CLOSE WINDOW

D1176
བོད་ཡིག

/'dis 'jig rten dang 'jig rten las 'das pa'i mngon par 'dod pa mtha' dag bdag dang gzhan du 'byor bar gyur cig/ @##/ /rgya gar skad du/ shrI sha ba ra pA da sto t+naM/ bod skad du/ dpal ri khrod zhabs kyi bstod pa rin po che/ dpal ldan bla ma dam pa'i zhabs la phyag 'tshal lo/ /rdo rje'i rang bzhin mchog gi rdo rje sems dpa' ni/ /nam mkha'i ngo bo rnam pa thams cad mchog rang bzhin/ /'dod pa sel ba des na sha yig gis brjod pa/ / rnal 'byor dbang phyug dpal ldan ri khrod pa la 'dud/ /rtag par byung zhing yod kyang rgyu yis bstod pa yi/ /rdo rje lta bu'i rol mnyam par gzhag gyur pa/ /des na 'di ni ba yig gis na yang dag brjod/ /mgon po ri khrod sdom brtson dbang po la phyag 'tshal/ /rtag tu rgyal ba skyes mchog rnams kyi gsang chen la//dgyes shing gzhan dag chos rnams la ni dga' mdzad pa/ /de lta bu ni ra yi yi ges brjod pa ste/ /rnal 'byor ri khrod par grags de la phyag bgyi'o/ /yig gsum gyis bshad ri khrod pa la rab btud nas/ /yon tan chu gter su zhig gis ni bstod par nus/ / 'on kyang bdag ni bla ma khyed la dad dbang gis/ /bstod par 'dod pa de slad bstod par bgyi ba lags/ /rab tu sra zhing mi phyed thabs kyi rgyud dang bcas/ /shes rab gzhu ni mngon sum dag tu bsnams nas ni/ /lhan cig skyes pa bdag med mngon sum rang nyid kyis/ /nyams su myong ba'i mda' bkang 'gro bar gtogs rnams kyi//thog ma med pa'i dus nas bsags pa'i sdig pa rnams/ /yongs su sbyang ba'i phyir dang nyon mongs shes bya yi/ /sgrib pa la sogs 'ben la bsnun par gyur pa na/ /phug pa lags te kye brtan po khyod ni a la la'o/ /bdag med nyid kyis rgyas btab yang dag mtha' yis ni//'khor las khyod kyi dpral ba'i mthar ni mdzes mdzad de/ /e ma'o gzhan don bdud rtsi dag la sred ldan pa/ /khyod ni dgra med dpa' bo'i dbang phyug ma lags sam/ /'dod chags dang ni gzhan pa sdang byed gti mug ste/ /gsum po 'di dag 'jig rten dug tu rab tu grags//de dag thams cad ma lus sel bar mdzad pas na/ /dgra bo drungs phyung dpa' bo'i dar dpyangs bcings pa lags/ /gang zhig 'dod la chags bral gtam gyis dman gyur cing / sra ba'i dregs pas che dang mtho tshig rnam grol ba/ /rnam dag ngag gi rdo rje'i rna rgyan bzang po dag / snyan gnyis dag la 'phyang ba de la phyag bgyi'o/ /thugs rje'i bdag nyid rdo rje mi rus phreng ba dag /gang gi mgul pa mchog gi rin chen mgul rgyan te/ /nges par 'gro ba rgyas mdzad nam mkha'i rang bzhin gyi/ /rnal 'byor dbang po bla ma de la phyag bgyi'o/ /srog gcod pa dang bral bas khyod kyi phyag dag la//de bzhin gshegs pa'i dpal ldan gdu bu nges bcings te/ /sbyin pa la sogs pha rol phyin drug rnam dag pa/ /ma ru'i phreng ba drug ni nges par bcings pa lags/ /ma dag 'dod chags btsan thabs dag kyang nges gsal ba'i/ /rnam dag nyid la reg pas skra yi srad bu ni/ /gnyis kyi 'khor lo'i rang gi lte bar nges dkris bcings//'khor ba dang ni mya ngan 'das pa rnam dag pa'o/ /skye bo skrag pas nyam thag pa dang mi rnams kyi/ /rang la gnod byed khro