CLOSE WINDOW

D1183
བོད་ཡིག

@##/ /rgya gar skad du/ yo ga rat+na mA la nA ma he badzra pany+tsi kA/ bod skad du/ dgyes pa rdo rje'i dka' 'grel rnal 'byor rin po che'i phreng ba zhes bya ba/ dpal dgyes pa'i rdo rje la phyag 'tshal lo//'jam dpal gzhon nur gyur pa la phyag 'tshal lo/ /mchog tu dga' ba'i gzugs can gyis/ /dgyes pa'i rdo rjer phyag 'tshal nas/ /sngon grub rim pa'i lugs bzhin du/ /dgyes pa'i rdo rje bdag gis bri//'di skad bdag gis zhes bya ba la sogs pa la/ 'di ni gleng gzhi'i tshig yin te/ /mdo dang rgyud du rab tu bstan/ /rgyud 'di ru ni snying po'i don/ /gzhan dag gis ni gzhan dag bstan//de yang bcom ldan 'das kyis dge slong dag 'di skad bdag gis zhes bya bas nga'i chos rnams bsdu bar bya'o zhes gsungs pa'i phyir sdud pa pos 'di skad bdag gis thos pa zhes bya ba smras pa yin no//'dir kha cig ni thos pa zhes bya bas ni sdud pa po ston pa yin te/ bdag nyid kyis shes pa dang brgyud nas thos pa ni sdud pa po tshad ma ma yin par 'gyur bas skyon 'di gnyis spang pa'i phyir 'di skad bdag gis zhes bya ba smos te/bdag gis zhes bya ba ni bdag nyid kyis thos kyi/ gcig nas gcig tu brgyud nas thos pa ni ma yin no/ /'di skad ces bya ba ni ji skad bsdus pa bzhin du'o/ / dus gcig na zhes bya ba ni dus gcig kho nar te/ thams cad kyi thams cad du ma yin pa'o zhes bya ba'i bar du'o/ /bcom ldan 'das zhes bya ba ni dgyes pa'i rdo rje'i gzugs kyi rdo rje 'chang ste/ gang la dbang phyug la sogs pa'i skal pa rnams mnga' ba de ni bcom ldan 'das te/de yang ji skad du/ dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa dang / /drug po de la ldan zhes bya// zhes bstan pa yin no/ /bzhugs zhes bya ba ni sangs rgyas kyi gnas pas bzhugs pa'o/ /gang du bzhugs she na/ de bzhin gshegs pa thams cad kyi sku dang gsung dang thugs rdo rje btsun mo'i b+ha ga la'o/ /de thams cad kyang yin la/de bzhin gshegs pa yang yin pas de bzhin gshegs pa thams cad de/ de dag gi sku dang gsung dang thugs zhes zhes pa ni gsang ba gsum bsdus pa la/ yang de ni bcom ldan 'das rdo rje 'chang gi gzugs can chos kyi 'byung gnas zhes bya ba yang yin no//de nyid rdo rje btsun mo'i b+ha ga ste/ de ni zag pa med pa'i chos dpag tu med pa'i chos nyid kyi lus yin pa'i phyir ro/ /de'i phyir de bzhin gshegs pa thams cad kyi sku dang gsung dang thugs kyang de nyid yin la/ rdo rje btsun mo'i b+ha ga yang de nyid do zhes khyad par bsdu ba yin no//la zhes pa ni de na gnas pa'i gzhal yas khang du'o/ /gsang ba las kyang shin tu gsang bar gyur pa'i gnas na bcom ldan 'das bzhugs par dmigs pa yin pas de lta bu dang rjes su mthun pa'i 'khor 'dus pa yang shugs kyis rgyud snga mar bstan pa yin pas 'dir ni ma bsten to//'di ni drang ba'i don gyis bshad pa'o/ /'di skad bdag gis zhes bya ba la sogs pa la/ yi ge e ni b+ha gar gsungs/ /baM gi rnam pa rdo rjer dran/ /ma yA zhes bya bskyod par bstan/ /thos pa gang phyir gnyis su 'dod/ /'di ni 'chad par 'gyur ba ste//bcom ldan khu ba'i rnam par 'gyur/ /de yi bde ba chags par dran/ /zhes bya bas chos dang longs spyod rdzogs pa'i gzugs can nyid kyis rdo rje 'chang ni/ kun rdzob kun lta bu ste/ /sgrib bral bde ba'i gzugs can nyid/ /ces bya ba dang po'i tshig gis stong pa nyid dang snying rje'i bdag nyid can/shes rab dang thabs kyi ngo bo chos dang longs spyod rdzogs pa'i sku'i rang bzhin kun rdzob dang don dam pa'i ngo bo nyid bskyed pa dang / rdzogs pa'i rim pa'i gzugs can du rgyud kyi don mdor bstan pa yin no/ /de yang / he ni snying rje chen po ste/ /rdo rje shes rab ces brjod do/ /thabs dang shes rab bdag nyid rgyud//bdag gis de ni bshad kyis nyon/ /zhes bstan pa yin no/ /de lta bas na de lta bur gyur pa'i dus gcig na zhes bya ba la sogs pa ni go sla'o/ /'di ni yang dag pa'i rab tu sbyin pa bshad pa'o/ /yang na don ni 'di yin te/ /e ni sa ru shes bya ste/ /las kyi phyag rgya sangs rgyas spyan//'dab ma drug cu bzhi lte bar/ /gnas pa lte ba'i 'khor lo nyid/ /rba ni chu ru shes bya ste/ /chos kyi phyag rgya mA ma kI/ /snying ga'i pad+ma 'dab brgyad la/ /chos kyi 'khor lo rnam par gnas/ /yi ge ma ni mer bstan te/ /phyag rgya chen mo gos dkar mo/ /pad+ma brgyad gnyis 'dab ma la//longs spyod 'khor lo rnam par gnas/ /yi ge ya ni rlung du bstan/ /dam tshig phyag rgya sgrol byed ma/ /sum cu gnyis 'dab pad+ma la/ /bde ba chen po'i 'khor lo gnas/ /thos pa lhan cig skyes bar bshad/ /gnyis su dbye bas dbye bar bya/ / kun rdzob lha yi rnal 'byor nyid/ /bskyed pa'i rim pa'i phyogs nyid do/ /sgrib bral bde ba'i gzugs can de/ /rdzogs pa'i rim pa bsgom pa'o/ /sangs rgyas rnams kyis chos bstan pa/ /bden pa gnyis la yang dag brten/ /de skad du gzhan dag nas kyang / /bskyed pa'i rim pa'i phyogs nyid dang / / rdzogs pa'i rim pa nyid dag ste/ /rim pa gnyis la brten nas ni/ /rdo rje 'chang gis ston par mdzad/ /gsungs pas de lta bu ni 'di skad bdag gis thos pa dus gcig na/ zhes sngar bstan pa'i bshad pa ste/ /der 'khor gyi nang du bcom ldan 'das kyis bka' stsal pa'o/ /de khyad par ji lta bu can zhig ce na/de bzhin gshegs pa thams cad kyi sku dang gsung dang thugs kyi snying bo ste/ bcud du gyur pa'i lha nyid do/ /de nyid kyi phyir de bzhin gshegs pa thams cad kyi gsang ba ni rdo rje 'chang ngo / /de las kyang ches shin tu gsang ba ni nyan thos la sogs pa la bstan par bya ba ma yin pa'i brtse ba'i rdo rje'o//de nas 'di ni rnyed par dka' bar gyur ba'o zhes dad par gyur pas shes nas spro bar gyur pa'i 'khor rnams la spro ba bskyed nas bcom ldan 'das kyis bka' stsal pa ni/ e ma'o rdo rje snying po zhes bya ba la sogs pa'o/ /nyon cig ces bya ba ni thos pa la sbyor ba'o/ /rdo rje snying pos gsol ba zhes bya ba la ci zhig gsol zhe na/don gsum dri bar gsol ba'o/ /bcom ldan 'das kyis bka' stsal pa/ rdo rje mi phyed ces byar brjod/ /ces bya ba la sogs pa la/ dbyer mi phyed pas na mi phyed pa ste/ bdag dang gzhan gyi rgol ba dag gis mi tshugs pas so/ /de ci zhig ce na/ chos thams cad kyi stong pa nyid do//de yang 'phags pa lha'i zhal snga nas/ stong pa nyid du smra ba yis/ /rtsod pa bzlog pa byas pa ni/ /des ni thams cad bzlog par 'gyur/ /bsgrub bya dang mtshungs gyur pa'i phyir/ /zhes gsungs pa dang / bcom ldan 'das kyis kyang rdo rje gtsug tor las/snying po brten zhing khong stong med/ /mi chod mi phyed mtshan nyid can/ /mi tshig pa dang mi nyams pa'o/ /stong pa nyid ni rdo rjer brjod/ /ces gsungs pa yin no/ /sems dpa' srid pa gsum gcig pa/ /zhes bya ba gsungs pa la/ yod pa'i srid pa ni sems dpa' ste/ rkyen nyid 'di pa'i mtshan nyid can don bya ba nyid de phung po lnga'i bdag nyid can no//de yang bcom ldan 'das kyis bram ze thams cad ces bya ba ni phung po lnga'o zhes gsungs pa yin no/ /de ni srid pa gsum ste lus dang ngag dang yid do/ /de dag gcig nyid du gyur pa ni/ /gnyis kyi dngos po med pa ste//'od gsal ba'i mthar thug par gyur ba'i phyir/ shes rab rigs pa 'di nyid ni/ /zhes bya ba ni shes rab kyi pha rol tu phyin pa dang dbu ma'i dpyad pa 'di nyid do/ /rdo rje sems dpa' zhes byar brjod/ /ces bya ba ni chos kyi sku'o/ /ye shes chen po'i ros zhes bya ba la sogs pa la/ye shes chen po ni theg pa chen po phul du byung ba'i chos so/ /de'i ro ni myong ba ste des gang ba'o/ /'di skad bstan par 'gyur te/ mchog tu 'bar ba'i rin po che sna tshogs kyis rab tu spras pa'i gzhal yas khang gi nang na shin tu rnam par dag pa'i mtshan dang dpe byad kyis rnam par mdzes pa'i sku dpag tu med pa'i rnal 'byor ma'i tshogs dang lhan cig bsdu ba dang spros pa'i tshul gyi rang bzhin gyis bde ba chen po'i ros ngoms shing 'khor ba ji srid kyi bar du 'pho ba med pa'i rtag par gyur pas rtag pa zhes bya ba'i don to//de lta bu'i sems dpa' chen po de ni sangs rgyas rnams kyi longs spyod rdzogs pa'i sku zhes bya'o//rtag tu zhes bya ba la sogs pa la spro ba'i sbyor bas kun du 'gro ba'i phyir dam tshig ste/ ci ltar rigs pa'i thabs kyis gdul bya sna tshogs la rnam pa sna tshogs kyi khams gsum du 'byung bar 'gyur bas dam tshig go//de la rtag tu 'jug par gyur pa nyid kyis na sems dpa' ste/ sangs rgyas rnams kyi sprul pa'i sku'i rigs dpag tu med pa ni dam tshig sems dpa' zhes bya ba'i sgras brjod pa yin no/ /rdo rje snying pos gsol ba zhes bya ba la don ci zhig gsol zhe na/ brtse ba'i rdo rje'i rdo rje 'chang nyid kyi rgyu'i ming gis gang mtshon pa'i don zhus pa ste/dgyes pa'i rdo rje zhes bya ba mtshan ma bsdus pa 'di lta bu zhes pa'o/ /thabs dang shes rab bdag nyid ces bya ba la sogs pa la/ rgyud ces bya ba ni rgyun no/ /de yang rnam pa gsum ste/ rgyu'i rgyud dang 'bras bu'i rgyud dang thabs kyi rgyud do/ /de la 'dir rgyu ni rdo rje'i rigs can gyi sems can no//yongs su rdzogs pa'i dgyes pa'i rdo rje'i gzugs ni 'bras bu'o/ /thabs ni 'chad par 'gyur ba'i mtshan nyid can bya ba dang bcas pa'i lam mo/ /de ni rdo rje 'chang bdag gis 'di skad bdag gis zhes bya ba'i tshig gis bstan pa yin no/ /de dag so sor bshad par bzhed pas nyon cig ces bya bas thos pa la sbyor bar mdzad do//ci de yang bstan pa tsam zhig gam zhe na/ lta stangs dgug dang zhes bya ba la sogs pa gsungs te/ ci rigs par zhes bya ba ni/ lha'i le'ur gsungs pa'i dman pa dang 'bring dang mchog gi rim pas so/ / bskyed pa ni dbyibs dang kha dog la sogs pa'o/ /gnas ni rten no/ /byed pa ni zla ba dang nyi ma dang sa bon dang phyag mtshan no/ /nus pa ni bzlas pa dang sgom pa mthar thug pa las rab tu skyes pa'o/ /ye shes ni dbab pa la sogs pa'o/ /rnam shes ni slob dpon gyi las so/ /lha rnams ni dgyes pa'i rdo rje la sogs pa rnams so//ji ltar bskyed pa ni ji ltar rigs par byung ba'o/ /dang por zhes bya ba la sogs pa la/ ci'i phyir dang po zhes bya zhe na/ theg pa chen po gsang sngags 'dir las dang po pa'i sems can rnams dang por 'jug par bya ba'i phyir lha'i sku bsgom pa bstan pa yin te/gang yang 'di skad du/ dang po'i las can sems can la/ /lha yi sku ni bsgom pa nyid/ /las rnams thams cad 'grub bya'i phyir/ /rgyud las dang po nyid du bstan/ /zhes gsungs pa yin no/ /gnyis pa 'chad par 'gyur ba'i rdzogs pa'i rim pa la ltos nas de bstan pa'i phyir gcig ces bya'o//rgyu zhes bya ba ni thabs chen po'o/ /dngos po nyid kyis zhes bya ba la sogs pa la/ /dngos po nyid du 'byung bar 'gyur zhing 'gro ba gzhan gyi ngo bor 'gyur ba ste phung po lnga'i mtshan nyid can gyi lus so/ /de nyid kyis grol bar 'gyur ba'o/ /rdo rje snying po snying rje che/ /zhes bya ba ni bod pa'o//phung po lhag ma med pa'i mya ngan las 'das pa'i dbyings su phung po med pa'i mtshan nyid can gyi thar pa kha cig gis smra bar byed cing 'di ltar rtogs te/ gal te dngos po nyid kyis grol bar ji ltar 'gyur na 'dir 'ching ba gang zhig yin zhe na/ de'i phyir/ dngos po yis na 'ching bar 'gyur/ / zhes bya ba gsungs te/ de la dngos por 'dzin cing bden par mngon par zhen pas te/ bden pa nyid du mngon par nga rgyal byed pa'o zhes bya ba'i don to/ /de ltar na grol bar ji ltar 'gyur zhe na/ de yongs shes pas zhes bya ba ste/ de yongs su shes pa ni de yongs su shes pa ste/ 'chad par 'gyur ba'i mtshan nyid can de kho na nyid kyi le'u nas bstan pa'i spyod pa/ngo bos gzugs med mthong ba med/ /ces bya ba la sogs pa phung po lnga bskyed pa med pa'i mtshan nyid can du yongs su shes pa ni grol bar 'gyur ro/ /rgyu de'i phyir/ dngos po bsgom 'gyur shes rab can/ /zhes bos pa yin te/ zla ba dang nyi ma dang sa bon dang phyag mtshan yongs su gyur pa las skyes pa'i lha'i gzugs ni spyir bsgom par bya ba yin pas bsgom par rigs so zhes bya ba'i don to//dngos po med pa zhes bya ba la yang dngos po med pa de ni nges par yongs su shes par bya ba yin te/ ma byung ba'i dngos pa ni dngos po med pas te ma skyes pa zhes bya ba'i don to//de yang 'di skad du/ bcom ldan 'das kyis lang kar gshegs pa las/ gang gis dngos rnams dngos po med shes pa/ /de ni dngos po kun la chags mi 'gyur/ /gang zhig dngos po kun la chags med pas/ /des ni mtshan med ting 'dzin reg par 'gyur/ / zhes gsungs pa yin no/ /de ltar he ru ka bsgom bya/ /zhes bya ba ni bstan pa'i mtshan nyid can de bzhin du'o/ /dngos po med pa zhes pa ni dngos po med pa yongs su shes par bya'o/ /rim pa gnyis pa bstan par bya ba'i phyir lus la zhes bya ba la sogs pa gsungs te/ lus la gnas par gyur pas lus la gnas pa'o//bde chen yang yin la ye shes kyang yin pas ye shes chen po'o/ /gal te lus la gnas pa yin na ye shes chen por 'gyur zhe na/ dngos po kun la khyab pa po/ /zhes bya ba gsungs te/ zag pa med pa'i bde ba chen po lhan cig skyes pa'i mtshan nyid can gyi chos nyid las chos thams cad phyi rol du gyur pa ma yin pas/de'i phyir lus la gnas na yang lus las skyes pa ni ma yin zhing lus kyang de'i rgyu ma yin te/ lus ni brdzun pa slu ba'i chos can yin pa'i phyir ro/ /de'i phyir dri med sgra med gzugs nyid med/ /ro dang sems kyi rnam par dag pa med//reg dang chos med thams cad rnam par dag /rang bzhin dag pa'i 'gro las grol bar shes/ /zhes gsungs pa yin no/ /de la 'dir dang po'i tshig gi thos pa zhes bya ba'i sgras bskyed pa dang rdzogs pa'i rim pas gnyis mtshon zhing bstan nas/ rdzogs pa'i rim pa'i dgyes pa'i rdo rje zhes bya ba'i rten gyi dkyil 'khor ni lus nyid yin la/ brten pa ni rnal 'byor ma bco lnga'i rang bzhin gyi rtsa'o/ /'on kyang de dag du zhig ltar rnam par gnas/ de'i mngon par rtogs pa ni ji lta bu zhig yin pa mi shes pas dri bar 'dod nas/ kye bcom ldan 'das zhes bya ba la sogs pa ste/byang chub kyi sems 'bab ces bya ba ni lhan cig skyes pa 'byung bar gyur pa'o/ /rtsa rnam pa gsum ni gtso bo ste zhes bya ba'i dgongs pa ni 'di yin te/ rtsa gsum gyi rnal 'byor yongs su shes pa tsam nyid kyis chog par 'gyur te/ de nyid du lhan cig skyes pa'i mtshan nyid can gyis brtsi ba'i rdo rje nges par lhag pa mtshon par bya ba nyid yin pas so//gsum po de dag gi ngo bo nyid bstan pa'i phyir/ shes rab rang bzhin la la nA/ /zhes bya ba gsungs te go sla'o/ /bcom ldan 'das zhes bya ba la sogs pas zhus pa'i dgos pa ni 'di yin te/ci rtsa'i gzugs nyid bsgoms par gyur pa kho nas dpal rdo rje 'chang gi go 'phang phun sum tshogs par 'gyur ba zhig yin nam 'on te gzhan zhig gis yin zhes dgongs pa'o/ /de la bka' stsal pa/ srid gsum yongs gyur zhes bya ba la sogs pa ste/ srid gsum ni sangs rgyas kyi chos thams cad de/de dag sku dang gsung dang thugs kyis bsdus pa'i phyir ro/ /de yongs su gyur pa ni de'i ngo bo nyid do/ /de nyid kyi phyir/ gzung dang 'dzin pa rnam par spangs/ /zhes bya ba'o/ /yang na zhes bya ba ni phyogs gzhan ston pa'o/ /thabs ni thams cad rdo rje 'chang gi go 'phang thob pa'i thabs su gyur pa'i rgyud nyid rtsa'i rang bzhin nyid kyis 'khor lo 'dir//la la nA'i rang bzhin ni 'di lta bu/ ra sa nA ni 'di lta bu a ba d+hU tI ni 'di lta bu'o zhes slob ma yongs su gzung ba'i phyir ro/ /dngos po'i mtshan nyid du ni brtags/ /zhes bya ba yin no/ /chos pa'i dbye ba zhes bya ba la sogs pa la/phyi rol gyi rgya che ba'i chos rnams nang du rtogs par rnal 'byor pa gang gis nges par byas pa de ni de'i sdom pas te lus su bsdus pa'i phyir dang / bsdus pa'i mchog nyid yin pa'i phyir ro/ /de'i dbye ba ni rnam pa du ma yin no/ /A li kA li zhes bya ba la sogs pa la/yi ge a la sogs pa dbyangs kyi yi ge bcu drug ni A li'o/ /yi ge ka la sogs pa sum cu rtsa bzhi ni kA li'o/ /de dag nyid ni la la nA dang / ras sa nA dang / zla ba nyi ma dang / shes rab dang thabs so/ /chos dang longs spyod dang sprul pa zhes bya ba ni chos kyi 'khor lo dang / longs spyod kyis 'khor lo dang /sprul pa'i 'khor lo ste/ snying ga dang / mgrin pa dang lte ba rnams su rim pa ji lta ba bzhin no/ /sku dang gsung dang thugs zhes bya ba ni 'khor lo gsum po de nyid ni sku'i 'khor lo ni lte bar/ gsung gi 'khor lo ni mgrin par/ thugs kyi 'khor lo ni thugs kar ro/ /gsum po yongs su shes pa'i ngo bo nyid bde ba chen po'i 'khor lo ste spyi bor shes par bya'o//'khor lo bzhi po 'di ni sa dang chu dang me dang rlung gi khams kyi ngo bo nyid phyag rgya bzhi dang / 'di skad bdag gis zhes bya bar grags pa yang yin no/ /da ni sprul pa'i 'khor lo zhes bya ba la sogs pa gsungs te/ pad+ma drug cu rtsa bzhi pa'i dbus kyi brgyad la ni g.yon skor du a ka tsa Ta ta pa ya sha rnams so/ /lte bar ni yi ge a'o/ /snying gar ni pad+ma 'dab ma brgyad pa thur du bltas pa'i mtshams kyi 'dab ma bzhi la ni ya ra la wa'o/ /phyogs kyi 'dab ma rnams la ni I I e o bzhi'o/ /lte bar ni yi ge hUM kha thur du bltas pa'o//mgrin pa'i [(]pad+mam [,]pad+ma [)]'dab ma bcu drug pa kha gyen du bltas pa'i dbus na gnas pa'i phyogs kyi 'dab ma bzhi la ni a i u e rnams g.yon skor du'o/ /lta bar ni oM mo/ /spyi bor ni pad+ma 'dab ma sum cu rtsa gnyis pa'i lte bar yi ge haM kha thur du bltas pa'o//'khor lo bzhi po 'di dag ni 'chad par 'gyur pa'i chos can du bskyed pa'i rim pas mos par bya ba ste/ mchog tu gyur pa bsdus pa nyid yin no/ /skad cig ma bzhi zhes bya ba ni sprul pa'i 'khor lo la sogs pa bzhi la mos par bya ba'o/ /'phags pa'i bden pa bzhi yang 'di nyid la mos par bya ba nyid yin te/'khor lo bsgom pa yongs su rdzogs par gyur na 'phags pa'i bden pa bzhi bsgom pa yang yongs su rdzogs par 'gyur ro zhes bya bar dgongs pa'o/ /sde pa bzhi zhes bya ba la/ 'di dag kyang 'di nyid du mos par bya ba nyid yin te/ 'khor lo bzhi bsgom pa nyid du chos thams cad bsdus pa'i phyir ro/ /bskyed pa'i rim par bshad pa gcig yin no/ /sdom pa'i dbye ba la sogs pa la/ sdom pa ni dbang bskur ba'o/ /de'i rab tu dbye ba ni dbye ba ste/ 'chad par 'gyur ba'i mtshan nyid can no/ /de yang ji skad du/ sems can rnams la phan pa'i phyir/ /dbang bskur ba ni bzhi ru bsgrags/ /'di yis bkrus shing dbang bskur bas/ /de phyir dbang bskur zhes byar brjod/ /ces gsungs pa yin no/ /dbang bskur ba bzhi po de nyid kyi rab tu dbye ba brjod pa'i phyir/ 'di ltar yang / slob dpon gsang ba shes rab dang //de ltar de bzhin bzhi pa yang / /zhes bya ba la sogs pas 'chad par 'gyur ba yin no/ /rnal 'byor ma'i rgyud 'dir ni sdig pa mi dge ba'i chos rnams las ring du gyur pa kun du spyod pa'i phyir slob dpon te/ de nyid kyi de'i sdom pa yin pas so/ /slob dpon gyis dbang bskur ba'i ngo bo gang las kyi phyag rgya las skad cig ma bzhis dga' ba bzhi'i rang gi ngo bo nyid rab tu bsgrub pa zhes bya ba yin gyi/yang bya ba'i rgyud la sogs pa dang thun mong du gyur pa'i phyir mi ldog pa'i dbang bskur ba thob pas slob dpon gyis dbang bskur bas dbang bskur ba la ni mi bya'o//de lta bas na rnal 'byor dang rnal 'byor ma'i rgyud la sogs pa thams cad bshad pa dang nyan pa la sogs pa'i skal pa dang yang ldan par 'gyur ro zhes bya ba'i tshig 'di ni ci yang ma yin no/ /de lta bas na dang por re zhig dgyes pa'i rdo rje la sogs pa rnal 'byor ma'i rgyud rnams mnyan pa dang bsgom pa la sogs pa la dbang bar bya ba'i phyir slob dpon gyi dbang bskur ba nyid kyis dbang bskur bar bya'o//yang de ni mngon par rtogs pa ji lta ba bzhin du slob dpon dang gsang ba dang shes rab dang bzhi pa'i mtshan nyid kyis nye bar mtshon pa yin par rig par bya'o/ /de lta bu'i slob dpon gyi dbang bskur ba thob pa'i dbang po rtul po rnams la ni mos pas nges par bzung nas/las kyi phyag rgya dang spros pa'i phyag rgya bsgom pa bstan par bya ba yin no/ /de bzhin du rdzogs pa'i rim pa'i phyogs la yang gsang bar gnas pa'i nor bu bla ma'i man ngag nyid kyis skad cig ma bzhi'i rang bzhin dga' ba bzhi po nyams su myong ba de ni gsang ba'i dbang bskur ba zhes bya bar brjod de/spros pa bsgom pa la sbyor ba'i rnal 'byor pa rnams la bstan par bya ba ma yin pa'i phyir ro/ /'dir dbang bskur ba'i dbang po 'bring po rnams la ni dam tshig gi phyag rgya bsgom pa nye bar bstan cing bshad par bya'o//de bzhin du khyad par can gyi ye shes ni shes rab ste/ chos thams cad sems tsam nyid du shes pa'o/ /de rab tu bsgrub pa'i phyir dbang bskur ba ni shes rab ye shes kyi dbang bskur ba'o/ /yang de ni gzhan gyi dbang dang kun brtags dang yongs su gyur pa rnam par shes pa gsum gyi ngo bo bsdus pa'i gzugs can snying gi nor bur gang bla ma'i man ngag nyid kyis phyi rol gyi phyag rgya dang skad cig ma rnams yang dag par mtshon pa ni shes rab ye shes yin par rig par bya'o//dbang bskur ba des dbang bskur ba'i dbang po rab rnams la ni sgyu ma lta bu'i ting nge 'dzin gyis chos kyi phyag rgya nye bar bstan cing bshad par bya'o//de bzhin du bzhi pa yang yin te/ de ltar de bzhin yang zhes bya ba ste/ de zhes pa ni shes rab ye shes so/ /de bzhin zhes bya ba ni de bzhin nyid de yang dag pa'i mtha' dang chos kyi dbyings zhes bya ba rnams la don gyi khyad par yod pa ma yin no//dbang bskur ba gang gis de'i ngo bo nyid mthong ba'am rab tu bsgrub pa ste/ de bzhin zhes bya ba'i sgras brjod par bya ba yin no/ /yang zhes bya ba'i sgra ni shes rab ye shes kyi dbang bskur ba'i rjes thogs su yang sbyin par bya'o zhes bya ba'i don to//yang de ni phyi rol gyi phyag rgya dang / gang bla ma'i man ngag nyid kyis yul so sor nges par yongs su bcad pa ma yin pa'i mtshan nyid can skad cig ma'i phun sum tshogs pa la dmigs pa med par dmigs pa'i rnal 'byor gyis dmigs par byed pa de ni dbang bskur ba bzhi pa zhes bya bar brjod par bya ba'i man ngag nye bar bstan par byas pa tsam gyis ni dbang bskur ba bzhi par 'gyur ba ma yin no//gzhan du na/ 'di yis bkrus shing dbang bskur ba/ /zhes bya ba la sogs pas bcom ldan 'das kyis dbang bskur ba ni 'dir dri ma bkru bar bzhed pa yin na/ de ji lta na man ngag bstan pa tsam gyis yin par 'gyur/gal te bzhi pa'i bdag nyid can gyi de kho na nyid bstan na der ji ltar mi 'gyur zhe na de ni bden mod/ /'on kyang de kho na nyid ni ngag gi spyod yul ma yin pa'i phyir brjod par nus pa ma yin la/ thos pas bsgrub par yang mi nus so/ /de yang 'di skad du/ nang na gsal ba de nyid ni/ /ngag las mngon sum thos mthong yin/ /'on kyang sgra la rnam rtog gi/ /gzugs brnyan 'byung bar 'gyur ba yin/ /rang gi rnam rtog de de rgyas/ /brtags pa'i de nyid bsgoms pa yis/ /rgyud la rnam rtog 'khrug 'gyur na/ /de nyid rtog par ji ltar 'gyur/ / zhes bstan pa yin no/ /gal te dbang bskur bas de kho na nyid mngon sum du rtogs par 'gyur zhing / dri ma ma lus pa dag par 'gyur na/ de ltar na de'i skad cig nyid la phyag rgya chen po'i dngos grub ci'i phyir 'grub par mi 'gyur zhe na/ dbang po rnon po brtson 'grus 'bar ba rnams kyis 'grub pa nyid yin no//gang zhig sus kyang mi 'dod cing ma mthong bas de med par 'gyur ram ci/ de yang ji skad du/ rdo rje theg pa'i thabs kyis gang / /yid ni dag par byas gyur nas/ /bde ba chen po'i chos kyi sku/ /rang rig gsal por byed par 'gyur/ /don gyi stobs kyis thos pa yis/ / rdo rje gsum po rnam nges pas/ /bdag med pa ni nges rig nas/ /srid pa'i 'khrul pa kun nas gcod/ /de nyid rang sngags gyur pa ni/ /phun sum tshogs thabs rnyed par sla/ /rdo rje 'dzin pa de yi ni/ /dngos grub lag pa'i mthil na gnas/ /zhes bya ba la sogs pas bstan pa yin no/ / de lta bas na 'di ni ci yang ma yin te/ gang gi phyir dbang bskur ba bzhi pa'i dus de nyid du dbang po rab kyis 'jug pa'i sems can rnams kyis phyag rgya chen po'i dngos grub 'grub par 'gyur ro/ /yang de las gzhan pa rnams la ni phyag rgya chen po'i man ngag bstan par bya'o zhes bya bar gnas so/da ni/ shes rab rang bzhin la la nA/ /zhes bya ba la sogs pas yang dbang gi don rab tu bsgrub par bya ba'i phyir rtsa gsum gyi dbye ba bstan par bya ste/ la la nA ni g.yon pa'i rtsa ste A li'i rang bzhin shes rab kyi ngo bo nyid do/ /ra sa nA ni g.yas pa'i rtsa ste kA li'i rang bzhin thabs kyi ngo bo nyid do//de dag gcig pa'i ngo bo nyid dbus kyi yul na gnas pa ni a ba d+hU tI'o/ /la la nA ni chos kyi sku/ ra sa nA ni longs spyod rdzogs pa'i sku/ a ba d+hU tI ni sprul pa'i sku'o/ /de dag nyid ji ltar rigs par lus dang ngag dang yid do/ /'khor lo gsum rtsa gsum dang gnyis su med par sbyor ba las bde ba chen po 'byung bar 'gyur ro//bde ba chen po rtogs par gyur na ni dbang bskur ba bzhi dang skad cig ma dang dga' ba'i rab tu dbye ba yang rig pa nyid du 'gyur ro/ /ji ltar bskyed pa'i rim pa'i phyogs kyi 'khor lo'i grangs kyi rim pa rnam par gzhag pa de bzhin du dbang bskur ba'i phyogs la yang rtogs par bya'o//'phags pa'i bden pa bzhi zhes bya ba la sogs pa la yang dbang bskur ba bzhi dang rim pa bzhin te/ /sdug bsngal yongs su shes par bya/ /kun 'byung spang bar bya/ 'gog pa mngon du bya/ lam bsgom par bya ba'i rnam par dag pa'o//de bzhin du de kho na nyid ni bzhi ste/ bdag gi de kho na nyid ni/ phung po lnga ni mdor bsdus na/ /sangs rgyas lnga ru rab tu grags/ /rdo rje skye mched nyid dag kyang / /rdo rje mkha' 'gro ma'i dkyil 'khor/ /zhes gsungs pa dang / lha la sogs pa de kho na nyid ni dgyes pa'i rdo rje la sogs pa'i sgyu ma lta bu'i ngo bo nyid yin no//de yang ji skad du mkha' 'gro ma rdo rje'i gur las/ grogs dag chu nang zla ba la/ /brdzun min bden pa'ang min pa ltar/ /de bzhin dkyil 'khor 'khor lo'i lus/ /dang zhing gsal ba'i rang bzhin no/ /zhes gsungs pa yin no//sngags kyi de kho na nyid ni yid la bya ba yin zhing skyob pa yin pas sngags te/ stong pa nyid dang snying rje chen po gnyis su med pa'i rang bzhin byang chub kyi sems so/ /nye bar brtags nas ni de dag gsal bar byed pa'i yi ge a la sogs pa yang yin no/ /ye shes kyi de kho na nyid ni spros pa med pa bde ba chen po'i ye shes te/de bzhin du dga' ba rnams kyi rim pa'i dbye bas rig par bya'o/ /'di skad bstan par 'gyur te/ skad cig ma bzhi dang dbang bskur ba'i dbye ba nyid so sor bzhi bzhir dbye ba byas na rnam pa bcu drug tu 'gyur ro/ /de dag kyang dbang bskur ba gsum gyis rnam par gzhag par bya bar nus pa yin gyi dbang bskur ba bzhi pa bstan pa'i dus su ni chos thams cad mi dmigs pa la dmigs par sbyor bas nus pa ma yin no zhes bya bar bsams pa'o//sde ba zhes bya ba la sogs pa la/ sde pa ni dge slong gi dge 'dun gyi ste/ de ni brtag pa gnyis pa'i le'u bzhi pa las/gnas brtan sprul pa'i 'khor lo ste/ /zhes bya ba la sogs pas ston par 'gyur ro/ /da ni sems brtan par bya ba'i phyir dang sgrib pa thams cad zad par bya ba'i phyir phra mo'i rnal 'byor bstan par bya'o/ /A li dang kA li dang zhes bya ba la sogs pa la A li ni sna khung g.yon pa nas 'byung ba'i rlung ngo //kA li ni de las gzhan las 'byung ba'i rlung ngo / /de dag nyid nas 'byung ba dang gnas pa dang ldang ba'i rim gyis yi ge oM AHhUM gi gzugs kyis lhag par mos par byas la rnal 'byor pas bltas na sems kyi brten pa nyid thob par 'gyur zhing bde bar 'gyur/myur bar ting nge 'dzin yang thob par 'gyur ro/ /de la nyin zhag gcig la rlung gi 'pho ba bcu drug tu 'byung bar 'gyur ro/ /de ltar thams cad bzhi'o zhes bya ba ni tha dad du sbyar bar bya ba yin te/ dge 'dun phal chen no zhes bya ba'i rjes thogs su blta bar bya'o//gtum mo zhes bya ba la sogs pa la gsum pa ni shes rab ste/ nyon mongs pa dang nye ba'i nyon mongs pa ma lus pa rtsad nas 'byin pa'i rang bzhin can yin pa'i phyir ro/ /A li zhes bya ba ni rdo rje sems dpa' ste/ des na tsaN+Da lI zhes bya ba'i sgrar brjod do/ / lte bar 'bar zhes bya ba ni sna tshogs pad+ma'i lte bar 'dod chags chen po'i mes so/ /'bar nas ci zhig byed ce na/ de bzhin gshegs pa lnga bsregs shing / /zhes bya ba gsungs te/ phung po lnga bsregs pa ste/ dngos po med par byas zhes bya ba'i don to/ /spyan la sogs pa zhes bya ba ni sa la sogs pa'o//bsregs nas ci zhig byed ce na/ rje btsun snying rje'i zhes bya ba la sogs pa'i klus bskul ba'i rjes thogs su'o/ /ri bong can haM 'dzag ces bya ba la/ yi ge haM gi ngo bo nyid ri bong can te rdo rje sems dpa'o/ /'dzag pa ni rab tu 'bab pa ste/ brtse ba'i rdo rje bdag nyid kyi lus kyis 'gro ba'i don byed pa 'thob pa'o//'di ni bskyed pa'i rim pa'i bshad pa'o/ /gtum mo zhes bya ba la sogs pa la/ tsaN+Da ni shes rab ste yi ge a'o/ /A li ni rdo rje sems dpa' ste yi ge hUM ngo / /yi ge AHdang hUM ni tsaN+Da lI ste de dag gnyi ga ro gcig par gyur nas thig le'i gzugs kyis rdo rje nor bu'i rtse mo'i bug pa'i lte bar bde ba chen po 'dod chags kyi me 'bar bas bsregs pa'o//de bzhin gshegs pa lnga ste phung po lnga dang / spyan la sogs pa ste sa la sogs pa rnams bsregs nas 'dzag ces bya ba bde ba chen po'i 'khor lo nas ri bong can te byang chub kyi sems so/ / yi ge don gyi bshad pa'o/ /tsaN+Da chos 'byung dmar po ste/ /A li dang po'i yi ger dran/ /'bar ba kun du bsdams byas nas/ /rlung gis 'bad nas bskor byas pas/ /mig la sogs pa'i ye shes lnga/ /mdor na sangs rgyas lnga yin te/ /'byung ba lnga yi bdag bsregs pas/ /byang sems sems can don kun byed//ces bya ba ste/ yang dag par rab tu sbyin pa'i bshad pa'o/ /tsaN+Da ni shes rab ste g.yon gyi rtsa'o/ /A li ni thabs te g.yas kyi rtsa'o/ /de dag gnyi ga bla ma'i man ngag nyid kyis yang dag par 'byor par 'gyur ba ni tsaN+Da lI zhes brjod par bya'o/ / lte bar 'bar zhes bya ba 'dir lte ba'i sgras ni dbus kyi tshig ste de dag gi bar gyi a ba d+hU tI'o/ /bsregs shing zhes bya ba ni 'dod chags chen po'i mes phung po lnga rnams so/ /spyan la sogs zhes bya ba ni sa la sogs pa rnams so/ /bsregs te zhes bya ba ni bdag dang bdag gir byed pa bsregs pa'o//ri bong can haM 'dzag ces bya ba ni bde ba chen po'i ye shes 'byung bar 'gyur ba'o/ /de ni 'chad par 'gyur te/ gzhan gyis brjod min lhan cig skyes/ /gang nas kyang ni rnyed mi 'gyur/ /bla ma'i dus tshigs bstan pa las/ /rang gis shes 'gyur bsod nams kyis//zhes bya ba ste/ 'di yang yang dag par rab tu phyin pa'i bshad pa'o/ /tsaN+Da ni shes rab ste bskyed pa dang rdzogs pa'i rim pa'i ting nge 'dzin la spyod pa'o/ /A li ni snying rje chen po'i rang bzhin can gyi sems so/ /des na stong pa nyid dang snying rje ni tsaN+Da lI zhes bya ba'i sgras brjod do//lte ba ni de dag gi dbus phyag rgya chen po 'od gsal ba'i mtshan nyid can no/ /der gtum mo sbar ba dang bla na med pa'i shes rab ste/ des ci zhig byed ce na/ de bzhin gshegs pa lnga zhes bya ba la sogs pa gsungs te/ mi bskyod pa la sogs pa dkyil 'khor can dang dkyil 'khor pa dang /spyan la sogs pa rnams so/ /bsregs pa ni thal ba tsam yang ma lus par ro/ /phyi nas bsregs nas ri bong can haM zhes bya ba ni bdag dang