CLOSE WINDOW

D1368
བོད་ཡིག

gnyal gyi lo tsA ba mi mnyam bzang pos bsgyur ba'o// @##/ /rgya gar skad du/ Sha Dang+ga yo ga TI kA/ bod skad du/ sbyor ba yan lag drug pa'i 'grel pa/ dpal dus kyi 'khor lo la phyag 'tshal lo/ /dus kyi 'khor lo'i dbang phyug dang //yon tan che ba'i bla ma la/ /btud de sbyor ba drug pa yi/ /yon tan rdzogs byed 'grel pa brtsam/ /'dir phyi nang gi rim pa la sbyangs pa'i thugs dang ldan pa'i slob dpon dpe med 'tsho dmigs pa'i de kho na nyid bsgom zhing / dpal khar+sa pa Ni'i drung du lo bcu gnyis bzhugs kyang rtogs pa'i khyad par ma thob pas yi chad nas gnyid du song ba la rdo rje rnal 'byor mas gsung byung ste/bu bi kra ma pU ra ra song shig /der khyod la rtogs pa'i khyad par 'byung bar 'gyur zhes so/ /des de'i bka' spyi bor bzhag nas/ slob ma tshod dpon gyi bu paN+Di ta chen po dpal 'dzin dang bi kra ma pU rar gshegs so//der dus bzang por dge sbyor la bzhugs pa la nam phyed la a ba d+hU tI'i tshul gyi rdo rje 'chang gis dngos su gdams/ de'i gdams pa thob pa tsam gyis ting nge 'dzin la snyoms par zhugs so/ /de nas bcom ldan 'das de nyid du mi snang bar gyur/ nam langs pa dang de 'ang ting nge 'dzin las langs nas bdag nyid chen po bla ma de'i grogs mdzad pa'i dpal 'dzin pa la gdams pa gnang ngo //des kyang thugs rje dang skal par ldan par paN+Di ta chen po 'od byed lha la gnang / des kyang paN+Di ta chen po'i bla ma snyigs ma'i dus kyi thams cad mkhyen pa chos kyi 'byung gnas zhi ba la bshad/ des kyang brjod du med pa'i yon tan gyi 'byung gnas kyi bla ma mnyes par byed pa la brtson pa nyi ma dpal bdag gis de kho na nyid thob bo//'di ni bla ma'i brgyud pa'o/ /de ltar slob mas gsol ba btab pa'i dbang gis slob dpon dpe med 'tsho des rdo rje 'dzin pa'i sa go 'phang thob pa'i rgyu sbyor ba yan lag drug pa byed par 'dod pas rang gi yi dam la bstod pa byed pa'i sgo nas yan lag drug pa brjod de/sgrib pa la sogs pa'o/ /de kho na nyid la bsgribs pas sgrib pa nyid kho na sprin gyi tshogs te de dang bral bas grangs ma lus pa rtogs pa dang / dbugs rlung 'gags pas mthar thug pa'i bar snang la 'char ba spyan ras gzigs ni sangs rgyas te/de kho na gang ba'i zla ba yin pas skye bo rnams dga' bar byed pas mdzes pa'o/ /nges don gyi gzung 'dzin gyi sgro btags pa dang bral ba ste/ 'dis so sor rtog pa dang bsam gtan gyi yan lag bshad do/ /grangs ma lus pa'i rtog pa ni chags pa dang bcas pa'i sems kyi skad cig stong phrag brgyad cu rtsa bzhi'i mtshan nyid can dang /'byung ba dang / rngub pa'i rlung 'gags pa'i bar snang du rnam pa thams cad du mthong ba'i sna tshogs gzugs 'dis srog rtsol dang / 'dzin pa dang / rjes su dran pa bshad de/ 'char ba'i gtum mo la reg pas bde ba chen po'i 'khor lo las so/ /sangs rgyas thams cad kyi spyi gtsug dang rdo rje'i rtse mos 'dzin pas 'jig rten dbang phyug /dga' ba bcu drug gis gang ba'i zla ba de lta bur mdzes pa'o/ /'dis ting nge 'dzin gyi yan lag bshad do/ /da ni yan lag drug pa'i bya ba 'gal tshabs can du bshad do/ /srid zhi la sogs pa'o/ /srid pa ni skye ba dang / 'chi ba'i rgyun kun rdzob dang /zhi ba ni don dam pa'i bden pa ste/ de gnyis kyi dmigs pa dang bral yang de gnyis las tha mi dad pas zung du 'jug pa'o/ /khams gsum la khyab pas khyab byed/ stong pa/ shin tu stong pa/ stong nyid chen po/ thams cad stong pas stong pa'o/ /me long gi gzugs brnyan lta bu'i rnam pa thams cad dang ldan pa'o//rtog pa med pa'i ye shes mthar thug gi gnas skabs pa ste/ de'i dbang phyug bcu gnyis pa'o/ /rab tu mi gnas ni dmigs pa la mi chags pas so/ /g.yo med ni ma nyams pas so/ /gnyis dang bral bas rtog med/ mkhas pa ni rtog med kyi ye shes rtogs pa la 'dod pa'i yon tan lnga'i bde ba ma nyams pa ston pa'o//sems min ni rtog pa 'gag pa'i sems so/ /de las 'char bas 'gro bas bsten bar bya bas mgon te/ des 'gro ba dag gi sems byin gyis rlob par smon pa'o/ /yod pa'i yon tan brjod pa sngon du 'gro bas bla ma la phyag 'tshal ba bshad de yod rtog la sogs pa'o//cung zad kyang yod par rtog na rtag pa'i mthar 'gyur te/ de yang ma brtags par dor na chad pa'i mtha' ste bskal pa du mar mnar med du sdug bsngal myong ba'i rgyu'o/ /de ltar dam pa'i lam subs par gyur pa las dpal ldan bla ma gang gis sems las 'das pa sems ma yin pa'i sems kyi rang bzhin stong par sdug bsngal la sogs pa'i rnam pa thams cad dang ldan pa/nam mkha'i gzugs brnyan ni sna tshogs pa'i gzugs slob ma dam pa la ston par byed pa'i bla ma de la rab tu dga' bar byed pas lus ngag yid kyi sgo nas phyag 'tshal lo/ / 'o na bla ma'i drin kho nas lam dam pa thob na de rang la bsngags pas mchog gi yan lag drug pa brjod pas ci bya zhe na/ smras pa/ de lta la sogs pa'o/ /ji lta ba'i