CLOSE WINDOW

D1186
བོད་ཡིག

/ //rgya gar gyi mkhan po pradz+nyA in+ta ru tsi ra dang / lo tsA ba dge slong shAkya ye shes kyis bsgyur ba'o// @##/ /rgya gar skad du/ badzra pA da sA ra saM gra ha pa ny+tsi kA /bod skad du/ rdo rje'i tshig gi snying po bsdus pa'i dka' 'grel/dpal kye'i rdo rje la phyag 'tshal lo/ /sangs rgyas kun gyi sprul pa mchog//rdo rje sems dpa' rab rtogs mdzad/ /'byung ba lnga yi bdag nyid mgon/ /dpal ldan bla mar bdag phyag 'tshal/ /sgyu ma lta sogs dpe rnams kyis/ /gang gi ngo bo rtogs bya ba//phyag rgya chen mo de nyid la/ /kun du gus pas bdag phyag 'tshal/ /dpral nas rdo rje nor bu'i mthar/ /dga' ba sogs kyis rab gang ba/ /gang zhig gang ba'i mthar skye ba/ /lha mo de la bdag phyag 'tshal/ /da ni re zhig 'dir dpal dang po'i sangs rgyas rgyud kyi mchog gi rim pa ji lta ba bzhin dang /dpal rdo rje snying po la sogs pa dang / dpal phyag na rdo rje'i gsung rab dang rgyud gzhan ma lus pa legs par bshad pa las phyung ste/ lung sna tshogs nas gsungs pa'i phyag rgya dang dkyil 'khor dang sngags dang sbyin sreg dang las rab 'byams la sogs pa rgya che ba gting mi rtogs pa'i zab pas 'jigs pa nyid kyis shin tu bsdus nas/dpal kye'i rdo rje'i tshig nges par bya ba cung zad cig bla ma dam pa'i brgyud pa'i man ngag gi rim pa thob pa'i kha che chen pos bdag nyid dran pa'i ched dang / /slob ma rnams kyis rtogs pa'i ched du yang dag par bsdus te bri bar bya'o//snyan dngags bkod tshig mu stegs pas/ /bshad pas ma yin khengs pas min/ /kun mkhyen gsungs pa bshad pa la/ /de phyir mkhas pa rnams bzod mdzod/ /de la dang por re zhig dpal dang po'i sangs rgyas kyi rim pas/ dpal kye'i rdo rje'i rgyud kyi don bstan pa drang ba dang /nges pa'i don gyi rim pas gsal bar bya'o/ /mdor bstan pa yis ji ltar byung / /rgyas par bshad pas rnam sbyong byed/ /sbas don rab tu rgyas bstan pas/ /rgyud la bstan pa rnam pa gsum/ /rdo rje theg pa mngon 'dod pa'i/ /rnal 'byor ldan pas shes par bya//brgyud pa'i rim pa kho na yis/ /drang don nges don sbyar bar bya/ /rengs pa la sogs thams cad kyi/ /sngags dang dkyil 'khor lha rnams dang / spyod brda de bzhin lta stangs dang / /sbyin sreg don dang dam tshig sogs/ /nges pa'i don gang gsal bar bya/ / de rnams drang don la rtogs sla'o/ /rgyud kyi thog ma bar dang mtha'/ /kun du 'di ni nges pa yin/ /dpal dri ma dang bral ba'i 'od du gsungs pa yang 'dir/ thams cad mkhyen pa ston pa po/ /la sogs pa sdud par byed pa rnams kyis rgyud kyi rgyal po ston par mdzad do/ /sgra bzang po smra ba de rnams kyi sgra bzang po'i 'dzin pa bshig pa'i ched du don la rton pa nyid la brten te/kha cig tu don la sgra nyams pa dang / kha cig tu ring po la thung ngu dang / kha cig tu thung ngu yang ring po dang / kha cig tu lnga pa'i don la bdun pa dang / bzhi pa'i don la drug pa dang / kha cig tu gcig gi tshig la mang po'i tshig dang mang po'i tshig la yang gcig gi tshig dang /'ga' zhig tu pho'i rtags can la ma ning gi rtags dang kha cig tu ma ning gi rtags can la pho'i rtags dang / 'ga' zhig tu spyi bo las byung ba/ so las byung ba rkan las byung ba dag dang / kha cig tu so las byung ba la rkan las byung ba dang spyi bo las byung ba dag ste/de bzhin du gzhan rnams kyang rjes su rtogs par bya'o/ /de'i phyir kun mkhyen lam don gnyer ba rnams la sgra dang sgra min rnam dpyad chen mo ni/ /sna tshogs yul skad ngan pa yis kyang chen po rnams kyi lam la rtag tu 'jug /sems can rnams kyi mos pa'i sems kyi dbang las thams cad mkhyen pa'i gsung mchog la//brda sprod pa la lha klus bkod pa sgra la rtsod pa don gnyer rnams kyi gzhan/ sgra nyams pa dang yul gyi skad las kyang / /rnal 'byor ldan pas don ni 'dzin byed de/ /chu la 'o ma nges par zhugs pa de/ /dang pas gyen du byung ste 'thung bar byed//don dam de kho na nyid yul la ni/ /rtag tu che rnams tshig la rton pa min/ /bcom ldan 'das kyis kyang bka' stsal pa/ yang rton pa bzhi rnams te/ 'di lta ste/ don la rton pa nyid yin gyi tshig 'bru la rton pa ma yin pa dang / ye shes la rton pa nyid yin gyi rnam par shes pa la rton pa nyid ma yin pa dang /nges pa'i don gyi mdo sde la rton pa nyid yin gyi drang ba'i don gyi mdo sde la rton pa nyid ma yin pa dang / chos la rton pa nyid yin gyi gang zag la rton pa nyid ma yin pa'o/ /bcom ldan 'das kyi gsung 'di'i phyir tshig 'bru'i rjes su 'brang ba nyid ma yin no//'dir sems can rnams kyi mos pa sna tshogs pa'i dbang las thams cad mkhyen pa du ma dang / /thams cad mkhyen pa'i skad du ma dang / bzhugs pa'i gnas du ma dang / gsol ba 'debs pa po du ma dang / chos ston pa du ma'o zhes pa ste/ de phyir de bzhin gshegs pas rgyud thams cad ston pa ni e waM mA ya shru ta zhes pa la sogs pas mgrin pa dang /rkan la sogs pa'i 'bad rtsol gyis skyes pa lha'i skad gcig pus ma yin no/ /'dir dang por re zhig nyan thos kyi tshul sde snod gsum la sogs pa la chos bstan pa ni ma ga d+ha'i skad kyis so/ /de ltar de bzhin gshegs pa yul du ma'i yul gyi skad kyis theg pa gsum ston par mdzad pa ste/e waM mA ya shru ta zhes bya ba la sogs par legs par sbyar ba'i skad gcig pus ni ma yin no/ /'dir gal te e waM mA ya shru ta zhes bya ba la sogs pa legs par sbyar ba'i tshig mgrin pa dang / rkan la sogs pa'i 'bad rtsol las skyes pa nyi tshe bas de bzhin gshegs pa chos ston pa yin no/de'i tshe chos kyi phung po brgyad khri bzhi stong dus du mar yang de bzhin gshegs pas ston par mi nus shing / /sdud pa pos bri bar yang mi nus te/ nyi tshe ba'i tshig yin pa nyid kyi phyir ro//'dir sprul pa'i sku mtha' yas pa med pa'i phyir na mtha' yas pa mtha' yas pa'i 'jig rten gyi khams rnams su sems can mtha' yas pa mtha' yas pa'i sgra rnams kyi cig car chos ston par mi 'gyur zhing / chos kyi phung po brgyad khri bzhi stong ston pa med pa'i phyir thams cad mkhyen pa ma yin par 'gyur na/de ltar yang ma yin no/ /'dir sangs rgyas tshad med pa dang chos tshad med pa dang / dge 'dun tshad med pa ste/ de'i phyir de bzhin gshegs pa'i gsung gi phyir ston pa po thams cad mkhyen pa gcig ma yin zhing / thams cad mkhyen pa'i skad gang sems can thams cad kyi skad cig rnams kyis don rtogs par byed pa gcig ma yin no//bzhugs pa'i gnas nges par bstan pa gcig ma yin no/ /de bzhin gshegs pa'i nyan thos kyi dge 'dun dang gsol ba 'debs pa po gcig ma yin no/ /dpal dang po'i sangs rgyas su bcom ldan 'das kyis gsungs pa de nyid la 'jug par bya ste/dud 'gro yi dags lha min rnams dang lto 'phye lha min 'phags pa bod la sogs rnams la/ /byung dang 'byung 'gyur da ltar byung ba rnam pa gsum dang rtag tu bden pa'i chos gsung zhing / /rang rang skad gzhan rnams kyis srid gsum ma tshad med pa lam la yang dag 'god byed pa//'di ni bde mnyam 'bras bu ster ba thams cad mkhyen pa'i gsung ste lha yi skad kyis min/ /slar yang de nyid du gsungs pa/ skye ba snga mar rang gi snying gis bskyed pa'i zhi dang chags sogs dngos po rnams kyis ni//bag chags stobs kyis 'khor lor gnas pa gcig ni du mar smon lam yon tan dbang gis mthong / /don gcig du ma'i skad ni rang rang dngos pos srog chags rnams kyi snying la rab tu 'jug /gnas can rnams kyi bsod nams slad du 'khor lo la gnas bsod snyoms rnam par rgyu ru gshegs//de skad du yang gsungs pa/ ji ltar chu 'dzin las ni bsil zhim dang zhing 'jam la yang ba'i chu byung ba/ /de ni sa gzhir rgyu dang gnas kyi dbye bas rnam pa mang po'i ro nyid 'gyur/ /de bzhin legs yangs thugs rje'i sprin gyi snying po las byung yan lag brgyad ldan lam//rgyud dang gnas kyi dbye bas skye dgu rnams la rnam pa mang po'i ro nyid 'gyur/ /de'i phyir sems can gyi don gyi ngor sangs rgyas dang byang chub sems dpa' rnams mngal du rab tu 'jug pa rnams dang / dmyal bar gshegs pa yang byis pa'i skye bo rnams kyis brtag par nus pa ma yin te/dpal a ra l+li'i rgyud chen por gsungs pa/ /de nas byang chub sems dpa' de rnams rkang gnyis kyi mchog nyid thob ste/ sangs rgyas kyi zlos gar ston par mdzad do zhes so/ /dpal mtshan yang dag par brjod par yang gsungs pa/ /de nas bcom ldan shAkya thub//rdzogs pa'i sangs rgyas rkang gnyis mchog /ces so/ /de'i phyir/ la lar rdzogs pa'i byang chub mdzad/ /la lar dka' ba spyod pa dang / lha las babs pa sprul pa dang / de bzhin khab nas nges 'byung dang / /chos kyi 'khor lo bskor ba ste/ /la lar rab tu 'byung bar mdzad//'dul ba ston mdzad de bzhin du/ /bsam gyis mi khyab mngon pa'i chos/ /la lar sngags kyi tshul 'chang mdzad/ /la lar pha rol phyin pa'i tshul/ /la lar bye brag smra ba'i lam/ /la lar mdo sde ston pa ste/ /la lar rnam shes smra ba yang / /la lar de bzhin dbu ma'o//la lar dmyal bar gshegs pa dang / /la lar sems can rjes srung ba/ /sems can gdul ba rgyur byas nas/ /snying rje'i bsam pas gar mdzad do/ /zhes pa'o/ /dpal mtshan yang dag par brjod par yang gsungs pa/ phyir mi ldog pa phyir mi 'ong //'dren pa rang rgyal bse ru'i tshul/ /nges 'byung sna tshogs nges 'byung ba/ /'byung ba chen po rgyu gcig po/ /dge slong dgra bcom zag pa zad/ /'dod chags bral bas dbang po thul/ /zhes pa la sogs pa'o/ /ji skad du bcom ldan 'das kyis rnam par snang mdzad mngon par byang chub pa'i rgyud chen por gsungs pa/ji ltar rgyal ba'i dbang po phyogs bcur gnas/ /de yi sku las rkang rus sha med kyang / /sems can phan ched ring bsrel rab 'jog cing / /sprul pa'i sku yis bya ba mdzad pa'o/ /zhes so/ / gsungs pa yang / sprul pa'i sku ste sku yi mchog /sangs rgyas sprul pa'i rgyud 'chang ba/ /phyogs bcur sprul pa sna tshogs 'gyed/ /ji bzhin 'gro ba'i don byed pa/ /zhes so/ /dpal dang po'i sangs rgyas su gsungs pa yang / /mi mnyam 'di rnams dgrol ba'i slad du sras bcas rgyal ba'i bdag po las kyi sar ni rab zhugs te//mngal ni rab tu gzung ba mdzad cing mchog gi thugs rjes byang chub bskyed pa mdzad nas ni/ /nyon mongs dang ni bdud rnams bcom nas sa steng gnas su chos kyi 'khor lo rab bskor te/ /sprul pa sgyu ma mdzad nas slar yang bcom ldan 'das ni bdag po'i sku can de kho na'o//zhes so/ /dpal shes rab kyi pha rol tu phyin pa 'dzin pa'i yon tan gyi le'ur yang bka' stsal pa/ sangs rgyas bcom ldan 'das rnams ni chos kyi sku can te/ dge slong rnams 'di ni 'jig tshogs kyi skur ma sems cig/ / dge slong rnams ngal ni chos kyi sku yongs su rdzogs par ltos shig /de bzhin gshegs pa'i sku 'di ni yang dag pa'i mthas rab tu phye bar blta bar bya'o zhes pa'o/ /de'i phyir rgyal ba'i dag pa'i sku ni skyes shing ma nyams srid pa gsum po la yang gnas/ /bcom ldan de yis thams cad dus su sems can don ni mi 'dor las kyis bcings ma yin//de ltar 'jig rten dbang phyug bdag ni srid gsum gnas su las kyi sar gnas nyi ma kye/ /sems can rnams la lam ni sbyin byed dmyal ba'i 'jigs 'phrog lha gzhan nam yang ma yin no/ /zhes so/ / gsungs pa yang / mchog ldan mchog sbyin gtso bo ste/ /skyabs kyi dam pa skyabs su 'os/ /'jig rten dgra ste rab kyi mchog /'jigs pa ma lus sel ba po/ /zhes so/ /de'i phyir byang chub sems dpa' gcig kyang pha rol tu phyin pa bcus nges par byung ba sa bcu'i dbang phyug dbang bcu thob pa stong gsum gyi stong chen po'i 'jig rten gyi khams su sprul pa'i sku du ma rnams kyis byang chub sems dpas gdul bar bya ba'i sems can rnams la chos ston par mdzad de/byang chub sems dpa' de du ma ni ma yin no/ /de ltar sangs rgyas bcom ldan 'das ni sngon gyi smon lam gyi stobs kyis bsod nams dang ye shes kyi tshogs yongs su rdzogs pa'o//gsungs pa yang / bsod nams ldan pa bsod nams tshogs/ /ye shes ye shes 'byung gnas che/ /ye shes ldan pa yod med shes/ /tshogs gnyis tshogs ni bsags pa po//zhes so/ /mi 'jigs pa la sogs pa thams cad kyi dbang phyug gi yon tan phun sum tshogs pa can stong gsum gyi stong chen po'i 'jig rten gyi khams kyi sangs rgyas kyi zhing rnams su mtha' yas pa mtha' yas pa'i sprul pa'i sku'i sgyu ma sgrib pa med pa rnams kyis mtha' yas pa mtha' yas pa'i sems can rnams la//mtha' yas pa mtha' yas pa'i skad rnams kyis gsol ba 'debs pa po sna tshogs kyis gsol ba btab pas/ thams cad mkhyen pa'i skad sems can thams cad kyi sgra la rab tu zhugs pas 'jig rten pa dang 'jig rten las 'das pa'i chos rab tu ston par mdzad do//shes rab kyi pha rol tu phyin pa lha'i le'ur gsungs pa yang / rab 'byor 'dir byang chub sems dpa' sems dpa' chen po bla na med pa yang dag par rdzogs pa'i byang chub tu mngon par rdzogs par sangs rgyas par gyur pas/ 'jig rten rang bzhin gyis skye ba med cing 'gag pa med pa'i ched du chos ston to//de bzhin du tshor ba dang 'du shes dang / 'du byed rnams dang / rnam par shes pa rang bzhin gyis skye ba med pa dang 'gag pa med pa'i ched du chos ston to/ /de bzhin du chos thams cad kyang rang bzhin gyis skye ba med cing 'gag pa med pa'i ched du chos ston to zhes so//gsungs pa yang / yid bzhin nor bu chen po 'chang / /khyab bdag rin chen kun gyi mchog /dpag bsam shing chen rgyas pa ste/ /bum pa bzang po che ba'i mchog /byed pa sems can kun don byed/ /'phan 'dod sems can mnyes gshin pa//zhes so/ /dpal he ru ka mngon par 'byung ba'i rgyud du yang gsungs pa/ e ma byang chub sems khyod ni/ /gdul byar bsam pa mnyes gshin pa/ /thugs rje'i lcags kyus drangs nas ni/ /rnam pa du mas tha dad do/ /zhes so/ / de bzhin du bzang po spyod pa'i smon lam du yang gsungs pa/ lha yi skad dang glu dang gnod sbyin skad/ /grul bum rnams dang mi yi skad rnams te/ /'gro ba kun gyi skad rnams ji tsam par/ /thams cad skad du bdag gis chos bstan to/ /zhes so/ /de ltar thams cad mkhyen pa gcig yin la/sangs rgyas bcom ldan 'das kyis chos bstan pa ni gcig kho na ste/ dpal thabs la mkhas pa'i mdo sder gsungs pa/ /theg pa gcig dang tshul yang gcig pu ste/ /'dren pa rnams kyi bstan pa 'di gcig pu/ /bdag gis thabs la mkhas pa'i rang bzhin gyis//theg pa gsum po rnams ni nye bar bstan/ /zhes so/ /dpal mtshan yang dag par brjod par yang gsungs pa/ /theg pa sna tshogs thabs tshul gyis/ /'gro ba'i don la rtog pa po/ /theg pa gsum gyis nges 'byung la/ /theg pa gcig gis 'bras bur gnas/ zhes so/ /zhes pa la sogs pa don la rton pa nyid sgrub pa'o/ /da ni rgyud sna tshogs su gsungs pa'i phyag rgya bzhi'i man ngag gi rim pas dbang bskur bzhi pa rtogs par byas nas rgyud ston par byed par bya'o/ /las dang ye shes phyag rgya che/ /dam tshig zhes bya 'od gsal rnams//rgyu dang bsgom bya de bzhin du/ /thob bya bzhi pa 'jig pa med/ /mdor bstan pa'i tshig 'di'i rgyas par bshad par bya ste/ rgyu zhes pa ni dang por re zhig las kyi phyag rgya las byung ba gang / lhan cig skyes pa 'pho ba med pa'i bde bar bcom ldan 'das kyis gsungs so/ / de ni bden pa kho na ste 'on kyang kun rdzob tu 'jig rten pa'i dpe yis me long lta bu yin gyi don dam par ni ma yin no/ /de'i phyir dbang po rnon pos las kyi phyag rgya gzung bar bya ba ma yin no/ /bsgom bya zhes bya ba ye shes kyi phyag rgya ste phung po dang khams dang skye mched la sogs pa lha'i rnam pas sbyangs nas dkyil 'khor gyi 'khor lo cho ga ji lta bar gsal bar byas te/bsrub cing srub pa'i sbyor bas ye shes kyi me sbar la/ ji srid du haM yig bsregs pa 'dzag pa ni/ ri bong can dpral ba nas mgrin padang snying ga dang lte ba dang rdo rje dang pad+ma'i lte ba dang rdo rje dang pad+ma'i lte bar 'ongs pa'i byang chub kyi sems kyi ngo bos yul dang dbang po mtha' dag bde ba chen por ro mnyam pa'i go 'phang la gang gcig tu 'dres par gyur te/de'i rang bzhin gyi ting nge 'dzin la snyoms par zhugs par gyur nas ji srid du dpal phyag rgya chen po mngon du phyogs par gyur pa'i bar du gnas par bya'o/ / thob bya zhes bya ba phyag rgya chen po ste/ rmi lam dang mig 'phrul dang yid kyi rang bzhin dang 'dra ba ste/ de la 'khyud nas dam tshig gi phyag rgya ji srid par mngon du bya'o/ /'jig pa med pa ni mchog tu mi 'gyur ba'i ngo bo can no/ /de ltar lus dang ngag dang sems dang ye shes rnam par dag pas phyag rgya bzhi'i ngo bo ji lta ba'o//dpal dang po'i sangs rgyas la 'jug par bya ste/ pad+mar rdo rje zhugs dang rtse mo can la rlung dang thig le mi lhung gsum pa'o/ /'di rnams rnal 'byor gsum gyi rab gsal nges par lus dang ngag dang sems kyi phyag rgya'o/ /chags dang chags med dang po'i mthar son dang po mchog bde'i gter ni rnal 'byor bgrod bya bzhi pa ste//phyag rgya rnams kyi lags pa'i ma rgyud de 'gyur rnam bcu dpal ldan bla ma'i zhal 'di'o/ /zhes so/ /de bzhin du yang gsungs pa/ /'gyur dang 'gyur med de nas g.yo/ /mi g.yo dri ma med pa gzhan/ / zhes pa de bzhin gshegs pa'i nges pa'o/ /dpal rnam par snang mdzad mngon par byang chub pa'i rgyud du yang gsungs pa/ de nyid la 'jug par bya ste/ las kyi phyag rgya yongs bsgrubs nas/ /chos kyi phyag rgya rnam bsgom bya/ /de las steng du phyag rgya che/ /de las dam tshig yang dag 'byung //zhes so/ /de skad du dpal mchog gi dang po'i sangs rgyas su yang gsungs pa/ las kyi phyag rgya'i snyoms 'jug dang / /ye shes phyag rgya'i dmigs pa dang / /phyag rgya chen po gcig sbyor bas/ /mi 'gyur ba de 'phel bar 'gyur/ /zhes so/ /de bzhin du dpal don dam pa'i bsnyen par yang gsungs pa/thar pa'i dpal mo ma nyams bde ba de/ /dor nas dge med gzhon nu mar rtse ba/ /phal cher sngon bsags drags pa'i las gang gis/ /bdud rtsi dor nas dug ni 'thung bar byed/ /ces so/ /dpal dang po'i sangs rgyas su yang gsungs pa/snying ni rnyog bcas las kyi phyag rgya 'di dang brtags pa'i ye shes phyag rgya btang byas te/ /yang dag rdzogs pa'i byang chub slad du rgyal ba mchog bskyed mchog gi phyag rgya gos pa med/ /rnam par 'gyur ba med pa mkha' mnyam mun bcom khyab byed rnal 'byor bgrong bya ther zug gnas//ye shes gzi brjid srid pa'i dri ma 'phrog cing dus kyi 'khor los rje rigs bsgom par bya/ /de bzhin du yang gsungs pa/ gang zhig shes rab kyi ni nu ma la reg gzhan dag bdud rtsi myang dang 'khyud pa gang yin dang / /shes rab dang 'grogs byang chub sems ni zhu ba dag la bzhi pa'i skad cig bdud rtsi rtogs pa gang //de rnams thams cad nges par 'jig rten pa ste mchog gi snying rje yis ni lam gyi rgyu ru bstan/ /'jig rten 'das pa'i dbang gang mchog gi rgyal ba'i bdag po'i phyag rgya mchog la rjes su sbyor ba'o/ /zhes so/ /slar yang de nyid du gsungs pa/sems kyi snang ba tsam ste rang gi yid la skyes pa me long gi ni gzugs brnyan lta bu nyid/ /mtha' dag rgyal ba'i sras dang sangs rgyas sras kyis bsten gang rnal 'byor dbang pos bsten bya ste/ /ye shes me lce rab rgyas de ni bdud tshogs yul dang bcas pa mtha' dag sreg byed cing //lus la chags sogs kyang ste rnal 'byor rnams la lo yi sbyor bas bde mnyam ster bar byed ces so/ /ci ltar zhe na/ gsungs pa/ 'gyur med bde ba'i 'bras ster phyag rgya bzhi po 'di rnams grong dang 'brog dgon dur khrod dang / mi gtsang ba dang gtsang ba'i gnas dang khyim dang lha yi khang pa kun du dus kun du//rab dga'i dga' ba la gnas 'jig rten lam las rab gol rigs dang rigs min mngon spyod cing / /lus stobs bde ster bza' dang btung sogs longs spyod dang ldan rnal 'byor pa yis bsgom par bya/ /zhes so/ /de bzhin du 'di nyid du yang gsungs pa//bza' dang btung dang de bzhin khrus/ /sad dang nyal yang bsam par bya/ /phyag rgya chen po mngon 'dod pas/ /de nas rtag pa nyid du 'gro/ /zhes pa dang / chu bo'i rgyun ni rab 'bab dang / /mar me'i 'od kyi rgyun bzhin du/ /rtag tu goms pa'i rnal 'byor gyis/ /nyin dang mtshan mor gnas par bya//zhes so/ /gsungs pa yang / ji ltar shing gi snying por me/ /gnas pa ma gtsubs 'byung mi 'gyur/ /de ltar goms med byang chub ni/ /skye ba 'di la skye ba min/ /zhes pa la sogs pa'o/ /dpal mtshan yang dag par brjod par gsungs pa yang / /chos kyi sbyin bdag gtso bo ste//phyag rgya bzhi po'i don ston pa/ /'gro ba'i bsnyen bkur gnas kyi mchog /nges 'byung gsum po bgrod rnams kyi/ /zhes so/ /da ni dang por re zhig rdo rje sems dpa'i sku dang gsung dang thugs kyi ngo bo nges pa'i don gyi rim pas gsal bar bya ste/ /dpal dri ma dang bral ba'i 'od du gsungs pa yang /e yig nam mkha'i khams dbus su/ /sangs rgyas kun gyi bde ba'i gzhir/ /waM gyi rdo rje sems dpa' 'di/ /sku gsung thugs kyi sbyor ba las/ /thig le zla ba khu ba sku/ /rnam par bcad pa rdul nyi gsung / /a yig mun can thugs rab brjod/ / mkha' khams e la rnam par gnas/ /sku gsung thugs kyi rnal 'byor gyis/ /sku gsung thugs kyi dkyil 'khor du/ /sku gsung thugs kyi chags pa yis/ /srid gsum bdag nyid la gnas pa'o/ /zhes so/ /de bzhin du gsungs pa/ mkha' dbyings rdo rje'i dbus gnas par/ / rdo rje'i dkyil 'khor bsgom pa ste/ /lus ngag sems kyi nga rgyal ni/ /bsams nas bskal bar de gnas so/ /zhes so/ /dpal mtshan yang dag par brjod par yang gsungs pa/ rigs gsum 'chang ba gsang sngags mkhan/ /dam tshig chen po gsang sngags 'chang / /gtso bo dkon mchog gsum 'dzin pa//theg pa mchog gsum ston pa po/ /zhes so/ /de ltar brda rnam pa sna tshogs rnams kyis gnas par byas nas/ /de rnams su cher gsal te/ /yid la mi byed pa'i rnal 'byor gyis rtag tu dngos grub thob par 'gyur ro/ /zhes pa'i rgyu 'di'i lha rnams yongs su smin pa'i ched dang /yang dag par rdzogs pa'i sangs rgyas nyid thob pa'i ched du dpal 'dus pa la sogs pa dang / kye'i rdo rje'i rgyud kyi rgyal por yang / 'di skad bdag gis thos pa zhes pa la sogs pas bzhugs pa'i gnas nges par bstan pa bcom ldan 'das kyis gsungs so//dngos po gang zhig dpal 'dus pa la sogs par ming 'dis gsungs pa'i dngos po de nyid mngon par brjod pa 'bum pa la sogs pa'i rgyud kyi rgyal por gsang ba zhes pa la sogs pa de bzhin gshegs pas gsungs so/ /de yang bla ma dam pa'i man ngag las rgyud ni rgyud gzhan gyis dang dgongs pa'i skad gzhan gyis rtogs par bya'o//gsungs pa yang / dang po'i gsang chen ni e waM du gyur pa sngon sgom pa'i rig pa'o/ /mtha' ste tha ma'i dgyes pa ni shru taM brten par bshad pa'o/ /dbus su mA ya ni mchog ste shin tu khyad du 'phags pa'o/ / dus gcig na ni bcom ldan 'das thams cad kyi bdag nyid la rtag tu bzhugs pa'o zhes pa'o/ /dgos pa ci zhig gis na sdud par mdzad pas de bzhin gshegs pa thams cad kyi gsung rab rnams la/ e waM mA ya zhes pas nges par bstan/ i dam ma yA dang / e tad mA ya zhes pa 'di lta bu la sogs par yang smra bar nus pa kho na'o zhe na/'di la brjod par bya ste/ de bzhin gshegs pa thams cad kyi brda shes rab dang thabs gsal bar byed pa/ e waM zhes pa 'di gsung rab kyi dang por nges par brjod par bya'o/ /smras pa/ gal te de lta na sdud par byed pas 'dir bdag gis zhes pa la sogs pa'i tshig rnams 'byung bar mi 'gyur te/'brel ba med pa'i phyir ro zhe na/ 'di ni bden mod 'dir sdud par byed pa po ni yod pa ma yin no/ /smras pa/ ci'i don du btsun pa kun dga' bo la sogs pa sdud par byed pa rnams 'jig rten du yang dag par bstan zhe na/smras pa/ 'dir kun dga' bo ni byang chub sems dpa' chen po kun du bzang po ste/ phyag na rdo rje yin la gzhan ma yin gyi rdo rje 'chang chen po kho na'o/ /gzhan du na mdo sde la sogs pa'i chos kyi phung po brgyad khri bzhi stong dang / rdo rje theg pa yang de bzhin gshegs pa'i drung nas chad pa dang lhag pa med par lan cig thos nas 'dzin par ga la nus/'di ni bcom ldan 'das kyis thun mong ma yin pa'i gsang ba zhes bya ba'i rnal 'byor chen po'i rgyud du gsungs pa/ de nas gzhan yang thams cad mkhyen pa'i 'khor phun sum tshogs pa bshad par bya'o/ /'di lta ste/ rgyal po chen po zas gtsang ma ni 'jam dpal du 'gyur ro//lha mo chen mo sgyu ma ni 'jig rten dbang phyug tu 'gyur ro/ /lha mo dpal ni grags 'dzin mar ro/ /sgra gcan 'dzin ni rdo rje sems dpa'o/ /shA ri'i bu ni sgrib pa thams cad rnam par sel ba'o/ /gnas brtan 'phags pa kun dga' bo ni kun tu bzang po'o//gnas brtan lhas byin ni lha'i dbang po'o/ /yang dag par rdzogs pa'i sangs rgyas dpal shAkya thub pa ni rnam par snang mdzad chen por 'gyur ro zhes so/ /de bzhin du dpal A ra l+li chen po'i rgyud du yang gsungs pa/ rgyal po chen po zas gtsang ni/ /A ra l+li ru yang dag gsal//sgyu ma chen mo ri gi der/ /'gro ba shes rab thabs bdag nyid/ /rdo rje sems dpa' don kun grub/ /mchog tu dga' ba bde ba che/ /lha mo sa 'tsho phyag rgya che/ /sgra gcan 'dzin bzang bde ba che/ /sa 'tsho ma ni sgyu 'phrul che/ /sgyu ma'i rang bzhin spros pa las/ /lhan cig skyes dga' dga' rab bshad//rdo rje sgyu ma'i rnam 'phrul gyis/ /slar yang bcom ldan rdo rje can/ /skyed pa por ni rab tu grags/ /sgyu ma chen mo skyed mor 'gyur/ /de nyid phyag rgyar rab tu grags/ /zhes so/ /rigs pa 'di'i sdud par byed pa po ni 'khor ro zhes pa'o// // dpal dang po sangs rgyas su gsungs pa yang / lha min bla ma mtho ris 'jig rten du nga dbang po sa steng du ni 'khor los sgyur/ /sa 'og klu yi rgyal po gdengs can rigs kyis btud dang kun 'gro mchog nga ye shes dang / sangs rgyas thub dbang 'gyur med mchog dang khyab bdag rnal 'byor rnams kyi rdo rje rnal 'byor dang /rig byed oM gyi yi ge gtsang ma'i rgyal po dngos po kun gyis bdag la skyabs su song / /zhes so/ /las dang po pa'i sems can rnams gzhug pa'i ched du 'di ni sangs rgyas kyi zlos gar rab tu bstan pa'o/ /'di la gsungs pa/ sangs rgyas mya ngan mi 'da' zhing //chos kyang nub par mi 'gyur te/ /sems can rnams ni gdul don du/ /mya ngan 'das pa nye bar bstan/ /zhes so/ /smras pa/ e waM zhes pa'i yi ge gnyis po shes rab dang thabs kyi bdag nyid yin pa lags mod/ /'di yang ji ltar shes par bya zhe na/bcom ldan 'das kyis lha'i dbang pos yongs su zhus par gsungs pa/ brgya byin gyis gsol ba/ e waM zhes 'di ci don du/ /ci phyir dang po rab tu sbyar/ /'di ci bde gshegs gsungs yin nam/ /nyan thos kyis bshad yin nam ci/ /bdag gi the tshom 'di rnams kun//srid mthar mdzad pas bsal du gsol/ /dam chos yon tan smras pa yis/ /lha yi dbang po'i tshig gsan nas/ /de las legs so zhes byin te/ /bcom ldan 'das kyis 'di skad gsungs/ /gang don thams cad gzigs pa yis/ /dang por e waM zhes gsungs pa//de ni go rims ji bzhin khyod/ /lha yi bdag po mnyan par gyis/ /chos kyi phung po brgyad khri dang / /bzhi stong gi ni grangs rnams kyi/ /kun gyi gzhi dang pha ma ni/ /yi ge gnyis su bdag gis bshad/ /e yi yi ge ma ru 'gyur/ /wa yig kyang ni pha ru bshad/ / thig le der ni sbyor bar 'gyur/ /sbyor te mchog tu rmad byung ba'o/ /e yig pad+ma zhes bshad de/ /waM yig rdo rje kho na yang / /thig le der ni sa bon 'gyur/ /de las 'gro ba gsum po skyes/ /e yi yi ge shes rab 'gyur/ /waM yig rab dga'i bdag po'o/ /thig le gzhom med de nyid de//de las skyes pa yi ge rnams/ /chos kyi phyag rgya yi ge gnyis/ /de nyid shes pa gang gis shes/ /de ni sems can thams cad la/ /chos kyi 'khor lo bskor byed 'gyur/ /skye bo gang gis yi ge gnyis/ /mi shes rtag tu 'don byed pa/ /de ni sangs rgyas chos rnams las//phyi rol longs spyod spangs sgra bzhin/ /e waM yig gnyis sgyu ma ste/ /'dir ni thams cad mkhyen pa bzhugs/ /de phyir dam chos bstan bcos kyi/ /thog mar de ni rab tu bshad/ /de phyir brgya byin lha bdag po/ /gal te rtag pa'i gnas 'dod na/ /yig gnyis sgyu ma dran bya zhing //dam pa'i chos la bla mar byos/ /zhes gsungs pa yang / dam chos chos rgyal gsal bar ldan/ /'jig rten snang bar byed pa'i mchog /ces so/ /'di skad bdag gis zhes pa la sogs pa'i rdo rje'i tshig rnams kyi don yang bshad pa'i rgyud la 'jug par bya ste/e waM rdo rje chu skyes dang / /nor bu'i nang gnas thig le 'dzin/ /de nyid tha dad med bdag nyid/ /ma mA zhes pas rab gsal byas/ /'di skad bdag gis thos zhes brjod/ /'khor los sgyur ba'i gzugs can gyis/ /rdo rje sems dpa' bde ba che/ /de ni ston byed bde ba nga //thos pa zhes pa bdag gis ni/ /bdag nyid kho nas bdag nyid kyis/ /zhes so/ /gsungs pa'ang / nga las 'gro ba thams cad byung / /nga las sa gsum po yang byung / /nga yis 'di kun khyab pa ste/ /'gro ba rang bzhin gzhan ma mthong / /zhes so/ /slar yang 'di nyid du gsungs pa//'chang ba po nga chos kyang nga / /rang gi tshogs ldan nyan pa nga / /'gro ba'i ston pa bsgrub bya nga / /'jig rten pa nga 'jig rten dang / /lhan cig skyes dga'i rang bzhin nga / /mchog mtha' dga' bral dang po can/ /dngos dang dngos po med pa nga / /dngos po rtog phyir sangs rgyas nga //gang zhig le los bsnun pa dang / /rmongs pa gang gis nga mi shes/ /rdo rje btsun mo'i b+ha ga ni/ /bde ba can du nga gnas so/ /zhes so/ /dpal thams cad mkhyen pa rdo rje 'jigs byed kyi rgyud du yang gsungs pa/ spro dang sdud pa'i gnas la ni/ /gsang chen dam pa rmad byung bar//shes rab bdud rtsi'i mtsho gnas su/ /bcom ldan 'das ni skye med bzhugs/ /stong pa ma yin mi stong min/ /rnam par mi rtog gzhi med pa/ /spros pa med cing snang ba med/ /rdo rje sems dpa' bde ba che/ /zhes so/ /dpal dang po'i sangs rgyas su yang gsungs pa//phung po lnga'i rang bzhin rnams kyis rdo rje btsun mo'i b+ha ga rnams la thugs rjes bzhugs/ /nges pa rnam par ma bsgrubs bsod nams min pa bsags pa'i sems can rnams smin don du ste/ /gtsang ma'i gnas la sogs par bcom ldan gang zhig rnam par bzhugs pa nyan thos rnams slad du'o//gang zhig e waM yi ge la gnas mchog gi nges pa can rnams mchog la dgod don du'o/ /zhes so/ /dus gcig na zhes pa la sogs pa 'di'i don ni skad cig gcig gis mngon par rdzogs par byang chub pa na'o/ / gsungs pa yang / mkhas pa chen pos skad cig la/ /chos kun khong du chud par 'chang / /zhes so/ /rgyud gzhan du yang gsungs pa/ /sa bon gzugs kyis yang dag 'dres/ /lha yi 'khor lo dam pa ste/ /mchog tu dga' ba'i dus 'di ni/ /dus gcig na zhes brjod par bya//zhes so/ /bcom ldan 'das zhes pa 'di'i don 'di yin te/ dbang phyug brgyad kyis bcom ldan 'das/ /bde ba chen po'i go 'phang gnas/ /dpal rdo rje rtse mor yang gsungs pa/ nyon mongs las dang de bzhin skye/ /nyon mongs shes bya'i sgrib de bzhin/ /mi mthun phyogs kyis chos gang bcom//de ni bcom ldan 'das zhes bshad/ /ces so/ /de bzhin gshegs pa thams cad ces pa 'di'i don ni 'di yin te/ rgyal ba phung po lnga rnams 'dir/ /de bzhin gshegs pa thams cad bshad/ /ces bya'o/ /dpal shes rab kyi pha rol tu phyin pa dmyal ba'i le'ur yang gsungs pa/phung po dang khams dang skye mched rnams las gzhan par shes rab kyi pha rol tu phyin pa rtogs par mi bya'o/ /de ci'i phyir zhe na/ rab 'byor phung po dang khams dang skye mched nyid ni stong pa dben pa zhi ba yin pa'i phyir na/ shes rab kyi pha rol tu phyin pa dang phung po dang khams dang skye mched ni gnyis su med gnyis su byar med de/stong pa nyid dang / dben pa nyid kyi phyir dmigs su med do/ /gang chos thams cad kyi dmigs su med pa de ni shes rab kyi pha rol tu phyin pa zhes brjod par bya'o/ /zhes so/ /sku dang gsung dang thugs kyi rdo rje zhes pa 'di'i nges pa'i don ni rgyud gzhan du gsungs te/bdag nyid kyi ni sku gsung thugs/ /snying 'di rdo rje bde ba che/ /rdo rje rdo rje zhes gsungs pa/ /cis 'di rdo rjer brjod ce na/ /sra zhing snying po khong stong med/ /gcad med dbyer med mtshan nyid can/ /mi 'tshig 'jig pa ma yin pa//stong nyid rdo rjer brjod par bya/ /'gro drug 'khor lo nyes byas kyang / /rdo rje yis ni 'joms par byed/ /byang chub sems gang de rdo rje/ /nyon mongs thams cad 'joms par byed/ /ces so/ /btsun mo zhes bya 'di'i don ni 'di yin te/ btsun mo lags sbyangs phyag rgya ste//b+ha ga legs sbyar pad+ma'o/ /zhes pa'o/ /dgongs pa lung ston pa'i rgyud du gsungs pa yang / /sangs rgyas kun gyis gang bsten pa/ /bcu gsum pa yi sar gyur gang / /der ni btsun mo yang dag bshad/ /dam chos b+ha ga zhes par yang / /de la ci phyir b+ha ga zhes bya zhe na/ 'di'i don ni 'di yin te/gnas gang zhig tu de bzhin gshegs pa thams cad dang / sangs rgyas dang byang chub sems dpa' rnams shes rab kyi pha rol tu phyin pa'i ye shes dang / ting nge 'dzin la snyoms par zhugs par gyur pa bzhugs pa de kho na ni/ dam tshig sems dpa' nyid yin pa'i phyir/ bcom ldan 'das kyis b+ha ga zhes gsungs te/'dod pa'i 'dod chags gcod byed cing / /nyon mongs rnams bcom gzhan mi thub/ /de phyir de ni b+ha gar brjod/ /mchog tu gyur pa'i gnas pa'i ched du yin pas na bzhugs so zhes pa'i don to/ /tshig 'di brtan par byed pa'i don du gsungs pa//dpal rdo rje gsang ba'i rgyud du bka' stsal te/ de nas nyams dga' ba yi gnas/ /nam mkha' kun la rab gnas pa/ /rdo rje rin chen 'od kyis gsal/ /dri med gzi brjid kyis brgyan pa/ /dra ba me long me tog ldan/ /me tog phreng ba rgyan ldan pa/ /bde ba chen po rdo rje che/ / rdo rje kun gyi 'dus byas pa/ /rdo rje sems dpa'i gnas chen po/ /sangs rgyas kun gyis rjes bsten pa/ /byang chub sems dpa'i gnas kyi mchog /rdo rje 'dzin pa kun gyi gzhi/ /bde ba chen po rdo rje che'i/ /nor bu rin chen mchog ces bya/ /rdo rje chen po'i gzhal yas na/ /rdo rje 'dzin pa thig le yi//gzugs kyis bzhugs shing gnas pa'o/ /zhes so/ /de kho na ni de bzhin gshegs pa thams cad kyi sku dang gsung dang thugs gcig pa'i sku can mchog tu mi 'gyur ba'i bde ba chen po'i ngo bo sna tshogs gzugs 'dzin pa gzhom du med pa'o zhes pa'o/ /dpal mtshan yang dag par brjod par gsungs pa//sna tshogs gzugs can skyed pa po/ /mchod bya brjed bya drang srong che/ /rigs gsum 'chang ba gsang sngags mkhan/ /dam tshig chen po gsang sngags 'dzin/ /yang de nyid du bka' stsal pa/ 'jig rten dbang phyug kun gyi bdag /rdo rje 'dzin pa kun gyi rje/ /sangs rgyas kun gyi thugs che ba/ /sangs rgyas kun gyi thugs la gnas/ /sangs rgyas kun gyi sku che ba/ /sangs rgyas kun gyi gsung yin no/ /zhes pa la sogs pa rgya cher ro/ /de bzhin du dpal dang po'i sangs rgyas su yang bka' stsal pa/rgyud rnams su gang 'di skad bdag gis thos zhes gsungs te 'di ltar bdag gis zhes pa ste/ rdo rje can ni za ba zhu las gang zhig spyi mgrin snying ga'i chu skyes lte gsang ba/ /rdo rje bud med rnams kyi b+ha gar thig le grol ba gsum gyis mchog gi pad+mar gnas/ /de 'dir sangs rgyas zhing du rab zhugs bcom ldan 'das su rnal 'byor pa yis rig par bya//zhes so/ /'di nyid du yang gsungs pa/ /ston pa sum cu gnyis mtshan can/ /gtso bo dpe byad brgyad cur ldan/ /btsun mo'i b+ha ga bde chen du/ /khu ba'i ming gis rnam par gnas/ /zhes so/ / mtha' yas rtogs las nges grol ba/ /zla ba shar kha ltar dang ba/ /de las rang nyid che nyid kyis/ /sems can kun la rjes brtse bas/ /sprul pa pa yi skur mdzad de/ /sum cu rtsa gnyis mtshan mchog can/ /gang gi srid pa'i rtse mo nas/ /mnar med bar gyi khams gsum khyab//ces pa'o/ /mtshan yang dag par brjod par yang gsungs pa/ /sum cu rtsa gnyis mtshan 'chang ba/ /sdug gu 'jig rten gsum na mdzes/ /'jig rten shes legs slob dpon te/ /'jig rten slob dpon 'jigs pa med/ /mgon skyob 'jig rten yid gcugs pa/ / skyabs dang skyob pa bla na med/ /ces so/ /dpal thams cad mkhyen pa 'jigs byed kyi rgyud du yang gsungs pa/ /de nas shin tu chen po des/ /sems can kun la rjes brtse bas/ /sprul pa pa yi skur mdzad de/ /sum cu rtsa gnyis mtshan 'chang ba/ /de med bde ba nyid mi 'gyur/ / bde ba spangs nas de ma yin/ /khu ba'i rnam pa bcom ldan 'gyur/ /de yi bde ba 'dod mar bshad/ /de ni rang sangs rgyas rnams dang / /nyan thos rnams kyi spyod yul min/ /sangs rgyas sras kyi spyod yul lo/ /rdo rje pad+ma las byung ba'o/ /zhes pa la sogs pa nges pa'i don to/ /dpal nam mkha' dang mnyam pa'i rgyud du yang gsungs pa//'gro ba 'di kun sangs rgyas mnga' bdag nyid/ /sna tshogs zlos gar yid 'ong blta bar gyis/ /mchog tu bde ba chen po gcig pu de/ /gcig dang du ma'i nyams kyis gar mdzad do/ /zhes pa la sogs pa'o/ /de'i phyir na/ gcig dang gcig min rnam bral 'di//skad cig las gcig mchog dga'o/ /rang gi rig bya'i ye shes 'di/ /ngag gi lam 'das spyod yul lo/ /'di ni byin rlabs rim pa ste/ /kun mkhyen ye shes de rang bzhin/ /sa dang chu dang me dang ni/ /rlung dang nam mkha' nyid thams cad/ /rang bzhin rig pa'i tshor ba ni//skad cig las ni gnod mi 'gyur/ /mtho ris sa steng sa 'og rnams/ /skad cig las ni sku gcig 'gyur/ /rang bzhin cha yi rnam rtog gis/ /gnod par nus pa nyid ma yin/ /zhes so/ /mtshan yang dag par brjod par yang gsungs pa/ /thub pa med pa dpe med pa//mi mngon mi snang gsal byed min/ /cha med kun 'gro khyab pa po/ /phra zhing zag med sa bon no/ /rdul med rdul bral dri ma med/ /nyes pa spangs pa skyon med pa/ /shin tu sad pa sad pa'i bdag /kun mkhyen kun rig dam pa po/ /rnam par shes pa'i chos nyid 'das/ / ye shes gnyis med tshul 'chang ba/ /zhes so/ /de ltar sgrib pa thams cad las rnam par grol ba sku bzhi'i bdag nyid can bcom ldan 'das kye'i rdo rjes bcu gnyis kyi dbang phyug ni chos ston pa po'o/ /da ni rdo rje snying pos gsol ba btab pa'i de ma thag tu bcom ldan 'das kyis bka' stsal pa//e ma'o rdo rje snying po snying rje chen po legs so legs so/ /zhes pa la sogs pa ste/ rdo rje snying po ci zhig tu brjod par bya zhe na/ /rdo rje'i sgra yis shes rab yin la/ de'i pad+ma snying po ste/ byang chub sems kyi ngo bos gnas pa nyid kyi phyir na/ rdo rje snying po zhes brjod par bya'o/ /rdo rje snying pos gsol pa/ci yis rdo rje sems dpa' lags/ /ci ltar byang chub sems dpar 'gyur/ /ci phyir sems dpa' chen po lags/ /ci ltar dam tshig sems dpa' gtso/ /zhes pa'o/ /'di'i don ni 'di yin te/ /dpal mchog gi dang po'i sangs rgyas stong phrag bcu gnyis par gsungs pa//rang 'byung rdo rje sems dpa' 'di/ /don chen mchog tu mi 'gyur ba/ /'dod chags chen po sems dpa' che/ /sems can thams cad dga' bar byed/ /byang chub sems dpa' zhe sdang che/ /nyon mongs sgra chen zad pa po/ /dam tshig sems dpa' gti mug che//gti mug blo yis gti mug sel/ /dam tshig zla ba bdud rtsi yi/ /khu ba 'pho med de za ba/ /dam tshig sems dpa'o tshul 'di yis/ /gti mug blo can gti mug sel/ /zhes so/ /de bzhin du dpal dri ma med pa'i 'od du yang gsungs pa/ shes rab thabs kyi bdag nyid sbyor//dbyibs sku rdzu 'phrul bgrod pa can/ /rdo rje sems dpa' sems dpa' che/ /byang chub sems dpa' dam tshig sems/ /de bzhin gshegs pas gsungs pa ste/ /dngos dang dngos med zad khyab bdag /thog ma tha ma med zhi ba/ /byang chub sems te mchog mi 'gyur/ /zhes so//de bzhin du 'bum phrag lnga par yang bka' stsal te/ de'i phyir de nyid la 'jug par bya'o/ /der bcom ldan 'das kyis bka' stsal pa/ rdo rje mi phyed ces bshad pa/ /waM gyi yi ger rab tu grags/ /mi phyed pa ni sku gsung thugs/ /yi ge waM gyis mngon brjod bya/ /sems dpa' srid gsum gcig nyid ni//e yi yi ges brjod par bya/ /e yig shes rab dang lhan cig /waM yig rigs gsum bdag nyid can/ /lte ba'i dbus gnas dpa' bo ni/ /ze 'bru gsang ba'i spyod yul na/ /rang 'dra'i shes rab dang ldan te/ /rdo rje sems dpar rab brjod bya/ /phyag gnyis he ru ka ru bshad//'jig rten gsum bskyod nyid de'o/ /de nyid ngo bo nyid du brjod/ /sangs rgyas sku ste bde ba che/ /de nyid ye shes rdo rjer 'gyur/ /de nyid lhan cig skyes dga'i nyid/ /rgyu mthun par yang de nyid bshad/ /rdo rje rtse gcig pa ru brjod/ /gsungs pa yang / nyin dang mtshan mor bsam gtan dbang las ni//gang tshe rim gyis sems ni dbu mar gnas/ /mtha' yas sku can shin tu rnam dag sku/ /rdo rje rtse mo gcig par rgyal ba'i dbang / /zhes pa'o/ /de yang bzhi pa'i gnas skabs zad/ /rnam dag mchog tu mi 'gyur ba'o/ /byang chub la gnas gang zhig ni//snying ga'i pad+ma'i dbus gnas pa/ /hUM yig kho na sems dpar brjod/ /mi bskyod pa ni de kho na'o/ /thugs kyi rdo rjer de nyid brjod/ /khyab 'jug nyid de phyag bzhi pa/ /de nyid dz+wa la dz+wa la b+h+yo/ /de nyid chos kyi sku ru bshad/ /chos 'khor lor gnas rdo rje can/ /khyad dga'i dga' ba'i tshul 'chang ba//de nyid rnam par smin par bshad/ /gnyid stug zad par byed pa'o/ /ye shes chen po'i ros gang ba/ /sems dpa' chen por de brjod bya/ /mgrin par longs spyod 'khor lo'i dbang / /'od dpag med du mngon brjod bya/ /de nyid gsung gi rdo rjer bshad/ /pad+ma'i phyag can de bzhin gshegs//de nyid mchog tu dga' bar bshad/ /skyes bu byed par rab tu brjod/ /kun rdzob dang ni bzlog pa ste/ /de yang rmi lam gnas skabs zad/ /de nyid longs spyod rdzogs skur 'gyur/ /sangs rgyas rnams kyis chos ston mdzad/ /de nyid bde byed rab tu brjod/ / zhal gsum rnam pa phyag drug de/ /ki Ti ki Ti rdo rje nyid/ /he ru ka ni gsum par 'gyur/ /rtag tu dam tshig la gnas pas/ /gang zhig gnas pa yongs rtogs bya/ /dam tshig ri bong 'dzin khu ba/ /bde ba chen por dpral bar gnas/ /bdud rtsi legs gnas sems dpa'o/ /yi ge oM du rab tu bshad//de nyid rnam par snang mdzad brjod/ /byang chub sems te mchog mi 'gyur/ /tshangs pa sku yi rdo rje 'dzin/ /de nyid yongs su bshad par bya/ /dga' ba tshangs pa'i ngo bo ste/ /gzugs kyi sku ru de brjod bya/ /de nyid phyag na 'khor lor bshad/ /sku ni sprul pa'i mtshan nyid can//don dam pas de dri ma med/ /sad pa'i gnas skabs zad de nyid/ /de nyid pi tsu badzrar 'gyur/ /zhal brgyad he ru ka ru bshad/ /dpa' bo chen po zhabs bzhi pa/ /bcu drug phyag dang yang dag ldan/ /de ltar sku yi dbye ba yin/ /he ru ka ni bzhi par bshad/ /ngo bo nyid las chos su 'gyur//chos las longs spyod rdzogs pa nyid/ /de las sprul pa'i skur 'gyur te/ /de ltar sku ni bzhi yin no/ /tshangs pa sku yi rdo rje 'dzin/ /gsung gi rdo rje dbang phyug che/ /khyab 'jug thugs kyi rdo rje 'dzin/ /rdo rje sems dpa' bde ba che/ /zhes so/ /rtsa ba'i rgyud du rgyas bshad pa//rigs ni gsum du nges par brjod/ /ngo bo nyid dang yang dag ldan/ /rigs bzhi zhes par bshad pa yin/ /mdzad pa bzhi yi bye brag gis/ /rigs rnams kyi ni rnam gzhag de'o/ /sangs rgyas lam ni 'dod pa yi/ /rnal 'byor ldan pas shes par bya/ /ces so/ / da ni bcom ldan 'das la rdo rje snying pos 'di skad ces gsol ba/ /mtshan bsdus pa ni 'di lta bu/ /ci yis kye yi rdo rje lags/ /he yig gis ni ci zhig bshad/ /de bzhin badzra yis kyang ci/ /bcom ldan 'das kyis bka' stsal pa/ /he yig gis ni snying rje che/ /badzra'ang shes rab brjod par bya//mdor bstan pa'i cho ga 'di'i rgyas par bshad pa rtsa ba'i rgyud la 'jug par bya ste/ der bcom ldan 'das kyis bka' stsal pa/ sems can chos dang dmigs pa med/ /snying rje 'di ni rnam gsum bshad/ /'dir sems can la dmigs pa ni dkar po'i tshes gcig la sogs pa tshes lnga rnams so//chos la dmigs pa ni drug pa la sogs pa tshes lnga rnams so/ /dmigs pa med pa ni bcu gcig pa la sogs pa tshes lnga rnams so/ /nya'i mtha' dang nag po'i tshes gcig 'jug pa'i dang po'i dbus su snying rje bcu drug pa'o/ /'di dag gcig pa nyid stong pa nyid bcu drug pa dang snying rje bcu drug gi bdag nyid ces so//he yig gis ni mngon par brjod/ /sku gsung thugs kyi sbyor ba yis/ /sngar bshad waM yig de nyid do/ /rdo rje'i sgra yis yi ge e/ /rnam pa thams cad stong pa nyid/ /'di dag snyoms 'jug gang yin pa/ /rnal 'byor sgra yis mngon brjod bya/ /shes rab thabs kyi bdag nyid rgyud//rnal 'byor rgyud du rab brjod bya/ /'dir ming dang ming gis brjod par bya ba'i 'brel ba med pa shes rab dang thabs kyi bdag nyid gnyis su med pa'i rnal 'byor brjod par bya ba dang / rjod par byed pa'i mtshan nyid can du 'gyur ba ma yin no/ /rnal 'byor gyi sgra ni thabs kyi don nyid rjod par byed pa'am//shes rab kyi don nyid brjod pa ma yin gyi/ rnal 'byor gyi sgra ni shes rab dang / /thabs kyi don rjod par byed pa'o/ /de skad du yang gsungs pa/ rnal 'byor thabs kyi lus dang ni/ /shes rab gcig pus 'gyur ba min/ /shes rab thabs ni snyoms 'jug pa/ /de bzhin gshegs pas rnal 'byor gsungs/zhes so/ /thabs dang shes rab bdag nyid rgyud/ /de ni nga yis bshad kyis zhes pa la sogs pa 'di'i nges pa'i don ni dpal rdo rje rtse mo'i rgyud du gsungs pa/ ci'i don shes rab brjod par bya/ /rab sbyar sbyor byed shes ldan zhing / /phul du byung bar rtogs byed pa//de bzhin nyid kyi bden pa shes/ /shes rab shes rab ces brjod bya/ /thabs kyi sgra yis de nyid de/ /dga' ba bzhi yi mtshan nyid can/ /gang gis de yi rang bzhin bya/ /rnal 'byor pa rtag rnal 'byor rig /rgyud kyi sgra yis ci brjod bya/ /rgyud ni rgyun chags zhes brjod de//'khor ba rgyud du 'dod pa yin/ /de nyid gsang dang gsang chen zhes/ /phyi ma'i rgyud du brjod par bya/ /zhes so/ /da ni/ lta stangs dgug dang brda chen dang / /don mnyam rnam pa mang po rig /rengs par byed dang skrod pa nyid/ /sde rengs byed dang mngon spyod dang / /zhes pa gsal bar bya ste lta stangs dgug pa zhes pa ni me long lta bu la sogs pa'i ye shes lnga dgug pa'o//brda chen ni 'dra ba'i ngo bo'o/ /don mnyam zhes pa ni thams cad dbyer med pa'i rnal 'byor ro/ /rnam mang zhes pa ni rnam pa sna tshogs pas ye shes bskyed nas sna tshogs pas lta bar byed pa'o//rengs par byed pa zhes pa ni dbang po rnams ye shes su dmigs pa'o/ /skrod pa zhes bya ba ni gzugs rdo rje la sogs pa rnams kyi gnas gcod pa'o/ /sde ni gzugs la sogs pa'i rgyun gyi ngo bo ste/ mngon spyod ni 'di rnams dag pas gzhan gsal nas/ sems kyi rdo rje la