bdag gis spros pa las gzhan yod pa ma yin pas sems tsam nyid ni bdag go zhes pa'o/ / bsregs pas ci zhig byed ce na/ ri bong can 'dzag ces bya ba gsungs te/ de phyir 'od gsal ba'i ting nge 'dzin las bzhengs nas gnas pa'i ri bong can te rdo rje 'chang ngo / /'das pa dang ni ma 'ongs dang / /da ltar ba ni srid gsum nyid/ /'od gsal bas ni rnam dag pa'i/ /skad cig de la ma lus mthong //zhes gsungs pas so/ /rdo rje rigs kyi le'u zhes bya ba la rdo rje zhes bya ba ni 'dir dgyes pa'i rdo rje'o/ /rigs ni lus so/ /yang na de 'byung ba ni rigs so/ /de mngon par gsal bar byed pa'i le'u ni rdo rje'i rigs kyi le'u'o/ /dgyes pa'i rdo rje'i dka' 'grel rnal 'byor rin po che'i phreng ba las le'u dang po'i 'grel pa'o// //nus pa rnam mang brjod pa dang / /rengs par byed dang skrod pa nyid/ /sde rings byed dang mngon spyod dang / /zhes bya ba la sogs pa gsungs pas/ de'i phyir le'u gnyis pa'i dbang du byas nas gsungs pa yin te/sngags kyi le'u zhes bya ba ni don dam par gyur pa'i yid kyis 'gro ba rnams skyob par byed pas na sngags te/ don dam pa'i byang chub kyi sems la bsngags zhes bya'o/ /sngags kyi rgyu mthun pa nyid yin pa'i phyir yi ge oM la sogs pa la yang de skad ces bya ste/ de gsal bar byed pa'i le'u la yang de skad ces bya'o//dbang po la sogs pa 'khor dang bcas pa ni 'byung po thams cad de/ 'di yang lha de dag gi yin pas 'byung po thams cad pa'o/ /gtor ma ni mchod pa'i phyir nye bar dgod pa'o/ /de'i don gyi sngags la yang de skad ces bya'o/ /sngags thams cad ces bya ba ni dgyes pa'i rdo rje'i bzlas pa'i sngags kyi tshig ste/yi ge oM dang por sbyar zhing hUM hUM hUM phaT ces bya bas brgyan cing swA hA mthar dbye bar bya'o/ /gzhan dag ni bla ma'i man ngag gis ci rigs par dbye bar bya'o/ /a phuHzhes bya ba la sogs pa la klus byin gyis brlab pa'i mtshe'u las sa nag po blangs nas klu mtha' yas kyi gzugs brnyan sor bzhi pa'i tshad gdengs ka bdun yod pa byas pa'o//bdud rtsi lnga zhes bya ba ni zho dang 'o ma dang mar dang ba'i chu dang lci ba'o/ /ba nag mo'i 'o mas dgong zhes bya ba ni kham phor ro/ /dkri zhes bya ba ni kha sbyor ro/ /gzhag ces bya ba ni rdzing bu'i nang du'o//bdag nyid kyis zhes bya ba ni 'gying ba dang bcas pa'i khro ba'i sems kyis so/ /a ka zhes bya ba ni pa na sa'o/ /pha rol sde zhes bya ba la sogs pa la/ bdud rtsi lnga zhes bya ba ni nang gi bdag nyid can no/ /tshangs pa'i sa bon zhes bya ba ni pA la sha'i sa bon no/ /dus ma yin pa'i dus zhes bya ba ni bdun nam bcu gsum gyi'o//rdo rje ma dang dkar mo dang / /zhes bya ba la sogs pa la ni 'di'i rnal 'byor ni 'di yin te/ yi ge A las nges par 'byung ba'i ro'i steng na gnas pa kha dog dkar mo gri gug dang thod pa dang kha T+wAM ga 'dzin pa'i rdo rje ma bsgom par bya'o/ / oM hU~M swA hA zhes bya ba sngon du bsnyen pa'i don du 'bum bzla bar bya'o/ /phyi nas kham por ma bsregs pa la rdo rgyus kyis yi ge paM bris la/ de'i dkyil du oM hU~M de ba dat+ta staM b+ha ya hU~M swA hA zhes bya ba bris te/ dur khrod kyi thal bas bkang nas kham por so ma btang ba gzhan zhig zhes kha sbyar du byas la/de'i steng du dbang chen gyi dkyil 'khor rdo rjes nye bar mdzes par byas pa zur bzhi pa bris la sa'i 'og tu bcug nas rkang pa g.yon pas mnan la/ sngar bstan pa lta bu'i ting nge 'dzin la gnas nas sngags bzla bar bya ba ste/ oM hU~M badzra de ba dat+ta staM b+ha ya hU~M swA hA zhes bya ba brgya rtsa brgyad dam stong bzlas na rengs par 'gyur ro//de bzhin du yi ge i las nges par rdzogs par gur gum gyi mdog can gyi dkar mo'i rnal 'byor bya ste/ zhags pa dang lcags kyu 'dzin pa'o/ /yi ge aM me tog ban+du ka'i mdog lta bu rang gi snying gar bsgoms la/ oM aM swA hA zhes bya ba'i sngags sngon du bsnyen pa'i don du 'bum bzla zhing /de nas bsgrub bya kha dog dmar po gos dang bral ba/ skra grol ba mdun du bsgoms la/ de'i b+ha gar yi ge oM me'i mdog can bsam mo/ /yang na skyes pa yin na snying gar te/ yi ge aM gi 'od kyis zhu zhing myos par 'gyur ba bsams la/oM aM gau rI che ge mo me g+ha sha mA na ya haM swA hA zhes bzlas shing zhags pas mgrin pa nas bcings lcags kyus snying ga nas phug nas yang dag par drangs nas/ rkang pa'i drung du nges par lhags par bsams na nges par dbang du 'gyur ro/ /de bzhin du yi ge i las nges par rdzogs pa'i chu ma'i rnal 'byor ma mdog sngon po mthe bo dang sdigs mdzub kyis phyag mtshan pa bsams la/snying gar nyi ma la yi ge khaM sngon po bsam zhing bsnyen pa'i don du sngar oM kha swA hA zhes bya ba 'bum bzlas la bsgrub bya gos dang bral ba/ skra bshig pa/ rnga mo sngon mo la zhon pa bsams la/kha lho phyogs su bstan nas 'khrugs pas dbyig pa thogs pa brims pas 'bros par 'gyur ba bsams la sngags bzla bar bya ste/ oM a khaM bIr yo gi nI che ge mo u tsa ta ya khaM hU~M hU~M hU~M phaT/ zhag bdun gyis nges par skrod par 'gyur ro/ /de bzhin du yi ge u las rdo rje mkha' 'gro ma'i rnal 'byor du bsgoms la snying gar nyi ma la yi ge dz-IM sngon po bsams shing /oM dzr-IM swA hA zhes 'bum bzlas na bsgrub bya rta dang ma he zhon pa phan tshun 'thab mo byed pa bsams la sngags bzla bar bya ste/ oM dzr-iM badzra DA ki nI de ba dat+ta dza ga dat+ta ya bid dwe Sha ku ru dzr-iM hU~M hU~M hU~M phaT ces bzlas na nges par phan tshun sdang bar 'gyur ro//de bzhin du yi ge a las yongs su rdzogs pa'i bdag med ma'i gzugs su gyur pa thod pa dang kha T+wAM ga dang gri gug 'dzin pa rnam par bsams la snying gar nyi ma las yi ge b+h+rUM sngon po blta zhing sngon du bsnyen pa byas la bram ze'i thod pa la dug dang skye tshe dang tshwa dang khrag rnams kyis 'khor lo rtsibs drug pa bris la/zur rnams su hU~M bri zhing / dkyil du oM b+h+rUM che ge mo dzo ra ya hUM zhes bya ba'am/ gnod pa gzhan dag gis sbyor bar 'dod na yang de'i ming gis brgyan zhing bsnun pa'i me la gdungs pas las thams cad bya'o/ /drag po'i las la ni sngags thams cad kyi mjug tu hU~M hU~M hU~M phaT ces bya'o//de bzhin du rang gi sa bon las yongs su rdzogs pa'i man+da ra ba'i me tog gi steng na gnas pa'i mkha' spyod ma bsgoms la sngon du bsnyen pa byas nas/ rlung dang me'i dkyil 'khor gyi steng du bsgrub bya myos par gyur par bsams la/ snying ga'i sa bon las 'od zer kha dog dmar po 'bar ba byung bas bsgrub bya'i sna khung g.yas pa nas zhugs nas snying phug ste sna khung g.yon pa las phyir byung nas snying ga'i sa bon du zhugs nas/sbubs kyi rlung yang dag par bkug cing sngags bzlas na/ nges par 'gugs par byed do/ /de bzhin du rang gi sa bon las nges par byung ba'i sa spyod ma'i rnal 'byor kha dog sngon po bsams la/sngon du bsnyen pa byas te/ yi ge g+hu las byung ba'i rdo rje 'bar ba bsgrub bya kha thur du bltas pa'i phyogs nas bcug par bsams la/ sngags bzla bar bya ste/ oM g+hu b+hU tsa re che ge mo mA ra ya hU~M hU~M hU~M phaT ces bya bas nges par 'chi bar 'gyur ro/ / dgyes pa'i rdo rje'i dka' 'grel rnal 'byor rin po che'i phreng ba las gnyis pa sngags kyi le'u'i 'grel pa'o// //lha'i le'u zhes bya ba la lha rnams te dgyes pa'i rdo rje dang rnal 'byor ma rnams kyi le'u'o/ /dgyes pa'i rdo rje la sogs pa rnams bskyed pa'i sbyor ba ji skad bstan pa bzhin du rim gyis rgyas par 'byung ba ni 'di las 'chad par 'gyur bas so//dang por zhes bya ba la sogs pa la/ snying rje la ltos nas te/ thams cad kyi dang por ni yid dang mthun pa'i gnas su gnas nas bde ba'i stan la 'dug ste/ gnas dang bdag dang rnal 'byor bsrung ba'i phyir oM rak+Sha rak+Sha hU~M hU~M hU~M phaT ces lan gsum gyi bar du brjod nas ras bris la sogs par gtogs pa'i bcom ldan 'das la rang gi sngags bzlas pa'i ar+g+has kun nas mchod la sdig pa bshags pa dang bsod nams la rjes su yi rang ba dang gsum la skyabs su 'gro ba byas nas/byang chub kyi sems nye bar gzhag pa'o/ /de nas dang po byams pa bsgom par bya ste/ sems can thams cad la bla na med pa'i bde ba nye bar sbyin par 'dod pa'i rnam pa can no/ /skad cig ma gnyis pa la ni de dag nyid kyis sdug bsngal thams cad sel bar byed pa'i rnam pa can gyi snying rje'o/ /gsum par zhes bya ba la/de dag nyid la lha'i bde ba rgyun mi 'chad par sbyin par 'dod pa'i rnam pa can gyi dga' ba'o/ /btang snyoms ni mtha' ma nyid na ste/ de dag nyid la nyon mongs pa dang nye ba'i nyon mongs pa ma lus pa'i gnyen por 'gyur ba lam nye bar bsgrub pa'i rnam pa can bsgom par bya'o zhes bya bar bsgrub pa yin no//'di dag ni rnal 'byor thams cad kyi thun mong gi dang po'i rnal 'byor gyi byed par 'gyur ba yin no/ /rnal 'byor gyi lus bstan pa ni/ de nas stong pa zhes bya ba ste/ de'i rjes la bsgom par bya/ /zhes bya ba'o/ /de ci zhig ce na/ stong pa'i byang chub yang zhes bya ba la sogs pa ste/ dngos po thams cad yid kyis dmigs pas na 'di dag thams cad sems tsam ste/phyi rol gyi yul ni yod pa ma yin pas phyi rol gyi rnam pa ltar 'khrul bar snang bar gyur te/ dper na rmi lam bzhin no zhes bya bar gcig tu nges pa yin no/ /de ltar snang ba'i rang bzhin gyi sems de yang gcig dang du ma'i rang bzhin dang bral ba nyid kyis snang ba med pa 'od gsal ba'i rang bzhin du mthong ba'o//gnyis pa la ni sa bon bsdu/ /zhes bya ba ni 'od gsal ba'i de nyid las ji ltar rigs par nyi ma la sogs pa'i dkyil 'khor gyi steng du 'od gyi phreng ba can gyi lha'i sa bon bltas la sa bon de las lha'i rnal 'byor pa'i rigs dpag tu med pa sprul nas 'gro ba rnams kyi don byas nas/sa bon de nyid du nye bar bsdus pa ni sa bon bsdu ba zhes bya ba ste de bsgom par bya'o/ /gsum pa la ni gzugs brnyan rdzogs/ /zhes bya ba ni sa bon de las lha'i sku sna tshogs pad+ma'i lte ba la gnas pa'i nyi ma la sogs pa'i dkyil 'khor gyi steng gi ro mnan nas/skyil krung phyed pa'i gar gyis rdzogs par 'gyur pa ni gzugs brnyan rdzogs pa ste/ de bsgom par bya'o/ /bzhi pa la ni yid 'bru dgod/ /ces bya ba ni rang gi snying gar nyi ma la sogs pa'i dkyil 'khor la gnas pa'i sa bon gyi yi ge bsgom par bya ba'o//'di ni sman pa'i rnal 'byor gyi ting nge 'dzin to/ /da ni rnal 'byor gnyis pa'i dbang du byas nas/ re phas zhes bya ba la sogs pa gsungs te/ 'dir yang stong pa'i byang chub kyi bar gyi bya ba yongs su rdzogs par bya ba yang snga ma bzhin blta bar bya'o/ / re phas zhes bya ba la sogs pa'i tshigs su bcad pa gnyis pa de las khyad par du bskrad par bya ba'i phyir gsungs pa yin te/ raM me'i mdog can las nyi ma'i dkyil 'khor bltas la/ de'i steng du hU~M sngon po las sna tshogs rdo rje'o/ /de dag las thad kar rdo rje'i ra ba dang / steng du rdo rje'i bla re dang /'og tu rdo rje'i rang bzhin gyi sa gzhi dang / phyi rol du rdo rje 'bar ba bsgom par bya'o zhes bya ba ni tshigs su bcad pa'i don yin no/ /de nas sngags kyis byin gyis brlab par bya ste/ oM rak+Sha rak+Sha hU~M hU~M hU~M phaT swA hA zhes bya bas so/ /dang por ro ni zhes bya ba ni rnal 'byor gyi lus kyi dang por zhes bya ba'i don te/rdo rje ra ba'i nang gi sna tshogs pad+ma dang nyi ma'i dkyil 'khor la sogs pa'i steng du ro bsgom par bya'o/ /'di lha'i gdan du ji ltar rung zhe na/ chos kyi dbyings kyi bdag nyid brjod/ /ces bya ba gsungs te/ ro ni bdag med pa'i ngo bo'o/ /bdag med pa ni chos kyi dbyings so//chos kyi dbyings la gnas pa ni mkha' 'gro dang mkha' 'gro ma rnams so/ /rnal 'byor pa ni sgom pa po ste de'i steng du gnas nas bdag nyid he ru ka nyid du lhag par byas nas rab tu bsgrub par bya ba ste/ rnal 'byor 'bring po'i bya ba'o/ /rang gi snying gar zhes bya ba la sogs pa la/zhe sdang bdag nyid rnam par bsgom/ /zhes bya ba ni bdag nyid he ru ka'i gzugs su bsgom par bya'o zhes bya ba'i don to/ /rgyud 'dir gtso bo dgyes pa'i rdo rje'i dbang du byas nas lha thams cad kyi rnal 'byor yang rab tu shes par bya'o/ /gzhan dag ni rang gi phyag mtshan dang sa bon yongs su gyur pa las ci rigs par rtogs par bya ba yin no//'dam skyes sngon po zhes bya ba ni ut+pal sngon po'o/ /dad pas zhes bya ba ni rang gi 'dod pa ste/ kha dog rnams ji ltar mos pa de lta bur bsgom par bya'o/ /rnal 'byor gsum pa'i dbang du byas na nam mkhar zhes bya ba la sogs pa gsungs te/gnyis pa'i bya ba ji lta ba de ltar gsum pa'i yang yin pas dang po'i rtsom pas lhag par bstan pa yin no/ /snying ga'i sa bon gyi 'od zer gyis bkug pa'i bcom ldan 'das nam mkhar bltas la yid kyis rnam pa sna tshogs pa'i mchod pas mchod de/ /gau rI la sogs pa'i lha mo brgyad kyis kyang mchod par bya'o//ri dgas mtshan ma ni ga bur ro/ /bdud las rgyal ba zhes bya ba ni shI la'o/ /snod ces pa ni thams cad du sbyar bar bya'o/ /chu lag ni mi bskyod pa'o/ /sman ni bzhi mnyam pa'o/ /rdo rje ni sha li dza'o/ /ro 'dzin zhes bya ba ni sbrang rtsi'o/ /cang te'u ni tri pi ta'o//g.yung mos zhes bya ba ni ji ltar 'os par gyur nas 'khyud nas de ltar mchod par byed pa'o/ /de ltar bcom ldan 'das la mchod par byas nas gnyis pa'i bya ba ltar ro'i gdan la sogs pa'i mthar thug pa'i bya ba de gsum pa'i yang yin no/ /yang 'dir rnal 'byor gyi lus ni mngon par byang chub pa rnam pa lnga ste/de bstan pa'i phyir A li zla ba zhes bya ba la sogs pa gsungs pa yin te/ a la sogs pa dbyangs kyi yi ge bco lnga ni A li'o/ /ka la sogs pa gsal byed kyi yi ge sum cu rtsa bzhi ni kA li ste/ ro'i snying gar a la sogs pa yongs su gyur pa las byung ba'i zla ba ni A li zla ba'o//ka la sogs pa yongs su gyur pa'i nyi ma ni kA li'i nyi ma'o/ /sa bon nang du son gyur bsgom/ /zhes bya ba ni zla ba dang nyi ma'i dkyil 'khor gyi steng du sa bon yongs su gyur pa las byung ba'i phyag mtshan de'i lte bar sa bon bsgom par bya'o zhes bya ba'i don to/ /de nyid sems dpa' zhes byar brjod//ces bya ba ni sa bon de nyid rdo rje 'chang yin no zhes brjod pa'o/ /khyad par ji lta bu can zhig ce na/ mchog tu dga' ba'i rang bzhin can/ /zhes bya ba'o/ /rnam par spro zhes bya ba ni sa bon de nyid las dgyes pa'i rdo rje'i sku dang mtshungs pa sna tshogs kyis khyab par spro bar bya'o//bsdus nas snying gar zhes bya ba ni de dag nyid yang dag par bsdus nas sa bon de nyid la gzhug par bya'o/ /de nas rnal 'byor pa de zhe sdang gi bdag nyid du gyur pa de zla ba dang nyi ma dang mtshan ma dang sa bon yongs su gyur pa las he ru ka'i gzugs su gyur pa'o/ /'di ni mngon par byang chub pa rnam pa lnga yin no//de yang ji skad du le'u brgyad pa las/ zla ba me long ye shes ldan/ /bdun gyi bdun pa mnyam nyid ldan/ /lha yi sa bon phyag mtshan ni/ /so sor rtog par brjod par bya/ /thams cad gcig gyur nan tan nyid/ /rdzogs pa chos dbyings dag pa ste/ /zhes gsungs pa yin no//sngo dang nyi ma zhes bya ba la sogs la gsum po 'di dag ni dpa' bo gcig pu'i rnal 'byor te/ lha thams cad kyi thun mong du gyur ba yin no/ /da ni dgyes pa rdo rje rnam pa bzhi dang / bdag med ma'i rnal 'byor bzhi pa dkyil 'khor gyi 'khor lo'i bdag nyid can mdor bstan par bya ba'i phyir/dur khrod ces bya ba la sogs pa gsungs te/ rnal 'byor gsum pa'i bya ba ji lta ba bzhin du bzhi pa la yang blta bar bya'o/ /rdo rje ra ba'i nang du 'jigs su rung ba'i dur khrod brgyad kyi dkyil 'khor gyi gzhal yas khang gi nang du mgon po dgyes pa'i rdo rje gau rI la sogs pa rnal 'byor ma brgyad kyis yongs su bskor ba'o//dbugs rgyu zhes bya ba ni ro gnas par gyur pas zhes bya ba'i nges pa'i tshig gi yi ge phyis pa ste/ ro'i gnas zhes bya ba'i don to/ /'chad par 'gyur ba'i le'u brgyad pa'i rdzogs pa'i yang dur khrod ces bya ba'i sgra 'dis mdor bstan pa byas pa yin te/ dur khrod ces bya ba bdag med pa'i lus la mgon po mchog tu dga' ba'i rang bzhin bzhugs pa yin no//lus ji ltar dur khrod yin zhe na/ dbugs rgyu zhes pa'i rigs pa 'dis/ /dur khrod ces ni mngon par brjod/ /ces bya ba'o/ /da ni dgyes pa'i rdo rje phyag bzhi pa khyad par du brjod par bya ba'i phyir/ phyag bzhi ni bdud bzhi las rnam par rgyal ba zhes bya ba la sogs pa gsungs te/ bcom ldan 'das kyi gzugs can ma/ /zhes bya ba ni de'i dbyibs dang kha dog can phyag gnyis na gri gug dang thod pa 'dzin par bsgom par bya'o/ /phyag drug pa'i shes rab rdo rje lcags sgrogs ma yang de bzhin no//rgyud 'dir dkyil 'khor gyi 'khor lo'i phyogs la phyag gnyis pa'i shes rab bdag med ma yin te/ spyir dgyes pa'i rdo rje'i grub pa yin pa'i phyir ro/ /Dom+bi ni thams cad du mchod pa'i lha mo yin gyi/ phyag rgya ni ma yin no zhes bya ba ni gzhung lugs so/ /dgyes pa'i rdo rje'i dka' 'grel rnal 'byor rin po che'i phreng ba las le'u gsum pa'i 'grel pa'o// //dbang bskur ba ni rnal 'byor pa thams cad kyi thun mong gi bsgom pa yongs su rdzogs par byed pa ste/ de bstan pa'i phyir lha dbang bskur ba'i le'u zhes bya ba la sogs pa gsungs te/ dbang bskur ba ni bag chags dang bcas pa'i sgrib pa thams cad dag par bya ba'i phyir ro//spyi bor rang gi rigs kyi zhes bya ba ni lha rnams la ji ltar 'os par de bstan par bya'o/ /lha'i gzugs su gzhag go zhes bya ba ni rang gi 'dod pa'i lha de'i gzugs su ste der gzhag par bya'o/ /dgyes pa'i rdo rje'i dka' 'grel rnal 'byor rin po che'i phreng ba las le'u bzhi pa'i 'grel pa'o// //de ltar lha'i rnal 'byor bstan nas de yang de kho na nyid la mos pa med pa la myur du byang chub thob pa yod pa ma yin pas/ de nas de kho na nyid kyi le'u zhes bya ba gsungs te/ de kho na nyid gsal bar byed pa de la de skad ces bya ba/gzugs ni sngon po dang ser po la sogs pa ste de ni med do/ /ja ltar mthong ba nyid ma yin nam de ji ltar med ce na/ rang gi ngo bos med de/ gang gi phyir bcos pa ma yin pa gzhan la ltos pa med pa'i gnyug ma'i gzugs rang bzhin can de'i rnam pas med de rten cing 'brel bar 'byung ba'i phyir ro//gang rten cing 'brel bar 'byung ba de nyid ni dngos po rnams kyi skye ba med pa'o/ /gal te skye ba'i sngon rol du dngos po rnams kyi ngo bo nyid yod pa zhig tu gyur na ni de ltar na bdag bden pa mthong bar bya ba'i phyir rgyu gzhan la ltos par mi 'gyur ro/ /rgyu gzhan la ltos na ni dngos po rnams ngo bo nyid du grub bo//de yang ji skad du klu sgrub zhabs kyis/ gzhan la ltos pa med pa'i phyir/ /rang bzhin bcos ma ma yin no/ /zhes gsungs pa yin no/ /gal te dngos po rnams rang bzhin med pa yin pas rang bzhin dmigs par mi 'gyur na/ rnam pa sna tshogs pa 'di ji ltar snang bar 'gyur zhe na//byis pa rnams la snang ba kho na yin te/ snang ba tsam gyis rang gi ngo bo nyid 'grub par 'gyur ba ni ma yin no/ /skra shad dang zla ba gnyis dang rma bya'i mdongs dang / sbrang ma la sogs pa rnams kyang ci rab rib can rnams la snang ba ma yin nam/ gal te de dag la ni rab rib kyi stobs kyis snang bar gyur pa yin no zhe na/gzhan dag gis kyang ma rig pa'i ling tog gis blo'i mig nyams par byas pas dngos po thams cad rang bzhin gyis yod pa ma yin na yang rab rib can gyis nye bar dmigs pa'i skra la sogs pa bzhin du mdun du grub par gyur nas mthong bar 'gyur gyi/ blo'i mig gi ma rig pa'i ling tog dag par gyur pa'i 'phags pa rnams la ni ma yin no//de yang ji skad du/ byang chub sems dpa' sgrib pa thams cad rnam par sel bas bcom ldan 'das la bstod pa las/ gdod nas zhi ba skye ba med/ /rang bzhin gyis ni mya ngan 'das/ /chos kyi 'khor lo bskor ba na/ / mgon po khyod kyis chos rnams gsungs/ /zhes gsungs pa yin no/ /de lta bas na gzugs la sogs pa rnams rang gi ngo bo nyid kyis yod pa ma yin no zhes gsungs so/ /mthong ba med ces bya ba la sogs pa la gang gzugs la blta ba mig gi rnam par shes pa la sogs pa'i chos de dag ni yod pa yang ma yin te/chos thams cad ma skyes pa'i phyir ro/ /de bzhin du sgra la sogs pa la yang sbyar bar bya'o/ /sems med ces bya ba la sogs pa la sems ni yongs su grub pa rnam par shes pa'o/ /sems las byung ba ni gzhan gyi dbang dang kun tu brtags pa ste/ gsum po 'di dag don dam par yod pa ma yin pa nyid do//gal te de ji ltar med/ bcom ldan 'das kyis kyang / kye rgyal ba'i sras dag khams gsum po 'di dag ni sems tsam mo zhes gsungs pa de ji ltar yin zhe na/ de ni bden la 'on kyang gzugs la sogs pa la mngon par zhen pa'i gdul bya rnams kyi mngon par zhen pa spang ba'i phyir yin no//don de nyid klu sgrub zhabs kyis/ 'di dag thams cad sems tsam zhes/ /thub pa yis ni gang gsungs pa/ /byis pa'i skrag pa spang phyir te/ /de ni yang dag de nyid min/ /zhes gsungs pas des na sems de ni yod pa ma yin no/ / 'di ni dngos po thams cad kyi de kho na nyid bstan pa yin no/ /da ni nang gi bdag nyid can gyi rnal 'byor bstan pa'i phyir/ skyed byed ma zhes bya ba la sogs pa gsungs te/ skyed byed ma ni phan pa ston par byed pa'o/ /sring mo ni brtse ba can no/ /gar ma ni gsal bar spyod pa'o/ /chos ma ni dkar po'i las la dga' ba'o//rdo rje ma ni bsam gtan la dga' ba'o/ /gdol pa mo ni nga rgyal spangs shing bzod pa'i ngang tshul can no/ /bram ze ma ni kha na ma tho ba med pa'i las la dga' ba'o/ /thabs dang shes rab ces bya ba la sogs pa la/ bdag med ma ni shes rab bo/ /dgyes pa'i rdo rje ni thabs so//'di dag nyid kyi gzugs can la 'chad par 'gyur ba'i lugs kyis mchod par bya'o/ /de nyid rig pas zhes bya ba ni de nyid dga' ba'o/ /rab tu 'bad pas zhes bya ba ni gsang ba'i phyir 'bad pa ste/ ji ltar grags par mi 'gyur ba'o/ /grags na mthong ba dang ma mthong ba'i skyon bstan pa'i phyir ma gsang zhes bya ba la sogs pa ste yi ge'i don to//skyed byed ma zhes bya ba la sogs pa la skyed byed ma ni gnyis spangs pa'o/ /srin mo ni rkyang ma'o/ /dang zhes bya ba ni ro ma bsdus te de dag mchod par bya'o/ /rnal 'byor ni yang dag par sbyar ba'o/ /shes rab dang thabs kyi rang bzhin can gyi rtsa gsum po de dag nyid 'byor pa las bde ba chen po 'byung bar 'gyur ro//de'i phyir de'i rnal 'byor rig pa'i rnal 'byor pas so/ /rtag tu zhes bya ba ni dus thams cad du bde ba chen po'i rang bzhin gyis mchod pa bya'o/ /gar ma zhes bya ba la sogs pa la lce dang ro dang de'i rnam par shes pa dang gsum ni gar ma'o//reg pa dang reg bya'i dang po dang / de'i rnam par shes pa ni tshos ma'o/ /rna ba'i dbang po dang sgra dang de'i rnam par shes pa ni rdo rje ma'o/ /sna dang dri dang de'i rnam par shes pa ni gdol pa ma'o/ /mig dang gzugs dang de'i rnam par shes pa ni bram ze ma'o//thabs dang shes rab ces bya ba la sogs pa la chos thams cad stong pa nyid ni shes rab bo/ /snying rje chen po ni thabs so/ /de dag gi cho ga ni bde ba chen po'i rang bzhin gyi ting nge 'dzin to/ /des rtag tu mchod pa ni/ rtag tu nyams su myong bar bya//zhes bya ba'i don to/ /ci sgra dang gzugs dang ro la sogs pa 'di dag rnal 'byor pas yongs su spang bar bya ba zhig gam zhe na/ bstan pa nyid ces bya ba gsungs te/ rab tu 'bad pas zhes bya ba ni shin tu 'bad pas so/ /ji ltar grags par zhes bya ba ni ji ltar sgra la sogs pa gsum du dmigs par mi 'gyur bar ro//gal te gsum dmigs par 'gyur na skyon yod ce na/ ma gsang zhes bya ba la sogs pa gsungs te/ sbrul la sogs pa ni 'khor ba pa'i sdug bsngal gyis zil gyis gnon par 'gyur ba'o/ /sbrul ni sbrul dang stag la sogs pa'o/ / sa spyod ni sha za la sogs pa'o/ /gal te mig la sogs pa 'di dag phyag rgya'i sgras ji ltar brjod par bya ba yin zhe na/ gzugs la sogs pa 'di dag nyid rigs lnga zhes byas so/ /de lta na yang mi shes so zhe na/ de'i phyir rdo rje 'dis ni zhes bya ba la sogs pa gsungs so/ /rdo rje ni mi phyed pa'i ye shes te 'di dag gdab pa'o//rgyas gdab pa ni gdab pa ste/ 'dis bde ba chen po skyed par byed pas na de'i rgyus phyag rgya zhes brjod par bya ba'o/ /rdo rje pad+ma zhes bya ba la sogs pas ni bstan pa'i don de nyid gsal bar byed do/ /rigs ni zhes bya ba la sogs pa ni rdo rje pad+ma zhes bya ba la sogs pa'o//de bzhin nyid gshegs shing zhes bya ba ni 'od gsal bar zhugs pa'o/ /dpal ldan zhes bya ba ni bsod nams dang ye shes kyi tshogs yang dag par bsags pa'o/ /slar yang gshegs pa zhes bya ba ni 'od gsal ba las langs nas 'gro ba rnams kyi don mdzad pa'o/ / rigs ni zhes bya ba la sogs pa la thugs dang / rtag pa dang / rin po che dang / gsung dang don yod pa dang / snying stobs can te rigs drug go/ /rdo rje sems dpa' bsdus na rigs lnga'o/ /de dag kyang bsdus na mi bskyod pa dang rtag pa dang gsung gi bdag po zhes bya ba'o/ /'di skad bstan par 'gyur te/mig dang rna ba dang sna dang lce dang lus dang yid ces bya ba'i rigs drug ni mdor bsdus na gzugs dang / tshor ba dang / 'du shes dang / 'du byed dang / rnam par shes pa zhes bya ba ni de bzhin gshegs pa lnga'o/ /yang de ni rnal 'byor pa'i lus dang ngag dang yid ces bya ba'i rigs gsum mo//sgom pa po med ces bya ba la sogs pa la chos thams cad de bzhin nyid kyi rang bzhin yin pa'i phyir sgom pa po dang / bsgoms pa dang / bsgom par bya ba gsum don dam par dmigs par mi 'gyur ro/ /de ltar na ji ltar 'jig rten gyis mthong bar 'gyur zhe na/spros pa med pa'i rang bzhin las/ /zhes bya ba gsungs te/ spros pa ni sna tshogs kyi mtshan nyid can no/ /de'i gcig dang du ma'i rang bzhin dang bral ba nyid kyi de dag gi skyob med pa'i mtshan nyid ni de bzhin nyid do/ /rnam pa de lta bur yod do zhes bya bar dgongs pa'o//rnam snang zhes bya ba la sogs pa la/ 'od gsal ba de nyid ni rnam par snang mdzad kyi rang bzhin nyid do/ /de nyid ni mi bskyod pa ste/ nyon mongs pa las bskyod par mi nus pa'i phyir ro/ /de nyid ni don yod de/ rnam pa thams cad kyis 'gro ba rnams kyi don mdzad pa'i phyir ro//de nyid ni rin chen te/ sangs rgyas kyi chos rin po che thams cad kyi rten du gyur pa'i phyir ro/ /de nyid ni 'khor 'das te/ de dag rnam pa thams cad yongs su spyod pa'i phyir ro/ /de nyid ni sems dpa' ste/ ye shes lnga'i rang bzhin gyi phyir ro/ /tshangs pa zhes bya ba la sogs pa la/de nyid ni tshangs pa la sogs pa yin par brjod par bya'o/ /ji ltar byas nas she na/ sgrib bral zhes bya ba gsungs te/ nyon mongs pa rnams lhag ma ma lus par bral ba ni thar pa ste/ ye shes kyi gzugs can yin pa'i phyir ro/ /sangs rgyas kyi de kho na nyid ni sangs rgyas te/ de lta bas na de nyid ni sangs rgyas so/ /'jug phyir zhes bya ba la/ de nyid du de'i bdag nyid kyi 'jug pa'o/ /rtag tu dge ba zhes bya ba ni de nyid ni mchog tu dge ba'i de bzhin nyid yin pa'i phyir zhi ba nyid do/ /thams cad kun gyi zhes bya ba la sogs pa la/ ji ltar na de thams cad yin zhe na/ gang gi phyir 'dis rgyu ba dang mi rgyu ba thams cad la mngon par khyab pa de'i phyir de thams cad ces bya'o//dam pa'i bde ba zhes bya ba ni zag pa med pa'i bde ba'i ngo bo nyid yin pa'i phyir ro/ /de nyid ni de kho na nyid ces bya ba'o/ /rnam sangs rgyas zhes bya ba ni de nyid bla na med pa'i dga' ba'i tshor ba yin pa'i phyir ro/ /tshangs pa zhes bya ba la sogs pa mdor bstan pa'i rgyas par bstan pa yin no//gal te 'dis dngos po thams cad la khyab par gyur pa zhig yin na/ 'di ji ltar goms par bya bar nus/ /gang du ni goms par bya zhes som nyi za na de'i phyir/ gang phyir lus las byung ba nyid/ /ces bya ba gsungs te/ da ni lus nyid las byung ba'i phyir de lus nyid la goms par bya ba yin no//de lta bas na/ lha zhes mngon par brjod par bya/ /zhes bya ba ste dgyes pa'i rdo rje dang rdo rje rnal 'byor ma la sogs pa'i lha rnams te/ de dag nyid bde ba chen po'i rang bzhin can kyi gnyis su med pa'i ye shes so/ /de nyid ni lus la gnas pa nyid yin no//de nyid ni don dam par na sangs rgyas bcom ldan 'das zhes bya'o/ /ji ltar na bcom ldan 'das zhes brjod par bya zhe na/ bcom pa zhes bya ba la sogs pa gsungs so/ /da ni skyed byed ces bya ba la sogs pa'i sgras bla na med pa'i shes rab brjod par bya ba yin pas phyi dang nang gi bdag nyid can las khyad par du bstan par bya ba'i phyir/ma zhes brjod ces bya ba la sogs pa gsungs te/ bde ba chen po'i rnam pa sna tshogs pa 'di dag skyed par byed pas ma zhes brjod do/ /kun rdzob dang don dam pa'i bden pa dag rnam par 'byed par byed pa'i phyir sring mo'o//btso blag ma zhes bya ba la sogs pa la/ bla na med pa'i bde bas sems can thams cad la chags par 'gyur ba'i phyir btso blag ma'o/ /bla na med pa'i sangs rgyas kyi yon tan rnams kyis yongs su 'gengs par byed pa'i phyir bu mo'o/ /las dang po'i sems can rnams kyis brtan par bya bar mi nus pa'i phyir gar ma'o//dbang po rnams kyi yul ma yin pa'i phyir g.yung mo zhes bya ba'i sgras brjod par bya'o/ /gal te thams cad rdzogs pa'i rim pa'i nang du 'dus par 'gyur na/ bzlas pa dang bsam gtan dang phyag rgya dkyil 'khor la sogs pa gang dag gsungs pa de dag ci thams cad du med pa zhig yin nam/'on te yod pa zhig yin zhe na/ des 'dul ba'i las dang po pa rnams la de yod pa nyid du bstan pas de dag yongs su gzung bar bya ba yin no/ /de nyid kyi phyir spros pa med pa'i rang bzhin las/ sngags dang lha ni yang dag gnas//zhes gsungs pa yin no/ /gal te de ltar na rdzogs pa'i rim pa'i phyogs la bzlas pa dang / bsam gtan la sogs pa rnams ji ltar bya ba yin zhe na/ de'i phyir/ brjod pa bzlas par yang dag bshad/ /ces bya ba la sogs pa gsungs te/ brjod pa ni mngon par rtogs pa dang rnam par gzung bar bya'o//gang gi zhe na/ A li zhes bya ba ste/ g.yas pa dang g.yon pa'i sna'i sbubs kyi rlung du rtogs pa la nges par rtogs pa'o/ /de yang bla ma'i man ngag las nges par gzung bar bya'o/ /bzlas pa ni de nyid las rdo rje bzlas pa zhes bya ba'i sgras brjod par bya'o/ /dkyil 'khor yin zhes bya ba la sogs pa la dkyil ni snying po ste/bde ba chen po'i ye shes so/ /de len par byed pa ni 'khor te dkyil 'khor zhes bya'o/ /de ci zhig ce na/ rkang pa'i rjes zhes bya ba gsungs te/ rkang pa'i mthe bong dag dam du bskums pa'o/ /nyed phyir dkyil 'khor brjod par bya//zhes bya ba ni nyed cing 'dzin pa zhes bya ba'i skad kyi dbyings kyis bde ba chen po 'dzin par byed pa la dkyil 'khor zhes bya'o/ /man ngag 'di ni bde ba chen po'i rnam par 'dzin par byed pa'i thabs yin no/ /lag pa bsgyur ba zhes bya ba ni mthe bo gnyis kyis ming med gnyis bsdams pa ni lag pa bsgyur ba'o//de nyid ni phyag rgyar 'gyur ba'o/ /sor mo nyid pa de bzhin no/ /zhes bya ba ni 'dir sor mo'i sgra ni ling+ga dang lce'o/ /de dag gis nyed pa ni gyen du sbyor ba'o/ /gang bsams pa de ni zhes bya ba la sogs pa la/ de ni zhes bya ba ni de kho na nyid kyi le'u gang du bsams pa ma lus pa skye ba med pa'i mtshan nyid can bsgom par bya ba ste/de lta bas na gang gi phyir mchog tu snying po 'gyur ba de rnam par bsam par bya'o/ /'od gsal ba'i mtshan nyid de nyid rnam par bsam par bya ba yin pas de'i phyir de nyid bsam par bya ba'o/ /pha ni rdo rje 'chang