CLOSE WINDOW

D1110
བོད་ཡིག

@##/ /rgya gar skad du/ bi she Sha sta ba nA ma TI kA/ bod skad du/ khyad par du 'phags pa'i bstod pa'i rgya cher bshad pa/ bcom ldan 'das 'jam dpal gzhon nur gyur pa la phyag 'tshal lo/ /khyad par phul du byung ldan zhing / /lha rnams kyis mchod sangs rgyas la//phyag 'tshal khyad par 'phags bstod pa/ /don las tshul bzhin bshad par bya/ /mtho btsun grub rje zhes bya ba'i bram ze rig byed bzhi la mkhas pa/ bram ze rnams kyis gtso bor bkur ba zhig yod pa dang / de bcom ldan 'das kyi bstan pa la dad pa thob nas/ sangs rgyas bcom ldan 'das la brtsams te bstod pa 'di byas par gyur pa yin no//de yang 'di ltar rjes su thos te/ yul shar phyogs na khyad par can gyi bram ze las drug la mngon par dga' ba'i bram ze'i rigs su byung ba/ sngon legs par spyad pa nye bar brtsams pa las mtho btsun grub rje zhes bya ba dang /bde byed bdag po zhes bya ba spun gnyis su skyes par gyur to/ /de dag kyang bstan bcos thams cad rtogs par gyur pa dang / de'i tshe de gnyis 'di snyam du sems par gyur te/ 'di ltar bdag cag gi khyim na ni dbang phyug chen po mchod la/ sangs rgyas bcom ldan 'das kyi gsung rab ni shin tu phul du byung bar snang na/des na yu bu cag gis ci dbang phyug chen po khyad par du 'phags pa yin nam/ 'on te sangs rgyas bcom ldan 'das khyad par du 'phags pa nges par brtag par bya'o snyam pa dang / de gnyis kyis thos pa/ ri bo ti se na dbang phyug chen po u ma dang khyu mchog dang bcas par mngon sum du gnas so zhes thos kyis/der song la dbang phyug chen pos yu bu cag la ji ltar bstan pa de ltar bya'o zhes nges pa bskyed nas/ der myur bar song ste 'bad pa chen po dang lha dag gis grogs byas te/ ri bo ti se'i sa mnyam par song ba dang /lha chen po'i khyu mchog sprin dkar po'i dum bu lta bu gzas la yan pa mthong ngo / /de mthong bas rab tu dga' ba dang / de'i rjes thogs nyid la lha mo u ma 'bras bu'i shing gi tshang tshing gi nags na 'bras bu thu ba mthong nas/ gus pa dang bcas pas phyag byas te/de dag gis me tog rgyas pa'i nags tshal gyi gnas na yu bu cag gi rje bo gnas so zhes gtam thos pa dang / de dag yid la rab tu dga' ba thob pas me tog sil ma gtor bas nye bar mdzes pa'i sa'i char song ba dang / lha chen po 'byor ba chen po dang ldan pa'i stan la 'dug cing /'khor gyi tshogs stong gis bskor ba mthong ngo / /mthong ba'i rjes thogs nyid la tshogs kyi bdag pos lag pa nas bzung ste/ de'i thad du khyer nas gus pa dang bcas pas phyag byas pa dang / de dag la smras pa/ khyed cag ga las 'ongs zhes de dag la dris pa dang / de gnyis kyis ji ltar gyur pa rgyas par smras so//de nas ji tsam na dge slong rnams kyi zas kyi dus la bab pa dang nye bar gyur pa na/ nam mkha' las srin bu lham bu chu gsher gyi mdog can gyi gos gyon pa ma dros pa'i mtsho la gnas pa'i dgra bcom pa lnga brgya/ bya gshog pa dmar po dngar ba lta bur babs par gyur to//de nas lha chen po 'khor gyi tshogs dang bcas pa gus pa dang bcas pas spos dang / byug pa dang / mchod pa'i yo byad rnams thogs te/ de dag gi thad du song nas de dag rang rang gi stan la 'dug pa la re re zhing gos rin che ba bskon te bde bar 'dug pa dang / bza' ba dang / bca' ba dang / bsod pa rnams kyis yang dag par tshim par byas nas/ u mas kyang me tog dang / 'bras bus mchod de/ de dag las chos kyi gtam mnyan nas/ de dag slar song ba dang / de gnyis la smras pa/ khyed cag 'dir bya ba gang gi phyir 'ongs pa kho bos shes kyis/de khyed la smra bar bya'o/ /gang gi slob ma bdag cag nyin re dga' bas mchod byed yon tan dam par ldan/ /'jig rten nyes sel yon tan chen po'i mtshan gyi mchog ni rab tu grags gyur cing / /shin tu dga' ba'i yid kyis yang dag mchod byed tshe na mya ngan 'das 'drar sems//'jig rten gsum gyi bla ma yon tan mnyam med sangs rgyas de ni mkhas pas mchod/ /de bas na khyed cag gi ston pa de nyid dang / de'i gsung rab la mchod par bya'o/ /de nas de ltar rtogs par gyur nas slar rang gi yul du song ste/ de bzhin gshegs pa'i gsung rab kyi chos kha na ma tho ba med pa yin par shes pas rig byed kyi tshig rnams rtswa ltar bor te rab tu byung nas/sangs rgyas bcom ldan 'das la khyad par du 'phags par bstod pa dang / lha las phul du byung ba'i bstod pa gnyis byas so// //da ni tshigs su bcad pa dang po'i yan lag gi don bshad par 'dod nas smras pa ni/bdag ni ston pa gzhan spangs te/ /zhes bya ba la sogs pa yin te/ gal te gzhan dag khyed ci'i phyir bstan bcos ma lus pa'i de kho na nyid rtogs nas/ ser skya dang / gzegs zan dang rkang mig la sogs pa'i ston pa dang /des byas pa'i bstan pa rnams kyang spangs te/ sangs rgyas bcom ldan 'das nyid dang / de'i bstan pa la 'jug par byed ces zer ro snyam du dogs pa'i phyir/ bdag ni ston pa gzhan spangs nas/ /bcom ldan khyed la skyabs mchis pa/ /de ci'i slad du zhe na khyod/ / skyon mi mnga' la yon tan ldan/ /zhes bya ba'i tshigs su bcad pa smras pa yin no/ /de la bdag ni zhes bya ba ni bstod par byed pa bdag nyid do/ /ston pa zhes bya ba ni 'chos shing 'dul bar byed pa yin pas na ston pa ste/ 'di ni ser skya la sogs pa yin par 'dod do/ /de spangs pa ni yongs su spangs shing dor ba zhes bya ba'i don to//bcom ldan zhes pa ni bod pa ste/ 'dod chags la sogs pa'i nyon mongs pa bag chags dang bcas pa spangs pa gang yin pa de la ni bcom pa zhes bya ba'i sgrar bshad la/ de gang la mnga' ba de ni bcom ldan no/ /khyed la zhes bya ba ni sangs rgyas bcom ldan 'das so//khyod ji lta bu zhe na/ skyabs zhes bya ba smras pa yin te/ rtan zhes bya ba'i don to/ /de yang gang la brten na nyes par spyod pa rnams zad par 'gyur ba'o/ /mchis pa zhes bya ba ni mchi zhing zhugs pa zhes bya ba'i don te/ yid mi rton pa la sogs pa nyes par spyod pa rnam pa mang po nye bar bsags pa rnams bcom ldan 'das la yang dag par bstan pas sdig pa rnams dang bral bar gyur cing /mtho ris su skyes par gyur pa 'dir dper sbyar bar bya'o/ /ston pa gzhan dag spangs pa dang / /ston pa de la skyabs su 'gro ba'i rgyu ci zhig yin zhe na/de ci'i slad du zhe na/ zhes bya ba la sogs pa smras pa yin te/ gang gi phyir khyed skyon ni mi mnga' la yon tan dang ldan pa yin no zhes bya ba'i don to/ /de yang 'di ltar gang la bag chags la sogs pa'i nyes pa mi mnga' ba ni skyon mi mnga' ba'o/ /de yang lus dang ngag dang sems sun 'byin par byed pas na skyon te/nyon mongs pa rnams zhes bya ba'i don to/ /yon tan ni stobs dang mi 'jigs pa la sogs pa'o/ /de mnyam pa med pa gang la mnga' ba ni yon tan dang ldan pa ste/ de ni khyed yin no zhes bya ba'i don to/ /gal te sangs rgyas bcom ldan 'das nyid skyon mi mnga' zhing /shin tu phul du byung ba'i yon tan dang ldan pa yin na/ ci'i phyir gzhan dag la la bcom ldan 'das spangs nas ser skya la sogs pa gzhan dag la bsten ce na/ de'i phyir/ gang phyir 'jig rten skyon la dga'/ /yon tan 'dzin la zhen pas na/ / skyon yang yon tan ltar mthong nas/ /gzhan la skyabs su mchis par gyur/ /zhes bya ba smras pa yin te/ yang zhes bya ba ni rnam par brtag pa'i tshig gi phrad do/ /'jig rten zhes bya ba ni sems can tha mal pa so so'i skye bo zhes bya ba'i don yin te/ 'phags pa rnams ni skyon la dga' ba ma yin no//de yang yul rnams la chags pas na 'jig rten no zhes bya ba ni nges pa'i tshig go/ /skyon la dga' zhes bya ba ni smad par bya ba'i dngos po rnams la dga' zhing phyogs su lhung ba zhes bya ba'i don to/ /yang na 'jig rten 'di ni skyon la dga' ba ma yin mod kyi/ 'on kyang skyon gang yin pa de yon tan nyid du rtogs pa la zhugs pa zhes bya ba'i don do/ /dper na/ mkhris pa'i nad kyis bcom pa'i mig gis zla ba'i 'od zer rnams kyi mdzes pa dngos po dkar bar gyur pa yang ser por mthong ste/ bdag cag gis kha dog ser por mthong zhing rtogs so snyam du sems so//de bzhin du mi dge ba'i bshes gnyen dang 'dres pa dang / dam pa'i chos ma yin pa mnyan pa'i nyes pas/ gang gi nyes pa rnams la'ang yon tan nyid du 'dzin par 'gyur bar sems 'khrul bar 'gyur ro/ /yon tan 'dzin la zhen pas na zhes bya bas ni yon tan rnams len pas na yon tan 'dzin pa ste/yon tan rtogs pa zhes bya ba'i don yin la/ yon tan 'dzin pa la dman par gyur pa ni rmongs shing gti mug pa zhes bya ba'i don to/ /de la skyon la dga' zhes bya ba 'dis ni phyin ci log gi nyes pas rgyud dri ma can du byas par bstan pa yin no//skyon yang yon tan ltar mthong nas/ /zhes bya ba 'dis ni 'gro ba blo gros dang bral zhing / rnam par rtog pas rmongs pas 'dzin par byed pa bstan pa yin no/ /sngar bshad pa de dag nges par bya bar ji ltar nus she na/ gzhan la zhes bya ba la sogs pa smos pa yin te/gang gi phyir lha chen po dang / khyab 'jug dang / tshangs pa la sogs pa gzhan dag la skyabs su song ba zhes bya ba'i don to/ /'di skad ston par 'gyur te/ gang gi phyir 'jig rten pa rnams ni yon tan med cing / nyes pa mang po bsags pa yin pas gzhan dag la skyabs su 'gro bas ston pa gzhan 'dod par nges pa yin no zhes tshigs su bcad pa 'dis ston to//ji ltar na gzhan dag skyon dang ldan zhing yon tan dang ldan pa ma yin zhe na/ khyab 'jug ces bya ba la sogs pa smos te/ nor lha dang / dbang phyug chen po ni khyab 'jug dbang phyug ste/ de dag la sogs pa gang yin pa de ni khyab 'jug dbang phyug la sogs pa'o//de la dad pa ni de la dga' zhing rab tu dang ba'i skye bo gang yin pa des yon tan gang yongs su bsgrags shing / khyad par gang dag mngon par sgrogs pa de ni khyed kyi bstan la de dag skyon zhes pa ste/ sangs rgyas bcom ldan 'das khyed kyi bstan pa la skyon te/nyes pa dang / phongs pa dang / smad par bya ba'i gnas yin no zhes bya ba'i don to/ /yang khyed kyi bstan pa la nyes pa yin pa'i phyir de rnams kyi yon tan gang zhig sgrogs par byed ce na/ lha chen zhes bya ba la sogs pa nas brtsams nas/ de dag ston pa yin te/lha chen khros pa zhes bya ba ni khro bas khyab par gyur pa'i sems kyi rgyud kyis so/ /grong khyer sum brtsegs zhes bya ba ni grong khyer gsum po gcig tu bsdus pa'i grong khyer sum brtsegs 'jig ces bya ste/ de drag pos bsregs pa'o/ /drag ces bya ba ni yon tan du sgrogs par srid par ston te/de yang lha chen po'i yon tan 'jig rten du sgrogs shing ston pa ni/ lha ma yin rnams kyi grong khyer gsum nam mkha' la rgyu ba zhig byung ba dang / de las lha ma yin rnams babs shing mi rnams la gnod par byed do/ /de nas lha chen pos mi rnams la bskyab par bya ba'i phyir/ gzhu blangs te mda' gcig gis lha ma yin rnams kyi grong khyer sum brtsegs bsregs par gyur to/ /de yang ji skad du/ 'di na lha min grong khyer mkha' la rgyu/ /skyes pa bud med rgan dang gzhon bcas pas/ /gzhu chen blangs nas 'bar ba'i mda' yis ni/ /me yis bsreg bya bzhin du skad cig bsregs//zhes 'byung ba yin no/ /'di ni khyed kyi bstan pa la srog gcod pa zhes bya ba nyes pa chen po yin te/ des dmyal bar ltung bar 'gyur ba yin pa'i phyir ro/ /de yang ji skad du/ gang zhig khyod mthong srog gcod las/ /mi ldog pa yi mtha' de ni/ /khyed rnams deng ni dmyal ba ru//kye ma 'gro bar 'gyur bar shes/ /zhes mdo las gsungs pa yin no/ /gal te des lha ma yin gyi grong khyer bsregs pa de nyes pa dang ldan pa yin na/ khyed kyi yon tan dang ldan pa'i bsregs pa gang yin zhe na/ khyed kyi zhes bya ba la sogs pa smos te/mtshon cha gang zhig ce na/ ye shes mda' chen gyis zhes bya ba yin te/ ye shes nyid mda' chen yin pas na/ ye shes mda' chen te des so/ /khro ba'i me zhes bya ba ni khro ba nyid ma dang 'dra bas na khro ba'i me ste/ de nyid ni bcom ldan 'das kyis nges par bsegs shing nye bar zhi bar mdzad do zhes bya ba'i don to//dris pa/ byams pa'i mnga' chen pos khro ba'i me nye bar zhi ba yin te/ ji skad du/ bcom ldan 'das kyis dge slong dag /byams pa bsgoms shig /byams pa bsten pa dang / bsgom pa dang / mang du byed pa ni zhe sdang spang ba la 'jug par 'gyur ro zhes gsungs pa ma yin nam zhe na/de lta yin mod kyi/ de ni byams pas rtse gzhil ba tsam du 'gyur gyi/ ye shes kyis ni rtsa ba nas 'byin par 'gyur bas na 'dir ye shes smos pa yin no/ /lha chen gyis ni zhes bya ba la sogs pa la/ bsregs nyes pa ni legs par ma bsregs pa ste/rtsa ba nas 'byin par ma bsregs pa'o/ /'di skad ston te/ 'dod pa de nyid bsregs nyes pas lha chen po slar drangs shing / dbang du byas pa yin no/ /de yang 'di skad zer te/ dus 'ga' zhig na lha chen po grong khyer gsum bsregs pa la sogs pa'i bya bas/shin tu yid byung nas kha na ma tho ba de sbyang bar bya ba'i phyir/ ri kha ba can gyi ri sul gyi tshang tshing du bzhugs te/ brtul zhugs la gnas pa'i tshe/ 'dod pa'i lhas bzlog pa na khyed nga la 'tshe bar ma byed cig ces smras kyang ji tsam na de 'tshe bar byed pa na/ lha chen po khro ba 'bar bas gdung ba'i yid kyis mig gsum pa las phyung ba'i mes gang 'di thal ba yang mi lus pa de ltar 'dod pa'i lha bsregs pa dang /yang 'dod pa'i lhas lha chen po la bka' bzlog ma'i ro smad kyi 'jo sgeg gis rgyun du bzlog par gyur to/ /khyed kyi ye shes zhugs kyis ni/ / zhes bya ba ni/ khyed kyi ye shes kyi mes so/ /rtsar btsas zhes bya ba ni thob par bya ba'i lhag ma med pa ste/ bag chags dang bcas pa zhes bya ba'i don to/ /bsregs nas bton zhes bya ba ni/ ji ltar na slar yang skye bar mi 'gyur ba de lta bu'i tshul gyis rnam par bsal ba'o/ /lha chen thig le'i mchog ma la//zhes bya ba la sogs pa la/ 'di ltar rjes su thos te/ sun d+ha dang / u pa sun d+ha zhes bya ba lha ma yin spun gnyis shig byung ba dang / de gnyis kyis tshangs pa bsgrubs te/ 'jig rten gsum gyis ma sod par gyur pa dang / bdag cag lus tsam tha dad kyi/sems ni de lta ma yin par tha dad pa med par mdzod cig ces byas pa dang / tshangs pas kyang mchog byin no/ /de nas de gnyis kyis khams gsum las rnam par rgyal ba'i bya ba la zhugs par gyur to/ /lha rnams kyis de gnyis gsod pa'i thabs la dpyod par gyur pa dang /tshangs pas smras pa/ de dag gcig la gcig gsod pa'i thabs bsgrub par bya'o zhes smras pa dang / lha rnams kyis rang gi lus las 'od til 'bru til 'bru tsam byin nas/ de las thig le'i mchog ma zhes bya ba'i lha'i bu mo zhig bskyed nas/ /de yang tshangs pa la bskor ba byed du bcug pa dang /de de'i gzugs la yid rnam par g.yengs pas lta ba na/ ngo tsha bar gyur pas gdong bzhi sprul par gyur to/ /de bzhin du lha chen po yang de dang 'dra bar 'dod chags kyi dbang gis gdong bzhi sprul par gyur to/ /de bas na/ lha chen thig le'i mchog ma la//rab tu chags pas gdong bzhi byung / /zhes smos pa yin te/ lha chen zhes bya ba ni rtse gsum gyi mtshon cha yod pa'o/ /thig le'i mchog ma la zhes bya ba ni lha'i bu mo'o/ /chags pa skyes pas zhes bya ba ni chags pa'i bsam pa skyes pa la zhugs pa'o/ / gdong bzhi byung zhes bya ba ni gang gdong bzhi par gyur pa'o/ /yang bcom ldan 'das ni/ bdud kyi bu mos sgeg pa yis/ /khyod kyi ba spu'i rtse mi g.yo/ /zhes bya ba yin te/ bdud dang rjes su 'brel ba'i bu mo ni bdud kyi bu mo ste/ sred ma dang / dga' mo zhes bya ba 'khor dang bcas pa la bya'o//de rnams kyi sgeg pa ni dgod cing smra ba dang zur gyis blta ba dang / gar byed pa'i mtshan nyid can te/ de dag gis kyang ngo / /khyed kyi zhes bya ba ni mgon po khyed kyi'o/ /ba spu'i rtse zhes bya ba ni sku'i yan lag gi ba spu'i rtse mo yang mi g.yo zhing 'gyur ba med pa'o/ / de yang bcom ldan 'das rdo rje'i gdan la bzhugs pa'i tshe/ so so skye bo'i gnas skabs na yang de dag gis 'dod chags bskyed par ma nus so zhes ston pa yin no/ /lha chen phyed ni zhes bya ba la sogs pa la/ phyed ni chung ma zhes bya ba lus kyi phyed chung ma ste/ lha mo u ma 'chang zhing 'dzin par byed pas na ngur pa zhes bya ba'i byas kyang thub cing rgyal bar mi nus te/gang gi phyir de ni phan tshun tha dad pa'i lus can yin pa'i phyir ro/ /de yang 'di ltar gang gi tshe lha chen po 'di u ma dang lhan cig lo stong gi bar du 'dod pa'i bde ba nyams su myong ba na/ ji tsam na de khu ba 'byin pa'i gnas skabs su gyur pa'i tshe/des bsams pa/ re zhig lus kyi phyogs gcig gis 'dod pa'i bde ba la ngas longs spyod par gyur gyis/ da ni yid dga' ba nyid kyis nga'i phyed lus kyi phyed du zhugs par byas la khyad par can gyi bde ba nyams su myong bar bya'o snyam ste/ de nas lus phyed bud med kyi dbang phyug ces bya bar gyur to//yang / khyed ni bde bar bgyid pa yi/ /zhes bya ba 'khrul bar byed pa'i 'dod pa nyid kyis rmongs ma gyur ces bya ba ste/ 'khrul cing chags par ma gyur pa/ /zhes bya ba'i don to/ /'khor lo mdung thung zhes bya ba la sogs pa la/'khor lo gang la yod pa de ni 'khor lo can te/ 'khor lo'i mtshon cha thogs pa khyab 'jug ces bya ba'i don to/ /mdung thung can ni lha chen po ste/ mdung rtse gsum pa thogs pa'o/ /bdud kyi stobs ni bdud kyi dpung bye ba phrag sum cu rtsa drug go/ /rgyal ba ni zil gyis gnon pa ste/ des dbang du bya bar mi nus pa'o/ /khyod ni 'khor lo mdung med par/ /byams pa'i mtshon gang lags pas rgyal/ /zhes bya ba ni 'di skad ston te/ bdud kyi stobs las rgyal bar bya ba la gang khyab 'jug dang / lha chen po'i 'khor lo dang / mdung med par yang byams pa'i mtshon chas mngon par rgyal zhing /bcom par spyod do zhes bya ba'i don to/ /rgan pos zhes bya ba la sogs pa la/ rgan pos khyab 'jug mda' yis bsnun/ /zhes bya ba ni 'di skad thos te/ khyab 'jug gi gnyen gyi tshogs rnams sa phyogs 'ga' zhig tu chang 'thung zhing 'dug pa na/ ji tsam na drang srong gnas ngan der nye bar song ba dang /ma 'gags pas bsams pa kho bos drang srong 'di la co 'dri bar bya'o snyam nas/ bud med kyi gzugs su byas nas de'i thad du song ste/ de la gus pa dang bcas pas rjes byas nas lto bar gzhong pa glan nas g.yogs te bcings pa bstan nas/ kho mo'i dgu 'di na ci zhig yod/'di las ci zhig 'byung bar 'gyur/ /zhes smras pa dang / drang srong des bsam gtan gyi stobs kyis bltas pa las de la shin tu khro ba drag po skyes par gyur nas/ khyod kyi khong nas lcags kyi gtun gang gis khyab 'jug gi rigs ma lus pa rlag par byed pa 'byung bar gyur cig ces de thams cad la dmod pa btab po//de nas ji tsam na lcags kyi gtun byung bar gyur pa dang / biSh+Nu'i rigs thams cad 'ongs te lcags kyi gtun de chu dang rdo la bdar te/ de 'dam dang bye ma 'dam bu'i rdzing gi nang du bor ro/ /de yang 'dam bu'i tshal du gyur to/ /yang lcags kyi gtun de las mde'u tsam zhig lus par gyur pa dang /'dis ci zhig nus par 'gyur snyam nas chu bor dor ro/ /dor ba'i 'og tu nyas mid nas de yang rgya'i nang du chud de/ nya pas khyer nas rngon pa rgan po zhig la btsongs so/ /des kyang nya de bshas pa dang / lcags kyi mde'u byung nas de mda'i mde'ur btags so//ji tsam na dmod pas nye bar bcom pa'i 'jigs pas dus 'ga' zhig gi tshe/ rdzing gi ngogs der khyab 'jug gi rigs rnams chang 'thungs pas ra ro ba dang / dmod pas rnam par 'khrul pas rtsod pa chen po byung bar gyur nas 'dam bu'i dbyug pas phan tshun nye bar bsnun par byed pa na/de na med pa'i khyab 'jug ma gtogs pa de'i rigs rnams rnam par 'jig par gyur to/ /de nas khyab 'jug gis bsams pa nga'i chung ma'i tshogs khri drug stong grong khyer sgo ldan na gnas kyis/ de dag gal te dmod pa 'dis phan tshun gcig la gcig gnod pa byed pa'am/gzhan dag gis phrogs par 'gyur ba srid