CLOSE WINDOW

D1389
བོད་ཡིག

@##/ /rgya gar skad du/ se kod+de sha Tip+pa ni/ bod skad du/ dbang mdor bstan pa'i brjed byang / dpal dus kyi 'khor lo la phyag 'tshal lo/ /dmigs bcas nam mkha' las byung dang //dmigs med bde la phyag 'tshal nas/ /byang chub sems dpa'i rnam bshad pas/ /dbang mdor bstan pa dbye bar bya/ /zla ba bzang pos gsol ba zhes pa sa bcu'i dbang phyug phyag na rdo rje'i sprul pa'i sku sham+b+ha la'i yul gyi bdag po chen pos gsol ba 'debs par byed do//yang dag par ston par byed pa nyid kyis na kye ston pa'o/ /gang zhig 'chad par 'gyur pa chu la sogs pa dbang bskur ba rnam pa bdun dang bum pa la sogs pa rnam gsum dang /bla na med ces pa mchog tu mi 'gyur pa ste/ de bzhin zhes pa dbang bskur ba'o/ /'dis 'khrud cing lus la sogs pa sgrib pa med par byed do zhes pas na dbang bskur ba ste/de bdag la gsungs shig pa'o/ /'jig rten pa'i dngos grub ces pa 'og min gyi srid pa'i mthar thug pa'i bdag po dang / mchog gi dngos grub ces pa bag chags dang bcas pa'i nyon mongs pa dang shes bya dang snyoms par 'jug pa'i sgrib pa 'gog pa las sa bcu gnyis thob pas yang dag par rdzogs pa'i sangs rgyas nyid de/de'i ched du'o/ /mdor bsdus pa yis zhes pa gsol ba 'debs pa po nyon mongs pa dang bskal ba dang sems can dang lta ba dang tshe'i mtshan nyid kyi snyigs ma lngas nye bar bcom pa'i skye bo rjes su 'dzin par mngon par dgongs pa'i phyir ro//dang po'i sangs rgyas ting nge 'dzin la snyoms par zhugs pa'i ston pa po'i lan gsungs pa/ nyon cig ces pa la sogs pa'o/ /dbang bskur don zhes pa dbang bskur dang de'i dgos pa'o/ /mchog ces pa mchog tu mi 'gyur pa ste/mchog tu mi 'gyur pa'i bde ba'i thabs nyid kyi phyir lhag par 'dod pa ma yin pa yang ngo / /rtsa'i kun spyod la sogs pa gsungs te/ steng dang 'og tu la la nA la sogs pa rtsa drug po rnams su 'chad par 'gyur pa'i rim pas srog dang thur sel gyi rlung yang dag par rgyu ba'o//rtsol pa ni zhes pa/ yams nye bar 'gog pa'o zhes pa'i dbyings 'di'i/ A ste kun nas 'gog pa ni srog rtsol te/ srog dang thur sel gyi rlung dag 'gog pa zhes pa'i don to//mdor bstan pa yis zhes pa mdor bsdus pas so/ /rnal 'byor dang rnal 'byor ma la sogs pa'i rgyud thams cad du mdor bstan pa rnam pa gsum ste rgyas par bshad pa yang ngo / /de la mdor bstan pa rang ming nyid kyis brjod pa'o//rab tu mdor bstan pa ni gnyis pa'o/ /mdor bstan che ni gsum pa'o/ /de bzhin du rgyas par bshad pa yang rang ming nyid kyis brjod pa'o/ /rab tu rgyas par bshad pa ni gnyis pa'o/ /gzhan zhes pa rgyas par bshad pa chen po ste gsum pa'o/ /mdor bstan pa dang rgyas par bshad pa dag nyid ni rgyud yang dag par bsdus pa ste/de la mdor bstan pa yang dag par bsdus pa ni nyung ngu'i rgyud mtha' dag ste dper na brgya phrag bco brgyad pa'i gzhung dpal 'dus pa la sogs pa lta bu'o/ /rgyas par bshad pa yang dag par bsdu ba ni rtsa ba'i rgyud kyi rgyal po bstan pa mtha' dag ste dper na stong phrag nyi shu lnga pa'i dpal 'dus pa la sogs pa lta bu'o//de bzhin du rab tu mdor bstan gyi nyung ngu'i rgyud la dka' 'grel lo/ /'dir rgyas par bshad pa ni rab tu rgyas bshad du mngon par 'dod de/ rtsa ba'i rgyud la dka' 'grel lo/ /de bzhin du mdor bstan chen pos nyung ngu'i rgyud la rgya che 'grel lo//'dir rgyas par bshad pa ni rgyas bshad chen por mngon par 'dod de/ rgyas bshad chen pos rtsa ba'i rgyud la rgya che 'grel lo/ /de ni ste yang dag par sdud pa dang dka' 'grel dang rgya che 'grel te gsum ka'ang / mngon shes thob rnams kyis zhes pa lha'i mig dang lha'i rna ba dang pha rol gyi sems shes pa dang rang dang gzhan gyi sngon gyi gnas rjes su dran pa dang /nam mkha' la 'gro ba'i rdzu 'phrul thob pa rnams kho na nas bya'o/ /mkhas rnams kyis min nyid ces pa rtog ge skam po goms pas sems kyi rgyud nye bar bcom pa/so so rang gi rig par bya ba nang gi bdag nyid sgom pa la kha phyir phyogs pa rnams kyis ni ma yin no/ /de ltar mdor bstan pa la sogs pa mtha' drug rnams kyis dang ji srid du 'jig rten khams la sogs pa'i bar rnams kyis dag pa 'di ni dang po'i sangs rgyas kyi rgyud do//shin tu rnam par dag pa dang / chos dang sngags dang dbyibs kyi rdo rje'i rnal 'byor rnams kyis te/ stong pa nyid dang mtshan ma med pa dang smon pa med pa dang mngon par 'dus ma byas pa'i rnam par thar pa rnams snying rje dang byams pa dang dga' ba dang / btang snyoms kyi tshangs pa'i gnas rnams la lhan cig rim pa ltar ro mnyam pa'i ngo bo can/bzhi pa dang shin tu gnyid log pa dang rmi lam dang sad pa'i gnas skabs 'jig par byed pa/ lhan cig skyes pa dang chos dang longs spyod rdzogs pa dang sprul pa'i sku'i ngo bo rnams kyis so/ /skad cig gcig dang rnam pa lnga dang rnam pa nyi shu dang sgyu 'phrul dra ba'i mngon par rdzogs pa'i byang chub rnams kyis zhes pa la/skye ba'i rim pas pha dang ma dag gi gnyis ka'i thig le ro mnyam par gyur pa'i ma'i gsang ba'i 'khor lor skye bar 'dod pa'i kun gzhi rnam par shes pa gang skad cig gcig po bde ba yang dag par rig pa 'ba' zhig pa//lus kyang nya ro hi ta ltar rnam pa gcig pa de ni skad cig gcig gis mngon par rdzogs par byang chub pa'o/ /gang gi tshe mngal na gnas pa de nyid kyi gzugs la sogs pa'i bag chags kyi bdag nyid can shes pa lnga yang dag par rig cing / rus sbal ltar 'bur po'i rnam pa lnga 'thon pa de'i tshe rnam pa lnga mngon par rdzogs par byang chub pa'o/ /de nas gang gi tshe shes pa lnga po rnams kyi so so rang gi sa la sogs pa'i bag chags kyi dbye ba dang / lus sor mo nyi shu rdzogs pa de'i tshe rnam pa nyi shus mngon par rdzogs par byang chub pa'o//de nas mngal nas 'thon te sgyu ma'i dra ba ltar mtha' yas pa'i dngos po yang dag par rig pa ni sgyu 'phrul dra bas mngon par rdzogs par byang chub pa'o/ /rdzogs pa'i rim pas ni du ba la sogs pa'i mtshan ma bcu po rnams kyi chung ngu dang 'bring dang chen po dang shin tu chen po'i dbye bas sgrub pa bzhi po rnams rdzogs pa'i byang chub pa rnams so//phung po rnams kyis ni gzugs dang tshor ba dang 'du shes dang 'du byed dang rnam par shes pa dang ye shes rnams kyis so/ /khams rnams kyis ni sa dang chu dang me dang rlung dang nam mkha' dang ye shes rnams kyis so//skye mched rnams kyis ni lus dang lce dang mig dang sna dang rna ba dang yid dang / dri dang gzugs dang ro dang reg bya dang chos kyi dbyings rnams kyis so/ /mang po'i tshig las bshang lam dang rkang pa dang lag pa dang ngag dang mdoms dang dung can ma dang / bshang ba gtong ba dang 'gro ba dang len pa dang smra brjod dang gci ba 'dzag pa dang khu ba 'pho ba rnams kyis te/rnam par snang mdzad la sogs pa rnam par dag pa so sor rigs drug po 'di rnams kyis so/ /'jig rten gyi khams dang nang dang mngon par dbang bskur ba dang sgrub thabs dang ye shes zhes bya ba'i le'u lnga pa snod kyi 'jig rten dang sems can gyi 'jig rten dang sems can sbyong bar byed pa dang 'jig rten pa'i dngos grub sgrub par byed pa dang mchog tu mi 'gyur pa'i don rab tu gsal bar byed pa rnams kyis so//bden gnyis ni 'jig rten dang 'jig rten las 'das pa dag gis so/ /dang po'i sgra ni thog ma dang tha ma med pa'i don to//chos rnams thams cad phyin ci ma log par/ /sangs rgyas zin to zhes pas sangs rgyas so/ /dang po yang 'di yin la sangs rgyas kyang ngo zhes pa ste skye ba dang 'jig pa dang bral ba thams cad mkhyen pa zhes pa'i don to/ /mtshan yang dag par brjod par//sangs rgyas thog ma tha ma med/ /dang po'i sangs rgyas gnyis rtogs med/ /ces so/ /snying rje stong nyid sku can te/ /dus ni kun rdzob gzugs can ma/ /stong nyid 'khor lo zhes par bshad/ /dus 'khor gnyis med mi 'gyur pa'o/ /yang na yi ge re re'i ming gis te/ka yig las ni rgyu zhi ba/ /la yig las 'dir thim pa nyid/ /rtsa yig las ni g.yo ba'i sems/ /kra yig las rims bcings pas so/ /dang por zhes pa la sogs pa tshigs su bcad pa gnyis ni gsal lo/ /dkyil 'khor gyi byang gi sgor sgrib pa dang bcas pa'i lus dag pa'i don du chu dang cod pa na dag go//lho'i sgor ngag dag pa'i don du dar dpyangs kyi dbang ste/ rdo rje dang dril bu'i dbang bskur yang ngo / /shar du sems dag pa'i don du brtul zhugs chen po dang ming gi dbang bskur dag go/ /nub tu ye shes dag pa'i don du rjes su gnang ba'i dbang bskur ro//dag pa gzhan yang yod cing de gsungs pa/ sa la sogs pa'i khams drug rnams spyan ma la sogs pa rig ma drug nyid du grub pa gsal bar byed pa ni chu'i dbang bskur ro/ /de bzhin du gzugs la sogs pa'i phung po lnga rnams rnam par snang mdzad la sogs pa nyid du rdzogs pa ni cod pan gyi dbang ngo //du ba la sogs pa pha rol tu phyin pa bcu so sor thob pa'i don du dpa' bo'i dar dpyangs kyi dbang bskur ba'o/ /rdo rje mi 'gyur che/ dril bu sangs rgyas skad ces par sbyar te/ 'khor ba ba'i sdug bsngal mtha' dag gis mi phyed pa nyid kyis dang /de rnams 'byed par byed pa nyid kyis na bde ba mi 'gyur pa chen po kho na rdo rje'o/ /mtha' yas pa'i lha dang mi la sogs pa rnams la de dang de'i skad kyis rgyun mi 'chad par chos kyi bdud rtsi bstan pa'i don du gzhom du med pa'i sgra'i rang bzhin rdo rje dril bu'o//nyi ma zla ba zhes pa srog dang thur sel g.yas pa dang g.yon par 'bab pa dag gcig pa nyid a wa d+hU tI ru zhugs pa ste de'i don du rdo rje dang rdo rje dril bu dang ldan pa'i lag pa dag gis 'khyud pa'i tshul ni rdo rje