CLOSE WINDOW

D1205
བོད་ཡིག

byas pa las skyes bsod nams gang / /'jig rten zla ba dri med gzhon nu bzhin/ /ma lus pa ru rnyog med shog /slob dpon chen po dge slong gzhon nu zla bas mdzad pa'o// //[]@##/ /rgya gar skad du/ shrI ta t+t+wa pra dI paM nA ma tan+t+ra rat+na mA lA pany+tsi kA/ bod skad du/ dpal de kho na nyid kyi sgron ma'i rgyud kyi dka' 'grel rin chen phreng ba zhes bya ba/ dpal bde ba chen po la phyag 'tshal lo/ /mi gnas rnam rtog kun bral ba'i/ /sangs rgyas kun gyi bdag nyid dngos/ /rang rig brjod du med pa yi/ /ye shes chen po la phyag 'tshal/ / phal pa'i spyod yul ma yin pa'i/ /bla na med pa'i rgyud kyi mchog /'di la gzhan gyis gsol bskul bas/ /ji bzhin don gyis gsal bar bya/ /drang ba dang ni nges pa'i don/ /rdo rje 'dzin pas gsungs pa la/ /nges pa la ni rim pa bzhin/ /ji bzhin don gyis dbye bar bya/ / 'di la rdo rje tshig mang ldan/ /de nyid dam pa 'bras bu'i don/ /yid bzhin rin chen nor bu yi/ /phreng ba nyid ni khyab pa'i bdag /dgos pa'i mtshan nyid sgrub byed pa/ /'grel 'di de bzhin bdag gis khyab/ /'di skad bdag gis zhes bya ba la sogs pa la/ 'di skad ni skyon dang bral ba'i tshul ji lta ba bzhin ston pa la'o//bdag gis thos zhes bya ba ni sdud par byed pa kho nas thos pa yin gyi/ gzhan du brgyud pa dang gzhan nas thos pas byung ba ma yin no/ /'khrul pa bsal ba'i don gyis rdo rje 'dzin pa kho na la thos pa'o/ /dus gcig na zhes bya ba ni shes rab kyi b+ha ga la 'khor dang bcas pa bzhugs pa'i dus na'o//de yang rjes su mthun pa'i gnas khyad par can ni 'khor dpa' bo dang dpa' mor bcas pa bzhugs pa'i dus gcig go/ /bcom ldan 'das ni bdud rnam pa bzhi bcom pa'i phyir ro/ /yang na legs pa'i yon tan rnams dang ldan pa'i phyir na'o//de bzhin gshegs pa ni rigs lnga'i bde bar gshegs pa la sogs pa'o/ /rigs kyis phye ba ni bde ba chen po nyid las gshegs pa ste/ gdul bya'i don mdzad pa'i phyir ro/ /yang na de bzhin nyid du gshegs pa ste/ sangs rgyas rnam par snang mdzad la sogs pa'o//thams cad na ni ji snyed pa bzhugs lus med pa de snyed kyi de bzhin gshegs pa gang+gA'i klung gi bye ma snyed kyis mtshon pa kun bsdu ba yin no/ /sku dang gsung dang thugs rdo rje/ /zhes bya ba ni sangs rgyas thams cad kyi sku gsung thugs rdo rje bcom ldan 'das kyi sku gsung thugs rdo rje'i rang bzhin nyid pas na rdo rje 'chang ngo //byang chub sems dpa' rnams dang de bzhin du lha mo'i gzugs kyis bzhugs pa ni/ dpa' bo chen po dang dpa' mo'i dbang phyug ma'o/ /sa bcu la gnas pa'i tshul gyis byang chub sems dpa' rnams ni nyid las sprul pa'i 'khor gyis bcom ldan 'das la bskor nas bzhugs te/chos kyi dbyings kyi rang bzhin shes rab kyi b+ha ga'i nang gzhal yas khang khyad par can na bzhugs pa'o/ /sku gsum gyi bdag nyid can bcom ldan 'das 'khor dang bcas pa rnams bzhugs zhes bya'o//der bcom ldan mo zhes bya ba la sogs pa la bzhugs pa'i gnas de ru bcom ldan 'das la rnam pa sna tshogs pa'i sgo nas mnyes par byas te/ gsol ba 'debs par byed pa'i don gyis so/ /'di skad ces gsol te zhes bya ba la sogs pa zhus pa'o//gzhan dag ni 'di rnams la nang la sogs pa'i don gyis bshad pa yin zhes smra'o/ /de ni 'gal te rgyud kyi bka' nyams pa'i phyir bstan par mi bya'o/ /bcom ldan 'das kyis bka' stsal pa zhes bya ba la sogs pa gsungs so/ /de la e waM ma yA zhes bya ba ni rgyud kyi don thams cad 'dus pa'i phyir na sdom pa yang gsungs so//'dir bsdus nas ston pa yin la/ rgyas pa ni 'di nyid kyi 'og nas bstan to/ /rgyud gzhan nas sdom pa'i don gyis shes rab thabs dang / A li dang kA li dang / 'khor lo bzhi dang /lha mo dang skad cig bzhi dang / dga' ba bzhi dang / de kho na nyid bzhi dang / bden pa bzhi dang / sde pa bzhi dang / dbyu gu la sogs par yi ge bzhi po 'di dag rnams sbyar bar gsungs so/ /gzhan nas de bas kyang rgyas par bstan pa yang yod pa yin no/ /'o na yang mi 'gal bar bstan dgos so//sogs pa'i sgras bzhugs pa yan chad bsdu ba ste/ 'di skad bdag gis thos pa dus gcig na zhes bya ba nas shes rab kyi b+ha ga la bzhugs so zhes bya ba'i bar ro/ /khams zhes bya ba'i sgras 'byung ba rnams so/ /sa dang chu dang me dang rlung ngo //srid pa gsum gyi ngo bo lus ngag yid dang ldan pa ni 'dod khams dang / gzugs dang gzugs med pa dang rang rang gi yang khams te gsum mo/ /'gro ba ni rnam pa lnga'i rigs kyi sems can/ mi 'gro ba ni snod kyi 'jig rten gyi rang bzhin/ yang na mi 'gro ba ni sangs rgyas dang byang chub sems dpa' la sogs pa la bya'o//phyag rgya rnam pa bzhi ni shes rab de dang ldan pa'i thabs ni dngos po'i ye shes so/ /rang bzhin gyis zhes bya ba ni rang bzhin dga' ba nyid kyis khyab cing rgyas btab nas bzhugs so/ /de yang kun gyi snying po dam pa ste/kun la gnas pa'i phyir rgyas btab pa'o/ /rnam par rtog pas mi 'phrogs pa rang bzhin gyis 'od rab spros pa dang bral ba la ni/ gzhan gyis ma yin kun rgyas btab/ /ces bya'o/ /de skad du/ tshangs pa'i g.yul sa byed pa mthar/ /legs dgyes khyed kyis rab btab nas//grangs med pa la rgyas btab ste/ /de bas phyag rgya chen khyod grags/ /zhes gsungs so/ /dri med rdzogs pa'i 'bras bu nyid/ /ces bya ba ni de nyid la 'bras bu zhes bya ba dang / de kho na nyid dang mchog tu gyur pa dang / skye ba med pa dang 'gag pa med pa la sogs pa rnam grangs su phye na mang yang ngo bo ni gnyis su med pa'i ye shes bde ba chen po nyid do//de rgyud 'di nas gsal bar ston pa yin pa'i phyir de kho na nyid kyi sgron mar grags zhes bya'o/ /de'i don rgyas par gsungs pa/ 'di skad bdag gis zhes bya ba la sogs pa la e waM thabs dang shes rab kyi rgyud ces bya ste/rgyud ni rgyun gyis rtag par gnas pa thabs dang shes rab ni yab yum sku dang gsung dang thugs rdo rje'i rang bzhin bde ba dang bcas pa'i rnam pa'o/ /sku mtshan dang dpe byad dang gsung yig 'bru'i rnam pa dang thugs byang chub sems dpa' rnams kyi gzugs dang /rdo rje'i rang bzhin bde ba'i bye brag ste/ bcom ldan 'das rdo rje 'dzin pa dang dbyer med pa'i rgyud do/ /thabs ni rdo rje rin po che'i byang chub sems kyi don gyi rnam pa la sogs pa'o/ /shes rab ni pad+ma can gyi rnam par te gnas kyi khyad par gyi rim pas so//de skad du/ e yi yi ge dbyibs bzang gang / /de dbus waM gyis rab tu brgyan/ /sangs rgyas rin chen za ma tog /bde ba thams cad kyi ni gzhi/ /zhes gsungs so/ /ma yA zhes bya ba'i sgras sdud pa po nyid bcom ldan mo bdag gis thos pa yin la/de sku'i rnam pa la sogs pa'o/ /de yang / 'di skad bdag gis de nyid gsum/ /zhes bya ba la sogs pa la/ sku dang gsung dang thugs kyi rang bzhin rdo rje dang bcas pa'i yig 'bru'i rang bzhin zla ba'i rang bzhin ga bur dang gsum du dbye ba'i cha dang / thig le dang tshul sdud pa po dang /rgyud bcas pa phyi'i gnas la sogs pa'i dbye bas/ bcom ldan 'das la bcom ldan 'das mos sngon bskul ba byas nas rgyud gsungs pa de bzhin du 'dir yang bskul zhing gsol ba btab pa las thos par gyur pa ni gsang ba'i pad+ma'i lte ba las bzhengs te/ bde ba chen po'i bcom ldan 'das la bskul ba byas pas/ sku gsung thugs rdo rje'i rang bzhin yin pa'i tshul gyis thos pa'am/ go bar gyur pa ni zla ba bde ba mchog thos pa dga' ba'i rnam pa nyams su myong ba ste/ sku la sogs pa'i don gyis sprul pa dang longs spyod rdzogs pa dang /chos kyi dga' ba gsum mo/ /rang bzhin bde ba chen po dang ldan pa ni/ bdag nyid kyis dang bcas pa ste/ /rang bzhin bzhi yi bye brag tu/ /zhes bya'o/ /rang bzhin dga' ba tshul tsam dang bcas pa'i rdo rje nyid las ma 'phros pa ni 'bras bu'i don dam pa spros pa dang bral ba'o//de la ni/ don dam par ni shes par bya/ /zhes so/ /shes rab kyi b+ha ga'i gnas su zla ba bde ba mchog gi sgrar bshad de/ phyi la sogs pa'i rim pas phye ba'i gnas so/ /de khyad par can gyi gnas su gshegs pa ni 'gog go/ /ye shes kyi stobs su gyur pas na gzhan mchog ste gnas de rang ngo //bcom ldan 'das 'khor dang bcas pa thams cad kyi gnas gcig pa ni thos pa'i don to/ /mtha' gnyis la mi gnas pa'i phyir srid pa dang mya ngan las 'das pa spangs pa'o/ /de ni dga' ba gnyis kyi rtog pa med pa yab yum thabs dang shes rab dbyer med pa ni gnyis dang bral ba'o//bzang ba dang ngan pa dang bral ba bsam du med pa'i dus te/ gnyis su med pa'i ye shes dang ldan pa'i dus so/ /de nyid phyag rgya chen po bskyed pa dang rdzogs pa dang bral zhes de nyid la bya'o/ /'o na yang 'bras bu'i ming rgyu la btags pa'o//de bas na/ bcom ldan 'das ni mtha' zhes bya/ /rang bzhin dga' ba nyams myong dngos/ /zhes gsungs so/ /yang na rtsa ba'i pad+ma'i gnas mchog tu phra ba dang ldan pas cha/ byang chub sems ga bur gyi gzugs kyis thig le nyid/ ye shes gsal bas de rang nyid tshul te de kho na nyid gsum zhes bya'o//rnam pa sna tshogs kyi ye shes sbyor ba'i tshul tsam/ de dkar ba'i gzugs bde ba shin tu 'phel ba ni zla ba bde mchog /de nyid kyis rang bzhin rnams rgyas btab pa'i ngo bos phyag rgya chen po'o/ /de rnams kyi skyon gyis ma gos pa ni gzhan mchog /rang bzhin dga' ba nyid dga' ba kun gyi mthar thug pas ni mtha' ste/ ye shes de rnams kun rdzob pa'i don to/ /de bzhin du yang rkang mthil du cha'i dngos po/ de snying gar thig le bzhugs pa'i gnas su tshul/ /de kho na nyid gsum mo/ /dpag med pa'i gnas su tshul tsam zla ba mchog dang ldan pa'o//chos kyi 'khor lo'i sems kyi gnas su mchog /phyag rgya chen po'i rang bzhin/ longs spyod 'khor lo'i dbus kyi gnas su ni gzhan mchog gi ngo bo mtha'/ zla ba rgyas pa'i gnas su rdzogs pa ste/ rang bzhin dga' ba sku gsum gyi bdag nyid brjod pa dang bral ba'i don to//yang rgyud ye shes thig le las ni de ltar ma gsungs so/ /gzhan dag snying ga'i mi shigs pa'i bdag nyid kyis de kho na nyid gsum la sogs pa'i don gyis bstan pa dang / de nas rim pas longs spyod 'khor lor bstan pa de nas bde ba chen por rdzogs pa'o//de yang dang por de kho na nyid gsum gyi bdag nyid snying gar gnas pa las/ gyen la 'od zer spros pa des zla ba zhu bas bde bar gyur pa zla ba bde mchog phyag rgya chen po chos kyi 'khor lor mtha' dang gzhan mchog /de ni skyed pa'i sbyor drug /de longs spyod la sogs pa sngar bstan pa byas pa ni sbyor ba drug rdzogs pa'i don to zhes smra'o//thams cad ye shes gsum stong nyid/ /ces bya ba ni srid pa dang mya ngan las 'das pa'i chos thams cad rnam pa gsum gyi rim pas shar tsam na rnam par rtog pa stong pa'o/ /de yang phung po dang rtsa dang khu ba'i gzugs la sogs pa thams cad dang ldan pa'i sems can rnams la yang snang ba gsum gyi rim pas 'byung zhing ldan te 'khor ba'i rang bzhin no//'di gsal bar snang ba'i skabs su 'og nas bshad/ 'o na yang sku gsung thugs rtsa'i don gyis bstan pa'i dga' ba gsum gyi ye shes snang bas thams cad do//rnam par rtog pa rim pas chung ba ni stong pa stong nyid ye shes so/ /rnam rtog mtshan ma'i snang ba spangs pa ni stong pa ste/ de nyid kyis ni spangs pa'o/ /zhes bya ba'o/ /de bzhin gshegs pa ni sangs rgyas phung po lnga la sogs pa/phung po'i sgras rnam par shes pa byang chub kyi sems 'od rab kyi gnas nas de bzhin nyid las gshegs pa'i don to/ /de yang snang ba gsum gyi rim pas rang bzhin bzhi pa rdo rje'i sprul par gshegs pa dang / slar nyid kyi gnas su gshegs pa'o/ /rnam 'byed grags zhes bya ba ni gsum po la rtogs pa bag chags yod pa 'byed pa'i rnam par 'byed pa'o//dang po'i gnas ni rab 'grub byed/ /ces bya ba ni bde ba chen po las gzugs kyi sku'i mtshan nyid kyis byon nas/ yang bde ba chen po'i rang bzhin 'od rab tu gshegs pa ste/ don du bde ba chen po'i 'khor lor gshegs ni dang po'i gnas so/ /de ni phung po la sogs thams cad bde ba chen por gyur pa'o/ /sku ni phyi la sogs pa'i don gyis dbye bar bya/ de bzhin du snga phyi bstan pa spang ngo / /sku mthong bas dga' ba'i ngo bor gyur to/ /de la thabs dang shes rab kyis pho dang mo'i dbang po'i rnam par rtog pa 'gags te/mi skye bas na bral ba'o/ /byung ba'i sgras khu ba la sogs pa rdzas kyi rtog pa dang yang bral ba'o/ /de bzhin du bde ba'i dga' ba'i rim pa la sogs pa ni phyag rgya bzhi la brten pa'i rnam par rtog pa spangs pa ni de bzhin gshegs pa thams cad kyi sku gsung thugs rdo rje ni bcom ldan 'das nyid kyis byas pas phyir na rang bzhin dga' ba'i thugs la sogs pa'o//de yang lam gyi rim pas dbye ba ni bya ba yin no/ /lha mo dbang chen nyi ma skyes/ /zhes bya ba la sogs pa la/ dpa' bo chen po'i sgras byang chub sems dpa' rnams kyi sku'i gzugs kyis so//de bzhin du dpal lha mo rnams kyang bstan pa de rang nyid la bshad pa A li dang rtsa ba'i rim pa dang / byang chub sems thig le bcu drug /dpa' mo'i rtsa'i 'khor lo/ /de bzhin lte bar byang chub sems thig le bcu drug /g.yas g.yon bcu drug phrag gnyis dpa' mo rtsa'i dngos po'o/ /dpa' bo mchog gi dga' ba dang dpa' mo bral ba'i dga' ba zhus pa dang 'pho ba dang 'jig pa dang bral ba'o/ /dpa' bo byang chub sems ga bur dpa' mo lte ba'i snying po/ rang bzhin gyis bcom ldan 'das la bskor ba'o//rnam par bskor ro zhes pas lha la sogs pa'i gzugs rtsa dang byang chub sems kyi yi ge la sogs pas bskor ba'o/ /yan lag ni de rnams thams cad bsdu ba'o/ /khyab pa'i chu yis pad+ma bzhin/ /zhes bya ba ni/ gtso bo'i rang bzhin dang ldan pa'i phyir ro/ / dper bstan pa dang mtshungs pa'o/ /shes rab de ni tshangs pa'i gnas/ /zhes bya ba ni gnas dang rten dang bzhi ni rnam grangs so/ /rnam par rtog pa dang bral ba'i gnas kyi khyad par te/ 'dir byang chub sems kyi zla ba'i rang bzhin la tshangs pa zhes bya'o/ /de'i phyir/ tshangs pa ye shes 'dzin pa'i phyir//zhes so/ /ye shes bral ba'i dga' bar 'dzin pa ni rang bzhin dga' bar 'dzin pa'o/ /b+ha ga bdud ni 'joms pa'i phyir/ /zhes bya ba ni gnyid dang rmugs pa dang / the tshom dang 'gyod pa de dag ni lha'i bu'i bdud do/ /'dod chags la sogs pa ni nyon mongs pa'o//na tsha la sogs pa phung po'i dang tshe dang dbang po 'gags pa 'chi bdag gi bdud do/ /'dir rnam par rtog pa'i dngos po 'joms pa ni rang bzhin dga' ba'i bcom ldan 'das kyis so/ /yang na longs spyod myong bas so/ /zhes bya ba ni drug dang ldan pa'i bdag nyid ro dang ye shes longs spyod na bcom ldan 'das b+ha ga'i don gcig pa ste/phyi nang gi rim pa'o/ /bzhugs pa nyid kyi mtshan nyid de/ /zhes bya ba ni mtshan dang dpe byad dang yig 'bru la sogs pa sngar bshad pa yin no/ /de bzhin gnas pa yang na gshegs/ /zhes bya ba ni dam tshig dbang gis gnas pa dang bzhugs pas mtshungs/ye shes sems dpa'i don gyis gshegs pa ste/ sku'i rnam pas dbye ba dang / gsung dang thugs dang rdo rje'i rang bzhin bde bas dbye bar bya'o/ /de lta bu'i don dam par zhes bya ba la sogs pas ni nges pa'i don gyis thabs kyi rim pa gang la brten kyang 'bras bu'i don dam pa rnyed de/'dir 'di skad bdag gis la sogs pa'i don gyis 'thob pa'o/ /thams cad rnal 'byor rgyud du gsang / /zhes bya ba la sogs pa ni bya ba dang spyod pa dang rnal 'byor du sgras so/ /rnal 'byor bla ma dang / rnal 'byor bla na med pa'i rgyud du nges pa dang drang ba'o//gzhan dag go sla'o/ /e waM zhes bya ba la sogs pa ni yab yum thabs dang shes rab kyi rin po che dang pad+mar ldan pa'i rtsa'i 'khor lo'i gnas kyi rim pa 'dab ma drug cu rtsa bzhi dang / brgyad dang gsum dang de dag rnams dang bcas pa'i ye shes bskyed pa'o//'di ni rdo rje 'dzin pa bzhugs pa'i sa'i chos kyi 'byung gnas zhes bya'o/ /byang chub kyi sems rang bzhin dga' ba spros pa dang bral ba'i sa thams cad la dbang byed pa yin no/ /rgyud las ni rtag tu sprul pa sku'i sa bcu gcig pa zhes brjod pa'o/ /longs spyod rdzogs pa bcu gnyis pa//chos kyi sku ni bcu gsum pa/ /bcu bzhi bde ba chen po ste/ /gang zhig bco lnga pa yi sa/ /de ni ye shes sar bstan yin/ /bcu drug sa ni brtag pa mi/ /de bzhin du rgyas par gsungs so/ /de kun dga' ba'i bye brag gis/ /sa yi sgra yis kun du btags/ /zhes gsungs so//der gang zhig de kho na nyid gsum gyi bdag nyid de ni zhes bya ba la sogs pa'i rim pa ni sngon du ji skad smras pa dang / gnas skabs kyis shes par bya ste/ dga' ba dang mchog gi dga' ba'i lan gsum shukra dang ldan pa'i rnam par shes pa'i ye shes skye ba ni sems dang sems las byung ba dang ma rig pa'i don gyis de nyid la gsungs pa'o//de'i 'bar ba dang zhu ba dang 'dzag pa dang / longs spyod pa dang / dga' ba rnams dang / de bzhin du thun tshod dang 'pho ba rnams dang chu tshod dang / dbyug gu'i don rnams dbye ba ni nang gi rim pa'i dbang du byas nas bshad pa yin no//ma rig pa'i ye shes kyi rang bzhin skye bar 'gyur te/ de dag rim pas 'byung ba las de kho na nyid