /lhag ma ni go sla'o/ /le'u sum cu bdun pa'o// //dpa' bo'i yan lag dbye ba ni sku mdog dang /phyag dang / zhal dang / phyag mtshan la sogs pa'o/ /dpa' bo'i dbang phyug mi bri'o/ /zhes bya ba ni dam tshig las 'da' bar byed pa la bcom ldan 'das mi gzigs so zhes bya ba'i don to/ /yang dag rab sbyin rig par 'gyur/ /zhes bya ba ni khams gsum gyi bde ba gang yin pa de myong bar 'gyur ro zhes bya ba'i don to//le'u sum cu brgyad pa'o// //gzhan yang rnam pa bzhi yis dgod/ /ces bya ba ni dpa' bo'i rtsa ba'i sngags rnam pa bzhi pa ste/ ki li ki li/ si li si li/ hi li hi li/ d+hi li d+hi li/ zhes bya ba dang /mkha' 'gro ma'i rtsa ba'i sngags ni ha hA he hai/ ho hau huM hUM zhes bya ba'o/ /le'u sum cu dgu pa'o// //de nas da ni zhes bya ba la sogs pa ni sbyor rgyal po la sogs pa dbang du bya ba yin no/ /sgron ma ni nya dang sha la sogs pa ste/ sha dang por yod pa smos pa yin no//'di zhes bya ba ni sbyin sreg go/ /sbyin sreg kyang rnam pa gnyis te/ phyi'i sbyin sreg dang / lus kyi sbyin sreg go/ /de nyid kyis na nya'i sha dang ldan zhes bya ba la sogs pa smos pa yin no/ /gnas skabs thams cad du zhes bya ba ni dga' ba dang khro ba'i gnas skabs su yang ngo //dpa' bo'i dbang po ni dpal he ru ka ste/ de sgrub pa po la dngos grub rgya chen po stsol bar 'gyur ro zhes bya bar sbyar ro/ /mtshan mo sbyin sreg byed la gzhol/ /zhes bya ba ni lus kyi sbyin sreg ni nges par mtshan mo bya dgos pa'i phyir ro/ /brgya dang zhes bya ba la sogs pa ni go sla'o//le'u bzhi bcu pa'o// //de nas las kyi zhes bya ba la sogs pa ni 'dir rdzogs pa'i rnal 'byor pas dngos grub thams cad 'grub par ston pa yin no/ /bcu gnyis zhes bya ba ni dbang du bya ba dang / dgug pa gnyis gcig tu bya ba dang / gsad pa dang bskrad pa gnyis gcig tu bya ba la ltos te gsungs pa yin no//rab mchog ces bya ba la sogs pa ni mkha' 'gro ma nyi shu rtsa bzhi'i gnas gsal bar byas pa yin no/ /rdo rje dkyil 'khor ni dpal he ru ka'i dkyil 'khor ro/ /der gtso bo ni bdag po'o/ /dgon pa ni ma ru bu'i'o/ /a ra na ni rA me shwa ra'o//pul+lI ra dang mA la ya bstan pa ni gnas thams cad kyi gtso bo yin pa'i phyir ram/ man ngag las khong du chud par bya'o/ /pul+lI ra ma zhel ya la sogs pa'i gnas thams cad kyang go bzlog pa'i tshul gyis phyogs dang mtshams su gzung ngo / /rdo rje phag mo nas sme sha can gyi bar rnal 'byor ma drug ni rdo rje phag mo la sogs pa tsaN+Di ka'i mthar ro//ma mo ni kA kA s+ya la sogs pa'o/ /lA ma nyid ces bya ba ni lA ma'i rigs su gtogs pa rnal 'byor ma drag mo'o/ /rigs kyi gtso mo ni mkha' 'gro ma la sogs pa bzhi po'o/ /nag po chen po ni 'jigs byed chen po'o/ /mkha' 'gro rnams kyis zhes bya ba ni lhan cig pa'i don la gsum pa ste/ji lta bur gyur pa rnams dang / lhan cig gzugs can ma rnams dang ngo / /gzugs can ma zhes bya ba ni rU pi ni gzhan dag ste/ tsum+pi ka dang ba li ka la sogs pa ste/ tha dad par gyur pa rU pi ni dang lhan cig par blta bar bya'o//paM tsa la zhes bya ba ni gnas