ste gsum pa'i don gyi bdun pa yin te/rdo rje 'chang gis brnyes pa'i bde ba gang yin pa'i bde ba bskyed par bya'o/ /rang gis zhes bya ba ni phyi rol gyi phyag rgya la ltos pa med pa nyid du nye bar spyod par byed pa'o/ /de ni bsam gtan no zhes bya ba la sogs pas 'od gsal gyi bsam gtan gsungs pa der ni bsam gtan pa dang bsam gtan bya ba dang bsam gtan zhes bya ba gsum char yang yod pa ma yin na de ji ltar bsgom par bya zhe na/bde ba gang gis 'chi ba 'dir/ /zhes bya ba la sogs pa gsungs te/ 'chi ba ni thar pa'o/ /de nyid du sems dang sems las byung ba dang ma rig pa'i mtshan nyid rnams nub par gyur pa de ni 'chi ba zhes bya'o//bde ba gang gis zhes bya ba ni nyon mongs pa dang nye ba'i nyon mongs pa ma lus pa zad pa'i mtshan nyid can bde ba chen po zhes bya ba'o/ /dgyes pa'i rdo rje'i dka' 'grel rnal 'byor rin po che'i phreng ba las lnga pa de kho na nyid kyi le'u'i 'grel pa'o// // da ni rnal 'byor pa rtag tu bsgom pa la dga' ba yin du zin kyang spyod pa med par myur du byang chub thob par mi 'gyur ro zhes bstan pa'i phyir/ de nas gzhan yang rab bshad bya/ /zhes bya ba la sogs pa gsungs te/ bla ma sangs rgyas kyi bka' dang / dka' thub kyi sdug bsngal byed pa ni spyod pa ste bshad par bya ba'o//pha rol song zhes bya ba ni shin tu 'jig rten las 'das pa'o/ /mchog ni gtso bor gyur pa ste/ gang gis rtogs par 'gyur zhing rab tu go bar 'gyur ba'o/ /gang gis zhes bya ba ni gang gis so/ /ci zhig rab tu go bar 'gyur zhe na/ grub mtha' nges par zhes bya ba'o//dngos grub rgyu zhes bya ba ni dngos grub kyi don du tshe 'di nyid la dngos grub 'byung ngam mi 'byung ba mtshan ma thob pa la nges par 'gyur ba'o/ /sgom pa po zhes bya ba ni rnal 'byor pa spyod pa po ste/ lha rdzas kyi rus pa'i rang bzhin nyid do/ /mi 'chi bcu phyed ni bdud rtsi lnga'o/ /he ru ka sbyor zhes bya ba la sogs pa la/gnas zhes bya ba ni slong mo pa la sogs pa rgyu ba'o/ /rigs lnga ni shin tu dman par 'gyur ba'am/ rigs lnga zhes bya ba 'di bden pa la mngon par zhen pa'i byis pas rnam par brtags pa ste/ sdig pa la sogs pa'i skyon dang mtshungs par ldan pa'i phyir zhes byas nas so//rang gi ngo bos ni rigs gcig kho na yin te/ ji ltar byas nas she na/ rigs dag du ma nyid kyis ni/ /gang phyir dbye ba mtshon mi bya/ /zhes bya ba gsungs te/ skyob tha dad pa'i srog chags rnams kyi rnam pa tha dad pa nyid yin no/ /'di lta ste glang po rta dang phag dag gi rigs gcig pa rnams kyi rnam pa ni gcig pa nyid yin te/ji ltar ba lang dag dang glang po ni glang po dag dang ngo / /de dag kyang kha dog tha dad kyang rigs tha dad du mi 'gyur te/ de ltar na 'jig rten gyi tha snyad du yang rigs gcig pa nyid du grub na/ rnal 'byor gyi kun rdzob tu lta smos kyang ci dgos te/thog pa med pa dang ldan pa'i 'khor bar thams cad kyang rigs thams cad yin pa'i phyir ro/ /spyod pa dang rjes su mthun pa'i gnas bstan pa'i phyir/ shing gcig gam zhes bya ba la sogs pa gsungs te/ gang gi grib ma shing gzhan la mi 'phog cing gang gzhan gyi grib mas kyang mi 'phog pa de ni shing gcig go//gtsor rnal 'byor rgyun mi gcod pa 'di ni spyod pa ste/ shing gcig la sogs pa dben par rigs so zhes bya bar dgongs so/ /'di ni ma brtags pa dang yid gnyis kyis bya ba ni ma yin no zhes bya ba bslab pa'i phyir/ cung zad drod ni zhes bya ba la sogs pa gsungs te/drod ni ting nge 'dzin dang sngags las byung ba'i mthu ste/ de thob par gyur nas bya'o zhes bya bar dgongs pa'o/ /sbrul dang stag dang mi dang mi ma yin pa la sogs pas ji ltar zil gyis mi non cing bsrung bar 'gyur la/ de dag gis mi 'jigs pa dang bkres pa dang skom pa la sogs pas kyang mi gnod pa ste/gal te tshe 'di nyid la phyag rgya chen po'i dngos grub thob par 'dod par gyur pa de'i tshe spyod pa 'di spyad par bya'o zhes bya bar dgongs so/ /rdo rje bu mo 'di khyer nas/ /zhes bya ba la sogs pa la/ rdo rje rigs kyi bu mo kho na'o/ / rtogs par bya ba ni rigs pa nyid yin pas te/ de ni rigs rnams kyi mchog nyid yin pa'i phyir dang / gzhan gyis mi 'phrogs pa nyid yin pa'i phyir ro/ /byang chub sa bon nyams myong ba/ /zhes bya ba ni dbang bskur ba la sogs pas de 'dus byas pa'o/ /rdo rje mchog dang ldan pa ni bde ba chen po'i ye shes te de brjod pa'o//rdo rje rkang pas zhes bya ba la/ rdo rje ni dgyes pa'i rdo rje'o/ /de'i rkang pa ni go 'phang ste/ g.yas brkyang ba dang / g.yon brkyang ba dang / zlum po dang / sa ga dang / skyil krung phyed pa la sogs pa'o/ /zhe sdang rnam dag ces bya ba ni dgyes pa'i rdo rje'i rnam par dag pa'o//rtag tu zhes bya ba ni rtag par rgyun du'o/ /sman zhes bya ba ni bzhi mnyam pa'o/ /chu ni mi bskyod pa'o/ /rtag par zhes bya ba ni rtag pa nyid du'o/ /rgas pa ni gnyer ma dang skra dkar 'byung ba'o/ /bsrung bar gyur pa zhes bya ba ni 'byung po dang sha za la sogs pas gzung bar mi nus pa'o//rkun ma'i skra zhes bya ba ni dpyangs pa'i skra'o/ /hUM byung zhes bya ba ni dgyes pa'i rdo rje'i gzugs so/ /thod pa ni mi bskyod pa la sogs pa'i sangs rgyas lnga'i rang bzhin no/ /rnal 'byor ni thabs dang shes rab kyi rnal 'byor gyi snyoms par 'jug pa'o//de'i rol pa ni phyi dang nang gi bdag nyid can gyi mchod pa'o/ /de'i phyir thod pa'i dum bu sor lnga pa 'dzin par mdzad do zhes bya bar dgongs pa'o/ /skra'i ske rags ni skra'i tha gu'o/ /thal ba ni thal bas bskus pa'o/ /skra'i mchod phyir thogs zhes bya ba ni skra'i mchod phyir thogs pa nyid do/ / ngo tsha ba ni ngo tsha ba nyid do/ /gnyid ni rnal 'byor gyi bar chad chen po'o/ /lus dang srog la chags pa ni de bzhin nyid du spang bar bya ba'o/ /the tshom med par zhes bya ba ni the tshom dang bral bar gyur pas zhes bya ba'i don to/ /lus dag ces bya ba la sogs pa la/ dang por de sangs rgyas thams cad dang /sems can thams cad la dbul zhing sbyin pa'o/ /skal dang skal min zhes bya ba ni mkho'am mi mkho dpyod pa rnam par spangs nas ltos pa med par sbyin pa'o/ /mngon phyag 'tshal zhes bya ba ni phyag bya ba ste/ phyag ma byas na mnar med par ltung ba'o/ /spang ba'i rgyu'i phyir zhes bya ba ni yongs su spang ba'i ched du'o//dus su za ba ni bslab pa'o/ /skra breg pa la sogs pa ni dbang ngo / /dngos po kun gyi rang bzhin gyis/ /zhes bya ba ni gnas skabs thams cad du kye'i rdo rje'i nga rgyal gyis gnas pa'o/ /sbyin sreg ces bya ba la sogs pa la/ dgyes pa'i rdo rjer lhag par mos pa nyid kyis 'di la lhag par rnal 'byor brtan par bya ba'i phyir phyi rol gyi sbyin sreg la sogs pa yongs su spang ba'o//ci'i phyir zhe na/ gang gi phyir dgyes pa'i rdo rje'i bdag nyid can 'dis gang cung zhig ci za ba de nyid sbyin sreg yin pa'i phyir ro//mchod sbyin ni phyag rgya la brten pa'o/ /lus kyi las thams cad ni dka' thub bo/ /cang te'u'i sgra dang kha T+wAM 'dzin pa ni sngags dang bsam gtan no/ /yang na rdo rje glu dang rdo rje gar ni sngags dang bsam gtan no/ /de'i phyir 'dis gang byed pa de ni dam tshig yin la/ gang mi byed pa de ni sdom pa yin no/ /rgyud 'dir dman pa dang bar ma dang mchog dang shin tu mchog tu gyur pa'i sems can gyi dbye bas phyag rgya rnam pa bzhi bstan pa yin no/ /de la shin tu mchog tu gyur pa'i sems can gyis ni brgya la dbang bzhi pa bskur ba dang dus mnyam du phyag rgya chen po mngon sum du byed pa yang srid pas logs shig tu spyod pa ma gsungs so//de'i phyir dbang po dman pa dang 'bring dang mchog tu gyur pa'i slob ma rnams la spyod pa med par myur du byang chub thob par mi 'gyur ro zhes bstan pa'i phyir spyod pa rnam pa gsum gsungs pa yin te/ spros bcas dang spros med dang shin tu spros pa med pa'o//'di ni spros pa med pa'i spyod pa ste/ dbang po dman pa dang bar ma'i phyir gsungs pa yin no/ /dbang po mchog tu gyur pa rnams la ni le'u bcu bzhi pa las kye'i rdo rje'i rnal 'byor ma zhes bya ba la sogs pas shin tu spros pa med pa'i spyod pa ston par mdzad par 'gyur ro/ /dbang po dman pa rnams kyi spros pa dang bcas pa'i spyod pa yang brtag pa gnyis pa'i le'u bdun pa las mdor bstan pas ston par 'gyur ro//snying rje btung bar zhes bya ba la sogs pa la dmigs pa dang bcas pa'i bsgom pa ni snying rje ste/ de nyid kyis bde ba chen po'i ro myong bar byed pa ni btung ba'o/ /de ni dus thams cad du btung bar bya ba ste/'gro ba'i don bya ba'i ched du'o/ /de nyid kyi phyir rnal 'byor btung bas zhes bya ba la sogs pa gsungs te/ rnal 'byor ni ting nge 'dzin to/ /de nyid ni btung ba ste/ de la dga' ba ni 'dod pa'o/ /de'i phyir gzhan chang la sogs pa'i btung bas spyod pa byed pa'i rnal 'byor pas bzi bar mi bya ba ste/rmongs pa gtsor gyur pas rnal 'byor gyi gegs chen por 'gyur ba'i phyir zhes de ltar bslab par bya'o/ /dgyes pa'i rdo rje'i dka' 'grel rnal 'byor rin po che'i phreng ba las drug pa spyod pa'i le'u'i 'grel pa'o// //brda ni kla klo'i skad de/rnal 'byor ma rnams kyis rtogs pa brda ston pa'o/ /de yang thabs kyi mchog tu gyur pa nyid yin pa nyid du shes par bya'o/ /de'i phyir de nas brda'i le'u zhes bya ba la sogs pa gsungs te/ brda gsal bar byed pa'i le'u la yang 'di skad ces bya'o/ /spun ni rnal 'byor pa'o/ / sring mo ni rnal 'byor ma'o/ /sor mo gcig ces bya ba ni mdzub mo ste/ 'ongs sam zhes bya ba'i don to/ /gang zhig ces bya ba ni gang zhig gis blta bar bya'o/ /gnyis kyis zhes bya ba ni mdzub mo dang gung mo dag gis so/ /dar dpyang ston pa zhes bya ba ni de gnyis kyis dar dpyang bcings pa'i tshul ston pa'o//rtse gsum zhes bya ba ni mthe'u chung mthe bos mnan nas lhag ma rtse gsum gyi tshul du brkyang pa'o/ /mtshams ni zhes bya ba ni spyi gtsug gi mtshams so/ /'khor lo ni 'khor lo'i tshul ston pa'o/ /khro gnyer ni smin ma g.yo ba'o/ /gtsug phud dgrol ba zhes bya ba la sogs pa ni drang ba'i don gyi bshad pa'o//sor mo gcig ni ston pa dang / /zhes bya ba la sogs pa la/ gang yang sor gcig ces bya ba mdzub mo'am/ gung mo dang mdzub mo dag gis shes rab kyi pad+mar ston pa ste bskul bar bya'o/ /de nyid ni legs par 'ongs pa yin zhes bya ba la/legs par zhes bya ba ni khu ba ste sor mo sbyor bas phab ces bya ba'i don to/ /bsnyun gyi phyag rgyar zhes bya ba la sogs pa la/ bsnyun gyi phyag rgya ni bde ba'i mthar thug pa'i chos kyi dbyings rab tu bsgrub pa ste/ de rnams shes pa'o/ /de ji lta bu zhig ce na/ g.yon gyi mthe bong bcangs pa las//zhes bya ba la sogs pa gsungs te/ g.yon zhes bya ba ni shes rab ste/ de'i pad+ma'i nang ngo / /mthe bong ni rdo rje ste des 'dzag pa'i gnas skabs thob par gyur pa ni btsir bar bya ba'o/ /srin lag ces bya ba la sogs pa la/ srin lag ni shes rab kyi ye shes kyi dbang bskur ba'o//gang zhig ces bya ba ni gang gi phyir rim pa 'di nyid kyis byin pa'o/ /de la mthe'u chung ni dbang tha ma ste bzhi pa zhes bya ba'i bar du'o/ /ji ltar sbyin par bya zhe na/ gung mo zhes bya ba gsungs te/ gung mo zhes bya ba a wa d+hU tI zhes bya ba bstan pa'o/ /gang zhig ces bya ba ni bla ma gang zhig gis slob ma la bzhi pa'i man ngag ces bya bar grags pa sdigs mdzub spangs la bstan par bya'o//de la mdzub mo dang srin lag ces bya ba ni la la nA dang ra sa nA'o/ /sbyin par bya zhes bya ba ni bstan par bya ba'o/ /ji lta bu la bstan par bya zhe na/ mgrin par rab tu ston pa la//zhes bya ba la sogs pa gsungs te/ gang zhig zhabs la gtugs pa la sogs pas bla ma yang dag par mnyes par byed pa'i slob ma la bstan par bya zhes bya bar dgongs so/ /dar dpyang zhes bya ba la sogs pa la/ sor mo gnyis kyis dar dpyang bcings pa'i tshul du byed pa ste/shes rab dang thabs mtshon pa'o/ /de 'dir ston cig ces dri ba la/ de la rtse gsum du ston zhes bya ba ste rtse gsum ni shes rab dang thabs dang gnyis su med pa'i mtshon par byed pa'i la la nA dang ras nA dang a wa d+hU tI'o/ /de la rab tu phye nas bstan par bya ba'o/ /nu ma ston pa zhes bya ba la sogs pa la/slob ma gang zhig la nu ma ste shes rab dang thabs mtshon par byed pa ste/ de dag nyams su myong bas bstan cing smra bar bya ba'o/ /mtshams ni bde ba chen po'i 'khor lo ste/ de la rab tu bstan par bya'o/ /sa ni sprul pa'i 'khor lo ste de bstan par bya ba'o//gang zhig ces bya ba ni phyin ste/ de la 'khor lo zhes bya ba chos kyi 'khor lo bstan par bya ba'o/ /khro gnyer zhes bya ba ni longs spyod kyi 'khor lo bstan par bya ba'o/ /gang zhig ces bya ba ni yang ngo / /gtsug phud dgrol bar brjod par bya/ /zhes bya ba la thar pa'i don gyis bslab pa ste/khyod kyis srog chags gsad par bya/ /zhes bya ba la sogs pa brjod par bya ba'o/ /dpral ba ston pa la zhes bya ba ni ngag gis yang phyag bya ba'o/ /de la rgyab ni zhes bya ba ni lag pas de'i rgyab la reg par bya'o zhes bya bar dgongs pa'o/ /lag pas reg pa 'ba' zhig ma zad kyi/ rkang mthil zhes bya ba ni rkang pa'i mthil gyis sa'i dkyil 'khor bstan par bya ba ste/rnal 'byor 'di dang ldan pas sa la ji ltar bde bar gnas par bya'o zhes brjod par bya'o/ /gang zhig bla mas rjes su gnang bar byas par 'gyur ba gnas pa des/ lto ba'i rnam par rtse bar bya/ /zhes bya ba la lto ba zhes bya ba ni rnal 'byor pa ste/sangs rgyas bcom ldan 'das so/ /rim gyis de dag lhan cig tu de lta bu'i yon tan gyi tshogs kyis brgyan par bya ba'o/ /'di ni nges pa'i don gyi bshad pa'o/ /phyag rgya lan zhes bya ba la/ sor mo gnyis zhes bya ba la sogs pas dbye bar bya'o/ / phreng ba ma'i lag ces bya ba ni skra bcing ba ltar bya ba'am/ phreng ba drang ba ltar bya ba'o/ /de la mngon du phyogs pa ltar ston pa ni/ phreng ba mngon par bstan byas na/ /zhes bya ba'o/ /'di dag gnyi ga yang dngos su'am de lta bu'i tshul gyis rtogs par bya'o/ /'di dag thams cad kyang lag pa g.yon pa bstan par bya'o//phreng ba mngon par gtad byas zhes bya ba'i don bstan par bya ba'i phyir/ dam tshig la gnas zhes bya ba la sogs pa gsungs te/ lha rdzas zhes bya ba ni rnal 'byor ma'o/ /phyi rol zhes bya ba ni bstan par gyis shig ces bya ba'o/ /kye bcom ldan 'das zhes bya ba la sogs pa la/'di rnams sa ni bcu gnyis zhes bya ba ni gnas la sogs pa'o/ /'di las 'byung bar 'gyur bas na sa zhes bya ste/ rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du 'gro ba dang / mi g.yo ba dang /legs pa'i blo gros dang / chos kyi sprin dang / kun du 'od dang / dpe med pa zhes bya ba rim bzhin no/ /ye shes ldan zhes bya ba bcu gsum pa rdo rje 'dzin pa'i sa ni shin tu mi gnas pa'i mya ngan las 'das pa'i ngo bo nyid yin pas de ni ma brjod do/ /sa bcu'i dbang phyug gi byang chub sems dpa' dang /mgon po sangs rgyas kyis bstan pa yin no zhes sbyar bar bya'o/ /gang dag las zhes bya zhe na/ gnas la sogs pa 'di dag nyid la zhes bya ba'i don te/ kye bcom ldan 'das zhes bya ba la sogs pa'o/ /ko la gi ri ni pu li ra ma la ya'o/ /na ga ra ni pa tA la pu tra'o/ /lan tshwa rgya mtsho nas skyes zhes bya ba ni ha li ke la'i khyad par ro//gser dang ldan pa'i gling zhes bya ba ni gser gling nyid do/ /de nye ba zhes bya ba ni u pa li la ste nye ba'o/ /rdzing bu zhes bya ba ni ring ba'o/ /nyin mo nyid kyang zhes bya ba la sogs pa la yi dags zla phyed ces bya ba ni mar ngo'i phyogs so//'di ni phyi rol gyi bstan pa'o// //da ni gdug pa can rnams gzhug par bya ba'i phyir dang slob ma'i rnal 'byor bstan pa'i phyir/ phyi dang nang gi bdag nyid can sgra gcig gis bstan par 'dod nas rgyal mtshan dang ni zhes bya ba la sogs pa gsungs te/ rgyal mtshan ni dpyangs pa'o//mtshon bsnun nyid ni g.yul ngo la sogs par gsad pa'o/ /lan bdun pa ni skya ba bdun pa'o/ /snying rjes zhes bya ba ni de'i 'khor ba'i sdug bsngal bsams nas so/ /mkhas pa zhes bya ba ni rnam par mkhas pa nyid de 'di ni bshad pa gcig go/ /rgyal mtshan ni dmigs pa dang bcas pa'i sems so//mtshon bsnun na ni shes rab kyi mtshon gyis bcad pa ste/ gcig dang du ma'i rang bzhin gyis bcad pas rang bzhin med par byas pa ni mtshon gyis bsnun pa'o/ /nyid ces bya ba ni gang gis gcod par byed pa'i sems nyid kyang bcad pas rang bzhin med par byed par bstan pa'o//lan bdun pa yang zhes bya ba ni lan bdun gyi bar du yang yang bltas nas bza' bar bya ba ste/ rang bzhin med par byas zhes bya ba'i don to/ /'di ni gnas ji lta bur yang bdag dang gzhan mchog tu bsrung bar byas par 'gyur te/ bdud la sogs pas kyang nye bar 'tshe bar mi 'gyur ro//stong pa nyid kyi ting nge 'dzin la mngon du phyogs par 'gyur ro/ /snying rje bskyed ces bya ba la sogs pa la/ dang por tshangs pa'i gnas bzhi bsgom pa byas nas so/ /'bad pas zhes bya ba ni nges pa kho nar ro/ /mkhas pas zhes bya ba ni rnam par mkhas pa'o//gal te 'gro ba rnams gsad cing mi dmigs par bya ba yin na/ de lta na ci'i phyir tshangs pa'i gnas bzhi dang por bsgom par bya zhe na/ snying rje med na zhes bya ba la sogs pa gsungs te/ gang gi tshe dang por tshangs pa'i gnas bzhi bsgom pa med na de'i tshe yang dag par rdzogs pa'i byang chub kyi ngo bo med par yang 'gyur te/stong pa nyid 'ba' zhig bsgoms pas nyan thos la sogs pa'i mya ngan las 'das pa nyid du yang 'gyur ba srid do/ /de lta bas na de'i phyir snying rje bskyed pa nyid ces bya bas nye bar bsdus pa yin no/ /thams cad gdug pa zhes bya ba ni bde bar gshegs pa'i bstan pa la sdang ba ste rgyang 'phen pa la sogs pa'o//de dag gsang sngags kyi theg pa la sbyar bar bya ba'i phyir gsungs pa yin no/ /cho ga'i gtso bo zhes bya ba la sogs pa 'dir cho ga'i gtso bos dgag par bya ba yin no/ /gang dag gang du gsad pa la sogs pa'i sgra dang ldan pa mthong ba de dang der 'di bzhin du rig par bya'o//nyin mo bcom ldan rdo rje can/ /zhes bya ba la sogs pa la/ rtag tu zhes bya ba ni dus thams cad du'o/ /'jig rten pa la sogs pa'i drung du ni rgyal mtshan la sogs pa spang bar bya ba la tshogs kyi 'khor lo la sogs pa dben pa'i gnas su ni longs spyod par bya'o zhes bya ba yin no//mi bsam yod ma yin zhes bya ba la sogs pa la/ mi bsam zhes bya ba ni bsam pa gzhan ci yang mi bsam pa ste/ ji ltar bdag nyid dgyes pa'i rdo rje'i nga rgyal byed pa de bzhin du sems can gzhan la yang bya ba'o/ /de bzhin bdag nyid ces bya ba ni kun bsdu ba ste/de dag dang bdag gnyi ga dgyes pa'i rdo rjer blta bar bya'o/ /bdag nyid gzhan zhes bya ba ni bdag nyid dang gzhan dag go/ /gnas bzhugs pas zhes bya ba la sogs pa la/ gnyis med ces bya ba ni chos thams cad stong pa nyid do/ /de nyid shrI ste chos thams cad 'od gsal ba'i rang bzhin yin pa'i phyir ro//rgyu zhes bya ba ni byed rgyu'o/ /sogs pa zhes bya ba ni rang bzhin no/ /stong pa nyid ni de dag dang bral ba'o/ /tshogs ni rnam par rtog pa ste de dang bral ba ni yongs su spangs pa nyid do/ /ka zhes bya ba ni mi gnas pa'i mya ngan las 'das pa'o/ /'di dag gis ni stong pa nyid dang mtshan ma med pa dang mngon par 'du byas pa med pa dang /smon pa med pa'i don rnams ni he ru ka zhes bya ba'i sgras bstan pa yin no/ /'gro drug tu skye bar 'gyur bas na skye bo ste phung po lnga'o/ /sha zhes bya ba ni de'i rang bzhin no/ /bza' bya ba zhes bya ba ni snang ba med par bya ba'o/ / mkhas pa zhes bya ba ni dgyes pa'i rdo rje'i rnal 'byor dang ldan pa'o/ /sems can de de zhes bya ba ni dngos po de dang de'o/ /dbang du 'gyur zhes bya ba ni de dang de la dbang thob par 'gyur ba ste/ gzugs la sogs pa rnam pa sna tshogs pa sprul pas gdul bya sna tshogs 'dul bar 'gyur ro//rdo rje ni dgyes pa'i rdo rje'o/ /thod pa ni bde ba srung bar byed pa'i phyir bdag med pa ste/ stong pa nyid dang snying rje'o/ /de'i sbyor ba ni ting nge 'dzin te de yis so/ /dgyes pa'i rdo rje'i dka' 'grel rnal 'byor rin po che'i phreng ba las brda dang gnas kyi nges par bstan pa le'u bdun pa'i 'grel pa'o// //de nas zhes bya ba la sogs pa la 'khor lo ni dkyil 'khor te/ mchog dang po'i pho brang thar pa chen po'i grong khyer zhes bya ba'i don to/ /de yang rnam pa gnyis te/ rten dang brten pa'i dkyil 'khor ro/ /de la 'dir ni dang po'i rnal 'byor dang / dkyil 'khor rgyal mchog dang las rgyal mchog ste/ ting nge 'dzin gsum gyi rnal 'byor bstan par bya'o/ /de yang lha'i le'ur ni dpa' bo gcig pu'i rnal 'byor gyi skabs yin pas bsam gtan no/ /rnal 'byor ma ni bdag med ma'o/ /de'i 'khor lo ni rnal 'byor ma'i 'khor lo'o/ /nam mkha'i khams su zhes bya ba la sogs pa/rdo rje ra ba dang gur gyi nang du nam mkha'i khams so/ /chos 'byung ni ston ka'i zla ba lta bu'i gru gsum ste chos 'byung zhes bya ba bsgom par bya'o/ /dbus su rnam par bsgom par bya ba ni de'i dbus kyi rten gyi 'khor lo bskyed pa'i rgyur gyur pa 'byung ba chen po bzhi bsgom par bya ba'o//ci ltar zhe na/ 'khor lo mngon du zhes bya ba la sogs pa gsungs te/ 'di ni mdor bstan pa'o/ /rgyas par ni 'khor lo sa dang zhes bya ba la sogs pa ste/ sa ni sa'i dkyil 'khor ro/ /'di'i sngon du zhes bya ba dang por chu ste chu'i dkyil 'khor ro/ /'di'i sngon du ni ci ltar rigs par te me'i dkyil 'khor ro/ / 'di yang sngon du lha rnams zhes bya ba ni rlung gi dkyil 'khor ro/ /sgom pa po'i sems 'di lta bu'i rnam par nges par gnas pa ni ji ltar sgom pa po 'byung ba'o/ /de la 'dir dang por chos 'byung gi dbus su yaM yongs su gyur pa las byung ba'i gzhu'i dbyibs can sngon po ba dan gnyis kyis mtshan pa'i rtse mo gnyis g.yo ba'i rlung gi dkyil 'khor ro//de'i steng du raM las byung ba gru gsum zur rnams su yi ge raM gyis mtshan pa'i me'i dkyil 'khor ro/ /de'i steng du baM las byung ba chu'i dkyil 'khor dkar zhing [(]zlub [,]zlum [)]pa bum pas mtshan pa'o//de'i steng du laM las byung ba gru bzhi pa ser po mtshams rnams su rdo rjes mtshan pa'i sa'i dkyil 'khor bsgom par bya'o/ /chos 'byung zhes bya ba la sogs pa la/ chos 'byung de nyid ni phyag rgya gru gsum mo/ /de las skyes pa'i rlung la sogs pa'i dkyil 'khor bzhi yongs su gyur pa las 'dir 'di skad ces bya'o//'khor lo ni rten gyi dkyil 'khor te gru bzhi pa la sogs pa'i yon tan dang ldan pa'o/ /de'i phyir/ bdag gi 'khor lo khyod bshad na/ /zhes bya ba nas/ do shal do shal phyed pas brgyan/ /zur bzhi pa la sgo bzhi pa/ /zhes bya ba'i bar dang / rdo rje srad bus yang dag brgyan//zhes bya bas ston par 'gyur ba yin no/ /'phar ma gnyis rim zhes bya ba ni rim pa gnyis pa'o/ /ze'u 'bru las zhes bya ba ni dbus kyi pad+ma 'dab ma brgyad pa ni rim pa gcig go/ /gru gsum zhes bya ba ni chos 'byung gis mngon par khyab par byas pa'i gzhi gru bzhi pa'o//de'i dbus su zhes bya ba ni gzhal yas khang rim pa gnyis kyi dbus su ste rnal 'byor ma bco lnga'i gdan gyi bdag nyid de/ de dag nyid kyi gnas rnams so sor ro'i gdan bsam par bya'o/ /de dbus bsam zhes bya ba ni dbus kyi ro'i gdan gyi snying gar A li yongs su gyur pa las zla ba'o//de'i steng du sa bon nyid ces bya ba ni dbyangs kyi dang po'o/ /de'i steng du kA li yongs su gyur pa las bdud las rgyal ba'i dkyil 'khor ro/ /gnyis 'dus zhes bya ba ni shes rab dang thabs kyi ngo bo nyid nyi ma dang zla ba'o/ /de'i dbus su bde ba chen po'i ngo bo nyid kyi sa bon bstan pa'o//yang nyi ma dang zla ba'i ngo bo nyid ci yin zhe na/ A li zla ba'i gzugs kyis gnas/ /zhes bya ba la sogs pa gsungs te/ gau rI la sogs pa rnal 'byor ma bco lnga nyid do/ /'di las zhes bya ba ni zla ba dang nyi ma dang sa bon las kun du byung ba'o/ /sa bon dbye bas zhes bya ba ni yi ge tha dad pa nyid do//'di dag gis ni shes rab dang thabs dang bde ba chen po'i rang bzhin gyi rnal 'byor ma rnams ni rdo rje 'chang gi ngo bo nyid du bstan pa yin no/ /da ni me long lta bu la sogs pa ye shes lnga'i ngo bo nyid kyis de bzhin gshegs pa lnga'i rang bzhin du bstan pa'i phyir zla ba me long zhes bya ba la sogs pa gsungs te/sa bon yongs su gyur pa las byung ba'i gri gug gi chang zungs la zla ba las sa bon blta ba ni phyag mtshan no/ /rang lha'i zhes bya ba ni lha mo rnams kyi'o/ /so sor rtog par zhes bya ba ni so sor rtog pa'i ye shes zhes brjod pa'o/ /gcig gyur zhes bya ba ni phyag mtshan la gnas pa'i sa bon las spros pa'i rnal 'byor ma'i tshogs kyis sna tshogs 'di khyab par byas nas/thams cad ces kun yang dag par bsdus nas sa bon dang gcig tu gyur pa'i sa bon de ni bya ba nan tan no/ /rdzogs pa zhes bya ba ni zla ba dang nyi ma dang phyag mtshan dang sa bon yongs su gyur pa las lha'i sku yongs su rdzogs pa ste/chos kyi dbyings rnam par dag pa'i ye shes so/ /rnam pa lnga po zhes bya ba ni me long lta bu la sogs pa rnams so/ /mkhas pas zhes bya ba ni shes rab can gyis so/ /A li kA li mnyam sbyor zhes bya ba ni zla ba dang nyi ma'i dkyil 'khor zung du 'byor pa'o//gdan zhes bya ba ni bzhugs pa'i gdan no/ /rdo rje ni phyag mtshan no/ /sems dpa' ni sa bon gyi yi ge ste/ rdo rje sems dpa' de yi gdan/ /zhes bya ba'i don ston to/ /yi ge las byung zhes bya ba la sogs pa la yi ge ni dang po'i yi ge'o/ /de las byung ba ni gong bu zhes bya ba la sogs pa ste/dkyil 'khor gyi gtso bo'o/ /hUM zhes bya ba la sogs pa la phaT rnam pa zhes bya ba ni yi ge a dang aM dang shes rab thabs kyi bdag nyid can gyi lus zhu bar gyur pa la sogs pa ni bdag med ma'i dkyil 'khor gyi gtso bo bskyed pa la mi 'dod pa yin no/ / gal te zhu bar 'gyur ba las 'byung bar mi 'gyur na/ 'o na gang las 'byung bar 'gyur zhe na/ sems dpa'i gzugs brnyan zhes bya ba la sogs pa gsungs te/ sems dpa' ni sa bon gyi yi ge'o/ /gzugs brnyan ni phyag mtshan te de dag las byung ba'o/ /dkyil 'khor bdag po zhes bya ba ni dkyil 'khor gyi gtso bo ste/bdag med ma zhes bya ba'i don to/ /gong ma bzhin zhes bya ba ni ji ltar lha'i le'ur rdo rje lcags sgrog bstan pa'i g.yas dang g.yon pa'i phyag la gri gug dang thod pa bzhin no/ /phyag mtshan zhal sogs zhes bya ba la/ zhal ni zhal gdong ngo //phyag mtshan ni gri gug dang thod pa dang kha T+wAM ga'o/ /sogs pa'i sgras ni pags pa'i gos kyis brgyan pa la sogs pa bsdu'o/ /zla ba dang chu shel gyi nor bu dang 'dra ba'i 'od 'di la yod pas/ zla ba chu shel nor bu'i 'od/ /ces bya ste zla ba'i gdan dang zla ba'i dkyil 'khor gyi 'od lta bu zhes bya ba'i don to//'di ltar zhes bya ba ni dkyil 'khor gyi gtso bo bzhin no/ /thams cad ces bya ba ni rdo rje gau rI la sogs pa'o/ /rdzogs pa nyid ji lta bu zhe na/ thabs dang shes rab rang bzhin las/ /zhes bya ba ste/ gau rI la sogs pa zhes bya ba'o/ /'di las zhes bya ba ni dkyil 'khor gyi gtso bo'i thugs ka'i zla ba dang /phyag mtshan la gnas pa'i sa bon la ste/ zla ba dang nyi ma dang phyag mtshan dang sa bon yongs su gyur pa las gau rI ma la sogs pa'i dkyil 'khor pa rnams 'byung bar 'gyur ba'o/ /ci de dag gi sa bon yang de yin nam zhe na/ yi ge'i dbye bas zhes bya ba la sogs pa gsungs te/yi ge ni sa bon te/ de'i dbye ba ni sa bon gzhan dang gzhan no zhes bya ba'i don to/ /de yang rgyud thams cad la rgyas btab pa'i don bsdus pa'i le'u las/ A li dang po bdag med ma/ /A li gnyis pa rdo rje ma/ /zhes bya ba la sogs pa gsungs pa yin no//da ni rnal 'byor ma rnams kyi gnas bstan pa'i phyir/ re zhig nang gi 'phar ma la/ /zhes bya ba la sogs pa gsungs te/ nang gi zhes bya ba ni nang rol gyi rim pa la phung po lnga'i rnam par dag pa bsgom par bya'o/ /dbang por zhes bya ba ni shar phyogs su'o/ /phyi rol gyi 'phar ma la zhes bya ba ni shar la sogs pa'i sgo rnams su gau rI dang tsau rI dang be+e tA li dang g+hasma rI'o//dbang ldan la sogs pa'i mtshams rnams su ni puk+ka sI dang sha ba rI dang tsan+Da lI dang Dom+bi nI rnams so/ /'og ldan ma ni 'og gi phyogs srung bar byed pas 'og ldan ma zhes bya ba ste sa spyod ma'o/ / de bzhin du steng ldan ma nyid ni mkha' skyod ma'o/ /srid dang zhes bya ba la sogs pa ni 'khor ba dang mya ngan las 'das pa rnam par dag pa'o/ /sangs rgyas lnga ni rnam dag pas/ /zhes bya ba ni/ sangs rgyas lnga'i ngo bo nyid do/ /phyag rgya zhes bya ba ni phyag rgya'o/ /de ltar zhes bya ba ni de bzhin du zhes bya ba'i don to//'bar zhing gsal zhes bya ba lus 'bar zhing sems ni gsal ba'o/ /nga rgyal la sogs zhes bya ba la sogs pas ni gri gug la sogs pa'i ngo bo gsungs so/ /'dis ni zhes bya ba ni 'di ltar bsgoms pas so/ /myur du zhes bya ba ni mgyogs par ro//da ni sems mnyam pa nyid du bya ba'i phyir/ yan lag drug bsgom rnal 'byor pas/ /zhes bya ba gsungs pa yin te/ kha dog drug gis 'khor los sgyur ba drug dang mnyam pa nyid du bstan pa'i phyir ro/ /yang zhes bya ba ni phyi nas so/ /dga' bral mthar zhes bya ba ni lhan cig skyes pa'i dga' ba tsam zhes bya ba'i don to//da ni bskyed pa'i rim pa bshad nas/ gnyis pa rdzogs pa'i rim pa yang dag par bstan pa'i phyir/ bskyed pa'i rim pa nyid dang ni/ /zhes bya ba la sogs pa gsungs te/ rim pa zhes bya ba ni rnam pa'o/ /gang gi rim pa zhe na ting nge 'dzin gyis te/sa bon dang zla ba dang phyag mtshan dang sa bon yongs su gyur pa las lha'i rnam par yongs su rdzogs pa ni bskyed pa'o/ /de'i ting nge 'dzin gang la yod pa de ni bskyed pa'i rim pa'o/ /rdzogs pa ni ngo bo nyid kyi gzugs can te/ de nyid la de kho na nyid du mos par byas nas rnal 'byor gang gis sgom par byed pa de ni rdzogs pa'i rim pa'o//de lta bu'i rim pa gnyis la mnyam par gnas nas/ sangs rgyas rnams kyis chos 'chad do/ /zhes bya ba'i ting nge 'dzin ston pa'o/ /nam mkha'i khams zhes bya ba la sogs pa'i tshigs su bcad pa 'dis ni bskyed pa'i cha zhes bya ba bskyed pa'i rim pa'i phyogs so//bshad do zhes bya ba ni don bstan par 'gyur bas te/ rdzogs pa'i rim pa'ang bstan to zhes bya ba'o/ /de nyid bstan par bya ba'i phyir nam mkha'i khams zhes bya ba la sogs pa gsungs te/ pad+ma zhes bya ba ni shes rab kyi pad+ma'o//ye shes zhes bya ba ni rdo rje'o/ /bsgom zhes bya ba ni 'jug pa'o/ /gsum po 'di ni dang por yin la/ lhan cig skyes pa gnyis ni mthar yin te/ 'di gnyis kyi bar du bsgom par bya ba yin no/ /mnyam par gzhag pa'i bya ba la snyoms 'jug ces bya ba'o/ /de bsgom zhing bskyed pa las byung ba'i bde ba ni de'i bde bas so//'khor lo zhes brjod pa ni rnal 'byor ma'i 'khor lo zhes brjod par bya ba ste/ bde ba chen po de nyid kyis de dag bsdus pa'i phyir ro/ /de'i bde ba de ji lta bu zhig ce na/ ji ltar rigs par zhes bya bar gsungs te/ rang rig ni gzhan gyi rkyen la mi ltos par so so rang gis rig pa'i ngo bo nyid ces bya ba'i don to//rang rig pa de nyid ni byang chub ste/ byang chub kyi rang bzhin gyi sems ni byang chub sems zhes bya'o/ /bya ba zhes bya ba'i sgra ni bsdu ba'i don to/ /lus gnas par byed pas de nyid ni lha zhes bya ba'o//ji ltar 'byung ba zhes bya ba ni don ji lta ba bzhin 'byung ba ste/ gzung ba dang 'dzin