dang rdo rje dril bu'i dbang bskur te bzhi pa'o/ /tha mal pa'i yul dang dbang po dang rnam par shes pa rnams 'gog pa las lha'i mig la sogs pa'i dbang po rnams kyis lha'i rnam par shes pa rnams stong pa nyid kyi gzugs kyi yul la bems po ma yin par rab tu 'jug par nges pas phyag rgya chen po'i dngos grub thob par byed pa nyid kyi phyir rdo rje brtul zhugs kyi dbang bskur te lnga pa'o//bram ze la sogs pa'i rigs rnams gcig tu bsre ba'i dgongs pas che ge mo rdo rje zhes bya ba'i ming gi byed pa las byams pa la sogs pa tshangs pa'i gnas rnams yongs su rdzogs pas ming gi dbang bskur ba ste drug pa'o/ /sems can gyi khams dpag tu med pa la bsam pa'i dbang ji lta bar kun rdzob dang don dam pa'i rnam par dbye bas/mchog tu gsang ba'i rdo rje theg pa ston pa'i don du rjes su gnang ba'i dbang bskur bas sangs rgyas nyid rdzogs par byed pa ste bdun pa'o/ /dbang bskur bdun po 'di rnams ni rdul tshon gyi dkyil 'khor rnam par spangs nas gzhan ras bris la sogs pa'i dkyil 'khor du sbyin par bya ba ma yin no//sngar mdor bstan pa'i dbang bskur bcu gcig po rnams kyi nang nas 'jig rten pa dang 'jig rten las 'das pa'i dngos grub kyi khang bzangs kyi them skas su gyur pa 'og ma'i kun rdzob kyi ngo bo can dbang bdun po rnams rnam par bshad nas rnal 'byor gyi kun rdzob tu gyur pa 'jig rten pa'i dngos grub sgrub par byed pa don dam pa'i rjes su mthun pa'i dbang bskur gsum rnams/bum pa zhes pa la sogs pas mdor bstan nas/ mchog gi dngos grub kyi rgyu thun mong ma yin pa gsungs pa/slar yang zhes pa la sogs pa'o/ /shes rab chen po zhes pa kun du rtog pas ma brtags pa 'chad par 'gyur pa'i phyag rgya chen mo'o/ /de bsgom pa las ye shes ni de las skyes pa mi 'gyur pa'i bde ba chen po ste/ dbang bskur bcu gcig pa'o//bum pa la sogs pa bzhi po 'di rnams kyi ming rjes su 'gro ba dang bcas pa rnams ni grangs ji lta bar 'gyur pa dang / mi 'gyur pa dang 'dzag pa dang mi 'dzag pa zhes bya ba rnams so/ /lus zhes pa la sogs pa go sla'o/ /de bzhin du byis pa dang dar ma dang rgan po dang skye dgu'i bdag po'i ming can rnams so//shes rab ces pa lo bcu gnyis ma nas brtsams nas lo nyi shu ma'i bar te/ rang gi sems dga' bar 'os pa dbang bskur ba'i skal ba can de'i nu ma'i yan lag la reg pas byang chub sems 'pho zhes pa gtsug tor gyi pad+ma 'dab ma bzhi pa las khu ba bdud rtsi'i rgyun dpral ba'i pad+ma 'dab ma bcu drug pa'i lte bar 'ongs pa na gang sku'i dga' ba dang /gsung gi dga' ba dang / thugs kyi dga' ba dang / ye shes kyi dga' ba'i bdag nyid kyi bde ba nyams su myong ba de ni dbang bskur dang po thob pa nyid kyi phyir rnal 'byor ba'o ma 'dzin pas dbang bskur ba byis pa zhes brjod do//de nas de'i gsang bar rdo rje cung zad bskyod pas byang chub sems ni 'pho zhes pa mgrin pa'i pad+ma 'dab ma sum cu rtsa gnyis pa nas snying ga'i pad+ma 'dab ma brgyad pa'i lte bar gang sku'i mchog dga' dang / ngag gi mchog dga' dang /thugs kyi mchog dga' dang / ye shes kyi mchog dga'i bdag nyid kyi bde ba nyams su myong ba gang yin pa de snga ma las shin tu lhag pa nyid kyi phyir dar ma gsang ba'i dbang bskur ba'o/ /de nas drag par bskyod pas g.yo bar bgrod ces pa lte bar pad+ma 'dab ma drug cu rtsa bzhi pa las gsang ba'i pad+ma 'dab ma sum cu rtsa gnyis par 'ongs pas khu ba zla ba'i cha bco lnga'i rtse mor son pas shin tu dang bar zhu ba g.yo ba zhes bya ba'i rdo rje nor bu'i bu ga'i mthar bgrod pas gang chen po sku'i khyad par gyi dga' ba dang /gsung gi khyad par gyi dga' ba dang / sems kyi khyad par gyi dga' ba dang /ye shes kyi khyad par gyi dga' ba'i bdag nyid kyi bde ba nyams su myong ba gang yin pa de ni rgan po ste shes rab ye shes kyi dbang bskur ba'o/ /phyag rgya chen po zhes pa nam mkha' las byung ba'i gzugs te/ de rang gi ngang gis 'byung ba'i sgom pa zhes bya ba la rjes chags las skyes pa g.yo med ces pa rdo rje nor bu las phyi rol du g.yo zhing zag pa 'gog pa/gang gi zla ba bdud rtsi mi 'dzag pa'i bde ba nyid kyis na sku'i lhan cig skyes pa'i dga' ba dang / ngag gi lhan cig skyes pa'i dga' ba dang / thugs kyi lhan cig skyes pa'i dga' ba'i bdag nyid can ye shes chen po zhes bya ba dbang bskur bzhi pa'o//'di ni 'jig rten las 'das pa'i ye shes sgrib pa med pa lhag par rtogs pa/ grub pa'i dngul chus zangs la sogs pa rnams gser gyi ngo bo bzhin du sgrib pa dang bcas pa'i phung po la sogs pa rnams de bzhin gshegs pa nyid la sogs pa skye dgu'i dngos por 'grub par byed pa nyid kyi phyir/skye dgu'i bdag po'o/ /khu ba steng du gsang ba dang lte ba dang snying ga dang mgrin pa'i 'khor lo rnams su bgrod pa gnyis su med pa mi 'gyur pa 'di kho na'i ming rdo rje sems dpa' la sogs pa bzhi'o//dpral bar bgrod pa ni shin tu rnam par dag pa la sogs pa rdo rje'i rnal 'byor rnam pa bzhi'o/ /gtsug tor du bgrod pa ni dus kyi 'khor lo'i zhes pa sems dpa' drug rnams so/ /nyon mongs pa dang shes bya'i sgrib pa'i bud shing ma lus pa sreg pa'i thams cad mkhyen pa'i ye shes kyi me 'di nyid kyis ni sgrub byed de gsal bar 'gyur pa du ba sogs rnams kyi rnal 'byor pas bya'o//ci ltar gyur pa rnams kyis she na/ rtsa ba'i rgyud dang bsdus pa'i rgyud dang 'phags pa shes rab kyi pha rol tu phyin pa la sogs pa nges pa'i don gyi mdo sde thams cad du rab tu grags pa stong pa la glo bur du so sor snang ba'i phyir rab gsal de rnams kyis so//rnam par rtog pa thams cad nye bar nub pa'i phyir bsam pa ma yin pa rnams kyis so/ /de kho na nyid kyi 'bras bu'i snga ltas su gyur pa nyid kyi phyir mtshan ma rnams kyis so/ /gzung ba dang 'dzin pa dang bral ba rang bzhin gyis stong pa nyid kyi blo ni shes rab ste/de'i gzugs brnyan rnal 'byor pa la mngon sum du snang ba rnams kyis so/ /phyi dang nang gi dri mas ma gos pa nyid kyi phyir nam mkha' dang mnyam pa rnams kyis so/ /yod pa dang med pa la sogs pa'i rnam par rtog pa'i rnyog pa mtshan ma nyid kyi phyir yod dang med las rnam par 'das pa rnams kyis so//rnal 'byor pa'i so so rang gis rig par bya ba nyid kyi phyir rang gi sems kyi rtogs pa'i don rnams kyis so/ /rnam pa thams cad du ma byas pa rmad du byung ba rang bzhin med pa'i dngos po'i ngo bo can nyid kyi phyir rdul phran las skyes pa'i tshogs pa rnams dor ba rnams kyis so//phyi nang mtha' dag khyab pa dkar po du ba'i rnam pa stong pa'i snang ba ste/ 'di yang sprin ltar snang ba'i de ma thag tu 'byung ngo / /ji skad du gsungs pa/ dang po sprin dang 'dra bar snang //gnyis pa du ba lta bu'o/ /zhes so/ /de bzhin du g.yo ba'i chu'i rnam pa smig rgyu'o/ /mkha' snang dang sgron ma'i rnam pa dag ni rab tu grags so/ /mtshan ma bzhi po 'di rnams ni bug pa med pa'i khang par mun pa la 'byung ba nyid kyi phyir/ mtshan mo'i rnal 'byor dang nam mkha'i rnal 'byor ro//ji skad du dpal gsang ba 'dus pa la sogs par dang po dang gnyis pa bzlog pas gsungs pa/ 'gog pa rdo rjer bgrod sems la/ /mtshan ma nyer 'dzin skye 'gyur pa/ /dang por smig rgyu'i rnam pa ste/ /gnyis par du ba lta bu'o/ /gsum par mkha' snang rnam pa ste//bzhi par sgron ma rab 'bar ba'o/ /lnga pa rtag tu snang ba ni/ /sprin med nam mkha' lta bu'o/ /zhes so/ /de nas sprin med pa'i nam mkha' dang 'dra bar snang ba sngon du 'gro ba'i me'i rnam pa stong pa'i snang ba ni 'bar ba'o/ /zla ba dang nyi ma'i snang ba dag ni rab tu grags so//mun can ni sgra gcan gyi snang ba ste rin po che nag po ltar snang ba'o/ /cha zhes pa glog gi snang ba'o/ /thig le che zhes pa rgyu ba dang bcas pa'i mi rgyu ba gsal bar byed pa kha dog sngon po zla ba'i dkyil 'khor gyi rnam par snang ba'o/ /mtshan ma drug po 'di rnams ni sprin med pa'i nam mkha'i snang ba las byung ba nyid kyi phyir nyin mo'i rnal 'byor dang bla gab med pa'i rnal 'byor ro//de nas de'i dbus su son pa longs spyod rdzogs pa'i sku'i bdag nyid kyi sangs rgyas kyi gzugs mthong ba sngon ma can/ skad cig gcig la lag par gnas pa'i chu lta bur shin tu dang pa rnam pa thams cad pa'i bum pa dang snam bu la sogs pa mthong ba ni sna tshogs gzugs brnyan 'od gsal ba'o//bkab dang ma bkab mig dag gis/ /zhes pa bar snang la ltung ba nyid kyis na phyed btsums pa'i mig dag gis stong par te nam mkha' la gzung ba dang 'dzin pa dang bral ba la rjes brtag min pa rnal 'byor ba'i mngon sum mo//gzugs de ste du ba la sogs pa bsgom par bya/ rang gis nyams su myong bar bya'o/ /rnal 'byor gnyi ga dag kyang dpal dang po'i sangs rgyas su bka' stsal pa/ nam mkhar kun nas zhen pa'i sems dang mig mi 'dzums na rdo rje'i lam du rab zhugs pas//stong pa las ni du ba smig rgyu rab gsal dri med mkha' snang nyid dang mar me dang / /'bar ba zla ba nyi ma rdo rje rnams dang mchog gi cha dang thig le mthong bar 'gyur/ /de yi dbus su sangs rgyas gzugs ni yul dang rnam bral du ma longs spyod rdzogs pa'i sku//zhes so/ /rgyal ba'i yum bar mar yang bka' stsal pa/ rin chen snang ba zhes bya ba'i ting nge 'dzin dang / rin chen sgron ma zhes bya ba'i ting nge 'dzin dang / zla ba snang ba zhes bya ba'i ting nge 'dzin dang / nyi ma sgron ma zhes bya ba'i ting nge 'dzin dang / rnam pa thams cad gzigs pa zhes bya ba'i ting nge 'dzin dang zhes pa la sogs pa'o//yang shes rab kyi pha rol tu phyin par bka' stsal pa/ kau shi ka gang nam mkha' la rnal 'byor du byed pa de shes rab kyi