snyam nas/ der srid sgrub btang ngo / /des kyang de rnams blangs la khyab 'jug gi thad du khyer te 'ong ngo zhes smras te chas so/ /ri brags pa rnams kyis kyang gtam de thos nas mtshon cha sna tshogs pa thogs te/srid sgrub kyi thad du 'thab pa'i phyir lhags pa dang / de rnams kyis srid sgrub kyi mtshon cha ma lus pa zad par byas nas de thams cad phrogs so/ /khyab 'jug gis de thos pa dang / yid kyi gdung ba bzlog par mi nus pas sems gdung bzhin du mya ngan de bsal ba'i phyir dgon par song ngo //der tshang tshing shin tu stug pa zhig tu/ mya ngan gyi dbang gis lus thams cad phab nas 'dug ste/ rkang pa brkyang pa'i mthe bo bskyod pa dang / ji tsam na rngon pa rgan po de ri dgas bshor ba'i phyir nags tshal du zhugs te/ ri dgas blta ba'i phyir sems gtod cing gnas pa dang /mthe bo bskyod pa de ri dgas kyi rna ba 'gul ba yin no snyam nas mda' bsnun pa dang / de srog dang bral bar byas so/ /rgan po zhes bya ba ni rngon pa rgan pos so/ /khyab 'jug ces bya ba ni sred med kyi bu'o/ /mda' yis zhes bya ba ni rngon pa'i mda' yis so/ /bsnun zhes bya ba ni bcom pa'o//lha chen mgrin pa sngor gyur pas/ /zhes bya ba la/ lha chen ni dbang phyug chen po ste/ de yang dug gis nye bar bcom pas mgrin pa sngon por gyur to/ /de yang 'di ltar lha rnams rgya mtsho bsrub pa'i phyir zhugs pa na/ de'i tshe nor bu kau stu b+ha dang /rta mgrin rings la sogs mang po zhig rgya mtsho las byung bar gyur pa dang / ji tsam na dug cig byung bar gyur nas de'i mthus khyab 'jug de'i gan na gnas pas pags pa'i mdog nag por gyur to/ /lha chen pos de blangs nas 'jigs pa med par mid par rtsom pa na/ /ji tsam na mgrin par thogs te steng du yang ma byung /'og tu yang ma song bar de'i mgrin pa rma bya'i mgrin pa ltar snang bar gyur pa dang / lha rnams kyis smras pa/ 'di ni shin tu mdzes pas da ni deng nas de mgrin pa nyid du bzhag pa'i rigs so zhes smras so zhes grag go/ /lha 'di gnyis la zhes bya ba ni/ khyab 'jug dang /lha chen po la'o/ /gnod bgyid mchis zhes bya ba ni/ gnod pa dang bcas par gnas pas na gnod bgyid mchis zhes bya ste/ gzhan gyis byas pa'i nye bar gnod pa'am gsod pa dang ldan pa'o/ /mgon khyod ces bya ba ni bcom ldan 'das la bod pa ste/ bdag po zhes bya ba'i don to//gnod pa bgyid pa med pas na gnod bgyid bral ba lags zhes bya'o/ /dris pa/ bcom ldan 'das la gzhan gyis byas pa'i bgrongs pa mi mnga' mod kyi/ gzhan gyis byas pa'i gnod pa ni mnga' ste/ bya rgod kyi phung por rdo'i dum bus zhabs snad pa yin no zhe na/ 'dir smras pa/de ni rma btod pa tsam du zad kyi/ nye bar gnod pa zhes mi bya ste/ de yang 'di ltar dus yun ring por zhugs pa'i nye bar 'tshe ba la gnod pa zhes bshad kyi/ skad cig pa ni ma yin te/ bcom ldan 'das ni skad cig ma de nyid la de tsam zhig tu 'gyur gyi/ lha chen po'i mgrin pa sngo ba ji lta ba de lta ni ma yin no//khyab 'jug mi thung gzugs bsgyur nas/ /zhes bya ba la sogs pa la/ 'di ltar thos te/ stobs ldan zhes bya ba'i lha ma yin zhig byung ba dang / des rang gi pha rol gnon pas khams gsum ma lus pa rnam par gnon pa na khyab 'jug gis bsams pa/ ngas 'di dang lhan cig g.yul sprod par mi nus te/shin tu skyes bu'i rtsol ba phun sum tshogs pa dang ldan pa yin pa'i phyir ro/ /de bas na nges par sgyu thabs kyis bslu bar bya'o snyam du rnam par bsams nas/ bdag nyid bram ze mi'u thung zhig gi gzugs su sprul nas slong mo'i bdag nyid can du byas te song nas/rgyal po stobs ldan rta'i mchod sbyin byed pa'i brtul zhugs la gnas pa'i tshe/ su zhig /su zhig 'dod/ gang la ci zhig sbyin par bya/ /zhes zer ba la brtson pa de'i thad du phyin nas/ pha dang ma'i phyir me la mchod sbyin byed pas de'i don du sa phyogs gom pa nyid kyi tshad slong ngo zhes smras pa dang /des smras pa/ 'di tsam zhig gis khyod la dgos pa ci zhig rdzogs par 'gyur/ gzhan du na glang po dang / rta dang / shing rta dang / gser la sogs pa'i dngos po slongs shig dang / de ngas dgag pa med pa dang / khyad par dang bcas pa sbyin par bya'o zhes smras kyang 'dod par ma gyur to//de nas des smras pa/ gal te de ltar 'dod na re zhig gom pa gsum yang khyer cig ces smras pa dang / khyab 'jug gis gom pa gnyis kyis 'jig rten gsum gyi bar du rkang pa gcig brkyang nas/ gom pa gsum pa'i gnas ma rnyed pa dang / dam bcas pa las nyams par byas pa'i dor thabs khas blangs pas yid zhum par gyur pa dang /'jigs pa chen pos bdag nyid kyi dngos po thams cad bcom par gyur pas stobs ldan bzung ste/ sa 'og tu bcings par gyur to/ /mi'u thung ni gzugs thung ba'o/ /gzugs ni lus so/ /bsgyur nas zhes bya ba ni mngon par sprul nas so//gang gis she na/khyab 'jug gis so/ /ci pha rol gnon pas sam zhe na/ g.yo thabs kyis ni zhes bya ba smos te/ slu thabs kyis so/ /stobs ldan zhes bya ba ni lha ma yin gyi rgyal po'o/ /bslus zhes bya ba ni rgyal srid las nyams par byas zhes bya ba'i don to//khyed ni gzhan dag la slu bar mi mdzad de/ gal te g.yo mi mkhyen pas de'i phyir gzhan dag slu bar mi mdzad do zhes rtog pa la/ de'i phyir g.yo yang mkhyen gyur la/ /zhes smos pa yin te/ de yang g.yo mkhyen pas na g.yo yang mkhyen gyur la zhes bya ba yin te/ bcom ldan 'das ni thams cad mkhyen pa yin pa'i phyir/kun nas nyon mongs pa dang / nyon mongs pa can ma yin pa'i dngos po thams cad mkhyen cing / nyon mongs pa can gang yin pa de ni spyod par mi mdzad pa ste/ 'dir ral gri thogs pa'i gtso bo'i mdo dper brjod par bya'o/ /mgon khyod rdzu 'phrul zhes bya ba la sogs pa la/khyed kyi rdzu 'phrul pa rnams ni mgon khyod rdzu 'phrul te/ yid mgyogs pa la sogs pa'o/ /de'i rnam par 'phrul ba ni rnam par rol ba'o/ /ji lta bu zhe na/ rmad byung zhes bya ba ste/ ngo mtshar du gyur cing rmad du byung ba bskyed pa zhes bya ba'i don to/ /khyad 'jug 'jig rten gsum rgal ba//zhes bya ba ni gom pa gsum gyis 'jig rten gsum rgal ba'o/ /'phye bo zhes bya ba ni rkang pa med pa ste/ 'phye zhing 'gro bas 'phye bo yin la/ de dang 'dra bar 'jug pas na 'phye bo bzhin du'o/ /mthong ba ni rtogs pa'o/ /'di skad ston par 'gyur te/ gang khyed kyi rdzu 'phrul gyi rnam par 'phrul pa rmad du byung ba mthong ba des ni lha yul dang sa 'og tu khyab 'jug gis 'jig rten gsum rgal bar gyur pa yang 'phye po mchi ba bzhin du mthong ste/ ci'i phyir zhe na/ 'di ltar 'jig rten pa rnams ni 'dzam bu'i gling tsam nyid la 'jig rten gsum du 'dod de/rgya mtsho bzhis yongs su bcad pa 'jig rten gnyis kyi bar ni mi'i 'jig rten yin la/ 'og gi gzhi ni klu'i 'jig rten no/ /ri kha ba can la sogs pa ri bo lha rnams gnas pa dang / skar ma la sogs pa ni lha'i 'jig rten nyid yin na/ de khyab 'jug gis brgal bar byas pa 'di tsam la 'jig rten gsum rgal ba zhes bya ba la/sangs rgyas bcom ldan 'das ni thugs bskyed pa tsam gyis/ yid ltar mgyogs pa'i rdzu 'phrul gyis stong gsum gyi stong chen po'i 'jig rten gyi khams sa ya dpag tu med pa 'das pa'i 'od zer can gyi 'jig rten gyi khams nas myur ba nyid du gshegs pa 'dir/dper sbyar bar bya'o/ /gzhon nu tshangs par spyod pa na/ /zhes bya ba la/ gzhon nu dang / karti ka dang / phug na gnas pa dang / rma bya la zhon pa zhes bya ba ni rnam grangs so/ /tshangs par spyod pa zhes bya ba ni 'khrig pa spyod pa las log pa ste/ 'dod pa'i 'dod chags dang bral ba'i phyir chings pa nyid 'di ltar spyod pa'o//lhan cig ces bya ba ni dus gcig dang thabs cig pa'o/ /gang dang zhe na/ drug ldan ma dang zhes bya ba ste/ de'i chung ma drug ldan ma zhes bya ba dang ngo / /spyod ces bya ba ni spyod pa'i byed pa'am srung ba'o/ /de yang 'di ltar thos te/ drug ldan ma zhes bya ba'i lha'i bu mo mchog tu gzugs bzang ba/spyod pa la mkhas pa/ gzugs kyi nye bar spyod pa dang / bud med kyi yon tan gyis gzhan dag zil gyis mnan pas gnas pa zhig byung bar gyur la/ de yang gzhon nus chung ma'i don du blangs pa dang / de la drang srong 'ga' zhig gis smras pa/gal te khyed 'jig rten gsum las rnam par rgyal ba don du gnyer zhing / grags pa khyad par can bsgrag par bya ba'i bsam pa yod na/ dus 'di'i tshe khyed kyis ral gri'i so zhes bya ba'i brtul zhugs spyad par bya'o/ /de'i brtul zhugs ni 'di yin par shes par bya ste/lang tsho la bab cing 'dod pa'i bde ba nyams su myong bar nus pa na/ chung ma thams cad kyi gtso mor gyur pa gzugs shin tu bzang ba dang ldan pa de dang lhan cig rtse zhing / yan lag reg pa la sogs pa'i bde ba nyams su myong bar gyur kyang / gnyis snyoms par zhugs pa yin no zhes tshor ba med par byas te/brtul zhugs 'di dus ring por bsten na 'bras bur 'gyur ro zhes smras pa dang / de nas brtsams te gzhon nus brtul zhugs brtsams pa yin no/ /khyod kyis 'khrig pa'i zhes bya ba la sogs pa la/ 'khrig pa ni gnyis kyis gnyis sbyor ba zhes bya ba'i tha tshig go//de yang 'khrig par gyur pas na/ 'khrig pa ste/ kun tu sbyor ba la nye bar longs spyod pa'o/ /de bas na khyed kyis thal ba bzhin du mdzad par gyur pa ni thal ba ma yin pa las thal ba nyid du mdzad cing brlag par gyur ba'o/ /de yang bcom ldan 'das kyis 'khrig pa'i sbyor ba bdun dang ldan pa'i mdo las gsungs te/bram ze 'di la kha cig bdag tshangs par spyod par khas 'che zhing / /de bud med dang gnyis kyis gnyis mi sbyor yang bud med la mig gis mig gi yul gzugs la nges par sems shing blta ste/ des de nyams su len cing rtog la zhen cing / / zhen nas gnas pa 'di ni bram ze tshangs par spyod pa 'khrig pa'i chos dang ldan pa yin gyi/ mi ldan pa ma yin te/ tshangs par spyod pa yongs su ma dag pa spyod pa yin zhing / zhig pa dang / bu ga can dang / 'dren ma dang / nag nog can yin te/ skye ba dang / rga ba dang / na ba dang /'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / phongs pa rnams las yongs su grol bar mi 'gyur zhing / sdug bsngal rnams las thar bar nga mi smra'o/ /gzhan yang bud med kyi yul la mig gis mig gi yul gzugs la nges par sems shing /lta bar yang byed pa nas de dang lhan cig rtse ba dang / ca co 'don pa nyams su len pa yang tshangs par spyod pa yongs su ma dag pa yin te/ snga ma bzhin no/ /gzhan yang bud med dang lhan cig ca co 'don pa nyams su len par yang byed cing / /bud med las bsku ba dang / mnye ba dang /khrus bya ba bdag gir byed cing / nyams su len pa de yang de bzhin no/ /gzhan yang de bzhin du yongs su med pa'i bar du bdag gir yang byed cing rtsig pas chod pa dang / yol bas chod pa'i bud med kyi rgyan dang / glu dang / gar la sogs pa'i sgra nyams su len par byed cing nyan par byed pa de yang de bzhin no//gzhan yang sgra'i bar du nyams su len par byed pa nas/ gzhan dag 'dod pa'i yon tan lnga dang ldan pa la bltas nas nyams su len cing rtse ba dang / dga' bas yongs su spyod pa nyams su myong bar byed pa yang de bzhin no/ /gzhan yang yongs su spyod pa'i bar du yang byed la/sngon nyams su myong ba'i dgod pa dang / rtse ba dang / dga' mgur yongs su spyod pa de rjes su dran par byed cing / de las de bdag gir byed pa yang de bzhin no/ /gzhan yang / rjes su dran pa'i bar du yang byed la/ bdag ni tshul khrims dang / brtul zhugs sam/dka' thub bam/ /tshangs par spyod pa spyad pa 'di lha la sogs pa'i gnas su bsngo ste/ tshangs par spyod pa'ang de bzhin no/ /zhes bya ba nas/ bram ze 'khrig pa'i chos bdun gyi sbyor ba 'di ma spangs shing yongs su ma shes pa de srid lha dang bcas pa'i 'jig rten las 'da' bar 'gyur ba nga mi smra'o zhes bya ba la sogs pa rgya cher gsungs pa yin no//tshangs sogs zhes bya ba la tshangs pa la sogs pa ni 'di skad smra'o zhes grag ste/ ji ltar kho bo sems can gyi 'jig rten dang / snod kyi 'jig rten ma lus pa 'byin par byed pa nas/ nga'i tshangs pa 'jug par byed pa yin no zhes bya ba'i don to//grag ces bya ba ni gtam du brgyud pa 'ba' zhig yin no zhes bya bar ston to/ /de nyid gzigs khyod ces bya ba ni de kho na nyid gzigs pa'i dang tshul gang la yod pa de ni de nyid gzigs pa ste/ thams cad mkhyen pa des zhes bya ba'i don to/ /des ji skad bstan ce na/'jig rten pa dang / de yang las las skyes zhes bstan zhes bya ba smos te/ 'jig rten dag dang / gang de dag 'byin par bshad pa tshangs pa la sogs pa de yang las las skyes par khyod kyis bstan cing gsungs pa'o/ /de yang sems can rnams ni las las skyes pa/las kyi bgo skal la spyod pa/ las kyi rjes su 'brel pa ste/ dge ba'am sdig pa'i las gang dag byed pa de las de nyid kyi skal ba can du 'gyur ro zhes mdo las gsungs pa yin no/ /brgya byin gyis ni bshol med ma/ /zhes bya ba la sogs pa la/ brgya byin zhes bya ba ni rdo rje mtshon du thogs pa ste/dbang po zhes bya ba'i don to/ /bshol med ma ni drang srong gi bu mo ste/ de mthong bar gyur pa las so/ /'dod pas zhes bya ba ni 'dod pa'i lha'i 'dod chags kyis so/ /rmongs pa ni 'khrul par gyur pa'o/ /grag ces bya ba ni 'jig rten gyi gtam yin par ston to/ /de yang 'di ltar thos te/drang srong gau ta ma zhes bya ba zhig yod pa de la bshol med ma zhes bya ba'i chung ma yod de/ de lang tsho'i mdangs phun sum tshogs pa dang ldan pa yin pas de la brgya byin chags par gyur la/ de yang de la chags te/ des na de dag phan tshun 'brel bar gyur to/ /dus lan 'ga' zhig na drang srong de bsti gnas gzhan du mgron du bos par gyur nas//me tog dang / yam shing dang / ku sha'i don du phyi rol du byung ngo / /brgya byin yang der 'ongs nas bshol med ma dang bag phebs par mngon par rtse zhing 'dug pa na/ gau ta mas yongs su ma shes pa nyid du bsti gnas su zhugs pa dang / bshol med ma yang 'jigs shing rta pas bas brgya byin mid do/ /de nas gau ta mas yang bshol med ma khrid de/ bsti gnas gzhan du mgron du bos par song ba dang / drang srong des rnal 'byor gyi stobs kyis ji ltar gyur pa de dag shes nas stan gsum bshams so/ / gau ta mas bsams pa/ ci'i phyir stan gsum shom snyam nas brtags pa dang / ji tsam na bshol med ma'i khong na brgya byin yod par mthong nas/ de ngo tsha bar gyur pa dang / zas la spyad nas rang gi gnas su song ste/ bshol med ma la brgya byin skyugs shig ces smras pa dang / des kyang skyugs so//de nas des brgya byin la mo mtshan stong gis mtshan par gyur cig ces dmod pa btab po/ /de nas ci tsam na/ lha rnams der 'ongs te gau ta ma mgu bar byas pa dang / gang 'di khyed kyis mo mtshan stong mig stong du gyur cig ces mchog byin pa yin no/ /de nas brtsams te mig stong par gyur to//dpa' bo khyod ces bya ba la sogs pa la/ brtson 'grus kyi khyad par dang ldan pas na dpa' ba ste/ bcom ldan 'das de la bod pa ni dpa' khyod ces bya'o/ /'dod pa nyid kyis ni/ ma rmongs slad du zhes bya ba ni 'dod pa rnam par bcom pa'i phyir ro/ /btsun mo btang zhes bya ba ni grags ldan ma dang /ri dgas skyes dang / sam tshom la sogs pa btsun mo'i 'khor stong phrag drug cu btang zhing yongs su spangs pa yin no/ /sgra gcan zhes bya ba la sogs pa la/ sgra gcan nyid kyi lag pas zin pas na/ sgra gcan lag pas so/ /zla ba ni ri bong gis mtshan pa'o//ji lta bu'i zla ba zhe na/ dbang med pa ste dbang dang nus pa dang bral zhing rang dbang med par gzhan dbang du gyur pa'o/ /mid pa ni zin pa'o/ /de yang 'di ltar thos te/ ji tsam na lha rnams kyis 'o ma can gyi rgya mtsho bsrubs pa na/ ji srid cig na bdud rtsi byung bar gyur pa dang /lha ma yin sgra gcan gyis phrogs nas spyod par rtsom pa na/ khyab 'jug gis bsams pa/ gal te 'dis bdud rtsi 'thungs par gyur na lha thams cad kyis kyang mi thub par 'gyur ro snyam nas/ 'khor los mgo bcad pa dang / des de bor ba na lha rnams kyis yang blangs so//sgra gcan de'i lkog ma'i phyogs kyi bar du bdud rtsi'i chas khyab par gyur pa dang / des de'i 'og gi cha'i lus shi bar gyur kyang gson la/ de yang lha dang mi rnams la gnod pa bya ba'i phyir rgyu'o/ /gnas skabs de nas brtsams te/ sa gsum snang bar byed pa'i nyi ma dang /zla ba 'dzin par byed pa yin no/ /mnga' brnyes zhes bya ba la sogs pa la/ sems can nam 'byung po gang mgon po khyed la rang dbang med par bgyid cing / gnod par bgyid pa'i gzhan dbang can te 'ga' yang ma mchis so zhes bya ba'i don to/ /mi dbang zhes bya ba la sogs pa la/dga' byed dang gos sred ni dga' byed gos sred de/ de dag la sogs pa'i rgyal po gang yin pa de ni/ nags tshal nas zhes bya ba dka' thub kyi nags nas phyir yang mchis zhes bya ba 'dod pa'i 'dod chags kyis yid brlan par byas nas/ slar yang khyim du 'ongs pa'o//de yang 'di ltar rgyal po shing rta bcu pa sum cu rtsa gsum pa dang / lha ma yin g.yul 'gyed par phyin te/ lus la lha ma yin gyi mtshon gyis zug rngu mang po zug pa dang / grong khyer 'thab pa med par phyin nas/ de'i chung ma ke ke ya zhes bya bas bsnyen bkur byas pas sos par gyur pa dang /des kyang de la mchog sbyin par byas so/ /de nas dus gzhan zhig na phas dga' byed rgyal srid la dbang bskur bar rtsom pa na/ ke ke ya rgyal srid la phrag dog gis dkrugs pa'i sems kyis smras pa/ lhas bdag la mchog stsal bar dam bcas pa lags kyis/ ded gsol bar bgyid de/dga' byed lo bcu gnyis kyi bar du nags su rdzongs la bdag gi bu b+ha ra ta rgyal srid la dbang bskur bar gsol zhes bya ba nas/ ji srid na dga' byed nags su song ste/ der si ta phrogs pa dang / sgra sgrogs bsad pa la sogs pa byas nas/ me tog can zhes bya ba'i rgyu ba'i gzhal yas khang du zhugs te/b+ha ra ta la sogs pas gsol ba btab cing mchod pa dang / grong khyer 'thab pa med par song ste/ dga' byed bde ba rnams la mngon par rol par gyur to/ /gos sred la sogs pa'i rgyal po gzhan dag kyang sdug bsngal gyis nyen par gtses pa'i 'jig rten mthong ba dang /nga yang gnas skabs 'di lta bur 'gyur du 'ong ngo snyam nas rgyal srid spangs nas nags su song ba dang / slar yang de dang bral bas sa chen po 'di dag la gnas pa mi rigs pa la zhugs pas skye bo ma lus pa song ste/ gus pa dang bcas pas slar yang rgyal po'i pho brang du spyan drang ba'i phyir gsol ba btab cing /de yang 'dod chags la nye bar dga' ba'i yid kyis slar grong khyer du 'ongs so zhes thos so/ /bde gshegs khyod ni zhes bya ba ni bod pa'o/ /dben pa zhes bya ba ni lus dben pa dag kyang dben pa'i sgrar grag mod kyi/ 'on kyang 'dir ni de gnyis ka skyed pa ting nge 'dzin gyi khyad par yin par 'dod do//de nyid ni bdud rtsi ste mi 'chi bar byed pa yin la/ des khyed ngoms par gyur pas nags su gshegs nas slar khyim du phyir mi byon no zhes bya ba'o/ /mchod sbyin la ni zhes bya ba la sogs pa la/ mchod sbyin zhes bya ba ni mchod cing sbyin par byed pa ste/ba lang gi mchod sbyin la sogs pa'o/ /phyugs 'gums pa zhes bya ba ni ba lang dang / rta la sogs pa'i dud 'gro gsod pa'o/ /de skad su zhig smra zhe na/ drang srong rnams ni smra zhes grag /ces bya ba ste gzegs zan la sogs pa sngon gyi drang srong rnams kyis de ltar bshad pa yin no zhes thos so//sdig med khyod kyis zhes bya ba ni gang la sdig pa yod pa ma yin pa de ni sdig med de/ de la kyi sdig med khyod ces bod pa yin no/ /grog ma la'ang zhes bya ba ni lus shin tu chung ba'i srog chags so/ /gnod pa bgyid pa ni gsod pa'o/ /rjes ma gnad zhes bya ba ni de ltar ma gsungs shing de bya bar ma bstan to zhes bya ba'i don to//de yang chos kyi rgyal po'i mdo las/ gang khyed rnams kyis ma mthong ba srog gcod pa las mi ldog pa'i mtha' ni nges par kye ma dmyal