CLOSE WINDOW

D1181
བོད་ཡིག

'bro dge slong lo tsA bas/ paN+Di ta mai tri zhabs las rnyed de/ bod yul du dpe spyan drangs nas/ dge slong rnal 'byor spyod pa dbang phyug grags pas gsol ba btab ste bsgyur ba'o// // @##/ /rgya gar skad du/ he badzra tan+t+ra pany+dzi kA pad+ma ni nA ma/ bod skad du/ kye'i rdo rje'i rgyud kyi dka' 'grel pad+ma can zhes bya ba/ ngag gi dbang phyug 'jam dpal gzhon nur gyur pa la phyag 'tshal lo/ /rdo rje sems dpa' dpal dang ldan/ /mkha' 'gro ma yi 'khor los sgyur//ye shes lnga dang sku gsum phyir/ /'gro ba skyob la phyag 'tshal lo/ /ji snyed rdo rje mkha' 'gro rnams/ /kun du rtog pa'i 'ching gcod pa/ /'jig rten don du rab 'jug rnams/ /de snyed pa la rtag phyag 'tshal/ /lhan cig skyes pa mdzes dga' ba/ /bdag med yang dag ldan pa'i dpal//shes rab thabs cig la btud de/ /de dang de nyid bshad par bya/ /'di skad bdag gis zhes bya ba la sogs pa la/ 'di skad ces bya ba ni don ji lta ba bzhin du sdud par byed pa'o/ /bdag gis zhes pa ni bdag nyid kyis thos pa'o/ /dus gcig na zhes pa ni gang gi tshe bzhugs pa'o//gang du zhe na/ de bzhin gshegs pa thams cad kyi sku dang gsung dang thugs rdo rje btsun mo'i b+ha ga la ste/ brten pa'i dkyil 'khor de'i bdag nyid do/ /rten gyi dkyil 'khor yang b+ha ga la ste/ de'i dbus kyi gzhal yas khang du'o/ /phyi dang gsang ba de bzhin nang //de bzhin nyid don rnam pa bzhi/ /dkyil 'khor las kyi phyag rgya dang / /lus dang rang bzhin med rnams so/ /thos pa ni btsun mo'i b+ha ga la 'dzag pa'o/ /bi ni rnam pa sna tshogs so/ /dza ha ra ni 'phrog par byed pa ste/ 'di skad bdag gis zhes bya ba ni tshul de lta bus so/ / yang na 'di skad bdag gis thos pa zhes pa ni/ 'khor lo bzhir 'dzag pa ste/ 'di rnams la bzhugs pa'o/ /yang na 'di skad ni yang dag par sbyor ba la'o/ /bdag gis ni bdag tu 'dzin pa'o/ /thos pa ni 'jig pa'o/ /dus gcig na zhes pa ni thams cad kyi thun mong ma yin pa'i skad cig la'o//yang na 'di skad bdag gis ni tshangs pa'i gnas bzhi las so/ /thos pa ni byung ba'o/ /bcom ldan 'das ni bde ba chen po'i bdag nyid do/ /de bzhin gshegs pa thams cad kyi sku dang gsung dang thugs rdo rje btsun mo'i b+ha ga la bzhugs zhes pa ni stong pa nyid kyis te/ 'di ni bsgrub bar bya ba'o/ /der bcom ldan 'das kyis bka' stsal pa zhes pa ni gnas der ro/ /yang na skal ba dang ldan pa gzigs te longs spyod rdzogs pa'i sku'i bdag nyid kyis bka' stsal pa ni bod pa'o/ /de bzhin gshegs pa thams cad kyi gsang ba gsum gyi snying po ni snying po ste rdo rje sems dpa'o//de nyid kyi gsang ba'i yang gsang ba'i snying po nyid do/ /sku gsum gyi bdag nyid de bzhin gshegs pa thams cad kyi snying po rdo rje'i snying po ste/ 'bras bu nyid ces bya ba bka' stsal pa'o/ /rdo rje sems dpa'i ming khyad par du byed pa dang /khyad par du bya ba gsungs pas sku gsum po zhus pa ni rdo rje sems dpa' zhes pa'o/ /shes rab 'di yis zhes bya ba 'di'i bshad pa ni rigs pas zhes bya ba ste chos kyi sku'o/ /yang na nges par 'byed pa 'dis shes rab dang rigs pa ni snying rje dang sbyor bas zhes so/ /chen po zhes bya ba ni byang chub sems dpa' ste/de rnams kyis rtogs par bya ba'i phyir shes rab dang thabs kyi bdag nyid kyi ye shes so/ /de la ro de rnams kyis yongs su gang ba ni longs spyod rdzogs pa'i sku'o/ /dam tshig ni yang dag par 'gro bar byed cing thob par byed pa ste/ gdul bya rnams kyi don gyi phyir rab tu 'jug pa nyid kyis dam tshig sems dpa' ni sprul pa'i sku'o//bsgrub bya'i don zhus pa ni he badzra zhes pa ste/ thabs bde bas sems can rnams skyob par byed pas snying rje chen po'am/ yang na ma hA kaM zhes bya ba ste/ ma hA ni chen po'o/ /kaM ni bde ba ste bde ba chen pos bsdus pas zhes bya ba'o//de bas na shes rab dang thabs kyi bdag nyid kyi rgyud ces pa rgyud ni gnyis su med pa'i bdag nyid kyi sbyor ba'o/ /rgyud ces bya ba ni brjod par bya ba ste/ ngas bshad kyis nyon zhes pa ni zung shig pa ste/ de nyid ni/ lta stongs dgug dang brda chen pos nus pa//zhes pa ste/ de yang gang zhe na/ rengs dang bskrad pa nyid dang ni/ /zhes bya ba la sogs pa'o/ /de bzhin du rnal 'byor ma rnams bskyed pa dang ni gnas pa'i rgyu'o/ /mthu zhes pa ni mthu'i rdzu 'phrul lo/ /ye shes ni de kho na nyid do/ /rnam par shes pa ni rdo rje ma la sogs pa'o//lha rnams zhes pa ni phyag gnyis pa la sogs pa'i rgyu'o/ /dang por zhes bya ba ni rgyud kyi dang por ro/ /gcig ces bya ba ni gnyis su med pa'o/ /he ru ka yang yin la bskyed pa'i rgyu yang yin pas he ru ka ni bskyed pa'i rgyu zhes so/ /dngos po nyid kyis zhes pa ni 'dir yang dag pa nyid du bsams nas sems can rnams grol te gzhan du ma yin no//dngos po'i 'ching bas bcings pa'o/ /zhes pa ni de la chags pas so/ /dngos med yongs su shes pa yis/ /zhes bya ba ni gnyis su med pa'i ye shes kyis te grol bar 'gyur ro/ /de bzhin zhes pa ni gsungs pa'i rim pas so//he ru ka bsgom bya zhes pa ni/ yongs su shes pas bsgom par bya'o/ /dngos med ces pa ni rang bzhin med par gyur pa ste/ de'i phyir dang por dngos po bsgom par bya'o/ /dngos po med pa de nyid yongs su shes par bya ba yin te/ dngos po dang dngos po med pa dang bral bas dngos po dang dngos po med pa'i rang bzhin he ru ka bsgom par bya'o//gang du bsgom par bya zhe na/ ye shes chen po lus la gnas/ /zhes bya ba gsungs te/ ye shes chen po ni bde ba chen po'i ye shes so/ /kun du rtog pa thams cad spangs/ /zhes bya ba ni dmigs pa med pa'i ye shes kyi rang bzhin no//dngos po thams cad bya ba byed pa/ /zhes pa ni 'joms par byed pas so/ /gnas kyang lus kyis bskyed pa min/ /zhes pa ni lus la nye bar brtag par bya ba yin yang lus las ma skyes pa'o/ /khyab par byed cing skye ba med pa dang 'gag pa med pa la sogs pa nyid yin no//lus la ji ltar nye bar brtag par bya snyam pa'i sgo nas zhus pa ni/ kye bcom ldan 'das zhes bya ba'o/ /bsgrub bya so sor rtogs par bya ba'i phyir de rnams zhes pa ste/ thabs dang shes rab gnyis po dag dang dbyer med pa nyid kyi rtsa ni 'di rnams kyi gtso bo gsum mo//gcig ni bya ba'i dbye bas mi phyed ma la sogs pa'i dbye ba ste/ rdo rje gsum dbyer med pa nyid kyis der mi phyed mar rab tu grags so/ /skra'i rtse mo la sogs pa'i dbye bas de nyid phra gzugs ma zhes bya bar sbyar ro/ /bems pos bsdus pas na de gzugs can ma'o//gang gi phyir lus la gnas pas na bzang mo'o/ /g.yon phyogs su brten pas na g.yon pa ma'o/ /zlum po nyid kyis ni mi'u thung ma'o/ /rus sbal gyi gzugs nyid kyis ni rus sbal skyes so/ /srid pa bsgoms pas na bsgom pa ma'o/ /dbang bskur ba sbyin par byed pas na dbang bskur ma'o//nyon mongs pa sun 'byin par byed pas na skyon ma'o/ /lus skyod par byed pas 'di rnam par gnas pa ma'o/ /skyed par byed pa nyid kyis na ma ma'o/ /thams cad du song ba nyid kyis na mtshan mo'o/ /zhi ba nyid kyis na bsil sbyin mar bshad do//tshim pa med pa'i ngo bo nyid kyis na la la na'o/ /gzugs med pas na a ba d+hU tI'o/ /ro ster bar byed pas na ra sa nA'o/ /zla ba lta bus na tshad ma'o/ /mun pa chen po lta bus na nag mo'o/ /spyi ma ni mnyam pa'i dngos pos so/ /gang gi phyir rgyu thams cad sbyin par byed pas rgyu sbyin ma'o//sbyor ba thams cad med pas de sbyor bral ma'o/ /dga' byed ma ni dga' bas bsdus pas so/ /dngos grub ma ni dngos grub sbyin par byed pas so/ /me ma ni nyon mongs pa bsregs pas so/ /yid bzangs ma ni shes rab kyi lha mo'o/ /gsum 'jug ma ni rnam pa gsum gyis 'jug par byed pa'o//'dod pa'i yon tan thams cad dang ldan pas de la 'dod byed ma'o zhes gsungs so/ /de khyim gyi bdag mo yin pas khyim ma'o/ /gtum pa'i las byed pas na gtum byed ma'o/ /de nyid bdud 'joms par byed pas na bdud 'joms ma'o//'di dag ni 'og nas 'chad par 'gyur ro/ /srid pa gsum zhes pa ni sku gsum gyi rang bzhin te/ rtsa gsum gyi gzugs kyis so/ /yongs su gyur pas zhes pa ni sum cu rtsa gnyis po 'di dag go/ /don dam pa las ni a ba d+hU tI'i rang bzhin te/ de bas na gzung ba dang 'dzin pa spangs pa'o//yang na thams cad kyi thabs kyi dngos po'i mtshan nyid kyis brjod pa'o zhes pa ni/ rnal 'byor ma bco lnga'i gzugs kyis ni 'di dag thams cad bsgom pa'i thabs kyi mtshan nyid kyis gsungs pa'o/ /de dang de nyid bde ba chen po'i rdo rjes chos thams cad gcig tu bsdoms pas bsdoms pa'am/bde ba chen po mchog gi dbye bas bshad par bya ba ni dbye ba'i mtshan nyid do/ /A li kA li nyid thabs dang shes rab dag ste/ de dag kyang la la nA dang ra sa nA 'am/ yang na tsaN+DalI dang / gzhom du med pa dag go/ /chos la sogs pa dang ji ltar rigs par sku la sogs pa gnas rnams ni de dang de nyid du'o//sngar gsungs pa bshad pa ni/ e wa zhas bya ba la sogs pa ste/ go rims ji lta bar sprul pa la sogs pa'o/ /de nyid gsungs pa'i 'khor lo zhes pa ni 'og ma dang yang sbyar te/ bya rog gi mig bzhin no/ / rnam pa sna tshogs zhes bya ba la sogs pa la de'i bshad par 'gyur ba ni rnam pa sna tshogs pa zhes bya ba la sogs pa'o/ /thugs rdo rje de nyid sdug bsngal la sogs pa'i tshul gyis shes par bya'o/ /de nyid de kho na nyid bzhi'i tshul gyis te/ de la bdag nyid kyi de'i rang bzhin ni de kho na nyid do//de nyid lha'i gzugs longs spyod rdzogs pa'i bdag nyid sgyu ma'i rang bzhin gyis de kho na nyid do/ /de nyid shes par byed pa dang skyob par byed pa nyid kyi rang bzhin gyis ye shes kyi de kho na nyid do/ /de nyid shin tu gnyis su med pa'i bde ba chen po rang rig pa'i tshul gyis de kho na nyid do/ /de nyid chung ngu dang /'bring dang / chen po dang chen po'i yang chen po'i dbye bas dga' ba la sogs pa'i rang bzhin no/ /de nyid gnas brtan la sogs pa nye bar mtshon pa'i gnas 'og nas 'chad par 'gyur ro/ /zla ba dang nyi ma dag ni sna'i bug pa g.yas pa dang g.yon pa dag gi rlung ngo / /de nyid A li dang kA li dag ste gnyis ka nas thun phyed phyed kyis nyin mtshan du spyod pas 'pho ba bcu drug go//de nyid 'pho ba'i dus dag tu/ /bzhi cha yis ni me dang rlung / /de bzhin dbang chen chu dag gi /dkyil 'khor las ni kun du spyod/ /de nyid steng 'og dbus 'og rgyu/ /dbyu gu drug cu rtsa bzhi yin//bzang ngan las ni de yi phyed/ /chu tshod sum cu rtsa gnyis thun/ /bzhir ni nyin dang mtshan du yang / /de bas thun gyi rnam dag pas/ /chos kyi 'khor lo 'pho ba ni/ /longs spyod dbyu gu sprul pa yin/ /chu tshod rnam dag chen po'o/ /zhes so/ /gtum mo'i srid pa'i nyon mongs pa rtsad nas med pa byed pa nyid do//'bar ba zhes bya ba ni mched par byed pa ste/ snang bar byed pa zhes bya ba'i bar du'o/ /A li zhes pa ni ri mo'o/ /lte ba ni bde ba chen po'i pad+ma'i lte ba la'o/ /bsregs zhes pa ni ngo bo nyid med par byed pa'o/ /de bzhin gshegs pa lnga zhes pa ni phung po lnga'o//spyan la sogs pa zhes pa ni sa la sogs pa 'byung ba rnams so/ /gang gi tshe bsregs she na/ bdag bsregs te bdag tu 'dzin pa bsregs pa de'i tshe na'o/ /rdo rje ni rdo rje sems dpa' ste de'i rigs ni gnas so/ /de rtogs par byed pa'i le'u ste dang po'o// //de nyid sngags kyi gzugs kyis sna tshogs pa'i don byed par nus so zhes bstan pa'i phyir gsungs pa sngags rnams kyi le'u ste tshogs bshad par bya'o/ /bsod nams dang ye shes kyi tshogs rdzogs par byed pa'i phyir gtor ma'i sngags gsungs pa oM zhes pa ste/a kA ro mu khaM ni dang po'i sgo'o/ /sa rba d+ha rmA NAM ni chos thams cad do/ /gang las she na/ de dang po nyid nas skye ba med pa nyid do/ /chos thams cad skye ba med par byed pa ni a'o/ /de'i phyir chos thams cad skye ba med pa bde ba chen po'i rdo rjer lhag par mos te/ a las rten cing 'brel bar 'byung ba rmi lam dang /sgyu ma lta bu'i sems can thams cad tshim par bya ba'i phyir gtor ma sbyin par bya'o zhes bya ba'i don to/ /oM AHhUM zhes pa ni lus dang ngag dang yid de nyid kyis byin gyis brlab pa'o/ /gdug pa can bdud la sogs pa zlog par byed pas phaT do/ / swA hA ni lus dang ngag dang yid de kho na nyid du sems zhi bar byed pa'o/ /rigs mtha' yas kyang rigs thams cad sdud par byed pa nyid kyis de bzhin gshegs pa thams cad ni rnam par snang mdzad la sogs pa'i sa bon te/ de dag nyid yang dag par ston par byed pa dang skyed pa'i gnas kyi sngags so//rgyud la gtso bo nyid yin pas re zhig lha de nyid kyi sngags dang por brjod par bya'o/ /de gsungs pa oM de ba pi tsu badzra zhes pa'o/ /kye'i rdo rje phreng ba'i sngags ma gtogs pa nges pa dang ldan pas thams cad ces bya ba gsungs te/ sngags kyi tshig rnams phun sum tshogs pa thams cad dang de dang ldan pa'i de bskyed pa'i gnas yin pas tshig go//dang por oM gang yin pa de dag ni oM la sogs pa'o/ /phaT dang spel zhes pa ni bar du gzhug pa'o/ /gang dag swA hA mthar yin pa de dag ni swA hA mthar ro/ /oM la sogs pa yang yin la swA hA mthar yang yin pa dang phaT dang spel ba gang yin pa de la de skad ces bya'o//sngags gang zhe na/ hUM gsum mo/ /gang las she na sngags brjod pa las mang po'i tshig nye bar blangs pa dang / he ru ka yang mi bskyod pa nyid dang / gang sku gsung thugs su gcig pas bod pa'o/ /grong khyer ni skye bo'i gnas te 'khrug par byed pa ni sngags gang gis grong khyer dkrug par byed pa de ni grong khyer dkrug pa'i sngags so//sprul pa'i 'khor lor phyogs brgyad kyi 'dab ma la sde tshan brgyad kyi dang po'i yi ge rnams shes rab gtso bor byas te spros nas de nyid kyis sna tshogs dbang du byas te bde ba chen po'i sbyor bas bsdus te sngags mdog dmar pos bzlas na grong khyer 'khrug par byed do//rnal 'byor ma rnams zhes bya ba ni shes rab dang thabs gnyis su med pa'i rnal 'byor ma rnams te bdag med ma la sogs pa'o/ /sa bon ni sngags te de kho na nyid skul bar byed pa'i tshig ste/ go rims ji lta bas dbyangs yig bco lnga'o//trai lo kyA k+She pa zhes pa ni trai lo kyA ni khams gsum mo/ /k+She pa ni gnyis su med pa'i bde ba chen po'i rang bzhin du sdud par byed pa ste gnyis su med pa'i bde ba chen po'i rang bzhin du sdud par byed pa ni trai lo kyA k+She pa zhes bcom ldan 'das la yang dag par bod pa'o//dz+wa la dz+wa la zhes pa ni dngos po thams cad la bde ba chen po de bzhin nyid kyi rang bzhin 'bar bar gyis shig pa'o/ /b+h+yo zhes pa ni kye bcom ldan 'das zhes pa'i don to/ /ki Ti ki Ti zhes pa ni chos thams cad dang bdud choms shig choms shig ces bya ba'i don to/ /badzra zhes pa ni kye'i rdo rje zhes pa'o//sku dang gsung dang thugs byin gyis rlob par byed pa zhes pa ni sku dang gsung dang thugs rdo rjer byin gyis rlob par byed pa gnyis su med pa'i bde ba chen po de thob par byed pa ste/ sngags gang yin pa de la de skad ces bya'o/ /'di dag brjod pa'i 'og tu rdo rje gsum dbyer med par bsgom par bya'o zhes bya ba'i don to//sa spyod pa'i sngags zhes pa ni dkyil 'khor gyi sa dang rnal 'byor gyi sa'o/ /sbyong ba ni stong pa nyid du byas nas rdo rje rkang pas bsrung bar sbyor ba ste/ de srung bar byed pa'i sngags zhes bya ba'i don to/ /rengs par zhes bya ba la sogs pa la rengs pa la sogs pa'i phyir sngags zhes bya ba'i don to//de la rnal 'byor pa rdo rje ma'i sbyor ba dang ldan pas oM hUM swA hA zhes bya ba'i sngags sngar bsnyen pa mang du bzlas pa dang ldan pas drang por mi g.yo bar bltas te rlung zhi ba dang ldan pas 'jag ma la sogs pa g.yo ba'i rtsa la bslabs te brten par gyur na bsgrub bya de bzhin du rengs par bya'o//gau rI'i rnal 'byor dang ku ru ku l+le'i rnal 'byor gyis oM aM swA hA zhes sngags bzlas te/ g.yon phyogs su lta ba'i lta stangs dang / rlung bzung bas pad+ma'i me tog la sogs pa la bslab par bya ste/ de bzhin du bsgrub bya dbang du bya'o//de ltar gzhan du yang ji ltar rigs pa'i sbyor bas sbyar ba'i rjes su 'brangs te sbyar bar bya'o/ /sngags bzlas de bzhin sbyin sreg dang / /de nyid bsgom dang mchod pa dang / /snying rjes sngags ni 'grub 'gyur te/ /gzhan du mchog tu nyon mongs 'gyur/ /zhes so//AHphu zhes pa ni sngags 'di bzlas te tsan+dan las mtha' yas kyi gzugs byas te lte ba yan chad skyes pa'i gzugs dang / man chad klu'i mjug mar byas te lag pa bzhi pa/ lag pa g.yon par bdud rtsi'i thod pa dang pad+ma thogs pa/ g.yas pas bdud rtsi'i 'bras bu dang rin po che thogs pa/steng du gdengs ka bdun gyis brgyan pa byas te 'o ma dang / zho dang / mar dang / sbrang rtsi dang / sha ka ra zhes bya ba bdud rtsi lngas bkru bar bya'o/ /de nas ut+pal sngon pos mchod par bya'o/ /bu mo nag mos bkal ba zhes pa ni/ rams su bcos pa'i skud pas phyogs brgyad du lan brgyad du dkri bar bya'o//shin tu zhes bya ba ni sngags kyi sgra gsal bas so/ /khros pa'i sems kyis zhes pa ni zhe sdang chen po'i sems kyis so/ /dgon pa'i gnas su zhes pa ni ji ltar skye bo rnams kyis sngags bzlas pa'i sgra mi thos pa'o/ /a rdza ka zhes pa ni sdong bu dkar po ste de'i snye ma ji lta bar zhes pa de la nyi mas reg pas skad cig gis rnam pa du mar 'gas par 'gyur ba de bzhin du klu rnams kyi mgo bo 'gas so//char chen sprin dral ba'i cho ga gsungs pa sprin rnams zhes pa'o/ /rdo rje gri gug gi bsgrub pa gsungs pa ni rdo rgyus kyi sgrub pa ste rnam par snang mdzad la sogs pa bdud rtsi lnga dang rdo rgyus btags te/sta res gcod par byed pa dang lhan cig tu mig tsam gyi ri lu byas te he ru ka'i khar bcug ste sngags bzlas nas ji srid du sku gzugs rang gi kha nas rang rang byung ste sgrub pa po la ma gtad pa de srid du stan gcig la 'bum bzlas pas grub par 'gyur te/rdo rgyus des ril ba spyi blugs kyi mgrin pa la ri mo bris na bsgrub bya 'khor dang bcas pa'i mgrin pa la de nyid snang bar 'gyur te/ 'di ni 'phral du yid ches par byed pa'o/ /'di lta bus kyang dkon mchog gsum la sogs pa la gnod pa byed pa las mi ldog na bcag par bya'o//rdo rje gri gug ces pa rdo rje'i gri gug lta bu ni rdo rje gri gug ste/ dper na rdo rje las byas pa'i gri gug ni gang du btab pa de nges par gcod par byed do/ /de bzhin du 'di yang dgra'i mgo bo gcod par byed do/ /rdo rje'i sta res bsgrub pa gsungs pa/ lha zhes pa ni skar ma rgyal gyi tshes bco lnga la tshangs pa'i sa bon ni pa la sha'i sa bon te/de blangs la ste res gcod par byed pa dang lhan cig tu cha bsnyams la mi bskyod pas sbrus te/ de las dgra sta bya ste nyi ma gzas bzung ba'i dus su de rkang pa'i 'og tu mnan nas sngags bzlas so/ /sngon du bye ba bzas te nyi ma gzas bzung ba'i nyin mtshan du bsgrubs nas de bdar la thig le sta re lta bu bya ste/de nas lha gang la phyag byas te 'gas par 'gyur ro/ /'bras phub kyi me zhes pa ni a rka'i lo ma sa la sor brgyad brkos te de gzhug par bya/ de'i steng du 'bras phub kyi me bus te khri phrag gcig bzlas pas de'i tshe bsgrub bya de rims kyis thebs par 'gyur ro//slar phyung ste 'o mas bkrus na rims las grol bar 'gyur ro/ /chang skyug par 'dod pas zhes pa ni sngon du lto bar chang sngags las bsgrubs te chang skyugs par byed par 'dod pas so/ /bsgrub bya'i lte bar yaM yongs su gyur pa las rlung gi dkyil 'khor bsgom par bya'o//de'i steng du maM yongs su gyur pa las chang lto bar bsgom par bya'o/ /bsgrub bya yang skra grol zhing chang skyugs par bsgoms te sngags brgya rtsa brgyad bzlas so/ /oM he badzra ma d+ya mud gi ri ya hUM hUM hUM phaT swA hA/de'i 'og tu chang skyugs par 'gyur ro/ /sngon du ku ru ku l+le'i sngags bsgrubs pa'i rnal 'byor ba'i dbang du byas te dgug pa gsungs pa ni bud med ces pa'o/ /zla ba dang nyi ma dag rnam par gzung ba'i cho ga gsungs pa/ zla ba dang nyi ma zhes pa ste/ sngon du bsnyen pa bye ba bdun bzlas te sngags bsgrub par bya'o//sA lu btags pa'i zla ba dang nyi ma byas te rlangs pa la bcos nas sor bzhi pa'i rdo rje'i chu blugs pa'i kham por du bcug la sngags bzlas par bya'o/ /nyi ma'i phyogs kyi sngags 'di'o/ /zla ba'i phyogs kyi sngags ni oM badzra tsan+d+ra ma tsa la ma tsa la tiSh+Tha tiSh+Tha he ba dzrA ya hUM hUM hUM phaT swA hA/khri bzlas pas 'dug par 'gyur ro/ /dri chu las phyung bas ni grol bar 'gyur ro/ /rdo rje skar ma gsungs pa/ oM na gra zhes pa sngon du 'bum bzlas te pad+ma dmar po'i sbyin sreg byas nas sngags bsgrub par bya'o/ /oM na grA na grA ku mA rI ke Di bya lo tsa ne swA hA zhes bya ba 'dis tshes bcu gsum mam bdun gyi mtshan mo'i thun mtshams su bu mo'i lus dang mig gnyis la brgya rtsa brgyad mngon pa bsngags te mchod nas snyan gsan dbab par bya'o//da ni sngar gsungs pa'i rengs pa la sogs pa'i sbyor ba'i lha gsungs pa/rdo rje ma zhes bya ba la sogs pa'o/ /le'u gnyis pa'i bshad pa'o// //sngags dang dbyibs dang chos bdag nyid/ /sbyor ba rnam pa gsum du 'dod/ /ces bya ba'i rigs pa 'dis chos dang sngags kyi bdag nyid kyi sbyor ba brjod nas/ dbyibs kyi bdag nyid kyi sbyor ba gsungs pa/lha'i le'u zhes bya ba chos thams cad kyi rang bzhin bde ba chen po'i tshul gyis rol pas lha ste lha nyid lha'o/ /de nyid rtogs par byed cing gtan la 'bebs pa'i gzhung ni le'u'o/ /byams pa la sogs pa rnal 'byor pa'i byang chub kyi sems bskyed pa ni rang dang gzhan gyi don sgrub par byed pas 'jug par bya'o zhes pa ni dang po tshad med pa bsgom pa gsungs pa/dang por byams pa bsgom par bya/ /zhes pa ste/ sems can thams cad la tshad med pa'i phan pa dang bde ba nye bar sdud par byed pa'i byams pa bsgom par bya'o/ /de nas de rnams sdug bsngal dang de'i rgyu las bsgral ba'i bsam pa'i ngo bo nyid kyis snying rje'o//ma rig pa dang bral bas dge ba'i phyogs la rab tu 'jug pa la dga' ba'i sems de ni dga' ba'o/ /srid pa zhi zhing mnyam pa nyid la 'jug pa rnams la ltos pa med pa ni btang snyoms so/ /yang na dga' ba dang bde ba nyer bar sdud pa'i rang bzhin mnyam pa nyid byams pa'o//ka ni bde ba chen po'o/ /ru ni sdud par byed pa ste/ snying rje ni gnyis su med pa'i bde ba chen po la brtson pa'o/ /de nyid la mchog tu lhan cig skyes pa rjes su myong bar dga' ba ni dga' ba'o/ /de nyid du nyon mongs pa rnams la rnam pa thams cad du btang snyoms su byed de dpyod pa med pa'o//de'i 'og tu stong pa'i byang chub sems zhes pa ni chos thams cad dmigs pa med cing ngo bo nyid dang bral ba ni stong pa nyid do/ /de nyid byang chub ste chos thams cad kyi don dam pa rtogs pa ste/ shes rab kyi pha rol tu phyin pa lhan cig skyes pa'i gnas skabs so//de nyid mtshan ma med pa la sogs pa yang bsdus so/ /stong pa nyid 'di la gang du ci yang rgyu dang 'bras bu yod pa ma yin te/ de ltar na chos thams cad rgyu dang 'bras bu med pa'i rang bzhin pas smon lam gang gis gang du yang yod pa ma yin no//yan lag bzhi gsungs pa/ gnyis pa la ni sa bon bsdu/ /zhes pa ni sa bon ni bskyed pa'i rgyu'o/ /bsdu ba ni nye bar bskyed pas bsdus pa ste/ hUM la sogs pa las bskyed ces pa'i don to/ /yang na sa bon gyis bsdus pa ni mngon par byang chub pa bzhi'o//de nas gzugs rdzogs pa dang de'i 'og tu yi ge dgod do/ /stong pa nyid bsgom pa'i 'og tu raM las zhes pa ni raM las nyi ma bsgoms la nyi ma de la hUM la sa byung ba'i de bzhin gshegs pa lnga'i rang bzhin kha dog sna tshogs pa'i rdo rje ni sna tshogs rdo rje'o/ /ra bzhes pa ni 'jig rten gyi khams la sogs pa'i tshad kyis sa'i 'og dang steng du tshangs pa'i gnas la thug par rdo rje 'bar ba'i rang bzhin zur bzhi pa sna tshogs rdo rje 'phros par bsgom mo//steng du yang rdo rje'i rang bzhin gyi dra ba'o/ /yang zhes pa ni 'og tu rdo rje'i rang bzhin gyis 'bar ba dang ldan par bsgom par bya'o//de nas de'i dbus su yang dag par byung ba'i pad+ma la/ ro zhes pa chos thams cad bdag med pa'i phyag rgya'i rang bzhin no/ /de nyid kyis gsungs pa/ mkhas pas chos kyi bdag nyid can/ /zhes so/ /de steng rnal 'byor pa gnas nas/ /zhes pa ni de'i steng du gnas pa bdag nyid he ru ka nyid du rnam par bsgom par bya'o//rang gi snying gar zhes pa ni ro'i snying ga'o/ /zhe sdang bdag nyid ces pa ni zhe sdang gi rnam par dag pa'o/ /'dis ni dpa' bo gcig pa bsgom pa gsungs so/ /rnal 'byor ma brgyad kyis bskor ba mngon par byang chub pa lnga las bskyed par gsungs pa/yang na zhes pa ste byams pa la sogs pa bsgom pa'i 'og tu/ nam mkhar rje btsun dmigs nas ni/ /lha mo brgyad kyis