CLOSE WINDOW

D1377
བོད་ཡིག

/[]@##/ /rgya gar skad du/ an+ta rma ny+dza rI nA ma/ bod skad du/ nang gi snye ma zhes bya ba/ dpal dus kyi 'khor lo la phyag 'tshal lo/ /nang mi shes pas 'gro ba ma lus 'chi dbang gyur/ /de phyir thams cad mkhyen pas nang gi thugs rjes gsungs/ /de yang rtogs dka' gzhung mang skye bos shes mi nus//de bas btus te rtogs sla cung zad bdag gis bri/ /brtan dang g.yo ba'i 'jig rten ltar/ /nang dang dkyil 'khor de bzhin no/ /de shes pas ni lus gnas dang / /grol phyir nang gi snye ma'o/ /de ltar bcom ldan 'das kyis skye ba dang / rga ba dang / na ba dang / 'chi ba dang / mya ngan dang / smre sngags gdon pa dang / sdug bsngal ba dang / yid mi bde ba dang / 'khrugs pa'i dbang du gyur pa/ bdag dang byed pa po med kyang bdag dang bdag gi ba'i rtog pa'i mal stan la nyal zhing / /rang bzhin gyis dag pa'i sangs rgyas kyi bdag nyid rang lus ma rtogs pas dug dang 'dra ba'i spyod yul gyi ro la mngon par zhen pa'i skye bo rnams la snying rjes gsungs pa/'jig rten ni rnam pa gnyis te brtan pa dang g.yo ba'o/ /de la brtan pa ni sa gzhi'i dbus su ri rab ste de bskor ba'i gling bdun dang / mtsho bdun dang / ri bdun dang / steng du mtho ris dang /'og tu sa 'og go/ /der ri rab ni lus kyi rgal tshigs te rked pa nas tshigs pa dang po'i bar ro/ /spyi gtsug ni tshangs pa'i gnas so/ /mtho ris ni mkhur ba'i bar ro/ /mi yul ni lag pa gnyis kyi bar ro/ /sa 'og ni rkang pa gnyis kyi bar ro/ /ba tsha'i rgya mtsho ni dri chu'o/ / chang gi mtsho ni rdul lo/ /chu'i mtsho ni mchil ma'o/ /'o ma'i mtsho ni bud med kyi nu zho dang skyes pa'i snabs so/ /zho'i mtsho ni glad pa'o/ /mar gyi mtsho ni tshil lo/ /sbrang rtsi'i mtsho ni sa bon te mtsho bdun no/ /mkhrig ma gnyis dang / gru mo gnyis dang / dpung mgo gnyis dang / brla gnyis dang / pus mo gnyis dang / long bu gnyis te dum bu bcu gnyis ni 'dzam bu'i gling chen po'o/ /drag po'i gling ni sha'o/ /khrung khrung gi gling ni skran no/ /mi 'am ci'i gling ni glo ba'o/ /ku sha'i gling ni lto ba'i tshil lo/ /dkar 'od kyi gling ni rgyu ma'o/ /zla ba'i gling ni rtsa rnams te gling bdun no/ /rdo rje'i ri rnams ni rkang pa dang /lag pa'i sen mo rnams so/ /gangs ri ni lag pa'i rus pa'o/ /dri med ni lag ngar ro/ /nor bu'i 'od ni dpung pa'i rus pa'o/ /drug bral ni rkang pa'i rus pa'o/ /maN+DA ra ba ni rje ngar gyi rus pa'o/ /'od sngo ni brla'i rus pa ste ri bdun no/ /sa dang chu'i khor yug gnyis bshad zin to//me'i khor yug ni khrag go/ /rlung gi khor yug ni pags pa rnams so/ /bcud kyi 'jig rten la skra rnams ni grub pa thob pa ste mkha' la byed spyod pa rnams so/ /mchan khung gi spu ni sa la spyod pa rnams so/ /b+ha ga dang ling+ga'i spu ni sa 'og na spyod pa'o/ /lha dang 'byung bo rnams ni ba spu bye ba phrag phyed dang bzhi'o//gzhu'i dbyibs snying gar glog ste lho'i me'o/ /mgul pa'i zlum po la nyi ma'i me ste khyim gyi bdag po'o/ /lte ba gra bzhi pa sha za'i me sbyin sreg gis mchod bya'o/ /dpral bar ye shes kyi me ste/ gang na gza' rnams dang skar ma rnams glog la sogs pa me 'char ba'o//gci ba'i lam ni nyi ma'o/ /bshang ba'i lam ni zla ba'o/ /sa bon gyi lam ni dus kyi me'o/ /kha ni sgra gcan no/ /mig g.yas pa ni mig dmar ro/ /g.yon pa ni lag pa'o/ /sna bug g.yas pa ni phur bu'o/ /g.yon pa ni pa ba sangs so/ /rna ba g.yas pa ni spen pa'o/ / g.yon pa ni mjug rings te 'dir gza' bcu'o/ /so sum cu so gnyis las bzhi ni mtshams kyi skar ma'o/ /steng du bcu bzhi dang 'og tu bcu bzhi ni rA shi 'khor lo mthon dman du 'khor ba'i phyir ro/ /nam gru dang bcas pa phyogs kun du bdun bdun yin la/ /shar phyogs kyi dkyil du khrums smad de/de nas g.yon skor du dbyung ba la sogs pa'o/ /lo gcig gi nyin zhag ni sum brgya drug cu'o/ /nang du dbugs drug gi chu srang gcig chu grang drug cu dbyu gu gcig ste dbugs sum brgya drug chu'o/ /dbyu gu drug cus nyin zhag gcig ste dbugs ni nyi khri chig stong drug brgya'o/ / 'jig rten gyi khams la chu bo ni stong phrag bdun cu rtsa gnyis te/ lus la rtsa stong phrag bdun cu rtsa gnyis te ro rgyu ba'o/ /rgyu ma ni sprin te/ ro'i char 'bab pa dang sgra sgrogs pa'i phyir ro/ /phra ba dang rags pa'i spu ni tshes gcig dang gnyis so/ /de ltar pags pa ni tshes gsum dang bzhi'o//khrag ni tshes lnga dang drug go/ /sha ni tshes bdun dang brgyad do/ /rtsa ni tshes dgu dang bcu'o/ /rus pa ni tshes bcu gcig dang bcu gnyis so/ /rkang mar ni tshes bcu gsum dang bcu bzhi'o/ /cha bcu drug pa ni nya'o/ /sa las byung ba rnams ni skyes pa ste nang du ba spu rnams so/ / rlung las byung ba ni sgo nga las skyes pa ste nang du shig rnams so/ /chu las byung ba ni drod gsher las skyes pa ste nang du srin bu rnams so/ /me las byung ba ni sa bon las skyes pa ste nang du sa bon nyid do/ /nam mkha' las byung ba ni rdzus te skyes ba ste nang du sems phra mo'o/ /phyi rol du tshes gcig la sogs pa lnga lnga ni dga' ba dang /bzang po dang / rgyal ba dang / stong pa dang / gang ba'i ming can te nang du dkar po dang / nag po'i phyogs kyi tshul du dpyid zla 'bring pho la sogs pa la lag pa g.yon pa'i mthe chung gi rtse mo'i tshigs la sogs pa gsum gsum bco lnga ni dkar po'i phyogs te nam mkha' la sogs pa'i rim pa'o//lag pa g.yas pa'i mthe bong gi rtsa ba'i tshigs la sogs pa'i rim pas sa la sogs pa ni nag po'i phyogs so/ /de ltar zla ba gnyis pa'i tshes rnams ni rkang pa'i sor mo'i tshigs rnams so/ /de bzhin du sogs par yang ste lo gcig la lan drug tu 'khor ro/ /snying gar shar gyi 'dab ma la nyi ma'o//mer zla ba'o/ /lhor mig dmar ro/ /bde na bra la du lag pa'o/ /nub tu phur bu'o/ /rlung du pa sangs so/ /byang du spen pa'o/ /dbang ldan du mkha' 'gro ma'i longs spyod kyi phyed la yang spen pa'o/ /phyed gzhan la sgra gcan no/ /gza' ni bdun la brgyad pa ni mkha' 'gro ma'i longs spyod de/spen pa'i tshes la thun dang po'i phyed la stong pa'o/ /lte ba'i bzhi ni stong pa ste drug bcu la ni dkyil 'khor drug cu rgyu ba'o/ /dpral bar bcu drug la gnyis ni stong pa yin la/ bcu bzhi ni zla ba'i rkang pa ste 'byung ba la sogs pa'o/ /chu srang drug cu dbyu gu gcig /dbyu gu drug cu nyin zhag gcig /drug cu drug cus bsgyur ba'i chu srang stong phrag sum brgya drug cu lus la yod do/ /phyi rol du nyi ma ni