ni gsal ba'o/ /yang na bral ba'i dga' ba las de nyid der gsal bar bstan te/ de yang bzang ba dang ngan pa gnyis te/ bzang po'i don rnyed pa ni bzhi pa'o//de skad du/ ji ltar mun pa'i rin po che/ /mar me med na mthong ba med/ /de bzhin de kho na nyid ni/ /lam la sogs pa'i rim pas rnyed/ /ces gsungs so/ /chos thams cad rnam par rtog pa'i dngos po ste/ 'di rnams ni de kho na nyid gcig pus bcom zhing dben pa'o/ /rgyu la 'bras bu'i ming btags pa'o//srog gi rlung yin pa/ dbyug pa yang ni/ byang chub kyi sems la kha cig 'dod do/ /la la ni byang chub kyi sems ni srog la/ dbyug pa yang rtsa yin no zhes smra'o/ /'dir ni phyi dang nang gi rtsa la dbye bar bya ba ni rang bzhin dga' ba'i gnas su/ srog gi rlung gzung zhing dgug pa tsam gyis kyang rtsa mdud sum cu rtsa gnyis la sogs pa ye shes myong ba'i ror gcig pas na/de la de kho na nyid de bzhin du spros pa dang bral ba'o/ /dga' ba gsum gyi rim pas 'byung ba ni bskyed pa'i rim pa gsum/ gyen du rdzogs pa'i rim pa gsum ni sbyor ba drug gi don to//yang na ut+pa la'i gnas su rdzogs pa'i rim pa'i don to/ /mchog gi dga' ba dang bral ba'i dga' ba'i don gyis shar ba dang nub pa dang / mi snang ba dang longs spyod rlung dang byang chub sems kyi mtshan nyid dang bcas pa'o/ /yang rang bzhin dga' ba nyid la bshad do//rlung dang byang chub sems phrad pa las ni dga' ba'i bye brag rang bzhin dga' ba dang ldan nas steng dang 'og gi 'dab mar 'pho ba ni dga' ba'i gnas su sems la dbang ba/ mchog gi dga' ba la sogs pa'i rim pas bde ba chen po shar ba'o/ /rtsa dang byang chub sems su ldan nas gnas khyad par can du bzhag pas ni rang bzhin dga' ba rnyed pas/de lus la sogs pa'i yan lag rgyas pa yin no/ /bum pa'i dbang dang gsang ba dang / /shes rab ye shes dang / bzhi pa'i gnas kyi rim pa dga' ba la sogs pa dang ldan pa dbang gi rim pa'o/ /dga' ba'i rnam pa'i sems la dbang bzhi pa'i 'bras bu dang bcas pas chad pa'i dga' ba'i bdud rang bzhin dga' bas 'joms pas srung ba'i 'khor lo mchog tu bshad pa ste/rdo rje dang rin po che la sogs pa'i mtshams de bzhin gshegs pa'i thugs mtshan no/ /de yang re re'i dbye bas zur brgyad pa yang rim pas rgyas pa slob dpon kha cig gzhung gis 'dod pa yin te/dad pa yin na gzung bar bya'o/ /kho bos ni de bzhin mi 'dod de/ de'i don 'di nas mar gsal bar ston to/ /gsang ba chen po'i ye shes mchog /ces bya ba la sogs pa ni bstan par bya ba ma yin pa la gsang ba/ spros pa thams cad las rnam par grol ba'i ngo bo/ ye shes chen po'i mchog nyan thos la sogs pa'i spyod pa'i yul ma yin pa 'di ni thos shing shes pa tsam gyis kyang sa'i bdag por 'gyur ba yin na/ bsam pa dang bsgom pa smos kyang ci dgos te/ brjod du med pa'i sa thob par 'gyur ro//brtson 'grus dang mi ldan na yang 'thob na brtson 'grus dang ldan na smos kyang ci dgos te/ gdon mi za ba'i tha tshig go/ /gang zhig snying po'i sngags 'di nyid/ /de ni bdag nyid bcu drug bde/ /zhes bya ba la sogs pa ni A li dang kA li'i sngags las oM la sogs pa'i snying po'i sngags dang /de bzhin du lus la sogs pa'i gnas rnams la bkod pa'i byang chub kyi sems kyi yi ge'i gzugs kyi snying po'i sngags dang / de bzhin du dga' ba la sogs pa las byung ba'i yid kyi snying po'i sngags dang / de bzhin du shes rab dang thabs gnyis phrad pa'i sa'i don dam pa'i sngags so//gang zhig sku brgyad mchod sbyin ni/ /de ni mtshan ma brgyad mchog go/ /zhes bya ba la sogs pa ni gnas dang zhing la sogs pa'i dzA lan+d+ha ra la sogs pa'i gnas kyi dbang du bskyed rim bsgom pa'i mtshan ma dang / spyi bo la sogs pa lus kyi gnas brgyad du/ byang chub kyi sems kyi sku brgyad kyi mtshan ma brgyad dang /'dab ma brgyad pa'i ge sar dang bcas par sku brgyad kyi ye shes kyi mtshan ma rnams ni yab yum thabs dang shes rab gnyis las byung ba'i don to/ /gang zhig mi snang longs spyod dbang / /de ni bskyed pa'i rim pa bzhin/ /zhes bya ba la sogs pa ni sku'i don gyi bskyed pa dang de bzhin du byang chub kyi sems rnams las lus la bskyed pa dang /dga' ba la sogs pa gsum rdo rje rin po che gsang ba'i rim pas skyed pa ste/ rang bzhin de kho na nyid shar ba la sogs pa'i don to/ /de nyid ni 'bras bu'i bde ba chen po nyid do/ /skal ldan mo gang ye shes sku//da ni rim sogs yan lag spangs/ /zhes bya ba la sogs pa ni bcom ldan 'das bde ba chen po'i ye shes kyi sku bskyed pa la sogs pa bsnyen bsgrub dang / yan lag drug dang bral ba dang / lus kyi 'khor lo la sogs pa'i yan lag dang / sprul pa'i 'khor lo la gsang ba'i rdo rje rin po che la sogs pa'i dga' ba dang sbyor ba'i yan lag kun gyi bdag nyid spangs pa can gyi ye shes chen po'i sku/mchog tu phra ba mi 'gyur ba mi zad pa/ skye ba dang 'gag pa ma yin pa rnam par rtog pa thams cad spangs nas/ bde ba'i ye shes chen po nyid las rol pa'o/ /lha mo gang zhig gsang ba'i sgra//de ni ye shes gsum dang bral/ /zhes bya ba la sogs pa ni dam tshig med pa'i spyod yul ma yin pa la sogs pa ni gsang ba/ sku dang gsung dang thugs gsum dang bral ba'i gsum gyi bdag nyid ye shes sems dpa' dang / sku'i 'khor la sogs pa'i bdag nyid dang bcas pa dang srog ma'i rtsa la sogs pa gsum ga bur dang bcas pa las de dag gi bdag nyid rtog pa med pa'i mtshan nyid kyi ye shes dang /sku'i gsang ba'i rdo rje'i rtsa ba'i dag pa thabs dang shes rab las byung ba rnam pa sna tshogs/ mgrin par mchog gi dga' ba mchog tu gsang ba rnam par smin pa/rtse mo'i gnas su bral ba'i dga' ba shin tu gsang ba rnam par 'joms pa la/ lte ba'i gnas su rang bzhin dga' ba snang ba la sogs pa'i ye shes gsum dang bral ba'i gsum gyi bdag nyid rnam pa'i mtshan nyid do/ /yang na de rnams kun kyang gsum pa'i bdag nyid rang bzhin pa de rang nas rnyed pa'o//lha mo gang zhig dam tshig ni/ /bsrung ba la sogs nges par bstan/ /zhes bya ba la sogs pa ni sku rdo rje la sogs pa'i dam tshig bsrung zhing bdud rtsi lnga la sogs pa bza' ba dang / snying gar mi shigs pa nyi zla'i dbus su byang chub sems kyi bdud rtsi dam tshig bsrung zhing bza' ba dang /ye shes kyi dam tshig rang bzhin dga' ba mchog dang bral ba dga' ba'i dbus su bdud rtsi ye shes kyi dam tshig bsrung ba dang bza' zhing tshim par bya'o/ /'khor la yang gsungs pa yin te/ bla ma'i kha las so/ /gang zhig sbyin sreg don dam par//de ni ha zhes glo bur pa/ /zhes bya ba la sogs pa ni/ zhi ba dang rgyas pa la sogs pa'i las rnams kun ji ltar rigs pa bzhin bya ste/ bza' ba dang btung ba la sogs pa'i sbyin sreg dang / yang na chu rgyun pa las pa'i don gyis bstan pa'am/ 'khor lo rnams la mkha' 'gro ma'i sngags ha'i yi ges sbyin par bya ba'i sbyin sreg dang tshul dang cha de'i dbus rnam par rtog pa'i sreg rdzas btsal te/rtsa'i mkha' 'gro ma'i sngags kyis mchod pa'i ha'i sngags kyi thig le'i dbus su mchod sbyin byas pas sbyin sreg gi dga' ba'i 'bras bu bde ba chen po de kho na nyid do/ /gang zhig bsrub dang bsrub thabs ni//de ni thog ma'i dga' dang bral/ /zhes bya ba la sogs pa ni bskyed pa'i thabs dang shes rab las 'byung ba'i dga' ba'i rim pa las rang bzhin dga' ba/ rkan gyi pad+ma dang rdo rje'i dga' ba'am/ 'khor lo'i bsrub pa dang bsrub thabs dam tshig gi phyag rgya dang /de bzhin gnas kyi rim pas bstan te/ thog ma dang tha ma gnyis su med pa'i rang bzhin dga' ba mchog dang bral ba'i bsrub pa dang bsrub thabs te/ de dag rnams spangs pa'o/ /lha mo'i gang zhig sngags kyis bzlas/ /de ni srid pa 'das pa'i yid/ ces bya ba la sogs pa sngags kyi sgras ni thabs shes skyes so//shes rab ni yum thabs ni yab nyid srid pa dang / mya ngan las 'das pa gnyis sbyor ba gnyis dang bral ba dang / srog dang rtsol ba'i rlung 'gog pas de dag bza' bar byas nas de bzhin du mnyam par byas te srog dang rtsol ba la blta bar bya'o//yang na sngags kyi bzlas pa'i don ni dga' ba gsum po srid pa dang mya ngan las 'das pa'i mtshan nyid can du gsum po'i bdag nyid mchog dang bral ba gnyis kyi ngo bo gnyis dang bral ba'o/ /'di skad du yang 'byung ste/ thig tshul cha dang bral ba dang / /thig le tshul dang cha yi nang //rnal 'byor pa yi der yid bsam/ /cha yi nang du bsam bya ste/ /yang na tshul gyi nang du'o/ /tshul yang thig ler bsgom par bya/ /thig le yang ni stong par 'gro/ /stong pa rang bzhin dga' ba nyid/ /gsum dang bral ba bsam skyes mchog /ces gsungs so/ /lha mo gang zhig gnas brgyad ni//de ni nyi skyes ma'i ni rgyas/ /zhes bya ba la sogs pa la/ gnas brgyad ni dkyil 'khor gyi gdan pad+mo'i gdan shar phyogs la sogs pa'i gnas dang zhing la sogs pa brgyad du lha dang lha mo'i dngos pos bskyed la gsal bar shar ba de bzhin du gnas kyi dkyil 'khor rdzogs pa'o//nyi ma skyes pa'i ni pad+ma'i gdan rnams dang bcas pa dang / spyi bo'i rtsa'i pad+ma'i gdan dang ldan pa brgyad dam 'dab ma brgyad pa pad+ma dang lte bar bcas pa'i lhag pa'i byang chub sems kyi dkyil 'khor ba dang ye shes kyi bye brag gis gnyis su med pa'i ye shes rgyas shing shar ba'o//gang zhig dga' ba la sogs rim/ /de ni rim gyis gnyis su dbye/ /zhes bya ba la sogs pa ni mkha' 'gro ma la sogs pas lung bstan pa'i phyag rgya rnyed pa las sbyor ba'i ye shes dang bcas pa'i dam tshig sna tshogs pa byas pas sa dang po nas sa brgyad pa'i bar ro/ / phyag rgya dang bral nas so sor spyod pa'i khyad par mi 'dra ba sna tshogs pa byas mod kyi/ 'on kyang mtshan ma med pa'i dbang gis rnam pa dang bral ba sa bcu pa'i dbang phyug thob pa'i bdag nyid do/ /de skad du yang / la lar chang gis ra ro dang / /zhes pa la sogs pa'i spyod pa dang / yang / rnal 'byor dbang phyug chen po nyid/ /rang dbang gis ni kun du brtags/ /zhes gsungs so/ /yang slob dpon a wa d+hU tI pa'i gzhung gis las dang po pa'i rnal 'byor pas las kyi phyag rgya la brten par bya ba yin te/ dbang po'i rim pa dang sbyor la/ de nas dam tshig la sogs pa'i rim pa'i phyag rgya la brten te/sa brgyad pa mtshan ma med pa'i don gyis sa bcu'i dbang phyug rnyed pa'o zhes bshad do/ /'di rang gi 'og nas ni dang po dga' ba dang bcas pa las dang po la sbyin par bya ba la sogs pa gsungs so/ /gang zhig dur khrod rnam rtog bral/ /dbugs dbyung la sogs rnam par spangs//zhes bya ba la sogs pa'i don to/ /shi ba'i ro la dbugs la sogs pa'i rnam par rtog pa bral ba'i dur khrod kyi bye brag bsgom pa dang / byang chub kyi sems kyi gnas mchog tu gyur pa'i sa'i dur khrod dang rdzogs pa'i rim pa'i dur khrod du gzung ba dang / 'dzin pa'i rnam par rtog pa tshig cing bde ba'i ye shes kyi ro myang ba rlung 'byung bas rdul dang bral ba'i ga pur zhu bas bskyed pa dang /rdzogs pa'i mtshan nyid kyis gnyis su med pa'o/ /lha mo gang zhig chu yi ngogs/ /de ni rtog med ma yi mthar/ /zhes bya ba la sogs pa la ye shes thob par bya ba'i gnas kyi dbye ba ni gsang ba'i rin po che snye ma'i kha dang /tshangs pa'i yul sa'i lte ba'i snying po'i gnas de'i don gyis rtog pa med pa'i mtha' ma byang chub kyi sems bde ba'i chu bo 'bab pa'o/ /yang na srog pa rtsa gsum pa dang ldan pa'i gnas nas bde ba'i chu bo 'bab pa'i gnas te/ dga' ba bcu drug gi gnas bgyid pa'i phyir ro//rtog med ma nas ni rtag tu byang chub sems kyi chu 'bab pa ste/ srog pa rtsa'i dbus na bzhugs pa'o/ /dur khrod dang chu ngogs kyi gnas der ni bzhi pa ye shes kyi sku bsgom mo/ /gang zhig snang ba sogs ye shes/ /sa dang chu dang zhes bya ba la sogs pa ni/rang bzhin rnams rim pas phung po dang khams la sogs pa la thim/ de snang ba dang snang ba mched pa dang snang ba thob pa la thim pa las 'od rang la thim pa'i ye shes spros pa dang bral ba mthong ba'o/ /'di'i don ni 'og nas rgyas par gsungs so/ /gzhan ni 'di skad du 'byung ba'i bzhi yis mtshon pa tsam ste/snang ba bzhi'i ye shes skye ba'i rim pa bstan pa'i rim par bstan zer ro/ /gang zhig dngos po rten la sogs/ /de ni bde ba dang por rig /ces bya ba la sogs pa la/ dngos po ni shes rab ma'i lte ba la sogs pa'i sbyor thabs rnams dang po'i dga' ba/ rten ni rtsa'i mdud pa'i lte ba rnams dbus kyi dga' ba/ye shes ni rlung dang dga' ba rnams kyi bdag nyid tha ma'i dga' ba/ rnam par 'byed pa ni 'od la sogs pa'i thig le rnams bzhi pa'i dga' ba'o/ /gzhan yang dngos po ni bde ba chen po'i 'khor lo srog ma'i lte ba dang bcas pa dga' bzhi'i rnam pa'o/ / rten ni longs spyod rdzogs pa'i 'khor lo rtsa ro ma'i lte ba dang bcas pa mchog gi dga' ba'o/ /ye shes ni chos kyi 'khor lo 'dzin ma'i lte ba dang bcas pa bral ba'i dga' ba'o/ /rnam par 'byed pa sprul pa'i 'khor lo rtog med ma dang bcas pa rang bzhin gyi dga' ba'o/ /'dir ni gsang ba'i gnas kyi bye brag gis dga' ba dang /mchog gi dga' ba la sogs pa'i bye brag gis gsungs te/ bzhi pa rang nyid las spyod pas nges par dbye ba yin no/ /lha mo gang zhig dur khrod brgyad/ /de ni bde ba la thim zhes bya ba la sogs pa ni mi zad pa dang mi sdug pa dang / ce spyang gi tshogs dang 'jigs su rung ba dang /sha za'i khwa dang / ha har dgod pa dang / nag po'i me 'bar ba dang / 'jigs byed kyi dur khrod brgyad do/ /kha dang sna la sogs pa brgyad dang / 'dir ni ga bur kyi rnam pa la dbye ba bya'o/ /rdo rjer gnas pa rus pa dkar po'i kha dog can dang / de rang tsha bas na nag po'i me 'bar ba dang /bde ba chen po gnas pas mi brten pa ma yin pa dang / sbyor ba dang dga' ba rnams ni dum bu dang / mgo bo la sogs pa dang / dga' ba gnyis gong 'og tu 'pho bas swa swa tseg tseg dang / rang bzhin dga' bas ma grub pas phyed tshig pa dang / srog gi rlung phyir mi rgyu bas shin tu tshig pa dang /rtsa'i yan lag kun la ri bong can rgyas pas rus pa dkar po bkram par bstan te/ de rnams kyang 'dab ma brgyad pa'i lte ba'i rang bzhin dga' ba'i bde bar ro gcig pa'i phyir rnam par rtog pa'i nyon mongs pa thams cad dang bral ba'i/ dur khrod brgyad kyi don bde ba chen po bdag med pa'o//gang zhig shing la sogs pa'i don/ /zhes bya ba la sogs pa ni dur khrod brgyad kyi don gyis shing brgyad pa'i don go sla ba'o/ /gang / rlung de kho na snying po'i don/ /de yi rin chen gdu bu'i bde/ /zhes bya ba la sogs pa ni srog ma la sogs pa'i snying po'i don ni phyag rgya rnams la brten te/rlung ma dang gnyid mar ldan pa'am/ bde ba'i byang chub sems bzhu nas bcas pa'i ye shes rin po che gsang ba'i gnas su rang bzhin dga' bas de kho na nyid kyi don gsal ba'i rlung gis so/ /lha mo gang zhig 'jug la sogs//de ni gyen du gzung ba'i rlung / /zhes bya ba la sogs pa la/ 'jug pa ni g.yon phyogs kyi 'dzin ma/ byang chub sems dang ldan nas srog gi rlung gyen du dgug pas rang bzhin dga' ba'o/ /gnas pa ni rtog med ma nyid la dus rtag tu gnas pa'o/ /'gro ba g.yas phyogs kyi ro can ma/longs spyod dang dbang mi snang ba'i ngo bos so/ /yang na gtum mo 'jug pa'i bya ba byed pa/ rtog med ma gzung 'dzin dang bral ba'i don gyis gnas pa/ bya gdong ma dang rang bzhin dga' ba ye shes 'gro ba'o/ /de yang rang bzhin gyi rlung gyen la bzung bas nyams su myong ba'i gnas su bsten pa ni goms pa'i sbyor bas bde ba chen po rnyed pa'o//gang zhig nyer 'gro'i bsam gtan ni/ /de ni zla ba gyen du byed/ /ces bya ba la sogs pa'i don to/ /rin po che'i pad+ma'i gsang ba'i pad+ma'i snying ga'i 'og gi sgor gnas pa'i ri bong can rang bzhin dga' ba'i snying gar 'gro ba'o//yang na snying ga'i nyi zla'i bar na mo'i bde ba'i byang chub sems rim pas bde ba chen po'i 'khor lo nas bde bar spros pa dang bral ba'i gnas su gshegs su gsol ba'o/ /phyag rgya la brten pa'i rgyu'i phyir na zhes man ngag go/ /gnas nas ni bskyed pa dang rdzogs pa'i man ngag gis yang dag pa'i gnas bde ba can gyi thams cad mkhyen pa'i nye bar 'gro ba'i bsam gtan zhes grags so//gang zhig ye shes thig le ni/ /de ni drug phyed gsum dang bral/ /zhes bya ba la sogs pa ni thams cad kyi bdag nyid ye shes thig le nyid/ phyi la sogs pa'i don gyis bsdus pa rang bzhin dga' ba gsum dang bral ba/dga' ba bco lnga dang yang bral ba bcu drug pa brjod du med pa'i rang bzhin bco lnga sa'i dbang phyug 'pho ba med pa bzhugs so/ /sngar khungs drangs pa 'di la dgongs pa yin no/ /gang zhig bdag gi rang ngo mchog de ni stor yang nyams su myong //zhes bya ba la sogs pa ni bcom ldan 'das kyi don phyi nas bstan pa bzhin bcom ldan 'das ma yang bstan pa/ lha mo mkha' 'gro ma'i rang bzhin rtsa ba'i gzugs kyis sam/ 'od kyi ngo bos gsang ba'i pad+ma'i snying ga nas bskul ba'i don la gshegs te/bde ba chen po'i rdo rje 'dzin pa dang bcas nas rang bzhin dga' ba'i gnas su byon pa'i tha tshig go/ /de nas yang gnyis su med pa'i bde ba