dang nye ba'i gnas las gzhan pa'i grub pa'i gnas so/ /de la sogs pa nye bar mtshon pa tsam du gsungs pa ste/ rgya cher ni grub pa'i rnal 'byor ma stong phrag nyi shu rtsa gcig yin te/ de dag kyang 'khrugs pa'i tshul gyis 'gro ba yin no//'khor lo gsum la gnas pa'i slar yang pul+lIr ma la ya la sogs pa go bzlog pa'i tshul gyis sbyar bar bya'o/ /lha mo lhag ma gzhan dag kyang dpal he ru ka'i rnal 'byor ma yin no/ /shrI he ru ka sbyor ba che/ zhes bya ba ni dpal he ru ka'i bsrub pa'i sbyor ba chen po dang 'tsham pa'o//de'i zhes bya ba ni nges par gzung ba'i tshul gyis drug par byas pa'o/ /dkyil 'khor gtso mo yin zhes bya ba ni 'khor lo gsum gyi mkha' 'gro ma nyi shu rtsa bzhi ste/ de dag dang lhan cig tu khyab pa'o zhes bya bar sbyar ro/ /rgyu dang mi rgyu zhes bya ba ni rgyu ba dang mi rgyu ba dang bcas pa'i sa gzhi rnams su khyab cing gnas pa'o//ji lta bu zhe na/ tha mal pa ma yin pa'i gzugs kyis bsrub pa dang srubs pa'i sbyor bas phyi rol gyi phyag rgya ma ste/ de yang ji lta bu zhe na/ bsags pa med pa ste/ gzhan dag gis las ngan pa bsags par gyur pa gang yin pa de med par 'gyur ro//dang po'i don la gsum par shes par bya'o/ /de dang lhan cig sgren mo rtag tu nub mo spyad ces bya bar 'brel to/ /lhag ma ni go bar zad do/ /le'u bzhi bcu gcig pa'o// //me tog chu ni dus su 'byung ba dang lhan cig skyes pa'o/ /sngags 'di zhes bya ba ni rtsa ba'i sngags yi ge bdun pa'o//de bzhin sbyin zhes bya ba ni 'khor lo gsum po rnams la sbyin pa'o/ /nag mo chen mo ni rdo rje phag mo'o/ /bden pas tshangs par spyad pa zhes bya ba ni tshangs par spyod pa dang ldan pa'o/ /thog mtha' zhes bya ba ni dbus med na thog ma dang tha ma med pa nyid kyis na thog ma dang dbus dang tha mar bdag nyid dbang du gyur pa'o//bzhad pa nyid phyag rgya yin pas na rol cing dgod pa gtso bor gyur pas dga' bar byed pa ste/ phyag rgya des so/ /lta ba'i snyems pa yang dag par ston cing snyems pas mthong ba ni snyems pa'o/ / 'di lta bu'i khyad par dang ldan pa'i lha mo ni grags pa dang ldan par 'gyur ro/ 'dis zhes bya bas ni mo rtags su shes par bya'o/ /bzhad pa ni nye bar mtshon pa tsam ste/ rab tu dga' ba'i bde ba thams cad kyang mtshan mo'am nyin mo bya'o zhes bya bar sbyar ro/ /gzugs dang las kyi zhes bya ba la sogs pa ni sgrub pa pos mthong ba dang grub pa'i lha mo rnams sngon ma byung ba'i gzugs dang bya ba dag ston par byed de/de'i las dang las kyi lan bstan pa ni gar dang zhes bya ba la sogs pa yin te lha mo'i bya ba'o/ /rdo rje la ni zhes bya ba la sogs pa ni sgrub pa po'i bya ba'o//dbugs 'byin zhes bya ba ni rgyu ba med pa yin no zhes bya ba'i don to/ /sgeg dang zhes bya ba ni gar gyi khyad par ro/ /sna tshogs zhes bya ba ni sna tshogs kyi bdag mo'o/ /dang por zhes bya ba ni sgrub pa'i las so/ /ha ha zhes bya ba ni gzhan gyi las te/ sngar bshad pa'i rim pa de nyid kyis bya ba'o//lhag ma ni go sla'o/ /le'u bzhi bcu gnyis pa'o// //bzhi po zhes bya ba ni gnod mdzes kyi