CLOSE WINDOW

D1150
བོད་ཡིག

lo tsA ba btsun pa d+ha r+m+ma yon tan gyis bsgyur ba'o//[ ##]@##/ /rgya gar skad du/ mi shra ka sto tra nA ma/ bod skad du/ spel mar bstod pa zhes bya ba/ thams cad mkhyen pa la phyag 'tshal lo/ /gting mtha' med pa'i 'khor ba yi//rgya mtsho'i nang du rnam par gnas/ /'dod chags la sogs mi bzad pa'i/ /chu srin gyis ni lus zos pas/ /de ring gang la skyabs su mchi/ /ji srid bdag la sems yod na/ /gang gi bstan la gnas pa dang / /gang bstod gang la bsnyen bkur bgyi//gang zhig la ni nyes pa kun/ /gtan nas yong ye mi mnga' zhing / /gang la 'ang rnam pa thams cad du/ /yon tan thams cad gnas gyur pa/ /gzhan gyi gnod pa bsal ba'i phyir/ /gang gi nyes pa zad gyur pa/ /gzhan mngon mtho dang thar pa'i phyir//yon tan goms byas bdag gi min/ /gal te sems shig yod na ni/ /de nyid la ni skyabs 'gro zhing / /de bstod de ni bkur ba dang / /de yi bstan la gnas pa'i rigs/ /gang zhig nyes de gzhan la gnod/ /de ni yon tan gang gzhan smad//nyes pa rang gi nyes bcom pa/ /'tsho ba rang don yon tan no/ /thams cad mkhyen la yon tan kun/ /mnga' la de yang nyams mi mnga'/ /nyes pa bag chags bcas de yang / /skyob pa gcig pu la mi mnga'/ /spyod pa la ni mi smod phyir/ / thub pa skyon ni med par grub/ /bde bar grags pa'i chos spangs nas/ /skye bo dkar ba smod pa med/ /bcom ldan 'das kyi sku dang ni/ /gsung dang thugs kyi phrin las la/ /zhe 'gras gyur pa gang gis kyang / /chos dang ldan par glags mi rnyed/ /che ba'i yon tan cha yis kyang //tshig rnyed nges par ma blangs par/ /gal te ston bstod mi byed na/ /mi [(]kham [,]khom [)]gnas bzhin bdag bcom 'gyur/ /rgya mtshor gnya' shing bu ga ru/ /rus sbal mgrin pa chud pa ltar/ /dam chos dga' ston cher bcas pa'i/ /mi nyid bdag gis thob nas ni//mang du bcad par gyur pa ste/ /mthar yang bskal pa'i skyon gyis gnas/ /lce ni don can ma gyur te/ /gzhan du bdag ni bslus par gyur/ /mi rtag nyid dang rjes 'brang zhing / /las kyi glags la dogs bcas pa/ /bdag gi lce 'di nyid kyis go/ / snying po ci phyir blang mi bya/ /yon tan gyi mtha' ma rtogs pas/ /gal te bstod pa mi byed na/ /shA ri'i bu la sogs pas kyang / /nges par bstod par mi 'gyur ro/ /de ltar thub pa'i yon tan gyis/ /yul lta grangs med shes mod kyis / /rang gi don la gus pa yis/ / de yi phyogs gcig bsgrims te brjod/ /gang zhig gzhan la slob pa dang / /dman phyir legs par ma bslabs gang / /nyes pa zad kyang de slob cing / /gang phyir don gyis khyod mi slob/ /gang gi yon tan grangs dag dang / /mthu la thug pa ma mchis la/ /rmad byung phrin las dpag med can//rang byung khyod la phyag 'tshal lo/ /yon tan grangs kyi mthu yis ni/ /slob la smra bar nus pa dang / /mtha' can gzhal bar byed nus kyi/ /mi slob pa yi mdun du min/ /'di snyed bgyi ba'i mtha' med na/ /'di ltar lags zhes ci zhig smos/ /khyod kyi yon tan slad du bdag /bsod nams snyam nas spyi brtol skyes/ /sangs rgyas bcom ldan 'das la bstod pa dad pa las spobs pa skyes pa zhes bya ba las bstod pa gleng bslang ba zhes bya ba ste le'u dang po'o// //bde nas snying rje med pa ni/ /spyod dam mi spyod rnam mi spyod//rang gi bde bas gzhan dbang phyir/ /de nyid dang ni nges par sbyar/ /spyod dam mi spyod snyam pa yi/ /rnam par rtog pa rnam spangs nas/ /'gro ba 'di ni nyam thag ces/ /khyod bdag nyid kyis zhal gyis bzhes/ /snying rje rnam par spangs nas ni/ /gzhan gyi gzhan ni bcol ba byed//la lar bdag phan la brtson pas/ /rang gi bde phyir rab tu 'jug /khyod ni ma bcol legs mdzad pa/ /khyod ni rgyu med bzhin du byams/ /khyod ni ma 'dris mdza' bshes te/ /'brel pa med pa'i gnyen 'dun lags/ /sbyin pa'i pha rol phyin pa'i phyir//thugs rjes 'gro ba blangs nas ni/ /slong la dgyes pa 'phel 'gyur ba/ /ba spu du ma ldang dang bcas/ /nyid kyi sha yang stsol mdzad na/ /dngos po gzhan lta smos ci 'tshal/ /legs mdzad khyod kyi srog kyang ni/ /slong ba'i skye bo rnams la btang / / bdag la bdag nyid spangs nas ni/ /gzhan la bdag nyid blangs pas na/ /rtswa yis rin chen rigs chen ltar/ /dgyes pa mi nyams ldan pa yis/ /nyid kyi sku dang srog dag gis/ /lus can gshed mas zin rnams kyis/ /lus dang srog kyang khyod kyis ni/ /lan brgya phrag tu bslu ba mdzad//'jig rten bdag lta'i bsam pa can/ /snying rje'i sems ni med pa ste/ /sdug bsngal 'jigs sam bde 'dod pas/ /tshul khrims kun du blangs nas srung / /ngan 'gros bsnyengs slad ma lags la/ /bzhed pa'i 'gro ba'ang sgrub ma lags//dgongs pa dag pa 'ba' zhig gis/ /khyod kyis tshul khrims goms par mdzad/ /phyi rol rkyen gyis ma rdzogs dang / /rang sbyor phun tshogs med pa'i phyir/ /bsam pa rnam par dag pas kyang / /tshul khrims pha rol dag mi 'gyur/ /rtag tu gya gyu rnam spangs shing //drang brtan rnams ni rtag bsten pas/ /yongs su dag pa'i las rnams kyis/ /khyod ni gzhi rten gcig pur gyur/ /bzod pa'i pha rol phyin pa'i rgyu/ /thugs rje'i dbang gis mchod bya yang / /ma 'ongs sdug bsngal bsnyengs pa yis/ /gzhan nyid rang nyid la nyes pas//sdug bsngal mang pos gzir ba ni/ /khyod kyis dga' ba'i thugs kyi ni/ /nyon mongs rnams ni sran btsugs nas/ /skye bo nyon mongs can la brtse/ /gzir bar gyur pa rnams la yang / /nyes pa rnams ni mi sems pa/ /bzod pa'i pha rol phyin 'dod phyir/ / byas pa nyid ni rjes lta bas/ /khyod kyis gzhan gyi don slad du/ /sku srog btang nas dgyes gyur gang / /de 'dra srog chags 'gum pa las/ /sos pa rnams la'ang byung ma gyur/ /phan byed mchod pas dga' gyur pa/ /ngo mtshar che ba'i sems mi rtsi/ /mgon po khyod ni dgyes pa gang //bdag gi de ni ngo mtshar dgongs/ /khyod ni lan 'ga' ma lags par/ /gtubs kyang sdug bsngal mi dgongs par/ /gshed ma bgyid pa'i sems can la'ang / /gtso bo thugs rjer gyur pa gang / /gang yang gshed ma nyid kyis ni/ /ral gri nyid kyis bcad byas nas//byang chub gnyer bar gzigs nas ni/ /byams pa la ni bzhugs par