pa la mi ltos par ji ltar 'byung ba'o/ /khu ba ni kun da dang zla ba lta bu'i khu ba'i gzugs so/ /gang gi phyir de ltar na/ lhan cig skyes pa rnam pa gnyis/ /zhes bya ste/ lhan cig skyes pa'i dga' ba rnam pa gnyis yin no//gal te de lta bu lhan cig skyes pa yin na/ skyes pa dang bud med ci zhig yin zhe na/ re zhig btsun mo zhes bya ba la sogs pa gsungs te/ 'di dag la zhes bya ba ni bdun te/ dga' ba rnam pa gnyis so/ /ji lta bu zhig ce na/ kun rdzob don dam zhes bya ba ste/ bde ba chen po'i ngo bo ni don dam pa'o//ji lta ba bzhin 'byung ba ni kun rdzob ste/ kun rdzob nyid kyi cha tsam yod pa'i phyir ro/ /de nyid phyir na zhes bya ba ni rnam pa gnyis kyi phyir ro/ /bzhi'i zhes bya ba ni bzhi rnams so/ /rab tu dbye ba zhes bya ba ni lhan cig skyes pa'i spyi'i rab tu dbye bas so/ /gal te gzhan du ni dga' ba bzhir 'dod pa ma yin nam/'dir gzhan du 'dod pa ji ltar 'gal bar mi 'gyur zhe na/ 'di ltar lhan cig skyes zhes bya ba la sogs pa gsungs te/ dga' ba dang mchog tu dga' ba la sogs pa bzhi'i rim pas 'byung bar 'gyur zhes bya ba ste/ bskyed pa'i rim pa'i phyogs zhes bya ba'o//de ltar lhan cig skyes pa'i rnam pa gnyis rnam pa bzhir bstan pa yin te/ 'di ni bshad pa gcig go/ /nam mkha'i khams zhes bya ba la sogs pa la/ pad+ma la zhes bya ba ni sangs rgyas spyan la sogs pa rnams so/ /ye shes ni gnyis su med pa'i ye shes so//nyon mongs pa'i bdud la sogs pa rnams 'jig par byed pas na b+ha ga zhes brjod do/ /bsgom pa zhes bya ba ni phyi rol gyi phyag rgya dang lhan cig tu'o/ /pad+ma dang rdo rje'i sbyor bas dus mnyam du 'bab par gyur pa ni snyoms par 'jug pa'o/ /de'i bde ba ni snyoms par 'jug pa'i bde ba'o//'khor lor brjod par bya ba ni 'khor lo rnam pa bzhir brjod pa yin no zhes bya ba'i don to/ /ji ltar rigs par bya zhes bya ba ni rim pa bzhin du brjod do zhes bya ba'i don to/ /rang rig ces bya ba ni las kyi phyag rgya las slob dpon gyi dbang bskur ba'i mtshan nyid can gyi bde ba gang zhig bla ma'i man ngag nyid kyis 'khor lo dang por bstan pa ni rang rig nyid de rang rig pa zhes brjod par bya ba'o//chos kyi phyag rgya las gang bskyed pa de ni byang chub kyi sems zhes bya ba ste/ bde ba de nyid la byang chub kyi sems zhes bya ba'i don to/ /dam tshig gi phyag rgya las gang dmigs pa'i bde ba de ni lha zhes bya'o//phyag rgya chen po las bde ba'i mtshan nyid gang zhig ji ltar 'byung ba'i rim gyis nye bar 'byung ba'i mtshan nyid can gyi bde ba chen po de ni khu ba zhes bya ste/ shu zhes bya ba mya ngan te 'khor ba'i sdug bsngal yin la tra ni gcod par byed pa dang 'dra bas khu ba zhes bya ba yin no//rnam pa gnyis zhes bya ba ni de lta bu'i phyag rgya rnam pa bzhi las nyams su myong ba'i bde ba nyid ni lhan cig skyes pa rnam pa gnyis zhes bya ste bde ba chen po'i rnam pa ni gcig go/ /mya ngan gcod pa'i rnam pa ni gnyis pa ste/ las dang chos la sogs pa'i phyag rgya'i dbye bas lhan cig skyes pa rnam pa gnyis gsungs pa yin no//ci 'di skyes pa kho na la 'byung bar 'gyur ram bud med la yang 'byung bar 'gyur zhe na/ de'i phyir shes rab la yang zhes bya ba la sogs pa gsungs te/ de nyid phyir na zhes bya ba la sogs pa la dga' ba ni bzhi zhes bya ba ni phyag rgya rnam pa bzhis dbye ba byas pa zhes bya ba'i don to//rnal 'byor ma'i rgyud 'dir bud med ji lta ba bzhin du skyes pa yang dman pa dang 'bring dang mchog gi dbye bas dbang la sogs pa rjes su gzung bar bya'o zhes bya ba yin no/ /phyag rgya bzhi'i dbye bas dga' ba bzhi'i dbye ba byas par ji ltar 'gyur zhe na/'di ltar lhan cig skyes zhes bya ba la sogs pa gsungs te/ bskyed pa'i rim pa zhes bya ba la/ bde ba bskyed pa'i mtshan nyid kyi skad cig ces bya bar dgongs pa'o/ /bshad pa gnyis pa ste/ 'di dag thams cad bla ma'i man ngag las shes par bya'o/ /da ni mdor bsdus nas gsum du bstan pa'i phyir dga' ba dang po zhes bya ba la sogs pa gsungs te/dpa' bo zhes bya ba ni sgrub pa po ste brtson 'grus brtsams pa nyid kyi phyir ro/ /mchog tu dga' ba'i rnal 'byor ma/ /zhes bya ba ni de med na kun du dga' ba mi 'byung ba'i phyir ro/ /shin tu dga' ba ni ma lus pa'i lhan cig skyes pa'i mtshan nyid de kun kyang gsum nyid do zhes bya ba'i don to//de nyid bstan pa'i phyir thabs las zhes bya ba gsungs te/ thabs ni phyag rgya'i man ngag bstan pa'o/ /de bsgoms pa las skyes pa'i bde ba ni des bde ba'o/ /thams cad rig ces bya ba ni rdo rje 'chang ngo / /bskyed pa'i rim par 'di lhan cig skyes pa mtshon par bya ba'i phyir dga' ba bzhi 'dod par byed pa yin no//rdzogs pa'i rim par ni lhan cig skyes pa gcig nyid bsgom par bya ba'o/ /don dam nyid rig pa gsum dang tshigs su bcad pa gsum gyis bstan pa'i phyir dga' bas bde bya ba zhes bya ba la sogs pa gsungs te/lhag mas lhan cig skyes dga' nyid/ /ces bya ba ni kun gyi phyi ma nyid do/ /gang yang gsum po 'di dag ni 'khor ba dang mya ngan las 'das pa'i ngo bo nyid yin pa'i phyir dang / 'khrul pa nyid yin pa'i phyir 'khor ba kun tu 'byung bar byed pa yin no/ /des na de'i phyir bsgrub par bya ba bde ba chen po'i chos kyi sku'i mtshan nyid thob par byed pa ni lhan cig skyes pa zhes bya ste/de'i bsgom par bya ba gcig yin no/ /yang ci'i phyir gsum po 'di dag thar par 'dren par byed pa ma yin zhe na/ dang por reg par zhes bya ba la sogs pa gsungs te/ reg par zhes bya ba ni pad+mar rdo rjes so//gnyis pa zhes bya ba ni de bas lhag par gyur pa'i bde ba 'dod pa'o/ /gsum pa zhes bya ba ni dga' bral gyi dga' ba'o/ /'dod chags 'jig pa nyid ces bya ba ni 'dod chags dang bral ba'i ngo bo nyid kyi phyir ro/ /des na zhes bya ba ni de'i phyir bzhi pa zhes bya ba lhan cig skyes pa bsgom par bya'o zhes bya bar dgongs pa'o//mchog tu dga' ba zhes bya ba la sogs pa la/ srid par zhes bya ba ni 'khor ba'i mtshan nyid can de/ lhan cig skyes pa la 'dod pa dang chags pa'i phyir ro/ /dga' bral las ni zhes bya ba ni dga' bral ni mya ngan las 'das par bstan pa'o//dbu ma zhes bya ba ni dga' ba dang po ni dga' ba tsam ste thun mong gi bde ba tsam nyid do/ /'di dag ces bya ba ni bstan pa'i gsum po spangs pa'i lhan cig skyes pa ste 'khor ba dang mya ngan las 'das pa dag gi skyon gyis mtshon par ma gyur pa'i ngo bo nyid de/de bsgom par bya ba yin gyi/ gzhan ni ma yin no zhes bya ba'i bar du'o/ /gal te de ltar na lhan cig skyes pa'i bde bas bsgrub par bya ba rdo rje 'chang chen po'i go 'phang thob par byed pa yin na shes rab kyi ze'u 'bru nyid du nyams su myong bar 'gyur ba'i phyir bya ba byas pa yin pas bsgoms pas ci zhig bya zhe na/gzhan gyis brjod min zhes bya ba la sogs pa gsungs te/ bla ma dang rdo rje 'chang la sogs pas gang du yang ma yin la 'khor lo bzhi dang shes rab kyi pad+ma dang mnyam par sbyor bas kyang ma yin te/ de ni so so rang gis rig par bya ba dag gis rtogs pa'i yul las 'das pa'o zhes bya bar dgongs pa'o//gal te de ltar na de bstan pa dang thos par ji ltar 'gyur zhe na/ kun rdzob kyis brjod pa yin gyi/ gang gi ngo bos ni ma yin te/ lha dang dmyal ba'i bde ba dang sdug bsngal bstan pa dang thos pa bzhin no/ / gal te de ltar na de ji ltar shes pa nyid yin zhe na/ bdag gi bsod nams zhes bya ba la sogs pa gsungs te/ bsgom pa'i khyad par nyid kyis dmigs par bya ba yin no/ /de'i phyir bsgom pa don med pa ma yin te/ bsgom pa yongs su rdzogs pa med par de mngon sum du bya bar mi nus pa'i phyir ro//de yang ji skad du/ srid pa'i zug rngu sel byed pa'o/ /nga yis khyod la lam bstan byas/ /khyod nyid kyis ni bya ba ste/ /de bzhin gshegs pa ston pa tsam/ /zhes gsungs pa yin no/ /gal te dkyil 'khor gyi 'khor lo la sogs pa bsgom pa 'di ni rigs kyi/lhan cig skyes pa'i dga' ba ni mngon sum du nye bar dmigs pa yin pas mngon sum du 'gyur ba'i don de gzhan la bstan par rigs pa ma yin no zhe na/ de'i phyir bsod nams las zhes bya ba gsungs so/ /'di snyam du dgongs te/ 'jig rten pa nyid kyis lhan cig skyes pa'i dga' ba ni bsgrub par bya ba ma yin te/grub pa nyid kyi phyir dang zag pa dang bcas pas dri ma can yin pa'i phyir dang 'khor ba pa rnams de'i rtsa ba can yin pa'i phyir ro/ /'o na ji lta bu zhe na/ de bzhin gshegs pa nyid kyis gang so so yang dag par rig par bya'o/ /chos kyi sku zhes bya ba lhan cig skyes pa de 'dir bsgrub par bya ba yin no//de yang thabs gzhan yod pa ma yin pas 'dir 'jig rten pa'i lhan cig skyes pa'i dga' bas man ngag ji lta ba bzhin du lhag par mos par byas nas bsgoms pa las yongs su smin par 'gyur ba'i stobs kyis bdag nyid kyis shes par 'gyur gyi/sngar gyi ni ma yin no/ /de'i phyir thos pa dang bsams pa dang bsgoms pa don med par mi 'gyur ro/ /thabs ni lam mo/ /de bsten pa ni yang dag par bsgom pa'o/ /de'i dus ni mang po nyid de/ rnam pa du ma zhes bya ba'i don to/ /bla ma las rnyed pa'i dus ni bla ma'i dus te/gang snod du gyur pa'i slob ma la bla mas cho ga bzhin du byin pa ste/ man ngag ces bya ba'i don to/ /gal te lhan cig skyes pa de ji ltar bsgom par bya/ yul gcig nyid du'am/ 'on te sna tshogs la mngon par khyab pa nyid du zhe na/ dman pa dang zhes bya ba la sogs pa gsungs te/'di ni mdor bstan pa'o/ /'di bshad pa ni phra ba'i don zhes bya ba la sogs pa ste/ phra ba'i don ni bdag nyid kyi sems dang sems las byung ba'o/ /dngos por zhes bya ba ni bdag nyid kyi lus so/ /gnyis kyis zhes bya ba ni rang gi lus dang yan lag go//dbang po drug ni lus la gnas pa'i mig la sogs pa'o/ /brten dang g.yo zhes bya ba ni phyi rol gyi sems dang ldan pa dang sems med pa'o/ /nga nyid yin zhes bya ba ni bdag nyid 'ba' zhig bde ba chen po'i rang bzhin gyi rdo rje 'chang yin par ma zad pa'o/ / mnyam nyid mtshungs par zhes bya ba ni dbyer med pa'i ngo bo nyid du'o/ /de ji lta bu zhig ce na/ de nyid bsgoms pas zhes bya ba gsungs te/ 'di'i bshad pa ni ro mnyam zhes bya ba'o/ /yang 'di'i bshad pa ni mnyam zhes bya ba la sogs pa ste/ mnyam pa ni mtshungs par 'gyur ba zhes bya ba'i don to//de zhes bya ba ni dman pa dang 'bring la sogs pa'o/ /ro zhes bya ba ni snying po ste dngos po zhes bya ba'i rnam grangs so/ /gang ro yin zhe na/ 'khor lo'i steng bde ba chen po'i mtshan nyid can lhan cig skyes pa'i zhes bya ba'i don to/ /mdor bsdus pa'i don bstan pa'i phyir/bsgom pa ro gcig mnyam pa nyid/ /ces gsungs so/ /yang ro gcig pa'i mnyam pa nyid ji ltar bsgom par bya zhe na/ nga las zhes bya ba la sogs pa gsungs te/ de ltar rnal 'byor pas shes nas zhes bya ba ni de ltar nges par bzung nas so/ /shin tu mnyam gzhag ces bya ba ni gnas skabs thams cad du'o//de nyid gsal bar bya ba'i phyir bza' ba dang btung ba zhes bya ba la sogs pa gsungs te/ ngang gis zhes bya ba ni rang gi ngang gis 'jug pa'o/ /phyag rgya chen po zhes bya ba la sogs pa la/ phyag rgya chen po bsgrub pa'i phyir/ /zhes bya ba'i don te/ 'dis ni lhag par mos pa'i rnal 'byor bstan to/ /da ni 'di nyid la sems bstan par bya ba'i phyir/ 'gro ba thams cad bsgom par 'gyur/ /zhes bya ba la sogs pa gsungs te/ 'gro ba thams cad ces bya ba ni sems can dang snod kyi 'jig rten te/ de thams cad bsgoms pa las 'byung ba nyid do//gang gi phyir zhe na/ yid kyis zhes bya ba gsungs te/ rnam par rtog pa can gyi shes pas so/ /gal te brtag par mi bya na bsgom par yang mi 'gyur ro zhe na/ thams cad chos ni zhes bya ba la sogs pa gsungs te/ lhan cig skyes pa'i ngo bo nyid yongs su shes par 'gyur ba ni bsgom par bya ba yin no zhes bya ba'i don to//brtan dang g.yo ba'i zhes bya ba la sogs pa la/ de thams cad dam pa'i de nyid ces bya ba de kho na nyid kyi gzugs su bsgom par bya ba'o/ /yang de'i dam pa'i de nyid gang yin zhe na/ bdag gi dngos po'i zhes bya ba la sogs pa gsungs te/bdag gi zhes bya ba ni rang gi sems lhan cig skyes pa'i mtshan nyid can gyi ngo bo'o/ /de rnams dam pa gcig yod min/ /zhes bya ba ni lhan cig skyes pa'i mtshan nyid can gyi de kho na nyid do/ /yang de dag gcig yod min pa ci zhe na/ rang rig ces bya ba gsungs so//gal te yang chos thams cad kyi de kho na nyid ni yang dag pa'i mtha' yin pas de las gzhan pa'i de kho na ni yod pa ma yin zhe na/ rang rig nas ni zhes bya ba la sogs pa gsungs te/ bde ba chen po'i rang bzhin gyi sems kho na las phyag rgya chen po'i dngos grub tu 'gyur ba'o//rang rig phyir ni zhes bya ba ni bde ba chen po'i mtshan nyid can gyi sems kho na rdzogs pa'i rim pa'i phyogs na bsgom par bya ba yin no/ /rang gis rig ces bya ba la/ gang cung zhig sems can rnams kyi las kyi rnam par smin pa las skyes pa'i brtan pa dang g.yo ba la sogs pa rnam pa sna tshogs mthong ba de nyid ni las yin no//gal te de ltar rang rig pa las 'byung bar 'gyur na phyag rgya chen po 'grub par ji ltar 'gyur zhe na/ de'i phyir rtog pa las ni zhes bya ba gsungs te/ rtog pa ni gzung ba dang 'dzin pa'i ngo bo nyid bsgrub pa'o/ /de las skyes par 'gyur gyi/yang sna tshogs kyi rang bzhin gyi lhan cig skyes pa bsgoms pa las ni ma yin no/ /de lta bas na gang gi phyir las rnams ni lhan cig skyes pa'i rang bzhin yin pa'i phyir/ rang gis 'phrog cing rang gis byed/ /ces bya ba gsungs te/ de las ma gtogs pa'i byed pa po gzhan med pa'i phyir ro//rang gis 'phrog cing zhes bya ba ni legs par spyad pa dang nyes par spyad pa'i las rnams so/ /rang nyid rgyal po zhes bya ba ni rgyal po nyid do/ /nyon mongs pa ma lus pa zad par byed pa'i mthu dang ldan pas rang gtso bo zhes bya ba'o/ /'dod chags zhes bya ba la sogs pa ni 'dod chags la sogs pa'o//de kun gnas ni zhes bya ba ni rang rig pa'i go 'phang bsgom par bya ba 'di'o/ /bcu drug char yang zhes bya ba ni nyams par byed par mi nus pa'o/ /da ni rang rig pa'i rang bzhin bstan pa'i phyir chos 'byung las skyes zhes bya ba la sogs pa gsungs te/chos zhes bya ba ni 'phags pa'i chos so/ /de rnams 'di las 'byung bas na chos 'byung zhes bya ste chos kyi dbyings so/ /'dir ni de'i phyag rgyar bstan pa btsun mo'i pad+ma la chos 'byung zhes bya'o/ /de la mos pa'i stobs kyis so//de las byung ba 'di la yod pas na chos 'byung las skyes zhes bya ba ste ye shes so/ /de ji lta bu zhig ce na/ nam mkha' mnyam zhes bya ba ste nam mkha'i rang bzhin can no/ /thabs ni lam mo/ /de yang rnam pa du mar bshad cing bstan to/ /rdzogs pa'i rim pa'i phyogs la lhan cig skyes pa nyid gcig pu tsam bsgom par bya ba la yang thabs du ma nyid kyis yin no//'dis ji ltar na rdo rje 'chang chen po'i go 'phang thob par 'gyur zhe na/ 'jig rten gsum po zhes bya ba la sogs pa gsungs te/ phyogs bcu dus gsum gyi sangs rgyas rnams kyi sku dang gsung dang thugs kyi gsang ba so so yang dpag tu med pas 'jig rten gsum zhes bya'o//de dag bsdus pa ni 'jig rten gsum zhes bya ba rdo rje 'chang chen po ste/ de de las skyes pa'o/ /de'i phyir ye shes de bsgom par bya'o/ /ci'i ngo bo zhe na/ thabs dang shes rab rang bzhin las//zhes bya ba gsungs te/ khyad par can gyi ye shes ni shes rab ste chos kyi sku'o/ /thabs ni 'gro ba'i don byed pa'i thabs so/ /de dag gi rgyu mthun par 'gyur ba ni longs spyod rdzogs pa dang sprul pa'i sku gnyis te/ de dag gi rang bzhin nyid ni de dag gi rang bzhin las skyes pa zhes bya ba'i don to//ji ltar de dag gi rang bzhin las skye zhe na/ khu ba'i zhes bya ba la sogs pa gsungs te/ bcom ldan 'das zhes bya bas ni sku gnyis kyis bsdus pa'i thabs gsungs so/ /de'i bde zhes bya ba ni gang yang nam mkha' dang mnyam pa'i ye shes zhes pa de ni chags can ma ste shes rab ces bya ba'i don to//gcig dang du ma bral ba zhes bya ba la 'di zhes bya ba ni thabs kyi cha ste khu ba'i rnam pa'o/ /gcig dang du ma'i rang bzhin dang bral ba'i phyir brtags na stong pa nyid ces bya ba'i don to/ /de'i phyir na bsgom par bya ba ma yin te/ mi bden pa'i ngo bo nyid yin pa'i phyir myur du byang chub thob pa'i sbyor ba ma yin pa nyid do//skad cig ces bya ba la sogs pa la/ gcig las mchog dga' zhes bya ba ni lhag par dga' ba ste/ lhan cig skyes pa'i bde ba chen po'i ye shes so/ /de nyid ni chos thams cad stong pa nyid de bsgom par bya ba'i mchog gtso bo zhes bya ba'i don to//de la gcig dang du ma'i dpyad pa yod pa ma yin no zhes bya bar dgongs pa'o/ /gal te de la dpyod pa'i skabs yod pa ma yin na de ji ltar shes par 'gyur zhe na/ rang gis rig pa'i zhes bya ba la sogs pa gsungs te/ so so rang gis rig par bya ba yin pas gzhan gyis brjod pa ma yin no//ngag gi lam 'das zhes bya ba ni ngag gi lam ni sgrub pa ste ngag gi lam zhes bya ba'o/ /de las 'das pa ni spyod yul ma yin pa ste/ de'i yul las shin tu 'das pa zhes bya ba'i don to/ /'di ni byin rlabs rim pa'i phyir//zhes bya ba la sogs pa la/ de bzhin gshegs pa thams cad kyi sku gsung thugs bsdus pa nyid kyis de'i rang bzhin no/ /sa dang zhes bya ba la sogs pa tshigs su bcad pa gnyis kyis ni lhan cig skyes pa bsgoms pa'i 'bras bu gsungs so/ /ji ltar na sa la sogs pas mi gnod ce na/gal te sgom pa po 'dod par gyur na sa la 'og tu 'dzul zhing steng du 'byung bar 'gyur ro/ /thad kar yang ri dang rtsig pa la mi thogs par 'gro ba dang 'ong bar yang byed do/ /dug dang mtshon la sogs pas nyon mongs par yang mi 'gyur ro/ /chu'i steng du gnas shing nang du 'jug par yang 'gyur la/nyal ba dang 'dug pa dang 'chag par yang byed do/ /rlung dang char 'bab pa la sogs pas kyang nyon mongs par mi 'gyur ro/ /de bzhin du gzhan dag la yang sbyar bar bya'o/ /rang gzhan rig pa'i tshor ba yis/ /zhes bya ba ni bdag dang gzhan gyi 'das pa dang ma 'ongs pa dang da ltar gyi sems shes pa'o//mtho ris mi yul zhes bya ba la sogs pa la/ gzugs gcig ces bya ba ni rang bzhin gcig pa'o/ /rang gzhan cha'i zhes bya ba la sogs pa'i don bstan zin to/ / lung gzhan dag las dgyes pa'i rdo rje khyad par can rab tu bstan pa'i phyir thams cad rig byed ces bya ba la sogs pa gsungs te/ rig byed ni nges brjod dang srid srung dang snyan dngags dang mchod sbyin no/ /grub mtha' ni mu stegs kyi 'dod pa ste rnying ba la sogs pa dang / nyan thos kyi sde snod kyi mdo sde la sogs pa ste yang srid kyi mthar byed par 'dis 'gyur pas so//las rgyas ni bya ba'i rgyud la sogs pa'o/ /'di dag la bshad pa'i mtshan nyid can gyi dngos grub yod pa ma yin no/ /pha rol tu phyin pa'i theg pa la yod dam 'on te med ce na/ srid pa dag 'gyur zhes bya ba la sogs pa gsungs te/dag pa ni 'dis nyon mongs pa dang shes bya'i sgrib pa zad par byed pas na dag pa ste/ pha rol tu phyin pa drug gi mtshan nyid can gyi lam mo/ /dag pa des byang chub thob par 'gyur te/ 'on kyang srid mthar zhes bya ba bskal pa grangs med pa gsum du skye ba gcig nas gcig tu brgyud par zhes bya ba'i don to//gal te rnal 'byor gyi rgyud du yang tshe 'di la byang chub thob par gsungs na/ de las ci yis lhag par 'gyur zhe na/ de med pas kyang zhes bya ba la sogs pa gsungs te/ de zhes bya ba rang rig pa'i mtshan nyid can gyi lhan cig skyes pa med na skye ba 'di'am skye ba gzhan dag la yang dngos grub yod par ma gsungs so//de ltar na de dang 'di la khyad par ci yod ce na/ gang gis mi shes dgyes pa rdo rje zhes bya ba la sogs pa gsungs te/ rgyud gzhan las ni lhan cig skyes pa bstan pa tsam zhig tu zad la/dgyes pa'i rdo rje 'di las ni yongs su gsal ba'i rnam pa gsungs pa'i phyir ro/ /de'i phyir gang gis dgyes pa'i rdo rje mi shes pa de'i thos pa dang bsam pa dang bsgom pa'i ngal ba don med par 'gyur ro zhes shin tu gsal bar bstan pa yin no/ /gal te byang chub ni rnyed par dka' ba yin na/skye ba 'di la ji ltar thob par 'gyur zhe na/ chu bo'i rgyun zhes bya ba la sogs pa gsungs te/ chu bo'i rgyun ni chu rgyun 'bab pa ste de bzhin du rgyun mi 'chad pa'o/ /mar me'i rtse mo ni mar me'i 'od kyi rtse mo ste de'i rgyun bzhin du'o/ /rtag tu ni rgyun mi 'chad par ro//de nyid rnal 'byor ni lhan cig skyes pa'i dga' ba'i rnal 'byor te/ des nyin mtshan du gnas par bya ba'o/ /nges par de ltar gnas par gyur na tshe 'di nyid la byang chub 'grub par 'gyur ro zhes bya ba'i don to/ /rnal 'byor ma ni bdag med ma la sogs pa'o/ /de dag dang 'du ba ni 'du ba ste gzhal yas khang dang lhan cig skyes pa'i dga' bar ro//de gsal bar byed pa'i le'u la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba las le'u brgyad pa'i 'grel ba'o// //rnam par dag pa'i le'u zhes bya ba la 'dis rnam par dag par byed pas na rnam par dag pa ste/gang gis srid pa thams cad skyon dang bral bar 'gyur ba de ni rnam par dag pa'o/ /de gsal bar byed pa'i le'u la yang rnam par dag pa'i le'u zhes bya ba'o/ /dngos po thams cad la khyab pa ni rnam par dag pa ste/ de bzhin nyid ces bya ba chos thams cad kyi stong pa nyid do/ /brjod ces bya ba ni le'u brgyad par bstan pa'o/ /phyi nas zhes bya ba ni da ltar ro/ /lha rnams zhes bya ba ni rdo rje'i gau rI la sogs pa'o/ /ji ltar ma dag pa ji lta bu zhig ji ltar rnam par dag par byed ce na/ skye mched drug ces bya ba la sogs pa gsungs te/rang bzhin gyis ni zhes bya ba ni de bzhin nyid kyi rang bzhin gyis so/ /gal te dag pa zhig yin na ci'i phyir dag ce na/ nyon mongs zhes bya ba la sogs pa gsungs te/ shes bya'i sgrib pa ni rang bzhin yongs su mi shes pa ste/ mi shes pa'i sgrib pa zhes bya ba'o//nyon mongs pa ni 'dod chags la sogs pa ste/ nyon mongs pa'i sgrib pa'o/ /des bsgribs pa ni bkab pa'o/ /de'i phyir rnam par dag par byed do/ /de bzhin nyid kyi bdag nyid can gyi dag pa de ji lta bu zhig ce na/ rang rig bdag nyid ces bya ba la sogs pa gsungs te/sngar ngas le'u brgyad par bstan pa yin te/ dag pa gzhan gyis rnam grol min/ /zhes bya bar dgongs so/ /yul gyi dngos po zhes bya ba la/ gzugs la sogs pa rnams kyi rang rig pa'i bde ba mchog tu khyad par can du 'gyur ba'i dag pa'o//gzhan yang zhes bya ba ni phyi rol gyi gzug la sogs pa'o/ /dngos po de kun dag pa ste/ /zhes bya ba ni dngos po rnams rang bzhin gyis dag pa'o/ /ji lta bu zhe na/ sangs rgyas bdag ces bya ba gsungs te/ lhan cig skyes pa'i bdag nyid can no/ /'gro ba ni brtan pa dang g.yo ba'o//da ni kye bcom ldan 'das zhes bya ba la sogs pas lha'i rnam par dag pa zhus pa yin no/ /mig ces bya ba la sogs pa la gzung bar bya zhes bya ba ni/ yongs su spyad par bya ba'o/ /myong bar bya zhes bya ba ni yongs su spyod pa'o/ /lce yis zhes bya ba ni ro'o/ / thob par zhes bya ba ni gzung bar bya ba'o/ /gal te dag pa ma yin na bsten par bya ba ma yin no zhe na/ de'i phyir bsten bya 'di dag ces bya ba gsungs te/ bsten bya ni bsten par bya ba'o/ /'di dag dug med par ji ltar bya zhe na/ gzugs phung zhes bya ba la sogs pa gsungs te/rdo rje ma ni gzugs kyi phung po rnam par dag pa'o zhes bya ba'i don to/ /de nyid kyi phyir de nyid rnal 'byor pas zhes gsungs pa yin no/ /dbang ldan du ni zhes bya ba la sogs pa ni phyi rol gyi rim pa nas brtsams pa'o/ /gal te nang gi rim par yang gau rI brjod pa ma yin nam/ phyi rol gyi rim par yang de brjod pa ni ji lta bu zhe na/gzhan yang lha mo gau rI la sogs pa zhes bya ba gsungs te/ ming tsam 'dra ba'i gau rI gzhan zhig go/ /lha mo 'di gnyis zhes bya ba ni lha mo 'di gnyis zhes bya ba'i don to/ /gnas kyi dbye ba ni lha mo rnams kyi dbye ba shes par bya ba'i phyir bstan to//yang 'di dag gi rnam par dag pa ni ma bstan pa de bstan pa'i phyir/ gzugs la gau rI zhes bya ba la sogs pa gsungs te/ de nyid rnal 'byor pas zhes bya ba lha'i de kho na nyid kyi rnal 'byor pa'o/ /phyag gi zhes bya ba la sogs pa ni dgyes pa'i rdo rje phyag bcu drug pa'i phyag rnams kyi rnam par dag pa gsungs pa yin te/phyag bcu drug po rnams kyi de kho na nyid ni stong pa nyid bcu drug ste/ 'di lta ste nang stong pa nyid dang / phyi stong pa nyid dang / phyi nang stong pa nyid dang / chen po stong pa nyid dang / stong pa nyid stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / rang gi mtshan nyid stong pa nyid dang / chos thams cad stong pa nyid dang / dngos po med pa stong pa nyid dang / dngos po med pa'i ngo bo nyid stong pa nyid de 'di dag kho na phyag tu byas pa'o/ /zhabs rnams ni bdud rnams bcom pa'i rnam par dag pa ste/ phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud ces bya ba'o/ /zhal rnams zhes bya ba ni zhal rnams so//rdo rje gsum zhes bya ba ni sku dang gsung dang thugs rdo rje'o/ /sa ni zhes bya ba la sogs pas ni sa la sogs pa rnams kyi rnam par dag pa bstan te/ puk+ka sI la sogs pa'o zhes bya ba'i don to/ /'dis ni zhes bya ba la sogs pa la/ phung po zhes bya ba ni phung po la sogs pa'o//de ltar re zhig bskyed pa'i rim pa'i phyogs kyi rnam par dag pa bstan nas/ yang rdzogs pa'i rim pa'i phyogs la de nyid ro gcig pa'i rnam par dag pa bstan pa'i phyir/ gang dang gang gis zhes bya ba la sogs pa gsungs te/ gzugs la sogs pa gang gis 'jig rten 'ching bar 'gyur ba de nyid kyis bdag nyid grol bar bya'o//lha'i rnam pa'i bsgom pa yang mi bya'o/ /gal te de dang des grol bar 'gyur ba nyid yin na 'jig rten na bcings pa nyid du 'gyur ba ji lta bu zhe na/ 'jig rten rnams rmongs par gyur pas de nyid las 'di bden pa la mngon par zhen pa nyid kyis de nyid mi shes pa ste/de rnams kyi ma skyes pa'i de kho na nyid de ma rtogs pa'o/ /de nyid rnam spangs zhes bya ba ni skye ba med pa'i bsgom pa dang bral ba zhes so/ /dngos grub ni rdo rje 'chang gi go 'phang ste/ rnyed par mi 'gyur ro zhes bya bar dgongs pa'o/ / gang gi phyir de de ltar na de'i phyir zhes bya ba rgyu des dri la sogs pa don dam pa nyid du yod par mi 'gyur ro zhes bya bar dgongs pa'o/ /sems kyi rnam par dag pa yang tha dad du bya ba ma yin te/ de'i skye ba med pa'i ngo bo nyid kyi phyir ro/ /thams cad rnam par dag ces pa ni 'gro ba thams cad rnam par dag pa'o//gang gis 'gro ba rnam par dag ce na/ rnam par dag ces bya ba gsungs te/ chos thams cad kyi stong pa nyid kyi rnam par dag pa'o/ /de'i phyir rang bzhin dag pa'i 'gro la zhes so/ /yang de lta bu sus shes sha na/ 'gro bar zhes bya ba gsungs te/shes par gyur na zhes bya ba'i don to/ /dgyes pa'i rdo rje'i dka' 'grel rnal 'byor rin po che'i phreng ba las rnam par dag pa'i le'u'i 'grel pa ste dgu pa'o// //da ni slob ma mngon par dbang bskur ba sbyin par bya ba yin la/ de yang bris pa'i dkyil 'khor nyid du sbyin pa yin pas/de'i phyir de nas ji ltar zhes bya ba la sogs pa gsungs te/ rim pa yang dag ces bya ba ni phyin ci ma log pa yin pa'i cho ga ste/ cho ga gang gis slob ma dbang bskur bar byed pa de'i cho ga yang dag par rab tu bshad do zhes bya bar sbyar ro/ /nor 'dzin zhes bya ba ni sa gzhi'o/ / lha'i bdag nyid kyi zhes bya ba ni dgyes pa'i rdo rje phyag gnyis pa'i rnal 'byor dang ldan pas so/ /hUM las rdo rje can zhes bya ba la sogs pa la/ stong pa nyid kyi rnam par bsgoms nas ra~M las nyi ma'i dkyil 'khor/ de'i steng du hU~M las sna tshogs rdo rje'o/ /de las rdo rje'i rang bzhin gyi sa gzhi dang /rdo rje ra ba dang / gur dang de'i phyi rol du rdo rje me 'bar bar bsams nas/ oM rak+Sha rak+Sha hU~M hU~M hU~M phaT ces bya bas byin gyis brlabs nas dkyil 'khor bri bar bya'o/ /byang chub sems dpa' ni phyag na rdo rje la sogs pa'o/ /khru gsum zhes bya ba la sogs pa la/ mthe bo gsum gyis lhag pa zhes bya ba'i don te/'di ni dkyil 'khor mdor bstan pa'o/ /rgyas par ni 'og nas 'chad par 'gyur ro/ /dbang bskur ba rab tu brjod par bya ba'i phyir/ rig ma zhes bya ba la sogs pa gsungs te/ bzang mo zhes bya ba ni mchog tu gyur pa'o/ /yang na zhes bya ba ni nus pa med na'o//de'i tshe ni ji ltar rnyed pa'i lang tsho gtsor gyur pa gzhug par bya ba ste/ rnal 'byor ma'i tshul 'di ni 'dod chags chen po'i tshul yin pas so/ /'dis ni slob ma'i mtshan nyid mdor bstan to/ /da ni gsang ba'i dbang bskur ba mdor bstan pa'i phyir/ ji srid ces bya ba la sogs pa ste/phyag rgya'i gdong yang zhes bya ba ni slob ma'i gdong ngo / /thabs kyi zhes bya ba ni slob ma'i'o/ /bya bar bya zhes bya ba la sogs pa de nyid la yang zhes bya ba ni shes rab la'o/ /ro mnyam zhes bya ba ni shes rab kyi dbang bskur ba'o/ /slob ma'i spyod yul zhes bya ba ni slob ma'i gdong g.yogs dgrol ba'o//de dag gis cir 'gyur zhe na/ rang rig ces bya ba la sogs pa gsungs te/ de lta bu nyid kyi ro mnyam pas rang rig ye shes nyid du 'gyur zhes bya'o/ /de khyad par ji lta bu can zhig ce na/ rang gzhan zhes bya ba la sogs pa gsungs te/ bdag dang gzhan gyi char rnam par 'byed pa dang bral ba'o//mkha' mnyam zhes bya ba ni snang ba med pa nyid kyi phyir nam mkha' dang mnyam pa'o/ /nyon mongs pa med pa nyid kyi phyir rdul bral lo/ /spros pa las shin tu 'das pa'i phyir stong pa'o/ /dngos po ni 'byung ba'o/ /dngos po med pa ni 'gag pa'o//de dag gi bdag nyid can de skad ces bya'o/ /mchog ces bya ba ni don dam pa'i shes rab bo/ /thabs kyi stong pa nyid ni shes rab bo/ /thabs ni snying rje chen po ste/ sems can thams cad la bdag nyid dang mnyam pa yongs su myong ba'o/ /de dag 'dres pa ni de dag gzugs gcig tu snang bar 'gyur ba'o//chags pa ni mchog tu dga' ba'o/ /chags pa dang bral ba ni dga' bral gyi dga' ba ste/ de dag 'dres par 'gyur ba'i rang bzhin no/ /srog chags ni sems can no/ /de dag nyid ni srog ste de dag med na srog med pa'i phyir ro/ /yi ge mchog ni thog ma dang tha ma med pa chos kyi dbyings kyi gzugs can nyid kyi phyir ro//khyab pa po ni chos thams cad de'i rang bzhin yin pa'i phyir ro/ /thams cad lus la rnam par gnas/ /zhes bya ba ni srog chags rnams kyi lus la rnam par shes pa gnas pa'i phyir ro/ /de nyid las 'gro ba rnams 'byung bar 'gyur te/de'i bdag nyid can gyi las dang nyon mongs pa las 'byung ba'i phyir zhes bstan pa'i phyir ro/ /dngos dang dngos med ces bya ba la sogs pa gsungs te/ dngos po ni lus so/ /dngos po med pa ni tshor ba la sogs pa'o/ /gzhan dang zhes bya ba ni dbang po drug go//gang rnams de rnams zhes bya ba ni phyi rol gyi dngos po brtan pa dang g.yo ba la sogs pa'o/ /mu stegs pa rnams kyis kyang de nyid la bdag la sogs pa nyid du yongs su brtags pa yin zhes rab tu bsgrub pa'i phyir/ rnam par shes pa kun gyi gzugs//zhes bya ba gsungs so/ /rnam par shes pa'i gzugs ni rig byed kyi mtha' smra ba rnams kyi'o/ /sems kyi gzugs can gyi skyes bu zhes bya ba ni grangs can gyi'o/ /gang zag ces bya ba ni gang zag tu smra ba rnams kyi'o/ /'gro ba'i byed pa po rtag pa'i dbang phyug ces bya ba ni zhi ba'i grub pa'i mtha' smra ba rnams kyi'o//bdag nyid nye bar skye bar 'gyur/ 'tsho bar 'gyur/ 'chi bar 'gyur/ bcing