mchod par bya/ /zhes so/ /ri dgas mtshan ma ni byang chub kyi sems so/ /nyi ma'i snod ces pa ni rin chen 'byung ldan gyis gang ba'i pad+ma'i snod do/ / chu ni mi bskyod pa'o/ /sman ni mar me lnga'o/ /rdo rje ni rnam par snang mdzad do/ /ro ni sbrang rtsi'o/ /chos thams cad sgra brnyan lta bur rtogs pas cang te'u brdung ba'o/ /g.yung mos mgul nas 'khyud de thabs dang shes rab gnyis su med pa'i sbyor bas mchod pa byed do/ /de'i 'og tu stong pa nyid kyi byang chub bo//de'i 'og tu bsrung ba'i 'khor lo'i dbus su pad+ma 'dab ma brgyad pa dur khrod brgyad kyis bskor ba/ pad+ma'i lte ba la ro bsgom par bya'o/ /de'i snying gar/ A li zla ba kA li nyi/ /zhes pa ni A li las zla ba bsgom pa dang / kA li las nyi ma'i dkyil 'khor ro/ /de'i dbus su zhes pa ni rdo rje'i dbus su ste/sa bon de nyid ces pa ni hUM ngo / /sems dpa' zhes pa ni rdo rje sems dpa' ste/ 'di ni de bzhin gshegs pas gsungs pa'o/ /gang las she na/ dam par dga' ba'i rang bzhin can/ /zhes gsungs pas so/ /rnam par spro zhes pa ni hUM de nyid las so/ / rang lus 'od ces pa ni kye'i rdo rje'i sku lta bu'i 'od zer dang / rnal 'byor ma yang ngo / /bsdu ba ni sdud par byed pa ste gzhug pa'o/ /snying gar zhes pa ni hUM la ste/ 'di ni bya ba grub pa'i ye shes so/ /de'i 'og tu rnal 'byor pa shin tu rnam par dag pa'i chos kyi dbyings kyi ngo bo zhe sdang gi bdag nyid ni kye'i rdo rjer gyur pa'o//thabs dang shes rab kyi rnam par dag pas sngon dmar du snang ba'o/ /dbugs phyung zhes bya ba la dbugs phyung ba ni gyen du dbugs phyung ba ste ro'o/ /dur khrod ces pa ni 'dir yi dags dang ro la sogs pa'i gnas so/ /yang na dur khrod ni lus te/ mgon po rol zhes pa ni rdo rje sems dpa'o/ /rnal 'byor ma ni brgyad kyis zhes pa ni gau rI la sogs pa brgyad kyis so/ /rol zhes pa ni rang gi shes rab dang lhan cig tu gnyis su med pa'i sbyor bas dgyes pa'o/ /lus ji ltar dur khrod yin snyam pa la/ dbugs phyung ba yi rigs pa'am//zhes bya ba gsungs te/ dbugs ni srog dang rtsol ba dag gi rigs pa 'dis so/ /thugs kyi rgyal po de phyag bzhi par gyur pa yin no/ /ji ltar snyam pa la bdud bzhi rnam par dag pas zhes bya ba gsungs so/ /sngar gsungs pa'i kha dog dang rang bzhin te/ nag po ni mi bskyod pa'o zhes bya ba'i don to//yang na kha dog dang dbyibs dang skra dmar ser gyen du brdzes pa dang / go cha dang phyag rgya lngas brgyan pa rol bzhugs pa dur khrod la sogs pas bskor ba bcom ldan 'das ma rdo rje lcags sgrog ma dang lhan cig gnyis su med par lhan cig skyes pa'i snyoms par 'jug pas zhugs pa/khams gsum gyi bdag nyid can gyi ro zhes pa ni khams gsum ma lus pa bdag med pa'i rang bzhin gyi ro mnan pa'i bcom ldan 'das yum dang bcas pa'o/ /lha'i le'u bshad pa ste gsum pa'o// //lha dbang bskur ba'i le'u bshad par bya'o zhes pa'i lha ni sngar gsungs pa dang 'chad par 'gyur ba'o//ye shes kyi 'khor lo sngon du bcug ste dbang bskur ba ni ye shes kyi chus nyon mongs pa'i dri ma thams cad 'khru bar byed pas dbang bskur ba'am/ yang na lhas dbang bskur ba ni lhas dbang bskur ba'o/ /rang gi snying gar sa bon zhes pa ni kye'i rdo rje'i snying ga'i nyi ma la rang gi sa bon ni hUM ngo //lha mo brgyad kyis zhes pa ni gau rI la sogs pa'o/ /rang gi sa bon las yang dag par spros te mchod la rjes su blang ba zhes pa ni gsol ba gdab pa'o/ /rdo rje'i glus kyang zhes pa ni ko l+la i re T+Thi a bo la zhes bya ba la sogs pa'o//rang gi rigs kyi bdag po mi bskyod pa'o/ /lha'i lus kyis gnas par bya'o zhes pa ni sgyu ma lta bu gnyis su med pa bde ba chen po'i rang bzhin gyi bdag nyid kyis chos thams cad lhag par mos te thams cad du gnas par bya'o/ /lha dbang bskur ba'i le'u bshad pa ste bzhi pa'o// //da ni sngags dang lha dag gi de kho na nyid kyi le'u bshad par bya'o/ /de bas na de'i thabs kyis chos thams cad kyi de kho na nyid gsungs pa/ gzugs med ces pa ni gzugs kyi skye mched do/ /lta ba po zhes pa ni mig gi skye mched dang / bdag dang gang zag la sogs pa'i rang bzhin no//ji ltar med snyam pa la gsungs pa/ ngo bo nyid kyis gzugs la sogs pa rang bzhin med de/ ngo bo nyid ces bya ba'i don to/ /reg pa med ces pa dang / reg bya yod pa ma yin zhes pa ni sa la sogs pa'am/ gzugs kyi phung po'am skye mched bcu dgag par mdzad pa'o//phung po bzhi ni yid dam chos kyi skye mched ngo bo nyid med par ston par byed do/ /sems med ces bya ba la sogs pa la sogs pa la sems ni rnam par shes pa'i phung po'am yid do/ /sems las byung ba ni tshor ba dang / 'du shes dang / 'du byed kyi phung po'am yid kyi dmigs pa'i yul gyi chos so//yang med ces pa ni nges par med pa ste/ gzod ma nas chos 'di dag skye ba med par dgag pa ni dngos por mngon par zhen pa dgag pa'i phyir ro/ /dngos po med ces pa ni yul dang dus nges pa nyid la dngos po med pa'o/ / rnam pa thams cad kyi thams cad du dngos po med pa la ni de bzhin du dgag pa'i sbyor ba med pa'o/ /'o na de lta na de kho na nyid bsgom pa ji ltar gang du nye bar brtag par bya snyam pa la/ ma dang zhes bya ba la sogs pa gsungs te/ mchod par bya zhes pa ni dga' ba la sogs pa'i sgang cig bskyed par bya'o//sbyor ba rig pas zhes pa ni thabs dang shes rab gnyis su med pa'i sbyor ba shes pas so/ /rtag tu zhes pa ni skad cig kyang gzhan du sems ma yengs pas so/ /ma 'ba' zhig ma yin gyi gzhan la yang mchod par bya ba ni gar mkhan ma zhes bya ba la sogs pa gsungs te/gar mkhan ma zhes pa la sogs pa bsdus pa 'di'i bshad pa ni le'u 'di nyid las bcom ldan 'das rang gis mdzad par 'gyur ro/ /'byed pa ni gnyis su'am shes par 'gyur ba'o/ /'o na de kho na nyid la chags pa 'dis ci zhig bya snyam pa la phyag rgya lnga zhes pa ste/de gsungs pas phyag rgya rigs lnga rnams so/ /de las cir 'gyur snyam pa la thar pa'i rgyur zhes bya ba gsungs te/ kun rdzob tu de bzhin gshegs pas bstan pa ni mi gnas pa'i mya ngan las 'das pa lhan cig skyes pa bde ba chen po'i go 'phang ni thar pa ste/ de'i rgyus so/ /phyag rgya 'di dag ji lta bu snyam pa la gsungs pa/rdo rje ni grags par zad do/ /yang na de bzhin gshegs pa lngas sam/ gnyis su med pa'i ye shes kyis te/ 'dis zhes gsungs pa ni phyag rgyas gdab pa ste rgyu des phyag rgyar brjod do/ /yang na 'dis zhes pa ni rigs lnga'i mtshan nyid kyi phyag rgyas gdab pa 'dis te de kho na nyid brtag pa la ste/phyag rgya ni de kho na nyid kyi phyag rgya'i rgyu nyid 'dis so/ /'o na rigs lnga nyid las ci zhig gzhan yod pa ma yin nam snyam pa la gsungs pa/ rigs ni rnam pa lngar zhes gsungs te/ mchog ces pa ni rigs lnga po 'di dag mchog ste thams cad bsdus pa nyid yin pas 'di dag la brten nas rigs gzhan dang gzhan rnams kyang zhes bya ba'i don to//rigs de dag ci gang gi snyam pa la gsungs pa/ rdo rje'i phyag rgya Dom+bi zhes bya ba la sogs pa'o/ /gal te rigs 'di dag gang gi snyam pa la gsungs pa/de bzhin gshegs pa rnams kyi ste rnam par snang mdzad la sogs pa sangs rgyas rnams kyi'o/ /mdor bsdus pas ni bsdus pas so/ /de bzhin gshegs pa rnams kyi don ji lta bu snyam pa la/ de bzhin nyid du zhes pa ste/ gsungs pa chos thams cad rang bzhin med pa nyid de bzhin nyid de/de bzhin gshegs pa de'i tshul gyis mi gnas par gnas pa'i sbyor bas so/ /dpal ldan zhes pa ni bsod nams dang ye shes kyi tshogs dang ldan pas so/ /de nyid kyi ye shes kyi tshogs kyis de bzhin nyid du gshegs nas slar bsod nams kyi tshogs kyi mthus slar yang 'khor bar 'ongs te mi gnas pa'i mya ngan las 'das pa zhes bya ba'i don to//mdor bsdus na ni rnam pa lnga/ /zhes pa ni rdo rje sems dpa' de bzhin gshegs pa lnga'i nang du 'dus pa'o/ /gzhan yang gsum du sdud par byed/ /ces pa ni gang las snyam pa la/sku gsung thugs kyi dbye ba yis/ /zhes bya ba gsungs te/ rdo rje sems dpa'i rang bzhin gyis dbyer med kyang / sku la sogs pa'i dbye bas rnam pa gsum/ /zhes bya ba'i don to/ /rnam pa gsum gang snyam pa la/ /rigs lnga rnams ni 'byung ba lnga/ /zhes bya ba gsungs te/phung po lnga'i rang bzhin nam/ sa dang / chu dang / me dang / rlung dang nam mkha' rnams so/ /phyag rgya'i don sngar bshad nas rigs kyi don gsungs pa/ rigs ni grangs zhes bya ba zhes pa ni dga' ba la sogs pa'i dbye bas bde ba chen po 'dis rigs zhes bya bar mngon par brjod pa'o/ / da ni sngags dang lha dag gi de kho na nyid ston par byed pa'i gzhi gding bar bya ba'i phyir ro/ /sgom pa po med pa ni byed pa po'o/ /sgom pa 'ang med ces pa ni bsgom pa'o/ /yang na sgom pa po med ces pa ni gang las gang gi phyir zhe na/ phung po lnga'i bdag nyid kyi dngos po med pa'o/ /gsungs ba rigs pa ste rgyu des sngags dang lha yang med de dngos po skye ba med ces bya ba'i don to//gal te 'on sngags dang lha med pa de'i tshe chos thams cad med pas ngal ba 'bras bu med pa yin no snyam pa la yod ces bya ba smos te/ gal te yod na yang rtag par lta bar lta ba'o snyam pa la spros pa med ces pa ste spros pa ni 'khrul pas kun du brtags pa'i gzung ba la sogs pa'o//des stong pa nyid kyis gnas pa ste/ gnas pa med pa'i sbyor bas lhan cig skyes pa'i de bzhin nyid kyi gnas su'o/ /de nyid kyis na/ nges par dngos po 'di dag kun/ /de bzhin nyid du rnam par dag /ces 'chad par 'gyur ro/ /gang dag de bzhin gshegs pa de dag gi ming ni ci/ rigs drug ni gang dag snyam pa la/ rnam par snang mdzad mi bskyod pa/ /zhes bya ba gsungs te/ rin po che ni rin chen 'byung ldan no/ /A ro l-i ka ni 'od dpag tu med pa ste/ ro l-i ka ni rtsod pa'o//de yang mchog tu dga' ba'i rang bzhin 'dod chags chen po la yod pa ma yin pas A ro l-i ka go/ /'di dag nyid kyi ming gzhan gyis rtogs par bya ba'i phyir gsungs pa/ tshangs pa khyab 'jug ces bya ba la sogs pa'o/ /ji ltar 'di dag gi ming de skad ces bya snyam pa la gsungs pa/tshangs pa mya ngan las 'das pa/ /zhes bya ba la sogs pa'o/ /mya ngan las 'das pa ni me long lta bu'i ye shes te/ de'i phyir mya ngan las 'das pa'i rang bzhin gyis sangs rgyas rnam par snang mdzad la tshangs pa zhes gsungs so/ /shin tu rnam par dag pa chos kyi dbyings de chos thams cad kyi rang bzhin yin pas khyab pa ni bzhugs pa ste/mi bskyod pa la khyab 'jug ces gsungs so/ /bya ba grub pa'i rang bzhin gyis sems can 'di dag thams cad kyi 'jig rten dang 'jig rten las 'das pa'i don gyi mtshan nyid dge ba ster bar byed pas zhi ba ste don yod grub pa'o//mnyam pa nyid kyi ye shes kyi rang bzhin gyis chos thams cad mnyam pas thams cad ni rin chen mchog go/ /so sor rtog pa'i ye shes kyi rang bzhin gyis de kho na nyid so sor rtogs pa bde ba chen po nam mkha' lta bu nyid kyis de kho na nyid ni 'od dpag tu med pa'o//dga' ba ni lhan cig skyes pa'i bde ba chen po de rtogs pa'i rang bzhin tsam gyi gnas skabs kyis rnam par sangs rgyas ni rdo rje sems dpa' ste/ rigs thams cad bsdu na de bzhin gshegs pa drug go/ /de nyid kyis rnam par sangs rgyas zhes pa ni khyad par du 'phags pa'i sangs rgyas ni rnam par sangs rgyas so//yang na shes rab nyid rigs te rigs su bya zhing brtag par bya ba 'dis rigs so/ /de nyid la mtshon par bya ba dang mtshon par byed pa med pas stong pa nyid du'o/ /sgom pa po med pa ni rnal 'byor par dmigs pa med pa'o//de bzhin du bsgom pa'ang med ces pa de ltar de'i gnas skabs kyi sngags kyi sngags med pa dang lha med pa'o/ /spros pa med pa las ni zhes pa de nyid bde ba chen po yid kyi rang bzhin nyid sngags so/ /lha yang bde ba chen po'i rol pa'i rang bzhin nyid dam/ lus las byung ba nyid lha ste de'i tshul gyis mdzes pas rnam par snang mdzad pa'o//gnyis su med pa'i ye shes nyid dbyer med pa nyid kyis mi bskyod pa'o/ /'bras bu dang bcas pa nyid kyis don yod grub pa'o/ /sangs rgyas thams cad kyi yon tan rin po che 'byung ba'i rgyu nyid kyis rin chen mchog go//spros pa med pa nyid rtsod pa'i dngos po med pas A ro l-i ka go/ /de dang de nyid thams cad nye bar sdud pa'i tshul nyid kyis sems dpa' ni rdo rje sems dpa' ste/ srid pa gsum gcig pa'i tshul can des gnas can no/ /de nyid tshangs pa la sogs pa'i sgras kyang bshad par bya snyam pa la gsungs pa/tshangs pa zhes pa'o/ /gang las snyam pa la gsungs pa/ tshangs pa mya ngan las 'das pa/ /zhes pa ste/ shin tu zhi zhing gnyis su med pa'i ye shes mya ngan las 'das pa'i rang bzhin nyid tshangs pa'o/ /chos thams cad la khyab pas ni khyab 'jug go//thams cad du zhi ba'i tshul gyis zhi ba'o/ /thams cad kyi bdag nyid dang chos thams cad kyi rang bzhin du gnas pas na thams cad do/ /bde ba'i mchog nyid kyis dmigs pa med pa'i bde ba chen po nyid kyis de kho na nyid kyang de'o/ /dga' ba ni shes rab dang thabs gnyis su med pa'i sbyor bas rtogs pa de'i phyir rtogs pa'i rang bzhin nyid rnam par sangs rgyas te khyad par gyis sangs rgyas pa'o//yang na de nyid lus las yang dag par byung ba yis/ lha nyid ces bya bar yang brjod pa yin no/ /bcom ldan 'das zhes bya bar yang gsungs te/ gang gi phyir snyam pa la/bcom pa mnga' zhes bya ba 'di gsungs te/ bcom zhes bya ba ni/ dbang phyug dang ni gzugs bzang dang / /dpal dang grags dang ye shes dang / /de nas brtson 'grus ldan gyur pas/ /de bas bcom pa zhes byar grags/ /zhes so/ /yang na nyon mongs pa la sogs pa'i bdud rnams rtsa ba nas 'don par byed pas na/shes rab nyid la bcom par gsungs so/ /bcom pa 'joms par byed par gsungs/ /nyon mongs pa yi bdud bcom pas/ /shes rab nyon mongs bcom pa yang / /de phyir shes rab 'joms par gsungs/ /shes so/ /sngar bstan pa'i ma la sogs pa sgra'i don gsungs pa/ma zhes pa ni skyed par byed pa ste/ gang gi phyir 'gro ba skyed par byed pa ni 'jig rten thams cad do/ /yang na 'gro ba zhes pa brten pa'o/ /bskyed pa zhes pa g.yo ba'o/ /yang na 'gro ba bskyed pa ni 'gro ba skyed par byed pa'i bde ba chen po ste/ 'gro ba skyed par byed pas shes rab nyid la mar gsungs so/ /de nyid sring mo ste/ gang gi phyir dga' ba la sogs pa 'byed cing ston par byed pas so/ /de nyid khrus mkhan ma ste 'dod chags kyi rang bzhin 'dod chags chen pos dag par byed pas khrus mkhan ma'o/ /de nyid sangs rgyas thams cad kyi yon tan 'dren par byed pas bu mo'o//de nyid kyang gar mkhan ma ste/ chos thams cad kyi rang bzhin du gar byed pas sam/ gnas pa med pa'i sbyor bas g.yo ba nyid kyis gar mkhan ma'o/ /rnam par rtog pa de las byung ba'i nyon mongs pa thams cad kyis reg pa'i yul ma yin pas reg tu med pa ste/de nyid kyis g.yung mor gsungs so/ /da ni 'di lta bur gyur pa'i bde ba chen po gnyis su med pa'i rang bzhin can dpal he ru ka'i rnal 'byor pa rnams kyi sku dang gsung dang thugs kyi bya ba de thams cad phyag rgya dang sngags dang ting nge 'dzin gyi rang bzhin te/de'i rang bzhin ma lus pa sna tshogs pa yin no zhes gsungs pa ni/ brjod pa yis ni bzlas par grags/ /rigs pa gzhan yang gsungs pa/ A li kA li rab brjod pas/ /zhes pa ste/ A li kA li dang bral bas brjod pa yod pa ma yin pa ma yin te/ de dag kyang so sor sngags kyi rang bzhin nyid do//de gsungs pa A li kA li dag gi sngags/ gang yang de dag las byung gang / /zhes so/ /yang gsungs pa/ gang yang nges par sngags yod min/ /'grub pa yod pas rnam par gnas/ /zhes so/ /mnan pa las byung ba des bris pa'i dkyil 'khor ste/mnan pas dkyil 'khor 'dri ba la mngon par zhen pa rnams zlog par byed do/ /lag pa bskyod pa ni rnam pa sna tshogs kyi gar byed pas 'byed pa ste/ lag pa bskyod pa'i bye brag go/ /de thams cad kyi phyag rgya ni phyag rgya yin zhes pa ste/ de lta bu'i rgyur gyur pa'i de kho na nyid gsungs so//'di ni bde ba chen po dang lha mngon sum nyid du mthong ba'i rang bzhin nyid kyis so sor snang ba'i phyag rgya mchog yin no/ /de la yid kyis gang bsams pa/ /zhes pa ni gnyis su med pa'i sbyor ba des gang bsams pa de nyid bsam gtan no//gang las snyam pa la/ gang phyir rnam bsams bsam gtan no/ /zhes pa ste/ sems par byed pas bsams pa ste/ /de kho na nyid kyi tshul du rnam par sems par byed pa ste/ de nyid bsam gtan no/ /de kho na nyid kyi rnal 'byor pa 'di'i ni gang nyid dmigs shing bsams pa de nyid gnyis su med pa'i bde ba chen po der snang bas bsam gtan du gyur pa yin no//phung po dang khams dang skye mched dag las gzhan du bsam par bya ba yod pa ma yin no/ /de yang so sor gcig gam du mas dbyer med pas thams cad rnam par dag pa ste/ gzhan du lhag ma yod pa ma yin no/ /gang dang gang du yid bsams pa/ /de nyid la sbyor shes par bya/ /gang du bskyod pa'i 'gro ba de/ /gang phyir de yi rang bzhin pas/ /zhes so/ /he ru ka gnas gnas pa yi/ /yan lag bskyod pa ji snyed dang / /brjod pa yi ni tshogs rnams kun//de snyed sngags dang phyag rgya yin/ /ji ltar pha yi bde thob pa/ /zhes pa ni pha ni bla ma ste/ de la yod pa'i man ngag gang yin pa'o/ /bde ba ni lhan cig skyes pa'i bde ba'i skad cig tsam mo/ /thob pa ni bde ba de la yun ring po'i dus su gnas pas mchog la sogs pa'i yon tan dang ldan par rnal 'byor pa rang gi phyag rgya la ltos pa med par spyod par 'gyur ro//de ji ltar snyam pa las/ gang gis 'chi ba zhes bya ba smos te/ gang gis ni bde ba chen po skyes pas rnam par rtog pa dang / de'i mthu las byung ba nyon mongs pa'i dra ba gzung ba la sogs pa bshig nas lhan cig skyes pa'i bde ba de dang de nyid rang gis spyod par 'gyur te/de nyid kyang de lta bur gyur pa'i bde ba yang dag par rtogs par byed nus te/ rang rig pa tsam de kho na nyid mthar phyin pa'i dngos po med pa'i bsam gtan zhes gsungs te/ don dam pa'i bsam gtan gyi sgrar brjod do//de bas bsam pa'i dmigs pa med de de kho na nyid kyi yul can nyid do/ /de kho na nyid kyi le'u ste lnga pa'i bshad pa'o// //de ltar de kho na nyid kyi rnal 'byor gyis drod thob pa'i rnal 'byor pa rnams kyi spyod pa gsungs pa/ de nas gzhan zhes pa ste/ de nas ni de kho na nyid kyi rnal 'byor ba'i de kho na nyid bshad pa las gzhan de dang de dag gi spyod pa bya ba'o//pha rol 'gro ba zhes pa ni spyod pa ma lus pa'i mchog tu gyur pa ste/ 'di ni shin tu spyod pa dang ldan pa gtso bor gyur pa zhes bya ba'i don to/ /gang gis grub pa'i mthar 'gro ba zhes pa ni gang gis ni 'chad par byed pa'i spyod pas so//grub pa'i mthar ni rnal 'byor ba rnams kyi spyod pa'i gzhung ngo / /'gro ba ni de don du gnyer ba rnams la de bzhin du bshad par bya'o zhes pa'o/ /ci'i phyir snyam pa la/ kye yi rdo rje dngos grub rgyus/ /zhes pa ste/ kye'i rdo rje ni dngos grub de'i mtshan ma ste/gsungs pa yongs su shes pa dang spyod pa spyad do/ /da ni de'i chos kyi rgyal srid nyid kyi dbang du byas te/ rgyal tshab kyi rgyan rnams re zhig ji snyed pa bshad par bya'o/ /sgom pa po yis zhes pa ni/ /des na gnyis su med pa'i de kho na nyid bsgom pa'i rnal 'byor ba rgyal ba'i sras kyi thu bos so//rnam gzung bya zhes pa ni khyad par du sangs rgyas lnga'i rigs kyi rna cha la sogs pa gzung bar bya'o/ /bcu phyed ces pa ni bdud rtsi lnga'o/ /he ru ka yi sbyor ba yis/ /zhes pa ni he ru ka'i rgyu la sogs pa stong pa nyid la sogs pa'i bdag nyid du sbyor ba gang yin pa de ni he ru ka'i sbyor ba ste/de'i kha dog lnga rnams la zhes pa la/ lnga ni bram ze la sogs pa dang rdo rje'i rigs la sogs pa'i mthar thug pa tha ma rnams la mnyam pa nyid kyis spyod pa dang / slong ba dang / reg pa la sogs pa'i chos byed pa'o/ /yang na sangs rgyas lnga'i bdag nyid du phung po lnga rnams la'o//de nyid la mnyam pa nyid gsungs pa/ kha dog lnga dang yang dag ldan/ /zhes so/ /kha dog lnga ni de bzhin nyid du bsdus pas kha dog gcig ni gnyis su med pa'o/ /brtag pa ni bsam pa'o/ /gang la snyam pa la/ kha dog sna tshogs pa nyid ces bya ba gsungs te/gang gi phyir ni don dam pa las so/ /dbye ba brtag mi bya zhes pa ni dmigs par mi bya'o/ /da ni spyad pa spyod du rdung ba nyid rnyed pa'i phyir rnal 'byor ba'i spyod pa'i bsam gtan gyi rjes su mthun pa'i gnas gsungs pa/ shing gcig ces bya ba la sogs pa ste/ gnod sbyin la sogs pas byin gyis brlabs pa dang ldan pas gtso bor gyur pa'i shing dang / khyab 'jug ma la sogs pa'i ma mo'i gnas dang / rnal 'byor ma'i gnas dang zhing la sogs pa'o/ /dgon pa ni bgrod par dka' ba dang / lam ring ba rnams so/ /yang na rkang pa dang lag pa la sogs pa'i yan lag dang ldan pa'i lus nyid gcig tu thun mong ma yin pa'i shing ste/bde ba chen po'i 'bras bu chen po sbyin par byed pa'o/ /de nyid dbugs phyung bas dur khrod do/ /ma mo ni rtsa la sogs pa'i rang bzhin gyi rnal 'byor ma rnams kyi khyim mam ma ni skyes par byed pas kye'i rdo rje rang gis shes rab nyid khyim ste gnas so//mtshan mo ni shes rab kyis 'dod chags la sogs pa 'gags pa nyid do/ /dben pa ni snying stobs la sogs pa'i kun du rtog pa dang bral ba'o/ /bas mtha' ni 'khor lo dag gi nang gi lam rnams so/ /dro ba cung zad rnyed nas zhes pa ni cung zad rnal 'byor gyi mthu thob pa na spyod pa bya'i gzhan du ma yin no//de nyid kyis 'chad par 'gyur ba las 'jigs pa'i gzugs kyis zhes pa'o/ /gal te 'dod ces pa ni nges pa thams cad du spyod pa bya ba med par ston par byed do/ /'on kyang tshe 'di nyid la dngos grub rtog par 'dod pa rnams la/gal te 'dod na de'i tshe spyod pa spyad do/ /ci gcig pu zhig gis sam zhe na ma yin no zhes gsungs pa/ 'dis zhes pa 'chad par byed pas so/ /de nyid gsungs pa bzhin mdzes ma bya ba la sogs pa gsungs pa'o/ /mi yi bu mo blangs nas ni/ / de la chos ni bshad par bya/ /phyag rgya chen po zhes brjod pa/ /dngos grub de dang lhan cig 'gyur/ /zhes so/ /skal ba dang ldan pa'i lha'i rigs te yi dam gyi lha'i rigs so/ /ku ru ku l+le la sogs pa'i rnal 'byor pa'i bsam pa gsungs pa/ byang chub sa bon rab btang nas/ /zhes pa ni byang chub tu sems bskyed pa'i rim pa dang /gsang ba'i dbang bskur ba la sogs pa'i rim pas zhes bya ba'i don to/ /de'i tshe rdo rje ldan pas mchog /ces pa ni rdo rje'i tshig dang ldan pa nyid kyis glu blang bar bya ste/ grong gi glus bya ba yang ma yin no/ /glu yang blang ste shes rab dang //rnal 'byor ma ni des mnyes so/ /rnam pa de bzhin gzhan du yang / /rnal 'byor rig pas de ltar bya/ /zhes so/ /de nyid kyi rnam par dag pa gsungs pa/ kye yi rdo rje'i nga rgyal gyis/ /sngags kyi dag pa glu yin te/ /gar ni bsgom pa'i rang bzhin yin/ /lag pa rkang pa spyod pa dag /de nyid kyis gsungs pa/ rdo rje rkang pa yis zhes pa dang / rnal 'byor zhe sdang rnam dag pa/ /zhes pa'o/ /thams cad du dam tshig thob par bya ba gsungs pa/ sman yang bza' bar bya ba dang / /zhes pa ni rnam par snang mdzad do/ /chu zhes pa ni rdo rje'i chu'o/ / rkun ma'i skra zhes pa ni mtshon gyis phug pa dang 'gegs nas bsad pa'i rkun ma'i skras cod pan bya'o/ /de nyid las yang hUM byung zhes pa ni rus pa'i rgyan byas pa'am/ kye'i rdo rje dang sbyar bar bya/ /zhes pa ni bsgom pas sbyar bar bya'o/ /skra yi skud pa nyis skor gyis/ /zhes pa ni rkun ma'i skra'i ska rags nyis skor bcing bar bya'o//nyis skor gyi rnam par dag pa gsungs pa/ shes rab thabs kyi rang bzhin gyis/ /zhes pa'o/ /thal ba zhes pa ni yan lag thams cad la'o/ /skra'i dag byed ces pa ni rkun ma'i skra'i mchod phyir thogs pas spras pa'o/ /rdo rje thod pa ni kye'i rdo rje ste de'i spyod pas so//ngo tsha ba ni 'dzem pa'o/ /bya ba ni las so/ /bdag nyid kyang zhes pa ni bdag tu lta ba rtsa nas dbyung ba'o/ /lus ni sbyin pa gtang bar bya/ /zhes pa ni thams cad du rdo rje rnal 'byor ma la sogs pa dang / sems can thams cad kyi phyir ro/ /skal dang skal min rnam dpyad na//zhes pa ni gcig dang du ma'i sbyor ba dang ldan pas sbyin pa dang sbyin par byed pa la sogs pa mi dmigs pa'o/ /gang gi phyir don dam pa la sbyin par mi bya ba de'i phyir rnal 'byor pas mi sbyin te lus mi sbyin zhes bya ba'i don to/ /dngos grub thob pas kyang //zhes bya ba ni rnal 'byor pa rnams kyis nges par bla ma la phyag bya ste/ gzhan du dngos grub thams cad las nyams te dmyal ba nyid du ltung ngo zhes bstan pa'i phyir gsungs pa ni dngos grub thob pas kyang zhes pa ste/ mnar med spang ba'i rgyu yis zhes so/ /mnar med pa ni dmyal ba