rab tu bcug ste rengs par byed do//zhes pa ni sde rengs byed dang mngon spyod dang / /zhes pa'o/ /da ni rnal 'byor ma rnams bskyed pa dang gnas pa'i rgyu brjod par bya ste/ rgyud 'dir rnal 'byor ma rnams ni phung po lnga rnams dang khams bzhi rnams dang / skye mched drug rnams te/ zla ba'i cha bco lnga'i dbye bas bdag med ma la sogs pa rnams so//de rnams kyi bskyed pa dang gnas pa'i rgyu'o/ /de las de rnams kyi don mnyam zhes pa rnam shes dang / lha rnams ji ltar 'byung ba'o ru 'gyur ro/ /'di rnams kyi rgyas par bstan pa le'u brgyad par brjod par bya'o//da ni kye'i rdo rje'i skye ba dang gnas pa'i byed rgyu brjod par bya'o/ /dang por re zhig gcig tu 'gyur/ /zhes pa e waM gyi yi ge ni he ru ka'i dang po'i byed rgyu'o/ /hUM yig ni gnyis pa'i skyed pa'i byed rgyu'o/ /zhes pa nges pa'o/ /de las dngos po 'byung ba ni/ /gzung dang 'dzin pa'i bye brag las//yul dang dbang po'i sbyor ba yis/ /rnam shes rnams kyi so so'o/ /dngos po'i 'ching bas 'ching bar 'gyur/ /dngos po'i 'ching ba des rnam par shes pa rnams dang / mig la sogs pa rnams 'ching bar 'gyur ro/ /de yongs shes pas grol bar 'gyur/ /yul dang dbang po de rnams 'gog pas de yongs su shes pas zhes pa'o//de'i phyir/ dngos po nyid kyis rnam grol 'gyur/ /zhes pa lha'i mig la sogs pa rnams kyis 'das pa dang ma 'ongs pa dang da ltar byung ba'i yul mthong bas rnam par shes pa drug rnams grol lo/ /dpal shes rab kyi pha rol tu phyin pa'i rjes su yi rang ba'i le'ur gsungs pa yang /sangs rgyas bcom ldan 'das rnams ni mtshan ma'i tshul gyis yongs su bsngo ba snang bar mdzad pa ma yin te/ gang 'das pa de ni zad pa 'gags pas bral bar rnam par gyur ba'o/ /gang ma 'ongs pa de yang ma thob pa'o/ /da ltar byung ba ni gnas pa dmigs su med pa'o zhes so//de bzhin du lha'i mig dang lha'i rna ba dang / lha'i sna dang / gzhan gyi sems shes pa dang / sngon gyi gnas rjes su dran pa dang rdzu 'phrul te mngon par shes pa drug rnams so/ /de'i phyir rnam par shes pa la sogs pa gzhan rnams so/ / zhes bcom ldan 'das kyis bka' stsal pa las so/ /dpal dang po'i sangs rgyas su gsungs pa yang / shes rab ye shes rang bzhin las gang bde mnyam thams cad dus su gzhom du med par 'gyur/ /lha yi spyan gyi mthu las mig gis ma mthong ba dang srid rnam gsum yang mthong bar 'gyur//lha yi rna ba'i mthu las srog chags kyis brjod snying dang ga yi sgra ni thos par 'gyur/ /de bzhin sku gsung thugs kyi sbyor las ma yi bdag po reg bya la sogs thams cad 'gyur/ /zhes so/ /de bzhin du gzugs gzhan no la sogs pa yang ste/ de'i phyir/ thams cad nas ni phyag zhabs sogs//thams cad du ni spyan zhal dbu/ /kun nas thos ldan 'jig rten du/ /thams cad la ni khyab nas bzhugs/ /zhes pa'o/ /da ni sngar bshad pa'i shes rab dang thabs dag gis don dam pa'i sgom pa brjod par bya ste/ dngos po bsgom bya zhes pa la sogs pa'o/ / 'dir nam mkha' la dngos po bsgom bya ni rmi lam lta bu ste rdul phra rab kyi chos nyid las 'das pa'o/ /de yongs su shes pas ni dngos po med pa bsgom par bya ste/ /rtog pa dang bral ba'i sems kyis snang brnyan snang ba/ rtog pa dang bral zhing ma 'khrul pa ni mngon gsum zhes brjod par bya'o/ / nam mkha' zhes pa ni shes rab e yig tu 'gyur la/ /de bzhin he ru ka zhes pa dngos po med pa bsgom bya ste/ /shes rab kyi ye shes su 'gyur ro/ /he ru ka ni bde ba chen po ste shes rab ji lta bar thabs kyang de bzhin no/ /de yongs su shes pas/ dngos po med pa yang bsgom par bya ba ste/ thabs su 'gyur ro/ /de bzhin gyi sgra las rgyu ji lta ba de ltar 'bras bu'o zhes pa'o/ /dpal mchog gi dang po'i sangs rgyas stong phrag bcu gnyis par yang gsungs pa/ stong pa las byung gzugs brnyan rgyu/ /mi 'gyur las skyes bde ba 'bras/ /rgyu la 'bras bus rgyas btab cing / / 'bras bu rgyu yis rgyas btab pa'o/ /stong nyid gzugs brnyan 'dzin pa rgyu/ /snying rje 'gyur med 'bras bu'o/ /stong nyid snying rje dbyer med pa/ /byang chub sems su de brjod bya/ /zhes so/ /slar yang de nyid du gsungs pa/ /'bras bu rgyu yis phan tshun du/ /gzhan dang gzhan la rgyas btab med//rgyu dang 'bras bu thams cad gang / /de ni rten cing 'brel par 'byung / /shes rab ma yin thabs kyang min/ /lhan skyes shes rab dang lhan cig /kun nas yongs su bde ba rdzogs/ /sgrib pa thams cad spangs pa'o/ /zhes so/ /dpal sam+bu Tar yang gsungs pa/spros pa med pa'i rang bzhin nyid/ /shes rab ces par yongs su bsgrags/ /yid bzhin nor ltar ma lus pa'i/ /sems can don mdzad snying rje'o/ /dmigs med gnas su shes rab dang / /dmigs med snying rje chen po ni/ /blo dang lhan cig gcig gyur pa//nam mkhar nam mkha' ji lta ba'o/ /zhes so/ /de bzhin du 'di nyid du yang gsungs pa/ phyag rgya rgyu dang bral ba las/ /rnal 'byor snying rje thabs su 'gyur/ /stong nyid snying rje dbyer med pa/ /byang chub sems zhes bshad pa'o/ /dpal shes rab kyi pha rol tu phyin par yang gsungs pa//chos thams cad ni rnam par rtog pa med pa/ chos thams cad ni stong pa/ chos thams cad ni mtshan ma med pa/ chos thams cad ni smon pa med pa/ chos thams cad ni 'dus byas pa dang bral ba/ chos thams cad ni skye ba dang bral ba/ chos thams cad ni 'gyur ba med pa rnams so//zhes so/ /dpal dri ma dang bral ba'i 'od du yang gsungs pa/ rnam rtog med pa'i chos rnams la/ /dngos po med cing sgom pa'ang med/ /rnam rtog med par mos pa yis/ /brtag bya thams cad brtag par bya/ /rnam rtog med pa'i chos rnams la/ / sems can don la yongs su brtag /de bzhin gshegs pa'i chos rnams kun/ /chos min chos nyid kyang ma yin/ /zhes pa la sogs pa de bzhin gshegs pa'i nges pa'o/ /e waM gyi yi ge shes rab dang thabs kyi bdag nyid can ni lus gnas te lte bar gnas pa'o/ /de ltar na/ lus gnas ye shes chen po ni/ /kun du rtog pa thams cad spangs/ /zhes pa grub ste dkyil 'khor gyi 'khor lo dang las dang ye shes kyi phyag rgya'i rtog pa dang bral ba'o/ /dpal dang po'i sangs rgyas su yang gsungs pa/ bsam gtan dang ni sngags kyi bzlas pa byed pa dkyil 'khor chen po rnams dang gdan rnams dang //sbyin sreg sngags kyi rab gnas tshon la rgyal ba'i rigs rnams spyan drang bskul ba med par yang / /bud med sbyor rnams spangs nas rab mchog khyab bdag bde ba phyag rgya'i dngos grub ster bar byed/ /de phyir de ni nyin zhag so so'i dus su rnal 'byor pa yis thar pa'i rgyur bsgom bya//zhes so/ /shes rab pha rol phyin pa'i ye shes rnam par rtog pa dang bral ba mchog tu mi 'gyur ba'i bde ba'o zhes pa'o/ /'di'i don ni 'di yin te dpal rdo rje rtse mor yang gsungs pa/ nyan thos rang rgyal phyi rol gyi/ /shes rab las ni mchog tu bshad/ /pha rol de bzhin nyid gzhol 'di//shes rab pha rol phyin par bshad/ /de nyid rnam shes shes gyur pa/ /slar yang chos kyi rtog pa med/ /chad dang rtag par smra ba ni/ /de bzhin nyid gzhan shes par bya/ /zhes pa nges pa'o/ /de kho na ni rdo rje sems dpa' 'jig rten gsum skyong ba'i he ru ka ngo bo nyid kyi sku'o//dngos po kun la khyab pa po/ /zhes pa ni/ phung po drug ni gzugs la sogs/ /rnam shes mthar thug snying rje che/ /dbang po dang ni yul nyid dang / /dbang po'i rnam par shes pa nyid/ /rnal 'byor ma rnams go bya'i ched/ /khams ni bco brgyad rnams su bshad/ /dngos po 'di rnams la khyab par byed pa ye shes kyi sku'o//lus la gnas kyang lus skyes min/ /zhes pa skye ba dang 'jig pa med pa'i phyir te/ dpal sam+bu Ta ru gsungs pa/ /gang tshe las kyi lus zhig na/ /de 'dra ba yi lha ru 'gyur/ /ji srid las dang las min 'gyur/ /de srid lus la rnam par gnas//zhes so/ /da ni rdo rje'i lus la rtsa rnams bshad par bya ste/ 'dir rdo rje snying pos gsol ba/ /kye bcom ldan 'das rdo rje'i lus la rtsa du lags/ bcom ldan 'das kyis bka' stsal pa/ /rtsa rnams ni sum cu rtsa gnyis te/ byang chub kyi sems sum cu rtsa gnyis 'bab pa bde ba chen po'i gnas su 'dzag pa rnams so zhes pa/'dir bde ba chen po zhes pa ni bde ba chen po myong bar byed pa'i phyir bde ba chen por brjod par bya'o/ /dpal dang po'i sangs rgyas su yang gsungs pa/ dang por mtha' dag rgyal ba'i lus ni dngos grub rgyu ru sngags pas yang dag bsrung bar bya//lus med na ni dngos grub med cing skye ba 'di la mchog bde thob par 'gyur ba 'ong med/ /de phyir lus kyi don rgyur nyin zhag so so'i dus su rtsa yi sbyor ba bsgom par bya/ /lus ni grub na gzhan pa'i dngos grub srid gsum gnas su mngag gzhug nyid du rab tu 'gyur//zhes so/ /dpal dri ma med pa'i 'od du yang gsungs pa/ /'og tu phyogs pa bdud rtsi 'bab pa sum cu rtsa gnyis rnams brjod par bya ste/ mi phyed ma la sogs pa rnams so zhes pa ste/ 'dir yang ngo la dbyangs bco lnga'i cha rnams te bcu drug pa ni thig le'o//rtsa de rnams kyis 'phyang ma la bskor nas gnas so/ /'di lta ste/ tshes gcig dang gnyis pa dang gsum pa dang bzhi pa dang lnga pa ste/ rim pa ji lta ba bzhin no/ /de bzhin du yon tan rnams ni drug pa la sogs pa rnams la rim pa ji lta ba bzhin no/ /ya na ru bsgyur ba rnams ni bcu gcig pa la sogs pa rnams la rim pa ji lta ba bzhin no//thig le ni dbus su ste bcu drug pa 'phyang ma'o/ /de ltar rkan las steng du dbral bar khu ba'i cha'i rang bzhin gyi bdud rtsi 'dzag ste phyi rol du bsil ba dang nang du khu ba'o/ /de bzhin du rtsa so so ste/ 'di lta ste/ mi phyed ma dang phra gzugs ma//mchog ma g.yon pa thung ngu ma/ /zhes pa tshes gcig la sogs pa lnga rnams so/ /de nas/ rus sbal skyes sgom dbang bskur ma/ /skyon ldan ma dang bshad pa ma/ /zhes pa drug pa la sogs pa rnams so/ /ma mo mtshan mo bsil sbyin ma/ /drod bskyed ma dang la la nA//zhes pa bcu gcig pa la sogs pa rnams te rim pa ji lta ba bzhin no/ /la la nA bco lnga pa'i bdag nyid dang / a ba d+hU tI ni bcu drug pa ste dga' ba bcu drug rnam par dag pas dkar po'i phyogs la lhan cig skyes pa ma nyams pa'o zhes pa de bzhin gshegs pa'i nges pa'o//de nas nag po'i tshes gcig la sogs pa rnams ra sa nA'i tshes bco lnga rnams te/ 'di rnams kyi dbus su ra sa nA la sogs pa rnams so/ /'di lta ste ro ma dang 'bab ma dang mdog nag ma dang spyi ma dang / rgyu sbyin ma rnams zhes pa rnams ni tshe gcig la sogs pa lnga rnams so//sbyor bral ma dang gdu gu ma dang / grub ma dang / 'tshe ma dang / yid bzangs ma zhes pa drug pa la sogs pa rnams so/ /sum skor ma dang 'dod ma dang khyim ma dang gtum mo dang / kA t+yA ya ni zhes pa bcu gcig pa la sogs pa ste/ de ltar bco lnga ni nag po'i phyogs la cha nyams pa'o//lce'i dbus su bdud bral ma skud pa nag po'i rang bzhin gyis lce'i rtse mor byung ba ro 'dzag tu 'jug pa bcu drug pa rnam par gcod pa'o/ /de'i phyir rnal 'byor pa rnams kyis yongs su spang bar mi bya ba'o zhes pa'i don to/ /dpal sam+bu Tar yang gsungs pa//'khor lo bzhi yi rab dbye bas/ /bcu phrag gnyis lhag brgya yin te/ /byang chub sems kyi rang bzhin gyis/ /rtsa ni sum cu rtsa gnyis mchog /ces so/ /slar yang de nyid du gsungs pa/ byang chub sems ni sum cu gnyis/ /gang tshe 'dir ni gang bar 'gyur/ / dbang po phung po 'byung ba rnams/ /de ma thag tu sangs rgyas nyid/ /ces so/ /'di'i don ni 'di lta ste/ dpal mchog gi dang po'i sangs rgyas stong phrag bcu gnyis par yang gsungs pa/ shes rab chags pas zhu ba yi/ /thig le rim pas mgo bo las/ /rdzogs pa'i gnas su bzhugs pa rnams//'ching ba dam pa'i don las so/ /ji ltar zla shar rim pa yis/ /cha rnams kyis ni rdzogs par 'gyur/ /grib ma nyams pa rdzogs pa ste/ /zla ba chad dang rdzogs pa min/ /de bzhin ye shes skyes rim pas/ /sa rnams kyis ni rdzogs par 'gyur/ /nyon mongs la sogs nyams pa rdzogs//ye shes chad dang rdzogs pa min/ /zhes pa la sogs pa'o/ /rdo rje snying pos gsol pa/ bcom ldan 'das rtsa rnams ci lta bu lags/ bcom ldan 'das kyis bka' stsal pa/ srid gsum yongs gyur thams cad rnams/ /gzung dang 'dzin pa rnam par spangs//thams cad rnams zhes pa ni phung po dang dbang po yongs su gyur pa rnams so/ /yang na thabs ni thams cad kyis/ /dngos po'i mtshan nyid du ni brtags/ /zhes pa ni gsungs pa/ yang nye ba'i rtsa rnams du ma'i khams/ /lus bkang nas ni legs gnas pa/ /stong phrag bdun cu rtsa gnyis po//de snyed de rnams lha rnams so/ /zhes so/ /da ni sdom pa'i dbye ba bshad par bya ste/ dpal rdo rje mkha' 'gror yang gsungs pa/ rang gi mtshan ma lha mo'i dpal/ /gos dang rgyan gyis brgyan rnams kyis/ /gzhag bya rtag tu mchod par bya/ /yang dang yang du 'dod par bya//de ltar bshad pa lha mo yi/ /sdom pa bde ba mchog tu 'dod/ /'dir yang gsungs pa/ sangs rgyas kun gyi sdom pa ni/ /e waM yi ger rab tu gnas/ /zhes so/ /A li dang kA li dang / zla ba dang / nyi ma dang shes rab dang thabs zhes pa la sogs pa 'di'i don ni 'di yin te/dpal gdan bzhi par yang gsungs pa/ kA li rdo rje zhes bshad de/ A li yang de bzhin gshegs ma'o/ /A li kA li'i rab sbyor gyis/ /las rnams thams cad bsgrub par bya/ /mtha' dag sems can don nyid kyang / /'di lta'i ngo bos bsgrub par bya/ /shes rab thabs las phyi 'gyur rnams//'khor ba las sgrol ga la zhig /ces so/ /ji ltar phyi rol de bzhin nang / /sdom pa de ni rab tu gsal/ /bo la'i bde ba phyag rgya che/ /rdo rje skye mched thabs yin te/ /gsang ba'i snyoms par 'jug pa 'dis/ /phyi rol gnyis gnyis bstan pa min//sku gsum lus kyi nang du ni/ /'khor lo'i ngo bos brjod par bya/ /sku gsum yongs su shes pa ni/ /bde ba chen po'i 'khor lor 'dod/ /chos dang longs spyod sprul pa dang / /de bzhin bde ba chen po nyid/ /skye gnas snying mgrin mgo bo la/ /sku gsum po ni rnam par gnas/ / ma lus pa yi sems can gyi/ /skye ba gang du rab brjod pa/ /der ni sprul pa'i skur 'gyur te/ gang phyir sprul pa gnas brtan no/ /gang gis bskyed dang sprul byed pa/ /sku ni sprul pa ba ru bshad/ /chos ni sems kyi rang bzhin te/ /chos kyi sku ni snying gar 'gyur/ /ro rnams drug gi rang bzhin gyi//bza' ba yang dag longs spyod brjod/ /mgrin par longs spyod 'khor lo ste/ /bde ba chen po spyi bor gnas/ /e waM yi ger rgyu mthun te/ /rnam smin chos kyi 'khor lo la/ /skyes bu'i byed pa'i longs spyod la/ /bde ba 'khor lor dri ma med/ /rgyu mthun sogs kyis rnam phye ba//'bras bu rnam pa bzhi ru brjod/ /ji ltar byas pa de bzhin spyod/ /rgyu mthun zhes par bsgrags pa yin/ /rnam par smin pa de las bzlog /las chung 'bras bu che ba'o/ /rnal 'byor dag pas dri ma med/ /skyes bu'i byed pa nyer bsgrub pa'o/ /sprul pa'i 'khor lo gnas brtan pa/ / gang phyir sprul pa gnas brtan phyir/ /thams cad yod smra chos 'khor lor/ /chos ni smra ba yang dag 'byung / /longs spyod 'khor lor kun bkur te/ /gang phyir mgrin par kun rig byed/ /bde ba'i 'khor lor dge 'dun che/ /gang phyir bde chen mgor gnas phyir/ /'dab ma drug cu rtsa bzhi par dang /'dab ma brgyad par dang / 'dab ma sum cu rtsa gnyis par dang / 'dab ma bcu drug par te lte ba dang snying ga dang / mgrin pa dang / dpral ba la'o/ /dpral bar longs spyod do/ /mgrin par dbang byed do/ /snying gar thim pa'o/ /lte bar bdag po nyid do/ /de ltar thams cad bzhi'o zhes pa la sogs pa ni ji lta ba bzhin du rtsa ba'i rgyud kyi rjes su 'brangs nas/rgyud ni rgyud gzhan du gsungs pa'i rnam pas rigs drug gi dbye bas 'khor lo drug rnams su sdom pa'o/ /rigs lnga'i dbye bas rigs lnga rnams su sdom pa'o/ /rigs gsum la sogs pa'i dbye bas rigs gsum rnams su sdom pa'o zhes pa de bzhin gshegs pa'i nges pa'o//de ni gtum mo'i rnal 'byor brjod par bya ste/ lte bar gtum mo 'bar ba yis/ /de bzhin gshegs pa lnga bsregs te/ /spyan sogs rnams kyi yang bsregs te/ /bsregs nas ri bong can haM 'dzag/ / ces pa mdor bstan pa'i tshig 'di'i rgyas par bshad pa'i tshig /dpal mtshan yang dag par brjod par gsungs pa/ nam mkha' las byung rang byung ba/ /shes rab ye shes me bo che/ /'od chen rnam par snang bar byed/ /ye shes snang ba lam me ba/ /zhes so/ /dpal dri ma dang bral ba'i 'od du yang gsungs pa/gtum mo'i de kho na nyid las me ste de'i mgo bo ni 'od zer yin la/ de'i mgo bo'i steng dpral bar zla ba lta bur byang chub kyi sems skye ba'i gnas su gzhag par bya ba zhu bar gyur te/ gang dang gang thig le sems kyi thig le zhu ba dpral ba nas mgrin pa dang snying ga dang lte ba dang gsang bar son zhing 'gag par 'gyur la/srog rtsol gyi me yis lus kyi thig le gsang bar 'gags pa'o/ /bdud rtsi khu ba'i gzugs can ni/ /thig le'i gzugs kyis 'dzag par byed/ /thig le'i rnal 'byor zhes par bshad/ /bcu drug phyed phyed thig le 'chang / /cha med cha las 'das pa ste//bsam gtan bzhi pa'i rtse mo 'chang / /phra mo'i rnal 'byor zhes par bshad/ /rgyu mthun la sogs steng du 'gro/ /zhes so/ /dpal 'dus par yang gsungs pa/ rin chen chen po kha dog lnga/ /yungs kar kyi ni 'bru tshod tsam//sna yi rtse mor 'bad pa yis/ /rnal 'byor rig pas rtag tu bsgom/ /dpal 'dus pa phyi mar yang gsungs pa/ ye shes lnga yi rang bzhin dbugs/ /'byung ba lnga yi rang bzhin can/ /gong bu'i gzugs kyis phyung nas ni/ /sna yi rtse mor rnam par bsgom/ /zhes pa ste/'dir ni rin chen lnga'i sgras ra sa nA dkyil 'khor lnga'i chos can sa la sogs pa khams lnga po rnams so/ /de'i rang bzhin can gyi dbugs ni/ rin chen lnga yi rang bzhin dbugs/ /zhes pa ste sna bug g.yas pa la'o/ /sangs rgyas rnams ni la la nA dkyil 'khor lnga'i chos can rnam par shes pa la sogs pa'i phung po lnga rnams so//de rnams kyis byin gyis brlabs pa'i dbugs ni/ /sna bug g.yon pa la'o zhes so/ /gong bu'i gzugs kyis phyung nas ni/ /zhes pa 'dir gong bu ni g.yas pa dang g.yon pa'i dkyil 'khor gyi bdag nyid dbu ma d+hU tIr gcig pa nyid kyi srog gi rlung zhes pa'o//srog gi rlung de/ gong bu'i gzugs kyis phyung nas ni/ /sna yi rtse mor rnam bsgom bya/ /zhes pa/ 'dir sna'i sgras ni lte ba dang snying ga dang mgrin pa dang dpral ba dang / gtsug tor gyi pad+ma'i ze 'bru brjod de/ de'i rtse mor bsgom par bya ba ni sna'i rtse mor bsgom par bya ba'o//dpal rdo rje phreng ba'i rgyud du yang gsungs pa/ /sna rtser yungs kar zhes bya ba/ /srog dang rtsol bar brtag pa ste/ /srog dang rtsol ba la gnas pa/ /'od lnga rnams su sangs rgyas gsungs/ /mgrin pa snying ga lte ba dang / gsang ba'i pad+mar 'gro 'ong ston/ / thun phyed dus su rnam par gnas/ /rgyu ba'i rim pa ji lta bar/ /de ltar ze'u 'bru'i lte ba'i dbus su thig le'i gnas su gong bu'i gzugs srog 'gags pa'o zhes pa'o/ /dpal dang po'i sangs rgyas su yang gsungs pa/ zla ba nyi ma'i rgyu ba nyams shing lam gnyis kyi yang srog gi rlung ni chen po 'gags//chu skyes rdo rje rab tu sad cing ri bong can zhu nyi ma'i gzugs can la rab zhugs/ /dngos dang dngos med gcig gyur rnam gsum srid pa la gnas gzhom med legs par rab rtogs pa/ /de yi dus su rnal 'byor pa de gang la gnyis ci'ang med pa mchog gi go 'phang 'gro//zhes so/ /'di nyid du yang gsungs pa/ sprul pa'i 'khor lor dbyu gu drug cu rtsa bzhi dang longs spyod rdzogs pa'i 'khor lor dbyu gu gnyis kyi bdag nyid can/ chu tshod sum cu rtsa gnyis dang / bde ba chen po'i 'khor lo la chu tshod gnyis kyi bdag nyid can/ 'pho ba bcu drug dang chos kyi 'khor lor thun tshod brgyad do//de ltar na nyin zhag la dbugs 'byung ba dang 'jug pa drug brgya lhag pa'i stong phrag nyi shu rtsa gcig rnams so/ /gzhung mangs pa'i 'jigs pas 'dir bdag gis grangs ma byas so zhes pa dpal kye'i rdo rje'i rgyud la kha che chen pos rtogs par byed pa zab mo'i rdo rje'i tshig 'byed pa'i snying po bsdus pa'i dka' 'grel du rdo rje rigs kyi le'u ste dang po'o// //da ni sngags kyi le'u bshad par bya'o/ /sngags zhes pa ni de kho na nyid kyi don shes par byed pa'i phyir man te 'gro ba skyob par byed pa'i phyir tra'o zhes pa man+t+ra ste ting nge 'dzin las skyes pa'i byang chub kyi sems so zhes pa'i don to//'di lta ste 'byung po thams cad kyi gtor ma'i sngags zhes pa thams cad kyang de yin la 'byung po yang ngo zhes pa 'byung po thams cad de rnams kyi sngags ni rim pa ji lta ba dang / grangs ji lta ba'o/ /oM a kA ro mu khaM sarba d+harmA NAM A d+ya nu t+pa na na twA te oM AH hUM phaT swA hA/ zhes pa 'dir a yig gi sgra ni gzhom du med pa'i sgra ste/gsungs pa yang / rdzogs pa'i sangs rgyas a yig 'byung / /a yig yig 'bru kun gyi mchog /don chen 'gyur med dam pa ste/ /srog chen po ni skye ba med/ /tshig tu brjod pa spangs pa ste/ /zhes pa la sogs par rig par bya'o/ /de skad du yang rtsa ba'i rgyud du gsungs so//sa la sogs pa'i 'byung ba rnams la skyes pa ni 'byung po rnams te/ phung po lnga'i ngo bo'i chos can no/ /de rnams kyi sngags ni phung po lnga'i bdag nyid can gyi yi ge lnga ste/ oM yig gis de rnams kyi gzugs kyi phung po sku rdo rje'o/ /a yig gis 'du shes kyi phung po ste gsung rdo rje'o//hUM yig gis rnam par shes pa'i phung po thugs rdo rje'o/ /swA yig gis tshor ba'i phung po'o/ /hA yig gis 'du byed kyi phung po'o/ /'di'i nges pa'i don ni dpal shes rab kyi pha rol tu phyin pa'i le'u bcu par gsungs pa/ bcom ldan 'das kyis bka' stsal pa//rab 'byor shes rab kyi pha rol tu phyin pa la spyod pa'i byang chub sems dpa' sems dpa' chen po ni/ gal te gzugs kyi 'phel ba yang dag par rjes su mi mthong na shes rab kyi pha rol tu phyin pa la spyod do/ /de bzhin du 'du shes dang / 'du byed rnams dang / rnam par shes pa 'phel ba yang dag par rjes su mi mthong na shes rab kyi pha rol tu phyin pa la spyod do/ /gzugs kyi yongs su nyams pa yang dag par rjes su mi mthong na shes rab kyi pha rol tu phyin pa la spyod do/ /de bzhin du tshor ba dang 'du shes dang 'du byed rnams dang rnam par shes pa'i 'grib pa yang dag par rjes su mi mthong na shes rab kyi pha rol tu phyin pa la spyod do//chos yang dag par rjes su mi mthong na shes rab kyi pha rol tu phyin pa la spyod do/ /chos ma yin pa yang dag par rjes su mthong ba med na shes rab kyi pha rol tu phyin pa la spyod do/ /de lta na 'di'i shes rab kyi pha rol tu phyin pa bsgom pa yongs su rdzogs par 'gyur ro zhes so//de rnams la gtor ma ni tshim par byed pa'o/ /de bzhin du de bzhin gshegs pa rnams kyi sa bon rnams rim pa ji lta ba bzhin du 'di lta ste/ oM yig gis rnam par snang mdzad spyi bor ro/ /aM yig gis rin chen 'byung ldan te lte bar ro/ / hrIHyig gis 'od dpag med ste mgrin par ro/ /gsang bar khaM yig gis don yod grub pa'o/ /hUM yig gis mi bskyod pa ste snying gar ro/ /de ltar pi tsu badzra'i lus la dgod par byas nas rdo rje mkha' 'gro ma rnams kyi yang nges pa'o/ /de nas phyag bcu drug pa'i nges pa ni/oM de ba pi tsu badzra hUM hUM hUM phaT swA hA/ 'dir nges pa'i tshig ni/ oM yig gis lha rnams kyi gdan yin pa ji lta ba de ltar sngags kyi yi ge dang pos lha 'grub pa'o/ /sprul pa sna tshogs pa rnams kyis sems can gyi don gyi ngor rtse bar byed rol par byed pas na lha'o/ /thugs rje'i yan lag gis pi tsu ste shin tu dang ba nyid kyi phyir ro//rdo rje ni mi phyed pa nyid kyi phyir te shes rab dang thabs kyi yan lag gis so/ /sngags 'di ni phyag bcu drug pa'i'o/ /grong khyer gcig dkrugs pa ni grong khyer gyi sgras bde ba chen bo'i 'khor lo brjod par bya ste/ de yang dag par bskyod pa'i rang bzhin las rnam pa gzhan nyid na grong khyer bskyod pa'o//de nyid dbang du 'gyur ba ni/ byams pa la dmigs pas gang yin pa ste/ de'i phyir rnal 'byor pas sngags 'di bzlas par bya'o zhes pa nges pa'i don to/ /drang ba'i don gyi ni go sla'o/ /oM a ka tsa Ta ta pa ya sha swA hA/ rnal 'byor ma rnams kyi sa bon ni/ a A i I u U r-i r-I l-i l-I e ai o au aM a/ 'di'i nges pa'i don ni cha bcu drug rnams dga' ba'i rim pa'i dbye bas rtogs par bya'o/ /phyag gnyis pa'i oM trai lo kya k+She pa hUM hUM hUM phaT swA hA/ phyag bzhi pa'i/ oM dz+wa la dz+wa la b+h+yo hUM hUM hUM phaT swA hA/ phyag drug pa'i/ oM ki Ti ki Ti badzra hUM hUM hUM phaT swA hA/ sku dang gsung dang thugs byin brlab pa'i sngags ni/ oM AHhUM/ da ni ku ru ku l+le'i sngags brjod par bya ste/ dpral bar oM mo/ /lce la hrIH'o/ /mgrin par ku'o/ /snying gar ru'o/ /lte ba la ku'o/ /gsang bar l+le'o zhes dgod pa'o//dbugs 'jug pas bkang ste/ bzlas pa 'bum phrag gcig byas nas dbugs dbyung ba'i dus su bgrang phreng bskyod par mi bya'o/ /'di'i nges pa'i don ni phyag rgya lnga'i man ngag gi le'u bshad par bya'o/ /zla ba dang nyi ma rnam par 'dzin pa zhes pa la/ zla ba zhes pa ni g.yon pa'i rtsa brkyang ma'o//nyi ma zhes pa ni ro ma rtsa g.yas pa ste gnyis po dag gi 'char ba dang / nub pa dang 'jug pa dang phyir 'byung ba 'pho ba 'gogs pa'i phyir zla ba dang nyi ma rnam par 'dzin pa'o zhes pa'o/ /dran pa'i don gyis ni go sla'o/ /sngags kyi tshig rnams thams cad la dang po oM yig dang hUM phaT yig spel ba rtogs par bya'o//'dir sngags btu ba'i le'ur hUM dang phaT yig ni man ngag las shes par bya'o/ /'dir rtsa ba'i rgyud du rim pa dang rim pa las bzlog pas thams cad slob dpon gdug pa can rnams la sbas te bla ma dam pa brgyud pa'i rim pas shes par bya'i/ glegs bam klog pas ni ma yin no/ /gzhan thams cad rgyud gzhan bltas nas gang rigs pas 'thad cing rgyud ming ba dang mthun pa'i bcom ldan 'das kyi gsung gzung bar bya'i dad pas rmongs pa nyid kyis ni ma yin no/ /de skad du bcom ldan 'das kyis gsungs pa/ nga'i gsung ni thog mar dge ba bar du dge ba tha mar dge ba'o/ /gsungs pa yang / thog ma med nas spros med bdag /de bzhin nyid dag dag pa'i bdag /bden par smra zhing tshig mi 'gyur/ /ji skad smras pa de bzhin byed/ /gnyis su med dang gnyis med gsungs/ /yang dag mtha' la rnam par gnas//zhes so/ /de ltar slar yang dang po'i dge ba bar dang tha mar mi dge ba ma yin zhing dang po dang bar du mi dge zhing tha mar dge ba ji ltar byis pa'i skye bo rnams kyis kun du brtags pa/ dang po rnam par rtog pa'i bsgom pa dang / bar du dbang po gnyis kyi bde ba bsgom pa dang / mthar rnam par mi rtog pa bsgom pa ste bde ba chen po bsgom pa'o//zhes pa de ni ngan pa'i tshig ste/ thams cad du rgyu dang 'dra ba'i 'bras bu mthong gi /ko tra wa yi sa bon las/ sA lu'i myu gu 'byung med phyir/ /rnam rtog sa bon las 'byung ba/ /rnam rtog bcas pa'i 'bras bur 'gyur/ /rnam par mi rtog las skyes pa//rnam par mi rtog 'bras bur 'gyur/ /rgyu de'i phyir dang por dge ba bar du dge ba tha mar dge ba'o/ /ji ltar sa bon de bzhin ljon/ /ji ltar sdong po de bzhin 'bras/ /'jig rten 'di kun du mthong ste/ /de ni rten cing 'brel 'byung nyid/ /da ni rengs pa dang dbang du bya ba la sogs pa las rab 'byams gsungs pa/oM hUM swA hA/ rengs par byed pa'o/ /de bzhin du dbang du bya ba dang / de bzhin du skrod pa dang / de bzhin du sdang bar byed pa dang / /mngon spyod dang 'gugs pa dang gsod pa zhes pa la sogs pa gsal bar bya ste/ kye'i rdo rjes rtsa rgyud du/ ji ltar bdag la gsal gsungs pa//de bzhin nyung rgyud 'di ru ni/ /bkas gnang ba las de brjod bya/ /sa yi sa bon gyis rengs byed/ /rmongs dang phur gdab de bzhin no/ /rtag tu zhi byed chu'i sa bon/ /de bzhin rgyas dang dug med byed/ /me yi sa bon chen pos 'gugs/ /dbang dang bskyod pa rnam kun du'o//sdang byed bskrad pa rlung rnams kyis/ /de bzhin du ni dug 'pho ba'o/ /stong pa'i sa bon gyis dug gcod/ /de bzhin gsod dang 'tsho ba byed/ /gso dang bslang dang dga' ba ni/ /ye shes sa bon gyis grub byed/ /lkugs pa nyid dang 'on nyid dang / /ma ning byed pa nyid kyang ni/ /thugs gsung sku yi sa bon gyis//sngags pas rim pa ji bzhin bsgrub/ /sa chu me rlung stong pa dang / /ye shes dkyil 'khor rnal 'byor las/ /rengs pa la sogs las rnams ni/ /sgrub po mchog gis bsgrub par bya/ /'di'i don ni 'di yin te/ /sa chu me rlung stong pa dang / /zhes pa ni 'byung ba lnga'i bdag nyid can byang chub kyi sems kyi thig le'o//ye shes dkyil 'khor sbyor ba las/ /zhes pa byang chub kyi thig le de nyid dpral ba las mgrin pa dang snying ga dang lte ba dang / rdo rje pad+ma'i ze 'bru'i rtse mor ma 'phos pa bde ba chen pos yongs su rdzogs par gyur pas ni rengs pa dang dbang du bya ba la sogs pa sgrub par byed do zhes pa nges pa'i don to//da ni rengs pa la sogs pa rnams 'grub pa'i gnas gsungs so/ /gsungs pa yang / /ri bo tshang tshing sman ljongs dang / /rgya mtsho chen po'i 'gram rnams dang / /gdod nas grub pa'i dur khrod de/ /gnas 'di rnams su bya ba yin/ /sngags bzlas de bzhin bsam gtan dang /sbyin sreg dkyil 'khor bzhengs pa dang / /rab gnas las kyi ngo bo yis/ /las rnams thams cad bsgrub par bya/ /'di yi don ni 'di yin te/ /dpal rdo rje mkha' 'gror gsungs pa/ /nags chen zhes pa 'dod chags sogs/ /nyon mongs shing gis gtibs pa ste/bud med phyag rgya brten pa'i thabs/ /dag pas byang chub phyogs su 'gyur/ /de yang rnam par dag pa ni/ /rab kyi mthar thug son pa las/ /yul phyogs chos 'byung zhes pa'o/ /de nyid de bzhin gshegs kun gyis/ /rab bsngags rdo rje'i rigs sogs kyi/ /khyad 'phags gzhon nu ma yi rigs//las byung nyid kyi skye bos dben/ /de kho na g.yo ba med pa'i bde ba chen po'i bdag nyid ngo bo nyid kyi phyir/ sems can dman pa rnams kyis 'jug pa mi nus pa nyid kyi phyir tshang tshing ngo / /mdzod du gyur pa nyid kyi phyir sman ljongs so/ /'gram rnams su zhes pa de dang yang dag par sbyor ba'i shes rab kyi rgya mtsho'i 'gram rnams su ste mtshungs pa nyid kyi phyir ro//sems can thams cad kyi rgyud dang du long ba ni dur khrod do/ /gdod nas grub pa zhes pa rtag tu grub cing yongs su rdzogs pa ste 'char ba dang nub pa dang bral ba'o/ / thal bas rtag du bde ba chen po'i rnam par thob cing de'i rang bzhin du bya ba ste/ de ltar na sgra'i bden pa nyid rtogs par byed do/ /dpal dang po'i sangs rgyas su yang gsungs pa/ skyed mos tshal lam ri bo skye bo ri dgas bral bar zhi ba'i sngags rnams bsgrub par bya/ /drag po rnams ni drag po'i dur khrod du ste lha mchog rnams su rengs dang rmongs pa yang //dbang dang dgug pa sngags pas mchog gi khyab bdag bde ba phyag rgya kun dang rab sbyor la/ /gnas gzhan skye gnas gzhan du mi rnams kyis ni skye ba 'bum phrag gis kyang 'grub mi 'gyur/ /zhes so/ /yang de nyid du gsungs pa//skyes bu rnams kyi sems ni kun nas mi dge'i 'bras bu'i dbang gis phran tshegs rig pa la rjes chags/ /rig pa 'di yis srid pa gsum po mtha' dag skad cig gis ni bdag gi dbang du byed pa'o/ /zhen pa'i bsam pa brkam chags sems kyis ye shes sbyin pa rnam par spangs na dmyal bar rab tu 'jug /rgyab tu rdzas dang rang gi khyim thab gzhan gyi dbang 'gyur kye ma ngan pa'i chos la rab tu 'jug /ces so/ /de bzhin du dpal dgongs pa lung ston pa'i rgyud du yang gsungs pa/ so sor sdud dang dmigs par bshad/ /brda dang don dam pa yin no/ / so sor sdud pa spyi yin te/ /sangs rgyas nyid kyi dmigs pa nyid/ /brda ni sngags kyi de nyid bshad/ /de bzhin nyid ni don dam pa'o/ /dpal dang po'i sangs rgyas su yang gsungs pa/ khyim dang grong du bgrang phreng rnams kyis nyin dang mtshan du sngags kyi bzlas pa byas nas ni/ /ngal zhing rmongs te chags bral slar yang 'di ni sngags kyi dngos grub med pa rjod par byed//gnas dang stong pa dus dang mchog gi mtshan mo la gnas yang dag par ni shes min nyid/ /rkang pa'i sor mo rnams kyi nad la spyi bor sman rnams kyis ni rab byug byed pa bzhin/ /zhes so/ /dpal sa m+bu Tar yang gsungs pa//nang gi dbye ba 'di nyid ni/ /shin tu gsal bar bla ma yi/ /zhal las rnyed 'gyur gang rnams ni/ /bla mas dman pa'i sems can la/ /sngags dang phyag rgya mi rnyed do/ /de phyir 'dzam gling gru gsum pa/ /dag pa sangs rgyas bzhugs pa 'dir/ /e yig dbyibs can gang dbus su//ji ltar e waM du 'gyur bar/ /gru gsum dkyil 'khor nyams dga' bar/ /rdo rje rol pa rnams spros 'byung / /chos 'byung zhes ni bshad pa ste/ /btsun mo'i b+ha ga zhes kyang ngo / /de yi dbus son pad+ma ni/ /'dab ma brgyad pa ze'u 'brur bcas/ / der ni A li kA li spel/ /sde tshan brgyad rnams rnam par gnas/ /las kyi tshogs rnams byed pa ste/ /gsang sngags gzugs kyis lus can gyi'o/ /yi ge lnga bcu rnams nyid ni/ /rig byed sogs su gnas pa rnams/ /phyag rgya nyid dang rgyud rnams dang / /phyi rol bstan bcos ngo bor ro//rdo rje snying po 'di rnams kyi rang bzhin rnams ni lus las gzhan cung zad kyang yod pa ma yin no/ /a ka tsa Ta ta pa ya sha'i sde dga' ba yi ge lnga bcu ru mnyam pa rnams/ rdo rje rol pa pad+mar son pa rnams 'dab ma so so la phyogs brgyad rnams su rig par byas pa'o/ /'di rnams dbus su ze'u 'bru la//mchog gi dbang phyug yod pa yin/ /sde tshan brgyad kyis bskor byas pa'o/ /mchog gi yi ge nyid kyang ngo / /a ni yig 'bru kun gyi mchog /don chen yi ge'i 'dren pa ste/ /lus can rnams kyi sngags kun ni/ /de nyid las ni yang dag 'byung / / zhes so/ /gsungs pa yang / brjod pa kun gyi rgyu yi mchog /ngag kun rab tu 'od gsal ba'o/ /zhes so/ /de bzhin du dpal rdo rje snying po'i rgyan du yang gsungs pa/ /snying gi dbus su gzhom med pa/ /sgron ma 'bar ba dang mtshungs shing / /mi 'gyur mchog tu phra ba yi/ / a yig dam pa gtso bo'o/ /zhes so/ /dpal mtshan yang dag par brjod par yang gsungs pa/ /'gro ba'i mar me ye shes sgron/ /gzi brjid chen po 'od gsal ba/ /rig pa'i rgyal mchog sngags dbang po/ /gsang sngags rgyal po don chen byed/ /ces so/ /sangs rgyas kun gyi yon tan 'dir//A li'i gzugs kyis 'jug par 'gyur/ /zhes pa la sogs pa yang ngo / /dpal lang kar gshegs par yang gsungs pa/ skyes bu gang la la zhig sgron ma bzung nas nor tshol bar byed do/ /blo gros chen po de bzhin du ngag tu rnam par brtag pa'i sgra'i sgron mas byang chub sems dpa' sems dpa' chen po rnams dag tu rtog pa dang bral ba'i so so rang gi bdag nyid rtogs pa la rjes su 'jug par 'gyur ro zhes so//dpal dgongs pa lung ston pa'i rgyud du yang gsungs pa/ /dang po gcig pu dgu dbus na//gang zhig bcu yis mi 'ching ba/ /de ni bcings med shes bya ste/ /de shes pa ni mchog gi gnas/ /dbyangs dang gsal byed yi ge rnams/ /grangs dgu yis ni rjes 'jug pa/ /as bcings phan tshun yang dag sbyor/ /gang zhig rig dang 'gro ba'i bla/ /dpal 'dus pa phyi mar yang gsungs pa/rig pa'i tshul gyi cho ga yis/ /thun mtshams bzhi yi sbyor ba las/ /sngags kyi yan lag dbyer med pa/ /mtshon bya mtshan nyid bral ba bzlas/ /zhes so/ /gnyis su med pa mnyam pa rnam par rgyal ba rnal 'byor chen po'i rgyud du gsungs pa yang /rnam par shes las yang dag byung / /gsang sngags 'bum phrag drug bzlas nas/ /rdo rje sems dpar phyag byas te/ /zla ba nya la de 'grub 'gyur/ /zhes so/ /'di'i don ni 'di yin te/ /dpal mchog gi dang po'i sangs rgyas su yang gsungs pa/ /bde ba chen po'i rang bzhin ni//nya yi sgra yis brjod par bya/ /gzhan ni bsgom pa'i bar chod can/ /spro dang bsdu ba byed pa kun/ /zhes pa la sogs pa'o/ /de la brtul zhugs bshad pa med/ /sngags dang phreng ba yod ma yin/ /'dzin dang sbyin sreg las kun med/ /thams cad gzhan dang gzhan du 'jug/ / rnal 'byor bsgom pa'i bar chad can/ /phyi rol bzlas pa spang bar bya/ /sngags don bcom ldan rdo rje can/ /rdo rje'i bdag nyid ci ltar bzlas/ /zhes so/ /gsungs pa yang / gsang sngags tshul chen las byung ba/ /gsang sngags tshul chen bdag nyid can/ /zhes so/ /glang chen rnyed nas 'phral du ni//glang chen rjes ni tshol ba ltar/ /rang nyid sngags lus dngos yin na/ /gzhan pa ci zhig tshol bar byed/ /sngags kyi de nyid gsal ba 'di/ /gsung gi rdo rje'i sgrub thabs te/ /ye shes gsum gyi dbye ba yis/ /sems tsam la ni nges par sbyor/ /zhes so//dpal dgongs pa lung ston pa'i rgyud du yang gsungs pa/ yi ge gang rnams sngar bshad dang / /gang yang mngon du phyogs de rnams/ /bud med skyes pa ma ning ste/ /byings la sogs par yongs brtags shing / /'og dang steng du yang dag sbyar/ /shes shing rtogs na der sbyar ba'o//don gyi rjes 'gro'i bzlas pa ni/ /rang bzhin med pa mdzes pa yis/ /ma ning go 'phang la gnas pas/ /sngags kyi yan lag dbyer med gnas/ /dpal lang kar gshegs par gsungs pa yang / /blo gros chen po byang chub sems dpa' sems dpa' chen pos don la rton par bya'i tshig 'bru la rton pa ma yin no//blo gros chen po rigs kyi bu'am rigs kyi bu mo tshig 'bru'i rjes su 'brang ba ni bdag nyid nyams par byed cing don dam pa'i mtha' yang rtogs par mi 'gyur ro/ /blo gros chen po 'di lta ste/ la la zhig 'ga' zhig la sor mo'i rtse mos cung zad cig ston par byed cing de sor mo'i rtse mo nyid la blta ba'i phyed du ston par byed do//blo gros chen po de bzhin du byis pa'i rigs can byis pa so so'i skye bo shes rab 'tshal ba'i rang bzhin can gyi tshogs rnams sgra ji bzhin pa'i sor mo'i rtse mo la mngon par zhen cing mngon par zhen pa de bzhin kho nar dus byed par 'gyur ro//sgra ji bzhin pa'i sor mo'i rtse mo spangs nas don dam pa tshol bar mi byed do zhes so/ /dpal shes rab kyi pha rol tu phyin pa'i bslab pa'i le'ur yang gsungs pa/ rab 'byor 'di lta ste/ dper na skyes bu'i srog gi dbang po 'gags na dbang po rnams thams cad 'gag par 'gyur ro//rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la slob bzhin pa'i mi shes pa 'gags na/ mi dge ba'i chos rnams thams cad 'gag par 'gyur ro/ /de las gzhan pa'i pha rol tu phyin pa rnams thams cad kyang nang du 'dus shing yongs su gzung bar 'gyur ro//zhes so/ /de'i phyir byang chub sems dpa' sems dpa' chen pos don 'dod pas 'byung bar bya zhing de'i phyir phyin ci log pa sgra ji bzhin par don la mngon par zhen pa spang bar bya'o/ /zhes pa'i don to/ /gsungs pa yang / / sngags pas de ltar shes nas ni/ /'gro ni byis pa bzhin du spyad/ /de ltar sngags rnams 'grub par 'gyur/ /rnam par mi rtog chos las so/ /zhes so/ /dpal dri ma dang bral ba'i 'od du yang gsungs pa/ /'dir sngags kyi tshul la/ srid pa gsum gyi bdag pos drag po'i las kyi rang bzhin du ma'i sngags rnams rab gsungs gang //de rnams thams cad bdud kyi phyogs nyams 'jig pa skyed byed srog chags rnams la nam yang min/ /'dir bdud rnams kyi ni/ gang zhig dran pa rnams kyi byed po g.yul gyi yul dga' gsod byed gzhan yang mu stegs pa//zhes so/ /dpal dang po'i sangs rgyas su yang gsungs pa/ gang la rigs ni tshad mar gyur pa de la mi yi bdag po rig byed tshad mar 'gyur/ /gang la rig byed tshad ma de la nges par sa gzhi'i gnas su mchod sbyin tshad ma ste/ gang la mchod sbyin tshad ma de la rnam mang phyugs dang mi rnams la 'tshe tshad mar 'gyur//gang la 'tshe ba tshad mar gyur pa de la dmyal ba'i 'jigs byed sdig pa tshad ma'o/ /zhes so/ /de'i phyir 'dir rnal 'byor ma'i rgyud las rdo rje mkha' 'gro ma gang yin pa de rnams ni phyugs kyi skye bo ste mi shes pa rnams gsang pa'i don du sangs rgyas pa mkhas pa rnams kyis gsol ba gdab par mi bya ste/gang la ci'i phyir zhe na/ sems can rnams ni bsrung ba'i don du srid gsum bla mas de rnams 'jig rten khams su spros pa ste/ de'i phyir mchog gi snying rje dang ldan pa de rnams ni 'jig rten rnams srung bar byed cing 'jig rten slu bar byed pa'i sgrub po la sdang bar byed do//ci ste gsad pa la sogs pa'i las byas par gyur pa na/ gal te bsgrub bya las kyi mthu yis shi bar gyur na de'i tshe 'di ni sgrub pa po'i bdud yin te/ bdag gis gsad do zhes pa'i nga rgyal las so/ /dpal shes rab kyi pha rol tu phyin pa sring mo gang gA'i lha mo'i le'ur gsungs pa yang //ji lta ba bzhin du chos thams cad rmi lam lta bur bcom ldan 'das kyis gsungs pa/ /de lta na de'i las bsags pa dang / nye bar bsags par mi 'gyur ro/ /tshe dang ldan pa shA ri'i bu ci ste skyes bu de gnyid sad pa na gal te kun du rnam par rtog par byed cing gsad pa'i 'du shes skyed par byed na de'i las bsags pa'am/nye bar bsags par 'gyur ro/ /ci ltar zhe na/ tshe dang ldan pa shA ri'i bu rnam par rtog par byed cing gsad pa'i 'du shes skyed par byed de/ /de gal te rmi lam gyi nang du srog gcod par byas nas gnyid sad par gyur pa na/ e ma bsad do legs par bsad do//shin tu bsad do/ /ngas bsad do/ /zhes rnam par rtog par byed na de'i las bsags pa'am rnam par bsags par 'gyur ro/ /sangs rgyas bcom ldan 'das kyang rnam par rtog par mdzad cing zad pa'i 'du shes skyed par mdzad na de'i yang las rnams bsags pa'am/ nye bar bsags par 'gyur ro zhes so//dpal kye'i rdo rje'i rgyud la kha che chen pos rtogs pa gnas brtan dul ba'i dpal bshes gnyen gyis gsol ba btab pa rdo rje'i tshig gi snying po bsdus pa'i dka' 'grel du sngags kyi le'u ste gnyis pa'o// //da ni lha'i le'u bshad par bya'o/ / lus su byung ba'i phyir zhes pa la sogs pas na ste/ dpal dri ma dang bral ba'i 'od du yang gsungs pa/ gang gi phyir lus 'byung ba lnga'i bdag nyid la kun rdzob kyi bde ba yang dag par 'byung ba de'i phyir lha zhes brjod par bya'o/ /dpal rdo rje bdud rtsi'i rgyud du yang gsungs pa/ ci'i phyir lha zhes brjod ce na/lus la lus can gnas pa ste/ /rtogs phyir rtogs pa po zhes bshad/ /rang nyid rtogs phyir lha nyid de/ /de phyir lha zhes bshad pa'o/ /dang po byams pa bsgom par bya/ /zhes pa ni gnyen bshes tha mal pa dang dgra bo rnams la pha rol po la phan pa dang bde ba nye bar sgrub par sems pa ni byams pa'o//gnyis pa snying rje zhes pa la sdug bsngal dang sdug bsngal gyi rgyu las sems can rnams thams cad rang gi lus dang srog gis kyang 'don par 'dod pa ni snying rje'o/ /gsum pa dga' ba bsgom par bya/ /zhes pa gzhan la phan pa la rangs pa ni dga' ba'o//bzhi pa btang snyoms bsgom par bya/ /zhes pa gzhan gyi skyon la btang snyoms pa ni/ kun gyi lhag mar btang snyoms so/ /zhes pa'o/ /da ni kha dag pa la sogs pa byas nas phyi nas 'jam pa'i stan la nye bar 'dug ste/ rdzas bcu'i rang bzhin gyi ril bu byas nas khar gzhug go//de nas rang gi snying ga'i hUM yig gi 'od zer rnams kyis nam mkha'i mthil yongs su bkang ste/ /mos pa ji lta ba bzhin du bla ma dang sangs rgyas dang byang chub sems dpa' dang bcas pa'i rje btsun gtso bo rang gi shes rab la 'khyud pa/ /ma ma brgyad kyis yongs su bskor ba nam mkhar bsam par bya'o//de nas 'od zer de rnams log ste rang gi snying gar zhugs pa dang hUM yig las lha mo brgyad bcom ldan 'das la mchod pa bya ba'i ched du dbyung bar bya'o/ /'dir spyan drangs pa dang lhan cig pa rnams spro zhing / rgyan rnams thams cad 'dzin pa yi/ /lha mo brgyad po rnams kyis mchod//gau rI ri dgas mtshan ma 'dzin/ /chom rkun bdud las rgyal ba'i snod/ /ro langs ma ni chu lag ma/ /g+hasmarI ni sman 'dzin zhing / /pu k+ka sI ni rdo rje'i lag /de bzhin ri khrod ma ro 'dzin/ /gdol pa mo ni cang te'u 'khrol/ /g.yung mo chags pas gar mdzad do//zla ba khu ba nyi ma rdul/ /chu ni mi bskyod pa ru brjod/ /sman ni sha dang myos byed do/ /rdo rje rnam par snang mdzad bshad/ /ro ni ro drug yang dag bshad/ /go ku sogs stobs cang te'u/ /gar ni chang gi btung ba ste/ /zhes 'di dam tshig brgyad du bshad/ /rnal 'byor ba yis 'di rnams kyis//kye rdor gtso bo 'khor bcas mchod/ /de nas de mdun sngags pa yis/ /dkon mchog gsum la skyabs su 'gro/ /sdig pa rnams ni bshags par bya/ /bsod nams rnams la rjes yi rang / /rang gi lus nyid dbul ba dang / /lam la brten pa nyid kyang ngo //byang chub sems ni bskyed par bya/ /de nas sangs rgyas gshegs su gsol/ /stong pa nyid la dmigs don du/ /smon lam la sogs rnam spyad bya/ /rang bzhin med phyir stong pa ste/ /rgyu med phyir na mtshan ma med/ /ji ltar sgyu ma rmi lam dang / /dri za'i grong khyer ji bzhin du//de bzhin sems can sangs rgyas rnams/ /de nyid bsgom pas blta bar bya/ /ji ltar sgra brnyan de bzhin du/ /sangs rgyas rnams kyis chos ston pa'o/ /dpal shes rab kyi pha rol tu phyin par rtag tu ngu'i le'ur gsungs pa yang / gang zag med pa sgyu ma lta bu sgra brnyan lta bu ste/ rigs kyi bu khyod de ltar chos rnams yang dag pa'i tshul la so sor rtog pas chos smra ba'i rjes su 'brangs nas ring por mi thogs par shes rab kyi pha rol tu phyin pa la nges par 'byung bar 'gyur ro/ /de ltar rnam par spyad nas ni/ /'khor ba'i bar du srid pa ru/ /sems can rjes su gzung ba'i rgyur//byang chub sems dpa' gnas par mdzad/ /bdud dang nyon mongs snyoms 'jug dang / /shes bya'i sgrib pa nyid kyang ni/ /khro bo chen pos nges bsregs kyang / /cha shas tsam ni srung mdzad pa'o/ /gsungs pa yang / stobs po che la thabs che ba/ /smon lam ye shes rgya mtsho ste//byams chen rang bzhin dpag tu med/ /snying rje chen po blo yi mchog /ces so/ /sangs rgyas byang chub sems dpa' nyid/ /thams cad yongs su rnam spyad nas/ /stong pa nyid la dmigs par bya/ /sngags 'di rnams ni brjod par bya/ /oM shU n+ya tA dz+nyA na badzra swa b+hA ba At+ma kou0f85haM/de nas smon lam dran par bya zhing / smon lam gyi sems de sngags pas rang gi sems kyis lha'i nga rgyal bsgom par bya ste/ 'gro ba rnams rol par bya ba'i ched du'o/ /'dir 'chad par 'gyur ba'i dkyil 'khor gyi 'khor lo dur khrod brgyad kyis brgyan par bsams nas/ de'i dbus su pad+ma 'dab ma brgyad pa dang /nyi ma'i dkyil 'khor dang / de nas chos kyi dbyings kyi bdag nyid can gyi ro nyi ma'i steng du bsgom par bya'o/ /sangs rgyas mtshan gyi rgyu las ni/ /zla ba dbyangs rnams sum cu gnyis/ /gsal byed brgyad cu nyi ma la'o/ /de dag dbus su hUM yig ste/ /de nyid sems dpa' nyid du