sngags kyis so/ /gis zhes bya ba la sogs pas mchod pa 'di rnams shin tu gsang ba yin par bstan to/ /snyim pa zhes bya ba la sogs pas ni sgrub pa po'i nus pa thams cad kyi mtshan ma ston pa yin te/gang gi tshe gsang sngags mngon par bzlas nas me tog nam mkha' la gtor la de las me tog gcig kyang la mi ltung na de'i tshe las thams cad kyang byed par nus so zhes bya ba rgyas par sbyar ro/ /lha dang mi yis mthong mi 'gyur//zhes bya ba ni lha dang mi rnams kyis kyang phyed par mi 'gyur ba'o/ /shing zhes bya ba la sogs pas ni yi ge bdun pa'i sngags kyis sngon du bsnyen pa byas pas cho ga du ma dag bstan pa yin te/ dus min 'chi dang bcom dang nyams/ /zhes bya ba las dus ma yin par 'chi ba sel bar 'gyur zhing tshe 'phel bar byed pa'o//de bzhin zhes bya ba la sogs pas ni pra se na'i cho ga ston to/ /yang na zhes bya ba la sogs pas ni nad zhi ba'i cho ga ston te/ yi ge bdun pa'i sngags bsgom pa'am lan brgya bzlas pa'o/ /nyi ma'i dbus su mngon sum du bsam par byas te/ de la nad kyis gzir ba'i nad pa bzhag la yang lan stong gi bar du bzlas la/de'i lus shel ltar dri ma med par bsams na ji skad bshad pa bzhin du 'gyur ro/ /yang 'dra ba zhes smos pas bsgrub par bya ba de nyid kyi snying gar mthe bo tsam gyi tshad la shel ltar dang ba'i 'od zer 'bar ba dang bcas pa'i rnam par shes pa'i rang bzhin bsams na nad med par 'gyur ro//ston ka'i zhes bya ba la sogs pas ni dug bsal ba'i cho ga ston to/ /gzhan ni go sla'o/ /gzugs lnga zhes bya ba la/ /zla ba'i dkyil 'khor re'u mig lngar byas pa la re'u mig dgu ru 'gyur te/ de la 'di ltar bkod na 'di sa rgyu ba dang mi rgyu ba'i dug gis zin pa'i mgor bzhag la/de nas bdud rtsi'i rgyun babs pas lus thams cad du dug med par bsams na nad med par 'gyur ro/ /de bzhin du rims la sogs pa'i nad rnams kyang bsal bar bya zhing rang nyid kyis bza' ba dang bca' ba la sogs pa yang spyad par bya'o zhes bya ba ni man ngag go//gzhan dag ni go sla'o/ /'khor lo 'di nyid lag pa'i mthil du bsams la bsgrub par bya ba'i mgo la bzhag na yang snga ma bzhin du 'gyur ro/ /le'u bzhi bcu gsum pa'o// //gtsang ma'i 'o ma zhes bya ba ni ba'i 'o ma'o//le'u bzhi bcu bzhi pa'o// //rta gsod pa ni ka ra bI ra'o/ /skye gnas rgya bcings pa zhes bya ba ni phyi'i lha mo dang kha sbyor gyi sbyor ba bya ba'o/ /spra tshil gyis kyang rab tu byug /ces bya ba ni/ 'dir spra tshil las gzugs brnyan byas la/ tsan+dan dmar po'i phye ma dang /tsha ba gsum gyi lde gus byug/ /ces bya bar sbyar ro/ /le'u bzhi bcu lnga pa'o// //yi ge ha ni lnga po dang / /lag pa kun du mnyes nas ni/ /zhes bya ba ni gang zhig gi rkang rjes kyi rdul khrag dang / dug dang / ske tshes lag pa gnyis kyi mthil bskus la/ de'i steng du ba bla'i snag tsha dang bya rog gi sgro'i smyu gus yi ge lnga/heM h+ha/ /hau ho bris la bsam gtan gyis kyang de ltar bsams la seng ldeng gi me mdag gam/ ro bsregs pa'i me mdag la lag pa gnyis nyed cing sbyin sreg byas na dgra bo'i kha nas khrag 'dzag