pha rol tu phyin pa la rnal 'byor du byed pa'o/ /gang bla gab med pa la rnal 'byor du byed pa de shes rab kyi pha rol tu phyin pa la rnal 'byor du byed pa'o zhes pa la sogs pa'o//de bzhin du mtshan yang dag par brjod par/ /sangs rgyas thams cad mngon sum pa/ /ye shes me lce 'od rab gsal/ /zhes pa la sogs pa'o/ /de ltar ni/ bla ma'i bka' yis nyams myong med pa las/ / sngags kyi tshul gyi gtam dang gtam yin te/ /gang phyir 'di ni bla ma'i bkas gnang ba'i/ /shes rab longs spyod sngon du 'gro ba'o/ /rtsa ba'i rgyud du bcom ldan 'das kyis bka' stsal pa/ yod dang med las rnam par 'das/ /gnyis med dngos po dngos med zad/ /stong nyid snying rje dbyer med pa//rdo rje'i rnal 'byor bde ba che/ /phra rab rdul gyi chos nyid 'das/ /stong pa'i chos ni rnam par spangs/ /rtag dang chad las nges par grol/ /rdo rje'i rnal 'byor gnyis rtog med/ /ces so/ /gzhan du yang / bsam pa thams cad yongs spangs nas/ /nyin gcig yongs su brtag par bya//gal te yid ches ma gyur na/ /de tshe der nga'i tshig de brdzun/ /zhes so/ /'phags pa klu sgrub zhabs kyis kyang gsungs pa/ /gang gi blo ni rten med pa/ /yod dang med las rnam par 'das/ /de yis zab mo dmigs med pa/ /yid ches don la rnam par bsgom/ / zhes so/ /'phags pa lha'i zhabs kyis kyang / bcom ldan srog gi bdag po rje bo rang nyid la ni thim gyur cing / /'tsho ba'i rlung gi rgyu ba 'byung dang 'jug pa'i tshogs rab zhi bar gyur pa na/ /gang zhig rnal 'byor dbang phyug rnams kyis snang ba shin tu 'od gsal rab 'byam 'di//rang lus nyid las nges 'thon mun pa bcom nas 'jig rten gsum po gnon par byed/ /ces so/ /la ba'i na bza' can gyi zhabs kyis kyang gsungs pa/ snang ba thob pa'i rnal 'byor pas/ /'dir ni rtags zhes bya ba ste/ /grub la 'khrul pa med pa rnams/ / lam nag gi ni du ba bzhin/ /zhes so/ /yang / gnas skabs de yang rnam mi shes/ /ji lta'i stong nyid brjod par bya/ /'jig rten grags pa kho na min/ /med par smra don rjes 'gro min/ /mig dag rengs par byed pa dang / /mgo bo'ang dud pa nyid du ni/ / sems dang sems byung mi g.yo dang / /stong nyid mthong ba'i stong ba nyid/ /ces pa la sogs pa'o/ /sa ra ha'i zhabs kyis kyang / thams cad dngos por rtogs pa dang ldan g.yo ba'i yid ni 'khor ba 'dir/ /g.yang sar rab tu ltung 'gyur blo yang rmongs par rab tu ltung bar 'gyur/ / gal te 'dir ni gang las dmigs pa'i don med chos rnams rtogs rengs par/ /gyur pa de tshe lha mo phyag 'tshal bde ba dam pa dpal gyi mthu/ /zhes so/ /gzhan gyis kyang gsungs pa/ gang du dri ma med pa'i mkha' la mig phyed btsums pa na/ /thugs rje chen po 'phro bas rlan pa bsam pa'i rten za las//yod dang med dang gnyis dang dngos dang dngos med 'byed pa bral/ /stong pa nyid kyi rjes 'gro du sogs mtha' dag glo bur 'char/ /de bzhin du/ dang por thog mtha' las grol ba'i/ /dbu ma tsam la yang dag gnas/ /gang zhig der gnas 'dor ba ste/ /'di yi snang ba bcu bdag nyid//ces so/ /'dir bsod nams dang ldan pa rnams kyis bla ma chen po'i bka' drin las bar snang las khong du chud pa 'di ni rnal 'byor gyi dbang phyug gi rdo rje'i glur kun rdzob dang don dam pa'i tshig gis gsungs te/ dpal ldan dpa' bo sa ha ra yis gsungs pa/ rmongs pa bar snang tshad rnams ni//gal te shes na rmongs tshogs gcod/ /dang por rnam dag nam mkha' la/ /blta zhing blta bas mthong ba 'gag /de bzhin du/ chos kyi tshad ni 'di yis chog /mig phyed gyen du blta ba na/ /mthong ba brtan pa nyid kyis shes/ /rmad byung nam mkha'i dkyil shar b+hu su ku//stong pa'i gzugs mdzes ltos shig b+hu su ku/ /dpe med me tog rgyas so b+hu su ku/ /rin chen rin thang med pa'i me tog long / /me tog 'di ni kha dog sna tshogs can/ /me tog 'di ni stong ba'i dgon par rgyas/ /de bzhin du/ lA mA nam mkha'i me tog shar/ / rab tu mi gnas lci ba'o/ /blta zhing blta bas nam langs kyang / /shAn+ti sgron mas lam tshol lo/ /de bzhin du/ skya rengs shar ro b+hu su ku/ /shan+tis smras pa nam langs thun/ /gang tshe zla ba nya ba shar gyur pa/ /de tshe sems kyi rgyal po rab tu nyal/ /dga' dang snying rje'i Da ma ru yi sgra//'phags pa lha yi dmigs pa med par gsal/ /g.yon dang g.yas su 'khrol ba la/ /kAh+nas smras pa bar lam mo/ /sems rtogs rin chen rab dgas grol/ /grong khyer mi smra rmongs pa rnams/ /me tog lnga byung de ru thim/ /dga' ba'i sems ni nam mkha' byin/ / de bzhin du/ rmad du byung ba gang zhig mthu las byung / /gang zhig nyi zla bcings shing sgron me sbar/ /shAn+ti rang nyid dbang gzhag rang nyid rgod/ /nam mkha'i sbrum ma las ni skye ba mthong / /slar yang zab mo'i chos thos nas ni lam ngan pa/ /mun pa'i lam la ci yang mthong ba med/ /gal te nam mkha'i rtse mor me tog rgyas//shAn+ti sa smras pa de tshe 'khrul pa chad/ /gzhan rnams kyis kyang rab gsungs pa/ /bar snang la ni yid dang rlung dang mig /dus gcig tu ni gal te legs sbyar na/ /rgyal po'i yon tan rin chen nges par skye/ /'di rnams mtha' dag de bzhin gshegs pa'i gsung //sna tshogs rnam rtog bral zhing mi sems par/ /gal te bar snang la ni mig gtad na/ /phyogs bcu'i 'jig rten dag ni yin nam snyam/ /rnal 'byor dbang phyug mtha' dag 'di las thob/ de bzhin du/ rang yid mtshan nyid mtha' dag bral ba yis/ /mig phyed gyen du blta ba dang bcas pas//gal te dbu mar rlung ni bus gyur pa/ /de tshe rdo rje'i me dang du ba 'byung / /zhes so/ /de'i phyir sangs rgyas nyid don du gnyer bas the tshom med par du ba la sogs pa'i lam bsgom par bya'o/ /'o na phyag rgya chen po bsgom pa'ang rnam par rtog pa'i rnyog pa mtha' dag gi mtshan ma med pa ma yin nam/sgro btags pa de ci ltar bsgom par bya zhe na gsungs pa/ dngos med ces pa la sogs pa'o/ /man ngag ji lta ba bzhin te/ phyi rol dang nang gi dngos po med pa la de kho na la gzugs brnyan gyis rnal 'byor ba rnams kyis bsgom pa yin te/sgom pa de ni dngos po med pa nyid kyi phyir sgom pa ma yin no/ /'o na dngos po dang dngos po med pa'i rnam par rtog pa dag rnam par rtog pa nyid du khyad par med phyir ci ltar dngos po med pa sgom pa ni sgom pa ma yin zhe na/ dngos po zhes pa la sogs pa ste/ gang gi phyir rnal 'byor pa'i stong pa nyid kyi gzugs la dngos po dang dngos po med pa'i rnam par rtog pa dag med pas so/ /ci'i phyir zhe na/ gsungs pa/ gang gi phyir stong pa nyid kyi gzugs la ma brtags pa'i du ba la sogs pa mngon sum du mthong ba'i phyir ro/ /bsam pa ni 'di yin te gal te brtags par gyur na ni bum pa la sogs pa bzhin du dngos por 'gyur zhing /gal te mthong ba ma yin par gyur na de'i tshe mo gsham gyi bu la sogs pa bzhin du dngos po med par 'gyur ro/ /'dir ni rnam par brtags pa ma yin par mngon sum du mthong ba'i phyir thams cad legs par gnas so//rnam par ma brtags par mthong ba 'grub pa'i don du rjes su mthun pa'i dpe gsungs pa/ pra phab pa'i sgrub pa pos bsams pa/ dngos skyes min pa chom rkun la sogs pa bems po'i chos las skyes pa ma yin pa'o/ /rnam par ma brtags par mthong ba 'di la dngos po dang dngos po med pa dag yod pa ma yin te/dang po ma yin pa'i don bya ba'i 'bras bu can nyid tsam nye bar dmigs pa'i phyir ro/ /'jig rten na'ang dngos po ba med pa'i don yang sgyu ma dang rmi lam dang dbang po'i gzhu la sogs pa mthong ngo / / de nyid kyi phyir gsungs pa/ med pa'i zhes pa la sogs pa ste/ de yang rnam par rtog pa med pa'i shes pa las skyes pa'o/ /rnam pa thams cad pa'i 'gro ba'i don phun sum tshogs par byed pa nyid kyi phyir yid bzhin gyi nor bu lta bu'o/ /dpe dag gsungs pa'i sngon ma mthong ba'i rkun mo la sogs pas sngags kyis byin gyis brlabs pa'i mig gis gzhon nu ma 'dir gnas pas pra phab par gyur pa na mthong ste/sgrub pa po'i skyes bu rnams kyis ni gnas de dang der song nas gzhon nu mas smras pa thun mong ba'i mig dag gis mthong ngo / /bsam pa ni 'di yin te/ rnal 'byor ba byang chub kyi sems zla ba ma g.yos pas ni grub pa'i man ngag gi sngags kyis byin gyis brlabs pa'i mig can gyi gzhon nu ma bzhin du man ngag med pa'i so so skye bos rtogs par bya ba ma yin pa nam mkha' la mthong ba'o//de yang spros pa thams cad dang bral ba'i sems su gsungs pa/ gal te zhes pa la sogs pa'o//gzhan gyi mig dpral ba la sogs pa na yod pa dag gis mi mthong zhing rang gi mig dag gis kyang ma yin te/ gzhan gyi tshe ma mthong ba'i phyir ro/ /pra phab pa'i dpe 'dis rnal 'byor pa'i mngon sum ni rnam pa thams cad du rang bzhin med pa'i phyir ma skyes pa rmi lam du gzhon nu mas bu nye bar dmigs pa lta bur thams cad mkhyen pa'i ye shes grub bo//ting nge 'dzin rgyal po'i mdor gsungs pa/ ji ltar rmi lam nang 'dir gzhon nu ma/ /de yis bu skyes pa dang shi ba'ang mthong / /skyes na dga' dang shi na mya ngan gnas/ /de lta'i dpe yis chos kun shes par gyis/zhes so/ /gzugs brnyan zhes pa rnam pa thams cad pa sna tshogs pa'i gzugs brnyan no/ /srog rtsol ni lte ba las steng dang 'og gi rtsa gsum gsum rnams su rim pa ji lta bar srog dang thur sel gyi rlung dag 'gog pa ste/ srog rtsol ni lus la sogs pa'i khams 'gog par byed pa yin pa nyid kyi phyir ro//ci ltar gyur pa rnams su zhe na/ steng du g.yon pa dang g.yas pa dang dbu ma rnams su dang / 'og tu dbu ma dang g.yon pa dang g.yas pa rnams su zla ba la sogs pa'i khams 'bab pa rnams su ste/ de bzhin du chu la sogs pa 'bab pa rnams la'o/ / gzhan rtsa stong phrag bdun cu rtsa gnyis po rnams kyis skye