བོད་ཡིག

e-texts based on the ACIP/ALL Input

@##/ /rgya gar skad du/ pa dAr+tha tsan+d+ra ka pra b+hA ba ti nA ma aSh+TAM ga hr-i da ya br-it+ti/ bod skad du/ yan lag brgyad pa'i snying po'i rnam par 'grel pa'i tshig gi don gyi zla zer zhes bya ba/ dkon mchog gsum la phyag 'tshal lo/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sman gyi bla bai DUr+ya'i 'od la phyag 'tshal lo/ /'phrog byed mi zad tshig gi gter/ /lha yi lha dbang rab btud de/ /rgyas bshad tshig don zla ba'i zer/ /kun la phan gsal bdag gis ni/ /dpal ldan sgrib med lha yis ni/ /snying ni rnam par drangs pas na/ /bla ma'i lung ni yang dag nyid/ /gsal bar rtogs nas brtsam par bya/ /rig pas rab zab grags ldan pa'i/ /dge ba'i 'o ma'i mtsho las skyes/ /zla ba dga' ba zla ba ltar/ /ma rtogs tsha ba zhi byed yin/ /'dod chags la sogs ma lus pa yi nad/ /rgyun du 'brel bas lus kun ma lus khyab/ / 'dod dang gti mug khro ba sel ba yi/ /sman pa sngon med de la phyag 'tshal lo/ /zhes bya ba la/ bstan bcos rtsom pas ni mngon par 'dod pa'i lha la phyag bya dgos pa'i phyir tshigs su bcad pa dang po 'di smos pa yin te/ 'dod chags la sogs pa'i nad sel sman pa de la phyag 'tshal lo zhes bya bar sbyar ro/ /'dir 'dod chags la sogs pa ni 'dod chags dang zhe sdang la sogs pa yin la/ 'dod chags la sogs pa de nyid ni gnod cing gzir bar byed pas na nad de/ lus dang sems gdung bar byed pa zhes bya ba'i don to/ /de yang gang gi phyir lus can rnams shin tu gzir bar byed pa yin la/ de gang gis sel bar mdzad pa'o/ /de ji lta bu zhe na/ rgyun du 'brel ba zhes bya ba smos te/ rtag tu rjes su 'brang zhing dus thams cad du kun tu 'brel la lhan cig skyes pa zhes bya ba'i don de dang bral ba'i 'khor ba ni nam yang 'byung bar mi 'gyur ro/ /lus kun khyab ces bya ba ni lus kyang yin la kun yang yin pas na lus kun zhes bya ste/ skyes bu dang / phyugs dang / glang po dang / rta dang / ba lang dang / ba lang rgod dang / 'bu srin dang / grog sbur la sogs pa dang 'brel ba'i lus ma lus pa de thams cad la mchog tu khyab par gnas pas na ma lus khyab ces bya ste/ rtsa ba dang bcas shing sa bon dang bcas pa ma lus pa la khyab ba zhes bya ba'i don to/ /'dod dang gti mug khro ba sel/ /zhes bya ba la/ 'dod pa ni yul rnams la 'dod cing chags pa la mngon par zhen pa'o/ /gti mug ni bya ba dang bya ba ma yin pa mngon par ma rtogs shing mi shes pa'o/ /khro ba ni sems kyis zhe sdang zhing gang du yang mngon par chags pa med pa ste/ gang de lta bu sel zhing 'joms par mdzad pa'i sman pa sngon med de la phyag 'tshal lo zhes bya ba yin te/ ngo mtshar du gyur cing rmad du byung ba'i tshul can gyi sman pa sngon med de la phyag 'tshal zhing 'dud par ni gang gi phyir sman pa 'di ni lhan cig skyes pa'i tshul can rtag tu 'brel la/ khyab par gnas pa rtsa ba dang bcas pa gsor mi rung ba'i nad dang mtshungs pa'i rnam pa can/ 'jig par mdzad pa yin la/ sman pa gzhan dag ni rims la sogs pa'i nad rnams mtshan ma 'di dag dang ldan na sel bar mi nus so/ /yang na gang zhig gi sngon du gzhan med pa gang yin pa de ni sngon med ces bya'o/ /'di skad ston te/ de nyid ni de thams cad las thog mar gyur pa yin no/ /gang gi phyir mngon par 'dod pa'i lha la phyag bya ba sngon du 'gro bar ni rtsom pa la 'jug pa thams cad ring po mi thogs par gegs med pa nyid du rdzogs shing 'bras bu dang bcas par 'gyur ro/ /de'i phyir 'dod pa'i lha la phyag byas nas/ de'i 'og tu sman dpyad kyi rgyud byed pas/ rgyud 'di thams cad rtsom pa la 'jug pa yin no/ /de bzhin du 'dir yang 'brel pa la sogs pa bzhi bya dgos la/ tshig ni rim gyis 'jug pa yin pas/ 'di dag cig car brjod par mi nus so/ /de bas na dang por re zhig 'brel pa bshad par bya'o/ /de yang / gang phyir 'brel pa brjod pa yis/ /nyan pa po yi 'jug pa 'grub/ /de bas bstan bcos thams cad la/ /'brel ba dang por brjod par bya/ / zhes bshad pas na/ 'brel ba brjod dgos la/ dgos pa yang / bstan bcos dag ni thams cad dang / /las rnams ci yang rung ba yi/ /ji srid dgos pa ma smras pa/ /de srid de ni su zhig 'dzin/ /zhes bshad pa yin no/ /de la 'dir 'brel pa ni thabs nad kyi mtshan nyid dang / thabs las byung ba nad nye bar zhi ba'i tshe'i rig byed de/ de dag thabs dang thabs las byung ba'i mtshan nyid du 'brel pa ni 'brel pa'o/ /dgos pa ni khams dang rang bzhin gyi bya ba yang ston pa ni gzhung 'di'i dgos pa yin la/ dgos pa'i dgos pa ni chos dang / nor dang 'dod pa rdzogs pa yin no/ /de nas tshe ring bar 'dod pa'i le'u bshad par bya'o/ /zhes bya ba la/ 'dir de nas zhes bya ba'i sgra ni bkra shis pa dang / dbang du bya ba dang / de ma thag pa'i don gyi dbang du byas pa yin te/ de yang / yi ge oM dang de nas sgra/ /gnyis po 'di dag sngon tshangs pa'i/ /mkhur tshos brtol te mngon par byung / /des na 'di gnyis bkra shis yin/ /zhes smos pa yin la/ bkra shis pa la sogs pa ni de 'don par byed pa rnams la bar chad med par rab tu 'jug cing / mngon par 'dod pa'i don bsgrub pa 'byung bar 'gyur ba yin no/ /dbang du bya ba ni tshe ring bar 'dod pa la phan pa'i bstan bcos kyi dbang du byas pa yin te/ gang 'di nas nye bar brtsams te/ gzhung yongs su rdzogs pa de dag thams cad ni tshe ring bar 'dod pa rnams la phan pa yin no/ /de ma thag pa yang lha la phyag byas pa'i rjes thogs nyid la tshe ring bar 'dod pa rnams la phan par bshad pa yin no/ /de nas zhes bya ba ni rgyu'i don te/ gang gi phyir 'gal ba dang / the tshom dang bcas pa dang / don med pa dang / zlos pa la sogs pa'i nyes pa dang bcas pa'i gzhung mang du yod pa'am/ 'gro ba'i khongs su gtogs pa'i 'jig rten pa rnams nad kyi zil gyis non par mthong ste/ de bas na tshe la phan pa dang / nad med pa'i 'gro ba la phan pa bshad par bya'o/ /zhes pa'o/ /tshe zhes bya ba ni 'gro bas na tshe ste/ rgyun mi 'chad par 'gro zhing skad cig kyang mi sdod pa'o/ /tshe de 'dod pa rnams la phan pas na tshe ring bar 'dod pa'o/ /le'u zhes bya ba la/ shes par byed pas na le'u ste/ de yang yi ge bsdus pa ni ngag yin la/ ngag bsdus pa ni rab tu byed pa'o/ /rab tu byed pa bsdus pa ni le'u'o/ /bshad par bya'o zhes bya ba la/ sna tshogs shing du mar phye ba ste/ tshig dang / don dang / dris pa dang / lan te/ gzhung yongs su rdzogs kyi bar du/ gang cung zad bshad pa de thams cad ni tshe ring bar 'dod pa rnams la phan pa'i phyir bshad cing / bstan la rnam par dbye bar bya'o zhes bya ba'i bar du'o/ /rgyun shes kyi bu la sogs pa drang srong chen po rnams kyis 'di ltar bshad de zhes bya ba la/ rgyun shes las skyes pas na rgyun shes kyi bu ste/ 'dis ni rigs yongs su dag par ston par 'gyur ro/ / de bzhin du tshe'i rig byed kyi bstan bcos 'di lung gi tshad ma dang ldan pa yang yin no/ /rgyun shes kyi bu la sogs pa yang yin la/ drang srong chen po yang yin pas na/ rgyun shes kyi bu la sogs pa'i drang srong chen po rnams te/ 'dis ni rang bzo byas pa bkag pa yin te/ kho bos ni rang dgar ni cung zad kyang smra bar nus pa ma yin no zhes pa'o/ /'di ltar zhes bya ba'i sgra ni 'di skad ces bya ba'i don to/ /bshad de zhes bya ba'i sgra ni sngon gyi dus su smra zhing ston pa zhes bya ba'i don to/ /tshe ni ring bar 'dod pa yis/ /chos dang nor dang bde ba bsgrub/ /tshe yi rig byed lung bshad pa/ /rab tu gus par bya bar gyis/ /zhes bya ba la/ chos dang nor gyi bde ba tshe 'dod pa'i skyes bus tshe'i rig byed bstan pa mchog tu gus par bya ba ni/ rang ngam gzhan las shes te bya'o/ /de la tshe zhes bya ba ni 'tsho ba ste/ lus dang dbang pos sems can bdag / 'dus pa bzhi yis 'tsho ba ste/ /rtag par 'gro zhing rjes 'brel ba/ /tshe yi rnam grangs yin par bshad/ /ces bya ba yin la/ tshe de rig par byed pas na tshe'i rig byed do/ /ji lta zhe na/ phan pa dang / phan pa ma yin pa dang / bde ba dang / sdug bsngal ba dang / tshad ma dang / tshad ma ma yin pa nyid las shes so/ /de yang lung las/ phan dang mi phan bde sdug bsngal/ /de yi tshe yin phan mi phan/ /gang du tshad du bshad pa ni/ /tshe yi rig byed yin par bshad/ /ces smos pa yin no/ /yang na gang gis gang la tshe yod par 'gyur ba de ni tshe'i rig byed de/ de yod par shes pa thob cing / rnam par dpyod par 'gyur ro/ /de'i lung bshad pa ni tshe'i rig byed ston par byed pa'i bstan bcos te/ de ltar na tshe'i rig byed ston par byed pa'i bstan bcos la rab tu gus shing 'bad pas go bar gyis shig ces bya ba'i don to/ /de ci'i phyir zhe na/ tshe de ni chos la sogs pa sgrub par byed pa yin no/ /de la chos zhes bya ba ni 'jig rten pa rnams 'dzin cing 'tsho bar byed pas na chos so/ /blang zhing don du gnyer bar bya ba yin pas nor ro/ /bde ba ni sdug bsngal dang bral ba'o/ /de rnams bsgrub pa ni sgrub pa'i thabs su gyur pa'o/ /da ni bstan bcos gcig las gcig tu brgyud pa yin par bstan pa'i phyir/ tshangs pas tshe yi rig byed dran/ /skye dgu'i bdag la bshad pa yin/ / de yis tha skar des brgya byin/ /des rgyun shes sogs drang srong la'o/ /de yis me bzhin 'jug la sogs/ /de rnams kyis rgyud so sor byas/ /zhes smos pa yin no/ /de la tshangs pa ni mes po chen po ste/ /des ni tshe'i rig byed dran pa yin te/ tshe'i rig byed ni rtag pa nyid yin pa'i phyir ro/ /skye dgu'i bdag ces bya ba ni myur ba zhes bya ba ste/ de la bshad cing 'dzin du bcug go/ /de yis tha skar zhes bya ba ni skye dgu'i bdag po des lha'i sman pa tha skar gyi bu gnyis la bshad cing 'dzin du bcug go/ /des brgya byin zhes bya ba ni tha skar gyi bu gnyis kyis/ brgya byin mig stong ldan 'dzin du bcug go/ /des rgyun shes la sogs pa drang srong la zhes bya ba ni/ brgya byin des rgyun shes kyi bu la sogs pa'i drang srong rnams 'dzin du bcug ste/ rgyun shes kyi bu ni nab so skyes so/ /sogs pa'i sgras ni thang la 'bar dang / rkang gnyis spyod dang / mu khyud dang / 'drob skyong gi bu la sogs pas gzung ngo / /de yis me bzhin 'jug la sogs/ /zhes bya ba ni/ rgyun shes kyi bu la sogs pa'i drang srong de rnams kyis/ /drang srong me bzhin 'jug la sogs pa la bshad de/ sogs pa'i sgras ni drang srong lug dang / rgya skyegs sna dang / mda'i mchog dang / lan tshwa'i lag pa zhes bya ba'i bar la bshad cing 'dzin du bcug go/ /de rnams kyis rgyud so sor byas/ /zhes bya ba ni/ me bzhin 'jug la sogs pa de rnams kyis kyang so sor zhes pa re res/ rgyud ces pa sman dpyad kyi gzhung byas shing rgya cher sbyar ba yin no/ /de yang gzhung 'dis tshe'i rig byed kyi don 'dzin cing sdud pas na rgyud zhes bya'o/ /gal te drang srong chen po rnams kyis byas pa'i gzhung rnams yod bzhin du/ rgyud 'di ci'i phyir rtsom par byed/ de la 'bad pa don med pa bskyed pa 'ba' zhig tu zad do zhe na/ de'i phyir shin tu 'thor ba de rnams las rig byed kyi don 'dzin cing sdud pas na rgyud ces bya'o/ / rab ces phal cher bsdus pa ni/ /shin tu bsdus min rgyas min par/ /yan lag brgyad pa'i snying po byas/ /zhes bya ba smos pa yin te/ shin tu 'thor zhing ma 'dus la/ tshig mthon dman can gyis don phan tshun 'phyan par 'gyur ba'i gzhung de rnams las/ shin tu zhes pa phal mo che mang du bsdus nas/ yan lag brgyad pa'i snying po ngas byas la/ de yang shin tu bsdus pa'am/ shin tu rgyas pa ni ma yin no zhes bya ba'i don to/ /tshig gi don ni rnam par 'thor ba'i tshig rnams las btus shing legs par bsdus pas btus pa'o/ /de yang gces pa nyid las phal cher btus pa yin te/ gzhung gzhan dag tu gces pa tsam zhig bsdus pa yin la/ 'di ni rab tu gces pa bsdus pa yin no/ /shin tu bsdus min rgyas min par/ /zhes bya ba la/ bsdus pa ni gzhung nyung ngu zhig sbyar ba'o/ /rgyas pa ni gzhung mang po sbyar ba yin no/ /gang gi phyir shin tu bsdus pa ni blo dman pa rnams kyi don du mi 'gyur la/ de rnams nyid la shin tu rgya cher bshad na yang mnyan pa dang / go ba dang nyams su len par mi nus so/ /de bas na blo dman pa dang / bar ma dang / mchog dang ldan pa'i slob ma rnams kyi don du rgyud 'di byas pa yin no/ /yan lag brgyad pa'i snying po zhes bya ba ni/ yan lag brgyad po rnams kyi snying po ste/ de ni snying dang 'dra bas na snying po ste/ snying po'i sgra ni gces pa'i tshig yin te/ gces par gyur pa gtso bor byas pas gces pa'i don to/ /yan lag brgyad po de rnams kyang gang zhig yin zhe na/ lus dang byis pa gdon lus stod/ /mtshon dang mche ba rgas ro tsa/ /gso dpyad gang la gnas pa yi/ /yan lag brgyad du de bshad do/ /zhes smos pa yin te/ tshe'i rig byed ces bya ba'i rgyud de'i yan lag rnam pa brgyad ni lus kyi yan lag gso ba'i dpyad gnas shing brten pa'i yan lag brgyad du drang srong rnams kyis bshad cing bstan to/ /de la gso dpyad ces bya ba ni/ nad bsal zhing zhi bar byas nas/ khams mnyam par bya ba'i don gyi bya ba'o/ /de yang lung las/ sman pa la sogs rnam pa bzhi/ /bsngags pas khams ni 'gyur ba la/ /khams snyoms phyir ni rab 'jug pa/ /gso dpyad ces ni bya bar bshad/ /ces 'byung ba yin no/ /de la lus kyi gso ba ni yan lag thams cad la brten pa'i nad rims dang / 'khru ba dang / skrang pa dang / khrag dang / mkhris pa dang / mdze dang / gcin rtug 'gags pa la sogs pa nye bar zhi bar bya ba'i don to/ /byis pa gso ba ni gzhon nu gso ba na ma'i nu zho'i nyes pa sbyang ba'i phyir te/ gnod pa byed pa'i nu zho las byung ba'i nad nye bar zhi bar bya ba'i don to/ /gdon gso ba ni lha dang / lha ma yin dang / dri za dang / gnod sbyin dang / srin po dang / yi dwags dang / sha za dang / klu la sogs pa'i gdon gyis sems zin pa la zhi ba'i las dang / gtor ma sbyin pa la sogs pa gdon nye bar zhi ba'i don du bya'o/ /lus kyi stod kyi yan lag gso ba ni/ nam tshong yan chad du gtogs pa'i nad kyi rnam par gyur pa ste/ mig dang / rna ba dang / sna dang / kha la sogs pa'i nad nye bar zhi bar bya ba'i don du bya'o/ /mtshon gyis smas pa gso ba ni/ rtswa dang / shing dang / rdo dang / sa rdul dang / lcags dang / bong ba dang / rus pa dang / skra dang / sen mo sna tshogs kyi rnag 'dzag pa dang / rma mi bzad pa dang / nang du nub pa'i zug rngu dbyung ba'i don du bya'o/ /mche ba'i gso ba ni/ sbrul dang srin bu la sogs pas zin pa bsal ba dang / dug sna tshogs kyis bcom pa nye bar zhi ba'i phyir bya ba'o/ /rgas pa la gso ba ni lang tsho la gnas par bya ba dang / tshe dang blo 'phel ba dang / nad nye bar zhi ba'i don du bya'o/ /ro tsa bar bya ba'i phyir gso ba ni/ khu ba chung ba dang / gdug pa dang / zad pa dang / bskams par gyur pa rnams sa bon 'phel zhing rab tu dang ba bskyed pa'i phyir dang / rab tu dga' ba bskyed pa'i phyir bya ba'o/ /de ltar na yan lag rnam pa brgyad du bshad pa yin no/ /gang gi don du gso bar bya ba'i nyes pa de bstan par bya ba'i phyir/ 'di ltar/ rlung dang mkhris pa bad kan yang / /nyes pa rnam gsum mdor bsdus yin/ /zhes smras pa yin te/ de la dang por rlung smos pa'i rgyu bshad par bya ste/ khyab dang myur du byed phyir dang / /stobs ldan gzhan dag 'khrug byed cing / /rang rgyud grub dang nad mang phyir/ /kun las rlung ni stobs ldan yin/ /zhes bshad pa yin no/ /de'i 'og tu ni phal cher rgyu 'di dag nyid kyis mkhris pa smos pa yin la/ de bzhin du bad kan ni nus pa chung ba dang / nad nyung ba yin pa'i phyir tha mar bstan pa yin no/ /yang zhes bya ba'i sgras ni/ nyes pa gzhan dag kyang yod pa nyid du ston pa yin te/ nyes pa gzhan dag ni 'dod chags dang / zhe sdang dang gti mug go/ la la ni khrag kyang yin no zhes zer ro/ /gnod cing sun 'byin par byed pas na nyes pa'o/ /rnam gsum zhes smos pa ni nges pa'i don te/ gsum nyid yod kyi bzhi pa ni yod pa ma yin no zhes pa ste/ ji ltar gzhung gzhan las bshad pa lta bu'o zhes nges par bya ba yin te/ 'dod chags dang / zhe sdang dang / gti mug dang / khrag gcig pus nad skyed par nus pa ni ma mthong ngo / /de yang / nyes pa gzhan ltar khrag dag ni/ /gzhan gyi dbang gis nyes yod min/ /'di ni til mar tshig pa ltar/ /nad kyi ming du byas pa yin/ / zhes bshad pa dang / de bzhin du bsdus pa las kyang / khams sogs gnas pa nyes pa las/ /nad ni gang zhig 'byung 'gyur bas/ /nye bar gdags pa de bskyed par/ /bshad pa tshig pa'i mar dang mtshungs/ /zhes bshad pa yin no/ /mdor bsdus yin zhes bya ba ni bsdus nas bstan pa'o zhes bya ba ste/ rgyas par ni rlung la sogs pa ldan pa dang / 'dus pa dang / zad byed dang / mnyam pa dang / rnam par 'phel ba dang / de bzhin du shin tu shas che bar yongs su brtags pas kyang mtha' yas par 'gyur ro/ / de ni rnam gyur ma gyur pas/ /lus ni 'joms dang gnas pa yin/ /zhes bya ba la/ rlung la sogs pa de rnams rnam par gyur pa ste/ rang gi rang bzhin las gzhan du gyur cing g.yos pas ni/ lus 'joms shing gnod par byed la/ ma gyur cing rang gi rang bzhin du tha mal par mnyam par gnas pas ni/ lus gnas shing 'tsho bar byed pa yin no/ /zhes bya ba'i don to/ /des khyab gyur kyang snying ga dang / /lte ba'i 'og bar steng na gnas/ /zhes bya ba la/ rlung la sogs pa de rnams khyab cing lus ma lus pa la rgyu bar gyur kyang / gnas nges pa yod par shes par bya ste/ de'i snying ga dang lte ba'i 'og bar steng na gnas zhes bya ba yin no/ /de'i don ni 'di yin te/ snying ga dang lte ba'i 'og man chod ni rlung gi gnas yin no/ /de gnyis kyi bar ni mkhris pa'i gnas yin no/ /de gnyis kyi steng yan chod ni bad kan gyi gnas yin no/ /na tshod nyin zhag zas zos la/ /de yi mtha' dbus sogs gtogs rim/ /zhes bya ba ni nyes pa de rnams na tshod la sogs pa'i mtha' ma dang / dbus la sogs par gtogs pa na rnam par 'phel bar 'gyur ba yin no/ / rim zhes bya ba ni go rims ji lta bar yin gyi/ rim pa 'chol bar ni ma yin no/ /de yang na tshod ni dus su rnam par gzhag pa'i lus kyi gnas skabs gzhon nu la sogs pa'o/ /nyin zhag ni nyin mo dang mtshan mo'o/ /zas zos pa ni zas la spyod pa'o/ /de'i mtha' ma dang dbus dang thog mar gtogs pas na mtha' dbus gtogs zhes bya'o/ /des ni 'di skad ston par 'gyur te/ na tshod kyi mtha' rgas pa'i dus su ni rlung 'phel bar 'gyur la dbus te lang tsho'i dus ni mkhris pa 'phel bar 'gyur ro/ /dang po ste byis pa'i dus su bad kan 'phel bar 'gyur ro/ /de bzhin du nyin mo'i tha mar ni rlung 'phel lo/ /nyi ma phyed na mkhris pa'o/ /snga dro ni bad kan no/ /mtshan mo'i mthar ni rlung 'phel bar 'gyur ro/ /nam gyi gung la ni mkhris pa'o/ /nam stod ni bad kan no/ /de la zas zos pa'i mtha' ma la/ kha tsha bar bro bar gyur pa'i dus su ni rlung 'phel bar 'gyur ro/ /zas zos pa'i bar skyur bar gyur pa'i dus su ni mkhris pa'o/ /zas zos nas dang po mngar ba'i dus su ni bad kan 'phel bar 'gyur ro/ /des ni 'ju ba mi snyoms rno/ /chung dang mnyam pas mnyam par 'gyur/ /zhes bya ba ni rlung la sogs pa de rnams kyi me'i drod kyis 'ju ba mi snyoms pa la sogs pa rnam pa bzhir 'gyur ro/ /de yang rlung gis ni 'ju ba mi snyoms par 'gyur ro/ /mkhris pas ni 'ju ba'i me drod shin tu rno bar 'gyur ro/ /bad kan gyis ni me drod chung bar 'gyur ro/ /mnyam pas ni me drod mnyam par 'gyur te/ nyes pa gsum 'phel 'grib med pas mnyam par 'gyur ro/ /de la gang legs par zas zos kyang yun ring po zhig nas 'ju ba dang / lan 'ga' legs par ma zos kyang shin tu myur bar 'ju ba ni mi snyoms pa'o/ /gang dus thams cad du zas ran par ma zos kyang myur du 'ju ba de ni rno ba yin no/ /gang dus thams cad du zas ran par zos kyang yun ring mo zhig nas 'ju ba de ni chung ba yin te/ rgyu ma 'khrug cing ltam ltam por gyur pa'o/ /gang ran zhing legs par ma zos kyang bde bar 'ju ba ni mnyam pa zhes bya'o/ /de ni lto ba sra snyi ran/ /mnyam pas kyang ni bar mar 'gyur/ /zhes bya ba ni/ rlung la sogs pa'i nyes pa de rnams kyis ni lto ba rnam pa bzhir 'gyur te/ rlung shas che bas lto ba sra bar 'gyur te/ dur byid la sogs pas kyang 'khru ba dka' bar 'gyur ro/ /mkhris pa shas che bas lto snyi bar 'gyur te/ zho ga chu dang / 'o mas kyang 'khru nus par 'gyur ro/ /bad kan gyis ran par 'gyur te/ dong ga la sogs pas kyang 'khru nus par 'gyur ro/ /mnyam pas zhes bya bas ni nyes pa gsum mnyam ste/ des ni bar mar 'gyur zhes bya ba/ sra ba yang ma yin/ snyi ba yang ma yin par 'gyur ro/ /skye ba'i dang por khu khrag gnas/ /dug can srin bu'i dug dang mtshungs/ / de ni rang bzhin rnam gsum ste/ /chung 'bring chen po so sor blta/ /ma lus pa la khams mnyam pa/ /mchog yin nyes pa gnyis 'byung smad/ /ces bya ba ni/ rlung la sogs pa de dag ni re re zhing rang bzhin gsum du 'gyur te/ chung ngu dang / 'bring dang / chen po'o/ /rang bzhin zhes bya ba ni lus kyi rang gi ngo bo'o/ /de ni skye ba'i dang po'i mngal du 'jug pa'i dus skye ba rtsom zhing mngal na gnas pa zhes bya ba'i don to/ /khu ba ni sa bon no/ /khrag ni zla ba'i dus su rgyu bas zla mtshan te/ de la gnas pas na khrag gnas zhes bya'o/ /dris pa gang gi tshe khu ba dang khrag la shas cher gnas pa de'i tshe/ lus rdzogs par ga la 'gyur/ de las nyes pa gang lhag par 'gyur ba de nyid ni rnam par 'gyur zhing 'jig pa yin na/ nyes pa lhag par gnas pa de rang bzhin gyi rgyur ji ltar 'gyur te/ rang bzhin las nyams pa yin la/ rang bzhin las nyams par ni/ rang bzhin gyi rgyur nam yang mi 'gyur ro/ /de yang 'bras bu ni rgyu dang 'dra bar gnas pa yin no zhes rtogs pa dag la dpe bstan pa'i phyir/ dug can srin bu'i dug dang mtshungs/ /zhes bya ba smos te/ dper na dug can ni srog 'jig pa'i rgyu yin yang / dug ni srin bu 'di skye ba'i rang bzhin 'byung bar snang ngo / /de bzhin du 'di dag ni gnod pa'i rang bzhin can yin yang / rang gi tshad las lhag pa'i nyes pa khu ba dang khrag la gnas pas/ skye ba'i dang po lus 'byung bar 'gyur ro/ /de yang rlung shas che bas ni rang bzhin chung bar 'gyur ro/ /mkhris pa shas che bas ni 'bring ngo / /bad kan shas che bas ni chen po'o/ /ma lus pa ste khams thams cad kyi nang nas khams gang mnyam pa'i rang bzhin de ni mchog ste/ thu bo dang dam pa yin la 'di ni bzhi pa'o/ /de yang gang gis khams mnyam par gyur pa de ni khams mnyam pa ste/ khams kyi sgra ni nad gzhi'i nyes pa la bya'o/ /nyes pa gnyis 'byung smad/ ces bya ba ni gang nyes pa gnyis 'dres pa las byung ba'i rang bzhin gsum ni smad pa yin te/ nad med pa ma yin pa'i gzhir gyur pa'i phyir ro/ /de ni rlung dang mkhris pa las byung ba dang / rlung dang bad kan las byung ba dang / mkhris pa dang bad kan las byung ba'o/ /de la rlung ni rtsub cing yang / /grang zhing sra la phra zhing g.yo/ /zhes bya ba la/ de la zhes bya ba ni nges par gzung ba ste/ nyes pa de rnams kyi nang nas/ rlung ni rtsub pa dang / yang ba dang / grang ba dang / sra ba dang / phra ba ste/ rtsa sbubs phra mo la 'jug pa dang g.yo ba ste/ 'gro ba'i ngang tshul can gcig tu mi gnas pa yin no/ /dris pa gzegs gzan la sogs pas ni/ rlung grang ba dang / dro ba yin par bshad la/ 'dir yang zung du 'jug pa'i rjes su gnang bas grang ba dang / dro ba gnyis ka ma yin par 'dod de/ de yang / zung du 'jug pa rlung gi mchog /yang dag sbyor bas don gnyis byed/ / nyi ma ldan pas sreg byed la/ /zla bar gnas pas bsil bar byed/ /ces bshad pa de bzhin du/ rlung ni zung du 'jug pas na/ /bad kan ldan pas bsil bar 'gyur/ /mkhris pa ldan pas tsha ba yin/ /zhes bshad pa'i phyir ro zhe na/ 'dir lan brjod par bya ba ste/ rlung grang ba dang dro ba nyid ma yin pa ni bden mod kyi/ de zung du 'jug pa yin yang de tsam gyi dro bas grang ba'i ngo bo nyid med par mi 'gyur ro/ /rlung gi mtshan nyid grang ba yin par bshad pa'i dgos pa ni 'di yin te/ 'di la dro bas nye bar zhi bar 'gyur ro/ /zhes bstan pa'i phyir de skad smos pa yin no/ /mkhris pa snum bcas rno zhing dro/ /yang zhing dri mnam 'khru zhing gsher/ /zhes bya ba la/ snum bcas zhes pas ni/ cung zad snum pa ste/ bcas pa'i sgra ni cung zad tsam gyi don te/ dper na kha ba dang bcas pa'i sha kha ra zhes zer ba ltar cung zad snum bag can gang yin pa de ni snum bcas zhes bya'o/ /rno ba ni khab kyis 'bigs pa ltar myur du 'byed pa ste/ dman pa las go bzlog pa'o/ /dro ba ni tsha ba 'ur 'ur po skyed pa'o/ /dri mnam pa ni nya rul lta bu'i dri mnam pa lta bu'o/ /'khru ba ni bshang ba sla ba'am/ steng dang 'og tu khyab cing rgyu ba brtan pa yin pa'o/ /gsher ba ni sla ba'o/ /bad kan snum bsil lci ba dang / /brtul zhing 'jam brtan 'byar bag can/ /zhes bya ba ni snum pa'i yon tan dang ldan pas na snum pa'o/ /bsil ba ni tsha ba med pa'o/ /lci ba ni yang bar ma gyur pa'o/ / brtul ba ni yun ring po zhig na ldang ba'o/ /'jam pa ni mi rtsub pa'o/ /brtan pa ni khyab pa'i ngang tshul can no/ /'byar bag can ni mnyes pa na sor mo la chags shing / 'jam bag nal nal po la 'tsher bag can no/ /de ltar na yon tan de dang ldan pas/ yon tan dang yon tan can tha mi dad pa'i nye bar gdags pas/ rlung la sogs pa'i yon tan nyid du bshad pa yin no/ /'di dag 'dres par gyur pa'i tha snyad gzhung du bstan par bya ba'i phyir ming gnyis smos pa ni/ de gnyis gsum zad 'khrugs pa las/ /ldan pa dang ni 'dus pa yin/ /zhes bya ba yin te/ kun tu 'dus pa'i rnam pa gcig ni ldan pa zhes bya la/ gnyis pa ni 'dus pa zhes bya ste/ gnyis pa dang gsum pa ni gnyis dang gsum zhes bya la/ zad pa dang 'khrugs pa ni zad 'khrugs zhes bya ste/ gnyis dang gsum gyi zad pa dang 'khrugs pa zhes bya ste/ de ltar na gnyis dang gsum zad pa dang 'khrugs pa de las ming gnyis 'byung ngo / /'di skad ston pa yin te/ gnyis 'khrugs shing rang gi tshad las lhag par gyur pa'am/ zad par gyur pa las 'dres par gyur pa ni ldan pa zhes bya la/ nyes pa gsum po zad pa'am/ 'phel bar gyur pa las 'dres par gyur pa ni 'dus pa zhes bya'o/ /de yan chad nyes pa rnams smras nas/ khams rnams bstan pa'i phyir/ lus zungs dngas ma khrag dang sha// tshil dang rus rkang khu chu ste/ /gnod bya bdun yin zhes smos te/ bcud kyi dngas ma la sogs pa bdun ni lus zungs zhes bya ste/ lus 'dzin par byed pa yin pa'i phyir lus zungs so/ /de rnams kyang gnod bya zhes bya ste/ rlung la sogs pas gnod cing nyes par bya ba'i gzhi yin pas gnod bya zhes bya ste/ gang gi phyir rlung la sogs pa ni gnod pa'i ngo bo yin pas/ don dang ldan pa'i ming nyes pa zhes btags pa yin la/ des na de rnams ni gnod par bya ba la ltos dgos te/ las med par byed pa po las rtsom par mi 'gyur ro/ /de bzhin du gnod pa med par dngas ma dang lus zungs la sogs pas gnod bya'i ming mi 'thob la/ de med par yang rlung la sogs pas gnod pa'i ming mi 'thob bo/ /de bas na gcig la gcig ltos pa yin pa'i phyir gnod pa dang gnod par bya ba dag gnod par bya ba nyid dang / gnod pa nyid kyi ming 'thob pa yin no/ /dri ma/ gcin/ bshang ba/ rdul la sogs pa'ang yin zhes bya ba'i sgras gnod bya yin par ston te/ bcud kyi dngas ma la sogs pa 'ba' zhig gnod bya yin par ma zad kyi/ dri ma la sogs pa de rnams kyang rlung la sogs pas gnod par bya ba yin no/ /de ltar na dngas ma la sogs pa ni gnod bya dang / lus zungs zhes bya ba yin la/ de bzhin du bshang ba dang gci ba la sogs pa yang dri ma zhes bya ba dang / gnod bya zhes bya ba yin no/ /de ltar gnod pa dang / lus zungs dang / dri mar bstan pas lus bshad pa yin te/ de yang gzhung 'di nyid kyi 'og nas/ nad dang lus zungs dri ma ni/ /rtag tu lus kyi rtsa ba yin/ /zhes bshad pa yin no/ /de ltar bshad pa'i lus te thabs 'ga' zhig gis dus thams cad du yongs su srung ba rdzogs par 'gyur ba'i thabs de bstan pa'i phyir/ thams cad mnyam pas 'phel 'gyur zhing / /de las bzlog pas gnod par 'gyur/ /zhes bya ba smos pa yin te/ thams cad ces bya ba ni gnod pa dang / lus zungs dang / dri ma lus la brten pa rnams te/ de dag mnyam zhing cha mtshungs pa'i rang bzhin du gyur pas brtas shing 'phel bar byed de/ rang gi tshad las lhag par gyur la/ de las bzlog pa ni mi mnyam pa nyid du gnas pa ste/ des gnod par 'gyur ba ni zad par 'gyur zhing 'bri bar 'gyur ba'o/ /spyi dang khyad par la ni rdzas dang yon tan dang / las kyi dbye bas gsum du 'dod de/ de yang / kun gyi rnam kun 'phel ba ni/ /rdzas dang yon tan bya bar mtshungs/ /bzlog pa yis ni dngos po rnams/ /de las gzhan du 'gyur ba yin/ /zhes bshad pa yin no/ /de yang rdzas la ni khrag ni khrag gis brta bar bya'o/ /sha ni shas so/ /tshil ni tshil gyis so/ /rus pa ni rus pas so/ /rkang ni rkang gis so/ /khu ba ni khu bas so/ /de bzhin du mngal ni phyis 'byung bar 'gyur ba'i mngal gyis so/ /zhes bshad pa yin no/ /de la khrag gis khrag go zhes bya ba ni gnyi ga chu'o/ /sha ni shas so zhes bya ba ni sa'o/ /de bzhin du chu'i bdag nyid can gyi chus ni de'i bdag nyid can gyi bad kan 'phel bar 'gyur la/ de bzhin du mar dang 'o mas ni khu ba 'phel bar 'gyur ro/ /de bzhin du sman 'tsho byed dang nye'u shing la sogs pa ni zla ba'i bdag nyid can te/ tshim par byed pas rdzas kyi khyad par rnams kyis/ lus zungs mnyam por byed pa nyid du bya ba gcig pa yin pas/ lus snum zhing stobs dang skyes bu nyid kyi gzi mdangs bskyed pa yin no/ /na le sham dang / tsha ba lnga dang / bse shing gi 'bras bu la sogs pas ni blo dang shes rab dang / me drod la sogs pa 'phel bar byed pa yin no/ /yon tan las ni btso tsa dang / mo tsha dang / kha ru tsha la sogs pa sa'i khams can gyi rdzas su bstan du zin kyang chu'i bdag nyid can bad kan 'phel bar byed de/ snum pa dang / lci ba dang / bsil ba la sogs pa'i yon tan gyi cha dang mtshungs pa'i phyir ro/ /las kyang rnam pa gsum ste/ lus dang ngag dang yid kyi bya ba'i bdag nyid can no/ /de la lus kyis ni rgyug pa dang / mchong ba dang / rkyal ba la sogs pas ni bskyod pa nyid du mthun pas rlung 'phel bar byed do/ /ngag gis ni klog pa dang / smra ba dang / 'don du 'jug pa dang / glur len pa rnams so/ /yid kyis ni yid kyi bya ba ste/ sems shing dpyod pa dang / 'dod pa dang / mya ngan dang / 'jigs pa'o/ /de dag kyang yid 'khrugs par byed pa'i rgyur gyur pas rlung 'phel bar byed pa yin no/ /de bzhin du gdung ba bskyed par mthun pas na/ khro ba dang phrag dog la sogs pas ni mkhris pa 'phel bar byed do/ /gnyid log pa dang / snyom las dang / mal stan bde ba la chags pas ni bstan par mthun pas bad kan 'phel bar byed pa yin no/ /khyad par du gyur zhing mi mnyam pas ni zad par 'gyur ro/ /dper na rdzas las 'bras ga b+he d+ha ni skem par byed pa yin la/ de rlung gi bdag nyid can yin pas sa'i bdag nyid can gyi sha la sogs pa zad par byed pa yin no/ /de bzhin du me'i bdag nyid can gyi lan tshwas ni bad kan zad par byed do/ / yon tan las ni dper na skyur rtsa bas ni chu'i bdag nyid can yin pas/ bad kan la de dang mi mthun pas yang ba dang / rtsub pa dang / dro ba dang / rno ba dang / skam pa'i yon tan gyis zad par byed do/ /las las ni gnyid dang / snyom las dang / yid mi bde ba dag ni rlung kun tu g.yo ba dang bcas pa yin la/ 'di dag yongs su mi g.yo ba'i mtshan nyid can yin pas na 'bri bar byed pa de bzhin du yongs su g.yo ba'i tshul can sems las dang / phan tshun bskyod pa dang / rtsol ba la ni mi 'gul ba'i mi mthun pa'i phyogs yin pas na bad kan zad par byed do/ /de ltar na/ thams cad mnyam pas 'phel 'gyur zhing / /de las bzlog pas gnod par byed/ /ces bshad pa yin no/ /rlung la sogs pa de rnams gang las 'phel ba dang / zad par 'gyur ba de bshad par bya ba'i phyir/ ro ni mngar skyur lan tshwa dang / /tsha dang kha dang bska ba ste/ /rdzas drug la gnas de rnams kyang / /go rims bzhin du stobs chen yin/ /zhes bya ba smos pa yin te/ mngar ba la sogs pa'i ro drug ni lce'i dbang po'i yul yin pas na ro'o/ /de dag kyang 'byung ba lnga'i bdag nyid can gyi rdzas la brten pa yin te/ go rims ji lta ba bzhin du mthu stobs che ba yin te/ sngon ma sngon ma rnams stobs thob cing nus pa che ba yin no/ /de bas na ro thams cad la ro mngar ba ni lus can rnams kyi stobs shin tu 'ang bskyed pa yin la/ bska ba ni thams cad las stobs bskyed pa la dman pa yin no/ /de la mngar ba ni bu ram dang / mar la sogs pa ro mngar ba rnams so/ /skyur ba ni skyur rtsi chen po la sogs pa shin tu skyur bar byed pa yin no/ /lan tshwa ni lce myang tsha la sogs pa'o/ /tsha ba ni na le sham la sogs pa'o/ /kha ba ni nim pa la sogs pa'o/ /bska ba ni a ru ra la sogs pa'o/ /drug ces bya ba ni drug po nyid de lhag pa'am/ chad pa ma yin pa'o/ /ro de rnams kyi yon tan dang / ro la sogs pa'i bye brag dang / de bzhin du sbyar zhing 'dres pa dang / ro'i rjes nyid dang / shin tu myur bar brtag pa la sogs pa'i dbang gis tha dad par 'gyur du zad kyis/ 'on kyang drug po nyid las 'da' bar mi 'gyur ro/ /de las dang po gsum po ni/ /rlung 'joms tsha sogs bad kan sel/ /bska dang kha dang mngar ba ni/ /mkhris sel gzhan dag byed pa yin/ /zhes bya ba ni/ de la ro de rnams kyi nang nas/ dang po ni gsum ste/ mngar ba dang / skyur ba dang / lan tshwa rnams ni rlung 'joms shing zhi bar byed pa yin no/ /gzhan dag tsha ba dang / kha ba dang / bska ba gsum po dag ni rlung de nyid skyed par byed cing / 'khrugs par byed pa yin no/ /tsha sogs bad kan sel zhes bya ba ni/ tsha ba dang / kha ba dang / bska ba gsum ni bad kan sel ba yin la/ mngar ba dang / skyur ba dang / lan tshwa ste gsum po gzhan dag ni bad kan skyed pa yin no/ /bska ba dang / kha ba dang / mngar bas ni mkhris pa sel ba yin no/ /skyur ba dang / lan tshwa dang / tsha ba ste gzhan dag ni mkhris pa de nyid skyed par byed pa yin no/ /des ni 'di skad ston par 'gyur te/ mngar ba ni rlung dang mkhris pa sel zhing bad kan skyed pa yin no/ /skyur ba ni rlung sel zhing bad kan dang mkhris pa skyed pa yin no/ /lan tshwa ni rlung sel zhing bad kan dang mkhris pa skyed pa yin no/ /tsha ba ni bad kan sel zhing rlung dang mkhris pa skyed pa yin no/ /kha ba ni bad kan dang mkhris pa sel zhing rlung skyed pa yin no/ /bska ba ni bad kan dang mkhris pa sel zhing rlung skyed pa yin no/ /ro de rnams kyi rten gyi rdzas rnam pa gsum yod par bshad pa ni/ de ltar rdzas ni rnam pa gsum/ /zhi 'khrugs tha mal gnas la phan/ /zhes smos pa yin no/ /de ltar zhes pa tshul 'dis rdzas zhi ba la sogs pa'i dbye bas rnam pa gsum du 'gyur ba yin gyi/ rnam pa gzhan gyis ni gnyis sam/ yang na rnam pa du ma nyid yin no zhes so/ /de ltar gyi sgras ni dam pa'i don du bshad pa yin no/ /de la gnod pa gang 'khrugs par gyur pa zhi bar gyur pa de ni zhi ba ste/ dper na til mar dang / mar dang / sbrang rtsi lta bu'o/ /de la til mar ni snum pa dang / dro ba dang / lci ba dang ldan pas rlung gi de dang mi mthun pa'i mtshan nyid zhi bar byed pa yin la/ mar sar ni mngar ba dang bsil ba dang brtan pa'i yon tan dang ldan pas/ de dang mi mthun pa'i mtshan nyid dang ldan pa'i mkhris pa sel ba yin no/ /sbrang rtsi ni rtsub pa dang / rno ba dang / bska ba dang ldan pas de dang mi mthun pa'i mtshan nyid can bad kan zhi bar byed do/ /de la 'khrugs pa ni gang rlung la sogs pa'i gnod pa rnams dang / bcud kyi dngas ma la sogs pa'i lus zungs rnams dang / gcin la sogs pa'i dri ma rnams 'khrugs par byed pa ni 'khrugs pa'o/ /de ni dper na nas thug dang / ba ta la dang / ma sha dang / nya sha dang / rdo gu rlon pa dang / yungs kar dang / zho sar pa dang / phrum dang / mi mthun pa'i kha zas nya dang 'o ma lhan cig bza' ba lta bu la sogs pa'o/ /tha mal par gnas pa la phan pa ni gnod pa nas dri ma'i mthar thug gi bar du rang gi tshad dang ldan par gnas pa ni/ mnyam par 'jug cing tha mal bar gnas pa ste/ de la phan pa'i rdzas gang yin pa de ni tha mal gnas la phan zhes bya ste/ de ni dus su spyad pa la brten pa'i skabs su 'og nas bshad pa dang / de bzhin du zas kyi tshod ran par bza' ba'i le'u las bshad pa dang / sA lu rtsa snar dang / drug cu pa dang / nas dang / gro dang / srog chags skams la gnas pa'i sha dang / 'tsho byed kyi tshod ma la sogs pa dang / zho ga chu dang / 'o ma la sogs pa dang / de bzhin du gang stobs skyed cing bcud kyis len pa dang / ro tsa bar byed pa dang / rnam pa thams cad du bza' bar bya ba nyid du bstan pa rnams so/ /de'i nus pa bshad pa ni/ de la tsha bsil phul byung bas/ /nus pa rnam pa gnyis su bshad/ /ces bya ba yin te/ de la zhes pa rdzas de la nus pa rnam pa nyi shu yod pa'i nang nas/ tsha ba dang bsil bdag ni phul du byung ba yin pas nus pa zhes bya ste/ tshe'i rig byed thams cad las tsha ba dang bsil ba'i nus pa gnyis po nyid du bshad pa ni/ rgyu dang 'bras bu'i don yin no/ /de la nus pa ni yon tan la bya la/ tsha ba dang bsil ba phul du byung ba ni/ tsha ba dang bsil ba khyad par du 'phags pa nyid de/ la la ni tsha ba'i nus pas phul du byung bas tsha ba'i nus pa'i ming thob la/ de bzhin du bsil ba'i nus pas phul tu byung zhing / bsil ba'i nus pas khyad par du 'phags pa nyid kyis bsil ba'i nus pa'i ming thob bo/ /gal te rdzas rnam pa sna tshogs pa yod mod kyi/ 'on kyang 'gro ba ni me dang zla ba'i bdag nyid can yin pa'i phyir/ nus pa'i rnam pa gnyis kho nar bshad do/ /sman zhu ba'i rjes bshad pa ni/ rdzas kyi zhu ba rnam gsum ste/ /mngar skyur tsha ba'i bdag nyid can/ /zhes smos pa yin te/ zhu ba ni rnam pa gsum ste/ rdzas thams cad yongs su zhu bar gyur pa'i dus su/ 'bras bu las rjes su dpag par bya ste/ pho ba'i me dang phrad pa las/ ro rnams rang gi rang bzhin las gzhan du 'gyur la/ de ni rnam pa gsum nyid yin gyi/ ro drug yod kyang drug ni ma yin no/ /de la rdzas ni la la ni mngar bar zhu'i/ la la ni skyur bar zhu/ la la tsha bar zhu ba yin no/ /de la mngar ba dang / lan tshwa ni mngar bar zhu ba'o/ /skyur ba ni skyur bar zhu ba'o/ /tsha ba dang / kha ba dang / bska ba ni tsha bar ro/ /de ni 'bras bu las rjes su dpag pa yin no/ /de yang / pho ba'i me dang phrad pa las/ /gang zhig ro ni gzhan gyur pa/ /ro rnams zhu ba'i tha ma dag /de ni zhu ba zhes bshad do/ /zhes 'byung ba yin no/ / de bas na khyad par du smin par gyur pa las zhu ba zhes bya'o/ /cung zad smin pa ni ma yin no/ /de bzhin du mtho btsun drang srong tsa ra kas kyang / rdzas kyi ro ni 'bab pa na/ /las kyi mtha' ni zhu ba yin/ /ji srid gnas pa yon tan te/ /'dus pa las ni shes par 'gyur/ / zhes bshad pa yin no/ /de ltar na las byas pa rjes su dpag pa'i tshul gcig pa'i gnas skabs pho ba'i me drod dang phrad pa las ro rnams ro gzhan du gyur pa gang yin pa de nyid ni zhu ba zhes bya'o/ /gang pho ba me dang phrad pa tsam gyis ro rnams gnas skabs du mar 'gyur te/ dang po ni mngar ba'o/ /de'i rjes thogs la de nyid smin pa ni skyur ba'o/ /de las kyang smin pa'i mthar thug pa na tsha bar gyur pa la ni mi bya'o/ /rdzas kyi yon tan rnams bshad pa ni/ yon tan lci rtul bsil dang snum/ /'jam dang bska ba mnyen dang brtan/ / phra dang bcas shing skam bag can/ /de bzlog pa ni nyi shu yin/ /zhes bya ba yin te/ de la rdzas kyi yon tan ni/ lci ba la sogs pa bcu yin la/ de las bzlog pa dang / nyi shu yin par shes par bya ste/ 'di dag rim gyis bzlog pa ni yang ba dang / rno ba dang / tsha ba dang / rtsub pa dang / sla ba dang / sra ba dang / g.yo ba dang / sbom pa dang / sla bag nal nal po yin no/ /de ltar na go bzlog pa ni/ de dag yin pas spyir nyi shur 'gyur ro/ /nad kyi rgyu bshad pa ni/ dus don las kyi sbyor ba rnams/ /dman dang log pa lhag pa dang / / yang dag sbyor bas nad dang ni/ /nad med rgyu gcig yin zhes bya ba yin te/ de la dus ni bsil ba dang / tsha ba dang / char 'bab ba'i dus te gsum mo/ /don ni 'byung ba chen po'i yon tan sgra dang / reg bya dang / gzugs dang / dri dang / ro'o/ /de yang lung las/ don ni sgra sogs yin zhes bya/ /spyod yul yul dang yon tan yin/ /zhes bshad pa yin no/ /las ni bya ba ste/ lus dang ngag dang yid kyi kun tu spyod pa'o/ /de ltar dus dang don dang las ni dus don las te/ de rnams kyi sbyor ba ni 'brel pa'o/ /ji lta bu zhe na/ dman dang log pa lhag pa dang / /zhes bya ba dang / de bzhin du yang dag pa'i sbyor ba yin te/ gang dus la sogs pa'i sbyor ba dman pa dang / log pa lhag pa ste/ de ni nad kyi rgyu gcig pu yin la/ de rnams nyid kyi yang dag pa'i sbyor ba gang yin pa de ni nad med pa'i rgyu gcig pu yin no/ /de la yang dag pa'i sbyor ba smos pa ni nad dang nad med pa'i rgyu go rims bzhin du shes par bya ba'i phyir 'di logs shig tu bstan pa yin no/ /rgyu gcig yin zhes bya ba ni rgyu gcig pu yin pa ste/ gcig gi sgra ni gtso bor gyur pa'i tshig yin no/ /de yang dper na gzhu 'dzin pa ni srid sgrub gcig pu yin no zhes zer ba lta bu'o/ /dus kyi sbyor ba dman pa ni rang gi rang bzhin las nyams pa'o/ /lhag pa'i sbyor ba ni rang gi rang bzhin las lhag par gyur pa'o/ /log pa'i sbyor ba ni rang gi rang bzhin las phyin ci log tu byed pa'o/ /de yang dper na dman pa'i bsil ba dang / dman pa'i tsha ba dang dman pa'i char ni dman pa'i sbyor ba'o/ /dper na grang ba'i dus kyi gnas skabs su shin tu grang ba ni lhag ba'i sbyor ba'o/ /dper na lhag par bsil ba dang / lhag par tsha ba dang / lhag par char 'bab pa ni lhag pa'i sbyor ba ste/ /sbyor ba 'di gsum ni nad kyi rgyu yin no/ /mnyam pa'i sbyor ba ni yang dag pa'i sbyor ba ste/ rang bzhin ji lta ba bzhin du gnas pa ni nad med pa'i rgyu yin no/ /yang don ni dbang po rnams kyi rang rang gi don dman pa la sbyor ba ni dman pa'i sbyor ba'o/ /shin tu sbyor ba ni lhag par sbyor ba'o/ / rtsub cing mngon par mi 'dod pa la sogs pa'i sbyor bar gyur pa ni log pa'i sbyor ba'o/ /lus la sogs pa'i las dman pa la 'jug pa ni dman pa'i sbyor ba'o/ /lhag par 'jug pa ni lhag pa'i sbyor ba'o/ /bshang gci la sogs pa'i shugs 'gags pa dang / phyed tsam za zhing mang du smra ba la sogs pa dang / 'dod chags dang / zhe sdang la sogs pa rang rang gi bdag nyid kyis 'og nas bshad pa rnams ni log pa'i sbyor ba'o/ /thams cad kyang mnyam par 'jug pa ni yang dag pa'i sbyor ba'o/ /de bas na dman pa la sogs pa'i sbyor ba gsum ni nad kyi rgyu yin no/ /yang dag pa'i sbyor ba ni nad med pa'i rgyu yin no/ /nad dang nad med pa'i zhes gang la bya zhe na/ nad kyi nyes pa ma snyoms pa yin no/ /nyes pa snyoms pa nad med nyid/ /ces bshad pa yin no/ /rlung la sogs pa'i nyes pa rnams gcig gam gnyis sam gsum rang gi tshad las 'phel lam zad par gyur na/ nad kyi rgyu yin pas nad nyid ni ma snyoms pa yin par brtag par bya ste/ rang gi rang bzhin las g.yos par gyur pa yin la/ de bas na rgyu dang 'bras bu tha mi dad ba'i nye bar gdags pas nad ces bya'o/ /nyes pa rnams snyoms shing rang gi rang bzhin las mi 'gyur ba mnyam par gyur pa de ni nad med pa nyid ces bya ste/ tha mal par rang bzhin du gnas pa zhes bya'o/ /de'i dbye ba bstan pa ni/ /de la nad ni rang bzhin gnas/ /glo bur cha yis gnyis su bshad/ /ces bshad pa yin no/ / de la zhes pa nad dang nad med pa de dag la nad ni rang bzhin du gnas pa dang / glo bur ba'i dbye bas gnyis su bshad do/ /de la rang bzhin gyis gnas pa ni/ rlung la sogs pa'i nyes pa las byung ba'o/ /glo bur ba ni phyi rol nas 'ongs pa'o/ /de yang slob dpon gyis/ nyes pa gsum las byung ba ni/ rang bzhin gyis gnas pa yin la/ phyi rol gyi rgyu las byung ba'i glo bur ba yin no/ /zhes bshad pa yin no/ /'di gnyis kyi khyad par ni 'di yin te/ rang bzhin gyis gnas pa'i nad rlung la sogs pa ni/ dang po ma snyoms par gyur nas/ phyis zug gzer bskyed pa yin la/ yang glo bur ba ni dang po nyid du zug gzer bskyed nas/ der rlung la sogs pa 'khrugs par 'gyur ro/ /rang bzhin gyis gnas pa dang / glo bur ba'i khyad par gyis phye ba'i nad 'di gnyis kyis sems kun tu gdung ba yin par shes par bya'o/ /gang gi phyir 'di ltar lus dang sems ni nad kyi gnas nyid du gnas pa yin te/ lus gcig pu'am sems gcig pu ni ma yin no/ /de bas na de'i rjes thogs la 'di skad ces bshad pa yin te/ de rnams lus sems dbye ba yis/ /gnas kyang rnam pa gnyis yin no/ /zhes bya ba las yang rang bzhin gyis gnas pa dang / glo bur ba'i nad de rnams ni lus dang sems kyi dbye bas gnas rnam pa gnyis yin te/ rims dang / khrag dang / mkhris pa dang / lud pa la sogs pa'i gnas ni lus yin la/ myos pa dang / brgyal ba dang / sgyid lug pa dang / gdon dang / 'byung bo dang / smyo ba dang / dran pa nyams pa dang / 'dod chags dang / zhe sdang la sogs pa'i gnas ni sems yin no/ /de yang 'di las gnas pas na gnas so/ /dris pa lus kyi nad skyed pa'i rgyu ni rlung la sogs pa'i nyes pa rab tu 'khrugs pa yin par bshad kyi/ sems kyi nad kyi rgyu gang zhig yin zhe na/ de'i phyir bshad pa ni/ 'dod chags gti mug kyang yid kyi/ /nyes pa gnyis su bstan pa yin/ /zhes bya ba yin te/ yid ni sems la bya la/ de ni 'dod chags dang gti mug bde zhing ma rig pa las byung ba yin la/ 'dir yang gtso bor gyur pas dang por 'dod chags smos pa yin no/ /kyang zhes bya ba'i sgras ni rlung la sogs pa yang nye bar bsdu ba'i don yin te/ gang gi phyir de rnams kyang sems la brten nas/ rnam par 'gyur bar byed pa yin te/ dus dag tu rlung dang mkhris pa dang bad kan dang ldan pa dang 'dus pa dang / dug gi rgyu las byung ba'i smyo nad drug yod pa yin no/ /bstan pa yin zhes bya ba ni tshe'i rig byed kyi bstan bcos dag tu tshig gis mdo tsam du bstan gyi/ rlung la sogs pa bzhin du 'dod chags dang gti mug gi mtshan nyid ma lus par ni ma yin no/ /'dir rang bzhin gyis gnas kyi mtshan nyid la sogs pas/ rlung la sogs pa'am ma lus pa bshad pa yin gyi/ 'dod chags dang gti mug ni ma yin no/ /nad kyis bcom pa'i lus shes par bya ba'i thabs bstan pa ni/ nad pa blta dang rig pa dang / /dris pa yis ni yongs su brtag /ces bya ba smos pa yin te/ nad yod pas na nad pa ste nad kyis gdungs pa'o/ /de ni blta ba la sogs pas yongs su brtag par bya'o/ /de la blta ba ni mig gis te/ mig ser ba la sogs pas nyam thag pa rnams la mdog ser ba dang / dkar por snang ba dang / dbyibs kyi tshad kyis 'phel 'grib dang / mdangs dang bshang gci dang / skyugs pa la sogs pas brtag par bya'o/ /reg pa ni lag pa dang / lus kyi reg pas rims dang / skran dang / ma zhu bas nyen pa dang / de bzhin du grang ba dang / tsha ba dang / rengs pa dang / 'dar ba dang / 'jam pa dang / rtsub pa la sogs pa reg pas brtag pa dang / dris pa ste gzer dang / yi ga 'chus ba dang / slon ba dang / lto sra ba dang / snyi ba dang / rmi lam du mthong ba dang / bsam pa dang / na tshod dang / nad kyi mgo gang nas zug pa dang / skar ma dang / mdza' bo dang / dgra bo dang / bde ba dang / sdug bsngal la sogs pa dang / nad pa'i tshig las yongs su brtag par bya'o/ /nad kyi bye brag shes par bya ba'i thabs bshad pa ni/ nad kyi gzhi yi dang po'i tshul/ /mtshan nyid nyer bstan thob pa yin/ /zhes bya ba yin te/ nad ni nad gzhi la sogs pa lngas yongs su brtag par bya ste/ nad gzhi dang rgyu dang byed pa zhes bya ba ni ming gi rnam grangs so/ /de yang nye ba dang ring ba'i bye brag gis rnam pa gnyis yin la/ nye ba yang nye ba dang shin tu nye ba'i dbye bas gnyis so/ /de la nye ba ni rtsub pa dang / yang ba dang / grang ba la sogs pa'i rdzas dang 'dres par gyur pas so/ /shin tu nye ba ni dper na rlung la sogs pa'i nyes pa rnams gang dag gi rjes thogs nyid la nad 'byung bar 'gyur bas 'khrugs par 'gyur ro/ /ring ba ni gang rims la sogs pa'i dang po'i dus nyid du 'byung ba ste/ dper na phyi rol du sha bkra la sogs pa 'byung ba dang / mdze dang gcin nad la sogs pa ste/ des na 'di lta bu'i don bskyed pa dang / 'di lta bu'i nad kyi rgyu nyid du nye bar gnas pa yin la/ de ltar byung ba yin pas de'i phyir nad gzhi las nad shes par bya'o/ /dang po'i tshul ni phyis 'byung ba'i nad mi gsal ba'i khyad par gnas pa'i mtshan nyid de/ rims la sogs pa'i nad 'byung bar 'dod pa na/ rlung la sogs pa'i gnod pa'i khyad par gyis khyad par mi snang ba la/ gang gis snang bar 'gyur zhing ci nas chung ba nyid kyis gang mi gsal zhing rtags mngon du ma gyur pa de ni dang po'i tshul lo/ /mtshan nyid kyang dang po'i tshul las mtshan nyid tha dad pa ste/ gang gis nyes pa ma lus pa'i bye brag gis khyab pa'i rtags dang ldan par nad gsal ba nyid du mthong zhing shes pa'o/ /nyer bsten ni bde ba dang / rjes su 'brel pa'i kha zas la sogs pa la spyod pa ste/ 'di lta bu'i kha zas la sogs pas ni/ 'di'i nad 'di na ma byung ba 'di lta bus ni deng 'byung bar 'gyur ro zhes bstan pa las nad 'di yin no zhes shes pa'o/ /nad de ni gso ra rung zhing bde ba'i rgyu yin pas na bde ba thob pa yin no/ /thob pa dang rdzogs pa dang yang dag par thob pa dang 'ongs pa dang / skyes pa zhes bya ba ni don gyi rnam grangs yin no/ /de yang 'di lta bu'i mi mthun pa dang / gnas 'di lta bu gnas pa dang / 'di ltar rjes su 'gro ba dang / brtag pa 'di dang / lam 'di dang nyes pa 'di thob pa yin no zhes yongs su brtag pa ste/ de bas na thob cing mthar phyin pa las/ nad 'di yin no zhes shes pa'o/ /nye bar bstan pa la sogs pa'i skabs kyi yul dang dus la sogs pa dang nye bar sbyar dgos te/ de bas na de gnyis kyang bshad pa ni/ sa dang lus kyi bye brag gis/ /'di la yul sa rnam gnyis bshad/ /ces bya ba yin te/ tshe'i rig byed kyi bstan bcos 'di la yul sa ni slob dpon dag gis rnam pa gnyis su bshad do/ /de gang zhe na sa'i bye brag dang lus kyi bye brag gis so/ /de la lus kyi yul ni mgo bo dang lag pa la sogs pa'i mtshan nyid dang ldan par grags pa'i lus nyid do/ /sa'i yul bshad par bya ste/ skams phal cher rlung skyed cing / /rlan can bad kan 'phel ba yin/ /cha mnyam nyes pa mnyam pa ste/ /sa yi phyogs ni gsum du bshad/ /ces bya ba la/ /yang sa'i phyogs ni rnam pa gsum du bshad de/ de la skam sa'i chu dang shing dang ri bo nyung zad cig yod pa ste/ 'og nas bshad do/ /phal cher rlung skyed cing zhes bya ba ste/ de las skyes pa'i sman ni rtsub pa dang / sra ba yin pa dang / ri dgas la sogs pa yang rlung gi shas che ba yin no/ /rlan can ni chu dang / shing med pa dang / rlung med pa dang / than pa nyung ba'o/ /de ni bad kan 'phel ba yin te/ de las skyes pa'i sman la sogs pa yang / snum la sogs pa dang ldan pa yin no/ /cha mnyam pa ni mtshan nyid gnyi ga dang ldan pa ste/ 'dres pa'i tshul can no/ /nyes pa mnyam pa ste zhes bya ba ni rlung la sogs pa'i nyes pa mnyam pa'o/ /sman rnams kyis yang dag par sbyar ba'i rgyu'i dus bshad pa ni/ skad cig la sogs nad kyi skabs/ /dus su sman ni sbyor bar byed/ /ces bya ba yin te/ dus ni rnam pa gnyis te/ skad cig la sogs pa'i mtshan nyid dang / nad gyi gnas skabs kyi mtshan nyid do/ /sman ni sbyar bar bya zhes bya ba ni sman gyi sbyor ba byed do/ /de'i don rdzogs par byed nus so zhes pa'i don to/ /de la skad cig ni grags par zad do/ /sogs pa'i sgras ni thang cig dang / yud tsam dang / thun gcig dang / nyin zhag dang / zla ba phyed dang / zla ba dang / dus dang / lho phyogs dang / byang phyogs su 'gro ba dang / lo rnams gzung bar bya'o/ /skad cig la sogs pa'i dus kyi dper brjod par 'di ltar/ snga dro'i dus su skyug sman gtang / /nyi ma'i gung la 'khru sman te/ /nyi ma gung las cung zad yol/ /sman nas sman ni mkhas pas gtang / /zhes bshad pa yin no/ /nad kyi gnas skabs ni ma zhu ba dang / zhu ba dang / dal ba dang / bar ma dang / drag pa nyid kyi de dang 'tsham pa'i sman gyi sbyor ba gtang bar bya'o/ /de ni 'di ltar/ smyung ba dugs dang rtsa ba lnga/ /nas thug tig ta sha khu dang / /dri ma rnams ni smin bya ba/ /gnas skabs kyis sam rim pas so/ /zhes bya ba dang / de bzhin du/ rims la thug pa ska ba dang / /mar sar 'o ma bkru sman dag /nad stobs yod med bltas nas ni/ /nyi ma drug drug sbyar bar bya/ /zhes bya ba dang / de bzhin du/ rims ni rtse zhil lus yang la/ /dri ma la sogs g.yos pa na/ /rims btab yun ring ma lon kyang / /de tshe sman gyi sbyor ba bya/ /zhes bya ba yin te/ gnas skabs 'dir byin pa'i sman ni nad med pa'i don du 'gyur ro/ /sman de yang rnam pa gnyis su bshad do/ /mdor na sman ni rnam gnyis te/ /sbyang ba dang ni zhi ba'o/ /zhes bya ba yin te/ mdor bsdu na 'jig rten dag na sman rnams yod pa de rnams du mar yod du zin kyang tshul gnyis las 'da' bar mi byed de/ sbyang ba dang zhi ba'i mtshan nyid rnam pa gnyis su bshad pa yin no/ /de la sbyang ba ni nyes pa 'khrugs pa phyi rol du bton nas nad nye bar zhi bar byed do/ /zhi ba ni gang rang gi gnas na gnas pa nyid la cha mnyam par byed pas zhi ba yin no/ /sman bshad nas de'i yul bshad pa ni/ lus las byung ba'i nad rnams kyi/ /rim gyis sman gyi dam pa ni/ /mas gtong bkru sman slon sman dang / /de bzhin til mar mar sbrang rtsi/ /zhes bya ba yin te/ lus las byung ba'i nad rlung la sogs pa rnams kyi rim gyis zhes bya ba grangs ji lta ba'i go rims gyis bstan pa dang / bshad par gyur pas sman gyi dam pa zhes bya la/ sman gtso bor gyur pa ni mas gtong ba nas slon pa'i bar gyis sbyang bar bya ba dang / de bzhin du til mar nas sbrang rtsi'i bar ni zhi bar byed pa'i tshul can yin no/ /des na rlung la ni mjug ma nas sbrang rtsi dang sman bskol ba lgang pa nas gtang bar bya ba sman gyi mchog yin no/ /mkhris pa la ni bkru sman kha nas btung zhing mjug ma'i las kyi mtha' nas dbyung ba sman gyi mchog yin no/ /bad kan la ni slon sman kha nas 'thungs pas/ de nyid nas nad dbyung ba sman gyi mchog yin te/ de dag ni nad rnams sbyangs pa'i tshul gyi sman yin no/ /til mar la sogs pa zhi ba'i rang bzhin can gyi sman yin no/ /de bzhin du zhes bya ba ni rim gyis te rlung la til mar ro/ /mkhris pa la ni mar sar ro/ /bad kan la ni sbrang rtsi sman gyi dam pa ste/ sman gyi gtso bo yin zhes bya ba'i don to/ /dus la sogs pa'i yul la brten pa thams cad du lus las byung ba'i nad thams cad kyi sman gyi dam pa bshad zin kyang / de'i 'og tu sems kyi nad gso ba'i mchog gang zhig yin zhe na/ de'i phyir bshad pa ni/ blo dang brtan bdag sogs shes pa/ /sems kyi nyes pa'i sman mchog yin/ /zhes bya ba yin te/ sems kyi nyes pa 'dod chags dang zhe sdang dang gti mug dag la ni nad sel bar byed pa'i sman gyi mchog ni blo dang brtan pa la sogs pa yin te/ de la blo ni shes rab ste/ phyi dang nang gi bdag nyid can gyi dngos po rnams la phan pa dang / phan pa ma yin pa'i bye brag gis cha rnam par 'byed shes par bya'o/ /brtan pa ni sems mi 'gyur zhing brtan pa nyid de blo mi rgod pa'o/ /de yang gong gis bkag pa rnams la 'jug par mi byed pa dang / phan pa ma yin pa rnams dang sdug bsngal la yid zhum pa med pa'o/ /bdag nyid shes pa ni rnal 'byor gyi ngo bo nyid shes pas/ ting nge 'dzin gyi don dam pa'i bdag nyid shes pa'o/ /sogs pa'i sgras ni ye shes dang / rnam par shes pa dang / dran pa dang / yul dang / dus la sogs pa shes pa yongs su bsdu'o/ /sems kyi nyes pa 'byung ba 'dod pa la sogs pa nad bsal ba'i don du mchog ces bya ba'i sgra ni khyad par gyi tshig tu bstan pa yin no/ /de ltar na re zhig 'dis ni gso ba ma lus par bstan pa yin la/ de yang yan lag bzhi dang ldan na dgos pa byed pa yin pas/ de'i phyir bshad pa ni/ gso ba dag tu bstan pa ni/ /sman pa sman dang nad g.yog dang / /nad pa yan lag rnam bzhi ste/ /re re'ang rnam pa bzhi bzhi yin/ /zhes bya ba yin te/ gso ba zhes bya bas nad nye bar zhi bar bya ba'i mtshan nyid kyi yan lag ni rnam pa bzhi yod par bshad la/ de re re la yang rnam pa bzhi bzhi yod de/ de ltar na yon tan rnam pa bcu drug yin par gso dpyad mkhas pa'i sman pa rnams 'dod do/ / de la sman pa ni de'i gtso bo yin pas dang por bstan te/ de yang lung las/ sbyor zhing rab sbyor ston pas na/ /'di ni sman pa gtso bo yin/ /zhes bshad pa yin no/ /de bzhin du bsdus pa las kyang / sman pa yon tan med yan lag /yon tan ldan yang don med yin/ /de yi yon tan ldan yan lag / mtshang na yang nad pa 'tsho/ /de bas gso dpyad la de nyid/ /rgyu yis gtso bo yin zhes bya/ /zhes bshad do/ /sman ni rdzas rnams so/ /nad g.yog ni bsnyen bkur byed pa'o/ /nad pa ni nad kyis nyam thag pa ste/ de dag ni slob dpon gyis mdor bstan pa yin no/ /de rnams kyi yon tan rgyas par bshad pa ni/ sman pa mkhas stegs gzhung dan shes/ /las rnams mthong zhing gtsang ba yin/ /zhes bya ba yin te/ de la sman pa'i yan lag bzhi ni mkhas pa ste/ las rnams la byang ba'o/ /stegs ni rang gi mkhan po'i lung gi don shes pa las/ bstan bcos kyi gzhung gi don la shes shing khong du chud pa gang yin pa de ni/ sman pa mkhas stegs gzhung don shes/ /zhes bya ba yin te/ lung brgyud pa las bstan bcos kyi don rtogs pa thob ba'o/ /las rnams mthong zhing zhes bya ba ni/ gang gis gso ba'i mtshan nyid ces bya ba'i las mang po mthong ba de ni/ las rnams mthong zhing zhes bya ba ste/ lan mang zhing nad pa gsos shing las goms par gyur pa'o/ /gtsang ba zhes bya ba ni lus dang ngag dang yid kyi bya ba rnams la sdig pa'i dri mas ma gos pa'o/ /sman yang rnam pa bzhi ste/ de ni/ sman ni cho ga mang po dang / /yon tan mang ldan phun tshogs 'phrod/ /ces bya ba ste/ de la sman gang la cho ga mang po yod pa de ni cho ga mang po ste/ bcud dbyung zhing bskol ba dang / phye ma la sogs par byas pas na nad rnams sel nus pa ste/ lan tshwa ltar cho ga gcig yod pa ni ma yin te/ de ni kha gcig pu'i nang du dgos pa byed pa yin no/ /yon tan mang ldan zhes bya ba ni sems can sred pa tha dad pa dag la lci ba dang rtul ba la sogs pa'i yon tan mang po yod pa de ni yon tan mang ldan no/ /yang na gang nad du ma dag gi tshogs rnams sel ba'i nus pa dang ldan pa'o/ /phun sum tshogs pa ni phun sum tshogs pa'i yon tan dang ldan pa yin gyi/ yon tan ma tshang bar gyur pa ma yin pa ste/ sa gzhi bzang po las skyes pa la sogs pa'o/ /de yang gzhung las/ sa phyogs cha mnyam bsngags pa ni/ /gzhi mnyam sa bzang gtsang ba dang / /dur khrod mchod rten nye 'khor dang / /g.yang sa grog mkhar rnams spangs pa'o/ /zhes bshad pa'i sa gzhi bzang po las skyes pa la sogs pa'i yon tan dang ldan pa'o/ /yang na legs par smin cing sbyar ba la sogs pa'i yon tan dang ldan pa'o/ /'phrod pa ni sbyor bar 'os pa ste/ gang gang la 'phrod cing 'os pa de de la sbyar ba'o/ /de yang nad dang / yul phyogs dang / dus dang / gnod pa dang / gnod par bya ba dang / lus dang / na tshod dang / stobs la sogs pa shes par byas nas sbyor zhing ster ba dag nad pa dang / nad kyi tshogs las dpag ste 'phrod cing 'os pa dang / phan par gyur pa'o/ /nad g.yog gi yon tan yang rnam pa bzhi ste/ nad g.yog rjes brtse gtsang sbra can/ /sgrim zhing blo dang ldan pa yin/ /zhes bya ba yin te/ rjes su brtse ba zhes bya ba ni nad pa la byams shing dad pa'o/ /gtsang sbra can ni lus dang ngag dang yid kyi las ngan pas ma gos pa'o/ /sgrim pa ni bya ba thams cad la gshor zhing brtson pa'o/ /blo dang ldan pa ni blo gros khyad par can yod pa ste/ mkhas shing byang ba zhes bya ba'i don to/ /nad pa'i yon tan yang rnam pa bzhi ste/ nad pa phyug cing bsgo ba nyan/ /shes par nus shing snying stobs ldan/ /zhes bya ba yin te/ phyug pa ni nor dang ldan pa'o/ /bsgo ba nyan pa ni sman pa'i dbang du gyur cing bsgo ba nyan pa'o/ /shes par nus zhes bya ba ni/ ci las gyur pa'i nad kyi gzhi la sogs pa shes par nus pa ste/ na ba'i zas dang spyod pa la sogs pa sman pa la brda sprad par nus shing zas dang spyod pas ji ltar gyur pa'i lo rgyus ston par nus pa'o/ /snying stobs ldan pa ni sman dang dpyad kyi bya ba la sems zhum pa med cing phog snya che la blo dang ldan pa'o/ /da ni gso sla ba la sogs pa'i nad rnam pa bzhi'i mtshan nyid bshad pa ni/ sman kun bzod par nus pa'i lus/ /skyes bu gzhon zhing bdag nyid thul/ /gnad du ma song rgyu sngar tshul/ /mtshan nyid chung dang gnod pa med/ /gnod bya yul dus rang bzhin rnams/ /mtshungs min yan lag phun sum tshogs/ /gza' ni rjes su mthun pa la/ /nyes pa lam gcig gsar gso sla/ /zhes bya ba yin te/ sman kun bzod par nus pa'i lus la nad skyed par gyur na gso sla ba zhes bya ba ste/ gso ba'i thabs bde zhing sla ba yin no/ /de yang gzhung las/ gso sla ba ni thabs bde ba/ /cung zad dus kyis bsgrub tu rung / /zhes bshad pa yin no/ /de la/ sman kun bzod par nus pa'i lus/ /zhes bya ba ni/ gang gis sman thams cad bzod cing bsten par nus pa ste/ rno ba dang / bar ma dang / 'jam pa'i tshul yul sna tshogs nas skyes pa dang / zhi bar bya ba dang / de bzhin du sbyang ba dang / dug dang lan tshwa la sogs pa bsten par bzod pa'o/ /skyes bu zhes smos pa ni bud med dag ma yin te/ gang gi phyir bud med dag ni rtag tu sdang zhing blo dang mi ldan pa yin pas/ ji skad bshad pa'i nad pa yon tan dang mi ldan pa yin la/ de ni shin tu gzhon sha can yin pas/ sman rnon po bsten par mi bzod pa yin no/ /gzhon zhing zhes bya ba ni/ lang tsho la gnas shing gzhon pa nyid ces bya ba'i don to/ /bdag nyid thul zhes bya ba ni/ brkam zhing chags pa ma yin pa ste/ gang gi yul la mngon par 'dod pa spangs pas bdag nyid thul ba'o/ /gnad du ma song zhes bya ba ni/ gnad la mi gnas pa ste/ gnad ni mgo dang / snying ga dang / mdoms la sogs pa ste/ de rnams su ma song zhing / snying dang lkog ma la sogs par shas cher gnod mi nus pa'o/ / rgyu sngar tshul/ /mtshan nyid chung dang zhes bya ba ni/ rgyu dang sngar gyi tshul mtshan nyid dag ni/ rgyu sngar tshul gyi mtshan nyid ces bya ste rgyu dang sngar gyi tshul dang / mtshan nyid de dag chung ba gang yin pa de la de skad ces bya'o/ /de la rgyu ni nad kyi gzhi'o/ /sngar gyi tshul ni sngar dang po byung ba'i tshul lo/ / mtshan nyid ni rtags kyi tshul te/ de dag chung ba gang yin pa de ni gso ba sla ba yin no/ /gnod pa med ces bya ba ni gang la 'tshe zhing gnod pa med pa de ni gnod pa med pa zhes bya ste/ 'di ltar sngar nad gcig bskyed pa la/ de'i 'og tu gang nad gzhan bla brnan du byung ba ni/ de'i mtshan nyid ma yin zhing / gtso bo ma yin la/ rang gi mtshan nyid ji lta bzhin ma yin te/ nad snga ma de sel bar byed pa la gnod pa byed pa yin no/ /de yang lung las/ nad kyi steng du nad gang zhig /phyis dus dag tu 'byung ba dag /gso ba dag la gags byed pa/ /de ni gnod pa zhes bshad do/ /zhes 'byung ba ni yin te de med pa la gnod pa med pa zhes bya'o/ /gnod bya yul dus rang bzhin rnams/ /mtshungs min zhes bya ba la/ gnod bya dang / yul dang / dus dang / rang bzhin rnams ni/ gnod bya yul dus rang bzhin rnams/ /zhes bya ste/ gang gi de rnams mtshungs ba ma yin pa ni mtshungs min no/ /de la de rnams mtshungs pa ma yin pa ni/ dper na gnod par bya ba rkang dang tshil la sogs pa dang / shin tu rlan che ba'i yul dang / grang ba'i dus dang / nad pa'i rlung gi rang bzhin de la mkhris pa 'khrugs par gyur na gso sla ba yin no/ /gnod par bya ba mtshungs pa ma yin no/ /dper na bad kan gyi mtshan nyid grang bas khrag dro ba la gnod pa yin no/ /yul mtshungs pa ma yin pa ni/ dper na rlan can shing rtsi mod pa'i yul du mkhris pa skyes pa'o/ /dus mtshungs pa ma yin pa ni dper na ston ka'i dus su bad kan skyes pa'o/ /rang bzhin mtshungs pa ma yin pa ni dper na mkhris pa'i rang bzhin can la bad kan gyi nad skyes pa lta bu'o/ /'dir dris pa/ gnod bya dang / yul dang / dus dang / rang bzhin rnams mtshungs pa ma yin pa ni gso bar dka' ba'am/ spang bar bya ba yin gyi gso sla ba ma yin te/ sgo du ma nas gso ba tsam dgos pa yin pa'i phyir te/ 'di ltar gnod bya la sogs pa 'dra ba ma yin pa dag la/ phan tshun gso ba'i rtsom pa gzhan dang gzhan dag kyang bya dgos kyi/ sgo gcig nas gso ba ni gso ba sla ba yin no zhe na/ de'i lan brjod par bya ste/ gnod bya la sogs pa mtshungs pa ni rang bzhin stobs dang ldan pa yin zhing / rtsom pa che bas gso dka' ba'i nad nyid 'byung bas de gso sla ba ma yin no/ /la lar ni gnod bya la sogs pa mtshungs su zin kyang / gso sla ba dag ni yod do/ /de yang gzhung las/ rims la yul dus mtshungs pa dang / /gcin 'gags gnod bya mnyam pa dang / /khrag gi skra ni rnying pa nyid/ /gso sla ba yi rgyu nyid yin/ /zhes bshad pa yin no/ /yan lag phun sum tshogs zhes bya ba ni/ sman la sogs pa yan lag bzhi'i phun sum tshogs pa ni 'byor bar gyur pa ste/ yan lag bzhi po ste yongs su rdzogs par gyur na/ nad gso sla bar 'gyur ba'o/ /gza' ni rjes su mthun pa la/ /zhes bya ba la/ gza' ni nyi ma la sogs pa ste/ de dag rjes su mthun pa zhes bya ba/ skar ma'i khyim rjes su mthun pa na gnas shing / gnas bzang po na gnas par gyur na yang nad gso sla ba yin no/ /nyes pa lam gcig ces bya ba ni nyes pa dang lam gnyis gcig dang ldan pa ni/ nyes pa lam gcig ste/ nyes pa ni rlung la sogs pa'o/ /lam ni gsum ste/ 'og nas bshad pa'i yan lag gam/ yal ga la sogs pa ni phyi dang nang dang bar gyi dbye bas so/ /des na gang yang rlung la sogs pa'i nang nas gang yang rung ba gcig las skyes kyi/ gnyis sam gsum las ma skyes pa dang / de bzhin du phyi rol lam nang ngam bar ma ste lam gcig las skyes pa de ni gso sla ba yin no/ /gsar pa zhes bya ba ni nad ma rnyings pa ste/ skyes nas ring po ma lon pa zhes bya ba'i don to/ /gang gi phyir lo gcig yan chad 'das pa'i nad ni gso dka' ba yin no/ /de ltar na de lta bu'i nad ni gso sla zhing / gso ba'i thabs ni sla ba nyid yin no/ /gso dka' ba'i nad bshad pa ni/ nad ni mtshon sogs kyis gdab cing / /gso ba dka' zhing de las 'dres/ /zhes bya ba yin te/ nad gang mtshon la sogs pas bsgrub cing gdab dgos pa de ni/ gso dka' zhing bzlog par dka' ba yin pas/ thabs mang po dang yun ring pos gso dgos pa yin no/ /de yang gzhung las/ gso dka' ba la dka' ba dang / /thabs mang yun ni ring pos so/ /zhes bshad pa yin no/ /so la sogs pa'i sgras ni nas tshig 'khus pa'i thal bas bsku ba dang / me gdab pa dang / dug gis bsku ba la sogs pas bsdu'o/ /de las 'dres zhes bya ba la/ de las zhes bya ba ni sngar bshad pa'i gsor rung ba'i mtshan ma las/ nad dang 'dres pa zhig byung na de yang gso bar dka' ba yin no/ /de la de las 'dres pa'i mtshan nyid ni sngar bshad pa'i gso sla ba'i mtshan nyid las 'dres shing gnyis sam gsum tshogs par gnas pa ste/ dper na gzhon pa na yang bdag nyid thul ba dang / dbang po thul ba yin yang / nad gnad kyi gnas su song ba dang / sman thams cad bzod par nus pa'i lus dang ldan yang rgas pa dang / gal te gzhon du zin kyang sman thams cad kyis bzod par mi nus pa'o/ /de ltar na phyogs 'dis thams cad la bsgre bar bya'o/ /gso ba tsam du bya ba bshad pa ni/ tshe yi lhag ma lus phyir 'tsho/ /go bzlog pa la goms phan nyid/ /ces bya ba yin te/ phyin ci log rnam pa mang pos bsgrub par bya ba'i gso ba'i thabs dang mi mthun par gyur la/ tshe'i lhag ma ni ma zad pas/ nad kyis gso bar mi nus pa dag la ni kha zas dang spyod lam phan pa dag gis re zhig gso zhing 'tsho ba tsam du bya'o/ de yongs su spang bar ni mi bya'o/ /'di dang yongs su spang bar bya ba'i nad kyi khyad par ni 'di tsam zhig yod do/ /'di la ni tshe'i lhag ma tsam zhig yod pas/ re zhig spang bar mi bya ba yin gyi/ mtshan nyid gzhan thams cad ni phal cher mthun pa yin no/ /go bzlog ces bya ba gang zhig bzlog pa yin zhe na/ 'das ma thag pa'i rang bzhin gso sla ba las bzlog pa'o/ /goms pa ni yang dang yang du bya zhing bslab pa ste/ de bas na phan pa'i zas dang / spyod lam gyis gso bar bya'o/ /de yang gso bas bde ba cung zad cig bskyed cing / yang rgyu cung zad kyis ni 'phel bar 'gyur ro/ /de yang bsdus pa las/ bde ba cung zad skyes nas ni/ /cung zad rgyu ni 'phel 'gyur zhing / /nad kyi lhag ma med mi 'gyur/ /las skyes tshe ni nges pa yin/ /lhung ba las ni 'jus pa bzhin/ / nad la phan pas gzung bar bya/ /zhes bshad pa yin no/ /spang bar bya ba bshad pa ni/ bcos pa'i thabs med nyid du 'gyur/ /shin tu phyin ci log par gnas/ /'dod dang rmongs dang khro bar byed/ /'chi ltas snang zhing dbang po nyams/ /zhes bya ba yin te/ gang la bcos shing gso ba'i thabs med par gyur pa de ni bcos pa'i thabs med pa ste/ spang bar bya ba zhes bya ba'i don to/ /bcos pa'i thabs med pa de gang zhig yin zhe na/ gang shin tu phyin ci log la gnas pa zhes bya ba yin no/ /nad gang gso ba tsam gyi tshul las kyang / shin tu phyin ci log par gnas pa ste bya ba'i las kyi lam thams cad las 'das shing / nad rkang dang khu chu la sogs pa lus zungs shin tu gting ring bar zhen pa gnad dang tshigs kyi nang du zhen pa de ni bcos pa'i thabs med cing gso bar mi nus pa yin no/ /de bzhin du 'dod pa la sogs pa byed pa yang gsor mi rung ba nyid de/ 'dod pa ni yul rnams la lhag par chags shing zhen pa'o/ /rmongs pa ni sems dang bral zhing dran pa nyams la mi shes par gyur pa'o/ /khros pa ni gnas dang mal la sogs pa gang du yang mi dga' zhing sems ldog pa'o/ /byed pa zhes bya ba ni gang de dag ltar byed pa de yang bcos pa'i thabs med pa yin no/ /de bzhin du 'chi ltas snang zhing dbang po nyams pa yang spang bar bya ba yin no/ /de la 'chi ltas snang ba ni 'chi ba'i mtshan ma snang ba'o/ /dbang po nyams pa ni mig la sogs pa'i dbang po nyams shing dbang po 'gags par byed pa'i nad kyang bcos pa'i thabs med pa yin te/ myur du dbang po 'joms pa yin no/ /de ltar na dang po nad yongs su brtags la gso ba brtsam par bya'o/ gzhan du sman pa'i rang gi don la sogs pa nges par nyams par 'gyur ro/ /de yang gzhung las/ dang por 'di ltar nad brtags la/ /de nas las ni brtsam bya yi/ /gzhan du rang don rig pa dang / /grags pa nyams pa nyid thob 'gyur/ /zhes bshad pa yin no/ /nad pa bcos pa'i thabs yod pa dag kyang / spang bar bya ba dag bshad pa ni/ sman pa rgyal po la sdang dang / /de dang mi mdza' sdang ba dang / /yo byad mi 'byor brel ba dang / /nyan du mi btub tshe zad dang / /gtum zhing mya ngan la mnan 'jigs/ /byas pa mi gzo sman brnyas spang / /zhes bya ba yin te/ nad pa de lta bu ni gsor rung yang spang bar bya'o/ /sman pa rgyal po la sdang zhing / /zhes bya ba ni sman pa dag dang rgyal po ste/ sa bdag la sdang ba dang / de bzhin du de dang mi mdza' zhes bya ba/ sman pa dang rgyal po la sdang zhing mi mdza' ba de yang spang bar bya'o/ /sdang ba dang zhes bya ba ni bdag nyid la sdang zhing dgrar byed pa'o/ /yo byad mi 'byor zhes bya ba ni yo byad mtshang ba ste/ gso ba'i yan lag dang mi ldan pa'o/ /brel ba ni bya ba mang ba ste/ bya ba gzhan la ltos shing / /las gzhan la sems zhen pa'o/ /nyan du mi btub pa ni sman pa'i bsgo ba mi byed pa gang yin pa de yang spang bar bya'o/ /tshe zad pa ni 'tsho ba yongs su zad pa'o/ /gtum pa ni 'phral du gnod pa byed cing gdug pa'i chos can no/ /mya ngan la mnan pa ni chung ma la sogs pa shi ba las byung ba'i mya ngan gyis gzir ba'o/ /'jigs pa ni 'jigs pa dang bcas pa'o/ /byas pa mi gzo ba ni gang la yang phan par byas su zin kyang / gnod pa byed pa'o/ /sman pa brnyas pa ni bdag nyid sman pa ma yin du zin kyang / sman pa lta bur 'chos shing rmongs pas rang dgar sman dpyad byed pa ste/ de yang spang bar bya'o/ /de ltar le'u dang por gzhung ma lus pa'i don mdor bsdus pa bshad nas/ de'i 'og tu bde blag tu dran par bya ba'i phyir/ le'u'i grangs kyi mdor bsdus pa bshad pa ni/ de nas gzhan yang rgyud 'di yi/ /le'u bsdus pa bshad bya ste/ /zhes bya ba yin te/ de nas de'i 'og tu bde bar dran par bya ba'i phyir/ le'u bsdus pa bshad par bya'o zhes bya bar sbyar ro/ /rgyud ces bya ba 'dis tshe'i rig byed kyi don 'dzin cing sdud pas na rgyud do/ /le'u bsdus pa ni le'u rnams bsdus shing phung po gcig tu byed pa'o/ /de dag kyang gang zhig yin zhe na/ tshe ring nyin re dus spyod dang / /nad med bya dang btung ba dang / /zas shes bya dang zas bsdam bya/ /zad tshod sman dang ro la gnas/ /nad shes bya dang de'i dbye ba/ /de gso ba dang gso thabs gnyis/ /sbyang sogs snum chos khrus brta bya/ /sman dud khar dor mig bkru dang / /gso dang dbyung thabs zug rngu mtshon/ /gtar dpyad zug rngu dbyung ba'i dpyad/ /mtshon dang thal sman me btsa'i las/ /mdo gnas le'u sum cu ni/ /'di yin/ zhes bya ba la/ de ltar sngar bshad pa'i le'u sum cus ni mdo'i gnas bshad pa yin te/ tshe ring bar 'dod pa dang / nyin re dang dus su spyod pa dang / zhes pa gnyis pa'i mtshams sbyar bar bya'o/ /des na tshe ring bar 'dod pa dang / nyin re spyod pa dang / dus kyi spyod pa dang / nad med par bya ba dang / btung ba'i rdzas shes par bya ba dang / zas kyi rang bzhin shes par bya ba dang / zas legs par bsdams par bya ba dang / zas kyi tshod zin par bza' ba dang / sman la sogs pa'i rdzas shes par bya ba dang / ro rnams shes par bya ba dang / nad la sogs pa shes par bya ba dang / nad de'i bye brag shes par bya ba dang / nad gso ba bstan pa dang / gso thabs rnam pa gnyis dang / sbyang ba la sogs pa'i tshogs bsdu ba dang / snum chos kyi dpyad dang / dugs kyi dpyad dang / slon dang khrus kyi dpyad dang / mdoms kyi dpyad dang / sna nas gtong ba'i sman dang / sman gyi dud pa'i dpyad dang / sman khus mkhur ba bkang zhing dor ba la sogs pa'i dpyad dang / mig sman blugs te mig nad bkru ba'i dpyad dang / mig gso zhing tshim par bya ba'i dpyad dang / sman gyi phur ma btso zhing sman khus mig brta ba'i cho ga dang / mtshon gyi dum bu lus las dbyung ba'i cho ga dang / gtar dpyad kyis dbug pa'i cho ga dang / mtshon gyi las kyi cho ga dang / thal sman rnon po dang me btsa'i las kyi cho ga'o/ /'di dag gis ni rgyud kyi don ma lus pa mdor ston pa yin pas na mdo'i gnas te rgyud ma lus pa'i mgo bo lta bu yin no/ /da ni/ lus kyi brjod bya ste/ zhes bya ba la/ lus kyi zhes bya ba ni lus kyi gnas so/ /ci zhig brjod ce na le'u bsdus pa las/ de dag kyang gang zhe na/ mngal du 'jug dang de'i nad dang / /yan lag gnad kyi bye brag dang / /rnam 'gyur bang chen las byung drug /ces bya ba yin te/ de la lus de'i mngal du 'jug pa dang / de'i nad ni mngal de'i nad de/ lus kyi mngal 'jig pa dang / lus kyi yan lag gi bye brag dang / lus kyi gnad kyi bye brag dang / lus kyi rnam par 'gyur ba shes par bya ba dang / lus kyi bang chen la sogs pa shes par bya ba ste/ de ltar na le'u drug po de dag ni lus kyi gnas yin no/ /de nas nad gzhi'i gnas bshad pa ni/ nad kun 'byung ba'i nad gzhi dang / / rims khrag dbugs mi bde gcong sogs/ /chang dang gzhang 'brum tshad pa'i nad/ /chu 'gags gcin ni snyi ba dang / /khong 'bras dmu rdzing dag dang ni/ /skya rbab mdze nad rlung gis gzir/ /dreg nad dag dang bcu drug yin/ /zhes bya ba yin te/ nad thams cad kyi nad gzhi dang / rims dang / mkhris pa dang / lud pa'i nad gzhi dang / dbugs mi bde ba'i nad gzhi dang / zad byed la sogs pa'i nad gzhi dang / chang drags pa la sogs pa'i nad gzhi dang / gzhang 'brum gyi nad gzhi dang / tshad pas 'khru ba'i nad gzhi dang / gcin 'gags pa'i nad gzhi dang / gcin snyi ba'i nad gzhi dang / khong 'bras dang / skran gyi nad gzhi dang / dmu rdzing gi nad gzhi dang / skya rbab dang / 'or nad dang / me dbal la sogs pa'i nad gzhi dang / mdze nad dang / sha bkra dang / srin bu'i nad gzhi dang / rlung nad kyi nad gzhi dang / dreg nad kyi nad gzhi ste/ de ltar le'u bcu drug ni nad gzhi'i gnas yin no/ /gso ba brjod par bya ste/ rims nad gso dang khrag dang ni/ /lud pa dbugs mi bde dang gcong / /slon dang chang nad gzhang 'brum dang / /tshad nad pho ba gcin nad gnyis/ /khong 'bras skran dang dmu rdzing dang / /skya rbab 'or nad me dbal dang / /mdze nad sha bkra rlung nad dang / /dreg nad gso ba'i dpyad rnams te/ /le'u nyi shu gnyis 'di yin/ /zhes bya ba yin te/ gso ba'i nad la le'u nyi shu rtsa gnyis yod pa'o/ /de yang gang yin zhe na/ rims nad gso ba dang / khrag dang mkhris pa gso ba dang / lud pa gso ba dang / dbugs mi bde ba gso ba dang / gcong chen po'i nad gso ba dang / rtag tu slon ba dang / snying nad dang / chang nad gso ba dang / gzhang 'brum gso ba dang / tshad pas 'khru ba gso ba dang / pho ba'i nad gso ba dang / gcin 'gags pa'i nad gso ba dang / gcin snyi ba gso ba dang / khong 'bras 'phel ba gso ba dang / skran nad gso ba dang / dmu rdzing gso ba dang / skya rbab kyi nad gso ba dang / 'or nad gso ba dang / me dbal gso ba dang / mdze nad gso ba dang / sha bkra gso ba dang / srin nad gso ba dang / rlung nad gso ba dang / dreg nad gso ba'i dpyad de/ nyi shu rtsa gnyis po 'di dag ni gso ba'i gnas zhes bya'o/ /de las gzhan yang cho ga grub/ /skyug sman bkru sman cho ga dang / /de grub mas gtong cho ga dang / /mas gtong nyes grub drug pa ni/ /sman yin/ zhes bya ba ni 'di yan chad cho ga grub pa'i gnas yin no/ /skyug sman gyi cho ga dang / bkru sman gyi cho ga dang / skyug sman dang bkru sman de grub par bya ba'i cho ga dang / sman mas gtong ba'i cho ga dang / sman mas gtong nyes pa grub pa'i cho ga dang / sman gyi cho ga'o/ /de ltar na le'u drug ni cho ga grub pa'i gnas yin no/ /de nas phyi ma ni/ /byis pa nyer spyod de'i nad dang / de'i gdon 'byung por gtogs pa gnyis/ /smyo dang brjed byed sogs gnyis gnyis/ /mig chu rdzi ma grwa yi mtshams/ /mig 'bras rab rib mthong nyams gsum/ /gnyis gnyis kun la 'gro ba yin/ /rna nad sna dang kha dang mgo'i/ /rma dang chag grugs mtshan bar rdol/ /'bras sogs phra mo'i nad rnams dang / /gsang ba'i nad ni tha dad gnyis/ /dug dang sbrul dang srin bu'i dug /byi ba dang ni bcud kyis len/ /bu med sa bon gso ba ste/ /le'u bzhi bcu nyid yin no/ /zhes bya ba la/ de nas zhes bya ba la grub pa'i gnas man chad ni phyi ma zhes bya ba ste/ rgyud phyi ma yin par shes par bya'o/ /byis pa'i nye bar spyod pa ni/ /byis pa'i nye bar spyod par bya ba gang yin pa dang / de'i nad dang / de'i gdon dang / 'byung por gtogs pa gnyis te/ gdon gyi dmigs shes par bya ba dang / gdon nad bsal bar bya ba'o/ /smyo ba dang brjed byed la sogs pa la yang gnyis gnyis te/ smyo ba'i nad shes par bya ba dang / smyo nad bsal ba dang / brjed byed kyi nad shes par bya ba dang / brjed byed kyi nad bsal bar bya ba dang / rdzi ma dang mig chu'i nad shes par bya ba dang / grwa mtshams kyi dkar ba dang / gnag pa'i nad shes par bya ba dang / grwa mtshams kyi dkar ba dang / gnag pa'i nad bsal ba'o/ /mig gi 'bras bu'i nad shes par bya ba dang / rab rib bsal ba dang / mthong ba nyams pa'i nad bsal ba dang / mig nad sna tshogs shes par bya ba dang / mig nad sna tshogs bsal ba dang / rna nad shes par bya ba dang / rna nad bsal ba dang / sna nad shes par bya ba dang / sna nad bsal ba dang / kha nad shes par bya ba dang / kha nad bsal ba dang / mgo nad shes par bya ba dang / mgo nad bsal ba dang / rma rnying pa'i nad shes par bya ba dang / rma rnying pa'i nad bsal ba dang / rma sar pa gso ba dang / rkang lag chag grugs su gyur pa gso ba dang / mtshan par rdol ba'i nad gso ba dang / 'bras dang / thor bu dang / rkang bam dang / zad byed dang / rtsa sbubs shes par bya ba dang / 'bras dang thor bu la sogs ba'i nad gso ba dang / 'brum bu phra mo'i nad shes par bya ba dang / 'brum bu phra mo'i nad gso ba dang / gsang ba'i gnas kyi nad shes par bya ba dang / gsang ba'i gnas kyi nad gso ba dang / dug sna tshogs kyi dmigs brtag pa dang / dug gso ba'i cho ga dang / sbrul gdug pas zin pa'i nad gso ba dang / srin bu gdug pas zin pa'i nad gso ba dang / byi ba dang / phus pa la sogs pas zin pa'i nad gso ba dang / bcud kyis len pa dang / sa bon 'phel zhing ro tsa bar byed pa ste/ de ltar le'u bzhi bcu ni rgyud phyi ma yin no/ /de'i nad dang / de'i gdon zhes bya ba la/ de zhes bya ba ni byis pa la bsnyeg pa yin no/ /gnyis gnyis zhes bya ba ni/ mig gi mchu gnyis dang / grwa mtshams gnyis so/ /gsum zhes bya ba ni mig 'bras dang / rab rib dang / mthong ba nyams pa gsum po ni re re zhing re re'o/ /de la rab rib ni cung zad mi gsal ba'o/ /mthong ba nyams pa ni sprin lta bus khebs pa'o/ /gnyis gnyis zhes bya ba ni/ mig nad sna tshogs nas/ rma'i bar du yin par shes par bya'o/ /rkang lag chag grugs dang / mtshan bar rdol ba ni re re'o/ /'bras la sogs pa dang / gsang ba'i nad dang / 'brum bu phra mo'i nad ni so so zhing gnyis gnyis so/ /bu med pa ni rabs chad pa'i skyes bu ste/ de'i sa bon gso zhing khu ba 'phel bar bya ba ni/ le'u bzhi bcu pa yin no/ /de ltar le'u ni brgya nyi shu/ /gnas ni drug tu bshad pa yin/ /zhes bya ba la/ de ltar zhes bya ba rnam pa 'dis na/ le'u brgya nyi shu yod pa yin no/ /gnas drug ces bya ba ni/ mdo dang / lus dang / nad gzhi dang / gso ba dang / chog grub pa dang / rgyud phyi ma'o/ /bshad pa yin zhes bya ba ni/ bstan pa yin zhes pa'i don to/ /yan lag brgyad pa'i snying po bsdus pa zhes bya ba'i mdo'i gnas las rnam par 'grel pa/ tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u dang po'i 'grel pa'o// //de nas nyin re zhing spyad pa'i le'u bshad bar bya'o/ /zhes bya ba la/ de nas zhes pa ni le'u thams cad la bkra shis pa'i don yin pa'am/ de bzhin du de ma thag pa dang / rtsom pa dang / rjes su 'brel pa yin no/ /de nas zhes bya ba la sogs pa'i sgra le'u snga mar don bshad zin mod kyi/ bkra shis ba'i don du slob dpon gyis le'u re re'i rtsom pa la bkra shis par bya ba'i phyir/ de nas zhes bya ba'i sgra ni smos pa yin no/ /nyi ma re re zhing bya ba'i spyod pa yin pas na/ nyin re zhing spyad par bya ba'am/ nyin mo spyod pa yin pas na/ nyin re'i spyod pa ste/ 'jig rten gnyi ga la phan par bya ba'i zas dang / spyod lam gyi spyod pa spyod par byed pa ste/ nyi ma re re zhing gang zhig bya ba'i le'u de bshad par bya'o zhes pa'o/ /tshe ring bar 'dod pa'i le'u'i rjes thogs su 'di bshad pa'i 'brel pa gang zhig yin zhe na/ de brjod par bya ste/ gang gi phyir tshe ring bar 'dod pa'i skyes bus/ gtso cher tshe la phan pa gang yin pa de dang por kun tu bsten par bya ba'am/ de'i rjes la ni phan ba gzhan gang dag yod pa bsten par bya ba yin no/ /de bas na dang po re zhig kun tu spyod pa gtsor gzung bar bya'o/ /de yang gang gi phyir kun tu spyod pa las/ tshe ring ba 'thob par 'gyur bas na kun tu spyod pa yin no/ /gang 'dir mtshan mo'i spyod pa dag kyang bshad mod kyi/ 'on kyang gtso bor gyur pas/ le'u 'di las nyin mo'i spyod pa bstan pa yin no/ /de bas na 'di la ni nyin re'i spyod pa zhes bshad do/ /gzhung 'di las ni tshe bskyang ba'i rang bzhin can ston la/ de yang rnam pa gnyis te/ tha mal par bde bar gnas pa'i 'jug pa dang / nad pa'i 'jug pa'o/ /de la bkra shis pa'i phyir dang / smra bar bya ba nyung zad cig yod pa'i phyir dang / nad pa la yang dgos pa'i phyir/ tha mal par bde bar gnas par 'jug pa nyid thog mar bshad pa yin te/ bder gnas tshe ni bsrung ba'i phyir/ /yud tsam tshangs phyir gnas te langs/ /zhes bya ba la/ bde bar gnas shing nad med la dge ba des ni/ tshad ji tsam du 'ongs ba'i srog bsrung ba'i phyir tshangs pa'i yud tsam na ldang zhing langs par bya'o/ /de la yud tsam ni chu tshod gnyis so/ /tshangs pa'i ni mya ngan las 'das pa la bya'o/ /de'i don du 'don pa la tshangs pa zhes bya'o/ /de bya ba dang 'tsham pa'i yud tsam ni/ thun tha ma'i chu tshod gnyis so/ /'di ni bde bar gnas pa'i dbang du byas pa yin par shes par bya'o/ /langs nas ci zhig la brten par bya zhe na/ de'i phyir bshad pa ni/ lus kyi bya ba rdzogs byas nas/ /de nas gtsang sbra'i cho ga bya/ /arka n+ya gro d+ha seng ldeng / /ka rany+dza ka ku la sogs/ /bska dang tsha dang kha ba dag /rtse 'jam nang par zas spyad nas/ /so dang rnyil la ma gnod par/ /so yi dag byed bca' bar bya/ /zhes bya ba yin te/ lus kyi bya ba rdzogs byas nas/ /zhes bya ba ni/ bshang ba dang / gci ba dor ba la sogs pa'i mtshan nyid can te/ rnam grangs gzhan du na nges par bya ba'i bya ba byas nas/ de nas de'i 'og tu gtsang sbra'i cho ga byas la/ so dag par byed pa'i so shing bca' bar bya'o/ /de'i nang par te tho rangs dang / zas spyod de zas zos zin nas bca' la/ de yang rtse mo 'jam pa ste/ pir lta bur gyur pa tsam du bca' la bya'o/ /de bzhin du bska ba dang / tsha ba dang / kha ba'i zhes bya ba yin te/ ro de lta bu dag go/ /de yang gang zhig ce na/ arka zhes bya ba la sogs pa yin no/ /sogs pa'i sgras ni/ shing sad dza dang / a ri me da dang / a ba marga dang / dzA ti'i shing la sogs pa bsdu'o/ /de yang so dang rnyil la mi gnod cing / ma gtses par bca' bar bya'o/ /ci thams cad kyis bca' bar bya ba'am/ 'on te 'ga' zhig gis she na/ de'i phyir bshad pa ni/ ma zhu slon bro dbugs mi bde/ /lud pa lu rims kha yon can/ /skom zhing kha skams snying mig rna/ /mgo bo na bas 'di mi bca'/ /so shing de ni 'di dag gis bca' bar mi bya'o/ /gang gis she na/ ma zhu ba ste/ kha zas ma zhu ba dang / slon bro zhing skyugs pa dang / dbugs mi bde ba la sogs pa/ 'og nas bshad pa'i mtshan nyid dang ldan pa'o/ /can zhes bya ba ni thams cad la sbyar te/ gang la ma zhu ba yod pa de ni ma zhu ba can no/ /de bzhin du gzhan dag la yang sbyar ro/ /kha yo ba ni kha'i phyed rlung gis yon por gyur pa'o/ /na ba zhes bya ba ni skom pa la sogs pa kun dang sbyar te/ des na skom dad can dang / kha skoms pa'i nad can dang / snying nad can dang / mig nad can dang / rna nad can dang mgo na ba dag gis so shing bca' ba de spang bar bya'o/ / so shing bca' ba'i 'og tu mig sman bya ste/ de'i phyir bshad pa ni/ rtag tu mig sman skyer khaN+Da/ /mig la phan pas de phyir bsten/ /zhes bya ba yin te/ rtag par dus thams cad du rgyun du nang par dang dgongs ka mig gnyis su skyer khaN+Da bcug pa ni phan zhing bde bar byed pa yin no/ /de bas na de'i phyir de bsten cing goms par bya'o/ /ci dus thams cad du de nyid bsten par bya ba yin nam zhe na/ de'i phyir bshad pa ni/ de ni me yi rang bzhin te/ /lhag par bad kan la 'jigs pas/ /mchi ma 'dzag phyir skyer khaN+Da/ /zhag bdun zhing ni blugs par bya/ / zhes bya ba yin te/ gang gi phyir mig de ni me'i rang bzhin can nam/ tshul can yin pa'i phyir bas/ de'i phyir dbang po rnams ni 'byung ba lnga'i bdag nyid can yin par phal cher bshad la/ mig de ni rlung la sogs pa bas khyad par du bad kan la lhag par 'jigs pa yin zhing brten pa yin la/ de dag phan tshun mi mthun pa yin la/ de bas na bad kan dbyung zhing 'dzag par bya ba'i phyir/ zhag bdun bdun 'das pa dang / skyer khaN+Da blugs par bya zhing bsten par bya'o/ /de nas snar blugs pa la sogs pa bya dgos te/ de'i phyir 'di'i 'og tu sna sman bshad pa yin no/ /de yang bsdus pa las/ mig sman sna sman khar gzhag dor/ /dud pa brngub par bya ba dang / /du ba so rtsi dor ba yis/ /rim gyis bad kan rlung las rgyal/ /zhes bshad pa yin pas na 'dir/ /de nas sna sman mkhur bkang dor/ /dud pa so rtsi bsten par bya/ /zhes pa yin te/ de nas zhes bya ba la mig sman gyi rjes thogs la/ sna sman la sogs pa bsten par bya'o/ /sna sman ni sna nas gtang ba'i sman no/ /mkhur bkang dor ba ni/ sman gyi khu ba bskol ba la sogs pas mkhur ba bkang ste cung zad gzhag la dor ba'o/ /du ba ni 'og nas bshad pa'i mtshan nyid can gyi sbyor ba'o/ /so rtsi tam po la ni grags par zad do/ /de dag kyang ci thams cad kyis bsten par bya ba'am/ 'on te la la zhig gis bsten par bya zhe na/ de'i phyir smras pa ni/ so rtsi glo 'grams mkhris pa khrag /rtsub pas mig ni na ba dang / /dug gis brgyal zhing chang nad gzir/ /lus skem gyur la gnod pa yin/ /zhes bya ba smos pa yin te/ mkhris pa khrag gis gnod par gyur pa'am/ lus skem por gyur pa la/ so rtsi tam po la de gnod pa yin no/ /de la glo 'grams pa ni glo rdol ba'o/ /mkhris pa khrag ni mkhris pa las gyur pa'i khrag go/ /rtsub pa'i rgyus gang gi mig gnod cing na bar gyur ba de ni/ rtsub pas mig ni na ba dang / /zhes bya'o/ /yang na rtsub par gyur pa dang / mig na bar gyur pa'o/ /dug ni kha lkugs pa la sogs pa'o/ /brgyal ba ni 'bog pa'o/ /chang nad kyis gzir ba ni chang gis gnod par gyur pa ste/ 'og nas bshad pa'o/ /lus skems gyur pa ni gcong chen pos thebs pa ste/ 'di dag la ni gnod pa yin no/ /snar blugs pa la sogs pa byas nas/ bsku byug bya ba yin pas na/ de'i phyir smras pa ni/ rtag tu bsku byug spyod byed na/ /de ni rgas ngal rlung 'joms yin/ /mig gsal lus rgyas tshe 'phel zhing / /gnyid 'ong lpags 'jam brtas byed yin/ /zhes bya ba yin te/ rtag par dus thams cad du bsku byug la spyad par bya'o/ /ci'i phyir zhe na/ bsku byug de ni rgas pa dang / ngal ba dang / rlung 'joms pa yin pa dang / de bzhin du mig gsal zhing dngas par byed pa dang / lus rgyas shing 'phel ba dang / tshe shin tu 'phel bar byed pa dang / gnyid legs par log par gyur pa dang / pags pa shin tu 'jam zhing mdog gsal ba nyid dang brtas pa ste/ brtan pa nyid kyis las rnams nus par byed pa yin no/ /de ni mgo dang rna ba dang / /rkang par khyad par dag tu bsten/ /zhes bya ba ni bsku byug bya ste/ mgo bo la sogs pas khyad par du bsten zhing goms par bya'o/ /gang gis spang bar bya zhe na/ /bad kan skyes dang ma zhu dang / /bkru sman sogs gtang bsku byug spang / /zhes bya ba ste/ bad kan gyis gzir zhing skyes pa la sogs pas spang bar bya zhing bsten par mi bya'o/ /de yang bad kan skyes pa ni/ bad kan gyis gzir zhing gnod par gyur pa ste/ skyes pa smos pa ni shin tu gzir bar gyur par bstan pa'i phyir ro/ /ma zhu ba ni zas kyi lhag ma ma zhu bar gyur pa'o/ /bkru sman sogs gtang zhes bya ba ni/ bkru sman dang skyug sman la sogs pa byas pa ste/ lus sbyangs nas dus yun ring por ma lon par des bsku byug bsten par mi bya'o/ /bsku byug byas nas lus kyi rtsol ba la brten par bya ba yin pas/ de'i phyir bshad pa ni/ yang zhing las ni nus pa dang / /me yi drod skyed tshil 'bri la/ /lus kyi skabs phyed mkhregs pa nyid/ /rtsol ba las ni 'byung bar 'gyur/ /zhes bya ba yin te/ lus dub par byed pa'i las la ni/ rtsol ba zhes bya'o/ /de bas na rtsol ba bsten pa las ni yang ba la sogs pa nye bar 'byung bar 'gyur ro/ /de la yang ba ni lus kyi khong yang ba nyid do/ /las nus pa ni nus pa brtan pa nyid do/ /me'i drod bskyed pa ni 'ju ba'i me drod bskyed pa'o/ /lus zungs kyi tshil bri ba ni tshil chung bar 'gyur ba'o/ /lus kyi skabs phyed pa ni lus kyi stod smad kyi cha phyed par gnas pa'o/ /mkhregs pa ni lhod cing grims la brten pa ste/ de lta bu'i lus kyi yan lag gang yin pa de ni/ lus kyi skabs phyed mkhregs pa zhes bya'o/ /de lta bu'i rang bzhin can nyid du 'gyur bas na/ lus kyi skabs phyed mkhregs pa nyid/ /ces bya'o/ /de kun gyis kyang bya ba'am 'on te ma yin zhe na/ de'i phyir/ rlung mkhris nad can byis pa dang / /rgas shing 'khogs pas de spang bya/ / zhes bya ba smos te rlung dang mkhris pa'i nad kyis gzir ba dang / byis pa dang / rgan pos rtsol ba de spangs shing dor bar bya'o/ /de la rlung nad can ni rlung gi nad kyis nyen pa'o/ /mkhris nad can ni mkhris pas nyen pa'o/ /tha dad pa smos pa la ni/ rlung dang mkhris pa gnyis ka smos kyang spang bar shes par bya'o/ /rgan po ni lo bdun cu yan chad yin par shes par bya'o/ /gzhan yang ji ltar bstan par bya zhe na/ stobs ldan snum bag za ba dang / /grang ba'i dus dang dpyid dus dang / /nus ldan dag gis de bsten bya/ /de las gzhan tshe dal ba nyid/ /ces bya ba la/ rtsol ba de yang skyes bu stobs dang ldan pa dang / zas snum bag can za ba dang / grang ba'i dus te/ dgun stod dang / dgun smad dang / dpyid kyi dus dang / nus ldan dag gis zhes pa/ ji srid shin tu nub par ma gyur pa de srid kyi bar du bsten par bya'o/ /de las gzhan tshe zhes bya ba ni/ de las dus gzhan pa'i tshe ste/ so ga dang / dbyar dang / ston gyi tshe ni dal ba nyid de ran cing cung zad tsam nyid bsten par bya'o/ /de byas ci bder lus dag ni/ /kun nas yongs su mnye bar bya/ /rtsol ba de byas zin nas ni/ /bde bar lus kun gnas par bya/ /zhes bya ba la/ rkang pa nas mgo bo'i bar thams cad du/ rkang pa dal gyis yongs su mnye bar bya'o/ /shin tu rtsol drags lud pa dang / /skom dang gcong can mi dran mun/ /khrag dang mkhris rgyas ngal dang dub/ /rims dang slon pa 'byung bar 'gyur/ /zhes bya ba ni/ ji skad du bshad pa'i tshad las 'das shing brtsal ba'i shugs ha cang drags par bsten pas ni/ skom dad che ba la sogs pa 'byung bar 'gyur ro/ /de la skom pa ni skom dad che ba'o/ /gcong chen po ni zad byed do/ /mi dran mun zhes bya ba ni/ mi dran zhing mun par zhugs pa snyom sems pa'o/ /ngal ba ni skyo ba'o/ /dub pa ni na ba'o/ /rims dang slon pa ni rlung las byung ba'o/ /gzhan dag ni grags par zad do/ /'di'i zhar la dgag par bya ba gzhan dag kyang bshad pa ni/ rtsol ba mi nyal lam bud med/ /bgad dang smra sogs shugs 'byin pa/ /seng ges glang po drangs pa bzhin/ /shin tu drags pas ma rung 'gyur/ /zhes bya ba yin te/ rtsol ba la sogs ha cang drags par bsten cing spyod par gyur ba'i skyes bu ni ma rung bar 'gyur ro/ /de ni dper na seng ge rnam par gnon pa dang ldan yang shin tu stobs chung bas/ stobs shin tu che ba'i glang po che drangs shing 'dren pa na/ rang nyid rked pa 'chad par 'gyur te/ gang gi phyir seng ge shin tu brtan pa dang ldan pa yin mod kyi/ 'on kyang glang po che gnas nas gnas su drangs nas khyer bar ga la nus te/ glang po che khyer ba nyid na srog dang bral bar 'gyur ro/ /de bzhin du mi yang gzhu 'dren pa la sogs pa'i rtsol ba ha cang drags pas ma rung zhing 'jigs par 'gyur ro/ /rtsol ba'i 'og tu ska ba'i rdzas dag gis byugs shing dril bar bya ba yin te/ de bas na de'i yon tan smras pa ni/ dril phyis bad kan sel ba dang / /tshil ni rab tu zhu byed cing / /yan lag brtan par byed pa dang / /pags pa gsal bar byed pa'i mchog / ces bya ba yin te/ dril phyis ni bad kan sel zhing 'joms par 'gyur ro zhes bya ba ni tshig gi lhag ma'o/ /tshil ni lus zungs te/ de zhu bar byed pa ni me ltar zhu bar byed pa'o/ /yan lag rnams brtan par byed pa ni/ mgo bo dang rkang pa la sogs pa brtan par byed cing brtas par byed pa'o/ /de bzhin du pags pa shin tu gsal bar byed pa'i mchog kyang yin te/ pags pa gsal zhing dri ma med par byed pa'i don to/ /de ltar lus dril nas khrus byas pa yin pas/ de'i phyir smras pa ni/ khrus ni drod skyed ro rtsa dang / /tshe dang mdangs dang stobs rab skyed/ /g.ya' dang dri ma ngal dang rdul/ /snyom skom lus tsha mi shis sel/ /zhes bya ba yin te/ khrus ni drod bskyed pa la sogs pa'i yon tan dang ldan zhing / g.ya' ba la sogs pa sel ba yin no/ /de las khrus byas pas drod bskyed pa ni dngos po'i chos nyid yin te/ pho ba'i me