ba'am/ gzhan dag tu kho bos mthong ste/ de ci'i phyir zhe na/ dmyal bar byed pa'i chos rnams yang dag par blangs te gnas pa yin no zhes rgya cher gsungs pa yin no//gzhan dag rang don zhes bya ba la sogs pa la/ gzegs zan la sogs pa gzhan dag ni rang don zhes bya ba rang la phan pa'i phyir ro/ /thabs gang gis she na/ mchod sbyin la zhes pa ste/ mchod sbyin shes pa'i thabs kyis so//gzhan gyi srog gi zhes bya ba ni sems can gzhan gyi srog bcad nas mchod sbyin gyi rdzas su byas te mchod sbyin byed pa'o/ /de yang sems can la nye bar 'tshe ba dang ldan pa'i mchod sbyin gyi cho ga bstan pas rang gi don bsreg pa'am/ mtho ris la sogs pa thob pa'i rgyu bdag nyid gsod pa nye bar ston pa yin te/ji skad du/ chur ni stong phrag bdun dag ste/ /me la stong phrag bcu gcig yin/ /mi dbang zas bcad pa yis ni/ /grangs yod pa ni ma yin no/ /zhes g.yul ngor brtan pa la 'jigs byed kyis smras pa yin no/ / yang mgon po khyed ni gzhan gyi don du zhes bya ba gzhan dag la phan pa'i phyir ro/ /khyod gcig pu zhes bya ba grogs med par ro/ /rang gi srog gis zhes bya ba nyid kyi 'tsho ba de nyid kyis so/ /sbyin sreg mdzad ces bya ba ni sbyin sreg gi rdzas su mdzad de bsregs shing gzhan gyi don mdzad pa'o//'dir ni stag mo'i skyes pa'i rabs la sogs pa dper brjod par bya'o/ /drang srong dmod me zhes bya ba la/ drang srong ni sngon gyi drang srong rnams kyis so/ /dmod me zhes bya ba ni dmod pa nyid me dang 'dra ba'o/ /ji lta bus she na/ mi bzad pas zhes bya ba ste/ 'jigs su rung bas so//skye bo mang po zhes bya ba ni sems can tshad med pa'o/ /bsregs pa ni thal bar byas pa'o/ /de yang bcom ldan 'das kyis ji skad du/ nye ba 'khor 'di ji snyam du sems/ ma ta ka'i dgon pa 'di gang gis stongs par byas shing gtsang mar byas/ kye gau ta ma drang srong rnams kyi yid kyi 'dod pa mi bzad pa'i dmod pas so zhes rgya cher mdo las gsungs so//khyod ni bcom ldan 'das so/ /ye shes me yis zhes bya ba ni shes rab kyi mes bsregs shing thal bar mdzad pa'o/ /skye bo zhes bya ba ni sems can rnams kyi'o/ /skye rgyu zhes bya ba ni bdag gi dngos po mngon par 'phel ba'i rgyur gyur pa las dang nyon mongs pa zhes bya ba'i don to//drang srong zhes bya ba la sogs pa la/ dmod pa grub pa ni dmod pa byed pa'i nus pa yod pa'o/ /dka' thub ni brtul zhugs so/ /grub pa ni rdzogs pa'o/ /rjes su dpag pa ni shes par 'gyur ba'o//de yang 'di ltar gang gi tshe/ de rnams dmod pa 'dor bar nus par gyur pa de'i tshe/ 'di dag ni brtul zhugs grub pa yin no zhes shes par nus pa yin no/ /gang gi tshe gzhan dag la gnod pa dang dmod pa de yang byed par mi nus pa de'i tshe/ de grags pa dang ldan par mi 'gyur ba'o//mgon khyod ces bya ba ni sangs rgyas bcom ldan 'das la bod pa'o/ /thugs brtse grub pa zhes bya ba ni thugs rje yongs su rdzogs pa ste/ gzhan gyi dgos pa bya ba'i mthar phyin pa zhes bya ba'i don to/ /de yang snying brtse bas 'jug pa'i gzhan gyi don gyi bya ba la thugs brtse ba zhes bshad do//de grub pa ni sgrub pa'i bya ba gzhan gyi don gyi bya ba byed pa zhes bya ba'i don to/ /dka' thub grub pa ni brtul zhugs rdzogs pa'o/ /lha chen 'dod pa can gyi mtshan/ /zhes bya ba la sogs pa la/ 'di ltar rjes su thos te/ thang shing gi nags 'ga' zhig tu drang srong mang po bu dang bu mo dang chung ma dang bcas par dka' thub shin tu dka' bas gdungs shing gnas par gyur la/de rnams kyi dka' thub mi bzad pa mthong bas lha mo u ma de rnams la kun du skyo ba skyes te/ lha chen po'i thang du song nas dben par bag phebs pa'i dbang gis 'di skad ces smras te/drang srong 'di rnams ni dka' thub chen po la spyod par brtson pa/ thar pa 'dod pa lags pas 'di rnams la khyed kyis nges par thar pa thob par mdzad pa'i rigs so/ /lha chen pos smras pa/ thar pa'i bde ba ni sems can 'dod chags dang zhe sdang dang bral bas thob par 'gyur la/'di dag ni de lta ma yin na ji ltar na nges de dag la thar pa thob par bya/ u mas smras pa/ de skad ma gsung shig/ 'di dag ni nges par zhe sdang dang bral ba yin pas rnam pa thams cad du bdag gis gsol ba gson la/ khyed kyis mya ngan las 'das pa'i bde ba'i bdud rtsis lus tshim par mdzod cig /de nas lha chen pos u ma'i bsam pa nges par shes pa dang / drang srong gi bu mo rnams la 'dod chags kyi shugs skyes pa dang / re zhig 'di dag sad par bya'o zhes blo skyes nas/ nyi ma gnyis pa la mgo me tog gi phreng bas brgyan te/ lus brtan cing sra bar byas pa dang /lang tsho bdo bar gyur pa la gnas shing shin tu sgeg pa'i cha lugs kyis brgyan te/ bzhag pa'i bdag nyid kyi dngos po gzhon par byas nas/ rang gi mtshan ma bkab cing mngon par ldang la 'dzag bzhin par byas nas song ba dang / drang srong gi chung ma dang / bu mo gzhon nu'i tshogs lo ma'i spyil bu las byung ste/de'i lus la reg cing 'dzin pa la mngon par dga' bas thang shing gi nags kyi gnas su zhugs pa dang / des kyang yid phrogs pa mthong zhing shin tu gzugs dang ldan pa la bltas nas/ 'dod chags kyi dbang gis brla'i phyogs gnyis su chu 'dzag pas khyab par gyur cing shes cher brgyal bar gyur to//de nas lo ma'i spyil bu las byung ba'i drang srong rnams kyis de mthong ba tsam gyis khro ba'i shugs kyi stobs kyis yid rnyog pa can du gyur pas khyed ma dul zhing 'dod chags kyis ldang bar byas pa'i dbang po lhung bar gyur cig lhung bar gyur cig ces de la dmod pa btab po//de'i rjes thogs la brgya byin gyi glang po che'i sna lta bu'i mtshan sa la lhung bar gyur to/ /ji tsam na de rnams bsam gtan gyi stobs dang / lha mos smras pa/ 'di ni lha chen po yin te kho bo cag sad pa'i phyir 'dir 'ongs pa yin no zhes ji lta ba bzhin du shes pa dang / snying por gyur pa'i mtshan de blangs nas mchod pa'i khyad par rnam pa mang pos mchod par gyur to/ /de nas brtsams te 'jig rten 'dir mtshan la mchod pa byung ba yin no/ /lha chen po ni bde byed do/ /'dod pa can gyi ngang tshul 'di la yod pas na 'dod pa can te/ de yang 'di drang srong gi bu mo rnams dang lhan cig 'dod pa spyod pas na 'dod pa'o//yang na 'dod pa ni 'dod pa'i 'dod chags so/ /de gang la yod pa ni 'dod chags can no/ /mtshan ni skyes pa'i dbang po'o/ /drang srong rnams kyi zhes bya ba ni thang shing gi nags na gnas pa'i 'o/ /gang gis she na dmod pa ste/ khyed kyi mtshan lhung bar gyur cig lhung bar gyur cig ces bya ba'i khro bas kun nas bslang ba'i tshig rtsub pos so/ /lhung ba ni sa la lhags par gyur pa'o/ /yang sangs rgyas bcom ldan 'das khyod kyis ni 'dod pa nyid lhung bar mdzad pa ste/ 'dod pa'i 'dod chags nyid bag chags dang bcas par spangs pa'o//ji lta bu'i 'dod pa zhe na/ phung khrol bdag gi rtsa ba zhes smos te/ gang tshe 'di'i dang / tshe rabs gzhan gyi gnod pa'i phung khrol de rnams kyi rtsa ba ni 'dod pa nyid yin no/ /de yang bcom ldan 'das kyis ji skad du/ 'dod chags kyi rgyu dang / 'dod chags kyi gzhi dang /'dod chags kyi dbang gis ma dang bu lhan cig kun du smra zhing bu yang ma dang lhan cig spyod do zhes mdo las rgya cher gsungs pa dang / slob dpon dpa' bos kyang / 'jig rten 'dod pas bcing dang gsod dang khengs pa dang / /dub dang 'jigs dang sdug bsngal sna tshogs nyer 'thob cing //'dod don nyid kyis sa bdag rnams ni lhung gyur la/ /chos rnams mngon du 'joms shing gzhan du dmyal bar 'gro/ /zhes bshad pa yin no/ /gling las skyes sogs zhes bya ba la sogs pa la/ gling las skyes ni drang srong rgyas pa'o/ /sogs pa'i sgras ni ra ma na'i gtam gyi byed mkhan drang srong bal mi ka dang /gzhan yang snyan dngags gzhan dag sbyor ba rnams la bya'o/ /phal cher zhes bya ba ni mang du ste/ de dag rang gi rjes su dpag nas rab tu brtags pa ni de na cung zad cig yod do zhes ston to/ /gzhan gyis gang smras zhes bya ba ni pha rol gyi bshad pa gang yin pa ste/de dag smra bar byed cing de la 'jig rten pa rnams dga' ba yin no/ /'di skad ston te/ gang gling las skyes la sogs pa rnams kyis b+ha ra ta la sogs pa la smras pa ni phal cher gzhan dag gis smras pa de smra bar byed pa yin no zhes bya ba'o/ /khyod kyis thun mong ma yin chos//zhes bya ba la sogs pa la/ thun mong ma yin pa zhes bya ba ni gzhan dag gis ma smras pa'o/ /chos zhes bya ba ni gsung rab kyi khyad par 'phags pa'i bden pa bzhi yongs su gsal bar byed pa'o/ /rang gis thugs su chud nas zhes bya ba ni rang nyid kyis gzhan gyis rjes su bstan pa la ma ltos par thugs su chud pa ste/chos kyi 'khor lo bskor ba'i mdo las/ dge slong dag sngon ma thos pa'i chos rnams la 'di ni sdug bsngal gyi bden pa'o zhes blo dang rig pa dang rtog pa skyes so zhes rgya cher gsungs pa lta bu yin no/ /bstan zhes bya ba ni gzhan dag la ston par mdzad pa ste/chos kyi rnam grangs 'di kun du rgyu ba spyod pa pa gzhan dag la bstan par bya'o zhes bya ba la sogs pa ji skad gsungs pa lta bu'o/ /mu stegs can gyi zhes bya ba la sogs pa la/ mu stegs can gyi zhes bya ba ni mu stegs pa rnams kyi'o/ /de gang yin zhe na/ rig byed tshig ste/ mu stegs can gyi tshig gzhan dag go/ /dben pa ni skye bo med par ro/ /kho nar zhes bya ba ni nges par gzung ba ste/ ji ltar zhe na/ de dag smra zhing ston par byed pa nyid yin no/ /yang na bram ze rnams 'di skad ces smra ste/ rig byed ni ji ltar yang bram ze ma yin pa bklag tu mi gzhug go zhes smra ba dang /gcer bu pa'i dge sbyong gi skar ma'i bstan bcos dge sbyong gcer bu pa ma yin pa la mi sbyin pa dang / khyab 'jug pa'i mtshan mo lnga pa la sogs pa'i bstan bcos rnams ni gzhan dag la smra bar mi bya'i/ dben pa dag tu so so'i nges pa'i sems can dag la 'di dag smra bar bya'o zhes zer ro//khyod kyis zhes bya ba la sogs pa la/ 'di ni seng ge'i sgra dang 'dra ba yin pas na seng ge'i sgra'o/ /'di skad ston te/ khyed ni seng ge'i sgra sgrogs pas dge sbyong dang / bram ze dang / spyod pa pa dang / kun du rgyu ba thams cad la ser sna mi mnga' ba dang /phyogs su lhung ba mi mnga' bar ston par mdzad pa yin no/ /grangs can zhes bya ba la sogs pa la/ de la grangs can gyi de kho na nyid ni 'di skad ces 'chad de/ gang gi tshe skyes bu 'di'i snying stobs dang / rdul dang mun pa'i gzugs can gyi/ /rang bzhin 'di la 'jug pa na//de kho na nyid nyi shu rtsa lnga mthong bar gyur pa'i rnal 'byor pa rnam par dben par gyur pa de'i tshe grol bar 'gyur ba yin no zhes zer ro/ /b+ha ra dwa dza ni zhes bya ba ni/ drang srong b+ha ra dwa dza ba'i bu yin pas na b+ha ra dwa dza'o/ /de nyid mthong yang zhes bya ba ni gang grangs can rnams kyis bshad pa'i de kho na nyid mthong ba'o//de yang 'di ltar rjes su thos te/ b+ha ra dwa dza de brtul zhugs drag po'i spyod pa la brtson zhing / grangs can gyi shes pas de kho na nyid shes pas nags na gnas so/ /nags na gnas pa'i lha rnams kyis mthong ba dang / de 'di lta bu'i dka' thub spyod pa las na bdag cag rnams kyi bgegs byed par nus par 'gyur du 'ong gis ma la bdag cag gis 'di dka' thung yas nyams par bya'o snyam nas/dpyid ldan ma zhes bya ba'i lha'i bu mo dar btang ba dang / ji tsam na de'i bsti gnas dang nye bar gar byed pa dang / glu len par brtsams so/ / drang srong des de thos pa dang / lo ma'i spyil bu las byung ba na/ lha mo de mthong ba tsam gyis 'dod chags rab tu g.yos pas yid gdungs shing gzir bar gyur pas de blangs te lo ma'i spyil bur zhugs nas/ dus shin tu yun ring mor de dang lhan cig 'dod pa'i bde ba la longs spyad pa rjes su myong bar gyur to//de ltar na b+ha ra dwa dza zhes bya ba de ni dpyid ldan ma zhes bya ba'i lha'i bu mo la yongs su chags shing zhen pa dang ldan pa yin no zhes bya ba'i don to/ /gtso khyod ces bya ba ni bod pa ste/ chos rnams la dbang phyug tu gyur pa zhes bya ba'i don to/ /khyod kyi slob ma de rnams kyang bud med rnams la chags pa med na khyed lta smos kyang ci dgos zhes bya ba'i don to//de yang 'di ltar 'khor ba'i dngos po'i rang bzhin shes pa ni nam yang 'dod pa'i yon tan lnga po 'jig cing yid brtan du mi rung ba la chags par ga la 'gyur/ 'ug pa pas ni zhes bya ba la sogs pa la/'ug pa la ni gzegs zan la sogs pa bye brag pa'i bstan bcos rtsom pa rnams kyis bshad pa'o/ /khyad par can la zhes bya ba ni bram ze la sogs pa yon tan dang ldan pa la sbyin gyi gzhan dag la ni ma yin no/ /de yang ji skad du/ bram ze min las mnyam po ste/ /tha mal bram ze las gnyis 'gyur//'don pa la ni brgya stong ste/ /rig byed pha rol 'gro mtha' yas/ /zhes bshad pa yin te/ de bas na rig byed kyi pha rol tu phyin pa'i bram ze la sbyin pa po khyad par can gyi 'bras bu 'dod pas sbyin par bya'i/ bram ze ma yin pa gzhan dag la ni ma yin te/ gang de yod na rig byed ma lus pa mthar chub par ma byas pa la yang ma yin no zhes zer ro/ /mgon po khyod ni zhes bya ba la sogs pa la/ kye mgon po skyabs su gyur ba khyod kyis ni khyi'i bar la'ang sbyin par bya'o zhes gsungs so/ /dris pa/ khyi 'di ni khyad par gyi zhing ma yin na/ ci'i phyir de la sbyin par bya zhes gsungs she na/ de'i phyir thugs rje yis zhes bya ba gsungs te/ de yang bdag nyid chen po rnams kyis ni snying rjes sbyin pa la 'jug par bya'i/ 'bras bu mngon par 'phel ba la chags pa ni ma yin no/ /de yang gnas brtan dkon mchog 'bangs kyis/gang zhig skye bo dman dang phongs pa re ba'i bsam ldan mthong na yang / /brtse med 'bras bu 'dod pas snod gzhan yon tan dag dang ldan tshol ba/ /bsam brlag de ni sbyin par byed kyang slong ba rnams dang mtshungs so zhes/ /de slad khyod ni thugs rjes slong ba rnams la sbyin par bzhed la zhugs//zhes bshad pa yin no/ /de bas na khyed sbyin pa la 'jug par mdzad pa ni slong ba rnams la thugs rje chen po nyid kyis gus pas mdzad pa yin no/ /lus kyi zhes bya ba la sogs pa la/ lus kyi dka' thub ni nyon mongs pa'i gdung ba zhes bya ba'i don to//des byas pa'i mdud pa zhes bya ba ni 'ching ba ste/ nyon mongs pa'o zhes bya ba'i don to/ /de 'jig pa ni bshig cing rnam par spangs pa zhes bya ba'i don to/ /lus las kyang mdud pa 'jig par 'dod pa de gang zhig yin zhe na/ gcer bu 'tshal zhes bya ba smos te/ gos med pa'i dge sbyong gcer bu pa zhes bya ba'i don to//de yang de rnams kyi grub pa'i mtha' ni 'di yin te/ 'di lta ste/ tshe snga ma la byas pa'i las ni dka' thub kyis zad par byas la/ 'dir yang dge ba'am mi dge ba sngon med pa nye bar bsags par mi bya la/ des na lus kyi rgyud la yod pa'i las zad pas skye ba zad la/skye ba zad pas sdug bsngal zad de/ de zad pas ni mya ngan las 'das pa thob pa yin no zhes 'dod do/ /khyed ni zhes bya ba la sogs pa la/ thugs yin pas na thugs kyi zhes bya ba'am/ 'di ni thugs kyi yin pas thugs kyi dka' thub bo/ /'di skad ston te/ khyod ni thugs kyi dka' thub nyid kyis mdud pa 'jig cing las zad pa dang /nyon mongs pa zad par bzhed pa lags kyi lus kyis ni ma yin na de skad du/ slob dpon rta skad kyis/ bdag nyid nyon mongs skye bo byis pa 'dod/ /de bzhin dbang po'i spyod yul rnam pa la chags so/ /'di dag gnyis ka / nyes dang ldan par mthong / /nga yis bdud rtsi rtogs lam dag pa yin/ /zhes bya ba la sogs pa bshad pa yin no/ /de bas na 'di ltar rigs te/ gang gi phyir kun nas nyon mongs pa thams cad kyi gnas yin pas sems nyid gnod pa thams cad byed pa yin la/ de bas na de nyid ci nas kyang phyis nyon mongs pa rnams kyi rten du gyur pa mi byed pa de ltar yongs su sbyang bar bya ste/gnas med pa las ni nyon mongs pa skye bar mi 'gyur la/ nyon mongs pa med par las rnams mi 'byung zhing / de dag med pa las ni skye ba len par mi 'gyur la/ de med pa ni thar pa yin no zhes bcom ldan 'das kyis legs par bstan pa yin no//lus kyi dka' thub ni don med pa yin te/ sems kyi rgyal po'i kha na las pas de las rang nyid bya ba ma yin pa las ldog pa yin pa'i phyir ro/ /rtog ge pa dag dngos po rnams zhes bya ba la sogs pa la/ rtog ge pa ni mu stegs pa rnams so//dngos po rnams zhes bya ba ni bdag dang rang bzhin dang dus dang phyogs la sogs pa med par gyur pa rnams kyang yod de gnas pa nyid du 'dod cing las len to/ /ltos pa med pa zhes bya ba ni/ ma brtags ma dpyad par zhes bya ba'i don to/ /de yang de rnams 'di skad ces smras te/chos ma yin pa'i rtog pa yis/ /dpyad pa dag ni mi bya ste/ /long ba lkugs pa ltar gyur na/ /gang zhig bshad pa de dpyad kyis/ /yang na rtog pa ngan pa'i bstan bcos la mchog tu gzhol ba de ni rtog ge ba ste/ de yang phyin ci log gi ming dang / du ma'i mtha' can gyi rgyu dang ldan pa'i gzhung khas blangs nas/med pa'i dngos po rnams kyang dngos po ltar sgrub par byed do/ /de yang 'di ltar 'o ma'i rgyu ni lci ba yin te/ de'i rgyu las byung ba'i phyir 'o ma dang 'dra'o/ /de yang gang ba lang gi rgyu las byung ba ni 'o ma'i rgyu yin te/ 'di ltar 'o ma dang ba'i lci ba ni de'i rgyu las byung ba yin la/de bas na ba lang gi lci ba yang 'o ma'i rgyu yin no/ /gang du 'o ma'i rgyur ma gyur pa de ni de'i rgyu las 'byung ba ma yin te/ dper na rdo ba la sogs pa bzhin no/ /'dir mi shes pa dag ni 'o ma'i rgyur ba lang gi lci ba nyid yin pa mi srid du zin kyang / de lta de ltar khas len pa la dga' bar 'gyur la/gang shes rab dang ldan pa de ni bags pa dang / spu dang / gcin la sogs pa du ma'i mtha' can nyid du shes par 'gyur ro/ /yang bdag ni yod par 'dod de/ de'i bya ba nye bar dmigs pas me dang 'dra'o/ /de yang gang dang gang gi bya ba nye bar dmigs su yod pa de dang de ni yod pa yin te/dper na me ni de'i smin pa la sogs pa'i bya ba nye bar dmigs su yod pa yin la/ gang du me med par der ni bya ba dmigs su yod pa ma yin te/ dper na ri bong gi rwa dang 'dra'o/ /bdag gi bya ba yang byed pa po dang / spyod pa po dang / 'gro ba po nyid dang / ston pa po nyid la sogs pa'o zhes zer la/ shes rab dang ldan pa dag ni rten du 'gyur ba'i lus ma grub pas de'i rgyu med pa nyid du 'dod de/ 'di la ni nyes pa mang po yod do zhes sbyar bar bya'o/ /tshig dbang zhes bya ba la sogs pa la/ tshig dbang khyod ces bya ba ni bong pa ste/tshig la dbang ba ni gsung gi dbang phyug ces bya ba'i don to/ /cung zad kyang mi ltos med ces legs par gsungs zhes bya ba ni gang ma brtags shing rnam par ma dpyad par gsungs pa rigs pa dang mi ldan pa'i legs par gsungs pa ni 'ga' yang med do zhes bya ba'i don to//de yang bcom ldan 'das kyis/ skye ba'i sdug bsngal dang / rga ba'i sdug bsngal dang zhes bya ba nas/ mdor na nye bar len pa'i phung po lnga ni sdug bsngal ba'o zhes bya ba gsungs pa thams cad kyang de lta bu nyid yin no/ /gzhan yang / tshul khrims blangs pa bde ba yin/ / byin na dga' bar 'gyur ba dang / /byams pa'i gnyen po zhe sdang yin/ /zhes bya ba la sogs pa de thams cad phyin ci ma log pa dang / gcig tu bden pa nyid yin no zhes rgya cher sbyar bar bya'o/ /ne tsos zhes bya ba la sogs pa la/ ne tso ni rgyas pa'i bu'o/ /lam gang nas she na/ nyi ma brtol nas zhes bya ba smos te/nyi ma'i dkyil 'khor brtol zhing phug pa'o/ /de yang thar pa ni nyi ma'i dkyil 'khor gyi dbus nas 'gro zhes 'jig rten pa rnams smra'o/ /thar pa zhes bya ba la thar pa ni sangs rgyas pa dag phung po med pa yin par 'dod de/ phung po ni sdug bsngal yin la/ de med pa ni thar pa yin te/de yang 'di ltar phung po lnga po thams cad sdug bsngal gsum po nyid dang ldan pas mi 'dod bzhin du sdug bsngal bar gnas te/ 'di dag la ni sdug