cing mod la 'chi bar 'gyur ro//thod pa la sogs pa la yang sbyor ba de bzhin du bya'o/ /byi la la sogs pa'i sha kha na ma tho ba med pas rnyed pa ni mkha' 'gro ma dgyes par bya ba yin no zhes bstan pa'i phyir byi la zhes bya ba la sogs pa gsungs pa yin no/ /yang yi ge bdun pa'i yi ge re re zhing bzlas brjod 'bum gyi grangs tshad mar mngon par bzla bar bya zhing dang por sreg blugs gsum byas la phyis stong rtsa brgyad bya'o zhes bya bar sbyar ro//le'u bzhi bcu drug pa'o// //rab tu rtogs pa ni mi shi ba'o/ /gnam lcags ni lcags kyi zegs ma'o/ / ka ka an+ti ka'i 'bras bu ni/ shing gan+d+ho pa la'i 'bras bu'o/ /ne'u le'i spyi bor zhes bya ba ni srog gcod pa'i kha na ma tho ba med par rnyed pa'i thod pa'i nang du rgya skyegs dang gur gum dang lhan cig phye mar byas la ji ltar ji skad bshad pa bzhin du cho ga'o/ /gser gyi 'bras bu ni d+ha du ra'i 'bras bu'o//bya chen po'i gnas ni 'ug pa'i tshang ngo / /rgyus pa ni chu rgyus so/ /'bru ni 'bras sam 'u su'i 'bras bu'o/ /le'u bzhi bcu bdun pa'o// //de nas zhes bya ba la sogs pas ni bcom ldan 'das kyi yum gyi snying po'i sngags ston pa'o/ /ri bo bzang po bri bya zhing //zhes bya ba ni rlung dang / me dang / chu dang / dbang chen gyi dkyil 'khor dang / rus sbal dang / sna tshogs rdo rje dang / sna tshogs pad ma'i steng du gser gyi ri bdun gyis yongs su bskor ba'i ri'i rgyal po ri rab bsams te/ de'i steng du 'khor lo gsum la sogs pa rdzogs par bya ba'i rim pa ston te/ha ha he he zhes bya ba ni lha'i nga rgyal gyis sngags chen po'i bshad pa ston te/ /de nas dpa' bo nyi shu rtsa bzhi'i mtshan go bzlog pa'i tshul gyis ston to/ /'jigs byed ni 'jigs byed chen po'o/ /bI ri na ni su ra bI ri na'o/ /ka ta zhes bya ba ni ma hA kaM ka la'o//bya ba kun la sgrub pa pos/ /zhes bya ba ni zhi ba dang rgyas pa la sogs pa'i bya ba thams cad la las dang rjes su mthun pa'i 'khor lo gsum dang ldan pa'i sngags pas bsgrub par bya'o zhes dgongs so/ /de nyid kyi phyir 'khor lor bzhugs pa zhes bya bya ba la sogs pa gsungs pa yin no//'khor lo chen po zhes bya ba ni gang la 'khor lo chen po'i tshogs mnga' bde la de skad ces bya ste bcom ldan 'das so/ /yang na chen po'i 'khor lo gsum gang la mnga' ba'o/ /yang na chen po yang yin la 'khor lo yang yin pas 'khor lo chen po ste 'khor lo gsum po nyid do//le'u bzhi bcu brgyad pa'o/ /da ni de nas zhes pa la sogs pas sngar bshad pa'i phyugs sgrub pa de'i kha bskang pa ston pa yin te/ de ni 'dir bcom ldan 'das dpal he ru ka nyid du bskyed pa gsal bar byas pa yin no/ /le'u bzhi bcu dgu pa'o// //go mAM sa la sogs pas dbang du bya ba la sogs pa'i cho ga ni sngar bshad pa'i cho ga bzhin du bya'o//kha chu ni bad kan no/ /so shing ni de nyid do/ /rang gi lus zhes bya ba ni 'gro ba'am 'dug pa'am gnyid log pa'am ma log pa la sogs pa'i gnas skabs thams cad du yang sngags pas gsang sngags bzla bar bya zhes pa'i don to//dus kyi nges pa med pa'o/ /sbyin sreg brgya rtsa brgyad kyi bar/ /zhes