CLOSE WINDOW

D1264
བོད་ཡིག

@#/ /rgya gar skad du/ he badzra sA d+ha naM/ bod skad du/ dgyes pa'i rdo rje'i sgrub pa'i thabs/ 'jam dpal gzhon nur gyur pa la phyag 'tshal lo/ /dpal ldan dgyes pa'i rdo rje bde ba mchog gi ga 'phang rnam par mi rtog par gcig sku/ /brtan dang g.yo ba ma lus lus pa med pa'i dngos po'i rang bzhin bsod nams ye shes las byung nyid//dri ma bsal zhing dga' ba kun gyis rgyas 'gyur mkha' 'gro ma yi 'khor lo'i mgon/ /de la dngos po kun gyis btud nas de yi sgrub thabs gsal zhing yangs pa bshad/ / bla ma dam pa'i gzhung lugs ni/ /shin tu rnyed dka' gang thos pas/ /de zhabs pad+ma la btud nas/ /bdag nyid dran pa'i phyir yang ngo / /'di ltar yang drag cing rgal dga' ba'i/ 'khor ba'i g.yang sa chen po shin tu 'jigs pas skyo bar gyur pa'i sems can gyi khams la bltas la snying rje mchog gi ros bsgoms pa'i sems kyis 'khor ba'i rgya mtshor 'khyams pa bsgral ba'i thabs dang ldan par bla ma la brnyas pa la sogs pa'i skyon spangs pa/sbyin pa la sogs pa'i yon tan dang ldan pa/ dbang po las rgyal ba bdud rtsi lnga la sogs pa'i dam tshig bstan pa/dpal dgyes pa'i rdo rjer gsungs pa'i dkyil 'khor du dbang bskur zhing /yang dag par rjes su gnang ba thob pa'i rnal 'byor bas/ dur khrod la sogs pa yid dang mthun pa'i gnas 'ga' zhig tu nyi ma dang zla ba dang chu dang dri dang sman gyi khyad par gyis dag par byas pa'i sa'i char gnas pa la tho rangs kyis langs nas//chos kyi dbyings kyi bdag nyid kyi/ /ro ni dang por bsgom par bya/ /de yi snying la gnas byas la/ /go 'phang mchog ni bsgom par bya/ /rdo rje skyil krung gis 'dug la//bsam gtan phyag rgyas lag bsdams pas/ /rang gi snying gar re khA bsgom/ de las nyi ma'i dkyil 'khor te/ /der ni hUM las byung ba yi/ /shes rab thabs kyi rang bzhin nyid/ /kha dog nag po 'jigs chen po/ /hUM las byung ba'i rdo rje'o// rdo rje'i lte ba'i dbus gnas pa/ /hUM gi de nyid yang dag bsgom/ /hUM yig gyur pa la blta ba/ /zhe sdang bdag nyid rnam par bsgom/ /rdo rje las skyes nag po che/ /'dam skyes sngon po 'dra ba'i mdog /rang gi lha yi gzugs nyid ni/ / man ngag ji bzhin rnam pa gsum/ /gsum gyi nang na rnal 'byor bas/ /mos pa ji bzhin bsgom par bya/ /mdangs chen dpa' bo gcig pu nyid/ /dad pa nyid kyis bsgom par bya/ /de nas snying ga'i nyi ma la sa bon gnyug ma bkod la de'i 'od kyis spyan drangs pa'i bcom ldan 'das bsgom par bya ba'i gzugs rang gi 'khor dang bcas pa mdun gyi nam mkha' la bltas la/snying ga'i sa bon las byung pa'i ston ka'i nam mkha' dri ma med pa lta bu mchod pa rnam pa sna tshogs kyi khyad par lag pa'i yal ga na thogs shing sgeg pa'i 'og tu gau rI la sogs pa lha mo brgyad po rnams kyis phyi rol gyi mchod pa'i khyad par gyis go rims bzhin du mchod par byed do//de la gau rI ni ri dgas kyi mtshan ma 'dzin pa'o/ /rtsau rI ni nyi ma'o/ /ro langs ma ni chu'o/ /za phod ma ni stobs so/ /puk+ka sI ni dri'o/ /sa ba rI ni ro'o/ / tsaN+DalI ni je chung drug pa'o/ /Do m+bi nI ni 'khyud pa'i tshul du ston to/ /de nas bcom ldan 'das 'di nyid kyi spyan snga ru thog ma med pa'i dus kyi bag chags kyis bskyed pa'i sdig pa bshags pa la sogs pa bya'o/ /bdag gis sdig pa bgyis pa dang / bgyid du stsal ba dang / bgyi dpal rjes su yi rang ba'i sdig pa thams cad bshags par bya'o/ /sangs rgyas dang byang chub sems dpa' thams cad dang / so so'i skye bo'i dge ba'i rtsa ba ma lus pa la rjes su yi rang ngo / /bdag gis dge ba'i rtsa ba gang cung zad ci bgyis pa de dag thams cad bla na med pa yang dag par rdzogs pa'i byang chub tu yongs su bsngo bar bgyi'o//de ltar bdag byang chub kyi snying po la mchis kyi bar du dngos po thams cad kyi rang bzhin gyi bde ba chen po'i rnam pa can dgyes pa'i rnam pa'i rdo rje sangs rgyas la skyabs su mchi'o/ /des bstan pa'i bskyed pa dang rdzogs pa'i rang bzhin gyi chos la skyabs su mchi'o//de'i 'khor lor gnas pa'i mkha' 'gro ma'i tshogs kyi dge 'dun la skyabs su mchi'o/ /'khor ba'i rgya mtsho'i chur nub pa'i sems can 'di dag la bdag he ru