drod gang yin pa/ /ba spu'i bu ga rnams las phyi rol du 'byung bar byed pa yin la/ de khrus kyis reg pa khyad par grang ba'i rang bzhin gyis ba spu'i bu ga bkag pas drod nang du zhugs te/ pho ba'i me drod skyed pa yin te/ dper na dgun gyi dus su rlung grang mo'i reg pas/ ba spu'i bu ga bkag pas lus kyi me phyi rol du mi 'byung bas/ me'i drod rnam par 'phel ba lta bu yin no/ /ro tsa ba ni khu ba 'phel bar byed pa'o/ /tshe ni tshe la phan pa'o/ /mdangs ni gzi mdangs dang ldan par 'gyur ba'o/ /stobs ni nus pa ste rab tu skyed par byed pa'o/ /g.ya' ba la sogs pa yang sel ba dang / snyom pa ni gnyid kyis 'thibs par gyur pa ste/ de yang lung las/ gnyid kyis log pa rnams khyad par du non par 'gyur ba ni snyom pa'o/ /mi shis pa ni sdig pa ste/ de sel bar bya'o zhes bshad pa yin no/ /chu dron gyis ni lus kyi smad/ /blugs shing bkrus pa stobs skyed yin/ /de nyid mgor blugs khrus byas na/ /skra dang mig gi stobs 'phrog yin/ /zhes bya ba ni/ chu dron gang yin pas ro smad bkrus shing blugs pa de ni stobs skyed cing / stobs thob par byed pa yin te/ lus kyi smad de nyid kyi rang bzhin de yin pa'i phyir ro/ /chu dron po de nyid kyis mgo bor blugs shing khrus byas pa ni/ skra dang mig gi stobs 'phrog cing gnod pa yin no/ /khrus ni 'gram chags mig nad dang / /rna ba'i nad dang tshad pas 'khru/ /lto sbos cham pa ma zhu dang / /zos ma thag pa rnams la smad/ /ces bya ba dang / yang khrus ni 'gram pa'i nad kyis nyen pa rnams la smad cing spang bar bya ba yin no/ /'gram chags zhes bya ba ni/ rlung gi nad de 'og nas bshad pa'i mtshan nyid dang ldan pa'o/ /sbos pa ni rlung gis lto ba gang zhing sbos par gyur pa'o/ /cham pa ni sna nas 'dzag pa'o/ /ma zhu ba ni zas mi 'ju ba dang / thogs pa dang / tsha ba skye ba'i khyad par gyis rnam pa gsum yin no/ /khrus byas nas zas la spyad par bya ba yin pas/ de'i phyir smras pa ni/ zhu nas phan zhing ran par bza'/ /bshang sogs nan gyis brnag mi bya/ /zhes bya ba la sogs pa yin te/ kha zas zhu ba ni legs par zhu bar gyur pa ste/ de'i kha zas zhu bar gyur pa'o/ /phan pa ni gnod pa med pa'o/ /ran pa ni zas kyi tshod zin par bza' zhing spyad par bya ba'o/ /bshang sogs ni bshang ba dang gci ba la sogs pa ste/ de nan gyis zhes pa stobs kyis brnag par mi bya'i yongs su dor bar bya'o/ / shugs ma phyung bar gzhan mi bya/ /gnod las mi bde bar ma yin/ /zhes bya ba ni rlung dang bshang ba dang gci ba'i shugs 'byung bar gnas na/ de mi dbyung bar gzhan la brtsam par mi bya ste/ gang gi phyir shugs bkag pas ni nad rnams 'byung bar 'gyur ro/ /gnod pa zhes bya ste/ bsgrub par bya ba'i mtshan nyid dang ldan pa'i nad las mi rgyal zhing / de gso bas bde bar ma byas par yang bya ba gzhan mi bya'o/ /gang gi phyir gsor rung ba'i nad btang snyoms su byas na gsor mi rung ba nyid du 'gyur ro/ /de yang 'dir gzhan dag las/ gso min gso bya nyid mi 'gyur/ /gso bya gso dka' ba nyid 'gyur/ /gso dpyad las gzhan las kyis ni/ /nad gzhi gnas skabs gzhan du 'gyur/ /zhes bya ba yin no/ /sems can thams cad bde 'dod phyir/ /rtsom pa kun la 'jug par 'dod/ /bde ba chos med par ma yin/ /de bas chos la brtson par bya/ /zhes bya ba ni/ sems can thams cad de/ srog chags kun gyi rtsom pa'i bya ba ma lus pa kun ni bde ba 'dod cing bsgrub par bya ba'i phyir byed par 'dod pa yin no/ /bde ba zhes bya ba ni sdug bsngal dang bral ba'o/ /de ni chos med par ma yin zhes bya ba ni/ chos med cing spangs la/ chos las gzhan par spyod pa las 'byung bar mi 'gyur ro/ /rgyu de bas na chos gtso bor bya zhing chos la brtsam par bya'o/ /des ni 'di skad ston par 'gyur te/ bya ba la sogs pas rtsom pa gang dang gang byed pa de dang de ni/ chos la brtsams par byas nas bya'o zhes bya ba'i don to/ /mos pas dge ba'i bshes gnyen bsten/ /cig shos ring du spang bar bya/ /zhes bya ba la/ mos pas zhes bya ba ni lus ngag dang / yid kun tu 'dud pas/ dge ba'i bshes gnyen zhes bya ba/ mtho ris dang / thar pa'i grogs bshes su gyur cing / ye shes la sogs pa ston par byed pa ste/ de 'bad pas bsten cing bsnyen bkur du bya'o/ /cig shos ring du spang bar bya/ /zhes bya ba ni/ dge ba'i bshes gnyen la ltos pa'i cig shos sdig pa'i bya ba byed pa ste/ de ni spang bar bya'o/ /'tshe dang rku dang 'dod log spyod/ /phra ma ngag rtsub brdzun tshig dang / /mi 'brel smra dang gnod sems dang / /brnab sems lta ba phyin ci log /de ltar sdig pa'i las rnam bcu/ /lus ngag yid kyis spang bar bya/ /de la 'tshe ba ni srog chags rnams 'joms pa ste gsod pa'o/ /rku ba ni gzhan gyi rdzas 'phrog cing brku ba'o/ /'dod pa la log par spyod pa ni/ bgrod par bya ba ma yin par song ba ste/ de ltar na lus kyi rnam pa gsum mo/ /phra ma ni gzhan gyi nyes pa sgrogs par byed pa'o/ /ngag rtsub po ni tshig mi bzad par rno ba'am/ gzhan gyi gnad la 'bebs pa'o/ /brdzun ni tshig mi bden pa smra ba'o/ /mi 'brel par smra ba ni/ log par smra zhing dgos pa med par smra ba ste/ de ltar na ngag gi rnam pa bzhi'o/ /gnod sems ni sems can rnams la rnam par sdang ba'o/ /brnab sems ni mi rigs par gzhan gyi rdzas la reg pa'o/ /lta ba phyin ci log ni log par lta ba ste/ bstan bcos las bshad pa'i lta ba las phyin ci log tu gyur pa med par lta ba nyid de/ sbyin pa med do/ /sbyin sreg med do/ /'jig rten 'di med do/ /'jig rten pha rol med do/ /zhes bya ba de lta bu ni lta ba phyin ci log ste/ yid kyi rnam pa gsum mo/ /phongs pa nad pa mya ngan gzir/ /ci nus par ni phan gdags bya/ /zhes bya ba la/ phongs pa ni 'tsho ba'i thabs dang bral ba'o/ /nad kyis gzir ba ni nad kyis gnod par gyur pa'o/ /mya ngan gyis gzir ba ni mya ngan gyis nyam thag pa'o/ / phan gdags pa ni sbyin pa dang / gso ba dang / mya ngan bsal ba dag gis de las bzlog cing phan gdags par bya'o/ /'bu srin grog sbur dag la yang / /rang dang 'dra bar rtag tu blta/ /zhes bya ba la/ 'bu srin grog sbur lta bu srog chags phra mo rnams la yang rang dang 'dra zhing bdag dang mtshungs par dus rtag tu blta zhing bsam par bya'o/ /de yang ji ltar bdag nyid bde ba dang sdug bsngal 'dod cing 'dor ba la sogs pa dang / srog la sdug par 'dzin pa de bzhin du 'di rnams kyang / bde ba dang sdug bsngal 'dod cing 'dor ba dang / srog la sdug par 'dzin pa yod pa nyid de/ de bas na de rnams la 'tshe ba la sogs pa mi bya'o/ /zhes pa'o/ /lha dang dge slong bram ze dang / /sman pa rgan rgyal mgron 'ongs mchod/ /ces bya ba ni/ lha la sogs pa mchod cing bsnyen bkur du bya'o/ /rgan po ni shes pa dang tshul khrims dang dka' thub dang / tshangs par spyod pa dang / brtul zhugs la sogs pa rnams la rgan pa'o/ /rgyal po ni sa bdag go/ /mgron 'ongs pa ni glo bur du lhags shing gsar du 'ongs pa'o/ /slong la rgyab kyis phyogs mi bya/ /brnyas par mi bya tshar mi gcad/ /ces bya ba ni/ slong ba'i mi rnams la rgyab kyis phyogs shing re thag chad pa yongs su spang ba dang / ma go ba lta bu dang / tshig rtsub par mi bya'o/ /brnyas pa ni bsnyen bkur med cing bzlog pa'o/ /tshar gcad pa ni khyed rnams kyis ci zhig thos sam/ bslabs sam shes pa yin zhes dris pa'i tshul gyis kun spyos pa'o/ / gnod par byed brtson dgra gzhan la'ang / /phan gdags pa ni gtso cher bya/ /zhes bya ba ni/ gnod par byed pa la brtson zhing mi rigs par byed pa'i dgra bo la yang phan gdags pa la gtso cher brtson pa nyid byas na/ dgra bo rnams kyis gang sdang bar gyur pa nyid yid la rnam pa thams cad du gnas mod kyi/ 'on kyang gnod par bya ba nyid ni lan 'ga' zhig 'grub pa yin la/ gnod par byed pa de la ni/ gnod par byed pa nyid mi bya'o/ /phan par byed du gnas na/ gnod pa'i sems kyang ldog par 'gyur ba nyid yin no/ /'byor dang rgud la'ang yid gcig bya/ /rgyu la phrag dog 'bras bu min/ /zhes bya ba la/ 'byor pa ni phun sum tshogs pa'o/ /rgud pa ni de dag nyid dang bral ba ste/ de dag las yid gcig cing sems mnyam par bya'i/ 'byor pas dregs par yang mi bya la/ rgud pas zhum par yang mi bya'o/ /rgyu la phrag dog ces bya ba ni/ phun sum tshogs par byed pa'i rgyu'i dngos po la phrag dog bya'i/ 'bras bu gzhan gyi phun sum tshogs pa la ni ma yin no/ /de yang spyod pa dam pa la 'jug pa dang / thos pa dang / gtong ba la sogs pa gzhan gyi yon tan skyed par byed pa de'i rgyu nyid la phrag dog bya'i/ de'i 'bras bu thob pa la ni ma yin te/ skyes bu nyid du gyur par mtshungs su zin kyang / 'di ni 'di ltar yon tan dang ldan pa yin na/ bdag 'di lta bu'i yon tan gyis brgyan par ci'i phyir mi bya zhes gang gis sngon ma thob pa'i thos pa la sogs pa 'phel bar 'gyur ba de lta bu'i rgyu la 'bad pa nyid du bya ba yin no/ /dus su phan dang ran par smra/ /slu ba med cing nges par bya/ /zhes bya ba la/ tshig smra bar bya ba dag ni dus su shes pa gnas skabs la bab cing dus tshod la bab par bya'o/ /phan pa ni chos dang don dang snyan pa dang ldan pa'o/ /ran pa ni nyung zhing tshod zin pa'o/ /slu ba med pa ni bden zhing mi slu ba'i chos can no/ /nges pa ni mnyan na bde ba ste/ 'jam par smra zhing yid du 'ong la dga' bar smra ba'o/ /bzhin 'dzum gsong por smra ba dang / /spyod pa bzang zhing snying rje 'jam/ /zhes bya ba la/ rang bzhin 'dzum pa ni/ rang bzhin mdzes pa ste/ khro gnyer med pa'o/ /gsong por smra ba ni dang po nyid du smra bar byed pa'o/ /spyod pa bzang ba ni rang bzhin bzang ba ste/ kun tu spyod pa mi rtsub pa'o/ /snying rje 'jam pa ni snying rje 'jam pa ste/ snying brtse ba dang ldan zhing sems mnyam pa'o/ /gcig pu bde min thams cad la/ /yid mi brtan zhing dogs mi bya/ /zhes bya ba la/ skyes bus ni bdag gcig pu bde ba dang ldan par mi bya'i/ gzhan du na dge sbyong dang / bram ze dang / gnyen 'dun dang / mdza' bshes dang bran g.yog la sogs pa rnams dang lhan cig thun mong du longs spyad pas gnas par bya'o/ /thams cad la zhes bya ba la/ yul thams cad la yid brtan zhing blo gdeng bar mi bya la/ yid brtan du rung ba'i mi dang / nye du dang / mdza' bshes dang / bran g.yog la sogs pa thams cad la yang dogs pa dang bcas par mi bya'o/ /su yang bdag gi dgra yin dang / /bdag ni su yang 'gras gyur dang / /brnyas dang bdag la gtso bo ni/ /mi byams zhes ni smra mi bya/ /zhes bya ba ni/ bdag la dgra bo yod ces bya ba ni su la yang smra zhing brjod par mi bya ste/ de brjod na g.yon can dag gis shin tu yang 'byed par 'gyur ro/ / bdag ni su'i dgra yin zhes skye bo 'ga' la yang smra bar mi bya ste/ gal te de ltar byas na shin tu 'gras par 'gyur ro/ /gtso bo dang 'brel pa'i brnyas pa ste/ ma bstun pa yang smra bar mi bya'o/ /de bzhin du gtso bo dang 'brel pa'i mi byams shing brtse ba med pa la yang smra bar mi bya'o/ /'gro ba'i bsam pa shes nas ni/ /gang zhig ji ltar yongs mgu ba/ /de la de bzhin rjes 'jug cing / /gzhan dag dga' byed mdzangs pa yin/ /zhes bya ba ni/ skye bo 'jig rten pa'i sems kyi bsam pa brtags shing shes par byas la/ shes rab kyis yongs su dpyad nas/ rnam pa gang gis skye bo gang dag yongs su mgu zhing kun tu dga' bar 'gyur ba'i 'gro ba de la/ de bzhin du rnam pa de nyid kyi rang bzhin dang bstun te gnas shing 'jug par byed la/ sbyin pa dang snyan par smra ba la sogs pas gzhan dag dga' bar byed pa de ni mdzangs shing mkhas par gyur pa'o/ /dbang po gzir bar mi bya zhing / /'di rab nyams bder bya ba'ang min/ /zhes bya ba la/ dbang po ste lce la sogs pa kha zas shin tu ngan pa la sogs pas gnod cing gzir bar mi bya la/ yang dbang po 'di dag longs spyod kyi bde ba la 'bad pas brtsal nas brten cing rab tu bde ba'i nyams su yang mi bya'o/ /tshoms gsum med pa'i rtsom pa la/ /mi bsten de dang 'gal mi bya/ /zhes bya ba la/ tshoms gsum ni chos dang / nor dang / longs spyod ces bya ba yin te/ bzhi ba thar pa'i ni chos kyi khongs su gtogs pa yin no/ /de lta bu'i sde tshoms gsum med cing / stong pa'i rtsom pa ste/ spyod pa'i 'bad pa la brten par mi bya zhing gnas par mi bya'i/ ci nas kyang chos dang mi 'gal ba'i bya ba gang yin pa de ni sde tshoms gsum dang mi 'gal ba nyid du skyes bus bsten par bya'o/ /de yang chos la kun tu brten pa na/ ci nas kyang nor dang longs spyod dang 'gal bar mi 'gyur ba de ltar bya la/ nor la brten pa na yang chos dang 'gal bar mi bya la/ longs spyod la brten pa na yang / nor dang chos dang 'gal bar mi bya'o/ /chos rnams kun gyi lam la ni/ /dbu ma'i lam gyi rjes 'jug bya/ /zhes bya ba la/ chos rnams kun te/ dngos po thams cad la lam zhes bya ba bsgrub cing / bya ba'i gnas rnams la dbu ma ste/ dman pa yang ma yin la/ shin tu mtho ba yang ma yin pa de ni rjes su 'jug cing spyad par bya'o zhes bstan pa yin no/ /skra sen kha spu ring mi gzhag /sgo dgu rkang pa dri med bya/ /zhes bya ba ni/ skra dang sen mo dang / kha spu ring por ma gyur par bregs pa ste/ kha spu zhes bya ba ni ko sko'i phyogs kyi spu'o/ /sgo dgu dang rkang pa ni/ sgo dgu dang rkang pa ste/ de dag dri ma med par bya'o/ /de la sgo dgu ni dri ma'i gnas kyi sgo rnams te/ mig dang / rna ba dang / sna dang / kha dang / bshang ba'i sgo dang / gci ba'i sgo la sogs pa'o/ / rkang pa ni rkang pa gnyis te/ de rnams kyi dri ma bsal zhing sbyang bar bya'o/ /khrus la dga' zhing dri zhim bsgo/ /cha lugs bzang zhing mi 'phyar spa/ /zhes bya ba la/ khrus la dga' ba ni rtag tu khrus byed pa'o/ /dri zhim bsgo zhes bya ba ni/ ga pur la sogs pa'i dri zhim pa'i rdzas rnams kyis lus rjes su bsgo zhing byugs pa'o/ /chas bzang ba ni dri dang byug pa dang / phreng ba dang / gos dang / rgyan gyi rnam pas brgyan gyis chas par bya'o/ /mi 'phyar ba ni khengs shing 'phyar ches pa ma yin par byas nas/ spa zhing mdangs dang ldan par bya'o/ / rin chen grub pa'i gsang sngags dang / /sman chen rtag tu bcang bar bya/ /zhes bya ba ni/ rin po che ni marka ta dang / pad+ma rA ga dang / bai DUr+ya dang / gser sa le sbram dang / rdo rje la sogs pa'o/ /grub pa'i gsang sngags ni/ rab tu grub par grags shing / mthu sngon du snang ba'i gsang sngags/ 'jig rten pa dang bstan bcos las grags pa'o/ /sman chen po ni lag smi dang / gu ha dang / dzA ti la dang / shu dag dang / yungs kar la sogs pa'o/ /rin po che dang sngags dang sman de dag ni mgo dang mgul dang dpung pa la btags te bcang bar bya'o/ /gdugs dkar lham dang ldan pa ni/ /gnya' shing gang tsam blta zhing 'gro/ /zhes bya ba la/ gdugs dkar po ni tshad pa 'gebs ba'i gdugs so/ /lham ni rkang pa skyob par byed pa ste/ skyes bus de gnyis dang ldan pa dang / gnya' shing gang tsam du blta zhing 'gro bar bya ste/ de tsam zhig tu mdun du blta'o/ /des ni sbrul dang / phyugs dang / ba lang dang / rta dang / rdo rtsub mo la sogs pa dag gi gnod pas nye bar mi 'gyur ro/ /mtshan mo don chen dag la ni/ /dbyug thogs mgo dkri grogs ldan bya/ /zhes bya ba ni/ mtshan mo'i dus su ni 'gro bar mi bya'o/ /gal te shin tu don che zhing bstan pa'i bya ba'i las la 'gro zhing / mtshan mo rgyu bas nges par 'gro ba yin na/ dbyig pa dang / mgo dkri ba dang / grogs dang ldan par byas la 'gro bar bya'o zhes ston te/ don gyi shugs kyis na mtshan mo nges par 'gro ste/ mi byar mi rung ba'i bya ba ma yin pa'i don du chung ngu dag la ni 'gro bar mi bya'o zhes ston to/ /de la ber ka yod pas na dbyig pa can te/ sbrul la sogs pa skrag par bya ba'i phyir/ dbyig pa sgra dang ldan par bya ba dang / 'gyel ba las brten par bya ba'i phyir dang / dgra bo bzlog par bya ba'i phyir bya'o/ /mgo g.yogs pa ni mgo bo dkris pa ltar steng nas 'bab pa'i bya dang / phye ma leb dang / 'bu srin la sogs pa las bsrung bar bya ba'i phyir ro/ /grogs dang ldan pa ni rkun po dang / gnod sbyin dang / srin po dang / sha za la sogs pa'i 'jigs pa las bsrung bar bya ba'i phyir bya'o/ /mchod rten mchod bya rgyal mtshan dang / /mi shis grib ma thal phub dang / /mi gtsang gseg bong gtor ma dang / /khrus byas sa ni 'gom mi bya/ /zhes bya ba la/ mchod rten ni mchod rten nyid dag dang / khyad par can gyi lhas gnas bcas pa'i zhing gi khyad par 'jig rten na grags par gang gyur pa'o/ /mchod bya ni bla ma la sogs pa'o/ /rgyal mtshan ni gtsug lag khang dang / lha khang gi nang du btags pa mdung ngam 'khor lo dang ldan pa'i ba dan no/ /mi shis pa ni bkra mi shis pa'i dngos po ste/ de rnams kyi grib ma 'gom par mi bya zhing / brdzi bar mi bya'o/ /thal ba ni lci ba la sogs pa tshig pa las byung ba'o/ /phub ma ni 'bras kyi shun ba'o/ /mi gtsang ba ni bshang ba dang gci ba la sogs pa'o/ /gseg ma ni rdo'i dum grugs so/ /bong ba ni sa'i rang bzhin la rdo dang 'dra ba'o/ /gtor ma'i gnas ni 'byung po la sogs pa la zas sbyin pa'i gnas so/ /khrus byas pa'i sa ni gang du 'ga' zhig gis khrus byas pa ste/ de thams cad 'gom par mi bya zhing yongs su spang bar bya'o/ /chu bor rkyal te 'gro mi bya/ /me tshan phung por 'gro mi bya/ /zhes bya ba la chu bo ste/ klung gi chu chen po la lag pa gnyis brkyang zhing 'gro bar mi bya ste/ chu srin dang rus sbal la sogs pas gnod par 'gyur ba'i 'jigs pa yod pa'i phyir ro/ /de bzhin du me'i phung po chen po'i tshogs kyi thad du 'gro bar mi bya'o/ /the tshom bcas pa'i gru shing la/ /bzhon pa mi srun bzhin mi 'dzeg /ces bya ba la/ the tshom dang bcas pa'i gru ni chings ma lhod cing rnyings pas pha rol du skyel mi nus so/ /de bzhin du the tshom dang bcas pa'i shing ni/ dug la sogs pa'i gdug pa yod pa'am/ lha la sogs pa gnas pa'am/ chag tu nye ba dag tu 'dzeg par mi bya zhing / de dag gi steng du gnas par mi bya'o/ /ji lta zhe na/ bzhon pa mi srun bzhin zhes bya ba yin te/ dper na rta la sogs pa'i bzhon pa mi srun pa la bzhon du mi rung ba dang mtshungs so/ /'dis ni zur gyis bzhon pa mi srun pa la yang zhon par mi bya'o zhes ston pa yin no/ /sbrid pa gad mo glal bal/ /kha ni gdangs par mi bya'o/ /zhes bya ba la/ sbrid pa ni sbrid pa 'byung ba'o/ /gad mo ni dgod pa'o/ /glal ba ni bya rmyang ste/ de la kha gdangs par mi bya'o zhes pa ste/ kha mi dgab par mi bya'o/ / sbrid pa la sogs pa 'byung ba na lag pa'am gos kyis dgab par bya'o zhes pa'i don to/ /sna ni brud par mi bya zhing / /don med sa ris mi bya'o/ /zhes bya ba la/ sna brud cing shas cher gnod par mi bya ste/ shu ba dang thor bu la sogs pa'i gnod pa spang bar bya ba'i phyir ro/ /don med cing dgos pa 'ga' zhig med par sa la sor mo la sogs pas de la 'dri zhing drud par mi bya'o zhes bya ba'i don to/ /lus kyi yan lag mi gcu zhing / /tsog tsog por yang 'dug mi bya/ /zhes bya ba la/ lus kyi yan lag lag pa dang rkang pa la sogs pa gcu ba ste/ mi mthun par byas nas bya ba'i las mi bya'o/ /'di dag gis ni lag pa dang rkang pa'i rnam par 'gyur ba spang bar bya'o zhes ston pa yin te/ gzer dang yan lag chag par 'gyur ba'i nyes pa yod pa'i phyir ro/ /de bzhin du tsog tsog por gnas te 'dug par mi bya ste/ tsog tsog por gnas pas yun ring por 'dug na/ gzhang 'brum gyi nad 'byung bar bshad do/ /lus ngag yid kyi spyod pa ni/ /snga nas ngal las bzlog par bya/ /zhes bya ba ni/ lus dang ngag dang yid kyi spyod pa zhes bya ba las su bya ba ni snga nas te/ ngal bar ma gyur pa'i dang po nyid nas bzlog par bya ste/ ji tsam gyis shin tu dub par ma gyur pa de tsam na bshol bar bya'o/ /des ni 'di skad ston pa yin te/ lus dang ngag dang yid kyis 'gro ba dang / bklags pa dang / sems pa la sogs pa'i las rnams ni ji srid shin tu dub par ma gyur pa de srid kyi bar du bya'o zhes pa'i don to/ /pus bsgreng yun ring gnas mi bya/ /mtshan mo shing drung bsten mi bya/ /zhes bya ba ni pus mo gyen du bsgreng ba gang yin pa de ni pus bsgreng zhes bya ste/ gan rkyal du 'dug nas pus mo brkyang ste/ yun ring du gnas par mi bya'o/ /de bzhin du mtshan mo shing chen po dag tu gnas shing bsten par mi bya'o/ / sum mdo mchod rten drung bzhi mdo/ /lha yi khang pa'ang de bzhin no/ /zhes bya ba la/ sum mdo la sogs par yang de bzhin du mtshan mo bsten par mi bya'o/ /de la sum mdo ni lam gsum 'dus pa la bya'o/ /de la la la dag gis phyogs gang du/ gang zhig grong ngam ljongs nas phyir byung ste/ gnad du grong na gnas par ram/ ljongs na gnas pa las rang dgar 'ongs te/ sna tshogs pa'i gtam de dang smra ba'i gnas la bya'o zhes 'dod do/ /mchod rten gyi drung ni mchod rten gyi nye 'khor ro/ /gzhi mdo ni gang du lam bzhi gcig tu 'dus pa'o/ /lha'i khang pa ni lha rnams kyi gnas kyi khang pa'o/ /gsod sa 'brog stong khang stong dang / /dur khrod du ni nyin mo'ang min/ /zhes bya ba ni gsod sa la sogs pa nyin mo'ang bsten par mi bya'o/ /de la gsod sa ni rkun po la sogs pa gsod pa'i gnas so/ /'brog stong ni dgon pa'o/ / khang stong ni skye bo med pa'i khang pa'o/ /dur khrod ni ro bsregs pa'i gnas te/ 'di dag tu ni nyin par yang bsten par bya ba ma yin na/ mtshan mo lta smos kyang ci dgos/ rnam kun nyi ma la mi blta/ /mgo yis khur ni bskur mi bya/ /zhes bya ba la/ rnam pa kun tu zhes pa rnam pa thams cad du nyi ma la blta zhing brtag par mi bya'o/ /de yang gzhan dag las/ 'char dang nub par 'gyur tshe dang / /phyed dus gzugs brnyan rtog pa dang / /gos kyis bsgribs par byas pa las/ /nyi ma blta bar mi bya'o/ /zhes bshad pa yin no/ /de bzhin du mgo bo ste/ spyi bos khur bskur bar mi bya zhing / gnas nas gnas su bskur bar mi bya'o/ /shin tu phra dang 'tsher ba dang / /mi gtsang mi sdug rgyun mi blta/ /zhes bya ba la/ shin tu phra zhing blta dka' ba dag la rtag par rgyun tu blta zhing brtag par mi bya'o/ /de bzhin du 'tsher ba ste/ me la sogs pa dang / gzhan yang shin tu 'tsher zhang gzi mdangs dang ldan pa la blta bar mi bya'o/ /mi gtsang ba ni btsog par gyur pa ste/ bshang gci la sogs pa ste/ de la yang mi blta'o/ /mi sdug pa ni mngon par mi dga' zhing sdang bar gyur pa la blta bar mi bya'o/ /chang 'tshong ba dang sbyor ba dag /sbyin dang len dang spyad mi bya/ /zhes bya ba la/ btsong ba zhes bya ba ni zong du bya'o/ /'dis sbyor bar byed pas na sbyor ba ste/ chang byed pa'o/ /sbyin pa ni rang gi bya ba las bzlog cing / gzhan dag bstabs pa'o/ /len pa ni bstan bcos ji lta ba bzhin du gzhan las len pa'o/ /de ltar chang 'tshong ba la sogs pa bram ze dang / dge sbyong dag gis mi bya'o/ /mdun gyi ser bu nyi tshan rdul/ /ba mo dang ni rlung rtsub dang / /sbrid pa sgregs pa lud pa zad/ /gnyid log nyal po gcu mi bya/ /gad ka'i grib ma rgyal po sdang / /sbrul gdug gcan gzan rwa can dang / /dus mtshams rtag tu zas bza' dang / /bud med nyal klog sems las dang / /dgra bo nar mar zan tshogs 'dus/ /smad 'tshong tshong pa'i zas dag dang / /lus dang mchu dang sen sgra 'byin/ /lag pa skra ni sprugs pa dang / /chu me mchod bya'i bar du 'gro/ /ro bsregs la brten dud pa dang / /chang sogs chags dang bud med la/ /yid rton rang dbang gyur pa spang / /zhes bya ba ni/ mdun gyi bser bu la sogs pa skyes bus spang bar bya'o zhes bya bar sbyar ro/ /de la mdun gyi bser bu ni shar phyogs nas ldang ba'i rlung ngo / /nyi tshan ni nyi ma'i than pa'o/ /rlung ni rdul gyi tshogs so/ /ba mo ni ba mo lhags pa'o/ /rlung rtsub pa ni rlung drag pa'o/ /sgregs pa ni rlung gyen du rgyu ba'o/ /lud pa ni lud pa lu bar gyur pa'o/ /zas ni zas la spyod pa'o/ /nyal po ni 'khrig pa spyod pa ste/ de dag gcus shing yon por gyur pa mi bya bar spang bar bya'o/ /gad ka'i grib ma ni chu bo'i 'gram gyi gad ka'i grib ma'o/ /rgyal po sdang ba ni rgyal pos dgra ba'o/ /sbrul gdug ni mche ba gdug pa can no/ /gcan gzan ni seng ge la sogs pa'o/ /rwa can ni ma he la sogs pa'o/ /dus mtshams thams cad du zas la spyod pa la sogs pa yang spang bar bya'o/ /bud med ni de dang nyal po bya ba'o/ /nyal po ni gnyid log pa'o/ /klog pa ni gzhung 'don pa'o/ /sems las ni thos pa la sogs pa yang yang du dran par bya ba'o/ / dgra bo'i nar ma'i zan la sogs pa yang spang bar bya ste/ nar ma'i zas zhes bya ba ni/ me lha bstod pa'i cho ga la sogs pa'i dus su ster ba'i zan te/ mdun na 'don la sogs pa ma gtogs par gzhan dag gis de zos na/ sdig pas gos par 'gyur bar 'dod de/ gang gi phyir mchod sbyin rdzogs khar de las byung ba'i sdig pa zad par bya ba'i phyir/ nyes pa 'chags pa las 'go bar 'gyur ro zhes zer ro/ /tshogs 'dus ni skye bo mang pos bstan pa'o/ /yun du tshogs te gtan du zlos par byed pa mang po 'dus par byed pas khyab pa'o/ /smad 'tshong ni 'phyon ma ste/ de dang 'brel pa'i zas gang yin pa de yang bza' bar mi bya ste/ sdig pas gos par 'gyur ba'i phyir ro/ /tshong pa ni nor bsgyur mkhan te/ de'i zas kyang sdig pas gos par byed pa yin par 'dod pas bza' bar mi bya'o/ /de bzhin du lus dang / mchu dang sen mo ste/ yan lag dang kha dang / lag skyes kyi sgra 'byin pa yang spang bar bya'o/ /de bzhin du lag pa dang / skra sprugs shing bskyod pa yang spang bar bya'o/ /chu me mchod bya'i bar du 'gro/ /zhes pa ni chu dang me dang mchod par bya ba dag gi bar du 'gro zhing / song ba yang spang bar bya'o/ /mchod bya ni bla ma la sogs pa'o/ /ro bsregs pa la brten pa'i dud pa ni/ mi ro bsregs pa las byung ba'i dud pa yang spang bar bya'o/ /de bzhin du chang la sogs pa la chags pa ste/ chang dang / rgyan po dang / bud med dang / yul gzhan dag la chags shing yang nas yang du bsten pa yang spang bar bya'o/ /de bzhin du bud med la yid rton pa dang / rang dbang du bya ba'i yul de spang bar bya'o/ /blo ldan spyod pa thams cad la/ /'jig rten nyid ni slob dpon yin/ /de bas 'jig rten pa yi don/ /rtogs par byed pas de nyid bya/ /zhes bya ba la/ blo dang ldan zhing shes rab dang ldan pas/ spyod pa thams cad de bya ba thams cad la/ 'jig rten nyid ces bya ba/ 'jig rten pa dam pa nyid slob dpon yin te/ rjes su ston pa yin no/ /de bas na zhes pa gtan tshigs de'i phyir gang phyir gang 'jig rten pa'i don rtogs par byed cing / so sor rtog pa sngon du gtong zhing blang bar bya ba dang / spang bar bya ba'i tshul gyis legs pa dang nyes pa dag gi bye brag shes pa dag gis 'jig rten pa dam pa dag gi spyod pa de nyid rjes su spyad par bya zhing bslab par bya'o/ /snying rjes brlan zhing gtong dang ldan/ /lus dang ngag yid dul ba dang / /gzhan gyi don la rang don sems/ /de dag dam pa'i spyod mthar thug/ /ces bya ba la/ snying rjes brlan pa ni sems can thams cad la snying brtse ba dang ldan pa nyid de/ snying rjes sems non pa'o/ /de bzhin du gtong ba dang ldan pa ni/ ci nus pa dang bstan bcos ji lta ba bzhin du bdag gir bya ba las bzlog cing gzhan dag la ster ba'o/ /lus dang ngag dang sems ni lus ngag yid kyi rnam pa'o/ /dul ba ni nye bar zhi ba'o/ /gzhan gyi don la zhes pa ni gzhan gyi dgos pa'o/ /rang don sems pa ni gzhan gyi don blo la sems pa 'di nyid kho bo'i rang gi don yin no zhes de snyam du sems pa'o/ /de dag ces pa de lta bu ni dam pa ste/ ya rabs rnams kyi spyod pa yin pas na dam pa'i spyod pa'o/ /mthar thug pa ni rdzogs pa'o/ /yang na dam pa yang yin la spyod pa yang yin pas dam pa'i spyod pa ste/ spyod pa mdzes pa zhes bya ba'i don to/ /da ltar bdag ni nyin mtshan du/ /ji lta bur ni gnas 'gro zhes/ /rtag tu dran pa nyer 'jog pa/ /sdug bsngal snod du mi 'gyur ro/ /zhes bya ba ni da ltar zhes pa gnas pa'i gnas skabs nyid na/ bdag ni nyin mo dang mtshan mo rtag tu ci chos la sogs pa'i bya ba dang ldan nam/ 'on te chos dang mi ldan par 'gro zhing dus 'das pa yin zhes/ de ltar rtag tu dran pa nye bar 'jog cing / dus thams cad du yid la byed pa dag ni sdug bsngal gyi snod du mi 'gyur gyi/ 'jig rten 'di dang gzhan du kun tu dga' ba nyid du 'gyur ro/ /de ltar spyod pa mdor bsdus pas/ /gang zhig kun tu spyod byed pa/ /tshe dang nad med dbang phyug dang / /grags pa 'jig rten rtag thob 'gyur/ /zhes bya ba la/ de ltar zhes bya ba ni rdzogs pa'i tshig go/ /spyod pa ni kun tu spyod pa'o/ /mdor bsdus pa ni mdo tsam du bsdus te bshad pa yin pas so/ /de lta bu'i spyod pa de skyes bu gang zhig kun tu spyod par byed pa ni/ tshe la sogs pa thob par 'gyur ro/ /de la tshe ni srog go/ /nad med pa ni bde bar gnas pa'o/ /dbang phyug ni 'byor pa dang ldan pa'o/ /grags pa ni snyan pas kun tu khyab pa'o/ /'jig rten rtag pa ni mi bzad pa'i gnas thob cing mi 'jigs pa'i 'dod pa ma lus pa thob par 'gyur ro/ /yan lag brgyad pa'i snying po'i rnam par 'grel ba tshig gi don gyi zla zer zhes bya ba/ slob dpon zla ba la dga' bas rnam par sbyar ba las le'u gnyis pa'i rnam par 'grel pa'o/ / //de nas dus su spyad pa'i le'u bshad par bya'o zhes bya ba la/ 'dir tha mal par bde bar gnas pa'i 'jug pa bshad pa'i skabs yin la/ de yang le'u snga mar ni/ dus tshigs spyi tsam du bstan pa yin la/ da ni dus kyi khyad par bstan par bya ba'i phyir/ le'u 'di rtsom pa byas pa de nyid rigs pa yin pa'i phyir ro/ /de yang gang gi phyir zhag gcig gi cha shas ni/ thang cig yin la/ de'i spyod pa yang thang cig gis nye bar mtshon nas ston te/ de ni tshangs phyir thang cig ces bya ba la sogs pa'i gzhung gis bshad pa yin no/ /nyin zhag cha shas bsdus pa ni zla phyed do/ /zla ba phyed bsdus pa ni zla ba'o/ /zla ba bsdus pa ni dus so/ /dus bsdus pa ni lho dang byang du 'gro ba'o/ /de la dus dang dus su spyad par bya ba yin pas dus kyi spyod pa'o/ /de nas zhes bya ba la sogs pa gzhan dag gi tshig don sngar bshad par byas so/ /dgun zla ra ba sogs gnyis gnyis/ /rim bzhin dus ni drug tu bshad/ /de nas dgun zla tha chungs sogs/ /gsum ni byang du 'gro zhes bya/ /de tshe mi rnams nyin re zhing / /mthu 'phrog pa zhes bya ba yin/ /zhes bya ba la/ dgun zla ra ba la sogs pa zhes pa ni/ dgun zla ra ba dang 'bring po la sogs pa'o/ /gnyis gnyis ni grang gnyis kyis bcad pa ni zla ba bcu gnyis so/ /rim ni go rims ji lta ba bzhin du bya ba yin gyi/ go rims 'chol ba ni ma yin no/ /dgun zla tha chungs sogs zhes bya ba ni/ dgun smad dang / dpyid dang / so ga dang / dbyar dang / ston dang / dgun stod de/ dus drug tu dus kyi rnam par dbye ba bshad cing bstan pa yin no/ /de la dus gsum ste/ dgun smad dang / dpyid dang / so ga zhes bya ba'i dus gsum la ni/ nyi ma byang phyogs su 'gro ba yin te/ nyi ma byang phyogs su 'gro ba de ni/ mthu 'phrog pa zhes kyang bya bar shes par bya ba'o/ /de yang gang gi phyir dus de'i tshe mi rnams kyi mthu dang stobs nyi ma re re zhing 'phrog cing 'bri bar byed pa yin no/ /su zhig 'phrog ce na/ rang gi rang bzhin yin pa'i phyir/ nyi ma'i 'od zer dag gis 'phrog par byed do/ /ci'i phyir zhe na/ de tshe shin tu rno zhing tsha/ /rtsub pa'i las kyi ngo bo nyid/ /nyi ma rlung gi zla ba yi/ /sa yi yon tan zad par byed/ /ces bya ba la/ dus de'i tshe gang gi phyir/ shin tu rno ba dang / tsha ba dang / rtsub pa'i las kyi ngo bo nyid de/ rang bzhin can yin pas/ nyi ma dang rlung gi zla ba'i cha las byung ba'i bsil ba'i rang bzhin gnas pa'i yon tan de zad par byed cing 'bri bar byed do/ /tshul de ltar na me ni rtsub pa'i rang bzhin can yin pas mthu stobs phrogs te/ de bas na de'i dngos po rnams kyi khu bcud rtsub par 'gyur ba yin no/ /'dir ni tsha bska kha ba yi/ /ro rnams stobs ni che ba yin/ /zhes bya ba ni/ dus 'di'i tshe tsha ba la sogs pa'i ro rnams grangs ji lta ba bzhin rim gyis stobs che ba yin no/ /de la dgun smad kyi dus su ro che ba stobs che ba yin no/ /dpyid ni bska ba'o/ / so ga'i ni kha ba stobs che ba'o/ /stobs che ba smos pa ni 'di skad ston pa yin te/ de'i tshe tsha ba la sogs pa'i ro 'di dag skyed bar byed pa ni ma yin gyi 'on kyang rang gi nus pa gsal bar snang bar byed pa nyid yin no/ /de'i tshe stobs che bar 'gyur ba yin zhing / rang gi mthu khyad par can rdzogs par byed do/ /de bas me ni mthu stobs 'phrog /ces bya ba ni/ gang gi phyir de ltar sa'i zla ba bsil ba'i yon tan 'bri bar byed cing / rtsub pa'i ro 'phel bar byed la/ nyi ma rno bar byed pas 'gro ba'i snum pa'i stobs 'phrog par byed cing / rlung gis kyang chu'i khams skems pa yin no/ /lho phyogs su ni 'gro ba'i dus/ /dbyar la sogs par slar stobs bskyed/ /'dir stobs slar ni bskyed pas na/ /'dir ni bsil bas zla ba ni/ /stobs dang ldan pas nyi ma 'bri/ /zhes bya ba ni/ lho phyogs su 'gro ba zhes bya ba ni nyi ma lho phyogs su 'gro ba'o/ / de'i dus ni dbyar la sogs pa yin te/ dbyar dang / ston dang / dgun stod ces bya ba ni gsum mo/ /dus de ni slar bskyed pa zhes bya ba dang / bsil zhing zhi ba zhes bya ba yin te/ gang gi phyir nyi ma'i 'od zer gyi stobs 'phrog pa'i dus su mi rnams kyi stobs kyi bcud 'phrog cing zad par byed pa ste/ slar gtong zhing skyed par byed pa yin te/ de bas na 'di ni slar gtong ba yin pas na/ don dang mthun pa'i ming du dus 'di la skyed pa zhes bya'o/ /slar bskyed pa'i dus 'dir ni bsil zhing zhi ba yin pas zla ba stobs dang ldan zhing nus pa che ba yin la/ des ni nyi ma 'bri ba yin te/ de'i tshe nyi ma'i stobs chung bar 'gyur ba yin te/ 'di'i nus pa 'bri ba na/ zla ba'i stobs 'phel bas bsil bar byas pa dang / lho phyogs su 'gro ba'i lam gyi mtshan nyid yin pa'i phyir ro/ /char 'bab pa dang rlung bsil bas/ /sa steng tsha ba zhi ba na/ /'dir ni snum dang skyur lan tshwa/ / mngar ba'i ro rnams mthu bskyed do/ /zhes bya ba la/ 'dir ni zhes pa slar stobs bskyed pa'i dus 'dir snum pa dang / ro gsum po skyur ba dang / lan tshwa dang / mngar ba mthu che zhing stobs bskyed pas rang gi nus pa gsal bar byed la/ 'byung ba chen po rnams che chung gi shas snyoms pas/ ro de rnams mthu che bar 'gyur ba yin no/ /de ci'i phyir zhe na/ dus bsil ba'i phyir te/ char gyi tshogs 'bab pa dang / rlung bsil zhing grang bas sa'i steng gi tsha ba zhi zhing than pa dang bral bas mthu skye ba yin no/ /'dir yang rim pa bzhin du sbyar bar bya ste/ dbyar ni ro skyur ba mthu bskyed pa yin la/ ston ni lan tshwa'o/ /dgun stod ni mngar ba'o/ /dgun tshe char dang tsha dus su/ /stobs chung lhag ma dag la 'bring / /zhes bya ba la/ dgun ni grang ba'i dus te/ dgun stod dang dgun smad ces bya ba'o/ /che ba ni de'i tshe mi rnams kyi mthu stobs mchog tu che bar 'gyur ro/ /'dir dgun zhes smos pas ni/ dgun stod dang dgun smad gnyi ga yin par shes par bya ste/ de'i tshe ni mi'i stobs shin tu che ba yin no/ /char dus dang / tsha dus ni dbyar dang so ga'i dus te/ de'i dus su mi'i stobs chung ba yin no/ /lhag ma ste/ ston dang dpyid dag la ni/ mi'i stobs 'bring zhing ran pa yin no/ /de la re zhig dgun gyi dus kyi spyod pa smras pa ni/ stobs ldan grang bas bkag pa ni/ dgun gyi dus su me stobs ldan/ /de ni rlung gis sbar ba na/ /zas nyung gyur na lus zungs skems/ /de bas dgun ni mngar skyur dang / /lan tshwa'i ro ni bsten par bya/ /zhes bya ba la/ stobs zhes bya ba skyes bu'i me dgun gyi dus su stobs dang ldan par 'gyur ro/ /de yang dgun ni slar stobs bskyed pa'i dus yun ring du bsags pa yin pas/ mi'i stobs bstan par gyur pa yin gyi/ dang po rtsom pa tsam gyis ni ma yin pas/ stobs 'phrog pa'i dus kyi stobs rdzogs pas/ de la gnod par mi nus so/ /de bas na dgun ni stobs mchog tu che bar grub pa yin no/ /de nyid kyis na dang po nyid du/ stobs ldan grang bas bkag pa ni/ /zhes smos pa yin te/ stobs ni 'di ltar byed de/ slar stobs bskyed pa'i dus su stobs bsags pas/ de'i tshe skyes bu stobs dang ldan pa yin la/ stobs de grang bas bkag pas mi smin par nus pa'i stobs dang ldan par 'gyur ro/ /'dir dngos po'i chos nyid ni 'di yin te/ pho ba'i me drod kyi tshogs gang yin pa ba spu'i bu ga rnams las phyir 'byung ba ni grang ba'i reg pas ba spu'i bu ga bkag pas nang du 'dus la/ nang du zhugs pa des rang gi me'i drod des pho ba'i me drod de nyid mngon par 'phel bar byed do/ /pho ba'i me drod 'phel ba des ci zhig byed ce na/ de ni rlung gis sbar bas na/ /zas nyung gyur na lus zungs skems/ /zhes smos pa yin te/ pho ba'i me drod de rlung gis sbar zhing bus pas/ zas nyung bar 'gyur zhing / de'i tshe kha zas legs par 'grangs par zos na dngas ma la sogs pa'i lus zungs rnams btsos shing skems par 'gyur ro/ /de bas na dgun gyi dus su ni me'i drod bsrung ba'i phyir/ kha zas legs par 'grangs par bza' ba nges pa kho nar bya dgos te/ pho ba'i me drod kyis zas kyi tshod lci ba 'ju bar nus pa yin gyi/ dus gzhan dag tu na de ltar ma yin no/ /de bas na zhes pa ni rlung gis pho ba'i me sbar ba na stobs can yin pa de las rgyal bar bya ba'i phyir ro/ /dgun ni kha ba 'bab pa'i dus dag tu mngar ba dang / skyur ba dang / lan tshwa'i ro bsten par bya zhing longs spyad par bya'o/ /de tshe mtshan mo ring bas na/ /nang par nyid ni bkres par 'gyur/ /nges par bya ba byas nas ni/ /ji skad bshad rdzogs de rjes la/ /rlung 'joms til mar gyis byugs shing / /spyi bo'ang til mar gyis byugs mnye/ /bag yod pa dang stobs 'byed cing / /rkang pas ran par mnye bar bya/ /zhes bya ba la/ dgun gyi dus de'i tshe/ mtshan mo nam ring bas nang par te/ tho rangs kyi dus nyid du bkres shing zas 'dod par 'gyur ro/ /de bas na de'i tshe nges par bya ba zhes bya ba/ bshang gci dor nas gtsang sbra'i cho ga bya ba dang / so shing bca' ba dang / mkhur ba bkang ste dor ba la sogs pa ni nyin re spyad pa'i cho ga'i le'u las ji skad bshad pa rdzogs shing zin par byas la/ de'i rjes la rlung 'joms shing sel ba'i til mar gyis rlung gi nad gso ba las bstan pa bzhin du byugs shing mnye ba bsten par bya'o/ /de bzhin du spyi bo ste/ mgor til mar gyis byugs pa dang / mnye ba ste khyad par du yan lag rnams lag pa dag gis mnye ba dang / bag yod pa ni mkhas shing goms pa ste/ de dang lhan cig lag pa'i stobs 'gyed pa'i tshul gyis mnye bar bya'o/ /de bzhin du rkang pas ran par mnye ba ste/ rkang pa gnyis kyi pags pa dang / spu la sogs pa la mi gnod par ran zhing ci rigs par mnye bar bya'o/ /de nas bska bas snum bsal la/ /cho ga bzhin du khrus dag bya/ /gur kum gla rtsi dang bcas pas/ /lus bskus a ka ru yis bdug /sha tshon khu ba snum bag dang / /bu ram chang dang chang dngas chang / /gro dang 'bras khur ma sha dang / /'o ma bu ram shing byas bza'/ / kha zas gsar dang zhag til mar/ /dro 'jam chu yis gtsang sbra bya/ /zhes bya ba ni/ de ltar lus bkrus pa'i 'og tu sran chung gi phye ma la sogs pa rdzas bska bas snum bsal zhing med par byas la/ de'i 'og tu cho ga ji lta ba bzhin du zhes pa cho ga dang mi 'gal ba ste/ chu dron pos lus kyi smad bkru ba la sogs pa sngar ji skad bshad pa bzhin du lus bkru bar bya'o/ /de nas ni gur kum gla rtsi dang bcas pas lus bkru bar bya'o/ /de'i 'og tu skyes bu'i lus a ka ru'i bdug pas bdug par bya'o/ /sha tshon ni sha bzang po'o/ /khu ba ni sha khu'o/ /snum can ni mar la sogs pa dang ldan pa'o/ /de la bu ram chang ni bu ram las byas pa'i chang ngo / /chang dngas ma ni shin tu dngas pa'i chang ngo / /yang chang zhes smos pa ni yang de las gzhan pa chang bska ba dag btung ba'o/ /de bzhin du gro las byas pa'i khur ba dang la du la sogs pa bza' ba dang 'bras khur te/ 'bras btags pa las byas pa'i chang ngo / /chang ngam sha las byas pa'i bza' ba dang / kr-i sa ra la sogs pa'i bza' ba dang / 'o ma las byas pa'i phrum dang zho dang chur ba la sogs pa dang / bu ram shing las byas pa ste/ btung ba dang / bu ram la sogs pa ste/ de thams cad bza' bar bya'o/ /de bzhin du kha zas sar pa ni gsar thog las byas pa'o/ /zhag ni tshil med pa'i sha btsos te tshos pa dang / de'i steng na snum gang zhig 'byung ba de la ni zhag gi sgrar bshad do/ /de yang lung las/ tshil med sha yi snum gang yin/ /de ni zhag tu yongs su bsgrags/ /zhes bshad pa yin no/ /til mar ni til las byung ba yin no/ /de bzhin du dro 'jam chu ni ran par bsros pa'i chu ste/ des khrus la sogs pa gtsang sbra'i bya ba bya'o/ /be'u ras slag pa dar sogs bgo / dre'u rngog re'u bal can gding / /rang bzhin dro zhing yang ba yi/ /gos bgos mal la brten par bya/ /nyi ma'i 'od la ran par 'di/ /dugs bya lham ni rtag tu bgo/ /zhes bya ba ni/ de'i tshe skyes bus mal la brten par bya'o/ /ji lta bu zhe na be'u ras zhes bya ba la sogs pa ste/ be'u ras ni be'u phrug gam lwa ba dmar po'o/ /slag pa ni pags pa'i gos so/ /dar ni rgya las byung ba'o/ /sogs pa ni gos bzang po gzhan dag bsdu'o/ /dre'u rngog re'u bal can ni/skyin la sogs pa'i spu las byas pa'o/ /rang bzhin dro ba ni phal cher spu dang ldan pa'o/ /yang ba ni phra ba la sogs pa'i yon tan dang ldan pa'o/ /de bgos pa ni de dag steng nas bgo ba dang / 'og tu bting ba'i mal stan la skyes bus brten par bya'o/ /de bzhin du nyi ma'i 'od la ran par zhes bya ba/ 'gro ba la sogs pa spangs la/ nyi ma 'di zhing bsten par bya'o/ /de bzhin du dugs te bsro ba la sogs pa'i dbye ba rnam pa bzhi dag kyang ci rigs par bsten par bya'o/ /de bzhin du lham zhes bya ba dus 'di'i tshe rnam pa thams cad du rtag par lham bgo bar bya'o/ /chung ma gzhon zhing yid 'ong rgyags/ /nu ma brla dang ro smad rgyas/ /gur gum gyis byugs spos kyis bdugs/ /lus kyi drod kyis grang sel ba'o/ /zhes bya ba ni/ de'i tshe chung ma gzhon zhing dar la bab pa dang / yid du 'ong zhing snying du sdug pa dang / nu ma dang brla dang ro smad kyi cha shas shin tu rgyas pa dang / spos kyis bdugs pa la sogs pas lus kyi drod kyis grang ba sel nus pa bsten par bya'o/ /sa khang khang pa nyis rim bya/ /mdag me'i drod kyis bsros pas ni/ /grang dang rtsub pa las byung ba'i/ /nyes pa nam yang mi 'byung ngo / /zhes bya ba la/ sa khang ni gang sa brkos nas khang par byas pa'o/ /khang pa nyis rim ni khang pa'i nang du khang par byas pa'o/ /mdag me dag ni drod kyis bsros pa'i sol ba mdag mer lhags par byas pa'i drod kyis khang pa gang bsros par gyur pa der gnas shing spyod par byed pa'i skyes bu de la ni grang ba dang rtsub pa las byung ba'i zhes pa/ grang ba dang rtsub pa'i dngos po las gyur pa'i nyes pas gnod pa nam yang 'byung zhing skye bar mi 'gyur ro/ /da ni dgun smad kyi spyod pa bstan par bya ba'i phyir smras pa ni/ dgun smad dus su lhag par yang / /cho ga 'di nyid bya ba yin/ /de tshe lhag par grang ba dang / /stobs 'phrog las byung rtsub pa'ang yin/ /zhes bya ba la/ dgun stod kyi bya ba 'di nyid ni/ /dgun smad kyi dus su yang lhag par te/ khyad par du bya'o/ /des na snum pa dang / ro gsum po dgun stod kyi dus su bsten par bshad pa ste/ dgun smad kyi dus su shin tu snum pa bsten par bya la/ de bzhin du bsten par bya ba bshad pa gzhan gang dag yin pa de rnams de'i tshe lhag par shas che bar byas nas thams cad bsten par bya'o/ /de ci'i phyir zhe na/ dgun stod kyi dus las kyang de'i tshe lhag par grang bar 'gyur ba ni dus kyi rang bzhin yin la/ de bzhin du stobs 'phrog pa'i dus las byung ba'i rtsub pa yang de'i tshe 'byung ba yin no/ /dpyid kyi dus kyi spyod pa dag bstan pa ni/ dgun ni bad kan khong na sogs/ /dpyid dus nyi ma'i 'od dros pas/ /me yi drod nyams nad skyed de/ /de bas de ni myur du bsal/ /rno dang skyug sman sna sman sogs/ /yang dang rtsub pa'i kha zas dang / /bcag dang lus phyi mnye ba yis/ /bad kan bdo ba'i nad bsal bya/ /khrus byas ga bur tsan+dan dang / /gur gum la sogs bsku bar bya/ /zhes bya ba la/ dgun zhes pa ni grang bar cha mthun pas/ dgun stod dang dgun smad gnyi ga yin par shes par bya'o/ /de'i tshe ni bad kan khong du sogs shing 'phel ba yin no/ /de yang gang gi phyir dgun stod dang / dgun smad kyi dus su snum bag la spyod pa dang / de bzhin du dus las byung ba'i grang bas 'di lhag par bsgongs par gyur pa dang / de dpyid kyi dus la bab pa dang / nyi ma'i 'od zer gyi tsha bas gdungs pa dang / gzugs zhu ba nyid du gyur nas/ chu ltar me'i mi mthun pa'i phyogs su 'gyur ro/ /des na pho ba'i me drod nyams par byas shing bcil nas/ nad skyed par byed cing 'byung bar byed do/ /de bas na dpyid kyi dus la bab ma thag bad kan chu'i tshogs ltar gnas pa de myur du zam pa lta bu'i skyug sman la sogs pas bad kan bdo ba bsal zhing bzlog par bya'o/ /de'i mi mthun pa'i phyogs ni sman rnon po rnams gtang ba dang / de bzhin du yang ba dang rtsub pa'i kha zas te/ zas phal mo che kha ba dang / bska ba la sogs pa dang ldan pa bza' ba dang / de bzhin du bcag pa la sogs pas bad kan bdo ba bsal zhing bzlog nas/ de'i 'og tu khrus byas la/ ga bur la sogs pas lus bkru zhing byug par bya'o/ /nas dang gro ni rnying pa dang / /sbrang rtsi skam sa'i bsregs sha bza'/ /a mra'i khu dang sbyar ba yi/ /khu ba skom du sbyar ba btung / /chung ma dri zhim ut+pal gyi/ /mig dang ldan dang lhan cig cing / /yid ni dga' zhing bder byas pas/ /grogs dang lhan cig btung bar bya/ /skyon med chang rgan dro 'jam dang / /bu ram rgun chang sbrang chang dang / /sga chu bskol dang se'u'i chu/ / sbrang chu'am gla sgang chu btung bya/ /zhes bya ba ni/ gang nas rnying pa dang / gro rnying pa dang / sbrang rtsi dang / srog chags skam sa na gnas pa'i sha thur ma la bskyon te/ bsregs pa de za ba dang / chang legs par btung bar bya'o/ /ji lta bu zhe na/ a mra'i khu ba dang sbyar ba zhes pa ste/ shing tsu ta'i khu ba dang sbyar ba de btung bar bya'o/ /de bzhin du chung ma ut+pal lta bu'i mig dang ldan pa'i mtshan ma dang lhan cig btung bar bya'o/ /de bzhin du yid dga' zhing dang bar bya ba dang / sems bde zhing tshim par bya ba dang / de bzhin du grogs po mdza' bshes rnams dang lhan cig btung bar bya'o/ /de bzhin du skyon med pa ste/ mdog dang / dri dang / ro dang / gzugs phun sum tshogs pa'i chang rgan la sogs pa'i chang gi bye brag btung bar bya'o/ /de la chang rgan ni gang yun ring du sbyar zhing bslangs pa la bya'o/ /dro 'jam ni gang bskol nas byas pa de ni dro 'jam mo/ /bu ram chang ni bu ram shing gi khu ba las chang du byas pa'o/ /rgun chang ni rgun 'brum las byas pa'o/ /sbrang chang ni sbrang rtsi las byas pa'o/ /de bzhin sga chu bskol ba ni/ /bca' sga bskol ba'i btung ba'o/ /se'u'i chu ni se'u 'bru bskol ba'i chu'o/ / sbrang rtsi'i chu ni sbrang rtsi dang chu sbyar te btung bar byas pa'o/ /gla sgang chu ni gla sgang bskol ba'i chu btung ba'o/ /lho phyogs bser bus bsil ba dang / /mtha' ma kun tu chu 'bab la/ /nyi ma'i 'od ni mi snang dang / /nor bu bcag 'dra'i mdangs ldan pa/ / khu byug snyan pa'i sgra sgrogs shing / /'dod pa'i longs spyod ldan pa'i sa/ /sna tshogs me tog ldan pa'i shing / /dri zhim skyed mos tshal du ni/ /dga' 'dun gtam ni sna tshogs pas/ /phyed dus bde bas bde bar bya/ /zhes bya ba la/ skyed mos tshal gyi nags tshal du 'dug la/ nyi ma phyed kyi dus su bde ba nyid kyis dus 'da' bar bya'o/ /ji ltar zhe na/ dga' 'dun gtam ni sna tshogs pa/ /zhes bya ba yin te/ dga' 'dun ni glu dang rol mo sna tshogs len pa dang / gtam ste snyan dngags kyi gtam sna tshogs pa bya bas so/ /gang du zhe na/ lho phyogs bser bus bsil ba dang / /zhes bya ba la sogs pa ste/ lho phyogs kyi rlung ni rjes su mthun par ldang ba'i rlung gang yin pa ste/ rdul dang bye ma dang gseg ma dang bcas par ldan pa ni ma yin te/ de lta bu'i rlung gis bsil bar gyur pa'i skyed mos tshal du'o/ /yang na lho phyogs nas ldang ba'i rlung ni bsil ba yin pa'i phyir ro/ /de bzhin du mtha' ma kun tu chu 'bab pa'i ngang tshul dang ldan pa'o/ /de bzhin du/ nyi ma'i 'od ni mi snang dang / /zhes pa ste/ ji srid nub pa de srid kyi bar du nyi ma mi snang ba ste/ de ltar shin tu stug pa'i nags tshal der ro/ /yang na phyogs la la ni mi snang zhing cung zad snang la/ la la ni rnam pa thams cad mi snang bar gyur pa'o/ /de bzhin du/ nor bu bcag 'dra'i mdangs ldan pa/ /zhes bya ba ste/ bai DUr+ya la sogs pa'i nor bu bcag pa lta bu'i 'od dang ldan pa gang yin pa de la de skad ces bya'o/ /de bzhin du/ khu byug snyan pa'i sgra sgrogs shing / zhes bya ba ste/ skyed mos tshal de la khu byug rnams sgra sgrogs shing ca co 'don pa dang / de bzhin du/ 'dod pa'i longs spyod ldan pa'i sa/ /zhes pa ste/ sna tshogs pa'i gzugs yid du 'ong ba dang / 'dod pa'i yul du ma dang ldan pa'i nags tshal lo/ /de bzhin du/ sna tshogs me tog ldan pa'i shing / /zhes bya ba ste/ sna tshogs shing tha dad pa'i ste/ me tog dang ldan pa'i shing du ma dang / de bzhin du dri zhim pa ste/ yid du 'ong ba'i dri 'byung ba'i tshul can gyi skyed mos tshal du nyi ma phyed pa'i dus bde bar bya'o/ /lci bsil nyin mo nyal ba dang / /snum bag mngar skyur spang bar bya/ /zhes bya ba ni/ de'i tshe lci ba nas skyur ba'i bar ni bad kan 'phel bar byed pa yin pas de'i phyir spang bar bya'o/ /so ga'i spyod pa smras pa ni/ /nyi ma'i 'od zer rab tsha bas/ /so ga 'phrog pa 'dra ba yin/ /de bas de tshe lan tshwa tsha/ /skyur rtsol nyi ma'i 'od zer spang / /zhes bya ba la/ nyi ma ni 'od zer stong ldan no/ /de ni so ga'i dus su tsha bar 'gyur te/ stobs 'phrog pa'i rang bzhin mthar thug pa'i dus yin pa'i phyir ro/ /de ni 'phrog pa dang 'dra bar ston pa yin te/ sngar rnam par dpyad pa'i las gzhan dag bya bar rigs pa ma yin no/ /de bzhin du bsil ba'i yon tan dang / 'gro ba'i snum pa dag kyang 'phrog pa 'dra ba nyid yin no/ /de bas na de'i tshe lan tshwa sna tshogs la sogs pa yang spang bar bya ste/ de ni stobs sel bar byed pa yin no/ /de tshe zhes bya ba 'dis ni/ 'di skad ston pa yin te/ dman zhing shes chung ba'am/ log par gyur pa'i tshe/ lan tshwa la sogs pa spang bar mi bya'i rang gi mtshan nyid ji lta bu dang ldan pa de'i tshe bya ba yin no/ /de la tsha ba ni na le sham la sogs pa'o/ /skyur ba ni dar ba skyur ba dang skyur po la sogs pa'o/ /rtsol ba ni lus dub par byed pa'i las rnams so/ / nyi ma'i 'od zer ni nyi ma tsha ba'i 'od de de dag spang bar bya'o/ /de nas dus de'i tshe ci zhig bsten par bya zhe na/ de'i phyir smras pa ni/ zas ni mngar dang yang ba dang / /snum bsil sla ba nyid bsten bya/ /zhes bya ba ni/ de'i tshe zas mngar ba nyid yang dang yang du bsten zhing goms par bya'o/ / ro gzhan la bsten par mi bya'o/ /de bas na nyid ces bya ba nges par bzung bar bstan pa yin no/ /de bzhin du zas yang ba ste rang bzhin gyis yang ba dang / tshod zin par bza' zhing / yang bar bya ba snum pa ste/ mar dang / 'o ma la sogs pa dang sbyar ba dang / bsil ba ste grang ba nyid dang / sla ba ste kan ter ma gyur pa nyid bsten cing bza' bar bya'o/ /rab bsil chu yis lus bkru zhing / /phye zan kha rar bcas pa bza'/ /zhes bya ba ni/ rab tu bsil ba'i chus lus bkru zhing gtor ba dang / phye zan slan te kha ra dang sbyar ba lhag cing bza' bar bya'o/ /chang mi btung ste 'thung na yang / /nyung ba'am chu mang bsres la btung / /zhes bya ba ni/ so ga tsha ba'i dus su chang btung bar mi bya'o/ /gal te de gtong mi phod na/ nyung zad cig gam/ chu mang pos bsres la bslad de btung bar bya'o/ /gzhan du de ni kha skam lhod/ /tsha dang rmongs par byed pa yin/ /zhes bya ba ni/ gzhan du na chang de mang du 'thungs pa'am/ chu mang pos ma bslad par 'thungs na/ kha skam zhing mchil ma bska ba dang / lhod pa ste lus lhod cing zhig pa snyam byed pa dang / tsha ba ste yan lag thams cad tsha bas 'debs pa dang / rmongs pa ste/ sems med pa snyam du byed par 'gyur ro/ /chang btung bar mi bya'o zhes bya ba'i skabs 'dir rang bzhin gyis dbye ba la brten te smras pa yin gyi/ yul gcig la ni ma yin no/ /'o na ci zhig yin zhe na/ /tha dad pa'i yul gsum ste/ des bya ba dgag pa ni yul gcig la yin pas 'gal bar 'gyur ro/ /de la re zhig dus su spyad pa la sogs pa'i cho ga 'di ni khams mnyam pa bde bar gnas pa las brtsams te/ thams cad nges par bshad pa yin no/ /de bas na khams snyoms pa chang la sred pas gang ci yang rung ba de btung bar mi bya'o/ /de bas kyang mkhris pa'i rang bzhin can dag gis ni shin tu btung bar mi bya'o zhes pa 'di ni dgag pa'i yul yin no/ /cho ga'i dbye ba ni rlung dang / bad kan gyi rang bzhin can dang / de bzhin du mkhris pa dang bad kan gyi rang bzhin can gyis btung bar mi bya zhing / de bzhin du rlung dang mkhris pa'i rang bzhin can gyis kyang btung bar mi bya ste/ chang ni phal cher rlung dang mkhris pa skyed par byed pa yin no/ /de yang phal cher chang gi nyes pa ni mkhris pa dang rlung gi mthar thug pa'i nad skyed par byed pa len pas gsum po de dag gis so ga'i dus su chang de zad par bya ba'i phyir/ dus gzhan gyi tshe na 'thung ba ltar mang po btung bar mi bya'o/ /de dang cha mthun pa nyung zad cig btung bar bya la/ de bzhin du bad kan dang / mkhris pa'i rang bzhin can chang la sred pa dag gis ni bad kan zad par bya ba'i phyir dang / mkhris pa dang yang mi mthun pa med par bya bar 'dod na chang de chu mang pos bsres te btung bar bya'o/ /yang na gnas skabs kyi dbye ba las/ yul gyi dbye ba ste/ gang gis chang de 'thungs pas des so ga'i dus su gnas skabs la lar ni/ nyung zad cig btung bar bya la/ gnas skabs la lar ni chu mang pos bslad de btung bar bya'o/ /'bras chan kun da zla ltar dkar/ /skam sa'i srog chags sha dag bza'/ /zhes bya ba ni 'bras sA lu la sogs pa'i 'bras chan kun da dang / zla ba ltar dkar ba de srog chags skam sa na gnas pa'i sha dang bcas par bza' zhing longs spyad par bya'o/ /khu ba mi ska zho dang ni/ /bu ram sbyar sogs g.yos byas btung / /phal cher skyur ba btung bar bya/ /zhes bya ba la/ khu ba ni sha khu ste de btung bar bya'o/ /mi ska ba ni gar po ma yin pa slan te'o/ /de bzhin du zho dang bu ram sbyar te/ spod kyis btab pa btung ba dang / de bzhin du rgun 'brum dang / se'u la sogs pa las g.yos su sbyar ba phal cher skyur ba btung bar bya'o/ /snying po lnga yi btung ba ni/ /kham phor sar pa la gnas pa/ /chu shing rgya star dum bur bsres/ /skyur bcas kham phor snod kyis btung / /zhes bya ba ni chu dang / sbrang rtsi dang / nA ga ge sar la sogs pa dang sbyar ba'i btung ba btung bar bya'o/ /snying po lnga ni rlung dang mkhris pa gso ba'i gnas skabs nas bstan pa'i skyo ma'i btung ba rdza bum gsar pa'i nang du bcug cing bzhag pa ste/ 'brang rtsi 'bra go rgun 'brum dang / /pa ru sha ka kha ra'i chu/ /snying po lnga yi skyo ma ni/ /'bras yos phye dang mar bcas btung / /zhes khrag mkhris gso ba'i gnas skabs las kyang bshad pa yin te de btung bar bya'o/ /chu shing rgya star dum bur bsres/ /zhes bya ba ni/ chu shing gi 'bras bu dang / rgya star gyi 'bras bu'i dum bu dang bsre ba dang / skyur bcas zhes bya ba ni/ se'u dang skyu ru ra la sogs pas ro skyur bar byas pa'o/ /kham phor snod kyis zhes bya ba ni/ sa las byas pa'i kham phor srab mo chung ngus btung ba'o/ /chu ni pa ta las bsgos shing / / ga pur bcas shing shin tu bsil/ /zhes bya ba la/ de bzhin du chu btung bar bya ste/ de yang pa ta las bsgos pa zhes pa/ pa ta la'i me tog gis dri zhim par byas pa dang / ga pur la sogs pa dang bsres shing shin tu bsil bar btung ngo / /zla zer lta bu'i bza' ba ni/ /mtshan mo'i dus su bza' ba dang / /zla ba skar ma ltar dkar ba'i/ /ma he'i 'o ma bsil po btung / /zhes bya ba la/ zla zer lta bu'i bza' ba zhes bya ba ni 'bras kyi khur ba ga phur dang bcas shing khong stong du byas pa/ kha ra dkar po la sogs pa bcug pa mtshan mo'i dus su bza' bar bya zhing ma he'i 'o ma kha ra dkar po dang bcas pa/ zla ba dang skar ma'i 'od kyis bsil bar gyur pa btung bar bya'o/ /sA la ta la chen po ni/ /sprin reg tsha ba'i 'od zer sgrib/ /rgun 'bru'i snye ma g.yur za zhing / /'khri shing ldan dang nags tshal bzang / /dri bzang khang pa chu yis ni/ /bsil khang lus dang 'tsham byas par/ /chag chag btab dang a mra yi/ /ldum bu 'bras bu 'phyang ba dang / /chu shing 'dab dang kal lha ra/ /pad rtsa pad+ma ut+pa la/ /me tog rgyas pa dang ldan par/ /'jam pa'i gnas mal bcas nas ni/ /phyed dus nyi mas gdungs pa na/ /nyal ba'am/ zhes bya ba la/ skyed mos tshal dag tu skyes bu'i rang gi lus kyi tshad dang mnyam pa'i mal du/ nyi ma phyed kyi dus su nyal bar bya'o zhes bya bar sbyar ro/ /skyed mos tshal ni ci lta bur zhe na/ sA la ta la chen po ni/ /zhes pa shing sA la dang / ta la sprin reg ces pa bar snang dag la shin tu 'phags shing / rtse mos snyob pa lta bur gnas pa gang yin pa des tsha ba'i 'od zer zhes pa so ga'i nyi ma tsha ba'i 'od zer skyed mos tshal du 'bab pa gang yin pa de sgrib cing 'gebs par byed pa dang / de bzhin du rgun 'bru'i snye ma ste/ 'bras bu'i tshogs gcig tu 'byar ba ni snye ma zhes bya ste/ de g.yur za zhing 'phyang ba dang / ma du ka la sogs pa'i 'khri shing gi yal ga rnams la 'jus shing 'khris pa ste/ de lta bu'i skyed mos tshal du nyal bar bya'o/ /gzhan yang 'od ma la sogs pa las byas pa'i khang par dri bzang po ste/ ga bur la sogs pa'i dris bsgos shing / kha bas grang bar byas pa'i chus chag chag btab cing / brlan par byas pa dang / de bzhin du lus dang 'tsham par byas pa'i gnas de'i nye 'khor na/ gos kyi tshogs dpyangs pa dang / de bzhin du a mra'i ldum bu byu ru ltar dmar ba'i yal ga sar pa dang / de'i 'bras bu'i tshogs 'phyang ba des kun nas bskor zhing khyab pa dang / ci skyed mos tshal der lus kyi tshad dang 'tsham par byas pa'i spyil bur/ mal khri med par bab bab tu nyal bar bya ba'am/ 'on te ma yin zhe na/ de'i phyir mal stan bcas pa zhes bya ba smos pa yin no/ /gang gis bca' zhe na/ chu shing 'dab ma la sogs pas so/ /ji lta bu zhe na/ 'jam po'o/ /de la chu shing gi 'dab ma ni chu shing gi 'dab ma'o/ /kal lha ra ni gan d+ha so ma ga'o/ /pad+ma'i rtsa ba ni/ pad+ma'i rtsa ba gzhon nu'o/ /pad+ma'i me tog ni pad+ma'o/ /ut+pa la ni ut+pa la sngon po'o/ /gzhan yang ci lta bu zhe na/ me tog rgyas te me tog gi yal ga dgod pa lta bu dang ldan pa gang yin pa der ro/ /yang me tog rgyas pa ni/ lo 'dab kyi mtha' mar me tog cung zad rgyas pa dang ldan pa der/ nyi ma phyed kyi dus su nyi mas gdungs pa na nyal bar bya'o/ /chu yi khang pa ni/ /bud med bcos gzugs nu ma lag / kha las u shir chu 'bab bya/ /zhes bya ba ni/ yang na nyi ma phyed kyi tsha bas gdungs pa'i dus su chu'i khang par nyal bar bya'o/ /de yang bud med bcos ma zhes bya ba ste/ shing las bud med kyi gzugs byas la/ khong du chu drangs te de'i nu ma dang / lag sor dang / kha las pu shel tsi dang sbyar ba'i chu 'bab pa'i drung du 'dug cing des reg par bya'o/ /mtshan mo yang thog rdo thal byugs/ /zla ba'i 'od kyis bsil bar nyal/ /zhes bya ba ni/ mtshan mo'i dus su khang bzangs kyi steng gi yang thog rdo thal gyis byugs shing / zla ba'i 'od kyis bsil zhing khyab par nyal bar bya'o/ /mal stan bde bar sems bde zhing / /tsan+dan lde gu phreng ba thogs/ /rab tu phra ba'i gos bgos shing / /'dod pa'i rgyun las ldog par bya/ /zhes bya ba ni/ mal stan bde ba bting nas khang bzangs kyi steng du 'dug pa ni/ mtshan mo bsngags pa yin la/ de bzhin du sems bde ba ste/ sdug bsngal gyi gdung ba med pa dang / de bzhin du tsan+dan lde gu ste/ tsan+dan gyi lde gus lus byugs pa dang / phreng ba thogs pa ste/ me tog gi phreng ba rnams kyis brgyan pa dang / de bzhin du/ rab tu phra ba'i gos bgos shing / /zhes bya ba ste/ shin tu phra zhing srab pa'i gos bgos pa dang / de bzhin du/ 'dod pa'i rgyun las ldog par bya/ /zhes bya ba ste/ bud med nyal po byed pa spang zhing 'khrig pa mi bya ste/ de lta bu dag ni de'i tshe phan pa yin no/ /ta la'i bsil yab spos chus gdang / /pad+ma 'dab brgyad rlung yab dang / /dal gyis legs par g.yob pa dang / /rdzi char ser bu dang ldan pa/ /ga pur mA li ka'i phreng ba/ /mu tig do shal tsan+dan dkar/ /ne+e tso sha ri ka la sogs/ /sgra snyan yid 'ong sgrogs pa dang / /chung ma gdu bu pad rtsa 'dra/ /pad+ma rgyas pa lta bur mdzes/ /pad+ma can ni 'gro 'dra ba/ / snyom bsel bar byed pa yin/ /zhes bya ba la/ dus 'di'i tshe na/ ta la'i rlung yab la sogs pa snyom zhing tsha bas zhum pa sel bar byed pa yin no/ /de la ta la'i bsil yab spos chus btab pa ni/ shing ta la'i lo ma spos chus sbangs shing brlan par byas pa'am/ yang na ta la'i bsil yab ces bya ba ni/ rma bya'i 'jug ma la sogs pa las byas pa'i rdul yab tsha ba sel ba'i bya ba byed nus pa la bya'o/ /pad+ma'i 'dab ma rgyas pa ni/ pad+ma'i 'dab ma dag nyid rgyas pa bsil yab tu byas pa dang / rlung yab ces bya ba'i rma bya'i sgro las byas pa rlung yab nus pa'i rnam par byas pa dag gis te/ de dag dang dal gyis legs par g.yob cing / sgeg pa dang bcas pas gyen du bteg pa gang yin pa de ni dal gyis legs par g.yob pa'o/ /de bzhin du rdzi char ser bu dang ldan par byas te/ rdzi char dang ser bu bsil ba'i bya ba byed pa dang ldan par g.yob par bya'o/ /de bzhin du ga pur gyis bsgos pa'i mA li ka ni/ ga pur gyi mA li ka ste/ de'i phreng ba ni/ ga pur mA li ka'i phreng ba zhes bya ba'am/ yang na mA li ka khyad par can gyi phreng ba la de skad ces bya ste/ de gdags pa dang / de bzhin du mu tig do shal ni mu tig gi rgyan chun 'phyang zhes bya ba ste/ tsan+dan dkar po dang bcas par gnas pa la de skad ces bya'o/ /de bzhin du byis pa yid du 'ong bar smra ba dang / ne tso dang / sha ri ka la sogs pa sgra yid du 'ong bar sgrogs pa dang / de bzhin du chung ma gdu bu pad+ma'i rtsa ba ltar dkar ba thogs shing / pad+ma'i 'dab ma rgyas pa ltar bzhin ras shin tu mdzes pa de la 'di ltar blta ba ni/ pad+ma can ni 'gro ba 'dra/ /zhes bya ste/ pad+ma can gyi mtsho 'gro zhes pa lta bur blta zhing dga' ba bskyed par bya'o/ /dbyar gyi spyod pa smras pa ni/ /mthu 'phrog pa ni na ba'i lus/ /dman pa las kyang dman 'gyur te/ /dbyar ni gnod pas/ zhes bya ba ni/ dgun smad nas so ga'i bar dus gsum po ni/ mthu 'phrog pa'i dus yin te/ mthu 'phrog pa'i dus des na zhing nus pa 'bri ba'i lus gang yin pa de ni/ mthu 'phrog pa na ba'i lus su shes par bya'o/ /de'i mi dman pa las sngar dman zhing zhen par gyur pa las kyang yang dbyar gyi nyes pa rlung la sogs pas 'khrugs shing zhum pas dman pa nyid du 'gyur ro/ /gnod 'gyur te/ /mkha' la sprin 'dus chu yis brlan/ /chu thigs bcas pa'i rlung dang ni/ /grang ba drag por ldang ba dang / /sa yi rlangs pa skyur min dang / /chu ni rnyog pa can dag gis/ /me drod chung bas gnod par byed/ /ces bya ba ni/ nyes pa de dag gis gnod par 'gyur zhing / sdug bsngal bskyed pa nyid du 'gyur ro/ /gang gi tshe zhe na/ mkha' la sprin 'dus chu yis brlan/ /zhes bya ba ste/ chus rgyas pa'i char sprin mkha' la 'dus par gyur pas/ gang chu thigs phra mo dang bcas pa'i rlung grang mo drag cing shugs che bar ldang ba dang / de bzhin du sa'i rlangs pa byung zhing khug rna byung ba dang / de bzhin du chu skyur ba'i rnam par smin zhing mthu skyed pa dang / de bzhin du chu rnyog par bcas shing dri ma yod pa dag gis/ me'i drod chung bar byed pas nyes pa de 'phel bar 'gyur ro/ /phan tshun gnod pa de la ni/ /dro zhing me yi stobs skyed pa/ /thun mong gang yin bsten par bya/ /zhes bya ba ni/ phan tshun gcig la gcig gnod par byed pa'i ngang tshul can gang yin pa de ni phan tshun gnod pa ste/ gcig la gcig gnod par byed pa ni rang gi ngo bo las nyams par byed pa yin no/ /tshul 'dis na phan tshun gnod pa dag la ni rlung la sogs pa'i thun mong gi nyes pa gsum char sel bar byed pa'i bza' ba dang btung ba dag sman la sogs pa bstan cing goms par bya'o/ /de yang dro zhing pho ba'i me drod skyed par byed pa/ tsha ba lnga la sogs pa bsten par bya'o/ /sbyang bas lus ni dag byas la/ /zas ni yang bag khu ba bza'/ /skam sa'i srog chags sha khu dang / /sbrang rtsi can ni rnying pa btung / /zhes bya ba ni slon sman la sogs pas lus dag par byas shing / nad la sogs pa bsal ba la brten par bya'o/ /de bzhin du zas yang ba ste/ gsar thog dang khu ba ste sha khu la sogs pa dang sbyar ba bza' bar bya'o/ /skam sa'i srog chags kyi sha dang khu ba ste/ sran mung+ga la sogs pa sbyar ba'i khu ba'o/ /sbrang rtsi ni sbrang rtsi las byas pa'i chang gi khyad par te/ de yang rnying pa ste skyon med btung bar bya'o/ /dar ba kha ru tshar sbyar ba'am/ /tsha ba lnga yi phye ma can/ /khron pa'i chu ni bskol ba'ang rung / /zhes bya ba la/ dar ba'am kha ru tsha sbyar ba ni/ lan tshwa kha ru tsha zhes pa dang ldan pa'o/ /de bzhin du tsha ba lnga'i phye ma can nam/ yang na khron pa'i chu'am/ char chu bskol ba bsten par bya'o/ /char che'i dus su kha zas ni/ /rab skyur lan tshwa snum dang bcas/ /skam zhing sbrang rtsir ldan pa yang / /zhes bya ba la/ shin tu char ches shing yul rmus pa'i dus su bza' ba'i kha zas ni/ rab skyur lan tshwa snum dang bcas/ /zhes bya ba yin te/ shin tu skyur ba dang / lan tshwa dang bcas pa'i kha zas gang yin pa de la de skad ces bya'o/ /skam pa ni phal cher skam po dang bcas pa'o/ /sbrang rtsir ldan pa ni sbrang dang bcas pa'o/ /yang ba ni rang bzhin gyis yang ba'am/ tshod zin par bza' ba ste/ de lta bu dag bsten par bya'o/ /de yang dus 'di'i tshe ni lus zungs rnams shin tu sla bar gnas pa de bas na sla bas na bsrung ba nyid kyi/ /sbrang rtsi'i nus pa der thim par 'gyur bas/ sbrang rtsis rlung skyed mi nus so zhes sman dpyad kyi lung 'chad pa rnams zer te/ de yang / rlung can rlung ni 'khrugs byed kyang / /dbyar ni sbrang rtsi bsngags pa yin/ /zhes smos pa yin no/ /rkang gis mi 'gro dri zhim byugs/ /rtag tu gos ni spos kyis bdug /khang bzangs steng du ba mo bsil/ /char gyi zer sbangs gnas par bya/ / zhes bya ba ni dbyar gyi dus de'i tshe rkang gis 'gro bar mi bya zhing / ban glang mo la sogs pa'i bzhon pa brtan zhing mtho bas 'gro bar bya'o/ /dri zhim byugs zhes bya ba ni/ ga pur dang gur kum la sogs pas lus la byugs pa dang / dus rtag tu gos la sbos kyis bdug pa dang / a ka ru la sogs pa'i bdug pas gos la bdug cing bgo bar bya'o/ /khang steng zhes bya ba ni khang thog ste/ der ba mo la sogs pas mnyen par gnas par bya'o/ /klung chu dang sbyar skyo ma dang / /nyin gnyid rtsol dang nyi tshan spang / /zhes bya ba la/ dbyar gyi dus der chu bo rnams kyi chu dang phyer sbyar ba la/ mar dang bcas pa mi btung ngo / /de bzhin du nyin par gnyid log pa dang / rtsol ba ste drag shul gyi ngal bag dang / nyi tshan te nyi ma'i 'od zer spang zhing dor bar bya'o/ /ston gyi dus kyi spyod pa spras pa ni/ /dbyar lus bsil bar gyur pa la/ / 'phral du nyi zer gyis gdungs pas/ /char 'bab tshe na bsags pa yi/ /mkhris pa ston ni ldang bar 'gyur/ /de bsal phyir ni sman mar kha/ /bkru sman btang dang gtar ga bya/ /zhes bya ba ni/ dbyar lus bsil bar gyur cing char gyis grang ba'i bdag nyid can du gyur pa la/ 'phral du zhes pa'i mod la/ ston gyi dus la bab pan nyi ma'i 'od zer tsha ba rnams kyis gdungs shing / dros par gyur pa'i skyes bu la ni char 'bab tshe na/ zhes pa dbyar gyi tshe na bsags shing rang gi gnas su 'phel bar 'gyur ba'i mkhris pa ston ldang bar 'gyur te/ rang gi nus pa lhag pas rang gi gnas nas gnas gzhan du song ste/ skye bo mi srun pa ltar gnod par byed par 'gyur ro/ /de bas na mkhris pa de bsal bar bya ba'i phyir/ sman mar kha bo ru rta dang sbyar ba bsten pa dang / bkru sman gtang zhing khrus bya ba dang / gtar ga bya ste khrag gdon pa la sogs pa bya'o/ /kha dang mngar dang bska ba dang / /bkres tshe zas ni yang ba bza'/ /'bras chan mung+ga skyu ru ra/ /sbrang rtsi skam sa'i pa to la/ /zhes bya ba la/ nam bkres par gyur pa na/ bza' ba'i rnam pa kha ba dang / mngar ba dang / bska ba dang / yang ba bsten zhing bza' bar bya'o/ /de bzhin du 'bras sA lu'i chan dang / mung+ga ste/ mon sran sde'u dang / sha ka ra dang / skyu ru ra dang / sbrang rtsi dang / skam sa nas skyes pa'i srog chags kyi sha dang / pa to la'i tshod ma bza' bar bya'o/ /nyi ma'i zer gyis gdungs pa dang / /zla ba'i 'od kyis bsil byas la/ /r-i Shi shar bas dug med pa/ /nyin mtshan gnyi gar sbyang chu btung / /dngas pa'i dri med chu zhes pa/ /dri med dri ma sel 'gyur ba/ /mi 'brug rtsub pa ma yin pa/ /btung ba la sogs bdud rtsir mtshungs/ /zhes bya ba la/ yang ston ka'i dus de'i tshe/ nyin mo nyi ma'i 'od zer gyis gdungs shing rnam pa thams cad du tsha bar gyur pa dang / mtshan mo zla ba'i 'od zer gyis bsil zhing grang par byas pa ste/ de ltar dus kyis bcos shing smin par byas pa dang / r-i Shi shar bas dug med par shes pa/ skar ma r-i Shi zhes pa shar ba na dug med pa ste/ de shar bas bar snang las 'bab bcing byung nas chu bo dang / rdzing bu la sogs par gnas pa'i gnod pa rnams ston gyi tshe dug med pa nyid du byed pas na de skad ces bya'o/ /khron pa'i chu ni ma yin te/ de ni thams cad du dug med pa yin no/ /dngas pa'i dri med chu zhes pa ni/ nyi ma dang zla ba dag la bya ste/ de gnyis kyis bsten cing dri ma med la rdul dang bral ba ni/ dri ma zhes pa rlung la sogs pa sel zhing 'joms par 'gyur ba yin no/ /mi 'brug ces bya ba ni chu mig ltar de snum zhing lci ba ma yin pas/ bad kan skyed par mi byed la/ 'brug pa ma yin pa nyid kyis na rtsub pa yin no/ /btung ba la sogs pa zhes bya ba ni/ tsan+dan u shir ga pur dang / /mu tig chun 'phyang phreng gos mdzes/ /khang bzangs rdo thal gyis dkar zhing / /zla zer can du mtshan gnas bya/ /zil pa thal sman ha cang 'grangs/ /zho dang til mar zhag nyid mtshan/ /mi bzad chang dang nyin par nyal/ /mdun gyi ser bu yongs su spang / /dgun dang dbyar ni dang po'i gsum/ /dpyid ni tha ma'i ro gsum bsten/ /so ga mngar ram ston ka ni/ /mngar dang kha dang bska ba bsten/ /mdor na zas dang skom dag ni/ /ston dang dpyid ni rtsub pa ste/ /so ga dbyar mthar bsil bar bya/ /gzhan dag tu ni de las bzlog /rtag tu ro kun bsten pa las/ /rang rang dus su lhag par bsten/ /dus gnyis thog mtha'i zhag bdun ni/ /dus mtshams yin par shes par bya/ /des ni snga ma'i cho ga spang / / 'og ma rim bzhin bsten par bya/ /ma spangs na ni nad 'gyur te/ /'phral du nad ni 'ong bar 'gyur/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ /slob dpon zla ba la dga' bas rnam par sbyar ba las/ le'u gsum pa'i rnam par 'grel pa'o/ / //de nas nad mi 'byung bar bya ba'i dpyad kyi le'u bshad par bya'o/ /zhes bya ba ni/ dus su spyad par bya ba'i le'u bshad pa'i 'og tu/ nad mi 'byung bar bya ba'i le'u brtsams pa yin te/ de yang gang gi phyir ji skad du bshad pa'i dus su spyad par bya ba'i cho ga ji lta ba bzhin du/ rang rang gi dus su spyad cing nyams su blang ba la spyod par byed du zin kyang / bshang ba dang gci ba la sogs pa'i shugs bkag pas/ de dang rjes su mthun pa'i nad 'byung bar 'gyur ba yin la/ de yang dus su spyad pa'i cho ga las gzhan du log par spyad pa dang 'dra ba yin te/ de bas na 'di'i rtsom pa byas pa yin no/ /de la nad ni lus dang sems la gnas ba'i bye brag gis gnyis su bshad par bya ba yin la/ de rnams mi 'byung bar bya ba le'u gang na yod pa de bshad par bya'o zhes pa ste/ /'di ni tha mal par nad med par gnas pa'i dbang du byas pa yin te/ tha mal par gnas par gyur pa des nyin re spyad pa'i le'u las bshad pa'i bya ba'i cho ga nyams su blang bar bya ba dang / de bzhin du dus su spyad pa'i le'u las bshad pa rnams spyad do/ /de bzhin du nad 'byung bar 'gyur ba spang ba la ni/ rlung la sogs pa shugs bkag pa dang / nan kyis btsir ba la sogs pa yang mi bya ba las spyad par bya ba yin pas na/ de'i phyir smras pa ni/ phyi'i dbugs bshang gci sbrid pa dang / /bkres skom gnyid dang lud pa dbugs/ /glal dang mchil ma skyug pa dang / /khu ba'i shugs ni dgag mi bya/ /zhes bya ba yin te/ rlung la sogs pa'i shugs dgag par mi bya'o/ /ngal dbugs zhes bya ba ni/ ngal zhing dub pa las byung ba'i dbugs ni ngal ba'i dbugs te mi dgag pa'o/ /shugs zhes bya ba ni khu ba'i bar de dag 'byung ba la/ rjes su phyogs par gnas pa nyid ni shugs zhes bya ste/ shugs de dag dang 'brel ba de nan gyis dgag par mi bya'o/ /de la rlung ni gtso bor gyur pa yin la/ des na de bkag pa las byung ba'i nad ni shin tu bzlog par dka' ba'i nyes pa yod pas 'jigs pa dang por bstan pa yin no/ /de'i phyir smras pa ni/ 'phyen ni bkag par gyur pa yis/ /skran dang rtug skam gzer snyom lci/ /'phyen dang bshang lci khong du 'gags/ /mig rtul drod chung snying nad 'gyur/ /zhes bya ba ni/ bshang sgo nas byung ba'i 'og gi rlung bkag pas/ skran la sogs pa'i nad 'byung bar 'gyur ro/ /rtug skam ni bshang ba la sogs pa rang gi gnas las gyen du 'phags shing gnod pa byed pa'o/ /gzer ba ni lto kun tu gzer ba'o/ /snyom zhing lci ba ni lus zhum zhing khong sbo ba'o/ /'phyen dang bshang gci khong du 'gags pa ni phyir mi 'byung ba'o/ /mig rtul zhing drod chung ba ni mig la gnod cing khong pa'i me drod 'bri ba'o/ /snying nad ni snying nad kyis 'debs pa'o/ /bshang 'gags byin pa'i nywa 'gyur zhing / /cham pas 'debs shing klad pa na/ /khar ni mi gtsang 'byung ba dang / /sngar bshad nad du'ang 'gyur ba yin/ /zhes bya ba ni/ bshang ba zhes pa slad sa chen po 'gags pas byin pa'i nywa 'gyur bar 'gyur te/ nywa zhes bya ba ni byin pa'i rgyab kyi cha'i sha zlum po gnas pa la bya la/ de gnyis 'gyur pa ni ldog pa ste/ lag pa la sogs pas mnyes pa lta bur 'gyur ba'o/ /cham pa ni sna nas snabs 'dzag pa'i rlung nad do/ /klad pa na ba ni mgo na ba'o/ /de bzhin du khar mi gtsang ba 'byung ba ni kha nas bshang ba 'byung ba'o/ /sngar bshad nad ni 'phyen 'gags pa las skran la sogs pa'i nad du 'gyur bar bshad pa ste/ de yang 'byung bar 'gyur ba'o/ /gcin 'gags pa yis yan lag na/ /rde'u chu so pho mtshan na/ /dku yi nang na sngar gyi nad/ /phal cher 'byung ngo / /zhes bya ba ni gcin 'gags pa las yan lag na ba la sogs pa 'byung bar 'gyur ro/ /de la yan lag na zhes pa ni/ yan lag rnams bcag pa snyam pa'am/ gcus shing btsir pa snyam du sems pa'o/ /rde'u ni gcin sri ba'i nad gzhi'i skabs nas bshad pa'o/ /chu so la sogs pa'i nad la chu so ni gcin gyi gnas so/ /mtshan ni pho mtshan no/ /dku'i nang ni brla phugs kyi mtshams so/ /'dis ni nad 'di dag 'ba' zhig 'byung bar ma zad kyi/ /sngar 'phyen la sogs pa bkag pa las byung ba'i nad skran la sogs pa yang gcin 'gags pa las 'byung bar 'gyur ro/ /phal cher zhes smos pas ni sngar gyi nad thams cad 'byung bar 'gyur ba ni ma yin gyi/ /la la ni 'byung / la la ni mi 'byung ngo zhes pa'i don te/ phal cher smos pa'i don ni cung zad mtshang ba nyid du ston pa yin no/ /de yang lung las/ phar cher sgra ni khyad par don/ /cung zad ma tshang nyid du ston/ /zhes 'byung ba yin no/ /'phyen la sogs pa'i shugs gsum po de rnams bkag pa'i sman spyi tsam du smras pa ni/ de yi sman/ reng bu bsku byug lus bcing dang / /dugs dang sman mar mas gtong ba'o/ /zhes bya ba yin te/ de'i zhes pa 'phyen dang bshang ba dang gci ba 'gags pa las rnam par gyur pa'i sman zhes pa/ gso ba'i thabs su gyur pa'i sman ni reng bu la sogs pa yin te/ de la reng bu ni po son cha dang / khang pa'i dud pa dang / lan tshwa la sogs pa las byas pa'i reng bu ste 'og nas bshad pa yin no/ /bsku byug ni til mar la sogs pas byug pa'o/ /lus bcing ba ni sman rnams bskol ba'i chu dang / til mar la sogs pas bkang ba'i zangs sam/ gzhong pa chen po zabs ring ba'i nang du lus bcing pa'o/ /dugs ni bsro ba la sogs pa rnam pa bzhi po 'og nas bshad pa'o/ /sman mar mas gtong ba ni/ sman dang bskol ba'i til mar la sogs pa bshang sgo nas bcug pa'o/ /'di dag ni gsum char la yang thun mong yin no/ /zas skom bshang ba 'gags pa dang / /bshang 'gags las byung glo gcong mtshungs/ /zhes bya ba ni/ gang bshang ba 'gags pa las byung ba'i glo gcong byin pa'i nywa 'gyur ba la sogs pa ni/ bshang gci 'gags pa la phan pa'i zas dang skom sbyar bar bya ste/ de ni nas thug dang / zan dron po dang / ma sha dang / mung+ga dang / rgya sne'u'i tshod ma mthug po'i sha dang bcas pa dang / chang bska ba dang / zho ga chu dang / 'bras kyi khu le rang skyur la sogs pa yin no/ /chu 'gags pa las mar sar ni/ /che tshad tsam ni rab tu sbyar/ /zhes bya ba yin te/ gcin 'gags pa las byung ba'i nad/ yan lag na ba la sogs pa rnams la ni mar sar che tshad tsam sbyin par bya ste/ che tshad kyi sgra ni gang nyin mtshan gcig gis 'ju bar 'gyur ba'i snum gyi tshad che ba la bya ste/ de yang zas ma zos pa'i gong du'am/ zas zhu ba'i rjes la sbyin par bya'o/ /de yang bsdus pa las/ mar ni dang por bza' bar bsngags/ /'ju mthar tshad ni chen po'ang rung / /zhes bshad pa yin pas/ sbyor ba de gnyis slar bya ba yin no/ /de ltar zas kyi sngar ram/ zhu ba'i rjes la bya ba gnyi ga la che tshad tsam gyi sgrar bshad do/ /sgregs pa bkag na yi ga 'chus/ /lus 'dar snying dang brang 'gags na/ /sbo zhing lud la skyigs bus 'debs/ /de'i sman skyigs bu dag dang 'dra/ /zhes bya ba yin te/ sgregs pa bkag pas yi ga 'chus pa la sogs pa 'byung bar 'gyur ro/ /de la yi ga 'chus pa ni zas la mngon par mi dga' ba'o/ /lus 'dar ba ni mgo dang lag pa la sogs pa 'dar ba'o/ /snying brang 'gags shing na ba ni/ snying dang brang gi dong ga dag sbubs kyis 'gags shing rengs ba snyam sems pa'o/ /sbo ba ni lto ba rlung gis khengs pa'o/ /lud pa dang skyigs bu ni rang gi mtshan nyid kyi skabs su 'og nas ston to/ /de'i zhes pa yi ga 'chus pa la sogs pa de rnams kyi sman te/ gso ba'i cho ga ni skyigs bu dag dang 'dra zhes bya ba yin te/ 'og nas skyigs bu gso ba'i le'u las bshad pa dang 'dra'o/ /sbrid bkag mgo na dbang mi rno/ /gnye'u rengs kha yo 'gram chag 'gyur/ /dud rnon gyis bdug mig sman dang / /sna sman nyi ma lta ba yis/ /sbrid pa 'gags pa bsal bya zhing / /snum dang dugs kyang bsten par bya/ /zhes bya ba ni/ /sbrid pa bkag cing brnags pas/ mgo nad la sogs pa 'byung bar 'gyur ro/ / mgo na ba ni klad pa na ba yin no/ /dbang po mi rno ba ni mig la sogs pa nyam chung zhing rang gi yul 'dzin par mi nus pa'o/ /gnye'u ni gnad gnyis 'dus pa la bya la/ de dag rengs pa ni 'gyur mi shes par byas pa'o/ /kha yo ba ni rlung gis kha yon por byas pa'o/ /'dir sbrid pa 'gags pa la dud pa la sogs pas sbrid pa dbyung bar bya'o/ /de la dud rnon ni 'og nas bshad pa'o/ /mig sman rnon po ni pi pi ling la sogs pa sman rnon po'i mig sman dang / sman rnon po'i phye ma sna nas rngub pa'i sna sman dang / nyi ma lta ba ni sbrid pa dbyung ba'i phyir nyi ma la blta ba ste/ 'di dag bya ba dang / de la snum dang / dugs dag kyang bsten cing goms par bya'o/ /skom 'gags pas na kha skams shing / /yan lag mi bde rna mi gsang / /mgo 'khor myos shing snying nad 'byung / /der bsil cho ga thams cad phan/ /zhes bya ba ni/ skom las 'gags shing brnags pas kha skam pa la sogs pa'i nad 'byung bar 'gyur ro/ /de la kha skam pa ni shas cher kha skam par gyur pa'o/ /yan lag mi bde ba ni rkang lag nus zhan cing snyom pa'o/ /rna ba mi gsang ba ni rna ba gnyis kyis sgra mi thos pa'o/ /mgo 'khor ba ni 'khor lo la bskyon pa tsam du sems pa'o/ /myos pa ni mi dran pa'o/ /snying nad ni snying ga na ba'o/ /der zhes bya ba ni nad de rnams la'o/ /bsil ba'i cho ga thams cad phan/ /zhes bya ba ni/ bza' ba dang / btung ba la sogs pa'i cho ga bya ba thams cad bsil bar byas pa phan zhing gnod pa sel ba yin no/ /bkres pas lus zhig yi ga 'chus/ /lus snyom nyam chung gzer mgo 'khor/ /de la zas yang snum dro dang / /chung ba dag ni sbyar bar bya/ /zhes bya ba ni/ shas cher bkres pa brnags pa las/ lus zhig pa la sogs pa'i nad 'byung bar 'gyur ro/ /lus zhig pa ni lus bcom pa snyam sems pa'o/ /yi ga 'chus pa ni yi gar mi 'ong ba'o/ /lus snyom pa ni gzengs dma' ba'o/ /nyam chung ba ni sbeg pa'o/ /gzer ba ni zug cing na ba'o/ /de la zhes bya ba ni nad de rnams la'o/ /zas yang ba ni 'bras sA lu rtsa snar la sogs pa yang ba las byas pa sbyin zhing sbyang ba dang / de bzhin du snum pa ste/ mar dang sha la sogs pa dang ldan pa dang / dro ba ste tsha zhing legs par tshos pa dang / chung ba ste ran cing chung ba'i tshad tsam sbyin no/ /gnyid bkag khong myos spyi bo mig /lci zhing snyom la glal gnyid 'ong / /lus zhig snyam sems de la ni/ /gnyid log lus mnye phan pa yin/ /zhes bya ba ni/ gnyid bkag cing brnags pas khong myos pa la sogs pa 'byung bar 'gyur ro/ /khong myos pa ni mi dran pa snyam byed pa'o/ /spyi bo dang mig lci ba ni lcid che ba snyam sems pa'o/ / snyom pa ni nyam chung zhing rmya ba'o/ /glal 'ong ba ni yan lag rkyong ba dang bcas pa'i kha gdangs pa'o/ /lus zhig snyam sems pa ni lus brdungs pa snyam sems pa'o/ /de la zhes pa ni nad de rnams la'o/ /gnyid log ces pa ni bde bar gnyid kyis ngoms par byas pa dang / de bzhin du lus mnye ba ste/ bde bar byas nas lus legs par mnyes pa ste/ de dag phan zhing 'dod par bya ba yin no/ /lud pa 'gags pas de 'phel zhing / /dbugs mi bde zhing yi ga 'chus/ /snying nad skem byed skyigs bus 'debs/ /der ni lud bsal cho ga bya/ /zhes bya ba ni/ lud pa 'gags shing 'gags pas lud pa de nyid 'phel bar 'gyur ba dang / dbugs mi bde ba dang / yi ga 'chus pa dang / snying nad 'byung bar 'gyur ba dang / de bzhin du skem byed ces bya ba gcong chen po dang / skyigs bus 'debs par 'gyur ro/ /der nad 'di dag la lud pa bsal te/ lud pa gso ba'i skabs nas bshad pa'i cho ga shin tu 'bad de bya'o/ /ngal dub dbugs ni bkag pa las/ /skran dang snying nad myos par 'gyur/ /de la ngal gso bya ba dang / /rlung sel bya ba'i cho ga phan/ /zhes bya ba la/ ngal zhing dub pa'i dbugs ni rtsol ba la sogs pa bsten pa la/ gang 'phral du byung ba'i dbugs de 'gags pa las/ skran dang glo snying gi nad dang / myos shing mi dran pa 'byung bar 'gyur la/ nad de rnams la bde bar ngal gso zhing rtsol ba la sogs pa spangs la/ lus ma bskyod pa dang / de bzhin du rlung sel bar bya ba'i cho ga rlung gi nad 'joms par 'gyur ba'i gso ba'i rim pa phan pa yin no/ /glal bkag na ni sbrid 'gags mtshungs/ /cho ga thams cad rlung 'joms bya/ /zhes bya ba la/ glal 'ong bkag cing brnags pas/ sbrid pa 'gags pa dang 'dra ba'i nad thams cad de/ klad pa na ba dang / dbang po mi gsal ba la sogs pa 'byung bar 'gyur ro/ /nad de rnams la ni cho ga thams cad rlung 'joms shing sel ba'i cho ga rnams bya'o/ /mchil ma 'gags pas mgo snying na/ /gnya' rengs yi ga 'chus mgo 'khor/ / skran bcas sna chu 'dzag 'gyur der/ /gnyid log chang btung gtam snyan phan/ /zhes bya ba ni/ mchil ma 'gags pa las mgo na ba la sogs pa dang / skran dang bcas shing sna chu 'dzag par 'gyur ro/ /mgo na ba la sogs pa ni bshad zin to/ /der zhes bya ba ni nad de rnams la gnyid log pa dang / rgun chang la sogs pa btung ba dang / gtam snyan pa ste/ chos la sogs pa dang 'brel cing yid dga' bar 'gyur ba'i gtam rnams mnyan pa phan pa yin no/ /skyug bro brnags pas me dbal mdze/ /'bras dang mig nad g.yan pa rims/ / skya rbab lud pa dbugs mi bde/ /dang ga ro stod mi bde skrangs/ /der kha bkang dbo dud smyung gnas/ /rtsub zos de nyid skyugs pa dang / /rtsol dang myur bar gtar ga gdab/ /bkru sman gtong ba'ang bsngags pa yin/ /zhes bya ba ni/ skyugs shing slon bro ba 'gags shing brnags pas me dbal la sogs pa lud pa dang bcas pa 'byung bar 'gyur ro/ /de la me dbal ni nad gzhi'i skabs nas bshad par bya'o/ /mdze ni pags pa'i 'gyur ba'o/ /'bras ni sha'i steng du 'khor lo dmar por gyur pa'o/ /mig nad la sogs pa ni rang rang gi le'u las bshad par bya'o/ /ro stod mi bde ba ni kha ma gtogs pa gzhan dag tu sngon po thal thil 'byung ba'o/ /dang ga mi bde ba ni snying gar 'tshang ba snyam byed pa'o/ /nad de rnams la ni kha bkang ba ste/ sman bskol ba'i khu bas kha bkang zhing dbo ba dang / dud pa rnon po dang / smyung bar gnas shing zan bcad pa dang / de bzhin du zan rtsub mo zos la de nyid skyugs pa byas pas phan pa yin no/ /de bzhin du rtsol ba ste/ lus dub par byed pa'i las rnams dang / nyung ba nyid du gtar ga gdab cing khrag dbyung ba dang / de bzhin du bkru sman bya ba ste/ a ru ra dang / sbrang rtsi la sogs pa dang / khrus bya ba bsngags shing phan pa yin no/ /khu ba bkag pas de 'dzag dang / /pho mtshan na dang 'or nad rims/ /snying nad chu 'gags lus zhig dang / /rde'u 'phel dang ma ning 'gyur/ /de la khyim bya'i sha dang chang / /'bras chan mas gtong lus bcing dang / / chu so'i nad bsal til mar btsos/ /'o ma bud med gzhon bsten phan/ /zhes bya ba ni khu ba 'byung ba bkag pa las khu ba de nyid 'dzag cing 'byung bar 'gyur ba dang / pho mtshan na bar 'gyur ba dang / 'or nad dang / rims nad dang / snying nad 'byung ba dang / chu 'gags pa ste/ gcin 'gags par 'gyur ba dang / lus na zhing zhig pa snyam sems pa dang / rde'u 'phel ba ste gcin 'gags pa'i rde'u 'phel ba dang / ma ning ste bud med rnams la nyal mi nus shing dga' ba med par 'gyur ro/ /de lta bu'i nad de la ni khyim bya'i sha la sogs pa bsten par bya'o/ / khyim bya ni grags par zad do/ /chang ni dngas ma'am ska ba'o/ /'bras chan ni 'bras dmar po la sogs pa'i chan no/ /mas gtong ba ni bkru sman drag po mas gtong ba'am/ 'jam rtsi dang / mas gtong ba gong ma'i dbye bas rnam pa gsum mo/ /lus bcing ba ni sman khus snod gang bar zhugs shing dugs bya ba'o/ /chu so'i nad bsal ba la ni ku sman da dang / gze ma dang / dong gra la sogs pa til mar dang bskol ba dang / 'o ma dang / bud med gzhon zhing sdug pa bsten zhing longs spyad pa phan pa yin no/ /shugs ni bkag dang btsir ba yis/ / nad ni kun kyang 'byung bar 'gyur/ /shin tu mang po de yi phyir/ /gso dpyad mang po 'dir bshad do/ /zhes bya ba ni/ shugs bkag pa dang btsir ba yis ni nad kun kyang zhes pa nad ma lus pa dag kyang 'byung zhing skye bar 'gyur te/ shugs bkag pa dag tu nad gang zhig smras pa de 'ba' zhig 'byung ba tsam du zad pa ma yin gyi/ rims la sogs pa gang yin pa ci yod pa thams cad skye bar 'gyur ro zhes bya ba ni kyang zhes bya ba'i sgra'i don yin no/ /gang yang nad shin tu mang po yod pa de'i phyir/ gso zhing bcos pa'i cho ga'i dpyad 'dir bstan cing bshad pa yin no/ /de las phal cher rlung du ma/ /gang phyir 'khrugs par gyur pas na/ /de phyir de'i zas skom dang sman/ /mnyam par 'gyur ba sbyar bar bya/ /zhes bya ba la/ de las zhes pa ni shugs 'gags pa dang btsir ba las/ /phal cher zhes pa mang du/ rlung dag du mar zhes pa rnam pa du ma'i tshul gyis rab tu 'khrugs par 'gyur zhing / rnam par ldang bar 'gyur ba gang yin pa de'i phyir/ rlung des zas dang skom dang sman mnyam par 'gyur ba zhes pa/ rlung snyoms par 'gyur zhing lam log pa na gnas par rang gi mal la gnas par byed cing / gnod pa sel bar 'gyur ba de sbyar bar bya zhing spyad par bya'o/ /'di dang gzhan du phan 'dod pas/ /'dod chen phrag dog zhe sdang dang / /ser sna 'dod chags la sogs shugs/ /rtag bkag dbang po thul bar bya/ /zhes bya ba la/ yang skyes bu dbang po thul zhing 'di dang gzhan la phan par 'dod pas/ yang 'dod chen la sogs pa la zhugs pa'i shugs 'di dag rtag par dus thams cad du dgag par bya'o/ /de la 'dod chen ni gzhan gyi rdzas rnams la re zhing 'dod pa'o/ /phrag dog ni gzhan gyi rdzas phun sum tshogs pa la mi bzod pa'o/ / zhe sdang ni srog chags rnams la rab tu sdang ba'o/ /ser sna can ser sna nyid do/ /'dod chags ni bud med la sogs pa la zhen pa'o/ /sogs pa'i sgras ni 'jigs pa dang khro ba dang / g.yo sgyu dang / dregs pa la sogs pa bsdu ste de dag gi shugs rnam par bkag cing dbang po thul ba'i rang bzhin can nyid du bya'o/ /dri ma rnams ni sbyang ba'i phyir/ /ci bzhin dus su nan tan bya/ /de ni shin tu sogs gyur na/ /shas cher 'khrugs pas srog rgyun gcod/ /ces bya ba ni rlung dang mkhris pa dang bad kan dang / bshang gci la sogs pa'i dri ma rnams sbyang bar bya zhing / rnam par bsal bar bya ba'i 'bad pas nan tan du bya'o/ /gang gi tshe zhe na/ ji bzhin dus su zhes bya ba ste/ dus las ma yol bar ro/ /de ci'i phyir zhe na/ dri ma de rnams ni shin tu sogs shing rang gi gnas su 'phel bar gyur na/ lan 'ga' zhig na zas dang spyod lam gyi tshul gyis 'khrugs par 'gyur ba'i rgyu la brten nas gang gi tshe shas cher 'khrugs shing dkyel du gyur pa de'i tshe/ dri ma 'khrugs par gyur pas srog gi rgyun gcod par 'gyur zhing tshe 'phrog par byed par 'gyur ro/ /de bas na de rnams sbyang ba nyid du bya'o/ /'di ltar shin tu bsags pa'i zil gyis mnan pa'i thabs kyi gtso bo ni sbyang ba'i phyir te/ gang gi phyir des shin tu myur bar 'gyur la/ phal cher sogs pa dag la ni smyung ba dang / gzhu bar byas pa yun ring por byas bas bsal te/ smyung ba dang gzhu bar byas pa dag /de bsal ba'i cho ga'i gtso bo dag yin no/ /de ltar na la lar ni sbyang ba gtso bo yin la/ la lar ni smyung ba dang gzhu bar bya ba dag go/ /la lar ni smyung ba nyid nad zil gyis gnon pa'i cho ga'i gtso bo yin la/ gang gi phyir de ltar yin pa des na/ gzhung 'di brtsams par rigs pa yin no/ /gnod pa smyung dang gzhu byas pas/ /bsal yang slar ni ldang srid kyi/ /gang zhig lags par sbyangs pa dag /de ni slar yang 'byung mi 'gyur/ /zhes bya ba ni/ rlung la sogs pa'i gnod pa rnams smyung ba bya ba dang / gzhu ba byas pas bsal zhing rgyal bar byas su zin kyang / nam zhig na slar sdang bar 'gyur ba srid kyi/ yang gnod pa gang zhig slon sman la sogs pas dag par 'gyur zhing / legs par sbyangs pa'i gnod pa dag pa'i gtsang bas dag pa de rnams ni slar yang 'byung zhing skye bar mi 'gyur te/ rtsa ba nas bcad pa yin pa'i phyir/ de rnams slar skye bar mi 'gyur ro/ /de bas na smyung bar byas pa dang / gzhu bar bya ba byas su zin kyang / sbyang ba bya dgos pa yin na/ ma byas pa la de'i tshe brtsam pa bya dgos par lta smos kyang ci dgos/ de ltar smyung ba dang smin cing gzhu bar byas pa dag la yang sbyang ba'i brtsam pa bya dgos pa yin no/ /sbyang ba'i gnas dag la yang yul dang dus dang / lus kyi stobs la sogs pa las dpags te/ smyung ba dang smin par bya ba rlung gis gnod par ma gyur pa'i tshul gyis brtsam pa bya dgos so/ /dus shes pa yis de phan chad/ /rim pa bzhin du ci rigs par/ /bcud kyis len rnams grub pa dang / ro tsa'i sbyor ba sbyar bar bya/ /zhes pa ni/ dus shes pa'i mkhas pas sbyar bar bya ba ste/ dus la sogs pa gang gis shes pa de ni dus shes pa yin gyi/ dus tsam ni ma yin no/ /de bas na yul dang / lus kyi stobs dang / zas dang / khu bcud dang / rang bzhin dang / snying stobs kyi tshul gang gis shes pa des/ de phan chad ces bya ba sbyang ba byas pa'i rjes thogs la/ rim pa bzhin du zhes bya ba/ go rims ma 'chol bar thug pa la sogs pa'i go rims kyis zhag bdun gyi bar du byas nas/ de'i 'og tu lus kyi stobs mthar phyin pa thob pa dang / tha mal pa'i kha zas zos nas/ de'i 'og tu ci rigs par zhes pa/ rigs pa mi 'gal bar bya ba ste/ bcud kyis len 'di ni rlung gi rang bzhin can no/ /'di ni bad kan gyi rang bzhin can no/ /'di ni bad kan gyi rang bzhin can no zhes bya ba dang / bcud kyis len de yang grub pa ste/ grub pa'i drang srong dag gis bshad pa yin gyi/ rang bzo'i ci dga' bas khu bcud dang yon tan dang / nus pa'i mthu las dpags nas blo dang ldan pa'i sman ba rang nyid kyis/ yongs su brtags pa ni ma yin no/ /yang na grub pa zhes bya ba mang po'i mngon sum du gyur pas yid ches pa ste/ tshangs pa dang / gnas 'jog dang / ri byi dang 'pho byed kyis sbyar zhing longs spyod pa dag go/ /ro tsa'i sbyor ba zhes bya ba ni bud med la phod par bya ba grub pa rnams te de dag sbyar bar bya'o/ /sman rnams kyis ni lus sbyangs phan/ /sA lu drug cu pa dang gro/ /mung+ga sha dang mar la sogs/ /phan pa'i zas kyis lus brta zhing / /yid 'ong drod skyed sman sbyar ba/ /yi ga 'bye zhing 'ju byed dang / /bsku zhing dril phyis khrus byas dang / /drag po 'jam rtsi mas gtong brta/ /zhes bya ba ni/ skyes bu sman gyis lus sbyangs shing skyug sman la sogs pas lus kyi nyams dmad pa la/ lus brta bar bya ba'i phyir/ sA lu rtsa snar la sogs pa'i zas rnams dang / bsku ba dang bcas pa la sogs pas rim gyis lus brta bar bya'i 'phral du ni ma yin no/ /phan pa zhes bya ba ni lus la phan par 'gyur ba'o/ /yid du 'ong ba yang ma yin la/ drod skyed pa'i sman yang yin pas na yid 'ong drod skyed sman te/ sge gsher dang / pi pi ling dang / na le sham dang / se'u 'bru dang / bi dza pu ra dang / dar ba rnying pa dang / lce myang tshal sogs pa ste/ de dang sbyar zhing 'dres pa'i kha zas gang yin pa de ni sbyor ba de las yig 'bye zhing 'ju bar byed la/ zas 'dod cing smin par byed nus pa ste brta ba dang / lus bsku ba la sogs pa ni grags par zad do/ /drag po ni bkru sman drag po mas gtong ba'o/ /'jam rtsi gtong ba ni snum gyi sbyor ba mas gtong ba ste/ de dag gis brta bar bya'o/ /des ni me kun stobs ldan zhing / /blo mdog dbang po dri ma med/ /de bzhin tshe ring ro tse dang / /dpal dang gzi mdangs thob par 'gyur/ /zhes bya ba ni de ltar rnam pa de dag byas shing bshad ma thag pa'i bya ba rdzogs pa des na/ skyes bu de dpal dang gzi mdangs thob par 'gyur ro/ /de bzhin du me kun zhes pa/ lus zungs rnams kyi me'i drod kyi me thams cad dang / 'byung ba'i me rnams dang / pho ba'i me drod stobs dang ldan zhing gsal la smin par byed pa'i nus pa dang ldan par 'gyur te/ de ltar na me bcu gsum smin pa'i nus pa skye bar 'gyur ro/ /de bzhin du blo mdog dbang po dri ma med/ /ces bya ba ste/ blo gros dang / kha dog dang / mig la sogs pa'i dbang po rnams dri ma med cing dang bar 'gyur ba dang / de bzhin du tshe ring ba ste/ lhag par 'tsho bar 'gyur ba dang / de bzhin du ro tsa ba zhes pa khu ba rnam par 'phel bas/ bud med la phod par 'gyur ba dang / dpal dang gzi mdangs thob par 'gyur ro/ /'byung po dug dang rlung dang me/ /mtshon rmas chag grugs sogs byung dang / /'dod chags zhe sdang 'jigs sogs gang / /de ni glo bur nad ces bya/ /zhes bya ba ni nad 'di dag ni glo bur ba zhes bya ste/ de yang gang 'byung pos mthong zhing zin pa dang / dug gis reg cing zin pa dang / gnod pa'i rlung dang / me dang mtshon gyis rmas pa dang / rdo la sogs pas yan lag chag grugs su gyur cing / nye bar bcom pa la sogs pa las byung bar gyur pa gang yin pa dang / de bzhin du 'dod chags dang / zhe sdang dang / 'jigs pa dang / khong khro ba dang / mi bzod pa dang / brkam chags la sogs pa yid kyi nad du gyur pa gang dag yin pa ste/ de dag kyang glo bur ba'i nad ces bya ba yin par shes par bya'o/ /shes rab nyes pa spong ba dang / /dbang po nyer zhi dran pa dang / /yul dus bdag nyid shes pa dang / /dam pa'i spyod pa'i rjes 'jug pa/ /lhan cig skyes dang glo bur nad/ /mdor na ma skyes mi 'byung dang / /skyes pa zhi bar bya ba'i phyir/ /cho ga 'di ni bsten pa yin/ /zhes bya ba la/ shes rab kyi nyes pa yin pas na/ shes rab nyes pa ste/ dam pa ma yin pa'i spyod pa byed cing / bkag pa rnams la spyod pa ste/ lha'i mig dang ldan pa'i slob dpon rnams kyis rnam par bkag pa'i yul dag sten par byed cing / bsgo zhing bstan pa'i don mi byed pa de lta bu'i shes rab kyi nyes pa yin te/ mdor na lus dang ngag dang yid kyi nyes pa spyod par byed ba'o/ /de spang ba ni mi byed par gtong zhing spang pa'o/ /dbang po nye bar zhi ba ni mig la sogs pa'i dbang po rnams mi dge ba'i rang bzhin can gyi yul la 'jug pa las ldog cing nye bar zhi ba'am/ yang na sgra la sogs pa'i yul la shin tu zhen pa las yang dag par sdom pa'o/ /dran pa ni sngar rjes su myong ba'i don yid la sems pa ste/ de yang dge ba dang mi dge ba'i tshul dran par byas nas/ len pa dang spong bar byed pa ste/ nyin dang mtshan du zhes bya ba la sogs pa rtag tu spyod pa'i cho ga las bshad pa'o/ /de bzhin du yul dus bdag nyid rnam par shes pa zhes bya ba 'di/ ci yul 'di skabs dgon dung can yin nam/ rlan can yin nam/ 'on te cha mnyam pa yin/ ci rlung gi rang bzhin can nam/ 'on te mkhris pa'i rang bzhin can nam/ yang na bad kan gyi rang bzhin can yin zhes shes par bya ba dang / de bzhin du dus zhes pa ste/ ci 'di ni dgun stod yin nam/ 'on te dgun smad la sogs pa gzhan dag yin zhes pa dang / 'di ni skad cig la sogs pa'i dus yin no/ /zhes pa dang / 'dir phongs par 'gyur ba dag kyang gzung bar bya'o/ /bdag ces pa ni rnam pa gnyis te/ nga'i rang bzhin ni 'di yin te/ 'di la ni ngas brten par bya'o/ /'di la ni brten par mi bya'o zhes bya ba la sogs pa bdag nyid shes pa ni gcig yin no/ /gnyis pa ni mya ngan las 'das pa'i rang bzhin can yin zhes pa ste/ de med par 'dod chags la sogs pa'i nad gzhan dag gis bsal bar bya bar mi nus pas de shes par bya'o/ /dam pa'i spyod pa'i rjes su 'jug pa zhes pa ni/ dam pa rnams kyi spyod par gyur pa gang yin pa de'i rjes su 'jug cing slob la nyams su len pa'o/ /lhan cig skyes pa la ni lus las byung zhing / lhan cig skyes pa'o/ /glo bur ba ni 'byung po la sogs pa dang 'brel pa las skyes pa'o/ /de lta bu'i nad kyi rnam par 'gyur ba des ma skyes pa rnams mi 'byung bar bya ba'i phyir dang / de bzhin du lhan cig skyes pa dang / glo bur ba'i nad skyes pa rnams zhi bar bya ba'i phyir/ cho ga 'di nyid mdor bsdus nas slob dpon gyis bstan cing bshad pa yin no/ /de bas na/ dri ma rnams ni sbyang ba'i phyir/ /ci bzhin dus su nan tan bya/ /zhes bstan pa yin no/ /'o na dus gang zhig yin zhe na/ de'i phyir 'di smas pa yin te/ grang ba las byung nyes tshogs dpyid kyi tshe/ /rnam bsal so ga las byung dbyar dus na/ /dbyar bsags sprin bral dus su legs sbyangs na/ /dus byung nad ni nam yang 'byung mi 'gyur/ /zhes bya ba la/ grang ba zhes bya ba'i sgra ni dgun stod dang / dgun smad gnyi ga gzung ngo / /nyes ba rnams kyi tshogs yin pas na nyes tshogs te/ de ltar grang ba las byung zhing skyes pa'i nyes pa'i tshogs gang yin pa de ni dpyid kyi tshe rnam par bsal zhing bsal bar bya'o/ /de bzhin du so ga'i tshe bsags pa las byung ba'i nyes pa'i tshogs ni dbyar gyi dus na rnam par sbyang bar bya'o/ /de bzhin du dbyar bsags pa'i nyes pa rnams ni sprin bral dus te/ ston gyi dus su myur zhing rings par gso dpyad kyi bstan bcos las byung ba'i cho ga bzhin du legs par sbyangs shing rnam par bsal na/ dus las byung ba'i nad skyes bu de la nam yang 'byung zhing skye bar mi 'gyur ro/ /dpyid kyi tshe rnam bsal zhes smos pa 'dir ni dpyid zla 'bring po mgo zug pa kho na'i dus su sbyang bar bya ba yin par khong du chud par bya ste/ de ltar ma byas na bzlog dka' ba'i nyes pa yod de/ dus gnyis po 'di la bsags pa'i nyes pa'i tshogs sbyang bar bya ba'i dus la bab pa dag ni dus gzhan dag la bsdad pa na bsal bar dka' ba yin pa'i phyir ro/ /so ga las byung dbyar dus na/ /zhes bya ba'i skabs 'dir yang dbyar gyi dus rtsom pa nyid na yin par bya zhing / ji srid grang ba dang / rlung dang / ba mo dang / char gyi rgyun dang / 'dres pa'i dus su ma phyin par bya ba yin no/ /dbyar bsags sprin bral dus zhes bya ba 'dis/ dus gang gi tshe sprin dang shin tu bral zhing / nam mkha' dang bar gyur pa ste/ ston zla gnyis kyi phyi ma'i cha/ ston zla tha chungs yin par shes par bya'i mgo rtsom pa la ni mi bzung ngo / /de skad du gzhung rtsom par byed pas kyang / dbyar dang ston zla chungs dpyid 'bring / /zla ba rim bzhin thun mong yin/ /so ga dbyar dgun la bsags pa'i/ /rlung la sogs pa myur du bsal/ /zhes bshad pa yin no/ /ji ltar na mi rnams rtag tu nad med par 'gyur ba de bstan pa'i phyir smras pa ni/ rtag tu phan pa'i zas dang spyod lam bsten/ /brtags te byed cing yul rnams la mi chags/ /gtong ldan sems snyoms bden brtson bzod dang ldan/ /nyams ldan sten par byed na nad med 'gyur/ /zhes bya ba ni yon tan 'di lta bu dang ldan pa'i skyes bu ni nad med cing tha mal par bde bar gnas par 'gyur ro/ /de yang gang zhig ce na/ gang rtag tu zhes pa dus thams cad du phan zhing 'phrod pa'i zas dang / spyod lam bsten zhing goms par byed pa ste/ phan pa'i zas ni 'og nas bshad pa dang / dus su spyad pa'i le'u las bshad par bya'o/ /spyod lam ni lus dang ngag dang yid kyi kun tu spyod pa ste/ de yang nyin re brtag par spyad pa'i le'u las bshad pa yin te/ de dag la brten pa dang / de bzhin du brtags te byed cing zhes bya ba ste/ gang dang gang byed pa de dang de spang ba dang blang bar bya ba legs par brtags shing byed de/ 'di byas na ni rdzogs par 'gyur la/ 'di byas na ni mi rdzogs shing mthar phyin par mi 'gyur ro zhes pa de ltar shes par byas nas/ dge ba byed cing mi dge ba spong bar byed pa dang / de bzhin du yul rnams la mi chags zhes pa ste/ gzugs dang / sgra dang / dri la sogs pa la sems chags pa med pa dang / gtong ldan zhes pa gtong zhing sbyin par byed pa'i ngang tshul can dang / sems snyoms zhes pa sems can thams cad nye dur gyur cing rjes su chags pa dang / khong khro ba med pa dang / bden brtson zhes pa bden pa gtso bor lhur byed cing / bden par dam 'cha' la/ slu ba med pa'i tshig phyin ci ma log par smra ba dang / bzod pa dang ldan zhes pa ste/ bzod cing des pa'i ngang tshul can dang / de bzhin du nyams ldan sten par byed pa ste/ mkhas pa'i ngang tshul can yin pas na mkhas pa ste/ 'jig rten gnyi ga la slu ba med cing chags pa dang / 'tshe ba med pa'i dngos po mthong ba la mkhas pa zhes bya'o/ /de yang drang srong tsa ra kas/ gang zhig dus gsum dri med par/ /shes shing rtag tu ma nyams pa/ /de mkhas phul byung blo rgyas yin/ /de'i tshig the tshom med cing bsten/ /skyon bral rmongs pa med pa ste/ / mi bden par ni ji ltar smra/ /zhes bya ba yin te/ mkhas shing lung dang ldan pa de la brten na nad med par 'gyur ro/ /yan lag brgyad pa'i snying po'i rnam par 'grel ba tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u bzhi pa'i rnam par 'grel pa'o/ / //de nas chu sna tshogs pa la sogs pa'i bye brag shes par bya ba'i le'u bshad par bya'o/ /zhes bya ba la/ sngar gong du rtag tu phan pa'i zas dang spyod lam bsten na/ nad med par 'gyur ro/ /zhes bstan la/ phan pa'i zas dang spyod lam de gnyis kyang ming tsam zhig bstan pa yin no/ /de la spyod lam ni rtsol ba la sogs pa'i rang gi ngo bo dang / las kyi bye brag bshad pas/ phal cher bshad zin pa dang / 'og nas kyang ston to/ /zas kyis kyang rang gi ngo bo dang / las dang yon tan dag 'dir cung zad kyang ma smos so/ / de bas na da ni de'i rang gi ngo bo dang las dang yon tan bshad par bya ba'i phyir dang / le'u 'di gnyis brtsams pa yin la/ de gnyis las kyang chu sna tshogs pa gsher ba'i rdzas kyi bye brag shes pa ni gtso bo yin pas dang por bstan pa yin no/ /chu sna tshogs pa ni chu rnams dang / 'o ma dang bu ram shing gi khu ba dang / til mar dang / chang la sogs pa'o/ /de rnams kyi bye brag shes par bya ba ni phan pa dang gnod pa nyid kyis ro dang nus pa dang / 'ju ba dang yon tan la sogs pa shes shing rtogs pa'o/ /de la phan zhing dgos pa ni le'u ste/ de bshad par bya'o zhes bya ba'i don to/ /de la dang por ni chu'i yon tan gyi nges pa ston pa yin te/ de ni thams cad la dgos pa yin pa'i phyir ro/ /de yang slob dpon gyis/ chu ni srog chags rnams kyi tshogs/ lus kyang de yi rang bzhin yin/ /de bas shin tu dgag pa yis/ / chu ni gang du'ang bzlog pa med/ /ces bshad pa yin no/ /mkha' las 'bab pa'i gang gA'i chu/ /'tsho byed ngoms byed yi gar 'ong / /tshim byed sems ni gsal byed la/ /sla zhing ro mi gsal la zhim/ /bsil zhing yang ba bdud rtsir mtshungs/ / nyi zla rlung gis reg gyur pa/ /de yi yul dus la ltos nas/ /phal cher phan dang gnod pa yin/ /zhes bya ba ni/ nam mkha' las 'bab pa'i gang gA'i chu ni/ yon tan 'di dag dang ldan pa ste/ 'tsho byed ces bya ba mdangs 'phel bar byed pa'o/ /ngoms byed ni ngal ba sel bar byed pa'o/ /dga' bar byed pa ni snying dga' bar byed pa'o/ /yang na snying la phan par byed pa'o/ /tshim byed ni bde ba skyed pa'am nad sel ba'o/ /blo sad par byed pa ni shes rab kyi kha 'byed par byed pa ste/ gang la shes rab ci tsam zhig de la gsal bar snang ba nyid du de 'thungs pa las gyur pa'o/ /sla ba ni ska ba ma yin pa'o/ /ro mi gsal ba zhes bya ba ni/ mngar ba la sogs pa'i ro de la gsal ba med pas na ro mi gsal ba'o/ /zhim pa ni ro bda' ba ste/ srog chags rnams kyis shin tu sred par byas nas/ btung ba'i don du 'thung ba zhes bya ba'i don to/ /de yang gang gi phyir drang srong dag gis/ bsil zhing gtsang la dge zhing zhim/ /zhes bshad pa yin no/ /bsil ba zhes bya ba ni reg pa dang nus pa gnyi ga sbyar ro/ /yang ba zhes bya ba ni yang ba'i yon tan dang ldan pa'o/ /de bzhin du bdud rtsir mtshungs zhes bya ba ni bdud rtsi'i yon tan dang ldan pa ste/ yon tan dam pa'i tshogs dang ldan pa'o/ /de lta bu'i yon tan dang ldan pa dag kyang nam mkha' ste/ bar snang las bab cing lhung ba ni/ nyi ma dang / zla ba dang / rlung gis reg cing phrad par gyur pa'i chu de yang yul dang dus la ltos shing yul dang dus kyi rjes su zhugs pas/ yul dang dus kyi yon tan dang 'dres shing bdag gir byed la/ des na phal cher slar zhing phan pa dang gnod pa ste/ lus la phan par 'gyur ba dang / gnod par 'gyur bar byed pa yin te/ de yang rlan che ba la sogs pa'i yul phyogs gzhan 'ga' zhig tu 'bab pa na/ de yang nag po'am/ dkar po la sogs pa las gzhan du 'gyur ba dang / dus te dus drug la ltos na phan pa dang gnod pa yin no/ /gang zhig char 'bab dri ma med/ /'bras chan dngul phor nang gnas pa/ /ma rul mdog kyang ma gyur pa/ /gang gA'i chu ste btung bar bya/ /zhes bya ba ni/ chu gang legs par char du 'bab pas brlan zhing spangs pa'i sA lu'i chan te/ dngul phor gyi nang na gnas pa de yang rul bar ma gyur cing / mdog kyang gzhan du ma gyur na/ chu de ni gang gA'i chu zhes bya ste/ de ni 'thungs na gnod pa med pa yin pas na btung bar bya ba yin no/ /gzhan du mtsho chu ston zla ni/ /'bring po min par btung mi bya/ /zhes bya ba ni/ chu de spangs pa'i 'bras sA lu'i chan rul ba'am/ mdog gzhan du gyur na/ de ni rgya mtsho'i chu dang 'dra ba yin pas btung bar mi bya ste/ ba tsha la sogs pa'i skyon dang 'dres pa yin pa'i phyir ro/ /ci dus thams cad du btung bar mi bya'am/ 'on te lan 'ga' zhig btung bar mi bya zhe na/ ston zla 'bring po min par btung mi bya/ /zhes bya ba smras pa yin te/ ston zla 'bring po ma gtogs par dus gzhan dag tu de btung bar mi bya'o zhes ston pa yin te ci'i phyir zhe na/ de'i tshe drang srong r-i Shi 'char ba'i dus yin pas/ des mtsho dang rdzing bu la sogs par gtogs pa'i chu thams cad gnod pa dag kyang phan par sgrub par byed pa yin pa'i phyir ro/ /char pa'i chu ni snod bzang bzhag / 'gyur ba med pa rtag tu btung / /zhes bya ba ni/ char pa'i chu ni dbang pos bar snang la char du 'bab pa'i chu'o/ /snod bzang bzhag ces pa ni snod bzang po bzed de bsags pa'o/ /'gyur ba med ces bya ba ni kha dog dang ro ma nyams shing 'gyur ba med pa ste/ de ni rtag tu zhes pa dus thams cad du btung zhing spyad par bya'o/ /de med na ni thang la gnas/ /bar snang ba dang rjes mthun yin/ /sa phyogs dkar nag gtsang zhing yangs/ /nyi 'od rlung gis phog pa bsngags/ /zhes bya ba ni/ de med na zhes pa bar snang gi chu bsags pa de ma rnyed na/ thang la gnas zhes pa/ sa la lteng kar gnas pa'i chu ni bar snang ba dang rjes mthun yin/ zhes bya ba/ bar snang gi chu dang 'dra bar 'tsho bar byed pa la sogs pa'i yon tan cha mthun par byed pa yin no/ /de bzhin du sa phyogs kha dog dkar ba dang / gnag pa dag gi cha 'dres pa ste/ phal cher dkar gnag tu gnag pa na yod pa dang gtsang ba ste/ dag pa dang yangs pa ste sa phyogs rgya che ba na yod pa de nyi ma'i 'od dang rlung gi ser bus kun nas phog cing bsten pa'i chu gang yin pa de bsngags pa yin pas btung bar bya'o/ /lteng ka 'dam rdzab nya lcibs dang / /rtswa dang lo ma rnyog ma can/ /nyi zla rlung gis ma phog pa/ /mngon du 'bab dang chu gar lci/ /sbu ba srog chags can dang dro/ /grang ches so yis mi bzod pa/ /char gang dus su ma bab dang / /dus kyi'ang dang por 'bab pa gang / /srog chags gdug dang ba sogs 'dres/ /bshang gci dug bsres gnod mi btung / /zhes bya ba ni/ lteng ka dang 'dam rdzab la sogs pas rnyog pa can du gyur pa'i chu de btung zhing longs spyad par mi bya'o/ /de la 'dam rdzab ni 'dam gyi rnam pa ste/ des rnyog pas nag nog can du byas pa'o/ /nya lcibs ni chu'i nang nyid nas skyes pa'o/ /rtswa dang lo ma ni grags par zad do/ /des rnyog pa can du gyur pa ni g.yogs pa'o/ /de bzhin du nyi zla rlung gis ma phog pa zhes bya ba ste/ nyi ma dang zla ba'i 'od dang rlung gi zer gyis ma phog pa'o/ /de bzhin du mngon du 'bab pa zhes pa ste/ mdun du 'bab pa dang 'dres shing chu gzhan gyis gang bar 'gyur ba'o/ /chu gar ni yun ring por gnas pa'i phyir ro/ /sla ba ma yin pa las ska ba nyid du gyur pa'o/ /de bzhin du lci ba ste/ yang ba las kyang lci bar gyur pa'o/ /sbu ba can ni sbu ba yod pa'o/ / srog chags can ni 'bu srin dang ldan pa'o/ /dro ba ni nyi ma la sogs pa'i tsha bas gdungs pa'o/ /de bzhin du shin tu grang ches pas/ so dang reg par mi bzod pa de yang btung bar mi bya'o/ /de bzhin du char pa gang dus su ma bab pa yang btung bar mi bya ste/ char chu yin pa'i phyir btung bar bya ba nyid yin yang / char 'bab pa'i dus su ma bab pa nyid kyis na gnod pa yin pa'i phyir bkag pa yin no/ /dus ma yin par 'bab pa bkag pa las na dus su 'bab pa las na bar bya'o zhes gnang bar don gyis go bar bya'o/ /de bas na bar snang las 'bab pa'i chu khyad par can de ni btung bar bya ba nyid yin pa las/ de dus su btung bar bya ba yin la/ de yang dbyar gyi dus yin te/ gang gi tshe dbyar nam mkha' las 'bab pa btung bar bya ba nyid yin gyi/ dus gzhan dag tu 'bab pa ni dus ma yin par btung bar mi bya'o/ /ci dus su bab pa thams cad du btung bar bya ba'am/ dus su bab pa yin du zin kyang btung bar mi bya ba cung zhig yod dam zhe na/ de'i phyir dus kyi dang por 'bab pa gang zhes bya bar smos pa yin te/ dus dang por 'bab pa'i chu gang yin pa de ni btung bar mi bya'o/ /des na 'di skad ston pa yin te/ dbyar gyi dus su 'bab pa ni btung bar bya la/ de las kyang dang por 'bab pa ni dus su 'bab pa yin yang btung bar mi bya'o/ /de bzhin du srog chags gdug pa dang / lu ta la sogs pa rnams kyi/ rgya dang / bshang ba dang / gci ba dang / dug dang 'dres pas rmas par byas pa'i chu gang yin pa de btung bar mi bya'o/ /nub phyogs nas ni rgya mtshor 'bab/ /gang yang myur 'bab rdul med chu/ /de dag mdor na dge ba yin/ /de las bzlog pa bzang ma yin/ /zhes bya ba ni/ chu bo gang nub phyogs nas mi 'bab pa dang / de bzhin du myur bar mi 'bab pa dang / rdul med pa ma yin pa ste gong ma las bzlog pa de dag ni bzang po ma yin pa ste/ gnod par byed pa yin no zhes bya ba'i don to/ /rdo la shugs drag rdebs pa yis/ /rgyun can g.yengs pa'i chu dag dang / /gangs can ma la ya las byung / /dge'o/ /zhes bya ba la/ rdo'i tshogs la shugs drag pos rdebs par byed la/ des rgyun chad cing rnam par 'thor bas g.yengs shing sprugs pa'i chu gang dag yin pa de dag gangs can te ri kha ba can dang / ma la ya'i ri las byung ba ste/ de gnyis las 'thon cing 'bab pa'i chu bo ni dge'o zhes pa ste phan zhing bsod pa yin pa'o/ /de ni brtan g.yung na/ srin bu rkang bam snying dang ni/ /lkog ma glad pa'i nad skyed 'gyur/ /zhes bya ba ni/ kha ba can dang ma la ya'i ri las byung ba de nyid brtan zhing g.yung ba ste/ dal gyis 'bab pa yin na/ srin bu la sogs pa skyed par 'gyur ro/ /rkang bam ni tshil dang sha la brten te/ rkang pa dag tu rkang pa dag 'byung ba ste/ mtshan nyid 'og nas bshad do/ /shar dang nub kyi mtha' las byung / /gzhang 'brum skyed do/ /zhes bya ba ni/ shar gyi lho bal gyi yul nas 'bab pa dang / nub phyogs te/ stag gzig gi yul nas 'bab pa dang / mtha' las byung ba lho nub kyi mtshams kyi yul ma la ya las byung zhing 'bab pa'i chu bo ni/ gzhang 'brum zhes bya ba'i nad skyed par byed do/ / dbang chen 'bab/ dmu rdzing rkang bam nad skyed 'gyur/ /zhes bya ba ni/ dbang chen zhes bya ba'i ri las 'bab cing rgyu ba'i chu bo ni dmu rdzing gi nad dang / rkang bam gyi nad skyed par 'gyur ro/ /sad h+ya bin da'i ri las 'bab/ /mdze dang skya rbab klad nad 'gyur/ /zhes bya ba ni/ ri bo sad h+ya dang / ri bo bin da zhes bya ba'i ri gnyis las 'bab cing / de las 'thon pa'i chu bo ni mdze dang / skya rbab kyi nad dang / klad pa'i nad skyed par 'gyur ro/ /pa ri yad tra'i nad kun sel/ /zhes bya ba ni ri bo pa ri yad tra zhes bya ba zhig yod de/ de las byung ba'i chu bo ni nyes pa gsum char sel ba yin no/ /khron pa rdzing la sogs pa'i chu/ /skam sa rlan can brag las shes/ /zhes bya ba ni/ khron pa dang / rdzing bu la sogs pa'i chu yang ba dang / lci ba dang / yon tan dang / skyon gnyis ka yang skam sa dang / gsher sa rlan can dang brag las shes par bya ste/ skam sa la sogs pa'i yon tan gyis/ de'i khron pa la sogs pa'i chu'i bye brag shes par bya'o/ /de yang / khron pa rdzing bu mtshe'u dang / /mtshor bcas chu mig la sogs chu/ /skam sa rlan can brag las ni/ /yon tan skyon dag shes par bya/ /zhes drang srong tsa ra kas bshad pa dang / bsdus pa las kyang / skam sa gsher sa ri bo dang / /nye las yang dang lci ba 'byung / /zhes bshad pa yin no/ /des na 'di skad ston pa yin te/ skam sa'i sa phyogs na gnas pa'i khron pa la sogs pa'i chu ni yang ba nyid yin la rlan can gyi phyogs la gnas pa'i khron pa la sogs pa'i chu ni lci ba nyid yin no/ /ri bo'i phyogs na gnas pa'i khron pa la sogs pa'i chu ni nyes pa skyed pa yin la/ ba ri ya tra'i phyogs na gnas pa'i ni nyes pa 'joms pa yin te/ thams cad la yang 'di bzhin du sbyar bar bya'o/ /drod chung skran yod skya rbab dang / /dmu rdzing tshad 'khru gzhang 'brum mam/ /pho ba'i drod chung 'or nad can/ /mi btung brnag dka' nyung zad btung / /zhes bya ba ni/ drod chung ba la sogs pas chu btung bar mi bya'o/ /gal te brnag bar dka' zhing skom pa mi bzod par gyur na/ rang gi rang bzhin dang / yul dang / dus dang / spyod lam dang / lus kyi tshod las dpags te/ cung zad cig btung bar bya'o/ /ston ka so ga ma gtogs par/ /nad med mis kyang cung zad btung / /zhes bya ba ni/ ston ka dang so ga'i dus ma gtogs par dus gzhan dgun stod dang / dgun smad dang / dpyid dang / dbyar dag gi tshe nad med pa'i mis kyang cung zad btung / zhes bya ba ni/ nyung shas nyung shas dag btung bar bya'o/ /zas zos par mtha' thog mar ni/ /chu 'thungs ran dang sbom skem 'gyur/ /zhes bya ba ni/ zas zos pa'i bar dang mtha' ma dang / /thog mar chu 'thungs na/ lus sbom phra ran pa dang / sbom pa dang / skem par 'gyur ro/ /des ni 'di skad ston par 'gyur te/ mis zas zos pa'i bar du skom 'thungs na lus zungs ran pa ste/ phra sbom 'tsham par 'gyur la/ zas zos pa'i bar mar skom 'thungs pas ni sbom zhing rags par 'gyur la/ zas zos pa'i thog mar 'thungs pas ni skems par 'gyur ro/ /de yang skom bar du 'thungs pas lus zungs mnyam por skyed cing ran pa nyid du byed do/ /mtha' mar 'thungs pas ni ma zhu ba'i gnas su bad kan 'phel bar byed pas sbom po byed do/ /zas kyi thog mar 'thungs pas ni zas kyi shing med pas/ pho ba'i me nyams par byed de/ me'i drod kyis mi mthun pa'i phyogs su gyur pas/ me'i drod 'bri bar byed la/ des na zas legs par 'ju bar mi nus la/ zas mi 'ju bas de'i tshe/ dngas ma la sogs pa'i lus zungs ji lta ba bzhin du rgyas par mi 'gyur la/ de rgyas shing 'phel bar ma gyur pas skyes bu skem por 'gyur ro/ /de skad du slob dpon gyis bsdus pa las/ zas kyi thog mar chu 'thungs na/ /me nyams byed pas skems par 'gyur/ /tha mas sbom po nyid byed de/ /de ni ma zhu bad kan rgyas/ /bar ma yan lag mnyam zhing snyoms/ /lus zungs smin pas bde ba yin/ /zhes bshad pa yin no/ /chu bsil chang nad brgyal ba dang / /skyugs dang ngal dang mgo 'khor dang / /skom dang lus tsha mkhris pa dang / /khrag rgyas dug ni sel byed yin/ /zhes bya ba la/ chu bsil bdag ni chang drags pa'i nad la sogs pa sel zhing 'joms la zlog par byed pa yin no/ /de la chang nad ni chang drags pa las gyur pa'i nad do/ /de la nad ces bya ba ni/ gnod pa sogs shing snyon rmongs par byed pa'o/ /brgyal ba ni dran pa stor ba'o/ /skyugs pa la sogs pa ni go bar zad do/ /lus tsha ba ni zas dang spyod lam tsha bas tsha bar gyur pa'o/ / mkhris pa dang khrag rgyas pa de ni de dag 'phel ba'o/ /dug ni rgyu ba dang / rgyu ba las byung ba'i dbye bas gnyis so/ /sel byed yin zhes bya ba ni/ 'thungs pa dang gtor ba la sogs pas 'di dag sel zhing 'joms par byed pa'o/ /chu tshan drod skyed zas 'ju zhing / / mgul bde lus yang gcin nad sel/ /skyigs bu lto sbos rlung bad kan/ /rims sar 'phral du zlog byed cing / /lud pa cham sar dbugs mi bde/ /rtsib logs zug la bsngags pa yin/ /zhes bya ba ni/ chu bskol zhing tsha bar byas pa dag ni me'i drod skyed par byed pa dang / de bzhin du ma zhu ba'i nyes pa sel bar byed pa dang / mgul pa bde zhing lkog ma sbyong la/ gdangs snyan pa dang / yang ba'i yon tan dang ldan pas/ lus yang bar byed ba dang / gcin nad sel zhes pa gcin gyi gnas ni chu so ste/ de la gnod pas khebs par gyur pa sel bar byed pa'am/ yang na de na gnas pa'i gcin gyi skyon sel bar byed pas na/ gcin nad sel zhes bya'o/ /yang chu bskol ba 'di ni skyigs bu la sogs pa'i nad rnams la yang bsngags pa yin te/ skyigs bu la sogs pa ni 'og nas bshad par bya'o/ /cham sar ni cham pa yang yin la/ sar pa yang yin pas cham sar zhes bya ste/ de la yang bsngags pa yin te/ gang gi phyir drod skyed pa dang / zas 'ju bar byed pa yin par gong du bshad pa des na/ 'ju zhing smin par byed pas ni ma zhu ba yin pas de la bsngags pa yin no/ /chu ni bskol nas grangs pa dag /bad kan mi skyed lus yang zhing / /mkhris pa can la phan pa yin/ /de ni zhag lon nyes gsum skyed/ /ces bya ba ni/ chu bskol nas bsgrangs pa ni bad kan skyed par mi byed de/ ma bskol ba'i chu las rang bzhin gyi yon tan dang ldan pa yin pa las kyang bskol nas bsgrangs pa na/ shin tu yang ba yin la/ bskol nas bsgrangs pa de yang rlung dang bad kan gyi nyes pa gang yang rung ba mkhris pa dang ldan pa la phan pa yin la/ gsum char 'dus pa las byung ba'i nad la ni gnod pa yin no/ de yang / yul dus lci dang yang ba las/ /bzhi cha gsum cha phyed 'dus par/ /lbu ba med par bskol ba ni/ /shugs med dri ma med cing phan/ /zhes bshad pa yin no/ /de ltar yon tan dang ldan zhing / /de ltar bskol nas bsgrangs pa de ni zhag lon pa ste/ nyin zhag gcig 'das pa'am/ yun ring por bzhag pa de ni/ nyes gsum skyed ces bya ba yin te/ rlung la sogs pa'i nyes pa gsum skyed par byed do/ /dus kyi rang bzhin nyid dang / me'i yon tan las nyams pa dang / skyur pa'i rnam par 'gyur bas nyes pa rnams skyed pa yin no/ /rgya star chu ni snum pa dang / /ro mngar ro tsa bsil zhing yang / /skom dang mkhris pa rlung nad sel/ /drod skyed lgang ba'i nad sbyong byed/ /dbyar ni char chu chu bo'i chu/ /mchog tu bzang dang ngan par bshad/ /ces bya ba ni/ rgya star gyi 'bras bu'i nang na gnas pa'i chu gtsor gzung bar bya'o/ / de'i cha shas las byung ba gzhan dag ni ma yin no zhes shes par bya ba'i phyir chu'i sde tshan 'dir bstan pa byas pa yin la/ rgya star gyi 'bras bu de'i nang gi chu ni snum pa'i yon tan dang ldan pas na/ snum pa dang ro mngar zhing zhim pa dang / ro mngar zhing khu ba 'phel bar byed pa dang / bsil zhing grang ba'i stobs dang ldan pa dang / yang ba la sogs pa dang ldan pa dang / me'i drod skyed par byed pa dang lgang pa ste/ gcin gyi gnas kyi nad sbyong zhing dag par byed pa yin no/ /char 'bab pa ste bar snang las 'bab pa'i chu dang chu bo'i chu ste/ de ltar char gyi chu dang chu bo'i chu ste/ de las dbyar gyi char gyi chu shin tu bzang zhing mchog tu gyur pa yin la/ chu bo'i chu ni dbyar mchog tu ngan zhing smad par bya ba yin par bshad do/ /chu'i sde tshan no/ /da ni 'o ma thams cad kyi spyi'i yon tan dang / las rnams smras pa ni 'di yin te/ de yang ci ltar chu ni 'tsho bar byed pa la sogs pa'i yon tan dang ldan pa de bzhin du/ 'o ma yang yon tan mang po dang ldan pa yin pas/ sde tshan gzhan dag las 'o ma'i sde tshan nyid mchog tu gyur pa yin pa dang / gzhan yang gang gi phyir/ zhun mar ni snum thams cad kyi mchog yin la/ de'i skye ba'i gnas ni 'o ma nyid yin te/ de bas na mchog tu gyur pa yin no/ /'o ma phal cher ro zhu mngar/ /snum zhing mdangs skyed lus zungs 'phel/ /rlung dang mkhris sel ro tsa byed/ /bad kan skyed cing bsil ba yin/ /zhes bya ba la/ 'o ma phal cher zhes pa ni 'o ma phal mo che'i yon tan 'di dag yin gyi/ thams cad kyi ni ma yin no/ /de la 'o mar gtogs pa thams cad kyi ni ro mngar ba dang zhu ba'i rjes la mngar zhing 'jam pa yin pas/ de dag ni khyad par med par ro mngar ba dang zhu ba'i rjes mngar ba yin no/ /snum pa'i yon tan dang ldan pas snum pa'o/ /gzi mdangs skyed pa la phan pas na mdangs skyed de/ mdangs zhes bya ba lus zungs rnams kyi snying por gyur pa/ 'og nas bshad pa'i mtshan nyid dang ldan pa de skyed par byed pa dang / lus zungs zhes pa dngas ma'i bcud la sogs pa 'phel bar byed pa dang / rlung dang mkhris sel zhes bya ba/ rlung dang mkhris pa'i nad 'joms par byed pa dang / ro tsa byed ces pa khu ba 'phel bar byed pa dang / bad kan skyed ces pa bad kan 'phel bar byed pa dang / lci ba'i yon tan dang ldan pas lci ba dang / bsil zhing grang ba ste/ yon tan de dag dang ldan pas lci ba'o/ /de dag ni phal mo che'i spyi'i yon tan yin gyi/ thams cad kyi yon tan 'di lta bu ni ma yin te/ la la ni gzhan dag tu yang mthong ste/ dper na rnga mo'i cung zad rtsub cing tsha ba dang / lan tshwa bro ba yang ba dang / de bzhin du ra'i 'o ma yang yang ba dang / lug gi 'o ma'i nus pa tsha ba skyed pa dang / rmig pa gcig pa'i 'o ma tsha ba'i nus pa can nyid yin no/ /'dir spyi'i yon tan bshad pa las/ gang de dang mi mthun pa'i khyad par gyi yon tan bshad pa de ni spyi'i yon tan dang mi mthun pa nyid yin par shes par bya'o/ /'on te cha 'dra ba dag yin na ni/ de nyid stobs skyed cing grogs su gyur pa yin no/ /'dir khyad par du bya ba ni/ ba yi 'o ma 'tsho byed cing / /bcud kyis len yin glo rdol dang / /glo gcong la phan yid gzhungs byed/ /stobs skyed nu zho skyed dang 'khru/ /ngal dang mgo 'khor myos dbal nyams/ /lud pa dbugs mi bde bkres skom/ /rims rnying gcin ni sri ba dang / /khrag dang mkhris pa sel ba yin/ /zhes bya ba ni 'dir 'o ma'i nang nas gal te/ de ba'i 'o ma yin na 'tsho bar byed pa yin pas na 'tsho byed cing zhes bya ste/ 'o ma thams cad kyang 'tsho byed yin mod kyi/ ba'i 'o ma 'di yang shin tu 'tsho bar byed pa yin te/ mdangs skyed cing lus zungs mnyam por 'phel bar byed pa yin no/ /bcud kyis len yin zhes bya ba ni/ srog yang dag par 'dzin par byed pa yin pas/ bcud kyis len dang 'dra ba'i phyir bcud kyis len zhes bya ste/ de yang bsdus pa las/ mar dang 'o ma bsten pas ni/ /bcud kyis len ni 'thob pa yin/ /gang phyir 'o ma bsngags pa yi/ /bcud rnams kyi ni bcud len yin/ /zhes bshad pa yin no/ /glo rdol dang gcong la phan pa ni glo dang brang rdol ba/ lus zungs zad par byed pa'i gcong la phan zhing rjes su mthun pa yin no/ /de bzhin du blo gros te/ yid gzhungs ba la phan pa yin pas na/ yid gzhungs byed ces bya'o/ /stobs la phan pas na stobs skyed do/ /nu zho skyed pa ni bud med rnams kyi nu zho 'phel bar byed pa ste/ nu zho snum pa bud med kyi 'o ma skyed pa'o/ /'khru ba ni khong nas 'khru ba'i ngang tshul can no/ /de bzhin du ngal ba la sogs pa yang sel ba yin no/ /mi bde ba ni yid kyi gnod pa'o/ /gzhan dag ni go sla'o/ /ma he'i 'o ma 'ju drags dang / /gnyid med la phan rab lci bsil/ /zhes bya ba la/ ma he'i 'o ma ni 'ju drags pa ste me'i drod che bas 'grangs mi shes pa dang / gnyid med pa la phan pa dang / de 'o ma gzhan dag las rab tu zhi zhing 'ju dka' ba dang / bsil zhing grang ba'i yon tan dang ldan pa yin no/ /ra ni chu nyung 'thung zas rgod/ /kha zhing tsha ba zabs yang / /skem dang rims dang dbugs mi bde/ /khrag dang mkhris pa tshad nad sel/ /zhes bya ba la/ ra'i 'o ma ni/ chu nyung ngu 'thung ba la sogs pa'i rang bzhin ni yin te/ 'dir rgyu smos pa ni gzhan dag kyang 'di bzhin du rgyu dang ldan pa'i dbang gis 'o ma yang ba nyid du shes par bya ba'i phyir smos pa yin te/ 'di las go bzlog pa'i rang bzhin can ni lci ba yin par shugs kyis go bar bya'o/ /chu nyung ngu 'thung ba la sogs pa'i rang bzhin ni dus dang yul la sogs pa la ltos nas bya ba yin no/ /ra'i 'o ma 'di ni skem pa la sogs pa'i nad skyed pa yin te/ skem pa ni gcong chen po'o/ /rnga mo'i 'o ma cung rtsub dro/ /lan tsha bro zhing drod che yang / /rlung dang bad kan lto sbos srin/ /'or nad dmu rdzing gzhang nad sel/ /zhes bya ba la/ rnga mo'i 'o ma ni cung zad rtsub pa dang / cung zad dro ba dang / cung zad lan tshwa bro ba yin zhing / me drod che bar skyed pa dang / yang ba yin la/ rlung dang / bad kan dang / lto sbos pa dang / srin nad dang / 'or nad dang / dmu rdzing dang / gzhang 'brum gyi nad la phan zhing bsngags pa yin no/ /bud med nu zho rlung mkhris khrag /snad ba'i mig nad sel byed de/ /tshim byed mig dang snar blugs phan/ /zhes bya ba la/ bud med kyi 'o ma de ni rlung dang / mkhris pa dang / khrag dang / snad pa las byung ba'i mig nad gang yin pa dag sel zhing 'joms par byed do/ /ji ltar na de sel bar byed ce na/ tshim byed mig dang snar blugs phan/ /zhes bya ba yin te/ tshim par byed pa la sogs pa'i mtshan nyid ni/ gnas 'di nyid kyi 'og nas bshad pa yin te/ tshim par bya ba ni mig bkang ba ste/ nas sam sran ma sha'i zan gyi reng bu sbom par byas la bskor te bkang ba'o/ /mig tu blugs pa ni mig 'bras kyi steng du blugs pa'o/ /snar blugs pa ni sna nas gtong ba'o/ /lug gi 'o ma snying gnod tsha/ /rlung 'joms skyigs bu dbugs mi bde/ / mkhris pa bad kan skyed pa yin/ /zhes bya ba la lug gi 'o ma ni snying la gnod pa ste/ shin tu mi dga' ba'am/ snying nad skyed pa'o/ /tsha ba ni nus pa tsha ba dang ldan pa'o/ /rlung 'joms pa ni rlung gi nad 'jig pa'o/ /de la skyigs bu dang dbugs mi bde ba dang / mkhris pa dang / bad kan ni skyed par byed pa yin no/ /ba glang mo yis rab brtan byed/ /ces bya ba ni/ ba glang mo'i 'o ma ni rab tu brtan par byed pa yin te/ lus shin tu brtan par byed pa yin no/ /rmig pa gcig pa'i 'o ma tsha/ /yan lag rlung sel skyur bcas shing / /lan tshwa bro zhing rmongs par byed/ /ces bya ba la/ rmig ba gcig pa ni/ rmig sbubs gcig yod pa ste/ rmig ba la kha brag tu ma gyur pa/ rta dang bong bu la sogs pa rnams la rmig pa gcig pa zhes bya ba ste/ de dag gi 'o ma ni tsha zhing dro ba'i nus pa dang ldan pa yin no/ /yan lag ni khrag la sogs pa'i lus zungs rnams te/ de la gnas pa'i rlung sel zhing 'joms par byed pa dang / skyur dang bcas pa dang / lan tshwa bro ba ni cung zad skyur ba dang / cung zad lan tshwa bro ba'o/ /rmongs par byed ces bya ba ni rmongs rmongs por byed cing / lus mi gsal ba bems po nyid du byed pa'am/ shes rab la gnod par byed pa'o/ /yang na rmongs pa ni blun pa nyid du gyur pa'o/ /zhes la las bshad do/ /'o rlon bad kan skyed cing lci/ /rigs par bskol bas de las gzhan/ /shin tu bskol na 'ju dka' lci/ /bzhos ma thag dro bdud rtsir mtshungs/ / zhes bya ba la/ 'o ma thams cad ma bskol ba ni bad kan skyed cing 'phel bar byed pa yin te/ dri ma dang ldan pas lus kyi mi rgyu ba yin par ro/ /lci ba ni yun ring zhig na 'ju ba ste/ sa ni zla ba'i yon tan gyi shas che ba yin pas de las 'byung ba'i phyir ro/ /rigs par bskol na zhes bya ba ni 'o ma de nyid rlon pa las go bzlog par bstan na de las gzhan pa ste/ bad kan skyed pa ma yin lci ba yang ma yin te/ bad kan sel zhing yang bar gyur pa'o/ /de la legs pa ni sbyor ba'i thabs te/ ji ltar 'o ma'i phyed kyi chus bsnan la bskol ba ni/ 'o ma rlon pa bas shin tu yang ba yin no/ /zhes rgyud gzhan nas bshad pa yin no/ /yang na shin tu bskol ba ma yin la/ cung zad bskol ba yang ma yin pa ni rigs pa yin te/ mi rigs par bskol ba ni me dang phrad pa yin du zin kyang lci ba nyid du 'gyur ro/ /de yang gang gi phyir mi rigs par bskol zhing / chu med par bskol ba las/ cha gcig dang / cha gnyis dang / gsum dang / bzhi nas cha brgyad lus pa'i bar gyis ni/ gong nas gong du snying po 'dus par 'gyur ro/ /de yang rgyud gzhan las/ 'o ma chu med par bskol ba/ gnyis gsum bzhi nas brgyad cha lus/ /ji ltar shin tu bskol ba bzhin/ /snying po lci zhing rab stobs ldan/ /zhes bshad pa yin no/ /de bas na shin tu bskol na 'ju dka' zhing rab tu lci bar 'gyur ro/ bzhos ma thag pa'i 'o ma dro ba ni 'phral du bzhos pa'o/ /de ni phan pa nyid kyis na bdud rtsir mtshungs/ zhes bya ba ste/ bdud rtsi dang 'dra ba yin no/ /da ni 'o ma las zhor gyur ba las/ gnas skabs du ma nyid du gyur ba/ ma rdzogs pa las ji skad du bshad pa'i skyur ba dang / shin tu skyur ba la sogs pa'i tshul gyis zho ma langs pa dang / legs par langs pa dang / langs nas thal ches pa nyid du yongs su gyur pa las/ ji ltar zho'i gnas skabs du mar gyur pa'i rang bzhin gyi gnas skabs gzhung rtsom pas snying la bzhag ste/ smras pa ni/ zho ni ro dang zhu rjes skyur/ /rtug skems lci la rlung nad sel/ /tshil dang khu chu stobs bad kan/ /khrag mkhris drod skyed 'or nad skyed yig 'byed cing kha zas len/ /grang ba'i rims dang mi snyoms rims/ /cham pa gcin 'gags gyur pa dang / /'khru ba'i nad la rtsub mo phan/ /zhes bya ba la/ zho gang ro dang zhu ba'i rjes skyur ba ni ro dang zhu rjes skyur ba'o/ /rtug skems zhes bya ba ni bshang gci la sogs pa rang gi gnas nas bskul nas gong por byed pa la bya'o/ /lci ba'i yon tan dang ldan pa ni lci ba'o/ /rlung gi nad sel bas na rlung sel lo/ /dro ba ni dro ba'i nus pa bskyed pa'o/ /de bzhin du tshil dang khu chu dang stobs la sogs pa rang gi gnas nas/ de bzhin du yig 'byed cing 'grangs su zin kyang 'dod par byed pa yin no/ /de bzhin du kha zas len zhes bya ste/ yig 'chus pa la phan zhing zas gzhan dag kyang yi gar 'ong bar byed pa'o/ /de bzhin grang ba'i rims dang zhes pa/ grang ba las gyur pa'i rims dang / rims ldang dub mi snyoms pa la sogs pa dang / cham pa dang gcin 'gags par gyur pa dang / 'khru ba'i nad rnams la phan pa yin no/ /de la rtsub pa ni legs par langs pa'i zho las dus 'das nas/ rim gyis shin tu smin par gyur pa ni rtsub po yin ba'am/ yang na spris ma bshus pa'i zho ni rtsub po yin no/ /zho dron dpyid dang so ga dang / / ston dus mtshan mo btung mi bya/ /de ni mung+ga'i sran tshod dang / /sbrang rtsi mar dang sha kha ra/ /skyu ru ra ni med mi btung / /rtag tu ma yin ma langs min/ /gzhan du rims khrag me dbal dang / /mdze dang skya rbab mgo 'khor skyed/ /ces bya ba la/ zho de ni dron por mi btung ba dang / de bzhin du dpyid dang so ga dang / ston gyi dus su btung bar mi bya'o/ /de ltar na sngar dron por zhes smos pa ni so ga'i dus yin par shes par bya ste/ de'i tshe btung bar mi bya ste/ de bzhin du mtshan mo yang btung bar mi bya'o/ /gal te de 'thung bar byed na sran mung+ga ste/ mon sran sde'u'i tshod ma dang sbyar ba btung bar mi bya ba dang / de bzhin du sbrang rtsi dang mar dang sbyar ba'am/ mar dang sha kha ra dkar po dang / sha kha ra dang mi ldan par btung ba dang / skyu ru ra ma zos par mi btung ngo / /de bzhin du rtag par rgyun du mi btung ba dang / ma langs min zhes bya ba ste/ legs par ma chags la/ gang gi tshe 'o ma'i rang bzhin ma spangs shing zhor legs par ma chags pa de'i tshe ma langs pa zhes bya ste/ de mi btung ngo / /gzhan du zhes bya ba ni sngar bshad pa'i cho ga dang mi ldan zhing de ma spangs par/ la la zhig spyod par byed na/ de'i tshe zho des rims la sogs pa skyed par 'gyur ro/ /dar sar yang la bska zhing skyur/ /drod skyed bad kan rlung dag sel/ /skran nad dmu rdzing gzhang 'brum dang / /pho nad chu sri yi ga 'chus/ /mcher pa skran dang mar ma zhu/ /sbyar dug skya rbab nad rnams sel/ /zhes bya ba la/ dar sar zhes bya ba la zho srub shing la sogs pas bsrubs pa las byung ba ste/ srub shing snum med pa dang / mar gyi phyed phyung ba dang / mar ma phyung ba ste/ gsum char yang yang ba yin la/ de las ro ni bska ba dang skyur ba yin no/ /drod skyed pa ni pho ba'i me drod 'phel bar byed pa'o/ /bad kan rlung dag sel zhes bya ba ni/ de las gnyis bsrubs pa las byung ba/ de bzhin du skran nad dang dmu rdzing la sogs pa sel bar 'gyur ba dang / chu sri ba ste/ gcin sri ba dang mcher ba zhes pa lto ba'i g.yon logs na brten pa'i rnam pa na ba dang / mar ma zhu zhes pa mar lhag par zos pa'am/ ma legs par zos pa las byung ba'i nad la ni mar ma zhu ba zhes bya'o/ /sbyar dug ni bcos ma'i dug go/ /skya rbab kyi nad ni skya rbab las nad du gyur pa ste/ nad de rnams sel zhing 'joms pa yin no/ /de 'dra zho ga chu 'khru yang / /rtsa srubs sbyong la rtug skams sel/ /zhes bya ba la/ de 'dra zhes pa ni dar ba sar pa ste de dang zho ga chu yon tan 'dra zhing mtshungs par shes par bya la/ de yang 'khru ba ste cung zad khong 'khru ba dang / yang pa zhes pa dar ba sar pa yang yang ba yin mod kyi/ 'di ni shin tu yang bas na khyad par smos pa yin no/ /rtsa sbubs sbyong zhing dag par byed pa dang / rtug skams 'gags pa sel zhing 'jig par byed pa yin no/ /zhes bya ba'i don to/ /'phral gyi mar sar ro tsa zhing / /bsil zhing mdog stobs drod skyed byed/ /'khru gcod rlung mkhris khrag gzhang 'brum/ /glo gcong kha yon lud pa sel/ /zhes bya ba la/ 'phral gyi mar sar zhes pa ni bsrubs zin ma thag phyung ba'i mar sar ro/ /ro tsa ba ni khu ba 'phel ba'o/ /bsil ba ni nus pa bsil ba'o/ /de bzhin du mdog dang stobs la sogs pa yang skyed par byed pa yin no/ /'khru ba gcod pa ni bshang gci sla ba las ska bar byed do/ /de bzhin du rlung dang mkhris pa'i khrag sel ba yin te/ rlung gi khrag ni rlung las gyur pa'i khrag go/ /mkhris pa'i khrag ni mkhris pa las gyur pa'i khrag ste/ de dag dang gzhang 'brum la sogs bsel zhing bsngags pa yin no/ /zhun mar blo rno dran gsal zhing / /yid gzhungs drod skyed stobs tshe 'phel/ /mig dang byis rgan bu 'dod dang / /mdangs bzangs rab gzhon skad snyan phan/ /glo rdol skem dang gcong dang 'bras/ /mtshon rmas mes tshig rma la'ang bsngags/ /rlung dang mkhris pa dug dang smyo/ /lus skems mdangs nyams rims rnams sel/ /snum gyi nang na snum mchog ste/ /bsil zhing na tshod 'jog pa'i mchog /zhun mar stobs ni stong dang ldan/ /sbyor bas las ni stong byed 'gyur/ /zhes bya ba la/ zhun mar ni blo rno ba la sogs pa la phan pa yin no/ /de la blo rno ba ni blo gros dang ldan pa ste/ dngos po rnams 'dzin par nus pa'o/ /dran pa ni 'das pa'i dngos po yid la dran par nus pa'o/ /yid gzhungs pa ni dngos po rnams bye brag phyed pa'i shes rab 'dzin par byed pa'o/ /drod skyed pa ni pho ba'i me drod skyed pa'o/ /stobs ni nus mthu'o/ /tshe ni srog dang 'tsho bar ldan pa ste/ de dag 'phel bar byed pa'o/ /mig ni mig nyid la phan par byed pa ste/ zhun mar ni de dag la bsngags pa yin no/ /byis ba ni bcu drug lon gyi bar ro/ /rgan po ni drug cu yan chad lon pa'o/ /bu 'dod pa ni bu skye bar 'dod pa'o/ /mdangs ni lus la gnas pa'i mdzes sdug pa'o/ /rab gzhon ni lus gzhon sha chags shing mi rtsub pa'o/ /skad snyan pa ni tshig gsal ba'o/ /phan zhes pa ni de dag 'dod pa la phan zhing rjes su mthun pa yin no/ /de bzhin du glo rdol ba la sogs pa rmya zhing snyon rmongs pa'i bdag nyid can rnams la yang bsngags te phan pa yin no/ /lus skem pa ni lus zungs zad pa'o/ /gzhan dag ni go bar zad do/ /snum gyi nang na zhes pa ni til mar dang zhag dang / rkang rnams kyi nang na'o/ /snum mchog ste ches pa ni gtso bo yin pa'o/ /bsil ba ni bsil ba'i nus pa dang ldan pa'o/ /na tshod 'jog pa ni rgas pa 'joms pa ste/ gzhon nu nyid du dus yun ring por 'jog pa'o/ /mchog ces bya ba ni shin tu dam pa yin pa'o/ /stobs stong dang ldan pa ni nus pa mtha' yas shing mthu du ma yod pa'o/ /de bzhin du sbyor bas zhes bya ba cho ga tha dad pa ste btung ba dang / sna nas btang ba dang / bsku ba dang / 'jam rtsi mas gtong ba la sogs pa'i sbyor bas so/ /las ni stong byed 'gyur/ zhes bya ba ni/ bya ba mang po byed pa'i phyir/ /las mtha' yas pa byed ba'o/ /mar rnying smyo dang brjed byed brgyal/ /glad nad rna mig mngal nad dang / /rma rnams sbyong zhing 'tsho byed pas/ /nad las rgyal byed dam pa yin/ /zhes bya ba la/ mar rnying ba sar pa ma yin pa lo mang po lon pa ni smyo ba la sogs pa'i nad sel ba yin pa dang / de bzhin du glad pa dang / rna ba dang / mig dang / mngal gyi nad rnams sel ba yin no/ /smyo ba dang brgyal ba dag ni 'og nas chang nad kyi nad gzhi'i skabs na bshad par bya'o/ /brjed byed kyang 'og nas bshad par bya'o/ /rma rnams sbyong zhing zhes bya ba ni rma'i rnag la sogs pa sel ba'o/ /de bzhin du 'tshob cing 'byor par byed pa yang yin te/ 'tshob ba ni rma de pags pa gzhan dang mdog mnyam par byed pa'o/ /phrum sar spri dang rgya phrum dang / /chur ba la sogs stobs skyed cing / /khu ba gnyid dang bad kan 'phel/ /rtug skams byed lci nyes dang ldan/ /zhes bya ba la/ phrum sar zhes bya ba ni 'o ma dang dar ba las byas pa ste/ grags par zad do/ /spri ni ba la sogs pa 'brangs ma thag pa'i 'o ma las byas pa'o/ /rgya phrum ni 'o ma'i btso phrum a mi tsha zhes grags pa'o/ /chur ba ni zho ga chu las gdus pa'i gong bo'o/ /'o ma las gyur pa 'di dag ni stobs skyed cing 'phel bar byed pa dang / de bzhin du khu ba dang / gnyid dang / bad kan 'phel bar byed pa yin no/ /gzhan yang rtug skams byed pa dang / lci ba dang nyes pa dang ldan pa ste gnod pa'i 'gyur ba dag ston pa'o/ /sogs pa zhes smos pa ni 'o ma las byas pa'i rnam pa gzhan gang dag yod pa bsdu'o/ /ba mar 'o ma mchog yin te/ / lug las byung ba smad pa yin/ /zhes bya ba la/ ba'i mar dang 'o ma dag ni mchog yin te zhes bya ba/ kun gyi mchog gtso bo yin zhing dam pa yin la/ lug las byung ba'i mar dang 'o ma ni smad cing mi bsngags pa yin no/ /'o ma'i sde tshan no/ /'o ma'i sde tshan gyi 'og tu bu ram shing gi sde tshan smos pa'i dgos pa ni ji ltar 'o ma'i ro dang / zhu ba'i rjes mngar ba yin pa de bzhin du/ bu ram shing gi khu ba yang ro dang zhu ba'i rjes mngar ba yin no/ /bu ram shing khu 'khru lci snum/ /sha skye ro tsa bad gcin 'phel/ /bsil zhing khrag mkhris sel ba dang / / ro dang zhu rjes mngar ba yin/ /zhes bya ba la/ bu ram shing las byung ba'i khu ba ni 'khru ba ste/ bshang ba la sogs pa sla bar byed pa dang / lci ba dang / snum par byed pa dang / sha skye ba dang / lus sbom zhing 'phel bar byed pa dang / ro tsa zhing khu ba 'phel ba dang / bad kan dang gcin 'phel bar byed pa dang / bsil ba ste nus pa bsil ba dang / de bzhin du khrag dang mkhris pa sel zhing 'joms pa dang / ro dang zhu ba'i rjes mngar zhing bda' ba'i yon tan dang ldan pa yin no/ /de tshe lan tshwa bro zhing sos/ /bcas na kha ra dag dang 'dra/ /zhes bya ba la/ bu ram shing de'i rtse mo cung zad lan tshwa bro zhing / sos bcas shing zos pa dang / de'i yon tan sha kha ra dang 'dra ba yin no/ /rtsa ba rtse mo 'bus zos sogs/ /btsir dang dri mas sbags pa dang / /dus ni cung zad lon pa las/ /'khrul 'khor can ni rnam 'gyur te/ /tsha zhing lci la mkhregs par 'gyur/ /zhes bya ba la/ rtse mo dang rtsa ba 'bus zos pa la sogs pa rtsa ba rtse mo 'bus zos sogs/ /zhes bya ba la/ de rnams btsir ba dang / de bzhin du dri mas sbags shing gos par gyur pa dang / de bzhin du dus cung zad lon par gyur zhing / dus cung zad 'das par gyur pa'i 'khrul 'khor gyis btsir ba'i bu ram gyi khu ba de ni rnam par 'gyur bar byed cing / gzhan du gyur pa nyid du 'gyur te/ 'gyur pa zhes bya ba ni rang gi ngo bo las gzhan du 'gyur ba'o/ /des na de'i tshe bsil ba yin pa las/ tsha bar 'gyur ba dang / yang ba las lci bar 'gyur ba dang / 'khru ba yin pa las mkhregs par 'gyur ba ste/ 'di dag ni de'i 'gyur ba yin no/ /de la gong du tsha ba zhes smos pa ni gang la tsha ba yod pa de ni tsha ba ste/ pho ba'i me drod dang phrang nas gang 'ju bar gyur pa de ni/ 'ju ba'i gnas skabs phyed zhu tsam du gyur pa na/ rnam par tsha zhing mkhris pa skyed par byed pas yun ring du gnas kyi myur du 'ju bar mi byed do/ /de ni lci ba yin pa'am/ dngos po'i rang gi rang bzhin yin pas na/ de tsha ba dang ldan pa yin no/ /zhes sman dpyad kyi lung la brten pa rnams 'chad do/ /de la kha ra dkar po'i shing / /bsil dang mngar bas mchog yin la/ /zhes bya ba la/ de la zhes bya ba ni bu ram shing de rnams kyi nang nas kha ra dkar po'i bu ram shing ni bsil zhing dri ma med pa dang / mngar bas mchog ste dam pa yin no/ /des na 'di ni phul du byung ba nyid yin no/ /de yi 'og ma sbubs can yin/ /zhes bya ba ni/ kha ra dkar po'i shing de las bang shi ka zhes bya ba'i bu ram shing sbubs che ba bsil ba la sogs pa'i yon tan chung ba yin te/ bsil ba la sogs pa'i yon tan nyung zad cig dang ldan zhes bya ba'i don to/ /tshigs brgya pa dang kan ta ra/ /bal yul skyes sogs de las rim/ /cung zad tshwa bro bska ba dang / /dro bcas cung zad tsha ba skyed/ /ces bya ba la/ tshigs brgya pa la sogs pa'i bu ram shing rnams ni/ rim gyis 'og nas 'og tu bsil ba la sogs pa'i yon tan dman pa yin te/ sbubs can de las yon tan tshigs brgya pa dman pa yin la/ de bas kyang kan ta ra'i sa bya ba'i bu ram shing phra mo zhig yod pa dman pa yin la/ de bas kyang bal yul gyi dman pa yin te/ de bzhin du gzhan dag la yang sbyar bar bya'o/ /de rnams kyang cung zad lan tshwa bro ba dang / cung zad bska ba dang / cung zad dro ba dang / cung zad tsha ba skyed pa'i ngang tshul can yin no/ /sbu ba can lci bad kan skyed/ /sogs byed gcin ni sbyong byed yin/ /zhes bya ba la/ sbu ba can zhes bya ba ni bu ram phra mo dag gi dzi rnam grangs yin te/ de ni lci ba dang / bad kan skyed cing 'khrugs par byed pa dang / sogs byed ces bya ba nyes pa gsum sogs shing sdud par byed/ /ces bya ba'i don to/ /de bzhin gcin ni sbyong byed yin/ /zhes bya ba ni/ gcin sbyong zhing dri ma med par byed pa'am/ yang na gcin mang po 'byin par byed pa yin no/ /dkar po bad kan cher mi skyed/ / bshang dang gci ba bde bar 'byin/ /zhes bya ba la/ bu ram skam po dang po bskol ba na/ /rnyog pa dang bral bar byas pa ni/ bad kan cher mi skyed ces pa ste/ bad kan cung zad tsam zhig skyed/ /ces bya ba'i don te/ /de bzhin du/ bshang dang gci ba bde bar 'byin/ /zhes bya ba ste/ bshang ba dang gci ba bde blag tu phyi rol du 'byin zhing 'byung bar byed pa yin no/ /dmar nag phal cher srin bu khrag /rkang tshil sha dang bad kan skyed/ /ces pa ni/ bu ram dmar nag rnyog pa can ni khong pa'i 'bu srin mang du skyed pa la sogs pa byed pa yin no/ /rnying pa yid 'ong phan pa yin/ /zhes bya ba ni/ bu ram rnying pa lo mang po lon pa ni yid du 'ong / zhes bya ba ste/ yi gar 'ong zhing sems dga' bar byed pa dang / de bzhin du phan pa ste/ lus zungs rnams dang / gnod pa rnams la phan pa yin no/ /sar pa drod 'bri bad kan skyed/ /ces bya ba ni/ bu ram sar pa dag ni bad kan skyed cing me'i drod 'bri ba yin no/ /hwags dang khaN+Da kha ra dkar/ /rim gyis yon tan che ba ste/ /ro tsa glo gcong glo rdol dang / /khrag dang mkhris pa rlung sel yin/ /zhes bya ba la/ hwags zhes bya ba ni bu ram gyi dngas ma'i sha kha ra ste/ ga la zhes ming du grags pa'o/ /khaN+Da ni de las kyang dngas shing dri ma med pa'o/ /kha ra dkar po ni de bas kyang ches dngas shing rnyog pa med pa'i kha ra dkar po'o/ /de ltar na rim gyis yon tan che ba'o/ /de dag ni ro tsa ba ste khu ba 'phel bar byed pa dang / gcod dang glo rdol ba la sogs pa la phan pa yin no/ /ya ba ka ra tsha zhing mngar/ /bska ste yon tan de dang 'dra/ /zhes bya ba ni/ ya ba ka ra zhes 'jig rten na grags pa yin gyi/ gzhan du na ya shA ba ra zhes bya'o/ /la la dag ni byi tsher ba'i khu ba las byed do/ /zhes zer ro/ /de'i yon tan yang ro tsha ba dang / mngar ba dang / bska ba'i rgyus hwags la sogs pa de dang 'dra zhing mtshungs pa yin no/ /kha ra dkar kun tsha dang skom/ /skyugs bro brgyal dang khrag mkhris sel/ /zhes bya ba la/ kha ra 'di dag dang kha ra gzhan gang dag yod pa de thams cad ni tsha ba la sogs pa sel zhing 'joms pa yin no/ /bu ram shing gdus kha ra dang / /sbu ba can mchog tha ma yin/ /zhes bya ba la/ bu ram shing gdus pa ni bu ram shing gi khu ba gdus pa rnams kyi nang na kha ra ni mchog yin la/ dbu ba can zhes pa bu ram phra mo rnyog pa can ni tha ma yin no/ /sbrang rtsi mig phan gcod skom dang / /bad kan skyigs bu khrag mkhris 'joms/ /tshil chen mdze nad gcin nad skyug/ lud pa dbugs mi bde tshad sel/ /rma sbyong rma 'tsho chag grugs 'byor/ /rlung ni skyed par byed pa yin/ /rtsub cing bskal mngar ba ste/ /sbrang rtsi'i khaN+Da de dang 'dra'o/ /zhes bya ba la/ sbrang rtsi dag ni mig la phan zhing bsod pa yin pa dang / gcod pa zhes bya ba'i ngang tshul can yin pa ste/ bad kan dang mdud pa ltar 'dril te gnas pa de/ rang gi mtshan nyid rno ba las gcod cing 'jig par byed pa yin pa dang / de bzhin du skom pa la sogs pa sel zhing 'jig par byed pa dang / de bzhin du mdze nad dang gcin nad la sogs pa la phan par byed pa yin no/ /de bzhin du rma'i rnags pa dang / 'drul ba la sogs pa sbyong bar byed pas na/ rma sbyong zhes bya ba la/ 'dir 'tsho bar byed pas na rma 'tsho ste/ pags pa 'tshob cing mdog ma nyams par byed pa'o/ /chag grugs 'byor pa ni 'dis rma gnyis gcig tu 'byor pa dang / chag pa 'byor par byed pas na de skad ces bya'o/ /rlung skyed par byed pa ni rlung gi nad 'khrugs par byed pa'o/ /de bzhin du rtsub pa dang / ro bska ba dang mngar ba yin no/ /sbrang rtsi'i khaN+Da'ang de dang 'dra/ /zhes bya ba ni/ sbrang rtsi'i yon tan ji snyed yod pa de thams cad sbrang rtsi'i khaN+Da'i yon tan yang yin pas na/ de gnyis yon tan mtshungs shing 'dra ba yin pas shes par bya'o/ /tsha zhing tshas gdungs tsha bar ldan/ /tsha ba des ni bsod par 'gyur/ /zhes bya ba ni/ sbrang rtsi de tsha zhing zhes pa/ me la sogs pas bsros na/ des mi bsod cing 'joms par 'gyur ro/ /de bzhin du tsha gdungs zhes pa/ nyi tshan la sogs pa tsha bas gdungs pa'i sbrang rtsis bsod par byed do/ /de bzhin du tsha bar ldan zhes bya ba tsha ba'i dus sam/ tsha ba'i yul du sbrang rtsi zos na mi bsod bar byed do/ /de bzhin du tsha ba zhes bya ba/ me la sogs pas bskol zhing tsha bar byas pa'i sman dang lhan cig sbrang rtsi zos na yang mi bsod par byed do/ /skyugs sman sman mar mas gtong la/ /sbrang rtsi dro ba bkag pa med/ /ces bya ba la/ sbrang rtsi dro ba dag kyang skyugs sman gtong ba dang / sman mar mas gtong ba la dgag pa med de/ gang phyir de ni mi 'ju bar/ /myur du ldog bar 'gyur phyir ro/ /zhes bsdus pa las gtan tshigs bshad pa yin no/ /bu ram shing gi sde tshan no// //'bru mar rang gnas lta bu yin/ /de la til mar til dang mtshungs/ /gtso bo rno zhing khyab pa yin/ /pags pa'i nyes sel mig la gnod/ /tsha zhing rno la bad kan sel/ /skem po dag ni sha skyed cing / /sbom po'i sha 'bri mkhregs par 'ong / /rtug 'gags srin bu 'joms pa dang / /sbyar bas nad rnams thams cad sel/ /e raN+Da'i mar tsha zhing kha/ /zhu rjes mngar lci 'khru ba yin/ /rlig rlugs skrang rlung bad kan dang / /lto nad ldang dub rims rnams sel/ /'or nad sked pa gas pa dang / /lto ba ro rgyab nad la phan/ /e raN+Da ni dmar po'i mar/ /rno tsha dri nga rab 'byil 'greng / /yungs mar tsha dro rno ba dang / /bad kan rlung sel khu ba 'bri/ /yang zhing khrag mkhris skyed byed la/ /sha bkra mdze 'brum rmen bu sel/ /ba ru ra'i mngar bsil zhing lci/ /skran skyed rlung dang mkhris pa sel/ /nim mar rab tu tsha min kha/ /lto srin mkhris pa bad kan sel/ /zar ma le brgan rtsi yi mar/ /dro zhing pags nad bad mkhris skyed/ /zhag dang rkang ni rlung 'joms shing / /stobs dang khu chu bad kan skyed/ / sha ni rang dngos rjes mthun la/ /tshil yang de dag 'drar shes bya/ /til mar la sogs pa'i sde [(]tshen [,]tshan[)]no// //chang gi sde tshan brtsams pa'i dgos pa ni/ chang ni nad med par byed pa dang / /me'i drod skyed cing yi ga 'bye ba la sogs pa'i yon tan gyi tshogs rnams dang ldan pa'i phyir bstan pa yin no/ /de yang til mar dang thun mong gi yon tan cung zad yod pas/ til mar la sogs pa'i 'og tu chang thams cad kyi spyi'i yon tan smos pa ni/ chang ni drod 'bar yig 'byed/ /rno zhing drod skyed khong brta dga'/ /mngar bcas kha zhing tsha ba dang / /zhu rjes skyur zhing cung zad 'khru/ /bska bcas gdongs snyan nad med dang / /spobs skyed mdog 'gyur khong yang la/ /gnyid med pa dang gnyid che la/ /phan zhing khrag dang mkhris pa skyed/ /rigs 'thungs skem dang sbom phan zhing / /rtsub rno lus sgo khyab cing sbyong / /rlung dang bad kan sel ba yin/ /gzhan du bsten na dug dang mtshungs/ /zhes bya ba 'di ni chang thams cad kyi thun mong gi yon tan brjod pa yin te/ de la chang ngo cog thams cad ni drod 'bar bar byed cing me'i shas bskyed pas na drod 'bar ro/ /yi ga 'bye zhing zas la sred pa skye bas na/ yi ga 'byed ces bya ste/ 'bras chan la sogs pa 'dod pa skyed pa'o/ /rno ba ni lus zung rnams spyod par byed cing / tshigs kyi mtshams 'byor dam po lhod par byed pa'o/ /drod skyed pa ni nus pa dang ldan pa dang / khong brta ba ni lus rgyas par byed ba'o/ /dga' ba ni sems mgu bar byed pa'o/ /mngar bcas kha zhing tsha dang bcas/ /zhes bya ba ni/ ro cung zad mngar ba dang / cung zad kha ba dang / de bzhin du zhu ba'i rjes dang / ro cung zad skyur ba nyid yin pa dang / 'khru ba ste khong 'khru bar byed pa dang / bska bcas zhes bya ba/ cung zad bska ba'i ro dang ldan pa'o/ /de bzhin du gdangs snyan par byed pa'ang yin te/ gdangs snyan pa ni tshig gsal zhing gdangs mtho ba'o/ /nad med pa ni tha mal par gnas pa nyid de/ de byed pa dang / spobs pa ni smra ba las zhum pa med par 'gyur ba dang / mdog ste mdangs dang ldan la yang ba nyid dang / gnyid med pa dang / gnyid che ba la phan zhing bsod pa ni chang thams cad ma yin gyi/ gang bad kan la sogs pa 'phel bar byed pa ni gnyid med pa la phan te/ dper na 'bru'i chang la sogs pa lta bu'o/ /chang la la ni gnyid che ba la phan te/ gang bad kan la sogs pa sel bar byed pa sbrang chang la sogs pa lta bu'o/ /yang na mthu nyid kyis chang thams cad gnyid med pa dang / gnyid che ba la phan no/ /khrag dang mkhris pa skyed pa ni khrag dang mkhris pa'i nad sel bar byed pa'o/ /rigs 'thungs skems dang sbom phan zhing / /zhes pa ni mi skem po dang tsho zhing sbom pa la phan zhing bsod pa yin no/ /zhes spyir smos su zin kyang chang la la ni skem pa la phan pa yin la/ chang la la ni sbom pa la phan pa yin gyi/ sbom pa la phan pa de nyid skem pa la phan pa ni ma yin no/ /yang na zas la sogs pa dang ran par 'thungs pa'i dbang gis sam/ sbyor ba la sogs pa'i dbang gis sam/ rdzas kyi nus pa'i dbang gis thams cad kyang skem pa dang sbom pa la phan pa yin no/ /de bzhin du rtsub pa'i yon tan dang ldan pa dang / rno ba ni rtsa phra mo rnams la 'jug par byed pa'o/ /lus kyi sgo khyab cing sbyong ba ni bad kan dang / rlung dang / tshil dang / dri mas yongs su gang ba rnams dri ma med par byed pa'o/ /de bzhin du de ran par 'thungs na rlung dang bad kan dag kyang sel zhing 'joms pa yin no/ /de la ran pa zhes bya ba ni cha mnyam pa'i sbyor ba ste/ thun tshod dang / yul dang dus la sogs pa'i rnam pa shes par byas nas/ de dang rjes su gang mthun pa gang 'thung ba de ni/ de'i rigs pa'am ran pa yin no/ /de nyid kyis na gzhung las/ de bas 'di yi sbyor bshad pa/ /gang zhig bder gyur 'ba' zhig phyir/ /zhes bshad pa dang / de bzhin du nus stobs dang dus dang / yul dang / bdag nyid kyi rang bzhin gang yin pa dang / mthun pa'i grogs dang / nad kyi tshul dang / na tshod kyi rim pa shes par byas nas/ de dang rjes su mthun par 'thungs na bdud rtsi 'thungs pa dang mtshungs pa yin gyi/ de las gzhan par rigs pa dang mi ldan zhing / rnam par ma dpyad par 'thungs na dug dang mtshungs shing 'dra ba yin no/ /mi rigs par 'thungs pa ni dman pa'am/ log pa'am ha cang mang du 'thungs pa yin no/ /de yang bsdus pa chen po las chang la sogs pa bsten pa ni blo dang brtan pa dang / dran pa 'phrog par byed pa yin no zhes bshad do/ /chang sar lci zhing nyes skyed yin/ /chang rnying de las gzhan du byed/ /ces bya ba la/ chang de thams cad las chang sar pa ni lci zhing nyes pa rnams 'khrugs la skyed par byed pa yin no/ /chang rnyings shing grungs mar gyur pa/ kha dog dang dri dang ro phun sum tshogs pa dang ldan pa'i chang thams cad ni sngar bshad pa'i chang sar pa de las gzhan du byed de/ de yang zhing nyes pa sel bar byed pa yin mod kyi/ 'on kyang mkhris pa ni skyed la/ rlung dang bad kan ni 'joms pa yin par sngar bshad pa yin no/ /tsha ba'i spyod par ldan mi btung / / sun cing bkres nyen nad pas min/ /shin tu rno min sar pa dang / /legs par ma bslangs rnyog can yin/ /zhes bya ba ni/ chang de thams cad tsha zhing dro ba'i kun tu spyod pa dang ldan pa'i skyes bus btung bar mi bya'o/ /de la spyod pa zhes bya ba ni bya ba ste/ de yang zas dang spyod lam gyi tshul te/ zas tsha ba zos pa'i rjes dang / so ga la sogs pa tsha ba'i dus dang / nyi tshan la sogs pas gdungs shing tsha ba'i skyes bus btung bar mi bya'o/ /de bzhin du chang gis sun pas de'i tshe/ btung bar mi bya ba dang / de bzhin du bkres pas nyen zhing zil gyis mnan pa'i mis mi btung ba dang / de bzhin du nad pas btung bar mi bya ste/ de bas na lus kyi gnas skabs las dpags te/ chang mi btung ba yang yod pas shes par bya'o/ /de bzhin du shin tu rno zhing tsha bas mi btung ba dang / shin tu gzhon zhing 'jam pas ni mi btung ba dang / de bzhin du legs par ma bslangs pa ste/ rgun 'brum dang / bu ram shing dang / 'bras bu dang / sbrang rtsi la sogs pa dang / ta ki la sogs pa'i rtsi nyung zad dang sbyar zhing / chang du legs par ma reg pa yang btung bar mi bya'o/ /rnyog can yin zhes bya ba ni rdul dang / 'dam rdzab dang / bong ba dang / rdo'i gseg ma la sogs pa dang ldan pa dang btung bar mi bya'o/ /'bru chang skran dang dmu rdzing dang / /rtug skem glo gcong sel ba dang / /rlung 'joms tshil dang khrag skyed cing / /gcin bder 'byin dang bad kan skyed/ /ces bya ba ni/ chang gang 'bras sA lu btags pa las byas pa/ ska zhing dkar ba de'i yon tan 'di dag yin te/ chang des skran la sogs pa sel zhing 'joms pa dang / tshil skyed par byed pa dang / de bzhin du lci zhing rlung 'joms par byed pa dang / tshil la sogs pa skyed cing 'phel bar byed do/ /chang dngas yon tan de 'dra bas/ /yid 'ong yang zhing rno ba dang / /gzer dang lud pa dbugs mi bde/ /skyug bro bshang 'gags sbos cham 'joms/ /zhes bya ba ni/ chang gi dngas ma steng du byung ba rnyog pa med pa chu lta bu de la ni dngas ma zhes bya ste/ de yang lung las/ dngas ma chu zhes bya bar bshad/ /'dzag bde de bzhin chang yin la/ /de 'og bska ba zhes bya ste/ /de yi 'og ma snyigs mar bshad/ /ces 'byung ba yin no/ /chang gi dngas ma de ni snga ma'i chang ska ba'i yon tan gang yin pa de thams cad dngas ma 'di yang yin pas/ yon tan snga ma de dang 'dra bar shes par bya ba dang / de ni yang yid du 'ong zhing snying dga' bar byed pa dang / de bzhin du yang ba dang rno bas bad kan dang tshil la sogs pa sel bar byed pa dang / gzer ba la sogs pa yang 'joms shing sel ba yin no/ /ba ru'i chang ni yang zhing phan/ /shin tu ra ror mi 'gyur zhing / / rma dang skya rbab mdze nad la/ /ha cang gnod par mi 'gyur zhing / /zhes bya ba la/ ba ru ra las sbyar ba'i chang ni ba ru ra'i chang ste/ de ni yang ba dang phan pa dang / shin tu ra ror mi 'gyur zhing / /zhes pa shas cher myos par mi byed pa dang / de bzhin du rma dang skya rbab kyi nad dang / mdze nad dag la de chang gzhan ltar ha cang mi gnod pa yin no/ /rdzas bzhin yon tan rjes mthun chang / /chang gi yon tan kun las lhag /pho nad skya rbab mdze gzhang 'brum/ /lus skem skrang 'or dmu rdzing rims/ /skran dang srin nad mcher nad sel/ / ro ni bska zhing tsha rlung skyed/ /ces bya ba la/ rdzas bzhin yon tan rjes mthun chang / /zhes bya ba ni/ rdzas gang bskol nas byas pa'am/ mnan nas byas pa na/ de rnams kyi yon tan de de'i rjes su 'gro zhing rjes su 'brang ba ste/ de'i yon tan dang ldan par 'gyur ro/ /zhes bya ba'i don to/ /de yang chang gi yon tan kun las lhag ces bya ba yin te/ drod skyed pa la sogs pa'i chang gi yon tan thams cad las yon tan lhag cing mang ba yin pa dang / de bzhin du pho ba'i nad la sogs pa'i gnod pa rnams sel zhing 'joms pa yin no/ /de'i ro ni bska ba dang tsha ba yin zhing rlung skyed par byed pa yin no/ /rgun chang nad sbyong snying la phan/ /shin tu dro min mngar zhing 'khru/ /mkhris rlung cung zad skyed skya rbab/ /gcin nad gzhang 'brum srin nad sel/ /zhes bya ba la/ rgun 'brum las byas pa'i chang ni rgun chang ste/ de ni nad sbyong zhing sel ba yin te/ shin tu rno ba yin pas bad kan la sogs pa sel ba yin no/ /snying la phan pa ni snying dga' bar byed pa'o/ /shin tu dro ba ma yin pa ni cung zad dro ba'o/ /mngar ba ni ro mngar ba'o/ /de bzhin du 'khru bar byed pa dang / mkhris pa dang rlung cung zad skyed pa ni/ chang gzhan la ltos na skyed pa yin no/ /de bzhin du skya rbab la sogs pa sel ba yin no/ /bu ram chang ni gcin rtug 'gags/ /'byin zhing ngoms la drod skyed yin/ /zhes bya ba la/ bu ram las byas pa'i chang gi bye brag gis ni bu ram chang ste/ de ni gcin rtug 'gags pa 'byin pa yin te/ gcin 'gags pa dang rtug pa dang 'phyen 'gags pa 'byin zhing phyi rol du bde bar byed pa yin no/ /de bzhin du/ tshim zhing ngoms par byed pa dang / me'i drod gsal bar byed cing skyed par byed pa yin no/ /bu ram shing chang rlung mkhris skyed/ /snum dang bad kan las byung 'joms/ /tshil 'or dmu rdzing gzhang 'brum sel/ /de las khu ba bskol mchog yin/ /zhes bya ba la/ bu ram chang ni bu ram shing gi khu ba bskol ba dang / ma bskol ba las byung ba ste/ de yang lung las/ bu ram shing khu'i bu ram chang / /rlon pa yis ni nus pa bsil/ /bskol ba bskol ma'i chang zhes bya/ / zhes bshad pa yin no/ /bu ram chang de ni rlung dang mkhris pa skyed par byed pa yin la/ snum las byung ba dang / bad kan las byung ba ni 'joms shing sel bar byed pa yin no/ /de bzhin du tshil dang / 'or nad dang / gzhang 'brum dang / sbos pa sel ba yin no/ /de las zhes pa bu ram shing las byung ba'i chang gnyis kyi nang nas khu ba bskol ba'i chang ni mchog ste dam pa yin no/ /sbrang chang 'grib byed rno ba ste/ /gcin nad cham pa lud pa sel/ /zhes bya ba ni/ sbrang rtsi dang da ta ki la sogs pa sbyar ba las byas pa'i chang ni sbrang chang ste/ de ni 'grib byed ces bya ba tshil la sogs pa 'grib par byed cing / rno ba las lus zungs rnams sel bar byed pa yin no/ /de bzhin du gcin nad dang / cham pa dang lud pa'i nad sel zhing rgyal bar byed pa yin no/ /tsha ni khrag mkhris bad kan dag/ 'ju zhing rlung ni snyoms byed la/ /rab tu tsha zhing rno rtsub skyur/ /yid 'ong yi ga 'byed cing 'khru/ /drod skyed reg na bsil ba dang / /skya rbab srin sel mig la gnod/ /ces bya ba ni/ chang thams cad phal cher ro lnga dang ldan pa yin du zin kyang / dus las yol zhing gzhan du gyur pa na/ gang gi tshe de'i mngar ba la sogs pa'i ro bzhi yal nas ro skyur ba 'ba' zhig shas cher 'phel zhing bdo ba de'i tshe/ de ni tsha zhes bya ste/ de nyid kyis na chang thams cad ni zhu ba'i rjes skyur ba yin no/ /zhes bstan pa yin no/ /de yang lung las/ shin tu skyur ba tsha zhes bshad pa yin no/ /de'i phyir chang thams cad ni dus yun ring po lon pa dang / shin tu skyur bar 'gyur ba ni tsha zhes bya'o/ /zhes sman dpyad kyi lung la brten pa rnams zer ro/ /tsha de ni khrag dang mkhris pa dang bad kan dag 'ju bar byed cing rang gi gnas nas skyod par byed de/ tha dad pa las 'dres pa yin par shes par bya'o/ /de bzhin du rlung snyoms par byed pa yin pas na/ rlung ni snyoms byed la zhes bya ste/ 'dis snyoms pa'am zhi bar byed pa'o/ /de yang lam gzhan na gnas las byung ba drangs nas/ rang gi gnas su gnas par rdzas gang gis byed pa de ni/ rlung 'joms par byed pa ste/ lam log pa na gnas pa rang gi gnas su 'jog par byed do zhes bya ba'i don to/ /yang de ni rab tu rno ba dang / rtsub pa dang / skyur ba dang / yid du 'ong ba dang / yi ga 'byed par byed pa dang / khong 'khru ba dang / pho ba'i me drod skyed pa dang / reg pa bsil ba dang / bskus shing byugs na bsil bar byed pa dang / mig la gnod pa yin no/ /bu ram bu ram shing rgun chang / /tsha ni phyi ma phyi ma yang / /zhes bya ba ni/ bu ram la sogs pa'i tsha ni phyi ma ji lta ba bzhin du yang ba yin te/ de yang bu ram chang gi tsha las bu ram shing gi khu ba'i tsha yang ba yin la/ bu ram shing gi khu ba'i tsha bas ni chang gzhan gyi tsha ba yang ba yin la/ chang thams cad kyi tsha bas ni rgun chang gi tsha ba yang ba yin par shes par bya'o/ /sdong bu rtsa ba 'bras sogs las/ /mnan byas de dang 'drar shes bya/ /zhes bya ba ni/ de la tsha de rnams nyid dang / sdong bu dang / rtsa ba dang / 'bras bu la sogs pa mnan pa las byung ba yang de dang 'dra bar shes par bya'o/ /tsha shin tu dro ba'i nus pa dang stobs su ldan pa dang 'dra bar sdong bu la sogs pa las mnan te byas pa yang de dang 'dra ba'o/ /sogs pa'i sgras ni shun pa dang lo ma la sogs pa bsdu'o/ / rdo gu sogs las bzhur ba gzhan/ /dus kyi skyur po yang zas len/ /zhes bya ba ni/ rdo gu la sogs pa'i tshod ma'i rnam pa mnan nas skyur por byas pa de ni yang ba dang / zas len zhing yi ga 'byed pa yin la/ de bzhin du rdo gu dang / rtsa ba dang / 'bras bu la sogs pa'i dus ring por skyur por gyur pa dang / yang zhing zas len par byed pa yin no/ /des na de gnyi ga yang yi ga 'byed par byed pa yin no/ /'bras khu'i rang skyur 'khru rno tsha/ /mkhris pa skyed byed bskus na bsil/ /ngal dang rmya sel yi ga 'byed/ /drod skyed chu so'i nad sel yin/ /zhes bya ba la/ 'bras khu'i rang skyur ni 'bras kyi khu le mnan nas/ rang skyur du gyur pa'i btung ba kany+dzi zhes bya ba ste/ de ni chang dang / tshwa dang / skyur po dang / cung zad skyur bas sde tshoms 'di'i nang du bstan pa yin te/ ji ltar chang yo byad bsags nas nad pa de bzhin du rang skyur 'di yang byed pa dang / gzhan yang chu mang ba nyid kyis/ chang dang 'dra zhing reg pa bsil ba yin no/ /de 'khru ba ste/ khong 'khru ba yin no/ /de skad du lung las/ bshang ba la sogs gang po ni/ /'jig pas 'khru ba zhes bshad de/ /de las bzlog pa 'gags pa ni/ / rtug skam zhes ni bya bar bshad/ /ces 'byung ba yin no/ /rno ba ni bad kan la sogs pa 'jig pa'o/ /mkhris pa skyed pa ni mkhris pa 'phel bar byed pa'o/ /bskus na bsil zhes bya ba ni/ lus kyi phyi rol nas bskus na tsha ba sel ba'o/ /ngal rmya sel zhes bya ba ni/ rtsol zhing las su byed pa la sogs pas zhum zhing zhan par gyur pa ni/ ngal ba sel zhes bya ba la sogs pa mi byed par lus zhum zhing nyam chung ba ni rmya ba zhes bya ste/ de dag sel bar byed pas na/ ngal ba dang rmya sel zhes bya'o/ /yi ga 'bye ba ni zas 'dod pa'i ngang tshul can no/ /yi ga 'chus par byed pa nges par 'joms pa yin pa'i phyir drod skyed pa'o/ /chu so'i nad sel zhing zhes bya ba ni/ lgang pa'i nad sel zhing 'byin par byed pa yin pas na de skad ces bya'o/ /mas gtong la phan yid du 'ong / /yang zhing rlung dang bad kan 'joms/ /zhes bya ba la/ de bzhin du mas gtong ba la phan pa zhes bya ste/ mas gtong ba ni rlung las gyur pa'i nad la/ sbu gu nas mar khu la sogs pa bshang ba'i lam nas 'dzud pa ste/ de ni 'og nas bshad par bya'o/ /gzhan dag ni go sla'o/ /ba gcin ra lug ma he dang / /glang po rta bong rnga mo'i gcin/ /mkhris skyed rtsub cing rno la tsha/ /'thungs rjes tsha bro ro tsha ste/ /srin nad 'or nad dmu rdzing sbos/ /gzer dang skya rbab bad kan rlung / /dug skran sha bkra yig 'chus/ /mdze dang gzhang 'brum myur du 'joms/ /zhes bya ba ni/ ba gcin la sogs pa'i gcin rnam pa brgyad 'dir bstan pa ni dro ba dang rno ba'i yon tan mang bas/ chang dang cha mthun pa yod pa bshad pa yin la/ rnam pa de brgyad char yang mkhris pa skyed ces bya ba ste/ mkhris pa 'phel bar byed pa dang / rtsub pa dang / rno ba dang / tsha ba yin zhing 'thungs pa'i rjes lan tshwa bro ba gang yin pa de ni 'thungs rjes tsha bro zhes bya ste/ 'thungs pa dang ro gzhan gyi rjes la lan tshwa bro ba yin la/ de yang gsal ba dang mi gsal bar bshad do/ /de la ro ni gsal zhes bya/ /mi gsal ba ni 'thungs rjes ro/ /mthar gsal bar yang 'dod pa yin/ /zhes bshad pa yin no/ /de bzhin du ro las tsha ba yin pa dang / srin bu la sogs pa 'joms shing yang bar 'gyur ba yin no/ /de ltar chu bo bu ram shing / /til mar chang gi sde tshoms rim/ /gsher pa'i rdzas phyogs gcig pa 'di/ /rags rim ji bzhin bstan pa yin/ /zhes bshad pa ni/ de ltar zhes bya ba bshad ma thag pa'i rnam pas chu dang 'o ma la sogs pa gsher ba'i rdzas kyi sde tshoms kyi tshogs kyi rim pa'i go rims bstan pa dang / bshad pa'i tshul ji lta ba phyogs gcig ces pa/ yan lag gi phyogs gcig gam/ cung zad tsam bstan pa yin gyi/ gsher ba'i rdzas mtha' dag ma lus pa bstan cing bshad pa ni ma yin te/ de dag ni rags rim ji bzhin bstan pa yin/ zhes bya ba ste/ rags shing sbom pa ma bor ba tsam du rags rim mthong ba bstan pa yin gyi/ zhib tu phra ba las rnam par dpyad pa ni mtha' yas pa yin no/ /de bas cung zad tsam zhig kho bos smras pa yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u lnga pa'i rnam par bshad pa'o// //de nas kha zas kyi tshul brtag cing shes par bya ba'i le'u bshad par bya'o/ /zhes bya ba la/ 'di'i 'grel pa ni 'di yin te/ gna' dang po 'jig rten chags pa'i dus su dang po ni chu nyid byung ba yin la/ de'i 'og tu ni zas byung ngo / /de'i 'og tu ni sems can byung ba yin no/ /de ltar na 'di'i rjes thogs la kha zas kyi tshul brtag cing shes par bya ba'i le'u brtsams pa yin no/ /de la zas kyi rang bzhin gyi tshul ni g.yos su byas pa dang / g.yos su ma byas pa ste/ de'i ro dang / nus pa dang / zhu ba'i rjes dang / mthu stobs dang / yon tan la sogs pa dang / de brtag cing shes par bya ba ni khong du bcud pa ste/ de la phan par byed pa'i le'u gang yin pa de bshad par bya'o/ /de la zas ni gang bza' bar bya ba ste/ 'bru la sogs pa'o/ /'bru yang gra ma can dang / gang bu can gyi dbye bas rnam pa gnyis so/ /de las kyang gra ma can gtso bo yin pas dang por bstan te/ de gtso bor gyur pa ni mang du dgos shing zhes pa yin gyi/ gang bu can gyi 'bru ni sran tshod la sogs pa nyid kyis cung zad dgos pa'i phyir gtso bo ma yin/ de bas na 'dir smras pa ni/ rtsa snar 'bras chan ka ma li/ /drug cu pa dang bya yis blangs/ /sgron bu'i mchu dang rtse rnon dang / /ro dra'i 'bras 'dra dri bzangs dang / /pa tang ga dang gser mdog can/ /gang gzhan 'bras ni bzang po rnams/ /ro mngar zhu rjes mngar zhing snum/ /ro tsa bshang gci ska zhing chung / /ro rjes bska zhing phan pa dang / /yang zhing gcin mang bsil ba yin/ /zhes bya ba ni/ 'bras gzhan dag las sA lu rtsa snar rak+ta li/ zhes bya ba la sogs pa ni gtso bo yin pas na dang por smos pa yin no/ /de la rak+ta sha li nas gser mdog can zhes/ Ta pa li zhes bya ba'i 'bras dang / gzhan yang gang dag de dang 'dra ba'i 'bras dkar po bzang po de thams cad ni ro mngar ba dang / zhu ba'i rjes mngar ba yin pa dang / snum pa dang / ro tsa zhing khu ba 'phel ba dang / bshang gci ska zhing bsgongs pa chung ngur byed pa dang / ro'i rjes bska zhing bska ba'i ro dang ha cang mi gsal zhing / shas chung ba dang ldan pa dang / phan zhing gnod pa sel ba dang / de bzhin du yang ba'i yon tan dang ldan pa dang / gcin mang zhing 'phel bar byed pa dang / bsil zhing grang ba'i nus pa yod pa ste/ yon tan de dag dang ldan pa yin no/ /de la rtse rno nang rtsa snar/ /mchog yin skom dang nyes gsum sel/ /zhes bya ba ni/ de la rtse mo rno zhing gra ma can de rnams kyi nang na rtsa snar te/ rak+ta sha li ni mchog dang dam pa yin la/ de ni skom dad sel ba dang / nyes pa gsum sel bar byed pa yin no/ /de yi 'og tu 'bras chan dman/ /de'i 'og ka ma la de'i 'og /ces bya ba ni/ rak+ta sha li de'i 'og tu ni 'bras chan te/ ma hA sha li zhes bya ba yon tan gyis snga ma las dman pa yin la/ ma hA sha li de'i 'og ka ma la ni de bas kyang yon tan chung ba yin no/ /de bas kyang de'i 'og ma drug cu pa la sogs pa de rnams rim gyis/ snga ma snga ma las phyi ma phyi ma yon tan chung ba yin no/ /nas 'dra ha yan char ma/ /ne+e sha da ka la sogs ni/ /ro mngar dri zhim lci la snum/ /zhu ba'i rjes gyur bad mkhris skyed/ /bshang dang gci ba thur du 'byin/ /snga ma snga ma smad pa yin/ /zhes bya ba ni/ nas 'dra zhes bya ba ya ba ka la sogs pa'i 'bras rnams ro mngar zhing bsil ba dang / de bzhin du/ nus pa dro zhing lci ba dang / /snum pa'i yon tan dang ldan pas snum pa dang / zhu ba'i rjes skyur ba nyid du smin par 'gyur ba dang / bad kan dang mkhris pa skyed cing 'phel bar byed pa dang / bshang ba dang gci ba thur du 'byin zhing phyi rol du 'byung bar byed pa dang / de bzhin du snga ma snga ma ste/ gang zhig gang las snga mar gyur zhing / gong ma yin pa de smad cing mchog ma yin pa nyid yin no/ /des na ni shad las char ma rdul can du skyes pa smad pa yin la/ char ma las ni ha yan smad pa yin la/ de las nas 'dra zhes pa smad pa yin te/ de ltar na thams cad las ya ba ka zhes pa nas 'dra smad pa yin no/ /'bras nang drug cu pa mchog ste/ /rtsa ser shun pa gnag pa dag /snum zhing 'ju sla brtan zhing mngar/ /nyes pa gsum sel bsil rtug 'dril/ /zhes bya ba ni/ 'bras sha sri ka zhes bya ba drug cu pa ni snum pa'i yon tan dang ldan pas na snum pa'o/ /brtan pa ni lus brtan par byed cing / de bzhin du ngal ba dang / dub pa dang / rmya ba sel ba yin te/ de nyid kyis na bcud kyis len dang / rims la sogs pa de dang der lus nyam chung zhing sbeg pa la sbyin pa nyid du bstan pa yin no/ /de ni 'bru rnams kyi yon tan gyi nang na mchog yin la/ de la yang rtsa ser ba dang / shun pa gnag pa'i dbye bas rnam pa gnyis yod la/ de gnyis las kyang shun pa gnag pa bas rtsa ser ba mchog yin no/ /de las rim bzhin thug chen dang / /shun gnag rgya skyegs tshigs ma 'dra/ /khyim bya'i sgong 'dra 'ur pa'i mig /phug ron 'bras dang su ka ra/ /'ba' ra ka dang ut+pal dmar/ / cin ston skyes da du ra/ /gan+d+ha na dang kun bin da/ /yon tan rim bzhin chung shes bya/ /zhes bya ba ni/ drug cu pa dang / 'bras chan la sogs pa nas/ kun bin da'i mthar thug pa dag ni go rims bzhin du yon tan dag chung zhing dman pa nyid du shes par bya'o/ /de ltar na thug po che'i yon tan las ni shun pa gnag pa dri sna bri ha zhes bya ba yon tan chung ba yin la/ de las ni rgya skyegs tshigs ma 'dra ba yin pas na/ 'bras thams cad las kun bin da yon tan chung ba nyid yin par shes par bya'o/ /'bras gzhan mngar zhing zhu rjes skyur/ /mkhris pa skyed cing lci ba dang / / gcin rtug mang zhing tsha ba yin/ /pa ta la nyid nyes gsum skyed/ /ces bya ba ni/ 'bras gzhan zhes bya ba gong du ma bshad pa'i 'bras rnams ni ro mngar ba dang / de bzhin du zhu rjes skyur zhes pa/ zhu ba'i rjes skyur bar 'gyur ba dang / mkhris pa skyed cing 'phel ba dang / lci ba dang / rtug pa mang bar 'gyur ba dang / tsha ba yin zhes bya ba drod skyed pa ste/ 'dir tsha ba'i sgra ni drod skyed pa la bya'o/ /mkhris pa ni ma yin te/ gong du mkhris pa skyed ces smos pa'i phyir ro/ /pa ta la nyid nyes gsum skyed/ /ces bya ba ni/ pa ta la zhes bya ba'i 'bras bu ni nyes pa gsum char skyed pa yin te/ gnod pa gsum shin tu 'khrugs pa yin par shes par bya ste/ nyes pa gsum skyed pa nyid kyis ni 'di bza' ba bkag pa yin no/ /ci tse khre dang ni ba ra/ /khre rgod sne'u 'bras sogs bsil yang / /rtsa 'bru de dag rlung skyed cing / /khong rtsub bad kan mkhris pa sel/ / zhes bya ba ni/ ci tse la sogs pa'i rtsa can gyi 'bras bu ni bsil ba ste grang ba'i nus pa yod pa dang / yang ba dang rlung skyed cing 'phel bar byed pa dang / de bzhin du khong rtsub cing 'khrugs pa dang / bad kan dang mkhris pa sel zhing 'joms pa yin no/ /de la khre ni brta byed lci/ /lus kyi chag grugs 'byor bar byed/ /ces bya ba ni/ de la rtsa can gyi 'bru de rnams kyi nang nas khre ni lus brta bar byed pa dang / lci ba dang lus kyi yan lag gi chag grugs 'byor cing 'tsho bar byed pa yin no/ /khre rgod mchog tu 'khru gcod cing / /reg na bsil la dug sel yin/ /zhes bya ba ni/ rtsa can gyi 'bru'i nang nas khre rgod de/ /ko tra ba ni shin tu yang 'khru ba gcod cing / sdud pa'i ngang tshul dang / reg na bsil ba ste/ phyi rol du bsku ba la sogs pa la sbyar na/ reg na bsil ba nyid kyis tsha ba sel bar byed do/ /dug sel zhing 'joms pa yin pas na/ dug sel yin zhes bya'o/ /nas ni rtsub bsil lci la mngar/ /cung zad khong 'khru bshang rlung 'phel/ /ro tsa brtan byed gcin dang ni/ /tshil dang bad kan mkhris pa sel/ /cham pa lud pa dbugs mi bde/ /da rgan lkog nad pags nad sel/ /zhes bya ba ni/ nas ni rtsub pa'i yon tan dang ldan pas na rtsub pa'o/ /de bzhin du lci ba dang / ro mngar ba dang / cung zad khong 'khru ba dang / bshang ba dang / rlung 'phel zhing skyed pa yin te/ de nas bshang ba zad pa dag la drang srong dag gis 'di'i sbyor ba bshad pa yin no/ /de bzhin du ro tsa ba dang lus brtan par byed pa dang / gcin dang tshil la sogs pa sel zhing 'joms par byed pa yin no/ /nas rgod cung zad dman pa yin/ /zhes bya ba ni/ nas dang dbyibs 'dra ba las/ shin tu phra ba la ni nas rgod ces bya ste/ de ni nas kyi yon tan las dman zhing zhan pa yin no/ / de ni 'jig rten na nas 'dra zhes ming du grags pa'o/ /smyig skyes 'bras nas rtsub cing tsha/ /zhes bya ba ni/ smyig ma las skyes pas na smyig skyes pa ste/ 'od ma'i 'bras bu'i nas zhes lung las bshad pa'o/ /smyig ma las byung ba'i nas de ni smyig ma'i 'bras bu nas 'dra ba de rtsub pa dang / de bzhin du tsha ba'i nus pa dang ldan pa yin no/ /gro ni ro tsa snum bsil lci/ /'tsho byed rlung dang mkhris pa sel/ /chag grugs 'byor byed mngar ba dang / /sha mkhregs byed cing cung zad 'khru/ /zhes pa la/ gro ni ro tsa ba ste/ bud med la phod par byed pa dang / snum pa dang bsil ba la sogs pa'i yon tan dang ldan pa yin no/ /nan di mu kha ro bska zhing / /bsil zhing mngar yang phan pa yin/ /zhes bya ba la/ nan di mu kha ni phran pa ste/ gro'i rigs su gtogs pa phra zhing ring ba yin te/ de ni bsil zhing ro mngar ba dang / bska ba dang yang ba'i yon tan dang ldan zhes gnod pa dang / dri ma rnams la phan zhing bsod pa yin no/ /gra ma can gyi 'bru sna tshogs kyi sde tshan no// //tshod ma bya ba'i don du/ gra ma can gyi sde tshan gyi 'og tu/ gang bu chags pa'i 'bru'i sde tshan ston pa yin te/ de'i phyir smras pa ni/ mon sran sde'u dkar sran chung sogs/ /gang bu can 'bru rtsa sgo 'gags/ /ro bska mngar zhing 'khru ba gcod/ /zhu rjes tsha la bsil zhing yang / /tshil dang khrag dang mkhris pa la/ /bskus shing blugs na phan pa yin/ /'di las mung+ga mchog rlung chung / /sran ma shin tu rlung skyed yin/ /zhes bya ba la/ mon sran sde'u ni sran mung+ga'o/ /mon sran dkar ru ni a d+ha ka zhes sam/ to ba ri zhes grags pa'o/ /sogs pa'i sgras ni sran ma la sogs pa yongs su bsdu'o/ /mon sran sde'u la sogs pa'i gang bu can gyi 'bru de rnams ni rtsa sbubs rnams kyi sgo 'gags par byed pas na/ rtsa sgo 'gags pa'o/ /de bzhin du ro ni mngar ba dang bska ba yin no/ /'khru ba gcod pa ni gang bshang ba la sogs pa sla ba'am/ 'bye ba bsdus shing gong por byed pas na 'khru ba gcod pa yin no/ /de bzhin du zhu ba'i rjes tsha ba ste/ pho ba'i me drod dang phrad pa las ro gzhan du 'gyur ba'o/ /de bzhin du bsil zhing yang ba dang / tshil dang khrag dang mkhris pa'i nad brtags te/ bskus pa'i lus la khu ba blugs na phan zhing bde bar 'gyur ro/ /'di las mung+ga mchog rlung chung / /zhes bya ba ni/ gang bu can gyi 'bru 'di dag gi nang na mung+ga ni zhes pa/ mon sran sde'u mchog ste dam pa yin pa dang / de bzhin du rlung chung zhes bya ba ste/ rlung cung zhig skyed pa yin no/ sran ma shin tu rlung skyed yin/ /zhes bya ba ni/ sran ma shin tu shas cher rlung skyed pa yin no/ /mon sran dkar po rlung skyed cing / /rtsub cing lci la bshang ba 'phel/ /zhes bya ba la/ mon sran dkar po rtsam sha zhes bya ba ni/ rlung shas cher skyed bar byed pa dang / rtsub pa dang / lci ba dang / bshang ba che zhing 'phel bar byed pa yin no/ /rgya sran nag tsha zhu rjes skyur/ /khu chu'i rde'u cham lud pa/ / dbugs mi bde rlung bad gzhang 'brum/ /'joms shing khrag mkhris mchog tu skyed/ /ces bya ba la/ rgya sran nag po ku lang+tha zhes bya ba ni tsha ba ste/ nus pa tsha ba dang ldan pa dang / zhu rjes skyur ba ste/ smin pa dang skyur ba zhes bya ba'i don to/ /khu ba las skyed pa'i rde'u ni khu chu'i rde'u ste/ de la sogs pa 'joms pa dang / de bzhin du khrag mkhris mchog tu shas cher spyod par byed pa yin no/ /nis pa pa ni rlung mkhris khrag /nu zho gcin 'phel lci zhing 'khru/ /tsha byed mig gnod khu ba 'bri/ /bad kan 'or nad dug rnams sel/ /zhes bya ba la/ nis pa pa zhes bya ba'i sran rgod ni rlung dang / khrag dang / mkhris pa dang / bud med kyi nu zho dang / gcin 'phel bar byed pa dang / lci ba dang / khong 'khru ba dang / lus tsha bar byed pa dang / de bzhin du mig la gnod pa dang / khu ba 'bri zhing zad pa dang / bad kan zad pa dang / 'or nad dang / dug rnams sel bar byed ba yin no/ /ma sha snum stobs bad kan skyed/ /bshang gci mkhris pa 'phel byed 'khru/ /lci zhing tsha la rlung 'joms dang / /khu ba 'phel zhing 'byin par byed/ /ces bya ba la/ ma sha zhes bya ba mon sran gre'u ni snum zhing stobs skyed pa la sogs pa'i yon tan dang ldan pa dang / de bzhin du khu ba mang du 'phel bar byed cing / khu ba de nyid mtshan gyi lam nas phyir 'byin par byed do/ /ka kan du la kha sral phre'u/ /yon tan mon sran gre'u dang 'dra/ /zhes bya ba la/ ka kan du la zhes bya ba ni/ ming 'di nyid 'jig rten pa la grags pa yin no/ /kha sral phre'u ni sran ma ad ma ku pa ta ste/ sa la 'bying bar skye ba'o/ /'bru de dag gi 'bras bu ni mon sran gre'u dang yon tan bar shes par bya ste/ sran ma ma sha la yon tan gang dag yod pa de thams cad dang ldan pa'i don to/ / til 'bru dro zhing pags pa 'jom/ /bsil zhing skra dang stobs skyed pa/ /lci zhing gcin nyung zhu rjes tsha/ /yid gzhungs drod skyed bad mkhris skyed/ /ces bya ba la/ til gyi 'bru ni dro ba ste/ nus pa dro ba dang / pags pa 'jam zhing mnyen par byed pa dang / bskus na reg pa bsil ba dang / skra skye ba dang / stobs skyed pa dang / de bzhin du lci ba dang / gcin nyung ngur byed pa dang / de bzhin du zhu ba'i rjes tsha ba dang / yid gzhungs pa dang / me'i drod skyed cing bad kan dang mkhris pa 'phel zhing skyed pa yin no/ /zar ma snum mngar kha zhing dro/ /lci zhing bad kan mkhris pa skyed/ /mig gnod khu skems zhu rjes tsha/ /zhes bya ba la/ zar ma'i 'bras bu ni snum pa dang / ro mngar zhing kha ba dang / nus pa dro ba dang / lci zhing bad kan dang mkhris pa skyed par byed pa dang / de bzhin du mig la gnod pa dang / khu ba skems shing zad pa dang / zhu ba'i rjes tsha ba yin no/ /le brgan rtsi 'bras de dang 'dra/ /zhes bya ba ni/ me tog le brgan rtsi'i sa bon yang bshad ma thag pa'i zar ma'i yon tan dang nyes pa cha mtshungs pa yin par shes par bya'o/ /gra ma can las nas rgod dang / /ma sha gang bu can tha tshad/ / ces bya ba la/ sngar gyi gra ma can rnams kyi tha chad ni nas rgod yin la/ gang bu can 'di dag gi nang na ni mon sran gre'u ste/ ma sha tha chad yin par shes par bya'o/ /'bru yi gsar thog bad kan skyed/ /lor lon 'bru ni yang ba yin/ /zhes bya ba ni/ gra ma can gyi 'bru dang / gang bu can gyi 'bru gsar thog lor ma lon pa ni bad kan skyed cing 'phel bar byed de/ rtsa sbubs rnams nas sla zhing 'dzag pa las mngon par phyogs par zhu ba'i tshul gyis bad kan skyed pa yin la/ don gyis na rnying pa ni bad kan sel ba yin no/ /lor lon zhes pa lo gcig 'das pa'i 'bru thams cad ni yang ba yin pas/ 'bru gsar pa lci bar bshad du zin kyang / lci ba nyid yin par don gyis ston pa yin te/ lo gcig lon pa 'dis lci ba 'ba' zhig dang bral ba yin gyi/ nus dang bral ba ni ma yin mod kyi/ 'on kyang snum pa'i yon tan rim gyis nyung zad 'bri ba yin gyi/ de la rtsub pa zhes bya ba'i gnas skabs gzhan du gyur pa ni ma yin no/ /de yang rgyud gzhan dag las/ lo gcig lon pa'i 'bru rnams kun/ /lci ba dag dang bral 'gyur gyi/ /de yi nus pa spong ma yin/ /de 'og rim gyis nus dang bral/ /zhes bshad pa yin no/ /myur skye de bzhin sran ma ni/ /spun med legs brngos tshod ma yang / /zhes bya ba la/ myur skye zhes bya ba ni myur du skye zhing smin pa'i 'bras bu ni yang ba yin pa dang / de bzhin du sran ma zhes pa/ mon sran sde'u la sogs pa'i gang bu can gyi 'bru rnams sbun med ces bya ba spun ma ma lus par bsil zhing shun pa med par byas pa dang / legs par brngos pa'i tshod ma'ang yang ba yin no/ /gang bur chags pa'i 'bru sna tshogs kyi sde tshan no// //gra ma can dang gang bu can gyi 'bru sna tshogs kyi sde tshan bstan pa de dag kyang / me la btsos pa la sogs pa'i g.yos su byas pa nyid kyis legs par dgos pa byed pa yin gyi gzhan du ni ma yin no/ /de bas na gra ma can dang gang bu can gyi sde tshan gyi 'og tu kha zas kyi sde tshan brtsams pa yin pas/ de'i phyir smras pa ni/ 'bras thug sla ska gar ba dang / /'bras chan rnams ni snga ma bzhin/ /yang ngo / /zhes bya ba ni 'bras thug slan te la sogs pa ni/ snga ma bzhin du yang ba yin par shes par bya ste/ des na 'bras ni yang ba yin la/ de las 'bras thug gar po yang ba yin/ gar po bas kyang 'bras thug skan te ches yang ba yin la/ de bas kyang 'bras thug slan te shin tu yang ba yin no/ /'dir yang thug pa la sogs pa las thug pa slan te mchog yin pas na dang por bstan te/ 'di zas kyi rnam pa thams cad las mchog tu gyur pa ni/ rlung lugs dang mthun par 'jug pa la sogs pa'i yon tan rnams 'di nyid la yod pa'i phyir mchog tu gyur pa yin no/ /de yang / pi pi ling dang / dong gra dang / se'u 'bru dang / 'bras yos la sogs pa las byas pa'i zas kyi rnam pa shin tu sla ba ni/ 'bras thug slan te zhes bya ste/ de yang tsa ra kas/ pi pi ling dang dong gra dang / /se'u 'bras yos chur bcas bskol/ /thug pa slar sbyar me drod skyed/ /rlung yang lugs mthun rgyu bar byed/ /ces bshad pa yin no/ /'bras thug slan te rkyang rkyang po/ /de las cung zad ska ba ni thug pa ska ba zhes bya la/ de bas kyang shin tu ska ba ni gar po zhes bya'o/ /de yang sman dpyad kyi lung las/ lci dang bral bar thug sla yin/ /lci ba dang ldan thug pa ste/ /lci ba ska ba gar po yin/ /nas thug 'bru ni tha dad gnas/ /zhes bshad pa yin no/ /'bras chan ni 'bras bskol ba'i chan la bya la/ de las sla ba ni/ dge zhing rlung ni lugs mthun byed/ /skom rmya nyes pa lhag ma 'joms/ /'ju zhing lus zungs mnyam par byed/ /rtsa sbubs mnyen byed rngul ba dang / /me yi drod ni skyed par byed/ /ces bya ba ni/ de la thug pa la sogs pa de rnams kyi nang nas 'bras thug slan te ni dge zhing nyes pa med cing bde bar gnas par byed la/ bsod cing phan pa yin no/ /zhes bya ba'i don to/ /rlung ni lugs mthun byed/ /ces bya ba ni/ lam log par zhugs pa rang gi rgyu ba'i gnas su 'jog par byed pa dang / mi bde ba bde bar byed do zhes bya ba'i don to/ /de bzhin du/ skom rmya nyes pa lhag ma 'joms/ /zhes bya ba ste/ skom gyis gdungs pa dang / rmya zhing nyam chung ba dang / nyes pa'i lhag ma rnams 'joms shing sel ba yin te/ skyug sman btang ba'am/ 'khru sman btang ba'am/ 'jam rtsi btang ba las nyes pa ste/ nad cung zad lus pa gang yin pa de ni nyes pa'i lhag ma ste/ skyug sman dang / 'khru sman dang / 'jam rtsi btang ba las nyes pa'i lhag ma yod pa la bya ba nyid du shes par byed pa ni 'di nyid yin par shes par bya ste/ nyes pa'i lhag ma cung zad yod pa'i phyir ni skyug sman dang / 'khru sman dang / 'jam rtsi mas gtong bar mi bya ste/ sbyor ba thal ches pa'i nyes pa'i 'jigs pa yod pa'i phyir ro/ /'ju zhing lus zungs mnyam par byed/ /ces bya ba ni/ lus zungs sam nyes pa rnams 'ju zhing smin par byed pas na 'ju zhing zhes bya'o/ /de bzhin du/ lus zungs rnams dang / rlung la sogs pa mnyam zhing snyoms par byed pas na lus zungs mnyam par byed ces bya'o/ /de bzhin du/ rtsa sbubs mnyen par byed pa ste/ rtsa'i sbubs kyi tshogs mnyen zhing 'jam par byed pa dang / de bzhin du lus las rngul 'byung ba dang / pho ba'i me drod skyed cing zas rnams bde bar 'ju bar byed pa yin no/ /thug ska bkres skom nyam chung rmya/ /lto nad rims nad sel ba yin/ /dri ma 'gags la phan pa ste/ /drod skyed nad ni 'ju bar byed/ /ces bya ba ni/ thug pa cung zad ska ba ni bkres nas rims nad kyi bar sel zhing 'joms pa yin te/ nyam chung ba ni 'tsho ba'i stobs chung ba'o/ /rmya ba ni rid cing skem pa'o/ /lto nad ni tshad pa'i nad du 'khru ba dang / gzer dang skran la sogs pa'o/ /dri ma 'gags pa la phan pa ni dri ma rnams bde bar 'byin pa la phan zhing snyoms pa'o/ /drod skyed pa ni 'dis me'i drod 'phel ba'o/ /'ju bar byed pa ni nyes pa rnams 'ju zhing smin par byed pa'o/ /thug gar 'khru gcod yi gar 'ong / /skem sel drod skyed rma dang mig /bkru sman rjes dang nyam chung dang / /snum 'thungs rjes la phan pa yin/ /zhes bya ba la/ thug pa gar po ni 'khru ba gcod pa ste/ bshang gci sla ba gong bur byed pa dang / yi gar 'ong ba ste/ yid du 'ong zhing dga' bar byed pa dang / skom sel zhes bya ba skom gyis gdungs pa zhi bar byed pa dang / drod skyed ces pa me drod skyed pa dang / de bzhin du rma byung ba dang / mig nad can dang / bkru sman dang skyug sman gyis sbyangs pa'i rjes la/ nyam chung zhing sbeg pa dang / mar la sogs pa'i snum bag 'thungs pa rnams la yang phan zhing bsod pa yin no/ /'bras chan legs bkrus khu btsags tshos/ /rlangs pa dang ni bral ba dang / /gang yang tsha ba'i sman rnams kyis/ / bskol ba'i 'bras tshos yang ba yin/ /zhes bya ba ni/ 'bras chan gang legs par bkrus pa ste/ dag par bkrus pa dang / de bzhin du khu btsags zhes pa ste/ phyed tsam btsags nas khu ba btsags pa dang / tshos pa ste legs par tshos pa dang / rlangs pa dang bral bar gyur pa yin no/ /gang yang tsha ba'i sman rnams kyis bskol ba'i 'bras tshos yang ba yin zhes bya ba ni/ gang tsha ba'i sman rnams tsha ba lnga la sogs pa'i chu dang bskol ba'i 'bras chan dang / brngos pas tshos par byas pa'i 'bras yos la sogs pa ni yang ba yin no/ / de las bzlog dang gang zhig ni/ /sha khu 'o ma bskol sogs lci/ /zhes bya ba la/ 'bras chan gang sngar bshad pa'i mtshan nyid las bzlog pa de ni lci ba yin no/ /gang ma bkrus pa dang / legs par ma btsags pa dang / ma tshos pa dang / grang mo dang / ma brngos pa dang / tsha ba'i sman gyi khu ba dang ma bskol ba de ni lci ba yin no/ /de bzhin du 'o ma dang / sha khu la sogs pa de yang lci ba yin no/ /sogs pa'i sgras ni tshod ma dang / til mar dang / mar dang / 'bras bu dang / ma sha dang / til dang / mon sran sde'u la sogs pa dang lhan cig bskol ba yang lci ba yin par shes par bya'o/ /de ltar rdzas dang bya sbyor dang / /tshad la sogs pas kun shes bya/ /zhes bya ba ni/ de ltar phyogs 'dis 'dir ma smos pa'i g.yos su byas pa'i zas kyi rigs rdzas dang bya ba dang / sbyor ba dang tshad la sogs pas thams cad bstan zhing shes par bya'o/ /de ltar rdzas las ni dper na 'bras sA lu dang / drug cu pa dang / mon sran sde'u dag ni rang bzhin gyis yang ba lta bu dang / 'o ma dang / bu ram shing dang / mon sran gre'u dang / rlan can gyi sha rnams rang bzhin gyis lci ba lta bu'o/ /des na 'bras sA lu rtsa snar las byas pa'i 'bras chan ni yang ba yin la/ 'o ma dang bu ram shing la sogs pa las byas pa ni lci ba yin no/ /bya ba ni las su bya ba ste/ las mngon par 'du byed pa'o/ /de yang chu dang me phrad pa'i mthu dang / snod la sogs pa las byung ba'o/ /de skad du drang srong tsa ra kas byas pa yin/ gang rdzas kyi rang bzhin rnams mngon par 'dus byas shing tshogs pa'i yon tan las skyes pa yin la/ yon tan de dag kyang chu dang