CLOSE WINDOW

D1160
བོད་ཡིག

/yul la chags pa'i thag pas dbang med drangs/ /brtson pa bsten na rgod pa'ang 'byung 'gyur zhing / /de spangs na ni zhum pa skye bar 'gyur/ /'di yi rigs pa'ang mnyam 'jug rnyed dka' na/ /bdag gi sems dkrugs pa ni ji ltar bgyi/ /shes rab la spyod na ni rgod pa 'byung //'dzin la bsten na zhum pa skye bar 'gyur/ /'di yi zung du 'jug pa rnyed dka' na/ /bdag gi sems dkrugs pa ni ji ltar bgyi/ /'bad pas 'jug na rgod pa 'byung 'gyur zhing / /de klod na ni zhum pa skye bar 'gyur/ /'di yi dbu mar bsgrub pa'ang rnyed dka' na//bdag gi sems dkrugs pa ni ji ltar bgyi/ /bsam gtan nags mes yang dang yang du ni/ /nyes pa'i nags tshal bsregs par gyur na yang / /bdag lta'i rtsa ba brtan po ma zad pas/ /char gyis brlan bzhin mdun na rab tu skye /gang zhig nyon mongs las 'bras tsam gyi rgyun//mthong ba yis kyang de ni ldog 'gyur la/ /sems kyi rgyun kyang spong bar byed mod kyi/ /'gro ba'i don brtson pa las shin tu ring / /skyob pa chags pa tsam dang rnam bral bas/ /'gro ba kun la ltos pa med gyur pa'i/ / sems kyi rgyu ni rgyu zad mar me bzhin/ /phung po lhag ma zad pa'i mya ngan 'das/ /gang yang 'gro kun nyam thag sel byed pa/ /byang chub sems ni bdud rtsi bcud kyis len/ /byang chub rgyu ru mi rtog sgom pa na/ /de tshe bdag ni rnam rtog kho nar rgyug /rmi lam tshul 'drar 'gro kun gang gis kyang //ci yang 'dzin pa nyid du mi byed par/ /bsgoms kyang rtog pa po dang rtog bya yi/ /rnam rtog dgra yi spyod yul nyid la spyod/ /gtso bo shin tu mi bzad 'tshe ba 'di/ /gzigs la bdag la lta ba dri med rtsol/ /bdag ni gces pa gang dang gang rtog pa/ /de dang de nyid dang por rnam par nyams//yang na sngon tshe bgyis pa'i bdag gis nyes/ /'di la bcom ldan 'das kyis ci zhig mdzad/ /'jig rten kun gyi mun sel nyi ma yang / /dmus long dag gis mun nag sel mi bgyid/ /yun rings dus su nad gzhi ston byed cing / /'dir yang rgyun du sems ni rnam rmongs pa'i//mdze can rkang pa lag pa chad pa la/ /thang 'ga' sman bsten pa yis ci bgyir mchis/ /sems kyi shing ni thog ma med dus can/ /nyon mongs kha ba'i khu bas brlan bsgos pa/ /ro zhim dngos por bgyi par mi nus la/ /yon tan chu yi thigs pas ci ru 'gyur//bdag yid nyes pa kun gyi rang bzhin nyid/ /byang chub gser bsgyur rtsir 'gyur ngo mtshar che/ /yon tan de dang de nyid la sbyar na/ /nyes pa'i dngos po nyid du gyur te gnas/ /sman chen nyid du gang dang gang bshad pa/ /de dang de nyid bdag la dug tu gyur/ /rigs pa nyid ni bcud len mchog yin na//gal te yid rton med na de yod min/ /gang zhig nyon mongs bdo ba rnam sel zhing / /gang yang nyes gzhan skyed par mi byed pa/ /de ni rigs pa yin zhes bdag sems na/ /ci 'dra yin zhes slar yang de ma byas/ /bsam pa bag la nyal dang khams bag chags//nyes pa'i rgyu yi gnyen po la sbyar ba/ /bsam pa'i man ngag de ni sgom pa na/ /'di ni ring por mi thogs zhi bar 'gyur/ /skyob pa nyes pa kun dang rnam bral zhing / /chos rnams kun gyi dam pa'i don gzigs pa/ /khyed kyis sna tshogs tshul du'ang des gsungs pas//nyon mongs sa bon ma lus sel bar byed/ /khyed sku mdzes pa'i mtshan gyis 'bar gyur pa/ /de yang mdun na bzhugs pa mthong ba dang / /rna bas btung ba'i bdud rtsi'ang thos gyur pa/ /nyon mongs sa bon ma lus rnam par 'jig /gtso bo khyed la de las rab mchog gyur//chos sku'i nyi ma bla na med pa mnga'/ /bsams kyang 'gro ba'i spyod yul mi 'gyur ba/ /nyes pa'i rab rib 'joms pa ngo mtshar che/ /thugs mchog gang yang rung ba de yis ni/ /zhi gnas gang yang rung ba der bzhugs nas/ /nyes kun rnam pa kun du zhi mdzad pa'i /bcom ldan gang yin de la phyag 'tshal lo/ /de ltar yon tan bla med la bshags pa'i/ /yang dag bstod pa rnam sbyar dge ba ni/ /zla mdzes ltar dkar bdag gis gang bsags des/ /'gro kun bde ba can du 'gro bar shog /bshags pa'i bstod pa zhes bya ba slob dpon tsan+d+ra go mis mdzad pa rdzogs so// //rgya gar gyi mkhan po ba ng+d+ha ka ra wa rma dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa'o// @##/ /rgya gar skad du/ de sha na sta ba pr-i t+ti/ bod skad du/ bshags pa'i bstod pa'i 'grel ba/ 'jam dpal gzhon nur gyur pa la phyag 'tshal lo/ /'di na bstod pa byed pa'i dus su bstod pa rtsom pa rnams sangs rgyas kyi rgyu dang 'bras bu dang / dgos pa mdzad pa'i mtshan nyid kyi gnas skabs rnam pa gsum las brtsams te smra bar byed la/bstod pa byed pa de yang dad pa dang / /mang du thos pa dang / nyam nga ba'i gnas skabs thob pa ste/ rnam pa gsum yin no/ /de la 'di ni gtso cher mang du thos pa'i rgyus dgos pa mdzad pa'i gnas skabs la brten te bcom ldan 'das kyi yon tan brjod pa'i sgo nas sdig pa bshags pa'i tshul smra bar 'dod pa'i phyir//sman pa'i rgyal po mnyam med 'gro ba'i bla/ /nyes pa kun bral yon tan 'byung ba'i gnas/ /skyabs khyed nye bar dmigs nas rtag na ba/ /rang gi nyes pa'i 'gyur brjod bshags par bgyi//zhes bya ba la sogs pa smos pa yin te/ sman pa'i rgyal po zhes bya ba ni sman pa'i gtso bo ste/ nyon mongs pa'i nad kyis gdungs shing ngan 'gror 'gro ba'i sems can rnams gso ba'i rig pa mkhyen pa yin pa'i phyir ro/ /de nyid kyis na mnyam med ces bya ste/ tshangs pa dang drag po la sogs pa'i nang na 'di dang thabs mnyam pa yod pa ma yin no/ /gzhan yang de nyid ni khams gsum pa rnams la lam gyi dam pa ston par mdzad pa yin pas na 'gro ba'i bla ma'o/ /gal te de lta na nyan thos dang rang sangs rgyas dag kyang 'gro ba'i bla ma yin no zhe na/de las khyad par du bya ba'i phyir nyes pa kun bral zhes bya ba smos pa yin te/ 'dod chags dang / zhe sdang dang / gti mug la sogs pa ni sems kyi rgyun la yang dag pa'i ye shes skye ba'i gegs byed pas na nyes zhes bya la/ de bag chags dang bcas pa ma lus pa dang bral zhing nges par spangs pa'o//nyes pa dang bral ba 'ba' zhig tsam gyis bla mar gyur pa yin nam zhe na/ de'i phyir yon tan 'byung ba'i gnas zhes bya ba smos te/ bslab cing byang bar bya ba yin pas na/ yon tan te/ stobs dang / mi 'jigs pa la sogs pa la bya la/de rnams kyi 'byung gnas ni bskyed pa'i gzhi zhes bya ba'i tha tshig go/ /rgyu de dag nyid kyis na skyabs su 'os pa yin pa'i phyir skyabs te/ gang la brten nas sdig pa la sogs pa'i mi mthun pa'i phyogs zad par byed cing / thun mong ma yin pa'i yon tan gyi bdag nyid che ba mnga' bas sangs rgyas bcom ldan 'das ni skyabs dam pa yin pa'i phyir skyabs zhes bya'o//khyed ces bya ba mngon sum gyi shes pas dmigs pa'i yul du gyur pa'o/ /nyes par dmigs nas zhes bya ba ni mngon par dad pa'i sems kyis dmigs shing mngon sum du byas nas nyes pa bshags par bgyi'o zhes bya bar sbyar ro//ci'i phyir bshags she na/ rtag na ba zhes bya ba smos te/ sems kyi rgyud nyon mongs pa'i nad kyis gdungs shing bdag dang bdag gir 'dzin pa'i mtshan nyid dang ldan pa la bya'i rlung la sogs pa 'khrug pa la ni mi bya ste/ 'dir gnas skabs ma yin pa'i phyir ro/ /rang gi nyes pa'i 'gyur ba ni rang nyid kyi sems nyon mongs pa'i dbang gi rang bzhin nyams shing gnas skabs gzhan du 'gyur ba'i tshul gang dag yin pa tshig gis brjod pa'i thal mo sbyar ba la sogs pa lus kyi gus pa'i tshul dang yang ldan pas bshags par bgyi zhing mi bcab par mngon sum du brjod par bgyi'o zhes bya ba'i don to//de ltar tshigs su bcad pa dang po 'di ni bdag nyid kyi bya bar brjod par bya ba dang / 'brel ba dang / dgos pa dang / dgos pa'i yang dgos pa ston pa yin te/ thams cad mkhyen pa nyid yon tan brjod pa'i sgo nas rang gi nyes pa bshags pa ni brjod par bya ba yin la/bstod pa'i tshig ni brjod pa yin no/ /de dag rgyu 'bras bu 'brel pa ni 'brel ba ni 'brel pa yin no/ /lam shes pa'i sgo nas nyon mongs pa las ldog pa ni dgos pa yin no/ /de la brten te rim gyis sangs rgyas kyi go 'phang nyid 'thob pa ni dgos pa'i yang dgos pa yin no//de'i nyes pa'i 'gyur ba de nyid bstan par bya ba'i phyir/ shin tu rgal dka'i chu bo'i rgyun 'dra zhing / /rtog dang dpyod pa ngan pa'i dpa' rlabs can/ /nyon mongs chu srin 'dzin khris dkrugs pa na/ /bdag gi rang gi sems la'ang zhi ma mchis//zhes bya ba la sogs pa smos pa yin te/ kye bcom ldan 'das bdag gi rang gi sems la zhi zhing nyon mongs pa dang bral ba ma mchis so/ /ji ltar med par gyur zhe na/ shin tu rgal dka'i chu bo'i rgyun 'dra zhes smos te/ 'dra ba zhes bya ba ni dper bya ba ste/ ji ltar chu bo'i rgyun drag pos bdas shing g.yengs par gyur pa dag sdug bsngal chen po nyams su myong bar gyur pa yin pa de bzhin du 'khor ba'i gnas su nyon mongs pa'i chu bo'i rgyun bzlog par dka' bas g.yengs par gyur pas na sems la zhi ba dang bde ba ma mchis so zhes bya ba'i don to//ci'i phyir zhe na/ rtog dang dpyod pa ngan pa'i dba' rlabs can/ /zhes bya ba smos te/ rtog pas na rtog pa ste sems kyi rgyu ba rtsing ba'o/ /dpyod pas na dpyod pa ste sems zhib pa'i rnam pa'o/ /rtog pa dang dpyod pa yang yin la ngan pa yang yin pas rtog dpyod ngan pa ste nyon mongs pa can no//de nyid ni dba' rlabs te sems gang la nyon mongs pa can gyi rtog pa dang dpyod pa'i rnam pas dkrugs shing g.yengs pa'i gnas skabs yin pa'i phyir dba' rlabs can te/ de nyid kyis ni brgal bar dka' ba yin no/ /gzhan yang ji lta bu zhe na/nyon mongs chu srin 'dzin khris dkrugs pa na/ /zhes bya ba smos te/ rtog dpyod ngan pa'i dbang gis 'dod chags la sogs pa'i nyon mongs pa skyed par byed pa/ de nyid ni sdug bsngal bskyed cing 'dzin pa dam po'i tshul gyis chos mthun par na chu srin te rgya mtsho'i srog chags so//de rnams kyi tshogs ni mang po'o/ /des dkrugs pa ni khyab cing g.yengs par gyur pa'o/ /rgyu des na ji srid nyon mongs pa can gyi rtog pa ma sangs pa de srid ni rang gi sems zhi zhing dkar po'i chos skye ba'i gzhir mi 'gyur ba'o/ /de yang lan chu bo'i mdo las/bdag ni nor phrogs rkun po rnams la 'jigs pa yod min te/ /de dag gis ni nor bzangs 'phrog par byed na de yang yod ma yin/ /yid kyi dge ba'i nor ni legs par rab tu bsags bsags pa/ /bdag gi tha mal rnam rtog dag gi mngon du 'phrog par byed//ri khrod dang ni mun khang dag dang nags ni stug po ru/ /nor ni rkun po rnams las 'di ni legs par bsrung nus kyi/ /gang du dge ba'i nor ni 'phags min rtog pa 'di yis ni/ /bcom par ma gyur sa phyogs de ni 'gro na yod ma yin/ /zhes bshad pa yin no/ / de la dang po kho nar bcom ldan 'das kyis 'dod chags dang / zhe sdang dang / gti mug dang ldan pa rnams la go rims bzhin mi gtsang ba dang / byams pa dang / rten cing 'brel par 'byung ba ston par mdzad cing / tshangs pa'i gnas bzhi gsungs pa dang mi mthun par gyur pa'i gnas skabs su gyur pa bstan par bya ba'i phyir/'dod chags rgya mtsho'i dba' rlabs che 'khrugs tshe/ /gal te mi gtsang rdzing la brten gyur na/ /der ni bdag yid zhe sdang me yis ni/ /rtswa skam bzhin du nges bsreg nye bar bcom/ /zhes bya ba la sogs pa smos te/ 'dod chags ni 'dod pa'i 'dod chags dang / dngos po'i 'dod chags so/ /de nyid ni mang ba dang stobs che ba'i phyir rgya mtsho'o/ /dba' rlabs ni de dang ldan pa'i rnam par rtog pa du ma ste/ des 'khrugs pa dang g.yo zhing bskyod par gyur pa'o/ /de yang mdo de nyid las/ ji ltar dang ba'i chu 'bab rgya mtsho ni//mi g.yo dba' rlabs kyis ni rab 'khrugs byed/ /de bzhin rtse gcig gyur pa'i sems kyi chu/ /rnam par rtog pas rab tu 'khrug par byed/ /ces bshad pa yin no/ /de ltar gyur pa de'i tshe ci zhig bya ba yin zhe na/ gnyen po bsten par bya ba yin pas de'i phyir/gal te mi gtsang gzings la brten gyur na/ /zhes bya ba smos te/ gal te bsal ba'i phyir mi gtsang ba ste mi sdug pa'i dngos po bsgom zhing 'dod chags kyi rgya mtsho rgal ba'i thabs kyi gzings la rten cing gnas par gyur pa'o/ /gnas skabs der sems ji ltar gnas she na/der ni bdag yid zhe sdang me yis ni/ /skam bzhin du nges bsregs nye bar bcom/ /zhes bya ba smos te/ bsgom pa'i gnas skabs der yul yid du mi 'ong ba la brten pa'i dbang gis bdag gi yid zhe sdang gi mes skam po bsregs pa bzhin du yid la gnod par gyur gyi 'dod chags dang bral ba'i sems zhi ba ni rnyed par ma gyur to zhes rang gi nyes pa brjod pa yin no//de ltar zhe sdang gis gnod par gyur pa