CLOSE WINDOW

D1247
བོད་ཡིག

/ //dpal ku mA ra kla shu'i zhal snga nas bsgyur cing zhus te gtan la phab pa'o// @##/ /rgya gar skad du/ sa ha dza sad+yo ga br-it+ti gar+b+ha pra kA she nA ma/ bod skad du/ lhan cig skyes pa'i rnal 'byor dam pa'i 'grel pa snying po rab tu gsal bar byed pa zhes bya ba/dpal rdo rje mkha' 'gro la phyag 'tshal lo/ /mchog gi gnas ni spyod yul gang 'gyur ba/ /sna tshogs rnam rtog dra ba'i mi gtsang khengs/ /dri med mtha' yas go 'phang 'jig rten thob/ /rdo rje mgon de mi mnyam mgo bos 'dud//kun rdzob don dam dbye bas rtogs 'gyur ba/ /gnyis te gnyis med ngo bo mi bzad pa/ /gang las lhan skyes nyams myong go 'phang thob/ /lha mchog mchod sbyin de la bdag phyag 'tshal/ /dgyes pa'i rdo rje'i rgyud las byung / /dpal ldan rin chen 'byung gnas mdzad//blo bzang rnam dpyad rnam dag pa'i/ /lhan skyes rnal 'byor dbye bar bya/ /de la re zhig slob dpon gyis dgyes rdor rgyu mthun dang bcas dam pa ni zhes bya ba la sogs pa'i mthun pa'i phyag 'tshal ba'i tshigs su bcad pa'i sgo nas rab tu byed pa ma lus pa'i brjod par bya ba bstan pa yin te mdor bsdus pa'i don to//de'i rgyas par bshad pa 'di yin te/ /rnal 'byor ma'i 'khor lo dam pa la rab tu btud de zhes bya ba ni phyag 'tshal nas rdzogs pa'i rim pa'i phyogs su mngon par rtogs pa ji ltar 'gyur ba de ltar bdag gis bshad par bya'o zhes tshig gi 'brel pa'o//sngon du ni phyin ci ma log par rnal 'byor ma'i 'khor lo dang / dgyes pa rdo rje'i rang bzhin rab tu byed pa gang gis rtogs par 'gyur ba de ni mngon par rtogs pa'o/ /rdzogs pa'i rim pa ni rang bzhin gyis grub pa'i rim pa'o// rnal 'byor ma'i 'khor lo de ji lta bu yin zhe na/ dgyes rdor rgyu mthun dang bcas zhes pa ni rgyu mthun ni rgyu dang 'dra ba ste de dang bcas pa'o/ /dgyes rdor nyid rgyu mthun te/ de dang bcas par shes par bya'o/ /dam pa zhes bya ba ni chos kyi sku'i lhan cig skyes pa'i rang bzhin no/ /de gang gi phyir 'dir ni rgyal mtshan dang mchog gi yan lag yang dag par reg pas bde ba chen po'i 'khor lo la 'dzag cing byang chub sems kyi thig le'i dga' ba la sogs pa'i rang bzhin nyid nyams su myong ste dpe'i lhan cig skyes pa'i bde ba nyams su myong ba gang yin pa de ni longs spyod rdzogs pa'i sku'i lhan cig skyes pa ste de nyid dgyes rdor zhes bya bar bshad pa yin no//de yang dpe las byung ba'i ngo bo chos kyi sku'i lhan cig skyes pa'i rang bzhin gyi rnal 'byor ma'i 'khor lo rnam grangs can gyi rgyu mthun zhes bshad pa yin no/ /ji skad du/ de dag las ni mkha' dang mtshungs//gang de skyob pa chos sku yin/ /gang zhig zla ba rdzogs 'dra ba/ /de ni longs spyod rdzogs sku'o/ /zhes bya ba dang / de nyid rnal 'byor ma'i 'khor lo/ /gang zhig ye shes gnyis su med/ /ces bya ba la sogs pa 'og nas gsungs pa'i phyir ro/ / de ltar na rdo rje nor bu'i rtse mor skar ma'i bdag por phyin ni longs spyod rdzogs pa'i sku'i lhan cig