me 'dus pa dang / bcing ba dang / dkrugs pa dang / dus dang / yul dang / gnas dang / mthu la sogs pa las byung ba yin no/ /zhes bshad pa yin no/ /sbyor ba ni rdzas dang lhan cig sbyor zhing sbyor ba'o/ /de yang drang srong tsa ra kas/ sbyor ba ni rdzas gcig gam/ mang po lhan cig sbyor ba ste/ de ni khyad par skyed par byed pa ni gang gcig ma yin no/ /zhes bshad pa'o/ /tshad ni srang tshad do/ /zho gnyis dang / srang gcig dang / phul dang / bre la sogs pa dang / de bzhin du tshad las lhag pa'i 'bras bu nges par shes par bya'o/ /sogs pa smos pa ni yul dang / dus dang rgyu'i yul/ lus kyi yan lag la sogs pa yongs su bsdu'o/ /de yang slon dpon gyis/ spyod dang lus kyi yan lag dang / /rang bzhin lus zungs bya ba dang / /mtshan ma tshad dang las su byas/ /tshad dag 'dir ni brtag par bya/ /zhes bshad pa yin no/ /'di'i dpe'i phyogs gcig bstan pa yang de nyid kyis mdzad pa yin te/ spyod pa rlan can chu dang mkha'/ /skam sar gnas pa spyod pa dang / /chu skyes rlan can skyes nyid dang / /chu dang rlan can la spyod gang / /gang yang lci ba za ba rnams/ /de dag thams cad lci bar bshad/ /skam sar spyod cing skam sar skyes/ /yang ba za ba yang ba yin/ /zhes bya ba ni gnas kyi yul lo/ /lus yan lag las brla lci dang / /de bzhin mgo dang ro stod de/ /dpyi las stod sha lci ba yin/ /de bas klad pa de bas mgo/ /rlig pa pags pa pho mtshan dang / /mjug to rked pa mjug rtse gzhang / /mcher pa rkang dang gzhungs pa ni/ /sha las shin tu lcir shes bya/ /zhes bya ba ni/ lus kyi yan lag go/ /rang bzhin gyis yang mung+ga dang / /de bzhin zla ba pin dza la/ /rang bzhin gyis lci mon sran gre'u/ /de bzhin phag dang ma he sha//zhes bya ba ste/ 'di ni rang bzhin no/ /khrag la sogs pa'i lus zungs ni/ /'og ma bzhin du lci ba yin/ /zhes bya ba ni/ lus zungs so/ /gang zhig myur zhing bya ba mang / /le lo can las khyad 'phags yin/ /zhes bshad pa ste/ 'di bya ba'o/ /pho dang mo yi mtshan 'dra las/ /lci dang yang bar 'gyur ba yin/ /zhes bya ba ni mtshan ma'o/ / rang gi rigs las tshad che ba/ /lci ba'o gzhan du yang ba yin/ /zhes bya ba ni tshad do/ /las su byas las go bzlog par/ /lci ba yang bar 'gyur shes bya/ /dper na 'bru las 'bras yos byas/ /phye las zan ni byas dang mtshungs/ /zhes bya ba ni/ las su byas pa'o/ / lci las nyung ngu bza' ba dang / /yang ba lhag par bsten pa ni/ /rdzas kyi lci dang yang ba dag /tshad kyi rgyur ni bshad pa yin/ /tshad ni rdzas dang mtshon pa dang / /me yi drod la ltos byas las/ /lci las nyung zhig sbyin par bya/ /yang ba 'grangs pa nyid du 'dod/ / ces bya ba ni tshad de/ de ltar na 'dir de dag thams cad brtag par bya ba yin no/ /khu ba nyams brtas tshim byed cing / /ro tsa mig phan rma la gnod/ /ces bya ba la/ khu ba ni sha khu la bya ste/ de yang sman dpyad kyi lung las/ khu ba khyad par med bshad par/ /sha khu yin par shes par bya/ /zhes 'byung ba yin no/ /bsdus pa las kyang / de la khu ba sha yi yin/ /sran khu 'bru yi 'bras bu dang / /kha ba'o rtsa ba til lde gu/ /cung zad skyur ba skyur po yin/ /de ni g.yos byas ma byas te/ /snum la sogs dang bral shes bya/ /zhes bshad pa yin no/ /khu ba de yang nyams brtas byed/ /ces bya ba ste/ lus nyams brtas shing rags par byed pa dang / tshim byed cing zhes pa/ lus zungs rnams rgyas shing 'phel bar byed pa dang / ro tsa zhing khu ba skyed pa dang / mig la phan zhing bde bar byed pa dang / rma la gnod pa ste rma 'joms par byed pa yin no/ /mon sran sde'u sbyangs dang rma/ /lkog ma mig nad dag la phan/ /zhes bya ba la/ mon sran sde'u mung+ga zhes bya ba bcos pa'i khu ba ni/ skyug sman la sogs pas lus sbyangs pa dang / rma byung ba dang / lkog man pa dang / mig na bdag la phan zhing bsod pa yin no/ /ku lang+tha'i khu rlung dang skran/ /ro smad slar gzer gnod pa sel/ /zhes bya ba la/ rgya sran ku lang+tha'i khu ba ni rlung lugs su 'byung bar byed pa dang / de bzhin du skran dang / ro smad chu so'i nad dag sel bar byed pa yin te/ de dag gi mtshan nyid ni skran ni nad gzhi las 'og nas bshad par bya'o/ /de bzhin du gzhung gzhan dag las kyang / gang zhig bshang dang gci ba'i gnas/ /ro smad dag tu nad byung zhing / /bshang gci'i lam ni 'gag snyam byed/ /de ni ro smad dpyi nad yin/ /bshang lam mdoms las byung ba'i nad/ /mi mthun rgyu bas gnod byed cing / /shugs kyis pho ba'i gnas su phyin/ /slar gzer ba zhes bya ba yin/ /zhes bshad pa yin no/ /til tshigs g.yos su sbyar byas nas/ /tshod ma skam dang myu gu dang / /skyur por chang bu bcug pa ni/ /mi gnod nyes skyed rmya byed lci/ /zhes bya ba la/ til gyi tshigs ma ni til btags pa'i lde gu'o/ /des g.yos su sbyar ba ni tshod ma nyid du byas pa'i rnam par 'gyur ba'o/ /tshod ma yang yin la skam pa yang yin pas na tshod ma skam mo/ /myu gu ni 'bras kyi khyi so 'thon pa'o/ /skyur por bcug pa'i chang bu ni skyur por chang bu bcug pa las tshod ma'i g.yos su byas pa'o/ /'di dag thams cad ni mig la gnod pa ste/ mig nad skyed pa dang / nyes pa skyed pa dang / rmya bar byed pa dang / lci ba yin no/ /de la skyur por chang bu bcug pa zhes smos pa ni/ chang bur bya ba skam po rkyang rkyang po ste/ sha la sogs pa las byas pa yin par gzung ste/ sngar skyur po smos pa'i skabs su rdzas gsher ba'i rnam pa 'dis zin pas/ 'dir la phug dang / yungs kar la sogs pa'i tshod ma bskol ba'i 'og tu phyis ske tshe'i phye ma bcug pa skyur zhing tsha la sogs pa rno ba la skyur po'i sgrar bshad pa yin no/ /dri 'dzin lus brta ro tsa zhing / /snum zhing stobs skyed yi ga 'byed/ /ces bya ba la/ dri 'dzin zhes bya ba ni zho dang spod sbyar nas dkrugs pa ste/ zho lag pas mnyes la shing tsha dang / sug smel dang / gan+d+ha b+ha dra dang / na le sham dang / sha ka ra'i phye ma btab la ras las btsags pa ni dri 'dzin zhes bya ste/ de ni lus brtas shing 'phel bar byed pa dang / ro tsa ba dang / snum pa'i yon tan dang ldan pa dang / stobs skyed par byed pa dang / yi ga 'chus pa yi ga 'byed par byed pa yin no/ /rgun chu'i btung ba ngal dub dang / /bkres sel tshim par byed cing lci/ /rtug skam gcin mang yi gar 'ong / /de yi yon tan sman bzhin blta/ /zhes bya ba la/ rgun chu'i btung ba ni btung ba tha dad yod pa de/ chu dang / sbrang rtsi dang / dri sna gsum dang / na le sham dang / rgun 'brum dang / 'bra go la sogs pa las byas pa dag ste/ des ni dub pa dang / bkres pa dang / skom pa sel zhing tshim par byed pa dang lci ba yin no/ /rtug skam ni bshang ba ska zhing 'dril ba'o/ / de bzhin du gcin mang zhing yi gar 'ong ba yin no/ /de'i yon tan zhes bya ba ni/ btung ba de dri sna gsum dang / bu ram dang / rgun 'brum la sogs pa sman dang / rdzas gang dang gang las byas pa/ rdzas de'i yon tan ci yod pa thams cad btung ba de la yod par shes par bya'o/ / 'bras yos skom dad skyug tshad 'khru/ /gcin mang tshil dang bad kan sel/ /lud pa mkhris pa nyer zhi byed/ /drod skyed yang zhing bsil ba yin/ /zhes bya ba la/ 'bras yos ni so ba rtse rnon la sogs pa las byas pa ste/ des ni skom dad la sogs pa sel zhing / zhi bar byed pa yin la/ de bzhin du lud pa dang mkhris pa nye bar zhi bar byed pa dang / pho ba'i me drod skyed pa dang / yang ba'i yon tan dang ldan pa dang / bsil zhing grang ba'i nus pa skyed pa yin no/ /srus leb lci zhing stobs skyed la/ /bad kan bshang ba sra byed yin/ /zhes bya ba la/ srus leb ces bya ba ni nas dang 'bras kyi srus brngos te/ spun pa med par byas pa gtun gyis brdungs pa la sogs pa ni srus leb ces bya'o/ /yang na srus brngos pa nyid la yang bya'o/ /yang na btags pa'o/ /de ni lci ba dang / stobs skyed pa dang / bad kan dang bshang gci sra zhing sgong bar byed pa yin no/ /nas yos rtug mkhregs rtsub pa dang / /skom zhing khong 'khrugs lci ba yin/ /zhes bya ba la/ nas brngos pa'i yos de ni rtug pa mkhregs shing rtsa sbubs 'gags par byed pa dang / rtsub pa dang skom dad skyed pa dang / khong 'khrugs pa dang bad kan la sogs pa dkrug cing sel ba dang lci ba yin no/ /nas phye khong yang bkres skom dang / /ngal dub mig nad rma la phan/ /skyo mar byas pa 'thungs pa yis/ /'phral du stobs ni skyed byed yin/ /zhes bya ba la/ nas phye ni nas las byung ba ste/ de ni khong yang ba dang bkres pa la sogs pa la phan pa dang / chu la sogs pa la sbyor zhing skyo mar byas te 'thungs pas/ 'phral du zhes pa de ma thag tu stobs skyed cing / lus brtas par byed pa yin no/ /chu dang phye spel mi bza' zhing / /dus gnyis mtshan mo'ang phrad med min/ /'grangs rjes mi bza' sos gcad min/ /ha cang 'grangs ches bza' mi bya/ /zhes bya ba la/ chu dang phye sbel zhing bza' bar mi bya ste/ dang por phye 'gams nas bar du chu/ de nas yang phye bza' ba dang / yang chu btung ba'i tshul gyis spel zhing bza' bar mi bya ste/ chu 'thungs nas bar bar du phye mi bza' bar bya ba'i don to/ /dus gnyis zhes bya ba'i dus gnyi gar phye mi bza' ba dang / mtshan mo'i dus su phye mi bza' ste/ de ni bkra mi shis par bshad do/ /de bzhin du phrad med pa ste/ chu la sogs pa gsher dang mi ldan par yang bza' bar mi bya ste/ 'grangs rjes zhes pa 'bras chan la sogs pas 'grangs pa'i 'og tu yang phye zan mi bza' ba dang mtshan mo'i dus su lag par bzhag pa'i zan gang sos gcad cing mi bza' ba dang / phye zan ha cang 'grangs ches pa yang bza' bar mi bya'o/ /'ba' cha nyams 'bri rtsub pa dang / bshang mkhregs mig la gnod pa yin/ /zhes bya ba ni/ til dang star ga'i 'bras bu la sogs pa btsir nas mar dang phral ba ste/ de ni nyams 'bri zhing rmya bar byed pa dang / rtsub pa dang bshang gci mkhregs shing 'byung dka' ba dang / mig la gnod pa yin no/ / sha g.yos spod sbyar snum zhing lci/ /stobs skyed sha 'phel brtas byed yin/ /zhes bya ba la/ sha g.yos spod dang sbyar ba ni bca' sga dang / 'u su dang go snyod la sogs pa dang sha btags pa ni g.yos su sbyar ba ste/ de yang lung las/ sha ni rlon pa btags nas ni/ /g.yos su sbyar ba sha g.yos te/ /zhes bshad pa yin la/ sha btags pa de yang shing kun dang / tsha dang / mar dang / til mar la sogs pa dang ci rigs par sbyar zhing btsos pa'o/ /de lta bu'i sha g.yos spod dang sbyar ba de ni/ snum pa dang / lci ba dang / stobs skyed cing sha 'phel ba dang brtas par byed pa yin te/ stobs ni nus pa'o/ /brtas pa ni lus zungs rgyas par byed pa'o/ /mung+ga g.yos sbyar lci ba dang / /sman gyi cha dang yon tan 'dra/ /zhes bya ba la/ sran mung+ga ste/ sde'u la sogs pa dang sbyar ba'i sha'i g.yos su byas pa ste/ phra mor btus nas brngos pa ni thams cad kyang lci ba dang / de bzhin du sman gyi yon tan mtshungs shing 'dra ba ste/ mung+ga la sogs pa'i yon tan gang yin pa de la g.yos su byas pa'i yang yon tan yod pa yin par shes par bya'o/ /khur ba mdag btsos dog le dang / /sa slang da nur rgya sol bsregs/ /khur ba 'di rnams rigs gcig kyang / /phyi ma phyi ma yang ba yin/ /zhes bya ba la/ 'bras kyi khur ba mdag ma la sogs par btsos pa ni rigs gcig pa ste/ 'bras la sogs pa'i rgyu gcig yin na yang / phyi ma phyi ma yang ba yin par shes shing rtogs par bya'o/ /de la rigs ni rgyu ste/ 'bras dang / gro dang / mon sran gre'u la sogs pa ste/ de dag ni rigs mthun pa la ltos nas rigs gcig pa zhes btags so/ /de nas 'bras la sogs pa'i skya khur mdag mar btsos par byas pa ni yang ba yin la/ de bas kyang dog le dang / sla ngar btsos pa ches yang ba dang / de bas kyang sa slang du btsos pa rab tu yang zhing / de bas kyang da nur btsos pa rab tu yang la/ rgya sol la bsregs pa ni yang ba'i mchog yin te/ 'bras sam gro'am nas la sogs pa gcig las bya na yang khyad par du yang ngo / /de la mdag btsos ni mdag ma'i shas chung ba la btsos pa'o/ /gzhan dag ni rlangs pa la btsos pa'o zhes zer ro/ /kha cig ni thal ba me ma mur du 'dug pa la bsregs pa yin no zhes zer ro/ /dog le me 'bar ba la btsugs pa'i lcags sam/ sa'i snod la bsregs pa'o/ /g.yos su byas pa'i kha zas kyi sde tshan no// //de la re zhig g.yos su byas pa'i kha zas btsos pa ste/ de yang sha dang tshod ma la sogs pa dang lhan cig sbyar zhing / de dang ldan na legs par dgos pa byed pa yin la/ zas ni mang du dgos pa yin pa ltar sha la sogs pa de lta ma yin no/ /de'i spags tsam du zad pa yin no/ /de bas na g.yos su byas pa'i kha zas kyi sde tshan gyi rjes la/ sha dang tshod ma'i sde tshan bstan pa yin no/ /de gnyis las kyang sha ni zas dang lhan cig zos na nyes pa med cing bsten par bya ba yin pas/ sha'i sde tshan dang por smos pa yin no/ /sha ba dgo ba ku rang ga /rkyang dang ri sha ri dwags ma/ /ri bong dang sgo tsa ru ska/ /ldang sgo la sogs ri dwags yin/ /zhes bya ba ni/ sha ba nas ldang sgo'i mthar thug pa rnams ni/ ri dwags kyi rigs su gtogs pa yin la/ sogs pa'i sgras ni mjug nag gam/ sring sha ta la sogs pa bsdu'o/ /de dag ni 'jig rten du grags par zad do/ /la ba bar ti bar ti ka/ /go tsa dmar dang gong mo dang / /sreg pa u pa tsa kra dang / /ka bin dza ra ku ru ba/ /ba ta ka dang ba ti ka /gong ma sreg dang rma bya dang / /khyim bya dang ni ba ra ka/ /go nan ta dang ri la gnas/ /shar ba dang in+d+ra pa/ /ri bya 'di dag gzas khron rko/ /zhes bya ba la/ la ba nas ri bya'i bar 'di dag ni gzas khron gyis rko ba zhes bya ba ni/ gang rko zhing rko zhing 'bru la sogs pa za bas na/ gzas khron rko zhes bya'o/ /'di dag zhes bya ba ni rnam pa'i tshig ste/ rnam pa de lta bu'i bya gzhan dag kyang yod do zhes ston to/ /shang shang te'u de tu ha/ /bung 'dra ne tsho sha ri ka/ /la twa khu byug ha ri ta/ /byi'u la sogs mchus rko yin/ /zhes bya ba la/ shang shang te'u nas byi'u'i bar ni mchus rko zhes bya ste/ mchus rko zhing za ba'i don gyis na mchus rko zhes bya'o/ /sogs pa'i sgras ni sha ta pa tra dang / khan dza ri la sogs pa'i bya rnams bsdu'o/ /sbal pa sbrul dang skyin gor dang / /byi thur la sogs khung na gnas/ /zhes bya ba la/ sbal pa nas byi thur bar ni khung na gnas pa yin te/ sa'i khung bu dag na gnas shing nyal bas na khung na gnas zhes bya'o/ /sogs pa'i sgras ni sha la ma ka la sogs pa bsdu'o/ /ba lang rta bong dre'u dang / /stag gzig seng ge dom spre'u/ byi ba byi la spyang ki dang / /sre mong dang ni dred dag dang / /wa dang 'phar ba khra dang ni/ /chun lag khra ljang bya rog khyi/ /bya rigs khra sngon bya ku ra/ /bya rgod 'ug pa ka ling ga /dung can ma du ha la sogs/ /gcan gzan bya dag rtsal mthus za/ /zhes bya ba la/ ba lang nas ma du ha'i bar gyi phyugs dang / gcan gzan dang bya dag ni rtsal dang mthus za ba zhes bya ba ste/ mngon mthon du stobs kyis 'phrog cing / sha la sogs pa rtsal mthus za bas na/ khron du rko ba dang / mthus za ba ni khron du rko ba la sogs pa'i tshul gyi bya ba dang ldan pas za bas na ming de skad ces bya ste/ de yang drang srong tsa ra kas/ 'thor zhing rnam par rko ba dang / /mchu yis rko bar byed pa dang / /rtsal mthus 'phrog cing za bas na/ /mthus za zhes ni de phyir bya/ /zhes bshad pa yin no/ /sogs pa zhes bya ba ni gzhan dag kyang bsdu ba'o/ /phag rgod ru ru ma he skyin/ /ro hi ta dang glang po che/ /mdzo rgod gnag rgod bse dang ni/ /smyig glang zhes grags ri dwags che/ /zhes bya ba la/ phag rgod nas smyig glang gi bar ni ri dwags chen po zhes bya'o/ /chur gnas ngang pa sa ra sa/ /chu skyar ka raN+Da bya bla/ /rgya dang khrung khrung ngur pa dang / /so bya ka dam pa sogs yin/ /zhes bya ba la/ ngang pa nas ka dam pa'i bar ni chu la gnas pa yin te/ de dag ni chu la spyod pa yin pas na chu la gnas pa'o/ /sogs pa'i sgras ni mgo dmar dang / pad+ma'i mig dang / sha la ri la sogs pa bsdu'o/ /nya ro hi ta pa ti na/ /nya phyis rus sbal kum b+hi ra/ /kar ta dung sram sham bu ka/ /nye ldang bar ma tsin tri ka//bu lu chu srin nag khra dang / /nya bo che ni byis pa gsod/ /dza ri tsi li tsi ma sogs/ /zhes bya ba la/ nya ro hi ta nas tsi li tsi ma'i bar ni/ chu las byung zhing chu la gnas so/ /sogs pa'i sgras ni rnam pa'i don te/ de lta bu dang gzhan dag kyang rnam pa du ma yod do/ /ka ra ka ta ni ku la ra zhes bya'o/ /sham bu ka ni phyung ba'i dung zhes bya'o/ /'di dag ni rnam grangs mi shes pa dag gis ni yul phyogs kun tu phyin pa dag las shes par bya ste/ gang gi phyir 'dir smos pa'i srog chags yul la lan med pas mi shes pa/ kha cig ni yul gzhan dag tu grags pa yod do/ /de bas na 'di rnams kyi ming gi rnam grangs yul tha dad pa na grags pa ni ri brags pa dang / nya pa la sogs pa las ming du ji skad grags pa gang yin pa las shes par bya'o/ /de ltar sha ni brgyad du bshad/ /ces bya ba ni/ de ltar zhes pa bshad ma thag pa'i rnam pas sha brgyad du zhes pa/ sha'i rnam grangs mdor bsdu na rnam pa brgyad yod par slob dpon gyis bshad cing bstan pa yin no/ /ra lug gzas kyi spyod yul ni/ /'dres pas rigs gcig nges ma yin/ /zhes bya ba la/ rigs brgyad po de dag gi nang nas/ ra dang lug gi nges pa med pa yin pas nges ba ma bshad de/ ci'i phyir zhe na/ spyod yul 'dres pa yin pa'i phyir te/ spyod yul 'dres pa ni rlan can dang / skam sa'i gzas kyi spyod yul 'dren mar gnas pa ste/ lan 'ga' ni gcig tu rlan can na gnas pa/ lan 'ga' ni skam sar gcig tu gnas pa yin no/ /de ltar na rgya bya yang de dang 'dra ba yin te/ de yang gnyi ga na spyod pa yin pa'i phyir ro/ /de yang drang srong tsa ra kas/ skam sa gsher sar gnas pa'i phyir/ /shin tu lci mngar tsha min pa'i/ /rgya bya'i sha ni rlung la sogs/ /nyes pa gsum po sel ba yin/ /zhes bshad pa yin no/ /de ltar na rgya bya ti ti ra zhes bya ba ni gnyi gar spyod pa yin du zin kyang / 'di yul gcig la nam yang gnas par dga' ba ma yin pas/ gzeb tu bcug pa ma gtogs par/ /gsher sa dang skam sa gnyi gar yang brten pa ma yin no/ /ra lug kyang ched 'ga' ni skam sa chu nyung ba na 'tsho la/ ched 'ga' ni rlan can chu mang ba na 'tsho ste/ rang bzhin des na ra dang lug ni nges pa ma yin pa yin no/ /thog ma tha ma skam gsher gnas/ /bar ma gnyis po thun mong bshad/ /ces bya ba la/ bar ma ni gnyis po zhes gnyis par bshad pa las thog ma dang tha mar ni sde tshan gsum gsum yin te/ dang po'i sde tshan gsum ni ri dwags dang khron du rko ba dang / mchus rko ba gsum ni skam sa la gnas pa yin pas/ skam sar sgrar brjod la/ tha ma'i gsum po ri dwags chen po dang / chu la spyod pa dang / nya rnams ni gsher sa nyid la spyod pa yin pas na gsher sa'i sgrar bshad do/ /bar gyi sde tshan gnyis po khung na gnas pa dang / rtsal mthus za ba zhes bya ba gnyis ni thun mong ste/ gnyi ga la spyod pa yin par bshad do/ /de las skam sa'i sha rtug 'gags/ /bsil ba dang ni yang ba yin/ /'dus pa mkhris pa shas che zhing / /rlung 'bring bad kan chung la phan/ /zhes bya ba la/ de las byas pa ni nges par bzung ba ste/ skam sa dang / gsher sa dang / thun mong gi gnas na spyod pa yin par bshad do/ /skam sa'i sha ni rtug pa 'gags par byed pa dang / nus pa bsil ba dang yang ba yin no/ /de bzhin du 'dus pa'i nad mkhris pa'i shas che zhing rlung che chung 'bring du gnas pa dang / bad kan shas chung ba la phan zhing / gnod pa 'joms pa yin te/ 'dus pa'i nad gang mkhris pa'i shas che ba dang / rlung 'bring tsam du gnas pa dang / bad kan ches chung ba de la phan pa yin no/ /ri bong sha ni drod skyed rtsub/ /zhu rjes tsha zhing 'khru gcod bsil/ /zhes bya ba la/ skam sar gnas pa de rnams kyi nang nas/ ri bong gi sha ni drod skyed pa ste/ pho ba'i me drod 'phel bar byed pa dang / de bzhin du rtsub pa dang / zhu rjes kyi ro tsha ba dang / 'khru ba gcod cing sdud pa dang / bsil ba'i mtshan nyid can yin no/ /bar ta ki la sogs pa'i sha//cung zad snum dro lci brtas byed/ /ces bya ba la/ skam sar gnas pa rnams kyi nang nas/ bya bar ta ki la sogs pa ste/ gang skam sar gnas pa'i bar de thams cad ni cung zad snum zhing dro ba dang lci ba dang ldan pa yin zhing lus brtas par byed pa yin no/ /de rnams las kyang rgya bya'i sha/ /yid gzhungs drod stobs khu ba 'phel/ /bshang skems mdog bzangs rlung shas che/ /'dus pa sel ba'i dam pa yin/ /de rnams zhes bya ba bar ta ki la sogs pa'i nang nas kyang / rgya bya ti ti ra'i sha ni yid gzhungs pa dang / drod skye ba dang / stobs dang / khu ba 'phel ba dang / bshang ba skems shing sdud pa dang / lus kyi mdog bzang por byed pa dang / rlung shas che ba'i 'dus pa'i nad sel zhing 'joms pa'i mchog dam pa yin no/ /rma bya'i sha ni bzang min yang / /rna mig skad 'gags rgas srar phan/ /zhes bya ba la/ rma bya'i sha ni bzang po ma yin te/ phan zhing bsngags pa ma yin mod kyi/ 'on kyang rna ba gnyis la phan te/ sgra legs par thos par 'gyur ba dang / mig gis legs par mthong bar byed pas mig la phan pa dang / gdangs snyan pas skad 'gags pa la phan pa dang / myur du rgas pa las bsrung bas na/ rgas pa sra ba la phan pa yin no/ /khyim bya de 'dra ro tsa la/ /grong gnas lci zhing bad kan skyed/ /ces bya ba la/ khyim bya ni rma bya'i sha 'dra bas shin tu bzang po ma yin mod kyi/ rna ba la sogs pa la phan par 'dra zhing ro tsa ba yin no/ /yang na grong na gnas pa'i khyim bya ste/ skye bo'i khyim na rgyu ba gang yin pa de ni lci ba dang / bad kan skyed par byed pa dang / ro tsa ba yin no/ /gong mo u pa tsa krar bcas/ /yid gzhungs drod skyed yi gar 'ong / /zhes bya ba la/ bya gong mo dang u pa tsa krar bcas pa'i sha ni yid gzhungs shing shes rab skyed pa dang / pho ba'i me drod skyed pa dang / yi gar 'ong zhing dga' bar byed pa yin no/ /thi ba zhar ba'i sha lci zhing / /tsha bro nyes pa thams cad skyed/ /ces bya ba la/ bya thi ba zhar ba'i sha ni lci ba dang tsha bro ba ste/ cung zad lan tshwa bro ba dang / nyes pa gsum po thams cad skyed par byed pa yin no/ /byi'u sha bad kan skyed cing snum/ /rlung 'joms khu ba rab 'phel byed/ /ces bya ba la/ bya bran bye'u rnams kyi sha ni bad kan skyed par byed pa dang / de bzhin du snum pa dang / rlung 'joms shing sel ba dang / mchog tu khu ba 'phel bar byed pa yin no/ /sde tshan de las phyi ma rnams/ /rim bzhin lci dro snum zhing mngar/ /gcin mang ro tsa stobs skyed cing / /rlung 'joms bad kan mkhris pa skyed/ /ces bya ba la/ skam sar gnas pa'i sde tshan de las/ phyi ma khung na gnas pa la sogs pa lnga rnams ni rim pa bzhin du zhes pa/ go rims ma 'chol bar lci ba nyid dang / dro ba nyid dang / snum pa nyid dang / mngar ba nyid de sde tshan de dag las phyi ma gang dang gang yin pa ni snga ma de dang de las lci ba la sogs pa nyid dang ldan pa yin no/ /des na khung na gnas pa ni mthus za ba lci ba la sogs pa'i yon tan dang ldan pa yin la/ mthu rtsal gyis za ba bas ni ri dwags chen po'o/ /ri dwags chen po bas ni khron du rko ba'o/ /khron du rko ba bas ni nya rnams so/ /de bzhin du rim gyis gcin mang ba dang / ro tsa ba dang / stobs skyed pa dang / rlung dang bad kan 'phel zhing skyed par byed pa yin no/ /de las ri dwags chen po'i bsil/ /zhes bya ba ni/ sde tshan lnga po de rnams kyi nang nas ri dwags chen po ni bsil ba ste/ bsil ba'i nus pa dang ldan pa yin no/ /rtsal mthus sha rlon za ba'i yang / /ro rjes lan tshwa bro zhu rjes/ /tsha zhing sha ni 'phel bar byed/ /gzhang 'brum rnying pa pho ba grang / /skem nad nyen la mchog tu phan/ /zhes bya ba la/ sha rlon za zhes bya ba ni/ /sha rlon pa gcod cing za bar byed pas na sha za ba'o/ /de la yang rnam pa gnyis te/ gcan gzan dang bya'o/ /de las kyang sha rlon pa za ba la la'i mtshan nyid 'di yin no/ /de yang ro rjes lan tshwa bro ba ste/ ro gang dag gi rjes la cung zad mi gsal bar lan tshwa bro ba ste/ gtso bo'i ros zil gyis mnan pas na/ cung zad mi gsal bar bro ba'i phyir ro/ / rjes zhes bya ba ste/ ro'i gtso bo tha dad pa yod par mtshon pa yin no/ /de bzhin du zhu rjes tsha ba ste/ zhu ba'i rjes tsha ba nyid du smin pa'o/ /de bzhin du sha 'phel bar byed pa ste/ sha skyed par byed pa'o/ /de bzhin du gzhang 'brum rnying pa dang / pho ba grang zhing drod chung ba dang / skem nad kyis nyen pa'i mi la mchog tu phan pa yin no/ /de la gzhang 'brum rnying pa zhes bya ba ni yun ring po lon pa'i/ /ra sha shin tu bsil min zhing / /lci snum ma yin nyes med min/ /lus dang khams ni mnyam pas na/ /bad kan mi skyed lus brtas byed/ /ces bya ba la/ shin tu bsil min zhes bya ba'i sgra ni cung zad kyi don la snyegs te/ des na ra'i sha ni cung zad tsam bsil ba dang / cung zad tsam snum pa yin no zhes pa'o/ /nyes med min zhes pa med pa'i don ni chung ba'i don te/ dper na lug spu med ces bya ba'am/ bu mo rkang med ces zer ba dang 'dra'o/ /des na cung zad tsam nyes pa yod cing / cung zad bad kan skyed pa yin no zhes pa'i don to/ /de bzhin du lus dang khams mnyam pas kyang rnam pa thams cad du nyes pa med pa yin te/ mi rnams kyi lus dang / lus zungs kyi tshul ji lta bu yin pa/ ra'i lus dang khams kyang de dang 'dra ba yin te/ de bas na lus dang lus zungs mtshungs shing mnyam pas na/ sha de ni nyes pa cung zad kyang mi skyed pa yin no/ /de bas na skyes bu'i lus dang lus zungs mtha' dag dang de mnyam ste/ mi'i lus zungs ci 'dra bar yang de dang 'dra bar don gyis ston pa yin te/ 'di skad bshad pas ni mi'i sha'i rang bzhin ci 'dra ba yin pa yang bshad pa yin no/ /bad kan mi skyed ces bya ba ni ra'i sha de bad kan yin yang shas cher skyed par mi byed pa'o/ /lus brtas par byed pa ni sha 'phel bar byed pa'o/ /lug sha de las bzlog pa sta/ lus brtas yin par shes par bya/ /zhes bya ba la/ lug gi sha ni ra sha de las bzlog par shes par bya ste/ des na ra'i sha ni shin tu bsil ba ma yin la/ 'di ni shin tu bsil ba dang / de ni shin tu lci ba ma yin la/ /'di ni shin tu lci ba dang / /de ni shin tu snum pa ma yin la/ 'di ni shin tu snum pa dang / /de ni lus par byed pa yin la/ 'di yang brtas par byed pa yin pas/ 'di la ni go bzlog pa med do/ /ba lang sha ni lud skam dang / /ngal dang tsho ches ma snyoms rims/ /cham pa dang ni skem pa dang / /rlung nad gcig pu na ba sel/ /zhes bya ba la/ ba lang dag gi sha yin pas na ba lang sha ste/ des ni lud pa skam pa la sogs pa sel zhing bzlog pa yin no/ /tshig gi don ni go sla'o/ /ma he'i sha ni lci zhing tsha/ /gnyid che brtan byed sha cher skyed/ /ces bya ba la/ de la ma he'i sha ni shin tu lci ba dang / tsha ba dang / gnyid che zhing mthug la brtan par byed pa dang / sha skye bar byed pa yin no/ /phag rgod sha ni de 'dra zhing / /ngal sel zas len khu stobs skyed/ /ces bya ba la/ phag rgod kyi sha ni de 'dra zhes pa ma he'i sha dang yon tan 'dra ba las de ni ngal ba sel ba dang / de bzhin du/ kha zas len zhing yi ga 'bye ba dang / khu ba dang stobs rab tu skyed par byed pa yin no/ /nya ni mchog tu bad kan skyed/ /ces bya ba ni/ ro hi ta dang / pa thi na la sogs pa'i nya sha ni shin tu yang bad kan skyed par byed pa yin no/ /tsi li tsi ma nyes gsum skyed/ / ces bya ba ni/ nya rnams kyi nang nas tsi li tsi ma zhes bya ba'i nya'i khyad par cig yod pa ni rlung la sogs pa'i nyes pa gsum skyed pa yin no/ /la wa ro hi ta skyin gor/ /sha ba rang rang sde tshan mchog /ces bya ba ni/ la wa la sogs pa'i sha ni rang rang gi sde tshan las mchog yin te/ des na khron du rko ba'i nang na ni/ la ba mchog yin la/ nya rnams kyi mchog ni ro hi ta yin/ khung na gnas pa rnams kyi mchog ni skyin gor yin/ ri dwags kyi nang na sha ba mchog yin no/ /sha ni 'phral bsad bdag dang / /dar la bab pa'i bsten par bya/ /zhes bya ba la/ sha thams cad ni 'phral bsad pa ste/ dus de'i tshe nyid bsad pa dang / de bzhin du dag pa ste/ dug la sogs pa dang / ma 'bags pa dang / dar la bab pa ste/ rgan pa dang gzhon pa ma yin gyi rang rang gi na tshod dar la bab pa'o/ /de lta bu'i sha de ni phan par 'gyur ba yin pas bsten par bya ba nyid yin no/ /rang shi rid dang shin tu tsho/ /nad chu dug gis shi ba spang / /zhes bya ba la/ sha thams cad las rang nyid shi ba spang ba dang / de bzhin du rid cing sbeg pa dang / shin tu tshil che zhing tsho drags pa spang ba dang / de bzhin du nad dam chu'am dug gis shi ba'i sha spang zhing dor bar bya'o/ /pho dang mo yi stod smad phyed/ /lci ste sbrum ma'i thams cad lci/ /zhes bya ba la/ srog chags thams cad kyi pho dang mo las go rims ji lta ba bzhin du pho'i mgo bo nas brtsams te/ lte ba'i bar gyi lus kyi phyed kyi sha lci ba yin la/ mo'i lte ba man chad kyi ro smad kyi phyed kyi sha lci ba yin no/ /sbrum mar gyur pa'i sha ni ma lus pa thams cad lci ba yin no/ /rkang bzhi mo yi yang ba yin/ /bya rnams kyi ni pho yi yang / /zhes bya ba la rkang bzhi ste/ ri dwags dang ra lug dang ma he la sogs pa'i nang nas ni mo'i sha yang ba yin la/ bya rnams til ba dang / ngang pa dang / rma bya dang / khyim bya la sogs pa gshog pa can rnams kyi sha yang ba yin no/ /mgo bo ro stod brang dang rgyab/ /rked pa dpyi yi lci ba yin/ /de bzhin pho ba rgyu ma sogs/ /go rims bzhin du lci ba yin/ /zhes bya ba la/ mgo bo la sogs pa'i yan lag gi cha shas las ni go rims bzhin du zhes pa go rims 'chol bar lci ba nyid yin par bstan to/ /des na dpyi'i sha bas ni rked pa'i sha lci la/ rked pa'i sha bas ni rgyab kyi sha lci/ rgyab kyi sha bas ni brang gi sha lci la/ brang bas ni ro stod lci/ ro stod kyi sha bas ni mgo'i sha shin tu lci ba yin no/ /de bzhin du zhu ba'i gnas rgyu ma la sogs pa'i sha bas ni ma zhu ba'i gnas pho ba'i sha lci ba yin te/ des zas zhu ba rnams kyi gnas ni zhu ba'i gnas te/ lte ba man chad do/ /zas ma zhu ba'i gnas ni ma zhu ba'i gnas te/ lte ba yan chad do/ /de yang drang srong gis bshad pa/ 'gro ba'i lte ba nu ma bar/ /ma zhu ba yi gnas su bshad/ /lte ba nas ni chu so'i bar/ /zhu ba'i gnas su shes par bya/ /zhes bshad pa yin no/ /khrag la sogs pa'i lus zungs rnams/ /phyi ma phyi ma lci ba yin/ /zhes bya ba ni/ khrag la sogs pa'i lus zungs drug po rnams phyi ma phyi ma lci ba yin par bshad do/ /des na khrag bas ni sha lci'o/ /sha bas ni tshil lo/ /tshil bas ni rus pa'o/ /rus pa bas ni rkang ngo / /rkang bas ni khu chu ches lci ba yin no/ /sha las rlig pa pho mtshan dang / /mkhal ma mcher pa gzhang dag lci/ /zhes bya ba la/ lus thams cad las byung ba'i sha rnams las ni rlig pa la sogs pa'i sha shin tu lci ba yin no/ /'di la rlig pa zhes bya ba ni 'bras bu shubs can zhes ming gi rnam par grags pa'o/ / pho mtshan ni mje'o/ /mkhal ma ni lto ba'i cha la gnas pa'o/ /mcher pa ni gsus pa'i g.yon logs na gnas pa nag po can zhes ming gi rnam par grags pa'o/ /gzhang ni bshang ba'i lam ste/ de dag ni lci ba yin no/ /'dir sha rnams pho dang mo'i khyad par du byas pa dang / rigs gcig pa dang / rigs tha dad pa de rnams kyi spyi dang khyad par du gnas pa las stobs che chung yod pa brtag par bya ba ni/ ci rigs par rang gi blo nyid kyis rnam par dpyad par bya'o/ /sha'i sde tshan no// // sngar tshod mar bstan pa de rnams kyi lhag ma de brtsams pa ni 'di dag yin te/ tshod ma pa tha sha ti dang / /su sha su ni sha na dang / /sa ti na dza rgya sne'u sogs/ /nyes pa gsum 'joms rtug sra yang / /zhes bya ba la/ pa tha la sogs pa'i tshod ma rnams ni nyes pa gsum sel bar byed pa yin pas/ nyes pa gsum 'joms zhes bya ba la/ de bzhin du rtug pa sri zhing mkhregs pa dang yang ba yin no/ /de la ba tha ni ming gi rnam grangs ba pa tsa li ka zhes bya ba'o/ /su ni sha na ni su la zhes bya ba 'dab ma bzhi ba btsong gi dri 'dra ba zhig chu'i nang na skye'o/ /sa ti na dza zhes bya ba ni dzak+Sha pa ni/ ming gi rnam grangs bkres byed ces bya bar grags pa'o/ /de las su ni sha na dro/ /ro tsa zhes bya ba tshod ma de rnams kyi nang nas su ni sha na ni drod skyed pa dang ro tsa bar byed pa'o/ /ra dzak+Sha pa ti/ pho ba gzhang 'brum nad sel mchog / ces bya ba la/ pa ta la sogs pa de rnams nang na ra dzak+Sha pa zhes bya ba ni pho ba dang gzhang 'brum gyi nad sel ba'i mchog yin no/ /rgya sne'u rtug skam 'joms pa yin/ /zhes bya ba la/ tshod ma 'di rnams kyi nang nas rgya sne'u'i tshod ma ni rtug skam 'joms shing 'khru ba yin no/ /mon sne'u dme ru nyes gsum 'joms/ /mdze sel ro tsa bcud len dro/ /'khru zhing mgul pa snyan par byed/ /ces bya ba la/ mon sne'u dme ru ka ka ma tsa zhes bya ba ni nyes pa gsum po ni rlung dang mkhris pa bad kan zhes bya ba 'joms pa dang / de bzhin du mdze nad sel ba dang / ro tsa zhing khu ba 'phel ba dang / bcud kyis len du 'gyur zhing tshe 'phel ba dang cung zad drod skyed pa dang / 'khru zhing bshang ba sla bar byed pa dang / mgul ba gsal zhing snyan par byed pa yin no/ /tsang gi ri sgyur me drod skyed/ /pho ba gzhang 'brum bad kan rlung / /drod che 'khru gcod yang ba yin/ /zhes bya ba la/ tsang gi ri ni ro skyur ba dang / de bzhin du pho ba'i me drod skyed pa dang pho ba la sogs pa la phan pa yin no/ /pa to la dang sa pa ta la/ /nim pa shang gash+tha sle tres/ /a bal gu za rtswa'i myu gu/ / bri ha ti dang bA sha dang / /ti la par+Ni ku ta la/ /man du ka'i 'dab kar ko ta/ /kar be+e la par ba ta/ /Na ti dang ni ka ta ya/ /go dzi ha dang bar da ka/ /ba na tig ta ka ri ram/ /ku li ka dang nan ti dang / /ku tse la shag kun da ni/ /ka ti la dang ke'u kam/ /sho tam ko sha ta ka dang / /kar sha 'jam bsil kha zhing tsha/ /bshang sri rlung skyed bad mkhris sel/ /zhes bya ba la/ pa to la nas kar sha dang bcas pa'i bar gyi tshod ma rnams ni bsil ba'i nus pa dang ldan pa dang / ro kha ba dang 'ju ba'i rjes tshab dang / bshang ba la sogs pa mkhregs shing sri ba dang / rlung skyed pa dang / bad kan dang mkhris pa dag sel bar byed pa yin no/ /de la pa to la ni kha ba zhig go/ /sab ta ni sa ta la zhes bya'o/ /nim pa ni a ri sta'o/ /shang gash+tha ni ang ka ra ba li ga'o/ /a bal gu za ni so mar dza'o/ /rtswa'i myu gu ni rtswa gzhon nu'i rtse mo'o/ /bri ha ti ni sing hi 'o/ /ba sha ni bri sha'o/ /til par+Ni ni rgya shug gi lo ma'am/ yang na til gyi lo ma'o/ /man du ka'i 'dab ma ni man du ki zhes bya'o/ /kar ka ta ni lug gi ra 'dra'o/ /kar be la ni ka du ka bi la'i 'bras bu'o/ / par pa ta ni ldum bu skra bzangs so/ /Na ti ka ni sran ma'i sbur ro/ /go dzi hA ni gla sgang gi lce 'dra ba ste/ kro sha ka mu la zhes bya'o/ /ban ti ga ta ni bad tsha ka'o/ /ku li ka ni kA kA tin du ka'o/ /nan ti ni me tog dzA ti'i shing ngo / /shag ku nad ni ka ru ka'o/ /ka ti la ni me tog dmar ba'i pur+Na rna ba'o/ /ko sha ta ka ni sbubs can no/ /kar sha ni grags par zad do/ /pa to la zhim srin nad sel/ /zhu rjes mngar zhing yi ga 'byed/ /ces bya ba ni/ pa to la sogs pa'i sde tshan gyi nges par bzung ba ston te/ pa to la ni zhim zhing tshim par byed pa dang / srin nad sel zhing 'joms pa dang / zhu rjes mngar ba ste/ zhu ba'i rjes mngar ba dang / shin tu yi ga 'bye bar byed pa yin no/ /bri ha ti gnyis mkhris skyed 'khru/ /drod skyed rlung ni 'joms pa yin/ /zhes bya ba la/ bri ha ti gnyis la gcig ni sbom mo/ /bri ha ti zhes bya ba yin la/ gnyis pa ni kaN+DA kA ri zhes bya ba ste/ ming gzhan k+shu ta zhes bya'o/ /bri ha ti gnyi ga yang mkhris pa 'khrugs shing skyed par byed pa dang / de bzhin du me'i drod skyed pa dang / khong 'khru ba dang rlung 'joms shing sel ba yin no/ /bri shan rlung dang lud pa 'joms/ /khrag mkhris sel ba'i dam pa yin/ /zhes bya ba la/ bri shan ni ba sha ka ste/ de ni slon zhing skyug bro ba dang / lud pa 'joms pa dang / de bzhin du khrag dang mkhris pa shin tu sel ba'i mchog dam pa yin no/ /ka ra bel la kha ba dang / /drod skyed bad kan sel mchog yin/ /zhes bya ba la/ ka ra bel la ni kha ba ste/ cung zad kha ba dang / pho ba'i me drod skyed pa dang / de bzhin du bad kan sel zhing 'joms pa'i mchog yin no/ /bar ta ka'i ro tsha zhing kha/ / mngar bro bad kan rlung dag sel/ /lan tshwar bcas pa me drod skyed/ /yid 'ong zas len mkhris mi skyed/ /ces bya ba la/ bar ta ka zhes bya ba ming gzhan ben dang zhes bya ba'i tshod ma ni ro tsha zhing kha ba dang / mngar ba dang dro ba'i nus pa dang ldan pa dang / bad kan dang rlung 'joms shing sel ba dang / lan tshwar bcas pa ste/ cung zad lan tshwa bro ba dang / me'i drod skyed par byed pa dang / yid du 'ong zhing dga' bar byed pa dang / zas len cing yi ga 'byed par byed pa yin pa dang / mkhris pa mi skyed ces pa mkhris pa la mi gnod pa yin no/ / ka ri ra ni sbos byed cing / /ro bska mngar zhing kha ba yin/ /zhes bya ba la/ ka ri ra'i tshod ma ni lto sbos par byed pa dang / de bzhin du ro bska ba dang / mngar ba dang kha ba yin no/ /ko sha ta ka bal gu za/ /'khru zhing drod ni skyed byed yin/ /zhes bya ba la/ ko sha ta ka ni a pa marga'o/ /bal gu za ni so ma ra dza'o/ /de dag ni bshang gci sla zhing 'khru bar byed pa dang / drod skyed par byed pa yin no/ /tan du li bsil rtsub pa dang / /ro mngar zhu rjes mngar zhing yang / /chang nad mkhris nad dug khrag sel/ /zhes bya ba la/ tan du li ni be'u li ste/ de ni bsil ba la sogs pa'i yon tan dang ldan pa yin no/ /mun dza las byung rlung mkhris sel/ /snum bsil lci zhing mngar ba dang / /lus brtas khu ba 'phel ba'i mchog /ces bya ba ni/ rtswa mun dza las byas pa'i tshod ma ni rlung la sogs pa sel ba'i mchog yin no/ /pa lag kya lci 'khru bar byed/ /ces bya ba la/ pa lag kya'i tshod ma ni lci ba'i yon tan dang ldan pas na khong 'khru bar byed pa'o/ /u pho da ka chang nad 'joms/ /zhes bya ba la/ u po da ka ra ni po ta ki ste des ni chang gis myos pa 'joms shing lci ba dang 'khru ba yin no/ /tsu tsu pa lag kya 'dra las/ /de ni 'khru gcod bdag nyid can/ /zhes bya ba la/ tsu tsu'i tshod ma'i yon tan ni pa lag kya dang 'dra la/ de ni yang yon tan 'dra ba gcod pa'i bdag nyid can yin gyi/ khong 'khru bar byed pa ni ma yin te/ lci ba'i yon tan tsam mthun pa yin no/ /bi da ri ni rlung mkhris sel/ /gcin mang mngar zhing bsil ba yin/ /'tsho bar byed cing lkog nad sel/ /lus brta ro tsa lci bcud len/ /zhes bya ba la/ bi da ri ni ming gi rnam grangs/ sri ga li kha zhes bya ba yin la/ de ni rlung mkhris sel ba la sogs pa'i yon tan byed pa dang / 'tsho bar byed pa zhes bya ba dang mdangs 'phel zhing lus zungs snyoms par byed pa dang / lkog nad sel ba la sogs pa'i mtshan nyid can yin no/ /dzi ban ti mngar bsil ba dang / /mig la phan zhing nyes gsum sel/ /zhes bya ba la/ dzi ban ti'i tshod ma ni mngar zhing bsil ba'i nus pa la sogs pa dang ldan pa yin no/ /ku sman da bum sha ka ling / /kar ka dang ni er ba ru/ /da na dis zhes bya ba dang / /da na dis dang ga gon dang / /tsin ta ka dang tsir bi ta/ /bad rlung skyed cing 'khru gcin mang / /bshang sri lci zhing zhu rjes mngar/ /zhes bya ba la/ ku sman da la sogs pa'i tshod ma ni/ rlung dang bad kan gnyis skyed par byed pa la sogs pa'i mtshan nyid can yin no/ /de la ku sman da ni pu sha pa la zhes bya ba ku ba 'dra ba la/ nang sa bon mang pos gang ba'o/ /bum sha ni ku ba'i sha'o/ /ka ling ka dang kar ka dang / er ba ru dang / lo ma shing dag ni ga gon gyi rnam grangs yin no/ /'khri shing 'bras bu'i nang na mchog /ku sman da ste rlung mkhris sel/ /gcin nad sel zhing ro tsar byed/ /ces bya ba la/ ku ba la sogs pa 'khri shing la brten te/ skyes pa'i 'bras bu rnams kyi mchog ni ku sman da yin te/ de ni rlung dang mkhris pa sel ba'i dam pa yin pa dang / gcin nad kyi rgyun lam sbyong zhing sel bar byed pa dang / ro tsa ba yin no/ /ga gon shin tu gcin mang zhing / / zhes bya ba ni/ 'khri shing la brten pa'i 'bras bu'i nang na/ ga gon ni mchog tu gcin mang ba yin no/ /ku ba shin tu rtsub pa yin/ /zhes bya ba ni/ 'khri shing la brten pa'i 'bras bu'i nang na/ ku ba ni shin tu rtsub pa yin no/ /ka ling ka dang er ba ru/ /tsir bi mkhregs gzhon mkhris sel bsil/ /smin pa de las gzhan du byed/ /'bras bu rnying lung lan tshwar bcas/ /mkhris skyed bad kan rlung nad sel/ /yi ga 'bye zhing dro yid 'ong / /hen langs lto sbos sel zhing yang / /zhes bya ba la/ ka ling ka dang er ba ru dang / tsi bi ra ni mkhregs pa ste/ bshang ba la sogs pa sri zhing 'byung ba dka' bar byed pa yin no/ /de bzhin du gzhon pa zhes pa ma smin zhing / ro dang nus pa dang smin pa ma rdzogs shing dang po skyes pa'i gzhon nu ni mkhris pa sel ba yin la/ nus pa ni bsil ba yin no/ /smin pa ni de las gzhan du byed bar shes par bya ste/ mkhris pa skyed pa dang nus pa tsha ba yin no/ /des na gzhon nu las go bzlog par shes par bya'o/ /'bras bu rnying pa ni 'khri shing la brten pa'i 'bras bu'i lung ste/ gang na ka ling ga'am/ er ba ru'am/ tsir bi ra de gsum gyi lung dengs shing rnyings par gyur pa smin pa las kyang thal bar gyur pa de ni lan tshwar bcas zhes bya ba cung zad lan tshwa bro ba dang / de bzhin du mkhris pa skyed pa la sogs pa'i yon tan dang ldan pa yin no/ /hen langs shing lto spos pa ni nang na mdud par 'chas pa snyam byed cing gyen du ldang ba dang / zug gzer dang bcas pas shing mkhan gyi tho ba lta bu skyes pa snyam byed pa ste/ de ni hen langs shing lto sbos pa'i nad gzhi'i skabs nas bshad pa yin no/ /de yang gzhung gzhan dag las/ tho ba lta bur srar gyur cing / /gyen du rgya cher ldang ba dang / / rlung gis lto sbos zhes bya ste/ /phyir 'byung lam ni 'gags byed yin/ /zhes bshad pa yin no/ /pad rtsa rtsa ba ut+pal rtsa/ /ku mu ut+pal chu ba dang / /chus pa sha lu ka ta dang / /sring ga dang ga shru ru ka /kron dza da na ka lo da/ /rtsub cing bshang sri bsil zhing lci/ / zhes bya ba la/ pad+ma'i rtsa lag gi sdong bo nas/ ka lo da'i bar gyi tshod ma ni rtsub pa'i yon tan dang ldan pas na rtsub pa'o/ /bshang ba sri ba ni 'khru ba las go bzlog pa'o/ /de yang sman dpyad kyi lung las/ bshang ba la sogs 'jig byed cing / /gong po med byed gang de 'khru/ /de las bzlog pa bshang 'gags te/ /de ni sri ba zhes byar bshad/ /ces bshad pa yin no/ /bsil ba ni nus pa'o/ /lci ba ni yon tan yin no/ /pad+ma'i rtsa lag ni pad+ma'i rtsa ba phra mo'o/ /gzhan dag ni pad+ma'i rtsa ba'i myu gu yin no zhes zer ro/ /pad+ma'i rtsa ba de nyid kyi sbom po ni pad+ma'i rtsa ba'o/ /sha lu ka ni pad+ma'i rtsa ba nyid do/ /ut+pal dang ku mu da'i rtsa ba dang / chu ba gang yin pa ni kun nas khyab par gnas pa'o/ /ka lo da ni ut+pal thung ngu'o/ /kron dza da na ni ka na da la'o/ /de dag ni rtsub pa dang bshang gci 'gags shing sri ba dang / bsil zhing lci ba yin no/ /ka lam pa dang na li ka /mar she zhes ni bya ba dang / /ku ti na dza ra ku kha/ /seng phrom yungs ma lo ni ka /ka ru da ka ga pe ru/ /'tsho byed dang ni dzun dzu dang / /e da ga dza dag dang ni/ /ya ba sha ka lcam pa dang / /a lu ka sogs thams cad dang / /sran lo shing mngar lo ma dag / mngar zhing rtsub la lan tshwa bro/ /bad kan rlung skyed lci ba dang / /bsil zhing bshang gci 'byung sla byed/ /phal cher zhu nas bshang gci mkhregs/ /tshos shing khu ba legs btsir la/ /mar cher btab ba nyes mi skyed/ /ces bya ba la/ ka lam pa nas nags ma'i bar gyi tshod ma ni ro mngar ba dang / rtsub pa'i yon tan dang ldan pa dang / cung zad lan tshwa bro ba dang / bad kan dang rlung skyed par byed pa dang / de bzhin du lci ba la sogs pa'i yon tan dang ldan pa dang / phal zhes pa mang du ste/ 'di dag ni nang nas tshod ma'i khyad par la la ni rang bzhin 'di lta bu ma yin no/ /zhes shes par bya ba'i phyir sgra smos pa yin no/ /yang ka lam pa la sogs pa'i tshod ma de rnams kyang / tshos shing zhes pa legs par tshos par byas pa dang / de bzhin du khu ba legs par btsir ba zhes bya ba/ tshos par byas pa'i 'og tu lag pas khu ba legs par btsir ba gang yin pa de la de skad ces bya'o/ /mar cher btab pa zhes bya ba ni snum shas cher btab ba dang ldan pa'o/ /nyes mi skyed ces bya ba ni nad kyi nyes pa rnams shin tu bskyed pa ma yin no zhes pa'i don no/ /'di rnams kyang ming gi rnam grangs dang / yul yul gyi skad dag las shes par bya'o/ /'on kyang 'dir cung zad cig bshad par bya ste/ ka lam ba ni ri las skyes pa/ ka li ka zhes bya'o/ /mar she ni gnad ri zhes bya'o/ /ku ti na dza ra ni 'bras bu las tshod mar byas pa'o/ /seng phrom ni sha bar pa da ste ro da'o/ /lo ni ka ni kha tse nA lo nA ra zhes grags pa'o/ /ka rud ka ni 'bras bu phra mo ste/ shi ti bar zhes bya'o/ /ga be+e du ni 'bru'i bye brag gcig go/ /'tsho byed ni dzi ban ti'o/ /dzun dzu ni dzi ni'o/ /e da ga dza ni pu na la'o/ /ya ba ka ni nas kyi nang nas skye ba kun lan zhes bya ba rgya sne'u'i khyad par gyi sne'u tshod do/ /lcam pa ni grags par zad do/ /a lu ka ni rnam pa mang ste/ a lu ka dmar po dang / a lu ka zlum po dang / a lu ka ljang gu dang / a lu ka mngar po'o/ /sran lo ni mon sran sde'u la sogs pa'i 'brur gtogs pa'i 'dab ma'o/ /shing mngar gyi lo ma ni lash+ma na zhes bya'o/ /seng phrom 'dab ma zhes bya gang / /de ni rgya sne'u dang 'drar 'dod/ /ces bya ba la/ seng phrom zhes bya ba tsi ba li lo 'dab phra mo yod pa'i tshod ma de ni yon tan rgya sne'u dang 'dra bar 'dod de/ rgya sne'u dang yon tan gyi cha 'dra ba'o/ /tar ka ri bar na mngar/ /kha bcas rlung dang bad kan sel/ /zhes bya ba la/ tar ka ri zhes bya ba ni a ga ni man tha'o/ /bar na ni ta ma la ste/ de gnyis kyi tshod ma ni mngar zhing zhim pa dang / kha bcas zhes bya ba cung zad kha bro ba dang / rlung dang bad kan dag sel bar byed pa yin no/ /pu r+Na rnam gnyis ka la sha /cung zad tshwa bro kha zhing tsha/ /drod skyed khong 'khru sbyar dug dang / /'or nad bad kan rlung nad 'joms/ /zhes bya ba la/ pur+Na rnam gnyis zhes bya ba ni/ sngon po dang dmar po'o/ /ka la sha ka ni ut+pa la'i tshod ma 'dra ba ste/ de gsum car yang cung zad lan tshwa bro ba dang / ro kha ba dang tsha ba yin zhing pho ba'i me drod skyed pa dang / bshang gci sla zhing 'khru bar byed pa dang / de bzhin du sbyar ba'i dug la sogs pa 'joms pa yin no/ /tsi bi ra yi myu gu ni/ /drod skyed rlung dang bad sel 'khru/ /zhes bya ba la/ tsi bi ra ni ka rany+dza ste/ ming gi rnam grangs sra ki rgya zhes bya ba'o/ /de'i myu gu ni myu gur 'thon pa'o/ /de ni me'i drod skyed cing rlung dang bad kan gnyis sel la 'khru bar byed pa yin no/ /nye'u shing myu gu kha ba ste/ /ro tsa nyes gsum sel ba yin/ /zhes bya ba la/ nye'u shing zhes pa sha ta pa ri'i myu gu ni kha ba dang / ro tsa zhing khu ba 'phel ba dang / nyes pa gsum po rlung dang mkhris pa dang / bad kan sel zhing 'joms pa yin no/ /smyig ma'i myu gu rtsub pa dang / /khong tsha rlung dang mkhris pa skyed/ /ces bya ba la/ smyig ma'i myu gu ni smyig ma'i khyi sor 'thon pa'i myu gu ste/ de ni rtsub pa dang / khong pa tsha bar byed pa dang / rlung dang mkhris pa skyed par byed pa yin no/ /pa ru ra ni drod skyed kha/ /mcher pa gzhang 'brum bad rlung sel/ /zhes bya ba la/ ba ru ra ni nya mig lta bu'i sman mang tshak+Shi zhes bya ba'o/ /de ni me'i drod skyed pa dang ro kha ba dang / mcher pa la sogs pa'i nad sel ba yin no/ /ka sa mar da srin lud pa/ /bad kan sel zhing zhu byed 'khru/ /zhes bya ba la/ ka sa mar da ni ka shu na d+hi zhes bya ba ste/ de ni srin nad dang lud pa dang / bad kan sel bar byed cing nad rnams zhu bar byed pa dang / 'khru bar byed pa yin no/ /le brgan rtsi tshod rtsub skyur tsha/ /lci zhing mkhris pa skyed la 'khru/ /yungs kar tshod ma lci zhing tsha/ /bshang dang lci 'gags nyes kun skyed/ /ces bya ba la/ le brgan rtsi zhes bya ba ku su ma'i tshod ma ni lci zhing tsha ba dang / bshang ba dang gci ba gnyis 'gags shing sri bar byed pa dang / nyes pa gsum po thams cad skyed par byed pa yin no/ /la phug gzhon nu ro mi gsal/ /cung zad tshwa bro kha dang bcas/ /gang yin de ni nyes kun sel/ /yang zhing cung zad tsha ba dang / /skran dang lud gcong dbugs mi bde/ /rma dang mig nad lkog nad sel/ /skad 'gags drod chung rtug skam dang / /cham pa'i nad ni 'joms pa yin/ /zhes bya ba la/ la phug gang gzhon zhing nar ma son la/ skyes nas ring po ma lon la/ ro mi gsal ba ste/ mngar ba la sogs pa'i ro gsal bar ma gyur zhing / cung zad lan tshwa bro ba dang / kha ba dang bcas zhes pa cung zad ro kha bag yod pa de'i la phug de ni nyes kun sel zhes pa/ nyes pa gsum car sel ba dang / yang ba dang cung zad tsha zhing drod skyed pa dang / de bzhin du skran la sogs pa 'joms shing sel ba yin no/ /nar son ro dang zhu rjes tsha/ /drod skyed byed cing nyes gsum skyed/ /bad kan skyed lci/ /zhes bya ba la/ gang la phug sbom zhing nar son la rgas pa de ni ro dang zhu ba'i rjes tsha ba yin pa dang / /de bzhin du drod skyed pa'i nus pa yod pa dang / nyes pa gsum car skyed pa dang / mchog tu yang bad kan skyed cing lci ba yin no/ /btsos pa ni/ /snum zhing de yang rlung sel yin/ /zhes bya ba la/ la phug chen po nar son pa de mar dang sha la sogs par btsos shing brngos pa de ni snum zhing rlung sel bar byed pa yin no/ /skam po rlung dang bad kan sel/ /zhes bya ba ni/ la phug de nar son pa dang / ma son pa gnyi g.yang skam par gyur pa'i tshod ma ni rlung dang bad kan 'joms shing sel ba yin no/ /rjen pa thams cad nyes skyed yin/ /zhes bya ba la/ la phug de gzhon pa dang nar son pa dang / skam po dang rlon pa yang rung ste/ rjen pa zhes bya ba mes btsos par ma byas pa thams cad ni nyes skyed yin zhes bya ba nyes pa gsum char skyed pa yin no/ /yungs ma tsha zhing dro ba dang / /bad kan rlung sel mkhris pa skyed/ /ces bya ba ni/ yungs ma dag ni ro cung zad tsha ba dang / nus pa dro ba dang / bad kan dang rlung sel ba dang / mkhris ba skyed pa yin no/ /shan ta mu la mkhris sel zhing / /bsil zhing zhu rjes mngar ba dang / /ro mngar bska zhing kha ba ste/ /bad kan dug kyang sel bar bshad/ /ku ther byi'u rug shi kru/ /su mu kha dang ske tshe dang / /bu srin dang pha ni dza/ /zin thig le dang dzam bi ra/ /de la sogs pa'i ldum rnams ni/ /bshang gci sra zhing me drod skyed/ /khong pa tsha byed kha rtsub tsha/ /yid 'ong lus dro yig 'bye/ /mig gnod khu ba srin 'joms rno/ /skrang bar byed dang yang ba yin/ /ces bya ba la/ ku ther la sogs pa'i ldum rngad rlon pa rnams ni/ bshang gci sra zhing bsgong ba'i mtshan nyid can/ drod skyed par byed pa'i nus pa yod pa dang / khong pa tsha lam lam por byed pa la sogs pa'i yon tan dang ldan pa dang / skrang bar byed cing rang gi tshad las lhag par skyed ba dang yang ba yin no/ /ku ther ni ka shi ru ka zhes bya ba 'dab ma chung zhing yod pa yin no/ /shi kru ni so ban dza na'o/ /su mu kha ni ban tig ta'o/ /ske tshe ni a su ra'o/ /pha ni dza ni ma ri dza ka'o/ /zin thig le ni ku the ra'i dbye ba a ra dza ka zhes bya ba 'dab ma phra ba zhig go/ /dzam bi ra ni lo rtsub ces bya ba sgyur rtsi chen po'o/ /sogs pas ni gzhan dag bsdu'o/ /ldum ni rjen rngad kyi ming gi rnam grangs so/ /bye'u rug skyigs lud dbugs mi bde/ /rtsib logs zug dug kha ma nam sel/ /zhes bya ba la/ ku ther la sogs pa'i sde tshan las/ su rus bye'u rug pa zhes bya ba ni skyigs bu la sogs pa'i nad 'joms pa dang / rtsib logs zug pa ste/ rtsib logs nas gzer ba la phan pa yin no/ /dug ni sbyar ba la sogs pa'o/ /kha mnam pa ni dri mi zhim pa ste/ de yang kha zas la sogs pa dang 'brel ba las kha dri mi zhim par gyur ba ste de dag sel to/ /su mu kha ni rab tsha min/ /sbyar dug 'or nad sel ba yin/ /zhes bya ba la/ ku the ra'i sde tshan gyi nang nas/ su mu kha ni rab tu tsha ba ma yin te/ de yang sbyar dug dang 'or nad skrang bag tu gyur ba sel ba yin no/ /'u su'i lo ma kha zhing mngar/ /gcin mang mkhris pa skyed ma yin/ /zhes bya ba la/ 'u su'i lo ma ni ar dri ka zhes bya ste/ de ni kha zhing mngar ba yin pa dang / gcin mang bar byed pa yin zhing / mkhris pa ni skyed par byed pa ma yin no/ /sgog skya rab tu tsha zhing rno/ /zhu rjes tsha zhing 'khru ba dang / /zhim zhing skra skyed lci ro tsha/ /snum zhing drod skyed yig 'bye/ /sha bkra mdze skran gzhang 'brum dang / /gcin nad sri dang bad kan rlung / /skyigs bu cham pa dbugs mi bde/ /lud pa sel te khrag mkhris skyed/ /ces bya ba la/ sgog skya ni ra sa na zhes bya ba ste/ de ni rab tu shas cher tsha ba dang / rno ba dang de bzhin du zhu ba'i rjes kyang rab tu tsha ba dang / 'khru bar byed pa dang / zhim zhing yid du 'ong ba dang / skra 'byi ba skyed pa dang / lci zhing yang ba ma yin pa dang / ro tsa zhing khu ba 'phel ba dang / snum pa'i yon tan dang ldan pa dang / drod skyed pa nas lud pa sel ba'i bar gyi yon tan dang ldan pa dang / khrag dang mkhris pa skyed cing 'phel bar byed pa yin no/ /kun dong de las yon tan dman/ /bad kan skyed mkhris rab mi skyed/ /ces bya ba la/ kun dong zhes bya ba ni pa lan da zhes bya ba'i sgog pa ste/ de ni de las yon tan dman zhes bya ba/ sgog skya'i yon tan las chung zhing dman pa yin no/ /bad kan skyed par byed cing mkhris pa ni ha cang rab tu skyed par mi byed do/ /ke'u btsos dugs sbyar zos pa yis/ /bad kan rlung dang gzhang 'brum sel/ /rno zhing rtug pa sri ba dang / /de ni mkhris can la phan min/ /zhes bya ba la/ ke'u gtubs shing btsos te dugs su sbyar ba dang / de bzhin du kha zas su zos pas ni bad kan la sogs pa sel bar byed pa dang / rno ba dang rtug pa sri zhing mkhregs par byed pa dang / ke'u de ni mkhris pa can gyi skyes bu la phan zhing bde bar mi byed do / /nad de sos pa'i rgyur mi 'gyur ba yin no/ /sur drod skyed kha zas len/ /bad sel dri ma sbyong zhing yang / /mchog tu gzhang 'brum dag la phan/ /zhes bya ba la/ su ra na ni sdong bu'i rnam pa sbom pa zhig ste/ de ni me drod skyed par byed pa dang / kha zas len cing yi ga 'bye ba la sogs pa'i yon tan dang ldan pa yin no/ /sbang phrum shin tu nyes skyed yin/ /zhes bya ba la/ tshod ma'i nang na sbang phrum ni shin tu ngan cing nyes pa thams cad skyed pa yin no/ /me tog 'dab ma 'bras yal ga /sdong bu rim bzhin lci ba yin/ /zhes bya ba la/ me tog la sogs pa'i tshod ma dang / ldum bu rnams ni me tog la sogs pa'i rim gyis 'og ma lci ba yin te/ me tog gi tshod ma la ltos na lo 'dab kyi tshod ma lci ba yin la/ de bas ni 'bras bu'i tshod ma dang / de bas kyang yal ga'i tshod ma lci ba yin no/ /de bas kyang ldum bu'i tshod ma shin tu lci ba yin no/ /ldum gyi rngad rjen par bza' ba rnams la yang / rim pa 'di bzhin shes par bya'o/ /tshod ma'i rab mchog 'tsho byed yin/ /yungs kar tshod ma tha chad yin/ /zhes bya ba la/ pa ta la sogs pa tshod ma'i sde tshan rnams kyi nang nas/ rab mchog ni 'tsho byed ces bya ba'i tshod ma yin la/ yungs kar gyi lo ma'i tshod ma ni tha ma ste kun gyi tha chad yin no/ /tshod rngad rnams kyi sde tshan no// //zas kyi nang na shing tog ni tha mar bza' bar bya ba yin pa dang / de bzhin du bza' bar bya ba la dgos par gyur pa yin pas/ 'di dag smos pa yin te/ rgun 'brum 'bras bu'i mchog yin te/ /ro tsa mig phan bshang lci sla/ /mngar zhing zhu rjes snum pa dang / /cung zad bska zhing bsil la lci/ /rlung dang khrag mkhris sel byed cing / /kha nang kha bro chang nad dang / /skom lud tshad rims dbugs mi bde/ /skad 'dzer glo rdol glo gcong sel/ /zhes bya ba la/ rgun 'brum ni shing thog rnams kyi nang na mchog dang dam par gyur pa yin la/ de ni ro tsa ba dang / mig la phan pa la sogs pa'i yon tan dang ldan pa yin te/ tshig gi don ni go sla'o/ /bal po se'u mngar mkhris rgyas dang / /nyes pa gsum po sel ba yin/ /zhes bya ba la/ bal po se'u ro mngar ba de ni mkhris pa rgyas shing / shas cher 'phel ba dang / rlung la sogs pa'i nyes pa gsum car la yang phan pa yin no/ /skyur ba mkhris skyed min cung dro/ /rlung dang bad kan 'joms par byed/ /ces bya ba la/ bal po se'u skyur ba gang yin pa de ni skyur ba nyid kyis na/ mkhris pa skyed par byed pa yin mod kyi/ mkhris skyed min zhes bya ba 'dis de bkag pa yin no/ /cung dro zhes pa ni shin tu tsha ba ma yin gyi cung zad dro ba'i don to/ /de yang rlung dang bad kan gnyis ni 'joms par byed pa yin no/ /se'u kun kyang yid 'ong snum/ /yang zhing bshang sra drod zas len/ /zhes bya ba la/ se'u kun kyang zhes pa mngar po dang / skyur po dang / mngar skyur 'dren ma thams cad kyang yid du 'ong zhing / dga' bar byed pa dang / snum pa dang / yang ba'i yon tan dang ldan pa dang / bshang ba sra zhing mkhregs pa dang / pho ba'i me drod skyed pa dang / 'bras chan la sogs pa'i zas len cing yi ga 'byed pa yin no/ /mo tsa 'bra go pa nas/ /rgya star pa ru sha ka dang / /a mra ta la kasma 'bras/ / ra dza da na ma du'i 'bras/ /rgya shug so bi ra ang kol/ /phal gu sles ma ta'i 'bras bu/ /ta mal bi shu star ga'i 'bras/ /myu gu la dang rgya kham dang / /a ru ma na pi yal u0f85'bras/ /brtas byed lci zhing bsil ba yin/ /lus tsha glo rdol glo gcong sel/ /khrag dang mkhris pa snyoms par byed/ /zhu rjes mngar zhing snum pa dang / /bshang sri bad kan khu ba 'phel/ /zhes bya ba la/ shing tog mo tsa nas/ pi la ya'i bar gyi 'bras bu rnams ni brtas par byed pa ste/ sha rgyas par byed pa dang / de bzhin du lci ba dang / bsil ba'i yon tan dang ldan pa yin zhing / lus tsha ba dang glo rdol ba dang / gcong sel ba yin no/ /de la glo rdol ba ni brang gi phyogs nas khrag 'byung zhing rdol ba'o/ /glo gcong ni lus zungs zad pa ste/ skem nad dang / gcong chen po zhes ming gi rnam par grags pa'o/ /de yang sman dpyad kyi lung las/ glo gcong zad byed skem nad dang / /nad kyi rgyal po zhes kyang bya/ /zhes bya ba bshad pa yin no/ /gzhan dag ni go bar zad do/ /shing thog la sogs mo tsa ni chu shing gi 'bras bu'o/ /ra dza da na ni bar na bri ya zhes bya'o/ /ta la'i 'bras bu mkhris skyed 'khru/ /zhes bya ba ni/ mo tsa la sogs pa'i shing thog rnams kyi nang nas/ ta la'i 'bras bu ni mkhris pa skyed cing 'phel bar byed pa dang khong 'khru ba yin no/ /kash+ma rgya 'bras bsil ba dang / /bshang gci 'gags pa sel byed cing / /skra skyed yid gzhungs bcud len 'gyur/ / zhes bya ba la/ shing kash+ma rgya'i 'bras bu ni bsil ba'i nus pa dang ldan pa nas/ bcud len gyi bya ba byed par 'gyur ba'i bar gyi yon tan dang ldan par 'gyur ba yin no/ /pa ta ma sogs dro ba dang / /bad kan mkhris pa skyed byed 'khru/ /snum zhing mchog tu rlung skyed byed/ /ces bya ba la/ pa ta ma la sogs pa nas/ pi la ya'i bar gyi shing thog ni dro ba'i nus pa dang ldan pa dang / de bzhin du bad kan dang mkhris pa skyed cing / khong 'khru la snum pa dang / mchog tu shas cher rlung 'phel bar byed pa yin no/ /pi la ya'i 'bras tsha ba min/ /zhes bya ba la/ pi la ya'i 'bras bu'i shing thog ni tsha ba min zhes bya ba ste/ bsil ba'i nus pa can yin no zhes bya ba'i don to/ /pi la ya yi tshi gu mngar/ /ro tsa mkhris pa rlung nad sel/ /zhes bya ba la/ pi la ya'i 'bras bu'i nang gi tshi gu ni ro mngar ba la sogs pa'i yon tan dang ldan pa'o/ /rgya shug tshi gu'i yon tan ni/ /de 'dra skom slon lud pa sel/ /zhes bya ba ni/ rgya shug nang gi tshi gu'i yon tan ni/ pi la ya'i 'bras bu'i yon tan dang ldan pa las/ de las lhag pa'i yon tan skom nad dang / slon bro ba dang / lud pa sel bar byed pa yin no/ / bil 'bras smin pa 'ju dka' zhing / /nyes skyed 'phyen ni dri nga byed/ /ces bya ba la/ bil ba'i 'bras bu smin par gyur pa ni 'ju dka' ba ste/ yongs su 'du zhing smin par dka' ba ste/ nyes pa gsum skyed pa dang / 'phyen gyi dri nga zhing mnam par byed pa yin no/ /ma smin drod skyed bad rlung sel/ /zhes bya ba la/ bil ba'i 'bras bu de ma smin pa/ ming gi rnam par bil ba'i ga gon zhes grags pa smin par gyur pa gang yin pa de ni me'i drod skyed pa dang / de bzhin du bad kan dang rlung sel ba yin no/ /de dag gnyi ga 'khru ba gcod/ /ces bya ba la/ bil ba'i 'bras bu smin pa dang / ma smin pa de gnyi ga yang 'khru ba gcod pa ste/ bshang ba sdud pa'i mtshan nyid can yin no/ /ma smin ka pid mgul nad dang / /nyes pa kun skyed/ ces bya ba la/ ka pi ta ma smin pa ni/ mgul nad skyed cing skad gsang nyams par byed pa dang / nyes pa kun skyed ces bya ba/ nad gzhi gsum car skyed par byed pa yin no/ /smin pa ni/ /nyes 'joms skyigs bu slon bro sel/ /zhes bya ba la/ ka pi ta smin pa ni nyes 'joms zhes pa nyes pa gsum car sel ba dang / de bzhin du skyigs bu dang / slon bro ba'i nad sel ba yin no/ /kun kyang 'khru gcod dug 'joms yin/ /zhes bya ba la/ ka pi ta smin pa dang / ma smin pa thams cad 'khru ba gcod pa'i mchog tu gyur pa dang / dug 'joms shing sel bar byed pa yin no/ /'dzam bu'i shing tog bshang gci sri/ /bsil zhing shin tu rlung skyed yin/ /bshang dang gci ba gcod byed cing / /lkog ma la gnod bad mkhris sel/ /zhes bya ba la/ shing 'dzam bu'i shing tog ni bshang gci sri zhing / rgyun 'gog par byed pa dang / lci ba la sogs pa'i yon tan dang ldan pa dang / bad kan dang mkhris pa sel ba'i bar gyi mtshan nyid dang ldan pa yin no/ /a mra'i 'bras bu ma smin rlung / /khrag mkhris skyed byed rus chags pa/ /bad kan mkhris skyed min rlung skyed/ /lci mngar bad kan khu ba 'phel/ /zhes bya ba la/ a mra'i shing tog ma smin pa gzhon nu ni rlung dang mkhris pa dang bad kan dag skyed par byed pa ste/ rlung las gyur pa'i khrag dang mkhris pa las gyur pa'i khrag skyed par byed do zhes bya ba'i don no/ /rus pa chags pa ni tshi gu'i rus pa skyes pa ste/ rus pa chags pa'i a mra de ni bad kan dang mkhris pa skyed pa yin no/ /a mra'i 'bras bu de smin zhing nar son pa ni rlung sel ba dang lci ba dang / ro mngar ba dang / bad kan dang khu ba 'phel bar byed pa yin no/ /br-ik+Sha am+la rtsub bshang sri/ /lci tsha bad kan rlung dag 'joms/ /zhes bya ba la/ br-ik+Sha am+la ni/ tin ti li kam ste/ de ni rtsub pa dang / bshang ba sri zhing bsgong ba dang / lci ba dang / nus pa tsha ba dang / bad kan dang rlung dag 'joms shing sel bar byed pa yin no/ /sha mya tsha lci skra gnod rtsub/ /ces bya ba la/ shing sha mya'i 'bras bu ni nus pa tsha ba dang / rang bzhin lci ba dang / skra la gnod cing 'byi bar byed pa dang / rtsub par gyur pa yin no/ /pi lu'i 'bras bu mkhris pa skyed/ /bad kan rlung nad sel zhing 'khru/ /mtsher pa gzhang 'brum skran srin sel/ /zhes bya ba la/ shing pi lu'i 'bras bu ni mkhris pa skyed par byed pa dang / bad kan la sogs pa sel ba'i mtshan nyid lnga dang ldan pa yin no/ /pi lu mngar zhing kha ba gang / /shin tu tsha min nyes gsum 'joms/ /zhes bya ba la/ pi lu'i 'bras bu gang mngar ba dang / cung zad kha ba de ni shin tu tsha min zhes pa ste/ cung zad tsam dro zhing tsha ba'i nus pa dang ldan pa zhes bya ba'i don te/ de ni rlung la sogs pa'i nyes pa gsum 'joms shing sel ba yin no/ /ba lu shun kha tsha zhing snum/ /rlung nad sel bar byed pa yin/ /zhes bya ba la/ ba lu ni ma du lung ga zhes bya ba ste/ ming gi rnam grangs bi dza bu ra zhes bya ba'o/ /de'i shun pa zhes bya ba ni steng gi shun lpags kyi ro ni kha zhing tsha ba yin pa dang / de bzhin du snum zhing rlung nad sel bar byed pa yin no/ /ba lung 'bras shas brtas byed mngar/ /rlung dang mkhris pa sel zhing lci/ /zhes bya ba la/ ba lung de'i 'bras bu'i sha zhes pa/ 'bras bu'i pags pa'i nang rim pags pa dang 'brel te nye bar gnas pa de ni brtas par byed pa ste/ lus nyams brtas shing rgyas par byed pa dang / ro mngar ba yin te/ de ni rlung dang mkhris pa sel ba dang lci ba yin no/ /de yi rkang yang skyigs lud pa/ /dbugs mi bde dang chang nad sel/ /kha skam rlung dang bad kan dang / /rtug sra skyugs bro yi ga 'chus/ /skran dang gzhang 'brum gzer nad dang / /me drod chung ba nyid sel to/ /zhes bya ba la/ ba lung de'i rkang ste/ nang na gnas pa'i snying po skyur ba gang yin pa de ni yang ba yin la/ des kyang skyigs bu la sogs pa'i nang nas drod chung ba'i bar sel zhing 'joms pa yin no/ /na rang ga 'bras mngar cung skyur/ /yi gar 'ong zhing kha zas len/ /lci zhing rlung ni rab skyed pa'i/ /yon tan ldan par shes par bya/ /zhes bya ba ni/ skyur rtsi chung ngu'i 'bras bu ni ro mngar zhing cung zad skyur ba yin no/ /de ni yi gar 'ong ba la sogs pa'i yon tan dang ldan par shes par bya'o/ /bse shing 'bras bu'i shun pa sha /khong brtas byed cing mngar la bsil/ /zhes bya ba la/ bse shing gi 'bras bu ba la ta ka zhes bya ba ste/ ming gi rnam grangs a ru kar zhes bya ba de ni shun pa dang / nang gi sha ni khong brtas shing lus rgyas par byed pa dang / ro mngar zhing zhim pa dang / bsil ba'i yon tan dang ldan pa yin no/ /de'i rus me mnyam yid gzhungs byed/ /bad kan rlung ni sel ba'i mchog /ces bya ba la/ bse shing gi 'bras bu de'i rus pa ste/ tshi gu ni rno bas me dang mnyam pa dang / phyi rol du bskus na chu bur 'byung bar byed pas na/ me dang mnyam pa zhes bya ba yin la/ de bzhin du nang du btang ba'i sman dang sbyar ba las kyang / myur du zas 'ju bar byed cing drod mchog tu skyed par byed pas tsi tra ka dang mtshungs pa yin te me dang mnyam zhes bya'o/ /la la ni rno ba dang tsha ba dang me ltar chu bur 'byin par byed pas me dang mnyam pa yin par 'dod do/ /gzhan dag ni me dang mnyam pa zhes bya ba/ tsi tra ka dang mnyam par yon tan dang nyes pa skyed par byed pas tsi tra ka dang mtshungs pa yin no/ /zhes zer mod kyi/ de ni rigs pa ma yin te/ tsi tra ka'i stobs me dang mnyam/ /zhes bya ba'i skabs su tshul ji ltar bshad par bya ste/ 'dir ni me nyid dang mnyam par dper sbyar bar rigs kyi/ bse shing gi rus pa dang mi sbyar ro/ /yid gzhungs byed ces bya ba ni/ blo rno ba la phan pa ste shes rab thob par byed pa'o/ /de bzhin du bad kan rlung ni sel zhes bya ba ste/ bad kan dang rlung sel zhing 'joms par byed la/ de yang mchog tu zhes shin tu sel bar byed pa'o/ /ku shu rnam gnyis lci ba ste/ /mngar skyur bsil dang tsha ba yin/ /yig 'bye zhing me rab 'bri/ /zhes bya ba la/ ku shu ni co'u ste/ de yang rnam pa gnyis zhes bya ba mngar ba dang skyur ba rnam pa gnyis yod do/ /de gnyi ga yang lci ba yin la/ de gnyis las go rims bzhin du mngar ba ni bsil ba yin la/ skyur ba ni tsha ba'i nus pa dang ldan pa yin no/ /de bzhin du yi ga 'bye bar byed cing me'i drod rab tu 'bri bar byed pa yin no/ /kham sha yig 'byed cing mngar/ /smin pa myur du 'ju bar 'gyur/ /shin tu tsha min lci nyes skyed/ /ces bya ba la/ kham sha'i dbye ba ni rnam pa bzhi ste/ de yang sman dpyad kyi lung las/ kham sha dang ni kham rgod dang / / tsi li sogs dang rgya kham ste/ /de ni rigs kyi khyad par gyis/ /kham bu rnam pa bzhir shes bya/ /zhes bshad pa yin no/ /de bzhi char yang yi ga 'byed cing zas len par byed pa dang / ro mngar ba dang / shin tu smin cing tshos nas ni myur du 'ju bar 'gyur ba yin no/ / shin tu tsha min zhes bya ba ni/ cung zad tsam nus pa tsha ba dang / de bzhin du shin tu lci ba dang / shin tu nyes pa skyed pa yin te/ cung zad lci ba dang / cung zad nyes pa skyed pa'o/ /rgun 'brum pa ru sha ka dang / /ka ra mar dang btsos rlon skyur/ /mkhris pa bad kan skyed cing 'khru/ /lci zhing nus tsha rlung 'joms so/ /zhes bya ba la/ rgun 'brum dang / pa ru sha ka dang / ka ra mar dang btsos pa rlon pa ste/ skam po ma yin pa dang / ma smin cing skyur bar 'gyur ba ni mkhris pa dang bad kan 'phel zhing skyed par byed pa dang / khong 'khru ba dang lci ba dang / rlung 'joms shing sel ba dang / nus pa'i stobs tsha ba yin no/ /rgya shug skyur thung li gu tshe/ /a mra ka ta de bzhin no/ /zhes bya ba la/ sngar bshad pa bzhin du rgya shug ni kham bu'i 'bras bu dag dang cha 'dra ba yin te/ rgya shug skyur po ni am+la go la'o/ /rgya shug thung ngu ni ka ra kan du'o/ /de bzhin no zhes bya ba ni 'bras bu de dag rlon zhing skyur bar gyur pas ni snga ma dang 'dra bar mkhris pa dang bad kan skyed cing 'khru ba dang / lci zhing nus pa tsha la rlung 'joms pa yin no/ /e ra ba ti tu da dang / / mri ga lin da dzam bir bcas/ /smin dang ka ra yar ta skam/ /mkhris pa shin tu skyed byed min/ /zhes bya ba la/ e ra ba ti dang / tud dang / mri ga lin da dang / dzam bi ra smin pa dag ni mkhris pa shin tu skyed pa ma yin la/ de bzhin du ka ra yar skam po yang mkhris pa shin tu skyed par byed pa ma yin te/ mkhris pa cung zad skyed par byed do zhes don gyis ston pa yin no/ /e ra ba ti ni ba rang ga'o/ /dzam bi ra ni dan da sha tha'o/ /am+li ka dang rgya shug skyur/ /skam po drod skyed 'khru ba dang / /skom dad ngal dang rmya ba sel/ /yang zhing rlung dang bad kan 'joms/ /zhes bya ba la/ am+bi peka ni tsu kri ka'o/ /rgya shug skyur po ni ko li ka'o/ /'bras bu de gnyis bskams par gyur pa ni me'i drod skyed pa dang / bshang gci sla zhing 'khru ba dang / skom dad dang ngal ba dang rmya ba sel ba dang / de bzhin du yang ba dang / rlung dang bad kan dag kyang 'joms shing sel ba yin no/ /de las 'bras bu kun tha chad/ /li gu tse ste nad kun slong / /zhes bya ba la/ 'bras bu'i sde tshan rnams la 'bras bu de rnams kyi tha chad ces pa/ tha ma ni li gu tse zhes bya ba yin te/ des ni nad kun slong zhes pa nyes pa gsum po mtha' dag skyed par byed pa yin no/ /kha ba me dang rlung gnod nyen/ /sbrul gyi kha chu sogs pas phog /srin bus zos dang chu nang lhung / /sa ngan dus min skyes pa dang / /'bru gzhan 'dres shing mthu nyams dang / /shin tu rnying gyur 'bru spang bya/ /zhes bya ba la/ 'bru kha ba la sogs pas nyen cing nyams pa rnams spang bar bya ste/ gnod pas nyen pa'i sgra ni kun la sbyar bar bya ste/ des na kha ba'i gnod pas nyen pa dang / de bzhin du mas tshig pa'i gnod pas nyen pa'am/ than pas khyer ba dang / rlung gis gnod pa ste/ 'bru la gnod pa rlung rtsub mos nyen pa dang / de bzhin du sbrul la sogs pa'i kha chus phog pa la sogs pa'i sgras ni ro bsregs pa'i dris phog pa dang / bshang ba dang gci bas phog pa bsdu'o/ /srin bus zos pa ni 'bu srin rnams kyis zos ba'o/ /chu nang lhung ba ste/ chu'i nang du nub pa dang / sa ngan pa ste/ mi mthun pa'i sar skyes pa ste/ de yang 'bru gang dang gang du skye bar 'os pa'i sa de ma yin pa gzhan dag tu skyes pa ni mi mthun par skyes ba'o/ /dus ma yin par skyes pa ni smin pa'i dus su ma phyin pa ste/ 'bru gang dus gang skyes par grags pa de las gzhan pa'i dus dag tu skyes pa zhes bya ba'i don te/ de'i mtshan nyid ni ro la sogs pa yongs su ma rdzogs pas gnod pa yin no/ /'bru gzhan ldan zhing zhes bya ba ni rigs mi mthun pa gzhan dag dang 'dres par gyur pa ste/ dper na 'bras rak+ta sha li rtsa snar ni 'bras ya ba ka zhes bya ba nas 'dra dang 'dres na gnod pa yin no/ /de bzhin du mon sran sde'u mung+ga ni mon sran gre'u ma sha dang mi mthun pa yin no/ /de bzhin du gra ma can yang gram can gyi ris mi mthun pa dang 'dres pa dang / gong bu can yang gong bu can gyi ris mi mthun pa dang 'dres pa spang bar bya'o/ /la la dag ni 'bru gra ma can ni 'bru gang bu can dang mi mthun pa yin no zhes zer ro/ /de bzhin du gzhan dag ni sar pa dang rnying pa 'dres pa dag ni 'bru gzhan 'dres pa yin no zhes zer ro/ /de bzhin du mthu nyams shing shin tu rnying pa ste/ lo mang por lon pa nyid kyis shin tu rnying par gyur pas mthu nyams shing nus pa zad pa'i 'bru spang bar bya'o/ /de yang rgyud gzhan dag las/ lo gcig lon na 'bru thams cad/ /lci ba nyid ni spong gyur gyi/ /de yi nus pa 'dor ma yin/ /de nas rim gyis 'dor bar 'gyur/ /zhes bshad pa yin no/ /des na mthu nyams shing shin tu rnying par gyur pa'i 'bru yin no/ /tshod ma'ang de bzhin rtsub par ni/ /g.yos ba dag dang mi snyi dang / /ro ni smin par ma gyur dang / /la phug ma gtogs skam po dang / /zhes bya ba la/ tshod ma'ang de bzhin zhes pa kha ba la sogs pas nyen pa spang bar bya'o/ / de bzhin du rtsub pos btsos pa ste/ rtsub pa nyid du btsos pa ni rtsub por g.yos pa'am/ yang na rtsub po ste dar ba dang zho ga chu dang skyur po la sogs pa dang / g.yos pa ni rtsub por g.yos pa'o/ /mi snyi ba ni sra ba ste/ rang bzhin gyis sra ba'am/ g.yos su byas pas sra ba'o/ /de bzhin du ro smin par gyur pa ste/ ro'i rang bzhin yongs su rdzogs par ma gyur pa'o/ /de bzhin du la phug ma gtogs pa skam po spang bar bya'o/ /gang gi phyir la phug skam po bza' bar bya ba sngar bshad pa'i phyir ro/ /'bras bu'ang phal cher de bzhin te/ /bil ba ma gtogs rlon pa spang / /zhes bya ba la/ 'bras bu shing thog kyang phal cher mang du de bzhin te/ ji ltar 'bru kha ba la sogs pas nyen cing snad pa dang / 'bus zos pa dang / chur lhung ba dang / sa ngan pa las skyes pa dang / dus ma yin par skyes pa dang / ro ma smin pa dang / skam po spang bar bya ba yin no/ /phal cher zhes smos pas ni 'bru gzhan dang 'dres pa dang rtsub mor g.yos pa la sogs pa dang / 'dir mi sbyar ba dang / rgun 'brum la sogs pas ni skam po yang sbyor ba dag la dgos shing skyon med par snang bas/ de dag ma gtogs par shes par bya ba'i phyir phal cher smos pa yin no/ /de bzhin du shing tog thams cad kyang rlon pa ste/ smin par ma gyur pa spang bar bya'o/ /de la bil ba ni ma gtogs te/ de'i ma smin pa'i sbyor ba'i yon tan chen po dag drang srong gis bshad pa yin no/ /'dir gzhan dag thams cad ni ci rigs par snga ma bzhin du sbyar bar bya'o/ /zas kyi tshul shes par bya ba 'dir 'bru dang sha dang tshod ma dang shing tog 'bras bur grags pa dang / ma grags pa rnams kyi ming ma smras pa de dag ni yul mang po mthong zhing tha snyad la mkhas pa rnams las shes par bya'o/ /'bras bu'i sde tshan no// //da ni lan tshwa la sogs pa dag zas kyi g.yos la dgos pa dang / sman dang zas kyi sbyor ba la sogs pa gang yin pa de brjod par bya ste/ lan tshwa kun kyang bad kan skyed/ /phra zhing bshang gci 'byin la 'jam/ /rlung 'joms 'ju byed tsha zhing rno/ /yi ga 'byed cing bad mkhris skyed/ /ces bya ba la/ lan tshwa thams cad ni spyir bad kan skyed cing rtsa sbubs kyi rgyun las chu rnams 'dzag par byed pa yin pas/ kun kyang bad kan skyed pa yin no/ /de sman dpyad kyi rgyud las/ rang gi nus pa snying gar ni/ /song ste rnam par sdud byed cing / /rno bas rnam par gcod byed la/ /tsha bas myur du 'dzag par byed pa yin pas/ kun kyang bad kan skyed pa yin no/ /de sman gyi rgyud las zhes bshad pa yin no/ /phra ba ni rtsa sbubs phra mo la zhugs par byed pa yin pa'i phyir ro/ /bshang gci 'byin pa ni dri ma sel zhing 'khru bar byed pa'o/ /'jam pa ni rang bzhin mnyen pa'o/ /rlung 'joms pa ni rlung nad sel ba'o/ /'ju bar byed pa ni zas la sogs pa smin par byed pa'o/ /tsha ba ni tsha ba'i nus pa dang ldan pa'o/ /rno ba ni lus zungs 'bigs pa'o/ /yig 'bye ba ni zas len pa'o/ /bad kan dang mkhris pa skyed pa ni de gnyis 'phel bar byed pa'o/ /de la lce myang tsha mngar bcas/ /ro tsa yid 'ong nyes gsum sel/ /yang zhing tsha la mig la phan/ /tsha ba mi skyed me drod skyed/ /ces bya ba la/ de la zhes bya ba ni nges par gzung ba ste/ lan tshwa de thams cad kyi nang nas/ lan tshwa lce myang tsha ni yang ba ste/ cung zad mngar ba dang / ro tsa zhing sa bon 'phel bar byed pa dang / yid du 'ong zhing snying dga' bar byed pa dang / rlung la sogs pa gsum sel bar byed pa la sogs pa'i yon tan dang ldan pa yin no/ /rtsal ru tsha yang yid 'ong zhing / /sgregs pa sbyong zhing dri zhim la/ /zhu rjes tsha zhing bshang sri sel/ /drod skyed yi ga 'byed byed yin/ /zhes bya ba la/ rtsal ru tsha ni se'u bar tsa la ste/ ming gi rnam grangs gzhan yang ru tsa ka zhes bya'o/ /de ni yang zhing yid du 'ong ba dang / sgregs pa'i dri mi zhim pa sbyong ba la sogs pa'i yon tan dang ldan pa yin no/ /kha ru tsha ni stod bad kan/ /smad kyi rlung 'byin drod skyed la/ /bshang 'gags lto sbos rtug skam dang / /gzer zug lus lci sel ba yin/ /zhes bya ba la/ kha ru tsha 'di ni bi da lo nu ste/ kha ru tsha bcos ma yin par shes par bya'o/ /de ni stod kyi bad kan 'dren par byed pa dang / smad kyi rlung 'byin par byed pa yin no/ /lugs su 'byung bar byed pa yin zhing drod skyed pa la sogs pa'i yon tan dang ldan pa yin no/ /rgya mtsho'i lan tshwa zhu rjes mngar/ /lci zhing bad kan rnams 'phel byed/ /ces bya ba la/ rgya mtsho'i lan tshwa ni zhu ba'i rjes mngar ba dang / lci zhing khyad par du bad kan 'phel bar byed pa yin no/ /bkod ma'i lan tshwa cung zad kha/ /tsha dang ba tsha rno byed gsher/ /zhes bya ba la/ bkod ma'i lan tshwa ni sa las skyes pa'i lan tshwa ste/ de ni cung zad tsha ba ni/ cung zad ba tsha'i zhad bro ba dang / rno ba'i yon tan dang ldan pa dang / sla zhing gsher bar byed la bad kan dang mkhris pa la sogs pa gnas nas sgul bar byed pas na gsher bar byed pa yin no/ /kha ru tsha nag yon tan dri/ /ma gtogs yon tan bi dar mtshungs/ /zhes bya ba la/ kha ru tsha nag po ni dri ma gtogs pa yon tan gzhan bi da kha ru tsha dang mtshungs shing mnyam ste/ 'di gnyis kyi khyad par ni dri tsam du zad do/ /mtsho tsha yang ste/ zhes bya ba ni lan tshwa mtsho tsha zhes bya ba ni ro ma ka ste/ de ni yang ba'i yon tan dang ldan pas na yang ba yin no/ /sa skam tsha/ bad kan skyed cing 'ju dka' lci/ /zhes bya ba la/ sa skam gyi tsha ni sa rul can gyi phyogs nas byung ba'i tsha ste/ de ni ba tsha bro zhing bad kan skyed par byed cing 'ju dka' ba dang / lci ba yin no/ /lan tshwa rnams kyi sbyor ba la/ /rgyam tsha la sogs rab tu sbyar/ /zhes bya ba la/ lce myang tsha la sogs pa'i lan tshwa rnams kyi nang nas gcig gam gnyis sam mang po brngos pa'i phye ma dang / la du dang / sman mar dang / til mar la sogs pa'i sbyor ba de dang de la rgyam tsha la sogs pa rab tu sbyar bar bya'o/ /des na 'di skad ston pa yin te/ gang du khyad par med par lan tshwa gcig smos pa de ni rgyam tsha'am lce myang tsha sbyar bar bya'o/ /gang du gnyis smos pa de ni rgyam tsha dang rtsal ru tsha'o/ /gang du gsum smos pa der ni/ rgyam tsha dang rtsal ru tsha dang / kha ru tsha nag po sbyar bar bya'o/ /gang du bzhi smos pa der ni/ lce myang tsha dang rtsal ru tsha dang / kha ru tsha dang kha ru tsha nag po'o/ /gong du lnga smos pa der ni/ lce myang tsha dang rtsal ru tsha dang / kha ru tsha dang kha ru tsha nag po dang / rgya mtsho'i tsha sbyar bar bya'o/ /de bzhin du bkod ma'i lan tshwa la sogs pa yang sbyar ro/ /nas tshig 'khus pa'i lan tshwa ni/ /skran dang snying nad skya rbab dang / /pho ba mcher pa lkog nad dang / /lud pa gzhang 'brum dbugs mi bde/ /lto sbos bad kan sel ba yin/ / zhes bya ba la/ lan tshwa'i nang nas nas tshig 'khus pa'i thal ba'i lan tshwa ni/ skran nas bad kan gyi bar sel zhing 'joms pa yin no/ /sardzi ka sogs thal tsha kun/ /rab rno tsha zhing srin sel yang / /khrag mkhris skyed byed smin byed la/ /gcod cing mi zhim rnam par 'byed/ /nas tshig 'khus tsha kha bas na/ /mdog mdangs khu ba skra mig gnod/ /ces bya ba la/ sardzi ka la sogs pa'i thal ba'i tsha khu ni rab tu rno ba dang / tsha ba'i nus pa dang ldan pa dang / srin bu'i nad sel ba dang / yang ba dang / khrag dang mkhris pa skyed pa smin par byed pa dang / bad kan la sogs pa gcod par byed pa dang / de bzhin du mi zhim pa ste/ snying mi dga' bar mi byed pa dang rnam par 'byed pa ste/ 'brum bu dang / phol mig la sogs pa 'byed cing 'gags par byed pa dang / lan tshwa bro zhing kha bas mdog mdangs dang khu ba la sogs pa la gnod pa yin no/ /shing kun rlung dang bad kan sel/ /gzer 'joms mkhris pa skyed byed de/ /zhu rjes ro tsha yi ga 'byed/ /drod skyed zas 'ju yang ba yin/ /zhes bya ba la/ shing kun ni rtsi bo che ste/ de ni rlung dang bad kan sel zhing gzer nad 'joms pa dang / de bzhin du mkhris pa skyed par byed pa dang / zhu ba'i rjes mngar zhing ro tsha ba dang / yi ga 'byed pa dang / drod skyed pa dang / zas ma zhu ba 'ju ba dang / yang ba'i yon tan dang ldan pa yin no/ /a ru ra bska zhu rjes mngar/ / rtsub cing lan tshwa'i ro med yang / /drod che zas 'ju yid gzhungs byed/ /na tshod la 'jog dam pa yin/ /dro zhing 'khru la tshe la phan/ /blo dang dbang gsal stobs rab skyed/ /mdze dang bzhin lus mdog mi sdug /skad 'gags rims rnying mi bzad rims/ /glad pa mig nad skya rbab dang / /mig ser pho ba'i nad rnams dang / /skem bcas 'or nad gcin nad dang / /tshad 'khru rmongs bag myos slon srin/ /mchil mang lud pa dbugs mi bde/ /gzhang 'brum mcher pa lto spos dug /gsum 'phel rgyun 'gags skran dang ni/ /da rgan na dang yi ga 'chus/ /rlung dang bad kan las gyur nad/ /de dang de ni sel byed yin/ /zhes bya ba la/ a ru ra ni ro rab tu bska ba yin la/ zhu ba'i rjes mngar ba yin zhing / rtsub pa'i yon tan dang ldan pas rtsub pa yin la/ lan tshwa'i ro med pa ni lan tshwa'i ro dang bral ba ste/ ro lnga dang ldan pa zhes bya ba'i don to/ /sngar bska ba zhes smos pa ni/ de shas che bar bstan pa'i phyir yin no/ /de ltar na a ru ra ni mngar ba dang / skyur ba dang / kha ba dang / tsha ba dang / bska ba ste/ ro lnga dang ldan pa yin par shes par bya'o/ /de yang ba la sogs pa'i yon tan dang ldan pa yin te/ na tshod la 'jog pa ni gzhon nu ma yin pa dag kyang rgas pa las bzlog nas mchog tu gzhon pa la 'jog pa yin pa dang / blo zhes bya ba 'phral gyi don 'dzin par nus pa dang / mig la sogs pa'i dbang po gsal bar byed cing / de rnams kyi stobs rang gi yul la 'jug par nus pa rab tu bskyed pa yin no/ /de bzhin du de ni mdze nas yi ga 'chus pa'i bar gyi nad dang / rlung dang bad kan las gyur pa'i nad gzhan gang dag yod pa de dang de thams cad sel bar byed pa yin no/ / rims rnying pa ni yun ring du lon pa'o/ /mi bzad pa'i rims ni rtag pa'i rims la sogs pa rnam pa bzhi'o/ /gzhan dag ni go bar zad do/ /skyu ru ra yang de 'dra bsil/ /ro skyur bad mkhris sel de las/ /zhes bya ba la/ skyu ru ra yang / a ru ra dang 'dra bar shes par bya'o/ /a ru ra'i yon tan bshad ma thag pa gang yin pa de thams cad skyu ru ra la yang yod de 'dra ba zhes bya ba la/ 'dir nus pa ni de dang mi mthun te/ de ni dro ba yin la/ skyu ru ra ni bsil ba'i nus pa dang ldan pa yin no/ /yon tan gzhan lan tshwa mi bro zhing zhu rjes mngar ba dang / ro lnga dang ldan pa la sogs pa dang / bad kan dang mkhris pa las byung ba'i nad de dang de 'joms par byed pa ni 'dra ba yin par shes la/ skyur ba'i ro ni shas che ba yin no/ /yon tan cung dman ba rur/ /zhu rjes tsha mngar skra mig phan/ /zhes bya ba la/ ba ru ra ni a ru ra ra'i yon tan de las cung zad cig dman zhing chung ba yin la/ de ni a ru ra dang yon tan las thun mong yin yang / ba ru ra nus pa bsil ba yin te/ de rtsom pa'i 'byung ba chen po de lta bu'i rnam par zhugs pa yin pa'i phyir ro/ /de ni zhu ba'i rjes tsha ba dang / ro mngar ba'i shas che ba dang / skra la phan pa dang / mig la phan pa yin no/ /'bras bu gsum po 'di dag ni/ /bcud kyis len mchog mig nad sel/ /rma 'tsho lpags nad rma red dang / /tshil ches gcin snyi bad khrag sel/ /zhes bya ba la/ a ru ra dang skyu ru ra dang ba ru ra zhes bya ba dang gsum mo/ /'bras bu gsum zhes legs bshad pa/ /'bras bu gsum po de shes bya/ /zhes 'byung ba dang / gzhan dag las kyang / 'bras bu'i mchog ni rnam gsum mo/ /'bras bu'i dam pa gsum zhes bshad pa yin no/ /'bras bu gsum po de dag nyid ni bcud kyis len pa'i mchog ces bya ba ste/ bcud kyis len rnams kyi nang na dam pa yin pa'o/ /mig nad sel ba ni mig gi nad rnams 'joms pa'o/ /rma 'tsho ba ni rma 'byor cing slar 'tsho bar byed pa'o/ /lpags nad ni mdze nad med pa la dang / skran nad la sogs pa'o/ /rma red pa ni rma las khrag la sogs pa 'dzag pa'o/ /tshil ches pa ni lus zungs kyi tshil lhag pa'o/ /gcin snyi ba ni chu so'i nad do/ /bad kan dang khrag ni dngos su zad de/ de dag sel zhing 'joms par byed pa yin no/ /shing tsha sug smel b+ha dra gsum/ /ge sar bcas pa dri bzangs bzhi/ /zhes bya ba 'di ni/ bsdus pa'i tshig yin pa las ming tsam bstan pa'i phyir/ 'ga' zhig gis 'dir bcug pa yin te/ shing tsha dang / sug smel dang / gan+d+ha b+ha dra gsum ni dri bzangs gsum zhes bya ba la/ gsum po 'di rnams kyi steng du nA ga ge sar gyis bsnan pa ni dri bzangs bzhi zhes bya ba'o/ /'di dag ni ming tsam bstan pa yin gyi/ yon tan ni 'dir ma bstan te gzhan las ni ming tsam btus par zad do/ /na le sham ni mkhris skyed rno/ /rtsub cing drod skyed yi ga 'byed/ /ro dang zhu rjes dag kyang tsha/ /bad kan 'joms shing yang ba yin/ /zhes bya ba la/ na le sham ni mkhris pa 'phel bar byed pa yin pas na mkhris pa skyed ces bya'o/ /de bzhin du rno zhing rtsub pa la sogs pa'i yon tan dang ldan pa yin no/ /pi pi ling rlon bad skyed mngar/ /bsil zhing lci ba snum pa yin/ /zhes bya ba la/ pi pi ling rlon pa ni bad kan skyed par byed cing ro mngar ba dang / nus pa bsil ba dang / lci zhing snum pa'i yon tan dang ldan pa yin no/ /skam po de las bzlog pa yin/ /snum zhing ro tsa ro tsha la/ / zhu rjes mngar zhing bad rlung dang / /lud pa dbugs mi bde sel 'khru/ /de gnyis bcud len ma gtogs pa/ /gzhan la shas cher sbyar mi bya/ /zhes bya ba la/ pi pi ling de skam po yin na ni/ pi pi ling rlon pa de las yon tan go bzlog pa yin te/ de las go bzlog pa ni rlon pa ni bad kan skyed pa dang / mngar ba dang lci ba yin la/ 'di ni bad kan sel ba dang / kha ba dang / nus pa bsil ba dang yang ba yin no/ /de'i khyad par gzhan yang / skam po ni ro tsa zhing khu ba 'phel ba dang / zhu ba'i rjes mngar ba dang / de bzhin du bad kan dang / rlung dang bad kan dang / dbugs mi bde bsel bar byed cing khong 'khru ba yin te/ de lta bu'i pi pi ling de ni bcud kyis len gyi cho ga ma gtogs par gzhan la zhes pa/ nad med par gnas pa dang / nad pa dag gso ba'i skabs la shas cher sbyar bar mi bya'o/ /dong gra drod skyed ro tsa dang / /'khru gcod yid 'ong mkhregs pa sel/ /yi ga 'bye yang zhu rjes mngar/ /khong snum drod che bad rlung sel/ /zhes bya ba la/ dong gra ni li dong gra ste/ ming gi rnam grangs bi shwa bi zhes grags pa'o/ /de ni drod skyed pa la sogs pa'i yon tan dang ldan pa yin te/ tshig gi don ni go bar zad do/ /sge'u gsher de 'dra/ zhes bya ba ni/ sge'u gsher zhes bya ba dong gra rlon pa ni dong gra de nyid dang yon tan 'dra ba yin par shes par bya'o/ /de dag ni/ /tsha ba gsum ste sha sbom dang / /me drod nyams dang dbugs mi bde/ /lud pa rkang bam cham pa 'joms/ /zhes bya ba la/ sngar bshad ma thag pa'i pi pi ling dang / na le sham dang / dong gra ste gsum po 'di dag ni tsha ba gsum zhes bya bar shes par bya'o/ /de ni sha sbom pa nas cham pa'i bar 'joms par byed do/ /dbyi mong pi pi ling rtsa ba/ /nal sham yon tan cung zad chung / /zhes bya ba la/ dbyi mong dang pi pi ling gi rtsa ba ni na le sham gyi yon tan las cung zad cig gis chung ba yin par shes par bya'o/ /tsi tra ka stobs me dang mnyam/ /'or nad gzhang 'brum srin mdze sel/ /zhes bya ba la/ tsi tra ka ni kru trug tres zhes bya ba ste/ de ni stobs me dang mnyam pa yin te/ me dang bya ba'i las mtshungs te/ de ni shin tu tsha zhing dro bas zas myur du 'ju bar byed do zhes bya ba'i don to/ /dper na phyi rol gyi mes zangs na gnas pa'i chu dang 'bras me lce 'bar ba dang ldan pa'i mdag mas smin par byed pa yin la/ de bzhin du tsi tra ka dang ldan pa ni me'i drod skyed pa'i sgo nas 'ju bar byed pa'i las kyis/ de nyid me dang 'dra bar 'gyur ba yin no/ /de yang 'or nad dang / gzhang 'brum dang / srin nad dang / mdze nad sel bar byed do/ /'di rnams las ni na le sham/ /ma gtogs tsha ba lnga zhes bshad/ /skran chen dmu rdzing lto sbos dang / /gzer 'joms drod ni skyed pa'i mchog /ces bya ba la/ bshad ma thag pa'i pi pi ling dang / pi pi ling mU la dang / dbyi mong dang / tsi tra ka dang / li dong gra ste/ 'di rnams la ni tsha ba lnga zhes bya ba'i ming gis ming du btags pa yin no/ /na le sham ma gtogs zhes bya ba ni 'dir na le sham mi bgrang ba ste/ gang gi phyir pi pi ling la sogs pa'i nang na/ na le sham yang bgrang mod kyi/ 'dir tsha ba lnga la ma gtogs pas de bkar ba yin no/ /tsha ba lnga po de ni skran la sogs pa 'joms pa dang / de bzhin du shin tu drod skyed pa'i mchog yin no/ /bi la pa kasma tar ka ri/ /pa ta la dang dun du ka /rtsa chen lnga po bska kha dro/ /rlung dang bad kan sel byed yin/ /zhes bya ba la/ bil ba ni ming gi rnam grangs su shi ri phal zhes bya'o/ /kash+ma rgya ni shi mi par+Ni 'o/ /tar ka ri ni ag ni man tha'o/ /pa ta la ni ba san ta du ti'o/ /dun du ka ni so na ka ste/ de rnams kyi rtsa ba ni rtsa ba chen po lnga zhes bya bar shes par bya ste/ de ni ro bska zhing kha ba yin la/ nus pa ni dro ba yin/ yon tan ni rlung dang bad kan sel bar byed pa yin no/ /ang shu ma ti bri ha ti/ /gnyis gnyis gze rtsa chung lngar bshad/ /zhu rjes ro mngar ha cang ni/ /bsil dang tsha min nyes kun sel/ /zhes bya ba la/ ang shu ma ti gnyis ni sa la par+Ni dang / kr-iSh+Na par+Ni'o/ /bri ha ti gnyis las bri ha ti gcig ni kaN+Da kA ri ste/ ming gi rnam grangs gzhan yang k+Shu tra zhes bya'o/ /bri ha ti gnyis pa ni sbom po ste/ ming gi rnam grangs gzhan yang sing hi zhes bya ba'o/ /gze ma ni ming gi rnam grangs khyi'i mche ba zhes bya ba ste/ de rnams kyi rtsa ba ni rtsa ba chung ngu lnga zhes bshad la/ de yang zhu ba'i rjes dang ro mngar ba yin la/ de bzhin du ha cang bsil ba dang / tsha ba ma yin pa ste/ cung zad tsha ba la cung zad bsil bas thun mong gi cha mnyam pa ste/ dper na mi'i seng ge zhes bya ba lta bu'o/ /de bzhin du rlung la sogs pa'i nad rnams 'joms pas na nad kun sel zhes bya'o/ /rtsa ba chen po dang chung ngu gnyis bsdus pa la ni rtsa ba bcu pa zhes bya ste/ de yang lung las/ rtsa ba chung dang chen po lnga/ /rtsa ba bcu pa zhes byar bshad/ /ces 'byung ba yin no/ /bal pur+Na e raN+Da/ / su pya par+Ni rnam gnyis rtsa/ /'bring yin bad kan rlung 'joms yin/ /shin tu mkhris pa mi skyed 'khru/ /zhes bya ba la/ ba la ni ming gi rnam grangs ba d+ho da ri zhes bya ba'o/ /pur+Na rna ba ni bar sha b+hu zhes bya ba'o/ /e raN+Da ni sor lnga pa zhes bya ba'o/ /su pya par+Ni gnyis ni mung+ga par+Ni dang / ma sha par+Ni ste/ de rnams kyi rtsa ba lnga ni rtsa ba 'bring po yin te/ de ni bad kan dang rlung 'joms par byed pa dang / shin tu mkhris pa mi skyed ces bya ba/ mkhris pa cung zad skyed pa dang / khong 'khru bar byed pa yin par shes par bya'o/ /nye'u shing ka ko la 'tsho byed/ /dzi ba ka dang ri shar bshad/ /'tsho byed ces bya mig la phan/ /ro tsa rlung dang mkhris pa sel/ /zhes bya ba la/ nye'u shing ni a b+hi ru'o/ /ka ko la ni bi ra'o/ /'tsho byed ni dzi ban ti sum ga la zhes bya ba'o/ /dzi ba ka ni kur tsa shing shi'o/ /ri sha ba ni bi sha ni ste/ rtsa ba lnga po de dag ni 'tsho byed kyi rtsa ba lnga zhes bya bar shes par bya'o/ /de ni mig gnyis la phan pa yin pas na/ mig la phan pa zhes bya la/ de bzhin du ro tsa ba dang / rlung dang mkhris pa sel ba yin no/ /'jag ma ku sha 'bras bur shing / /'dam rtsa rtsar bshad lnga mkhris sel/ /zhes bya ba la/ 'jag ma dang ku sha gnyis ka rigs gcig pa la sogs pa dang / phra ba'i khyad par gyis gnyis su bshad pa yin no/ /ku sha ni yang 'jag ma can gyi rtsa'i khyad par ro/ /'bras ni gra ma can gyi sde tshan las bshad pa'i rak+ta sha li la sogs pa'o/ /bu ram shing dang 'dam bu ni grags par zad do/ /de rnams kyi rtsa ba ni rtsa ba lnga zhes bya ba'i rtsa ba lnga pa yin la/ de ni mkhris pa 'ba' zhig sel bar byed pa yin no/ /gra ma gang bu g.yos sbyar zas/ /sha dang tshod ma shing tog sman/ /zas cha cung zad tshan gdus 'di/ /rtag tu dgos pa yod par smras/ /zhes bya ba la/ bza' bar bya ba yin pas na zas te/ de ni gram can dang / gang bu can dang / g.yos su sbyar ba dang / sha dang / tshod ma dang / shing tog dang / sman sna tshogs dang / tshod ma sna tshogs tshod ma la dgos pa'i rdzas cung zad yod pa de dag kyang zas dang 'dra bar nad sel bar gnas pa dang / nad pa rnams khams snyoms par bya ba'i phyir sbyar bar bya ba yin zhing skyon med pa nyid la rtag tu dgos pas 'dir bshad cing smras pa yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u drug pa'i rnam par 'grel pa'o// //de nas kha zas bsrung ba'i le'u bshad par bya'o zhes bya ba la/ de nas zhes bya ba ni 'das ma thag pa ste/ zas dang skom phan pa dang / gnod pa'i dbye bas phye ste/ bshad pa de la yang dug la sogs pa dang 'bags pa'am/ mi mthun pa zos pa dag dgag par bya ba yin pas/ de'i rjes thogs la 'di brtsams pa yin no/ /de la bza' bar bya ba yin pas na zas so/ /de bsrung ba ni dug la sogs pa dang ma 'dres par yongs su bsrung zhing bsdam pa'o/ /de'i le'u gong du bstan pa'i le'u de yang nye bar gdags pas de skad ces bya'o/ /de ltar na zas dang skom la sogs pas sbags pa dang mi mthun pa'i kha zas le'u gang du dgag par byed pa'i le'u de brtsam par bya ste/ gang gi phyir yon tan dang ldan pa'i zas dang skom ni srog 'dzin par byed pa yin pas/ srog dang 'dra ba de nyid dug la sogs pa dang nye bar bcom pa dang / de bzhin du mi mthun par gyur pa ni gsod par gyur pa nyid yin te/ de bas na zas kyi tshul shes pa'i le'u rjes thogs la 'di brtsams pa yin la/ rgyal po'i pho brang nye 'khor du/ /srog 'tsho'i slob dpon gzhag par bya/ /de ltar byas pas thams cad du/ /thams cad las ni bsrung bar 'gyur/ /zhes bya ba la/ rgyal po ni sa bdag go/ /pho brang nye 'khor ni rgyal po'i bzhugs gnas dang / 'dab nye bar ro/ /srog 'tsho'i slob dpon ni sman pa ste/ sman pa rnams kyi mchog tu gyur pa'o/ /de gzhag par bya zhes pa/ pho brang nye ba kho nar gzhag par bya zhing gnas par bya ba ste/ der de'i khang pa zhes bya ba'i don to/ /de ltar byas pas zhes pa de ltar nye bar bsten par gyur pas/ sman pa de thams cad du zhes pa dus thams cad du/ thams cad la zhes pa zas dang skom la sogs pa rnams la bsrung zhing sdom par 'gyur ro zhes bya ba'i don no/ /khyad par du ni sa bdag gi /zas skom dug las bsrung bar bya/ /chos la sogs dang gang 'brel pa'i/ /'byor bde de la rag las so/ /zhes bya ba la/ khyad par du zhes bya ba rab tu 'bad pas sa bdag ste/ rgyal po'i zas la sogs pa bsrung zhing bsdam par bya'o/ /zas dang skom zhes bya ba ni nye bar mtshon pa tsam du zad do/ /des na rgyal po'i longs spyod du dgos pa'i na