gyur/ /khyod kyi thugs ni rin po che/ /rdzogs pa'i byang chub sa bon te/ /dpa' khyod kho nas snying por mkhyen/ /de gzhan skye bos 'ol mi mchis/ /de ltar bdag nyid gyur pa yang //sems can rtag tu sdug bsngal can/ /ji ltar sangs rgyas chos rnams la/ /so sor brtags nas brtson 'grus bya/ /dka' spyad las ni ma bgyis par/ /go 'phang rnyed dka' mi 'thob ces/ /de slad nyid la'ang ma gzigs par/ /khyod kyis brtson 'grus legs par spel//khyad par yon tan rnyed nas ni/ /nyes pa rnam par spangs pa dang / /sems can don du khur khyer yang / /thugs ni kun du mi bsnyel te/ /khyad par 'phags par bgyi ba la/ /khyod la thang lhod 'ga' ma byung / /de slad khyod kyi khyad par rnams/ / thog drung rim par dbyer ma mchis/ /bsam gtan pha rol phyin pa ni/ /dag pa'i rjes su cis mi mchi/ /lta dang nga rgyal snang med pa/ /gang gi shes rab kyis ni bsal/ /thugs ni thugs rje chen po dang / /rtag tu rjes su 'brel slad du/ /ting 'dzin 'bras bur bcas pa yi//shin tu bde la'ang khyod ma chags/ /kha cig mu stegs pa rnams ni/ /longs spyod kyis ni nges legs 'thad/ /gzhan la gcig tu nyid kyis ni/ /longs spyod dgag pa ma mdzad do/ /gzhan dang thun mong ma lags pa'i/ /bde ba gang de gya nom yang / /dam pa'i spyod ldan khyod 'dra la//gnod par bas kyi sman ma mchis/ /khyod kyi shes rab mtshungs min te/ /dud 'gro du ma rnams la yang / /gang zhig ye shes rnam dag phyir/ /ji ltar rjes su mchi mi bgyid/ /'dres pa la ni legs bshad nyid / /snying po skyon med nyi tshe zhig /khyod kyi kun bzhes thugs la bzhag /nyes bshad dug bzhin yongs su spangs/ /legs bshad chen po sku srog gis/ /tshigs su bcad pa'i phyed tsam yang / /gang zhig shes rab rnam 'phel phyir/ /ji ltar rjes su mchi mi bgyid/ /khyod nyid gcig pus rnam mkhyen mdzad//rin chen snying po mkhyen khyod kyis/ /legs bshad srog gis mjal ba na/ /skye ba de dang de dag tu/ /byang chub slad du dpa' stsal bstan/ /sems can brtson 'grus 'phags pa ni/ /grangs med par ni gyur pa yang / /spyod med zha bo rnams kyi gang //skye bos thob par mi nus so/ /de slad grangs med gsum dag tu/ /khyod ni de ltar brtson pa na/ /brtson 'grus 'ba' zhig 'grogs gyur pas/ /go 'phang bla na med pa brnyes/ /sangs rgyas bcom ldan 'das la bstod pa dad pa las spobs pa skyed pa zhes bya ba las rgyu'i sgo nas bstod pa zhes bya ba ste le'u gnyis pa'o// //yon tan thams cad cung zad gzigs/ /gsol pa na yang mnal mi mnga'/ /nye bar blangs pa brtan mdzad cing / /khyad par la ni thugs ni chags/ /mtho la phrag dog mi mdzad cing / / dman la rngan chen mi mdzad la/ /mnyam la 'gran pa ma mchis pas/ /khyod ni 'jig rten gtso bor gyur/ /bka' bas sgrub la nyams mi mnga'/ /yun ring du ni mi gnas shing / /chags bcas kyang ni phal che ba/ /'bras bu las ni shin tu chung / /khyod ni yon tan rgyu rnams la//mngon dgyes 'bras bu rnams la min/ /yang dag sgrub pa de nyid kyis/ /khyod ni yon tan pha mthar phyin/ /thub dbang nyid ni dka' bas grub/ /de ltar smra ba'i skye bo rnams/ /snying rje phongs pas mi sems pa/ /brtson 'grus mi g.yo blangs nas ni/ /ji ltar khyod kyi zhabs rdul yang //bsod nams skye ba mched gyur pa/ /de ltar khyod kyi longs spyad pas/ /bdag nyid rab tu bskrun pa mdzad/ /'jig rten pa yi 'phags lam dang / /brtson 'grus shes rab kyis kyang ni/ /tshe rabs snga ma'i mthar yang ni/ /khyod ni yang dag byung ba yis//nyes pa nyams smad rtsa nas bton/ /yon tan spel nas rnam par sbyangs/ /gzhung lugs bzang po des na khyod/ /grub mchog lhag par brnyes pa lags/ /rtag tu ngal zhing mgon med pa/ /slong zhing bde ba ma mchis te/ /sems can rnams la nyams med pa'i//nyon mongs mang po spyod mthong nas/ /ji ltar bdag gi rgyud la de/ /bag chags lhag ma'ang ma lus pa/ /de ltar rnam pa thams cad du/ /nyes pa khyod kyis rab tu bcom/ /gzhan gyi phun tshogs bsgrub pa'i phyir/ /khyod ni gtso bor mthong nas ni/ / bdag gi yon tan dman pa'i phyir/ /gzhan min brtson 'grus phrin las can/ /ji ltar gzhan la de dag dang / /'dra ba tsam yang mi gda' ba/ /de ltar khyod kyis bsags bsags nas/ /bdag nyid la ni yon tan bsgrub / /chung dang dman dang 'tsho ba med/ /kha na ma tho chags bcas dang //tshim par mi byed legs mtha' med/ /thun mong gsal dang mi ldan te/ /'jig rten pa yis dpe dngos kun/ /gegs bgyid pa dang sgrib pa can/ /re zhig pa dang nyi tshe ba/ /shin tu rnyed par sla ba lags/ /mang ba dang ni rab kyi rab//kun tu mtsho dang dri ma gcod/ /tshim par mdzad dang bde mtha' can/ /thun mong min pa'i snang ba mnga'/ /khyod kyi yon tan bla med la/ /gegs bgyid ma mchis rtog ma mchis/ /brtan pa dang ni rgyun chags pas/ /dpe lta mchis par ga la 'gyur/ /nyan thos blo mchog rnams kyis kyang //bskal pa rnams kyis ma rtogs pa/ /lha ma yin gyis gting rnyed pa'i/ /khyod kyi dgongs 'dra ga la mchis/ /gang tshe khyod kyis dgongs pa'i dkyel/ /gting dang pha rol med brtags na/ /rgya mtsho zab pa nyid kyang ni/ /gnag rjes lta bur sa ler gda'//'dod pa'i mtha' la ma chags pas/ /gang zhig kha cig gis skyon min/ /khyod kyi bka' ni brtan bcas pa/ /su zhig gis ni mjal bar nus/ /chos rnams kun gyi mi bskyod pa/ /khyod kyis brtan pa mngon bsam na/ / sa yi brtan pa nyid kyang ni/ /shir sha'i ge sar rtse ltar chung / /bde ba 'dod pas phyi rol pa/ /nyi ma'i rjes su nyal byed de/ /khyod ni nyi ma dang mtshungs min/ /thun mong gi ni dbye bar brjod/ /thub pa khyod kyi ye shes kyi/ /snang bas mi shes rab rib dag /'joms pa'i thad na nyi ma yang //me khyer tsam du mi spyod do/ /sbyor dang bsam pa dag pa yis/ /sngon yang nyes pa mi mnga' la/ /khyod kyi spyod pa bsam min pas/ /sangs rgyas nyid ni sus bsam nus/ /khyod kyi gsung thugs mdzad spyod rnams/ /dag pa'i gan na ston zla dang //chu dang nam mkha'i dag pa rnams/ /dri ma can nyid lta bur gda'/ /gzhal du med pa'i yon tan rnams/ /dpe yi tshul kyis sus gzhal