ka'i ngo bor gyur pas rdo rje theg pa'i chos bstan pa'i gru rab tu byin pas yang dag pa'i gzung bas sgyu ma lta bu gnyis su med pa'i mchog tu dga' ba'i phung po'i bdag nyid kyi mtshan nyid can la rab tu gzhag par bgyi zhes byang chub tu sems bskyed par bgyi'o//dgyes pa'i rdo rje'i rnal 'byor bla na med pa'i bla ma sangs rgyas sgrub pa la 'di las gnyis pa gzhan med pa'i thabs kyi mchog 'di la bdag gis brten par bgyi'o zhes bya'o//de nas sems can thams cad la bu gcig pa ltar brtse ba'i mtshan nyid kyi byams pa chen po dang sdug bsngal dang sdug bsngal gyi rgyu las gzung bar 'dod pa'i snying rje chen po dang / sems can thams cad la dga' ba chen po 'jug pa'i mtshan nyid can gyi dga' ba chen po dang / brtags pa'i yul ma lus pa la btang snyoms pa'i mtshan nyid can btang snyoms bsgom par bya'o/ /de nas chos thams cad ni sems kyi rnam par brtags pa'o zhes yid kyi dmigs pa de dang de'i rnam par rab tu snang ba 'di dag ni sems nyid 'khrul ba ste/mya ngan la sogs pas rnam par 'khrul ba bzhin du sems las gzhan pa'i gzung ba 'di ni yod pa ma yin no/ /gzung ba med par 'dzin pa'i sems kyang yod pa ma yin no/ /de lta bas na sna tshogs 'di dag sems kyi rang bzhin du rtogs par bya'o zhes don de nyid bstan par byas nas rdzas ma lus pa'i de kho na nyid kyi snying po bsdus pa'i sngags brjod par bya zhing tha mal pa'i rnam pa gzhig par bya ste/oM shU n+ya tA dz+nyA na badzra swa b+hA ba At+ma kou0f85haM zhes bya'o/ / de nas sngags kyi don mngon sum du byas la/ 'gro ba thams cad rang bzhin med pa'i rmi lam du nye bar dmigs pa bzhin du rnam pa thams cad dang bral ba'i mtshan nyid can sgyu ma lta bu'i ston ka'i nam mkha' dri ma med pa'i dkyil lta bur bltas la 'di nyid ni bcom ldan 'das ma bdag med ma zhes bya'o//nga ni smon lam dang rjes su dran pa'i rgyu mthun par gyur pa'i rnam pa ltar/ bsdus pa'i 'khor lo dag pa'i 'jig rten pa'i rang bzhin bsgoms te/ mdun du sna tshogs pad+ma'i gdan la gnas pa'i raM las byung ba'i nyi ma'i dkyil 'khor la yi ge hUM bsam par bya'o//de las byung ba'i sna tshogs rdo rje kha dog nag po 'jigs su rung ba/ kha dog lnga pa rtse mo gsum pa'o/ /de'i dkyil du'ang nyi ma de la yi ge hUM dgod do/ /de la khro bo 'og mdung rtse/ /'jig dus me ltar bzod dka' ba/ /sdigs mdzub g.yon gyi khu tshur snying //bdud kyi dkyil 'khor bsdigs par byed/ /rdo rje 'bar ba g.yas pa na/ /zhal ni hUM gis gang bar gyur/ /dpa' bo stag gi pags pa bsnams/ /phyag rgya lnga yis rgyan du byas/ /drag po chen po kha dog gnag /'jigs pa shin tu 'jigs pa ste//khrag 'dzag mgo yi phreng ba can/ /'jigs byed 'jigs rung spro bar byed/ /skra ni dmar ser gyen du 'greng / /lce ni bsgyur zhing gar thabs can/ /spyan gsum dag dang yang dag ldan/ /mche ba cung zad gtsigs pa can/ /phyogs dang mtshams rnams kun du yang / / khro bo'i tshogs rnams spro bya zhing / /rnal 'byor rig pas gsang sngags 'dis/ /rang gi mtshams nas phur bus gdab/ /oM rak+Sha rak+Sha hUM hUM hUM phaT swA hA zhes ji snyed 'dod pa'i bar du'o/ /de'i nang du nyi ma dang sna tshogs rdo rje'i 'od zer 'jig pa'i dus kyi me lce'i rtse mo ltar gcig tu gyur nas phyogs mtshams su 'phros pas mtshams bcing ba dang /rdo rje'i ra ba dang / steng rdo rje'i gur dang 'og tu ni de yongs su gyur pa las rdo rje'i rang bzhin gyis gzhir 'og rim bdun gyi bar du bsam par bya'o/ /de'i dbus su hUM yongs su gyur pa las/ chos kyi 'byung gnas kyi gzugs ston ka'i ri bong can gyi rnam pa lta bu rdo rje 'chang chen po'i ngo bo rnam pa sna tshogs pa'i ngo mtshar chen po'i 'od zer gyi tshogs mngon par 'byung ba'i 'og phra ba steng yangs pa zur gsum pa'i nang stong pa'i dbus na gnas pa'i pad+ma 'dab ma sna tshogs dang sna tshogs pa'i rdo rje'o// de'i lte ba la 'byung ba chen po bzhi dkyil 'khor bzhi'i ngo bo rnam pa sna tshogs pa puk+ka sI la sogs pa lha mo bzhi'i rang bzhin gong nas gong du blta bar bya'o/ /de la dang por ni yaM las byung ba'i rlung gi dkyil 'khor zla ba phyed pa lta bu sngon po rtse