lam ston pa po'i bla ma'i yon tan brjod pa ni rang gi rtog pa brjod pa kho na ste/ gang gi phyir 'bar ba'i me med na du ba 'byung ba gsal bar mthong ba mi srid pa bzhin no//'o na nga rgyal zhi ba'i rgyu de kho na nyid kyi lam rtogs pa nyid la bdag de kho na nyid rig pa'o zhes nga rgyal mi rigs she na/ smras pa/ rtogs brjod la sogs pa'o/ /bdag gi rtog pa'i nga rgyal 'di skyon du mi 'gyur te/ gang gi phyi thar pa 'dod pa rnams 'jug par byed pas gzhan don gyi rgyu/rnyed pa la sogs pa'i phyir ni ma yin no/ /gang gi phyir ston pa pos ma nges pa'i dngos po la 'dod pa'i don bsgrub pa'i phyir skye bo rnams mi 'jug pa'o/ /da ni rgyud kyi byung tshul bshad de/ so so skye bos byas pa'i 'grel pas rgyud kun gyi drang don rtogs pas khengs pa'i sngags pa rnams kun rdzob dang don dam pa'i dbye bas mi shes pas lam la 'khrul pa/gzugs kyi phung po ni rnam par snang mdzad yin zhes pa la sogs pas 'jug pa rnam par snang mdzad kyi tshig gis gzugs kyi phung bo stong par bstan pas gzugs bkag par mi rtog pa de kho na nyid rtogs par bya ba'i phyir dpal rdo rje 'chang gi bkas byang chub sems dpa' sems dpa' chen po 'jam dpal gyi sbrul ba sham+b+ha la'i rgyal pos bka' bsdus pa'i sgo nas dus kyi 'khor lo'i rgyud phyi ma gsungs/'dis ston pa bo dang / bka' sdud pa po dang / don gyi zhu ba po phyag na rdo rje'i sprul pa rgyal po zla bzangs yin pas/ rgyud kyi che ba brjod do/ /rgyud gang la 'jig rten dbang phyug gi sprul pa pad+ma dkar pos don thams cad gsal bar byed pa'i dri ma med pa'i 'od ces bya ba'i 'grel pa mdzad/des gsal bar byas pa sangs rgyas rin po che'i thugs dam pa'i lam gyi dam pa bsod nams bsags pa rnams kyis bla ma las thob nas nges don bdud rtsi ston pas dga' ba bzhi'i bdud rtsis srid pa'i du gsal zhing /ma nyams pa'i bde bas rol pa 'dis bshad pa po'i che ba brjod do/ /slar yang rgyud kyi rgyal po'i bsngags pa brjod de/ gang du la sogs pa'o/ /shes bya'i tshogs thams cad phyi nang gi rig pa'i gnas kyi rten la/ dang po'i sangs rgyas las ma gsungs pa gang yin pa de ni med do zhes gsungs pa'i phyir ro//rgyud kyi rgyal po gang la sangs rgyas bcom ldan 'das la thams cad mkhyen pa zhes mtshan don dang ldan par bstan/ /yang de kho na nyid rin po che'i 'byung gnas gang la dbang phyug la sogs pa'i tshig snying po med pas rtswa dang 'dra'o/ /shes rab kyi pha rol tu phyin pa chos stong pa rtogs pas nam mkha' las byung ba ni sna tshogs gzugs las byung ba'i sangs rgyas kyi yum gyis skye bar 'gyur ba ni rtogs pa'i tshogs ma lus pa slar mi 'byung ba'i tshul du 'joms par mdzad do//da ni du ba la sogs pa'i mtshan ma ste ba'i rgyu yin la gdug pa'i rten bla ma'i gdams pa bshad de//gang du la sogs pa'o/ /rgyud gang la dri ma ste sprin la sogs pa med pa'i nam mkha'i bar snang la/ dmigs pas mig phyed brtan par gtad pa na snying rjes brlan pa rtog pa dang bral ba'i sems las mu bzhi dang bral ba du ba la sogs pa'i rtags 'byung ngo / /mun pa gnag pa la ci yang bsam par mi bya'o zhes pa ni gdams pa'o//gzhan du yang / yid kyi rtsa ba phyung byas te/ /stong pa nyid la goms byas na/ /ma rig rab rib kyis ldongs pa'i/ /mig sman 'di las gzhan ci yod/ /ces so/ /sa ra ha bas kyang / chos kun mkha' dang mnyam byas shing / /nam mkha' mnyam par sems bzung nas//sems de sems ma yin byas na/ /des ni bla med byang chub 'thob/ /ces gsungs so/ /da ni rdzogs pa'i rim pa gsal bar byed pa ni kun rdzob dang don dam ro gcig par son pa'o/ /dus kyi 'khor lo'i ye shes kyi le'u tshigs su bcad pa brgya dang nyi shu rtsa drug gi rjes la nyams med la sogs pa'o//nyams pa med pa'i lhan cig skyes pa'i sku'i A li dang kA li pad+ma dang zla ba nyi ma'i gdan hUM yig yongs su gyur pa las phyag mtshan las byung ba'i gzugs dang dbyibs dang phyag dang dbyibs su rtog pa'i chos 'gog pas bcom ldan 'das ma nyams pa'i ye shes kyi bsgrub pa brjod de/A li ni A la sogs te dbyangs kyi tshogs zla ba'o/ /kA li ni ka la sogs pa gsal byed kyi tshogs nyi ma'o/ /de gnyis gcig tu gyur pa'i gdan dang / paM las pad+ma dang / a las zla ba/ raM las nyi ma/ ma nyams pa'i ye shes dang ldan pa'i rdo rje 'chang gi gdan ma yin no//hUM las byung ba'i rdo rje yongs su gyur pa las lha'i sku rten pa mi 'dod do/ /mngon par zhen pa'i mtshan nyid can yin pas nyams pa'i phyir ro/ /ma nyams pa'i bde ba skyed cing nyams pa 'joms pas tha mal pas brtags pa'i a la sogs pa'i yi ger dang bral ba lha'i dbang po dang ldan pa'o/ /de bsan la sogs pa go sla'o//chos kyi dbyings ni mkha' la sna tshogs gzugs rnam pa thams cad dang ldan pa'i stong pa'i me long la phra phab pa ni sgrub pa pos bsdams pa bzhin no/ /der med pa'i chom rkun la sogs pa gzhon nu mas mthong bzhin du rtog pa