la rang gi gnyen po bsten mod ce na/ de'i phyir/ zhe sdang me yi gdung ba zhi bya'i phyir/ /zhes bya ba la sogs pa smos te/ zhe sdang ni gzhan la gnod pa'i sems te/mnar sems kyi rnam pa'o/ /de nyid me ste de las byung ba'i yid mi bde ba'i gdung bas sems kyi rgyud kun nas yongs su sreg pa'o/ /zhi ba ni gnod pa de zhi ba ste sems kyi rgyun de las bzlog pa'o/ /phyir zhes bya ba ni de'i don du'o/ /zhi ba'i phyir ci zhig byed ce na/gal te byams pa'i rdzing ni bsgoms gyur kyang / /zhes bya ba smos te/ gal te zhe sdang gi me'i gnyen por sems can thams cad bde bar 'dod pa'i byams pa ste/ mdza' ba'i sems rdzing gi chu ltar bsil ba zhe sdang gi me 'jil bar nus pa bsgoms shing mang du byas par gyur kyang ngo //de las cir 'gyur zhe na/ der ni skye bo thams cad bder 'dod pa'i/ /zhes bya ba smos te/ de ltar bsgoms pa'i gnas skabs der skye bo thams cad ces bya ba khams gsum par gtogs pa'i 'gro ba ma lus pa la byams pa'i sems kyis dmigs pa'i bde bar 'dod cing gnod pa dang bral bar dga' ba'i sems so//gal te yid 'di de ltar gtod pa na cir 'gyur zhe na/ chags pa'i 'dam gyis yid ni zin par gyur/ /zhes bya ba smos te/ byams pa'i sems kyis bde bar 'dod pa na rjes su dga' ba'i sems dang 'brel ba'i sred pa'i 'dod chags skye bar 'gyur la/de nyid ni sems zhen ching bying ba'i gnas su gyur pas na 'dam ste/ de lta bus yid ni kun nas zin par gyur to/ /'di skad ston te/ mngon par dga' ba dang bcas pa'i byams pa'i sems kyis 'gro ba rnams la chags pa'i kun tu 'dzin pa skye bar 'gyur bas na de nyid ni nyes pa yin no//de ltar yang ji ltar sgrub par byed ce na/ de'i phyir/ chags pa'i 'dam gyi dri ma rnam dag phyir/ /zhes bya ba smos te/ chags pa ni dngos po rnams la mngon par zhen pa'o/ /de nyid ni 'khor ba'i rgyur gyur pas na 'dam lta bu'o//de nyid ni dri ma ste rang gi yid bdag dang bdag gir zhen pa'i skyon chags pa'o/ /de lta bu'i dri ma rnam par dag cing sbyang ba'i phyir ci zhig bya zhe na/ gal te de ni btang snyoms chus 'khru yang / /zhes bya ba smos te/ 'dam gyi dri ma lta bur chags pa de shes rab kyi blos nyes pa yin par shes par bya la/'gro ba thams cad la kun du ltos pa med cing rjes su chags pa dang khong khro ba dang bral ba'i btang snyoms chu lta bus 'khru zhing dri ma sel bar byed pa na nyes pa cir 'gyur zhe na/ der ni 'gro kun nyam thag sel ba yi/ /'jig rten mgon po snying rje'ang rnam par nyams//zhes bya ba smos te/ kye 'jig rten gyi mgon po de ltar btang snyoms la bzhag ba'i gnas skabs der ni sems can thams cad 'don par byed pas rab tu 'jug pas 'gro ba thams cad kyi sdug bsngal sel bar byed pa'i snying rje chen po 'jig rten gyi mgon dang skyabs su gyur pa de yang rnam par nyams shing med par gyur pa des na bdag byang chub sems dpa' nyid du mi 'gyur ro//'on te snying rje de nyid kyang bsam mod ce na/ gtso bo gal te snying rje bsgom pa na/ /bdag ni mya ngan chen po kun du skye/ /zhes bya ba smos te/gtso bo zhes bya ba ni bod pa'o/ /gal te skyon de mthong nas snying rje nyid bsgom zhing mngon du byed pa na bdag gi yid la snying rje'i tshul las byung ba'i mya ngan zhes bya ba yid kyi gdung ba chen po kun du skye bar 'gyur te/ kye ma'o sems can 'di rnams sdug bsngal gyi kun du nyon mongs par 'gyur ro zhes bya ba'i mya ngan gyi sems shin tu gdungs par 'gyur ro zhes bya ba'i don to//de ci zhig bya zhe na/ 'di ni zhi phyir gal te dga' bsten na/ /zhes bya ba smos te/ snying rje las byung ba'i gdung ba zhi zhing mnyam par gnas pa'i phyir dga' ba zhes bya ba'i tshangs pa'i gnas la brten cing gnas par gyur na/de las cir 'gyur zhe na/ g.yo ba'i sems ni rgod pa nyid du gyur/ /zhes bya ba smos te/ de ltar dga' ba'i dngos po la yid gtang ba na yul la g.yo zhing rnam par 'gyur ba'i yid gzengs bstod pa'i dbang gis rgod cing khengs pa nyid du 'gyur gyi rang bzhin zhi bar mi gnas so//'on te de nyid zhi bar bya ba'i phyir thabs gzhan zhig la bsten mod ce na/ gal te dga' ba zhi phyir skyo skyed na/ /de ru sems ni dbang med zhum par 'gyur/ /zhes bya ba smos te/ dga' bas dregs pa'i sems zhi bar bya ba'i phyir skyo ba skyed par byed pa'i dngos po sdug bsngal gyi rnam pa la sogs pa la dmigs nas skyo ba skyed par byed pa na/gnas skabs de ru ni skyo bar byed pa nyid kyi rgyu sems rang dbang med par zhum zhing dmigs pa la gtod mi nus par rtsol ba zhan pa nyid du 'gyur ro zhes bya ba'i don to/de ltar gyur pa na spro bas gzengs bstod na nyes pa cir 'gyur zhe na/ gal te brtson pas dman las bstod pa na/ nga rgyal dgra yi spyod yul dag tu 'gyur/ /zhes bya ba la sogs pa smos te/ brtson zhing 'bad pa dang ldan pas sems zhum zhing dman pa las dregs pa skye bar byed pa'i tshul gang yang rung bas gzengs bstod par byas na yang nyes par 'gyur te/ci zhig ce na/ nga rgyal gyi dbang du gyur te/ nga rgyal dang lhag pa'i nga rgyal la sogs dgra ltar dge ba'i nor 'joms pa'i spyod yul du 'gyur zhing de'i dbang du 'gyur ba ste/nga rgyal zhes bya ba'i dgra bo de'i bran du 'gyur ro zhes bya ba'i don to/ /de ltar tshangs pa'i gnas pa bzhi la dmigs pa na sems kyi skyon du gyur pa bstan nas/ da ni nga rgyal gyi gnyen po bsten pa na skyon du 'gyur pa bstan pa'i phyir/ de'i gnyen por thams cad stong nyid sgom//zhes bya ba smos te/ nga rgyal zhes bya ba'i dgra bo de bsal ba'i phyir de'i gnyen por gyur pa'i sems kyi 'jug pa thams cad sel ba thams cad stong pa nyid ces bya ba/ rgyu ba dang mi rgyu ba dngos po thams cad rnam par 'jig pa'i stong pa nyid bsgoms pas nga rgyal la sogs pa'i mi mthun pa'i phyogs thams cad ldog par 'gyur ba ni gcig gi gcig spangs pa'i mtshan nyid mun pa dang snang ba lta bu'am/lhan cig mi gnas pa'i mtshan nyid gzugs can gyi rdzas yul bum pa dang snam bu lta bu dang 'dra ba yin pa las/ 'dir gzugs can gyi lhan cig mi gnas pa bsal te stong pa nyid kyi don sgom pa la bya'o//de ltar stong nyid kyi don sgom pa na yang cir 'gyur zhe na/ der ni gzhan gyi don la brtson med gyur/ /zhes bya ba smos te/ thams cad stong par sgom pa'i gnas skabs der rang dang sems can ma dmigs pa'i phyir 'gro ba gzhan dag smin cing 'gro ba'i don bya ba la brtson zhing 'bad pa med de/de las ldog par 'gyur ro zhes bya ba'i don to/ /skyon de ltar gyur pas ci zhig dmigs she na/ ci'i phyir/ gal te de yi don du kun rdzob bsten/ /zhes bya ba smos te/ stong pa nyid du blta ba'i skyon de bsal ba'i don du kun rdzob ces bya ba yang dag pa'i don mthong ba la sgrib pa dngos po'i chos la rten cing gnas par byed pa na'o//de las kyang skyon ci zhig 'byung zhe na/ der yid nor gyi bsam pa skye bar 'gyur/ /zhes bya ba smos te/ de ltar dngos po la sems sbyar ba nyo tshong la sogs pa ci nas kyang nor spel zhing sgrub pa'i bsam pa skye bas yid gdung zhing nyon mongs par 'gyur te/kun rdzob la rten cing sbyin pa la sogs gtong bar 'dod pa na gser dang nor bu la sogs pa nor gyi dngos po du ma dag nye bar sogs pa'i blo skye bar 'gyur ba'i phyir ro//gal te de ltar nor sog pa'i bsam pa bskyed kyang nyes pa ci zhig yod ce na/ gal te yid ni nor sog la sbyar na/ /zhes bya ba smos te/ gal te nor la sred pa bskyed nas bsam gtan la sogs pa'i khyad par can gyi sbyor ba spangs nas rang gi yid gser la sogs pa nor sog cing sdud pa la nye bar sbyar zhing sred pa skyed na de'i tshe yid phyin ci log gi dbang du gyur pa nyid yin pas/nyes pa kun gyi chang ni ldud 'gyur zhing / /zhes bya ba gzhan gyis brnyas pa na bag med par gyur pa dang / lus nyon mongs la sogs pa'i nyes pa 'byung la/nyes pa de nyid kyis ni de ni nor gyis skyob pa'i skyes bu la nyes pa'i rgyur gyur pa chang lta bu de ldud cing skye ba yin no/ /gzhan yang nyes pa ci zhig tu 'gyur zhe na/dregs dang rmongs pa'i gnyid kyis myos pas na/ /zhes bya ba smos te/ rgyu de dag nyid kyis sems bya ba dang bya ba ma yin pa'i dbye ba mi shes pas myos par byas pa yin no//gang gis myos par byas she na/ dregs dang rmongs pa'i gnyid kyis zhes bya ba ste/ ra ro ba'i skyes bu dang 'dra bar dregs shing khengs pa dang rmongs pas blo gros nyams pa dang / gnyid dang rmugs pa'i dbang du gyur pa ste dregs pas ni rmongs pa yin la/rmongs pas ni gnyid kyis myos par 'gyur pa'o/ /de dag las kyang nyes pa ci zhig 'byung zhe na/ mngon 'dod thams cad bcom pa nyid du gyur/ /zhes bya ba smos te/ mthong ba'i chos dang skye ba gzhan du dam pas bsgrub par bya ba gang dag yin pa'am/ mngon par mtho ba dang /nges par legs pa'i rgyur gyur pa'i mngon par 'dod pa'i don thams cad bcom zhing brlag par 'gyur ro/ /nyid ces bya ba ni nges par gzung ba'o/ /'dir bsdus pa'i don ni 'di yin te/ nor sog pa sred pa yin la de ni yongs su brnyes par 'gyur ba la sogs pa'i nyes pa rnams kyi rgyu yin no//de yang lan chu bo'i mdo las/ 'di de gus pa thams cad dang / /yon tan rnams ni 'jig byed de/ /gang gis ri rab ltar lci ba'ang / /shing bal lta bur yang bar byed/ /sred pas dgun gyi dus su ni/ /kha ba can yang grang ba'ang //mya ngan dag tu nyi ma'i zer/ /'bar ba dag kyang tshar mi tshor/ /sred pas gting mtha' med pa dang / /gnod pa du mas nyam nga ba'i/ /rgya mtsho'ang glang rjes tsam nyid du/ /shin tu chung ba nyid du sems/ /zhes gsungs pa yin no/ /de ltar sems mi mnyam pa'i tshul bstan nas/nor bsags pa las snying por bya ba'i sbyin pa nyid du yang rjes su mi mthun pa'i sems bstan pa'i phyir/ gang tshe bdag ni sbyin par 'dod na yang / /ser sna stobs can gyis ni nges par 'dzin/ /zhes bya ba la sogs pa smos te/ dus gang gi tshe dka' bas bsags pa'i nor slong ba rnams la bdag sbyin par bya bar 'dod cing 'gyed par spro ba na yang ser sna stobs can zhes bya ba dngos po la mngon par zhen cing chags par byed pa'i ser sna'i kun tu 'ching bar thog ma med pa'i dus can stobs dang ldan pa dag gis nges par 'dzin cing blo la dam por chags pas gtong ba'i mthu med par byed do//de'i tshe ci zhig bya zhe na/ gal te de bsal ci ste byin gyur na'ang / /de tshe yun ring dus su rjes su 'gyod/ /ces bya ba la sogs pa smos te/ gnyen po'i phyogs sgom pa'i stobs kyis ser sna de bsal zhing spangs nas zhing du gyur pa 'ga' zhig la dngos po 'ga' zhig byin par gyur na yang /de'i tshe slar yang ser sna'i sred pa las byung ba'i sems kyi gdung bas yun ring po'i dus su rdzas btang ba rjes su 'gyod par 'gyur ro/ /gal te mos pa brtan pas sems de slar bzlog pa na yang cir 'gyur zhe na/ gal te dad pas slar yang dad byas kyang / /zhes bya ba smos te/ dad pa ni sems kyi dang ba ste/ yid ches pa dang yon tan mngon par 'dod pa'i dad pas sems kyi dri ma bsal te dang zhing rnyog pa med par byas kyang 'jig rten gzhan gyi 'bras bur de ltung 'gyur zhes bya ba rdzas btang ba'i 'bras bu yang mngon par zhen cing lan la re ba'i tshul gyis sems de skyon chags par 'gyur ro zhes bya ba'i don to//de ltar skyon chags pa na/ mi rtag shes pas re ba med byas na/ /zhes bya ba 'du byed thams cad mi rtag pa zhes smos pa'i ston pa'i bka' dran zhing / mi rtag pa'i tshul du ma dag pa la brtags nas rdzas la sogs pa rtag pa med de skad cig ma'i tshul yin par shes par bya ba'i gnyen po des lan la re ba'am sbyin pa'i rnam par smin pa las byung ba'i longs spyod la sogs pa la ma chags par byas nas sems kyi rnyog pa de bsal ba na yang rjes su mthun par gnas te/ci zhig gi zhe na/ rgyu mtshan med pas le los rnam par zhum/ /zhes bya ba rgyu sbyin pa btang ba 'dis longs spyod chen po 'di lta bu zhig thob pas na de lta bu'i 'bras bu bsgrub pa'i phyir sbyin pa la sogs pa rgyur gyur pa rnams la 'bad par byed pa yin na//'bras bu la re ba med par byas pa'i phyir/ sbyin pa la sogs pa'i chos la rtsol mi 'dod cing le lo'i dbang gis sems rnam par zhum zhing sgyid zhan pa nyid du 'gyur ro zhes bya ba'i tha tshig go/ /rang gi don la nyams par brjod de bshags pa bstan nas/ gzhan gyi don las kyang nyams par gyur pa bstan pa'i phyir//mgon po 'jig rten sdug bsngal gyis rab gzir/ /zhes bya ba smos te/ kye mgon po sems can gyi 'jig rten 'di dag 'du byed la sogs pa'am skye ba la sogs pa'i sdug bsngal