CLOSE WINDOW

D1365
བོད་ཡིག

@##/ /rgya gar skad du/ shrI kA la tsa kra gar+b+hA laM ka ra sA d+ha naM nA ma/ bod skad du/ dpal dus kyi 'khor lo'i snying po'i rgyan zhes bya ba'i sgrub thabs/ bcom ldan 'das dpal dus gsum gyi bde bar gshegs pa thams cad kyi mnga' bdag dpal rdo rje 'chang chen po la phyag 'tshal lo//dus 'khor bden pa gnyis kyi bdag /chos sku zab mo longs spyod rdzogs/ /'gro ba dad mos sprul sku dang / /mnyam pa nyid la phyag 'tshal lo/ /kA ni mi 'gyur zhi ba ste/ /la ni 'di la stobs dang ldan/ /tsa ni sems kyi g.yo ba nyid/ /kra ni rigs kyis 'ching ba ste/ / ye shes gsum la phyag 'tshal lo/ /thams cad rmi lam thugs chud cing / /mi mkhyen mi mnga' sa le mkhyen/ /thugs kyi chos dbyings nyid las 'byung / /ye shes thugs la phyag 'tshal lo/ /chos kyi sku yi gsung dang thugs/ /longs spyod rdzogs pa'i sku gsung thugs/ /sprul pa'i sku yi sku gsung thugs//ye shes gcig tu sbyor la 'dud/ /dpal ldan dus 'khor sbyor ba 'di/ /rtsod pa'i dus kyi sems can gyis/ /ye shes 'dod lugs mi shes pas/ /nga mkhas zer zhing byis pa 'drid/ /rmongs pa nga rgyal can ni glegs bam mthong bas khengs/ /rdo rje 'dzin 'dra'i bla ma la brnyas shing //shi ma thag tu rdo rje dmyal bar 'gro/ /de phyir dus 'khor rgyan 'di bdag gis bri/ /de la dang po kho nar bdag nyid la gnas pa ste rnal 'byor pa'i lus la khams drug ste/ 'khor lo drug la la la nA dang / ra sa nA dang / dbu ma a ba d+hU tI rtsa gsum dang bcas pa gnas te/gtsug tor gyi 'khor lo la rtsa 'dab ma lnga'i dbus na/ a ku ha'i sde chan dang rnam par shes pa'i phung po dang nam mkha'i khams dang / rna ba'i dbang po dang / chos dang / b+ha ga dang / khu ba dang / 'di rnams kyi mtshan nyid dang rang bzhin bskyed pa'o/ /dpral bar bde ba chen po'i 'khor lo'i rtsa 'dab ma bcu drug la de'i dbus na u pu wa wa'i sde tshan dang /'du shes kyi phung po dang / chu'i khams dang / lce'i dbang po dang / yul gzugs dang / rkang pa'i dbang po dang / len pa dang / 'di rnams skyed par byed pa'o/ /mgrin pa longs spyod kyi 'khor lo'i rtsa 'dab sum cu rtsa gnyis ni r-i Tu ra Sha'i sde tshan dang /tshor ba'i phung po dang / me'i khams dang / mig gi dbang po dang / ro dang / lag pa dang / 'gro ba dang / 'di rnams skyed pa'o/ /snying gar chos kyi 'khor lo rtsa 'dab ma brgyad na i tsu ya sha'i sde tshan dang / 'du byed kyi phung po dang / rlung gi khams dang /sna'i dbang po dang / yul reg bya dang / ngag gi dbang po dang / dri chen 'dzag pa dang / 'di rnams skyed par byed pa'o/ /lte ba sprul pa'i 'khor lo rtsa 'dab ma drug cu rtsa bzhin l-i tu sa la'i sde tshan dang / gzugs kyi phung po dang / sa'i khams dang / lus kyi dbang po dang / dri dang / bshang ba'i dbang po dang /brjod pa dang / 'di rnams skyed par byed pa ste/ stong pa chen po yi ge lnga/ /zhes bya'o/ /drug pa ni gsang ba'i 'khor lo rtsa 'dab ma sum cu rtsa gnyis na ye shes kyi phung po dang / ye shes kyi khams dang / yid kyi dbang po dang / sgra dang / dbang po dam pa dang / dri chu 'dzag pa dang / 'di rnams skyed pa'o//ro mnyam zhing skyed pa gcig tu 'dres pa ni thig le stong pa yi ge drug pa'i ngo bo shes rab kyi rnam pa e'i cha byad can lnga po ni thabs kyi rnam pa waM gyi rang bzhin te/ 'dir rtsa ba'i rgyud las bcom ldan 'das kyis gsungs pa/ e dang pad+ma nam mkha'i dbyings/ /b+ha ga chos 'byung chu skyes kyi//yig gdan rdo rje can zhugs pa/ /bdag gi rgyud kyi nang du gsungs/ /rdo rje can waM rdo rje sems/ /rdo rje 'jigs byed dbang phyug dang / /shrI he ru ka dus 'khor lo/ /dang po'i sangs rgyas sogs ming dang / /sna tshogs yum gyi ming rnams kyis/ /gnas dang rten gyi mtshan nyid dang / / brten pa dag gis gsungs pa ni/ /sems can bsam pa'i dbang gis te/ /ston pa kun mkhyen rdo rje 'chang / /sangs rgyas seng ge'i gdan bzhugs pa/ /dus kyi 'khor lo ston pa po/ /zla ba bzang po khyod kyis zhus/ /zhes gsungs so/ /gcig pa ni rnam par shes pa'i bdag nyid sems gcig gi rang bzhin no//de la la la ni rnam par shes pa brgyad du 'dod do/ /la la ni drug tu 'dod do/ /la la ni gsum du 'dod do/ /la la ni rtsa ba'i rnam par shes pa dang dgu ru 'dod do/ /nges pa'i don du rnam par shes pa gcig nyid yin gyi du ma ni ma yin no/ /de yang lung dang rigs pas mngon te/ lung de mdo sde lang gar gshegs pa las/kun gzhi rnam par shes pa rgya mtsho chen po la 'jug pa'i rnam par shes pa yul gyi klung gi dba' rlabs dang 'dra ba 'byung zhes pa dang / sde snod gsum las kyang / ring du rgyu zhing gcig par gnas/ /lus med dbang po'i phug song ba/ /gdul bar dka' ba'i sems 'dul byed//'di ni bram ze ngas bshad de/ /bdud kyis bcings pa las grol 'gyur/ /zhes pa dang / rgyud kyi rgyal po nyid las kyang / bya ba po dang byed pa po ni kun gzhi rnam par shes pa nyid yin gyi ji ltar sbubs kyi srin bu bzhin no zhes so/ /dpal sangs rgyas thod pa las kyang / sems gcig dri med me long bzhin/ /gang bsam de ni gzugs brnyan te/ /rmi lam lta bur shes mod kyi/ /'on kyang rnam par rtog pas gzung / /zhes pa ste/ rdo rje bdud rtsi 'byung ba'i rgyud las kyang / rnam par shes pa