chen po ste/de spang ba'i phyir zhes bya ba'i don to/ /lus la sogs pa'i bya ba nges par ni bslab pa'o/ /dkyil 'khor du 'jug pa la sogs pa ni dbang ngo / /ngo tsha ba ni rang gi rigs kyi rjes su mthun pa'i bya ba mi spyod pa dang khrel yod pa'o/ /dngos po thams cad ngo bo yis//zhes pa ni dngos po thams cad ni phung po lnga'o/ /de rnams kyi ngo bo ni bla na med pa de bzhin nyid de'i tshul gyis ni stong pa nyid do/ /snying rje gsungs pa/ snying rje chen po zhes pa ste/ /de bas na stong pa nyid dang snying rje dbyer med pa'i skus gnas zhes bya ba'i don to/ /de la 'jigs par mi bya zhes pa ni 'jigs pa'i rgyu mthong ba na rang gnyis su med par dmigs pas sems zhum par mi bya'o//de nyid kyis seng ge'i gzugs kyis zhes pa ni seng ge'i spyod pas so/ /rnam pa thams cad du de'i rang bzhin gyis 'jigs pa med par spyod pa'o/ /snying rje ni bde ba chen po'o/ /btung ba ni gnyis su med pa'i a ba d+hU tI bzhos nas so//rnal 'byor btung ba zhes pa ni rnal 'byor pas btung ba de la dga' bar byed pa'o/ /de la dga' ba bskyed pa dang ldan pas btung ba gzhan gyi rol chags shing dga' bar mi bya'o/ /spyod pa'i le'u bshad pa ste drug pa'o// //da ni spyod pa'i rnal 'byor pa gzhan nam rang gi dam tshig la gnas pa'i rdo rje rnal 'byor ma la sogs pa mthong ba na skal ba med pa yongs su shes par bya bas yongs su shes par byed pa'i rgyu dam tshig gi phyag rgya bstan par bya ba'i phyir gsungs pa/de nas brda'i le'u zhes pa ste/ skal ba med pa yongs su shes par bya ba'i phyag rgya ni brda ste/de gsal bar byed pa'i nges pa'i tshig ni brda'i le'u'o/ /de ci'i phyir bya snyam pa la/ gang gi rnam par shes tsam gyis/ /zhes pas so/ /spun ni rdo rje spun no/ /sring mo ni rang gi dam tshig la gnas pa'i rdo rje'i sring mo'o/ /the tshom med pa ni som nyi med pa'o//sor mo gcig ni legs par 'ongs sam zhes pa'i don to/ /bstan par bya zhes pa ni steng du bya ba'o/ /srin lag bstan par bya zhes pa ni rang gi dam tshig gis blta bar bya ba'am sor mo gzhan gyis so/ /pa ti sa zhes pa ni sor mo dbu ma gnyis dpral bar 'phred la 'jog pa'o/ / rtse gsum zhes pa ni sor mo dbu ma gsum brkyang ba'o/ /mtshams kyi mtha' ni dpral ba'i dbus kyi steng gi gnas so/ /khro gnyer ni dpral ba'i gnyer ma bsdus pa'o/ /gtsug phud dgrol bar bya zhes pa ni gtsug phud dgrol ba'o/ /bya zhes pa ni slar la rnal 'byor pa rnams kyis smra bar bya ba'o//rgyab ces bya ba ni rgyab phyir bsgyur ba'o/ /pho long zhes pa ni btsun mo dang rtse ba'i rgyus pags pa la sogs pa'i ri lu gyen du 'phen par ston ces bya ba'i don to/ /phyag rgya dang por bstan pa dang / gnyis pa phyag rgya'i lan gyi dbye bas dam tshig shes par bya ba ni gsal bar bya ba'o//smra bar byed ces pa ni rang gi dam tshig la gnas pa mthong na smra zhing bdag nyid gsal bar byed pa'o/ /'di ltar mthong ba dang gal te phreng ba ston pa ni lag pa ston par byed pa'o/ /'du bar byed ba ni bdag cag dang 'khor lo 'dir zer ba'o/ /de la phyag rgya'i lan me tog gi phreng ba bor ba ni de lta bur ston pa'o//dam tshig la gnas par gyis zhes pa ni smras pa bzhin byed pa'o/ /rang gi dam tshig la ji ltar gnas par bya ba ni bdag ni bka' blo bde bar der 'gro bar bya'o/ /phyi rol zhes pa ni dur khrod la sogs par ro/ /'du bar zhes pa ni 'khor lor ro/ /bzang po'i spyod yul ni zhing dang gnas la sogs pa gnas bzang por ro//de'i tshe gnas pa ni der 'dus pa ste/ rnal 'byor pa dang rnal 'byor ma 'dus pa'o/ /'dus pa can gyi gnas la sogs pa gzhan gsungs pa/ gnas dang nye ba'i gnas zhes bya ba la sogs pa'o/ /'di dag sa ni bcu gnyis rnams//zhes pa ni gnas la sogs pa'o/ /'di dag ni 'dir bdag po sangs rgyas dang byang chub sems dpa' rnams te/ rab tu dga' ba la sogs pa las gzhan ma yin no/ /sa bcu'i dbang phyug ni byang chub sems dpa'o/ /mgon po ni sangs rgyas so//gnas la sogs pa'i gnas gsungs pa/ gnas ni dzA la n+d+ha rar gsungs/ /zhes bya ba la sogs pa'o/ /gnas 'di rnams kyang sum cu rtsa gnyis te/ mgo bo dang spyi gtsug la sogs pa'o/ /mi phyed ma la sogs pa rnal 'byor ma rnams te/ de bsdus shing nye bar bsdus pas 'dus pa ni sa bcu gnyis rnams su'o//rnal 'byor ma rnams gnas su 'du ba'i gnas kyi nyi ma gsungs pa/ yi dags zla phyed ces gsungs pa ni nag po'i phyogs so/ /rgyal mtshan ni 'phyang ba'o/ /mtshon gyis gsad pa ni 'thabs nas shi ba'o/ /lan bdun pa ni skyed bdun pa ste/kha na ma tho ba med par gyur pas gsad pa'i cho gas gsad de/ de ci'i phyir mi bza' snyam pa la/ snying rje bskyed par bya zhes gsungs te/ gsang ba'i cho ga 'di bza' ba'i don du ma yin te/ 'on kyang ngan 'gro'i sems can snying rjes bsgral ba'i phyir ro/ / yang na dngos po thams cad 'dus pa der gsad par bya'o/ /'o na ni stong pa nyid 'ba' zhig gis nyan thos kyi byang chub lta bur 'gyur ro snyam pa la gsungs pa/ snying rje bskyed par bya zhes pa ste/ snying rjes smon lam gdab par byas na bde ba chen po dang ldan pa'i stong pa nyid kyi skyon du mi 'gyur zhes pa'i don to//snying rje med na mi 'grub ste/ /zhes pa ni phyag rgya chen po'i dngos grub mi 'thob bo/ /de bas na dang por snying rje bskyed par bya'o/ /'o na gal te bza' ba'i phyir gsad pa'i cho ga ma yin na de'i tshe ci'i phyir snyam pa la/ gdug pa gzhug pa zhes gsungs te/ gdug pa can rnams bstan pa la ste/ 'jug pa ni rab tu 'jug par byed pa ste de'i don du'o/ /cho ga ni kha sbyor 'byed pa'i cho gas te/ gtso bo ni gtsor 'jug pa de'i don gyi cho ga nyid kyis so/ /sngar 'dus pa'i don du nyi ma gsungs pa/ de yang nyin mtshan no/ /de dag gi rnam par dag pa gsungs pa/de la'ang 'di ltar rtogs par bya/ /zhes so/ /mi bya med ces pa ni 'jig rten na smad pa snying rje dang mi 'gal bas sdig pa med par dge ba'i sems kyis so/ /ji ltar bdag nyid ces pa ni stong pa nyid dang snying rjes so/ /de bzhin du sems can blta bar bya'o/ /bdag nyid kyang ji ltar blta bar bya snyam pa la gsungs pa/de bzhin bdag nyid bdag dang gzhan/ /zhes pa ste/ bdag nyid kyang de bzhin du bya ste/ bdag nyid ji lta bar gzhan du ma yin no zhes so/ /gnyis su med pa'i tshul 'dis chos rnams yang dag par bsams nas/ bza' btung la sogs brtsam par bya//zhes pa ni dbyer med pa'i blos so/ /he ru ka dpal go 'phang zhes pa ni shes par bya ba'i go 'phang ste/ dpal he ru ka'i don la gnas pa zhes bya ba'i don to/ /su zhig he ru ka'i don du gang du gnas pa'i lus ngag gi bya ba phyag rgya dang sngags kyi rang bzhin yin snyam pa la/gsungs pa/ shrI ni gnyis med ye shes te/ /zhes so/ /he ni he'o/ /de'i don ni rgyu la sogs pa stong pa nyid dang / rgyu dang 'bras bu dang / gzung ba dang 'dzin pa la sogs pa stong pa nyid 'dis ni mtshan ma med pa'o/ /ru ni tshogs dang bral ba zhes bya ba ni tshogs ni sa la sogs pa kun du gnas pa'o//de dang bral bas de la smon pas smon pa med pa ni ru zhes bya ba'i don to/ /ka ni stong pa nyid kyi don te/ gang du'ang mi gnas pa ni thams cad ci yang stong pa nyid de/ thams cad du gnas pa'i sbyor ba med ces bya ba'i don to/ /'di ni dpal he ru ka'i go 'phang ngo / /sems can gar dang gang rnams kyi//zhes pa ni 'dus pa la sogs par rgyal mtshan la sogs pa'i sha'o/ /mkhas pas zhes pa ni rnal 'byor dang rnal 'byor ma rnams kyis te/ rnal 'byor la mkhas pa ni mkhas pas so/ /sems can de dang de zhes pa ni skye ba gzhan gyi 'gro ba rnal 'byor dang rnal 'byor ma'i dbang du 'gyur ba ste/bka' nyan par 'gyur zhing sbyor ba la dga' bar 'gyur ro/ /ci 'di nyid ltar bza' 'am zhe na ma yin te/ rdo rje thod pa'i rnal 'byor pas zhes gsungs te/ sngar gsungs pa'i dpal he ru ka'i sbyor bas so/ /yang na rdo rje ni de bzhin gshegs pa'i sa bon rnams te b+h+rUM la sogs pa'o//ka pA la ni a las byung ba'i pad+ma'i snod do/ /rnal 'byor bas zhes pa ni 'og tu rlung dang me'i sbyor ba sngar byas te/ 'bar ba dang khol bas rdo rje'i bdud rtsi dang gcig tu byed pa'o/ /yang na sems can gyi phung po rnam par rtog pa ni sha ste/de dang de dag gis sems can dang de dag gi phung po dbang du byed pa'i rang bzhin gyis spyod pa'o/ /brda dang gnas la sogs pa gtan la dbab pa'i le'u ste bdun pa'i bshad pa'o// //da ni rtsa'i 'khor lo bshad pa/ rnal 'byor ma bco lnga bskyed ba dang rdzogs pa'i rim pa'i dbye bas bsgom pa gsungs pa/de nas rnal 'byor ma'i 'khor lo zhes pa'o/ /rnal 'byor ma rnams ni bdag med ma la sogs pa dkyil 'khor du 'dus pa'am/ ye shes kyi tshul gyis pad+ma la 'dus pa ni rnal 'byor ma'i 'khor lo ste de bshad par bya'o/ /nam mkha'i khams la b+ha ga bsam//zhes pa ni stong pa nyid bsgoms pa'i 'og tu nam mkha'i rnam par dag pa chos kyi 'byung gnas bsam mo/ /de la/ dbus su bsgom par bya ba ni/ /ji ltar 'khor lo'i sngon du yin/ /zhes pa ni dkyil 'khor bsgom pa sngon du bya ba yin te/ lha rnams 'byung ba'i rim pas bsgom par bya'o zhes pa'i don to//ci rigs par zhes pa ni sa la sogs pa'i bsgom pa'i rim pas so/ /de nyid gsungs pa 'khor lo ni dkyil 'khor ro/ /ltung zhes pa ni sa ste sa'i dkyil 'khor zhes pa'i don to/ /chu ni sngon zhes pa ni me'i dkyil 'khor gyi sngon du chu'i dkyil 'khor bsgom par bya'o//de ltar rlung gi sngon du me dang de nas rlung chen po'o/ /dkyil 'khor 'di rnams kyang / ji ltar rigs par lha rnams te/ spyan la sogs pa'i rnam par dag pa'o/ /bsgom pa po yang de'i tshe rnal 'byor pa'o/ /ji ltar 'byung ba zhes pa ni dkyil 'khor rnams 'byung ba'i rim pas de'i bdag nyid kyis rnam par gnas pa'o//chos 'byung las byung zhes pa ni chos kyi 'byung gnas kyi dbus su 'khor lo bzhi yongs su gyur pa las byung ba'i dkyil 'khor gyi 'khor lo'o/ /nyis brtsegs ni khang pa nyis rim mo/ /lte ba yis ni gcig yin te//zhes pa ni lte bas nye bar mtshon pas pad+ma ni dbus kyi pad+ma zhes bya ba'i don to/ /zur gsum gyis ni zhes pa ni chos kyi 'byung gnas kyis mtshon pas brtsegs ma gzhan phyi rol gyis te phyi'i gau rI la sogs pa'i gnas gru bzhi'o/ /de'i dbus su zhes pa ni dkyil 'khor gyi dbus su'o//de'i steng du ro'i snying gar zla ba ste/ de'i steng gi A li yongs su gyur pa las so/ /zla ba'i steng du sa bon a la sogs pa bco lnga'o/ /phyis ni nyi mas mnan pa'o zhes pa ni/ de'i 'og tu kA li yongs su gyur pa las byung ba'i nyi ma'i dkyil 'khor gyis mnan pa'o//gnyis zhes pa ni nyi ma dang zla ba dag go/ /shes rab dang thabs dag 'dus pa ste/ 'dus pa ni bde ba chen po shes rab dang thabs kyi sbyor ba las byung ba'o/ /de nyid kyis gsungs pa A li gnas pa ni shes rab ste zla ba'i gzugs kyis so/ /kA li'i gzugs kyis ni nyi ma'o//de dag dbus su gau rI sogs/ /zhes pa ni a la sogs pa de'i sngags dang sngags kyi lha dag dbyer med pas so/ /sa bon rnams zhes pa a la sogs pa dbyangs kyi yi ge bco lnga'o/ /mtshan ma zhes pa gri gug tu mtshan ma gcig pa nyid kyis gcig gi tshig can no/ / thams cad gcig gyur zhes pa ni spro ba dang bsdu ba sngon du byas te zla ba dang / mtshan ma dang / sa bon dang nyi ma'i bdag nyid gcig tu 'dres par gyur pa'o/ /sgrub pa zhes pa ni bya ba grub pa'i ye shes so/ /gzugs zhes pa ni rnal 'byor ma rnams kyi lus so/ /rdzogs pa ni skyes pa'o/ / dag pa ni shin tu rnam par dag pa chos kyi dbyings kyi rnam par dag pa'o/ /A li kA li mnyam sbyor ba/ /zhes pa ni thabs dang shes rab kyi gzugs kyis A li dang kA lir gyur pa las/ zla ba dang nyi ma dag 'dus pa nyid do/ /rdo rje sems dpa'i gdan du'o/ /zhes pa ni bskyed pa'i rgyu'o//dbyer med pa'i sa bon ni shes rab dang thabs dbyer med pa'i rang bzhin nyid de rdo rje sems dpa'o/ /de'i/ yi ge las byung gong bu la/ /zhes pa ni mi 'gyur bas na yi ge ste/ shes rab dang thabs gnyis su med pa'i sbyor bas so/ /de las byung ba'i gong bu ni bde ba chen po'i rang bzhin no//hUM dang phaT kyang 'dod pa min/ /zhes pa ni/ hUM las byung ba'i rdo rje dang phaT kyis 'dzin par byad pa yang 'dod pa ma yin no/ /sems dpa'i gzugs zhes pa ni sems dpa' skyed par byed pa'i gzugs zla ba la sogs pa gyur pa'i byang chub kyi sems kyi gzugs gcig tu 'dus pa las dkyil 'khor bdag po zhes pa bdag med ma gtso mo ste/dkyil 'khor gyi bdag po ni dkyil 'khor gyi gtso bo dang gnyis su med pa'i tshul can nyid do/ /zhal dang phyag mtshan la sogs sras dang mthun zhes pa ni ji ltar sras 'bras bu'i rdo rje sems dpa' dang zhal dang phyag mtshan la sogs pa de bzhin te/'di'i zla ba'i nor bu lta bu ni dkar po blang lta bu'o/ /yang na zla ba ni byang chub kyi sems so/ /nor bu ni nor bus byin pas bskyed pa'i lhan cig skyes pa ni snang ba lta bu gang yin pa 'di ni zla ba nor bu'i 'od nyid do//de ltar thams cad rdzogs pa las/ ji ltar bdag med rnal 'byor ma/ /zhes pa ni mngon par byang chub pa lnga ste/ de bzhin du gau rI la sogs pa yang de nyid kyis gsungs te/ shes rab dang thabs kyi ngo bo nyid kyis so/ /shes rab dang thabs gang dag gis snyam pa la/shes rab A li zhes byang la sogs pa gsungs te/ zla ba nyi ma'i rab dbye bas/ /zhes pa ni so sor yang dag pas dbye bas so/ /de nyid las gau rI la sogs par 'gyur ro/ /yi ge'i dbye bas zhes pa ni rang rang gi dbye bas so/ /gzhan so sor zhes pa ni bdag med ma la sogs pa 'di rnams mtshan ma yang thun mong nyid do//nyis pa rtsegs zhes pa ni sngar bshad do/ /de las brtsegs ma gang du rnal 'byor ma du zhi gang zhugs snyam pa la/ nang gi brtsegs ma zhes bya ba gsungs so/ /dbang po'i zhes pa ni dbang po'i phyogs kyi 'dab ma la'o/ / 'og tu gnas pa dang ldan pa ni 'og ldan ma ste/ kha 'og tu bltas pa 'khor ba'i gzugs can dang / snying rje'i rang bzhin nyid do/ /steng du gnas pa dang ldan pa ni steng ldan ma ste mkha' spyod ma mya ngan las 'das pa'i rang bzhin dang / shin tu stong pa nyid kyi rang bzhin nyid do/ / de dag gi dbus su ni gang dag bdag med rnal 'byor ma srid pa dang zhi ba'i rang bzhin gang yin pa de ni mi gnas pa'i mya ngan las 'das pa ste/ stong pa nyid dang snying rje dbyer med pa'i sku nyid do/ /gri gug thod pa phyag na bsnams/ /zhes pa ni gri gug dang thod pa dag go/ /bsnams pa ni 'brel ba'o//lag par ni lag par te 'di rnams kyis zhes bya ba'i don to/ /de nyid kyis bshad pa/ lag pa gcig ni thod pas dra la/ /zhes pa ni/ gang dag gi lag pa gcig ni thod pas brel ba de ni lag pa gcig ni thod pas brel ba'o/ /nga rgyal la sogs skyon drug rnams//gri gug gcod par byed pas gnas/ /zhes pa ni nga rgyal dang / ma rig pa dang / the tshom dang / 'dod chags dang / khong khro ba dang lta ba ste/ rtsa ba'i nyon mongs pa drug po nga rgyal la sogs pa gnas ngan len dang bcas pa'o/ /de gcod pas 'di dag thams cad kyi phyag ni gri gug bsnams pa'o//dngos dang dngos med rnam rtog pa'i/ /mgo bo yi ni pad+ma'i snod/ /ces pa la/ dngos po dang dngos po med pa'i rnam par rtog pa rtsad nas phyung bas pad+ma'i snod de thod pa'o/ /de yang / bdud bzhi'i khrag gis bkang ba'o/ /zhes gsungs pa ni/khrag ni bdud bzhi rnams kyi'o/ /'thung ba dngos grub rgyu yin no/ /zhes pa ni/ gsungs pa'i rim pa 'dis so/ /da ni mnyam pa nyid kyi don la kha dog tu mngon par zhen pa'i skyon bsal ba'i phyir yan lag drug bsgom pa gsungs pa/ dang por zhes bya ba la sogs pa'o//dga' bral mtha' yang de bzhin no/ /zhes pa ni dga' bral gyi mtha' ni gang lhan cig skyes pa ste/ de ni dga' bral gyi mtha' lhan cig skyes pa tsam yin pas de'i phyir bsgom par bya'o zhes pa'i don to/ /yang na khyad par du 'phags pa'i dga' ba ni rnam par dga' ba'o//de'i mthar ni lhan cig skyes pa gang yin pa'am dga' bral gyi mtha'i sgra nyid kyis lhan cig skyes pa gsungs te/ lhan cig skyes pa'i dga' ba de/ /zhes bya ba ni tshig gi lhag ma'o/ /yang na de bzhin zhes pa gzhan yang snga ma bzhin du bsgom par bya'o/ /bskyed pa'i rim pa nyid kyang zhes pa ni kun rdzob kyi bden pa dang /don dam pa'i bden pa'i dbye ba gnyis kyis rim pa gnyis so/ /mkha' dbyings zhes pa nam mkha'i khams rnam par dag pa pad+ma rnams nyid mkha' dbyings so/ /de la b+ha ga zhes bya ba byang chub kyi sems so//de'i dbus su bsgom par bya ba ni thabs dang shes rab snyoms par 'jug pa'i mtshan nyid bsgom par bya'o/ /de las byung ba'i bde ba gang yin pa de 'khor lo ste lha rnams 'dus shing bsdus pa'o/ /ji ltar rigs par rang rig pa zhes pa de yang bde ba ste/ rigs pa'i stobs nyid kyis rang rig pa bdag dang gang zag la sogs pa'i dngos po med pa'o//byang chub sems ni lha yin no zhes pa ni stong pa nyid dang snying rje dbyer med pa'i mtshan nyid kyi lha bdag med pa'o/ /ji ltar rdzas ni 'byung 'gyur ba/ /zhes pa ni de las byung ba 'dor ba med pa'i mtshan nyid kyis te 'byung ba'i rim pa zhes bya ba'i don to//rnam pa de'i phyir byang chub kyi sems kun rdzob dang don dam pa'i dbye bas lhan cig skyes pa yang rnam pa gnyis so zhes gsungs pa/ de bas lhan cig skyes rnam gnyis/ /zhes pa ni lhan cig skyes pa rnam pa gnyis kyis zhes bya ba'i don to//de rtogs par bya ba'i phyir gsungs pa/ re zhig btsun mo zhes gsungs so/ /'di ltar thabs dang shes rab dag so sor rnam pa gnyis kyis dbye bas rnam pa bzhi zhes bya ba'i don to/ /de nyid kyi phyir na dga' ba yang / dbye ba yis ni rnam pa bzhi/ /zhes bya ba la/de nyid ces bya ba gang las snyam pa la/ lhan cig skyes pa rnam pa bzhi/ /gang phyir zhes pa ste/ lhan cig skyes pa nyid dga' ba rnam pa bzhi'i rjes su 'jug ste/ chung ngu dang 'bring po la sogs pa'i dbye bas so/ /rdzogs pa'i rim pa'i phyogs las ni/ /zhes pa ni bskyed pa'i rim pa las ni lhan cig skyes pa rjes su 'gro ba med do//de ni gnas nges pa nyid do/ /dga' ba dang po dpa' bo ste/ /zhes pa ni dpa' bo ni kye'i rdo rje ste/ de dga' ba'i rang bzhin dang bde ba'i rang bzhin no/ /de bas lhag pa ni shes rab ste/ dga' ba'i rang bzhin nyid mchog tu dga' ba'o//de dag las shin tu dga' ba skyes pa gang yin pa'i dga' ba de ni thams cad ma lus pa bsdus pa lhan cig skyes pa'i rang bzhin no/ /de bde thabs kyis thams cad rig /ces pa ni de lta bur gyur pa'i bde ba'i thabs su gyur pas thams cad rig cing thams cad shes pa thob par byed do//yang na shin tu dga' ba'i dga' ba zhes pa ni dga' ba gsum pa'o/ /ma lus zhes pa ni lus thams cad khyab pa'o/ /yang na/ de bde thabs kyis thams cad rig /ces pa ni dga' ba gsum pa de nyid kyi thabs kyi bzhi pa'o/ /thams cad rig ces pa ni thams cad mkhyen pa'i rang bzhin can thams cad nye bar sdud pa dbyer ba rdo rje sems dpa'i rang bzhin zhes bya ba'i don gang yin pa'am/yang na thams cad ni phung po lnga'i rang bzhin te/ de bzhin gshegs pa nye bar sdud pas stong pa'i rang bzhin nyid do/ /rig pa yang bde ba chen po lhan cig skyes pa'i rang bzhin rang rig pa yin pa de'i phyir thams cad rig pa'o//nga ni bskyed pa'i rim pa'i phyogs la lhan cig skyes pa'i gnas nges pa nyid gzhan du yang dag pa nyid du gsungs pa/ dga' ba bde ba cung zad tsam/ /zhes pa'o/ /lhan cig skyes pa dga' lhag ma ni//zhes pa ni lhag ma ste lhan cig skyes pa'i dga' ba nyid bur du phyung ba'o/ /de'i phyir de nyid rdzogs pa'i rim pa la khyab par bsgom par bya'o/ /de nyid gsal bar bya ba'i phyir/ /dang po rig par 'dod pa'o/ /zhes pa'o/ /mchog tu dga' ba 'khor bar bsrungs/ / zhes pa ste dmigs pa dang bcas pa'i bde ba nyid do/ /mya ngan 'das pa dga' dang bral/ /zhes pa ni 'dod chags dang bral ba nyid kyi rang bzhin can dga' bral lo/ /dbu ma dga' ba tsam nyid de/ /zhes pa ni dga' ba tsam gyi dbus ni dbu ma phul bu byung ba ma yin zhes bya ba'i don nam/ mchog dang dga' bral dag gi dbus kyi dga' ba tsam ste/ lhan cig skyes pa'i bde ba tsam mo/ /'khor ba dang mya ngan las 'das pa la mi gnas pa'i mya ngan las 'das pa'i rang bzhin zhes bya ba'i don to/ /de nyid kyis lhan cig skyes pas 'di dang spangs zhes pa ste/ rnam par rtog pa la sogs pa 'gags pa ni spangs pa'o/ / 'dod chags nyid dang chags bral yang / /'dres par gyur pas rtog med pa/ /de bzhin chags dang chags bral dag /skad cig gcig la ro gcig 'gyur/ /zhes so/ /de'i phyir rnam pa thams cad du las kyi phyag rgyas bskyed pa'i rim pas kyang lhan cig skyes pa nyid gtso bor 'dod do//de nyid bsgom par bya zhing bsgrub par bya ba dang brtag par yang bya'o/ /de thabs gang gis rnyed snyam pa la gsungs pa/ gzhan gyis bshad las lhan skyes min/ /zhes pa ni gzhan bla ma la sogs pas bshad pa las ma yin te/ tshig gis brjod par bya ba ma yin pa nyid do//gang du yang zhes pa ni bstan pa la sogs pas mi rnyed de/ de bstan du med pa nyid do/ /gal te de lta na bla ma mnyes par byas nas nyan pa dang slob pa la sogs pa don med pa nyid do snyam pa la/ rang nyid kyis shes par 'gyur te/ rang nyid kyis rnyed par 'gyur ro//'on de ltar na yang thams cad du 'di rnyed par 'gyur ba nyid yin no snyam pa la/ bsod nams dang / bla ma mnyes par byas nas thabs kyis brgyud pas zhes bya ba gsungs te/ rgyu gnyis kyis so/ /de lta na yang rang nyid kyis ji ltar shes par 'gyur snyam pa la/ smras pa 'di'i don ni sngon du bla ma mnyes par byang la sogs pa bsod nams kyi tshogs bskyed de/bla ma brgyud pa'i rim pas shes nas rjes su gnang ba dang brtson pas rang nyid las lhan cig skyes pa 'byung bar 'gyur gyis/ gsung thos pa tsam dang bsod nams bskyed pa tsam gyis sam/rgyu med pa las rnyed par mi 'gyur ba'o/ /bla ma brgyud pa'i thabs kyis bstan pa nyid ji ltar bya snyam pa la gsungs pa/ dman dang 'bring dang phul byung rnams/ /zhes pa ste/ 'di nyid kyi don bshad pa'i phyir gsungs pa/ dman pa phra mo'i gnas kyi don/ /zhes pa la/dman pa ni rdul phra rab dang ye shes la sogs pa'o/ /phul du byung bas dang / ri dang rgya mtsho la sogs pa'o/ /bar ma ni bum pa dang snam bu la sogs pa'o/ /brtan pa dang g.yo ba ni gang rnams so/ /de rnams ni 'dis gsungs so/ /de rnams thams cad ni 'di rnams thams cad do//mnyam par zhes pa ni blta bar bya ba'o/ /bdag med pa nyid ni 'di dag bdag med pa nyid do/ /'dis ni bdag tu blta bar bya ba ma yin par ston te/ mnyam pa nyid du gsungs pa ni/ mtshungs par bya zhes pa ste/ mnyam par bya ba 'di dag kyang dngos por mi bya ba nyid dam/'di dag lhan cig skyes pas so/ /de kho na nyid bsgom par bya'o zhes pa'i bshad pa/ ro mnyam pa zhes pa ni/ ro mnyam pa de nyid kyi don gsungs pa/ mnyam zhing mtshungs pa zhes pa ste/ de bzhin nyid kyi rang bzhin gyis thams cad mtshungs pa ni mnyam pa de'i ro'o//'khor lo ni rnal 'byor ma'i 'khor lo ste/ nye bar bsdus pa gsungs pa/ ro gcig tu ni bsgom pa yis/ /zhes so/ /yang na thams cad kyi bdag nyid do/ /yang na/ thams cad spangs pa'am zhes 'chad par 'gyur ro/ /thams cad spangs pa zhes gsungs nas/thams cad bdag nyid ces gsungs pa nga las byung zhes pa'o/ /'di ltar bla ma brgyud pa'i rim pa shes nas bsgrubs pas 'grub cing lhan cig skyes pa 'dabs so/ /shin tu mnyam gzhag ces pa ni de nyid gsungs pa/ bza' dang btung dang zhes pa dang / /rgyun mi 'chad par de las 'gyur//zhes pa ni/ de'i phyir de ltar gyur pas bslab pa ste/ rgyun mi 'chad pa ni thams cad du lhan cig skyes pa de'i tshul gyis gnas skabs kyi rgyun mi 'ching bar te lhan cig skyes pa de'i rang bzhin gyis rgyun du'o/ /de las 'gyur zhes pa ni thob pa'o/ /'gro ba kun gyis bsgom byas kyang //zhes pa ni dang por dpyod par byed pa'i shes rab kyis chos thams cad bsgom par byas pa ni dmigs par byas pa'o/ /de'i 'og tu dngos po ma mthong bas bsgom du med pa'o/ /de'i phyir chos thams cad lhan cig skyes pa de bzhin nyid du yongs su shes pa nyid kyis bsgom bya med ces pa ni dngos po med pas dmigs su med cing bsgom du med do//de nyid kyis gsungs pa/ brtan dang g.yo ba zhes pa/ rtswa dang gal ba lcug ma sogs/ /zhes pa'i spras sa la sogs pa dang / mi la sogs pa de dag mchog tu de kho na nyid kyi tshul gyis bsgom par byas na'o//bdag gi dngos po'i rang bzhin can/ /zhes pa ni bdag nyid kyi dngos po'i rang bzhin can te de'i gzugs can nyid do/ /ji ltar yang bdag ni/ thams cad nas thams cad kyi dam pa thams cad du mi dmigs te/ de bzhin du 'di dag kyang ji lta ba'am/ rnal 'byor ba'i bdag nyid kyi gzugs bde ba chen po'i gzugs kyi de bzhin