med par ma skyes pa'i chos mthong ba'o/ / byis pas brtags pas phyi rol gyi dngos po med pas mig yod na rmi lam lta bur snang bas so/ /bems po med pas rdul phra rab med pa'o/ /rgyang pan pa'i lugs la ma zhugs pas chad pa'i stong nyid ring du byas pa'o/ /nang gi bde ba rang nyid kyi rig pa la chags pas so/ /las kyi phyag rgya mi bsten pas phyi'i la sogs pas so//man ngag ni 'chad par 'gyur bas so/ /rgyal ba la sogs pa ni lam ma thob pas bsdu na bzhi/ phye na bcu drug 'chad par 'gyur ba ni rtog pa'i lam gyis mi 'thob bo/ /hUM phaT la sogs pa ni sogs pa'i sgras phyag rgya la sgos pa dang bral ba bskyed pa'i rim pa lam du zhugs pa ste/de de las 'das pa rdzogs pa'i rim pa ni nam mkha' la bsgoms pas rtogs par bya ba de'i rim pa ni du ba la sogs pa'i sbyor ba de kho na nyid rgyu yin gyi pad+ma la sogs pa'i rtogs pa gzhan ma yin no/ /byang chub kyi sems mthong ba'i thabs bshad de/ me ni la sogs pa'o//rten med pa lta zhog gi shing la gnas pa yang sta re la sogs pas gcod pa dang sog legs gshags kyang mi mthong la gtsub shing la sogs pa'i sbyor bas mthong ba ltar de bzhin du rnam rtog yang dang yang du goms pas sems kyi snang tshul mi mthong gi 'on kyang ro ma dang rkyang ma dbu ma gnyis su med pa'i sbyor bas rang sems de nyid du snang bar 'gyur/don dam pa bsnyen pa las de bshad pa/ shing las me byung chu ni chu shel las/ /zho las mar dang rdo las gser sogs ltar/ /bud med bstan pas ma nyams bde ba ni/ /de thabs sbyor bas skal ldan gyis gzung bya/ /khyod kyi sems la cung zad bsags pa min//gzhag bya med la 'phel zhing 'grib pa med/ /rang gi sems la sems nyid snang ba tsam/ /dper na khams gsum chu la nyi ma bzhin/ /zhes so/ /sems gcig pu nyid shes rab kyi gzugs brnyan las du mar 'gyur zhes dgongs pa'o/ /de nyid bshad de/du ba la sogs pa'o/ /du ba nyid thog mar gang gi yin pa de ni smig rgyu la sogs pa'o/ /rtags ni yid ches pa'o/ /srog rtsol ni bum pa can de gong dang 'og tu rtsa gsum 'gog pa'i bdag nyid can no/ /dbu mar rgyu ba ni sems kyi rtsa la srog rlung zhugs nas rgyu ba'o/ /rig ma'i brtul zhugs ni rig ma gtso bor byas pa tshangs par spyod pa'o//ma nyams pa ni 'greng ba'o/ /gyen du rgyu ba ni nor bu dang pad+ma la sogs te lam 'dis ni du ba la sogs pa la yan lag drug pa'i mtshan nyid can gyis so/ /sangs rgyas thams cad kyi dbang po dang bral ba'i bde ba ni ma nyams pa'i mchog yin no//pho nya kun ni rtsa stong phrag bdun cu rtsa gnyis 'gog pa'i rang bzhin mkha' 'gro ma rnams kyi lhan skyes so/ /gzugs la sogs pa ni gzugs la sogs pa la gzugs bsgoms pa ni las kyi phyag rgya'o/ /sogs pa'i sgras yid kyi phyag rgya'o/ /dkyil 'khor ni rten yin la/ 'khor lo ni brten pa lha'i tshogs so/ /sogs pa'i sgras sngags dang phyag rgya'o/ /de dag bsgoms pas 'jig rten ni khams gsum ste de'i grub pa ni 'og min gyi bar gyi dbang phyug grub kyi phyag rgya chen po grub pa 'jig rten las 'das pa gang la grub/ 'o na lam gyi gdams pa 'di thams cad las 'byung ngam ma yin te 'on kyang sems can la sogs pa'o//lam 'di bla ma dam pa'i drin gyis dbang la sogs pas tha mal pa'i nga rgyal gyi dri ma dag pas rnam par dag pa'i slob ma la skye'o/ /phyag rgya chen po'i thig le las gsungs pa/ji ltar dug ni sngags sogs kyis/ /sbyangs pa yis ni bcud len 'gyur/ /de ltar dbang la sogs pa yis/ /ma dag slob ma dag par 'gyur/ /zhes so/ /gang gi sems can snying rje gzhan don dang rtag tu dge ba la brtson pa'o/ /da ni lam thob na'ang bag med pas me dang 'bral ba'i rgyu bshad de/lam mchog la sogs pa'o/ /sangs rgyas nyid dka' tshegs med par gang gis thob pa de ni lam ste/ de nyid dga' ba 'phel bar byed pas rin po che/ rnyed par dka' ba dang 'dod pa'i don phun sum tshogs pa ster bas yid bzhin nor bu lta bu'o//bag med ni phan pa dang bde ba la ltos pa med pa/ 'khor bar rigs drug tu 'khyams pa/ snying rje la sogs pa'i yon tan dang bral ba/ gzhan la phan pa dang bde ba la mi brtson pa la byin na rang gi khyim ni chung ma ste de nyid nags yin te/ ma rungs pa'i sems can gyi rten yin pas so//der 'di la dbang po rnams chags pas yul te/ gzugs la sogs pa phyi'i yul longs spyod de ni dman pa ste/ lam gyi mi mthun phyogs yin pa de rmongs pas bsten pa'o/ /de nyid chom rkun te de dag gis phrogs par 'gyur/ 'di dag 'ba' zhig gis ma yin gyi 'on kyang bla ma dang lung dang rang nyid yid ches pa'i lam rin po che la the tshom dang le lo ni dge ba la ma spro ba'o//gnyid ni lus dang yid las su mi rung ba'o/ /'gyod pa ni las dman pa bdag gis byas pas lam mngon sum bdag gis bya bar mi nus so zhes bya ba'i rnam pa can no//chom rkun 'di dag gi nye du ni bu dang chung ma la sogs pa de nyid nags te der zhugs pa'i grol lam mchog ni 'phrog par 