CLOSE WINDOW

D1201
བོད་ཡིག

@##// //rgya gar skad du/ A nan+da tsak+Shu nA ma TI kA/ bod skad du/ dga' ba'i spyan zhes bya ba'i rgya cher 'grel pa/ dpal rdo rje mkha' 'gro la phyag 'tshal lo/ /rnal 'byor ma yi rgyud rgyal kun/ /rgyal dbang rmad byung rmad du byung / /de nyid rgya mtsho dpal thig le/ / gang gsung de la phyag 'tshal lo/ /de nas gsang ba bshad bya ba/ /zhes bya ba tshigs su bcad pa de'i don ni dang po rgyal po chen po in+d+ra b+hU ti'i zhal snga man chad bla ma grub pa thob pa zam ma chad pa'i rim pa las/ dbang bskur ba dang man ngag rnyed pa'i mkhas pa chen po rgyal po'i dbang po'i rgyal po mchog gi bla ma kha che'i mkhan po dpal rin chen rdo rje'i zhabs kyi pad+ma'i bka' drin ji ltar thos pa de bdag nyid dran pa'i don du bris pa la skyon ci/yang na dam pa slob dpon ma bod yul dbus su skyes pa'i dge slong rin chen rgyal mtshan gyis dpal phyag rgya chen po'i thig le'i rgyud kyi sbyor ba drug gi don dam pa'i bskyed rim dang rdzogs rim ji ltar lags zhes bskul ba byas pa de'i don du bshad pa'i phyir ji lta bar bris pa la skyon gang /gang gi phyir mkhas pa rnam par zhe sdang / yang na log pa'i shes pa dang ldan pa'i long ba rnams lam rab stor ba'i phyir bdag gis de la dga' ba'i mig sbyin pa de la yon tan gyi don las gzhan skyon med do//da ni gang zhes pa'i don dpyad par bya'o/ /de nas zhes bya ba'i sgra ni de'i 'og tu zhes bya ba'i don no/ /dpal dgyes pa'i rdo rje ye shes kyi rgya mtsho 'bum lnga'i bdag nyid kyi rgyud las/ rgyal ba'i mnga' bdag dpal rdo rje sems dpa' bcom ldan 'das rang bzhin sbyor ba'i ngo bo bde ba chen po'i dga' ba'i gnas na bzhugs pa la/ rdo rje mkha' 'gro ma bye ba phrag bdun cu rtsa gnyis kyi grangs kyi 'khor gyi dbus nas btsun mo dpal legs dgyes dbang mos zhus pa'i ngor mdzad nas/dpal phyag rgya chen po'i thig le phyi ma'i rgyud rnal 'byor ma'i rgyud kyi dbang po'i rgyal po mchog gi gsang ba rmad du byung ba/ ye shes bdud rtsi'i 'bras bu shin tu smin pas bka' stsal to/ /yang na dbang po'i rgyal po'i rgyud 'di las thams cad kyi rgyud dang /dbang bskur ba'i le'u gnyis kyi 'og tu sbyor ba drug gi rnam par shes pa'i don dam pa bshad pa ni de'i 'og tu zhes bya ba'i don to/ /de'i phyir gsang ba yin no/ /yang na nyan thos la sogs pas ma rnyed pa'i phyir de ni gsang ba'o/ /rtogs par dka' ba'i rdo rje'i tshigs bcad rnams phyi ma'i rim pas gsal ba de ni bshad pa'i don to//don ni chos kyi phyag rgya'i ye shes rang bzhin dga' ba sna tshogs pa'i thabs kyis rnyed pa'o/ /de ni yi ge'i don to/ /da ni der bstan pa'i kun du yan lag gi don bshad par bya ste/ bya ba'i rgyud la sogs pa las gzhan pa'i rab mchog gi lam shes rab thabs kyi sbyor ba'i mtshan nyid de/de nas kyi don to/ /shes rab dang thabs mnyam par sbyor ba'i yan lag dang longs spyod dang dbang gis rang gi snying ga'i pad+ma'i lte ba'i nang du/ zla ba dang rdo rje dang sa bon gyis bskyed pa'i rim pa'i sku mdog dang phyag mtshan la sogs pa'i lha'i rnam pa sgom pa de ni gsang ba'o//de lha'i rnam pa la sgyu 'phrul chen po'i ye shes gnyis su med pa'i