CLOSE WINDOW

D1388
བོད་ཡིག

sgra don ji lta ba bzhin du bsgyur zhing zhu chen grub pa'o/ /'dis 'gro ba shin tu mang po la phan par gyur cig/[]@##/ /rgya gar skad du/ gu Na NA pU ra Ni nA ma Sha DaM ga yo ga Di p+pa na/ bod skad du/ rnal 'byor yan lag drug gi brjed byang yon tan gyis 'gengs pa zhes bya ba/dpal dus kyi 'khor lo la phyag 'tshal lo/ /dpal dus 'khor lo dbang phyug dang ni yon tan gyis/ /che ba'i bla ma rnams la bdag gis phyag 'tshal nas/ /dpal dang ldan pa rnal 'byor yan lag drug la ni/ /yon tan rnams kyis 'gengs par byed pa'i brjed byang bya//'dir nges par phyi dang nang gi rig pa la bsgom pa goms par gyur pa'i thugs rgyud can slob dpon dpe med 'tsho dmigs pa dang rtog pa med pa'i de kho na nyid kyi man ngag bsgoms pas/ dpal khar+sa pA Ni'i drung du lo bcu gnyis bzhugs par gyur to//der yang rtog pa'i khyad par ma byung ba las yid zhum nas yid kyi dbang du gyur pa de la rdo rje rnal 'byor mas bstan par gyur te/ bu bi kra ma'i grong du song shig /der khyed la rtog pa'i khyad par 'byung bar 'gyur ro zhes so/ /de yang bka' de spyi bor bzhag nas de'i dus kyi slob ma paN+Di ta chen po legs pa'i bu dpal 'dzin rjes su 'brang bzhin pas bi kra ma'i grong du gshegs so//der yang tshigs mtshams kyi nyin zhag 'ga' zhig la mtshan phyed kyi dus su kun spangs pa'i cha lugs can/ bcom ldan 'das kyis dngos su nye bar bstan te/ kye bu 'di ni kho na nyid do zhes so//de yang man ngag de thos pa tsam gyis ting nge 'dzin la snyoms par zhugs par gyur to/ /bcom ldan 'das de yang de'i tshe mi snang bar gyur to/ /de'i tshe de ma thag tu mtshan mo 'das shing de yang ting nge 'dzin las langs so/ /dpal ldan bla ma bdag nyid chen po des kyang rnam pa thams cad kyang der dka' ba mdzad cing /skal ba dang ldan pa'i dpal ldan dpal 'dzin la rang gi rtog pa nye bar bstan to/ /dpal ldan bla ma mchog tu thugs rje can des kyang rnam pa thams cad du snod dang ldan par rtogs nas paN+Di ta chen po 'od byed lha la bka' drin du mdzad do//des kyang paN+Di ta chen po rgyal ba'i bla ma snyigs ma'i dus kyi thams cad mkhyen pa chos kyi 'byung gnas zhi ba la bshad do/ /kha na ma tho ba med pa'i thugs rje la sogs pa'i yon tan brjod du med pa'i rin po che'i 'byung gnas dpal ldan bla ma de las kyang / dpal ldan bla ma'i zhabs bsten pa la mkhas pa nyi ma dpal bdag gis de kho na nyid yang dag par thob bo zhes pa bla ma'i brgyud pa'o//de ltar slob ma dam pas gsol ba btab pa'i dbang las slob dpon dpe med 'tsho zhes bya bas rdo rje 'dzin pa'i go 'phang 'thob pa'i rgyu rnal 'byor yan lag drug mdzad par bzhed pas/rang gi 'dod pa'i lha la bstod pa'i sgo nas rnal 'byor yan lag drug gsal bar mdzad de/ kun la zhes pa la sogs pa'o/ /thams cad la sgrib par byed do zhes pa kun la sgrib pa'i sprin gyi dra ba ste/ sprin gyi tshogs rnams gang du bsal zhing spangs pa de ni skad de der ro//gang du 'khrul ba'i ngang tshul can nyid kyi phyir rnam rtog dang / phyogs can dang mtshungs pa'i rlung ste/ dbugs rnams grangs ma lus pa mtha' dag nyid nub ste zhig pa'o/ /de'i phyir yang rang gi nam mkha'i khams su ste/ ston ka'i nam mkha' dri ma med pa'i dkyil du shar zhing gsal bar gyur ba 'od bzang po can te/dge zhing bde ba'i 'od can 'jig rten dbang phyug sangs rgyas sam pad+ma'i phyag can no/ /de nyid ni skye bo rnams dga' bar byed pa nyid kyi phyir zla ba gang ba'o/ /zla ba yang thams cad sbyar bar bya'o//nang gi don dang bcas pa ni kun la sgrib pa'i sprin gyi dra ba bsal ba la ni gzung ba dang 'dzin pa la sogs par sgro btags dang bral ba la ste/ 'dis ni so sor sdud pa dang bsam gtan gyi yan lag gsungs so/ /'chad par 'gyur ba'ang / so sor sdud pa yul la yul dang yul can bcu rnams rab tu 'jug pa med pa'o//bsam gtan yang ni shes rab rtog dang dpyod pa dga' dang g.yo med bde bar sems rtse gcig pa'o/ /zhes pa'o/ /rlung dang rnam par rtog phyir 'gro ba med pa'i phyir bag chags dang bcas pa'i sems kyis skad cig stong phrag brgyad cu rtsa bzhi'i mtshan nyid can dang /srog dang thur sel gyi rlung rnams kyang grangs ma lus pa gang gis sam/ gang du nub cing 'gags par gyur pa ste/ 'dis kyang srog rtsol dang 'dzin pa'i yan lag dag gsungs so/ /de skad du yang / srog gi rtsol ba yang ni lam ni gnyis po sgyel zhing dbu mar srog ni zhugs par 'gyur//thig ler srog rab zhugs shing gnyis ka'i bgrod pa sems rtse gcig pa 'dzin pa'o/ /zhes pa'o/ /rang gi bdag nyid kyi sems so/ /de nyid nam mkha'i khams yin zhing rnam pa thams cad mthong ba sna tshogs pa'i gzugs ni zla ba ste/'dis kyang rjes su dran pa'i yan lag gsungs so/ /de skad du yang / gtum mo'i snang ba gang zhig lus dang nam mkha' la yang nges par 'gyur ba rjes dran 'gyur/ /zhes so/ /shar ba ni gtum mos reg pa las gtsug tor gyi 'khor lo las 'ongs pa ste/snang ba med pa rab tu gsal ba nyid kyi phyir 'od bzang can no/ /de 'jig rten thams cad kyi rten nyid kyi phyir na/ sangs rgyas thams cad kyi spyi bor dang / rdo rje'i rtse mor gzung ba nyid kyi phyir 'jig rten dbang phyug go/ /dga' ba bcu drug gi khu ba nyid kyi phyir gang ba'i zla ba ste phyin tshig sdud do//'dis kyang ting nge 'dzin gyi yan lag gsungs te/ shes rab thabs kyi bdag nyid ni 'gyur med bde ba'i dbang gis ye shes gzugs la ting nge 'dzin zhes 'chad par 'gyur ro/ /gsal bar gyur cig rgyal bar gyur cig pa'o//'dis ni phyag 'tshal ba yang 'phangs te/ des ni de la rab tu 'dud do zhes mtshon par bya'o/ /da ni rnal 'byor yan lag drug po 'di gang brjed par bya ba de 'gal bar snang ba'i sgo nas rtogs par byed pa gsungs te/ /gang zhes pa la sogs pa'o/ /mgon po gang zhig 'khor bar skye ba dang 'chi ba'i kun rdzob kyi bden pa dang /zhi ba de chad pa don dam pa'i bden pa ste/ de dag so sor dmigs pa ni kun nas dmigs par byed pa ste/ de dang bral ba nyid kyi phyir de skad du'o/ /de nyid kyi phyir kun rdzob dang don dam pa'i bden pa de dag las tha dad med par gnyis su med pa'i ngo bo zung 'jug go//'jig rten gsum pa dang gcig pa'i ngo bo nyid kyi phyir khyab bdag go/ /stong pa dang shin tu stong pa dang / stong pa chen po dang / thams cad stong pa nyid kyis 'od gsal ba nyid kyi phyir stong pa ste/ rdul phra rab kyi chos nyid las 'das pa zhes pa'i don to//me long gi gzugs brnyan lta bu'i rnam pa thams cad mchog dang ldan pa nyid kyi phyir brtse ba'i rang bzhin te/ rnam pa kun ldan rnam pa med/ /ces pa'i don to/ /gnas pa las 'das pa ni dmigs pa la chags pa'i sems te/ gnas pa med pa'i tshul gyis legs par gnas pa zhes bya ba'i don to//rnam par rtog pa med pa'i ye shes rab tu gyur pa'i gnas skabs kyi khyad par ni sa rnams te/ de rnams kyi dbang phyug ni sa bcu gnyis kyi dbang phyug go/ /rtogs ldan rnams ni rtog med kyi ye shes man ngag la mkhas pa rnams kyi'o//nyams med bde ba ni mchog tu mi 'gyur bar 'dod pa lnga la longs spyod pa'i bde ba'o/ /rgyas par byed pa ni 'phro bar byed pa ste/ rtog pa spangs pa ni gnyis dang bral ba'o/ /'gro ba med/ mi 'gyur ba med pa nyid kyis na g.yo ba med pa'i ngo bo'o/ /'gro bas nye bar bsten par bya ba nyid kyi phyir mgon po'o//ngag gi spyod yul ma yin pa nyid kyis na 'gal lo/ /brgyan par byed gyur cig ni byin gyis rlobs shig pa'o/ /'gro ba'i sems ni 'gro yid do/ /sems dang bral ba ni sems med pa'i sems te/ de yis 'char ro zhes pa sems dang bral ba 'char ba'o//'gal ba'i don ni go sla'o/ /bla ma sangs rgyas bla ma chos/ /de bzhin bla ma dge 'dun te/ /dpal ldan bla ma rdo rje 'dzin/ /bla ma nyid kyis 'dir byed rgyu'o/ /zhes pas phyin ci ma log pa'i de kho na nyid ston par byed pa'i dpal ldan bla ma dam par gyur pa'i yon tan gsal bar byed pa sngon du 'gro bas phyag 'tshal bar gsungs pa/cung zad ces ba'o/ /cung zad rtog pa'i yongs 'dzin ni cung zad kyang yod do zhes khas len pa ste/ yod do zhes dang rtag par lta ba'o zhes pa'i don to/ /nyams pa'i ched du ste 'gro ba sdug bsngal gyis 'khor ba'i sdug bsngal nyams su myong ba'i ched du'o//nges par sdug bsngal gyi rgyu nyid kyi phyir 'dzin pas bcings pa'o/ /rnam par rtog pa'i cha de yang gtong ba ni de gtong ste chad par lta ba zhes pa'i don to/ /bab col du spangs par ni rnam par ma bcad pa chad par lta ba'o zhes pa'i bar ro//bskal pa mtha' yas par sdug bsngal gyi rgyu nyid kyi phyir shin tu ring bar thar pa med de/ de yang 'di yin la ltung ba yang ste mnar med pa la sogs pa'i dmyal bar ltung ba'o/ /de skye ba'i phyir ram de gnyis rab tu skye zhing 'phen par byed pa ni de skad do//gsungs pa yang / gang rnams stong pa nyid lta ba/ /de rnams bsgrub tu med par gsungs/ /zhes so/ /de ltar rnam pa 'di yis dam pa'i lam bslad par gyur cing grol ba'i lam mi mngon par gyur pa la dpal ldan bla ma gang gis nam mkha'i gzugs brnyan du ba la sogs pa rnam pa thams cad pa sna tshogs pa'i gzugs sems las las rnams 'das te/sems med pa'i sems kyi ngo bo can mkha' dang brtse ba'i bdag nyid de stong pa nyid dang thugs rje tha mi dad pa ston par mdzad cing / stsol bar mdzad de slob ma dam pa rnams la zhes pa lhag ma'o//bla ma mchog dpal ldan bla ma de la phyag 'tshal zhing lus dang ngag dang yid rnams kyis rab tu 'dud do/ /dga' ba ni rangs pas so/ /rtag tu ni dus gsum du'o/ /'on gal te dpal ldan bla ma'i drin kho na las dam pa'i lam nye bar thob pa yin na de'i tshe bla ma dam pa'i yon tan sgrogs po kho na bya ba ma yin nam/ji ltar rnal 'byor yan lag drug pa'i rab tu byed pa rtsom pa zhugs she na/ gsungs pa/ de phyir zhes pa la sogs pa ste/ gang gi phyir de ltar yin pa de phyir te de'i phyir rang gi rtogs pa sgrogs pa kho na ni/ de lta bur gyur pa'i bla ma yang dag pa ji lta ba'i lam ston po'i bdag nyid chen po mchog tu thugs brtse ba'i bdag nyid sgrogs shing yon tan gsal bar byed pa ste/bla ma'i drin gyis thob pa'i bdag nyid kyi shes pa rab tu gsal bar byed pa kho nas so/ /don 'di nyid de gzhan bkod pas gsungs pa/gang gi phyir 'bar ba'i gzugs can me ni med pa na ste me 'bar ba med na du ba'i rtse mo yang dag par 'phyur zhing gsal bar 'dril ba rtogs pa med pas so/ /'dis ni dpal ldan bla ma'i drin kho na las gzhung 'di byed pa la bdag mkhas pa nyid do zhes bshad par 'gyur ro//'o na nga rgyal thams cad dang bral bas de kho na nyid kyi lam sgrub par byed pa khyod kyis ji ltar nga de kho na nyid shes pa thob pa'o zhes sems mtho bar 'gyur zhe na lan gsungs pa/ bdag gi rtog pa'i nga rgyal skyon gyi rgyur 'gyur min te 'gyur ba zhes pa lhag ma'o/ /gang gi phyir grol ba don du gnyer ba rnams rab tu 'jug byed nyid kyis gzhan don sgrub par byed pas so//don 'di yin te rnyed pa la sogs pa re ba'i bsam pas bdag gi shes pa gsal bar byed pa ma yin gyi/ 'o na ci zhe na/ srid pas 'jigs pa rnams la thabs kyi dngos po yang dag par bstan pas rab tu 'jug par byed pa'i ched du'o//don gzhan bkod pa gsungs pa/ /rab tu 'jug pa'i rgyu'i don 'ga' zhig brjod pa la ste/ bshad pa la rang nyid kyis ma nges pa'i smra ba po 'chad pa po'i skabs las nges pa med cing the tshom za ba na don du gnyer ba'i skye bo 'dod pa 'grub pa'i ched du ji ltar 'jug ste/ma yin pa kho na'o zhes pa'i don to/ /gang yang smra ba bo ste mngon par brjod pa po dang 'brel ba'i brjod pa'i tshig la ni so so skye bos byas pa'i rgya cher 'grel pa la sogs pa rnams kyis rgyud du ma rnams su drang ba'i don rtogs pas khengs pa'i blo can gyi sngags pa dam pa rnams dmyal bar 'gro ba na ste/'phags pa spyan ras gzigs dbang phyug gis mdzad pa'i rgya cher 'grel gyi dpal dus kyi 'khor lo nyung ngu'i rgyud kyi rgyal por drang ba dang nges pa'i don rnam par dbye ba rab tu rtogs so zhes rgyud kyi rgyal po'i bdag nyid chen po gsal bar byed pa gsungs pa/drang ba zhes pa'o/ /drang ba'i don ni/ de kho na nyid kyi don spangs te gsungs pa'o/ /lam spangs pa rnams ni kun rdzob dang don dam pa'i rnam par dbye ba la mi mkhas pa rnams so/ /de nyid kyi phyir/ shes rab dman pa nyid sgrub pa'i sgo nas te/bsgrub pa'i phyogs las dgag pa rnams mi rtogs so zhes bya ba ni/ rdo rje 'dzin dpal bka' yis ni/ bcom ldan 'das dpal dus kyi 'khor lo'i bka' yis so/ /'jam dpal byang chub sems dpa' chen pos dpal dus kyi 'khor lo nyung ngu'i rgyud gsungs te/sham+b+ha la'i yul du yang dag par bsdu ba mdzad nas bstan to/ /'dis ni ston pa po dang bsdu ba mdzad pa po dag gis dang don gyis na gsol ba 'debs pa po dpal phyag na rdo rje'i bdag nyid chen po nyid gsal bar byas par 'gyur ro/ /rgyud chen po gang la 'jig rten dbang phyug gi sprul pa'i sku dpal pad+ma dkar po zhes bya bas don thams cad gsal bar byed pa'i phyir thams cad don can dri ma dang bral ba'i 'od ces bya ba'i rgya cher 'grel mdzad de byas par gyur to//gsungs pa yang / rgyas 'grel don kun gsal byed pa/ /zhes so/ /rgya cher 'grel des gsal byas pa'i/ / sangs rgyas rin chen snying po ste/ /yang dag pa'i gdams ngag gi lam snying bo bsod nams las te/ bla ma dam pa'i skabs las thob nas nges pa'i don gyi bdud rtsi bsten pas te/ don dam pa dga' ba bzhi pa'i bdud rtsi thob pas srid pa'i dug ste/skye zhing skye ba'i dug chen po gcod par byed cing mchog tu mi 'gyur ba 'dren par byed do/ /de nyid kyi phyir/ /dga' bar byed de rtag tu lhun gyis grub pa'i bde ba rgyun mi 'chad pa'i phyir ro/ /'dis ni rgya cher 'grel mdzad pa po'i yang ches che ba nyid gsal bar byed do/ /slar yang rgyud kyi lhag pa'i rgyal po'i bdag nyid che ba nyid ston par byed de/shes bya shes so zhes bya ba'i tshogs rnams kyi ste/ phyi dang nang gi rig pa'i gnas kyi tshogs mtha' dag gi gzhi rten te 'byung gnas su'o/ /gsungs pa yang / dang po'i sangs rgyas su ma gsungs pa gang de/ med do zhes so/ /rgyud kyi rgyal po gang du bcom ldan 'das kyi ste/ sangs rgyas kyis kun mkhyen gyi mtshan thams cad mkhyen pa zhes pa'i mngon brjod rjes mthun pa ste/ don gyi rjes su mthun par gyur pa dang / de kho na nyid rin po che'i 'byung gnas der dbang phyug la sogs pas bshad pa ni rtswa dang 'dra ba ste/g.yo bzhin pa nyid kyis na snying po med pa nyid kyi phyir rtswa ra gyur pa'o/ /rgyud gang du shes rab pha rol phyin pa'ang ste chos thams cad stong pa nyid rtogs par byed pa yang ni gang du thal mkha' dag kyang de yin la/ 'du shes mang por gyur pa gang yin pa'i rnam par rtog pa'i ljon pa rnams te/de rnams rab tu 'jig byed mchog tu mi 'gyur ba ro mnyam par gyur pa yin pa de ni de skad do/ /nam mkha' las byung ni sna tshogs gzugs las byung ba'i'o/ /dag pa'i bdag nyid ni rnam par rtog pa mtha' dag gi mtshan ma med pa'i sku can nyid kyi phyir ro//da ni du ba la sogs pa'i mtshan byung ba'i rgyu rnal 'byor yan lag drug gi rten dpal ldan bla mas yang dag par rab tu byin pa'i man ngag gsungs pa dri med ces so/ /dri ma med pa'i nam mkha' gang la ste/ sprin la sogs pa'i sgrib pa dang bral ba'o//sprul pa la ste nang la dmigs pa'i bya ba can la'o/ /mig phyed la ste bkab cing ma bkab pa'i mig la'o/ /snying rje chen po rgyas pas brlan cing snum par byed pa'i bsam pa las te/ sems las rten rnam par rtog pa'i sems za zhing rang bzhin med par byed do zhes pa de las so//'dis yang dag par rab tu sbyin pa gsungs so/ /gsungs pa yang mun pa la cung zad kyang sems pa med par bya'o zhes nye bar bstan pa'o zhes so/ /gzhan du yang / yid kyi rtsa ba phyung byas te/ /stong pa nyid la goms byed pa/ /ma rig rab rib kyis ldongs la//mig sman 'di las gzhan ci yod/ /ces so/ /sar ha'i zhabs kyis kyang / /dngos kun mkha' dang mnyam byas shing / /nam mkha' mnyam par sems gzung na/ /des ni bla med byang chub 'thob/ /ces gsungs so/ /'dis ni rnam pa kun ldan rnam pa med pa rgyu'o zhes gsungs par 'gyur ro//yod dang med dang gnyis ka dngos po dngos med nges par 'jig pa ste/ yod pa dang med pa la sogs pa mtha' bzhi las rnam par grol ba glo bur ba ste/ rnam par rtog pa'i sgyu ma la ltos te'o/ /rang gis nyams su myong bar 'gyur ro zhes pa lhag ma'o//'char zhing rab tu skye ste du ba la sogs mtshan ma bcu po ma lus pa gang stong pa nyid kyi rjes 'gro ste 'brel pa can no/ /rdzogs pa'i rim pa gsal bar byed pa rnams ni kun rdzob dang don dam pa gcig nyid du rab tu gsal bar byed pa rnams so/ /dus [(]gyi [,]kyi [)] 'khor lo'i ye shes kyi le'u'i tshigs su bcad pa nyi shu rtsa drug lhag pa'i brgya ba'i de ma thag pa'i tshigs su bcad pas gsungs pa/gang phyir zhes pa la sogs pa'o/ /gang gi phyir 'gyur med las byung ba'i lhan cig skyes pa'i sku la a phreng dang ka phreng dang / pad+ma dang / zla ba dang / nyi ma'i gdan dang /hUM yig yongs su gyur pa'i mtshan ma las skyes pa'i gzugs dang / kha dog dang / phyag dang dbyibs yongs su brtags pa'i chos bkag pa de'i phyir/ bcom ldan 'das kyis mchog tu mi 'gyur ba'i ye shes grub pa gsungs so/ /a sogs ni a yig la sogs pa dbyangs kyi tshogs zla ba ste/ka sogs ni ka yig la sogs pa gsal byed kyi tshogs nyi ma'o/ /de dag gcig nyid ni gcig tu byed pa'o/ /gdan ni rten te pa yig gsal byed kyi bdag nyid can pad+ma dang / a yig gi bdag nyid can zla ba'i dkyil 'khor dang / re pha'i bdag nyid can nyi ma'i dkyil 'khor ro//rdo rje can gyi ni mchog tu mi 'gyur ba'i ye shes can gyi'o/ /ming zhes pa gsal ba'o/ /de bzhin du hUM yig yongs su gyur pa'i rdo rje'i mtshan ma dang / de yongs su gyur pa'i lha'i sku kha dog dang / phyag dang zhal dang / dbyibs yongs su brtags pa'i chos brten par bya ba'i mtshan nyid can mi 'dod de/mngon par zhen pa'i mtshan nyid kyis na 'gyur ba'i rang bzhin nyid kyi phyir ro/ /'gyur ba med pas te mchog tu mi 'gyur ba'i bde bas bskyed cing de'i phyir yang 'gyur ba mthar byed de 'gyur ba tha mal ba'i skye bos yongs su brtags pa'i a yig la sogs pa'am mi 'gyur ba dang bral ba'am/skye ba dang 'gag pa dang bral ba mchog gi dbang po can phyag rgya chen po'i bdag nyid du gyur pa rnam kun pa'i ste 'jig rten gsum gyi rnam pa'i bde ba'i ngo bo can gyi'o/ /thig le'i ste lhan cig skyes pa'i dga' ba bzhi pa'i thig le'i'o/ /rgyal ba'i bdag po mchog gi ste rdo rje sems dpa'i'o//sna tshogs sgyu ma 'dzin pa'i ste/ sna tshogs sgyu ma ni sna tshogs yul phyag rgya chen po ste de 'dzin pa'i'o/ /bla ma dam pa'i man ngag thob pas ni dpal ldan bla ma'i yang dag par rab tu sbyin pa thob pas so/ /gdug pa'i grogs yongs su spang ba ni sdig pa'i grogs po yongs su dor bas so//du ba la sogs pa'i mtshan ma bsgom pa ni du ba la sogs pa'i mtshan ma yongs su sgom pa nyid kyi phyir te/ sems brtan par byed pas so/ /thog mar zhugs pa nyid kyi phyir las dang po pa'o/ /sbyangs ba'i dbu ma 'bab pa'i phyir dbu ma rnam par sbyangs pa'o//gsungs pa yang / du ba la sogs bsgom bya ste/ /sems ni g.yo ba med byas nas/ /dbu ma sbyang ba byas nas ni/ /mchog tu mi 'gyur bsgom par bya/ /zhes so/ /tshogs khang ni gra ba la sogs pa'i gnas so/ /gtsug lag khang ni dge slong gi dge 'dun gyi gnas so//nam mkha'i khams ni sna tshogs gzugs brnyan la rnam pa thams cad pa'i stong pa nyid me long la phra phab pa bzhin du skyes pa med pa'i chos mthong ba ste/ rnam par ma brtags pa'i chos mthong bas so/ /byis pa skye bos brtags pa'i phyi rol gyi don med pa'i phyir rang gi sems kyi spros pa'i snang brnyan rmi lam dang mtshungs pa'i don du sems pa'o//bye brag tu smra ba dang / mdo sde pa dang / rnal 'byor pa'i lugs kyi nang du ma lhung ba'i phyir rdul phra rab tshogs pa'i bdag nyid kyi chos rnam par dpyad pas stong pa'o/ /tshu rol mdzes pa'i lugs la mi 'jug pa'i phyir chad par smra ba ring du byas pa nyid kyi phyir na chad pa'i stong pa nyid ring du byas pas so//nang gi bdag nyid kyi bde ba kho na mchog gi phyag rgya'i bde ba ste/ de nyid rang rig par bya ba'i chos yin zhing de la rjes su chags pa'o/ /las kyi bud med dang ye shes kyi bud med las byung ba'i bde ba rnams la chags pa med pa'i phyir phyi rol gyi dbang po'i rang rig par bya ba'i chos yongs su spangs pa'o//shes rab dang thabs kyi bdag nyid can gyis te/ du ba la sogs pa'i mtshan ma 'byung ba'i de ma thag tu ting nge 'dzin gyi yan lag gsal bar 'byung bar bya ba'i ched du/legs par bslabs pa'i las kyi phyag rgya la rjes su chags pa'i ro can gyis so/ /gsungs pa yang / rdo rje pad+mar bzhag byas nas/ /srog ni thig ler gzhug par bya/ /'khor lor thig le thig le rnams/ /g.yo ba rdo rje dgag par bya/ /zhes so/ /rgyun mi 'chad par phyag rgya chen po la brten pa'i sems kyis yang na'o//da ni lam shes pa'i de kho na nyid mi 'thob pa gsungs pa/ lam zhes pa la sogs pa'o/ /de bzhin gshegs pas gang gsungs pa'i bzhi'i rab tu dbye ba bcu drug can gyi de kho na nyid bzhi pa dpal ldan bla ma rdo rje de ni rnal 'byor pa ma yin pas 'thob pa ma yin no//sna tshogs rnam rtog ni pad+ma dang nyi ma dang zla ba dang sgra gcan dang dus me dang sa bon dang / mtshan ma yongs su gyur pa'i zhal dang phyag dang / kha dog dang dbyibs dang dpa' bo'i rim pa rang byin gyis brlabs pa'i rigs la sogs pa'o/ /sogs pa'i sgras ni chos thams cad chad pa'i stong pa nyid smra ba la sogs pa'o//de kho na nyid 'di rab tu gsal bar dbang bskur gyi le'ur gsungs te/ 'dod dang dga' ba dag dang 'dar dang 'gyur med kyang ste bzhi pos sbyor ba de gcig ste/ /gang pa dang ni nus dang skye ba mchog tu dga' ba nyid ni gnyis par nges par 'gyur//'bar dang thig le dang ni gnyid yur slar yang khyad dga'i dga' ba 'di ltar gsum pa'o/ /oT+Ta dang ni nA da gnyis dang lhan cig skyes pa'i dga' ba 'di ltar bzhi par 'gyur/ /zhes so/ /de'i phyir rnam par rtog pa'i lam gyis de kho na nyid ma yin zhing / de kho na nyid ma yin zhes bya yang de kho na nyid kyi sgrub byed du 'gyur ba yang ma yin no//gal te 'di de kho na nyid kyi sgrub byed du mi 'gyur ro zhes pa de ci zhe na/ gsungs pa/ bskyed pa'i rim pa zhes pa la sogs pa ste/ de kho na nyid kyi ste bde ba chen po'i sgrub byed de 'di yis bsgrub par bya'o zhes pa sgrub byed de kho na nyid de kho na yin gyi/gzhan pad+ma la sogs pa'i kun du rtog pa ni ma yin no/ /de kho na nyid de ci zhe na/ bskyed pa'i rim pa las grol ba ste/ mngal du 'jug pa'i rim pa dang bral ba'o/ /hUM dang phaT yid ces sngags so/ /sogs pa'i sgras ni phyag rgya la sogs pa'i rtog pa ste/de dang bral ba ni de kho na nyid do/ /de ci zhe na gsungs pa/ rdzogs pa'i rim pa'i rnal 'byor zhes pa la sogs pa ni grub par gyur pa ste/ nam mkha'i sgom pas rtogs par bya ba'o/ /de'i rim pa ni du ba la sogs pa'i lam ste/ de'i rnal 'byor ni shes rab kyi gzugs dang lhan cig mi 'gyur ba'i ye shes chen po skye ba la chags pa'o zhes pa'o//da ni 'phags pa'i tshigs su bshad pa gnyis kyis dpe dang bcas par byang chub kyi sems mthong ba'i thabs ni thabs ma yin pa spangs pas gsungs pa/ shing la gnas pa zhes pa la sogs pa'o//ji ltar te gang dang 'dra bar me rten med par re zhig mi mthong ba ni shing la gnas kyang zhes pa'i kyang gi sgra'i don to/ /bcad dang dbye ba'i thabs kyis zhes pa byed pa la gsum pa'o/ /gcod pa ni sta re la sogs pa rnams kyis so/ /dbye ba ni shing 'byed byed la sogs pa rnams kyis so//thabs ni sgo'o/ /gtsub shing ni srub shing ste de dag gis bsrub pa las so/ /me de de la gnas pa yang / /zhes pa de la ste bsrub par bya ba'i shing de la gnas pa'o/ /de bzhin du ste de de dang 'dra bar sems kyi snang ba ni sems snang ste/ khams gsum pa mthong ba yin la/rnam rtog bsgom pa'i thabs rnams kyis te rnam par rtog pa yang yang du mngon du phyogs par byed pa'i sgo rnams kyis mi mthong ngo / /'di ni ste sems kyi snang ba ni brkyang ma dang ro ma gcig tu sbyor bas mthong ste zhes pa byed pa la gsum pa'o/ /gcig tu sbyor ba ni gnyis su med par sbyor ba'o//de nyid du ste rang gi sems kho na la'o/ /don dam bsnyen par yang gsungs pa/ /shing las me dang zla ba chu shel las ni chu yang me/ /zho las mar dang rdo ba rnams las lcags rigs rnams/ /bud med skye gnas 'grogs las ma nyams bde ba ni//de thabs sbyor bas skal ldan rnams kyis gzung bar mdzod/ /khyod kyi sems la bsal bar bya dang gzhag bya ba/ /cung zad med cing 'grib dang 'phel ba dag kyang med/ /sems la rang gi sems ni khams gsum pa nyid du/ /so sor snang ba tsam ste chur son nyi ma bzhin//zhes so/ /sems gcig tu kho na shes rab kyi gzugs brnyan du gyur pa du ma'o zhes dgongs pa'o/ /'di nyid ston pa gsungs pa/ du ba zhes pa la sogs pa'o/ /du ba kho na mtshan gang gi dang po yin pa de yis te/ mtshan ma ni yid ches par byed pa ste/ gang gis mngon par 'dod pa gsal bar bya ba de zhes so//srog rtsol ni bum pa can te steng dang 'og gi rtsa gsum 'gog pa'i bdag nyid do/ /dbu mar 'bab pa ste sems kyi rtsar srog gi rlung 'bab cing rjes su 'jug pa'o/ /rig ma gtso bo'i brtul zhugs ni tshangs par spyod pa ste/ rig ma ni rang gi rgyal ba'i dbang bskur zhing yon tan lhag pa gzung bar bya'o//mngon par brjod pa bla mar yang / /puk+ka sI ni mchog mdzes ma/ /gzugs dang lang tshos brgyan byas ma/ /gcig tu rnal 'byor goms byas ma/ /dam tshig shes shing brtul shugs brtan/ /brtan ma chags med ngo tsha med//sred bral nga rgyal med thob nas/ /de dang lhan cig sngags rig pa/ /rang gi rig ma'i brtul zhugs spyad/ /ces so/ /de las rdo rje ma ltung ba ste/ rdo rje ma lhung ba ni nges pa nyid de des so/ /steng du khu bas zhes pa nor bu dang pad+ma las gyen du 'gro bas dbral bar son pas so/ / lam 'di yis ni steng du ba la sogs pa yan lag drug gi mtshan nyid can gyis so/ /rnal 'byor ni rdzogs pa'i rim pa'i rnal 'byor te 'di la yod pas so/ /sangs rgyas kun gyi bde ba ni dbang po'i ma yin pa ste/ mchog tu 'gyur ba med pa ni/ mngon par sgrub pa'am ste mchog tu mi 'gyur ba//zhes pa mngon par sgrub par byed pa ste/ gang gis kun nas rdzogs par byed