gcig nyid de zhes bya ba la sogs pa gsungs so/ /rigs pas kyang rnam par shes pa brgyad ni mi 'thad de/kun gzhi rnam par shes pa la sogs pa me long lta bu'i ye shes la sogs pa ye shes bzhi la la ni chos can la dmigs pa/ la la ni chos dang chos can gnyis ka la dmigs zer te/ gang chos can la dmigs pa'i ye shes de ni sangs rgyas kyi ye shes ma yin te/chos can la dmigs pa'i phyir dper na sems can bzhin no/ /kha cig na re kun gzhi rnam par shes pa rgyun brtan pa yin la 'jug pa'i rnam par shes pa mi brtan pa yin zer ro/ /de la skad cig ma skye 'gag byed mi byed brtags te/ de la du ma ni kun gzhi skad cig ma khas len te/ skad cig ma mi rtag pa de dang rgyun gyi mi rtag pa de gnyis skad cig ma mi rtag par khyad par med de mi rtag pa'i phyir na'o/ /dper na yid kyi rnam par shes pa bzhin no/ /de'i phyir rnam par shes pa du ma ma yin te gcig kho na the tshom yin no/ /'di la kha cig 'di skad du sems par 'gyur te/ 'du shes kyi phung po dang tshor ba'i phung po dang 'du byed kyi phung po pa la sogs pa rang rig pa'i dbye ba la sogs pa nyams su myong bas na rnam par shes pa yin no//gzugs kyi phung po ji ltar rnam par shes pa yin zhe na/ smras pa/ mngon pa'i mdo las kyang / rdul phra rab kyis ma byas/ /sa rnams lta bur kun gzhi snang //ji ltar 'o ma gyur pa las/ /yon tan zho dang dar ba 'byung / /de bzhin rnam shes gyur pas ni/ /rnam par gyur nas gzugs su snang / /zhes gsungs pa dang / yang theg pa chen po'i mdo sde lang kar gshegs pa las kyang / ji ltar byis pas brtag pa yi/ /phyi rol dngos po yod min par//bag chags kyis ni sbags pa'i sems/ /don gyi dngos por rab tu skyes/ /zhes so/ /mdo sde sa bcu pa las kyang / kye rgyal ba'i sras dag khams gsum pa 'di dag ni sems tsam mo zhes gsungs so/ /de'i phyir na khams gsum pa 'di dag thams cad ni rnam par shes pa las gud na skra'i rtse mo brgyar gshags pa tsam yang grub pa med do//des na khams gsum 'di dag ni rang gi sems nyid sa dang / chu dang / me dang / rlung dang / nam mkha' dang / ye shes la sogs par rnam pa sna tshogs su snang ngo / /de yang ye shes pa'i rang gi mtshan nyid du gcig go/ / de yang rgyud kyi rgyal po thams cad las gsal bar gsungs te/ de yang rgyud kyi rgyal po las kyang / rnam pa kun ni rang gi sems nyid de/ /yul dang bral ba rang gi sems nyid min/ /zhes pa dang / dpal gsang ba 'dus pa las kyang / lus sems lta bu skyed cig ces bya ba la sogs pa gsungs so//de nas thog ma med pa nas spros pa'i bag chags yongs su smin pa'i dbang gis gzung ba dang 'dzin pa'i rnam par rtog pa'i bye brag gis yul sems tha dad par snang zhing ngo bo tha dad pa ni ma yin no/ /de nas rgyud kyi rgyal po dpal saM pu Ta las/ chu bo'i rgyun dang de bzhin rgya mtsho bzhin//zhes bya ba la sogs pa gsungs so/ /chu bo stong phrag bdun cu rtsa gnyis thams cad kyang rgya mtsho las byung nas slar yang rgya mtshor 'jug pa de bzhin du gzugs dang tshor ba la sogs pa thams cad kyang rnam par shes pa las byung nas slar rnam par shes pa la 'jug go/ /smras pa rnam par shes pa nyid thog ma med pa nas spros pa'i bag chags la zhen pa'i dbang gis gzung 'dzin du snang ba dang /bem po ru snang ba de'i phyir te/ rnam par shes pa nyid tha dad du snang bas so/ /dper na ras dkar po tshon gyis bsgyur ba lta bu'am/ /shel dag pa tshon gyis bsgyur ba lta bu'o/ /de yang yul gyi bye brag gis shes pa de nyid 'dod chags dang zhe sdang la sogs pa dang /dge ba dang mi dge ba la sogs pa tha dad par snang gi ngo bo la ni ma yin no/ /shes pa dag ni gar mkhan dang / mig 'phrul mkhan dang / sgyu ma mkhan dang 'dra'o/ /de nyid rang byung gi ye shes dang gzung ba dang 'dzin pa nyid kyis stong pa spros pa'i mtha' dang bral ba'i rdo rje 'chang chen po ste/de nyid lhun gyis grub pa'i ye shes chen po ste/ gang nas kyang ma byung ba'i phyir ro/ /gnyis su med pa'i ye shes zhes bya ba ste/ gzung ba dang 'dzin pa'i rnam par shes pa gnyis kyis stong pa'i phyir dang / stong pa dang / snying rje dbyer med pa'i phyir dang bden pa gnyis dbyer med pa'i phyir ro//de yang dpal gsang ba 'dus pa las kyang / dngos po kun dang rnam bral zhing / /phung po khams dang skye mched dang / /gzung dang 'dzin pa rnam spangs pa/ /chos bdag med pa mnyam pa nyid/ /rang sems gdod nas ma skyes pa/ /stong pa nyid kyi ngo bo nyid//ces gsungs so/ /mtshan yang dag par brjod pa las kyang / sangs rgyas thog ma tha ma med/ /dang po'i sangs rgyas rgyu med pa/ /ye shes mig gcig dri ma med/ /ye shes lus can de bzhin gshegs/ /zhes gsungs so/ /de bas na rnam par shes pa'am ye shes ni gcig kho na'o//thun mong bca' gzhi'i rim pa ste dang po'o// //da ni lha'i ngo bo gsal bar bya ste/ de yang gsang ba 'dus pa las kyang / mdor na phung po lnga rnams ni/ /sangs rgyas lngar ni rab tu grags/ /rdo rje skye mched nyid dag kyang / /byang chub sems dpa'i dkyil 'khor mchog /sa chu spyan dang mA ma kI/ /me rlung gos dkar sgrol mar grags/ /zhes gsungs te/ des na phung po dang khams dang skye mched lha dang lha mor gsal lo/ /rigs drug pa ni dpal dus kyi 'khor lo'i rgya cher 