'gyur ro/ /ting nge 'dzin gyi sgrib pa 'di dag 'ba' zhig pa ma yin gyi/ 'on kyang srog gcod pa dang / ma byin par len pa dang /brdzun du smra ba dang / phra ma dang / tshig rtsub po dang / 'dod pas log par g.yem pa dang / ngag 'khyal pa dang / brnab sems dang / gnod sems dang / log lta ste 'di dag gis kyang lam rin po che 'phrog par 'gyur ro/ /de dag 'ba' zhig gis ma yin gyi 'on kyang bza' btung shin tu tshad med pas kyang 'phrog ste de la bza' ba ni sha la sogs pa'o//btung ba ni chang la sogs pa'o/ /shin tu ni rgyal ba'i chos kyis so/ /longs spyod ni phreng ba tsan+dan na bud med la sogs pa sna tshogs pa'o/ /des brtson 'grus dang ldan pa'i yang 'phrog na brtson 'grus med pa'i lta ci zhig dgos/bag med ni grogs ngan pa dang 'grogs pa la sogs te/ des brgyal ba bzhin no/ /lam rin chen brtag pa bshad de/ rin chen la sogs pa'o/ /rang gis rin chen yin min mi shes pas gzhan sdig can mi mkhas pa la rin chen yin nam ma yin zhes ston na/des ma yin zhes smras/ des tshig gis skal ba med pas de 'dor bar byed do/ /des sdig pa'i grogs dang 'grogs pa'i skyon bshad do/ /'o na rang gis brtag pas mi shes pa lam rin chen ji ltar shes she na smras pa/ rin chen la sogs pa'o/ /rin chen brtag dpyad mkhas pa kho na la brten par bya ste de'i mi slu ba'i tshig gis rin thang med par shes par bya/ des dge ba'i bshes gnyen bsten pa bshad do/ /lam la zhugs pa la bdud byung na spang bar bshad do/ /pha la sogs pa'o/ /gang gi phyir lam 'phrog pa yod pa de bas bdud sdig can sangs rgyas la sogs pa'i gzugs kyis bar chad byed de 'dis 'tshang rgya ba'i lam yin zhes bya ba la sogs pa bdud kyi le'u las bshad pa bzhin no//nye bar bsdus shing bshad de chom rkun la sogs pa'o/ /gang gi phyir lam 'phrog pa yod pa de bas nye du dang the tshom la sogs pa spangs nas 'bad de bla mas gnang ba'i lam rin po che shin tu gsal bar bya/thar pa thob pa'i lam gzhan yang yod ce na/ smras pa/ bdag la sogs pa'o/ /bdag byin gyis brlab pa'i rim pa ni zhi ba'i lha la dmigs pa'o//dpa' bo'i rim pa ni drag po'i lha la dmigs pa'o/ /de ni thar pa'i slad du sangs rgyas kyis bstan pa ma yin gyis 'on kyang shin tu rnam par dag pa'i rim pa nyid rdzogs pa'i rim pa 'ba' zhig pa'o/ /de cis shes she na/ smras pa/ gang gis ma la sogs pa'o//rgyu mtshan gang gis pa dang / ma dang / dgra bcom pa bsad pa dang / dge 'dun gyi dbyen dang / de bzhin gshegs pa la ngan sems kyis khrag 'byin pa ste mtshams med pa lnga byas pa rnams kyang bde bas 'bad rtsol med par rnam dag gi rim pa dbang gi don gyis bsdus par byas pa las gzhan du na mtshams med pa byas pa rnams dpa' bo'i rim pas drag po'i las las ldog par mi 'gyur ro//bdag byin gyis brlabs pas kyang 'khor ba'i bde ba las thar pa mi thob bo/ /'o na rim pa gnyis po 'di lam ma yin na bcom ldan 'das kyis ci ste gsungs she na/smras pa/ dpa' bo zhes bya ba la sogs pa'o/ /dpa' bo'i rim pa ni phyi rol du ma yin gyi gang gi phyir lus la srog rlung zad par byed pa 'di yin no/ /bdag byin gyis brlab pa ni rang sems kyi snang ba ste/ de yang nam mkha' la khams gsum gyi snang ba'o//bdag byin gyis brlab pa ni rang gi sems kyi snang ba ste/ khams gsum gyi snang ba yin pas byung nas de mi ldog pas 'khor ba mi ldog par 'gyur ro/ /ji ltar sangs rgyas she na/ smras pa/ 'khor ba la sogs pa'o/ /khams gsum snying po med pa brdzun pa zad pa'i rjes su sangs rgyas thams cad mkhyen pa la sogs pa'i yon tan can 'bras bu 'byung ngo //dper na chu shing snying po med pa la 'bras bu smin pa ni de zad nas 'byung ba bzhin no/ /'o na sgyu ma ltar snang ba 'di ma rig pa yin pas de las byung ba'i byang chub kyi sems ji ltar 'tshang rgya ba'i rgyu yin zhe na/smras pa/ rta bla mo la sogs pa'o/ /rta bla mo dang sdig srin la sogs pa rnams ni ma gang las skyes pa de gsod par byed/ de ltar thabs dang shes rab rnal 'byor gyi sems de 'ang bzhi pa kun rdzob kyis gang las byung ba des sgyu ma de gsod par byed/rnal 'byor gyi sems 'di'i ma nyams tshul gyis dbye ba bzhi dang bcu drug bshad de/ gnyis med la sogs pa'o/ /gnyis med ni 'khor ba dang mya ngan las 'das pa de gang la med pa'o/ /nor bu dang pad+ma las mi g.yo bas mi g.yo ba'o/ /thabs sam shes rab kyi rgyu med pas rgyu med do//bla na med pa'i bde ba ster bas yi dam ste rnal 'byor bzhi pa'o/ /dbugs nyi khri chig stong drug brgya 'gog pas ma nyams so/ /chags pa dang chags pa dang bral ba'i bar du gnas pas chags pa chen po'o/ /rnam pa dang bcas pa dang rnam pa med pa'i bar las grol bas dngos po dang dngos min ma yin pa'o//shes bya ma lus pa mthong bas ye shes de rnal 'byor gsum pa'o/ /'gro ba dga' bar byed pa sngon du 'gro ba sems can gyi don la zhen pas sems dpa'o/ /thog mtha' bar