do zhes pa'o/ /pho nya kun gyi lhan cig skyes pa 'thob ste rtsa stong phrag bdun cu rtsa gnyis 'gags pa'i rang bzhin gyi mkha' 'gro ma rnams kyi stong pa ni lhan cig skyes pa zhes brjod cing srid pa gsum spangs pa'i gzhom du med pa yin gyi/'jig rten la grags pa'i bzhi ba'i sgrib pa'i dag nyid kyi lhan cig skyes ba ni ma yin no/ /stong pa ni gcig nyid du brjod par bya ste/ sgrib pa kun dang bral ba'i phyir ro zhes pa'am gyi sgra'i don to/ /'od na de ltar rdzogs pa'i rim pa'i rnal 'byor ni de kho na nyid dang de kho na nyid kyi sgrub par byed pa yin zhing gzhan ma yin no zhes bshad la/de'i phyir de nyid 'gyur mod/ nye bar mi mkho ba gzhan gyis ci bya zhe na/ gsungs pa/ gzugs zhes pa la sogs pa'o/ /'jig rten ni khams gsum pa ste/ /de la yod pa ni 'jig rten pa nyid do/ / de yang 'di yin la dngos grub kyang ngo zhes pa'o/ /dngos grub ni 'og min gyi srid pa'i mthar thug pa'i dbang phyug nyid de 'grub bo/ /gzugs la sogs pa'i rtog pa zhes pa gzugs su yod cing gnod par bya'o zhes pa gzugs te de kho na gang gi dang po yin pa'o/ /de'i rtog pa ni yid kyi las so zhes pa ste/de la gzugs bsgom pa ni las kyi phyag rgya'o/ /sogs pa'i sgras ni ye shes te/ de sgom pa ni ye shes kyi phyag rgya'o/ /dkyil 'khor 'khor lo la sogs pa/ sgom pa goms pa yis zhes pa la dkyil ni rten gyi mtshan nyid can no/ /'khor lo ni lha'i tshogs pa brten pa'i mtshan nyid can no//sogs pa'i sgras ni sngags dang phyag rgya dang gdan la sogs pa'o/ /de rnams kyi sgom pa ni mngon du phyogs par byed pa ste/ de sgom pa ni yang yang du mngon par zhen pa yin zhing de rnams kyis so/ /gal te da lta na lam 'di kho nas thams cad dngos grub 'grub par 'gyur mod//du ba la sogs pa'i lam gyi man ngag gi dgos pa med do zhe na/ gsungs pa/ ga la zhes so/ /che na po yang 'di yin la dngos grub kyang ngo zhes pa dngos grub chen po ste phyag rgya chen po'i dngos grub bo/ /'dod pa ni 'jig rten las 'das pa pa'o//gang la 'grub ste du ba la sogs pa'i man ngag ces par cis 'grub ste/ ma yin pa kho na'o zhes pa'i don to/ /'o na lam gyi nye bar bstan pa 'dis ci yang dag par rdzogs pa'i byang chub 'thob par brtson pa'i blo can thams cad kyi thams cad las 'gyur ram/'o na te dag par 'gro ba'i don byed pa la mkhas pa la spro ba 'ga' zhig kho na rnams kyi 'ga' zhig kho na las yin zhe na gsungs pa/ lam zhes pa la sogs pa'o/ /bla ma dam pa ni dpal ldan bla ma ste/ de'i mtshan nyid ni don dam bsnyen par rgyas par gsungs pa ji skad du/ bsam ldan srid pa'i bsam gtan nyams pa la chags pa/ /'dod ldan 'dod pa chen po la ni thugs brel pa/ /brtul zhugs che ldan dbang po gnyis kyi sde sbyor la/ /phyag rgya rab tu 'grogs la'ang 'dod chags ma nyams pa/ /zla ba nyi ma'i lam ni rab nyams rnal 'byor can/ / shes rab me la rnal 'byor stobs las rab tu zhugs/ /mtha' yas bde ba nyid kyis bdud rtsi thob 'gyur ba/ /dpal ldan bla ma rdo rje 'dzin pa sdig 'joms de'i zhes rgyas par ro/ /de'i bka' drin ni de kho na nyid kyi man ngag gis rjes su 'dzin pa'o/ /de las 'byung ste skye'o/ /su rnams kyis she na/slob ma dag pa rnams kyis te dag pa ni dbang bskur ba la sogs pa rnams kyis tha mal ba'i nga rgyal gyi dri ma sbangs pa rnams so/ /slob ma de rnams ni gzhan gyi don byed pa la sogs pa rnams kyis rjes su bstan par bya ba yang ngo zhes pa'o/ /phyag rgya chen po'i thig ler gsungs pa/ji ltar dug ni sngags sogs kyis/ /sbyangs bzhin pa ni bcud len te/ /de bzhin dbang bskur la sogs kyis/ /slob ma ma dag dag ldan 'gyur/ /zhes so/ /gang rnams gzhan gyi bya ba dge la brtson pa ste/ dge ba de la spro ba'o zhes pa'o/ /da ni lam thob pa rnams kyi bag med pa rnams kyis lam 'phrog pa'i rgyu mtshan gsungs pa/gzhan zhes pa la sogs pa'o/ /sangs rgyas nyid gang gis bde ba tshol zhing don du gnyer bar byed pa ste/ de ma thag tu brjod pa 'di ni dga' ba rgyas par byed do zhes pas rin chen te yid bzhin gyi rin po che dang 'dra bas rin po che ste/rnyed dka' ba nyid kyi phyir dang / bsams pa'i don gyi 'bras bu ster ba nyid kyi phyir na lam bzangs rin chen no/ /phyi nas khyad par gyi bsdu ba'o/ /bag med ni bag med pa'i spyod pa can te/ phan pa bde ba la ltos pa med pa'o/ / 'gro ba drug po rnams su nyams par 'gyur bas na sems can no/ /gzhan pa ni gang snying rje la sogs pa'i yon tan dang bral ba pha rol la phan pa dang bde ba la mi brtson pa'o/ /rang gi khyim ni chung ma'o/ /de kho na dgon pa ste/ gdug pa'i sems can gyi gnas te zhugs pa de'o//'di rnams su dbang po rnams 'ching ngo zhes pa yul rnams te/ gzugs la sogs pas phyi rol gyi longs spyod rnams so/ /de rnams kyang ngan pa ste ro bro ba chung ba nyid kyi phyir dang / rnam par smin pa rtsub pa nyid kyi phyir dang brgyal ba'i sems kyis bsten pa nyid kyi phyir ro/ / de rnams kho na chom rkun pa rnams te/ byin pa'i lam bzang po'i rin po che yang de rnams kyis 'phrog par byed/ /rku bar byed do zhes pa'o/ /'di rnams 'ba' zhig gis lam bzang po rin po che'i nor khyim gyi dgon par zhugs pa 'phrog pa 'ba' zhig tu ma zad kyi/ gnyen 'dun 'thib po'i nang du zhugs pa'i the tshom la sogs pa'i rkun po rnams kyis kyang ngo //gnyen 'dun ni chung ma dang bu dang bu'i bu la sogs pa grags pa'o/ /thibs po ni nags so/ /yid ches pa rnam gsum gyis nges pa'i lam bzang po'i rin po che la yang so ma nyi za ba ni the tshom ste/ci ste 'di lam bzang po yin nam 'o na te ma yin zhes pa'o/ /'gyod pa ni las ngan pa bdag gis byas te/ de'i phyir bdag gis lam mngon du mi bya'o zhes pa 'di lta bu'i rnam pa can no/ /gnyid ni gnyis pa ste/ lus dang yid dag las su mi rung ba nyid du skyed par byed pa rmugs pa zhes pa'i bar ro//le lo ni spro ba zhan pa'o/ /rgod pa ni sems rnam par g.yengs pa nyid de/ grong khyer la sogs su 'khyam ba zhes pa'i bar ro/ /de ltar 'di rnams ni lam bsgom pa rnams kyi ting nge 'dzin gyi dri ma rnams su 'phags pa'i tshigs su bcad pa 'di yis bshad do zhes pa'o//ting nge 'dzin gyi dri ma 'di rnams kyis 'phrog ba 'ba' zhig tu ma zad kyi/ srog gcod pa la sogs pa rnams kyis kyang ste/ rin po che zhes pa ni lam bzang po'i rin po che'o/ /rtag tu ni dus gsum du'o//srog gcod pa sems can gsod pa'o/ /brdzun zhes pa mi bden pa smra ba'o/ /ma byin pa zhes pa gzhan gyi rdzas rku ba'o/ /gzhan gyi bud med ces pa ni 'dod pa log par spyod pa'o/ /tshig rtsub ni pha rol po'i zhe 'gegs par byed pa'o/ /phra ma smra ba ni nyon mongs pa can gyi sems kyis pha rol 'byed pa'i tshig go//tshig 'khyal pa ni 'dod pa la sogs pas nye bar bcom pa'i ha ha hi hi zhes pa la sogs 'dod chags bskyed pa'i tshig go/ /brnab sems ni gzhan gyi rdzas la log par chags pa'o/ /gnod sems ni gnod par byed pa'i sems nyid do/ / lta ba ngan pa ni med pa'i lta ba'o/ /de bzhin du yod pa'i sdig pa lnga ni 'tshe ba la sogs pa'o/ /nye ba'i sdig pa lnga ni cho lo la sogs pa'o/ /gsod ces pa ba lang la sogs pa gsod pa lnga'o/ /'khu zhes pa grogs po la sogs pa la 'khu ba lnga'o/ /mig la sogs pa'i dbang po kun nas chags pa lnga'o zhes pa 'di'i tshad lnga yin pas lnga pa rnam lnga ste chom rkun pa de rnams kho na'o zhes pa'o//de skad du/ 'tshe dang mi bden gzhan gyi bud med spongs shig gzhan gyi nor dang chang gi btung ba de bzhin nyid/ /'khor bar rdo rje zhags pa yin te rang gi dge ba mthar byed sdig pa lnga po 'di rnams so//cho lo kha na ma tho ba cas pa'i zas dang tshig ngan klog dang 'byung po lha min dbang po'i chos/ /ba lang byis pa bud med skyes pa rnams dang lha mi'i bla ma gsod pa lnga ni mi bya'o/ /grogs po rje bo rnams dang lha dang mi yi bla ma dge 'dun yid brtan rnams la 'khu ba yang //dbang po rnams ni kun nas chags pa'o zhes pa mi'i bdag po'i brtul zhugs rnams ni nyi shu lnga/ /zhes so/ /sdig pa can gyi las zhes bya ba bar du gcod par byed pas te/ mtshams med pa lnga po byed pa rnams kyang bsdus pa'o zhes pa'o/ /'di rnams kyis lam bzang po'i rin po che 'phrog pa 'ba' zhig tu ma zad kyi/shin tu bza' dang btung ba rnams kyis dang sna tshogs pa'i longs spyod rnams kyis kyang zhes pa'o/ /bza' ba ni shin tu sha la sogs pa za ba'o/ /btung ba ni chang 'thung ba la sogs par grags pa'o/ /shin tu ni brgyal ba la sogs pa'i chos kyis so//longs spyod par bya bas na longs spyod de me tog phreng ba dang tsan+dan dang bud med dang mal stan la sogs pa ste sna tshogs pa rnam par bkra ba'o/ /brtson 'grus ldan pa la yang ste lam bsgom pa la spro pa'i'o/ /brjod ma thag pa brtson 'grus brtan pa can 'ba' zhig gir ma zad kyi/brtson 'grus brtan pa dang mi ldan pa'i yang ngo zhes pa yang gi sgra'i don to/ /bag med pa ni shin tu bza' ba dang btung ba la sogs pa dang mi dge ba'i grogs po dang 'grogs pa'o/ /de las brgyal ba ste sems dang bral ba nyid du gyur pa la 'phrog par byed pa kho na'o zhes bya pa'o//rnam pa sna tshogs pa'i srid pa'i longs spyod la mngon par dga' ba ni dge ba byed pa rnams kyi yang bar du gcod par byed pa'o zhes pa'o/ /'o na de ltar lam rin po che yongs su rtog pa po la mngon par dgongs nas bar du gcod par byed pa'i skyon rnams rjod par byed pa ma yin nam//rang nyid lam gyi yongs su rtog pa po ma yin pa la brjod pa ci zhig ce na/ gang phyir te gang gi phyir rang nyid rtog pa po min pa de'i phyir gzhan cig shos g.yon can khram pa chen po la ston te/ 'di rin po che rin thang chen po yin nam zhes shes pa'i ched du'o/ /des smras pa ma yin no//de nas de'i ngag las te/ g.yon can gyi tshig las 'dor bar byed pa kho na'o zhes pa'o/ /de bzhin kho nar shes rab 'chal ba'i rigs can ni sdig pa'i dregs pa'i tshig las lam bzang rin thang med par rin po che thob na yang gtong bar byed do/ /de ltar lam rin po che yongs su rtog pa don du gnyer ba rnams kyis yang sdig pa'i grogs po dang nye bar 'grogs pa'i skyon gsungs so zhes pa'o//'o na de ltar lam rin po che rnam par shes par byas na rang nyid yongs su rtog pa po ma yin pas ji ltar bya zhe na/ bden mod/ de ni gal te gang rnams kyi skabs las rin chen chen po yongs su rtog par byed du gzhug pa de rnams kyi rnam dag ngag gis te/mi slu ba'i tshig rnams kyis ni gsal bar rnam par shes par bya ste/ rin thang med pa'i nor bu rin po che 'di'o nges par bya'o/ /de ltar kho na rigs kyi bus lam rin po che thob pa dge ba'i bshes gnyen gyi tshig las 'di ni rin thang med pa'o zhes legs par yongs su brtags te shin tu brtan par byas nas lhag par rjes su 'brel par bya zhing dor bar mi bya'o zhes pas dge ba'i bshes gnyen la brten pa ni rtag tu dge legs kyi ched du lam rin po che bsgom pa la brtson pa rnams kyi yang shin tu legs pa yin no zhes bshad do zhes pa'o//de ltar lam bsgom pa la rab tu zhugs pa'i yang bdud kyi las rnam par spangs pa med par sems brtan par gyur pa ma yin no zhes pa de'i phyir de kho na ston pa gsungs pa/ bdud rtsi 'khyil ba la sogs pa'o//bdud sdig can ni yang dag par rdzogs pa'i sangs rgyas la sogs pa rnams kyi gzugs rnams su sprul nas lam bsgom pa la rab tu zhugs pa'i byang chub sems dpa' bgegs te bar du gcod par byed do/ /ji skad du/ 'di ni bla na med pa yang dag par rdzogs pa'i byang chub kyi ched du ba'i lam ma yin la/gang gis khyod gnas pa'i lam 'dis 'ga' zhig kyang nges par byung ba dang / nges par 'byung bar 'gyur ba dang / nges par 'byung ba'ang ma yin no zhes pa la sogs pa rig par bya ste zhes rgyas par shes rab kyi pha rol tu phyin par bdud kyi las kyi le'ur gsungs pa shes par bya'o//de ltar bdud kyi las kyi skyon nye bar spangs nas thams cad nye bar bsdu ba gsungs pa/ de phyir zhes pa la sogs pa'o/ /ni ste gang gi phyir lam 'phrog par byed pa 'di yod pa'i rgyu de'i phyir ro/ /chom rkun rtsa lag ces pa nye bar mtshon pa ste/the tshom la sogs pa yang yongs su btang ste 'bad pas te gus pa chen pos bla ma dam pas byin pa'i lam rin chen khyad par du 'phags pas legs par sba ba rab tu gsal ba ma yin par slob ma rnams kyis bya'o zhes pa thar pa 'dod pa rnams kyi lam yongs su srung ba gsungs so zhes pa'o//'o na thar pa'i ched du lam gzhan yang yod pa ma yin nam des na 'di la gus pas ci zhe na gsungs pa/ dpa' bo zhes pa la sogs pa'o/ /dpa' bo'i rim pa ni phyi rol gyi drag po'i lha mchod pa dang dmigs pa la sogs pa'i mtshan nyid can no/ /rang byin gyis brlab pa'i rim pa ni sems kyis lha zhi ba'i rnal 'byor gyi sgo la dmigs pa'i mtshan nyid can no//thar pa'i ched du sangs rgyas rnams kyis yang dag par bstan pa min zhes pa'o/ /bstan pa 'di ci zhig yin zhe na gsungs pa/ shin tu rnam dag rim pa gcig pu zhes pa ste/ rdzogs pa'i rim pa'i rnal 'byor gnyis med pa'o/ /gal te 'di lta bu ji ltar shes par bya zhe na/ gsungs pa/ gang gis zhes pa'o/ /rgyu gang zhig rgyal ba'i dbang po rnams kyis mtshams med pa lnga po byed pa rnams yang dag par gzung ba ste dbugs phyung bar gyur pa'o/ / mtshams med pa lnga po rnams ni/ ma gsod pa dang / pha gsod pa dang / dgra bcom pa gsod pa dang / dge 'dun gyi dbyen dang / de bzhin gshegs pa lang na sems kyis khrag 'byin pa zhes pa ste/ lnga po rnams las gang yang rung ba'i skyon gyis bar mtshams med pa kho nar mnar med par bskal bar gnas par 'gyur te/des na mtshams med par brjod par bya'o/ /bde ba nyid kyis te thabs bde bas so/ /dbang bskur don gyi ni bzhi pa'i don gyis so/ /gzhan du na mtshams med pa lnga po byed pa rnams dpa' bo'i rim pa drag po'i las la chags pa dang bral ba dang /rang byin gyis brlab pa'i rim pa 'khor ba'i bde ba shin tu 'phel ba'i bag chags kyi rgyun can rnams kyis thar pa thob pa ma yin te/ rgyu des zhes pa'o/ /'o na gal te rim pa gnyis po 'di khyod rim pa ma yin par sems na de'i tshe bcom ldan 'das kyis ci'i don du gsungs she na/gsungs pa/ dpa' bo'i zhes pa la sogs pa'o/ /ni ste gang gi phyir lus la srog zad pa la 'di gsungs pa de'i phyir dpa' bo'i rim pa phyi rol la ni min no/ /'o na de ltar lus la rang byin gyis brlab pa gsal lam zhe na ma yin te/gang gi phyir rang gi sems byin gyis brlab pa so sor snang ba ste/ de yang stong pa la khams gsum pa nyid mthong pa'o/ /ming zhes pa rab tu grags pa'o zhes pa'o/ /'gro ba'i don byed pa rnams kyi shin tu rnam par dag pa'i rim pa rnam par gzhag pa yang gsungs pa'o zhes pa'o//'o na rang byin gyis brlab pa ni khams gsum pa mthong ba nyid du gsungs la/ de mthong ba las de mi ldog pa'i phyir des na 'khor ba gnas par gyur pa'i mtshan nyid can sangs rgyas nyid ji srid ce na/ gsungs pa/ 'khor ba zhes pa la sogs pa'o//'khor bar te khams gsum pa snying po med pa brdzun pa bslu ba'i chos can la sangs rgyas nyid de thams cad mkhyen pa nyid dang / rnam pa thams cad mkhyen pa nyid dang / lam gyi mkhyen pa nyid dang / stobs bcu dang / mi 'jigs pa la sogs pa'i yon tan rnam par 'byor pa'i mtshan nyid can ni 'bras bu ste snying por 'gyur ro//de zad las te 'khor ba zad pa de ma thag tu'o/ /ci dang 'dra bar 'byung zhe na gsungs pa/ chu shing gi 'bras bu bzhin zhes pa ste/ ji ltar snying po med pa'i chu shing las snying po 'bras bu smin pa chu shing nyams pas yang dag par 'byung bde bzhin du sangs rgyas nyid kyang ngo zhes pa'o//'o na sangs rgyas nyid ni sgrub par byed pa byang chub sems dpa'i byang chub kyi sems su 'dod na de kho na nyid kyi sgrub par byed pa ni de kho na nyid do zhes pa'i gsung gi phyir de yang sgyu ma las skyes pa nyid kyi phyir sgyu ma ni rang rig pa yin la/de 'jug bzhin pa'i de kho na ma yin pa ji ltar sangs rgyas nyid kyi sgrub par byed par 'gyur bar 'os she na/ gsungs pa/ sdig pa zhes pa la sogs pa'o/ /sdig pa ni shu ka'i srin bu'o/ /ku lI ra ni karka Ta'o/ /gang gi skabs las byung zhing 'byung ba rang gi ma de de rnams kyis nyams par byed pa ji lta ba bzhin zhes pa de ltar rnal 'byor gyi sems te/rnal 'byor ni shes rab dang thabs snyoms par 'jug pa'o/ /de la yod pa'i sems gang yin pa dbang bskur bzhi pa sgyu ma gang rig pa 'pho ba'i chos can gyi skabs las kun rdzob tu skyes pa yin zhing /de rnam par nyams par byed par 'gyur ro zhes pa'o/ /sgyu ma dang bral bas na 'khor ba slar ldog pa med par brjod de de kho na nyid kyi rnal 'byor ba rnams kyi dbugs 'byung ba'i don du'o/ /'o na byang chub kyi sems ni bems bo'i khams su 'dir brjod la/ de yang be mas po ma yin pa mchog tu mi 'gyur ba'i ye shes sangs rgyas nyid kyis sgrub par byed par ci ltar brjod ce na/brjod pa bden te/ khu ba mi 'gyur ba'i rang bzhin gyis mchog tu mi 'gyur ba bsgom par bya'o zhes pa'i gsung las so/ /de nyid kyi phyir rnal 'byor gyi sems 'di'i mchog tu mi 'gyur ba'i ngo bo bzhi'i rab tu dbye ba bcu drug gsungs pa/gnyis med ces pa la sogs pa'o/ /gnyis zhes bya ba ni 'khor ba dang mya ngan las 'das pa'i sems te/ gang la yod pa ma yin pa de gnyis med do/ /nor bu dang pad+ma las g.yo ba med do zhes pa g.yo ba med do//gnyis rtog ste shes rab dang thabs kyi cha 'di la yod pa ma yin no zhes pa gnyis rtog med do/ /bla na med pa'i bde ba ster ba nyid kyi phyir 'dod pa'o zhes pa rnal 'byor bzhi pa'o/ /dbugs brgya phrag drug lhag pa'i stong phrag nyi shu rtsa gcig 'gog pa'i phyir mchog tu mi 'gyur pa'o//chags pa dang bral ba'i phyogs dkar po dang nag po zhes bya ba bdag gi gnas pa dang 'gro ba med pa'i phyir 'dod chags chen po'o/ /rnam pa dang bcas pa dang rnam pa med pa las nges par grol ba nyid kyi phyir dngos dang dngos po med pa'o/ /shes bya ma lus pa mthong ba'i phyir ye shes so zhes rnal 'byor gsum pa'o//'gro ba dga' bar byed pa sngon ma can sems can gyi don la kun nas chags pa nyid kyi phyir sems dpa'o/ /dang po dang / dbus dang / tha mar dge ba byed pa nyid kyi phyir kun du bzang po zhes pa'o/ /bdud dang /nyon mongs pa dang / rnam par rtog pa dang bral ba'i phyir sgra ste/ grag pa phyi dang nang gi brjod pa 'am/ yang na rab tu sgrogs shing rnam par lhod pa'i seng ge'i sgra can gyi g.yul 'di yod pa ma yin pas sgra 'thab med pa'o/ /gzhom du med pa'i sgra'i ngo bo nyid kyi phyir 'di'i sgra ste grags pa chen po'o zhes pa rnal 'byor gnyis pa'o//'jig rten gyi spyod pa rnam par spongs pa nyid kyi phyir lhan skyes so/ /sku bzhi'i sgrib pa zad pa'i phyir dpal ldan byang chub sems kyi thig le 'dzin pa'o/ /stong pa nyid dang snying rje dag dbyer med pa nyid kyi phyir dpal ldan dus kyi 'khor lo rdo rje'o//tshul khrims kyi tshogs yang dag par rdzogs pa nyid kyi phyir shes rab thabs kyi bdag nyid rnal 'byor ro zhes pa rnal 'byor dang po'o/ /da ni bla ma bsten pa'i ched du rdo rje slob dpon yongs su brtag pa gsungs pa/ dang por zhes pa la sogs pa'o//'dir sngags kyi tshul la 'jig rten pa dang 'jig rten las 'das pa'i dngos grub 'dod pa'i slob ma rnams kyis bla ma la bsten par bya ste/ de yang yang dag par yongs su brtag par bya'o zhes gsungs pa/ byang chub kyi sems bsrung pa'i phyir dam tshig can no/ / bsten par bya ste bu dang chung ma la sogs pa rnams kyis mnyes par bya'o/ /rdo rje theg par lhag par gnas pa ni sngags kyi theg pa chen po lhag par gnas pa'o/ /mchog tu mi 'gyur ba'i ye shes sgom pa po nyid kyi phyir de kho na nyid bsgom pa'o/ /bu dang chung ma la sogs pa thams cad dang /rang gi lus la yang ltos pa med pa'i phyir ma chags pa'o/ /'dod chags la sogs pa'i skyon dang bral ba'i phyir dri ma med pa'o/ /bzod pa la dang tshul te 'bras bu la ltos pa med par 'jug pa gang gi rang bzhin yin pa de ni bzod pa'i ngang tshul can no/ /lam ni yang dag par rdzogs pa'i sangs rgyas kyi lam ste/de la 'jug pa'i ngang tshul can ni lam la 'jug pa'o/ /bla ma 'di mnyes par byas par gyur na slob ma rnams la lam gyi sbyin byed dmyal ba'i 'jigs pa 'phrog par 'gyur/ /de yang de kho na nyid las tshangs spyod ldan te mchog tu mi 'gyur ba'i de ba thob pa'o//bdud rnams kyi ni ste bdud bzhi bo rnams kyi rdo rje dbyug pa dang 'dra bas rdo rje dbyug pa ste/ 'joms par byed pa nyid kyi phyir ro/ /brjod pa'i mtshan nyid can mtshan nyid can gyi dpal ldan bla ma ste/ yang rdo rje 'dzin ma'i gzhi la rdo rje sems dpas byin gyis brlabs pa'i sku can nyid kyi phyir rdo rje sems dpar rab tu grags te sprul pa'i sku yis so//da ni 'jig rten las 'das pa'i dngos grub kyi ched du lha'i dmigs pa gsungs pa/ mngon sum zhes pa'o/ /de kho na nyid sbyor las te/ sna tshogs gzugs brnyan bsgom pa'i rnal 'byor las so//skar ma'i tshogs bzhin zhes pa nor bu sngon po dang / zla ba'i dkyil 'khor gyi rnam pa can gyi thig le'i dbus sangs rgyas longs spyod rdzogs pa'i sku mtha' yas pa mthong ba sngon ma can khams gsum pa bum pa dang snam bu la sogs pa mthong ba'o/ /sha'i mig gis ni dpag tshad brgya'i bar du chod pa'i dngos po mthong bas te/mngon par shes pa rdzu 'phrul la sogs pa rnams kyis so/ /lha mig ste 'jig rten gyi khams mtha' yas pas bar du chod pa'i phra mo dang cig shos kyi gzugs mthong bas so/ /sangs rgyas kyi spyan gyis te gzhan gyi sems rig las so//shes rab kyi spyan gyis te chos thams cad la rnam par mi rtog pa'i mtshan nyid can gyis so/ /ye shes spyan gyis te dngos po thams cad kyi rnam pa thams cad mthong bas so/ /sems can gzhan rnams ni tshu rol mthong ba rnams so/ /shi ba'i lus bzhin zhes pa ni g.yo ba dang 'gul ba med pa'i phyir ro//byas pa ni sa la sogs pas so/ /blugs pa ni ra gan la sogs pas so/ /bshang ba la sogs pa ni bi ra shu ma mu ste lnga'o/ /go ku la sogs pa ni go ku da han ste lnga'o/ /nang du bdud rtsi lnga ni phung po lnga rnams so/ /dbang po lnga rnams ni sgron ma lnga'o zhes pa'o//gsungs pa'ang nyin dang mtshan mor thig le las ni dkar po'i rgyun 'bab gang ste mA ma kI ste chang ma yin/ /go ku sogs ni nyin zhag so sor mig la sogs pa spro ba'o sha gzhan res 'ga' yang ni min/ /rang rig sa la gnas pa'i lha rnams kyis ni dag pa'i lus la bdud rtsi lnga rnams bsnyen pa ste//stong par sems rab 'jug las lhan skyes sems kyi bde ba 'khrig pa'o de ni skye gnas pa ma yin/ /zhes so/ /dbyung ba dang dgang ba dang bum pa can gyi rnal 'byor te oM yig phyir 'gro ba dang / AHyig 'jug pa dang hUM yig byed gnas par so sor rtog pa'i mtshan nyid can no//ma bsdams pa ni brtan par ma byas pas so/ /thun mong gi dngos grub kyi don du ni 'jig rten pa'i zhi ba la sogs pa'i dngos grub kyi don du'o/ /sdud pa ni mngon du phyogs par byed pa ste/ 'jig rten pa'i gzugs la sogs pa la mngon du phyogs par byed pa so sor spangs pa nyid kyi phyir/so sor sdud pa'o zhes pa'i don to/ /gzhan rnams kyi gzugs la sogs pa ni rdul phra rab kyi chos nyid las 'das pa 'jig rten las 'das pa'i gzugs la sogs pa rnams kyis so/ /bsam gtan ni shes rab dang rtog pa dang dpyod pa dang dga' ba dang g.yo med bde ba'i mtshan nyid can no//srog rtsol ni zla ba dang nyi ma'i bgrod pa 'jig pa'i mtshan nyid can no/ /'dzin pa ni gsang ba dang lte ba dang snying ga dang mgrin pa dang dpral bar 'gro ba dang 'ong ba'i sgo yis thig le la 'gog pa'i mtshan nyid can no//rdo rje pad+ma ni gtsug tor gyi pad+ma ste/ der byung ba nyid las rdo rje pad+mar skyes pa'i bdud rtsi des de byang chub kyi sems mi 'pho bas zhes pa'i don to/ /chu skyes ro mnyam gyur pa ni snying ga dang / lte ba dang gsang ba'i pad+ma'i ze 'brur ro mnyam par gyur pa'o/ /su shu ma nA'i rtsa ni dung can ma ste/de'i steng du khu ba yang dag par sbyor ba las te/ byang chub kyi sems 'gro ba las so/ /'dis ni phra mo'i rnal 'byor gsungs so/ /da ni dman pa dang mchog gi dbye bas bsnyen pa la sogs pa brjod par bya ste/ dang por zhes pa la sogs pa'o/ /phung po yongs su dor ba las zhes pa da ltar ba'i lus yongs su btang ba las so//skye ba'i char gtogs pa'i phung po 'dzin pa las zhes pa 'byung ba'i srid pa kun 'dzin pa las so/ /'di'i dbus te gang bar du srid pa bar ma'i mtshan nyid can no/ /srid pa gsum mthong ba ni srid pa gsum dngos su mthong ba'o//kun gzhi rnam par shes pa bag chags ma lus pa'i rten gyi rdul dang khu ba'i thig le'i dbus su sems 'jug pa ste/ ma'i mngal du khu ba'i thig le rnams 'dzin pa zhes bya ba ni yang dag par 'dzin no/ /zla ba bdun rnams kyis zhes pa spyi'i ngo bo las zla ba dgu rnams kyis zhes brjod do//lha'i sgrub pa la mngal gyi dpe yis te/ des na de nas zhes pa la sogs pas nye ba'i sgrub pa la sogs pa'i yan lag gsum gsal bar mdzad do/ /phung po drug po rnams kyis te/ gzugs dang / tshor ba dang / 'du shes dang / 'du byed dang /rnam par shes pa dang / ye shes kyi mtshan nyid can rnams so/ /'di ni spyi'i bsnye pa ste 'jig rten pa'i dngos grub kyi bsnyen pa'o/ /de bzhin du nye ba'i sgrub pa dang / sgrub pa dang / sgrub pa chen po'i zhes pa ste de nyid kyi phyir chu gter la sogs pa'o/ /'dis ni sku dang gsung dang thugs dang ye shes rdzogs pa'o zhes bshad par 'gyur ro//sgrub pa 'bring po zhes pa ni nye ba'i sgrub pa ste/ 'bring po zhes pa 'dis sgrub par khyad par du byas pa nyid kyi phyir ro/ /de nyid kyi phyir srog rdzogs pa'o zhes bshad pa'o/ /'di la zhes pa de ma thag tu brjod pa'i bsnyen pa dang /nye ba'i sgrub pa dag la'o/ /thabs ni rnam pa bzhi zhes pa chung ngu la sogs pa rnam pa bzhi'o zhes pa'i don to/ /de bzhin rnams la dbus su rnam pa gnyis te/ de'i phyir bsnyen pa dang nye ba'i bsnyen pa dag la'o/ /rnam pa bzhi zhes pa chung ngu la sogs pa rnams pa gnyis ni phyi nas sbyar bar bya ste/ sgrub pa dang sgrub pa chen po dag la'o/ /de'i phyir gsungs pa/ bsnyen pa'i yan lag la dang nye ba'i sgrub pa'i yan lag la zhes so/ /dman pa dang brtan pa zhes pa yang brjod ma thag pa'i bsnyen pa dang / nye ba'i sgrub pa dang 'chad par 'gyur ba'i sgrub pa dang / sgrub pa chen po dang 'brel lo//de yang sdeb sbyor gyi dor dang po dang mtha' smos pa'i so sor bsdu bas te/ de'i phyir 'dir 'bring po'i byis pa dang / gzhon nu dag kyang 'dzin par rig par bya'o/ /brtan pa ni dar ma'o/ /rtsa bar de bzhin nyid ces pa sgrub pa chen po'i yan lag la'o zhes pa'i don to//gzhon nu ni dman pa ma yin pa yan lag gsum pa'i ngo bo'o/ /'dis ni bsnyen pa la sogs pa bzhi dang sbyar bar 'gyur ro/ /skyes pa kho na dang bcu drug ces pa la sogs pa'i lus nges par brtan pa btsas pa ni don dper brjod nas ston par byed de 'dir zhes pa la sogs pa'o//dman pa ni skyes pa'i byis pa'o zhes zla ba thig le sdud pas btsas pa'i mtshams ni dman pa zhes bya'o/ /dman pa la sogs pa'i dbye bas thob pa zhes pa dman pa la sogs pa bzhi so sor sa gsum la sbyar ba'o zhes pa'i don to/ rab tu dga' ba la sogs pa ye shes dang ldan pa'i mthar thug pa'i sa bcu gnyis kyi thob pa las bcu gnyis kyi dbang phyug go//de'i phyir bden don rnam pa bcu gnyis zhes pa la sogs pa'i tshigs su bcad pa'i don ni kho bos mtshan yang dag par brjod pa'i brjod byang bdud rtsi'i thigs par bkral zin to zhes pas 'dir rgyas par mi bya'o//da ni 'jig rten las 'das pa'i dngos grub sgrub par byed pa'i lam brjod par bya ste stong pa zhes so/ /stong par du ba la sogs lam ni bla ma'i nges pa'i dbang las te 'chad par 'gyur ba'i rim pa las bsgom par bya'o/ /gzugs brnyan mtshams su ste gzugs brnyan ni rnam pa thams cad pa sna tshogs pa ste de'i mthar thug par sems kyis so zhes pa'o//mtshams de nas rtsa'i 'khor lo rnams su srog gi rlung ni rten pa'ang byed de thur sel gyi rlung yang rnal 'byor pa yis so/ /phyi nas zla ba 'gog pa zhes gza' bzhin te sgra gcan bzhin du'o//zla ba ste byang chub sems so/ /rnal 'byor pa zhes pa srog dang thur sel dag phan tshun du yang dag par sbyor ba ni rnal 'byor te/ de gang la yod pa zhes pa rnal 'byor pa'o/ /byang chub kyi sems 'dzag pa'i skad cig 'gog cing nye bar zhi ba ste/rgyu mthun la sogs pas 'gyur ba med par byed cing de'i phyir rgyu mthun pa dang rnam par smin pa dang skyes bu byed pa dang dri ma med pa nyid do/ /gang cung zad ni brjod par bya ba ma yin pa ste de byed do/ /nyin zhag nyung zad kyis ni lo gsum dang phyogs gsum dus kyi 'khor lo'i nyin zhag rnams kyis te phyag rgya chen po'i dngos grub 'thob po zhes pa'i don to//da ni tshigs su bcad pa drug gis rnal 'byor yan lag drug gsungs pa/ so sor sdud pa zhes pa la sogs pa'o/ /las dang po pa du ba la sogs pa'i mtshan ma bsgom pa ni rgyal ba'i dbang po zhes pa rdo rje sems dpa'o//ral gri can ni don yod grub pa'o/ /'dod pa'i gnas skabs bcu'i dbye ba las zhes pa/ bsam dang 'dod dang lus la rims dang kha mchog pad+ma skam dang zas la rab tu mi 'jug dang / /'dar dang smyo ba rab tu rmongs par gyur dang yid kyi rnam par 'khrul dang drag tu rgyal ba ni//rdo rje can gyi du ba la sogs rab gsal rnam pa bcu ste srog chags lus la 'jig rten du/ /rab gsal nges pa de rnams yid sgrub gnas skabs rnams su zhig rgyal ba'i 'dod pa de ni su/ /zhes pa'o/ /rlung bcu rnams te srog dang / thur sel dang /mnyam gnas dang / gyen rgyu dang / khyab byed dang / klu dang / rus sbal dang / rtsangs pa dang / lhas byin dang / nor las rgyal ba rnams 'gog cing nye bar zhi ba mi 'gyur bar gyur pa'o/ /chags pa dang bral ba'i phyogs med pa'i phyir mi gnas pa'i mya ngan las 'das pa'o//re re dbye ba lnga rnams kyis te slar yang gang las a sogs ka sogs rnams kyis phye ba'o zhes gsal byed sum cu'i bdag nyid ka tsa Ta ta pa sa rnams nam mkha' dang / rlung dang / me dang / chu dang / sa dang / ye shes kyi khams kyi rang bzhin rnams kyis dang / a i r-i u l-i yig dbyangs thung ngu lnga yis phye ba rnams kyis dang /de bzhin du sa la sogs pa'i rang bzhin l-I yig la sogs pa dbyangs ring po lnga yis phye ba rnams kyis te spro ba dang sdud pa'i rim pas so/ /lug dang glang la sogs pa 'pho ba bcu gnyis kyi dbye bas te drug cus lhag pa'i brgya phrag gsum gyi dbugs rnams so//lhor bgrod pa la gsal byed gcig pa dang dbyangs thung ngu'o/ /byang du bgrod pa la gsal byed brtsegs pa dang dbyangs ring po ste nyi ma'o/ /'pho ba na gsal byed gsum brtsegs pa dang shin tu ring po ste sgra gcan no/ /snying stobs dang rdul dang mun pa'i phyi mo'i dbye bas spyod cing dbye bar bya ba'o zhes pa'i don to//mig la sogs pa gzhan rnams kyis zhes pa sha'i la sogs pa rnams kyis so/ /lta ba ni sna tshogs gzugs can la lta pa'o/ /dngos po 'dzin pa ni dngos po la nges par rtogs pa'o/ /de'i ste dngos po'i don nges par byed pa ni stong pa nyid kyi ngo bo nyid du nges par 'dzin pa'o//gzugs la chags pa ni yul bzlog pas yid tsam du nang du phyogs pas lha'i bdag nyid la dmigs bzhin pas bla na med pa'i shes rab dang thabs ro gcig par rnam par dpyod pa las de kho na nyid la 'jug cing mngon du phyogs pas gang yid bde ba nyid de de ni dga' ba ste rangs pa'o zhes pa'i don to//lus shin tu sbyangs pa la sogs pa'i bde ba ni g.yo med bde ba'o/ /dbu ma'i lam du rab tu 'jug pa zhes pa ni nam mkha' la sogs pa dang sa la sogs pa dkyil 'khor bcu 'jig pas brkyang ma dang ro ma dag 'gags pa'i dbu ma'i lam kho nar rab tu 'jug pa dang gnas pa dang 'byung ba'i mtshan nyid can srog gi rlung phra mo 'jug pa ni srog rtsol lo zhes pa'i bar ro//gnyis ka'i bgrod pa bcom pa zhes pa ni lte ba dang / snying ga dang / mgrin pa dang dpral ba dang /gtsug tor rnams su 'gro ba dang 'ong ba dang bral bas 'gro bar byed pa dang bral ba'o zhes byas nas/ rim pas rlung rnams med pa la thig le rnams la ste byang chub kyi sems kyi thig le la sems kyi bzhon pa srog gi rlung stong pa nyid dang ro gcig pa nyid ni 'dzin pa'o zhes gsungs par 'gyur ro//rnam pa bcu ni sngar gsungs zin to zhes pa ni 'dzin pa la rab tu zhugs pa'i sems la rang gi ngang gis du ba la sogs pa'i mtshan ma rnam pa bcu so sor snang ba sngon ma can rdzogs pa'i dkyil 'khor gyi lha mthong ba gzugs brnyan gyi rnam pa can rtog pa med pa dang /de las 'od zer du ma spro ba dang / de nas khams gsum du lha'i 'khor lo spro ba sngon ma can bsam pa la 'dod pa'i gnas skabs bcu ni rjes su dran pa'o zhes smras pa'o/ /srog la sogs pa rnams med pa las zhes pa gtum mo 'bar bas yang dag par gsal bar byas pa nyid kyis rdo rje nor bu'i mgo bo'i rtse mor rab tu gnas pa'i byang chub sems ma nyams pa ste/de nas rim gyi 'khor lo drug rnams su dbugs brgya phrag drug gis lhag pa'i stong phrag nyi shu rtsa gcig 'gags pa nyid kyis rnam par rtog pa med pa'i rnal 'byor mi 'gyur ba'i bde ba chen po'i rang bzhin zung 'jug gi bdag nyid kyi ye shes kyi rang bzhin gyi sku rdo rje 'chang chen po'i ngo bo ni ting nge 'dzin zhes pa'o//so sor sdud pa la sogs pa'i 'bras bu ni yan lag drug gi rjes su bsngags pa'i mtshan nyid do/ /byang chub sems dpar 'gyur ro zhes pa ni skye ba dang byang chub pa dang chos kyi 'khor lo la sogs pa rab tu mi 'jug pa'i phyir te/de rab tu 'jug pas ni sangs rgyas kyi zhing yongs su rdzogs pa'i sangs rgyas su tha snyad bya ba bsten par 'gyur ba kho na'o zhes dgongs pa'o/ /dbang bcu la sogs pa zhes pa tshe dang / las dang mos pa dang /sems dang / yo byad dang / smon lam dang / rdzu 'phrul dang / skye ba dang / ye shes dang / chos la dbang ba la sogs pa'o/ /gzung ba dang 'dzin pa'i sems ni byed pa po'o/ /gzhan du yang rjes su bsngags pa gsungs pa/ so sor sdud pas snyoms 'jug pa/ /sngags rnams kun gyis byin gyis rlob//bsam gtan ye shes snyoms 'jug pas/ /mngon shes lnga ni thob par 'gyur/ /srog gi rtsol bas nges par ni/ /byang chub sems dpa' rnams kyis gzigs/ /rtag tu 'dzin pa'i stobs kyis ni/ /rdo rje sems dpa' mnyam par 'jug /rjes dran mnyam par sbyor ba las//'od kyi dkyil 'khor skye bar 'gyur/ /ting 'dzin dbang gyur tsam gyis ni/ /sgrib pa med pa ldan par 'gyur/ /zhes pa'o/ /dman pa nyid kyis g.yon pa dang g.yas par 'bab pa bar ma chad pa'i phyir srog ma bsdams pa nyid kyis so/ /nA da goms pa las ye shes lhan cig skyes pa'i dga' ba goms pa las so//stobs kyis te hUM yig gi nA das shes rab kyi chu skyes dang rdo rje nor bur byang chub kyi sems kyi thig le 'gog pa las te/ ji skad bshad pa'i 'dod ma mchog rjes su chags pa can gyi kak+kol ru cho ga bzhin du bo la bcug nas g.yo ba med pa nyid kyis dal bso ste/de'i ze 'bru'i sgo ru rdo rje nor bu btsir nas shin tu dga' ba'i ro yis skad cig g.yo ba med par bya'o/ /de nas de dag gis 'gyur ba'i skabs byung na hUM yig brjod pa sngon du 'gro bar bla ma'i zhabs kyi bka' drin gyis byas pa la mngon du phyogs shing zhi ba lhan cig skyes pa'i dga' ba nyams su myong bas byang chub kyi sems kyi thig le 'gog pa ste/de nas 'gyur ba med pa'i skad cig 'thob pa'o zhes pa'i don to/ /dpal dus kyi 'khor lo 'di nyid du 'brel pa can du gang zhes pa la sogs pa ste/nus ma ni srog gi nus pa'o/ /gzhan gyi gnas su 'gro ste/ dmigs pa med pa'i gnas su'o/ /bcu gnyis mtha' zhes pa sna bug g.yon pa nam mkha' la sogs pa sa'i dkyil 'khor gyi mthar thug par sor bcu drug la sogs par sor bcu gnyis kyi mthar thug par ro//cha'i mtha' zhes pa sna bug g.yas par sa'i dkyil 'khor la sogs pa nam mkha'i dkyil 'khor gyi mthar thug pa sor bcu gnyis la sogs pa sor bcu drug gi bar du'o/ /hUM yig gi brjod pas srog dang thur sel gyi rlung dag sbyor ba las de lte bar bkag nas srog gi nus pa de nyid ni glog gi me dang mtshungs shing glog gi me dang 'dra ba'o//bskyod pa ni bsgul ba'o/ /khab bzhin ni khab dang 'dra ba'o/ /thur du sel ba zhes pa 'gro ste rab tu 'jug go/ /pha rol gyi grong du ste lus gzhan du'o//ci ste 'di tsam gyis kyang gzhan gyi grong du 'jug pa ma yin na cir 'gyur zhe na/ de'i tshe 'di ltar bya'o zhes gsungs pa/ 'di ltar te rim pa 'di yis rdo rje rab tu sad pa las te mchog tu bde ba'i ye shes rab tu sad pa las so/ /yid la zhes pa gzung ba dang 'dzin pa'i sems gcig tu 'dres par gyur ba'i sems la'o//yul dang bcas pa ni dbang po dang yul gcig tu 'dres par gyur pa nus pa de'o/ /mkha' la spyod pa nyid ni 'og min gyi sa'i mthar thug pa la dbang byed pa'i bdag po nyid du 'gro'o/ /'ba' zhig tu ma zad de zhes gsungs pa/mngon shes zhes pa la sogs pa ste/ rdzu 'phrul dang lha'i mig dang / lha'i rna ba dang / gzhan gyi sems shes pa dang sngon gyi gnas rjes su dran pa'i rang bzhin ni mngon shes lnga'i rang bzhin no/ /sna tshogs yul du yang 'gyur te phyag rgya chen mor shes rab gyi chags pas rnam par rtog pa med pa'i gtum mo 'bar bas 'gyur med gsum gyi rnal 'byor zhes pa gsang bar son pa sems kyi thig le 'gags pa dang /lte bar son pa ngag gi thig le 'gags pa dang / /snying gar son pa lus kyi thig le 'gags pa zhes pa'o//bde ba ma nyams pas rdo rje'i sgor thig le'i tshogs ma 'phos pas ye shes kyi thig le 'gags pas ye shes kyi rnal 'byor ro/ /zung gi rlung gis ngag 'gags pa 'di ni zhes pa'i mthar thug pas sa la spyod pa'i dngos grub gsal bar mdzad cing mkha' la spyod pa nyid du 'gyur zhes pa'i mthar thug pas mkha' la spyod pa'i dngos grub rtogs par mdzad la/sna tshogs yum zhes pa'i bar gyis phyag rgya chen po'i dngos grub gsal bar mdzad do zhes pa'o/ /phyag rgya zhes pa ni phyag rgya chen mo'o/ /sgyu ma'i rjes su mthun pa ni shin tu dang ba'i me long gi gzugs brnyan lta bu'o//yid dang nam mkha' la yang ni sems med pa'i sems la'o/ /de nyid kyi phyir gsungs pa/ me long la ni gzugs bzhin zhes pa ste/ gzugs bzhin ni gzugs dang 'dra bar 'phro ba'o/ /phyi dang lus la dbyer med pa yul dang dbang po dag gcig tu 'dres par gyur pa'o//chos can dang tha dad par chos snang ba'i ngo bo nyid kyi phyir yul dang rnam par bral ba'o/ /du ma'i ngo bo 'gro ba'i sems la 'khyud bar byed de de gcig pu spang ngo / /de nyid kyi phyir sems kyi rang bzhin te sems med pa'i sems kyi rang bzhin no/ /sems kyi ste gzung ba dang 'dzin pa dag gcig tu 'dres par gyur ba'i snang ba tsam rang gi lus la snang brnyan gyi ngo bo mchog gi phyag rgya'o//rang gi yid la ste rnam pa thams cad pa rnam pa med pa'i ngo bo las skyes pa ste byung ba'o/ /de ni ye shes me lce 'bar ba ste ye shes kyi gtum mo 'bar ba 'phel ba'o//yul dang bcas pa ste phung po dang khams dang skye mched kyi 'khor lo dang bcas pa'i bdud tshogs te rnam par rtog pa'i sems kyi dra ba'o/ /gsungs pa yang bdud ni rang gi sems te bdud gzhan yod pa ma yin zhes so/ /ster zhing stsol te zhi ba'i bde ba ni lhan cig skyes pa'i dga' ba'i bde ba'o//lo'i sbyor ba las te lo gsum dang phyogs gsum gyi dus kyi 'khor lo yis so zhes pa'i don to/ /shes rab dang ni ye shes zhes pa grangs ji lta ba bzhin te/ shes rab ni chos thams cad stong pa nyid du rtogs pa ste de ni sems so/ /de'i du ba la sogs pa'i kun nas mthong ba'i snang ba ni gzung bya'i sems te de kho na'i ye shes so//'dis ni ji ltar me long la gzugs brnyan rang gis te bdag nyid kyi mig gis gzung bar bya ba de ltar stong pa nyid kyi rang bzhin gyi sems kyis stong pa nyid kyi rang bzhin