chen po'i gnas su gshegs nas sems can thams cad kyi byang chub sems la bzhugs shing rgyas btab pa yin no/ / gnyis su med pa'i phyag rgya chen po zhes gsungs so/ /gang zhig sa rnams dbang byed pa/ /de ni de nyid drug rang bzhin/ /zhes bya ba la sogs pa ni de kho na nyid drug ni/ sbyor ba drug gi don gyis de kho na nyid bzhi bcu'i bdag nyid drug dang sbyar bas na/ sa rnams dang rim pas sbyar ba'o//de skad du/ gzhan mchog tshig gis brjod du med/ /rnam par dag pa kho na nyid/ /thams cad kho na'i bdag nyid phyir/ /de bas bye brag mi bya'o/ /zhes gsungs so/ /de yang 'dir rang gi 'og nas gsungs so/ /gzhan nas dga' ba'i rim pa dang sbyar ba dang sa'i rim pas bshad par bzhugs so//gang zhig de bzhin gshegs pa'i sku'o/ /de ni dga' ba dga' dang bral/ /zhes bya ba la sogs pa ni phung po dang nyon mongs pa'i 'dod chags la sogs pa kun ye shes lnga las grub pa'i sku yin te/ byang chub sems bde ba dkar po dang /nag po la sogs pa'i rim pas dga' ba bzhi'i dga' ba'i de kho na nyid do/ /yang na de bzhin gshegs pa mya ngan las 'das pa'i sgras bral ba'i dga' ba nye bar brtags pa tsam/ de las yang rang bzhin dga' ba bde ba chen po nyid mya ngan las 'das pa'i don to/ /lha mo gang zhig rgyud bstan pa//de ni bde ba shin tu 'phel/ /zhes bya ba la sogs pa ni rtsa ba'i rgyud la sogs pa'i rim pa pas don rgyas shing zab pa de bzhin du/ phyi la sogs pa'i bde ba'i ye shes rim pas nyams su myong bas 'phel ba dang rgyas pa'i don yin no 'dir gzhi dang bcas pa'i rang bzhin bde ba'i snang ba mar me de'i ngo bo nyid gzhi med pa'i bde ba chen po nyid gsal ba zhes pa'o//yang na rgyu'i rgyud nyid 'bras bur grub pa'i tha tshig go/ /gang zhig phyag rgya che rang bzhin/ de ni mi snang tshogs yid 'das/ /zhes bya ba la sogs pa la sku gsum gyi bdag nyid phyag rgya chen po'i rang bzhin dga' ba brjod pa la sogs pa'i mtshan ma dang bral ba/rin po che'i gdu bu'i rang bzhin dga' bas mtshon pa'i nyams su myong bas kun gyi bdag nyid kun gyi ngo bo kun spangs pa'o/ /'di skad du yang / shar ba ma yin nub ma yin//ma skyes cha ni rtag tu shar/ /yang dag dri med rnam pa'i 'od/ /dus dang gnas skabs grol ba'o/ /zhes pa dang / yang / rnal 'byor pa yis rnyed dka' ba/ /de yang thabs rab kyis rnyed la/ /thabs rab med na rnam yang min/ /zhes gsungs so/ /ji ltar bskur ba'i thabs dang bcas pa'o//gang zhig gsang ba don dam par/ /de ni nang gi reg bya ste/ /zhes bya ba la sogs pa ni mchog gi gsang ba rnyed par dka' ba ni gsang ba'i rdo rje'i rin po che'i nang du byang chub kyi sems bstan pas nang gi reg bya 'jam pa phra ba'o/ /de la mtshan ma'i rnam pa dang bral ba'i reg bya dang bral ba'i rang bzhin dga' ba gsang ba rab tu gyur pa'o//yang na dga' ba'i bye brag gi mtshan ma spangs pa brjod du med pa'i dga' ba dag cing dri ma med pa'o/ /de skad du/ ji ltar gzhon pa'i chags dga' dang / /ji ltar lkugs pa'i rmi lam bzhin/ / zhes bshad pa yin no/ /de nas thams cad kyi bdag nyid rang bzhin dga' ba nam mkha' bzhin gos pa med pa'o/ /gang zhig bskul ba'i mchod pa'i don/ /de ni dri med bde ba 'byung / /zhes bya ba la sogs pa ni rang bzhin dga' ba nyid du gyur pa la/ mkha' 'gro ma'i 'khor rnams kyis mgrin gcig tu drug ldan la sogs pas bskul ba ni mthong ba'i thabs so//de nas ji lta ba bzhin rang bzhin dang tha dad par mthong ba dang / yang nyid rang bzhin dga' ba'i don gyis bzhugs pa bzhin/ /bde ba chen po'i bcom ldan 'das la rtsa'i 'khor lo rnams dang bcas pa'i 'od zer bcas pa'i sgras bskul bas/'khor lo la sogs pa'i khyad par can gyi dga' ba'i gnas su bzhugs pa mthong ba ni dri med 'byung ba'o/ /de skad du/ rdo rje 'dzin pa bde ba chen/ /gnas mchog dam pa kun na bzhugs/ /bcom ldan 'das ni bde chen gnas//sprul sku rdo rje gdan gnas bzhugs/ /zhes gsungs so/ /de rang bzhin dga' ba'i don la gzigs te/ sku gsum dbyer med pa'o/ /'das pa la ni yang skye ba/ /zhes bya ba ni rang bzhin gyis sngar gshegs pa'i lam yang skyes pa ste/ kun du rgyas pa'i phyir ro/ / phyis slar la bde ba chen po'i 'khor lo'i gnas su gshegs pa ni skye ba de la 'phel ba'o zhes bya ste/ mchog gi dga' ba'i don gyis rtsa'i mkha' 'gro ma la sogs pa kun bde ba chen po'i skur bzhugs pa'o/ /lha mo shes rab ye shes gang / /de ni kha dang snying gar bde/ /zhes bya ba la sogs pa ni sngar bshad pa bzhin shes rab dang ye shes dbye'o//'di rin po che kha'i gnas su shes rab kyi dbang de'i snying gar ye shes kyi don to/ /de nas gzhi dang rang bzhin dga' ba'o/ /yang shes rab kyi khar shes rab/ de nas slar gyi thabs kyi snying gar ye shes de'i rang bzhin bzhi pa'o//gang zhig gsang ba yi dkyil 'khor/ /de ni ga pur 'pho med bde/ /zhes bya ba la sogs pa la gsang ba'i dkyil 'khor gyi sgras rdul tshon dang / me tog dang dri zhim pa sna tshogs pa'i 'khor lo de rnams kyi don gyi khu ba/ steng 'og gi gnas su mi 'pho ba rang bzhin dga' ba me tog la sogs pa dang bcas pa'i dkyil 'khor gsang ba'o//yang na bde chen la sogs pa'i sgras ni rang bzhin dga' ba'i don bde ba chen po'o/ /ye shes rnam par rtog pa spangs pa bde chen byang chub sems zhes rgyu dang 'bras bu'i bye brag gis bshad pa'o//de yang tshangs pa'i yul sa'i sgras so/ /lha mo gang zhig tshig rgyas pa/ /de ni bya gdong khong du chud/ /ces bya ba la sogs pa ni/ rdo rje dang pad+ma'i lte bar gnyis kyi bye brag dbyer med par byas la/ rang bzhin byang chub sems rgyas pas de kho na nyid do/ / yang na mchog gi gnas gang yang rung ba'i tshig rgyas pa zhu ba la sogs pa dang bral ba'i bde ba'i ye shes dngos po spangs pa'i de nyid do/ /'byung ba bsrung don gtor ma gtang / /de ni srog chags gsad pa'o/ /zhes bya ba la sogs pa la/ 'dis 'byung ba'i sgras ga pur te/ sems can kun gyi snying po'i rang bzhin can 'di rin po che'i 'khor lor bsrung bar bya/gzung bar bya zhes pa'o/ /sems can sna tshogs pa'i srog bcad pa'i sha la sogs pa mkha' 'gro ma'i tshogs la gtor ma gtang zhing sbyin par bya'o/ /'gro ba ris drug gi rgyud bcad cing 'gog par bya ba ni snying po dang ldan pa'i sems can thams cad de zhes brdar bshad do//de dag ni mchog gsang ba chen po'i gsang chen zhes bya ba la sogs pa'o/ /de skad du/ ji ltar nor bu rin po che/ /sems can rnams kyi bsam pa bzhin/ dbul zhing phongs pa dang bral nas//phun sum tshogs pa thams cad 'byung / /zhes pa dang yang ji ltar nam mkha'i ngos dag la/ sprin med ri bong can gsal ni/ /skyon dang bral ba'i chu snod du/ /de ltar de yi gzugs su mthong / /de bzhin tshogs ni bsags pa la/ /bde ba chen po'i rgyal po nyid/ /chos dang longs spyod rdzogs pa dang //sku dang gsung dang thugs rdo rje/ /byin rlabs yid bzhin nor bur 'char/ /de bzhin sprul dang yang sprul sogs/ /ji ltar chos rnams de rnyed pa/ /sems can rnams la so sor snang / /zhes pa dang / yang / de nyid sngags kyi bzlas pa dang / / de nyid dka' thub bye brag go/ /de nyid dkyil 'khor de dkyil 'khor/ /kun bsdus pas na sems 'dus bsdus/ /zhes pa dang / yang / gzugs dang tshor ba 'du shes dang / /'du byed rnams dang rnam shes dang / /khams dang skye mched la sogs kun/ /thams cad sems nyid gsal bar snang //zhes pa dang / yang / phyi nang bdag nyid 'di kun ni/ /sems las gzhan na yod ma yin/ /dngos po rnams kyi nges pa ni/ /rnam par dag pa de bzhin nyid/ /ces pa dang / phyi yi don kun skad cig ma/ /dga' ma sems kyi rdzu 'phrul lo/ /gzhan med sems kyang de bzhin min//sems nyid nam mkha' lta bu nyid/ /ces pa dang / yang / 'jig rten khams ni gang nas kyang / /sangs rgyas gzhan nas rnyed pa med/ /sems nyid rdzogs pa'i sangs rgyas pas/ /gzhan du sangs rgyas rnyed pa min/ /gzhan nas sangs rgyas yod ma yin//rang gi byang chub sems nyid do/ /de gsal rin chen rnyed pa bzhin/ /dbul po thams cad med par byed/ /de bzhin byang chub sems kyi gter/ /dbul po kun las grol bar 'gyur/ /zhes gsungs pa'i phyir ro/ /'dir sngar gyi don gsal bar bstan te/lha mos gsol pa/ bzhi bcu'i bdag nyid de kho na nyid ces bya ba la sogs pa ni sa dang sbyar ba'i don zhus pa'o/ /rnam pa sna tshogs sum cu drug /bcu gcig pa yi bdag po'o/ /zhes bya ba la sogs pa ni lan bka' stsal ba'o/ /sum cu rtsa gnyis kyis bdag la/ / sum cu rtsa gnyis chu tshod kyi/ /bar du