pa'am 'dod par bya ba ci yang med de/ dper na mi gtsang ba'i phung po ni/ gang gi phyir mi gtsang ba'i phung po chen po yang mi gtsang ba yin zhing /mi rnams kyis mi mthun par gyur pa yin la/ de bzhin du dbus sam cung zad dam/ phra rab tsam gyi bar du yang mi mthun pa nyid yin te/ lha dang mi rnams kyis de thams cad kyi thams cad du mi 'dod par bya ba nyid yin no zhes bshad de/ gtsang ba dang ni lha rnams dang //mi rnams bsngags pa byed pa yin/ /zhes gsungs pa'i phyir ro/ /de ltar na gang srid pa'i rtse mo'i phung po de yang skad cig ma re re zhing 'du byed dang ldan pa'i phyir/ mi 'dod pa byas pa yin zhing / 'phags pa rnams kyis sdug bsngal ba nyid yin par bzhed na/ dmyal ba'i bar lta smos kyang ci dgos/des na sdug bsngal bar gyur pa'i phung po 'di med pa gang yin pa de ni bde ba'i mchog yin la/ /de ni char pa yin no zhes bshad do/ /phyi rol pa dag las/ la la dag gis bshad pa ni ye shes kyi dbang gis las dang nyon mongs pa zad pa las/ skyes bu'i lus dang dbang po la sogs pas sdug bsngal bar mi 'gyur ba dang /bar chad lhag ma rnams dang bral ba ni thar pa yin no zhes zer ro/ /yang la las ni 'dod pa'i bde ba'i longs spyod kyi bde ba thams cad phun sum tshogs shing / rtag tu shes pa'i khyad par la goms pas bsgrubs pa'i gnas kyi khyad par ni thar pa yin no zhes bshad do//des na 'dir thar pa gang yin par 'dod ce na/ sngar rtogs par gyur pa med pa 'dir rtogs pa'i sgra nye bar smos pas phyi nas gang nges par shes pa'i thar pa der song bar gyur pa'o/ /de ni ne tsos nyi ma brtol te thob bo zhes sbyar ro/ /de yang 'di ltar thos te/ji ltar drang srong rgyas pa'i bu ne tso zhes bya bas phongs pa brgyas sdug bsngal bar gyur pa'i 'gro ba la bltas nas skyo ba chen po skyes nas/ shin tu 'jigs pa med pa'i mya ngan las 'das pa'i grong khyer du 'gro bar 'dod pa dang / rgyal po skyed pa po'i man ngag gis rdzu 'phrul thob nas nam mkhar 'phags te/nyi ma'i dkyil 'khor gyi dbus rdzu 'phrul gyi stobs kyis brtol nas thar pa'i grong khyer du zhugs so zhes zer ro/ /yang khyed ni mya ngan las 'das pa ste/ thar pa yang dag par brnyes su zin kyang / gang du yang ni gshegs ma mchis/ /zhes bya ba yin te/bcom ldan 'das ni gang du yang gshegs par mi mdzad pa'o/ /de yang / de ni mar me shi ba ltar/ /de yi sems ni rnam par grol/ /zhes gsungs pas/ gang du de rnal 'byor byed pa de nyid de'i phung po lnga mya ngan las 'das par 'gyur gyi/ slar 'byung bar mi 'gyur ro/ / de yang slob dpon rta skad kyis/ dper na mar me shi bar gyur pa na/ /'og tu mi 'gro steng du mi 'gro zhing / /phyogs dang phyogs mtshams gar yang mi 'gro bar/ /snum zad pa yis shi ba kho nar zad/ /de bzhin thub pa nye bar mya ngan 'das/ /sa ru mi 'gro bar snang mi 'gro zhing / / phyogs su ma yin phyogs mtshams 'gar yang min/ /nyon mongs zad pas zhi ba kho nar zad/ /ces bshad pa yin no/ /thar pa gzhan 'gyur skyed pa dang / /zhes bya ba la sogs pa la/ rgyal po skyed pa po zhes bya ba de dka' thub chen po la gnas nas/ rnal 'byor gyi lam la slob dpon nyid thob nas dus la bab cing lus dang bral nas mya ngan las 'das par song la/yang de'i slob ma ne tso ni rang gi lus nyid kyis nyi ma'i dkyil 'khor gyi dbus brtol te/ thar par lam gzhan gyis song bar gyur to zhes grag go/ /khyod nyid lam gang nas zhes bya ba la sogs pa la/sangs rgyas bcom ldan 'das khyed thar pa'i lam gang nas gshegs pa slob ma shA ri'i bu la sogs pa lam de nyid nas song zhes thar pa thob pa yin no zhes bya ba'i don to/ /khyab 'jug gis ni bud med dag /ces bya ba la sogs pa la/ khyab 'jug ni nar ya'o/ /bud med stong phrag drug cu ni bud med grangs de snyed pa'o//yongs bzung zhes bya ba ni bsnyen bkur ba dang / mngag gzhug mar byas pa'o/ /gyur pa ni byung ba'o/ /'dir gtam ni/ rgan pos khyab 'jug mda' yis bsnun/ /zhes bya ba'i skabs su smras pa yin no/ /ston pa zhes bya ba ni ston cing 'chos pa ste/yang dag par ston par mdzad pa zhes bya ba'i don to/ /'jig rten 'das zhes bya ba'i don ni 'jig rten rnams kyi dam par gyur pas na 'jig rten 'das pa ste/ 'jig rten gyi gtso bor gyur pa'o/ /de yang bcom ldan 'das kyis sems can gang rkang med dam/rkang mangs sam/ gzugs can nam/ gzugs med pa'i sems can de rnams kyi nang na de bzhin gshegs pa mchog yin no zhes ji skad gsungs pa lta bu'o/ /bdag gi med cing zhes bya ba'i rnam pa med par gyur pa de ni bdag gi med pa'o/ /'dis ni 'jig tshogs la lta ba spangs pa'i sgo nas nyon mongs pa dang bral ba nyid du ston to//yongs 'dzin med ces bya ba ni btsun mo la sogs pa dang 'brel pa'am/ longs spyod dang 'brel pa'i yongs su bzung ba mi mnga' ba gang yin pa de ni yongs su 'dzin pa med ces bya ste/ 'dis ni nyon mongs pa'i dngos po spang ba nyid du ston to//de yang nyon mongs pa'i dngos po la yongs su 'dzin pa med pas na de skad ces bya'o/ /ka shi mdzes dga' mo la ni/ /zhes bya ba la sogs pa la/ 'di ltar rjes su thos te/ b+ha ra ta'i 'thab mo 'das nas yun ring po ma lon pa na/ rgyas pa nye du'i phongs pa dang sdug bsngal gyis sems kyi rgyud zhum pa dang /yongs su 'khyams shing bA rA Na sI ra song ba dang / srang bar na ka shi mdzes dga' mo zhes bya ba'i smad 'tshong ma'i gtso mo zhig sgo dang nye ba na skye bo'i tshogs chen pos bskor ba mthong ba dang / de ltad mo la zhen pa'i yid kyis de'i thad du song ste dris pa/'di su zhig gi khyim yin zhes dris nas/ de'i gzugs la sogs pa'i yon tan thos pas sems phrogs pa dang 'dug go/ /de nas mngag gzhug pa'i skye bo zhig gis ka shi mdzes dga' mo la smras pa/ drang srong 'ga' zhig sgo na sdod cing 'dug go/ /de yang dmod pas 'jigs skrag nas/mchod yon dang / rkang khrus la sogs pa bsnyen bkur sngon du 'gro bas bdag nyid kyis mdun bsu ste nang du bcug nas/ dben par stan la 'dug tu bcug ste/ rang nyid kyis rkang pa bkrus so/ /rgyas pas bgad pa dang / des de mtshan mar bzung nas glags thod par shes te/rab tu dga' bas khyed rgyu med par 'dzum mam zhes smras pa dang / des smras pa/ khyed ni sgyu rtsal thams cad la mkhas par thos na lag pa dang rkang pa mnye ba mi shes so/ /des smras pa/ gal te khyed 'di la mkhas par gyur na/ lag pa rkyong shig dang bstan par bya'o//des kyang de la lag pa byin no/ /de nas des ji ltar na 'dod pa'i skye bo khyad par can du ma dang / reg par gyur kyang de lta bu'i reg pa sngon chad nyams su myong bar ma gyur pa de ltar tshor bar byas so/ /de yang de dang lhan cig dus shin tu yun ring mor mngon par dga' bar bya'o zhes yongs su chags shing 'dod pa'i 'dod chags skyes par gyur to//gang la chags she na/ ka shi mdzes dga' mo la ste smad 'tshong ma'i gtso mo la'o/ /rnam par bsgyur zhes bya ba ni dus shin tu yun ring mor yang 'dod pa rjes su myong bas rnam par 'gyur ba nyid du gyur pa'o/ / khyod khab bzhugs na'ang zhes bya ba ni rab tu ma byung ba na yang ngo / /phung khrol ba'i zhes bya ba ni 'phags pa ma yin zhing smad par gyur pa'o/ /don gyi dbang po zhes bya ba ni mig la sogs pa'i yul lnga po ste 'dod pa'i yon tan lngas zhes bya ba'i don to/ /rmongs ma gyur zhes bya ba ni rnam par 'gyur bar ma gyur pa'o//rgyas pa 'dod gdungs g.yen spyo ba/ /zhes bya ba la sogs pa la/ 'dod pas gdungs shing gzir ba yin pas na 'dod gdungs te/ 'dod pa'i 'dod chags kyis gtses zhes bya ba'i don to/ /g.yen spyo pa zhes bya ba ni brtan pa dang bral zhing sems g.yo ba nyid kyis ngo tsha med par gyur pa'o//bud med kyi ni rdog pas bsnun/ /zhes bya ba ni/ bud med kyi rdog pa dag ste/ de'i rkang pa gnyis kyis bsnun zhing brdegs pa zhes bya ba'i don to/ /de su zhig yin zhe na rgyas pa'o/ /de yang 'di ltar drang srong rgyas pa ka shi mdzes dga' mo dang lhan cig bag phebs par 'dod pa'i bde ba rjes su myong zhing 'dug pa na/dus 'ga' zhig gi tshe grong khyer bA rA Na sIr rgyal po tshangs pas byin la phas kyi rgol ba'i 'jigs pa nye bar gyur nas/ gang gi phyir gzhon nu rnams kyang nyin gcig la 'obs khru bcu bcu rkor bcug pa'i lung bsgo na gzhan dag lta smos kyang ci dgos/de nas ka shi mdzes dga' mo la'ang lung bsgo ba dang / des gla rngan chen pos gla mi'i skyes bu btsal kyang ma rnyed nas sems pa la zhugs par gyur to/ /rgyas pas smras pa/ ci'i phyir khyod mi dga' bar byed/tog tse dang skon ba byin cig /ngas 'obs brko bar bya'o zhes smras nas/ ji tsam na sor ste brkos pa dang / 'obs ma rdzogs par nyi ma nub pa la mngon du phyogs par gyur to/ /de nas rgyas pas dgongs ka'i dus la bab bo snyam nas ma log par de nyid du gnas par gyur to/ /chu tshod la sogs pa'i mtshan mas nyin mo rdzogs par gyur cing /mtshan mo'i dus la bab par shes nas rgyal po dang blon po'i grong khyer ba dang bcas pa sems rnam par g.yengs pa dang / rnam pa de 'gro ba la brtson par gyur pa na/ ji tsam na bram ze gzhan zhig gis 'obs brko ba la g.yengs pa'i sems kyis rgyas pa mthong ba dang /yun ring mo zhig na ngo shes par gyur to/ /de nas de las thos pa dang / rgyal po dang / blon po grong khyer gyi skye bo dang bcas pa de'i thad du song ste/ rkang pa gnyis la gtugs nas bzod par gsol ba dang / de gdong gzhan du blta zhing rko ba nyid kyis gnas so//de yang dmod pas 'jigs skrag pa dang / 'di ni ka shi mdzes dga' mo'i skal ba rko bar shes nas de la phrin du bskur ba/ thub pa khyad par can 'di khyed kyi skal ba'i 'obs rkor bcug pa las slong shig ces byas pa dang / des bu mo mngag gzhug ma zhig lan gsum gyi bar du btang yang de langs su ma 'dod do//de nas de rang nyid bzhon pa la zhon te 'ongs nas de las babs te/ rkang gdub dang bcas pa'i rkang pas mgo bor bsnun te/ gang gi phyir nga ni skyo bar gyur pas ngas lan gsum gyi bar du phrin bskur na ci'i phyir ldang bar mi byed/ rgyas pa yid dga' bar gyur pa dang / smras pa/ gang gi phyir 'di ltar rab tu brtse bas na shin tu rjes su gzung ba yin no zhes smras nas langs par gyur to/ /yang khyed ni khyim par bzhugs pa na'ang zhes bya ba ni btsun mo'i 'khor stong phrag drug cus yongs su bskor du zin na yang phyir zhing 'khrugs par gyur pa med ces bya ba ste/ 'di ltar btsun mo la yid rnam par bskyod pa'ang med na/ 'di lta bu'i gnas skabs su 'gyur pa lta smos kyang ci dgos zhes mi srid pa nyid du ston pa yin no/ /rna can 'thab dka' la sogs la/ /zhes bya ba la sogs pa la/ 'di ltar thos te/ kun ti bo dza zhes bya ba'i rgyal po zhig yod pa de la kun di zhes bya ba'i bu mo gzugs dang lang tsho la sogs pa phun sum tshogs pa zhig yod pa dang /ji tsam na drang srong gnas ngan zhes bya ba de'i khyim du zhugs nas 'o thug bslangs pa dang / myur bar bsgrubs te 'o thug gis bkang ba'i snod lag par blangs nas/ lag pa'i sdug bsngal chen po nyams su myong yang bzhin dang mdog rnam par 'gyur ba med par gus pa dang bcas par zas la spyod du bcug nas/zas kyi mthar yang lag pa'i pad+ma gnyis po de ma tshig par mthong nas yongs su mgu bas smras pa/ nga las mchog long shig gal te mnyes par gyur na bdag skyes bu gang dang gang 'dod pa de dang de bdag nyid kyi dbang du 'gyur ba de lta bu'i mchog stsol cig /des de la rig sngags byin nas rig sngags 'di khyed kyis bzlas na lan lnga'i bar du khyed mngon par 'dod pa'i dngos grub byed par 'gyur ro zhes smras nas song ngo / /de yang gnas kyi sa gzhir 'dug ste/ci rig pa 'di'i don bden pa yin nam/ 'on te ma yin zhes rtog pa skye zhing de nyams sad pa'i phyir de bzlas nas nyi ma dang phrad par gsol ba btab pa dang / skad cig ma de nyid la nyi ma shing rta dang bcas shing go cha dang bcas par drung na 'dug pa dang / de mthong nas kun dis nga'i gan du ma 'ongs shig ces bzlog pa dang /nyi mas smras pa/ nga la gsol ba btab nas bya ba ma byas par nga mi ldog go/ /yang na khyed kyi rigs ma lus pa rnam par brlag pa'i dmod pa gdab par bya'o/ /des smras pa/ ji ltar na rang gi rigs sun par byed ces smras pa dang /slar yang gzhon nu nyid du gyur pa'i mchog byin nas de dang lhan cig 'dod pa'i bde ba spyad nas nyi ma song ngo / /de'i rjes thogs nyid la rna can go cha bgos pa dang bcas pa/ rna ba gnyis rna chas brgyan pa skyes par gyur to/ /ji tsam na grogs mo zhig gis sbrang rtsi dang mar gyis kha bkang ste/shin tu 'jam pa'i gos kyis lus dkris nas sgrom gyi nang du bcug ste/ de blangs nas gang+gA'i ngogs su mtshan mo song ste/ nyi ma'i bu ni mdzes pa 'di/ /sgrom ni rgya mtshos bsrung bar gyis/ /lha yi tshogs ni 'dus pa dang / /tshangs pas kyang ni rtag tu srungs/ces smras nas gang+gAr por ro/ /gang+gA dang thag mi ring ba na yul 'khor srung gi rta'i spyan lhag pa'i shing rta zhes bya ba rta 'tsho zhing 'dug pas gang+gA'i chu bos sgrom khyer zhing 'gro ba mthong ba dang / de blang ba'i phyir 'khor rnams la bsgo nas khyer te 'ongs pa mthong ba dang /'di nga'i bur bya'o snyam nas sos par gyur to/ /yang de'i tshe ri dbang chen na dga' byed dgra sta can zhes bya ba mtshon cha'i sbyor ba la mkhas pa zhig dka' thub spyod pa dang / des 'di ltar dam bcas te bram ze ma yin pa rnams la ngas mtshon cha'i sbyor ba 'di bslab par mi bya'o zhes dam bcas so//rna can des kyang bram ze'i cha lugs su byas te/ de'i gan du song nas bram ze'i mtshon cha'i sbyor ba bslabs so/ /des kyang de la thams cad bslabs so/ /des mtshon cha'i sbyor ba legs par bslabs nas 'thab dka'i thad du song ste/ de la bdag nyid rten ma'i phyir bstabs la/des kyang ang ga'i yul byin te ang ga'i rgyal por gyur to/ /de bzhin du rgya cher sbyar te/ ji tsam na brgya byin gyis bsams pa/ da ni 'thab pa'i dus dang nye bar gyur gyis/ rna can 'di dang sred sgrub rtsod pa byed par 'gyur ro snyam nas brgya byin bram ze'i cha lugs su byas te rna can gyi gan du song ngo //des kyang ci'i don du 'ongs zhes lan gsum gyi bar du dris shing mgron du bos kyang gsal bar smrar ma 'dod do/ /ji tsam na lan bdun gyi bar du ci zhig 'dod ces dris pa dang / khyod kyi go cha 'dod do zhe'o/ /des smras pa/ ci'i phyir sngar khyed mi smra/ the tshom med par khyod la sbyin par bya'o zhes smras nas/de'i 'og tu rdo rje'i spu gri blangs nas des lus las go cha bshus te de la byin pa dang / brgya byin yongs su mgu nas smras pa/ gang gis slong ba mgu bya'i phyir/ /rang gi srog la'ang mi dpyod par/ /rna can lta bu'i sbyin byed med/ /nga dang 'dra ba'i brtse bral med//ces smras so/ /'di dag gi gtam ni shin tu mang mod kyi/ 'dir rgyas par ma smras so/ /'thab dka' byung ba'i gtam ni 'di skad thos te/ yan lag bkra sbyin dang / sna tshogs brtson 'grus dang / 'jigs byed dang / rgyas pa ste bzhi ni gang+gA las skyes pas spun yin no//yan lag bkra sbyin ni dri za'i rgyal po yan lag bkra sbyin zhes bya bas ming gi 'khon gyis g.yul ngor bsad do/ /sna tshogs brtson 'grus ni gcong chen pos btab nas shi'o/ /'jigs byed ni tshangs par spyod pa la zhugs par gyur pa dang / bde ldan mas 'jigs byed la smras pa/yu bu cag gi rabs chad par 'ong bas bu skyed pa'i rtsol ba gyis shing / /des smras pa/ nged gnyis spun yin mod kyi/ nga ni gzhon nu nyid nas tshangs par spyod pas 'dod pa'i bde ba nyams su myong bar mi byed do zhes bzlog pa dang / de'i rigs rgyud thams cad 'dus te/ rgyas pa la gsol ba btab nas/ aM bi ka dang / aM pa li ka dang / rtog ldan ma de gsum dang / rgyas pa 'dus pa las rim pa bzhin du/ yul 'khor srung dang / skya bseng dang / blo ldan zhes bya ba gsum skyes pa las/ yul 'khor srung dmus long du gyur pa dang / skya bseng gis sa chen po kun du rgyal bar byas te/yul 'khor srung la byin no/ /yul 'khor srung la rgyas pas mchog byin pa/ khyed kyi chung ma'i dam pa dri za mo las bu brgya skye bar gyur cig /de las phu bo 'thab dka' zhes bya ba 'byung bar 'gyur ro/ /ji tsam na dri za mo mngal dang ldan par gyur nas lo gsum nas sha'i gong bu lcags kyi tho ba 'dra ba skyes pa dang /rgyas pas smras pa/ 'di sha'i dum bu brgyar gyis la so sor bzhag ste/ chu bsil mos yang dang yang du gtor cing / de nas ji tsam na de las bu brgya dbang po yongs su rdzogs pa byung ba dang / blo ldan gyis yul 'khor srung la smras pa/'thab dka' 'di ni sdig pa'i mtshan nyid dang ldan pas gang gis na 'di la brten nas sgra ngan gyi rigs thams cad 'jig par 'gyur bar shes kyis/ 'di rnam pa thams cad du gsad par bya ste/ bu gcig bsad nas srog chags mang po'i srog byin pa la ni nyes pa 'ga' yang yod par ma mthong ste/chos kyi bstan bcos dag las/ gang gis 'bras bu chung 'gyur ba/ /sdig pa chen po de mi bya/ /sdig pa chung la don che ba/ /blo dang ldan pas rtag tu bya/ /zhes 'byung ngo zhes smras pa dang / de bu la brtse bas gsod par ma nus so//skya bseng ni nags su dka' thub la song ngo / /blo ldan ni chos kyi tshig can yin la/ yul 'khor srung ni nus pa med par gyur pa dang / 'thab dkas rgyal po byas so/ /de nas rna can dang / 'thab dka' g.yul 'gyed pa'i bar du rgya cher sbyar te/ de'i tshe srid sgrub kyis gsol ba btab pas khyab 'jug ni shing rta'i kha lo par gyur nas g.yul ngor de drangs par gyur to//der gnas pa na/ srid sgrub kyis dpung gi tshogs thams cad la bltas nas/ 'di ltar/ kun di'i bus ni de bltas na/ /thams cad gnyen du rnam par gnas/ /mchog tu brtse bas non pa yis//zhum pa yis ni 'di skad smras/ /khyab 'jug gnyen rnams mthong bas na/ /'thab par 'dod de gnas pa la/ /bdag gi lus ni zhum gyur cing / /kha yang yongs su skams par byed/ /nga yi lus ni 'dar gyur cing / /spu yang rnam par ldang bar 'gyur/ / gzhu ni lag nas lhung gyur zhing / /pags pa'ang yongs su tshig par gyur/ /nga yi yid ni rnam 'khor bas/ /gnas par bya bar nus ma gyur/ /gang gi don du rgyal srid dang / /longs spyod bde ba 'dod gyur pa/ /de nyid srog dang nor rnams ni/ /spangs nas nga dang 'thab par gnas/ /zhes bya ba la sogs pa smra zhing 'thab par mi byed do//ji tsam na khyab 'jug gis de spro ba dang bral bar mthong ba dang / sgra ngan rnams gsad par bya ba'i phyir spro ba bskyed pa smras pa/ bum skyes 'jigs byed rgyal ba'i shing rta rna can dang / /de bzhin 'jig rten dpa' bo gzhan dag nga yis bsad//khyed ni sems la mi dgar ma byed gsod par gyis/ /g.yul du dgra las nges par rgyal ba nyid du 'gyur/ /gzhan yang gang gis 'di kun rgyal 'gyur ba/ /de ni mi 'jig shes par gyis/ /mi 'jig pa dang mi zad pa/ /de ni sus kyang bsad mi nus/ /lus 'di mtha' dang ldan 'gyur gyi//lus can dag ni rtag par bshad/ /'jig cing tshad med gyur pas na/ /'thab par gyis shig b+ha ra ta/ /dper na gos rnying dag ni bor nas su/ /sar pa gzhan dag mi ni len par byed/ /de bzhin lus ni rnying pa spangs nas su/ /lus gzhan sar pa dag ni len par byed//ces bya ba la sogs pa smras nas/ de'i tshig gi rjes su 'brangs te/ srid sgrub kyis g.yul bkye ba nas srog chags brgya stong dpag tu med pa bsad par gyur to/ /sems can rnams la zhes bya ba la sogs pa la/ /sems can zhes bya ba ni srog chags zhes bya ba'i don to/ /de la phan par bzhed pa ni phan pa nyid mdzad par bzhed pa'o//bzhed nas ci zhig mdzad ce na/ /khyod kyis srog kyang btang bar mdzad/ /ces bya ba yin te/ 'dir pad+ma can la sogs pa'i skyes pa'i rabs dper sbyar bar bya'o// //khyab 'jug gis ni sgyu byas nas/ /zhes bya ba la sogs pa la/sgyu ni g.yo'i rnam pa'o/ /des sgyu byas nas ci zhig byas she na/ gom gsum zhes bya ba la