bza' dang / gzims mal dang / dri dang / phreng ba dang / rin po che la sogs pa dag kyang dug las bsrung bar bya ste/ de ci'i phyir zhe na/ chos spyad pa dang / sogs pa zhes bya ba nor dang / 'dod pa dang thar pa rnams dang gang 'brel zhing rgyur gyur pa'i skye dgu dang / bdag nyid kyi 'byor pa dang / bde ba ni rgyal po de la rag las shing de'i kha na lus pa yin no/ /de la 'byor pa ni longs spyod ma thob pa rnams thob par byed pa'o/ /thob pa rnams yongs su bsrung ba ni bde ba ste/ de gnyi ga yang rgyal po de la rag lus pa yin no/ /de bas na de'i gnod pa bsrung bar bya dgos so/ /de dag kyang ji ltar shes shing bsrung bar bya zhe na/ 'bras chan dug bcas gsher bag kyang / /skam bag can ni 'dra bar 'gyur/ /yun ring tshos par gyur pa dang / /tshos pa'ang zhag lon lta bur 'gyur/ /rlangs pa rma bya'i mgrin 'dra zhing / /khong myos brgyal dang lus rngul skyed/ /dri dang mdog sogs nyams par 'gyur/ /rul zhing rma bya'i sgro ltar 'tsher/ /zhes bya ba la/ 'bras chan ni 'bras btsos pa'i chan te/ de dug dang bcas shing dug gis sbags par gyur na/ gsher bag dag kyang skam bag can 'dra bar 'gyur te/ rlan bag med cing bcang du mi 'dod par 'gyur ro/ /de bzhin du tshos dka' bar 'gyur te/ dus ring mos tshos par 'gyur ba dang / de tshos par gyur nas kyang 'phral du zhag lon pa lta bur 'gyur te/ nyin zhag gcig 'das pa ltar rlangs pa med cing bsdur mi 'dod par 'gyur ro/ /de bzhin du de'i rlangs pa rma bya'i mgrin pa 'dra bar kha dog sna tshogs par 'gyur bas na/ rlangs pa rma bya'i mgrin pa 'dra zhes bya'o/ / de zos par gyur nas kyang / khong myos pa dang / brgyal ba dang / lus rngul ba skyed par 'gyur te/ khong myos pa ni sems med pa'o/ /brgyal ba ni 'du shes nyams pa'o/ /lus rngul ba ni bad kan 'thon pa'o/ /yang 'bras chan de dri dang mdog sogs zhes pa'i dri dang / kha dog dang / ro dang / reg pa rang gi ji lta ba nyid nyams shing 'jig par 'gyur ro/ /de bzhin du rul cing zhes pa/ rab tu 'drul bar 'gyur ro zhes bya ba'i don to/ /de bzhin du rma bya'i sgro ltar 'tsher ba zhes bya ste/ rma bya'i mjug sgro'i rtse mo lta bu'am/ chu nang du til mar gyi thigs pa bor ba ltar sngo dmar 'tsher bar 'gyur ro/ /tshod ma myur du skam pa dang / /bskol ba mdog ni gnag 'gyur zhing / /der gzugs chung ba'am che ba'am/ /mi sdug pa'am mi snang 'gyur/ /sbu ba steng byung ri mo mtshams/ /kha chu 'dra dang chu bur 'byung / /zhes bya ba la/ tshod ma zhes bya ba ni sran tshod la sogs pa ste/ de la dug yod na myur du skam par 'gyur ba dang / de bzhin du bskol ba ni mdog gnag cing dri ma can du 'gro ba dang / der zhes pa tshod ma bskol ba der rang gi gzugs kyi rang bzhin las chung zhing zhan pa'am/ che zhing lhag pa'am/ mi sdug pa ste/ rang bzhin gzhan du snang bar 'gyur ro/ /yang na der rang gi rnam pa nyid snang bar mi 'gyur ro/ /yang tshod ma bskol ba der sbu ba la sogs pa 'byung ba las kyang shes par bya ste/ de la sbu ba ni sbu ba'i rnam par 'bur du chas shing 'byung ste/ de'i nang na ri mo sna tshogs pa dag snang ba'am/ mtshams 'bye zhing 'chad pa lta bur snang ba dang / kha chu 'dra bar na la nal por 'byung ba dang / chu bur dag ji ltar chu'i nang na snang ba dang 'dra ste/ de dag der 'byung bar 'gyur te/ btung ba mngar skyur tshod ma dang / /sha dag mtshams 'byed ro dang bral/ /zhes bya ba la/ btung ba ni rgun 'brum la sogs pa la sngar sbyar ba phal cher mdog dmar por snang zhing mngar ba dang skyur ba ste/ yang btung ba'i bye brag bal po'i se'u la sogs pa las byas pa'i ro skyur ba dang / tshod ma ste/ shu sha dang / pa tha la sogs pa dang / sha btsos pa dag ste/ btung ba mang po mdog can la sogs pa de thams cad dug dang bcas par gyur na/ mtshams 'bye ba dang / ro dang bral bar 'gyur te/ ro drug po dag mi snang zhing gsal bar mi rnyed par 'gyur te/ de ltar na ro dang bral ba ste ro mi zhim pa dang / phyin ci log gi ro dang ldan par 'gyur ba'i don no/ /sha khu ri mo sngor snang zhing / /'o ma zangs mdog zho dri ma/ /dar ba la ni ser dang gnag /mar khu chu dang 'dra bar snang / /chang dang chu gnag sbrang rtsi la/ /ljang snang til mar dag la dmar/ /zhes bya ba la/ sha khu ni sha las byas pa'i khu ba ste/ de dug gis sbags par gyur pa na/ dbus na ri mo sngon por snang bar 'gyur ro/ /'o ma la dug gis sbags na/ nang na zangs kyi mdog lta bur snang bar 'gyur ro/ /zho la dug yod na ri mo dri ma can snang bar 'gyur ro/ /dar ba la dug yod na ni ri mo ser po dang nag po snang bar 'gyur ro/ /mar dug dang 'dres na ni ri mo chu dang 'dra bar snang bar 'gyur ro/ /chang dang chu la dug yod na gnag cing snag tsha ltar snang bar 'gyur ro/ /sbrang rtsi la dug yod na ni ljang gur snang zhing mdog sngo bsangs su snang bar 'gyur ro/ /til mar la dug yod na ni ri mo dmar zhing zangs ltar snang bar 'gyur ro/ /shing tog ma smin smin par snang / /smin pa dag ni yongs su 'drul/ /zhes bya ba ni/ shing tog ma smin pa la dug gis sbags pa ni/ smin pa lta bur snang bar 'gyur la/ shing tog smin pa rnams la dug gis sbags pa ni yongs su 'drul zhing rul bar 'gyur ro/ /kha zas rlon dang skam pa dag /rnyings shing mdog ni nyams par 'gyur/ /zhes bya ba la/ kha zas rlon pa ni dug gis sbags na ni rnyings par 'gyur la/ kha zas skam po dag la dug gis sbags na ni mdog nyams shing kha dog dang bral bar 'gyur te/ 'dir tshig gnyis go rims bzhin sbyar bar bya'o/ /snyi ba dang ni sra ba dag /reg pa go ni bzlog par 'gyur/ /zhes bya ba la/ rdzas snyi ba rnams dang / de bzhin du sra ba dag la dug gis sbags na/ reg pa go bzlog par 'gyur te/ snyi ba ni sra bar 'gyur/ sra ba ni snyi bar 'gyur te/ 'di ni reg pa'i go bzlog pa'o/ /me tog phreng rtse lo ma gas/ /rnyid cing dri ni mi zhim 'gyur/ / zhes bya ba la/ gal te me tog gi phreng ba la dug yod na ni de'i rtse mo gas shing zad pa dang / rnyid cing kun tu dengs par 'gyur ba dang / dri mi zhim pa ste dri zhim po dang bral nas/ dri mnam pa gzhan dag 'byung bar 'gyur ro/ /gos la nag po tal til dang / /spu rnams 'thul zhing kha tshar 'chad/ /ces bya ba la/ steng nas bgo ba dang 'og tu gding ba la sogs pa'i gos rnams la dug gis bsgos pa na ni ri mo dri ma can tal til dag snang ba dang / gos kyi spu rnams rnam par 'thul zhing chad pa dang / kha tshar gcad cing lhung bar 'gyur ro/ / gser dngul mu tig shing dang rdo/ /rin chen sogs la dri ma chags/ /gzi mdangs reg pa 'od nyams 'gyur/ /zhes bya ba la/ gser dngul gyi khams kyi rang bzhin can gyi rin po che rnams te/ 'di dang gzhan yang bsdu'o/ /mu tig ni mu tig gi rdo gu'o/ /shing dang rdo ni dngos su zad do/ /rin chen ni bai DUr+ya dang / rdo rje la sogs pa ste/ gser dngul la sogs pa 'di rnams la dug gis sbags na dri ma chags pa ste/ /'dam gyis bskus pa 'dra bar 'gyur ba dang / de bzhin du gser dngul la sogs pa 'di rnams nyid kyi gzi mdangs dang / reg pa dang 'od nyams shing med par 'gyur ro/ /sa yi snod ni mdog bcas byed/ /ces bya ba la/ sa'i snod ces bya ba kham phor la sogs pa las byas pa'i snod rnams ni mdog med pa dag kyang / mdog dang bcas shing gzim dngas can du 'gyur ro/ / dug ster kha ni sngo bskams la/ /gnong bag gi sa ni phyogs su blta/ /rngul zhing 'dar la skrag pa dang / /'jigs shing 'gros 'khyor glal ba dang / /zhes bya ba la/ dug ster zhing sbyin par byed pas na dug ster te/ dug sbyor ba'i mi'o/ /de'i kha ni sngo bskams la zhes bya ba/ de'i kha sngo zhing bskams par gyur pa dang / de bzhin du gnod bag gis zhes bya ba ngo tsha ba dang bcas pa lta bur g.yer bag med pa dang / phyogs kun tu blta zhing rtog par byed pa dang / de bzhin du lus tsha la rngul zhing 'dar bag dang ldan la/ rang gi nyes pa'i dogs pas skrag pa ste/ khong skyo ba dang / 'jigs pa ste bred pa dang bcas pa dang / 'gros 'khyor ba ste/ rdeg 'chos shing 'tsho ba dang / de bzhin du glal zhing kha gdangs par byed par 'gyur ro/ /dug ldan zas ni mes bsregs na/ /me lce gcig 'khyil me stag rgal/ /du ba rma bya'i mgrin 'drar 'gyur/ /me lce mi 'bar 'bar yang mnan/ /sbrang mas zos na 'chi bar 'gyur/ /bya rog gis zos skad zhan 'gyur/ /'di ni ne tsho da ru ha/ /ri skegs kyis mthong ca co 'byin/ /ngang pas zos na rdeg 'chos la/ /shang shang te'u na bar 'gyur/ /sreg pa mig ni mi chags byed/ /khrung khrung dag ni 'dzur bar 'gyur/ /phug ron khu byug bya ga ga dang / /ngur pas zos na 'chi bar 'gyur/ /byi la skyo zhing 'dor bar 'gyur/ /spre'u mi gtsang 'dor bar byed/ /rma byas de mthong dga' bar byed/ / dug gi dpal ni nyams par 'gyur/ /de ltar zas ni dug ldan bar/ /shes shing lci nas de yis ni/ /srog chags phra mo yan chad la'ang / /gnod par 'gyur bar 'bad de dor/ /reg na g.ya' zhing tsha la na/ /rims 'debs 'brum 'byung tshor ba chung / /sen mo spu 'byung lus skrang ste/ /de la dug ni rnam 'jig pa'i/ /tsan+dan shug pa pu shel tse/ /so ma'i shun bcas bal bu'i 'dab/ /ru rta sle tres a ka ru'i/ /chus bkrus blugs shing bsku bar bya/ /khar chud nas ni mchil snabs mang / /lce mchu sbrid cing bem por byed/ /lus tsha na zhing so brtse la/ /ro mi tshor zhing 'grams so 'thams/ /de la dug kun 'joms sman dang / /ur shi sogs khus khur bkang dbo/ /ma zhu'i gnas babs rngul ba dang / /brgyal zhing lto sbos myos mgo 'khor/ /ba spu ldang zhing skyug lus tsha/ /mig ni gsal zhing snying mi dran/ /yan lag thig les khyab par 'gyur/ /zhu ba'i gnas su phyin na yang / /kha dog sna tshogs skyug pa dang / /gcin mang rab tu 'khru bar 'gyur/ /rmya snyom skom zhing mdog skya la/ /gsus pa che zhing nyams stobs zad/ /de gnyis slon dang khrus byas nas/ /ser gnyis bu ram gi ri kar/ /sen du ba ri nis pa ba/ /ba shis ka dang tshigs brgya pa/ /tan du li ya'i rtsa ba dang / /bya gag sgo nga bal gu za/ /snar gtong mig sman blud bya ba/ /dug zhi'i phyir ni sbyar bar bya/ /zhes bya ba la/ de gnyis zhes pa ma zhu ba dang / zhu ba'i gnas dag slon dang khrus bya ba ste/ slon sman gyis ma zhu ba'i gnas nas slon can de drangs pa dang / 'khru sman gyis 'ju ba'i gnas nas khrus bya zhing bton nas/ de ltar legs par sbyang ba'i lus la ser po gnyis la sogs pa nas/ sna nas btang zhing mig sman khu ba dang / blud pa'i bar gyi sbyor ba dug zhi bar bya ba'i phyir sbyar bar bya'o/ /de la ser po gnyis zhes bya ba ni yung ba dang skyer pa ste/ ser po rnam pa gnyis so/ /bu ram ni bu ram shing las byung ba'i bu ram dkar po'o/ /gi ri kar ni ga ta bi'o/ /sen du bi ra ni shwe ta puSh+pe'o/ /nis pa ba ni gang bu can gyi 'bru'i khyad par zhig go/ /ba shis ka ni he gu ba tra'o/ /tan du li ya ni me gan+d+ha ste/ de'i rtsa ba'o/ /bya gag gi sgo nga ni khyim bya'i sgo nga'o/ /a bal gu za ni so ma ra dza ste/ rdzas de rnams cha snyoms la lde gur byas te sna nas gtang ba dang / mig sman du bsku ba dang / blud cing sbyin par bya ba dag dug zhi bar bya ba'i phyir bya'o/ /dug 'thungs pa dag steng dang ni/ /de bzhin 'og ni sbyangs gyur nas/ /dus su zangs bzang bdar phye ma/ / sbrang rtsir bcas pa snying sbyong sbyin/ /zhes bya ba la/ dug 'thungs pa'i skyes bu de/ slon sman dang khrus sman gyis steng ste ro stod dang / 'og ste ro smad sbyangs shing dag par gyur nas/ rigs shing 'tsham pa'i gnas skabs kyi dus su zangs ma bzang po legs par bdar ba'i phye ma zhib mo sbrang rtsi dang sbrang rtsir bcas pa'i lde gu de snying na yod pa'i nad sbyong bar byed pa la sbyin par bya'o/ /snying nad sbyangs nas gser phye ni/ /zhib mo zho gcig sbyin byas na/ /zhes bya ba la/ de ltar zangs ma'i phye ma'i lde gu sbyin zhing / snying nad sbyangs par gyur nas/ de'i 'og tu gser gyi phye ma zhib mor byas pa srang gcig gi bzhi cha sbyin par bya'o/ /pad+mo'i 'dab mar chu bzhin du/ /gser gyis yan lag la mi chags/ /tshe yang ring du 'phel bar 'gyur/ /zhes bya ba la/ gang gi phyir gser 'thungs par gyur pas dug zos pa'i yan lag rnams la dug de chags shing zhen par mi 'gyur te/ dper na pad+ma'i 'dab mar chu chags par mi 'gyur ba de bzhin du/ de la chags par mi 'gyur ba dang / de bzhin du gser 'thungs par gyur pa dag ni tshe ring zhing 'phel bar 'gyur ba nyid kyang 'thob par 'gyur ro/ /sbyar dug la yang cho ga 'di'o/ /zhes bya ba la/ bshad ma thag pa'i dug zhi bar bya ba'i cho ga 'di ni 'og nas bshad pa'i sbyar dug la bya bar drang srong gis bshad do/ /sbyar ba'i dug ni dug sbyar ma'o/ /sbyar dug dang ldan pa'i zas skom dag ni dus phyis zhig nas gsod par byed pa yin pas gtso bo ma yin la/ de ltar gtso bo ma yin pa nyid kyis na 'di'i cho ga'i dpyad du bya ba phyis bstan pa yin no/ /de bzhin du zas kyi phung po yon tan mchog dang ldan pa dag kyang g.yos su bya zhing sbyar ba dang / tshad dang dus la sogs pa'i dbang gis kha zas mi 'phrod par gyur pa ni/ sdug bsngal skyed par byed pas sbyar ba'i dug dang 'dra ste/ 'phral dang dug phyi nas gsod par 'gyur ro/ /de bas na 'dir smras pa ni/ kha zas dag kyang mi mthun zos/ /sbyar dug 'dra bar shes par bya/ /zhes bya ba yin te/ kha zas kyang g.yos su byas kyang sbyar ba dang / tshad pa dang / yul dang / dus la sogs pas mi mthun par gyur pa zos pa ni/ sbyar ba'i dug dang 'dres par shes par bya zhing khong du chud par bya'o/ /rlan can sha dang mon sran gre'u/ /sbrang rtsi'o ma myu gu can/ /pad+ma'i rtsa ba la phug skam/ /bu ram dang bcas mi 'phrod yin/ /zhes bya ba la/ rlan can gyi sha ni ri dgas chen po dang / chu la spyod pa dang / chu la gnas pa zhes bya ba'i sde tshan gsum du bstan pa ste/ de dang mon sran gre'u zhes bya ba/ sran ma dang / sbrang rtsi dang / 'o ma dang / myu gu can dang / pad+ma'i rtsa ba dang / de la sogs pa mi 'phrod pa'i zas gang yin pa des ni/ de'i gnod pa'i khyad par 'dir ma bstan kyang / drang srong tsa ra kas ji skad bstan pa'i ma ning la sogs pa'i 'gyur ba skyed cing / des 'phral tam/ dus phyis srog 'joms par byed pa yin no/ /mi 'phrod pa'i 'bras bu tsa ra kas bshad pa ni/ 'on pa dang / long ba dang / 'dar bag dang / rmongs bag dang / lkugs pa dang / dran pa med pa dang / rmugs pa rnams kyi rtsa ba yin pa'am/ yang na 'chi bar 'gyur ba nyid yin no/ /zhes bshad pa yin te/ de dag ni 'dres pa'i sbyor ba'i mi 'phrod pa yin no/ /khyad par du ni 'o ma nya/ /nya rnams las kyang tsi li tsim/ /zhes bya ba la/ khyad par du zhes bya ba ni lhag par ro/ / nya ni ro hi ta la sogs pa ste/ rlan can gzhan dag na yod pa'ang rung ste/ de ni 'o ma dang lhan cig zos na mi 'phrod pa yin no/ /de bzhin du nya rnams kyi nang nas kyang / tsi li tsi ma zhes bya ba'i nya 'o ma dang lhan cig mi 'phrod pa yin te/ 'di gnyi ga yang ro mngar ba dang / zhu ba'i rjes mngar ba dang / bad kan skyed la dro ba dang / bsil bar byed pa'i tshul gyis nus pa mi mthun pa yin la/ nus pa mi mthun pas na khrag 'khrug par byed pa yin la/ bad kan skyed par byed cing rgyu ba'i lam 'gag par byed pa yin no/ /de las kyang nya tsi li tsi ma ni cung zad zlum zhing mdog dmar por snang la/ phal cher sa la rgyu bas/ gal te 'o ma dang lhan cig zos na gdon mi za bar khrag las byung ba'am/ rtug 'gags las byung ba'i nad gang yang rung ba 'byung bar 'gyur ro zhes drang srong tsa ra kas bshad do/ /'o ma lhan cig skyur kun ni/ /mi 'phrod shing tog de bzhin no/ /zhes bya ba la/ 'o ma dang lhan cig skyur thams cad mi 'phrod do/ /'dir kun gyi sgra smos pas skyur ba la sogs pa rdzas gsher ba thams cad bsdu ba dang / de bzhin du sman skyur ba dang / chu'i rtsa ba la sogs pa de thams cad 'o ma dang lhan cig mi 'phrod pa yin no zhes nges par shes par bya'o/ /'dir lhan cig ces smos pa ni/ don lhag par bstan par bya ba'i phyir te/ 'o ma 'thungs na zas gzhan gyis bar bcad du zin cing / pho bar ji srid gnas par 'gyur ba de srid kyi bar du/ skyur po la sogs pa rdzas skyur ba gang yin bza' bar mi bya ste/ lhag pa'i don 'di lhan cig ces bya ba'i sgra las shes par bya'o/ /de yang bsdus pa las/ gsher ba dang bska ba'i rdzas thams cad ni 'o ma dang lhan cig gam/ de'i rjes la mi 'phrod pa yin no zhes bshad pa yin no/ /shing thog ni de bzhin no zhes bya bar 'dir 'o ma dang lhan cig mi 'phrod do zhes bya bar sbyar te/ skyur ba rnams 'o ma dang mi 'phrod pa 'ba' zhig tu ma zad do/ /shing tog kyang mi 'phrod de/ don gyis na shing tog star ka'i 'bras bu la sogs pa skyur ba ma yin pa dag kyang / star ka'i 'bras bu la sogs pa phal cher lhan cig mi 'phrod do zhes bya ba ni de bzhin no zhes bya ba'i don yin no/ /de yang drang srong tsa ra kas a mra'i 'bras bu dang / a mra ta ka dang / ba lung dang / li ku rtse dang / ka ra mar ta dang / chu shing gi 'bras bu dang / skyur rtsi chen po dang / rgya shug gi 'bras bu dang / ko sha a mra dang / 'dzam bu'i 'bras bu dang / bil ba'i rkang dang / tig ti li ka dang / ku shu dang / star ka'i 'bras bu dang / pa na sa dang / rgya star gyi 'bras bu dang / bal po se'u dang / skyu ru ra la sogs pa de lta bu dang / gzhan dag dang / skyur ba'i rdzas skam po dang / gsher ba thams cad 'o ma dang lhan cig mi 'phrod pa yin no zhes bshad pa yin no/ /de bzhin rgya sran khre dag dang / /ba la ku mu ta mi 'phrod/ /ces bya ba la/ de bzhin du rgya sran ku la da tha la sogs pa yang 'o ma dang lhan cig mi 'phrod pa yin no/ /la phug la sogs sngo rngad ni/ /zos nas 'o ma spang bar bya/ /zhes bya ba la/ la phug la sogs pa'i sngo rngad rjen pa zos nas 'o ma spang bar bya'o/ /la sogs pa'i sgras ni/ sku thi ra dang / shi kru dang / bye'u rug pa la sogs pa bsdu'o/ /de yang drang srong tsa ra kas/ mdze'i nad du 'gyur ba'i 'jigs pas/ la phug dang / yungs kar gyi lo ma dang / sgog skya dang / gri na gan+d+ha dang / zin thig le su mu kha dang / su ra la sogs pa'i sgras zos nas/ 'o ma btung bar mi bya'o zhes bshad pa yin no/ /sngo rngad ces smos pa ni la phug gi khyad par la bya bar bstan te/ 'di ltar smos pa las na 'di ni rjen par yang bzar rung bar bstan pa yin la/ sngar tshod ma'i sde tshan gyi nang du 'di smos pas ni/ tshod ma nyid du byar rung bar ston pa yin no/ /de ltar na rjen pa zos nas 'o ma mi btung ba yin gyi/ tshod mar byas pa ma yin te/ legs par btsos nas khu ba btsir ba dang / snum la sogs pas brngos te/ tshod mar g.yos su byas pa'i rjes la 'o ma mi btung ba ni ma yin no/ /phag rgod byi dur sha mi bza'/ khyim bya bri sha ta zhor min/ /zhes bya ba la/ phag rgod kyi sha dang / byi dur sha lhan cig mi bza' ba dang / de bzhin du khyim bya dang / bri sha ta'i sha zho dang lhan cig mi bza'o/ /sha rlon mkhris pa dag dang ni/ /la phug ma sha'i tshod mar min/ /zhes bya ba la/ sha rlon pa mkhris pa dag dang lhan cig mi bza' ba dang / de bzhin du la phug ma sha'i tshod ma dang lhan cig mi bza'o/ /le brgan rtsi tshod lug shar min/ /myu gu'i tshod ma pad rtsar min/ /zhes bya ba la/ le brgan rtsi'i tshod ma dang / lug sha lhan cig mi bza' ba dang / de bzhin du 'bru'i myu gu skyes pa'i tshod ma dang / pad+ma'i rtsa ba lhan cig bza' bar mi bya'o/ / ma sha'i sran tshod bur ma zho/ /mar 'o li ku rtse'i 'bras min/ /zhes bya ba la/ ma sha'i sran tshod dang / bur ma mam/ zho'am mar ram 'o ma'am/ li ku rtse'i 'bras bu lhan cig bza' bar mi bya'o/ /chu shing 'bras bu dar bar min/ /ta la'i 'bras bu zhor mi 'phrod/ /ces bya ba la/ chu shing gi 'bras bu dar bar mi bza' ba'am/ ta la'i 'bras bu zho dang lhan cig mi 'phrod pas mi bza'o/ /tsha ba gnyis po bu ram dang / /sbrang rtsi ka ka ma tsir min/ /zhes bya ba la/ ka ka ma tsi tsha ba gnyis po pi pi ling dang / na le sham dang / lhan cig sbrang rtsi'am bu ram dang ldan par mi bza'o/ /de ni nya btsos pa'i snod dang / /dong gra btsos par g.yos pa min/ /zhes bya ba la/ ka ka ma tsi de ni nya btsos pa'i snod du g.yos su byas pa'ang mi bza'o/ /ka ma ta ni snod gzhan du/ /btsos nas nyin mtshan lon mi bza'/ / zhes bya ba la/ ka ma ta ni/ ka ka ma tsi ste/ de snod gzhan dag tu btsos nas nyin mtshan lon zhing zhag 'das pa dag bza' bar mi bya'o/ /de la mi bza' zhes bya ba 'di ni/ 'di yan chad kun la sbyar bar mi bya'o/ /nya brngos pa yi snum la ni/ /pi pi ling brngos spang bar bya/ /zhes bya ba la/ nya brngos pa'i snum la brngos pa'i pi pi ling spang bar bya ste/ nya gang du brngos pa der brngo ba yang spang bar bya'o/ /mar sar 'khar snod zhag bcu lon/ /go bye'i 'bras bu dror mi bza'/ /zhes bya ba la/ mar sar 'khar ba'i snod du zhag bcu lon pa spang bar bya'o/ /de bzhin du go bye'i 'bras bu la ta ka bza' ba dang / btung bar dro ba dag sman pas spang bar bya'o/ /ba sa sreg shar mi 'phrod cing / /dar bar kam bi la btsos min/ /zhes bya ba la/ bas zhes bya ba'i sha sreg shar bya bar mi 'phrod pas bza' bar mi bya'o/ /de bzhin du kam bi la zhes bya ba ste/ ming gi rnam grangs yan lag dmar zhes bya ba de dar bar btsos te bza' ba mi 'phrod pa yin no/ /'o thug dang ni kri sar/ /chang dang lhan cig mi 'phrod spang / /zhes bya ba la/ 'o thug dang / kri sa ra dang / chang lhan cig mi 'phrod pas spang bar bya'o/ /de la 'o thug ni 'bras chan 'o ma'i nang du btsos te spod kyis btab pa ni 'o thug go/ /kri sa ra ni til dang / sran mung+ga dang / ma shal sogs pa g.yos pa'i thug pa'o/ /chang ni 'bras btags pa la sogs pa las mnan nas byas pa'o/ /de rnams lhan cig tu bza' zhing longs spyad par mi bya'o/ /sbrang rtsi mar sar zhag til mar/ /chu rnams gnyis gnyis gsum gsum mam/ /cha mnyam lhan cig zos pa dag /phan tshun dag ni mi mthun no/ /zhes bya ba la/ sbrang rtsi la sogs pa'i rdzas lnga ni gnyis gnyis sam/ gsum du zhes bya ba gsum gsum mam/ cha mnyam zhes bya ba gcig tu cha mnyam par bya ste/ bza' ba ni phan tshun mi 'phrod pa yin no/ /de yang gnyis gnyis ni dper na/ mar sar dang sbrang rtsi'am/ mar sar dang zhag gam/ mar sar dang til mar ram/ sbrang rtsi dang chu'o/ /gsum gsum ni dper na/ sbrang rtsi dang mar sar dang / til mar du bza' ba'o/ /cha mnyam pa ni sbrang rtsi dang / mar sar dang / zhag dang / til mar dang / chu rnams la bsres te lhan cig zos pa ste/ de dag ni mi 'phrod pa yin no/ /mar sbrang cha ni mi mnyam yang / /char pa'i chu ni 'thungs na gnod/ /ces bya ba la/ mar dang sbrang rtsi cha mi mnyam par gyur kyang / char pa'i chu dang lhan cig 'thungs na mi 'phrod par 'gyur ro/ /sbrang rtsi pad+ma'i sa bon dang / sbrang rtsi 'bru chang kha rar min/ / zhes bya ba la/ sbrang rtsi dang pad+ma'i sa bon lhan cig sbyar te bza' ba yang mi 'phrod pa yin no/ /de bzhin du sbrang rtsi dang / 'bru chang zhes bya ba/ 'bru las mnan pa'i chang dang / sha khar las byas pa'i chang mi 'phrod cing gnod pa skyed pa yin pas/ rlung shin tu skyed par byed pa yin no/ /'o thug rjes la skyo mar min/ /sha mo yungs mar brngos mi 'phrod/ /ces bya ba la/ 'o thug ni 'o ma la 'bras btsos pa'i thug pa'o/ /de ni skyo ma dang mi 'phrod pa yin te/ skyo ma de ni bad kan skyed par byed pa yin te/ skyo ma zhes bya ba la phye dang mar sbyar ba chu dang sbyar la ha cang sla ba'am/ ha cang ska bar ma gyur ba la bya'o/ /sha mo ni gdugs lta bur skyes ba'i tshod ma'i khyad par ro/ /de ni yungs mar brngos te bza' ba mi 'phrod pa yin te/ shin tu mkhris pa skyed pa yin no/ /u po ta ka til tshigs la/ /btsos pa 'khru bar byed pa yin/ /zhes bya ba la/ u po ta ka ni li sa zhes bya ba'i tshod ma ste/ de til gyi tshigs ma dang btsos shing g.yos pa ni 'khru bar byed pa ste/ tshad pas 'khru bar byed pa yin no/ /bya gag sha ni chang dngas dang / /ku la ma sha'i thug mi 'phrod/ /ces bya ba la/ bya gag ni bya ba la ga zhes bya ste/ de'i sha chang dngas ma ba ru ra zhes bya ba dang / ku la ma sha tha'i thug pa dang lhan cig mi 'phrod de/ ku la ma ni mon sran sde'u dang sran chung la sogs pa btsos nas/ shing kun la sogs pa'i spod btab pa'i thug pa'o/ /de nyid phag rgod tshil la brngos/ /srog ni 'phral du 'joms par byed/ /ces bya ba la/ bya gag gi sha de nyid phag rgod kyi tshil dang brngos pa ni/ srog 'phral du 'joms par byed pa yin te/ de'i mod la gsod par 'gyur ro zhes pa'i don to/ /de bzhin sreg pa rma bya dang / /la ba ka pin dza la sram/ /e raN+Da yi me la ni/ /e raN+Da'i mar brngos mi 'phrod/ /ces bya ba la/ de bzhin du sreg pa la sogs pa'i sha// e raN+Da'i me la btsos shing de bzhin du e raN+Da'i mar dang bsres shing brngos pa ni mi 'phrod de/ snga ma dang 'dra bar srog 'phral du 'joms par byed pa yin no/ /ha rid dra sha skyer pa yi/ /thur ma dag la bskyon nas ni/ /skyer pa'i me la bsregs gyur pa/ /'phral du srog ni 'joms par byed/ /ces bya ba la/ de bzhin du bya ha rid dra'i sha skyer pa'i thur ma la bskyon zhing btsugs nas de bzhin du shing skyer pa bus pa'i me la bsregs shing tshos par byas pa ni 'phral du srog 'joms par byed de/ dug dang 'dra bar myur du srog 'phrog cing srog dang bral bar byed do zhes bya ba'i don to/ /de nyid thal ba rdul gyis gos/ /sbrang rtsir bcas ba 'phrod ma yin/ /zhes bya ba la/ bya ha ri ta'i sha de nyid thal ba dang rdul gyis gos shing nyams par gyur pa dang / sbrang rtsi dang bcas pa ni 'phrod pa ma yin te/ 'phral du gsod par byed pa yin no/ /de bzhin du mi mthun pa gzhan dag ste/ grang ba dang / dro ba dang / sar pa dang / rnying pa dang / btsos pa dang / ma btsos pa dag ni rlung dang / bad kan dang mi mthun pa'i sman rnams ni/ bad kan gyi khams dang mi 'phrod par gyur pa yin no/ /la la ni phan tshun gcig la gcig mi 'phrod pa yin la/ kha cig ni sbyor ba'i dbang gis phrad pa las mi 'phrod pa yin zhing / gzhan dag ni g.yos su bya ba la sogs pa'i dbang gis mi 'phrod pa yin la/ yang gzhan dag ni dus dang yul dang tshad la sogs pas mi 'phrod pa yin pa dang / de bzhin du rang bzhin gyis mi 'phrod pa yang yod de/ gzhung rtsom par byed pas/ bsdus pa las bshad pa/ rdzas mthu dang ldan pa dag ni yon tan phan tshun mi mnyam pa nyid kyis g.yos su bya ba la sogs pa'i dbang gis mi 'phrod par 'gyur te/ 'o ma ni rgya sran ku lang+tha dang mi 'phrod la/ pa na sa ni nya dang mi 'phrod cing / mar dron po dang / sbrang rtsi dang / zho dron por mi 'phrod pa dang / tsha sgo can gyi chu dang phyer bsres te mtshan mo bza' ba mi 'phrod pa dang / de bzhin du chu gzhan dag dang nas 'dra mi 'phrod pa lta bu'o/ /gang yang nyes pa ma sbyangs pa/ /mdor na de ni mi 'phrod yin/ /zhes bya ba la/ gang yang rung ba'i kha zas las byung ba'i nyes pa khrus dang / slon la sogs pas ma sbyangs par de ni mdor na zhes pa/ mdor bsdus na mi 'phrod pa yin pas bsten par mi bya'o/ /nyes 'di sbyang bar 'dod pa'am/ /yang na de dang mi mthun pa'i/ /rdzas de nyid kyis dang po ni/ /lus ni mngon par sbyang bar bya/ /zhes bya ba la/ zas mi 'phrod pa las byung ba'i nyes pa 'dir ni sbyang ba zhes bya ba/ slon dang khrus la sogs pa'i tshul bya ba ni 'dod cing bsngags par bya ba yin no/ /yang na de dang mi mthun pa'i rdzas kyi sman gyis zhi bar bya ba 'dod pa yin te/ mi 'phrod pa'i kha zas de'i gnyen por gyur pa'i sman yon tan go bzlog pa des zhi bar bya ba ni/ yul dang dus la ltos nas bya ba nyid yin no/ /yang na gang phan par 'gyur ba'i sman dang / zas kyi rdzas de nyid kyis dang po kho nar lus mngon par sbyang zhing phan pa'i dpyad du bya ba ste/ mdor na dang po nyid nas zas phan pa nyid bza' bar bya zhing bsten par bya'o zhes bya ba'i don to/ / de yang drang srong tsa ra kas/ mi 'phrod zas zos las gyur na/ /slon dang khrus kyis sbyang bya zhing / /rnam par bsal nas zhi ba'am/ /dang por 'phrod pa bsten pas so/ /zhes bshad pa yin no/ /rtsol can snum bsten drod che dang / /dar la ba bcing nyams stobs ldan/ / goms par zos dang cung zad zos/ /mi 'phrod gyur kyang gnod mi 'gyur/ /zhes bya ba la/ gang la rtsol zhing las su bya ba yod pa de ni rtsol bcas te/ rtsol ba can des ni zas dang btung ba dang / sman mi 'phrod pa bsten kyang nad du mi 'gyur ro/ /de bzhin du snum shas cher bsten pa dang / pho ba'i me drod che ba dag dang / dar la bab cing na tshod bde ba dang / de bzhin du nyams stobs dang ldan zhing shin tu bsngags par bya ba'i stobs yod pa des mi 'phrod pa dag zos kyang nad du mi 'gyur ba dang / de bzhin du goms par byas shing rtag tu zos pa dang / cung zad cung zad zos pa dag gis kyang nad du mi 'gyur te/ zas dang skom la sogs pa mi 'phrod cing mi mthun par 'gyur ba yin yang skyes bu de la gnod pa'i nad du mi 'gyur gyi/ nad med pa nyid du gnas par 'gyur ro/ /dris pa gang mi 'phrod pa'i zas skom zos pa na goms pa'am/ nyung zad cig bsten pa'i rgyus dus dang yul la ltos nas/ goms pas lus la gnod pa med cing bde bar 'gyur ba de mod la spang bar bya ba'am/ 'on te rim gyis spang / de bzhin du gang lus la phan zhing 'phrod pa dag kyang mod la cig car bstan par bya ba'am de lta ma yin/ de gnyis kyis rim pa spang ba dang / blang ba'i tshul bstan pa smras pa ni/ mi 'phrod cha yis goms bya'am/ /cha yi cha yis yongs su spangs/ /phan pa'ang de bzhin bsten bya ste/ /'di dag gnyis gsum gyis chod bya/ /zhes bya ba la/ gang mi 'phrod cing phan pa ma yin pa bsten cing goms par bya ba de yang / cha yis goms par bya zhes bya ba rang gi tshad las de'i bzhi chas spang bar bya'o/ /yang na shin tu shas cher zos pa ni/ cha'i yang cha shas su bgos pa ste/ bcu drug char yang spang bar bya'o/ /'am zhes bya ba ni mi 'phrod pa yin kyang / gnod pa med pa dag mod la spangs pas lus la gnod par 'gyur ba mthong bas bstan bcos rtsom pas 'am gyi sgra smos pa yin no/ /de ltar spangs nas phan zhing 'phrod pa dag kyang de bzhin du rim pa de nyid kyis bsten par bya ste/ 'phrog pa dag kyang bzhi cha'am bzhi cha'i bzhi chas bsten par bya'o/ /de ltar mi 'phrod pa cha yis spang ba ste rim pa la ltos pa med par dor bar bya ba'am/ 'on te ltos pa dang bcas pas dor bar bya zhe na/ 'di dag gnyis gsum gyis chod bya/ /zhes smras pa yin te/ sngar bshad pa 'di dag ni zhag gnyis sam gsum gyis mi 'phrod pa'i nye bar mtshon pa thams cad med par 'gyur bas/ bar du chod par byas la mi 'phrod pa de bzhi cha'am/ bcu drug chas spang bar bya'o/ /de bzhin du phan pa dag kyang zhag gnyis dang gsum gyis phan pa ma lus pa nye bar 'phel bar 'gyur bar/ bar gyis chod par byas la bzhi cha'am/ bcu drug chas nges par bsten cing goms par bya'o/ /'dir don ni 'di yin te/ mi 'phrod pa goms par 'gyur ba'i cha gcig spangs la/ mi 'phrod pa sum cha'i nang du 'phrod pa gcig bcug la bza'o/ /de nas nyi ma gnyis pa la/ mi 'phrod pa'i goms pa'i cha bza' bar bya'o/ /de ltar na mi 'phrod pa'i cha gcig gis chod pa yin no/ /nyi ma gnyis pa dang gsum pa dang bzhi pa la yang mi 'phrod pa'i cha gsum dang 'phrod pa'i cha gcig bsres te bza' bar bya'o/ /nyi ma lnga ba la ni yang thams cad mi 'phrod pa bza'o/ /de ltar na mi 'phrod pa gnyis kyis chod pa yin no/ /zhag drug pa dang / bdun pa la mi 'phrod pa'i cha gsum dang / 'phrod pa'i cha gcig bza' bar bya'o/ /zhag dgu pa la ni thams cad mi 'phrod pa'o/ /de ltar na mi 'phrod pa cha gsum gyis chod pa yin no/ /de bzhin du mi 'phrod pa'i cha gcig 'bri zhing de nyid phan pa'i cha bcug pa ltar yang nyi ma bcus mi 'phrod pa'i cha gnyis bcug par bya'o/ /yang de bzhin du zhag bcus snga ma bzhin du mi 'phrod pa'i cha gsum gyis chod pa yin no/ /de bzhin du mi 'phrod pa'i cha bzhi pa yang zhag bcus spangs la/ 'phrod pa'i cha gsum gzhug par bya'o/ /de ltar na zhag bcus spang ba dang / blang ba goms par byas pa yin no/ /gzhan dag ni 'di las gzhan du 'chad de/ nyi ma dang po la mi 'phrod pa las cha gcig spangs la/ 'phrod pa las cha gcig bcug la de nas zhag gcig bsdad par bya'o/ /de nas nyi ma gnyis pa la mi 'phrod pa thams cad bza' bar bya ste/ de ltar na gcig gnyis chod par gyur pa'o/ /de nas nyi ma gsum pa la mi 'phrod pa'i cha gnyis bsten par bya'o/ /de nas nyi ma bzhi pa la thams cad mi 'phrod pa bza' ba dang / de bzhin du zhag lnga pa la yang thams cad mi 'phrod pa bza' bar bya'o/ /de ltar na nyi ma gnyis kyis chod pa yin no/ /zhag drug pa la mi 'phrod pa las cha gcig 'phrod pa las cha gsum bza' bar bya'o/ /de nas bdun pa dang brgyad pa dang / dgu pa'i nyin zhag la thams cad mi 'phrod pa bza' bar bya ste/ de ltar gsum gyis chod pa'o/ /de nas zhag bdun pa la mi 'phrod pa'o/ /de nas zhag bcu gcig pa la 'phrod pa las cha gsum mi 'phrod pa las cha gcig bza' bar bya'o/ /de'i 'og tu nyi ma bcu gnyis pa la thams cad 'phrod par bza' bar bya'o/ /de ltar zhag gis chod par byas nas/ zhag bcu gsum pa la 'phrod pa'i cha gnyis dang mi 'phrod pa'i cha gnyis bza' bar bya'o/ /de nas zhag bcu bzhi pa dang / bco lnga ba la 'phrod pa 'ba' zhig bza' bar bya'o/ /de ltar na nyin zhag gnyis gnyis kyis chod par gyur ba yin no/ /de nas nyi ma bcu drug pa las 'phrod pa las gsum dang / mi 'phrod pa las cha gcig bza' bar bya'o/ /de nas zhag bcu bdun pa dang / bco brgyad pa dang / bcu dgu ba'i grangs kyis bcad pa'i nyin zhag la thams cad kyang 'phrod cing phan par 'gyur ba bza' bar bya'o/ /de ltar nyin zhag gsum gyis chod pa yin no/ /de'i 'og tu zhag nyi shu pa nas brtsams te/ cha bzhi po thams cad kyang phan zhing 'phrod pa las bza' bar bya'o zhes zer ro/ /la la 'di skad 'chad de/ kha zas gnod pa goms pa'i cha gcig bor la/ gnod pa'i kha zas cha gsum gyi nang du phan pa'i cha gcig bcug la/ ji srid goms par gyur pa de srid kyi bar du bsten par bya'o/ /de ltar na gnod pa ni gcig gis chod pa yin la/ phan pa'i zas ni gsum gyis chod pa yin zhing / gang gi phyir gnod pa'i cha las ni cha gcig bor ba yin la/ phan pa las kyang cha gsum bor nas/ cha gcig bcug pa yin pa'i phyir ro/ /de bzhin du cha gnyis kyis chod pa ni gnod pa dang / phan pa gnyis las cha gnyis dor te cha gnyis gnyis bsres la/ ji srid goms par gyur pa de srid kyi bar du bsten par bya'o/ /de'i 'og tu cha gsum gyis chod pa ste/ gnod pa'i cha gsum dor la/ cha gcig pa ste phan pa'i cha gsum gyi nang du bsres te/ ji srid goms par gyur pa de srid kyi bar du goms par bya'o/ /de'i 'og tu phan pa'i zas dang sman cha bzhir rdzogs pa bsten par bya'o zhes zer ro/ /de bas na drang srong tsa ra kas kyang / de phyir gnod pa'ang goms byas pa/ /rim gyis yongs su spang bar bya/ /bsten pas phan par gyur pa yang / /rim gyis rnam par 'phel bar bya/ /gnod pa'i cha gcig dor bya ba/ /phan pa'ang cha gcig dor bya ba/ /nyin zhag bco lnga nyi shus byas/ /de phan chad ni cha res bya/ /zhes bshad pa yin no/ /gzhung rtsom par byed pas yan lag brgyad pa la 'jug pa las kyang / gnod pa'i zas ni goms gyur pa'am/ /spyod pa'i cha yis dor bar bya/ /phan pa'ang cha yis bsten bya ste/ /zhag gcig gnyis gsum gyis chod bya/ /zhes bshad pa yin no/ /skyon ni rim gyis 'grib pa dang / /yon tan rim gyis 'phel 'gyur na/ /slar skye bar ni mi 'gyur zhing / /g.yo ba med pa dag tu 'gyur/ /zhes bya ba'am/ des ni mi 'phrod cing gnod pa skyed par byed pa yang gong du bshad ma thag pa'i rim gyis 'grib cing zad par 'gyur la/ yon tan te bde bskyed bar gyur pa yang rim gyis 'phel bar gyur pa nyid ni grangs ji lta ba bzhin du nyes pa rnams slar zhing phyis 'byung bar mi 'gyur zhing / yon tan g.yo ba med par 'gyur ro/ /mi 'phrod pa yang spangs gyur dang / /'phrod pa goms par gyur pa nyid/ /'phral du spangs dang ma bsten pas/ /nyes pa rnams ni 'byung bar 'gyur/ /zhes bya ba la/ de ltar gong du bshad pa'i rim gyis mi 'phrod pa goms par gyur pa spangs par gyur cing / 'phrod pa za ba goms pa bsten par 'gyur ba nyid ni nyes par mi 'gyur gyi gzhan du na 'phral du ste/ de ma thag pa 'ong bar gyur pas ni 'di gnyis las nyes pa 'byung bar 'gyur ro/ /mi 'phrod pa yang spangs gyur dang / /zhes bya ba 'dir 'phral du zhes bya ba sbyar bar bya ste/ mi 'phrod par gyur pa yang / 'phral du spangs par gyur pa dang / de bzhin du 'phrod pa 'phral du goms par gyur pa nyid las ni sngar bshad pa'i tshul las go bzlog pa yin pas/ de lta bu'i spangs pa dang bsten pa las ni nyes pa ste nad rnams 'byung bar 'gyur ro/ /gnod pa gnod bya'i bdag nyid can/ /shin tu nyes par gyur pa la/ /phan med gnod par byed pa ni/ /mkhas pas phyir zhing bya mi rigs/ /zhes bya ba ste/ gnod pa po ste rlung dang / mkhris pa dang / bad kan dang / gnod bya ste/ lus zungs la gnod pa'i bdag nyid can rang bzhin can de shin tu nye bar gyur cing / lus la gnod par gyur pa la/ phan med ces bya ba rjes su mi mthun par gyur pa'i byed par/ byed pa nyid gnod cing gdug bar byed pa ni mkhas shing bdag nyid shes pas phyir zhing yang nas yang du bya ba mi rigs so/ /de ltar na mkhas pas nyes pa ste/ nad rnams spangs shing bsal nas ni/ nad slar skye bar mi 'gyur la yon tan rim gyis 'phel zhing bsags pa'i 'phrod pa bsten pas ni g.yo ba med de/ rtag tu nad med par byed par 'gyur ro/ /zas dang mal stan 'dod pa spyod/ /ran zhing rigs par sbyar ba yis/ /khang khyim 'chos pa lta bur ni/ /rtag tu lus ni gzung bar bya/ /zhes bya ba la/ zas dang mal stan dang / 'dod pa spyod pa ran zhing rigs par 'gal ba med par sbyar bar bya ba ste/ rigs pa ni bstan bcos las bshad ba'i cho ga ste/ cho ga de sbyar ba'i nges pas dus rtag tu lus gzung bar bya zhing 'di rnams kyis gnas par bya'o/ /de yang khang khyim lta bu 'chos shing brtan par bya ba'i tshul lta bur bya ba ste/ dper na khang pa ka ba brtan pos brten pa ltar lus kyi khang pa 'di yang / sngon gyi las kyi rtsa ba can ka bas brten par gyur pa la/ nye ba'i ka ba lta bu'i zas dang / mal stan dang / 'dod pa la spyod pa rigs pa dang ldan pas brten par bya'o/ /de las zas ni bshad zin cing / /de dang der ni bshad par bya/ /zhes bya ba la/ de la nye ba'i ka ba lta bu'i nang nas zas ni bshad zin te/ chu sna tshogs pa la sogs pa'i tshul shes par bya la/ zas kyi tshul shes par bya ba dang / dus su spyod pa'i le'u sngar bshad zin la de bzhin du 'og nas kyang zas kyi 'og tu skom btung ba'i tshul rims la sogs pa la ji ltar bya ba dang / zas kyi tshod zin par bya ba la sogs pa'i skabs nas de dang der bshad par bya'o/ /mal stan dang 'dod pa la spyod pa ni le'u 'di las bshad par bya'o/ /bde sdug sbom skem stobs che chung / /bud med la phod mi phod dang / /shes dang mi shes 'tsho dang 'chi/ /gnyid la rag ni lus pa yin/ /zhes bya ba la/ bde ba dang sdug bsngal ba la sogs pa ni gnyid la rag lus pa yin te/ gnyid legs par log pas ni bde ba dang / sbom zhing rgyas pa dang / stobs dang bud med la phod pa dang / shes pa dang / 'tsho ba 'phel zhing 'byung ba yin la/ gnyid nyes par bsten pas ni sdug bsngal dang / skem pa dang / stobs chung ba dang / bud med la mi phod pa dang / mi shes pa dang / 'chi ba nyid du 'gyur bas de la rag las pa zhes bya'o/ /de la bde ba ni nad med pa'o/ /sdug bsngal ba ni lus zungs mi snyoms pa'o/ /sbom pa ni lus zungs rgyas pas sha che ba'o/ /skem pa ni lus zungs zad pa'o/ /bud med la phod pa ni ro tsa ba'i sgo nas de dga' bar nus pa'o/ /de la mi phod pa ni khu ba zad pa'i sgo nas ma ning lta bur gyur pa'o/ /shes pa ni rtogs pa dang ldan pa'o/ /mi shes pa ni rnam par rmongs pa nyid do/ /'tsho ba ni srog dang ldan pa'o/ /'chi ba ni srog dang bral ba'o/ /dus min ha cang thal ches dang / /gnyid ni kun tu 'gegs pa dag /bde dang tshe ni nyams byed de/ /dus mtshan gnyis pa lta bu yin/ /zhes bya ba la/ gnyid ni dus min zhes bya ba la/ bstan bcos las bkag pa'i dus su bsten pa dang / de bzhin du ha cang thal ches par bsten pa dang / kun nas kun tu bkag cing ma 'dres pas ni bde ba dang tshe nyams shing 'jig par byed par 'gyur ro/ /de la bde ba ni nad dang bral ba'i mtshan nyid can no/ /tshe ni 'tsho ba dang ldan pa ste/ de gnyis nyams shing 'jig par byed pa'o/ /de ni dper na dus mtshan zhes bya bas 'chi ba'i dus kyi mtshan mo la bab pa ni bde ba dang tshe nyams par byed pa yin no/ /de bzhin du 'di ni dus mtshan sngon chad med pa gnyis pa lta bu yin te/ bde ba dang tshe nyams par byed pa 'di gnyis chos mthun pa yin pa'i phyir ro/ /mtshan mo gnyid ni ma log rtsub/ /nyin mo gnyid log snum lcir 'gyur/ /tsog phur 'dug ste yur ba dag /mig rtsub bad kan med par 'gyur/ /zhes bya ba la/ gang mtshan mo gnyid ma log pa de ni rtsub pa yin la/ gang nyin mo gnyid log pa de ni snum zhing lci bar gyur pa yin te/ gnyid kyis ma log pa'i dbang po thams cad ni bya ba la phyogs shing rtsol ba'i mtshan nyid can yin pas/ bya ba ma rdzogs pa'i tshul gyis na bad kan dang / tshil la sogs pa zhi zhing rang bzhin du gnas pa'i ngo bo 'grib pas rtsub pa'i yon tan 'byung bar mi rigs su zin kyang rtsub pa yin par sgro btags nas smras pa yin gyi/ yang dag par rtsub pa ni ma yin no/ /de yang dper na yur ba la sogs pa ni gnyid ma log pa'i sngon du/ bad kan dang tshil la sogs pa rang gi rgyu las byung ba yin du zin kyang / skyes bu gnyid kyis ma log pa la/ de'i bad kan dang tshil la sogs pa zad par snang gi 'phel bar mi 'gyur te/ de bas na gnyid kyis ma log pa la rtsub pa zhes bshad do/ /gnyid log pa la yang dbang po thams cad kyi bya ba 'gags pa ni mtshan nyid can/ bya ba zin pa lta bu 'di la snum pa'i yon tan dang 'brel pa med pa ma yin mod kyi/ 'on kyang snum pa lta bur sgro btags nas bshad pa yin te/ gang gi phyir de'i tshe rang bzhin zhi bar gyur pas/ bad kan dang tshil la sogs pa rang gi rgyu nyid kyis bshang gci la sogs pa mngon par 'phel bar byed de/ dbang po thams cad kyi bya ba las ldog pa yin pa'i phyir gnyid ma log pa ltar zad par byed pa ni ma yin gyi/ gnyid log pa'i sngar ni bad kan dang tshil la sogs pa'i tha mal par zhi bar gnas pa'i ngo bo rang gi lus la gnas par gtogs pa cung zad gnyid kyis log pa lta bur mi snang ste/ de bas na gnyid kyis log pa la snum par bshad pa yin gyi/ yang dag par ni ma yin te/ 'di'i bya ba'i mtshan nyid ni 'di tsam du zad pa'i phyir ro/ /tsog pur 'dug ste gang yur zhing cung zad gnyid log pa de ni rtsub pa dang / bad kan med par 'gyur ba yin te/ shin tu gnyid med pa ma yin pa'i phyir/ rlung skyed cing 'khrugs pa yang ma yin no/ /bad kan yang skyed pa ma yin no/ /so ga rlung 'phel stobs 'phrog dus/ /rtsub cing mtshan mo thung bas na/ /nyin par gnyid phan/ zhes bya ba la/ so ga'i dus su nyin par gnyid log pa phan no zhes bya bar sbyar ro/ /ci'i phyir zhe na/ rgyu gsum smras pa yin te/ rlung 'phel ba'i dus yin te/ so ga bsags ba'i rlung dbyar gyi dus na ldang bar 'dod pa'i phyir dang / stobs 'phrog pa'i dus byung ba'i rtsub pa yin pas so ga rtsub pa'i phyir dang / de bzhin du de'i tshe mtshan mo thung bar gyur bas na/ nyin par gnyid log pa phan pa yin no/ /gzhan dag tu/ de ni bad kan mkhris pa skyed/ /ces bya ba la/ so ga las gzhan par dbyar la sogs pa'i dus su ni nyin mo'i gnyid de ni bad kan dang mkhris pa gnyis skyed pa yin no/ /smra mang bzhon dang lam gyis du ba/ /ra ro bud med bsten khur las/ /khros dang mya ngan 'jigs pas dub/ /skyigs bu dbugs mi bde tshad 'khru/ /rgan dang byis pa nyams stobs zad/ /glo rdol skem dang gzer gyis gnod/ /zas ma zhu dang bcom dang smyo/ /nyin par gnyid log rigs ma gtogs/ /zhes bya ba la/ smra mang nas 'jigs pa'i bar du dub ba'i sgra so sor zhing sbyar bar bya ste/ de dag gis dub pa dang skyigs bu la sogs pas dub par sbyar ro/ /de la smra ba mang ba ni klog pa la sogs pa'o/ /bzhon pa ni rta la sogs pas bskyod pa'o/ /lam gyis dub pa ni lam du zhugs pa'o/ /ra ro ba ni ra ro bas nyen pas dub pa'o/ /bud med kyis dub pa ni 'khrig pas dub pa'o/ /khur gyis dub pa ni khur bas lus nyon mongs pas dub pa'o/ /las ni lus dub par byed pa'i rtsol ba rnams so/ /de ltar na smra ba mang ba la sogs pas dub pa dang / gzhan yang skyigs bu la sogs pas btab pa ma gtogs par gzhan dag nyin par gnyid log pa ni/ bad kan dang mkhris pa skyed par byed pa yin la/ tshul 'di dag dang ldan pa dag gis ni/ dus thams cad du nyin par gnyid log par mi bya'o/ /zas ma zhu ba ni rnam pa lnga ste/ ring du thogs pa dang / khong tsha ba dang / bshang ba 'gags pa dang / shin tu thogs pa dang / bcud kyi lhag ma lus pa'o/ /bcom pa ni ral gril sogs pa'i mtshon gyis lus bcom zhing btags pa'o/ /smyo ba ni gdon dang brjed byed la sogs pas khams mi mnyam par byas nas dran pa med pa'o/ /nyin par gnyid log par rigs pa ni/ sngar goms shing 'obs pa'i rang bzhin yod pa ste/ de dag thams cad ma gtogs par gzhan gyis dus thams cad du spang bar bya'o/ /'di dag de bzhin lus zungs snyoms/ /bad kan skyes shing lus brtas 'gyur/ /zhes bya ba la/ smra ba mang ba la sogs pas dub pa de dag gis sngar bshad pa'i tshul de bzhin du bsten par gyur na/ de lus zungs zhes bya ba dngas ma la sogs pa dang / bad kan la sogs pa lus 'dzin par byed pa snyoms pa ste/ lhag pa dang 'bri ba med par cha snyoms par 'gyur ba dang / de bzhin du bad kan dang / lag ngar dang / brla la sogs pa'i lus kyi yan lag rnams skyes shing brtas par 'gyur ba'o/ /tshil che bad kan mang dang snum/ /rtag za nyin par gnyid ma log /ces bya ba la/ mi gang tshil che zhing bad kan mang ba dang / de bzhin du snum bag rtag tu za ba dag ni/ nyin par gnyid ma log ces bya ba ste/ dus thams cad du yang nyin par gnyid log par mi bya'o/ /dug gis phog dang lkog nad can/ /mtshan mo nam yang gnyid ma log /ces bya ba la/ dug gis phog cing nyen pa'i nad pa dang / lkog ma'i nad yod pa'i lkog nad can de gnyi gas kyang mtshan mo'i dus su nam yang gnyid log par mi bya'o/ /dus min gnyid log rmongs bag dang / /rims skyed rmugs shing cham pas 'debs/ /mgo na skrang zhing slon sgyid skyur/ /rtsa yi rgyun 'gags me drod nyams/ /zhes bya ba la/ dus ma yin par gnyid kyis log pa ni sngar bkag pa'i dus smos pa dag tu nyin mo gnyid log pa las ni rmongs bag la sogs pa 'byung bar 'gyur ro/ /de la rmongs bag ni gang byas pa rnams mi dran pa'o/ /rmugs pa ni sems mi gsal ba'o/ /sgyid skyur ba ni mer mer por byed pa'o/ /rtsa'i rgyun 'gags pa ni rtsa sbubs 'gags shing legs par mi rgyu ba'o/ /de la smyung dang slon sman dang / /rngul dbyung sna sman gtang ba dang / /zhes bya ba la/ dus ma yin par gnyid log pa nas byung ba'i rmongs bag la sogs pa la smyung ba nas sman sna nas gtong zhing sbyin par bya'o/ /gnyid ches gyur la skyug sman rno/ /mig sman rno dang sna sman dang / / smyung ba sems las bud med bsten/ /mya ngan 'jigs dang khros pa sbyar/ /zhes bya ba la/ shin tu gnyid ches pa las gyur pa'i nad la skyug sman rnon po btang ba la sogs pa nas khros pa'i bar sbyar bar bya'o/ /de la skyug sman ni slon sman gtang ba'o/ /de yang sman rnon po sbyar te bya ba yin pas rnon po zhes bya'o/ /de bzhin du mig sman yang ro tsha ba dang / lan tshwa dang / skyur ba'i sman las sbyar ba'i rno ba nyid do/ /sna nas gtang ba'i sman ni sna sman no/ /smyung ba ni zas bcad pa'o/ /sems las ni dngos po rnams yid la dran pa'o/ /bud med bsten pa ni 'khrig pa'o/ /mya ngan ni sdug bsngal bar gnas pa'o/ /'jigs pa ni skrag pa'o/ /khros pa ni 'khrugs pa'o/ /'di dag nyid kyis gnyid drags pa/ /'jig cing bad kan rab zad byed/ /ces bya ba la/ 'di dag nyid kyis zhes bya ba/ bshad ma thag pa'i skyug sman rnon po btang ba la sogs pas gnyid kyis drags pa yang zhing 'jig la/ de bzhin du bad kan rab tu zad par byed pas kyang gnyid med par 'gyur ro/ /gnyid yar ba yis yan lag snyom/ /glad pa lci zhing glal 'ong la/ / mi gsal na zhing mgo 'khor la/ /zas mi 'ju rmya rlung skyes nad/ /ces bya ba la/ gnyid yar ba zhes bya ba gnyid med par gyur pa las/ yan lag snyom pa la sogs pa 'byung bar 'gyur ro/ /de la yan lag snyom pa ni yan lag brdungs pa snyam sems pa'o/ /glad pa lci ba ni mgo lci ba'o/ /rlung skyes nad ni 'di dag dang / rjes su mthun pa'i nad mang po 'byung ba'o/ /gzhan ni go bar zad do/ /de bas mtshan mo dus bzhin du/ /ci bder gnyid ni log par bya/ /zhes bya ba la/ rgyu de bas na mtshan mo'i dus su dus bzhin du zhes bya'o/ /gnyid log pa'i dus ci tsam yin pa de tsam du ci bder zhes bya ba/ bde bar gyur pa nyid du gnyid log par bya zhing goms pas bsten par bya'o/ /ma goms gnyid kyis ma log na/ /nang par ma zos phyed gnyid log /ces bya ba la/ ma goms shing gnyid kyis ma log par 'os pa ma yin pa dag gnyid ma log na/ nang par nyin mo'i dus su zan ma zos bar de'i phyed gnyid kyis log par bya'o/ /des ni 'di skad ston pa yin te/ ci srid gnyid log par rigs pa'i dus de srid du gnyid ma log na/ mtshan mo ci tsam gnyid ma log pa de tsam gnyid log pa ni ma yin mod kyi/ de'i phyed tsam gnyid log par bya ste/ gang mtshan mo thun gnyis gnyid ma log na/ de nyin mo nang par gyi dus su thun gcig gnyid log par bya'o/ /gnyid yar gyur na 'o ma dang / / chang dang sha khu zho rnams btung / /lus bsku dril dang khrus bya zhing / /mgo bsku rna ba mig dag bya/ /zhes bya ba la/ gnyid yar ba'am/ shin tu sra bar gyur na/ 'o ma btung ba la sogs pa nas/ rna ba dang mig dag pa'i bar du ci rigs par bya'o/ /mgo bsku ba dang / rna ba dang / mig dag pa ni snum gyis bya'o/ /na chung lag dar gyis 'khyud dang / /sems bde bya ba zin pa dang / /yid dang rjes mthun yul ldan pa/ /ji 'dod gnyid 'ong bde bar skyed/ /ces bya ba la/ bud med na chung gzhon nus 'khyud pa la sogs pa dang / de bzhin du sems bde ba ste/ yid dga' ba dang ldan pa dang / bya ba zin te/ gang bya ba'i dngos po de byas zin par gyur ba dang / de bzhin du gzugs dang / sgra dang / dri dang / ro dang / reg bya yid dang rjes su mthun zhing yid du 'ong ba dang ldan par gyur pa ste/ 'di dag gis ni ji ltar dga' ba bzhin du gnyid 'ong zhing des bde ba rab tu skyed par 'gyur ro/ /nyal po'i bde la sems ma chags/ /tshangs par spyod pa la dga' ba/ /chog shes pa yis mgu ba'i gnyid/ /rang gi dus las 'da' mi byed/ /ces bya ba la/ skyes bu gang grong yul gyi bde ba 'khrig pa la sogs pa la ma chags pa/ tshangs par spyod pa la dga' ba/ chog shes pas mgu bar gyur ba'i gnyid ni rang gi dus las ldog cing 'da' bar mi byed kyi/ rang gi dus nyid du 'ong ngo zhes bya ba'i don to/ /de la grong gi bde ba ni bud med la chags pa dang / zas skom zhim po la zhen pa ste/ de rnams la gang sems zhen par ma gyur pa'o/ /tshangs par spyod pa ni bud med dang 'dus pa med pa ste/ de la dga' ba dang / chog shes pa ni/ bya ba thams cad la re ba dang bcas pa med pa ste/ yon tan des mgu zhing tshim par gyur pa nyid ni rang gi dus mtshan mo ji tsam log par bya ba de las 'da' bar mi byed do/ /nyal po'i chos ni spang bya ba/ /bkan min zla mtshan ldan pa dang / /yid du mi 'ong mi sdug spyod/ /mngal ni skyon gyis khyab pa dang / /rab sbom skem dang bcas pa dang / /sbrum ma gzhan gyi bud med dang / /rigs gzhan skye gnas mi mthun dang / /bla ma lha dang rgyal po'i gnas/ /mchod rten dur khrod gsod gnas dang / /bsti sa lam gyi bzhi mdo chu/ /dus tshigs nyin mo yan lag min/ /snying ga mgo bor brdeg spang bya/ /zhes bya ba la/ grong gi chos ni 'khrig pa'i chos te/ ming gi rnam grangs gzhan yang skyes pa dang / bud med kyi kun tu sbyor ba zhes bya ba yin no/ /de dag las spang bar bya ba 'di dag yod de/ bkan min zhes bya ba ni/ bkan pa ma yin pa spang ba ste/ don gyis na bkan te bsten par ston pa yin no/ /zla mtshan ldan pa zhes bya ba ni zla mtshan rgyu nas dang po'i zhag gsum spang bar bya'o/ /de bzhin du yid du mi 'ong ba ste/ snying du mi sdug pa yang spang bar bya'o/ /de bzhin du mi sdug spyod pa ste/ ngang tshul ngan cing mi rigs pa dang ldan pa spang bar bya'o/ /de bzhin du gang gi mngal skyon gyis khyab cing gnod pa de spang bar bya'o/ /de bzhin du rab tu sbom zhing sha che ba yang spang bar bya'o/ /de bzhin du shin tu skem zhing / sha dang tshil dang / khrag zad pa yang spang bar bya'o/ /btsas pa dang zhes btsas ma thag pa dang / bud med sbrum ma yang spang bar bya'o/ /de bzhin du gzhan gyis bdag gir bzung ba'i bud med kyang spang bar bya'o/ /de bzhin du rigs gzhan te/ rab tu byung ba'am/ rigs shin tu mtho ba dag kyang spang bar bya'o/ /de bzhin du skye gnas mi mthun pa ste/ rta la sogs pa skye gnas tha dad pa la spyad pa yang spang bar bya'o/ /de bzhin du grong gi chos la 'jug pa na/ bla ma dang / lha dang / rgyal po'i gnas spang bar bya ste/ gnas de dag tu 'khrig pa mi bya'o zhes bya ba'i don to/ /de bzhin du mchod rten la sogs pa'i gnas dag tu yang 'khrig pa'i bya ba spang bar bya ba ste/ de la mchod rten ni de bzhin gshegs pa'i mchod rten no/ /'jig rten pa dag ni grong gi phyi rol na yod pa'i shing chen po lha la sogs pas gnas bcas pa la bya bar 'dod do/ /dur khrod ni shi ba'i ro bsregs ba'i gnas so/ /gsod gnas ni rgyal po'i chad pas gcod cing gsod pa'i gnas so/ /bsti sa ni grong khyer gyi pha rol gyis phyogs kyi khyad par ro/ /bzhi mdo ni lam gyi bzhi mdo'o/ /chu ni chu'i nang ste/ de dag tu 'khrig pa spyad par mi bya'o/ /dus tshigs ni tshes bzhi dang / tshes drug dang / tshes brgyad dang / nya dang / dgu stong la sogs pa 'jig rten pa'i chos lugs las bkag ba'i nyin zhag rnams te/ de dag gi tshe yang spang bar bya'o/ /de bzhin du nyin mo spyad pa yang spang bar bya'o/ /yan lag min zhes bya ba la/ 'khrig pa spyad pa'i yan lag dang / 'tsham pa ni mngal gyi sgo yin pa las/ de ma yin pa yan lag gi gnas su mi rung ba/ kha dang bshang ba'i lam la sogs par yang spyad par mi bya'o/ /de bzhin du snying ga dang / mgo bor brdeg par byas nas 'khrig pa bya ba yang spang bar bya'o/ /spang ba zhes pa ni kun la sbyar bar bya'o/ /'grangs ches ltogs dang brtan bral dang / /yan lag mi bder gnas dang skom/ /byis pa rgan dang shugs gzhan nyen/ /nad pa yis kyang 'khrig pa spang / /zhes bya ba la/ 'grangs ches shing gsud par zos pa dang ltogs shing bkres pas nyen pa dang / brtan zhing yid rton pa dang bral ba dang / yan lag mi bde bar gnas shing lus nyam nga bar gnas pa dang / skom pas nyen pa dang / byis pa ste lo bcu drug pa man chad dang / rgan po bdun cu yan chad lon pa dang / shugs gzhan gyis nyen pa ste/ bshang ba dang gci ba la sogs pa'i shugs kyis nyen cing gzir ba dang / nad pa ste rims la sogs pa'i nad kyis gtses pa ste/ de dag thams cad kyis kyang 'khrig pa spyad pa spang bar bya'o/ /de yang bsdus pa las/ tshe 'dod skyes pa bud med kyis/ /bcu drug lon pa tshun chad dang / /bdun cu lon pa phan chad ni/ /kun sbyar bya bar mi rigs so/ /rab gzhon ma rdzogs lus zungs kun/ /bud med la ni zad 'gyur te/ /lteng ka chung ngu'i chu bzhin du/ /mod la nye bar bskam par 'gyur/ /dper na shing ni skams gyur zhing / /'bus zos rnam par dengs pa ni/ /reg na myur du 'jig par 'gyur/ /rgan po bud med bsten de bzhin/ /shugs bkag gyur pa dag gis kyang / /gcin nad rde'u 'phel ba dang / /rab rib la sogs nad skyed cing / /dbang po bcom pa thob par 'gyur/ /zhes bshad pa yin no/ / dgun dus ro tsa byas drags tshe/ /'dod pas 'dod pa bsten par bya/ /dpyid ston zhag ni gnyis gnyis nas/ /so ga dbyar tshe zla phyed cing / /zhes bya ba la/ dgun dus zhes bya ba ni grang ba'i dus te/ dgun stod dang dgun smad do/ /de'i tshe skyes bu ro tsa ba'i cho ga byas shing drags pa bdo bar gyur pa'i tshe/ 'dod pas zhes pa ci dga' bar 'dod pa bsten par bya'o/ /de la ro tsa bar bya ba'i sbyor ba ni khu ba 'phel bar bya ste/ 'o ma dang / mar dang / sha khu la sogs pa 'og nas bshad pa bzhin du byas shing ngoms par gyur pa'o/ /de bzhin du dpyid dang son ni zhag gnyis gnyis nas ro tsa bar byas pas ngoms pa dang / 'dod pa bsten par bya'o/ /so ga dang dbyar gyi tshe ni/ ro tsa ba byas nas zla ba phyed cing 'dod pa bsten par bya'o/ /gzhan du bud med la zhugs na/ /mgo 'khor ngal dang bla mthu nyams/ /stobs dang lus zungs dbang po nyams/ /dus min 'chi bar byed pa yin/ /zhes bya ba la/ gzhan du zhes bya ba ji skad du bshad pa las go bzlog pas bud med la zhugs shing 'dod pa spyod pa'i skyes bu de ni mgo 'khor ba la sogs pa'i nad 'byung bar 'gyur ro/ /de la mgo 'khor ba ni mi bde bar gnas shing 'khor ba'o/ /ngal ba ni dub pa'o/ /bla'i mthu nyams ba ni mal du 'jug cing 'gro mi nus ba'am/ sha dang khrag zad pa'o/ /de bzhin du stobs nyams pa dang / lus zungs nyams pa dang / dbang po nyams par 'gyur ba dang / dus min 'chi bar byed pa ni shin tu bud med la bsten pas dus ma yin par 'chi bar yang 'gyur ba yin no/ /bud med dag la legs bsdams na/ /dran dang yid gzhungs nad med tshe/ /dbang po brtas shing grags stobs rnams/ /lhag par 'phel zhing rgas srar 'gyur/ /zhes bya ba la/ bud med dag bsten pa legs par bsdams shing bsrung ba'i skyes bu ni/ dran pa la sogs pa 'phel bar 'gyur ro/ /de la dran pa ni 'das pa'i don ma brjed pa'o/ /yid gzhungs pa ni rnam par dpyod nus pa'i shes rab bo/ /nad med pa ni bde bar gnas pa'o/ /tshe ni srog go/ /dbang po ni mig la sogs pa'o/ /brtas pa ni lus rgyas ba'o/ /grags pa ni snyan pa'o/ /stobs ni lus kyi nus pa ste/ de dag lhag par 'phel zhing rgyas par gyur pa dang / de bzhin du rgas sra bar 'gyur ba ste/ skra dkar med pa la sogs par 'gyur ro/ /khrus dang byug pa rlung bsil khar la sogs bza'/ /chu bsil 'o ma sha khu sran tshod chang dngas 'thungs/ /nyal po dga' byas 'dod dang bral 'gyur rjes la bsten/ /de 'dras de yi lus mdangs stobs slar skye bar 'gyur/ /zhes bya ba la/ sngar bstan pa'i bud med bsten pa'i rjes la chags pa dang bral ba'i skyes bus khrus la sogs pa bsten par bya'o/ /de la byug pa ni tsan+dan la sogs pa rdzas dri bzang pos lus byugs shing kha dog bsgyur ba'o/ /rlung bsil ba ni rlung grang mo'o/ /kha ra la sogs pa ni bza' ba'i khyad par te/ de dag bza' ba'o/ /chu bsil ba ni chu grang mo'o/ /sran tshod ni 'bru las byas pa'o/ /chang dngas ma ni chang gi snying po'o/ /de dag thams cad ni 'dod pa spyod pa'i dga' ba byas nas/ 'dod chags dang bral bar gyur pa'i rjes te/ 'og tu bsten cing longs spyad par bya'o/ /de ltar byas par gyur pas skyes bu de'i lus kyi mdangs dang stobs slar skye bar 'gyur ro/ /de yang bud med dang 'phrad pas 'phral du lus kyi stobs 'bri bar gyur kyang / 'di ltar brta zhing tshim par byas pas de'i khu ba dang stobs 'phel ba nyid du 'gyur ba'i don to/ /sman pa thos spyod phun tshogs ldan zhing las mkhas snying rje can/ /gags dang gnod med lus srung byed pa nye bar gzhag byas nas/ /rgyal po rang gi dge ba'i 'bras bu'i longs spyod ba der spyod cing / /nad med mthu dang gzi brjid grags pa yun ring 'phel bar 'gyur/ /zhes bya ba la/ sman pa zhes bya ba ni sman dpyad kyi yan lag la mkhas pa ste/ de yang thos pa dang spyod pa phun sum tshogs pa dang ldan pa ste/ rtog pa dang tshul phun sum tshogs pa'i yon tan dang ldan pa'o/ /las la mkhas ba ni gso ba la mkhas shing byang ba'o/ /snying rje can ni rjes su brtse ba dang ldan pa'o/ /gags dang gnod pa med pa ni mi mthun pa med cing bar chad kyis gnod par byed pa med pa'o/ /lus srung byed ba ni rgyal po'i sku 'tsho bar byed pa ste/ de lta bu nye bar gzhag cing / lus bsrung du bcug na/ rgyal po ste sa bdag grags pa 'phel ba'i bar du 'gyur ro/ / de yang rang gi dge ba'i bsod nams su bya ba'i las te/ de'i 'bras bu ni longs spyod chen po la sogs pa dang ldan pas bde bar nye bar longs spyod pa yin la/ de gang zhig spyod par byed pa de ni/ de skad bya ste/ de la yun ring du spyod par 'gyur ba dang / nad med cing lus bde bar gnas pa dang / mthu ste longs spyod kyi 'byor pa rnams dang / gzi brjid ces pa lus kyi gzi mdangs dang grags pa ste/ snyan pas khyab pa yun ring du rgya cher 'phel zhing rgyas par 'gyur ro/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u bdun pa'i rnam par 'grel pa'o// //de nas kha zas kyi tshod ran par bza' ba'i le'u bshad par bya'o zhes bya ba la/ de nas zhes bya ba ni 'das ma thag pa ste/ sngar brtsams pa'i kha zas bsrungs pa'i rjes thogs la/ kha zas kyi tshod ran par bza' bar brtsams pa yin te/ gang gi phyir yon tan dang ldan pa'i zas kyang yin la/ dug la sogs pa dang 'dres par ma gyur du zin kyang tshad las lhag pa'o/ /tshad las shin tu chung bar zos na srog nye bar 'joms par 'gyur la/ de nyid ran par zos pa ni srog chags rnams kyi srog nyid yin no/ /kha zas ni bza' bar bya ba rnams so/ /tshod ran pa ni tshad dang ldan pa'o/ /tshod ran par bza' ba ni tshad dang ldan par bza' zhing spyad pa'o/ /de la phan zhing dgos pa byed pa'i gzhung la ni le'u zhes bya ste/ de bshad cing rnam par phye ba bstan par bya'o/ /dus kun tu ni tshod zin bza'/ /de ni me drod skyed byed yin/ /zhes bya ba la/ skyes bu nad med pa'am/ nad dang ldan pa yang rung ste/ des dus kun tu zhes pa dus thams cad du zas tshod zin cing / tshad dang ldan pa bza' bar bya'o/ /de ci'i phyir zhe na/ gang tshad dang ldan par za ba la 'jug pa de ni me'i drod skyed pa yin te/ rang gi bya ba smin pa'i las byed par nus pa yin no/ /de ni tshod ran par bza' zhing tshod zin par za ba dang / tshod zin par btung ba dang / tshod zin par bldag par bya'o/ /zhes blta bar bya'o/ /tshod ran pa'i mtshan nyid ni slob dpon gyis 'di ltar bshad de/ tshad kyang me'i drod kyi stobs dang / zas kyi dngos po la ltos par bya dgos te/ zas kyis lto bar gnod pa mi skyed pa dang / snying gar thogs par mi byed pa dang / rtsib logs gnyis su zug cing gnod par mi byed pa dang / pho ba shin tu mi lci ba dang / dbang po tshim zhing brtas par byed pa dang / bkres pa dang / skom pa dang bral ba dang / gnas dang / stan dang / mal dang / 'gro ba dang / dbugs 'byin pa dang / dbugs rngub pa dang / gtam zer ba na bde bar gnas pa dang / dgongs ka dang / nang par bde bar yongs su zhu ba dang / stobs dang kha dog nye bar 'phel bar byed pa ste/ 'di dag ni tshad dang ldan pa'i mtshan nyid yin no/ /'di dag gis kyang tshad dang ldan zhing tshod zin pa gtso bo yin te/ se 'bru dang / skyur po la sogs pa'i rdzas me'i drod skyed par byed pa'i rang bzhin can de tshad dang ldan par zos na me'i drod skyed par 'gyur gyi/ tshad dang mi ldan pas ni ma yin no/ /lci zhing rang bzhin g.yung ba'i rdzas 'o ma dang bu ram shing la sogs pa lta smos kyang ci dgos te/ de bas na/ rdzas ni lci ba'am yang ba'ang rung / /chad la ltos par bya ba yin/ /zhes bya ba la/ rdzas lci ba ni bu ram shing dang / 'o ma dang / 'bru dang / mon sran gre'u dang / rlan can gyi sha rnams so/ /yang ba ni char gyi chu dang / rak+ta sha li zhes bya ba la 'bras rtsa snar dang / drug cu pa dang / mon sran sde'u dang / bya la wa'i sha rnams te/ de gnyi ga la yang tshad la ltos par bya ba yin te/ de rnams ni de la rag lus par gyur pa yin no zhes bya ba'i don to/ /rdzas lci ba'am/ yang ba de dag za zhing spyad pa na/ zas kyi tshul la goms par bya ba cha 'dra bar rtag tu bza' bar bya ba'am/ yang na lci ba ni tshad las gzhan du bya la/ yang ba la ni tshad gzhan las zhes som nyir gyur pa de'i phyir smras pa ni/ lci ba las ni phyed 'grangs bya/ /yang ba las ni rab 'grangs min/ /zhes bya ba la/ kha zas lci zhing 'ju dka' ba las ni phyed 'grangs tsam du bza' ba dang kha zas yang ba char chu dang / sA lu rtsa snar la sogs pa las ni/ rab tu 'grangs bar mi bza'i/ gzhan du na ran cing bde bar gnas pa tsam gyis 'grangs par bya dgos te/ gang gi phyir me dang rlung dag gis yon tan mang po yang ba la ni/ cha mnyam par gnas pas me'i drod skyed par byed pa yin la/ tshod ma zin par nyes par zos su zin kyang nyes pa cung zad skyed pa yin no/ /rdzas lci ba la ni sla ba dang chu'i yon tan mang du gnas pas me'i mi mthun par gyur cing / thun mong gi yon tan gzhan yod pas me'i drod 'bri bar byed pa yin no/ /bde blag 'ju ba de tsam la/ /tshod zin zhes ni bshad pa yin/ /zhes bya ba la/ tshad yongs su chad pa ste/ tshad ji tsam zas zos na bde blag tu gcod pa med par zhu zhing dengs par 'gyur ba de tsam gyi tshod la ni tshod zin pa yin no zhes bshad cing bstan pa yin no/ /zas tshod ma zin chung gyur na/ /stobs dang gzi mdangs 'phel mi 'gyur/ /rlung gi nad ni thams cad kyi/ /rgyu nyid du ni 'gyur ba yin/ /zhes bya ba la/ kha zas kyi tshod ma zin cing / tshad las chung zhing dman par gyur pa zos na stobs su yang mi 'gyur/ gzi mdangs su yang mi 'gyur/ lus 'phel zhing rgyas par mi 'gyur ba dang / de bzhin du rlung las gyur pa'i nad ma lus pa thams cad kyi rgyu nyid de/ bskyed pa'i rgyur 'gyur zhing 'byin par byed do zhes bya ba'i don to/ /tshad las shin tu ches pa yang / /nyes pa thams cad myur du skyed/ /ces bya ba la/ tshad las shin tu ches pa ni zas lhag par mang po zos pa ste/ des ni nyes pa gsum po thams cad myur zhing rings par skyed par byed cing rab tu g.yo bar byed do/ /ma zhu'i zas ni mi bzad pa/ / de yis rlung sogs gzir gyur pas/ /cig car rnam par 'khrug 'gyur zhing / /de nyid du ni zhugs gyur nas/ /rtsa sgo 'gags shing be'u snabs skyed/ /steng dang 'og gi lam dag tu/ /bskyod pas gsud cing zug byed pa/ /brkam chags can la 'phral skyed byed/ /ces bya ba la/ zas ma zhu zhing lhag par zos pa mi bzad cing gnod par gyur pas des rlung sogs zhes pa/ rlung dang mkhris pa dang bad kan 'khrug cing g.yo bar gyur pas cig car de rnams dus gcig tu 'khrug cing ldang bar byed pas na/ rtsa sgo 'gags shing zhes pa/ rtsa sbubs 'gags par byas pas/ be'u snabs zhu ba zhes bya ba'i nad skyed par 'gyur ro/ /ci zhig byas nas de skyed ce na/ /de nyid du ni zhugs gyur nas/ /zhes pa ste/ zas ma zhu ba de nyid kyis nang du rlung la sogs pa zhugs shing de dang gcig tu gyur cing 'dres par gyur nas be'u snabs kyi nad skyed par byed pa yin no/ /de bzhin du zas ma zhu zhing 'dug pa de nyid du zhugs nas/ steng dang 'og gi lam dag tu bskyod cing / bla 'og tu dri ma dang / zas la sogs pa phyi rol du 'dren cing 'pho bar byed pas na/ de nyid kyi rgyus gsud pa'i zug gzer drag po skyed par byed pa yin no/ /su zhig la zhe na/ brkam chags can la zhes bya ba ste/ bza' btung la chags shing lto 'dun can te/ sems ma bsdams pa dag la gnod pa 'di lta bu 'phral du skyed cing 'byung bar 'gyur ro zhes bya ba'i don to/ / de yang / phal cher shes rab nyes pa yis/ /nad kyi tshogs ni skye bar 'gyur/ /zas la brkam pa'i mi rnams la/ /khyad par du ni gsud pa 'byung / /zhes bshad pa yin no/ /de las rlung las gzer mgo 'khor/ /khong sbos 'dar zhing rengs sogs 'gyur/ / mkhris pa las ni 'khru rims 'debs/ /khong tsha skom zhing kha sogs 'gyur/ /bad kan slon zhing yan lag lci/ /tshig thogs mchil ma mang bar 'gyur/ /zhes bya ba la/ de la ma zhu ba la rlung la sogs pa'i nad gzhi zhes bya ba las nad 'di dag 'gyur te/ de las kyang rlung las gyur pa'i ma zhu ba'i khong pa gzer ba dang / mgo 'khor zhing lci ba dang / khong sbos pa la sogs par 'gyur ro/ /mkhris pa dang 'dres pa'i ma zhu ba las ni 'khru ba la sogs pa'i nad skye bar 'gyur ro/ /bad kan gyi shas che ba las ni slon zhing sgyugs pa dang / yan lag lci ba dang / tshig thogs pa dang / tshig 'byin mi nus pa la sogs par 'gyur ro/ /ma zhu ba be'u snabs can dang gsud cing gzer zug can gyi mtshan nyid bsdus ba las/ ming don dang ldan pa bshad pa ni/ zas ni 'ju bar ma gyur la/ / steng dang 'og tu mi 'gro bar/ /ma zhu'i gnas su be'u snabs 'gyur/ /des ni be'u snabs can zhes bshad/ /rlung la sogs pa rab 'khrugs pas/ /gzer zug sna tshogs kyis zug cing / /khab kyis lus ni 'bigs pa ltar/ /rno bar zug pas gsud gzer yin/ /zhes pa'o/ /khyad par du ni nyam chung zhing / /me drod zhan dang shugs bkag pa'i/ /zas ni rlung gis bkag pa dang / /bad kan gyis ni bar bkag pa'i/ /nyes pa be snabs dkrugs pas na/ /zug rngu zug pa lta bur gnas/ /'khru dang slon par mi byed par/ /gzer la sogs pa mi bzad pa/ /be+e snabs de yin/ zhes bya ba ni/ khyad par du zhes pa mchog tu yang skyes bu shin tu nyam chung zhing sbeg par gyur pa dang / de bzhin du me drod zhan pa ste/ bad kan mang pos pho ba'i me drod nyams par gyur pa dang / shugs bkag pas zhes bya ba/ 'phyen dang bshang ba dang / gci ba'i shugs bkag par gyur pa'i skyes bu'i zas ni rlung gi nad kyis lam nye bar bkag par byas pa dang / de bzhin du bad kan gyis bar du zhes pa dbus su lam bkag pa'i rgyus ni/ zas de be'u snabs su gyur cing / phyi rol du 'byung bar 'gyur la/ 'ju ba'i sgo med par gyur pa'i nyes pa be'u snabs su byas nas dkrugs shing rnam par bskyod pas ma zhu ba'i be'u snabs te/ zug rngu zug pa lta bu nyid du kun du gnas shing / gzer ba dang khong pa dang / yan lag snyom zhing zug pa la sogs pa'i nad rnam pa mang po'i spyi'i rgyur gyur pas zas de mar 'khru ba dang / yar slon par mi byed pas de ma gtogs par/ ji skad du bshad pa'i rlung la sogs pa'i nad mi bzad cing brnag par dka' ba gang yin pa ni be'u snabs su gyur nas skyed par byed pas na/ nad de la ma zhu ba be'u snabs zhes bya'o/ /nyes rab gdug /be snabs mi bzad kyis sbubs bkag /rtsib logs kun tu drang por 'gro/ /shing bzhin rengs par gyur na ni/ /ma zhu shing 'dra zhes bya ste/ /myur du gsod byed de spang bya/ /zhes bya ba la/ rlung la sogs pa'i nyes pa shin tu gdug pa ste/ shas cher gnod par gyur pa dang / be'u snabs mi bzad pa rnams kyis sbubs bkag pa ste/ ma zhu ba'i be'u snabs mi bzad cing gdug pas rtsa sbubs kyi khong stong par bkag cing go skabs kyi bar chad pas rlung la sogs pa rnams rtsib logs kun tu thad kar phan tshun 'gro zhing / drang por 'gro bas khyab par gyur pas na/ lan 'ga' skyes bu de'i lus shing bzhin du rengs shing dbyig pa bsgreng ba ltar gyur na/ lus g.yo bar ma nus par byed par gyur na ni/ de'i nad de'i ming ma zhu ba shing 'dra zhes bya ste/ des ni myur du gsod cing 'chi bar byed pas gsor mi rung ba ste/ de spang zhing dor bar bya ste/ de ni zug thabs shing 'dra ba'i ma zhu ba zhes bya'o/ /mi 'phrod lhag za ma zhu bar/ /zad byed ma zhu dug gi ni/ /mtshan nyid can de mi bzad pa/ /dug gi ming can gang yin de/ /dug gi tshul can myur gsod byed/ /gso dpyad bya bar dka' bas spang / /zhes bya ba la/ mi 'phrod pa ni zas bsrung ba'i le'u'i skabs su bshad pa/ rlan can gyi sha la sogs pa dang / 'o ma la sogs pa lhan cig bza' ba ma 'phrod pa la sogs pa yin no/ /lhag par za ba ni zas kyis 'grangs pa'i steng du yang za ba'o/ /ma zhu bar za ba ni/ sngar de zhag gi zan ma zhu bar gang za bar byed pa'o/ /de ltar na mi 'phrod par za ba dang / lhag par za ba dang / ma zhu bar za ba'i skyes bu de ni dug gi mtshan nyid can te/ ma zhu ba'i nyes ba dug gi mtshan ma can gyi ma zhu ba dang / mi bzad pa shin tu gsor mi rung ba dug gi ming can te/ dug dang mtshan ma 'dra ba yin pa'i phyir dug gi tshul can te/ dug dang tshul 'dra ba dang / myur du gsod bar byed pa dang / gso zhing bcos par bya ba'i dpyad bya bar dka' bas spang zhing dor bar bya'o/ /de yang gang gi phyir ma zhu ba ni bya ba dro bas gso dgos na/ de dug gi dbang gis mi 'phrod/ dug ni bsil bas gso bar bya ba yin pa'i phyir/ dug la ni gso ba bsil ba phan la/ de ni ma zhu ba'i be'u snabs la mi 'phrod pa ste/ ma zhu ba ni dro ba'i bya ba'i rim pas gso dgos pa yin no/ /de bas na mtshan nyid gnyi ga dang ldan pa'i ma zhu ba'i dug gi ming can des ni gsod par byed pa yin pas spang zhing dor bar bya ba kho na yin no/ /de nas ma zhu'i be'u snabs 'gyur/ /gsor rung shu dag rgyam tsha dang / /po son cha bcug chu dron ni/ /'thungs pas skyug bcug /ces bya ba la/ de nas zhes bya ba ni/ bkra shis pa'i don te/ ma zhu ba'i be'u snabs la sogs pa ni shin tu mi bzad cing / gsod par bya ba yin pa las/ ma zhu be'u snabs su gyur pa gang gsor rung zhing / bcos pa'i thabs yod pa'i ma zhu ba de ni myur du skyug tu gzhug cing slon par bya'o/ /ci zhig gis slon du gzhug ce na/ shu dag dang / rgyam tsha dang / po son cha bskol ba'i chu dron po 'thungs bas skyug tu gzhug go/ /de nas ni/ dugs dang mas gtong reng bu dag / dri ma rlung dag legs rgyu sbyar/ /zhes bya ba la/ de nas zhes bya ba skyug sman btang ste/ slon pa'i rjes nyid la ma zhu bas nyen pa la dugs bya ba ste/ ma zhu ba be'u snabs can gyis nyen pa la dugs kyi le'u las bshad pa'i dugs rnams ci rigs su bya ba dang / de bzhin du mas gtong ba'i reng bu ste/ po son cha dang / khang pa'i dud pa dang / lan tshwa la sogs pa las byas pa/ dri ma dang rlung dag legs par rgyu bar byed pa ste/ bshang ba dang gci ba dag phyir 'byung ba'i rlung rang gi gnas su 'jog par byed cing phyir 'byin par byed pa sbyar zhing gtong bar bya ste/ de yang gang gi phyir/ 'phral du legs par dag pa ni/ /gnod pa de ni zhi bar 'gyur/ /zhes bshad pa yin no/ /yan lag 'khums par gyur pa la/ /shin tu dugs bya dkri bar bya/ /zhes bya ba la/ lag ngar la sogs pa'i yan lag 'jas pa 'dra bar gyur cing / yon por 'khums pa dag la/ shin tu dugs byas nas 'jam pa nyid du gyur pa dang / bal gos la sogs pas dkri bar bya'o/ /gsung nad shin tu 'phel ba dang / /rting par me btsa' gdab par bsngags/ /zhes bya ba la/ ma zhu ba gzer thabs can shin tu 'phel zhing stobs can du gyur pa la/ rkang pa'i rgyab kyi cha long mo'i 'og /rting pa zhes bya ba de gnyis su lcags kyi thur ma la sogs pas me btsa' btab pa ni bsngags pa yin no/ /de ni de'i nyin smyung bar gzhag /khrus btang lta bur nye bar spyad/ /ces bya ba la/ ma zhu ba be+e'u snabs dang gsud pas nyen pa'i skyes bu de de ltar byas pas/ slon dang khrus kyis dag par gyur pa de'i rjes la de'i nyin par smyung bar bzhag cing zas bcad pa dang / khrus btang lta bur 'bras thug slan te dang / ska ba la sogs pa'i sbyor bas rim gyis gso bar bya'o/ /ci'i phyir ma zhu ba'i be'u snabs gsor rung ba la skyug sman la sogs pa bya ba bstan gyi/ gzer 'joms par byed pa'i sman shing kun la sogs pa ma bstan pa dang / gsud pa gsor rung ba la rting bar me btsa' bstan gyi/ slon dang khrus kyis gzer 'joms par byed pa dang / 'ju bar byed pa'i sman la sogs pa ma bstan zhes bya ba rtog par byed pa dag dgag pa'i phyir smras pa ni/ ma zhu mi bzad nyen gyur kyang / /gzer 'joms sman ni btung mi bya/ be'u snabs ma zhu me drod nyams/ / nad kyi sman ni 'ju mi nus/ /de yis nad pa 'phral du ni/ /thu zhing 'chi ba dag tu 'gyur/ /zhes bya ba la/ ma zhu bas ni sman btung bar mi bya'o/ /zhes tshig sbyar bar bya'o/ /zas zhu zhing smin par ma nus pas ma zhu ba ste/ zas zhum nus pa des mi bzad pas nyen par gyur cing / shin tu gzer zug pa dang ldan par gyur kyang / gzer 'joms pa'i sman shing kun can gsum pa la sogs par btung bar mi bya'o/ /de ci'i phyir zhe na/ be'u snabs ma zhu bas me drod nyams shing ma zhu ba'i nyes pas bcom pa'i me'i drod des ni ma zhu ba'i nad kyis/ sman dang zas kyi rigs 'ju zhing smin par bya bar mi nus so/ /des na sman dang zas dang nyes pa 'di dag gis ma zhu bas nyen pa'i nad pa 'phral du de'i mod la thu zhing gnod pa'i khyad par 'phel zhing sman gyi sbyor ba nyid kyis 'chi ba dag nyid du 'gyur ro/ /kha zas zhu nas lto ba ni/ /rtsub srar gyur la sman dag kyang / /nyes pa'i lhag ma sbyang phyir dang / /pho ba'i me ni bskyed phyir gtang / /zhes bya ba la/ skyes bu'i kha zas zhu zhing smin par gyur du zin kyang / lto ba rtsub cing sra bar gyur pa ste/ pho ba rem rem por gyur pa la/ nyes pa'i lhag ma zhu zhing sbyang ba'i phyir dang / pho ba'i me drod bskyed par bya ba'i phyir/ sman gtang bar bya zhing sbyang bar bya'o/ /ma zhu'i 'gyur ba zhi ba dag /nyams smad par ni byas las 'gyur/ /zhes bya ba la/ ma zhu ba'i 'gyur ba zhes pa zas ma zhu ba'i nyes pa las byung ba'i be'u snabs dang / snyom pa dang / gzer ba la sogs pa rnams la zhi ba dag ni nyams dmad pa/ smyung ba dang zhi bar byas pa dang / dugs dag byas pa las de nye bar zhi zhing nyams dmas pa 'byung bar 'gyur ro/ /de gsum nyes pa rnam gsum ni/ /brtags nas rab tu sbyang bar bya/ /zhes bya ba la/ nyams smad par bya ba de ni smyung ba dang / zhu bar byas pa dang / dugs bya ba rnam pa gsum yod pa de nyes pa rnam gsum ni zhes pa/ chung ngu dang / bar ma dang / chen po'i tshul brtags shing rim pa 'dis/ chung ngu la sogs pa'i nyes pa'i dbye bas so sor brtags shing dpyad nas rab tu sbyang bar bya'o/ /de la chung la smyung ba phan/ /'bring la smyung dang gzhu bya ba/ /chen po la ni sbyang ba ste/ /de yis dri ma rtsa nas 'byin/ /zhes bya ba la/ de la zhes pa nyes pa rnam pa gsum po la/ chung ngu la ni smyung bar gnas pa nyams dmad pa phan zhing rjes su mthun pa yin te/ des kyang me dang rlung 'phel bar byas pas dper na rlung dang than pas chu'i tshogs nyung zhig gi gnas skems par byed pa bzhin du/ 'di la phan par 'gyur ba yin no/ /'bring la zhes pa nyes pa'i stobs 'bring tsam du gyur pa la ni smyung ba zhes bya ba zas bcad pa dang / de bzhin du gzhu ba zhes bya ba shu dag dang / pu shel tse la sogs pas phan pa yin te/ de gnyis ni nyes pa 'bring po 'joms te/ dper na chu'i tshogs ha cang mi che ba la thal ba dang / sa rdul dag dang 'dres pa'i rlung dang than pas chu'i tshogs ha cang mi che ba skems par byed pa dang 'dra'o/ /che la zhes pa nyes pa mang po stobs dang ldan pa dag la ni sbyang ba ste/ khrus dang slon la sogs pa'i tshul gyis nyams smad par bya ba phan pa yin te/ gang gi phyir skyug sman la sogs pa sbyangs pas de yis dri ma zhes pa rlung dang / mkhris pa dang / bad kan dang / bshang ba dang / gci ba la sogs pa rtsa ba nas 'byin cing gcod par 'gyur te/ dper na 'dam bu'i zhing chu med pa dag tu ni 'bras la sogs pa skye bar mi 'gyur ba dang 'dra'o/ /de bas na nyams mthos pa'i ma zhu ba las byung ba la ni nyams dmad pa ma byas par zhi bar 'gyur ba ma yin la/ nyams dmad bar gyur ba las byung ba la yang nyams brta ba ma byas par zhi bar 'gyur ba ma yin no/ /de bzhin nad gzhan dag la yang / /rang nad gzhi las go bzlog pas/ /gso ba/ zhes bya ba la/ de bzhin du chung ngu la sogs pa'i rim pa 'dis/ rims la sogs pa'i nad gzhan dag la yang rang gi nad gzhi las go bzlog pa zhes pa/ rang gi nad kyi rgyu dang mi mthun pa'i sman gyis gso bar bya zhing bzlog par bya'o/ /de yang rang gi nad gzhi yin pas na/ rang gi nad gzhi ste/ rang gi rgyu gang yin pa'o/ /de las go bzlog pa ni de dang mi mthun pa ste/ dper na tshim zhing brtas par byas pa las byung ba'i nad la nyams dmad par bya ba dang / nyams dmad ba las byung ba'i nad de las bzlog pa ni brtan par bya ba yin pa dang / de bzhin du lci ba dang / snum pa dang / grang ba la sogs pa las byung ba'i nad la de dang mi mthun pa yang ba dang / rtsub pa dang / dro bar bya ba dang / yang ba dang / rtsub pa dang / dro ba las byung ba'i nad la de dang mi mthun pa lci ba dang / snum pa dang / bsil bar bya ba la sogs pa lta bu'o/ /de las rjes 'brel yod/ /rgyu las go bzlog rnam spang ba/ /sman pas ci lta ci lta bar/ /nad las go bzlog sbyar ba'am/ /zhes bya ba la/ nad kyi rgyu las go bzlog pa'i sman byas su zin cing / nyes pa stobs dang ldan/ nad dang rjes su 'brel ba yod cing / shin tu zhen par gyur pa la ni rgyu las bzlog pa ste/ nad gzhi dang / rjes su mi mthun pa'i sman spangs shing dor/ sman pas ji ltar rigs shing 'os pa'i sman nad las go bzlog pa'i sman de sbyar bar bya zhing sbyin par bya ste/ dper na rims la gla sgang dang / par pa ta dang / nas thug sla ba sbyin pa dang / gcin nad la ser po rnam gnyis dang / nas zan la sogs pa sbyin pa dang / mkhris pa gyen du 'byung ba la khrus sman gyis 'og nas gdon par bya'o/ / de bzhin du nad las go bzlog pa'i gso dpyad kyi bcos pa'i thabs kyi gtso bo rnam pa gnyis dang / las rnam lnga du ba sna nas gtang ba dang / mig sman la sogs pa dang bcas pa la sogs pa bya ba ste/ dper na gla sgang dang par pa ta mkhris pa sel bar byed pa yin du zin kyang / rims 'joms par byed pa de ltar mkhris pa las byung ba'i nad gzhan la ni ma yin no/ /dper na skyer pa ni tshil dang / bad kan sel bar byed pa yin du zin kyang / gtso cher gcin nad 'joms par byed pa de ltar tshil dang bad kan las byung ba'i nad gzhan dag la ni de lta ma yin no/ /'di dag kyang 'og nas slob dpon gyis rgya cher bstan pa yin no/ /de'i don byed pa sbyor bar bya/ /zhes bya ba ni/ rgyu dang nad kyi go bzlog pa de'i don byed pa ste/ 'di ni rgyu dang nad kyi go bzlog pa'i don byed pa'i tshul can yod pas na don byed pa ste/ de'i don ni nad kyi gzhi las go bzlog pa dang / nad la go bzlog pa dag la/ go ma bzlog par gyur pa'i las de'i don byed pa sbyor bar bya ste/ dper na skyug bro ba la slon sman btang ba'am/ tshad pas 'khru ba la khrus bya ba'am/ chang nad la chang sbyin pa'am/ mes tshig pa la mes bsrod pa'am/ zhi ba dang / rgyas pa'i las bya ba ste/ 'di dag ni bsdus pa las rgyas par bshad do/ /don gnyis kas byed pa lha rnams la yang brten cing / sman gyi sbyor ba yang byed pa dang / skyug bro ba la slon sman dang / tshad pas 'khru ba la dri ma sbyang ba dang / chang gi nad la chang blud pa dang / mes tshig pa la me la bsrod pa dang / mkhris pa nang du zhen pa'am/ lam log par song ba la dugs bya ba dang / kha ba dang skyur ba dang bska ba'i ro la brten cing dro ba dang / grang ba'i spyod lam gyis gnas pas phyi rol du gdon cing / rang gi lam nas rgyu bar bya ba dang / bad kan nang du zhen cing rengs par gyur pa la/ phyi rol nas bsil ba'i nye bar spyod pa la gnas pas/ de'i gnod pa nang du zhugs nas/ bad kan gzhu bar bya ste/ de lta bu'i go bzlog pa'i don byed do/ /nyes smin me drod skyes gyur nas/ /nyams brta snum gyis byugs pa dang / /btung dang 'jam rtsi sogs rigs sbyar/ /zhes bya ba la/ nyes pa rnams smin cing zhu bar gyur pa ni/ ma zhu ba'i be'u snabs dang / gsud pa la sogs pas nyen pa de ma zhu ba'i nyes pa dang bral bar gyur cing / nyes pa smin nas smyung ba la sogs pa byas pas/ pho ba'i me drod kyang skyes shing 'phel bar gyur nas nyams brta bar bya ba'i phyir/ til mar la sogs pa'i snum gyis byug pa dang / sman mar btung ba dang / 'jam rtsi mas gtong ba dag rigs par zhes bya ba yul dang dus la sogs pa'i cha las brtags te/ cho ga bzhin du sbyar bar bya ba ni phan pa yin no/ /sogs pa'i sgras ni bcud kyis len pa dang / ro tsa ba'i cho ga dag bsdu'o/ /'jam rtsi mas gtong ba'i dbye ba yang dang por sbyang ba la sogs pa'i sgo nas rnam pa gsum yod de/ de dag kyang nad dang / sman la sogs pa'i gnas skabs kyi tshul las brtags nas/ sman pas 'di dag rigs par sbyar bar bya'o/ /bad kan ma zhu'i be'u snabs te/ /de ni mig dang mkhur ba skrang / /sgregs pa zos ma thag 'dra 'byung / /mchil ma mang zhing nyes g.yo lci/ /zhes bya ba la/ bad kan 'phel ba las/ ma zhu bar gyur pa gang yin pa de ni be'u snabs zhes bya ste/ de la bad kan gyi ma zhu ba'i mtshan nyid ni 'di yin te/ mig dang mkhur ba skrangs pa ste/ mkhur ba dang mig gi khung bur gtogs pa skrang bar 'gyur ro/ /de bzhin du sgregs pa zos ma thag pa'i 'dra ba 'byung ste/ ma smin pa 'byung bar 'gyur ba dang / mchil ma shin tu mang zhing bad kan 'byung ba dang nyes pa rnams smin/ rang gi gnas nas g.yo ba dang / bad kan gyen du 'byung bar 'gyur ba dang lci bar 'gyur ro/ /rlung las rengs bag gzer ba dang / /bshang gci 'gags shing sbos drod nyams/ /zhes bya ba la/ rlung las gyur pa'i ma zhu ba gang yin pa de ni/ ming rengs bag ces bya ste/ de ni gzer zhing 'jug pa dang / bshang ba dang / gci ba 'gags shing thogs pa dang / sbos shing gsus pa rgyas pa dang / me'i drod nyams pa dang yan lag snyom par byed par 'gyur ro/ /mkhris las khong tsha skom mgo 'khor/ /rmongs bag sgregs pa skyur zhing tsha/ /zhes bya ba la/ mkhris pa las gyur pa'i ma zhu ba gang yin pa de ni khong tsha ba zhes bya ste/ de ni skom dad che ba dang mgo 'khor ba dang / rmongs bag can sgregs pa skyur ba dang / lus tsha ba dang ldan par 'gyur ro/ /ma zhu be'u snabs smyung ba bya/ /rengs bag la ni dugs rab bya/ /tsha ba'i ma zhu skyug sman dag / btang ba'am gnas skabs gang phan bya/ /zhes bya ba la/ bad kan las byung ba'i ma zhu ba be'u snabs la ni smyung ba ste zan gcod par bya'o/ /rengs bag ste rlung las gyur pa'i ma zhu ba ni dugs rab bya ba ste shas cher dugs bya'o/ /tsha ba ste mkhris pa las gyur pa'i ma zhu ba la ni skyug sman gtang bar bya'o/ /yang na gnas skabs ji lta ba bzhin du gsum po dag ci rigs par bya'o/ /ma zhu'i be snabs lci ba na/ /rtsa sbubs thim las yun rings can/ /bad kan rlung ni 'dres mtshan ma/ /de dang mnyam par bsgrub par bya/ /zhes bya ba la/ ma zhu ba'i be'u snabs lci bar gyur pa rtsa sbubs su thim zhing zhen par gyur ba las yun rings can zhes bya ba'i ma zhu ba'i khyad par 'byung bar 'gyur ro/ /bad kan dang rlung 'dres shing rjes su 'brel bar 'gyur ba las byung ba'i ma zhu ba be'u snabs can gyi mtshan ma mig skrang ba la sogs pa dang ldan pa gang yin pa de la ni/ ma zhu ba de dang mnyam zhing mtshungs par sgrub cing gso bar bya ba ste/ de ltar na de ni smyung bas bsgrub par bya ba yin no/ /dngas ma lus las zas dad chung / /snying na sgregs pa mnam par 'gyur/ /zhes bya ba la/ zas kyi dngas ma'i lhag ma ma lus pa yongs su ma zhu bar gyur pa las ni zas dad chung ba ste/ zas la mi dga' ba dang / snying na zhing sgregs pa mnam par 'gyur ro/ /'di la cung zad gnyid log bya/ /zhes bya ba la/ dngas ma'i lhag ma ma zhu ba 'di la ni cung zad ces pa/ dus cung zad cig gnyid log par bya'o/ /ma zhu kun gyis nyin par ni/ /zas ma zos par gnyid log la/ /bkres gyur yang las ran par bza'/ /zhes bya ba la/ ma zhu bar gyur pa'i skyes bu kun gyis ni/ be snabs la sogs pa'i dbye bas rnam pa bzhi dang ldan par gyur pa kun gyis kyang / zas ma zos par nyin par gnyid log par bya la/ de nas de bkres par gyur cing zas la 'dod pa skyes par gyur nas/ 'bras la sogs pa las byas pa'i zas yang ba las ran par zhes bya ba tshod zin par nyung zad bza' bar bya'o/ /ma zhu spyi yi mtshan ma ni/ /rnam par 'gags sam shas cher 'byung / /na zhing rlung ni mi gsal rgyu/ /mkhregs shing lus lci mgo bo 'khor/ /zhes bya ba la/ ma zhu ba spyi'i mtshan ma'am/ rtags su gyur pa ni/ bshang ba dang gci ba dang / 'phyen la sogs pa sra zhing rnam par 'gags par gyur pa'am/ yang na bshang gci la sogs pa shas cher 'byung bar 'gyur ba dang / na zhing rmya bar 'gyur ba dang / rlung mi gsal bar rgyu zhing shes par dka' ba 'byung bar 'gyur ba dang / bshang ba mkhregs pa dang / lus lci ba dang / mgo bo bskor ba lta bur 'khor bar 'gyur ba ste/ 'di dag ni ma zhu ba bzhi char gyi thun mong gi mtshan nyid yin no/ /zas tshod lhag par gyur pa nyid/ /gcig pu ma zhur ma zad kyi/ /mi 'dod gags byed tshig ma tshos/ /lci dang rtsub dang mi gtsang grang / /khong tsha skom dad chu mang dang / /bsres pa'i zas ni 'ju mi 'gyur/ /mya ngan khro dang bkres pa yis/ /nye bar gdungs shing zas mi 'ju/ /zhes bya ba la/ zas kyi tshod lhag par gyur par zos pa gcig pu ma zhu bar gyur par ma zad kyi/ mi 'dod bzhin du zos pa dang / 'gag par byed pa ste/ rtsa sgo'i sbubs kyi gags byed pa dang / tshig pa ste btsos pa thal drags pa dang / ma tshos pa ste legs par tshos shing smin par ma gyur ba dang / lci ba dang 'ju dka' ba dang / rtsub ste snum med pa dang / mi gtsang ba ste ma dag pa dang / grang ba ste khengs pa dang / tsha ba ste lus kyi khong tsha bar byed pa dang / skam pa ste phal cher sra ba dang / chu mang ba ste/ chu mang po dang bsres pa'i zas 'di dag ni 'ju bar mi 'gyur zhing yongs su dengs par mi 'gyur gyi/ be'u snabs kyi nyes pa 'ba' zhig skyed par 'gyur ro/ /gzhan yang gang mya ngan la sogs pas gzir bar zos pa de yang mi mthun pa yin te/ mya ngan ni mya ngan gyis gdungs pa'o/ /khro ba ni sems 'khrugs pa'o/ /bkres pa ni bru ba tsha bas gdungs pa ste/ de lta bu ma zos pa de yang 'ju bar mi 'gyur gyi/ ma zhu ba'i be'u snabs kyi nyes par 'gyur ro/ /phan dang mi phan bsres pa dang / /zos pa mnyam za yin par 'dod/ /ces bya ba la/ phan pa dang mi phan pa dang / 'phrod pa dang mi 'phrod pa gcig tu bsres nas zos pa ni/ mnyam pa'i zas za ba yin par slob dpon rnams 'dod do/ /'grangs rjes slar yang za gyur ba/ /lhag par za ba yin zhes bya/ /zhes bya ba la/ kha zas 'grangs bar zos shing longs spyad nas de'i steng du slar yang bza' ba za bar gyur pa gang yin pa de ni lhag par za ba zhes bya bar shes par bya'o/ /dus min che ba'am chung zos pa/ /mi mnyam par ni za ba yin/ /zhes bya ba la/ dus ma yin pa ni zas kyi dus la ma bab pa'am/ dus las yol bar za ba'o/ /che ba ni gang lhag par zos pa'o/ /chung ba ni tshad las chung zhing dman par zos pa ste/ de dag ni mi mnyam par za ba yin par shes par bya'o/ / gsum po 'dis kyang gsod pa'am/ /mi bzad nad kyis 'debs par byed/ /ces bya ba la/ mnyam par za ba dang mi mnyam par za ba ste/ gsum po 'di dag gis kyang gsod cing 'ching bar byed pa'am mi bzad cing gso dka' ba'i nad kyis 'debs par byed cing skyed par byed do/ /dus su goms shing gtsang la phan/ /snum dro yang dang ma yengs dang / /ro drug ldan zhing mngar bag che/ /shin tu myur min dal bar min/ /khrus byas bkres shing dben par gnas/ /kha gdong lag pa rkang pa bkrus/ /lha dang yi dgas rjed cing sbyin/ /bla ma byis pa mgron mchod byas/ /dud 'gro rnams kyang rab brtags te/ /bdag nyid legs par brtags nas ni/ /ma smad smra 'am yid 'ong smra/ /skye bo gtsang zhing gus pas stobs/ /yid 'ong gnyen dang lhan cig bza'/ /zhes bya ba la/ zas ni dus su bza' zhing longs spyad par bya'o/ /zhes bya bar sbyar ro/ /de yang dus ni bshang dang gci bsal zhes bya ba la sogs pa'i gzhung gis 'og nas bshad pa yin no/ /dus yol nas zos pa de ni rlung gis bkag nas shin tu dka' bas 'ju bar 'gyur ba dang / zas len cing yi gar 'ong ba 'gag par 'gyur ro/ /goms pa zhes bya ba 'di ni/ bdag nyid kyis goms shing bsten par gyur na 'phrod par gyur pa yin gyi/ de las bzlog pa mi 'dod cing gnod pa ni ma yin no/ /gtsang ba ni gang las 'ongs shing ci ltar g.yos pa shes pa'o/ /phan pa ni zas kyi rigs gang gis khams snyoms pa mnyam pa yin du 'jog par byed cing / ma snyoms pa rnams snyoms par byed pa'o/ /de las bzlog pa ni mi phan pa'o/ /zas snum pa dang / dro ba dang / yang bas ni me'i drod skyed par byed de/ cung zad dro bas ni lus sbyong zhing lus zungs 'khrug par mi byed pa dang / myur du 'ju bar byed pa dang / lam ma yin par zhugs pa rnams bzlog cing lugs su 'jog par byed do/ /snum pa ni dbang po rnams brtan par byed pa dang / lus brtas shing 'phel ba dang / rgas sra ba dang / stobs skyed pa dang / kha dog dang bar byed pa yin no/ /yang ba ni zas kyi rang bzhin gyis gnod pa med par 'ju bar 'gyur la/ ma zhu na yang gnod pa chen po med pa yin no/ /yang dro bas ni yi ga 'bye bar byed pa dang / bad kan 'jig par byed pa yin no/ /ma yengs pa yid la gtod pa ste/ yid gzhan du yengs pa'am/ shin tu myur bar za ba'am/ smra bzhin nam/ dgod bzhin du za na/ snum mdangs mi skyed pa dang / rmya ba dang / gnas su ma chad pa dang / yon tan dang skyon mi rtog par 'gyur ro/ /ro drug ldan zhing zhes bya ba ni mngar ba dang / skyur ba dang / lan tshwa dang / kha ba dang / tsha ba dang / bska ba'i ro dang ldan pa'o/ /mngar bag che zhes bya ba ni/ phal cher mngar ba'i shas mang ba'o/ /shin tu dal ches par bza' ba ni ngoms shing chog shes par dka' ba dang / mang du za bar 'gyur ba dang / zas kyi bag 'grangs bar 'gyur ba dang / 'ju dka' bar 'gyur ro/ /khrus byas pa ni gtsang sbra'i cho ga byas pa'o/ /bkres pa ni bru ba tsha ba dang ldan pa'o/ /dben par gnas pa skye bo mang pos ma bskor ba'o/ /kha gdong lag pa rkang pa gang dang gang gis bkrus shing dag par byas pa'o/ /de bzhin du lha rnams mchod cing rjed pa dang / yi dgas la sbyin par bya ba dang / bla ma dang / byis pa dang / mgron du bos pa'am/ glo bur du 'ongs pa la mchod cing sbyin par bya ba dang / khyi la sogs pa la yang sbyin zhing / phyugs la sogs pa'i dud 'gro rnams kyang rab tu brtags shing / rtswa la sogs pa sbyin la/ /bdag nyid legs par brtags nas ni/ /zhes bya ba la/ nga'i 'di ni goms shing bsten pa yin no zhes pa dang / rtag tu bag yod pas gnas pa dang / ma smad pa ste zas la dpyas mi brjod pa dang / mi smra ba dang / yid du 'ong zhing rjes su mthun pa cung zad cig smra ba dang / skye bo gtsang zhing gus pas stobs shing byin pa'am/ g.yos su byas pa de yid du 'ong zhing snying du sdug pa'i gnyen dang lhan cig bza' bar bya'o/ /zas ni rtsa dang skra spu sogs/ /'dres shing khong du slar bsros dang / /tshod ma zas ngan mang ba dang / /tsha ches lan tshwa mang ba spang / /phrum dang zho dang phrum skam dang / /ba tsha tshwa dang la phug rjen/ /phag rgod lug dang ba lang nya/ /ma he'i sha dang rid dang skam/ /ma sha chu ldum nis sha pa/ /pad rtsa 'bras khur myu gur gyur/ /tshod ma skam dang nas 'dra dang / /bu ram phra mo bza' mi bya/ /zhes bya ba la/ phrum nas bu ram phra mo'i bar du bza' bar mi bya'o/ /bza' mi bya zhes bya ba 'dis ni 'di skad ston pa yin te/ phrum dang chang la sogs pa rtag tu goms par rgyun du bza' ba bkag pa yin gyi/ 'di dag lan 'ga' yang bzar mi rung bar bkag pa ni ma yin no/ /de la phrum ni ba'i 'o ma la sogs pa las byas pa'o/ /ba tsha ni ya bak+Shar la sogs pa'o/ /tsha ni chang thams cad shin tu skyur bar song ba'o/ /la phug rjen pa ni la phug rgan po'o/ /sha zhes bya ba ni rid pa la sogs pa kun dang sbyar ro/ /rid pa ni pags pa dang rus pa tsam lus pa'o/ /skam pa ni rlan med pa'o/ /nis pa ni gang bu can gyi 'bru'i bye brag gcig go/ /chu ldum ni ut+pal la sogs pa'i sdong bu'i tshod ma'o/ /'bras khur ni sA lu la sogs pa btags pa las byas pa'i khur ba'o/ /myu gur gyur pa ni 'bras la sogs pa'i khyi so 'thon pa'o/ /ya ba ka ni gra ma can gyi 'bru'i bye brag go/ /bu ram phra mo ni bu ram gyi khyad par chung ngu zhig go/ / sA lu'i 'bras dang gro dang nas/ /drug cu ba dang skam sa'i sha// a ru skyu ru rgun 'brum dang / /mung+ga kha ra pa to la/ /zhun mar char chu 'o ma dang / /sbrang rtsi se'u 'bru rgyam tsha bza'/ /mig