lo gcig gis khyim bcu gnyis 'khor ro/ /lus la lte ba'i rtsa bcu gnyis la nyin zhag gcig gis so/ /zla ba gcig la dbyu gu brgya phrag bco brgyad kyis 'pho ba gcig go/lus kyi sna bug gcig la dbugs brgya phrag bco brgyad kyis 'pho ba gcig go/ /zhag mang nyung ltar dbugs mang nyung gis so/ /phyi rol du nyi mas dkyil 'khor gcig la longs spyod pa ni zhag drug gi dbyu gu sum brgya drug cu'o/ /sna bug la dkyil 'khor gcig gi longs spyod ni dbugs sum brgya drug cu'o//sna bug re re dkyil 'khor lnga rgyu ste dbyu gu lngas so/ /sna bug gnyi gar 'og tu sa'i dkyil 'khor dang / g.yon du chu'i dang / g.yas su me'i dang / steng du rlung gi dang / dbus su nam mkha'i dkyil 'khor ro/ /mnyam par rgyu ba ni gnyi ga las so//dkyil 'khor re re la dbugs sum brgya drug cu ste/ de la tha mar bcu gcig bzhi cha dbu mar mnyam par rgyu'o/ /sna bug g.yon nas nam mkha' la sogs pa dang / g.yas nas la sogs pa ni rim pas rgyu ba'o/ /g.yon nas nam mkha' lha ni sgra gcan no/ /g.yas su dus me'o//de bzhin du rlung la zla ba dang nyi ma'o/ /me la lag pa dang mig dmar ro/ /chu la pa ba sangs dang phur bu'o/ /sa la mjug rings dang spen pa'o/ /rkyang ma ni sa bon rgyu ba'o/ /ro ma ni khrag rgyu ba'o/ /lte ba'i nang du rtse 'dab pa bzhi dang / /de'i phyir brgyad dang / de'i phyir bcu gnyis dang / de'i phyir drug cu rtsa bzhi'o/ /lte ba'i steng du sor phyed dang bcu gsum na snying gar rtsa 'dab brgyad dang / 'dir 'pho ba ni thun re rer dbyu gu phyed dang brgyad kyis dbugs brgya phrag nyer bdun gyis so/ /srog rlung ni sna bug byed g.yas nas gyen du rgyu'o/ /thur sel ni g.yon nas 'og tu rgyu'o/ / shar du snang ma'i rtsa la mnyam gnas so/ /mer glang chen gyi rtsa la gyen du rgyu'o/ /lhor dmar ser gyi rtsa la khyab byed do/ /bden bral du rgyal gyi rtsa la klu'o/ /nub tu rgyal ba'i rtsa la rus sbal lo/ /rlung du sku'i rtsa la rtsangs pa'o/ /byang du lug gi rtsa la lha sbyin no/ /dbang ldan du ku ha'i rtsa la nor rgyal lo//dbus ma la srog ste skye bo kun la sbyor/ thur sel ni dung can ma la'o/ /g.yas g.yon gyi srog rlung gis stobs skyed do/ /thur sel ni bza' btung 'og tu 'khyer ro/ /mnyam gnas ni ro mnyam par byed do/ /gyen rgyu lus g.yo bar byed pa dang / khas glu dang dgod pa la sogs pa dang /lag pa dang rkang pas gar dang 'gro ba la sogs pa byed do/ /khyab byed ni chu la sogs pa'i dbang gis lus la nad byed do/ /klu yis sgregs par byed do/ /rus sbal gyis rkang lag skum par byed do/ /rtsangs pas 'khrug pa dang khro bar byed do/ /lha sbyin gyis g.yal bar byed do/ / nor rgyal gyis ni shi ba'i lus kyang mi 'dor ba'o/ /rtsa brgyad po 'di dag ni brgya byin la sogs pa phyogs pa bdag gi rang bzhin te thun rgyu ba'o/ /snying gi steng du sor phyed dang bcu gsum gyi mthar mgul pa la 'dab ma sum cu rtsa gnyis te/ bzhi mi rgyu ba'o/ /gza' dang bcas pa'i skar ma'i 'khor lo ste/dbyu gu drug cu las dbyug pa la sogs pa nyi shu rtsa brgyad kyis bgos pas thob pa de dbyu gu gnyis dang chu srang brgyad de 'dab ma re re la'o/ /mgul pa nas sor phyed gang bcu gsum nas dpral pa ste/ dbus su a dkar po ste a la sogs pa bcu drug gis bskor ba'o/ / 'dab ma bcu drug las 'dab ma gnyis dor nas zla ba'i rkang pa bcu bzhis dbyu gu drug cu la bgos pas thob pa dbyu gu bzhi dang chu srang bcu bdun 'dab ma re re nas rgyu'o/ /de nas tshes gcig la sogs pa'o/ /de nas sor bzhi pa'i steng du spyi gtsug pad+ma 'dab ma bzhi thun mtshams bzhi ste/ / stong pa dang shin tu stong pa la sogs pa'i rang bzhin no/ /gsang gnas su 'dab ma sum cu rtsa gnyis kyi phyi rol gyi bcu drug la dbyangs yig rnams so/ /de'i nang bcu ni phung po dang / khams kyi rang bzhin no/ /de'i nang du drug ste stong pa'o/ /'khor la drug brgya lnga bcu rtsa drug go/ /'dir dbu ma ma bgrangs so//dbugs ni lte ba dang / snying ga dang / mgul pa dang / dpral ba dang / spyi gtsug dang / sna bug dang / dbyu gu dang / skar ma dang / tshes dang / thun mtshams dang / dkyil 'khor lngas 'bigs nas dmigs med pa bcu gnyis kyi mtha' dang bcu drug /gnyis kyi mtha' dang drug gi mthar rgyu'o//de nas ldog go/ /gang gi tshe phyi rol du thung ba sor bcu gnyis su rgyu ba de'i tshe lte ba'i 'og tu sor bzhi rgyu'o/ /rkang pa g.yon pa'i tshigs gsum la 'khor lo gsum ste/ zla ba'i tshes kyi grangs kyis lha sum cu sta sa'i khams la snying stobs la sogs pa'i dbye bas so//rkang pa g.yas pa chu khams dang / lag pa g.yon pa me'i khams dang / lag pa g.yas pa rlung gi khams te lo gcig la bcu gnyis so/ /g.yon dang g.yas pa'i lag pa dang rkang pa'i sor mo rnams ni sa la sogs pa'o/ /sor mo'i tshigs gsum ni snying stobs la sogs pa'o//mthe bong sa'o/ /sdigs mdzub chu'o/ /gung mo me'o/ /ming med rlung ngo / /mthe'u chung ni nam mkha'o/ /skra dang ba spu bye ba phyed dang bzhi ni nam mkha'o/ /ma'i khrag gis gsum ste/ pags pa dang / sha dang khrag go/ /sku la sogs pa'i rigs ni gsum ste lte bar 'khor lo'i rigs dang /mgul par rin chen dang / gsang bar gri gug go/ /pha'i sa bon gyis gsum steng rus pa dang / rkang mar dang / rgyus pa'o/ /rigs kyang gsum ste/ dpral bar pad+ma dang / snying gar ral gri dang / spyi gtsug tu rdo rje'o/ /mngal du zla ba gcig gi bar du 'byung ba lngar gyur pa'i las sa bon 'phel lo//zla ba gcig gi rjes su de'i myu gu snying gar srog la sogs pa'i gnas phra mo bcu'o/ /lte bar drug cu bzhi dang de'i nang du 'pho ba'i rtsa ni bcu gnyis so/ /drug cu rtsa bzhi 'di dag lag pa dang rkang pa dang kha'i gnas dang byed pa'i steng du song ste/zla ba gnyis tshang nas lag pa la sogs pa cung zad 'byung ngo / /rus sbal gyi gnas skabs su 'bur lnga ste lag pa gnyis dang rkang pa gnyis dang mgul bar mgo bo rkang lag gi tshigs drug la rtsa phra mo rnams so/ /zla ba bzhi tshad nas mgrin par longs spyod kyi rtsa rnams so//zla ba lnga la phag gi skabs su sha la brten nas rus pa sum brgya drug cu dang / de'i tshigs kyang sum brgya drug cu'o/ /khrag dang bde ba la sogs pa'i tshor ba dang / zla ba drug la mngon shes kyis ma chags par byed/ srid pa'i sdug bsngal la rmongs/ sangs rgyas kyi lam la bstod/ /zla ba bdun gyis smin ma dang skra dang kha spu dang mig la sogs pa'i skye mched tshang ba'o/ /mngal gyi zla ba'i gting la nyin re bzhin du rtsa brgya phrag gnyis