bar 'gyur/ 'gro bar 'gyur zhes bya ba ni bdag tu smra ba rnams kyi'o/ /srog ces bya ba ni phyogs kyi gos can rnams kyi'o/ /sems can zhes bya ba ni sems can du smra ba rnams kyi'o//dus zhes bya ba la/ dus kyis 'byung ba smin par byed/ /dus kyis skye dgu sdud par 'gyur/ /dus kyis logs shig sad par byed/ /dus las shin tu 'da' bar dka'/ /zhes bya ba ni dus rgyur smra ba rnams kyi'o/ /las kyis 'gengs par byed cing de dag yongs su smin pa na 'dzag par yang 'gyur ro zhes bya ba de lta bu ni gang zag tu smra ba rnams kyi'o//dngos po kun zhes bya ba ni 'jig rten dang 'jig rten las 'das pa'o/ /sgyu ma'i gzugs zhes bya ba ni sna tshogs pa'i sprul pa'i sprul pa po nyid do/ /yang de lta bu'i ro mnyam par 'gyur ba de ji ltar slob ma rnams kyi spyod yul du 'gyur bar bya zhe na/dang por zhes bya ba la sogs pa gsungs te/ dga' ba tsam zhes bya ba ni thun mong du 'gyur ba'i bde ba tsam zhes bya ba'i don to/ /gnyis pa'i grangs las zhes bya ba gnyis pa'o/ /gsum pa zhes bya ba ni tha dad du sbyar bar bya'o//dga' bral zhes bya ba ni dga' bral gyi dga' ba'o/ /lhan cig skyes pa zhes bya ba ni lhan cig skyes pa'i dga' ba'i rang bzhin no/ /'di ni bshad pa gcig yin no/ /dang por zhes bya ba la sogs pa la/ dang por zhes bya ba ni thog ma ste/ phyi rol gyi pad+ma dang rdo rje rnal 'byor gyis slob dpon gyi dbang bskur bas dga' ba tsam 'byung ba'o//ci phyir dga' ba tsam yin zhe na/ thun mong gi ngo bo nyid yin pa'i phyir te gzhan dag gis kyang rdo rje dang pad+ma'i sbyor ba de lta bu dang mthun pa'i bde ba nyams su myong bar 'gyur ro zhes byas nas dga' ba tsam zhes brjod do/ /mchog dga' nyid ces bya ba la sogs pa la mchog ni khyad par can du gyur pa ste/man ngag nyid las gsang ba'i nor bur yang dag par myong bar 'gyur ba nyid do/ /gnyis pa'i grangs las zhes bya ba ni dbang bskur ba'i grangs gnyis pa'o/ /gsum pa zhes bya ba la sogs pa la khyad par can gyi dga' ba ni dga' bral te shes rab kyi dbang bskur ba'i mtshan nyid can te/de las gzhan pa'i nor bu bde ba chen po yang dag par rig pa nyid do/ /bzhi pa zhes bya ba la sogs pa la/ bzhi pa ni dbang bskur ba bzhi pa'o/ /lhan cig skyes pa zhes bya ba ni mi gnas pa'i mya ngan las 'das pa'i dbyings kyi ngo bo nyid yang dag par rtogs pa'o//de lta bu'i lhan cig skyes pa nyid ro mnyam zhes bya ba'i sgra dang skad cig ma'i dbye bas slob ma'i spyod yul du nges par bstan pa na/ de'i tshe bcom ldan 'das 'khor gang dag gis yongs su bskor ba brjod par 'dod nas/ sdud pa pos de skad ces bya ba la sogs pa gsungs te/ ngo mtshar zhes bya ba ni rmad du byung ba rtogs par 'gyur ba'o/ /sa zhes bya ba ni sa'o/ /ci'i phyir 'gyel bar 'gyur zhe na/ dang por zhes bya ba la sogs pa gsungs te/ 'gro ba'i gzugs zhes bya ba ni 'gro ba rnams kyi rigs pa nyid kyi phyir ro//mchog dga' 'gro ba nyid ces bya ba ni lam gyi ngo bo nyid kyis kun rdzob kyi bden pa'i ngo bo nyid yin pa'i phyir ro/ /de bzhin zhes bya ba ni de bzhin du zhes bya ba'i don to/ /gang yang dga' bral gyi dga' ba'i ngo bo zhes grags pa de yang shin tu phra ba rang gi sems kyis so sor rig par bya ba'i ngo bo'o//de yang 'gro ba nyid yin te/ kun rdzob kyi bden pa'i rang bzhin nyid kyis te de yang sems tsam nyid yin pas kun rdzob kyi bden par bsdus pa'i phyir ro/ /nyid ces bya ba ni nges par gzung bar bya bar blta'o/ /gsum char yang 'jig rten pa'i 'gro bas rig par 'gyur ba yin pas 'gro ba zhes bya bar brjod do//gsum la lhan cig skyes pa med/ /ces bya ba ni gsum po 'di dag la lhan cig skyes pa yod pa ma yin zhing / yang dag par rigs pa yang med pa nyid de/ mtshan nyid dang bral ba'i phyir zhes bya ba'i don to zhes bya ba ni sdud pa po'i tshig yin te/yongs su rdzogs zhes bya ba'i don to/ /de lta bur gyur pas ngo mtshar skyes par 'gyur ro zhes bya'o/ /bcom ldan bka' stsal zhes bya ba ni sdud pa po'i tshig go/ /sangs rgyas kun dang lhan cig gnyis su med par gyur pa'i sku ni sku gcig pu'o//'dis the tshom nges par sel bar byed pas na the tshom legs par sel ba'o/ /bzang po zhes bya ba ni gtso bo'o/ /rtogs pa'i phyir zhes bya ba ni rab tu bsgrub par bya ba'i phyir ro/ /'dod chags med cing zhes bya ba la sogs pa la 'dod chags ni mchog tu dga' ba'o//chags bral ni dga' bral gyi dga' ba'o/ /dbu ma zhes bya ba ni dang po'i dga' ba'o/ /gsum po 'di dag ni yang dag par rdzogs pa'i byang chub kyi ngo bor dmigs par mi 'gyur ro/ /gsum po zhes bya ba ni gsum po de dag go/ /spangs pa ni tha dad du byas pa'o//lhan cig skyes pa zhes bya ba ni lhan cig skyes pa'i dga' ba'o/ /byang chub ces bya ba ni rdzogs pa'i byang chub kyi rgyu yin pa'i phyir ro/ /'dod chags zhes bya ba ni 'dod chags la dmigs pa'i phyir 'dod chags te/ dbang bskur dang po'o/ /chags bral ni khyad par can gyi bde ba la dmigs pa'i phyir dbang bskur ba gsum mo//dbu ma ni de dag gi bar na gnas par gyur pa ste/ gnyis gsang ba'i dbang bskur ba'o/ /dmigs par mi 'gyur ro zhes bya ba ni yang dag par rdzogs pa'i byang chub kyi de ma thag pa'i rkyen gyi ngo bo nyid ma yin pa'i phyir ro//de'i phyir/ gsum po spangs pa nyid kyi phyir/ /zhes bya ba gsungs pa yin no/ /lhan cig skyes pa zhes bya ba lhan cig skyes pa'i don gyi dbang bskur ba la lhan cig skyes pa zhes bya ste/ bzhi pa zhes bya ba'i don to/ /byang chub brjod ces bya ba ni rgyu la 'bras bu btags pa'o//gal te dbang bskur ba'i khyad par gzhan la yang ci'i phyir brjod par mi bya zhe na/ rgyu yi rgyu nyid yin pa'i phyir/ /zhes bya bar dgongs pa'o/ /de nyid kyi phyir/ dga' ba gsum po rnam par spangs/ /zhes gsungs pa yin no/ /gal te gzhan dag la thams cad du de yod pa ma yin na lhan cig skyes pa zhes bya ba khyab pa po nyid du mi 'gyur ro zhe na/de'i phyir rgyu'i gtso bo nyid yin pa'i phyir/ lhan cig skyes pa la rdzogs pa'i byang chub ces brjod do/ /da ni yang bstan par gyur pa'i lhan cig skyes pa nyid gsal por bstan pa'i phyir/ de yang dga' bral dang por mtshon//zhes bya ba la sogs pa gsungs te/ dga' bral gyi dang po zhes bya ba de mchog tu dga' ba yin nam zhe na/ de ma yin no zhes bstan pa'i phyir/ dga' ba gsum po rnam par spangs/ /zhes gsungs te/ shugs kyis na mchog tu dga' ba'i phyi ma zhes bya bar bstan par 'gyur ro//de yang le'u gsum pa las/ /lhan cig skyes dga'i rang bzhin bdag /mchog mtha' dga' bral dang por ni/ /zhes bya ba gsungs pa yin no/ /bshad pa gcig yin no/ /dga' bral dang po mtshon zhes bya ba ni dbang bskur ba gsum pa la sogs pa'o//mtshon zhes bya ba ni ji ltar rigs par bya'o/ /khyad par ji lta bu zhig ce na/ dga' ba gsum po rnam par spangs/ /zhes bya ba gsungs te/ dga' ba dang mchog dga' dang dga' bral spangs pa ste/ 'di ni mtshan nyid dang bral ba'i ngo bo nyid yin pas ngo bo nyid gzhan yin pa'i phyir ro//de ltar yang dag par mtshon nas man ngag gis lhan cig skyes pa bsgom pa'i ting nge 'dzin las skyes pa gang yin pa de bstan pa ni sprin lta bu dang / sgyu ma lta bu dang / rmi lam lta bu dang / rmi lam sad pa'o zhes gsungs te/ dang por zhes bya ba ni goms par byed pa'i dus su'o//ji ltar sprin dang 'dra zhe na/ sprin srab mos g.yogs pa'i zla ba nya ba ltar mi gsal ba'i phyir ro/ /ji ltar sgyu ma lta bu zhe na/ gang gi tshe mngon sum du gyur pa'i tshe grub pa zhes bya ba bde ba chen po'i ros nges par bsgos pas 'gro ba rnams sgyu ma bzhin du mthong ngo //phyi nas zhes bya ba ni de'i rjes la rmi lam dang 'dra ba'o/ /ji ltar rmi lam dang 'dra zhe na/ bdag dang gzhan du mi dmigs pa'i phyir ro/ /de nas ni rmi lam dang sad pa lta bu ste/ sad pa dang rmi lam gyi gnas skabs la dbye ba med par rtag tu mnyam par gzhag pa'i phyir ro//de ltar ting nge 'dzin bzhi yongs su rdzogs par 'gyur ba'i rnal 'byor pa ci ltar 'grub par 'gyur zhe na/ mi phyed mtshan nyid ma grub pa/ /zhes bya ba la sogs pa gsungs te/ gzugs la sogs pa'i dbye ba med pas mi phyed pa'o/ /dbye ba med pa ji lta bu zhe na/mtshan nyid ma grub pa'i phyir dbye ba med pa'o/ /'dis mtshon par byed pas na mtshan nyid de rang bzhin no/ /de ma grub pa ni dngos po thams cad bde ba chen po'i rang bzhin nyid kyis rang bzhin med par byas pa'o/ /phyag rgya rnal 'byor zhes bya ba/ /phyag rgya chen po'i rnal 'byor te//'grub par 'gyur ba'i zhes bya ba'i don to/ /nyid ces bya ba ni de lta bu'i phyag rgya chen po'i dngos grub ni dbang bskur ba med na 'byung bar mi 'gyur bas dbang bskur ba sbyin par bya'o/ /de'i phyir ston pa zhes bya ba rdo rje 'chang gis de'i ched du dkyil 'khor gsungs pa yin no/ /yang dag 'bar ba zhes bya ba ni rin po che sna tshogs kyis brgyan pa'o//sna tshogs rnga yab ces bya ba ni rgyan sna tshogs can gyi rnga yab dang ldan pa'o/ /mgrin pa gos kyis bkab pa dang / /zhes bya ba ni gos sar pas mgul pa bcings pa'o/ /rin chen lnga ni byi ru dang mu tig dang mu men dang gser dang dngul lo//gzhag ces bya ba ni gzhag par bya ba'o/ /dkyil 'khor bdag po zhes bya ba la sogs pa ni sngon gyi bsnyen pa gsungs pa yin no/ /gang du zhes bya ba ni sa sbyang ba'i yang sngon du'o/ /a sogs sngags kyis zhes bya ba ni a kA ro mu khaM sarba d+harmA NAM Ad+ya nut+pan na twA ta oM AHhUM phaT swA hA zhes bya ba'o//mchod dang gsol ba gdab pa zhes bya ba ni bla ma la'o/ /ji ltar bshad pa de bzhin zhes bya ba ni de kho na nyid bsdus pa la sogs par ro/ /rdo rje sems dpa' zhes bya ba ni dgyes pa'i rdo rje'o/ /phyi nas zhes bya ba ni dbang bskur ba'i rjes thogs su'o//rnam dag ni 'khor ba pa'i skyon dag pa'o/ /ye shes gzugs can ni thams cad mkhyen pa'i ye shes dang mnyam pa'o/ /'khor ba dang ni rnam byang dag /ces bya ba ni ye shes gang la srid pa dang mya ngan las 'das pa dag khyad par cung zad kyang med pa zhes bya ba ni lhag pa ste/spros pa thams cad las shin tu 'das pa'i phyir zhes bya bar dgongs so/ /'di nyid ni mchog dgar zhes bya ba la sogs pa'i tshigs su bcad pa gnyis kyis gsal bar ston par 'gyur ro/ /mchog dga' ni mchog tu gyur pa'i shes rab ste 'od gsal ba'i mtshan nyid can gyi ye shes so//der ni sgom pa med ces bya ba bsgom par bya ba cung zhig kyang med pa'o/ /bsgom pa po ni sems te de yang med pa'o/ /lus ni lus so/ /gzung ba ni snang bar 'gyur ba'i dngos po'o/ /'dzin pa ni mig la sogs pa'o/ /de bzhin du sha dang khrag la sogs pa yang med pa'o//de ltar nyon mongs pa'i sgrib pa yod pa ma yin no zhes bya bar bsgrubs nas/ /shes bya'i sgrib pa yang yod pa ma yin no zhes bstan pa'i phyir mthong ba med ces bya ba la sogs pa gsungs te/ mthong bar bya ba la sogs pa'i phyi rol gyi dngos po yang yod pa ma yin no zhes bya ba'i don to//rlabs med pa'i zhes bya ba la sogs pa la rlabs ni rnam par rtog pa'o/ /de zad par gyur pa ni rlabs med pa'o/ /sna tshogs ni rnam pa sna tshogs su snang ba'o/ /de med pa ni sna tshogs med pa'o/ /'di skad ces bya ba ni 'di skad bcom ldan 'das kyis bka' stsal ba'o//gsol zhes bya ba ni rdo rje snying pos zhus par 'gyur ba'o/ /don ci zhig zhus she na/ ci slad ces bya ba la sogs pa gsungs so/ /dgongs pa ni 'di yin te/ lhan cig skyes pa'i ngo bo nyid kyi rang bzhin gyis rnam par dag pa'i lus 'di ci'i slad du zag pa dang bcas pa'i 'byung ba lnga'i bdag nyid can du 'gyur ba'i rgyu las 'dra bar gyur pa'i 'bras bu 'byung bar 'gyur ro zhes bya ba'i rigs pas 'od gsal ba las bzhengs pa'i rdo rje 'chang gi sku bzhin du lus can thams cad kyang 'gyur te/lhan cig skyes pas bskyed pa'i phyir/ /zhes bya bar dgongs pa'o/ /bcom ldan 'das kyis bka' stsal pa/ /zhes bya ba la 'jig rten pa'i 'di ni bde ba tsam yin na ji ltar lhan cig skyes pa zhes brjod par bya/ 'dra ba dang rgyu'i ngo bo yang yod pa de'i phyir rdo rje'i pad+ma zhes bya ba la sogs pa gsungs te reg par gyur pa na sra ba nyid ni chos so//chos ni sa'o/ /byang chub sems ni khu ba ste/ rlan pa'i ngo bo nyid yin pa'i phyir ro/ /bskyod pa las ni me'o/ /khu ba 'gro bar 'gyur ba ni rlung ngo / /de'i bde ba ni nam mkha'i khams te/snang ba med pa'i ngo bo nyid yin pa'i phyir ro/ /gal te phung po lnga'i bdag nyid ni yin du zad na bde ba chen pos bskyed pa nyid yin pas zag pa med pa'i ngo bo nyid du ci'i phyir mi 'gyur zhe na/ de'i phyir bde ba de nyid ces bya ba la sogs pa gsungs te/ kun rdzob tu rdo rje dang pad+mas bskyed pa de ni de kho na nyid ces bya ba yang ma yin la don dam pa'i lhan cig skyes pa yang ma yin no//ci'i phyir zhe na/ gang phyir 'byung ba che bde ba/ /zhes bya ba la sogs pa gsungs te/ 'byung ba chen po bskyed pa'i phyir ro/ /gal te 'byung ba chen po skyed par byed pa yin pas 'byung ba chen po zhes brjod pa yin no//de ltar na sngar ci'i phyir bsngags par byed ce na/ lhan cig skyes par gang skyes pa/ /zhes bya ba la sogs pa gsungs te/ nang gi bdag nyid can gyi thabs dang shes rab dag las gang byung ba'i lhan cig skyes pa zag pa med pa'i mtshan nyid can de ni don dam par lhan cig skyes par zhes bya ba'i sgras brjod par bya ba yin no//'di nyid gsal bar bstan par bya ba'i phyir rang bzhin zhes bya ba la sogs pa gsungs te/ chos thams cad kyi rang bzhin dang / de bzhin nyid dang / yang dag pa'i mtha' dang / ngo bo nyid ces bya ba ni rnam grangs so/ / de nyid lhan cig skyes pa nyid/ /ces bya ba'i sgras sngar brjod pa yin gyi bde ba tsam ni ma yin no/ /de khyad par ci lta bu can zhig ce na/ rnam pa thams cad ces bya ba la sogs pa gsungs te/ rnam pa thams cad ni sangs rgyas kyi chos thams cad do/ /de dag mdor bsdus pa ni sdom pa ste/sangs rgyas kyi chos thams cad de la brten pa'i phyir ro/ /de ltar nang gi bdag nyid can gyi thabs dang shes rab kyi ting nge 'dzin las skyes pa'i lhan cig bskyed pa brjod pa yin no/ /da ni dmigs pa med pa'i ngo bo nyid kyi thabs dang shes rab kyis bskyed pa'i lhan cig skyes pa bstan pa'i phyir/rnal 'byor snying rje thabs su 'gyur/ /zhes bya ba gsungs te/ sems can thams cad la mnyam pa nyid kyi sems ni snying rje'o/ /de nyid ni thabs kyi mchog yin te de yang dag par rdzogs pa'i byang chub sgrub pa'i thabs kyi gtso bo'i ngo bo yin pa'i phyir ro/ / de nyid rnal 'byor pa rnams kyi gtso bo yin pa'i phyir ro/ /phyag rgya ni shes rab bo/ /de gang zhig ce na/ stong pa nyid de chos thams cad kyis ma skyes pa'o/ /ma skyes pa nyid ci ltar yin zhe na/ rgyu dang bral ba las zhes bya ba gsungs te/ bdag dang gzhan dang gnyis las chos thams cad ma skyes pa nyid do//ma skyes pa'i mtshan nyid can ni stong pa nyid de mchog tu gyur pa'i shes rab bo/ /de dag dbyer med pa 'od gsal ba'i mtshan nyid can don dam pa'i lhan cig skyes pa zhes bya ba de byang chub sems zhes bya ba'i sgras bstan pa yin gyi/ yang phyi rol gyi phyag rgya las nyams su myong ba'i bde ba tsam ni ma yin no zhes bya bar dgongs so//gal te 'di dag rdzogs pa'i rim pa'i rnal 'byor pas sgom par byed pas na gsang sngags bzlas pa la sogs pa bya'am 'on te mi bya zhe na/ sngags kyi bzlas med ces bya ba la sogs pa gsungs te/ sngags ni yi ge oM la sogs pa'o//me la mar la sogs pa blugs pa ni sbyin sreg go/ /dkyil 'khor ba'i dbus su gnas pa ni dkyil 'khor can no/ /dkyil 'khor ni gzhal yas khang ngo / /gal te de lta na bsngags bzlas pa la sogs pa'i 'bras bu rnal 'byor ba de la yod par mi 'gyur ro zhe na/de'i phyir de ni sngags bzlas zhes bya ba la sogs pa gsungs te/ rdzogs pa'i rim pa'i lhan cig skyes pa bsgom pa'i ting nge 'dzin de nyid bsngags pa'i de kho na nyid yin no/ /sems ni ji skad bstan pa'i byang chub kyi sems so/ / de nyid ni bsdus pa ste chos thams cad ro gcig par bsdus pas rnal 'byor pa de'i gzugs can du gyur pa'o/ /de lta bu ni 'dir bzhi pa'i dbang bskur ba zhes bya ba ste/ rnam par rtog pa'i dri ma thams cad 'dis mngon sum du dag par byed pa'i phyir ro/ /dbang bskur ba gsal bar byed pa'i le'u la yang de skad ces bya'o//dgyes pa'i rdo rje'i dka' 'grel rnal 'byor rin po che'i phreng ba zhes bya ba las le'u bcu pa'i 'grel pa'o// //gsang sngags kyi gzhung lugs la sems can rnams gzhug pa'i phyir/ lta stangs bzhi po ltung bar byed pa dang /dbang du bya ba dang dgug pa dang rengs par bya ba rnams mnyam par zhes bya ba la sogs pa gsungs te/ mnyam pa ni mi g.yo ba'o/ /ma rungs pa ni khro ba dang bcas pa'o/ /dpral ba can ni mig 'bras gnyis dpral ba la brten pa ste/ des ni ltung bar byed do//gang g.yon phyogs su brten pa ni g.yon na gnas pa ste des dbang du bya'o/ /gang steng du brten pa dag gis g.yas logs su blta ba des ni dgug par bya bas so/ /sna gong du drang por blta ba gang yin pa des ni rengs par bya ba'o/ /sna'i rtse mo nas 'byung ba nyid kyi rlung ni 'byung ba nyid do//'jug pa ni 'gengs byed do/ /nang gang bar 'gyur ba ni bum pa'o/ /zhugs nas mi g.yo bar gyur pa ni zhi ba'o/ /'di dag goms par bya ba'i gnas bstan pa'i phyir rlon pa'i shing zhes bya ba la sogs pa gsungs te/ khu ba dang bcas pa'i shing dang / me tog dmar po dang / rdo rje shing dang / g.yo ba dang bcas pa'i rtswa rnams la'o/ /'khrul pa ni the tshom dang bcas pa'o/ /gsang ba'i lta stangs ci'i phyir ma gsungs she na/ 'dir dgongs pa ma yin te/ lta stangs bzhi po bsgrubs nas ni/ /mkhas pas sems can gzhug par bya//zhes gsungs pa'i phyir ro/ /skye ba bdun pa ni len bdun skyes pa'o/ /dga' bral dga' ba smod pa la/ /zhes bya ba ni lhan cig skyes pa'i mtshan nyid can gyi dngos grub bo/ /dbang gi las la ni ku ru kul+le khyad par du bsngags te/ de'i sgrub thabs mdor bsdus pa'o//gang sngon du bstan pa der ni rgyas par bshad pa ste/ dgyes pa'i rdo rje'i rgyud brtag pa bcu gnyis par ro/ /mda' ni mda'o/ /gzhu ni gzhu'o/ /ut+pal ni ut+palo/ /lcags kyu ni lcags kyu'o/ /thams cad kyang dmar po'o/ /rdo rje ni rdo rje 'chang ngo / /de'i snying po ni thugs te dgyes pa'i rdo rje'o//de'i mngon par zhes bya ba ma lus par rtogs pa gang yang yod pa de ni rdo rje snying po mngon par byang chub pa'o/ /de gsal bar byed pa'i rtog pa la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba zhes bya ba las brtag pa dang po'i 'grel ba'o// //ras ris la sogs pa la lha rnams nges par gnas pa ni rab gnas so/ /'dir ni de'i cho ga la rab gnas zhes bya'o/ /de'i mtshan nyid ni rang gi ngo bo'o/ /rdo rje ni phyag na rdo rje ste/ de bzhin gshegs pa thams cad kyi sku dang gsung dang thugs so//de nyid ni snying po ste de'i bdag nyid gang la yod pa de la de skad ces bya'o/ /sbyin sreg ces bya ba ni bgegs gzhig par bya ba'i phyir ro/ /srod la zhes bya ba ni mtshan mo rtsom pa'i dus su'o/ /sta gon la sogs byas nas ni/ /zhes bya ba ni cho ga ji lta ba bzhin du sta gon byas nas zhes bya ba'i don to//sangs rgyas kun zhes bya ba ni rab tu gnas par bya ba'o/ /oM zhes bya ba la sogs pa ni mchod pa'i sngags bstan pa'o/ /sna tshogs zhes bya ba'i rnam pa sna tshogs pa'o/ /gong ma'i rgyud kyi lugs rim pa'i dgyes pa'i rdo rje'i rgyud rgyas pa'i cho ga'i rim pas so//skabs la bab pa'i sbyin sreg thams cad bstan pa'i phyir zhi ba'i thab khung zhes bya ba la sogs pa gsungs te/ de nyid la ni zhes bya ba ni gsum po 'di nyid la ci ltar rigs par til la sogs pas sbyin sreg bya ba'o/ /lha mo khyed ni zhes bya ba la sogs pa ni sa gzung ba'i skabs su ste/'di ni sngags brjod pa'i skabs yin par bstan to/ /mthar ni ar+g+ha la sogs pa'i sngags te me la dbul ba'o/ /dgyes pa'i rdo rje'i dka' 'grel rnal 'byor rin po che'i phreng ba zhes bya ba las dang po rab gnas kyi le'u'i 'grel pa'o// //rdo rje snying pos gsol pa zhes bya ba ni zhus pa'o/ /nam mkha' lta bu zhes bya ba la sogs pa la sems can rnams kyi dge ba ma yin pa'i chos thog ma med pa'i dus nas brtsams pa ni nam mkha' lta bu'o/ /de dag gi gnyen po'i phyogs su gyur pa ni rang 'dod pa'i lha bsgom pa'o//de lta bas na mi mthun pa'i phyogs kyi phung po ni rgya mtsho lta bu yin la/ gnyen po'i phyogs ni ku ba lta bur gnas pas/ mi dge ba'i rgya mtsho las rgal bar nus pa ma yin no snyam du dgongs pa'o/ /de ltar na sems can rnams de bsgoms pas grol bar ci ltar 'gyur zhes bya ba ni zhus pa'i don to//bcom ldan 'das kyis bka' stsal ba/ /bdag med rnal 'byor zhes bya ba la sogs pa ste/ rnal 'byor ni ting nge 'dzin te de dang ldan pa'i bdag nyid dam/ /yang na dpal he ru ka'i rnal 'byor dang ldan pa'i bdag nyid ni rnal 'byor gyi mi mthun pa'i phyogs kyi phung po ma lus par spongs nas nges par 'grub par 'gyur ro zhes bya ba'o//gal te rgya mtsho lta bu'i mi mthun pa'i phyogs kyi phung po las lha'i rnal 'byor tsam gyis ji ltar rgal bar 'gyur zhe na/ rgal bar 'gyur ba nyid yin te/ ji ltar ri'i phug gi nang gi mun pa'i phung po yun ring por bsags pa ni 'bar ma thag pa'i me sgron gyis skad cig gis mi snang bar byed do/ /de bzhin du 'dir yang bdag med ma dang dgyes pa'i rdo rje bsgom pa'i khyad par gyis 'gyur ro zhes bya bar dgongs pa'o/ /gal te de ltar na yang gnyen po'i phyogs skad cig tsam bsgoms pas mi mthun pa nyams par 'gyur ba zhig yin na/de lta na ni ci'i phyir dngos grub 'grub par mi 'gyur zhe na/ de ni bden ni de lta na mi mthun pa'i phyogs nyams pa tsam gyis phyag rgya chen po'i dngos grub 'thob pa ni ma yin no//'on kyang tshogs gnyis rdzogs pa des ni 'thob par 'gyur ro/ /de nyid kyi phyir/ gzhan pa'i sems kyis skad cig kyang / /zhes bya ba gsungs te/ gzhan pa'i sems zhes bya ba ni zhi gnas kyi mtshan nyid can gyi bsgom pa'i khyad par las so/ /de yang rim gyis goms pas 'thob par bya ba yin pas na/de'i phyir/ dang por goms par byed dus kyis/ /zhes bya ba la sogs gsungs te/ mtshan dus su zhes bya ba ni mtshan mo nyid kyi dus su ste/ dus gzhan na mi mthun pa'i sa phyogs 'byung bar 'gyur bas so/ /bdag nyid 'grub pa'i zhes pa ni mos pa'i khyad par te/mtshan mo mnyam par gzhag pa'i rnal 'byor bya'o zhes bya ba gsungs pa'o/ /de las gzhan pa'i dus su rgyun mi 'chad par bya ba'i phyir/ rkang pa 'khrud dang zhes bya ba la sogs pa gsungs pa la/ bsten pa dang zhes bya ba ni bsnyen par bya ba'o//gang la bsnyen par bya zhe na/ rnal 'byor ma ste bdag med ma la'o/ /gzhan gyi gzugs kyis zhes bya ba ni bdag med ma ma yin pa'i gzugs kyis so/ /rdo rje snying po zhes bya ba ni nye bar sdud pa'o/ /nyon mongs pa zhes bya ba ni skyon no/ /brtan pa nyid bskyed par bya ba'i phyir ro//brtse bas zhes bya ba la sogs pa gsungs te/ zla phyed ces bya ba ni zla ba phyed do/ /nyi ma gcig tu zhes bya ba ni shin tu mnyam par gzhag pa'i tshul gyis so/ /lan cig ces bya ba ni rtag tu thun re goms par byed pa'o/ /'jig zhes bya ba la sogs pa ni yid ches pa ston par byed do//de ltar zhes bya ba la sogs pa la nges par shes nas zhes bya ba ni nges par spyod pa'i ngang tshul can no/ /phan pa'i 'bras bu 'byung bar 'gyur zhing mi phan pa ste dge ba ma yin pa ni zad par 'gyur ba'o/ /ngu 'bod ces bya ba la 'jig rten gyi spyod pa ni dmyal ba'i rgyu yin no//gal te de lta bur gnas par gyur kyang sdig pa can la sogs pa rnams kyis phyag rgya chen po'i dngos grub 'thob pa'i skabs ga la yod ce na/ mtshams med lnga ni byed pa dang / /zhes bya ba la sogs pa gsungs te/ yan lag ma tshang ba ni yan lag nyams pa'o/ /bsams pas zhes bya ba ni bdag med ma bsgoms pas so//gal te de ltar na chos dang ldan pa rnams kyis ni de 'grub par mi 'gyur zhe na/ dge ba bcu la goms pa dang / /zhes bya ba la sogs pa gsungs te/ rtag tu goms pa'i zhes bya ba la sogs pa la dngos grub thob ces bya ba ni ting nge 'dzin thob pa'o//de nyid kyi phyir mnyam par gzhag pas zhes bya ba gsungs pa yin no/ /zla ba gcig tu zhes bya ba la sogs pa la/ gsang la zhes bya ba ni sbas pa'i brtul zhugs las te phyag rgya chen po thob par bya ba'i phyir ro/ /de nas rnal 'byor ma rnams gnang ba nye bar ston par 'gyur ro//byang chub sems kyis zhes bya ba ni gsum la skyabs su 'gro ba la sogs pa'o/ /lha'i gzugs kyis sems ni lha'i rnal 'byor nyid do/ /dam tshig ni bsrung bar bya ba dang bza' bar bya ba la sogs pa'o/ /sems kyang gcig pa zhes bya ba ni lhan cig skyes pa'i rnal 'byor ro//skal ldan par zhes bya ba ni dngos grub kyi skal ba dang ldan par ro/ /rtog pa ni rnam par rtog pa'o/ /bkug la zhes bya ba ni kun dgug pa'o/ /de yang zhes bya ba ni mchog thob pa'am dgug pa de'o/ /brtan pa bstan pa'i phyir zhes bya ba ni brtan par rab tu bsgrub pa'i phyir ro//de nas longs spyod phyir ni spyad ma gsungs/ /zhes bya ba la sogs pa gsungs te/ spyad par bshad ces bya ba sngar brtul zhugs kyi le'u'i nang du'o/ /'jigs pa'i tshul gyis zhes bya ba ni dka' ba dang bcas pas 'jug pa nyid do/ / rdo rje snying pos gsol zhes bya ba la don ci zhig zhus she na/ bdag med rnal 'byor zhes bya ba la sogs pa gsungs te/ phyag rgya zhes bya ba ni phyi rol gyi phyag rgya ste/ ci'i phyir tshol bar byed ces bya bar dgongs pa'o/ /phyag rgya phyag rgya gnyis dag gis/ /zhes bya ba la gnyi ga phyag rgyar gyur pas phyag rgya'i dngos grub ces bya ba'o//bud med gzugs zhes bya ba ni bdag med ma'i gzugs so/ /bcom ldan 'das zhes bya ba ni dgyes pa'i rdo rje'o/ /nu ma spangs pa zhes bya ba ni nu ma gnyis spangs par 'gyur bas rdo rjer 'gyur bar bya'o zhes bya ba'i don to/ / 'gram gnyis zhes bya ba la sogs pa la/ 'gram gnyis po nyid dril bu zhes bya ba 'bras bur ro/ /ze'u 'bru zhes bya ba ni sna ste rdo rjer bya'o/ /dga' chen zhes bya ba ni 'dod chags chen po'i rang bzhin no/ /phyag rgya'i dngos grub 'gyur zhes bya ba ni phyag rgya chen po'i dngos grub tu 'gyur ba'o//de'i phyir zhes bya ba ni rim pa de gnyis kyis so/ /gsal dang mi gsal zhes bya ba ni bskyed pa'i rim pa sgom pa dang ldan pa'i'o/ /gal te phyag rgya chen po'i dngos grub thob pas lha'i gzugs gnyis thob par gyur pa de'i phyag rgya chen po'i dngos grub de yang ji ltar gzhal yas khang na spyod pa'i tshangs pa la sogs pa'i lus 'chags pa dang 'jigs pa dag gis bskyed cing 'jigs par 'gyur ba bzhin du yin nam zhe na/'byung dang 'jig pa dag gis kyang / /zhes bya ba la sogs pa gsungs te/ 'byung ba dang 'jig pa dag gis kyang gnod par mi 'gyur ro//ci'i phyir gnod par mi 'gyur zhe na/ thabs ni zhes bya ba la sogs pa gsungs te/ 'byung ba nyid ces bya ba ni rtag tu 'byung bar 'gyur te/ ji srid nam mkha' gnas kyi bar du rtag pas rtag par gyur pa zhes bya ba'i don to/ /'di nyid thabs te de'i 'bras bu bsgom pa rdzogs par 'gyur ba nyid ji ltar 'jig par 'gyur/'jig pa zhes bya ba ni dngos po thams cad mi dmigs pa'o/ /de nyid ni shes rab ste 'di nyid kyis srid mthar byed ces bya ba lus la mngon par zhen pa mthar byed pa'o/ /de dag ro gcig par 'gyur ba rmi lam dang mig 'phrul dang sgyu ma dang smig rgyu lta bu nam mkha' ji srid kyi bar du gnas pa'i sku gnyis ni phyag rgya chen po'i dngos grub bo//gang gi phyir de lta bu'i rnam pas 'byung ba dang 'jig pa yod pa ma yin te/ gzhan yang de kho na nyid du gang yang 'jig pa yod pa ma yin no//gal te la la dngos po'i ngo bo zhig tu gyur na ni skye zhing 'jig par yang 'gyur na/ ji srid mi gnas pa'i mya ngan las 'das pa'i ngo bo nyid 'dus ma byas kyi mtshan nyid can yin pa de'i phyir gang zhig 'jig par 'gyur ba de med pas zad pa yang med do/ /de lta bas na de ltar phyag rgya chen po'i dngos grub thob pa la 'byung ba dang 'jig pa yod par mi 'gyur ro zhes bya bar gnas pa yin no//de yang bsgoms pas thob par bya ba nyid yin pas ci lta bu zhig bsgom par bya zhe na/ bskyed pa'i rim pa zhes bya ba la sogs pa gsungs te/ spros pa zhes bya ba ni rten dang brten pa'i mtshan nyid can de rnam pa sna tshogs pa'o//rmi lam ltar byas na zhes bya ba ni ji ltar rmi lam na sems nyid rnam pa sna tshogs par snang ba de ltar byas pa nyid do/ /spros pa zhes bya ba la sogs pa la dag gi rnam par rtog pas spros par mi byed cing rnam par rtog par mi byed pa'o//rim pa 'di ltar goms par byas pas cir 'gyur zhe na/ ji ltar sgyu ma zhes bya ba la sogs pa gsungs te/ dri za'i grong khyer zhes bya ba na seng ge'i zla ba'i grong khyer ro/ /de bzhin 'dod ces bya ba ni de lta bur gsal po nyid du gyur ba zhes bya ba'i don to//da ni rim pa'i bdag nyid can gyi bde ba chen po de nyid ngo bo nyid kyi dkyil 'khor gyi 'khor lor bsgom par bya'o zhes rab tu bsgrub pa'i phyir phyag rgya chen pos zhes bya ba la sogs pa gsungs te/ phyag rgya'i dbang bskur ba ni shes rab kyi dbang bskur ba ste bzhi po de dag go/ / ci ltar shes pa'i zhes bya ba'i bla ma'i man ngag nyid las ji ltar rig pa'o/ /de ci zhig ce na/ bde ba chen po zhes bya ba ni bsgrub bya sgrub byed kyi mtshan nyid can te/ de nyid las byung bar gyur pa ni dkyil 'khor 'di nyid yin no zhes bya ba'i don to/ /byin rlabs zhes bya ba ni de'i rang bzhin no zhes bya ba'i don to//dkyil 'khor zhes bya ba ni dgyes pa'i rdo rje dang bdag med ma'i dkyil 'khor ro/ /gzhan las 'byung ba med ces bya ba ni gzhan las 'byung bar 'gyur ba ma yin pa'o/ /gal te shes rab kyi ye shes kyi dbang bskur ba ni spros pa med pa'i mtshan nyid kyi bde ba tsam nye bar dmigs pa yin na/des ji ltar rnam pa thams cad kyi mchog dang ldan pa'i dkyil 'khor 'byung bar 'gyur/ 'dra bar 'gyur ba las 'dra bar 'byung bar 'gyur ro zhes gsungs pa'i phyir ro zhe na/ de ltar ni ma yin te/ /'dra ba las 'dra bar 'byung bar 'gyur ro zhes bya ba ni 'jig rten gyi tha snyad tsam du yin te/ ji ltar kun gzhi rnam par shes pa smra ba rnams kun gzhi rnam par shes pa ni 'gro ba rnams kyi sa bon 'dzin pa yin no zhes smra ba ltar/ de bzhin du shes rab ye shes kyi dbang bskur bas rtogs par byas pa bde ba chen po'o/ /mtshan nyid can chos thams cad kyi stong pa nyid ces bya ba yang chos thams cad kyi rten du gyur pa nyid yin no zhes theg pa chen po'i gsang sngags las sngags par byed do//de nyid bsgrub par bya ba'i phyir/ bde ba gnag ces bya ba la sogs pa gsungs te/ gnyis sbyor zhes bya ba ni thabs dang shes rab kyis snyoms par 'jug pa'o/ /dngos ni sangs rgyas lnga'i rang bzhin no//dngos med ni de dag nyid kyis spros pa med pa nyid do/ /thabs dang shes rab kyi rang bzhin nyid kyi dpal dgyes pa'i rdo rje'i dkyil 'khor du ni ji ltar bde ba'i ngo bor 'gyur zhe na/ rdo rje sems dpa' zhes bya ba la sogs pa gsungs te/ thabs dang shes rab kyi rang bzhin dag nyi ma dang zla ba yang dag par 'byor pa las 'byung ba'i sa bon las 'byung ba'i phyag mtshan gyi rdo rje dang /de'i dkyil na gnas pa'i sa bon ni sems dpa' ste/ rdo rje dang bcas pa'i sems dpa' ni rdo rje sems dpa'o/ /de nyid bde ba zhes bya bar brjod do/ /rdo rje