'grel pa las kyang / phung po drug dang / khams drug dang / dbang po drug dang / yul drug dang las kyi dbang po drug ces gsungs so//de gsal bar bstan pa'i phyir gzugs kyi phung po ni rnam par snang mdzad do/ /tshor ba'i phung po ni rin chen 'byung ldan no/ /'du shes kyi phung po ni snang ba mtha' yas so/ /'du byed kyi phung po ni don yod grub pa'o/ /rnam par shes pa'i phung po ni mi bskyod pa'o//ye shes kyi phung po ni rdo rje sems dpa'o/ /sa ni sangs rgyas spyan no/ /chu ni ma mA kI'o/ /me ni gos dkar mo'o/ /rlung ni sgrol ma'o/ /nam mkha' ni rdo rje dbyings kyi dbang phyug ma'o/ /ye shes kyi khams ni sna tshogs kyi yum mo/ /mig gnyis ni gti mug rdo rje'o/ /rna ba zhe sdang rdo rje'o//sna la ser sna rdo rje'o/ /kha la 'dod chags rdo rje'o/ /lus la phrag dog rdo rje'o/ /yid la dbang phyug rdo rje'o/ /gzugs la gzugs kyi rdo rje'o/ /sgra la sgra'i rdo rje'o/ /dri la dri'i rdo rje'o/ /ro la ro'i rdo rje'o/ /reg la reg gi rdo rje'o/ /chos la chos kyi rdo rje'o/ /ngag gi brjod pa dang dbang po la gshin rje mthar byed yab yum mo//lag pa dang len pa la shes rab mthar byed yab yum mo/ /rkang pa dang 'gro ba la bgegs mthar byed yab yum mo/ /bshang lam dang dri chen la pad+ma mthar byed yab yum mo/ /b+ha ga dang dri chu la gtsug tor 'khor los sgyur ba yab yum mo/ / dam pa'i dbang po khu ba la gnod mdzes yab yum mo/ /des ni lus rnam par dben pa gsal bar bstan to/ /lha sum cu rtsa drug po de ni 'khor lo drug la gnas te/ gtsug tor gyi 'khor lo na rtsa 'dab ma bzhi'i dbus na mi bskyod pa'i rigs rnams gnas so/ /dpral ba bde ba chen po'i 'khor lo na rtsa 'dab ma bcu drug pa'i dbus na 'od dpag med pa'i sde gnas so//mgrin pa longs spyod kyi 'khor lo na rtsa 'dab ma sum cu rtsa gnyis kyi dbus na rin chen 'byung ldan gyi rigs rnams gnas so/ /snying ga chos kyi 'khor lo rtsa 'dab ma brgyad pa'i dbus na don yod grub pa'i sde gnas so//lte ba sprul pa'i 'khor lo rtsa 'dab ma drug cu rtsa bzhi'i dbus na rnam par snang mdzad kyi rigs rnams gnas so/ /gsang ba'i 'khor lo rtsa 'dab ma sum cu rtsa gnyis kyi dbus na rdo rje sems dpa'i rigs gnas so/ /de ltar phung po dang khams dang skye mched rnams lha dang lha mo'i dkyil 'khor du gsal bar bstan pas tha mal pa'i rnam par rtog pa bsal nas de nyid du gsal lo//de yang 'khor lo re re la drug tu bstan te/ lte ba sprul pa'i 'khor lo na shar na don yod grub pa gnas/ lho na rin chen 'byung ldan gnas/ nub na rnam par snang mdzad gnas/ byang na snang ba mtha' yas gnas/dbus steng na mi bskyod pa/ 'og na rdo rje sems dpa'o/ /de yang mtshan yang dag par brjod pa las/ stong pa chen po'i yi ge lnga/ /thig le stong pa yi ge drug /ces gsungs so/ /lus rnam par dben pa'i rim pa ste gnyis pa'o// //da ni gsung rnam par dag pa'i srog rtsol brjod de/de yang 'khor lo drug tu gtsug tor du a/ dpral bar u/ mgrin par r-i/ snying gar i/ lte bar l-i/ gsang bar aM gnas so/ /de ni gtsug tor na a stong pa'o/ /dpral ba na o dang u dang hA'o/ /mgrin par ar ro/ /snying gar i dang ya'o/ / lte ba na ta dang al lo/ /gsang bar aM ngo / /de ltar sna rtse re re na yang drug drug gnas te/ 'khor lo drug gi shar nas rlung rgyu/ lho nas me rgyu/ nub nas sa rgyu/ byang nas chu rgyu/ dbus steng nas nam mkha'/ dbus 'og nas ye shes rgyu ste/ de bzhin du 'khor lo lnga las kyang de bzhin du rgyu'o/ / de rnams kyang la la nA dang / ra sa nA dang / a ba d+hU tI nas rim pa bzhin rgyu ste/ 'byung ba lnga'i dbugs phung po lnga bskyed pa'i bdag nyid yan lag lnga'i rlung lnga rgyu ste/ rdo rje sgo'i rgyud las/ srog dang thur du sel ba dang / /me dang mnyam du gnas pa dang / /gyen du rgyu dang khyab byed dang / /rgyu dang rnam par rgyu ba dang //yang rgyu rnam par rgyu ba dang / /rab tu rgyu dang nges par rgyu/ /zhes gsungs so/ /dpal dus kyi 'khor lo las kyang / srog ces bya ba'i rlung gcig pu/ /rnam pa bcu ru 'gyur ba ste/ /steng dang 'og dang shar du'o/ /zhes gsungs so/ /de nyid rnam par grol te steng du ni nam mkha'i rang bzhin gyen du rgyu ba ljang gu'o//'og tu ye shes kyi rang bzhin thur du sel ba sngon po'i rlung ngo / /shar du 'od zer nag po mnyam pa'i rlung ngo / /nub tu srog gi rlung ser po'o/ /lhor khyab byed kyi rlung dmar po'o/ /byang du lha sbyin gyi rlung dkar po'o/ /de bzhin du rus sbal dang / klu dang /rtsangs pa dang / nor rgyas te rlung bcu'o/ /de yang dbugs nyi khri chig stong drug brgya'i rlung dbugs 'khor lo drug nas khyab par rgyu ste/ de yang la la nA nas khri bzhi brgya drug cu rtsa phyed dang gsum rgyu/ /ra sa nA nas khri bzhi brgya drug cu rtsa phyed dang gsum rgyu/ /a ba d+hU tI nas drug brgya bdun cu rtsa lnga'i dbugs rab tu rgyu'o//de ltar lte ba'i 'khor lo la rA shi bcu gnyis kyi 'dab ma la rim pa bzhin du rgyu ste/ lug la sogs pa mi mthun pa'i 'dab ma la brgya phrag bco brgyad kyi dbugs las a ba d+hU tI nas bzhi cha dang bcas pa'i lnga bcu rtsa drug rgyu'o/ /glang la sogs pa mthun pa'i 'dab ma las brgya phrag bco brgyad kyi dbugs las a ba d+hU tIr bzhi cha dang bcas pa'i lnga bcu rtsa drug