srog dang sos pa'i rlung / /gnyis shar ba yi kun spyod do/ /zhes bya ba la/ sum cu rtsa gnyis ni/ de kho na nyid sum cu rtsa gnyis kyi bde ba chen po'i rtsa sum cu rtsa gnyis so/ /bdag nyid ni zung brgyad kyi rnam pa de kho na nyid lte ba dang ge sar bcas pa'i bdag nyid la zhen pa'o//sum cu rtsa gnyis chu tshod ni nang la sogs pa'i chu tshod dang / 'pho ba dang / thun tshod dang / dbyu gu'i don gyis rtsa dang byang chub sems dang rlung dang bcas pa'i mtshan nyid du gsungs so/ /srog dang sos pa'i rlung gnyis ni/ dbus kyi rtsa'i g.yas g.yon nas rlung dang bcas pa'i bde ba chen po'i gnas nas/bde ba chen po'i bar du srog gi rlung dang / sos pa'i rlung yan lag kun la 'byung ba'o/ /snying ga'i rlung dang lte ba'i rlung gi don gyis 'dir gsal bar bstan pa ni 'di skad du/ srog rlung snying gar gnas pa ste//de bzhin lte bar sos pa'i rlung / /gang zhig rkang mthil las rlung ni/ /'byung bar gyur pas de yi tshe/ /srog gi rlung ni gyen la 'gro/ /sos pa'i rlung ni lte bar gnas/ /yang na gang zhig srog gi rlung / /spyi gtsug las ni thur 'gro na/ /sos rlung de ni rang gnas 'gro//sos rlung lte bar bstan pa'o/ /zhes gsungs so/ /shar ba ni gnyis yan lag thams cad la nye bar longs spyod par byed pa'i don gyis so/ /kun ni phung po dang khams dang skye mched dang rtsa dang khu ba'i rnam par rtog pa thams cad do/ /dpyid kyi dus ni de thams cad bde ba'i ye shes kyi bye brag gi ngo bo la spyod pa'i phyir ro//'di skad du/ ngan pa'i dus ni bral bar bshad/ /bzang po'i dus ni mchog gi dga'/ /gnyis dang bral ba 'dir ni dus/ /kun la bde ba'i ye shes spyod/ /ces gsungs so/ /sos pa'i rlung 'byung ba'i dus su//zhes bya ba ni/ srog dang phung po la sogs pa dang lus ngag yid kyis bsdus pa kun sos par byed pa'i rlung gi gnas su 'byung ba'i dus ni/ mtshan ma'i dngos po'i rtog pa las grol ba'o/ /nang gi lte ba'i snying po ni 'khor lo rnams kyi nang gi lte ba'i srog gi rtsa dang bcas pa'i snying po bde ba'i byang chub kyi sems 'di nyid do//yang na kun gyi lte ba rdo rje rin po che'i dbus so/ /rtsa ba sdong bu'i lam gyis 'jug pa'o zhes bya ba ni srog gi rtsa'i rtsa ba dang / sdong bu gsum po'i lam nas nang dang gsang ba 'dir dbus ma'i lam nas snying po de nyid 'jug pa ni rin po che'i snye ma'i gnas su'o//'jug pa tsam gyis zur brgyad pa'i nang nas yod pa'i bde ba chen po srog gi rgyal po la zhes bya ba zur brgyad pa'i nang na ni 'dab ma gsum pa'i lte ba'i dbus kyi gnas ni rten brgyad pa'i don dang ldan pa'o/ /yod pa'i bde ba chen po srog gi rgyal po ni byang chub kyi sems spros pa med pa gzhi'i rnam pa can/nyon mongs pa'i gnyen por gyur pa bde ba'i rgyal po'o/ /la zhes bya ba ni rten gyi don gyis bzhi pa'i rten gyi rgyud nyid kyi phyir ro/ /gang zhig ro gcig pa'i mtshan nyid de ni 'dus pa'o zhes bya ba la de kho na nyid du yan lag la sogs pa gsungs pa thams cad gsang ba'i rdo rje rin po che'i dkyil du 'dus pa ste/de kho na nyid kun gyi rgyal por byed pa'i phyir na zhes bshad do/ /'dzums pa'i don ni gyen po'i lam gyis 'gro ba'o/ /de skad du/ thabs dang shes rab bsrubs pa yis//legs dgyes shin tu bde ba ni/ /byang chub sems ni bde bar bcas/ /sdong bu dbu ma'i lam nas 'byung / /srog rlung lte ba'i rtsa bar ni/ /gzhan du 'gro bar mi byed na/ /pad+ma kha sbub gnas pa 'di/ /gyen du gnas par 'gyur ba'o/ / de yi lte ba'i dbus su ni/ /byang chub sems ni brtan 'gyur ro/ /zhes gsungs so/ /de'i dus su gang zhig bdag dang gzhan gyi bye brag mi byed cing zhes bya ba la sogs pa ni go sla bas ma bshad do/ /dbang gi don zhus pa lha mos gsol pa zhes bya ba la sogs pa la/ dang po dga' bar bcas pa ni las dang po pa la sbyin pa'o zhes bya ba la sogs pa la/bum pa dang gsang ba dang shes rab ye shes dang / bzhi pa'i dbang rnams nang la sogs pa'i rim pas 'bras bu dga' ba'i rim pa dang ldan par byas pa la/ sa la sogs pa'i rim pa la gnas pa'i bdag nyid can la stobs bskyed par bya ba'i phyir sbyin te/nang gi bum pa dang gsang ba'i bum pa la sogs pa'i dbang bskur zhing man ngag bstan te/ slob dpon gzhan ni bum pa'i dbang bskur bas sa brgyad pa'i 'bras bu bsgrub cing rgyu la sogs pa'o/ / snang ba gsum gyi bcu pa de'i rim pas bde ba chen po'i ye shes spros pa dang bral ba'o zhes zer ro/ /la la ni theg pa chen po dang rdo rje theg pa'i khyad par gyis bstan pa'o zhes gsungs so/ /yang kha cig bzhi pa'i rin po che'i dbang gis sbyin zhes smra/ la la las kyi phyag rgya bzhi lung bstan rnyed nas bzhi pa'i dbang thob zer ro//bdag gis rgyal po'i gzhung dang 'di mthun par dgongs pa'o/ /ci'i phyir zhe na/ bar ma chad pa'i thos pa las byung ba'i phyir ro/ /lha mos gsol ba zhes bya ba la sogs pas ni zhu ba gsol pa'o//lan du sa la sogs pa ma rnyed pa rnams la/ thog mar rang gi ngo bos so/ /zhes bya ba ni/ dbang gi sta gon dang dkyil 'khor la sogs pa'i cho ga gsungs pa bzhin du dbang bskur ba la sogs pa'i don gyis rgyas par bstan te/ rdul tshon la sogs pa'i dkyil 'khor dang bcas pas so//sa la sogs pa rnyed pa rnams la zhes bya ba la sogs pa ni/ skye ba sngon bskal ba dpag tu med pa nas dge ba la gzhol ba dang / bsod nams bsags pa dang / /brtson 'grus la sogs pa'i stobs dang ldan pa ste/ / 'di nyid nas dpe don gyis rgyas par gsungs pa'o/ /'dir mthar phyin pa'i 'bras bu gang yin snyam pa la de 'dir bstan pa ni/ ye shes chen po'i sku dang bral/ /gnyis su med pa nam mkha' bzhin/ /zhes bya ba la sogs pas bshad pa yin no/ /de skad du/ kun brtags thams cad rnam bral ba'o//gnyis med ye shes 'di nyid yin/ /shes rab thabs bdag zhi ba nyid/ /byang chub sems mchog 'di nyid do/ /'di ni 'jig rten 'das ye shes/ /theg pa chen po chos sku nyid/ /rdo rje rdo rje sems dpa' nyid/ /sangs rgyas byang chub bla med yin//zhes gsungs so/ /de skad du rgyu la sogs pa kun nas bshad pa yin no/ /khyod kyi rang ngo bdag gis shes/ /zhes bya ba la sogs pa ni khu ba'i tshig go/ /bcom ldan 'das kyis bka' stsal pa/ byang chub rnyed pa las gzhan ci/ /'on kyang de la mthong ba yod/ / zas la bdud rtsi ji bzhin no/ /zhes bya ba ni bla na med pa'i byang chub ni bsgrub par bya ba yin te/ kun du 'od mthong ba las gzhan rnyed pa yod/ mdo sde la sogs pa'i theg pa chen po'i 'bras bu mthar phyin pa ni kun du 'od yin la/ gsang sngags rdo rje theg pa'i don ni 'on kyang gzhan du mthong ba ste/gnyis su med pa'i bde ba chen po'i rang bzhin gyi bdag nyid skye 'gag spangs pa/ kun dang bral ma yin pa'i ngo bo/ de skad du yang / bde chen gcig pu nyid las ni/ /bye brag so sor bstan pa tsam/ /rigs lnga la sogs bstan pa yang //des 'dul don du yod ces pa'o/ /zhes gsungs so/ /ji ltar zas kyi rnam pa gcig nyid kho na yang rnam pa sna tshogs par mthong ba dang / bdud rtsi'i rang bzhin nyid la yang de rnam par rtog pa'i sems kyi bye brag mang por mthong ba ste/ de bzhin gshegs pas bdud rtsir gzigs pa bzhin no//de rnams rtog pa dang bral ba'i phyir ro/ /de skad du/ 'dod chags la sogs nyon mongs rnams/ /'dzin pa dug tu 'gyur ba ste/ /ye shes rim pas bsams na yang / /de nyid ye shes nyid du 'gyur/ /zhes gsungs so//lha mos dbang gi don gsol ba'o/ /de yi lan bka' stsal pa ni/ /bzhi pa de kho na nyid grags/ /zhes bya ba ni dbang bzhi pa ni gnas dang bcas pa'i rang bzhin dga' ba dang / gnas dang bral ba'i don gyis de kho na nyid mchog go/ /de ltar ye shes 'du shes so//zhes bya ba ni bral ba'i dga' ba'i ye shes de ltar rang bzhin dga' ba'i ye shes de bstan pa'o/ /de bzhin ye shes las byung shes ni 'dab ma gsum pa'i lte ba'i snying po bzhi po'i gnas so/ /de bzhin du gnas kyi rim pa'i don gyis ye shes dang ye shes las byung ba dang bzhi po'i don gyis 'bras bu rdzogs pa yin yang bskyed pa'i phyogs zhes grags so//zlas dbye ba'i phyir rdzogs par grags pa ni yang na de bzhin gyi sgras/ ji bzhin shes rab la sngar thal/ /zhes bya ba la sogs pa'o/ /bcom ldan ye shes rin chen nyi//zhes bya ba la sogs pa ni dpe dang don gyi ngo bo bstod pa'i yon tan brjod par byas nas gsang ba'i gzhi dga' ba'i gzhi la sogs pa'i don la gsol ba btab pa'o/ /bcom ldan 'das kyis bka' stsal pa/ snang ba bzhi la go rims gnas/ /zhes bya ba ni snang ba dang /sems dang stong pa dang zla