brjod//lhan cig skyes dga'i rang bzhin te/ /me long mnyam nyid ye shes dang / /so sor rtog pa'i rim pa las/ /de rnams gcig nyid bya ba sgrub/ /gzugs ni yongs su rdzogs pa yang / /chos kyi dbyings su 'di brjod do/ /ye shes lnga pa mchog yin no/ / gsungs pa yang / phung po 'di rnams sangs rgyas 'di/ /rigs 'di rnams kyang ye shes rnams/ /a yig la sogs shes pa 'di/ /me long la sogs rab tu grags/ /zhes so/ /rnam lnga mngon par byang chub pa/ /phyag gnyis kye yi rdo rjer bsgom//sngo dang skya rengs mtshungs pa'i mchog /ban+du dmar po'i spyan dang ldan/ /dpa' bo thod pa'i phreng ba can/ /mi bskyod pa yis thod byas la/ /'khor lo can dang rna cha dang / /mgul rgyan lag gdub ska rags nyid/ /sangs rgyas la ni rnam dag pas/ /'di rnams phyag rgya lnga ru bsgrags//'khor lo can la mi bskyod gnas/ /rna char 'od dpag med pa bzhugs/ /mgul gyi phreng bas rin chen dbang / /gdu bur rgyal ba rnam snang mdzad/ /ska rags la ni don yod gnas/ /de ltar sangs rgyas rnams rab bzhugs/ /gti mug rdo rje sogs lha mo/ /mig sogs skye mched rnams la'o//lus ngan sems kyi rdo rje la/ /oM AHhUM ni rnam par dgod/ /ye shes dkyil 'khor dbang bskur dang / /bstod dang mchod pa rnams kyang bya/ /g.yon na rdo rje thod pa dang / /kha T+wAM ga yang g.yon pa na/ /g.yas na rdo rje nag po ste/ /hUM yig 'don pa'i bdag nyid can//dur khrod du ni mgon po rol/ /rnal 'byor ma yis yongs su bskor/ /dbugs rgyu zhes pa'i rig pa 'dis/ /dur khrod ces ni mngon par brjod/ /gsungs pa yang / de 'dra'i rnal 'byor ma brgyad rnams kyis yongs su bskor ba'i bcom ldan 'das dur khrod na'o zhes pa 'di ni dpa' bo gcig pa ma yin no//de'i phyir dur khrod du rol zhes gsungs te/ /'byung ba lnga'i bdag nyid can gyi phyir ro/ /de bzhin du 'dir yang lhan cig skyes pa'i sku ro yis brjod pa'o/ /'di ni dgongs pa yin te ji ltar dur khrod ni sems can rnams bdag med pa de ltar thams cad du'o zhes pa sems can thams cad bdag med par gnas pa'i phyag rgya ni dur khrod do//sems can rnams sems can gyi rang bzhin gyis stong pa sems can gyi gnas rnams kyang sems can gyi gnas kyi rang bzhin gyis stong pa'o/ /zhes pa dur khrod kyi don to/ /de ltar phyag gnyis pa'i sgrub thabs kyi nges pa'o//phyag bzhi pa ni bdud bzhi rnam par dag pa ste/ gong du brjod pa'i gzugs dang sku mdog can hU~M las byung ba'o/ /phyag g.yon gyi dang pos skyes pa'i thod pa lha dang lha ma yin rnams kyi khrag gis gang ba dang / phyag g.yas kyi dang po na rdo rje'o/ /phyag lhag ma dag gis shes rab ma la 'khyud pa ste/shes rab rdo rje phag mo ni bcom ldan 'das kyi gzugs can no/ /phyag drug pa ni zhal gsum g.yon dmar ba/ g.yas pa zla ba dang skya rengs lta bu/ zhal dang po sngo ba/ gcer bu sngar brjod pa'i kha dog dang gzugs can/ phyag rnams ni pha rol tu phyin pa drug rnam par dag pa'o//dpal mtshan yang dag par brjod par gsungs pa yang / sbyin bdag chen po gtso bo ste/ /tshul khrims chen po 'chang ba'i mchog /bzod chen 'chang ba brtan pa'o/ /brtson 'grus chen po pha rol gnon/ /bsam gtan chen po ting 'dzin gnas/ /shes rab chen po lus 'chang ba//zhes so/ /'di'i nges pa'i don ni dpal dang po'i sangs rgyas su gsungs pa yang / /nor stong sbyin pa yid dang bud med 'grogs pa las kyang 'pho ba med pa'i tshul khrims te/ /bzod pa dgra sogs mi 'jug pa ste rlung gi gnyi ga'i bsgrod 'jig brtson 'grus nyid/ / bsam gtan shes rab dag kyang lhan skyes bde la gnas sems kun du 'gro byed kun gyi skad/ /de las sems can don dang rdzu 'phrul srid pa mthar byed mi skye thob ste gzhan bzhi rnam shes so/ /phyag g.yon gyi dang po na rtse gsum pa/ phyag g.yas kyi dang po na rdo rje/ phyag g.yon gyi gnyis pa na dril bu/phyag g.yas kyi gnyis pa na gri gug /phyag lhag ma gnyis kyis rdo rje lcags sgrog ma la snyoms par zhugs pa'o/ /bcom ldan 'das ji lta ba de bzhin du shes rab ma ste/ g.yas pa dang g.yon pa na gri gug dang thod pa'o/ /khams gsum pa'i bdag nyid can gyi ro mnan pa'o//de ltar phyag gnyis pa dang phyag bzhi pa dang / phyag drug pa'i sgrub thabs kyi nges pa'o zhes pa ni drang ba'i don to/ /da ni rdzogs pa'i rim pa la 'jug par bya ste/ de nyid du gsungs pa/ bskyed pa'i rim pa nyid dang ni/ /rdzogs pa yi yang rim pa nyid/ /rim gnyis mnyam par gnas nas ni//rdo rje can gyis chos ston to/ /des na dpal sam+bu Ta la sogs pa rgyud sna tshogs kyi rim pas nges pa'i don gsal bar bya ste/ /rkang pa'i mthil du rlung chen po/ /rtsol chen rlung ni gzhu yi dbyibs/ /sum mdo skyed pa'i phyogs gnas pa/ /de bzhin me ni gru gsum mo//chu ni zlum po'i rnam pa can/ /ngo bo lte bar gnas pa'o/ /snying gar sa gzhi nyid kyang ni/ /kun nas gru bzhi pa yin na/ /keng rus dbyug pa'i ngo bo ni/ /de bzhin ri rgyal lhun po'o/ /de nas spyi bo'i char gnas pa/ /sum cu gnyis 'dab 'dam skyes la/ /dbyangs dang gsal byed yang dag 'byung //byang chub yig ni sum cu gnyis/ /mgo bo'i dbus gnas klad pa ru/ /gang zhig brjod pa de yin te/ /de yi dbus su haM yig ni/ /thig le'i gzugs can gzhom du med/ /bdud rtsi 'dzag pa'i ngo bo yis/ /nyin dang mtshan du rnam par gnas/ /me ni yang dag dga' byed pa//de yis nA da 'byed pa'o/ /der gser gyi gdan bkra ba'i dbus su gnas pa ming la sogs pa dang ming med pa lhan cig skyes pa dri ma med pa zla ba'i 'od can/ yan lag thams cad kyi tshigs su rim gyis 'gro bar byed cing / pad+ma'i sna rtse'i phyogs su nye bar 'byung ste/ de ni brtan dang g.yo bdag nyid/ /'jig rten kun gyi rtsa ba'o/ /sa bon ngo bor gnas pa ni/ /mi gsal gsal ba'i rang bzhin can/ /lus can kun gyi ngo bo ni/ /dang por de las skyes pa yin/ /de nyid dkyil 'khor zhes bshad do/ /dngos po rnams kyi snying po mchog /de ni 'dzin cing len pa'i phyir//lus ni dkyil 'khor yin par 'dod/ /sum cu rtsa gnyis rtsa chen ni/ /'khor lo 'du bar byed par 'dod/ /byang chub sems ni rin chen che/ /dkyil 'khor de nyid dkyil 'khor lo/ /de yis yongs rdzogs dkyil 'khor du/ /'gyur ba nyid de the tshom med/ /der gnas sa bon las rdzogs pa//de dpal he ru ka ru brjod/ /shrI yig yang dag bshad pa ni/ /thams cad skyed la byed rgyu'o/ /shrI yig kla klo'i skad kyis ni/ /b+ha ga'i don la mngon par brjod/ /sems ni he ru ka nyid de/ /de dpal he ru ka ru brjod/ /shrI sgra gnyis med don gyi ste/ /he yig rgyu dang bral ba'o/ / ru yig ngo bo mnyam pa'i don/ /ka yig gang du'ang mi gnas pa'o/ /de ltar lte ba dang gsang ba dang rdo rje nor bur lus dang ngag dang sems kyi chos kyis lhan cig skyes pa'i dga' ba ni bcom ldan 'das he ru ka ru brjod par bya'o/ /de'i phyir lhan cig skyes pa'i dga' ba ye shes rdo rje bzhi pa ste/ de ni phyi dang nang gi ngo bos thams cad la khyab nas rnam par gnas pa'i lhan cig skye ba'i sku de kho na sems can gyi don byed pa'i ched du longs spyod rdzogs pa dang sprul pa'i sku'i bdag nyid de dpal bde ba chen po rdo rje 'dzin pa'o//mtshan yang dag par brjod par yang gsungs pa/ dus gsum du 'jug pa'i sangs rgyas rnams kyi thugs la gnas pa'i ye shes kyi sku nga'o//zhes so/ /gsungs pa yang / sangs rgyas kun gyi sku gang yin/ /snang ba med cing gsal byed min/ /ma skyes ma byas dag pa ste/ /dngos med la sogs rnam par spangs/ /zhes so/ /gsungs pa yang / ji ltar me long gzugs la ches dang bar//yan lag mtha' dag ldan pa'i gzugs snang ba/ /de ltar rdo rje 'dzin pa rtag nyid du/ /dpe byad brgyad cu'i mtshan gyis phyug pa'o/ /ji ltar nam mkha' dbang po'i mtshon cha kha dog du mar mthong / /'jig rten pa la dge ba la sogs la sa ni ston par byed/ /de ltar rdo rje 'dzin pa dkar sogs kha dog thob nas ni//nges par las ni ma tshang med pa phun sum tshogs par byed/ /gsungs pa yang / gzugs med gzugs dang ldan pa mchog /sna tshogs gzugs can yid las skyes/ /gzugs rnams thams cad snang ba'i dpal/ /gzugs brnyan ma lus 'chang ba po/ / zhes so/ /gser dang dngul dang nor bu dung gi rdo dang byi ru dang / /bai DUr+ya dang zangs dang ra gan la sogs gang gnas pa/ /de ni ri bong can nyid gcig pu nam mkha'i nang dbus nas/ /'jug bzhin pa yi lus kyi so sor snang ba ji lta bar/ /de bzhin nges par thugs kyi rdo rje mgon po de nyid ni/ /sna tshogs rnam pas skye bo'i tshogs la gnas par mdzad pa ste//de yang zad min rang bdag nyid la sna tshogs ngo bo can/ /sgyu ma'i rang bzhin mtha' dag 'jig rten rnams la khyab pa'o/ /dpal mtshan yang dag par brjod par yang gsungs pa/ mkhas pa sgyu 'phrul chen po 'chang / /sgyu 'phrul chen po'i don bsgrub pa//sgyu 'phrul chen po dga' bas dga'/ /sgyu 'phrul chen po'i mig 'phrul can/ /zhes so/ /dpal dang po'i sangs rgyas su yang gsungs pa/ /sangs rgyas rnams kyi'ang rtog bya min pa dpag med yon tan dang ldan sangs rgyas sprul pa ni/ / sgyu ma srid pa gsum gyi gnas su bdag nyid ston byed brgya byin gzhu ni ji bzhin nyid/ /sna tshogs dngos rnams kyis che rgyal ba dang bcas lha mi rnams kyi rang rang sems la ni/ /rab zhugs 'di ni ma skyes chos te chu la mkha' bzhin 'dir ni skye bar 'khrul ster ba'o/ /dpal shes rab kyi pha rol tu phyin par yang gsungs pa/rab 'byor de ci snyam du sems/ sgyu ma yang ma yin sgyu ma lta bu yang ma yin pa'i sems gang yin pa de yang dag par rjes su mthong ngam/ de ci khyod kyis sgyu ma'am sgyu ma lta bu'i sems las gzhan du chos gang bla na med pa yang dag par rdzogs pa'i byang chub tu mngon par rdzogs par sangs rgyas pa'i chos de yang dag par rjes su mthong ngam/gsol pa/ bcom ldan 'das de ni lags so/ /bcom ldan 'das bdag gis sgyu ma'am sgyu ma las gzhan du chos gang bla na med pa yang dag par rdzogs pa'i byang chub tu mngon par rdzogs par sangs rgyas pa'i chos de yang dag par rjes su ma mthong lags so zhes so//dpal dam tshig gsum gyi rgyan du yang gsungs pa/ sgyu ma'i ngo bor kun rtogs nas/ /rang bzhin gyis yongs mya ngan 'das/ /sgyu ma'i rang bzhin sems kyis ni/ /'dir ni sgyu ma'i dkyil 'khor nyid/ /nam mkha'i khams kyi mthar thug par//ma ma'i tshogs kyis yang dag 'khrigs/ /rnam pa thams cad mchog ldan pa/ /chos kyi dbyings kyis rnam rol pa'o/ /zhes so/ /rnal 'byor pa yis 'di kun spro/ /bdag nyid kyis ni bsdu yang bya/ /sgyu ma lta bu'i ting 'dzin gnas/ /dkyil 'khor rnams kyang rgya che ba/ / gzugs sgra de bzhin dri dang ni/ /ro dang reg bya mdzes pa yang / /'dod chags chen po'i tshul gnas pa'i/ /rnal 'byor pa yis rtag myong bya/ /gsungs pa yang / 'dod pa'i yon tan lnga yi bde/ /byis pa rnams ni 'ching bar 'dod/ /rnal 'byor pa rnams chos de yis/ /sangs rgyas nyid kyang thob par byed//mang du brjod pas 'dir ci bya/ /rdo rje theg pa de nyid las/ /rnal 'byor pa yis gang gang dmigs/ /de de sgyu ma lta bur brtag /gang gang dbang po'i lam nyid du/ /gyur pa de de rang bzhin las/ /mchog tu grub pa'i rnal 'byor gyis/ /sangs rgyas kun gyi rang bzhin thob/ / gsungs pa yang / 'di ni gnyis med ces bshad de/ /'di ni byang chub sems mchog nyid/ /shes rab pha rol phyin nyid kyang / /pha rol phyin pa kun rang bzhin/ /'gro ba brtan dang g.yo ba rnams/ /'di nyid du ni thams cad skyes/ /mtha' yas byang chub sems dpa' dang / /sangs rgyas nyan thos sogs rnams so//zhes pa la sogs pa'o/ /dpal kye'i rdo rje'i rgyud la kha che chen pos rtogs pa rdo rje'i tshig 'byed pa snying po bsdus pa'i dka' 'grel du lha'i le'u ste gsum pa'o// //da ni dbang bskur ba'i le'u bshad par bya'o/ /bcom ldan 'das kyis bka' stsal ba/ /rang gi snying ga'i sa bon las 'od zer nges par phyung ste/sngon po la sogs pa'i 'od zer lcags kyu'i rnam pa de rnams kyis khams gsum na bzhugs pa'i sangs rgyas de rnams spyan drangs la/ /ma mo brgyad kyis yang dag par mchod nas gsol ba gdab par bya'o/ /oM a b+hi Shi ny+tsa n+tu mAM sarba ta thA ga ta zhes pa'o/ /de nas sangs rgyas de rnams he ru ka'i rnam pa rnams kyis de bzhin gshegs pa lnga'i bdag nyid kyi bdud rtsis gang ba'i bum pa rnams kyis dbang bskur bar bya'o//dbang bskur bzhin pa nam mkha' las me tog gi char 'bab par 'gyur ro/ /lha rnams kyi rnga bo che'i sgra rnams byed do/ /gur kum gyi char ba 'byung ngo / / gzugs rdo rje ma la sogs pa rnams kyis mchod pa byed do/ /spyan ma la sogs pa rnams kyang rdo rje'i glu blang bar bya'o/ /dbang bskur nas spyi bor rang gi rigs kyi dbang por 'gyur ro/ /'dis ni he ru ka rdzogs par 'gyur ro/ /de nas sku la sogs pa byin gyis brlab pa'i sngags brjod par bya ste/ oM sarba ta thA ga ta kA ya bA ka tsi t+ta badzra swa b+hA wa At+ma kou0f85haM/ de ltar thun gsum du byin gyis brlabs par bsgoms nas langs te dus thams cad du lha'i gzugs kyis gnas par bya'o zhes drang ba'i don to/ /da ni nges pa'i don gsal bar bya ste/ /dpal dang po'i sangs rgyas su gsungs pa yang / 'khor bar mi nyid du ni 'gyur ba 'ga' zhig tu ste chos kyi blo yang res 'ga' na/ /de bas sangs rgyas rjes chags dge ba'i dbang gis 'gyur zhing dang po'i theg par rab tu 'jug /de bas dpal ldan rdo rje theg pa bsgom pa la ni blo gros ma lus brgya lam dag na 'jug /de las sangs rgyas nyid 'dod mchog gi bde ba'i go 'phang la 'jug e ma shin tu dka'/ /nyung ngu'i rgyud 'dir dbang bskur ba'i le'u'i don rtsa ba'i rgyud du yang gsungs pas de'i phyir de nyid la 'jug par bya'o/ /de'i phyir rtsa ba'i rgyud du bcom ldan 'das kyis bka' stsal pa/ /ji ltar bskyed pa'i rim pa ni//rdo rje snying pos bshad kyis nyon/ /sgo nga skyes dang mngal nas skyes/ /srid pa skye ba'i rim rnam gnyis/ /sgong skyes tshangs pa'i sgo nga skyes/ /bshad de 'jig rten khams 'byung ba'o/ /mngal nas skyes pa gnyis pa ste/ /bud med mngal du 'byung ba'o/ /dang po stong nyid byang chub ni//'chi mthar 'pho ba'i bde ba'o/ /gnyis par sa bon bsdu ba ni/ /ma yi mngal du khu ba brdul/ /khu ba rdul dang sngags dang ni/ /srog dang rnam shes kho na ste/ /lnga po rnams kyis lus rdzogs pa/ /gzugs brnyan rdzogs par brjod par bya/ /rnam lnga mngon rdzogs byang chub pa'o/ /a ba d+hU tIr bde bas rgyal//dpal dri ma dang bral ba'i 'od du yang gsungs pa/ ma rig zhugs pa'i 'chi ba na/ /de la 'du byed rnams skye ba'o/ /de nyid dang po'i mgon por brjod/ /mchog tu mi 'gyur sna tshogs gzugs/ /dpal mtshan yang dag par brjod par yang gsungs pa/ rnam par rtog med lhun gyis grub/ / dus gsum sangs rgyas las byed pa/ /sangs rgyas thog ma tha ma med/ /dang po'i sangs rgyas gnyis rtogs med/ /ces so/ /'dir gzugs rdzogs pa na/ pha dang ma yi dkar dang khrag /de bzhin srog dang thur sel gnyis/ /sems kyi rdo rje yang dag ldan/ /lus bskyed pa yi rgyu yin no/ /srog dang thur sel rim ji bzhin//'od dpag med dang rin chen 'dzin/ /lus ngag yid dang chags pa rnams/ /sems kyi rdo rje can gyi sgo/ /khu ba las ni zla ba skye/ /khrag las nyi ma yang dag 'byung / /srog las sgra gcan nges par rdzogs/ /thur sel las kyang dus kyi me/ /khu ba las ni rtsa rnams skye//rus pa khu ba las byung ba'o/ /rdul las khrag ni yang dag 'byung / /khrag las sha ni kun nas skye/ /sha las pags pa skye ba yin/ /rus pa las ni rkang skye 'gyur/ /phyi rol skye mched longs spyod che/ /bde ba chen po sad byed de/ /puk+ka sI dang ri khrod ma/ /gdol pa de bzhin g.yung mo ste//sa dang chu dang me rlung gis/ /rmi lam gnas skabs rang bzhin las/ /byis pa de rnams kyis blang ba/ /ma yi mngal nas phyir byung ba'o/ /sad pa'i gnas skabs yang dag thob/ /mig la sogs pa byin brlabs pa/ /rnam shes drug po'i rab sbyor las/ /yul lnga po rnams 'dzin par byed//dpal dri ma med pa'i 'od du gsungs pa yang / /byis pa skyes la ma yis ni/ /chu yis 'khru ba'i dbang skur byed/ /de yi gtsug phud rab gzhag pa/ /dbu rgyan du ni yongs su brtags/ /de yi rna ba 'bugs la sogs/ /dar dpyangs dbang bskur zhes par bshad//byis pa dgod dang smra ba ni/ /dril bu rdo rje'i dbang bskur ro/ /lnga la longs spyod brtul zhugs yin/ /ming gis ming gi dbang bskur ro/ /klog la sogs pa'i rjes snang ba/ /pha bdag gis ni rtag tu ster/ /de ltar rnam pa bdun gyis ni/ /dbang bskur bdun du rab tu grags//de yi bag ma len byed pa/ /gsang ba'i dbang bskur zhes par bshad/ /de yi shes rab gtod pa ni/ /de yi lag pas 'dzin pa brjod/ /shes rab thabs kyi snyoms 'jug pa/ /'chi ba'i mtha' ni de bder 'dod/ /de bzhin du dpal rtsa ba'i rgyud du gsungs pa yang / rigs kyis byis pa rgyas btab cing //byis pas rigs la rgyas btab pa/ /pha yis bu ni rgyas btab cing / /bus kyang pha la de bzhin no/ /'bras bus rgyu la rgyas btab cing / /rgyu yis 'bras bur rgyas btab pa'o/ /'bras bu byed rgyu'i 'brel pa ni/ /rnam par dpyad pas dmigs su med/ / 'bras bu byed rgyu brtag pa 'di/ /de phyir bshad par bya yis nyon/ /sa bon sdong po'i rang bzhin gyis/ /byed rgyu'i 'bras bu'i mtshan nyid du/ /byis pas thams cad kun du brtags/ /rgyu la 'bras bu 'gyur ba ste/ /sa bon rgyu la ltos pa ni/ /'bras bu ljon pa 'gyur ji bzhin/ / de ltar rgyu la 'bras bur 'gyur/ /'bras bu la yang byed rgyur 'gyur/ /'bras dang byed rgyu gnyis dag 'gyur/ /de ltar de rnams bzhi nyid do/ /sa bon med par sdong bu min/ /ljon shing med par sa bon min/ /byed rgyu med par 'bras bu gang / /dam bca' bya ba don med 'gyur//dpal dang po'i sangs rgyas su gsungs pa yang / gang gis myu gu 'di bskyed skyed byed de ni dngos po skyes nas rnam pa nyams par 'gyur/ /nyams pa de yis skyes par rab tu 'gyur te slar yang sa bon rgyal po skyed byed do/ /snga ma gang de bzhin gyi dngos las shing zhes tshig ste rang gi ngo bos skyes pa min//gang gis stong pa nas ni slar 'ongs bde ba'i skad cig de yis stobs bcu 'gro bar 'gyur/ /dpal mya ngan las 'das pa'i mdor yang gsungs pa/ de nas bcom ldan 'das bsam gtan dang po la snyoms par zhugs so/ / bsam gtan dang po las bzhengs nas bsam gtan gnyis pa la snyoms par zhugs so/ /bsam gtan gnyis pa las bzhengs nas bsam gtan gsum pa la snyoms par zhugs so/ /bsam gtan gsum pa las bzhengs nas bsam gtan bzhi pa la snyoms par zhugs so//bsam gtan bzhi pa la gnas te/ de bzhin gshegs pa yongs su mya ngan las 'das so zhes so/ /de'i phyir bcom ldan 'das slar yang skye ba dang zhig pa lam yin te/ de nyid bcom ldan 'das kyi dag pa'i sku'o/ /zhes pa la sogs pa'o/ /gsungs pa yang / sangs rgyas thams cad skyed pa po//sangs rgyas sras po dam pa'i mchog /shes rab srid 'byung skye gnas te/ /chos kyi skye gnas srid mthar byed/ /ces so/ /bde ba gang gis phung por 'gyur/ /de rnams kyis ni bde ba'ang 'gyur/ /bde gnas bde la rjes chags skad cig 'dir ni lhan skyes dngos po gzhan la rjes chags min//phung po gang rnams de yis bskyed rnams slar yang bde ba'i skad cig de yi skyed byed do/ /dag pa las chos de las gzhan te slar yang de las gzhan dang de las rnam dag pa'o/ /dag pa'i sa las sa bon btab las rtsa ba rnams dang lo ma me tog 'bras bu bzhin//dpal zhi ba'i lha'i zhabs kyis kyang gsungs pa/ bskal pa du mar rab dpyod mdzad pa yis/ /thub dbang rnams kyis 'di nyid phan par gzigs/ /gang phyir bde ba nyid kyis bde 'phel dang / /tshad med skye bo'i tshogs rnams sgrol bar mdzad/ /ces so/ /de'i phyir/ rdo rje sems dpa' skyed por 'gyur/ /phung po rnams kyi 'chi las bde/ /phung po rnams de'i skyed byed 'gyur/ /'chi dang 'pho ba'i rgyu las so/ /bde ba med par phung po min/ /phung po med par bde ba min/ /rgyu med par ni 'bras bu med/ /'bras bu med pa'i rgyu yod min/ /rgyu dang 'bras bu dag gnyis 'gyur//de ltar de rnams nges pa bzhi/ /'di yi don ni 'di yin te/ /der ni bzhi yi rgyas 'debs pa/ /su yis rab tu brtag par nus/ /slar yang bzhi po bzhi rnams te/ /spro dang bsdu ba'i chos las so/ /rnam par gnas med thal 'gyur bas/ / 'khor ba'i srid pa'i bar gnas so/ /zhes pa'o/ /dpal snang ba bsam gyis mi khyab pa'i khye'u'i mdo sder yang gsungs pa/ /khye'us gsol pa/ /sems can 'di ni dmigs min na/ /thub khyod sems can su zhig skyob/ /ci ste chos de gzigs med na/ /su yi nyon mongs skye bar 'gyur//bcom ldan 'das kyis bka' stsal pa/ /ngag 'di nyid ni de bzhin te/ /sems ni rtag tu 'od gsal ba'o/ /sems can glo bur nyon mongs pa/ /dam pa min pas rtag nyon mongs/ /khye'us gsol pa/ phyi'am nang gi 'ga' zhig tu 'ang / /nyon mongs rnams ni dmigs min na//de rnams glo bur ci ltar lags/ /bdag gis zhu ba 'di gsung gsol/ /bcom ldan 'das kyis bka' stsal pa/ /ji ltar bar snang sprin rnams ni/ /mthong yang de rnams de bzhin med/ /de ltar nyon mongs skye ba ni/ /mthong ste de yang de bzhin med/ / khye'us gsol pa/ log pa'i chos de gang gnas pa/ /de la de ni chos nyid na/ /'o na de lta'i mtshan nyid chos/ /log pa'i dmigs par mi 'gyur ro/ /bcom ldan 'das kyis bka' stsal pa/ /sngon gyi mtha' dang phyi ma'i mtha'/ /de bzhin da ltar byung ba nyid/ /skad cig gcig gis rtogs na nga //mnyam pa nyid ni ston par byed/ /khye'us gsol pa/ chos rnams yi ge med pa ni/ /thub pa ston par rigs ma yin/ /chos med pa la chos gsungs pa/ /khyod kyis 'jig rten slu bar mdzad/ /bcom ldan 'das kyis bka' stsal pa//nga ni 'jig rten slu ba min/ /chos min smra ba'ang nga ma yin/ /phyin ci log 'gyur sems can gyis/ /nyon mongs nga ni sel bar byed/ /dam pa ma yin 'du shes ldan/ /byis pas log par brtags zhes bya/ /don du khong du chud don du/ /'dren pa rnams ni 'byung bar byed//skye dang zad pa'i chos kyis ni/ /'bras bu rgyu dag srid par gnas/ /'bras bu rgyu dag 'gog pa yis/ /de dag skye med 'jig pa med/ /dpal bdun brgya par yang gsungs pa/ bcom ldan 'das kyis bka' stsal pa/ /'jam dpal gang gi tshe khyod shes rab kyi pha rol tu phyin pa sgom pa de'i tshe/ci zhig la gnas nas khyod shes rab kyi pha rol tu phyin pa sgom/ 'jam dpal gyis gsol pa/ bcom ldan 'das gang [(]gyi [,]gi [)]tshe bdag gis shes rab kyi pha rol tu phyin pa bsgom pa na/ gang la yang mi gnas pa de'i dus su shes rab kyi pha rol tu phyin pa sgom/bcom ldan 'das kyis bka' stsal pa/ 'jam dpal mi gnas pa la khyed shes rab kyi pha rol tu phyin pa sgom pa ci zhig yin/ 'jam dpal gyis gsol pa/ bcom ldan 'das gang ci la yang mi gnas pa de kho na shes rab kyi pha rol tu phyin pa sgom pa'o zhes so//dpal shes rab kyi pha rol tu phyin par de bzhin nyid kyi le'ur bka' stsal pa/ rab 'byor gyis smras pa/ tshe dang ldan pa shA ri'i bu 'dir de bzhin nyid la khyod kyis byang chub sems dpa'i chos 'ga' zhig gcig kyang yang dag par rjes su mthong ngam ci smras pa/ tshe dang ldan pa rab 'byor de ni ma yin no//rab 'byor gyis smras pa/ tshe dang ldan pa shA ri'i bu 'di ltar bden pa la gnas pas byang chub sems dpa'i chos nye bar mi dmigs na/ khyod la 'di ltar 'di ni nyan thos kyi theg pa'o/ /'di ni rang sangs rgyas kyi theg pa'o/ /'di ni theg pa chen po'o zhes pa ga la yin zhes so//dpal 'dus par gsungs pa yang / e ma rdo rje e rdo rje/ /e ma rdo rje ston mdzad pa/ /'di la lus dang sems med cing / /de la gzugs ni rnam par sgom/ /rang bzhin dag pa bdag med pa/ /chos kyi dbyings ni bdag med la/ /brtags pa'i rdo rje las byung ba/ /smra bar byed dang smra ba'ang min//zhes so/ /dpal tog tse ba'i zhabs kyis gsungs pa yang / rtog dang mi rtog sbyor ba yis/ /gnyis med mchog ni bsgom mi bya/ /rtog med bsam gyis mi khyab pas/ /rdo rje can gyi bde ba 'thob/ /da ri ka pa'i zhabs kyis kyang gsungs pa/ srid pa kho na byang chub sems//rang bzhin gyis sems yongs shes te/ /gnyis dag ro mnyam byas nas ni/ /sems dang sems med rnam par spangs/ /zhes so/ /de bzhin du dpal la k+Sh+mI'i sgrub thabs su yang gsungs pa/ ji srid brtan dang g.yo ba'i dngos/ /srid gsum gnas 'dir yod pa rnams//de kun de nyid rnal 'byor gyis/ /rdo rje 'dzin pa ji bzhin blta/ /dpal in+d+ra b+hU ti'i zhabs kyis kyang gsungs pa/ ji ltar nam mkha' mi gnas pa/ /khyab cing mtshan nyid rnam par spangs/ /'di de de nyid dam pa'o/ /rdo rje ye shes bla na med/ / dpal yan lag med pa'i zhabs kyis kyang gsungs pa/ rnam 'gyur med cing dgongs pa med/ /'dod pa med cing sdig pa bral/ /dang po'i tha ma'i rtog las grol/ /nam mkha' bzhin du mkhas pas sgom/ /'di nyid du gsungs pa yang / sgom pa po med bsgom bya med/ / sngags med lha rnams yod pa min/ /spros pa med pa'i rang bzhin las/ /sngags dang lha ni yang dag gnas/ /zhes so/ /dpal shes rab kyi pha rol tu phyin par lha'i le'ur yang gsungs pa/ thob pa med/ mngon par rtogs pa med/ lhag par rtogs pa med/ lam med/ lam gyi 'bras bu med/ ye shes med shes pa med/ skye ba med/ 'jig pa med/ 'byung ba med/ zag pa med/ 'gog pa med/ rnam par sgom pa med ces so/ /de bzhin du dpal gsang ba'i dbang po'i nor bu'i thig ler gsungs pa yang / de nyid dngos po thams cad kyis/ / dus kun du ni yang dag gnas/ /thog mtha' med pa'i sems dpa' ni/ /rdo rje sems dpa' dam pa'i bde/ /zhes so/ /gsungs pa yang / stong nyid gzugs brnyan rnal 'byor gyis/ /khams rnams ji ltar bde spyad nas/ /byang chub dri ma med rtogs pa//gzhan gyi sems la lhag gnas 'gyur/ /mgon po byams pas gsungs pa yang / /'di la gsal bya ci yang med/ /gzhag par bya ba ci yang med/ /yang dag nyid la yang dag lta/ /yang dag mthong nas rnam par grol/ /gsungs pa yang / de phyir yang dag yang dag min/ /gang gang shin tu goms gyur pa//bsgoms pa'i stobs ni rdzogs pa na/ /bde gsal mi rtog blo 'bras bu/ /'di skad bshad pa ni/ sangs rgyas dang byang chub sems dpa' dang grub thob sna tshogs pa'i rim pa'i man ngag phyin ci ma log pa yongs su dag pa'i rang bzhin gyi chos gcig pu ste/ de rnal 'byor pa rnams kyis yid ches pa/brtan pa nyid 'thob pa'i ched du rab tu gsal bar byas pa'o zhes pa'o zhes pa/ dpal kye'i rdo rje'i rgyud du kha che chen pos rtogs pa rdo rje'i tshig gi snying po bsdus pa'i dka' 'grel du dbang bskur ba'i le'u ste bzhi pa'o// //de nas 'di las de kho na nyid kyi le'u bshad par bya'o//ci zhig de kho na nyid du brjod par bya zhe na/ yod min med yin yod med min/ /gnyis ka'i bdag nyid min pa'ang min/ /mtha' bzhi las ni rnam grol ba'o/ /de kho na nyid bde ba chen por rig /'di yi don ni 'di yin te/ /dpal dri ma med pa'i 'od du yang gsungs pa/'dir shes rab ni cha bco lnga'i bdag nyid de dkar po'i phyogs so/ /zla ba'i nyams pa ni nag po'i phyogs te thabs so/ /de ltar na dkar po ni mtshan mo'o/ /nag po ni nyin mo'o/ /de'i phyir lhan cig skyes pa'i sku shes rab ma yin thabs kyang min pa 'di ni sangs rgyas rnams kyi lhan cig skyes pa'i sku ste/de ltar yod pa dkar po'i phyogs ma yin la/ med pa ste cha'i dngos po med pa nag po'i phyogs ma yin no/ /yod med min te 'di dag phan tshun 'gal ba'i phyir tshogs pa med do/ /gnyis ka'i bdag nyid med pa yang min/ /zhes pa ni nag po dang dkar po'i phyogs 'di dag las ma gtogs pa'i lhan cig skyes pa'i bde ba de med do//de ltar mtha' bzhi yongs su dag pa cha bcu drug pa stong pa nyid kyi chos can ni lhan cig skyes pa'i skur brjod par bya ste/ bzhi pa zad pa las rgyu mthun pa'i mtshan nyid du rnal 'byor pas rig par bya'o/ /de ltar ma ning ngo zhes grub po/ /lha mo bzhis zhus par yang gsungs pa/thub pa chen po'i chos phung po/ /stong phrag brgyad cu rtsa bzhi la/ /gang rnams de nyid mi shes pa/ /de rnams thams cad 'bras bu med/ /ces so/ /de nyid rin chen ma thob par/ /nam yang dngos grub min pa nyid/ /zhing rab rnam par dag gyur kyang //sa bon med par myu gu bzhin/ /zhes so/ /ngo bos gzugs med ces pa la sogs pa gsal bar bya ste/ ngo bo ni rang gis rig par bya ba de bzhin gshegs pa'i ye shes so/ /ngo bo des te gzung ba dang 'dzin pa byed pa dang / 'dzin pa khams bco brgyad kyi rnam par 'gyur ba dang bral ba des rnal 'byor pa rnams la phyi rol gyi gzugs med mthong ba po med/mig gi rnam par shes pa med/ de bzhin du thos pa po med/ /sgra med rna ba'i rnam par shes pa med do/ /de bzhin du dri med snom pa po med/ sna'i rnam par shes pa med do/ /de bzhin du ro med myong ba po med lce'i rnam par shes pa med do//de bzhin du reg bya med reg pa po med/ lus kyi rnam par shes pa med do/ /de bzhin du chos kyi khams med/ 'dzin pa po med yid kyi rnam par shes pa med do/ /de ltar mig la sogs pa rnams kyang yod pa ma yin te/ de ltar khams bco brgyad dang bral ba'i de kho na nyid rin po che rnal 'byor pas bsgom par bya'o//dpal shes rab kyi pha rol tu phyin par yang gsungs pa/ gzugs la gnas par mi bya'o/ /tshor ba dang 'du shes dang 'du byed rnams dang / rnam par shes pa la gnas par mi bya'o/ /sa'i khams la gnas par mi bya'o//chu'i khams dang me'i khams rlung gi khams dang / stong pa nyid kyi khams la gnas par mi bya'o zhes so/ /'di nyid du gsungs pa yang / mchog dgar bsgom bya med cing sgom pa po yang med/ /lus kyang med de gzung ba med cing 'dzin pa'ang med/ /ces pa la sogs pa'o/ / de'i phyir chos thams cad bdag med par yang dag par rjes su blta bar bya'o/ /phyi dang nang gi bdag nyid thams cad stong pa nyid ces pa'o/ /dpal rtsa ba'i rgyud du yang gsungs pa/ bcom ldan 'das kyis bka' stsal pa/ /'gyur ba'i ma rig 'gog pa yis/ / 'du byed nges par 'gag par byed/ /'du byed nges par 'gog pa yis/ /rnam par shes pa 'gag par byed/ /rnam par shes pa 'gog pa yis/ /ming dang gzugs ni 'gag par byed/ /ming dang gzugs ni 'gog pa yis/ /skye mched drug rnams 'gog par byed/ /skye mched drug rnams 'gog pa yis//reg pa yang ni 'gag par byed/ /reg pa 'gog pa yis kyang ni/ /tshor ba nges par 'gag par byed/ /tshor ba nges par 'gog pa yis/ /sred pa yang ni 'gag par byed/ /sred pa 'gog pa yis kyang ni/ /nye bar len par 'gag par byed/ /nye bar len pa 'gog pa yis//srid pa yang ni 'gag par byed/ /srid pa 'gog pa yis kyang ni/ /skye ba'ang nges par 'gag par byed/ /skye ba 'gog pa yis kyang ni/ /rga shi nges par 'gog par byed/ /phung po khams rnams nges 'gog pa/ /de nyid nye bar zhi bar brjod/ / ces so/ /dpal shes rab kyi pha rol tu phyin par yang me tog bkram pa'i le'ur gsungs pa/ rab 'byor dus gang gi tshe byang chub sems dpa' sems dpa' chen po shes rab kyi pha rol tu phyin pa mi zad pa mngon par bsgrubs pa na/ rten cing 'brel bar 'byung ba la rnam par lta bar byed pa de'i tshe ma rig pa yang dag par rjes su mi mthong ngo //de bzhin du 'du byed ma yin/ rnam par shes pa ma yin/ ming dang gzugs ma yin/ skye mched drug ma yin/ reg pa ma yin/ tshor ba ma yin/ sred pa ma yin/ len pa ma yin/ srid pa ma yin/ skye ba ma yin/ rga shi ma yin/mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa rnams yang dag par rjes su mthong ba ma yin no zhes so/ /de ltar sdug bsngal ba dang yid mi bde ba dang / 'khrug pa 'gog pas lus kyang 'gog pa'o/ /lus 'gog pas srog kyang 'gog pa'o//srog 'gog pas byang chub kyi sems 'gog pa'o/ /byang chub kyi sems 'gog pas 'pho ba 'gog pa'o/ /'pho ba'i skad cig 'gog pas rnal 'byor pa rnams kyi sangs rgyas nyid do/ /de ltar nyon mongs pa 'gog pas las kyang 'gog go/ /las 'gog pas sdug bsngal yang 'gog pa'o//sdug bsngal 'gog pas nyon mongs pa 'byung bar 'gyur ba ma yin te/ /nyon mongs pa 'byung ba med pas las 'byung ba ma yin pa kho na'o/ /sad pa rmi lam shin tu gnyid/ /bzhi pa'i gnas skabs bzhi po yis/ /rgyu 'bras gang tshe 'gags de'i tshe/ /sangs rgyas nyid du the tshom med//da ni de sgrub pa'i ched du kun rdzob kyi phyag rgya brjod par bya'o/ /dpal nyung ngu'i rgyud du yang gsungs pa/ skyed byed ma dang sring mo dang / /bu mo sring mo'i bu mo ni/ /shes rab thabs kyi cho ga yis/ /rnal 'byor rig pas rtag tu mchod/ /ces pa la sogs pa'o//rnal 'byor zhes pa gzung ba dang 'dzin pa'i sems dag gcig pa nyid de/ /la la nA dang ra sa nA dag gcig pa/ gtum mo dang khu ba dag gcig pa ste de las nges par grub pa'i dbang phyug khu ba ma 'phos pa'i tshangs par spyod pa mi 'gyur ba'i bde bas shes rab dang thabs snyoms par 'jug pas mchod par bya'o//gsungs pa yang / 'dir rgyud rnams thams cad du ma la sogs pa'i phyag rgya rnams thun mong du gsungs te/ rnal 'byor pa rnams rjes su chags par byed pa'i ched du'o/ /de yang byang chub kyi sems brtan par byas pa'i rnal 'byor pa rnams kyi yin gyi/ gzhan rnams kyi ni ma yin no//gzhan 'jig rten gyi tha snyad kyi bud med rnams gnas skabs kyi dbye bas ma la sogs pa rnams su 'gyur ro/ /'dir gang gi tshe rnal 'byor pa bud med la sems par byed na/ de'i tshe sems kyis bsam par byas pas ma ru 'gyur ro/ /reg pas ni sring mo'o//rdo rje zhugs pas bu mor 'gyur/ byed pa dang bcas shin tu dga' bar gyur pa ni sring mo'i bu mor 'gyur ro/ /thig le ltung bar gyur pas na chung ma'o/ /gzhan gyi rigs gyur gtum mo'i rnal 'byor mar ni 'dod chags nyams par gyur pa las te chags bral las 'gyur ro//'di rnams rnal 'byor phyag rgya drug ste rnal 'byor pas sa la sogs pa rnams su rig par bya'o/ /phyi rol du ni rigs dang yul gyi tha snyad kyis ma la sogs pa rnams so/ /de bzhin du/ gar ma tshos ma g.yung mo dang / /gtum mo de bzhin bram ze mo/ / rnal 'byor rig pas zhes pa/ sngar bshad pa yi cho gas dang / shes rab thabs kyi cho ga yis/ /rnal 'byor rig pas rtag tu mchod/ /dus thams cad du mi 'pho ba'i bde bas/ /'bad pa yis ni bsten par bya/ /phyi rol du ji ltar bye bar mi 'gyur bar bya ba ni nges pa'i don gyis byang chub kyi sems 'pho ba'o//drang ba'i don gyis phyi rol du skye bos smod pa'o/ /de'i phyir ma la sogs pa rnams la gsal bor bsten par bya ba ma yin no zhes pa bcom ldan 'das kyi nges pa'o/ /gang gi tshe gsal por bsten na rgyal rigs la sogs pa rnams kyis byis pa'i rnal 'byor pa rnams la sdug bsngal ster bar byed do//gang phyir skye 'gro bskyed pa'i phyir/ /shes rab ma zhes brjod par bya ste/ rdul gyi khams so/ /de bzhin du thabs ni khu ba'i khams so/ /rdul dang khu ba las yang dag par byung ba ni ma la sogs pa rnams so/ /gang phyir rnam dbye ston pa'i phyir//shes rab de nyid sring mor brjod par bya ste khams kyi rnam 'gyur so so ba spu dang pags pa dang sha dang khrag go/ /de bzhin du sring mo'i bu mo ni rtsa dang rus pa dang rkang gi rnam par dbye ba'i cha ru 'jug par byed pa de'i phyir ro/ /shes rab de nyid ni/ yon tan 'jo phyir bu mor yang brjod par bya ste yon tan gyi tshig gis ni sgra dang /reg dang ro dang gzugs dang dri'i khams kyi yul rnams yin te/ de rnams 'jo ba'i phyir ro/ /zhes pa'o/ /shes rab ni chung mar brjod par bya ste chags bral du mi byed pa'i phyir ro/ /reg par bya ba ma yin pa nyid kyi phyir mthar skyes mar brjod par bya'o zhes pa phyag rgya drug gi nges pa'o//khams thams cad kyi bde mnyam gyi ro 'bab par byed pa'i phyir de kho na bram ze mo zhes brjod par bya'o/ /gsungs pa yang / rnam par mi rtog khams mi zad/ /chos khams dam pa zad pa med/ /ces so/ /'tshed phyir shes rab tshos ma'o//khams rnams g.yo phyir gar ma'o/ /gtum pa'i las ni byed pa'i phyir/ /gtum mo ru ni brjod pa yin/ /reg min phyir ni g.yung mor bshad/ /de ltar bya ba lnga'i rang bzhin las/ /bram ze ma sogs shes par bya/ /de'i phyir rang bzhin gyis bud med thams cad dang skyes pa thams cad mi'i rigs gcig tu yang dag par byung ba ste/de rnams la rigs gzhan yod pa ma yin no zhes pa rgyud thams cad du de bzhin gshegs pa'i nges pa'o/ /rigs lnga'i phyag rgya zhes bya ba/ /thar pa'i rgyur ni brjod par bya/ /zhes pa/ thar pa zhes pa ni mchog tu mi 'gyur ba'i bde ba thob pa ste/de kho na rnal 'byor pa rnams kyi rgyu'o zhes pa nges pa'i don to/ /'dir thar pa'i rgyur phyag rgya zhes bya ba de bzhin gshegs pa lnga'i rigs can rnams yin la/ rdo rje yis te/ byang chub sems 'dis rgyas gdab bya/ /zhes pa phyag rgya ste/ a ba d+hU tI 'o/ /'dir rdo rje zhes pa la sogs pas ma la sogs pa'i phyag rgya rnams 'khrags 'khrugs su gsungs mod rim pa ji lta ba bzhin du gzung bar bya ste/ 'dir ma ni de bzhin gshegs pa'i rigs dang bram ze mo dang spyan ma dang lte ba'i pad+ma dang / sa'i khams so/ /sring mo ni mA ma kI dang /snying gar rdo rje'i rigs can dang g.yung mo dang chu'i khams kyi rigs so/ /pad+ma'i rigs can ma ni bu mo dang / gar ma dang / gos dkar mo dang / mgrin pa dang / me'i khams so/ /las kyi rigs can ma ni tshos ma dang dpral bar te sring mo'i bu mo dang sgrol ma dang rlung gi khams so//chung ma ni rdo rje dbyings kyi dbang phyug ma dang / rin po che'i rigs dang gtum mo dang / gtsug tor du nam mkha'i khams so/ /mthar skyes ma ni ye shes kyi khams dang / rdo rje sems dpa'i rigs can ma dang gsang ba'i pad+mar ro/ /dpal ldan de bzhin nyid gshegs shing //de bzhin slar yang byon pa nyid/ /shes rab ldan pa 'di yis ni/ /de bzhin gshegs pa brjod par bya/ /zhes pa shes rab stong pa nyid 'di dang lhan cig ldan pa ste/ stong pa nyid kyi gzugs dang lhan cig pa'o/ /de bzhin nyid du ste/ gsang ba'i pad+mar rdo rje nor bu'i mthar thug par mi gnas pa'i mya ngan las 'das pa'i sa la gtsug tor nam mkha'i khams nas dpral ba dang mgrin pa dang snying ga dang /lte ba dang gsang ba'i pad+ma rlung dang me dang chu dang sa dang / ye shes [(]gyi [,]kyi [)]rang bzhin gyi rdo rje btsun mo'i b+ha ga rnams su zhugs par gyur to zhes pa dpal ldan byang chub kyi sems kyi rdo rje gshegs pa'o//de bzhin byon pa zhes pa ji ltar 'og gi char gshegs pa de ltar byon pa ste/ rdo rje nor bu dang gsang ba'i pad+ma ye shes kyi khams nas lte ba dang snying ga dang / mgrin pa dang dpral ba dang / gtsug tor du gyen du khu ba'o//de ltar na ji ltar byon pa de bzhin gshegs pa'o zhes grub bo/ /dpal shes rab kyi pha rol tu phyin pa chos 'phags kyi le'ur gsungs pa yang / de skad ces smras pa dang / byang chub sems dpa' sems dpa' chen po chos 'phags kyis byang chub sems dpa' sems dpa' chen po rtag tu ngu la 'di skad ces smras so//rigs kyi bu de bzhin gshegs pa rnams ni nges par 'ga' zhig nas byon pa'am bzhud pa med de/ de bzhin nyid ni g.yo ba med pa ste/ gang de bzhin nyid de ni de bzhin gshegs pa'o/ /rigs kyi bu skye ba med pa la ni 'gro ba'am 'ong ba med de//gang skye ba med pa de ni de bzhin gshegs pa'o/ /rigs kyi bu yang dag pa'i mtha' la ni 'ong ba'am 'gro ba rab tu shes pa ma yin te/ gang yang dag pa'i mtha' de ni de bzhin gshegs pa'o/ /rigs kyi bu stong pa nyid la ni 'ong ba'am 'gro bar rab tu gdags pa med de gang stong pa nyid de ni de bzhin gshegs pa'o//rigs kyi bu ji lta ba bzhin nyid la ni 'ong ba'am 'gro bar rab tu gdags pa med de/ gang ji lta ba bzhin nyid de ni de bzhin gshegs pa'o zhes so/ /dpal rdo rje rtse mor yang gsungs pa/ de kho na nyid chos gnas pas/ / de bzhin ma yin slar mi 'gyur/ /de kho na nyid lam ston pa/ /de bzhin gshegs par de brjod bya/ /dpal mtshan yang dag par brjod par yang gsungs pa/ ye shes mig gcig dri ma med/ /ye shes lus can de bzhin gshegs/ /zhes so/ /de bzhin du dpal shes rab kyi pha rol tu phyin par 'jig rten ston pa'i le'ur yang gsungs pa/gnas brtan rab 'byor gyis gsol pa/ bcom ldan 'das ci lags/ de bzhin gshegs pa nyid kho na bsam gyis mi khyab pa mnyam pa med pa/ gzhal du med pa/ bgrang du med pa/ mi mnyam pa dang mnyam pa lags sam/de ltar sangs rgyas nyid dang / de ltar rang byung nyid dang / de ltar thams cad mkhyen pa nyid de ltar bsam gyis mi khyab pa/ mnyam pa med pa/ gzhal du med pa/ grangs med pa/ mi mnyam pa dang mnyam pa lags zhes so/ /yan lag bcu gnyis 'gog pas sa bcu gnyis thob pa'o//ji ltar 'jig rten gyi kun rdzob kyi dga' ba dang / mchog tu dga' ba dang khyad dga'i dga' ba dang lhan cig skyes pa'i dga' ba'i dbye bas dpral ba nas 'og tu 'ongs pa de bzhin du bzlog pas rgyu mthun pa dang / rnam par smin pa dang / skyes bu'i byed pa dang / dri ma med pa'i gsang ba nas dpral bar song ba'o/ /de skad du yang gsungs pa/ lte bar rgyu mthun nyid du brjod/ /rnam smin chos kyi 'khor lo la'o/ /skyes bu'i byed pa'am longs spyod la/ /bde ba chen por dri ma med/ /ces pa'i nges pa 'chang bar 'gyur ba la'o/ /de ltar na ji ltar tshes gcig la sogs pa'i cha bco lnga'i dbye bas cha'i rang bzhin gyis rdzogs pa dang /gtsug tor nas gsang ba'i pad+mar cha'i rang bzhin gyis rdzogs par 'ongs pa kun rdzob tu 'og tu khu ba ye shes kyi sems yin pa de ltar rdo rje nor bu las rnal 'byor gyi stobs kyis drangs pas gsang ba'i pad+ma nas don dam par tshes gcig la sogs pa'i cha'i dbye bas steng du khu bas dpral ba'i pad+mar gshegs pa ste/gtsug tor du cha bcu drug pa'i rang bzhin gyis so zhes so/ /de skad du yang gsungs pa/ lus can thams cad 'chi ba na/ /zla ba bdud rtsi 'og tu 'gro/ /steng du nyi ma rdul sgra gcan//rnam shes dngos po'i mtshan nyid do/ /de phyir zla ba bdud rtsi ni/ /steng du bgrod bya mi yi bdag /'og tu nyi ma rdul sgra gcan/ /rnam 'gyur med bde ba la'o/ /gsungs pa yang / nA da thig le yang dag ldan/ /gang tshe dus kun du 'gyur ba/ /de tshe rnal 'byor pa mchog gi//'bras bu zhes par bshad cing smra/ /gang phyir thig le thams cad khyab/ /gang tshe rtags ni 'gyur med gyur/ /de tshe dga' ba phun tshogs 'byung / /dga' ba las ni lhan skyes 'gyur/ /zhes pa nges pa'i don to/ /don dam pas 'chad par 'gyur ba ni//byang chub sems ni zla bar 'gyur/ /bco lnga'i cha yi bdag nyid can/ /bde ba chen po A li'i gzugs/ /rnal 'byor ma rnams de yi cha/ /zhes pa dga' ba bcu drug gi nges pa'o/ /rnam par mi rtog yid la ni/ /sgom pa po med bsgom bya'ang med/ /sngags dang lha ni yod ma yin//spros pa med pa'i rang bzhin las/ /sngags dang lha ni yang dag gnas/ /de nyid kyis na lhan cig skyes pa'i dga' ba'i rang bzhin rnam par rtog pa'i rnyog pa mtha' dag so sor nub pa'i ngo bos so/ /zhes pa'o/ /da ni phung po drug po rnams kyi kun rdzob dang don dam pa'i dbye ba brjod par bya ste/rnam snang zhes pa la sogs pas so/ /'dir rnam par snang mdzad ni sa'i 'khor lo la 'dren pa'o/ /mi bskyod pa ni nam mkha'i 'khor lo la 'dren pa'o/ /'od dpag tu med pa ni chu'i 'khor lo la 'dren pa'o/ /rin chen 'byung ldan ni me'i 'khor lo la 'dren pa'o//don yod grub pa ni rlung gi 'khor lo la 'dren pa'o/ /sems can ni ye shes kyi 'khor lo la 'dren pa'o/ /de rnams kyang grangs ji lta ba bzhin du/ /tshangs pa khyab 'jug zhi ba dang / /thams cad rnam pa de nyid brjod/ /ces pa kun rdzob kyis sems can rnams 'og tu khu ba can rnams te/don dam pas sangs rgyas rnams steng du khu ba can rnams so/ /tshangs pa myang 'das sangs rgyas te/ /zhes pa bshad pa'i khams ni 'dzag pa nyid kyi phyir ro/ /'jug phyir khyab 'jug brjod par bya/ /gci ba'i khams rang gi lus la 'jug pa'i phyir te/phyi rol du 'byung ba med pa'i phyir na sangs rgyas khyab 'jug tu brjod par bya'o/ /rtag tu dge phyir zhi ba'o/ /zhes pa dge ba ni tshul khrims ma nyams pa ste/ byang chub kyi sems 'pho ba med pa'i phyir na sangs rgyas ni zhi bar brjod par bya'o/ /thams cad kun bdag la gnas phyir//zhes pa thams cad ni rin chen 'byung ldan khrag gi khams te/ de 'pho ba med pas na sdug bsngal med pa yin la de med pa'i phyir/ bde sdug sel ba mthar gyur pa/ /chags bral lus ni zad pa po/ /kun bdag la gnas zhes pa lha'i spyan dang gzhan gyi sems shes pas khyab par byed pa nyid kyi phyir na/sangs rgyas ni thams cad ces par brjod par bya'o/ /rtog pa med phyir rnam sad do/ /zhes so/ /mig la sogs pa'i dbang po rtogs pa med pas don yod grub pa sha'i khams te/ de mi zad pa nyid kyi phyir mig la sogs pa rnams 'du byed pa med la/de med pa'i phyir rnam sangs rgyas te/ bdag rig gzhan rig thams cad pa/ /kun la phan pa'i gang zag mchog /'jig rten dpe las 'das pa ste/ /shes dang shes bya'i bdag po mchog /ces pa/ sangs rgyas ni/ rtog pa med pa rnam sangs rgyas/ / zhes pa nges pa'o/ /dam pa'i bde bas de nyid 'gyur/ /zhes pa/ dam pa'i bde ba ni zag pa med pa stong pa nyid mtshan ma med pa dang / smon pa med pa dang / mngon par 'dus ma byas pa ste/ rnam par thar pa bzhi gcig tu 'dres par gyur pa/ snying rje dang byams ba dang dga' ba dang / btang snyoms dmigs pa med pa'i rang bzhin gyis dmigs pa/ shes rab dang thabs kyi bdag nyid can gyi de kho na nyid ni sangs rgyas zhes brjod par bya'o/ /de ltar na/ bden don rnam pa bcu gnyis pa/ /de nyid rnam pa bcu drug rig /rnam pa nyi shus byang chub pa/ /rnam dag mchog tu mi 'gyur rig /ces pa sangs rgyas bcom ldan no/ /brjod pa ces bya ba la sogs pas te/ 'dir sems can rnams thams cad kyi brjod pa ni A li kA li dbyangs dang gsal byed dag gi brjod pa gang yin pa ste/ de'i phyir de kho na nyid kyi rnal 'byor pa rnams kyis/ brjod pa bzlas pa yin par bshad//de skad du yang / dpal sam+bu Ta ru gsungs pa/ skye bo rnams kyis dag gis ni/ /rab 'jam gang ci'ang rab bskyed pa/ /de rnams thams cad sngags kyi gzugs/ /de nyid las ni rab tu skye/ /de bzhin du sems can rnams kyi gang sems dpa' de ni da bsam bya ste/pha rol gyi sems shes pa'i rnal 'byor pas zhes pa'o/ /gang phyir bsam bral bsam bya ba/ /bsam bral zhes pa ni sems pa med pa ste/ rnal 'byor pa rnams kyis bsam bya gang yin pa'o/ /pha'i yul la shi ba'i mthar skye ba'i char gtogs pa'i rang gi phung pos 'pho ba'i gnas skabs su bde ba thob pa gang yin pa'i bde ba de nyid ni lo bcu drug gi mtshams su skyes pas rang gi bza' bar bya'o//bud med kyis lo bcu gnyis kyi mtshams su longs spyod