བོད་ཡིག

e-texts based on the ACIP/ALL Input

/mi sdug pa'i sgo nas sems gnas pa'i thabs cung zad bris pa rdzogs so/ /[]zhe sdang zug rngu bag chags bcas par spangs/ /'gro ba kun la bu gcig bzhin du byams/ /zug rngu 'byin pa'i sman 'dra gsung sgrogs la/ /phyag 'tshal des gsungs byams pa'i bsgom thabs bshad/ /sdom ni/ rtags dang phan yon shes bya dang / /tshogs dang bsgom dang tshod gzung dang / /skye rim gnas tshad brten pa'i thabs/ /skyo ba spang dang bcu yin no/ /de la rtags ni 'dir zhe sdang shas che ba'i rtags gzung ste/ de la gang zag zhe sdang spyad pa'i rtags rnams gang zhe na/ 'di na gang zag zhe sdang spyad pa ni/ zhe sdang bar 'gyur ba'i dngos po la khong khro ba'i rgyu mtshan chung ngus kyang khong khro ba'i kun nas dkris pa stug po dang mang po skyed par byed na/ 'bring dang chen po dag gis lta smos kyang ci dgos te/ khong khro ba'i kun nas dkris pa de yang yun ring du sems kyi rgyud la gnas par byed cing / khong khro ba'i kun nas dkris pa de yang yun ring du rjes su 'brel bar 'gyur ba dang / de khong khro bar 'gyur ba'i chos rnams kyis zil gyis non par 'gyur zhing khong khro bar 'gyur ba'i chos rnams zil gyis non par mi nus pa dang / dbang po mi mnyen pa dang / dbang po mi 'jam pa dang / dbang po rtsub pa dang / dbang po brlang ba dang / gzhan dag la 'di lta ste/ lus dang ngag gi shin tu rnam par tho 'tsham pa'i rang bzhin can yin pa dang / bral ba sla ba dang / yid dbyung bar sla ba dang / cor ba dang / mu cor smra ba dang / spyi rtol che ba dang / mi mos pa mang ba dang / las kyi mtha' dma' ba dang / las kyi mtha' bstan pa dang / brtul zhugs dma' ba dang / brtul zhugs brtan pa dang / yid mi bde ba mang ba dang / 'khrug pa mang ba dang / bzod pa med pa dang / spro thung ba dang / mi mthun pa'i rang bzhin can yin pa dang / mthun par 'dzin pa ma yin pa dang / khro ba mang ba dang / bzlog dka' ba'i rang bzhin can dang / 'khrug pa mang ba dang / bsam pa khro zhing gtum pa dang / 'tshig cing brlang por smra ba dang / de cung zad tsam zhig smra ba yang mi dang zhing 'khrugs la gnod sems skye ba dang / gnod bzhin du gnas pa dang / 'khrug pa skyed pa dang / khro gnyer dang ldan pa dang / gzhan gyi mdog mi gsal ba dang / gzhan gyi 'byor pa la zhe sdang zhing phrag dog mang ba yin te/ de lta bu dang mthun pa dag ni gang zag zhe sdang spyad pa'i rtags rnams yin par rig par bya'o zhes gsungs so/ /de la phan yon ni/ zla ba sgron ma'i mdo las ji skad gsungs pa lta bu ste/ bye ba khrag khrig dkrigs pa'i zhing dag na/ /mchod pa rnam mang dpag med ji snyed pa/ /skyes mchog rnams la de yis rtag mchod dang / /byams pa'i sems kyi grangs dang char mi phod/ /ces gsungs so/ /bkra shis tshigs su bcad pa'i mdo las kyang / /gang zhig sems can thams cad la/ /byams pa'i sems ni rab bsgom zhing / /dpag tu med de mi 'khrugs pa/ /de ni bkra shis dam pa yin/ /zhes gsungs so/ /de la shes par bya ba ni mdor bsdu na gnyis te/ dbye ba dang / ngo bo'o/ /de la dbye ba ni gsum ste/ sems can la dmigs pa dang / chos la dmigs pa dang / dmigs pa med pa'o/ /de la sems can la dmigs pa'i byams pa ni sems dang po bskyed pa rnams kyis byams pa'o zhes gsungs so/ /ngo bo ni gzhan la phan pa dang bde bar 'dod pa ste/ nyon mongs pa can ma yin pa'i chags pa'o/ /de la tshogs ni spyir tshul khrims rnam par dag pa