CLOSE WINDOW

D1296
བོད་ཡིག

gtor ma 'di nyid rab tu bshad/ /'byung po thams cad pa'i gtor ma'i cho ga /slob dpon chen po dpal mar me mdzad ye shes kyis mdzad pa rdzogs so// /[]@##/ /rgya gar skad du/ shrI he badzra maN+Dal bi d+hi nA ma/ bod skad du/ dpal dgyes pa rdo rje'i dkyil 'khor gyi cho ga zhes bya ba/dpal dgyes pa'i rdo rje la phyag 'tshal lo/ /bcom ldan 'das dgyes mdzad rdo rje'i bsnyen pa 'bum dang khri song bas/ gnas dben par rigs can smin par byas te/ der maN+Dal 'dab brgyad dmar po rdo rjes bskor ba/ khyams dang bcas pa byas nas me tog gi tshom bu dgu dgod do//bum pa gnyis la rdzas dang / rgyan cha dang ldan pa'i dbus dang byang shar du bkod nas/ de la bla re dang yol ba la sogs pas brgyan no/ /dkyil 'khor gyi phyogs bzhir mchod pa lnga tshan bzhi dang / gtor ma lnga dang / tshogs kyi yo byad kyis bskor bar bya'o/ /de nas rdo rje slob dpon khrus byas/stan bde ba la bskyed rdzogs bsgoms nas/ skad cig gis bum pa stong pa'i ngang las hUM las gzhal yas khang gi dbus su/ paM las byed pad+ma'i sdong po'i steng du/ pad+ma dmar po 'dab brgyad/ de'i lte ba la nyi ma dang bdud bzhi'i ro'i steng du cho ga lnga'am/ gsum mam/ skad cig gis he ru ka zhal brgyad phyag bcu drug pa'am/ zhal gcig phyag gnyis pa yum dang bcas pa bskyed/ pad 'dab brgyad la a las bdag med ma zhal gcig phyag gnyis pa brgyad bskyed do/ /de nas rang gi hUM gi 'od kyis ye shes pa spyan drangs la/ mchod bstod dang yab yum gyi sngags bzhi la bsnyen pa ci 'grub byas nas yang mchod de/lha rnams bdud rtsir bzhu'o/ /las bum du bdud rtsi 'khyil pa bskyed nas/ bsnyen pa byas la des slob ma la khrus bya'o/ /de nas slob ma gral la 'khod pa la skyabs 'gro sems bskyed/ gsol ba gdab pa/ gnang ba sbyin pa rtog pa bsdu ba/ yan lag lnga bya ba/ sdom pa gzung ba dang / dam pa bsgrag pa rnams gzhung bzhin byas la ye shes dbab par bya'o/ /de nas bla ma la dbang bskur zhu ba'i gsol ba gdab pa ni/ he ru ka dpal dbang bskur ba/ /'gro skyob phyir na gzi brjid can/ /de ltar yon tan 'byung gnas rdzogs//de bzhin bdag la deng gsol cig /byang chub rdo rje sangs rgyas la/ /mchod chen ji ltar stsal ba ltar/ /bdag kyang skyob pa'i don gyi phyir/ /nam mkha'i rdo rje deng bdag stsol/ /ces gsol ba btab pa dang / dkyil 'khor dang nam mkha'i lha tshogs kyi thugs ka nas lha mo bdud rtsi'i bum chu thogs pa dang /gsang ba'i chu rgyun gyis dbang bskur bas/ lus kyi sdig sgrib dag par bsams nas/ dbang bskur rdo rje chen po la/ /khams gsum kun gyis phyag byas pa'i/ /sangs rgyas kun gyi gsang gsum las/ /rab tu byung bas sbyin par bya//zhes brjod pas bum dbang thob par bsam/ de bzhin mgrin par gsang dbang / snying gar shes rab ye shes/ lte bar dbang bzhi pa'o/ /gzhan don 'ba' zhig gi dbang ngo / /de nas rang gzhan rnams la rgyun du dbang bzhi bskur ba bshad par