ba'i gnas nyid kyi phyir rigs rnams la'o/ /zla ba zhes pa/ steng du zla ba la sogs pa'i rtsa gsum lus dang ngag dang sems rnams te/ 'og tu bshang ba la sogs pa'i rtsa gsum yang ngo / /zla ba zhes pa ste/ de la thabs kyi ste khu ba'i khams kyi zla ba'i rtsa sku ru 'gyur ro//shes rab kyi ste rdul gyi khams kyi nyi ma'i rtsa gsung du 'gyur ro/ /rdul gyi khams kho na'i bshang ba'i rtsa ni sku'o/ /gtso bo ste khu ba'i khams kyi gci ba 'bab pa gsung yin no/ /steng zhes pa khu ba'i khams kyi thugs sgra gcan 'bab pa ste/ rdul gyi khams kyi thugs khu ba 'bab ma'o//steng 'og rigs drug ces pa chu dang rlung dang nam mkha' 'bab pa rnams thabs kyi yan lag nyid kyi phyir dang / sa dang me dang ye shes 'bab pa rnams shes rab kyi yan lag nyid kyi phyir ro/ /phyed dang bcas pa'i zla ba bcu dang ldan pa'i lo dgu bcu rtsa drug gi nang du 'chi ba de 'chad par 'gyur pa'i nges pas 'chi ltas su 'gyur te lhag pa'i rlung 'bab pa rnams kyis so//mun can zhes pa la sogs pa mdor bstan pa ste/ de'i rgyas par bshad pa skye dang zhes pa la sogs pa'o/ /khu ba 'bab pa 'ba' zhig tu ma zad kyi/a wa d+hU tI yang skye ba la sogs pa'i dus gsum du 'bab bo/ /gzhan yang dus sbyor bcu gnyis la 'khor bar mtshungs pa'i phyir nyi ma'i ste srog gi rlung gi lug la sogs pa'i dus sbyor gyi bdag nyid sna bug g.yon pa nas glang la sogs pa'i dus sbyor gyi bdag nyid g.yas pa'i bu gar 'pho ba na mnyam pa zhes bya ba yang 'bab bo//de rgyas par 'chad pa/ dus sbyor 'char ba'i zhes pa la sogs pa ste/ zla ba dang nyi ma dag la mnyam pa 'bab pa'i phyir mnyam pa'o/ /mnyam pa'i grangs gsungs pa/ rkang zhes pa la sogs pa ste dus sbyor gcig 'char pa'i mngon mtshams su 'jug pa dang 'byung ba dag gcig tu byas pa'i rkang pa dang bcas pa'i lnga bcu rtsa drug 'bab bo//de bzhin du nyin mo dang mtshan mo'i dus sbyor bcu gnyis kyi mtshams su bdun cu rtsa lngas lhag pa'i drug brgya 'bab po/ /sems can thams cad kyi lus la gang drug brgyas lhag pa'i stong phrag nyi shu rtsa gcig po rnams bdun cu rtsa lngas lhag pa'i drug brgya po 'di yis dman pa rnams la la nA dang ra sa nA 'bab bo//nyin zhag so sor dbu ma'i bdun cu rtsa lngas lhag pa'i drug brgya po rnams lo brgya'i nyin zhag stong phrag sum cu rtsa drug rnams kyis bsgyur te/ de las nyin zhag gi dbugs drug brgyas lhag pa'i stong phrag nyi shu rtsa gcig rnams kyis bgos nas thob pa de rnams nyin zhag nyi shu rtsa lngas lhag pa'i brgya phrag bcu gcig rnams so//de rnams kyang nyin zhag drug cus lhag pa'i sum brgya rnams kyi rnam par phye ba rnams phyogs gsum gyis lhag pa'i lo gsum rnams su 'gyur ro/ / steng du g.yon pa gang yin pa de kho na zla ba dang rkyang ma dang lug dang chu 'bab pa ste de bzhin gshegs pa 'od dpag med kyi rang bzhin no/ /g.yas pa ni nyi ma dang ser skya dang gzhan zhes pa ro ma dang me 'bab pa rin chen 'byung ldan gyi rang bzhin yang ngo / /'og tu dbu ma bshang ba'i rtsa dang sa 'bab pa ste rnam par snang mdzad kyi rang bzhin yang ngo //g.yon pa ni gci ba'i rtsa dang rlung 'bab pa ste/ don yod grub pa'i rang bzhin no/ /steng du dbu ma ni sgra gcan gyi rtsa ste stong pa 'bab par byed ma dang mi bskyod pa'i rang bzhin no/ /de kho na 'og tu g.yon pa khu ba'i rtsa ste ye shes 'bab par byed ma dang rdo rje sems dpa'i rang bzhin no//bshang ba'i rtsa steng du zla ba'i lam dang gcig tu 'gyur te bug pa gcig pa nyid kyi phyir ro/ /de bzhin du gci ba'i rtsa nyi ma dang gcig tu 'gyur ro/ /de bzhin du skye ba la sogs pa bzhi la khu ba'i rtsa sgra gcan dang gcig tu 'gyur ro/ /steng du kun 'dar ma la sogs pa ming gsum ste/'og tu mkha' 'gro gdong la sogs pa ming gsum mo/ /lte ba la sogs pa'i pad+ma lnga'i ze'u 'bru rnams su 'byung ba'i kun 'dar mar son pa'i srog gi nus pa sa la sogs pa khams rnams rim pas 'bab ste/ sdud pa yis ni shes pa phyi rol du 'bab pas khams zad pa'i phyir ro//'jug pa ni gtsug tor gyi pad+ma la sogs pa'i rim pas sa la ste/ lte ba'i pad+ma la ngal so bar byed do/ /spro bas zhes pa nang du 'bab pas lus kyi khams 'phel ba'i phyir ro/ /de ltar kun 'dar mar 'gro ba dang 'ong ba dag go/ /lhag par lus pa las rkyang ma dang ro ma dag la ni pad+ma'i 'dab ma rnams la song ba dang 'ongs pa'o//lte ba la sogs pa gsum la rim pas lus la sogs pa gsum 'bab par byed pa dung can mar son pa'i thur sel gyi nus pa snga ma bzhin du gnas pa'o/ /dung can ma 'di kho na chags pa'i bde ba las khu ba 'bab bo//zla mtshan gyi dus su ni de kho na khrag 'bab bo zhes pa la sogs pas shes rab dang thabs 'khyud pa 'chad par 'gyur ba'i mdor bstan pa ni shes rab ces pa la sogs pa'o/ /bud med rnams kyi dung can ma kho na rdul 'bab pa'i phyir gtum mo ste khu ba 'bab pa'i phyir mkha' 'gro gdong ngo //kun 'dar ma ni rdul 'bab pa g.yung mo ste skyes pa'i ni kun 'dar ma kho na'o/ /sna bug g.yon pa la 'chad par 'gyur pa'i rim pas rnam par shes pa dang 'du byed dang tshor ba dang 'du shes dang gzugs zhes bya ba'i phung po lnga 'bab po//de bzhin du g.yas pa la sa dang chu dang me dang rlung dang nam mkha' zhes bya ba'i khams lnga 'bab po/ /dbus su zhes pa kun 'dar ma la phung po dang khams kyi bdag nyid can drug pa ye shes kyi khams 'bab po/ /lte ba'i pad+ma'i 'dab ma'i g.yon gyi 'dab ma drug po lug dang 'khrig pa dang seng ge dang srang dang gzhu dang bum pa'i bdag nyid can rnams la so sor rnam par shes pa la sogs pa lnga'i bdag nyid las dkyil 'khor sum cu rnams so//de bzhin du g.yas kyi 'dab ma drug po glang dang karka Ta dang bu mo dang sdig pa dang chu srin dang nya'i bdag nyid can rnams la so sor sa la sogs pa dkyil 'khor lnga'i bdag nyid can nyid las dkyil 'khor sum cu rnams so//rtsa bar zhes pa bug pa g.yas pa'i gnas su dbyu gu re res sa la sogs pa'i dkyil 'khor re re 'bab po/ /sna bug g.yon pa'i 'dab ma'i dbus su zhes pa la sogs pas 'chad par 'gyur te/de la ltos pas na sna bug dag la'o zhes gsungs so/ /sa la sogs pa dkyil 'khor kho na chu tshod de/ de la chu tshod gcig ni 'jug pa dang 'byung ba dag gcig tu byas nas dbugs drug cu dang bcas pa'i brgya phrag gsum 'bab po/ /de ltar dkyil 'khor lngas dus sbyor zhes bya bas dbugs brgya phrag bco brgyad rnams so//de ltar dus sbyor bcu gnyis kyis brgya phrag drug lhag pa'i stong phrag nyi shu rtsa gcig dbugs dbyung ba dang 'jug pa rnams te/ lus la chu tshod drug cu rnams su 'gyur ro/ /sna bug g.yon pa la 'bab pa'i rim pa ni 'dab ma'i dbus su ni sna bug gi dbus su'o//phung po rten ni 'byung ba zhes pa'i gsung la brten pa rnam par shes pa la sogs pa phung po rnams dang lhan cig rten nam mkha' la rlung dang chu dang me dang sa'i khams kyi dbye bas gsungs pa/ nam mkha' sogs zhes bya'o/ /gzhan las so zhes pa snga ma bzhin du rtsa ba nas brtsams nas zhes pa'i don to//g.yon par rnam shes sogs pas 'byung ba zhes spro bar rnam par gzhag par bya ste zla ba yin pa nyid kyi phyir ro/ /g.yas par sa la sogs pas sdud pa ste nyi ma yin pa nyid kyi phyir ro/ /yang na gang g.yon par zla ba gnas pa shes rab dang bcas pa'i mi bskyod pa la sogs pa'i rang bzhin rnam par shes pa la sogs pa'i dkyil 'khor gyi 'khor lo dang /g.yas par thabs dang bcas pa'i spyan ma la sogs pa'i rang bzhin sa la sogs pa'i dkyil 'khor gyi 'khor lo ste/ sngags dang lha'i bdag nyid spro ba dang sdud pa'i ngo bo can lhan cig skyes pa sems can thams cad la gnas pa'o/ /shes rab ces pa la sogs pas mdor bstan pa de'i shes rab dang thabs nyid rgyas par 'chad de nub ces pa'o/ /snam bu so sor nub tu ste nub phyogs su sa'i rang bzhin spyan ma dang rnam par snang mdzad dag go//shar du rlung gi rang bzhin sgron ma dang don yod grub pa dag go/ /de la rnam par snang mdzad kyi shes rab sgron ma ste don yod grub pa'i ni spyan ma'o zhes pa phan tshun zhal phyogs pas 'khyud pa'i nges pa'o/ /de'i phyir byang chub sems dpas mdzad pa'i thabs dang bral ba bsdus pa'i rgyud nyan pa ma rnyed pa rnams la yang dag par yid ches par byed pa'i don gsal bar shes par byed pa gsungs pa mthe bo zhes pa la sogs pa'o//gang gi phyir lag pa g.yon pa'i mthe chung la sogs pa sor mo lnga rnams nam mkha' la sogs pa'i rang bzhin rnams kyi dbus su mthe bo dang ming med sa dang rlung gi rang bzhin dag gis 'khyud pa tshim par byed pa'i phyag rgya ste gsang ba'i dbang bskur gyi don du slob ma'i kha dang lha mnyes par byed pa la yang ston pa de'i phyir sa dang rlung shes rab dang thabs nyid du grub bo//'dis bshang ba dang gci ba'i rtsa dag shes rab dang thabs nyid du gzhung btsugs so//g.yas su me'i rang bzhin gos dkar mo dang rin chen 'byung ldan dag go/ /gzhon nu chu'i rang bzhin mA ma kI dang 'od dpag tu med pa dag go/ /de la 'od dpag med kyi shes rab gos dkar mo ste rin chen 'byung ldan gyi mA ma kI'o//gang gi phyir lag pa g.yas pa'i gung mo dang mdzub mo me dang chu'i rang bzhin dag gis 'khyud pa ral gri'i phyag rgya la ston pa de'i phyir me dang chu dag shes rab thabs nyid du grub ste/ 'dis ni ro ma dang rkyang ma dag shes rab dang thabs nyid do/ /dbu ma la steng gi phyogs su rnam par gnas pa stong pa'i ngo bo mi bskyod pa ni 'og gi phyogs su rnam par gnas pa mi 'gyur pa'i ye shes kyi bdag nyid can shes rab kyi pha rol tu phyin pa dang lhan cig 'khyud pa'o//phan tshun zhes pas 'chad par 'gyur