rnam pa shes rab kyi phyag rgya la sgom pa de ni bshad pa'i don to/ /da ni sngar bshad pa'i snying po'i don bshad par bya ste/ de nas ni shes rab dang thabs kyi 'og tu ste/rnam par smin nas rgyu mthun pa la sogs pa'i 'bras bu rnyed do/ /rgyu'i rab de ni 'khor ba dang mya ngan las 'das pa'i mtshan nyid kyi phyir ro/ /ci'i phyir 'khor ba dang mya ngan las 'das pa'i mtshan nyid ce na/ kun brtags dang gzhan dbang gi gzugs kyi phyir ro//gzhan la brten te skye ba'i phyir gzhan dbang ngo / /gzhan gyi sgra ni rten cing 'brel par 'byung ba'o/ /de ltar yang thams cad mkhyen pas/ gang zhig rten 'byung de ni skye ba min/ /zhes gsungs so/ /rang gi ngo bo dang bral ba'i phyir kun brtags so//gcig dang du mas rnam par dpyad na don dam par phyi rol gyi dngos po'i ngo bo nyid ni rnyed pa ma yin no/ /mi rnyed pa'i phyir thams cad stong pa'i ngo bo ste/ nam mkha' bzhin no/ /ji ltar log pa'i shes pa dang ldan pa'i longs spyod pa'i mis ci yang med par shes pa de ltar ma yin no/ / ci yang med pa'i phyir thar pa'i don du 'bad pa'i 'bras bu med par 'gyur ro/ /bsod nams kyi las su bya ba'i dge ba'i rtsa ba la sogs pa don med par 'gyur ro/ /don med pa'i phyir thar pa rnyed par mi 'gyur ro/ /de ltar ni rigs pa ma yin no/ /sbyin pa la sogs pa'i rtog pa rnyed na yang de bzhin du bcos ma ma yin no//de ltar na yang slob dpon chen po dpal rin chen rdo rje'i zhal snga nas mdzad pa'i rdzogs pa'i rim pa la/ dge ba'i tshogs ni rgyu yi phyir/ /bde bar gshegs pa'i lam yin no/ /'di ni thar pa bcos ma min/ /rang bzhin ye shes mtshan nyid do//gang phyir bsod nams gyis rnyed skye ba min/ /bsod nams de las skye ba min/ /zhes 'byung ngo / /de bzhin du shes rab dang thabs 'khor ba dang mya ngan las 'das pa/ kun brtags dang gzhan dbang rnam par smin pa dang / rgyu mthun pa'i 'bras bu yongs su shes nas/ yongs su grub pa'i dri ma med pa rnyed kyi skye ba ma yin no/ /de ltar yang gsang ba'i ngo bo'i rim pa de kho na nyid grub pa las/ dbang po sde tshan nang du bzhugs/ /'khor ba'i sa bon ma rdzogs mod kyi skye ba med/ /dka' ba'i dngos po'i sbyor ba yis/ /nam mkha' dang mnyam des ni bsil ba myong //zhes 'byung ngo / /de bzhin du slob dpon chen po 'phags pa klu sgrub kyi zhal snga nas/ 'khor ba yongs su shes pa ni/ /mya ngan 'das zhes brjod pa yin/ /zhes bshad do/ /rgyal po chen po in+d+ra b+hU ti'i zhal snga nas/ mya ngan 'das pa yongs shes pa/ /de ni ye shes rang bzhin mkha'//zhes bshad do/ /slob dpon ki la ri ba'i zhal snga nas ni/ srid dang mya ngan 'das pa yongs shes na/ rtog pa med pa'i bde ba chen po zhes bshad do/ /slob dpon kong+ka na'i zhal snga nas ni/ srid dang mya ngan 'das dag pa'i/ /skad cig tsam gyis 'dra med skye//zhes bshad do/ /dpal rnal 'byor ma thams cad kyi snying po'i rgyud las ni/ skye ba dang ni 'gag pa med/ /rgyud dang dpe dang bral ba ni/ /srid dang mya ngan 'das med pa/ /de ni 'dra med blo gros che/ /zhes gsungs so/ /de ni de nas kyi don to//phyi'i shes rab mi dgos par 'dzums pa dang 'byed pa la sogs pa'i shes rab kyi sgos gtum mo rang gi mtshan nyid