bya ste/ rang gi spyi bor paM las gyur pa'i pad+ma'i sdong po'i steng du/ pad+ma dmar po 'dab brgyad kyi lte bar nyi ma dang / ro'i steng du cho ga gsum mam/ skad cig la he badzra yum med cig bsam/ pad+ma 'dab brgyad la nyi ma dang ro'i steng du/ a las bdag med ma bde ba rgyas pa brgyad bsam mo//de nas gong bzhin gsol ba btab la/ spyi bo'i lha tshogs rnams las 'od zer dpag tu med pa byung nas/ rang gi lus phyi nang thams cad 'od kyis khyab pa las/ las dang nyon mongs pa'i sgrib pa thams cad sangs dag nas/ lus 'od kyi rang bzhin du bsam/ des bdag nyid he badzra yum med pa cig tu gyur pa ni bum pa'i dbang ngo / /de nas yang gsol ba btab pas/ spyi bo'i lha mo bde ba rgyas nas 'od du 'dus te/ yab la 'khyud nas yab yum gnyis sbyor ba byas pas/ sbyor mtshams nas byang sems dkar dmar gnyis bde phri li li byung nas lce thog tu babs pas/bde ba skyes pa ni gsang ba'i dbang ngo / /lha tshogs la yang gsol ba btab pas/ /gtso bo'i yum las bdag med ma cig chad nas byung ste/ rang he badzra la 'khyud nas bsrub pa'i sbyor ba byas pas/ lus la zag med kyi bde ba chen po skyes pa ni/shes rab ye shes kyi dbang ngo / /de nas spyi bo'i lha tshogs la mchod pas lha gdan dang bcas pa spyi bor thim nas/ lha sku mnga' bas gsal ba'i gsal stong 'dzin med bde ba chen po la mnyam par gzhag go/ /mdor na snang srid 'khor 'das kyis bsdus pa'i chos thams cad kyi ngo bo rnam par dag pa/spros pa thams cad dang bral ba/ rang bzhin gyis 'od gsal ba'i phyag rgya chen po 'ba' zhig la gzhag par bya'o/ /de ni dbang bzhi pa'o/ /de nas yaM raM kaM /a las byung ba'i nang du sna tshogs rdzas rnams sha lnga bdud rtsi lngar legs par sbyangs nas/ lha tshogs rnams mchod cing /rnal 'byor pa rnams rol par bya'o/ /gtor ma lnga ni gong bzhin sbyangs la 'byung po thams cad pa'i sngags kyis bla ma dang / dgyes mdzad dang / chos skyong dang / gzhi bdag dang / gnod byed rnams tshim par byas nas/ rdo rje'i glu blang / lha tshogs la mchod bstod dang bshags pa byas nas/bdag gis sbyin sogs bgyis pa'i bsod nams kyis/ /bcom ldan dgyes mdzad rdo rje mnyes byas te/ /pha rol phyin drug yongs su rdzogs byas nas/ /'gro kun rdo rje rgyal po thob par shog /ces pa bsngo ba bya'o/ /de nas slob dpon dang thams cad mgrin gcig tu smon lam gdab pa ni/rigs su skye dang dam tshig can/ /mnyam med kye yi rdo rje ston/ /bla ma la gus snying rjer ldan/ /skye zhing skye bar 'gyur bar shog /lag pa rdo rje dril bu 'khrol/ /zab mo'i chos ni klog pa dang / btsun mo'i zhu ba mnyam za zhing / /skye zhing skye bar 'gyur bar shog /ces brjod do/ /de nas dkyil 'khor la bskor ba bya zhing bzod gsol bya/ bkra shis brjod/ ye shes pa gshegs/ dam tshig pa spyi bor bsdu/ rdo rje slob dpon yon gyis mnyes par bya'o/ /dpal dgyes mdzad rdo rjes dbang bskur ba'i cho ga mdor bsdus pa/

CLOSE WINDOW