sogs pa smos pa yin no/ /'di skad ston par 'gyur te/ sa'i dkyil 'khor gang yin pa de mi'u thung gi gzugs su bsgyur nas gom pa gsum gyis stobs ldan las phrogs pa yin la/ sa de ni khyed kyi sa rtswa dang 'dra bar lan mang du btang zhing bor bar gyur to/ /ji lta bu khyed kyis she na/ thar bzhed pa zhes bya ba smos te/ nges par thar pa nyid thob par bzhed pa gang yin pa de ni thar pa bzhed pa'o/ /'dir mthong dga' chen po la sogs pa'i mdo dper sbyar bar bya'o/ /khyab 'jug gis sgyu byas pa'i gtam gang yin pa de ni sngar/khyab 'jug mi'u thung gzugs bsgyur nas/ /zhes bya ba'i skabs su smras zin to/ /dga' byed srog gcod byed pa'i mdas/ /zhes bya ba la sogs pa la/ 'di ltar rjes su thos te/ drang srong dza mA dag ni zhes bya ba de'i chung ma brtul zhugs can ma zhes bya la/de'i bu ni dga' byed ces bya ba shin tu dpa' ba zhig yod la/ yang de'i tshe srid sgrub brtson zhes bya ba'i rgyal po zhig byung ste/ de ba lang gi tshogs kyi gnas su song ba dang / drang srong mis byin zhes bya ba 'thab mo la mngon par dga' ba zhig yod pa de'i thad du song ste/ser ba'i sgras dza mA dag ni 'dod bzhos kyi ba zhig yod pa skrag pa dang / rgyal po srid sgrub kyis dris pa na/ mis byin gyis smras pa/ dza mA na'i bu 'phong slob pa'i gzhu rgyud brdabs pas ba 'di skrag pa yin no zhes byas pa dang / ngan spong gi rigs las byung ba'i dga' byed kyi pha rol gnon pa dang /yon tan gyi bsngags pa smras pa dang / de khros nas ci nas kyang / dga' byed dang lhan cig 'thab par bya ba'i nga rgyal skyes nas bsti gnas su song ste be'u phrogs pa dang / dga' byed bsam gtan la gnas pa'i lus kyi steng du sbrul shi ba bskyur ro//rdul can ma ni ngang tshul [(]bzad [,]bzang [)]po can yin pas/ de me tog thur song ba na shing rnams rang nyid 'dud par byed do/ /des rgyal po mthong nas yid chags par gyur pa dang / de nas brtsams te shing rnams 'dud par mi byed do/ /de dza mA na dag ni bsam gtan gyi stobs kyis shes pa dang /chung ma la khros pas dga' byed la/ ma'i mgo bo chod cig ces smras pa dang / des kyang pas tshig tu bsgo ma thag mgo bcad par gyur to/ /de nas pha mgu ste/ bu mchog slongs shig ces byas pa dang / des kyang bdag gi ma slar 'tsho bar mdzod cig pa'i mchog bslangs nas de 'tsho bar gyur to//de nas brtsams te rgyu des khros pas dga' byed kyis bdag gis 'jig rten du rgyal rigs gcig kyang med par bya'o zhes dam bcas so/ /de'i 'og tu dgra ste thogs te chas nas rgyal po srid sgrub dang lhan cig g.yul sprad nas ji tsam na de la lag pa stong yod pa dgra stas thams cad bcad de sa la lhags par byas so//de nas mgo btsugs nas rgyal rigs rnams rtsad nas brlag pa'i phyir zhugs shing / 'jig rten du rgyal rigs rnams med par byas so/ /de ltar na 'jig rten du rgyal rigs rnams med pa nyid du byas pas/ 'jig rten rgyal rigs med byas nas/ /zhes bya'o/ /gang gis byas she na/ srog gcod byed pa'i mdas zhes bya ba smos te/ srog chags rnams zad cing med par byed pa ni srog gcod pa ste/ de byed pa'i mda' yin pas na/ srog gcod byed pa'i mda' ste des so/ /grags pa thob pa gang yin pa//zhes bya ba ni snyan pa thob cing rnyed pa'o/ /dga' byed ces bya ba ni dga' byed dgra sta can no/ /de zhes bya ba ni dga' byed kyi bya ba'o/ /khyod kyi bstan la zhes bya ba ni sangs rgyas bcom ldan 'das kyi bstan pa la'o/ /grags pa min zhes bya ba ni mi snyan par gyur pa'o/ de yang 'di ltar khyod kyi bstan pa la srog chags grog sbur tsam bsad pa yang smad par bya ba'i gnas yin na/ rgyal rigs rnams bsad pa lta smos kyang ci dgos/ sgra ngan dang ni skya bseng dang / /ces bya ba la sogs pa la/ sgra ngan ni 'thab dka' la sogs pa'o/ /skya bseng ni g.yul ngor brtan pa la sogs pa ste de dag go//gang gi phyir ni g.yul bkye ba/ /zhes bya ba ni rgyal srid kyi dpal gang gi don du g.yul 'gyed cing 'thab par byed pa'o/ /de yang rgyal srid kyi dpal nye bar bsdu ba'i don du de rnams kyis g.yul sprad pas dpung gi sde tshoms bco brgyad kyi grangs kyis bsdus pa'i srog chags rnams 'chi ba'i dbang du gyur to//dpal de zhes bya ba ni sa stengs kyi rgyal srid phun sum tshogs pa ste/ de spangs shing yongs su dor ba'o/ /de ji lta bur spangs she na/ 'khri shing gdug pa bzhin du ni/ /zhes bya ba smos te/ shing gang la gdug pa'i sbrul rnams kyis dkris nas 'dug pa de la 'ga' zhig 'jigs pas spong bar byed pa de bzhin du/bcom ldan 'das nyes par spyod pa'i sbrul gyi dug gis rmas shing / skad cig ma tsam du dga' ba yongs su gyur na sdug bsngal pa'i rgyal srid kyi dpal yongs su spangs nas ltos pa med par rab tu gshegs pa yin no//khyod kyi bstan pa rnyed pa na/ /zhes bya ba la sogs pa la/ khyod kyi bstan pa zhes bya ba ni mgon po khyod kyi bstan pa chos 'dul ba'i gsung rab ces bya ba'i don to/ /de rnyed pa ni brtags nas shes pa'o/ /thang shing nags na zhes bya ba ni thang shing gi nags tshal te/de na lha chen po zhes bya ba bde byed do/ /rnal 'byor ni bsam gtan gyi khyad par te/ de la dbang byed pas na rnal 'byor dbang phyug ces bya ste/ bsam gtan sna tshogs pa thob pa'i drang srong rnams zhes bya ba'i don to/ /rnal 'byor gyi dbang phyug gi spyod pa ni lus kyi rnam par 'gyur ba'o//gang zhes bya ba ni bstan pa'o/ /de ni zhes bya ba ni bshad pa'o/ /mi shes pa ni kun du rmongs pa ste/ de'i spyod pa ni rnam par 'gyur ba'i tshul yin pas na mi shes spyod pa bas zhes bya'o/ /de yang 'di skad ston te/ thang shing gi nags na gnas pa'i rnal 'byor gyi dbang phyug gi drang srong rnams la lha chen pos spyod pa gang zhig byas pa thos na/de ni khyed kyi bstan pa'i gsung rab la ltos na shin tu mi shes pas ldongs pa'i rnam par 'khrul pa yin par shes so/ /'di'i gtam gang yin pa de ni lha chen po 'dod pa can gyi mtshan zhes bya ba'i skabs su bris pas yang ma bris so// //dbang po bshol med byi bo zhes/ /zhes bya ba la sogs pa la/ dbang po zhes bya ba ni brgya byin no/ /bshol med ces bya ba ni drang srong gau ta ma'i chung ma'o/ /bram ze da dung bar du sgrogs/ /zhes bya ba ni bram ze rnams da dung yang smod par byed pa'o//ci'i phyir zhe na/ byi bo zhes bya ba ste mi rigs par spyod pa'o/ /de yang rig byed kyis brgya byin 'bod pa'i skabs nas/ bshol med byi bo zhes 'don pa'i phyir ro/ /khyod kyi zhes bya ba la sogs pa la/ yang khyod kyi yon tan gyi grags pa ni brgya byin nyid sgrogs shing gsal bar byed do//ci zhig sgrogs she na/ 'bras bu mchog brnyes pa zhes bya ba yin te/ 'bras bu mchog gi sgra ni 'dir rgyun du zhugs pa'i 'bras bu yin par 'dod de/ 'jig rten pa'i 'bras bu thams cad la ltos nas de skad btags pa yin pa'i phyir ro//de yang zag pa med pa'i lam gyis thob pa dang / mi 'pho ba nyid yin no/ /de yang 'bras bu'am nges pa sngon 'gro las zhes bya ba la sogs pa chos mngon pa las bshad pa dang 'dir brgya byin gyis zhus pa'i mdo dper sbyar bar bya'o/ /khyab 'jug gis ni nag bkra bos//zhes bya ba la sogs pa la/ 'jig rten 'dir lha ma yin nag bkra bo zhes bya ba dang / kun gtong zhes bya ba pha rol gnon pa chen po dang ldan pa gnyis shig byung ba dang / de dag phan tshun dregs pa'i dbang gis mi mthun par gyur la/ des kyang 'jig rten gsum las rgyal ba'i phyir ro//brtson pa ni khyab 'jug gis de'i brtson pa mi bzod pas gsod pa'i thabs la brtson par byed do/ /ji tsam du dus gzhan zhig gi tshe khyab 'jug 'khor lo thogs te/ nag bkra bo'i gan du song nas de dang lhan cig 'thab pa la zhugs pa dang / de nas de'i dbyig pas bsnun te lus snad par gyur pas khyab 'jug 'dar zhing zhum pa dang 'bros par rtsom pa dang /gnas gzhan ma rnyed pas kun gtong nyal ba'i khri'i 'og tu zhugs par gyur to/ /de yang mgyogs par 'ongs nas gar song / slar byung shig ces smras pa dang / kun gtong gnyid sad par gyur to//sad nas kyang de 'ongs pa mthong zhing khri'i 'og nas skyobs shig ces nyam thag pa'i sgra thos te bsams pa/ 'di ni nges par kho bo bsad pa'i phyir 'ongs la/ nga'i bsnyen bkur ba ni skrag nas khri 'di'i 'og tu zhugs pa yin no snyam du bsams nas/ gzhan gyi brnyas pa chen po 'di lta bu su zhig gis bzod par nus zhes smra zhing /mtshon cha blangs te langs nas/ de dag phan tshun 'thab par gyur pa dang / gnyis ka shi bar gyur to/ /khyab 'jug ni sred med kyi bu'o/ /nag bkra bo ni lha ma yin te/ des bred cing 'jigs pas nag bkra bos bred pa'o//des 'thoms par gyur pa ni sems 'khrugs par gyur pa'o/ /kun gtong gi khri'i 'og tu zhugs par gyur zhes bya ba ni lha ma yin kun gtong gi khri'i 'og tu 'jigs pas zhugs par gyur pa'o/ /gtso khyod ces bya ba ni bod pa ste/ dbang phyug ces bya ba'i don to/ /bsnyengs mi mnga' zhes bya ba ni bsnyengs shing 'jigs pa mi mnga' ba gang yin pa de ni bsnyengs pa mi mnga' ba'o//gang la mi bsnyengs she na/ kun tu zhes smos pa yin te/ de bzhin gshegs pa ni 'jigs pa thams cad las brgal ba'o zhes gsungs pa yin no/ /skye dgu'i bdag po rang nyid kyis//zhes bya ba la sogs pa la/ 'di ltar thos te bar gyi bskal pa 'di la skye dgu'i bdag po myur ba zhes bya ba la/ ji tsam na bu mo brtul zhugs bzang mo zhes bya ba gzugs la sogs pa'i yon tan rnams kyis lha'i bu mo gzhan rnams zil gyis mnan nas gnas pa zhig skyes te/ gang gis na skye dgu'i bdag po myur ba zhes bya ba 'jig rten thams cad 'byin pa yang ngo mtshar gyi blo skyes te/ ngas ni 'di lta bu 'byin cing skyed par mi nus so snyam mo/ /de nas de blangs te tshangs pa'i 'jig rten du song ba'i bar du sbyar ro/ /ji tsam na tshangs pa dang / dbang phyug chen po dang / chos kyang lus dang ldan par gnas gcig tu tshogs par gyur pa dang / nga'i bu mo dpal mo yang zil gyis gnon pa 'di la ltos shig ces smras nas de nyid du 'dug go/ /ji tsam na tshangs pa 'dod chags skyes te rang gi yid 'dzin par ma nus nas de dang lhan cig log par zhugs so//de bzhin du dbang phyug chen po dang / chos dang / skye dgu'i bdag po myur ba yang de la log par spyod par zhugs so/ /de'i rjes thogs nyid la bu bzhi kha dog bcas zhes bya ba dus gcig tu skyes so/ /de nas tshangs pas smras pa thams cad nga'i bu yin no/ /dbang phyug chen po la sogs pas kyang de skad smras pa dang /rgyu de las tshangs pa'i 'jig rten nas ca co'i sgra 'jig rten du byung bar gyur to/ /gtam de thos nas brgya byin la sogs pa'i lha rnams 'ongs nas rtsod pa zhi bar bya ba'i phyir/ bu ni phal cher 'jig rten na/ /pha dang 'dra bar 'gyur bas na//gzugs kyis gang zhig gang dang 'dra/ /de ni de yi yin zhes bya/ /zhes smras so/ /de'i 'og tu gzugs dang mthun mthun du rang rang gi bu yongs su blangs par gyur to/ /skye dgu'i bdag po ni myur ba zhes bya/ rang nyid kyis zhes bya ba ni bdag nyid kyis so/ /bu mo ni bdag nyid kyi'o//'khrig ces bya ba ni 'dod pa spyad pa ste/ de dang lhan cig 'dod pa'i bde ba nyams su myong ba'o/ /thos zhes bya ba ni gtam de ltar thos pa'o/ /thub pa khyod ces bya ba ni bod pa'o/ /slob ma'ang zhes bya ba ni nyan thos rnams la'ang zhes bya ba'i don te/ / sangs rgyas bcom ldan 'das la ni smos kyang ci dgos zhes pa'i 'ang gi sgra las shes par bya'o/ /tshangs par spyod pa skyon ma mchis/ /zhes bya ba la/ tshangs par spyod pa ni dbang po sdom pa dang / tshul khrims kyi sdom pa zhes bya ba'i don to/ /skyon ma mchis zhes bya ba ni tshangs par spyod pa gang la rnyog pa'i dri ma med pa de ni skyon ma mchis pa'o//bram ze rnams ni zhes bya ba la sogs pa la/ sbyin pa dang len pa ni sbyin pa len pa ste/ de gnyis mnyam par gnas pa'i phyir sbyin pa len bzhin zhes bya'o/ /ci zhig ce na 'pho bar smra zhes bya ba smos so/ / ji ltar zhe na/ dge sdig dag ces bya ba smos te/ dge ba ni bsod nams te lags par spyad pa'o/ /sdig pa ni bsod nams ma yin pa ste/ nyes par spyod pa'o/ /dge ba dang sdig pa de dag 'pho ba ni rnam par 'pho ba'o/ /su zhig de ltar zer zhe na/ bram ze rnams ni zhes bya ba smos te/drang srong rnams zhes bya ba'i don to/ /de yang 'di ltar/ gser dang / dbyig dang / zas dang / skom la sogs pa ni gzhan dag la sbyin pa dang / gzhan dag las len pa rigs pa de bzhin du/ bsod nams dang sdig pa yang de dang 'dra'o zhes bya ste/ de yang bram ze rnams 'di skad ces/bram ze gsod pa la sogs pa'i sdig pa gzhan dag las rang dgas len pa ni 'pho bar 'gyur zhing / bsod nams kyang de dang 'dra'o zhes bya ba ni grub pa'i mtha' yin no/ khyod kyis zhes bya ba la sogs pa la/ gal te de ltar yin na byas pa chud za bar 'gyur te/legs par spyod pa dang nyes par spyod pa byas nas rnam par smin pa ma smin par chud za bar thal bar 'gyur te/ gzhan dag la rnam par smin pa byin pa'i phyir ro/ /legs par spyod pa dang / nyes par spyod pa ma byas pa dang ni phrad par thal bar 'gyur te/gzhan gyis byas pa'i sdug pa dang mi sdug pa'i 'bras bu 'di dag la spyod pa'i phyir ro/ /de bas na de dag ni rigs pa ma yin te/ gang gi phyir gal te gzhan gyis byas pa gzhan spyod par 'gyur na ni/ phas zan zos pa tsam gyis ci'i phyir bu 'grangs par mi 'gyur/gal te rang gis rtogs pa gzhan la skye na ni bstan bcos lan cig thos pas bstan bcos thams cad 'dzin cing shes par ji ltar mi 'gyur/ gal te 'pho ba yod na ci'i phyir rtogs pa nyid las 'pho bar 'gyur/ gzhan dag bstan la dge ba mi byed de/ /gzhan gyis byas pa 'di yi rjes mi 'gro//rang gis thob pas byas chud mi za zhing / /ma byas pa yi 'bras bu grub yod min/ /ma byas pa ni nam yang byas ma yin/ /ma byas pa las gzhan du bder mi 'gyur/ /'byor pa der ni 'gro ba yod min te/ /de bas dge las bya ba la 'bad gyis//zhes bshad pa yin no/ /ser skyas bdag gi mtshan nyid ni/ /zhes bya ba la sogs pa la/ bdag gi mtshan nyid ces bya ba ni skyes bu'i mtshan nyid do/ /shes dang ldan zhes bya ba ni rtogs pa dang ldan pa ste/ shes pa'i ngo bo nyid du yongs su brtags pa ni shes pa dang ldan pa skyes bu'i rang gi ngo bor rtogs pa'o//de yang bskal pa dang po'i tshe ser skya zhes bya ba'i drang srong zhig byung ste/ de ni grangs can gyi bstan bcos rtsom par byed pa yin la/ de'i slob ma yang ser skya pa zhes bya ste/ ser skya'i bu yin pas na ser skya pa zhes slob ma la yang bu zhes bya la/ser skya pa des yongs su brtags pa ni khas blangs pa ste/ 'di ni rigs pa med pas yongs su brtags pa tsam kho na yin no zhes ston to/ /khyod kyis zhes bya ba la sogs pa la/ de ltar khas blangs par gyur na bdag de mi rtag pa dang /mi brtan pa dang / skad cig mar 'jig pa nyid du thal bar 'gyur ro zhes mgon po khyod kyis bstan to/ /de yang de rnams kyis skyes bu ni sems dang ldan pa dang / rtag pa nyid yin par khas 'chi ba mi rigs so/ /de yang gang gi phyir dang por mig gi dbang pos gzugs shes par 'gyur la/de'i tshe skyes bu sgra la sogs pa shes par 'gyur ba na/ gal te shes pa'i gzugs can dang rtag pa yin na de rtag tu yul gzugs shes pa nyid du 'gyur la/ de bas na sgra la sogs pa la 'on pa dang lkugs pa dang 'dra bar 'gyur na/ 'jig rten na 'di lta bu ni mi snang ngo //yang na dbang po gzhan dag gis gzugs shes par 'gyur na/ yang lan 'ga' sgra la sogs pa gzhan dag gis shes par 'gyur bas 'di ni gsal ba nyid du shes pa dang ldan par 'gyur te/ rnam par 'gyur ba la sogs pa'i nyes pa yod par thal bar 'gyur ro//'dir smras pa/ rtag 'gyur yul rnams kun ldan pa'i/ /skyes bu zhes ni ji ltar brjod/ /rgyu gzhan dag la ltos bcas na/ /de lta na ni ji ltar rtag /gang yang cung zad rtogs gyur pa/ /de kun brtan pa'i bdag can min/ /gal te bum ltar bdag mi rtag /de tshe ri bong rwa mtshungs 'gyur/ /don gyi bya ba nus pa gang / /don de dam pa'i don du yod/ /med cing skad cig par de gyur/ /rim dang rim pa min par 'gal/ /zhes bya ba la sogs pa'i rigs pa yin no/ /gzegs zan zhes bya ba ni drang srong chen po'o/ /shes pa zhes bya ba ni rtogs pa'i bdag nyid can te/gzhan gyi don gyi rang gi yon tan no/ /de bas na bdag ni gzhan yin gyi/ ji ltar grangs can gyis shes pa'i skyes bu'i rang gi gzugs su brtags pa de ltar ni ma yin no/ /khyab pa zhes bya ba ni thams cad khyab pa'o/ /yongs su brjod par bya ba ni shes pa dag las bdag de gzhan pa dang khyab pa yin par yongs su bshad do zhes bya ba'i don to//de yang 'di ltar drang srong chen po gzegs zan zhes bya ba bye brag pa'i bstan bcos rtsom pa po de 'di snyam du sems te/ gal te bdag rtogs pa'i rang bzhin can yin na ni mi rtag par thal bar 'gyur la/bdag ni rtag pa nyid du khas blangs dgos so/ /de bas na bdag ni shes pa'i gzugs can ma yin gyi/ shes pa ni rtogs pa'i bdag nyid can yin te/ des kyang yul la nye bar spyad nas yul gyi gzugs brnyan gyis skyes bur nye bar gnas la/ de yang khyab pa dang rtag pa yin pas 'dir nyes pa 'ga' yang med do zhes zer ro/ /khyod kyi zhes bya ba la sogs pa la/ gal te de ltar yin na de shes pa med pas shing dang 'dra bar thal bar 'gyur ro zhes gsung ngo zhes pa'i don te/ gang gi phyir gal te bdag gis cung zad kyang mi shes na/rtswa dang shing la sogs pas kyang cung zad kyang mi shes la/ de ltar yin na ni rtswa dang shing la sogs pa dang / bdag 'di yin no zhes phan tshun gcig gi khyad par 'ga' yang yod par mi 'gyur ro/ /'dir smras pa/ gal te mi shes bdag yin na/ /shing dang rtswa sogs ces mi 'dod//mi shes par ni mtshungs pa las/ /ji ltar cig shos sems med yin/ /bdag gi de nyid rtag yin na/ /de yi rtag pa ji lta bu/ /byed pa dang ni spyod pa dag /rtag par 'gyur ba ji ltar rigs/ /de la sogs pa'i nyes pa ni/ /gzhung 'dir yod par thal 'gyur bas//de phyir phyogs 'di'ang rigs pa ni/ /mkhas pa rnams ni khas mi len/ /zhes bya ba'o/ /gcer bu lus kyi tshad bzhin du/ /zhes bya ba la sogs pa la/ gcer bu zhes bya ba ni phyogs kyi gos can no/ /lus kyi tshad bzhin du zhes bya ba ni lus te gzugs kyi tshad yin pas na/lus kyi tshad bzhin du ste/ de dang ldan pa'o/ /de yang phra rab la ni shin tu phra rab yin la/ chen po la ni chen po yin no/ /srog ces bya ba ste lus thams cad khyab pa yin la/ lus de ni de'i za ma tog bzhin du gnas so/ /des na 'di zhum par gyur na/ de zhum par gyur na/'di rgyas par gyur na de rgyas par 'gyur ro/ /de yang zhum pa ni 'dus par gyur pa ste/ de gang la yod pa dang / chos pa ni brkyang bar gyur pa ste/ de ni srog dang / 'tsho ba dang / bdag ces bya ba yin no zhes zer te/ srog gam/ skye ba'am/ gso ba'am/ gang zag gam/skyes bu zhes bya ba ni rnam grangs so/ /smra zhes bya ba ni gcer bu pa'i ston pa de skad smra ba'o/ /de yang khyu mchog dang 'phel ba la sogs pa gcer bu zad byed kyi ston pa nyi shu rtsa lnga 'di skad ston cing smra'o/ /khyed kyis zhes bya ba la sogs pa la/ khyed kyis ni srog dang 'tsho ba de 'jig cing mi rtag pa yin par gsungs so //de ci'i phyir zhe na/ phyogs gcig phyir zhes bya ba smos te/ gang la phyogs gcig yod pa de ni phyogs gcig pa ste/ cha shas dang bcas pa zhes bya ba'i don to/ /phyogs cha med pa ni rdzas kyi dngos por mi rung ste/ phyogs dang bcas pa gang dang gang yin pa de ni mi rtag pa nyid de/ 'di ltar lus dang srog ni phyogs gcig par 'dod la/ de bas na 'di yang cha shas can ltar mi rtag pa yin te/ de dang phyogs gcig cig pa'i lus ni mi rtag pa yin no/ /rtag pa dang cha shas dang bcas pa ni ma rigs pas tshad ma dang 'gal ba yin no//'dir bsdus pa'i tshigs su bcad pa ni/ gal te phyogs gcig ji ltar rtag /rtag pa yin na phyogs gcig min/ /rdzas kyi 'brel pa