du dge bas kun du bzang po'o/ / bdud dang nyon mongs pa la rtog pa spangs pas phyi nang du brjod pa'i sgra med pas sgra med do/ /rang sgra'i rang bzhin med pas sgra chen de rnal 'byor gnyis pa'o/ /mngal las skye ba spangs pas lhan skyes so/ /sku bzhi'i sgrib pa zad pas byang chub sems kyi thig le 'dzin no/ /stong nyid dang snying rje tha mi dad pas dpal dus kyi 'khor lo'i rdo rje/tshul khrims kyi tshogs rdzogs pas thabs dang shes rab dang ldan pa'i rnal 'byor te rnal 'byor dang po'o/ /bstan pa'i phyir bla ma'i mtshan nyid bshad de/ de ltar la sogs pa'o/ /rdo rje'i theg pa la 'jug pa ma nyams pa'i ye shes bsgoms pas de kho na nyid bsgom la/byang sems bsrung bas dam tshig dang ldan pa/ 'dod chags la sogs med pas rnyog ma med pa/ bu dang chung ma dang rang lus la sogs pa ltos pa med pas 'dod pa med pa/ bzod pa dang ldan pa'i sangs rgyas pa'i lam la gnas pa'i bla ma mnyes par byas pa/dmyal ba'i 'jigs pa las skyo pa ba'i lam ston pa/ ma nyams pa'i bde ba thob pas de nyid du tshangs par spyod pa/ bdud bzhi 'joms par byed pa'i bla ma de ni rdo rje 'dzin pas byin gyis brlabs pas de'i sprul pa yin pas rdo rje sems dpa' yin no//da ni 'jig rten dang 'jig rten las 'das pa bsgrub pa'i phyir lha'i dmigs pa bshad de/ lha'i la sogs pa'o/ /de nyid kyi sbyor ba ni sna tshogs gzugs sgom pa'i sbyor bas so/ /skar ma'i 'khor lo bzhin ni nor bu sngon po zla ba'i dkyil 'khor gyi rnam pa can thig le'i nang du mtha' yas pa'i sangs rgyas kyi longs spyod rdzogs pa'i sku mthong ba sngon du 'gro ba dpag tshad brgyar ring ba'i dngos po mthong ba'i sha'i mig gis khams gsum gyi bum pa la sogs pa mthong ba dang /sangs rgyas kyi spyan dang / gzhan sems rig pa dang /chos thams cad mi rtog pa'i mtshan nyid can shes rab kyi spyan dang ye shes kyi spyan gyis dngos po thams cad rnam pa thams cad du mthong ba'o/ /tha mal pa gzhan gyi sa la sogs pa la byas pa dang / ra gan la sogs pa blugs pa/ spro ba la sogs pa med pas shi ba'i ro ltar mthong ngo //bdud rtsi lnga ni bshang ba dang / gci ba dang / rkang mar dang / khrag dang / sa bon no/ /sogs pa'i sgras sgron ma lnga ste ba lang dang / khyi dang / glang po che dang / rta dang / mi'i sha'o/ /nang gi bdud rtsi lnga ni phung ste/ sgron ma lnga ni dbang po lnga'o/ de la ltos pa med pa'o//zas ni mngon par phyogs pa ste/ tha mal pa'i gzugs la sogs pa mngon du phyogs pa las log pa ni so sor rtog pa'o/ /gzugs la sogs gzhan ni rdul phran ma yin pas 'jig rten las 'das pa'i gzugs la sogs pa'o/ /rdo rje'i pad+ma ni spyi gtsug gi pad+ma ste der 'char ba ste/bdud rtsis ni ma nyams pa'i byang chub kyi sems so/ /zla ba bdun gyis ni nye bar mtshon pas zla ba dgu'o/ /phung po drug gis ni gzugs dang / tshor ba dang / 'du shes dang / 'du byed dang rnam par shes pa dang / ye shes kyi phung pos so/ /chung ngu la sogs pa'i dbye bas sa thob pa ni chung ngu la sogs pa bzhi pa gsum la sbyar bas so//rab tu dga' ba nas ye shes spyan gyi bar sa bcu gnyis so/ /bden pa rnam pa bcu gnyis kyi don ni lug dang glang la sogs pa'i khyim bcu gnyis kyi dag pa sna bug tu 'pho ba bcu gnyis 'gog pa'o/ / de nyid rnam pa bcu drug rig ni 'khor ba'i cha bcu drug zla ba'i cha zad pas ma nyams pa'o/ /rnam pa nyi shus byang chub pa ni sbyor drug bsgoms pas dag pa'i dbu mas sbyangs pa phung po lnga dang / khams lnga dang / dbang po lnga dang / skye mched lnga dag pa'i rnam par rtog pas so/ rnam par sangs rgyas ni ma rig pa 'gog pas so//kun rig ni dngos po thams cad sangs rgyas kyi rang bzhin du rtogs pas so/ /de nyid kyi phyir mchog yin no/ /zhag 'ga' zhig gis ni log sum dang / zla ba phyed dang gnyis dus kyi 'khor lo'i zhag gis phyag rgya chen po'i grub pa thob par 'gyur ro//da ni tshigs bcad rdo rje sems la sogs pas sbyor ba drug bshad do/ so sor rtog ni du ba la sogs pa mtshan ma'i dbye bas rnam pa bcu'o/ /bsam gtan ni sna tshogs gzugs la yul dang yul can bcu gcig tu 'gyur pas so/ /srog rtsol ni g.yon dang g.yas kyi dkyil 'khor bcu gcig tu gyur pas so//'dzin pa ni lte ba snying ga mgul ba dpral ba spyi gtsug tu srog rlung 'gro ba dang 'ong ba med pas rnam pa bcu'o/ /rjes su dran pa la 'dod pa'i gnas skabs bcu'i dbye bas ni/ sems pa 'dod dang lus tshad 'byung / /kha skams pa dang za mi 'dod//'dar dang myos pa lus 'khor dang / /sems 'khrul ba dang shin tu brgyal/ /sems can lus la gnas skabs 'di/ /rdo rje 'chang gi gnas skabs yin/ /ting 'dzin rlung bcu 'gog pa ni/ /srog dang thur sel mnyam pa nyid/ /gyen du rgyu dang khyab byed dang //klu dang rus sbal kri ka ra/ /lha sbyin nor las rgyal ba'o/ /chags pa dang chags pa dang bral bas rab tu mi gnas pa'i mya ngan las 'das so/ /mig la sogs pa