par bya'o/ /bde ba gang gis 'chi ba 'dir/'khor ba pa rnams kyi 'khor bar skye ba dang gnas pa'i bde ba de kho na brtan par gyur pa ni rnal 'byor pa rnams kyi bsam gtan du brjod par bya'o zhes pa'o/ /gsungs pa yang / bsam gtan cha shas kun shes shing / ting 'dzin rig dang rgyud rig pa/ /ting 'dzin sku ste sku yi mchog/ / longs spyod rdzogs sku kun gyi rgyal/ /zhes so/ /zhes dpal kye'i rdo rje'i rgyud la kha che chen pos rtogs pa rdo rje'i tshig gi snying po bsdus pa'i dka' 'grel du de kho na nyid kyi le'u ste lnga pa'o// //da ni de kho na nyid kyi le'u rig pa'i rnal 'byor pas sems can rjes su gzung ba'i sems la dmigs pa'i ched du spyod pa'i le'u gsungs pa/spyod pa pha rol phyin zhes pa ste spyod pa zhes pa spyod pa ni rdo rje'i spyod pa ste/ phyag rgya chen po lhan cig skyes pa rdo rje dang pad+ma las ma 'phos pa'i bde ba thob pa'o/ /rgyud gzhan du yang gsungs pa/ rdo rje spyod pa'i rab sbyor gyis//rdo rje phung po rnam bsgom bya/ /rdo rje dkyil 'khor dbus gnas pa/ /mchog tu mi 'gyur bsgom pa'o/ /zhes so/ /pha rol phyin zhes pa ni dpal theg pa chen po phul du byung ba la gnas shing rgal dka' ba'i srid pa'i rgya mtsho las shin tu 'das pa'o/ / gsungs pa yang / skye ba'i rgya mtsho 'jigs chen po/ /rga ba'i rlabs kyis 'khrugs pa las/ /sems can rnams ni sgrol byed cing / /bde bar 'gro byed gru lta bu/ /zhes so/ /de bzhin du dpal mtshan yang dag par brjod par yang gsungs pa/ mi shes 'dam du byings gyur cing / nyon mongs pas ni sems dkrugs pa'i/ /sems can kun la phan pa dang / /bla med 'bras bu thob bya'i ched/ /ces pa la sogs pa'o/ /gang gi dngos grub mthar 'gro ba/ /zhes pa dngos grub kyi mthar mchog tu mi 'gyur ba'i bde bar 'gro zhing shes par byed pa'o/ /kye yi rdo rje'i dngos grub rgyur//zhes pa la kye'i rdo rje cir brjod par bya zhe na/ pad+mar gnas shing khro ba bral/ /gtsang zhing mkhas la mnyam gzhag pa/ /rnal 'byor ye shes yang dag ldan/ /sems ni kye yi rdo rjer brjod/ /dngos grub rgyus zhes pa dngos grub ni sangs rgyas nyid de/ de nyid ni rnal 'byor pa rnams kyi rgyu'o zhes pa'o//sgom pa po yis rnam bzung ba/ /rna bar lha yi rna rgyan te/ /zhes pa la sogs pa la 'dir phyag rgya lnga'i nye bar bstan pa ni bris sku sgrub pa'i le'ur nges pa'i don gyis brjod par bya'o/ /bgo ba stag gi pags pa zhes gsungs pa yang / 'dod chags zhe sdang sogs rnams kyi//stag gis 'gro ba gsum po zos/ /de rnams 'joms phyir pags pa ste/ /stag gi pags pa'i na bzar bcas/ /zhes so/ /rigs lnga la ni rnam par gnas/ /rigs lnga'i mnyam par ldan par ni/ /rigs gcig pa ni rnam par brtag /ces pa la sogs pa rigs gcig nyid sna tshogs pa rigs lnga dang yang dag par ldan par blun po rnams kyis brtags pa'o/ /gang las she na gsungs pa/ du ma zhes pa la sogs pa ste/ srog chags rigs tha dad pa rnams ni sha gzugs tha dad par mtshon te/ 'dir ni rigs gcig gi ngo bo ni du ma'i dbye bar mtshon pa med do/ /dpal mtshan yang dag par brjod par yang gsungs pa/ lus med lus te lus kyi mchog /lus kyi mtha' ni rtog pa po/ /gzugs rnams ma lus ston mdzad pa/ /nor bu chen po rin chen tog /ces so/ / 'di nyid du yang gsungs pa/ bde ba nag po bde ba ser/ /bde ba dmar po bde ba dkar/ /bde ba ljang gu bde ba sngo/ /bde ba mtha' dag rgyu mi rgyu/ /bde ba shes rab bde ba thabs/ /de bzhin kun du ru skyes bde/ /bde ba dngos po dngos med bde/ /bde ba rdo rje sems dpar bshad/ / ces so/ /rigs gcig dang ni du ma yis/ /gang phyir bye ba mtshon mi bya/ /bye ba ni nyams pa ste byang chub kyi sems 'pho ba'o/ /de'i phyir de mi bya'o zhes pa'i don to/ /shing gcig ces pa ni lhan cig skyes pa gcig pu'i sku mchog tu mi 'gyur ba gcig pu'i bde ba bcad du med cing dbyer med pa ste byang chub kyi sems kyi shing gcig pu'o//gsungs pa yang / mgo bor gnas pa rtsa ba ste/ yal ga dril bu'i nang du'o/ /chos 'byung zhes bshad dbus su ste/ /lhan skyes 'bras bu bla na med/ /ces pa la sogs pa'o/ /gzhan thams cad ni drang ba'i don gyis go sla'o//dbugs rgyu zhes pa'i rigs pa 'dis/ /lus 'di dur khrod brjod par bya/ /'di'i don 'di yin te/ rgyud gzhan du yang gsungs pa/ ro ldan na gnas pa ni phyi rol du ro'i sgras srog nyams pa shi ba'i tshogs te/ de 'di la yod pas na ro ldan ni dur khrod kyi sa'o//nang du ni ro zhes pa dbugs 'byung ba dang 'jug pa drug brgya lhag pa'i stong phrag nyi shu rtsa gcig rnams 'gog pa'o/ /de 'di la yod pas na chos kyi sprin gyi sa'o/ /de na gnas pa ni ro ldan na gnas pa'o/ /bdud dang nyon mongs pa dang shes bya dang snyoms 'jug gi sgrib pa'i gnod sbyin rnams gsod par byed pa ni gnod sbyin gyi bdag po ste/dpal phyag na rdo rje de bzhin gshegs pas bstan pa'o/ /dpal sangs rgyas thams cad mnyam par sbyor ba mkha' 'gro ma dra ba sdom par gsungs pa yang / de nas gnod sbyin cir brjod bya/ /gang zhig nyon mongs thams cad zad//gang zhig sgra rnams kyang zad pa/ /gdul bya las ni phyag rdo rje/ /des na gnod byin zhes par brjod/ /ces so/ /de la ci ltar bcom ldan 'das phyag na rdo rje yin zhe na/ mi phyed so sor bcad du med/ /gdug pa kun la gnod byed phyir/ /rdo rje sangs rgyas kun rang bzhin//byang chub sems ni shin tu bstan/ /chos kyi seng ge'i sgra yis ni/ /sems can so so'i skad rnams kyis/ /sems can rnams kyi don mdzad gyur/ /zhes so/ /ma mo'i khyim zhes pa ma mo ni rang 'dra ba'i shes rab ste/ khyim zhes pa ni gsang ba'i pad+mar ro/ / yang na dben pa'am bas mtha' ru/ /zhes pa lte ba dang snying ga dang mgrin pa dang mgo bo rnams so/ /gnas 'di rnams su mchog tu mi 'gyur ba'i bde ba bsgom par bya'o zhes nges pa'i don to/ /cung zad drod ni zhes pa la sogs pa ste/ de skad du yang gsungs pa/ rnal 'byor snying ni rnyog med pa//rdo rje spyod par dbang bskur ba/ /khyim gnas dge slong dge tshul rung / /ji srid drod ni 'gyur bar du/ /spyod pa de ni gsang ste gyis/ /de nas 'jig rten gnod pa nyid/ /nus pa can la byos shig go/ /zhes so/ /gal te 'grub 'gyur 'dod yod pa/ / grub chen spyod pa byed 'dod na/ /gal te zhes pa nges par ma yin pa'o/ /'di ni spyod pa spyad par bya/ /zhes pa nges pa'i don to/ /'di nyid du gsungs pa yang / gang bshad 'jigs pa'i gzugs can gyis/ /spyod pa longs spyod phyir ma gsungs/ /yid ni brtan nam g.yo 'am ci//rang gi sems ni so sor brtag /shes rab med par spyod pa spyad par bya bar ma yin no zhes ston pas gsungs pa bzhin bzang zhes pa la sogs pa'o/ /gsungs pa yang / dang po gang zhig stong pa'i ngo bo yul dang yon tan pa gnas de yi rang bzhin 'gyur/ /khams dang phung po rnams la rab zhugs slar yang mig sogs dbang po rnams la mnyam pa ste//sad dang rmi lam sogs zhugs mchog gi bde mnyam gzhom du med par yang dag rab zhugs pa/ /rig ma sangs rgyas yul te rdo rje'i tshig la gnas pa rnal 'byor pa yis btsal bar bya/ / phyag rgya chen po 'di ni gang la skye ba gzhan gyi bsod nams kyi bag chags kyi dbang las dang / bla ma dam pa'i man ngag las nye bar bstan pa las dus du mar nyin mo dang mtshan mor chos thams cad rtog pa dang bral ba rang gi sems kyi snang ba tsam rnam pa thams cad mchog dang ldan pa stong pa chen po lhan cig skyes pa'i dga' ba skyed par byed ma mngon du byas nas 'gyur ba med pa la byung ba 'dis de ni skye ba med pa ste/phyag rgya chen po de bzung nas spyod par bya'o zhes pa nges pa'i don to/ /gal te glu len zhes pa la sogs pa la dpal rdo rje bdud rtsir gsungs pa/ snyan pa'i sgra yis glu blangs te//mos dang sgrol dang pheg rdob dang / /drug skyes skyes sogs grangs rnams kyis/ /sna tshogs pa dang thun mong bas/ /len bzhin pa yi glu 'di yis/ /dga' dang bde ba'i rnam 'gyur gyis/ /sangs rgyas byang chub bsgrub par bya/ / rdo rje bdud rtsi'i bde chen po/ /shes rab can gyis glu mi smad/ /rnal 'byor ma rnams des dga' byed/ /rnam pa de lta de gzhan yang / /de ltar rnal 'byor rigs des bya/ /zhes so/ /gal te dga' ba skyes pa na/ /thar pa'i rgyu yis gar bya ste/ /zhes pa la/ rgyud gzhan du yang gsungs pa/phreng ba tsan+dan bu mo sogs/ /ji ltar mthong bas bde 'gyur ba/ /de ni dga' bar yang dag bshad/ /sems can kun la yang dag gnas/ /rdo rje pad+mar mnyam sbyor la/ /gang zhig sems ni rnam gnas pa/ /de yi sems kyi mtshan nyid gang / /dga' ba chen po de brjod bya//zhes so/ /thar pa zhes pa la gsungs pa yang / 'khor ba las 'das thams cad lus la gnas/ /gang gis kyang ni bcings min grol min pa/ /mchog tu mi 'gyur bde ba thar pa ces brjod bya/ /zhes so/ /de tshe rdo rje rkang pas gar/ /mnyam gzhag rnal 'byor pa yis bya//zhes pa la 'di'i nges pa'i don ni dpal dri ma med pa'i 'od du gsungs pa yang / g.yas pa bskum pa gang yin pa de ni g.yon brkyang gi rkang par brjod do/ /grangs ji lta ba bzhin te/ cig car nyid du rtsa gnyis la dbu mar rgyu ba las mnyam pa'i rkang par 'gyur ro/ / g.yon pa bskum pa las g.yas brkyang gi rkang par 'gyur ro/ /pad+ma'i gdan dang rdo rje'i gdan gang yin pa ni rim pa ji lta ba bzhin du/ nam mkha'i dkyil 'khor la srog rgyu ba na sa ga'i rkang pa'o/ /rlung gi dkyil 'khor rab tu rgyu ba ni zlum po'i rkang stabs so/ /me'i dkyil 'khor la rab tu rgyu ba ni rol pa'i rkang stabs so//chu'i dkyil 'khor la rab tu rgyu ba ni pad+ma'i 'dug stangs so/ /sa'i dkyil 'khor la rab tu rgyu ba ni rdo rje'i 'dug stangs te/ de ltar mnyam dang mi mnyam bgrod ma srog rlung rab tu rgyu ba rnam pa lnga gang yin pa de'i rnam par dag pas lha rnams kyi rkang stabs dang 'dug stangs rnam par dag pa'o zhes so//dpal gsang ba'i rgyan bkod par yang gsungs pa/ dga' ba'i rnal 'byor yang dag gnas/ lha mo bzhi dang 'grogs pa las/ bcom ldan 'dod can gar mdzad de/ /rdo rje rol sogs kha sbyor las/ /gsang ba'i snying po thub pa che//kun gyi bdag nyid der zhugs nas/ /rdo rje lha mo mnyam ldan pas/ /zlos gar kun la gar mdzad do/ /glu ni rnam dag sngags su gnas/ /gar ni bsgom pa'i rnam pa'o/ /de yi phyir na glu dang gar/ /yo ga'i rtag tu rtag tu bya/ /zhes pa'o/ /sman ni bza' bar bya ba ste//zhes pa la sogs pa la sman ni bdud rtsi lnga la sogs pa'o/ /'di'i don ni 'di yin te/ dpal bde ba chen po rtog pa'i rgyud chen por gsungs pa yang / rnam par mi rtog mos pa yis/ /sgrub po mchog gis bsgrub par bya/ /khrag dang khu ba de bzhin sha /gci ba bshang ba nyid kyang ngo //nga yis phyir ru gang bshad pa'i/ /dam tshig ces pa 'bad pa yis/ /de kun de bzhin gshegs pa ste/ /kla klo yi ni tha snyad las/ /gang tshe sems ni mnyam chags pa/ /sems can phan la rab tu 'jug /rtag tu chags pa'i sems de nyid/ /gang tshe sems can yod min pa//'di yi don ni rtogs pa yis/ /khrag ni zos par 'gyur ba yin/ /khrag chen po ni zos pa na/ /'od dpag med par 'gro bar byed/ /chos rnams skye ba med pa gang / /khu ba'i sgra yis sgrar bya ba/ /de ni skye med rtogs pa las/ /za bar yang dag brjod pa yin//dngos po rnams kyi mnyam nyid gang / /sha zhes rab tu gsal byas pa/ /ma skyes sbyor ba bral ba las/ /za ba ces par mngon brjod bya/ /gang zhig sems ni rab zag pa/ /dam tshig don la rjes sbyor las/ /mi bskyod ces par de la gsungs/ /de yi las sbyor las 'thungs pa'o//sems gnas pa'am rjod pa yang / /cung zad kyang ni yod min pa/ /de ni bshang bar gsungs pa'o/ /de rtog med phyir zos pa'o/ /'di ni dam tshig rnams kyi ni/ /mtshan nyid gsal bar bshad pa'o/ /don 'di nges par rtogs pa yis/ /sangs rgyas chos rnams rjes su rtogs//dam tshig 'di rnams la 'jug phyir/ /dam tshig sems dpa' brjod par bya/ /zhes pa la sogs pa'o/ /gzhan thams cad ni drang ba'i don gyis go sla'o/ /thal ba skra yi mchod phyir thogs/ /zhes pa la gsungs pa yang /byang chub sems ni steng du 'gyur/ /yan lag kun la rnam gnas pa/ /de nyid thal ba dag par brjod/ /phyi dang nang du yang dag gnas/ /zhes so/ /sgra zhes pa la kaM ni mgo bo ste yan lag mchog go/ /der gnas pa yi dbang ldan ni/ /gtso bo byang chub kyi sems rdo rje 'dzin pa yin la/dag byed kyang ste sgrib pa spangs pa nyid kyi phyir dang rang bzhin gyis 'od gsal ba nyid kyi phyir na/ dag byed ces pa nges pa'i don to/ /rdo rje thod pa'i spyod pa la dpal sangs rgyas thod pa'i rgyud du gsungs pa yang / rdo rje sangs rgyas zhes par bshad/ / thod pa gsang bar yang dag gnas/ /zhes so/ /spyod par byed pas na spyod pa zhes pa gsang ba las kyang shin tu gsang ba'i ye shes te/ de'i rang bzhin du byed pa ni spyod pa zhes mngon par brjod par bya'o/ /lus kyi sbyin pa byin nas ni/ /zhes tshig 'di'i rgyas par bshad pa'i tshig ni dpal dri ma dang bral ba'i 'od du gsungs pa/des dam bca' ba 'di bya ste/ bdag gis dus thams cad du dngos po thams cad kyi drug cha sbyin par dbul bar bya'o/ /zhes so/ /dang por re zhig drug cha lus kyi nang nas lag pa rkang pa lus las zhes pa lag pa gnyis dang rkang pa gnyis dang lus te lnga po 'di rnams las drug pa yan lag mchog slob dpon la phyag 'tshal ba'i don du sbyin par rab tu dbul bar bya'o//sangs rgyas dang byang chub sems dpa' dang ldan pa'i bla ma la phyag byas nas mchog gi phyag rgya rjes su rig pa'i bde ba'i go 'phang du 'gro zhing sbyin par byed do//de bzhin du ngag dang lag pa dang rkang pa dang / bshang lam dang / nyer gnas te las kyi dbang po rnams las ngag nyid bden par smra ba'i don du dbul bar bya'o/ /skal pa skal med rnam dpyad pa/ /zhes pa gcig dang du ma dang bral bas na sbyin par bya ba dang / sbyin pa po dang len pa po ste gsum po mi dmigs pa'i tshul gyis sbyin par bya'o/ /zhes pa'o/ /sbyin mi bya zhes pa sbyin pa'i rnam par rtog pa de'i phyir mi bya'o zhes pa'i don to/ /sbyin sreg mchod sbyin dka' thub 'das/ /zhes pa la sogs pa/ sbyin sreg med cing mchod sbyin med//dka' thub med cing bya dka' med/ /'gro ba gsum po thams cad yod/ /chos kyi dbyings kyi rang bzhin gyis/ /sgom yang sgom pa ma yin no/ /zhes so/ /brgya byin lta bu'i lha min gang / /zhes pa la sogs pa la dpal sam+bu Tar gsungs pa yang / /de nas rang gi 'dun pa yis//dogs pa kun las phyir phyogs pas/ /de nyid ldan pa'i bdag nyid spyad/ /seng ge lta bur kun du'o/ /zhes so/ /gsungs pa yang / /bdag med seng ge'i sgra dang ldan/ /mu stegs ri dgas ngan 'jigs byed/ /ces so/ /snying rjes btung bar bya zhes pa snying rje ni byang chub kyi sems zhu ba'i ro'o//'di'i nges pa'i don ni rgyud gzhan du yang gsungs pa/ /srog dang rtsol ba'i me'i byang chub sems kyi khu ba zhu ba ni/ /thig le'i gzugs can btung ba rdo rje'i rtse mos phyung nas gang / /lhan cig skyes pa'i dga' ba skyed byed myos byed btung ba ni/ / rnal 'byor pa yis rnal 'byor ldan pas btung bar bya'o/ /zhes so/ /dpal dang po'i sangs rgyas su yang gsungs pa/ /nyin dang mtshan mor thig le las gang dkar po'i rgyun 'bab mA ma kI ste chang ma yin/ /go ku la sogs mig la sogs pa nyin zhag so sor spro ste sha gzhan res 'ga' min//rang rig sar gnas lha rnams kyis ni dag pa'i lus la bdud rtsi lnga rnams bsnyen pa ste/ /stong par sems rab zhugs pas ro mnyam byed pa 'khrig pa de ni skye gnas la ma yin/ /zhes so/ /rnal 'byor zhes pa dpal rdo rje rtse mor gsungs pa yang / yod dang med las rnam par 'das//dngos dang dngos med gnyis zad cing / /stong nyid snying rje dbyer med pa/ /rdo rje rnal 'byor bde ba che/ /zhes pa la sogs pa'o/ /gzhan thams cad ni drang ba'i don gyis go sla'o/ /phyi rol du ni lha rnams gtor ma'i don du gsungs pa'o zhes pa'o/ / dpal sam+bu Ta ru gsungs pa yang / /phung po khams sogs mtshan nyid ni/ /thams cad rmi lam sgyu ma bzhin/ /khams gsum 'di kun thams cad kyang / /mdor bsdus pa las shes nas gnas/ /zhes so/ /'di'i don ni 'di yin te/ dpal shes rab kyi pha rol tu phyin par thabs la mkhas pa'i le'ur gsungs pa yang / rab 'byor gal te byang chub sems dpa' sems dpa' chen po de rmi lam gyi nang du son pa na yang / chos thams cad rmi lam lta bu rnams su zhes rnam par lta zhing mngon sum du yang mi byed na/ rab 'byor 'di yang phyir mi ldog pa'i byang chub sems dpa' sems dpa' chen po'i phyir mi ldog pa'i mtshan nyid du rig par bya'o/ /zhes so/ /de bzhin du slar yang rmi lam gyi nang de nas sad pa'i de ma thag tu langs pa'i 'di ltar 'gyur te/ khams gsum pa'i bdag nyid 'di thams cad ni rmi lam lta bu ste/bdag gis bla na med pa yang dag par rdzogs pa'i byang chub tu sangs rgyas nas yang dag par chos bstan par bya'o zhes so/ /sgrib pa kun las rnam par grol/ /mtsho dang dbang phyug du ba dang / /de bzhin 'jig rten chos brgyad rnams/ / thams cad shin tu ring bar spang / /de skad du yang gsungs pa/ rnal 'byor dbang po rnal 'byor ma thob rab tu g.yo ba'i yid kyis res 'ga' shi gyur na/ /dpal ldan mi yi 'jig rten du ni rab mchog thub pa'i rigs su rnal 'byor ldan skye 'gyur/ /sngon gyi goms pa de yis slar yang ye shes rnal 'byor yangs pa kun du 'dzin par 'gyur//ye shes thob na mi zad mchog gi gnas su rab 'gro gang du slar yang skye ldan min/ /zhes pa dpal kye'i rdo rje'i rgyud du kha che chen pos rtogs pa rdo rje'i tshig gi snying po bsdus pa'i dka' 'grel du spyod pa'i le'u ste drug pa'o// //da ni ts+tsho ma'i le'u gsungs pa/ dang por yi ge'i brda yis dngos po'i chos rig par bya ste/ gnas la sogs par tshogs kyi 'khor lo la sogs pa la'o/ /dam tshig med pa'i sems can gyi nang du ts+tsho ma ste dgongs pa'i skad gzhan gyis rnal 'byor pa'am rnal 'byor ma smra bar bya'o zhes pa rgyud thams cad kyi nges pa'o//gang phyir sor mo gcig ston dang / /gnyis kyis legs par 'ongs pa yin/ /bsnyun gyi phyag rgyar shes bya ste/ /g.yon pa'i mthe bong bsdams pa la/ /gang zhig ming med ston pa na/ /de yi mthe chung sbyin par bya//gang zhig gung mo ston pa la/ /de yi phyogs gcig pa sbyin bya/ /zhes pa la sogs pa yan lag gi brda ste 'di'i rim pa rtogs par bya zhing phyag rgya dang phyag rgya'i lan gyis dam tshig can dang / de ma yin pa dbye bar bya ste/ de ltar drang ba'i don to/ /da ni nges pa'i don gsal bar bya ste/dpal rdo rje bdud rtsir gsungs pa yang / rnal 'byor phyag rgya brtag ces bya/ /lag pa'i phyag rgya mi brtan te/ /phyag rgya yid ches ngo bo ni/ /lha nyid kyi ni btsun mo mchog /b+ha ga'i pad+mar mchod par bya/ /dbang po'i bde ba thams cad kyang / /rdo rje pad+ma mnyam sbyor bas//bya ba thams cad bsgrub par bya/ /zhes so/ /ji ltar dpag bsam shing chen po/ /yal ga brgya phrag stong yod pa/ /der ni de las rtsa ba gzung / /de ni skyed pa'i byed rgyu'o/ /de bzhin bdud rtsi 'bab pa'i rtsa/ /sngags dang phyag rgya rnams kyi ma/ /phyag rgya thams cad skyed byed pa/ /b+ha ga'i dbus na rnam par gnas//zhes so/ /gsungs pa yang / phung po skye mched khams rnams kun/ /phyag rgya yis ni rgyas btab pa/ /phyag rgya de yis rtag tu bkod/ /dkyil 'khor zhes pa rnam par bstan/ /dpal 'dus par gsungs pa yang / gal te byang chub mchog 'dod na//lag pa'i phyag rgya bcing mi bya/ /dam tshig 'di ni sngags kun dang / /rgyal ba yis kyang mi 'da' 'o/ /de ltar phyag rgya mi bcing par gsungs pa na/ rdo rje bcing ba'o zhes pa bcom ldan 'das kyis nges pa'o/ /'di'i don 'di yin te/ dpal thams cad gsang bar gsungs pa/nga rgyal med cing snang ba med/ /mtshan ma med cing gsal byed min/ /bdag med mnyam nyid ye shes ni/ /rdo rje bcings pa zhes par bshad/ /de bzhin du phyag rgya gcig ston pa la yang phyag rgya'i lan du mar 'gyur to/ /de'i phyir nus pa dang bral bas/ /phyag rgya'i lan bstan par mi bya'i//'di rnams la phyag 'tshal ba byas nas/ snying gar lag pa g.yon pa'i mthil gzhag ste rang gi lus g.yon skor du bskor la de nas lag pa g.yon gyis phyag byas nas 'gro bar bya zhing de rnams dang lhan cig rtsod par mi bya'o/ / byis pa'i rnal 'byor pa rnams la nges pa gang byin pa de de yis bya'o/ /rnam pa gzhan du na 'chi ba thob ste khros pa'i pho nya mo nus pa dang ldan pa'o/ /kye bcom ldan 'das gnas la sogs pa de rnams du lags/ mchog gi gnas la sogs pa dzA lan+d+ha ra la sogs pa'i gnas la sogs pa'o//'di'i nges pa'i don ni rgyud gzhan du gsungs pa/ mchog tu gnas pa shes rab bshad/ /bdag nyid gnas ni thabs yin no/ /'di dag gnyis su byar med pa/ /rnal 'byor gnas zhes bzhag pa yin/ /de nyid gnas ni de las skyes/ /de dang bral bar gang gyur pa/ / lhan cig skyes pa yang dag bshad/ /ngag gi lam 'das spyod yul lo/ /zhes so/ /dpal dang po'i sangs rgyas su yang gsungs pa/ gnas ni bud med gsang ba'i pad+mar rab 'gyur dam tshig la ni rdo rje nyid nye'i gnas/ zhing dang tshan+do ha dang 'dus pa dur khrod sa gzhi de bzhin de ltar mtha' dag go//zhes pa la sogs pa'o/ /gsungs pa yang / 'dir thun mong gis byis pa rnams yul du 'khyam pa'i don du dzA lan+d+ha ra la sogs pa gnas la sogs par gsungs te/ de nyid kyi thams cad du khyab par byed par mi 'gyur te/ rnal 'byor ma rnams kyi rigs sum cu rtsa drug ni grong khyer gcig tu yang gnas la/gang gis na 'dir mchog gi dang po'i sangs rgyas su gsungs pa ni/ sa thams cad khyab par byed pa nyid kyi phyir ro/ /'dir dpal 'khor lo sdom par/ gang gnas dang nye ba'i gnas la sogs par gsungs pa/ de rnams dpal kye'i rdo rjer zhing dang nye ba'i zhing la sogs pa rnams su 'khrags 'khrugs su gsungs so/ /rnal 'byor pa rnams kyi 'jig rten pa'i dngos grub rnams kyang phyi rol gyi gnas la sogs par ji lta ba bzhin du mi 'gyur ro/ /nang du ni ma rig pa la sogs pa'i yan lag bcu gnyis 'gags pa rnams rga shi la sogs pa'i 'gog pas gnas la sogs pa rnams su rtogs par bya'o//de skad du yang gsungs pa/ nges 'byung kun gyi lam la gnas/ /nges par 'byung ba kun ston pa/ /yan lag bcu gnyis srid rtsa bton/ /dag pa rnam pa bcu gnyis 'chang //zhes so/ /gnas la sogs pa de rnams su rim pa ji lta bar dpa' bo dang dpa' mo'i dbang phyug ma rnams rtogs par bya'o/ /'di'i nges pa'i don ni rgyud gzhan du gsungs pa/ mtshan nyid bzhi yi sbyor ba las/ /gang du rtag tu chags bral ba/ /rnam pa thams cad mchog ldan pa//de ni dpa' bo zhes par bshad/ /der ni dbang phyug yang dag thob/ /stong nyid snying rje'i bdag nyid can/ /lhan cig skyes dga'i rang bzhin te/ /dpa' bo'i dbang phyug ma zhes 'gyur/ /de ltar de bzhin gshegs pa thams cad rnam par dag pa'i phung po dang khams dang /skye mched la sogs pa byang chub kyi sems lha'i ngo bos 'ong ba'am/ 'gro ba'o/ /'di rnams rim pa ji lta bar spyi gtsug dang spyi bo dang / rna ba g.yas pa dang / ltag pa dang / rna ba g.yon pa dang / smin ma'i dbus dang / mig dang / dpung pa'i rtsa ba dang / mchan khung dang / nu ma zung dang / lte ba dang / sna'i rtse mo dang / kha dang / mgrin pa'i phyogs dang / snying ga dang / mdoms bar dang / rtags dang / bshang lam dang / brla'i phyogs dang byin pa dang / sor mo dang / rkang pa'i bol dang / pus mo rnams su dbang byed pa la sogs pa ste/skye bar byed gnas par byed/ thim par byed do/ /pul+lI ra ru dbang byed cing / /dzA lan+d+ha rar longs spyod bshad/ /o Di ya nar thim par brjod/ /gnas la sogs pa'i gzhi dang gzhir/ /yan lag kun la thim par 'gro/ /he ru ka yi mtshan nyid do//sprul pa yis ni rtag tu skye/ /longs spyod rdzogs pa gnas pa'i rgyu/ /chos kyi sku yi rang bzhin gyis/ /thim par gyur te the tshom med/ /de ltar lus kyi rnam dbye bas/ /dbang byed longs spyod thim pa rnams/ /gnas 'di rnams su ji ltar bzhin/ /rtag tu dga' ba skye bar 'gyur//skye bar byed cing gnas par byed/ /thim par byed de rim pas so/ /snga ma 'gags pa ni phyi ma skye ba'o/ /dpal dang po'i sangs rgyas su gsungs pa yang / srog gi rtsol ba'i me yis ri bong can ni zhu ba'am btung ba chang ni btung ba'o/ / mthe bo'i tshigs las gtsug tor du ni nya'i mthar rang sems 'gro ste chos kyi dbang gis so/ /gtsug tor nas ni sor mo rnams su slar yang 'di 'gro nag po'i phyogs kyi mtha' ru'o/ /rnal 'byor pa rnams spyod pa gang de nyin zhag so so'i dus su 'dod pa'i dngos grub ster zhes so//de bzhin du dpal mtshan yang dag par brjod par yang gsungs pa/ sa'i dkyil 'khor gzhi la gnas/ /rkang pa ya gcig mthil gyis gnon/ /rkang mtheb sen mo la gnas pas/ /tshangs pa'i sgo nga'i rtse mo gnon/ /don gcig gnyis med chos kyi don/ /dam pa'i don te 'jigs pa med//rnam rig sna tshogs gzugs don can/ /sems dang rnam shes rgyud dang ldan/ /zhes pa la sogs pa ste/ 'di ni 'chi ba'i mtha' dang skye ba'i mthar rtog pa'i chos gos dag gi'o zhes rigs par bya'o/ /'di'i don ni dpal thams cad gsang bar gsungs pa yang /sangs rgyas kun gyi bdog pa kun/ /rang gi sems kyi chos su 'dus/ /chos kyi bdag med rnal 'byor gyis/ /rang nyid gsang bya 'chi bar 'gyur/ /rang gi sems nyid gsad bya ste/ /sems nyid kho na gsod byar byed/ /rang sems nyid ni rdzogs sangs rgyas//sems nyid rtogs par bya ba yang / gsungs pa yang / gnas rnams nyi shu rtsa bzhi rnams/ /sa bcu rnam par dag pa las/ /'di yi don ni 'di yin te/ /sbyin pas rab dga' rnal 'byor pa'i/ /tshul khrims ldan pa dri med 'gyur/ /bzod pas 'ong byed pa ru bstan//brtson 'grus 'od 'phro bsod nams ldan/ /bsam gtan las ni mngon gyur dga'/ /shes rab kyis ni spyad dka' ba/ /thabs chen ring du song ba'o/ /stobs dang ldan pa mi g.yor 'gyur/ /smon lam gyis ni legs pa'i blo/ /chos kyi sprin ni ye shes ldan/ / bde gshegs rgyal bas so so ni/ /rang gis rig bya bcu gcig pa/ /zhes so/ /gsungs pa yang / pha rol phyin bcu thob pa ste/ /pha rol phyin pa bcu la gnas/ /pha rol phyin bcu dag pa ste/ /pha rol phyin pa bcu yi tshul/ /mgon po sa bcu'i dbang phyug ste/ /sa bcu la ni rab tu gnas//zhes so/ /sa bcu shin tu non nas ni/ /de las rtags ni nges par 'gyur/ /dpal sangs rgyas thams cad mnyam par sbyor ba mkha' 'gro ma dra ba sdom par gsungs pa yang / rang nyid rtags ni rangs gyur nas/ /rtag tu chu skyes steng du rtags/ /rdo rjes byin gyis brlabs byas nas//gdod ma'i rdo rje sems dpa' nga'o/ /zhes so/ /nag po'i phyogs la bcu bzhi pa/ /de bzhin du'ang brgyad pa la/ /zhes pa 'di'i don yin te/ tshes gcig la sogs brgyad pa dang bcu bzhi pa gnam stong gi mthar thug pa ni nag po'i phyogs la chags bral te/ cha nyams pa byang chub kyi sems 'pho ba'o/ /byang chub kyi sems 'phos pa las/ /'khor ba'i srid pa'i bar du gnas pa'o/ /de'i phyir/ /rgyal mtshan mtshon bsnun nyid dang ni/ /lan bdun pa yang bza' bar bya/ /zhes pa la rgyal mtshan gyi sgras dro ba rnams kyi tha ma thig les brgyan pa'o//mtshon bsnun zhes pa ye shes kyi mes bsnun pa'o/ /lan bdun pa zhes pa rnam par snang mdzad la sogs pa drug po bde ba chen po dang lhan cig bdun du 'jug pa ste/ gcig tu 'dres par gyur pa bza' bar bya'o zhes pa mi 'pho bar bya'o zhes pa'i don to/ /'dir brtan par byed pa dpal rtsa ba'i rgyud du gsungs pa/dbang po dang ni yul 'gags shing / /dga' ba la sogs skyes pas na/ /thig le rnams 'dzag zla ba la/ /haM yig mgo bor yang dag gnas/ /gsang ba'i 'khor lo 'dir skyes pa/ /de ni phyugs chen nyid du bshad/ /rtse gsum thur du rtsa gsum zug /gang du sbubs su rab tu bstan/ /skye ba bdun pa'i phyugs nyid ni/ /mkha' spyod dngos grub sbyin pa po/ /rgyal ba yis ni nad rnams 'phrog /phung po khams can bzhu ba yis/ /'khor los sgyur ba sbyin par byed/ /dbang po dang ni yul gsad pa/ /'di ni mkha' spyod ster byed de//phra la sogs pa'i yon tan ldan/ /sad pa sogs kyi rjes 'brangs pas/ /myur du sangs rgyas ster bar byed/ /ji ltar phyi rol dngul chu bcings/ /de ltar ye shes bcud 'di yang / /de bzhin tshangs pa khyab 'jug phyugs/ /gsang ba'i 'khor lor btung ba ni//ji srid sreg blugs 'bab pa'i bar/ /yangs pa'i tshe ni ster bar byed/ /steng du sgra gcan phyugs su brjod/ /zla ba nyi ma phyugs chen dag /tshangs pa'i bu gar lhung gyur pa/ /spyod dang grol ba'i 'bras bu ster/ /khrag dang chu rgyus de bzhin du/ /rkang mar 'bad pas btung bar bya//'di rnams kyang ni phyugs zhes bya/ /phyi rol gzugs can gzhan phyugs min/ /skye ba bdun pa phyugs rnams 'dir/ /kun las mchog gi dbang phyug go/ /lus la skye bdun ji lta ba/ /de ltar da ni bshad bya nyon/ /bza' dang btung ba'i ro rnams kun/ /zos dang mthungs pa rnam pa drug /smin ma las ni bcu 'gyur te/ /de de'i skye ba dang po'o/ /phyi nas khrag nyid du ni 'gyur/ /gnyis par gsal bar 'gyur ba yin/ /sha nyid du 'gyur gsum pa'o/ /zhi ba pags pa nyid du 'gro/ /lnga par rtsa nyid 'gyur ba yin/ /drug par rus pa nyid 'gyur ro//bdun par rkang nyid du 'gyur te/ 'di ni 'di bdun par 'gyur ro/ /zhes so/ /nyin mo bcom ldan rdo rje can/ /mtshan mo shes rab rab tu bsgrags/ /ji ltar nyi sogs drag po ste/ /de ltar zla ba dbu mar 'dod/ /de ltar nyi zla nyin mtshan gyi/ /dbye bas nyin mtshan dus zhes brjod//de bzhin du gsungs pa/ dus kyi 'byung po rnam spro byed/ /dus kyi skye dgu sdud par byed/ /dus ni bcom ldan rdo rje can/ /nyin dang mtshan mo'i ngo bor ldan/ /zhes so/ /skye bo gang dang gang rnams kyi/ /zhes pa la sogs pa la 'di'i don ni 'di yin te/ de bzhin gshegs pa rnams kyi phung po dang khams dang skye mched la sogs pa gcig tu 'dres par gyur pa'i sha byang chub kyi sems zhu ba dpral ba nas mgrin pa dang /snying ga dang / lte ba dang / rdo rje nor bu rnams su 'ongs pa bza' bar bya/ /longs spyad par bya snang ba med par bya'o zhes pa nges pa'i don to/ /dpal rdo rje rtse mor gsungs pa yang //skye 'gro skye 'gro zhes bshad pa/ /ming dang gzugs kyis brtags pa ste/ /skye bo dam pas bsnun nas bza'/ /dngos grub chen po thob par 'gyur/ /zhes so/ /rdo rje thod pa'i sbyor ba las/ /zhes pa la rdo rje ni mchog tu ma 'phos pa'i go 'phang ste/ ki bde ba skyong bar byed do zhes pa thod pa'o/ /sbyor ba las te gnyis su byar med pa las zhes pa nges pa'i don to/ /gzhan thams cad drang ba'i don gyis go sla'o zhes pa dpal kye'o rdo rje'i rgyud la rdo rje'i tshig gi snying po bsdus pa'i dka' 'grel du brda'i le'u ste bdun pa'o// // da ni rnal 'byor ma rnams kyi skyes pa dang / /skye ba'i rgyu so sor rtogs pa'i ched dang / /gnas pa'i rgyu rgyas par bstan pa'i phyir du/ /rnal 'byor ma'i le'ur gsungs pa/ /nam mkha'i khams su b+ha ga bsam/ /dbus su bsgom par bya ba ni/ /zhes pa la/ nam mkha'i khams su zhes pa ni pad+ma'i brda'i shes rab bo//b+ha ga zhes pa ni ye shes kyi brda'i thabs so/ /sgom pa zhes pa gnyi ga snyoms par 'jug pa'o/ /'khor lo zhes pa gnyis po dbyer mi phyed pa'i rang bzhin nyid kyis na/ bde ba chen po 'khor lo zhes par mngon par brjod par bya'o/ /'di nyid du gsungs pa yang //mkha' khams su zhes pad+ma la/ /b+ha ga zhes pa ye shes bshad/ /sgom pa zhes bya snyoms 'jug ste/ de yi bde ba 'khor lor brjod/ /lha rnams te 'og nas 'byung ba rnams kyi ji ltar 'byung ba zhes pa rim pa ji lta bar skye ba gsal bar bya ste/ sa la sogs pa rlung gi mthar thug pa'i lha rnams gcig nyid de ro mnyam par byed pa'o//rdo rje pad+ma yang dag par sbyor ba'i bde bas lhan cig skyes pa'i dga' ba'i ngo bo gcig pa nyid kyis 'du ba ni 'khor lo zhes pa'o/ /sgom pa po zhes pa ni kye'o rdo rje'i rnal 'byor dang ldan pa'o/ /ji lta ba yang dag pa'i don 'byung ba rtogs par 'gyur ba ste/gang gsungs pa'i lha'i 'khor lo de ga las 'byung zhes dogs par byas nas gsungs pa/ chos 'byung las skyes 'khor lo ni/ /rim gnyis zhes pa ste/ stong pa nyid dang snying rje dbyer med pa'i bdag nyid kyi byang chub kyi sems kyi thig le'o/ /dag pa zhes pa rang bzhin gyis 'od gsal ba'o//skyon med pa zhes pa rang bzhin brgya drug cu'i snang ba dang bral ba'o/ /ze 'bru'i ni zhes pa rdo rje dang pad+ma'i ze 'bru'o/ /gcig ces pa gnyis med pa mchog tu mi 'gyur ba'i bde ba'i rang bzhin no/ /gru gsum zhes pa chos 'byung du'o//gzhan brjod min zhes pa byang chub kyi sems rdo rje gcig pu kho na'o/ /de'i dbus su zhes pa nor bu'i nang du gnas pa'o/ /ro zhes pa lus dang ngag dang sems gcig pa'i sku'o/ /bco lnga'i cha'i bdag nyid can gyi gdan ni dga' ba bcu drug gcig tu 'dres par gyur pa'i rje btsun gang gi nges pa yin pa'o zhes pa nges pa'i don to//'dir rab tu rgyas par ston pa ni dpal sam+bu Ta ru gsungs pa'ang / mgo bo med dang mgo bo nyid/ /nA da'i mtha' dang gsang pad+ma/ /cha rnams sna tshogs yi ge rnams/ /de bzhin nyid du gdan rnams kyang / /sku gsung thugs kyi rdo rje ni//chos kyi dbyings su rnam par 'phrul/ /bsdus nas gong bu'i sbyor ba yis/ /rdo rje sems dpa' rang nyid 'gyur/ /zhes so/ /dpal mtshan yang dag par brjod par yang gsungs pa/ 'dod pa chen po bde ba che/ /dga' ba chen po mgu ba che/ / gzugs chen lus kyang che ba ste/ /kha dog che zhing lus bongs che/ /ming yang che zhing rgya che ba/ /dkyil 'khor chen po yangs pa yin/ /zhes pa la sogs pa'o/ /chu'i khams dang me'i khams ro mnyam pa mchog gi go 'phang shes rab dang thabs kyi bdag nyid kyi rnal 'byor dbang po dang bcas pa de ni sangs rgyas kyi gzugs brnyan zhes pa'o//'di las gau rI la sogs pa rnams su 'gyur zhing / /kha dog dbye bas so so gzhan/ /zhes pa nges pa'i don to/ /da ni snying ga'i zla ba'i dkyil 'khor la lha'i sa bon gyi yi ge bsams nas/ rnam par thar pa'i sgo la sogs pa rnam par dag par byas te/nam mkha'i mthil du ye shes kyi sa bon gyi 'od zer rnams kyis de bzhin gshegs pa rnams dang byang chub sems dpa' rnams spros nas de rnams la mchod pa byas te/ /sdig pa bshags pa dang / bsod nams la rjes su yi rang ba dang / gsum la skyabs su 'gro ba dang /byang chub tu sems bskyed pa dang / lam la brten pa dang / bdag nyid kyi dngos po 'bul ba dang / stong pa nyid du dmigs pa sngags pas bya'o/ /de skad du yang gsungs pa/ 'dir mi mngal nas skyes pa rnams 'chi ba'i dus su/ sa yi khams ni chu la thim/ / chu ni me la thim pa ste/ /me yang phra ba'i khams la'o/ /rlung yang sems la rnam par thim/ /zhes pa'o/ /de ltar khams kyi tshogs myur du rnam par nyams pa/ nam mkha'i khams rnam pa thams cad pa'i gzugs brnyan yul dang rnam par bral ba dbus kyis la kun gzhi'i rnam par shes pa gzhag par bya'o zhes pa'o//de nas sngags 'di brjod par bya ste/ /oM shU n+ya tA dz+nyA na badzra swa b+hA wa At+ma kou0f85haM/ zhes brjod la khams gsum pa rdul phra rab kyi chos nyid las 'das pa stong pa nyid du rnam par bsgom par bya'o zhes pa/ de bzhin gshegs pa'i nges pa'o/ / de nas chos 'byung nam mkha'i khams kyi rang bzhin bsgom par bya'o/ /de'i dbus su hUM yig yongs su gyur pa rdo rje'i sa gzhi la sogs pa zhes pa drang ba'i don to/ /da ni nges pa'i don gsal bar bya ste/ rgyud gzhan du gsungs pa yang / /rdo rje dang pad+ma'i steng du gnas pa de las nges par byung ba'i de bzhin gshegs pa thams cad dang rang gi lha'i bdag nyid rnam par snang mdzad du byas nas rdo rje'i tshig gis sngags kyi yi ge bkod de khang pa brtsegs pa kun nas bskyed par bya'o//de'i steng du sngags kho nas de bzhin gshegs pa thams cad bzhugs pas rgyal mchog tu gyur pa nor bu rin po che chen pos spras shing /kha dog sna tshogs pa dril bu 'phyang zhing / rlung gis bskyod pa'i dar dang ldan pa'i ba dan dang / me tog gi phreng ba dang lda ldi dang / do shal dang do shal phyed pa dang / /zla bas nye bar mdzes pa rdo rje nor bu'i rtse mo can gyi gzhal yas khang pa bsam par bya'o/ / gzhal yas khang pa ye shes su/ /gsang ba'i dkyil 'khor mtshan nyid can/ /sems dang ye shes 'dres pa ste/ /bde ba chen po gsung du gsol/ /dpal sangs rgyas thams cad mnyam par sbyor ba mkha' 'gro ma dra ba sdom par gsungs pa yang / dkyil 'khor gyis ni dman pa dang //dam tshig rnams ni dor ba dang / /gsang ba'i de nyid mi shes pas/ /rdo rje sems dpa' grub mi 'gyur/ /zhes so/ /bcom ldan 'das kyis gsungs pa yang / /sra mkhregs dkyil 'khor gsang ba che/ /nam mkha' lta bur dri ma med/ / yid mi bde las rnam par grol/ /rnam par rtog pa 'phrog pa'i mchog /ces so/ /gsungs pa yang / gcig tu sra mkhregs rdo rje'i bdag /'gro ba'i bdag po 'phral du skyes/ /zhes so/ /nyon mongs dri ma kun las 'das/ /zla ba bzhin du dkyil 'khor sdug /sangs rgyas kun gyi yon tan 'dir//A li'i gzugs las rab 'jug go/ /zhes pa la sogs pa'o/ /bcom ldan 'das zla ba'i dkyil 'khor yon tan gyi khyad par ci lta bu lags/ dpal gsang ba'i dbang po'i thig ler gsungs pa/ yan lag thams cad sgom las 'das/ /rtogs pas brtag pa rnam par spangs//phyi mo thig le cha las 'das/ /'di ni dkyil 'khor dam pa'o/ /zhes so/ /dpal dri ma dang bral ba'i 'od du yang gsungs pa/ nyi ma'i steng du zla ba'i dbus su hUM yig zla ba'i mtshan ma lta bu'o/ /de bzhin du rdul gyi steng du byang chub kyi sems so//byang chub kyi sems kyi dbus su kun gzhi'i rnam par shes pa dri za'i sems can no/ /de nas me long la sogs pa rnam pa lnga rnams kyis zhes pa ni/ de la zla ba byang chub kyi sems dbyangs dang ldan pa ni me long lta bu'i ye shes te/ gzugs kyi phung po skyed par byed pa rnam par snang mdzad do//nyi ma dang rdul gsal byed dang ldan pa ni mnyam pa nyid kyi ye shes te/ tshor ba'i phung po skyed par byed pa rin chen 'byung ldan no/ /dri za'i sems can hUM yig dang ldan pa ni so sor rtog pa'i ye shes te/ 'du shes kyi phung po skyed par byed pa 'od dpag tu med pa'o/ /'di rnams gcig pa nyid srog gi rlung haM yig dang ldan pa ni bya ba grub pa'i ye shes te/'du byed kyi phung po skyed par byed pa don yod grub pa'o/ /de nas sku thams cad kyi cha shas yongs su rdzogs pa dang / rnam par shes pa haM yig dang ldan pa ni chos kyi dbyings rnam par dag pa'i ye shes te/ rnam par shes pa'i phung po skyed par byed pa mi bskyod pa'o zhes pa phyi rol dang nang du ye shes lnga'i bdag nyid do//'di rnams gcig tu 'dres par gyur pa ni sa bon te/ rdo rje sems dpa' 'o zhes so/ /'di'i don ni 'di yin te/ dpal shes rab kyi pha rol tu phyin pa'i le'u bcu par gsungs pa/ rab 'byor gyis gsol pa/ bcom ldan 'das 'di ni bsam gyis mi khyab pa ston pa'o/ /bcom ldan 'das kyis bka' stsal pa/ gzugs ni bsam gyis mi khyab pa'o/ /rab 'byor de bzhin du tshor ba dang 'du shes dang 'du byed rnams dang rnam par shes bsam gyis mi khyab pa'o/ /rab 'byor gzugs bsam gyis mi khyab pa'o zhes kyang 'du shes pa med na shes rab kyi pha rol tu phyin pa la spyod do//rab 'byor de bzhin du tshor ba dang / 'du shes dang / 'du byed rnams dang / rnam par shes pa bsam gyis mi khyab pa'o zhes kyang 'du shes pa med na shes rab kyi pha rol tu phyin pa la spyod do zhes so//da ni rdo rje sems dpa' zhes pa gsal bar bya ste/ rdo rje ni mchog tu bde ba'i ye shes byang chub kyi sems so/ /sems dpa' ni rnam pa thams cad pa'i shes rab kyi gzugs brnyan no/ /ye shes dang rnam par shes pas byin gyis brlabs pa sgrib pa med pa gcig tu 'dres par gyur pa'i de kho na nyid/'gro ba'i don byed pa ni rdo rje sems dpa' zhes pa'o/ /de'i gdan 'di ni rdo rje sems pa'i gdan te/ gsungs pa yang 'di lta ste/ a sogs ka sogs mnyam sbyor ba/ /rdo rje sems dpa'i gdan du dang / /'gyur med las byung gong bu la/ /hUM phaT yi ge mi 'dod do/ / zhes pa/ 'gyur med 'di yis bskyed cing 'gyur ba nyams par 'gyur ba mchog gi dbang po can/ /zhes pa la 'gyur ba ni skye ba dang 'jig pa'i gnas skabs kyi mtshan nyid can te 'pho ba'i skad cig go/ /de gang la 'gags par gyur pa de ni mchog tu mi 'gyur ba 'pho ba med pa'i skad cig go/ / de nyid rdo rje ye shes zhes pa'o/ /dpal mtshan yang dag par brjod par gsungs pa yang / /gsang sngags skye gnas 'gyur ba med/ /gsang sngags chen po rigs gsum pa/ /gsang sngags don kun skyed pa po/ /thig le chen po 'gyur ba med/ /ces so/ /de skad du yang dpal dang po'i sangs rgyas su gsungs pa/gang gi bde ba'i dbang po skyed cing nyin zhag so so'i dbang las gang gis mngal nas byung / /skad cig gang gis 'gyur ba rnam par bral ba grub cing g.yo ba med gyur pa/ /sangs rgyas bya ba de spangs nas ni bde mnyam dang bral stong pa gzhan gang sgom byed pa//de yi bskal pa bye ba du ma rnams kyis sangs rgyas nyid dang lhan skyes bde ba'ang ring / /zhes so/ /dpal shes rab kyi pha rol tu phyin pa le'u bcu gcig par gsungs pa yang / 'di lta ste/ blo chung ba de rnams 'jig rten pa dang 'jig rten las 'das pa'i chos rnams yang dag par ji lta ba bzhin du yongs su shes pa'i rtsa ba shes rab kyi pha rol tu phyin pa spangs shing dor nas yal ga la 'ju bar bya bar sems so//rab 'byor 'di lta ste dper na/ khyi ni jo bo'i gan nas zan spangs nas las byed pa'i gan nas zan kham tshol bar sems te/rab 'byor de bzhin du ma 'ongs pa'i dus na byang chub sems dpa'i theg pa pa'i gang zag kha cig 'byung bar 'gyur te/ gang shes rab kyi pha rol tu phyin pa thams cad mkhyen pa'i ye shes kyi rtsa ba bor nas yal ga dang 'dab ma dang / lo mar gyur pa'i nyan thos dang rang sangs rgyas kyi theg pa la snying po sangs rgyas nyid tshol bar sems pa'o zhes so//da ni/ sems dpa'i gzugs brnyan las byung ba/ /dkyil 'khor dbang po rnam par sgom/ /bu bzhin zhal dang mtshan ma sogs/ /zla ba chu shel nor bu'i 'od/ /ces pa la/ /zla ba chu shel kun rdzob byang chub sems ni kun da dang /zla ba dang 'dra ba nyid kyi phyir ro/ /nor bu'i 'od ces pa nor bu'i nang du rab tu snang ba spros pa thams cad las rnam par grol ba lhan cig skyes pa'i sku bde ba chen po'i mtshan nyid can zhes pa'o/ /dpal mtshan yang dag par brjod par yang gsungs pa/dngos don ma lus rnams la dga'/ /stong pa nyid dga' blo yi mchog /srid pa'i 'dod chags sogs las 'das/ /srid gsum dga' ba chen po pa/ /sprin dkar dag pa shin tu dkar/ /'od bzang ston ka'i zla ba'i 'od/ /ces so/ /de nyid kyi phyir rang nyid las phyag dang zhal dang dbyibs med pa'i phyir bu bzhin zhes brjod do//gsungs pa yang / rdo rje yongs su gyur pa las/ /de nas rdo rje sems dpa' sgom/ /rnam pa thams cad mchog ldan pa/ /zla ba'i kha dog mtshungs pa'i 'od/ /ces so/ /zla ba'i kha dog nyid ci lta bu zhe na/ /dpal sangs rgyas thams cad mnyam par sbyor ba mkha' 'gro ma dra ba sdom par gsungs pa/mchog tu mi 'gyur dag pa'i phyir/ /chos kun rnam par dag pa las/ /gsang ba'i de nyid dag phyir yang / /rdo rje 'dzin de zla ba'i mdog /ces so/ /gsungs pa yang / yid mi bde las rnam par grol/ /rnam par rtog pa'i rab rib bcom//nyon mongs dri ma kun dag pa/ /zla ba 'dra ba'i sems zla ba/ /zhes so/ /de ltar de ma thag tu bshad pa'i yan lag so so dang ldan pa'i lha mo'i 'khor lo gsungs pa/ 'di las gau rI la sogs 'gyur/ /zhes so/ /de skad du 'di nyid du bcom ldan 'das kyis gsungs pa/byang chub sems ni zla bar 'gyur/ /bco lnga'i cha yi bdag nyid can/ /bde ba chen po A li'i gzugs/ /rnal 'byor ma rnams de yi cha/ /zhes so/ /dbang po rdo rje gshin rje dkar/ /chu ru chu yi rnal 'byor ma/ /lus ngan rdo rje mkha' 'gro ma/ /dbus su bdag med rnal 'byor ma//phyi'i 'phar ma la/ gau rI chom rkun ro langs ma/ g+hasmarI dang puk+ka sI/ bde bzhin ri khrod gdol ba mo/ /g.yung mo brgyad pa gang bar byed/ /'og ldan ma dang steng ldan nyid/ /mkha' spyod ma dang sa spyod brjod/ /srid dang myang 'das ngo bo yis/ /snying rje chen po 'di dag gnas/ / lha mo 'di rnams thams cad ni/ /kha dog nag mo drag chen mo/ /phyag rgya lnga yis rnam par brgyan/ /zhal gcig phyag gnyis spyan gsum pa/ /yid du 'ong ba'i gzugs can kun/ /ji ltar bdag med rnal 'byor ltar/ /g.yon na rnal 'byor lhung bzed de/ /kha T+wAM ga yang steng du gnas//g.yas pas rdo rje gri gug ste/ /ro la zhon pa gzi brjid 'bar/ /lhan cig skyes dga' dga' ba'o/ /zhes pa drang ba'i don to/ /da ni nges pa'i don gsal bar bya ste/ dpal phyag na rdo rjes gsungs pa/ 'dir tshes gcig la sogs pa'i tshes dkar po'i lnga pa rnams bdag med ma la sogs pa'i rnal 'byor ma rnams te/phung po lnga rnam par dag pas dang po dga' ba'i 'khor lo'o/ /de bzhin du drug pa la sogs pa bcu pa ji srid pa'i tshes lnga rnams gau rI la sogs pa'i rnal 'byor ma rnams te/ khams lnga rnam par dag pas gnyis pa mchog tu dga' ba'i 'khor lo'o//de bzhin du bcu gcig pa la sogs pa nya'i mthar thug pa tshes lnga rnams ri khrod ma la sogs pa'i rnal 'byor ma lnga rnams te/ yul lnga rnam par dag pas gsum pa khyad par dga' ba'i 'khor lo'o/ /de'i mthar lhan cig skyes pa'i dga' ba bcom ldan 'das kye'i rdo rje stong pa las/stong pa byang chub kyi cha bcu drug pa'o zhes pa dbang bskur gyi don to/ /de bzhin du bcom ldan 'das kyis gsungs pa/ dang po dga' ba rab tu bshad/ /mchog tu dga' ba gnyis pa ste/ khyad dga'i dga' ba gsum pa'o/ /lhag ma lhan cig skyes dga' 'o/ /zhes pa 'di lta bu la sogs pa dbang bskur gyi don to//'dir lha mo lnga lnga'i 'khor lo gsum gyi mthar bzhi pa lhan cig skyes pa'i dga' ba byang chub kyi sems kyi cha bcu drug pa 'jig rten kun rdzob tu bcom ldan 'das kyis gsungs so zhes pa'o/ /dpal mtshan yang dag par brjod par yang gsungs pa/rnam pa kun ldan rnam pa med/ /bcu drug phyed phyed thig le 'chang / /cha med cha las 'das pa ste/ /bsam gtan bzhi po'i mtha' 'chang ba/ /zhes so/ /'di kho na dbang bskur ba'i rdo rje'i tshig tu bshad par bya ste/ rnam pa kun ldan rnam pa med/ /ces pa ni rgyu ste sngar brjod pa'i sangs rgyas kyi gzugs brnyan zhes pa'o//bcu drug phyed phyed thig le 'chang / /zhes pa ni byang chub kyi sems zhu ba thig le bzhi 'dzin pa'o zhes pa 'bras bu'o/ /cha med pa ni cha bco lnga'i mthar