ba la sogs pa ni rnam grangs te/ sna tshogs pa'i sgo nas dga' ba dang / snang ba'i don bstan pa yin no/ /de yang mi gsal ba'i phyogs kyis snang ba'i ye shes dga' ba'i sems kyi mtshan nyid kyi khyad par ni gnas skabs dang sbyar ba'o//sems las byung ba snang ba mched pa'i ye shes te/ mchog gi dga' ba bde ba'i ye shes de bas mchog go/ /ma rig pa'i mtshan nyid ni snang ba thob pa'i ye shes te/ bral ba'i dga' ba bde ba'i ye shes shin tu mchog gi bdag nyid de bas lhag go//sems ni mtshan ma'i ngo bo nyid/ /ces bya ba la sogs pa la ye shes de rnams kyi khyad par bstan pa yang 'dir dpe dang don dbye bas shes par bya ba ni sems ni snang ba'i ye shes kyi 'du shes can ye shes gsal ba ma yin pa/ 'di ltar ston ka'i dus su dri me med pa'i nam mkha' la zla ba rdzogs pa'i 'od zer snang bas khyab pa bzhin gyis gsal ba'i phyir dngos po thams cad dmigs pas snang ba'i ye shes so//nyin mo'i rang bzhin sems las byung ba zhes bya ba ni snang ba mched pa'i ye shes kyi bdag nyid can/ yang ji ltar ston ka'i dus su nyi ma'i 'od zer gyis khyab pa bzhin du shin tu gsal zhing dri ma med pa nyid kyi dngos po ma lus pa thams cad dmigs pa snang ba mched pa'i ye shes kyi ngo bo'o//ma rig mtshams kyi 'du shes can/ /zhes pa ni snang ba thob pa'i 'du shes can/ ji ltar na nam gyi smag la bab pa phra zhing bdag med pa'i ngo bos khyab pa de bzhin du srog dang rtsol ba rgyu ba med pa/mi rgyu ba'i bdag nyid snang ba thob pa'i ye shes so/ /yang dag rab 'od gsum dang bral/ /zhes bya ba ni 'od rab ye shes kyi bdag nyid can yang ji ltar mtshams kyi mtshan nyid kyi mun pa spangs pa'i skad cig la nyi ma ma shar ba'i rang bzhin du rnam par rtog pa dang mtshan ma la sogs pa las grol ba/'od rab dri ma med pa'i ye shes su gsal ba'i bde ba chen po kho na'o/ /de la/ rang bzhin dga' ba'i mtshan nyid de/ /zhes gsungs so//de skad du 'di nyid nas/ dang por dga' ba dang bcas pa/ /las dang po la sbyin par bya/ /zhes pa la sogs pa gsungs so/ /da ni gnas dang bcas pa'i don bshad par bya ste/ gang tshe tshangs pa'i tshigs su sems/ /zhes bya ba la sogs pa gsungs pa/ tshangs pa'i sgras ni byang chub sems kyi dga' ba'i yid dang ldan pa'o/ /rdo rje rtsa ba'i gnas ni tshigs de la mchog gi dga' ba'i gnas su 'gro ba ni nyon mongs pa'i sgras snang ba mched pa ste/ lte ba'i gzugs su srog 'phro ba'i don to/ /'dir ni srog la rlung la sogs su bstan te/byang chub sems dang phrad pas 'pho ba'i phyir ro/ /yang na tshigs ni rdo rje dang rin po che gdu bu'i mtshams so/ /de ni dga' ba'i gnas te/ rim pas bshad par bya'o/ /steng yang ma yin 'og ma yin/ /zhes bya ba la sogs pa ni rdo rje dang rin po che'i sangs rgyas rin chen gyi kha'i sgo gnyis kyi bar bral dga'i gnas su mtshams so//de rnams brdas bshad pa ni snang ba zla bar bstan te/ snang ba las ni shar dus 'gyur/ /zhes pa la/ snang ba'i bde ba'i ye shes nyams su myong ba'i byang chub sems shar ba'i don bzang po'i dus ni dga' bar gyur nas 'dun pa 'jug pa'o//gang gis nyi ma yod pa dang / /de ni nyi ma srog 'dzin ma/ /zhes bya ba la/ snang ba mched pa'i ye shes nyi ma bde ba khyad par can du gyur pa/ srog ni byang chub sems kyi rang bzhin gyi rlung shin tu bzang zhing mchog gi dga' ba de nyid nyi ma'i sgras bstan pa 'dzin pa ni bstan par gyur pa'o//mtshams ni snang ba thob pa nyid/ /de yang me yi rang bzhin grags/ /zhes bya ba ni snang ba thob pa'i ye shes shin tu yang khyad par du gyur pa'i bde ba me'i sgras bstan pa'i don to//zla ba dang nyi ma dang me'i sgras snang ba gsum dang sbyar ba ni/ dpal in+d+ra b+hU tis dga' ba'i me tog gi phreng bar yang rgyas par gsungs so/ /snang ba'i rim pa shes par 'dod pas kyang de ru blta bar bya zhing gzhung gis kyang sbyar bar bya'o/ /yongs su zhu ba ni byang chub kyi sems bde ba chen po'i 'khor lo nas zhu nas dga' ba skye ba'i bar du'o//bdud rtsi g.yo ba ni nyon mongs pa rnams las thar pa'i bdud rtsi mchog gi gnas su 'pho ba'o/ /lha mo chen mos g.yo ba'i phyir/ /zhes pa ni go sla'o/ /gang du bral dga' mi snang ba//zhes bya ba ni dga' bar ye shes ma skyes pa de bzhin mchog tu yang ma skyes par bstan to/ /de rnams kyi don rgyas par bstan pa ni/ de ni snang ba dang po dga'/ /zhes bya ba ni dga' ba bzhi'i dang po dga' ba'i ye shes so/ /de las mchog dga' gsal bar ni//zhes bya ba ni dga' ba las mchog dga' ba'i rim pa snang ba mched par gyur pa ni gyur pas mchog dga' shar ba'i dus zhes bya ba la sogs pa'o/ /zhu med g.yo med bska ba'o/ /zhes bya ba ni bral ba'i dga' ba'i ngo bo snang ba thob pa'i ye shes de la brten pas ni spros pa dang bral ba bzhi pa de kho na nyid 'bras bu'i don rnyed pa'o//bska ba las ni phrad pa'i dngos po ni gsum pa nyid kyis bzhi pa gnyis su med pa'i rang bzhin dga' ba yang dag 'od rab rnyed par 'gyur ba yin no/ /kha cig ni/ de yi snang ba dang po dga'//zhes bya ba la sogs pa ni 'khor lo bzhi dang / dga' ba'i rim par sbyar la bstan pa dang / de nas yang sprul ba'i 'khor lo'i rim pas sbyar la bshad zer ro/ /yang na rdzogs pa'i rim par dbye bar bya ste/ gang du bral dga' mi snang ba//zhes bya ba la sogs pa'i rim pa gsungs pa la/ bral ba'i dga' ba mi snang ba ni rang bzhin dga' bar dang po'i ye shes snang ba rten can bzhi pa'o/ /de nyid la dang por dga' ba zhes sbyar ba yin no/ /de nyid shin tu brtan pa'i rang bzhin dga' ba ni/ mchog tu dga' ba gsal bar ni//zhes pa'i don to/ /gyur pas mchog dga' shar ba'i dus/ /zhes bya ba ni/ gyur pas zhes pa'i sgra rdzogs pa'i rim pa ste/ mchog dga' gnas su rab 'od kyi/ /ye shes nyi ma shar ba ni/ dus kyi bsam du med pa'i dus/ /bzang dang ngan pa spangs pa'o//de nyid 'khor rnams kyi rim pas gsal ba la ni/ gsal phyir snang ba chen por grags/ /zhes bya'o/ /gsal phyir de nyid bde ba chen po'i 'khor lo'i ye shes kyi bdag nyid du gnas pa ni/ zhu med g.yo med bska ba'o/ /de nyid rten dang bcas pa bde ba chen po'i rang bzhin dga' ba nyid kyis ni/bska ba la ni phra ba'i dngos/ /zhes bya ba ni mchog tu zab pa de kho na nyid dam pa spros pa thams cad dang bral ba'i bde ba chen po'i rgyal po rnal 'byor gyi dbang phyug gis mthong ba'o/ /bde sbyin yang kun spyod do/ /zhes bya ba ni srog gi rlung dang sos pa'i rlung yan lag thams cad la shar ba der bshad pa bzhin no//kun spyod las ni zhes bya ba la sogs pa la snang ba'i ye shes kyi rnam pa sna tshogs pa kun/ rang bzhin dga' ba'i ye shes kyi bdag nyid du thob pa'o/ /de rang gi don ni nyin mo dang mtshan mo'i bar gyi mtshams so//mchog gi dga' ba dang bral bas dga' ba'i gnas kyi bar ni gnas pa'i phyir dbus kyi gnas su yod pa'o/ /de nyid med pa'i mchog gi dga' ba gang sus kyang mi shes so/ /'og nas bshad pa'i don gyis/ dbus kyi gnas ni yod pa ni//zhes bya ba la sogs pa gsungs pa yin no/ /yang na gang du mtshan mo ni/ /zhes bya ba la sogs pa ni/ gang dang de gnyis 'bral ba'i phyir na 'di'i don ni mtshan mo'i snang ba'i ye shes de spang ba'i phyir nyi ma ni snang ba med pa'i ye shes de yang spangs pa de'i phyir/nyi ma nub pa'i sgras bstan pa'o/ /dbus kyi mtshan nyid bral ba'i dga' ba snang ba thob pa'i ye shes yin la/ de bas na/ rang bzhin dga' ba sbyin byed ma/ /zhes bya ba la sogs pa gsungs so/ /byang chub sems bde ba'i rnam pa de ni sprul pa'i 'khor lo'i lte ba'i bral ba'i dga' ba snang ba thob pa zhes bshad do//thams cad skye ba'i rgyu yin no/ /zhes bya ba ni srid pa dang mya ngan las 'das pa'i chos thams cad skye zhing sprul pa'i phyir ro/ /de dag ni don gsal bar gsungs pa/ gang du dbus mtshams skad cig gis//zhes bya ba la sogs pa'o/ /'khor ba dang mya ngan las 'das pa gnyi ga yod pa ma yin na yang / mya ngan las 'das pa'i chos kyi sku srid pa ni gzugs kyi sku ste/ 'khrul pa'i rnam par rtog pas 'khor ba la sogs pa'o/ /der yang glo bur du byung zhing gzung 'dzin gyi dngos po la zhen pa'o//de bas khams gsum 'khor ba'i rgya mtshor 'khor ba ste/ de'i rgyu ni don rab yin la/ de bzhin du srid pa dang mya ngan las 'das pa rgyu dang 'bras bu'i tshul gyis gnas pa yin no/ /de rnams kun rdzob dang don dam pa'i sku'i gzugs dang /de dang bral ba gnyis su btags pa ste dpyod pas gang yang ma grub bo/ /de yang bskyed