rnam gnyis med/ /de bas gzhung 'di rigs ma yin/ /zhes bya'o/ /bram zes 'gro ba rnams kyi rgyu//zhes bya ba la sogs pa la/ bram ze zhes bya ba ni dzi mi ni la sogs pa dpyod pa ba la sogs pa'i bstan bcos mkhas pa rnams kyis zhes bya ba'i don te/ des ni rgyu skyes bu yin par 'dod do/ /gang gi rgyu zhe na/ 'gro ba rnams kyi rgyu zhes bya ba smos te/ 'jig rten ma lus pa'i 'o//de yang gang gi phyir lha sbyin gyi rgyud la yod pa'i skyes bu ni lha sbyin nyid kyi rgyu yin gyi/ mchod sbyin la sogs pa'i ni ma yin no zhes bya ba grub pa'i mtha'o/ /rgyu zhes bya ba ni 'byin par byed pa'i rgyu zhes bya ba'i don to/ /ji lta bu'i rgyu zhe na/ skyes bu rtag pa zhes bya ba smos te/skyes bu dang bdag ces bya ba ni don tha dad pa ma yin no/ /rtag pa zhes bya ba ni mi 'gyur ba ste/ gang gi phyir sa bon la sogs pa yang rgyur 'gyur mod kyi/ de ni rtag pa ma yin te/ des na khyad par des bye brag tu phye ba yin no/ /brtags zhes bya ba ni nan gyis 'dod pa'o/ / khyed kyis zhes bya ba la sogs pa la/ gal te rtag pa yin na ni rgyu ma yin la/ 'on te rgyu yin na ni rtag pa ma yin te/ rtag pa dang rgyu zhes bya ba ni 'bral pa med pa'i tshig yin no/ /'dir ni 'di ltar brjod par rigs te/ gang dang gang rgyu gyur pa de dang de ni mi rtag pa yin te/ dper na sa bon la sogs pa bzhin no//des na de rnams kyi rgyur 'dod pa'i skyes bu de ni mi rtag pa yin par shes par bya'o/ /gang yang rtag pa zhes bya ba'i rgyu ni yod pa ma yin te/ dper na nam mkha' la sogs pa bzhin no/ /rtag pa rgyu nyid yin na de rtag par 'gyur ba tshad ma dang 'gal ba nyid yin te/rtag cing mi 'gyur ba dang / rgyu nyid du gyur la rtag pa zhes bya ba de lta bu ni cung zad kyang yod pa ma yin te/ ci yang med ces khyod kyis gsungs pa yin no zhes bya ba'i don to/ /'dir smras pa/ rtag na gang gi rgyu nyid yin/ /mi 'jig na ni ji ltar rgyu/ rtag dang rgyu nyid ces bya ba//gnyis po gcig tu rigs ma yin/ /rgyu nyid du ni gang rtag par/ /'dod de de ltar rtag pa min/ /gang phyir de yi bya ba yod/ /rnam pa kun du rnyed mi 'gyur/ /gal te bya ba byed 'gyur la/ /gal te 'di ni mi byed na/ /de ltar yang ni mi rtag par/ /de ni nges par thal bar 'gyur//zhes bya ba'o/ /bdag nyid chen po dug can pa'i/ /zhes bya ba la sogs pa la/ 'di ltar rjes su thos te/ rlung thob dang sar ldan zhes bya ba'i lha ma yin spun gnyis shig yod de/ rlung thob ni thug po'i gzugs can du byas/ sar ldan ni mi'i cha lugs su byas nas drang srong rnams mgron du bos te/rlung thob bshas nas bsnyen bkur chen po dang / kha zas bstabs te/ de rnams kyis zos pa dang / sar ldan phyi rol du song ste/ bu rlung thob gang na gnas/ tshur shog ces sar ldan gyis bos pa dang / de'i rjes thogs nyid la gang dang gang gis zos pa de dang de'i gsus pa brtol te byung bar gyur to//bya ba 'dis drang srong gi rigs dang bram ze'i rigs lhag ma nyung zad cig lus par byas so/ /lha rnams kyi mchod sbyin byed pa yang zad par gyur to/ /de nas lha rnams 'dus te drang srong chen po a ga ta'i gnas su song ste lha ma yin de gnyis bsad pa'i don du gsol ba btab bo//ji tsam na de gnyis kyis de mgron du bos pas der zan zos pa dang / bu rlung thob gar song zhes sar ldan gyis bos pa dang / drang srong gis sgregs pa bton te/ de ni ngas zhu bar byas zin to zhes smras nas/khro bas 'khrugs pa dang sar ldan yang mngon sum du zos so/ /ji tsam na skom pa stobs dang ldan pas gdungs pa dang / mtsho dang rdzing bu la sogs pa gang dang gang dag yod pa de rnams 'thungs kyang ngoms par ma gyur to/ /de nas song ste rgya mtsho 'thungs pa las/ de'i tshe dug can pa zhes bya ba'i rgyal po zhig yod pa dang / de la chung ma gnyis yod pa las/ gcig la 'chol ba zhes bya ba'i bu yod la/ cig shos la lha chen po las mchog thob pas bu drug khri yod par gyur to/ /ji tsam na rgyal po rta'i tshil zhes bya ba'i mchod sbyin byed par rtsom par gyur nas sdom pa blangs te/mchod sdong la btags pa'i rta mchod sbyin gyi yo byad du sogs shing me thab kyi kha khyer la sogs pa byas nas rta de dag yongs su bsrung ba'i phyir/ bu drug khri thams cad go cha bgos shing mtshon cha'i khyad par du ma lag na thogs par byas nas bsrung du bcag go//ji tsam na khyab 'jug gis bsams pa/ rgya mtsho 'di thams cad skams par gyur na thabs gang gis 'di yongs su dgang bar bya/ ma la ngas rgyal po dug can pa'i mchod sbyin bya ba'i gnas nas/ rta brkus na rgyu 'di las nga'i don 'di 'grub par 'gyur ro snyam du bsams nas song ste/rta blangs nas sa 'og tu zhugs par gyur to/ /ji tsam na dug can pa'i bu rnams kyis gtam de thos pa dang / rgya mtsho bkros te sa 'og tu zhugs pa las khyab 'jug drang srong ser skya'i gzugs kyi cha lugs 'dzin pa/ seng ge'i khri'i steng na 'dug pa'i gan na rta thams cad 'dug par mthong ba dang /'dis 'di dag phrogs so snyam nas khro ba'i shugs mi bzad par gyur pas khyab 'jug la brnyas pa nyid kyis rta rnams khyer bar brtsams pa dang / des dug can pa'i bus brnyas par shes nas khro bas gdungs pa'i mig dag bltas pas thams cad thal bar byas so//de dag shi nas dmyal bar skyes pa dang / dug can pas ji ltar gyur pa de thos nas rta blang pa'i phyir 'chol pa btang ngo / /de song ste khyab 'jug bstod pa la sogs pa'i mchod pas mgu bar byas nas rta blangs te/ slar rang gi grong khyer du 'ongs nas rgyal pos kyang mchod sbyin gyi bya ba bar chad med pa nyid du byas so//rgyal po de dus byas nas lha'i gnas su skyes so/ /de nas 'chol pa rgyal por gyur te/ de'i bu myur ba zhes bya ba rgyal srid la dbang bskur ba dang / ji ltar bdag gi khu bo rnams rgyu 'dis dmyal bar skyes zhes thos kyis/de rnams kyi don gyi bya ba dug can pa'am/ bdag gi pha 'chol pas ci yang ma byas kyis/ dngas de'i dgos pa bya'o snyam nas gang+gA dbab par bya ba'i phyir/ lha'i lo sum khri'i bar du dka' thub spyad kyang des gang+gA dbab bar ma nus so//de 'das par gyur pa dang / de'i bu li pas gang+gA dbab par bya ba'i phyir lha'i lo sum khri'i bar du dka' thub spyad kyang des kyang ma nus so/ /de yang 'jig rten gzhan du song ba dang / de'i bu b+ha go ra thas dka' thub chen pos tshangs pa mgu bar byas pa dang /des de la mchog byin pa/ ci nas kyang ngas mi'i 'jig rten du gang+gA dbab pa de ltar bya'o zhes smras nas/ tshangs pas kyang gang+gA la mi'i yul du 'bab par gyis shig ces smras pa dang / de shin tu smre sngags 'don te/ ji ltar nga der song nas thun mong du 'gyur zhing / rigs ngan la sogs pa rnams kyis kyang bsten par 'gyur na/ gnas skabs 'di lta bu ji ltar spyad par bya/ mes po'i bka' las 'da' bar bya ba yang rigs pa ma yin no/ /'on kyang shugs chen pos song la/ sa 'og nyid du zhugs par bya'o snyam pa dang / ci khyod kyis mi'i 'jig rten du dag byed ma byas par sa 'og tu 'bab par byed dam zhes tshar bcad nas/lha chen pos rang gi ral pa'i tshogs kyi nang du bzhag par gyur to/ /de yang de nas 'byung ba la lha'i lo stong gi bar du 'khor zhing / 'bab kyang ral pa de'i mtha' rnyed par ma gyur to/ /de nas yang b+ha go ra thas dka' thub kyi khyad par chen pos lha chen po dga' bar byas nas/ral pa btsir ba dang / ri ti se'i steng du thigs pa gcig bab par gyur pa las skad cig ma gcig las der mtsho chen po gcig tu gyur te/ deng sang na yang thigs pa bdun du gyur nas/ si ta sin d+hu bak+Shu dang //gang+gA de bzhin 'jig rten rgyan/ /rgal dang tshim pa nyid dang ni/ /na li ni ni bdun par bshad/ /ces bya ba yin no/ /ji tsam na gang+gA lho phyogs kyi rgya mtsho chen po de 'da' bar bya'o snyam nas dregs pa dang bcas par ri kha ba can phug ste/ de'i sul nas bde bar 'bab par gyur to/ / yang de'i tshe drang srong dza na hu zhes bya ba dka' thub drag po can zhig yod pa de ri kha ba can gyi sul na rnal 'byor bsgom pa la brtson zhing gnas par gyur to/ /des kyang ca co'i sgra sgrogs shing sgeg pas dal gyi sa 'bab par mthong ba dang / shin tu khros par gyur te song nas smras pa/ nga yi gnas dang nye ba 'dir/ /bud med 'di ni sgeg pa yis/ /'dzem pa med par ci phyir 'gro/ /spyod ngan sdig pa chen po yin/ /zhes smras te/ de blangs nas 'thungs so/ /yang b+ha go ra thas drang srong de dka' thub kyis mgu bar byas pa dang / des skyugs so/ /de de nas byung nas gegs med par phyogs bzhir song ste/sa 'og gang bar byas nas dug can pa'i bu dang 'brel pa'i gnas skabs kyi lhag ma rnams rnam par bkrus la/ des kyang de rnams dmyal ba las 'phos te mtho ris su skyes so zhes zer ro/ /de ltar na dug can pa'i bu stong phrag drug cu bsregs so zhes bya bar sbyar ro//bdag nyid chen po zhes bya ba ni bdag nyid che ba nyid yod pas na bdag nyid chen po zhes bya ste/ shin tu longs spyod che ba la sogs pa'i yon tan dang ldan pa'o/ /de su zhig yin zhe na/ dug can pa zhes bya ba ste/ rgya mtsho zhes bya ba'i rgyal po la dug can pa zhes bya ba'o//su zhig ce na/ sras po stong phrag drug cu dag /ces bya ste/ de'i bu drug khri'o/ /gang gis she na/ ser skyas zhes bya ste/ ser skya'i gzugs su gnas pa'i khyab 'jug gis zhes bya ba'i don to/ /ji ltar zhe na/ bltas pa tsam gyis zhes bya ste/ khro bas gdungs pa'i mig gnyis kyis so zhes ston pa yin no//ci zhig du byas she na/ bsregs zhes bya ba ste/ thal bar byas pa'o/ /de la'ang zhes bya ba ni rgya mtsho'i bu stong phrag drug cu la'o/ /yang na de la zhes bya ba ni srog dang bral bar byed pa de la'o/ /khyod ni thugs rje mdzad ces bya ba ni/des khyod dgos pa mdzad pa'i thugs skyes par gyur pa'o/ /de yang de bzhin gshegs pa ni thugs rje chen po nyid kyi rgyud las nam yang mi 'dor te/ ji skad du/ thugs rje'i thugs la gnas shing rtag tu zhi ba nyid ni spyan la gnas/ /bzod pa'i skad cig tsam yang khyed dang bral bar nus pa ma yin la//de ni shin tu mdzes pas yun ring thugs ni rnam par mkhyud par gyur/ /'on kyang khyed ni 'dod chags bral ba lta bur grags pa rnam par rgyas/ /zhes bstod pa byed pa 'ga' zhig gis bshad pa yin no/ /ser skya de nyid rig pas ni/ /zhes bya pa la sogs pa la/gtso bo las grol ba ma lus pa skye'o zhes drang srong ser skyes bshad pa yin no/ /de yang 'di ltar thos te/ bskal pa dang po'i tshe skye dgu rnams kyi tshe lo tshad med pa na/ bram ze ser skya zhes bya ba zhig byung ste bsti gnas kyi gnas su 'dug nas dka' thub kyi khyad par las thar pa 'ba' zhig pa thob ste/gzhan dag la lam legs par bstan pa'i phyir bstan bcos dag byas so/ /de yang des rtsa ba'i dngos po'i don gnyis shig bstan te/ 'di ltar gtso bo dang skyes bu'o/ /de la gtso bo ni yon tan gsum ste/ snying stobs dang / rdul dang / mun pa'i gzugs kyis byed pa po dang / yongs su 'gyur ba dang / sems med ces bya ba yin la/ skyes bu ni shes pa can dang / spyod pa po dang / rtag pa dang cha mnyam pa'o/ /ji ltar na gtso bo byed pa por bshad ce na/ snying stobs dang / rdul dang / mun pa'i yon tan cha mnyam pa'i gnas skabs yan lag dang / yan lag can du gyur pa'i gnas skabs ni gtso bo'o/ /yang gang gi tshe gsum po las gang yang rung ba cung zad tsam rtsol bar gyur cing mi gsal ba nyid yin pa de'i tshe ni chen po zhes bya'o/ /de las kyang cung zad sbom pa nga rgyal dang /de tsam du yongs su gyur pa las 'gyur ro/ /nga rgyal las yang dbang po bcu gcig tu rnam par 'gyur bar 'gyur te/ mig dang / rna ba dang / sna dang / lce dang / lus zhes bya ba'i blo'i dbang po lnga dang / lag pa dang / rkang pa dang / ngag dang / rkub dang / mdoms te las kyi dbang po lnga dang / yid do/ /de tsam lnga las 'byung ba chen po lngar yongs su 'gyur te/ sgra'i de tsam las ni nam mkha'o/ /reg pa dang 'dres pa'i sgra las ni rlung ngo / /gzugs dang 'dres pa'i snga ma gnyis las ni me'o/ /ro dang 'dres pa'i snga ma gsum las ni chu'o//dri dang 'dres pa'i snga ma bzhi las ni sa'o/ /de ltar byas na de kho na nyid nyi shu rtsa bzhir 'gyur ro/ /skyes bu ni nyi shu rtsa lnga pa'o/ /gang gi tshe 'di ni yon tan yin no/ /'di ni skyes bu yin no zhes khyad par mi shes pa de'i tshe/ skyes bu dang yon tan 'dus par 'gyur te/ dper na mtshan mo mun nag gis khyab pa'i khang pa'i nang du skyes bu 'dod chags can dang /bud med mdze can dga' ba dang bcas pas 'dug par gyur pa dang 'dra la/ gang gi tshe yon tan dang tha dad par byed pa po dang / yongs su 'gyur ba po nyid du shes pa de'i tshe/ skyes bu 'di nam yang de dang lhan cig 'dris par mi byed de/dper na nyin mo mig dang ldan pa'i skyes bu bud med mdzes can la reg par mi byed pa dang 'dra'o/ /yon tan dang skyes bu tha dad par mthong ba ni thar pa thob pa'i rgyu yin no zhes bya ba ni grangs can gyi grub pa'i mtha'o/ /ser skya ji lta bu zhig /de skad ces smra zhe na/de nyid rig pas zhes pa smos pa yin te/ de kho na nyid kyi sgra ni 'dir nyi shu rtsa lnga po yin par bshad la/ de rnams shes pas na de nyid rig pa ste/ de nyid rig pa ni mkhas pa zhes bya ba'i don to/ /khyod kyi 'gro ba'i skye ba ni/ /zhes bya ba la sogs pa la/ las dang nyon mongs pa ni nyon mongs pa dang las te/de las byung zhing skyes pa gang yin pa de la de skad ces bya ste/ gang gi phyir skye ba ni nyon mongs pa las 'jug pa yin pa'i phyir ro/ /de yang gnas brtan rta skad kyis/ nyon mongs zad pas srid pa'i 'ching ba med/ /las zad gyur na sdug bsngal yod ma yin/ / gang phyir yod las byung ba'i don gang yin/ /de phyir med las de ni slar mi 'byung / /zhes bshad pa yin no/ /gang zhig nyon mongs pa dang las byung ba yin zhe na/ 'gro ba'i zhes bya ba smos te/ 'chi ba dang ldan pas na 'gro ba zhes bya ste/ sems can gyi 'jig rten no/ /de'i skye ba ni nyon mongs pa dang las las byung ba yin par khyed kyis gsungs shing bsgrags pa yin no//'dir smras pa/ nyon mongs med la 'gro ba rnams/ /skye bar gang du'ang 'dod ma yin/ /las ni gang yang rung med par/ /bde dang sdug bsngal 'byung mi 'gyur/ /dgra bcom nyon mongs yod pa ma yin te//de med las kyang yod pa ma yin la/ /de las 'di la skye ba yod min te/ /sa bon med pa'i myu gu dag dang mtshungs/ /zhes bya ba la sogs pa gsungs pa yin no// //ser skya la sogs thar pa yis/ /zhes bya ba la sogs pa la/ ser skya la sogs pa'i bdag nyid gang yin pa de thar par yang gnas shing /srid pa'i rgyu yin par 'dod do zhes zer ro/ /de yang skyes bu rtag par yang 'gyur la/ sngar lus dang dbang po 'dus byas par gyur pa gang yin pa de phyis kyang byed par 'gyur ro/ /de yang skyes bu rtag pa nyid gyur cing //lus dang dbang po 'byor ldan pa/ /phyis kyang de dang 'drar gyur pa/ /rkyen las gyur par the tshom med/ /ces bya ba la sogs pa smos pa yin no/ /khyod ni zhes bya ba la sogs pa la/ /zhi bar gshegs gyur nas zhes bya ba ni phung po lhag ma ma lus pa'i dbyings brnyes pa zhes bya ba'i don to//zhugs gum lta bur zhes bya ba ni mar me shi ba lta bur zhes bya ba'i don to/ /bgrang du med ces bya ba ni/ grangs su mi 'gro ba'o/ /mu stegs byed pa kha cig ni zhes bya ba la sogs pa la/ mu stegs ni thar pa dang mtho ris kyi lam ste/ de ston par byed pa'i bstan bcos la mu stegs zhes bya la/de byed pa yin pas na mu stegs byed pa'o/ /des thar pa ste mya ngan las 'das par 'gro ba dang ldan pa'o/ /'gro ba ni song ba yin la de gang la yod pa de ni 'gro ba dang ldan pa ste/ 'gro bas thob pa zhes bya ba'i don to/ /smra zhes bya ba ni gtam yin par ston to//smra ba zhes bya ba ni brjod pa ste/ sngar ji ltar/ ne tsos nyi ma brtol nas ni/ /thar pa mchis par bshad ces grag /ces smos pa'i skabs su bshad pa yin no/ /gang la 'gro yod de 'khor ba/ /zhes bya ba ni gnas gang du 'gro ba yod pa de ni 'khor ba ste/srid pa yin no/ /de yang gang gi phyir 'gro bas mya ngan las 'das pa rtogs pa ni med do/ /bcom ldan 'das kyis kyang / rta dmar gang du skye ba med pa dang 'chi ba med pa dang / 'byung ba med pa de ni 'gro bas thob par nga mi smra'o zhes mdo las ji skad gsungs pa lta bu'o/ /khyod kyis thugs su chud nas bstan//zhes bya ba ni/ bcom ldan 'das kyis mkhyen cing thugs su chud nas bstan cing bshad pa yin no zhes bya ba'o/ /gcer bu kun dga' ra ba sogs/ /zhes bya ba la/ gcer bu zhes bya ba ni dge sbyong gcer bu pa rnams so/ /'di kun du dga' bas na kun dga' ra ba ste/skyed mos tshal la sogs pa gang yin pa de ni kun dga' ra ba sogs zhes bya ste/ khrus kyi rdzing bu la sogs pa'o/ /rtsig pa zhes bya ba ni 'bad pas mngon par sgrub par byed pa zhes bya ba'i don to/ /sdig pa'i rgyu zhes bya ba ni nyes par spyad pa'i rgyu zhes bya ba'i don to/ /gang gi phyir de rnams rgyu med par sdig pa khas len cing rtog la smra bar byed pa'o//de yang / kun dga' ra ba gnas byed dang / /srog gcod pa las bzlog par bya/ /gal te der ni srog chags 'chi/ /sdig pa byed de byed la 'go/ /sems dang ldan pa de 'chi bas/ /sdig pa chen po nyid du 'gyur//de bas bsod nams rtsom pa dag /de yis de ltar mi bya'o/ /zhes bya ba la sogs pa mang du smra ba yin no/ /thams cad mkhyen pa zhes bya ba la sogs pa la/ thams cad mkhyen pa zhes bya ba ni bod pa yin no/ /de nyid ces bya ba ni kun dga' ra ba la sogs pa rtsig pa'o//bsod nams rgyu zhes bya ba ni bsod nams nye bar bsags pa zhes bya ba'i don te/ gal te 'jug par mi bya ba'i las la 'jug na de las nyes pa ni shin tu mang po 'byung bar thal bar 'gyur ro// //srog chags 'gro ba bsad pa na/ /khyed kyi yang ni sdig 'gyur te/ / khyed ni 'gro ba med 'gyur na/ /srog chags gsod pa yod ma yin/ /gal te yod na sdig ldan pas/ /ji ltar grol ba nyid du 'gyur/ /grol 'gyur de dang ji ltar ldan/ /sdig pa bsags las khyed grol lam/ /'on te sdig pa spangs pa dag /thar pa kun du bshad pa yin/ /blo ni sngon du ma song sdig /yod ces pa ni legs smras min/ /kha zas bsod pa dag gis ni/ /dga' bas slob dpon tshim byas nas/ /ma zhu pa yis de shi na/ /sdig pa nye bar bsags pa 'byung / /chags pa med par dben pa ru/ /las byed pa ni ma mthong ngo / /zhes bya ba la sogs pa yin no//yang bcom ldan 'das kyis/ kun dga' ra ba nags tshal skyed/ /skye bo gang zhig zam pa byed/ /chu gter khang dang chu mig dang / /gang zhig ngal so'i gnas ster dang / /zhes bya ba dang / de bzhin du/ brgya byin gtsug lag khang gi phyir/ /sa ni sbyin pa gtong byed pa//tshangs pa'i bsod nams rab skyed de/ /mtho ris dag tu bskal par dga'/ /zhes bya ba la sogs pa mdo las gsungs pa yin no// //lus las lus gzhan dag tu ni/ /zhes bya ba la sogs pa la/ lus las zhes bya ba ni rga ba la sogs pa'i nye bar 'tshe bas gdungs pa las so//lus gzhan dag tu ni zhes bya ba ni lus gzhan pa dag tu 'pho zhing song ba'o/ /ci zhig ce na/ srog ni zhes bya ba ste/ bdag dang skyes bu zhes bya ba'i don to/ /srog de ji lta bu zhe na/ phra ba zhes bya ba smos te/ shin tu phra zhing dbang po'i yul las 'das pa'o//de yang khyab 'jug gis/ dper na gos rnying dag ni bor nas su/ /sar pa gzhan dag mi ni len par byed/ /de bzhin lus ni rnying pa spangs nas su/ /lus gzhan sar pa dag ni len par byed/ /'di ni mtshon gyis mi chod cing / /'di ni me yis mi 'tshig la//chu yis 'drul bar mi 'gyur te/ /'di ni rlung gis skems mi 'gyur/ /zhes bya ba la sogs pa ji skad bshad pa lta bu'o/ /grag ces bya ba ni 'jig rten pa'i gtam tsam yin par ston te/ de yang don dam par ni bdag med do/ /gal te bdag yod na rtag pa dang mi rtag pa nyid du 'gyur bas bde ba la longs spyod pa na/rtag par nye