lnga gzhan gyis ni sha'i mig la sogs pa sna tshogs gzugs mthong ba'o/ /nges pa ni stong pa nyid du nges pa'o//sna tshogs gzugs la zhen pa ni yul la sogs pa'i yid tsam gyis bla na med pa shes rab dang thabs ro gcig tu gyur pa'i de kho na nyid la 'jug pas yid bde ba gang yin pa de ni dga' ba'o/ /bde ba mi g.yo ba ni lus sbyangs pa la sogs pa'i bde bas so//lam gnyis dbu mar 'jug pa ni sna bug g.yon par nam mkha' la sogs lnga dang / g.yas su sa la sogs pa lnga mi rgyu bas ro ma rkyang ma 'gags nas dbu ma'i lam kho na la 'jug pa dang gnas pa dang 'byung ba'i mtshan nyid can phra ba ni srog rtsol yin no//rgyu ba gnyis bral ni lte ba snying dang mgul ba spyi gtsug la 'gro ba dang 'ong ba med pas so/ /rnam pa bcur sngar bshad pa ni sems 'dzin pa la gnas pas na rang gi dang gis du ba la sogs pa'i mtshan ma rnam pa bcu'i snang ba sngon du 'gro bas rdzogs pa'i dkyil 'khor gyi lha'i snang ba gzugs brnyan lta bu rtog pa med pa/de nas 'od dum 'phro ba/ de nas khams gsum du lha'i dkyil 'khor spro ba la sogs pa sngon du 'gro ba sems pa la sogs pa 'dod pa'i gnas skabs bcu'i mtshan nyid can rjes su dran pa'o/ /srog rlung la sogs pa rgyu ba med pas ni gtum mo 'bar bas rdo rje'i nor bu'i rtse mor gnas pa ma nyams pa'i byang sems yin pas rim gyis 'khor lo drug la nyi khri chig stong drug brgya'i dbugs rlung 'gog pas rtog med ma nyams pa'i bde ba'i rang bzhin zung du 'jug pa'i ye shes kyi rdo rje 'chang gi rang bzhin ting nge 'dzin yin no// byang chub sems dpar 'gyur ro zhes pa ni mya ngan las 'das pa'i sems skye ba dang byang chub pa dang chos kyi 'khor lo bskor ba la sogs pa mi mdzad pa ste/ de mdzad pa na sangs rgyas kyi zhing khams su rdzogs pa'i sangs rgyas kho nar grags par 'gyur ro zhes dgongs pa'o/ /dbang bcu ni tshe dang /las dang / mos pa dang / yo byad dang / smon lam dang / rdzu 'phrul dang / chos dang / sems dang / skye ba dang / ye shes la dbang ba la sogs pa'o/ /nA da la goms pas ni lhan cig skyes pa'i ye shes kyi dga' ba la goms pas so/ /ji ltar bshad pa'i gzhon nu ma'i pad+mar rdo rje bcug cing g.yo ba med par ngal sol de'i pad+mar rdo rje'i nor bus mnan la dga' ba dang mchog tu dga' bas yud tsam mi g.yo zhing gnyis ka la nyams pa'i dga' ba 'char ba na hUM zhes brjod pa sngon du 'gro bas bla ma dam pa'i drin la mngon du phyogs shing /lhan cig skyes pa'i dga' ba bzhi pa myong bas byang chub kyi sems bkag ste ma nyams pa'i skad cig thob pa'o//dmigs pa med pa'i gnas su 'gro/ /bcu gnyis kyi mthar ni sna bug g.yon pa na nam mkha' nas sa'i dkyil 'khor gyi bar du sor bcu drug nas bcu gnyis kyi mthar ro/ /bcu drug mthar ni sna bug g.yas pa nas sa'i dkyil 'khor nas nam mkha'i bar du sor bcu gnyis nas bcu drug gi mthar ro//hUM gi sgras brjod pas srog dang thur sel gnyis sbyar bas lte bar thim par byas nas dbu mar bcug ste glog gi me dang mtshungs pa gyen du bskul bas kha ba lta bu'o/ /grong 'jug mi nus na 'pho ba byas te rdo rje langs pa ni bde ba'i ye shes kyi mchog bskyed nas so//mkha' la spyod pa ni 'og min gyi bar du dbang byed pa'o/ /mngon shes lnga ni rdzu 'phrul dang / lha'i mig dang / lha'i rna ba dang / gzhan gyi sems shes pa dang / sngon gyi gnas rjes su dran pa ste mngon shes lnga'i rang bzhin du sna tshogs yum gyur te phyag rgya chen po la chags pas rtog med gtum mo 'bar bas so//ma nyams gsum ni sems kyi thig le ni gsang gnas su 'gog pa dang / /ngag gi thig le lte bar 'gog pa dang / lus kyi thig le snying gar 'gog pa'o//ma nyams pa'i bde bas ni rdo rje'i rtse mor thig le'i tshogs ma nyams pas ye shes kyi thig le 'gog pa'o/ /rlung gnyis 'gog pa zhes bya ba'i bar gyis mkha' spyod kyi bsgrub pa dang / sna tshogs yum zhes bya ba'i bar gyis phyag rgya chen po'i sgrub pa bstan to/ /phyag rgya chen po sgyu ma lta bu ni me long dngas pa'i gzugs brnyan lta bu'o//nam mkhar sems su med pa ni sems ma yin pa'i sems la'o/ /shes rab dang ye shes kyi go rims bzhin du ni chos thams cad stong par rtogs pa ni shes rab bo/ /ye shes ni 'dzin pa'i sems so/ / du ba la sogs pa'i snang ba ni de'i gzung bya yin no/ /ji ltar me long gi gzugs brnyan mig rang gi mig gis mthong ba de bzhin du stong pa nyid kyi rang bzhin rang sems kyis stong pa nyid kyi rang bzhin rnam pa thams cad dang ldan pa'i rang sems mthong ngo / /gzung bya'i sems du ba dang ldan pa'i mtshan nyid 'di la rnal 'byor pas dbu ma la srog rlung gzhug dgos/des mtshan ma mthong ba'o/ /'di ni bla ma'i zhal dang po sku'i rdo rje'o/ /de bas nyi ma dang zla bar 'gro ba'i srog rlung bsdams pas gnyis pa srog rtsol gsung gi rdo rje'o/ /byang sems ni byang sems sna tshogs gzugs brnyan la chags pa gsum pa thugs kyi rdo