mo gnyis su g.yo ba'i ba dan gyis mtshan pa'o//raM las me'i dkyil 'khor gru gsum pa rtse mo phra ba dmar po 'od kyi phreng ba dmar pos mtshan pa'o/ /de'i steng du baM las byung ba'i chu'i dkyil 'khor zlum po kha dog dkar po bum pas mtshan pa'o/ /de'i steng du laM las byung ba sa'i dkyil 'khor grub bzhi pa kha dog ser po zur rnams su rdo rje rtse gsum pas mtshan pa'o//de'i steng du rnam par shes pa sgyu ma lta bu nyid du brtags pa'o/ /sna tshogs rdo rje'i lte ba la 'byung chen bzhi yongs su gyur pa las mdor bsdus nas sangs rgyas kyi zhing yongs su dag pa byang chub kyi phyogs kyi chos sum cu rtsa bdun rnam par dag pa rnam par snang mdzad chen po'i rang bzhin nor bu rnam pa sna tshogs kyis spras pa'i gzhal yas khang dpag tu med cing mtha' yas pa'i 'jig rten gyi khams sgyu ma lta bur ston pa'i dur khrod kyis yongs su bskor ba bsgom par bya ste/zur bzhi pa ka ba brgyad kyis nye bar mdzes pa sgo khyud bzhis mdzes par byas pa/rta babs bzhis brgyan pa dra ba dang dra ba phyed pa dang / me long dang me tog gi phreng ba dang / bla re dang / rnga yab kyis spras pa/ rdo rje thig gis brgyan pa/ sangs rgyas kyi tshogs 'phros pas mdzes pa/ g.yo ba'i ba dan yid du 'ong ba'i rtse mo'i phyogs kyi sgo rnams las dril bu'i sgra sgrogs pa/'dod pa'i yon tan lnga yang dag par bkod pas nyams su dga' ba'o/ /de'i dkyil du sna tshogs pad+ma 'dab ma brgyad pa ge sar dang bcas pa'o/ /de bzhin phyogs mtshams pad+ma ni/ /rang rang stan gyi ge sar la//tshangs dbang nye dbang drag po dang / /de bzhin gshin rje gnod sbyin dang / /bden bral dang ni thags bzangs ris/ /rgyas par gau rI la sogs kyi'o/ /lho dang nub dang byang dag dang / /dbus su bdud ni bzhi po dag /dbyibs dang kha dog ji lta bu/ /de lta'i gzugs su dgod par bya//bdud rnams dag ni thams cad kyi/ /snying la nyi ma'i dkyil 'khor ro/ /bgegs rnams bred pa de dang de/ /skyabs tshol ba la gcig pu 'bad/ /de la dbus kyi 'dab ma la ni lugs su 'byung ba dang / lugs las bzlog pa'i a la sogs pa dbyangs kyi yi ge nyis 'gyur du byas pa/skyes bu chen po'i mtshan sum cu rtsa gnyis mtshon par byed pa'i zla ba'i dkyil 'khor me long lta bu'i ye shes kyi rang bzhin no/ /de'i steng du yi ge k+Sha bor ba'i ka la sogs pa'i yi ge d+ha da b+ha ya ra la wa dang bcas pa'i lugs su 'byung ba dang /lugs las bzlog pa nyis 'gyur du byung ba de dpe byad bzang po brgyad cu mtshon par byed pa'i nyi ma'i dkyil 'khor mnyam pa nyid kyi ye shes kyi rang bzhin no/ /de'i dkyil du sa bon gyi yi ge hUM aM ngo / /de dag yongs su gyur pa las rang gi stan la gnas pa'i sa bon gnyis kyi snying po las sna tshogs rdo rje dang /gri gug dang / thod pa la gnas pa so sor rtog pa'i ye shes kyi rang bzhin bsam par bya'o/ /de'i 'od zer las byung ba'i mkha' 'gro ma'i rnam pa lta bu'i thub pa mchog gi tshogs kyis 'jig rten gyi khams dpag tu med pa la rnam par gzigs pas de dag tu gtogs pa'i sems can rnams yang dag par rdzogs pa'i sangs rgyas su byas nas/slar log nas gcig tu gyur par byas pa ni bya ba nan tan gyi ye shes kyi rang bzhin no/ /de nas nyi ma dang zla ba dang phyag mtshan dang sa bon las yongs su gyur pa'i bcom ldan 'das rdo rje 'chang chen po ni dpe med pa'i tshogs kyi rdul phra rab las yongs su bsgrubs pa bde ba chen po'i rang bzhin 'chad par 'gyur ba'i phyag dang zhal dang mdog dang dbyibs kyis mtshon pa'i rgyur gyur pa'o//de lta bu'i bdag med ma ni sku la 'khyud pa chos kyi dbyings shin tu rnam par dag pa'i rang bzhin bsgom par bya'o//de lta bu'i mngon par byang chub pa rnam pa lnga'o/ /de'i thugs ka nas byung ba'i 'od zer gyi tshogs kyis de bzhin gshegs pa'i tshogs ma lus pa he ru ka'i gzugs su rdzogs par byas nas spyan drangs nas bcug pa zhu bar gyur pa las gaM la sogs pa'i sa bon brgyad las byung ba'i gau rI la sogs mkha' 'gro ma spro zhing dran par bya'o//de nas nam mkha' la dri za'i sems can phra ba'i dkyil 'khor gyi gzugs can kha dog dmar po ho dmar po'i phreng ba gnyis kyis yongs su bskor bar