gsum mam/ brgyad du grags pa dag gis rab tu gzir cing shin tu nyam thag par byas pa de dag kyang /sngon tshe'ang gnyen du gyur pa la bltas nas zhes bya ba 'khor ba'i gnas 'dir skye ba brgyud pa'i tshe gzhan dag tu yang pha ma la sogs pa gnyen du gyur cing bdag dang rjes su 'brel bar gyur pa yin par blos bltas shing yid kyis bsams nas so//yang zhes bya ba ni da ltar 'ba' zhig tu ma zad pa'o/ /rgyu de las brten nas ci zhig byed ce na/ gal te gzhan don spyod par 'dod na yang / /zhes bya ba sems can sdug bsngal gyis nyen pa dag gnyen du ma gyur pa med pas de rnams kyi gnod pa bsal ba'i phyir sbyin pa la sogs pas gzhan gyi don bya'i/byang chub sems dpa'i spyad pa spyod par 'dod cing bya ba de rdzogs par rtsom pa na yang de'i ci zhig tu 'gyur zhe na/ bdag tu 'du shes pa yi dbang med 'dzin/ /zhes bya ba smos te/nye du la sogs pa la zhen pa las bag chags las byung ba'i bdag dang bdag gi 'du shes kyis rang dbang med par 'dzin cing dbang du byed pas bdag med pa la bdag tu lta ba'i phyin ci log tu 'gyur ro zhes bya ba'i don to/ /de ltar bdag tu lta ba la nyes pa ci zhig yod ce na/bdag tu lta ba'i rjes su nga rgyal 'brang / /zhes bya ba smos te/ bdag ces bya ba ni yod do zhes bya ba ni bdag tu lta ba ste/ bdag med pa la bdag tu rlom pa gang yin pa de ni nga rgyal yin la nga rgyal de ni bdag tu lta ba'i rjes su 'brang ste/ rtag pa dang brtan pa dang bdag yod pa la sogs pa mu stegs pa'i lta ba la zhen par 'gyur ro zhes bya ba'i don to//des kyang nyes pa ci zhig skyed ce na/ de ni nga'i zhes yongs su 'dzin par byed/ /ces bya ba smos te/ nga rgyal las byung ba'i ltung ba de yang nga'i zhes bya ba'am/ bdag gi snyam pa'i yongs su 'dzin pa dam po skye bar byed pa des 'ching bar byed do//de ltar gyur pa des kyang nyes pa'i tshogs ci zhig bskyed ce na/ der ni nga rgyal dregs dang 'dod sogs kyis/ /zhes bya ba smos te/ der ni zhes bya ba nga'i zhes yongs su 'dzin pa skye ba'i gnas skabs de'i tshe na nga rgyal la sogs pa'i nyes pa 'byung ste/nga rgyal ni nga rgyal dang lhag pa'i nga rgyal la sogs pa'i nyes pa'o/ /dregs pa ni sems rgyas shing gzengs mtho ba'o/ /'dod pa ni 'dod pa ste des chags pa'i yul la sred pa skyed pa'o/ /sogs pa smos pas ni zhe sdang dang gti mug la sogs pa nyon mongs pa gzhan rnams bsdus la de dag gis kyang ci zhig byed ce na/khros pa'i dgra bzhin du ni rnam par 'joms/ /zhes bya ba smos te/ 'di ltar zhe 'gras par gyur pa'i dgra bo dag shin tu khros pa na srog dang bral bar byed pa la sogs pa'i gnod pa du ma skyed par byed pa de bzhin du/ nyon mongs pa'i tshogs de dag gis kyang dge ba'i srog 'phrog cing 'gyur ba'i sdug bsngal sna tshogs skyed par byed do//bdag tu lta ba ni nyes pa thams cad kyi gzhi yin pa'i phyir ro/ /de yang / bdag yod na ni gzhan du 'du shes shing / /bdag gzhan cha las yongs su 'dzin dang sdang / /'di gnyis dang ni kun tu 'brel pa las//nyes pa thams cad rab tu skye bar 'gyur/ /zhes slob dpon tshogs kyi grags pas bshad pa yin no/ /nga rgyal la sogs pa'i nyes pa de dag nyid kyi mi mthun pa'i phyogs bskyed pa'i dpe bstan pa'i phyir/ gang tshe bdud kyi sde ltar 'jigs pa yi/ /nyon mongs dra ba kun nas bdo gyur pa//zhes bya ba la sogs pa smos te/ dus gang gi tshe na bdud kyi sde zhes bya ba bdud ni 'dod pa'i khams kyi dbang phyug ste/ de'i sde ni dpung tshogs yin la/ de dag kyang mtshon cha sna tshogs thogs shing rgol ba dang g.yul du 'jug pa'i tshul du ma ston pas shin tu 'jigs su rung ba yin no//ltar zhes bya ba ni 'dra ba ste/ nyon mongs pa'i tshogs rnams kyang gnod pa sna tshogs skyed pas 'jigs pa yin pa'i phyir ro/ /nyon mongs pa ni 'dod chags la sogs pa yin la/ dra ba ni de dag gi tshogs mang po la bya ba'am/ de dag gis kun nas dkris pas bsdams shing 'ching bar byed pa yin la/de lta bu'i nyon mongs pa de kun nas bdo bar gyur cing yul gyi bag la nyal sad par byas te/ nyon mongs pa'i kun nas dkris pa rnam pa thams cad du 'bar bar gyur pa na nyon mongs pa'i tshogs nyid bdud kyi sde yin la/de lta bu mi bzad pa'i nyon mongs pa'i shugs 'bar bar gyur pa/ de tshe dus mtshan mi bzad lta bur ni/ /zhes bya ba la/ dus zhes bya ba ni gshin rje'i pho nya yod de/ des de gang gi mtshan mo skyes bu'i mgul du zhags pas btags te khyer bar 'dod pa'i mtshan ma de ni dus mtshan zhes bya'o//lta bur zhes bya ba ni 'dra ba ste/ nyon mongs pa'i dra ba de ni de dang tshul 'dra ste/ gang gis na shin tu mi bzad pa'i 'jigs pa skyed par chos mthun pa yin no/ /de lta bur zhes bya ba ni/ nag po'i phyogs kyi mun pa rnam par 'phel//zhes bya ba bdud kyi phyogs dkar po'i chos dang mi mthun par gyur pa'i rmongs pa'i mun pa de rnam par 'phel zhing rgyas par 'gyur ba'am/ yang na nag po'i phyogs zhes bya ba ni zla ba mar ngo la bya la de'i mun pa smag tu gyur pa'i nang na dgra bo 'ga' zhig gi mtshon cha sna tshogs kyi char phab na shin tu 'jigs pa yin pa dang 'dri bar nyon mongs pa'i phyogs kyi mun pas bsgribs shing dkar po'i chos kyi snang ba dang bral ba na/gnod pa dang sdug bsngal sna tshogs rnam par 'phel bar 'gyur ro zhes bya ba'i don to/ /de ltar dpe'i tshul du ma bstan pas bdag tu lta ba las byung ba'i nyon mongs pa'i tshogs rnams shin tu 'jigs su rung bar bstan pa yin la de nyid kyis na zhi bar bya ba'i phyir sdig pa smod pa'i sgo nas 'chags par 'dod pa'i phyir/sdig pa brjod bgyi rjes 'gyod brnag dka' zhing / /zhes bya ba smos te/ kye bcom ldan 'das khyed kyi spyan sngar sdug pa dang mi sdug pa dag gi phyir sdig pa du ma bgyis shing bsags pa'i sdig pa gang yin pa de brjod par bgyi zhing rjes su bsgrag par bgyi'o//ji lta bu zhe na/ rjes 'gyod brnag dka' zhing zhes bya ba ste/ gang zhig byas na rjes su 'gyod pa'i sems kyi rgyud sred par nus pa brnag dka' zhing bzod par dka' ba skye ba de ni sdig pa'i rang bzhin yin pa'i phyir ro//gzhan yang ji lta bu zhe na/ skye ba sdug bsngal 'gyur ba mi bzad lags/ /zhes bya ba smos te/ skye ba ni 'gro ba lngar lus len pa'o/ /sdug bsngal ni phung po lnga'i bdag nyid can no//skye ba sdug bsngal ni skye ba sdug bsngal te de yang dang yang du len cing 'dzin par gyur pa na las dang nyon mongs pa las byung ba'i 'gyur ba'i sdug bsngal bskyed cing nyams su myong bar byed pa de ni mi bzad pa yin te/ shin tu brnag par dka' ba'i lus dang sems kyi sdug bsngal du ma bskyod pa lags so zhes bya ba'i don to//de ltar na/ de las lhag pa'i rab gnod ci zhig mchis/ /zhes bya ba nyon mongs pa las byung ba'i sdug bsngal de las lhag par ches rab tu gnod par byed pa'i dngos po ci zhig mchis zhes dri ba'i sgo nas/ de las lhag pa'i rab tu gnod pa ni ci'ang ma mchis so zhes nges par gzung ba'o//de ltar sdug bsngal mi bzad pa'i rgyu yin par shes nas ni dor ba'i rigs pa las de ltar mi byed kyi/ de ltar na yang de la rang nyid spyod/ /ces bya ba sdug bsngal gyi rgyu yin du zin na yang de'i rgyur gyur pa'i sdig pa de la bdag rang nyid mngon sum du spyod par byed kyi de las ldog par mi bgyid pa de nyon mongs pa'i dbang du gyur pa yin no zhes rang gi nyes pa brjod pa'i sgo nas 'chags pa'o//gal te de ltar yin na de las/ sems bzlog cing spang bar rigs pa yin pa las de ltar yang bzod par mi nus par bstan pa'i phyir/gal te sna tshogs sdug bsngal rgyur gyur pa'i/ /zhes bya ba smos te/ 'di ltar bzod pa ni bde ba thams cad kyi 'byung gnas yin la/ khro ba ni sdug bsngal thams cad kyi gzhir gyur pa yin pas/ gal te sna tshogs sdug bsngal rgyur gyur pa'i/ /zhes bya ba 'jig rten 'di dang gzhan gyi sdug bsngal lus dang sems kyi cha las byung ba rnam pa sna tshogs pa'i gzhi dang rgyur gyur pa ni zhe sdang yin te/de las ni sems can la 'tshe bar byed pa 'byung ba yin pa'i phyir/ gzhan la gnod pa byed pa las bzlog na/ /zhes bya ba khong khro ba las byung ba'i rgyus gzhan la gnod cing sdug bsngal bar byed pa las/khro ba'i nyes pa rnams dran pa'i sgo nas de las sems rjes su bzlog cing gnyen po dran pas bzod pa sten par byed pa na'o/ /de ltar gnas pa'i tshe cing 'gyur zhe na/ skye bo ngan pa nyes med dgrar gyur pa/ /ral gri'i so ltar gdug pas de 'khrug byed//ces bya ba smos te/ bzod par mi nus kyi blo 'khrugs shing sems kyi rgyun rnyog pa can du byed do/ /gang gis she na/ skye bo ngan pa nyes med dgrar gyur pa/ /ral gri'i so ltar gdug pas de 'khrug byed/ /zhes bya ba skye bo'i tshogs tshul khrims dang bzod pa la sogs pa dam pa'i spyod pa dang bral ba rang bzhin ngan par gyur pa rnams ni bdag gis gnod par byas pa'i nyes pa gzhi mod par yang rgyu med pa'i dgra bor gyur cing rjes su sdang bar gyur pa rnams kyi spyod pa ral gri'i so ltar gdug cing zhe gcod par byed pas bdag gi sems 'khrug par byed do//'on te rang bzhin ngan pa de dag la yang bzod pa bsten cing de la brtse bar bya mod ce na/ gang tshe bdag yid bzod byed 'dod na yang / /de tshe de yi nyes spyod 'ching bas bsdams/ /zhes bya ba smos te/ dus sam skad cig gang gi tshe bdag gi yid 'khrug par byed pa de las bzlog cing gnyen pos sems dang bar byas te/bzod pa'i tshul la gnas par byed 'dod na yang de'i tshe rang bzhin ngan pa'i dgra bo de'i rang bzhin ngan zhing gnod pa sna tshogs byed pa'i nye bar spyod pa sna tshogs pa sems kyi 'ching bar gyur pa rnams kyi sems slar yang bsdams shing dam du 'ching bar byed pas zhe sdang gi dbang du 'gro'o zhes bya ba'i don to//de ltar na yang de'i nyer spyod btang snyoms su gzhag cing sems glan mod ce na/ de ni bkag cing yongs bsdams drag po yi/ /zhe sdang me yis yongs skems brtse dang bral/ /zhes bya ba la sogs pa smos te/de'i nye bar spyod pa ngan pa de las byung ba'i zhe sdang gi 'ching ba de nan gyis bkag cing yongs su bsdams pa na brnags drags pa nyid kyis sems kyi rgyun so na mi gnas shing khong khro ba'i dbang du gyur la/ des na de las byung ba'i zhe sdang drag po de ni bdag dang gzhan gdung bar byed pas me lta bu yin la/me de yis 'phags pa chos kyi rlan dang sems bral bar byed pas sems kyi rgyud skems par byed pa yin la/ de lta bu des na sems brtse ba dang bral zhing snying rje med de dam pa'i spyod pa bzod cing dang ba dang bral bar gyur to zhes bya ba'i don to//de ltar brtse ba dang bral ba'i sems ni ji ltar gnas she na/ ji ltar mi bzad lta ba'i dug can dag /ces bya ba la sogs pa smos te/ ji ltar zhes bya ba dper bya ba ni/ mi bzad lta ba'i dug can dag /ces pa sbrul gang bltas pa tsam gyis gsod par mi nus shing /dug can gyi dbugs kyis brgyal bar byed nus pa'o/ /nang gnas shing ni mkhas rnams spong bar byed/ /ces bya ba ni shing gang gi khong stong gi cha na de lta bu'i sbrul gdug pas gnas bcas pa'i shing de ni mkhas pa blo dang ldan pa rnams rgyang ring por mod kho na la spong bar byed do/de bzhin khong khro'i spyod pa sbed pa yi/ /bdag gi bsam pa dge ba rnam spong byed/ /ces bya ba ni dpe bshad pa'i don bstan pa ste/ tshul de bzhin du khong khro ba zhes bya ba sbrul gdug pa lta bu'i zhe sdang gi cha las byung ba'i spyod pa gzhan la gnod par byed pa dug lta bu nang na gnas pa'i tshul sbed par byed cing 'chab par byed pa'i bdag gi bsam pa ste/sems kyi rnam pa shing lta bu ste/ de dge ba rnams zhes bya ba bslab pa gsum la sogs pa mngon par mtho ba dang nges par legs pa'i rgyur gyur pa'i las kyi tshogs rnams kyis spong bar byed cing 'dor bar byed pa 'di skad ston te/gal te bdag gi sems la mnar sems dang ldan pa'i zhe sdang gi spyod pa sbrul lta bu gnas na de ni snod dug can lta bu yin pas dge ba'i chos rnams mi gnas shing spong bar byed do zhes bya ba'i don to/ /sems la skyon chags pas chos kyi snod du mi 'gyur ba'i tshul gzhan yang bstan pa'i phyir/nyi ma'i zer gyis zhes bya ba la sogs pa smos te/ bdag gi bsam pa la dam pa'i chos kyi char 'bab pa don ma mchis so zhes bya bar sbyar ro/ /tshul ji ltar zhe na/ nyi ma'i zer gyis bsregs pa'i rdo 'dra zhing / /zhes bya ba smos te/ so ga'i nyi ma'i 'od zer shin tu tsha zhing rno bas bsregs shing gdungs pa'i rdo leb la char 'bab pa dang 'dra ba yin te/'dra zhing zhes bya ba ni chos