la sogs pa gzhan du blta'o/ / 'dir bye brag cung zad tsam zhig bsam par bya ste/ dper na tha ba skam po la myu gu mi skye ba de bzhin du bdag gi rgyud zhe sdang dang ldan na 'jig rten dang 'jig rten las 'das pa'i dge ba gzhan yang skyed mi nus la/ bla na med pa'i byang chub chen po ltag la 'thob/ /de skad du/ zhe sdang zug rngu'i sems 'chang na/ /yid ni zhi ba'i nyams mi myong / /dga' dang bde ba mi 'thob cing / /gnyid mi 'ong zhing brtan med 'gyur/ /zhes gsungs so/ /'phags pa 'jam dpal rnam par 'phrul ba las kyang / khong khro ba khong khro ba zhes bya ba ni bskal pa brgya stong du bsags pa'i dge ba'i rtsa ba zad par byed pas na khong khro ba zhes bya'o zhes gsungs so/ /de bas na 'jig rten dang 'jig rten las 'das pa'i dge ba'i rtsa ba skyed pa'i phyir bdag gi rgyud tha ba skam po dang 'dra ba de byams pa chu dang 'dra ba des brlan pa cig thog mar bsgrub par bya'o snyam du sems bskyed par bya'o/ /de la bsgom pa ni/ 'di ltar yid du 'ong ba'i sa phyogs su stan bde ba'i steng du skyil mo krung bcas lus drang por bsrangs la yud tsam zhig bsdad do/ /de nas mi'i 'gro ba bdag gi mdza' bo'am bshes pa'am yid du 'ong ba cig la 'di ni bdag gi pha ma'o/ /'di la lan du phan gdags so/ /don du gnyer ro/ /'jig rten 'dir kha na ma tho ba med pa'i bde ba ma thob pa thob cing / thob pa ma nyams shing gong du 'phel na ci ma rung / phyi ma ngan 'gro'i 'gro ba spangs te/ lha dang mi'i bde ba la brten nas 'jig rten dang 'jig rten las 'das pa'i tshogs rgya chen po la sogs pa rab tu brtson na ci ma rung snyam du shin tu bsgrims la gtad do/ /de la khams kyi tshod gzung ba ni/ spyir khams rab 'bring tha ma gsum yod kyang dge sbyong gzhan la rab tu 'jug la sgom pa la ha cang mi nus pa yang snang bas/ rab kyis kyang thun thung ngu nas bsgom mo/ /de bas na re zhig slob lugs gcig par bya'o/ /mtshan mo btang snyoms su bzhag ste/ gnyid ji tsam log pa de tsam gyis khams brtas pa de tsam log cing gdal lo/ /nyin par zhar la tshod bzung zhing bsgom mo/ / 'di ltar nyi ma dang po snga dro thun gcig yun gom pa tha mal pas mda' rgyang phyed du phyin pa tsam zhig bsgom/ phyi dro thun gcig la yang de bzhin du bsgom mo/ /de nas nyi ma bcu'i bar du thun re re bsnan cing bsgom mo/ /'di ltar nyi ma dang po snga dro thun gcig yun gom pa tha mal pas mda' rgyang phyed du phyin pa tsam zhig bsgom mo/ /de nas nyi ma bcu'i bar du thun re re bsnan zhing bsgom mo/ /'di ltar phyi dro thun gcig la yang de bzhin du bsgom mo/ /na tsha phran tshegs byung na 'phral du zhi bar bya'o/ /bsran skyed cing mi bsgom mo/ /khams mi bde ba med na gong du smos pa bzhin du bsgom mo/ /de lta bas na khams kyi tshod zhar la shes par 'gyur ro/ /de la sems kyi skye ba'i rim pa ni bdun te/ thog mar snying du sdug pa'i sems can la mnyam par gzhag pa'i tshe/ phan pa dang bde ba'i sems mi mthun pa'i phyogs kyis mi 'phrogs par skye la/ langs pa'i gnas skabs su yang nam dran pa'i tshe phan pa dang bde ba'i sems dka' ba med par 'jug ste bye brag ni mnyam par gzhag tsam na lus cung zad bde ba dang sems kyang sems can la dmigs pa'i mi de yang yid la gsal rab tu snang la/ de'i sbyor bas sems 'phro ba tsam du 'ong ngo / /de'i 'og tu 'dris pa rnams la'o/ /de'i 'og tu tha mal pa rnams la'o/ /de'i 'og tu nye 'khor ba rnams la'o/ /de'i 'og tu rang gi grong na gnas