bltas la/ snying gar 'od kyis spyan drangs shing bcug nas bla ma'i man ngag nyid kyis gnas ji lta ba bzhin du dgod par bya'o//de nas rdo rje can rang gi rig pa dang bcas pa 'dod chags chen pos zhu bar gyur pas ston ka'i zla ba dri ma med pa lta bur zhu bar gyur nas bde ba chen po'i mthar gnas par bya'o/ /de nas puk+ka sI la sogs pa lha mo bzhi shin tu 'dod pa'i tshul gyis 'ongs nas rang rang gi phyogs su 'dug ste/thugs sad par byed pa'i rdo rje'i glus bcom ldan 'das slong bar byed pa/ bzhengs shig dang sgrol thugs rje'i thugs/ /puk+ka sI ni bdag la skyobs/ /stong pa'i rang bzhin nyid spongs la//bdag la bde chen sbyor bzhed mdzod/ /khyod mi bzhugs na bdag 'gum pas/ /dgyes pa'i rdo rje khyod bzhengs shig /stong pa'i rang bzhin nyid spongs la/ /ri khrod ma 'bras 'grub par mdzod/ /bdag gtso 'jig rten mgron gnyer nas/ /stong pa nyid la bzhugs sam ci//khyod med phyogs ni ma 'tshal bas/ /tsaN+Da lI bdag gsol ba 'debs/ /bdag gis khyod kyi thugs 'tshal gyis/ /mig 'phrul mnga' ba khyod bzhengs shig /DoM bi mo bdag sgren mo lags/ /thugs rje rgyun chad ma mdzad cig /ces pa'o/ / de nas glu'i ngo bor rmi lam sad pa bzhin du zla ba zhu ba de bsdus pa las byung ba'i sa bon gnyis so/ /de dag yongs su gyur pa las phyag mtshan gnyis so/ /de'i dkyil du nyi ma dang zla ba la gnas pa'i sa bon de gnyis nyid de/ thams cad mkhyen pa'i ye shes kyi rang bzhin blta bar bya'o//de las mkha' 'gro ma'i rnam pa can gyi de bzhin gshegs pa rnams yang dag par spro zhing yang dag par bsdus pa'i sbyor bas de dag thams cad sgyu ma lta bu dang rmi lam lta bu'i sems kyi rang bzhin gnyug ma la ltos par dpag par bya zhing / zla ba dang nyi ma phyag mtshan dang sa bon yongs su gyur pa las byung ba'i he ru ka'i gzugs bdag med ma dang snyoms par 'jug pa'i bdag nyid bsgom par bya'o//zhabs rnams sa la brten mdzad cing / /lha dang lha min bsdigs par mdzad/ /mig ni dmar zhing zlum la 'gyur/ / khros shing sgeg pa ral ba can/ /zhabs ni bzhi dang zhal brgyad dang / /phyag ni bcu drug dag gis brgyan/ /phung po nyon mongs 'chi bdag lha'i/ /bu yi bdud bzhi mnyam par gnon/ /skyil krung phyed pa'i gar thabs can/ /khrag 'dzag mgo bo lnga bcu'i phreng / /shin tu 'jigs rung nyam ngar gnas//spyi gtsug sna tshogs rdo rje 'dzin/ /'jig dus me ltar 'bar ba'i 'od/ /zhal nas hUM ni sgrogs mdzad cing / /sku la thal ba'i rdul gyis bsgos/ /'jig dus sbyin dang dbang sngon 'dra'i/ /rtsa ba'i zhal dang sku lus can/ /ri bong can 'dra'i 'od dang ni/ / nyin mo byed pa'i 'od 'dra ba'i/ /g.yas dang g.yon pa'i zhal mdog go/ /steng ma'i zhal ni dud mdog 'dra/ /rnam par 'gyur dang bung ba 'dra/ /lhag ma'i zhal ni bzhi pa'o/ /zhal kun kyang mche ba gtsigs pa spyan gsum gyis mdzes pa/ /dpral ba'i steng du thod pa'i du ma bu lngas brgyan pa/smin ma g.yo ba/ skra dmar ser gyen du 'greng ba/ gcer bu gar dgu dang ldan pa/ /phyag rgya lnga yis rnam par brgyan/ /'khor lo rna cha mgul rgyan dang / /lag pa gang du bu ska rags so/ /glo dang dbugs rgod de bzhin skyo/ /za byed mdze dang za g.ya' dang / /dmu chu spri ha'i rang bzhin nyid//glang po rta bong glang rnga mo/ /de bzhin mi dang seng byi la/ /g.yas pa'i thod pa brgyad po ru/ /gnyis 'thung la sogs rim shes bya/ /sa dang chu dang me dang rlung / /zla ba dang ni nyi ma dang / /mthar byed dang ni nor sbyin rnams/ /g.yon pa'i thod pa brgyad na'o/ /lha mo bdag med ma de ni//phyag gnyis kyis ni rnam par brgyan/ /bdud bzhi'i khrag gis bkang ba yi/ /thod pa yis ni phyag g.yon brel/ /g.yas na nyon mongs gcod pa yi/ /gri gug bsnams par mdzad pa yin/ /gcer bu kha dog nag mo ste/ /bcom ldan 'das kyi mgul nas 'khyud//spyan gsum gyis ni rnam par brgyan/ g.yas brkyang pa yi gnas pas gnas/ /phyag rgya lnga yis rnam par brgyan/ /dpral ba'i steng du mgo skam phreng / /mdzes pa dag gis mdzes par byas/ /khrag med mgo yi phreng ba yis/ /grub pa'i mkha' 'gro ma la brgyan//de nas bcom ldan 'das kyi thugs ka'i pad+ma la gnas pa'i nyi ma la ni hUM