snying pos gsol pa zhes bya ba la don ci zhig gis gsol zhe na/bskyed pa'i rim pa'i de nyid bcom ldan 'das kyis bde ba'i ngo bo nyid du bsngags pa'i phyir/ rdzogs pa zhes bya ba la sogs pa gsungs te/ bsgom pa zhes bya ba ni lha nyid bsgom pa'o/ /med pa'i bskyed pa yis ni ci zhig dgos//zhes bya ba ni dgos pa med do zhes bya ba'i don to/ /dgongs pa ni 'di yin te/ bde ba chen por mos pa'i dkyil 'khor gyi 'khor lo bsgom pa'i 'bad pa 'dis ci zhig dgos/ /bde ba chen po 'ba' zhig kho nas mngon par 'dod pa'i don 'grub par 'gyur ro zhe na/gus pa bstan pa'i phyir/ dad pa'i shugs kyis rab tu nyams/ /zhes bya ba la/ bskyed pa'i rim pa la gus pa dang ldan pa nyams pa zhes bya ba bskyed pa'i rim pa spong bar byed pa nyid do/ /lus kyi dngos med ces bya ba ni bskyed pa'i rim pa de nyid la stong par byed pa'o//ci ltar zhe na/ gang las bde zhes bya ba de gzhan las bde ba nye bar bstan par nus pa ma yin no/ /de lta bas na bde bas nye bar khyab pa de nyid 'gro ba zhes bya bar brjod do/ /khyab par byed pa'i ngo bo 'ba' zhig gis ni ma yin gyi/ khyab par bya ba'i ngo bos kyang yin no/ /gnyi ga yang khyab par bya ba dang khyab par byed pa'i ngo bo nyid yin te/ ji ltar bde ba med par yang lus la sogs pa yod pa ma yin la/ lus de med par yang bde ba yod pa ma yin no zhes bya ba'i don to/ /ji ltar me tog bya ba la sogs pas ni dpe gsungs pa yin no//gal te de ltar na dkyil 'khor gyi 'khor lo bsgom pa kho nas chog mod/ bde ba chen po bsgom pas ci zhig bya zhe na/ dngos bdag ces bya ba la sogs pa gsungs so/ /dngos bdag ces bya ba ni longs spyod rdzogs pa dang sprul pa'i sku'i ngo bo nyid kyi dkyil 'khor gyi 'khor lo'i gzugs nyid do//dngos po bdag ma yin zhes bya ba la sogs pa ni chos kyi sku'i ngo bo nyid dang bde ba chen po'i rang bzhin gyis so/ /gal te khyod nyid dkyil 'khor gyi 'khor lo'i rnam pa nyid kyi ngo bo nyid zhig yin na ni de lta na dkyil 'khor ni gcig dang du ma'i rang bzhin dang bral ba'i phyir/khyod nyid 'khrul pa'i ngo bo yin pas de lta bas na sangs rgyas ma yin no snyam du bsams pa'o/ /de lta bas na sangs rgyas bdag ces bya ba la sogs pa gsungs te/ sangs rgyas bdag ces bya ba la dngos po ni chos thams cad do/ /de dag rtogs pa ni rnam pa thams cad mkhyen pa'o//ye shes de dang ldan pas sangs rgyas bdag med ces bya'o/ /de lta bas na bdag ni mchog tu zab pa'i sku gnyis kyi ngo bo nyid yin no zhes bstan pa'i phyir/ rmongs pa gang gis nga mi shes/ /zhes bya ba la sogs pa gsungs te/ rmongs pa zhes bya ba ni thos pa dang mi ldan pa dge ba'i bshes gnyen la bsnyen bkur bya ba dang bral ba'o//de lta bu'i zab mo'i ngo bo nyid kyi sku gnyis gsal bar bstan pa'i phyir/ bde chen gnas der rtag tu bzhugs/ /zhes bya ba la sogs pa gsungs te/ de bzhin gshegs pa 'od dpag med kyi sangs rgyas kyi zhing la bde ba can zhes brjod do//'dir ni bdag med ma la sogs pa'i b+ha ga la bde ba can zhes bya ste/ mdor bsdus pa'i rang bzhin gyi bla na med pa'i bde ba srung bar byed pa'i phyir te/ der bdag gnas pa'o/ /bde ba chen po'i gzugs su gcig par chos thams cad mtshon par bya ba'i phyir/e yi rnam pa'i cha byad gzugs/ /zhes pa'o/ /sangs rgyas nyid ni rin po che'o/ /de'i za ma tog ni gzhag pa'i gnas so/ /da ni de lta bu'i bdag nyid kyi che ba'i bdag nyid bstan pa'i phyir/ 'chad pa po bdag ces bya ba la sogs pa gsungs te/'di lta bu'i chos dgyes pa'i rdo rje la sogs pa 'chad par byed pa'o/ /nyan pa zhes bya ba ni yon tan dang ldan pa'i slob ma'o/ /bsgrub bya bdag ces bya ba ni gang sngar bstan pa'o/ /de'i sgrub pa po yang bdag nyid yin pa'o/ /'gro ba'i ston pa ni longs spyod rdzogs pa'i sku dag ste bdag nyid yin pa'o//'jig rten 'jig rten 'das pa zhes bya ba la sogs pa la gnyi ga spros pa las byung ba ni 'jig rten no/ /'jig rten las 'das pa ni de dag nyid rgyur gyur pa'i byang chub sems khu ba ste/ 'di 'jig rten la dgos pa'i phyir dang /longs spyod rdzogs sku'i ngo bo nyid yin pas bdag nyid yin no/ /gal te khyod gtsor bde ba chen po'i ngo bo nyid yin na de ji lta bu zhig ce na/ lhan cig skyes dga'i zhes bya ba la sogs pa gsungs te/ lhan cig skyes pa'i dga' ba de khyad par ji lta bu can zhig ce na/mchog mtha' zhes bya ba la sogs pa gsungs te/ mchog tu dga' ba'i mtha' dga' bral gyi dang po gang yin pa de de nyid yin no zhes bya ba'i don to/ /gal te bsgrub par bya ba bde ba chen po kun gyi bdag nyid gang yin pa de nyid khyod yin zhes sngar gsungs pas 'khor ba pa'i lhan cig skyes pa'i bde ba de ni bsgrub bya ma yin na'ang /de ji ltar khyod nyid yin par 'gyur zhe na/ de bzhin bus kyang zhes bya ba la sogs pa gsungs te/ kyang zhes bya ba'i sgra ni gtan tshigs so/ /gang gi phyir de nyid gtsor dpes bstan par bya ba yin pas 'dra bar 'gyur ba'i dpe nyid gyis rab tu bsgrub par bya ba yin pas de nyid ni gtsor bstan pa yin la/'di ni nye bar btags pa yin no/ /de nyid bstan pa'i phyir/ mun pa la ni mar me bzhin/ /zhes bya ba la sogs pa gsungs te/ 'ga' zhig ji ltar mun pa'i yul na gnas pa'i bum pa dang /snam bu la sogs pa rnams me sgron gyis gsal bar byed par bsgrub pa ltar/ de bzhin du dpar gyur pa 'jig rten pa'i lhan cig skyes pa'i bde bas bsgrub bya'i mtshan nyid bde ba chen po sgrub par byed pa yin par blta bar bya'o//bde gnas su zhes bya ba la sogs pa la sngar gsungs pa de nyid gsal bar bstan pa'i phyir/ sum cu rtsa gnyis zhes bya ba la sogs pa gsungs te/ mtshan dang dpe byad kyis 'bar ba'i sku'o/ /gtso bo zhes bya ba ni sangs rgyas kyi chos kyi bdag po'o/ /btsun mo zhes bya ba ni dpe ste rdo rje'i btsun mo'o//de'i b+ha gar khu ba zhes bya ba ni bdag nyid gnas pa'o/ /khu ba ni bde ba ste phyi rol gyi khu ba'o/ /de med ces bya ba ni khu ba de med na'o/ /gang gi phyir bde ba ni khu ba ltos pa dang bcas nas 'byung ba'i phyir te/ khu ba med na rgyu gzhan gyis de lta bu'i bde ba 'byung bar nus pa ma yin pa'i phyir ro//des na lha'i rnal 'byor las kyang bde ba 'byung bar 'gyur zhes brjod pa yin te/ de dang 'dra bar bde ba chen po 'dod pas lha'i rnal 'byor nges pa kho nar bya ba yin no/ /de'i lam ni dngos po yang ma yin dngos po med pa yang ma yin te/ khu ba dang bde ba'i ngo bo nyid yin pa'i phyir ro//de'i 'bras bur gyur pa sangs rgyas kyang dngos po yang ma yin dngos po med pa yang ma yin no/ /ji lta zhe na/ zhal phyag rnam pa zhes pa la sogs pa gsungs te/ longs spyod rdzogs pa'i sku'i ngo bo nyid ni gzugs can no/ /mchog tu bde ba'i chos kyi sku nyid kyis ni gzugs med pa'o//de'i phyir mi gnas pa'i gzugs can nyid yin pas na/ gzugs can ma yin gzugs med min/ /zhes bya bar gnas pa ma yin no/ /gang gi phyir de ltar na/ de'i phyir 'gro kun lhan cig skyes/ /zhes bya ba ste sems can thams cad do/ /lhan cig skyes pa zhes bya ba'i don ci zhig ce na/rang bzhin lhan cig skyes par brjod/ /ces bya ba ste/ chos rnams kyi rang bzhin dang lhan cig skyes pa zhes bya ba ste rnam grangs so/ /de nyid ni mya ngan las 'das pa ste/ ji ltar byas nas she na/ rnam dag rnam pa'i sems kyis ni/ /zhes bya ba la sogs pa gsungs te/rnam par dag pa ni dri ma med pa ste/ 'od gsal ba'i ngo bo nyid do/ /de'i rnam pa can gyi sems su gang gi tshe mya ngan las 'das par gyur pa yin no zhes bya ba'i don to/ /gal te dngos po dang dngos po med pa'i ngo bo nyid yin pa'i phyir 'gro ba sangs rgyas kyi rang bzhin nyid yin na/de lta na ni ci'i phyir lha'i rnam par sgom par byed ce na/ de ni bden na lha'i rnam pa'i zhes bya ba la sogs pa gsungs te/ bzhin lag kha dog ces bya ba la sogs pa ni tha mal pa'i lus kyi ni zhes bya ba'i don to/ /de ltar na yang bsgom pa don med do zhe na/'on kyang zhes bya ba la sogs pa gsungs te lus phal pa'i khyad par gyi de'i bag chags zhes bya ba ni lhag ma'o/ /de spang ba'i phyir zag pa med pa'i phung po'i bag chags rgyas par bya ba'i don du lha'i sku bsgom par bya ba yin no snyam du dgongs pa'o/ /da ni lus kyi bsgom pa yang mi gnas pa'i mya ngan las 'das pa'i rgyu nyid yin no zhes bya ba 'di bsgrub par bya ba yin pas/de'i phyir 'di nyid dpe du mas bsgrub par bya ba'i phyir/ dug de nyid shes pa des zhes bya ba la sogs pa gsungs te/ 'byin par byed ces bya ba ni 'jil bar byed pa'o/ /ji ltar snga ma la rlung zhes bya zhe na/dbugs kyi rgyu yin pa'i phyir ro/ /ji ltar zlog pa yin zhe na/ rigs gcig pa yin pa'i phyir ro/ /de'i brtags pa ni de nyid phan par ro/ /srid pa ni 'khor ba'o/ /dag pa ni yongs su zad pa'o/ /srid pa nyid kyis zhes bya ba ni nyi ma dang zla ba dang phyag mtshan dang sa bon yongs su gyur pas ni srid pa ste/lha'i rnam pa nyid kyis de dag zad par 'gyur ro zhes bya ba'i don to/ /rnam rtog ni 'khor ba'o/ /kun rtog ni lha'i rnam pa'i kun rtog pas zad par 'gyur ro zhes bya ba'i don to/ /ji ltar rna bar chu zhugs pa/ /zhes bya ba ni dpe bstan pa'o//de bzhin zhes bya ba la sogs pa la/ dngos po ni rnam par rtog pa'i ngo bo ste 'khor ba'o/ /rnam par zhes bya ba ni lha'i rnam pa'o/ /nges par zhes bya ba ni the tshom med par zhes bya ba'i don to/ /ji ltar zhes bya ba la sogs pa la 'dod chags ni nyon mongs pa'o//de nyid ni me'o/ /des tshig pa ni yongs su gdungs pa'o/ /'dod chags kyi mes bsregs shing yongs su btsos pa la/ 'dod chags chen po bsgom pa nyid thabs dang shes rab gnyis su med pa'i sku'i mtshan nyid can bstan pa'o/ /gang dang gang gis zhes bya ba la sogs pa la/ 'ching 'gyur zhes bya ba ni bcings par gyur pa'o/ /mi zad pa'i las zhes bya ba ni srog gcod pa la sogs pa'o/ /thabs ni snying rje chen po'o/ /chags pas zhes bya ba ni 'jig rten pa'i chags pa'o/ /rnam grol 'gyur zhes bya ba ni lhan cig skyes pa'i chags pas so//bzlog pa'i zhes bya ba ni rang gi phyogs nyid yin na yang mi mthun pa'i phyogs ltar gyur pa'o/ /yang dag par ni 'dod chags gcig pur ma zad kyi 'jig rten pa'i chos thams cad kyi yang ngo / /mi shes zhes bya ba ni de lta bu'i bde ba chen po bsgom pa mi rtog pa'o/ / sangs rgyas zhes bya ba ni nyan thos la sogs pa'o/ /ji ltar na de dag sangs rgyas zhes bya zhe na/ sangs rgyas nyid ston par khas len pa'i phyir ro/ /ci'i phyir mu stegs zhes bya zhe na/ bcom ldan 'das kyi bstan pa'i snying por gyur pa rdo rje theg pa nyid la rab tu sdang ba'i phyir ro/ /de dag gis ni dkyil 'khor gyi 'khor lo bsgoms pas phyag rgya chen po'i dngos grub 'grub par 'gyur ro zhes rab tu bsgrub pa yin no//da ni bde ba chen po'i mchog de nyid dpag tu med pa'i rigs su 'gyur ro zhes rab tu bsgrub pa'i phyir dbang po gnyis sbyor bas zhes bya ba la sogs pa gsungs te/dbang po gnyis sbyor ba zhes pa ni shin tu dga' ba'i sbyor ba'o/ /'gyur zhes bya ba ni 'byung bar 'gyur ba'o/ /lnga zhes bya ba ni longs spyod rnam pa lnga'o/ /'byung ba'i rang bzhin zhes bya ba ni sa la sogs pa 'byung ba chen po lnga'i ngo bo nyid do/ /yang de ci zhig ce na/ gcig nyid las zhes bya ba'o/ /lnga ru zhes bya ba ni rnam pa lngar ro/ /dbye bas zhes bya ba ni 'byung ba chen po lnga'i dbye bas so/ /rdo rje pad+mas zhes bya ba la sogs pa la/ sra bar zhes bya ba ni sra bar shes pa ste sa'i khams so/ /de nyid ni gti mug gi chos te sra ba'i phyir ro/ /drod ces bya ba ni dro ba'o//'dod chags drod las zhes bya ba ni chags pa nyid do/ /rlung gi rang bzhin gyis 'jug par 'gyur ba'i phyir ro/ /de nyid kyi phyir phrag dog ste/ i ra ga ta pi ti zhes bya ba'i skad kyi dbyings so/ /bde ba ni snyoms par 'jug pa'i chags pa ste/ chags pa med pa'i mtshan nyid can yin pa'i phyir ro//de nyid ni 'dod chags te 'gro ba thams cad kha dog bsgyur ba'i phyir ro/ /de ni nam mkha'i mtshan nyid de/ rang bzhin med pa'i phyir ro/ /phra ma rdo rje ni rin chen 'chang ngo / /don dam par rab tu ston par byed pas na phra ma'o/ /sems ni rin po che zhes bya ba ni bde ba chen po'i rang bzhin gyi sems so//rang bzhin lnga zhes bya ba la sogs pa la/ de nyid las zhes bya ba ni de dag nyid las so/ /gang gA'i klung bcu'i zhes bya ba la sogs pa la/ rigs gcig ni zhes bya ba ni de bzhin gshegs pa'i rigs gcig nyid la'o//rigs kyi tshogs la zhes bya ba ni de bzhin gshegs kyi rigs kyi tshegs la ste/ de bzhin gshes pa'i rigs kyi tshogs can gyi rigs te/ rigs de las rigs 'byung bar 'gyur ro/ /rigs 'bum so so las kyang rigs bye ba 'byung bar 'gyur ro/ /de dag las kyang rigs gzhan grangs med pa 'byung bar 'gyur ro//de dag thams cad kyang mchog tu dga' ba'i rigs las 'byung bar 'gyur ro/ /mkha' 'gro ma ni rdo rje mkha' 'gro ma'o/ /de'i dra ba ni tshogs te dkyil 'khor gyi 'khor lo'o/ /de'i sdom pa ni bde ba'i mchog go/ /de'i phyir dngos grub ces bya ste de gtan la dbab pa'o//dgyes pa'i rdo rje'i dka' 'grel rnal 'byor rin po che'i phreng ba las le'u gnyis pa'i 'grel pa'o// //de nas zhes bya ba la sogs pa la rdo rje can zhes bya ba ni rdo rje 'chang de/ /rgyud thams cad kyi gleng gzhi ni dgyes pa rdo rje'i rgyud kyi dbang du byas pa ste/de'i ched du byas pa'i dang por bstan pa'i rgyud do/ /zhes bya ba ni ming de skad ces bya bar rab tu grags pa'o/ /thabs zhes bya ba ni yang dag par rdzogs pa'i byang chub sgrub pa'i thabs so/ /de nyid mdor bstan pa'i phyir sdom pa dang ni zhes bya ba la sogs pa gsungs te/sdom pa ni bde ba chen po'i ye shes so/ /dbang ni dbang rnam pa bzhi'o/ /dgongs pa'i skad ni mngon par dgongs pa'i skad nyid do/ /dga' ba dang zhes bya ba ni dga' ba rnam pa bzhi'o/ /skad cig dbye ba zhes bya ba ni skad cig ma rnam pa bzhi'o/ / gzhan yang zhes bya ba ni spros pa med pa nyid kyi spyod pa'o/ /yang zhes bya ba ni mig la sogs pa dag pa'o/ /bza' ba ni slob dpon gyis so/ /sogs pa zhes bya ba'i sgras ni nges par bya ba'i tshigs bcad bsdu ba'o/ /sdom pa zhes bya ba la sogs pa la/ gang gis sdom pa zhe na/sangs rgyas kun gyi zhes bya ba ste/ bde ba chen po'i ngo bo nyid kyis sangs rgyas kun la tha dad pa mi mnga' ba'i phyir ro/ /e waM rnam par zhes bya ba ni chos 'byung gi phyag rgya la gnas pa'o/ /de ji ltar shes par bya zhe na/ dbang las yang dag ces bya ba la sogs pa gsungs te/bla ma'i man ngag las shes par bya zhing rab tu bsgrub par bya'o/ /mkha' 'gro ma'i zhes bya ba ni DA DA ni mkha' la 'gro bar byed pa zhes bya ba'i skad kyi dbyings kyis 'dir brtags nas/ nam mkha' la 'gro ba 'grub pa thams cad la mkha' 'gro zhes kla klo'i skad kyis bcom ldan 'das kyis bstan pa yin pas/mkha' 'gro ma ni rdo rje rnal 'byor ma'o/ /de dag sdom pa ni mchog tu mdor bsdus pa'i phyir ro/ /de bzhin gshegs pa thams cad kyi sku dang gsung dang thugs ngo bo nyid gcig par bstan pa'i phyir/ e'i rnam pa'i cha byad do//'di la bzang po yod pas na bzang po ste/ baM gyi rnam pa'o/ /brgyan pa ni des pad+ma'i ze'u 'bru mdzes par byas pa'o/ /gnas zhes bya ba ni rten no/ /sangs rgyas rin chen zhes bya ba la sogs pa la/ de bzhin gshegs pa lnga ni snod du gyur pa la de skad ces bya ste/de dag gi rten gyi ngo bo nyid yin pa'i phyir ro/ /dga' ba de las skye bar 'gyur/ /skad cig dbye bas phye ba yi/ /zhes bya ba ni rnam pa sna tshogs la sogs pa'i dbye bas phye ba'o/ /gal te dga' ba nyid yod par gyur na skad cig ma'i dbye bas ci zhig bya zhe na/ skad cig shes nas zhes bya ba la sogs pa gsungs te/skad cig ma rnams kyis rang gi ngo bo shes na ni dga' ba rnams kyis bde ba'i byed pa yongs su shes par 'gyur gyi/ gzhan du ni ma yin no zhes bya bar dgongs pa'o/ /skad cig ma'i dbye ba de dag nyid bstan pa'i phyir/ sna tshogs dang ni zhes bya ba la sogs pa gsungs te/sna tshogs zhes bya ba sna tshogs pa la mkhas pa ste slob dpon gyi las so/ /rnam smin zhes bya ba la sogs pa la/ de las zlog ces bya ba ni de dang mi 'dra bar gyur ba'o/ /ye shes zhes bya ba ni bde ba chen po'i ye shes so/ / de za ba ni de nyams su myong ba'o/ /rnam par nyed pa zhes bya ba la sogs pa la/ zos zhes bya ba ni 'das ma thag pa zhig pa dran pa'o/ /yang na shes pa so sor rtogs pa ni zos zhes bya ste/ bdag gis bde ba spyad par gyur to zhes sngar gyi nges par 'dzin pa'o/ /mtshan nyid bral ba zhes bya ba ni sngar bstan pa gsum po'i'o//chags dang chags bral zhes bya ba ni srid pa dang mya ngan las 'das pa dang bral ba'o/ /sna tshogs dang ni zhes bya ba la sogs pas ni dga' ba rnam pa bzhi dbang bskur ba rnam pa bzhi rnam par gzhag par byed de/ dga' ba so sos kyang slob dpon dang gsang ba dang shes rab dang bzhi pa zhes bya bar thob par 'gyur ro zhes bya bar dgongs pa'o//de nyid kyi phyir dga' ba sogs pas bya ba la sogs pa gsungs te/ rim zhes bya zhes bya ba ni dga' ba ni slob dpon gyi dbang bskur ba'o/ /mchog tu dga' ba ni gsang ba'i dbang ngo //dga' bral ni shes rab kyi dbang ngo / /lhan cig skyes pa ni dbang bskur ba bzhi pa'o/ /de ltar dbang bskur ba bzhi so so dang skad cig ma bzhi dang dga' ba bzhi bla ma'i man ngag las sbyar ba shes par bya ste/ de ltar na dbang bzhi'i rnam grangs shes par bya'o/ /rgod pa'i dag pas zhes bya ba la sogs ni dbang gi rnam par dag pa gsungs pa yin te/bya ba'i rgyud la sogs pa kha cig tu ni lha rnams thabs dang shes rab kyi rjes su chags pas dgod pa bstan te/ de rnam par dag pa ni slob dpon zhes bya ba slob dpon gyi dbang bskur ba'o//spyod pa'i rgyud la sogs pa kha cig tu ni thabs dang shes rab rjes su chags pa ston par byed phan tshun lta ba 'byung ba ste de'i rnam par dag pa ni gsang ba'i dbang bskur ba'o/ /rnal 'byor gyi rgyud la sogs pa kha cig tu thabs dang shes rab phan tshun 'khyud pa 'byung ste/ de'i rnam par dag pa ni shes rab kyi dbang bskur ba'o/ /rnal 'byor bla na med ces bya ba la sogs pa kha cig tu thabs dang shes rab gnyis kyis snyoms par 'jug pa 'byung bas de'i rnam par dag pa ni dbang bskur ba rnam pa bzhi'o/ /de'i phyir/ dbang ni rnam pa bzhi ru bshad/ /ces gsungs te/bzhi ni rnam pa bzhi'o/ /bshad ces bya ba ni dgyes pa'i rdo rje'i rgyud 'dir te rnal 'byor ma bla na med pa'i rgyud 'dir skal pa dang ldan par byas na thams cad la dbang ba'i phyir ro/ /de nyid kyi phyir sems can thams cad la phan par bya ba'i phyir zhes bya ba'o/ /dbang bskur zhes bya ba ni sgra'i don bstan pa'i phyir/des na dbang brjod par bya/ /zhes bya ba la sogs pa gsungs te/ blugs shing bkrus te dri ma med par byas/ /zhes bya ba'i don to/ /lag pa dag gis zhes bya ba la sogs pas ni slob dpon gyi dbang bskur ba gsungs pa ste/ rdo rje dril bus mnyam par sbyor ba'i lag pas sam/pad+ma dang rdo rje dag gis te man ngag ji lta ba bzhin du slob dpon gyi dbang bskur ba yin no/ /shin tu bzhin bzangs zhes bya ba la sogs pas ni shes rab kyi dbang bskur ba'i phyir shes rab kyi ngo bo gsungs pa yin te/ lag pa g.yon pa'i mthe bo dang srin lag dag gis snyoms par 'jug pa'i ro slob ma'i khar 'dzud cing gsang ba'i dbang bskur ba'i tshigs bcad brjod pa ste bshad pa gcig yin no//yang na mthe bo zhes bya ba ni la la nA'o/ /srin lag ces bya ba ni ra sa nA'o/ /de gnyis nas slob ma'i rdo rje nor bu'i sgor shes rab kyi byang chub kyi sems rab tu 'bab pa de'i man ngag bstan pa'o//de nyid du ni bya ba ste/ /zhes bya ba la sogs pa la/ de nyid du ni zhes bya ba ni shes rab gang la man ngag bstan pa nyid la'o/ /ro mnyam zhes bya ba ni thabs dang shes rab dag gi byang chub kyi sems yang dag par 'byor ba'o//slob ma'i spyod yul zhes bya ba ni so sor rtog pa'i yul du bya'o zhes bya ba'i don to/ /'di lta bu ni gsang ba'i dbang bskur ba'o/ /ston pas shes rab ces gsungs pa ni rgyud nas gsungs pa'i mtshan dang ldan pa'o/ /mchod ces bya ba ni dang por ro/ /ston pa zhes bya ba ni bla ma ste/dka' bar gyur pa'i las rnams kyi khur bzod dam mi bzod ces brtag pa'i phyir ro/ /de nas rgyud nas gsungs pa'i 'chad par 'gyur ba'i tshigs bcad brjod nas gtad par bya'o/ /phyag rgya bde ba ldan pa khyer/ /zhes bya ba ni chos kyi phyag rgya'o/ /'di lta bu ni shes rab kyi dbang bskur ba'o//slob ma che 'gyur shes nas ni/ /zhes bya ba la sogs pa la/ che 'gyur zhes bya ba ni phyag rgya chen po'i dngos grub kyi snod du gyur ba'o/ /phrag dog spangs zhes bya ba ni ser sna dang bral ba'o/ /khro ba rnam spangs zhes bya ba ni snying rje chen po dang ldan pa'o//de la zhes bya ba ni slob ma la'o/ /snang ba sbyin zhes bya ba ni man ngag bstan par bya'o zhes bya ba'i don to/ /'di skad kyang brjod par bya ste dbang po gnyis sbyor zhes kyang ngo / /sbyor zhes bya ba ni phyag rgya chen po'i snyoms par 'jug pa ste gyis shig ces bya ba'o//rdo rje 'dzin zhes bya ba ni rdo rje 'chang zhes bya ba'i don to/ /dbang bskur ba bzhi pa'o/ /da ni dbang gi don du slob mas ji ltar mnyes par bya ba bstan pa'i phyir/ slob ma'i bya ba zhes bya ba la sogs pa gsungs te/ gsol ba gdab ces bya ba ni don du gnyer bar bya'o/ /bcom ldan zhi ba chen po kye//zhes bya ba la sogs pa ni bla ma la bstod pa'o/ /gnyis su med pa'i rnal 'byor la nges par gnas pa'i phyir zhi ba chen po'o/ /rdo rje ni rdo rje'o/ /rnal 'byor ni snyoms par 'jug pa'i khyad par ro/ /der gcig tu gtad pa gcig bzhed pa'o/ /phyag rgya sgrub pa po zhes bya ba la phyag rgya ni phyag rgya bzhi'o//sgrub pa po ni yongs su mnyes par byed pa po'o/ /stong pa nyid kyi rang bzhin gyi phyir mi phyed pa'o/ /rdo rje ni de bzhin gshegs pa rnams so/ /de dag gi rnal 'byor ni ting nge 'dzin te/ de las yang dag par byung ba'o//ji ltar zhes bya ba la sogs pa la/ ji ltar khyod 'gro ba la phan pa'i rgyu yin pa ltar ro/ /de ltar zhes bya ba ni de bzhin du'o/ /mnga' bdag ces bya ba ni gtso bo'o/ /'dam dang 'dra ba ni 'dam ste 'khor ba'o/ /tshogs zhes bya ba ni spungs pa'o//der bying ba bdag la skyobs zhes bya ba skyabs mdzod cig pa ste/ skyabs med bdag la zhes bya bar sbyar ro/ /zhim pa'i zhes bya ba ni shin tu zhim par sems pa'o/ /bza' ba btung ba dang zhes bya ba ni mdor bstan pa'o/ /chang dang sha chen zhes bya ba ni rgyas par bshad pa'o//rdo rje 'dzin pa zhes bya ba ni gnyis su med pa'i ye shes 'dzin pa ste bla ma'o/ /mchog tu dga' ba zhes bya ba la sogs pa la/ thob ces bya ba ni shin tu gnas pa'o/ /sna tshogs spangs pa zhes bya ba ni lhan cig skyes pa zhes bya ba ste bzhi pa'o/ /sems dpa' che zhes bya ba ni slob mas rtogs par bya ba'i phyir bde ba ste/ye shes 'di ni ches phra zhing / /zhes bya ba la sogs pa'i tshigs su bcad pas so/ /bde ba chen po'i rnam par zung / /zhes bya ba ni man ngag ji lta ba bzhin du rjes su gnang ba sbyin pa'o/ /ji srid ces bya ba la sogs pas ni 'chad par 'gyur ba'i mtshan nyid can gyi rjes su gnang ba mdor bstan to//dbang bskur zhes bya ba ni dbang bskur bas dbang bskur ba'o/ /bya ba kun zhes bya ba ni bya ba'i tshogs so/ /rdo rje can zhes bya ba ni bla ma'o/ /'di skad smra zhes bya ba ni ci zhig smra zhe na/ 'di nyid ces bya ba la sogs pa ste 'di nyid ces bya ba ni dbang bskur ba thob pa'i lhan cig skyes pa'i ye shes chen po nyid do//thams cad la zhes bya ba ni phyag rgya bzhi lus la gnas pa'o/ /gnyis su med pa ni thabs dang shes rab gnyis su snang ba dang bral ba nyid do/ /gnyis ni de dag nyid kyi ngo bo'o//dngos dang dngos med bdag nyid ces bya ba ni mchog tu dga' ba dang / /dga' ba dang dga' bral gyi ngo bo'o/ /gtso bo zhes bya ba ni dga' ba gsum pos las mchog tu gyur pa'o/ /brtan ni chos dang dam tshig phyag rgya bsgoms pa'o/ /g.yo ba ni phyi rol gyi phyag rgya dang snyoms par 'jug pa'o//de dag thams cad la khyab nas gnas pa yang 'di nyid do/ /sgyu ma'i gzugs can zhes bya ba ni sprul pa sna tshogs lta bu'o/ /de lta na 'di thabs gang gis 'grub par 'gyur zhe na/ dkyil 'khor 'khor lo'i zhes bya ba la sogs pa gsungs te/sogs zhes bya ba'i sgras ni phyag rgya gnyis kyi man ngag dang / dpa' bo gcig pu la sogs pa la mos pa yang bsdu'o/ /yang na zhes bya ba ni dkyil 'khor gyi 'khor lo'i sgras phyag rgya chen po'i man ngag gzung ngo / /bzod pa gsol nas zhes bya ba ni bzod par gyis shig ces byas nas/gsol to zhes bya ba ni zhus par gyur ba'o/ /sangs rgyas thams cad kyis gang bar gyur bas na grong khyer ro/ /ci zhes bya ba ni gang gi phyir zhes bya ba'i don to/ /'khrul gyur pas zhes bya ba ni bdag the tshom dang ldan par gyur ces bya ba'i don to/ / dkyil 'khor zhes bya ba la sogs pa la dkyil zhes bya ba ni snying po zhes bya ba'i rnam grangs so/ /snying po de ci zhig ce na/ byang chub sems ni bde chen po/ /zhes bya ba gsungs te/ nyon mongs pa dang nye ba'i nyon mongs pa ma lus pas bskyed pa'i sdug bsngal dang bral ba'i mtshan nyid can no//de len pa ni bdag gir byed pa'o/ /de yis zhes bya ba ni bde ba chen po'i ye shes so/ /'dus pa ni sangs rgyas thams cad dang mnyam par sbyor ba ste/ 'di lta bu ni don dam pa'i dkyil 'khor zhes bya ba'i don to/ /'khor lo ltar zhes bya ba ni bde ba chen po'i mtshan nyid can no//gnas zhes pa ni snying rje chen po'o/ /nam mkha'i khams ni chos thams cad kyi stong pa nyid do/ /yul la sogs pa rnam par sbyong zhes bya ba ni de dag ro gcig par gyur pa'i 'od gsal ba'i mtshan nyid do/ /rdo rje ni snying rje chen po'i rang bzhin gyi sems rdo rje'o//pad+ma ni chos thams cad kyi rang bzhin no/ /de dag man ngag ji lta ba bzhin du yang dag par sbyor ba ni sbyor ba'o/ /de'i zhes bya ba ni phyag rgya chen po'i de'o/ /bde ba ni 'od gsal ba'i mtshan nyid can no/ /shes par gyur ces bya ba ni rtogs par gyur nas zhes bya ba'i don to//gsol ba zhes bya ba ni rdo rje snying po mgu bar gyur nas so/ /ci'i phyir gsol zhe na/ rnal 'byor bla na med pa 'dir dam tshig dang sdom pa ma gsungs pas de'i phyir gsol ba'o/ /khyod kyis srog chags gsad pa dang / / zhes bya ba ni mdor bstan pa'o/ /'di dag nyid kyi bshad pa ni sems gcig ces bya ba la sogs pa ste/ sems kyi rang bzhin 'od gsal ba'i ngo bo nyid thob par 'gyur ba ni sems gcig pa nyid de/ de ni srog chags gsod pa'o/ /de ji ltar yin zhe na/ gang phyir srog ni zhes bya ba la sogs pa gsungs te/gang gi phyir srog chags rnams kyi srog tu gyur pa ni sems nyid do/ /'di skye ba med nyid ni gcod pa'o/ /'jig rten zhes bya ba la sogs pa la/ bsgral ba zhes bya ba nyid brdzun gyi tshig ste/ don dam par sems can gyi 'jig rten mi dmigs pa'i phyir ro zhes bya bar dgongs pa'o//btsun mo zhes bya ba ni rdo rje'i btsun mo'o/ /de'i khu ba ni gnyis su med pa'i ye shes te/ de yang 'phags pa'i lam bsgom pas thob pa yin pas de'i phyir ma byin par len pa'o/ /rang mtshungs mdzes zhes bya ba ni bdag med ma la sogs pa'o//de ji ltar gzhan gyi bud med yin zhe na/ mchog tu phul du byung ba nyid yin pa'i phyir ro/ /'di rnams kyi rang bzhin ci lags zhes bya ba ni yul la sogs pa rnams kyi'o/ /gti mug rdo rje la sogs ldan/ /zhes bya ba ni ji ltar 'chad par 'gyur ba'o//dbang po drug ces bya ba ni mig la sogs pa'o/ /yul dang yul can zhes bya ba ni mig la sogs pa'o/ /'du byed tha ma zhes bya ba ni rnam par shes pa bar du ston pa'o/ /rnal 'byor ma rnams zhes bya ba ni las dang po pa'i rnal 'byor ma rnams so/ /go bya'i phyir zhes bya ba ni rab tu rtogs par bya ba'i phyir ro//'di rnams kyi rang bzhin ci zhig ce na/ gdod nas ma skyes zhes bya ba gsungs te/ gdod ma nas skye ba med pa'i ngo bo nyid do/ /de ltar na snang bar ji ltar 'gyur zhe na/ brdzun min bden min zhes bya ba gsungs te/ ji ltar snang bar 'gyur ba nyid ni brdzun pa nyid yin pa'i phyir bden pa yang ma yin brdzun pa yang ma yin pa'o//chu'i zla ba zhes bya ba la sogs pa ni rang bzhin yang gzhan yin la snang ba yang gzhan yin pa nyid do/ /shes gyis zhes bya ba ni shes par gyis shig pa'o/ /'dod pas zhes bya ba ni ltar 'dod pa'i dbang gis so//gtsub shing zhes bya ba ni gtsub par byed pa'o/ /gtsub stan zhes bya ba ni gtsub par bya ba'i gzhi'o/ /skyes bu'i lag pa'i rtsol ba zhes bya ba ni bya ba'o/ /glo bur du zhes bya ba ni de dag la yod pa ma yin na yang ngo / /yod pa ma yin pas zhes bya ba ni dmigs par ma gyur pa'o//bden pa ma yin zhing zhes bya ba ni gcig dang du ma'i rang bzhin dang bral ba'i phyir ro/ /brdzun pa yang ma yin zhes bya ba ni de lta bur snang bar gyur pa nyid kyi phyir ro/ /yid la gyis shig ces bya ba ni yid la zung shig pa'o/ /'thung bar byed do zhes bya ba ni ngoms par 'thung ba'o//rdo rje bdud rtsi zhes bya ba ni byang chub kyi sems kyi ro'o/ /dgyes nas zhes bya ba ni dgyes par gyur nas so/ /shin tu spros pa med pa'i mtshan nyid can gyi spyod pa gang gis byin gyis brlabs pa'i phyir/ rdo rje sems dpar byin gyis brlab pa bstan pa zhes bya ba ste/rab tu ston to zhes bya ba'i don to/ /de kho na nyid thob pa'i rgyu ni de nyid ces bya ba'o/ /mchod pa nyid ni rdo rje ste brtan par gyur pa'i phyir ro/ /'dod pas zhes bya ba ni mgu bas so/ /bcom ldan 'das kyis gsungs zhes bya ba ni bcom ldan 'das kyi bka'o/ / byang chub sems ni zhes bya ba ni byang chub thob par bya ba'i sems kyis sam/ yang na chos thams cad skye ba med pa'i sems te des so/ /de nyid bstan pa'i phyir/ gnyis med ye shes sems kyis ni/ /zhes gsungs pa yin no/ /yi dags gnas zhes bya ba ni dur khrod do//mgo skyes zhes bya ba ni skra'o/ /dbang po zhes bya ba la sogs pa la lha'i rnam par dag pa sngar ma mdzad pa'o/ /thams cad yul zhes bya ba ni shes bya'i dkyil 'khor thams cad kyi'o/ /gti mug rdo rje zhes bya ba ni rdo rje ma'o/ /zhe sdang rdo rje ni bdag med ma'o//ser sna rdo rje ma ni gsang ba'i gau rI'o/ /'dod chags rdo rje ma ni chu'i rnal 'byor ma'o/ /phrag dog rdo rje ma ni rdo rje mkha' 'gro ma'o/ /dgongs pa'i skad ni dgongs pa dang bcas pa'i tshig ste/ bsam pa gtsor byas nas smra ba yin gyi yi ge gtsor byas pa ni ma yin no zhes bya ba'i don to//dam tshig che zhes bya ba ni gsang ba'i brda'o/ /mi shes pa zhes bya ba ni mtshon pa ma yin pa'o/ /dgod dang zhes bya ba la sogs pas ni shin tu gsang ba nyid du gsungs pa yin no/ /dgod pa zhes bya ba ni bya ba dang spyod pa dang / rnal 'byor dang rnal 'byor bla na med pa rnams so//ma gsungs pa ni ma bstan pa'o/ /rigs ni zhes bya ba la sogs pa la/ rnam pa lnga zhes bya ba ni so sor gyur pa rnam pa lnga ste de bshad pa'o/ /gsang ba'i skad ni sangs rgyas kyi rigs can gyi'o/ /g.yung mo rdo rje'i rigs can bshad/ /ces bya ba la sogs pa la rigs nyid rigs can no//bshad ces bya ba ni rnal 'byor dang rnal 'byor ma'i rgyud rnams su'o/ /ci'i phyir 'di dag la rigs zhes bya zhe na/ shin tu grub par byed pa'i phyir ro/ /rdo rjer zhes bya ba ni rdo rje'i ye shes thob pa'i rgyu mtshan du gyur pa'i phyir ro/ /mchod nas zhes bya ba ni rdo rje dang