skyes pa nyams su myong ba'o/ /gang zhig rnam par mi rtog pa'i chos dbyings nyams su myong ba de ni chos kyi sku'i lhan cig skyes pa'o/ /ri bong gis mtshan pa rdo rje las 'byung zhing mtsho skyes kyi nang du gnas na de'i tshe sprul pa'i sku dang sbyar bar bya ste/snga ma'i slob dpon rnams kyi sku gsum bstan pa'i gdams ngag yin no/ /phyag 'tshal ba'i tshigs su bcad pa 'di la yang 'brel ba la sogs pa rtogs par bya ste/ rdzogs pa'i rim pa'i mngon par rtogs pa ni brjod pa dang rnal 'byor ma'i 'khor lo dang dgyes pa'i rdo rje dag brjod par bya'o//de dag la spyi'i mtshan nyid kyi sgo nas thabs dang thabs las byung ba'i dngos po'i 'brel pa'o/ /kun rdzob dang don dam pa'i rang bzhin gyis lhan cig skyes pa'i rnam pa gnyis nyams su myong ba ni dgos pa'o//bdag nyid kyis lhan cig skyes pa nyams su myong nas gzhan rnams la yang de nyid rab tu bstan pas byang chub bsgrub pa ni dgos pa'i dgos pa'o/ /da ni slob dpon gyis brtag pa dang po'i le'u brgyad pa las gsungs pa'i rdzogs pa'i rim pa bshad par bya ba'i phyir/mkha' dbyings b+ha gar bsams nas ni/ /dbus su bsgom par bya ba ste/ /'khor lo sngon 'gro ci rigs par/ /lha rnams ji ltar byung ba'o/ /zhes bya ba gsungs te/ de'i bskyed pa'i rim pa'i don ni 'di yin te/ stong pa nyid bsgom pa'i phyi nas chos 'byung gi phyag rgya rnam par bsgoms la/de'i steng du 'khor lo sngon 'gro ci rigs pa/ lha rnams zhes bya ba ni/ /'khor lo la sogs pa'i dkyil 'khor bzhi yang dag par bsams te/ de'i 'og tu rnal 'byor pas bya ba'i tshogs bya ba yin no/ zhes mdor bstan pa'o//ji ltar 'byung ba'i sgras ni sgom pa po bstan no/ /de ci'i phyir gang dkyil 'khor la sogs pa'i rim pas de dang de sgom pa po'i sems dang gnyis su med pa'i rnam pa can no/ /ji skad du/ 'khor lo sa dang sngon 'gro chu/ /ci rigs pa ni mi yin te/ lha rnams klu ni chen po ste//ji ltar byung ba bsgom pa'o/ /zhes bya ba bdag med pa'i le'u brgyad pa las gsungs so/ /'dir yang 'khor lo la sogs pa'i sgra rnams kyis sa la sogs pa ni chos kyi brda 'am rig pa'i sgo nas mu tig gi phreng ba las bstan pa ste/ de nyid las shes par bya'o/ / de ni drang ba'i don to/ /de'i don ni 'di yin te/ bya ba la sogs pas rgyas par bshad pa'i sgo nas nges pa'i don bshad par bya ba'i phyir/ gnas la byed pa zhugs nas ni/ /zhes bya ba la mtsho skyes la rgyal mtshan 'jug ste/ sgrub pa po yis bya ba bya/ /zhes pa ni/ sgrub pa'i dus su 'gro ba dang 'ong ba la sogs pa'i bde bas bde bar gyur pa'i bya ba dag rnal 'byor pas bya ba yin no//de'i rjes la sgrub pa po'i yan lag nyams su myong ba'i skad cig ma la 'bras bu rnal 'byor ma'i 'khor lo zhes pa ni dang po'i yan lag gsum rgyu ba'i rang bzhin du nyams su myong la/ bla na med pa dang gnyis su med pa'i bde ba chen po'i rang bzhin chos kyi sku'i lhan cig skyes pa'i rnam grangs can/rnal 'byor ma'i 'khor lo zhes bya ba'i sgras byed par bya