ngo / /de nas bcom ldan 'das ma'i thugs ka'i pad+ma la gnas pa'i zla ba la yi ge aM blta bar bya ste/ mig dang / rna ba dang / sna dang / lce dang / lus dang / yid lam tsho skyes dang / srog song ba'i snying ga'i zla ba'i dkyil 'khor gyi steng du a A i I uM gi sa bon las skyes pas mtshan ma'i gri gug dang / zla ba dang nyi ma kha sbyor du byas pa yongs su gyur pa las/ rdo rje ma la sogs pa'i mkha' 'gro ma dkar mo/ nag mo/ ser mo/ /dmar mo/ /ljang gu ni gti mug dang /zhe sdang dang / phra ma dang / 'dod chags dang / phrag dog ni bdag med ma mkha' 'gro ma'i rang bzhin te/ gri gug dang thod pa bsnams pa'i dkyil 'khor phyed pa'i gar gyis bzhugs pa bsgom par bya'o/ /rdo rje ma la sogs pa'i mkha' 'gro ma lnga po 'di dag ni rim pa ji lta ba bzhin du/gzugs dang / tshor ba dang / 'du shes dang / 'du byed dang / rnam par shes pa'i phung por bsam par bya'o/ /de bzhin du gti mug dang / zhe sdang dang / nga rgyal dang / phra ma dang / 'dod chags dang / phrag dog dang / gzugs la sogs pa'i yul rnams la ni/gau rI dang / tso rI dang / be tA lI dang / g+hasma rI dang / sa spyod ma dang / mkha' spyod ma dang / sa dang / chu dang / me dang / rlung dang nam mkha' la ni/ puk+ka sI dang / sa pa rI dang / tsaN+DalI dang / DoM bi nI'o/ /lus dang / ngag dang / yid la ni sdig song ba'i snying ga'i zla ba'i dkyil 'khor gyi steng du oM AM gi sa bon las skyes pa'i/dkar mo dang / dmar mo dang / nag mo dang / sa spyod ma dang / mkha' spyod ma dang / bdag med ma'i rnal 'byor ma rnams rdo rje ma la sogs pa bzhin du yongs su rdzogs pas gnas nas su'o/ /sha ni puk+ka sI ru grags/ /khrag ni sa ba rI ru brtags//tsaN+Da lI ni khu bar bstan/ /DoM bi rkang tshil dag pa ste/ /'di dag lha yi rnam dag go/ /da ni rnam par dag pa gzhan dag brjod par bya ste/ pags pa byang chub yan lag bdun/ /rus pa 'phags pa'i bden pa bzhi/ /thugs rje'i spyan ni dmar po ste//byams pa'i thugs kyis yan lag nag/ /bsdu ba'i dngos po bzhi dag gis/ /zhabs bzhi dag tu dran par bya/ /zhal brgyad rnam par thar pa ste/ /phyag ni stong pa bcu drug go/ /tshad ni sangs rgyas lnga yin te/ /khro ba gdug pa 'dul ba po/ /spyan ni rnam dag rdo rje gsum//brten pa'i sems kyis dngos grub 'gyur/ /drug cu rtsa bzhi brgyad cu drug /'dab ma sum cu gnyis pad+ma/ /sprul pa chos dang longs spyod dang / /bde chen zhes bya go rims bzhin/ /lte ba snying ga mgrin pa mgor/ /'khor lo bzhi po bsgom par bya/ /'od zer lnga po dkar dang nag /dmar dang sngo ba de bzhin te/ /oM hUM aM haM ci rigs par/ /steng dang 'og tu kha bltas nas/ /shes rab thabs kyi rnam dag gis/ /gnyis gnyis dag tu nye bar bstan/ /de nas rang gi snying ga'i sa bon gnyug ma'i 'od zer gyi tshogs kyis gdod ma nas grub pa'i khams gsum na bzhugs pa'i rgyal ba mchog gi tshogs spyan drangs pa nam mkhar bzhugs su gsol te/phyi dang nang dang gsang ba mchod pa'i khyad par gyis yang dag par mchod la/ oM a b+hi Shiny+tsa tu mAM sarba ta thA ga ta zhes bya bas gsol ba btab pa dang / he ru ka'i gzugs su gyur pa'i de bzhin gshegs pa de dag gis de bzhin gshegs pa lnga'i rang bzhin du bdud rtsi lnga'i rang bzhin bum pa lnga lag pa'i pad+mas gzung bas dbang bskur bar bya'o//dbang bskur ma thag tu spyi bor thugs kyi bdag por gzhag go/ /me tog gi char dang gur gum gyi char yang 'bab par 'gyur ro//rnga'i sgra yang sgrogs par byed do/ /gzugs rdo rje la sogs pas kyang mchod par byed do/ /sangs rgyas spyan la sogs pas kyang stod par byed do/ /de'i rjes la rang rig pa thugs kar gnas pas dbang bskur bas mig la sogs pa 'thob par bsgoms la/ tshogs lhag par bya ba'i don du rigs lngas byin gyis brlab par bya'o//de'i rim pa 'di yin te/ mgo dang / snying ga dang / lte ba dang / gsang ba dang / brla rnams su/ oM hUM swa AHhA'i sa bon lnga las rdzogs pa'i rnam par snang mdzad dang / mi bskyod pa dang / rin chen 'byung ldan dang / snang ba mtha' yas dang /don yod grub pa'i rang bzhin gyi rdul phra rab las bsgrubs pa'i sku can bsgom par bya'o/ /hUM dang