rgyu'o//de dbugs drug drug las chu srang du 'gyur ro/ /chu srang drug cu las chu tshod du 'gyur ro/ /chu tshod lngas dus sbyor du 'gyur ro/ /dus sbyor phyed dang gnyis kyis thun re thun brgyad do/ / dus sbyor gnyis gnyis kyis dus drug go/ /dus sbyor gsum gsum gyis dus bzhi'o/ /dus sbyor bzhi bzhis dus gsum du 'gyur ro/ /dus sbyor drug drug gis bgrod pa gnyis te/ de thams cad kyang rnam par shes pa gcig pu'i bzhon pa'o/ /'khor lo drug dang rtsa gsum nas byung nas dbang po'i yul nas yul rnams la nges par rgyu'o//de yang gsang ba 'dus pa'i rgyud las gsal bar gsungs te/ /rin chen kha dog sna lnga pa/ /yungs kar gyi ni 'bru tshod tsam/ /sna yi rtse mor nan tan du/ /rnal 'byor rigs pas rtag tu bsgom/ /zhes gsungs so/ /sna'i rtse mo ni 'khor lo lnga pa'o//'khor lo re re la yang lnga lnga ste/ drug pa ni 'khor lo'i gsang ba'o/ /'khor lo re re ni 'og nas so/ /'byung ba drug ni lhag pa'i i a r-i u l-i aM/ de ltar na rlung gi rang bzhin dang phung po dang khams dang skye mched thams cad rang nyid las gzhan ma yin no/ /rlung gi brten gnas dang / sngags ston te/ de bzhin gshegs pa thams cad kyi sku dang gsung dang thugs dang ye shes kyi rang bzhin 'byung ba dang 'jug pa dang gnas pa dang bde ba la oM AHhUM hoH'o/ /de bzhin du zhi ba la sogs pa'i las bzhi grub pa'o/ /de yang sbyor ba yan lag drug la bslab par bya ste/ srol rtsol ni rdo rje'i bzlas pa'o//srog rtsol gyi dbang gis sems mi yengs pa ni bsam gtan no/ /bsam gtan gyi yul lnga'o/ /dbang po lnga 'gag pa ni so sor sdud pa'o/ /de yis rang gnas su bzung nas ni de bzhin du bzung ba'o/ /de nas bde ba'i gnas la gnas pa ni rjes su dran pa'o/ /de nas ma yengs pa ni ting nge 'dzin no//gsung gi de kho na nyid kyi rim pa gsum pa'o/ /da ni thugs rnam par dag pa brjod pa'i phyir nam mkha' la sogs pa dang / bla gab med pa la goms pa dang sbyor ba'i yan lag drug la bslab pa'i goms pa skye ste/ 'di ni bcom ldan 'das kyis gsungs pa'o/ / bsgom pa 'di ni shes rab kyi pha rol tu phyin pa las 'di lta ste/ de nas lha'i dbang po brgya byin gyis tshe dang ldan pa rab 'byor la 'di skad ces gsol to/ /gang 'phags pa rab 'byor shes rab kyi pha rol tu phyin pa 'di la ji ltar nan tan du bya/ gang rnal 'byor du bya/ rab 'byor gyis smras pa/ kau shi ka shes rab kyi pha rol tu phyin pa la slob par 'dod pa des nam mkha' la rnal 'byor du bya'o//kau shi ka shes rab kyi pha rol tu phyin pa la slob par 'dod pa des bla gab med pa la rnal 'byor du bya'o zhes bcom ldan 'das kyis gsungs so/ /sa'i rlung chu la thim pas gtsug tor gyi 'khor lo dpral ba'i yi ge aM las mgrin pa'i 'khor lor thim pas dga' ba dang po skye ste/phyi gzung ba'i yul dang nang 'dzin pa'i sems gnyis kyi rags pa 'gags nas rang bzhin sum cu rtsa gsum gyi rnam par rtog pa 'gags nas dga' ba'i ye shes skye ste/ de'i rang bzhin du ba lta bu dang sems so sor rtogs pa dang po'o//zla ba'i 'khor lo dang 'bar ba dang lus kyi rnam par rtog pa 'gags nas snang ba sku'i rang bzhin no/ /de yang shes rab ye shes me chen 'di 'bar bar snang pa'o/ /rnam par snang mdzad 'od po che ni zla bar snang ba ni ston ka'i sprin med pa'i nam mkhar zla ba'i dkyil 'khor 'od zer snang bar byed pas khyab par byed pa bzhin du rang bzhin gyis gsal ba'i rnam par dngos po ma lus pa thams cad dmigs pas na snang ba ste zhes gsungs pa dang /de'i sku'i dga' ba dang gsung gi dga' ba dang thugs kyi dga' ba dang ye shes kyi dga' ba tshes gcig dang gnyis dang gsum dang bzhi pa a i ri u ste/ yar ngo tshes bzhi'i bdag nyid can gyi sad pa'i rnam par rtog pa 'gag pa'i sprul pa'i rgyu mthun pa bskyed pa'i byang chub kyi sems so sor rtog pa'i ye shes rgyu mthun pa dag gi rang bzhin dus kyi 'khor lo snang ba'i rang bzhin no/ /de bas mchog dga'i rang bzhin na chu me la thim pas mgrin pa'i 'khor lo a'i byang chub kyi sems las snying ga'i 'khor lor phab ste/ji tsam 'dzin nus tsam na phyi gzung ba dang nang 'dzin pa'i 'bring po 'gags pas sems so sor rtogs pa gnyis smig rgyu'i rnam pa dang nyi ma lta bu snang ba mched pa skyes pas rang bzhin bzhi bcu'i rnam par rtog pa 'gags nas mi rtog par 'gyur ro/ / 'gro ba'i mar me ni nyi mar snang ba'o/ /ji ltar ston ka'i dus su nyi ma'i 'od zer shar ba bzhin du gsal zhing dri ma med pa'i ngo bo nyid ni dngos po ma lus par dmigs pa byang chub kyi sems kun du bzang po ste/ rim pa gnyis pa bzhin du stong pa bde bas na sku'i dam pa'i dga' ba dang / gsung gi dam pa'i dga' ba dang /thugs kyi dam pa'i dga' ba dang / ye shes kyi dam pa'i dga' ba dang / tshes lnga dang drug dang bdun dang brgyad la l-i a e ar gyi bdag nyid rmi lam gyi gnas skabs 'gag pa longs spyod rdzogs pa'i sku'i rgyu mthun pa bskyed pa'i byang chub kyi sems mnyam pa nyid kyi ye shes rgyu mthun pa'i chos la dmigs pa'i snying rje rtse mo'i rang bzhin dus kyi 'khor lo snang ba mched pa'i ngo bo nyid do//de bas na dga' bral gyi rang bzhin me rlung la thim nas snying ga'i 'khor lo nas hUM byang chub sems kyi rang bzhin lte bar babs pas ji tsam 'dzin nus pa dang / phyi gzung ba