gnas pa'o/ /cha las 'das pa ni nag po'i tshes gcig la sogs pa la zhugs pa ma yin pa'o zhes pa'i don to//bsam gtan bzhi pa'i mtha' 'chang ba/ /zhes pa ni lhan cig skyes pa'i dga' ba'i mtha' 'chang ba'o zhes pa de bzhin gshegs pa'i nges pa'o/ /de'i phyir dong po dga' ba'i bde ba'i bsam gtan no/ /gnyis pa mchog tu dga' ba'i bde ba'i bsam gtan no//gsum pa khyad par du rangs pa'i bde ba'i bsam gtan no/ /bzhi pa lhan cig skyes pa'i dga' ba'i bde ba'i bsam gtan te/ lnga pa dang bcu pa dang nya gang ba dang / nya'i mthar thig le la mchog tu mi 'gyur ba'i bde ba ni bsam gtan gnas pa'o/ de'i mtha' ni rtse mo'i cha bde ba yongs su gang ba nyid bsam gtan gyi mtha' ste de 'dzin pas na/bsam gtan bzhi pa'i rtse mo 'chang / /zhes pas so/ /da ni yan lag drug sgom zhes pa la sogs pa la 'di'i don 'di yin te/ rgyud ni rgyud gzhan gyis rtogs bya/ /zhes pa de bzhin gshegs pa'i nges pa'o/ / de ltar na rgyud gzhan du gsungs pa des na yan lag drug gi rnal 'byor 'di bsgom par bya ste/ so sor sdud dang bsam gtan dang / /srog rtsol de bzhin 'dzin pa dang / /rjes su dran dang ting nge 'dzin/ /rnal 'byor yan lag drug tu 'dod/ /'dir so sor sdud ces bya ba ni phyi rol gyi gzugs la sogs pa'i yul rnams la mig la sogs pa'i dbang po rnams kyi mig gi rnam par shes pa rnams mi 'jug cing /nang gi yul rnams la lha'i mig la sogs pa'i dbang po rnams kyi lha'i mig gi rnam par shes pa la sogs rnams 'jug pa ste/ nang du stong ba nyid la dmigs pas ma brtags par dngos po thams cad mthong ba stong pa nyid so sor snang ba pra phab na gzhon nu mas me long la mthong ba lta bu'o zhes pa so sor sdud pa'i yan lag tu brjod de/khams gsum pa'i sangs rgyas kyi gzugs brnyan so sor mthong ba'i phyir ro/ /de nas bsam gtan zhes bya ba ni stong zhing mthong la yod pa'i chos rnams thams cad la shes rab ces bya ba dang po de rnams la sems 'jug pa dang rtog pa zhes bya ba sems kyi dngos po 'dzin pa dang spyod pa zhes bya ba dngos po so sor rtogs pa dang /dga' ba zhes bya ba dngos po thams cad la sems pa dang bde ba mi g.yo ba zhes bya ba dngos po thams cad la bde ba yang dag par myong ba zhes pa ste bsam gtan gyi yan lag lngar brjod par bya'o//de nas srog rtsol zhes bya ba rkyang ma dang ro ma dang g.yon pa dang g.yas pa'i lam 'gags pa dbu ma a wa d+hU tI'i lam du srog gi rlung rtag tu 'jug pa ste/ dbyung ba dang dgang ba dang bum can gyi sbyor bas bya'o zhes pa srog rtsol gyi yan lag tu brjod par bya'o/ /de nas 'dzin pa zhes bya ba srog dbang chen dang chu dang me dang rlung gi dkyil 'khor la lte ba dang snying ga dang mgrin pa dang / dpral bar 'jug pa phyi rol du mi 'gro bar thig le la srog 'jug par byed pa zhes pa 'dzin pa'i yan lag tu brjod par bya'o//de nas rjes su dran zhes bya ba ni rang gi 'dod pa'i lha mthong ba gzugs brnyan gyi rnam par rtog pa dang bral ba ste/ de las 'od zer du ma 'phro ba'i ngo bo 'od kyi dkyil 'khor te/ de las rnam pa du ma 'phro ba'i ngo bo khams gsum pa spro bar byed pa zhes pa rjes su dran pa'i yan lag tu brjod par bya'o//de nas ting nge 'dzin zhes bya ba ni 'dod pa'i lha la rjes su chags pa las gang mi 'gyur ba'i bde ba thob pa ste/ de las sems gcig tu byed pa sems gzung ba dang / 'dzin pa dang bral ba ni de bzhin gshegs pa rnams kyi ting nge 'dzin gyi yan lag tu brjod do//'dir ni yan lag drug gi rnal 'byor mdor bsdus pas gsungs pa ste/ rgyas par mngon par brjod pa 'bum pa'am mchog gi dang po'i sangs rgyas su bla ma dam pa'i gdams ngag las rnal 'byor pa rnams kyis phyag rgya chen po'i dngos grub kyi ched du rtogs par bya'o zhes so//dpal dang po'i sangs rgyas su gsungs pa yang / so sor sdud pas rnal 'byor pa ni yul dang rnam bral sngags rnams kun gyis byin gyis rlob/ /mngon par shes pa lnga 'thob 'gyur te mi yi bdag po bsam gtan sbyor bas dag pa'o//srog gi rtsol bas dag pa zla ba nyi ma dang bral byang chub sems dpa' rnams kyis mchod/ /bdud dang nyon mongs sogs nyams stobs bcu la ni 'jug par 'gyur te 'dzin pa'i stobs kyis so/ /rjes dran legs par dag na dri med 'od kyi dkyil 'khor rnams kyang ye shes gzigs las so//de nas ting nge 'dzin gyis dag na nyin zhag 'ga' zhig rnams kyis ye shes lus 'grub 'gyur/ /zhes so/ /bcom ldan 'das kyis ji skad gsungs pa/ rang gis rig bya zhes bya ba la sogs pa ste tshig 'di'i rgyas par bstan pa/ dpal dri ma med pa'i 'od du gsungs pa/ci ste byis pa rnams kyis 'di brjod de/ gal te de bzhin gshegs pa'i ye shes rang rig pa yin na/ de'i tshe chos rnams thams cad rang bzhin med par ci ltar de bzhin gshegs pas gsungs she na/ 'di la brjod par byas te/ 'dir de bzhin gshegs pa'i ye shes chos thams cad rang bzhin med par rtogs pa zhes bya ba ni dngos po thams cad med pa'i mtshan nyid can shin tu gnyid log pa'i sems ma yin no//dpal shes rab kyi pha rol tu phyin par yang gsungs pa/ rab 'byor sems gang zhig yod pa'i sems de ni sems ma yin te zhes pa rang bzhin gyis 'od gsal ba zhes bya'o//dpal mtshan yang dag par brjod par yang gsungs pa/ 'du shes kun gyi don spangs shing / /rnam shes don ni 'gag par byed/ /sems can kun yid yul can te/ /sems can kun gyi yid rig pa/ /sems can kun gyi yid la gnas//de rnams sems dang mnyam nyid son/ /gsungs pa yang gal te de bzhin gshegs pa'i ye shes rang rig par mi 'gyur na/ de'i tshe sems can gyi bsam pa'i dbang las de bzhin gshegs pa chos ston par mi 'gyur te/ chos thams cad rab tu ma rtogs pa'i phyir dang yang dag par rig pa med pa nyid kyi phyir ro//ci ste dbang po'i sgo nas rang rig pa yin na/ de lta na cha med pa dang kun du 'gro ba dang thams cad la khyab par mi 'gyur te/ sgrib pa thams cad pa nyid kyi phyir ro/ /de'i phyir de bzhin gshegs pa'i ye shes ni rang rig pa chos thams cad kyi rang bzhin mkhyen pa/rnam par mi rtog pa dbang po med pa'o zhes so/ /gsungs pa yang / thog ma med pa spros med bdag /de bzhin nyid dag dag pa'i bdag /ces so/ /rang gis 'phrog po rang byed po/ /zhes pa la sogs ni/ gsungs pa yang / 'phrog pa po ni kun gzhi'i rnam par shes pa'i mtshan nyid can byang chub kyi sems 'pho ba'i skad cig /lhan cig skyes pa'i dga' ba ste 'jig rten kun rdzob kyis so/ /de ltar 'pho ba'i skad cig la sogs pa byed pa po dang byed pa dang / las rnams sdud pa'i byed pa po gzhan du 'dir 'gyur te/ gang spro ba'i byed pa po ni byed pa po ma yin no//de'i phyir/ mkha' khyab mkha' yi rdo rje can te yul dang rnam bral yon tan med pa rang bzhin med/ /ces pa lhan cig skyes pa'i sku/ /cha med kun 'gro khyab pa po/ /phra zhing zag med sa bon dang / /rdzas kun las ni rnam par grol/ /nam mkha'i lam la shin tu gnas//zhes so/ /de'i phyir spro ba dang sdud pa'i byed pa po mya ngan las 'das pa'i mtshan nyid can yang med do zhes pa'i don to/ /de ltar byed pa po zad pa'i nges pa'o/ /dpal dang po'i sangs rgyas su gsungs pa yang / /de phyir byed po 'ga' yang srog chags rnams kyi bde dang sdug bsngal mi sbyin mi 'phrog ste/'khor ba rnam pa gsum po gang byas sngon gyi las ni 'bras bu rab tu sbyin par 'gyur/ /skye dang sdud pa'i byed pa po 'di ster zhing des 'phrog rmongs pa rnams kyi blo gros te/ /lus la dpag med dge ba 'phrog byed bug pa rang gi dbang po rnams kyis mthong ma yin//rang nyid byed pa po zhes pa la sogs pa ste spro ba ni srid pa spro ba'o/ /'phrog po zhes pa sdud pa po'o/ /rgyal po zhes pa spro ba med cing 'phrog pa med pa spro ba dang sdud pa las rnam par grol ba rang bzhin gyis gnas pa/ zla ba lta bur rnam par gsal lo zhes pas rgyal po'o//gsungs pa yang / chos kyi dbang phyug chos kyi rgyal/ /legs pa'i lam ni ston pa po/ /zhes so/ /'di tsam gyis kyang sems kho na mya ngan las 'das pa dang sems kho na 'khor ba'o zhes bstan to/ /dpal rdo rje rtse mor gsungs pa yang / 'khor ba'i don ni ci zhig lags//ji ltar byis pa rnams 'byung zhing / /yang dang yang du 'khor byed de/ /de yang 'khor ba'i drag pa'i bdag /nga nyid yin te rang nyid gtso/ /mya ngan 'das las 'das pa'ang ci/ /zhes brjod/ /dbye bya de bzhin stong nyid gang / /de yis rang bzhin rnam par spangs/ / dngos po'i ngo bos mtshan nyid dang / /mtshan ma yang ni rnam par spangs/ /ngag sgra yang na gzung ba dang / /rnam rtog rdul phran yod min te/ /de phyir mya ngan 'das pa'i sgras/ /nga nyid kho na skye dgu'i bdag /ces so/ /dpal kye'i rdo rje'i rgyud las rdo rje'i tshig gi snying po bsdus pa'i dka' 'grel du bdag med ma'i le'u ste brgyad pa'o// //da ni de las gzhan zhes pa la sogs pas rnam par dag pa de kho na nyid dang dbye bas te/ thog mar de kho na nyid kyi rnam par dag pa gsungs pa/ dpal rdo rje rtse mor gsungs pa/ rnam par dag pa ci zhig brjod/ /yod min med pa'ang ma yin la//dngos po med cing dngos med min/ /smra po med cing smra bya'ang min/ /rnam dag mya ngan 'das pa nyid/ /ces so/ /dngos po thams cad kyi zhes pa la sogs pa phyi rol dang nang gi rnam par rtog pa'i dngos po rnams mnyam pa nyid/ rnam dag de bzhin nyid de de lta kho nar rtag tu gnas pa ni de bzhin nyid de rang bzhin gyis dri ma med pa nyid kyis rtag tu rnam par dag pa nam mkha' bzhin du 'dus ma byas pa'i rang bzhin du bshad la/de'i ngo bos de bzhin nyid bsgom par bya'o zhes pa ste/ dpal shes rab kyi pha rol tu phyin pa de bzhin nyid kyi le'ur gsungs pa/ ji ltar de bzhin gshegs pa'i de bzhin nyid ni 'gyur ba med pa rnam par 'gyur ba med pa rtog pa med pa rnam par rtog pa med pa 'ga' zhig tu yang gzhom du med pa ste/de bzhin du chos thams cad kyi de bzhin nyid ni 'gyur ba med pa rnam par 'gyur ba med pa/ rtog pa med pa rnam par rtog pa med pa 'ga' zhig tu yang gzhom du med pa'o//de ci'i phyir zhe na/ gang de bzhin gshegs pa'i de bzhin nyid dang gang chos thams cad kyi de bzhin nyid na gcig pa kho na ste/ de bzhin nyid 'di ni gnyis su med cing gnyis su byar med pa'o zhes so/ /de bzhin du dpal mtshan yang dag par brjod par yang gsungs pa/ yang dag bdag med de bzhin nyid/ /yang dag mtha' ste 'gyur ba med/ /stong nyid smra ba'i khyu mchog ste/ /zab cing rgya che'i sgra sgrogs pa/ /zhes so/ /bye brag med par rtogs par byas nas/ /phyi nas zhes pa la sogs pas re re yis te/ phung po la sogs pa'i dbye bas lha rnams kyi rnam par dag pa phyi nas rtogs par bya ste/gzugs phung rdo rje ma ru 'gyur/ /zhes pa la sogs pas so/ /'o na dbang po la sogs pa rnams ci'i phyir rnam par dag par brjod ce na/ gsungs pa/ nyon mongs mi shes bsgribs pa zhes pa ste/ mi shes pa ni ma rig pa nga dang nga yi'o snyam du 'dzin pa'o//nyon mongs pa rnams ni 'dod pa dang mi 'dod pa'i las kyi rgyu sems kyi bye brag rnams so/ /de rnams kyis bsgribs pa ni g.yogs pa ste de sbyar bar bya'o/ /dpal dri ma med pa'i 'od du gsungs pa yang / stong pa las ni dngos po'i tshogs/ brtags pa'i gzugs ni rnam spangs gang / /snang ba mthong ste me long la/ /pra phab gzhon nu ma yis bzhin/ /zhes pa 'jig rten las 'das pa'i bden pas gzugs kyi phung po rnam par dag pa me long lta bu'i ye shes so/ /dngos po thams cad mnyam gyur nas/ /dngos po gcig po 'gyur med gnas//'gyur med ye shes las byung ba/ /chad pa ma yin rtag pa min/ /zhes pa tshor ba'i phung po rnam par dag pa mnyam pa nyid kyi ye shes so/ /ming gi bdag nyid yi ge kun/ /a yig rigs las yang dag byung / /'gyur med chen po'i go 'phang thob/ /ming med ming dang ldan pa'ang med//ces pa 'du shes kyi phung po rnam par dag pa so sor rtog pa'i ye shes so/ /skyes pa med pa'i chos rnams ni/ /'du byed bral ba rnams la yang / /sangs rgyas nyid med byang chub med/ /sems can med cing srog nyid med/ /ces pa 'du byed kyi phung po rnam par dag pa bya ba sgrub pa'i ye shes so//rnam par shes pa'i chos nyid 'das/ /ye shes rnam dag gos pa med/ /rang bzhin 'od gsal chos rnams ni/ /chos kyi dbyings su son zhing rtogs/ /zhes pa rnam par shes pa'i phung po rnam par dag pa chos kyi dbyings kyi ye shes so zhes so/ /slar yang de nyid du gsungs pa/rnam pa thams cad pa'i stong pa nyid kyi ye shes ni 'pho ba'i bde ba dang / rtog pa'i sgrib pa zad pa la sogs pa ste/ phung po dang khams dang skye mched la sogs pa rnam par dag pa'o zhes so/ /dpal shes rab kyi pha rol tu phyin par yang rnam par dag pa'i le'ur gsungs pa/ rab 'byor gang gzugs rnam par dag pa de ni 'bras bu rnam par dag pa/ 'bras bu rnam par dag pa gang yin pa de ni gzugs rnam par dag pa ste/ rab 'byor de lta na gzugs rnam par dag pa dang / 'bras bu rnam par dag pa 'di ni gnyis su med de gnyis su byar med so so ma yin tha mi dad do/ / rab 'byor de bzhin du tshor ba dang 'du shes dang 'du byed rnams te/ rab 'byor rnam par shes pa rnam par dag pa gang yin pa de ni 'bras bu rnam par dag pa/ gang 'bras bu rnam par dag pa de ni rnam par shes pa rnam par dag pa'o zhes so/ /'jig rten ji bzhin de sangs rgyas/ /ji ltar chos ni rnyog med pa//de ltar sems can khams rnams bshad/ /nam mkha' bzhin du dri ma med/ /dam min kun rtog rnam rtog gis/ /sems kyi rin chen dri mar byas/ /sems dag na ni dag par 'gyur/ /nam mkha' 'jig med ji bzhin no/ /dpal dgongs pa lung du ston pa'i rgyud du gsungs pa yang /lcags kyi gong bu chur dor ba/ /'byings pa 'ba' zhig kho na'o/ /de nyid snod du byas pas gzhan/ /sgrol 'jug rang nyid sgrol bar byed/ /de bzhin snod du byas pa'i sems/ /shes rab thabs kyi rang bzhin las/ /rang nyid grol zhing gzhan grol byed/ /mchog tu dga' bas rol par byed/ / ces so/ /gzugs sgra de bzhin dri dang ni/ /ro dang reg bya rang bzhin las/ /chos kyi dbyings ni mchog tu zhi/ /sems ni rin chen zhes bshad do/ /yid bzhin nor bu rin chen che/ /'dod pa'i don gyi 'bras bu ster/ /de bzhin sems ni yongs dag pa/ /sangs rgyas byang chub 'bras bu ster/ /khrag dang khu ba las byung lus//zhes bshad rdo rje dbang phyug ste/ /sen mo ba spu de bzhin du/ /khams kyi khu bar spyan ras gzigs/ /khrag dang pags pa gzi brjid che/ /tshil dang rkang la rdo rje 'dzin/ /phyi sar rnam par snang mdzad mgon/ /rtsa yi rdzas la bdud rgyal po/ /lnga po 'di rnams sangs rgyas lnga//rdo rje mkha' 'gros gsungs pa yin/ /sa yi khams ni rnam dag las/ /'khor los mdzes pa spyan ma'o/ /shin tu dang bar rdo rje'i yum/ /me la pad+ma'i bu mo'o/ /sgrol ma rlung ni rnam dag pas/ /rdo rje'i btsun mo bzhi po rnams/ /rdo rje mkha' 'gro'i mtshan can gyi/ / gur gyis 'di rnams gsungs pa yin/ /chags pas 'jig rten bskyed bya ste/ /'dod chags zad las zad par 'gyur/ /rdo rje'i chags pa yongs shes las/ /yid ni rdo rje sems dpar 'gyur/ /zhes so/ /gsungs pa yang / gang phyir rgyud gang kho na las/ /las kyi bag chags bsgos gyur pa//de kho na las 'bras bu 'brel/ /ral ba las ni mar nyid bzhin/ /zhes so/ /gal te dngos po ma dag yod min yang / /de lta na yang rgyal ba rnams kyis sbyong / /kun rdzob bden pa brten pa'i 'khor lo yi/ /chos nyid ngo bo rnam par bsgoms pa tsam//chos las dngos po yang dag rnam par dben/ /gang zag thams cad rnam spangs 'jig rten te/ /'jig rten 'gro ba bsam par nus ma yin/ /chos nyid ngo bor thams cad rnam par dag /gsungs pa yang / /rnam par dag pa bdag med chos/ /yang dag ye shes zla 'od bzang //zhes so/ /gsungs pa yang / dril sogs pa'i yul de rnams gzhan yin la/ rna ba la sogs pa'i yul can de rnams gzhan yin zhing / ngag dang lag pa la sogs pa'i rnams gzhan dang las kyi dbang po'i bya ba la sogs pa rnams gzhan te/ de ltar na/ thams cad du ni phyag zhabs sogs//kun du spyan dang dbu dang zhal/ /kun du thos ldan 'jig rten du/ /thams cad khyab par byas te bzhugs/ /rdo rje sems dpa' 'o zhes so/ /de ltar/ bdag rig gzhan rig thams cad pa/ /kun la phan pa'i gang zag mchog /'jig rten dpe las 'das pa ste/ / shes dang shes bya'i bdag po mchog /ces so/ /phyag bcu drug rnam par dag pas stong pa nyid bcu drug rnams so zhes pa 'dir nges pa'i don ni dpal dri ma dang bral ba'i 'od du yang gsungs pa/ bcu drug phyed phyed thig le 'dzin pa nyid kyi phyir ro zhes pa dang 'dir stong pa nyid ni phung po lnga stong pa nyid de/nag po'i tshes gcig la sogs pa tshes lnga rnams nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid ces pa'o/ /khams lnga stong pa nyid ni drug pa la sogs pa'i tshes lnga rnams te/ don dam pa stong pa nyid dang /'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid rnams so zhes pa'o/ /dbang po lnga stong pa nyid ni bcu gcig pa la sogs pa tshes lnga rnams te/ dor ba med pa stong pa nyid dang / rang bzhin stong pa nyid dang //rang gi mtshan nyid stong pa nyid dang / chos thams cad stong pa nyid dang / dngos po med pa'i stong pa nyid ces pa'o/ /gnam stong gi mthar thug pa nyid bco lnga rnams so/ /dkar po'i tshes gcig 'jug pa'i dus su de dag gi dbus su stong pa nyid bcu drug pa dngos po med pa'i rang bzhin stong pa nyid rnam pa thams cad pa'o//de bzhin du snying rje rnam pa gsum ste 'di dag gcig pa nyid stong pa nyid bcu drug dang snying rje bcu drug gi bdag nyid can gyi brjod par bya ba phyag bcu drug pa rnams kyi rnam par dag pa'o zhes pa nges pa'i don to/ /zhabs bzhi zhes pa bdud bzhi rnam par dag pa las te/gsungs pa yang / sems can rnams kyi lus dang ngag dang sems dang ma rig pa'i bag chags kyi rnam pa ni bdud bzhi rnams te/ de rnams la lus kyi sgrib pa ni phung po'i bdud do/ /ngag gi sgrib pa ni nyon mongs pa'i bdud do/ /sems kyi sgrib pa ni 'chi bdag gi bdud do/ /phyi rol du ma rig pa 'jug pa ni lha'i bu'i bdud ste zhes so//dpal mtshan yang dag par brjod par gsungs pa yang / dpa' bo bdud dgra bdud las rgyal/ /bdud bzhi'i 'jigs pa mthar byed pa/ /bdud kyi dpung kun pham par byed/ /rdzogs pa'i sangs rgyas 'jig rten 'dren/ /zhes so/ / zhal rnams rnam par thar pa brgyad/ /ces pa 'di'i don 'di yin te/ dpal mngon par brjod pa phyi mar gsungs pa/ gzugs can gzugs la lta ba 'di ni rnam par thar pa dang po'o/ /nang gzugs med pas phyi rol gyi gzugs rnams lta ba ni gnyis pa'o/ /sdug pa'i rnam par thar pa lus kyis mngon sum du byas nas rdzogs par byas te gnas so zhes pa gsum pa'o//nam mkha' mtha' yas skye mched ni bzhi pa'o/ /rnam shes mtha' yas skye mched ni lnga pa'o/ /ci yang med pa'i skye mched ni drug pa'o/ /'du shes med 'du shes med min gyi skye mched ni bdun pa'o/ /'gog pa'i snyoms par 'jug pa ni brgyad pa ste/rnam par thar pa brgyad rnam par dag pas zhal rnams so/ /rdo rje gsum gyi dag pa'i spyan/ /zhes pa la gsungs pa yang / sprul pa yis ni rtag tu skye/ /longs spyod rdzogs pa'i byed rgyu gnas/ /chos kyi sku yi rang bzhin gyis/ /thim par 'gyur te the tshom med//de bzhin du 'di nyid du yang gsungs pa/ /gang dang gang gis 'jig rten 'ching 'gyur ba/ /de dang des ni 'ching ba las grol te/ /'jig rten rmongs pa de nyid ma rtogs pa/ /de nyid rnams spangs dngos grub rnyed mi 'gyur/ /de phyir dri med sgra med gzugs nyid med//ro yang med de sems ni rnam par dag /reg med chos med thams cad rnam par dag /rang bzhin dag pa'i 'gro la 'gro bar shes/ zhes pa dpal kye'i rdo rje'i rgyud du rdo rje'i tshig gi snying po bsdus pa'i dka' 'grel du rnam par dag pa'i le'u ste dgu pa'o// // da ni dkyil 'khor med par dbang bskur sbyin par mi bya zhing / dbang bskur ba med pa la de kho na nyid gsal bar bya ba ma yin no zhes pas/ dkyil 'khor sngon du 'gro ba'i dbang bskur ba'i le'u de nas zhes pa la sogs pa mdor bsdus te btus nas gsal bar bya'o/ /gsungs pa yang / rgyud ni rgyud gzhan gyis rtogs bya/ /zhes pa de bzhin gshegs pa'i nges pa'o/ /lha'i bdag nyid can zhes pa la gsungs pa yang / chos dang longs spyod rdzogs pa dang sprul pa dang lhan cig skyes pa'i bde ba gcig tu 'dres par gyur pa'i bdag nyid can mchog tu mi 'gyur ba'i bde ba ni lha zhes mngon par brjod par bya'o//dkyil 'khor bri ba'i sa bzhi gsungs pa/ skyed mos tshal zhes pa la sogs pa ste/ /skyed mos tshal yid du 'ong ba dga' ba'i gnas sku dang gsung dang thugs kyi dkyil 'khor gyi bdag nyid can chos 'byung gi nang du son pa stong pa nyid dang snying rje bcu drug rnam par dag pas so zhes pa dkyil 'khor gyi gnas nges pa'o//ro dang dri rnams thams cad dang ldan mtha' dag yon tan gter zhes pa/ /nam mkha'i khams kyi mtshan nyid can du rnal 'byor pas rig par bya'o zhes pa sa'i mtshan nyid nges pa'o/ /rdo rje'i thig dang yang ldan/ /zhes pa la sogs pa la gsungs pa yang //zla ba khu ba'i cha dbye bas/ /rdo rje'i thig ni btab pa la/ /yang yang cha ru phye ba yis/ /sku gsung thugs kyi dkyil 'khor la'o/ /sku dang gsung dang thugs gcig tu gyur pa'i chos rnams thams cad rnam pa gcig pas rdo rje sems dpa' nga rdo rje'i sa gzhi la thig 'debs par byed do//oM AHhUM phaT/ gsang ba rgyan gyi bkod par yang gsungs pa/ dang po sngags kyi mchog gis ni/ /nam mkha' thig gdab byas nas su/ /de nas rnal 'byor chen pos thig /gsang ba'i ma ma'i dkyil 'khor gdab/ /ces pa la sogs pa'o//dpal bde ba rtogs par byed pa yang gsungs pa/ de phyir dkyil 'khor 'khor lo zhes/ /thabs ni bde ba'i sdom pa ste/ /sangs rgyas nga rgyal rnal 'byor gyis/ /sangs rgyas yun mi ring bar 'gyur/ /gang tshe sems ni legs gnas pa/ /de bzhin nyid rnams spyod yul te//chos rnams rang bzhin 'od gsal ba'o/ /gdod nas dag cing rnyog pa med/ /dkyil 'khor de bzhin nyid gyur par/ /phan pa 'dod pas shes par bya/ /phung po skye mched sogs tshogs kyis/ /gang zhig bye brag kha bsgyur dang / /lus ngag yid gsum kha bsgyur phyir/ /rdul tshon dkyil 'khor zhes byar gsungs//phung po la sogs ston pas na/ /tshogs kyi dkyil 'khor zhes par bshad/ /sems kyi dkyil 'khor dag pa ste/ /rang bzhin med las bsgom par bya/ /dang po'i grwa ni rtogs byed pa/ /'di ltar me long lta bur 'gyur/ /so sor rtog par zhes bshad pa/ / lho phyogs grwa yis brgyan pa'o/ /bya ba sgrub par byed pa mchog /nub kyi grwa yis rnam par gsal/ /mnyam nyid zhes pa ye shes che/ /byang gi grwa yis rjes song bdag /de ltar grwa bzhi pa can ni/ /ye shes spyod yul brtags pa yin/ /'di ltar de nyid rab zhugs pas/ /kun du grwa yi dbus su'o//sgo bzhi par yang brjod pa ni/ /dran pa bzhi po rtag 'byung ba'o/ /de bzhin zur bzhir bshad pa ni/ /sbyin pa bzhi po rnam dag las/ /dbus kyi dkyil 'khor ngo bo ni/ /mi bskyod rnam par brgyan pa'o/ /dkyil 'khor rtag tu zhi ba ste/ /zhi ba'i chos don rgyan byed phyir//dra ba dra phyed zla ba sogs/ /gang zhig dkyil 'khor du bris dang / /rta babs la sogs thams cad rnams/ /de rnams ting 'dzin yang dag nges/ /rta babs sems kyi mthar thug pa/ /de nyid rang bzhin las gsungs yin/ /sems ni gang zhig rab 'jug pa/ /ting 'dzin yan lag la gnas pa//de ni dra ba zhes par brjod/ /de yi phyed pas dra ba phyed/ /dril bu dra bar yang dag gnas/ /rang gi sgra sgrogs go byed pa/ /chos rnams sgra brnyan lta bur ni/ /so sor rtogs par byed pa'o/ /dpal shes rab kyi pha rol tu phyin par gsungs pa yang /rab 'byor gyis smras pa/ kau shi ka 'di ltar yang byang chub sems dpa' sems dpa' chen po shes rab kyi pha rol tu phyin pa la spyod cing gnas pas chos rnams thams cad sgra brnyan lta bu'o zhes rab tu shes so/ /de las kyang de rnams mi sems yang dag par rjes su mi mthong mi shes yang dag par mi shes te/chos de rnams kyang yod pa ma yin la yang dag par rig pa ma yin te mi dmigs so zhes so/ /de gal te 'di ltar gnas na shes rab kyi pha rol tu phyin pa la spyod do zhes so/ /rgyal mtshan phreng bar de bshad nyid/ /chos rnams skye med ston pa'i phyir//gang tshe sems ni rgya che zhing / /dngos po la sogs ma gos pa/ /sems ni bla rer bshad pa yin/ /dam pa'i don ni brjod pa las/ /phreng ba gos ni de thams cad/ /sna tshogs la sogs snang ba las/ /rdo rje'i rnam par gang zhig sems/ /dga' ba'i ye shes kyis mtshan pa//don des rtag tu brjod pa ni/ /mkha' 'gro ma yi sdom pa 'byung / /zur gyi cha ni thams cad dang / /sgo dang sgo khyung mtshams rnams su/ /rdo rje rin chen gyis spras pa/ /rdo rje rin chen rtogs pa las/ /zla ba nyi mar gang brjod pa/ /shes rab thabs don ston pa las/ /shes rab thabs kyi rang bzhin sems//ye shes 'di rnams kyis brgyan pa'o/ /dkyil 'khor brjod pa de nyid ni/ /sku gsung thugs kyi rdo rje skyes/ /sku gsung thugs ni nye ba las/ /rnam pa gcig pa mtshan nyid med/ /de nyid rab tu 'jug pa brjod/ /bla ma slob ma dag la gsal/ / zhes pa la sogs pa'o/ /dpal rdo rje mkha' 'gror yang gsungs pa/ dkyil 'khor ji lta de ltar ni/ /su yis yongs su brtags par nus/ /rang gi lhag pa'i lha sbyor bas/ /grub pa dkyil 'khor brtags pa'o/ /zhes pa nges pa'i don to/ /gru bzhi pa la sgo bzhi pa/ /rta babs bzhi yis brgyan byas pa//do shal do shal phyed pa la/ /zhes pa la sogs pa ste/ 'di thams cad drang ba'i don gyis go sla'o/ /gsungs pa yang / sngags kyi tshul 'dir slob ma rnam pa gnyis te/ gcig ni phyag rgya chen po'i dngos grub sgrub pa don du gnyer ba dang / gnyis pa 'jig rten pa'i dngos grub sgrub pa don du gnyer ba'o//gang phyag rgya chen po'i dngos grub sgrub pa don du gnyer ba de ni stong pa nyid kyi lam bsgom pa'i don du bum pa dang / gsang ba la sogs pa'i dbang bskur gyis yang dag par gzung bar bya'o/ /gang 'jig rten pa'i dngos grub sgrub pa'i don du gnyer ba ni sngags dang /phyag rgya dang dkyil 'khor gyi 'khor lo sgom pa don du gnyer ba ste/ dbang bskur gyis yang dag par gzung bar bya ste/ 'bring po bsod nams kyi rgyur ro zhes pa'o/ /tha ma ni dbang bskur gyis yang dag par gzung bar bya ba ma yin te/ dge bsnyen gyi bslab par yang dag par gzung bar bya'o zhes pa nges pa'o//da ni/ /slob ma dam pa mnyes gshin gus/ /bla ma'i zhabs la phyag 'tshal nas/ /rtse gcig gyur pa'i yid ldan bas/ /dbang bskur don du gsol ba gdab/ /thal mo sbyar ba byas nas ni/ /lus btud nas ni spyan sngar 'dug / bdag la phan dang bdag don ched/ /khyab bdag bdag la thugs brtse bas/ /sgyu 'phrul dra bas mngon rdzogs pa'i/ /byang chub ji ltar bdag 'thob par/ /rdzogs pa'i sangs rgyas bcom ldan ston/ /dam tshig chen po'i de nyid mkhyen/ /dbang po bsam pa mkhyen pa'i mchog /'gro ba'i bla mas bstan du gsol//nges par 'byung gi bar du 'di/ /bdag gi bsam pa brtan pos gzung / /mgon po rdzogs sangs rgyas kun gyi/ /gsang 'dzin ji ltar bdag 'gyur mdzod/ /he ru ka dpal dbang bskur ni/ /'gro ba bskyab pa'i sems ched du/ /ji ltar rdo rje sems dpas byin//de ltar deng 'dir bdag la stsol/ /zhes gsol ba btab pa'i slob ma lha'i rnal 'byor sngon du 'gro bas slob ma bzhugs pa'i rim pas rang nyid zhugs nas yol ba'i phyi rol du yon phul ba/ don dam shin tu rol pa'i bdag /phyag rgya lnga dang ldan dag pa/ /kha T+wAM ga brten yang dag gnas//lha mo gdugs mchog bslang ste 'dzin/ /cang te'u brel ba'i lag pa can/ /dpa' bo rnal 'byor ma tshogs kyis/ /bskor zhing dbus na gnas pa la/ /glu la sogs dang bkra shis kyis/ /'bad pas mchod par byas nas so/ / de'i rjes su dbang bskur ba'i skal pa dang ldan pa'i slob ma rnams/ snang mdzad kyi gzugs su dmigs pa la/ AHkhaM wA ra hUM zhes pa'i sngags kyis me tog gi phreng ba gzung ba'i mig dar bcings pa bgegs mthar byed kyi sngags zlos shing bum pa'i chus gtor ba la/ /dkyil 'khor du 'jug pa'i don du dri bar bya ste/shin tu dga' ba khyod su yin/ /zhes so/ /des kyang skal bzang bdag bde ba chen po'o zhes smra bar bya'o/ /de'i rjes su oM sarba yo ga tsi t+ta uta pA da yA mi zhes pa 'dis byang chub tu sems bskyed par bya'o/ /de nas me tog dang bcas pa'i rdo rje snying gar 'dis gzhag par bya ste/oM su ra te sa ma ya s+t+waM hoHsid+d+hi badzra ya thA su khaM zhes so/ /de nas sngar gsungs pa'i yi ge lnga pos yol ba'i nang du bcug nas 'di skad smra bar bya'o/ /de ring khyod de bzhin gshegs pa thams cad kyi rigs su zhugs kyis/ de nas ngas khyod la rdo rje'i ye shes bskyed par bya ste/ye shes gang gis khyod de bzhin gshegs pa rnams kyi dngos grub thob par 'gyur na dngos grub gzhan rnams lta ci smos/ /khyod kyis kyang 'di dkyil 'khor ma mthong ba'i mdun du smra bar mi bya ste/ khyod dam tshig nyams na mi rung ngo zhes so/ /de nas mgo bor rdo rje bzhag nas 'di skad ces brjod par bya'o//'di ni khyod kyi dam tshig rdo rje ste/ gal te khyod kyis 'ga' zhig la smras na mgo bo 'gems par byed do/ /oM rdo rje sems dpa' rang nyid deng / /khyod kyi snying la yang dag gnas/ /gal te tshul 'di smras na ni/ /de ma thag tu dral te gshegs/ /zhes pa 'di yis mna' byas te/tsan+dan dang gur kum la sogs pa bsres pa'i chu la oM badzra a mr-i ta u da ka tha zhes pa 'dis lan bdun bzlas pa/ 'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs las dngos grub ster/ /rdo rje bdud rtsi'i chu 'thungs shig /ces brjod cing 'thung du gzhug go/ /de nas 'di skad brjod par bya'o/ /deng nas brtsams te khyod kyi phyag na rdo rje nga yin gyis/ /ngas khyod la gang byos shig ces smras pa de khyod kyis bya dgos so/ /khyod kyis nga la yang brnyas par mi bya ste/ khyod yang ba ma spangs par 'chi ba'i dus byas nas dmyal bar lhung bar gyur na mi rung ngo zhes pa dam tshig gi chu sbyin pa'o//de nas dkyil 'khor gyi cho ga la sogs par gsungs pa'i dbab pa'i cho gas dbab par bya'o/ /de nas bden pa'i byin gyis brlab bya ste/ bdag gis yang dag dkyil 'khor du/ /slob ma 'di ni rab bcug pa//lha rnams rigs kyi rim pa ni/ /bsod nams ji lta de ltar shog /'di yi dngos grub ci 'drar 'gyur/ /rigs ni gang la snod du 'gyur/ /bsod nams mthu yang ci 'dra ba/ /de 'drar dkyil 'khor du gyur cig /ces bya ba la khyod kyi mig la ci 'dra ba snang zhes dri bar bya'o//de nas de yis smras pa yis/ dkar po dang ser po dang dmar po dang / nag po'i snang ba rnams kyis zhi ba dang / rgyas pa dang dbang dang / mngon spyod kyi dngos grub kyi skal ba can nyid du rim pa ji lta bar brjod par bya'o/ /de nas me tog gi phreng ba gzung ba de dkyil 'khor du pra tIts+tsha badzra hoHzhes pa 'dis dkyil 'khor du 'phen du gzhug go//de nas me tog ltung bas dman pa dang mchog la sogs pa'i dngos grub mtshon par bya'o/ /de la gal te sangs rgyas rnams kyi dbu'i mdzod spu'am gtsug tor du lhung na de'i tshe phyag rgya chen po'i dngos grub po/ /yan lag mchog la ni mchog go//dbus kyi cha la ni 'bring ngo / /'og gi cha la ni tha ma'o/ /sku las ring du gyur na/ /yun ring pos so/ /nye ba la ni nye bar 'grub po/ /lha rnams kyi rang gi gnas ni ling tshe la sogs pas yongs su bcad pas shes par bya'o/ /lha gnyis dag gi bar du gal te lhung na de'i tshe gang la me tog de nye ba de'i rigs su 'gyur ro//dkyil 'khor gyi phyi rol du lhung na dngos grub phra mor 'gyur ro/ /gal te ri mo rnams la lhung na/ de'i tshe slar yang 'phen du gzhug go/ /lan gsum byas kyang de nyid du lhung na dngos grub med do/ /phyi rol gyi rdo rje phreng ba las phyi rol du lhung na dngos grub med do//ze 'bru la lhung na ni dka' bas so zhes pa'o/ /me tog dor ba'o/ /de nas 'phangs pa'i me tog de slar yang bzung nas slob ma'i mgo bor bcing zhing / pra ti gr-ih+na twaM mi maM wa ts+tsha ma hA ba la zhes brjod par bya'o/ / de nas/ rdo rje sems dpa' rang nyid ni/ /de ring khyod kyi mig 'byed brtson/ /mig kun pa ni 'byed par mdzad/ /rdo rje'i mig ni bla na med/ /ces brjod cing mig ras bsal bar bya'o/ /de nas dkyil 'khor so sor lha rnams kyi ming brjod pa sngon du 'gro bas sgo skyong dang rang gi lhag pa'i bdag po'i mthar thug la bstan par bya'o zhes pa dkyil 'khor du gzhug pa'i cho ga'o//de las langs nas dgyes pa'i dpa'/ /he ru ka dpal bdag sbyor gyis/ /dbang bskur rin chen chen po ni/ /gnyis med chu yis sbyin par bya/ /dang po snying po bzlas pa yis/ /he ru ka yi bka' thob pas/ / dbang bskur sbyin par bya ba yin/ /gzhan du bzhad gad thob par byed/ /rnal 'byor nus pa med las so/ /snying ga'i dkyil 'khor 'od rnams kyis/ /slob ma'i lus ni rdzogs bkang nas/ /dbang bskur byin par bsam par bya/ /sangs rgyas lnga yi rang bzhin te/ /brtan g.yo kun gyi bdag nyid pa//de yis dang por dbang bskur lnga/ /bde ba phun tshogs sbyin par bya/ /dbang bskur mtshan nyid las byung ba/ /brtan dang g.yo ba'i 'gro ba ste/ /gang phyir 'gro ba dbang bskur byung / /de phyir dbang bskur sbyin mi bya/ /skyes bu de nyid de ldan yang / /mi shes de nyid mi rig nga / / skye med ye shes slar yang ni/ /bskyed par bya zhing brjod par bya/ /dang por dam pa'i chu sbyin te/ /mkha' 'gro ma yi sngags kyis btab/ /mchog tu dga' ba'i ting 'dzin gnas/ /rigs pa'i dbang bskur yang dag bstan/ /rang gi rigs pa'i skyes bu'i chus/ /kun nas bum pa brgyad kyis so//de nas bum pa gzung ba'i spyan ma la sogs pa rnams kyis dbang bskur bar bsam zhing / dbang bskur rdo rje chen po ni/ /khams gsum pa yis phyag byas pa/ /sangs rgyas kun gyi gsang gsum gyi/ /gnas las byung ba sbyin par bya/ /zhes brjod nas bdud rtsi 'khyil ba bzlas pa'i bum pa las//rdo rje dang bcas pa'i khu tshur gyis chu blangs te/ oM badzra a b+hi Shi ny+tsa zhes brjod pas slob ma la 'khor los sgyur ba lta bur dbang bskur bar bya'o zhes pa chu'i dbang bskur gyi cho ga'o/ /de nas rang gi lha dang ldan pa'i dbu rgyan gser dang gos la sogs pa las byas pa slob ma'i mgo bor sngar bshad pa'i sngags kyis bzhag nas/nam mkha'i dkyil na bzhugs pa'i de bzhin gshegs pa thams cad rigs kyi bdag po'i gzugs kyi cod pan la bzhugs par bsam par bya'o/ /de ltar dbu rgyan gyi dbang gi cho ga'o//de nas rdo rje blangs nas/ sangs rgyas rnams kyi rdo rje yi/ /bdag gis de ring khyod dbang bskur/ /'di de sangs rgyas thams cad nyid/ /rdo rje rab tu grub ched gzung / /zhes brjod cing snying ga la sogs par rdo rjes reg nas lag pa g.yas par rdo rje sbyin par bya'o/ /de ltar rdo rje'i dbang bskur gyi cho ga'o//de nas lag pa g.yon du dril bu byin nas rdo rje dril bu dang ldan pas slob ma'i lag pa dag gis 'khyud pa'i tshul byed du bcug ste/ oM badzra a d+hi pa ti s+t+waM/ a b+hi Shiny+tsA mi tiSh+Tha badzra sa ma ya s+t+waM zhes brjod par bya'o zhes pa dril bu'i dbang bskur ba'i cho ga'o/ /'di'i don ni 'di yin te/dpal thams cad gsang bar gsungs pa yang / /tshogs gnyis kyi ni sbyor ba yis/ /sems can kun gyi don ston pa/ /rang bzhin gyis ni 'od gsal ba'i/ /sems ni rdo rjer mngon brjod bya/ /chos rnams thams cad ma skyes pa/ /gdod nas zhi ba nam mkha' mnyam/ /zhes pa'i tshig ni rab 'jug pa//rdo rje dril bu zhes par bshad/ /de'i rjes su rdo rje dang dril bu spyi bor 'dzin zhing / oM badzra satwa s+t+waM a b+hi Shi ny+tsA mi/ badzra nA ma a b+hi She ka ta/ kye dpal shin tu dga' ba'i rdo rje dang / kye dpal shin tu dga' ba myu gu rdo rje zhes pa la sogs pa rigs dang rjes su mthun pa'i ming gdags par bya'o//dbang bskur ba 'di rnams kyis kyang sngags dang rgyud nyan pa dang / 'chad pa dang / sngags sgrub pa la dbang du byas par 'gyur ro/ /dbang bskur lnga po de kho na rig pa'i dbang du brjod par bya'o/ /thams cad du spyan ma la sogs pa'i rig ma rnams kyi bya ba yin pa'i phyir ro//de ltar ming gi dbang bskur ba'i cho ga'o/ /gsungs pa yang / chu yi shin tu rnam dag 'gyur/ /dbu rgyan mnyam pa nyid 'gyur te/ /rdo rje rtag tu so sor rtog /bdag pos dam tshig 'gyur ba'o/ /brtul zhugs lung bstan dbugs dbyung ba/ / dpal ldan rnam par snang mdzad bshad/ /dbang bskur 'di rnams rtag tu ldan/ /ye shes lnga po rnam dag pas/ /'di de sangs rgyas thams cad nyid/ /he ru ka yi phyag na gnas/ /khyod kyis kyang ni rtag tu gzung / /he ru ka yi brtul zhugs brtan/ /dga' ba bzang po rgyal ba dang / /stong pa gang bar phyogs gnyis la//dpa' bor bcas pa'i rnal 'byor ma/ /'bad pas rang gis mchod par bya/ /dpa' bo dpa' mo'i dbang phyug tshogs/ /myos byed dga' bas g.yo rnams dang / /bu khyod rtag tu rol par gyis/ /he ru ka dpal dkyil 'khor du'o/ /nam yang theg pa dman pa la//bzang po 'dod par bya ba min/ /'khor ba yongs su mi spang ste/ /mya ngan 'das la rtag mi dga'/ /zhes so/ /de bzhin du yang gsungs pa/ phyag rgya drug dang thal bar ldan zhing gos dang rnam bral skra ni grol ba'i phyag rgya ma/ /lag pa g.yon par nam mkha'i dbyug can cang te'u pad+ma kun du 'khrol byed ma//bkug nas phang ba'i phyogs su mkha' lding gdong pa byed pa'i dpa' bo mnan nas dbus su ni/ /bza' ba yang dag bzhag la dga' bas rab mchog bla mas stobs dang zla ba'i btung ba bya'o/ /bla mas kyang ting nge 'dzin gsum mngon du byed cing rang rig par byas nas/nam mkha'i khams su grol ba shes rab kyi pad+ma nas phyung ste/ shes rab gdong ni bcing byas te/ /thabs kyi gdong yang de bzhin no/ /mthe bong ming med dag gis ni/ /slob ma'i khar ni btung bar bya/ /phyi nas lag pa bzung nas ni/ /cho ga bzhin du sdig med pa'i//rnal 'byor ma ni de la sbyin/ /lha mo 'di khyod dngos grub sbyin/ /khams lnga'i bcud kyi bdag nyid de/ /he ru ka dpal bdag sbyor bas/ /bde ba dam pa myang bar gyis/ /e ma mnyes gshin dga' ba sngon 'gro chu skyes mchog la dam du 'khyud nas rengs pa yis/ / brjod bya rjod byed min gang he ru ka yi rnam pa'i snying po'i bde ba myong bar gyis/ /kun dga' dang bcas dpa' bo'i mgon pos nges par rjod byed bzhi pa la sogs mtshon bya gang / /kun mkhyen ye shes rang bzhin sa gsum bcas pa'i he ru ka yi rnam pa'i snying po'o/ /rdo rje'i brtul zhugs la sogs snying ni bde bar byed gang he ru ka la sbas pa sbyin//rnal 'byor ma yi gsang ba'i mtshon bya brda skad gyis shig nges par snying por der min nam/ sngon du gsungs pa'i mtshan nyid can/ /lha mos rdo rje sgrogs pa smras/ /pad+ma las byung za ba la/ /bu khyod spro ba yin nam ci/ /de nas slob mas kyang brjod bya//pad+ma phye ste yang dag dga'/ /bdag gis rtag tu bya bar nus/ /dag pa'i sems kyis de la smra/ /sangs rgyas mnyes pa la sogs pa'i/ /bya ba pad+mar ji bzhin gyis/ /'jigs dang ngo tsha rtag spangs nas/ /he ru ka mchog dga' ba gyis/ /de tshe slob ma blo bzang gis/ /ji skad smras pa thams cad bya//de nas lha mo pad+ma sbom/ /mdzes ma de ni dag 'gyur te/ /dam du 'khyud pa byas nas ni/ /dbang po thams cad kha sbyor byed/ /ma mchu so rnams kyis bzung nas/ /shIta yig sngags ni brjod par bya/ /chags pa'i chags ched 'dod par bya/ /pad+mar rdo rje gzhug par bya//shIta yig snyan pa'i sgra rnams ni/ /khu byug gling bu'i sgra ldan pas/ /byed pa bcing ba'i sbyor ba yis/ /dga' ma khyod kyis bdag dga' byas/ /de tshe slob ma blo bzang po/ /ji skad smras pa de kun bya/ /sangs rgyas bzhi yi gdan bzhugs pa/ /rdo rje pad+mar legs par gnas/ / rim gyis rjes su myong nyid kyis/ /dga' ba bzhi yi mtshan nyid do/ /de ltar khyab par bya ba dang / /khyab par byed pa'i 'brel pas lus dang ngag dang sems kyi dbye bas mchog tu mi 'gyur ba'i bde ba rnam pa bzhi'o/ /dpal 'dus par gsungs pa yang / b+ha gar ling ga rab bzhag nas/ /byang chub sems ni spro ma bgyi//khams gsum po ni ma lus nas/ /sangs rgyas gzugs su bsgom par bya/ /zhes so/ /tshig 'di'i don 'di yin te dpal mtshan yang dag par brjod par gsungs pa ni/ dpa' bo 'jig rten gsum las rgyal/ /rdo rje dbang phyug gsang ba'i rgyal/ /pad+ma dkar po'i rgyas spyan can//pad+ma rgyas pa'i zhal mnga' ba/ /zhes so/ /slar yang de nyid du gsungs pa/ /bdag gir mi 'dzin ngar mi 'dzin/ /bden pa gnyis kyi tshul la gnas/ /'khor ba'i pha rol mthar gnas pa/ /bya ba byas pas skam sar gnas/ / nyon mongs ma lus zhi byed pa/ /'khor ba'i rgya mtsho'i pha rol son/ /ye shes dbang bskur cod pan can/ /yang dag rdzogs pa'i sangs rgyas rgyan/ /rtag pa kun rgyal rnal 'byor can/ /bsam gtan bsam bya blo yi bdag /so so rang rig mi g.yo ba/ /mchog gi dang po sku gsum 'chang //zhes so/ /de skad du yang gsungs pa/ 'di nyid kho na bsrungs pa yis/ /skye ba 'di la sangs rgyas nyid/ /tshul khrims tshogs ni yongs rdzogs shing / /bsod nams ye shes yang dag ldan/ /pha rol phyin pa bcu thob pa'i/ /rdzogs pa'i sangs rgyas dus gsum bzhugs/ /'di yis rdzogs sangs rgyas kun gyis//chos kyi 'khor lo rab tu bskor/ /dpal dang po'i sangs rgyas su gsungs pa yang / /rlung ni yang dag phrad pa rnams kyis glog me'i rtse mos spyi bo'i zla ba zhu bar byed/ /thig le gang gang zhu ba 'di nas mgrin pa snying ga la son lte ba gsang bar 'gog / thig le las g.yo'i khu ba rdo rje nor bu la gnas rgyal mtshan rtse las 'gog gang de/ /shes rab ye shes skad cig gal te thig le'i phreng ba 'pho ba med pas bde na'o/ /sad dang rmi lam rang bzhin slar yang gzhan pa 'di ni gnyid dang bzhi yi rang bzhin ni/ /lus la gnas dang dbugs la zhen pa yul rnams rnam par spyod cing g.yo med sems thim pa//ye shes la gnas bud med rab tu 'grogs las byang chub sems zhu ba la'ang skad cig 'gyur/ /sprul pa sogs kyi rdo rje rnam pa bzhir ni rim pas nges par rab tu 'gyur/ /de ltar sems ni rnam bzhi srid pa gsum gnas srog chags rnams kyi thig le'i dbus su ste//rnal 'byor dbang po rnams kyis bde mnyam 'bras ster khyab byed thar pa'i slad du bsrung bar bya/ /thig le btang na rnal 'byor rnams kyi skye ba'i sa bon mchog bde song la thar pa ci/ /de phyir 'khor ba'i bde ba'i skad cig 'dir ni sdom brtson rnams kyis rtag tu dor bar bya//zhes so/ /yang de nyid du gsungs pa/ nim pa'i shing las rgun 'brum min te dug las bdud rtsi dang ni tshangs pa'i shing las 'dam skyes dang / stong pa las ni myang 'das bde ba sdig pa'i dbang las dge ba srog chags gsod las grub pa rnams//mchod sbyin rnams las phyugs rnams mtho ris mchog tu zhi ba'i go 'phang dbang po rnams ni 'gog las min/ /rig byed las ni kun mkhyen gsung dang 'gyur med bde ba g.yo med 'gyur ba ma dag sems las min/ /zhes so/ /dpal ye shes rdo rje kun las btus pa rnal 'byor chen po'i rgyud du gsungs pa yang //sgyu ma rnams ni thams cad las/ /bud med sgyu ma khyad par 'phags/ /ye shes gsum gyi dbye ba 'di/ /'di la gsal bar mtshon par 'gyur/ /zhes so/ /gsungs pa yang / snang ba mtshan mo'i cha yin gsal ba'i nyi ma'o 'od can nyin mo snang ba mched par 'gyur//mtshams ni snang ba thob pa rang bzhin rnams kyis lan cig min par sbyor ba 'di'o/ /mtshan mo ma yin mtshams kyang ma yin nyin mor yang ni mi 'gyur rang bzhin bral ba gang / /de 'di byang chub skad cig bla ma mchog gsungs rnal 'byor pa rnams kho na'i rtogs bya'o//mtshan mo'i mun pa rnam par zhig cing gang du mtshams kyi snang ba'am ma lus rnam par bral/ /gang du nyi ma ma shar ji srid skad cig 'dir ni dri bral yang dag mtha' ru bstan/ /slob mar slob dpon gtso bo rab rib bcom pas phyi rol rdzogs pa'i byang chub bstan pa yis/ /nang gi bde ba go 'phang ci yang rab mchog sangs rgyas byang chub skad cig gis thob 'gyur//gsungs pa yang / rnal 'byor spyod pa'i byang chub pa/ /nor bu'i nang du bde sgrub byed/ /dbu ma'i mngon par rdzogs byang chub/ /gang zhig 'phos mthar mtshan nyid bral/ /zhes so/ /de ltar gnyis po dbyer mi phyed pa gcig tu 'dres par gyur pa/mchog tu mi 'gyur ba'i bde ba ni mtshon par bya ba bzhi pa zhes brjod par bya'o/ /gsungs pa yang / slob dpon gsang ba shes rab dang / /bzhi pa 'bras bu'i ngo bo las/ /de 'di rnams la ji ltar yang / /log par rtog pa chen po byed/ /mchog 'gyur khyad dga' dag dbus su//gang rnams mtshon bya dam 'cha' ba'o/ /gal te sgra yi 'thad pa de/ /'bad pas byed du chug na yang / /de rnams kyi 'dir dbang bskur 'di/ /bzhi bar 'thad pa ma yin no/ /gsum pa 'bras bu'i ngo bo'i phyir/ /rang gi ngo bos rdzogs she na//thog mar 'bras bus yongs grub pas/ /phyi nas rgyu yis 'dir ci bya/ /dbang 'dis de ltar nyid bstan na/ /dngos grub don du rgyur gzhan min/ /gal te sngon du de grub na/ /slar yang de ni don cir 'gyur/ /gal te 'bras bu grub pa na/ /phyi nas dbang bskur mngon brjod na/ / sangs rgyas rdo rje 'dzin dag gi/ /dbugs dbyung dbye ba 'dir ci ltar/ /gal te mngon du rdor 'dzin gyi/ /dbugs dbyung phyi nas sangs rgyas 'gyur/ /de lta na ni rgyu 'bras kyang / /'khrugs pa nyid ni gang gis zlog /gal te tshigs su bcad pa'i ngor/ /gnyis kyi dbus su 'byung 'gyur na/ / mtshon bya min nyid de nyid las/ /tshigs bcad don ni rnam gzhag phyir/ /mtshon bya kho na'i ngor byas nas/ /tshigs su bcad pa'i don sbyar rigs/ /tshigs su bcad pa'i ngor byas nas/ /mtshon bya gzhan du drang bya min/ /kye'i rdo rje'am dpal 'dus par/ /'dir ni de nyid las dbye med//bsgrub par bya ba'i dbye ba yis/ /der ni nye bar dbye bar bshad/ /der ni dbang bskur rnam gsum bshad/ /ce na de ni 'jig rten las/ /'jig rten 'das pa'i dbang bskur yang / /gsungs kyang gsal bar byas pa min/ /shes rab ye shes dbang bskur gyis/ /bzhi pa de ni shes par bya//zhes 'di mkhas pas shes ched du/ /bla ma dam pa brten par bya/ /de phyir nam yang 'thad pa yis/ /dbus su mtshon byar gang smra mod/ /de lta na yang lung rigs kyis/ /mtha' ma kho nar the tshom med/ /lhan skyes mtha' mar 'byung ba'i phyir/ /tshigs bcad 'thad pa ci ltar du//bya yin zhe na skyon 'di med/ /tshigs bcad don 'di shin tu 'thad/ /lhan cig skyes pa dang dga' ba dag gi dbus su mchog dang khyad dga' dag yin zhing gang gi tshe dga' ba dang lhan cig skyes pa la ltos pas/ dbus su