a'i sa bon las nges par byung ba'i pad+ma 'dab ma brgyad pa'i ze ba la hUM dang oM las byung ba'i rnal 'byor pa'i rdo rje'i nor bu ji ltar rigs par sngags gnyis kyis byin gyis brlabs te/oM pad+ma su kha d+ha ra ma hA rA rA ga su kha d+ha ra/ tsa tur A nan+da b+ha ga bi shA hUM hUM hUM ka R+YaM ku ru Sh+wa me/ tsa tur A nan+da da ya ka kha ga mu khe ka rA so nA tha hUM hUM hUM/ kar+yaM ku ru Sh+wa me zhes bya ba de dang lhan cig tu dga' ba brtsam par bya'o zhes bya ba la sogs pa ni dang po'i rnal 'byor zhes bya ba'i ting nge 'dzin to//de'i rjes la rang gi snying ga'i sa bon gyi 'od kyi lcags kyus he ru ka'i 'khor lo spyan drangs nas bdag nyid la bcug la zhu bar byas nas/ zla ba zhu ba lta bur gyur pa pad+ma'i nang du ltung ba las bskyed pa'o/ /rang gi sa bon dang phyag mtshan las rdzogs pa'i dkyil 'khor gyi dbang phyug dang /gau rI la sogs pa'i mkha' 'gro ma'i tshogs bskyed cing / hUM aM gaM tsaM baM g+haM paM shaM laM DaM zhes bya ba'i 'byin pa'i sngags kyis sprul cing gdon no/ /de la bcom ldan 'das ma dang lhan cig bcom ldan 'das ji skad bstan pa'i phyag dang zhal sku mdog la sogs pas mtshon pa rang gi bdag nyid gzhug go//gau rI kha dog nag mo ste/ /g.yas dang gzhan la gri gug dang / /ro hi ta yi nya bsnams la/ /shar sgor nyi ma'i gdan la bsam par bya'o/ /de bzhin du tsau rI ni btsod kyi mdog lta bu rnge'u chung dang phag pa bsnams pa lho'i gdan la'o//de bzhin du ro langs ma ni gser btso ma'i mdog lta bu rus sbal dang / pad+ma'i snod bsnams pa nub kyi sgo'i gdan la'o/ /de bzhin du g+hasma rI ni nor bu ma ra ka ta lta bu ste/ sprul dang rnal 'byor gyi snod bsnams pa byang phyogs kyi gdan la'o/ /de bzhin du puk+ka sI ni in+d+ra nI la lta bu ste/seng ge dang dgra sta bsnams pa dbang ldan mtshams kyi gdan la'o/ /de bzhin du sa ba rI ni zla ba nya ba lta bu ste/ dge slong dang 'khar gsil bsnams pa me'i mtshams gdan la'o/ /de bzhin du tsaN+DalI ni nam mkha' ltar sngo bsangs te/ 'khor lo dang gshol mda' bsnams pa bden bral mtshams kyi gdan la'o//de bzhin DoM baM nI ni sna tshogs pa'i mdog can phyag na rdo rje dang sdigs mdzub bsnams pa ste/ rlung gi mtshams kyi gdan la gnas par bsam par bya'o/ /rdo rje rnal 'byor ma kun kyang / /skyil krung phyed pa'i gar gyis gnas//phyag rgya lnga yis rnam par brgyan/ /dbu skra dmar ser gyen du 'greng / /spyan gsum dmar zhing zlum pa ste/ /khrag med mi mgo'i phreng ba yis/ /rnam par brgyan cing bdag po la/ /bde mchog sbyin pa gcer bu'o/ /zhes bya bas thams cad du yongs su rdzogs pa'i dkyil 'khor la bltas la//phyag rgya byin rlabs sbyor ba yis/ /nyams med ye shes thob bya'i phyir/ /mtsho skyes rdo rjes bug pa ru/ /phaT ser po ni bsam par bya/ /de nas rang gi snying ga'i sa bon gyi 'od kyi lcags kyus ye shes kyi dkyil 'khor spyan drangs la/ shar phyogs kyi sgor phyogs par bltas la yon chab la sogs pa phul te/oM badzra gau rI A kaR+Sha ya dzaH oM badzra tsau rI bra be sha ya hUM/ oM badzra be tA lI ban+d+ha baM/ oM badzra g+hasma rI to sha ya hoH zhes bya ba spyan drang ba dang / gzhug pa dang / bcing ba dang / mnyes par byas pa dam tshig dang ye shes kyi dkyil 'khor gcig tu gyur pa rnam par bsams la/snying ga'i sa bon gyi 'od zer gyis rgyal ba mchog gi tshogs spyan drangs shing mchod la dbang bskur ba bya ba'i phyir gsol ba gdab par bya'o/ /de ltar de dag gis dbang bskur ba byas ma thag tu ming gis dbang bskur ba'i rgyal ba mgor gnas par 'gyur ro/ /de la thugs dang sangs rgyas rin chen dang //rdo rje chos kyi rgya yis ni/ /gau rI tsau rI be tA lI/ /g+hasma rI la go rims bzhin/ /lha mo puk+ka sI sogs bzhi/ /sangs rgyas 'di dag go rims bzhin/ /de nas rang gi snying ga'i sa bon gyi 'od zer gyi sgo las byung ba'i mkha' 'gro ma rnams lag pa'i yal gas mchod pa rnam pa sna tshogs thogs pa/rdzas dang / blta ba dang / dge ba ma lus pa sgyu ma lta bur blta ba'i ngo bo dang / de las gzhan pa'i phyi rol gyi mchod pa khyad par can gyi bdag nyid khams gsum pa'i bdag nyid