dang nang 'dzin pa phra ba yang 'gag ste/dga' bral gyi ngo bo sems so sor rtogs pa srin bu me khyer dang sgra ga can gyi dkyil 'khor lta bu snang ba thob pa'i sems tsam gyi ngo bo rang bzhin bdun dang bral ba mi rtog pa sems tsam gyi ngo bo ye shes sgron ma sgra tsam du snang ba'o/ /gzi brjid chen po 'od gsal ba na glog tu snang ba'o/ / de bzhin du nam mkha'i mtshan nyid dngos po med pa'i ngo bo nyid lus dang ngag med pa ste/ ji ltar mtshams kyi mun pa la thab pa'i ngo bos khyab pa phra zhing bdag med pa srog dang rtsol ba ni rgyu ba dang rgyu med pa sems med pa mi g.yo ba gang gi sa bon la brten pa'i sgo zhes gsungs so/ /de bas na sku'i dga' bral dang /gsung gi dga' bral dang / thugs kyi dga' bral dang / ye shes kyi dga' bral dang / tshes dgu dang / bcu dang / bcu gcig dang / bcu gnyis la o al ha ya'i bdag nyid dam pa'i gnas skabs kyi bdag nyid 'gag pa'i chos kyi sku'i rgyu mthun pa byang chub kyi sems bskyed pa bya ba nan tan gyi ye shes kyi rgyu mthun pas dmigs pa med pa'i snying rje dus kyi 'khor lo bzod pa thob pa'i rang bzhin snang ba thob pa'o//de'i mtshan nyid gsal bar bstan par bya ba'i phyir/ 'di dag kyang sems tsam gyi sku yin par gsal ba yin te/ 'phags pa klu sgrub kyi zhal snga gnas kyang / ye shes gsum gyi ngo bo yis//sems tsam la ni nges par sbyar/ /zhes gsungs so/ /mdo sdes bcu pa las kyang / kye rgyal ba'i sras po khams gsum pa 'di dag ni sems tsam mo zhes 'byung bas kyang don 'di nyid gsal bar gsungs so/ /ye shes gsum yang sems tsam gyi rang bzhin no/ / de yang pha rol tu phyin pa'i nang du drod dang rtse mo dang bzod pa dang gsum du bstan to/ /kam+ba la'i zhal snga nas kyang / /snang ba ni drod do/ /snang ba mched pa ni rtse mo'o/ /snang ba thob pa ni bzod pa'o zhes gsungs so/ /de nas dngos po ma lus par rnam par rig pa tsam gyi ngo bo nyid du lte ba sprul pa'i 'khor lo rtsa 'dab ma drug cu rtsa bzhi'i gnas su phebs tsam 'dzin nus pa gsal bar rdzogs pa'o//de nas yid kyi lus kyi rang bzhin gsal bar bstan te/ de yang mdo sde dang rgyud dang grub pa brnyes pas kyang gsungs te/ shes rab kyi pha rol tu phyin pa las kyang / gzugs ni rmi lam lta bu'o zhes pa nas/mya ngan las 'das pa'i chos cig yod na yang rmi lam lta bu zhes gsungs pas so/ /mngon par byang chub pa'i rgyud las kyang / 'ja' tshon lta bu'i lus dag ni/ /de nyid bsgom pas mthong bar 'gyur/ /zhes pa dang / gsang ba 'dus pa'i rgyud las kyang / kye bcom ldan 'das de bzhin gshegs pa thams cad 'di lta ste/dper na byang chub kyi sems ni de bzhin gshegs pa thams cad kyi ye shes 'byung bar byed pas rdo rje'i gnas lta bu ste/ byang chub kyi sems ni de yang lus la mi gnas ngag la mi gnas sems la mi gnas khams gsum la mi gnas pa de ni skye ba med de de ni ye shes 'byung ba rdo rje'i gnas 'di yin no//kye bcom ldan 'das de bzhin gshegs pa thams cad rmi lam 'di ni bdag gis khams gsum du rmi lam mthong bar bya'o zhes snyam du sems par bya'o/ /rmi lam yang bdag gis rmi lam du mthong bar bya'o zhes pa la sogs pa gsungs so//de'i don ni klu sgrub kyi zhal snga nas kyang / khong stong khyod kyi sku la med/ /nam mkha' la ni 'ja' tshon ltar/ /khyod kyi sku ni ston par mdzad/ /ces pa dang / dus kyi 'khor lo las/ bu mo gzhon nu mas me long la gzugs brnyan snang ba bzhin du zhes bya ba la sogs pa gsungs so//de'i don ni 'di yin te/ sems tsam la snang ba lugs las bzlog pas rig pa'i rgyal po gsang sngags mchog ni thig ler snang bas dngos po thams cad thig le sngon po gcig tu gyur par bsam/ mar me'i rnam pa lta bu de'i dbus su ri mo nag po skra'i tshad tsam ste/ de'i nang du rtsa dbus ma'i nang du dbug sa chud pa'i rtags su de'i dbus su sangs rgyas kyi sku longs spyod rdzogs pa chu'i zla ba dang 'dra ba brjod du med pa/sna tshogs pa'i mdog can rnam pa kun rang gi sems yul rnam par bral ba gzhan gyi sems mi shes pa de rang gi rgyud kyis bsdus pa'i chos can mthong ngo / /de yang chos yang dag par sdud pa las/bcom ldan 'das kyis spyan lnga gsungs te/ de bzhin rim pa bzhin du sha'i spyan dang lha'i spyan dang sangs rgyas kyi spyan dang chos kyi spyan rnams bsgom pa'i stobs kyis 'byung ngo zhes khams gsum ma lus pa mthong ngo / /longs spyod rdzogs pa'i sku/ sgra'i sgo nas chos ston te//de yang twa ta saM gra ha las kyang yid lha'i ngo bo'i ting nge 'dzin las mngon par byang chub pa lnga bstan pa bo d+hi tsit+tet+pa da yA mi la sogs pas bstan to/ /rgya cher rol pa las kyang / shAkya thub pa de bzhin gshegs/ /mngon par byang chub 'di bzhed nas/ /nair+ny+dza na'i chu 'gram gnas//mi g.yo ting 'dzin la zhugs nas/ /de tshe rgyal ba mkha' rdo rje/ /til gyi gang bu gtams pa las/ /de la dbyangs gcig gis bskul te/ /bsam pa 'di ni rnam dag min/ /'dis ni thar pa mi thob ste/ /zhes bya ba la sogs pas bskul lo/ /de bzhin du yang rnal 'byor pa yang ngo //de ltar yid kyis lus de snang ba thob pa las snang ba mched pa de las rlung drug /de las thig le'i dbus rgyal ba rigs drug tu bzhengs nas bskul lo/ /mnyam pa la gzhag pa'i sems tsam la gnas nas/ rlung drug 'gags