pa'i steng dang 'og tu gnas pa rdo rje dbyings kyi dbang phyug ma dang rdo rje sems dpa' dag 'khyud pa yang ltos pa'o//snga ma phyed shes par byed pa ni/ gang gi phyir lag pa g.yas pa'i khu tshur la mthe chung zla ba phyed pa'i rnam par byas pa/ mi bskyod pa'i mche ba'i phyag rgya gang yin pa de kho na shes rab kyi pha rol tu phyin pa'i gri gug gi phyag rgya yin pa de'i phyir stong pa dang ye shes kyi rigs can dag shes rab dang thabs nyid do//'dis ni kun 'dar ma dang dung can ma dag shes rab dang thabs nyid do/ /de ma thag tu 'chad par 'gyur pa'i tshigs su bcad pas rigs drug pa 'khyud pa'i shes par byed pa gsungs te/ gang gi phyir lag pa'i mthil g.yon pa dang g.yas pa sbyar bar byas pa spyi bor bzung ba na gang gi tshe stong pa la sogs pa'i rang bzhin sor mo rnams phan tshun sbyor ba dkyil 'khor bcu po yang dag sbyor ba byas pa de'i tshe rdo rje sems dpa'i rdo rje rtse gcig pa'i phyag rgya yin zhing /de kho na rdo rje dbyings kyi dbang phyug ma'i gri gug gi phyag rgya chu gri'i rnam pa can yin te/de'i phyir 'di dag shes rab dang thabs nyid do/ /phyi rol du gri gug dang bcas pa'i rdo rje rtse gcig pa'i bdag nyid rigs drug pa gang yin pa de yang nang du mnyam pa ste nyi ma dang zla ba mnyam par 'bab pa nyid kyi phyir ro/ /dbu ma'i rtsa ste a wa d+hU tIr 'bab na'o//mnyam pa ni skye ba'i dus su 'bab pa las spro ba'i rgyu ste/ 'chi ba'i dus su 'bab pa las sdud pa'i rgyu'o/ /yang na rnal 'byor pa rnams kyi de kho na nyid sgom pas phyi rol du 'bab pa 'gags pa ni 'jig rten las 'das pa'i phung po la sogs pa'i rgyu yin pa nyid kyi phyir spro ba'i rgyu ste/ 'khor ba pa rnams kyi ma 'gags pa ni phung po la sogs pa rnam par 'jig par byed pa nyid kyis ni sdud pa'i rgyu'o/ /de la mnyam pa ni sngar brjod pa'i sna bug g.yon par 'bab pa'i phung po lnga dang / sna bug g.yas par 'bab pa'i khams lnga dang / lte ba dang gsang ba dang nor bu'i pad+mar gnas pa sku dang gsung dang thugs rdo rje rnams dbu ma'i rtsar son pa na gcig nyid yin gyi gzhan ni ma yin no//de ltar rlung 'bab pa'i rnam par gzhag pa'i zol gyis dkyil 'khor gyi 'khor lo'i lha dang ye shes kyi rnam par gzhag pa gsungs pa'o/ /gang gi tshe steng du zla ba dang nyi ma dang sgra gcan gyi rtsa rnams 'gog pa de'i tshe 'og tu bshang gci dang khu ba'i rtsa rnams 'gog pa'o//de bzhin du steng du gsum po grol na 'og tu 'ang grol ba'o/ /rtsa drug po de rnams kyang snga ma bzhin du spro ba dang sdud pa'i byed pa can no/ /lug la sogs pa mi mnyam pa'i dus sbyor la skyes pa tshe thung ba rnams kyi lus la rlung dang mkhris pa dang bad kan mi mnyam ste/mi mnyam pa las srog ces bya ba'i rlung dbyu gu lnga lnga 'bab pa'i rim pa las brgal nas g.yon pa'i rtsar lhag par 'bab po/ /ci ltar lhag ce na gsungs pa/ mtshan mo gcig ste nyin mtshan 'bab pa de'i tshe 'chi ltas kyi nyin zhag nas brtsams te lo gsum rnams kyis 'chi bar shes par bya'o//de bzhin du glang la sogs pa mnyam pa'i dus sbyor la skyes pa rnams kyi rtsa g.yas pa la nyin mtshan lnga 'bab pa las lo gsum rnams kyis 'chi ba'o/ /de ltar mdor bstan nas re zhig nyi ma'i 'chi ltas rgyas par 'chad de/khyim gyi bdag nyid kyi 'dab ma bcu gnyis pa lte ba'i pad+ma'i nang gi yongs su bskor ba'i shar gyi 'dab ma la nyin mtshan lngar srog 'bab po/ /de nas g.yas su bskor bas 'dab ma gnyis pa la phyogs zhes pa bcu'o/ /gsum pa tshes rnams te bco lnga rnams so//bzhi pa la nyi shu'o/ /lnga pa la de gnyis rnams te/ nyi shu rtsa lnga rnams so/ /drug pa la de nyid rnams las gcig lhag rim pas te nyi shu rtsa drug go/ /bdun pa la slar yang gcig lhag rim pas te nyi shu rtsa bdun no/ /nyin zhag sum cu gsum rgyu na zhes pa brgyad pa la bco lnga'o//dgu pa la bcu'o/ /bcu pa la lnga'o/ /bcu gcig pa la gsum rnams so zhes pa sum cu rtsa gsum rnams so/ /bcu gnyis pa la ni stong pa ste/ slar yang g.yas pa'i rtsa la 'bab pa med pa'i phyir ro zhes pa 'chi ltas kyi nyin zhag 'bab pa'i rim pa'o//da ni 'chi ltas kyi bdag nyid 'tsho ba'i dus kyi rim pa gsungs te/ de rtogs pa'i don du yongs su zlum po rim pa gnyis pa bris pa las/ gsum gnyis gcig ces pa ste lo rnams te/ 'dab ma snga ma la gsum rnams so/ / gnyis pa la gnyis dag go/ /gsum pa la gcig go/ /zla ba rnams kyang bzhi pa la drug go/ /lnga pa la gsum mo/ /drug pa la gnyis so/ /bdun pa la gcig go/ /nyin zhag rnams ni brgyad pa la bco lnga'o/ /dgu pa la bcu'o/ /bcu pa la lnga'o/ /bcu gcig pa la gnyis dag go//pad+ma'i ze'u 'brul gcig go/ /'dis 'di gsungs te/ dang por 'dab ma sngon ma la nyin zhag lnga rnams 'bab po/ /de nas tshe lo brgya pa rnams kyi bzhin du 'pho ba bcu gnyis kyis 'tsho bar bya ba'i lo gsum gyi las sum cu rtsa lngas lhag pa'i nyin zhag brgya phrag gsum 'bab po//de yang gzhan la zhugs pa las 'dab ma de skam mo/ /gnyis pa la nyin zhag bcu rnams 'bab po/ /yang 'pho ba bcu gcig gis nyin zhag bzhi bcu rtsa lngas lhag pa'i sum brgya 'bab po/ /de bzhin du gsum pa la sogs pa la sngar ltar 'bab ste/ de la gsum pa ni 'pho ba bcu gnyis zhag bdun cus lhag pa'i brgya 'bab cing skam par byed do//bzhi pa ni 'pho ba dgus nyin zhag brgyad cu rtsa gnyis 'bab cing skam mo/ /lnga pa ni 'pho ba brgyad kyi nyin zhag lnga bcu rtsa bdun 'bab cing skam par byed do/ /drug pa ni 'pho ba bdun gyis nyin zhag nyi shu rtsa brgyad 'bab cing ngo / / bdun pa ni 'pho ba drug gis nyin zhag nyi shu rtsa bdun 'bab cing ngo / /brgyad pa ni 'pho ba lngas nyin zhag bco lnga 'bab cing ngo / /dgu pa ni 'pho ba bzhis nyin zhag bcu 'bab cing ngo / /bcu pa ni 'pho ba gsum gyis nyin zhag lnga 'bab cing ngo / /bcu gcig pa ni 'pho ba gnyis kyis nyin zhag gsum 'bab cing ngo //de ltar bcu gcig skam ste mkhris pa'i bdag nyid can rdul gyi khams skam pa las so/ /'dab ma bcu gnyis pa la g.yas pa'i rtsa dor nas rtsa g.yon pa la 'pho ba med pas nyin zhag gnyis 'bab cing / bad kan gyi bdag nyid snying stobs kyi khams skam par byed pa las 'dab ma de skam mo//de nas pad+ma'i ze'u 'bru la dbu ma'i rtsa la 'pho ba med pas nyin zhag gcig 'bab cing rlung gi rang bzhin mun pa'i khams zad pa las de bskams nas lam g.yas pas nges par 'byung ste/ rnam par shes pa dang ldan pa srid pa gzhan du 'pho'o/ /zla ba'i 'chi ltas gsungs pa/rtsa ba nas zhes pa lte ba'i 'khor lo'i lug la sogs pa mi mnyam pa'i dus sbyor gyi bdag nyid kyi 'dab ma snga ma nas brtsams te gcig lhag pas zhes pa gcig dang gnyis la sogs pa'i rim pas te ji srid du nyin zhag sum cu rtsa gsum gyi bar du 'dab ma bcu gcig la rtsa g.yon par zla ba'i rlung 'bab po//ji lta bur gcig lhag pas she na gsungs pa/ sngon ma'i snying po'i 'dab ma la nyin zhag gcig 'bab po/ /nyin zhag des dman pa'i zla ba gnyis ji lta ba bzhin du 'bab po/ /de nas zla ba gsum pa'i dang por 'dab ma de nyid la nyin zhag gnyis g.yon pa la 'bab po//nyin zhag des dman pa'i gsum pa dang bzhi pa la ji lta ba bzhin 'bab po/ /zla ba lnga por nyin zhag gsum 'dab ma de la g.yon par 'bab po/ /nyin zhag des dman pa'i zla ba lnga pa dang drug pa dag ji lta ba bzhin 'bab po/ /de ltar snga ma dang lhan cig bgrang bar bya ba'i zla ba dang po dang gsum pa dang lnga pa'i dang por skyes pa'i gsum po 'di rnams kho na 'chi ltas kyi nyin zhag rnams su rnam par gzhag par bya'o//yang na rnam par ma chad par 'bab pa'i phung po'i nyin zhag rnam par bzhag nas 'chi ltas kyi nyin zhag gsum mo/ / 'dis ni lo gsum la sngar nyin zhag gsum dang zla ba drug song ngo / /de bzhin du pad+ma 'dab ma gnyis pa la zla ba bdun pa'i dang por 'chi ltas kyi nyin zhag bzhi'o/ /brgyad pa'i dang por lnga'o/ /dgu pa'i dang por drug ste/ de ltar snga ma bzhin du nyin zhag gsum du rnam par bzhag nas 'dab ma snga ma'i nyin zhag gsum rnams dang lhan cig nyin zhag drug rnams 'chi ltas so//nyin zhag gzhan rnams la ji lta ba bzhin du 'gyur ro/ /'dis kyang nyin zhag gsum song ste/ de ltar zla ba gsum gsum rnams kyis nyin zhag gsum rnam par 'phel ba las 'dab ma bcu gcig po rnams lo gsum po 'dis rim pas 'dor ro//de ltar 'dab ma bcu gcig la 'bab pa las bad kan gyi bdag nyid snying stobs kyi khams skem par byed do/ /'dab ma bcu gnyis pa la rtsa g.yas pa la 'bab pa las 'dab ma gzhan rnams la gnas pa/zla ba gnyis pa dang bzhi pa dang drug pa dang 'brel pa'i nyin zhag gsum po'i nyin zhag gnyis zad de/ mkhris pa'i bdag nyid rdul gyi khams zad pa las te/ 'dab ma bcu gnyis pa skam pa las so/ /snga ma bzhin du ze'u 'bru la nyin zhag gcig dbu ma 'bab pa las rlung gi bdag nyid can mun pa'i khams bskams par byas nas sred pa gzhan du 'gro ba'o//rtogs pa'i don du bri ba'i rim pa ni khyim bcu gnyis kyi 'khor lo rim pa gnyis pa la/ shar la sogs pa'i 'dab ma bcu gcig rnams dang rtsa gsum rnams dang drug dang dgu dang bcu gnyis dang bco lnga dang bco brgyad dang nyi shu rtsa gcig dang nyi shu rtsa bzhi dang nyi shu rtsa bdun dang sum cu dang sum cu rtsa gsum rnams te/bcu gnyis pa la ni g.yon pa med pa'i phyir stong pa'o/ /phyi'i 'dab ma bcu gnyis rnams la rim pas zla ba rnams ni sum cu dang nyi shu rtsa bdun dang nyi shu rtsa bzhi dang nyi shu rtsa gcig dang bco brgyad dang bco lnga dang bcu gnyis dang bcu dang drug dang gsum dang /bcu gcig pa la zla ba gsum zad pa gsal bar byed pa stong pa dang / bcu gnyis pa la