gnyis dang / /gnad sum brgya drug cu dang / rkang mar dang / lce sra ba'o/ /brgyad pa la bshang ba dang gci ba'o//dgu dang bcu gnyis kyi bar skye ba'i dus su mi'i seng ge ste/ skye gnas kyis bsdams pas sdug bsngal mi bzad par 'gyur ro/ /bcu drug gi bar shing rta bcu pa'i bu'o/ /skra dkar gyi bar khyab 'jug go/ /rgas pa ni sangs rgyas so/ /'chi ba'i tshe tshangs pa can te phung po dang khams la sogs pa stong pa nyid du ro gcig tu byed pa'i phyir ro//de ni zhar las byung ba'o/ /da ni skabs su bab pa brjod par bya'o/ /lus la shes rab dang thabs ni rus pa dang sha'o/ /chu dang khrag go/ /me dang gci ba'o/ /rlung dang bshang ba'o/ /zla mtshan dang sa bon no//sgra dang rna ba'o/ /dri dang sna'o/ /gzugs dang mig go/ /ro dang lce'o/ /reg bya dang lus so/ /chos kyi khams dang yid do/ /bshad pa 'bab pa dang bshang lam mo/ /'gro ba dang rkang ba'o/ /'dzin pa dang lag pa'o/ /smra ba dang ngag go/ /byang sems mnyam pa dang lha'i dbang po'o//b+ha ga dang ling+ga'o/ /sa bon mnyam pa dang dung can ma'o/ /sa la sogs pa dang gzugs kyi phung po la sogs pa'o/ /'dir rtsa'i gtso bo gsum ste g.yon du rkyang ma zla ba rgyu ba'o/ /g.yas su ro ma nyi ma rgyu ba'o/ /dbus su dbu ma sgra gcan rgyu ba'o/ / sna bug gnyis la dkyil 'khor lnga lnga ste de la g.yon gyi dkyil 'khor du nam mkha'i dkyil 'khor dang po la dbugs sum brgya zhes brgyad dang zhe gsum sor bcu drug phyi rol du rgyu ba'o/ /'di sgra gcan dang mi bskyod pa'o/ /steng du rlung gi dkyil 'khor gnyis pa la dbugs sum brgya zhe brgyad dang zhe gsum sor bco lnga rgyu ba'o//'di don yod grub pa dang zla ba'o/ /lhor me'i dkyil 'khor gsum pa la dbugs sum brgya zhes brgyad dang zhe gsum sor bcu bzhi rgyu'o/ /'di rin 'byung dang lag pa'o/ /byang du chu'i dkyil 'khor bzhi pa la dbugs sum brgya zhe brgyad dang zhe gsum sor bcu gsum rgyu'o//'di 'od dpag med dang pa ba sangs so/ /'og tu sa'i dkyil 'khor lnga ba la dbugs sum brgya zhe brgyad dang zhe gsum sor bcu gnyis rgyu'o/ /'di rnam snang dang mjug rings so/ /dbugs 'di nas 'phos nas g.yas pa'i 'og tu sa'i dkyil 'khor dang por dbugs sum brgya zhe brgyad dang zhe gsum sor bcu gnyis rgyu'o//'di spyan ma dang spen pa'o/ /byang du chu'i dkyil 'khor gnyis pa la dbugs sum brgya dang zhe brgyad dang zhe gsum sor bcu gsum rgyu'o/ /mA ma kI dang phur bu'o/ /g.yas su me'i dkyil 'khor gsum pa la dbugs sum brgya zhe brgyad dang zhe gsum sor bcu bzhi rgyu'o//gos dkar mo dang mig dmar ro/ /steng du rlung gi dkyil 'khor bzhi pa la dbugs sum brgya zhe brgyad dang zhe gsum sor bco lnga rgyu'o/ /sgrol ma dang nyi ma'o/ /dbus su nam mkha'i dkyil 'khor lnga pa la dbugs sum brgya zhe brgyad dang zhe gsum sor bcu drug rgyu'o//rdo rje dbyings kyi dbang phyug ma dang dus kyi me'o/ /dbugs kyi grangs dang zhe gsum po thams cad dang po ltar ro/ /dkyil 'khor re re'i 'pho ba la dbu mar mnyam par rgyu ba'i dbugs bcu gcig dang / bzhi cha'o/ /g.yon na dkyil 'khor lngas lnga bcu rtsa drug dang bzhi cha gcig go/ /g.yas pa la yang nga drug dang bzhi cha gcig go/ /'pho ba bcu gnyis kyi dbugs drug brgya bdun cu rtsa lnga'o/ /nyin zhag gcig la dbu mar rgyu ba dang bcas pa nyi khri chig stong drug brgyar rgyu ba'o/ /de ltar rang bzhin du rgyu ba la nyi mar mi shis pa 'byung ste/sna bug g.yas pa na nyi ma lnga ba la bar med par rgyu ba na tshe lo gsum lhag mar yod de/ tshes bcu pa la rgyun du rgyu na lo gnyis so/ /tshes bco lnga la rgyun du rgyu na lo gcig go/ /tshes nyi shu la rgyun du rgyu na zla ba drug go/ /tshes nyi shu lnga la rgyu na zla ba gsum mo//tshes nyi shu drug la rgyu na zla ba gnyis so/ /tshes nyi shu bdun la rgyun zla pa gcig go/ /nyer brgyad la rgyu na zhag bco lnga'o/ /nyer dgu la rgyu na zhag bcu pa'o/ /sum cu pa la rgyun zhag lnga'o/ /so gcig pa la rgyu na zhag gsum mo/ /so gnyis pa la rgyu na zhag gnyis so//so gsum pa la rgyun zhag gcig go/ /zla ba'i mi shis pa brjod de tshe lo gsum yod pa'i sna bug g.yon pa na mi shis pa zhag gcig des mtshang ba'i zla ba gnyis rang bzhin du rgyu'o/ /mi shis pa zhag gnyis des ma tshang ba rang bzhin zla ba gnyis ni khyim dang por ro/ / gnyis pa la tshes lhag ma zla ba sum cu ste mi shis pa zhag bzhi des ma tshang ba zla ba gcig mi shis pa zhag lnga rang bzhin nyer lnga'o/ /mi shis pa zhag drug rang bzhin nyer bzhi'o/ /gsum pa la mi shis pa zhag bdun rang bzhin zhag nyer gsum mo/ /mi shis pa zhag brgyad rang bzhin zhag nyer gnyis so//mi shis pa zhag dgu rang bzhin nyer gcig go/ /bzhi pa la mi shis pa zhag bcu rang bzhin nyi shu'o/ /mi shis pa bcu gcig pas rang bzhin bcu dgu/ mi shis pa bcu gnyis pas rang bzhin bco brgyad do/ /lnga pa la mi shis pa bcu gsum rang bzhin bcu bdun no//mi shis pa bcu bzhi rang bzhin bcu drug go/ /mi shis pa bco lnga rang bzhin bco lnga'o/ /drug pa la mi shis pa bcu drug rang bzhin bcu bzhi'o/ /mi shis pa bcu drug rang bzhin bcu bzhi'o/ /mi shis pa bcu bdun rang bzhin bcu gsum mo/ /mi shis pa bco brgyad rang bzhin bcu gnyis so//bdun pa la mi shis pa bcu dgu rang bzhin bcu gcig go/ /mi shis pa nyi shu rang bzhin bcu'o/ /mi 'dod pa nyer gcig rang bzhin dgu'o/ /brgyad pa la mi 'dod pa nyer bzhi rang bzhin drug dang zla ba gnyis so/ /dgu pa la mi 'dod pa nyer bdun rang bzhin zhag gsum dang zla ba gnyis so//bcu pa la mi 'dod pa sum cu rang bzhin zla ba gnyis so/ /bcu gcig pa la mi 'dod pa so gsum rang bzhin nyer bdun dang zla ba gcig /'dab ma bcu gnyis pa la thog ma'i lhag ma zla ba gsum gyi tha ma'i zhag gsum las zhag gnyis sna bug g.yas pa nas rgyu ste gcig ni dbu mar rgyu'o//'dab ma dang po la zla ba drug zad de lhag ma'i 'dab ma rnams su gsum mo/ /nad med pa rnams kyi khams snyoms pa yin la/ mi snyoms pa'i tshe srog mi snyoms pas nyi ma dang zla ba'i skyon gyis dus ma yin par 'chi'o/ / de bas sa bon dang zla mtshan gyi chos can zla ba dang / nyi mas srog rtsol gang bar byas la 'chi ba bslu bar bya'o/ /nyi ma'i 'chi ltas la tshes la sogs pa bshad pas/ /da ni 'dir ma bshad pa brjod par bya'o/ /nyin phyed dang nyin gcig dang nyin zhag gcig dang nyin zhag gnyis dang gsum dang bzhir thug pa sna bug g.yas pa la rgyu na de la tshe lo ni bcu bzhi dang bcu gnyis dang bcu dang brgyad