can dkyil 'khor gyi 'khor lo'i ngo bo la mchod pa dang / mchod pa po dang mchod pa'i gnas kyi dbye ba'i blo mi bya bar yang dag par mchod par bya zhing /sgra'i grong khyer brag ca lta bur shes pas bstod par yang bya'o/ /rnal 'byor ma yi tshogs kyis khyod/ /bskor zhing khyod sems mchog thob 'gyur/ /de yis 'gro ba brtan g.yo sbyangs/ / thugs rje'i thugs kyis sems can bslang / /sgyu ma'i sprul par khyod kyis rdo rje phong / /dpal ldan khrag 'thung rdo rjes bdag la thugs kyis dgongs/ /de nas mdun du yaM las byung ba'i rlung gi dkyil 'khor rgyal mtshan gyis mtshan pa'o/ /de'i steng du raM las byung ba'i me'i dkyil 'khor 'bar bas mchan pa'o//de'i steng du aM las byung ba'i pad+ma'i snod do/ /de'i dkyil du bdud rtsi lnga dang gsal byed lnga/ /de bzhin gshegs pa lnga'i sa bon gyis mtshan pa sbar ba dang / bskor ba dang / dri ma med par sbyangs pas shel ltar gyur pa de'i steng du hUM las byung ba'i de bzhin gshegs pa thams cad kyis byin gyis brlabs pa'i rdo rje'i 'od kyis zhu bar gyur pa/oM gyis byin gyis brlabs pa/ de'i 'od zer gyis de bzhin gshegs pa thams cad kyi ye shes kyi bdud rtsi bkug la de dang ro mnyam par byas pa la de kho na nyid gsum gyis byin gyis brlabs pa/ ro dang / nus pa dang / dpe med pa'i smin pa'i rang bzhin hUM las byung ba'i lce dang / snying ga dang / nyi ma la bkod pa'i dkyil 'khor tshim par bya zhing mkha' 'gro ma'i dbus na gnas pa'i gtso bo bsgoms pa la yang de nyid kyis so zhes bya ba ni dkyil 'khor rgyal mchog ces bya ba'i ting de 'dzin to/ da ni gau rI la sogs pa'i mkha' 'gro ma'i tshogs kyi dkyil 'khor gyi dbang phyug mthar thug pa'i re re nas go rims bzhin du phyogs bcur yang dag par spros la/ ji ltar rigs par rjes su brtan par byas nas/ bya ba byas shing byed pa byas pa'i dkyil 'khor ma lus pa rnam par mi rtog pa bde ba'i rang bzhin du blta bar bya'o//de'i rjes la dang po sprul pa'i 'khor lo yi ge aM kha dog nag po 'od dang bcas pa'o/ /de yongs su gyur pa mar me'i 'od ltar 'bar ba'i 'od zer ba spu'i bu ga nas byung bas/ gau rI la sogs pa lha mo'i tshogs snang bar byas nas/dkyil 'khor dang dkyil 'khor gyi dbang phyug nag po chen po mig sman nag po bcag pa lta bu'i lus spro zhing bsdu ba bsgom par bya'o/ /rim pa 'di nyid kyis gnyis par dmar po/ gsum par ser po/ bzhi bar ljang gu/ lnga par sngon po/ drug par dkar po zhes bya ba yan lag drug bsgom par bya'o//phyi nas dga' bral mthar yang de bzhin no/ /zhes bya ba gau rI la sogs pa mkha' 'gro ma brgyad rang rang gi phyogs kyi zhal brgyad du bzhugs nas nyid kyi thugs ka'i sa bon gnyug mar gnas par bya'o/ /de nas bcom ldan 'das ma bdag med ma yang bcom ldan 'das kyi thugs kar bzhugs par bsam par bya'o//de nas bcom ldan 'das kyang 'khor lo bzhi po 'od zer gyi tshogs spros pas bdag nyid 'od kyi rang bzhin du gyur pas/ nyid kyi thugs ka'i nyi ma la gnas pa'i sa bon gnyug ma la 'jug par bya'o/ /nyi ma yang sa bon la/sa bon yang thig ler gyur nas/ thig le dang bcas pa'i 'khor lo gsum ni des mtshon pa bde ba chen po'i rang bzhin 'od zer dkar po'i tshogs kyi rnam pa can du bsgom par bya'o/ /rim gyis rang gi bdag nyid du zhu bar gyur pas mi dmigs par bya'o/ /de lta bu'i sems kyi rang bzhin gnyug ma'i ngo bo nyid bde ba chen po'i rnam par ro gcig par gyur to zhes bya ba yin no//bsgoms pas skyo bar gyur na/ sngags bzlas pa bya ste/ bdag nyid dang 'khor lo'i rnam pa bsams/ oM de ba pi tsu badzra hUM hUM hUM phaT swA hA zhes bya ba'i sngags sam/ rgyud nas 'byung ba'i rtsa ba'i sngags snying ga'i nyi ma la sngags kyi yi ge mgo gyen du bltas pa dkyil 'khor gyi rnam pa ltar yang dag par gnas pa rab tu 'bar ba rnams yid kyis bris la yid kyis bltas pa 'di ni rdo rje bzlas pa'o/ /yang na khro bo'i bzlas pa bya ste/ zhal brgyad dang / gau rI la sogs pa mkha' 'gro ma rnams kyis zhal nas sngags brjod par lhag par mos pa bya'o zhes bya ba ni bzlas pa mdor bsdus pa'o//bzlas pas skyo bar gyur na smon lam gdab par bya ste/ rigs bzangs skye dang