mthun pa ste/ ji ltar rdo ba'i ngos la char gyi rgyun 'bab tu zin kyang 'phel ba'am myu gu skye ba la sogs pa mi snang zhing nang du yang ba ngas par mi 'gyur gyi phyi rol brlan pa tsam kho nar 'gyur la/de yang skad cig tsam na mi snang bar 'gyur ro/ /de bzhin du nyon mongs pa'i tshogs nyi ma'i zer ltar drag pa brgya phrag gis gdungs par gyur pa'i sems la ni chos kyi char ba'i don med do/ /gzhan yang ji lta bu zhe na/ yongs su bskams pas rdul gyur thal ba 'dra//zhes bya ba smos te/ ji ltar thal ba'i tshogs nyi ma'i 'od zer gyis yongs su gdungs shing kun nas bskams par byas pa ni rdul du gyur cing shin tu rtsub par gnas par thal ba dang 'dra ba ste/ ji ltar thal ba'i phung po bskams shing rtsub par gyur pa la char 'bab tu zin kyang khyad par du gyur ba'i dngos po mi skye bas don med pa yin la/'on te mang du 'bab pas brlan pa tsam du gyur pas dus gzhan na de bzhin du gnas so/ /tshul de 'dra bar bdag gi sems thog ma med pa'i dus can gyi rnam par rtog pa ngan pa'i tshogs kyis bsdams shing rdul can du gyur pa la chos kyi char 'bab pa don med do//gzhan yang ji lta bu zhe na/ bye ma'i tshogs kyis khyab pa'i lam lta bu/ /zhes bya ba smos te/ bye ma'i tshogs ni bye ma'i phung po ste mang po zhes bya ba'i don la/ des khyab pa ni kun nas g.yogs shing khebs pa ste/de lta bu'i phyogs kyi rgyun lam du ni char 'bab pa don med do/ /lta bur zhes bya ba ni dper bya ba ste ji ltar bye ma'i tshogs kyis khyab pa'i lam du char gyi rgyun mang du bab kyang dgos pa byed par mi 'gyur gyi ring po mi thogs par snga ma kho bzhin du gnas so//tshul de bzhin du/ bdag gi bsam par chos char don ma mchis/ /zhes bya ba bdag gi sems ma rig pa dang sred pa la sogs pa bye ma lta bus khyab pa'i gzhi la yang dag pa'i chos kyi char 'bab pa don med do/ /dpe 'di dag gis ni 'di skad du ston te/ji ltar zhing sa bzang po dag tu char 'bab pa ni 'bras bu la sems pa 'bru'i tshogs dang 'bras bu'i tshogs rnams 'phel zhing rgyas par byed pas don yod pa bzhin du/ rdo ba'i rgyab dang thal ba'i tshogs dang bye ma'i lam du ni de lta ma yin no zhes chos mi mthun pa'i dpes bstan pa yin no//dpe gsum smos pa ni lung dang / rtogs pa dang / don dam pa ste chos rnam pa gsum yod pas de dag brten pa don med pa dang go rims bzhin du sbyar ba'am/ theg pa gsum gyi chos bstan pa'i snod du ma gyur pa dang go rims bzhin du sbyar ro/ /'di slob dpon gyi dgongs pa ni 'di yin te/yon tan gyi tshogs mang pos brgyan cing dam pa'i spyod pa dang ldan pa dag gis kyang re zhig bdag la smad pa ni bya ba'i cha yin te/ gal te nye bar ma brtags pa'am/ mi dge ba'i bshes gnyen gyi dbang gis sdig pa mi dge ba byas pa na de sbyang ba'i thabs ni bdag la smod pa yin pa'am/gzhan dag tshul de ltar bstan pa'i sgo nas nyes pa 'tshams su 'jug pa ni rnam par sun 'byin pa'i stobs kyis sdig pa dang bral bar gyur te/ sdig pa shin tu mi bzad byas pa yang / /bdag la rnam par smod pas bas par 'gyur/ / zhes bshad pa yin no/ /tshul 'di ni skabs 'di dang gzhan dag tu yang sbyar bar bya'o/ /bdag la smod pa'i tshul gzhan dag kyang bstan pa ni/ rang gi sdug bsngal zhes bya ba la sogs pa smos pa yin te/ de'i don kyang kye 'jig rten gyi mgon po zhes bcom ldan 'das la bos te/ de yang bdag gis bzod par mi nus te/khyed kyis bstan par mdzad pa'i lam la gus pa med cing don med par ma zad kyi khyed kyang bdag gis shes shing rten par ma nus so zhes bya ba ni 'ang zhes bya ba'i don yin no/ /ci'i phyir zhe na/ rang gi sdug bsngal mi bzad ma dpyad pas/ / zhes bya ba smos te/ bdag rang nyid kyis nyams su myong ba'i sdug bsngal gyi tshogs drag cing rtsub pa mi bzad cing brnag par dka' ba de sdig pa'i rnam par smin pa las byung ba yin pas blos ma dpyad cing rtog par ma gyur pas rgyu des na/ gang zhig bdag la phan brtson lta bur ni//zhes pa khyed lta bu gang zhig bdag la phan par brtson zhing gnod pa las bzlog pa'i mdza' bshes lta bur gyur pa'am/ lta bu zhes bya ba dper mi drang bar/ gang zhig bdag la phan par brtson pa nyid/ /ces nges par gzung bar drang du yang rung ste bdag la phan par brtson pa nyid du gyur pa'o//gang gis she na/ bzod dang sbyin pas bdag la phan 'dogs pa/ /'jig rten mgon de'ang bdag gis bzod mi nus/ /zhes bya ba smos te/ bzod pa dang ni bzod pa'i pha rol tu phyin pa'o/ /sbyin pa ni sbyin pa'i pha rol tu phyin pa ste/ 'di gnyis ni gzhan la phan gdags pa'i thabs kyi dam pa yin pas gtsor smos pa yin te/de dag gis mchog tu phan 'dogs shing dgos pa sgrub par byed pa'i ngang tshul can yin pa las de dag rjes su ston par mdzad pa na/ bdag gis bzod cing bsten par mi nus so/ /zhes bya ba'i don to//bdag ci zhig byed cing bzod mi nus she na/ sdang bar byed dam 'bros shing 'byol ba'am/ /zhes bya ba smos te/ sdang bar byed pa ni dgra bor 'du shes pa'o/ /gzhan yang ci zhig byed ce na/ 'bros shing 'byol ba ste/ phan pa'i gdams ngag bstan pa na de mi bzod par gzhan du 'gro ba'o//rab tu g.yeng ngam zlog par byed na yang / /zhes bya ba ni gdams ngag mi len par phan tshun rgyu zhing gnas su sems phyogs par byed pa'am/ zlog par byed dam zhes bya ba ni gnas na gnas pa nyid na yang slar tshig gis bzlog cing gshe bar byed pa'o//yang zhes bya ba ni shin tu dka' ba'i tshul te/ 'di ltar gdul dka' ba mi srun pa sems kyi rgyun log par mos pas skal ba med par gyur pa de lta bu la yang ston par mdzad cing / dam pa'i chos kyi char gyis sbyin par mdzad pas bdag 'dra ba skal ba med cing rang bzhin ngan pa la yang /rgyun mi 'chad par bdag 'dra la slob byed/ /de 'dra bla ma yin snyam bdag mi sems/ /zhes bya ba rgyun mi 'chad par slob par mdzad cing rig pa la 'dzud par mdzad cing skal ba can du byed pa'o/ /de 'dra zhes bya ba de lta bu la yang phan pa'i gdams ngag bstan pa'i bla ma yin pa snyam du bdag mi sems te/ma rig pas blo'i mig ldongs pa'i phyir log par 'dzin par 'gyur ro zhes bya ba'i don to/ /'di skad ston te/ ji ltar dmus long dag gis nyi ma dang zla ba'i rnam pa mi shes pa bzhin du lus dang sems kyi rgyud ma bsgom pa'i sems can dag gis kyang chos zab mo'i don rtogs shing phan pa'i gdams ngag len par mi nus so//de ltar sems kyi skyon gyi 'gyur ba rnam pa sna tshogs smras nas/ da ni rnal ma'i sems kyis yang bcom ldan 'das la gsol ba 'debs pa'i tshul bstan pa'i phyir/song ste gsol ba btab kyang rnyed dka' zhing / /zhes bya ba la sogs pa smos te/ song ste zhes bya ba ni phan 'dogs pa'i rgyu 'ga' zhig yod na don du gnyer ba de de'i thad du song nas bsnyen bkur la sogs pas mnyes par byas te/ gsol ba btab par gyur kyang rnyed par dka' zhing thob par dka' ba lta bu yin pa dang /bzod pa'i dus su sman chen mchog gyur pa/ /bzod pa'i ngang tshul gal te mi bzod na/ /zhes bya ba gang gi tshe khro ba'i dgra bos gtses pa'i sems rme byung ba na/ sdug bsngal dang du len pa la sogs pa'i thabs kyis gso dgos pa yin la/des na de'i tshe bsten pa'i sman sems kyi nad gso bas chen por gyur pa thabs gzhan las khyad par 'phags pa mchog tu gyur pa ni bzod pa yin pas bzod pa bsten dgos na bzod pa'i ngang tshul lam rang bzhin te/ gal te ma bzod cing bsten par ma byas na zhe sdang gi nad gso ba'i/bzod pa'i rgyu gzhan bdag la ci zhig mchis/ /zhes pa bzod pa'i rgyu'i thabs gzhan bdag la ci zhig mchis te ma mchis so zhes bya ba'i don to/ /da ni nyon mongs pa rang dbang med pa nyid du gyur pa bstan pa'i phyir/ nyon mongs srin pos zin pas sems dkrugs shing / / rim nya bcas bdag phan la yang brtson med pa'i/ /'jig rten blta bar 'os pa mthong ba na/ /gtso bo bdag sdang nyid skye'i snying rje'i min/ /zhes bya ba smos te/ /gtso bo zhes pos nas bdag gi sems la ni zhe sdang skye'i snying rje nam yang skye bar ma gyur to zhes ston to/ /su zhig la snying rje mi skye zhe na/'jig rten la'o/ /ji lta bu zhe na/ nyon mongs srin pos zin pas sems dkrugs shing / /zhes bya ba smos te/ 'dod chags dang zhe sdang la sogs pa'i nyon mongs pa rnams ni 'jigs shing gnod pa skyed pas srin po lta bu yin la/ des zin cing dbang du byas pas sems kyi rgyud dkrugs shing rang dbang med par byas pa yin la/de nyid kyis na rims dang bcas pa yin te/ sems skyon dang bcas shing mi mthun pa'i phyogs kyis myos par gyur pa yin la/ rgyu des ni bdag la phan par byas pa'i thabs 'jig rten 'di 'am gzhan du sdug bsngal med par bya ba'i las kyi rtsom pa la 'jug pa la yang brtson pa med cing yongs su dor bar byed pa'am/yang na nyon mongs pas dkrugs pa'i phyir bdag nyid g.yang sar mchong ba dang / dug za ba'i sbyor bas rang nyid la gnod pa byed pa'i 'jig rten pa dag ni blta bar 'os pa zhes bya ste/gang zhig mthong na rjes su brtse ba'i sems skye zhing snying rje'i yul du gyur pa de ni byang chub sems dpa'i spyod pa dang rjes su mthun par 'gyur ba'i rgyu yin pas blta bar rigs pa yin na/ de lta bu mthong ba na yang nyon mongs pa'i stobs che ba nyid kyis zhe sdang nyid skye bar byed kyi snying rje skye ba ni ma yin no//da ni rang nyid rigs pa'i tshul la gnas kyang nyon mongs pa'i dbang du gyur pa'i tshul bstan pa'i phyir/ skye bo rang gi las 'bras la spyod cang / /thams cad dbang med 'jigs pa yin par shes/ /gzhan dag nyes med par ni brtags gyur kyang /zhes bya ba smos te/ skye bo zhes bya ba ni las dang nyon mongs pas bskyed pa'i 'gro ba rnams te/ de ni rang gi las 'bras la spyod cing / /zhes bya ba gang rang gi lus dang ngag dang yid kyis byas pa'i las kyi 'bras bu rnam par smin pa yid du 'ong ba dang yid du mi 'ong ba la spyod pa yin pa'i phyir gzhan gyi rkyen las gyur pa'i sdug bsngal nyams su myong yang de nyid rang nyid kyis spyad pa'i las kyi 'bras bu yin pas gzhan dag gis nyes pa ma yin pa dang /sems can thams cad kyang rang dbang med par 'jig pa yin zhing skad cig ma'i chos can yin pa'i phyir thams cad mi rtag par yang shes la/des na rang gi bde sdug la myong ba ni rang gi las byung bar gzhan dag gis nyes par gyur pa med do/ /rang gi skyon yin par blos brtags shing shes par gyur kyang bzod par ma nus pa ni rang gi sems gti mug cing ma rig pa'i mun pas bsgribs pa yin pas na mi shes pa'i rab rib dag gis rnam par bslus par gyur pa'i rnam par 'khrul pa'am nus pa ni ngo mtshar che ba yin pas/rmongs pa rab rib dag gi rnam 'khrul gzigs/ /zhes bya ba smos pa yin no/ /rnam par 'khrul pa de nyid yang bstan pa'i phyir/bdag ni nyes pa'i rgya mtsho yin na yang / /su yi nyes pa'i cha yang bzod mi bgyid/ /ces bya ba smos te/ de la re zhig bdag nyid ni lus dang sems kyi rgyud ngan par byed pa'i nyes pa 'dod chags la sogs pa'i nyon mongs pa dang / de las byung ba'i las mi dge ba rgya mtsho snyed du mang zhing rgya che ba yod pa yin na yang /gzhan su yang rung ba'i nyes pa'i rnam pa shin tu phra ba'i cha tsam mam thigs pa tsam yang bzod par mi bgyid cing brnag mi nus pa de ni bdag gi sems ngo mtshar che'o/ /gzhan yang / bzod pa yon tan phun tshogs gzhan mchis kyang //zhes bya ba la/ bzod pa ni khro ba'i gnyen por gyur pa 'ba' zhig tu ma zad kyi gzugs bzang ba la sogs par 'gyur ba'i yon tan phun sum tshogs pa mtha' yas pa dag yod pa'am/ yang gzhan gyi bzod pa yon tan phun sum tshogs kyang zhes bshad du yang rung ste/yon tan dang ldan pa gzhan rnams kyis bzod pa dang tshul khrims la bzod pa'i yon tan phun sum tshogs pa yod pa dag kyang ngo / /gang phyir mi bzod de 'dir ngo mtshar che/ /zhes bya ba ni rgyu gang gis bzod pa'i yon tan mtha' yas kyang de'i cha tsam yang brten cing bzod par mi nus pa de ni rmongs pa'i rang bzhin can gyi bdag gi sems 'di ngo mtshar te/rmad du byung ba yin no zhes bya ba'i don to/ /kyang zhes bya ba ni 'gal bar snang ba'i tshul ston pa yin te/ nyes pa'i rgya mtsho yin yang nyes pa mi bzod la/ yon tan mtha' yas kyang yon tan mi brten pa ni 'gal ba yin pa'i phyir ro//nyes pa de nyid 'byung ba'i tshul bstan pa'i phyir/ dbyar dus mkha' la ldang ba lta bur ni/ /bdag gi yid la nyon mongs sprin tshogs rnams/ /yang dang yang du 'gro zhing 'ong gyur pa/ /ngo tsha rnam spangs le lo can bdag ngan/ /zhes