dang drug dang bzhi lhag ma'o//zhag lnga nas nyer lnga'i bar du ma bshad pa bcu drug bshad de/ drug bdun brgyad dgu rim par rgyu na tshe lo gsum las nyin zhag nyer bzhi dang zhe brgyad dang don gnyis dang go drug re 'bri'o//nyin zhag bcu gcig dang bcu gnyis dang bcu gsum dang bcu bzhi rgyu na tshe lo gnyis las zhag nyer bzhi dang zhe brgyad dang don gnyis dang go drug dang dgu bri'o/ /zhag bcu drug bcu bdun bco brgyad bcu dgu rim par rgyu na tshe lo gcig las zhag bcu gnyis dang nyer bzhi dang so drug dang zhe brgyad dang go drug 'bri'o//zhag nyer gcig dang nyer gnyis dang nyer gsum dang nyer bzhi rim pas rgyu na tshe lo zla ba drug las zhag drug dang bcu gnyis dang bco brgyad dang nyer bzhi dang zhe brgyad 'bri'o//rtsa dbu mar nyin zhag gcig srog gi rlung rgyu bar ma nus na g.yon pa'i 'chi ltas la dbugs g.yas su 'pho bar bya'o/ /nyi ma'i 'chi ltas la g.yon du 'pho bar bya'o/ /zla ba phyed kyi bar du mchan khung dang nu ma g.yas pa mnan na g.yon du rgyu'o/ /mchan khung dang nu ma g.yon pa mnan na g.yas su rgyu'o//'khor lo drug la gnas pa'i rtsa drug go/ /gsang ba'i 'khor lo las gsum gyen du zla ba dang nyi ma dang sgra gcan rgyu'o/ /gsum 'og tu bshang ba dang gci ba dang sa bon dang zla ba dang nyi ma dang sgra gcan gyi mjug ma rgyu'o/ / sbyor ba yan lag drug gis 'khor lo drug gi lte bar gnas pa la srog rlung 'jug par byas nas mtha' gcig tu 'chi ba bslu'o/ /dbu ma la srog rlung 'jug par ma nus na 'chi ba bslu bar mi nus so/ /da ni dus su 'chi ba bshad de tshe lo brgya'i nyin zhag ni stong phrag sum brgya ste/ 'dir rtsa stong phrag bdun cu rtsa gnyis su 'chi ba'i rlung 'jug pa na 'khor lo lnga'i rlung drug cha gcig bzhag ste 'pho ba'o/ /lo brgya'i drug cha ni bcu drug dang zla ba brgyad do/ /'chi ba'i rlung 'jug pa'i rim pa ni 'di lta ste/ lus la dbugs kyi 'khor lo ni dbugs drug go/ / chu srang gi 'khor lo ni chu srang drug cu'o/ /dbyu gu'i 'khor lo ni dbyu gu drug cu'o/ /'chi ltas kyi 'khor lo ni dus kyi 'khor lo gsum gyis zhag stong phrag gcig dang brgyad bcu'o/ /dus su 'chi ba'i 'khor lo ni zhag brgya phrag bcu gcig dang lnga bcu rtsa drug ste de yang lo gsum zhag ni stong phrag gcig dang brgyad cu dang zla ba phyed dang gnyis kyis zhe lnga dang mngal gyi zla ba gcig gi sum cu dang lte ba'i zhag gcig ste de rnams bsdus pa'o//'khor lo 'di dag la 'chi ba'i dbugs kyi tshul dang chu srang gi tshul dang dbyu gu'i tshul dang nyin zhag gi tshul gyis rim gyis 'jug go//gang la lo brgya thub pa 'chi ltas med pa de la skye nas lo phyed gnyis kyi sna bug gnyi ga'ang dbugs dkyil 'khor lnga'i rang bzhin du rgyu'o/ /de nas lo phyed kyi mthar g.yon gyi nam mkhar dbugs gcig mi 'dod pa rgyu'o/ /de nas lo phyed bzhi'i bar mi rgyu'o//de nas lo phyed lnga pa la g.yas pa'i sa'i dkyil 'khor la dbugs gnyis mi 'dod par rgyu'o/ /drug pa la mi rgyu'o/ /bdun pa la g.yon pa'i nam mkhar dbugs gsum mo/ /brgyad pa la mi rgyu'o/ /de ltar dgu pa la g.yas pa'i sa la dbugs bzhi'o/ / bcu pa la mi rgyu'o/ /bcu gcig pa la g.yon gyi nam mkhar dbugs lnga'o/ /bcu gnyis pa la mi rgyu'o/ /bcu gsum pa'i g.yas pa'i sa la dbugs drug rgyu'o/ /bcu bzhi pa la mi rgyu'o/ /de nas dbugs kyi dkyil 'khor gcig ste/ chu srang gcig gis longs ma spyad pa'i zla ba phyed dang gnyis kyis mtshang ba lo bdun song ngo //de'i rjes la lo drug cu'i bar lo phyed pa re re bar du bor zhing g.yon pa'i nam mkha' la lnga bcu rtsa dgu dang sna bug g.yas pa sa'i dkyil 'khor la chu srang drug cu ste/ rA shi 'dab ma drug drug mi mnyam pa dang mnyam pa rnams la'o//chu srang drug cu nyid dbyu gu yin no/ /lo drug bdun gyi rjes la lo sum cu'i bar du zla ba gsum gsum bar du bor zhing dbyu gu'i ngo bos rtsa la rgyu'o/ /lo phyed pa'i phyed gong ma la g.yon pa'i nam mkha' la dbyu gu gcig rgyu'o/ /phyed 'og ma la mi rgyu'o/ /lo phyed pa gnyis ba'i phyed gong ma la sna bug g.yas pa'i sa la dbyu gu gnyis rgyu'o//de ltar zla ba gsum gsum na g.yon pa'i nam mkha' dang g.yas pa'i sa la rA shi 'dab ma drug drug la dbyu gu nga dgu dang drug cu 'chi rtags rgyu'o/ /dbyu gu drug cus nyin zhag gcig go/ /zla ba phyed dang gnyis kyis ma tshang ba'i lo go bdun gyi rjes su nyin zhag gi ngo bos nyin zhag gi//lor re re sngar bzhin rgyu'o/ /zhag lnga pa la rgyu na nyi ma'i tshes la lo gsum lhag ma lus so/ /zhag bcu pa la rgyu na lo gnyis so/ /zhag bco lnga pa la rgyu na lo gcig go/ /zhag nyi shu pa la rgyu na zla ba drug go//zhag nyer lnga rgyu na zla ba gsum mo/ /zhag nyer drug rgyun zla ba gnyis so/ /zhag nyer bdun rgyu na zla ba gcig go/ /nyer brgyad rgyu na zla ba phyed do/ /nyer dgu rgyu na zhag gcig go/ /sum cu rgyu na zhag lnga'o/ /so gcig rgyu na zhag gsum mo/ /so gnyis rgyu na zhag gnyis so/ /so gsum rgyu na zhag gcig lus so//so bzhi rgyu na 'chi'o/ /zhag gi tshogs ni brgya phrag bcu gcig dang nyer lnga sum cu so phyed dang gsum gyis bgos pas thob pa zhag sum cu rtsa phyed dang bzhi dang / dbyu gu so drug dang chu srang nyer lnga dang dbugs gnyis so/ /zhag re re dbyu gu re re lhag par rgyu'o//tha ma rtsa g.yas pa la rgyu ste dus su 'chi ba'i nges pa'o/ /g.yon dang g.yas su dbu ma ni/ stobs dang rdul dang mun pa ste/ 'chi ba ni mun pa'i rgyu ba bzung ste g.yon dang g.yas su rgyu'o/ /da ni dbu ma'i 'chi ltas brjod de tshe lhag ma lo gsum dang zla ba phyed dang gnyis yod pa'i skye bo'i sna bug g.yon par 'chi rtags kyi nyin zhag gcig rgyu la rang bzhin yang zhag gcig rgyu'o//de nas mi 'dod pa zhag gsum dang rang bzhin yang zhag gsum/ yang mi 'dod pa zhag lnga na rang bzhin zhag lnga ste nam mkha'i dkyil 'khor zad do/ /yang mi 'dod pa zhag bdun rang bzhin zhag bdun no//mi 'dod pa dgu rang bzhin zhag dgu'o/ /yang mi 'dod pa bcu gcig rang bzhin bcu gcig ste rlung gi dkyil 'khor zad do/ /de nas mi 'dod pa bcu gsum rang bzhin bcu gsum mo/ /de nas mi 'dod pa bco lnga rang bzhin bco lnga'o/ /de nas mi 'dod pa bcu bdun rang bzhin bcu bdun te me'i dkyil 'khor zad do//de nas mi 'dod pa bcu dgu rang bzhin bcu dgu'o/ /de nas mi 'dod pa nyer gcig rang bzhin nyer gcig go/ /de nas mi 'dod pa nyer gsum rang bzhin nyer gsum ste pa'i dkyil 'khor zad do/ /de nas mi 'dod pa nyer lnga rang bzhin nyer lnga'o/ / de nas mi 'dod pa nyer bdun rang bzhin nyer bdun no/ /de nas mi 'dod pa nyer dgu rang bzhin nyer dgu ste sa'i dkyil 'khor zad do/ /sum cu rtsa gsum de ni snying stobs dang rdul dang mun pa'i dbye bas so/ /de nas sna bug g.yas pa la mi 'dod pa zhag gnyis dang rang bzhin zhag gnyis so/ / mi 'dod pa zhag bzhi dang rang bzhin zhag bzhi'o/ /mi 'dod pa zhag drug dang rang bzhin zhag drug ste sa'i dkyil 'khor zad do/ /mi 'dod pa zhag brgyad dang rang bzhin zhag brgyad/ mi 'dod pa zhag bcu rang bzhin zhag bcu/ mi 'dod pa zhag bcu gnyis rang bzhin zhag bcu gnyis te chu'i dkyil 'khor zad do//mi 'dod pa zhag bcu bzhi rang bzhin bcu bzhi/ mi 'dod pa bcu drug rang bzhin bcu drug /mi 'dod pa bco brgyad rang bzhin bco brgyad de me'i dkyil 'khor zad do/ /mi 'dod pa nyi shu rang bzhin nyi shu/ mi 'dod pa nyer gnyis rang bzhin nyer gnyis so/ / mi 'dod pa nyer bzhi rang bzhin nyer bzhi ste rlung gi dkyil 'khor zad do/ /mi 'dod pa nyer drug rang bzhin nyer drug /mi 'dod pa nyer brgyad rang bzhin nyer brgyad/ mi 'dod pa sum cu rang bzhin sum cu ste nam mkha'i dkyil 'khor zad do/ /de nas g.yon du ye shes kyi dkyil 'khor la mi 'dod pa'i zhag sum cu rang bzhin sum cu ste de nas snying stobs kyi khams zad do//de nas g.yas pa'i rnam shes kyi dkyil 'khor la mi 'dod pa so gnyis rang bzhin so gnyis te rdul gyi khams zad do/ /de nas g.yon du ye shes kyi dkyil 'khor la mi 'dod pa so gsum rang bzhin so gsum ste mun pa'i khams zad do//bad kan gyi rtsa zad pa ni snying stobs kyi khams so/ /mkhris pa'i rtsa zad pa ni rdul gyi khams so/ /rlung gi rtsa zad pa ni mun pa'i khams so/ /de ltar zhag ni brgya phrag bcu gcig dang nyer gnyis so/ /mngal gyi tha ma'i zla ba gcig zad par bya ba'i phyir sna bug g.yas pa la zhag gnyis rgyu'o//dbugs kyi 'khor lo zad par bya ba'i phyir zhag gcig dbu ma nas rgyu'o/ /de dag ni zhag brgya phrag bcu gcig dang nyer lnga'o/ /rtsa g.yon pa'am g.yas pa chad pas mi rgyu na tshe zla ba drug ste gci ba skyur mor 'gyur ro//tshe zhag drug pas sgra mi thos so/ /tshe zhag lnga pas ro mi tshor ro/ /tshe zhag bzhi pas gzugs mi mthong ngo / /tshe zhag gsum pas dri mi tshor ro/ /tshe zhag gnyis pas reg bya mi 'dzin no/ /'chi ba'i dus su sa bon dang dbugs stong ngo / /zhag drug pa'i sna'i rtse mo glang po'i sna ltar 'og tu zhum mo//lag pa mgor bzhag na lag pa mi 'phra'o/ /lag mthil gyis tshos mnyes kyang dmar por mi 'gyur ro/ /nyi ma nag por mthong ngo / /zla ba gang ba ser por mthong ngo / /lce'i 'og tu ri mo nag po 'byung ngo / /mig la nag po dmar po'i dkyil 'khor ri mo phra mo sub par 'gyur ro//dbugs sna bug gnyis kar rgyu'o/ /'gram pa gnyis 'phrig go/ /nu ma'i rtsa gnyis mchan khung gi nang du 'jug go/ /skar ma rnams me stag 'phro bar mthong ngo / /lus dang mgul pa rengs par 'gyur ro/ /lus 'khor ba zhes 'chi ltas shes nas sbyin pa la sogs pa bya'o//'jig rten du byed pa gang yin pa de nyid zad par byed pa yin te de ltar kun gzhi dang nyon mongs pa can gyi yid mngal du khrag dang sa bon la 'jug pa dang skyes pa dang byis pa dang gzhon nu la sogs pa skye bar byed do/ /'chi ba'i dus su de nyid 'od gsal du thams cad 'jug par byed do//gang gi phyir sa bon la sogs pa'i rten la gnas pa'i rnam shes kyis thams cad sdud par byed do/ /gang sdud ce na/ zla ba sa bon dbang phyug dang / khrag nyi ma ste rtag tu dge ba dang / rkang mar drag po dang / gci ba khyab 'jug dang / bshang ba tshangs pa dang sa la sogs pa'i 'byung ba rnams te mngal na gnas pa rnam shes kyis 'di dag sdud par byed do//lte ba'i rtsa'i sgo nas lus ngag yid gsum skyes pa'i phyir de dag thams cad lus la 'dus te yan lag skyed byed do/ /dbugs kyis lte ba nas 'thon par byed do/ /slar yang spyi gtsug la sogs pa drug la sdud par byed do//rnal 'byor gyi sems ni bshang ba dang gci ba la sogs pa'i khams lus la gnas nas 'ju ba dang gsod pa la sogs pa sdud par byed do/ /slar yang rgyu lugs sna tshogs kyis gzugs nyid byed do/ /yang na 'chi ba'i dus su bsdus nas nyon mongs ba dang las rnam pa sna tshogs pa'i dbang gis skye ba phyi ma sna tshogs byed do//lus rdzogs pa na yul drug ni gzung bya dang dbang po drug dang lo dang zla ba dang phyogs nyin mo la sogs pa'i byed pa'o/ /'on 'di ni kun rdzob pa yin pa'i phyir byed pa po la sogs par mi 'grub ste byed pa po la sogs pa 'di dag gzhan sdud pa yod de de yang lhan cig skyes pa'i sku don dam pa'o zhes ni gzhan zer ro//de ni ma yin te/ gang gi tshe sdug bsngal gyi phung po nga rgyal tsam bdag ma yin te/ des ni mi rtag pa sdug bsngal ba/ stong pa/ bdag med pa'i phung po la sogs pa la yid du 'ong ba la sogs par sgro btags nas 'dod chags la sogs pa'i 'ching bas dar gyi srin bu ltar 'ching bar byed do//rnam par mi rtog pa'i ye shes bskyed nas rtog pa'i dra ba 'joms te grol bar byed do/ /de bas na byed pa po la sogs pa gang yang med do/ /'khor ba'i sems kyi rang bzhin ni brgyad da/ sa la sogs pa lnga dang yid dang blo dang nga rgyal lo/ /de yang gsum ste/ snying stobs la sogs pa'i yon tan gyi dbye bas so/ /de la rags pa dang phra ba dang gzhan dang bzhi pa ste/ de la rags pa ni bems po'i bag chags can rags par zhen pa rnams la sad pa'i dngos pos gzung ba'i phyir gnas skabs so//phra ba ni rmi lam gyi gnas skabs te yid kyi dbang pos sgyu ma'i dngos po bzung ba'o/ /gzhan ni shin tu gnyid log pa'i gnas skabs te dbang po thams cad 'gags pa'i phyir ro/ /bzhi pa ni ye shes kyi sku ste skye ba 'gog pa'i rgyu chos kyi dbyings kyi rang bzhin no//'dir lta ba log pa ni 'khor ba dang / rgyu bdag yin pa dang / rgyu mi mthun pa dbang phyug gis 'khor ba byas zhes pa'o/ /sa bon las myu gu ltar rgyu tshogs pa las 'bras bu 'byung ba dang / pha ma la sogs pa phan 'dogs pa'i zhing dang / rdzogs pa'i sangs rgyas la sogs pa yon tan gyi zhing dang /rgyu 'bras mi slu ba la yid ches pa ni 'jig rten pa'i yang dag pa'i lta ba dang / gang zag chos kyi bdag med byang chub kyi rgyud yid ches pa ni 'jig rten las 'das pa'i lta ba bskyed par bya'o/ /dran pa nye bar gzhag pa las/ rang gi dge dang mi dge'i las//lus ngag yid kyi byed pa gang / /'jig rten pa de 'bras la longs spyod/ /byed pa po gzhan gang yang med/ /ces gsungs pa'i phyir grol ba dang 