pad+ma'i rnal 'byor gyis so//rdo rje snying po zhes bya ba la sogs pa la/ sems dpa' zhes bya ba ni dam tshig yongs su skyong bar byed pa'o/ /dam tshig nyams zhes bya ba ni dam tshig 'dral bar byed pa'o/ /yams dang 'tshe ba zhes bya ba ni de dag gi gnod pas yongs su gnod pa'o/ / rang gi dam tshig ces bya ba ni dgyes pa'i rdo rje'i rnal 'byor pas rnyed pa'o/ /khro ba ni zhe sdang ngo / /rgyud thams cad kyi gleng gzhi dang dgongs pa'i skad gsal bar byed pa'i le'u la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u gsum pa'i 'grel pa'o// //de nas zhes bya ba la sogs pa la/ rdo rje snying po la sogs pa/ /zhes bya ba ni rdo rje snying po sngon du 'gro ba'o/ /the tshom du gyur pa ni yid gnyis za ba'o/ /ci'i phyir the tshom du 'gyur zhe na/ tha mal pa'i glu dang gar la sogs pa ni rnam par g.yeng ba'i ngo bo nyid yin pa'i phyir ro//lha dbang bskur ba'i zhes bya ba'i lha dbang bskur ba'i le'u las mngon par dbang bskur bar gyur pa ni cod pan la rang gi rigs kyi bdag po bsgom par bya'o zhes bya ba'i tha tshig gis so/ /phyag rgya zhes bya ba ni rgyas btab pa'o/ /gang sa bon zhes bya ba ni lha gang gi sa bon gang yin pa'o//'khrul pa ni yongs su mi shes par bdag gyur pa zhes bya ba'i don to/ /kol+la i ri zhes bya ba ni gnas kyi khyad par ro/ /m+mu ni zhes bya ba ni zhing ngo / /bol+la kak+ko la zhes bya ba ni des nye bar mtshon pa'i rnal 'byor dang rnal 'byor ma rnams ring na gnas su zin kyang 'du ba nyid mtshon par byed do//g+ha Na a zhes bya ba rgyun mi 'chad pa'o/ /kri pi Da ho zhes pa ni cang te'u'o/ /kA ru Ni zhes bya ba ni phan tshun brtse ba dang ldan pa'i bya bas ku co mi byed pa'o/ /ro lA zhes bya ba ni 'thab rtsod do/ /'o na de ltar ni mi byed ce na/ bA la kha dz+dza zhes bya ba la sogs pa ste/ g+ha Do zhes bya ba ni chog pa med par ji ltar yod pa bzhin 'thung ba'o/ /ha le zhes bya ba ni rnal 'byor ma rnams la 'bod pa'o/ /ka liny+dza ra zhes bya ba ni dam tshig dang ldan pa rnams so/ /du d+hu ra zhes bya ba ni dam tshig dang mi ldan pa rnams so/ / tsa u sa ma zhes bya ba ni mnyam par 'byung ba rnams so/ /ta hiM b+ha ru kha i a i zhes bya ba ni 'du ba byas pa der shin tu yang bza' bar bya'o/ /shud+d+ha zhes bya ba ni yongs su rdzogs pa'o/ /a shud+d+ha zhes bya ba ni las dang po pa ste de dag mi shes pa'o/ /a ga tsa Da wi zhes bya ba ni lus la gdags par bya ba'o//ta hiM dza zhes bya ba ni der ro/ /sa rA wa zhes bya ba ni gzhag par bya ba zhes bya ba'i don to/ /tshigs su bcad pa bzhi po 'di dag ni rkang pa bzhi bzhi dang ldan pa yin no/ /tshigs su bcad pa bzhi po'i rjes thogs su 'dru ba ka zhes bya ba bstabs shing glur blang bar bya'o//de nyid gsungs pa ma la a dze zhes bya ba la sogs pa yin no/ /kol+la i ri zhes bya ba ni mgo'o/ /bol+la zhes bya ba ni de gnas pa'i yi ge haM ngo / /mum+mu ni zhes bya ba ni lta ba'o/ /ka k+ko lA zhes bya ba ni yi ge aM ngo / /de gnyis kyi rnal 'byor ni g+ha Na ste rgyun mi 'chad pa'o//kri pi TA ni mi shig pa'i sgra'o/ /bAdz+dza zhes bya ba ni de kun du 'byung ba'o/ /kA ru Ni zhes bya ba ni rnal 'byor pa'o/ /ka a i zhes bya ba ni mi byed pa'o/ /Na ro la zhes bya ba ni phyi rol gyi snyoms par 'jug pa mi byed pa'o//ta hiM bi la zhes bya ba ni bdag nyid kyi dngos po'o/ /khadz+dza i zhes bya ba ni bdag nyid mi dmigs par bya'o/ /ma a Na bi dza a i zhes bya ba ni rnal 'byor las skyes pa'i bde ba chen po'i btung ba btung bar bya'o/ /kaliny+dza zhes bya ba ni rlung ngo / /pa ni a i zhes bya ba ni nang du 'jug pas so//du d+hu ra zhes bya ba ni 'dod chags la sogs pa'i nyon mongs pa'o/ /tsa u sa ma zhes bya ba ni gzugs kyi phung po'o/ /kats+tshu ri zhes bya ba ni tshor ba'o/ /sih+la zhes bya ba ni 'du shes so/ /ka pu ra zhes bya ba ni rnam par shes pa'o/ /lA i a i zhes bya ba ni sbyor bar byed pa'o//ma la in+d+ha Na zhes bya ba ni 'du byed kyi phung po'o/ /thams cad kyang bdag tu nga rgyal ba'i bdag nyid can ni sa li dza'o/ /ta haM zhes pa der rnal 'byor pas bza' bar bya ba ste/ rang bzhin med par bya ba'i don to/ /phreM kha Na khe Ta zhes bya ba ni byang chub kyi sems khu ba bde ba chen po nas 'bab pa ni phreM kha Na zhes bya la/yang slar 'jug pa ni khe Ta zhes bya'o/ /shud+d+ha a shud+d+ha zhes bya ba ni dngos po dang dngos po med pa mi shes pa'i don to/ /de nyid kyi phyir ni raM su zhes bya ba ni de dang chos mthun pa'i phyir ni raM su ste khu ba'i thigs pa'o/ / des aM b+ha zhes bya ba lus kyi yan lag rtsa dag la dgod par bya ba'o/ /ta hiM zhes bya ba ni de lta bu'i sbyor bas so/ /chos thams cad bdag med ma ni sa rA wa'o/ /pa Ni a i zhes bya ba ni rjes su 'jug par bya zhes bya ba'i don to/ /ma la ya dza zhes bya ba ni rtsa rnams 'dus pa'o/ / DaN+Di ma zhes bya ba chos thams cad mi dmigs pa'i ting nge 'dzin to/ /N+Na badz+dza a i zhes bya ba ni rang gi ngang gis 'jug par bya'o zhes bya bar dgongs pa'o/ /he ru ka'i gzugs kyis zhes bya ba la sogs pa la he ru ka'i gzugs ni he ru ka'i lus so/ /ji lta bu zhig ce na/ dran pa mi 'phrogs rnal 'byor las//zhes bya ba ste/ ting nge 'dzin brtan pa las so/ /de nyid gsungs pa/ bsgom pa la chags sems kyis ni/ /zhes bya ba la sogs pa ste/ rdo rje chos zhes bya ba ni pad+ma gar gyi dbang phyug go/ /sangs rgyas zhes bya ba ni rnam par snang mdzad kyi gzugs so//ma mo yis zhes bya ba ni bcom ldan 'das ma bdag med ma'o/ /'di dag ces bya ba ni bstan pa'i mtshan nyid can 'di dag go/ /legs par zhes bya ba'i don to/ /tshogs srung zhes bya ba ni tshogs kyi 'khor lo srung ba'o/ /dbang byed ces bya ba ni dbang du 'gyur ba'o/ / 'dis ni zhes bya ba ni 'dis sngags bzlas pa yang byas par 'gyur ro/ /dri ni zhes bya ba ni dri nyid do/ /glu'i byin rlabs kyis rnal 'byor ma rnams der mtshon par bya ba ste mtshan ma'o/ /sgra zhes bya ba ni ku co ste ngang pa la sogs pa'o/ /glu'i byin rlabs kyis mtha' nas thos par 'gyur ro//ba lang 'tshe zhes bya ba ni ce spyang ngo / /phyi rol tshal du'ang zhes pa'ang gi sgras ni nam mkha' yang bsdu'o/ /'dis ni glu dang gar zhes bya ba dris pa'i lan bstan pa yin no/ /dris pa gnyis pa'i lan bstan pa'i phyir phyag rgya zhes bya ba la sogs pa gsungs te/ phyag rgya dang rtags dang mtshan ma zhes bya ba ni rnam grangs so/ /phyag rgya 'dis mtshon par bya ste rab tu rtogs par bya'o/ /'di dag gis cir 'gyur zhe na/ rigs 'chol zhes bya ba la sogs pa gsungs te/ rnal 'byor sgom par byed pa na/ rigs gzhan gyis rgyas btab par gyur pa na/sgrub pa pos dngos grub 'grub par mi 'gyur gyi/ dam tshig nyams par gyur pas de'i phyir rigs yongs su shes par bya ba la 'bad par bya'o zhes bya bar dgongs pa'o/ /bdag med ma zhes bya ba la sogs pa la zhe sdang ni mi bskyod ba'o/ /gti mug ni rnam par snang mdzad do//phra ma ni rin chen 'byung ldan no/ /chags pa ni snang ba mtha' yas so/ /phrag dog ni don yod grub pa'o/ /puk+ka sI zhes bya ba la sogs pa la/ puk+ka sI dang sha ba rI dang tsaN+Da lI dang Dom+bi nI rnams la zhe sdang dang gti mug dang phra ma dang 'dod chags rnams kyis so//yang ni gau rI zhes bya ba ni skyong ma ste/ gau rI dang tsau rI dang be tA lI dang g+hasma rI rnams la zhe sdang dang phra ma dang gti mug dang 'dod chags rnams kyis rim bzhin no/ /gti mug gis ni sa spyod ma'o/ /'dod chags kyis ni mkha' spyod ma'o/ /'dod pas zhes bya ba ni gus pa shes nas so//dris pa gsum pa'i lan bstan pa'i phyir A li zhes bya ba la sogs pa gsungs te/ I li dang po ni yi ge a'o/ /bdag med ma zhes bya ba ni bdag med ma'i sa bon no/ /bzhi pa'i lan bstan pa'i phyir rigs kyi le'u las zhes bya ba la sogs pa gsungs te//gsungs zhes bya ba ni bstan pa'o/ /bcu drug gnyis zhes bya ba ni sum cu rtsa gnyis te rtsa gnyis gnyis la rnal 'byor ma re re'o/ /rim pa bzhin zhes bya ba ni rim pa ji lta ba bzhin du'o/ /la la ra sa zhes bya ba la sogs pa'i rtsa gsum ni bdag med rnal 'byor ma zhes brjod pa ste/rnal 'byor ma bco lngar don gyis bstan par 'gyur te/ ge ha dang tsan ti ka dang ma ra da ri ka ni mkha' spyod rnal 'byor ma'o/ /gal te sum cu rtsa gnyis kyi phyed ni bcu drug tu 'gyur ba yin no/ /ji ltar rnal 'byor ma bco lngar 'gyur zhe na/ de'i phyir/ 'bad pas kun gyi lhag ma spang / /zhes bya ba la sogs pa gsungs te/ kun gyi tha ma'i cha spang bar bya ste/ 'di ni rnal 'byor ma'i ngo bo nyid ma yin no zhes bya ba'i don to/ /de ji ltar zhe na/ gang phyir bcu drug cha med pas/ /zhes bya ba la sogs pa gsungs te/ don mi byed pas ni don gyi bya ba mi byed pa ste/de yang dkar po'i phyogs kyi tshes grangs bco lngas zla ba'i cha snang ba 'phel ba'i don mtshon pa'i bya ba byed kyi/ bcu drug pas ni ma yin te/ de ni 'grib pa'i rgyur gyur pa'i phyir ro/ /de'i phyir 'bad pas spang bar bya'o/ /des cir 'gyur zhe na/ byang chub sems su 'gyur zhes bya ba la sogs pa dang /ga pur zhes bya ba la sogs pa gsungs te/ cis zhes bya ba ni rnam par brtag pa'o/ /mi spang zhes bya ba ni cis kyang spang bar bya ba ma yin pa'o/ /rnal 'byor ma kun zhes bya ba ni rtsa thams cad las byung ba'o/ /lhan cig skyes dga'i rang bzhin zhes bya ba ni lhan cig skyes pa'i dga' ba'i rgyur gyur pa'o//yang dang yang 'byung bas 'grib med ces bya ba'o/ /lus thams cad la gnas pa'i phyir khyab pa'o/ /nam mkha' zhes bya ba ni skye gnas te 'gro bar gyur pas nam mkha'o/ /ji skad smras pa de bzhin zhes bya ba ni gtang bar bya ba ma yin pa nyid do zhes bya ba'i don to//dkyil 'khor 'khor lo sogs zhes bya ba'i sogs pa'i sgras ni rnal 'byor ma gzhan yang bsgom par bstan pa'o/ /rang byin brlab pa ni rdzogs pa'i rim pa'i sgom pa'i man ngag go/ /gang du bskyed par bya zhe na/ bud med pad+ma bde ba can//zhes bya ba gsungs te/ ci'i phyir bde ba can zhes bya zhe na/ bde ba bsrung ba nyid kyi phyir/ /zhes bya ba gsungs so/ /gal te 'di dag thams cad mos pa tsam yin pas 'di dag ni 'khor ba nyid yin la bdag ni thar pa 'dod pa yin no zhe na/ de'i phyir 'di nyid 'khor ba zhes bya ba la sogs pa gsungs te/'khor ba las mya ngan las 'das pa zhes bya bar rtogs par bya ba'i yul gzhan ma yin no zhes bya ba dgongs pa'o/ /'di rnams zhes bya ba la sogs pa la rang gi mtshan nyid 'dzin pas chos so/ /don dam pa nyid ni mya ngan las 'das pa ste/ kun gyi yang dag pa'i mtha' ni chos nyid yin pa'i phyir ro//gal te 'di dag mya ngan las 'das pa yin na 'khor ba gang yin zhe na/ 'di dag nyid/ rmongs phyir 'khor ba'i gzugs can nyid/ /ces bya ba gsungs te/ rmongs pa ni mi shes pa ste/ rang gi ngo bo ma rtogs pa'i phyir ro/ /rmongs med ces bya ba ni bla ma las man ngag thob pa'o//'khor bar gnas pas na 'khor ba'o/ /dag pa zhes bya ba ni sngar bstan pa'o/ /mya ngan las 'das par 'gyur zhes bya ba ni mya ngan las 'das pa dang 'dra bar 'gyur ba'o/ /ji ltar zhe na/ byang chub sems ni mya ngan 'das/ /kun rdzob don dam tshul can no//zhes bya ba mya ngan las 'das pa ni bde ba chen po'i ngo bo nyid kun rdzob ni kun+da dang 'dra ste/ longs spyod rdzogs pa'i mtshan nyid can no/ /'di dag gis ga pur cis kyang mi spang zhes bya ba'i 'phros pa rdzogs par bstan pa yin zhing de'i thabs kyang bstan pa yin no//da ni kun rdzob 'byung bar 'gyur bar bstan pa'i phyir/ shin tu bzhin bzangs zhes bya ba la sogs pa gsungs te/ /khrag dang khu ba 'byung ba'i zhes bya ba ni gsang ba'i dbang la sogs pas dbang bskur ba'o/ /brtul zhugs can ni sgrub pa'o/ /blo'i stobs zhes bya ba ni 'phel bar byed pa'i phyir ro//'dis ni ga pur nges par mi spang zhing / /zhes bya ba rdzogs pa yin no/ /da ni don dam pa'i ngo bo'i ga pur gyi ngo bo 'byung ba'i rim pa bstan pa'i phyir/ ga pur nyid ni zhes bya ba la sogs pa gsungs te/ bdag med pa zhes bya ba ni dngos po med pa'o//ci'i phyir zhe na/ bde ba zhes bya ba la sogs pa gsungs pa ste/ rgyu gang gi phyir bde ba ni bde ba chen po'o/ /de ni bdag med pa'i tshul can zhes bya ba dngos po med pa'i tshul can zhes bya ba'i don to/ /de'i zhes bya ba ni bdag med pa'i'o/ /bde ba ni thob par 'gyur ba'i rgyu mtshan no//de ci zhig ce na/ phyag rgya che zhes bya ba gsungs te/ phyag rgya'i mchog dang nang gi bdag nyid can/ /zhes bya ba'i bar du'o/ /de gang na gnas she na/ lte ba'i dkyil 'khor nyid du gnas/ /zhes bya ba la sogs pa gsungs te/ lte ba'i dkyil 'khor ni sprul pa'i 'khor lo'o//de blor zhes bya ba ni shes rab ste/ las kyi phyag rgya la ltos nas khyad par can gyi ye shes skye bar 'gyur ba'i phyir ro/ /de ni ring min zhes bya ba la sogs pa ni spros pa thams cad las 'das pa'i phyir ro/ /de las zhes bya ba la sogs pa la skye ba ni rnal 'byor pa nyid do//bde ba bza' ba nyid ces bya ba ni goms par byed pa'i dus su'o/ /de dang lhan cig ces bya ba ni gang yang bskyed pa'i rim pa'i phyogs la ni de nyid phyag rgya'o/ /de nyid lhan cig skyes zhes bya ba ni de rab tu bsgrub pa'i rgyur gyur pa'i phyir ro/ /lha'i rnal 'byor ma zhes bya ba ni de nyid ni bdag med ma'o//de nyid dkyil 'khor 'khor lo zhes bya ba'i don to/ /de nyid bdag med ces bya ba la de'i de kho na nyid ci zhig ce na/ chos kyi dbyings kyi rang bzhin can zhes bya ba gsungs te/ 'di ni dris pa lnga'i lan no/ /rdo rje snying pos gsol ba zhes bya ba ci zhig gsol zhe na sdom pa'i don te/rnal 'byor ma lus dbus gnas su/ /zhes bya ba la sogs pa gsungs pa la lus kyi dbus ni lte ba'o/ /e'i rnam pa zhes bya ba ni dbyangs yig dang po'o/ /gnas zhes bya ba ni rtag tu gnas pa nyid do/ /sdom pa'i don bstan pa'i phyir/ ji ltar phyi rol zhes bya ba la sogs pa gsungs te/ji ltar phyi rol gyi bdag med ma bsgom pa de bzhin du zhes bya ba'i don te/ de las dman pa ma yin no zhes bya ba'i don to/ /lus su bsdus pa'i phyir sdom pa'o zhes bya bar dgongs pa'o/ /de yang 'dir bdag med ma'i dkyil 'khor ji lta ba de bzhin du lte bar gnas pa'i yi ge a yang yin no//ji ltar lte ba na gnas pa'i yi ge a bdag med ma'i sdom pa yin pa ltar/ rdo rje skye mched ces bya ba yi ge hUM yang ngo / /thabs nyid kyis zhes bya ba thabs dgyes pa'i rdo rje thugs ka na gnas pa'i sdom pa yin no zhes bya bar dgongs pa'o//des cir 'gyur zhe na/ rdo rje bde ba zhes bya ba la sogs pa gsungs te/ yi ge de gnyis rdo rje rtse mor phyin pa'i bde ba ni phyag rgya chen po'i sku 'grub pa'i rgyur gyur pa yin pa'i phyir phyag rgya chen po zhes bya bar dgongs pa'o/ /'dis ni zhes bya ba la sogs pa la gsang ba'i snyoms 'jug ni nang gi bdag nyid can gyi snyoms par 'jug pa'o//'di la dpe ci zhig yod ce na/ phyi rol gnyis kyi gnyis zhes bya ba gsungs te/ bdag med ma dang he ru ka'i snyoms par 'jug pa'o/ /sku gsum zhes bya ba la sogs pa la sangs rgyas rnams kyi sku gsum ni sku gsum mo//de rnal 'byor ma'i lus kyi nang du gnas par brjod par bya'o/ /gsum yongs su shes pa ni mnyam pa nyid du shes pa'i ngo bo nyid kyi sku yin te/ bde ba chen po'i 'khor lo zhes bya ba'i don te/ sku gsum sdom pa'i gzugs bde ba chen po'i 'khor lo'i rnam par bstan pa yin no zhes bya ba'i tha tshig go//'khor lo rnams kyi ming bstan pa'i phyir chos dang longs spyod ces bya ba la sogs pa gsungs te/ skye gnas zhes bya ba ni lte ba'i 'og gi yul lo/ /sku gsum zhes bya ba ni yongs su shes pa zhes bya ba'i don to/ / lus kyi gnas dang 'brel ba'i gnas kyi rigs pa bstan pa'i phyir/ ma lus pa'i zhes bya ba la sogs pa gsungs te/ gang la zhes bya ba ni skye gnas so/ /brjod bya zhes bya ba ni rab tu bstan par bya ba'o/ /de la zhes bya ba ni 'gyur ba'o/ /sprul par byed pa'i chos mthun pa yod pas sprul pa'o//gzhan yang sangs rgyas rnams 'khor ba ji srid kyi bar du sprul pa'i skus bzhugs pas de'i gnas brtan pa'o/ /de'i phyir gnas par gyur pa nyid kyi chos mthun pa yod pas skye gnas kyang gnas brtan zhes bya'o/ /des na gang gi phyir gang gis bskyed dang zhes bya ba gsungs so//chos kyi zhes bya ba ni chos thams cad ni sems tsam mo/ /de'i phyir chos sku'i gnas ni sems te/ gnas yin pa'i phyir ro/ /bza' ba nges par longs spyod ces bya ba la bza' ba ni nye bar spyod par byed pa'o/ /ro rnams zhes bya ba ni mgrin par zhes bya ba dang sbyar bar bya'o//longs spyod par mtshungs pas de la longs spyod rdzogs pa'i sku zhes bya'o/ /yang longs spyod rdzogs pa'i sku gang yin zhe na/ byang chub sems dpa' rnams kyi gsang ba'i chos ston pa'o/ /bde ba chen po zhes bya ba ni bde ba chen po'i sku'o/ /spyi bor zhes bya ba ni mgo la gnas pa'o//de ltar 'khor lo bzhi ji ltar lus rnams bsdus pa de bzhin du 'bras bu rnams dang sde pa rnams kyang bsdus pa yin no zhes rab tu bsgrub pa'i phyir/ e waM zhes bya ba la sogs pa gsungs te/ e waM rnam pa zhes bya ba ni skye gnas kyi 'khor lo'o/ / der ci zhig ce na/ rgyu mthun nyid ces bya ba gsungs te 'bras bu'o/ /chos kyi 'khor lo ni rnam par smin pa'i 'bras bu'o/ /longs spyod kyi 'khor lo ni skyes bu byed pa'i 'bras bu'o/ /bde ba chen po'i 'khor lo ni dri ma med pa'i 'bras bu'i zhes bya ba'i don to/ /su zhig ni las kyi 'bras bu la spyod par 'gyur/su zhig ni sbyin par 'gyur zhe na/ las la bcom ldan 'das shes rab spyod ces bya ba gsungs te/ las kyi 'bras bu ni las zhes bya ste de la spyod pa ni shes rab nyid yin gyi bdag la sogs pa gzhan ni ma yin no/ /las kyi rlung ni las kyi dbang ngo //de yang las nyid yin gyi gzhan pa dag dang dbang phyug la sogs pa ma yin no/ /rgyu mthun pa'i las la sogs pa'i mtshan nyid ji ltar shes par bya zhe na/ ji ltar byas pa zhes bya ba la sogs pa gsungs te/ las kyi phyag rgya dang spros pa bsgom pa'i mtshan nyid can gyis de dang rjes su mthun pa'i spros pa'i spyod pa 'chad par 'gyur ba'i spro ba dang bsdu ba la sogs pas ji ltar bdag nyid rdo rje 'chang gi sku 'gro ba'i don la sogs pa mdzad pa'o//de bzhin spyod ces bya ba ni 'thob pa'o/ /rgyu mthun zhes ni rab tu bsgrags/ /zhes bya ba ni bstan pa ste/rgyu mthun rgyu dang 'dra ba'i phyir/ /zhes bya ba'i tshig gis so/ /rnam par smin pa zhes bya ba ni de las bzlog pa ste 'dra ba las bzlog pa'o/ /mtshan nyid 'di dag dang bral ba ni chos kyi phyag rgya la yod de/ de yang chos kyi phyag rgya sgyu ma lta bu'i ting nge 'dzin gyis spros pa med pa'i spyod pas gnas pa ni las chung yang 'bras bu chen po rdo rje 'chang gi go 'phang thob pa'o//phyag rgya chen po ni yang longs spyod la ste skyes bu byed pa'i 'bras bu'o/ /de yang shin tu spros pa med pa'i spyod pas bdag nyid kyi skyes bur gyur pas bsgrubs pa'i 'bras bu'o/ /de'i phyir skyes bu byed pa'i 'bras bu zhes bya ste/brtson 'grus dman pa rnams kyis de la dbang ba ma yin pa'i phyir ro/ /dri med nyid ces bya ba la sogs pa la/ rnal 'byor zhes bya ba ni phyag rgya chen po'i rnal 'byor ro/ /de'i dag pa ni dbang bskur ba'i rjes thogs su phyag rgya chen po'i dngos grub thob pa'o//de yang bskal pa grangs med pa dpag tu med pa bsgoms pas dag pa'i blo dang ldan pas dbang po rab rnams ni bsgom pa la ltos mi dgos par phyag rgya chen po'i dngos grub 'thob ste/ 'bras bu de ni bde ba chen po'i 'khor lo la gnas pa'o/ /gnas brtan zhes bya ba la sogs pa la gnas brtan pa nyid kyi sbyor ba yod pas sprul pa'i 'khor lo gnas brtan pa'i sde pa'o//thams cad yod do zhes smra ba 'di la yod pas thams cad yod par smra ba ste sems kyi 'khor lo nyid do/ /de ci ltar zhe na/ smra bas 'byung ba'i phyir zhes bya ba smra ste/rgyu la de skad ces bya'o/ /yang dag par rig par sbyor bas mang pos bkur ba nyid ces bya ste ro drug yang dag par rig pa'i phyir ro/ /chen po yang de nyid yin la sangs rgyas kyi chos rnams 'dus pa yang yin pa'i phyir/ bde ba chen po'i 'khor lo ni dge 'dun phal chen no/ / de nyid kyi phyir mgor gnas pas zhes bya ba gsungs te/ thams cad kyi steng na gnas pa nyid do/ /gang gi phyir zhes bya ba ni gang gi phyir zhes bya ba ste/ de'i phyir dge 'dun phal chen zhes bya bar dgongs pa'o/ /da ni sdom pa'i khyad par gzhan bstan par bya ba'i phyir/ sde pa zhes bya ba la sogs pa gsungs te/sde pa zhes bya ba ni dge slong gi dge 'dun gyi'o/ /de'i sdom pa ni rnal 'byor ma'i lus te/ chos thams cad kyi gzhir gyur pa'i phyir ro/ /lto ba zhes bya ba ni ma'i mngal lo/ /'dod chags bral zhes bya ba ni skye ba'i dus na skye gnas dang ldan pa'i tshe 'dod chags med pa'i phyir ro//'khrul min dri ma can ma yin pa'o/ /sngags 'don zhes bya ba ni sngags brjod pa dang ldan bzhin pa'o/ /gcer bu zhes bya ba ni rked pa ma bcings pa'o/ /'di dag ces bya ba ni bstan pa 'di dag go/ /sa bcu'i dbang phyug ces bya ba ni skye ba'i sngon rol lo//tshig 'di dag ces bya ba ni bcom ldan 'das kyis gsungs pa ste/ sems can rnams ni sangs rgyas nyid/ /ces bya'o/ /sa dang chu zhes bya ba la sogs pa la sa ni sprul pa'i 'khor lo'o/ /chu ni chos kyi 'khor lo'o/ /rlung ni bde ba chen po'i 'khor lo'o/ / byin za ni longs spyod kyi 'khor lo'o/ /khyod ces bya ba ni khyed nyid ces bya ba ste sangs rgyas spyan dang mA ma kI dang na bza' dkar mo dang sgrol ma ste snod du gyur pa rnams so/ /kye lha mo rnams ci 'di dag rtogs par ma gyur tam zhes bya ba'o/ /kye dpa' mo bdag med ma khyod nyid bdag gi dbang du gyur pa yin te/nga ni brdzun du smra ba ma yin nam/ ci'i phyir khyed brgyal bar gyur zhes bya ba'o/ /gal te gang gi phyir 'di lta bu'i mchog tu gsang ba rjod par byed ce na/ spro yis nyon zhes bya ba gsungs te/ spro yis zhes bya ba ni rgyas par byed pa'o/ /de nyid ces bya ba ni de kho na nyid bstan pa'o//gang zhig sus kyang mi shes pa/ /zhes bya ba ni de nyid kho na mchog tu gyur pa'i snying rjes khyod nyid de kho na nyid kyi don 'di la rab tu mkhas par bya ba'i phyir te/ 'di la ngo mtshar du gyur pa ci zhig yod ces bya bar dgongs pa'o/ /bshad pa gcig yin no//sa dang zhes bya ba la sogs pa la/ rdo rje dang pad+mar sbyor ba las dang po gnyis kyi sra ba'i ye shes ni sa'i khams so/ /gsher ba nyid kyi ye shes ni chu'i khams so/ /spyod pas yongs su smin pa ni me'i khams so/ /khams yang dag pa 'byung ba ni rlung gi khams so//'di dag nyid kyi snod du gyur pa ni khyod nyid de sde pa bzhi po gzhan dang gzhan gyi ngo bo nyid du gyur pa nyid do/ /bde ba chen po'i ye shes ni dpa' mo'o/ /de nyid nga nyid de rdo rje 'chang gi ngo bo'o/ /spro yis zhes bya ba ni sems can rnams la bshad par bya ba'o/ /gang gi phyir sus kyang mi shes pa de kho na nyid do//de'i phyir srog rnyed par gyur to zhes bya ba'o/ /gal te de ltar sems can rnams la bstan par bya ba yin na de lta na gang du sems can rnams sangs rgyas nyid du the tshom med ces ci'i phyir bstan par bshad ce na/ sems can rnams ni sangs rgyas nyid/ / ces bya ba gsungs te/ shin tu rnam par dag pa'i chos kyi dbyings kyi ngo bo nyid yin pa'i phyir ro/ /'on kyang zhes bya ba la sogs pa la de de bzhin te zhes bya ba ni rnal 'byor ma rnams kyi tshig go/ /bden te zhes bya ba ni khas len pa'o/ /gal te dri mas bsgribs par gyur pa yin na 'di dag thar par ji ltar 'gyur zhe na/brgyal bar 'gyur zhes bya ba la sogs pa gsungs te/ btsan dug ces bya ba dug zos par gyur pas 'jig rten brgyal bar gyur pa'o/ /de nyid ni de'i mya ngan yongs su gcod pa'i mchog yin pas de skad ces bya ba ste/ 'di ni dpe yin no/ / dpes bstan pa brjod pa'i phyir/ de bzhin zhi ba'i zhes bya ba la sogs pa gsungs te/ zhi ba zhes bya ba ni thar pa'o/ /dgyes pa'i rdo rje'i ngal sos pas ni shin tu dbugs thon pa'o/ /ma rig pa ni nyon mongs pa can gyis mi shes pa'o/ /sogs pa zhes bya ba'i sgras ni khro ba dang 'dod pa la sogs pa bsdu'o//kun rdzob kyi chos rnams la 'di bden pa la mngon par zhen pa ni rmongs pa ste de nyid ni 'ching ba'o/ /gzhan yang sangs rgyas ma yin zhes bya ba la sogs pa la/ rtogs pa las zhes bya ba ni yang dag par myang ba nyid do/ /rang dang zhes bya ba ni bdag nyid do//rang gi zhes bya ba ni bde ba chen po'i rang bzhin du zhes bya ba'i don to/ /rang gi ngo bo mthong ba nyid stong pa nyid mthong ba ste/ de nyid ni byang chub bo/ /de yang gang so so'i skye bo de kho na nyid de ni thams cad mkhyen pa'i de kho na nyid do zhes bya ba'i tshig gis sangs rgyas nyid ni sems can thams cad do//gal te gang bla na med pa'i tshor ba'i bde ba de lha la sogs pa rnams la ni yod pas sangs rgyas su gyur du chug na dmyal ba la sogs pa la ni de lta bu'i bde ba'i tshor ba med pas ma yin no zhe na/ dmyal ba yi dags zhes bya ba la sogs pa gsungs te/rtag tu zhes bya ba ni dus thams cad du'o/ /gal te de dag la dus thams cad du bde ba ga la yod/ bde ba ni tshogs pa las skyes par 'gyur zhing tshogs pa las 'byung bar 'gyur la tshogs pa dang bral na ni ma yin zhe na/ rang bzhin bde ba can zhes gsungs te/ ngo bo nyid kyi bde ba dang ldan pa ste/bde ba'i rigs su gcig par gyur pa zhes bya ba'i don to/ /gal te lha la sogs pa'i bde ba ji lta ba de lta bu dmyal ba la sogs pa la ni med do zhe na/ med du zad de/ bde ba gang phyir mi shes pas/ /lha dang lha min mi rnams la/ /zhes bya ba ste/ sangs rgyas rnams kyis ni lha dang lha ma yin la sogs pa'i bde ba la bde ba'i ngo bo nyid mi gzigs te/ mi rtag pa'i phyir dang zag pa dang bcas pa'i phyir sdug pa snyam du dgongs so/ /de lta bas na bde ba chen po'i nyid bde ba yin la de yang thams cad kyi rang bzhin gyi ngo bo nyid du gyur par mnyam pa yin no//sangs rgyas gzhan du rnyed mi 'gyur/ /zhes bya ba ni rigs pa'i khyad par gzhan du gsungs pa yin te/ gzhan du zhes bya ba ni bstan pa'i mtshan nyid can gyi byang chub kyi sems las gzhan du'o/ /sems ni zhes bya ba ni byang chub kyi sems so/ /gzhan du bstan pa med ces bya ba ni sgrub tu med pa'o//gdol pa zhes bya ba la sogs pas ni rgyud kyi che ba'i bdag nyid ston par byed do/ /gsod don zhes bya ba la gsod pa nyid don thob par bya ba'i ched du byed pa nyid de/ don des 'tsho bar sems pa'o/ /dgyes pa'i rdo rje shes na zhes bya ba la he zhes bya ba ni snying rje chen po'o//badzra ni chos thams cad kyi stong pa nyid do/ /shes pa ni bshad ma thag pa'i rigs pas mngon sum du byas pa'o/ /'di zhes bya ba ni dgyes pa'i rdo rje gsungs pa'i rigs pa'o/ /srid pa nyid 'ching ba yin te 'ching ba dam po zhes bya ba'i don to//'di dag ni sdom pa zhus pa'i lan yin no/ /da ni 'ga' zhig phyag rgya la log par rtog par 'gyur ba srid pas de'i phyir zhus pa'i lan bstan pa'i phyir/ sa ni zhes bya ba la sogs pa gsungs te/ 'dir zhu ba po rdo rje snying po'o/ /sra ba nyid ni sa ste de nyid ni gti mug dang sku'o/ / de dag nyid ni rnam par snang mdzad de nyid kyis rgyas gdab par rigs kyi/ mi bskyod pas ni ma yin no zhes bya ba'i zhus pa'i don te/ de'i phyir zhes bya ba ni gang gi phyir de ltar na sku'i ngo bo nyid puk+ka sI la thugs mi bskyod pa nyid kyis rgyas gdab par bya'o/ /chu khams sha ba rIr bshad pa zhes bya ba la sogs pa la de lta bas na sems kho na gti mug ste/rnam par snang mdzad yin no/ /de ni tsaN+Da lIr bshad pa/ /zhes bya ba la sogs pa la/ 'dod chags phyag rgyas zhes bya ba ni 'od dpag med kyi phyag rgyas so/ /khrag ces bya ba ni bud med kyi me tog ste/ de nyid rin chen 'byung gnas so/ /phra mas zhes bya ba ni rin chen 'byung gnas kyis so//gang gi phyir DoM bi nI zhes bya ba la sogs pa la/ rlung gi gzugs can nyid ces bya ba ni rlung gi rang bzhin nyid do/ /'dod chags ma gtogs zhes bya ba la sogs pa la ma yin te zhes bya ba ni 'byung bar 'gyur ba ma yin pa'o/ /gzugs ni sra ba nyid ces bya ba la sogs pa la/sngar gsungs zhes bya ba ni puk+ka sI la bstan pa'o/ /'di dag gi lan ni tsau rI ma zhes bya ba la sogs pa ste/ de bzhin du g+hasma rI dang / sha ba rI dang tsaN+Da lI dang DoM bi nI zhes rim pa la yang ji lta ba bzhin du phyin ci ma log par rgyas gdab par bya'o zhes bya ba'i don to//e baM zhes bya ba la sogs pas ni sdud pa po'i tshig yin no/ /zhugs nas ni zhes bya ba ni bdag med ma dang snyoms par zhugs nas so/ /rdo rje sems dpa' ni dgyes pa'i rdo rje'o/ /bstan pa ni ston pa'o/ /in+da dza ma dza la dzak+Sha zhes bya ba phyogs kyi bdag po rnams la 'bod pa'o//b+hU ta b+'ahI bA u rak+kha zhes bya ba ni mtshams kyi rnams la'o/ /tsan+d+ra zhes bya ba ni zla ba'o/ /sUd+dza zhes bya ba ni nyi ma la'o/ /ma da zhes bya ba ni sa'i lha mo'o/ /pAp+pa zhes bya ba ni tshangs pa la'o/ /aSh+Ta sabA zhes bya ba ni klu brgyad pa'o/ /sa he zhes bya ba ni swA hA zhes pa'i sgras te/brtse bar bya ba'i don to/ /i daM zhes bya ba la sogs pa la/ i daM ba liM b+huny+dza zhes bya ba ni zo shig ces pa'o/ /dzi ga zhes bya ba ni snoms shig ces pa'o/ /de ci zhig ce na/ phul+la d+hUp+pa ces bya ba gsungs te/ me tog dang spos so/ /maM sa piM g+ha zhes bya ba ni bdag nyid kyi sha skyed cing 'phel bar gyis shig ces pa'o//am+b+ha sap+pa kadz+dza sAd+ha zhes bya ba ni bdag gi dgos pa thams cad sgrubs shig pa'o/ /khan+ti khu Ni pheDa ga ta zhes bya ba ni lus las so/ /de ltar gtor ma sbyin pa'i phan yon bstan pa'i phyir/ gal te 'dis ni zhes bya ba la sogs pa gsungs te/legs par 'gyur ro zhes bya ba ni bdag dang gzhan gyi don bzang po rnams so/ /dri ma med pa zhes bya ba ni dri ma dang bral ba'o/ /'gro ba rab tu 'byor ba rnams ni 'di dag phun sum tshogs par 'gyur bas rab tu 'byor bar 'gyur ba zhes bya'o/ /dbang dang zhes bya ba la sogs pa la 'gyur ro zhes bya ba ni rdzogs par 'gyur ba'o//rtag tu zhes bya ba ni thams cad du'o/ /rdo rje snying pos gsol ba zhes bya ba ni zhus pa'o/ /mkha' spyod ma zhes bya ba la sogs pa la/ gsang ba gsum po gang zhig ce na/ sku gsung thugs su phye ba las/ /zhes bya ba la sogs pa gsungs te/de ji ltar 'khor lo'i dbus su gnas she na/ steng dang 'og dang zhes bya ba gsungs te/ rim pa ji lta ba bzhin du sbyar ro/ /gang phyir sku'i rdo rje can yin pas de'i phyir sku rdo rjes rgyas gdab par bya'o/ /thugs kyi rdo rje zhes bya ba la sogs pa la/ dbus skyes zhes bya ba ni dbus kyi gnas su skyes pa'o//rigs ni rnam pa drug ces bya ba la sogs pa la/ dag pa'i rigs pa zhes bya ba ni rigs drug gis rnam par dag pas so/ /bsgom pa nyid ces bya ba ni bsgom par bya'o/ /spangs nas zhes bya ba ni yongs su btang ba'o/ /de rjes rnam pa gsum zhes bya ba ni rnam pa lnga por mdor bsdus pa'i ngo bo'o//de dag mdor bsdus na rigs gcig gi ngo bo nyid do/ /rigs ni drug dang lnga ru brjod/ /ces bya ba ni rgyud thams cad kyi ste/ dgyes pa'i rdo rje'i rgyud ma lus pa 'di dag gi'o/ /thams cad ces bya ba ni dgyes pa'i rdo rje'i rgyud ma lus pa'o//phyag rgya bsdus pa'i don zhes bya ba ni mdor bsdus pa'i don to/ /de gsal bar byed pa'i le'u