dang stobs phyir mtshan mo ni/ /'bras gsum sbrang rtsi mar sar bza'/ /mi nar 'jog par byed gang dang / /nad sel byed pa gang yin bsten/ /zhes bya ba la/ rak+ta sha li la sogs pa dang / sA lu'i 'bras chan la sogs pa dang / skam sa'i sha rtag tu bza' bar bya'o/ /de bzhin du mig la phan pa dang / lus kyi stobs bskyed par bya ba'i phyir/ mtshan mo'i dus su 'bras bu gsum dang / sbrang rtsi dang mar sar du sbyar ba bza' bar bya'o/ /gzhan yang sman gyi rigs gang smos su zin kyang / smin par byed cing bde bar 'ju bar byed pa gang yin pa dang / sman gang nad sel zhing 'joms par byed pa de yang bsten cing bza' bar bya'o/ /pad rtsa bur shing tso tsa dang / /mo tsa a mra'i 'bras bu dang / /la du khur ba bu ram can/ /zas ni lci zhing snum pa dang / /mngar zhing 'ju dka' brtan pa rnams/ /dang po nyid du bza' bar bya/ /zhes bya ba la/ pad+ma'i rtsa ba la sogs pa ni zas kyi dang por thog ma nyid du bza' bar bya'o/ /tso tsa ni rgya star gyi 'bras bu'o/ /mo tsa ni chu shing gi 'bras bu'o/ /khur ba bu ram can ni bza' ba'i khyad par ro/ /'ju dka' ba ni ro rtul ba'o/ /brtan pa ni brtan por gnas pa ste/ de dag thog mar bza' bar bya'o/ /de las bzlog pa tha mar bza'/ /bar du skyur tsha lan tshwa can/ /zhes bya ba la/ sngar bshad pa de las go bzlog pa ni/ yang ba dang / rtsub pa dang / tsha ba dang / rno ba dang / g.yo ba'i rang bzhin can gyi sman rnams kha ba dang / tsha ba dang / bska ba'i mtshan nyid can zas kyi tha ma rdzogs pa'i dus su bza' bar bya'o/ /zas kyi bar du ni skyur ba dang / tsha ba dang / sngar lan tshwa can bza' bar bya'o/ /lto yi cha gnyis zas kyis te/ /cha gcig skom gyis dgang bar bya/ /rlung la sogs pa'i gnas su ni/ /cha bzhi bar ni lhag mar gzhag / ces bya ba la/ lto'i cha gnyis ni zas kyis dgang bar bya'o/ /lto'i cha gcig ni skom ste btung bas dgang bar bya'o/ /rlung la sogs pa'i nyes pa rnams kyi gnas dang rten du ni lto'i bzhi pa lhag mar gzhag cing lus par bya'o/ /'di ni rnam pa thams cad du bya ba ma yin te/ de yang gzhung las/ rlung me'i shas chung nad med dang / /rgyal po'i bde ba'i bdag nyid la/ /rim 'di rtag tu sbyar bya yi/ /gzhan dag la ni nges pa med/ /ces bshad pa yin no/ /de ltar zas zos zin nas/ de'i rjes la skom btung bar bya ba yin pas na/ de'i phyir smras pa ni/ zos rjes skom ni bsil ba'i chu/ /nas dang bag phye'i g.yos byas zos/ /zho chang dug 'bags sbrang rtsi la/ /chu bsil rjes su 'thungs na phan/ /zhes bya ba la/ zas zos pa'i rjes la skom du btung ba ni chu nyid bzang ba yin te/ ro thams cad kyi skye gnas yin pa'i phyir dang / sems can thams cad kyi thun mong gi longs spyod yin pa'i phyir dang / 'tsho bar byed pa la sogs pa'i yon tan dang ldan pa'i phyir ro/ /de yang khyad par ni bsil zhing grang ba'i yon tan dang ldan pa'o/ /de yang gang dang rjes su mthun zhe na/ nas dang bag phye las g.yos su byas pa zos pa dang / zho dang / chang dang / dug dang / sbrang rtsi zos pa'i rjes la 'thungs na phan zhing bde bar 'gyur ba yin no/ /mi 'ju 'gags la chu dron gtang / /tshod ma mung+ga'i gnod pa la/ /zho ga chu dang dar ba dang / /rang skyur rtsab mo btung bar bya/ /zhes bya ba la/ gang zas mi 'ju ba dang / bshang gci 'gags pa la ni chu bskol dron mo btung bar bya ba la/ tshod ma dag dang / mung+ga zos pa las gnod par gyur pa'i nad la ni zho ga chu dang / dar ba dang / 'bras khu mnan pa'i rang skyur gyi rtsab mo btung bar bya'o/ /skem po rgyas phyir chang btung ste/ /zhes bya ba la/ mi skem zhing sha chung ba dag la/ lus rgyas shing lus zungs 'phel bar bya ba'i phyir/ skom du chang btung ba phan pa yin no/ /sbom pos sbrang rtsi'i chu btung ngo / /zhes bya ba la/ mi sbom zhing sha che ba dag skem por bya ba'i phyir/ skom du sbrang rtsi'i chu btung ba ste/ sbrang rtsi dang chu sbyar ba'i skom btung bar bya'o/ /gcong chen nad la sha khu btung / /zhes bya ba la/ gcong zhes bya ba zad byed kyi glo gcong chen po na ba la sha khu btung bar bya'o/ /drod chung sha zos chang btung bya/ /zhes bya ba la/ me drod chung zhing sha zos pas ni skom du chang btung bar bya'o/ /nad dang sman sogs sbrum bud med/ /zan bcad dka' thub las rnams kyis/ /skem dang byis pa rgan po la/ /'o ma bdud rtsi lta bur phan/ /zhes bya ba la/ nad pa la sogs pa nyam chung zhing rmya bar gyur pa'i mi dang / skem pa dang / byis pa dang / rgan po dag la skom du 'o ma btung ba ni bdud rtsi lta bur phan par byed pa yin no/ /mdor na zos rjes btung ba ni/ /gang zhig zas dang yon tan gyis/ /mi mthun mi 'phrod med gyur pa/ /de ni rnam pa kun tu bsngags/ /zhes bya ba la/ mdor bsdu na zas kyi rjes la skom du btung bar bya ba ni gang zhig zas dang mi 'dra zhing / de dang rang bzhin mi mthun par gyur pa de ni/ dus rnam pa kun tu bsngags shing phan par 'gyur ba yin la/ de yang mi 'phrod pa med par gyur pa'o/ /de yang dper na snum pa la rtsub pa dang / rtsub pa la snum pa dang / grang ba la dro ba dang / dro ba la grang ba dang / mngar ba la skyur ba dang / skyur ba la mngar ba dang / mngar ba la kha ba dang / kha ba la mngar ba'o/ /de lta na ni 'o ma las g.yos byas pa'i zas dang / 'o ma las gyur pa rnams la skom du rang sgyur gyi rtsab mo la sogs pa btung bar bya dgos te/ zas kyi yon tan las yon tan mi mthun pa med pa yin pa'i phyir ro zhe na/ de'i phyir mi 'phrod pa med pa mi bya ba'i tshig smos pa yin te/ rtsab mo rang skyur la sogs pa skyur ba gang yin pa de ni 'o ma la sogs pa dang yon tan mi mthun par gyur pa yin du zin kyang / de ni mi 'phrod pa yin te/ 'o ma dang skyur lhan cig bza' ba ni mi 'phrod pa yin no/ /zhes sngar bstan pa'i phyir ro/ /de bas na gang zas dang skom yon tan mi mthun zhing / mtshan nyid tha dad kyang mi 'phrod pa med par gyur ba btung ba de mchog tu bsngags pa yin no/ /da ni skom 'thungs pa'i yon tan smras pa ni/ zas rjes skom 'thungs ngoms dang khyab/ /stobs 'phel lus ni brtan byed la/ /zas sdud snyi bar 'gyur ba dang / /'drul zhing rnam par 'ju bar 'gyur/ /zhes bya ba la/ zas kyi rjes skom 'thungs pa ni ngoms shing tshim par byed pa dang / lus khyab cing rdzogs par byed pa dang / gzi ma dngas 'phel zhing brtas par byed pa dang / de bzhin du lus brtan par byed pa dang / yan lag brtan zhing mkhregs par byed pa dang / de bzhin du zas kyi tshogs sdud cing gcig tu gnas bar byed la sgong bar byed do/ /snyi bar byed pa ni zas bsdus pa de lhod cing snyi bar byed pa dang / zas de nyid 'drul bar byed cing sla bar byed pa dang / de bzhin du rnam par 'ju zhing bde bar 'ju bar byed par 'gyur ro/ /de ni nam tshong yan chad nad/ /dbugs lud glo rdol cham pa dang / /glu len smra mang la chags dang / /skad 'gags pa la gnod pa yin/ /zhes bya ba la/ skom 'thungs pa de ni/ nam tshong yan chad kyi nad la gnod pa yin no/ /de la nam tshong ni mchan khung dang / dpung pa g.yas g.yon gyi bar mtshams la nam tshong zhes bya ste/ de yang lung las/ nam tshong mgo dang ske ba'i rten/ /mgo 'dzin zhes kyang bshad pa yin/ /zhes 'byung ba yin no/ /de ltar na de yan chad kyi yan lag gi nad la gnod pa yin no/ /de bzhin du dbugs mi bde ba dang / lud pa mang ba dang / glo rdol ba dang / cham pas btab pa la yang gnod pa yin no/ /de bzhin du glu len pa dang / smra ba mang po la chags shing yang dang yang du slon pa dang / skad 'gags pa la yang gnod pa yin te/ de rnams kyis ma zhu ba'i gnas la gnod par gyur nas/ lkog mar gyur pa'i zas las byung ba'i snum dang 'dres te/ slon pa la sogs pa'i nad skyed par 'gyur ba yin no/ /lus las rnag 'dzag gcin nad mig /lkog nad rma yi nad kyis nyen/ /skom spang / zhes bya ba la/ gang gi lus la mdze la sogs pas nyen cing rnag 'dzag par gyur pa dang / de bzhin du gcin nad de/ lgang pa'i nad yod pa dang / mig na ba dang / lkog ma'i nad na ba dang / rma'i nad kyis nyen cing gnod par gyur pa ste/ de dag thams cad kyis skom spang zhing dor bar bya'o/ /kun gyis skom 'thungs nas/ /mang smra lam zhugs nyal ba spang / /zhes bya ba la/ kun gyis zhes bya ba nad med pa'am/ nad dang ldan pa'i mi thams cad kyis kyang skom 'thungs par gyur pa'i rjes thogs la mang du smra zhing 'don pa dang / lam du zhugs shing 'gro ba dang / nyal zhing gnyid log pa ste/ dus de'i tshe nyid 'phral du bya ba dag spang zhing dor bar bya'o/ /zas zos nas ni nyi tshan me/ /rta zhon rkyal dang 'degs pa spang / /zhes bya ba la/ zas zos pa'i rjes thogs nyid la nyi tshan la sogs pa spang bar bya ste/ nyi tshan ni nyi ma'i than pas gdungs pa'o/ /me ni me tsha ba la 'des par gyur pa'o/ /bzhon pa ni rta la sogs pas 'gro ba'o/ /rkyal ba ni mtsho la sogs bar rkyal ba'o/ /'degs pa ni gur la sogs pa yul gzhan du bskyod pa ste de spang bar bya'o/ /zas dang skom yon tan dang ldan pa dang / tshod zin par byas su zin kyang dus ma yin par zos pa dang 'thungs pas lus la gnod par byed pa yin no/ /de bas na bshang ba dang / gci ba bsal zhes bya ba la sogs pa'i tshigs su bcad pas de'i dus smras pa yin te/ bshang dang gci bsal snying la dri med nyes pa lam min par mi 'gro/ /sgregs pa dag cing bru ba tsha gyur thur gyi rlung ni tha mal rgyu/ /de bzhin me yi drod bdo dbang po gsal zhing lus kyang rab tu yang / /zas kyi tshod ran cho gar sbyar bzhin za ba de ni dus su 'dod/ /ces bya ba la/ bshang ba dang gci ba legs par bsal zhing btang ba dang / snying la dri ma med pa ste/ sems dngas shing nyam nga ba med pa dang / nyes pa ste rlung la sogs ba lam ma yin pa dag tu log par mi 'gro zhing / rang gi gnas na gnas pa dang / sgregs pa dag cing dri ma mnam pa med pa dang / bru ba tsha bar gyur cing bkres pas za 'dod par gyur pa dang / thur gyi rlung tha mal par rgyu ba ste/ thur du 'byung ba'i rlung lugs bzhin 'byung ba dang / de bzhin du pho ba'i me drod bdo zhing shas che ba dang / dbang po gsal zhing rang gi bya ba rnams la 'jug pa gsal ba dang / de bzhin du rang gi lus kyang rab tu yang bar gyur cing bya ba la thogs pa med par gyur pa ni/ zas kyi tshod ran pa'i cho gar sbyar ba ji skad bshad pa de bzhin du za ba de ni zas la spyod pa'i dus yin par slob dpon dag 'dod cing bzhed pa yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u brgyad pa'i rnam par 'grel pa'o// //de nas sman la sogs pa rnams kyi bye brag shes par bya ba'i le'u bshad bar bya'o/ /zhes bya ba la/ de nas zhes bya ba ni sngar bshad pa'i rjes thogs la ste/ zas kyi tshod zin par bza' ba'i rjes la/ sman la sogs pa rnams kyi bye brag shes par bya ba'i le'u bshad par bya'o/ /de la sman la sogs pa zhes smos pa la sogs pa'i sgras ni nus pa dang 'ju ba la sogs pa bsdu'o/ /de rnams bye brag shes bar bya ba ni/ mtshan nyid khong du chud par bya ste/ de shes par 'gyur ba la phan pa'i le'u bshad par bya'o zhes pa'o/ /de gang gi phyir zas dang skom 'di dag ni zas dang / ro dang / nus pa dang / 'ju ba la sogs pa yongs su brtags nas sbyar bar bya'i gzhan du ni ma yin no/ /de la sman nam rdzas ni ro la sogs pa las mchog tu gyur pa yin pas dang por bstan pa yin te/ sman rnams nyid kyi ro la sogs/ /de ni de la brten pas mchog /ces bya ba la/ sman rnam gnyis ro dang nus pa la sogs pa rnams kyi nang na mchog yin te/ ci'i phyir zhe na/ ro la sogs pa de rnams ni sman de la brten cing gnas pa yin gyi/ ro la sogs pa 'ba' zhig tshig skyar gnas pa ni ma yin te/ de bas na de ni mchog yin no/ /de yang 'byung lnga'i bdag nyid can/ /zhes bya ba la/ sman de yang 'bras bu'i rang bzhin rgyu ba dang mi rgyu ba la sogs pa'i tshul du gnas pa gang yin pa de ni 'byung ba lnga'i bdag nyid can te/ 'byung ba chen po rnam pa lnga las shes par bya ste/ nam mkha' la sogs pa rgyu'i rdzas rnams ni ma yin te/ nam mkha' la sogs pa rgyu'i rdzas kyi 'byung ba chen po lnga'i bdag nyid can du gyur pa ni so sor rang nyid thob pa'i don du gnas pas 'di ni nam mkha' zhes bya ba'i 'byung ba chen po'o/ /'di ni sa'i 'byung ba chen po zhes smra bar nus pa ma yin gyi/ sa la sogs pa 'byung ba rnams ni 'byung ba chen po lnga'i bdag nyid can yin pas na/ de'i sgras bstan pa yin no/ /de bas na 'byung ba lnga'i bdag nyid can dang gcig pa ma yin no/ /de nye bar dmigs pa rnam pa lngas zhes bya ste/ de la de'i dri'i shas che ba gang yin pa de ni sa'i yin la/ ro'i shas che ba gang yin pa de ni chu'i yin no/ /gzugs kyi yon tan shas che ba de ni me'i yon tan no/ /reg pa'i yon tan shas che ba gang yin pa de ni rlung gi yin no/ /sgra'i yon tan shas che ba gang yin pa de ni nam mkha' yin te/ gang dang de ni rtag tu 'brel ba yin pa'i phyir/ gang zhes bya ba'i tshig 'di ma smos su zin kyang / bstan pa nyid yin par shes par bya'o/ /gal te sman de 'byung ba chen po lngas skyed pa yin na/ de 'byung ba chen po gang gis ji ltar byas nas bskyed pa yin/ de'i phyir smras pa ni/ sa la brten te skye ba yin/ / zhes bya ba yin te/ sa brten pa'i gnas su byas nas skye ba yin no/ /de ltar nas zhes bya ba'i 'byung ba chen pos rten du byas pa'i dgos pa byas pas na/ des bskyed cing bskrun pa yin no zhes bshad do/ /de bzhin du de ni me'i skye gnas zhes bya ba chu'i skye gnas su gyur cing / skyed par byed pa'i rgyu byed pas na/ sman gyi skye gnas ni chu'i yin te/ de ltar chu zhes bya ba'i 'byung ba chen pos ro dang ldan par skye gnas kyi dgos ba byas pas des de skyed pa zhes bya'o/ /chu ni skye gnas me dang rlung / /nam mkha' rnams ni tshogs pa las/ /de skyes gyur dang khyad par byung / / zhes bya ba la/ sman de skyes shing byung bar gyur pa dang / rdzogs par 'thon pa de ni me dang rlung dang nam mkha' rnams kyi tshogs pa las skyes par gyur pa yin te/ tshogs pas rgyu dang 'bras bu'i tshul gyis skyed de/ des na dper na me ni smin par byed pa nyid kyis dgos pa byed la/ rlung ni g.yo 'gul gyis so/ /nam mkha' ni go 'byed pa'i tshul gyis so/ /de skyes par gyur ba me dang rlung dang nam mkha' rnams kyi tshogs pa las de skyes par gyur pa 'ba' zhig tu ma zad kyi gang khyad par du gzhan rnams tshul tha dad cing / rang bzhin du ma gyur pa'i bar de rnams kyang me dang rlung dang nam mkha' de rnams kyi tshogs pa las byung ba yin no/ /gal te de ltar sman thams cad dang 'byung ba chen po lnga char gyis bskyed pa yin na/ 'di ni sa'i 'o/ /'di ni chu'i'o zhes ming ci'i phyir 'dogs she na/ de'i phyir smras pa ni/ ming ni shas che las gyur yin/ / zhes bya ba yin te/ rdzas gang la 'di dag thams cad rgyur gyur pa yin yang / gang gang gi shas che zhing mang bar gyur pa des/ de nyid kyi ming du btags pa yin te/ sa'i shas che ba las skyes pa ni sa'i ming can yin la/ chu'i shas che ba las skyes pa ni chu'i'o/ /de ltar na sman thams cad ni 'byung ba chen po lnga'i bdag nyid can yin no/ /de bas 'byung ba 'dus pa las/ /'byung bas sman ni ro gcig min/ /zhes bya ba la/ gang phyir 'byung ba chen po'i tshogs pa rnams las sman rnams 'byung zhing skye ba yin pa de bas na/ sman rnams ni ro gcig kho nar mi 'gyur te/ ro mang zhing tha dad pa yin no/ /zhes bya ba'i don to/ /'dir 'di ltar gang ro'i rgyu ni 'byung ba chen po gcig po chu nyid yin no/ /'byung ba chen po gzhan dag ni ma yin te/ de dag ni ro med pa yin no/ /'bras bu ni rgyu dang cha 'dra bar 'byung ba yin pas/ gzhan las ro 'byung bar mi rigs so zhes brgal zhing brtag par mi bya ste/ gang gi phyir 'byung ba 'dus pa las 'byung zhes bya ba 'di skad ston pa yin te/ ci ltar sman 'byung ba chen po 'dus pa las sman 'byung ba de bzhin du/ sman la brten pa'i ro tha dad par gyur pa dag kyang / 'byung ba 'dus pa nyid las skye ba yin gyi/ yon tan gzhan ltar sman la ltos pa ni ma yin no/ /de bas na 'byung ba chen po 'dus pa nyid ro 'byung bar byed pa yin gyi/ 'byung ba chen po kha dog la sogs pa lta bur rdzas gcig pu la rag lus pa ni ma yin no/ /de ltar na ro ni 'byung ba chen po 'dus pa las 'byung gi / gcig las ma yin te/ sman la brten pa'i ro rnams kyi rgyu rnams 'byung ba chen po 'dus pa yin no/ /la la ni yang 'byung ba gnyis shas che ba las sman mngar ba la sogs pa'i ro gsal bar 'gyur te/ de yang ro tha dad pa shes par bya ba'i le'u las/ mngar ba la sogs ro skye ba/ /sa chu me sa chu dang me/ /zhes bya ba la sogs pa 'byung ba yin no/ /de ltar na ro thams cad ni 'byung ba 'dus pa las 'byung la/ de la mang zhing shas che ba las ni 'di ni sman mngar ba'o/ /'di ni skyur ba la sogs pa'i sman rnams so zhes bya bar gnas kyi/ mngar ba'i sman de la skyur ba la sogs pa'i zhad du gyur pa med pa ni ma yin no/ /myangs par gyur pa dang nus pa'i dbang gis rdzas rnams la phan tshun du ro du ma snang la/ chu ni ro mi gsal ba yin te/ ro drug car dang ldan yang mi gsal zhing mi mngon pa yin no/ / de ltar na 'byung ba 'dus pa las sman 'byung ba'i rgyu yin pa de bzhin du mngar ba la sogs pa ro rnams kyi yang rgyu yin pas/ ro thams cad ni 'byung ba 'dus pa las byung ba yin zhing ro gsal ba mang po bshad pa yin no/ /de phyir nad kyang nyes gcig min/ / zhes bya ba ni/ gang gi phyir sman ro sna tshogs pa yin pa'i phyir nyid kyis na nad ni gcig pu ma yin no zhes bstan te/ de la nad ni nad kyi tshogs rnams so/ /nyes pa ni rlung la sogs pa'o/ /de yang ro la brten la ro yang sman la brten te/ sman ni 'byung ba chen bo'i bdag nyid can yin pas ro sna tshogs pa nyid la de dang phrad pa las rlung la sogs pa skyed par 'gyur ba yin la/ de rnams bskyed pa las ni nad du 'gyur ba yin te/ de'i phyir nad kyang nyes pa gcig dang ldan pa ma yin te/ nyes pa gsum car ldan pa ma yin no zhes bya ba'i don to/ /'dir yang mang po nyid yin no zhes shugs kyis sbyar bar bya ste/ 'di ni rlung gi rims so/ /'di ni mkhris pa'i rims so/ /zhes bya ba la sogs pa lta bu'o/ /de la 'dir ro ni gang / ro rjes ni gang zhe na/ de'i phyir smras pa ni/ de la gsal bar ro zhes bshad/ /mi gsal ro rjes mtha' mar ni/ /cung zad gsal ba dag tu'ang 'dod/ /ces bya ba la/ 'byung ba chen po lnga las gyur pa'i sman/ ro thams cad kyi gnas su gyur pa de la/ mngar ba la sogs ba'i ro gang gsal zhing nges pa nyid kyi tshul du shes par 'gyur ba de la ni ro zhes bya bar bshad de/ 'di ni mngar ba nyid do/ /'di ni skyur ba nyid do zhes bya'o/ /ro'i rjes ni mi gsal ba la bya ste/ skyu ru ra la sogs pa gang za ba na/ lces gsal ba nyid du ma rtogs pa de ni ro rjes zhes bya'o/ /de ni tha mar zhabs su cung zad ces nyung shas cig ro dang bcas pa gsal ba dag tu'ang 'dod pa yin no/ /dris pa/ mngar ba la sogs pa'i ro la lci ba la sogs pa'i yon tan dang ldan par smra bar mi rigs te/ gang gi phyir mngar ba la sogs pa'i ro rnams ni yon tan nyid yin la/ lci ba la sogs pa yang de bzhin du yon tan yin te/ des na lci ba la sogs pa'i yon tan rnams kyi gnas mngar ba la sogs pa'i yon tan bshad par ni mi rigs te/ gang gi phyir bye brag pa dag gis yon tan la ni yon tan med pa zhes bshad pa'i phyir ro zhe na/ de'i phyir smras pa ni/ sman gyi yon tan lci sogs dang / /ro ni sa la sogs brten pas/ /mtshungs par spyod bar nyer gdags pas/ /ro las ming du btags pa yin/ /zhes bya ba la/ ro'i gnas la sogs pa la yang dag par na sman gyi yon tan lci ba la sogs pa yang gang yin par ni 'bras bu las dpag par bya'o/ /des na sman gyi yon tan lci ba yin la/ lci ba de bstan pa'i ro yang yon tan lci ba yin par mtshungs shing thun mong du spyod pa yin te/ lhan cig spyod pas na mtshungs par spyod pa zhes bya'o/ /nye bar gdags pa ni cha 'dra bar spyod pa ste/ gzhan gyi chos dang mtshungs par bsgre'o/ /de ltar na mtshungs par spyod pa'i nye bar gdags pas cha 'dra bas lci ba la sogs pa'i yon tan ni/ ro la sogs pa la yon tan yod par btags pa yin gyi/ yang dag par rol sogs pa'i yon tan yod pa ni ma yin no/ /de bas na ro gtso bor gyur pa las ming du sgros btags pa yin no/ /de la sa'i sman lci dang sbom/ /sra zhing dri yi shas rab che/ /lci zhing brtan dang 'dus pa dang / /nye bar 'phel bar byed pa yin/ /zhes bya ba la/ de la zhes pa de rnams kyi nang nas sa'i rang bzhin can gyi sman ni lci ba la sogs pa'i yon tan dang ldan pa dang dri zhes bya ba'i yon tan gyi shas rab tu che ba yin te/ sa'i rang bzhin can gyi sman de'i lus ni/ lus la sogs par byed pa yin no/ /de la lci ba ni 'ju dka' zhing lci bar gyur pa nyid do/ /brtan pa ni lus brtas par byed pa'o/ /'dus pa ni yan lag mkhregs shing sra ba'o/ /nye bar 'phel ba ni lus zungs rnams rgyas par byed pa'o/ /chu yi gsher dang lci bsil snum/ /rtul zhing bska la ro shas che/ /'jam zhing bad kan 'dra ba la/ /'drul zhing tshim byed sdud bar byed/ /ces bya ba la/ chu'i rang bzhin can gyi sman ni gsher ba la sogs pa'i yon tan dang ldan pa dang / ro'i yon tan gyi shas che ba yin no/ /de lus la sbyar na lus 'jam zhing snum par byed pa dang / rtsa sbubs gsher zhing bad kan 'dra ba 'dzag pa dang / zas 'drul zhing myags pa dang / sems tshim zhing ngoms par byed pa dang / tshigs dang rkang lag sdud cing 'byor bar byed pa yin no/ /me yi rtsub rno tsha zhing skam/ /phra zhing gzugs kyi yon tan che/ /tsha zhing 'bar la mdog skyed cing / /gsal zhing smin pa'i bdag nyid can/ /zhes bya ba la/ me'i rang bzhin can gyi sman ni rtsub pa la sogs pa'i yon tan dang ldan zhing / de ni gzugs kyi yon tan gyi shas che ba yin no/ /de zos shing spyad na lus tsha bar byed pa dang / mdangs 'bar bar 'gyur ba dang / lus kyi mdog skyed pa dang / gsal zhing snang ba dang ldan pa dang / zas smin cing 'ju bar byed pa'i yon tan can yin no/ /rlung gi rtsub cing khyab la yang / / reg pa'i yon tan shas che yin/ /rtsub cing yang la dri ma sel/ /rnam dpyod na bar byed pa yin/ /zhes bya ba la/ rlung gi rang bzhin gyi sman ni/ rtsub pa la sogs pa'i yon tan dang ldan pa dang / reg pa'i yon tan gyi shas che ba yin la/ de lus la brten na rtsub pa dang / yang ba dang / dri ma sel ba la sogs pa'i yon tan gyi las byed pa yin no/ /nam mkha'i phra zhing dngas la yang / /sgra yi yon tan shas che ste/ /khong stong yang bar byed pa yin/ /zhes bya ba la/ nam mkha'i bdag nyid can gyi sman ni phra ba la sogs pa'i yon tan dang ldan pa dang / sgra'i yon tan shas che ba yin no/ /de lus kyis bsten na khong stong ste/ nang stong par byed pa dang / yang bar byed pa yin no/ /dris pa/ rlung dang nam mkha'i ni gzugs med pa yin pas de'i bdag nyid can gyi rdzas yod par ga la 'gyur zhes pa la/ nyes pa 'di yod pa ma yin te/ sman gang la rtsub pa dang / khong stong gi las byed pa mang du snang la/ der ni rlung dang nam mkha'i bdag nyid can du nye bar gdags pas ming du btags pa yin te/ dper na dad pa dang / tshul khrims dang / thos pa dang / gtong ba la sogs pa'i las byed pa mthong nas/ skyes bu dam pa dag la 'di ni lha yin no zhes nye bar 'dogs par byed pa dang 'dra'o/ /de ltar 'gro na don dang ni/ /sbyor ba sna tshogs dbang gis ni/ /sman min ci yang yod ma yin/ /zhes bya ba la/ de ltar 'byung ba chen po las byung ba 'dis na/ sman lci ba la sogs pa'i yon tan dang ldan pas/ 'gro ba ste 'khor ba'i gnas 'di/ sman ma yin par gyur pa'i rdzas ci yang yod pa ma yin te/ gzhan du na thams cad nad sel bar byed pa'i dgos pa byed pas sman nyid yin no/ /de yang ji ltar gyen du nyes pa sel bar byed nus pa'i dgos pa de'i don byed par nus pa dag gis stod du nyes pa sel te/ me dang rlung gi shas che ba'i sman gang yin pa dag phal cher de byed par nus pa yin te/ rlung ni 'phar bar byed pa dang / me ni ring du 'bar bar byed pa yin pa'i phyir/ de bas na ro stod kyi nad bsal ba'i don gyi dbang gis me dang rlung shas che ba'i sman gang yin pa de rnams de'i sman yin no/ /'og gi nyes pa sel bar nus pa'i sman ni don de sgrub par byed nus pa dang / chu shas che ba'i sman gang yin pa dag phal cher ni de'i nus pa dang ldan pa yin te/ sa ni lci ba nyid dang / dri dang ro ni chu'i rang bzhin yin te/ de ltar na 'og gi nad sel ba'i rgyu'i dbang gis sa dang chu'i shas che ba'i rdzas gang yin pa de/ de'i sman gyi me dang rlung gi ma yin la/ stod kyi nyes pa sel ba ni sa dang chu'i shas che ba dag ma yin no/ /de ltar na rgyu'i don gyi dbang gis rdzas la 'ga' zhig sman du 'gyur ba yin gyi/ thams cad thams cad du ni ma yin no/ /de bzhin du sbyar ba'i dbang gis kyang rdzas la la dag la lar sman du 'gyur ba yin gyi/ sbyor ba gcig gis nad thams cad la sman du 'gyur ba ma yin mod kyi/ 'on kyang sbyor ba'i dbang kha cig gis nad kha cig la sman du 'gyur ba yin te/ 'di ltar po son cha la sogs pa'i sman sbyor ba'i khyad par gzhan dag gis snga ma las lhag par 'gyur ba yin la/ gzhan dag gis kyang gzhan du 'gyur gyi gcig gis thams cad byed pa ni ma yin no/ /de bas na sbyor ba'i dbang gis kyang rdzas thams cad sman yin no/ /de la sman gyi gyen du 'gro/ /phal cher me dang rlung shas che/ /zhes bya ba de la/ sman gyi rigs de rnams kyi nang nas/ gyen du 'gro zhing steng du rgyu ba'i sman slon par byed pa ni phal cher zhes pa mang du me dang rlung gi shas che ba ste/ me dang rlung gi bdag nyid can yin te/ de yang gang gi phyir gyen du 'gro bas me yin pa dang / yang bas rlung yin par shes par bya'o/ /thur du 'gro ba phal cher ni/ /sa chu'i yon tan shas cher yin/ /zhes bya ba la/ sman thur du 'gro zhing 'og tu rgyu bas 'khru bar byed pa'i ngang tshul can gang yin pa de ni/ sa dang chu'i shas che ba yin te/ de gnyis ni sa lci ba dang / chu gzhol phyogs su 'gro ba yin pa'i phyir ro/ /de ltar sman no/ /zhes bya ba la/ de ltar zhes bya ba'i sgra ni yongs su rdzogs pa la bya ste/ sman gyi phyir smra bar bya ba gang dag yod pa de thams cad rdzogs so zhes bya ba'i don to/ /cha 'dres pa'i bdag nyid can gyi sman dang / steng dang 'og gi nyes pa cha mnyam par sel ba'i sman ni/ sngar so sor bstan pa'i don gyi shugs kyis shes par 'gyur ba'i phyir/ gzhung mangs par 'gyur ba'i dogs pas/ rgyud gzhan dag ltar 'dir ma bstan pa yin no/ /de ltar sman bstan nas de la brten pa'i ro mngar ba la sogs pa gang yin pa de dag re zhig bstan par bya ste/ de ni/ ro'i bye brag /'di yi 'og nas ston pa yin/ /zhes bya ba yin te/ ro'i bye brag drug cu rtsa gsum gyi grangs su nges par chad par 'di'i 'og nas zhes pa/ ro tha dad pa zhes bya ba'i le'u las gzhung rtsom par byed pas ston cing 'chad par 'gyur te/ 'dir ni bshad par bya ba mang du yod pas ma smras pa yin no/ /da ni sman gyi nus pa bshad pa rtsom par byed de/ de ni/ sman mthu la las bshad pa ni/ /lci snum bsil dang 'jam pa dang / /yang rtsub tsha dang rno ba ste/ /de ltar rnam pa brgyad du 'dod/ /ces bya ba la/ sman gyi mthu ni thams cad du thogs pa dang / gtugs pa med par 'gro ba yin pas sman gang la yon tan gyi rigs gang cung zad yod pa de thams cad la mthu'am nus pa zhes bya'o/ /de la slob dpon gzhan dag gis bshad pa ni/ sman gyi mthu ni lci ba la sogs pa'i yon tan gyi dbye ba rnam pa brgyad du 'chad de/ de ltar rnam pa 'dis ni grangs kyi rnam pa brgyad yin par slob dpon dag 'dod cing 'chad kyi/ rnam pa gzhan gyis ni rnam grangs kyi nges pa gzhan du 'dod do/ /sman mthu tsa ra kas bshad pa/ /gang gis bya ba gang byed pa/ /mthu min ci yang mi byed kyi/ /de dag thams cad mthu yis byed/ /ces bya ba la/ drang srong tsa ra kas sman gyi mthu'am/ nus pa bshad cing bstan pa ni/ dngos po gang gis byed pa/ gang la zhugs shing bya ba/ gang zhig byed cing rdzogs par gyur pa'i dngos po'i rang bzhin te/ de'i mthu yin no zhes mtho btsun drang srong tsa ra kas bshad do/ /mthu gang gis byas pa gang byed pa zhes bya ba'i tshig gis na/ nus pa ni mthu yin zhing ro yang mthu yin la/ de bzhin du sman la brten pa'i yon tan lci ba la sogs pa gang ci yang rung ba de thams cad ni/ sman de'i mthu zhes bya ste/ nus pa nyid las ma 'das pa mthu byung ba yin no/ /spyir ni sman de'i mthu la slob dpon rnams tha dad par 'dod de/ slob dpon la las ni lci ba la sogs pa'i yon tan brgyad la mthu yin par 'dod de/ de rnams ni khyad par can nyid la mthur 'dod kyi/ nus pa phra mo tsam la ni mi 'dod do/ /gal te nus pa phra mo tsam la mthur 'dod na ni/ lci ba la sogs pa'i yon tan brgyad po'i cha phra mo'i dngos po thams cad la yod par 'gyur bas mi rigs pa yin no/ /de'i khyad par can gyi nus pa dang ldan pa'i lci ba la sogs pa'i yon tan brgyad la mthu zhes bya ba'i ming mthong ba yin no/ /des na yon tan ni brgyad po de dag yin no/ /de yang gang gi sbyor ba byed pas byed/ rdzas de'i nus pa yin zhes bya ba yin no/ /de ltar na drang srong tsa ra kas 'dod kyi sman gang la yon tan gyi rigs gang dag yod pa de thams cad sman de'i mthu dang bral zhing / mthu ma yin pas na dngos po'i rigs des bya ba ci yang mi byed de/ bya ba gang zhig kyang rdzogs par mi nus so/ /des na bya ba de dag thams cad mthus byed cing nus pa rdzogs par byed pa yin no/ /gal te de ltar bya ba thams cad mthu yin na/ ci'i phyir lci ba la sogs pa'i yon tan brgyad po nyid la mthu zhes bya/ ro la sogs pa'i yon tan dag la mthu zhes ci'i phyir mi bya/ de dag gis kyang bya ba de ni byed pa nyid yin no zhe na/ de'i phyir smras pa ni/ des na lci la sogs pa nyid/ /nus pa'i khyad par ldan pa dang / /yon tan ma lus snying por ni/ /gyur pas mthu zhes bshad pa dag /don dang mthun par btags pa yin/ /zhes bya ba la/ des na slob dpon drang srong tsa ra kas lci ba la sogs pa brgyad po nyid ni nus pa'i khyad par dang ldan pa yin zhing / yon tan ma lus pa'i snying por gyur pa yin pas/ mthu zhes bshad cing nus pa zhes ming du btags pa de ni gzhung dang don mthun zhing ldan par ming du btags pa yin no/ /de la nus pa'i khyad par dang ldan pa ni yon tan lhag pa nyid de phul du byung ba'i nus pa'o/ /yon tan ma lus pa'i snying po ni yon tan mtha' dag gi dam par gyur pa'o/ /tha snyad ni 'jig rten pa dang / bstan bcos kyi brtags pa rnams so/ /de las kyang 'di rnams ni tha snyad gtso bo yin no/ /de yang 'jig rten pa rnams 'di skad smra ba dag thos shing mthong ste/ 'di ni lci ba'o/ /'di ni yang ba'o/ /'di'i yon tan ni 'di lta bu'o zhes zer ba de bzhin du bstan bcos las/ gces pa mang du yod na yang / /tha snyad gtso bo nyid kyis yin/ /zhes bya ba la sogs pa smos pa yin no/ /gzhan yang gces pa mang du smos zhes bya ba yin te/ lci ba la sogs pa de ni gces par mang du smos pa yin gyi/ ro la sogs pa rnams ni de lta ma yin pa dang / de bzhin du gtso bo nyid du smos pa yang yin te/ rol sogs pa'i yon tan las de rnams mchog tu bzung bar 'og nas bshad de/ bad kan la sogs pa'i nad kyi rang bzhin brtag pa na/ rang rang gi yon tan lci ba la sogs pa yod par bstan pa dang / bad kan lci zhing bsil la snum/ /zhes bshad kyi mngar bar ma bshad pa dang / mkhris pa snum bcas bsil zhing tsha/ /zhes bshad kyi yang bar ma bshad pa yin no/ /de bas go ni bzlog pa'i phyir/ /de ni ro la sogs pa la/ /srid du zin kyang ma bshad de/ /de bas lci la sogs pa yin/ /zhes bya ba la/ de bas de ltar bstan pa'i rgyu 'dis na yon tan ma lus pa'i snying por gyur pa la sogs pa las/ gang go bzlog par gyur pa'i ro la sogs pa zhes pa ste/ ro dang 'ju ba la sogs pa'i yon tan gzhan dag la de srid kyang zhes bya ba/ mthu zhes bya ba de yod du zin kyang / gtso bor ma gyur pas mthu zhes de la ma bshad pa yin no/ /de bas ni lci pa la sogs pa nyid mthu nyid kyi/ ro la sogs pa ni ma yin no/ /gzhan dag tsha dang bsil nyid gnyis/ /stobs yin zhes kyang ston par byed/ /ces bya ba la/ slob dpon gzhan dag ni sman gyi tsha ba dang bsil ba gnyis la mthu gnyis zhes bya'o zhes ston to/ /nyid ces bya ba ni nges par gzung ba'o/ /de yang rdzas gang gis bya ba gang byed pa ste de'i mthu zhes bya'i/ lci ba la sogs pa'i yon tan brgyad ni mthu ma yin no/ /de yang tsha ba dang bsil ba'i mtshan nyid can gyi mthu gnyis po 'dir sngar bshad pa'i stobs lngar ma 'dus pa thams cad 'dus pa yin pa'i phyir ro/ /'dir de'i gtan tshigs smras pa ni/ sman ni sna tshogs bdag nyid can/ /nyi ma zla ba'i stobs can yin/ /'gro 'di gsal dang mi gsal las/ /nam yang 'da' bar mi 'gyur ro/ /zhes bya ba la/ gang 'di 'gro ba na sman rnams ni ngo bo nyid gcig kyang sna tshogs pa'i bdag nyid du snang la/ de yang nyi ma dang / zla ba nyid ni stobs che ba yin pas na/ de'i rang bzhin las 'da' bar mi byed do/ /de'i bdag nyid can yin pa'i phyir ro/ /de la re zhig rdzas 'di dag sna tshogs dag kyang nyi ma dang zla ba'i rang bzhin las 'da' bar mi byed ce na/ de'i dpe bstan pa'i phyir 'og ma 'di smos ba yin te/ ci ltar 'gro ba 'di dag ni gsal ba dang mi gsal bar snang ba'i chos las nam yang 'da' bar mi 'gyur ro/ /de bzhin du rgyu ba dang mi rgyu ba'i tshul gyis sna tshogs pa'i bdag nyid can du gnas ba dag kyang / zla ba dang nyi ma'i rang bzhin las 'da' bar mi byed de/ de ltar na sman la la ni nyi ma'i rang bzhin can yin la/ sman la la ni zla ba'i rang bzhin can yin no/ /de bas na la la ni tsha ba'i mthu yin la/ la la ni grang ba'i mthu can yin no/ /de la tsha ba mgo 'khor skom/ /rmya rngul tsha zhing myur 'ju byed/ /rlung dang bad kan zhi bar byed/ /ces bya ba la/ de la zhes bya ba ni tsha ba dang bsil ba'i mthu gnyis kyi nang na/ sman tsha ba'i mthu can ni mgo 'khor ba la sogs pa byed do/ /myur 'ju byed ces bya ba ni zas myur ba nyid du 'ju bar byed do/ / rlung dang bad kan gnyis zhi bar byed pa ni/ rlung nad dang bad kan gyi nad sel bar byed pa'o/ /bsil ba dag ni tshim byed cing / /'tsho dang rengs par byed pa dang / /khrag dang mkhris pa rab dang byed/ /ces bya ba la/ sman bsil zhing stobs grang ba dang ldan pa ni tshim par byed pa la sogs pa dang / khrag dang mkhris pa rab tu dang bar byed do/ /de la tshim pa ni bde ba skyed par byed pa'o/ /'tsho ba ni gzi mdangs 'phel bar byed pa'o/ /rengs par byed pa ni lus shing bzhin rengs par byed pa'o/ /khrag dang mkhris pa rab tu dang ba ni de dag gsal zhing rnyog pa med par byed pa'o/ /da ni pho ba'i zhes bya ba la sogs pa tshigs su bcad pa'i rdzas 'ju ba smras pa yin te/ pho ba'i me dang phrad pa las/ /gang zhig ro gzhan byung gyur pa'i/ /ro rnams kyi ni mthar zhu ba/ /de ni zhu ba zhes bshad do/ /zhes bya ba la/ pho ba'i me dang sman phrad cing 'dus pa las gang ro gzhan du 'gyur ba ste/ mngar ba la sogs pa'i ro gzhan dag tu byung bar gyur pa zas kyi las kyi mthar thug pa na/ mngar ba dang / skyur ba dang / tsha ba'i ro rnams kyi zhu ba'i tha mar gang zhig zhu zhing smin par gyur pa de ni zhu ba zhes bya'o/ /zhes drang srong dag gis bshad do/ /ji ltar mngar ba'i ro zos pa na/ dang ba'i ro'i khyad par 'byung bar gyur pa de ni bstan bcos shes pa dag gis zhu ba yin no zhes bshad do/ /de nyid kyi phyir smras pa ni/ mngar dang lan tshwa zhu rjes mngar/ /skyur ba'i zhu rjes skyur ba yin/ /kha dang tsha dang bska ba rnams/ /zhu rjes phal cher kha ba yin/ /zhes bya ba la/ mngar ba ni ro zhim pa'o/ /lan tshwa ni tshwa rnams te/ de gnyis ni zhu ba'i rjes mngar ba'o/ /ro skyur ba zos pa'i rjes kyang skyur ba nyid yin no/ /ro kha ba dang tsha ba dang bska ba rnams ni phal cher kha bar 'ju ba yin no/ / de la phal cher zhes smos pa ni/ kha cig tu 'dir smos pa dang mi mthun pa yod de/ 'bru la gnas pa'i ro mngar ba ni zhu ba'i rjes skyur bar 'gyur la/ des ni 'bru ni ro mngar yang zhu rjes skyur ba yin pas/ mkhris pa skyed cing lci ba yin no/ /de bzhin du a ru ra dang / bca' sga dang / sge'u gsher dang / pi pi ling la sogs pa la yang sbyar bar bya'o/ /de yang bsdus ba las/ 'bru ni mngar dang skyur ba nyid/ /de bzhin se'u skyur yang mngar/ /til mar kha bar gyur pa dang / /pi pi ling yang bska bar 'gyur/ /zhes bshad pa yin no/ /de ltar na 'bru ni mngar du zin kyang zhu ba'i rjes skyur bar 'gyur ba dang / se'u skyur yang mngar bar 'ju ba dang / til mar skyur du zin kyang kha bar 'ju ba dang / pi pi ling tsha yang zhu rjes bska bar 'gyur ba yin no/ /des na 'di ltar mi mthun pa dag kyang yod pas phal cher zhes smos pa yin no/ /ro dang zhu rjes 'bras bu mnyam/ /zhes bya ba la/ ro zhes pa lce'i yul du gyur ba mngar ba dang / skyur ba la sogs pa dang / zhu ba'i rjes 'di ni 'bras bu yin pas mnyam zhing mtshungs pa yin te/ 'di ni mngar ba'i ro myangs pa na lus tshim par byed pa la sogs pa gang byed pa de ni me tog lta bu yin te/ ro mngar ba de zhu ba dang / de mtshungs pa yin la/ gang gzhan ro zhim pa la sogs pa'i bya ba byed pa de ni/ ro mngar ba de'i 'bras bu yin pas thams cad du mthun pa yin no/ /ro mngar ba'i las ni 'ju ba rtul ba dang / lus zungs rgyas pa la sogs pa'i las byed pa yin no/ / de la sman ni bzang dang ngan/ /la la ro yis las byed la/ /gzhan dag 'ju bar byed pa yin/ /yon tan gzhan dang nus pa dang / /mthu yis la la byed pa yin/ /zhes bya ba la/ de la zhes bya ba ni nges par gzung ba ste/ sman dang / ro dang / nus pa dang / mthu stobs kyi nang nas/ sman bzang dang ngan zhes bya ba ni yod pa dang med pa'i las sman la ni ro yis byed pa dang / bska ba dang bcas pas bad kan zhi bar byed cing / nus ba bsil bar byed pas rlung skyed par byed do/ /rlan can gyi sha'i chu ni nus pa dro ba yin pas mkhris pa skyed par byed do/ /de bzhin du til mar ni zhu rjes kha ba nyid kyis bshang gci skyed la/ rang skyur yang rtsub cing dro ba yin pa dang bil ba'i rkang ni rtsub pas mkhris pa skyed pa dang / skyu ru ra ni nus pa bsil ba dang / zhu rjes mngar bas bad kan skyed pa dang / yang zhing rtsub kyang rlung mi skyed pa dang / lan tshwa lce myang tsha ni zhu rjes mngar bas mkhris pa sel zhing yang bad kan la phan pa dang / pu shel tse dang / bca' ska ni snum ba dang / dro ba dang / zhu rjes mngar bas rlung sel ba dang / pi pi ling yang de dang 'dra bas/ rlung sel ba dang / sgog skya dang kun dong dag ni snum pa dang / tsha ba dang / lci bas rlung sel bar byed la/ de dag ni snum pa dang / lci bas bad kan skyed par byed pa yin no/ /la phug sgong po yang zhu rjes mngar bas bad kan skyed do/ /bri ha ti dang / kaN+Da ka ri dang / byi sha la ni nus pa tsha bas mkhris pa skyed par byed pa dang / sha ni nus pa dro bas rlung sel zhing mkhris pa skyed pa dang / ku lang+tha ni ro bska yang zhu rjes bsil bas rlung sel zhing mkhris pa skyed pa yin no/ /de ltar na de dag ni phyogs gcig tsam gyi dper bstan pa yin no/ /sman gyi ro sogs gang dang gang / /stobs ldan nyid kyis gnas byed de/ /shin tu zil gnon de dang de/ /sgrub byed rgyu ni nyid du gnas/ /zhes bya ba la/ sman gyi ris su gtogs pa'i ro dang / nus pa dang / 'ju ba dang mthu gang dang gang yin pa de dag gi nang nas/ stobs dang ldan pa nyid kyis sman la gnas par byed pa de ni/ sman gyi rigs de shin tu zil gyis mnan cing stobs chung ba gzhan dag pham par byas nas/ gnas pa de dang de ni bya ba gang sgrub par byed pa de dag ni/ rgyu nyid du gnas par 'gyur zhing / bsgrub par bya ba nyid sgrub par byed pa yin no/ /de yang ros ni 'di byas so/ /nus pas ni 'di byas so/ /stobs kyis ni 'di byas so/ /zhes bya ba lta bu'o/ /don 'di nyid kyis dper brjod pa/ bsdus pa las spros te bshad pa 'dir bstan pa yin la/ /gang 'di ltar ro la sogs pa'i rigs su gtogs pas ro gzhan dag la stobs dang ldan par gnas shing / de dang de nyid du zil gyis mnan nas sgrub pa'i rgyu nyid du byed kyi/ rang dang gzhan gyi stobs la gnas pa dang / stobs dang ldan pa dang / stobs chung ba dang / gnyi ga'i tshul gyis rang rang gi las byed pa yin pas na/ de'i phyir 'di bstan par bya ba smras pa ni/ yon tan mi 'phrod sbyar ba ni/ /mang pos nyung ngu zil gyis gnon/ /zhes bya ba yin te/ gang gi phyir yon tan mi 'phrod pa dag sbyar zhing bsres pa ni/ mang po stobs dang ldan pas/ stobs chung ngu zil gyis gnon cing rgyal bar byed do/ /yon tan mi 'phrod ces bya ba 'dir ni/ rdzas mi 'phrod pa'i sbyor ba la bya'o/ /yon tan mi 'phrod pa nyid du ni smra bar rigs pa ma yin no/ /de yang drang srong tsa ra kas bshad pa/ sbyor ba ni rdzas gnyis sam rdzas mang po sbyar ba yin la/ de yang mi 'phrod pa ni gnyis te/ rang bzhin mi 'phrod pa dang / 'bras bu mi 'phrod pa'o/ / rang bzhin mi 'phrod pa ni/ dper na sman yang ba dang / lci ba sbyar ba dang / chab dang bsil ba sbyar ba la sogs pa'o/ /'bras bu mi 'phrod pa ni/ dper na rlung gi nad bsal ba'i phyir/ /sman rtsub pa dang / ro lhan cig sbyar ba dang / de bzhin du bsil ba dang / dro ba dang lhan cig sbyar ba la sogs pa'o/ /de ltar na rang bzhin gyis yon tan mi 'phrod pa'i sman gyi sbyor ba dang / de bzhin du 'bras bu mi 'phrod pa'i sman gyi sbyor ba phan tshun rigs mi mthun pa'i sbyor ba de ni/ gang zas kyi rigs nyung ngu rdzas kyi rigs mang pos zil gyis mnan nas/ de nyid du rgyu nyid du sgrub par byed par gnas par mthong ngo / /de yang dper na sbrang rtsi ni mngar du zin kyang bad kan zhi bar byed do/ /ro mngar ba ni bad kan skyed par byed pa yin yang / sbrang rtsi bad kan zhi bar byed pa ni mi mthun pa mi 'phrod pa'i yon tan dang ldan pa'i phyir ro/ /de ltar na rigs mthun pa'i mtshan nyid sbyor ba las kyang gang zhig gang gis zil gyis mnan nas/ rang rgyud du grub pa yin par som nyir gyur pa de dgag par bya ba'i phyir 'dir smras pa ni/ ro dang 'ju ba'i mthu dag ni/ /de yi stobs kyis zil gyis gnon/ /zhes bya ba yin te/ ro dang nus pa dang 'ju ba dang / stobs rnams ni ci ltar lhan cig sbyar zhing nus pa mnyam pa yin du zin kyang rang bzhin gyis 'ju bas ni ro zil gyis mnan te de'i nus pa med par byas nas/ rang gi bya ba bstan pa'i sgo nas/ de'i nus pa zil gyis mnan nas/ rang gi nus pa gsal bar ston to/ /de bzhin du ro dang 'ju ba de gnyis kyang mthus zil gyis gnon la/ mthu de rnams kyi stobs kyis zil gyis gnon pa yin no/ /ro sogs de ltar stobs ni mnyam/ /ma bcos pa ni stobs dang ldan/ /zhes bya ba ni/ ro dang 'ju ba dang mthu dang stobs rnams ni/ de ltar zhes pa rnam pa 'dis stobs mnyam zhing mtshungs pa yin la/ de'i stobs ni ro la sogs pa la dmigs nas ma bcos pa gang yin pa de ni stobs dang ldan par bshad de/ rdzas gang gi ro mngar ba de ji skad bshad pa bzhin du 'ju ba mngar ba dang ldan pa dang / de bzhin du nus pa bsil ba dang ldan pa ni stobs che ba yin la/ de bzhin du ro skyur ba ji skad bshad pa'i zhu rjes skyur ba dang ldan zhing / de bzhin du tsha ba'i nus pa dang ldan pa dang / de bzhin du ro tsha ba dang ji skad bshad pa'i 'ju ba'i tsha ba dang ldan zhing dro ba'i nus pa dang ldan pa dang / de bzhin du 'o ma dang chang dang / na le sham la sogs pa las 'o ma ni ro mngar la 'ju ba dang nus pa bsil ba dang / chang ni skyur la 'ju ba dang nus pa dro ba dang / na le sham ni ro tsha la 'ju ba dang nus pa dro ba skyed pa dang / sman de dag ni ro dang 'ju ba dang nus pa dang stobs mnyam pas ma bcos pa'i stobs dang ldan pa zhes bya ba yin par shes par bya'o/ /kho bo cag gis ro dang 'ju ba dang nus pa'i rang bzhin ci lta bu yin pa des ni las la rjes su dpag pas shes pas ni/ mthu zhes bya ba ni rang bzhin shes par dka' bas de mi shes pas the tshom du gyur na mthu ni gang zhig yin/ gang las ni rjes su dpag par bya zhe na/ 'dir smras pa ni/ ro sogs mnyam pa'i las gang ni/ /khyad 'phags de ni mthu las skyes/ /zhes bya ba yin te/ ro la sogs pa mnyam zhing mtshungs pa nyid kyis las gang khyad par du 'phags pa sman gang la snang ba de ni mthu las skyes pa yin par shes par bya'o/ /rjes su dpag pa des na mthu zhes bya ba shes par bya ste/ 'di ni rdzas kyi mthu yin no/ /de yang sman gnyis ro mtshungs pa dang nus pa mnyam du zin kyang de la sman gcig las gzhan byed la cig shos kyang las gzhan byed pa nyid yin te/ des ni stobs kyis stobs yod pa nyid du shes par bya'o/ /de ltar na sman re re'i 'jug pa dang ldog pa'i mtshan nyid can gyi chos rang gi rang bzhin dngos po rkyen tshogs pa las byung ba nges par byed pa'i mtshan nyid can de ni mthu zhes bya ste/ dngos po gzhan gyi mthu ni ma yin no/ /dan ti dang ni tsi tra ka /ro sogs mtshungs kyang dan ti 'khru/ /shing mngar rgun 'brum 'dra yang 'khru/ /'o ma mar 'dra mar drod skyed/ /ces bya ba la/ de ltar na sman dan ti dang / tsi tra ka ni ro dang nus pa'i zhu rjes mtshungs te/ tsi tra ka la ro dang nus pa dang 'ju ba'i rjes gang dag yod pa de dag dan ti la yod du zin kyang / dan ti ni dan ti rang nyid kyi mtshan nyid kyis 'khru bar byed pa yin gyi/ tsi tra ka ni ma yin te/ de lta bu'i khyad par gyi chos la mthu zhes bya'o/ /de bzhin du mngar ba dang / rgun 'brum ro mngar ba la sogs par mthun du zin kyang rgun 'brum 'khru bar byed kyi shing mngar ni ma yin no/ /de bzhin du 'o ma dang / mar la sogs pa mtshungs su zin kyang 'o ma ni 'o mar gyur pas drod mi skyed kyi/ mar gyis drod skyed do/ /de bzhin du thams cad kyang mthu las gyur pa yin no zhes bya bar sbyar ro/ /'di ltar re zhig dngos po thams cad la yang spyi dang khyad par gyis khyab pa yin pas/ de'i phyir bstan bcos byed pas smas pa ni/ de ltar sman la sogs pa yi/ /spyi yi las te de yang ni/ /zhes bya ba yin te/ de ltar zhes bya ba'i sgra ni yongs su rdzogs pa'i tshig gam rnam pa'i don no/ /de yang sman la sogs pa'i ro dang 'ju ba dang nus pa dang mthu spyi'i las rdzogs pa yin gyi khyad par ni ma yin te/ de rtsom bar byed pa'i 'byung ba chen po spyi'i las byung ba na spyi'i rkyen spyi'i rgyu las byung ba zhes bya ba'i bar du'o/ /yang na rnam pa'i don te/ rnam pa 'dis sman la sogs pa spyi'i las nyid bshad kyi khyad par gyi ni ma yin te/ 'byung ba chen po dag gi sman la brten pa'i ro dang mthu la sogs pa ji ltar bskyed pa spyi'i rgyu bstan pa de bzhin du de'i las kyang spyi tsam du bstan to/ /zhes bya ba'i don to/ /de la sman la sogs pa'i spyi'i las bshad nas khyad par gyi dbye bas sman de rnams re re zhing las gzhan dang gzhan byed pa'i tshul smras pa ni/ sna tshogs rkyen gyi dbye ba yis/ /sman dbye tha dad gyur pa yin/ /zhes bya ba la/ spyir bshad pa'i sman gyi ro dang 'ju ba dang nus pa la sogs pa'i las de yang tha dad par 'gyur ba yin zhing / bye brag tu 'gyur ba yin no/ /gang gis tha dad par 'gyur zhe na/ sna tshogs pa'i rkyen gyi dbye ba tha dad par 'gyur ba yin te/ sna tshogs pa'i rkyen ni rnam pa tha dad pa'i tshul du gnas pa'i 'byung ba chen po rnams la bya la/ de yang sems can tha dad pa rnams kyis sngon dge ba dang mi dge ba byas pa'i las las byung ba'i 'byung ba chen po de rnams sna tshogs shing tha dad pa de lta bur yongs su 'gyur ba'i rkyen sna tshogs pa rnams kyis bskyed pa'i sman de rnams kyi dbye ba ni khyad par te/ khyad par gyi dbye ba des spyir bshad pa'i sman rnams las kyi dbye ba tha dad par 'gyur zhing du ma nyid du gnas pa yin la/ ro la sogs ba yang la brten pa yin pas de rnams kyi las kyang sman gyi dbye bas tha dad par 'gyur ba yin no/ /de ltar sman rnam pa gnyis po las/ la la ni rtsom par byed pa'i rkyen gyis mtshungs par skyed pa yin la/ la la ni nus pa skyed pa'i rkyen gyis mtshungs par skyed pa yin pas rkyen sna tshogs nyid du gnas pa yin te/ de dag gi phyogs gcig gi dpe bstan par bya ba'i phyir smras pa ni/ gro dang nas ni mngar ba dang / /lci las rlung 'joms skyed pa yin/ /nya dro 'o ma bsil ba dang / /seng ge kha yi phag ma yin/ /zhes bya ba la/ gro dang nas dag ni ro mngar ba dang yon tan lci ba dang ldan pa yin du zin kyang / gro ni rlung 'joms par byed la/ nas ni rlung skyed par byed pa ni rkyen sna tshogs las byung ba nyid yin pa'i phyir ro/ /de bzhin du rkyen sna tshogs pa las byung bas/ nya ni ro mngar du zin kyang nus pa dro ba yin gyi grang ba ma yin la/ 'o ma ni mngar du zin kyang zhu rjes nus pa bsil ba yin gyi dro ba ma yin no/ /de bzhin du rkyen sna tshogs pa las byung ba'i phyir/ seng ge'i sha ni mngar du zin kyang zhu rjes la sogs pa kha ba yin la/ phag gi sha ni mngar ba yin pa las/ zhu rjes la sogs pa yang mngar ba nyid yin no/ /de ltar na thams cad kyang rkyen sna tshogs las byung ba'i phyir/ ro dang / zhu rjes dang / nus pa tha dad yin par dpes rim pa bzhin du bstan pa yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u dgu pa'i rnam par 'grel pa'o// //de nas ro tha dad pa shes par bya ba'i le'u bshad par bya'o zhes bya ba la/ sman la sogs pa rnams kyi bye brag shes par bya ba'i le'u bshad pa'i 'og tu/ ro tha dad pa shes par bya ba'i le'u bshad par bya ste/ ro rnams ni sman la brten pa yin pa'i phyir ro/ /de yang / sman rnams nyid kyi ro la sogs/ /de ni de la brten pas mchog /ces sngar bshad pa'i phyir te/ sman med par ro la sogs pa nye bar dmigs par mi 'gyur ro/ /de bas na dang por sman bshad nas de'i 'og tu brten pa po'i ro'i bye brag shes pa bstan pa brtsams pa yin no/ /de la ro rnams kyi tha dad pa ni ro'i khyad par te de shes par bya ba la phan pa'i le'u gang yin pa de bshad par bya zhing bstan par bya'o zhes pa'o/ /de la ro ni re zhig chu'i rang bzhin dang / dang po mi gsal ba yin pa la/ de ni dus rnam pa drug dang ldan pa yin pa'i phyir dang / 'byung ba chen po'i yon tan shas che chung gi dbang gis byung ba dang mi mnyam zhing / tshig pa las mngar ba la sogs pa'i dbye ba rnam pa drug tu 'gyur ro/ /de ltar chu smos pas ni/ ro dag chu'i rnam par 'gyur ba yin par shes pas la sogs pa ni/ lhan cig byed pa'i tshul gyis dgos pa byed pa yin te/ de bas na tshogs pa ni yang dag par na ro'i byed pa po yin no/ /des na 'byung ba chen po shas che ba'i khyad par las ro 'byung ba'i tshul smras pa ni/ mngar ba la sogs ro skye ba/ /sa chu me sa chu dang me/ /mkha' rlung me rlung sa dang rlung / /gnyis gnyis shas che las rim 'byung / /zhes bya ba la/ ro mngar ba dang skyur ba la sogs pa drug po rnams ni skye zhing 'byung ba ni 'byung ba gnyis gnyis shas che zhing lhag pa las go rims ji lta ba bzhin du bstan pa dang bshad pa'i tshul gyis 'byung ste/ 'byung ba gnyis gnyis gang la shas che bar gyur pa de las 'byung ba'o/ /de las 'byung ba chen po gang dag ro gang zhig rtsom pa las lhag par gyur pa yin zhe na/ de dag grangs ji lta ba bzhin du smras pa ni/ sa chu zhes bya ba la sogs pa ste/ sa chu zhes pa sa dang chu'i 'byung ba shas che ba las ni/ ro mngar ba 'byung la me sa zhes bya ba me dang sa'i shas che ba las ni skyur ba 'byung ngo / /chu dang me zhes bya ba 'byung ba/ chu dang me'i shas che ba las ni lan tshwa'i ro 'byung ngo / /mkha' rlung zhes bya ba nam mkha' dang rlung shas che ba las ni ro kha ba 'byung ngo / /me rlung zhes bya ba me dang rlung shas che ba las ni ro tsha ba 'byung ngo / /sa rlung zhes bya ba 'byung ba sa dang rlung gi shas che ba las ni ro bska ba 'byung ngo / /de lta na gnyis gnyis las 'byung ba yin no/ /shas che zhes smos pas na ro thams cad kyang 'byung ba las gyur pa yin par ston to/ /des na tshogs pa las byung ba yin yang shas che ba'i shas rdzogs par byas pa yin te/ gang du gang zhig shas che ba ste der ro'i khyad par gzhan bskyed pa yin no/ /de ltar na shas che ba'i dbang gis na ro mngar ba ni 'byung ba thams cad kyis bskyed du zin kyang / sa dang chu las byung ba yin zhes bshad pa yin no/ /de bzhin du lhag ma rnams la yang sbyar bar bya'o/ /da ni mngar ba la sogs pa 'byung ba rnams kyi mtshan nyid dang las bstan pa'i phyir smras pa ni/ de las ro ni mngar ba dag /gang zhig myangs pa'i tshe na ni/ /kha la chags shing lus kyang ni/ /tshim byed dbang po rab dang byed/ /grog ma la sogs dga' ba yin/ /zhes bya ba la/ ro drug po de dag gi nang nas ro mngar ba dag tu shes par bya ba ni gang zhig myangs shing lce dang phrad par gyur pa na/ kha la chags shing 'byar bag can du gyur pa dang / de bzhin du lus kyang tshim zhing bde bar byed pa dang / dbang po rnams rab tu dang zhing dga' bar byed pa dang / de bzhin du grog ma la sogs srog chags phra mo rnams kyang dga' zhing sred par byed pa yin no/ /skyur ba kha nas chu 'dzag cing / /so brtse spu ni ldang ba dang / /mig dang smin ma 'dzum par byed/ /ces bya ba la/ ro skur ba ni myangs pa'i tshe kha nas chu 'dzag cing / gsher ba 'du ba dang / de bzhin du so brtse ba dang / spu ldang bar byed pa dang / mig gnyis dang smin ma gnyis 'dzum zhing sdud par byed pa yin no/ / lan tshwa khar ni mchil ma 'du/ /mkhur ba gre ba tsha bar byed/ /ces bya ba la/ ro lan tshwa ni lces myangs pa na khar mchil ma 'du zhing 'dzag pa dang mkhur ba dang gre ba tsha bar byed pa yin no/ /kha ba kha yi dri ma sbyong / /lce ni 'joms par byed pa yin/ /zhes bya ba la/ ro kha ba ni myangs par gyur pa na/ kha'i dri ma sbyong zhing dag par byed de/ ljan ljin sel ba yin zhing lce 'joms te/ ro gzhan 'dzin par byed pa'i nus pa 'jig par byed pa ste/ rang gi las kyi nus pa nye bar 'joms par byed do zhes bya ba'i don to/ /tsha ba lce rtse skyo byed cing / /tsag tsag byed par 'gyur ba dang / /kha mig sna las 'dzag byed cing / /mkhur ba sreg par byed pa yin/ /zhes bya ba la/ ro tsha ba ni lce la myangs pa'i lce'i rtse mo skyo bar byed cing na bar byed pa ste/ lce bem bem por byed do zhes bya ba'i don to/ /tsag tsag byed par 'gyur zhes bya ba ni/ me lce la reg pa ltar lam lam por byed pa'am/ ske tsho'i lde gus bskus pa ltar tsha ba tsag tsag por byed par 'gyur ro/ /de bzhin du kha dang mig dang sna las chu 'dzag par byed pa dang / mkhur ba me lces phog pa ltar sreg par byed pa yin no/ /bska bas lce ni bem por byed/ /gre ba rtsa sbubs 'gags par byed/ /ces bya ba la/ ro bska ba ni lces myangs pa na lce bem bem por byed do/ /ro ji lta ba bzhin du tshor bar gyur pa las nyams par byed pa dang / de bzhin du gre ba dang rtsa'i sbubs 'gags par byed par 'gyur ro/ / ro yi tshul ni de dag ste/ /zhes bya ba la/ ro rnams kyi mtshan nyid bshad nas de dag gi rang bzhin nyid kyi don gyi mjug bsdu ba'i tshig tu slob dpon gyis smras pa yin te/ mngar ba la sogs pa'i ro'i tshul ni sngar bshad pa'i rnam pa de lta bu'i mtshan nyid can yin par shes par bya'o zhes bya ba'i don to/ /las ni ro mngar ba dag gis/ /skyes nas 'phrod par byed pa dang / /lus zungs mthu stobs rab skyed cing / /byis pa rgan po glo rdol skem/ /mdog mdangs skra dang dbang po bzang / /lus brtas skad 'gags phan zhing lci/ /nu zho skyed cing rma 'byor byed/ /tshe ring 'tsho byed snum pa dang / /rlung dang mkhris pa dug rnams sel/ /ha cang drags na tshil bcas dang / /bad kan las byung nad skyed cing / /lus sbom drod 'bri chang nad dang / /gcin nad lba ba rmen sogs skyed/ /ces bya ba la/ ro mngar ba bsten cing spyad na las 'di dag byed do/ /de yang skyes nas 'phrod par byed pa ste/ skyes pa nas brtsams te 'phrod cing rjes su mthun pa yin pa'i phyir/ bcud kyi dngas ma la sogs pa'i lus zungs rnams kyi mthu stobs rab tu skyed par byed pa ste/ nus pa khyad par can dang ldan pa'i stobs bskyed par 'gyur ro zhes bya ba'i don to/ /de bzhin du rtag tu byis pa dang rgan po glo rdol ba dang skem ba dang mdog mdangs dang / skra dang dbang po rnams la bzang zhing bsngags par byed pa yin no/ /de bzhin du lus brtas par byed pa dang skad 'gags pa'i lkog ma la phan pa dang bud med kyi nu zho skyed pa dang / rma dang rus pa chag pa 'byor zhing 'tsho bar byed pa dang / tshe ring bar byed pa dang / 'tsho bar byed cing mdangs skyed pa dang / snum pa'i yon tan dang ldan pa dang / de bzhin du rlung dang mkhris pa'i nad dang dug las gyur pa'i nad rnams sel bar byed pa yin no/ /yang ro mngar ba de ha cang drags shing shas cher bsten par gyur na/ tshil dang bad kan las byung ba'i nad rnams skyed cing 'phel bar byed pa dang / lus sbom ba la sogs par byed pa dang / chang nad ni 'og nas bshad do/ /de la sogs pa skyed par 'gyur ro/ /skyur ba me drod skyed byed snum/ /zhim zhing 'ju byed yi ga 'byed/ /dro ba'i nus skyed reg pa bsil/ /tshim byed 'drul byed yang ba ste/ /bad kan khrag mkhris rgyas par byed/ /rlung 'gags rgyu bar byed pa yin/ /de ni shin tu bsten drags na/ /lus lhod rab rib mgo 'khor dang / /g.yan pa skya rbab me dbal dang / /'or nad thor bu skom rims skyed/ /ces bya ba la/ ro skyur ba bsten cing spyad na/ khong ba'i me drod skyed cing 'phel bar byed pa dang / de bzhin du snum pa dang / zhim zhing sems dga' bar byed pa dang / kha zas 'ju zhing smin par byed pa dang / yi ga 'byed cing zas len pa dang / de bzhin du dro ba'i nus pa skyed pa dang / bskus na reg pa kha ba ltar bsil ba dang / tshim par byed pa dang / kha zas 'drul zhing sla bar byed pa dang / de bzhin du yang ba dang / bad kan dang mkhris pa dang / khrag rgyas par byed pa dang / de bzhin du rlung lam 'gags shing 'khyil ba dag bde bar rgyu bar byed cing 'byung bar byed pa yin no/ /ro skyur ba de ni shin tu bsten drags shing shas cher zos na lus lhod cing mi mkhregs par byed pa dang / de bzhin du rab rib la sogs pa'i nad skyed par 'gyur ro/ /lan tshwa sra dang 'khyil ba dang / /'gags pa 'byin cing drod skyed byed/ /snum dang dugs kyis rdul zhing rno/ /yi ga 'byed cing gcod 'byed byed/ /de ni drags pas rlung khrag dang / /skra 'byi skra dkar gnyer ma dang / /skom mdze dug dang me dbal rnams/ /skyed cing stobs ni 'bri bar byed/ /ces bya ba la/ ro lan tshwa can bsten cing longs spyad na/ sra ba 'byin par byed pa dang / 'khyil ba 'byin par byed pa dang / 'gags pa 'byin par byed pa yin no/ /de la sra ba ni rengs shing 'gyur mi shes pa'o/ /'khyil ba ni bshang ba la sogs pa'i tshogs pa 'khyil zhing 'byung du mi btub pa'o/ /'gags pa ni rtsa sbubs rnams 'gags pa ste/ de dag 'byin cing sel bar byed pa yin no/ /de bzhin du drod skyed de me'i shas 'phel bar byed pa dang / snum pa dang / dugs kyis rdul 'byin par byed pa dang / rno zhing 'jug pa myur ba dang / yi ga 'byed cing zas 'dod pa dang / gcod cing kha gnyis su byed pa dang / 'byed par byed pa yin no/ /lan tshwa'i ro de drags shing shas cher bsten pas rlung dang khrag gi nad dang / de bzhin du skra 'byi zhing spyi ther du 'gyur ba dang / rgas sra ba'i mtshan ma skra dkar ba dang / gnyer ma zhes pa pags pa 'dus pa dag byed pa dang / de bzhin du skom dad la sogs pa skyed par byed cing / stobs 'bri zhing 'jig par byed pa yin no/ /kha ba rang nyid zhim min zhing / /yi ga 'chus dang srin skom dug / mdze dang brgyal dang rims slon bro/ /tsha dang mkhris pa bad kan 'joms/ /'drul dang tshil dang zhag dang rkang / /bshang dang gci ba skems pa dang / /yang zhing yid gzhungs bsil zhing rtsub/ /nu ma'i nad dang skad 'gags sel/ /de ni shin tu drags gyur nas/ /lus zungs zad cing rlung nad skyed/ /ces bya ba la/ ro kha ba ni rang nyid zhim pa ma yin zhing yi ga 'byed par byed pa yin la/ rang nyid yi gar mi 'ong ba yin no/ /de bzhin yi ga 'chus pa nas bad kan gyi bar du 'joms par byed pa yin no/ /de bzhin 'drul ba la sogs pa zhu zhing gsher ba'i tshul can dag skem par byed pa dang / de bzhin du bzhin yang ba dang / yid gzhungs shing shes rab 'phel ba dang / bsil zhing grang ba'i nus pa skyed pa dang / de bzhin du rtsub pa dang / bud med kyi nu ma'i nad dang / skad 'gags pa'i lkog ma'i nad sel zhing 'joms pa yin no/ /ro kha ba de shin tu drags par bsten cing goms par gyur na/ lus zungs dngas ma la sogs pa zad cing 'bye ba dang / rlung las gyur pa'i nad rnams skyed cing 'byin pa yin no/ /tsha bas lkog nad 'gags pa dang / /mdze dang ma zhu 'or nad sel/ / rma 'jig byed cing snum pa dang / /tshil dang 'drul bag skems par byed/ /drod skyed 'ju zhing yi ga 'byed/ /sbyong zhing zas ni 'jig par byed/ /'ching ba gcod cing rtsa sbubs dag /rnam par 'byed cing bad kan sel/ /de ni shin tu drags gyur pas/ /skom skyed khu ba stobs zad cing / /brgyal zhing lus 'khums 'dar ba dang / /rked pa rgyab sogs na bar byed/ /ces bya ba la/ ro tsha bas ni lkog ma'i nad la sogs pa sel bar byed de/ lkog nad ni lkog ma'i phyogs su byung ba'i nad do/ /'gags pa ni brang 'gags shing bad kan gyis rgyas pa las byung ba'i nad la bya'o/ /la la ni grang ba'i 'dar nad la u dar du zhes bya'o zhes zer ro/ /gzhan dag ni grang ba'i dus su khyad par du/ grang ba chu yi reg pa las/ /lkog mar skrangs par gyur pa'i nad/ /gag pa zhes bya bad kan 'byung / /zhes bshad do/ /ma zhu ba ni ma zhu ba be'u snabs can no/ /rma 'jig par byed pa ni/ rma shin tu mtho ba'i skrangs bag can 'dzum zhing 'bri bar byed pa'o/ /yang rma 'byor ba dag gi gags byed pa'o/ /de bzhin du snum pa dang / tshil la sogs pa skems shing 'bri bar byed pa dang / me'i drod skyed cing 'phel ba dang / ma zhu ba zhu bar byed pa dang / kha zas yi ga 'byed par byed pa dang / rtsa sbubs sbyong ba dang / zas 'jig par byed pa dang / 'ching ba gcod pa ste/ rno bas lhu tshigs kyi 'ching ba dam po lhod par byed pa dang / rtsa sbubs kyi kha rnam par 'byed pa dang / bad kan sel zhing 'joms pa yin no/ /tsha ba de shin tu drags par bsten cing zos pas ni skom dad skyed pa la sogs pa byed pa yin no/ /brgyal ba ni rmongs par gyur pa'o/ /lus 'khums ba ni yan lag 'jas pa ltar gyur pa'o/ /de bzhin du 'dar ba dang / rked pa dang rgyab na ba ste/ de dag tu gzer ba la sogs pa mi bzad pas 'debs pa dang / sogs pa'i sgras ni rkang pa dang / rtsib logs na bar byed pa yin no/ /bska bas mkhris pa bad kan sel/ /lci zhing khrag nad rnam par sbyong / /skem zhing rma 'tsho bsil ba dang / /'drul dang tshil ni rnam par skems/ /be'u snabs 'khyil cing sri bar byed/ /rtsub cing pags mdog rab dang byed/ /de ni shin tu bsten drags na/ /bshang 'gags lto sbos snying nad dang / /skom dang skem zhing skyes mthu nyams/ /rtsa sgo 'gags shing dri ma sri/ /zhes bya ba/ ro bska ba bsten cing spyad pas ni/ mkhris pa bad kan sel zhing 'joms par byed pa dang / lci ba'i yon tan dang ldan pa dang / khrag gi nad rnam par sbyong ba la sogs pa byed pa dang / be'u snabs 'khyil zhing thogs pa dang / bshang bsri bar byed pa dang / de bzhin du shin tu rtsub pa dang / pags pa'i mdog rab tu dngas zhing mdog gsal bar byed pa yin no/ /ro bska ba de bsten pa drags shing shas cher zos na bshang ba 'gag pa la sogs pa skyed par byed pa dang / skyes bu'i mthu nyams shing khu ba zad par 'gyur ba dang / dri ma sri ba ste/ gcin dang phyi sa 'gags par 'gyur ba yin no/ /mngar ba la sogs pa'i rdzas kyi sde tshan smras pa ni/ zhun mar bu ram star ga gser/ /mo tsa tso tsa pa ru sha/ /nye'u shing ra mnye ba nas/ /ra dza dan ba la gsum/ /me da gnyis dang par+Ni bzhi/ / 'tsho byed dzi ba ri sho ba/ /shing mngar ma du ka pim bi/ /shra ba ni gnyis bi da ri/ /cu gang k+Shi ra shu ku la/ /sa ha 'o can gash+ma ri/ /'o ma bu ram shing gze ma/ /rgun 'brum sbrang sogs mngar ba'i sde/ /zhes bya ba la/ zhun mar nas rgun 'bru'i bar gyi sde tshan ni rdzas mngar ba ste/ sman mngar po yin no zhes bya ba'i don to/ /de la mo tsa ni chu shing gi 'bras bu'o/ /tso tsa ni rgya skyegs kyi 'bras bu'o/ /nye'u shing ni a bi ru'o/ /ra mnye pa nas ni bi ra'o/ /ra dza dan ni ba na ya bri ya'o/ /ba la gsum ni ba la dang / a ti bal dang / nA ga ba la'o/ /me da gnyis ni me da dang / ma hA me da'o/ /par+Ni bzhi ni sa la par+Ni dang / kr-iSh+Na par+Ni dang / mung+ga par+Ni dang / ma sha par+Ni'o/ /'tsho byed ni dzi ban ti'o/ /dzi ba ka ni ku ra tsa shir sha'o/ /ri sho ba ni bi la bar d+ha'o/ /ma du ka ni ma du ka'i me tog go/ / bim bi ni tun ta ke ri'o/ /shra ba gnyis ni/ shri ba ni dang / ma hA shri ba'o/ /bi da ri ni k+Shi da ri'o/ /cu gang ni tu ka k+Shi ra'o/ /k+Shi ra shu ku la ni/ k+Shi ra ka lo li'o/ /mahA gnyis ni ma hA sa ha dang / k+Shu das ha'o/ /'o ma can ni 'o ma yod pa'i phyir 'o ma la sogs pa'o/ / kash+ma ri ni kad pha la'o/ /gzhan ni go bar zad do/ /skyur ba skyu ru a m+lika /ba lung dang ni star bu dang / /se'u 'bru rdul dang dar ba dang / /tsha dang ku shu a mra dang / /am+la ta ka b+ha bya dang / /kar ma rda ka bid tha'o/ /zhes bya ba la/ skyu ru ra nas ka pid tha'i bar gyi sde tshan 'di ni sman skyur ba'i sde tshan yin no/ /am+li ka ni tsu kri ka'o/ /ba lung ni pi za pu ra'o/ /gzhan ni go bar zad do/ /tsha mchog rtsal ru kha ru tsha/ /bi da rgya mtsho bkod pa'i tsha/ /mtsho tsha skam tsha ro nye dang / /k+Sha ra lan tshwa'i sde tshan yin/ /zhes bya ba la/ tsha mchog nas lan tshwa'i bar ni/ tsha'i sde tshan gyi sman gyi tshogs so/ /tsha mchog ni rgyam tsha dang / lce myang tsha'o/ /rtsal ru tsha ni so bar tsa la ste/ ming gi rnam grangs ru tsi ka zhes bya'o/ /kha ru tsha ni tsha nag po'o/ /bi da ni kha ru tsha nag po dri mi zhim pa'o/ /rgya mtsho'i tsha nis mu tra la wa na'o/ /ro nye zhes bya ba ni zha nye nag po'o/ /k+Sha ra ni sa rdzi ka dang / ya bak+Sha la sogs pa'o/ /kha ba kyi lce pa to la/ /tsan+dan ur shi ba le ka /ci skrigs nim pa pu tse shel/ /rgya spos a kar ba tsa ka /nag ta ma la ser po gnyis/ /gla sgang mur ba ba sha ka / a pa marga po son cha/ /'khar lcags sle tres byi tsher ba/ /rtsa ba che lnga bya gri gnyis/ /bong nga shu dag bi shal/ /zhes bya ba la/ kyi lce ba nas bi sha la'i bar gyi sde tshan 'di ni sman kha ba'i sde tshoms so/ /ci skrigs ni ka ri ta tig ta'o/ /nag ta ma la ni ka rany+dza'o/ / ser po gnyis ni yung ba dang skyer pa'o/ /ba sha ka ni ang ta ru sha ka'o/ /byi tsher ba ni dur la ba'o/ /rtsa ba chen po lnga ni/ bil ba dang ka k+Sha ri la sogs pa'o/ /bya gri ni bri ha ti dang / kaN+Da ka ri'o/ /tsha ba shing kun na le sham/ /byi dang ga dang tsha ba lnga/ /ku ther sogs ldum rngad sngo/ /mkhris pa gcin dang go bye yin/ /zhes bya ba la/ shing kun nas go bye'i bar gyi sde tshan 'di ni/ sman tsha ba'i sde tshan yin no zhes bya ba'i don to/ /tsha ba lnga ni pi pi ling dang / pi pi ling mU la dang / dbyi mong dang / tsi tra ka dang / bca' sga'o/ /ku the ra sogs ldum rngad sngo zhes bya ba ni tshod ma'i nang nas ldum gyi sngo rngad ku the ra dang / shi kru dang / byi'u rug pa la sogs pa'o/ /mkhris pa ni ri dgas dang bya la sogs pa'i mkhris pa'o/ /gcin ni ba lang dang ra lug la sogs pa'i gcin rnam pa brgyad do/ /go bye ba ni pa la ka zhes bya ba bse shing 'bras bu'o/ /bska tshan a ru ba ru ra/ /sbrang rtsi seng ldeng shi ri sha /ka dam u dum+bA ra dang / /mu tig byi ru an tsan btsag /ka pid ta gzhon khar dzu ra/ /pad tsa pad+ma ut+pa la'o/ /zhes bya ba la/ a ru ra nas ut+pa la'i bar gyi sde tshan 'di ni ro bska ba'i sman gyi tshogs so/ /an tsan ni lig bu mig dang dngul rdo'o/ /btsag ni su bar na gi ri ste/ btsag yug snam mo/ /ka pid tha gzhon zhes bya ba ni ba li ka pid tha gzhon nu'o/ /khar dzu ra zhes bya ba ni ka pid tha rlon pa dang / khar dzu ra ma smin pa'o/ /'bras rnying nas rnying gro rnying dang / /mung+ga sbrang rtsi sha kha ra/ /skam sa'i sha rnams ma gtogs pa'i/ /mngar ba phal cher bad kan skyed/ /ces bya ba la/ mar la sogs pa'i sman ro mngar ba phal mo che de dag ni/ bad kan skyed cing 'phel bar byed pa yin mod kyi/ 'bras rnying pa dang / nas rnying pa dang / gro rnying pa dang / sran mung+ga ste/ mon sran sde'u dang / sbrang rtsi dang / sha kha ra dang / skam sa'i sha rnams ni ma gtogs te/ 'di dag mngar yang bad kan mi skyed kyi/ de las gzhan pa'i mngar ba phal cher bad kan skyed pa yin no/ /skyu ru se 'bru ma gtogs ba'i/ /skyur ba phal cher mkhris pa skyed/ /ces bya ba la/ gang skyur ba'i sman phal cher zhes pa mang du ste/ ma du lung ga la sogs pa gang yin pa de thams cad mkhris pa skyed cing 'phel bar byed pa yin mod kyi/ rgyam tsha lce myang tsha ma gtogs/ /lan tshwa phal cher mig la gnod/ /ces bya ba la/ rgyam tsha dang / lce myang tsha ni mig la phan no zhes don gyi shugs kyis ston pa yin no/ /sle tres pa to la bca' sga/ /sgog skya pi pi ling ma gtogs/ /kha dang tsha ba phal cher ni/ /ro tsa 'bri zhing rlung skyed yin/ / zhes bya ba la/ sman kha ba dang tsha ba thams cad las phal cher te ro tsa zhing khu ba 'phel ba la gnod cing 'bri bar byed pa dang / de bzhin du rlung skyed par byed pa yin mod kyi/ gzhan du na sman kha ba'i nang na sle tres dang / pa to la ma gtogs pa/ sman tsha ba rnams kyi nang na bca' sga dang / sgog skya dang / pi pi ling ste/ gsum ma gtogs pa sman kha ba dang / tsha ba gzhan dag ni ro tsa ba 'bri zhing rlung skyed pa yin zhing / lnga po de dag ni ro tsa bar byed ba yin la/ rlung 'joms pa yin no/ /bska las a ru ra ma gtogs/ /phal cher bsil zhing sri bar byed/ /ces bya ba la/ sman bska ba shi ri sha la sogs pa thams cad las phal cher te/ mang du bsil ba'i nus pa dang ldan zhing / bshang ba la sogs pa sri bar byed ba yin mod kyi/ a ru ra ma gtogs te/ de ni nus pa dro zhing 'khru bar byed pa yin no/ /ro tsha skyur dang lan tshwa rnams/ /go rims bzhin du dro nus ldan/ /zhes bya ba la/ ro tsha ba dang / skyur ba dang / lan tshwa rnams ni go rims bzhin te/ rim pa ma 'chol bar tsha ba'i nus pa dang ldan pa yin te/ de yang tsha ba ni tsha zhing dro ba yin la/ skyur ba ni rab tu tsha ba yin te/ lan tshwa ni mchog tu dro ba'i nus pa dang ldan pa yin no/ /kha dang bska dang mngar ba rnams/ /de bzhin du ni bsil ba nyid/ /ces bya ba la/ ro kha ba dang bska ba dang mngar ba rnams ni de bzhin du zhes pa/ go rims snga ma bzhin du bsil ba'i nus pa dang ldan pa yin gyi kha ba ni bsil ba yin la/ bska ba ni rab tu bsil ba yin/ mngar ba ni mchog tu bsil ba yin no/ /kha dang tsha dang bska ba rnams/ /de bzhin rtsub cing dri ma sri/ /zhes bya ba la/ ro kha ba dang / tsha ba dang / bska ba rnams ni de bzhin du zhes pa go rims ji lta ba bzhin du rtsub cing dri ma sri bar byed pa yin te/ kha ba ni rtsub pa dang dri ma sri bar byed pa yin la/ tsha ba ni rab tu rtsub cing rab tu dri ma sri ba yin te/ bska ba ni shin tu rtsub cing dri ma sri ba yin no/ /lan tshwa skyur mngar snum ba dang / /bshang gci thur gyi dbugs 'byin byed/ / ces bya ba la/ ro lan tshwa dang / skyur ba dang / mngar ba rnams ni snum pa dang / bshang gci dang thur gyi dbugs 'byin cing 'don par byed pa yin la/ go rims bzhin zhes bya ba 'dir yang sbyar bar bya ste/ lan tshwa ni snum pa dang / bshang gci dang phyi rol gyi dbugs 'byin par byed pa yin la/ skyur ba ni rab tu snum pa dang / bshang ba dang gci ba dang phyi rol gyi dbugs rab tu 'byin par byed pa yin no/ /mngar ba ni shin tu snum pa dang / bshang ba dang gci ba dang phyi rol gyi dbugs shin tu 'byin par byed pa yin no/ /lan tshwa las bska de bas kyang / /mngar ba mchog tu lci ba yin/ /zhes bya ba la/ ro lan tshwa las ni ro bska ba lci ba yin la/ de bas kyang zhes bya ba/ ro bska ba bas kyang ro mngar ba mchog tu lci ba yin no zhes bya ba'i don no/ /skyur las tsha dang de bas kyang / /kha ba dag ni yang ba yin/ /zhes bya ba la/ ro skyur ba ni yang ba yin la/ de bas kyang tsha ba yang ba yin zhing ro tsha ba de las kyang kha ba dag yang ba yin no/ /ro rnams kyi dbye ba bshad pa ni/ ro rnams kyis ni dbye ba las/ /sbyor ba lnga bcu rtsa bdun dang / /brtag pa drug cu rtsa gsum du/ /rags rim ji bzhin phye ba yin/ /zhes bya ba la/ ro rnams kyi gzhi bo sman gyi sbyor ba byas pa las 'og nas bshad pa'i tshul du phan tshun 'dres pa'i sbyor ba byas shing rnam par phye ba las sbyor ba lnga bcu rtsa bdun tha dad par bya ba yin pa dang / yang 'di rnams la brtag pa drug cu rtsa gsum du phye ba yin no/ /ji ltar byas nas ro rnams kyi sbyor ba lnga bcu rtsa bdun dang / brtag pa drug cu byas pa yin zhe na/ rags rim ji bzhin zhes bya ba yin te/ rags pa'i go rims la ltos shing mtshon nas/ ro gsal bar myang ba'i tshul dang / / rjes su mthun par byas pa yin gyi/ ro phra mo yan chad rab dang mchog gi dbye ba las ni ro mtha' yas pa yin pas/ phra mo rnams kyi dbang du byas pa ni ma yin no/ /de yang ji tsam zhig lus las dgos pa yod pa de tsam gyi rags rim ji lta ba bzhin du phye zhing grangs su chad par byas pa yin no/ /sbyor ba nyid ro gnyis la sogs pa'i dbye bas bshad pa ni/ de lnga re re phri ba las/ /lngar gyur pa ni ro gnyis pa/ /zhes bya ba la/ ro gnyis sbyar ba ni gnyis pa ste/ ro'i gzhi sman dang 'brel pa'i sbyar ba gnyis pa de la ro lnga po de dag gi sbyor ba byas pa las 'gyur te/ ji ltar 'gyur zhe na/ re re phri ba las gyur te/ mngar ba phri ba'i skyur ba la sogs pa dang / skyur ba phri ba'i lan tshwa la sogs pa dang / kha ba phri ba'i tsha ba dang bska ba gnyis dang / tsha ba phri ba'i bska ba'o/ /de ltar na mngar ba la sogs pa'i ro re re phul ba'i ro lnga ni sbyor ba'i don du 'gro bar byed pa yin no/ /skyur ba la sogs pa ni sbyor bar byed pa yin te/ de yang 'di lta ste/ mngar ba dang skyur bar sbyar ba dang / mngar ba dang lan tshwa sbyar ba dang / mngar ba dang kha ba sbyar ba dang / mngar ba dang tsha ba sbyar ba dang / mngar ba dang bska ba sbyar bar bya ste/ de ltar na mngar ba dbye ba rnam pa lngar 'gyur ro/ /skyur ba'i gnyis pa ni mngar ba la ltos nas re re phri bar gyur na/ dbye ba rnam pa gsum du 'gyur ba ni 'di lta ste/ lan tshwa dang kha bar sbyar ba dang / lan tshwa dang tsha bar sbyar ba dang / lan tshwa dang bska bar sbyar ba ste/ de ltar na lan tshwa'i gsum par 'gyur ro/ /kha ba'i gnyis pa ni lan tshwa la ltos nas/ re re phri bar gyur na dbye ba rnam pa gnyis su 'gyur ba ni 'di lta ste/ kha ba dang tsha bar sbyar ba dang / kha ba dang bska bar sbyar bar bya'o/ /tsha ba dang kha ba la ltos nas gcig phri bar gyur na/ dbye ba rnam pa gcig tu 'gyur te/ tsha ba dang bska bar sbyar bar bya'o/ /de ltar na gnyis pa de dag dbye ba rnam pa bco lngar 'gyur ro/ /gsum pa mngar bcu skyur drug ste/ /lan tshwa gsum ste kha ba gcig /bzhi pa la ni mngar po bcu/ /skyur pa bzhi po lan tshwa gcig /ces bya ba la/ gsum pa mngar bcu zhes bya ba la/ sman gyi ro gsum pa la/ ro mngar ba dbye ba rnam pa bcur 'gyur te/ de yang 'di ltar mngar ba dang / skyur ba dang / lan tshwar sbyar ba dang / mngar ba dang skyur ba dang kha bar sbyar ba dang / mngar ba dang skyur ba dang tsha bar sbyar ba dang / mngar ba dang skyur ba dang bska bar sbyar ba dang / mngar ba dang lan tshwa dang kha bar sbyar ba dang / mngar ba dang lan tshwa dang tsha bar sbyar ba dang / mngar ba dang lan tshwa dang bska bar sbyar ba dang / /mngar ba dang kha ba dang tsha bar sbyar ba dang / mngar ba dang kha ba dang bska bar sbyar ba dang / mngar ba dang tsha ba dang bska bar sbyar ba ste/ de ltar na bcu'o/ /skyur drug ste zhes bya ba ni/ ro skyur ba gsum pa'i dbye ba drug tu 'gyur ba ni 'di lta ste/ skyur ba dang lan tshwa dang kha bar sbyar ba dang / skyur ba dang lan tshwa dang tsha bar sbyar ba dang / skyur ba dang lan tshwa dang bska bar sbyar ba dang / skyur ba dang kha ba dang tsha bar sbyar ba dang / skyur ba dang kha ba dang bska bar sbyar ba dang / skyur ba dang tsha ba dang bska bar sbyar ba ste/ de ltar na drug go/ / lan tshwa gsum zhes bya ba ni/ lan tshwa'i gsum pa ni dbye ba rnam pa gsum du gyur pa ni 'di lta ste/ lan tshwa dang kha ba dang tsha bar sbyar ba dang / lan tshwa dang kha ba dang bska bar sbyar ba dang / lan tshwa dang tsha ba dang bska bar sbyar ba ste/ de ltar na dbye ba rnam pa gsum du 'gyur ro/ / kha ba gcig pu nyid ces bya ba ni ro kha ba ni kha ba dang tsha ba dang / bska bar sbyar ba ste/ dbye ba gcig pu nyid du 'gyur ro/ /de ltar na gsum pa nyi shur 'gyur ro/ /bzhi pa la ni mngar po bcu zhes bya ba ni/ bzhi pa la ni zhes bya ba dbye ba bzhi pa can la ro mngar ba dbye ba bcur 'gyur ro/ /de yang 'di lta ste/ mngar ba dang skyur ba dang / lan tshwa dang kha bar sbyar ba dang / mngar ba dang skyur ba dang lan tshwa dang tsha bar sbyar ba dang / mngar ba dang skyur ba dang lan tshwa dang bska bar sbyar ba dang / mngar ba dang skyur ba dang kha ba dang tsha bar sbyar ba dang / mngar ba dang skyur ba dang kha ba dang lan tshwar sbyar ba dang / mngar ba dang skyur ba dang kha ba dang bska bar sbyar ba dang / mngar ba dang skyur ba dang tsha ba dang bska bar sbyar ba dang / mngar ba dang skyur ba dang kha ba dang bska bar sbyar ba dang / mngar ba dang lan tshwa dang tsha ba dang bska bar sbyar ba dang / mngar ba dang lan tshwa dang kha ba dang bska bar sbyar ba ste/ de ltar na dbye ba rnam par bcur 'gyur ro/ /skyur ba bzhi po zhes bya ba ni/ skyur ba bzhi po dbye ba bzhir 'gyur ba ni 'di lta ste/ skyur ba dang / lan tshwa dang kha ba dang tsha bar sbyar ba dang / skyur ba dang lan tshwa dang kha ba dang bska bar sbyar ba dang / skyur ba dang lan tshwa dang tsha ba dang bska bar sbyar ba dang / skyur ba dang kha ba dang tsha ba dang bska bar sbyar ba ste de ltar na dbye ba rnam pa bzhir 'gyur ro/ /lan tshwa sna gcig ces bya ba ni/ ro lan tshwa'i bzhi pa ni/ dbye ba gcig tu 'gyur te/ lan tshwa dang tsha ba dang kha ba dang bska bar sbyar ro/ /de ltar na dbye ba rnam pa bco lngar 'gyur ro/ /lnga pa la ni skyur gcig pu/ /mngar ba lnga la bsten pa yin/ /zhes bya ba ni/ dbye ba rnam pa lnga ni/ ro skyur ba'i dbye ba gcig pu bsten pa ni 'di lta ste/ skyur ba dang / lan tshwa dang / kha ba dang / tsha ba dang bska bar sbyar bar bya'o/ /lnga pa la ro mngar ba ni dbye ba lnga bsten cing gnas pa yin te/ 'di ltar mngar ba dang skyur ba dang lan tshwa dang kha ba dang tsha bar sbyar ba dang / mngar ba dang skyur ba dang lan tshwa dang kha ba dang bska bar sbyar ba dang / mngar ba dang lan tshwa dang kha ba dang tsha ba dang bska bar sbyar ba dang / mngar ba dang skyur ba dang kha ba dang tsha ba dang bska bar sbyar ba dang / mngar ba dang skyur ba dang lan tshwa dang tsha ba dang bska bar sbyar ba ste/ de ltar rnam pa lnga dang / snga ma dang bcas pa lnga pa dbye ba drug tu 'gyur ro/ /sman ni ro drug gcig pu yin/ /zhes bya ba ni/ sman ni ro drug ces bya ba gcig pur 'gyur ba yin te/ mngar ba dang skyur ba dang / lan tshwa dang / kha ba dang / tsha ba dang / bska ba ste/ spyir gcig pu kho nar 'dus shing gcig tu 'gyur ba yin no/ /de ltar na sbyor ba ni lnga bcu rtsa bdun du 'gyur ba yin no/ /ma 'dres pa ni ro drug 'gyur/ /zhes bya ba la/ ma 'dres pa ni gcig dang gnyis la sogs pa'i sbyor ba dang 'brel te/ gcig pu nyid du ni ro drug tu 'gyur te/ mngar ba dang / skyur ba dang / lan tshwa dang / kha ba dang / tsha ba dang / bska ba'o/ /de rnams bye brag gi cho gas nye bar sbyar ba yin la/ bye brag de ni snum gyi cho ga la drug cu rtsa gsum du 'gyur te/ de yang ro dbye ba de gnyis gcig pu gnyis/ drug cu rtsa gsum dag tu brtag / snum gyis gzhan dag zil mnan cing / /nyung ba nyid kyi rim las bshad/ /ces 'byung ba yin no/ /dbye ba de dag bye brag dran par bya ba'i phyir tshigs su bcad par bsdus te smras pa ni/ lnga pa drug dang ro ni tha dad drug /bzhi pa gnyis pa rnam pa bco lnga yin/ /dbye ba gsum pa nyi shu gcig nyid de/ /sman ni ro drug de ltar drug cu gsum/ /zhes bya ba la/ ro lnga'i sbyor ba du yod ce na/ drug ces bya ba ste/ lnga pa la ni skyur gcig pu/ /mngar ba lnga ni bstan pa yin/ /zhes bshad pas ni/ de ltar lnga pa la ni sbyor ba'i dbye ba drug yin no/ /ro tha dad drug ces bya ba ni ma 'dres pa'i ngo bo nyid las ni mngar ba dang / skyur ba dang / lan tshwa dang / tsha ba dang / bska ba ste/ ro drug gi dbye bar 'gyur ro/ /bzhi pa gnyis pa rnam pa bco lnga yin/ /zhes bya ba ni/ bzhi pa dang gnyis pa'i dbye ba ni rnam pa bco lnga ste/ de ltar na bzhi pa dang / gnyis pa'i rnam pas phye ba'i ro ni dbye ba rnam pa sum cur 'gyur ro/ /de yang / bzhi pa la ni mngar bo bcu/ /skyur ba bzhi po lan tsha gcig /ces smos pa'i phyir bco lnga yin no/ /dbye ba gsum pa nyi shu zhes bya ba ni/ dbye ba rnam pa gsum gyis phye ba'i ro rnams ni/ dbye ba ni rnam pa nyi shur 'gyur te/ gsum pa mngar bcu skyur drug ste/ /lan tshwa gsum ste kha ba gcig /ces bya ba yin pas na nyi shu'o/ /gcig nyid de/ sman ni ro drug ces bya ba ni/ sman ni ro drug gcig pu yin/ /zhes bya ba'o/ /de ltar drug cu rtsa gsum zhes bya ba ni ro rnams kyi dbye ba drug cu rtsa gsum yod pa'o/ /de dag kyang gong du grangs lnga bcu rtsa bdun du chad pa'i bcos mar yongs su dbye ba'i sbyor ba dang bcas par bshad pa dang / ma bcos pa'i ro drug ste/ ro drug cur ro rnams dbye bar bshad pa gang yin pa de ni dgos pa'i dbang du byas pa las/ mtshon cing lus la dgos pa'i yul du rigs pa nyid las/ rags rim ji lta ba bzhin du phye zhing bshad pa yin gyi/ phra ba rnams kyi sbyor ba brtsis pa'i tshul 'di tsam du zad pa yang ma yin la/ dbye ba yang drug cu rtsa gsum du zad pa ma yin te/ gang gi phyir phra zhing rab tu phra bar brtag pa dang / de bzhin du rab dang mchog tu brtag pa'i dbang dang / de bzhin ro dang ro rjes kyi dgos pa'i dbang las ni/ 'di rnams kyi dbye ba grangs med pa yin pas na/ 'di dag bstan par bya ba'i phyir smras pa ni/ de rnams ro dang ro rjes ro'i dbye ba/ /rab dang rab mchog dag tu brtags pa las/ /rtsis las 'das par byung bar gyur pa ni/ /nad dang sman gyi dbang las nye bar sbyar/ /zhes bya ba la/ drug cu rtsa gsum gyi grangs kyi dbye bas phye ba de rnams ni rtsis las 'das pa yin te/ shin tu mang ba'i phyir brtsi bar mi nus par 'gyur zhing skyes par gyur pa yin no/ /de ci lta zhe na/ ro dang rjes kyi dbye ba las te/ de bas 'byung ba 'dus pa las/ /byung bas sman rnams ro gcig min/ /zhes bya ba smos pa yin te/ ro dang rjes de gnyis kyang 'di ltar mngar ba'i rjes ni skyur ba la sogs pa yin la/ skyur ba'i rjes ni mngar ba la sogs pa yin pa dang / de bzhin du skyur ba ni lan tshwa'i la sogs pa'o/ /lan tshwa ni kha ba la sogs pa ste/ de rnams zhes bya ba'i tshig gis thams cad la snyegs su zin kyang / lnga bcu rtsa bdun po nyid la ci rigs par ro dang ro rjes kyi dbye ba byas na grangs med par 'gyur la/ ro drug po 'ba' zhig la rab dang rab mchog la sogs pa'i brtag pa las grangs med par 'gyur ba lta su zhig 'gog / de gnyis kyis na rab dang / rab mchog dag tu brtag pa las zhes smos pa yin te/ ro sbyar ba dang / ma sbyar ba'i dbye ba mchog dang / rab mchog dag tu brtag pa ni 'di ltar mngar ba dang / rab tu mngar ba dang / rab mchog tu mngar ba dang / cung zad mngar ba dang / cung zad rab tu mngar ba dang / cung zad rab mchog tu mngar ba ste/ de bzhin du gzhan dag la yang sbyar bar bya'o/ /yang ro'i dbye ba de rnams nad kyi sman gyi dbang gis nye bar sbyar bar bya ste/ de la nad ni rlung la sogs pa'o/ /sman ni a ru ra la sogs pa'o/ /nad dang sman gyi mngar ba ni de'i ched dam/ dbang du byas pa'am/ de la ltos pa ste/ de'i dbang du byas pa las yongs su brtags te sbyar bar bya'o/ /bab bab tu 'chol bar bya ba ni ma yin no zhes bya ba'i don to/ /nad dang sman zhes smos pa ni nye bar mtshon pa tsam yin par shes par bya'o/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u bcu pa'i rnam par 'grel pa'o/ / //de nas nad la sogs pa'i tshul shes par bya ba'i le'u bshad par bya'o zhes bya ba ni/ de'i rjes thogs la nad la sogs pa shes par bya ba brtsam par bya'o/ /gang gi phyir ro rnams kyi dbye ba drug cu rtsa gsum gyis phye ba de dag kyang nad kyi sman gyi dbang du sbyar bar bya ba yin par bshad la/ de lta bas na nad las rjes su dpags te sbyar bar bya'i/ bab bab tu 'chol bar bya ba ni ma yin no/ /de bas na nad de rnams ni rang gi las kyi mtshan nyid ji lta ba nyid las rjes su dpags te shes par bya dgos te/ de shes par bya ba'i phyir na le'u 'di brtsams pa yin no/ /'dir nad rnams gzhi med par ni ji ltar yang shes par mi nus la/ de bas na nad de rnams kyi gzhir gyur pa/ lus zungs dang dri ma rnams gang yin pa de shes par bya dgos pas na/ nad shes par bya ba 'ba' zhig tu ma zad kyi zhes bya bar nges par gnas so/ /de ltar na nad la sogs pa shes par bya ba de la phan pa'i le'u bshad par bya zhing bstan par bya'o zhes bya ba'i don to/ /nad dang lus zungs dri ma rnams/ /rtag tu lus kyi rtsa ba yin/ /zhes bya ba la/ nad dang lus zungs dang dri ma rnams ni/ nad dang lus zungs dang dri ma rnams te/ de ni rtag par dus thams cad du lus kyi rtsa bar gyur pa yin te/ lus ni de las byung ba yin pa'i phyir/ rtsa ba dang 'dra bas na rtsa ba ste/ rgyu'i gtso bo zhes bya ba'i don to/ /de rlung dbugs 'byung dbugs rngub dang / / bskyod dang las spyod shugs 'byin dang / /lus zungs legs par rgyu ba dang / /dbang po rnams ni gsal ba dag /mi gnod pa ni rjes 'dzin yin/ /zhes bya ba la/ lus de ni rlung mi gnod cing / dbugs 'byung ba la sogs pas mnyam par gnas na lus rjes su 'dzin cing rten par byed pa yin no/ /de la dbugs 'byung ba ni gyen du dbugs 'byin cing gtong ba'o/ /dbugs rngub ba ni dbugs sdud cing thur du 'jug pa'o/ /bskyod pa ni dbugs su bya ba thams cad la brtson zhing rtsol ba'o/ /las la spyod pa ni lus dang ngag dang yid kyi las la spyod cing 'jug pa'o/ /shugs 'byin pa ni bshang ba dang / gci ba dang rlung phyi rol tu 'byin pa'o/ /lus zungs legs par rgyu ba zhes pa ni/ lus zungs kyi sgras ni dngas ma la sogs pa dang / mkhris pa dang bad kan dag gzung ngo / / de rnams legs par rgyu ba ni mnyam par gnas shing 'jug pa'o/ /de la mnyam par rgyu ba'i gnas skabs nyid kyis de rnams rlung nyid mi gnod par 'gyur ba'i rgyu nyid yin te/ gang gi phyir rnam par 'thor zhing 'khrugs pa sdud cing zhi bar byed pa yin pa'i phyir ro/ /de bzhin du dbang po rnams gsal ba ste/ mig la sogs pa'i dbang po yul 'dzin pa la gsal bar gnas pa ste/ yon tan de dag dang ldan na mi gnod cing rjes su 'dzin pa yin no/ /mkhris pa 'ju drod mthong byed dang / bkres skom zas len mdangs yid gzhungs/ / blo ldan dpa' snying lus 'jam pas/ /zhes bya ba la/ de mkhris par 'gyur ba med cing 'ju ba la sogs pas rjes su 'dzin cing rten par byed pa yin no/ /de la 'ju ba ni zas smin cing 'ju ba'o/ /drod ni me'i shas so/ /mthong ba ni gzugs 'dzin par nus pa'o/ /bkres pa ni zas 'dod pa'o/ /skom pa ni 'thung 'dod pa'o/ /zas len pa ni yi ga 'byed cing nye bar longs spyod par 'dod pa'o/ /mdangs ni bzhin mdog gsal zhing gzi mdangs che ba'o/ /yid gzhungs pa ni shes rab dang ldan pa'o/ /blo dang ldan pa ni blo gros dang ldan pa'o/ /dpa' snying ni sems kyis rtul phod pa yin te/ brtan zhing mi g.yo ba'o/ /lus 'jam pa ni lus kyi sha mdangs 'jam zhing mnyen pa ste/ de dag gis lus kyi rten byed do/ /bad kan brtan zhing snum nyid dang / /tshigs 'brel bzod la sogs pas so/ /zhes bya ba la/ de la bad kan ni mi 'gyur zhing brtan pa la sogs pa dang ldan pa/ lus rjes su 'dzin par byed do/ /brtan pa ni mi g.yo ba nyid do/ /snum pa nyid ni lus snum par gyur pa nyid do/ /tshigs 'brel pa ni lhu tshigs kyi bar de rnam par 'brel zhing dam du gnas pa'o/ /bzod pa ni gnod pa la mi 'khrugs pa ste/ de dag la sogs pas phan pa'i las byed pa yin no/ /lus zungs las gtso go rims bzhin/ /tshim byed 'tsho byed g.yogs pa dang / /snum dang brtan dang 'gengs pa dang / /mngal ni skyed byed yin par bshad/ /ces bya ba la/ bcud kyi dngas ma la sogs pa/ lus zungs bdun po rnams kyi mchog dang / gtso bo bdun ni go rims ji lta ba bzhin du tshim par byed pa la sogs pa yin par slob dpon dag gis bshad cing bstan to/ /de la tshim par byed pa ni lus zungs tshim zhing sems dga' bar byed pa ni dngas ma'i bcud kyi las kyi mchog yin no/ /'tsho bar byed cing srog 'dzin par byed pa ni khrag gi las so/ /lus kyi rus pa g.yogs shing khebs par byed pa ni sha'i las so/ /lus snum zhing bcud can du byed pa ni tshil gyi las so/ /lus brtan zhing mkhrang por bsgreng ba ni rus pa'i las yin te/ gzhan du na lus la rus pa med na sha'i gong bu nyid du 'gyur ro/ /rus pa'i rkang sbubs 'gengs pa ni rkang gi las so/ /mngal skyed cing 'byung bar byed pa ni khu ba'i las kyi mchog yin par bshad do/ /brtan par byed pa bshang ba yin/ /'drul dang 'byin pa gcin gyi yin/ /ba spu brtan pa rngul gyi yin/ /zhes bya ba la/ lus brtan cing 'byin par byed pa ni/ /bshang ba'i las kyi gtso bo yin no/ /zas 'drul zhing myags pa dang / phyi rol du 'byin zhing 'don pa ni/ gcin gyi las kyi gtso bo yin no/ /skra dang ba spu brtan par 'dzin par byed pa ni/ rngul gyi las kyi gtso bo yin no/ /rlung ni 'phel bar gyur pa yis/ /skem dang mdog gnag drod bag dga'/ /'dar dang lto sbos bshang ba sri/ / stobs dang gnyid dang dbang po nyams/ /smra mang mgo 'khor zhum par byed/ /ces bya ba la/ rlung gi nad 'phel zhing skyes par gyur pas skem pa la sogs pa skyed par byed do/ /de la skem pa ni khrag la sogs pa zad pas skem zhing nyam chung ba'o/ /mdog nag pa ni kha dog nyams pa'o/ /drod bag la dga' ba ni dro ba mngon par 'dod pa'o/ /'dar ba ni g.yo zhing 'gul ba'o/ /lto sbos pa ni gsud pa rgyas pa'o/ /bshang ba sri ba ni bshang gci 'gags pa'o/ /stobs la sogs pa nyams pa ni de dag dang bral ba'o/ /smra mang ba ni ma 'brel bar mang du smra ba'o/ /mgo 'khor ba ni lus mal na mi gnas shing 'khor ba'o/ /zhum pa ni sems mi dga' zhing gdung bar byed pa'o/ /mkhris pa bshang gci pags mig ser/ /bkres skom lus tsha gnyid chung byed/ /ces bya ba la/ mkhris pa 'phel zhing rgyas par gyur na/ bshang ba la sogs pa ser por byed pa ste/ bshang ba dang gci ba sri ba dang / pags pa dang / mig gi mdog kha dog ser por 'gyur bar byed pa dang / de bzhin du bkres pa dang / skom pa dang / lus tsha ba dang gnyid chung ba nyid du byed par 'gyur ro/ /bad kan drod nyams mchil ma mang / /khong snyom lci dang sha mdog dkar/ /lus grang yan lag lhod pa dang / /lud pa dbugs mi bde gnyid che/ /dngas ma'ang bad kan dang 'dra la/ /zhes bya ba la/ bad kan 'phel bas me drod nyams pa la sogs pa byed do/ /de la drod nyams pa ni pho ba'i me drod nyams pa'o/ /mchil ma mang ba ni mchil ma lhag par 'byung ba'o/ /khong snyom pa ni spro ba chung zhing sgyid lug pa'o/ /lci ba ni lus kyi yan lag lci ba nyid do/ /sha mdog dkar ba ni lus kyi mdog dkar zhing skya ba nyid do/ /de bzhin du lus grang ba nas gnyid che ba'i bar yang skyed pa yin no/ /dngas ma'ang bad kan dang 'dra la/ /zhes bya ba la/ bcud kyi dngas ma 'phel bar gyur na/ drod nyams pa nas gnyid che ba'i bar bad kan dang 'dra bar skyed par byed pa'o/ / khrag 'phel me dbal khong 'bras mcher/ /mdze dang rlung khrag mkhris pa khrag /skran dang rnyil nad mig ser dang / /bskyod dka' drod nyams rmongs bag dang / /mig dang gcin pags dmar bar 'gyur/ /zhes bya ba la/ khrag 'phel ba las ni me dbal la sogs nad skyed par 'gyur ro/ /rlung khrag ni rlung dang khrag 'dres pa las gyur pa'i nad do/ /mkhris pa dang khrag ni mkhris pa dang khrag 'dres pa'o/ /rnyil nad ni so'i sha las khrag las gyur pa'i sha lhag skye ba'am skrang ba'o/ /bskyod dka' ba ni rkang lag lci ba la bya'o/ / yang na byang gya zhes pa gdong la dmar po tal til byung ba'i pags nad la bya'o/ /gzhan dag ni go bar zad do/ /sha 'phel wa ba rmen bum dung / /mkhur tshos brang lto brla sbom zhing / /mgul sogs lhag par sha yang che/ /zhes bya ba la/ sha 'phel ba las ni lba ba la sogs pa skyed par byed do/ /de bzhin du mkhur tshos dang / brang dang / lto ba dang / brla sbom pa nyid du 'gyur ba dang / mgul pa la sogs par lhag par sha che bar 'gyur ba ste/ sha'i steng du sha skyes pa lta bur 'gyur ro/ /tshil 'phel de 'dra de bzhin ngal/ /cung zad bskyod kyang dbugs rgod cing / /rkub tshos nu ma gsus 'phyang 'gyur/ /zhes bya ba la/ tshil 'phel ba ni sha 'phel ba de dang 'dra bar lba ba la sogs pa skyed par 'gyur ba dang / de bzhin du ngal ba dang / cung zad bskyod cing g.yo ba dag la yang dbugs rgod par 'gyur ba dang / rkub tshos dang nu ma dang gsus pa dag kyang sbom zhing rgyas pa nyid kyis 'phyang bar 'gyur ro/ /rus 'phel rus lhag so lhag 'gyur/ /zhes bya ba la/ rus pa 'phel bas ni rus pa'i steng du rus pa skye ba dang / de bzhin du so'i steng du so 'byung bar 'gyur ro/ /rkang 'phel lus lci mig rtsa g.yung / /tshigs kyi mgo bo sbom pa dang / /tshigs la thor bu gso dka' 'byung / /zhes bya ba la/ rkang 'phel nas ni lus lci ba dang / mig rtsa g.yung zhing zhan par byed pa dang / tshigs mdud kyi mgo bo rnams sbom zhing che bar 'gyur ba dang / tshigs la thor bu g.yo zhing mi bzad pa 'byung bar 'gyur ro/ /khu 'phel bud med la rab gdu/ /khu ba'i rde'u dag tu 'gyur/ /zhes bya ba la/ khu ba 'phel zhing rgyas pa ni bud med la rab tu gdu zhing chags pa che bar 'gyur ba dang / khu ba las byung ba'i rde'u dag chags par 'gyur ro/ /bshang 'phel lto sbos rgyu 'khrug cing / /lus lci lto ba na bar byed/ /ces bya ba la/ bshang ba 'phel bar 'gyur ba ni/ lto ba ste khong sbos shing gang ba dang / rgyu ma 'khrug cing krug krug zer ba dang / lus lci zhing bskyod dka' ba dang / lto ba na zhing zug gzer skyed par byed pa yin no/ /gcin 'phel chu sor zug cing na/ /gcis kyang ma gcis snyam sems 'gyur/ /zhes bya ba la/ gcin 'phel bar gyur pa ni chu sor zug cing lhag par na ba dang / de bzhin du gcis shing btang du zin kyang ma gcis pa snyam sems par 'gyur ba ste/ yongs su 'dor ba snyam sems par 'gyur te/ yang dang yang 'ong bas na gcis so snyam du sems par byed par 'gyur ro/ /rngul 'phel rngul che dri mi zhim/ /g.yan pa nyid kyang skyed ces bya/ /zhes bya ba la/ rngul chen nang du 'phel bas rngul rab tu che bar 'gyur ba dang / lus dri mi zhim pa nyid du byed do/ /g.yan pa nyid kyang skyed cing 'byung bar byed pa yin par shes par bya'o/ /mig rdul la sogs dri ma rnams/ /mang bas lci la sogs par byed/ /ces bya ba la/ mig rdul ni mig gi dri ma'o/ /sogs pa'i sgras ni rna ba la sogs pa'i dri ma rnams kyang bsdu bar bya'o/ /de ltar na mig rdul la sogs pa'i dri ma rnams mang zhing 'phel bas lci zhing mang du 'byung ba dang / de bzhin du sogs pa zhes smos pas g.ya' ba dang / 'drul ba la sogs par byed pa bsdu'o/ /de dag kyang zad cing 'bri bar 'gyur ba'i mtshan nyid ni/ rlung zad mtshan ma lus mi bde/ /smra nyung