nus/ /khyad par la ni sbyor ba'i phyir/ /tshig tsam yang ni mang po yin/ /'jig rten legs pa gang ci'ang rung / /thams cad sngo na'ang der bas te//nyon mongs 'jig rten chos rnams kyis/ /sangs rgyas chos la khyad mi 'khor / /bse ru'i rwa dang 'dra ba gang / /gang yang khyod kyi rjes 'gro slob/ /grol ba tsam gyis khyod dang mtshungs/ /rmad byung yon tan nyid kyis min/ /rin chen chos gang brnyes nas khyod//mchog tu gyur pa de nyid dang / /khyod du bsgrun zhing de dang ni/ /khyod dang bsgrun ldon kho nar bas/ /yang na de yang khyod mtshungs min/ /gang phyir gnyis ka mnyam pa ni/ /tshad ma mkhan gyis brjod mi nus/ /des ni sus kyang rtogs mi 'gyur/ /gang la spyi tsam bsgrun nas ni//cung zad brjod par bgyis pa de/ /smra ba po yi rang dga' dang / /thabs dang gcam bu tsam du bas/ /sangs rgyas bcom ldan 'das la bstod pa dad pa las spobs pa skyes pa zhes bya ba las dpe med par bstod pa zhes bya ba ste le'u gsum pa'o// // 'gro las bdud las rnam par rgyal/ /rjes su dpag pas rnam par lhag /khyod kyi nyan thos kyis kyang ni/ /mnyam gnas bdud las rgyal bar 'gyur/ /khyod ni bdud las rnam rgyal te/ /'gro kun dad par mdzad pa yang / /bdag gi chos nyid rjes bsams nas/ / chen po ltar gang ma mthong ngo / /khyod ni stobs gnas ma yin yang / /gang gis rgyal bar bya ba'i rigs/ /de yis srid gzhan rgyal ba'i phyir/ /bdud kyi bran dang mngag gzhug rnams/ /sdang bas gol par rtsol byed pa/ /mang po'ang gzhol bar bya ba ni/ /khyad par gnas la brten pa yi//bzod pa'i tshegs su mtshar mi che/ /g.yeng ba'i rkyen dang mjal na yang / /gzhan la mi bsten pa yis ni/ /'khor ba thog ma med pa ni/ /khyod bdag nyid kyis dgyes par mdzad/ /gang tshe bdud rnams mngon btul ba/ /de yi nub mo kho na la//nyon mongs shin tu che spangs pa/ /de nyid rmad du byung ba lags/ /gang gi de ltar bsam min yang / /lhag par nyon mongs las rgyal gyur/ /skye bo gzhan dang thun mong gang / /mu stegs las rgyal de smos ci/ /'od zer phreng ba stong ldan pa'i/ /nyi mas mun bsal gang lags dang //dpa' bo khyod kyis mu stegs las/ /rgyal bar mdzad pa ci zhig mtshar/ /chags sdang gti mug bcas pa dang / /de nyid dang ni 'gro ba srid/ /phra rgyas spangs pa rnams kyis ni/ /rgol ba'i tshe na rnam dpyod yin/ /'dod chags bral bas chags bcas dang //zhe sdang bral bas zhe sdang can/ /gti mug bral bas rmongs pa ste/ /gsum pos rtag tu gsum dag btul/ /btang snyoms gnas la gnas pa gang / /ngo mtshar min zhing dga' ba min/ /'jug pa dang ni ldog pa'i phyir/ /de ni ngo mtshar zhes bya ste//dam chos rab tu bstod pa dang / /dam chos ma lags smod mdzad kyang / /dam pa dag dang tha ma la/ /khyod ni chags dang khro mi mnga'/ /yun ring por ni mngon 'dod pa'i/ /yid la re ba skong ba dang / /mi rigs pa ni rtsod pa yis/ /chos nyid la ni gegs byed la//dgra bcom pa dang mu stegs la/ /rjes su chags dang khong khro bar/ /khyod kyi thugs ni mi 'gyur na / /khyod la bstod du ci zhig mchis/ /gang zhig 'phel ba'i rgyu mtshan phyir/ /srog kyang khyod kyis mi dgongs na/ /gzigs pa dang ni gsan pa dang //khyod kyis ma gzigs ma gsan bzhin/ /yon tan rnams la'ang ma chags la/ /yon tan can la'ang bzhed mi mnga'/ /kye ma'o khyod kyi thugs stobs ni/ /rab dang yongs su dag pa lags/ /phan tshun rjes su 'jug pa'i phyir/ /nges par lus dang sems dag gi /mya ngan dga' sogs gnas skabs ni/ /re dogs kyis kyang shin tu bsgribs/ /dbang po rnams ni rab dang ba/ /dus rnams rtag tu mi nyams pas/ /khyod thugs rtag tu dang ba dag /mngon sum gyur pa bzhin du gda'/ /shin tu nyung ngu 'dod pa yis//'bad pa yis ni sbas na yang / /nyes zad shin tu ma lus pas / /gzhan don gyis ni drangs pas na/ /rang bzhin dam pa legs gsungs dang / /mdzad spyod bzang pos bsgrags pas na/ /khyod kyi blo gros dgongs pa dag /rnam dag byis pa'i bar la grags/ /sangs rgyas bcom ldan 'das la bstod pa dad pa las spobs pa skyes pa zhes bya ba las rmad du byung bar bstod pa zhes bya ba ste le'u bzhi pa'o// //gang gis khyod kyi sku mthong bas/ /sems ni dang bar ma gyur pa/ /de la mig ni med pa ste/ /yang na yod kyang don med pa'o//nye bar zhi la yid du 'ong / /'bar la gnod pa mdzad mi mnga'/ /dul la rngom brjid che ba yi/ /sku 'dis su zhig dad mi mdzad/ /gang yang lta dang zhi ba'am/ /yul ni shin tu rnyed pa na/ /thams cad chags dang bral 'gyur zhing / /'di ni mthong ba'i nang na mchog /khyod kyi sku de gang gis ni//lan brgya mthong dang gang zhig gis/ /dang por mthong ba de gnyis ka /'dra bar mig ni mgu bar mdzad/ /rnam par sdang ba'i sems ldan yang / /mthong bas ngoms pa cis mi 'gyur/ /khyad par la mkhas ma yin yang / /gang zhig yi dags rnams kyis ni//khyod kyi sku ni mdzes pa'i phyir/ /blta bas mi ngoms rang bzhin pas/ /mthong ngo cog ni phyi phyir zhing / /dga' ba skyed par mdzad pa lags/ /dub par ma dgongs ngo mtshar te/ /rjes su mthun pa'i don mdzad cing / /phrin las gsal bar gyur pa na/ /gang gi 'bad pa med par 'phrul//rten gyi yon tan dag dang ni/ /brten pa'i yon tan phan tshun du/ /'tsham pas khyod kyi sku dang ni/ /yon tan phun tshogs mchog dang ldan/ /khyod la yon tan mi mnga' na/ /de bzhin gshegs pa'i sku 'di ni/ /gzhan la gang zhig la ni rten/ /gzhan mi bas ni rnam par spras//mtshan dang dpe byad bzang 'bar ba/ /khyod kyi sku las ma gtogs pa/ /de bzhin gshegs pa'i yon tan 'di/ /gzhan gang zhig la legs gnas 'gyur/ /phun sum tshogs las lhag pa'i sku/ /gzhan dang mtshungs min thob pa ni/ / brten pa yi ni khyad par gyis/ /phun sum tshogs pa lhag par 'chang / /khyod sku rten pa'i yon tan la/ /nga dpal che zhes gsung gsung ltar/ /de yi yon tan rnams kyang slar/ /nged legs bkod ces gsung ba 'dra/ /sangs rgyas bcom ldan 'das la bstod pa dang pa las spobs pa skyes pa zhes bya ba las sku la bstod pa zhes bya ba ste le'u lnga pa'o// //gsod dang bkres skom grang dro