shes rab ye shes las kun rdzob byang chub kyi sems 'byung ba de ni gsang ba'o/ /de'i rdo rje'i rtsa ba'i lte ba'i snyoms pa'i dam tshig gi phyag rgya ye shes kyi tshogs te bshad pa'i don to//da ni rang bzhin gyi don bshad do/ /de nas zhes bya ba ni rnam par smin pa dang rgyu mthun pa'i 'bras bu'i 'og tu yongs su shes pas dri ma med pa 'byung ba yin no/ /yongs su bor nas ma yin no/ /de gnyis yod pa'i phyir rdo rje rin chen gyi brta ka'i ye shes kyi rlung 'gog pas dri ma med pa rnyed do//de ni gsang ba'o/ /de rnyed pa tsam gyis chos thams cad mi dmigs pa dba' rlabs dang bral ba'i rnam pa'i ngo bo/ /yang dag dri med mchog gi 'og gi rang bzhin phyag rgya chen po'i ye shes kyis thams cad mthong ba ste/de ni bshad pa'i don to/ /da ni yi ge re re la sbyor ba drug gi dga' ba dang skad cig dang ldan pa'i don bshad do/ /char yang thig le zhes bya ba la sogs pa la char yang ni dus so/ /yang na char yang dus sbyor gang dang gang sbyor/ ta'i yig 'bru dang ra'i yig 'bru gnyis su sbyor ro//ta'i yig 'bru ni 'dzin ma shes rab kyi ngo bo rnam par 'joms pa'i gzugs so/ /ra'i yig 'bru ni ro ma thabs kyi ngo bo rnam par smin pa'i gzugs so/ /de dag sbyor bar byed pa'i phyir sbyor ba mdzad pa rtog med ma rnam pa'i mtshan nyid kyi ngo bo rlung gi gnas na bzhugs so//rlung gi 'khor ba ni lte ba nas rkang pa'i mthil gyi bar du'o/ /de lta ma yin dgongs na ni skyon chen po 'byung bar 'gyur te/ de ni 'brel pa'o/ /'dzin ma dang ro ma dang rtog med ma ni gsang ba'i pad+ma'i snying po las skra'i rtse mo stong gi cha tsam yang phyi rol du mi 'gro'o//mi 'gro bas na gang gi phyir/ 'khor lo drug drangs rlung gi 'khor lo'i rtsa dang dga' ba rnams gzhan gang du gnas par 'gyur/ de bas na rlung gi 'khor lo rab kyi gnas ni gsang ba'i pad+ma'i lte ba'i ni rigs pa'i gzhung lugs so/ /de ni rdzogs pa'i rim pa'i phyogs so//bskyed pa'i rim pa'i lugs bde ba chen po'i 'khor lo'o/ /gang gi phyir thams cad 'byung ba'i gnas so/ /'bras bu sbyin pa'o/ /'bras bu rnyed pa'i don du dang po 'di ltar bsgom mo/ /lte ba'i rtsa bar yaM yongs su gyur pa'i rlung gi dkyil 'khor gzhu lta bu mdog sngon po de'i steng du raM yongs su gyur pa las me'i dkyil 'khor gru gsum lta bu mdog dmar po//rlung bskyod pas lte ba'i pad+ma'i ye shes kyi me 'bar ba'i 'od kyi gzugs kyis chos kyi 'khor lo na bzhugs pa'i de bzhin gshegs pa rnams bsregs nas/ longs spyod lam du u rgyan gyi 'du shes gser sgo'i nang mtshams kyi bu ga'i bde ba chen po'i 'khor lor bzhugs te/rang gi 'od kyis bdud rtsi zhu bar byas nas/ de nyid khyer te zhi ba'i gzugs kyis sngar bsregs pa rab tu tshim par byas nas lte ba'i pad+mar bzhugs sa byed do/ /de las chags pa chen po'i yid dang ldan par 'gyur ro//chos thams cad kyi steng na gcig gi ngo bor shes so/ /shin tu yang bsam par byed do/ /gang gis 'di kun rdzob char yang gi don gyis so/ /char yang gnyis su gyes pa'i don rab tu nye ba'i gnas byed do/ /rgyu yang sbyin no/ /thigs pa mngon par 'byung ba la'o//de ni rtsa dang yi ge sbyor bas a'i yig 'bru 'byung ba yin no/ /'byung ba ni 'dir 'gro