bya ba smos pa yin te/dbyar gyi dus su nam mkha' la char sprin gyi tshogs 'dus shing ldang bar gyur nas char 'bebs pa lta bur bdag gi yid kyi mkha' la 'dod chags la sogs pa'i nyon mongs pa'i tshogs glo bur du 'byung zhing sprin dang chos mthun pas sprin lta bu'i tshogs te mang po rnams 'byung ba yin la/ji ltar 'byung zhe na/ yang dang yang du 'gro zhing 'ong gyur pa/ /zhes bya ba'i don to/ /rgyun du yang dang yang du phan tshun du 'gro zhing slar 'ong ba yin te/ ji ltar sprin dag mkha' la tshogs 'dus shing ldang zhing rgyu ba dang chu'i rgyun 'bebs par byed pa de bzhin du bdag gi sems la nyon mongs pa rnams rtag tu 'byung zhing ldang la sdig pa'i char bskyed nas bar gyur nas char 'bebs par byed do//de bas na nyon mongs pa de lta bu dang ldan zhing 'byung bar bdag nyid shes bzhin du ngo tsha ba'i chos rnam par spangs nas nyon mongs pa spang ba'i phyir brtson 'grus la mi brten cing le lo'i dbang du gyur pa ni bdag nyid shin tu ngan te smad par bya ba nyid yin no//de ni nyon mongs pa bsal ba'i thabs kyi ting nge 'dzin dang mi mthun par gyur pa bstan pa'i phyir/ gal te nyon mongs grang lhags byung gyur na/ /ting 'dzin 'bar bas rgyal bar spro gyur kyang / /zhes bya ba la sogs pa smos te/nyon mongs pa ni 'dod chags la sogs pa'o/ /de nyid ni tshul khrims 'chal ba la sogs pa'i gnod pa'i rgyur 'gyur ba la lus dang sems nyon mongs par byed pa'i tshul gyis grang lhags drag po lta bu yid te/ ji ltar grang lhags kyis lus rengs pa na rtsol mi nus pa dang 'dra bar nyon mongs pa'i grang bas nyen pa na 'phags pa'i lam la 'jug mi nus pas grang ba dang 'dra la/de ni ma rig pa'i rgyu las byung bar gyur pa na sems kyi rgyud las bsal dgos na gang gis bsal zhe na/ ting nge 'dzin te gnyen po bsgoms pa las sems rtse gcig tu bya bas so//khyad par ji lta bus she na/ 'bar bas rgyal bar zhes bya ba ste/ bsam gtan gyi gtsub shing las byung ba'i ye shes kyi me 'bar bas nyon mongs pa'i grang lhags zil gyis gnon cing brgyal bar bya ba ste/ gang gi phyir grang ba'i gnyen po me yin pa dang 'dra bar chos mthun pa'i phyir ro//de lta bu bya bar mngon par spro zhing rtsol bar gyur kyang ngo / /de ltar rtsol ba na nyes pa ci zhig 'byung zhe na/ gnyid dang rmugs pa'i rab rib bde gyur pas/ /mal stan 'dod pa dag kyang rnam par 'phel/ /zhes bya ba smos te/ gnyid ni gang gis 'jug pa rang dbang med par sems sdud pa'o//rmugs pa ni gang gis sems blong zhing yul legs par 'dzin mi nus pa ste de gnyis ni mi shes pa'i rgyu yin pas na rab rib po/ /de bdo ba ni shugs drag par 'byung bas sems gsal ba zil gyis gnon par nus pa'o/ / rgyu des na/ mal stan 'dod pa dag kyang rnam par 'phel/ /zhes bya ba gnyid dang rmugs pa'i shugs kyis ting nge 'dzin gyi yul la gtod par mi nus kyi/ ci nas kyang mal stan bde mo dag la nyal bar 'dod pa'i sems 'gyur zhing le lo rnam par 'phel bar 'gyur ro/ /de ltar nyon mongs pa'i gnyen po la bsten mi nus pas cing 'gyur zhe na/bdag yid 'dod chags zhags pas dbang med bgyis/ /zhes bya ba smos te/ bdag gi yid ting nge 'dzin dang bral bas nyon mongs pa'i dbang du gyur pa yin pas/ 'dod chags zhags pas dbang med bgyis/ / zhes bya ba la/ 'dod chags ni yul la mngon par zhen cing chags pa yin la/ de nyid ni 'ching ba dam po yin pas zhags pa dang 'dra la des sems kyi rgyud rang dbang med par bsdams shing gol ba'i dbang med par byas pas na dbang med bgyis zhes bya ste/ stobs med par byas so zhes bya ba'i don to//zhe sdang mes bsregs nga rgyal dag gis bcom/ /zhes bya ba ni sems kyi kun nas mnar sems pa'i mes rang gi rgyud la gnas pa'i 'phags pa'i lam dang rjes su mthun pa'i dge ba rnams bsregs shing zad par byas pa'o/ /nga rgyal dag gis bcom zhes bya ba ni nga rgyal dang che ba'i nga rgyal la sogs pas sems kyi rgyud khengs shing 'phags pa'i nor dang bral bar byas pa'o//de dag 'ba' zhig tu zad dam zhe na/ ma yin te/ nyes pa kun gyi mda' mdung mtshon cha yis/ /kun tu gang bas dbang med pa rgyal bar gyur/ /zhes bya ba nyes pa yang yin la kun yang yin pas na nyes pa kun gyi ste/ji skad smos pa'i nyon mongs pa de las gzhan pa'i nyon mongs pa dang nye ba'i nyon mongs pa'i tshogs rnams so/ /nyon mongs pa de dag nyid rno ba'i phyir dang sems kyi rgyud phra rab 'bigs pa'i phyir mda' lta bu yin la/ rags pa'i tshul gyis 'bigs shing gnod pa tshabs che bar bskyed pa'i phyir ni mdung lta bu yin te/de lta bu'i mtshon cha gang yin pa de yis sems kyi rgyud kun tu gang ba ste lus la phog pa'i mtshon cha zug rngur lus pa dang / phyi rol mchod pa dang 'dra bar bag la nyal ba dang / kun nas dkris pa'i nyon mongs pa'i tshogs kyis sems la khyab pa'i rgyu des na gnyen po'i chos la rtsol ba'i dbang med par shin tu zhum par gyur cing 'phags pa'i lam la rtsol mi nus par gyur pa'am/nga rgyal zhing myos pa lta bur gyur to zhes bya ba'i don to/ /nyon mongs pas sems dbang du byas pa'i nyes pa gzhan dag kyang bstan pa'i phyir/dran pa rnyed nas bcings shing myur skrag la/ /rab tu bcom pas rnam par zhum gyur cing / /g.yo dang sgyu rnams kyis kyang bslus gyur pas/ /dman pa bdud kyi spyod yul dag na 'khyam/ /zhes bya ba smos te/ de ltar nyon mongs pas zil gyis mnan te brgyal ba lta bur gnas pa las slar sems kyi gnas skabs rnal du 'dug pa'i dran pa rnyed pa na yang slar nyon mongs pa rnams kyis bcings shing de'i dbang du 'gyur la/de nyid kyis na myur du skrag par 'gyur te/ sems rnal du 'dug pa'i tshul la ring por mi gnas par nyon mongs pa'i tshogs kyi mtshon cha rnams kyis dkrugs shing skrag par byas la rab tu bcom zhing zil gyis mnan par byas pas sems kyi ting nge 'dzin gyi yul la rtsol mi nus par rnam par zhum par 'gyur zhing nus pa dang bral bar 'gyur la/de nyid kyis na sems mi mthun pa'i dbang du gyur pas g.yo sgyu la sogs pa'i nyon mongs pa rnams kyang 'byung bas des sems bslus shing 'phags pa'i lam stor bar 'gyur la/des na sems gnyen po'i stobs dang bral te nus ba zhan cing dman pas mi shes pa'i dbang gis bdud kyi spyod yul nyon mongs pa'i tshogs kyi nang na gnas shing yun ring por don med par 'khyam par 'gyur ro zhes bya ba'i don to//de lta bu'i nyon mongs pa de bsal ba'i phyir zhi gnas dang lhag mthong bsgom pa yin na yid gtod mi nus par bstan pa'i phyir/ ji ltar ji ltar zhi gnas la dmigs shing / /de dag der yid yang yang gtad pa na/ / de dang de las nyon mongs zhags pa ni/ /yul la chags pa'i thag pas dbang med drangs/ /zhes bya ba smos te/ tshul ji lta ji ltar zhi gnas zhes bya ba dmigs pa'i yul la rtse gcig pa bsam gtan gyi tshul la gnas shing sems kyis dmigs par byed la/ rtse gcig pa de thob par bya ba'i phyir ting nge 'dzin gyi yul gang yang rung ba de dang der yid yang dang yang du gtod cing rtse gcig pa la slob par byed pan yang de ltar gnas par mi 'gyur te/dmigs pa'i yul de dang de las ni gnas su gyur pa'i nyon mongs pa'i zhags pa dam po lta bu 'dod pa'i yul lnga la mngon par chags shing zhen pas sems phyi rol tu bltas par gyur pa'i thag pa lta bus sems kyi rgyud dmigs pa'i yul la nang du gtod pa las rang dbang med par phyir drangs shing g.yeng bar 'gyur ro//'di skad ston te/ rnam par rtog pa'i tshogs bsal ba'i phyir gang gi tshe zhig gnas kyi stobs kyis sems nang du bsdus te/shes rab kyis chos rnams rang bzhin gyis dben zhing rtog pa dang bral ba'i yul la gtad pa na yang nyon mongs pa'i tshogs kyis bskyod pas sngon nyams su myong ba'i yul gyi dbang du 'gyur zhing g.yengs par byed do zhes bya ba'i don to/ /de ltar gyur kyang yul la blan pa'i rtsol ba bstan te sems mnyam par gzhag mod ce na/de ltar gnas par dka' bar bstan pa'i phyir/ brtson pa bsten na rgod pa 'byung 'gyur zhing / /zhes bya ba smos te/ brtson pa ni 'dir dge ba'i phyogs la mngon par spro bas bsgrims te 'jug pa la bya'i/ ra ma Na dang / ba ra ta'i sgrung las byung ba'i si tA dang / gro bi ta slar dgug pa'i phyir rtsol ba la sogs pa lta bu 'dod chags dang zhe sdang gis kun nas bslang ba las byung ba'i rtsol ba la ni mi bya'o/ /des na 'dir le lo'i gnyen po brtson 'grus kyi sbyor ba bsten cing gnas pa na rtsol bas sems zhi ba las nyams pa'i phyir sems phyi rol du rgod cing 'phyar ba 'byung bar 'gyur ro//de ltar gyur na brtson pa yang spong mod ce na/ de spangs na ni zhum pa skye bar 'gyur/ /'di yi rigs par mnyam 'jug rnyed dka' na/ /bdag gi sems dkrugs pa ni ji ltar bgyi//zhes bya ba smos te/ rgod par 'gyur ba'i nyes pa mthong nas brtson pa de spangs te rtsol ba btang bar gyur na/ sems nang du zhum zhing dmigs pa la gtod pa mi skye bar 'gyur ro/ /de bas na nyon mongs pa dang ldan pa'i sems 'di'i tshul las/ rgod pa dang zhum pa'i tshul gnyis ka dang bral zhing cha mnyam par gnas pa ni sems rigs par mnyam du 'jug pa yin pa las de ni shin tu rnyed cing thob par dka' ba nyid kyis na/ bdag gi sems mi brtan zhing nyon mongs pa'i tshogs kyis dkrugs pa ji ltar bgyi zhes pa ste gnyis ka ltar yang skyon du 'gyur zhing brtan pa dang bral bas de ci zhig la spyod par bgyi zhes bya ba'i don to//spang ba dang blang ba'i cha ni shes rab kyis 'grub par 'gyur bas de bsten par bya'o zhe na/ de'i phyir/ shes rab la spyod na ni rgod pa 'byung / /'dzin la brten na zhum pa skye bar 'gyur/'di ni zung du 'jug pa rnyed dka' na/ /zhes bya ba smos te/ shes rab ni chos rnams kyi spyi dang rang gi mtshan nyid la khyab par ji lta ba bzhin du rnam par dpyad pa yin la/ de lta bu de la gzhan zhig spyod par 'gyur na ni rgod pa 'byung bar 'gyur te/ 'di ltar sems zhes bya ba'i yul sna tshogs la rnam par 'phyos pas zhi bar mi nus so//gal te de spangs nas sems zhi gnas kyi yul gang yang rung ba la gtad pa'i tshul gyis 'dzin cing nang du sdud pa kho na la brten par 'gyur na ni/ shes rab dang bral zhing yul rnams las blan pa'i phyir shes rab kyi cha gsal ba dang bral bas sems nang du zhum pa skye bar 'gyur ro//de ltar na skyon chags pa 'di'i zung du 'jug pa zhes bya ba zhi gnas dang lhag mthong cha mnyam par gnas pa ni zung du 'jug pa zhes bya ste/ 'di ltar glang gnyis kyi gnya' shing cha mnyam par gnas pas zhing sa shin tu sra ba dag kyang legs par 'byed par nus pa dang 'dra bar gang gi tshe sems zhi gnas dang lhag mthong cha mnyam par gnas pa mar me rlung gis ma bskyod pa ltar gnas pa'i tshe nyon mongs pa'i tshogs spangs pa'i ye shes skye ba yin la las dang po pa'i sems ka zung du 'jug pa de shin tu rnyed dka' zhing de ltar gnas par mi nus la/de nyid kyis na sems nyon mongs pa'i dbang du gyur pa'i phyir/ bdag gi sems dkrugs pa ni ji ltar bgyi/ /zhes bya ba smos so/ /bdag gi sems zhi gnas dang lhag mthong dang bral bas rnam par 'jug pa la gnas mi nus pas/ dkrugs shing g.yengs par gyur pa 'di ltar spyad par bgyi zhing ci zhig bsgrub par bgyi zhes bya ba'i don to//don de nyid la rtsol ba kho nas 'jug mod ce na/ 'bad pas 'jug na rgod pa 'byung 'gyur zhing / /de glod na ni zhum pa skye bar 'gyur/ /zhes bya ba smos te/ zung du 'jug pa la sogs pa'i tshul du sems de gnas pa'i phyir/shin tu 'bad par bsgrims te 'jug cing rtsol ba na ni sems de rgod cing g.yeng ba 'byung bar 'gyur bas bcom pas rtsol ba las kyang sems gnas pa mi rnyed la/ de ltar de nyes pa nyid yin pas de bzlog pa'i phyir 'bad pas 'jug pa'i sems de glod cing rtsol ba btang bar gyur na ni dmigs pa'i yul brjod pa la sogs pa'i skyon gyis sems nang du zhum zhing bying ba skye ba 'byung bar 'gyur bas/tshul 'di ltar gnas pa las kyang ting nge 'dzin la sems rtse gcig pa'i sems skye bar mi 'gyur ro/ /de bas na/ 'di yi dbu mar sgrub pa'ang rnyed dka' na//zhes bya ba smos te/ de ltar rgod pa dang zhum pa'i nyes pa dang ldan pa'i sems 'di dbu mar bsgrub pa zhes byab zhum rgod kyi mtha' gnyi ga dang bral bas dbu mar bsgrub cing mnyam par gnas pa gang yin pa de'ang shin tu rnyed par dka' ste/ sems ni rang zhin gyis gdul dka' ba yin pa'i phyir mi mthun pa'i dbang du gyur pa kho na yin no//de'i phyir/ bdag gi sems ni dkrugs pa ji ltar bgyi/ /zhes bya ba smos te/ sems rang bzhin gyis