mchog dang khyad dga' dag 'gyur ba de'i tshe bzhi pa mtshon par bya'o zhes bltas nas bstan par byos shig /dpal kye'i rdo rje'i rgyud du le'ur bshad par/ khyad dga'i mthar yang de bzhin no/ /zhes pa'i gsungs las khyad dga'i mthar lhan cig skyes pa'o zhes gsal bar rtogs par bya ba kho na'o/ /de bzhin du/ shin tu mgu dga' mtha' dag nges/ / de bde thabs can thams cad rig /ces pas shin tu 'thad pa kho na'o/ /dga' ba gsum po 'di ni lhan cig skyes pa'i rgyur gyur pa shin tu mgu dga' ba'i rang bzhin te/ de bde thabs zhes pa de'i tshe dga' ba gsum po bde ba'i rang bzhin thabs te/ gang gi dngos dang brgyud pa'i rgyu yin pa de ni thams cad rig pa lhan cig skyes pa'i dga' ba'i rang bzhin can no//gsungs pa yang / byed dga'i dga' bas khyad chags 'gyur/ /lhag ma lhan cig skyes dga' nyid/ /ces pa 'di'i don 'di yin te/ khyad par du chags pa ni khyad chags te gros byed pa'i ngo bor khyad par du nyams su myong ba bde ba'i rnam par rtog pa'i zhes pa'i bar ro//lhag ma lhan cig skyes dga' ni/ /zhes pa ni de'i de ma thag tu lhan cig skyes pa'i dga' ba'o zhes pa'i don to/ /de bzhin du/ gsum pa 'dod chags pa yi phyir/ /des na bzhi pa bsgom par bya/ /zhes pa yang kun nas nyon mongs pa can gyi 'dod chags 'jig pa nyid kyi phyir ro//zhes pa'o/ /der rtog pa med pa nyid kho na las de skye ba'i phyir ro/ /rgyu des na bzhi pa kho na lhag ma lhan cig skyes pa'o zhes pa lhag ma ste mtha' mar bsgom par bya'o/ /de bzhin du/ mchog tu dga' ba srid par brjod/ /chags bral las ni mya ngan 'das//dbu mar dga' ba tsam nyid de/ /lhan skyes 'di rnams kyis spangs pa'o/ /zhes pa 'di'i don 'di yin te/ mchog tu dga' ba zhes pa kun nas nyon mongs pa can gyi bde ba'i longs spyod pa'i mtshan nyid can nyid kyi phyir srid pa ste 'khor bar brjod do/ /chags bral las ni mya ngan 'das//zhes pa ni khyad dga'i dga' ba ni 'gro ba'i bdag nyid can nyid kyis na/ kun nas nyon mongs pa can gyi chags pa 'jigs pa'i mtshan nyid can nyid kyi phyir mya ngan 'das pa'i ngo bo nyid do/ /dbu ma dga' ba tsam nyid do/ /zhes pa ni dang po'i dga' ba ni bde ba thun mong pa'i mtshan nyid can nyid kyi phyir dbu ma'o zhes pa'i don to//dga' ba gsum po 'di rnams kyis spangs pa ni lhan cig skyes pa'i 'bras bur gyur pa zhes pa'i don to/ /de bzhin du/ 'dod chags med cing khyad chags med/ /dbu mar dmigs par mi 'gyur ro/ /zhes pa la 'dod chags zhes pa kun nas chags pa'i mtshan nyid kyi phyir mchog dga' 'o//khyad chags zhes pa bde ba'i rnam par rtog pa nyid kyis khyad par du byas pa nyid kyi phyir khyad dga'i dga' ba'o/ /dbu ma ces pa dang po'i dga' ba ste/ dmigs par mi 'gyur ro/ /zhes pa dga' ba gsum po 'di lhan cig skyes pa nyid du dmigs par mi 'gyur ro zhes pa ste/de'i de ma thag pa de kho na'i bzhi pa ni de'i ngo bo nyid kyi phyir ro zhes pa'i don to/ /de bzhin du le'u bcu par/ khyad dga' dang por mtshon par bya/ /de yang dga' ba gsum po spangs/ /zhes pa la de zhes pa ni lhan cig skyes pa'o//khyad dga' dang por zhes pa gang gi dang po khyad dga' yin pa mtshon par bya ba'o zhes pa'i don to/ /brtag pa gnyis pa'i le'u gnyis par yang gang gsungs pa/ lhan cig skyes dga'i rang bzhin dang / /mchog mtha' khyad dga' dang po can/ /zhes pa 'di'i don 'di yin te/ bzhi pa'i mtshan nyid can gyi ngo bo kho na nga yin te/ mchog gi mtha' yang 'di yin la/ khyad dga' yang ngo zhes pa mchog gi mtha' dbus ma khyad dga'/ lhan cig skyes pa gang gi dang po yin pa de de skad du brjod do/ /kha cig tu/ mchog mtha' dga' bral dang po can/ /zhes klog pa der yang dbugs dbyung gnyis gsal bar byed pa'i phyir 'bras bu dang rgyu dbyer med par bstan pa las ngag gcig nyid kyis kyang skyon med do//de bzhin du le'u lnga par/ khyad dga' dang po mchog can mtha'/ /zhes pa 'di'i don 'di yin te/ dang po skye byed rgyur gyur ba'i mchog gang yin pa de ni dang po mchog can te khyad dga' yang yin la//dang po mchog can yang yin pas khyad dga' dang po mchog can no/ /de'i mtha' kho na ni mtha' can te 'bras bur gyur pa zhes pa'i don to/ /de bzhin du/ mchog mtha' dbus ma khyad dga' yi/ /stong dang stong min he ru ka /zhes pa 'di'i don ni 'di yin te/ lhan cig skyes pa la ltos pas dbus ma yang 'di yin la/ /khyad dga' yang ngo zhes pas dbus ma khyad dga'o/ /mchog mtha' yang 'di yin la dbus ma khyad dga' yang ngo zhes pa mchog mtha' dbus ma khyad dga'o/ /rgyur gyur pa de'i stong dang stong min zhes pa stong pa nyid dang /snying rje dbyer med pa ni he ru ka zhes pa ste/ lhan cig skyes pa 'bras bur gyur pa zhes pa'i don to/ /de nyid kyi phyir ni'i sgra ni khyad par gyi don rab tu rtogs par byed par 'thad do/ /'di'i dbugs dbyung ba'i dbye ba ni gsal ba kho nar rab tu bstan to/ /kha cig tu/ mchog gi mtha' dbus khyad dga'i/zhes klog pa der yang mchog gi mtha' dbus ma khyad dga' lhan cig skyes pa gang gi yin pa de ni de skad de/ dang po'i don la drug pa nges par bstan pa las ngag gcig nyid kyis na stong dang stong min zhes pa lhan cig skyes pa'i dga' ba kho na'i khyad par ro zhes pa'o//gang rnams khyad dga'i chags bral te chags pa nyams pa'i mtshan nyid can du brjod nas/ mchog dang khyad dga' dag gi dbus su mtshon par bya ba'o/ /zhes lhan cig skyes pa kho na gzhung 'jugs par byed pa de rnams kyi lugs la dga' ba bzhi po'i rim pa ji lta bar sbyar ba'i tshigs su bcad pa/dga' ba dang po'i sna tshogs la/ /rnam smin la ni mchog dga' 'o/ /khyad dga'i dga' ba rnam nyid la/ /mtshan nyid bral ba lhan skyes dga'o/ /slob dpon gsang ba shes rab dang / /bzhi pa de yang de bzhin no/ /dbang bskur bzhi yi grangs kyis ni/ /dga' ba la sogs rim shes bya//dgod pa dag las slob dpon te/ /lta ba gsang ba de bzhin no/ /lag bcangs la yang shes rab ste/ /de yang gnyis gnyis 'khyud la'o/ /sems can rnams kyi dngos grub rgyur/ /dbang bskur rnam pa bzhi ru bshad/ /ces pa 'di lta bu la sogs pa rnams kyi don ci ltar bshad par bya//dbugs dbyung ba'i rab tu dbye ba yang ci ltar gzhung 'dzugs zhes pas ngas mi shes so/ /'dir brtan par byed pa bshad de/ /dbang por bcas pa'i tshig brjod pa/ /smra po tshad mar lhag par rtogs/ /dpal mchog gi dang po'i sangs rgyas stong phrag bcu gnyis par dbang bzhi pa gsungs pa de nyid la 'jug par bya ste zla ba bzang pos gsol pa/ston pa dbang bskur rnam bdun dang / /rnam gsum de bzhin bla na med/ /'jig rten pa mchog dngos grub ched/ /mdor bsdus pa yis bdag la gsungs/ bcom ldan 'das kyis bka' stsal pa/dang por dbang bskur bdun po gang / /byis pa rnams ni gzhug pa ste/ /rnam gsum 'jig rten kun rdzob kyis/ /bzhi pa dam pa'i don las so/ /bden pa gnyis kyis chos rnams kyi/ /rdo rje can dag gis bstan pa/ /'jig rten kun rdzob bden pas so//dam pa'i don gyi bden pas so/ /bum pa gsang ba'i dbang bskur dang / /shes rab ye shes mngon brjod can/ /slar yang shes rab chen po nyid/ /de yi ye shes mngon rjod byed/ /'gyur dang 'gyur dang de nas 'dzag /de las gzhan pa mi 'dzag pa'o/ /lus ngag sems ni legs dag pas//dbang bskur gsum po rim pa las/ /bzhi pa ye shes yang dag dag /lus ngag sems ni dag par byed/ /byis pa dar ma de bzhin rgan/ /bzhi pa skye dgu'i bdag po'o/ /shes rab nu mar yan lag ni/ /reg las byang chub sems 'pho'i bde/ /'o ma 'dzin pas dbang bskur ba//gang las bde thob de byis pa'o/ /yun ring gsang bar spros las skyes/ /byang chub sems ni 'pho ba'i bde/ /gsang ba'i dbang bskur gsang ba ni/ /gang las bde thob de dar ma/ /yun ring gsang bar spros las skyes/ /rdo rje rtse mor g.yo ba'i bde/ / shes rab ye shes dbang bskur ba/ /gang las g.yo bar son te rgan/ /phyag rgya chen po'i rjes chags las/ /skyes pa g.yo med bde ba gang / /shes rab chen po'i dbang bskur ba/ /gang las g.yo med rtogs pa de/ /skye dgu'i bdag por rnam shes bya/ /skyob pa kun gyi skyed pa po/ / rdo rje sems dpa' sems dpa' che/ /byang sems gnyis med mi 'gyur ba/ /'di ni dam tshig sems dpar 'gyur/ /rdo rje'i rnal 'byor rnam pa bzhi/ /zhes pa la sogs pa de bzhin gshegs pa'i nges pa'o/ /de ltar dbang po rnon po rnams kyis dga' ba bzhi'i rim pas bzhi pa'i don shes par bya'o//dpal thams cad mkhyen pa 'jigs byed kyi rgyud du gsungs pa yang / /ye shes tshogs ni thob don du/ /bla mar yon ni rab tu dbul/ /dar dkar rang bzhin gdugs de bzhin/ /phreng ba lda ldi me tog dang / /cod pan mchil lha ma ral gri ni/ /'byor par gyur na dbul bar bya//sring mo dang ni chung ma yang / /rnam rtog med pa'i sems kyis ni/ /rang nyid longs spyod don du 'bul/ /'jig rten smod pa srung don du/ /slar yang rin gyis slu bar bya/ /gzhan du ltung bar byed par 'gyur/ /sangs rgyas rnams dang bla ma dang / /rdo rje spun la mchog tu dad/ /lus ngag sems [(]gyi [,]kyi [)]bya ba ste//de tshe rgyud kyi rgyal po nyon/ /zhes so/ /zhes pa dpal kye'i rdo rje'i rgyud las rdo rje'i tshig gi snying po bsdus pa'i dka' 'grel du dbang bskur ba'i le'u ste bcu pa'o// //da ni rdo rje snying po mngon par byang chub pa'i le'u gsungs pa/ /mnyam par khros pa'i dpral ba can//rtag tu ltung bar byed par brjod/ /ces pa la sogs pa dang / dbyung ba nyid kyis ltung bar byed/ /bum pa can gyis dbang du byed/ /dgang ba yis kyang dgug pa'o/ /zhi ba can gyis rengs par byed/ /ces pa la sogs pa de ltung bar byed pa la sogs pa'i lta stangs sgrub pa'i ched dang /dpal theg pa chen po la gzhug pa'i ched du'o/ /gsang ba 'dir min zhes pa gsung rab tu ste gzhug pa'i bya bar gyur pa ma yin no/ /mchog tu dam tshig nyams par 'gyur/ /zhes pa la dam tshig ces pa ni sems can thams cad la bu gcig pa lta bur sdug pa'i mtshan nyid can dam tshig ces pa ste snying rje'o /de'i dbye ba ni mchog tu nyams par 'gyur ba'o zhes pa drang ba'i don to/ /da ni lta stangs bzhi po rnams dgongs pa'i skad gzhan gyis bde ba chen po'i 'khor lo la sogs par thig le rnal 'byor bzhi rnam par dag pa nang gi bdag nyid kyi rim pas gsal bar bya ste/gtsug tor nas ni thig le mes/ /zhu ba dbyung bas ltung ba'o/ /bde ba chen po'i ting 'dzin gnas/ /stong nyid lta bas ltung bar bya/ /kun bkur 'khor lor bum pa can/ /dpral ba can zhes rab tu grags/ /rdo rje pad+ma'i ting 'dzin gnas/ /khams gsum po ni dbang du 'gugs//snying ga chos su dgang bas 'gugs/ /khros pa de las thams cad can/ /he ru ka dpal rang bzhin phyir/ /lta ba ngan pa rtag tu 'joms/ /rengs dang zhi ba nor bu'i nang / /rgyal ba'i gzugs brnyan rnam par bsgom/ /da ni mnyam nyid mi g.yor bshad/ / mchog tu mi 'gyur rtog pa'o/ /'dir brtan par byed par bshad de/ dpal rnam par snang mdzad mngon par byang chub pa'i rgyud du gsungs pa yang / 'di ltar dpal bde ba chen po'i ting nge 'dzin goms pa mchog thob pa'i rnal 'byor pas tshogs kyi dkyil 'khor de nyid du tshar bcad pa dang rjes su gzung bas sems can rnams yongs su smin par byed do//stong pa nyid la mngon par zhen pa'i lta ba can kha cig la bcom ldan 'das bde ba chen po de kho na rnam par snang mdzad kyi gzugs kyis zhi ba chen po'i ting nge 'dzin gyis stong pa yang ma yin/ mi stong pa yang ma yin no zhes mi gnas pa'i mya ngan las 'das pa'i mtshan nyid can yang dag pa'i lta ba rtogs par mdzad nas stong pa nyid du lta ba tshar gcod par mdzad do//log par lta ba rnams la pad+ma gar gyi dbang phyug gi gzugs kyis don dam pa'i bden pa rtogs par mdzad nas dbang du mdzad do/ /de bzhin du shin tu dgra po gdul dka' ba rnams la dpal he ru ka khro bo'i rgyal po chen po'i ting nge 'dzin gyis lta ba ngan pa tshar gcad par mdzad nas rjes su 'dzin par mdzad do zhes pa la sogs pa de bzhin gshegs pa'i nges pa'o//zla drug goms pa'i sbyor ba yis/ /'grub 'gyur 'di la the tshom med/ /'di la 'khrug par mi bya ste//sangs rgyas rdzu 'phrul bsam mi khyab/ /ces pa la dpal dang po'i sangs rgyas su gsungs pa yang / /yang dag sbyor las chu shel las kyang chu ru 'gyur te me long la ni dngos po'i gzugs/ /skyur ba'i rgyu las lce 'dzag rang gi sgra las cig shos dag pa'i sa bon las myu gur//'gyur te khab len las kyang lcags kyi thur ma'ang g.yo 'gyur 'dod pa 'di la ci yang min/ /dngos po rnams kyi nus pa 'di ni srid gsum gnas su su zhig gis kyang sprul pa min/ /sems can slu ba spangs nas ni/ /bya ba ma yin thams cad bya/ /sems can gnod pa tsam gyis ni//phyag rgya'i dngos grub thob mi 'gyur/ /zhes pa 'di'i don 'di yin te/ sems can zhes pa rnam par snang mdzad la sogs pa de bzhin gshegs pa drug dang / spyan ma la sogs pa lha mo rnams 'dod chags chen po la rjes su chags pa'i ting nge 'dzin gyis byang chub kyi sems kyi ngo bor gyur pa rnams so//byang chub kyi sems de 'phos pa las sems can la mchog tu gnod par 'gyur ro zhes pa'o/ /phyag rgya zhes pa phyag rgya chen po ste mchog tu mi 'gyur ba'i bde ba'i rang bzhin can no/ /thob mi 'gyur ba ni rnyed par mi 'gyur ro zhes pa nges pa'i don to/ /drang ba'i don gyi ni go sla'o//da ni dam tshig bskyang ba'i cho ga gsal bar bya ste/ de la dam tshig bza' bar bya/ /sgrol ma zhes bya mnyam gzhag pas/ /na ga de bzhin ha dang po/ /mtha' yi shwa dang dang po'i shwa/ /zhes pa la sogs pa 'di'i don 'di yin te/ /rgyud gzhan du yang gsungs pa/ /'dir dam tshig rnam pa gnyis te/phyi rol dang nang gi bdag nyid do/ /dam tshig de rnams rnal 'byor pas bskyang zhing bsrung bar bya ste/ phyi'i ni phyi rol du 'jig rten pa 'jug pa'i don du'o/ /nang gi bdag nyid rnams ni nang gi ye shes 'jug pa'i don du'o/ /de ltar phyi rol du 'jig rten pa 'jug pas rnal 'byor pa rnams kyi bsod nams kyi tshogs su 'gyur te/phyi rol gyi dam tshig bsrung ba las so/ /de bzhin du nang gi bdag nyid la ye shes 'jug pas ye shes kyi tshogs su 'gyur te nang gi bdag nyid kyi dam tshig bsrung ba las so/ /de'i phyir/ /legs par mnyam gzhag sgrub pa pos//rtag tu dam tshig bskyang bar bya/ /zhes pa'o/ /dpal mtshan yang dag par brjod par gsungs pa yang / dge mi dge shes dus mkhyen pa/ /khyab bdag dam shes dam tshig ldan/ /sems can dbang shes dus shes pas/ /rnam grol gsum la mkhas pa po/ /zhes pa'o//dpal 'dus par yang gsungs pa/ 'di lta ste/ phyag na rdo rje de bzhin gshegs pa thams cad kyi bdag pos de bzhin gshegs pa thams cad kyi sku rdo rje'i dam tshig nyid ni sku dang gsung dang thugs rdo rje rnams las phyung ngo / /dam tshig bzhi po bsrung bar bya/ /sku gsung thugs kyi rdo rje'i bdag /gsang bar byang sems thig le'i gzugs/ /dam tshig gzhan gyis bsrung bar 'os/ /zhes pa ste nges pa'i don to/ /dpal phyag na rdo rjes kyang gsungs pa/ /shes rab dang kha sbyar bas dga' ba'i skad cig tu 'gyur te/ de yang sku'i dam tshig go//dga' ba'i skad cig las pad+mar rdo rje zhugs pas mchog tu dga' ba'i skad cig tu 'gyur te de nyid gsung gi dam tshig go/ /mchog tu dga' ba'i skad cig las pad+mar rdo rje bskul bas khyad dga'i dga' ba'i skad cig tu 'gyur te/ /de nyid ni thugs kyi dam tshig go/ /khyad dga'i dga' ba'i skad cig las rdo rje nor bu byang chub kyi sems 'ongs pas lhan cig skyes pa'i dga' ba'i skad cig tu 'gyur te/de kho na ye shes kyi dam tshig bzhi pa'o/ /dam tshig 'di rnams la rab tu zhugs pa nyid kyi phyir dam tshig sems dpa' zhes mngon par brjod par bya'o/ /zhes pa nges pa'i don to//de bsrungs pa yin na dang po dang ga dang po dang de bzhin du ha dang po dang / mtha'i shwa la sogs pa'i sha rtag tu bza' bar bya'o zhes pa gzugs dang / tshor ba dang / 'du shes dang 'du byed rnams dang / rnam par shes pa'i phung po ste bza' bar bya zhing sgrib pa med par bya'o/ /'di ni dam tshig dam pa ste/byis pa'i rnal 'byor rtogs bya min/ /zhes pa nges pa'i don to/ /'di nyid du gsungs pa yang / ma dag pa na dug nyid 'gyur/ /dag na bdud rtsi lta bur 'gyur/ /zhes so/ /dpal shes rab kyi pha rol tu phyin par yang dmyal ba'i le'ur gsungs pa/ de ci'i phyir zhe na/ yongs su bsngo ba 'di ni dug dang bcas pa zug rngu dang bcas pa ste/ 'di lta ste dper na kha zas bzang po dug can zhig yod pa la 'on kyang de kha dog dang / dri dang ro dang reg bya yid du 'ong ba yin kyang dug dang bcas pa nyid kyi phyir mkhas pa rnams kyis yongs su spang bar 'gyur gyi/ yongs su longs spyod par bya ba'i ched du ni ma yin no//de nyid byis pa'i rigs can shes rab 'chal ba'i rigs can ni yongs su longs spyad par bya bar sems te/ /des zas de zos shing kha dog dri dang ro myangs pa na bde ba byed cing zhu ba na de la sdug bsngal smin par 'gyur ro zhes so/ /zhes pa dpal kye'i rdo rje'i rgyud la kha che chen pos rtogs pa rdo rje'i tshig gi snying po bsdus pa'i dka' 'grel du rdo rje snying po mngon par byang chub pa zhes bya ba brtag pa'i rgyal po dang po rdzogs so// //da ni chos rnams thams cad rab tu mi gnas pa'i mya ngan las 'das pa'i chos can yin pa de lta na'ang sems kyi rang bzhin yang dag par sbyang ba'i don du sku gzugs la sogs pa'i rab tu gnas pa rtogs par byed pa'i le'u gsungs pa/bshad du gsol zhes pa la sogs pa rdo rje snying pos gsol ba 'debs pa'o/ /rab tu gnas pa'i mtshan nyid de rang bzhin bcom ldan 'das kyis bshad du gsol zhes sbrel lo/ / rdo rje snying pos zhes pa la 'di'i don ni 'di yin te/ dpal rdo rje rtse mor gsungs pa yang / de bzhin nyid bden sems gang zhig /don yod rnam 'gyur med pa can/ /skye med 'gag med ces bya ba/ /'di 'dra rdo rje nyid du 'gyur/ /zhes so/ /snying po ni rang bzhin zhes mngon par brjod par bya'o/ /sbyin sreg byas te dkyil 'khor ni//ji ltar gsungs pa bzhengs byas nas/ /srod la lhag gnas la sogs pa/ /byas te sku gzugs sbyang bar bya/ /nam mkhar bzhugs pa'i sangs rgyas kun/ /sku gzugs snying gar rab gzhug bya/ /rang 'dod lha mnyam rnal 'byor pa/ /rab mthong sngags kyi pha rol son//oM badzra puSh+pe zhes pa la sogs pa ste/ de ltar nye bar spyod pa lnga'i mchod pa la sogs pa ni rgyud gzhan gyi cho gas bya'o/ /cho ga ji lta ba ni dkyil 'khor gyi cho ga rgyas par bya'o zhes pa drang ba'i don to/ /da ni nges pa'i don gsal bar bya ste/ /dpal sa m+bu Ta'i rgyud du gsungs pa yang /lha lags ya mtshan che ba thos/ /nang gi dkyil 'khor sbyin sreg sogs/ /bdag gis mi shes ci ltar lags/ /bde ba chen po bshad du gsol/ /bcom ldan 'das kyis bka' stsal pa/ /he ru ka sogs lha rnams kyis/ /rtsa yi gzugs su legs gnas pa/ /lus ni dkyil 'khor nyams dga' ba'o//ji skad gsungs pa'i sgo bzhir ldan/ /rang gi yan lag las byung ba'i/ /ka ba brgyad kyis gzung ste gnas/ /dngos po kun gyis mnyam pa nyid/ /gru bzhi pa ru rab tu grags/ /sku gsung thugs kyi ngo bo yis/ /'khor lo gsum gyi bdag nyid brjod/ /mgo bo ri bo ze 'bru la//rtsol chen rlung sogs rim ji bzhin/ /bla ma brgyud pa'i rim pa yis/ /rdzogs pa'i dkyil 'khor de yin no/ /nyan thos rnams dang de bzhin du/ /so so gcig pu sangs rgyas dang / /tshangs pa la sogs lha rnams kyang / /dkyil 'khor de la rdzogs pa'o//nang gi khu ba sogs rnams dang / /de bzhin phyi rol gzugs sogs kyi/ /bsreg rdzas rnams kyis sbyin sreg bya/ /shes rab me ni cher 'bar la'o/ /skye mched drug dang khams rnams dang / /khyad par du ni phung po sogs/ /lha yi ngo bo de rnams dang / /de bzhin mkha' 'gro ma rnams la//gang phyir de rnams des mchod na/ /mchod sbyin mchod par yang dag bshad/ /mgo bo'i thod pa nyid kyang ni/ sreg rdzas snod du brjod par bya/ /blugs gzar ro mar yang dag bshad/ /snying ga'i 'khor lo brgyang ma dag /dgang gzar zhes par yang dag bstan/ / thab kyang lte ba'i dkyil 'khor du'o/ /las kyi rlung gis bskyod byas pa/ /tshangs pa'i me ni skyed par gnas/ /nA da sngags zhes brjod pa yin/ /kun nas bskor ba bzlas par 'gyur/ /so sor snang ba sgom pa ste/ /dkyil 'khor gnyis med rnal 'byor las/ /lhan cig skyes la gnas pa nyid/ / rgyal ba rnams kyi dkyil 'khor sogs/ /sems kyi rgyal po slob dpon te/ /dkyil 'khor gtso bo'i ngo bo las/ /ji skad bshad pa'i e waM sogs/ /thams cad 'di nyid du bsam bya/ /dpal bde ba dam pa rtogs par byed pa'i rgyud chen por yang gsungs pa/ lha rnams tshim par byed pa'i mchog / sbyin sreg nga yis bshad par bya/ /rnam par mi rtog sems gang yin/ /thab kyi sgra yis mtshon pa yin/ /rnam par dben pa'i me dbus su/ /gzugs kyi phung po la sogs lnga'i/ /yam shing sems las yang dag par/ /byung ba mtha' dag sbyin sreg bya/ /gzugs la sogs pa'i dngos po gang //yam shing zhes par rab tu grags/ /de ltar snum ni zla ba'i rgyun/ /phung po skye mched khams rnams sogs/ /khams gsum po ni ma lus pa/ /gnyis su dbyer med tha dad med/ /shes rab me la dgang blugs dbul/ /lus ni sbyin sreg yang dag ldan/ /phyi rol sbyin sreg tshim mi byed//rdo rje bdud rtsi la sogs pa'i/ /rgyud la kun nas brten nas ni/ /phyi rol gyi ni sbyin sreg bya/ /gsang bar skra grol gcer bu yis/ /tsA ru'i bza' ba sngon 'gro ba/ /he ru ka dpal rnal 'byor ches/ /sbyin sreg las ni brtsam par bya/ /zhes so/ /zhi bar thab khung zlum po ste//rgyas pa la ni gru bzhi pa/ gsad pa la ni gru gsum brjod/ /'di nyid kho nar lhag ma sgrub/ /ces pa 'di'i rgyas par bshad pa ni dpal mkha' 'gro ma rdo rje gur du gsungs pa/ zhi la zhi ba'i sems kyis ni/ /dbang bskur yang dag brtsam par bya/ /rgyas la rgyas pa'i sems kyis ni//rin chen sprin gyi char ba dbab/ /rjes chags sems kyis gzhon nu ma/ /kun nas bkug ste longs spyod bya/ /gsad la sdang ba'i sems kyis ni/ /me yi sprin gyi char rnams kyis/ /zhes pa la sogs pa'o/ /dpal dang po'i sangs rgyas su yang gsungs pa/ skyed mos tshal lam ri bo skye bo ri dgas bral bar zhi ba'i sngags rnams bsgrub par bya//drag po rnams ni drag po'i dur khrod du ste lha rnams gnas su rengs dang rmongs pa yang / /dbang dang dgug pa sngags pas mchog gi khyab bdag bde ba phyag rgya kun dang rab sbyor ba/ /gnas gzhan skye gnas gzhan du mi rnams kyi ni skye ba 'bum phrag gis kyang 'grub mi 'gyur/zhes pa nges pa'i don to/ /de ltar sbyin sreg mchog tu gyur/ /rab tu gnas pa'ang bshad par bya/ /gsungs pa yang / pad+ma yang dag bzung nas ni/ /bdud rtsi lnga dang ldan pa yi/ /mchod yon sngags pas de nas dbul/ / zhabs bsil nyid kyang khyad par du'o/ /dpal bde ba dam pa rtogs par byed par gsungs pa yang / rab tu gnas pa zhes pa ni/ /sku gzugs lha zhes yang dag bshad/ /gang zhig sems kyis mtshon gyur cing / /sems ni gang zhig brtan gyur pa/ /lus ngag sems las rtag tu ste//de nyid sku gzugs yin par bshad/ /phung po rnams ni dngos gcig tu/ /rdo rje skyil krung de bcings nas/ /sna yi rtse mor lta ba yis/ /rang gi rang bzhin rnal 'byor gyis/ /de nyid lta bas gnas par bya/ /rnam par mi rtog rang bzhin du/ /gang tshe sems ni rab 'jug pa//de tshe de yi rab gnas dang / /lha yi mchod pa phun sum tshogs/ /'di las rang byin brlab par 'gyur/ /sangs rgyas kun bdag 'dus pa las/ /sangs rgyas kun bdag sdom pa'o/ /rnal 'byor rdzogs pa'i sangs rgyas 'gyur/ /thugs kyi rdo rje'i gsung ji bzhin//bdag gis gsal bar bshad pa ste/ /sku gsung thugs kyi dngos grub ster/ /zhes so/ /rgyud gzhan du gsungs pa yang / pad+ma'i nang du mi yi sna rtse ru/ /rdo rje las byung 'o ma'i rgya mtsho'i gzugs/ /yid bzhin nor bu 'gro ba kun gyi rang bzhin te/ he ru ka dpal rtag rig 'dzag pa'i skad cig ma/ /gcig gis thams cad nges par rab gnas 'gyur/ /dpal mtshan yang dag par brjod par gsungs pa yang / chos kyi dung ste sgra chen ldan/ /chos kyi gaN+DI sgra bo che/ /rab tu mi gnas mya ngan 'das/ /phyogs bcu chos kyi rnga bo che/ / zhes pa nges pa'i don to/ /drang ba'i don gyis ni 'di thams cad go sla'o/ /da ni gsang ba chen po'i mchod pa brjod par bya ste/ dpal phyag na rdo rjes gsungs pa yang / 'dir shes rab dang thabs kyi rgyud gzhan du mchod pa rnam pa gnyis te/ phyi rol dang nang gi bdag nyid kyi mchod pa'o zhes so/ /de la phyi rol gyi mchod pa ni nye bar spyod pa lnga la sogs pa rnams kyis te/ji skad du shes rab kyi pha rol tu phyin pa mchod rten la bsnyen bkur bya ba'i le'ur gsungs pa/ me tog dang bdug spos dang / dri mchog dang / phreng ba dang / byug pa dang / phye ma dang / na bza' dang / gdugs dang / rgyal mtshan dang / dril bu dang / ba dan dang / kun nas mar me'i phreng ba rnams dang / mchod pa mang po rnams kyis mchod par bya'o/ /zhes so/ /bdud rtsi lnga dang sgron ma lnga la sogs pa rnams kyis phung po dang khams la sogs pa rnams tshim par byed pa'o zhes pa'o/ /nang gi bdag nyid kyi mchod pa ni rang gi khu ba'i thig le ma 'phos pa bzhi po gsang ba dang lte ba dang /snying ga dang / mgrin pa dang / dpral bar son pa rgyu mthun pa dang / rnam par smin pa dang / skyes bu'i byed pa dang / dri ma med pa'i rang bzhin rnam pa sna tshogs pa dang / rnam par smin pa dang / rnam par nyed pa dang / mtshan nyid dang bral ba chos mi mthun pa de rnams kyis sangs rgyas la sogs pa ste/gzugs dang / tshor ba dang / 'du shes dang / 'du byed dang / rnam par shes pa'i phung po rnams dang / byang chub sems dpa' rnams zhes pa mig dang / rna ba dang / sna dang / lce dang / lus dang / yid ces pa dbang po'i khams rnams dang /dang yig las sa la sogs pa'i khams rnams dang / gzugs la sogs pa yul gyi khams rnams mchod par bya ste/ byang chub kyi sems ma 'phos pa'i thig le rnams dang mi 'gyur ba'i bde ba chen po'i skad cig rnams kyis yongs su mchod par bya'o zhes pa nges pa'i don to/ / zhes pa dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du brtag pa gnyis pa rab gnas kyi le'u ste dang po'o// //da ni gnyis pa dngos grub kyi le'u gsungs pa/ nam mkha' lta bu'i chos kun la/ /rgya mtsho'i ku ba ji lta bar/ /sems can rang 'dod lha yi ni/ / gzugs kyis ji ltar 'grub par 'gyur/ /zhes pa la sogs pa la nam mkha' lta bu zhes pa ni rang bzhin med pa'i chos thams cad rnam pa ji ltar thog mar rgya mtsho chen por 'phangs pa'i ku ba nyi tshe bar 'gyur ba de ltar 'dod chags la sogs pa'i chu srin gyis dkrugs pa'i 'khor ba'i rgya mtshor sems can rnams ji ltar grub par 'gyur zhes pa'o//dpal Dom+bi'i zhabs kyis kyang gsungs pa/ de ltar shes nas srid pa'i rgya mtsho dug gi chu can 'dod chags la sogs chu srin 'khrugs/ /nad kyi zug gzer rba rlabs rgyas pas bsgrubs pa'i 'gram nyid gcig pu bde ba chen po ste/ de phyir skye bo byang chub blo ldan skad cig tsam yang rang gi don la mtha' gcig tu/ /brtson pa gti mug zhags pa'i phongs pa spangs te yang dag rmad du byung bar mi 'gro'am/ /zhes so/ /rang 'dod lha'i gzugs zhes pa dpal gdan bzhi par yang gsungs pa/ /bdag nyid lha dang pha rol lha/ / bdag nyid lha ni dam pa ste/ /bdag nyid gzugs su nus med rnams/ /gzugs brnyan la sogs rnams rtog byed/ /bdag med rnal 'byor ldan pa'am/ /yang na he ru ka dpal brtson/ /zhes pa la dpal 'dus par gsungs pa yang / /dngos po 'di rnams ma skyes pa/ /chos med chos nyid kyang med de//nam mkha' lta bur bdag med pa/ /'di ni byang chub tshul bstan pa'o/ /zhes so/ /kye'i rdo rje sems zhes bshad/ /rnam rtog med pa'i rang bzhin te/ /rang bzhin 'od gsal rnam pa can/ /gdod nas zhi ba nam mkha' mnyam/ /zhes so/ / bsam gtan nyon mongs 'jig byed pa/ /zhes pa la/ dpal rdo rje rtse mor gsungs pa yang / bsam gtan ci yi don brjod bya/ /sdug bsngal thams cad gcod pa dang / /nyon mongs dra ba 'jig byed pa/ /shes rab lhan cig bsam gtan ni/ /srid pa 'joms par byed pa'i mchog /ces so//bsam pa thams cad yongs spangs nas/ /lha yi gzugs su sems pa yis/ /nyin gcig bar chad med pa ru/ /bsgoms nas yongs su brtag par gyis/ /zhes pa 'di'i don ni 'di yin te/ dpal dang po'i sangs rgyas su yang gsungs pa/ rang gi sems ni brgyal dang gnyid la rab zhugs mi yi bdag po rang bzhin med par 'gyur//sad la rang bzhin dang bcas gsal byed de rnams srog chags rnams kyi thar pa'i lam ma yin/ /dngos dang dngos med kyis phye sems kyi rdo rje rnal 'byor ba la bde mnyam ster ba yin/ /nam mkha'i shes rab la 'khyud lhan skyes bde bar gnas pa'i rang sems gang de thar pa ster//gsungs pa yang / rgyud ni rgyud gzhan gyis rtogs par bya'o/ /zhes pa de bzhin gshegs pa'i nges pa'o/ /dpal phyag na rdo rjes kyang gsungs pa/ 'dir bcom ldan 'das kyis dam bca' ba ni/ bsam pa thams cad yongs spangs te/ nyin gcig yongs su brtag par bya//gal te yid ches ma byung na/ /de tshe nga yi brdzun tshig yin/ /zhes pa'o/ /'dir yid ches ni du ba la sogs pa'i mtshan ma ste/ gzhan sngags la sogs pas nyin gcig bsgrub par bya ba ma yin pa gang gis sngags pa rnams kyi yid ches par 'gyur ba'o/ /de'i phyir yod pa dang med pa'i blo yongs su spangs te/rten med par byas nas zab mo stong pa nyid kyi gzhi la yid ches su 'gyur te/ /bden par yid ches par byed pa yid ches pa'i don du ba la sogs pa rnal 'byor pas shes par bya'o zhes pa de bzhin gshegs pa'i nges pa'o/ /de bzhin du/ byed pa bcing ba'i sbyor ba yis/ /sa gsum pa ni bsgrub par bya//zhes pa la sangs rgyas kyi gzugs ni srid pa gsum ste/ byed pa mig la sogs pa rnams kyis bsgrub par bya'o/ /man ngag de nyid ni bla ma'i zhal las rtogs par bya'o/ /dpal mkha' 'gro ma rdo rje gur du gsungs pa yang / gang dang gang gis 'dul ba yis/ / sems can gdul bya nyid 'gro ba/ /rnam pa de dang de yis ni/ /sangs rgyas rnams kyis chos bstan pa'o/ /zhes pa'o/ /dpal mchog gi dang po'i sangs rgyas stong phrag bcu gnyis par gsungs pa de nyid la 'jug par bya ste/ bkab dang ma bkab mig dag gis/ stong par gang zhig rjes brtags min//rmi lam lta bur gzugs brnyan mthong / /rtag tu gzugs de bsgom par bya/ /ji ltar me long pra phab la/ /gzhon nu mas mthong dngos med skyes/ /de bzhin 'das dang ma 'ongs chos/ /mkha' la de ltar rnal 'byor pas/ /med pa'i chos can rnams la chos/ /skye ba 'di ni rab tu mthong //yid bzhin nor ltar mtha' yas pa'i/ /sems can re ba yongs gang byed/ /pra phab pa yi gzhon nu mas/ /ma mthong ba yi rdzas mthong byed/ /nyi tshe ba yi mig dag gis/ /bsams nas sgrub pa po yis mthong / /zhes so/ /dpal dang po'i sangs rgyas su yang gsungs pa/nam mkhar kun nas zhen pa'i sems dang mig ni mi 'dzums rdo rje'i lam du rab zhugs pas/ /stong pa las ni du ba smig rgyu rab gsal dri med mkha' snang nyid dang mar me dang / /'bar ba zla ba nyi ma rdo rje rnams dang mchog gi cha dang thig le mthong bar 'gyur/ /de yi dbus su sangs rgyas gzugs ni yul dang rnam bral du ma longs spyod rdzogs pa'i sku//nam mkha' chu 'dzin bral ba rnal 'byor pa yis bgrad pa'i mig gis blta bar bya ba ste/ /re khA nag po dri med 'od zer 'pho ba dus kyi rtsa la mthong gi bar du'o der/ /kun mkhyen gzugs ni chu la nyi ma lta bu gos pa med pa kha dog sna tshogs te//rnam pa kun ldan rang sems yul dang rnam par bral ba'o sems ni gzhan pa min pa nyid/ /ces so/ /'dir brtan par byed pa gsungs te/ dpal shes rab kyi pha rol tu phyin par gsungs pa yang / de nas lha rnams kyi dbang po brgya byin gyis tshe dang ldan pa rab 'byor la 'di skad ces smras so//'phags pa tshe dang ldan pa rab 'byor gang shes rab kyi pha rol tu phyin pa la rnal 'byor du byed pa yin/ rab 'byor gyis smras pa/ kau'u shi ka gang shes rab kyi pha rol tu phyin pa la rnal 'byor du byed pa de ni nam mkha' la rnal 'byor du byed pa yin no/ /gang shes rab kyi pha rol tu phyin pa la bslab par bya bar sems pa de ni bla gab med pa la rnal 'byor du byed do zhes so//'dir bla ma'i man ngag gis nam mkha' la thog mar rnal 'byor pas du ba mthong ste/ smig rgyu ni ma yin no zhes pa rang gi nyams su myong ba las shes par bya'o/ /de ltar du ba ni mtshan ma dang po'o/ /smig rgyu ni mtshan ma gnyis pa'o//mkha' snang ni mtshan ma gsum pa'o/ /sgron ma ni mtshan ma bzhi pa'o/ /mtshan ma lnga pa ni sprin med pa'i nam mkha' lta bu'o/ /zhes dpal 'dus pa dang mkha' 'gro ma rdo rje gur du bcom ldan 'das kyis gsungs te/ dngos grub 'di kun rgyu dang bcas/ / dngos grub nye bar 'grub pa'o/ /phyi nas sgyu ma'i rnam pa ste/ /rmi lam rnam par skad cig re/ /zhes pa la sogs pa'o/ /dpal dang po'i sangs rgyas su gsungs pa yang / /khro bo sangs rgyas lha mo dang bcas nges par ro yi rdo rje rnams dang sa snying sogs/ /rab tu dga' ba'i thugs rnams rnal 'byor pa la grub pa'i dus su mkha' la mngon sum 'gyur//de yi 'dod pa'i dngos grub ri bong can zhag tho rangs dang ni mtshan mo phyed la 'gyur/ /rin po che'am me tog char ba mchog gyur dus kyi sbyor bas sa steng du 'bab 'gyur/ lus ni dang zhing rdul phran nyams pa nam mkha' dang mtshungs mtshan sogs rnams kyis rab rdzogs 'gyur//sna tshogs 'jig rten gsum po rnams ni dang zhing sgrib pa rnam bral rmi lam bzhin du snang / skad ni kun nas tshad med du ma'i skad gzhan rnams kyis gzhan gyi snying la 'jug pa ste/ sems ni dam pa'i bde bas gang zhig mi g.yo thams cad dus su lhan cig skyes pas 'khyud//ces so/ /gsungs pa yang / 'di la ye shes 'khrul ba med/ /'di la 'khrul ba rigs ma yin/ /sangs rgyas rdzu 'phrul bsam mi khyab/ /yid la mi byed pas kyang 'thob/ /ces so/ /de bzhin du dpal dang po'i sangs rgyas su gsungs pa yang / dpal ldan zla ba chu shel rnam rtog med pa'i rang bzhin las ni chu 'dzag pa'i//de bzhin 'jig rten du ni rgyal ba'i bdag po'i phung po la brten kun mkhyen chos 'byung ste/ /chu ni sa bon khams la kun du brten nas ro mnyam 'gyur ba ji bzhin nyid du chos/ /sems can rnams kyi dag pa'i sems kyis rnams mang 'gyur te sngon gyi las kyi mthu las so//zhes so/ /'jigs smyo de bzhin sdug bsngal dang / /mya ngan gdung sogs nyer 'tshe dang / /'dod chags zhe sdang gti mug ches/ /sgrub pa po nyid nyon mi mongs/ /zhes pa'i tshig 'di rgyas par bshad pa ni dpal mtshan yang dag par brjod par gsungs pa/ sman pa che mchog gtso bo ste//zug rngu 'byin pa bla na med/ /sman rnams ma lus ljon pa'i shing / /nyon mongs nad kyi dgra che ba/ /zhes so/ /phyag rgya che ge mo khyer la/ /sems can don gyi rdo rje 'dzin/ /zhes pa la/ rgyud gzhan du gsungs pa yang / kun mkhyen bde ster de nyid gcig pu rdo rje 'dzin pa'i phyag rgya chen mo ste//phung po la sogs sgrib pas rab dman yul can gang zhig pra phab brgyang lta bu/ /de bor sangs rgyas nyid ched nor chags 'khyog po'i snying can ma dang brtags ma la/ /gang gis rten byed rnam brtags blo can de yis de yang 'pho ba thob par byed/ /'dod chags nyams la sdig ste gang phyir shin tu sdug ma la ni zhe sdang ste//sdang las gti mug 'di las rang gi rdo rje lhung las sems ni rtag brgyal te/ /ma lus mchog min bza' dang btung ba la sogs yul can la ni rab tu 'jug /de yis sems la co dris bde ba bcom zhing skye ba drug tu 'khor bar 'gyur/ /zhes so/ /slar yang de nyid du gsungs pa/phyag rgya sgyu ma'i rjes su mthun pa'i yid dang nam mkha' la ni me long la gzugs bzhin/ /'jig rten gsum po snang bar byed cing dri med glog mtshungs 'od zer du ma 'phro bar byed/ /phyi dang lus la dbyer med yul dang bral ba snang ba tsam ni mkha' gnas pa'i/ /sems la sems kyis bdag gis 'khyud de 'gro ba du ma'i gzugs kyi don ni gzugs su'o//zhes so/ /rdo rje snying pos gsol pa/ rdzogs pa'i rim pa'i rnal 'byor kyis/ /dam pa'i bde ba bde chen na/ /rdzogs pa sgom pa med pa ste/ /bskyed pa yis ni dgos pa ci/ /zhes pa la de la rdzogs pa'i rim pa zhes bya ba rtogs pa dang dbang po gnyis kyi bde ba dang bral ba ste/de nyid sangs rgyas ster bar byed pa yin na de'i phyir/ rdzogs pa'i dkyil 'khor bskyed pa dang / /phyag rgya bskyed pas dgos pa ci/ /zhes pa'o/ /tshig 'di gsan nas bcom ldan 'das kye'i rdo rjes bka' stsal pa/byang chub sems dpa' chen po 'di/ /e ma dad pa'i shugs kyis nyams/ /zhes pa kun rdzob tu'o/ /lus kyi dngos med ga las bde/ /bde ba smra bar mi nus so/ /khyab bya khyab byed ngo bo yis/ /bde bas 'gro ba khyab pa'o/ /ji ltar me tog la gnas dri/ /me tog dngos med las mi rtogs//de bzhin gzugs sogs dngos med pas/ /bde ba dmigs pa nyid mi 'gyur/ /zhes pa kun rdzob kyis so/ /rgyud 'di nyid du slar yang don dam pas 'gog pa 'di lta ste/ dngos po dngos po med pa nga / /zhes pa rnam pa thams cad pa'i shes rab bo/ /dngos po rtogs phyir sangs rgyas nga //zhes pa mngon par shes pa drug can thabs so/ /rmongs pa gang rnams nga mi shes/ /'di ltar gyur pa'i gang zhig le los bcom pas kyang ste de rnams ni dbang po gnyis kyi bde bas nye bar bcom pa rnams so/ /'dir khams gsum pa rgyu ba dang bcas pa'am mi rgyu ba dang bcas pa'i 'das pa dang ma 'ongs pa dang ltar byung ba la khyab par byed pa nyid kyi phyir/gal te sangs rgyas kyi ye shes lus las skyes rten dang brten pa'i 'brel bas ji ltar me tog las skyes pa'i dri lta bu yin na de med pa na yang 'jig ste/ ji ltar me tog med pa na dri lta bu yin no/ / de lta yang ma yin no/ /de'i phyir phyi dang lus la khyab par byas nas/ phyi la gnas pa lus la gnas pa zhes brjod kyi/ /lus med na de med pa ni ma yin te/ gang gi phyir de'i phyir lus skyes min zhes pa ni nges pa'o/ /de skad du yang gsungs pa/ ji ltar bum pa zhig gyur kyang / /nam mkha' la ni 'jig pa med//de bzhin lus ni zhig gyur kyang / /ye shes la ni 'jig pa med/ /rang bzhin kho na mya ngan 'das/ /rnam dag rnam pa'i sems las so/ /zhes pa la sogs pa'o/ /dpal shes rab kyi pha rol tu phyin pa brgya byin gyi le'ur yang gsungs pa/ tshe dang ldan pa rab 'byor gyis smras pa/ lha'i bu de gal te mya ngan las 'das pa las ches khyad par du 'phags pa'i chos gzhan 'ga' zhig yod na de yang kho bo ni sgyu ma lta bu rmi lam lta bu'o zhes smra'o/ /lha'i bu rnams de ltar sgyu ma dang mya ngan 'das pa 'di ni gnyis su med de gnyis su byar med do/ /de ltar rmi lam dang mya ngan las 'das pa 'di ni gnyis su med de gnyis su byar med do zhes so//lha'i gzugs kyi rnal 'byor ni/ /skyes zin tsam la rnam par gnas/ /zhes pa la/ dpal dang po'i sangs rgyas su gsungs pa yang / mngal du yang dag dag pa'i sku ste btsa' ba'i dus nas so ni skyes pa'ang chos kyi'o/ /so ni rab tu ltung bar gyur ba mi yi bdag po rgyal ba'i longs spyod rdzogs pa'i sku//de nas sprul pa'i sku ni rab tu gsal zhing nges par 'chi ba'i mtshams te mi rnams kyi'o/ /mngal dang phyi rol dag tu slar yang 'di ni ye shes rnam shes dbye bas rnam bzhir 'gyur/ /zhes so/ /'on kyang bag chags phal pas so/ / zhes pa la/ phal pa zhes pa ni bde ba chen po dang gcig tu 'dres par gyur pa'i byang chub kyi sems 'pho ba las phal ba zhes brjod par bya'o/ /chags pas 'jig rten 'ching 'gyur te/ /chags pa nyid kyis rnam grol 'gyur/ /zhes pa la sogs pa la/ rgyud gzhan du yang gsungs pa/ chags pa nyid dang chags bral yang / /'dres par gyur pa rnyog pa med/ /de ltar chags dang chags bral dag /gcig pa ro mnyam skad cig go/ /zhes so/ /'byung ba lnga yi rang bzhin las/ /kun du ru las lnga ru 'gyur/ /dga' ba chen po gcig nyid ni/ /dbye bas lnga ru 'gro ba'o/ /zhes so//slar yang 'di nyid du gsungs pa/ /bo la kak+ko la sbyor bas/ /reg pas sra ba'i bag chags te/ /sra ba gti mug chos nyid phyir/ /gti mug rnam par snang mdzad 'dod/ /gang phyir byang sems zhu ba nyid/ /khu ba chu yi khams su 'dod/ /chu ni mi bskyod ngo bo'i phyir/ /zhe sdang 'dren pa mi bskyod pa//gnyis ka bsrubs pa'i sbyor ba las/ /drod ni rtag tu skye bar 'gyur/ /'dod chags dpag med rdo rje yin/ /'dod chags me las yang dag 'byung / /kak+ko lar ni gang zhig sems/ /de ni rlung gi ngo bo can/ /phrag dog don yod grub par 'gyur/ /don yod rlung las yang dag byung //bde ba 'dod chags chags par 'gyur/ /chags pa nam mkha'i mtshan nyid de/ /nam mkha' phra ma rdo rjer 'gyur/ /phra ma nam mkha' las byung ba/ /dpal shes rab kyi pha rol tu phyin par 'jig rten bstan pa'i le'ur gsungs pa yang / rab 'byor de ji snyam du sems/ 'on kyang nam mkha' la mnyam pa'am/ bgrang ba'am tshad dam mtshungs pa'am/ sems sam sems pa'am sems las byung ba'i chos rnams yod dam/ rab 'byor gyis gsol ba/ bcom ldan 'das de ni ma lags so/ /bcom ldan 'das kyis bka' stsal pa/rab 'byor de lta kho nar rnam grangs 'dis kyang chos thams cad kyang bsam gyis mi khyab pa mnyam pa med pa gzhal du med pa grangs med pa mi mnyam pa dang mnyam pa ste/ rab 'byor 'di rnams ni de bzhin gshegs pa'i chos rnams so zhes so/ /sems ni chen po gcig nyid ni/ / lnga yi gzugs kyis mtshon pa'o/ /zhes pa la dpal rgyud thams cad kyi snying po phyi mar gsungs pa yang / e ma bsam gyis mi khyab stong nyid rdo rjer nges/ /rdo rje'i bdag nyid can ni rang nyid thar par byed/ /rang nyid kyang ni du ma'i gzugs kyis ston byed cing / /rang nyid 'chi bar byed ste rang nyid kyang ni du//rang nyid me las sa yang rang nyid de/ /rang nyid rlung ste chu yang rang nyid do/ /rang nyid nam mkha' rang nyid drag po yang / /rang nyid khyab 'jug nyi ma zla ba'ang rang / /zhes pa la sogs pa'o/ /rigs ni lnga po de nyid la/ /stong phrag du ma skyes pa'o/ /de phyir 'di ni rang bzhin gcig /bde ba chen po mchog tu brtag /dpal dang po'i sangs rgyas su gsungs pa yang / lus la bsam pa rab tu zhugs pa nam mkha' bzhin du ro mnyam bsam pa'i lus su'ang lus/ /rnal 'byor ldan pas shes bya rang bzhin yon tan dbang gis khams kyi kha dog sogs dbye bas/ ser po nag po kha dog dmar po zhes dang dkar po sa rlung me dang chu la'o/ /ye shes nam mkha' la yang sngon po ljang gur gyur te lus dang bsam pa'i rab dbye bas/ /dpal mkha' 'gro ma rdo rje gur du yang gsungs pa/ gti mug zhe sdang de bzhin chags/ /nga rgyal ser sna can 'gro rnams/ / bsdu phyir 'khor lor rdo rje can/ /rang nyid rnam pa du ma'i gzugs/ /dpal mtshan yang dag par brjod par yang gsungs pa/ mchod pa chen po 'dod chags che/ /sems can thams cad dga' bar byed/ /mchod pa chen po zhe sdang che/ /nyon mongs kun gyi dgra che ba/ /mchod pa chen po gti mug che//gti mug blo can gti mug sel/ /mchod pa chen po khro ba che/ /khro ba chen po dgra che ba/ /mchod pa chen po chags pa che/ /'dod pa thams cad sel bar byed/ /ces pa la sogs pa'o/ /'di nyid du gsungs pa yang / gcig nyid du ma nyid du 'gyur/ /sna tshogs gzugs can nor bu bzhin//zhes so/ /dpal kye'i rdo rje'i rgyud la rdo rje'i tshig 'byed pa'i snying po bsdus pa'i dka' 'grel du brtag pa gnyis par dngos grub gtan la dbab pa zhes bya ba'i le'u ste gnyis pa'o// //da ni rdo rje rnal 'byor ma rnams kyis dngos grub kyi thabs le'u gsum pa gsungs pa/de nas rdo rje can gyis rgyud thams cad kyi gleng gzhi zhes pa la sogs pa'o/ /gsungs pa yang / rdo rje can zhes pa 'gyur ba med cing ma 'phos pa'i thig le bzhi po rdo rje nor bur son pa rnams ni rdo rje nor bur zhugs pa'i pad+mar kun nas dga' ba thams cad pa bde ba mnyam pa'i gzhi ma 'phos pa nyid kyi phyir rdo rje can rnams so//rgyud thams cad ces pa la/ brtson chen sgyu 'phrul dra ba ste/ /rgyud kun gyi ni bdag po mchog /ces so/ /dpal rdo rje rtse mor yang gsungs pa/ sangs rgyas rnams kyi chos longs spyod/ /sangs rgyas thugs rje skul byed pa/ /sems can kun la phan don ched//thams cad rgyud ni yang dag 'byung / /zhes so/ /sangs rgyas kun gyi sdom pa ni/ /e waM yi ger rab tu gnas/ /zhes pa la sogs pa 'di'i nges pa'i don ni dpal dri ma dang bral ba'i 'od du gsungs pa yang / sprul pa yi ni sku gsung thugs/ /ye shes gcig sbyor sdom pa dang //longs spyod rdzogs pa'i sku gsung thugs/ ye shes gcig sbyor sdom pa dang / /dpal ldan gyi ni sku gsung thugs/ /ye shes gcig sbyor sdom pa dang / lhan cig skyes pa'i sku gsung thugs/ /ye shes gcig sbyor sdom pa ni/ /sad rmi gnyid lhug bzhi pa las//dbang po gnyis skyes bde min zhing / /ye shes lus dang ngag dang sems/ /gnas bzhir yang dag mi gnas te/ /zhes sdom pa'i rnal 'byor gyi nges pa'o/ /mkha' 'gro ma'i sdom pa e waM yi ge gsungs pa/ e yig cha byad bzang po gang / zhes pa la sogs pa la dpal sam+bu Tar gsungs pa yang / gru gsum kun rdzob rnam pa'i gzugs can shes rab ste/ /bzang po pad+ma'i steng gnas rdo rje mgon po'i sgrub byed do/ /dbus su waM yig gis brgyan pa/ /zhes pa dbus su ste ze 'bru la thabs su gyur pa'i waM yig gis brgyan zhing spras par byas pa'o//bde ba thams cad rnams kyi gnas/ /zhes pa la gnas ni bzhi'o/ /thams cad ni dam tshig lnga'o/ /bde ba ni drug pa'o/ /bde ba dang thams cad de rnams kyi'o/ /sangs rgyas ni rnam par snang mdzad la sogs pa rnams te de rnams kho na ches khyad par du 'phags pa nyid kyis na rin po che rnams so//de rnams kyi za ma tog ni sangs rgyas rin po che'i rnam pa'i gnas so/ /dpal sam+bu Ta ru gsungs pa yang / e yig gis ni shes rab bshad/ /waM yig kyang ni thabs dang ldan/ /waM yig gis ni brgyan pa ste/ /e yig bud med la mdzes pa'o/ / zhes so/ /gsungs pa yang / e yig rnam pa'i gzugs can no/ /sangs rgyas rin chen za ma tog /sangs rgyas rin chen ni mchog tu mi 'gyur ba'i bde ba ste/ za ma tog ni rdo rje nor bu dang pad+ma'o zhes pa sangs rgyas rin chen za ma tog go/ /dga' ba de yis skye bar 'gyur/ /zhes pa la sogs pa la gsungs pa yang /dga' ba mchog tu dga' ba dang / /khyad dga'i dga' ba gsum pa ste/ /lhan cig skyes pa'i rang bzhin 'di/ /brtan dang g.yo ba kun gyi bdag /kun gyi lhan cig skyes gang 'di/ /bsam gyis mi khyab ces par bshad/ /brjod med kun 'gro zhi ba yis//ye shes he ru ka ru brjod/ /kha sbyar 'khyud pa