བོད་ཡིག

e-texts based on the ACIP/ALL Input

/dmus long gyur pas sprul sku ma mthong la/ /'di rtogs gong nas gong du gyur pa yis/ /de mthong bya phyir bgyis pas de mthong shog /zhi gnas la 'jug pa'i thabs cung zad bris pa rdzogs so// //[]dngos dang dngos med rab mkhyen te/ sku mchog mkha' 'dra brnyes gyur kyang / /thugs rje'i dbang gis ji srid par/ /'gro drug sems can mun 'thoms la/ /chos kyi sgron ma spor mdzad pa/ /de la gus par phyag 'tshal te/ /tha dad las las byung bas na/ /'di la mos pa'i skye bo 'ga'/ /yod srid de don bdag gis ni/ /bsam gtan la 'jug ci nus bsdu/ /sdom ni/ tshogs dang dmigs dang nyes pa dang / /spang bya go rims brtags 'bras bu/ /de la tshogs ni rnam pa gnyis te/ phyi dang nang gi'o/ /de la phyi'i mdor bsdu na yid du 'ong ba'i sa phyogs so/ /nang gi yang mdor bsdu na gnyis te/ /ma chags pa dang / tshul khrims rnam par dag pa'o/ /'jig rten chags pa med la mngon dgas 'grub/ /ces kyang gsungs la/ sdom pa'i tshul khrims kyi sems gnas pa'i bya ba byed ces kyang gsungs so/ /de la dmigs pa gang zhe na/ 'dir skye ba med pa'o/ /de yang mdo sde las chos 'di dag thams cad ni sems la gnas pa/ sems las byung ba/ sems sngon du 'gro ba ste/ sems shin tu bcil/ sems shin tu brtul/ shin tu khong du chud par byas nas chos de dag thams cad kyang / shin tu bcil ba dang / shin tu brtul ba dang / shin tu khong du chud par 'gyur te/ des chos rnams de ltar mthong bas rgyu de dang / rkyen de dang / gzhi des sems zhi bar bya ba'i phyir nan tan byed de/ sems nyid la sems nyid 'dogs so/ /sems nyid kyis sems zhi bar byed do/ /sems nyid la sems rab tu gzhog go/ /de ltar zhi ba la brtson pas sems rtse gcig tu 'gyur te/ rtse gcig tu gyur nas mnyam par 'jog go/ /sems mnyam par bzhag pa la dben pa las skyes pa'i dga' bar gyur nas 'dod pa dag las dben pa sdig pa mi dge ba'i chos rnams las dben pa/ rnam par rtog pa dang / bcas pa/ dpyod pa dang bcas pa/ dben pa las skyes pa'i dga' ba dang / bde ba can bsam gtan dang por rdzogs par bya ste gnas so zhes bya ba la sogs pa gsungs so/ /de la sems ni skad cig ma'i mtshan nyid yin la de yang blos gzhigs na mi gnas te/ 'das pa dang ma 'ongs pa ni 'gags pa dang / ma skyes pa'i phyir ma grub na/ da ltar gyi yang skye ba'i cha dang / gnas pa'i cha dang / 'gag pa'i cha gcig tu mi 'grub po/ /gang gi ngo bo gcig tu ma grub pa des du ma yang spangs te/ de bas na sems ni gcig dang du ma dang bral ba/ gzung du med pa dang / bstan du med pa dang / gzugs can ma yin pa ste/ skad cig thog ma mtha' yod pas/ /'jig rten skad cig la mi gnas/ /zhes kyang gsungs so/ /de ltar sems ma skyes par rtogs pa de nyid kho na la goms par bya'o/ /nyes pa ni lnga ste/ de spang ba'i ched du 'du byed brgyad bsgom par gsungs so/ /mdor na dmigs pa brjed pa'i gnyen po dran pa ma shor na shes bzhin gnas te/ de'i skabs su mi brtsal bar lus dang sems la mi gnod tsam du bsgom zhing 'dug par bya'o/ /spang bar bya ba ni 'dod pa'i sred pa dang / sdig pa mi dge ba'i chos rnams te/ de yang ji skad du 'dod pa ni nyon mongs pa'i 'dod pa dang dngos po'i 'dod pa ste/ mtshungs par ldan pa las dben pa dang / dmigs pa las dben pa'o/ /sdig pa mi dge ba'i chos ni gang dag nyon mongs pa'i