dang / /mi srun smad pa la sogs mang / /gsum la dub pa med bzod cing / /ngan song gi ni sdug bsngal yang / /'gro ba 'di dag thams cad ni//khyad med nyon mongs rnams kyis bcings/ /khyod ni 'gro ba'i nyon mongs dag /dgrol slad yun rings thugs rjes bsdams/ /bcings pa'i rgyu ni nyon mongs pas/ /'gro ba yis ni nyon mongs bzod/ /khyod ni thugs rje yis bcings pas/ /bzod pa gang de ngo mtshar lags//dang por khyod la phyag bgyi 'am/ /'on te gang gis 'khor bar khyod/ /skyon mkhyen yun ring de lta bur/ /bzhugs mdzad thugs rje che la bgyi/ /de ltar sdug bsngal btang snyoms nas/ /dben pa'i gnas su bzhugs par mdzad/ /shin tu gsal bar bya ba'i phyir//de ltar gyi yang bzod par mdzad/ /dben pa'i bde ba spangs gyur khyod/ /mang po'i nang du bzhugs pa gang / /de khyod thugs rje dus 'das pa/ /glags shig thod nas bgyis par bas/ /'jig rten spyod pa 'dra ba mang / /ma 'ongs bde ba la brten nas//da ltar byung la gus pa yis/ /sems can rnams la rnam dpyad nas/ /rig pa yi ni mtsho nang nas/ /klu bzhin khyod kyi thugs rje yis/ /dgon pa zhi gnas grong gi mthar/ /gdul ba'i don gyi slad du drangs/ /gzhan la chags shing dgongs pa yis//thugs rje btsun mos mi bya med/ /yang na khyod ni de chags pas/ /rang dang mthun pas spangs nas gang / /nyer zhi mchog la gnas bzhin du/ /thugs rje gtso dang ldan pas na/ /rol mo mkhan gyi sgyu rtsal yang / /khyod kyi zhabs kyis 'dor bar mdzad//don dam pa ni ma brnyes pas/ /sngon ni de bzhin dka' spyod min/ /sangs rgyas nyid ni brnyes pa yis/ /zhi gnas bdag nyid spangs nas kyang / /rdzu 'phrul seng ge'i sgra dang ni/ /nyid kyi yon tan brjod pa gang / /de ni bzhed spyod mi mnga' ba/ /khyod kyi thugs rje bstan pa lags//gal te sems can don mdzad 'di/ /sems can yod na mi 'gyur ba/ /gus pas gzhan du mi 'dre la/ /ji ltar mi bzad ltar brtse med/ /gzhan gyi don du rab bzang gi /nyid kyi don la brtse med pas/ /mgon po khyod nyid 'ba' zhig la/ / thugs rjes thugs rje mdzad ma gyur/ /yang na khyod nyid dka' ba rnams/ /spyod pa ma nyams des ni mdzad/ /khyod kyis nyid don las lhag par/ /gzhan don rjes su gzigs par mdzad/ /'di ltar res 'ga' bstan pas gang / /gzhan don grub par mdzad slad du/ / khyod ni lan brgyar phyogs dag [(]du[,]tu[)]/ /gtor ma bzhin du btang ba lags/ /gang zhig rjes su mi mthun pa'i/ /rol mo mkhan gyi bzo sogs ni/ /ngan pa'i las la'ang drang bar mdzad/ /de nyid de ni mi 'thad do/ /de ltar khyod la gnod mdzad kyang / /nongs pa can du mi rtsi bas//khyod kyi bzhed pa kho na dang / /mthun 'jug pa ni lags par gda'/ /gtong min yod de chags pa min/ /chags pa yod de dngos mi shes/ /kha cig dngos po shes na yang / /rjes su mthun min gtong ba yang / /gtong ba min la chags pa yang / /dngos po shes na rjes su mthun//thugs rje de yis spyod legs mang / /gang gi smra bar byed par nus/ /sangs rgyas bcom ldan 'das la bstod pa dad pa las spobs pa skyes pa zhes bya ba las thugs rje la bstod pa zhes bya ba ste le'u drug pa'o// //tshig bzang ba dang don che dang //bden pa dang ni snyan pa dang / /rab gsal gnyis ka'i don ldan dang / /bsdus dang spros pa dang ldan pa/ /nyon mongs 'joms dang rtsub min dang / /gsal dang bde blag rtogs pa dang / /sna tshogs don ni ma 'khrugs dang / /snying po can dang mang ba yang //khyod kyi gsung ni de lta bu/ /khyod kyi dgra bos thos na yang / /thams cad mkhyen pa lags so zhes/ /su zhig nges pa bskyed mi 'gyur/ /rjes su chags dang bar ma dang / /sdang bas gnod pa byed pa la/ /nyes kun skyug par mdzad pa'i phyir/ /thams cad la ni thugs mnyam mnga'//mang po ril gyis snyan ma lags/ /bcos pa 'ga' tsam snyan pa lags/ /khyod kyi gsung ni don grub pas/ /thams cad legs gsung kho na lags/ /mos khams dbang po'i dbye ba yis/ /gang phyir bsam pa sna tshogs pa/ /de bas thabs la mkhas pa yis//skyes bu 'dul mchog kha lo sgyur/ /khyod kyi gsung ni rnam brtags na/ /gang zhig 'jam dang rtsub pa dang / /gang yang de gnyis ldan pa dag /thams cad ro gcig nyid du 'gyur/ /yun ring 'phel bar 'gyur ba ni/ /thugs rje brtson 'grus phun tshogs pas//dgongs pa yang dag shes rab kyang / /thams cad la ni brtson dang ldan/ /e ma'o shin tu yongs dag pa'i/ /phrin las rnams kyang rab tu bzo/ /de yis rin chen gsung rnams kyi/ /snod 'di 'dra ba 'di bgyis so/ /snod kyi skyon dang 'brel pas na/ / rna bar bdud rtsi 'di 'dra ba'ang / /ro ni phrogs par gyur pa ste/ /lha yi chu ni rgya mtsho bzhin/ /khyod zhal blta na rab sdug pa/ /de las mnyan na snyan pa yi / /gsung 'di dag ni zla ba las/ /bdud rtsi 'dzag pa bzhin du gda'/ /sngo ba thi sogs dbye ba yis//mi sdug pa ni bstan pa dang / /byams pa dang ni snying rje yang / /spyod pa'i gnyen po'i phyogs kyis ni/ /khyod kyi gsung ni 'dod chags kyi/ /rdul rab zhi mdzad char sprin 'dra/ /zhe sdang sbrul ni gdon pa'i phyir/ /nam mkha' lding dang 'dra ba lags/ /gzhan yang rten cing 'brel 'byung ba'i//rnam pa sna tshogs bstan pa yis/ /de bzhin las bdag gir bya ba/ /bdag med pa gang dbyer med pas/ /yang dang yang du mi shes pa'i/ /rab rib 'joms pas gdugs dang 'dra/ /nga rgyal ri bo mngon 'joms pas/ /brgya byin mtshon cha 'dra ba lags//gal te 'di ni ma gsungs na/ /bde gshegs dgra bcom sangs rgyas dang / /de ltar rtogs nyid phun tshogs pa'i/ /khyod kyi bden gsung sus rtogs 'gyur/ /don gzigs pas na mi slu ba/ /nongs mi mnga' phyir rjes su mthun/ /legs par sbyar bas go sla ste//khyod kyi gsung ni legs gsum ldan/ /zab pa dang ni snyan pa dang / /go sla dang ni legs sbyar dang / /gdul bya dang ni rjes su mthun/ /gdug pa la yang bden don phyir/ /re zhig dang por khyod kyi gsung / /nyan pa rnams kyi yid 'phrog mdzad/ /de nas yid la bsams bgyis na//rdul dang mun pa dag kyang sel/ /longs spyod nyung ngu tsam zhig dang / /skye ba dang ni 'jig pa yang / /gzhan yang 'gro ba gzhan dbang la/ /nges par 