rtsol ba chung bar 'gyur/ /dran pa mi gsal bad kan 'phel/ /sngar bshad pa yi nad rnams 'byung / /zhes bya ba la/ rlung zad cing 'bri bar 'gyur ba'i mtshan ma ni lus mi bde zhing sgyid snyom pa dang / smra ba nyung zhing gcom chung ba dang / rtsol zhing lus kyi las su byed pa dag kyang chung zhing zhan pa dang / dran pa mi gsal ba ste/ rig cing tshor ba chung ba dang de bzhin du bad kan 'phel bar gyur pa'i skabs su sngar bshad pa'i nad drod nyams pa dang / mchil ma mang ba la sogs pa rnams 'byung bar 'gyur ro/ /mkhris zad drod nyams grang ba dang / /mdog nyams byed de/ zhes bya ba la/ mkhris pa zad pa'i mtshan ma ni me'i drod nyams shing rtul ba dang / lus grang zhing bsil bag tu 'gyur ba dang / mdog mdangs nyams par byed par 'gyur ro/ /bad kan zad/ /mgo 'khor bad kan gnas stongs shing / /snying 'dar tshigs ni lhod par 'gyur/ /zhes bya ba la/ bad kan zad pa'i mtshan ma ni mgo 'khor ba ste/ lus dang sems mal la mi gnas pa dang / bad kan gyi gnas sna la sogs pa stongs shing bskams pa dang / snying 'dar zhing g.yo la 'dzag pa dang / tshigs kyi tshogs rnams lhod cing shig shig por 'gyur ba yin no/ /cung zad rtsub ngal skam pa dang / /na zhing sgra cher mi bzod 'gyur/ /zhes bya ba la/ bcud dam dngas ma zad pa'i mtshan ma ni/ lus rtsub pa nyid dang / ngal zhing dub pa dang / kha skam pa dang / na zhing nyam chung ba dang / sgra cher grags pa mi bzod cing / tshig smras brnag dka' bar 'gyur ro/ /khrag zad skyur dang bsil la dga'/ /rtsa lhod pags pa rtsub par 'gyur/ /zhes bya ba la/ khrag zad pa'i mtshan ma ni ro skyur ba dang / reg pa bsil ba la mngon par dga' zhing 'dod pa dang / rtsa lhod cing rnying pa dang / lus kyi pags pa rtsub par 'gyur ro/ /sha zad dbang nyams mig mkhur ba'i/ /rus skams lhu tshigs na bar 'gyur/ /zhes bya ba la/ sha zad pa'i mtshan ma ni dbang po nyams shing rang gi yul 'dzin par mi nus pa dang / mig dang mkhur ba'i rus pa skams shing sha zad pa dang / lhu tshigs rnams na zhing bcag pa snyam sems par 'gyur ro/ /tshil zad gnyid che dpyi rked mngon/ /mcher pa che dang lus skems 'gyur/ /zhes bya ba la/ tshil zad pa'i mtshan ma ni dpyi dang rked pa mngon zhing tshor ba chung ba dang / mcher pa che zhing 'phel ba dang / lus skems shing rid par 'gyur ro/ /rus zad rus zug so dang ni/ /sen mo skra la sogs pa 'byung / /zhes bya ba la/ rus pa zad pa'i mtshan ma ni rus pa nyid zug cing na ba dang / de bzhin du so dang sen mo dang / skra la sogs pa 'byung zhing 'byi bar 'gyur ro/ /rkang zad rkang sbubs stong pa dang / mgo 'khor rab rib can du 'gyur/ /zhes bya ba la/ rkang zad pa'i mtshan ma ni rkang gi rus pa'i sbubs khong stong du 'dug pa dang de bzhin du mgo 'khor ba dang / rab rib can du 'gyur zhing mun par 'thoms par 'gyur ro/ /khu ba zad pas ring nas 'byung / /yang na khu ba khrag nyid 'byung / /rlig pa shin tu na ba dang / /pho mtshan tshig pa snyam du sems/ /zhes bya ba la/ khu ba zad pa'i mtshan ma ni/ khu ba ring zhing 'gor nas 'byung ba dang / yang na khu ba khrag nyid du 'byung bar 'gyur ba dang / rlig pa de 'bras bu sbubs can shin tu na zhing 'jug pa dang / pho mtshan tshig cing du ba 'thul ba snyam du sems par 'gyur ro/ /bshang zad rlung ni rgyu ma'i nang / /sgra bcas 'khyil ba lta bur byed/ /lto bar rgyu zhing gyen du 'gro/ /snying ga rtsib logs mi bzad na/ /zhes bya ba la/ bshang ba zad pa'i mtshan ma ni rlung rgyu ma'i nang na rgyu ba sgra dang bcas shing 'khyil ba lta bur yan man du rgyu ba dang de bzhin du lto bar gyen du rgyu zhing 'gro bas na bar byed pa/ snying ga dang rtsib logs gnyis su mi bzad par na zhing gzer bar byed pa yin no/ /gcin zad gcin ni nyung sri dang / /mdog 'gyur ba'am khrag bcas nyid/ /ces bya ba la/ gcin zad pa'i mtshan ma ni gcin zad cing cung zad 'byung ba dang / sri zhi ngan par 'byung ba dang / mdog 'gyur ba dang / khrag dang bcas pa nyid du 'gyur ro/ /rngul zad spu 'byi spu 'grengs la/ /pags pa rnams ni 'gas par 'gyur/ /zhes bya ba la/ rngul zad pa'i mtshan ma ni spu 'byi zhing lhung ba dang / ba spu'i bu ga 'dzums shing 'grengs pa dang / pags pa rnams 'gas shing 'gyes par 'gyur ba yin no/ /dri ma shin tu phra ba rnams/ /zad pas brtag dka' dri ma yi/ /rang gnas bskams dang na ba dang / /stong dang yang ba las shes bya/ /zhes bya ba la/ mig rdul la sogs pa'i dri ma shin tu phra ba rnams zad pa'i mtshan ma ni brtag par dka' ste/ de bas na dri ma rnams kyi rang gi gnas skabs la sogs pa las shes shing rtogs par bya'o/ /dri ma rnams kyi rang gi gnas yin pas na dri ma'i rang gnas te/ mig la sogs pa de rnams bskams pa dang / na ba dang stong pa dang / yang ba las zad pa brtag par dka' ba'i dri ma de rnams kyi zad pa shes par bya'o/ /de ltar nad dang lus zungs dang / dri ma rnams kyi zad pa dang 'phel ba rgya cher bshad nas/ mdor bsdus nas smras pa ni/ nad sogs rang nyid ji lta ba'i/ /yon tan 'di ni bzlog pa dag /zad pa dang ni 'phel 'gyur las/ /'phel 'bri sman pas shes par bya/ /zhes bya ba la/ ji ltar shes par bya zhe na/ rang nyid kyi mtshan nyid ji lta ba'i go bzlog pa zad pa las ni 'phel bar shes par bya la/ rang nyid kyi yon tan go bzlog pa 'phel bar 'gyur ba las ni 'bri bar shes par bya ste/ nad la sogs pa'i nam mtshan nyid las go bzlog par 'gyur ba'i mtshan nyid do/ /de ji ltar rlung gi nad kyi yon tan las go bzlog pa ni snum pa la sogs pa'o/ /mkhris pa'i ni bsil ba la sogs pa'o/ /bad kan gyi ni rtsub pa la sogs pa'o/ /de rnams las go bzlog pa zad cing / bri ba las ni nad 'phel bar shes par bya la/ de rnams kyi las kyang go bzlog pa'i mtshan nyid 'phel zhing lhag par gyur pa las ni/ 'bri zhing zad par 'gyur bar shes par bya'o/ /dri ma thogs las 'phel ba ste/ /shin tu 'byung las zad shes bya/ /zhes bya ba la/ bshang ba dang gci ba la sogs pa'i dri ma rnams thogs shing 'byung bar mi byed pa las ni 'phel bar shes par bya la/ shin tu 'byung zhing lhag par phyir 'byung ba las ni zad par shes par bya ste/ sngar bshad pa 'ba' zhig tu ma zad kyi/ tshul 'dis kyang shes par bya'o/ /dri ma rnams 'phel ba dang / zad pa gnyi ga yang nad skyed par byed pa yin la/ de la yang gang zhig zad par 'gyur ba de 'phel ba bas ches lhag par 'phel te gnod pa'i rgyur 'gyur ba yin te/ de bas na/ lus ni dri mas brten pas na/ /'phel bas zad pa gnod pa yin/ /zhes bya ba la/ lus te phung po 'di ni dri mas brten cing grogs su byas pa yin pas dri ma rnams 'phel zhing lhag par gyur pas zad cing 'grib par gyur pas ches lhag par gnod par byed pa yin no/ /nad la sogs pa'i dngos po de rnams las gang zhig gzhi gang la brten zhe na/ de'i phyir smras pa ni/ de la rlung ni rus par gnas/ /mkhris pa rngul dang khrag la gnas/ /bad kan lhag ma gnas/ zhes bya ba la/ de la rlung la sogs pa de rnams kyi nang nas rlung ni rus pa la brten zhing gnas la/ mkhris pa ni rngul dang khrag la gnas so/ /bad kan ni lhag ma la gnas pa ste/ rus pa dang / rngul dang / khrag ni gnas pa po dang ldan pas/ de ma gtogs pa lhag ma dngas ma dang / sha dang / tshil dang / rkang dang / khu chu dang / bshang ba dang gci ba la sogs pa gzhan dag la gnas te/ de dag la gnas pa po med pas lhag ma zhes bya ba la/ dngas ma la sogs pa lhag ma de rnams la bad kan brten zhing gnas pa yin no/ /des 'di/ /phan tshun rten dang brten pa yin/ /'phel dang zad par byed pa'i sman/ /gcig gi gang yin gzhan gyi'ang de/ /zhes bya ba la/ gang tshul de lta bu des na nad dri ma rnams gnas dang gnas pa po 'phel bar byed pa yin la/ gang brten cing zad par byed pa na brten pa po'i yang zad par byed pa yin pas na gcig gi sman gang yin pa gzhan gyi yang de nyid yin no/ /de lta na ni gang rlung gi gnas rus pa 'phel ba'i sman des ni/ dang po rlung yang 'phel bar byed la/ rus pa zad par byed pa'i sman des ni rlung yang zad par byed par 'gyur ro zhe na/ rus pa rlung gnyis la 'di min/ /zhes bya ba yin te/ rus pa dang rlung gnyis ma 'phel ba dang / zad par byed pa'i sman 'di ltar mi sbyor ro zhes shugs kyis sbyar bar bya'o/ /phal cher brtas pas 'phel bar 'gyur/ /bad kan rjes mthun de yi phyir/ /de las bzlog pas zad pa yin/ rlung dang rjes mthun/ /zhes bya ba la/ gang gi phyir nad dang lus zungs 'di rnams ni phal cher brtas par byas shing tshim par byas pas 'phel zhing skye bar 'gyur la/ 'phel ba de yang bad kan dang rjes su mthun pa yin no/ /phal cher zhes smos pa ni gzhan dag tu ni kha cig 'di ltar ma yin pa yang yod do zhes ston pa yin no/ /de ltar brtas pa las 'phel bar 'gyur pa'i rgyu de'i phyir brten pa po'i tshul can dang nad dang lus zungs 'di dag zad par bya ba ni de las bzlog pa ste/ nyams smad pa ming gi rnam grangs su smyung bar bya ba zhes bya bas zad par 'gyur ba yin no/ /de ltar na/ gang yang rus pa 'phel bar byed pa'i sman snum pa dang mngar ba la sogs pa de ni rlung zad par byed pa yin no/ /gang rlung 'phel bar 'gyur ba'i sman rtsub pa dang / kha ba la sogs pa de ni nyams smad par byed pa/ smyung ba'i rjes su mthun pas ni rus pa zad par byed pa yin no/ /de bas na rus pa rlung gnyis la 'di yin zhes smos te/ bstan bcos byed pas phal mo che'i dbang du mdzad nas smras pa ni/ 'phel dang zad pa 'byung 'gyur ba'i/ /smyung dang brta bar bya ba yis/ /nad ni rim gyis gso bar bya/ /rlung ma gtogs te/ /zhes bya ba yin te/ gang gi phyir de ltar blta ba'i tshul las ni 'phel bar 'gyur la/ nyams smad pa'i tshul las ni zad par 'gyur ba des na nad kyi 'phel ba dang zad pa 'byung bar 'gyur ba'i smyung ba dang brta bar bya ba dag gis nad kyi rnam pa rim gyis gso bar bya zhing bsgrub par bya'o/ /de yang 'phel ba las gyur pa'i nad la smyung ba dang nyams smad pas gso bar bya la/ zad pa las gyur pa'i nad la ni brta zhing tshim par bya bas bsgrub par bya'o/ /de lta na ni rlung gso bar bya ba dag la rlung 'phel ba las gyur pa'i nad la ni smyung bar bya bas gso dgos la/ rlung zad pa las byung ba'i nad la brta bar bya dgos par 'gyur ro zhes rtogs par gyur pas/ de'i phyir smras pa ni/ rlung ma gtogs te zhes bya ba yin te/ gso ba'i rim pa de la rlung ni ma gtogs te/ 'di las gzhan du bya ba yin no/ /de skyes la/ /de nyid bzlog thabs sbyar bar bya/ zhes bya ba la/ rlung de las skyes pa'i nad rnams la ni de nyid ces bya ba smyung ba dang / brta bar bya ba dag gi bzlog pa'i thabs kyis gso bar bya ba ste/ 'phel ba ni brta bar bya ba dang / zad pa la ni smyung bar bya bas gso bar bya'o/ /khyad par du ni khrag skyes nad/ /gtar ga bkru sman dag gis so/ /zhes bya ba la/ nad kyi gso ba la yang khyad par du bya ba ni khrag skyes shing 'phel ba las nad du gyur pa las/ gtar ga bya zhing khrag dbyung ba dang / bkru sman btang bdag gis gso zhing bsgrub par bya'o/ /sha cher skyes las byung ba'i nad/ /gtar ga me btsa' thal sman sbyar/ /zhes bya ba la/ sha cher skyes shing sbom pa las byung ba'i nad la ni gtar ga bya ba dang me btsa' gdab pa dang / thal sman rnon po sbyar ba la sogs pas gso bar bya'o/ /tshil ches sbom skems gso bar bya/ /zhes bya ba la/ tshil ches shing 'phel ba las byung ba'i nad la ni/ sbom pa gso ba'i cho ga rnam pa gnyis bshad pa'i tshul gyis gso bar bya la/ tshil zad pa las byung ba'i nad la ni skem po gso ba'i cho ga rnam pa gnyis kyis gso bar bya'o/ /rus pa zad pa las byung la/ /mar dang 'o ma kha rar sbyar/ /de bzhin 'jam rtsi gtang bas gso/ /zhes bya ba la/ rus pa zad pa las byung ba'i nad la ni/ sman ro kha ba dang sbyar ba'i 'o ma la sogs pas gso ba dang / de bzhin du 'jam rtsi mas gtong bas gso bar bya'o/ /bshang ba 'phel la 'khru bas gso/ /zhes bya ba la/ bshang ba 'phel ba las byung ba'i nad la ni drag tu 'khru ba'i cho gas gso'o/ /bshang ba zad las byung ba'i nad/ /ra lug nang khrol zan dron dang / /sbyar thug ma sha gnyis sogs sbyin/ / zhes bya ba la/ bshang ba zad pa las byung ba'i nad la ni/ ra dang lug gi nang khrol rgyu ma la sogs pa g.yos su byas pa dang / zan dron dang / sbyor thug dang / ma sha gnyis po ste mon sran sde'u dang / mon sran dkar po gnyis sbyin pa dang / sogs pa'i sgras rgya sne'u'i tshod ma dang / zho ga chu dang / rtsab mo rang skyur la sogs pa sbyin pa bsdu'o/ /gcin 'phel gyur la gcin 'bri ba/ /gcin zad las byung gcin snyi gso/ /zhes bya ba la/ gcin mang ba las byung ba'i nad la ni/ gcin 'bri ba'i gso ba'i cho gas gso bar bya'o/ /gcin zad pa las byung ba'i nad la ni/ gcin snyi ba gso ba'i cho gas gso bar bya'o/ /rngul mi 'byung la rtsol dang bsku/ /rngul 'byung cho gas gso bar bya/ /zhes bya ba la/ rngul zad pa las byung ba'i nad la ni/ rtsol ba la sogs pas rngul dbyung ba'i cho gas gso bar bya'o/ /lus kyi me drod rang gnas 'dug / cha shas lus zungs rnams la brten/ /de rnams 'bri zhing rab 'bar bas/ /lus zungs 'phel dang zad par 'gyur/ /zhes bya ba la/ lus kyi me drod ces bya ba/ pho ba'i me drod yin la/ rang gnas su 'dug ces bya ba/ rang gi gnas zhu ba'i gnas kyi bar na 'dug pa de'i cha shas gang yin pa rnams lus zungs la brten cing gnas pa'i cha de rnams 'bri zhing nyams dmas pas dngas ma la sogs pa'i lus zungs rnams 'phel bar 'gyur la/ cha shas de rnams nyid rab tu 'bar zhing stobs che bar gyur pas ni lus zungs rnams zad par 'gyur ro/ /lus zungs dang po phyi ma ni/ /rgyas byed zad pa'ang de bzhin no/ /zhes bya ba la/ lus zungs kyi dang po dngas ma zhes bya ba rgyas par gyur na de'i phyi ma khrag ces bya ba'i lus zungs rgyas par byed la/ lus zungs kyi dngas ma zad na phyi ma khrag kyang de bzhin du zad par 'gyur ro/ /nad dang / lus zungs dang / dri ma dang / dri ma rnams kyi gnas la gnod pa'i rim pa dang / nad 'byung ba'i rim pa smras pa ni/ nyes 'khrugs pas ni lus zungs nyen/ /gnyi gas dri ma la gnod byed/ /'og na gnyis te mgo bor bdun/ /bu ga dang ni rngul 'byung ba'i/ /dri ma'i gnas ni dri ma ste/ /rang rang gnas su nad skyed 'gyur/ /zhes bya ba la/ nyes pa ni rlung la sogs pa ste/ de rnams 'khrugs pa ni rang gi rgyu rnams kyis ldang zhing g.yos so/ /des na lus zungs bya ba dngas ma la sogs pa la nyen cing gnod par 'gyur ro/ /nyes pa dang lus zungs de gnyis ka 'khrugs shing g.yos pas ni dri ma la gnod par byed la/ gnod pa dang ldan pa ni dri ma des ni dri ma'i gnas la gnod pa skyed par 'gyur na/ dri ma'i gnas de dag gang yin zhe na/ de'i phyir smras pa ni/ 'og na gnyis te bshang ba'i lam dang gci ba'i lam mo/ /mgo bor ni dri ma'i gnas bdun te/ mig gnyis dang rna ba'i bu ga gnyis dang / sna'i bu ga gnyis dang / lkog ma'i bu ga gcig ste/ bu ga ni bu ga'i khung bu rnams dang / de bzhin du rngul 'byung bar byed pa ste/ lus thams cad du gtogs pa'i ba spu'i bu ga rnams te/ de thams cad kyang dri ma'i gnas yin la/ de rnams ni gnod pa can gyi dri mas gnod pa skyed do/ /de bas na lus zungs dang dri ma'i gnas de rnams su rang rang gi gnas pa de rnams su rang gi nad skyed cing 'byung bar 'gyur ro/ /de yang lus zungs rnams la nyes bas gnod pa skyed la/ dri ma'i gnas rnams su ni dri mas gnod pa bskyed nas rang rang ji lta ba'i nad rnams 'byung bar 'gyur ro/ /de ltar nyes pa dang lus zungs dang dri ma rnams rang gi las nyid la sogs pa'i khyad par gyis bshad nas/ da ni nyes pa dang lus zungs dang dri ma rnams kyi rtsa ba/ lus 'di'i nyes pa dang lus zungs dang dri ma rnams zad dam ma zad par gyur kyang srog dang bcas par zad par gyur la/ de 'phel bas srog dang bcas pa 'phel bar 'gyur ba'i lus gnas pa'i rgyu'i gtso bo de smras pa ni/ lus zungs khu ba'i mthar thug pa'i/ /nang nas gzi can mdangs mchog yin/ /snying la gnas kyang khyab pa dang / /lus ni brtan par gnas pa yin/ /gang zhig 'jig na des 'jig la/ /gang zhig gnas na gnas gyur pa/ /gang la dngos rnams sna tshogs pa/ /lus la brten pa 'byung ba yin/ /zhes bya ba la/ lus zungs dngas ma nas khu ba'i mthar thug pa rnams kyi nang na gzi can mdangs ni mchog yin te/ shin tu snying por gyur pa yin la/ de ni mdangs zhes bya bar slob dpon gyis bshad do/ /de bzhin du snying ga la gnas su zin kyang lus ma lus par khyab pa yin no/ /de yang rnam pa gnyis su bshad de/ thig le drug pa'i tshad dang khyab par byed de/ /de ni lus thams cad la khyab par byed cing thig le drug pa kha dog dkar po dang / dmar po lta bu dang / cung zad ser por snang ba khyad par du snying la gnas pa yin no/ /de yang lus ni brtan par gnas pa yin zhes bya ba ste/ de ni lus brtan par gnas pa dang / de bsrung zhing gnas par byed pa yin te/ de lus gnas shing 'jog par byed pa yin no/ /gzhan yang gang zhig 'jig cing med par gyur na/ nges par gdon mi za bar 'jig par 'gyur la/ de bzhin du mdangs gang zhig gnas shing yod par gyur na/ skyes bu de gnas shing 'tsho bar 'gyur ba dang / de bzhin du mdangs gang las dngos po'i ngo bo rnams rnam pa du mar 'byung zhing snang bar 'gyur la/ lus la sogs pa sna tshogs par 'byung bar 'gyur zhing brten pa de ni mdangs zhes bya'o/ /de yang bsdus pa las/ 'byung ba kun gyi mdangs gang yin/ /gzi can de ni mchog tu bshad/ /de ni zla ba'i rang bzhin dag / dmar zhing cung zhig ser dang bcas/ /dang po mngal gyi snying po gang / /gang de mngal gyi dngas mar gnas/ /snying ni chags par gyur pa na/ /gang zhig sngon chad brten gyur cing / /lus kyi dngas ma snum dag dang / /srog ni gang la brten gyur la/ /gang zhig 'jigs pas 'jig 'gyur zhing / /gang gis lus can 'tsho byed la/ /snying la gnas kyang khyab gyur gang / /de ni srog gi gnas mchog yin/ /zhes bshad pa yin no/ /mdangs ni sems 'khrugs bkres sems las/ /mya ngan ngal la sogs pas zad/ /ces bya ba la/ mdangs de ni sems byung 'khrugs pa la sogs pas zad par 'gyur te sems 'khrugs pa ni khros pa'o/ /bkres pa ni shin tu mi bzad par brub tsha ba'o/ /sems las ni yul rnam pa du ma la dpyod pa'o/ /mya ngan ni sems kyi sdug bsngal lo/ /ngal ba ni lus nyon mongs pa'o/ /sogs pa'i sgras ni 'jig pa la sogs pa bsdu'o/ /de zad sngangs shing lus rid la/ /yang yang sems shing dbang po nyams/ /gzi nyams rtsub dang yid mi dga'/ /nyam chung bar ni 'gyur ba yin/ /zhes bya ba la/ mdangs de zad cing nyams par gyur na mi sngangs pa ste/ glo bur du skrag pa dang bcas par 'gyur/ de bzhin du lus rid cing me stobs chung ba dang / yang dang yang du sems shing dpyod pa la brtson par gyur pa dang / dbang po thams cad nyams shing sdug bsngal la/ myo myo por nus pa chung bar 'gyur ba dang / gzi byin nyams shing skya bo 'od 'od por 'gyur ba dang / rtsub pa ste pags pa la sogs pa snum med pa dang / yid mi dga' zhing sems kyi mdud pa'i shas che bar 'gyur ba dang / nyam chung ba ste lus zungs rnams zad cing 'bri bar 'gyur ba yin no/ /'tsho byed sman dang 'o ma dang / /sha khu la sogs de'i sman yin/ /zhes bya ba la/ mdangs zad pa de'i sman ni dzi ban ti dang / nye'u shing la sogs pa 'tsho byed kyi sman rnams dang / de bzhin du 'o ma dang / sha'i khu ba dang / sogs pa'i sgras brtas par byed pa'i sman rgun 'brum la sogs pa'i sman mngar ba'i sde tshan las bstan pa rnams bsdus te/ de dag kyang de'i sman yin no/ /'o ma yang 'tsho byed yin pas/ 'tsho byed kyi sman gyi sde tshan gyi nang du gtogs na/ ci'i phyir logs shig tu smos she na/ 'o ma ni der sman gyi mchog yin pas khyad par du smos pa yin no/ /zad pa dang 'phel ba dag ni sman mdor bsdus te smras pa ni/ zas gang mi 'dod gang zhig slong / /de la mi 'phrod 'phrod pa ni/ /spang dang sbyin par bya ba dag /de dang des 'phel zad par 'gyur/ /zhes bya ba la/ bza' bar bya ba'i zas gang skyes bu mi 'dod cing 'grangs pa dang / yang zas gang zhig slong zhing 'dod par byed pa de dang de la zas mi 'phrod pa dang zhe 'grangs pa ni/ spang zhing mi bza' ba dang / 'phrod pa dang yid la 'dod pa ni sbyin zhing bza' bar bya ba gang yin pa de dang de ni nad 'phel ba dang nad zad par 'gyur ro/ /de yang 'dod cing slong ba'i zas de mi 'phrod pa med par gyur na bza' bar bya'i gzhan du ni ma yin no/ /nyes pa phyin ci log pa dang / /mthun pas sred pa skyed byed de/ / phal cher 'phel dang zad pa dag /mi mkhas pa yis mi shes so/ /zhes bya ba la/ gang gi phyir rlung la sogs pa'i nyes pa dag ni phyin ci log tu gyur pa'i zas kyis yul de la sred cing dga' ba skyed par byed la/ de yang phal cher te thams cad du ma yin no/ /zad pa ni zas kyi ris su gtogs pa dang cha 'dra zhing mthun pa'i yon tan gyis yul de sred pa skyed par byed de/ ji srid rlung 'phel ba ni/ zas snum pa dang / skyur ba dang / mngar ba la dga' ba skyed par byed pa'o/ /mkhris pa 'phel bas grang ba dang bsil ba'o/ /bad kan 'phel ba ni kha ba dang rtsub pa la sred pa skyed par byed do/ / de la zad pa la rlung zad pas snum pa dang lan tshwa'o/ /mkhris pa zad pas ni skyur ba la sogs pa'o/ /bad kan zad pas ni zas snum pa dang / mngar ba la sogs pa la dga' ba skyed par byed pa ni dngos po'i rang bzhin nam chos nyid yin no/ /de lta bu'i nyes pa'i rang bzhin ni sman pa mi mkhas shing / shes rab chung bas mi shes shing yul de'i rang bzhin shes pa de la mi skye'o/ /zhes bya ba'i don to/ /yang mtshan nyid gzhan dag mdor bsdus te smras pa ni/ ci bzhin stobs dang rang ji bzhin/ /'phel na nyes pa rgyas par 'gyur/ /zad pas rang bzhin 'dor bar 'gyur/ /mnyam na rang gi las rnams byed/ /ces bya ba la/ nad dang nyes pa rnams kyi stobs ci lta ba dang / rang gi rang bzhin ci lta ba las tshad las 'phel bar gyur na ni/ nyes pa rgyas shing skye bar 'gyur la/ de bzhin du zad pa ste rang gi stobs ji lta ba dang / rang gi mtshan nyid chen po dang 'bring dang chung ngu ci lta ba dang / rang gi rang bzhin rtsub pa dang / dro ba dang snum pa la sogs pa'i rang bzhin ci lta ba zad pa las ni nad de rnams rang gi mtshan nyid 'dor zhing spong bar 'gyur ro/ /gang gi tshe nyes pa de rnams mnyam pa ste 'phel ba yang med la zad pa yang med pa de'i tshe ni rang gi tshad dang ldan par gnas pa yin te/ de'i tshe na ni mnyam zhing mi 'gyur bar gnas pa nyid kyis na/ rang gi las nad la sogs pa'i tshul shes par bya ba las bshad pa/ dbugs rngub pa dang dbugs dbyung ba la sogs pa'i las de rnams byed cing skyed pa yin no/ /mtshan nyid des na de rnams mnyam zhing 'gyur ba med par shes par bya'o/ /nyes pa zad pa rnams ni lus la nyes pa ci yang skyed par mi byed de/ mi ldang ba'i phyir dang / nus pa zad pa'i phyir dang / ci yang mi byed pa yin pa'i phyir nyes pa ci yang skyed par mi byed do snyam du sems nas/ sman pa dag nyes pa zad pa 'phel ba'i phyir/ bza' ba dag ster bar byed pa la sbyor bar byed pa ni nam yang ma gyur cig snyam nas smras pa ni/ gang zhig mnyam pas lus 'di 'phel bar byed/ /nyes pa de nyid mi mnyam gsod par byed/ /de bas zad pa'ang 'phel ba lta bu ni/ /phan pa'i spyod pa nyid kyis bsrung bar bya/ /zhes bya ba ni/ nyes pa gang zhig mnyam zhing snyoms par gyur pas lus 'phel bar byed pa'i don du 'gyur te rang gi tshad dang ldan par gnas pa ni lus mnyam pa'i rgyur 'gyur ro/ /nyes pa de nyid mi mnyam zhing rang gi tshad las lhag pa'am chad par gyur na lus gsod par 'gyur ro/ /gang gi phyir nyes pa mnyam pa ni lus 'phel ba'i rgyu yin la/ mi mnyam pa ni lus gsod pa'i rgyu yin pa de bas na/ nyes pa rnams zad kyang 'phel ba bzhin du phan pa'i spyod pas bsrung bar bya ste/ ji ltar 'di rnams 'phel nas nad ldang zhing gnod par 'gyur bas na/ khyad par du mi 'phel ba'i phyir srung bar byed pa bzhin du zad pa las kyang rjes su mthun zhing phan pa'i spyod pa nyid kyis kyang bsrung zhing bskyang bar bya'o/ /yan lag brgyad pa'i snying po'i rnam par 'grel ba tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u bcu gcig pa'i rnam par 'grel pa'o/ / //de nas nad kyi dbye ba shes par bya ba'i le'u bshad par bya'o zhes bya ba la/ sngar nad la sogs pa'i tshul shes par bya ba bshad mod kyi/ nad rnams ni tha dad par 'byung ba yin pas/ de'i phyir nad kyi dbye ba shes par bya ba med par nad ma lus pa'i tshul shes par 'gyur ba bshad pa ma yin pas de'i phyir nad la sogs pa'i tshul shes par bya ba'i 'og tu nad kyi dbye ba shes par bya ba'i le'u bshad pa yin no/ /de la nad rnams kyi dbye ba ni nad kyi dbye ba ste/ gnas dang ming dang / dbye ba la sogs pa'i rab tu dbye bas shes par bya zhing rtogs par bya ba ste/ de la phan pa'i gzhung ni nad kyi dbye ba shes par bya ste/ de'i le'u bshad cing bstan par bya'o zhes pa'o/ /de la re zhig rlung la sogs pa lus la gnas pa'i dbye ba'i nges par brtag pa smras pa ni/ zhu ba'i gnas dang rked pa dpyi/ /rna ba rus pa reg dbang po/ /rlung gnas yin te de las kyang / /zhu ba'i gnas su khyad par gnas/ /zhes bya ba la/ rlung gi gnas ni zhu ba'i gnas la sogs pa yin te/ lte ba'i 'og nas rked pa dang / dpyi dang / rna ba dang / rus pa dang / reg pa'i dbang po ste/ pags pa rnams yin la/ de rnams kyi nang nas kyang zhu ba'i gnas ni rlung gi khyad par gyi gnas yin te/ zas 'ju ba rnams gang na gnas shing brten pa de ni lhag par rlung gi gnas yin no/ /mkhris gnas lte ba pho ba rngul/ /chu ser dngas ma khrag dang ni/ /mig dang pags pa dag yin te/ /de las lte ba khyad par gnas/ /zhes bya ba la/ mkhris pa'i gnas ni lte ba la sogs pa yin te/ pho ba ni lte ba yan chad kyi ma zhu ba'i gnas spyi la bya'o/ /chu ser ni pags pa'i sha mdangs na chur gnas te 'dug pa la bya ste/ pags pa phrugs pa las chu'i rnam par byung bar snang ba'o/ /dngas ma dang khrag ni lus zungs dang po dang gnyis pa'o/ /mig ni mig gi dbang po'o/ /pags pa ni reg pa'i dbang po ste/ de ni rlung gnas yin par bstan mod kyi/ mkhris pa'i yang de nyid yin te/ rlung gi grogs yin pa'i phyir ro/ /'dir gnas de dag las kyang lte ba ni khyad par gyi gnas yin no/ /bad kan brang dang mgul pa mgo/ /glo ba rus tshigs ma zhu'i gnas/ /dngas ma tshil dang sna lcer gnas/ /brang ni khyad par dag gi gnas/ /zhes bya ba la/ bad kan gyi gnas ni brang la sogs pa yin no/ /de la brang ni thong kha'i gnas so/ /mgul pa ni lkog ma'o/ /mgo bo ni spyi bo'o/ glo ba ni khong pa'i nang cha ste/ lus kyi yan lag gi dbye ba las 'og nas bshad do/ /rus tshigs ni tshigs kyi mdud pa'o/ /pho ba'i gnas ni lte ba yan chad do/ /dngas ma la sogs pa ni go bar zad do/ /'dir gnas 'di rnams kyi nang na brang ni bad kan gyi khyad par gyi gnas so/ / rlung ni srog sogs dbye ba yis/ /lnga yi bdag nyid/ ces bya ba la/ rlung gcig pu g.yo ba'i bdag nyid can/ gcig pu ni srog dang / stod du rgyu ba dang / khyab byed dang / me dang mnyam du gnas pa dang / thur du sel ba zhes bya ba rnam pa lnga'i bdag nyid can du gnas pa la sogs pa'i dbye bas 'gyur ro/ /'dir srog ni/ spyir gnas brang dang gre bar rgyu/ /blo dang dbang po sems 'dzin byed/ /mchil 'dor sbrid 'byung sgregs pa 'don/ /dbugs rngub zas ni mid par byed/ /ces bya ba la/ 'dir lnga po 'di dag gi nang nas srog ces bya ba'i rlung ni spyi bor gnas shing mgo la brten pa dang / brang dang gre bar rgyu zhing 'gro ba dang / blo dang dbang po dang sems 'dzin par byed pa dang / mchil ma la sogs pa 'dor zhing 'byin par byed do/ /mchil ma ni kha nas bad kan 'byung ba'o/ /dbugs rngub pa ni dbugs nang du sdud pa'o/ /gyen rgyu'i gnas ni brang yin te/ /sna dang lce dang lkog mar rgyu/ /tshig 'byin 'bad rtsol mdangs dang ni/ /stobs dang kha dog dran las byed/ /ces bya ba la/ rlung gyen du rgyu ba'i gnas ni brang yin te/ der brten nas sna la sogs pa gsum du rgyu bar byed do/ /de'i dbye ba ni tshig 'byin pa la sogs pa yin te/ 'bad rtsol ni bya ba la brtson pa'o/ /mdangs ni gzi mdangs dang ldan pa'o/ /stobs ni nus pa'o/ /kha dog ni dkar po la sogs pa'i dbye bas phye ba'o/ /dran pa ni 'das pa'i don ma brjed pa'o/ /khyab byed snying gnas lus kun la/ / ma lus khyab cing rab tu mgyogs/ /'gro dang 'degs dang 'jog pa dang / /mig 'byed 'dzums pa la sogs pa/ /lus can bya ba phal cher ni/ /de la rag ni lus pa yin/ /zhes bya ba la/ rlung khyab byed ces bya ba ni snying la gnas te/ lus kun ma lus par khyab cing rgyu ba yin la/ rab tu mgyogs pa ste myur du 'gro zhing shas cher mgyogs pa yin no/ /de'i las ni 'gro ba la sogs pa'i lus can te/ sems can gyi bya ba thams cad las phal cher te/ mang du rlung de las rag las shing ltos pa yin no/ /de yang 'gro ba ni yul nas yul gzhan du 'gro ba la sogs pa'o/ /'degs pa ni gyen du 'dren pa'o/ /'jog pa ni yan lag smad de 'jog pa'o/ /mig 'byed pa ni mig gi rdzi ma gnyis 'byed pa'o/ /'dzums pa ni de nyid 'dzums pa'o/ /mnyam gnas me drod nye bar gnas/ /nang khrol kun tu rgyu ba yin/ /bya ba zas len 'ju ba dang / /dngas snyigs 'byed cing 'dor bar byed/ /ces bya ba la/ rlung me dang mnyam du gnas pa zhes bya ba ni/ pho ba'i me drod dang nye bar gnas te/ nang grol gyi nang na ma zhu ba'i gnas zhes bya ba der brten nas nang grol du rgyu zhing spyod pa yin la/ de'i las kyi bye brag ni zas len cing 'dzin pa dang de bzhin du 'ju zhing smin par byed pa dang dngas snyigs 'byed cing bye brag 'byed pa dang phyi rol du 'dor zhing 'byin par byed pa yin no/ /thur sel gzhang gnas 'dong mo dang / /lgang pa pho mtshan brla nang rgyu/ /bya ba khu ba zla mtshan dang / /bshang gci mngal nas 'byin par byed/ /ces bya ba la/ rlung thur du sel ba zhes bya ba ni gzhang na gnas pa ste/ rked pa'i 'og na 'dug pa dang / de bzhin du 'dong mo zhes bya ba mjug to'i nang la sogs pa'i gnas na rgyu ba dang / lgang pa dang pho mtshan dang brla'i nang na rgyu ba yin no/ /bya ba'i las ni khu ba dang zla mtshan 'byin pa la sogs pa yin no/ /mkhris pa'i rang bzhin lnga/ zhes bya ba la/ mkhris pa'i rang bzhin ni rnam pa lnga ste/ 'ju byed dang / dmar sgyur dang / sgrub byed dang / mthong byed dang / mdog gsal lo/ /de la/ /zhu dang ma zhu'i bar na gnas/ / 'byung lnga'i bdag nyid can gyis ni/ /gang me'i yon tan shas che bas/ /gsher nyid skems byed 'ju la sogs/ /las kyi me yi sgrar bshad do/ /zas ni 'ju dang de bzhin du/ /dngas ma snyigs ma 'byed par byed/ /der gnas bzhin du mkhris pa ni/ /lhag ma rnams kyi grogs byed pas/ /stobs skyed pa yis byed 'gyur ba/ /de ni 'ju byed ces bshad do/ /zhes bya ba la/ de la zhes bya ba lnga po de rnams kyi nang nas/ mkhris pa 'ju byed ces bya ba ni zhu ba'i gnas dang ma zhu ba'i gnas kyi bar na gnas shing brten la/ de yang 'byung ba chen po lnga'i bdag nyid can du gyur pa yin gyis kyang gang gi phyir me'i yon tan gyi shas che zhing bdo bas gsher ba nyid skems par byed pa yin zhing / zla ba'i yon tan zad par byas pas gsher ba nyid skems pa yin te/ des na 'ju ba la sogs pa'i las kyis te 'ju ba dang sreg pa la sogs pa'i bya ba'i las kyis me'i sgrar bshad cing ming 'thob pa yin no/ /de bzhin du zas rnam pa bzhi 'ju bar byed pa yin no/ /zas zhu bar gyur pa rnams kyi dngas ma dang snyigs ma 'byed par byed cing bye brag tu tha dad par byed pa dang zhu ba dang ma zhu ba'i bar der gnas bzhin du mkhris pa dmar sgyur la sogs pa bzhi po grogs byed cing stobs byed la/ stobs skyed pa ste nus pa skyed par byed par 'gyur te/ mkhris pa de ni 'ju bar byed ces bshad do/ /mkhris pa ma zhu'i gnas la brten/ /dngas mdog sgyur bas dmar sgyur yin/ /zhes bya ba la/ dmar sgyur zhes bya ba'i mkhris pa ni ma zhu ba'i gnas la brten cing gnas nas/ lus zungs dngas ma zhes bya ba khrag gi rang bzhin du mdog sgyur bar byed pas/ dmar por byed pa'i phyir dmar sgyur zhes bya ba'i sgrar bshad pa yin no/ /mkhris pa sgrub byed snying la gnas/ /blo dang yid gzhungs nga rgyal sogs/ /mngon 'dod don ni sgrub byed pas/ /zhes bya ba la/ mkhris pa sgrub byed ces bya ba snying la gnas shing brten pa gang yin pa de ni blo la sogs pa'i rgyur gyur pas mngon par 'dod pa'i don rdzogs par byed cing / phyi'i don rnams 'dzin cing dran par byed pa la sogs pa'i tshul gyis sgrub par byed pas na de ni sgrub byed ces bya'o/ /blo dang yid gzhungs pa ni phan tshun khyad par yod par shes par bya ste/ da ltar byung ba'i dus su don gang la yid the tshom du gyur pa'i don de la tshig 'di'i don ni 'di yin no/ /zhes gang nges pa skyed pa de ni blo zhes bya la/ yid gzhungs pa ni blo'i khyad par yin no/ /mig la gnas te gzugs mthong byed/ / mthong byed ces bshad/ ces bya ba la/ mig gi dbang po la gnas pa'i mkhris pa ni/ mig 'bras kyi nang na gnas nas gzugs mthong bar byed pas na mthong byed ces bshad do/ /gzugs 'dzin pa de ni de la rag las pa yin pa'i phyir ro/ /mdog gsal ni/ /pags mdog gsal byed pags par gnas/ /zhes bya ba la/ mkhris pa mdog gsal ni pags pa mdog gsal zhing dang bar byed pas na mdog gsal zhes bya la/ de'i gnas ni pags par gnas so/ /des na bsku ba la sogs pa 'ju zhing smin par byed do/ /'ju bar ma gyur pa'i sman gyis ni rang gi bya ba mi byed do/ /bad kan rnam lnga zhes bya ba ni/ rten byed dang / myags byed dang / myong byed dang / brtas byed dang / 'byor byed dang / dbye ba rnam pa lnga'o/ /bad kan rnam lnga brang gnas pa/ /rang gi stobs kyis sum mdo dang / /snying dang zas kyi mthu dang ni/ /de nyid la gnas chu'i las byed/ /bad kan lhag ma'i gnas gyur pa'i/ /rten ni gang phyir byed gyur pas/ /de phyir rten byed ces bshad do/ /zhes bya ba la/ yang bad kan de las/ brang la gnas pa de rang gi stobs sam/ nus pas sum mdo zhes bya ba dpung pa gnyis dang / gnya' ba 'dus pa'i mdo rang gi nus pas rten par byed cing / rang gi bya ba'i nus pa skyed par byed pas na rten byed ces bya'o/ /de bzhin du snying gar zas zos pa'i mthu dngas ma'i tshul gyis rten par byed pa rang gi stobs kyis gnas pa dang / de bzhin du brang de nyid la gnas nas/ chu'i las byed cing chu'i bya ba ngoms pa dang / 'gengs pa zhes byed pas/ bad kan lhag ma rnam pa bzhi'i gnas su gyur cing rten byed de/ gang gi phyir rgyu de ltar byed par gyur pas/ de'i phyir bad kan rten byed ces ming du bshad do/ /gang zhig ma zhu'i gnas la gnas/ /de ni zas tshogs 'drul byed pas/ /myags byed ces ni bya ba yin/ /zhes bya ba la/ bad kan de nyid gang ma zhu ba'i gnas la gnas shing / des zas kyi tshogs te/ zas kyi phung po 'drul bar byed cing / mdag mdag por byed pas na/ ming myags byed ces bya ba yin no/ /myong byed lce gnas ro tshor byed/ /ces bya ba la/ bad kan myong byed ni lcer gnas nas ro legs par tshor bar byed cing / shes par byed pas myong byed ces bya'o/ /brtas byed mgor gnas dbang po ni/ /tshim par byed de/ /zhes bya ba la/ bad kan brtas byed ni mgo bor gnas nas/ mig la sogs pa'i dbang po rnams tshim par byed cing brtas par byed pas na/ ming brtas byed ces bya'o/ /'byor byed ni/ tshigs la gnas nas 'byor par byed/ /ces bya ba la/ bad kan 'byor byed ces bya ba yan lag gi tshigs la gnas nas tshigs rnams 'byor bar byed pas na/ 'byor byed ces bya'o/ /de ltar na nad rnams kyi gnas dang las rnams rnam par phye ste bshad nas nye bar bsdu ba'i phyir smras pa ni/ de ltar nad ni phal mo che/ /mi 'gyur bdag nyid can khyab kyang / /gnas yin par ni shes bya ste/ /las rnams kyang ni tha dad yin/ /zhes bya ba yin te/ bshad ma thag pa'i tshul de ltar rlung la sogs pa'i nad phal mo che mang po mi 'gyur ba'i bdag nyid can te/ bstan bcos las ji skad bshad pa'i rang gi tshad dang ldan par gnas shing / mi mnyam pa med par gyur pa dag ni lus kun ma lus par khyab cing rgyu ba yin yang / rang rang gi gnas de dag yin par shes par bya zhing khong du chud par bya'o/ /gnas 'ba' zhig tu ma zad kyi/ de rnams kyi las rnams kyang so so tha dad pa yin par shes par bya'o/ /rlung la sogs pa de dag re re zhing rnam pa lngar phye ba yin mod kyi/ 'on kyang rtsub pa dang / snum pa nyid kyi rang gi mtshan nyid 'dor bar byed pa yin pas na/ de'i phyir rdzas la brten pa'i yon tan mnyam pas ni/ nad de rnams kyi sogs pa dang 'phel bar 'gyur ba yin/ de rnams kyi rang gi mtshan nyid dang mi mthun pa'i yon tan rdzas la brten pas ni zhi bar gyur pa yin na/ 'dir gzhan dag la ltos shing rag las pa ni cung zad kyang med de/ thams cad kyang yon tan mnyam pas ni 'phel bar 'gyur la/ mi mthun pas ni zhi bar byed pa yin no snyam du sems pa la/ de'i phyir gzhung rtsom par byed pas 'di skad ces smras pa ni/ rtsub sogs dro bar ldan pa ni/ /rlung ni sogs par 'gyur ba yin/ /grang bas ldang byed snum la sogs/ /yon tan dro ldan zhi byed 'gyur/ /zhes bya ba yin te/ rtsub pa la sogs pa'i yon tan ni rtsub pa dang / bsil bar byed pa dang / phra ba dang g.yo ba dag ni yon tan dro ba dang ldan zhing / rlung gi gnyen por gyur cing de dang mi mthun pa'i yon tan dang ldan na rlung nad sogs shing 'phel bar 'gyur ba yin te/ rlung gi yon tan gyi spyi'i mtshan nyid tsam dang ldan pa'i rtsub pa la sogs pa dag ni/ rlung sogs shing 'phel ba'i rgyur gyur pa yin mod kyi/ 'on kyang de gcig pur ma zad de/ yon tan dro ba rlung gi gnyen por 'gyur ba dang ldan pa'i rtsub pa la sogs pa de dag kyang rlung sogs par byed do/ /yang rtsub pa la sogs pa'i rlung gi yon tan de dag rlung dang ldan par grang ba'i yon tan dang ldan pa ni rang gi rjes su mthun pa yin pas na/ rlung ldang bar byed pa yin no/ /snum pa la sogs pa'i yon tan de/ snum pa dang / lci ba dang / phra ba dang / sbom pa dang / brtan pa dag dro ba'i yon tan dang ldan na rlung rab tu zhi bar byed do/ /rno sogs bsil ba dang ldan pas/ /mkhris pa sogs par byed 'gyur la/ /dro bas ldang zhing ro rtul sogs/ /bsil bar ldan pas zhi bar 'gyur/ /zhes bya ba la/ rno ba la sogs pa'i yon tan ni rno ba dang / yang ba dang / dri nga ba dang / 'khru ba dang / sla ba ste/ mkhris pa'i yon tan cha mnyam pa dag ni bsil ba'i yon tan mkhris pa'i mi mthun phyogs dang ldan pas/ mkhris pa'i nad sogs shing 'phel bar 'gyur la/ rno ba la sogs pa'i yon tan mkhris pa'i yon tan gyi cha dang mnyam pa de nyid mkhris pa'i yon tan dang rjes su mthun pa dro ba'i yon tan dang ldan pas ldang zhing 'khrugs par byed do/ /de ro rtul ba la sogs pa'i yon tan te/ ro rtul ba dang / lci ba dang / rtsub pa dang / brtan pa dang / bska ba dang / dang ba'i mtshan nyid mkhris pa'i yon tan gyi mi mthun pa'i phyogs su gyur pa bsil ba zhes pa yang mkhris pa'i gnyen por gyur pa dang ldan pas zhi bar byed par 'gyur ro/ /snum sogs grang dang ldan pa yis/ /bad kan sogs par byed 'gyur la/ /dro bas ldang 'gyur de nyid ni/ /rtsub sogs yon tan gyis zhir 'gyur/ /zhes bya ba la/ snum pa'i yon tan ni lci ba dang / rtul ba dang / 'jam pa dang / brtan pa ste/ bad kan gyi yon tan dang cha mnyam pa dag / grang dang ldan pa yis/ zhes bya ba bad kan gyi yon tan grang ba dang ldan par gyur na/ bad kan sogs par byed par 'gyur te/ bad kan ni snum pa la sogs pa'i yon tan dag ni de'i yon tan dang cha mthun pa yin pas/ de tsam gyis gang la yang mi ltos par sogs par byed pa ma yin gyi/ gzhan du ni grang ba'i yon tan lhag par gyur pa la ltos na grang ba lhag par shas che ba'i yon tan de dang ldan na/ snum pa la sogs pa bad kan 'phel zhing sogs par byed do/ /de yang 'dir snum pa la sogs pa'i bad kan gyi yon tan rnams grang zhing bsil bas bsdus par bshad pa ni grang bas bsgongs shing 'khyags par byas pas sogs pa nyid du 'gyur ba yin la/ dro ba la sogs pa bad kan gyi yon tan dang cha mthun pa 'di dag nyid dro ba'i yon tan gyi gnyen por gyur pa dang ldan pas/ bad kan zhu bar byas pa'i sgo nas ldang bar 'gyur ba yin no/ /de nyid ni zhes pa dro ba'i yon tan bad kan gyi gnyen por gyur pa de nyid/ rtsub sogs yon tan gyis zhes pa/ rtsub pa dang / yang ba dang / rno ba dang / mkhrang ba dang / g.yo ba ste/ bad kan gyi yon tan gyi gnyen por gyur pa dang ldan pas zhi bar byed par 'gyur ro/ /de la dngos po rnams kyi chos nyid dang / rang bzhin ni 'di yin te/ gal te rtsub pa la sogs pa 'ba' zhig nyid rlung gi yon tan dang cha mthun pa tsam gyis rlung lhag par 'phel bar gyur na ni/ de'i tshe de rnams la rlung gi yon tan gyi gnyen por 'gyur ba/ dro ba zhes bya ba med pas rtsub pa la sogs pa rnams rlung ldang zhing 'khrugs pa'i gnas skabs skyed kyi/ sogs par ni mi byed la/ yang gang gi tshe yon tan dro ba'i nus pa dang 'brel pas rtsub pa de rnams nus pa zhan par gyur pa'i phyir sogs pa'i gnas skabs skyed kyi/ ldang ba'i gnas skabs ni mi byed de/ nus pa zhan pa yin pa'i phyir ro/ /mkhris pa la rno ba la sogs pa 'ba' zhig gi gnyen po bsil ba'i yon tan med par ni ldang ba'i gnas skabs skyed kyi/ sogs pa'i gnas skabs su mi byed de/ rigs pa snga ma'i tshul gyis so/ /bad kan la yang snum pa la sogs pa'i yon tan dang cha mthun par gyur pa yin du zin kyang / grang ba'i yon tan gyi shas lhag par che ba dang ldan pas bad kan 'khyags shing bsgongs pa'i tshul skyed par byed pas so/ /sogs pa'i gnas skabs nyid byed kyi/ 'di'i ldang ba'i gnas skabs ni mi byed do/ /de yang de'i gnyen por gyur pa grang ba'i yon tan dang ldan pa'i snum pa la sogs pas bad kan 'di'i gzugs zhu bar byas nas/ ldang ba'i gnas skabs skyed par byed nus kyi/ zhu bar byed pa'i rang bzhin can yin pa'i phyir sogs par byed pa'i gnas skabs ni byed mi nus so/ /de ltar rlung la sogs pa dang ldan pa ci lta ba nyid yon tan ji lta ba las byung ba de ltar bstan nas/ da ni sogs pa dang 'phel ba ji lta ba nyid du 'khrul pa dag bsal ba'i phyir gzhung rtsom par byed pas/ rang gi mtshan nyid bshad pa'i 'og tu smras pa ni/ rang gnas nyid du 'phel sogs yin/ /dkyel gyur rgyu las 'khrugs pa dang / /mi mthun pa yi yon tan 'dod/ /ces bya ba yin no/ /gang nyes pa rnams rang rang gi gnas su 'phel bar 'gyur ba yin/ zhes bya ba 'dis ni sogs pa bshad cing bstan pa yin no/ /dkyel gyur rgyu las 'khrugs pa dang / /zhes bya ba la/ de bzhin du phyin ci log pa'i yon tan 'dod/ ces bya bas ni rgyu bstan pa yin no/ /de ltar na gang gi tshe rlung la sogs par 'gyur ba de'i tshe rtsub pa la sogs pa'i yon tan dang cha mthun pa rnams/ dkyel du gyur pa'i rgyu las 'khrugs par 'gyur la/ de dang mi mthun pa'i yon tan snum pa la sogs pa 'dod cing / mngon par dga' ba las 'di'i rjes su dpag par bya'o/ / des na 'di skad ston par 'gyur te/ rang gi gnas te nad rang nyid kyi gnas su gang 'phel bar gyur pa de ni sogs pa yin la/ nad rnams sogs par gyur nas dkyel du gyur pa'i rgyu las ni 'khrugs shing g.yos par gyur pa dang / de dang mi mthun pa'i yon tan snum pa la sogs pa 'dod pa skyes par 'gyur ro/ /ldang ba log pa'i lam zhugs nyid/ /rang gi rtags ni ston pa dang / /bde med nad ni 'byung 'gyur ba'o/ /zhes bya ba la/ yang ldang ba ni 'phel zhing lhag par gyur ba las/ nad rnams rang gi gnas las gnas gzhan du 'gro ba ste/ rang gi gnas spangs nas/ log pa'i lam gzhan du zhugs par 'gyur te/ ldang ba log pa'i lam zhugs nyid/ /ces bya ba 'dis ni nad ldang ba ston pa yin no/ /gzhan du na 'phel ba tsam gyi rang bzhin du mthun pas na tshul gcig pa nyid du 'gyur ro/ /des na sogs pa ni rang gi gnas nyid du nad gang 'phel bar ma gyur pa la bya la/ ldang ba'i khyad par ni sogs pa'i rgyu'i tshogs las gzhan du gyur ba ste/ rang gi gnas yongs su spangs nas nad rnams lam gzhan du zhugs pa gang yin pa de la ldang ba zhes bya'o/ / de bas na/ rtsub sogs dro bar ldan pas ni/ /zhes bya ba la sogs pas sngar bstan pa nyid kyis sogs pa'i rgyu ni gzhan yin la/ ldang ba'i rgyu yang gzhan yin par bshad pa 'di ni nges pa yin no/ /de bzhin du/ rang gi rtags ni ston pa dang / /zhes bya ba ste/ nad kyi mtshan nyid ji lta ji lta bar byung ba de lta de ltar nad rnams 'byung zhing ldang bar 'dod la/ spyir lus dang sems zil gyis gnon par byed pa nyid la/ bde ba med pa zhes bya'o/ /de bzhin du nad ni 'byung 'gyur ba'o zhes bya ba 'dis ni rjes su dpog par byed pa'i rgyu ston par byed pa'o/ /de ltar na rgyu la sogs pa re re 'ba' zhig las nad rnams ldang bar rjes su dpag par nus pa ma yin te/ mi mthun zhing cha mi 'dra ba nyid yin pa'i phyir ro/ /yang nyes pa thams cad ni rang gi tshad las lhag kyang lam de nyid na gnas nas nad skyed par byed par ma zad pas/ nad gang 'byung ba las de'i rjes su dpag par bya'o/ /de yang gang gi phyir nad rang gi tshad las chung bar gyur kyang / nad stobs can gzhan zil gyis gnon pa dang / rang gi gnas spangs te log pa'i lam du gyur nas/ rang gi nad ji lta ba nyid shas cher skyed par byed do/ /de bas na mtshan nyid gsum po 'di dag ni/ nad rnams yongs su shes par bya ba'i phyir smras pa yin gyi lhag par smras pas ci zhig bya/ rang gnas gnas pa mnyam nyid dang / /nad rnams ma byung zhi ba yin/ /zhes bya ba la/ 'dir tshig 'di ni bsdus pa las byung ba yin par shes par bya'o/ /de la nad rnams rang gi gnas na gnas pa mnyam pa nyid gang yin pa de ni zhi ba yin no/ /de bzhin du nad rnams kyi rnam par gyur ba ma byung zhing ma skyes pa'i mtshan nyid des kyang zhi bar rjes su dpag par bya'o/ /nad rnams sogs pa dang ldang ba dang / zhi ba'i mtshan nyid bshad nas/ /da ni rlung la sogs pa dus gang dang gang gi tshe na sogs pa dang ldang ba dang / zhi bar 'gyur ba bstan pa'i phyir smras pa ni/ sogs dang ldang dang rab zhi ba/ /rlung ni so ga sogs gsum tshe/ /mkhris pa dbyar la sogs par to/ /bad kan dgun smad sogs par re/ /zhes bya ba yin te/ gong du bstan pa'i nad sogs pa dang ldang ba dang / rab tu zhi bar 'gyur ba dag rlung la sogs pa re re dang sbyar ba las/ rlung ni so ga sogs gsum tshe/ /zhes bya ba ni/ so ga'i dus su sogs par 'gyur la/ dbyar gyi tshe ldang bar 'gyur zhing / stan ni rab tu zhi bar 'gyur ro/ / mkhris pa ni dbyar la sogs pa'i dus gsum du sogs pa dang ldang ba dang zhi bar 'gyur te/ dbyar ni sogs par 'gyur ro/ /ston ni ldang ngo / /dgun ni zhi bar 'gyur ro/ /bad kan ni dgun smad la sogs pa'i dus gsum du sogs pa dang ldang ba dang / rab tu zhi bar 'gyur te/ de la dgun smad ni sogs par 'gyur ro/ /dpyid ni ldang bar 'gyur ro/ /so ga ni rab tu zhi bar 'gyur ro/ /zhes pa rlung 'di ni so ga sogs par mi 'thad kyi/ /ldang ba'i dus yin no/ /de yang ci'i phyir zhe na/ de'i tshe yang zhing rtsub pa'i dus yin pas/ sman phal cher yang de dang rjes su mthun pa yin pa'i phyir ro/ /de bzhin du dbyar yang mkhris pa sogs par mi 'thad de/ chu rnams skyur ba nyid du zhu bar byed pa dang / de bzhin du sman rnams kyang skyur ba smin pas mkhris pa ldang ba'i dus yin no/ /de bzhin du bad kan yang dgun sogs par mi 'thad de/ chu rnams snum pa dang / sman rnams kyang snum pa nyid yin la/ dus kyang grang ba nyid kyis na/ de'i tshe ldang bar 'gyur gyi/ sogs par mi 'gyur ro zhe na de'i phyir smras pa ni/ yang dang rtsub pa la sogs pa'i/ /sman dang lus kyang de mtshungs pas/ /so ga rlung ni sogs 'gyur gyi/ /dro ba'i dus kyis ldang mi 'gyur/ /zhes bya ba yin te/ sogs pa ste so ga'i dus su yang ba dang / rtsub pa la sogs pa'i sman rnams dang / lus kyang de bzhin du yang ba dang / rtsub pa la sogs pa yin pa dang / dus kyang yang ba dang rtsub pa yin pas/ rlung yang dus kyi rang bzhin gyis yang ba dang rtsub pa nyid yin te/ de bas na yon tan cha mtshungs pa nyid kyis rlung ldang bar rigs mod kyi/ so ga'i tshe rlung sogs par 'gyur gyi/ ldang bar mi 'gyur/ de gang gis she na/ dro ba'i dus kyis ldang mi 'gyur/ /zhes bya ba 'dis bkag par gyur pa yin te/ dro ba nyid kyis na rgyu snga ma nyam chung bar byas pa yin pa'i phyir ldang bar mi 'gyur gyi sogs pa nyid du 'gyur ro/ /chu rnams 'ju ba skyur ba dang / /sman yang de dang 'dra ba yin/ /mkhris pa sogs kyi dus kyi ni/ /grang ba nyid kyis ldang mi 'gyur/ /zhes bya ba la/ dbyar chu rnams kyis 'ju ba skyur bar 'gyur ba dang / de bzhin du sman yang de dang 'dra bar 'gyur ba'i rnam pa yin pas/ mkhris pa de yang de dang 'dra bar sogs par 'gyur gyi/ ldang bar ni mi 'gyur te/ ci'i phyir zhe na/ dbyar smad kyi tshe grang ba yin pas na ldang bar mi 'gyur te/ grang ba ni dro ba'i mi mthun pa'i phyogs yin pas grang ba 'dis ldang ba'i gnas byed pa yin no/ /chu dang sman ni bsil ba dang / /snum pas dus ni mtshungs gyur kyang / /dgun smad bad kan sogs 'gyur gyi/ / bsgongs pas ldang bar mi 'gyur ro/ /zhes bya ba la/ dgun smad ni chu dang sman bsil ba dang / snum pa dang / dus kyang bsil ba dang snum pa yin pa'i phyir/ bad kan dang dus la sogs pa mtshungs shing 'dra ba yin du zin kyang / dus kyi rang bzhin gyis ldang bar mi 'gyur gyi/ sogs pa kho nar 'gyur ro/ /de ci'i phyir zhe na/ grang bas bsgongs shing mar 'khyags pa ltar gyur pas ldang bar mi 'gyur te/ bsgongs pa zhes bya ba 'di nyid kyis bkag pa yin no/ /de ltar dus kyi rang bzhin 'di/ /zhes bya ba la/ gang bsags pa la sogs pa so ga la sogs pa'i tshe 'byung ba bshad pa de ni dus kyi rang bzhin la brten nas bshad pa yin te/ de yang / so ga la sogs sbyor mtshungs kyang / /zhes bya ste/ rlung la sogs pa'i rgyu bshad pa yin no/ /ci nad rnams sogs pa la/ sogs pa'i rgyu dus 'ba' zhig tu zad dam/ gzhan dag kyang yod ce na/ de'i phyir smras pa ni/ zas la sogs pa'i dbang gis ni/ /dus la bab par ma gyur kyang / /'phral du sogs pa la sogs 'gyur/ /zhes bya ba la/ zas la sogs pa'i dbang gis te/ zas dang skom la sogs pa'i nus pa dang / sogs pa zhes bya ba slon sman dang / 'khru sman dang / 'jam rtsi mas gtong ba dang / dub pa la sogs pa'i dbang gis kyang rlung la sogs pa'i nad sogs pa dang / ldang ba dang / rab tu zhi bar 'gyur ro/ /de yang rgyu de dag gis dus de dag la phyin cing skabs la bab par ma gyur kyang / de dag la ltos pa med par 'phral du ste/ de'i mod la sogs pa'i dus la sdod pa med par zas la sogs pa de'i dbang gis sogs pa la sogs par 'gyur ro/ /yang na sogs pa'i dus su nad la sogs par mi 'gyur gyi zas la sogs pa nyid las 'gyur ro/ /nad ni ldang gyur 'phral du lus/ /mgo nas rkang gi bar du khyab/ /ldog 'gyur chu yi rgyun bzhin du/ /cung zhig cung zhig dag gis zhi/ /zhes bya ba la/ nad ni lus nyon mongs par byed pa ste/ rlung dang mkhris pa dang bad kan la sogs pa'o/ /de ldang bar gyur pa ni 'khrugs par gyur ba ste/ de'i tshe ni 'phral du zhes pa mod la lus kyi mgo nas rkang gi bar du ma lus par khyab cing gnod par 'gyur ro/ /nad de nyid lus las ldog par gyur cing / gso bas zhi bar byas pa na/ cung zhig cung zhig gis zhi bar 'gyur te/ de yang / dper na chu yi rgyun bzhin du/ /zhes bya ba ste/ dper na chu'i rgyun skye ba dang / de'i tshogs kyis zam pa yang khyer nas/ mod la kun tu khyab cing 'gro bar byed la/ chu'i rgyun de 'bri ba na/ gnas de las rim gyis cung zad cung zad kyis ldog cing 'bri bar 'gyur ro/ /de bzhin du nad rnams kyang ldang bar gyur na/ nyes pa thams cad skyed par 'gyur gyi/ 'bri ba'i tshe na ni de lta ma yin no/ /nad thams cad la rnam par 'gyur ba re re zhing nad gzhi dang gso ba'i mtshan nyid mtha' yas bstan par mi nus pas de'i phyir de bsal ba la yang 'bad par mi byed do snyam du dogs pa'i phyir 'dir smras pa ni/ nad 'khrugs sna tshogs tshul can ni/ /grangs med par ni gyur pa'i lus/ /thams cad nye bar gzir gyur pa/ /de rgyu tshul dang bsgrub pa dag/ /re re nas ni bstan mi nus/ /de bas spyi yi brjod pa yin/ /zhes bya ba yin te/ rlung la sogs pa'i nad 'khrugs par gyur cing / rnam par ldang bar gyur na sna tshogs pa'i tshul can du 'byung ba'i nad rnam pa tha dad pa'i mtshan nyid can grangs med cing / brtsi ba las 'das pas lus thams cad nye bar gzir zhing gdungs par gyur te/ lus sdug bsngal bar byed do zhes bya ba'i don to/ /de bas na de dag gi rgyu'i tshul gyis 'byin par byed pa dag gi mtshan nyid dang / bsgrub cing gso bar bya ba dag gi re re nas zhes pa/ nad kyi tshul so so nas ming gis bstan par mi nus te/ nad 'di'i rgyu ni 'di yin no/ /'di'i mtshan nyid ni 'di yin no/ /gso ba ni 'di ltar bya'o zhes bstan par shin tu dka' ste/ de bas na spyi'i brjod pa yin te/ spyir khyab pa'i tshig gang yin pa de nyid bshad cing brjod pa yin no/ /de nyid kyang gang zhe na/ nad rnams dag ni thams cad kyi/ /nyes pa'i rgyu ni gcig pu nyid/ /ces bya ba yin te/ 'di ltar nad thams cad kyi rgyu ni nyes pa nyid gcig pu rgyur gyur pa yin te/ rgyu yang yin la gcig pu nyid kyang yin te/ gtso bo'i rgyur gyur pa'am/ yang na thams cad kyi spyi'i mtshungs pa'i rgyu yin pas na rgyu gcig pu ste/ thun mong gi rgyu zhes bya ba'i don to/ /nyid ces bya ba ni nges par gzung ba'i phyir smos pa yin te/ nad kyi rgyu ni gcig pu nyid yin gyi/ dngos po'i rigs gzhan dag ni ma yin te/ thun mong ma yin pa'i phyir ro/ /don 'di'i dpe bstan par bya ba'i phyir tshig tu smras pa ni/ dper na bya ni lding gyur pa/ /nyin rangs kun tu song gyur kyang / /rang gi grib ma dang mi 'bral/ /'gro kun de dang 'dra ba yin/ /zhes bya ba yin te/ dper na khra la sogs pa'i bya rnams lding bar gyur pa na nyin rangs te/ nyin thog thag kun song zhing lding bar gyur kyang / rang gi grib ma dang 'bral bar mi 'gyur zhing / grib ma de dang bral bar skad cig kyang mi snang ste/ 'gro ba'i nad kyi tshul yang de dang 'dra'o/ /yang don 'di'i dpe gzhan dag bstan pa'i phyir/ smras pa ni/ yang na ji ltar ma lus pa'i/ /'gro ba mi 'dra sna tshogs 'di/ /yon tan gsum dang mi 'bral lo/ /zhes bya ba yin te/ dpe'i rnam pa gzhan yang ma lus pa'i 'gro ba rang bzhin mi 'dra ba/ mngal nas skyes pa la sogs pa'i dbye bas tha dad pa'am/ rgyu ba dang mi rgyu ba la sogs pa'i dbye bas phye ba sna tshogs shing rigs tha dad pa 'di dag kyang / yon tan gsum po snying stobs dang / rdul dang mun pa'i tshul dang mi 'bral zhing de las mi 'da' ste/ yon tan gsum po 'di dag dang nam yang 'bral bar mi 'gyur ro/ /de bzhin rang khams ma snyoms pa'i/ /rgyu yang gnas skabs thams cad du/ /nad rigs nyes pa gsum mi 'bral/ /zhes bya ba la/ dpe de bzhin du rang khams ma snyoms pa'i rgyu yang dus dang gnas skabs thams cad du nad kyi rigs su bshad pa/ nyes pa gsum po dang nam yang mi 'bral lo/ /de yang rlung la sogs pa'i khams 'di rnams ni lus 'dzin par byed pa yin du zin kyang gal te khams ma snyoms par gyur na de yang nad kyi rgyu yin pa'i phyir ro/ /nad dang dri ma'i tshul gyis ma snyoms pa med par yang / nad kyi rgyur 'gyur bar bshad pa'i phyir/ 'dir yang zhes bya ba'i sgra khyad par du smras pa yin no/ /de rnams kyis ni ldang ba'i rgyu/ /dbang don mi 'tsham phrad pa dang / /dus dang nyes pa'i las rnams so/ /zhes bya ba la/ rlung la sogs pa de rnams kyi ldang zhing 'khrugs par byed pa'i rgyu ni/ mig la sogs pa'i dbang po'i don mi mthun zhing 'tsham pa ma yin pa dang / phrad cing 'brel pa dang / dus mi 'dra ba ste/ grang ba dang / dro ba dang / char la sogs pa dang / de bzhin du las nyes par spyad pa tshe snga ma'am/ 'dir lus dang ngag dang / yid rnam pa gsum gyi las mi dge ba byas pa de thams cad ni rlung la sogs pa 'khrugs shing ldang ba'i rgyu yin no/ /de yang dman lhag log sbyar bas/ /dbye ba rnam pa gsum du 'gyur/ /zhes bya ba la/ gang rlung la sogs pa 'di dag gi rgyu'i tshul sngar rnam par dbye ba byas su zin kyang / yang de dman pa dang / lhag pa dang / log pa'i sbyor bas dbye ba rnam pa gsum du 'gyur te/ snga ma de dag re re zhing yang gsum du 'gyur ba yin no/ /dbang don rang yul chung ngu'am/ /mi sbyor ba ni dman pa ste/ /shas cher gtad pa lhag sbyor ba/ /zhes bya ba la/ gang mig la sogs pa'i dbang po rnams gzugs la sogs pa'i yul rnams la rang gi yul chung ngu la sbyor ba'am/ rang gi yul la mi sbyor zhing ma tshang ba de ni dman pa'i sbyor ba zhes bya'o/ / yang rang gi yul shas cher gtad cing bsten drags pa ni lhag pa'i sbyor ba zhes bya'o/ /rab phra'i 'od dang 'jigs pa dang / /shin tu nye dang shin tu ring / /yid du mi 'ong mi sdug pa'i/ /gzugs la mig ni lta byed pa/ /log sbyor de ni mi zad yin/ /zhes bya ba la/ log pa'i sbyor ba ni rang rang gi dbang po'i yul rab tu phra ba'i 'od mig gi dbang pos lta zhing brtag par byed pa de ni rang gi yul la log par sbyor ba yin no/ /de bzhin du shin tu 'jigs pa'i gzugs la lta ba la sogs pa rjes su mi mthun zhing gnod pa skyed par byed pa dag kyang log pa'i sbyor ba yin te/ de dag ni shin tu mi bzad cing 'jigs pa yin no/ /de bzhin rab grag rul la sogs/ /dbang don ji bzhin shes par bya/ /zhes bya ba la/ phyogs 'dir bsdu ba ni dbang po'i don rab tu mthong ba dang / rul ba la sogs pa yang log pa'i sbyor ba'i rang bzhin can yin par ji lta ba bzhin du shes par bya'o/ /de yang ji ltar mya ngan skyed pa la sogs pa'i sgra mi sdug pa drag po rna ba'i dbang pos thos pa ni log pa'i sbyor bar 'gyur ro/ /gang gi tshe rul zhing zhigs par gyur cing / mi gtsang ba myags pa la sogs pa'i dri mi sdug pa sna'i dbang pos tshor ba na/ rang gi yul dri zhes bya ba 'di sna'i dbang po'i log pa'i sbyor ba yin no/ /sogs pa'i sgras ni/ lce'i yul lan tshwa shas cher bro ba la sogs pa dang / de bzhin du reg bya'i yul shin tu tsha ba dang / shin tu grang ba la sogs pa ni rang gi yul log pa'i sbyor ba yin par bstan te/ de dag ni nad rnams ldang ba'i rgyu yin par bshad do/ /de dag thams cad ni drang srong tsa ra kas gsal ba kho nar bshad de/ /de yang rang gi nus pas shas cher lta ba ni lhag par sbyor ba'o/ /phyis mi mthong bar gyur pa ni dman pa'i sbyor ba'o/ / phra ba dang / shin tu thag nye ba dang / shin tu thag ring ba dang / drag cing mi bzad pa dang / 'jigs pa dang / zhe 'gras pa dang / mi sdug pa dang / skrag par byed pa la sogs pa'i gzugs mthong ba ni log pa'i sbyor ba'o/ /de bzhin du rnga bo che drag tu brdungs pa la sogs pa'i sgra gsang mtho ba la lhag par gtad de mnyan pa ni lhag pa'i sbyor ba'o/ /thams cad du mi thos pa ni dman pa'i sbyor ba'o/ /sgra rtsub pa dang / sdug pa dang bral ba dang / 'dar ba'i sgra dang 'jigs pa'i sgra thos pa ni log pa'i sbyor ba'o/ /de bzhin du 'dzag cing rul ba'i dri shin tu rno zhing drag pa shas cher bsnoms pa ni log pa'i sbyor ba'o/ /rnam pa thams cad du ma bsnoms pa ni dman pa'i sbyor ba'o/ /rul ba la snom pa la sogs pa 'di ni log pa'i sbyor ba'o/ /yang khrus la sogs pa'i tsha ba dang / grang ches pa bsten pa dang / go rims 'chol bar bsten pa dang / gnod pa dang mi gtsang ba la sogs pa ni log pa'i sbyor ba'o/ /dus kyang grang dang tsha ba dang / /char dus dbye bas gsum du 'dod/ /ces bya ba la/ de bzhin du dus kyang grang ba dang / tsha ba la sogs pa'i dbye bas rnam pa gsum yin te/ de la grang ba ni dgun stong dang / dgun smad ces bya ba'o/ /tsha ba ni so ga'o/ /dbyar ni char gyi dus so/ /de'i dman pa'i sbyor ba dang / lhag pa'i sbyor ba dang / log pa'i sbyor ba bstan pa'i phyir/ de dman grang sogs chung ba dang / /lhag sbyor shin tu che mtshan nyid/ /rang gi mtshan nyid phyin ci log / log pa'i sbyor ba yin par bshad/ /ces bya ba la/ de bzhin du grang ba dang / tsha ba dang / char gyi dus dang / dgun dang / so ga dang / dbyar zhes bya ba'i mtshan nyid can/ sngar ji tsam gyi tshad du bstan pa de las gang cung zhig shin tu dman par snang ba de nyid ni dus dang mi sbyor ba yin pas na/ chung ba'am/ dman pa'i sbyor ba zhes bya'o/ /lhag pa'i sbyor ba ni gang gsum po de dag rang gi tshad las kyang ches lhag par ston pa/ de ni lhag pa'i sbyor ba zhes bya'o/ /log pa'i sbyor ba ni rang gi mtshan nyid las phyin ci log pa ste/ ji ltar dgun gyi dus su dro ba dang / so ga'i dus su grang ba dang / dbyar gyi dus su char mi 'bab pa'o/ /las kyang dbye ba rnam pa gsum du bshad de/ smras pa ni/ lus ngag yid kyi dbye ba yis/ /las kyang rnam pa gsum du bshad/ / ces bya ba la/ las zhes bya ba ni sbyor ba'i rgyu yang lus dang ngag dang yid kyi dbye bas rnam pa gsum du bshad do/ /lus la sogs pa'i las dman la/ /'jug pa dman pa'i ming can yin/ /zhes bya ba la/ lus kyi las dang / ngag gi las dang / de bzhin du yid kyi las rnams kyang / rang gi yul dag la gang dman par 'jug pa de ni dman pa'i sbyor ba yin no/ /brtun ngas 'jug pa lhag sbyor ba'o/ /zhes bya ba ni/ lus dang ngag dang yid kyi las rnams la gang rung brtan ngas shing drag tu sbyor ba de ni lhag pa'i sbyor ba yin no/ /shugs bkag pa dang btsir ba dang / /mi bzad lus kyi las rnams dang / /gcus dang rdeg 'chos gom 'khyor sogs/ /ldang bzhin smra bar byed pa dang / /'dod chags zhe sdang 'jigs sogs dang / /srog gcod la sogs las rnams dang / / rnam bcu de yang smad pa yin/ /'di dang gzhan du byas pa rnams/ /de dag ma lus log sbyor yin/ /zhes bya ba la/ log pa'i sbyor ba ni shugs bkag pa nas brtsams te/ rdeg 'chos shing gom pa 'khyor ba la sogs pa'i bar gyis las gang yin pa de lta bu la 'jug pa gang yin pa de ni lus kyi log pa'i sbyor ba'o/ /de la shugs bkag pa ni rgyu ba brnags pa'o/ /shugs btsir ba ni kha nang du bltas par gyur pa phyir phyogs par byas pa'o/ /mi bzad lus kyi las rnams dang / /zhes bya ba ni/ 'dir mi bzad pa'i sgra ni tshig kun dang sbyar bar bya'o/ /sogs pa'i sgra ni 'gro ba la sogs pa bsdu'o/ /ldad bzhin smra bar byed pa ni gang phyed mid tsam na smra ba ste/ 'di dag ni ngag gi las te/ rab tu drag pa la bya'i ngal ba la ni ma yin no/ /'dod chags dang zhe sdang la sogs pa gang yin pa de dag ni yid kyi las yin te/ gang yul de lta bu la 'jug pa de ni yid kyi log par sbyor ba'o/ /de dag thams cad kyang tshe 'dir byas shing spyad pa'am/ skye ba gzhan dag tu byas kyang rung ste/ /de rnams thams cad log pa'i sbyor ba yin par shes par bya'o/ /'di dag nad kyi rgyu yin no/ /zhes bya ba la/ gsum gsum du brtags pa ni nad kyi rgyu las ldang bar byed pa'i gzhi yin no/ /ldang gyur de ni mtha' yas te/ /sna tshogs nad ni byed par 'gyur/ /yan lag nang grol lhu tshigs brten/ /yan lag khrag sogs pags pa yin/ /zhes bya ba la/ nad kyi gzhi de dag las nad de rnams ldang zhing 'khrugs par gyur pa de ni gang zhig mtha' yas pa yin te/ rnam pa tha dad pa'i tshul gyi nad kyis 'debs shing skyes pa yin no/ /gang du skye zhe na/ yan lag rnams dang / de bzhin du nang grol dang / lhu tshigs dang / gnad rnams su skye'o/ / yan lag khrag sogs pags pa yin/ /zhes bya ba ni/ de la yan lag ni khrag la sogs pa'i lus zungs pags pa'i mthar thug pa la bya'o/ /de ni phyi rol nad gnas te/ /zhes bya ba la/ de dag ni phyi rol gyi nad rnams kyi gnas dang rten yin par bshad do/ /de brten ma zhu yan lag na/ /lba ba be'u snabs 'brum pa sogs/ /gzhang 'brum skran dang 'or nad sogs/ /de dag phyi rol nad ces bya/ /zhes bya ba la/ gang gi phyi rol gyi nad yan lag khrag la sogs pa'i lus zungs kyi gnas su gyur pa yin la/ de bas na de la brten te ma zhu ba dang / yan lag na ba la sogs pa 'byung bar 'gyur ba dang / de bzhin du phyi rol gyi nad gzhang 'brum la sogs pa'i nad rnams kyang 'byung bar 'gyur ro/ /nang nad rtsa sbubs chen po dang / /ma zhu zhu ba'i gnas la brten/ /zhes bya ba la/ yang na nang gi nad ces bya ba ni lto ba dang de bzhin du rtsa sbubs chen po rnams dang / ma zhu ba dang zhu ba'i gnas la brten pa rnams so/ /gnas de las ni skyug tshad 'khru/ /dmu rdzing lud pa dbugs mi bde/ /nang gi cha yi gzhang 'brum skrang / /skran dang me dbal khong 'brum pa/ /zhes bya ba la/ nang grol gyi gnas de la ni skyug pa dang / tshad pas 'khru ba la sogs pa'i nad rnams 'byung bar 'gyur ro/ /de bzhin du nang gi cha'i gzhang 'brum dang / skran la sogs pa 'byung bar 'gyur te/ de ltar na gzhang 'brum la sogs pa ni phyi dang nang gi cha'i dbye bas rnam pa gnyis yin no/ /mgo bo snying dang chu so sogs/ /rus pa'i tshigs nad gnad yin no/ /zhes bya ba la/ 'di dag ni gnad ces bya ste/ mgo bo dang / snying dang / chu so la sogs pa'i nad dang / rus pa'i tshigs te/ 'dir tshigs ni rus pa'i tshigs la bya'o/ /sha dang rgyus pa dang / rtsa la sogs pa gnyis 'dus pa'i tshigs gzhan dag la ni mi bya'o/ /de bas na 'dir rus pa'i tshigs nges par gzung ba yin no/ /de 'brel rtsa dang chu ba dang / chu ba che sogs bar ma yin/ /de la nad lam der gnas pa/ /gcong chen gzhogs phyed mjing kha yo/ /glad nad sogs dang tshigs rus dang / /dpyi yi gzer dang gnod nad sogs/ /zhes bya ba la/ de rnams dang 'brel pa yin pas na/ de 'brel te/ gnad de rnams dang / de bzhin du rus pa'i tshigs rnams dang 'brel pa'i lam bar ma zhes bya ba de la/ nad gcong chen po la sogs pa gnas pa yin no/ /de bzhin du glad nad la sogs pa'i nad dang / tshigs pa dang / rus pa dang dpyi'i gzer dang / gnod nad la sogs pa yang der gnas so/ /'byin khyab zug dang snyom pa dang / lus tsha nad gzer bye ba dang / /'byar zhing chag snyam rkang lag 'khums/ /bsgongs dang brtse dang skom byed dang / /'dar dang rtsub dang khong stong dang / /skem dang 'gul dang dkris snyam dang / /rengs dang ro bska bro ba'o/ /mdog ni gnag gam dmar ba dag /rlung gi las yin/ zhes bya ba la/ rlung 'khrugs par gyur pa las 'byin pa snyam byed pa'i las byed par 'gyur ro/ /de la 'byin pa ni mig la sogs pa'i yan lag thur du lhung ba snyam sems par byed pa'o/ /lus kun tu khyab cing 'dren par byed pa'o/ /zug pa ni yan lag rdeg pa snyam sems pa'o/ /snyom pa ni lus kun dkris pa snyam sems pa'o/ /lus tsha ba ni lus bsregs pa snyam sems pa'o/ /nad ni tshor ba drag po'o/ /gzer ba ni khab kyis phug pa bzhin du byed pa'o/ /bye ba ni 'gyes pa snyam sems pa'o/ /'byar ba ni bshang ba la sogs pa gnas las mi 'gul bar byed pa'o/ /chag pa snyam sems pa ni yan lag chag pa ltar zug cing na ba'o/ /yan lag 'khums pa ni yan lag 'ja' zhing 'khums par byed pa'o/ /bsgongs pa ni tha dad par 'dug pa gcig tu bsdus pa'o/ /brtse ba ni lus dang spu'i tshogs rnams brtse ba'o/ /skom par byed pa ni skom gyis gdungs pa'o/ /'dar ba ni yan lag g.yo zhing 'gul ba'o/ /rtsub pa ni reg na mi bde bar rtsub pa'o/ /khong stong pa ni nang stong pa'o/ /skems pa ni lus skems bag tu gyur pa'o/ /'gul ba ni cung zad g.yo ba'o/ / dkris pa snyam byed pa ni yan lag bcings pa snyam sems pa'o/ /rengs pa ni lus dang yan lag rnams shing ltar rengs pa'o/ /ro bska ba ni ro gzhan dag kyang bska ba'i ror tshor ba'o/ /mdog gnag pa ni phal cher lus dri ma can du 'dug pa'am/ de bzhin du phal cher dmar bag tu snang ba ste/ 'di dag ni rlung gi las yin no/ /mkhris pa'i las/ lus tsha mdog dmar dro smin byed/ /rngul dang rnag dang 'dzag rma red/ /'drul dang brgyal zhing myos pa dag /kha'i ro kha dang skyur ba dang / /mdog skya dmar rtsa ma yin pa'o/ /zhes bya ba ni/ mkhris pa ldang bar gyur na de'i las ni lus tsha ba la sogs pa byed par 'gyur ro/ /de la lus tsha ba ni gang lus thams cad la shin tu mi bzad pa'i tsha ba 'byung bar 'gyur ba de la tsha ba ni sgrar bshad do/ /mdog dmar ba ni lus dang yan lag shas cher dmar ba'o/ /dro ba ni lus dang yan lag tsha ba'o/ /smin par byed pa ni lus kyi yan lag gi phyogs gcig 'drul zhing smin pa'o/ /rngul ba ni rlan dang ldan pa nyid do/ /rnags pa ni lus 'drul zhing smin pa'o/ /'dzag pa ni rnag la sogs pa 'dzag pa'o/ /rma red pa ni rma zhig cing mnam pa'o/ /'drul ba ni lus dang yan lag 'drul zhing myags pa'o/ /brgyal ba ni sems med cing mi dran pa'o/ /myos pa ni chang gis myos pa'i nad lta bu'o/ /kha'i ro ni kha ba dang skyur ba dag tu tshor bar 'gyur ro/ /lus kyi mdog ni skya zhing rtsa dmar ba ma yin pa ste/ gzhan du na sngo ba dang / ser ba la sogs pa'i dbye bas phye bar snang ngo / /bad kan las ni mkhrang zhing snum/ /g.ya' zhing khong grang lci ba dang / /tshigs dam sha rgyas rmongs bag dang / /skrang zhing gnyid che zas mi 'ju/ /mdog dkar kha ro lan tshwa mngar/ /las kyi mtha' la 'dam ring ngo / /zhes bya ba la/ bad kan ldang bar 'gyur ba'i las ni mkhrang ba dang snum pa la sogs pa byed bar 'gyur ro/ /de la mkhrang ba ni lus kyi yan lag dang nying lag rnams sra ba nyid do/ /snum pa ni pags pa la sogs pa snum bag tu gnas pa'o/ /g.ya' ba ni lus kyi pags pa g.ya' ba'o/ /khong grang ba ni lus kyi yan lag rnams bsil bag tu gnas pa'o/ /lci ba ni lus zungs rnams lci ba nyid do/ /tshigs dam pa ni rtsa sbubs rnams 'gags pa'o/ /sha rgyas pa ni lus kyi sha che ba ste/ bad kan can dag gi kha dang lkog ma la sogs pa'i lus kyi sha rgyas pa'am 'gags pa'o/ / rmongs bag ni yul rnams la dbang po mi gsal ba nyid do/ /gzhan dag ni yur ba nyid do/ /zhes zer ro/ /skrang ba ni 'or bag tu 'dug pa'o/ /gnyid che ba ni gnyid stug pa'o/ /zas mi 'ju ba ni pho ba'i me drod mi snyoms shing 'ju bar mi nus pa'o/ /lus kyi mdog ni dkar zhing skya rbab rbab por snang ba'o/ /kha'i ro ni lan tshwa dang / mngar bag tu bro bar 'gyur ro/ /las kyi mtha' la 'dam zhing ring ba ni nad yun ring bo nas 'byang ba'am/ yun ring zhig nas 'chi bar byed do/ /de ltar ji skad bshad pa yi/ /mtshan nyid kyis ni nad kun khyab/ /ces bya ba la/ de ltar zhes bya ba ni yongs su rdzogs pa'i tshig gam/ de lta bu'i rnam pa'i don yin te/ rdzogs pa ni nad rnams kyi mtshan nyid gang gis/ nad gang yin par shes par 'gyur ba'o/ /ji lta bu zhe na/ nad kun khyab byed ces bya ba ste/ nad ma lus pa khyab pa'i ngang tshul gang yin pa nad kun khyab pa'o/ /de ni ma yengs blta sogs pas/ /yang dag par ni shes par bya/ /nad kyi gnas skabs dbye shes pas/ /nad ba skad cig re rer blta/ /zhes bya ba la/ de ltar nad kyi mtshan nyid kun la khyab pa ji skad bshad pa'i nad kyi mtshan nyid de ni ma yengs pa ste/ 'bad pa dang ldan zhing sems gzhan du ma yengs pa'i sman pa la sogs pa brtson pa dang ldan pas/ blta ba la sogs pas zhes pa blta ba dang / myang ba dang dris pas yang dag par shes par bya zhing rtogs par bya'o/ /de la blta ba'i mdog dang / gnas dang / tshad dang / mchil snabs dang / bshang gci dang / skyugs pa la sogs pa la blta ba ste/ sogs pa'i sgras ni rna ba'i sgra dang / rgyu ma krug krug zer ba dang / sor tshigs la sogs pa gcog pa thos pa las shes par bya'o/ /snum pa ni lus dang bshang ba dang rma la sogs pa'i dri brtag par bya'o/ / reg pa ni grang ba dang / dro ba dang 'jam pa dang rtsub pa dang / 'gul pa'i reg bya shes par bya'o/ /kha'i ro ni dris pa las shes par bya'o/ /de bzhin du skyug sla ba dang / skyug dka' ba dang / lto ba sra ba dang / snyi ba dang / rmi lam du ci mthong ba dang / gang la mngon par dga' ba dang / nad gang gi tshe nas zhugs pa dang / skyes pa'i skar ma dang / mdza' ba dang / mi mdza' ba dang / bde ba dang sdug bsngal la sogs pa dri bar bya'o/ /'di dag ni phyogs gcig tsam bstan pa yin par shes par bya'o/ /de bzhin du rjes su dpag pa las kyang shes par bya'o/ /re zhig phyir 'byung zhing rgyu ba las lus kyi bcud dang / ro nyams pa shes par bya'o/ /sbrang bu 'du ba las ni mngar bar ro/ /de bzhin du pho ba'i drod ni 'ju ba las so/ /stobs ni rtsol ba'i nus pa las shes par bya'o/ /nad kyi mtshan ma mngon pa dag ni bsal ba'i sred pa dang mi sred pa las so/ /nad kyi tshad ni spyod pa'i khyad par las so/ /tshe zad pa ni 'chi ltas las so/ /rang bzhin dang / snying stobs dang / spro ba dang / goms pa ni rtag tu 'grogs pa las shes par bya'o/ /de yang tsa ra kas/ shes pa'i sgron ma'i snang ba yis/ / nad pa'i nad kyi bdag nyid ni/ /ma shes bar du sbyor shes gang / /de ni nad rnams gso mi byed/ /ces bshad pa yin no/ /ci sman gang la la zhig ci ltar rung ba tsam zhig de'i mtshan nyid dang ldan pa yin nam zhe na/ de thams cad ma yin te/ gzhan du na nad kyi gnas skabs kyi dbye ba shes pa dang / de bzhin du nad la skad cig re re zhing lta ba dag sman pa yin te/ skad cig skad cig cing gnas skabs thams cad du yang dang yang du rgyun mi 'chad par lta zhing / rtogs par byed pa'i sman pa de lta bu ni nad kyi gnas skabs kyi dbye ba shes pa yin te/ de ltar na nad pa skad cig re re yang bltas pas de rnams skye bar 'gyur ba yin no/ /de bas na de ni/ goms pas nges par tho ba 'gyur te/ /las rnams 'grub pa gsal byed yin/ /zhes bshad pa yin te/ goms pa ni gso ba'i las la yang dang yang du 'jug par nges par shes par gso ba shes pa'i nges pa rnyed par 'gyur gyi/ gso ba'i bstan bcos khong du chud pa 'ba' zhig tsam gyis ni ma yin te/ ji lta bu'i nges pa zhe na/ las rnams 'grub pa gsal byed yin/ /zhes bya ba ste/ las thams cad 'grub par byed pa yin pas na las 'grub pa ste/ de gsal bar byed pa ni snang bar byed pa'o/ /'di nyid kyi dpe bstan pa'i phyir/ rin chen la sogs bzang ngan shes/ /bstan bcos 'ba' zhig las mi 'byung / /zhes bshad pa ni/ margad la sogs pa 'di dag gi bzang ngan shes pa gang yin pa ni goms pa kho na rgyu'i gtso bo yin te/ des 'di ni bzang po'o/ /'di ni ngan pa'o zhes rtogs par 'gyur te/ 'dir ni rin po che brtag pa'i bstan bcos yod du zin kyang / de shes par 'gyur ba'i bstan bcos 'ba' zhig las mi 'byung ste/ de ni rin po che mang po lan mang du mthong ba'i goms pa las 'di ni rin po che bzang po yin no/ /'di ni ma yin no zhes shes pa skye bar 'gyur ro/ /de bzhin du gang zhig sman dpyad kyi bstan bcos shes shing khong du chud pa dang / de bzhin du las la goms shing bya ba'i sman pa des nad rab tu zhi ba'i las byed na/ srog chags rnams kyi srog ster bar byed pa yin gyi/ las la goms shing byang bar ma byas par/ gso ba'i bstan bcos shes pa 'ba' zhig gis ni ma yin te/ thos pa med par goms pa 'ba' zhig gis kyang ma yin no/ /de bas na 'ba' zhig ces bya ba'i sgra smos pa yin te/ 'di la ni gnyi ga dgos pa yin no/ /nad ni 'di ltar rnam gsum ste/ /la la tshe 'di'i nyes las byung / /la la sngon gyi nyes las byung / /gzhan dag de gnyis 'dres las byung / /zhes bya ba la/ nad pa la la ni tshe 'di'i nyes pa zhes pa mthong ba'i chos kyi nyes pa ste/ nad kyi rgyu la nyes pa zhes bya'o/ /de bzhin du la la ni sngon gyi nyes pa las byung ste/ bdag nyid kyis sngon las mi dge ba byas pa'i/ nyes pa byas pa'i rnam par smin pa las byung ba yin no/ /gzhan dag la la ni gnyis 'dres shing 'dus pa las byung ste/ de ltar mthong ba'i chos kyi tshe 'di'i nyes pa dang / sngon gyi nyes pa dang / de bzhin du 'dus pa ste/ gsum yod pa ste/ de ltar na nad rnam pa gsum yin par shes par bya'o/ /yang 'di rnams kyi mtshan nyid go rims ji lta ba'i dbang du byas nas smras pa ni/ nyes 'byung nad gzhi ji bzhin par/ /zhes bya ba la sogs pa yin te/ bshad pa'i nad gzhi de dang de nyid yin gyi tshe 'di'i nyes pa las byung ba de nyid ni rlung dang / mkhris pa dang bad kan las byung ba yin la/ de la ni nad gzhi ji lta ba bzhin du shes par bya zhing / nad gzhi ma 'chol bas nad gang yin pa ldang ba'i nad gzhi gang dang gang yin pa/ nad ni nad gzhi gzhan las mi 'byung gi/ rang gi nyes pa kho na las byung ba de ni tshe 'di'i nyes pa las byung ba yin par shes par bya'o/ /las skyes rgyu ni med pa yin/ /zhes bya ba ni/ gang rgyu zhes pa nad gzhi med par nyes pa gang yang rung ba zhig las byung ba 'di ni las las byung ba'i nad yin no/ /zhes nges par shes par bya ste/ nad gzhi ji lta ba'i nyes pa las byung ba ma yin pa'i phyir ro/ /rgyu chung ba la dkyel che'i nad/ /nyes dang las las byung ba yin/ /zhes bya ba la/ nad gang rgyu chung ngu zhig las dkyel shin tu che bar snang ba de ni nad gzhi ji lta ba'i nyes pa las byung ba yin du zin kyang / nad de nges par nad gzhi'i nges pa dang / las kyi nyes pa gnyis las byung ba yin par nges par shes par bya'o/ /de ni nad rnam pa gsum po 'di dag gi gso ba smras pa ni/ dang po mi mthun bza' ba yin/ /las skyes las ni zad pa ste/ /zhes bya ba yin te/ dang po bshad pas na dang po ste/ gang nad gzhi'i nyes pa 'ba' zhig las byung ba la/ ji skad du bshad pa'i rlung la sogs pa'i mi mthun pa'i gnyen por gyur pa/ zos pa las zad cing dengs par 'gyur ro/ /zhes tshig sbyar bar bya'o/ /las las skyes pa ni mi dge ba'i las de nyid byang zhing zad pa las nad zad par 'gyur ro/ /gnyi ga las byung nyes dang las/ /zad pas zad par 'gyur ba yin/ /zhes bya ba yang / tshe gnyi ga'i nyes pa dang las las byung ba'i nad ni rgyu'i nyes pa dang / nad kyi rgyu'i las zad cing 'jig pas nad de med par 'gyur ba yin no/ /de ltar re zhig nad rnam pa gsum du bstan nas/ yang dbye ba gnyis kyi dbang du byas nas smras pa ni/ nad ni rang rgyud gzhan rgyud las/ /gnyis 'gyur/ zhes bya ba yin te/ nad ni rang gi rgyud dang gzhan gyi rgyud kyi rnam pa dag las gnyis su 'gyur te/ de la rang gi rgyud ni gtso bo ste/ gzhan gyi dbang du ma gyur pa zhes bya ba dang don gcig go/ /gzhan gyi rgyud ni 'khor gzhan yod pa dang / gtso bo yin pa dang / rjes su 'brang ba ma yin zhes bya ba ming gi rnam grangs yin te/ mtha' ma'ang gnyis yin te/ /sngar skyes snga ma'i tshul du bshad/ /phyi skyes pa ni bla brnan yin/ zhes bya ba la/ mtha' ma ni gzhan rgyud can te/ mtha' mar bstan pas na mtha' mar te/ gzhan gyi rjes su 'brang ba'o/ /de yang rnam pa gnyis yin te/ sngar skyes pa ni gcig go/ /gnyis pa ni phyi nas skyes pa'o/ /de las gang sngon du skyes shing sngar byung ba de ni nad rnams kyi sngar skyes pa'i nad kyi tshul du bshad do/ /gang phyis 'byung zhing nad kyi rjes su 'brang ba ni nad kyi bla brnan zhes bya ba yin no/ /rang gnas ci bzhin gnas pa ni/ /rang rgyud can de mtshan nyid gsal/ /zhes bya ba la/ gang yang rgyud du sgrub cing rang nyid gtso bor gyur pa de ni mtshan nyid gsal ba yin te de ni rang gi gnas na gnas shing mtshan nyid gsal la/ ji lta ba bzhin du mngon pa nyid yin te/ de ni shes par sla ba yin no/ /gzhan dag de las go bzlog pa/ /zhes bya ba la/ gang de las gzhan pa snga ma'i tshul dang de bzhin du bla brnan zhes bya ba'i nad de ni rang rgyud can gyi nad de las go bzlog pa ste/ rang bzhin go bzlog pa yin pas/ rang gi gnas na ji bzhin du gnas pa ltar mtshan nyid gsal ba ma yin la/ gzhan gyi dbang du gyur pas na/ /gzhan rgyud can zhes bya ba'o/ /ci na da 'ba' zhig rang rgyud dang gzhan rgyud kyis phye ba'i rang gi mtshan nyid ji skad du bstan pa bzhin du shes par bya'am/ 'on te gzhan dag kyang de ltar shes par bya zhe na/ de'i phyir smras pa/ dri ma'ang de bzhin shes bar gyis/ /zhes bya ba ste/ nad 'ba' zhig rang rgyud dang gzhan rgyud can du shes par bya ba 'ba' zhig tu ma zad kyi/ dri ma'i bar yang rlung dang mkhris pa dang bad kan gyi rang rgyud dang gzhan rgyud can du shes par bya'o/ /de ni nad re ldang ba na/ /ma yengs pas ni shes bya ste/ /zhes bya ba la/ nad de rang gi gnas ji lta ba bzhin du gnas pas nye bar gnas pa'i rang bzhin shes par bya ste/ nad re re ldang zhing rnam par g.yos pa na sman pas ma yengs shing de la gtad pa'i sems bsdus pas lung dang / mngon sum du rjes su dpag pas shes par bya'i gzhan du sems pas ni ma yin no/ /de la nad rang rgyud can gyi rang gi skye ba'i mtshan nyid dang / rjes su mthun pa'i sman la sogs pas bde bar gso ba ni/ de'i mtshan nyid kyi don bshad pa yin te/ de bas na de nyid de'i nye bar zhi ba'i thabs yin no/ /gzhan rgyud kyi nad rnams zhi bar byed pa'i thabs gang zhig yin zhe na/ de'i phyir smras pa/ de rnams gtso bo zhi byas pas/ /zhi 'gyur/ zhes bya ba ste/ gzhan rgyud can gyi nad de rnams ni gtso bo ma yin pas gtso bo rang rgyud can zhi zhing gso ba byas pas/ zhi bar 'gyur gyi/ logs shig tu gso bas gso dgos pa ni ma yin no/ /zhi bar ma gyur na/ /de bzhin phyi nas gso bar bya/ /zhes bya ba la/ gal te gtso bo'i nad gsos kyang gtso bo ma yin pa'i bla brnan rang rgyud can ma yin pa zhi bar ma gyur na de'i tshe nad bla brnan de yang snga ma gsos pa'i rjes la gso bar bya'i/ de btang snyoms su mi bzhag ste de ni gsor mi rung ba ma yin pa'i phyir ro/ /'on te bla brnan stobs che na/ myur gso/ /zhes bya ba la/ gal te nad gzhan dbang can bla brnan zhes bya ba tshabs che zhing stobs dang ldan na/ de'i tshe bla brnan las byung ba'i nad tshabs po che de myur ba kho nar dang por gso bar bya'i/ phyis ni ma yin no zhes bya ba'i don to/ /de nad kyis gzir ba/ lus la shas cher gnod byed yin/ /zhes bya ba la/ gang gi phyir nad bla brnan de ni sngar nad kyis gzir ba'i skyes bu'i lus la bla brnan shas cher gnod par byed pa yin te/ bla brnan phyis 'byung ba yin du zin kyang / nad kyis nyon mongs pa'i las las 'byung bas shin tu gnod par byed pa yin te/ dper na gcin 'gags pa la thor bu 'byung ba la sogs pa lta bu'o/ /de ltar na gzhan dbang gi nad gtso bo ma yin pa stobs zhan pa ni rang dbang can gyi nad gsos pas zhi bar 'gyur la/ gzhan dbang can stobs che zhing nad tshabs che ba ni phyis 'byung ba yin yang bla brnan de snga ma gsos pas zhi bar mi 'gyur te/ de ma gsos na tshabs che ba nyid yin pa'i phyir ro/ /de ltar na nad kyi mtshan nyid shes par byas nas/ gang nad ma lus pa'i rnam par 'gyur ba thams cad kyi ming nas bzung ba'i tshul du bsdus te bstan mod kyi/ ming med pa'i nad dag kyang snang bas de dag gso bar bya ste/ gang gi phyir nad gzhi med par nad kyi rnam par 'gyur ba yod mi srid do/ /de bas na 'dir smras pa/ nad la rnam par mi mkhas zhes/ /ngo tsha nam yang ma byed cig /nad kyi 'gyur ba thams cad kyi/ /ming gi nges bstan yod ma yin/ /zhes bya ba la/ nad la rnam par mi mkhas pa ni sman pas nad kyi ming mi shes pa ste/ des ngo tsha bar mi bya ste/ bdag ni nad rnams kyi ming mi shes pa'o/ /zhes ngo tsha ba nyid du ma byed cig pa'o/ /ci'i phyir zhe na/ nad kyi 'gyur ba thams cad de/ nad ma lus pa rnams kyi ming gi nges pa 'di dang 'di yin zhes pa bstan par gnas pa yin no/ /nyes pa de nyid 'khrugs nas ni/ /khyad par du ni ldang gyur nas/ / gnas gzhan dag tu song nas ni/ /nad ni mang por byed par 'gyur/ /de bas nad kyi rang bzhin ni/ /rang gnas gzhan du 'phos pa dang / /rgyu yi khyad par shes byas la/ /sman dpyad kyis gso myur du bya/ /zhes bya ba la/ gang gi phyir rlung la sogs pa'i nyes pa gang yang rung ba cig po de nyid 'khrugs shing rnam par ldang ba'i khyad par gyis gnas gzhan dang gzhan dag tu song zhing phyin nas rang gi gnas spangs te/ gzhan gyi gnas de dang der song ba dang / nad kyi rnam par 'gyur ba'i rgyu rlung la sogs pa yin par mi shes pas ni nad de gso bar mi bya'o/ /de bzhin du gzhan dag kyang shes nas rlung la sogs pa de rnams 'khrugs pa'i rgyu'i nad gzhi'i khyad par shes par byas la/ nad rnams sman dpyad kyis gso zhing zhi ba myur zhing rings pa nyid du bya'i/ nad rnams mi shes par ni nad de gso bar mi bya'o/ /gal te rgyu dang rang bzhin dag tha dad pa ma yin mod kyi/ 'on kyang 'di dag gi rang gi mtshan nyid kyi 'jug pa ni nges par khyad par yod par shes par bya ste/ gang gis rlung la sogs pa khyad par du byed pa de ni de'i rang bzhin yin la/ rtsub pa la sogs pas ldang bar byed pa de ni rgyu zhes bya'i/ rtsub pa la sogs pa la rang bzhin zhes mi bya ste/ ring ba'i rgyu yin pa'i phyir ro/ /ci de tsam zhig las su bya ba nyams su blangs nas/ sman pa dag gso bar byed na nyes pa med par 'gyur ba yin nam/ 'on te gzhan 'ga' zhig la yang ltos par bya dgos she na/ de'i phyir smras pa ni/ gnod bya yul dang nyams stobs dus/ / me drod rang bzhin na tshod dang / /snying stobs goms dang zas rnams kyis/ /gnas skabs rnam pa tha dad pa/ /'di dag phra mo yan chad brtag /nad dang sman gyi tshul brtags pas/ /gang zhig gso ba la 'jug pa/ /de ni nam yang 'khrul mi 'gyur/ /zhes bya ba yin te/ 'di dag gi mtshams sbyor ma byas pas gnod bya la sogs pa re re zhing rang rgyud du so sor ma lus par brtags la/ ji lta ba bzhin du shes par bya ba dang / de bzhin du nad kyang shes par bya ba dang / gnod bya la sogs pa de dang de rnams phra ba dang / phra ba'i yang phra ba dang shin tu phra zhing shes par dka' ba yan chad kyi gnas skabs legs par brtags pa'i tshul sna tshogs pa dang / nad dang sman gyi tshul brtag cing yongs su shes par bya bas nges par byas nas/ sman pa gang zhig gso zhing nad bsal ba la 'jug pa de ni dus nam yang gso ba dang / sman gyi sbyor ba de la 'khrul zhing nyes pa dang ldan par mi 'gyur te/ 'dod pa'i don rdzogs par byed par 'gyur ro zhes bya ba'i don te/ yul de la sogs par sgrub par mi 'gyur ro/ /de la gnod bya ni lus zungs dang dri ma rnams so/ /yul ni sa phyogs kyi yul dang lus kyi yul lo/ /de yang skam sa dang / rlan can dang / gnyi ga 'dres pa'i dbye bas phye ba'o/ /nyams stobs ni rnam pa gsum ste/ lhan cig skyes pa dang / dus kyis skyes pa dang / sbyor bas skyes pa'o/ /dus ni rnam pa gsum ste/ grang ba dang / tsha ba dang / char gyi dus so/ /me drod ni rnam pa bzhi ste/ snyoms pa dang / ma snyoms pa dang / drag pa dang / zhan pa'o/ /rang bzhin ni bdun te/ nad gzhi re re dang / gnyis gnyis dang / cha mnyam pa'o/ /na tshod ni gsum ste/ byis pa dang / dar la bab pa dang / rgan po'o/ /snying stobs ni rnam pa gsum ste/ snying stobs dang / rdul dang / mun pa'i dbye bas so/ /goms pa ni gsum ste/ mchog dang / bar ma dang / tha ma'i dbye bas so/ /zas ni rnam pa gnyis te/ phan pa dang / gnod pa nyid kyis so/ /de lta bu'i gnas skabs rnam pa bcu so sor brtags pas brtag pa dang / de bzhin du bcu po 'di dag nyid kyis phra mo ste/ shin tu shes par dka' ba'i gnas skabs yan chad brtags pas shes par byas na de gso ba la nam yang 'khrul bar mi 'gyur gyi/ gal te gnas skabs de dag sman pas ma brtags par byed na ni nad pa gsod par 'gyur ba yin no/ /nad dkyel che 'am chung ba dag /phog snya lus nyams che chung las/ /gnod par byed pa snang gyur pas/ /de la'ang ma yengs nyid du bya/ /zhes bya ba la/ phog snya che ba dang lus kyi nyams che ba la/ dang por nad dkyel che zhing stobs dang ldan pa byung du zin kyang stobs chung ba lta bur shes par bya ste/ ci'i phyir zhe na/ snying stobs dang / lus kyi nyams gnyis shin tu che ba yin pa'i phyir ro/ /de bzhin phog snya chung ba dang / lus kyi nyams shin tu chung ba la/ nad yang ba nyid byung du zin kyang che ba lta bur shes par bya ste/ snying stobs dang lus kyi nyam chung ba nyid yin pa'i phyir ro/ /de ltar phog snya dang / lus kyi nyams che ba dang / chung ba las nad kyi dkyel che ba'am chung ba gnod par byed pa gzhan dang gzhan du snang bar 'gyur gyi/ nad kyi mtshan nyid ji lta ba bzhin du ma yin no/ /'ang zhes pa'i sgras ni nad kyi dkyel che chung gcig kho nar snang ba ni ma yin no/ /de bas na nad kyi gnas skabs 'dir dang por nad gzhi nas bzung ste/ gnas skabs kun la sman pas ma yengs pa nyid du bya dgos so zhes bya ba'i don to/ /sman pa ngan pas nad rnams ni/ /lci ba yang bar yongs rtog cing / /nad nyung dag tu brtags pa yis/ / gso ba log pa dag tu 'gyur/ /zhes bya ba la/ sman pa ngan cing mi shes pa de ni nad kyi dbyibs tsam mthong ba las nad lci ba yang ba lta bur rtog cing nges par byed do/ /nad nyung bar brtags pas nad kyi tshad chung bar nges par byas pa'i phyir gso ba log par byed par 'gyur la/ nad chung ngu dag nad che ba/ nad tsha bas lci ba nyes pa ltar byed de/ de ltar na nad yang ba ni lci ba lta bur nyes pa mang bar rtog la/ lci ba ni yang ba lta bur rtog pas nad chung ngu la nad lci ba la 'os pa'i sman ster bar byed la/ nad lci ba la ni nad yang ba la 'os pa'i sman ster bas gso ba log pa dag tu 'gyur ro/ /de bas chung ba'am stobs chung ba/ / dkyel chen nad la rab tu sbyor/ /sbyar ba chung ngur sbyar ba yis/ /nad ni shin tu slong ba yin/ /zhes bya ba la/ gang gi phyir de ltar byed pa de bas na tshad chung bas chung ba'am/ stobs chung ba'am/ nad kyi dkyel chung bar brtags pas nad dkyel chen po stobs dang ldan pa la sman de rab tu sbyor zhing ster bar byed pas sbyar ba chung ngur sbyar zhing btang bas nad de shin tu slong zhing dkrugs pas slar thu bar byed par 'gyur ro/ /sbyor ba'ang lhag par sbyor ba dang / /log par sbyor bas phyin ci log /dri ma 'byung bar ma zad kyi/ /lus kyang shin tu ma rungs 'gyur/ /zhes bya ba la/ sbyong bar byed pa na nad shas che bar brtags bas lhag par shas che ba'i sbyor ba byed pa dang / log par sbyor ba ste/ nad chung ngu la phyin ci log tu sbyong ba la sbyor bar byed pa'o/ /ci'i phyir phyin ci log yin zhe na/ rang bzhin chung zhing stobs chung ba las tshad che ba dang stobs che ba'i sbyor ba la sbyor ba ni/ lhag par sbyor ba yin pas des dri ma 'ba' zhig 'byung zhing zad par 'gyur bar ma zad kyi/ lus kyang shin tu 'jig cing ma rungs pa nyid du 'gyur ro/ /de bas rtag tu brtson pa dang / /thams cad kun tu legs brtags nas/ /ci nas nad med brtan gyur pa/ /de ltar sman dpyad sbyar bar gyis/ /zhes bya ba la/ gang gi phyir tshul de ltar nad rnams kyi mtshan nyid rtogs pa shes par dka' ba yin pa'i rgyu de bas na sman pa shes rab dang ldan pas/ brtson zhing 'bad pa dang ldan pas dngos po thams cad dus kun tu gnod bya la sogs pa'i dngos po rnams la legs par dpyad cing brtags nas/ rnam pa thams cad du ni ci nas kyang tshe'i rig byed kyi rjes su 'brang ba'am de'i bstan bcos las bshad pa bzhin du byas la/ nad med pa bstan par bya ba'i phyir sman dpyad dag mkhas shing gsal bas sbyang bar bya ste/ rnam pa de lta bus nad dang lus zungs la sogs pa dang / rjes su mthun pa'i rnam pa gang gis sman de byin pa na nad med pa nyid du 'gyur ba de ltar bya'o/ /sngar nyes pa dang de nyid nad thams cad kyi rgyu yin par bshad nas de'i 'og tu nad de rnams gnod par bya ba la sogs pa'i rnam par brtags nas bshad pa yin no/ /de bas na 'dir smras pa ni/ de nas gzhan yang nad rnams ni/ /'phel zad dbye bas bshad bya ste/ /zhes bya ba la sogs pa yin te/ de nas de'i rjes thogs la nad de rnams kyi dbye ba bshad cing bstan par bya'o/ /ci ltar dbye bas ci bya zhe na/ 'phel zad dbye bas zhes bya ba ste/ 'phel ba dang zad pa ni 'phel zad de/ de gnyis kyi dbye ba'i khyad par de las bshad cing bstan par bya'o/ /tha dad pa las gsum zhes bya/ /ldan gsum de yang de dgu yin/ /mnyam par 'phel bas gsum nyid de/ /gcig rab lhag las drug tu 'gyur/ /ma lus pa las bcu gsum yin/ /gnyis gcig lhag pa las drug ste/ /mtshungs las gcig yin rab dang ni/ /rab mchog brtags pa las drug yin/ /de ltar nyi shu rtsa lnga ni/ /'phel ba'o zad pa'ang de snyed yin/ /de dag re re 'phel mnyam zad/ /drug ste slar yang de dag ni/ /gcig zad gnyis gnyis 'phel ba ni/ /go bzlog bcas las drug tu 'gyur/ /dbye ba drug cu gnyis su bstan/ /drug cu gsum pa bder gnas rgyu/ /zhes bya ba la/ rlung la sogs pa gsum po de dag so so tha dad pa las gsum yin la/ rang gi tshad las lhag pa gsum gsum du 'gyur bas dgur shes par bya'o/ /de yang rlung 'phel ba dang / mkhris pa 'phel ba dang / bad kan 'phel ba dang / de ltar na nad kyi dbye ba rnam pa gsum du shes par bya ba dang / ldan pa dang / 'dus pa dang / de gnyis dang gsum zad pa las 'khrugs pa las 'gyur la/ 'dus pa ni nyes pa 'dus pa las 'gyur ro/ /de la re zhig ldan pa ni gsum ste/ rlung dang / mkhris pa dang / rlung dang bad kan dang / mkhris pa dang bad kan no/ /ldan pa der rnam pa gsum du gzhag pa'i nad kyi dbye ba rang gi tshad las lhag par gyur ba de la shes par bya'o zhes 'di thams cad la sbyar bar bya'o/ /ji lta zhe na/ de la re zhig ldan pa'i nad kyi dbye ba gsum po nyid 'phel ba las/ gcig ni rlung dang mkhris par ldan pa lhag par gyur bas phye ba'o/ /gnyis pa ni bad kan gyi ldan pa lhag par gyur bas phye ba'o/ /gsum pa ni mkhris pa dang bad kan gyi ldan pa lhag par gyur pas phye ba ste/ de ltar na ldan pa'i dbye ba gsum du shes par bya'o/ /shin tu lhag par gcig drug 'gyur/ /zhes bya ba la ni ldan pa la gnas pa'i nad 'di dag las nad gcig shin tu lhag cing khyad par du 'phel bas ldan pa'i dbye ba drug tu 'gyur bar shes par bya ste/ rlung 'phel ba dang / mkhris pa mchog tu 'phel ba dang / mkhris pa 'phel ba dang / rlung mchog tu 'phel ba dang / rlung 'phel ba dang / bad kan mchog tu 'phel ba dang / bad kan 'phel ba dang / rlung mchog tu 'phel ba dang / bad kan 'phel ba dang / mkhris pa mchog tu 'phel ba dang / mkhris pa 'phel ba dang / bad kan mchog tu 'phel ba ste/ de ltar na 'phel ba shas che chung 'dres pa las ldan pa drug tu 'gyur ro/ /ma lus pa las bcu gsum yin/ /zhes bya ba ni nad gsum po de dag ma lus pa 'dus pa las 'dus pa'i nad bcu gsum du 'gyur bar shes par bya ste/ ji lta zhe na/ lhag pa yis kyang drug gnyis gcig / ces bya ba ste/ gnyis dang gcig ni gnyis gcig ste/ de rnams kyi lhag pa yin pas na/ lhag pa yis ni gnyis gcig ste/ gnyis dang gcig gis lhag pa ste 'phel bar gyur pas nad gnyis lhag pa dang gcig lhag pa las 'di dag tu 'gyur te/ de yang rlung 'phel ba dang / mkhris pa dang / bad kan gnyis mchog tu 'phel ba dang / mkhris pa 'phel ba dang / rlung dang bad kan mchog tu 'phel ba dang / bad kan 'phel ba dang / mkhris pa dang rlung mchog tu 'phel ba dang / rlung dang mkhris pa 'phel ba dang / bad kan mchog tu 'phel ba dang / mkhris pa dang bad kan 'phel ba dang / rlung mchog tu 'phel ba dang / rlung dang bad kan 'phel ba dang / mkhris pa mchog tu 'phel ba ste/ de ltar 'dus pa drug gi rnam par dbye bas gnyis dang gcig lhag pa yin par shes par bya'o/ /lhag pa mtshungs pas gcig yin la/ /'dus pa'i nad gcig pu'i dbye ba mtshungs pa'i lhag pa'i nyes pas shes par bya'o/ /de yang gang lhag pa'i nyes pa mtshungs shing mnyam par byas nas/ de 'dus pa'i nad kyi dbye ba gcig yin par shes par bya'o/ /rab dang rab mchog brtags pas drug /de yang rab mchog gi dbye bas 'dus pa'i nad de rnam par brtag pa'i dbyi bas 'phel ba'i tshul las 'dus pa'i dbye ba drug tu shes par bya ste/ rlung 'phel ba dang / mkhris pa rab tu 'phel ba dang / bad kan mchog tu 'phel ba 'dus pa dang / mkhris pa 'phel ba dang / bad kan rab tu 'phel ba dang / rlung mchog tu 'phel ba 'dus pa dang / bad kan 'phel ba dang / mkhris pa rab tu 'phel ba dang / rlung rab mchog tu 'phel ba 'dus pa dang / rlung 'phel ba dang / bad kan rab tu 'phel ba dang / mkhris pa rab mchog tu 'phel ba 'dus pa dang / mkhris pa 'phel ba dang / bad kan rab tu 'phel ba dang / rlung rab mchog tu 'phel ba 'dus pa dang / bad kan 'phel ba dang / rlung rab tu 'phel ba dang / mkhris pa rab mchog tu 'phel ba 'dus pa ste/ de ltar drug go/ /de ltar nyi shu rtsa lnga ni 'phel ba'o zhes bya ba ni nad 'di dag ni nad kyi dbye ba shes par bya