bar spyod kyi/ sdug bsngal la sogs pa'i nyes pa rnams su thal bar mi 'gyur ro/ /de bas na bdag ni rnam pa thams cad du med do/ /lus gzhan gyur pa'i zhes bya ba ni lus zhes bya ba'i sgras 'dir phung po lnga nyid bdag gi dngos por brjod la/lus de las gzhan du gyur cing tha dad pa'i srog ces bya ba'i bdag yod pa ni ma yin pa nyid du khyod kyis gsungs so zhes sbyar te/ sangs rgyas bcom ldan 'das kyis bka' stsal pa'o/ /de yang chos thams cad ni srog med pa dang /gso ba med pa dang / gang zag med pa zhes bya ba nas/ 'du byed kyi tshogs 'ba' zhig tu zad do zhes bya ba'i bar du gsungs pa dang / bdag gi nga rgyal rnam par bzhag nas gang du bdag de'i phung po lnga'i bdag gi dngos por gyur pa de tsam la nye bar gdags pas bdag nyid kyi dngos por bcom ldan 'das kyis la lar gsungs pa yod do//khros pas g.yul ngor bsad na ni/ /zhes bya ba la sogs pa la/ khros pas zhes bya ba khro ba nyid du gyur pas so/ /g.yul ngor te 'thab sar bsad pa'i skyes bu bde 'gror 'gro bar 'gyur ro zhes rgyas pa zer te/ de yang 'di skad du/ sna tshogs rgyan gyis brgyan pa yi/ /lha yi bu mo 'ongs nas ni/ /g.yul ngor bsad pa yongs 'khyud de/ /lha yi khyim du 'khyer par 'gyur/ /zhes zer ro/ /mgon po khyod kyis zhes bya ba ni bod pa'o/ /gnas skabs de'i zhes bya ba ni gnas skabs de nyid kyi sems te/sems de lta bus shi ba ni ngan 'gro nyid yin no zhes gsungs shing bka' stsal pa yin no/ /de yang / skal ngan khros nas shi bar gyur pa ni/ /'jig rten gzhan du ngan 'gror mkhas pas bshad/ /re zhig 'dir ni grags par mi 'gyur zhing / /'jig rten pha rol du yang bder mi 'gyur//zhes gsungs pa yin no// //skya bseng bu ni brjod byas na/ /zhes bya ba la sogs pa la/ 'di ltar thos te/ rgyal po skya bseng ri dgas la chas pa dang / de'i tshe drang srong ngan 'dul zhes bya ba zhig ri dgas kyi gzugs su gyur nas ri dgas mo dang lhan cig 'dod pa'i dga' ba nyams su myong bar gyur pa na/skya bseng gis ngo ma shes te mdas bsnun pa dang / de'i rjes thogs nyid la drang srong de rang gi gzugs su gnas te/ khro ba'i dbang gis ji ltar khyod kyis nga dga' ba spyod pa na/ dga' ba nyams su ma myong ba nyid du 'jig rten gzhan du 'gro bar 'gyur bar byas pas khyod kyang de bzhin du 'chi bar gyur cig ces dmod pa btab bo//drang srong gi chung mas kyang bdag nyid drang srong de shing gi phung po chen po'i steng du 'dzegs te/ khyod kyi chung ma yang khyod shi nas bsreg pa'i shing brtsigs pa la 'dzeg par gyur cig ces dmod pa'i tshig smras so//skya bseng la ma dri dang kun dI zhes bya ba'i chung ma gnyis yod pa dang / rgyal po dmod pa'i 'jigs pas de dang lhan cig spyod par byed ma nus so/ /de'i tshe kun dIs bsams pa/ ngas ni drang srong gnas ngan las rig sngags thob la/ des nga'i mngon par 'dod pa cig ni bsgrubs zin mod kyi/ des ni da dung yang lan bzhi'i bar du 'dod pa'i don byed par 'gyur gyis/ gal te rgyal pos gnang na de'i tshe ngas bu skyed pa'i bya ba bya'o snyam mo/ /rgyal po yang thabs gang gis nga la bu yod par 'gyur snyam du sems so//de nas dben par song ste rgyal po la don de smras pa dang / de thos pas rgyal po dga' ste/ de la rjes su gnang ba byin no/ /de khang par zhugs nas rig sngags bzlas nas chos zhes bya ba'i lha nga dang spyad pa'i phyir shog cig ces smras pa dang / ji tsam na chos 'ongs te de dang lhan cig 'dus pa las g.yul ngor brtan pa zhes bya ba'i bu skyes so//de bzhin du rlung lha bkug ste 'dus pa las 'jig sde'o/ /de bzhin du brgya byin bkug ste 'dus pa las srid sgrub skyes so/ /ji tsam na ma dri bu med las mya ngan gyis yid gdungs te/ nga ni 'chi bar bya'o zhes smra zhing mya ngan byed la/zhum pa'i tshig gis kun dI la gsol ba btab pa/ rig sngags de nga la lan cig byin cig /gal te na bdag la yang bu skye bar 'gyur ro zhes smras pa dang / de skya bseng la dris te rig sngags de byin no/ /des kyang rig sngags bzlas nas lha'i sman pa tha skar gnyis bkug ste/de gnyis dang 'dus pa las lhar bcas dang / ku na la zhes bya ba gnyis mtshe mar dus gcig tu skyes so/ /ji tsam na skya bseng gis sa chen po las rgyal bar byas te/ yul 'khor srung la byin nas/ bdag nyid dang / chung ma gnyis dang / bu yang khyer te/ri bo rtse mo brgya par song nas tshangs par spyod pa la brtson par gnas pa na/ de yun ring por tshangs par spyod pa spyad pa dang / ma dri'i gzugs sdug pa mthong bas 'dod pa'i 'dod chags skyes te/ kho bo shi ba ni bla'i 'di dang lhan cig dga' ba nye bar longs mi spyod pa ni de lta ma yin no snyam nas/de dang lhan cig tu spyod par brtsams pa dang / de'i tshe nyid dus las 'das par gyur to/ /ji tsam na bsti gnas de na drang srong chen po gang dag yod pa de dag thams cad sdug bsngal bar mthong bas mgon med par gyur pa'i ro dang / ma dri dang / kun dri dang / bu lnga po khyer te yul 'khor srung gi gan du phyin nas/ de dang ji ltar 'tsham pa'i bsreg shing brtsigs te/ bsnyen bkur chen pos steng du bzhag nas/ skya bseng la yul 'khor srung gis mchod do/ /ma dris kyang bu gnyis kun dI la gtad de/ ro bsregs sar bdag nyid dor ro/ /de nas ji tsam na 'thab dka' la sogs pa dang /g.yul ngor brtan pa la sogs pa 'phong slob pa'i gnas su lhan cig tshogs te/ kri pa dang kro na la sogs pa'i mtshon cha'i thabs kyi rig pa slob pa nas/ rna can las 'khon gcugs su gyur te/ skya bseng gi bu lnga rgya skyegs kyi khang par bcug pa dang /de nas mtshan mo bros nas srin po hi dim pa bsad de/ de'i sring mo 'jigs sdes blangs nas de las bu bum skra zhes bya ba skyes so/ /de nas song ste grong khyer 'khor lo gcig par song ba dang / de'i lam khar rgyas pa dang phrad nas/ dbugs phyung ste/ rgyal srid dang chung ma thob pa'i mchog byin no//de nas grong khyer der phyin nas bram ze zhig gi khyim du lo bzhi 'dug ste/ de la phan par bya ba'i phyir srin po chu skyar zhes bya ba bsad nas grong khyer lnga len du song ste/ rgyal po rnams khyo gdam pa'i skabs su tro pa ti zhes bya ba'i chung ma thob pa dang / spun lngas spyir blangs nas lo gcig 'dug ste/dbang po'i gnas zhes bya bar song nas rgyal srid thob bo/ /lo nyi shu rtsa dgu'i bar du rgyal srid byas nas/ rgan pos sbyar ba zhes bya ba la sogs pa'i rgyal po bsad de/ mchod sbyin byas nas/ 'thab dka' dang / g.yul ngor brtan pa la sogs pa cho los rtse ba dang /sgyu thabs kyis pham par byas te/ rgyal srid nas bdag nyid kyi bar du skugs la shor to/ /yang lo bcu gnyis kyi bar du nags su gnas par byas nas slar 'ongs te grong khyer bi ra tar lo gcig gnas nas/ 'jigs sdes ki tsa ka bsad do/ /de nas ku ru k+She tra ra 'thab mo la zhugs pa'i bar du sbyar te/'thab dka' can na dpung tshogs bcu gcig /skya bseng la bu bdun te/ de thams cad g.yul ngor shi nas g.yul ngor brtan pa rgyal por gyur te/ lo sum cu rtsa drug gi bar du rgyal srid byas nas ji srid na khyab 'jug lha yul du song ste/ yul 'khor srung dang /skya bseng gi bu thams cad dang / chos zhes bya ba'i lha khyir skyes pa de dag thams cad kyang dus las 'das par gyur to/ /'dir chos zhes bya ba'i lha ji ltar khyir skyes pa'i gtam bri bar bya ste/ drang srong brgyan pa zhes bya ba zhig bsti gnas zhig na dka' thub kyi 'byor pas gnas par gyur to//yang ji tsam na de dang thag mi ring ba zhig na grong khyer chen po zhig yod pa de las rkun po rnams kyis rdzas brkus te/ bsti gnas de'i nags kyi tshang tshing du zhugs nas gnas bcas pa dang / rgyal po'i skyes bu mang po 'ongs te/ de dag gis drang srong la smras pa/khyed kyis rkun po 'ga' zhig mthong ngam/ des kyang ma mthong ngo zhes smras so/ /de nas rgyal po'i skyes bu rnams kyis nags kyi tshang tshing du btsal ba dang / rkun po rnyed de bzung nas 'ongs te drang srong 'di ni 'di rnams kyi sbed mkhan yin no zhes bzung nas rgyal po la phul lo/ /ji ltar gyur pa yang smras so//rgyal po yang 'di ni nyes pa dang bcas pa'o zhes khros nas gsal shing la bskyon pa'i phyir/ de gsod ma pa rnams la gtad do/ /de rnams kyis drang srong gsod sar khyer te/ der seng ldeng la sogs pa'i shing bsdus pa dang / de dag thams cad bros shing mi snang bar gyur to//de nas sbar ma'i shing khyer te 'ongs pa dang / de ma bros so/ /de nas gsod ma de rnams kyis gsal shing btsugs nas de la drang srong bskyon no/ /ji tsam na shing de las 'dab ma skyes nas des kyang drang srong de'i lus kyi 'og nas phug ste skyes pa dang / rgyal po yang der 'ongs nas drang srong 'di la ni nongs pa med pa zhig go snyam nas gsal shing de las phab bo/ /de yang khros pas chos kyi gan du song ste/ khyod gnas bzhin du chos ma yin pas yun ring por kho bo sdug bsngal bar gyur te/ shin tu mi rigs par byas kyis/ 'di la gcig tu legs par rtogs shig /kho bos mi rigs pa ci zhig byas zhes smras pa dang / chos kyis smras pa/ 'di ni nges par khyed nyid kyis nyes pa yin te/ gang gi phyir khyed kyis skye ba gzhan dag tu sbrang ma la rtswa shing gi tshal pas lus kyi smad nas phug ste/ mchu'i rtse mor phyung nas gyen du 'phen pa byas pas na de las 'bras bur gyur pa 'di yin no zhes smras pa dang /drang srong de khros te kho bo nyid kyi nyes par bkal gyis/ chos la dmod pa gdab par bya'o snyam nas/ gang gi phyir kho bo bram ze'i drang srong yin pa las shin tu gnod pa byas pas khyod gnod sbyin du gyur cig /gang gi phyir nga'i kun du spyod pa'i bya ba mi shes pas dmangs rigs su gyur cig /gang gi phyir kho bo la skye bo dam pa ma yin pa'i spyod pa byas pas khyir skye bar gyur cig ces bya ba'i drang srong gi dmod pa 'dis chos 'dzam bu'i gling du babs te/ de las re zhig dmangs rigs ni be+e du ra'i yul 'khor srung gi spun zlar skyes so//'dod pa can zhes bya ba'i dgon par drang srong rtsa'i thig le'i bsti gnas dang nye bar gnod sbyin du skyes so/ /khyi ni 'dir skabs su bshad pa yin no/ /de nas ni yang tshe 'phos te lhar skyes so/ /de ltar na skya bseng gi bu de rnams kyi ming brjod pa byas pas kyang bsod nams chen po bsags pa dang ldan par 'gyur ro zhes so so skye bo dag smra'o zhes 'jig rten na thos so//de yang / mkhas pas skya bseng rnams kyi ni/ /ming ni bzung ba tsam gyis kyang / /bsod nams che dang ldan par ni/ /'gyur ba nyid du the tshom med/ /ces zer ba yin no/ /brjod byas na zhes bya ba ni/kun du brjod cing ming 'dzin la de dang ldan pa'i gtam brjod pas zhes bya ba'i don to/ /gang brjod pas she na/ skya bseng bu ni zhes bya ba smos te/ rgyal po skya bseng gi bu yin pas na skya bseng gi bu ste/ g.yul ngor brtan pa la sogs pa'o/ /bsod nams 'gyur zhes bya ba ni bsod nams la sogs par 'gyur ro zhes rgyas pa smra'o//ci thams cad kyi brjod pas sam/ 'on te re re'i brjod pas she na/ so so'i zhes bya ba smos te/ re re nas zhes bya ba'i don to/ /gang zhig bgrod min bgrod byed pa/ /zhes bya ba la/ spun zla'i chung ma ni bgrod par bya ba ma yin pa ste/ de la gang zhig bgrod pa de dag ni khyed kyi bstan pa la shin tu smad pa yin pas na de dag ni bgrod min bgrod pa'o// //skem byed dbang po nye dbang po/ /zhes bya ba la sogs pa la/ skem byed ni smin drug gi bu'o/ /dbang po ni brgya byin no/ /nye dbang ni nor lha'i bu'o/ /drag po ni dbang phyug chen po'o//sogs kyi sgras ni 'dod pa'i lha dang / tshogs kyi bdag po la sogs pa gzung ngo / /'jigs pa ni bdag nyid skrag pa'o/ /bsdigs pa ni pha rol la 'tshe ba ste/ de dag gi phyir lag na mtshon cha rtag tu thogs pa ste/ 'di ltar skem byed ni mdung thung / dbang po ni rdo rje/ nye dbang ni 'khor lo/ drag po ni rtse gsum/ 'dod pa'i lha ni mda' gzhu/ tshogs kyi bdag po ni dgra sta 'dzin pa la sogs pa'o/ /de dag 'jigs pa dang / bsdigs pa'i lo rgyus kyang / gong du/ rgan pos khyab 'jug mda' yis bsnun/ /zhes bya ba dang / lha chen 'dod pa can gyi mtshan//zhes bya ba dang / rna can 'thab dka' la sogs pa/ /zhes bya ba dang / khyab 'jug dag ni nag bkra bos/ /zhes bya ba la sogs pa dang / 'og nas kyang / gzhon nu rang gi zhang po la/ /zhes bya ba dang / rgan pos sbyar ba'i 'jigs shes pas/ /zhes bya ba dang / khyab 'jug gis ni gnyen 'dun dag /ces bya ba la sogs pa'i skabs su bshad pa nyid yin no/ /dpa' bo chen po khyod ni bsnyengs pa dang bral ba ste/ bdag nyid la do zla med par mkhyen pas 'jigs pa dang bral la/ sdigs par mi mdzad pa ni thugs rje chen pos rgyud gang bas gzhan la gnod pa mi mdzad pa ste/skyes pa'i rabs sna tshogs las ji ltar 'byung ba nyid 'dir sbyar bar bya'o/ /khyod ni sus kyang mi bsnyengs pa/ /zhes bya ba la sogs pas ni de nyid bshad pa yin te/ khyod ni zhes bya ba ni bde bar gshegs pa'o/ /mi bsnyengs pa ni 'jigs pa dang / bag tsha ba med pa'o/ /gang gis mi 'jigs she na/ sus kyang ste/ 'jig rten na mngon par mtho bar rlom pa dge sbyong dang / bram ze dang / bdud dang / tshangs pa la sogs pas 'jigs par mi 'gyur ba ste/ 'jigs pa'i rgyu ma lus pa spangs pa'i phyir ro/ /gal te rang nyid la gnod pa med cing kha btsan pa dag phal cher gzhan la gnod cing /gdung ba skyed pa yin par 'jig rten na mthong ngo snyam na/ kho bo cag gi ston pa 'di la de lta bu mi mnga'o zhes ston pa ni/ su la'ang bsdigs par mi mdzad pas zhes pa ste/ de'i phyir bde bar gshegs pa khyod nyid gcig pu rtse gsum la sogs pa'i mtshon cha rnams mi bsnams pas dbang phyug la sogs pa'i 'gro ba rnams las khyad par du 'phags so zhes bya ba'i don to//'dir smras pa/ gal te dbang phyug la sogs pa dag kyang / mtshon cha thams cad spangs te/ dgon par dka' thub spyad pa dag kyang thos la/bde bar gshegs pa nyid kyang res 'ga' gnod sbyin dang srin po'i cha byad du bsgyur nas mtshon cha bsrel zhing gzhan dag tshar gcod par thos te de dag mtshungs pa ma yin nam zhe na/ mi mtshungs te/ dbang phyug dang / khyab 'jug la sogs pa dag ni rang bzhin gyi lus la nyon mongs pa brnag par ma nus pa'i spyod pa yin par kho rang gis tshad mar khas blangs pa'i rig byed kyi cha dag las byung la/sangs rgyas bcom ldan 'das ni gzhan gdul ba'i phyir sprul pa'i lus las snying rje'i stobs kyis bcos te/ zhe sdang la sogs pa dang 'brel pa'i spyod pa lta bur ston pa yin pas ga la mtshungs/gal te dbang phyug la sogs pa'ang sprul pa'i lus kyis nyon mongs pa dang 'brel pa lta bur ston pa yin gyi/ rang bzhin gyi lus ni nyon mongs pa zhi ba nyid yin no snyam na de lta yin na mi brtsad mod kyi/ 'on kyang khyed rang gi gzhung las/ dbang phyug chen po'i rang bzhin gyi lus nyid kyis tshangs pa bsad pa dang /khyab 'jug gi zhe sdang gi bsam pas sgra ngan brlag par byas so zhes 'byung ba la sogs pa rnams dang 'gal bar 'gyur ro/ /smra po nyon mongs bcas pa'i tshig /ces bya ba la sogs pa la/ smra po ni rjod par byed pa po'o//de nyid nyon mongs bcas pa ste/ rang gi phyogs la mngon par zhen cing / gzhan gyi phyogs la zhe sdang la/ thams cad du bdag tu 'dzin pas gzir ba'i nyon mongs pa gsum dang rjes su 'brel ba gang yin pa'o/ /des byas pa'i dag ni de'i tshig ste/ rig byed la sogs pa'o//de nyid rig byed la sogs pa'ang yin la/ tshig kyang yin pas rig byed la sogs pa'i tshig ste/ nges brjod la sogs pa'i rig byed do/ /sogs kyi sgras rgyas pas sbyar ba'i skya bseng gi rabs dang / grog mkhar gyis sbyar ba'i dga' byed kyi 'jug pa la sogs pa gzung ngo / / gal te skya bseng gi rabs la sogs pa dag skyes bus byas pa'i tshig nyid yin du chug kyang / rig byed ni nyes pa thams cad kyi rgyu skyes bus ma byas pas skyes bu'i tshig ga la yin snyam na/ 'di ni ches ma 'brel te/ 'di ltar rig byed kyang skyes bu'i tshig yin te/ skyes bu'i 'du byed pa las byung ba'i phyir/dper na dga' byed kyi 'jug pa bzhin zhes bya ba la sogs pas shes par nus te/ 'di'i spros pa re zhig gzhag go/ /phal cher ltag 'og 'gal ba lags/ /zhes bya ba la/ phal cher ni mang po zhig go/ /ltag 'og 'gal ba ni gong 'og gi tshig phan tshun gnod pa yod pa ste/de'i rgyu 'chad pa po nyon mongs pa dang bcas pa yin par dgongs so/ /khyod kyi gsung la 'gal ba med do zhes bar gyi tshig mi mngon pa'i bsdu bar sbyar te/ dper na zho'i bum pa zhes bya ba lta bu'o/ /'gal ba med par cis mngon zhe na/ thams cad mkhyen pa'i gsung zhes smos te/nyon mongs pa dang / shes bya'i sgrib pa zad pas shes bya thams cad la dbang 'byor ba brnyes pa'i gsung yin pa'i phyir zhes bya ba'i don to/ /gzhan gyi bstan bcos gzhan dag ni/ /zhes bya ba la/ gzhan gyi bstan bcos ni ser skya dang / gzegs zan la sogs pas bshad pa'i grangs can dang / rigs pa can la sogs pa'o/ /gzhan dag ni gzhan ji snyed pa de dag thams cad ces bya ba'i don to/ /phal cher snga phyi'i 'gal ba lags/ /zhes bya ba ni 'di ltar gtso bo rtag par 'dod la/ de nyid thams cad kyi rgyur yang 'dod pa lta bu ste/rtag pa rgyur 'gyur ba shin tu 'gal ba dang / rigs pa can ni bdag bems po yang yin la/ yul la longs spyod pa po yang yin no zhes zer ba dang / rig byed pa ni rig byed dag gi 'du byed pa'ang yin la/ skyes bus ma byas pa yang yin no zhes 'dod pa dang / gzhan yang khyab 'jug dang / dbang phyug la sogs pa'i lha chen po de dag ni/ thams cad mkhyen par 'dod bzhin du phung khrol dpag tu med pa la zhugs nas/ phyis 'gyod bzhin du de sel ba'i thabs la zhugs par 'dod pa ste/ bde bar gshegs pa dag gis mthong na bzhad gad du 'gyur ba du ma smra ba yin no//khyod nyid kyi ni gzhung lugs dag /ces bya ba ni bde bar gshegs pa khyod nyid kyis gsungs pa'i gzhung lugs sde snod gsum gyi bdag nyid can gang yin pa de la ni/ thog ma bar mthar skyon ma mchis/ /zhes sbyar te/ thog mar gsungs pa'i tshig de bar dang tha mar gsungs pa'i tshig gis mi gnod cing /de bzhin du sbyar te/ bar dang tha mar gsungs pa de la snga phyi dang gong ma dag gis mi gnod pa'ang yin la/ rang gi ngo bo'i tshig gang yin pa de la'ang rigs pas gnod pa 'ga' yang yod pa ma yin no/ /yang na thog ma bar mtha' ni thos pa dang /bsam pa dang / bsgom pa dag gi dus na rigs pa dag gis mi gnod pa'i phyir/ skyon med pa yin no zhes kyang sbyar te/ ha cang yi ge'i don ma yin no/ /chos 'dod pa dag dmangs rigs la/ /zhes bya ba la sogs pa la/ chos smra bar 'dod pa'i gang zag rgyal dpog pa la sogs pa dag /dmangs rigs la blo gros te phyin ci ma log pa'i de kho na nyid sbyin bya min te/ bshad pa'i snod ma yin no zhes zer ro/ /'di ltar dmangs rigs la rig byed 'don na dmyal bar lhung ngo zhes 'chad do/ /de ltar 'chad pa'i rgyu yang dmangs rigs la sogs pa thams cad thun mong du gyur na/bram ze rnams la gzhan gus par mi 'gyur bas des na phrag dog gis de skad sbyar ba yin no/ /khyod ni gdol pa rnams la'ang / /zhes bya ba ni bde bar gshegs pa khyod ni gdol pa ni nye bar mtshon pa ste/ lham mkhan dang / nya ba la sogs pa rigs med pa rnams gzung ngo / /'ang gi sgras ni rgyal rigs la sogs pa rnams bsdu'o//thugs rjes dam chos ston par mdzad/ /ces bya ba ni thugs rje kho nas zhes bya ste/ thugs rje kho nas dam chos ston gyi grags pa dang khe'i phyir ma yin no zhes bya ba'i don to/ /'di ltar/ na ba'i bu la khyad par du/ /ma ni gdung ba skye ba ltar//de bzhin byang chub sems dpa' yang / /dam pa min la khyad par brtse/ /zhes bshad pa lta bu'o/ /ljon shing bzang po zhes bya ba la sogs pa la/ ljon shing yang yin la bzang po yang yin pas na ljon shing bzang po ste/ lo ma dang / me tog dang / 'bras bu phun sum tshogs pa gang yin pa'o//de