'byung ba ston par mdzad/ /phongs pa rnams kyi dbugs 'byin cing / /bag med rnams ni skrag par mdzad//bde ba can dag skyo bgyid las / /khyod gsung kun dang 'tsham par 'jug /yongs smin dbang gis shes rab ni/ /sgom pa'i rang bzhin skyed mdzad cing / /de las ldang ba'i dus su ni/ /thos bsam rang bzhin gyis kyang ni/ /mkhas pa rnams ni dga' ba bskyed//bar ma rnams kyi blo yang spel/ /tha ma'i rab rib rnam 'joms pas/ /gsung 'di skye bo kun la sman/ /shes rab spyan ni zag pa med/ /dang po bden pa skyed par mdzad/ /de 'og dbang po'i dbye ba yis/ /bsgom pa dang ni mi slob lam/ /lta ba dag la dgar mdzad cing //mya ngan 'das par nye bar 'dren/ /nyes pa sel mdzad khyod kyi gsung / /yon tan rnams kyi char yang 'bebs/ /'dul ba'i thabs la mkhas pa yis/ /sngon dus lo rgyus gsung ba'i phyir/ /skal can rnams la don dam pa/ /shin tu ma 'das pa yis kyang //kun la ma thogs thugs mnga' zhing / /dgongs pa'ang kun tu nyer gnas pas/ /de slad khyod kyis lung bstan kun/ /thams cad la yang slu mi mnga'/ /khyod kyi nyan thos mchog rnams kyi/ /rigs dang smin dang mos pa yis/ /mi shes pas ni bsgribs pa'i tshig /khyod ni thugs dgongs ma nyams pas/ /gang slad dus min yul min dang / /snod min rnams su mi 'jug pa/ /de slad khyod gsung don mchis te/ /brtson 'grus legs par brtsams pa bzhin/ /khyod gsung yon tan cha tsam la'ang / /bdag gis bstod par nus ma yin//gang gis khyod kyang 'dod chung ba'i/ /rab tu gsal bar kun du 'dren/ /sangs rgyas bcom ldan 'das la bstod pa dad pa las spobs pa skyes pa zhes bya ba las gsung la bstod pa zhes bya ba ste le'u bdun pa'o// //bgrod pa gcig dang thabs bde dang //legs par 'brel dang nyes pa med/ /thog ma bar dang mthar dge bas/ /khyod kyi bstan 'dra gzhan la med/ /gzhan rnams kyang ni thar don min/ /dka' bas thob cing bde 'gro min/ /mi rtag phan tshun 'gal ba ste/ /de lam 'bras bu bstan pa'i phyir/ /khyod kyi gzhung lugs de lta bu//gcig pu phongs la lta chags pas/ /byis pa gal te smod bgyid na/ /lta dang 'dra ba'i dgra ma mchis/ /byang chub sems ni nyer blangs nas/ /gzhan don la chags thugs mnga' bas/ /khyod bskal bye bar skad cig bzhin/ /dmyal bar yang ni de bzhin bzhugs//'gro ba yi ni don slad du/ /sdug bsngal mang ltar gang lags pa/ /de bsams khyod bstan ngan na yang / /gnas par bgyi ba la thug na/ /nyon mongs bde ba chung byed pa'i/ /mi yi bdag po'i bka' lung gis/ / dmyal ba yi yang las rnams la'ang / /byas pa gzo bas 'jug par mthong / /phan pa gsung zhing phan pa mdzad/ /khyod kyi bstan pa ci smos te/ /mgo la zhugs ni 'bar bas kyang / /ci yi slad du sgrub mi bgyid/ /zhi gnas ye shes rdzogs pa dang / /rtogs par gyur nas dad pa dang //nyon mongs kun las rnam 'grol phyir/ /byis pa slob dang mkhas rnams kyis/ /khyod kyi bstan pas rang dbang dang / /byang chub bde dang zhi ba dang / /khyod kyi yon tan bsngags pa dang / /legs pa bzhi po 'di kun thob/ /stong pa nyid ni gsung ba dang //srid par smon pa mi mnga' dang / /mtshan ma med pa rnyed mdzad pa/ /gang de chags sdang med pa'i phyir/ /dpa' bo khyod kyi bstan pa 'di/ /mu stegs thams cad skrag mdzad la/ /bdud ni sems khong chud mdzad cing / /lha dang mi rnams dbugs kyang 'byin/ / bdag tu lta bas 'dus byas la/ /smod med mya ngan 'das mi 'thad/ /de slad de yi mi mthun pa/ /'chi bdag gis ni 'tshe bar 'gyur/ /'chi bdag bstan pa khams gsum gyi/ /sa chen dag la spyod bgyid pa/ /mi thogs zlog pa ma mchis pa'ang / /khyod kyi bstan pas zil gyis mnan//skyes nas nges par 'jig pa'i phyir/ /'on te nyon mongs bzhin 'chi 'pho/ /khyod sras kyis kyang dbang thob phyir/ /de las 'di ni khyad ches 'phags/ /khyod kyi bstan pa'i lugs 'tshal ba/ /dga' na bskal par yang gnas la/ /gang du bdud kyis mi rdzi ba//der yang dga' mgur rab tu mchi/ /thabs sogs sgrub la mkhas pa yis/ /shes rab gsum po rnam 'phel phyir/ /gang tshe sems ni nges sbyar dang / /gzhag dang sdang ba zhes bya 'dis/ /lung gi don ni bsams pa dang / /bsgoms dang gus par mnyan pa yi//dus gsum cha dbye khyod kyi ni/ /bstan las gzhan la mchis ma lags/ /rig pa snga phyir ma 'phel zhing / /bsam bya'i gnas dang bral ba'i phyir/ /mu stegs gzhan gyi mthong bzhin yang / /lta la srid pa'i gdon gyis dkrugs/ /drang srong skyes mchog khyod kyi bstan//de ltar legs pas khyab 'di la/ /ma gus gang lags de las ni/ /sdug bsngal chen po'ang ci zhig mchis/ /sangs rgyas bcom ldan 'das la bstod pa dad pa las spobs pa skyes pa zhes bya ba las bstan pa la bstod pa zhes bya ba ste le'u brgyad pa'o// //gang zhig snga mar smon lam mdzad/ /yang na mthong dang thos pa yang / /'gro ba rnams la smon mdzad pa/ /de ltar yang ni don ldan 'khums/ /khyod thos pas ni spro ba skyed/ /mthong bas dad pa skye bar 'gyur/ /khyod gsung thos pas dga' 'gyur te/ / bstan pas rnam par grol bar mdzad/ /kye ma'o gnas skabs thams cad du/ /skye dgu rnams la sman mdzad pa'i/ /chos bstan pas ni byed pa na/ /gang mthar bde ba sgrub pa'i phyir/ /khyod kyi sras kyis mgu bar 'gyur/ /'phel bas skye dgu rnams kyang dga'/ / gshegs pa na ni phan 'dogs mdzad/ /ldog pa na ni 'god pa mdzad/ /gang zhig dad pas brlan sems kyis/ /yon tan dran pa gsal bas kyang / /gal te khyod ni bde mdzad na/ /de las ngo mtshar ma mchis lags/ /bsgrags pas sdig pa 'phrog par mdzad/ / khyod dran pas ni rangs par 'gyur/ /btsal bas blo gros skye 'gyur te/ /yongs su shes pas rnam par 'dag /de bzhin skyabs 'gro len pa dang / /sbyin dang slob pa rjes byed pa'i/ /'jigs 'joms mdzad pa ci ngo mtshar/ /gang zhig chos la mngon 'dod pas/ /khyod la bsu bas dpal du byed//bsten pas blo gros mchog tu 'gyur/ /bsten na 'jigs pa med par mdzad/ /bsnyen bkur bgyis pas bde bar 'gyur/ /glags skabs tshol bar byed pas kyang / /khyod kyi drung du nyer mchis na/ /phyi nas gdung ba dang ldan phyir/ /sman pa bzhin du de bzhin