nas dga' bral la gnas so/ /kun rdzob bden pa'i rim pa ste bzhi pa'o// //de nas sku gsung thugs rnam par dag pa'i lhan cig skyes pa'i 'od gsal ba'i ngo bo nyid bzhi pa'i gnas skabs zad pa 'di/ 'byung ba med pa'i mdo las kyang / chos 'di sgra skad kyis ni lung bstan pa/ /chos dang sgra dag 'dir ni rnyed ma gyur/ /chos nyid tshul gyis dngos la 'jug byed pa//bzod mchog bla na med pa thob par 'gyur/ /zhes gsungs te/ dus kyi 'khor lo las kyang / kun rdzob kyi rnal 'byor ni mdog dang phyag dang dbyibs dang bcas pa'o/ /don dam pa'i rnal 'byor ni mdog dang phyag dang dbyibs dang bral ba'o zhes gsungs so/ /de yang skye ba med pa'i bka' lits+tsha bI dri ma med par grags pa'i mdo las kyang /'jam dpal gyis ni yang dag zhus/ /rgyal ba'i sras po mi gsung bzhugs/ /mi gsung bas ni rgya cher bshad/ /ces gsungs so/ /de'i don ni 'di yin te/ rlung gi rlung ni mkha' dang ye shes la thim pas lte ba'i 'khor lo nas gsang ba'i 'khor lo rdo rje nor bu'i dbus su byang chub kyi sems ril por 'dzin pa'am/rjes su gzhig pa'i man ngag gis don dam pa'i bden pa ru bcug pas dngos po thams cad rnam par dag ste/ sku'i lhan cig skyes pa'i dga' ba dang / gsung gi lhan cig skyes pa'i dga' bdag thugs kyi lhan cig skyes pa'i dga' ba dang /ye shes kyi lhan cig skyes pa'i dga' ba dang / ra ba la a tshes bcu gsum dang / bcu bzhi dang / bco lnga dang / bcu drug pa'i yar ngo'i phyogs kyi rtog pa las 'das pa bcu drug phyed phyed 'dzin pa'i bdag nyid can rdo rje nor bur chud nas mi 'dzag pa'i bde ba lhan cig skyes pa'i sku/ma ning gi gnas skabs bcu drug pa'i cha yongs su rdzogs pa'i nam mkha'i dkyil ltar skad cig ma gcig la thugs su chud pa sprin med pa'i nam mkha' dang 'dra bar snang ngo / /don dam pa'i bden pa dbugs stong brgyad brgya mnyam pa la gzhag kyang rung mnyam pa las langs kyang rung gsang bar nyi ma dang zla ba'i cha zad pa bcu drug pa las yongs su rdzogs pa dang sa dang po'i bden pa la gnas zhes bya ba thob ste sbyin pa'i pha rol tu phyin pa yongs su rdzogs pa'o//de yang kha dog med pa lus med pa dbyibs med pa bya ba dang rtsol ba thams cad dang bral ba so so rang gis rig pa rdo rje slob dpon gyi kha las shes par bya'o//rdo rje bcu drug pa'i ngo bo nyid rang bzhin thams cad dang bral ba don dam pa'i bden pa yod pa dang med pa'i phyir skad cig ma gcig shes te gcig tu mi 'gal ba'i phyir ro/ /yang bcom ldan 'das de nyid 'bras bu sngags kyi theg par lhan cig skyes pa'i sku dga' ba ni lhan cig skyes pa'i sku gzung ba dang 'dzin pa spangs pa/rnam par shes pa'i chos nyid las 'das pa srid pa dang mya ngan las 'das pa la mig nas pa sangs rgyas rnams kyi lhan cig skyes pa lha mo rnams kyi sdom pa'o zhes gsungs so/ /de yang mtshan yang dag par brjod pa las/ bcu drug phyed phyed thig le can//cha med cha las 'das pa po/ /bsam gtan bzhi pa'i rtse mo can/ /bsam gtan yan lag kun shes shing / /ting 'dzin rig pa rgyud rig pa/ /zhes gsungs so/ /don dam pa'i bden pa bstan pa'i rig pa ste lnga pa'o// //de nas zung du 'jug pa la bslab par bya ste bzhi pa'i de nyid thob pa'o//de nas rdo rje nor bu nas yar bzlog ste/ gsang ba'i gnas su dbugs sum stong brgyad brgya pa gcig 'gags pas sa gnyis pa thob ste/ tshul khrims kyi pha rol tu phyin pa yongs su rdzogs pa'o/ /de nas lte ba dang snying ga dang mgrin pa dang dpral ba rnams su sum stong drug brgyar mnyam pa la bzhag kyang rung ma bzhag kyang rung 'gag pas bzhi dang drug dang brgyad dang bcu bzhi'i sa rnams 'thob ste/pha rol tu phyin pa bcu yongs su rdzogs nas sa bcu thob ste/ sa bcu'i dbang phyug phyag na rdo rje'i rjes su mthun pa'i mngon par shes pa lnga dang / nyon mongs pa'i sgrib pa dang shes bya'i sgrib pa dag par 'gyur ro//de nas bla ma dam pa'i man ngag gis dpa' bar 'gro ba'i ting nge 'dzin la bslab par bya'o/ /'di dag ni don dam pa ye shes kyi sku ro mnyam pa rdo rje lta bu'i ting nge 'dzin to/ /de la bslabs pas gsang ba nas lte ba'i bar du khu ba gyen du 'gro bas mar ngo'i sku'i dga' ba dang /gsung gi dga' ba dang / thugs kyi dga' ba dang / ye shes kyi dga' ba dang bzhi'i bdag nyid can no/ /stong pa nyid dang de yang yi ge ya la wa ra'o/ /de nas lte ba nas snying ga'i bar du byang chub kyi sems gyin du 'dren nus na/ sku'i dam pa'i dga' ba dang / gsung gi dam pa'i dga' ba dang /thugs kyi dam pa'i dga' ba dang / ye shes kyi dam pa'i dga' ba ste/ sa drug gi bdag nyid stong pa chen po stong nyid can ta la oM ar ro/ /snying gnas mgrin par 'dren nus tsam na sku'i dga' bral dang / gsung gi dga' bral dang / thugs kyi dga' bral dang / ye shes kyi dga' bral te/sa brgyad pa'i bdag nyid can/ don dam pa stong pa nyid e A l-I ai/ de nas mgrin pa nas dpral ba dang gtsug tor gyi gnas su byang chub kyi sems 'dren nus tsam na sku'i lhan cig skyes pa'i dga' ba dang / gsung gi lhan cig skyes pa'i dga' ba dang / thugs kyi lhan cig skyes pa'i dga' ba dang /ye shes kyi lhan cig skyes pa'i dga' bas sa bcu pa non nas/ stong pa nyid bcu drug pa'i bdag nyid r-i I a i'i yi ge'i bdag nyid can nam mkha' stong pa'i