'ching ba yang rtog pa tsam ste/ de yang rtog med kyi mnyam gzhag la mi 'byung ngo / /ji ltar chu len pa'i phyir bum pa khyer ba na nang du yod pa'i nam mkhar mi 'gro ste/de ci yang min pa'i phyir/ de ltar sems kyi chos mi skye mi 'gag mi 'byung mi rgas so/ /'chi ba'i dus su snying stobs zhing ba'i sems kyis 'chi ba na lhar skye'o/ /mun pa'am/ drag po'i sems kyis dmyal bar skye'o/ /mi dge ba 'bring po rdul gyi sems kyis dud 'gror skye'o//dge mi dge 'dres mas mir skye'o/ /yon tan gsum 'dres pa las snying stobs lhag na yi dags bzang por skye'o/ /rdul lhag na bar mar ro/ /mun pa lhag na dman par ro/ /lha ma yin ni lhar 'dus so/ /mi ni snying stobs lhag na bde ba dang ldan no//rdul lhag na bde sdug can no/ /mun pa lhag na rtag tu sdug bsngal lo/ /de ltar mtho ris su skye ba ni rnam pa brgyad de/ sa dang chu dang me dang rlung dang nam mkha' dang nyi zla dang sgra gcan gyis zad par bsgom pa dang / sbyin pa dang tshul khrims la sogs pa'i stobs kyis so/ / phung po bdag tu bzung ba dang longs spyod bdag tu bzung bas rigs drug tu 'khor ro/ /bslab pa'i mdo sde dang / rtogs pa'i shes bya dang / sgra byA ka ra Na dang / ts+tshan+da dang / nges tshig dang / rtsis te yan lag drug dang ldan pa'i rig byed ni ma rig pa'o/ /dran pa rnams ni shed bu la sogs pa'o//rtog pa ni 'jig rten gyi rtog pa'o/ /dkyil 'khor 'khor lo la sogs pa bsgom pa ni rtog bcas so/ /rgyas pa'i snyan dang gas ni b+ha ra thA'o/ /sna tshogs zos pa'i snyan dang gas ni bsgom pa'i chos so/ /grogs mo'i snyan dang gas ni rA ma Na'o/ /bdud mda'i snyan dang gas ni lo rgyus kyi chos te 'di dag rigs pa ma yin no//nang gi rig pa ni rnam pa thams cad dang ldan pa ni stong pa nyid zag pa med pa'i bdag nyid dmigs pa med pa'i snying rje rgyu dang 'bras bu gcig tu gyur pa gang las khams gsum skye ba ngang thim pa'o/ /de la goms pa'i rnal 'byor pa 'bras bu ma thob par 'chi na byang chub sems dpa'i rigs su skye zhing dang por goms pas dka' ba med par de'i ye shes thob bo//de nas ma nyams pa'i go 'phang thob bo/ /'chi ba'i dus su yang sngar byas pa'i dge ba'i mthus zhen pa mtha' dag dang bral ba'i sems kyis 'chi na lhar skye'o//gang gi phyir gang la zhen pa de nyid du skye'o/ /ye shes skye ba dang longs spyad pa'i dus ni nyi ma phyed nas nam phyed kyi bar ro/ /gang goms pas nyi ma ltar gyen du rgyu'o/ /mtho ris su 'gro ba'i lam ni snang ba dang bcas pa'o/ /gang zhig chos gang la 'jug pa'i brtul zhugs dang smyung gnas la dga' ba de'i chos la mngon par zhen pa de ni 'ching ba'o//'dod pa dang gzugs dang gzugs med pa'i bag chags dang bde ba la sogs pa'i tshor ba ji srid yod pa de srid du kun gzhi'i rnam shes ni srid par 'khor ro/ /zla ba nyi ma'i 'chi ltas kyi rtsa chad pa ni sna bug g.yon dang g.yas su zhag sum cu so gnyis kyi bar ro//dus su 'chi ba la yang zhag so gsum gyis lus ngag yid gsum dang phung po khams dang dbang po la sogs pa stong par ro/ /de nas rkyang ma dang ro ma spangs nas srog rlung zhag gcig dbu mar zhugs te dbu ma'i nang du dus kyi rlung gis mnan pas lte bar sgra la sogs pa'i yon tan lnga dang ldan pa stong ste sa 'chad par 'gyur ro//snying gar yon tan bzhi dang ldan pa'i chu yang ngo / /de chad par byas nas mgrin par yon tan gsum dang ldan pa'i me bcad de/ dpral bar yon tan gnyis dang ldan pa'i rlung btang nas/spyi gtsug tu yon tan gcig dang ldan pa'i nam mkha' gtong ngo / /de ltar srog rlung gis gyen du khams gtong lugs so/ /lus kyi thig le'i chos can thur sel 'og tu gtong ste/ sad pa'i gnas skabs zad do/ /gsang gnas su ngag gi thig le'i chos can gtong ste rmi lam gyi gnas skabs zad do//nor bus sems kyi thig le'i chos can gtong ste shin tu gnyid log pa'i gnas skabs zad do/ /de ltar gyen du yang snying mgul dpral bar rdul gyi thig le rnams srog gis gtong ste lus la sogs pa 'chad do/ /tha mar drug pa'i ye shes kyi khams gtong ngo //yan lag kun las sa bon 'og tu gtong ba dang / rdul gyen du 'gro ba ste bzhi pa'i gnas skabs zad do/ /de ltar mngal las skyes pa rnams 'chi'o/ /des na 'jig rten byed dang / 'jig rten las 'das pa bsgrub pa'i phyir lus kyi srung ba bshad de/ lte ba snying gam gul pa dang //dpral ba spyi gtsug pad+ma la/ /sa chu me rlung nam mkha' rnams/ /sdud par rab tu rgyu ba yin/ /phyi ru 'byung dang nang du bsdu/ /de ni skyed pas sa la 'jug /srog gi nus pa ni sdud pas phyir 'byung la skyed pas nang du 'jug go/ /thur sel gyi nus pa yang / lte ba gsang gnas nor bu'i nang //lus ngag yid ni rim gyis rgyu/ /phyi ru 'byung dang nang rgyu la/ /sdud dang skyed pa'i rang bzhin no/ /zhes dbang mdor bsdus las so/ /de bas sangs rgyas kyi rang bzhin lus bsrung bar bya'o/ /lus med na sgrub pa yang med pas zag pa med pa'i bde ba yang med do/ /byang sems bsrung ba'i phyir rtsa'i rnal 'byor ni rkyang ma dang ro ma nas dbu mar srog rlung bsgom pa dang /thur sel dung can ma bsgom par bya'o/ /'jig rten las 'das pa bsgrub pa'i phyir stong pa la du ba la sogs pa'i lam bla ma la bslabs te sna tshogs gzugs brnyan gyi bar du bsgom par bya'o//de nas rtsa'i 'khor lo re rer srog dang thur sel la brten par bya'o/ /de nas sgra gcan ltar byang sems 'gog par bya'o/ /srog dang thur sel sbyor nus pa'i rnal 'byor gyis lo gsum dang zla ba phyed pa gsum la phyag rgya chen po bsgrub bo/ /dus ma yin pa'i 'chi ba'i mtshan nyid ltar shes nas//skyed dang sdud pa la gnas pa'i srog dang thur sel bkag la dbu mar sgra gcan dang dus kyi me'i nang du srog dang thur sel 'jug par bya'o/ /nyin zhag gcig dbu ma'i nang du rgyu bar nus na dus ma yin par 'chi ba slu bar byed do/ /de ltar ma nus na btsan thabs kyis kyang bya'o/ / lte bar re bzhi dang gnas kyi phyi rol gyi bcu drug gis rlung skyed do/ /'di dag khams snyoms par bya ba'i phyir dang rlung dang gzer zhi bar bya ba'i phyir thur sel bsdam par bya'o/ /dpral bar bcu drug dang spyi gtsug tu bzhi ste nyi shus ni bad kan skyed do/ /de dag khams snyoms par bya ba'i phyir srog rlung gi rtsol bas bsdam par bya'o//thog mar srog rlung dang thur sel lan gsum bus la lce chung la bzhag ste/ phyi rol gyi rlung yid kyis drangs shing bdud rtsi 'thungs pas mkhris pa zhi bar byed do/ /snying gar brgyad dang mgul par so gnyis ni mkhris pa