CLOSE WINDOW

D1280
བོད་ཡིག

@/ /bung ba 'dod pa'i sgrub thabs bzhugs// @##/ /bcom ldan 'das dpal dgyes pa rdo rje la phyag 'tshal lo/ /de nyid ye shes rgyus skyes pa'i/ /longs spyod rdzogs sku phyag 'tshal nas/ /shin tu bsdus par gyur pa yi/ /bung ba'i sgrub thabs bshad par bya/dang po kho nar khams gsum thams cad sems tsam du shes par byas la/ de nas bdag nyid dpal he ru ka'i gzugs chu skyes dmar po dang 'dra ba skad cig gis rdzogs par byas te/ rang gi snying gar bcu drug phyed kyi pad+ma shin tu dmar ba bsams la/ de yi lte ba la A li yang dag par bsdus pa'i gzugs/sangs rgyas thams cad kyi yon tan rjes su chags pa'i yi ge aM dang hUM yang dag par yid kyis bris te/ de nas hUM dang aM las byung ba shin tu dmar ba'i 'od zer yid bzo bar byed pa spros te/ gur gum lta bu'i 'od zer de phyogs thams cad khyab ste/sems can thams cad rang gi gzugs su byas la de'i sku gsung thugs lhan cig tu bkug ste/ hUM dang aM gnyis kyi thig le la gzhug par bya'o/ /de nas hUM yongs su gyur pa las/ thabs dang shes rab kyi rang bzhin bung ba'i gzugs/ rin po che lta bu'i snying rje chen po'i rang bzhin me tog gi ro 'thungs pas brgyal ba/hUM gi ngo bo'i sgra rtag ring du sgrog pa/ bdag med ma dang he ru ka'i rang bzhin bsgom par bya'o/ /de nas de'i snying gar tshon dmar po/ /ko ba'i chu lta bu'i thig le phra mo aM dang hUM gi yi ger bltas te/ de nas thabs dang shes rab kyi bung ba srog gi rlung la zhon te/ sna'i bu ga nas phyung la/ khams gsum na gnas pa sems can gyi lus ngag yid gsum rnam par dag par byas te bsdu'o/ /yang dbugs kyi rlung la brten nas ji lta bar bya ste/ rang gi snying ga'i pad+ma'i lte ba la rab tu rnam par dag pa la gzhug par bya ste/gzhan gyi sku gsung thugs dang / rang gi sku gsung thugs gcig tu mnyam par bsgom par bya'o/ /de ltar yang dang yang du ji srid skad cig gis mthong gi bar du/ dbugs la brten pa'i gzugs bsgom par bya'o/ / de ltar goms pa'i rting la skyes pa dang bud med kyi skad cig pad+ma dmar po 'dab ma brgyad pa rnam par bsams la/ de'i ro bung ba srog dang rtsol ba la brten nas snga ma bzhin du byung ste/ bdag nyid kyi snying gi me tog lte ba la gzhug par bya ste/ skyes pa'i sna'i bu gar zhugs te/lus ngag yid gsum gyi gzugs/ snying ga'i pad+ma'i lte ba la 'dug ste de'i snying ga'i pad+ma'i 'dab ma la lus kyi rang bzhin gyi rdul yod pa bdag nyid kyi lus bsgom/ ngag gi rang bzhin pad+ma 'thungs/ /sems kyi rang bzhin pad+ma'i snying po zos te/de nas sgrub pa pos rang gi dbugs kyi rlung bkug ste/ skyes pa'i sna'i bu ga nas phyung la/ bdag nyid sna'i bu ga nas snying gi pad+ma'i ge sar la gzhug go/ /de ltar lus sprugs der lus kyang rang bzhin gyi chu skyes kyi rdul gnyis gcig tu byas/ ngag gi rang bzhin gyi me tog gi khu ba gnyis gcig tu byas/sems kyi rang bzhin pad+ma'i snying po gnyis gcig tu byas par bsam par bya'o/ /de yang de ltar spros pa dang / de ltar gzhug pa dang / de ltar bstims te/ yang dag par bsam par bya'o/ /de yang dang yang du ji srid du rjes su chags pa mthong ba dang /ji ltar bsgom pa bzhin du shes nas byed de/ ji ltar mngon par 'dod pa grub par byed do/ /'dir bsgom pa 'di byas na/ bud med dga' ba'i sems kyis chags par byed pa dang / 'dod pas brgyal ba'i lus kyis/ sgrub pa po'i sems bde bar byed cing dbang du 'gyur ro//nyes pa yod par mthong na/ ji ltar bstan par mi bya'o/ /gal te byas na chen po'i sdig par 'gyur ro/ /de bas na sngon du yul dang yul ma yin pa shes par byas la/ de shes pa dang / ji ltar bstan pa bsgom par bya'o/ / bung ba 'dod pa sgrub pa'i thabs/ /rnam par bsgrubs pa'i bsod nams kyis/ /'dir ni 'khor ba'i skye bo rnams/ /dpal gyi snying rje thob par shog/ /rdzogs so/ /grub pa brnyes pa'i rat+na tsan+d+ras mdzad pa/ lo tsA ba khu dngos grub po// //

CLOSE WINDOW