dag cing 'od gsal ba yin na yang glo bur ba'i nyon mongs pa'i tshogs kyis dkrugs shing rnyog pa can du gyur pas yang dag pa'i don gyi gzugs brnyan 'char zhing mthong bar mi nus na/ji ltar gnas shing bsgrub par bgyi/ /zhes sems nyid kyi nyes pa brjod pa'i sgo nas bshags pa'o/ /da ni nyes pa'i rtsa ba ma rig pa las byung ba'i bdag tu 'dzin pa yin par bstan pa'i phyir/bsam gtan nags mes yang dang yang du ni/ /zhes bya ba smos te/ bsam gtan zhes bya ba sems mnyam par gzhag pa ste bsam gtan bzhi la sogs pa'o/ /des ni nyon mongs pa'i tshang tshing rnams sreg cing zad par byed pas na nags la mched par byed pa'i me chen po dang 'dra la/de lta bu'i me des yang dang yang zhes bya ba skad cig ma re re'i dus dag tu'o/ /ci zhig byed ce na/ nyes pa'i nags tshal bsregs par gyur na yang / /zhes bya ba smos te/ 'dod chags la sogs pa'i nyes pa ste/ de nyid mang zhing bsreg par bya ba'i gzhir gyur pas nags tshal dang 'dra ba de bsam gtan gyi mes bsregs par gyur cing bsal bar gyur kyang /bdag lta'i rtsa ba brtan po ma zad pas/ /zhes bya ba bdag dang bdag gir 'dzin pa nyon mongs pa skye ba'i gzhir gyur pas rtsa ba lta bu'i thog ma med pa'i dus nas byung bas shin tu brtan pa gang yin pa de yang dag pa'i shes rab kyis zad par ma byas shing drungs nas dbyung bar ma byas par slar yang rab tu skye ba yin no//tshul ji ltar zhe na/ char gyis brlan bzhin mdun na rab tu skye /zhes bya ba smos te/ ji ltar dbyar gyi tshe dang shing dag bsreg par gyur kyang gang zhig rtsa ba tshig cing bton par ma gyur pa de brlan dang phrad pa na slar skye ba dang 'dra bar bdag tu lta ba ni nyes pa kun gyi rtsa ba yin pas de ma spangs na yul gyi rkyen dang ldan pa na nyon mongs pa'i kun du rgyu ba mdun na gnas pa'i tshul du mngon du skye bar 'gyur ro//nyon mongs pa'i rtsa ba ni gang zag la bdag med par mthong bas kyang sel bar 'gyur bas shes rab kyi cha de tsam gyis chog go zhe na/ gang zhig nyon mongs las 'bras tsam gyi rgyun/ /mthong ba yis kyang de ni ldog 'gyur la/ /zhes bya ba smos te/ nyon mongs pa ni 'dod chags dang zhe sdang la sogs pa'o//las ni dge ba dang mi dge ba dang lung du ma bstan pa'i bdag nyid can no/ /'bras bu ni rnam par smin pa'o/ /tsam zhes bya ba dbang phyug la sogs pa la dga' ba ste/ nyon mongs pa dang las kyi 'bras bu nyi tshe tsam yin gyi de las logs shig na byed pa po med do//de'i rgyu ni skad cig ma'i rgyun chags su 'byung ba ste/ de mthong zhing rnam par dpyod pa'i rnal 'byor pa dran pa dang shes bzhin dang ldan pa'i shes rab kyis mthong ba na yang bdag tu lta ba de ldog par 'gyur te/ rnam par brtag na 'khor ba'i rgyun ni las dang nyon mongs pa'i 'ba' zhig tsam las 'byung gi de las logs shig na bdag ces bya ba ma grub pa'i phyir ro//de log pa 'ba' zhig tu ma zad kyi/ sems kyi rgyun kyang spong bar byed mod kyis/ /zhes bya ba 'phags pa nyan thos skad cig ma'i tshul du gnas pa'i sems kyi rgyun sdug bsngal gyi bden pa'i ngo bo rnam par shes pa'i phung po rdzas su brtags pa de de'i gnyen por rnam par shes pa'i stong pa nyid ces bya ba 'gog pa'i bden pa la dmigs pa'i lam gyi bden pa skyes pas mi mthun pa dang gnyen po'i tshul du spong bar byed ce na/stong pa nyid kyi ngo bor gyur te bdag dang gzhan dmigs pa med pas 'gro ba'i don brtson pa las shin tu ring zhes bya ba ste/gcig tu stong pa'ang ma yin gcig tu mi stong pa'ang ma yin par lta ba'i shes rab khyad par can dang bral ba'i phyir 'khor bar gnas shing sdug bsngal gyis zhum pas gzhan gyi don yongs su rdzogs par byed mi nus pa zhes bya ba'i don to//'gro ba'i don las ji ltar na ring ba yin zhe na/ skyob pa chags pa tsam dang rnam bral bas/ /zhes bya ba smos te/ skyob pa zhes bya ba ni 'phags pa'i bden pa bzhi dang ldan pa'i chos kyis rang gi rgyud skyob par byed pa'am mchod par 'os pa la bya ste 'phags pa dgra bcom pa dag go//de ni chags pa tsam zhes bya ba 'khor bar 'gro ba la rjes su chags pa'i sred pa tsam dang bral zhing de spangs par gyur pas de dang rnam par bral ba yin la/ gzhan yang / 'gro ba kun la ltos pa med gyur pa'i/ /zhes bya ba 'gro ba yang yin la kun kyang yin pas 'gro ba kun te khams gsum par gtogs pa thams cad do//del ltos pa med par gyur pa ni de rnams 'khor ba las gdon cing sdug bsngal las thar bar bya ba'i phyir 'jug pa'i ltos pa'i rtsol ba spangs par gyur pa ste rang gi don lhur len pa dag go/ /de'i sems kyi rgyun ni mya ngan las 'das pa yin no zhes bstan pa'i phyir/sems kyi rgyun ni rgyu zad mar me bzhin/ /phung po lhag ma zad pa'i mya ngan 'das/ /zhes bya ba smos te/ de la sems ni rnam par shes pa'i rang bzhin no/ /de'i rgyun ni skad cig ma gcig nas gcig tu brgyud pa'i tshogs te/rgyun de ye shes kyis dag cing gnas gyur pa na rgyu zad pa'i mar me bzhin zhes bya ba ji ltar mar me'i rgyu snum zad par gyur pa na mar me 'bar ba med par 'gyur ba de bzhin du/ rdo rje lta bu'i ting nge 'dzin las byung ba'i ye shes kyis bag chags dang bcas pa'i nyon mongs pa spangs pas mya ngan las 'das par gyur pa yin la/de yang lhag ma med pa'i mya ngan las 'das pa ste/ sngon gyi las dang nyon mongs pas bskyed pa'i phung po lhag ma tsam gnas pa de yang ye shes kyi mes bsregs te zad cing med par byas nas mya ngan las 'das pa'i dbyings la gnas par 'gyur pas na 'gro ba'i don bya ba dang shin tu ring ngo zhes bya ba'i don to//da ni de lta bu'i 'gro ba'i don ni byang chub kyi sems las byung na de dang rang gi rgyud mi mthun par bstan pa'i phyir/ gang yang 'gro kun nyam thag sel byed pa/ /zhes bya ba la sogs pa smos pa yin te/ gang yang zhes bya ba ni byang chub kyi sems so//yon tan ji lta bu dang ldan zhe na/ 'gro ba nyam thag ma lus sel byed pa/ /zhes bya ba smos te/ skye ba bzhis bsdus pa'i sems can srid pa'i rtse mo'i bar du gnas pa thams cad kyi sdug bsngal gsum gyis gzir cing nyam thag pa ma lus par sel zhing med par byed pa yin no//de lta bu su zhig yin zhe na/ byang chub sems ni bdud rtsi bcud kyis len/ /zhes bya ba smos pa yin te/ byang chub tu smon pa dang 'jug pa'i bdag nyid can gyi byang chub kyi sems so/ /khyad par ji lta bu zhe na/ bdud rtsi bcud kyis len zhes bya ba smos te/bdud rtsi za ba ni 'chi bas mi tshugs pa dang 'dra bar byang chub kyi sems kyis 'phags pa'i lam gyi srog 'dzin cing go 'phang thams cad thob par byed pas bdud rtsi lta bu yin la/ sman bcud kyis len bsten pas ni skra dkar dang gnyer ma sel zhing nad med par byed pa dang 'dra bar byang chub kyi sems kyis bdag dang gzhan gyi rgyud du gtogs pa'i sdug bsngal dang nyon mongs pa 'joms par byed pa yin no//de ltar yon tan dang ldan pa nyid kyis na nyams su blangs dgos pa nyid kyi phyir/ byang chub rgyu ru mi rtog bsgom pa na/ /zhes bya ba smos te/byang chub ni rnam pa thams cad mkhyen pa'i ye shes te/ de thob par bya ba'i rgyu dang gzhir mi rtog pa bsgom pa na zhes gzung ba dang 'dzin pa rnam par spangs pa'i tshul gyis spros pa med pa'i don yid la bya ba la slob na'o/ /gnas skabs der sems de ltar gnas sam zhe na/ma yin te/ de tshe bdag ni rnam rtog kho nar rgyug /ces bya ba smos te/ byang chub kyi sems kyi ye shes chen po bsgrub par bya ba'i phyir slob par byed pa de'i tshe/ de tshe bdag ni rnam rtog kho nar rgyug /ces smos te/ las dang po pa yin pa'i phyir/ bdag gi sems ni rnam par rtog pa kho nar rgyug ste/rnam par rtog pa ni yang dag pa ma yin pa'i kun du rtog pas bskyed pa'i tshul bzhin ma yin pa'i rnam par rtog pa du ma la rgyug cing phyogs par 'gyur ro zhes bya ba'i don to/ /kho na zhes bya ba'i sgras ni tshul gzhan las rang dga' ba ste/ des na gzhan gyi yul ma yin pa'i phyir sems kyi gzhi la ni rnam par rtog pa kho na rten gyis gzhan dag ma yin te/dper na srid sgrub kho na gzhu thogs pa yin gyi gzhan dag ni ma yin no zhes bya ba bzhin no/ /'dir dris pa de ni mi rigs te/ chu bo rgya mtsho ri bo rnams/ /'di dag sems kyi rnam 'phrul yin//zhes bshad pas sems las logs shig na gzhan med pa'i phyir rten dang brten par gdags su mi rung zhe na/ de lta yin mod kyis mdo sde ba'i tshul gyis yul sems gnyi ga grub par 'dod pas 'gal ba med do/ /bsgoms pa la gnas kyang rnam par rtog pa bsal bar ma nus pa'i tshul gzhan dag bstan par bya ba'i phyir/rmi lam tshul 'drar 'gro kun gang gis kyang / /zhes bya ba smos te/ rmi lam zhes bya ba ni sngon nyams su myong ba'i rgyus med kyang snang du rung ba ste slu ba nyid do/ /ji ltar rmi lam na yul gyi bzang mo la sogs pa chags pa'i yul lam/dgra bo dang sdang ba'i yul med kyang snang ba'o/ /tshul 'dra zhes bya ba ni de dang tshul mthun pa'o/ /ci zhig mthun zhe na/ 'gro ba ste snying po med pa'i 'khor ba'i gnas 'di na gnas pa'i dngos po rnams so/ /ji ltar mthun zhe na/ gang gis kyang /ci yang 'dzin pa nyid du mi byed par/ /zhes bya ba ste/ 'di ltar 'gro ba rnams kyi nang du rnam par rtog pa'am/ 'dzin pa po gang dag gis kyang yul lam gzung bar bya ba zhes pa'i dngos po phra rags ci yang 'dzin cing len pa nyid du mi byed do/ /dper na rmi lam na yul gyi dngos po sdug pa dang mi sdug pa rnam pa du ma mthong zhing zhen pa'i yul du gyur kyang de ni 'khrul pa'i rang bzhin yin pa'i phyir yang dag par na ci yang yod pa ma yin pa dang 'dra'o//bsgoms kyang rtog pa po dang rtog bya yi/ /rnam rtog dgra yi spyod yul nyid la spyod/ /ces bya ba ni chos thams cad rmi lam dang 'dra'o zhes thos shing shes pa 'ba' zhig tu ma zad kyi//don de yang dang yang du bsgoms shing goms par byas kyang rnam par rtog pa'i dbang du gyur to zhes bya ba ni kyang gi sgra'i don yin no/ /rnam par rtog pa de yang ji lta bu zhe na/ rtog pa po dang zhes bya ba la sogs pa smos te/rtog par byed pas na rtog pa po ste 'dzin pa po'i sems so/ /rtogs shing khong du chud par bya ba yin pas na rtogs bya ste/ gzung bar bya ba'i yul rnams so/ /de dag yod pa nyid du rtog pa gang yin pa de ni rtog pa po dang rtogs bya'i rnam rtog ste/ gzung ba dang 'dzin pa'i rnam par rtog pa can rnams zhes bya ba'i don to//de nyid ni bdag med pa dang rnam par mi rtog pa'i mi mthun pa'i phyogs yin pas na dgra ste/ rnam par rtog pa'i dgra bo de lta bu'i spyod yul du gyur pa nyid la bdag rtag tu spyod cing de'i dbang du gyur pa'am/ des bcom par gyur pa ste/rmi lam ltar brdzun pa yin par shes shing yul la sems blan zhing bsgoms su zin kyang thog ma med pa'i dus can gyi rnam par rtog pa'i tshogs kyis bcom par 'gyur ro zhes bya ba'i don to/ /de ltar rnam par rtog pa bzlog dka' ba dang / rang gi gnyen po nyam chung ba nyid du shes nas/bcom ldan 'das nyid la gsol ba gdab par bstan pa'i phyir/ gtso bo shin tu mi bzad 'tshe ba 'di/ /gzigs la bdag la lta ba dri med stsol/ /zhes bya ba smos te/ gtso bo zhes bya ba ni bod pa ste/ chos thams cad la mnga' brnyes pa'am/ nyon mongs pa'i nad rnams gso bar byed pas na gtso bo'o//shin tu mi bzad 'tshe ba 'di/ /zhes bya ba ni rang gi sems kyi rgyud la 'dod chags la sogs pa'i nyon mongs pa'i rgyud las byung ba'i gnod pa 'phral dang yun du lus dang sems kyi rgyud gdung bar byed pa drag cing shin tu mi bzad pa mngon sum du gyur pa 'di la gzigs la bdag la lta ba dri med stsol zhes bya bar 'tsho bar gyur pa de dag gi sman du gyur pa'i yang dag pa'i lta ba mi mthun pa dang nyes pa'i dri mas ma gos pa stsol cig ce'o//de dag ni rang gi rtsol ba'i stobs kyis bskyed mod ce na/ bdag ni gces pa gang dang rtog pa gang //de dang de nyid dang por rnam par nyams/ /zhes bya ba smos te/ 'di ltar gces shing snying por bya ba'i dngos po tshad med pa'am/ pha rol tu phyin pa rnams dang rjes su mthun pa'i gnyen po'i lam gang dang gang la rtog cing dpyod par gnas pa na lam de dang de nyid dang po kho nar rnam par nyams shing 'jig par 'gyur ro zhes bstan pa ste/don du na nyon mongs pa'i tshogs gzhom pa'i phyir gnyen po gang la brten kyang de nyam chung bas mi mthun pa'i phyogs kyis zil gyis gnon par 'gyur ro zhes bya ba'i don to/ / da ni skyon rnams bdag nyid kyi nyes pa yin par bstan pa'i phyir/ yang na sngon tshe bgyis pa'i