la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u bzhi pa'i 'grel pa'o// //phyag ni bcu drug ces bya ba la sogs pas he ru ka'i mngon par mtho ba gsungs te/ zhal zhes bya ba ni gdong ngo / /rje ngar dang zhabs mthil la sogs pa bsdus pa ni zhabs so/ /'jigs pa po ni 'jigs par byed pa'o/ /bla na med pa'i brtson 'grus kyi sbyor ba dang ldan pas dpa' bo'o//mgul nas zhes bya ba ni mgrin pa nas so/ /dbang dang ldan pa'i lhar gsal bar gyur pas lha ste/ sdud par byed pa'i tshig yin no/ /bdag gi zhes bya ba la sogs pa la/ sngar ma 'tshal zhes bya ba ni lha'i le'u ste der ma bstan pa'i phyir ro//kaM zhes bya ba ni bde ba skyong bar byed pa'i phyir thod pa ste pad+ma'o/ /'khor lo zhes bya ba ni rten gyi dkyil 'khor ro/ /sngar zhes bya ba ni snga ma bzhin du bskyed par bya ba ste/ ji ltar khyod nyid kyis bstan pa bzhin du zhes bya ba'i don to//de la zhes bya ba la sogs pa la nga yod de zhes bya ba ni mngon par byang chub pa lnga'i rim pas 'chad par 'gyur ba'i mtshan nyid du mngon par 'byung bar gyur pa'i rdo rje sems dpa' zhes bya ba'i don to/ /yod ces bya ba ni bsgoms zhes bya ba'i tha tshig go//khyod ces bya ba ni mnyam par 'khyud pa'i bdag med ma'o/ /'dod chags chen po ni 'gro ba'i don la chags pa'o/ /rjes su chags pa ni de la dga' ba'o/ /de nyid kyi phyir/ lhan cig skyes dga'i rang bzhin las/ /zhes bya ba gsungs te/ bcom ldan 'das 'di'i ngo bo nyid yin pa'o/ / 'jigs pa'ang zhes bya ba ni 'jigs par byed pa dag kyang ngo / /mgo bo'i phreng ba zhes bya ba ni mgo bo brgya phyed kyi do shal lo/ /nyi mar bzhugs zhes bya ba ni nyi ma'i dkyil 'khor gyi steng na bdud bzhi mnyam par mnan pa nyid do/ /gar thabs zhes bya ba ni skyil krung phyed pa'i gar thabs te de dang bcas pa ni de phyed pa zhes pa'i don to//dba' rlabs med pa zhes bya ba ni rnam par mi rtog pa'i bde ba thob pa'o/ /spyi bo'o zhal zhes bya ba ni sna tshogs rdo rje'i 'og tu'o/ /gtsigs pa can zhes bya ba ni rnam par 'gyur ba'o/ /nyi shu rtsa bzhis che zhes bya ba ni zhal re re la yang spyan gsum gsum pa'i phyir ro//lhag ma'i zhes bya ba ni ma bstan pa'i bzhi po'o/ /bung ba zhes bya ba ni bung ba lta bu'o/ /'di'i phyi ma'i gzhung dag ni phal cher rim pa tha dad pa yin no/ /de yang bla ma'i man ngag las shes par bya'o/ /kho bos ni tshig gi rim pa bzhin bshad pa yin gyi 'grel ba'i go rims kyis ni ma yin te/de yang brjod par bya ba mang du yod pa'i phyir dang / bcom ldan 'das kyi sgrub pa'i thabs ni rnyed sla ba'i phyir ro/ /khyod dang nga zhes bya ba la sogs pa la/ rol pa las zhes bya ba ni snyoms par 'jug pa'i rol pas so/ /dga' ba shin tu zhes bya ba ni dga' ba'i longs spyod do//phyung nas zhes bya ba ni byang chub kyi sems kyi thig le yongs su gyur pa las so/ /dbang po'i phyogs zhes bya ba ni shar phyogs su spros pa'i sprin gyis 'gro ba rnams kyi don byed pa'o/ /shar gyi sgo ru zhes bya ba ni gar thabs kyi stang stabs kyis legs par yang dag par gnas pa'o//tsau rI ma yang zhes bya ba ni de bzhin du rang gi sa bon gyi thig le yongs su gyur pa las so/ /gnyis kyis zhes bya ba ni bdag med ma dang dgyes pa'i rdo rje dag go/ /bskyod pa zhes bya ba ni 'gul bskyod do/ /'tshed pa ni me'o/ /de'i mtshams ni 'tshed pa'i mtshams so/ /srin po zhes bya ba ni bden bral lo//rlung gi zhes bya ba ni rlung gi phyogs te/ rlung gi mtshams zhes bya ba'i don to/ /'dir yang man ngag nyid kyis sbyor ba gzhan nyid yin no/ /de nas rdo rje zhes bya ba la sogs pa la/ khyod dang nga zhes bya ba'i rjes thogs su blta bar bya'o/ /rig mar bcas zhes bya ba ni bdag med ma dang bcas par zhu bar gyur pa bsgom pa'o//de nas zhes bya ba la zhu bar gyur pa'i rjes thogs su'o/ /lha mo zhes bya ba ni puk+ka sI dang sha ba rI dang tsaN+Da lI dang / DoM bi nI rnams rang rang gi phyogs nas 'ongs nas rang rang gi stan la 'dug ste bskul zhes bya bar yang dag par skul bar byed pa ste/ting nge 'dzin gyis zhu bar gyur pa la slong bar byed pa'o/ /sna tshogs glu yis zhes bya ba ni so so'i glus mchod pas so/ /de la dang por re zhig puk+ka sIs skul bar byed pa ni/ bzhengs shig dang sgrol zhes bya ba ste/ kye bcom ldan 'das bzhengs shig pa'o/ /snying rje'i thugs zhes bya ba ni snying rje'i rang bzhin can gyi thugs mnga' ba'o//puk+ka sI ni bdag la zhes bya ba ni puk+ka sI zhes bya ba bdag la'o/ /skyobs zhes bya ba ni yongs su bskyab pa mdzod ces bya ba'o/ /bde chen zhes bya ba la sogs pa la bde ba chen po'i don du sbyor ba ni bde chen sbyor ba ste/khu ba las 'byung bar 'gyur ba'i dgyes pa'i rdo rje'i gzugs so/ /des bdag la bzhed par mdzod cig pa'o/ /spongs la zhes bya ba ni thong mdzod ces bya'o/ /stong pa'i rang bzhin zhes bya ba ni rnam par stong pa'i zhu bar gyur pa'i ting nge 'dzin to/ /de nas sha ba rIs khyod mi bzhugs na zhes bya ba smras te/khyod mi bzhugs na bdag 'gum mo zhes bya'o/ /dgyes pa'i rdo rje khyod bzhengs shig /ces bya ba ni/ dgyes pa'i rdo rje kye bzhengs shig /stong pa'i rang bzhin nyid spongs la/ /zhes bya ba ni khu ba'i ngo bo nyid 'di thong mdzod ces bya ba'o//ri khrod ma 'bras grub par mdzod/ /ces bya ba ni sha ba rI bdag gi dgongs pa sgrubs shig ces bya ba'o/ /de nas tsaN+Da lIs 'jig rten mgron gnyer zhes bya bar brjod de/ /dga' gtso zhes bya ba ni/ shin tu chags pa'i gtso bo kye/ /zhes bya ba'o/ / stong pa nyid ces bya ba ni zhu bar gyur pa'o/ /bzhugs zhes bya ba ni gnas pa ste/ ci'i phyir zhes bya ba'o/ /tsaN+Da lI bdag gsol ba 'debs zhes bya ba ni/ tsaN+Da lI bdag gsol ba 'debs so zhes bya'o/ /khyod med phyogs ni mi 'tshal lo/ /zhes bya ba ni khyod mi bzhugs na gang gis sems can rnams sdug bsngal ba las bsgral bar bgyi ba'i phyogs mi 'tshal lo//de nas DoM bi mas/ mig 'phrul mnga' ba khyod bzhengs shig /ces bya bar brjod do/ /kyai mig 'phrul mnga' ba khyod bzhengs shig ces bya ba'o/ /gal te nga ni mig 'phrul mkhan lta bu ma yin no zhe na/bdag gis khyod kyi thugs 'tshal gyis/ /zhes bya ba ste/ bdag gis khyod nyid kyi thugs 'tshal lo zhes bya ba'o/ /DoM bi mo bdag sgrin mo 'tshal/ /zhes bya ba ni DoM bi ma zhes bya ba bdag ni sgrin mo ste/ grong khyer ma lags 'tshal lo zhes par shes so/ /snying rje rgyun chad ma mdzad cig /ces bya ba ni snying rje rgyun gcad pa ste/ khu ba'i ngo bo nyid du ma mdzad cig ces pa'o/ /da ni khu ba'i ting nge 'dzin las bzhengs nas bcom ldan 'das phyag bcu drug par gyur par phyag mtshan rnams brjod pa'i phyir/ glang po rta bong zhes bya ba la sogs pa gsungs te/sha ra ba zhes bya ba seng ge'o/ /byi la ni byi la'o/ /gnyis 'thung ni glang po la sogs pa'o/ /me ni gzi brjid can no/ /mthar byed ni gshin rje'o/ /nor sbyin ni rnam thos kyi bu'o/ /sgeg cing zhes bya ba la sogs pas ni/ ro dgu'i nyams dang ldan pa'i gar thabs gsungs so//da ni bskul ba'i rjes thogs su zhu bar gyur pa'i ting nge 'dzin las ldang ba bstan pa'i phyir/ /o~M dang hU~M gis zhes bya ba la sogs pa gsungs te/ zhu bar gyur pa'i ting nge 'dzin yongs su gyur pa las byung ba'i zla ba dang nyi ma'i dkyil 'khor gyi steng du o~M dang hU~M yongs su gyur pa'i gri gug dang thod pa'i dkyil 'khor la gnas pa'o//rdo rje che zhes bya ba ni dgyes pa'i rdo rje'o/ /ji ltar bzhengs par 'gyur zhe na/ zhabs rnams zhes bya ba la sogs pa gsungs so/ /da ni dbang po la sogs pa'i phyogs la brten pa'i gau rI la sogs pa 'byung bar 'gyur ro//lha mo'i tshogs rnams kyi sa bon rim bzhin bstan pa'i phyir/ gaM tsaM baM g+haM paM shaM laM DaM zhes bya ba ni sa bon gsungs te/ phyung ba dang zhes bya ba ni kun du phyung ba'o/ /'di dag ces bya ba ni gau rI la sogs pa rnams kyi sa bon 'di dag gis so/ /da ni aM hU~M zhes bya ba la sog pas gang sngar bstan pa de dag gi khyad par du gsungs pa ste/khyad par ji lta bu zhig ce na/ yi ge aM dang hUM dag go/ /bdag po zhes bya ba ni dkyil 'khor gyi bdag po'o/ /dga' ba'i zhes bya ba ni rtse ba'o/ /de'i btsun mo ni bdag med ma'o/ /'di dag gi sa bon dag sngo zhing 'bar bas na sngon po 'bar ba zhes bya'o//ma mo'i 'khor lo zhes bya ba ni lha mo rnams kyi dkyil 'khor ro/ /'di ltar zhes bya ba ni bstan pa dang 'chad par 'gyur ba'i mtshan nyid can no/ /gau rI zhes bya ba la sogs pas ni dkyil 'khor pa'i lha mo'i phyag mtshan gsungs te/ro hi ta ni nya'o/ /cang te'u ni cang te'u'o/ /phag ni phag go/ /rus sbal ni rus sbal lo/ /pad+ma'i snod ni thod pa'o/ /gau rI kha dog nag por 'gyur/ /zhes bya ba la sogs pa/ /nye dbang ni khyab 'jug go/ /gshin rje ni gshin rje'o/ /nor bdag ni ku be ra'o/ /bden bral ni srin po'i bdag po'o//thags bzangs ris ni lha ma yin gyi bdag po'o/ /gdan zhes bya ba ni bzhugs gdan no/ /'di dag gis dang po'i rnal 'byor dang / dkyil 'khor rgyal mchog gi ting nge 'dzin gnyis pa bstan pa yin no/ /gsum pa las rgyal mchog ces bya ba ni rgyud gzhan gyi rjes su 'brangs nas shes par bya'o//bzlas pa la brtson pas ni dngos grub kyang 'grub par 'gyur ro zhes bya bas bsgom pa'i skabs yin na yang bcom ldan 'das mas sngags zhus pa'o/ /khyad par ji lta bu can zhig ce na/ bud med rnams kyi zhes bya ba la sogs pa gsungs te go sla'o//da ni nga yi zhes bya ba la sogs pa ni bcom ldan 'das kyi bka'o/ /rnal 'byor bdag ces bya ba ni bstan pa'i mtshan nyid can gyi rnal 'byor bdag nyid do/ /thams cad ces bya ba ni dbang du bya ba la sogs pa'i las rnam pa bzhi'o/ /rig byed rnams zhes bya ba la sogs pa la/dang por zhes bya ba ni yi ge oM mo/ /rgyan zhes bya ba ni de'i ngo bo nyid do/ /sngags kyi tha mar ni yi ge ha dbyangs kyi yi ge bcu gnyis kyis brgyan pa'o/ /mthar ni phaT dang swA hA'o/ /zhus pa zhes bya ba ni dkyil 'khor te/ bcom ldan 'das kyis bris pa'i 'khor ro/ /de la zhes bya ba ni dgyes par gyur nas so//ston pa zhes bya ba la bka' stsal pa zhes bya ba ni lhag ma'o/ /ye shes che zhes bya ba ni slob dpon de nyid kyis dkyil 'khor bri bar mdzad ces bya ba ste/ gzhan ni ri mo mkhan la sogs pa ni ma yin no zhes bya ste dang por ro/ /bum pa zhes bya ba ni ri mos brgyan pas so//rgyan zhes bya bas ni lha mo rnams kyi'o/ /don gyis ni rnam par rgyal ba'i bum pa dang las thams cad pa'i bum pa yang yin na/ /dkyil 'khor tshon ci zhig gis bri bar bya zhe na/ gsungs pa/ rin chen lnga'i zhes bya ba ste de'i rang bzhin ni mchog go/ /'bras la sogs pa ni bar ma'o//dur khrod kyi so pag la sogs pa ni tha ma'o/ /de'i dbus zhes bya ba dkyil 'khor gyi dbus su'o/ /skyes pa'i thod pa zhes bya ba ni mi nyid kyi thod pa'o/ /sha ra ba ni seng ge'o/ /lto 'phye zhes bya ba ni sbrul lo/ /lha mo zhes bya ba la sogs pa la lha mo rnams kyi kha dog ci lta ba de ltar phyag mtshan yang bri bar bya'o//dbus su gnas pa'i thod pa la sna tshogs rdo rjes byin gyis brlabs pa bri bar bya'o/ /rnam rgyal bum pa zhes bya ba la sogs pa la/ shar du gzhag ces bya ba'o/ /shugs kyis na lha mo rnams kyi bum pa ni gnas ji lta ba bzhin gzhag par bya zhes bstan par 'gyur ro zhes bya bar bstan pa'i don to//dkyil 'khor du ni zhes bya ba la sogs pa la rab tu 'jug ces bya ba ni bzhugs par bya'o/ /brgyad gnyis lon pa zhes bya ba ni bcu drug lon pa ste/ rig ma brgyad po bstan par 'gyur ro/ /gang dag ce na ma dang zhes bya ba gsungs te/'di dag 'jig rten gyi 'brel pas ma yin gyi/ bla ma'i 'grel pas yin no/ /ma zhes bya ba ni slob dpon gyis gang bzhed pa slob ma'i ma yin no/ /srin mo zhes bya ba ni de dang lhan cig spyod pa'o/ /bu mo zhes bya ba ni slob dpon gyi slob ma'o/ /zhang po'i chung ma zhes bya ba ni ma'i snying du sdug par gyur pa'i grogs zhes pa'o//ma'i spun dang zhes bya ba ni slob dpon gyi grogs su gyur pa'o/ /sgyug mo zhes bya ba ni slob ma'i snying du sdug pa'o/ /pha'i sring mo ni slob dpon gyi sring mo'o/ /'di rnams zhes bya ba la sogs pa la rnal 'byor ma ni slob dpon no/ / ji ltar gsungs pa zhes bya ba ni de kho na nyid bsdus par ro/ /mchod dang bstod ces bya ba la sogs pa la/ sngar shes nas zhes bya ba ni sngar shes pa la sogs pa'o/ /dga' bral dang por zhes bya ba ni dga' bral gyi dang por ro/ /mchog mtha' zhes bya ba ni mchog tu dga' ba'i mtha' ste dbang bskur ba gsum pa zhes bya ba'i don to//gal te rgyud thams cad nas lhan cig skyes pa'i mtshan nyid can gyi de kho na nyid gsungs pa nyid can gyi de kho na nyid yin na/ 'dir khyad par ci zhig yod ce na/ sbas pa zhes bya ba gsungs te/ 'di ltar 'chad par 'gyur ba'i mtshan nyid can gyi shes rab kyi dbang bskur ba ni/thams cad rgyud du zhes bya ba rgyud thams cad du sbas pa yin no/ /de ltar na sngar ci zhig bstan zhe na/ mtha' mthas zhes bya ba gsungs te/ slob dpon dang gsang ba'i dbang bskur ba rab tu bstan pa yin no zhes bya bar dgongs pa'o//gang gi phyir shes rab kyi dbang bskur ba 'di sngar gong du bstan pas des na de'i phyir zhus pa/ de la zhes bya ba ni shes rab ye shes kyi dbang bskur ba la'o/ /dbang bskur ba gzhan chu dang cod pan la sogs pa thams cad 'dra ba'i ngo bo nyid kyi phyir dbang bskur ba bzhi char yang / rdo rje mchod pa'i sbyor ba yis/ /zhes bya ba ni khyad par ro/ /de'i phyir de la zhus pa ni/ de yi skad cig ji ltar lags/ /zhes bya ba la sogs pa gsungs te/ skad cig ces bya ba'i sgras 'dir skad cig gi rang gi ngo bo dang / thob par rjod par byed de 'di dag ni sdud par byed pa'i tshig yin no/ / bcom ldan 'das kyis bka' stsal pa/ thog ma dbus mtha' zhes bya ba la sogs pa ste/ thog ma ni mchog tu dga' ba'o/ /mtha' ni dga' bral gyi dga' ba'o/ /dbus zhes bya ba ni dga' ba dang po'o/ /srid min mya ngan 'das pa min/ /zhes bya ba ni gsum po de dag ji ltar rigs par srid pa dang /mya ngan las 'das pa'i ngo bo nyid yin pa'i phyir ro/ /'di ni zhes bya ba ni 'chad par 'gyur ba'i mtshan nyid can no/ /mchog tu bde zhes bya ba ni lhan cig skyes pa'i mtshan nyid can no/ /bdag med gzhan yang med ces bya ba ni gzung 'dzin dang bral ba nyid do/ / yang na thog ma dbus mtha' med/ /ces bya ba la dang po bya ba yin pas thog ma ste/ slob dpon gyi dbang bskur ba'o/ /mtha' zhes bya ba ni dbang bskur ba bzhi pa'o/ /dbus ni gsang ba'i dbang bskur ba ste/ 'di ni de dag ma yin no zhes bya ba'i don te/ ci ltar ma yin zhe na/ srid min mya ngan 'das pa min//zhes bya ba gsungs te/ 'di las sangs rgyas kyi yon tan rnams srid par gyur pas na lam zhes bya ba slob dpon dang gsang ba'i dbang bskur ba'o/ /mya ngan las 'das pa ni bzhi pa ste/ de thob na bya ba byas pa'i ngo bo nyid yin pa'i phyir ro/ /'di ni zhes bya ba ni shes rab ye shes kyi dbang bskur ba'o//ji lta bu zhig ce na/ bdag med gzhan yang med ces bya ba gsungs te/ gang la shes rab thabs rjes su mi dmigs pa'i phyir gnyis su med par rab tu gsal ba'o/ /de ji ltar 'byung bar 'gyur zhe na/ rang gi g.yas dang lag gzhan gyi/ /zhes bya ba la sogs pa gsungs te/g.yas pa ni g.yas pa'o/ /g.yon pa ni g.yon pa'o/ /las zhes bya ba ni srog go/ /mthe bong ni la la nA'o/ /srin lag ni ra sa nA'o/ /gang zhes bya ba ni de dag go/ /longs spyod ni yang dag par nyams su myong ba'i don to/ /rlabs gnyis zhes bya ba ni g.yas g.yon gyi rlung 'byung ba dang 'jug pa'o//des ci zhig tu 'gyur zhe na/ de nas zhes bya ba la sogs pa gsungs te/ shes rab dang ye shes kyi dbang bskur ba 'ba' zhig tu ma zad kyi/ phyi nas phyi rol gyi shes rab med par yang skye bar 'gyur ba'o/ /ye shes zhes bya ba ni gnyis su med pa'i mtshan nyid kyi ye shes so//gzhon nu ma yis sbyor myong bzhin/ /zhes bya ba ste/ sbyor myong bzhin zhes bya ba ni sngar dbang bskur ba bzhin bdag gis thob par ma gyur pa'o/ /lkugs pa'i rmi lam ji lta bzhin/ /zhes bya ba ni ngag gi spyod yul las 'das pa'o/ /yang na longs spyod kyi 'khor lo'i srog gi rlung gi rlabs gnyis mthe bong zhes bya ba brkyang ma dang /srin lag ces bya ba ro ma dang / de dag gis bsdam par bya ba'o/ /sbyor ba 'di gnyis ni gzhung lugs dang bla ma'i man ngag las shes par bya'o/ /yang der ci zhig skye bar 'gyur zhe na/ mchog gi mtha' dang zhes bya ba la sogs pa gsungs te/stong dang stong min zhes bya ba ni shes rab dang thabs gcig tu ro mnyam gyur pa'i ngo bo nyid do/ /de lta bu'i ye shes de nyid he ru ka zhes bya ba'i sgras brjod par bya ba ste/ stong pa nyid dang snying rje gnyis su bya ba'i gzugs can yin pa'i phyir ro/ /dgyes pa'i rdo rje'i mngon par zhes bya ba ni bskyed pa'o//de gsal bar byed pa'i le'u la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u lnga pa'i 'grel pa'o// //lha mo zhes bya ba la sogs pa la/ mchan khung zhes bya ba ni dpung pa'i 'og go//phyag rgya lnga zhes bya ba ni spyod pa byed pa'i dus dang / tshogs kyi 'khor lo la sogs pa'i dus phyag rgya 'dzin par byed do zhes bya bar dgongs pa'o/ /cho ga zhes bya ba ni thabs so/ /bya ba ni kun du spyod pa'o/ /dam tshig can zhes bya ba ni dam tshig dang mtshungs par ldan pa'o//'jigs pa zhes bya ba ni 'jigs par byed pa'o/ /skyes pa'i thod gnas zhes bya ba ni skyes pa'i thod pa'i nang na gnas pa'o/ /pir zhes bya ba ni skud par byed pa'o/ /bla ma zhes bya ba ni gus pa dang bcas pa ste/ dam tshig byin gyis brlabs nas lha mo'i rnal 'byor bsgoms nas so//bza' zhes bya ba ni zos nas so/ /g.yon phyogs su gnyug mar gnas pa'i phyag rgya gnas nas bri bar bya'o zhes bya bar sbyar ro/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u drug pa'i 'grel pa'o// // de nas zhes bya ba la sogs pa la/ ji ltar 'gyur zhes bya ba ni ci lta bu zhes bya ba'o/ /sbrang rtsi chen po las byas pa'i du ba'i snag tsha ni sbrang rtsi chen po'i snag tsha'o/ /skal med ces bya ba ni sdang bar gyur pa'o/ /dngos grub med ces bya ba ni sgrub pa po la'o/ /'jig rten pha rol ni skye ba gzhan no//yang dag rab sbyin ldan pa zhes bya ba ni dgyes pa rdo rje la lhag par mos pa'o/ /res 'ga' tsam zhes bya ba ni res 'ga' bstan pa'o/ /lam gyi spyod yul zhes bya ba ni lam du 'gro ba'i dus so/ /bstan zhes bya ba ni bstan par gyur pa'o/ /bza' ba zhes bya ba'i sgras ni 'di spros pa dang bcas pa'i spyod pa dang tshogs kyi 'khor lo la sogs pa'i cho ga yang bstan to//gang du zos pa zhes bya ba ni tshogs kyi 'khor lo dang spyod pa byed pa na'o/ /'dod pa'i don kun zhes bya ba ni phyag rgya chen po'i dngos grub bo/ /spyod pa'i gnas kyi khyad par bstan pa'i phyir/ /dur khrod ces bya ba la sogs pa gsungs te/ri'i bya skyibs zhes bya ba ni ri'i phug go/ /dgu dang ni zhes bya ba ni dgu dang zhes brtags pa'o/ /dam tshig ces bya ba ni go ku da han la sogs pa'o/ /zos nas yang zhes bya ba la sogs pa'o/ /ma mo zhes bya ba ni mig dang rna ba dang sna dang lce dang lus dang yid ces bya ba'i cha ste/gar dang glu dang rung ba la sogs pas nges par mchod par bya ba'o/ /de nyid bstan pa'i phyir/ gal te ma sring yin na yang / /zhes bya ba la sogs pa gsungs te/ ma zhes bya ba la sogs pa'i sgras dbang po lnga gsungs pa yin te/ de dag gzugs dang sgra dang dri la sogs pa 'dod pa'i yon tan lngas tshim par bya ba ste/gnas de dag na gnas pa'i lha mo de rnams la [(]gang [,]gong [)]na med pa'i mchod pa yin no/ /gal te mig la sogs pa ma yin par ji ltar 'gyur zhe na/ de yang ji skad du sangs rgyas thod pa zhes bya ba rnal 'byor ma'i rgyud las/ de nas yang dag bshad bya ba/ / ma dag sems ni sbyang bya ste/ /mig ni sring mor gyur pa'o/ /sring mo'i bu mo rna ba yin/ /sna ni skyed byed ma ru gyur/ /de bzhin lce ni bu mo nyid/ /yid ni chung mar gyur ba ste/ /lha rdzas mchog gyur lnga po 'dis/ /phyag rgya chen po rab ster byed/ /ces gsungs pa yin no/ /legs mchod nas zhes bya ba ni rtag tu mi 'chad par nyams su myang bar bya ba'o//cha gcig par zhes bya ba la sogs pa la/ thod chen zhes bya ba ni lan gnyis skyes pa'i thod pa'o/ /dbul zhes bya ba ni dang por ro/ /btung zhes bya ba ni phyi nas so/ /zas bza' bar gsal bar byed pa'i le'u la yang de skad ces bya'o/ / dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u bdun pa'i 'grel pa'o// //de nas zhes bya ba la sogs pa las phyag rgya chen po ni sngar brjod pa nyid do/ /da ni spros pa dang bcas pa'i spyod pa byed pa'i rnal 'byor pa rnams kyang gang dang lhan cig phyag rgya chen po 'grub par 'gyur ba de ci lta bu zhes bya ba ste/de'i phyir kun rdzob spyod pa'i zhes bya ba gsungs te/ 'jig rten gyi tha snyad kyis so/ /spyod pa yis zhes bya ba ni brtse ba'i tshig la sogs pa'o/ /gzugs zhes bya ba ni kha dog dang dri la sogs pa'o/ /ri dgas kyi lte ba ni gla rtsi'o/ / mtshungs zhes bya ba ni 'dra bar snang ba'o/ /dbang mchog ces bya ba ni ut+pala'o/ /skad cig ces bya ba ni res 'ga'o/ /'byung ba zhes bya ba ni kun du 'byung ba'o/ /khrag ces bya ba ni tu ru ska'o/ /de'i zhes bya ba ni lus kyi'o/ /a ga ru nag po zhes bya ba ni dri mchog dang ldan pa'i a ga ru'o//yid 'ong ma zhes bya ba ni yid dga' bar byed pa'o/ /zab mo'i chos ni klog pa dang / /zhes bya ba ni dgyes pa'i rdo rje klog pa'o/ /'dul bar gyur pa'i zhes bya ba ni gdul bya nyid do/ /gso sbyong ni nya la sogs pa ste nyi ma ma shar nas shar gyi bar du'o/ /bslab pa'i gnas ni brgyad dam bcu bzhi nyid ces ji srid 'tsho'i bar gyi dbang du byas pa ste/lus dang ngag dang yid kyi ngan du spyod pa sbyong ba'i mtshan nyid can no/ /'dod chags dang bral ba'i phyir smra ba ni bye brag tu smra ba ste/ de nyid ni bye brag tu smra ba'o/ /de yang nyan thos theg pa'i rtog pa brjod pa brgya pa dang /dbyu gu gsum pa'i phreng ba la sogs pa'o/ /mdo sde ni shin tu zab mo ma yin pa'i mdo sde ste/ tshigs su bcad pa gcig pa dang / tshigs su bcad pa bzhi pa dang / tshigs su bcad pa gnyis pa'i gzungs dang / sgo drug pa dang / bzang spyod dang / rgya cher rol pa dang / sa bcu la sogs pa'o/ /rnal 'byor spyod pa zhes bya ba ni sna tshogs 'di dag ni sems tsam ste/ mi bden pa'i don nyid 'khrul nas don du snang bar 'byung bar gsungs te/ dper na rmi lam lta bu zhes bya ba'o/ /dbu ma zhes bya ba ni chos thams cad skye ba med pa'o/ sngags kyi theg pa kun zhes bya ba ni bya ba dang / spyod pa dang / rnal 'byor dang / rnal 'byor bla na med pa dang / rnal 'byor gang na med pa'i dbye bas rnam pa lnga'o/ /bye brag tu smra ba la sogs pa'i ma lus pa'i rab tu byed pa tsam shes par bya ba smras pa yin gyi/ rdzas ma lus pa ni ma yin te/ dpag tu med pa'i phyir ro/ /blangs nas zhes bya ba ni gus par bya zhes bya ba'i don to/ /gus par zhes bya ba ni rgyud 'di la gus pa'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u brgyad pa'i 'grel pa'o// //de nas zhes bya ba la sogs pa la kha sbyar ni rnam par shes pa dang lus dag gi'o//'byed pa ni tha dad du byed pa ste/ bsam gtan gyis zhes bya ba ni lhag ma'o/ /dngos grub ni khros pa'i las kyi dngos grub bo/ /'khrugs shing zhes bya ba ni shin tu rngam pa'o/ /ma rung ba ni gsod pa'i sems so/ /bsgom pa zhes bya ba ni bstan ma thag pa'o//de nyid ni tsam zhes bya ba 'ba' zhig gis so/ /sangs rgyas zhes bya ba la/ sangs rgyas la sogs pas yang dag par bsrungs kyang ngo / /mthong nas zhes bya ba ni dran nas so/ /ji ltar gzugs zhes bya ba ni 'chad par 'gyur ba'i gzugs kyis so/ /khab ni zhes bya ba ni rdo rje'i khab bo//me'i gzugs can ni 'bar bar 'gyur ba'o/ /byin za'i sa bon ni re pha rab tu 'bar ba'o/ /dmigs nas zhes bya ba ni bsgoms nas so/ /bklags pas 'grub pa zhes bya ba ni tshig gi don ni 'grub par bden no zhes bya ba'i bar du'o/ /gsang ba ni skal ba med pa'i sems can gyi spyod yul ma yin pa'i phyir ro//mchog ces bya ba ni ngal ba med pa nyid mngon par 'dod pa'i don 'grub pa'o/ /rtog med ces bya ba ni the tshom med pa'o/ /rin chen zhes bya ba ni yid bzhin gyi nor bu rin po che'o/ /rin chen des ci zhig ce na/ lus zhes bya ba gsungs te/ gnyug mar gnas pa'i lus so//ltos zhes bya ba ni lha mo skye zhes bya ba'o/ /'bar ba zhes bya ba ni bde ba chen pos 'bar ba'o/ /phreng ba zhes bya ba ni rnal 'byor ma bco lnga'i ngo bo nyid kyi rtsa'o/ /'khrugs pa ni de'i ting nge 'dzin gyis gnas pa'o/ /sbyor bral 'gyur zhes bya ba la sogs pa la/ ma phug ces bya ba ni so sor ma phug pa ste/mi shes na ni 'khor ba pa nyid du 'gyur te/ ji ltar rin po che ma phug pa rgyan gyi las thams cad la mkho ba ma yin pa de bzhin du/ lus 'di yang mi shes na ni sangs rgyas nyid thob par mi nus pa yin no/ /rab tu phug pas ci zhig byed ce na/ dga' ba sbyin pa po zhes bya ba gsungs te/mngon par 'dod pa'i don sgrub par byed ces bya ba'o/ /de ltar zhes bya ba lus ji lta ba de ltar 'khor ba'i rin po che yang yin no/ /bdud rtsi ni mi gnas pa'o/ /gang gi gzugs kyis zhes bya ba ni de kho na nyid kyi'o/ /zhabs ni gshegs par byed pa'o/ /rnam par thar pa ni rnam par thar pa rnams so//gug skyed ces bya ba ni 'khor lo la sogs pa'i tshad rnams so/ /sngags btu ba'i zhes bya ba ni lha mo'i zhu ba'i tshigs bcad do/ /bcom ldan 'das zhes bya ba ni sdud pa po'i tshig go/ /lha mo shes rab chen mo nyon/ /zhes bya ba ni bcom ldan 'das kyi bka'o/ / rnam par snang mdzad ni oM mo/ /uSha rnams kyi bzhi ba ni yi ge ha'o/ /puk+ka sI ni u'o/ /stong pa ni thig le'o/ /mthar ni swA hA zhes bya ba ni mthar swA hA zhes sbyar ba'o/ /yig 'bru'i bdag po ni oM mo/ /mkha' spyod ma ni aM ngo / /dang po yi ni gnyis pa zhes bya ba ni kha'o/ /gnyis pa yi ni gsum pa zhes bya ba ni dza'o//b+ha ris zhes bya ba ni i'o/ /yig 'bru'i dbang phyug ni o mo/ /lnga pa nyid kyi gsum pa ni yi ge ba'o/ /mkha' 'gro ma ni yi ge u'o/ /yig 'bru'i thu bo ni oM mo/ /gti mug rigs zhes bya ba ni oM mo/ /dang po rnams kyi dang po ni yi ge ka'o/ /rdo rje mkha' 'gro ma ni yi ge u thung ngo / / mthar gnas pa'i gnyis pa ni ra'o/ /mthar gnas gsum pa ni la'o/ /tsau rI ma ni o'o/ /bzhi pa'i gsum pa da'o/ /mthar gnas bzhi pa ni wa'o/ /uSh+ma rnams kyi bzhi pa ni ha'o/ /puk+ka sI ni dbyangs kyi drug pa'o/ /lnga pa nyid kyi gnyis pa ni pha'o//gsum pa'i dang po ni yi ge Ta'o/ /lnga pa'i bzhi pa ni b+ha'o/ /mthar gnas pa'i dang po ni ya'o/ /g+hasma rI ni yi ge o'o/ /dang po'i dang po ni ka'o/ /nang gi gau rI ni i'o/ /gsum pa nyid kyi dang po ni Ta'o/ /lnga pa'i gsum pa ni ba'o/ /gnyis pa'i gsum pa ni dza'o//bzhi pa'i dang po ni ta'o/ /byin za ni re phA'o/ /pe tA lA+e ni e'o/ /mthar gnas pa'i gsum pa ni la'o/ /dang po'i dang po ni ka'o/ /mthar gnas pa'i dang po ni ya'o/ /rdo rje ma ni a'o/ /tsau rI ni ai'o/ /lnga pa'i dang po ni pa'o/ /bdag med ma ni a'o/ /dang po'i dang po ni ka'o//gnyis pa'i dang po ni tsa'o/ /gsum pa'i dang po ni Ta'o/ /bzhi ba'i dang po ni ta'o/ /lnga pa'i dang po ni pa'o/ /mthar gnas pa'i dang po ni ya'o/ /uSh+ma rnams kyi dang po ni sha'o/ /mthar gnas pa'i gnyis pa ni ra'o/ /rdo rje ma ni a'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u dgu pa'i 'grel pa'o// //de nas zhes bya ba la sogs pa la/ sdom gcig pa zhes bya ba gnyis su med pa'i mdor bsdus pa'i sdom pa'o/ /bzlas pa ni bzlas brjod do/ /de'i yul ni phreng ba'o/ /ma he yis kyang zhes bya ba ni ma he'i rus pa'i phreng bas zhes bya ba'i don to//las so so'i dam tshig bya ba bstan pa'i phyir rengs par zhes bya ba la sogs pa gsungs te go sla'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u bcu pa'i 'grel pa'o// //dam 'khyud ces pa la sogs pa la/ 'di skad ces bya ba ni 'chad par 'gyur ba'o/ /mi bskyod pa'i rigs zhes bya ba ni mi bskyod pa de'i rigs so/ /sems pa'i rigs zhes bya ba ni rdo rje sems dpa'i rigs so/ /de rnams zhes bya ba ni bud med de rnams de bzhin gshegs pa'i rigs can no//bdag med ma la'o mdzad pa/ /zhes bya ba ni bod pa'o/ /myos pas ni bde ba chen po 'byung bar 'gyur ba'o/ /mtshan ma'i zhes bya ba ni de'i don du sen mo 'debs pa'o/ /lag pas zhes bya ba ni sor mo gnyis kyis bskyod pa la sogs pa'o/ /rdo rje ldan pa zhes bya ba ni rengs par gyur pa'i rdo rjes so//'phyang thag ces bya ba la sogs pas ni dbang bskur ba bzhi po rnams kyi ngo bo nyid kyi man ngag gi bya ba rnams gsungs pa yin te/ 'phyang thag dang 'dra bas 'phyang thag go/ /steng phyogs na gnas pa'o/ /'di ni byed pa po bud med yin te/ mdun dang rgyab tu bud med kyis//dal gyis gsang gnas 'phyang pa yis/ /mtshan ma'i steng na mnyam gnas pa/ /'phyang thag 'dra bar rab tu grags/ /bla zhes bya ba la sogs pa la 'dir byed pa po skyes bu yin te/ bud med pus mo bslangs nas ni/ /g.yas dang g.yon pa'i dpung pa la/ /steng du sbyar ba'i byed pa yis//phan tshun mngon phyogs gnas pa'o/ /shin tu brkyang zhes bya ba la sogs pa la/ ngang pa'i gshog pa'i rnam pa ltar/ /brkyang par gyur pa'i rkang pa gnyis/ /shin tu brkyang bar gyur pa yin/ /'gyel bar gyur pa dag gir grags/ /de bzhin zhes bya ba ni kha ba gsungs te/'gyel ba'i rkang pa steng 'og tu/ /dbyug pa bzhin du gang gnas pa'i/ /zur dang rgyab tu cung mnan pa/ /khab kyi byed pa zhes byar brjod/ /ga pur rgyu'i phyir zhes bya ba ni ga pur 'phel bar byed pa'i ched du'o/ /lhan cig skyes pa'i don byed pa'i khyad par gang du ston pa'i le'u la yang de skad ces bya'o/ /dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u bcu gcig pa'i 'grel pa'o// //de nas zhes bya ba la sogs pa la ni dbang bzhi'i tshigs bcad kyi man ngag ji lta ba bzhin du shes rab gtad pa'i tshigs su bcad pa'o/ /rdo rje rab gnas zhes bya ba ni rdo rje 'chang nyid du rnam par gnas pa'o//byang chub ni shes rab bo/ /de'i sras ni byang chub sems dpa'o/ /dga' ba ni brtse ba'o/ /gnas ni byang chub kyi sems so/ /'di ni zhes bya ba la sogs pa la/ ches phra zhing zhes bya ba ni spyod yul ma yin pa'i phyir ro/ /rdo rje ni de bzhin gshegs pa rnams so//dkyil ni snying po'o/ /nam mkha' lta bu zhes bya ba ni nam mkha' lta bu ste snang ba med pa'i sems can rnams so/ /rdul bral zhes bya ba ni nyon mongs pa zad pa'o/ /mthar phyin zhes bya ba ni 'khor ba las 'das pa nyid do/ /zhi ba nyid ces bya ba ni gnod pa dang bral ba'i phyir ro/ /khyod rang nyid ni khyod kyi pha//zhes bya ba ni khyod nyid so so rang gis rig pa yin pa'i phyir ro/ /rdo rje pad+ma byin gyis brlabs pa ni rang gis byin gyis rlob pa'o/ /rin chen rnal 'byor rnams kyi phreng / /dgyes pa'i rdo rje'i 'grel byas pas/ /bsod nam bsags pa gang yod des/ /'gro kun nyon mongs kun bral shog /dpal dgyes pa'i rdo rje'i dka' 'grel rnal 'byor rin po che'i phreng ba las brtag pa gnyis pa'i le'u bcu gnyis pa'i 'grel pa rdzogs so// //rgya gar gyi mkhan po kriSh+Na paN+Di ta dang / lo tsA ba dge slong tshul khrims rgyal bas bsgyur cing zhus te gtan la phab pa'o/

CLOSE WINDOW