khyod//tshul khrims phun sum tshogs pas dag /bsam gtan phun sum tshogs pas dang / /shes rab phun tshogs mi 'khrugs pas/ /khyod ni bsod nams mtsho chen lags/ /mtshang 'bru ba la brtson pa ste/ /ba ra dwa dza la sogs kyang / / nges legs dang 'dra cis mi 'gyur/ /khyod la de ni ngo mtshar ci/ /khyod sku bltar 'os rin chen te/ /legs gsungs mnyan 'os rin chen lags/ /chos ni spyad 'os rin chen pas/ /khyod ni rin chen 'byung gnas lags/ /'jigs pa mi bzad rnams su yang / /khyod ni dran pa tsam gyis gang //zhi bar gyur pa de la yang / /mtshar min gang zhig thugs rje'i bdag /khyod ni chu bos bdas pa'i gling / /smas pa'i bdag nyid skyob pa ste/ /srid pa'i 'jigs pas nyen pa'i skyabs/ /thar 'tshal rnams kyi 'dren pa lags/ /me tog gcig ni rab phul bas//gang zhig ngan 'gror ltung ma gyur/ /de la dus nges bstan pa la/ /mtshar min khyod sngon 'di 'dra lags/ /tshul khrims dag phyir snod kyi mchog /zhing gshin 'bras bu phun sum tshogs/ /srog chags kun la phan mdzad phyir/ /grogs kyi phul yang khyod lags so/ / gang zhig gis khyod mthong tsam gyis/ /skyon yon la ni mi mkhas pa/ /dud 'gro dang ni gzhan min 'gyur/ /de la drin sogs mtshar ba lags/ /phan 'dogs mdzad pas mdza' bshes te/ /'grogs na bde phyir snying du sdug /zhi phyir gcig tu yid du 'ong / /yon tan kun mnga' mchod 'os khyod//gang zhig mthong ba tsam gyis ni/ /ngan song gi ni sdug bsngal yang / /nye bar zhi ba de la yang / /gnas min 'jig rten dogs pa can/ /sdig pa med pas yid dang 'thad/ /sku gsung bzang bas dga' bar mdzad/ /don kun 'grub phyir dpal yangs te/ / yon tan legs rten bkra shis lags/ /sangs rgyas bcom ldan 'das la bstod pa dad pa las spobs pa skyes pa zhes bya ba las smon lam gyi bstod pa zhes bya ba ste le'u dgu pa'o// //snga phyir sems gnas bsgrub slad du/ /rmugs la sogs pa zhi ba'i phyir//phyi rol g.yeng ba zhi don du/ /nang gi chog shes spangs pa'i phyir/ /khyod ni rngan then bgyid la skul / /chom rkun bgyid pa tshar yang gcod/ /gya gyu can rnams rnal du 'god/ /dal bus bgyid la bzhen skul 'debs/ /zhi gnas nges par rdzogs nas ni/ /phyi nas bden la sbyar bar mdzad//bsgom pa khyad par mdzad slad du/ /sa bon med par spangs par mdzad/ /dul ba rnams ni lam la sbyor / /dmu rgod rnams la btang snyoms mdzad/ /de slad skyes bu 'dul ba yi/ /kha los sgyur ba bla med mchog /thad du phyin nas khyod mtshang 'bru//gang zhig sa bon med par spangs/ /'on kyang de la btang snyoms min/ /phan pa'i dus la gzhes par mdzad/ /khyod ni nyam thag rnams la brtse/ /bde bar gnas la phan par bgyid/ /phongs par gnas la thugs rje bas/ /kun la phan par bzhed pa lags//gang zhig bar ma la phan bzhed/ /de ni shin tu ngo mtshar min/ /gang zhig slar yang byas 'joms pa'i/ /gnyen dang grogs rnams la ni bzhin/ /khyod ni dgra bo rnams la'ang byams/ /nyams par gyur la phan 'dogs mdzad/ /gtum po rnams la thugs brtse bas//khyod ni ya rabs rmad cig lags/ /skye ba gcig tu phyi rol gyi/ /bza' btung gos la sogs pa yi/ /nyon mongs pa yi dbang gis ni/ /lus tsam la ni phan byed dag /phan 'dogs bgyi slad pha ma dag /gal te bla mar 'tshal na go/ / khyod ni lhag par phan 'dogs pas/ /bla ma nyid gyur smos ci 'tshal/ /thar pa'i sa bon ji ltar yang / /de rnams dge ba la btsud nas/ /dus gcig yongs su smin slad du/ /dus ni kun du 'da' bar mdzad/ /rang gi don la mi lta bas/ /nyid kyi dgra bo ltar gyur cing //g.yang sa'i mu na gnas rnams la/ /ra ba lta bur gyur pa'ang khyod/ /de nas ji ltar snod gyur pa'i/ /yongs su smin par gzigs nas ni/ /slar yang thugs ni ma bsnyel zhing / /sman gdags bsam gtan la brtson lags/ /'jig rten gnyis kar sman gdags slad//'jig rten las ni 'da' slad du/ /mun par gyur pa'i 'jig rten la/ /khyod kyis shes rab snang bar mdzad/ /de las tha dad med pa yis/ /rgyu bcas rgyu ni med pa yang / /'phags pa'i lam nas 'god mdzad dang / /khyod kyi 'jig rten la ston mdzad//yul la nye bar spyad pa na/ /lha min spyod pa tha dad kyi/ /khyod kyi longs spyod thun mong bas/ /khyod la dbye ba mi mnga'o/ /gang du rgyu ni med pa la/ /khyod kyis bstan par rab btsud na/ /de la thar pa'i rgyu bcas la/ /mdor bsdus pas na smos ci dgos/ / bcom ldan khyod kyis skye ba dang / /na tshod rigs dang yul dang ni/ /dus kyi skyon med chos rnams kyis/ /'di dag kun la sman yon btags/ /'di ni sman dang 'di mchog ces/ /khyod kyi ltos pa bsal nas ni/ /de ltar yon tan 'phags 'dren pa/ /'bad pas ji ltar bdag nyid bzhin//khyod kyi nyan thos sred bral zhing / /ya mtshan 'dzin pa med rnams la'ang / /lha rnams thal sbyar smon bgyid cing / /ya mtshan che ba lta bur mchod/ /bdag nyid 'jigs pas bde thob pa'i/ /yul dag spangs par gyur nas ni/ /'gran zla bzhin du gcig nas gcig /mchog tu rjes su 'brang ba byed/ /e ma'o sangs rgyas 'khor ba yi/ /nying khur gyur pa byung ba brjid/ /des na mi yang lha rnams kyi / /smon par bya ba nyid du gyur/ /sangs rgyas bcom ldan 'das la bstod pa dad pa las spobs pa skyes pa zhes bya ba las lam la 'jug pa la bstod pa zhes bya ba ste le'u bcu pa'o// //mnyel dang zhi bde nyams gyur dang / /skye bo ngan dang 'grogs pa dang / /mi mthun pa dang mang po yi/ /skyon yang yon tan bzhin dgongs shing / /gzhan la sman pa mdzad la chags/ / thugs rje yis ni thugs bcings pas/ /bskal pa grangs med gsum gyis ni/ /khyod kyis sdug bsngal mi dgongs so/ /'gro ba'i don slad ma chags pa'i/ /thugs kyis brtson pa mdzad pa gang / /sangs rgyas rnams kyi sangs rgyas kyi/ /chos nyid bcom ldan de rmad do/ / zhi gnas bde ba ma thob pa/ /sngon mdzad gang de ngo mtshar min/ /khyod kyis zhi gnas thob pa yang / /spangs pa'i mdzad pa ngo mtshar to / /bshos kyang phal pa gsol mdzad cing / /res 'ga' smyung ba dag kyang mdzad/ /nyam nga'i tshul du'ang gshegs mdzad cing / /rad rod can du'ang man la ba mdzad//slar yang phyag gi bdud rtsi yis/ /gzhan rnams