skyed do/ /gsang gnas kyi bcu ni 'dus pa skyed do//de dag snyoms par bya ba'i phyir srog dang thur sel bsdam par bya'o/ /tshad pa la yang ngo / /gang gi phyir srog ni lte ba nas gyen du rgyu ba dang / thur sel 'og tu rgyu ba 'gog pa des rlung la sogs pa'i skyon thams cad sel lo/ /bshang ba dang / gci ba sa bon gyi lam 'og tu thur sel bsdams nas zla ba dang /nyi ma dang me'i khams gyen du srog bsdams te de gnyis kha sbyar bas 'pho ba'i mes lus khyab cing dmu chu dang / mchin nad dang gzhang 'brum dang / dbugs mi bde ba dang glo nad dang brtan pa dang g.yo ba dang bcos ma'i dug dang mig nad dang klad gzer 'joms par byed do//brla g.yas par rkang pa g.yon pa dang / brla g.yon par rkang pa g.yas pa ste/ rdo rje'i skyil krung bcas pa la lag pa g.yon pa rgyab tu song bas rkang pa g.yon pa'i mthe bong dang g.yas pa'i mthe bong bzung bas dbugs bzung na rgyab kyi gzer 'joms par byed do//rkang pa gnyis gyen du mgo 'og tu byas la srog 'gog pas bad kan 'joms so/ /gci ba dor ban srog rlung bsdams shing cung zad re stong pa goms pas chu 'gag zhi'o/ /snga dro gdong pa ma bkrus par ming med gnyis kyis so'i phreng mnyes pas mig gnyis la bskus pa dang chu lcag brgyab pas mig nad sel lo//gan rkyal du nyal te lag pa g.yon pas lte ba mnan nas srog rlung bzung bas ma zhu ba'i gzer ba 'joms so/ /'bras la sogs pa byung ba'i dus su mar dang tshwar ru gtums pas bdugs na 'phel ba 'joms so/ / arga'i 'o ma byugs pas kyang bya'o/ /kaN+Da ka ri'i me la bzhag pa'i dud pas gang ba'i sbubs so la yun ring por bdugs pas so'i srin bu dang bcas pa'i gzer 'joms so/ /du ba la sogs pa'i mtshan ma dang srog rtsol gyis ma nyams pa'i bsgrub pa la phyag rgya'i sbyor bas 'bab pa'i byang sems bde ba dam pa yang dang yang du bkag ste zla ba drug gis dkar mdze 'joms par byed do//stobs med na sha dang chang longs spyod cing lo bcu drug ma bsten pas rlung bum pa can gyis nges par 'joms so/ /lo bdun cu'i rgas pa gnyer ma dang skra dkar po dang bcas pa lo gnyis kyis so//de rjes lo gsum dang zla ba phyed gsum gyis phyag rgya chen po 'grub bo/ /bum pa can ni de srid du byed de ji srid snying tsha ba dang mgon ba mi 'byung ngo / /de'i phyis kyang byed na srog ni brgyal ba dang ma non pas spyi gtsug gas te 'gro'o/ /phyag rgya yang bde ba chen po bsgom pa'i don du yin gyi 'dod chags zad phyir ma yin no//myos byed ni rgyal ba thams cad kyi bdag nyid phung po la sogs pa tshim par byed pa'i phyir te myos par byed pa'i phyir ma yin no/ /sha la sogs pa'i bza' ba ni bde ba 'phel bar byed pa'i phyir te/ ma zhu ba'i phyir ma yin no/ / mtshan mo dur khrod du 'gro ba ni spyod pa sgrub pa'i phyir te rtsed mo'i phyir ma yin no/ /mi bskyod pa cung zad dron po pi pi ling gi phye ma dang bsres te khar bcug ste bzung ba na kha'i nad dang so'i gzer dang srin bu sel lo/ /snga dro mi bskyod pa tsha ba gsum dang bsres pa sna bug tu blugs pas mgo na ba sel lo//lci ba dron mo rna bug tu blugs te bzhag na rna ba'i nad sel lo/ /de grang mos mig nad sel lo/ /mi bskyod pa tsha ba gsum dang bsres pa sna bug tu blugs pas 'byung po la sogs pa'i gnod pa sel lo/ /dug sbrul gyis zin pa la yang ngo / /nang du bshang ba ni phyi rol du mu zi ste de gnyis mnyam mo//nang du dri chu ni phyi rol du b+h+r-iM ga rA dza'i khu ba'o/ /nang du bud med kyi zla mtshan ni phyir lhang tsher ro/ /khu ba ni phyir dngul chu'o/ /nang du sha dang rkang mar ni phyi rol du 'bras bu gsum mo/ /bshang ba cha gcig la ni bzhi cha gcig med pa'i cha gcig /khrag ni cha phyed sa bon bzhi cha gcig ste thams cad phye mar btags te lci bas sbrus te lan bdun du nyi ma la bskam par bya'o/ /de nas zhag re rer srang phyed phyed mar dang sbrang rtsi bsres te zla ba drug gi bar du zos na tshe ring bar 'gyur ro/ /lo ma dang skyur ba dang tsha ba dang mar nag spang bar bya ste/bdud rtsi lnga bsten pa'i cho ga'o/ /dbu mar srog rlung bkug la ke sa ra dza dang b+h+r-iM ga rA dza'i khu ba dang mnyam po'i zla mtshan sna bug tu zla ba drug blugs pas skra dkar ba dang bcas pa'i rgas pa 'joms so/ /ba lang / khyi/ glang po che/ rta/ mi'i sha rnams sbrang chang dang sbrang gis bsres te zla ba drug tu zos na nad thams cad sel lo//ke sar dza dang / b+h+r-iM ga rA dza'i khu ba dngul chu dang / byang sems dkar dmar gnyis dang thams cad mnyam par srang phyed phyed lo gcig gi bar zos na rgas pa 'joms pa ste lo ma dang skyur po la sogs pa spangs nas so/ / tshwa dang bcas pa'i skyur po 'thungs pas na rlung sel lo/ /ka ra la sogs pa mngar bas ni mkhris pa sel lo/ /bska bas ni bad kan sel lo/ /tsha ba gsum dang bcas pa'i khu ba yang ngo / /tsha ba gsum dang bcas pa'i ra'i 'o ma 'thungs pa dang / sna bug tu blugs pas bad kan sel lo//ka ra dang bcas pa'i ma he'i 'o mas mkhris pa sel lo/ /rnga mo'i 'o ma rgyam tsha dang bcas na rlung sel lo/ /ba'i 'o ma tsha ba gsum dang bcas na bad kan sel lo/ /ka ra dang bcas pas mkhris pa sel lo/ /rgyam tshwa dang bcas pas rlung sel lo/ /tshad pa med pa la mar yang ngo //dzA ti'i lo ma de'i brgyad 'gyur chu la bskol te bzhi cha gcig cung zad dro ba khar bzhag na so'i nad dang kha nad sel lo/ /til mar gyi khu ba dang ra'i chu mnyam por bskol te til mar tsam lhag mar bzhag ste tshwa dang tsha ba gsum de'i bzhi cha gcig der bsres la grang mo rna ba'i nang du bzhag ban rna ba'i nad sel lo//ba'i mar de brgyad 'gyur 'o ma dang bskol nas nA ga ge sar gur gum gyi phye ma dang bsres la sna bug tu blugs pas sna'i nad sel lo/ /pAny+dza kaM ko li dang / laM ka li dang / in+d+ri dang / in+d+ra ba ru ni dang / tig ta rnams bong bu'i chus btags te byugs pas 'bras mang po 'joms so//'brum bu'i nad la dang po tsha ba dang rkang lag gi tshigs dang mgo bo na ba'o/ /de shes nas bu ga med pa'i khang par rkang pa gnyis mnyam par langs te lag pa gnyis brla la thug par thur du dpyangs te ma 'gyel gyi bar du bum pa can bsgoms te tshad pa las grol ba'i bar ro//snying ga'i zla ba las phreM yig dkar po las byung ba sna tshogs yum mam gzugs rdo rje ma zhal gcig phyag gnyis la rdo rje/ pad+ma dang zla ba la rdo rje skyil krung du bzhugs pa/ g.yon gyi thugs kar pad+ma dkar po'i yu ba bsnams pa/ g.yas pa mchog sbyin can srog rtsol gyis