bar shes par bya'o/ /gang zhig a'i yig 'bru byang chub sems kyi ngo bo rtag tu rlung la zhon pa'i phyir 'gro bar shes par bya'o/ /de 'gro ba tsam gyis ni 'dar ba zhes bya ba'i rtags 'byung bar 'gyur ro//rtags de las rnam pa sna tshogs kyi skad cig rnal 'byor pas shes so/ /shes pa tsam gyis ni spyi bo na yod pa'i byang chub kyi sems dpral ba'i gnas su 'gro'o/ /de ni goms pa yis so/ /goms pas las kyi phyag rgya mi dgos par ting nge 'dzin shes so/ / de ni bde ba chen po'i 'khor lo'i gnas byang chub kyi sems la 'dar ba'i ro dang rnam pa sna tshogs pa'i skad cig dang ldan pa'i a'i yig 'bru'i don to/ /da ni tha'i yig 'bru'i don bshad do/ /tha'i yig 'bru'i thig le'o/ /rab tu bde ba'i rnam pa'i gzugs kyi phyir ro//yang na tshor ba'i phyir ro/ /de nyid yang gnyis su gyes pa'i don rab tu 'byed par gnas byed do/ /ma 'ongs pa'i rnam par smin pa las byung ba'i gsal bar byed do/ /rgyu yang sbyin no/ /tshul mngon par 'byung ba la'o/ /de'i dus su rdul zhes bya ba'i rtags 'byung ngo //rtags de las rnam par smin pa zhes bya ba'i skad cig shes so/ /de ni longs spyod rdzogs pa'i 'khor lo gnas pa rdul dang rnam par smin pa ldan pa'i tha'i yig 'bru'i don to/ /da ni tu'i yig 'bru'i don bshad do/ /tu'i yig 'bru'i tshul lo/ /rang 'byung ba'i phyir ro/ /de bas na rang byung ngo //thog ma dang bral ba'i phyir ro/ /thog ma bral ba'i phyir tha ma yang med do/ /thog ma dang bral ba'i phyir dbus kyang med do/ /thog ma dang tha ma dang dbus med pa'i phyir rang byung ngo / /yang na a kun du gang zhig gis rig pa med pa'i bag chags 'byung ba'i gti mug mun nag bcom pa'i phyir rang byung gi tshul lo//de nyid gnyis su gyes pa'i don rab tu byed par gnas byed do/ /rang gi yul bye brag gsal bar byed do/ /rgyu yang sbyin no/ /tshul tsam mngon par 'byung ba la'o/ /de las myos pa zhes bya ba'i rtags 'byung ngo / /rtags de las rnam par 'joms pa zhes bya ba'i skad cig shes so//de nyid chos kyi 'khor lo'i gnas na byang chub kyi sems yod pa'i phyir ro/ /de ni chos kyi 'khor lo'i gnas pa myos pa dang rnam par 'joms pa dang ldan pa'i tu'i yig 'bru'i don to/ /da ni ra'i yig 'bru'i don bshad do/ / ra'i yig 'bru ni tshul tsam mo/ /tsam gyi sgra ni yod med dang bral ba'i don gsal ba'o/ /tshul gyi sgra ye shes la sogs pa'i ngo bo yod pa'i dngos po'o/ /tsam gyi sgra'i ye shes la sogs pa'i ngo bo med pa'i dngos po'o/ /ji ltar chu zla lta bu'o/ /de'i phyir na tshul tsam mo/ / de nyid gnyis su gyes pa'i don rab tu byed par gnas byed do/ /rang gi yul gyi bye brag gi 'dzin pa'i reg bya byed do/ /rgyu yang sbyin no/ /mchog mngon par 'byung ba la'o/ /de'i skad cig gi yan lag mi brten pa zhes bya ba'i rtags 'byung ngo / /rtags de las rnam pa'i mtshan nyid shes so//de nyid sprul pa'i 'khor lo'i gnas su byang chub kyi sems yod pa'i phyir ro/ /de ni sprul pa'i 'khor lo'i gnas pa'i yan lag mi brten pa dang / rnam pa'i mtshan nyid dang ldan pa'i ra'i yig 'bru'i don no/ /da ni ha'i yig 'bru'i don bshad do/ /ha'i yig 'bru ni mchog gi rab po//kha khwa mu kha'i rnam pa'i gzugs can no/ /de nyid