la ni phan pa mdzad/ /de nyid kyis ni mi 'grang ba'i/ /mi srun spyod pas phal pa bzhin/ /mgon khyod gtso bor gyur lags kyang / /gdul bya rnams la byams slad du/ /sku ngas brdo dang gcam tshul dang //skad dang cha lugs sgyur ba'ang mdzad/ /mang po'i rang don mthar thug dang / /de ni khyod kyi che ba lags/ /de la mngon 'dod don la yang / /de lta'i sdug bsngal sdom pa mdzad/ /kun gyis dga' mgur rang don phyir/ /bran bzhin bskos par bsgrims pa lags//mgon khyod rtag tu bdag nyid la/ /mnga' ma mchis pa'ang ma lags so/ /lci dang cha lugs yang dgongs pa'ang / /de tshe khyod la ga la ste/ /gang phyir gzhan ma spangs nas kyang / /sdug bsngal ldan pa mthar phyin pas/ /khyod la gang dang gang du yang / /ji skad skul yang mi spong ste//nyid kyi sgrub pa bzang po las/ /'da' bar 'gyur ba ma mchis so/ /pha 'am yang na gzhan legs la/ /byams pa'am yang na snying rje yis/ /khyod yon phrag dog gis gdungs dang / /de bzhin rgyu med dgra bo la/ /ji ltar khyod ni gnod bgyid la//phan pa lhur mdzad de lta bu / /skye bo dag ni phan bgyid la'ang / /phan pa de ltar lhur mi bgyid/ /nyes rtog gdon gyis zos pa ni/ /phyir zhing shin tu mi bzad la/ /mgon po rang sems rjes mthun pas/ /khyod kyi nyes pa mthong ba la/ /khyod ni gnod bgyid dgra bo la//phan pa mdzad pa'i bshes lags te/ /rtag tu skyon dag tshol ba la/ /yon tan 'ba' zhig tshol ba'ang lags/ /shin tu dge ba'i spyod ldan pa/ /mgo dang yid dang tshig dag gis/ /khyod ni phyag 'tshal mchod 'os la/ /rtag tu bdag ni phyag 'tshal bstod//khyod ni gang na dug bcas shing / /zhugs dang bcas par spyan drangs pa/ /der ni brtser bcas gshegs pa dang / /khyod la bdud rtsi can du gyur / /shin tu phan tshun 'gal ba can/ /sems can rnams kyi log rtog pas/ / mi bskyod de la phan 'jug pa'i/ /thugs ldan khyod la phyag 'tshal lo/ /bzod pas mi snyan brjod pa dang / /'khu ba dag ni bde legs kyis/ /mi snyan smra la bden pa ste/ /khyod kyis sdang ba byams pas btul/ /dgra rnams la ni 'bad min pas/ /thugs kyis kyang ni rtag tu btul//bzlog la yang dag 'jog mdzad pa'i/ /rgyal mchog khyod la phyag 'tshal lo/ /thog ma med dus goms pa yis / /mi yi rang bzhin mang po yang / /khyod kyis ngan song rnam bzlog nas/ /skad cig nyid la yongs su bsgyur/ /shin tu bzang min khams tsam yang //yun ring [(]gyis [,]gis [)]ni 'phel mdzad pa/ /sman pa'i spyod pa rjes 'jug pa/ /sman mchog khyod la phyag 'tshal lo/ /sangs rgyas bcom ldan 'das la bstod pa dad pa las spobs pa skyes pa zhes bya ba las dka' ba mdzad pa la bstod pa zhes bya ba ste le'u bcu gcig pa'o// //rtsub po dang 'jam bgyid pa dang / /'jungs pa rnams ni gtong phod dang / /gtum pa des par bgyis pa gang / /de ni khyod kyi thabs mkhas lags/ /rang rig rjes su mi gcod cing / /dge ba gong du 'dren byed pa/ /skye ba gzhan du mdzad pa'i phyir//dge mchog khyod la phyag 'tshal lo/ /dga' bo dbang po nyer zhi dang / /nga rgyal khengs pa 'dud pa dang / /sor mo'i phreng ba 'ang zhi bgyis na/ /su zhig ngo mtshar skye mi bgyid/ /shin tu mchog don mdzad slad du/ /dmu rgod rnams ni bde ba yis/ / shin tu ngo mtshar gyur pa yis/ /'dul mdzad khyod la phyag 'tshal lo/ /khyod kyi chos kyis ros tshim pas/ /gser las bgyis pa'i mal spangs nas/ /ran mang gting ba'i gnas mal du/ /brtan rnams bsod nyams nyal bar bgyid/ /gzhan gyi dbang gis lus tsam ni//shin tu tshim dang rjes mthun min/ /gang phyir gzhan gyis tshim byed las/ /tshim mdzad mchog khyod la phyag 'tshal/ /khyod kyis dus dang bsam mkhyen pas/ /res 'ga' zhus na'ang mi gsung la/ /spros 'gyur gzhan la bstan pa dang / /drung du gshegs nas bshad pa'ang mdzad//rgyu min mkhas pa ma yin phyir/ /thams cad du ni tshig mi 'grub/ /de ni shin tu spangs mdzad phyir/ /bden gsung khyod la phyag 'tshal lo/ /dri med gos la tshon bzhin du/ /thog mar sbyin sogs gtam dag gis/ /sems la spro ba bskyed nas ni//phyi nas chos ni bstan pa mdzad/ /rig dang thabs la mi mkhas pa'i/ /tshig gis sems ni 'gug mi 'gyur/ /gzhan gyi sems ni bkug mdzad nas/ /'chi med gsol mdzad la phyag 'tshal/ /'khor ba mi bzad gting nas ni/ /'gro ba nyon mongs drang slad du//khyod kyis gang zhig ma stsal ba'i/ /thabs dang spyod pa de ma mchis/ /kha cig pha rol 'dod slad du/ /brtson 'grus ldan la thabs mi mkhas/ /thabs mkhas brtson 'grus med pa las/ /'dren mdzad mchog khyod la phyag 'tshal/ /sku yi cha lugs rnam mang dang //gsung gis so so'i skad bzhin du/ /gdul ba'i bsam pa tha dad pa/ /de dang der ni khyod kyis mdzad/ /gzhan gyi cha lugs sna tshogs ni/ /don med yang na gzhan gsod phyir/ /don ldan sku ni sna tshogs pa'i/ /don kun mdzad la phyag 'tshal lo/ /de dag kun kyang dag pa dang //mi 'gal ba dang mchod 'os dang / /brjid dang lha mi rnams la ni/ /sman 'dogs bkur ba sha stag lags/ /phyi rol rnams kyi spyod pa ni/ /gzhan gsod pa dang smod pa ste/ /bkra shis gzhan don du ldan pa'i/ /spyod pa mnga' khyod la phyag 'tshal/ / smra dang bgyid pa phal cher ni/ /legs pa rngo thogs ma lags kyi/ /bden par gsung ba khyed la ni/ /de gnyis gzhan du gda' ba lags/ /gzhan gyi spyod pa mig ni gzhan/ /nyon mongs phal cher 'khrugs pa yang / /spyod pa dang ni don mthun pa'i/ /legs gsung khyod la phyag 'tshal lo//bdag nyid dag pa 'ba' zhig gis/ /khyod kyis 'gro ba'i dpal zhing mdzad/ /'di ltar rnam pa 'di 'dra'i zhing / /'jig rten gsum na mchis ma lags/ /gal te dbye byed rnams kyi ni/ /'ba' zhig khyod ni smad gyur na/ /de bzhin dpag med dge ldan pa'i//sgor gyur khyod la phyag 'tshal lo/ /thog med srid pa nyam nga bar/ /snga nas gcig tu nyams pa yi/ /sems can kun la sman slad du/ /khyod ni de ltar brtson pa lags/ /sangs rgyas bcom ldan 'das la bstod pa dad pa las spobs pa skyes pa zhes bya ba las mkhas par bstod pa zhes bya ba ste le'u bcu gnyis pa'o// //gang phyir mya ngan gyis nyams pas/ /ston pa