pa'i rim pas byung ba ni/ 'od rab las snang ba thob pa'i rim pa'i rnam par shes pa de la rlung dang me dang chu dang sa dang phung po la sogs pa'o/ /rim pas 'byung ba ni srid pa'i dngos po gzugs kyi sku nyid snang ba gsum dang ldan pa/yang dag 'od rab [(]gyi [,]kyi [)]rgyu las byung ba'o/ /yang rgyu srid pa'i dngos po las snang ba thob pa 'bras bu dag pas bde ba chen po nyid thob pa'o/ /de rnams thams cad snang ba gsum gyi rgyu can no//de dag gi rang bzhin dang bcas pa ma shes pas srid par 'khyam zhing 'khor ba ste/ 'khrul pa'i phyir gnyis su med pa mi thob pa'o/ /de'i phyir/ bde ba'i tshor ba ma shes na/ /zhes bya ba la sogs pa gsungs so/ /de rnams kyi rgyu bstan pa'i phyir/ bde ba chen po'i bdud rtsi gter/ /zhes bya'o/ /bsrubs las skyes pa yin pa'i phyir/ /zhes bya ba la sogs pa ni srid pa'i dngos po bskyed rim gyi gzugs kyis lha rnams 'byung ba dang / mya ngan las 'das pa'i mtshan nyid rdzogs rim gnyis ka rim pas bshad pa'o//de rnams kyi 'bras bu'i don ni 'bras bu thob pa'i grags pa ste/ mtshan dang dpe byad ldan pa'o/ /dngos dang dngos med bral ba'i phyir/ /zhal bzang mtshams kyi ye shes so/ /zhes bya ba ni mya ngan las 'das pa'i phyogs gcig pu la yang gzugs kyi sku dang /gzugs med pa'i sku ste/ de bzhin du dbye bar bya ba'o/ /de rnams kyi don 'dis kyang bshad de/ nyin mo snang ba mched 'khor grags/ /mtshan mo zhes pa snang ba'o/ /mtshams ni snang thob mya ngan 'das/ /zhes bya ba ni srid pa'i thabs nyin mo'i mtshan nyid can snang ba mched pa'i dngos po mchog gi dga' ba'i ro can ma'i bdag nyid can no zhes gsungs so//mtshan mo zla ba'i don gyis snang ba'i dga' ba dngos po'i bdag nyid srog ma'i rtsa'i gzugs kyis sku'i rang bzhin no/ /mtshams ni mya ngan las 'das pa smag gi mtshan nyid can bral ba'i dga' ba'i dngos po 'dzin pa'i bdag nyid can thugs so//rdo rje dang pad+ma phrad pa'i mtshams yang na lte ba gnyis ga phrad pa mchog gi dga' ba dang bral ba'i dga' ba'i bar gyi mtshams ni nyi zla dang nyin mtshan gyi mtshams mya ngan las 'das pa'i bde ba'i rang bzhin can no//de la gnyis su med pa'i ye shes 'byung ba'am yang na de rang nyid la ni/ srid dang mya ngan 'das dang bral/ /gang du yang ni gsal ma byas/ /zhes bya ba ni bya ba dang / spyod pa dang rnal 'byor dang rnal 'byor chen po dang rnal 'byor bla na med pa'i rgyud gang du yang mi gsal ba'o//snang ba gzhi la go rims gnas pa'i don ni 'dir bstan pa'i don to/ /de'i phyir/ de lta bu yi gsang chen mchog /ces bya ba la sogs pa gsungs so/ /lha mos gsol ba/ 'bras grags de nyid rin chen gang / /zhes bya ba la sogs pa la/dga' ba thams cad dang snang ba la sogs pa'i 'khor ba dang mya ngan las 'das pa'i 'bras bu gzhi'i don zhus shing gsol ba btab pa'o/ /de'i lan rten dang bcas pa'i nyams su myong ba'i bdag nyid dang / de'i rnam par rtog pa spangs pa rang bzhin gyis kun la gnas shing kun dang bral ba'i don gyis bcom ldan 'das kyis bka' stsal pa zhes bya ba la sogs pa gsungs pa/mchog dga' ba'i ngo bor grags pa ni/ nyams su myong ba rnyed pa yin/ /zhes bya ba ni shes rab ye shes kyi dbang bskur ba'i dus su ji ltar ye shes nyams su myong zhing gtan la phab pa de bzhin du/drug cu rtsa bzhi'i sprul pa'i lte ba'i snying gar nyams su myong ba las yang nas yang du rgyun mi chad par goms pas rnyed par 'gyur ro/ /de skad du/ de la de nyid bstan pa ni//mchog dga' mtha' dang bral dga' dbus/ /rgyud rnams kun du sbas pa'i don/ /'di ru mthar thug gsal bar bya/ /zhes gsungs pa dang / yang / de rnams thams cad rab spangs la/ /gnas thob bsam gtan sbyor nges gnas/ /rang rig tsam la shes ldan dag /nyin dang mtshan du goms par bya/ /zhes gsungs pa dang / yang / bde chen rang rig tsam la ni/ /shes rab ldan pa bdag gis ni/ /nyin dang mtshan du goms byas nas/ /gnyis med mchog tu gyur pa nyid/ /ces gsungs so/ / mchog gi dga' ba dang bral ba/ /zhes bya ba la sogs pa ni/ gnas dang bral ba'i rang bzhin dga' ba nyams su myong ba yin pa'i rdzogs pa'i don mchog gi dga' ba/ rnam par rtog pa thams cad dang bral ba'i de kho na nyid dam pa'o/ /skal ldan ma gang nyams su myong //zhes bya ba la sogs pa ni der bshad par byas pa'o/ /yang de kho na nyid kyang rab tu gyur pa ni 'di skad du bshad pa/ bla na med pa'i ye shes che/ /gzhi dang bral bar rtag tu shar/ /zhes bya ba 'di nyid kyi gong nas gong du gzhan yod pa ma yin pa'i phyir bla na med pa'i mchog ye shes rnam pa lnga la sogs pa'i ye shes thams cad kyi bdag nyid bsdus pa dbyer med pa'i ye shes nyid pas na/gnyis su med pa'i ye shes chen po'o/ /brjod du med pa spros pa dang bral ba skye ba dang 'gag pa med pa zad pa dang 'phel ba med pa chos thams cad kyis ma gos pa'i phyir gzhi dang bral ba'o//shar ba yang ma yin nub pa yang ma yin dngos po dang dngos po med pa las grol ba phyag rgya chen po nyid dang bde ba chen po nyid ces bya ba la sogs pas bstan pa'i phyir na rtag tu shar ba'o/ /de skad du/ phyag rgya chen po gsang ba mchog /bde ba chen po nyid ni rab/ /brjod med mi zad ma skyes pa/ /thams cad gzugs can gzugs dang bral/ /dbyibs dang kha dog rnam par spangs/ /gzugs med bdag nyid gzugs kyi mchog /gzhal du med pa'i rang bzhin no/ / gang zhig tu ni gnas par 'gyur/ /shar ba ma yin nub ma yin/ /skye mched cha nyid rtag tu shar/ /yang dag dri med rnam pa'i 'od/ /skye dang 'jig pa'i rgyu yin te/ /dus dang gnas skabs grol ba'o/ /zhes gsungs pa dang / yang / rang rig pa yi ye shes 'od/ / tshig gi lam gyis brjod du med/ /byin brlabs pa yi rim pa de/ /kun mkhyen ye shes ngo bo nyid/ /ces gsungs pa dang / yang / gnyis med brjod du med pa nyid/ /rdo rje sems dpa' rdo rje'i dpal/ /byang chub sems mchog dam pa nyid/ /rdzogs sangs rgyas kyi byang chub nyid//de nyid shes rab pha rol phyin/ /pha rol phyin pa kun gyi dngos/ /de nyid rig pa gnyis su med/ /de nyid mnyam nyid 'dir brjod de/ /sangs rgyas kun gyi mchog sgom pa/ /zhes gsungs so/ /de bzhin du rgyud la sogs pa thams cad nas 'bras bu'i don 'di nyid gsal bar bstan pa yin no//de kho na nyid dam pa 'di ma rtogs par rang gzhan gyis mi grub par bstan pa ni rtag tu shar ba las gzhan ci zhes bya ba la sogs pa'o/ /lha mos gsol ba/ rgyud 'di gsang ba chen po ni/ /zhes bya ba la sogs pa ni don gyis bcom ldan 'das rdo rje 'dzin pa sku gsum dang bral bar bya ba mya ngan las 'das nas mi gsung ba'i dus ni sems can las dang skal bar ldan pa rnams la bshad pa ci su zhig ces pa ni gang zhig lags zhes bya ba'i don to//de'i don gyi lan gsungs pa ni/ bcom ldan 'das kyis bka' stsal pa/ ma 'ongs dus na byang phyogs su/ /zhes bya ba la sogs pa ni go sla'o/ /de kho na nyid kyi bdud rtsi'i rgya mtsho'i snying po rab mchog rgyal gyur cig ces bya ba la sogs pa la/ bcom ldan 'das nyid la bstod pa ste/ sku gsum gyi rang bzhin ni rdo rje 'chang chen po'i khams gsum gyi sems can thams cad la khyab par gnas pa dang /bskyed pa'i rim pa la sogs pa'i don gyis/ rgyud kyi rim par zhugs pa dang / 'bras bu'i ngo bo sangs rgyas de bzhin gshegs pa thams cad la bzhugs pa'i tshul gyis dang / de rnams kun gyi rang bzhin dbyer med pa'i bcom ldan 'das la bstod pa'i phyir na/kun gyi bdag nyid kun dang bral ba'i de kho na nyid kyi bstod pa'o/ /rgyud rnams kun gyi snying po las/ /snying po'i yang snying mchog gyur pa/ /de nyid nges don 'di yi rgyud/ /kun gyi 'bras mchog dam pa yi//ma rig rmongs par gyur pa dag /dbang bskur la sogs med pa la/ /'di yi don gsal byed pa gang / /de kun bdud kyis bslus pa'o/ /gang zhig 'di don sgrub mi byed/ /de yi 'bras bu mi 'thob ste/ /lus sems thang chad nyon mongs la/ /srid pa'i rgya mtshor 'khor 'gyur gsungs//zab mo'i don rnams brjod pa dang / /bag med 'khrul par gyur na yang / /rgyal ba sras bcas tshogs rnams kun/ /'gal ba mchis na bzod par mdzod/ /tshig dang yi ge la brten nas/ /'di yi don ni gsal bar bshad/ /de yi bsod nams kyis thob pa'i//dge bas 'gro kun sangs rgyas shog /dpal de kho na nyid kyi rgyud kyi dka' 'grel rin chen phreng ba zhes bya ba/ rgya gar gyi slob dpon chen po'i mchog /ma hA su kha ta badzras mdzad pa rdzogs so// //dge slong byang chub 'byung gnas kyis bsgyur ba'o/

CLOSE WINDOW