ba'i rnam par mi rtog pa'i chos nyid kyi ngo bo 'bras bu yin no zhes ston to/ /de'i rgyu mthun he tu ka'o/ /zhes bya ba la dpe las byung ba'i rang bzhin gyi chos kyi sku'i lhan cig skyes pa gang yin pa de'i rgyu mthun ni rgyu dang mthun pa'i 'bras bu ste/dpe'i rang bzhin gyi longs spyod rdzogs pa'i sku'i lhan cig skyes pa'i mtshan nyid he ru ka ni/ /kun rdzob kyi byang chub sems kyi ngo bo yin no zhes pa'i tha tshig go/ chos kyi sku las longs spyod rdzogs pa dang sprul pa'i sku dag sngon gyi smon lam gyi stobs kyis 'byung ngo zhes theg pa chen bo la yang bstan pa kho na yin no/ /gzhan du yang skyes bu gnas pa tsam gyis ni/ /yid bzhin nor bu 'dra ba ste/ /rtsig pa la sogs bstan pa rnams/ /ci 'dod pa yis 'byung ba yin//zhes bstan to/ /de bas na 'dir yang dpe ni/ lhan cig skyes pa'i bdag nyid kyis longs spyod rdzogs pa'i sku'i dpe las byung ba'i phyir/ chos kyi sku'i rgyud mthun du bshad pa yin no/ /'dir yang khyab par byed pa'i rang bzhin gyi chos kyi skus longs spyod rdzogs pa'i sku khyab pa ste/chos kyi sku'i rgyu mthun nyid du bshad pa yin no/ /bskyed pa'i phyogs su zhes bya ba la sogs pas dga' ba la sogs pa'i skad cig ma'i mtshan nyid dang mi mthun pa'i lhan cig skyes pa'i rang bzhin so sor ston pa yin te/'dir bskyed pa'i phyogs ni dga' ba la sogs pa rnams 'byung ba'i rang bzhin nyid du 'dod pa yin te/ zla ba dang rdo rje la sogs pa yongs su gyur pa las 'byung ba'i lha'i mtshan nyid ni ma yin no/ /de gang gi phyir bde ba chen po'i 'khor lo las byang chub sems kyi zla ba 'dzag na 'dab ma bcu drug gi pad+ma'i gnas su phyin pa'i tshe skad cig ma dang por dga' ba 'char ba yin no//de'i rjes la yan lag thams cad kyi tshigs khyab pa'i tshe/ skad cig ma gnyis pa mchog dga' 'char ba yin no/ / de nas rdo rje rtse mor phyin pa'i tshe skad cig ma gsum pa la lhan cig skyes pa'i dga' ba 'char ba yin no/ /de'i 'og tu mchog tu yan lag la spro ba'i tshe skad cig ma bzhi pa la dga' bral 'char ba yin te/ dga' ba rnams kyi bskyed pa'i phyogs de lta bur shes par bya'o/ /de ni lhan cig skyes pa'i don dam pa dang kun rdzob kyi bden pa rnam pa gnyis bstan par bya ba'i phyir/de nyid 'dir ni rnam pa gnyis/ /'bras bu rnam pa gnyis su 'dod/ /gcig ni nam mkha' dang mtshungs pa/ /gzhan ni zla ba rdzogs pa bzhin/ /zhes bya ba gsungs te/ dang po'i tshig rkang gnyis kyis mdor bstan pa dang /de nas tshig rkang gnyis kyis rgyas par bstan pa'o/ /de dag las ni mkha' dang mtshungs/ /zhes bya ba la sogs pa'i tshigs su bcad pas slar yang bshad par bya ste/ 'dir mkha' dang mtshungs pa ni gang zhig gzung ba dang / 'dzin pa gnyis dang bral ba rdzas ma yin pa'i ngo bo bde ba chen po rang rig pa'i chos nyid nyams su myong ba'i mtshan nyid gang yin pa de ni skyob pa rnams ni phung po lnga'i rang bzhin du bsdu ba'i bcom ldan 'das sangs rgyas rnams kyi chos kyi sku ni