rnyed par dka' ba yang / /slar yang dka' la brtson ldan pa/ /khyod la rtag tu phyag 'tshal lo/ /gang gi khyod drin lan lon pa'i/ / sgrub de mchis snyam mi bgyid de/ /skye bo gang dag mya ngan 'das/ /de dag gis kyang lan ma lon/ /rang don byed par bdag mchog cing / /de ltar gang gis rmad byung gsungs/ /thog mar ma thogs phun sum tshogs/ /ston mdzad khyod la phyag 'tshal lo/ /khyod kyi chos la gnas de dag /rang don kho na bgyid par bas/ /de yi slad du 'o brgyal gang / /de la lan go ci zhig lon/ /khyod ni sems can gnyid log pas/ /rgyud la gzigs pa'i zhugs tse ba/ /bag med gyur pa rnams kyi ni/ /grogs bzang bag dang bcas pa lags/ /gti mug mnal ni bcom pa'i phyir//shin tu sad khyod phyag 'tshal lo/ /snod dang snod min sogs dpyod phyir/ /'jig rten mkhyen la slar phyag 'tshal/ /khyod kyis nyon mongs gzhom pa bshad/ /bdud kyi g.yo dag bstan pa mdzad/ /'khor ba'i rang bzhin mi bzad brjod/ / 'jigs pa med pa'i phyogs kyang bstan/ /gal te gzhan gyis rgyud rnams kyi/ /nyon mongs bdud las rgyal gyur pa/ /bdud kun las rgyal smos ci 'tshal/ /phan dgongs thugs rje can gyis ni/ /sems can rnams la bgyi 'tshal ba/ /gang zhig khyod kyis ma mdzad pa/ / gzhan go ci zhig mchis lags kye/ /mgon khyod grangs dang 'phags pa dang / /bla ma yan lag gnyen 'dun gyis/ /dgongs pa mdzad pa gang lags pa/ /de phyir kun bdag la phyag 'tshal/ /gal te chos ni 'di dag kyang / /spo ba zhig tu btub na ni/ /gdon mi 'tshal bar khyod kyi ni//lha sbyin la brten kun la'ang stsol / /khyod kyi mdzad par mi spyod gang / /de ni nges par bgyid mi rigs/ /gnas ma yin las ldog pa dang / /gnas la zhugs la phyag 'tshal lo/ /de slad 'gro la brda sprod pa/ /'gro ba'i mgon po khyod kyis ni/ /'di ni phan tshun byed pa po/ /med pa skad du nges par gsungs//khyod kyis mi spyod pa yis kyang / /gang phyir ldog pa'i mi 'thad na/ /de phyir gnas skabs thams cad du/ /lta bcas khyod la phyag 'tshal lo / /'jig rten rnams la thugs brtse bas/ /yun ring sa steng dam chos bshad/ /'jig rten gsum phan 'dogs nus pa'i//slob ma dam pa'ang mang du bskrun/ /bskrun nas gdul ba'i khyad par gyis/ /bstan pa rgyas ni btab nas kyang / /mngon du btul ba'i tshogs kyang ni/ /mdzes bzang yan chad btul lags pas/ /de ko khyod la sems can gyi/ /bu lon lhag ma ci mchis na//chos kyi sku yis ma lus pa'i/ /'gro ba dag dang ldan khyod kyis/ /slob dpon khu tshur bcing min phyir/ /bu lon lhag ma gzhan ci [(]mchas[,]mchis[)]/ /'di ltar rdo rje'i ting 'dzin gyis/ /sku gdung til 'bru bzhin blags nas/ /mjug tu'ang khyod kyis shin tu ni//dka' spyad yal bar ma dor ro/ /yang na gzugs sku'i mthar yang ni/ /sems can don mdzad nyid gzigs nas/ /nyid kyi bde la chags mi mnga'/ /de la ltos pa dor bar mdzad/ /gzugs kyi sku dang chos 'di dag /gzhan don kho nar mdzad do zhes//'jig rten yid ches dka' 'di la/ /khyod kyis mya ngan 'das pa bstan/ /de ni spyod bzang mthar thug pa'i/ /sems can gzhan don mdzad pa nyid/ /gang zhig thog ma dbus mthar yang / /khyod kyis ma nyams nyid du 'khums/ /de slad chos sku ma lus pa/ / sras kyi mchog la gtad mdzad de / /gzugs sku til 'bru ltar bshig nas/ /khyod ni yongs su mya ngan 'das/ /de ltar thog ma dbus mtha' ru/ /chos gzugs sku gnyis bdag nyid kyis/ /sems can don la phan mdzad phyir/ /bu lon mi mnga' la phyag 'tshal//e ma'o gnas pa e ma'o tshul/ /e ma'o yon tan e ma'o sku/ /sangs rgyas kyi ni chos rnams la/ /ya mtshan mi che 'ga' ma mchis/ /tshul khrims dang ni bsam gtan rgyu/ /de'i 'bras gzugs dang gzugs med pa'ang / /gang phyir khyod kyis ma dgongs te//de phyir bas min khyod phyag 'tshal/ /phan 'dogs mdzad cing blta na sdug /sku gsung phrin las zhi gyur pa/ /khyod la'ang sdang bar rab bgyid pa'i/ /rmongs pa mi bzad pa la gzigs/ /khyod la sdang bar byed pa la/ /sman mdzad pa ni bsam mi nus/ /de sman mdzad pa bsam min pas//rtag tu khyod la phyag 'tshal lo/ /bsod nams rgya mtshor rin chen gter/ /yon tan 'byung gnas chos kyi tshogs/ /khyod la sems can gang 'dud pa/ /de dag la yang phyag 'tshal lags/ /khyod kyi zhabs rdul gyis brgyan pa'i/ /yul gang de la'ang phyag 'tshal nas//dge ba'i bstan pa la mkhas pa'i/ /mtshan gyis brgyan pa smos ci 'tshal/ /mgon khyod yon tan mi bas kyang / /bdag gi zho sha bas 'tshal bas/ /des na 'jigs pa mchis slad du/ /glo ba la ni gcags shing mchis/ /khyod ni rang sangs rgyas kyis min//nyan thos mchog gtso bos ma yin/ /byang chub nye ba'i byang sems kyis/ /rtogs mi 'gyur na gzhan ci smos/ /khyod kyi rang gi ngo bo nyid/ /tshad ma mchis la bsam mi khyab/ /bstan min grangs kyang ma mchis pa/ /khyod bdag nyid kyis mkhyen lags grang / / bsam min tshogs des phun sum tshogs thob pa/ /gzhan don spyod pa ngo mtshar dge las kyi/ /yon tan cha tsam brjod par bdag rmongs pas/ /rang don dgongs pas mi nus par yang byas/ /mtsho chen chab ni bas par ma gyur kyang / /skye bo'i gdung ba rab tu zhi bgyid ltar/ / khyod kyi yon tan cha tsam ma sgrogs kyang / /bdag ni mchog tu glo ba dga' zhing mchis/ /btsun pas mdzad pa'i bstod pa'i drung du ni/ /rjod nyung mdzes pa ma yin ci zhig 'gran/ /'o na'ang bdag ni mi shes pa yis spel/ /skye bo'i rna bar ji ltar 'jug par 'gyur/ /bdag gis thub la dad pas spobs skyes pa'i//dge ba'i las 'di'i 'bras bu 'khrungs pas ni/ /ngan rtog rlung dmar 'tshub mas dkrugs pa yi/ /'gro ba'i sems ni rnal du gnas par shog /sangs rgyas bcom ldan 'das la bstod pa dad pa las spobs pa skyes pa zhes bya ba las bu lon med par bstod pa zhes bya ba ste le'u bcu gsum pa'o// //spel mar bstod pa zhes bya ba slob dpon chen po ma ti tsi Ta dang / slob dpon phyogs kyi glang po dag gi zhal snga nas mdzad pa rdzogs so// //rgya gar gyi mkhan po ku ma ra ka la sha dang / zhu chen gyi lo tsA ba dge slong bsod nams bzang pos bsgyur cing zhus te gtan la phab pa'o/

CLOSE WINDOW