ba'i rnam pa rab zhi'i slad/ /khyed zhabs chu skyes rtsa ba dag la zhabs gdub dang / /de nyid phyir na dpung rgyan zung dag dkris par 'dod/ / 'gyur med sems kyi thal bas sku la nges par ni/ /khyab par mdzad de ba spu nges par gang ba nyid/ /de slad khyod kyi sku ni me long 'dra ba ste/ /dpal ldan rdo rje'i sku can bla ma khyod la 'dud/ /phung po yi ni lus la dga' bar 'dzin pa yi/ /'dod chags la sogs rnams kyang sbyang ba'i slad du ni/ /thal ba dag gis sku la yang dag byugs pa yi//dpal ldan khyod la bdag ni skyabs su mchis pa lags/ /ral pa ring gnyis khyo shugs zung ste 'di dag ni/ /gsal por rab tu phyo bas de ni bstan pa yin/ /ral pa ring po bde chen 'khor lor gnas pa ni/ /'od gsal ba yis byin rlabs zung du 'jug pa 'di//seng ge yis ni 'jigs par byed pa'i sgra bsgrags pas/ /gang phyir glang po cher skrag 'jigs pas nyam thag pas/ /gzhom med bdag nyid sgra yi rang bzhin rwa yi ni/ /skad kyi bgegs rnams la ni mgon khyod de 'dra'o/ /khyod kyi ma ru'i phreng ba'i rgyan ni rmad byung ba/ /'di yi phyed dmar ba ni kun rdzob bden pa ste//phyed nag pa yang don dam pa yi rang bzhin lags/ /de dag gcig nyid 'dud pa gang lags rab tu shis/ /lhan cig skyes pa'i rang bzhin bde ba rgyas mdzad pa/ /de bzhin gshegs pa kun gyi bcos min de nyid do/ /de slad khyod kyi sku la rnam par bkra ba yis/ /rma bya'i mjug ma 'chad pa rmad byung chen po lags//sum cu rtsa gnyis rtsa 'di dag dang grangs mnyam pa'i/ /dbang phyug yon tan mchod phyir thogs pa rnam par 'chang / /zhi bde'i sa bon rang gi snying ga'i phyogs na ste/ /dpal ldan ri khrod khyod la rtag par phyag 'tshal lo/ /rdzogs pa'i byang chub phun sum tshogs pa'i gter gyi mchog /dam pa'i sku yi rdo rje dag dang ldan na yang / /de las khyod kyis gcig tu sems can don grub phyir/ /sna tshogs byed pa rnams kyang nges par gzung ba lags/ /kha yig gis ni a ye bdud sde dum bur byas/ /de nas ga yig sems yongs shes pas mkha' la gshegs/ / gti mug sogs sel de slad kha dang ga dag gis/ /nam mkha'i sku ste mkha' 'gro yang ni khyod nyid lags/ /kun gyis bkur ba'i mu stegs ngan pa'i 'dod pa bcom/ /mi rnams bde gshegs go 'phang la ni 'god par mdzad/ /legs par 'dus la dam chos rab bstan phan pa dag /gtan bde dam pa'i lam du bde par bgrod pa'i gnas//rdzu 'phrul rnam 'phrul brgya phrag gnas kyis gang ba yi/ /bsam pa thams cad rdzogs par byed pa'i bum pa thogs/ /e ma gzhan don phul byung bsags pa'i rgyal ba ni/ /ri khrod dam pa 'di yin khyod zhabs la 'dud do/ /de ltar bla ma dam pa sha ba ra dbang bstod pa yi//rin chen brtul zhugs dam pa nags kyi rin chen gyis byas 'dir/ /dge ba gang thob de yis srid pa'i chu gter bying ba dag /phyung nas kun gyis lhun skyes bde 'byor myur du sa thob shog /ces pa dpal sha ba ra'i zhabs kyi bstod pa rin po che rdzogs so// //mkhas pa chen po dpal nags kyi rin chen gyis mdzad pa rje btsun dam pa de nyid kyi spyan sngar chos smra ba gzhon nu dpal gyis ding rir bsgyur ba'o/

CLOSE WINDOW