rje'o//bde ba'i mchog gis rdo rje bslang / /sna tshogs gzugs kyi sgo nas dga' ba ma skyes na de'i tshe bul bar rdo rje'i sgra bya'o/ gal te shes rab ma ma rnyed na de'i tshe rang gi lag gis rdo rje gsor ba bde ba 'phel ba'i phyir te ltung ba'i phyir ma yin no//de ltar byang sems mi 'dor zhing bde ba dang ldan pa 'chi ba'i 'jigs pa las skyob pa bzhi pa ye shes rdo rje 'di'o/ /'di ni rnal 'byor pas bsgom pa'i des pa'o/ /dang po sangs rgyas ni dbang mdor bsdus pa'i skabs su ste/ 'di kho nal sogs pa'o//nyon mongs pa dang shes bya'i sgrib pa'i bud shing can/ thams cad mkhyen pa'i ye shes kyi me du ba la sogs pas 'di kho na rnal 'byor bas bsgrub par bya ste/ ji lta bus she na/ rtsa ba'i rgyud dang / rgyud phyi ma dang / shes rab kyi pha rol tu phyin pa la sogs pa nges don gyi mdo las grags pa/stong pa nyid la snang ba rtog pa thams cad dang bral bas bsam du med pa de kho na nyid kyi 'bras bu mngon du 'byung bas mtshan ma sogs gzung 'dzin dang bral bas rang bzhin gyis stong ba'i shes rab kyi gzugs brnyan/ phyi nang gi sgrib bas ma g.yogs pas nam mkha' dang mnyam pa/yod med la sogs pa'i rtog pa med pas/ yod med las 'das pa/ rang rig yin pas rang sems kyis myong ba'i don ma byas pas ngo mtshar ba/ rang bzhin med pas rdul phra rab kyi tshogs pas stong pa/ mo gsham gyi bu mo dang phrad pas bde ba rmi lam du 'byung ba ltar/nam mkha' las byung gzugs brnyan la/ /brten bas rang la de bzhin no/ /sa yi rnam pa la sogs pa ni gzugs brnyan gyi mtshan nyid do/ /'dir stong pa nyid kyi snang ba dngos po ma yin pa la sogs par snang ba sra ba min/ khu ba'i rnam pa can smig rgyu'i chu bzhin du chu ma yin te/dngos po ma yin pas so/ /me'i rnam pa can me ma yin te/ mi sreg pas so/ /g.yo ba rlung ltar snang / rlung min dngos po min pas so/ /nam mkha' lta bu de mi mthong ba'i phyir ro/ /sgyu ma'i grong khyer ltar dkar po la sogs pa'i kha dog dang ldan kyang dngos po ma yin pas mdog ma yin no//rnam pa thams cad dang ldan yang byis pa rnams kyis mthong bya ma yin te/ nyon mongs pa dang bdud kyi mthu ste/ g.yon dang g.yas su srog rlung rgyu bas so/ /da ni dkyil 'khor lnga thim tshul bshad de/ sa rlung la sogs pa'o//gang gi tshe rnal 'byor ba mig brtan cing khro bo'i stangs kyis stong pa la sems gtad pa de'i tshe sna bug g.yon nam g.yas la nam mkha' la sogs pa'am/ sa la sogs pa rgyu bas sa'i rlung chu rlung la thim/ de ltar g.yon nas nam mkha' la sogs pa rnam shes kyi dkyil 'khor gyi bar ro//de ltar stong pa nyid du ba la sogs pa rtags bcur 'gyur/ rtags kyang rnam pa thams cad dang ldan pa'i gzugs brnyan du 'gro/ gzugs brnyan de ma nyams pa'i bde bar 'gro/ de nyid shes rab kyi pha rol tu phyin pa'i ye shes yin/ ye shes las nam mkha' la 'gro ba la sogs pa'i rdzu 'phrul dang khams gsum gyi dbang phyug gi sgrub pa skye ba 'di nyid dug grub par 'gyur ro/ /rnal 'byor nyi bar bsdus shing bshad de dbu ma la sogs pa'o/ /'dir dang po 'dzin pa'i sems stong bar thim pa ni ro gcig tu gyur ba'o//byis pa dang dar la bab pa dang 'dzag pa ni thabs kyi nyams pa'i bde ba gnyis 'gyur ba dang bul ba'o/ /shes rab mi 'dzag pa ste myur du ma nyams pas so/ /de dag gi mchog 'jig rten las 'das pa gang gi mi 'dzag pa de bzhin pa phyag rgya chen po las byung ba'o//da ni rang gi sems snang ba me long gi gzugs brnyan lta bu la 'jug par bshad de/ nam mkha' la sogs pa'o/ /mtshan mo ni mun pa nye bar mtshon pa'o/ /chags pa ni nam mkha' la sems thim pa'o/ /gzugs kyi snang ba ni me long gi gzugs brnyan lta bu de rnyog pa dang bral ba thogs pa med par snang bas so//sgra'i snang ba ni mgul pa dang rkan la sogs pa'i rtsol ba las byung ba ma yin/ bde ba chen po'i stobs kyis rang sgra tsam myong bas so/ /tshigs bcad 'dis sku gnyis bshad do/ /gzhan gyi sems shes pa med pa ni rang gi sems las tha dad pa gzhan gyi sems shes par byar med pas so//gsungs pa/ ma skyes pa dang ma 'gags pa/ /'dir ni shes bya gang mthong ba/ /de ni rang sems gzhan ma yin/ /phyi yi shes bya las gzhan phyir/ /de bas rang gis rang nyid la/ /rgyas 'debs pa ni gar yang med//ral gri chen pos rang nyid kyi/ /rang sogs gcod par mi nus bzhin/ /tshigs bcad 'dis chos kyi sku sgrub par bshad do/ /phyi nang khyab pa'i du ba'i rnam pa sprin gyi snang ba'i rjes su 'byung ngo / /de gsungs pa/ dang po nyid du sprin bzhin snang / /du bar snang ba gnyis ba'o//zhes so/ /smig rgyu ni g.yo bA chu bzhin no/ /srin bu me khyer dang mar me'i rnam pa grags pa bzhin no/ /mtshan ma bzhi po 'di dag ni bug med pa'i khyim du mun pa las 'byung bas/ mtshan mo'i sbyor ba dang nam mkha'i sbyor ba'o/ /gsang ba 'dus pa las dang po dang gnyis pa bzlog par gsungs pa/sems 'gog rdo rjer gyur pa