nyin zhag gnyis so/ /lte ba la nyin zhag gcig go//de ltar gsum la sogs pa nyin zhag la 'chi ltas 'phel zhing / sum cu la sogs pa'i nyin zhag gi bdag nyid 'tsho ba zhes bya ba'i dge ba 'grib pa'o/ /phyed dang bcas pa'i zla ba bcu dang ldan pa'i lo dgu bcu rtsa drug gi mtshams ni nyi ma dang zla ba 'bab pa'i dus so/ / nyin zhag gsum gyis dman pa'i phyogs gsum lo gsum lo brgya gang bar byed pa la dbu ma'i 'chi ba rgyu ba'o/ /'di rgyas par 'chad de/ gnyis la sogs pa sum cu rtsa gnyis kyi mthar thug pa mnyam pa'i nyin zhag rnams kyis g.yas pa la dang / gcig la sogs pa sum cu rtsa gsum gyi mthar thug pa mi mnyam pa'i nyin zhag rnams kyis g.yon pa la de'i ste 'chi ba'i rgyu ba'o//'di ltar yang skye ba'i dus su skyes pa glang la sogs pa'i dus sbyor gyi sa la sogs pa gang yang rung ba'i dkyil 'khor rnams kyis dang / de bzhin du lug la sogs pa'i dus sbyor gyi stong pa la sogs pa gang yang rung ba'i dkyil 'khor rnams kyis te/dkyil 'khor de nas brtsams te zhes pa'i don to/ /'di yang g.yas pa dang cig shos kyi khams dang phung po la sogs pa 'bab pa rnam par nyams pa'i dbang du byas te lag pa phyis pa la lnga pa'o/ /'thad pa gsungs pa/ gzhan du 'chi bar mi 'gyur te//zhes pa'o/ /'dis 'di gsungs te/ mnyam pa'i dus sbyor la skyes pa'i ni thog mar g.yas pa la nyin zhag gnyis 'bab po/ /yang nyin zhag gnyis ji lta ba bzhin du'o/ /de nas g.yon pa la nyin zhag gcig go/ /nyin zhag gcig ji lta ba bzhin no/ /nyin zhag bzhi rnams g.yas pa la'o//bzhi rnams ji lta ba bzhin du'o/ /gsum rnams g.yon pa la ste gsum rnams ji lta ba bzhin du'o/ /drug rnams g.yas pa la ste drug rnams ji lta ba bzhin du'o/ /lnga g.yon pa la ste lnga rnams ji lta ba bzhin du'o/ /de bzhin du ji srid sum cu rtsa gnyis kyi bar g.yas pa la ste sum cu rtsa gnyis kyi bar ji lta ba bzhin du'o//sum cu rtsa gsum g.yon pa la dang sum cu rtsa gsum ji lta ba bzhin gyi bar du'o/ /'dir g.yas pa la gnyis la sogs pa sum cu'i mthar thug pa mnyam pa'i nyin zhag gsum gsum rnams kyis rim pas sa la sogs pa'i khams zad pa'o//g.yon pa la gcig la sogs pa nyi shu rtsa dgu'i mthar thug pa mi mnyam pa'i nyin zhag gsum gsum rnams kyis nam mkha' la sogs pa'i khams zad pa ste rim pa las so/ /de nas nyin zhag sum cu rtsa gcig gis snying stobs kyi khams zad pa'o//nyin zhag sum cu rtsa gnyis rnams kyis rdul gyi khams zad pa'o/ /nyin zhag sum cu rtsa gsum rnams kyis mun pa'i khams zad pa'o/ /mi mnyam pa'i dus sbyor la skyes pa rnams kyis ni gcig la sogs pa'i rim pas 'bab pa'o zhes pa khyad par ro//de ltar nyin zhag gsum gyis dman pa'i lo brgya ste de'i steng du nyin zhag sum cu rtsa bzhi rnams rgyu'o/ /de la nyin zhag gcig g.yas pa la'o/ /nyin zhag gcig g.yon pa la'o/ /de lta bu'i rim pas ji srid du nyin zhag sum cu rtsa gsum gyi bar du 'bab po/ /de nas rim pas khams dang phung po dang yul dang dbang po dang las kyi dbang po'i bya ba dang las kyi dbang po lnga rnams kyi zad pa'o//de nas dbu ma la nyin zhag gcig ste/ de las phung po la sogs pa drug pa rnams bskams nas srid pa gzhan du 'gro ba'o/ /de ltar 'chi ltas mtshan nyid shes nas ni/ rnal 'byor pas de slu ba'i thabs gsungs te/ nyi ma'i 'chi ltas su gyur na rdo rje skyil krung bcings nas srog rtsol sngon du 'gro bar dpung pa g.yas pas nu ma g.yas pa btsir ba las dkyil 'khor lnga 'bab pa'i bdag nyid g.yas pa las bkug nas g.yon pa la srog yang dag par rgyu bar bya'o//de yis nyi ma'i 'chi ltas ldog go/ /de bzhin du g.yon pa las g.yas pa la ste zla ba'i 'chi ltas ldog go/ /de bzhin du skyil krung byas nas thig ler te/ dpral bar gnas pa'i pad+ma 'dab ma bcu drug pa dkar po'i dbus su srog rtsol sngon du 'gro bar sems gzhug par bya'o/ / de bzhin du skyil krung byas nas a wa d+hU tI'i zhabs ni lte ba'i pad+ma 'dab ma drug cu rtsa bzhi pa ste/ de'i dbus su zla ba'i dkyil 'khor la aM yig dkar po re khA phyed kyi rnam pa srog rtsol dang bcas pa bsgom par bya'o/ /de bzhin du/ rdo rje rtag tu bslang bar bya/ /rang gi lag pa la sogs pas ji ltar thig le phyi rol du mi 'byung ba ltar te/'chi ltas kyi rgyu zla nyi'i bgrod pa 'joms pa nyid las so/ /thabs 'di gtso bor gsungs pa gzhan du zhes pa'o/ /steng gi 'chi ltas slu ba dang bcas pa gsungs nas 'og gi 'chi ltas gsungs pa/ 'og tu'ang / dung can mar me rtsa la yang //zhes pa bshang ba dang gci ba 'bab pa dag la thur sel zhes bya ba'i rlung 'bab po zhes pa lhag ma'o/ /rgyun du khu ba dang bshang ba dang gci ba 'bab pa nyid kyis de ma zhugs pa las 'chi ba'o/ /'chi ltas thams cad slu ba'i thabs kyi zol gyis 'chi ltas zhes pa la sogs pas dga' ba rnams mdor bstan te/khu ba zhes pas rgyas par bshad do/ /gtsug tor gyi pad+ma 'dab ma bzhi pa'i dbus las dpral ba'i pad+ma 'dab ma bcu drug pa'i dbus su khu ba dga' ba dang bzang po dang rgyal ba dang stong pa dang gang ba zhes bya ba cha lnga yis 'ongs pa gnyis ka la khyab pa ni dang po la dga' ba'o//de bzhin du mgrin pa'i chu skyes 'dab ma sum cu rtsa gnyis pa las snying ga'i pad+ma 'dab ma brgyad par snga ma bzhin du khyab pa ni mchog dga'o/ /de bzhin du lte ba'i pad+ma 'dab ma drug cu rtsa bzhi pa las gsang ba'i chu skyes pa'i dga' ba ste phyi rol du 'gro ba med pa'i phyir mi 'pho ba'o//'dod chags bral las te chags pa dang bral ba las gtsug tor du gnas pa'i bde ba gang yin pa khu ba de rab tu gnas pa'o/ /gang rdo rje nor bu las 'phos pa de ni mya ngan las 'das pa'o/ /bde ba'i rgyal po 'di ni gtsug tor dang rdo rje nor bu'i bar du khyab pa'i phyir rab gnas mya ngan las 'das pa yin no//de nyid kyi phyir chags chen dang mi 'gyur pa yang ste/ gtso bo yin pa nyid kyi phyir khyab bdag go/ /khu ba zla ba de'i gtsug tor du 'char ba ni dkar po'i tshes gcig ste/ gsang bar gang ba ji srid pa ste cha bcu drug pa ni rdo rje'i rtse mo'i mthar gnas pa'o//nag po'i tshes gcig 'ongs pa na ni 'pho ba'i dus te 'pho ba'i dus kho na nag po'i tshes gcig go zhes pa'i don to/ /de yang 'dod chags nyams pa'i phyir nag po'i phyogs la rdul gyi gzugs nyi ma'i cha dang po nor bu'i rtse mo la ste dpral ba ji srid par der gnas shing bcu drug pa ni gtsug tor du'o//de kho na zla ba nyams pa ste/ chags pa'i bde ba las chags bral yang ngo / /brjod zin pa'i rim pas zla ba bdud rtsi 'og tu 'gro ste/ 'pho ba'i chags pa goms pa lags so/ /de bzhin du steng du nyi ma rdul lo/ /sgra gcan gyi ngo bo bag chags kyi grogs can dang rnam par shes pa dngos po'i mtshan nyid can skye ba gzhan du 'gro'o//de phyir zla ba bdud rtsi ni/ /zhes pa bshad zin pa'i lam bsgom pas so/ /sangs rgyas rnams kyi ni zla ba byang chub kyi sems rnams kyi zla ba gang la dpral bar te/ de'i cha bcu drug pa gtsug tor du'o/ /rdul gyi gnam stong gsang bar te/ de'i cha bcu drug pa nor bur ro zhes pa ste bshad zin pa ni ston pa rdo rje gnas te mi phyed pa'i ye shes so/ /'khor ba kun gyi phyin ci log go/ /'di'i phyir mi gnas pa'i mya ngan las 'das pa zhes bya ba bde ba chen po'i ming can dag pa'i sku las khams rnams te sems dang ngag dang lus rnams sgrib pa med pa nyid las phyin ci log tu 'gyur ro//de nyid kyi phyir chos kyi sku dang por gnas pa rnams spro'o/ /thugs la sogs pa 'di rnams thabs kyi cha'i 'og tu rnam par gzhag par bya'o/ /shes rab kyi steng du ste/'di yi dpral bar sprul pa zhes bya ba sku rdo rje'o/ /mgrin pa la sogs par rim pas gsung dang thugs dang ye shes rdo rje rnams ni longs spyod rdzogs pa dang chos dang lhan cig skyes pa'i sku rnams te shes rab kyi cha'i rnam par gzhag pa'o/ /de bzhin du shes rab dang thabs kyi bdag nyid rdo rje sems dpa'i sku las phung po la sogs pa rnams rnam par snang mdzad la sogs pa nyid kyis sems can gyi don du spro ba'o//de ltar 'bras bu mdor bstan nas de'i sgrub par byed pa gsungs te/ gdams ngag thob pas dang por rjes su mthun pa'i las kyi phyag rgya dang snyoms par 'jug pa rnam par rtog pa chen po'i chen po zad pa las chung ngu'i chung ngu 'gyur pa'i bde ba 'phel ba'o//de bzhin du sna tshogs yum la sogs pa ye shes kyi phyag rgya la dmigs pas rnam par rtog pa chen po zad pa las chung ngu 'gyur pa'i bde ba 'phel ba'o//bka' stsal pa yang / rgyal ba'i lhan cig skyes pa'i bde 'di 'phel ba don rgyur dang por las kyi phyag rgya bsten par bya/ /de nas nyi ma'i gzugs ni gdong pa lag pa rkyang ba gtsug tor yan lag thams cad rdzogs pa ste/ /zhes pa la sogs pa'o/ /sogs pa'i sgra las phyag rgya chen po'i ste/snga ma'i ngo bo du ba la sogs pa'i gzugs brnyan chos kyi phyag rgya la sogs dmigs pas nyon mongs pa chung ngu zad pa las mi 'gyur pa'i bde ba chen po 'phel ba'o/ /phyi nang gi ngo bo sna tshogs gzugs brnyan zhes bya ba phyag rgya chen po goms pas/sgrib pa bag chags dang bcas pa chung ngu'i chung ngu zad pa las mi 'gyur pa'i bde ba chen po'i chen po 'phel ba'o/ /'o na mi 'gyur pa'i bde ba ni 'phel ba dang 'grib pa spangs pa yin na ci ltar 'phel bar 'gyur zhe na gsungs pa/ 'phel ba'i 'phel ba med/ 'phel ba'i chos can gyis gcig dang du ma la sogs pa'i ngo bo dang bral ba rnams rang bzhin stong pa nyid kyi phyir zad pa na chos mi 'phel ba'o//de bzhin du zad pa la sogs pa'i zad pa nyid la sogs pa yang gsal ba'o/ /'o na de lta na skye ba dang zad pa med pa'i phyir gsungs pa/ rang bzhin stong pa nyid kyi chos lam la