gnyis su gyes pa'i don rab tu 'byed par gnas byed do/ /thams cad la mtha' yas dga' ba'i 'dzin pa'i bde ba'i rnam par smin pa byed do/ /rgyu yang sbyin no/ /mchog gzhan du 'byung ba la'o/ /de'i dus su 'phar ba zhes bya ba'i rtags 'byung ngo //rtags de las dang po'i dga' ba shes so/ /de nyid rin po che ske'i gnas su byang chub kyi sems yod pa'i phyir ro/ /de ni rin chen ske'i gnas 'phar ba dang dga' ba dang ldan pa'i ha'i yig 'bru'i don no/ /da ni s+yaM gi yig 'bru'i don bshad do//s+yaM gi yig 'bru ni mchog gzhan no/ /yang na sangs rgyas rin po che'i snod kyi don no/ /nyid ni ma yin no/ /de bas na gzhan no/ /de nyid gnyis su gyes pa'i don rab tu 'byed par byed do/ /'dod pa dang mi 'dod pa'i dngos po 'dzin par byed do/ /rgyu yang sbyin no/ /chos thams cad mi dmigs pa la'o//de'i dus su dbugs rgod pa zhes bya ba'i rtags 'byung ngo / /rtags de las mchog gi dga' ba shes so/ /de nyid nang gi dpral ba'i gnas su byang chub kyi sems yod pa'i phyir ro/ /de ni nang gi dpral bar dbugs rgod pa dang mchog gi dga' ba dang ldan pa'i s+yaM gi yig 'bru'i don to//da ni ba'i yig 'bru'i don bshad do/ /ba'i yig 'bru ni gsang ba'i rin chen brta'i snying po/ /yang na snying nyid sangs rgyas rin po che'i snod shin tu 'jam pa/ phra ba/ mi bzad pa/ rags pa ma yin pa/ s+yaM gi pad+ma'i lte ba'i don to/ /der phyin pa tsam gyis ni byang chub kyi sems gnyis su gyes pa'i don rab tu 'byed pa'i gnas byed do//rgyu yang sbyin no/ /srog gi rlung la zhon nas sangs rgyas 'byung ba'i don du shes rab ma'i snying po'i nang du 'gro'o/ /de'i skad cig la bkrag ces bya ba'i rtags 'byung ngo //rtags de las chad pa'i dga' ba'i nang gi reg bya shes pa'i rnal 'byor pas dus shes so/ /'di ni chad pa'i dga' ba'i dus kyi skad cig go/ /de ni rdo rje gtsug tor gyi nang na byang chub kyi sems yod pa'i phyir ro/ /de'i gnas su k+Sha'i yig 'bru dpal rdo rje sems dpa'i ngo bo nyid stong pa nyid kyi ye shes dran par byed do//'gro ba med pa'i phyir k+Sha'i yig 'bru rang gi snying rin chen gsang ba'i pad+ma'i lte ba'i nang ye shes kyi rlung 'gog pa'i drod ces bya ba'i rtags 'byung ngo / /rtags de las skye med 'gag med rang rig brjod med bla ma'i zhal snga nas kyi bka' drin rang bzhin dga' ba rnyed pa ni de'i don to//de ni rang gi snying ga'i gsang ba'i pad+ma'i lte ba'i nang drod dang rang bzhin dga' ba dang ldan pa'i ba dang k+Sha'i yig 'bru'i don to/ /de ni/ de nas gsang ba bshad bya ba/ /zhes bya ba'i tshigs bcad kyi don rab kyi bla ma'i zhal snga nas kyi bka' drin gyis shes rab dpal gsang ba rang gi dran pa'i don du bris so//da ni [(]ye [,]yi [)]ge brgyad dang ldan pa'i don dam pa'i byang chub kyi sems rang gi slob ma rnams ye shes grub pa'i don du bsam gtan smra'o/ /dang por re zhig snying ga'i nam mkhar e'i rnam pa'i chos kyi dbyings kyi phyag rgya de'i nang du ka la sogs pa yongs su gyur pa las kA li'i dkyil 'khor/a la sogs pa yongs su gyur pa las A li'i dkyil 'khor/ de'i steng du baM gyi yig 'bru yongs su gyur pa las sna tshogs pad+ma 'dab ma brgyad pa lte ba dang ge sar du ldan