mthar thug pa'o/ /bcom ldan 'das kyis dpa' bar 'gro ba'i ting nge 'dzin gyi mdo las gang dpa' bar 'gro ba'i ting nge 'dzin thob pa'i skyes bu dam pa 'di ni sangs rgyas thams cad kyi yul du mchis pa lags so//rang dbang gi ye shes la dbang bgyid pa lags so/ /dpa' bar 'gro ba'i ting nge 'dzin ma thob pa'i phyir byang chub sems dpa' zhes nga mi smra'o/ /dpa' bar 'gro ba'i ting nge 'dzin ma thob pa'i phyir byang chub sems dpa' de la ni mngon par shes pa thob pa zhes nga mi smra'o//dpa' bar 'gro ba'i ting nge 'dzin ma thob pa'i phyir byang chub sems dpa' de la ni sbyang ba byas pa zhes nga mi smra'o/ /byang chub sems dpa' de la ni sbyin pa dang / tshul khrims dang / bzod pa dang / brtson 'grus dang / bsam gtan dang /shes rab dang / thabs dang ldan pa zhes nga mi smra'o/ /dpa' bar 'gro ba'i ting nge 'dzin ma thob pa'i phyir byang chub sems dpa' de la ni mang du thob pa zhes pa mi smra'o/ /dpa' bar 'gro ba'i ting nge 'dzin ma thob pa'i phyir byang chub sems dpa' de la ni mos pa dang ldan pa'o zhes nga mi smra'o/ /rigs kyi bu dag de bas na nges par 'byung ba'o//lam thams cad du nges par 'byung ba ni 'dod pa'i byang chub sems dpa' rlom sems thams cad med pa'i phyir dpa' bar 'gro ba'i ting nge 'dzin la bslab par bya'o zhes gsungs so/ /de bas na dpa' bar 'gro ba'i ting nge 'dzin dang / rnam mkhar mdzod kyi ting nge 'dzin dang /rdo rje lta bu'i ting nge 'dzin dang / zung du 'jug pa'i ting nge 'dzin la bslab par bya'o/ /de nas byang chub sems dpa' des dbugs nyi khri chig stong drug brgya gtsug tor gyi gnas su 'gags nas byang chub kyi sems gtsug tor gyi gnas su 'dren nus tsam dang / skad cig ma gcig la mngon par rdzogs par byang chub pa 'gro ba dang mi 'gro ba thams cad snang bar byed la/nyon mongs pa thams cad las rnam par grol ba bsgom pa de nyid kyi mthu yis thabs kyi bdag nyid can zhi ba/ mtshan dang dpe [(]byed [,]byad [)]'byung ba'i gzhi can rnam pa kun gyi mchog dang ldan pa/ stong pa nyid kyi ye shes las byung ba/gnyis su med pa mchog tu zhi ba gzung ba dang 'dzin pa bsgom pa de nyid kyi mthu yis spangs pa/ lhan cig tu skyes pa'i sku mchog tu mi 'gyur ba ye shes de kho na nyid rdo rje 'chang chen po 'dod pa dang gzugs dang gzugs med pa la mi gnas pa/ 'od gsal ba'i rang bzhin dri ma med pa ye shes sgyu ma dang 'dra zhing sgra dang dri dang ro dang reg bya dang chos las 'das pa'i ting nge 'dzin gyi mig can mchog gcig ni mthong bar bya'o//sangs rgyas thams cad mkhyen pa nyid dang rnam pa thams cad mkhyen pa nyid dang lam mkhyen pa nyid dang lam gyi rnam pa mkhyen pa nyid dang stobs bcu dang mi 'jigs pa la sogs pa'i yon tan gyi 'byor ba steng bas na de sangs rgyas kyi 'bras bu rab tu ster ba'o//'dir rtsa ba'i rgyud du bcom ldan 'das kyi gsungs pa'o/ /yod dang med pa las 'das pa/ /gnyis med dngos dang dngos med zad/ /stong pa snying rje gnyis med pa/ /rdo rje sbyor ba bde chen po/ /stong pa'i chos ni rnam par spangs//rdo rje sbyor ba gnyis med pa'o/ /zhes gsungs so/ /de yang mtshan yang dag par brjod pa las/ sangs rgyas thog ma tha ma med/ /dang po sangs rgyas rgyu med pa/ /ye shes mig gcig dri ma med/ /ye shes lus can de bzhin gshegs/ /zhes gsungs so/ /dpal dam pa dang po las kyang /nam mkha' las kyang nam mkha' 'byung / /thams cad stong pa nam mkha' cha/ /zhes gsungs so/ /de'i phyir na skad cig ma gcig la mngon par rdzogs par byang chub pa'o/ /rnam pa lngas mngon par byang chub pa de ni de kho na nyid skyes bu'i dus su ye shes rnam pa drug shar te/ gzugs kyi phung po dang lo'i yi ge rnam par dag pas me long lta bu'i ye shes snang zhing srid pa'i chos thams cad ye shes sgyu ma tsam du shes so//de nyid thugs rje chen po tshor ba'i phung po dang r-i'i yi ge rnam par dag pas thams cad la nyi ma ltar khyab pas/ mnyam pa nyid kyi ye shes so/ /mnyam pa nyid kyi ye shes de nyid 'du shes kyi phung po dang u'i yi ge rnam par dag pa so sor 'byed pas na so sor rtog pa'i ye shes so//de nyid kyis 'gro ba sems can thams cad la dgos 'dod re ba thams cad bskong bas 'du byed kyi phung po dang i'i yi ge rnam par dag pas na bya ba nan tan grub pa'i ye shes so/ /de nyid nam mkha' las tha mi dad pas na stong pa nyid kyi ye shes te/rnam par shes pa'i phung po dang a rnam par dag pa'o/ /de thams cad rang rig pa bde ba chen po'i rang bzhin yin pas na bde ba chen po'i phung po dang e rnam par dag pas so/ /drug pa ni khyab byed do/ /lnga pa ni khyab bya'o/ /de yang dus kyi 'khor lo las/thams cad mkhyen pa'i ye shes sku/ /nyin mor byed pa'i 'od lta bu/ /pad+ma'i 'dab ma 'dra ba'i spyan/ /sangs rgyas seng ge'i gdan bzhugs pa/ /zhes gsungs so/ /yang de nyid las/ stong pa'i yi ge dang thig le/ /mchog gi rdo rje 'dzin pa dang / /zhes gsungs so/ / dpal dgyes pa'i rdo rje las kyang / e yi cha byad bzang po gang / /dbus su waM gyis rnam par brgyan/ /sangs rgyas rin chen za ma tog /bde ba chen po kun gyi gzhi/ /zhes gsungs so/ /dpal 'khor lo sdom pa las kyang / gsang ba mchog gi dgyes pas na/ /thams cad bdag nyid rtag tu bzhugs//zhes