sogs pa rnams skye ba dang 'jig pa'ang sgyu ma lta bu kho na yin gyi de kho na nyid du ma yin no//de bzhin nor bu'i sgra las nub pa dang 'char ba la sogs pa'i mtshan nyid can yang 'jig rten kun rdzob tu sgyu ma lta bu kho na'o/ /de gsungs pa/ 'jig par mi 'gyur pa zhes pa la sogs pa ste/kun rdzob tu don bya ba byed pa'i phyir dngos po'i rang bzhin te/ de kho na nyid du rang bzhin stong pa nyid kyi dngos po med pa'i mtshan nyid can no/ /las kyi phyag rgya la sogs pa rang gi shes rab la 'khyud pa byang chub kyi sems gang gi tshe rdo rje nor bu'i pad+mar son pa de'i tshe rdo rje nor bu der zla ba son pa ni las kyi phyag rgyas 'gyur pa'i bde ba'i gnas skabs dang /ye shes kyi phyag rgya'i sa g.yo ba'i gnas skabs te/ g.yo ba zhes pa 'dzag pa'i chos yin la des 'gyur pa yang dag par gzung ba'o/ /bad ba'i gnas skabs 'di dag mngon sum du byas pa ni/ 'dod pa dang gzugs kyi khams kyi dbang phyug gi mtshan nyid can 'jig rten pa'i dngos grub sgrub par byed pa dag go//phyag rgya chen pos mi g.yo ba dang mi 'gyur pa bsgom pa ni 'jig rten las 'das pa'i dngos grub thams cad mkhyen pa nyid kyi mtshan nyid can sgrub par byed pa'o/ /dbu ma kho na dga' ba bzhi la khu ba zla bas khyab pa'i cha bzhi rnams lus la sogs pa'i rtsa bzhi rnams su rnam par gzhag par bya ste/de la dpral bar sku sgom pa'o/ /snying gar ngag sgom pa dang / gsang bar thugs sgom pa dang / sku la sogs pa'i thig le gcig pa nyid ni rdo rje nor bur ye shes sgom pa'o//sngar bshad pa'i shes rab kyi chags pa las zhu ba'i thig le rnams bshad zin pa'i rim pas mgo bo las gang ba'i gnas nor bu'i pad+mar son pa rnams de kho na nyid bsgom pas 'ching ba'o/ /brjod zin pa'i rim pas mi 'gyur pa'i bde ba 'phel ba dang zad pa la sogs pa de kho na nyid ma yin par rtogs par byas nas/'jig rten pa'i dpe yis de nyid bstan par byed de/ ji ltar zla ba shar rim pas/ cha rnams kyi ni gang ba zhes pa 'jig rten pa'i gang ba ni grib ma nyams pa 'ba' zhig ste/ de'i chad pa'am gang ba nyid ma yin no/ /de ni rtag tu gang ba yin yang mun pas bkag pa dang ma bkag pa dag gis nyams pa dang gang ba'i tha snyad du bya ba'o/ /de bzhin du mi 'gyur pa'i ye shes kyang rdo rje nor bur shes rab rim pas 'chad par 'gyur pa'i sa rnams kyis gtsug tor gyi 'khor lor gang ba zhes pa nyon mongs pa dang shes bya dang snyoms par 'jug pa'i sgrib pa'i bag chags med pa kho na gang bar rnam par bstan to//rdzogs par byed pa la dpe gsungs nas chad pa la dpe gsungs pa ji ltar dkyil 'khor gyi dbus su son pa zla ba'i sa bon du gyur pa mtshan mo'i ngo bo ri bong rim par 'phel bas gang bar ri bong can mi gnas te/rtag tu gang ba ma yin no zhes pa'i don to/ /de bzhin du bag chags 'phel bas sems kyang 'gyur pa med la mi gnas te/ gnyis med pa ni 'gyur med bde ba'o/ /phyi nang sbyar ba'i zol gyis dpe gzhan gsungs te/ji ltar zla ba'i cha 'phel pa dkar po'i phyogs dang / cha mnyam pa nag po'i phyogs te/ de dag rab tu gnas pa dag ste 'jig rten gyis rtogs par bya ba dag dang / de dag gi dbus su son pa cha bcu drug pa skad cig gcig 'byung ba ni de lta bu ma yin pa de bzhin du khu ba zla ba'i zla ba yin te zer ba spyod de/gang gi tshe rnal 'byor pa'i byang chub kyi sems rdo rje nor bur gang ba na ni skad cig gcig la mi 'gyur par mngon par rdzogs par sangs rgyas pa de'i tshe drug brgyas lhag pa'i stong phrag nyi shu rtsa gcig gi 'byung ba dang 'jug pa'i skad cig rnams kyis gang bar byed pa'i rgyun mi 'chad par 'bab pa'o//'di kho na gnyis su med pa thams cad mkhyen pa'i ye shes te/ 'di ni mi gnas zhes pa la sogs pa go sla'o/ /de'i zhes pa sa bon du gyur pa'i zla ba'i cha bcu drug po rnams gang ba nyid kyi phyir rdo rje nor bur gang ba ste/ 'on kyang thabs med pas chags pa nyams pa'i sbyor ba las cha bcu drug po rnams nyams pa'o//rdo rje nas brtsams te nyams pa la nyi ma bdun gyi ngo bo'i gtsug tor du gang ba nyid do/ /slar yang las kyi phyag rgya la sogs pa'i sbyor bas gtsug tor du zhes pa la sogs pa go sla'o/ /ye shes ni cha bcu drug pa ste de ni nyams pa ma yin pa'o//gsungs pa yang / sems can thams cad de bzhin gshegs pa'i ye shes kyi snying po can rnams so zhes so/ /bde ba chen po'i ngo bo nyid ni 'di'i gang ba ste/ 'di kho na rnal 'byor pa rnams kyis brtan par bya'o/ / dngos po bar ma gzhan ni de'i skye ba dang 'jig pa dag ste/ lus can rnams kyi spro ba dang 'jig pa'i rgyu'o/ /gang ba la brtan par byas pa ma yin pa'i bde ba zla ba 'di ni yang dang yang du skye zhing 'jig par 'gyur ro/ /'di la dpe ni ji ltar dkar po dang nag po'i phyogs dag las zla ba bzhin dang /byang dang lho bgrod pa dag las nyi ma bzhin te/ nyin mo'i ngo bo'i nyi ma 'phel ba dang zad pa mthong ba'i phyir ro/ /sgom pa'i stobs kyis gang ba na brtan pa 'di ni rim gyis gtsug tor du sa bcu gnyis kyis gang ba nyid do/ /gsang ba la sogs pa gtsug tor gyi mthar thug pa 'khor lo so sor mi 'gyur pa'i skad cig dbugs brgya phrag sum cu rtsa drug 'gags pa rnams kyis sa gnyis 'thob bo//mi 'gyur pa de gang gi tshe 'byung ba dang 'jig pa'i ngo bo chags pa dang chags bral gyi phyogs gnyis spangs pa de'i tshe sa rnams kyis gang ba bden don rnam pa bcu gnyis pa la sogs pa'i ming can no//de rgyas par 'chad pa sa rnams kyis te/ kun du 'od dang / bdud rtsi 'od dang / nam mkha' 'od dang / rdo rje 'od dang / rin chen 'od dang / pad+ma'i 'od dang / sangs rgyas kyi phrin las byed pa dang /dpe med pa dang / dpe dang / shes rab 'od dang / thams cad mkhyen pa nyid dang / so so'i bdag nyid rig pa zhes bya ba rnams kyis so/ /lhag ma ni gsal lo/ /kun nas cha shas gang bar gyur pa'i sems 'di ni don gcig la sogs pa don ji lta ba bzhin bstan pa'i ming can no//chags pa dang chags bral ba'i phyogs gnyis kyis/ bag chags rnams kyis ma sbyar ba kun nas nyon mongs par ma byas pa'o/ /mi 'gyur pa der rab tu zhugs pa'i dngos po'i tshogs 'gyur med nyid du 'gro'o/ /mi 'gyur pa'i rig pa 'dzin pa'i ston pa la bde ba'i rang bzhin rnam pa thams cad pa'i dngos po thams cad so sor gsal ba'o zhes pa'i don to//ji ltar zhes pa'i dpe ni gsal lo/ /dpe gzhan ni ji ltar lhang tsher la sogs pa'i khams kyi tshogs dngul chus zos pa ro nyid du 'gro'o/ /gser la sogs pa'i sa bon zhu ba rnams kyis sa bon nyid de/ lcags brgyad 'bugs pa'o/ /'bras bu'i dus su bskol ba lhag par bye ba la sogs 'bugs pa nyid kyis tshad spangs pa'o/ /de ltar zhes pa dpe can te gsal lo/ /rnam par mi rtog pa'i bde ba chen po thams cad la khyab pa nyid du che ba zhes pa la sogs pa tshigs su bcad pa dag gis gsal bar gsungs so//ji ltar zhes pa grub pa'i ro'i dpe'i dpe can ni de ltar zhes pa ste/ rdo rje nor bur brtan par byas pa'i bde ba byed pa po las kyi phyag rgya la sogs pa'i sbyor bas sbar ba'i gtum mos yang dag par gdungs pas sems kyi las kun nas 'bigs par byed de/de'i rang bzhin nyid du skyed par byed pa'i phyir ro/ /ji ltar zhes pa la sogs pa'i tshigs su bcad pa gnyis ni gsal lo/ /nyon mongs pa la sogs pa rnams de kho na nyid yin pa gcig nyid yin par sems zhes pa la sogs pa tshigs su bcad pa gsum gyis 'gog par byed do//de rnams ni re zhig glo bur ba ma yin te 'dod chags dang bral ba yang 'dod chags can nyid du thal bar 'gyur pa'i phyir ro/ /sems las sngar byung ba'i ngang tshul can rnams kyang ma yin te rgyu med pa'i phyir ro/ /gang phyir nyon mongs pa la sogs pa rnams sems la rnam par sgrub pa yin pas so//rgyu med pa can yang ma yin te/ nam mkha'i me tog la sogs pa bzhin du cung zad kyang mi byed pa nyid kyi phyir ro/ /nyon mongs pa rnams rang bzhin du gyur pa yang ma yin te/ 'jig pa dang bral bar 'gyur pa'i phyir ram/ spangs pa na yang mar me bzhin mya ngan las 'das par thal bar 'gyur pa'i phyir ro//de'i phyir rnam par dpyad par mi bzod pa nyid kyi phyir sgyu ma lta bu rnams so/ /zangs kyi ces pa ste/ dri med nyid kyis ni gser nyid kyis so/ /lhag ma ni gsal lo/ /de bzhin zhes pa la/ stong nyid ni du ba la sogs pa'i lam mo//ye shes nyid ni so so rang gis rig par bya ba nyid do/ /ji ltar bcud kyis zhes pa la sogs pa'i tshigs su bcad pas grol ba la/ slar 'khor ba med pa gsungs so/ /chags bral zhes pa ste/ gnas par bya zhes pa la ma bsgoms pas so/ /gzhon nu ma zhes pa la sogs pa tshigs su bcad pa bdun gsal lo//khu ba zhes pa ste gang gi phyir rten khu ba 'phos na brten par bya ba 'jig pa de'i phyir khu ba mi 'gyur pa kho na nyid kyis bde ba chen po bsgrub par bya'o/ /ji srid du rten dang brten par bya ba tha dad pa de srid du gtsug tor du gang ba nyid ma yin no//mchog tu 'gyur med las byung ba'i sku'i bde ba chen po'i mdzod spu ni dpral ba'i 'khor lo ste/ der nges par 'gro ba nyid kyis gtsug tor du son pa'i cha bcu drug pa shugs las gsungs te ston pa 'di'o/ /a yig la sogs pa dbyangs yongs su gyur pa zla ba dang ka la sogs pa yongs su gyur pa nyi ma ste/de dag yang dag par sbyor ba ni rten ma yin zhing / hUM yig la sogs pa yongs su gyur pa'i dkyil 'khor dang gtso bo yang ni brten pa ma yin te rgyu med pa'i phyir ro/ /'on kyang gtsug tor dang nor bu'i lte bar gnas pa'i zla ba dang nyi ma dag rten yin zhing /thams cad la khyab pa'i bde ba chen po brten par bya ba'o/ /kun rdzob kyi rnam pa thams cad pa sna tshogs pa'i gzugs brnyan ni rgyu ste/ khu ba mi 'gyur