khyab byed kyi ngo bo shin tu rnam par dag pa'i de bzhin nyid kyi bdag nyid dpe las byung ba'i lhan cig skyes pa'i bde ba chen po'i mtshan nyid du bshad pa yin no//gang zhig zla ba rdzogs 'dra ba/ /zhes pa ni dpe'i ngo bo lhan cig skyes pa'i bde ba rdzas kyi mtshan nyid gang yin pa de ni longs spyod rdzogs pa'i sku'o zhes bya ba la longs spyod rdzogs pas ni longs spyod rdzogs pa ste/dpe'i bde ba'i rang bzhin sangs rgyas rnams kyi longs spyod rdzogs pa'i sku yin no zhes ston to/ /de nyid rnal 'byor ma'i 'khor lo zhes bya ba la sogs pas 'das ma thag tu bshad pa'i don kho na rab tu bstan pa ste/gzhan du bshad par mi bya'o/ /da ni lhan cig skyes pa'i bsgom pa'i yan lag bshad par bya ba'i phyir/ 'dir mngon par rtogs pa 'di yin te zhes bya ba la sogs pa gsungs te/ dpa' bo gcig pu ni rnam par rtog pa thams cad kyi dra ba dang bral ba rnal 'byor pa gang yin pa de la 'di skad ces bya'o//bdag nyid he ru kar mos shing zhes bya ba ni bskyed pa'i rim pa bsgom pa'i rnal 'byor pas rang gi bdag nyid lhag par mos pa'i bdag nyid kyi rnal 'byor gyis he ru ka'i rang bzhin du yang dag par bsams la/ yid kyis gang yang rung ba bkug ste/ zhes bya ba ni gang zhig sngar rnal 'byor pa dga' ba la zhugs pa'i 'khyud pa la sogs pas sems gzung zhing shin tu dga' ba la sogs pa bskyed pa'i rgyur gyur pa gang yin pa de nyid ye shes kyi phyag rgya'i ngo bo bdag med ma'i rang bzhin du bsams te/ kak+ko la bo la'i ril pa'am/ zhes bya ba ni yid kyis sprul pa'i rig ma gang yin pa de'i kak+ko lar bo la'i rol pa bsgom zhing / don dam pa ni gnyis su med pa'i ye shes mngon par phyogs par bya'o zhes gong ma dang 'brel lo/ /'di tsam gyis ni ye shes kyi phyag rgya'i sbyor ba bstan to/ /yang na bo la'i bu gar zhes bya ba la sogs pas phyag rgya chen po'i man ngag bshad par bya ste/rang gi snying ga dang lte ba las 'byung ba'i thabs dang shes rab kyi rnam par rol pa bsgom pa zhes bya ba la lte ba ni sprul pa'i 'khor lo'i lte ba ste/ de la gnas pa'i shes rab ni bcom ldan 'das ma bdag med ma'i ngo bo dbyings kyi dang po'o//snying ga la gnas pa'i thabs ni pad+ma 'dab ma brgyad pa'i lte ba la gnas pa'i dpal he ru ka'i rang bzhin sprin gyi sgra'o/ /rang gi lte ba dang / snying ga las babs pa de dag nang gi shes rab dang thabs yin te/ gsang ba'i rdo rje'i bu gar phyin pa dang /de dag gi rnam par rol pa ni bde ba chen po nyams su myong ba'i rang bzhin gang yin pa de nyid rnal 'byor pas bsgom zhing / don dam par mngon par phyogs par bya ba ni de dang ro gcig pa nyid la brten par bya'o zhes ston to/ /'di tsam gyis ni phyag rgya chen po'i sbyor ba bstan to//ji ltar mngon par phyogs par byas pa zhes bya ba la sogs pa bla na med pa dang gnyis su med pa'i ngo bo bde ba chen po de nyid snang ba med cing gsal ba tsam zhes bya ba ni gzung ba dang 'dzin pa la sogs pa'i rnam par rtog pa'i rang