rgyu las byung ba lus dang / ngag dang / yid kyi nyes pa sbyong bar rtogs pa chad pas gcod pa dang / mtshon chas 'debs pa dang / 'thab pa dang / rtsod pa dang / 'gyed pa dang / g.yo ba'i tshig dang / gnod pa dang / brdzun zer ba la sogs pa las dben pa'o zhes gsungs so/ /go rims ni rnam pa bdun du gsungs te/ de la mtshan nyid rab tu rig pas ni spang bar bya ba dang / thob par bya ba legs par yongs su shes nas spang ba dang / thob par bya ba'i phyir sems 'jog go/ /de ni thos pa dang sems pa dang / 'dres par rig par bya'o/ /de'i 'og tu thos pa dang sems pa las 'das nas gcig tu bsgom pa'i rnam pas de'i rags pa zhi ba'i mtshan nyid kyis mtshan ma la dmigs pa'i zhi gnas dang lhag mthong bsgom zhing yang ji ltar yongs su brtsal bar rags pa zhi ba nyid du mos te/ de ni mos pa yid la byed pa zhes bya'o/ /de goms pas thog ma kho nar spong ba'i lam dang ldan pa'i yid la byed pa ni rab tu dben pa'i yid la byed pa zhes bya'o/ /des kun nas nyon mongs pa chen po rnams rab tu spang ngo / /de dag kyang gang zhe na/ ye shes sgron ma'i mdo las/ de la 'dod chags chen po gang zhe na/ gang lus thams cad du khyab ste/ sems kun nas gzung zhing gnas pa dang / gang gis de la gzhol zhing 'dod chags dang bral ba'i sems mi 'thob pa ste/ de la gzhol ba de la ngo tsha ba dang / 'dzem pa thams cad kyi thams cad du med par 'gyur te/ ji ltar na ngo tsha ba dang 'dzem pa thams cad kyi thams cad du med pa yin zhe na/ de gcig pu lkog tu song ste/ de nyid rjes su rnam par rtog cing de nyid legs par shin tu smon pa dang / de nyid la yang yon tan du lta ba yin te/ de ltar na de la ngo tsha ba med pa yin no/ /ji ltar na 'dzem pa med pa yin zhe na/ de rgyu de dang rkyen de dang / gzhi des pha ma'am/ bla ma lta bu gzhan dag dang rtsod cing phyir bzlog pa dang / rgol bar byed cing des ngo mi tsha la/ de la yon tan du lta ba yin te/ de ltar na 'dzem pa med pa yin te/ de rgyu de dang rkyen de dang gzhi des na ngan song rnams su skye bar 'gyur te/ de ni 'dod chags chen po zhes bya'o/ /zhe sdang chen po gang zhe na/ zhe sdang gi rnam pa gang gis zhe sdang zhing rngam 'khrugs gtum par gyur nas/ /mtshams med pa lnga las gang yang rung ba byed pa 'am/ dam pa'i chos spang ba gang byas pa la mtshams med pa lnga bsdoms kyang grangs su yang nye bar mi 'gro/ /cha dang / bgrang ba dang / dpe dang rgyur yang nye bar mi 'gro ba de lta bur byed de/ de rgyu de dang rkyen de dang / gzhi des lus zhig nas sems can dmyal ba chen po dag tu skye zhing / gal te brgya la mir skyes na yang gnag cing mig dmar la gtum zhing gnod sems mang bar 'gyur te/ de rgyu de dang rkyen de dang gzhi des yang sems can dmyal ba dag tu skye bar 'gyur te/ de ni zhe sdang chen po zhes bya'o/ /gti mug chen po gang zhe na/ gang ji skad du smos pa'i gnas de dag la nyes kyang dga' zhing mya ngan du mi byed/ smre sngags mi 'don/ 'gyod pa med pa yin te/ de ni gti mug chen po zhes bya'o/ /zhes gsungs so/ /rnal 'byor ba de de'i 'og tu spong ba la dga' bar 'gyur zhing spong ba la phan yon du lta ste/ rab tu dben pa'i dga' ba dang bde ba chung ngus reg nas dus dus su dad par gyur ba'i yid la byed pas ji tsam du rmugs pa dang / gnyid dang / rgod pa dang bral bar