rnam pa thams cad pa'i sems rtag tu mthong ba'o zhes pa'i don to//gzung ba'i sems du ba la sogs pa'i mtshan nyid can 'di la 'dzin pa'i sems stong pa nyid zhugs shing gcig tu 'dres par gyur pa'o/ /rjes su dran pa gsungs pa/ dri med ces pa'o/ /byis pa dang dar la bab pa dang g.yo ba rnams kyi zhes pa thabs kyi gyur ba'i bde ba rnam pa gnyis te byis pa dar la bab pa'o//shes rab kyi g.yo ba ni bde ba rgan po'o/ /de rnams kyi mchog ni 'jig rten las 'das pa'o/ /shes rab dang thabs de dag gang gi tshe g.yo ba med par 'gyur ba de zhi ba ste mchog gi phyag rgya las byung ba zhes pa'o//rdo rje 'dzin pa ni rdo rje 'dzin pa'i sprul pa'i sku'o zhes pa'i don to/ /de ni rang gi sems 'di'i snang ba la ste/ me long gi gzugs brnyan dang mtshungs pa'i sems kyi snang ba la gzhug pa brjod par bya ste/ nam mkhar zhes pa la sogs pa'o/ /mtshan mo zhes pa mun pa nye bar mtshon pa'o//nam mkhar kun nas zhen pa'i sems ni gang rnams kyi sems nam mkha' la kun nas chags pa ste/ de dang ro mnyam par gyur pa yin pa de rnams kyis so/ /rdo rje'i lam du zhugs pas ni srog a wa d+hU tIr son pa nyid kyi phyir ro/ /nam mkha' sprin med pa'i mtshan ma ni gzhi can gyi ngo bo'i phyir ro//de ltar gzugs snang ba las zhes pa me long gi gzugs brnyan lta bu rnyog pa med cing thogs pa med pa'i gzugs so sor snang ba las so/ /sgra snang ba las zhes pas mgrin pa dang rkan la sogs pa'i rtsol ba las ma skyes pa'i bde ba chen po rol pa gzhom du med pa'i skra tsam nyams su myong ba las so//'di tsam gyis ni tshigs su bcad pa 'dis bcom ldan 'das dpal rdo rje 'dzin pa'i sku gnyis gsal bar byas par 'gyur ro/ /nam mkha' zhes pa la rengs pa'i mig gis mig g.yo ba med pas so/ /gzhan gyi sems shes pa med pa'i phyir te rang gi sems las tha dad pa'i gzhan gyi sems shes par bya ba med pa'i phyir ro//gsungs pa yang / /ma skyes pa dang ma 'gags pa'i/ /shes bya gang zhig 'dir mthong ba/ /de ni rang sems gzhan gyi min/ /phyi yi shes bya rnam 'byed phyir/ /de phyir bdag gis bdag nyid la//'gar yang rgyas gdab nus ma yin/ /ral gri chen pos bdag nyid la/ /bdag nyid so yis gcod dam ci/ /mo gsham bu mo dang 'grogs pas/ /rmi lam du ni bde 'gyur ltar/ /nam mkha' las byung gzugs brnyan ni/ /bsten pas bdag la de bzhin no/ / zhes so/ /tshigs su bcad pa 'dis chos kyi sku'i sgrub par byed pa gsungs par 'gyur ro/ /sa'i rnam pa zhes pa la sogs pa gzugs kyi mtshan nyid de/ 'dir stong pa nyid kyi so sor snang ba rdzas ma yin pa sa la sogs pa la mthong ste sra ba me yin no/ /zhu ba'i rnam pa can smig rgyu'i chu lta bu ni chu ma yin te gsher pa med pa'i phyir ro//me'i rnam pa ni de bzhin du me min te gang gi phyir sreg par byed pa med pas so/ /g.yo ba rlung gi lus ni rdzas med pa nyid kyi phyir gang g.yo ba med pa de ni rlung ma yin no/ /rdzas med pa nyid kyi phyir stong pa'i rnam pa ste/ de yin yang blta bar bya'o//sgyu ma'i grong khyer bzhin du dkar po la sogs pa'i kha dog dang ldan yang rdzas med pa'i phyir kha dog ma yin no/ /rnam pa thams cad pa yin yang dus thams cad du byis pa rnams kyis blta bya min no/ /de ci'i phyir zhe na/ nyon mongs bdud kyi mthu las te g.yon pa dang g.yas pa'i rtsa la srog rab tu rgyu ba las so zhes pa nges pa'o//da ni dkyil 'khor lnga zad pa gsungs pa/ sa zhes pa la sogs pas so/ /'dir gang gi tshe rnal 'byor pa mig mi 'dzums par gyur cing / khro bo'i lta bas stong pa la sems bkod pa de'i tshe g.yon nam g.yas su sa zhes pa nye bar mtshon pa ste gang tshe g.yas su rab tu 'bab pa'i dus su rnal 'byor pa sgom par byed na de'i tshe rnam pa 'di lta ste/g.yon pa'i rtsa la rab tu 'bab pa'i dus su ni ma yin te/ 'on kyang nam mkha'i dkyil 'khor la sogs pa'i rim pa las so/ / des na g.yon nam g.yas su srog gi dkyil 'khor gang 'bab pa de'i chos can nyid kyi phyir dkyil 'khor de nyid gsungs so/ /des na g.yas pa'i rtsa la sa'i dkyil 'khor las srog chu'i dkyil 'khor la 'gro ste/ de bzhin du ye shes kyi dkyil 'khor gyi bar du'o/ /rtsa g.yon pa la nam mkha' la sogs pas 'gro'o//de bzhin du stong pa nges par du ba la sogs pa'i mtshan ma rnam pa bcu ru 'gyur zhing mtshan ma ni rnam pa thams cad pa'i gzugs su 'gyur ro/ /gzugs las mi 'gyur bde bar 'gyur zhing de nyid ye shes te shes rab kyi pha rol tu phyin pa'i rang bzhin no/ /ye shes las rdzu 'phrul te nam mkha' la 'gro ba la sogs pa dang dngos grub khams gsum pa'i dbang phyug nyid du 'gyur ro//mi bdag skyes bu rnams kyi skye ba 'di nyid la'o zhes pa lam la rab tu 'jug pa'i nges pa'o/ /da ni rnal 'byor nye bar bsdu ba brjod par bya ste/ dbu mar srog ni zhes pa la sogs pas so//'dir dang po'i rnal 'byor pas dbu mar srog rab tu 'jug par bya ste gang gis mtshan ma mthong bar byed pa a wa d+hU tIr ro/ /de ltar dpal ldan bla ma'i ste sangs rgyas kyi sku rdo rje ste zhal gcig tu brjod par bya'o/ /de nas nyi ma dang bcas te g.yas pa'i bgrod pa dang lhan cig tu ri bong can gyi bgrod pa g.yon pa'i rtsa'i srog bcing ba'o zhes pa nges pa ste/srog rtsol gnyis ni gsung rdo rje'o/ /phyag rgya rab tu 'grogs la sems te gzugs la rjes su chags pa'i byang chub kyi sems dang mchog gi bde ba la gnas rdo rje yang dag bslang ba yang gsum pa thugs kyi rdo rje'o//ci sta gzugs kyi sgo nas kun dga'i bde bar ma gyur na de'i tshe pad+mar rdo rje'i sgra'am zhes pa dal bu rnams kyis bya'o/ /ci ste bud med ma rnyed na de'i tshe rang gi lag pa'i pad+mas gsor bar bya ste/ bde ba 'phel ba'i rgyu ru yin gyi ltung ba'i rgyur ni ma yin no//de ltar sa bon gtong ba min pa'i bde ba de ni 'chi ba'i 'jigs 'phrog tu 'gyur te/ dpal ldan bla ma'i zhal bzhi pa ye shes rdo rje 'di'o zhes pa rnal 'byor goms par byed pa'i nges pa'o/ /mchog gi dang po'i sangs rgyas stong phrag bcu gnyis par te gang las dbang mdor bstan pa phyung ba'o//'di nyid kyi ni zhes pa nyon mongs pa dang shes bya'i sgrib pa'i bud shing ma lus pa'i me thams cad mkhyen pa'i ye shes kyis sgrub byed de gsal bar 'gyur ba du ba la sogs pa rnams kyis rnal 'byor pas bya'o/ /cir gyur pa rnams kyis she na/ de rnams kyi ste rtsa ba'i rgyud dang nyung ngu'i rgyud dang 'phags pa shes rab kyi pha rol tu phyin pa la sogs pa nges pa'i don gyi mdo ru rab tu grags pa rnams kyis so//glo bur du stong pa la so sor snang ba'i phyir gzugs brnyan rnams kyis so/ /rnam par rtog pa thams cad zhi ba'i phyir bsam pa ma yin pa rnams kyis so//de kho na nyid kyi 'bras bu'i snga ltas nyid kyi phyir mtshan ma rnams kyis so/ /gzung ba dang 'dzin pa dang bral ba rang bzhin stong pa nyid kyi blo ni shes rab ste de'i gzugs brnyan rnal 'byor pa la mngon sum du snang ba rnams kyis so/ /phyi dang nang gi dri mas ma gos pa nyid kyi phyir mkha' mnyam rnams kyis so//yod ces pa la sogs pa rnams yod pa dang med pa la sogs pa'i skyon gyi rnam par rtog pa'i rnyog pas mtshan ma med pa nyid kyi phyir rnam par 'das pa'o/ /rnam par rnal 'byor pas rang rig par bya ba nyid kyi phyir rang gi sems kyi yid ches par byed pa'i don rnams kyis so//rnam pa thams cad du ma byas pa/ rmad du byung ba rang bzhin med pa'i ngo bo nyid kyi phyir rdul phran las skyes tshogs pa rnams kun nas yongs su dor bas so/ /du ba zhes pa la sogs pa la phyi dang nang thams cad du khyab pa du ba'i rnam pa can stong pa'i rnam pa ste/'di yang sprin lta bur snang ba'i bar ma chod du 'byung ngo / /ji skad du gsungs pa/ dang po sprin dang 'dra bar snang / /gnyis pa du ba lta bu'o/ /zhes so/ /chu g.yo ba'i rnam pa ni smig rgyu'o/ /mkha' snang dang sgron ma'i rnam pa dag ni rab tu grags so/ / mtshan ma bzhi po 'di dag ni bug pa med pa'i khang par mun pa las 'byung ba nyid kyi phyir mtshan mo'i rnal 'byor dang nam mkha'i rnal 'byor ro/ /ji skad du dpal gsang ba 'dus pa la sogs par dang po dang gnyis pa bzlog nas gsungs pa/ 'gog pa rdo rje bgrod sems las//mtshan ma rab 'dzin skye 'gyur te/ /mtshan ma de ni rnam pa lngar/ /byang chub rdo rjes gsungs pa yin/ /dang po smig rgyu'i rnam pa ste/ /gnyis pa du ba lta bu yin/ /gsum pa mkha' snang rnam pa ste/ /bzhi pa sgron ma 'bar ba'o/ /lnga pa rtag tu snang ba ni//sprin med nam mkha' lta bu'o/ /zhes so/ /de nas sprin med pa'i nam mkha' snang ba sngon ma can me'i rnam pa stongs pa'i snang ba ni 'bar ba'o/ /zla ba dang nyi ma'i snang ba dag ni rab tu grags so/ /mun can ni sgra gcan gyi snang ba ste ri mo dag pa ltar snang ba'o/ /thig le che zhes pa rgyu ba dang bcas pa'i mi rgyu ba gsal bar byed pa sngon po zla ba'i dkyil 'khor gyi dbyibs su snang ba'o//mtshan ma drug po 'di rnams ni sprin med pa'i nam mkha' la lta ba la 'byung ba'i phyir nyin mo'i rnal 'byor dang / bla ga ba med pa'i rnal 'byor ro/ /de nas de'i dbus su son pa mtshan ma med pa'i longs spyod rdzogs pa'i sku'i bdag nyid sangs rgyas kyi gzugs mthong ba//sngon ma can skad cig gcig la lag mthil du gnas pa'i chu ltar shin tu dang ba/ rnam pa thams cad pa bum pa dang snam bu la sogs pa mthong ba ni sna tshogs gzugs brnyan 'od gsal ba'o//btsums pa zhes pa la sogs pa ste/ btsums shing ma btsums mig gis ni bar snang la dmigs pa nyid kyis mig phyed btsums pa dag gis stong pa la gzung 'dzin dang bral ba 'di ni rjes brtags min par rnal 'byor pa'i mngon sum du'o/ / gzugs de du ba la sogs bsgom par bya ste rang gis nyams su myong bar bya'o/ /rnal 'byor gnyis ka dag kyang dpal dang po'i sangs rgyas kyi rgyud du gsungs te/ nam mkha' kun nas zhen pa'i zhes pa la sogs pa'o/ /shes rab kyi pha rol tu phyin par yang gsungs pa/rin chen snang ba zhes bya ba'i ting nge 'dzin dang / rin chen sgron ma zhes bya ba'i ting nge 'dzin dang / zla ba snang ba zhes bya ba'i ting nge 'dzin dang / nyi ma sgron ma zhes bya ba nas ji srid du rnam pa thams cad mthong ba zhes bya ba'i ting nge 'dzin no zhes pa la sogs pa'o/ de'i phyir the tshom med pas sangs rgyas nyid don du gnyer bas du ba la sogs pa'i lam bsgom par bya'o//'o na phyag rgya chen po'i rnam par rtog pa'i rnyog pa mtha' dag gis mtshon pa med pa yin zhing / sgom pa yang sgro btags pa yin na bsgom par bya ba zhes brjod pa ji ltar yin zhe na/gsungs pa/ dngos med ces pa la sogs pa'o/ /man ngag ji lta ba bzhin du phyi dang nang gi dngos med kho na sgom pa/ gang gzugs brnyan la rnal 'byor pa rnams kyi sgom pa de ni dngos po med pa nyid kyi phyir sgom pa ma yin no/ /'o na dngos po dang dngos po med par sgom pa dag rnam par rtog par khyad par med pa nyid kyi phyir ci ltar dngos po med pa sgom pa yin zhe na/gsungs pa/ dngos po zhes pa'o/ /gang gi phyir rnal 'byor pa'i stong pa nyid kyi gzugs la dngos po dang dngos po med pa'i rnam par rtog pa dag med de/ ci'i phyir zhe na/stong pa nyid kyi gzugs la ma brtags pa'i du ba la sogs pa mngon sum mthong ba'i phyir ro/ /dgongs pa ni 'di yin te/ gal te brtags par gyur na de'i tshe dngos por 'gyur te/ bum pa dang snam bu la sogs pa bzhin no/ /gal te mthong ba ma yin par gyur na de'i tshe dngos po med par 'gyur te/mo gsham gyi bu la sogs pa bzhin no/ /'dir ni rnam par ma brtags par mngon sum du mthong ba'i phyir thams cad legs par gnas so/ /rnam par ma brtags pa mthong ba grub pa'i don du rjes su mthun pa'i dpe gsungs te/pra pha ba ces pa la sogs pa'o/ /pra phab pa ni sgrub pa pos bsam pa me long dang ral gri dang mthe bo dang / mar me dang / zla ba dang / nyi ma dang / chu dang / thab dang / mig gi yul can dngos por skyes pa min pa chom rkun la sogs pa bems po'i chos su skyes pa ma yin pa'o//rnam par ma brtags pa mthong ba 'di la dngos po dang dngos po med pa dag med de/ dngos po med pa'i don bya ba dang 'bras bu nyid tsam nye bar dmigs pa'i phyir ro/ /'jig rten pa kho na la yang dngos po med pa'i don yang sgyu ma dang rmi lam dang mig 'phrul la sogs pa la mthong ngo //de nyid kyi phyir gsungs pa/ med pa'i zhes pa la sogs pa'o/ /rnam par rtog pa med pa'i ye shes skye ba de yang rnam pa thams cad pa'i 'gro ba'i don phun sum tshogs par byed pa nyid kyi phyir yid bzhin gyi nor bu lta bu'o/ /dpe 'grub pa gsungs pa/ma mthong ba'i zhes so/ /sngon ma mthong ba kho na'i chom rkun la sogs pa gnas 'dir sngags kyi byin gyis brlabs pa'i mig gis gzhon nu mas mthong ste pra phab par gyur pa na'o/ /sgrub pa po pra da bab pa la 'jug pa po rnams kyis ni de dang der gnas gzhon nu mas smras pa nyi tshe ba'i mig gis te sgrib pa dang bcas pa'i mig dag gis mthong ngo //bsam pa ni 'di yin te rnal 'byor pa grub pa'i man ngag gi sngags kyi byin gyis brlabs pa'i blo mig can byang chub kyi sems zla ba ma nyams pas gzhon nu ma bzhin du nye bar ma bstan pa so so skye bo'i rtogs bya ma yin pa/'jig rten las 'das pa'i de kho na nyid kyi nam mkha' la mthong ngo / /de yang spros pa thams cad spangs pa'o zhes gsungs pa/ gzhan