bzhin gang la med pa de ni snang ba med pa'o//de lta bu yin na yang gsal ba tsam ni rang rig pa'i rang bzhin gyis ye shes kyi chos dang ma 'das pa'o/ /mtha' yas pa zhes bya ba ni/ thog ma dang tha ma med pa'i rang bzhin gyis rtogs pa'i chos kyi sku'i ngo bo ji srid nus pa de srid du blta bar bya ba ni 'dir lta ba ni rgyun mi 'chad par de'i rang bzhin yongs su shes par bya'o//'di tsam gyis ni rang gi bdag nyid lhan cig skyes pa'i bde ba chen po'i rang bzhin du bltas la/ g.yo ba dang mi g.yo ba'i dngos po thams cad kyang de'i rang bzhin du blta bar bya'o zhes bstan to//'dir ni rigs pa 'di yin te/ chos nyid ni khyab par byed pa ste/ de nyid chos kyi sku rang bzhin gyis 'od gsal ba bde ba chen po'i rang bzhin no/ /bde ba chen po de nyid kyis chos thams cad khyab pa ste/ chos rnams dang chos nyid la de'i bdag nyid kyi 'brel ba yod pas rgyu ba dang mi rgyu ba'i dngos po thams cad bde ba chen po'i rang bzhin du grub pa kho na yin no//ji skad du chos las chos nyid tha mi dad pa yin no zhes gsungs so/ /'o na gal te de ltar yin na sgom pa don med pa yin no zhe na/ smras pa blo bur ba'i dri ma rnam par dag pa'i dbye ba de la yod pa ma yin te/sgom pa don med pa ma yin no/ /'di tsam gyis ni mnyam par gzhag pa'i rnal 'byor bstan to/ /langs nas kyang dngos po thams cad zhes bya ba la sogs pas gnyis pa mnyam par ma bzhag pa'i rnal 'byor gnyis pa bstan to/ /'dir yang sngar bshad pa'i brjod par bya ba kho na yin te bshad zin to//srog chags thams cad bdag las byung / /zhes bya ba la sogs pa'i rgyud las 'byung ba'i tshigs su bcad pa gnyis 'das ma thag tu bshad pa'i don dang rjes su mthun pa kho na yin te de gzhan du bshad par mi bya'o/ / ldang ba'i rnal 'byor ni mnyam par ma bzhag pa'i rnal 'byor ro/ /yang dang yang zhes bya ba'i sgras ni rnal 'byor gnyis po la yang rgyun ma chad pa nyid bstan to/ /chu bo'i rgyun ni rgyu ba bzhin/ /zhes bya ba la sogs pa'i tshigs su bcad pas de kho na nyid yin te gzhan gyi rnal 'byor gsum pa bstan to//ji ltar chu bo'i rgyun ma chad par chu'i rgyun rnams rgyu ba de bzhin du rgyu ba dang / mar me'i snang ba'i rgyun rgyu ba de bzhin du de kho na nyid kyi rnal 'byor gyis gnas par bya ba ni rnal 'byor gnyis khyab par byed pa'o/ /rang bzhin gyi de kho na nyid kyi rnal 'byor gyi dus thams cad du rnal 'byor pas gnas par bya'o zhes ston to//de gang gi phyir de kho na nyid kyi rnal 'byor mi shes pas mnyam par bzhag pa'i rnal 'byor ni mnyam par ma bzhag pa'i rnal 'byor dang 'dra bar 'gyur te/ de kho na nyid kyi rnal 'byor shes pa'i rnal 'byor pa rnams spyod lam bzhi'i rang bzhin gyis lus ngag yid gsum gyi las gang yang rung ba byed na de dag thams cad de rnams la gnyis su med pa'i ye shes kyi rang bzhin du 'gyur ro//rang gis rig pa'i ye shes 'di/ /zhes bya ba la sogs pa nye bar bsdu ba'i tshigs su bcad pa ste go sla'o/ /sa