nyid du mthong ba yang ngo / /de dag gcig ces pa ni de nyid kyi tshul gyis so/ /de rnams kyi gzhan ni pha rol med pa'o/ /de ci'i phyir rang bzhin snyam pa las/rang rig pa bde ba chen po'o zhes pa de lta bu'i tshul gyis bsgom par bya'o zhes bya ba'i don to/ /de bas cir 'gyur snyam pa la gsungs pa/ rang rig las ni dngos grub yin/ /zhes pa ni/ phyag rgya chen po'i dngos grub po/ /rang gis rig pa bsgoms pa yis/ / zhes pa ni gang du rang gis rig pa med pa de la don dam par bsgom pa med do/ /gnyis su med pa'i yul gyi don la btags pa nyid do/ /rang gis rig pa'i rang bzhin las/ /zhes pa ni lus la sogs pas byas pa'i bya ba la sogs pa yang rang rig pa rnal 'byor ba rnams kyis bde ba chen po'i rang bzhin dang ldan pa'o//gal te de lta na de'i chos dang chos ma yin pa'i las de dang nyon mongs pa de las sdug bsngal zhes bya ba la sogs pa gzhan dang gzhan du ji ltar 'gyur snyam pa las gsungs pa/ rtsod pa las ni las skyes te/ /zhes pa ni thog ma med pa'i ma rig pa'i stobs kyis rang bzhin yongs su ma shes pa'i rnam par rtog pa la sogs pa'i rtsod pas bde ba chen po rang rig pa dang 'gal lo//'on bde ba chen po de nyid dang ldan bzhin du yang de ji lta bu snyam pa la gsungs pa/ rang gis 'phrog ces pa ni de ltar bde ba de dang de nyid rang gi bla ma'i bka' la sogs pa'i rkyen gyis rtogs pas las dang nyon mongs pa la sogs pa kun du phrogs te/de med pas rang gi las la sogs pas 'khor bar byed kyi/ gzhan dbang phyug la sogs pas ni ma yin no/ /rtogs pas rang nyid rgyal po bas rgyal po zhes bya'o//bdag po yang thams cad kyi mchog nyid kyis mthu dang ldan zhes pa'o/ /de'i bdag po nyid ji lta bu snyam pa la/ 'dod chags zhe sdang zhes pa ste/ 'dod chags la sogs pa rnam par dag pa snang ba mtha' yas la sogs pa'i de bzhin gshegs pa la ni 'dod chags la sogs pa'i sgrar gsungs so//de dag kyang rdo rje 'dzin pa chen po'i go 'phang der gnas pa'i tshul gyis lhan cig skyes pa'i go 'phang la gnas pa'i rnal 'byor ba ni rdo rje sems dpa'o/ /bcu drug char yang me phod ces pa ni mi rnyed pa ste/ de bas na de bzhin gshegs pa dag gi yang gtso bo nyid dang bdag po'o//chos 'byung las skyes ye shes ni/ /zhes pa ni gang las chos rnams kyi rang bzhin 'byung ba de ni chos 'byung ngo / /de las byung ba'i ye shes gang yin pa de ni mkha' dang mnyam pa ste de bzhin nyid kyi rang bzhin no/ /thabs dang ldan pa zhes pa ni dmigs pa med pa'i snying rje bde ba chen po dang ldan pa ste/stong pa nyid dang snying rje'i bdag nyid can byang chub kyi sems zhes bya ba'i don to/ /'jig rten gsum po de las skyes/ /zhes pa ni don dam pa'i byang chub kyi sems de nyid las srid pa gsum yang skyes pa'o//ji ltar snyam pa la/ shes rab thabs kyi rang bzhin las/ /zhes bya ba gsungs te/ de yang de las skyes pa ni de dang rjes su mthun pa'i rgyu byed pa'i ngo bo nyid de/ don dam par skye ba med pa'i rang bzhin nyid do/ /de bas na 'di dag thams cad byang chub sems dpa'i rang bzhin te/ cung zad kyang 'di 'char mi 'gal bar rnal 'byor pas bstan par bya'o zhes ston to//thabs dang shes rab kyi rang bzhin nyid do zhes ston par byed pas gsungs pa/ rdzas ni bcom ldan 'das yin te/ /zhes pa ni thabs dmigs pa dang bcas pa nyid do/ /de'i bde ba mi lhan cig skyes pa'i rang bzhin can ni 'dod ma ste/shes rab dmigs pa med pa de bzhin nyid kyi rang bzhin can no/ /gcig dang du ma'i sbyor bral 'di/ /zhes pa ni/ lhan cig skyes pa'i rang bzhin byang chub kyi sems zhes bya ba rdo rje 'dzin pa'o/ /skad cig ces pa ni lhan cig skyes pa la sogs pa'i skad cig tu'o/ / mchog ni thun mong ma yin pa'o/ /dga' ba ni bde ba chen po'o/ /byin gyis brlabs pa'i rim pa 'di dag ces pa ni lhan cig skyes pa 'byung ba'i byin gyis brlabs pa'i ye shes gang yin pa de dang de'i rang bzhin te/ rim pa 'di dag ste rdo rje 'dzin pa'i rang bzhin dang bcas pa ni rdo rje sems dpa'i byin gyis brlabs pa'i bdag po'o//kun mkhyen ye shes rang bzhin te/ /zhes pa ni thams cad mkhyen pa'i ye shes gang yin pa de dang de'i rang bzhin te/ lhan cig skyes pa'i rang rig pa dang bde ba chen po mchog dang gzhan ma yin pa'i rang bzhin no//skad cig rtsod pa thams cad spags/ /zhes pa lhan cig skyes pa 'byung ba'i skad cig la thams cad de dang de'i rang bzhin nyid du gyur te/ gnyis kyi tshul gyis rtsod pa med pa'o/ /rtsod pa thams cad ni gnyis kyi spyod yul te/ gnyis su med pa la su zhig gang gis rtsod par byed ces bya ba'i don to//rtsod pa de ci snyam pa la gsungs pa/ rang bzhin yang dag tshor bas rig /ces pa ste de nyid kyis gsungs pa/ mtho ris mi yul sa 'og tu yang / /zhes so/ /rig byed grub mtha' ma lus rnams/ /zhes pa la/ rig byed pas smras pa ni grub pa'i mtha'o//dngos grub ni phyag rgya chen po'i dngos grub ma yin pa'o/ /srid pa ni 'khor ba ste/ rnam par dag pas yang dag pa yongs su shes pa gang yin pa de dngos grub ste de ma yin zhes bya ba'i don to/ /de'i tshe ci yin snyam pa la gsungs pa/ yang ni skye ba gzhan dag la//zhes pa'o/ /chu bo'i rgyun ni 'bab pa dang / /mar me 'bar ba'i rgyun gzhan du/ /zhes pa ni dper na chu bo'i rgyun 'bab pa la mar me 'bar bas ni mun pa sel bar byed kyang mi gnas pas don med pa bzhin du/ kye'i rdo rje'i don shes nas gzhan du ngal bar byas kyang 'bras bu gnas pa ma yin pa de nyid de don med do//yang na gang du chu bo'i rgyun 'bab pa na rgyun mi 'chad pa dang / yang ji ltar mar me 'bar ba rgyun rang gsal ba de bzhin du rtag tu de kho na nyid kyi sbyor bas gnas par bya ste/ rnal 'byor ba rnams kyis so/ /yang na ji ltar chu bo'i rgyun 'bab pa na rgyun mi 'chad pa de bzhin du rnal 'byor pas kyang rang gis gsal ba nyid du yang mar me 'bar ba'i rgyun bzhin zhes pa ni bla ma'i zhal snga nas gnang ba las shes par bya'o zhes pa'o//rnal 'byor ma'i 'khor lo'i le'u'i bshad pa ste brgyad pa'o// //da ni mchog dang mchog ma yin pa'i dbye bas rnam par dag pas gsungs pa mchog ces pa'o//de la mchog tu rnam par dag pa ni de bzhin nyid dang tha mal pa lha'i rang bzhin nyid do zhes gsungs pa ni/ ngas par dngos po 'di dag kun/ /zhes pa'o/ /lha rnams gsungs zhes pa ni bshad par bya'o zhes pa'o//phung po lnga ni gzugs la sogs pa'o/ /dbang po drug ni nang gi skye mched do/ /skye mched drug ni phyi'i skye mched do/ /ngo bo nyid kyis rnam par dag /ces bya ba ni de bzhin nyid kyi bdag nyid kyi ngo bo 'di byas so/ /thams cad dag ces pa ni sngar gsungs pa'i dngos po'i don thams cad du gsungs pa'o//phung po dang skye mched dang khams kyi dbye bas gal te 'di dag ngo bo nyid kyis rnam par dag pa yin na rnam par dag pas ci zhig bya snyam pa la/ mi shes nyon mongs bsgribs pa yis/ /dag bya zhes pa ni rang bzhin gyis dag kyang phung po la sogs pa'i rang bzhin yang dag par mi shes pa'i glo bur gyi nyon mongs pas bsgribs pas de'i phyir rang bzhin rtogs par bya ba'i sgo nas sbyor bar byed pa'o//rang rig bdag nyid rig pa yis/ /zhes pa ni de bzhin nyid kyang pha rol tu phyin pa'i tshul lta bu nyid ni ma yin te/ 'on kyang bde ba chen po rdzogs pa'i byang chub kyi tshul rang rig pa mchog tu bde ba ste/ rang rig pa bde ba chen po nyid do/ /de rnams kyi khyad par du 'phags pas mig la sogs pa'i spyod yul gyi don ma yin pa'o/ /dag pa'i dngos po ni dag pa'i rang bzhin no/ /gang phyir 'gro ba sangs rgyas dngos//zhes pa ni de bzhin gshegs pa lnga'i rang bzhin gyi dbye ba dang / dbyer med pa de bzhin nyid kyi bdag nyid can rdo rje sems dpa'i rang bzhin zhes bya ba'i don to/ /mig gis gzung ba'i gzugs dang zhes pa ni gzugs gzung bar byas na/ gzung ba'am/ mig 'dzin par byed pa po'am byed pa ste/'dis zhes bya ba ni 'dzin par byed ces bya ba'i don to/ /de ltar sgra dang rna ba la sogs pa dang / lces myang bar bya ba shes zhes pa ni myang bar bya bas na myang bas te ro'o/ /shes pa ni shes par byed pas na shes pa'o/ /rdzas zhes pa ni reg par bya ba ste/sa la sogs pa'o/ /gal te de ltar dngos po 'di dag ma dag pas de'i tshe spangs te dag par byas pas ci zhig bya snyam pa la/ rnal 'byor pa yis bstan par bya/ /zhes pa ste gang las snyam pa la/ gang phyir bsten par bya zhes bya ba gsungs so/ /gal te bsten par byas na de'i tshe 'khor bar gnas pa'o snyam pa la/dag pas dug med byas nas ni/ /zhes gsungs te/ dper na dug gi de kho na nyid mi shes pas bsten par byas na skyon du 'gyur ro/ /de dang de nyid kyi de kho na nyid shes na dug med par byas te/ de kho na nyid shes pas zos na skyon med pa 'ba' zhig tu ma zad kyi 'on kyang sngar dug gzhan las gyur pa yang 'joms so//de bzhin du yul gyis kyang dug dang bcas pa de dag gal te rnam par ma dag pas bsten par byas na de'i tshe 'dod chags la sogs pa'i skyon skyed par byed do/ /gang snga ma bsten pas ni skyed par yang mi byed de 'joms par yang mi byed do//gang gi tshe gzhan de bzhin nyid la sogs pa'i dag pas dug med par byas te/ bsten na de'i tshe yon tan skyed par yang byed cing 'joms par yang byed do/ /de'i phyir nan tan gyis bsten par bya'o/ /da ni phung po la sogs pa'i dbye bas dag pa gsungs pa/gzugs phung zhes bya ba la sogs pa'o/ /da ni sngar ma gsungs pa'i phyogs rnam par dbye ba gsungs pa/ dbang ldan du ni pu k+ka sI/ /zhes bya ba la sogs pa'o/ /rdo rje sems dpa'i rnam par dag pa gsungs pa/ phyag rnams zhes pa'o/ / zhabs dag ces pa ni g.yon pa dang g.yas pa dag gis zhes pa'o/ /zhabs bzhi bdud bzhi las rnam par rgyal ba'i rnam par dag pa'o/ /zhal brgyad rnam par thar pa yis/ /zhes pa ni sgo brgyad po gzugs can gzugs rnams la lta zhes bya ba la sogs pa rnam par thar pa'i sgo brgyad rnam par dag pa'o//spyan gsum dag pas rdo rje gsum/ /zhes pa ni sku rdo rje la sogs pa'i rang bzhin mkha' spyod ma dang / sa spyod ma dang / bdag med ma'i rnam par dag pa'i zhes bya ba'i don to/ /zhe sdang zhes bya 'khor lo can/ /zhes pa ni zhe sdang rnam par dag pa'o//'khor lo can ni 'khor lo'i bdag mo'o zhes bya ba yang zhes pa ni 'dod chags dang / 'dod chags dang bral ba rnam par dag pa'i brjod pa ste/ bdag med ma zhes bya ba'i don to/ /'dod chags ni 'dod chags rnam par dag pa zhes gsungs pa'o/ /gsang pa'i gau rI ma zhes bya ba ni nang gi brtsegs ma'i gau rI ma'o//gti mug rdo rje de bzhin brjod/ /ces pa ni rdo rje ma gti mug rnam par dag pa'o/ /bskyed pa'i rim pa'i phyogs la ni/ /zhes pa ni rdzogs pa'i rim pa'i phyogs la ni de bzhin nyid kyi phung po la sogs pa nyid dag pa mchog ces bya bar dgongs so/ /gang dang gang gis zhes pa ni gang dang gang gis ni phung po dang 'dod chags la sogs pas 'jig rten pa bcings te/las dang nyon mongs pa la sogs pas sdug bsngal dang nye bar ldan pa'o/ /de dang de nyid kyis zhes pa ni phung po dang 'dod chags la sogs pa dag pas bcings pa las grol ba'o/ / de'i phyir 'jig rten rmongs pas zhes pa ni rmongs par 'gyur ba yis so/ /gang las snyam pa la/ /gang gi phyir de nyid rig pa med ces pa ni dngos po rnams sgyu ma lta bu dang de bzhin nyid kyi bdag nyid du rnam par dag pa mi shes pas so/ /mi shes pas de kho na nyid spangs te nam yang dngos grub thob pa ma yin no//de'i phyir de kho na nyid yongs su shes pa yang dri la sogs pa'i dngos po yod pa ma yin no/ /de bas na de bzhin nyid la sogs pas sems ma dag pas ma dag pa de sbyong bar byed pa yin no/ /de yang lhan cig skyes pa'i gnas la gnas pas de'i rang bzhin thams cad pas 'di cis dag par bya ste/de nyid kyis thams cad rnam par dag pas rang bzhin gyis dag par 'gro ba rtogs par bya zhes gsungs te/ dngos po thams cad shin tu rnam par dag pa nyid de/ dag pa'i ngo bo las byung ba'o/ /lhan cig skyes pa las skyes pa nyid 'di yang phung po la sogs pa lhan cig skyes par blta bar bya'o zhes bya ba'i don to//rnam par dag pa bshad pa'i le'u ste dgu pa'o// //de ltar de kho na nyid bsgom pa ni dbang ma bskur bar skal ba med do/ /dbang bskur ba yang dkyil 'khor med par ma yin pas na de kho na nyid gsal bar byed pa'i thabs slob ma dbang bskur ba'i phyir dkyil 'khor gsungs pa/de nas yang dag bshad par bya/ /zhes so/ /ji ltar rim pas zhes pa ni dkyil 'khor bri ba'i rim pa gang yin pas so/ /cho ga gang gis zhes pa ni/ slob ma dbang bskur bas te/ de yang rab tu bshad par bya'o//rnal 'byor pa yis sa sbyang bya/ /zhes bya ba la sogs pa ni skyed mos tshal la sogs pa'i gnas su sngags pas sngon du bsnyen pa byas te slob ma bsdu ba'i phyir ram/ rab tu gnas par bya ba'i phyir dkyil 'khor bya bar 'dod pas me tog la sogs pas sa'i lha mo mchod do//oM b+hu khaM zhes sngags kyis ni/ bum pa 'dzin cing kha dog ser/ /sngon du dgug pa byas nas ni/ /nam mkha' la ni shes par bsam/ /oM tiSh+Tha badzra hUM gis yang dag par byin gyis brlabs nas pus mo man chad tsam brko bar bya'o/ /de nas byung ba'i thal ba dang / sol ba dang /phub ma dang / rdo dang / rus pa dang / gseb ma la sogs pa bsal te/ sa des sam gzhan dri zhim po'i chus gtor te brkos pa'i khung bu des sa dgang bar bya'o/ /hUM zhes bzlas te/ dri zhim po'i chus gtor nas brdzis te mnyam por byas te/ de la sa'i lha mo oM me di nI ba dzri b+ha ba badzra ba n+d+ha hUM zhes pas spyan drangs te bcug la byin gyis brlabs par bsam mo//nges par skyon rnams 'di dag kun/ /gal te bsal bar ma nus na/ /lag pa gtad la sngags bzlas te/ /de nyid dag par grags chen po/ /khang thog rdo steng gnag lhas dang //lha khang chu 'gram rgyal gnas sogs/ /brkos pas rnam par dag bya min/ /sngon du sbyongs pa'i gnas su yang / /zhes pa ste/ de ltar sa sbyang bar bya'o/ /de la dkyil 'khor bri ba'i cho ga ni 'chad par 'gyur ro/ /'bad pas hUM las rdo rjer bya/ /zhes pa ni raM yongs su gyur pa las nyi ma la gnas pa'i hUM las byung ba'i sna tshogs rdo rje'i sa'i rang bzhin du byas te sa sbyang bar bya zhes bya ba'i don to//dkyil 'khor bri ba'i gnas gsungs pa/ skyed mos tshal zhes bya ba la sogs pa'o/ /bzang po zhes bya ba 'di'i bshad pa gsungs pa/ rin chen sna lnga'i phye ma yis//zhes pa la sogs pa'o/ /dkyil 'khor gyi tshad nges pa dang ldan pa gsungs pa dkyil 'khor khru gsum zhes pa'o/ /'di'i don rdo rje sems dpar snyems byas te/ g.yas brkyang ba yi zhabs dag bya/ /phyag gnyis he ru kar sbyor ba/ /slob dpon dkyil 'khor 'jug par bya//hUM hUM zhes ni sgrogs pa dang / /hi hi zhes bya 'jigs su rung / /sngags pa rdo rje dril bu 'dzin/ /gau rI sogs kyis gsol ba 'debs/ /de bzhin gshegs pa kun zhi ba/ /de bzhin gshegs pa kun gyi gnas/ /rdo rje sems dpa' yang dag 'byung //dkyil 'khor gtso bo bshad du gsol/ /mtshan rnams thams cad yang dag rdzogs/ /mtshan min thams cad rnam par sngangs/ /kun du bzang po yang dag 'byung / /dkyil 'khor bdag po bshad du gsol/ /zhi ba'i chos ni mchog las byung / /ye shes spyod pa rnam sbyong byed//rdo rje rin chen yang dag byung / /dkyil 'khor bdag po bshad du gsol/ /sems can kun gyi sems chen po/ /rang bzhin dag pas dri ma med/ /rnam par snang mdzad cher 'byung ba/ /dkyil 'khor bdag po bshad du gsol/ /de bzhin phyag rgya gnas bzhengs te//kun du rnam par gzigs mdzad nas/ /hUM zhes rjod par byed pa'i bdag /rkang pa rdo rje gar byas nas/ /snyems dang ldan pas yongs su bskor/ /rdo rje lta bas bltas nas kyang / /rkang 'og rdo rje 'bar ba ni/ /hUM las sprul pa bsgom par bya/ /blo ldan rdo rje gsor byed cing //dril bu dkrol bar byed par brtson/ /sa ni dag par byed pa 'dis/ /bsrung ba yang ni chen por 'gyur/ /brjod pa 'di yis bgegs rnams ni/ /chen po yang ni skrod par byed/ /bgegs chen po ni 'gro bar gyis/ /gang yang lus la sogs pa rnams/ /bde chen ye shes las byung bas//rdo rje sems dpa'i rang bzhin byung / /nga ni dpal ldan snying rje'i stobs/ /bsrung ba'i 'khor lo rab sbyor byed/ /rdo rje 'bar ba'i lus ldan pas/ /sku gsum las byung 'gag par byed/ /gal te 'da' bar gyur na ni/ /'jigs par 'gyur te gzhan du min//sa ni yongs su bzung byas nas/ /bgegs med phyir ni phur bus gdab/ /oM badzra kI li kI la ya ba n+d+ha hUM phaT/ /mtshams dang ra ba phyogs bcings nas/ /sa ni sta gon gnas par bya/ /baM las byung ba'i ser mo yis/ /gser gyi bum pa 'dzin par byed//mchod pa lnga yis mchod par bya/ /mi bskyod phyag rgyas gsol ba gdab/ /kye yi rdo rje mchod byed pa'i/ /lha mo rin chen sna tshogs 'dzin/ /lha mo khyod ni dpang du gyur/ /bdag ming 'di zhes bya ba ni/ /dkyil 'khor dam pa bri lags na/ /dkyil 'khor gnas ni sbyang du gsol//dri zhim tsan+dan la sogs kyis/ /lha mo'i gnas ni ji lta bar/ /dkyil 'khor gyi ni rim pas bya/ /'khor lo de la spyan drangs te/ /mchod dang bstod pa la sogs bya/ /mgrin pa ring zhing lto ba 'phyang / /rtsa ba nag po spangs pa yi/ /dang po'i rim pas bum pa brgyad/ / a mra'i 'dab ma la sogs ldan/ /ras kyis mgrin pa dkri bar bya/ /lha yi mtshan ma bris nas ni/ /'bru lnga sman lnga rin chen lnga/ /lto ba chen po'i nang du gzhug /me tog phreng ba rdo rje'i rtse/ /btags nas rang gi sngags rnams kyis/ /sngags pa rab tu gnas par bya/ /a r+g+haM zhabs bsil mchod sogs dbul//me tog dkar po gzhug par bya/ /dri zhim chu yis bkang nas ni/ /cho ga'i rim pas gzhag par bya/ /yang na sngar bzhin mchod par bya/ /lag pas bdug spos blangs nas ni/ /blo ldan 'khor gtsor gsol ba gdab/ /bdag med ma la pus btsugs nas//rdo rje lha mo bdag med ma/ /rig sngags rgyal la phyag 'tshal bstod/ /bdag ni dkyil 'khor 'bri bar 'tshal/ /snying rje'i stobs la mchod pa'i phyir/ /slob ma'i don du gshegs nas ni/ /bdag la gnang bar mdzad pa'i rigs/ /sangs rgyas dpa' bo mkha' 'gro ma/ /'gro ba'i don la mchog tu gzhol//sangs rgyas bdag la dgongs su gsol/ /'jig rten skyong ba mthu chen rnams/ /bdag med la sogs dkyil 'khor ni/ /'gro ba'i don du bri bar 'tshal/ /rdo rje 'dzin bdag 'di zhes bya/ /ji ltar nus pa'i yo byad kyis/ /bdag dang slob mar bcas pa la//rjes su brtse bar mdzad nas su/ /dkyil 'khor du ni tshogs pa kun/ /nye bar yang ni mdzad pa'i rigs/ /'khor lo lan gsum gsol btab ste/ /mkhas pas mchod pa la sogs bya/ /yang dag bsrungs la phyir byung ste/ /slob ma me tog phreng thogs shing / /yid gzhungs spro ba chen po dang //dman pa'ang lhag par gnas par bya/ /de la slob ma ma lus des/ /blo yis rang gi nang bcug nas/ /rang snang pad+ma 'khor lo dag /khyim sgo nas ni gsol ba gdab/ /bdag gi ston pa dpa' chen khyod/ /sems can thams cad don brtson pa/ /mgon po dam tshig bdag la stsol//sdom pa'i mchog kyang bdag la stsol/ /sangs rgyas chos dang dge 'dun te/ /byang chub sems kyang bdag la stsol/ /kun du kun rtog spangs pa yis/ /grong khyer nyams dga' 'jug par 'tshal/ /de nas slob gtso gcig dmigs te/ /tshig ni 'di skad brjod par bya//tshur shog theg pa chen po yi/ /sngags kyi spyod pa'i tshul gsal ba/ /bu la nga yis bstan par bya/ /khyod ni tshul chen snod yin te/ /dus gsum 'byung ba'i sangs rgyas rnams/ /sku dang gsung dang thugs 'dzin pa/ /rdo rje sngags kyi mthu yis ni/ /ye shes mnyam med yang dag thob//bdud sde shin tu mi bzad bcom/ /shAkya seng sogs dpa' bo yis/ /'jig rten rjes su gshegs nas ni/ /'khor lo bskor te mya ngan 'das/ /de bas blo ldan bu yis 'di/ /thams cad mkhyen pa thob par gyis/ /bshags sogs lan gsum byas nas ni//snying ga lkog ma spyi bor ni/ /mkha' spyod sa la spyod pa dang / /sa 'og spyod pa gnas par bsams/ /tsan+dan rdo rje khu tshur gyis/ /oM AHhUM zhes yang dag brjod/ /snying ga mgo bo lkog ma la/ /me tog la sogs rim bzhin sbyin/ /me tog mgo bor mdun du spos/ /mar me dri yang snying ga la//rang rang sngags kyis yang dag bzlas/ /slob ma rnal 'byor bas mchod bya/ /sor ni bcu gnyis me tog rtser/ /ma yo ma gas srog chags med/ /a shwa ta u du m+ba ra yi/ /mo yo ba yi so shing sbyin/ /shar dang byang du kha bltas nas/ / ba ko tsam gyis sa byugs te/ /'chos nas kyang ni dor bar bya/ /zhi la sogs pa'i dngos grub bstan/ /gang phyogs bltas la dngos grub ni/ /de yi mchog ni shes par bya/ /shar du bltas nas dngos grub ni/ /dbu ma ru yi yongs su grags/ /byang du bltas dang thad kar yang //zhi ba'i 'jig rten dngos grub yin/ /gang tshe 'og tu kha bltas pa/ /de tshe sa 'og dngos grub yin/ /'thor 'thung skyor chu lan gsum blud/ /byin nas phyi rol gzhag par bya/ /ku sha'i stan la nyal du gzhug /dpung par skud pas shin tu bsrung / /oM hrIHbi shu d+ha sa rba d+ha rmA pA pa ni sh+tsA s+ya sho d+ha ya bi ka lpa a pa na ya hUM/kun mkhyen rnams ni 'jig rten du/ /brgya lam na ni 'byung 'gyur te/ /u du m+bA ra'i me tog bzhin/ /brgya lam na ni mi 'byung srid/ /'di skad la sogs bstan byas nas/ /ku sha'i stan la nyal du gzhug /de nas dkyil 'khor dbus su ni//rang gi sbyor ba ldan pas 'dug /kye yi rdo rje'i phyag rgya yis/ /cho ga bzhin du byin gyis brlab/ /rang gi lha yi sbyor ba yis/ /shin tu sar par ldan pa ni/ /tshad dang ldan zhing mdzes pa yis/ /shes rab can gyis thig gdab bya/ /sgo bzhi 'bar ba chen po ste//zhes bya ba la sogs pa'i yon tan gyis mdzes pa'o/ /de ltar 'khor lo'i thig btab nas/ /tshon la 'bar ba'i lta ba yis/ /mngon par bsngags te 'bar bar bya/ /khu tshur g.yon pas dgye bar bya/ /'di ni chos dbyings dag pa ste/ /sems can khams ni grol byed pa//kye'i rdo rje rgyal po che yi/ /sa tshon dgye ba brtsam pa ni/ /dkar dang de bzhin ser po nyid/ /dmar po nyid dang ljang gu gnag /mnyam zhing g.yas skor rgyun ma chad/ /'og tu nas gang tsam gyi bar/ /de las dkyil 'khor bri bar bya/ /kun du ye shes 'khor lo ni/ / spyan drangs nas ni gzhug par bya/ /phyogs skyong gtor ma byin nas ni/ /sbyin sreg gis ni rdzogs par bya/ /de nas slob ma gzhug pa'i phyir/ /de nyid bden pa bsgrag par bya/ /chos rnams gzugs brnyan lta bu ste/ /dag cing gsal la rnyog pa med/ /gzung ba dang ni brjod du med//rang gi rgyu las kun du byung / /de bzhin nyid las nges par skyes/ /bden pa 'di yis dri med pa/ /slob mas gzugs brnyan gsal ba ni/ /kun gyis dri ma med mthong shog /sems can kun gyi yid khyab cing / /sems can kun gyi snying la gnas/ /sems can kun gyi yab gyur nyid//'dod chags dam tshig rnams kyi mchog /bden pa gang gis ye shes mchog /dkyil 'khor shes rab thabs bdag nyid/ /bden pa de yis de bzhin bdag /khyod kyis 'dod pa rab rdzogs mdzod/ /de nas thun tshod gnyis pa la/ /mig ni ras kyis dgab bya ste//slob ma de la gzhug par bya/ /de nas dkyil 'khor bstan par bya/ /de ltar 'di yi rim pa yis/ /sngon du dkyil 'khor gzhug bya ste/ /slob dpon gyi dbang bskur ba'i 'og tu gsang ba dang shes rab ye shes kyi dbang bskur ba'i phyir gsungs pa/ rig pa de la gzhug par bya//zhes pa ni ma dang sring mo zhes bya ba la sogs pa'o/ /gsang ba'i dbang bskur ba la brgya la the tshom za ba srid pas/ gnyi ga'i gdong pa bcing ba gsungs pa ni/ phyag rgya'i zhes bya ba la sogs pa'o/ /shes rab kyi dbang bskur ba gsungs pa/ de nyid la yang bya ba nyid//ces pa ni dkyil 'khor sa de nyid du shes rab de nyid la'am gzhan la'o/ /shes rab ye shes kyi rang bzhin gsungs pa rang rig ces pa'o/ /thabs dang shes rab rnam par 'dres pa shes pa ni/ gnyis ka kun du dga' ba nyid kyis mnyam pa nyid kyi ye shes nyid dam/ stong pa nyid dang snying rje'i bdag nyid do//chags dang chags bral rnam par 'dres/ /zhes pa ni mchog dang dga' bal dag mnyam pa nyid kyi rang bzhin no/ /de thams cad du song ba mtshon par bya ba'i phyir gsungs pa/ de nyid ces bya ba la sogs pa'o/ /gzhan rnams gang rnams de rnams dag /ces pa ni bstan ma thag pa'i brtags pa'i gzugs rnams kyang de'i rang bzhin rnams nyid de/rang bzhin ma shes pas ming gzhan nyid dam/ ngo bo nyid gzhan gyis grags pa rnams don dam par ni lhan cig skyes pa nyid do/ /de dang de'i rnam par dag byed de de nyid gsungs pa/ sems can rnam par shes pa dang / /gzugs zhes bya ba la sogs pa'o/ /de nyid kyis gsungs pa/ sgyu ma'i gzugs ltar yang dag gnas/ /rnam pa gang gis rnam brtags pa/ /de yi gzugs kyis snang bar byed/ /kun gyi gtso bo mtshon par bya ba nyid so sor ston par byed pa ni/ dang por dga' ba tsam nyid ces pa ni/ /dga' ba dang mchog tu dga' ba la sogs pa de'i thabs su gyur pa dga' bral ni yang dag par mi 'dod pa nyid de/ de bskyed pa'i rim pa ste dran par byed pa nyid pas so/ /de bas na gsum po dag las mtshan nyid dang bral ba ni bzhi pa ste/ bzhi pa'i grangs rdzogs pa yin gyi//gsum pa'i bar med par gnas pa de ni ma yin no/ /de skad thos zhes pa ni lhan cig skyes pa'i bdag nyid chen po'i rang bzhin no/ /rdo rje snying po sogs mkhas pa/ /zhes pa ni byang chub sems dpa'o/ /mchog tu ngo mtshar zhes pa ni ngo mtshar du byed pa ste/ lhan cig skyes pa dang ldan pa ni thob pa'o//thob nas kyang shin tu lhan cig skyes pa'i bde bas rang rig pas brgyal bas gzung ba dang 'dzin pa la sogs pa dang / dbang po la sogs pa yang dag par bsdus nas de bzhin nyid tsam du gzhol te/ stong pa nyid thob nas snying rjes ji ltar skal ba dang ldan pa'i sems can la gzigs te/'jig rten gyi khams der gshegs nas stong pa nyid dang snying rje'i bdag nyid can bde ba chen po thob par gyur cig ces bya ba'i don to/ /'di skad kyang gsungs te/ dang po dga' ba 'gro ba'i gzugs/ /zhes bya ba la sogs pa'o/ /'gro ba'i gzugs ni 'gro ba ni grags par zad do//de bzhin du mchog dang dga' bral yang ngo / /lhan cig skyes pa gsum la med/ /ces pa ni tshul 'dis lhan cig skyes pa de mchog tu phul du byung ba nyid de/ de yang bcom ldan 'das kyis gsal bar mdzad do zhes bya ba'i don to/ /'di ni de ltar brnyes nas bcom ldan 'das kyis gzhan la yang gsal bar bya ba'i phyir gsungs pa/'dod chags ma yin chags bral min/ /zhes pa dang / dbu ma'ang dmigs su med pa'o/ /zhes pa'o/ /thog ma dang tha mal ltos nas dbus ma yin te/ de dag med pas dbu ma yang dmigs su med de/ 'di ni/ thog ma dbus mtha' stong pa nyid//ces so/ /de bzhin du yang 'chad par 'gyur ba las thog ma dang tha ma dbus med pas zhes so/ /yang na 'dod chags dang / 'dod chags dang bral ba dag la gal te lhan cig skyes pa ma yin na de'i tshe gang yin snyam pa la gsungs pa/ dbu ma 'dod chags dang /'dod chags dang bral ba las grol ba dbu ma lhan cig skyes pas so sor dmigs su med ces pa ni dmigs su med cing mi 'gyur ba'o/ /gal te de lta bur gyur na de'i tshe 'jig rten pa'i yul ma yin pas mi rtogs shing 'thob pa nyid ma yin no snyam pa la/ de yang dga' bral dang po brtag /ces gsungs te/ de yang zhes pa ni mtshan nyid de/ de 'dir rnam pa thams cad du gzhan las rtogs pa ma yin te/ bla ma'i man ngag bsgoms pa'i stobs las de gsal bar 'gyur ro/ /bla ma'i man ngag bsgoms pa las so sor snang ba'i rim pa bstan pa'i phyir gsungs pa/dang po zhes bya ba slob pa'i tshe na re zhig bsgribs pa lta bur so sor snang ngo / /de nas cung zad gsal te sgyu ma lta bur ro/ /de nas brtag par bya ba de nyid shin tu gsal te lhan cig ni skad cig go/ /rmi lam ltar snang zhes pa ni ji ltar sngon mthong ba de nyid de/ rmi lam dang dbyer med par gsal bar snang ba'o//de bzhin du lhan cig skyes pa de yang gsal ba nyid du snang ngo / /de las kyang shin tu gsal bar bsgoms pas rmi lam dang sad pa dbyer med pa lta bur ro/ /gnas skabs thams cad du mnyam par gsal ba'i tshul gyis snang ba'o/ / de nas gnas skabs thams cad du dbyer med cing so sor snang ba'i mtshan nyid kyi dngos grub phyag rgya chen po'i dngos grub 'grub par 'gyur ro zhes gsungs pa/ dngos grub dbyer med mtshan nyid do/ /zhes gsungs so/ /'di skad gsungs zhes pa ni 'di'i don 'di lta ste/ dkyil 'khor gsungs pa'o//ji lta bur gyur snyam pa la gsungs pa/ gru bzhi pa la kun du 'bar/ /zhes bya ba la sogs pa'o/ /dkyil 'khor rdzogs pa dang rnam rgyal gzhag ces pa ni rnam par rgyal ba'i bum pa'o/ /shar du zhes pa ni shar sgo las g.yas su'o/ /sar pa zhes pa ni ma sbyang bas so//shin tu ldan pas zhes pa ni de bzhin gshegs pa la sogs pa dang ldan par gnas pas sam bkal bas so/ /tshad dang ldan pas zhes pa ni chur dkyil 'khor gyi nyis 'gyur gyis so/ /de'i don gsungs pa/ dur khrod sa las rnyed pa'am/ /dam tshig ma yis bkal ba yi//cho gas mtshal chen byugs pa dang / /de bzhin ye shes lnga ldan pas/ /a n+yo n+yA nu ga tA sa rba d+ha rmA zhes bya ba la sogs pa'i sngags bzlas te/ shes rab can gyis thig 'dis gdab/ /rang gi yi dam lhar sbyor bas/ /phyogs bcu'i 'jig rten khams bzhugs pa'i//'gro ba'i don du bde gshegs rnams/ /thig gi sgra yis bskul nas ni/ /yang dag 'dir ni gshegs su gsol/ /khu tshur g.yon pas lte bar gzung / /shar dang byang du kha bltas te/ /blo ldan nam mkha'i thig gdab bya/ /de bzhin 'og tu thig rab gdab/ / byang du bltas te shar gyi thig /nub kyi lho ru bltas pa ste/ /shar du bltas te de bzhin byang / /shar du bltas te de bzhin lhor/ /me dang srin por gnas byas nas/ /de nas mtshams kyi thig gdab bya/ /dz+dza gsum gyis ni de btang zhing / /rang yang dz+dza dz+dza dz+dza zhes brjod/ /g.yas skor gyis ni rim gnyis kyis//song ste rab tu thig gdab bya/ /zhes bya ba la sogs pa ni thig gdab pa'i cho ga'o/ /sngon du bsnyen pa gsungs pa/ 'khor lo'i bdag po'i bzlas pa 'bum/ /zhes bya ba la sogs pa'o/ /sngon du gsungs pa'i zhes pa ni/ /oM ra k+Sha ra k+Sha hUM hUM hUM phaT swA hA zhes bya ba 'dis so//de la gtor ma sbyin par bya/ /zhes pa ni dkyil 'khor byed pa'i gnas skabs der ro/ /ji ltar gsungs pa nyid ces pa ni lha'i le'ur ro/ /gsal byas pa ni dbang bskur ba ste/ 'di'am rgyud gzhan du yang cho ga bzhin du zhes pa ni slob ma sngon du bcug ste chu la sogs pa'i rim pas so//rang gi dkyil 'khor du zhes pa ni rang gi yi dam gyi lha'i dkyil 'khor du'o/ /mchod dang gsol ba gdab pa nyid/ /ji ltar grags pa zhes pa ni bla ma la mchod pa dang / gsol pa gdab pa ji lta bar slob mas bya ba de bzhin du 'ang 'dir rig par bya'o/ / de nas gau rI la sogs bri/ /zhes pa ni nang gi brtsegs ma la bdag med ma la sogs pa lnga'i gri gug bri bar bya'o/ /de 'og tu gau rI la sogs pa'i mtshan ma bri bar bya'o zhes bya ba'i don to/ /de nyid kyis gsungs pa shar du zhes bya ba la sogs pa'o/ /de bzhin 'og dang steng de bzhin//zhes pa 'og tu sa spyod ma/ /de bzhin zhes pa ni gri gug go/ /steng du mkha' spyod de bzhin no/ /'dir man ngag gis ro langs ma'i mtshan ma dang nye bar sa spyod ma'o/ /phyi'i gau rI'i mtshan ma dang / nye bar mkha' spyod ma'o/ /rdo rje sems dpa' snyems byas nas/ /zhes pa ni rdo rje sems dpa' bzhin bya ba ste/snyems pa ni nga rgyal byed pa gang yin pa de la de skad ces bya'o/ /hUM hUM zhes ni sgrogs pa yis/ /zhes pa ni hUM hUM zhes rjod par byed pa ste/ sgrogs par byed pa ni bgegs skrod par byed pas rtsol ba gang yin pa de la de skad ces bya'o/ / 'di ltar dkyil 'khor du zhugs te yongs su bskor bar bya'o/ /rang gi lha'i ting nge 'dzin rdzogs nas me tog la sogs pas 'khor lo mchod de/ bdug spos kyis bdug pa dang bstod pa byas nas de nas slob ma dbang bskur te/ de nyid kun du bshad ces pa ni slob ma'i phyir ro/ / rnam dag ni sgrib pa thams cad dang bral ba'o/ /ye shes rang bzhin zhes pa ni lhan cig skyes pa ni gsal ba'i rang bzhin nyid kyis so/ /'khor ba rnam par byang ba yin/ /zhes pa ni don dam pa la srid pa dang mya ngan las 'das pa dag med pas bye brag cung zad med de/ srid pa nyid yongs su shes pa mya ngan las 'das pa zhes bya ba'i don to//de nyid gsungs pa/ dam pa'i dga' ba med na yang / /zhes pa ni dga' ba ni thabs dang shes rab gnyis su med pa'i ye shes der bsgom par bya ba dmigs su med pa'o/ /sgom pa po ni yul can gyi lus lha la sogs pa'i rang bzhin no//bsgom bya dang sgom pa por gyur pa mchog tu gzung ba dang 'dzin pa por byed pa med do/ /lus dngos po med pa nyid kyis sha dang khrag med ces bya ba la sogs pa'o/ /yang na bsgom bya ni rten gyi dkyil 'khor ro/ /sgom pa po ni brten pa'i dkyil 'khor ro/ / lus kyang med ces bya ni phung po lnga po lhar rnam par dag pas so/ /gzung ba med ces pa ni gzugs la sogs pa gau rI ma la sogs pa'i rnam par dag pa'o/ /'dzin pa med ces pa ni mig la sogs pa gti mug rdo rje la sogs pa drug gi rnam par dag pa'o/ /sha la sogs pa med pa ni pu k+ko sI la sogs pa'i rnam par dag pa'o//sgyug bro ba med ces pa ni snying rje la sogs pa'i rnam par dag pa spyan la sogs pa de nyid kyi rang bzhin yin no/ /'dod chags med ces pa ni snang ba mtha' yas la sogs pa 'khor los sgyur ba drug go/ /bsgom pa med ces pa ni lam med pa'o/ / sgom pa po ni sgom par byed pa gang zag dang sems la sogs pa'o/ /grags ni sangs rgyas kyi yon tan 'byung bar byed pa'o/ /dgra zhes pa ni gzhom par bya ba'i nyon mongs pa ste/ 'di dag thams cad dmigs su med pa'o/ /gang gi phyir snyam pa la mi rtog ces pa'i ste/ mchog tu dga' ba lhan cig skyes pa'i rang bzhin gyis 'di dag mi rtog pa'o//rtog pa ni bye brag tu rtog pa ste/ de zhi bas bde ba chen por mchog tu gcig pa nyid do/ /de nas ni rnam pa sna tshogs kyi dbye bas ngo mtshar byed de/ sngar ma mthong ba nyid dam/ yang na rnam pa sna tshogs ni sna tshogs kyi rang bzhin dang bral bas so//da ni lhan cig skyes pa nye bar mtshon pa'i phyir gsungs pa/ de nyid lhan cig skyes par mi gzung ngo zhes bstan pa'i phyir nges par dbye ba'i zhus pa 'di skad ces gsol to zhes pa ste/ gzung du med cing lhan cig skyes pa gzung bar bya ba ma yin no/ dris pa 'di zhes pa ni bde ba chen po lhan cig skyes pa'i ye shes thams cad las dben pa nyid la/rdo rje snying po zhes bya bas slar gsol pa/ ci'i phyir 'byung ba'i bdag nyid lhan cig skyes pa'i ye shes su gyur/ lhan cig skyes pa nyid kyis de brjod ces bya ba'i don to/ /lus zhes pa ni kye'i rdo rje la sogs pa lhan cig skyes pa'i lus ngo bo nyid dag pa'o//gang las dag snyam pa la gsungs pa/ gzod ma nas skye ba med pa nyid rang bzhin med pa nyid do/ /da ni 'byung ba'i bdag nyid re zhig ji ltar skyes par byed pa gsungs pa/ rdo rje pad+ma mnyam sbyor bas/ /zhes pa dang / de phyir bde ba de nyid min//zhes pa ni de lta bur gyur pa'i bde ba de kho na nyid ma yin no/ /'on kyang des de kho na nyid nye bar mtshon par byed par sngar bshad do/ /de'i tshe de kho na nyid ji lta bu snyam pa la/ thabs dang shes rab las lhan cig skyes pa ni gang skyes pa de don dam pa las lhan cig skyes pa ste/ de kho na nyid do//gang las snyam pa la rang bzhin lhan cig skyes pa zhes pa ni rang bzhin ni rang gi tshul te/ dngos po rnams lhan cig skyes pa'o/ /phyi rol gyi yul la sogs pa la nam yang ltos pa med pa 'byung ba chen po'i bdag nyid lhan cig skyes pa yin par ji ltar 'os/ de nyid kyis dngos po thams cad gcig tu bsdus pa ni dngos po rnams gcig cing gnyis su med par bsdus pa ni sdud par byed pa ste/gcig tu bsdus pa'am bde ba'i mchog go/ /de'i phyir/ rnal 'byor shes rab thabs su gyur/ /phyag rgya de dang de'i rgyu'i sbyor ba dang bral bas chos rnams skye ba med pa'o/ /chos thams cad skye ba med cing dmigs pa med pa nyid de/de'i phyir phyag rgya rang gi shes rab las gzhan ma yin no/ de nyid kyis gsungs pa/ stong pa snying rje dbyer med pa/ /byang chub sems zhes bya bar gsungs/ /zhes pa ni de lta bur gyur pa'i lhan cig skyes pa thabs dang shes rab dag las shes pas bde ba chen po de nyid don dam pa'i byang chub kyi sems de kho na nyid ces bya ba'i don to//de lta bur gyur pa'i byang chub kyi sems bsgoms pas/ sngags bzlas pa med pa dang / dka' thub med pa la sogs pa'o/ /byang chub kyi sems de dang de nyid sngags bzlas pa ste/shes par byed pa dang skyob par byed pa'i bdag nyid do/ /de nyid brtul zhugs te kha na ma tho ba thams cad dang bral ba'i rang bzhin nyid do/ /de nyid sbyin sreg ste nyon mongs pa dang phung po'i sreg rdzas thams cad 'joms pas so/ /de nyid dkyil 'khor pa ste rdo rje rnal 'byor ma 'dus pa'i bdag nyid do//de nyid dkyil 'khor te chos thams cad kyi snying po len pa nyid do/ /de'i phyir mdor na ni mdor bsdus pas so/ /mang du smras pas ci zhig bya ste/ sems 'dus pa'i tshul can zhes pa ni sems ni byang chub kyi sems so/ /'dus pa'i tshul can ni chos thams cad 'dus pa'i tshul te chos thams cad kyi bdag nyid ces bya ba'i don to//de'i phyir de nyid bskyed par bya ste/ de nyid bskyed pa des thams cad 'grub par 'gyur ro zhes bya ba'i don to/ /dbang bskur ba'i le'u ste bcu pa bshad pa'o// //dbang bskur pa la sogs pas slob dpon gyi go 'phang thob pa'i rnal 'byor pa rnams chos bstan pa'i phyir sems can gzhug pa'i rgyu gsungs pa/mnyam par khros pas zhes pa la/ /mnyam pa ni 'og dang logs su blta bsam yin na/ /khros pas ni khro ba dang bcas pas so/ /dpral ba ni cung zad dpral pa la brten pa'o/ /lhung bar byed pa ni ltung bar byed pas na ltung ba ste/blta zhes pa gong ma dang sbyar ro/ /dbang la lta stangs ni g.yon phyogs su brten pa'o/ /de nyid gsungs pa/ 'bras bu gnyis zhes pa'o/ /dgug pa g.yas kyi cha la'o/ /zhes pa ni gyen du bzlog ste g.yas su bsgyur zhing g.yas phyogs su blta bar bya'o//de nyid gsungs pa/ gnyis kyang steng du sbyar bar bya/ /zhes so/ /dbus su zhes pa ni steng 'og dang zur du 'gro bar byed pa ma yin pa'o/ /da ni rlung gi sbyor ba gang gis lta stangs gang dag bsgrub par bya snyam pa la gsungs pa/ ltung ba la ni spro ba yis/ /zhes bya ba la sogs pa ste/lha'i rnal 'byor dang sngags bzlas pa ni sngon du gsungs so/ /da ni slob ma'i gnas rnams gsungs pa/ ltung ba rlon pa'i shing la'o/ /zhes bya ba la sogs pa'o/ /lta stangs bsgrub pa'i dgos pa gsungs pa/ bsgrub par bya zhes pa dang / gzhug par bya zhes pa ni bstan pa la'o//dam tshig gsungs pa/ dam tshig kyang ni bza' bar bya/ /zhes pa'o/ /de la zhes pa dbang bskur ba dang / dngos grub bsgrub pa la sogs pa la'o/ /lan bdun pa zhes pa skye ba bdun rnams su mi'i lus nyid blangs pa'o/ /lan bdun pa ni skye ba bdun pa'o/ /dga' dang bral ba sun 'byin pa//zhes pa ni thams cad du yang lhan cig skyes pa'i rang bzhin bskyed cing dga' bral sun 'byin par byed do/ /mkha' la spyod pa nyid ces pa ni rig pa 'dzin pa'i 'khor los sgyur ba 'dzin pa nyid nam mkha' dang mnyam pa'i ye shes rnyed pa nyid do/ /dbang gi don du lta stangs gsungs pa/lha'i rnal 'byor gsungs pa/ ku ru ku l+le'i sgrub pa ni/ /zhe pa'o/ /sngar bstan zhes pa ni sngags kyi le'ur sngags bstan pas sngags dang lha dag dbyer med pa'i phyir ro/ /hrIHlas byung ba zhes pa ni rang gi snying gar zla ba'i dkyil 'khor la hrIH'i rnam par bsams te/ de'i 'od zer gyi lcags kyus bla ma dang /sangs rgyas dang / byang chub sems dpa' dang / ku ru ku l+le yang mdun du bkug ste/ dmigs nas sdig pa bshags pa la sogs pa bya'o/ /lha'i le'u las gsungs pa'i byams pa la sogs dang / srung ba'i 'khor lo'i mthar thug par bsgoms nas//bar snang la hrIHlas byung ba'i pad+ma dmar po de'i dbus su sa bon nam/ dkyil 'khor gyi 'khor lo'i rnam pa lnga sngon du bya ste/ de yongs su gyur pa las bcom ldan 'das ma ku ru ku l+le bsgom mo/ /'bum phrag gcig gis rgyal po rnams/ /zhes pa ni bzlas pas so//rdo rje slob dpon mtsho skyes rdo rjes mdzad pa/ kye'i rdo rje'i rgyud las brtag pa dang po'i bshad pa rdzogs so// //da ni dbang bskur ba thob pa'i slob dpon gyis rab tu gnas pa'i las kyi phyir gsol ba 'debs par byed pas bstan du gsol zhes pa'o/ /ji ltar rigs par zhes pa ni rab tu gnas pa'i cho ga gang gis dbye ba de'i mtshan nyid do//rdo rje snying po zhes pa ni rdo rje rnams ni/ /de bzhin gshegs pa lnga rnams kyi'o/ /snying po ni rdo rje sems dpa' de'i bdag nyid dang de'i ngo bo nyid do/ /de nyid kyis gsungs pa/ /sangs rgyas kun gyi sku gcig pa//zhes so/ /ji ltar rnyed pas sbyin sreg bya/ /zhes pa ni ji ltar 'byor pas rnyed pa'i yam shing la sogs pas 'chad par 'gyur ba'i thab khung du sbyin sreg bya zhes bya ba'i don to/ /de la 'di'i rim pa ni de nas/ yig 'bru gsum gyis bsrungs pa yi/ /me ni snod du gzhag par bya//thab khung me ni dbugs 'byin pas/ /bzhag ste de bzhin bsang gtor bya/ /rlung yab g.yab pas me sbar nas/ /oM dz+wa la dz+wa la hUM zhes brjod do/ /rtswa dang lci ba skam po yi/ /phye ma de dag sbar bar bya/ /mthe'u chung khru yi tshad kyi shing / /lan bdun bsngags te mar gyis byug /oM badzra sa twa aHzhes bzlas nas/ /shin tu ring min thung min pa'i/ /ku sha gnyis ni kha khyer la/ /shar la sogs par kha bltas dgod/ /de nas shar du rtse bstan te/ /ku sha re res thab khung dgram/ /rdo rje sems dpa' zhu las byung //shes rab kyis chags raM las byung / /spyi blugs mi 'jigs dbyug pa dang / /kha dog dmar ser phreng ba 'dzin/ /las kyi rjes mthun rnam shes dang / /'od zer gdan bcas gsus pa che/ /bong thung rgyas pa'i me chen po/ /me yi mtshams nas nam mkhar dmigs/ / oM ag+na ye ma hA te dza sarba karmA r+tha sA d+ha k+Sha/ kA ru Ni kr-i twa satwAr+tha a smin san+ni hi to b+ha ba/ nye bar byed pa'i sngags 'di yis/ /thab khung 'gram du bzhugs par bya/ /de nyid gsum bzlas chu yis ni/ /dkris pa ku shas bsang gtor bya/ /mthe bos mdzub mo mnan nas ni/ /lan gsum chu yis gtor bar bya//rdo rje thal mo kha phye nas/ /snod nas ar+g+ha blangs nas dbul/ /ar+g+haM'i snod dam me tog ni/ /khu tshur g.yas pas chu dang bcas/ /mthe bong mdzub mo sbyar te blang / /sgyur ba'i rim pas sor mo kun/ /sor mo thams cad rim pa yis/ /dkyil 'khor rim pas dbul sngags bzlas//oM dzaHhUM baM hoHkhaM raM zhes bya ba la sogs pa 'chad par 'gyur ba'i a r+g+ha la sogs pa'i sngags so/ /de nas dgug pa'i cho ga yis/ /me tog la sogs der dbul bya/ /oM badzra a na la ma hA b+hU ta dz+wa la sarba duSh+TA na hUM phaT/ dr-i sh+ya dzaHhUM baM hoH//sa ma ya s+t+waM zhes pa ste/ sngags 'di yis ni spyan drangs te/ mkhas pas mchod nas sbyin sreg bya/ /sboms su khu tshur gzung de'i tshad/ /chu ru khru ste sor drug pa'i/ /rdo rje rin chen yu mthar gnas/ /kha khyer du ni sor bzhi pa/ /sor gnyis brkos te nang rdo rje/ /sor bzhi pa la rdo rje can//de brkos pad+ma'i 'dab ma'i mthar/ /gru bzhi pa la shin tu mdzes/ /dgang gzar mthe'u chung tshad tsam du/ /ro rnams blugs pa'i mchu dang ldan/ /'phang ni rjes su mthun pa la/ /rdo rje rim pa lnga gsum rtse/ /blugs gzar pad+ma'i 'dab ma'i dbyibs/ /sor gcig brkos te rdo rjes mtshan//sor gnyis sngon bzhin yu ba ni/ /rin chen rdo rje ldan pas mdzes/ /dgang gzar mchod sbyin shing las byas/ /blugs gzar de bzhin nim pa yi/ /zangs sogs rdzas las yang dag byung / /bdag nyid sngags las byung ba yis/ /lag pa g.yon pas dgang gzar ni//pus mo'i bar du gyen bltas bzung / /mar gyis bkang ste blangs nas ni/ /g.yas pa 'og tu kha bltas pas/ /blugs gzar dgang gzar kun du brtsegs/ /gyen bltas mar gyis bkang nas ni/ /me khar yi ge raM bkod nas/ /lha yi gzugs dang yang dag ldan//g.yas skor byas te dgang blugs kyis/ /snod ni gang bar dbul bar bya/ /sngags la oM na maHsa ma n+ta bu d+d+hA nA ag+na ye swA hA/ /bzang dang ngan pa'i mtshan ma ni/ /blo dang ldan pas de la brtag /bzang po 'khyil zhing 'bar ba ste/ /'ja' tshon lta bur dkar ba'am//las kyi rjes su mthun pas kyang / /de yi kha dog sbyor ldan pas/ /gal te mtshan ma mthong nas ni/ /sngags ni mnyam par bzhag nas bzlas/ /bsreg rdzas gsum bdun gcig nyid dam/ /de nas ji snyed rnyed pa dang / bsreg rdzas kyi ni yam shing dag /de 'og rim pas gnyis gnyis sbyar/ /u du m+bA ra pa la sha/ /a Sh+wad+tha dang kasma d+ya/ /a mra ka dam+pa ka dang / /sa mi pa la sha ba Ta/ /'o ma can las byung ba yi/ /rlon shing lo ma gnyis dang ldan/ /mtho ris tshad du mnyam bcad nas/ /rtse mo gnyis ka mar gyis byugs//mthe bo srin lag dag gis dbul/ /mar ni blugs gzar gyis blugs nas/ /de nyid kyis ni 'bru dbul bya/ /med par gyur na lag pa yis/ /dgang blugs dang ni gzhan gyis dbul/ /til dang ma sha nas rnams dang / /so ba gro dang ma grugs pa'i/ / dUr ba dang ni ku sha dang / /zho dang de bzhin 'bras chan rnams/ /rang rang sngags kyis sbyin sreg bya/ /oM ag+na ye swA hA/ /mar gyi'o/ /oM sarba pA paM da ha na badzrA ya sarba pA pa da ha swA hA/ til gyi'o/ /oM badzra A yu She swA hA/ dUr ba'i'o/ /oM badzra pu Sh+Ta ye swA hA/'bras ma grugs pa'i'o/ /oM sarba saM pa de swA hA/ zho dang 'bras chan gyi'o/ /oM a pra ti ha ta badzra ye swA hA/ ku sha'i'o/ /oM badzra bi dza ye swA hA/ 'bras so pa'i'o/ /oM ma hA be gA ya swA hA/ nas kyi'o/ /oM ma hA ba lA ya swA hA/ ma sha'i'o/ /oM badzra g+ha sma rI swA hA/gro'i'o/ /oM badzra ya dz+nyA ya swA hA/ u du m+WA ra'i'o/ /oM bo d+hi br-i k+ShA ya swA hA/ a shwa t+tha'i'o/ /oM badzra lA tA ya swA hA/ pa la sha'i'o/ /oM badzra ku be rA ya swA hA/ n+ya gro d+ha'i'o/ /oM badzra ha sa ka rA ya swA hA/ a mra'i'o/ /sbyin sreg byed pa na gang rang gi sngags med pa ni til gyi sngags kyis so//des gang dgang blugs phul nas ni/ /yang ni me tog sogs pas mchod/ /kun du sku la bsang gtor dang / /de bzhin zhabs gnyis zhabs bsil dang / /zhal du skyor chu lan gsum bya/ /dbu la ar+g+ha dbul bar bya/ /me tog kyang der mar me bdun/ / spyi bor bdug spos dbul bar bya/ dri ni de bzhin snying gar de'i/ /rang gi yi dam lha dgong bya/ /bsgoms la de bzhin phyi mchod bya/ /sngar bzhin de la'ang sbyin sreg dbul/ /oM e h+ye hi b+ha ga bA na nri ha b+ha ga ta na sa ma ye na tsa ar+g+haM pra tIts+tsha ta pU dzi ta pra sid+d+hi m+ma/ 'di ni rang gi yi dam gyi lha spyan drang ba'i sngags so//de nas de ni tshim byas nas/ /so rtsi phye ma med par dbul/ /dgang blugs lhag ma phul nas ni/ /mchod cing bstod de gshegs su gsol/ /swA a r+tha tsa wA pa ra a r+tha tsa zhes bya ba la sogs pa'i sngags kyis so/ /de ltar sbyin sreg byas te/sta gon la sogs byas nas ni/ /nang par sku gzugs sbyang bar bya/ /zhes pa ni nang bar sbyang ba ni rab tu gnas par bya ba ste/ mtshan mo'i dus la sta gon la sogs pa bya'o/ /de la 'di'i rim pa cung zad bshad par bya'o/ /rang gi yi dam lha sbyor bas/ /sngar gsungs pa yi bum pa la//thams cad chu las kham phor du/ /nyung zad blugs te rnam rgyal gyi/ /bum pa baM las bskyed pa yis/ /rin chen steng du gzhag par bya/ /der ni dkyil 'khor bskyed bya ste/ /dam tshig bdag nyid rdzogs pa dang / /ye shes dkyil 'khor spyan drangs te/ / zhabs bsil la sogs rim pas dbul/ /dam tshig lhan cig gcig byas te/ /mchod pa rnams kyis tshim par bya/ /me tog spos sogs rol mo yis/ /'bad pa yis kyang mchod bya ste/ /dril bu dag ni dkrol ba dang / /bstod pa bya ste de la bzlas/ /khu tshur g.yas pas mthar bzung ste//me tog phreng btags rdo rje ni/ /bum pa chu yis bkang ba yis/ /kham phor steng du gzhag par bya/ /'khor lo'i rang bzhin gyi gnas las/ /de nas mchod pa phyag byas te/ /de nas chu yi tshul gyis ni/ /bum pa ru ni gnas par bya/ /'di ni bum pa sta gon la gnas pa'o//de nas rang gi sbyor bstan pas/ /yungs kar chu dang dUr ba yis/ /lha la bya bas te ba yi lngas/ /shing shun lngas byugs legs par bkru/ /mngon par bsngags te dri zhim pa'i/ /chu ni shin tu gtsang ba yis/ /bkru bar rung na rang bzhin gyis/ /bris pa la sogs me long la//yungs mar gyis kyang byugs pa dang / /dri zhim skyu ru ra chus kyang / /ba yi rnam lnga sogs pas byugs/ /dUr ba'i chun pos byug par 'dod/ /gang du las kyi sngags med na/ /de la rtsa ba'i sngags kyis sbyar/ /oM sa rba ta thA ga ta kA ya bi sho d+ha na ye swA hA/ /yungs mar gyi sngags so//ras 'jam po yis phyis nas ni/ /ras la sogs pa ci nus dbul/ /ye shes sems dpa' snying 'od kyis/ /lha rnams bkug ste gzhag par bya/ /ku sha yis ni bsang gtor bya/ /de la zhabs bsil la sogs dbul/ /mchod pa la sogs de la bya/ /pus mos la btsugs nas ni//rdo rje dril bu g.yon gyis gzung / /bdug spos g.yas kyis blangs nas ni/ /bcom ldan che ge rdo rje mchog /rig sngags rgyal la phyag 'tshal lo/ /thugs rje'i bdag nyid can khyod kyis/ /sang ni rab gnas bgyi bar 'tshal/ /slob ma rnams la brtse phyir dang / / khyed rnams la yang mchod pa dang / /sems can bsod nams spel phyir dang / /byang chub sems ni 'byung bya'i phyir/ /bcom ldan bdag ni gus pa la/ /de ni gnang ba mdzad pa'i rigs/ /sangs rgyas byang chub sems sogs dang / /sems can bstan la dga' ba gang //gang yang rdo rje'i spyan mnga' ba/ /thams cad bdag la dgongs