spangs te zhes bya ba ni dor nas zhes bya ba'i don to/ /ngan pa ni shing e raN+Da la sogs pa ste de la ni su zhig bsten zhes bya ste/ dpyod pa dang ldan pa su zhig len par byed de/ mi byed do/ /de nyid don la sbyar ba na/ 'dod chags bral brnyes zhes bya ba ni nye bar mtshon pa ste/nyon mongs pa mtha' dag dang bral ba'i chos thob pa nyid gzung ngo / /de gang la yod pa'i bde bar gshegs pa khyod bzhugs bzhin du/ mkhas pa su zhig nyon mongs pa'i 'dam du bying ba'i ser skya dang / gzegs zan la sogs pa'i ston pa gzhan la 'dud cing phyag 'tshal bar byed de/mi byed ces bya ba'i don to/ /ser skya yul rnams la spyad bzhin/ /zhes bya ba la/ ser skya ni grangs can gyi ston pa'o/ /yul rnams la spyad pa ni yul gzugs la sogs pa 'dod pa'i bde ba la longs spyod bzhin du ye shes te yang dag pa'i de kho na nyid mthong bar 'gyur ba'o//'di yang gong du/ ser skyas bdag gi mtshan nyid ni/ /zhes bya ba'i skabs su bshad pa ltar ro/ /mchi zhes bya ba ni de skad grag ces bya ba'i don te/ ma rangs pa'i tshig go/ /sdig bral ba zhes bya ba ni bod pa ste/ mi dge ba thams cad zad pa'i bde bar gshegs pa khyod kyis so//kun nas nyon mongs la/ thar pa ga la yod ces gsungs zhes bya ba ni/ sems gang la kun nas nyon mongs pa yod par zhes 'bru mang po pa'i bsdu bar sbyar ro/ /thar pa ni sdug bsngal thams cad las grol ba'i mya ngan las 'das pa'o/ / ga la yod ces bya ba ni spong ba'i tshig ste/ med ces bya ba'i don to/ /gsungs pa ni bka' stsal pa ste/ mdo sde dag las ji skad du/ 'dod pa'i yon tan lnga la brten na bar du gcod pa'i chos su 'gyur ro zhes 'byung ba lta bu'o/ /bsod nams byas pa'i tshogs dag ni/ /zhes bya ba la sogs pa la/bsod nams ni sbyin pa las byung ba'i bsod nams bya ba'i dngos po la sogs pa yin la/ byas pa ni lus dang / ngag dang / yid kyis mngon par 'dus byas pa gang yin pa'o/ /tshogs ni mang du bsgrubs pa'o/ /de dag ni sems can rnams la yongs su bsngo bar bcom ldan 'das kyis gang gsungs pa ni ji skad du/dus gsum dang rjes su 'brel pa'i dge ba'i rtsa ba thams cad sems can thams cad dang thun mong du byas te/ bla na med pa yang dag par rdzogs pa'i byang chub tu yongs su bsngo bar bya'o/ /zhes bya ba la sogs pa rgya cher 'byung ba de lta bu ni gzhan ser skya dang /gzegs zan la sogs pa'i gzhung lugs kyi bstan bcos rnams las cha tsam yang ma bshad do/ /lha rten dang ni mchod sbyin la/ /zhes bya ba la sogs pa la/ lha rten ni dbang phyug dang / u ma la sogs pa'i gzugs brnyan no/ /mchod sbyin ni mi bsad dang /rta bsad la sogs pa'i mchod sbyin no/ /la zhes bya ba ni bdun pa'i sgra ste/ gnyis ka'i mthar sbyar la/ de yang lha rten la sems can rnams gsod pa zhes sbyar na/ yul gyi bdun par 'gyur la/ mchod sbyin la sems can gsod pa zhes sbyar na/ dus kyi bdun par 'gyur ro//gsod pa'i tshul yang / rig byed kyi gzhung las/ bar gyi dus la bab pa na/ /byol song drug gam bdun sbyar bya/ /rta yi gtsang ma'i rigs yin te/ /min na byol song gsum gyis so/ /re re la yang grong gi mi/ /byol song bcu drug bcu drug sbyin/ /cho ga bzhin du mchod sdong gzugs//bar du bcu dang bdun sbyin bya/ /zhes bya ba dang / bram ze la ni bram ze bsad/ /rgyal rigs la ni rgyal rigs bsad/ /ma ru dag la rje rigs te/ /dka' thub dag la dmangs rigs so/ /zhes bya ba la sogs pa'i gzhung 'jig rten pa chos su 'dod pa'o/ /khyod kyi bstan la de smad lags//zhes bya ba ni/ bde bar gshegs pa khyod kyi bstan pa la de dag smad pa ste/ ji skad du/ srog gcod pa'i las kyi rnam par smin pa ni sems can dmyal ba dang zhes bya ba la sogs pa rgya cher 'byung ba lta bu'o/ /de la 'di snyam du/ srog gcod pa spyi tsam chos ma yin mod/mchod sbyin gyi dus su rig byed las 'byung ba'i cho ga phun sum tshogs pas bsad pa ni chos yin no snyam na ma yin te/ chos gang zhig srog chags la rtag tu gnod pa gang yin pa de ni rig byed las 'byung ngam/ drang srong gis bshad dam/ mchod sbyin gyi dus su'ang rung ste/ de lta bu'i tshul de la chos nyid ga la yod de med do//ci'i phyir zhe na/ chos ni ngan song du lhung ba las 'dzin pa'am/ 'phos nas bde ba ster bar byed pa'i don gyis na d+harmA zhes bya ba yin la/ mi bsad kyi mchod sbyin la sogs pa ni de las bzlog pa'i phyir ro/ /ji ltar zhe na/ gzhan la gnod pa yin pa'i phyir te/ dper na gdol ba'i bya ba bzhin no/ /de ltar yang drang srong rgyas pas mchod sbyin gyi bsngags pa brjod pa na/ de'i bu ne tsos smras pa/ mchod sdong btsugs te phyugs bsad nas/ /khrag gis 'dam ni byas gyur pa/ /des kyang mtho ris 'gyur na go/ / dmyal bar gang gis 'gyur ba gsungs/ /zhes smras par grag go/ /de'i phyir gtso bo khyod kyis ni gzhan la gnod pa lta zhog gi/ rang nyid kyi srog gis sems can legs par bsrungs te/ glang po che'i skyes pa'i rabs la sogs pa dper brjod par bya'o/ /'o na mchod sbyin gyi cho ga chos su mi rung na/phyin ci ma log pa'i chos de gang yin pa spros shig ce na/ smras pa/ shAkya'i rgyal rigs 'khrungs khyod kyi/ /zhes bya ba la sogs pa ste/ shAkya ni khyim pa'i phyogs kyi rigs rnams kyi bla ma smos pa'o/ /de yang rgyal po mang pos bkur ba zhes bya ba nas brtsams te/rgyal rabs sa ya phrag gcig dang / khri phrag gcig dang / dgu stong dang / bzhi brgya dang / brgyad cu gya dgu 'das pa na/ /grong khyer gru 'dzin zhes bya bar/ /rgyal po bu ram shing pa 'phags skyes po zhes bya ba byung ngo / /de la bu lnga ste/ skar mda' gdong / lag na glang po che 'dul/rkang gdub can/ rgyal srid dga'o/ /de'i tshe ba bzhis grong khyer ser skya bzung nas shin tu phod pa che bas shAkya zhes grags so/ /de'i rgyud yin pas na shAkya'i rgyal rigs so/ /der 'khrungs pa ni bsams bzhin du skye ba bzhes pa'o/ /bden pa ni rang gi ngo bo phyin ci ma log pa'o//mi slu ba ni zhugs pa yid ches pa skyed pa'o/ /tshangs par spyod pa ni dbang po'i sgo bsdams pa'o/ /dul ba ni mtshan ma dang / rnam par rtog pa zhi ba'o/ /brtser ldan ni pha rol la phan par sbyor ba ste/ tshul de lta bu ni khyod kyi dam pa'i chos lags par dgongs kyi/nye bar 'tshe ba ni ma yin no zhes bya ba'i don to/ /rig byed mtha' la 'byams pas kyang / /zhes bya ba la sogs pa la/ rig byed mtha' dag la 'byams par shes pa ni rgyas pa la sogs pa ste/ de dag kyang g.yul ngo ste 'thab sar dgra 'ongs na bsad par smra ste/ de yang gong du/ khros pas g.yul ngor bsad byas na//zhes gsungs pa lta bu'o/ /bde bar gshegs pa khyod ni dgra la'ang snying rje kho na bya bar gsungs te/ bzod par smra ba'i skyes pa'i rabs dper sbyar bar bya'o// //gzhon nus rang gi zhang pho la/ /zhes bya ba la sogs pa la/ skem byed kyi sngon gyi gtam rgyud las 'di ltar thos te/ri kha ba can la nya can dang / ngur pa zhes bya ba'i bu gnyis yod de/ ri bo ngur pa ni shin tu yang nyams dga' ba yin pas/ ri rab kyang zil gyis mnan nas lhag par gnas shing / phrag dog can yin pas grub pa gang la yang skabs mi 'byed do/ /de nas grub pa'i lha rnams kyis bsams pa/kho bo cag der 'dug nas 'dod pa'i bde ba spyod par nam zhig 'gyur snyam zhing 'dod pa dang bcas par gyur pa dang / gzhon nu ri bo ti se na bstod pa byed cing 'dug pa'i gan du song ste gsol ba btab pa/ ci nas kyang ri bo dur bar bdag cag rnams chung ma dang lhan cig 'dod pa'i bde ba spyod par 'gyur ba de ltar gyis shig ces smras pa dang /gzhon nus bsams pa/ gzhan gyis gsol ba ngor bzlog pa/ /sog 'dor bas kyang smad bya yin/ /de bas 'di yi las la ni/ /da ni kun tu brtson par bya/ /snyam nas/ de song ste bsnyen bkur chen pos ri bo dur pa la gsol ba btab pa/dur pa kho bo'i gsol ba bya ba gcig cig nges par spyad par gyis shig /des smras pa/ ci zhig /gzhon nus smras pa/ grub pa rnams kyis skabs rnyed pa'i phyir rjes su brtse bar gyis shig ces smras pa dang / smras ma thag tu khro bas dregs par gyur pa'i gdong gis khro gnyer bsdus pa'i bzhin dang /nga ni su la'ang go skabs mi 'byed do zhes smras pa dang / gzhon nus 'bad pa sna tshogs byas kyang don de ma grub pas/ de'i tshe de dang lhan cig 'thab par brtsams so/ /gtam 'di lha mo u mas thos pa dang / bu la gtses par dogs pa'i sdug bsngal dang ldan pas lag pa 'gram pa la gtad de mya ngan gyis gnas par gyur cing /'di lta bu'i rnam par 'khrug pa byung ba las nas gsum mtha' dag 'khrug par mi 'gyur ram snyam mo/ /ti se dang / sa h+ya dang / 'bigs byed dang / ma la ya la sogs pa'i ri bo rnams kyang der song ste smras kyang /rtsod pa de zhi bar bya ma nus so/ /de nas gzhon nu khro bo'i gdon gyis 'khrugs shing khros pa'i sems kyis rnam par ma dpyad par mdung 'phangs pas 'di gzhig par nus so snyam nas/ gzhon nu khros pas ci nas kyang ri bo dur pa dum bu gnyis su gyur pa de ltar bsnun no//de yang gshong chen por gyur nas der rig 'dzin grub pa rnams rang gi chung ma rnams dang lhan cig tu rang dgar 'dod pa'i bde ba spyad par byas so/ /gzhon nu zhes bya ba ni karti kas so/ /rang gi zhang po zhes bya ba ni ri bo dur pa ste/ ma'i spun zla'o/ / de la gang gis bsnun zhe na/ mdung gis zhes bya ba smos te/ mdung rtse gcig pas so/ /bsnun zhes bya ba ni dum bu gnyis su byas pa'o/ /bka' mchid gda' zhes bya ba ni gtam du grags pa thos pa'o/ /dpa' chen zhes bya ba ni bod pa ste/ dpa' ba chen po dang ldan pas na dpa' bo chen po'o//khyod kyis zhes bya ba ni bcom ldan 'das kyis so/ /nyon mongs pa'i dra ba zhes bya ba ni mthong ba dang / bsgom pa'i lam gyis spang bar bya ba rnams te/ bag la nyal gyi tshogs zhes bya ba'i don to/ /nyon mongs pa'i tshogs de ci zhig ltar mdzad ce na/ dral zhes bya ba smos te/rnam par bcom zhing bshig la spangs pa zhes bya ba'i don to/ /gang gis dral zhing zad par mdzad ce na/ shes rab mtshon gyis zhes bya ba smos te/ ye shes kyi mdung gis zhes bya ba'i don to/ /de yang bcom ldan 'das kyis/ glog dang 'dra ba'i sems rdo rje lta bu'i ting nge 'dzin gyis nyon mongs pa'i tshogs rnams bsad do zhes gsungs pa yin no//khyab 'jug dag gis rang nyid kyi/ /zhes bya ba la sogs pa la/ rang nyid kyi pho brang gi slas yin pas na rang nyid kyi slas te/ btsun mo'i 'khor gyi tshogs zhes bya ba'i don to/ /yongs su bskyab mi nus zhes bya ba ni yongs su bsrung bar mi nus pa'i don to//gang gis mi nus she na/ khyab 'jug gis so/ /'dir gtam du bya ba ni/ rgan pos khyab 'jug mda' yis bsnun/ /zhes bya ba'i skabs su bshad zin to/ /gtso bo khyod kyis zhes bya ba ni bod pa'o/ / sems can kun zhes bya ba ni khams gsum par gtogs pa ste/ de rnams bskyab pa'i don du zhes bya ba phan par mdzad cing bskyang ba zhes bya ba'i don to/ /rtag tu brtson zhes bya ba ni dus rtag par rgyun du brtson zhing 'bad par mdzad pa ste/ de yang nyin lan gsum mtshan lan gsum du sangs rgyas kyi spyan gyis 'jig rten rnams la/su ni 'phel/ su ni 'grib ces gzigs par mdzad do zhes bya ba la sogs pa gsungs pa yin no/ /rgan pos sbyar ba'i 'jigs shes nas/ /zhes bya ba la sogs pa la/ 'di ltar rjes su thos te/ rgan pos sbyar ba zhes bya ba'i lha ma yin zhig yod pa dang /de khyad par gyi dka' thub la spyad pas tshangs pa chen po las 'jig rten gsum gyi bdag por gyur pa'i mchog blangs nas des bsams pa/ khyab 'jug ni kun las rgyal bar 'dod ces thos kyis/ de bas na de dang por brlag par bya ste/ de brlag nas gegs med par sa gsum rnam par gnon par bya'o snyam nas/khyab 'jug bsad pa'i phyir brtson par byed pa dang / khyab 'jug ni bcom brlag na 'dug go zhes thos nas des ring po nyid nas dbyug pa chen po cig 'phangs te/ de'i rjes la bdag nyid chas so/ /de nas dbyig pa 'phangs pa'i sgra thos bas de 'ong bar khyab 'jug gis shes nas 'chi ba'i 'jigs pas bcom brlag btang ste/rgya mtsho'i nang du sgor ldan gyi grong khyer yod pa der song bar gyur to/ /rgan pos sbyar ba'i 'jigs pa yin pas rgan pos sbyar ba'i 'jigs pa'o/ /shes pa ni rtogs pa'o/ /su zhig gis she na/ khyab 'jug gis so//gang gis btang zhe na/ bcom brlag btang zhes bya ba smos te/ bcom brlag ces bya ba'i grong khyer btang zhing spangs par gyur pa'o/ /thub pa khyod la bsnyengs bgyid gang / /zhes bya ba la/ thub pa khyod ces bya ba ni bod pa'o/ /bsnyengs bgyid gang zhes bya ba ni gang las bsnyengs shing 'jigs pa byed pa'o//sems can de ni 'ga' ma mchis/ /zhes bya ba ni 'jig rten gsum po dag na 'gro ba de lta bu 'ga' yang ma mchis pa'o/ /de yang 'dir ba ku la'i mdo dper brjod par bya ste/ ba ku la de bzhin gshegs pa 'jigs par byed pa de ni yod pa ma yin no zhes bya ba la sogs pa rgya cher brjod pa yin no//khyab 'jug gis ni zhes bya ba la sogs pa la/ khyab 'jug gis ni zhes bya ba ni khyab 'jug rmongs par gyur pas zhes bya ba'i don te/ gal te ma 'gags pa la sogs pas drang srong gnas ngan la bsnyen bkur ma yin pa mi byed de/de rnams 'di ltar brlag par mi 'gyur ba'i phyir ro/ /gnyen 'dun dag ces bya ba ni khyab 'jug gi gnyen biSh+Nu rnams te/ de rnams brlag cing gtugs par gyur pa'o/ /'dir gtam du bya ba ni/ rgan pos khyab 'jug mda' yis bsnun/ /ces bya ba'i skabs su bris pa yin no//yang bcom ldan 'das khyed kyis ni/ gnyen 'dun thams cad ni zhes bya ba nye du'i tshogs thams cad do/ /'khor ba las ni zhes bya ba ni/ srid pa'i btson ra las so/ /rnam par bkrol zhes bya ba ni mya ngan las 'das pa thob par mdzad do zhes bya ba'i don to//'dir yab dang sras mjal bar bre bo zas la sogs pas khyad par rtogs par mdzad pa dang / yum la chos ston pa'i phyir sum cu rtsa gsum gyi gnas su gshegs pa la sogs pa thams cad sbyar bar bya'o// //mu stegs gzhan gyi gzhung lugs la zhes bya ba la sogs pa la/mu stegs gzhan gyi zhes bya ba ni 'di las phyi rol du gyur pa'o/ /gzhung lugs la zhes bya ba ni grub pa'i mtha' la'o/ /ji lta ji ltar zhes bya ba ni bzlas pa ste/ ji srid ji srid du zhes bya ba'i don to/ /rnam bsams pa zhes bya ba ni rnam par dpyad pa'o/ /de lta de ltar zhes bya ba ni de srid de srid du'o//mgon po khyod la zhes bya ba ni bod pa'o/ /bdag gi sems ni dad par gyur/ /ces bya ba ni/ dad pa dang ldan zhing yid dang pa dang ldan par gyur to zhes bya ba'i don to/ /de ltar thams cad mkhyen min pa'i/ /zhes bya ba la sogs pa la/ de ltar zhes bya ba'i sgra ni/sngar smras pa'i nyes pa'i rnam pa ston te/ des zin cing dbang du byas la drangs pa'i sems dang ldan pa gang yin par ni 'di ltar sems pa'o/ /thams cad mkhyen min pa'i zhes bya ba ni thams cad mkhyen pa nyid ma yin pa ste/ ser skya la sogs pa'o/ /des byas pa'i grub pa'i mtha' ni thams cad mkhyen pa ma yin pa'i grub pa'i mtha' zhes bya'o//de'i skyon yin pas na thams cad mkhyen pa ma yin pa'i grub pa'i mtha'i spyon no/ /bsam brlag rnams kyi zhes bya ba ni byis pa ste/ blo gros yod pa ma yin pa gang yin pa de la bsam brlag ces bya'o//skyon med pa'i ston pa khyod kyang mi mthong ngo zhes bya ba la/ skyon med pa ni nyon mongs pa'i skyon ma lus pa bag chags dang bcas pa spangs pa yin pas so/ /ston pa zhes bya ba ni lha dang mi rnams la ston pa mdzad pa'o/ /khyod ces bya ba ni sangs rgyas bcom ldan 'das so//mi mthong ngo zhes bya ba ni ma rtogs pa'o/ /'jig rten lha dang bram ze dang / /zhes bya ba la sogs pa la/ mu stegs pa'i 'jig rten 'di dag ni 'di skad ces smra ste/ shAkya'i bu 'di ni lha dang bram ze dang / rig byed la sdang ngo zhes smra'i/ rang nyid skyon byed pa ni de lta na'ang sems par mi byed cing /rtogs par mi byed do/ /de yang 'di ltar 'jig rten pa rnams ma dad pa'i dbang gis gang dag dran pa'am rnam par rtog pa de thams cad sngon dang phyi ma'i mtha' mi rtog par de rnams tshig gis sgro 'dogs par byed la/ shAkya de yang sngon dang phyi ma'i mtha' mi rtog par de rnams tshig gis sgro 'dogs par byed la/shAkya de yang sngon dang phyi ma'i mtha' bltas te/ 'brel pa med cing snying po med par shes nas de ltar ston mod kyi/ de nyes pa dang bcas par gyur pa ma yin gyi/ 'jig rten 'di lta bur gyur pa nyid skyon dang bcas pa yin no/ / gzhan yang bdag cag lta bu'i skye bo dag ci'i phyir khyed kyi bstan pa la dga' bar byed ce na/ gang slad khyed kyi bstan pa ni/ /zhes bya ba la sogs pa smos te/ gang slad ces bya ba ni gang gi phyir ro/ /khyed kyi bstan pa ni zhes bya ba ni sangs rgyas bcom ldan 'das kyi gsung rab bo/ / bde ba zhes bya ba la ni thar pa'i bde ba'am/ mtho ris la sogs pa'i bde ba'o/ /bde nyid ces bya ba ni rjes su mthun pa'i thabs kyis lam nyid kyis so/ /thob bgyid pa zhes bya ba ni rnyed par byed pa'o/ /de slad ces bya ba ni de'i phyir ro/ /smra ba'i seng ge zhes bya ba ni bod pa ste/smra ba'i seng ge khyed kyis zhes bya ba'i don to/ /gzhung lugs zhes bya ba ni bstan pa ste/ de la dga' ba'o/ /su zhig ce na/ 'gro 'di zhes bya ba smos te/ bdag cag lta bu'i sems can dag go/ /dga' zhing zhes bya ba ni dang zhing mos pa'o/ /bstod pa las byung ba'i bsod nams bsngo bar bya ba'i phyir/khyed kyi yon tan yang dag pa/ /zhes bya ba la sogs pa smos te/ khyed kyi zhes pa ni de bzhin gshegs pa'i'o/ /yon tan zhes bya ba ni nyon mongs pa spangs pa la sogs pa'o/ /yang dag pa zhes bya ba ni nges par mnga' bar gyur pa'o//rnam pa 'di ltar zhes bya ba ni sngar bshad pa'i rnam pas zhes bya ba'i don to/ /brjod pas zhes bya ba ni smra bas so/ /bdag gis zhes bya ba ni bstod pa byed pa po'o/ /bsod nams gang zhes bya ba ni legs par spyod pa gang yin pa'o/ /thob pa zhes bya ba ni byung ba'am rnyed pa'o//'gro ba'i 'jig rten zhes bya ba ni sems can gyi 'jig rten thams cad do/ /khyod 'drar shog ces bya ba ni sangs rgyas bcom ldan 'das khyed dang 'dra bar shog ces bya ba ste/ rnam pa thams cad mkhyen pa'i ye shes thob par gyur cig ces bya ba'i tha tshig go/ //de dang de las rnam bsags shing //de bzhin las kyis nyer mdzes pa/ /rgyas bshad sems can la brtse bas/ /shes rab go chas 'di byas so/ /de rnams de 'dra'i rigs ldan de ni shes nas su/ /thub pa'i yon tan tshogs kyi de nyid rnam nges pa/ /nyes pa bdo ba rnams mang yang dag spangs nas ni//'jig rten 'di dag bde gshegs la gzhol ji ltar 'gyur/ /bdag gis dad pa sngon 'gro las byas bsod nams gang / /zla ba'i 'od zer zil gnon legs par skyes gyur pa/ /des ni gti mug rab rib kyis bsgribs 'jig rten dag /blo yi nam mkha' dri med sman dang myur ldan shog /khyad par du 'phags pa zhes bya ba de bzhin gshegs pa'i bstod pa/ slob dpon mtho btsun grub rjes mdzad pa'i rgya cher bshad pa/ byang phyogs kyi rgyud du byung ba/ b+ha ga la'i yul gyi slob dpon shes rab go chas mdzad pa rdzogs so// // rgya gar gyi mkhan po paN+Di ta dzA ran da na dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa// //yid srub zla ba'i gtsug dang gos ser can/ /rig byed byed po dga' byed grog mkhar ba/ /rgyas pa rgyal dpog pa dang sa yi bu/ /thub pa rkang mig phur bu lha min rjes//skyob pa nyin mor byed pa'i rgyud 'khrungs pa/ /srid gsum bla ma shAkya'i rgyal po de'i/ /rnam par thar la bskrun min der bstod pa/ /de yi 'grel pa de 'dir rdzogs par byas/ /dge ba de yis srid pa'i ljongs rgyu bas/ /bdag tu 'dzin pa'i thibs por 'khyams gyur pa//mu stegs byed kyi mun pa 'joms byed pa'i/ /rgyal ba nyin mor byed par bdag gyur cig /khyad par du 'phags par bstod pa'i rgya cher bshad pa/ slob dpon shes rab go chas mdzad pa las/ bar skabs su tshigs su bcad pa bcu gnyis kyi 'grel pa'i rgya dpe ma rnyed nas/

CLOSE WINDOW