dang chu dang me dang ni//zhes bya ba la sogs pa tshigs su bcad pa gnyis kyis mthong ba'i chos las 'gyur ba'i phan yon bstan to/ /da ni rnal 'byor la 'di'i gnas skabs kyi dbye ba zhes bya ba la sogs pas 'das ma thag tu bshad pa'i ting nge 'dzin gnas skabs kyi dbye ba rnam pa bzhi ru bstan pa yin te/'dir gal te lhan cig skyes pa'i rnal 'byor ngo bo gcig yin pa'i phyir de la gnas skabs kyi dbye ba yod pa ma yin te/ 'on kyang de la brten pa'i rnal 'byor pa la rim gyis de dang de'i rnam par snang ba'i phyir gnas skabs kyi dbye ba bstan to/ /de gang gi phyir rdzogs pa'i rim pa'i rnal 'byor slob bzhin pas ro lhan cig skyes pa'i ro gcig pa yin na yang /dang po sprin lta bu mthong ba yin no/ /de bzhin du gong nas gong du rim par rtogs par bya'o/ /ngo bo gcig pa yin na yang / /sna tshogs pa'i snang bas 'jig rten la snang bar 'gyur te/ dper na dri ma dang bcas pa dang /dri ma med pa'i mig gi dbang po dang ldan pa'i skyes bu rnams kyis zla ba'i dkyil 'khor mi gsal ba dang / gsal ba lta bu'i zhes bya ba la sogs pa'o/ /zla ba'i dkyil 'khor la ni gsal ba dang mi gsal ba'i rang bzhin yod pa ma yin te/ snang ba 'ba' zhig pa'i ngo bo yin pa'i phyir ro/ /de bas na slob bzhin pa'i rnal 'byor ba'i bya bas rnal 'byor gyi gnas skabs kyi dbye ba bstan pa yin no/ /'di nyid bshad par bya ba'i phyir/ /dngos grub sngon du sprin lta bu'i/ /zhes bya ba la sogs pa gsungs te/ re zhig dang po bla ma mnyes par byas pa'i slob mas dkyil 'khor la zhugs pa sngon du 'gro ba'i las kyi phyag rgya 'am/dam tshig gi phyag rgya'i sbyor bas cho ga bzhin du shes rab dang ye shes kyi dbang thob pas mdor bstan pa dang rgyas par bstan pa'i bla mas slob ma la gang gi tshe lhan cig skyes pa nye bar mtshon pa de'i tshe de la dngos grub kyi sngon gyi gnas skabs yin no//de gang gi phyir dbang bskur ba'i dus su slob ma de'i/ lhan cig skyes pa nye bar mtshon pa yin te/ sngon du ni ma byas so/ /gal te sngon du byas na slar yang sgyur ma lta bu la sogs pa'i gnas skabs la rim pa bzhin du ye shes kyi phyag rgya dang phyag rgya chen po dang /las kyi phyag rgya dang dam tshig gi phyag rgya'i sgom pa don med par 'gyur ba'i phyir ro/ /gal te mtshon par mi 'gyur na de'i sgom pa mi rigs pa'i phyir ro/ /de bas na sprin lta bu ni gang gi tshe las kyi phyag rgya dang / dam tshig gi phyag rgya'i sbyor bas slob ma la bla mas dbang bskur ba de'i tshe shes par bya'o//sprin lta bu la dpe sngon du 'gro ba'i gtan tshigs bshad par bya ba'i phyir/ sprin srab pas bkab pa la zhes bya ba la sogs pa gsungs te/ ji ltar srab pa'i sprin gyis bkab pa'i zla ba rgyas pa cung zad mthong bar 'gyur ba ste/shin tu gsal bar mthong ba ma yin na/ de bzhin du lhan cig skyes pa yang dngos grub kyi sngon du ni slob bzhin pa'i gnas skabs su mi gsal bar snang bar 'gyur te/ sprin lta bu nyid du bstan no/ /'grub na sgyu ma lta