na/ /mtshan ma dag ni 'byung bar 'gyur/ /mtshan ma de yang rnam pa lnga/ /byang chub rdo rjes gsungs pa yin/ /thog mar smig rgyu'i rnam pa can/ /du ba lta bu gnyis pa'o/ /srin bu me khyer gsum pa ste//mar me lta bu bzhi pa yin/ /sprin med nam mkha' lta bu ni/ /rtag tu snang ba lnga pa'o/ /zhes so/ /sprin med nam mkha' snang ba sngon du 'gro ba me'i rnam pa can 'bar ba dang zla ba dang nyi ma'i snang ba grags pa bzhin/ sgra gcan ni rin chen nag po ltar snang / glog dang thig le chen po ni brtan pa dang g.yo ba gsal bar byed pa mdog sngon po zla ba'i dkyil 'khor gyi rnam pa ltar snang /mtshan ma drug po 'di dag ni sprin med pa'i nam mkha'i snang ba las byung ba nyin mo'i rna 'byor dang blags ba med pa'i rnal 'byor ro/ /de nas de'i dbus su longs spyod rdzogs pa'i sku'i bdag nyid sangs rgyas kyi gzugs brnyan mthong ba sngon du 'gro ba skad cig gcig la lag mthil na yod pa'i chu bzhin du dang ba rnam pa thams cad dang ldan pa'i bum pa dang ras la sogs pa'i sna tshogs gzugs 'od gsal ba mthong ba'o//btsums pa la sogs pa ni bar snang la phyed phye ba'i mig gnyis kyis stong pa ni gzung 'dzin dang bral ba las te/ma brtags pa'i rnal 'byor gyi mngon sum du gzugs brnyan du ba la sogs pa rtag tu bsgom par bya'o/ /rnal 'byor gnyi ga nam mkha' la chags pa la sogs pas dus kyi 'khor lor gsungs so//shes rab kyi pha rol tu phyin pa las kyang gsungs pa/ rin po che snang ba zhes bya ba'i ting nge 'dzin dang / rin po che sgron ma zhes bya ba dang / zla ba'i snang ba zhes bya ba dang / /nyi ma'i sgron ma zhes bya ba dang / rnam pa thams cad mthong ba zhes bya ba la sogs pa'o//de bas the tshom med par du ba la sogs pa'i lam 'tshang rgya bar 'dod pas bsgom par bya'o/ /'o na rtog pa dang bral ba phyag rgya chen po yin la/ sgom pa ni sgro btags pa ste ji ltar bsgom par bya zhes bshad ce na/ smras pa/ sgom pa la sogs pa'o/ /gdams pa ji lta ba bzhin du phyi nang med pa la sgom pa'i gzugs brnyan de nyid la/rnal 'byor ba'i bsgom pa gang yin pa de dngos po ma yin pa'i phyir bsgom pa ma yin no/ /'o na dngos po'i yin rung dngos po ma yin pa'i yin rung rtog pa la khyad med pas ji ltar dngos min sgom zhe na smras pa/sems la sogs pa'o/ /gang gi phyir stong nyid kyi gzugs brnyan la rnal 'byor pa'i dngos dang dngos min gyi rtog pa med de/ stong nyid kyi gzugs brnyan ma brtags pa'i du ba la sogs pa la mngon sum du mthong ba'i phyir ro/ /dgongs pa 'di lta ste gal te brtag pa yin na dngos por 'gyur te lugs ma la sogs pa bzhin no//mthong ba med na dngos po ma yin par 'gyur te mo gsham gyi bu la sogs pa bzhin no/ /'dir ni ma brtags par mngon sum du mthong bas thams cad legs par gnas so/ /mthong ba'i dpe bshad de pra phab pa la sogs pa'o//pra phab pa ni sgrub pa pos byed pa ste/ me long dang ral gri dang mthe bong dang mar me dang zla ba dang nyi ma dang chu la mig gi spyod yul dngos po las ma byung ba/ chom rkun la sogs pa bems po'i chos las ma byung ba/ ma brtags par mthong ba 'di la dngos po dang dngos min med do//dngos po med par don byed nus pa tsam dmigs pas so/ /'jig rten kho na la dngos po med par dngos por mthong ste/ dper na sgyu ma dang rmi lam la sogs pa'o/ /chos can la sogs pa ni rtog pa med pa'i ye shes 'byung ba de ni rnam pa thams cad du 'gro ba'i don sgrub par byed pas yid bzhin nor bu lta bu'o//dpe bshad de sngar la sogs pa'o/ /sngar ma mthong ba'i chom rkun la sogs pa sngags kyis byin gyis brlabs pa'i mig gis gzhon nu mas pra phab na mthong / /sgrub pa pos ni gzhon nu mas bshad pa der song la nyi tshe ba'i mig gis mthong ngo //bsam pa 'di lta ste sgrub pa'i man ngag sngags kyis byin gyis brlabs pa'i blo'i spyan gyis rnal 'byor pa gzhon nu ma bzhin byang sems ma nyams pas ma bstan pa/ tha mal pa'i bgrod bya ma yin pa nam mkha' la 'jig rten las 'das pa'i de kho na nyid mthong ngo //de'ang spros pa mtha' dag dang bral bar bshad de gzhan gyis la sogs pa'o/ /gzhan gyi mig gis mi mthong ste du ba gzhan du mi mthong ba'i phyir ro/ /rang gi mig gis mi mthong ste mig ras kyis bkab pa'i phyir ro/ /pra phab pa'i dpe 'dis rnal 'byor gyi mngon sum rang bzhin kun med pas ma skyes te/rmi lam du gzhon nu mas bu dmigs pa bzhin thams cad mkhyen pa'i ye shes grub bo/ /sbyor ba yan lag drug gi ni/ /bdag gis bshad pa'i dge ba gang / /des ni 'jig rten ma lus pa/ma nyams bde ba thob par shog /sbyor ba yan lag drug pa'i 'grel pa paN+Di ta chen po nyi ma dpal ye shes kyis mdzad pa rdzogs so// //rgya gar shar phyogs kyi paN+Di ta chen po shrI bi b+hU ti tsan+d+ras ru lag gi snying po 'bring mtshams kyi sa'i cha dpal rgya rtags kyi gtsug lag khang du bsgyur cing zhus te gtan la phab pa'o/

CLOSE WINDOW