bya ba'i phyir rab tu dga' bar byed pa 'di ni dga' ba sdud pa zhes bya'o/ /des nyon mongs pa'i rnam pa 'bring rab tu spong ngo / /de yang gang zhe na/ de nyid las 'dod chags 'bring po gang zhe na/ gang gis 'dod pa rnams la brten par gyur na bya ba grub kyi bar du rten cing bya ba grub nas 'dod chags dang bral ba'i sems 'thob pa dang / 'gyod pa 'thob pa dang / sems la mi cha ba 'thob pa ste/ de ni 'dod chags 'bring po zhes bya'o/ /zhe sdang 'bring po gang zhe na/ gang gis zhe sdang bar 'gyur te/ sdig pa mi dge ba'i las byas na myur ba myur bar skyen pa skyen par la gor la gor du 'gyod cing de'i gnyen po la yang brten pa ste/ de ni zhe sdang 'bring po zhes bya'o/ /gti mug 'bring po gang zhe na/ gang gis mi dge ba'i las la byas kyang la gor la gor du 'gyod cing tshangs pa mtshungs par spyod pa rnams kyi drung du 'chags shing mi 'chab la de yon tan du yang mi lta ba yin te de ni gti mug 'bring po zhes bya'o/ / de ltar legs par zhus pa de dge ba'i phyogs la sbyor bas brten pa'i phyir 'dod pa na spyod pa'i nyon mongs pa'i kun nas dkris pa kun tu mi 'byung bas de spangs sam ma spangs pa khong du chud par bya ba'i phyir de 'byung ba dang mthun pa sdug pa'i mtshan ma yid la byed pas so sor rtogs pa ni dpyod pa yid la byed pa'o/ /des thos pa mngon pa'i nga rgyal med pa la sems 'jog par byed do/ /des de ltar dpyad nas gnyen po bsgoms pas dus de ji srid cig pa'i tshul gyis 'dod pa spyod pa'i nyon mongs pa thams cad dang bral bar bya ba'i phyir bsam gtan dang po la sbyor ba'i mthar thug pa'i gnyen po yid la byed pa ni sbyor ba'i mtha'o/ /des nyon mongs pa'i rnam pa chung ngu rab tu spang ngo / /de nyid la 'dod chags chung ngu gang zhe na/ gang gis 'dod pa rnams bsten par gyur kyang mnam pa dang byug pa dang / lus kyi reg pa tsam mam/ tshig tu smras pa tsam gyis tshim par 'gyur ba de ni 'dod chags chung ngu zhes bya'o/ /mdor na 'tsho ba'i yo byad thams cad la chags pa'i sems su gyur pa ste/ de ni 'dod chags zhes bya'o/ /zhe sdang chung ngu gang zhe na/ gang gis zhe sdang bar gyur nas/ tshig tsam dang / mi snyan pa dang / ngan du brjod pa tsam gyis mi dge ba'i las sogs pa ste/ byung na yang skad cig de nyid dang / yud tsam de nyid dang / thang cig de nyid la gnyen po bsten pa ste/ de ni zhe sdang chung ngu zhes bya'o/ /gti mug chung ngu gang zhe na/ gang gis rang bzhin gyi kha na ma tho ba ma yin par bcas pa'i kha na ma tho ba bslab pa kun la spyad pa'i lan gnyis gsum las 'da' ba ste/ de ni gti mug chung ngu zhes bya'o/ /zhes gsungs so/ /rtags ni lus g.yo ba snyam byed pa dang / lus phyar ba rtsub pos drud pa snyom byad pa dang / lus thams cad la 'o mas gtor ba snyam byed pa dang / lus drod 'byung ba dang / snying ga nas mar me lta bu 'byung ba dang / smin mtshams nas nyi zer gyi 'od lta bu 'byung ba dang / spyi bo nas 'od zer sna lnga 'byung ba la sogs pa gsungs so/ /'bras bu yang de nyid de bsam gtan dang po zhes bya'o/ /dad pas 'di bsdebs bsod nams kyis/ /'gro kun srid pa yongs spong zhing / /bsam gtan bde la rten byed de/ /rtag tu gzhan don mos par shog /bsam gtan la 'jug pa bsdus pa rdzogs so// //[]sems kyi nyams cung zad tsam zhig mdor bsdus te brjod par bya'o/

CLOSE WINDOW