bya ba ni arka'i yam shing dang rgyas pa'i cho gas zla ba gcig gi bar du sbyin sreg brgya rtsa brgyad rtag par byas na dbul ba thams cad 'jig par byed do zhes ston to/ / gzhan dag ni go sla'o/ /mkha' la spyod pa nyid thob 'gyur/ /zhes bya ba ni so sor snang ba thob par gyur pa'i sngags pas thun gnyis kyi bar du mnyam par gzhag la sbyin sreg byas na lha thams cad kyi dam tshig thob par bya'o zhes bya bar dgongs so/ /go ma yu zhes bya ba la/ wa'i sha kha na ma tho ba med pa rnyed pa dang /myos byed ces bya ba chang gi sbyin sreg dang / gtor ma la sogs pa byas shing bzlas brjod byas na mtshan mo khyad par du 'gyur ro zhes 'dir sbyar bar bya'o/ /gtor ma dang las dang sngags zlos pas byas nas gang gi nub mo ce spyang gi sha ji ltar rnyed pa bza'o//bil ba zhes bya ba la sogs pa ni snga ma bzhin rgyas pa'i cho ga bya bar shes par bya'o/ /go mAM sa zhes bya ba la sogs pa ni go sla'o/ /go ma yu zhes bya ba wa'i sha'i sbyin sreg yang dang yang du smos pa ni sbyin sreg 'di nyid 'bras bu lhag par che bar ston to/ /brtul zhugs gtsang sbra med na yang //bstan pa'i dngos grub thob par 'gyur/ /zhes bya ba la/ phyi'i brtul zhugs la spyod pa yang med la phyi'i gtsang sbra med du zin kyang tshul 'di bzhin du spyod pa'i rnal 'byor ba la lha rnams kyis bstan pa'i dngos grub thob par 'gyur ro zhes dgongs so//lhag pa'i tsher 'gyur ba ni tshe dpag tu med par 'gyur ba'o/ /kusmaN+DaM zhes bya ba bum sha'i sa bon dang / mon sran sde'u dang / mon sran gre'u dang tsa na ka dang spra tshil te sbrang rtsi'i tshigs ma dang / ske tshe dang / ta ma la'i lo ma cha mnyam par byas te/ gang gi don du bya ba'i ming nas smos te/sngags kyis bskul la de'i khang pa'i phyogs gcig tu bskus na ji skad bshad pa bzhin du 'gyur ro/ /le'u lnga bcu pa'o// //bla ma'i man ngag dag gis rang blo phye/ 'dir bdag mdo tsam brtsams pa'i blo skyes gyur/ /gal te ngan na 'phags pas dag par mdzod//sems 'khrul pas 'di rnam par 'khor bar 'gyur/ /gang 'dir phyugs zhes sgrub pa la sogs pa/ /bshad pa de ni tshul bzhin mi shes shing / /de bzhin sa stengs skye bo dman pa dag /sdang byed dman zhing sbrul nag lta bu yin//bsod nams 'di yis 'khor lo gsum dag pa'i/ /mnyam par byed pa rnams su bdag gyur cig /de bzhin 'di yis 'gro ba ma lus pa/ /rtag tu sdig pa kun las nges grol shog /'dir ni 'di rtsom byed pa dpal ldan ni/ /lang+kar skyes par gyur pa gang yin pa//rgyal ba bzang po zhes bya de la ni/ /dpa' bo rnal 'byor ma rnams bzod par mdzod/ /bde bar gshegs pa'i gnas gyur pa/ /mchod rten las mchog dag gi rten/ /cho 'phrul rgyun mi 'chad pa yi/ /dpal ldan ma hA bim par bshad/ /byang chub mchog tu blo mchog mkhas pa'i grags pa'i rgyu//sgrol ma'i gtsug lag khang mchog dag tu gnas bcas te/ /gzhung 'di dang ni bstod dang sgrub pa'i thabs dang ni/ /de yi dkyil 'khor cho ga rab rgyas brtsams pa yin/ /dpal 'khor lo sdom pa'i dka' 'grel/ /slob dpon rgyal ba bzang pos mdzad pa rdzogs so// //

CLOSE WINDOW