gsungs so/ /de bas na ye shes lnga'o/ /bde ba chen po chos kyi dbyings las tha mi dad pa la de skad ces bya'o/ /rnam pa nyi shus mngon par byang chub pa ni/ ye shes lnga po re re la yang sku gsung thugs ye shes rnam pa bzhi dang ldan/ longs spyod rdzogs pa'i sku mtshan gyi me tog la dpe byad kyi 'bru chags pa byang chub sems dpa' sa bcu pa'i dbang phyug nyid la bde ba chen po nyid de ltar snang ngo //de ni rnam pa nyi shus mngon par rdzogs par byang chub pa'o/ /sgyu 'phrul dra bas mngon par rdzogs par byang chub pa ni/ sems can gdul bya ji ltar gdul bde bzhin du sprul pa'i sku'i zhing khams bsam gyis mi khyab pa ru ji ltar 'dul ba'i sku snang bar mdzad pa'o//de yang gcig las 'phros pa'i rgyud las/ 'jig rten khams la rdul snyed du/ /sku don rdul phran grangs med nyid/ /sprul pa rdul snyed bsam yas kyis/ /skad cig yud la lhun gyis grub/ /ces so/ / gsung gi sgo nas mchog dpag tu med pa ston to/ /de yang mtshan yang dag par brjod pa las/ dpag bsam shing chen rgyas pa yi/ /bum pa bzang po che ba'i mchog /byed pa sems can kun don byed/ /phan don sems can mnyes gshin pa/ /zhes gsungs so/ /bde ba chen po nyid ji ltar yang snang ba ji ltar yang ma yin te/bden pa gnyis su med pa thabs dang shes rab gnyis su med pa rdo rje 'chang chen po zhes bya'o/ /zung du 'jug pa gnyis su med pa'i rtogs pa ste drug pa'o// //de nas rdo rje 'dzin pa'i dam tshig yang dag par bstan par bya ste/ dam tshig la rnam pa gsum yod de/ slob dpon phyi dang nang gi'o/ /kun gyi mchog tu slob dpon te/ /rtsa ba'i rgyud dang bsdus rgyud dang / /grub pa thob pa'i slob dpon ni/ /dpal ldan yan lag med rdo rje/ /u rgyan pad+ma la ba pa/ /in+d+ra bo d+hi la k+Sh+mI dang / /nA gA rdzu na rje 'bangs bcas/ /sha ba ri dang DoM bi dang / /sa ra AR+Ya lU yi pa/ / dA ri ka sogs grub thob pa'o/ /slob dpon mkhas pa grangs med kyis/ /kun gyi gtso bo slob dpon pas/ /'di la dam tshig ma nyams na/ /'dul khrims nyis brgya lnga bcu dang / /byang sems sdom pa nyi shu sogs/ /nyams kyang rdo rje 'dzin pa thob/ /dbang bskur slob dpon mig dang 'dra/ /rgyud ston pa ni lus dang 'dra//man ngag ston pa snying dang 'dra/ /de bas slob dpon mchog yin pas/ /ngag 'khyal tshig gcig brjod mi bya/ /zhe sa'i tshig dag ma brjod na/ /ngu 'bod gnas su skye bar ni/ /nges par rdo rje 'dzin pa dang / /grub thob slob dpon grangs med gsungs/ /yid la ngan sems skyes gyur na//thugs kyi dam tshig nyams pa ste/ /nges par rdo rje dmyal bar 'gro/ /phyag mi 'tshal zhing gong mi 'jog /lus kyi brnyas pa byas gyur na/ /rdo rje brag chen gtams par ni/ /dpag tshad brgya khrir gnas par 'gyur/ /sngags rgod drag po rnon po yang / /bsgrub kyang grub par mi 'gyur ro/ / dpal ldan rdo rje 'dzin pa yang / /snying la zhugs pa dral te gshegs/ /rigs 'dzin sar zhugs mkha' 'gros kyang / /de la 'jigs par mi 'gyur ro/ /dpal ldan rdo rje 'dzin pa dang / /byang chub sems dpa' grangs med dang / /grub thob slob dpon rnams kyis gsungs/ /rgyud chen bde mchog 'khor lo las//ji ltar pad+ma 'byung gnas nyams dga' la/ /ngang pa mang po'i tshogs rnams 'dus pa ltar/ /de bzhin rnal 'byor dam tshig ma nyams na/ /ma mo mkha' 'gro dam tshig can rnams 'du/ /dpal chen gsang ba 'dus pa las/ /snying nas slob dpon smod pa ni/ /nam yang grub par mi 'gyur ro//dpal bde mchog 'khor lo'i rgyud las/ slob dpon phyi dang nang gi dam tshig gsungs so/ /shin tu mnyam gzhag sgrub pa pos/ /rtag tu dam tshig bskyang ba dang / /dam tshig nyams pas dkyil 'khor du/ /dbang bskur dngos grub thob mi 'gyur/ /zhes gsungs pa dang /phyi dang nang gi dam tshig brgyad/ /phyag na rdo rjes gsal bar gsungs/ /rtag tu dngos grub rnams kyi rgyur/ /dam tshig rnams ni bskyang bar bya/ /rigs gzhan las 'byung pho nya mo/ /'dod la chags pas bgrod mi bya/ /gnyis su med dang thogs med dang / /dam tshig rnams la spyod pa dang //bud med spyod pa bsgrub pa dang / /tshangs par spyod pa de bzhin zhal/ /zhes pa nas dam tshig bskyang ba'i cho ga'o zhes pa'i bar ni bde ba mchog gi stod 'grel las shes par bya'o/ /de ltar phyi'i dam tshig nyams pas ni 'jig rten pas dpya bar 'gyur ro/ /chos la smod pas sdig pa chen por 'gyur ro//sdig pa bskyed pas bsod nams nyams par 'gyur ro/ /bsod nams nyams pas dngos grub med do/ /nang gi dam tshig nyams pas dga' ba bzhin shor nas chags pa dang bral ba'i sdig pa las sdug bsngal skye'o/ /de ltar dam tshig nyams pas phyag rgya chen po'i dngos grub mi thob bo//rdo rje slob dpon la brnyas pa byas zhing bkur ba ma byas pas mi pha rol pos brnyas par 'gyur ro/ /rdo rje slob dpon gyi sku gsung thugs sun phyung bas rdo rje 'dzin pa sun phyung ba dang 'dra bas rdo rje dmyal bar 'gro'o/ /dus 'khor bde chen rgya mtsho lta bu la/ /shes rab zab mo gru gzings lta bus 'chad//bla ma zla rgyas lta bu'i thugs mnga' ba/ /bka' gnang nyes par gyur na bzod par bzhes/ /dus kyi 'khor lo snying po'i rgyan zhes bya ba'i sgrub thabs lho phyogs rgya mtsho'i yul du sku 'khrungs pa mkhas pa chen po bram ze bsod snyoms pas mdzad pa rdzogs so// //

CLOSE WINDOW