gyi mig gis gzhan gyi dus su ma mthong phyir dang / rang gi mig dag gis mun pa dang ras kyis bkag pa nyid kyi phyir ro//pra phab pa'i dpe 'dis rnal 'byor pa'i mngon sum rnam pa thams cad du rang bzhin med pa'i phyir skyes pa med pa'i rmi lam du gzhon nu ma'i bu dmigs pa bzhin du thams cad mkhyen pa'i ye shes grub bo/ /gsungs pa yang / ji ltar rmi lam na 'dir gzhon nu ma//de yis bu dang skye dang 'chi ba mthong / /skye zhes rga dang shin yid mi bde/ /de bzhin chos rnams thams cad dpes shes bya/ /zhes so/ /da ni bde mchog gi rgyud la sogs pa'i rim pas yan lag drug gi rnal 'byor gyi rim pa gsungs pa/ rnal 'byor pa nyid ces pa la sogs pa'o//nyung ngu'i rgyud du gsungs pa yang / /rnal 'byor pa nyid bsod nams mchog /dag byed sdig pa 'jig byed pa/ /sngags bzlas pa dang bsam gtan dang / /bde ba yis kyang 'grub par 'gyur/ /zhes so/ /sngags bzlas pa la sogs pa 'dis dbus ma rim pa ma yin pa zhes pas sngags bzlas pa las sngon du bsam gtan gyi tshig bklag par bya'o zhes pa'i don to//ma brjod pa'i yan lag so sor sdud pa dang / srog rtsol dang / rjes su dran pa gsum mo/ /'di zhes pa nyi ma'o/ /gzhan zhes pa zla ba'o/ /'dir zhes pa nyung ngu'i rgyud du'o//rgyud gzhan du gsungs pas te dpal 'dus pa'i rgyud du gsungs pa rnams kyis rtogs par bya'o zhes pa 'phags pa phyag na rdo rje'i zhabs kyis gsungs so/ /dpal 'dus pa phyi mar ni le'u bco brgyad par ro/ /ma ning gi bzlas pa ni a wa d+hU tI'i de kho na nyid du srog so sor rtog pa'o//rdo rje'i bzlas pa ni don dam pa'i bzlas pa'o/ /gyen du sna'i rtse mor srog gi rtsol pa'i brtag pa ste sgom pa rab kyi mthar phyin pa ni srog gi rtsol ba 'gog pa'o/ /lte ba las gyen du 'gro zhes ji ltar 'dod par gsal bar bya ste/ phyir 'byung ba mi dmigs pa'i mthar thug par ro//sna las phyir 'byung ba'i dbugs med par bsam par bya'o/ /de bzhin kho nar gzhan la mi dmigs pa srid pa ste ji ltar 'dod par sgra yis rtogs pa'o/ /gzhan ni sbas pa'i man ngag go/ /de bzhin zhes pa'o/ /sngags bzlas pas zhes pa la so sor sdud pa ni/oM yig la sogs pa brjod pa de'i ming can gyis so/ /lha'i mig gi rnam par shes pa la sogs pa rnams kyi sogs pa'i sgras lha'i rna ba'i rnam par shes pa la sogs pa bsdu'o/ /dbugs 'jug pa ni rab tu 'jug pa'i mtshan nyid can no//'gog pa ni brtan par gyur pa'o/ /dbugs 'byung ba na phyir 'byung ba'i ngo bo ste don 'di ni rang gi nyams su myong bas grub pa'o/ /nges pa'i don ni phyag na rdo rje'i zhabs la sogs pa byang chub sems dpa' chen pos yang dag par bzhed pa ste log par rtogs pa'i yul ma yin no//gzhan du rnam pa gzhan pa ni dgos pa gzhan gyi dbang gis so/ /rang gi 'dod pa'i lha mthong ba ni rnam par rtog pa med pa'i gtum mo mngon sum du byed pa'o/ /dgongs pa'i skad gzhan gyi zhes pa/ /khyad 'phags 'dod pa'i sems can la/ /'gal ba brjod pa'i tshul gyis ni//chos kyi de nyid rab gsal byed/ /gang de dgongs pa'i ched du gsungs pa'o/ /zhes bshad pa'i mtshan nyid can gyis so/ /gang gi phyir rgyud ni mtha' drug pa'i mtshan nyid can du gsungs te/ de skad du yang dpal 'dus par/ /dgongs pa'i skad dang skad min dang / /drang ba'i don dang nges don dang //ji bzhin sgra dang sgra bzhin min/ /mtha' drug ces par bsgrags pa yin/ /khyad 'phags 'dod pa'i sems can la/ /'gal ba brjod pa'i sbyor ba yis/ /chos kyi de nyid gsal byed pa/ /gang de dgongs pas gsungs pa'o/ /dbang po rtul po'i sems can rnams/ /rtogs pa'i don du cher gsal ba//dgongs pa min par yang dag bshad/ /dkyil 'khor la sogs rtogs pa dang / /spyod pa ji lta ji lta bar/ /rgyas pa'i don ni rjod byed pa/ /de ni ji bzhin sgra ru bshad/ /ko TA k+Sha la sogs pa'i sgra/ /'jig rten bstan bcos phyi rol byas/ /de bzhin gshegs pas brdar byas pa/ /de ni ji bzhin sgra min bsgrags//sbas te de nyid gsungs pa ni/ /rgyal bas drang ba'i don du gsungs/ /yang dag don ni gsal ched du/ /nges pa'i don yang bshad pa yin/ /zhes so/ /gtsug tor gyi gzugs ni sangs rgyas [(]gyi [,]kyi [)]gzugs so/ /khams gsum pa zhes pa ni thig le chen po'i dbus su ri mo nag po la so sor snang ba rnam pa sna tshogs kyi longs spyod rdzogs pa'i sku'i bdag nyid 'jig rten gsum mthong ba'o//bsam pa thams cad ces pa gang cung zad rtog pas sems par byed pa'o/ /rten med pa ni dmigs pa med pa'o/ /smig rgyu ni mtshan ma gnyis pa'o zhes pa rgyud gzhan du/dang por smig rgyu lta bu ste/ /zhes pa lugs las bzlog pa rtogs par bya'o zhes pa'i bar ro/ /'di yang bla ma dam pas nye bar bstan pa las dang / byang chub sems dpas mdzad pa'i rgya cher 'grel las dang / rang gi nyams su myong ba las kyang rnam par shes par bya ste/ shes rab dang thabs kyi dbye bas so//gtso bor khams lnga rnam par dag pa'i ngo bo mtshan ma lnga rnams dpal gsang ba 'dus pa la sogs par rab tu rtogs par mdzad de/ nam mkha'i khams kyang der gsungs pa nyid kyi phyir ro/ /le'u bco brgyad par gsungs pa yang / chu dang me dang rlung dang sa/ /nam mkha' de rnams thams cad ni//byang chub sems dpa' dang 'dra bar/ /rnam par dmigs bzhin pa yin no/ /zhes so/ /sa chu la thim pa las smig rgyu'i rnam pa'o/ /chu me la thim pa las du ba'i rnam pa'o/ /me rlung la thim pa las mkha' snang gi rnam pa'o/ /phra mo'i khams kyi snang ba gsum nam mkha' la sgron ma dang 'dra par snang ba'i phung po'i chos nyid kyi phyir sgron ma'i rnam pa'o//rang bzhin gyi snang ba nub pa las sprin med pa'i nam mkha' dang 'dra ba rtag tu snang ba'i ngo bo nyid ni sprin med pa'i nam mkha' dang mtshungs pa'o zhes pa'i mtshan ma lnga rnams so/ /gsungs pa yang / dang pos ni chu la 'gro/ /chu ni gtsang byed rlung la rjes su 'gro//rnam par shes la rlung 'jug byed/ /rnam shes 'dzin pa'i yan lag nyid/ /de nas 'od gsal ba la 'jug /ces so/ /sgyu 'phrul dra bar nyin mo'i rnal 'byor gyis phung po drug rnam par dag pa'i ngo bo'i mtshan ma drug rnams nam mkha' las byung zhes pa la sogs pas gsungs so//dpal ldan dang po'i sangs rgyas rgyud kyi lhag pa'i rgyal po ru ni yul dang dbang po shes rab dang thabs rnam par dag pa'i ngo bo'i mtshan ma bcu rnams gtso bor rtogs par mdzad do/ /byed pa 'di rnams kyis zhes pa lha'i mig la sogs pa rnams kyis so sor sdud pa'i yan lag thob pa rnams kyis so//bcing pa'i sbyor bas ni srog 'ching ba'i rgyud nyid kyi phyir srog rtsol gyi ngo bo rnams kyis so/ /de nyid ni so sor sdud pa'i zhes dgongs pa ste rtog pa dang bral zhing ma 'khrul pa'i mngon sum nyid kyi phyir ro/ /gsungs pa yang / dbang po bcu po rnams kyi ni/ /rang gi 'jug gnas thams cad nas//'dod pa phyi phyir sdud pa ni/ /so sor sdud pa zhes brjod do/ /zhes so/ /'di'i so sor rgyas par bshad pa ni dbang po rnams dang dbang po'i don rnams kyang ste/ de rnams kyi rang gi 'jug pa ni rang nyid ji lta bar gzung ba dang 'dzin pa'i ngo bos 'jug pa ste/ der gnas pa ni rang 'jug gnas so//thams cad nas ni dman pa dang bar ma dang mchog gi dbye bas so/ /'dod pa phyi phyir sdud pa ni 'dod par bya zhing mngon par 'dod par bya'o zhes pa 'dod pa rnams te gzugs la sogs pa rnams so/ /de rnams dbang po rnams kyis gang du sdud pa ni 'dzin pa'o/ /phyi phyir ni yang dang yang du'o//de so sor sdud pa'o zhes pa yan lag dang po'i so sor rgyas par bshad pa'o/ /so sor sdud pa brjod pa'i mtshan nyid can gyi gang mthong ba gsal bar byas pa de ni dngos po ma yin zhing dngos po med pa ma yin la/ brtags pa'i ngo bo ma yin te ci'i phyir zhe na/ rnam par rtog pa med pa'i sems rtse gcig pa nyid la ma brtags par 'das pa dang ma 'ongs pa dang da ltar byung ba'i dngos po mthong ba'i phyir ro zhes pa bsam gtan gyi yan lag go//gsungs pa yang / /'dod pa lnga rnams bsdus pa yis/ /sangs rgyas lnga dang rab sbyor las/ /rtog byed bsam gtan zhes brjod de/ /bsam gtan de ni rnam lngar 'gyur//rtog pa dang ni dpyod pa dang / /dga' ba nyid dang de bzhin bde/ /sems rtse gcig pa nyid dang lnga/ /de rnams bsam gtan bsdus pa'o/ /gsang ba gsum ni rtog pa ste/ /de la longs spyod dpyod pa'o/ /dga' ba 'dra ba gsum pa ste/ /bde ba bsdus pa bzhi pa'o/ /shes pa shes bya la 'byung zad//rang sems lnga par shes par bya/ /sangs rgyas kun gyi rang bzhin no/ /rnam pa thams cad so sor gnas/ /zhes so/ /so sor sdud pa rnam par sbyang ba'i ched du yan lag gnyis pa so sor rgyas par bshad de/ /'dod pa lnga ni gzugs la sogs pa dbang po rnams kyi yul du gyur pa rnams so/ / bsdus pa yis ni dbang po rnams dang gcig tu gyur pas so/ /bsam gtan lnga ni mig la sogs pa rnams te/ de rnams kyi sbyor ba ni bskul ba ste sangs rgyas lnga'i rab sbyor las so/ /de'i phyir gzugs la sogs pa rnams kyang sangs rgyas lnga rnams so zhes pa'i rnam pa 'di ltar gang yongs su rtog pa des bsam gtan no//de yang rtog pa la sogs pa'i dbye bas rnam pa lngar 'gyur te/ rtog pa la sogs pas rab tu dbye ba bshad de/ /gsang ba gsum zhes pa la sogs pa la dbang po dang yul dang rnam par shes pa rnams ni gsang ba gsum mo/ /dbang po lnga rnams dang dbang po rnam par shes pa rnams dang de'i yul rnams kyang de bzhin gshegs pa lnga'i bdag nyid rnams so zhes gang yongs su shes pa de ni rtog pa'o//de nyid la gang rnam par dpyod par byed cing de kho na nyid la 'jug pa la mngon du phyogs pas gang yid bde ba nyid kyi mtshan nyid can de'i dga' ba dang 'dra ba'o/ /de kho na nyid la mngon par zhugs pas lus shin tu sbyangs pa la sogs pa'i mtshan nyid thob pa'i bde ba gang yin pa de ni bde ba sdud pa'o//de ltar goms pa las rab kyi mthar thug par 'gro ba'i phyir shes pa yi ste mig la sogs pa'i 'jug pa'i rnam par shes pa drug gi shes bya la ste/ gzugs la sogs pa chos kyi khams kyi mthar thug pa la 'byung ba ni shes pa shes bya las 'byung ste/de zad pa ni sems kyi gzung ba dang 'dzin pa ste stong pa nyid yongs su shes pa'i mtshan nyid can sems rtse gcig pa nyid ni rang gi sems zhes brjod do/ /rnam pa de lta bu'i sems de ni sangs rgyas kun gyi rang bzhin zhi ba ste/ snang ba tsam thams cad stong pa nyid du gcig pa'i mthar thug pa skye'o zhes pa yan lag gnyis pa'i rab tu dbye ba rnam pa lnga'o//nam mkha' la mtshan mo'i rnal 'byor gyis te bla gab med pa la zhes pa nyin mo'i rnal 'byor gyis so/ /bdud rtsi 'khyil pa'i gzugs brnyan gyi ming can zhes pa la sogs pas yan lag gsum pa srog rtsol brjod par bya'o//gsungs pa yang / rin chen chen po kha dog lnga/ /srog gi rtsa ba zhes par bshad/ /rang sngags snying gar bsams nas ni/ /srog ni thig ler son par dgod/ /ces so/ /'di'i rgyas par bstan pa brjod par bya ste/ kha dog lnga ni de bzhin gshegs pa lnga'i bdag nyid do//de nyid kyi phyir rin chen chen po'o/ /srog ni 'tsho ba ste/ rtsol bar byed cing gang gis ring por rgyas par byed pa de ni srog rtsol lo zhes par bshad de 'dod do/ /de kho na 'jug pa la sogs pa'i rang bzhin gyis nyin mtshan du goms par bya ba nyid kyi phyir rang sngags snying gar te/rang gi snying ga'i pad+ma dkar po la bsgoms nas srog gi thig ler son par dgod ces pa yan lag gsum pa'o/ /de ltar thig le'i gnas su gong bu'i gzugs kyis srog 'gag pa ste/ des na de ni 'dzin par brjod par bya'o zhes pa 'dzin pa'i yan lag go/ /gsungs pa yang /rang dbang rin chen 'gags pa la/ /gzung bar bya'o 'dzin par brjod/ /ces so/ /'di'i so sor rgyas par bshad pa ni rang gi gzugs la sogs pa'i yul rnams so/ /dbang po ni mig la sogs pa rnams te rang dang dbang po 'gags shing thim pa de la de gnas yul dang dbang po'i rten du gyur pa'i rin chen te sems kyi rin chen la srog rtsol dang lhan cig 'gags shing nub par gyur pa la gang gzung bar bya ba de 'dzin pa'o//da ci zhe na/ yang dag pa'i mtha' kho na 'dzin pa zhes bya'o zhes pa yan lag bzhi pa'o/ /dbu ma dbyer med pa'i yan lag gis bzlas par bya'o zhes pa 'di'i bshad pa ni srog g.yon dang g.yas kyi rtsa la mi rgyu bas zhes pa'o//gsungs pa yang / slong mo za zhing bzlas bya min/ /slong 'byung dga' bar 'gyur ba'ang yin/ /sngags kyi yan lag dbyer med bzlas/ /'dod pa kun la longs spyod pas/ /zhes so/ /tha dad pa'i rnam pa can gyi yi ge ni slong mo za ba brjod pa ste/so sor sdud pa la nye bar dmigs pa zhes bya'o/ /slong byung ni brda las gyur pa ste sngags kyi de kho na nyid ces bya ba'o/ /sngags 'jug pa dang gnas pa dang ldan pa la so sor rtog pa'i bdag nyid can te yan lag dbyer med ni de bzhin nyid don dam pa dbu ma dbyer med pa'i yan lag nyid do//rjes su dran pa bsgrub par brjod par bya'o zhes pa'o/ /gsungs pa yang / brtan pa rdo rje'i lam gyis ni/ /nam mkha'i khams su spro byed pa/ /rjes su dran pas bsgoms nas gang / /de yi rnam par spro bar bya/ /zhes so/ /rdo rje'i lam gyis te 'gom par bya ba min pa mtshan ma lnga'i rim pas 'od gsal ba la rab tu zhugs pas brtan pa rnam par dag pa'i sems ni nam mkha'i khams su ste 'jig rten gyi khams rnams su spro bar bya ste chos kyi sku'i ngo bos so//de ltar bdag nyid 