bu yi/ /zhes bya ba la sngar nye bar mtshon pa'i lhan cig skyes pa'i dga' ba gang yin pa de nyid rgyun ma chad pa dang rtag tu dad pas bsgom zhing mngon du gyur pa'i dngos grub gang yin pa de la 'byung ba lta bu ni ji ltar nor bu dang /sman dang sngags kyi mthu las 'byung ba'i sgyu ma so sor snang ba med na yang mthong bar 'gyur ba de bzhin du yid kyis sprul pa'i rig ma'i stobs ni ye shes kyi phyag rgya'i sbyor bas ye shes gsal bar 'char bar 'gyur te/sgyu ma lta bu nyid so sor bstan to/ /de nas rmi lam dang 'dra ba ste zhes bya ba la sogs pa la ji ltar kha cig gnyid log pas mi rtog pa nyams su myong ba de bzhin du nang gi bdag nyid kyi thabs dang /shes rab rnam par rol pa sgom par byed pa'i rnal 'byor pas phyag rgya chen po bsgoms nas rnal 'byor gyi gnyid log par cig car du lhan cig skyes pa nyams su myong ba yin pas rmi lam dang 'dra ba bstan to/ /de nas rmi lam dang sad pa lta bu zhes bya ba la sogs pa la phyi rol gyi rig ma ni las dang dam tshig gi phyag rgya ma gnyis so//phyag rgya gnyis kyi sbyor ba las byung ba'i phyir sad pa lta bu yin no/ /rnam par mi rtog pa'i chos nyid la mngon du byas pas rang gi lus dang shes rab ma'i lus yod na yang mi dmigs pa'i phyir rmi lam lta bu'o//g.yeng ba'i rgyu yod na yang zhes bya ba la g.yeng ba'i rgyu ni phyag rgya gnyis kyi mtshan nyid do/ /rmi lam dang sad pa lta bu'i ting nge 'dzin la gnas pa'i rnal 'byor pa la g.yeng ba'i rgyu yod na yang brtan pa la mnyam par gzhag pa'i phyir sems 'ong bar mi 'gyur te/'on kyang de'i dam tshig ni phyag rgya'i sbyor ba zhes bya ba yin no/ /shin tu mnyam par gzhag pa nyid ni de'i sdom pa'o/ /de ltar dam tshig dang sdom pa'i sbyor ba yod pas tha ma thams cad las mchog tu gyur pa yin no/ /dgyes pa'i rdo rje las kyang /dang po sprin bzhin snang ba ste/ /'grub na sgyu ma lta bur 'gyur/ /cig car du ni rmi lam 'dra/ /rmi lam sad pa tha mi dad/ /tha mi dad pa'i mtshan nyid 'grub/ /phyag rgya'i rnal 'byor rab tu 'grub/ /ces bya ba la sogs pa gsungs so/ /shin tu zab pa'i dgyes pa'i rdo rje las zhes bya ba la sogs pa la 'dis ni slob dpon gyi rang bzo yongs su spangs pas bdag gis rab tu byed pa 'di byas pa yin te zhes bya ba dang /bsod nams yongs su bsngo ba bstan pa ste/ de yang go sla'o/ /lhan skyes rnal 'byor dam pa la/ / 'grel pa byas nas dge ba gang / /bdag gis bsags pa de yis ni/ /'jig rten lhan skyes rtse gcig gyur/ /gang zhig brjod bya rjod byed blo yis spyod yul min/ /gti mug tshogs kyi mtshan mo sel byed nyi ma gang / /rang bdag snang bas phyogs kyi dbye ba yongs bkang ba//lhan skyes nam mkha' zla ba rdzogs 'dra de la 'dud/ /mkhas pa chen po rin chen 'byung gnas zhi ba'i zhal snga nas mdzad pa'i lhan cig skyes pa'i 'grel pa snying po rab tu gsal bar byed pa zhes bya ba/ o rgyan gyi slob dpon chen po bram ze tha ga nas mdzad pa rdzogs so/

CLOSE WINDOW