su gsol/ /rdo rje 'dzin bdag 'di zhes bya/ /che ge mo yi rab gnas phyir/ /de bas khyod kyis bgyi bar 'tshal/ /kun du nye bar mdzad pa'i rigs/ /ting 'dzin gsum dang ldan par ni/ / rdzogs nas sku gzugs la sogs la/ /nam mkha' la gnas sangs rgyas dag /sku gzugs sogs la gzhug par bya/ /kha rgyan phyung ba'i chu yis kyang / /mnyam par gzhag pas bkru bar bya/ /de yis mchod sogs sngon byas te/ /sngags kyis mngon par bsngags par bya//'dud dang mchod pa sogs byas te/ /nang par byon par 'dod pa yis/ /yang ni mchod pa lnga rnams kyis/ /ye shes 'khor lo gshegs su gsol/ /'di ni lha sta gon la gnas pa'i cho ga'o/ /sta gon byas te nang par ni/ /byabs pa nyid la sogs pa bya//sngar bzhin sangs rgyas sogs spyan drangs/ /zhabs bsil mchod pa la sogs bya/ /pus btsugs bdug spos blangs nas ni/ /sngon du bshad pa'i tshigs bcad brjod/ /bgyi bar 'tshal ba'i tshig spangs te/ /bdag ni da ltar bgyid ces sbyar/ /bkra shis sgra ni sngon bsgrags te//chu yis slar yang bkru bar bya/ /ji ltar bltams pa tsam gyis ni/ /de bzhin gshegs kun khrus gsol ba/ /lha yi chu ni dag pa yis/ /de bzhin bdag gis khrus bya'o/ /oM sarba ta thA ga ta a b+hi She ka sa ma ya shri ye hUM/ 'di ni khrus kyi sngags so//ras sogs rang rang gsang sngags kyis/ /mnyam par gzhag pas dbul ba'am/ /yang na rang gi sngags kyis dbul/ /bzlas te phyag 'tshal gtso bo la/ /oM badzra ba Sh+Ta se swA hA/ me tog la sogs pa'i sngags su yang 'gyur ro/ /gser la sogs pa'i snod byas te//sbrang rtsi mar sar byugs pa yi/ /gser gyi thur ma yis ni mig /dbye ba'am yang na bsam gtan gyis/ /oM tsa k+Shu tsa k+Shu sa ma n+ta tsa k+Shu bi sho d+ha ni swA hA/ ji ltar rdzogs pa'i sangs rgyas kun/ /dga' ldan yang dag rab bzhugs nas/ /ji ltar lha mo sgyu 'phrul lhums//de bzhin 'dir gnas zhugs byas la/ /'dir ni rgyun du bzhugs gyur nas/ /mgon po me tog la sogs 'di/ /byang chub sems kyis bsdus pa'i phyir/ /che ge mo yi don du bzhes/ /lha rnams brten par 'dod pa yis/ /mgo bo snying ga lkog gnas su/ / rdo rje yis ni bskor nas de/ /lan gsum bskor te rab gnas bya/ /chad pa'am ni lhag pas kyang / /bdag gis brjed ngas gang bgyis pa/ /gang phyir lus can skyob mdzad pa/ /mgon po khyod kyis bzod par mdzod/ /ma rnyed pa dang ma shes pa/ /ma nus pa yang bzod par mdzod//nyung ba'am gzhan du bgyis pa gang / /de dag bzod par mdzad pa'i rigs/ /'di dang 'di ltar rab tu gnas par bya'o zhes pa de nyid kyi don mdor gsungs pa/ nam mkhar gnas zhes pa'o/ /shes pa zhes pa ni rab gnas kyi cho ga shes pa'o/ / sngags kyi pha rol phyin zhes pa ni sngags kyi theg pa'i pha rol tu phyin pa'am/ sngar bsnyen pas sngar gsungs pa'i pha rol tu phyin pa'o/ /sna tshogs hUM las skyes pa yi/ /zhes pa ni so sor me tog la sogs pa hUM las skyes pa'o/ /sngags 'di rnams kyis dbul bar bya'o//sngar rgyud cho ga'i rim pa yis/ /zhes pa ni 'di ni rgyud phyi ma ste de kho na nyid bsdus pa dang / gsang ba 'dus pa la sogs pa rgyud snga ma ste/ de las gsungs pa'i cho ga'i rim pas so/ /da ni thab khung gi mtshan nyid gsungs pa/ zhi ba'i zhes pa'o/ /lhag ma de nyid kyis bsgrub bya zhes pa dbang dang /dgug pa dang / 'thab pa dang / bskrad pa la sogs pa'o/ /khru gcig pa'am khru phyed ces pa ni bsdus pa'o/ /'og dang steng du zhes pa ni gting dang rgyar zhes bya ba'i tha tshig go/ /de la 'di'i rim pa ni/ /khru gang rgyal mtho gang zabs/ /'khor lo lta bur zlum po'o//pad+ma kha bye lta bu la/ /ngos su sor bzhi dor byas te/ /de tshad kha khyer rdo rje yi/ /ra ba yis ni mdzes par bskor/ /shar du sa dkar gyis byas te/ /tsan+dan gyis ni nye bar byugs/ /sa tshon me tog dkar po dgram/ /pad+ma 'dab brgyad dbus chud par//lte ba la ni thod pa gzhag /der ni sna tshogs rdo rje bri/ /rgya dang 'phang la kha dog dkar/ /sor drug sor phyed pa yi tshad/ /lha mo'i mtshan ma dbus gnas pa/ /kye'i rdo rje yi phyogs las 'di/ /bdag med ma yi sgrub par ni/ /gri gug lnga dang ldan pa yi/ /dkar po'i cha byad 'dzin pa ste//cung zad zhal phye zhi ba'i sems/ /blo ldan 'jam pa'i stan la ni/ /'dug ste yang dag mngon phyogs nas/ /g.yon du dung la sogs pa dkar/ /me tog chu dang ldan pa'o/ /rang gi lha yis yang dag bzlas/ /snod ni gsum dag gzhag bya ste/ /mar la sogs pa g.yas su gzhag /mkhas pas bshad bzhin sbyin sreg bya/ /khru gnyis pa dang khru gcig pa/ /logs dang 'phang du rgyas pa la/ /gru bzhi pa la kha khyer yang / /snga ma'i nyis 'gyur tshad kyis so/ /kha dog ser po'i sa yis byugs/ /me tog ser pos brgyan par bya/ /phreng ba gos ni ser por ldan//nang bar byang du kha bltas te/ /ji skad gsungs pa'i bud shing ni/ /sngon bzhin gzhan du lci ba yang / /ser po'i dri dang chu mchod yon/ /cho ga sngon du byas la gzhag /de nyid yam shing thams cad du/ /ser po'i dri yi chu yis bsang / /zho dang sbrang rtsi mar dang ldan//til dang sA lu 'bras bur bcas/ /mkhas pas ji ltar rnyed pa yis/ /kun du bil bas sbyin sreg bya/ /oM gyi mtha' yi gsang sngags kyis/ /rgyas par 'gyur la the tshom med/ /rgya dang rngams kyi tshad dag tu/ /sor ni nyi shu de yi phyed/ /gsad pa la ni thab khung 'di/ / kha khyer sor mo gsum gyis bskor/ /khrag dang chu yis gsher ba'i ras/ /yang na sngon po'i rgyan gyis brgyan/ /nyi ma'i gung dang nam phyed la/ /sra ba'i stan la gshin rjer blta/ /rus pa rdob ni ma pa'i 'dab/ /bca' bar byed cing khro gnyer gdong / /tsha ba tsher ma kha ba rnams/ /yam shing la ni thal bas byug /yungs kar dang ni yungs mar khrag /tshwa dang rus phye ske tshe dang / /ro bsregs rdul dang rkang rjes sa/ /bya rog la sogs gshog pa dang / /bshang ba gci ba tsher ma rnams/ /bdag nyid khros pa'i sbyor ba yis/ /bsgrub bya rkang pas mnan nas su//oM g+huHswA hA zhes pa'i sbyin sreg bdun gyis dgra bo brlag par 'gyur ro/ /oM khaM gis sbyin sreg bya ste khros pa'i sems kyis skrod par byed do/ /bsgrub bya bong bul zhon te kha steng du phyogs par bsgom mo/ /'di ni mngon spyod kyi sbyin sreg go/ /'di ni dpal ldan gos dmar bgo//sa dmar po dang dri yis bya/ /ma da na sogs sbyor ba yis/ /rnal 'byor shar du kha bltas te/ /chags pas de bzhin dmar pos brgyan/ /de nyid rdo rje skyil krung gis/ /dmar po'i stan ni mtho la 'dug /smad 'tshong ma las mnyam gzhag pas/ /ut+pal dmar pos ci rigs par//me tog dmar po 'bras bus kyang / /oM swA hA zhes sngags kyis ni/ /bsregs pas 'gro ba dbang du byed/ /oM hUM swA hA'i sngags kyis ni/ /yang na lcags kyu'i thab khung gis/ /dgug la steng du kha bltas te/ /gar mkhan me yis gnas gsum 'gugs//'di ni phyi yi sbyin sreg yin/ /da ni nang gi bshad bya ste/ /lte ba'i pad+ma'i thab khung cher/ /de la gtum mo'i shes rab me/ /las kyi rlung gis 'bar ba las/ /dogs pa med pas sbyin sreg bya/ /phung po'i khams sogs kun rtog pa/ /lus pa med pa'i yam shing bsreg /gzhom du med pa'i dgang gzar gyis/ /rdzogs pa'i byang chub sems kyi rgyun/ /bde ba chen po'i rab sbyor bas/ /de la sreg blugs dbul bar bya/ /chos dang gang zag bdag med pa'i/ /sta gon rab tu gnas par bya/ /stong pa snying rje dbyer med pa'i//byang chub sems ni de nyid yin/ /don kun sgrub byed sbyin sreg dang / /mchog tu rab tu gnas par gsungs/ /yang gsungs pa/ de nyid sngags bzlas pa dang / de nyid brtul zhugs dang / de nyid sbyin sreg ces bya ba la sogs pa'o/ /zhi ba la sogs pa'i gtso bo'i sreg rdzas gsungs pa/zhi ba la til zhes bya ba la sogs pa'o/ /sngags kyi gnas skabs su sa sta gon du bya ba'i sngags gsungs pa/ lha mo khyod ces bya ba la sogs pa'o/ /brtag pa gnyis pa'i le'u dang po'i bshad pa'o// // thabs du ma zhig gsungs na yang nges par gsungs pa'i phyir zhus pa/ nam mkha' bzhin zhes pa ni nam mkha' lta bu'o/ /chos rnams la zhes pa ni mtha' yas pa de'i phyir/ rang bzhin med pa'i ngo bo dri ma med pa'i ngo bo des so/ /ji ltar rgya mtshor ku ba ltung nga chung ba dang / nges pa med par 'gro ba de bzhin du sems can nges pa med par 'gro ba dang / dge ba ji ltar nges pa'i thabs gang gis ji ltar 'grub par 'gyur/ 'dir lan du/ bdag med pa yi sbyor ba yis/ /zhes pa bdag med pa'i sbyor ba dang ldan pa ste/ bskyed pa dang rdzogs pa'i rnal 'byor dang ldan pas zhes bya ba'i don to//yang na ni phyogs gzhan nam sdud par byed cing / bsod nams dang ye shes kyi tshogs mtha' yas pa bsags pa'i thabs kyis de'i 'gro ba'i thabs nges par gyur pa 'dir ston par byed pa ni skad cig kyang gzhan sems med pas zhes so//gnas ni rnam brtags zhes pa ni thams cad du khyad par med pa'i thun mong gis kyang gnas nges par brtags pa'i thabs kyis brtan pa de ji lta bu snyam pa la gsungs pa/ rang gi khyem zhes pa'o/ /dngos grub bdag nyid sems 'di yis/ /zhes pa ni bdag ni rang bzhin gyis dag pa'o snyam du nga rgyal dang ldan pa'o//skad cig kyang gzhan sems med pas/ /zhes pa 'di'i bshad pa gsungs pa/ rkang pa zhes bya ba la sogs pa'o/ /bcom ldan 'das ma zhes bya ba la sogs pa la/ bcom ldan 'das ma ni rnal 'byor ma'o//bsten par bya ba ni bsgom par bya zhes bya ba dang sbyar ro/ /skad cig gzhan gyi gzugs kyis min/ /zhes pa ni dbye ba'i tshul gyis so/ /bye brag gi sems nyid ma rig gdug pas min zhes sun 'byin no/ /cung zad du 'jig pa zhes pa ni bag chags dang bcas pa'i sgrib pa'i sdig pa cung zad do//de lta bur gyur pa'i sgom pa'i phan yon gsungs pa/ 'jigs dang smyo zhes pa'o/ /smyo ba ni sems rnam par 'khor ba'o/ /de'i phyir 'di ltar dpyad ces pa ni rnal 'byor pas so/ /phan dang gnod pa'i 'bras bu 'byung / /zhes pa ni bsam gtan 'di'i 'bras bu ni phan pa'o//sems gzhan gyi 'bras bu ni mi phan pa'o/ /ngu 'bod ni sdug bsngal drag po dang / rnam par rtog pa la sogs pas 'khrugs pa'i 'khor bar ro/ /'o na re zhig gang dag bsod nams kyi las byed pa de dag 'dir 'jug pa'i gnas nyid do/ / gang dag sdig pa'i las byed pa de dag gi yang mi 'jug pa nyid du 'gyur te/ 'bras bu mi myong bas so/ /de rnams kyi 'jug pa yang ji lta bu snyam pa la gsungs pa/ mtshams med lnga po byed pa dang / /zhes bya ba la sogs pa ste/ 'di nyid kyi mthus sdig pa de dag rnam par bcom pas so//de bas na de bslabs pas de rim gyis zad nas bsod nams dang ye shes kyi tshogs nye bar bsags na de dag kyang snod ces bya ba'i don to/ /de ltar rgyun du sbyor ba yis/ /dngos grub 'thob ces bya ba ni nus pa cung zad 'thob pa'o/ /zla ba gcig tu gsang la zhes pa ni gang du cung zad kyang mi bstan pa'o//spyod pa rnal 'byor pa nyid ces pa ni rgyu bar bya ba'o/ /mchog rnyed ces pa ni rnal 'byor mas bstan pa rnyed pa'o/ /de'i phyir/ rtog pa thams cad rnam par spangs/ /zhes pa'o/ /bdag nyid brtan pa'i rkyen du'o/ /zhes pa ni bdag nyid sdug bsngal la sogs pa 'jig rten gyi chos rnams kyis mi 'phrogs pa de rtogs par bya'o//longs spyod kyi phyir ma gsungs zhes pa ni phyag rgya chen po thob pa'i don du longs spyod kyi tshul gyi ma yin pa'o/ /'jigs pa'i tshul gyis zhes pa ni thams cad du sems rtse gcig pa nyid kyis dka' ba spyad ces bya ba'i don to//bdag ni brtan pa'i rkyen du'o/ /zhes bya ba 'di'i bshad pa ni/ rang sems so sor brtag par bya/ /zhes so/ /phyag rgya nyid de ji ltar dbye snyam pa la/ 'dir phyag rgya zhes pa ni phyag rgya'i dbye ba ji ltar rung ste/ 'dir phyag rgya dang phyag rgya gzhan du sbyor bar mi rung ngo //phyag rgya zhes pa ni re zhig bdag med pa'i phyag rgya 'di dang / gal te de'i yang phyag rgya gzhan yin na ji ltar dngos grub 'thob ste/ thabs dang shes rab kyi sbyor ba'i dngos po med ces bya ba'i don to/ /'dir lan du bud med gzugs zhes pa'o//ngos gnyis zhes pa ni pad+ma'i 'gram gnyis so/ /dril bu zhes pa ni 'bras bu'o/ /pad+ma'i dbus gnas zhes pa ni lte ba rdo rjer 'gyur zhes bya bar sbyar ro/ /nus pa gsal ba zhes pa ni gsal ba'i tshul gyis nus pa skyes pa mthu'o/ /nus pa srid pa tsam gyis ni ma yin te/ gang gi phyir phyag rgya chen po'i dngos grub ni phyag rgya chen po'i dngos grub ste/de'i phyir de dang de nyid kyi dbang du byas te spyod pa bya'i gzhan du ni ma yin no/ /da ni phyag rgya chen po'i dngos grub thob pa'i rnal 'byor ba'i skye ba dang 'chi ba dgag pa'i phyir gsungs pa/ skye ba dang ni 'jig pas kyang / / zhes so/ /thabs dang shes rab ces pa'i thabs dang shes rab dbyer med pa'i byang chub kyi sems kyi tshul gang yin pa'o/ /gang de ji ltar skye ba dang 'jig pa dag gis 'ching bar 'gyur/ /thabs dang shes rab kyi rang bzhin gsungs pa/ thabs ni gang gi phyir 'byung ba ste zhes pa ni gang gi phyir rnal 'byor pa'i thabs kyi stobs kyis 'byung ba ni skye ba dang byang chub pa dang chos kyi 'khor lo bskor ba la sogs pa ste/'di dag ni thabs so/ /shes rab ni de'i srid pa mthar phyin pa'o/ /de nyid du skye ba la sogs pa yang mi rtog ste gang shes rab 'di la ste/ de nyid kyis 'dir zhig pa ni 'dus par byed pa ste/chos thams cad 'di dang 'dir bya ba'o/ /de'i phyir rnal 'byor pa rnams kyi don dam pa la skye ba dang 'jig pa med do/ /kun rdzob tu ni byang chub pa dang / yongs su mya ngan las 'das pa la sogs pa 'jig rten gyi spyod pas 'jug par mdzad do/ /'jig pa zhes pa ni rgyu dang rkyen gyis sbyor ba dang bral bas 'jig pa ni 'chi ba'o//'jig dang dngos med zad pa'ang med/ /ces pa ni gang rgyu dang rkyen ma tshang ba med pa de la 'jig pa med do/ /'di'i don gang la chos dang chos ma yin pa yod na zad pas ni de nges par 'jig go/ /gang gi chos rnams skye ba med pa yin na ngo bo nyid kyis med pa de dang de dag ji ltar 'jig ces bya ba'i don to//da ni bskyed pa'i rim pa'i bdag nyid chen po gsungs pas/ bskyed pa'i rim pa zhes pa'o/ /phyag rgya chen po'i dbang bskur ba/ /zhes pa ni shes rab ye shes kyi dbang bskur ba'o/ /shes par bya ba ni nye bar brtag pa'o//bde ba chen po khyab par byed pa nyid do zhes bstan par bya ba ni bde ba zhes bya ba la sogs pa'o/ /rdzogs pa'i rim pa nyid bstan par bya ba'i phyir/ rdo rje snying pos gsol ba/ rdzogs pa'i rim pa zhes pa'o/ /e ma'o dad pa'i shugs kyis zhes bya ba ni shin tu dad pas so//'di'i don ni gang la skad cig gis dmigs te/ bde ba'i blo dang ldan pa'i lha/ /shin tu yid ni dga' nas te/ /dga' dgur spyod pas myur du 'grub/ /ces so/ /dngos po nga zhes pa ni thabs kyi tshul gyis so/ /dngos po med pa nga zhes pa ni shes rab kyi tshul gyis so//'chad pa po nga zhes pa ni longs spyod rdzogs pa'i sku'o/ /chos ni chos kyi sku'o/ /nyan pa ni sprul pa'i sku'o/ /yang na thams cad da'i rang bzhin zhes pa ni nyan pa la sogs pa'i dngos po rnams kyang sangs rgyas nyid do/ /chos rnams ngo bo nyid kyis dag pa nyid do//bsgrub bya nga zhes pa ni mi shes pa'i sgrub pa pos so/ /de bzhin du yang rkyen yin zhes pa ni/ de bzhin du yang rig pa'o/ /gang / nga nyid ston pa sum cu rtsa gnyis mtshan/ /zhes pa ni longs spyod rdzogs pa'i skus chos ston par byed pa'o/ /de nyid khu ba zhes bya zhes pa ni sprul pa yis dang /bde ba'i tshul gyis chos kyi sku mtshon par byed pa'i tshul gyis gsungs so/ /de med pas na zhes pa'o/ /de'i phyir longs spyod rdzogs pa dang sprul pa dag gi dngos po yang lhan cig skyes pa der dngos po med pa'o/ /de'i tshul gyis gnas kyang phul du byung ba'i snying rje nyid kyis sku gnyis po sprul pas dngos po med pa ma yin no//yang na lhan cig skyes pa yang dag par rigs pa'i tshul des shin tu dngos po med pa'i rang bzhin nga ma yin no/ /de'i phyir 'gro kun lhan cig skyes/ /zhes pa gang las snyam pa la gsungs pa/ lhan cig skyes pa'i rang bzhin brjod//ces pa ste/ dngos po rnams rang bzhin gyis lhan cig skyes pa ste/ de yang thams cad du ma skyes pa nyid kyis gnas te/ chos rnams kyi rang bzhin med pa nyid kyi rang bzhin no/ /de ltar na rmi lam lta bu nyid kyis dngos po rnams re zhig sems las phyi rol na med par grub bo//de yang gcig dang du ma dang bral zhing rgyu dang bral bas ngo bo nyid med pa dang / skye ba med pa ste sgyu ma lta bu'o/ /de bas na dngos po thams cad rang bzhin med pa nyid de/ rtag tu lhan cig skyed pas gnas/ /zhes so/ / lha yi rnam pa'i gzugs dang ldan/ /zhes pa gang las sangs rgyas dang mi'i lus dag dbye ba ni/ phyag dang zhal gyi rnam pas re zhig bye brag med de/ phung po lnga nyid du yang bye brag med de/ sha la sogs pa pu k+ka sI la sogs pa'i tshul gyis rnam par gzhag pas so/ /gal te sangs rgyas kyi sku dag rnam par shes pa'i rang bzhin dang 'di dag sa la sogs pa'i rang bzhin no snyam na/e ma'o zhes ma shes pa yin te/ da ltar nyid du chos 'di dag thams cad rnam par shes pa'i rang bzhin du mthong ste bye brag cung zad kyang med do/ /de ltar na gal te ji ltar 'khor snyam pa la/gsungs pa/ 'on kyang rang bzhin bag [(]chag [,]chags [)]kyis/ /zhes pa ste/ thog ma med pa'i ma rig pa'i bag chags kyis rang bzhin snang ba ma yin pas so/ /gal te ma rig pa nyid gang las skye zhe na/ las la sogs pa las skyes so/ /gal te ma rig pa nyid gang las snyam pa la/ma rig pa gzhan las zhes bya ba la sogs pa las so/ /chos thams cad yod pa ma yin na gal te ma rig pa gang las she na/ de ltar bden te brtan par rtogs na ma rig pa yod pa ma yin te/ 'di dag brtan par rtogs par bya ba'i phyir ston par byed de/ ma rig pa med na chos thams cad skye ba med cing mya ngan las 'das pa'o//de nyid gsungs pa/ gang gis bya ba la sogs pa'o/ /mi shes sangs rgyas mu stegs pas/ /zhes pa la sangs rgyas kyis ni nyan thos la sogs pa rnams kyis so/ /mu stegs kyi shes pa ni mu stegs thams cad kyis so//gcig nyid dga' ba chen po ni lhan cig skyes pa'i dga' ba'o/ /lnga ru 'gyur ba'i dbye ba ni/ /zhes pa ni de dbye ba'i grangs kyis so/ /de bzhin gshegs pa'i dbye bas rdo rje sems dpa'i dbye ba ste rigs lnga rnams su'o/ /yang de bzhin gshegs pa rnams nyid nang gi dbye ba'i bsam pas so//de'i phyir gcig gi ngo bo ni zhes pa 'di nyid kyi phyir thams cad skye ba med pa de nyid kyi rang bzhin nyid de/ ji ltar sa las byung ba bum pa dang kham phor la sogs pa sa'i gzugs ma spangs pa lta bu'o/ /de nyid kyis gsungs pa/ mchog tu dga' ba las byung ba/ / zhes pa ste/ de bas na de nyid las byung ba thams cad du mtha' yas pa'i rigs gzhan rnams kyang zhes bya ba'i don to/ /brtag pa gnyis pa las dngos grub gtan la dbab pa ste le'u gnyis pa'i bshad pa'o// //de nas rdo rje can zhes pa rdo rje sems dpa'o/ /rgyud thams cad kyi gleng gzhi zhes pa ni rgyud kun gyi gleng gzhi ste gang gi don gyis rgyud ma lus pa la 'jug pa de'i thabs zhes bya'o//rnal 'byor ma rnams kyi zhes bya ba ni rnal 'byor ma dag gi phyir ram/ rnal 'byor ma rnams te thabs gang gis 'grub ba'o/ /de'i thabs bka' stsal pa/ de ci snyam pa la/sdom pa zhes bya ba la sogs pa bzhi'o/ /sdom pa ni bde ba'i mchog gam chos thams cad kyi bdag nyid de bzhin gshegs pas bsdus pa'o/ /dbang bskur ba las shes par bya/ /zhes pa ni gang du e dang waM las dbang bskur ba shes par byed pa'o/ /yang dag ces pa ni mchog gi dbang bskur bas dri ma ma lus pa ra 'khru bar byed pa'o//de ci snyam pa la gsungs pa/ bde ba chen po ste bde ba chen po'i ye shes so/ /de nyid kyi don gsal bar bya ba'i phyir rnal 'byor ma rnams kyis zhus pa de nas shes pa'o/ /waM ni thabs su gyur pa'o/ /brgyan pa ni rgyan byas pa'o//de gsungs pa/ e ni shes rab ces byar gsungs/ /waM ni thabs zhes bya ba gang / /waM zhes bya bas mdzes pa yang / /e ni nges par mdzes pa yin/ /skad cig ye shes zhes pa skad cig gi dbye bas dga' ba la sogs pa yongs su shes na bde ba'i ye shes te bde ba chen po'i ye shes yin no//skad cig gis dbye ba nyid gsungs pa/ rnam pa sna tshogs zhes bya ba la sogs pa'o/ /de ltar shes par byed ces pa ni e waM gyi sdom pa shes par byed do/ /rnam pa sna tshogs sna tshogs dga'/ /'o dang 'khyud pa la sogs pa'o//rdo rje pad+ma mnyam sbyar bas/ /rnam par smin pa ye shes mchog /rnam nyed phyag rgya nyed pa'o/ /mtshan nyid bral ba nges brtag bya/ /gang las gang du ji ltar bsgrub par bya ba brtag snyam pa la/ slob dpon zhes pa ste/ slob dpon gyi dbang bskur ba bzung bas chu dang cod pan la sogs pa dbang bskur ba bdun bsdus te des sku rnam par dag pa'o//gsang ba'i dbang bskur bas gsung rnam par dag pa'o/ /shes rab kyi dbang bskur pas thugs rnam par dag pa'o/ /yang dag par brtag par bya ste/ bzhi ba bsgrub par bya bas bsgrub par bya'o/ /'di nyid kyi dga' ba la sogs pa'i rim gyis dbang bskur ba bzhir shes par bya'o//shes rab ye shes kyi dbang bskur ba gcig nyid du dbang bskur ba bzhi'i tshul nyid du gsungs pa/ dgod pa zhes pa dgod pa dang smra ba la sogs pa rnam par dag pa slob dpon te/ rnam pa sna tshogs su brtson pa nyid do//gsang bar lta ba ni gsang ba'i dbang bskur ba'o/ /lag pas 'khyud pa'i sbyor ba shes rab ye shes dbang bskur ba'o/ /de yang zhes pa ni bzhi pa'o/ /gnyis gnyis 'khyud ces pa phan tshun du 'dus pa na rgyud gang yin pa thabs dang shes rab kyi bdag nyid dbyer med pa'i ye shes der gnas pa'o//bkrus pas shes rab dri ma med par bya ba'o/ /rdo rje dril bu mnyam sbyor bas/ /zhes pa ni rdo rje la sogs pa'i dbang bskur ba thob pas slob dpon gyis dbang bskur bar byed pas dbang bskur ba'o/ /bzhin bzangs zhes pa byin gyis brlab par bya zhes bya ba'i don to//slob ma shes bya ba zhes pa ni shes rab kyi dbang bskur ba'i skal ba dang ldan par shes par bya'o/ /da ni slob mas ji ltar bla ma la mchod par bya ba dang / shes rab ye shes kyi dbang bskur ba'i phyir gsol ba gdab par bya ba'i cho ga de gsungs pa/ phyag rgya ldan zhes pa rgyan thams cad yongs su rdzogs pa'i phyag rgya dang ldan pa'i bla ma la mchod pa byas nas 'dis bstod de/kye bcom ldan 'das zhes bya ba la sogs pa gsungs so/ /nye bar zhi ba zhes pa nyon mongs pa'i me nye bar zhi bas zhi ba chen po'o/ /rdo rje rnal 'byor ni thabs dang shes rab kyi bdag nyid dbyer med pa'o/ / dal gcig tu brtson pa ni de'i gnyis su med pa'i sems kyis so/ /phyag rgya rab sgrub byed ces pa ni phyag rgya chen por rjes su chags shing skyed par byed pa nyid kyis dbyer med pa'o/ /ji ltar khyod ces pa thabs gang gis bdag nyid chen po khyod kyi mthu chen por gyur pa'o/ /bdag kyang zhes pa thabs des phun sum tshogs par mdzod cig pa'o//sha chen po zhes pa ni mchog tu mang ba'o/ /phyi nas zhes pa ni slob mas mchog tu dga' ba yang dag par thob par ro/ /ston pa ni slob ma'o/ /brjod ces pa ni ci brjod ce na/ gzung bar gyis zhes pa ste brtan pas ye shes la 'di ltar de kho na nyid brtan par gyis zhes pa'o//dbang bskur nas bya zhes pa ni gang gis gnas par bya ba ste/ de'i tshogs gang yin pa'o/ /dbang bskur nas de kho na nyid gsal bar bya'o zhes pa ni slob dpon la sogs pa dbang bskur ba gsum byin nas bzhi pa gsungs pa/'di nyid ces pa ni gang khyod kyis shes par bya ba ste/ de nyid thams cad du khyab par byed pa dang / gnyis su med pa dang stong pa nyid dang snying rje dbyer med pa'i byang chub kyi sems dang gnyis kyi gzugs dang mi ldan pa'i de kho na nyid do/ /'di nyid khyod kyi dkyil 'khor 'khor lo'i thabs kyis zhes pa ni mngon du bya'o zhes pa'o//dkyil 'khor 'khor lo'i thabs kyis ni/ /zhes pa thos nas de'i don rdo rje snying pos zhus pa/ dkyil 'khor 'khor lo ci zhes pa'o/ /bcom ldan 'das kyis bka' stsal pa/ dkyil ni snying po zhes pa ste de nyid snying po'o/ / de ci snyam pa la/ byang chub sems ni bde chen po/ /zhes pa'o/ /de ltar dkyil 'khor snying po de len par byed pa ni thob par byed pa ste/ de ni dkyil 'khor ro/ /de nyid 'khor lo ste kye'i rdo rje'i rnal 'byor ma rnams kyi tshogs 'dus pa'o/ /mkha' dbyings zhes bya ba zhes pa ni nam mkha'i khams rnam par dag pa rdo rje sems dpa'i rang bzhin no//de nyid thams cad du yul la sogs pa rnam par sbyong ba zhes pa ni sbyong bar byed pa ste/ yul ni gzugs la sogs pa'i skye mched rnams so/ /sogs pas ni mig la sogs pa'i skye mched dang phung po la sogs pa gzung ngo //rdo rje snying pos gsol pa/ dbang bskur nas dam tshig gang gis gnas par bgyi zhes pa'o/ /'dir lan du 'di'i don gyis srog chags rnams kyang zhes bya ba la sogs pa'o/ /don 'di nyid nges pa'i