bsgom par bya'o//sran chung btags te chu grang mo dang bsres te btung ngo / /zhag gsum pa la 'brum pa skye ba na/ 'brum pas shi ba'i thod pa'am gzhan bdar la mi bskyod pa bsres te btung ngo / /oM phreM bi shwa mA trai badzra kaN+Da ki nA sha ya nA sha ya che ge mo shAn+tiM ku ru swA hA/sngags 'dis yams drug dang gnod pa rnams la/ bdag dang gzhan bsrung ba'i phyir bzlas pa bya'o/ /sman la yang lan bdun du bsngags par bya'o/ /'dis dpral ba snying ga mgul pa lte ba gsang gnas spyi gtsug tu thun gsum bsrung bar bya'o/ /'byung bos bzung ba la tsha ba gsum dang bsres la mi bskyod pa 'thungs na zhi ba'o//da ni bcud len brjod de/ gser srang gnyis sbyangs pa dang / zangs ma lcags kan+ti dang / lhang tsher lcags kan+ti/ k+Sha ti de dag cha mnyam par srang gnyis mu zi kha ma bkab pa la sman de dag gi bar kun du su bar+Na ma k+Shi ka'i phye ma spang gnyis blugs te me drag po la bskol te gser gnas pa'i bar du'o//dngul chu srang bzhi la yung ba ma bcas pa dang so phag gi phye ma dang lhang tsher ras la lan bdun btsags la gser de dang bsres pa'i 'dag pa srang drug byas te ba'i dar ba mar med pa me drag po la bskol te ras la btsags nas tshigs ma dor te chur khu de khab len gyi snod la gser gyi 'dag pa dang bskol te srang gsum lus pa'i bar ro//de ni zla ba drug gi zhag grangs dang mnyam par bskol te/ ka ra phye ma 'dag pa srang brgyad dang / pho ba'i me drod dang cha mthun par bdun nam dgu la sogs pa dang de'i drug cu cha gcig gis pho ba ris kyi phye ma dang bsres te bza' bar bya'o//zas gzhan spang bar bya'o/ /zla ba drug gis lha'i lus dang 'dra ba'i rgas pa dang gnyer ma dang 'chi med 'grub bo/ /sman rdzogs pa dang ji srid 'tsho'i bar du ka ra phye ma cig bsres pa'i khur ni bza' bar bya'o//da ni gser gyi phyed bsgyur brjod de/ bshad ma thag pa'i sa bon dngul chu de dang mnyam por bsres te tshwa dang skyur po dang tshwa'i rigs gzhan yang bsnur ji srid 'dres kyi bar ro/ /de nas mu zi dang / lhang tsher dang / ldong ros dang / ba bla dang / zha nye dang / ka k+Shi dang / ka shi sha dang / dbyig dang / gser gyi btsag ste 'di dag cha mnyam par cha gnyis gong gi sman cha gcig dang gsum dngul chu dang cha mnyam pa'i nya'i mkhris pa pi dza pU ra la sogs pa'i skyur por bsnur la de nas dngul gyi lab leb la bskus te zhag gsum gyi bar du thab kyi 'og tu bzhag la thab kyi mes btsos pas gser du 'gyur ro//de'i phyed gser dang 'dres pas gser gyi phyed bsgyur ba yin no/ /da ni 'dra min brjod par bya ste/ tIk+Sha na dang lhang tsher ni shing b+ha tri'i 'o mas spangs pas zhu ba dang ba bla dang rgya tsha dang ya bak+Sha ra dang / spos dkar te/tI k+Sha na la sogs pa rim gyis gcig gnyis gsum bzhi lnga drug gi bar du cha je mang byas te thams cad bsres pa de zangs nyis 'gyur dang lugs kong gi nang du kha bkab la bskol nas/ yang kha phye nas bskol te zangs lus pa'i bar ro/ /de cha las dag par byas te cung zad snyi bar 'gyur ro//arga'i rtsa ba dang / da dur ser po'i rtsa ba dang / e raN+Da'i rtsa ba dang / k+Shi ra kaM tsug gi rtsa ba ste cha mnyam par btags pa'i dar ba la zhag bdun gyi bar du gzhag go/ /de nas bcu gnyis pa de gong ma'i nang du blugs te shin tu snyi bar gyur gyi bar du gzhag bar bya'o//de cha gcig dngul cha gnyis dang bsres la 'dra min byas te dag par 'gyur ro zhes 'dra min gyi nges pa'o/ /de ni chos pa rnams kyi 'tsho ba'i phyir ro/ /chos pa'i kun rdzob ni sgyu ma lta bu'i dbu ma yin la/ don dam pa ni rab tu mi gnas pa'o/ /rdul phra rab ni rig pas ma grab pas sems pa'i dngos po smra bar 'dod pa mi 'grub ste//'di ltar bum pa la sogs pa'i dngos po gcig tu ma grub ste/ steng 'og phyogs bcu'i dbye ba du mar gyur pa'i phyir ro/ /cha shas yod par 'dod na/ drug gis cig car sbyang ba na/ /phra rab rdul cha drug tu 'gyur//cha shas med par 'dod na/ drug po dag ni go cig na/ gong bu'ang rdul phran tsam du 'gyur/ /cha shas med na thogs pa med pa'i phyir phan tshun du thim mo/ khams gsum rnam shes tsam smra ba la brjod de rnam shes tsam yod de/ don med na ci snang rnam shes tsam las phyi rol gyi don med na ci ste snang zhing 'dug /smras pa/ bag chags kyi dbang gis so/ /ji ltar rmi lam du med kyang snang ba bzhin no/ /brjod pa/ nyin mor mthong ba rmi lam snang / /dngos po yod pa'i phyir ro/ /gang la don ni gtan nas med/ /rnal 'byor spyod pa la'o/ /de la bag chags gang la 'byung //dngos po gtan med pa yi phyir/ /dngos po'i bag chags gang las 'byung / /smras pa ma rig pa las so/ /brjod pa 'khor ba ma lus de yin no/ /dngos po bag chags 'ba' zhig tu ma zad 'on kyang gnyis ka 'dod pa'i 'gro ba ma lus pa ma rig par grub ste/ /phyi rol nyid du snang ba'i phyir ro//rnam shes de ni don dam 'dod/ /ma rig dang bral ga la srid/ /'gro ba ma lus rnam shes tsam du khyod 'dod la/ rnam shes te de yang don dam la yin pas ma rig pa dang bral ba'i dus khyed la gtan nas mi srid do/ /da ni rnam shes tshe rabs tshe rabs su mi 'dod pa'i rgyang pan pa smra ste/'byung ba lnga ni yongs smin pas/ /smyon pas nus bzhin sems byung ngo / /byung ba rnams kho na sems su 'gyur te/ chang las sngar med kyang yongs su smin pa'i tshe smyo bar byed pa'i nus pa skye ba bzhin no/ /de ltar mngal dus la sogs pa yongs su smin pa las sems byung ste skye ba phyi ma dang thar pa med/brjod pa/ kye sdig can gal te 'byung ba rnams las sems sogs pa byung na de'i tshe ni shing dang lcags la sogs pa yang sa la sogs pa byung ba rnams yongs su smin pa yod pas/ de dang sbyor bas dam bcas yin/ /shing la sogs par cis mi 'byung / / sems can la dbang bo dang bcas pa'i sems yod pa de bzhin du shing la sogs pa la yang 'byung bar 'gyur te/ long bas nyi zla la sogs kyi gzi brjid de phung po ma mthong bas/ de med ces ni smras na yang / /de la su zhig yid ches 'gyur/ /stong pa nyid ltar thams cad las/ / phyir 'byung las ni rgyas par gsungs/ /gang gi lta ba stong nyid de/ /de ni grol bya min par bshad/ /nang gi rgyud don zab mo las/ /nang gi snye ma phyung bris las/ /byung ba'i dge bas 'gro ba kun/ /nang la mkhas shing rgyal bar 'gyur/ /nang gi snye ma zhes bya ba/ /rgya gar shar phyogs kyi dza gat+ta la'i paN+Di chen po bi b+hU ti tsan+d+ras phyogs gcig tu mdzad pa rdzogs so/

CLOSE WINDOW