CLOSE WINDOW

D1127
བོད་ཡིག

/ //rje btsun gnas brtan chen po dpal rdo rje 'chang gi sku can spyan snga nas kyi bka' bzhin zha lu lo tsA ba d+harma pA las dpal gdan sa thel gyi yang dgon du bsgyur ba'o// @##/ /rgya gar skad du/ pra dz+nyA pA ra mi ta sto traM / bod skad du/ shes rab kyi pha rol tu phyin ma'i bstod pa/ bcom ldan 'das ma shes rab kyi pha rol tu phyin ma la phyag 'tshal lo/ /gang khyod sku kun nyes med la/ /nyes med rnams kyis gzigs mdzad pa/ /dpag med shes rab pha rol phyin/ /rnam par mi rtog phyag 'tshal 'dud//nam mkha' bzhin du gos med cing / /spros pa med cing yi ge med/ /bsam yas khyod mthong gang yin pa/ /des ni de bzhin gshegs pa mthong / /'phags ma yon tan phyug khyod dang / /sangs rgyas 'gro ba'i bla ma rnams/ /khyad par yod par ma 'khums te//zla ba dang ni zla 'od bzhin/ /gus la byams ma sangs rgyas kyi/ /chos kyi sngon 'gro khyod brtan nas/ /thugs rje'i bdag nyid mnyam med pa'i/ /bdag nyid chen por bde blag 'gro/ /lan cig tsam yang bsam dag pas/ /khyod la tshul bzhin blta ba dang / /des kyang mthong ba don yod kyi//dngos grub nges par thob par 'gyur/ /gzhan don mngon dga'i bdag nyid can/ /dpa' bo dag ni thams cad kyi/ /gso mdzad bskyed par mdzad pa ste/ /khyod ni byams ma'i yum lags so/ /gang slad sangs rgyas 'jig rten gtso/ /thugs rje can rnams khyod kyi sras/ / de yi slad du dge ma khyod/ /sems can kun gyi phyi mo lags/ /pha rol phyin pa dri med pa/ /kun gyis ma smad pa khyod kyi/ /dus kun rjes su 'brang lags pa/ /rgyu skar rnams kyis zla ris bzhin/ /gdul bya'i 'gro ba la brten nas/ /de dang de bzhin gshegs rnams kyis/ /khyod nyid gcig pu tshul mang du//sna tshogs mtshan gyis bsngags pa mdzad/ /zil pa'i chu yi thigs pa rnams/ /nyi ma'i 'od dang mjal ba bzhin/ /rgol ba rnams kyi rtsod dang skyon/ /khyod dang mjal na 'jig par 'gyur/ /khyod nyid byis pa rnams la ni/ /skrag byed mthong na 'jigs pa dang / / mkhas pa rnams la dbugs 'byin pa/ /skyed pas mthong na zhi ba lags/ /khyod mgon gang la khyod la yang / /mngon par chags pa mnga' min na/ /de la yum gcig ji ltar na/ /gzhan la 'dod chags zhe sdang 'byung / /khyod ni gang nas ma byon zhing / /gang du yang ni mi gshegs pas//gnas ni thams cad dag tu yang / /mkhas pa rnams kyis dmigs ma lags/ /gang khyod de ltar ma 'khums nas/ /bsam pa yis ni bsgrubs pa dang / /bsgrubs pa las ni rnam grol ba/ /de 'dir rmad byung chen po lags/ /khyod nyid mthong na 'ching 'gyur zhing / /ma mthong na yang 'ching bar 'gyur//khyod nyid mthong na grol 'gyur zhing / /ma mthong na yang grol bar 'gyur/ /e ma ya mtshan cher 'ong ma/ /grags ldan ma khyod bzang mo lags/ /shin tu rtogs dka' sgyu ma bzhin/ /snang zhing mi snang ba yang lags/ /sangs rgyas rang sangs rgyas rnams dang / / nyan thos rnams kyis nges bsten ma/ /khyod nyid gcig pu thar pa'i lam/ /de ltar gzhan dag med par nges/ /lus can rnams la phan don du/ /tha snyad mdun du mdzad nas ni/ /brtse bas 'jig rten mgon rnams kyis/ /khyod bstan ma bstan par yang gda'/ /'dir khyod bstod par sus rngo thogs //mtshan ma med cing gos pa med/ /ngag gi yul kun las 'das ma/ /gang khyod 'gar yang rten mi mnga'/ /de ltar gda' yang kun rdzob tu/ /bdag cag ngag lam 'di 'dra bas/ /khyod ni bstod byar mi gda' na'ang / /bstod pas shin tu mya ngan 'das/ /shes rab pha rol phyin bstod las//bdag gis dge ba gang bsags pa/ /de yis 'jig rten ma lus pa/ /shes rab pha rol phyin gzhol shog /shes rab kyi pha rol tu phyin ma'i bstod pa slob dpon 'phags pa klu sgrub kyis mdzad pa rdzogs so// //kha che'i paN+Di ta thig le bum pa dang /

CLOSE WINDOW