don gyis gsal bar byed pas sems gcig ces par ni srog chags ni 'dir rnam par rtog pa ste/rnam par rtog pa nye bar zhi ba nyid gnyis su med pa'i ye shes su srog chags nye bar sdud pa ni gsod pa ste/ srog chags ni sems so/ /gang phyir srog ces pa ni srog chags ni 'dir sems las ma gtogs pa med de/ sems kyang sems can la sogs pa rnam pa du mas rab tu 'jug go//de sdud pa nyid bsad pa'o/ /'jig rten bla med byar 'dod pa/ /zhes pa brdzun te/ ngo bo nyid kyis dag pa ni sems can rnams so/ /sems can nam mkha' dang mnyam pas de dag ji ltar bsgral te/ de ltar yang de'i phyir yal bar dor ba ma yin zhes gsungs pa yin pas sems can bla na med par bya bar 'dod pa yin no//snying rje ldan pas bya ba ni/ /sems can yal bar dor mi bya/ /sems can yod dang med pa zhes/ /de ltar rtag par bya ba min/ /zhes so/ /yul la sogs pa rnam spyod byed/ /ces gsungs pa de gsal bar bya ba'i phyir zhus pa/gang yang de dag ces pa'o/ /'di rnams sbyong ba bstan par bya ba'i phyir gsungs pa/ rang bzhin gzod nas skye ba med/ /ces pa'o/ /de nyid kyis 'di rnams skye ba med de/ gzugs brnyan la sogs pa lta bur/ bden pa ma yin brdzun pa min//zhes so/ /de ni skye ba med pa yang rten cing 'brel par 'byung ba nyid du ston par byed pa ni/ gtsub shing zhes pa'o/ /de ltar chos thams cad rnal 'byor ma rnams zhes pa ni de ltar chos thams cad gzod ma nas skye ba med pa dang rang bzhin gyis dag pa dang / lhan cig skyes pa tsam du mchog tu gzhol ba dang /brdzun pa ma yin pa dang / bden pa ma yin pa dang / gzod ma nas zhi ba'o/ /chos thams cad 'di ltar bdag med par thos nas rnal 'byor ma rnams dga' ste bcom ldan 'das la yang dag par mnyes par byad do/ /bcom ldan 'das kyang mnyes nas yang dag par gsungs pa/bza' btung zhes bya ba la sogs pa'o/ /de ltar chos thams cad skye ba med par shes pa'i rnal 'byor bas 'di ltar bya ste/ de la bza' ba sha lnga la sogs pa dang / btung ba ste byang chub kyi sems la sogs pa'o/ /bgrod bya ste yul las byung ba'i bde ba'o/ /bgrod min te yul las 'das pa'o//gtsang sbra ni dag par rtog pa ste/ chos kyi dbyings so sor rtog pa las lhag pa'i gtsang sbra mi byed pa'o/ /grang gi chos ni bde bar yang dag par shes nas spong bar mi byed pa'o/ /sngags ni yi ge so sor nges pa dang ma nges pa'i rim pas so/ /rtog pa ni sngags nges pa'i rim pas so//gnyid ni rnal 'byor gyi gnyid de de spang bar mi bya ba'o/ /de dang de'i dbang po'i rnam par dag pa grub pa'i dbang po rnams rang gi rjes su mthun par yul la myong bar byed pas dgag par mi byed do/ /grogs po la byams pa zhes bya ba la sogs pas rjes su chags pa dang khong khro ba spangs pa gsungs so//lha ni de bzhin gshegs pa'o/ /phyag mi bya ba ni de dag dang bdag bye brag gi blo mi bskyed pa'o/ /Dom+bi la sogs pa yang bdag nyid dpal he ru ka'i sku bzhin du reg pa'o/ /bu ram ni khrag go/ /chang ni rkang mar ro/ /dug ni zhag go//nim pa ni pags pa ste/ de yang bu btsas pa las byung ba'o/ /skyu ru ra yis rlung sel byed/ /mngar ni mkhris pa sel bar byed/ /ska bas mig ni dag pa yin/ /kha bas rims ni 'jig par byed/ /tshwa yis me ru 'gyur ba yin/ /tsha bas bad kan 'joms par byed//ces so/ /bdud rtsi lnga zhes bya bar gsungs/ /zhes pa de'i bshad pa rus pa zhes bya ba la sogs pa ste/ rus pa don yod grub pa'o/ /chang ni rnam par snang mdzad do/ /chu ni mi bskyod pa zhes bya/ /khrag ni rin chen 'byung ldan no/ /'di dag bcud kyis len rnams te/ / nad rnams thams cad 'jig par byed/ /thams cad srung bar byed pa'i gtso/ /rtog pa thams cad 'joms byed pa/ /sngar ma gsungs pa'i rnam par dag pa rnams kyi rnam par dag par bya ba'i phyir zhus pa/ dbang po rnams zhes pa'o/ /sngar bstan pa'i dgongs pa bstan pa bshad pa zhus pa/dgongs pas bshad pa gsungs pa ci/ /zhes pa ni/ dgongs pas zhes bya ba la sogs pa'o/ /rgyud kyang rnam pa bzhi rnams kyi/ /zhes pa ni bya ba dang spyod pa dang rnal 'byor dang rnal 'byor bla ma las kyang ma gsungs so/ /rigs lnga zhes pa ni 'di dag rigs lnga rnams te sangs rgyas lnga'o//de nyid gsungs pa g.yung mo zhes pa'o/ /khyi sha 'tshed ma ni tsaN+DalI'o/ /dam tshig gnod pas zhes pa ni nyams pa'o/ /rgyud thams cad kyi gleng gzhi'i le'u ste gsum pa'i bshad pa'o// //da ni sngar gsungs pa rnams kyi bshad pa'i le'u gsungs pa//de nas zhes pa'o/ /the tshom skyes pa ni the tshom skyes pa nyid kyis yid mi bde ba'o/ /gal te dga' bas glu len na/ /de tshe rdo rje mchog ldan pas/ /zhes bya ba la sogs pa gang gsungs pa/ glu dang gar de la rdo rje dang ldan pa ci/ rdo rje rkang pa'i gar ji lta bu zhes pa dang /lha dbang bskur ba zhes pa lha dbang bskur ba'i le'u ru gang gi phyag rgya gang gis gdab ces pa/ gang la gang gis gdab par bya/ /zhes pa'o/ /sngags btu ba zhes pa sngags kyi le'u ru'o/ /de la gang dang gang gi sa bon zhes bya ba'i don to/ /de la rdo rje'i glu re zhig gsungs pa/kol+la i re T+Thi a zhes pa kol+la i re T+Thi ni gnas so/ /de la gnas pa'i bo la'i sbyor bas bo la ni rnal 'byor pa'i rdo rje'o/ /mum+mu Ni zhes pa ni/ zhing ni mum+mu Nir rab grags/ /zhes so/ /de la gnas pa de'i sbyor bas kak+ko la ni rdo rje'i rnal 'byor ma rnams kyi'o/ /gnas la sogs pa na bzhugs pa'i rnal 'byor dang rnal 'byor ma rnams su 'dus par gsungs so//de la 'dus par de rnams kyi lhan cig skyes pa'i rjes su mthun par bya ba gsungs pa/ g+ha Ne kr-i pi Ta ho bA dz+dza i zhes pa de la/ rde'u chung rgyun mi chad par brdung bar bya ba ste/ chos thams cad sgra brnyan lta bur gsungs pa/sngon du bya ste gar dang glu bya ba'i don to/ /kA ru Ne ki a i na ro lA zhes pa rtsod par mi bya ba ste/ der phan tshun du byams par bya zhing sems can thams cad la yang snying rje bar bya'o/ /ta hiM ba la khAdz+dza i zhes pa der yang sha bza' bar bya'o/ /g+ha D+heM ma a Na pi dz+dza i a i zhes pa shin tu dga' ba skyed par byed pa'i chang btung bar bya'o//ha le zhes pa rnal 'byor ma rnams la bod pa'o/ /kA li ny+dza ra pa Ni a i zhes pa der skal ba dang ldan pa'i rnal 'byor dang rnal 'byor ma rigs lnga la sogs pa nas phyung ba bzhugs par bya ba'o/ /dun+du ra bAdz+dzi a i zhes pa dun+du ra ni dbang ma bskur zhing the tshom dang ldan pa ste phyir spang bar bya ste gzhug par mi bya'o//zhugs pa yang phyir dbyung bar bya ste/ de rnams nyid kyis ngan 'gro bsrung ba'i phyir ro/ /tsa u sa ma kats+tshu ri sih+la/ kAp+pU ra lA i a i zhes pa dri chen dang rin chen 'byung ldan dang snang ba mtha' yas rnams der phyi dang nang du lus la byug par bya'o//mA la in+d+ha Na sA liny+dza/ ta hiM b+ha ru khA e a i/ /zhes pa tshod ma rnams dang sha chen khyad par gyis der bza' bar bya'o/ /phreM kha Na khe Ta ka ran+te/ shud+d+ha a shu d+d+han mu Ni a i/ zhes pa phan tshun dam tshig byin te/ gar la sogs pas 'gro ba dang 'ong bar byed cing 'di dag ni dag pa'o/ /'di dag ni ma dag pa'o zhes yid la mi byed pas dmigs pa med pa ste/ dmigs pa med pa'i sbyor bas thams cad bya zhes bya ba'i don to/ /ni raM shu a ge tsa DA bi/ ta hiM dza sha rA wa pa Ni a i zhes pa 'khor lo der yang rus pa'i rgyan yan lag rnams la gdags so//shA rA ba zhes pa ro ste gzhug par bya ba'o/ /ma la a dza kun du ru pA Ta i zhes pa 'dus pa der phan tshun du bde ba chen po'i rgyu'i phyir sbyor bar byed pa'o/ /Di N+Di ma ta hin+na bAdz+dzi a i zhes pa der yang sbyor ba la g.yung mo spang bar mi bya'o//yang na kol+la i reT ces pa ni mgo bo la'o/ /ji a ni gnas pa'o/ /bo la ni rdo rje 'dzin pa gzhom du med pa'o/ /mum+mu Ni re ni lte ba'i pad+mar ro/ /kak+ko lA ni shes rab bo/ /de la g+ha Ne zhes pa ni rgyun du dga' bral med pa'o/ /kr-i pi Ta ho ni gzhom du med pa'o/ / bA dz+dza i zhes pa ni chang 'bab pa'o/ /kA ru Ne zhes pa ni bde ba chen po'i ye shes kyis so/ /ki a i na ro lA zhes pa ni rnam par rtog pas rtsod pa mi bya ba'o/ /yang na kA ru Ne zhes pa ni bde ba chen po'i rgyus so/ /ki a i na ro lA zhes pa ni thabs dang shes rab dag gi g.yul 'thab pa'o//ta hiM ni der char 'bab pa na'o/ /ba la khA dz+dza i zhes pa ni sha ni tha mal pa'i sha rnams bza' bar byed pa ste/ snang ba med par byed pa'o/ /gA D+heM zhes pa ni shin tu'o/ /ma a NA zhes pa ni snying rje'i ro'o/ /badz+dzi i a i ni 'thub par byed pa ste/ bdag nyid dang bcas par byed pa'o//ha le kA li ny+dza ra zhes pa ni dpal rdo rje sems dpa'i rang bzhin bde ba chen po'o/ /pa Ni a i zhes pa ni de'i nang na bsgom par bya'o/ /dun+du ra zhes pa ni rnam par rtog pa'o/ /bAdz+dzi a i zhes pa ni thams cad spang bar bya'o/ /tsa u sa ma zhes bya ba la sogs pa ni rnam par snang mdzad la sogs pa de bzhin gshegs pa rnams bde ba chen po nyid la lhan cig skyes pa gnyis su med pa'i ye shes su bzhugs pa'o//mA la i zhes bya ba la sogs pa mA ni sa'o/ /la i ni chu'o/ /in+d+ha Na ni me'o/ /sa liny+dza ta hiM ni rlung ngo / /b+ha ru khA i a i zhes pa ni 'di'i don ni shin tu snang ba med par byed pa'o//phreM kha Na khe Ta ka ra n+te zhes pa ni shes rab kyis 'gro ba dang 'ong bar byed pa na'o/ /shud+d+ha a shud+d+ha zhes bya ba la sogs pa ni dag pa dang ma dag pa la sogs pa yid la byed pa med de bde ba chen por mchog tu rtse gcig pa nyid do/ /ni raM shu ni byang chub kyi sems dkar po cha shas dang bral ba'o//aM ge tsa DA bi ta hiM dza zhes pa ni yan lag rnams la gzhag pa'o/ /sa rA wa pa Ni a i zhes pa ni de nyid lus thams cad du khyab par byed pas gzhug par bya ste/ spro bar bya'o/ /ma la a dzo kun du ru pA Ta i zhes pa ni rnal 'byor pa rnams 'dus pa na der thabs dang shes rab dag gi yang dag par sbyor bas sbyor bar bya'o//der thabs dang shes rab yang dag par sbyor ba na/ /DiN+Di ma ta hi n+na bA dz+dzi a i zhes pa ye shes kyis reg tu med de rnam par rtog pa la sogs pa rnams kyis reg par mi nus pas reg par bya ba ma yin pas lhan cig skyes pa'i bde ba'o//'dis yang dbang bskur ba'i don gsungs pa ni/ yang na kol+la i reT+di a ni lte ba'i lkog na'o/ /bo la ni rdo rje'o/ /mum+ma Ni re zhes pa ni lte ba'i lkog na'o/ /kak+ko lA ni pad+ma'o/ /pad+ma de la rdo rje'i rang bzhin kr-i pi Ta ste brdung ba ni bskyod pa'o/ /ka ru Ne zhes bya ba ni bde ba chen po 'byung bas so//ro lA ni rtsod pa mi byed cing brtan pas rgyun du bde ba'i mchog nyid do/ /der ba la ni rnam par rtog pa'o/ /za ba'am 'byung ba'i don gyis ba la bza' ba dang / chang yang btung ba'o/ /kA liny+dza ra zhes pa ni lhan cig skyes pa'i dga' ba nye bar brtag pas gzhug par byas pa'o//dun+du ra zhes pa ni dga' bral te yang spang bar bya ba'o/ /skye gnas nang gi rtsa gnyis ni/ /g.yon dang de bzhin g.yas pa las/ /g.yon nas khu ba 'byung ba ste/ /g.yas pa las ni khrag nyed kyang / /rdo rje dbyings kyi dbang phyug rtsa/ /g.yon du yang dag sbyang bar bya/ /sor mo yis ni cung zad bskul//phyir yang lce yi thur mas so/ /rtsa yi kha ni bya gyur nas/ /mchog tu shin tu dga' ba 'byung / /cung zad sngags pa'i rdo rje yis/ /nang dang nang du bskyod par bya/ /phaT ni nor bu'i nang bzhag nas/ /yid las byung ba dgag par bya/ /byang chub sems ni ma shor bas//skad cig bde mchog 'byung bar 'gyur/ /ma lus de yi rang bzhin spro/ /chad pa med par snang ba ni/ /nges par khyab cing bde zhi ba/ /dam pa'i go 'phang thob par byed/ /byang chub sems ni shor ba yis/ /brgyal te rnyed par 'gyur ma yin/ /zhes bya ba'i thabs 'dis skal ba med pa blo dang ldan pas spang bar bya'o//tsa u sa ma zhes bya ba la sogs pa'i don 'di yang snga ma bzhin du sbyar bar bya'o/ /da ni 'dus pa de nyid du gar bya ba gsungs pa/ gar ni he ru ka'i gzugs kyis/ /zhes pa ni kye'i rdo rje'i nga rgyal gyis so/ /rdo rje chos zhes pa ni gsung rdo rje'i bdag nyid kyis glu blangs pa'am/gsung rdo rje rnal 'byor pas glu blang bar bya'o/ /sangs rgyas kyis zhes pa ni rnam par snang mdzad kyi gar gyi bdag nyid kyis sam/ sku rdo rje'i rnal 'byor pas gar bya ba'o/ /ma mo rnal 'byor ma rnams kyis/ /zhes pa ma mo la sogs pa'i rnal 'byor ma rnams kyis sam//gau rI la sogs pa rnams kyis lhan cig bskor bas so/ /tshogs kyi bdag pos zhes pa ni tshogs kyi gtso bo dpal he ru ka rdo rjes mdun du bya ba'o/ /der byin gyi rlab kyi mtshan ma gsungs pa de la dri zhes pa'o/ /da ni phyag rgya rnams la zhus pa'i lan gsungs pa/phyag rgya rnams zhes pa'o/ /phyag rgya la sogs pa'i sgra'i don gcig go/ /phyag rgyas mtshan pas gang dang gang gi rigs de brtag par bya'o/ /phyag rgyas mtshan pas zhes pa rigs 'khrugs par bsgoms pas dngos grub mi thob bo/ / rigs yongs su ma shes pa'i sgrub pa pos kyang ma yin no/ /sa bon ci zhes bya ba la sogs pa zhus pa'i lan gsungs pa/ A li zhes pas ste/ A li dang po ni a'o/ /gnyis pa la sogs pa'i rim pas a la sogs pa'o/ /rigs kyi le'u las gang bshad pa zhes bya ba la sogs pa zhus pa'i lan rigs kyi le'u zhes pa'o//bdag med ma'i khyad par gyis gsungs pa/ la la nA dang ra sa nA dang a ba d+d+hU tI ste rtsa gsum gyi gtso bo bdag med ma'o/ /'o na de lta na yang thams cad ma bsdus pa nyid de/ bdud 'joms par byed pa'i rnam par dag pa'i rnal 'byor ma rnams las ma gsungs pa dang /A li'i gzugs can byang chub kyi sems kyi zla ba dang / bcu drug gi cha'i rang bzhin gyi sa bon ma gsungs pas so snyam pa la gsungs pa/ kun gyi mtha' ma zhes pa'o/ /gang gi phyir snyam pa la/ gang phyir bcu drug cha med pas/ / zhes gsungs so/ /gang gi phyir rgyu'i bya ba mi byed pa dang / cha med snyam pa la gsungs pa/ gang gi phyir don gyi bya ba mi byed pas so/ /'di'i don cha dang cha med pa dang / don gyi bya ba sbyor ba med pa ste/ de chos kyi dbyings kyi rang bzhin gyis so/ /lha mo thams cad kyi rnam par dag pa'i rang bzhin rnal 'byor ma bco lnga bsgom pas de'i gnas skabs su 'dus pa yin pa dang /don gyi bya ba mi byed pa dang / gang du ci'i phyir bsgom pa yang don gyi bya ba ni bsgrub bya de nyid yin no/ /da ni dgongs pa dang bcas pas rdo rje snying pos zhu bar byed pa dang / ga bur ni byang chub kyi sems so//nges par cis mi 'byung zhes pa/ /nges pa'i sgra ni bzod pa ma yin pa ste cis mi 'byung ste/ 'on kyang gang bskyed par bya zhes bya ba'i don to/ /de yang kun rdzob dang don dam pa'i tshul gyis so/ /de la/ rnal 'byor ma rnams yang dag 'byung / /zhes pa rnal 'byor ma rnams skyed par byed pa ni mya ngan las 'das pa'o//de las byung na kun rdzob kyi rang bzhin no/ /de nyid gsungs pa/ lhan cig skyes pa'i rang bzhin gyis/ /zhes pa dang / zad ma med pa ni mi 'jig pa'o/ /rgyas pa zhes pa ni rgyun rgyas pa'o/ /nam mkha' ni bya gdong mar 'ong ba ste/ pad+mar gnas pa'o/ /'dir de bzhin nyid du bcom ldan 'das kyis lan bka' stsal pa/ de nyid kyis de ltar te de bas nges pa ni mi spang ba nyid du bskyed par bya ba nyid do/ /gang bskyed par bya ba zhus pa/ gang gis zhes pa'o/ /'dir lan du dkyil 'khor 'khor lo zhes pa ste/ dkyil 'khor 'khor lo la sogs pas bskyed pa dang rdzogs pa'i rim pas don dam pa'i byang chub kyi sems bskyed par bya'o//sogs pa'i sgras nang gi sbyor bas so/ /bdag byin gyis brlabs pas zhes pa dang thabs dang shes rab kyi sbyor bas las kyi phyag rgya byin gyis brlabs nas kun rdzob kyi byang chub kyi sems bskyed par bya ba'o//gnyis ka'i rang bzhin gsungs pa kun rdzob ces pa'o/ /gnyi ga'i yang btsun mo'i pad+mar zhes pa shes rab kyi pad+mar bskyed par bya'o/ /'di nyid ltar ni mya ngan 'das/ /zhes pa 'di nyid ltar mya ngan las 'das te sdug bsngal thams cad nye bar zhi ba lhan cig skyes pa'i rang bzhin no//de ltar yongs su ma shes pas 'khor ba'o/ /'khor ba spangs te gzhan du ni/ mya ngan 'das pa shes mi 'gyur/ /zhes pa ni thob par ro/ /'khor ba nyid yongs su shes pa nyid mya ngan las 'das pa zhes bya ba'i don to/ / 'khor ba gang yongs su shes nas mya ngan las 'das pa yin no snyam pa la/ 'khor ba gzugs dang sgra la sogs/ /zhes pa'o/ /rmongs pa ni rang bzhin yongs su ma shes pa'o/ /ma rmongs pa ni de kho na nyid yongs su shes pa'o/ /'khor ba dag pas zhes pa 'khor ba rnam par dag pa ni tha snyad dam 'dod pas skye ba la sogs pa yongs su 'dzin par mdzad pa yang de'i 'khor ba ste gzugs la sogs pa'o//gang gi phyir mya ngan las 'das pa ni mya ngan las 'das pa'i 'bras bu 'byung bar byed pa'o/ /mya ngan las 'das pa nyid ci nyan thos la sogs pa lta bu yin nam snyam pa la ma yin te gsungs pa/byang chub sems ni mya ngan 'das/ /zhes pa stong pa nyid dang snying rje dbyer med pa bde pa chen po lhan cig skyes pa'i gnas skabs nyid 'dir 'jug par byed pa nyid 'dir mya ngan las 'das pa ste gzhan ma yin zhes bya ba'i don to/ /da ni mya ngan las 'das pa'i rgyu kun rdzob byang chub kyi sems bskyed pa'i rim pa gsungs pa bzhin mdzes zhes bya ba'o//de la sbyor ba las byung ba'i zhes pa de la thabs dang shes rab gnyis su med pa'i sbyor ba las byung ba'i byang chub kyi sems gang yin pa ni ga pur te/ mi spang ba ni kun rdzob blang ba dang / mya ngan las 'das pa rtag par bya bas zhes bya ba'i don to/ /de la kun rdzob blang ba'i tshogs gsungs pa/ lag pas ma yin zhes pa'o/ /bzlog pas zhes pa ni bsrung ba'i phyir ro/ /stobs ni nus pa'o/ /da ni mya ngan las 'das pa 'ba' zhig gi mtshan nyid byang chub kyi sems bskyed pa la sogs pa bstan pa'i rim pa gsungs pa//ga pur ni byang chub kyi sems so/ /bdag med ma ni a ba d+hU tI ste/ de las skyes pa'i bde ba yang bdag med ma ste chos thams cad bdag med pa'i rang bzhin bde ba de phyag rgya chen po ste/ de nyid shin tu gsal bar gyur pa gang yin pa bde ba chen po de'i rang bzhin phyag rgya chen po'i dngos grub bo//de gang du gnas snyam pa la gsungs pa/ lte ba'i dkyil 'khor nyid du zhes pa ste/ bde ba chen po'i pad+ma'i lte ba'i dkyil 'khor der bde ba chen po'i snying po sdud par byed pa gzhom du med pa'i tshul gyis der gnas so/ / de la 'khyud pa de'i rang bzhin gyis gnas pa de las byung ba yang / dang po'i dbyangs yig rang bzhin te/ /zhes pa a'i rang bzhin dang skye ba med pa'i rang bzhin gyis thams cad kyi rgyu nyid de dang de'i rang bzhin zhes bya ba'i don to/ /de nyid blor ni sangs rgyas rnams kyis brtags/ /zhes pa ni brjod pa ste/rang rig pa'i bdag nyid chen po nyid do/ /de nyid rang gi shes rab dang de nyid bcom ldan 'das ma ste/ dbang phyug la sogs pa'i yon tan sbyor ba dang / nyon mongs pa la sogs pa'i bdud 'joms pa'o/ /de la rnal 'byor pas bskyed bya/ /zhes pa de dang de'i rang bzhin nyid thams cad kyi rgyu nyid do//thams cad kyi rgyu nyid dam des bcings pas sam de yin pas so/ /rnal 'byor pas bskyed par bya ba yin pas zhes pa ni rdzogs par bya'o/ /rdzogs pa'ang de nyid kyi bde ba mi 'jig pas spyod par byed pa'o/ /de nyid kyi phyir yang shes rab kyi gzugs la sogs pa dang chos kyi dbyings kyi tshul gyis rnal 'byor pa spyod par byed do//de nyid yang dkyil 'khor 'khor lo'i dpa' bo dang dpa' mo'i dbang phyug ma thams cad sdud par byed pa nyid do/ /de nyid yang ye shes lnga'i rang bzhin gyis so/ /ji ltar snyam pa la gsungs pa/ me long lta bu'i ye shes kyi rang bzhin te/chos thams cad gzugs brnyan lta bu'i ye shes la sogs pa 'byung ba'i rgyu nyid do/ /de nyid yang chos thams cad mnyam pa nyid kyi rang bzhin bde ba chen po'i tshul gyis khyab par byed pa'am sdud par byed pas so/ /de nyid yang rang rig pa gnyis su med pa bde ba chen po'i tshul las yang dag par 'byung ba so sor rtog pa ste/'di las lhag par yang dag par gyur pa yod pa ma yin no/ /de nyid yang bya ba sgrub pa ste/ sems can thams cad kyi bya ba sgrub pa de las byung bas 'gro ba'i don byed pa'i phyir ram/ sems can rnams de'i rang bzhin nyid kyis dbyer med par rtogs par byed do//de nyid yang rdo rje sems dpa'i tshul gyis dri ma med pa dang / sgyu ma'i rang bzhin bde ba chen po'i tshul nyid de shin tu rnam par dag pa'i chos kyi dbyings de thams cad kyi bdag po nyid do/ /de nyid kyis gsungs pa/ chos kyi dbyings kyi rang bzhin can//zhes pa de/ shes rab kyi pha rol tu phyin pa'i rang bzhin no/ /chos kyi dbyings zhes pa chos kyi dbyings snying po dang / bdag med pa dang / yang dag pa'i mtha' dang / stong pa nyid dang / de'i don dam pa'i rang bzhin no/ /da ni rdo rje [(]rig [,]rigs [)]kyi le'u las bstan pa'i sdom pa bshad pa'i phyir rdo rje snying pos zhus pa/'khor lo'i zhes pa'o/ /rnal 'byor ma'i lus dbus gnas pa/ /zhes pa ni de nyid bdag med rnal 'byor ma'i sa bon a lus kyi dbus na gnas pa de nyid sdom pa ste/ phyi rol gyi tshul sdud par byed pa de nyid kyis gsungs pa/ ji ltar phyi rol de ltar nang / /zhes pa ste/ gang phyi rol gyi dkyil 'khor du a de yongs su gyur pa las bdag med ma ste/ de nyid kyi rnam par dag pa lus kyi dbus na'o/ /yang na phyi dang nang gi chos thams cad rnam pa mang bas de'i phyir sdud par byed pas sdom pa'o/ /rdo rje bde bzhes pa rdo rje'i thabs kyi lhan cig tu sbyor bas na bde ba 'byung ba gang yin pa de rdo rje'i bde ba ste/phyag rgya chen po yang dag pa'i shes rab bo/ /rdo rje'i skye mched ces pa rdo rje ni kye'i rdo rje ste/ de'i skye mched ni bskyed pa'i gnas kyi sa bon te thabs so/ /'dis ni gsang ba'i zhes pa ni gsang ba dag tu ste/thabs dang shes rab dag snyoms par 'jug pas so/ /phyi rol gnyis gnyis zhes pa ni phyi'i thabs dang shes rab yang dag par sbyor ba mi ston te/ bsgrub bya nye bar mtshon pa tsam gyi thabs nyid kyis ston par byed pa med ces bya ba'i don to/ /da ni sku bzhi bsdu ba gsungs pa sku gsum zhes pa'o//sku gsum yongs su shes pa ni/ /zhes pa sku gsum dbyer med pa'i rang bzhin gang yin pa sku gsum gyi 'bras bu bde ba chen po'i 'khor lo'i sku'o/ /skye gnas zhes pa ni skye gnas dang nye ba nyid do/ /sems can dag ni ma lus rnams/ /skye gnas gang du skye ba ni//zhes pa'o/ /der zhes pa ni de dang nye ba na'o/ /da ni 'bras bu rnam par gzhag pas gsungs pa/ e waM ni sprul pa'i 'khor lo ste rgyu mthun pa'o/ /'bras bu rnams kyi don gsungs pa/ /las spyod ces pa'o/ /las kyi 'bras bu la spyod par byed pa ji ltar las kyi 'bras bu la spyod ce na/gsungs pa/ ji ltar byas pa de ltar spyod/ /ces pa ste/ /bskul ba la sogs pa las kyi rjes su mthun par 'bras bu spyod ces bya ba'i don to/ /rnam par smin pa ni de las bzlog pas so/ /chos kyi 'khor lo las cung zad yin yang las kyi 'bras bu chen po sbyin pas de las bzlog pa yin no//longs spyod rdzogs pa ni skyes bu byed pa ste/ bde ba chen po'i 'khor lor gyur pa 'bras bu bde ba chen po'i thob pa'i phyir khyad par du 'phags pa'i lam las byung bas so/ /bde ba chen po dri ma med pa'i 'bras bu yongs su rdzogs pa nyid do/ / sde pa bzhi dang sbyor bas gsungs pa/ gnas brtan sprul pa'i 'khor lo ru/ /zhes pa'o/ /da ni sangs rgyas nyid ma tshang ba med de sems can rnams sangs rgyas nyid kyi ngo bo nyid dang ldan no zhes bstan pa'i phyir/ sde pa lus zhes bya ba la sogs pa'o/ /skye gnas su ni 'dod chags bral//zhes pa skye gnas kyi gnas skabs su yang chags par mi 'gyur bas so/ /spyi bor thal sbyar zhes pa skye ba'i dus su lag pa spyi bor sbyar te skye bas so/ /'gro ba'i bya ba zhes pa ni 'gro ba rang gi bya ba nges pa'o/ /sgra ni sngags zhes pa thabs dang shes rab kyi bdag nyid kyi sngags zlos pa'o//gcer bu ni gos med cing yongs su mi 'dzin pa'o/ /tshogs pa 'di yis zhes pa ni sngar sangs rgyas nyid du rtogs pa dang / da ni tshogs pa yang rtogs pas de'i phyir the tshom med de/ 'di dang 'di ltar ngo bo nyid kyis sangs rgyas pa thos nas ngo mtshar du byed pa ste/ngo mtshar dang ldan nas brgyal ba ni byang chub kyi sems kyi gzugs su zhu ba'o/ /skrag pa ni dngos po'i grong khyer bshig cing bsdus pas so/ /'dar ba thob ces pa ni g.yo ba dang ldan pas so/ /gal te sems can yang rang bzhin gyis dag pa dang / tshogs pa dang ldan pas sangs rgyas na bdag cis 'khor bar byed de/chos kyi sku las gzhol bar byed pa yin no zhes bya ba'i don to/ /da ni bcom ldan 'das kyis de rnams bslang bar bya ba'i phyir de rnams la yang bstod pa'o/ /sa dang chu dang me dang rlung / /zhes pa ni 'byung ba ni sa la sogs pa'i