la sogs pa/ /rnam pa sna tshogs sna tshogs dga'/ /b+ha gar ling ga rab sbyor bas/ /rnam smin ye shes dam pa'o/ /phyag rgya nyed pa rnam nyid do/ /mtshan nyid bral ba nges par mtshon/ /zhes so/ /shes rab bcu drug lo lon la/ / lag pa dag gis yang dag 'khyud/ /ces pa 'di'i don ni 'di yin te/ dpal dgongs pa lung ston pa'i rgyud du gsungs pa yang / nang la sogs pa'i dbye ba yis/ /stong phyir bcu drug lo lon pa'o/ /de rnams kyi ni skye med pa/ /de yang btsun mo zhes par brjod/ /dpal mchog gi rgyud du yang gsungs pa/dril bu nA da la dmigs nas/ /me tog bdug spos rnams kyis brgyan/ /bcu gnyis lo lon dril bur 'gyur/ /rnga chen bcu drug lo lon pa'o/ /zhes so/ /dkyil 'khor 'khor lo ci zhes brjod/ /ces pa la 'di nyid du gsungs pa yang / phyag rgya chen po'i dbang bskur la//ji ltar shes pa'i bde chen po/ /'di ni de yi mthu nyid de/ /gzhan las dkyil 'khor 'byung ba med/ /dpal 'dus par yang gsungs pa/ b+ha ga'i dkyil 'khor zhes bya dang / /byang chub sems kyi dkyil 'khor dang / /lus kyi dkyil 'khor zhes bshad pa/ /gsum la dkyil 'khor brtag pa'o//zhes so/ /khyod kyis srog chags gsad par bya/ /zhes pa la sogs pa 'di'i don ni 'di yin te/ /dpal dri ma dang bral ba'i 'od du gsungs pa yang / 'dir gang rnal 'byor ba yis srog gcod pa bya ba de ni thams cad mkhyen pa'i go 'phang thob pa'i ched du rang gi lus la srog nyams par gsungs te/phyi rol du srog gcod pa ni ma yin no/ /'dir phyi rol du gang srog gcod par gsungs pa ni gdul dka' ba 'dul ba'i ched du srog rnal 'byor gyi stobs kyis bkug nas slar yang lus de nyid la rnal 'byor pas gzhug par bya'o/ /de ltar na gdul dka' ba 'dul ba por 'gyur gyi gdul dka' ba mthar byed pa ni rnal 'byor pa ma yin no zhes grub po//gsungs pa yang / de nas dpal ldan rdo rje 'chang / /dpa' bo gdul dka' 'dul ba po/ /zhes so/ /sgrub pa po/ bdag gir mi 'dzin ngar mi 'dzin/ /bden pa gnyis kyi tshul la gnas pas kyang phran tshogs kyi las byed pa ni dmyal bar 'gro'o zhes so//gsungs pa yang / ji ltar bdag nyid la lta ba/ /de ltar sems can rnams la'o/ /zhes so/ /sgra ni gang zhig zhal gyis dman/ /zhes pa 'dir thams cad mkhyen pa'i gsung skad thams cad pa gang las sems can rnams kyi snying la rang rang gi skad gzhan gyis 'gyur ba de nyid rab tu mi gnas pa ste/sems can thams cad kyi skad yin pa nyid kyi phyir ro/ /rab tu mi gnas pa'i sgra yin pa nyid kyi phyir brdzun du smra ba zhes brjod do/ /de skad du yang gsungs pa/ gtso bo khyod kyis cung zad kyang / / yi ge gcig kyang brjod med kyang / /gdul bya'i skye bo thams cad ni/ /chos kyi char bas tshim par mdzad/ /ces so/ /de bzhin du yang gsungs pa/ /skyes bu de nyid tsam las ni/ /yid bzhin nor bu las bzhin du/ /rtsig sogs las kyang ston pa ni/ /ji ltar 'dod pas nges par 'byung / / zhes so/ /sems can thams cad gdul bar bya ba'i don du ste/ /sems can rnams slu ba'i ched du sangs rgyas pa'i rnal 'byor pa rnams kyis slu ba can gyi tshig 'di ma yin no zhes pa ni grub bo/ /'dir lus sgrib pa med par skyes par gyur pa na thams cad mkhyen pa'i sa bcu gnyis po gang 'dzin pa ni/ rnal 'byor ba'i ma byin par len ba'o/ /pha rol du bud med ces pa la pha rol te ches mchog tu gyur pa las dang ye shes dang bral ba bde ba chen po'i rang bzhin phyag rgya chen po ste/ de bsten par gyis shig pa'o/ /rang mtshungs mdzes ma zhes pa dpal dang po'i sangs rgyas su yang gsungs pa/ rnal 'byor pa yis nyin dang mtshan mor srog gcod bya ba de ni srog nyams par gsungs te/sgra ni gang zhig zhal gyis dman pa'ang snying la 'gyur ba de ni brdzun du smra ba nyid/ /gang zhig thams cad mkhyen pa'i ye shes sa ni 'dzin pa'ang rnal 'byor pa yis rku bar gsungs/ /thig le ma lhung ba las bder 'gyur chags bral min las gzhan gyi bud med bsten pa'o//zhes so/ bza' btung ji ltar rnyed pa dang / /bgrod dang bgrod min spang mi bya/ /zhes pa la sogs pa ste/ 'di'i nges pa'i don ni gsungs pa yang / /bza' ba ni gzugs la sogs pa'i phung po lnga'o/ /btung ba ni byang chub kyi sems zhu ba'i khu ba'o//bgrod bya ni rgyur gyur pa'i ye shes so/ /bgrod bya ma yin pa ni lhan cig skyes pa'i ngo bo'o/ /'di dag dbyer med pa'i rnal 'byor gyis/ /bgrod dang bgrod min spang mi bya/ /zhes pa'o/ /khrus dang gtsang sbra mi bya ste/ /phung po lnga sgrib pa med pas dri ma 'byin pa ni me long lta bu la sogs pa'i ye shes lnga skyed pas na dag pa'o//dpal gdan bzhi par yang gsungs pa/ /rang gi lus ni bkru bya ste/ /'dod chags zhe sdang dri ma'i nad/ /zab mo rgya mtsho lta bu rnams/ /stong nyid ye shes de nyid kyis/ /zhes so/ /gtsang sbra ni sems kyi rdo rje rnam par spyod pas dag pa'o//de skad du yang gsungs pa/ gtsang sbra dang po pho nya mo/ /gnyis pa zla ba nyid du 'dod/ /gcig tu tsA ru'i bza' ba ni/ /gtsang sbra gsum pa brjod par bya/ /phyi rol rnal 'byor dga' rnams la/ /chu yi gtsang sbra yang dag spyad/ /rang sems dri ma can gyur na/ /gtsang sbra yis ni dgos pa ci//mi bya zhes pa ni dmigs pa med pa'i sbyor bas rnam par gnas pa nyid kyi phyir ro/ /grong ba'i chos kyi sgra yis ni/ /mig la sogs pa'i skye mched de/ /spang mi bya zhes pa'o/ /blo ldan sngags nyid mi bzla zhing / /zhes pa phyi rol gyi sngags brjod pa ste/ gdod ma nas ma skyes pa'i rang bzhin gyis ni bzlas par mi bya'o//bsam gtan nyid ni dmigs mi bya/ /zhes pa la bsam gtan ni gang yid rtse gcig pas kun nas gnas par bya ba ste/ bya ba med pa nyid kyis na de'i tshe/ bsam gtan nyid kyang dmigs mi bya/ /zhes pa'o/ /gnyid ni spang bar mi bya zhing / /zhes pa la gnyid ni gti mug ste/gti mug ni rnam par snang mdzad du 'dod la/ rnam par snang mdzad gang yin pa de 'di ni byang chub kyi sems yin la de yongs su gtang bar bya ba ma yin no/ /dbang po rnams ni mi dgag go/ /dbang po ni mig la sogs pa rnams te/ byang chub sems kyi rang bzhin nyid kyi phyir dgag par mi bya'o zhes pa'o//ba la thams cad bza' bar bya/ /zhes pa ni gzugs la sogs pa'i phung po lnga po lus pa med par sgrib pa med pa'o/ /rigs lnga la ni mnyam par sbyang / /ces pa de bzhin gshegs pa rnams kyi gzugs su dmigs pa'o/ /btsun mo thams cad dga' bar byed/ /ces pa'i btsun mo zhes pa 'di yis spyan ma la sogs pa'i lha mo rnams so//de rnams dbyer med pa'i rnal 'byor gyis 'jug par gang gi tshe 'gyur ba de'i tshe/ /btsun mo thams cad dga' bar byed pa kho na'o zhes so/ /dogs pa med pa'i sems kyis ni/ /zhes pa ji lta bar bcom ldan 'das byang chub kyi sems rdo rje ni dbang po rnams dang lhan cig tha mi dad pa nyid kyis na bde ba chen po'i rnam pas bya ba med pa nyid du gnas par 'gyur te/de'i tshe/ dogs pa med pa'i sems kyis ni/ /zhes pa'o/ /bshes la sdug par mi bya zhing / zhes pa la/ bshes ni byang chub kyi sems kyi rang bzhin te/de la rang bzhin med pas na sdug par mi bya'o zhes pa'o/ /de bzhin sdang la sdang ba min/ /zhes pa sdang ba mig la sogs pa'i shes pa ste/ de la sdang bar bya ba ma yin zhes pa dbyer med pa'i rnal 'byor las so/ /rdo shing 'jim pa'i rang bzhin gyi/ /lha 'di rnams la phyag mi bya//zhes pa gang gi tshe/ sems kyi rdo rje dbang po rnams thams cad kyi ye shes kyi rgyur byas nas dkyil 'khor gyi 'khor lo'i rang bzhin gyis rnam par gnas par 'gyur ba de'i tshe shing dang rdo ba la sogs pa la phyag mi bya'o zhes bshad par bya'o/ /'gro ba thams cad bsgom par bya//zhes pa la sogs pa la gsungs pa yang / bde ba chen pos 'gro ba khyab/ /bde ba spangs nas rtogs ma yin/ /sangs rgyas byang chub sems dpa' dang / /mkha' 'gro ma dang btsun mo bzang / /sangs rgyas lnga dang du ma rnams/ /de bzhin bde bas sangs rgyas gshegs//tha mal nga rgyal gzhom don du/ /sgom pa yang dag rab tu bsgrags/ /tha mal gnas skabs gzhom ched du/ /sgom pa bsgom pa nyid ma yin/ /zhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du dgongs pa'i skad kyi le'u ste gsum pa'o// // da ni spyod pa'i le'ur gang mdor bstan pa'i glu dang gar la sogs pa rgyas par bstan pa'i ched du rgyud thams cad kyi phyag rgya bsdus pa'i don gyi le'u gsungs so/ /dang por re zhig glu bstan par bya ste/ kol+la i ri T+Thi a bo la zhes pa 'di yis te/ bo la ni rdo rje byang chub kyi sems su bshad do/ / ko zhes bya ba bde ba'o/ /l+la i re bzung nas so/ /T+Thi ya zhes pa gnas so ste byang chub kyi sems rdo rje'o zhes pa 'di yis kol+la i re T+Thi a zhes pa po la'i sgra yis brjod par bya'o/ /mu m+mu Ni re ka ko la/ zhes pa la mu m+mu Ni re'i sgra yis lte ba'i dkyil 'khor ro/ /ka k+ko la ni pad+ma'o/ /des na pad+ma'i chags pas byang chub kyi sems rdo rje la 'khyud par byas pa'o zhes pa'i don to//g+ha N+k+ra bi T+Ta ho bA dz+dza i ka ru Ne ki a i na ro lA zhes pa la g+ha Na ni rgyun ma chad par ro/ /kri pi T+Ta ni rdo rje bsgul ba'o/ /ka ru Na ni zhu ba'i rnam pa 'jig rten gsum gyi ngo bo 'dzin pa ste/ 'on kyang byang chub [(]gyi [,]kyi [)]sems thams cad kyi rdo rje'o//des na bo la dbang po gnyis bsrubs pas rol ni tshogs par bshad par bya'o/ /taM haM ba u kha dz+dza e g+ha De m+ma a NA pa dz+dza i zhes pa la ta haM zhes pa po la dang ka k+ko la yang dag par sbyar ba la bza' bar bya'o/ /ba la ni sha ste de bzhin gshegs pa lnga rnams gzugs la sogs pa'i rang bzhin yin pas na phung po lnga'o//de rnams kyi sha za bar bya zhing rang bzhin med par bya ste/ byang chub kyi sems kyi rang bzhin gyi zhu bar gyur pa nyid kyi phyir ro/ /ma da na ni chang ste me long lta bu la sogs pa'i ye shes lnga dang ldan pa'i byang chub kyi sems so/ /g+ha DeM ne po la dang ka k+ko la sbyar bas yang dag par bsdams nas ches cher btung ste btung bar bya'o zhes pa'i don to//ha le kA li ny+dza ra pa ni a i dun+du ra ta hiM bi dz+dza a i/ zhes pa la ha le ni bod pa'o/ /kA li ny+dza ra ni skal pa dang ldan pa'i byang chub kyi sems te pad+ma'i ze 'brur rab tu 'jug pa'o zhes pa'i bar ro/ /dun du ru ni skal pa mad pa mig la sogs pa'i skye mched de/ dor ba ni sel bar byed pa ste/ rang bzhin med pa'i gnas la rnam par 'jog pa'o zhes pa'i don to/ /tsa u sa ma kas+thu ri si h+la ka b+pu ra lA i a i/ zhes pa'i bzhi mnyam gyi sgra yis rnam par snang mdzad do/ /gla rtsi'i sgra yis mi bskyod pa'o/ /si h+la ni rin chen 'byung ldan no/ /ga bur ni 'od dpag tu med par 'dod do//'di rnams dang lhan cig bcom ldan 'das dbyer med pa'i yan lag gis bzhugs so/ /zhes pa'i don to/ /mA la i n+d+ha na shA li dza ta hiM b+ha ru khA i a i/ zhes pa mA la i n+d+ha na ni tshod ma ste phung po lnga'o/ /shA li dza ni de bzhin gshegs pa rnams kyi ye shes te rgyun ma chad par ma lus par bdag gi dbang du bya'o zhes pa'i don to//phreM kha Na khe Ta ka ran+ta shud+d+ha na mu Ni a i/ zhes pa la phreM kha Na ni 'ong ba'o/ /'gro ba ni kha Ta ste 'gro ba dang 'ong ba 'di dag 'gog pas dag pa dang ma dag pa'i shes pa rtogs par mi nus so zhes pa dgongs pa'o/ /ni raM shu aM g+he tsa DA bi a i ta hiM dza sha rA ba pa Ni a i/zhes pa la rus pa'i rgyan ni ni raM shu ste 'dis ye shes lnga'i bdag nyid kyi byang chub kyi sems rdo rje'o/ /tsa DA bi ni yid la mi byed pa la 'dog pa'o/ /sha rA pa Ni ni ro ste bdag med pa'i byang chub kyi sems pad+ma'i sna'i rtse mo rnam par gnas pa'o zhes pa'i don to//ma la ya dza ku n+tu ru ba T+Ta i Di N+Di ma ta hiM na ba dz+dzi a i/ zhes pa la ma la ya dza ni 'du bar 'dod do/ /bde ba dang lhan cig mig la sogs pa'i de bzhin gshegs pa thams cad kyi ye shes rgyur byas nas byang chub sems rdo rje shes rab dang lhan cig 'du bar bshad do/ /kun+tu ru ni dbang po gnyis yang dag par sbyor ba ste/gnyis po 'du bas rab tu 'jug pa'o/ /rab tu 'jug pa ni reg pa yin la/ DiN+Di ma ni de la mi reg pa yin la/ thams cad gcig tu gyur pa'i phyir ro zhes pa la sogs pa ngos pa'i don to/ /drang ba'i don gyis ni go sla'o/ /dran pa mi 'phrogs rnal 'byor las/ /he ru ka yi gzugs kyis gar//chags pa'i sems kyis sgom pa ste/ /rgyun mi 'chad par goms sems kyis/ /zhes pa 'di'i nges pa'i don ni gsungs pa yang / /dga' bas shes rab mthong ba las/ /lta ba'i ngo bos skye bar byed/ /dpal mkha' 'gro ma rdo rje gur du yang gsungs pa/ /chos 'byung grong khyer gang gi gnas//rdo rje dam tshig glu len las/ /rdo rje rkang pas gar stabs te/ /rdza rnga sgeg sogs khyad par du'o/ /zhes so/ /rgyud gzhan du yang gsungs pa/ pad+ma'i gdan gyi dbus su ni/ /gang zhig sems ni yang dag gnas/ /zhi ba de nyid yang dag dag /lhan cig skyes dga' gar mkhan no//gar gyi chos ni de nyid shes/ /gar byed pa ste the tshom med/ /'jig rten rnams la phan pa'i rgyur/ /'jig rten chos kyi gar byed do/ /de nyid 'di ni sbas pa che/ /phyag rgya chen po ster ba po/ /rdo rje sems dpa'i gsung ji bzhin/ /'bad pa yis ni bsrung bar bya/ /bde dang dga' dang mgu ba yis//glu dang rol mo'i rnam 'phrul dang / /dri dang phreng ba byug pa yis/ /rig pa'i rgyal po rab tu 'grub/ /ji ltar bde bas bde ba gzung / /ji lta'i spyad pa'i g.yo ba dang / ji lta'i bza' dang gnas pas kyang / /mchog tu 'gyur ba med pa 'grub/ /rdo rje chos kyis zhes pa la brjod du med pa'i don gsal bar byed pa gsung rdo rje'i bdag nyid glu rnams kyis so//sangs rgyas kyis zhes pa zag pa med pa'i 'jig rten gyi khams rnams su mtshan dang dpe byad kyi ngo bo'i sku sgyu ma lta bu'i don rab tu rtogs par byed pa longs spyod pa'i gar rnams kyis so/ /ma ma rnal 'byor ma rnams kyis/ / zhes pa gdul bya'i bsam pa'i dbye bas sna tshogs pa'i ngo bo'i sprul pa'i gar rnams kyis so/ /dpal mkha' 'gro ma rdo rje gur du yang gsungs pa/ /sangs rgyas gar mkhan ting 'dzin gnas/ /sangs rgyas gar gyis gar mdzad do/ /gar dang glu la zhen rnams la/ /sgom la chags pa'i sems kyis so//zhes so/ /sgom pa ni de kho na nyid sems pa ste bsgom bya dang / sgom par byed pa dang / sgom pa gsum mi dmigs pa'o/ /'di nyid du gsungs pa yang / 'gro ba thams cad bsgom bya ste/ /gang phyir yid kyis bsgom mi bya/ /thams cad chos ni yongs shes las/ / sgom pa bsgom pa nyid ma yin/ /de la dbang du gyur pa'i sgom pa la chags pa'i sems kyis rgyun mi 'chad par nye bar zhi ba med par gang gi sems la de kho na nyid goms pa sems pa de yis rgyun mi 'chad par goms pa'i sems kyis rnal 'byor pa'am rnal 'byor ma yis so zhes pa'o/ /sems nyid rdzogs pa'i sangs rgyas nyid//sangs rgyas gzhan du bstan pa med/ /ces pa 'di'i don 'di yin te/ dpal sangs rgyas thams cad mnyam par sbyor ba mkha' 'gro ma dra ba'i sdom par gsungs pa yang / bcom ldan 'das de la sems rdzogs pa'i sangs rgyas zhes pa ci ltar lags/ bsam gyis mi khyab rgya che zab/ /dngos grub bde kun 'byung ba'i gnas/ /kun nas khyab cing dri ma bral/ /nga ni byang chub sems bstan pa'o/ /zhes so/ /gdol pa smyig ma mkhan la sogs/ /mtshams med lnga ni byad pa rnams/ /zhes pa la sogs pa 'di'i don 'di yin te/ sngags kyi spyod pa rjes spyad na//skye 'di nyid la sangs rgyas 'gyur/ /zhes pa bcom ldan 'das kyis gsung yin no zhen bden te/ skye ba 'di la gang sngar mtshams med pa lnga la sogs pa drag po'i las byas pa de sngags kyi tshul 'di la phyag rgya chen po mi 'gyur ba'i ting nge 'dzin gyis bcom nas dge ba gzhan glo bur ba rnams mi 'jug par bya ba'i ched du rdo rje chos 'byung gi khang bar bdud bzhi'i gegs la sogs pa'i sgra 'jug pa'i sgo rnams la byams pa dang /snying rje dang dga' ba dang btang snyoms la sogs pa dang / byang chub kyi sems kyi sgo glegs bcug ste der rdo rje sems dpa' phyag rgya chen po dang lhan cig bsgrubs nas mtshams med pa lnga byed pa po rnams kyang skye ba 'di la sangs rgyas nyid kyi 'bras bu thob par 'gyur ro zhes pa de bzhin gshegs pa bzhed kyi/sngags kyi theg par zhugs par gyur pa slar yang mtshams med pa lnga la sogs pa drag po'i las byed pa rnams kyang skye ba 'di las sangs rgyas nyid kyi 'bras bu thob par 'gyur ro//zhes de bzhin gshegs pa bzhed pa ni ma yin no/ /'dir theg pa gsum ka la yang / bcom ldan 'das kyi gsung ni dang por dge ba bar du dge ba tha mar dge ba zhes pas sngags kyi theg pa la zhugs par gyur pa rnams kyis sdig pa byed pa rnams sangs rgyas nyid kyi 'bras bu thob par 'gyur ba ni ma yin no//zhes so/ /gsum pa yang / skye ba 'di nyid la sangs rgyas kyi 'bras bu ster ba zhes pa ni skye ba 'di la ste/ me'i skye ba la sangs rgyas nyid kyi 'bras bu ster ba rgyud kyi rgyal po yin gyi/ lha la sogs pa 'gro ba lnga'i skye ba la ni ma yin no//de ci'i phyir zhe na/ las kyi sar skyes pa ma yin pa nyid kyi phyir ro/ /'dir lha la sogs pa rnams la yang mi'i skye ba thob nas/ sangs rgyas nyid kyi 'bras bu ster bar 'gyur ro zhes pa bcom ldan 'das kyi nges pa'o zhes so/ /byis pa mi shes pas bsgribs pa/ /'gro ba mi shes pa 'di rnams//'gro drug srid pa'i rgyu ba ru/ /gang rmongs de rnams 'khor bar 'gyur/ /zhes pa dpal shes rab kyi pha rol tu phyin par gsungs pa yang / bcom ldan 'das kyis bka' stsal pa/ rab 'byor de ji snyam du sems bdag tu byed pa dang bdag gir byed pas sems can rnams 'khor ba na 'khor bar byed dam/bcom ldan 'das de de bzhin no/ /bde bar gshegs pa de de bzhin te/ ngar 'dzin pa dang nga yir 'dzin pas sems can rnams 'khor ba na 'khor bar byed lags so/ /bcom ldan 'das kyis bka' stsal pa/ rab 'byor de bzhin sems can rnams kun nas nyon mongs par rab tu shes par gyis shig ces so//dpal dang po'i sangs rgyas su gsungs pa yang / mngal du mngal gnas sdug bsngal btsa' ba'i dus dang byis pa'i dngos po la yang sdug bsngal te/ /gzhon nu lang tsho dag la bud med nor dang 'byor nyams nyon mongs sdug bsngal chen po gang / /rgan po nyid la 'chi ba'i sdug bsngal sngar yang 'gro ba drug tu 'jig ster ngu 'bod sogs//sgyu mas rmongs par byas pa'i mtha' dag 'gro ba 'di ni sdug bsngal rnams las sdug bsngal 'dzin par byed/ /ces so/ /e waM yi ger bzhugs pa yi/ /rdo rje sems dpas gtor ma bstan/ /zhes pa la sogs pa la/rgyud ni rgyud gzhan gyis rtogs par bya'o zhes pa de bzhin gshegs pa'i nges pa ste/ dpal rdo rje mkha' 'gro ma rdo rje gur du gsungs pa yang / rdo rje gur gyi ting 'dzin bzhugs/ /'byung po chen po'i gtor ma gsungs/ /nam mkha'i dbyings kyi dbus gnas par/ /pad+ma 'dab brgyad bsgom par bya//zla ba nyi ma tshangs lha sogs/ /tshangs pa'i ris ni dam pa ste/ /tshangs pa mdun na 'don nyid dang / /dga' ldan 'thab bral gnas pa dang / /rgyal po che las yang dag 'byung / /gzhan gyis sprul la dbang sgyur dang / gang zhig 'phrul dga'i lha rnams dang / / gtsang ma'i gnas na gang gnas dang / /bde ba can na 'dug pa rnams/ /'og min du ni gnas rnams dang / /'od zer can gyi 'jig rten khams/ /sum cu rtsa gsum gnas pa rnams/ /de rnams thams cad steng du bsam/ /chos 'byung nang du song ba'o/ /dbang po shar gyi 'dab mar bsam//mthar byed lho ru dgod par bya/ /chu bdag nub kyi 'dab ma la/ /byang du nor sbyin dgod par bya/ /me mtshams su ni me lha che/ /de bzhin bden bral bden bral du'o/ /rlung gi phyogs su rlung bsam ste/ /'byung po'i 'dren pa dbang ldan du/ /stobs kyi rgyu dang dung skyong dang / / mtha' yas de bzhin nor rgyas bu/ /'jog po dang ni rigs ldan nyid/ /pad chen pad+ma bzang po dang / /lha min sems can dmyal ba rnams/ /chos kyi 'byung gnas 'og mar ro/ /oM yig las gang tshangs lha sogs/ /hUM yig las gang brgya byin sogs/ /AHyig las ni stobs rgyu sogs//lag gnyis gdong gcig can rnams te/ /steng gi tshangs sogs lha rnams dkar/ /dbang po la sogs nag po mtshungs/ /stobs rgyu la sogs dmar po che/ /rang 'dra'i rig mas lus la 'grogs/ /rdo rje dril bus lag pa brel/ /g.yas brkyang ba yi 'dug stangs gnas//tshangs sogs brtags pas phyag rgyas gdab/ /rdo rje can gyis brgya byin sogs/ /stobs rgyu sogs rnams gar dbang gis/ /thams cad rigs gsum las byung ba'o/ /da ni thog mar yaM yig yongs su gyur pa'i rlung gi dkyil 'khor gzhu lta bu rgyal mtshan gyis mtshan pa'o//de'i steng du raM yig yongs su gyur pa me'i dkyil 'khor gru gsum pa rtse mo gyen du 'bar ba'o/ /de'i dbus su AHyig yongs su gyur pa'i thod pa'o/ /thod pa'i dbus su lcags kyu lnga dang sa bon lnga rnams zhes pa ste/ hUM yig gis glang po che'i/ /hUM yig gis ba glang gi /aM yig gis khyi'i/ /hrIHyig gis rta'i/ khaM yig gis mi'i ste lcags kyu lnga rnams so/ /sgyu ma chen po'i rgyud du gsungs pa yang / so gnyis myur 'gro nyid dang ni/ /de bzhin ba glang khyi nyid dang / /chen po nyid dang mnyam par ldan/ /de bzhin ye shes bdud rtsi lnga/ / bi ra shu ma mu ste bdud rtsi lnga'i sa bon rnams kyis byin gyis brlabs pas bdud rtsir bya'o/ /steng gi bar snang la hUM yig las byung ba'i rdo rje dkar po rtse lnga pa zla ba la gnas pa hUM yig gis byin gyis brlabs pa 'od zer dang bcas pa bsams nas/ phyogs bcur son pa'i sman rnams 'od zer gyis bkug ste/de nyid du rab tu gzhug cing gcig tu 'dres par gyur par bsgom mo/ /oM yig gis kha bcad nas de kho na nyid gsum gyis byin gyis brlab bo/ /de skad du yang dpal 'dus par gsungs pa/ /ye shes lnga yis byin brlabs pas/ /bdud rtsi lnga po zhes par bshad/ /sbar dang sro ba nyid dang ni//gsal bar byed dang gzugs bstan pa/ /sngags kyi lus su rab sbyor bas/ /bdud rtsi lnga po bza' bar bshad/ /rdo rje dang pad+ma yang dag par sbyor ba'i bdag nyid las yang dag par tshim par bya'o zhes pa'i don to/ /shel gyi rnam par bskyed nas ni/ /ye shes nyi ma gzhan gzhan lta bu//phyogs bcu'i 'jig rten khams rnams su/ /don dam mtshon gyis bkug nas ni/ /bdud rtsi der ni bskyed byas nas/ /bra ba'i sbyor bas za ru gzhug /mchod yon zhabs bsil de bzhin dbul/ /sngags 'di yis ni tshim par bya/ /oM i n+du dza ma dza la dza k+kha b+hU ta ba h+ni bA u rak+kha tsan+da sudz+dza mA da pA b+pha ta la pA tA le aSh+Tas p+pa sA hA/i daM ba liM b+hu ny+dza dziM g+ha phu l+la d+hu pa maM sa biM g+ha a m+ba kA dz+dza sa p+pa sa d+ha kha n+ti khu Ni pheDa gA ta/ oM a kA ro mu khaM sarba d+harmA NAM A d+ya nu t+pa n+na twA ta oM AHhUM phaT swA hA/ oM badzra satwa sa ma ya ma nu pA la ya/ D+r-i D+ho me b+ha wa su bo Sh+yo me b+ha ba/ su to Sh+yo me b+ha ba/ shA shu to me b+ha wa a nu rak+to me b+ha ba/hraM da yaM me a d+hi tiSh+Tha sarba sid+d+hi m+me/ pra ya ts+tsha/ sarba kA R+Ye Shu/ me tsi t+taM shre yaHku ru hU~M hU~M/ ha ha ha ha ho/ /b+ha ga wAn/ sarba ta thA ga ta mA me muny+tsa/ badzrI b+ha ba sa ma ya satwa AHmuHzhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du rgyud thams cad kyi phyag rgya bsdus pa'i don zhes bya ba'i le'u ste bzhi pa'o// //da ni brtag pa gnyis pa la he ru ka mngon par 'byung ba zhes bya ba'i le'u lnga pa gsungs pa/ phyag ni bcu drug zhal brgyad pa/ /zhabs bzhi pa dang 'jigs pa'o/ /dpa' bo thod pa'i phreng ba can/ /bdag med ma yis mgrin par 'khyud//phyag rgya lnga ni 'dzin lha la/ /bdag med rang nyid kyis zhus pa/ /bco lngas yongs su bskor ba yi/ /bdag gi 'khor lo khyod kyis gsungs/ /khyod kyi 'khor lo ji ltar lags/ /gtso bo bdag gis sngar ma 'tshal/ /bdag med tsum pa na mdzad nas/ /rdo rje thod par stsal nas ni//sta na dag ni mnyes byas nas/ /dkyil 'khor yang dag rab gsal mdzad/ /'khor lo ji ltar sngar gsungs bzhin/ /zhes pa la 'khor lo ni dkyil 'khor gyi 'khor lo ste/ gru bzhi pa la sgo bzhi pa/ /rta babs bzhi yis rnam par brgyan/ /dra ba dra ba phyed par ldan/ /ka ba brgyad kyis nye bar mdzes//me tog phreng dar lda ldi ldan/ /zhes pa la sogs pa drang ba'i don to/ /da ni nges pa'i don gsal bar bya ste/ ji skad du rgyud ni rgyud gzhan gyis rtogs par bya'o zhes pa de bzhin gshegs pa'i nges pa ste/ /dpal rdo rje bdud rtsir yang gsungs pa/ bcom ldan rdo rje can 'di gsungs//rdo rje bdud rtsi bde ba che/ /dga' chen yang dag sbyor ba yis/ /de la mA ma kI yis zhus/ /gsang ba'i pad+ma gru gsum du/ /dkyil 'khor bri bya mA ma kI/ /pad+ma 'dab ma brgyad byas nas/ /ze 'bru gsang ba'i spyod yul te/ /de yi dbus su rig ma'o/ / shes rab thabs kyi rang bzhin las/ /zhes so/ /dpal sam+bu Tar gsungs pa yang / dkyil 'khor lus zhes gsungs pa ste/ /sgo bzhi ji ltar gsungs pa nyid/ /lte ba'i dbus su pad+ma che/ /kun mkhyen ye shes grags pa'o/ /gnas der gnas pa'i dpa' bo ni/ /cha med cha ni rnam par spangs//lus can rnams kyi lus la rol/ /lus las 'das pa gsal byed min/ /zhes so/ /dpal dang po'i sangs rgyas su gsungs pa yang / thams cad zla ba zhu mtshungs rang gi rdo rje'i kha nas yum gyi pad+mar spro bar bya/ /de ni nyi mar rab tu zhugs pa ro mnyam 'gyur te a sogs ka sogs rab ldan pa//de yi dbus su zhi sogs las kyi ye shes sa bon du 'gyur rigs kyi dbang gis so/ /de yis rdzogs pa'i lha mo'am ni lha yang rnal 'byor pa la 'bras bu ster bar 'gyur/ /gsungs pa yang / byang chub spyod dang de bzhin sa'i/ /ye shes dag pa zag pa med/ / de ni dkyil 'khor dbus su gnas/ /rang gi mtshan mar de ltar bya/ /zhes so/ /de nas rnam pa lngas mngon par byang chub pa las rdzogs pa'i bcom ldan 'das/ zhal brgyad pa la zhabs bzhi pa/ /phyag ni bcu drug rnams kyis brgyan/ /bdud bzhi mnyam par mnan pa ste/ /'jigs pa yang ni 'jigs par mdzad//mgo bo'i phreng ba'i do shal brgyan/ /nyi mar bzhugs shing gar stabs ldan/ /sna tshogs rdo rje spyi bor 'dzin/ /kha dog nag po 'jigs pa po/ /nyid kyi zhal nas hU~M yig spro/ /thal bas lus la byugs pa nyid/ /dga' bas gnyis gnyis snyoms 'jug pa//bdag med ma dang lhan cig sbyor/ /rba rlabs med pa'i bde ba thob/ /rba rlabs med pa'i rang bzhin can/ /rtsa ba'i zhal ni nag po che/ /g.yas pa kun+da lta bu ste/ /g.yon pa dmar po cher 'jigs pa/ /steng gi zhal ni gtsigs pa po/ /spyan ni nyi shu rtsa bzhis byug// lhag ma'i zhal ni bung ba bzhin/ /glang bo rta bong glang rnga mo/ /mi dang sha ra b+ha byi la/ /g.yas pa'i thod pa brgyad rnams la/ /gnyis 'thung la sogs rim shes bya/ /sa dang chu dang rlung dang ni/ /me dang zla ba nyi ma nyid/ /mthar byed dang ni nor sbyin nyid/ /g.yon pa'i thod pa brgyad la'o/ / sgeg pa dpa' ba mi sdug pa/ /drag shul dgod pa 'jigs su rung / /snying rje rngam pa zhi ba yis/ /gar dgu'i nyams dang ldan pa'o/ /lha mo zhal gcig phyag gnyis ma/ /nag mo dbu skyes dmar ser can/ /gri gug thod pa kha T+wAM 'dzin/ /stag gi pags pa rked par dkris/ /dang po'i skyes bu bsgom byas nas//mkha' 'gro ma yi 'khor lo spro/ /de bzhin gshegs pa'i thig le de/ /sa bon brgyad po rnams su 'gyur/ /ga~M tsa~M ba~M g+ha~M pa~M sha~M la~M Da~M/ /sa bon rnams kyis spro bar bya/ /dbang dkar gshin rjer chom rkun ma/ /chu ru ro langs ma gnas shing / /lus ngan du ni g+hasmarI//dbang ldan du ni puk+ka sI/ /byin za'i mtshams su ri khrod ma/ /bden bral mtshams su gtum mo gnas/ /rlung gi mtshams su g.yung mo nyid/ /lha mo'i 'khor lo yang dag ldan/ /de nas pad+ma dang rdo rje byin gyis brlab par bya ste/ /oM pad+ma su khA d+hA ra ma hA rA ga su khan+da da/ /tsa tur A nan da b+ha ga bi shwa hUM hUM kA r+yaM ku ru ShA me/oM badzra ma hA dwe Sha tsa tu rA nan da dA ya ka kha ga mu khe ka rA so nA tha hU~M hU~M kA r+yaMku ru ShA me/ oM sarba ta thA ga ta a nu rA ga Na badzra swa b+hA ba At+ma kou0f85haM/ hoHyig gnyis kyi dbus su gnas pa'i sku dang gsung dang thugs kyi yi ge 'di ni dri za'i sems can du bshad de/ lha m o'i mtsho skyes su bsam par bya'o//dri za yang dag zhugs pa na/ /zhu bar gyur pa dran par bya/ /de las mtshams kyi lha mo yis/ /bskul ba'i glu yis skul bar byed/ /ces pa drang ba'i don to/ /da ni nges pa'i don gsal bar bya ste/ /dpal dri ma dang bral ba'i 'od du gsungs pa yang / de ltar sku dang gsung dang thugs las yang dag par byung ba 'og dang steng du shes rab kyi 'od zer rnams kyis zhu ba ste/shes rab chags pas zhu ba zhes pa la shes rab ni gtum mo ste des zhu ba'o/ /'dir bskul ba rnam pa gnyis te gcig ni srog rdzogs pa'i ched du yin la gnyis pa ni lo bcu drug mtshams su bde ba 'grub pa'i ched du'o//des na rdo rje can yang ri bong 'dzin pa zhu ba bzhin bltas nas yaM yig las de ltar zhi ba'i bde ba'i 'bras bu ster ba lte ba dang gsang ba la sogs pa'i pad+mar rnam par shes pa brgyal ba rab tu sad par byed do zhes pa'i nges pa'i don to/ /dpal mtshan yang dag par brjod par gsungs pa yang /sgrib pa kun las nges par grol/ /mkha' ltar mnyam pa nyid la gnas/ /nyon mongs dri ma kun las 'das/ /dus gsum dus med rtogs pa po/ /zhes so/ /dpal mtsho skyes rdo rje'i zhabs kyis kyang gsungs pa/ gang zhig zla nyi sbyar sar gnas sa bon//gnyis las skyes pa'i gtso bo rig mar bcas/ /nyid kyi sbyor bas 'jig rten gsum po ni/ /rgyal ba'i dkyil 'khor rnams pa 'di sprul nas/ /'di kun ma lus pa dang rig ma yang / /bdag la bsdus nas bde ba dam pa stsol/ /shes rab chags ro bdud rtsi gnyug ma yi/gnas su thim pa de la phyag 'tshal lo/ /stong pa dngos pos rnam par dman pa 'gro 'di mtha' dag dngos po'i ngo bo'i ring bzhin te/ stong phyir sangs rgyas byang chub med la gzhan phan thugs rjes mtshan med dam bca' 'ang med/ /de ltar mtha' dag shes nas sku gsung thugs kyi rdo rje de yang nges par dkyil 'khor gyi//dbang po dpag med yon tan can du byang chub sems dpa' rnams kyis dkyil 'khor du bsam bya/ /gnas de las steng du gshegs pa'i don du rgyu mthun pa'i bde ba la puk+ka sI la sogs pa rnams kyis rdo rje'i glu rnams kyis bskul bar mdzad do/ /de las lte bar rgyu mthun pa nyid kyi don du puk+ka sIs rab tu sad par mdzad do//snying gar ri khrod ma rnam par smin pa'i don du'o/ /mgrin par gtum mos skyes bu byed pa'i don du'o/ /mgo bor g.yung mos dri ma med pa nyid kyi don du'o/ /'di lta bu la sogs pa rnams kyis bzhengs su 'jug par byed do zhes pa'o//dpal thams cad mkhyen pa 'jigs byed kyi rgyud du gsungs pa yang / nam mkha' lta bur dmigs byas nas/ /glu 'di yis ni bskul gyur pa/ /skyes pa med pa'i rang bzhin yang / /dang po'i sangs rgyas nam mkha' mtshungs/ /zhes so/ /de ltar rtog pa med pa'i dkyil 'khor du rnal 'byor ma rnams kyis glus bzhengs su 'jug par mdzad do//zhes pa nges pa'i don to/ /gsungs pa yang / lha mo rnams kyis glu mdzad bcom ldan khyod ni sems can kun la phan par mdzad pa po/ /bdag cag srungs shig lha mi'i bla ma rdo rje can 'dod don gnyer rnams la 'dod pa mdzod//ces so/ /rje btsun snying rje'i yid bzhengs shing / /pu k+ka sI ni bdag la skyobs/ /stong pa'i ting 'dzin nyid spongs la/ /bdag la bde chen sbyor bzhed mdzod/ /khyod med na ni bdag 'gum pas/ /kye yi rdo rje khyod bzhengs shig /stong pa'i rang bzhin nyid spongs la//ri khrod ma 'bras grub par mdzod/ /dga' gtso 'jig rten mgron gnyer nas/ /stong pa nyid la bzhugs sam ci/ /khyod med phyogs ni mi 'tshal bas/ /gdol ba mo bdag zhu ba bgyid/ /bdag gis khyod kyi thugs 'tshal gyis/ /mig 'phrul mnga' ba khyod bzhengs shig /g.yung mo bdag yid chad par 'gyur/ /snying rje rgyun chad ma mdzad cig /da ni lha bzhengs pa brjod par bya ste/ 'dir bcom ldan 'das stong pa nyid la rab tu bzhugs pa la/ glu rnams kyis rab tu sad par gyur pa ni phung po dang / khams dang skye mched la sogs pa thams cad dang 'gro ba mtha' dag sgyu ma lta bur gzigs nas sems can gyi don gyi ched du slar yang skye bar mdzad do//dpal shes rab kyi pha rol tu phyin par rnam pa thams cad mkhyen pa nyid kyi le'ur gsungs pa yang / rab 'byor gyis gsol pa/ bcom ldan 'das de ma lags te/ bcom ldan 'das sgyu ma de gzhan la gzugs de gzhan pa ma lags te/bcom ldan 'das gzugs kho na sgyu ma'o/ /sgyu ma kho na gzugs lags so/ /bcom ldan 'das sgyu ma de gzhan la tshor ba de yang gzhan/ 'du shes de yang gzhan/ 'du byed de rnams kyang gzhan ma lags kyi/ /bcom ldan 'das de ltar sgyu ma kho na tshor ba dang 'du shes dang 'du byed rnams so zhes pa la sogs pa'o//dpal dang po'i sangs rgyas su yang gsungs pa/ /rdo rje can des glu rnams gsan nas srid pa gsum po mtha' dag mig 'phrul lta bur ni/ /gzigs nas bskyed pa mdzad de dri med 'od zer 'phro ba rang gi mtshan ma spro byas nas/ /rdo rje'i rgyan ldan rgyal ba'i bdag po'i cod pan can ni shes rab ma yis 'khyud pa yang //shes rab thabs kyis rgyal po slar yang dkyil 'khor ma lus pa ni rab tu spro ba yang / slar yang de nyid du gsungs pa/ rtag dang mi rtag mthong ste de lta na yang blun po'i blo can sems ni dag don ched/ /sgrub thabs brjod par bya ste snying por gyur pa 'ga' yang 'dir ni bsgrub par bya ba med//gang zhig bsgrub bya sgrub pa po de 'khrul zhes rdo rje can gyi sgrub thabs mtha' dag gang / /de phyir rgyal po rang sems dri ma rnam par bral ba dkyil 'khor dbang por rab tu bya/ /zhes so/ /oM hU~M dag las rdo rje che/ /zhu ba'i gzugs las bzhengs pa ni//kha dog nag po drag chen po/ /spyan gsum pa dbu skra dmar ser gyen du 'bar ba'i spyi bor sna tshogs rdo rjes mtshan pa/ dpral ba'i steng du mgo bo lnga'i phreng bas rnam par brgyan pa smin ma 'khyog po dang bcas pa'i khro gnyer can la zhal gtsigs pa/ zhal dang po nag po g.yas pa dkar ba/g.yon pa dmar ba slar yang g.yon gyi zhal gnyis nag pa/ de bzhin du g.yas kyi zhal gnyis nag po steng zhal du ba'i mdog can rnam par 'gyur ba/ zhal rnams thams cad mche ba gtsigs zhing spyan gsum pa can/ phyag g.yas pa brgyad rnams su pad+ma'i snod brgyad du rim pa ji lta bar glang po che dang rta dang bong bu dang ba lang dang rnga mo dang /mi dang byi la ste/ de bzhin du g.yon gyi thod pa brgyad rnams su/ sa'i lha dang chu dang rlung dang me'i lha dang / zla ba dang nyi ma dang / gshin rje dang / nor sbyin can phyag rgya drug dang ldan pa mgo bo rlon pa'i phreng bas sku la brgyan pa/gcer bu g.yas brkyang ba'i stabs kyi zhabs kyis bzhugs pa phung po dang / nyon mongs pa dang / 'chi bdag dang / lha'i bu'i bdud bzhi mnan pa/ nyi ma'i dkyil 'khor la gar stabs kyi tshul gyis bzhugs par bsam par bya'o/ /bdag med ma nag mo phyag gnyis ma/ / gri gug dang thod pa dang bcas pa'i g.yas pa dang cig shos kyi phyag dag gis bcom ldan 'das la snyoms par zhugs pa gcer bu phyag rgya lnga dang ldan pa/ spyan gsum pa dbu skra dmar ser gyen du brdzes pa/ /mgo bo'i phreng bas mgo bor rnam par brgyan pa/ mi mgo skam po'i phreng bas sku la brgyan pa/g.yas brkyang ba'i zla ba'i zhabs stabs kyis mchog tu bde ba chen pos bcom ldan 'das la snyoms par zhugs pa'i bcom ldan 'das ma bsgom par bya'o/ /de la shar gyi sgor gaM yig las byung ba'i gau rI kha dog nag mo phyag g.yas bar gri gug dang / g.yon par nya ro hi ta can tshangs pa mnan pa/gzugs kyi phung po'i rang bzhin spro bar bya'o/ /lho'i sgor tsaM yig las skyes pa'i chom rkun ma btsod kyi kha dog can phyag g.yas pa na cang te'u dang g.yon pa phag pa can dbang po la chibs pa tshor ba'i phung po'i rang bzhin spro bar bya'o/ /nub kyi sgor baM yig las skyes pa'i ro langs ma gser btso ma lta bu phyag g.yas pa na rus sbal dang /g.yon pa na chu skyes kyi snod can nye dbang mnan pa/ 'du shes kyi phung po'i rang bzhin bsam par bya'o/ /byang gi sgor g+haM yig las skyes pa'i za nus ma mar ka ta'i mdog can phyag g.yas pa na sbrul dang / g.yon pa na thod pa can drag po la chibs pa 'du byed kyi phung po'i rang bzhin blta bar bya'o//dbang ldan gyi mtshams su puk+ka sI baM yig las skyes pa sngon mo phyag g.yas pa na seng ge dang / g.yon pa na dgra sta can gshin rje mnan pa sa'i khams kyi rang bzhin rnam par bsam par bya'o/ /me'i mtshams su shaM yig las skyes pa'i ri khrod ma dkar mo g.yas pa na dge slong dang /g.yon pa na khar gsil can nor gyi 'dren pa la gnas pa/ chu'i khams kyi rang bzhin dgod par bya'o/ /bden bral gyi mtshams su gtum mo nam mkha'i mdog can/ /tsaM yig las skyes pa g.yas pa na 'khor lo 'dzin pa/ / phyag g.yon pa na thong gshol can srid po mnan pa me'i khams kyi rang bzhin can bsgom par bya'o/ /rlung gi phyogs su DaM yig las skyes pa'i g.yung mo khra bo'i mdog can phyag g.yas pa na rdo rje dang g.yon pa sdigs mdzub can/ thags bzangs ris la gnas pa rlung gi khams kyi rang bzhin can bsgom par bya'o//'di rnams thams cad spyan gsum pa zhal mche ba gtsigs pa can dbu skra dmar ser gyen du brdzes pa/ gcer bu phyag rgya lnga dang ldan pa/ skyil krung phyed pa'i gar gyis bzhugs pa/ /byang chub kyi spros pa las yang dag par byung ba bsgom par bya'o/ /zhes pa la sogs pa drang ba'i don to//da ni nges pa'i don gsal bar bya ste/ gsungs pa yang / 'di ltar lhan cig skyes pa gcig pu de kho na chos dang longs spyod rdzogs pa dang / sprul pa ste rnam pa bzhi'o zhes so/ /dpal dang po'i sangs rgyas su gsungs pa yang / shes rab ma yin thabs kyang min 'di lhan cig skyes pa'i sku ste chos kyi skur gyur pa//shes rab thabs kyi rang bzhin nges par mun pa dang bral ye shes rnam shes dbye ba las/ 'di ni longs spyod rdzogs sku sgra brnyan lta bu sems can du ma'i don ni byed pa po/ /sems can rnams smin ched du slar yang 'di ni sangs rgyas rnams kyi sprul pa'i sku ru 'gyur//rdo rje sems dpa' gcig 'di dus mtha'i sprin dang mtshungs pa he ru kar ni byung bar 'gyur/ /gdug pa rnams smin don te de yang dam tshig rgyal ba rmongs pa rnams ni bde ba'i don/ /rin chen dbang po sdug bsngal ldan pa'i de yang pad 'dzin chags can rnams kyi chags pa'i slad//bgegs rnams gzhom pa'i don du phyag gi pad+mar ral gri don yod grub pa 'byung bar 'gyur/ /sems can rnams ni smin pa'i slad du sku gsung thugs kyi dbye ba rnams kyis dus kun du/ /nges pa'i rdo rje can gyi bzhugs pa rnam gsum phyi dang nang dang gzhan du'ang rab tu 'gyur//phyi rol sna tshogs phyogs su 'gyur te mchog gi lus la srog gi rlung ni rab tu rgyu ba'o/ /khyab bdag gi gang sa sogs dkyil 'khor la rab gyur te rdo rje btsun mo'i b+ha ga la/ /gcig pu rdo rje can ni dbye ba gsum ste yul dang yul can khams rnams kyis kyang bskor//dus gsum gnas gsum du bzhugs srid pa gsum du gnas pa'ang sems can du ma'i don slad du'o/ /de ltar nges pa sku yi rdo rje mchog gi yon tan rnam mang dkyil 'khor rnam par gsungs/ /gsung gi rdo rje 'ang a sogs ka sogs lha yi rnam pa nyid de mtha' dag rgyal ba'i rigs rnams kyi//stong pa drug gis thugs kyi rdo rje rnams gsum srid pa la gnas gtso bo'i rnam pa gcig /de bzhin ye shes rdo rje srid pa'i 'jigs pa 'joms pa sna tshogs yul gyi rang bzhin no/ /zhes pa la sogs pa'o/ /hUM gi ye shes rjes su bsam par bya zhing / dam tshig gi 'khor lo la ye shes kyi 'khor lo cher 'bar ba myur du gzhug par bya'o//zhes pa 'di'i don ni dpal dri ma med pa'i 'od du gsungs pa yang / 'dir dkyil 'khor gyi 'khor lo bsgom pa la/ dam tshig gi dkyil 'khor rdzogs par byas nas/ de nas ye shes kyi 'khor lo dgug pa dang gzhug pa dang 'ching ba dang mnyes pa dang /ro mnyam par byed pa zhes pa la lang tsho can ma dang rab tu 'grogs pa la ye shes sems dpa' ni khu ba ste dgongs pa'i skad gzhan gyis so/ /de dgug pa ni srog la sogs pa'i rlung gi tshogs kyis byed de/ /steng du spyi bor byang chub kyi sems yongs su rdzogs par byed do zhes pa'i don to//de zhu bar byas nas khu ba thig le'i gzugs mgrin pa dang snying ga dang lte ba dang / gsang ba'i pad+ma la rab tu 'jug par byed do/ /sa'i khams ni thig le'i gzugs de'i bcing ba byed do/ /zhes pa mchog gi bde ba'i dbang gis shin tu mgyogs pas 'ongs pa 'gror mi ster ba'o//chu'i khams kyi thig le zhu ba dang gsang ba'i pad+ma dang rdo rje nor bur gnas pa ni g.yo ba zhes brjod cing / mi 'pho ba'i bde ba'i dbang gis brnyes pa ste lus la bsil ba nyid du byed do/ /dpal dang po'i sangs rgyas su gsungs pa yang / shes rab chos 'byung la gnas mtha' dag slar yang spro ba byas te nges par thig le yis//sna tshogs rgyan dang ldan zhing me long la gnas lta bu'i ye shes 'khor lo rang byung ba/ /'dod pa dang ni gzugs dang gzugs med srid pa rnam pa gsum po'ang rim pas sbyang byas te/ /phyi nas ye shes me lces srid pa gsum po mtha' dag dus gcig tu ni dgug par bya//zhes pa des pa'i don to/ /drang ba'i don gyis ni go sla'o/ /sku gsung de bzhin thugs la ni/ /oM AHhUM zhes gsang sngags las/ mkha' la spyod dang sa spyod nyid/ /sa 'og gnas par bsam par bya/ /sku gsung thugs kyi rdo rje yi/ /rnal 'byor ma rnams rigs gsum byung //'di'i nges pa'i don ni de bzhin du yang rgyud gzhan du gsungs te/ mkha' la ste pad+ma mkha' 'gro'i dbus su mkha' spyod ma 'khor lo sa dga' ba'i ngang tshul 'di ste der gnas pa'i legs par spyod pa ni mkha' spyod ma'i 'khor lor yang dag par bshad de/ sa zhes pa sa'i dbus gnas pa skye ba dang 'chi ba lte ba'i pad+ma rnams la ste/der gnas pa'i legs par rnam par spyod pa ni sa spyod ma'i 'khor lo yang dag par bshad do/ /sa 'og ces pa gang gsungs pa pad+mar byang chub kyi sems ltung bar byed cing tAM laM ste yid kyis phyi rol du nus pa ni sa 'og tu gnas pa zhes mtshan ma'o//mig tu gti mug rdo rje la sogs pa'i rigs drug rnams dgod par bya'o/ /gsungs pa yang rnam pa sna tshogs pa dang / rnam par smin pa dang / rnam par nyed pa dang mtshan nyid dang bral ba rnams kyis dbang bskur ba dang / de bzhin du mchod pa dang / bstod pa dang / bdud rtsi myang ba rnal 'byor dang ldan pa'i rnal 'byor pas bya'o zhes so//rang gi lag pa g.yas g.yon gyi/ /mthe bo ming med dag gis ni/ /longs spyod rdzogs pa'i rlabs gnyis su/ /rnal 'byor pa yis btsir bar bya/ /phyi nas ye shes skye bar 'gyur/ /gzhon nu ma yid dga' ba bzhin/ /de la ci yang skye 'gyur te//lkugs pa'i rmi lam ji lta ba'o/ /zhes pa la 'dis rgyas par bshad pa gsungs te/ rgyud gzhan du gsungs pa yang / g.yas dang g.yon zhes pa ni g.yas pa dang cig shos te 'di dag tha snyad ni gcig tu 'dres par gyur pa'i sems rdo rje'i rang bzhin gyis na a ba d+hU tI ni lag pa'o/ / de'i rgan po dang ming med dag ste brkyang ma dang ro ma de dag gis shes rab dang thabs 'jug bzhin pa'i rnal 'byor ma dag gis kun rdzob dang don dam pa'i rlabs gnyis la btsir bar bya'o zhes pa la btsir ba ni kha sbyor ba dang 'khyud pa la sogs pa rnal 'byor pa'i longs spyod pa ro mnyam par byed pa ste/ longs spyod par gyur pa na rlabs gnyis longs spyod pa'o//gzhon nu ma'i dga' ba zhes pa dus gnyis spangs pa chags pa dang bral ba zhes pa'i don to/ /lkugs pa'i rmi lam zhes pa bdag nyid kyis rang nyid kyi shes par bya'o/ /zhes pa ni brjod par mi nus pa ste/ ngag gi lam las 'das pa nyid kyi phyir ro/ / 'di nyid du gsungs pa yang / lha de'i skad cig ci ltar lags/ /gtso bo chen po bshad du gsol/ /de la thog ma dbus mtha' med/ /srid med mya ngan 'das pa med/ /'di ni mchog tu bde chen nyid/ /bdag med gzhan yang med pa'o/ /zhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du brtag pa gnyis par he ru ka mngon par 'byung ba zhes bya ba ste le'u lnga pa'o// //da ni phyag rgya lnga'i rnam par dag pa rab tu rgyas pa 'chad cing bris sku bsgrub pa'i le'u gsungs pa/ lha mo la ni dam 'khyud cing / /bo la thod par bcug nas ni/ /zhes pa la bo la ni rdo rje'o//kaM bde ba skyong bar byed do zhes pas thod pa zhes brjod par bya'o/ /dpal saM pu Ta ru yang gsungs pa/ chos kyis dbyings kyi lus can rnams/ /thod pa la ni su zhig smod/ /yang dag sbyor ba'i bde bsgrubs nas/ /phyag rgya lnga ni rab gsal mdzad/ /dpal mtshan yang dag par brjod par gsungs pa yang /bsam pa'i khyad par ji bzhin du/ /sems can rnams la rab gsal mdzod/ /nyon mongs ma lus bsal ba dang / /mi shes ma lus gzhom slad du'o/ /zhes so/ /bla ma slob dpon 'dod lha la/ /phyag 'tshal don du 'khor lo 'dzin/ /bla ma rdo rje 'dzin pa la/ /smod tshig mi nyan pa yi ched//rna ba dag la rna cha 'dzin/ /sngags kyi bzlas pa mgul rgyan nyid/ /gdu bu srog chags gsod pa spang / /phyag rgya bsten pa ska rags so/ /zhes pa drang ba'i don to/ /da ni nges pa'i don gsal par bya ste/ bla ma slob dpon 'dod lha zhes pa ni byang chub kyi sems kyi thig le'o/ / de'i 'dud pa ni 'pho ba ste de'i don du 'khor lo can 'dzin pa ste 'khor lo can ni 'ching ba'o/ /zhes pa'i don to/ /smod tshig ces pa la smod tshig ni nyams pa'o/ /de mi nyan pa'i ched du rna ba dag la rna cha gzung bar bya ste/ rna cha zhes pa ni rna cha 'ching ba'o/ /yid skyob par byed do zhes pas na sngags te bzlas pa zhes pa 'gog pa'i ched du/mgul rgyan zhes pa mgul rgyan 'ching ba'o/ /gdu bu srog chags gsod pa spang / /zhes pa srog ni gang gi phyir sems su 'dod de/ de gsod par mi bya'o zhes pa'i don to/ /phyag rgya ni las kyi phyag rgya ste/ bsten pa zhes pa bsten par bya ba'i ched du ska rags zhes pa ska rags 'ching ba'o//de ltar phyag rgya lnga'i man ngag bla ma brgyud pa'i rim pas nges pa'i don gyis shes par bya'o/ /de bzhin du yang dpal dang po'i sangs rgyas su gsungs pa/ me ni dngul chu'i dgra ni me dang rnam par bral na nam yang dngul chu'i 'ching ba med/ ma bcings gser byed med de gser dang bral na smra po nyid la longs spyod med pa nyid//de bzhin bud med sbyor ba bral na rtag tu rnal 'byor pa rnams sems ni 'ching mi 'gyur/ /bcings pa med na lus 'bigs med 'dir ma phug lus 'dir lhan skyes bde ba ster ba min/ /zhes so/ /gsungs pa yang / dang po'i 'khor lo can 'ching bcings pa gdu bu nges pa'i ska rags kyis ni dbugs 'byung 'gogs//mgrin rgyan rna rgyan