dam tshig can/ /rgyags med dgyes pa'i rdo rje 'chang / /bla ma la gus snying rje dang //ldan zhing skye zhing skye bar 'gyur/ /lag pa rdo rje dril bu 'khrol/ /zab mo'i chos ni 'don pa dang / /btsun mo'i khu ba mnyam za bar/ /skye zhing skye bar 'gyur bar shog /ces bya'o/ /yang na snga ma bzhin du rang gi lhag pa'i lha'i 'khor gyi 'khor lo yang dag par mchod la/rang gi snying ga'i sa bon gnyug ma las gzhal yas khang yangs shing rgya che bar lhag par mos par byas la mkha' 'gro ma'i tshogs khongs su chud par bsgoms nas/ lha'i nga rgyal nyid bya'o/ /yid kyis langs la bya ba rnams la spyad par bya'o/ /thun gnyis po gzhan la yang yid dang mthun pa'i gnas su nye bar 'dug la/snga ma bzhin du gzhal yas khang lhag par mos par byas la/ de'i dkyil du bdag nyid bdag med ma dang mnyam par 'dus pa'i zhal brgyad pa'i gzugs kyis de kho na nyid gsum brjod pas/ rang rang gi las nges par byung ba'i mkha' 'gro ma'i tshogs gsal por bltas la gnas ji lta ba bzhin du bkod la/dkyil 'khor gyi 'khor lo ma lus pa bde ba chen po'i rang bzhin du bsgoms la mchod pa dang / bstod pa la sogs pa yang bya'o/ /nyal dus su yang dga' bral mtha' can gyi rnal 'byor mngon sum du byas la/gnyid log par bya'o/ /sad pa'i dus su yang puk+ka sI la sogs pa lha mo bzhis glus bskul bas langs par bsam mo/ /langs nas kyang de lta bu nyid du gnas par bya'o/ /ji srid yang dag par rdzogs pa'i byang chub thob kyi bar du nyin re bzhin bya'o zhes bya ba ni las rgyal mchog ces bya ba'i ting nge 'dzin to//gal te phyag bcu drug pa la mos par byed na/ gzhal yas khang de nyid du phyag drug pa'am phyag bzhi pa bsgom par bya'o/ /de la bcom ldan 'das nyid kyi sa bon dang / phyag mtshan la sogs pa ni pha rol tu phyin pa drug go//stong pa dang / mtshan ma med pa dang / smon pa med pa rnam par dag pas zhal gsum mo/ /sku dang rtsa ba'i zhal ni 'dam skyes sngon po 'dra'o/ /g.yon ni dmar po'o/ /g.yas ni zla ba'i 'od lta bu'o/ /spyan gsum pa skyil krung phyed pas gnas pa//phyag g.yas kyi dang po na rdo rje'o/ /phyag gnyis pa na gri gug go/ /phyag g.yon gyi dang po na rtse gsum pa'o/ /phyag gnyis pa na dril bu'o/ /phyag lhag mas ni rdo rje lu gu rgyud ma la mnyam par 'khyud pa khams gsum gyi bdag nyid can gyis ro mnan pa'o//rdo rje lu gu rgyud ma ni mdog sngon po ste/ bdag med ma ltar rgyan sna tshogs kyis brgyan pa'o/ /gri gug dang thod pa bsnams pa'i phyag gnyis kyis rang gi bdag po gnyug ma'i mgul nas 'khyud par bsgom par bya'o/ /de bzhin du bdud nges par bcom pa'i rnam par dag pas phyag bzhi ste/'dam skyes sngon po dang 'dra'o/ /spyan gsum pa/ ro rnam par gnon pa/ skyil krung phyed pa'i gar gyis mnan pa'o/ /g.yas kyi dang po na ni rdo rje'o/ /phyag g.yon gyi dang po na ni mi'i thod pa lha dang lha ma yin gyi khrag gis gang ba'o/ /phyag lhag mas ni rdo rje phag mo la 'khyud pa'o//bcom ldan 'das ma ni sku mdog sngon mo ste/ phyag g.yas dang gzhan la ni gri gug dang thod pa 'dzin pa'o/ /rgyu'i rdo rje 'dzin 'di dag gi phyag mtshan dang 'khor lo yang 'bras bu bzhin te/ khyad par zla ba'i gdan dang / zla ba'i 'od bsgom par bya'o/ /phyag drug pa dang / phyag bzhi ba la zhal brgyad pa med na yang / mkha' 'gro ma'i tshogs rang rang gi phyogs kyi ba spu'i bu gar gzhug par bya'o/ /oM ki Ti ki Ti badzra hUM hUM hUM phaT swA hA/ zhes bya ba ni phyag drug pa'i'o/ /oM dz+wa la dz+wa la b+h+yo hUM hUM hUM phaT swA hA/ zhes bya ba ni phyag bzhi pa'i'o/ /lhag ma ni snga ma bzhin du rtogs par bya'o//dpal ldan yan lag med rdo rje/ /ye shes bsam yas brnyes gyur pas/ /yang dag rjes gnang thob gyur nas/ /bris kyi mngon pa'i nga rgyal min/ /bdag gis 'di bris nongs pa rnams/ /ston ka'i dri med 'od 'dra ba'i/ /yid dang ldan pa'i mkhas rnams dang //rnal 'byor pa rnams bzod par 'os/ /khrag 'thung sgrub thabs byas pa las/ /legs pa bdag gis gang bsags pa/ /des ni 'jig rten ma lus rnams/ /kun mkhyen ye shes pha rol son/ /dpal rnal 'byor ba yan lag med pa'i rdo rjes mdzad pa/

CLOSE WINDOW