pa de'i dbus su don dam pa'i byang chub kyi sems rin po che yang dag dri med mchog gi 'od kyi rang bzhin bsgom par bya'o//sna tshogs pad+ma'i shar gyis 'dab mar a'i yig 'bru char yang gi ngo bo dang / rin chen ma zhes bya ba'i rtsa dang / de bzhin du dga' ba'o/ /byang gi 'dab mar tha'i yig 'bru thig le'i ngo bo dang pad+ma chen po zhes bya ba'i rtsa dang /de bzhin du mchog tu dga' ba'o/ /nub kyi 'dab mar tu'i yig 'bru tshul gyi ngo bo dang / 'jigs chen ma zhes bya ba'i rtsa dang / de bzhin du chad pa'i dga' ba'o/ /lho'i 'dab mar ra'i yig 'bru tshul tsam gyi ngo bo dang / stobs chen ma zhes bya ba'i rtsa dang /de bzhin du rang bzhin dga' ba'o/ /me'i mtshams kyi 'dab mar ha'i yig 'bru mchog gi ngo bo dang / rtse chen mo zhes bya ba'i rtsa dang / rnam pa sna tshogs pa'i skad cig go/ /bden bral mtshams kyi 'dab mar s+yaM gi yig 'bru mchog gzhan gyi ngo bo dang / myos chen ma zhes bya ba'i rtsa dang /rnam par smin pa'i skad cig go/ /rlung gi mtshams kyi 'dab mar ba'i yig 'bru ye shes kyi ngo bo dang / dga' chen ma zhes bya ba'i rtsa dang / rnam par 'joms pa'i skad cig go/ /dbang ldan mtshams kyi 'dab mar k+Sha'i yig 'bru ye shes chen po'i ngo bo dang / dga' med ces bya ba'i rtsa dang rnam pa'i mtshan nyid kyi skad cig go/ /de ni yi ge dang / dga' ba dang / skad cig rnam par dag pa'i phyir sna tshogs pad+ma'o/ /dpal in+d+ra b+hU ti'i zhal snga nas mdzad pa'i dga' ba'i me tog gi phreng ba las/ de nyid kha bub shin tu 'dzums pa yang ma yin phye ba yang ma yin sdong bu dang ldan pa'i gzhon nu chos kyi 'khor lo zhes bshad do//gsang ba'i ngo bo de kho nyid grub pa las gsang ba'i snying ga'i lte ba'i nam mkhar 'dab ma brgyad pa dmar po nam mkhar kha bye ba sdong bu dang ldan pa'o zhes 'byung ngo / /de'i sdong bu'i 'og gi bu ga'i lam du 'dzin ma ro ma rtog med ma sa'i myu gu'i rnam pa lta bu'i srog gi rtsa dang lhan cig skra rtse'i stong cha tsam gyi kha gsal bar byed do//de ni mchog gi dga' ba'i dus so/ /pad+ma lte ba'i dbus su snyoms pa'i rtog med ma'o/ /'dzin ma dang ro ma ni g.yas g.yon na/ /gzhan dag na re de ni 'og gi cha'i srog gi rtsa'o zhes zer ro//rnal 'byor gyi dbang phyug chen po dpal in+d+ra b+hU ti'i zhal snga nas mdzad pa'i dga' ba'i me tog gi phreng ba las/ srog rtsa'i nang du zhugs pa'i gtso bo ni gsum te/ nang du 'gro ba dang / phyir 'gro ba dang / dbus su 'dug sa byed pa'o/ / zhes 'byung ngo / /dpal rin chen rdo rje'i zhal snga nas ni de dang gzhung gcig go/ /de lta mod kyi lu gu rgyud kyi rnam pa'i khyad par yod do/ /slob dpon mkhas pa chen po nA ro pas rtog med ma la srog gi rtsa ni sku'o/ /'dzin ma ni gsung ngo //ro ma ni thugs so/ /rtog med ma nyid ni bde ba chen po'i rang bzhin sku gsung thugs dang bral ba'o zhes bshad do/ /gcig pu de ni gsum du gyes par 'dod do/ /srog gi rtsa sku'i gzugs su med par gyur na gsung dang thugs kyi 'dug sa med do/ /de bzhin du dgyes pa'i rdo rje'i rgyud las/sku med na ni thugs kyi ni/ /de ni 'dug sa med pa yin/ /zhes 'byung ngo / /de bas na sku yang dgongs te 'bras bu sbyin pa'i phyir