'od gsal bar gyur pa bsgoms shing mngon du byas nas gang sngar rjes su dran pas smig rgyu la sogs pa'i rnam pas yang dag pa'i mtha' thob par gyur pa de'i rnam pa ste rim pa de kho nas yang dag par spro bar bya'o//de ma thag tu brjod pa 'di ni yan lag lnga pa rjes su dran pa'o zhes pa'o/ /lhan cig skyes pa'i dga' ba'i ngo bo can gyi gnas skabs de'i ni byang chub sems dpa' rnams kyi stong nyid byang chub tu brjod par bya'o zhes pa'i mthar thug pas ting nge 'dzin gsungs so//gsungs pa yang / shes rab thabs ni snyoms 'jug pas/ /dngos po thams cad bsdus pa las/ /bsdus te gong bu'i sbyor ba yis/ /gzugs brnyan dbus su bsgom par bya//yud kyis ye shes rdzogs pa ni/ /ting 'dzin zhes pa'i ming can no/ /zhes so/ /dngos po thams cad ni brtan pa dang g.yo ba'o/ /shes rab dang thabs snyoms par 'jug pas ni kun rdzob dang don dam pa'i sbyor bas gnas pa'o/ /gong bu'i gzugs kyis ni phyag rgya chen po'i gzugs kyis gcig tu byas nas so//brtan pa dang g.yo ba de'i dbus su zung 'jug gi bdag nyid rdo rje 'chang chen po nyid bsgom par bya zhing shes par bya ste rim pa 'dis yud kyis te de'i skad cig gi ye shes rdzogs pa ni ting nge 'dzin te yan lag drug po'i zhes pa 'dus pa'i rim pas yan lag drug gi rnal 'byor gyi rim pa'o//dngos po bsgom bya zhes pa la sogs pas zhes pa ni/ dngos po sgom 'gyur shes rab can/ /dngos po med pa'ang yongs shes pas/ /de ltar he ru ka bsgom bya/ /dngos po yongs su shes pas min/ /zhes dpal kye'i rdo rje'i rgyud du gsungs so//stobs bcu'i stobs dang ldan pas ni rdo rje 'dzin pa chen pos so/ /stong nyid sgom pa ni rnam pa thams cad pa'i stong pa nyid rtogs pa'o/ /mtshan mo ni mun pa la ste nyin par ni snang ba la'o/ /dus gsum gzugs ni 'dod pa dang gzugs dang gzugs med pa'i ngo bo'o//mun pa can du ni a wa d+hU tIr ro/ /phyi rol du 'byung ba med pa'i phyir dbugs 'byung dbugs rngub dman pa'o/ /gang gi gzugs las ni sna tshogs pa'i gzugs brnyan pas so/ /nam mkhar lta bas ni bar snang la gtang ba'i mig gis so//gti mug mthar byed pa ni rang bzhin med pa nyid do/ /de yang spyan ma'o/ /nang gi lta bas te phung po dang / skye mched la sogs pa nyid du lta bas 'dod chags mthar byed pa nyid do/ /de yang gos dkar mo'o/ /lus med lta bas ni rnam pa thams cad mchog dang ldan pa'i stong pa nyid kyi gzugs kyis lhan cig skyes pa la rjes su chags pa'i lta bas so//zhe sdang ste 'jig rten pa'i zhe sdang mthar byed nyid de rang bzhin med pa nyid dang sgrib pa med pa nyid de zhe sdang chen po nyid do/ /de yang rdo rje dbyings kyi dbang phyug ma'o/ /khu ba gang dri ma med pa nyid kyi gang bde ba ste de las so//srog gi lta bas te sna'i sa nye bar mtshon pa'i bar snang gi phyogs su lta bas nga rgyal te tha mal pa'i nga rgyal mthar byed nyid de sgrib pa med pa nyid do/ /de yang mA ma kI'o/ /gzhom du med pa'i tshangs pa'i dbyangs las te gzhom du med pa'i bde ba chen po'i sgra'i yang dag par rol pa las so//srog dang rtsol ba 'gags par gyur na ste phyi rol du 'gro ba med pas 'dzin pa'i yan lag gsal bar gyur pas na rnam par rtog pa med pa lhan cig skyes pa'i gtum mo gsal bar gyur ba'i phyir na sangs rgyas gzugs las te sna tshogs pa'i gzugs las dri ma dang bral dkyil 'khor te dri ma med pa'i 'od kyi dkyil 'khor du 'gyur te skye'o//'jig rten gsum gyi phrag dog zad pa'i phyir de ni sgrol ma'o/ /'khor lo drug rnams su khu ba son pas rdul 'og tu 'gro bas so/ /gzhom du med pa'i tshangs pa'i dbyangs las te/ mchog tu mi 'gyur ba'i bde ba chen po cher rol ba'i phyir ser sna mthar byed nyid do/ /de yang sna tshogs yum mo/ /de ltar 'khor lo so sor sa gnyis thob pa'i rim pas sa bcu gnyis kyi dbang phyug tu 'gyur ro/ /de ltar ni gsang ba'i 'khor lor dbugs dbyung ba dang 'jug pa brgya phrag drug gis lhag pa'i stong phrag gsum 'gogs pas rab tu dga' ba dang dri ma med pa'i sa gnyis so//lte ba'i 'khor lor de bzhin kho nar 'gags pas 'od byed pa dang 'od 'phro ba'i sa gnyis so/ /de bzhin kho nar snying ga'i chu skyes su shin tu thub par dka' ba dang / mngon du gyur ba'i sa gnyis so//mgrin pa'i pad+mar yang ring du song pa dang / mi g.yo ba'i sa gnyis so/ /smin mtshams kyi chu skyes su legs pa'i blo gros dang / chos kyi sprin gyis gnyis so/ /'di rnams byang chub sems dpa'i sa rnams te lnga kho na'o/ /de bzhin du gtsug tor gyi 'khor lor sangs rgyas kyi sa kun du 'od dang /rdo rje 'dzin pa'i sa ye shes dang ldan pa ste gnyis so/ /de ltar dbugs brgya phrag drug gis lhag pa'i stong phrag nyi shu rtsa gcig 'gog pas dri ma gsum dang rnam par bral ba'i sku gsung thugs kyi rdo rjes bcu gnyis kyi dbang phyug rnam par rtog pa med par chos ston pa po sangs rgyas bcom ldan 'das so zhes pa'o//rim pa 'dis rnal 'byor yan lag drug mngon du byed pas sa la sogs pa drug dag pa bstan to/ /mig lnga rnams so sor srid pa brjod par bya ste/ /khyi la sogs pa rnams kyi zhes pa la sogs pas so/ /rang bzhin yon tan dbang las te rigs kyi yon tan gyi dbang las so//da ni rnal 'byor yan lag drug sgrib pa med par byas pa'i 'khor lo drug gi pad+ma'i ze 'brur gnas pa ni de bzhin gshegs pa drug gi bdag nyid du gsungs pa 'dzag med ces pa la sogs pa'o/ /badzra d+h+ri ka ni mi bskyod pa'o/ /dzi na dzika ni rnam par snang mdzad da/ /A ro l-i ka ni 'od dpag med do//rat+na d+h+r-i ka ni rin chen 'byung ldan no/ /pradz+nyA d+h+r-i ka chi don yod grub pa'o/ /'dis ni phung po drug rnam par dag pa gsungs so/ /zla ba dang nyi ma'i gzugs te brkyang ma dang ro ma'i rang gi ngo bo nyams te zhig cing lam gnyis ka ste sna bug gnyis por srog gi rlung 'gags te srog dang thur sel gyi rlung phyi rol du 'gro ba med pa'i phyir 'khor lo lnga'i rnam par gnas pa na'o//chu skyes su ste stong pa nyid kyi gzugs gsal bar gyur pa la'am phyi rol gyi bud med kyi pad+mar ro/ /rdo rje ste sems kyi rdo rje'am bo la ru'o/ /rab tu sad pa na ste sngar bshad pa'i rim pas bslang ba na ste rdo rje langs pa na zhes pa'i don to//de'i tshe ri bong can zhu ba gang yin pa ni khu ba'o/ /der nyi ma'i gzugs chen ni lhan cig skyes pa'i gtum mo'i gzugs kyi rten la rab tu zhugs par gyur cing zla ba zhu bar gyur pa na'o/ /dngos po dngos med gcig gyur na ste stong pa nyid dang snying rje dbyer med pa na'o/ /srid pa gsum gyi 'jigs pa song ba na ste lus dang ngag dang sems kyi dri ma bral na'o//gzhom du med pa na ste/ mchog tu mi 'gyur ba'i bde ba chen pos cher rol cing yang dag rab tu rtogs par gyur pa na'o/ /de'i dus su ste bde ba chen po 'char ba'i skad cig la'o/ /rnal 'byor pa de ni rnal 'byor yan lag drug mngon du byed pa po mchog gi go 'phang ste lhan cig skyes pa'i dga' ba'i bde ba la rab tu gnas par 'gro'o//gang la ste rnal 'byor pa la gnyis te rang dang gzhan du zhen pa'i mtshan nyid can cung yod min pa'o/ /srog dang thur sel gyi rlung 'gags par gyur pa na/ gtum mo 'bar bas bskyod cing zhu ba'i ri bong 'dzin pa gang yin pa nyi ma'i gzugs la rab tu 'gro ste 'khyud par byed do//rdo rje byang chub kyi sems te/ pad+ma rnams ni 'khor lo rnams so/ /de rnams su rab tu sad pa na ste sngar brjod pa'i rim pas langs pa na ste/ de ltar gyur pa na'o zhes pa'i don to/ /zhu ba na ste zhu bar gyur pas yod pa na ste 'di ste ri bong 'dzin pa nyi ma'i gzugs kyi me lce dang lhan cig tu'o//rnam par shes pa dang ye shes gcig tu 'gyur te rlung dang lhan cig zla ba dang nyi ma 'gags shing sgrib pa med par gyur pa na'o/ /gang mchog tu mi 'gyur ba'i bde ba byung ba de ni smra par mi nus pa nyid kyi phyir de ltar nyams su myong bas rtogs par bya ba e yig dang waM yig gi bdag nyid de brjod pa can gsum nyid kyis rnam pa thams cad du bden pa nyid gsungs so//mtshan ma'i rnam par dag pa brjod par bya ste/ 'khor lo zhes pa la sogs pas so/ /srid gsum zhes pa kun nas rmongs pa rnams smin pa'i ched du rnam par snang mdzad kyi 'khor lo shin tu dang ba'o//srid pa gsum po 'di nyid kyi bde ba'i don du rin chen 'byung ldan gyi rin chen no/ /sgrib pa med pa'i 'du shes kyi chos kyis chags pa can rnams kyi chags pa chen po'i rgyur 'od dpag tu med pa'i pad+ma'o/ / nyon mongs zad pa zhes pa don yod grub pa'i ral gri'o/ /mi phyed pa'i ye shes sku zhes pa mi bskyod pa'i rdo rje'o/ /mi shes gcod pa zhes pa rigs drug pa'i gri gug go/ /rigs drug po 'di rnams kyis mkha' bzhin ro mnyam rnam par 'gyur ba med pa'i gzugs la sogs pa'i rang bzhin rnams so//gsungs pa yang / rdo rje sems dpa' gcig pu 'di ni 'jigs pa'i sprin dang mtshungs pa'i he ru ka 'di byung bar gyur/ /gdug pa rnams ni smin pa'i don du'o/ /de yang / dam tshig rgyal ba rmongs pa rnams ni bde don du/ /rin chen dbang po sdug bsngal ldan pa rnams kyi'o//de yang pad 'dzin chags can rnams kyi chags pa'i rgyur/ /bgegs rnams gzhig pa'i don du phyag gi pad+ma ral gri can gyi don yod grub par byung bar gyur/ /zhe sdang las ni sna tshogs yum gang 'jig dus rtse mo can mtshungs mkha' 'gro ma de byung bar gyur/ /gti mug las ni spyan ma zhes bya'o mchog gi thugs rjes mA ma kI ni nga rgyal rgyu las so//chags las gos dkar can zhes bya ste mtha' dag yon tan gter gyi sgron ma de yang phrag dog las/ /sna tshogs gzugs can gnyis 'di dag dang yul dang yul can gzhan rnams thams cad rnams kyang byung bar gyur//zhes so/ /rigs kyi gzugs ni tha mal pa'i gzugs so/ /'khor ba'i sdug bsngal la sogs pa'i tshor ba'o/ /de bzhin du phyi ma la yang ngo / /mthong dang ma mthong ba ni bar chod pa dang ma chod pa'o/ /yid kyi nam mkha' la ni sems med pa'i sems la'o/ /bde mnyam la ni mi 'gyur ba'i bde ba la'o//chos ni chos kyi dbyings la'o/ /'dis ni 'di skad gsungs te/ /kun la phyag dang zhabs la sogs/ /kun nas spyan dang dbu dang zhal/ /kun nas thos ldan 'jig rten du/ /thams cad khyab gnas gnas pa'o/ /zhes so/ /gzugs la ni gzugs brnyan la ste mi 'gyur ba'i bde ba la gzugs la sogs pa rnams ma skyes shing ma 'gags pa rnams so zhes pa'o//rnyog med ni lus dang sems rtsub pa rnams kyis ma dkrugs pa'o/ /ye shes kyis rtogs bya ni mchog tu mi 'gyur ba'i rig pa'o/ /dbang po'i sgos rtogs par bya ba'i gzung bar bya ba gzhan yod pa min no zhes pa lhag ma'o//sangs rgyas rnams kyis rtogs bya min pa ni 'di nyid kyis zhes so sor rtogs par mi nus pa nyid kyi phyir ro/ /sangs rgyas kyi ste rdo rje 'dzin pa'i sprul pa sgyu ma lta bu sna tshogs yum ni sangs rgyas sprul pa sgyu ma'o/ /brgya byin dra ba ni mig 'phrul lo//chu la nam mkhar mthong ba'i 'khrul pa de dang 'dra bar skye ba kho nar 'dir 'khrul pa ster ba'o/ /ro'i rdo rje rnams ni de bzhin gshegs pa drug rnams so/ /sa gzhi'i snying po la sogs pa rnams ni sa'i snying po la sogs pa rnams so/ /grub pa'i dus su ni phyag rgya chen po grub pa'i dus su'o/ /tho rangs la ni skya rengs 'char ba'i dus la'o//mtshan mo phyed la yang ste de yang 'grub pa'i dus yin pa nyid kyi phyir ro/ /ri bong can gyi zhag ni zla ba nya ba la'o/ /'dod pa'i dngos grub ni phyag rgya chen po'i dngos grub bo/ /dus kyi sbyor ba las ni phyogs gsum dang lo gsum gyi sbyor ba las so/ /rdo rje'i gnas ni de kho na nyid kyi gnas te lhag par gnas pa kun nas 'byung ba'i mtshan nyid can no//dpal dang po'i sangs rgyas la sogs pa rgyud sna tshogs pa rnams kyi zhes pa la sogs pa'i sgras ni dpal 'dus pa dang bde mchog dang kye'i rdo rje dang mkha' 'gro ma rdo rje'i gur rnams bsdu'o/ /gang gi bla ma la gus phongs la brtse dang 'phags pa 'jam pa'i dpal gyi ni/pad+ma bsten zhing rang bzhin ngag dag chos ni nyan par byed la shin tu chags/ /dpal ldan skyong mchog 'dren pa zhes par grags pa de yis chos la gnas pa la/ /phyi phyir gsol ba btab pas yan lag drug po 'gengs byed brjod byang bdag gis spros//rnal 'byor yan lag drug gi brjed byang ni/ /bdag gis byas nas gang zhig thob pa yi/ /dge ba 'di yis 'jig rten ma lus pa/ /mchog tu 'gyur ba med pa thob par shog /mkhas pa chen po gnas brtan nyi ma dpal ye shes kyis mdzad pa rnal 'byor yan lag drug gi brjed byang yon tan gyis 'gengs pa zhes bya ba rdzogs so// //rgya gar shar phyogs kyi paN+Di ta chen po shrI bi b+hU ti tsan+d+ras ru lag gi snying po 'bring mtshams kyi sa'i cha dpal rgya rtags kyi gtsug lag khang du bsgyur ba'o/ /'di'i gzhung gi tshad ni phyed dang bcas pa'i brgya phrag drug go//slar yang lo tsA ba'i ming tsam 'dzin ba snyom las pa dbang dge slong dpal ldan blo gros brtan pas/ dpal dus kyi 'khor lo'i tshul la mos shing blo'i snang ba cher rgyas pa'i slob dpon chen po grags pa dpal bzang po'i bkas bskul te bsgyur cing zhus chen grub pa'o//paN chen rnal 'byor zla ba'i rang 'gyur la/ /phyed tsam ma bsgyur 'ol byir mdzad pa las/ /blo gros brtan pas sgra don ji bzhin bsgyur/ /dge des 'gro kun kun mkhyen myur thob shog /'dis 'gro ba shin tu mang po la phan par gyur cig/ //

CLOSE WINDOW