pa las skyes pa 'bras bu'o/ /de dag phan tshun rgyas btab pa nyid de/ rgyu yang bde ba'i ngo bo nyid kyi phyir dang /'bras bu yang dmigs pa med pa nyid kyi phyir ro/ /stong pa zhes pa ste/ dmigs pa dang bcas pa'i stong pa nyid dang / dmigs pa med pa'i snying rje dag dbyer med pa'i byang chub kyi sems gang yin pa de goms par byed pa'i dus na rgyu ste/ sgom pa mthar thug par gyur pa'i dus na ni 'bras bu'o//mya ngan las 'das pa zhes pa la sogs pas 'di'i mtha' gnyis dang bral ba gsungs so/ /de la 'thad pa gsungs pa/ gzugs brnyan ni chad pa min te/ chos thams cad dmigs pa med par 'gyur pa'i rang bzhin du dngos med las so so rang gis rig par bya ba skyes pa'i phyir ro//'bras bu yang rtag pa nyid ma yin te nor bu las steng du son pa'i khu ba'i ngo bo las 'jig rten gyi mtshan nyid dang mi mthun pa'i zag pa med pa'i bde ba yang dag par byung ba'i phyir ro/ /dngos med dang dngos po dag gis brjod zin pa'i mtshan nyid can gyi stong pa nyid dang snying rje dag ste/lhag ma ni go sla'o/ /gnyis ka'i bdag nyid 'di ni ma ning gi go 'phang ste/ shes rab dang thabs 'ba' zhig pa'i phyogs dag med pa'i phyir ro/ /shes rab ces pa gzugs brnyan gyi mtshan nyid can chos thams cad stong pa nyid do//de yang rgyu las ma byung ste/ rang bzhin ni ma byas pa nyid kyi phyir ro/ /shes rab kho na rgyu ste/ de las byung ba'ang 'bras bu yin la/ shes rab rgyu las skyes pa min pa nyid kyi phyir/ ci ltar de las skyes pa rgyu las skye ba yin/ sngar kho nar rgyu'i gtam gsal ba'i phyir ro//de phyir ye zhes pa phyed go sla'o/ /'bras bu kho nas rgyu la rgyas btab pa'am rgyu kho nas 'bras bu la zhes pa phan tshun du'ang mi 'gyur la/ 'bras bus kyang rgyu rgyas btab cing / rgyu yis kyang 'bras bu zhes phan tshun du yang mi 'gyur ro/ /ci'i phyir zhe na/gsungs pa/ gang gi phyir rgyu dang 'bras bu dag gtan nas byung ba nyid kyi phyir te kun rdzob pa las so/ /gnyis ka dbyer med pa'i gzugs brnyan ni skye ba dang 'jig pa dang bral ba'o/ /gsungs pa yang / de bzhin gshegs pa rnams ma byung yang rung chos rnams kyi chos nyid 'di ni gnas pa kho na'o zhes so//gang gi phyir gnyis ka dbyer med pa'i gzugs brnyan gyi shes rab kyi cha gdod ma nas zhi ba nyid kyi phyir rtag tu ma skyes pa dang / thabs kyi cha so so rang gis rig bya nyid kyi phyir rtag tu byung ba kho na ste/ de'i phyir yang rgyu dang 'bras bu nyid ma yin zhing phan tshun rgyas btab pa yang ma yin no//phan tshun rgyas btab pa med pa nyid la rigs pa gzhan ni/ rab tu shes par bya ba gang sna tshogs gzugs phyi rol las rnam par phye ba mthong ste/ de ni rang gi sems las gzhan ma yin no/ /de'i phyir zhes pa la sogs nye bar bsdu ba'o/ / ral zhes pa la sogs pa dpe'o/ /'o na brjod zin pa'i mtshan nyid can gyi lam sgom pa med par mi 'gyur pa'i bde ba skye ba med na/ des na ci ltar rgyu dang 'bras bu'i dngos po med ce na/ gsungs pa mo gsham zhes pa ste/ 'dis ni rgyu dang 'bras bu'i dngos po de kho na nyid ma yin pa gsungs so//shes rab ma yin zhes pa ste/ 'di ni brjod zin pa'i shes rab dang lhan cig skyes pa'o/ /nam mkha' zhes pa la sogs pa go sla'o/ /rang byung zhes pa la sogs pa tshigs su bcad pa gsum ni 'jig rten las 'das pa'i sems dpa' drug mdor bstan pa'o/ / dmigs pa las 'byung ba'i phyir 'di ni rang 'byung ngo / /gsang ba la sogs pa gtsug tor gyi mthar thug pa 'khor lo drug tu rim pas rdo rje sems dpa' dang sems dpa' chen po dang byang chub sems dpa' dang dam tshig sems dpa' dang / rdo rje'i rnal 'byor dang dus kyi 'khor lo ste drug gi ming can no//'di'i rgyas par bshad pa la/ rdo rje ni stong pa'i gzugs te/ de gang gi phyir mi phyed pa de'i phyir te/ don chen ni mdor bstan par ro/ /sems dpa' ni gang 'dod pa'i khams la sogs pa'i ngo bo lus dang ngag dang sems gcig pa nyid ces bya'o/ /de ni mchog tu mi 'gyur par mdor bstan par bya'o zhes pa rdo rje sems dpa'o//de ni chen po ste bde ba chen pos gang ba nyid kyi phyir ro/ /'dod chags chen pos ni mdor bstan pa'o/ /de yang sems dpa' ste sa yis gang bar byas pa nyid kyi phyir ro/ /sems can thams cad dga' bar byed pa ni mdor bstan pa'o zhes pa sems dpa' chen po'o//'di ni gang gi phyir byang chub la ste chos kyi 'khor lo la gnas pa mi g.yo ba ste/ de nyid nyon mongs pa la sogs pa zhe sdang gi tshogs rnams las rnam par rgyal ba nyid kyi phyir zhe sdang chen po'o/ /dgra che ba yang mdor bstan pa'o//sems dpa' ni zhes pa byang chub sems dpa'o/ /dam tshig las dam tshig gi ste zla ba bdud rtsi zhes bya ba khu ba'i sems dpa' ni 'pho ba med kyi ngo bo ste/ de zab pa'o/ /gti mug las rnam par rgyal ba'i phyir gti mug chen po'o/ /gti mug gi blo can rnams kyi gti mug 'joms par byed pa yang mdor bstan pa'o//de'i phyir dam tshig sems dpa'o/ /de nyid ni gang gi phyir sku la sogs pa'i rdo rje rnams/ shes rab gzugs brnyan dang mi 'gyur pa'i thig le rnams dang lhan cig sbyor ba ni gcig nyid do/ /khro ba las nges par rgyal ba'i phyir khro bo chen po ste/bdud las rnam par rgyal bar byed pa'i phyir khros pa'i bdud kyi dgra bo yang mdor bstan pa'o zhes pa rdo rje'i rnal 'byor ro/ /de ni gang gi phyir dus bde ba chen po ste/ thabs de las mtha' yas pa'i sems can gyi don yongs su ma btang ba ni 'khor lo zhes bya ba bcom ldan 'das so//de nyid kyi phyir sems can grol du bcug nas chags pa chen po 'gyur pa'i chags pa sel bar byed pa yang mdor bstan pa'o zhes pa dus kyi 'khor lo'o/ /rtsa drug gi ngo bo'i rtsibs drug pa'i 'khor lo la rdo rje sems dpa' la sogs pa 'di rnams so sor rnam pa drug rnams so//de la dung can ma'i ngo bo 'og gi rtsibs la mi 'gyur pa'i ye shes so/ /ra sa nA'i ngo bo lho'i rtsibs la mi 'gyur pa'i tshor ba'o/ /a wa d+hU tI'i ngo bo steng gi rtsibs la mi 'gyur pa'i rnam par shes pa'o/ /bshang ba'i rtsa'i ngo bo nub kyi rtsibs la mi 'gyur pa'i gzugs so//gci ba'i rtsa'i ngo bo shar gyi rtsibs la mi 'gyur pa'i 'du byed do/ /la la nA'i ngo bo byang gi rtsibs la mi 'gyur pa'i 'du shes so zhes pa phung po drug rnams so/ /rigs drug po de rnams kho na rim pa ji lta bar mi 'gyur pa'i ye shes la sogs pa khams drug rnams kyis so//de bzhin du mi 'gyur pa'i yid la sogs pa dbang po drug po rnams kyi ste/ de bzhin du mi 'gyur pa'i sgra la sogs pa yul drug po rnams kyi dang / dbang pos nye bar mtshon pa las ni 'gyur pa'i mchog gi dbang po dang lag pa dang mdoms dang bshang lam dang rkang pa zhes bya ba las kyi dbang po rnams kyi dang /de bzhin du yul gyi nye bar mtshon pa las mi 'gyur pa'i khu ba 'pho ba dang len pa dang / gci ba 'dzag pa dang bshang ba gtong ba dang smra ba dang 'gro ba zhes bya ba las kyi dbang po'i bya ba rnams kyi'o/ /sum cu rtsa drug po 'di rnams rim pas dkyil 'khor la ste/'dod pa chen po zhes bya ba rdo rje sems dpa' dang / 'dod chags chen po zhes bya ba rin chen dbang po dang / khro ba chen po zhes bya ba mi bskyod pa dang / gti mug chen po zhes bya ba rnam par snang mdzad dang / zhe sdang chen po zhes bya ba don yod grub pa dang /chags pa chen po zhes bya ba 'od dpag tu med pa rnams shes rab kyi pha rol tu phyin pa dang gos dkar mo dang / rdo rje dbyings kyi dbang phyug ma dang spyan ma dang sgrol ma dang mA ma kI rnams dang / kun du bzang po dang sa'i snying po dang / phyag na rdo rje dang sgrib pa thams cad rnam par sel ba dang /nam mkha'i snying po dang 'jig rten dbang phyug rnams dang / sgra rdo rje ma dang ro rdo rje ma dang chos dbyings rdo rje ma dang dri rdo rje ma dang reg bya rdo rje ma dang gzugs rdo rje ma rnams kyi dang / gnod mdzes dang shes rab mthar byed dang gtsug tor dang / gshin rje mthar byed dang /bgegs mthar byed dang pad+ma mthar byed rnams dang / cher sngon mo dang rmugs byed ma dang drag spyan ma dang rengs byed ma dang brtson 'grus chen mo dang khengs byed ma rnams so/ /rigs sum cu rtsa drug la khyab par byed pa bsam gyis mi khyab pa'i thugs rdo rje 'di yang sgrib pa dang bcas pa'i 'dod chags la sogs pa 'gog pa'i phyir khro bo'i rgyal po ste/'dod pa chen po la sogs pa'i gdong drug pa'o/ /'chi bdag gi bdud la sogs pa 'jigs par byed pa nyid kyi phyir 'jigs pa'o/ /brjod zin pa'i ye shes la sogs pa'i rigs drug dag pa'o//lus zhes pa sku'i dkyil 'khor dang / gsang ba dbang po gsung gi dkyil 'khor dang / sems thugs kyi dkyil 'khor dang / gsum po 'di'i bdag nyid 'di ni rigs drug gi dkyil 'khor ro/ /de yang lam bsgoms pas dag pa ni sngar bshad pa'i rnam par dag pa drag po shes rab dang thabs kyi rdo rje gsum po rnams kyi rdo rje sems dpa' bsam du med pa'i thugs rdo rje nyid du 'grub par 'gyur ro//'di ni ste dbang mdor bstan pa zhes bya ba'i rab tu byed pa ni bshad zin pa ni dbang bskur bcu'i sgrub thabs dang mchog tu mi 'gyur pa'i dbang bskur gyi sgrub thabs te/brjod zin pa'i rtsa dang rigs rab tu gsal bar byed pa ni/ kye zla ba bzang po phyag na rdo rje mdor bstan pas te/ mdor bsdus pas gsal bar bshad do zhes pa bcom ldan 'das kyis gsungs so/ /nags phyogs rtsa ba phyung nas rtag tu ni//'jig rten rnams la bde ba ster gyur cig /nyon mongs tsha ba sel bar byed pa yi/ /dbang bskur zla ba'i zla 'od gsal bar brjod/ /dbang bskur mdor bstan pa'i brjed byang 'di ni dpal dus kyi 'khor lo pa paN+Di ta rnam par rgyal ba dbang po'i zhabs kyis mdzad pa'o/

CLOSE WINDOW