pa rnams la'o/ /de'i 'og tu gzhan gyi grong na gnas pa rnams la'o/ /de'i 'og tu phyogs gcig dang gnyis la sogs pa thams cad la yang mtshan nyid de 'dra ba'i sgo nas skye bar 'gyur ro/ /gnas pa'i tshad ni ji tsam gyis na byams pa la sems gnas pa yin zhe na/ 'di ltar rnal 'byor ba des byams pa'i sbyor ba kun tu bsten cing goms par byas/ lan mang du byas pa'i rgyus na/ rgyu yang rung / gnas kyang rung ste/ yul mngon du gyur cing mtshan ma so sor brtags su zin kyang / mngon par 'du byed pa med par rang bzhin gyis byams pa'i sems mang du snang la/ 'di lta ste byams pa shin tu goms par byas pa'i phyir khong khro ba'i sems med pa dang / gnod sems dang mthun pa'i chos rnams la sems mi 'jug par rig par bya ste/ de tsam gyis na byams pa thob pa yin no/ /de la bstan pa'i thabs ni sems gnas par shes nas/ sngar bsgoms pa las thun gyi grangs nyung bar bya ste/ yun cung zad ring bar bya/ srod tho rangs la yang bsgom mo/ /sems can thams cad la phan dang bde bar 'dod pa'i nyon mongs pa can ma yin pa'i chags pa zhes bya ba/ byams pa'i sems de sngar ji tsam 'jug pa de tsam las lhag par gdung ba mi skyed par dmigs pa'o/ /ji srid lus ngal ba'am/ sems dub pa'am/ bsgoms tsam na dngang ba'am/ shugs 'byung ba'am/ mgo bags kyis lci ba'am/ yam yom byed pa'am/ 'dar ba'am/ nub mo gnyid bral ba'am/ zas mi zhim pa'am/ ngag gi 'khrul pa mang du 'byung ba la sogs pa khams mi bde ba'i mtshan ma cung zad ma byung gi bar du bsgom mo/ /de nam byung tsam na ngal bso ste/ lus la bsku mnye bya ba/ chos dang mthun pa'i zas skom gyis lus kyi nus pa brtas su gzhug ste/ khams sor ma chud kyi bar du nyin mtshan gnyis la bsgom snying 'dod pa'i dus su thun chung re re lta ba tsam bsgom mo/ /nus pa brtas nas srod tho rangs thun re tsam bsgom zhing dge sbyor gzhan la yang 'jug par bya'o/ /de la skyo ba spang ba gang zhe na/ 'di ltar byams pa'i mtshan nyid ni sems can thams cad bde bar 'dod pa yin la/ sems can ni sdug bsngal dang / sdug bsngal gyi rgyu la gnas pas de la dmigs pa'i snying rje dang gis 'byung nas snying rje shin tu goms shing lan mang du byas pa'i rgyus gzhan gyi sdug bsngal la brten nas bdag la sems kyi sdug bsngal chen po skye zhing / des na shin tu skyobs sems can gtong bar 'gyur ro/ /sems can btang nas theg pa chen po las nyams par 'gyur ro/ /de bas na skyo ba spang ba'i ched du 'gro ba mtha' dag don dam par ngo bo nyid med par rtogs par bya ba'i ched du lhag mthong bskyed par bya'o/ /'di skad du mdo las kyang snying rje gcig pus kyang sems can gtong ste skyo ba skye ba'i phyir ro/ /shes rab gcig pus kyang gtong ste/ gzhan gyi sdug bsngal sdang bar mthong ba'i phyir ro zhes gsungs so/ /de bas na gnyis ka zung du 'brel dgos so/ /las tshul bsam gyis mi khyab kyang / /bdag pas blo zhan mi srid de/ /'on kyang don du mi gnyer bas/ /mkhas pa'i gdams ngag ma thos la/ /phan srid bsams nas bris pa lags/ /rab rib can gyis gzugs bltas nas/ /gzhan la 'di zhes ston 'dra bas/ /mkhas pa rnams la bzod par gsol/ / byams pa bsgoms pa'i sgo nas sems gnas par bya ba'i thabs cung zad bris pa rdzogs so/ /[]gti mug mun pa bag chags bcas par gtan spangs nas/ /'gro ba'i don du rten 'brel zab mo'i gsung sgrogs la/ /rab tu dang ba sngon du 'gro bas phyag 'tshal te/ /dang po'i las can gti mug shas che'i don du bshad/

CLOSE WINDOW