bdag nyid nyes/ /'di la bcom ldan 'das kyis ci zhig mdzad/ /ces bya ba smos te/ yang na 'di ni rang nyid las byung ba'i nyes pa yin pas ci zhig mdzad du mchis zhes sbyar ro/ / gang gi tshe nyes pa byas she na/ sngon tshe bgyis pa ste thog ma med pa'i dus nas brgyud pa'i sngon gyi tshe rabs rnams su yang dag pa ma yin pa'i kun du rtog pas bskyed pa'i phyir phyin ci log gi bag chags su bsags pa'i phyir ro/ /ci zhig ce na/ bdag gi nyes pa 'di lta ste gnyen po la brten cing snying por byas pa la tshol yang log pa'i dbang du gyur pa la sogs pa'i nyes pa'i skyon chags pa 'di la'o//bcom ldan 'das ni bdud bzhi bcom pa'am/ dbang phyug la sogs pa'i yon tan drug dang ldan pa ste sangs rgyas so/ /de lta bu bcom ldan 'das khyod kyis ci zhig mdzad ces bya ba ni bcos dka' ba ste/nyon mongs kyi dbang du gyur cing bdud kyi spyod yul na 'khyam pa ni rang gi nyes pa yin la/ 'gro ba rnams ni las bdag gir bya ba yin pas rang gis byas pa'i las kyi 'bras bu nyid la spyod kyi/ bde ba dang sdug bsngal gyis byed pa po ni bcom ldan 'das ma yin te/de'i phyir mdo las kyang / nga ni zhing yin gyi sa bon ma yin no zhes gsungs pa yin no/ /don de nyid dpes bstan par bya ba'i phyir/ 'jig rten kun gyi mun sel nyi ma yang / /zhes bya ba smos te/ 'jig rten yang yin la kun kyang yin pa'i phyir 'jig rten kun te/thams cad la snang bar byed par tshul mthun pas rgyu ba dang mi rgyu ba'i 'jig rten gnyi ga la bya'o/ /de rnams kyi mun pa ni snang ba med pa'i smag tu gyur pa ste/ de sel cing 'joms par byed pa gang yin pa de la de skad ces bya'o/ /su zhig ce na/ nyi ma ste 'od zer stong ldan no//de lta bu'i yon tan dang ldan pa'i nyi ma yang / dmus long dag gis mun nag sel mi bgyid/ /ces pa dmus long zhes bya ba skyes ma thag nas long bar gyur pa dag gis mun nag ni sel cing 'joms par mi byed mod kyi/ de ni nyi ma'i nyes pa ma yin gyi dmus long rang nyid kyi nyes pa las byung ba yin no//de bzhin du sangs rgyas bcom ldan 'das chos kyi nyi mas sde snod gsum dang ldan pa'i dam pa'i chos kyi 'od zer gyis 'gro ba'i snying la gnas pa'i mi shes pa'i mun pa 'joms par spyod na yang lta ba log pa la zhen cing shes rab kyi mig dang bral ba rnams kyi nyes pa sel bar mi mdzad pa ni 'gro ba nyid kyi nyes pa yin gyi ston pa'i ni ma yin no//de ltar rang gi nyes pa'i rang bzhin smras nas/ gzhan yang 'phags pa'i lam gyis gso bar dka' ba'i tshul bstan pa'i phyir/ yun ring dus su nad gzhi sten byed cing / /der yang rgyun du sems ni rnam rmongs pa'i//mdze can rkang pa lag pa chad pa la/ /thang 'ga' sman bsten pa yis ci bgyir mchis/ /zhes bya ba smos te/ mdze nad gsor mi rung bas zin pa la sman gyis ci bgyir mchis zhes bya bar sbyar ro/ /mdze can ji lta bu zhe na/ yun rings dus su nad gzhi rten byed cing //zhes bya ba ste/ las gang gis mdze skyed par byed pa dkon mchog gi rten bshig pa la sogs pa zas dang spyod lam mi 'phrod pa la sogs pa'i nad gzhi de la yun ring po'i dus su rten cing gnas par byed pa na'ang nad gzhi ste de yang rtag par rgyun du sems rnam par rmongs pa ste/de bsal ba'i thabs kyi sbyor ba la thang 'ga' yang gnas par mi byed pa dang / yang zhes bya ba nad gzhi la brten pa 'ba' zhig tu ma zad kyi de la sems zhen par yang byed pa'o/ /gzhan yang ji lta bu zhe na/ rkang pa lag pa chad pa zhes bya ba ste/ de ltar nad gzhi la gnas shing gso ba ma byas pa'i dbang gis mdzes lus thams cad la khyab ste/mthar rkang pa dang lag pa dag kyang chad cing 'brul bar 'gyur ba'i mdze can la dus thang 'ga' zhig mdze la phan pa'i sman bsten cing zos kyang de yis gso ba'i don mi byed pas ci bgyir mchis zhes bya ste/des nad med par mi 'gyur ro zhes bya ba'i don to/ /de bzhin du rang gi rgyud du gtogs pa'i nyon mongs pa'i nad kyi rgyud ni bdag tu lta ba yin pas lta ba de la dus yun ring por gnas shing mngon par zhen par yang byed la/ de'i gnyen por 'phags pa'i lam yang mi 'tshol bas gsor mi rung bar gyur pa dag la ni yang dag pa'i lam gyis lam gyi bya ba mi byed de zhes bya ba'i tha tshig go//yang rang gi nyes pa'i tshul las byung ba'i dpe gzhan dag gis kyang bstan par bya ba'i phyir/ sems kyi shing ni thog ma med dus can/ /zhes bya ba la sogs pa smos te/sems ni rnam par shes pa'i tshogs te/ de nyid dpe shing dang 'dra bas na shing ngo / /dus ji tsam nas byung zhe na/ thog ma med dus can zhes bya ba ste/ thog ma med pa yang yin la dus kyang yin pas thog ma med dus can/ dus can ni nyi ma dang zla ba dang gza' dang skar ma la sogs pas yongs su bcad pa la bya ba la/de yang 'khor ba la thog ma med pas de skad ces bya'o/ /de lta bu'i dus su shing de gang gis skyed ce na/ nyon mongs kha ba'i khu bas brlan bgos pa/ /zhes bya ba ste/ nyon mongs pa ni 'dod chags la sogs pa yin la/de dag nyid ni 'phags pa ma yin zhing ro myangs na gdug la mi zhim pas kha ba'i khu ba ste/ nim pa la sogs pa'i khu ba dang 'dra la/ de lta bu'i khu bas brlan pas bskyed cing 'phel bar bya ba yin la rgyu de nyid kyis/ ro zhim dngos por bgyi bar mi nus la//zhes bya ba ste/ ji ltar shing ro kha ba de chu yang kha bas brlan cing bskyed pa dag ni mngar ba la sogs pa'i rang bzhin du bya bar mi nus pa dang 'dra bas na sems kyi rang bzhin nyon mongs pas bskyed pa yang 'phags pa'i lam gyis bsgyur bar dka' ba'i don to//ji tsam zhig gis she na/ yon tan chu yi thigs pas ci ru 'gyur/ /zhes bya ba ste/ shing de lta bu la mngar ba la sogs pa'i yon tan brgyad dang ldan pa'i chu'i thigs pa gcig blugs pas ci ru 'gyur te/ thams cad ro zhim par mi 'gyur ro/ /de bzhin du sems kyi rang bzhin thog ma med pa'i dus can gyi nyon mongs pas bskyed pa yang dag pa'i lam gyis bsgyur cing bcos par dka' bdag la ni gnyen po'i chos mngar ba la sogs pa'i yon tan gyi chu'i thigs pa tsam gyis nyon mongs pa'i tshogs sbyong zhing 'phags pa'i lam gyi chos skye bar mi 'gyur ro zhes bya ba'i don to//yang yid kyi sgo'i nyes pa bstan par bya ba'i phyir/ bdag yid nyes pa kun gyi rang bzhin nyid/ /ces bya ba smos te/ bdag gi yid la nyon mongs pa'i tshogs kyis dkrugs pas spang ba dang blang bar bya ba'i dpyod pa dang bral bas 'di dang gzhan du gnod par 'gyur ba'i nyes pa 'dod chags dang /zhe sdang la sogs pa'i nyes pa kun gyi rang bzhin nam ngo bo nyid du gnas la/ nyes pa de bsal ba'i gnyen po'i mchog ni byang chub kyi sems yin pa'i phyir/ byang chub gser sgyur rtsir gyur ngo mtshar che/ /yon tan de dang de nyid la sbyar nas/ /nyes pa'i dngos po nyid du gyur te gnas//zhes bya ba ste/ byang chub ni bla na med pa'i ye shes te/ de thob pa'i sems la yang rgyu la 'bras bu btags pa'i tshul gyis byang chub ces bya ste/ de ni gser sgyur rtsi lta bu yin la/ ji ltar gser sgyur rtsi yis dngul chu gser du snang ba zhes bya bas lcags gser du bsgyur ba dang 'dra bar byang chub kyi sems des 'khor ba'i nyon mongs pa'i sems sbyong zhing /yang dag pa'i ye shes su 'gyur bar byed pas gser sgyur rtsi lta bu yin te/ thams cad mkhyen pa'i ye shes sems/ /zhes bya ba'i don to/ /rgyu de nyid kyis na de ni ngo mtshar che ste/rmad du byung ba yin la/ de lta bu'i byang chub kyi sems kyi yon tan gyi tshogs rnam pa mang po yod pa dang de nyid la nye bar sbyar zhing / sems bskyed pa la sogs pas sems kyi rgyud sbyang bar brtsam pa na yang de dang rjes su mthun par mi 'jug pas nyes pa'i dngos po nyid du gyur te gnas zhes bya ba ste/'jig rten dang 'jig rten las 'das pa'i yon tan gnyis kyis brgyan pa'i byang chub kyi sems la sbyar ba na yang nyon mongs pa'i dbang du gyur pas/ lus dang ngag dang yid kyi nyes pa'i dngos po nyid kyis rang bzhin du gyur pa blangs shing nye bar bzung nas gnas te/ skyes bu ra ro ba'i sems dang 'dra bar yon tan 'dzin mi nus kyi nyes pa'i 'byung gnas kho nar gyur pas gnas par byed do zhes bya ba'i tha tshig go/ /'di'i don mdor bsdus pa ni 'di yin te/ 'di ltar lcags la sogs pa yongs su sbyangs pa ma byas pa gser sgyur rtsis bskus kyang rang gi dngos po mi 'dor ba de bzhin du/yongs su ma sbyangs pa'i sems 'di yang byang chub kyi sems kyi yon tan la sbyor ba yang rang gis nyes pa'i skyon 'dor bar mi byed do/ /de ni byang chub gser sgyur de'i rigs pa nyid bstan pa'i phyir/ sman chen nyid du gang dang gang bshad pa//zhes bya ba smos te/ nyon mongs pa'i nad gso bar byed pas na sman chen te/ byams pa la sogs pa'i chos kyi sgo'i gnyen po'i lam du gyur pa gang dang gang bshad cing bstan pa ste/ 'dod chags kyi gnyen po mi gtsang ba dang / zhe sdang gi gnyen po byams pa dang /gti mug gi gnyen po rten cing 'brel bar 'byung ba la sogs pa'i lam gang dang gang bshad pa/ de dang de nyid bdag la dug tu gyur/ /zhes pa gzhan dag ma yin gyi/ sman gyi dam pa de dang de dag nyid kho na bdag nyid kho na skal ba ngan cing nyon mongs pa'i dbang du gyur pa'i phyir bdag la dug tu gyur te/ji ltar sman sbyor ba nyes pa la sogs pa'i rgyus 'chi ba'am/ 'chi ba la thug pa'i nad bskyed pa dang 'dra bar bdag la chos kyi sman de phyin ci log tu 'gyur zhing nyon mongs pa bskyed pas dug tu gyur zhes bya'o/ /de ltar gnas pa de la ci zhig gis gso zhe na/rigs pa nyid kyi ni bcud len mchog yin na zhes smos te/ sems kyi rigs pa'i lam btsal ba nyid dam/ bsam gtan dang ting nge 'dzin la nges par gnas pa nyid dam/ dad pas 'dug cing shes rab kyis dpyod pa nyid la sogs pa'i sgo nas nyon mongs pa spong ba ni rigs pa yin la rigs pa de ni bcom ldan 'das kyis gsungs pa'i dam pa'i chos la brten pa yin par bshad do//de ni bcud len mchog yin na/ /zhes bya ba ston pa'i gsung gi rjes su 'jug cing nyams su len pa ni nyon mongs pa'i nang sel cing 'khor ba'i sdug bsngal dang bral ba'i rgyu yin pas bcud len tha mal pa las khyad par du 'phags pas mchog yin no//de ltar yin na de gang gis thob ce na/ gal te yid rton med na de yod min/ /zhes bya ba smos te/ de yang gal te nyon mongs pa'i dbang du gyur pas/lam la mngon par dad cing / nges pa med pa yid brtan pa med na rigs pa de yang yod pa ma yin no zhes bya ba'i don te/ gang gi tshe sangs rgyas nyid sgrub pa la mngon par dad pas 'jug pa las ni grol bar 'gyur te/ mngon par dad na byang chub tu sems bskyed la/de las ni rim gyis grol bar 'gyur ba ni rang bzhin gyi gtan tshigs yin no/ /yang na yid rton pa ni yid bde ba la bya ste/ mnyam par 'jog pa las byung ba'i sems rtse gcig pa'i ting nge 'dzin gyi bde ba dang yid bde ba skye ba/ gal te nyon mongs pa spongs bar nus pa'i rigs pa de yang yod par 'gyur gyi yid bde ba de med cing sems g.yengs pa la ni rigs pa de yod pa ma yin pas nyon mongs pas bcom pa nyid du 'gyur ro//da ni rigs pa nyid gang zhig yin pa bstan pa'i phyir/ gang zhig nyon mongs zhes bya ba la sogs pa smos te/de la rigs pa ni nyon mongs pa spongs pa yin pas/ gang zhig nyon mongs bdo ba rnam sel cing / /gang yang nyes gzhan skyed par mi byed pa/ /de ni rigs pa yin zhes bdag sems na/ /zhes bya ba rigs pa gang dang ldan na 'dod chags dang / zhe sdang dang / gti mug la sogs pa'i nyon mongs pa bdo zhing kun du rgyu ba'i tshul du skyes pa rnams ni de nyid kyi gnyen pos spang ba ni thabs kyi dam pa ma yin te/gong du bstan pa ltar gyur la/ de bas na nyon mongs pa'i rgyu'i gnyen po'i rtog dpyod ngan pa zhi bar gyur pa yang dag pa'i rtog pa ste/ 'phags pa'i lam de sbyor ba'i lam la mos pa yid la byed pas bsam pa'i man ngag de goms par byas na/nyon mongs pa'i tshogs ring por mi thogs par de kho na mthong bas zhi bar byed pa yang gang zhig nyon mongs pa'i tshogs kyi nyes pa mngon du rgyu ba las gzhan pa bag la nyal gyi tshul du sems rgyud la gnas pa dang /gzhan zhar las byung ba'i nyes pa ste/ 'dod chags kyi gnyen por mi sdug pa sgom pa na zhe sdang 'byung ba lta bu skyod cing 'khrugs par mi byed pa'i gnyen po'i lam de ni rigs pa zhes bya ste/ tshad ma dang mi 'gal zhing yang dag pa'i ye shes bskyed pa'i gtan tshigs dang ldan pa yin pas de lta bu ni rigs pa yin no zhes bdag yid la sems shing blos shes mod kyi//'on kyang ci 'dra yin zhes slar yang nges ma byas/ /zhes