phab pa rdo rje pad+ma las skyes nor ni mthar phyin shin tu dag /'di ltar thun phyed thun du'ang nyin par dngul chu bzhin du sems kyi rdo rje bcing byas nas/ /kun+da 'gugs pa'i sbyor bas steng du drangs te rang gi grong du khams la brgyus te bzhag /g.yo ba yongs su spangs byas nas/ /yang dag rlung rnams dgang bar bya/ /bum pa can gyis rim par sbyin/ /gang gis rlung ni 'bab byed pa/ /nang gi rnal 'byor cho ga yis/ /rlung ni steng du sbar bar bya/ /de yis sa bon rang nyid 'gro/ /rang gnas rnal 'byor rtogs las so//sa chu me dang rlung gi gzhan dbang ma yin gzhan min la min gzhan du min te mkhar/ phung po khams dang skye mched kyis byas go 'phang ma yin thog ma dbus mthar 'gro ba'ang min/ /chags la min nyid chags bral la min 'byung ba'i dus su 'di ltar btsal bzhin pa ma yin//skyed la he ru ka min 'di ni ro mnyam dus su rab nub ga la bdud rtsi'i dpal/ /zhes pa la sogs pa'o/ /dpal dri ma dang bral ba'i 'od du gsungs pa yang / 'dir bcom ldan 'das kyis dbang po gnyis kyi snyoms par 'jug pas bde ba chen po bsgrub par gsungs pa gang yin pa ni bden te bcom ldan 'das kyis gsungs pa/chags pa gang gis sems can rnams ni nyams par gyur pa de yis skyob pa rnams grol te/ /sems can rnams kyis nyin zhag so so'i dus su srung byed gang de skyob rnams gtong bar byed/ /sems can rnams kyis rang snying la gnas bde ba gang gtong de ni rgyal rnams srung bar mdzad//de nas rgyal ba mchog gi spyod 'di lha klu lha min rnams kyi bya ba dka' bar 'gyur/ /zhes so/ /gsungs pa yang / gzhan gang chung zad spros pa yod pa'ang khyab bdag dkyil 'khor la ni 'byung po las skyes mthar/ /thams cad sems can don gyur mchog gi yon tan rnam mang rang gi lus la rig par bya//de bzhin rgyud sngags rnam mang rigs la gnas rnams rnal 'byor ma dang rnal 'byor dbye ba las/ /'dir ni dbang bskur rnam pa gnyis kyang bu yi yon tan dbang gis 'jig rten 'jig rten 'das/ /zhes so/ /lhan skyes gzugs can kye rdo rje/ / de la lha mo nges zhus pa/ /cho ga ji lta bu zhig gis/ /bris sku bri bar bya zhes so/ /'di nyid bdag gis mi shes pas/ /bde ba chen po bshad du gsol/ /'dir ni 'dri mkhan dam tshig can/ /zhes pa la sogs pa la/ gsungs pa yang / dam tshig chen po de nyid mkhyen/ /dbang po bsam pa mkhyen mchog gis//zhes so gsungs pa yang / chos 'byung bris sku bzang po la/ /byang chub sems kyi lha nyid ni/ /de ni bde chen ngo bo yis/ /rnal 'byor rigs pas rtag tu mchod/ /dpal he ru ka mngon par 'byung bar yang gsungs pa/ de nas rnal 'byor pa chen 'grub//skrag pa thams cad spangs pa ste/ /bris sku'i gzugs ni sna tshogs kyi/ /sngags pas cho ga bzhin du bri/ /rnal 'byor ma yi yan lag gnas/ /sgrub pa po yis mtshon pa'o/ /zhes pa la sogs pa'o/ /mi yi thod gnas kha dog lngas/ /sih+la ga pur bsgos pa yis/ / zhes pa la sogs pa rnams ni mi'i thod par gnas pa'i kha dog lnga pa lnga can gyis sih+la dang ga bur la sogs pa rnams te/ glu'i rim pa'i man ngag gi nges pa'i don gyis go sla'o/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du bris sku'i cho ga ste le'u drug pa'o// // da ni glegs bam gyi cho ga sngon ma can bza' ba brjod pa'i ched du dam tshig gi le'u gsungs pa yang / /gro gar bri zhes pa la sogs pa'o/ /gsungs pa yang / gro ga zhes pa ni sa la sogs pa'o/ /po ti ni mchog gi yi ge ste A li dang kA li'i rab tu sbyor bas bklag par bya'o/ /bzlas pa'o zhes pa nges pa'i don to//rdo rje can gyi bza' ba bstan/ /rgyud gzhan du yang gsungs pa yang / rdo rje can zhes pa bde ba chen po'i rdo rje 'dzin pa'o/ /bza' ba zhes pa 'chad bar 'gyur ba la brjod par bya'o/ /tshogs kyi dkyil 'khor zhes pa la sogs pa gau rI la sogs pa'i mkha' 'gro ma brgyad kyi 'khor dang gnas dang nye ba'i gnas la sogs pa'i dpa' bo dang rnal 'byor ma rnams te/de rnams 'dus pa'i tshogs kyi dkyil 'khor du kye'i rdo rje'i bdag nyid can tshogs kyi gtso bor gyur nas/ gnas dang bdag nyid dang rnal 'byor srung ba'i don du bgegs thams cad bzlog par bya'o//dpal mtshan yang dag par brjod par gsungs pa yang / rgyal ba dgra rgyal rnam par rgyal/ /'khor los sgyur ba stobs po che/ /tshogs kyi slob dpon tshogs kyi gtso/ /tshogs rje tshogs bdag dbang dang ldan/ /zhes so/ /da ni bza' ba 'grub pa'i gnas gsungs pa/dur khrod ces pa la sogs pa ste der nang gi bdag nyid kyi dkyil 'khor gyi 'khor lo sngon du byas te bza' ba dang longs spyod bya ba dang / btung ba la sogs pa sbar ba dang / bsro ba la sogs pa'i rim pas thams cad rnam par sbyangs nas/ lam gsum pa'i me'i thab tu bdud rtsi lta bur sbyin sreg bya'o//ci'i rang bzhin can zhes dogs pa la gsungs pa rgyud gzhan du yang gsungs te/ chu gter shin tu bkra ba dang / /'gram ni ri yi dbang po ldan/ /thibs po mdzes pa'i snying po can/ /gdod nas grub pa'i dur khrod du/ /sna tshogs rgyal mtshan ba dan dang / /dril bu do shal gyis mdzes pa//srid gsum bskyed pa 'khor lo ste/ /dkyil 'khor de ni lus yin no/ /zhes pa la sogs pa'o/ /de nas 'di la tshogs kyi 'khor lo la sngar bshad pa'i rdo rje'i rigs la sogs pa'i dmangs rigs la sogs pa rigs sum cu rtsa drug gi pho nya mo rnams kyi bza' ba dang btung ba la sogs pa'i cho ga brjod par bya ste//skye bo dang bral ba'i khyim du gsang ba'i gnas su rigs kyi pho nya mo thams cad gos dang bral ba rnams dang / sgrub pa po yang phyag rgya lnga yis brgyan pa rang rang gi gnas su rnal 'byor ma rnams skra grol ba sgrub pa po yang gtsug phud bcings pa'o/ /stan du rtag bya ba zhes pa la sogs pa la ro'i pags pa'i steng du gnas pa rnams so//tshogs kyi bdag po ni stag gi pags pa'i steng du 'khor lo'i dbus su'o/ /ro'i pags pa khru gang ba tsam gyis sder byas nas/ tshogs kyi gtso bo la sbyin par bya'o/ /shar dang lho dang nub dang byang gi rnal 'byor ma rnams la rta dang khyi dang mi dang glang po che dang ba lang rnams kyi pags pa'i sder sbyin par bya ste/dbang ldan gyi rnal 'byor ma dang bden bral phyogs kyi rnal 'byor ma dang rlung gi mtshams kyi rnal 'byor ma dang / me mtshams kyi rnal 'byor ma rnams la ba lang dang bong bu dang ce spyang dang rnga mo'i pags pa'i sder sbyin par bya ste/ rang rang gi rigs shi ba rnams kyi'o//'di nyid du yang gsungs pa/ cha gcig pa zhes pa la sogs pa ste/ pad+ma dum bu gcig pa dang / dum bu gnyis pa dang / dum bu gsum pa'am/ ji ltar rnyed pa rnal 'byor ma rnams la btung ba'i don du sbyin par bya'o/ /de nas bza' ba sder du byin nas sgrub pa pos bskor ba lan gsum byas te/dri dang me tog dang bdug spos la sogs pa rnams kyis mchod la yongs su bsngo ba bya ste/ bsod nams 'di yis sems can rnams thams cad phyag rgya chen po thob par gyur cig ces pa'o/ /tshogs kyi 'khor lo 'di rgyal pos bya ste/ thun mong du ni sngags kyi stobs kyis sam lha'i nges pas so//gzhan du ni sgrub pa po rnams la bar chad du 'gyur ro/ /thun mong ba'i tshogs kyi 'khor lo ni yul dang rigs kyi tha snyad kyis bsod nams kyi tshogs kyi don du bya ste/ rang gi rang rigs kyis smin pa'i rigs kyi bu mo rnams kyis so/ /gzhan du ni tshogs kyi 'khor lor mi 'gyur ro//shes rab dang thabs kyi bde ba byang chub kyi sems myang ba med par bza' ba dang btung ba 'ba' zhig pas ni dpa' bo'i ston mor brjod par bya'o/ /de yang slob dpon la sogs pa la dge bsnyen rnams kyis bya'o/ /sngags kyi tshul 'dir slob dpon rnam pa gsum ste khyim na gnas pa dang dge tshul dang dge slong chung ngu dang 'bring dang mchog go//dge slong gnyis dag gi nang nas thog mar dbang bskur ba thu bo dang / dge tshul gnyis kyi nang nas sngon la dbang bskur ba rgan pa dang / khyim pa gnyis kyi nang nas sngar dbang bskur ba gtso bo'o/ /de ltar rdo rje slob dpon thams cad mkhyen pa'i rgyal mtshan 'dzin pa ni tshogs kyi 'khor lo la shar du mngon par phyogs pa sbyin pa'i bdag pos tshogs kyi 'dren par bya'o//dge slong gzhan rnams kyang rgan pa dang / gzhon pa'i rim pas de nas nye bar 'khod par bya'o//de bzhin du byang du kha phyogs pas dge tshul gyi slob dpon gyi gral te/ bden bral mtshams nas me'i mthar thug par ro/ /dbang ldan nas rlung gi mthar thug par lhor kha phyogs pas rgan pa dang gzhon pa'i dbye bas khyim na gnas pa'i slob dpon gyi gral 'o/ /shar du dge slong ma dbang bskur ba rnams nub tu kha phyogs par rgan pa dang gzhon pa'i dbye bas nye bar 'khod par bya'o//zhes so/ /bza' ba dang btung ba la sogs pa shar du bya'o/ /dbus su rdul tshon gyi dkyil 'khor med na ba byung gi chu yis gru bzhi pa byas te/ der dri dang me tog la sogs pa rnams kyis mchod pa byas nas/tshogs kyi bdag po'i g.yon du las kyi phyag rgya gcig gzhag par bya ste/ tshogs kyi bdag po'i phyag rgya byas nas so/ /gzhan du na rnal 'byor ma med par tshogs kyi bdag pos btung bar mi bya ste/ tshogs kyi 'khor lo la dbang bskur ba'i sbyin pa'i bdag pos tshogs kyi bdag po la bsod nams 'phel ba'i don du phyag rgya mo nges par dbul bar bya'o//gzhan du na sbyin pa'i bdag po la rtsa ba'i ltung bar 'gyur ro/ /dang po'i sangs rgyas su gsungs pa yang / chang ni shes rab rang bzhin sbrang rtsi dang bcas bu ram skyes sam 'bras skyes shing skyes te/ /phyag rgya dang bral 'thung byed gang de yul can du 'gyur bdud kyi tshogs kyis bskor de'i phyir//shes rab lhag ldan sdig pa'i dri ma 'phrog cing sngags pa rnams la dngos grub sbyin par 'gyur/ /phyag rgya gang su rung ba 'dir ni dam tshig rnams bral btung ba'i slad du rab tu bya/ /zhes so/ /gang du dge slong rdo rje 'dzin pa dag gi nang nas rgan pa rmongs pa dang gzhon pa ston pa po yin na der gzhon pa tshogs kyi bdag po rgan po rmongs pa ni khang pa gzhan du tshim par bya'o//de ltar rim pas thams cad shes par bya'o zhes pa'o/ /dge bsnyen ma dbang bskur ba ni nub tu mngon par phyogs pa ste dge slong ma'i gral bzhin no//tshogs kyi gtso mo'i g.yon du thabs sbyin pa'i bdag pos gzhag par bya'o/ /rnam pa gzhan du na thabs med par tshogs kyi gtso mos myos byed dang sha bza' bar mi bya'o/ /de nas tshogs kyi bdag po la sogs pa la g.yon skor du bza' ba dang ston mo dbul bar bya zhing btung ba ni kham phor ram nA ri ka la sogs pa'i snod du dbul bar bya'o//de nas myos byed la sogs pa sbyangs shing rgyas par byas la sbar nas bdud rtsir byas te/ gtor ma la sogs pa phul nas/ 'chad par 'gyur ba'i bdud rtsi ril bus bsang gtor byas te lag pa g.yon pas oM yig gis sbyang bar bya'o//lag pa g.yas pas AHyig gis rgyas par bya'o/ /thal mo bkab nas hUM yig gis 'bar bar bya'o/ /bya khyung gi phyag rgyas hoHyig gis bdud rtsir byas nas myos byed kyi thigs pas g.yon pa'i ming med kyi rtse mos sa gzhi la chos 'byung gru gsum pa dang /dbus su thig le zlum po byas nas de'i dbus su ye shes kyi 'khor lo shin tu dang ba lha'i bdag nyid gzugs brnyan dang mtshungs pa de tshim par bya ste/ 'chad par 'gyur ba'i chogs so/ /zhing skyong la sogs pa rnams kyi grong khyer dang grong gi ming gi yi ge mnyam pa rnams dang po dang mtha'i yi ge dag gis ming gi yi ge gnyis dang ming gi yi ge mi mnyam pa rnams kyi dang po dang bar dang mtha' rnams kyis yi ge gsum ming du 'gyur ro//dang por oM yig dang bar du ming dang mthar AHhUM ste dper na/ oM che ge mo AHhUM/ ba liM gr-i h+na gr-i h+na sarba sa twA nAM ra k+ShaM ku ru swA hA/ de bzhin du oM hA rI ti pi Na Da ke pra tIts+tsha k+ShiM swA hA/ 'phrog ma la chang bu gnyis so/ /oM du tI ke a gra grA saM pra tIts+tsha swA hA/ oM AHhUM gi sngags kyis bsngags par byas nas bza' bar 'gyur ba ji srid bas la gzhag par bya'o/ /oM kha kha khA hi khA hi u ts+tsh-i Sh+Ta ba liM u ts+tsh-ib+ha k+Sha kA ya swA hA/ lhag ma'i gtor ma'i sngags so/ /'di yang sngar gsungs pa'i 'byung po thams cad pa'i gtor ma sbyin par bya'o/ /ji ltar rjes su mthun pa'i dus su thams cad so sor bya'o/ /de nas slob dpon slob ma dang bcas pa thams cad kyis bza' ba dang btung ba bya'o/ /gang gi tshe 'ga' zhig 'thab pa dang rtsod pa byed pa de gdon par bya'o//gang gi tshe dge slong ngam dge tshul lam/ khyim na gnas pa nga rgyal byed na de'i tshe nus pa dri bar bya'o/ /gal te mngon par shes pa la sogs pa'i nus pa ston par byed na de'i tshe de ni thams cad du thams cad kyi tshogs kyi gtso bo ste rnam pa gzhan du thos pa'i mngon pa'i nga rgyal dang /dbang bskur gyis rgan pa'i nga rgyal gyis dge tshul lam khyim na gnas pa tshogs kyi 'dren par mi 'gyur gyi gang sngar dge slong yin pa de thams cad du tshogs kyi 'dren pa'o/ /ci ste tshogs kyi 'khor lo la bton pa chad pa slong na de'i tshe bza' ba dang btung ba la sogs pa de las chad pa sbyin par bya ste tshogs kyi bdag pos so//de ltar tshogs kyi 'khor lo la bza' ba dang btung ba la sogs pa la cho ga 'di thams cad du sbyin pa'i bdag pos bya'o zhes pa drang ba'i don to/ /da ni nang gi tshogs kyi dkyil 'khor gyi cho ga gsal bar bya ste gsungs pa yang / der bcom ldan 'das bde ba chen po'i 'khor los sgyur ba yang dag pa'i tshul gyi bdag nyid kyi ting nge 'dzin dran pa sngon du 'gro bas rang gi sku'i dkyil 'khor la gnas pa'i de bzhin gshegs pa thams cad tshim par bya'o zhes khyad par du 'phags pa'i nga rgyal bskyed la dang por gzugs la sogs pa yul rnam pa gsum myangs nas de'i rjes su sbyang pa la sogs pa'i cho gas bza' ba thams cad mngon par 'dus byas te rang bzhin gyis grub pa'i nang gi thab khung rjes su dran par byas la/dam tshig sems dpa'i zhal du rtse gsum pa'i me'i dbus su sreg blugs sbyin sreg bya'o/ /zhes nga rgyal bskyed nas bza' bar bya'o/ /de las bde bar 'jug par byed cing bcud len du 'gyur ro//de ltar sgrub pa pos bza' ba dang ston mo dang btung ba la sogs pa rnams kyis sku'i rdo rje rim par byas nas mthar lnga pa reg bya'i yul myong bar byed do/ /rim pa 'di yis lhan cig spyod pa la sogs pa lha mo'i 'khor lo rjes su chags par byed pa la mkhas pa bltas nas ji ltar mngon par 'dod pa'i phyag rgya mo blangs te/brtags la bzhag nas phyag rgya chen po'i dngos grub 'grub par bya'o zhes bstan par mos pa bskyed nas 'khyud pa dang 'o byed pa dang 'jib pa dang / sen mo 'debs pa dang sid yig dang / khu byug dang / bung ba'i sgra yis rtsa rnams rgyas pa la sogs pa byas nas de bzhin gshegs pa'i skyil mo krung dang rdo rje'i skyil mo krung dang /rin po che'i skyil mo krung dang / las kyi skyil mo krung la sogs pa bcing ba bcings nas las la gnas par 'gyur ro/ /de nas shes rab dang thabs snyoms par zhugs pas rdo rje'i skyil mo krung bsrubs pa las lhan cig skyes pa'i me rab tu sbar nas phung po la sogs pa'i rang bzhin de bzhin gshegs pa thams cad kyi spyi bo nas brtsams nas rtsa stong phrag bdun cu rtsa gnyis su 'bab pa'i rgyun gyi rnam pas A li dang kA lir zhu bar gyur nas/'dod chags dang chags bral dang chags pa bar ma'i rim pas gang de las shes rab kyi pha rol tu phyin pa'i ngo bo nyid so sor rang gi bdag nyid kyis rig par bya ba mdzad do//chos 'phags kyi le'ur yang gsungs pa/ chos thams cad ro gcig pa nyid kyis na/ shes rab kyi pha rol tu phyin pa ro gcig pa nyid do/ /chos thams cad mtha' las 'das pa nyid kyis na/ shes rab kyi pha rol tu phyin pa mtha' las 'das pa nyid do/ /chos thams cad skye ba med pa nyid kyis na/ shes rab kyi pha rol tu phyin pa skye ba med pa nyid do/ /zhes so/ /der bcom ldan 'das bde ba chen po chos kyi 'byung gnas a ra li chen po la rol ba'i rang bzhin bstan pa'i don du yid gzhan du mi 'phro bar phan tshun rab tu dga' ba'i don du sangs rgyas kyi gar byed do//rim pa 'di yis te phyag rgya dang / phyag rgya'i lan bcing ba dang / mchod pa dang / mchod pa'i lan dang / gar dang gar kyi lan dang / glu dang glu'i lan dang / lus kyi brda dang / ngag gi brda yis tha snyad du bya'o/ /de ltar 'jig rten bsam gtan spangs bzhin pa yid kyi chags pa bcom nas rtag tu dga' ba yid la byed pa ni/rnal 'byor ma rnams dang lhan cig dga' bzhin pa ji ltar rgyal po in+d+ra b+hA ti bzhin du lus de bsgyur te/ rdo rje'i lus su gyur nas btsun mo dang lhan cig mi snang bar gyur cing dbang phyug gi yon tan brgyad dang ldan pas sangs rgyas kyi zhing nas sangs rgyas kyi zhing du 'gro'o zhes pa nges pa'i don to//da ni tshogs kyi 'khor lo la sogs pa dang / kha la sogs pa dag pa'i don du dam tshig gi ril bu brjod par bya ste/ nyi ma so sor dam tshig bzhi sngags pas bya'o/ /zhes pa de bzhin gshegs pa'i nges pa'o zhe na/de ni bden te/ rgyu gang gi phyir mtshan ma dang kha na ma tho ba dang bcas pas srog gcod par 'gyur ba rgyu de'i phyir rnal 'byor pas mtshan ma med pa kha na ma tho ba med pa go ku la sogs pa bza' bar bcom ldan 'das kyi bkas gsungs so/ /'dir nam mkha' la sogs pa yon tan re re 'phel ba'i dbye bas blangs nas bdud rtsi lnga dang gcig tu byas te rdzas bcu po rnams brtag par bya'o//go/ /ku/ da/ ha/ na/ bi/ mu/ ma/ ra/ shu/ zhes pa'o/ /gtor ma che zhing rgya che ba byin nas sngags kyi cho ga 'di yin te/ oM badzra kro d+hi shwa ri/ sarba tra byA ni/ bi sho d+ha ya hUM phaT ces pa rdzas sbyang ba'i sngags so//sran ma mu dga'i tshad kyi ril bu bya zhing sbar ba dang / bsro ba bdud rtsi lnga la sogs pa'i rim pas yi ge gsum gyi byin gyis brlab pa byas nas sbyangs pa nyid kyis na/ ril bus bza' ba dang btung ba la sogs pa thab kyi zlum po las byung ba dang lhan cig bsang gtor bya ste rnam par dag par 'gyur ro//khar bcug pas kha rnam par dag par 'gyur ro/ /tshogs kyi 'khor lo dang bsgom pa'i dus su yang thams cad bsrung bar 'gyur ro/ /de ltar ril bu'i cho ga'i nges pa'o/ /de skad du yang dpal mkha' 'gro ma rdo rje gur du gsungs pa/ sha lnga dang ni yang dag ldan//lcags gsum gyis ni dkris byas pa/ /rdo rje nyi ma'i rab sbyor gyis/ /kha ru bcug ste 'grub par 'gyur/ /'di ni ye shes bdud rtsir 'gyur/ /rnal 'byor pa la dngos grub ster/ /zhes pa nges pa'i don to/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du bza' ba'i le'u ste bdun pa'o// //da ni brgyad pa 'dul ba'i le'u gsungs pa/ de la rnal 'byor mas zhus pa/ /phyag rgya chen mo ci lta bu/ /kun rdzob rnam pa'i ngo bo yis/ /bde ba sbyin pa bshad du gsol/ /zhes pa la sogs pa la gsungs pa yang / chen mo yang 'di yin la/phyag rgya yang ngo zhes pas phyag rgya chen mo ste/ thugs kyi rigs las byung ba pra phab pa brgyad lta bu'o/ /de'i rnam pa gsungs pa/ 'dir phyag rgya bzang mo ni lus phra ba rdzi ma dang bcas pa'i skra can/ lag pa dang rkang pa 'jam pa/ sems can la mnyes gshin pa/ rdo rje dbyings kyi dbang phyug ma cung zad ring pa/mig mi g.yo ba ni pad+ma can zhes brjod par bya'o/ /gsungs pa yang / ha cang ring min thung ba min/ /ha cang dkar min nag pa min/ /ha cang sbom min skems pa min/ /skyes bu'i skyon ni rab sbed pa'o/ /dus shes kun rdzob rgyun can te/ /rol mo shes shing gar shes pa//glu len shes shing rol ba mo/ /rtag tu mdzes shing spu dang bral/ /de yi nyer gnas tshad dang ldan/ /bshad pa spu med pa/ sha sbom pa/ rus sbal gyi rgyab lta bu sdug pa glang po che'i dbang po'i phrag pa lta bur snang ba/ yangs ba shin tu dga' bskyed pa'o/ /de skad du yang gsungs pa/lha mo chen mo 'di gcig pu/ /mtha' yas yon tan ster ba mo/ /rtag tu skal ba bzang mor shes/ /sgrub pa po la mchog ster ma'o/ /zhes pa la sogs pa'o/ /de rnyed nas zhes pa phyag rgya chen mo brjod pa'i mtshan nyid can yang dag par bskyed nas/ lhan cig skyes pa'i dga' ba'i ngo bo ste/de 'di la yod pas na lhan skyes dga' ba'i gzugs can ma'o/ /dngos grub tu 'gyur ba ni de'i don du 'di 'dra ba'i phyag rgya btsal ba'i dgos pa'o/ /dpal dri ma dang bral ba'i 'od du yang gsungs pa/ phyag rgya chen po ni chos thams cad rang bzhin med pa'i mtshan nyid can/ rnams pa thams cad mchog dang ldan pa shes rab kyi pha rol tu phyin ma sangs rgyas skyed par mdzad ma'o//chos 'byung gi sgra yis brjod par bya ste/ chos 'byung de las chos rnams thams cad rang bzhin med par 'byung bar 'gyur ba'o/ /rang bzhin med pa'i chos rnams ni/ stobs dang mi 'jigs pa la sogs pa chos kyi phung po brgyad khri bzhi stong rnams so//zhes so/ /rten du gyur pa nyid kyi phyir de phyag rgya chen po zhes brjod par bya'o/ /'di nyid du yang gsungs pa/ chos 'byung las skyes ye shes ni/ mkha' mnyam thabs dang bcas par ldan/ /'jig rten gsum po de las skyes//shes rab thabs kyi rang bzhin las/ /zhes so/ /dpal tog rtse ba'i zhabs kyis kyang gsungs pa/ rdo rje 'dzin can dge ba'i sa/ /bcu gsum pa zhes rnam grags pa/ /gru gsum rnam par yang dag 'byung / /chos 'byung zhes par de bshad do/ /zhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du 'dul ba'i le'u ste brgyad pa'o// //da ni brtag pa dang por gsungs pa'i sngags rnams las kha cig btu ba'i le'u gsungs pa/ de nas 'di las zhes pa'o/ /gang gi tshe gdul dka' ba sngar bshad pa'i tshul gyis gdul bar mi nus pa de'i tshe nus pa bstan nas gdul bar bya'o//zhes pa rgyud de'i phyir kha sbyor 'byed pa'i cho ga bshad par bya'o zhes 'brel lo/ /kha sbyor 'byed pa'i cho ga yang bla ma'i man ngag las shes par bya'o zhes pa'o/ /de skad du yang dpal sam+bu Ta ru gsungs pa/ de nas rdo rje snying po la sogs pa byang chub sems dpa' sems dpa' chen po rnams rab tu dga' zhing spyan gdangs nas 'dir the tshom rnams zhus pa/ kha sbyor ci zhig brjod par bya/ /kha sbyor shes rab thabs bdag nyid/ /kha sbyor ni snyoms par 'jug pa'o zhes pa'i don to/ /de las byung ba dang rgyud thams cad kyi gleng gzhi'i kha sbyor gyi sgra yis rdo rje sems dpa' brjod par bya'o zhes so//dpal mngon par brjod pa phyi mar gsungs pa yang / lte ba'i dbus su pad+ma che/ /skud pa bcu drug yang dag ldan/ /yi ge la ni mnyam par sbyor/ /kha sbyor byed pa bla na med/ /de dbus rtag tu stong pa ni//spro dang sdud pa byed pa can/ /'di ni rtag tu de nyid 'gyur/ /rang 'byung thams cad khyab pa po/ /zhes so/ /de ltar gyur pa brtan pa dang g.yo ba'i rang bzhin gyis bdag nyid gcig tu 'dres par gyur pa mchog tu mi 'gyur ba'i bde ba rgyud kyi rgyal po gang gis 'byed par byed pa de kho na mtshon par bya zhes pa nges pa'i don to//'dir srog gcod pa la sogs pa'i dam tshig rnams ni rnam pa gnyis te drang ba'i don dang nges pa'i don gyis sam phyi rol dang nang gi bdag nyid do zhes pa'o/ /de la phyi rol du srog gcod par bcom ldan 'das kyis gsungs pa ni mtshams med pa lnga byed pa po rnams te/mtshams med pa lnga po de nyid sngon dang phyi mar shes nas so/ /'dir 'ga' zhig sngar mtshams med pa lnga byed pa'i ngang tshul can phyis bsod nams byed pa por 'gyur te/ gtum po mya ngan med pa dang chos rgyal mya ngan med pa bzhin no/ /de'i phyir de la gnod pa byas pa las sngags pa dmyal bar 'gyur te/dge ba dang mi dge ba'i las yongs su mi shes pa'i phyir ro/ /des na ji srid mngon par shes pa lnga can du ma gyur pa de srid du sngags pas zhi ba dang rgyas pa dang / dbang du bya ba dang dgug pa ma gtogs pa drag po'i las mi bya'o/ /de bzhin du brdzun du smra ba gzhan la gnod pa dang ma byin par len pa dang gzhan gyi bud med len pa dang /dam tshig bsten pa dang / rigs dang rigs ma yin pa la bgrod pa dang / rang gi mgo bo'i mthar thug pa sbyin pa yang rang gi don du ni ma yin no/ /da ni gang gi tshe 'chi ba'i mthar thug par mtshams med pa lnga byed na de'i tshe sngar bsgrubs pa'i sngags khro bo'i rigs la mi bskyod pa'i ting nge 'dzin 'di yis gsad par bya ste/bcom ldan 'das kyis so zhes pa ni drang ba'i don to zhes so/ /da ni sngags btub gsungs te/ dpal rdo rje rtse mor gsungs pa yang / sngags ni ci yi don du brjod/ /sngags rnams 'bod par byed pa dang //gdug pa thams cad rab sgrub byed/ /nyon mongs zhags pa gcod pa dang / /sangs rgyas chos ni spyan 'dren pa'o/ /zhes so/ /dpal yang dag par sbyor bar yang gsungs pa/ lha lags ya mtshan che ba thos/ /sngags btu'i cho ga ji ltar lags/ / de yi dbye ba bdag mi shes/ /bde ba chen po bshad du gsol/ /lha mo mkhas pa chen mo nyon/ /sngags kyi don nyid khyod la bshad/ /gru gsum dkyil 'khor nyams dga' bar/ /gsang ba'i pad+mar mA ma kI/ /pad+ma 'dab ma brgyad byas nas/ /ze'u 'bru gsang ba'i spyod yul du/ / 'dod pa thams cad sgrub pa yi/ /der gnas dpa' bo btu bar bya/ /a yig la sogs dbye ba yis/ /sngags kyi sde yi dbang phyug mchog /ces so/ /sngags btu ba ni gzhung mang ba nyid kyis na drang ba'i don gyis go sla ba nyid kyi phyir bdag gis ma btus so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du sngags btu ba'i le'u ste dgu pa'o// //da ni bzlas pa'i le'u gsungs pa/ de nas chos kun sdom gcig pa'i/ /rdo rje sems dpa' zhes byas gsungs/ /bdag med tsum pa na mdzad nas/ /bzlas pa'i yul ni rab gsal mdzad//ces pa la sogs pa'o/ /de bzhin du rgyud ni rgyud gzhan gyis rtogs par bya'o/ /zhes pa de bzhin gshegs pa'i nges pa ste/ dpal rdo rje rtse mor gsungs pa yang / rig sngags ji ltar bzlas par bya/ /gsang ba dbang phyug chen pos gsungs/ /rig sngags bzlas par bya ba la//rdo rje can kun mnyes par byed/ /ji lta'i skyil mo krung bcings la/ /mi rtog yid kyi dran pa yis/ /rig par bzlas pa sbyin par bya/ /gzhan yang rnam pa nyid kyang ngo / /mchu yis ma yin lces ma yin/ /rkan nyid kyis kyang ma yin no/ /gre bas ma yin mgrin pas min//thams cad dus su snying gar min/ /de ni phra bar yid la bya/ /chos kyi bdag nyid rtog yid kyis/ /zhes so/ /dpal shes rab kyi pha rol tu phyin par 'dzin pa'i yon tan gyi le'ur gsungs pa/ kau shi ka 'dir rig sngags 'di la slob pa'i byang chub sems dpa' sems dpa' chen po bla na med pa yang dag par rdzogs pa'i byang chub tu mngon par rdzogs par sangs rgya'o//thams cad mkhyen pa'i ye shes kyang thob par 'gyur ro/ /des na de bla na med pa yang dag par rdzogs pa'i byang chub tu mngon par rdzogs par sangs rgyas nas sems can thams cad kyi sems la rnam par blta bar 'gyur ro//de ci'i phyir zhe na/ kau shi ka rig sngags 'di la bslab pa'i byang chub sems dpa' sems dpa' chen po la gang ma mthong ba'am ma shes pa'am mngon sum du ma byas pa cung zad kyang med do/ /de'i phyir na thams cad mkhyen pa'i ye shes brjod do zhes so//shel gyis rengs pa zhes pa la sogs pa la/ shel zla ba'i 'od kyi rnam pa can te rengs pa la sogs pa brtsam par bya'o/ /tshig 'di'i rgyas par ston pa'i tshig ni/ mkha' 'gro ma rdo rje gur du yang gsungs la/ rtsa ba'i rgyud du yang / thabs gzhan gyis sngags sgrub par byed pa ma yin par gsungs shing / rengs pa la sogs pa'i las sgrub pa'i don du nyung ngu'i rgyud 'dir dgongs pa'i skad gzhan gyis don gyi rjes su 'gro bas/ de nyid brjod par nges pa la sogs pa'o/ /sa la sogs pa rnams bsgrub par bya'o/ /de bzhin du yang dpal dri ma dang bral ba'i 'od du yang gsungs pa/dang por rnam par snang mdzad byin/ /slar yang bzlas pa brtsam par bya/ /de nas bye ba bzlas byas la/ /sbyin sreg bcu yi cha byas te/ /rgyud nas gsungs pa'i cho gas kun/ /de nas lha ni 'grub 'gyur te/ /sngags pa gang zhig don gnyer ba'i//mchog ni de grub pa yis te/ /rigs gzhan dang ni bya ba dus/ /sngags dang rigs dang rigs can gzhan/ /gnas dang phyogs dang rten gzhan gyi/ /las rnams kun la 'bras bu med/ /glegs bam las ni sngags bklags nas/ /yang dag blang ba rnam spangs pa'i/ / gang zhig sgrub pa byed pa'i mi/ /de rnams sa la nyon mongs 'gyur/ /yang dag par blang pa ci zhes bya zhe na/ bla ma brgyud pa'i rim pas nges pa'i don gyis gang bstan pa'o/ /gsungs pa yang / zhi dang rgyas pa'ang sras bcas rgyal ba'i rigs dang rgyal po lha mo rnams kyis 'grub par 'gyur//dbye dang bskrad pa'ang rang bzhin yon tan dbang gis khro bo las skyes rnams kyis 'grub par 'gyur/ dbang sogs 'byung skyes rnams kyis rab gsal lha min rigs la'ang phur bus gdab pa lha min mos/ /yum dag gis ni las rnams gnyi ga'i rdo rje'i rigs la gsad dang gso ba yang //dpal dri ma dang bral ba'i 'od du yang gsungs pa/ rengs pa 'grub ste/ rdo rje dbyings kyi dbang phyug ma shes rab kyi pha rol tu phyin ma'i gsang ba'i pad+mar las rnams thams cad 'grub ste/ rdo rje'i gdan gyi thig le'i dbus su dga' ba dang bcas pa'i lha mos gso bar byed do/ / rnal 'byor gyi stobs kyis srog bkug ste/ ma 'phos pa'i thig les ni chags pa dang bral ba spong bar byed do/ /zhes pa nges pa'i don to/ /gsungs pa yang / a sogs ka sogs yang dag ldan/ /bgrang phreng skud par rab brjod bya/ /brgyad lhag brgya yi yi ge yis/ /sngags kyi bzlas pas lhag pa yang //gsal byed sum cu rtsa drug dang / /dbyangs thung bco brgyad dang ldan pa/ /gnyis 'gyur brgyad lhag brgya ru 'gyur/ /de yi phyed kyis bgrang phreng ni/ /gnyis ka yang ni rab bshad bya/ /rgyu skar gyi ni dbye ba yis/ /gsum par yongs su grags pa'o/ /de ltar rnam pa gsum du gsungs//dag pa'i las la dag pa nges/ /zhes pa drang ba'i don to/ /de bzhin du dpal gdan bzhi pa'i rgyud du gsungs pa/ ril bu thams cad dgra bcom pa/ /mchod rten steng du yongs su brtags/ /pad+mar rdo rje nges rgyas pa/ /skud pa'i dbus su yang dag sbyor//thams cad de nyid kyis bsgom bya/ /bgrang phreng lhag par gnas par bya/ /sngags kyi de nyid gsal ba ni/ /ye shes lnga yi rang bzhin can/ /rtog ge pa yis mi shes shing / /rnal 'byor byis pa'i rtogs bya min/ /zhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du bzlas pa'i le'u ste bcu pa'o// //da ni rnal 'byor pa dang rnal 'byor ma dag gi de bzhin gshegs pa lnga'i rigs kyi mtshan ma gsungs pa/ lus can rnams kyi rigs kyi gzugs/ /de la bdag med mas zhus so//b+ha gar ling ga rab bzhag nas/ /'khor lo'i 'dren pas 'di skad gsungs/ /lus can rang gi rigs bshad kyis/ /shes rab pha rol phyin ma nyon/ /bud med dam ni skyes pa yi/ /gang gi ming med rtsa ba la/ /rdo rje rtse dgu par gyur pa/ /mi bskyod pa yi rigs mchog nyid//rnam snang mdzad kyi 'khor lor 'gyur/ /pad+ma 'od dpag med mgon gyi/ /rin chen 'byung gi rin chen che/ /las kyi rigs kyi ral gri'o/ /de bzhin du ser po dang dkar po la sogs pa rnams kyang rim pa 'di yis rtogs par bya'o/ /da ni ji skad bshad pa'i rnam par snang mdzad la sogs pa'i rigs rnams kyi nges pa'i don rim pas bcom ldan 'das kyis gsungs pa'i rang bzhin bshad pa dpal thams cad gsang ba'i rgyud du gsungs pa yang /sems ni spro ba'i sbyor ba yis/ /phra mo'i ye shes sogs sbyor bas/ /de bzhin gshegs kun ye shes ni//rnam par snang mdzad ces par bshad/ /byams pa spro ba'i sbyor ba yis/ /spyad pa spyod byed dam pa ni/ /snang ba med pa bstan gyur pa'i/ /sems ni mi bskyod brjod par bya/ /snying rje spro ba'i sbyor ba yis/ /sems can rjes 'dzin byed pa po/ /sems can don dang ldan pa'i sems//rin chen 'byung ldan brjod par bya/ /dga' ba spro ba'i sbyor ba yis/ /ye shes chen po dri med mchog /rang bzhin 'od gsal dag pa'i sems/ /de ni snang ba mtha' yas brjod/ /btang snyoms spro bar byed pa'i sems/ /sems can don kun rtogs mdzad pa/ /don yod bla na med pa'i sku/ /don yod grub pa de brjod bya//rnal 'byor pa dang rnal 'byor ma dag gi nges pa'i don gyi rigs lnga rnam par dag pa zhes pa la sogs pa'o/ /da ni 'chad par 'gyur ba'i rim pa bstan pa'i ched du gsungs pa/ tshal dang skye bo med gnas dang / /bdag gi khyim dang gzhan du yang / /gcer bur phyag rgya che byas nas/ / rnal 'byor rig pas rtag tu mchod/ /ces pa la/ ci ste gal te rnal 'byor pa grong pa'i chos la sogs pas 'dod pa byed na de'i tshe rjes su chags par mi 'gyur te/ 'dod pa'i dngos grub kyang nyams par 'gyur ro/ /sngar ji skad du gsungs pa sngags pas gzhan pa mi 'dod do zhes so/ /de'i don du gsungs pa/shes rab ma la 'khyud pa zhes pa la sogs pa'o/ /de bzhin du dpal dang po'i sangs rgyas su gsungs pa yang / mchod pa'i don du 'dod pa'i bstan bcos yon tan mang po'i gnas ni rnal 'byor pas rig bya/ /shin tu dga' ba byas kyang rnal 'byor pa la rnal 'byor ma yis ma tshim dngos grub ni//sbyin par mi 'gyur mdzes ma lha mo sha za mo dang mi mo srin mo klu mor 'gyur/ /mdzes ma dpal ldan chos dbyings su 'gyur yon tan dbang gis lha mo dgra yi rdo rje ma/ /zhes pa la sogs pa'o/ /khyogs dang gru mo zhes bya dang / /de bzhin shin tu brkyang ba yis/ /zhes pa la sogs pa'o//kar Na 'di rnams kyis 'dod pa bya'o zhes pa'o/ /de la khyogs zhes pa khyogs pa lta bu ni khyogs te/ 'di ni nye bar 'dug pa'i ka ra Na yin la/ 'dir bud med byed pa po ste skyes bu'i ched du de sbyor bas skyes bu rnams kyis sgrub par byed pa gzhan gyi yul du gnas pa mi mos rang gi rked pa mdun dang rgyab nas 'degs par bya ste khyogs su 'gyur ro//'di'i mtshan nyid kyi tshigs su bcang ba gsungs pa/ pho mtshan steng na gnas pa la/ /mdun dang rgyab nas mi mo yis/ /rim pas sked pa 'degs par bya/ /mi mo'i khyogs su rab tu grags/ /gang gi tshe 'dis skyo bar gyur na de'i tshe steng gi kar Na bshad pa/gru mo zhes pa gru mo sbyor ba las bstan pa'i ka ra Na 'di'i zhes pa gru mo'i ming can no/ /de la skyes pa byed po ste/ gdong steng du gnas pa'i gnyi ga dag gis kyang ste/ mgrin pa la 'jus pa'i bar du myos mas rkang pa g.yas pa steng du bslang ba'i pus mo'i mthil la g.yon pa'i gru mo bzhag nas lag pa g.yas pa de'i rgyab nas gzung bar bya ste gru mor 'gyur ro//'dir tshigs su bcad par gyur pa/ /mi mo'i pus mo'i mthil bslangs nas/ /g.yas dang g.yon gyi dpung ba yis/ /sbyar te steng gi ka ra Na/ /gnyis ka steng du phyogs par gnas//shin tu brkyang pa zhes pa la/ 'dir yang skyes bu byed pa po ste rab tu brkyang pa'i khyad par gyis khyad par du byas pa nyid kyi phyir shin tu brkyang ba'o/ /de yang gan rkyal du g.yas pa dang g.yon pa'i rkang pa'i mthil la rang gi lag pa'i mthil gyis sbyar nas ngang pa'i gshog pa lta bur dpung pa brkyang ste rdzogs par bya'o//'di'i mtshan nyid kyi tshigs su bcad pa ni/ /ngang pa'i gshog pa mtshungs rnam pa/ /gan rkyal ba ru rab tu grags/ /rkang pa rab tu brkyang gyur pa/ /gnyis kyis rab tu brkyang pa'o/ /zhes so/ /'di ni gan rkyal gyi ka ra Na'o zhes pa drang ba'i don to/ /da ni rgyud gzhan du gsungs pa'i nges pa'i don gsal bar bya ba ste/dpal gsang ba nor bu'i thig ler gsungs pa yang / de nas bcom ldan 'das de bzhin gshegs pa rnam par snang mdzad kyis byang chub sems dpa' phyag na rdo rje la shin tu gsang ba gsungs par gyur to/ /rang gi sku las phyung nas rigs kyi lha mo chen mo mdun du gzhag par gyur to//phyag na rdo rje khyod kyis kyang rang gi snying la yid du 'ong ba'i lha mo phyung cig /de nas rdo rje'i bdag nyid kyis rdo rje gar gyi sbyor bas rigs kyi lha mo chen mo phyung bar gyur to/ /de bzhin du de bzhin gshegs pa thams cad la rjes su chags bzhin pas zhal cung zad bzhad pa/ gzugs mdzes shing yid du 'ong ba/ skal ba bzang mo spros nas mdun du bzhag par gyur to/ /pus mo gnyis kyi phyogs su gnas nas ched du brjod pa ched du brjod do/ /e ma bdag gi gsang ba gang yin pa/ 'di ni mchog tu gsang ba'o/ /de nas rdo rje sgeg mo rigs kyi lha mo chen mo de bzhin gshegs pa thams cad kyi dga' ma des/bdag nyid kyi gsang ba ched du brjod pa ched du brjod do/ /bde ba thams cad dang ldan pa/ /bdag gi gsang ba 'di gang zhig /cho ga yis ni bsten byed pa/ /de yi mdun du nga gnas so/ /zhes so/ /de nas phyag na rdo rjes bcom ldan 'das la 'di skad ces gsol to//bcom ldan 'das gsang ba 'di bstan du gsol/ ci ltar brten par bgyi/ de nas rnam par snang mdzad de bzhin gshegs pas phyag na rdo rje la 'di skad ces bka' stsal to/ /rkang pas rkang pa mnan byas nas/ /mchu ni kha la gzhag par bya/ /lag pa dag gis sbyar byas te/ mgo bo la ni bskul bar bya/ /sen rtses de yi pad+ma ni/ /lag pa g.yon pas mnyes byas nas/ /rdul ni kun nas 'bab par bya/ /de nas so yis so gzung bya/ /mchu yis mchu dang lce yis lce/ /ji srid 'o thigs mi rgyu'i bar/ /de srid rdo rje gnas par bya/ /dpal gsang ba'i thig ler gsungs pa yang /phyag na rdo rje'o ma'i thigs/ /gsang ba'i thig ler shes par bya/ /dpal 'jig rten gsum gsang ba'i rgyud du gsungs pa yang / de las langs nas nye bar 'jug par byed do/ /tsog bur byed do/ /de nas 'ching ba de nyid kyis 'dzin par byed do/ /de nas pad+ma dbang po'i gzhu'i rnam pa can du 'gyur ro//pad+ma'i dbus su nor bu gru gsum bsam par bya ste/ nor bu'i tshad ni rnam pa nor bu'i kha dog mu tig gi 'bras bu 'dra ba'o/ /de nas sngags pas bskul bar bya ste/ mgo bo dang spyi gtsug dang rgyab dang rked pa'i phyogs dang / phyag rgya'i pad+ma'i rtse mo la'o/ /de nas steng dang 'og tu phyogs par gnas nas gsang ba'i don du de rdo rje'i lce yis myang bar byas te/ji srid 'o ma ltung ba de srid du'o/ /de las langs te zlog pa'i dga' bas sngags pas 'dod par bya'o/ /de nas lha mo chen mo bde ba'o zhes smra bar bya'o/ /de nas phyag na rdo rjes bcom ldan 'das la 'di skad ces gsol to/ / rdo rje'i rnal 'byor ma de thar pa'i rgyur 'dod par bgyi'o/ /mdor bstan pa'i tshig 'di'i rgyas par bstan pa'i tshig ni dpal sangs rgyas thams cad mnyam par sbyor ba mkha' 'gro ma dra ba'i sdom par gsungs pa yang / bcom ldan thar pa zhes bya ba/ /de ni ci ltar ci zhig lags/ /bcom ldan 'das ni chags pa che//dngos grub thams cad chags byed phyir/ /dngos grub thams cad 'gyur med bde/ /bde ba chen po zhes par bshad/ /ka ra Na 'di rnams kyis dga' ba bzhi'i bdag nyid can bde ba chen po rnal 'byor pa rnams kyi de nyid la nye bar mtshon par bya'o/ /'di nyid du yang gsungs pa/ dga' bas bde ba cung zad te/ /mchog tu dga' ba de bas lhag /khyad dga'i dga' bas chags bral 'gyur/ /lhag ma lhan cig skyes dga' 'o/ /dpal pad+ma'i zhabs kyis kyang / /gsang ba grub par dga' ba bzhi'i bshad par gsungs pa de nyid ston par byed de/ yang dag rig pa skyed byed mchog /thog ma bar mtha' dri ma med/ /dang po'i las can sems can rnams/ /mtshon bya yid ches byed pa can/ /mkha' dbyings rdo rje sbyor las dang / /reg pa las kyang rmad byung che'i/ /bde ba skyed par byed pa gang / /de ni mchog dga' byed pa'o/ /de zad pa las khyad dga'i dga'//khyad dga'i mthar yang gzhan gang zhig /bstan du med pa'i rang bzhin can/ /rang nyid ci yang skye ba ni/ /dbang po kun gyis rnam par grol/ /gnyis med mchog tu zhi ba ste/ /khyad par byed pa rang bzhin med/ /byang chub go 'phang mchog de'o/ /dpal mtshan yang dag par brjod par gsungs pa yang /nyon mongs khams rnams dag pa'i bdag /las kyi khams rnams zad byed pa/ /chu bo'i rgya mtsho kun las rgal/ /sbyor ba'i dgon pa las byung ba/ /zhes so/ /kun du bzang po mchog ces bya/ /khyad dga'i mtha' ru rnam par gnas/ /sgrub pa po yi bde mchog go//grol ba'i gnas su rab tu grags/ /drug gis legs par yang dag phye/ /dpal 'dus par gang gsungs pa/ de bzhin gshegs pa rnams kyis te/ rang bzhin med pa mchog tu ngag /byang chub sems ni bla na med/ /rang bzhin dag pa de yi ni/ /rgyas par bstan pa bdag gis bshad//nam mkha'i dbyings kyi dbus gnas par/ /zla ba'i dkyil 'khor bsgom bar bya/ /zhes pa la sogs pa gang bshad pa/ de ni nam mkha'i dbyings kyi steng du rin po che las gyur pa rnam par gnas te/ rdo rje'i bde ba'i rang bzhin sangs rgyas nyid kyi 'bras bu ster bar byed pa bla ma'i brgyud rim pas rnal 'byor pas shes par bya'o zhes pa nges pa'i don to//dpal shes rab kyi pha rol tu phyin par rjes su yi rang ba'i le'ur gsungs pa yang / chos rnams thams cad ni rtogs pas rnam par bsgrubs pa ma skyes pa nges par ma skyes pa/ 'ong ba med pa 'gro ba med pa'o//'di la chos 'ga' zhig kyang skyes pa med do/ /chos 'ga' yang skye bar mi 'gyur ro/ /chos ci yang mi skye'o/ /chos ci yang 'gags pa yang ma yin no/ /chos ci yang 'gag par mi 'gyur ro/ /chos ci yang mi 'gag go/ /zhes so/ /dpal kye'i rdo rje'i rgyud la rdo rje'i tshig gi snying po bsdus pa'i dka' 'grel du lhan cig skyes pa'i don gyi le'u ste bcu gcig pa'o// //de nas rdo rje can gyis dbang bzhi'i tshigs su bcad pa bka' stsal pa/ dpal mtshan yang dag par brjod par bka' stsal pa yang / rdo rje kun 'chang rdo rje can/ /rdo rje gcig pu g.yul sel ba//zhes so/ /rdo rje che dang dril bu che/ /rdo rje rab tu gnas par gzung / /zhes pa la sogs pa la/ 'di'i nges pa'i don ni dpal don dam pa'i bsnyen par gsungs pa yang / shes rab lag tu rdo rje 'di ci'i don/ /thabs kyi lag tu rdo rje dril bu yang / /bdud rnams zad don bde ba ston pa'i don//rgyu mtshan can gyi tshul khrims 'dzin pa'am min/ /zhes so/ /dpal gdan bzhi par gsungs pa yang / slob dpon gyi ni lam gyis ni/ /mkhas pa rnams kyis bstan par bya/ /rdo rje bdag nyid ces bskyed nas/ /dril bu shes rab ces sprul te/ mnyam par lta ba gnas byas te//lhan cig skyes dga'i rang bzhin las/ /rdo rje'i rtse mor shes sa bon/ /bdag nyid lha rnams tshim pa nyid/ /rdo rje dril bu rang lus kyi/ /phyag rgya kha sbyor sbyar bar bya/ /rdo rje dril bu phyag rgya bzhi'ang / /de kho na nyid las gzung bya/ /de nyid kyis ni rdo rje gsor/ /dril bu'ang rang gi 'dod pas dkrol//gnyis kyi lus ni dga' byas nas/ /lha rnams thams cad tshim par byas/ /rnal 'byor pa la de nyid med/ /glang chen dril bu dkrol dang mtshungs/ /rnal 'byor de nyid kyis dman la/ /dngos grub ring bar mtshon par bya/ /zhes pa nges pa'i don to/ /drang ba'i don gyis ni 'di thams cad go sla'o//ji ltar 'das pa'i sangs rgyas kyis/ /byang chub sras rnams dbang bskur ba/ /gsang ba'i dbang bskur chen po yis/ /sems kyi rgyun gyis dbang bskur ro/ /zhes pa dang / lha mo dga' sbyin gnas sbyin ma/ /sna tshogs gzugs can yid 'ong ma/ /khyer cig khyer cig sems dpa' che//khyer ba byas nas mchod pa gyis/ /zhes pa la 'dir brjod par bya ste/ dpal dang po'i sangs rgyas su gsungs pa yang / dbus su srog ni rab tu zhugs pa sna tshogs yu ma la yul dang rnam bral 'khyud pa ste/ /pad+mar zhugs pa rang gi rdo rje spro ba'ang de bzhin zla nyi'i dbus su rab zhugs pa//bde ba sa bon ma lhung ba la rab dga'i dgar gnas rnal 'byor pa yi rnal 'byor 'di/ /phyag rgya'i dngos grub don rgyur khyab bdag gi ni dpal ldan gsang ba las kyang gsang ba'o/ /zhes so/ /ye shes 'di ni ches phra zhing / / rdo rje snying po nam mkha' mtshungs/ /rdul bral mthar sbyin zhi ba ste/ /khyod kyi pha yang khyod rang yin/ /zhes pa la sogs pa ste/ dpal shes rab kyi pha rol tu phyin par mngon pa'i nga rgyal gyi le'ur gsungs pa yang / rab 'byor 'di ltar byang chub sems dpa' sems dpa' chen po shes rab kyi pha rol tu phyin pa la slob bzhin pa'i rang bzhin gyis yongs su dag pa'i chos rnams thams cad la gang mi 'god zhing mi zhum pa 'di nyid ni/rab 'byor shes rab kyi pha rol tu phyin pa'o/ /zhes so/ /chu dang cod pan dang rdo rje dang / bdag po dang ming gi dbang bskur rnams la tshigs su bcad pa rgyud gzhan du gsungs pa dang /dbang bskur la gsol ba 'debs pa'i don ni blta bar bya'o zhes pa'o/ /dpal paT+Ti ka ra ka ra gnas pa'i dpal gser gyi mchod rten gyi gtsug lag khang chen por gnas pa/ tshul khrims kyi sdom pas bsdams pa/ dge slong dam pa dul ba'i dpal bshes gnyen la sogs pa rnams kyis gsol ba btab pa can dpal kha che chen po shAkya'i dge slong snyan grags bzang po bla ma dam pa brgyud pa'i man ngag thob cing rnyed pas ji skad bshad pa'i gsang ba'i lung sna tshogs kye'i rdo rje'i tshig rnams bsdus nas/skye bo dam pa'i yid kyi mtshor ngang pa'i mchog lta bur dpal kye'i rdo rje'i rgyud la gsang ba'i rdo rje'i tshig gi snying po bsdus pa gsal por rab tu gsal bar byed pa'i dka' 'grel 'di byas so//'dir tshigs su bcad bdag tu yang 'gyur te/ rdo rje slob dpon bka' drin dang / /rnal 'byor ma rnams mnyes byed pas/ / man ngag thob pa kho nas 'dir/ /kye yi rdo rje'i dka' 'grel byas/ /dka' 'grel de nyid byas nas ni/ /bdag gis bsod nams gang bsags des/ /bde ba can du sems can rnams/ /ji ltar 'dod bzhin gnas gyur cig /dpal ldan b+haM ga'i sa'i bdag po dpal ldan 'phrog byed tshangs pa'i lha'i rgyal srid rab tu 'phel zhing rnam par rgyal ba la/lo bco brgyad pa la dbo can gyi zla ba'i tshes bdun la dka' 'grel 'di grub pa'o/ /le'u bcu gnyis kyi bdag nyid can 'di ste/ /brtag pa gnyis kyi bdag nyid can gyi rgyud dpal kye'i rdo rje zhes bya'o/ /dpal kye'i rdo rje'i rgyud la kha che chen pos rtogs pa gnas brtan dul ba'i dpal bshes gnyen gyis gsol ba btab pa rdo rje'i tshig gi snying po bsdus pa'i dka' 'grel du brtag pa gnyis pa le'u bcu gnyis pa rdzogs so// //kha che'i paN+Di ta chen po shAkya shrI bzang po'i zhal snga nas/ bod kyi lo tsA ba dpyal chos kyi bzang pos dpal bkra shis gser sdings kyi gtsug lag khang du legs par zhus shing bsgyur te gtan la phab pa'o// //slar yang dpal ldan shong ston rdo rje rgyal mtshan gyi legs bshad la sogs pa'i mthu las/ brda sprod pa'i tshul rig pa'i dbang lo tsA ba dpal ldan blo gros brtan pas byang chub sems dpa'i 'grel pa skor gsum gyi tshul la shin tu dad cing blo'i snang ba rgyas pa'i dge ba'i bshes gnyen ra lung pa chos grags dpal bzang pos/slob dpon zhi ba'i tsho'i zhabs dpon slob kyis mdzad pa'i dbu ma'i gzhung lugs chen po de kho na nyid bsdus pa rtsa 'grel gyi glegs bam bris te yon du gnang nas/ yang yang du bskul ba'i ngor legs par bcos te bsgyur cing zhus nas gtan la phab pa'o/

CLOSE WINDOW