ro/ /lung nas ni gsang ba'i pad+ma'i lte ba'i rin chen nang na yod pa srog gi rlung gis dgug pas pad+ma gyen zhal lta bar 'gyur ro zhes gsungs so//gyen du zhal 'gro ba tsam gyis ni rgyal po'i sras mo rab tu lang tsho bab pa ji ltar legs dgyes bde ba de bzhin/ rang bzhin dga' ba the tshom med par myur du rnyed par 'gyur ro/ /de rnyed pa tsam gyis ni sa bcu'i dbang phyug byang chub sems dpa' lta bu rang dbang gi spyod pa la zhugs so//de ni gcig pu tshangs par spyod pa thams cad kyi dbus su tshangs par spyod pa'o/ /rang gi tshangs par spyod pa byed pa'i phyir ro/ /tshangs pa'i sgra ni byang chub kyi sems so/ /spyod pa ni a kun du gzung bar byed/ bor bar mi byed do//de bas na tshangs par spyod pa chen po'o/ /gyen du byang chub kyi sems kyi phyir ro/ /de ni bla ma rab kyi bka' drin gyis rnal 'byor mang po rgyal po in+d+ra b+hU ti la sogs pa dus ring po ma lon par phyag rgya chen po'i dngos grub thob po/ /de ni gsang mchog de kho nyid//brjod pa yis ni 'jigs pa'i phyir/ /gang zhig bre mo gtam tsam bris/ /mkhas pa chen pos bzod par mdzad/ /de skad shes na khyed cag kun/ /skyes bu yang dag dga' ba yis/ /'di yi don ni 'bad pas zung / /byis pa 'dra ba'i ngag yin yang //de bzhin nges par 'bras 'phel sbyin/ /dge ba yang dag rmad byung ngo / /bla ma'i bka' las bdag gis ni/ /cung zad kyis myong don med min/ /sngon med pa ni 'dir bris min/ /gang zhig rgyud la mthong ba min/ /'di byas pa yi yig don ni/ /gang zhig bdag gis rnyed pa yis//srid par bsdams shing bcings pa kun/ /de yis 'gro ba 'grol bar shog /gang zhig brda byed mchog gi rmad byung rtogs dka' ba'i/ /de nyid rang bzhin sbyor ba'i ngo bo mnyam sbyor gnas/ /dga' rgyas bde chen nyid bzhugs dpa' bo rab kyi bla//dpal ldan rin chen rdo rje de la bdag phyag 'tshal/ /e ma'o shAkya'i rgyal po dpal rdo rje sems dpas bsdus pa'i rgyud rgyal kun gyi rgyal chen rnal 'byor ma rgyud rnams kyi rgyal po'i dbang po'i 'od gsal rgya mtsho phyag rgya chen po thig le'i rgyud chen ngo mtshar rab rmad che//e ma'o rgyal chen in+d+ra b+hU ti rnal 'byor dbang phyug grub pa brnyes par ma chad pa yi rim pa'i slob dpon mkhas chen grub thob rin chen rdo rje slob ma dam pa rnal 'byor dbang phyug shes rab dpal gsang rmad byung dam pa che/ /e ma'o phyag rgya chen po'i nam mkhas dga' ba'i rgya mtshor shes rab skyes bus dpal gyi srub shing sbyor drug gsang ba'i bshad pa bzhi yi srub thabs bsam gtan bsrubs pas rang bzhin dga' ba'i bdud rtsi'i 'bras bu dga' spyan gsal thig ngo mtshar che//e ma'o de yi zhabs kyi pad reg rin chen rgyal mtshan bdag gis gzhan don lhur byas dad cing gus pas mang du gsol btab dri med dge bas 'gro kun rang 'od gsal bas nges par rol par shog cig rmad mchog che//dga' ba'i spyan zhes bya ba'i rgya cher 'grel pa slob dpon chen po rnal 'byor gyi dbang phyug shes rab dpal gsang ba'i zhal snga nas kyis mdzad pa rdzogs so// //rgya gar gyi mkhan po chen po pra dz+nyA shrI gup+ta nyid dang / zhu chen gyi lo tsA ba ban+de rin chen rgyal mtshan gyis bsgyur cing zhus te gtan la phab pa'o// //

CLOSE WINDOW