rang bzhin no/ / khyed ni khyed rnams so/ /snod ni snod nyid do/ /lha mo ni lha mo rnams so/ /nyon ni nyon cig pa'o/ /spros pa ni spros pas so/ /de nyid ni de kho na nyid do/ /nga ni nga las so/ /gang ni sus kyang mi shes pa/ /zhes pa la gang ni de kho na nyid do/ /rmi lam lta bur bcom ldan 'das kyi gsung thos nas de thams cad srog thob par zhes pa ni sgyu ma bzhin bcom ldan 'das kyi gsung thos te srog gi rlung nges par bsdus pas lus thob pa'o//de la bcom ldan 'das kyis bye brag tu bka' stsal pa/ sems can zhes pa ni de bas na bye brag med par thos nas sems can bsgral ba las phyir phyogs par ma byed cig pa'o//rnal 'byor ma rnams kyis gsol pa/ 'di dag bcom ldan 'das de ltar mad de brdzun pa ma lags so/ /bcom ldan 'das kyis bka' stsal pa/ btsan dug zos pas brgyal bar 'gyur/ /gang dag sems med pa zhes pa ni dug gi de kho na nyid mi shes pas so//de nyid shes pas/ gti mug spangs te de nyid yid/ /de yis de nyid yongs su gcod/ /ces pa de'i mchog tu gcod pa ni de'i brgyal ba'o/ /de'i phyir thabs kyang yin te/ thabs de yongs su shes pas sems can sangs rgyas kyi rang bzhin yang yin pa dang / tshogs pa dang ldan yang sangs ma rgyas te/dug zos pas brgyal ba bzhin no/ /de bas na sems can gyi don yod pa zhes bya ba'i don to/ /don de nyid kyis dpe bstan nas/ de bzhin du don la sbyang ba'i phyir/ mya ngan las 'das pa'i thabs shes na zhes pa'o/ /rang rang gis rtogs na zhes pa ni rang bzhin gyis lhan cig skyes pa shes pa las lhag pa'i gnas kyi don yod pa ma yin te/de yang rang rig pa nyid mthar phyin zhes bya ba'i don to/ /phyag rgya mi rigs pa mthong nas rdo rje snying pos zhus pa/ sa ni puk+ka sI ru grags/ /zhes so/ /lan du lus med ces pa ste/ lus dang ngag dang yid rnams phan tshun du brten pa nyid dang don dam pa la dbyer med pas skyon med ces bya ba'i don to//da ni gtor ma zhus pa snyoms zhugs zhes pa ste/ thabs dang shes rab snyoms par zhugs pas gnas pa dang / bde ba chen po la bzhugs te zhus pa dang / bcom ldan 'das kyis bka' stsal pa/ e waM rnam pa ni mdor bsdus nas zhes so//rdo rje sems dpar gyur pas bstan/ /zhes pa ni sbyin pa ste/ gtor ma sbyin pa'i phan yon gsungs pa 'dis shes pa ste/ las thams cad byed pa la gtor ma 'dis zhes bya ba'i don to/ /ma gsungs pa'i phyag rgya'i don zhus pa/ gang gis mkha' spyod ma zhes pa'o/ / dbu ma ru ni gnas pa'i sems/ /zhes pa dngos po dang dngos po med pa nyid las grol ba nyid do/ /da ni de bzhin gshegs pa'i rigs kyi rim pa gsungs pa/ rigs ni zhes pa'o/ /rgyas par zhes pa ni rdo rje sems dpa' gzhag pas so/ /de'i 'og tu/ rnam pa gsum dang rnam pa lngar/ /zhes pa rdo rje sems dpa' mi bskyod pa'i nang du zhugs pas rnam pa lngar bsgom mo//nga rgyal dang phrag dog gnyis 'dod chags kyi nang du bsdus pas rigs gsum mo/ /gti mug dang 'dod chags gnyis kyang zhe sdang gi nang du 'dus pas rigs gcig go/ /de yang sngar gyi rdo rje sems dpa'i nang du zhugs pas rdo rje sems dpa' dang dbyer med pa'o//brtag pa gnyis pa las rgyud thams cad kyi phyag rgya'i don bsdus pa ste le'u bzhi pa'i bshad pa'o// //da ni he ru ka mngon par 'byung ba'i le'u gsungs pa/ bcu drug phyag la zhal brgyad pa/ /zhes bya ba la sogs pa gsungs pa'o//bdag med mas zhus pa dang / 'dir lan du 'khor lo sngon po zhes pa ste/ ji ltar khyod kyis 'khor lo de bzhin du nga'i yang zhes bya ba'i don to/ /de la 'di ni sgrub thabs kyi rim pa ste/ rang snying raM las byung ba ni/ /nyi ma'i dkyil 'khor bsgom par bya/ /de nyid la yang hUM nyid ni/ / thabs dang shes rab bdag nyid can/ /rdo rje las skyes snying rje che/ /nam mkhar rje btsun dmigs nas ni/ /rgyan rnams thams cad 'dzin pa yi/ /lha mo brgyad kyis mchod par bya/ /dkar mo ri dgas mtshan ma 'dzin/ /rkun mo'i lag na nyi ma'i snod/ /ro langs ma yi lag na chu/ /b+ha sma ri ni lag na sman//sbos mo'i lag na rdo rje ste/ /ri khrod ma ni ro 'dzin ma'o/ /gtum mo cang te'u rdung bar byed/ /'di dag rnams kyis bdag po mchod/ /'dod chags chen po rjes chags pas/ /g.yung mo yis ni mgul nas 'khyud/ /dang po byams pa bsgom par bya/ /gnyis pa la ni snying rje bsgom/ / gsum pa dga' ba bsgom bar bya/ /kun gyi tha mar btang snyoms bsgom/ /yang na stong pa'i byang chub sems/ /gnyis pa la ni sa bon bsdus/ /gsum pa la ni gzugs rdzogs te/ /bzhi pa la ni yig 'bru dgod/ /shrI ni gnyis med ye shes te/ /he ni rgyu sogs stong pa nyid/ /ru ni tshogs dang bral ba nyid//ka ni gang du'ang mi gnas pa/ /he ni snying rje chen po ste/ /badzra shes rab tu yang brjod/ /'dis ni shes rab rig pa yis/ /kye yi rdo rjer yang dag 'dod/ /oM shU n+ya tA dz+nyA na badzra swa b+hA ba At+ma kou0f85haM/ raM las nyi ma mdun du bsgom par bya/ /de las hUM byung sna tshogs rdo rje ste/ /rdo rje d e nyid las ni rnam bsgom pa//ra ba dang ni dra ba dag kyang bcing / /nam mkha'i khams la b+ha ga bsam/ /de yi dbus su bsgom bya ba/ /'khor lo sngon du ci rigs par/ /lha rnams ji ltar 'byung ba'o/ /'khor lo sa yi sngon du chu/ /ji ltar rigs par me yi gdan/ /lha rnams kyi ni rlung chen po/ /ji ltar sgom pa po 'byung ba'ang //chos 'byung las byung 'khor lo ni/ /dra ba dra ba phyed pas mdzes/ /gru bzhi pa la sgo bzhi pa/ /rdo rje'i thig gis brgyan pa'o/ /'dab brgyad ge sar bcas pa yis/ /de yi dbus su pad+ma bris/ /de yi steng du zla ba bsgom/ /zla ba'i steng du sa bon te/ /phyis ni nyi mas mnan pa'o//gnyis 'dus pa las bde ba che/ /A li zla ba'i gzugs kyis gnas/ /kA li'i gzugs kyis nyi ma'o/ /zla ba me long ye shes ldan/ /mnyam nyid ye shes rta bdun pa/ /rang lha'i sa bon phyag mtshan ni/ /so sor rtog pa yin zhes brjod/ /thams cad gcig 'dus bya nan tan/ /gzugs brnyan rdzogs pa chos dbyings dag /de yi dbus su gnas pa nga / /bzhin bzangs khyod dang lhan cig tu/ /lhan cig skyes dga'i rang bzhin gyis/ /'dod chags chen po rjes su chags/ /zhal brgyad pa la zhabs bzhi pa/ /phyag ni bcu drug gis ni brgyan/ /bdud bzhi po ni mnyam par mnan/ / 'jigs pa yang ni 'jigs par byed/ /ces bya ba la sogs pa re zhig ji srid glus bskul ba'i bar ro/ /de'i 'og tu/ bdag po dga' ma'i sa bon gnyis/ /oM hUM 'bar ba 'jigs su rung / /aM dang hUM ni sngon po las/ /rdo rje 'dzin pa chen po bzhengs/ /zhabs bzhi sa la gnon pa yis/ /lha dang lha min skrag par byed//glang po rta dang bong bu glang / /rnga mo mi dang sha ra b+ha/ /de bzhin du ni byi la dag /g.yas kyi thod pa brgyad na'o/ /glang po la sogs rim shes bya/ /sa dang chu dang rlung dang me/ /zla ba nyi ma nyid dag dang / /mthar byed pa dang nor sbyin nyid/ /g.yon gyi thod pa brgyad dag tu/ /sa ni dang po nor sbyin mtha'//dbang phyug thams cad rab sgrub byed/ /glang po la sogs sems can rnams/ /glo dang dbugs dang de bzhin smyo/ /za byed mdze dang 'brum bu dang / /mcher ba mchin pa rang gzugs kyis/ /glang po la sogs rab tu grags/ /sgeg dang dpa' dang mi sdug dang / /drag dang dgod dang 'jigs su rung //snying rje ngo mtshar zhi ba yi/ /gar gyi ro ni dgu dang ldan/ /rnal 'byor ma ni brgyad kyis bskor/ /dur khrod du ni mgon po rol/ /mig gnyis gti mug rdo rje ma/ /rna bar zhe sdang rdo rje ma/ /sna la ser sna rdo rje ma/ /kha la 'dod chags rdo rje ma/ /lus la phrag dog rdo rje ma/ /yid la bdag med rnal 'byor ma//oM AHhUM zhes bya ba'i sngags/ /lus ngag de bzhin sems rnams la/ /mkha' spyod dang ni sa spyod nyid/ /sa 'og tu ni gnas pa bsam/ /ye shes 'khor lo spyan drangs te/ /dbang bskur ba ni blang bar bya/ /le'u bzhi pa las gsungs pa'i/ /tshul gyis 'dir ni dbang bskur bya//zhe sdang rdo rje kye'i rdo rje/ /gau rI phyag rgya de nyid kyi/ /rkun mo gti mug phyag rgya yis/ /zhes bya ba la sogs pas phyag rgya rnams 'dod do/ /mchod bstod bdud rtsi myang ba dang / /dag pa rjes su dran byas te/ /de nas gau rI sogs lha mo/ /rang phyogs kha bltas gzhug par bya/ /lha mo'i snying gar gri gug gnas//oM dang lhan cig zhu gyur nas/ /bcom ldan snying gar yang dag zhugs/ /rang snying nyi ma la gnas hUM/ /bcom ldan 'das dang lhan cig tu/ /gcig tu 'gyur bar rnam par bsam/ /nyi zla kha sbyor nang sa bon/ /gnas skabs kyis ni kun du gnas/ /gnas skabs der ni tshigs bcad 'dis//thogs med la sogs dran par bya/ /de yi sa bon nyi zla dag /'dres par gyur ba'i rim pa 'dis/ /mar me'i tshul gyis dga' ba che/ /byang chub sems kyi rang bzhin can/ /dmigs pa med par bsam par bya/ /ji srid shin tu stong pa nyid/ /'di dang 'di ltar brtags byas te//dkyil 'khor rim pas spro bar bya/ /sngags ni snying ga las rdo rje'i/ /lam nas bde ba'i gzugs kyis su/ /lha mo'i pad+mar song de las/ /lha mo yi ni khar byung ste/ /rang gi khar ni gzhug par bya/ /yang ni de nyid kyis phyung ste/ /zhes so/ /phreng ba'i sngags zhus pa/ rdo rje gzhibs par byas nas ni/ / zhes pa'o/ /bcom ldan 'das kyis bka' stsal pa/ bud med dbang du byed pa yi/ /zhes pa'o/ /sngags btu ba gsungs pa/ rig byed dang po zhes pa ni oM mo/ /zla phyed thig les brgyan zhes pa ni rang bzhin gsungs pa'o/ /da ni kye'i rdo rje'i dkyil 'khor du dbang bskur ba'i dkyil 'khor bri ba'i rim pa zhus pa/bcom ldan 'das zhes gsol ba dang / de la mnyes zhes pa'o/ /bcom ldan 'das kyis bkal stsal pa/ ston pa de la ye shes che/ /zhes pa ste/ kye'i rdo rje'i gzugs kyis dkyil 'khor bri zhes bya ba'i don to/ /thos pa zhes pa ni pad+ma'i snod do//rig pa brgyad kyang bde ba che/ /zhes pa ni bde ba chen po'i rgyu nyid do/ /lo bcu gnyis ma ni thugs kyi rnam par dag pa'o/ /lo bcu drug ma ni gsung gi rnam par dag pa'o/ /lo nyi shu ma yang sku'i rnam par dag par gsungs so/ /rig ma brgyad po de gang snyam pa la/ gsungs pa ma yin zhes pa'o//de la dbang bskur ba'i phyir slob ma gzhug pa gsungs pa/ phyis zhes pa'o/ /ji ltar gsungs pa zhes pa ni sngar de kho na nyid bsdus pa la sogs par yang ngo / /slob dpon la sogs rab dbye bas/ /zhes pa ni/ slob dpon gsang ba shes rab dang / /bzhi pa de yang de bzhin no//zhes pa'i rim pas so/ /de la slob dpon gyis dbang bskur bas ni chu dang / dbu rgyan dang / phreng ba dang / rdo rje dang / dril bu dang / ming dang / brtul zhugs dang / lung bstan pa dang dbugs dbyung ba la sogs pa gzung ngo / /mtha' dang mtha' mar gsal byas zhes pa mchog gi mtha' lhan cig skyes pa ste/rgyud 'dir gsal bar byas pas so/ /de nyid gsal bar bya ba'i phyir zhus pa/ de yi skad cig ci 'dra lags/ /zhes pa'o/ /bcom ldan 'das kyis bka' stsal pa/ thog mtha' med pa zhes pa'o/ /rang gi lag pa g.yas g.yon gyis/ /zhes pa lag pa g.yas pa ni thabs so/ / g.yon pa shes rab bo/ /rgan po ni mthe bong ste/ de yang rdo rje'o/ /srin lag ni chos kyi 'byung gnas so/ /de gnyis rnal 'byor bas btsir bar bya ba ni longs spyod kyi rtsa gnyis la zhes pa'o/ /gzhon nu ma yi dga' ba ltar/ /zhes pa ni sngon ma myong ba'i bde ba chen po skyed par byed pa'o/ /de nyid/ he ru ka yi rang bzhin no//zhes gsungs pa/ dam pa'i mtha' dang mtha' bral dbus/ /stong dang stong min he ru ka/ /zhes pa'o/ /brtag pa gnyis las he ru ka mngon par 'byung ba zhes bya ba'i le'u ste lnga pa'i bshad pa'o// //bcom ldan 'das kyis mya ngan las 'das pa'i phyag rgya'i rang bzhin 'dzin pa sngar gsungs pa'i thang ka'i cho ga'i le'u drug pa gsungs pa/lha mos dam du 'khyud nas ni/ /zhes pa'o/ /rnam par dag pa gsungs pa/ sangs rgyas lnga yi phyag rgya yis/ /zhes pa ni mi bskyod pa la sogs pa sangs rgyas lnga'i rang bzhin gyis phyag rgya zhes bya ba'i don to/ /le'u 'dis brjod par bya ba thang ka'i cho ga zhus pa/gang gi cho gas zhes pa ni thod pa la sogs pa'o/ /lus kyi bya bas zhes pa ni spyod pas te 'dri bar byed pa po dang / 'dri bar byed pa'i zhes bya ba'i don to/ /de la re zhig bya ba gsungs pa/ dam tshig ldan pas ri mo mkhan/ /zhes pa ni bsrung bar bya ba dang /bza' bar bya ba dang ldan pa'i ri mo mkhan gyis bri bar bya'o/ /sgrub pa po nyid kyang de lta bur gyur pas bri bar bya'o/ /de gnyis gsungs pa/ dkyil 'khor drag po ni byin gyis brlabs pa dang ldan pa'o/ /cho ga gsungs pa/ thod par gnas zhes pa'o/ /skud pa 'khal ba'ang gang gis bya/ /zhes pa ni shes rab gang gis skud pa 'khal bar byed pa dang /gang yang 'thag par byed pa ste de rnams kyang dam tshig mas bya'o/ /ji ltar dam tshig dang ldan pas bya snyam pa la gsungs pa/ dam tshig byin brlabs rnal 'byor pa/ /zhes rnal 'byor sngon du byas te dam tshig dang byin gyis brlabs pas zhes bya ba'i don to//yang ri mo mkhan gyi bya ba gsungs pa/ zla ba zla ba zhes pa ni bcu bzhi zhes pa nye bar mtshon pa ste/ chos brgyad ces bya ba yang rtogs par bya'o/ /de bas na zla ba'i nyi ma gnyis la bri bar bya'o/ /brtag pa gnyis pa las kye'i rdo rje'i thang ka'i cho ga'i le'u ste drug pa'i bshad pa'o// //da ni glegs bam gyi cho ga sngon du bya ba dang / chogs kyi ston mo'i cho ga bya ba gsungs pa/ de nas de la lha mos zhus/ /zhes pa'o/ /sbrang rtsi chen pos snag tsha bya/ /zhes pa ni mar khu chen pos sre mog bya ste des snag tsha bya ba'i don to/ /tshogs kyi 'khor lo gsungs pa/ nyon cig lha mo zhes pa'o/ / dbugs 'byin par byed pas dur khrod de la'o/ /ri'i ljongs ni chu bo dang 'khril shing la sogs pas g.yogs pa'i nang ste/ bde ba chen po'i 'khor lor ro/ /mi med pa'i grong du zhes pa ni sangs rgyas dang rdo rje mkha' 'gro ma'i gnas su'o/ /rgya mtsho'i mthar zhes pa ni gting dpag tu med pa dang /mi 'khrugs pa dang / me zad pa nyid kyis rgya mtsho ni bcom ldan 'das kye'i rdo rje ste de'i mthar ro/ /phung po la sogs pa'i ston mo 'di dag bsdus te bde ba chen po nyid kyis bde bar longs spyod do/ /der ni gdan du brtag bya ba/ /zhes pa la der ni 'dus pa der ro/ /der gdan ni rten no/ / dgu zhes pa ni phung po lnga dang khams bzhi'o/ /ji ltar brtag par bya snyam pa la gsungs pa/ ro'i gzugs kyis zhes pa ste/ /bdag med pa'i tshul gyis so/ /stag gi pags pa zhes pa ni khyad par du 'dzin par byed pas stag ste/ kun du rtog pa'o/ /de'i pags pa ni log pas gzhag pa'i dmigs pa des g.yogs pa'o//dur khrod kyi ras zhes pa ni/ dur khrod ni phung po'o/ /de'i ras ni g.yogs par byed pa'o/ /dbus su kye'i rdo rje zhes pa ni 'khor lo de'i dbus su kye'i rdo rje dgod par bya'o/ /de nas rnal 'byor ma rnams dgod/ /ces pa ni de nas de'i 'og tu rnal 'byor ma rnams dgod pa'o//gnas zhes pa ni kye'i rdo rje'i 'og tu gnas zhes bya ba'i don to/ /stag gi pags pa'i steng du spyad/ /ces pa de snang ba med par byas te spyad do/ /dam tshig ces pa ni dam tshig go/ /tshod ma zhes pa ni mA la ti ni bdag med pa'o/ /de'i in+d+ra naM ni 'bar bar byed pa'o//de nyid spyad par bya zhing myang bar bya'o/ /de yang rgyal po'i 'bras dang ldan/ /zhes pa ni bde ba chen po'o/ /spyad cing spyod ces pa ni bde ba chen po'o/ /mchod pa ni de la mnyes par bya ba'o/ /ma mo zhes pa ni rdo rje mkha' 'gro ma rnams so/ /ma zhes pa ni 'gro ba skyed par byed pa'i shes rab bo//sring mo ni rnam par 'byed cing ston par byed pa'i sring mo yang ngo / /btso blag mkhan zhes pa ni sems can thams cad bde ba chen pos 'khru bar byed pa'o/ /sgyug mo ni byams par byed pas so/ /dum bu gcig ces pas ni gnyis su med pa'o/ /thod pa ni bde ba chen po'o/ / chang bzang po zhes pa ni byang chub kyi sems kyis so/ /bla ma la zhes pa ni rdo rje 'dzin pa'i phyir ro/ /sbyin zhes pa ni gtad par bya ba ste de'i rang bzhin du bya zhes bya ba'i don to/ /phyag byas te zhes pa ni de dang de lta bur 'gyur ba'i rdo rje sems dpa' sgrub pas phyag rgya'o/ /rang yang zhes pa ni de'i tshul gyis so//btung zhes pa ni spyad par bya'o/ /myang bar bya zhes pa ni chos thams cad do/ /pad+ma'i lag pas zhes pa ni pad+ma'i lte ba la gnas pas chos thams cad len par byed pa'i thabs nyid kyi lag pas so/ /sbyin zhes bya ba ni sbyin pa byang chub kyi sems spro ba'o/ /brtag pa gnyis pa las tshogs kyi ston mo'i cho ga'i le'u ste bdun pa'i bshad pa'o// //phyag rgya chen po'i mtshan nyid dang smon lam gyi tshig sngon du bya ba dang / gdul bya 'dul ba'i rim pa'i le'u gsungs pa de nas zhus zhes pa'o/ /'o na phyag rgya chen po brjod du med pas ji ltar brjod snyam pa la gsungs pa/kun rdzob rnam pa'i gzugs kyis te/ /zhes pa ste phyag rgya chen po zhes pa ni rdo rje'i rigs mA ma kI'o/ /phyag rgya chen po mA ma kI/ /las kyi phyag rgya spyan yin te/ /dam tshig phyag rgya sgrol ma yin/ /chos kyi phyag rgya na bza' dkar/ /dkar mo yang min zhes pa ni kha dog ljang gu'o/ /phal pas zhes pa ni 'dod pa'i bstan bcos la sogs pa las pad+ma can du bshad do//de bzhin du yang / ha cang ring min thung ba'ang min/ /ha cang dkar min gnag pa'ang min/ /sbom pa ma yin skem pa'ang min/ /skyon rnams sbed par byed pa dang / /sgyu rtsal shes dang sngags rnams sped/ /'du shes dang ni 'jug sngags dang //rol dang glu la yang dag dga'/ /glu dang rol mo yang dag shes/ /mnyen zhing rgyun du 'bar ba dang / /lag pa rkang pa 'jam pa dang / /'jam smra pad+ma can mdzes pa/ /ljang gu zla ba'i gdong ldan rdul/ /pad+ma'i dri ltar zhim pa dang / /pad+ma'i 'dab ma lta bur gnas//ri dwags mgrin pa ri dwags gsus/ /ba spu med cing sha che sbom/ /b+ha ga rus sbal rgyab lta bu/ /zhes so/ /de ni rnyed pas dngos grub yin/ /zhes pa ni phyag rgya chen po'i dngos grub po/ /de'i rang bzhin gsungs pa/ lhan cig skyes dga' rang bzhin can/ /zhes pa rgyun mi 'chad pa dang /zad pa med pa dang / bde ba chen po'i rang bzhin can no/ /da ni kye'i rdo rje'i rnal 'byor pa'i smon lam gdab pa zhus pa/ de nas bdag med mas zhus pa zhes so/ /da ni sems can gdul ba'i thabs zhus pa/ gdul dka' zhes ba ste/ gdul bya 'jug par byed pa kye'i rdo rje'i rgyud grub pa'i mtha'i skal ba dang ldan pa yin no//bye brag smra ba de la bstan/ /zhes pa phung po lnga la sogs pa'i rang bzhin bstan pa'o/ /mdo sde pa zhes pa ni theg pa chen po'i mdo'o/ /rnal 'byor spyod pa zhes pa thams cad rnam par shes pa zhes pa'o/ / dbu ma zhes pa yod pa dang med pa la sogs pa'i phyogs stong pa'i stong pa nyid do/ /thams cad sngags kyi tshul zhes bya ba dang spyod pa dang rnal 'byor bla ma dang rnal 'byor ma'i tshul du'o/ /de ltar na gal te gzung na phan yon ni blangs pas slob mas de'i tshe 'grub par 'gyur ro/ /brtag pa gnyis pa las gdul bya la sogs pa'i le'u ste brgyad pa'i bshad pa'o// //da ni sngar gsungs pa'i gsad pa'i sngags dang sbyin sreg la sogs pa ji lta ba bzhin du de ltar cung zad kyang mi bya ste/ 'on kyang nus pa thob pas snying rje chen pos bla ma la 'khu ba dang dam tshig nyams pa dang / bstan pa la gnod pa byed pa'i skyes bu rnams rnam pa gzhan gyis bzlog par bya'o zhes bstan pa'i phyir//de'i cho ga sngar byas te kha sbyor byed pa'i mtshan nyid kyi le'u gsungs pa/ de nas zhes pa ste rnam par shes pa'i lus kyi zhes sbyar ro/ /kha sbyor de'i kha 'byed pa ni rnam par 'byed par byed pa'o/ /de'i mtshan nyid gang gis rnam par shes pa tsam gyis sgrub pa po zhes pa ni rnal 'byor pa'o//dngos grub ni kha 'byed pa rdzogs pa thob pa'am/ de mi bskyod pa'i sangs rgyas kyi zhing du skye bar bya ba ste/ bstan pa la gnod pa byed pa bsgrub par bya ba ste phyag rgya chen po'i dngos grub tu'o/ /bsgrub bya zhes pa chad pas gcad par bya ba mdun du gzhag ste/snying rje chen pos gsad par bya'o/ /kye'i rdo rje'i rnal 'byor gyis khros par byas te/ bsam gtan gyi lag pas lte ba'i rtsa nas dbyung bar bya'o/ /cho ga gzhan gsungs pa/ kha ni 'og tu bsgom par bya/ /zhes pa rgyu ni cho gas lus lha dang bral bar byas te/ kha spyi tshugs su bltas te/ bsgrub bya khrag skyug par bsgom ste/snying gar raM gyi sa bon las 'jigs pa'i me lta bur 'bar te/ mgo bo'i mthar thug pa'i lus bsregs par sgom par bya'o/ /bshang ba'i lam du me 'bar ba'i khab kyi gzugs can bsams te/ sngags oM g+huHswA hA zhes brjod do/ /rgyud kyi mthu gsungs pa/ rgyud 'dir zhes pa'o//da ni bcom ldan 'das kyis rnam par dag pa gsungs pa/ chos thams cad rnam par dag pas re zhig gsungs pa gsang chen zhes pa'o/ /'bar ba'i phreng ba 'khrugs pa ni 'bar bas so/ /phug na 'dod pa sbyin par byed/ /ces pa la 'dod pa ni mngon par 'dod pa'i don la sogs pa'o/ / da ni sngags btu ba gsungs pa/ sngags btu ba zhes pa'o/ /rnam par snang mdzad ni oM mo/ /uSh+ma na'i bzhi pa ni ha'o/ /pu kA sI ni u'o/ /stong pa ni thig le'o/ /yi ge'i bdag po ni oM mo/ /mkha' spyod ma ni aM ngo / /dang po'i gnyis pa ni kha'o/ /gnyis pa'i gsum pa ni dza'o/ /chu ma ni i'o/ / yi ge'i dbang phyug ni oM mo/ /lnga pa'i gsum pa ni ba'o/ /mkha' 'gro ma ni rdo rje mkha' 'gro ma ste u'o/ /yi ge'i gtso bo ni oM mo/ /gti mug gi rigs ni de nyid do/ /dang po'i dang po ni ka'o/ /mthar gnas pa'i gnyis pa ni ra'o/ /mthar gnas pa'i gsum pa ni la'o/ /tsau rI ni a'o/ /bzhi pa'i gsum pa ni da'o/ / mthar gnas pa'i bzhi pa ni wa'o/ /puk+ka sI ni u'o/ /lnga pa'i gnyis pa ni pha'o/ /gsum pa'i dang po ni Ta'o/ /lnga pa'i bzhi pa ni b+ha'o/ /mthar gnas pa'i dang po ni ya'o/ /g+hasma rI ni o'o/ /nang gi gau rI ni i'o/ /lnga pa'i gsum pa ni ba'o/ /me ni ra'o/ /bzhi pa'i dang po ni ta'o/ /ro langs ma ni ai'o/ /za phod ma ni o'o/ /rdo rje ma ni a'o//lnga pa'i dang po ni pa'o/ /bdag med ma ni a'o/ /bdun pa'i dang po ni go rims ji lta bas/ a ka tsa Ta ta pa ya sha zhes pa'o/ /k+Sha gnyis zhes pa ni ra dang bcas pa gnyis te ra k+Sha ra k+Sha zhes bya ba'i don to/ /uSh+ma na'i gsum pa ni sa'o/ /brtag pa gnyis pa las sngags btu ba'i le'u ste dgu pa'i bshad pa'o// // sngags btus pa rnams kyi las bya ba'i phreng ba'i dbye ba dang / dam tshig gi dbye ba yang gsungs pa ni le'u bcu pa gsungs pa/ de nas rdo rje sems dpas gsungs/ /zhes pa'o/ /bzlas pa'i yul ni phreng ba'o/ /lung tang ni lung tang gi 'bras bu'o/ /brtag pa gnyis pa las bzlas pa'i le'u ste bcu pa'i bshad pa'o// / de bzhin gshegs pa rnams kyi kun rdzob kyi rigs zhus pa ni dam 'khyud ces pa'o/ /rigs kyi gzugs zhes pa ni rigs ni kha dog dang dbyibs so/ /sems dpa'i rigs zhes pa ni rdo rje sems dpa'i rigs so/ /rgyu des/ skye bo rnams la smad mi bya/ /zhes pa ni nges par rigs drug po de dang de dag gi rigs zhes bya ba'i don to//lha mo rab tu mchod pa nyon/ /zhes pa ni ji ltar shes rab kyi pha rol tu phyin pa mchod par bya'o/ /chang gis mtshan pa'i lag pa yis/ /zhes pa ni 'ching ba la sogs pa'o/ /las zhes pa ni thabs dang shes rab kyi bdag nyid gnyis su med pa'i bdag nyid kyi sbyor bas so//rdo rje ldan zhes bya ba ni khyad par du 'phags pa'i rdo rjes so/ /khyogs dang gru mo zhes pa ni btsun mo'i mgrin par skyes bu'i lag pa gnyis kyis dam du 'khyud de/ gru mo gnyis bud med kyi rje ngar du gzhag pa ni khyogs su 'dod pa'o/ /de dag gis rkang pa gnyis brkyang ba mi shin tu brkyang ba'o/ / skyes bu 'dug pa'i brlar yum gyi rkang mthil gnyis gzhag pa ni gru mo'o/ /brtag pa gnyis pa las lhan cig skyes pa'i sbyor ba'i don gyi le'u ste bcu gcig pa'i bshad pa'o// //dbang bskur ba'i dus su go rims ji lta bas slob dpon la sogs pa'i dbang bskur ba la sogs pa la/ bla mas tshigs su bcad pa brjod par bya ba dang /rdo rje dang pad+ma byin gyis brlab pa yang gsungs pa/ de nas rdo rje can zhes pa ste/ dbang bskur ba bzhi po rnams su tshigs su bcad pa bzhi ste/ khyod ni rang gi pha de yin/ /zhes pa la/ pha ni rdo rje 'dzin pa'o/ /khyod rang gi yin zhes pa ni de'i rang bzhin du gnas pa yin te/ye shes de rnyed pas zhes bya ba'i don to/ /lte ba zhes bya ba ni a ste kha'i pad+ma'i lte ba zhes bya ba'i don to/ /brtag pa gnyis pa las le'u bcu gnyis pa'i bshad pa rdzogs so// //slob dpon mtsho skyes rdo rje'i zhal snga nas mdzad pa/ /dpal kye'i rdo rje'i 'grel pa pad+ma can zhes bya ba rdzogs so// //rgya gar gyi mkhan po mkhas pa chen po kI ti ga r+b+ha'i zhal snga nas/ zhu chen gyi lo tsA ba khu ston dngos grub kyis bsgyur cing zhus te gtan la phab pa las/ dben gnas rtsed kyi stag lung du slad nas yang skad gsar chad kyis TI kA dang gtugs te gtan la phab pa'o// //

CLOSE WINDOW