bya ba rnam par grol ba'i rgyur gyur pa'i rigs pa de'i lam bsgoms pas mngon sum du byas nas ye shes thob par gyur pa ni nges par byas pa yin pas/de ma thob pa'i phyir ci 'dra yin zhes slar yang nges ma byas zhes pa rigs pa'i lam de bdag gis goms par ma byas so zhes pa ste/ ston pas gsungs pa'i yang dag pa'i lam thos pa dang bsam pa'i shes rab kyis shes par byas mod kyi/ bsgom pa'i shes rab kyis mngon sum du ni ma byas so zhes bstan to//byang chub kyi sems kyi 'bras bu bstan nas/ da ni bsgom pa'i 'bras bu bstan pa'i phyir/ bsam dang bag la nyal dang khams bag chags/ /nyes pa'i rgyu yi gnyen po la sbyar nas/ /bsam pa'i man ngag de ni bsgom pa na//'dir ni ring por mi thegs zhi bar 'gyur/ /zhes bya ba smos te/ bsam pa ni lhag pa'i bsam pa ste sems so/ /bag la nyal ni 'dod chags la sogs pa'i phra rgyas rnams so/ /khams ni rang bzhin no/ /bag chags ni bsam pa la sogs pa de dag nyid ni bag chags sems la gnas pa ste/bsam pa dang bag la nyal ba dang khams rnams kyi bag chags las gyur pa'i nyes pa sems la gang dag yod pa ste/ gang gis 'dod chags dang zhe sdang la sogs pa skye bar 'gyur ba'i rgyu bdag tu lta ba la sogs pa gang dag yod pa de'i gnyen po ste/de dang mi mthun pa'i phyogs su gyur pa bdag med pa'am/ mi gtsang ba la sogs pa la sems sbyar zhing rjes su bsten la/ de yang bsam pa'i man ngag ces bya ba ston pas dbang po rab dang / 'bring dang / tha ma'i rim pa la dgongs nas theg pa'i khyad par ji skad gsungs pa'am/'dod chags dang / zhe sdang dang / gti mug gi gnyen po so sor ji skad gsungs pa'i don de thos pa dang / bsam pa'i shes rab kyis nges pa nyid du byas pa'i bsam pa'i man ngag de mngon sum du bya ba'i phyir bsgoms shing goms par byas pas rtse gcig tu byas pa las ni nyon mongs ba'i tshogs de zhi bar 'gyur ro//dus ji tsam na 'gyur zhe na/ 'dir ni ring por mi thogs zhi bar 'gyur/ /zhes bya ba smos te/ gnas skabs 'dir mag ngag gi tshul 'di legs par bsgoms shing yid la byas pas ni ring por mi thogs par myur du sems la yod pa'i nyon mongs ba'i tshogs bsal cing zhi bar 'gyur ba ste/bsgom pa la yang dag par gnas pas zhugs pa dag gi nyon mongs pa dag ni spang dka' ba ma yin no zhes bya ba'i don to/ /da ni bcom ldan 'das kyi gsung nyid slu ba med pa nyid yin par bstan pa'i phyir/skyob pa nyes pa kun dang rnam bral zhing / /zhes bya ba smos te/ skyob pa zhes bya ba ni sems can rnams sdug bsngal las skyob par byed pas skyob pa'o/ /nyes pa zhes bya ba ni 'dod chags la sogs pa'i 'khor ba pa'i chos rnams te/ de thams cad dang bral zhing spangs par 'gyur ba'o//gzhan yang ji lta bu zhe na/ chos rnams kun gyi dam pa'i don gzigs pa/ /zhes bya ba smos te/ chos kyang yin la kun kyang yin pas chos rnams kun te/ zag pa dang bcas pa'am/ zag pa med pa'am/ rgyu ba'am mi rgyu ba'am/ thag nye ba'am ring ba ste/ chos de rnams kyi dam pa'i don ni thun mong ma yin pa'i don te/ de gzigs pa'i ngang tshul mnga' bas na/ chos rnams kun gyi dam pa'i don gzigs pa/ /zhes bya'o/ /khyed kyis sna tshogs tshul du'ang nges gsungs pas/ /zhes bya ba ni dbang po dang mos tshul sna tshogs pas theg pa'i tshul du mar nges par phye ste gsungs pa'am/nyon mongs pa'i tshul mtha' yas pas gnyen po'i tshul yang sna tshogs par gsungs pa gang yin pa des ni 'dod chags la sogs pa'i nyon mongs kyi tshogs bag chags dang bcas pa ma lus par spong bar byed pas/nyon mongs sa bon ma lus sel bar byed/ /ces bya ba ste/ khams gsum pa'i nyon mongs pa thams cad ma lus par sel bar byed do zhes bya ba'i don to/ /de ltar bstan pa'i yon tan bshad nas/ da ni gzugs sku mthong zhing gsung thos pas nyon mongs pa spong ba'i tshul bstan pa'i phyir/khyed sku mdzes pa'i mtshan gyis 'bar gyur pa/ /de yang mdun na bzhugs pa mthong ba dang / /zhes bya ba la sogs pa smos te/ bcom ldan 'das khyed kyi gzugs kyi sku mdzes pa yang yin la mtshan kyang yin pas mdzes pa'i mtshan te/dbu gtsug tor dang ldan pa la sogs pa mtshan sum cu rtsa gnyis dang / dpe byad bzang po brgyad cu dag gis nye bar mtshon par gyur cing / de nyid kyis na lha na ne lham me lhang nges 'bar bar gyur ba dang / 'dzam bu chu bo'i gser lta bu'i sku mdog shin tu 'bar bar gyur ba yin la/de lta bu'i sku de yang mdun na bzhugs pa zhes bya ba dbang po'i mngon sum du mthong bar gyur pa'am/ yid kyi mngon sum na bzhugs pa lta bur blos mthong zhing mngon sum du byed pa dang / gzhan yang / /rna bas btung ba'i bdud rtsi'ang thos gyur pa'i//zhes bya ba skyes bu dag gis rnab gnyis kyis btung bar bya ba yin pas na rna bas btung ba ste/ rna bas gzung ba zhes bya ba'i don to/ /ci zhig ce na/ bdud rtsi'ang thos gyur pa zhes bya ba ste/ 'ang zhes bya ba ni bsdu ba ste/ mgon po khyod kyi sku mngon sum du mthong ba'am/yid kyis mngon du dmigs pas nyon mongs pa sel bar ma zad kyi khyed kyi gsung skyes bu gang gis thos par gyur pa de yang de la bdud rtsir 'gyur te/ ji ltar snyim pas bdud rtsi 'thung bar byed pa dag 'chi bas mi tshugs par 'gyur ba de bzhin du/ mgon po'i gsung gi bdud rtsi rna ba gnyis kyi snyim pas 'thung pa'i tshul len par byed pa dag ni nyon mongs pa'i dug gis mi tshugs kyis dge ba'i srog gi dbang po mi 'chad pas ngan 'gror 'gro bar mi 'gyur ro//nyon mongs sa bon ma lus rnam par 'jig /ces bya ba ni de lta bu'i sku mthong ba dang / gsung thos pa'i skyes bu'i nyon mongs pa khams gsum par 'khor zhing sdug bsngal skyed par byed pa sa bon dang bcas pa ma lus par mtha' dag rnam par 'jig cing / rang nyid dengs shing zad par 'gyur ro zhes bya ba'i don to/ /de ltar gzugs kyi sku mthong ba'i yon tan bshad nas/da ni chos kyi sku mthong ba'i yon tan bstan pa'i phyir/ gtso bo khyod la de las rab mchog gyur/ zhes bya ba la sogs pa smos te/ gtso bo zhes bya ba ni bod pa'o/ /khyed la de las rab mchog gyur zhes bya ba ni gzugs kyi sku de las ches phul du byung zhing rab mchog tu gyur la thun mong ma yin pa'i sku 'ang mnga'o zhes bya bar sbyar ro//de gang zhig yin zhe na/ chos sku nyi ma bla na med pa'ang zhes bya ba ste/ chos kyi sgras ni bcom ldan 'das de chos kyi ngo bo nyid yin pas shin tu phra ba brjod cing bstan pa med pa ji ltar mi snang ba thams cad mkhyen pa nyag gcig gi spyod yul du gyur pa yin par ston to//de nyid ni sku ste chos kyang yin la sku yang yin pas chos kyi sku'o zhes las 'dzin par mtshams sbyar ro/ /de nyid ni nyi ma dang 'dra bas chos kyi nyi ma ste/ ji ltar nyi mas phyi'i mun pa'i tshogs sel bar byed pa de bzhin du chos kyi dbyings kyi ye shes kyi snang bas ma rig pa'i mun pa mun gnag 'joms par byed pas nyi ma dang chos mthun pa'i phyir ro//de nyid kyi phyir bla na med pa ste/ de las lhag ma gzhan med pa'am/ sa 'og ma pa thams cad dang thun mong ma yin pa'i phyir ro/ /de nyid kyis na/ bsams kyang 'gro ba'i spyod yul mi 'gyur ba/ /zhes bya ba smos te/ chos kyi sku'i ngo bo bsams shing bsgoms su zin kyang khams gsum pa'i 'gro ba so so'i skye bo dngos po la mngon par zhen pa rnams kyi spyod yul du mi 'gyur ba yin te/ de'i rang bzhin blos rtogs shing khong du chud par mi 'gyur ba'i phyir ro//de ltar yod par ji ltar shes she na/ nyes pa'i rab rib 'joms pa ngo mtshar che/ /zhes bya ba smos te/ gang gi phyir ma rig pa zhes bya ba nyon mongs pa'i gzhi bor gyur pa'i nyes pa'i mun nag gi rab rib 'joms shing sel bar byed pa nyi ma lta bu gang yin pa ni chos sku ste stong pa nyid kyi ye shes yin la/de ni dngos por ma dmigs shing mig gi spyod yul du ma gyur pa yin yang skyes bu rnams kyi blo'i mun pa sel bar byed pa ni ngo mtshar che ste/ bsam gyis mi khyab pa'i yul yin pa'i phyir rmad du gyur pa yin no//de ltar bshags shing bstod pa brtsams pa mjug bsdu ba'i sgo nas bcom ldan 'das kyi yon tan gyi sgo brjod de phyag 'tshal ba bstan pa'i phyir/ thugs mchog gang yang rung ba de yis ni/ zhes bya ba smos te/ bcom ldan 'das khyed la btud cing phyag 'tshal lo zhes bya bar sbyar ro//ci'i phyir phyag 'tshal zhe na/ nyes pa zhi bar mdzad pa'i phyir ro/ /gang gis she na/ thugs mchog gang yang rung ba de yis ni/ /zhes bya ba ste/ gang gis gnyis su med pa'i ye shes nyan thos dang rang sangs rgyas la sogs pa'i yul ma yin pa thugs su chud par mdzad pa'i thugs kyi mchog gang yang rung ba de yis so//ci zhig la dmigs she na/ zhi gnas gang yang rung ba der bzhugs nas/ /zhes bya ba smos te/ zhi gnas dang lhag mthong zung du 'jug pa lhun gyis grub pa'am rdo rje lta bu'i ting nge 'dzin dang /bsam gtan gyi mchog la zhugs zhing rnal 'byor gyi mthar byon pa brnyes pa la bzhugs pa de la phyag 'tshal lo/ /de ci'i phyir zhe na/ nyes kun rnam pa kun du zhir mdzad pa'i/ /bcom ldan gang yin de la phyag 'tshal lo/ /zhes bya ba smos te/'khor ba'i sdug bsngal skyed pa'i nyes pa gang yin pa de kun zhi bar mdzad cing sel bar mdzad par spyod pa ni khyed nyid yin te/ de zlog par mdzad do zhes bya ba'i don to/ /ji ltar zhe na/ rnam pa kun zhes bya ba ste/ bag chags dang bcas pa rnam pa thams cad du sel bar mdzad pa'am/yang na rnam pa kun gyis zhi bar mdzad pa ste/ theg pa'i tshul sna tshogs sam/ rdzu 'phrul dang cho 'phrul la sogs pa'i thabs kyi sgo sna tshogs kyis zhi bar mdzad pa'o/ /de bas na bcom ldan 'das gang yang rung ba de la phyag 'tshal lo zhes bya ba ste/ nyes pa'i tshogs de lta bu zhi bar mdzad pa'i bcom ldan 'das gang yin pa de la lus dang ngag dang yid dang zhing gus pas 'dud cing phyag 'tshal lo zhes bya ba'i don to//gang yin de la zhes smos pa ni gang gi phyir khyed kyi mkhyen pas khyab par med pa'i tshig tu smos pa yin gyi/ de lta na ni gtso bo la de skad smra ba rigs pa ma yin no//de lta na khyed de lta bu'i yon tan dang ldan pa gang yang rung ba de la bdag phyag 'tshal zhing skyabs su mchi'o zhes bya ba'i don to/ /da ni bstod pa byas pa las byung ba'i bsod nams gang yin pa de sems can rnams la bsngo ba dang / byang chub sems dpa' rnams kyi bslab pa yin pas de dang rjes su mthun par bya ba'i phyir/de ltar yon tan bla med la bshags pa'i/ /zhes bya ba la sogs pa smos te/ de ltar zhes bya ba ni rdzogs pa'o/ /yon tan bla med ni gang la yon tan gyi tshogs thun mong ma yin pa mnga' ba ste ston pa'o/ / de la bshags pa ni rang gis sdig pa dang nyes pa gang dag byas pa de'i spyan sngar brjod pa'o/ /de lta bu'i sgo nas ci zhig byas she na/ yang dag bstod pa rnam sbyar dge ba ni/ /zhes bya ba smos te/ rang gi nyes pa de brjod pa'i sgo nas bcom ldan 'das la yang dag par bstod pa'i tshig rnam par 'phel zhing legs par sbyar ba las dge ba ste/bsod nams su byas pa'o/ /ji lta bu zhe na/ zla mdzes ltar dkar bdag gis gang bsags des/ /zhes bya ba smos te/ bsod nams de yang ston ka'i zla ba ltar dkar zhing mdzes pa ste/ nyes pa'i nag nog gis ma 'dres shing yid du 'ong ba'o//bdag gis gang bsags zhes bya ba ni bdag nyid kyis bsgrubs shing tshogs yongs su bsdus pa'o/ /zla ba smos pas ni bdag nyid kyi ming zla ba zhes bya bar yang ston to/ /dkar ba smos pas kyang bdag nyid kyi rang bzhin dag par ston to/ /bsod nams de gang du bsngo zhe na/'gro kun bde ba can du 'gro bar shog /ces bya ba smos te/ bdag gis de ltar bsags pa'i bsod nams des 'gro ba 'di dag thams cad 'jig rten gyi khams bde ba can du 'gro zhing der skye bar shog cig pa'o/ /yang na bla na med pa'i bde ba ni sangs rgyas kyi go 'phang ste/de dang ldan pa'i gnas thob par gyur cig ces bya ba'i don to/ /blo chen blo gros bzang po yis/ /gsol ba btab pa la brten te/ /sangs rgyas zhi ba bdag gis ni/ /bshags bstod 'grel pa 'di byas so/ /zla ba'i tshig don dbyings che bas/bde gshegs spyod pa zab mo 'di/ /bshags nas bstod pa'i tshul la ni/ /brten brtsams srid pa sbyang phyir yin/ /de yi 'grel pa zla zer ltar/ /yid 'ong bdag gis byas pa 'dis/ /'gro ba'i nyon mongs rnam sbyangs nas/ /skyon bral sangs rgyas nyid thob shog / bshags bstod kyi 'grel pa slob dpon sangs rgyas zhi bas mdzad pa rdzogs so// //rgya gar gyi mkhan po bud+d+ha shrI shAn+ti dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa// //

CLOSE WINDOW