ste/ de ltar ji skad du bshad pa'i rnam pa de dag gis nad kyi grangs nyi shu rtsa lngar nges pa nyid du shes par bya'o/ /zad pa'ang de snyed yin/ zhes bya ba la/ nad de rnams zad cing bri bar gyur pa'i gnas skabs su yang grangs de snyed kho na yin te/ nad kyi dbye ba'ang nyi shu rtsa lngar 'gyur bar shes par bya'o/ /de yang nad gzhi gsum po so sor zad pa las gsum du 'gyur te/ rlung zad pa dang / mkhris pa zad pa dang / bad kan zad pa ste/ de ltar nad kyi dbye ba gsum du shes par bya'o/ /nad zad pa gang yin pa 'di dag gi ldan pa ni dgur shes par bya ste/ ji lta zhe na/ gsum po de nyid zad par mnyam pa la ltos pa'i zad pa lhag par shas che ba ste/ rlung zad pa dang / mkhris pa rab tu zad pa'i ldan pa dang / mkhris pa zad pa dang / rlung rab tu zad pa'i ldan pa dang / rlung zad pa dang / bad kan rab tu zad pa'i ldan pa dang / bad kan zad pa dang / mkhris pa rab tu zad pa'i ldan pa dang / mkhris pa zad pa dang / bad kan rab tu zad pa'i ldan pa dang / bad kan zad pa dang / rlung rab tu zad pa'i ldan pa ste/ de ltar nad rab tu zad pa'i ldan pa las byung ba'i dbye ba drug tu shes par bya'o/ /nad gzhi zad pa'i 'dus pa las nad kyi dbye ba bcu gsum du 'gyur bar shes par bya ste/ ji lta zhe na/ gnyis dang gcig lhag par shas che ba drug ste/ nad gnyis lhag par shas che bar shin tu zad pa dang / de bzhin du nad gzhi gcig lhag par shas che bar shin tu zad pa'i rnam grangs las 'dus pa'i nad drug tu 'gyur bar shes par bya ste/ de yang 'di ltar rlung zad pa dang / mkhris pa dang / bad kan rab tu zad pa'i 'dus pa dang / mkhris pa zad pa dang / rlung dang bad kan rab tu zad pa'i 'dus pa dang / bad kan zad pa dang / mkhris pa dang rlung rab tu zad pa'i 'dus pa dang / rlung dang mkhris pa zad pa dang / bad kan rab tu zad pa'i 'dus pa dang / mkhris pa dang bad kan zad pa dang / rlung rab tu zad pa'i 'dus pa dang / rlung dang bad kan zad pa dang / mkhris pa rab tu zad pa'i 'dus pa ste/ drug dang / rlung dang mkhris pa dang / bad kan zad pa'i 'dus pa gcig go/ /de dag mchog rab tu brtags pa'i dbye bas nad kyi dbye ba drug tu 'gyur te/ rlung zad pa dang / mkhris pa rab tu zad pa dang / bad kan mchog tu rab tu zad pa'i 'dus pa dang / mkhris pa zad pa dang / rlung rab tu zad pa dang / bad kan mchog rab tu zad pa'i 'dus pa dang / bad kan zad pa dang / mkhris pa rab tu zad pa dang / rlung mchog rab tu zad pa'i 'dus pa dang / rlung zad pa dang / bad kan rab tu zad pa dang / mkhris pa mchog rab tu zad pa'i 'dus pa dang / mkhris pa zad pa dang / bad kan rab tu zad pa dang / rlung mchog rab tu zad pa'i 'dus pa dang / bad kan zad pa dang / rlung rab tu zad pa dang / mkhris pa mchog rab tu zad pa'i 'dus pa ste/ drug go/ /de ltar na spyir nad gzhi zad pa las gyur pa'i nad kyang nyi shu rtsa lnga yod par shes par bya'o/ /de dag re re 'phel mnyam zad/ /drug ste/ zhes bya ba la nad kyi dbye ba de rnams 'og nas bshad pa'i nad kyi dbye ba'i ming 'dis nad drug tu 'gyur te/ de yang 'phel ba dang / mnyam pa dang zad pa dag ni 'phel zad ces bya ste/ rlung la sogs pa gang yang rung ba re re zhing 'phel ba dang mnyam pa dang zad pa las drug tu 'gyur te/ 'di ltar rlung 'phel ba dang / mkhris pa mnyam pa dang / bad kan zad pa'i nad dang / mkhris pa 'phel ba dang / rlung mnyam pa dang / bad kan zad pa'i nad dang / bad kan 'phel ba dang / mkhris pa mnyam pa dang / rlung zad pa'i nad dang / rlung 'phel ba dang / bad kan mnyam pa dang / mkhris pa zad pa'i nad dang / mkhris pa 'phel ba dang / bad kan mnyam pa dang / rlung zad pa'i nad dang / bad kan 'phel ba dang / rlung mnyam pa dang / mkhris pa zad pa'i nad de/ de ltar na re re zhing 'phel ba dang / mnyam pa dang zad pa las drug go/ /slar yang de dag ni/ /gcig zad gnyis gnyis 'phel ba ni/ /go bzlog bcas las drug tu 'gyur/ /zhes bya ba la/ yang nad kyi dbye ba drug po de rnams las/ gcig gi zad pa ni gcig zad ces bya la/ gnyis gnyis kyi 'phel ba yod pa las ni gnyis 'phel zhes bya ba la/ de go bzlog dang bcas pa ni gang la go bzlog pa yod pa de la de skad ces bya ste/ yang nad kyi dbye ba drug po de rnams las/ gcig zad pa dang gnyis 'phel ba des bsnan na drug go/ /de yang 'di ltar rlung dang mkhris pa dang / bad kan 'phel ba'i nad dang / mkhris pa zad pa dang / rlung dang bad kan 'phel ba'i nad dang / bad kan zad pa dang / rlung dang mkhris pa 'phel ba'i nad dang / de bzhin du gnyi ga 'phel ba'i nad tshul gyis nad kyi dbye ba drug ste/ de yang gnyis gnyis zad pa re re la 'phel ba dang bcas pas 'gyur ba ni/ 'di ltar rlung dang mkhris pa zad pa dang / bad kan 'phel ba'i nad dang / rlung dang bad kan zad pa dang / mkhris pa 'phel ba'i nad dang / mkhris pa dang bad kan zad pa dang / rlung 'phel ba'i nad de/ de ltar tshul gnyis 'phel ba'i rnam pas nad kyi dbye ba rnam pa drug yin la/ de rnams kyi rab dang mchog rab kyi dbye bas brtsi ba phra mo ni mtha' yas pa yin par shes par bya'o/ /dbye ba drug cu gnyis su bstan/ /drug cu gsum pa bder gnas rgyu/ /zhes bya ba la/ de ltar rlung la sogs pa nad gzhi'i dbye bas/ spyir drug cu rtsa gnyis su bstan cing bshad pa'am/ drug cu rtsa gsum du bstan to/ /de ci'i phyir zhe na/ /bder gnas rgyu zhes bya ba ste/ / bde ba'i rgyur gyur ba nyid kyi phyir ro/ /de bzhin 'di dag dngas ma khrag sogs 'dres pa las/ /nad ni zad dang mnyam dang 'phel ba'i dbye ba yis/ /rab dang rab mchog dag la mtha' yas nyid 'gyur bar/ /rang bzhin ci 'dra ma yengs yid kyis shes par gyis/ /zhes bya ba la/ nad kyi dbye ba 'di dag dang / dngas ma la sogs pa 'dres shing 'dus pa dang / de bzhin du zad pa dang / mnyam pa dang / rnam par 'phel ba'i dbye bas rab dang rab mchog tu sbyar ba las mtha' yas pa nyid du 'gyur ba nyid/ rang bzhin ci 'dra ba yin pa sman pas ma yengs shing gzhan du g.yeng ba med par sems der gtod pas shes shing rtogs par gyis shig pa'o/ /de la dngas ma la rlung dang mkhris pa dang bad kan re re zhing 'khrugs pa las dbye ba gsum du 'gyur te/ tha dad pa las gsum shes bya/ /zhes bya ba'i tshul gyis so/ /dngas ma ldan pa byung na/ rlung la sogs pa 'phel ba las der cha mnyam pa'am/ lhag pa las snga ma bzhin du dgur shes par bya ste/ de ltar thams cad snga ma las rjes su dpag par bya'o/ /'dir 'di ltar rlung dang mkhris pa dang bad kan gyi nus pa mi mthun pa yod du zin kyang / sems can gyi nang gi mi dge ba la sogs pa'i dbang gis gnod pa skyed cing 'dus pa'i nad byed cing / gcig la gcig nye bar zhi ba ci'i phyir mi byed ces brtag par mi bya ste 'di dag gi rang bzhin nyid yin pa'i phyir dang / 'byung ba chen po ltar gcig gis gcig zil gyis gnon pa yin yang / rdzas dang ro sogs pa'i bya ba lhag cing rtsom pa dang 'dra'o/ /de bas na 'di dag gi rang bzhin ni mi 'gyur ba nyid yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba slob dpon zla ba la dga' bas rnam par sbyar ba las/ le'u bcu gnyis pa'i rnam par 'grel pa'o// // de nas nad gso ba'i thabs kyi le'u bshad par bya'o zhes bya ba la/ de la re zhig dbye ba de dag shes pa'i 'bras bu ni gang sman rnams dang nad rnams gso ba de shes pas nad gsal bar dag par nus pa nyid yin pas/ de'i 'og tu nad gso ba'i thabs kyi le'u'i dbang du byas nas/ de dran par bya ba'i phyir/ 'dir nad gso ba'i thabs la dgos pa'i snum la sogs pa'i ming gang yin pa ston pa de bshad par bya'o/ /de la rlung ni thams cad kyi gtso bo yin pas/ rlung nad gso ba snum dang ni/ /zhes bya ba la sogs pa'i tshigs su bcad pa gsum gyis/ rlung nad gso ba'i thabs smras pa yin te/ rlung 'khrugs shing ldang bar gyur na/ snum nas 'jam rtsi btang ba'i bar gso ba'i thabs yin te/ rlung de la gso ba thams cad kyi nang na gso ba'i mchog ni snum yin la/ de yang rnam pa du ma yod do/ /de'i 'og tu dugs bya'o/ /de yang gang gi phyir rlung ni zas dang skom dang sman rtsub pa dang / grang bas ci ltar myur du 'khrugs par 'gyur ba de ltar yang ba la sogs pa'i yon tan dang ldan pa'am/ yon tan mnyam pas 'khrugs par mi 'gyur ro/ /de bas na rlung 'khrugs par gyur pa la ni gso ba'i thabs gzhan dag las dang por snum pa dang / dugs kyi rnam pa du mas de zhi bar bya ba'i don du bya'i/ gso ba gzhan dag ni de lta ma yin no/ /rlung nad gso ba snum dang ni/ /dugs dang sbyang ba 'jam rtsi dang / /mngar skyur lan tshwa bro ba yi/ /zas dang bsku zhing mnye ba dang / / dkri snum sman chu blugs pa dang / /gro chang 'bras chang bu ram chang / /zhes bya ba la/ de la rlung nad gso ba la ni snum chos dang / dugs byas nas sbyang ba bya la/ de yang 'jam pas bya'i/ rno zhing drag pas ni mi bya ste/ rno ba ni rlung skyed par byed pa yin pas bkag pa yin no/ /de bzhin du bza' bar bya ba'i zas kyang mngar ba dang / skyur ba dang / lan tshwa dang / rno bas bya'i/ ro gzhan bza' bar mi bya'o/ /bsku zhing mnye ba zhes bya ba ni bsku ba sngon du byas pa mnye bar bya dgos pas na bsku zhing mnye ba'o/ /dkri ba ni yan lag ras la sogs pas dkri ba'o/ /snum 'jam pa'i rtsa la sogs pa brdeg pa ste/ gso ba'i thabs 'di ni rlung nad can kha yo ba la sogs pa la bya'i/ gzhogs phyed na ba la sogs pa'i rlung nad la ni mi bya'o/ /sman chu blugs pa ni rlung sel ba'i sman bskol ba dang / snum dang 'o ma la sogs pa'i chus blugs pa'o/ /gro dang 'bras las byas pa'i chang ni gro dang 'bras chang ngo / /bu ram chang ni bu ram chang las byas pa ste sbyar ba'i chang ngo / /snum dro 'jam rtsi gtang ba ni/ /'jam rtsi nges pa bde dga' dang / /zhes pa la/ rtsub pa dang grang ba bkag pa yin no/ /'jam rtsi smos pa ni nges par 'jam rtsi bya dgos pa'o/ / 'jam rtsi nges pa zhes bya ba ni/ las dang dus dang sbyor ba las 'jam rtsi lnga bcu rtsa gsum bya ba ni 'jam rtsi nges pa'o/ /bde dga' ni mya ngan la sogs pa blo 'khrugs par byed pa'i dngos po spangs la yid du 'ong ba'i yul bsten pa'i bde bas gnas pa'o/ /skye gnas du ma'i snum dag ni/ /zhes bya ba ni/ sems med pa dang sems yod pa'i dbye bas phye ba'o/ /de yang / /drod che 'ju bar byed g.yos sbyar/ /khyad par du ni sha tshon dang / /til mar dang sbyar 'jam rtsi bya/ /zhes bya ba la/ sman drod che zhing 'ju bar byed pa dang / lhan cig btsos shing g.yos su sbyar ba'o/ /yang rlung de 'khrugs par gyur pa la gso ba thams cad kyi nang na/ khyad par mchog tu gyur pa ni/ sha tshon po'i khu ba stobs skyed par byed nus pa ste sha khu dang / de bzhin du til mar dang sbyar ba'i 'jam rtsi gtang ba gso ba'i thabs ni mchog yin no/ /mkhris pa mar sar blud pa dang / / mngar zhing bsil ba'i 'khru sman dang / /mngar dang kha dang bska ba yi/ /zas dang sman ni sbyin pa dang / /dri bzang bsil zhing yid 'ong ba'i/ /dri ni nye bar bsten pa dang / /mgul du do shal se mo do/ /nor bu brang du gdags par bya/ /ga pur tsan+dan u shi ra'i/ /byug pas skad cig re re bsku/ / srod la rdo thal can zla zer/ /yid 'ong glu dang ser bsil bsten/ /bag phebs mdza' bo bde ba dang / /zhes bya ba la/ sogs pa'i sgras tshigs su bcad pa drug gis ni mkhris pa 'khrugs par gyur na mar sar blud pa la sogs pas gso bar bya ba dang / de bzhin du mngar ba dang / bsil ba'i nus pa dang ldan pa'i sman gyi bkru sman btang bas nad thur du dbyung ba ni gso ba'i thabs yin no/ /de bzhin du kha zas kyang mngar ba dang kha ba dang bska ba'i bza' ba dang / sman yang mngar ba dang kha ba dang bska ba nyid kyis sbyin par bya'o/ /de bzhin du dri bzang zhing bsil ba dang / yid du 'ong ba'i tsan+dan la sogs pa'i dri nye bar bsten pas gso ba dang / de bzhin du mgul du rgyan gyi rnam pa gser la sogs pa las byas pa'i do shal se mo do gdags pa dang / de bzhin du mu tig gi do shal brang du 'phyang bar gdags par bya ba dang / de bzhin du nor bu ste bai DUr+ya dang / pad+ma rA ga dang / chu shel dang / tshon shel la sogs pa'i chun 'phyang brang du gdags pa ni mkhris pa gso ba'i thabs yin no/ /de bzhin du ga bur dang tsan+dan dang / u shi ra'i byug pas/ skad cig ma re re zhing bsku ba ni mkhris pa gso ba'i thabs yin no/ /de bzhin du srod la ste/ mtshan mo'i dang po'i cha la rdo thal can te/ rdo thal dkar pos byugs pa'i khyim du 'dug ste/ zla ba'i 'od zer bsten cing yid du 'ong zhing rnar snyan pa'i glu dang / ser bu bsil ba bsten pa yang mkhris pa gso ba'i thabs yin no/ /de bzhin du bag phebs shing nyams rangs su gnas pa'i mdza' bo'i bde ba cha lugs dang spyod pa mthun pa yid tshim par byed pa dang de bzhin du/ bu la gzhon skad nyams rangs smra/ /chung ma yid mthun las byed cing / /sdug cing yon tan rnams kyis brgyan/ /khang pa nyis rim chu bsil blugs/ /skyed mos tshal rdzing bzang po ni/ /rgya che dang ni stegs bcas pa/ /chus brlan bye ma bsil ba dang / /spyil bu lus tshad shing khebs dang / /chu 'gram pad+mar bcas pa ni/ /bder gnas khyad par 'o ma dang / /mar sar bza' dang bkru sman bya/ /zhes pa gang bu chung ba dang / /mi gsal zhing gsang dma' bar smra zhing dga' bas gnas pa dang / de bzhin du chung ma yid dang mthun pa'i las byed pa dang / sdug cing yid du 'ong ba dang / yon tan gyi ngang tshul bzang po'i spyod pas brgyan pa dang / 'grogs pa ni mkhris pa gso ba'i thabs yin no/ /khang pa yang nyis rim du byas shing bsil ba dang / chu rgyun bsil ba'i rgyun 'bab pa blugs pa dang / skyed mos tshal rdzing bu bzang po dang ldan par gnas pa yang mkhris pa la phan no/ /de bzhin du rgya che zhing yangs pa'i stegs dang bcas pa chu dngas bas brlan zhing gsher ba'i bye ma bsil bar byed par gnas pas mkhris pa la phan no/ /yang chu 'gram der spyil bu lus kyi tshad tsam 'od ma la sogs pa las byas pa dang / shing bzang po skye ba dang / chu'i 'gram na pad+ma dang bcas pa gang yin pa de lta bur gnas pa dang / de bzhin du bde bar gnas pa ste/ lus dang sems dga' bar byed pa de dag ni mkhris pa gso ba'i thabs yin no/ /khyad par du ni 'o ma dang mar gsar bza' ba dang / bkru sman btang ba ni mchog thams cad kyi nang nas gso ba'i mchog yin no/ /bad kan cho gar ldan pa yi/ /skyugs sman bkru sman rnon po btang / /zas ni rtsub chung rno zhing dro/ /tsha zhing kha dang bska ba bza'/ /chang ni yun ring lon pa btung / /rtse dga' dang ni gnyid mi log /rtsol ba'i tshul ni sna tshogs dang / /sems las rtsub pas mnye ba dang / /khyad par sman khu skyugs sman btang / /sbrang rtsi tshil 'joms sman bsten bya/ /smyung ba dud bdug mkhur bkang dbo/ /bde ba med gnyid bde phyir bya/ /zhes bya ba la sogs pa tshigs su bcad pa gsum gyis bad kan gyi rgyu sogs pa dang / de bzhin du 'phel bas nad skyed par nus pa dag la skyugs sman la sogs pas gso bar bya'o/ /de la skyugs sman ni nad gyen du drang ba'o/ /de yang cho ga dang ldan par bya ba ste/ gso dpyad kyi bstan bcos las ji skad bshad pa'i cho gas gtang bar bya zhing sbyar bar bya la/ de yang rno bas bya dgos te/ sman rno ba las sbyar ba btang ngo / /de bzhin du bkru sman yang rnon pos bkru ba ni bad kan gso ba'i thabs yin no/ /de bzhin du zas te 'bras chan la sogs pa rtsub pa dang / chung ba dang / rno ba dang / dro ba dang / ro tsha ba dang / kha ba dang / bska ba bza' bar bya'o/ /de bzhin du chang dus yun ring por lon pa btung ba yang bad kan la phan no/ /de bzhin du rtse ba dang dga' ba ste yid la 'dod pa'i dga' ba la brten cing bud med la brten pa dang / gnyid mi log pa ste/ mel tse'i tshul du gnas pa yang bad kan gso ba'i thabs yin no/ /de bzhin du rtsol ba'i tshul sna tshogs shing rnam pa tha dad du lus dub par byed pa lag stobs 'gyed pa dang / rta 'dul ba la sogs pa yang bad kan gso ba'i thabs yin no/ /de bzhin du sems las te dngos po rjes su dran zhing dpyod pa dang / de bzhin du rtsub pa dang / phal cher rdzas rtsub pas mnye ba yang bad kan gso ba'i thabs yin no/ /de la bad kan gyi gso ba thams cad las khyad par du phan pa'i thabs ni sman khu dang skyugs sman gtang ba yin no/ /sman khu ni 'bru'i khu ba las byas pa'o/ /tshil 'joms pa'i sman ni gu gul la sogs pa'o/ /smyung ba ni zas bcad pa'o/ /dud pa ni 'og nas bshad pa'i mtshan nyid can no/ /mkhur ba dgang zhing dbo ba ni sman khus ba bkang zhing dbo ba'o/ /bde ba med pa ni bde ba nyid 'gegs pa ste/ bde ba dang mi ldan pa'am/ sdug bsngal ba'i tshul can gyis lus dang sems kyi las shin tu bsten pas gang sdug bsngal skye bar 'gyur ba de ni bde ba med pa ste/ de ni bad kan gyi bde ba skyed par byed pa'i phyir bde ba'i don rdzogs par 'gyur ro/ /nad rnams so sor gso ba dag / nad las dpags te bshad pa yin/ /ldan pa dang ni 'dus pa dag /de ni so so'i tshul gyis brtag /ces bya ba la/ gang gis gso ba gang yin pa nad rnams so so'i mtshan nyid las dpags te bshad pa de nyid ni/ rim pa ji lta ba bzhin du bya la/ ldan pa dang 'dus pa'i nad dag la ni so so'i tshul ji lta ba las brtag par bya ste/ dper na rlung dang mkhris pa'i nad ldan pa la/ rlung dang mkhris pa gso ba'i thabs 'dren ma brtag par bya la/ de bzhin du rlung dang bad kan gyi ldan pa yang rlung dang bad kan 'dren ma'i gso ba'i thabs brtag par bya'o/ /mkhris pa dang bad kan gyi ldan pa yang mkhris pa dang bad kan gyi gso ba'i thabs 'dren ma brtag par bya'o/ /de bzhin du 'dus pa la yang gso ba gsum ci rigs par dus gcig tu brtag par bya'o/ /yang ldan pa gsum po 'di dag la sgo gzhan dag nas gso ba'i thabs bsgre ba gsal bar bya ba'i phyir smras pa ni/ rlung ni zung du 'jug pas na/ /rlung mkhris phal cher so ga'i bya/ /bad kan rlung la dpyid kyi bya/ /bad kan mkhris la ston gyi bya/ /zhes bya ba la/ rlung dang mkhris pa'i tshul la ni phal cher so ga'i cho ga bya ste/ so ga'i dus kyi cho ga dus su spyad pa'i le'u las bshad pa'i snum pa dang / bsil ba'i cho ga sbyar bar bya'o/ /de bzhin du bad kan dang / rlung gi ldan pa la ni dpyid kyi zhes bya ba/ dpyid kyi spyod pa'i cho ga dro ba dang / rtsub pa zhes bya ba'i cho ga sbyar bar bya'o/ /dris pa so ga'i tshe ni phal cher bsil ba'i cho ga bshad la/ dpyid kyi dus su spyad pa'i le'u las bshad pa'i snum pa dang / rlung skye ba ches mthun pa ste/ gso bar ji ltar rigs te/ rlung gi rang gi mtshan nyid ni grang ba dang rtsub pa yin pa'i phyir ro zhe na/ rlung ni zung du 'jug pas na zhes smos pa yin no/ /gang gi phyir rlung ni zung du 'jug pa yin pas/ gang gis 'dres shing ldan par gyur pa de nyid kyi sbyor ba'i 'jug pa gcig pa nyid kyis na/ bad kan dang mkhris pa cha 'dres pas gso ba de la phan pa yin no/ /zhes bya ba'i don to/ /de yang gzhung las/ zung du 'jug pa rlung gi mchog /yang dag 'dres pas gnyis bdag can/ /me dang ldan pas sreg par byed/ /zla ba ldan pas bsil bar byed/ /ces bshad pa yin no/ /de ltar na rang gi mtshan nyid kyi gnas skabs na zung du 'jug pa nyid du bya bar rigs so/ /de bas na rlung mkhris pa dang lhan cig gnas su zin kyang / mkhris pa'i gso ba byar rung ste/ de gnyis zung du 'jug pa yin pa'i phyir ro/ /de bzhin du bad kan dang lhan cig gnas pa yang bad kan gyi gso bas gso bar byar rung ngo / /bad kan dang mkhris par ldan pa'i ldan pa la ni ston gyi zhes bya ba ston gyi dus su bya ba'i spyod pa bshad pa dag gis gso bar bya'o/ /da ni gso ba'i thabs kyi dus smras pa ni/ nad ni dkyel sogs dus su bsal/ /ldang na gzhan gnod med par gso/ /thams cad ldan na tshabs che ba/ /nad gzhan gnod pa med par gso/ /zhes bya ba la/ rlung dang mkhris pa dang bad kan zhes bya ba'i nad ni dkyel sogs pa'i dus nyid kyi gnas skabs na bsal zhing gso bar bya'i/ ldang bar gyur pa'i dus kyi bar du bsdang bar mi bya'o/ /gang gi tshe sogs pa'i dus su btang snyoms su byas pas ldang bar gyur pa de'i tshe nad de ldang bas na nad gzhan la gnod cing ldang bar 'gyur ba med pa'i tshul gyis gso bar bya'o/ /de ni 'di skad ston pa ste/ nad de ldang ba na de dang mi mthun pa'i kha zas la sogs pa dang / de dang cha 'dra bas na nad gzhan dag ci nas slong bar mi 'gyur ba de lta bur gso bar bya'o/ /yang gang gi tshe nad thams cad dus gcig tu langs na de'i tshe tshabs che ba'i nad stobs dang ldan pa ldang bar 'gyur ba ste/ dang por gso bar bya la/ de yang nad gzhan la gnod pa med par gso ba ste/ cung zad ldang ba'i nad dag la mi gnod cing mi mthun pa med pa'i tshul gyis gso bar bya la/ gal te mnyam par 'khrus na/ rlung stobs dang ldan pa ma yin la cha mnyam par gyur pa las gang gang zhig las rang bzhin gyis 'phel bar 'gyur ba de tshabs che ba yin pas/ nad gzhan dag la gnod pa med pa'i tshul nyid kyis gso bar bya'o/ /nad ni sbyong bas zhi bya ba/ /gang gzhan ldang bar byed pa dag /de ni dag min gzhan dag ni/ /ldang bar mi 'gyur rnam dag yin/ /zhes bya ba la/ nad zhi bar bya ba'i sbyor ba sman dang kha zas la sogs pa sbyor ba'i tshul gang gis nad gcig zhi bar byas nas gzhan gnyis pa ldang bar byed pa'i sbyor ba de ni rnam par dag pa ma yin te/ bzang po ma yin la/ gang gcig zhi bar byas nas gzhan dag ldang bar mi byed pa de ni dag pa dam pa yin te/ ci'i phyir zhe na/ gnod pa med pa'i bya ba bzang po byed pa'i phyir ro/ /rtsol drags tsha ba rno ba dang / /gnod par 'gyur ba spyad pas kyang / /khong pa yan lag rus pa dang / /gnad du rlung ni 'jug par 'gyur/ /de bzhin de la rtsa sgo ni/ /rnam par sbyangs pas 'byung bar 'gyur/ /smin byas rlung ni tshar bcad pas/ /khong pa'i nang du 'du bar 'gyur/ /zhes bya ba la/ rtsol ba drags pa ni lus la sogs pa la gnod par 'gyur ba'i las drags pa dang / tsha ba rno ba'i me chen po la brten pa dang / gnod par 'gyur zhing log pa'i las spyad pa las kyang / khong pa ste zas zhu ba dang ma zhu ba'i gnas zhes bya ba la/ yan lag dang rus pa dang gnad du rlung la sogs pa'i nad myur du 'jug par 'gyur ro/ /de la yan lag ni khrag la sogs pa'i lus zungs rnams dang pags pa'o/ / rus pa ni rus pa'i tshigs rnams so/ /gnad ni snying dang mgo bo la sogs pa ste/ de dag tu rlung myur ba'i bdag can yin pas na nad 'jug cing ldang bar byed do/ /de bzhin du yan lag dang rus pa dang / gnad rnams la yang khong pa'i nang du zhugs par 'gyur te/ ci'i phyir zhe na/ rtsa rnams kyi sgo gang yin pa de rnam par sbyangs pas rnam par dag pa'i phyir/ de khong par 'byung bar 'gyur ba dang / dkyel sogs shing 'phel bas 'byung bar 'gyur ba dang / de bzhin du 'dzags shing zhu ba ste/ lan tshwa dang 'o ma la sogs pa 'dzag par 'gyur ba'i zas zos pas 'byung bar 'gyur ba dang / de bzhin du smin pa ste/ smin par bya ba la sogs pa ste/ ma zhu ba med par byas pas khong pa'i nang du zhugs par 'gyur ro/ /zhes bya bar sbyar ba dang / de bzhin du rlung 'thor ba dang / sdud par byed pa tshar bcad cing zhu bar byed pa khong pa'i nang du nad de 'du zhing 'byung bar 'gyur ba yin no/ /der gnas nas kyang rgyu dag la/ /sdod cing ring du thogs pa yin/ /de ni dus sogs stobs thob nas/ /gzhan la brten kyang ldang bar byed/ /ces bya ba la/ khong pa'i nang der gnas nas nad de lhan cig byed pa'i rgyu dag dang ma phrad na sdod cing ring du thogs te/ rang gi shugs 'byin par byed de/ de ldang ba'i rgyu gang yin tshe ma tshang bas nad skyed pa'i nus pa dang mi ldan pa tshe 'gyur ba'i rgyu gzhan dag la sdod cing rgyu mang po la bzhes pas na de ldang bas na 'gor ba yin no/ /de nas de dus dang gnod bya dang / yul dang rang bzhin gyis stobs kyi nus pa thob cing skyes nas ldan par byed do/ /de'i tshe gzhan dag la brten kyang zhes bya ba la/ pha rol po dag la brten kyang gnas kyang rgyu'i tshogs pa rnyed na ldang bar 'gyur ro/ /de la gnas gzhan gnas pa ni/ /de nyid stobs ni med nyid la/ /gso bar bya ba rang gi ni/ / stobs kyis gzhan zil gnon byed na'o/ /zhes bya ba la de la nad rnams langs nas gzhan dag na gnas pa'i tshe de nyid gso bar bya'o/ /zhes bya bar sbyar ro/ /de la zhes bya ba ni/ nges par bzung ba ste/ nad de rnams kyi nang na gzhan na gnas pa de nyid ces pa de dang 'brel ba'i bla thabs su zhugs pa dang / 'brel pa de ni gzhan gyi gnas na gnas pa'o/ /de yang ji lta bu zhe na/ stobs ni med ces bya ba ste/ snga na yod pa'i nad stobs chung ba gzhan dag la gnas pa'i bla brnan la gso ba bya'i/ nad snga ma stobs dang ldan pa la/ bla thabs su byung ba la bla brnan dang po gso ba ni nges par bzung ba ste/ gnas gzhan dang 'brel pa de nyid bla brnan du gyur pa yin no/ /yang na snga ma stobs chung ba gzhan dag la gnas pa dang ldan pa la gnas na ci zhig bya zhe na/ rang gi ni/ stobs kyis gzhan zil gnon byed na'o/ /zhes bya ba yin te/ rang nyid gzhan gyi gnas na gnas pa na gso ba bya'i/ gzhan gyi gnas dang 'brel ba'i ni ma yin te/ ji lta bu zhe na/ stobs kyi rang gi nus pas nad gzhan zil gyis gnon cing rgyal bar nus pa de gso bar bya ste/ gang stobs dang ldan pa gso ba'i don no/ /ci gso ba'i nges par 'dir zad dam/ rnam pa gzhan dag kyang 'di la yod ce na/ de'i phyir smras pa ni/ bla brnan nad ni zhi byas na/ /rang gnas gnas pa gso mi dgos/ /zhes bya ba ste/ nad bsal ba'i cho ga ji skad bshad pas bla brnan nad stobs chung ba yin no/ /zhi bar bya zhing rnam par bsal na rang gi gnas na gnas pa yang gso mi dgos te/ bla brnan stobs can la ni rang gi gso ba dang 'dra bar gso dgos so/ /des na gzhan gyi gnas su song ba'i nad ni stobs chung ba yin yang de nyid gso bar bya'o/ /yang na rang gi gnas na gnas pa'i nad gsos nas/ de'i 'og tu bla brnan gsor yang rung ngo / /stobs dang ldan pa'i nad gzhan gyi gnas na gnas pa la ni rang gi dang 'dra bar gso bar bya'o/ /da ni gzhan gyi rtsib logs su 'gro ba'i nad rnams la mchog tu gso bar bya ba bstan pa'i phyir smras pa ni/ phal cher rtsib logs 'gro ba'i nad/ /nad pa yun ring nyon mongs byed/ / lus me'i stobs ni shes pa yis/ /de la rings thabs dag mi bya/ /de ni sbyor bas zhi ba'am/ /khong du bde bar bsdu bar bya/ /khong du 'dus par shes nas ni/ /ji ltar nye ba bzhin du bsal/ /zhes bya ba yin te/ phal cher zhes pa mang du rtsib logs su 'gro zhing rtsib logs g.yas g.yon na rgyu ba'i nad rlung la sogs pa ni nad pa sdug bsngal ba dang ldan pa yun ring zhing dus ring du nyon mongs shing sdug bsngal bar byed do/ /nad rtsib logs su 'gro ba de rnams la de ni lus kyi me stobs shes shing rtogs pa'i sman pas nad de las myur ba rings thabs su de'i gso ba dag mi bya'o/ /'o na ci zhig bya zhe na/ nad sbyor bar shes pa rigs pa dang ldan pas zhi bar bya ba'am/ khong pa'i nang du bde bar bsdu zhing nang du chud par byas la/ de'i 'og tu gzod gso'o/ /de yang nad de khong du 'dus shing chud par shes nas rtsib logs su 'gro ba'i nad de nang du bsdus nas/ sna'am kha'am bshang ba'i sgo la sogs pa nad gang dang nye ba'i lam de nas skyug sman la sogs pas bsal bar bya zhing phyir gdon par bya'o/ /rlung la sogs pa'i dri ma rtse ma zhil zhing me zhu ba'i bu ga 'gags pa la sogs pa'i spyi'i mtshan nyid bstan pa'i phyir smras pa ni/ bu ga 'byung 'gags stobs nyams shing / /lci zhing rlung ni khung du 'khrul/ /khong snyom mi 'ju mchil ma mang / /bshang gci sri dub zas mi len/ /nad rtse ma zhil spyi yi rtags/ /rtse zhil de las bzlog pa yin/ /zhes bya ba la/ bu ga 'byung ba 'gags pa ni/ /nad gyen du mi 'byung ba'o/ /stobs nyams pa ni stobs bcom pa'o/ /lci ba ni lus dang yan lag lci ba'o/ /rlung khung du 'khrul ba ni rlung gsal bar mi rgyu ba'o/ /khong snyom pa ni spro ba chung ba'o/ /mi 'ju ba ni zas 'ju bar mi byed pa'o/ /mchil ma mang ba ni mchil snabs 'dzag pa'o/ /bshang gci sri ba ni bshang ba la sogs pa 'gags pa'o/ /dub pa ni nyams bri ba'o/ /zas 'bri ba ni zas la sred pa med pa'o/ /de lta bu'i rtags rnams ni/ nad rtse ma zhi la zhing gting ma phyin pa'i spyi'i rtags yin no/ /rtse zhil de las bzlog pa yin/ /zhes bya ba ni/ rtse bcil zhing nad zhi ba'i rtags ni bshad ma thag pa'i las go bzlog pa ste/ de yang rtsa sbubs dag pa dang stobs skye ba dang / yang ba nyid dang / rlung lugs su 'byung ba dang / khong snyom pa med pa dang / zas 'ju ba dang mchil ma nyung ba dang / dri ma rnams bde bar 'byung ba dang / zas yi gar 'ong ba dang / spro ba dang ldan pa ste/ 'di dag ni nad med pa'i mtshan nyid yin no/ /yang ma zhu ba'i mtshan nyid ci zhig dang ldan na/ rlung la sogs pa la ma zhu ba'am/ nad kyi lhag ma dang bcas pa zhes bya zhe na/ de'i phyir smras pa ni/ khong pa'i drod stobs chung nyid kyis/ /lus zungs/ dang po mi 'ju ba/ /nad ni pho bar zhugs pa dag /dngas ma ma zhu yin par bshad/ /ces bya ba la sogs pa yin te/ lus zungs kyi dang po dang / dngas ma chen po zhes bya ba ste khong pa'i drod chung ba nyid kyis 'ju zhing smin par ma gyur pa rlung la sogs pa'i nad dang 'dres pa rang gi gnas pho bar zhugs pa gnod par 'gyur pa de ni dngas ma ma smin cing ma zhu ba yin no/ /zhes la la dag 'dod do/ /gzhan dag nad nyid rab 'khrugs pa/ /rab gdug phan tshun 'dom las byung / /ko dra ba yi dug bzhin du/ /nad tshabs chen po 'byung bar bshad/ /ces bya ba la/ slob dpon gzhan dag ni ma zhu ba'i 'byung ba'i tshul du 'dod de/ rlung la sogs pa'i nad nyid rab tu 'khrugs shing shin tu sogs pa las dus phyis zhig na kha zas mang ba rab tu gdug pa phan tshun gcig la gcig 'dom zhing 'dres par gyur pa nyid las ma zhu ba 'byung bar 'dod de/ de yang dper na ko dra zhes bya ba'i 'bru las dus dang yul gyi rgyu la ltos na dug tu 'gyur bar bshad do/ /des na 'di skad ston par 'gyur te/ dper na ko dra ba nyid dug tu 'gyur ba bzhin du nad rnams kyang tshabs chen por 'khrugs pa las rang nyid cha las ma zhu ba 'byung bar 'gyur ro/ /de bas na lus la sogs pa las ma zhu ba'i don gzhan dag yin par shes par bya ba'i phyir smras pa ni/ nad tshabs de dang 'dres pa dang / /gnod pa gnod bya gnod 'gyur dang / /nad gzhan gang dag de las byung / /ma zhu ba dang bcas par bshad/ /ces bya ba la/ ji skad bshad pa'i ma zhu ba de dang / rlung la sogs pa'i nad 'dres shing / gcig tu gyur pa la ma zhu ba dang bcas pa zhes bshad do/ /de bzhin du gnod bya ste dngas ma la sogs pa'i lus zungs rnams dang bshang ba la sogs pa'i dri ma de rnams dang ma zhu ba de nyid kyis gnod par gyur pa la ma zhu ba dang bcas pa zhes bya'o/ /de bzhin du nad gzhan gang dag rlung khong du 'khyil pa la sogs pa de las byung ba de rnams ni nad ma zhu ba dang bcas par bshad do/ /ci de dag bkru sman dang skyug sman la sogs pas mod la 'byung bar bya'am/ 'on te bsal bar mi bya zhe na/ de'i phyir smras pa ni/ de ni lus kun zhugs gyur pa/ /nad nang zhugs te rtse ma bcil/ /ma smin dbyung bar mi bya ste/ /ma smin shing thog khu bar mtshungs/ /zhes bya ba la/ ma zhu ba dang 'dres shing lhan cig gnas pa'i nad de/ lus kun tu khyab cing mgo nas rkang pa'i bar du zhugs pas khyab par byas pa/ nad nang du zhugs pa rtsa dang rgyus pa phra mo yan chad kyi tshigs la khyab cing zhugs pa dngas ma la sogs pa'i lus zungs la zhen cing dbyung dka' ba/ gnas las ma 'gul ba de/ smin cing snyi bar ma byas par slon sman la sogs pas dbyung bar mi bya ste/ de ni smin pa'i cho ga ma byas par phyung na gnod pa chen po nyid du 'gyur ro/ /'di nyid dpes bstan par bya ba'i phyir/ ma smin shing tog khu bar mtshungs/ /zhes bya ba smos pa yin te/ mtshungs zhes bya ba'i sgra ni 'dra ba'i don te/ dper na ma du lung ka dang / skyu ru ra dang rgun 'brum sogs pa'i shing tog ma smin cing ma tshos pa las/ khur ba btsir ba na khu ba thams cad 'byung bar mi nus kyi/ 'bras bu nyid rlag par 'gyur te/ dus la ma bab pa'i phyir ro/ /de nyid kyis na dpe bstan pa'i don gsal bar bshad pa'i phyir smras pa ni/ de ni dbyung bar dka' bas na/ /rten ni 'jig par byed par 'gyur/ /zhes bya ba yin te/ gang gi phyir nad ma smin pa de gnod par byed cing / lus kun la khyab pa lus zungs la zhen zhing 'dres pas smin pa'i cho ga ma byas par dbyung dka' ba yin te/ des na rten zhes bya ba lus nyid 'jig cing nyams par byed par 'gyur te/ shin tu dka' bas cung zad tsam yang dbyung bar mi nus pa yin no/ /de dag gi sman ci zhig yin pa bstan pa'i phyir smras pa ni/ de ni smin dang drod skyes snum/ /dugs bya rtse bcil de bsil ba/ /ji ltar nye dang stobs ji bzhin/ /sbyang ba'i dus su bsal bar bya/ /zhes bya ba la/ nyes pa de smin pa la sogs pa bya ste/ nad rnams smin cing zhu bar byed pas ni smin bas te/ de'i phyir smras pa ma smin pa lus zungs la zhen pa dbyung bar dka' ba ste/ smin pa la sogs pa'i rim gyis gnas par bya la/ de'i 'og ji ltar nye ba dang stobs ji lta ba bzhin du sbyang ba'i dus la bab pa dang / sbyang ba'i sman gyis bsal bar bya'o/ /de la ji ltar nye ba ni nad gang lam gang dang nye ba/ nad de lam de nyid nas bsal bar bya'o/ /de yang ma zhu ba'i gnas la gnas pa ni skyug sman gyis bsal bar bya'o/ /zhu ba'i gnas la gnas pa ni mas gtong bas bsal bar bya'o/ /mgo bo la gnas pa ni sna nas btang bas so/ /stobs ji lta ba bzhin zhes bya ba stobs dang nad tshabs shin tu che ba ni/ sman rno ba dang tshad che bas bsal bar bya'o/ /stobs 'bring tsam ni 'bring tsam gyis so/ /stobs chung ba ni 'jam pos so/ /de dag nyid bsal bar bya ba'i phyir smras pa ni/ kha nas rigs par sman btang bas/ /ma zhu'i gnas las nad myur bsal/ /nam tshong yan chad sna sman gyis/ /zhu ba'i gnas yod mas gtong bsal/ /zhes bya ba yin te/ kha nas ci rigs par sman btang bas ma zhu ba'i gnas las nad myur du bsal zhing gdon par bya'o/ /nam tshong yan chad kyi nad ni sna nas sman btang bas bsal bar bya'o/ /zhu ba'i gnas lte ba man chad na gnas pa dag ni mas gtong ba ste/ bshang sgo nas sman btang bas nad myur du bsal bar bya'o/ /nad 'byung bar rtsom pa'i ma smin par ni rang nyid 'byung yang dgag par mi bya ste/ khrag mkhris dang tshad par 'khru ba dang por 'byung ba na/ dgag par mi bya ste/ de ni nad du ma'i rgyur 'gyur ro/ /zhes bstan pa'i phyir/ steng ngam 'og tu 'byung bar rtsom/ /nad ni rang nyid 'byung bas na/ /sman gyis nad ni mi dgag ste/ /bkag na de nyid nad skyed 'gyur/ /zhes bya ba la/ steng gi lam kha dang sna zhes bya ba la/ 'og gi lam bshang sgo dang gci sgo las nad rnams 'byung bar rtsom zhing phyir phyogs par smras nas 'thags pa ma smin par gyur ba de/ rang nyid 'bad mi dgos par 'byung zhing 'bad pas na/ sman gyis gcad pa'i tshul gyis nad de mi gzhag cing dgag par mi bya'o/ /de yang gang gi phyir smin pa'i nad rang nyid 'byung bar rtsom pa ste/ nan gyis bkag na de nyid nad skye ba'i rgyur 'gyur ro/ /de bas dang por nad 'byung la/ /bsdad de phan pa bza' bar bya/ /zhes bya ba la/ de bas rgyu de'i phyir dang por nad 'byung ba la nan gyis bkag pa ni shugs bkag pa'i rgyur 'gyur bas sman gyis mi bzlog par btang snyoms su bya zhing bsdad par bya'o/ /gang gis she na/ phan pa bza' zhes bya ba ste/ nad pa zas su mthun pa'i kha zas phan zhing bsod pa bza' zhing longs spyad par bya'i/ der ni dgag par yang mi bya la/ sbyang bar yang mi bya ste/ rang nyid 'byung ba yin pa'i phyir/ btang snyoms su sdod pa nyid 'dir sman yin no/ /'khyil la smin pa de dang des/ /smin byas de bzhin bsal bar bya/ /zhes bya ba la/ ma smin pa'i nad de 'khyil zhing 'gags na/ smin par byed pa'i sman de dang des smin par byas shing dbyung du rung bar byas nas/ de bzhin du sngar ji skad bstan pa'i lam nas 'byung zhing bsal bar bya'o/ /sngar nad kyi dkyel sogs dus su bsal zhes smos na/ de ci ltar bsal bar bya zhe na/ de'i phyir smras pa ni/ dbyar ston tha chungs dpyid zla 'bring / /thun mong dus su rim bzhin du/ /so ga dbyar dang dgun bsags pa'i/ /rlung sogs nad ni myur du bsal/ /zhes bya ba la sogs pa yin te/ so ga la sogs pa dus gsum ni gso bar bya ba bsags par 'gyur ba'i nad ni dbyar zla tha chungs dang / ston zla tha chungs dang / dpyid zla 'bring po dag thun mong gi dus yin pas/ rim bzhin du bsal bar bya ste/ so ga'i dus su bsags pa'i rlung dbyar zla tha chungs la bsal bar bya'o/ /dbyar bsags pa'i mkhris pa ston zla tha chungs la bsal bar bya'o/ /dgun bsags pa'i bad kan dpyid zla 'bring po la bsal bar bya'o/ /so ga dbyar dang dgun gyi tshe/ /rab tsha char dang grang ba'i dus/ /zhes bya ba la/ gang gi phyir so ga dang dbyar dang dgun gyi tshe ni rim pa bzhin du rab tu tsha ba dang / char 'bab pa dang grang ba'i dus yin no/ / de la rab tu tsha ba ni so ga'i dus so/ /rab tu char pa 'bab pa ni dbyar gyi dus so/ /rab tu grang ba ni dgun gyi dus so/ /de rnams dus mtshungs thun mong ste/ /de tshe nad ni mi bzad bsal/ /zhes bya ba la rab tu tsha ba dang / char 'bab pa dang / grang ba'i dus so ga dang dgun zhes bya ba/ dro ba dang char 'bab pa cha mnyam pa'i dus de'i tshe/ rlung la sogs pa'i nad mi bzad cing gnod pa bsal zhing sbyang bar bya'o/ /tha mal bder gnas dbang byas kyi/ /nad pa nad kyi dbang du ni/ /grang tsha char gyi dus dag gi / gnyen po ci bzhin byas nas ni/ / sbyor ba'i dus su bab pa na/ /bya ba dus la mi sdod do/ /zhes bya ba la/ ngas de ltar bshad pa ni/ tha mal par bde bar gnas pa'i dbang du byas shing / de la dmigs nas thun mong gi nyin zhag rnams la/ slon sman la sogs pa btang ba bshang ba yin gyi/ nad pa'i dbang du byas nas smras pa ni ma yin te/ de'i nad ni gnod par byed drags pa yin pas btang snyoms su gzhag ste/ gsor rung ba yang gsor mi rung bar 'gyur ro/ /de la nad pa la ni nad skyed par gyur pa'i nad kyi dbang du byas nas/ nad dang rjes su mthun par grang ba dang tsha ba dang / char gyi dus dag gi gnyen po ji lta ba bzhin du bcos ma ma yin pa legs par bya zhing dus kyi yon tan ji lta ba las go bzlog pa dang / sbyor ba dang las bya ba dang / tshad brtags pas sman gyi las nye bar sbyar zhing / ma yengs pa kho nar nye bar sbyang bar bya'o/ /de yang gnyen po ji lta ba bzhin du bya ba ste/ grang ba dang dro ba dang / dro la grang bar bya ba dang / sbyor ba'i dus te/ nad kyi dbang gis gso bar bya ba'i dus su bab pa na/ bya ba'i dus de la mi bsdad kyi/ dus las mi 'da' bar bya'o/ /sman ni zas ma zos sngon dang / /dbus dang mtha' dang kham gyi bar/ /zas bar tseg bu zas bcas dang / /zas mnan mtshan mo btung ba'o/ /zhes bya ba la/ sman dus skabs bcur sbyar zhing gtang bar bya'o/ /de la zas ma zos pa ni gang du sman gcig pu dgos pa de la ni zas ma zos pa zhes bya'o/ /sngon dang zhes pa ni zas za ba'i sngon du sman zos na/ de'i rjes thogs nyid la'o/ /dbus ni gang zas kyi bar du'o/ /tha ma ni zas zos pa'i rjes thogs la'o/ /kham gyi bar zhes bya ba ni sman gyi kham zas dang 'dres mar bza' ba'o/ / zas bar du zhes bya ba ni gang zas kyi bar bar du bza' ba'o/ /tseg bu ni yang yang skad cig re re zhing zas zos pa'am/ ma zos pa'i skabs su za ba'o/ /zas bcas ni zas dang lhan cig bcos pa'am/ phyis bsres te bza' ba'o/ /zas mnan ni kha sbyar gyi tshul du sngar sman zos nas bar du zan za ba ste/ phyis kyang sman gyis mnan pa'o/ /bad kan bdo 'das nad pa ni/ /nyams stobs ldan la ma zos gtang / /zhes bya ba la/ bad kan gyi shas che zhing bdo ba'i dus 'das shing bad kan ldang ba'i dus tshod yol ba'i nad dang / nad pa nyams stobs dang ldan pa la/ zas ma zos pa'i sngar zas med par gtang bar bya'o/ /thur sel rlung la zas sngar gtang / /mnyam gnas ldang la bar du yin/ /zhes bya ba la/ thur du sel ba zhes bya ba'i rlung gi nad ldang bar gyur na/ zas kyi dang po nyid du sman btang la/ de'i rjes thogs kho na la zas bza' bar bya'o/ /rlung me dang lhan cig gnas pa zhes bya ba ldang bar 'gyur la/ zas kyi bar du sman bza' bar bya ste/ zas kyi phyed zos pa dang / bar du sman zos pa dang / de'i 'og tu zas lhag ma rnams bza' bar bya'o/ /khyab byed nang par zas za'i mtha'/ /gyen rgyu'i rlung la dgongs ka'o/ /zhes bya ba la/ rlung khyab byed ces bya ba ldang bar gyur pa na/ nang par na snga dro zas za ba'i mtha' ma rdzogs kar sman gtang bar bya'o/ /gyen du rgyu ba zhes bya ba la/ dgongs ka'i zas bza' ba'i mtha' mar sman bza' bar bya'o/ /srog ces bya ba'i rlung ldang la/ /kham gyi bar dang zas bar bza'/ /zhes bya ba la/ srog ces bya ba'i rlung ldang zhing / 'khrugs pa la kham gyi bar dang / de bzhin du zas kyi bar te/ dbus su sman bza' bar bya ste/ yang kham spag cing bza' bar bya'o/ /bza' ba'i bar bar du bza' ba'o/ /dug dang skyug lud dbugs mi bde/ /skom dad skye la tseg bu'o/ /zhes bya ba la/ dug 'thungs pa dang skyugs pa dang / lud pa dang dbugs mi bde ba dang / skom dad skye ba la tseg bur yang yang bza' ba zas zos sam/ ma zos pa'i skabs su bya'o/ /yi ga 'chus la sna tshogs zas/ /sman dang zas bcas sbyar bar bya/ /zhes bya ba la/ bad kan gyi shas che ba zas mi 'dod pa la/ sman sbyin par bya ba ni/ sna tshogs pa'i zas du ma dag dang / lhan cig sman sbyin par bya ba yin pas na/ zas dang bcas par sbyar bar bya'o/ /skyigs bu lus 'dar lag 'dar dang / /zas nyung za la mnan pa gtang / /zhes bya ba la/ skyigs bu la sogs pa'i nad rnams dang / zas nyung ngu za ba la sman gyis mnan pa gtang bar bya ste/ sman gyis mnan pa zhes bya ba ni gang zas kyi sngon dang phyi nas sman btang la/ gang gis zas de za ma tog gi nang du bcug pa ltar sman gyis steng 'og nas btab ste/ gnas pa de la mnan pa zhes bya'o/ /nam tshong yan chad nad la ni/ /mtshan mo'i dus su btang ba bsngags/ /zhes bya ba la/ nam tshong yan chad kyi nad mig dang gdong 'gyur ba la sogs pa'i nad la mtshan mo nyal khar sman btang ba rab tu bsngags shing mchog tu 'dod par bya ba yin no/ /yan lag brgyad pa'i snying po'i rnam par 'grel pa tshig gi don gyi zla zer zhes bya ba slob dpon zla ba la dga' bas rnam par sbyar ba las le'u bcu gsum pa'i rnam par 'grel pa'o/ / //de nas gso ba'i thabs rnam pa gnyis bstan pa'i le'u bshad par bya'o/ /zhes bya ba la/ rlung la sogs pa'i nad rnams kyi gso ba'i thabs snum chos bya ba la sogs pa rnam pa du ma zhig bshad pa yin te/ rnam pa du ma zhig yod du zin kyang nyams brta ba dang / nyams smad pa'i tshul rnam pa gnyis las mi 'da' ba yin no/ /de bas na de'i 'og tu gso ba rnam pa gnyis kyi le'u brtsams pa yin la/ gso ba rnam pa gnyis po de ston cing gang du gso ba gnyis po de'i nges pa bstan pa'i le'u la ni gso ba'i thabs gnyis bstan pa'i le'u zhes bya ste/ de bshad par bya'o/ /zhes pa'o/ /gso ba gnyis pa'i rigs pa bstan par bya ba'i phyir/ gso ba rnam pa gnyis yin phyir/ /gso thabs rnam pa gnyis su 'dod/ /ces bya ba yin te/ gso ba rnam pa gnyis kho na ste/ gcig ni nyams brta ba'i tshul gyis gso ba'o/ /gnyis pa ni nyams smad pa'i tshul gyis gso bar bya ba yin te/ gang gi phyir gso bar bya ba'i nad dam/ yang na de ldan pa'i skyes bu ni nyams brta bas gso bar bya ba'am/ nyams smad pas gso bar bya ba yin gyi/ de las gzhan pa'i phyogs gsum po yod pa ma yin no/ /de bas na gso ba'i thabs ni rnam pa gnyis kho na yin la/ gso ba dang nad gso ba'i thabs dang bya ba'i rim pa zhes bya ba ni don gcig yin no/ /drang srong tsa ra ka'i gzhung la brten pa gzhan dag ni gso ba'i thabs smyung ba la sogs pa bzhir 'dod mod kyi/ smyung ba la sogs pa ni 'di nyid kyi nang du 'dus pa yin no/ /kho na zhes bya ba ni nges par bzung ba ste/ de nyid kyi phyir smras pa ni/ de gcig brta bar bya ba yin/ /gnyis pa nyams ni smad pa'o/ /zhes bya ba yin te/ gso ba de gnyis las gso ba gcig ni nyams brta ba'i tshul yin la/ /gnyis pa ni nyams btsag pa yin no/ /de dag rgyas bya smyung ba zhes/ /rnam grangs dag tu bshad pa yin/ /zhes bya ba la/ nyams brta ba dang / nyams smad pa de dag ni go rims bzhin du rgyas par bya ba dang / smyung ba zhes bya ba'i sgras ming gi rnam grangs dag tu bshad cing bstan pa dag lung shes pa dag gis byas pa yin te/ de dag gi dkyil ming gi rnam grangs bstan pa tsam du zad de/ zhes bya ba'i don to/ /lus sha rgyas phyir rgyas bya ste/ /yang ba nyid phyir smyung bar bya/ /zhes bya ba ni/ de la rgyas par bya ba ni lus kyi sha 'phel zhing rgyas par bya ba'i don byed pa ste/ dper na sha dang 'o ma la sogs pa lta bu'o/ /gang lus kyi yang zhing srab pa nyid du gang gis byed pa de ni smyung bar bya ba zhes bya ba'o/ /de dag kyang ci lta bu'i bdag nyid can yin zhe na/ de'i phyir smras pa ni/ de ni phal cher sa chu dang / /cig shos las ni gyur pa yin/ /zhes bya ba yin te/ rgyas par bya ba dang smyung ba de gnyis ni/ sa dang chu dang cig shos las ni gyur pa yin te/ de yang sa dang bcas pa'i chu yin na sa chu'o/ /des ni 'di skad ston te/ sa dang chu'i rang bzhin can gyi rdzas ni rgyas par byed pa yin te/ de gnyis kyi ngo bo nyid de yin pa'i phyir ro/ /smyung ba ni de las gzhan pa cig shos te/ gang cig shos she na/ 'dir de'i skabs yin pas/ sa dang chu las cig shos me dang rlung dang nam mkha'i bdag nyid can yin no/ /phal cher zhes smos pas ni shin tu rgyas par byed pa ni sa dang chu yin la/ shin tu smyung bar byed pa ni cig shos me dang rlung dang nam mkha' yin pas na de skad ces bya'o/ /me dang rlung dang nam mkha' la rgyas shing 'phel bar 'gyur ba ye med pa ma yin la/ sa dang chu la yang smyung ba ye med pa ma yin te/ sman rnams ni 'byung ba lnga'i bdag nyid can yin pa'i phyir ro/ /sbrel gzhir gnas pa yang srid do/ /las gang snum dang dgag pa dang / /dugs dang khong rtsub bya ba ste/ /'byung ba de yang gnyis yin phyir/ /gnyis las 'da' bar mi byed do/ /zhes bya ba la/ gso ba'i thabs med du smras pa dag yod pa'i phyir/ 'dir smras pa yin te/ 'di nyid kyis las snum bag la sogs pa bzhi po bshad pa gang yin pa/ 'di'i las yin gyi/ brta bar bya ba dang nyams smad par bya ba ltar snum la sogs pa bzhi po 'di dag don tha dad pa ma yin no/ /'byung ba'i las bzhi po de dag kyang brta ba dang nyams smad pa gnyis kyi tshul can yin pa'i phyir gnyis po de las 'da' bar mi byed do/ 'byung ba rnams brta ba dang nyams smad pa'i rang bzhin gnyis kyis rnam pa gnyis yin pa'i phyir dang / de bzhin du me dang zla ba'i rang bzhin rnam pa gnyis dang ldan pa yin pas/ de las rgyas pa'am/ 'phel ba dang / smyung ba gnyis las 'da' bar mi byed do/ /de yang snum dang bsdam par bya ba'i zla ba'i rang bzhin pas brta ba'i sde tshoms su gtogs la/ rtsub pa dang dugs bya ba ni me'i rang bzhin can yin pas smyung bar gtogs te/ des nas la sogs pa'i 'byung ba rnams brta ba dang nyams smad pa'i tshul can yin no/ /da ni de gnyis kyi so so'i dbye ba smras pa ni/ de la'ang sbyang dang zhi bya ba/ /rnam pa gnyis po smyung ba yin/ /zhes bya ba la/ de la zhes bya ba ni nges par gzung ba ste/ nyams brta ba dang nyams smad pa zhes bya ba ming gi rnam grangs rnam pa gzhan du na/ rgyas par bya ba dang / smyung ba zhes bya ba la gang 'di smyung ba'am/ nyams smad pa zhes bya ba de ni rnam pa gnyis te/ sbyang ba dang zhi ba zhes bya ba yin te/de las lhag pa'i smyung ba yod pa ma yin no/ /yang na rnam pa 'di lta bu'i tshul gyis rnam pa gnyis pa ni smyung ba yin te/ gzhan du na 'og nas bshad pa'i tshul gyis rnam pa bcu gnyis su 'gyur ro/ /de las rang gi mtshan nyid dang de bzhin du de'i dbye ba bstan pa'i phyir smras pa ni/ /gang zhig nad ni phyir 'byin pa/ /sbyang yin de ni rnam lnga ste/ /mas gtong skyug sman lus nad bkru/ /mgo yi nad bkru gtar gas dbyung / /zhes bya ba yin te/ sman gang nang na yod pa'i nad phyir 'byin par byed pa ni sbyang ba zhes bya ba la/ sbyang ba de yang mas gtong ba la sogs pa'i dbye ba rnam pa lnga yin no/ /de la mas gtong ba ni bshang ba'i sgo nas/ sman dang mar la sogs pa bskol te gtong ba'o/ /skyug sman ni nad rnams gyen du drang ba'o/ /lus kyi nad bkru ba ni nad thur du dbyung ba'o/ /mgo bo'i nad bkru ba ni lus kyi phyogs gcig mgo bo zhes bya ba gcig pu'i nad sman sna nas btang bas gyen du drang ba ni mgo bo'i nad bkru ba'o/ /gtar gas dbyung ba ni khrag rtsa'i sgo la sogs pa las phyir gdon pa'o/ /de ni zhi ba'i mtshan nyid dang / de bzhin du dbye ba bshad pa'i phyir 'di smras pa yin te/ gang zhig nad ni mi sbyong dang / /snyoms gnas glongs pa ma yin dang / /ma snyoms snyoms par byed pa dag /zhi ba yin te de rnams bdun/ /smin dang drod skyed bkres skom dang / /rtsol bcag nyi tshan ser bu bsil/ /zhes bya ba la/ sman gang zhig gis rlung la sogs pa'i nad mi sbyong zhing / nang na gnas pa phyi rol tu ma bton pa dang / de bzhin du snyoms par gnas shing cha mnyam par rang gi tshad du gnas la glongs pa ma yin zhing rang gi gnas nas mi bsgul ba dang / de bzhin du ma snyoms pa ste/ rang gi tshad las lhag pa'am/ ma tshang ba'i tshul du gnas pa dag snyoms par byed cing / rang gi tshad dang ldan par byed pa'i sman de ni zhi ba zhes bya ba yin la/ zhi ba de ni smin pa nyid la sogs pa'i dbye bas rnam pa bdun yin no/ /de la smin pa ni smin par byed pas na smin pa ste/ pho ba'i me drod kyis 'ju ba'i bya ba rdzogs par byed cing / de smin cing 'ju ba'i nus pa lhag par skyed par byed pa'i sman gang yin pa'am/ bya ba gang yin pa la smin pa zhes bya ba ste/ dper na tig ta la sogs pa lta bu'am/ smyung ba bya'o/ /drod skyed ces bya ba 'dis drod skyed par byed pa ste/ dper na tsha ba gsum dang / tsha ba lnga la sogs pa'i sman gang gis me'i drod shin tu 'phel bar byed pas/ zas 'ju bar byed pa de'i nus pa lhag par nye bar 'phel bar byed pa de la drod skyed ces bya'o/ /de yang legs thos kyis/ ma smin pa ni smin byed cing / /mnyam gnas de ni zhi ba yin/ /drod skyed me drod shin tu skyed/ /ched 'ga' smin byed yang na min/ /zhes bshad pa yin no/ / gzhan dag ni go bar zad do/ /da ni rgyas pa'am brta bar bya ba bshad de/ brta ba dag ni rlung dang ni/ /rlung bcas mkhris pa zhi byed yin/ /zhes bya ba la/ ni zhes bya ba ni khyad par byed pa yin pa'i don te/ brta ba ni smyung ba las tshul 'dis khyad par du bya ba yin te/ brta bar byed pa 'o ma la sogs pa yang sbyor zhing 'khru bar byed mod kyi/ sbyor ba ni nyams dmod pa'i bdag nyid can yin pas de las kyang rlung 'ba' zhig gam/ mkhris pa dang bcas pa ldang bar byed de/ dper na smyung ba las a ru ra la sogs pa'i sbyor ba byed pa'i sman gyis ldang bar byed pa yin pas/ de'i phyir brta ba'i khyad par ston te/ brta ba'i rdzas 'o ma la sogs pa'i sbyor ba'am zhi ba ni/ rlung 'ba' zhig gam mkhris pa dang bcas pa zhi bar byed kyi/ smyung ba'i sbyor ba ltar nad skyed par ni mi byed do/ /de ltar na smyung ba las brta ba'am/ rgyas par bya ba khyad par du 'phags pa yin/ des na brta ba dag ni rlung dag ste/ mkhris pa dang bcas pa zhi bar byed pa yin gyi/ ldang bar byed pa nyid ma yin no/ /nyid ces bya ba ni nges pa'i don te/ rlung 'ba' zhig dang / de bzhin du de nyid mkhris pa dang bcas pa dag gi yin gyi/ mkhris pa 'ba' zhig gam/ bad kan mkhris pa dang bcas pa'am/ 'dus pa'i nad dag la brten pa de zhi bar byed pa ma yin no/ /de ltar na brta ba'i nyes pa'i yul des zhi ba yin par nges pa yin no/ /da ni brta bar bya ba'i dngos po gang dang gang yin pa brta bar bya ba'i phyir 'di smra ba yin te/ brta bya nad dang sman dang chang / /bud med mya ngan gyis nyam chung / /khur dang lam gyis glo rdol dang / /lus rtsub nyams dma' rlung shas che/ /sbrum ma bu btsas byis pa rgan/ /so ga'i dus dang gzhan yang brta/ /zhes bya ba la/ 'di dag la nyam chung ba zhes bya ba'i sgra kun la sbyar bar bya ste/ des na nad kyis nyam chung ba dang / sman 'thungs pas nyam chung ba dang / bud med la brten pas nyam chung ba dang / mya ngan gyis nyam chung ba ste/ de dag brta bar bya'o/ /de bzhin du rtag tu khur gyis dub pa dang / rtag tu lam gyis dub pa dang / glo rdol ba dang / gcang chen po dang / lus rtsub pa dang / nyams dma' ba dang / rlung gi shas che ba dang / sbrum ma dang / bu btsas pa dang / byis pa dang / rgan po dag kyang rtag tu brta ba'i cho ga dag kyang bya'o/ /de bzhin du so ga'i dus dang / gzhan yang zhes pa 'dir ma bstan pa'i gso bar 'os pa nad pa'am/ tha mal pa'i gnas skabs thams cad brta bar bya ba dang / yang de bzhin du so ga'i dus de'i tshe/ nad kyis nyam chung ba la sogs pa lhag par yang gso bar bya'o/ /de la gang gis brta zhe na/ de'i phyir smras pa ni/ sha dang 'o ma kha ra dkar/ /mar sar mngar bag mas gtong dang / /gnyid log nyal bde bsku byug dang / /khrus dang bder gnas nyams dga' brta/ /zhes bya ba smras pa yin te/ de la sha ni sngar bshad pa rnam pa brgyad do/ /'o ma yang de bzhin no/ /kha ra dkar po ni sha kha ra dag go/ /mar sar ni mar ro/ /mngar bag kyang yin la mas gtong ba yang yin pas na mngar bag mas gtong ste des brta ba'o/ /gnyid log pa'i bde ba ni nyal ba'i bde ba ste/ gnyi ga la yang bde ba'i sgra sbyar ro/ /bsku byug ni lus til mar la sogs pas bsku ba'o/ /khrus ni lus chu dron pos bkru ba'o/ /bde bar gnas pa ni sems dga' ba'o/ /nyams dga' ba ni mgu ba nas dga' ba ste yid dga' ba'o/ /da ni smyung ba ston te/ gcin snyi ma zhu snum rab zos/ /rims btab brla rengs mdze nad can/ /shu ba khong 'bras mcher pa na/ /klad nad lkog nad mig nad dang / /sbom po dgun dang gzhan dag kyang / /rtag tu smyung ba bya ba yin/ /zhes bya ba la/ gcin snyi ba dang / ma zhu ba la sogs pa'i nad yod pa la rtag tu smyung ba bya'o/ /de bzhin du dgun dang / gzhan ma bstan pa nad kyi 'gyur ba gzhan dag la yang bya ste/ stobs rdzogs pa yin pa dang / bad kan la sogs pa'i 'jigs pas smyung ba bya ste/ gzhan dag kyang zhes bya ba 'dis nad pa la bya ba yin gyi/ gzhan du na bde bar gnas pa'i tshe ni dgun stod dang / dgun sman brta ba'i cho ga khyad par dang bcas pa smras pa yin no/ /da ni sbyang ba'i yul las brtsams te smras pa ni/ de la sbyang bya shas che sbom/ /stobs ldan mkhris pa bad kan rgyas/ /zhes bya ba yin te/ de la sbyang bar bya ba ni shas che zhing sbom pa dang / stobs dang ldan pa dang / mkhris pa dang / bad kan rgyas pa ste/ nyams smad par bya ba de rnams kyi nang nas/ mtshan nyid gsum po 'di dag dang ldan pa'i mi/ sbyang ba rnam pa lnga po skyug sman la sogs pas ci rigs par sbyang zhing nyams smad par bya'o/ /ma zhu'i nad dang rims dang skyug /tshad pas 'khru dang snying nad can/ /lus lci sgregs mang bshang gci 'gags/ /yi ga 'chus sogs kyis na ba/ /'bring tsam sbom sogs phal cher ni/ /dang por smin dang drod bskyed bya/ /zhes bya ba la/ ma zhu ba dang / rims la sogs pa'i nad kyis nyen pa'i nad pa sha 'bring tsam du sbom par gyur pa dag la phal cher zhes pa ming du smin pa dang / drod skyed pa ni smyung ba'i rnam pas smyung bar bya'o/ /sogs pa'i sgras ni 'dir stobs dang mkhris pa dang bad kan dag bsdu'o/ /dang por ni thog mar te/ sngar smin pa dang / drod bskyed bskyed pas smyung ba bya la/ de'i 'og tu ci rigs pa'i smyung ba bya'o/ /phal cher zhes smos pa ni/ nad dang lus kyi nyams stobs la sogs pa rnams las brta'i thams cad du 'di ltar bya ba ma yin no zhes ston/ nad ni 'di dag gis nyam thag /sbom dang stobs sogs chung ba la/ /bkres dang sgom pas tshar bcad do/ /zhes bya ba ni/ sngar bshad ma thag pa'i nad rims la sogs pa 'di dag nyid kyis nyam thag cing gnod par 'gyur ba'i mi sha'i sbom tshad dang / stobs la sogs pa chung ba ste/ sha che ba'i shas chung zhing stobs zhan pa bad kan mkhris pa dang ldan pa dag la ni/ bkres pa dang skom pas tshar bcad pa ste/ ltogs pa dang skom pas nyen par bya ba'i shugs kyi smyung ba'i rnam pas nyams smad par bya'o/ /zhes bya ba'i don to/ /nad kyis nyam thag stobs 'bring brtan/ /ser bu tsha rtsol gyis smad na/ /nyam chung mi brta smos ci dgos/ /zhes bya ba la/ nad kyis gzir zhing nyam thag pa'i mi stobs che chung gnyi ga ma yin pa/ ran pa 'bring tsam yod pa nus pa brtan zhing che ba'i mi la ni ser bu bsil ba dang / nyi tshan dang / rtsol ba de dag shas cher bsten pas de nyams smad par bya zhing smyung ba bya'o/ /zhes bya bar nges par gnas nas/ nyams stobs chung zhing nad cung zad kyis khyab pa'i mi lta smos kyang ci dgos zhes pa'i don to/ /brta bar byas pa gang yin pa 'di dag dang nyams smad cing smyung bar bya ba gang yin pa 'di dag las gang yang brta bar bya ba la/ de la ni smyung bas mi gsol/ nyams smad par bya ba la ni brta bas mi gso zhes bstan la de ltar na rims la sogs pa smyung bas gso ba'i nad ni/ brta bar bya bar gyur bas the tshom du 'gyur te/ ci brta bar bya bar 'os pa'i mi smyung bas gso ba'i nad kyis nyam thag na/ smyung bas gso ba la 'jug par bya'am/ 'on te brta bar bya ba yin pa smyung ba'i nad yod kyang / skyes bu de brta bar bya zhes the tshom du gyur pa 'di la/ de bsal ba'i phyir 'dir smras pa yin te/ nyams smad bya ba brta mi bya/ /zhes bya ba yin te/ skyes bu nyams smad cing smyung ba bya ba ni nam yang brta bar mi bya ste/ ci'i phyir zhe na/ brta bar bya bas gso ba'i nad kyis nyam thag pa'i mi la slar nad skyed pa'i 'jigs pa yod pa'i phyir ro/ /brta bya nyams smad 'jam pos bya/ /zhes bya ba ni/ gang yang brta bar bya ba'i skyes bu de/ smyung bar bya ba'i nad kyis nyam thag na/ nyams smad pa 'jam pos bya zhing / smyung ba'i rnam pa 'jam pos byas na/ nyams smad pa de la nad ldang bar mi 'gyur ro/ /de dag ni brta bar bya ba dag tshad che ba dang bar ma dang chung ba'i zas skom gyi tshad de dag gi don shes par bya ba'i phyir/ de skad bshad pa yin no/ /yang na yul dang stobs sogs las/ /rigs pas de ni nye bar spyad/ /ces bya ba ni/ smyung bar bya ba brta bar mi bya ba dang / brta bar bya ba nyams smad pa 'jam pos bya ba ni thams cad du nges pa yin mod kyi/ 'on kyang gzhan gyi ni yang na yul dang stobs la sogs pa las rigs pa'i sbyor bas brta bar bya ba smyung ba'i nad kyis nyam thag pa de'i gso ba nye bar spyad par bya'o/ /sogs pa'i sgras ni lus zungs la sogs pa'i stobs las kyang nye bar byed la/ de bzhin du brta bar bya ba yang nyams smad pa 'jam pos bya ba yin pas/ ched 'ga' nyams brta ba dang nyams smad pa 'dren ma'i mtshan nyid kyis gso bas nad gso ba la nye bar spyad par bya ste/ 'dir brta bar bya ba la nyams smad pa 'jam pos gso dgos par nges pa kho na ni ma yin te/ gzhan du na yul dang dus kyi dbang dang rigs pa'i sbyor ba'i dbang gis gso bas kyang de la nye bar spyad par byar rung ba yin no/ /brta bar bya ba las ci zhig 'byung bar 'gyur zhe na/ de'i phyir smras pa ni/ brta bas stobs ni 'phel ba dang / /de yis bsgrub bya'i nad zad 'gyur/ /zhes bya ba yin te/ skyes bu brta bar byas par gyur na/ stobs dang nus pa skye bar 'gyur ba dang / de bzhin du lus zungs la sogs pa 'phel zhing rgyas par 'gyur ba dang / de bzhin du des bsgrub cing gso bar bya ba'i nad zad par 'gyur ro/ /de yis zhes bya ba ni brta ba la snyegs te/ brta bar bya bas gso zhing bsgrub par bya ba'i nad kyis nyam thag pa la sogs pa gang yin pa de rnams 'jig cing med par 'gyur ro/ /skyes bu smyung bar byas pa dag la mtshan nyid ci zhig 'byung bar 'gyur zhe na/ de'i phyir smras pa ni/ smyung bas dbang gsal dri ma rnams/ /mi sri khong yang yi ga 'bye/ /bkres dang skom pa lhan cig 'byung / /dang ga snying dang sgregs pa dag /nad kyi rtse zhil spro ba che/ /snyom bag med pa dag tu 'gyur/ /zhes bya ba yin te/ skyes bu smyung ba byas shing nyams smad par gyur na dbang po gsal ba ste/ dbang bo'i tshogs dag cing gsal bar 'gyur ba dang de bzhin du bshang ba dang gci ba la sogs pa'i dri ma rnams mi sri zhing bde bar 'byung bar 'gyur ba dang / de bzhin du khong yang ni lus bskyod pa yang ba nyid dang / yi ga 'bye ba ste zas len cing 'dod pa dang / de bzhin du bkres pa dang skom pa lhan cig tu dus gcig gi tshe 'byung zhing skye bar 'gyur ba dang / de bzhin du dang ga'am/ lkog ma dag par 'gyur ba dang / snying dag par 'gyur ba dang / sgregs pa dag cing mnam pa med par 'gyur ba dang / de bzhin du smyung bar bya bas gso dgos pa'i nad rtse zhil zhing snyi bar 'gyur ba dang / de bzhin du spro ba che ste bya ba rnams la brtson zhing 'bad nus par 'gyur ba dang / de bzhin du snyom bag dang / sgyid zhan pa med pa dag skye bar 'gyur ro/ /de dag nyid ha cang thal ches par tshad las lhag par byas pa'i nyes pa smras pa ni/ de dag tshad la sogs pa dang / /mi ldan sten par byed pa dag /rab sbom rab tu skem sogs 'gyur/ /de yang sman bcas bshad pa yin/ /tshul ni shin tu brta ba dang / /nyams smad de nyid las shes bya/ /zhes bya ba yin te/ brta ba dang nyams pa de dag tshad la sogs pa dang mi ldan par bsten pa ste/ tshad las lhag par bsten cing spyod pa dag ni go rims bzhin du rab tu sbom pa la sogs pa dang / rab tu skem pa la sogs pa byed bar 'gyur te/ de yang yul dang dus la sogs pa la ma ltos par brta ba ha cang shas che bar bsten pas ni shin tu sbom zhing tsho drags pa la sogs pa skyed par byed par 'gyur ro/ /smyung ba yang de bzhin du byas na shin tu skem pa la sogs pa skyed par byed par 'gyur ro/ /de yang zhes pa shin tu tsho ba dang / shin tu skem pa la sogs pa de rnams dang de gnyis kyi sman gang dang gang yin pa de dag kyang le'u 'dir bshad pa yin no/ / de bzhin du tshul de'i mtshan nyid shin tu brta ba dang nyams smad pa de gnyis las go rims bzhin du shes shing rtogs par bya'o/ /de las shin tu brta drags pa sman dang bcas pa smras pa ni/ shin tu tsho ches 'brum gcin snyi/ /rims dang dmu rdzing mtshan bar rdol/ /lus rmongs gcin sri be'u snabs chags/ /mdze la sogs pa mi bzad 'byung / /zhes bya ba la sogs pa yin te/ brta ba ha cang drags par bsten na shin tu tsho ches pa nas/ mdze la sogs pa'i bar du skyed par byed do/ /shin tu tsho ches pa'i mtshan nyid/ /drang srong tsa ra kas mdzad pa/ / sha dang tshil rab 'phel ba yis/ /nu ma gsus pa mjug ma 'phyang / /dgos med 'phel bar rtsom pa yi/ /mi ni shin tu tsho/ zhes bya ba yin no/ /'brum bu ni 'bras kyi phreng ba'o/ /gcin snyi ba la sogs pa ni 'og nas bshad pa'o/ /de rnams kyi ni sman smras pa ni/ /de la tshil dang rlung bad kan/ /sel bar byed pa thams cad phan/ /dzu rna khre rgod ku lang+tha/ /nas dang sran chung mon sran sde'u/ /dar ba dar rnying zho ga chu/ /sems las bya dang mi nyal bya/ /zhes bya ba la sogs pa yin te/ de la zhes pa tsho ches pa la sogs pa de rnams la/ tshil dang rlung dang bad kan sel bar byed pa'i zas dang sman dang spyod lam thams cad phan pa yin te/ dzur na dang / khre rgod dang / rgya sran ku lang+tha dang / nas ni bza' ba'i phyir bsten to/ /mon sren sde'u ni tshod ma'i don du bya'o/ /sran chung dang dar ba dang dar rnying dang / zho ga chu ni btung ba'i don du bya'o/ /sems las dang mi nyal ba ni spyod lam gyi don du'o/ /sbyang ba ni tshil dang bad kan la sogs pa dag par bya ba'i phyir ro/ /sbrang rtsi 'bras bu gsum pa'am/ /sle tres gla sgang a ru ra/ /zhes bya ba ni/ shin tu tsho ba la sogs pa de rnams la skyes bus 'bras bu gsum gyi phye ma/ sbrang rtsi dang sbyar ba bza' ba'am/ yang na sle tres dang sbrang rtsir sbyar ba bza' ba'am/ yang na gla sgang dang sbrang rtsir sbyar ba bza' bar bya'o/ /skyer khaN+Da dang rtsa ba ni/ /chen po lnga dang gu gul dang / /brag zhun gyi ni sbyor ba dang / /ag ni man tha'i khu bcas phan/ / zhes bya ba ni/ shin tu tsho ches pa de la skyer khaN+Da'i sbyor ba phan no/ /de bzhin du bil ba'i rtsa ba la sogs pa/ rtsa ba chen po lnga'i sbyor ba phan no/ /de bzhin du gu gul gyi sbyor ba dang / brag zhun gyi sbyor ba ag ni man tha zhes bya ba/ ta kha ra'i khu ba dang bcas pa yang phan pa yin no/ / nas tshig 'khus thal byi dang ga /bca' sga lcags phye sbrang rtsi dang / /nas dang skyu ru'i phye ma yi/ /sbyor bas shin tu tsho nad sel/ /zhes bya ba ni/ nas tshig 'khus pa'i thal ba la sogs pa'i sbyor ba 'di sbrang rtsi dang sbyar te/ bldags na shin tu sbom zhing tsho ches pa'i nad sel bar byed do/ /nas tshig 'khus pa'i thal ba ni ya bak+Sha ra'o/ /lcags phye ni lcags nag po'i phye ma'o/ /gzhan dag ni grags par zad do/ /tsha gsum 'bras gsum bu tse shel/ /shi kru byi dang po s+thi ra/ /shing kun go snyod kha ru tsha/ /la la phud dang 'u su dang / /kru trug tres dang ser po gnyis/ /bri ha gnyis dang chu rtsi mo/ /ha pu sha dang pa tha dang / /ke pu ka yi rtsa ba ste/ /'di rnams phye ma mar sbrang rtsi/ /til mar dag ni cha snyoms pa/ /nas phye'i cha ni bcu drug bskyed/ /sbyar ba 'thungs na de 'joms so/ /shin tu shas che'i bdag nyid kun/ / gzhan yang de 'dra'i nad rnams dang / /snying nad mig ser sha bkra dang / /lud dbugs mi bde lkog nad sel/ /blo dang yid gzhungs sems dran byed/ /zas 'ju pho ba'i drod kyang skyed/ /ces bya ba ni/ 'dir tsha ba gsum dang 'bras bu gsum la sogs pa'i sman nyi shu rtsa bzhi bshad pa 'di rnams ma lus pa'i phye ma dang / sbrang rtsi dang mar dang til mar cha mnyam par bya'o/ /de nas phye ma cha gcig /cha gnyis la sbrang rtsi/ cha gsum pa mar/ cha bzhi pa til mar/ nas phye phye ma la ltos pa'i bcu drug 'gyur bya'o/ /de la 'di skad ston pa yin te/ tsha ba gsum la sogs pa'i phye ma srang gcig / sbrang rtsi dang mar dang til mar srang re re/ nas kyi phye ma srang bcu drug 'gyur du bya ba'i don no/ /de la tsha ba gsum ni pi pi ling dang na le sham dang bca' sga zhes bya'o/ /'bras bu gsum ni a ru ra dang / skyu ru ra dang / ba ru ra'o/ /pu shel tse ni ka tu ka'o/ /shi kru ni so ban dza na'o/ /s+thi ra ni sa la par+Ni'o/ /kha ru tsha ni sau bar tsha la'o/ /go snyod ni tsa ra ka'o/ /'u su ni 'u su'i 'bras bu'o/ /ser po gnyis ni yung ba dang skyer pa'o/ /bri ha ti gnyis ni kaN+Da ka ri dang / bri ha ti'o/ /ha pu sha ni bra mo sha zhes bya ba 'dab ma sngo ba zhig go/ /ke pu ka'i rtsa ba ni chu'i pi pi ling gi rtsa ba ste/ de dag thams cad kyi phye ma rdzas gsher ba dang bsres te 'thungs na shin tu tsho ches pa la sogs pa'i nad thams cad sel bar byed cing / de bzhin du brtas pa las byung ba'i nad de dang tshul mthun pa sel bar byed pa dang / de bzhin du snying nad la sogs pa sel bar byed pa dang / de bzhin du blo dang yid gzhungs pa dang dran pa gsal bar byed pa dang / de bzhin du pho ba'i drod skyed cing / me drod nyams pa 'phel bar byed pa yin no/ /shin tu nyams smad cing smyung ba drags pa las nad du 'gyur bar bshad pa ni/ smyung drags rab skem mgo 'khor lud/ /skom dad che zhing yi ga 'chus/ /snum drod gnyid mig rna ba nyams/ /khu ba gzi mdangs skad gsang zad/ /chu so snying klad byin pa brla/ /dku do rtsib logs na rims 'debs/ /tshig mang stod du rlung nad 'jug /rmya zhing skyug bro rus tshigs na/ /bshang gci sri ba la sogs pa/ /smyung ba drags las 'byung bar 'gyur/ /zhes bya ba yin te/ shin tu smyung ba drag cing / nyams smad pa drags ches pa las/ skem pa la sogs pa 'byung bar 'gyur ro/ /de la rab tu skem pa ni shin tu skems shing lus zungs zad pa nyid do/ /mgo 'khor ba ni 'khor lo la bskyon pa ltar 'khor bas na mgo 'khor ba'o/ /lud pa ni lud pa mang ba'o/ /skom dad che ba ni skom nad kyis gdungs pa'o/ /yi ga 'chus pa ni zas la mngon par mi dga' ba'o/ /snum la sogs pa brgyad ni zad pa zhes bya ba sbyar te/ des na snum zad pa dang / me drod zad pa nas skad gdangs kyi gsang zad pa'i bar du'o/ /rims kyis 'debs pa ni rims nad 'byung ba'o/ /tshig mang ba ni 'brel ba med pa'i tshig mang du smra ba'o/ /stod du rlung 'jug pa ni ro stod du rlung zhugs pa'o/ /rmya ba ni lus kyi nyams stobs chung ba'o/ /skyug bro ba ni zas la sogs pa mi 'dod pa'o/ /rus tshigs na ba ni rus pa rnams dang de bzhin du tshigs rnams bcag cing grum pa snyam du sems shing na ba'o/ /bshang gci sri ba la sogs pa zhes bya ba la sogs pa'i sgras ni rlung las byung ba'i nad sna tshogs pa bsdu'o/ /rab tu tsho bas skem nyid mchog /shin tu tsho drags pa yi sman/ /shin tu tshil ches me rlung sel/ /brta dang nyams smad yod ma yin/ /zhes bya ba ni/ skem pa zhes bya ba 'di nad chen po yin mod kyi 'on kyang rab tu tsho zhing sbom pa bas skem pa mchog yin te/ 'dir shin tu tsho ba las skem pa mchog yin no/ /zhes bya ba 'di la shin tu tshob bas shin tu skem pa mchog yin pa la bya'i/ cung zad sbom pa las cung zad skem pa mchog ma yin no/ /de yang gang gi phyir shin tu tsho zhing sbom ches pa dang / shin tu skem pa nyid smyung ba dang brta bas gso bar bya ba nyid bstan gyi/ sbom po dang skem po tha mal tsam ni ma yin no/ /ci'i phyir sbom po bas skem po mchog nyid yin pa'i rigs pa 'dir smras pa ni/ shin tu cho drags pa'i sman zhes bya ba la sogs pa ni ma yin te/ tshil ches ba dang / shin tu me drod ches pa dang / rlung 'phel ba gang yin pa de lta bu yod pa ma yin no/ /shin tu tshil ches pa dang me drod dang rlung sel ba'i sman de lta bu shin tu tsho ches pa'i brta ba dang nyams smad par nus pa ma yin no/ /de la sbom po'i brta ba'i sman gyis sbom po bzlog pa'am/ nyams smad par nus pa ma yin te/ gang gi phyir brta zhing 'phel bar byed pa ni sha la sogs pas byed la/ des ni tshil 'phel bar byed de/ brta ba'i rang bzhin yin pa'i phyir tshil kho na sogs par byed do/ /nyams smad pa'i sman khre rgod la sogs pa gang yin pa 'di ni nyams smad pa'i rang bzhin can yin pa'i phyir rlung 'phel bar byed do/ /de ni 'di skad ston pa yin te/ gal te shin tu sbom ches pa la brta ba'i sman byin na ni/ des tshil dang me drod 'phel bar byed cing rlung 'grib par byed do/ /'on te nyams smad pa smyung ba byas na des tshil zad par byed kyi rlung dang me drod la gnod par mi byed do/ /de bas na shin tu tsho ches pa la brta ba yang bya dka' la/ nyams smad par yang nus pa ma yin no/ /zhes bya ba ni rigs pa yin te/ shin tu tsho ches pa la gang tshil zad par bya ba dang / me drod sel ba dang / rlung sel ba de la phan pa yin na/ de lta bu ma yin no/ /gang zhig mngar dang snum bag bza'/ /bsod bde dag gis skem pa sel/ /de las shin tu bzlog pa dag /nges par bsten pas sbom nyid sel/ /zhes pa 'di ni skem pa mchog yin pa'i gtan tshigs gzhan dag bstan pa yin te/ skem pa nyid ni gang gi phyir zas mngar bag la sogs pas bde zhing dga' ba med pas zhi bar 'gyur bas/ de'i phyir sbom po bas skem po nyid mchog yin gyi sbom po ni de lta ma yin te/ gang gi phyir sbom po nyid skem par byas pa'i gso ba'i thabs las shin tu go bzlog pa'i tshul bsten pas zlog par byed de/ shin tu go bzlog pa ni phal cher kha ba dang / tsha ba dang / bska ba dang / zas skom dang sman rtsub mo bsten na/ gdod shin tu tsho ches pa'i sbom po sel te/ tshil zad pa'i rgyu rnams kyis de 'byung gi zas dang skom la sogs pa mngar zhing snum pag zos te/ bsod cing tshim par byed pas ni ma yin no/ /de ltar na sbom pa dang skem pa 'di gnyis nad du mnyam pa yin du zin kyang / sbom por gyur pa ni gso dka' ba yin pas na yun ring 'gor ba'i phyir skem po nyid mchog yin no/ /skem po de'i sman ci lta bu yin zhe na/ de'i phyir smras pa ni/ de la bza' btung sman rnams ni/ /brta bar byed pa thams cad sbyar/ /zhes bya ba la sogs pa yin te/ skyes bu skem po de la bza' ba dang btung ba dang sman du 'bras drug cu'i chan dang sha dang 'o ma dang / bu ram shing gi khu ba la sogs pa dang / tsho bar byed pa dang / brta bar byed pa'i sman gyi rigs thams cad brta ba'i don du sbyar bar bya'o/ /sems las med dang dga' ba dang / /nges par brta bar bya ba dang / /gnyid cher log pas skem pa yang / / phag dang 'dra bar lus rgyas 'gyur/ /zhes bya ba la/ sems las med pa ni mya ngan gyis gdung ba med pa'am/ bya ba'i rigs gang yin pa gang yang yid la dpyod pa med pa'o/ /dga' ba ni nyams bag tu gnas pa'o/ /nges par brta bar bya ba ni shin tu tshim par bya ba dang / de bzhin du legs par gnyid log cing nyal bas/ skem po dag rnam pa thams cad du sha rgyas par 'gyur ro/ /de yang dper na phag dang 'dra ba ste/ skem po'i gnas skabs su sha rgyas pa'i rgyu gzhan pas gnyid cher log pa rgyu'i gtso bo yin par bstan par bya ba'i phyir dpe phag pa dang sbyar ba yin no/ /de ltar sems las med pa dang / dga' ba dang shin tu brta ba dang / legs par gnyid log pas lus zungs thams cad 'phel zhing rgyas par 'gyur ro/ /lus ni brtas shing tsho byed pa/ /sha dang 'dra ba gang yang med/ /sha mi za la sha za'i shas/ /lus ni mchog tu brtas byed yin/ /zhes bya ba la/ gang gi lus brtas shing tsho bar byed pa 'di la zas gang zhig zos shing longs spyad pa na/ sha dang 'dra bar lus brtas shing tsho bar byed pa'i kha zas kyi rigs gang yang yod pa ma yin no/ /de las khyad par du sha za rnams kyi sha ni shas skyed cing 'phel bar byed pa yin bas/ shin tu yang lus brtas shing 'phel bar byed pa yin no/ /sbom po dang skem po de gnyis kyi gso ba'i thabs mdor bstan pa'i phyir smras pa ni/ sbom la nyams smad lci bas bya/ /de las bzlog pa skem la phan/ /zhes bya ba yin te/ mi sbom po la ni nyams smad pa'i lcibs bya ste/ dper na sbrang rtsi dang sring ga ta zhes bya ba'i 'bras bu dang / pad+ma'i rtsa ba dang sdong bu la sogs pa ste/ de dag ni rtsub pa yin pa'i phyir tshil za bar byed pa dang / lci bas myur du mi 'ju ba'i phyir ro/ /sbom po la ni yang ba'i nyams smad pas yang sbom po phan te/ dper na rgya sran ku lad tha dang / khre rgod la sogs pa phan pa lta bu'o/ /de las bzlog pa skem la phan/ /zhes bya ba ni/ gang snga ma de las bzlog pa'i yang ba dang / de bzhin du brta ba de ni skem po la phan te/ dper na 'bras drug cu pa'i chan dang / ri dgas sha bkra dang / ri bong la sogs pa'i sha lta bu ste/ de yang gang gi phyir shin tu skem pa la ni zas dang skom dang sman gcig pa dag gis me drod 'bri bar byed pas de brtas par byed pa'i rdzas yin du zin kyang de mi 'ju bas slar nyams smod cing skem po nyid du byed par 'gyur ro/ /nas dang gro ni gnyi ga la/ /de la 'os par byed pas brtag /ces bya ba la/ sbom po dang skem po de gnyis ka la 'os shing 'tsham par bya zhing sbyar ba dang / g.yos su byas pa'i nye bar brtag par byas ba gang yin pa de ni/ de la 'os pas brtag ces bya'o/ /de ni 'di skad ston pa yin te/ gang gi phyir sbom po la nas dang gro ster ba na/ de'i tshe sbom bo la 'os shing 'tsham ba'i nyams smad pa'i bya bas bya la/ gang gi tshe nas dang gro de nyid skem bo la ster na de'i tshe skem po la 'os shing 'tsham pa'i brta ba bya ba'i tshul gyis brtag par bya'o/ /'di ni 'di ltar dogs ba skyed par mi bya'o/ /ji ltar nyes pa rnams kyi nad kyi rgyu mtha' las ba las nad kyang mtha' yas pa ji lta ba bzhin du gso ba yang mtha' yas/ nyams brta ba dang nyams smad pa'i gso ba'i thabs kyang sbyor ba rab dang rab mchog gi dbye bas mtha' yas par rigs na/ ci'i phyir gso ba'i thabs gnyis kho nar zad ces phyir rgol ba dag yod pas/ de'i phyir gzhung rtsom par byed pas 'dir smras pa ni/ nad kyi dbye ba tha dad kyi/ /gcod 'khru la sogs dbye ba yis/ /nad ltar tha dad gyur kyang ni/ /gso ba gnyis las yod ma yin/ /zhes bya ba yin te/ nad rnams zad pa dang / gnas pa dang / steng dang 'og dang rtsib logs la sogs par thad kar 'gro ba la sogs pa'i mtshan nyid kyis rnam par dbye na/ mtha' yas pa yod du zin kyang / gso ba ni rnam pa gnyis las lhag par dbye ba med do/ /de bzhin du gcad par bya ba la sogs pa'i dbye bar phye ba las kyang tha dad par 'gyur te/ 'di ni gcad pa'i gso ba'o/ /'di ni rab tu gcad pa'o/ /'di ni rab mchog tu gcad pa'o/ /'di ni rab tu 'khru ba'o/ /'di ni rab mchog tu 'khru ba'o/ /sogs pas ni snum dang rtsub pa la sogs pa yin na/ ji ltar na de mtha' yas pa yin du zin kyang / de rnams dbye ba med pa yin zhe na/ nang ltar tha dad gyur kyang ni/ zhes bya ba ste/ dper na nad gzhi la sogs pa'i dbang gis kyang / rims la sogs pa'i nad rnams tha dad par 'gyur ba yin kyang gso ba ni/ brta ba dang nyams smad pa'i tshul gnyis kyis bsgrub par bya ba yin pas na/ mtshan nyid de gnyis las dbye ba yod pa ma yin te/ lan 'ga' de rnams brta bar bya bas gso dgos par 'gyur ro/ /la la ni nyams 'bri bas gso bar bya dgos kyi de ma gtogs pa gso ba'i phung po gsum pa ni yod pa ma yin no/ /yan lag brgyad pa'i snying po bsdus pa'i rnam par 'grel pa tshig gyi don gyi zla zer zhes bya ba/ slob dpon zla ba la dga' bas rnam par sbyar ba las le'u bcu bzhi pa'i rnam par 'grel pa'o// //de nas sbyang ba la sogs pa'i sman gyi sde tshan sna tshogs 'dus pa'i le'u bshad par bya'o/ /zhes bya ba la/ ji ltar 'dir gso ba sna tshogs yod du zin kyang / tshul gnyis las lhag par med pa de bzhin du/ sman rnams tshul tha dad pa yod du zin kyang / sbyang ba dang zhi ba'i tshul gnyis las 'da' bar mi byed do/ /de bas na gso ba'i tshul rnam pa gnyis kyi 'og tu sbyang ba la sogs pa ni sman gyi sde tshan gyi le'u brtsams pa yin no/ /sbyang ba la sogs pa'i tshul can gyi sman du bstan pa'i sde tshan gang yin pa de ni sbyang ba la sogs pa'i sman gyi sde tshan no/ /sde tshan sna tshogs pa 'dus pa ni dngos po phan tshun 'thor ba gcig tu bsdus pa de'i le'u bshad par bya'o/ /zhes pa'o/ /sbyong ba'i skyug sman la sogs pa'i dbye ba phyi ma mchog tu gyur pa'i las rnam pa lnga yod pa las/ dang por re zhig skyug sman gyi sde tshan gyi gtso bo bshad par bya ba'i phyir 'di smras pa yin te/ po son cha dang shing mngar dang / /ku ba kha bo nim pa dang / /bim pa ga gon bi sha la/ /dug mo nyung dang mur ba dang / /de ba da li byi dang ga /lcam pa tsi tra kru trug tres/ /ko sha ba ti ka rany+dza/ /pi pi ling dang rgyam tsha dang / /shu dag sug smal yungs kar te/ /'di dag skyug pa'i sman gyi sde/ /zhes bya ba ni/ po son cha la sogs pa'i sman ni slon zhing skyug pa la dgos pa yin no/ /de la po son cha ni ma na pha la'o/ /shing mngar ni ma du yang shi'o/ /ku ba kha bo ni ka tu ka a ba bu'o/ /nim pa ni a ri stag ka'o/ /bim pa ni dza mu ta ka'o/ /byi tang ga ni ming gi rnam grangs gzhan yang 'bras bu mang po zhes bya'o/ /ga gon ni tri du su kha ba'o/ /bi la sha ni go ba a k+Sha ste/ ba lang gi mig lta bu'o/ /dug mo nyung ni pad tsa ka'o/ /mur ba ni ma dur sa ste/ khu ba mngar ba zhig go/ /de ba da li ni dzi mur ka'o/ /byi dang ga ni srin bu gsod ba'o/ /lcam pa ni bi tang so'o/ /tsi tra ni tra ba na tri'o/ / kru trug tres ni tsi tra ka'o/ /ko sha ba ni gnyis te/ gcig ni ra tsa ko sha ba ti'o/ /gnyis pa ni ka du ka ko sha ta ki'o/ /ka rany+dza ni pu ti kar ny+dza 'o/ /pi pi ling ni ka ra na'o/ /yungs kar ni yungs kar dkar bo'o/ /dan ti dang ni ti pid ta/ /'bras bu gsum dang bi sha la/ /shang ki ni dang snu ha dang / /seng phrom dong ga ni li ni/ /khron bu dang ni kam pi l+ya/ /'o ma ba gcin 'khru bar byed/ /ces bya ba la sogs pa'i sman rnams ni 'khru ba'i sde tshan yin no/ /de la dan ti ni kum ba'o/ /tri bi da ta ni kum ba'o/ /bi sha la ni go bA k+Shi'o/ /shing khi ni shing kha pus pa'o/ /snu ha ni bu ta'o/ /ni li ni nI la pus pa ste/ me tog sngon po can no/ /seng phrom ni dro tra'o/ /dong ga ni sham mya ka'o/ /khron bu ni su bar nak+shi ra'o/ /ka ma bi l+ya ni ra dza na ga ste/ tshon shing ngo / /'o ma ni 'o ma rnams so/ /ba gcin ni dngos su zad do/ /po son cha dang dug mo nyung / /ru rta de ba da li dang / /shing mngar shu dag rtsa ba bcu/ /thang shing ra sna la la phud/ /sha ta puSh+ba pa ta la/ /rgya sran nag po sbrang rtsi dang / /rgyam tsha lce tsha shing nye ro/ /'di dag mas gtong bkru sman te/ /zhes bya ba la/ po son cha la sogs pa ni mas gtong ba'i bkru sman gyi sde tshan yin no/ /de ba da li ni dzi mu dka'o/ /gzhan ni go bar zad do/ /rtsa ba bcu ni rtsa ba lnga pa che chung gnyis so/ /sha ta pu Sh+pa ni mi bi'o/ /a pa ma rga byi dang ga /tsha ba gsum dang skyer ba'i rtsa/ /su ral dang shi ri sha /bri hang shi kru'i sa bon dang / /seng ldeng ma du ka'i snying po/ /rgyam tsha dngul rdo pha bong dreg /sug smel gnyis dang go snyod sbom/ /mgo bo'i nad sbyong byed pa yin/ /zhes bya ba la/ a ba marga la sogs pa'i rdzas kyi sde tshan ni mgo bo'i nad sbyong bar byed pa yin no/ /a pa marga sra dag bus pa'o/ /tsha ba gsum ni pi pi ling dang / na le sham dang / bca' sga dang gsum bsres pa'o/ /skyer ba'i rtsa ba ni da du ha rid ta'o/ /su ral ni su lag gra na'o/ /shi ri sha'i sa bon dang pri ha'i sa bon dang / shi kru'i sa bon no/ /sa bon gyi sgra sum char sbyar ro/ /ma du ka'i snying po ni ma du ka'i me tog mchog tu gyur pa la bya'o/ /dngul rdo ni ku shar pa any+dza na'o/ /sug smel gnyis ni sug smel phra mo dang sbom po'o/ /go snyod sbom po ni 'phra thi ka'o/ /thang shing rgya spos ru rta dang / /rtsa ba bcu dang ba la gnyis/ /bi ra ta ra'i sman sder gtogs/ / bi da ri sogs rlung nad sel/ /zhes bya ba la/ thang shing la sogs pa'i sman rnams ni rlung 'joms par byed pa yin no/ /rgya spos ni niSh+Tha'o/ /ru rta ni kuSh+Tha'o/ /ba la gnyis ni ba la dang a tib la'o/ /pi ra ta la sogs pa'i sde tshan dang bid ra la sogs pa'i sde tshan ni bshad do/ /sde tshan de gnyis rlung sel bar byed ba yin no/ /dUr ba dang ni byi tsher ba/ /nim pa ba sha ka'i lo ma/ /kha sral phre'u 'ol ma se/ /nye'u shing pa zhes bya dang / /shi ta pa ki bri yang ku/ /n+ya gro d+ha sogs shug pa sogs/ /s+thir rnam gnyis pad+ma'i ze/ /ban n+ya thal tres sogs mkhris sel/ /zhes bya ba la/ dUr ba la sogs pa'i sde tshan ni mkhris pa 'joms shing sel bar byed do/ /de la dUr ba ni sha d+ha la'o/ /byi tsher ba ni ba sha ka'o/ /nim pa ni nim pa'o/ /lo ma ni ba sha ka'i'o/ /kha sral ni ad ma ku ba ta'o/ /'ol ma se ni dgun te'o/ /nye'u shing ni sha ta bar+Ni'o/ /shi ta pa ki ni shing khan di'o/ /pri yang ku ni gan+d+ha pri yang ku'o/ /n+ya gro d+ha la sogs pa dang / shug pa la sogs pa dang / thal tres la sogs pa'i sde tshan ni 'og nas ston te/ s+thir rnam gnyis ni sa la par+Ni dang / kr-iSh+Na par+Ni'o/ / pad+ma ni ka ma la'o/ /ban n+ya ni kun na ta'o/ /dong ga sogs dang arka sogs/ /mung+ga sogs dang po son sogs/ /bye'u rug pa gla sgang sogs/ /dug mo nyung sogs bad kan sel/ /zhes bya ba la/ dong ga la sogs pa'i sde tshan bdun po ni bad kan sel zhing 'joms par byed pa yin no/ /dzi ban ti dang ram nye ba/ /me da ma hA me da dang / /mung+ga ma sha par+Ni dang / /ldum bu zangs rtsi ba dang ni/ /dzi ba ka dang shing mngar te/ /sde 'di 'tsho byed ces bya yin/ /zhes bya ba la/ dzi ban ni dzi ba'o/ /ram nye ba ni gnyis te/ ka ko li dang / k+Shir ka ko la'o/ /me da dang ma hA me da ni me da gnyis so/ /mung+ga dang ma sha par+Ni ni mung+ga par+Ni dang / ma sha par+Ni'o/ /zangs rtsib ni ri sha pa'o/ /dzi ba ka ni sman 'tsho byed kur rtsa shi sha'o zhes bya ba'o/ /bi da ri dang e raN+Da/ /prish+tsi kha li pur+Na rna/ /de ba ha sa de ba dang / /par+Ni gnyis dang kha sral dang / /'tsho byed lnga dang rtsa chung lnga/ /thal tres dang ni lcang ma dang / /hang sa ba ti zhes bya rnams/ /bi da ri sogs 'di snying phan/ /nyam chung rlung dang mkhris pa sel/ /lus skem skran tshigs yan lag na/ /dbugs mi bde dang lud pa lu/ /sel bar byed pa'i sde tshan yin/ /zhes bya ba la/ bi da ri dang sogs pa'i sde tshan 'di ni snying gi nad la phan zhing yid du 'ong ba dang / nyams brtas shing sha skyed ba dang / de bzhin du rlung dang mkhris pa la sogs pa sel bar byed pa dang / lus skem zhing zad byed la sogs pa sel bar byed pa yin no/ /de la bi da ri ni shing pi da ri'o/ /e raN+Da ni sor lnga pa zhes bya'o/ /prish+tsi kha la ni aSh+Tha du ka'o/ /pur+Na rna ba ni bra shi ba'o/ /par+Ni gnyis ni ma sha par+Ni dang / mung+ga par+Ni'o/ /'tsho byed sna lnga dang / rtsab chung ngu lnga la/ 'tsho byed ces bya ba'i rtsa ba lnga la ni/ nye'u shing dang / ram nye ba dang / dzi ban ti dang / dzi ba ka dang / zangs rtsi ba'o/ /rtsa ba chung ngu lnga ni sap+ta par+Ni dang / kr-iSh+Na par+Ni dang / bri ha ti dang / kaN+Da ka ri dang / gze ma'o/ /thal tres ni sha ri ba'o/ /hang sa pa ti tri ba dang ste rkang gsum ba'o/ /thal tres dang ni pu tse shel/ /tang pa la dang ni ma du ka / tsan+dan dkar dang dmar ba dang / /shing mngar ba ru sha ka rnams/ /tshad ba mkhris pa khrag rgyas dang / /skom dad rims kyis btab pa sel/ /zhes bya ba la/ thal tres la sogs pa'i sde tshan 'dis ni tshad pa la sogs pa sel zhing 'joms par byed pa yin no/ / tang ba la ni kasma ri'o/ /ma du ka ni ma du ka puSh+pa'o/ /pa ru sha ka ni mri du pa ba ste/ 'bras bu chung ngu 'jam pa zhig go/ /shug pa buN+Da rI ka dang / /br-it+ti r-it+ti cu gang dang / /sring gi sle tres 'tsho byed bcu/ /nu zho skyed byed rlung mkhris sel/ /nyam chung tshim byed brtas byed la/ /'tsho byed ro tsa nyid du byed/ /ces bya ba la/ shug pa la sogs pa'i sman gyi sde tshan no/ /nu zho skyed pa la sogs pa byed do/ /nu zho ni bud med 'phel bar byed pa'o/ /de bzhin du rlung dang mkhris pa'i nad sel ba dang / nyam chung ba rnams tshim par byed pas na tshim byed do/ /mdangs skyed pa ni/ 'phel zhing rgyas par byed pa ste/ nyams stobs skyed pa'o/ /'tsho bar byed pas na 'tsho byed do/ /ro tsa bar byed pa ni khu ba 'phel bar byed pa'o/ /shug pa ni pad+ma ka ste/ ming gi rnam grangs gzhan du na he ma pad+ma zhes bya ba'o/ / puN+Da rI ka ni pra puN+Da rI ka'o/ /br-i t+ti ni shra ba na shi ra'o/ /r-it+ti ni tu shi'o/ /cu gang ni bang sha re tsa na'o/ /sring gi ni kar ka sring gi'o/ /sle tres ni gu ru tsi'o/ /'tsho byed bcu ni dzi ban ti'o/ /ram nye ba la sogs pa sngar bshad pa rnams so/ /pa ru sha dang 'bras bu gsum/ /rgun 'brum dang ni kad pa la/ /ka ta ka'i 'bras ra dza dan/ /se'u 'bru bar da du rnams/ /skom dad che dang gcin sri dang / /rlung gi nad rnams sel byed yin/ /zhes bya ba la/ pa ru sha la sogs pa'i sde tshan ni skom dad che ba dang / gcin sri ba'i nad dang / rlung nad rnams sel zhing 'joms pa yin no/ /rgun 'bru ni go tan ni rgun 'bru'o/ /kad pa la ni ma la bad ka'o/ /ka ta ka'i 'bras bu ni shing ta ka'i 'bras bu'o/ /ra dza da na ni ra dza da na'o/ /se 'bru ni go'o/ /ba ra da du ni kha ra ba tra ste/ lo ma rtsub pa'i shing lo zhig go/ /any+dza na dang pha li ni/ /spang spos pad+ma ut+pal/ /skyer khaN+Da dang sug smel dang / /shing mngar nA ga ge sar bcas/ /dug dang nang gi tsha ba dang / /mkhris pa rgyas pa sel bar byed/ /ces bya ba la/ any+dza na la sogs pa'i sde tshan ni/ dug dang nang gi tsha ba dang mkhris pa rgyas pa sel bar byed do/ /de la any+dza na ni rnam pa gnyis te/ lig bu mig dang dngul rdo'o/ /pha li ni gan+d+ha pri yang ku'o/ /spang spos ni nal da na'o/ /ut+pa la ni rnam pa gnyis te sngon po dang dmar po'o/ /pa tol dang pu tse shel/ /tsan+dan dkar po mur ba dang / /sle tres skra lor bcas pa dag /bad kan mkhris pa mdze dang rims/ /dug dang skyug bro yi ga 'chus/ /mig ser gyi ni nad rnams 'joms/ /zhes bya ba la/ pa to la la sogs pa'i sde tshan 'dis ni/ bad kan dang mkhris pa la sogs pa 'joms par byed do/ /pu tse shel ni ka ru ka ro hi na'o/ /mur ba ni mang du sra ba'o/ /sle tres dang ni shug pa dang / /nim pa 'u su'i 'bras bu dang / /tsan+dan dmar po zhes bya rnams/ /mkhris pa dang ni bad kan dang / /rims nad skyug bro lus tsha dang / /skom dad che sel me drod skyed/ /ces bya ba la/ sle tres la sogs pa'i sde tshan 'di ni mkhris pa dang bad kan la sogs pa rnams sel bar byed la/ me'i drod skyed par byed do/ /dong ga la sogs pa'i sde tshan 'di ni/ slon bro ba la sogs pa nas gcin nad rma red pa'i bar du sbyong zhing sel bar byed do/ /dang ga dang ni dug mo nyung / /ka ka ti ga ta pa ta li/ /nim ba sle tres dUr ba dang / /mur ba be+e dang ka ta dang / / pa tha ci skrigs she rgya ka /ka rany+dza gnyis pa to la/ /lo ma bdun pa kru trug tres/ /su Sha byi ta po son cha/ /sa ha ra dza zhes bya dang / /rgya shug gi ni 'bras bu rnams/ /de ni slon bro mdze nad dang / /dug dang rims dang bad kan dang / /g.yan pa dang ni gcin snyi dang / /rma red pa rnams sbyong bar byed/ /ces bya ba la/ dong ga la sogs pa'i sde tshan 'di ni slon bro ba la sogs pa nas/ gcin dang rma red pa'i bar du sbyong zhing sel bar byed do/ /dong ga ni sha mya ga'o/ /ka ka tig ta ni sha rang gaSh+Tha'o/ /pa ta la ni kri sna bri ta'o/ /mur ba ni ma dus ra'o/ /be tang ka ta ni srung ba bi shi ste/ /shing lo ma can zhig go /ci skrigs ni ki ri tig ta ste/ bu nim pa'o/ /shergya ka ni ha sa ka ra'o/ /ka rany+dza gnyis las gcig ni pu ti na ka rany+dza ste/ ming gi rnam grangs gzhan yang tsi ri bil pa zhes bya ba'o/ /ka rany+dza gnyis pa ni ming gi rnam grangs su nan ta ma la zhes bya'o/ /lo ma bdun pa ni sa b+ha par+Ni'o/ /kru trug tres ni tsi tra ka'o/ /su sha byi si ti ya ba li zhes bya'o/ /po son cha ni ma dang na la la'o/ /sa ha ra dza ni nI la bus pa ste/ me tog sngon po can zhig go/ rgya shug pa'i 'bras bu ni kun ta zhes bya'o/ /a sa na dang ti ni sha/ /stag pa shwe ta ba ha dang / /ka ta ra dang seng ldeng dang / /ban da dang ni shing sha pa/ /a dza sring ga tsan+dan na gsum/ /ta la a kar pa la sha /sa la khar ba tra dang / /d+ha ba ka ling ka spro tog /tsha ga kar+Na bad tsha ka /tha ram zhes ni bya ba ste/ /a sa na sogs de rnams kyis/ /sha bkra mdze nad bad kan dang / /srin nad skya rbab gcin snyi dang / /tsho ches nad ni sel bar byed/ /ces bya ba la/ a sa na la sogs pa'i sde tshan 'di ni tshad pa la sogs pa sel zhing 'joms pa yin no/ /de la a sa ni ba ta sa la'o/ /ti ni sha ni shing yan da na'o/ /shwe ta ba ha ni a dzu na'o/ /ka ta ra ni seng ldeng dang 'dra ba la sngon po can zhig go/ /ban da ni shi ri sha'o/ /shing sha pa ni kris snar ra'o/ /a dza sring ga ni mi shi sring ga ste/ ra thug gi rwa 'dra ba'o/ /tsan+dan gsum ni dkar po dang / dmar po dang / ser po'o/ /ta la ni shing gi khyad par te dwa tra dza zhes bya ba'o/ /a gar dza ni dzong ga ga'o/ /pa la sha ni shing sha ka'o/ /sa la ni shing mthon po zhig go/ /kha ra pa tra ni sha ka zhes bya ba'i shing gi khyad par zhig go/ /d+ha ba ni dzre had ta ru zhes bya ba/ shing chen po zhig go/ /ka ling ka ni in tra ya ba'o/ / spro tog ni bu ga'o/ /tsha ga kar+Na ni ra skyes kyi rna ba 'dra ba zhig go/ /tha ram ni a shar na'o/ /ba ra na she rgya ka gnyis/ /nye shing tsi tra mo ra ta/ /bil ba any+dza sring gi dang / /bri ha ti ni rnam gnyis dang / /ka rany+dza gnyis dza ya gnyis/ /shi kru ku sha ru rta'o/ /bar na sogs bad kan tshil/ /me drod chung dang rlung nad 'khyims/ /klad pa la brten nad sel zhing / /skran dang khong 'bras 'joms pa yin/ /zhes bya ba la/ bar na la sogs pa'i sde tshan 'di ni bad kan la sogs pa nas khong 'bras kyi bar du 'joms shing sel bar byed pa yin no/ / rlung nad 'khyims pa ni/ tshil gyis g.yogs pa'i rlung ngo / /ba ra ni ni shing ta ma la'o/ /she rgya ka gnyis ni ser po dang dmar po'o/ /mdog gis phye ba'i su ha ra tsa gnyis so/ /ma ra ta ni k+Shi ra mo ra ta'o/ /bil ba ni shing pha la'o/ /bri ha ti rnam pa gnyis ni bri ha ti dang kaN+Da ka ri'o ka rany+dza gnyis ni bu ti ka rany+dza dang / nag ma ba'o/ /dza ya gnyis ni/ /a ga ni man+d+ra gnyis so/ /shi kru ni so ban dza na'o/ /ku sha ni dUr pa'o/ /ru tsa ni ru tsa ka ra'o/ /ru sha ka shing kun spangs ma/ /rgyam tsha brag zhun nag tshur gnyis/ /gcin sri rde'us 'gags pa dang / skran dang tshil ches bad kan sel/ /zhes bya ba la/ ru sha kar la sogs pa'i sde tshan 'di ni/ gcin sri ba dang / rde'us 'gags pa la sogs pa sel ba yin no/ /ru sha ka shi ni bri ka ka'o/ /spangs ma ni rnam pa gnyis te/ ka ra ka ram du rma bya'i mgrin pa 'dra ba ma yUr gr-i ba'o/ /rgyam tsha ni tsha mchog go/ /brag zhun ni shel dza du'o/ /nag tshur gnyis las gcig ni ban su ka si zhes bya ba sa rul dang 'dra ba'o/ /gnyis pa ni pus pas ka si sa zhes bya ba'o/ /be+e lan tar a ra ni/ /spra tog bri sha sru sru'i rtsa/ /i ka ta dang gze ma dang / / sa ha ra dza ba na dang / /ka sha br-i k+Sha da ni dang / /'dam bu ku sha rnam gnyis dang / /kun tha dang ni kha sral dang / /bal bu ka dang mor ta/ /ku ru ta dang ka ram pa/ /lcam pa zhes bya sman sde 'di/ /be lan ta ra la sogs pa/ /rlung las gyur pa'i nad 'joms shing / /rde'u'i phre'u yod pa dang / /gcin srib yi nad rnams sel/ /zhes bya ba la/ be lan tar la sogs pa'i sde tshan 'di ni rlung las gyur cing / rlung las skyes pa'i nad rnams 'joms pa dang / chu so'i rde'u la sogs pa sel zhing 'joms so/ /de la rde'u phre'u ni rlung gis khrag bskams pa las dum bu byas pa las rde'u phre'u zhes bya'o/ /gcin srib ni gcin nad kyi nad gzhi las bshad do/ /be lan ta ra ni bi ra ta ra'o/ /a ra ni an mtha'o/ /spra tog ni i sha ram li ki'am/ bu ga na zhes bya ba me tog sbom bo can no/ /bri sha ni ba sha ka'o/ / sru su'i rtsa ba ni e ma de ba'o/ /a ga ta ni smyug pa tra'o/ /sa ha ra dza ni ser po'o/ /ka sha ni she ta tsa ma ra ste/ me tog rnga yab lta bu yod pa'i 'jag ma ser po'i rigs so/ /brik+Sha da ni ni bad kan zhes bya ba shing las shing gi nad kyi shing lo phre'u gzhan skyes pa'o/ /'dam bu ni na la ste nang khong stong ngo / /ku sha rnam pa gnyis ni 'jag ma'i sbom po dang / phra mo rnam pa'i dbye bas phye ba'o/ /kun tha ni rtsa ba bca' sga 'dra ba yod pa'o/ /kha sral ni kun tu sri ste ka pi ka chu'o/ /bal bu ka ni so na ka'o/ /mo ra ta ni shing ti par go'o/ /ka ram pa ni ag ni ma pa'i mchog go/ /lcam pa ni par tha'o/ /seng phrom sha ba ra ro tra/ /pa la sha dang dz+hin dzi ni/ /thang shing kad pa la ra sna/ /ka dam pa dang chu shing dang / /e la ba lu a sho ka /pa ri be+e la mo tsa ka /'di ni seng phrom sogs zhes bya/ /tshil ches bad kan sel ba'i sde/ /mngal nad 'joms shing 'khru ba gcod/ /mdog bzang dug nad sel byed yin/ /zhes bya ba la/ seng phrom la sogs pa'i sde tshan 'di ni/ tshil ches pa dang / bad kan gyi nad sel ba dang / mngal nad 'joms shing 'khru ba gcod pa'i tshul can dang / mdog bzang zhing gsal bar byed pa dang / de bzhin du dug sel bar byed pa yin no/ /de la seng phrom zhes bya ba ri dra ba rnam pa gnyis yod de/ gcig ni pa ti ka ri tra'o/ /gnyis pa sha ba ra ri tra'o/ /pa la sha ni keng su ka'o/ /dz+hin dzin gri ta many+dza ri ste/ yar kha mar zhig go/ / thang shing ni sar la te shing drang po tsi tra zhes bya'o/ /ra sna ni pa ni am ba ngan pa'o/ /chu shing ni ram pa ste nang stong pa'o/ /e la ba lu ka ni ha ri ba lu ka ste/ ming gzhan yang e le ya'o/ /a sho ka ni ming mya ngan med pa'o/ /pa ri be+e la ni ku ta nan da'o/ /mo tsa ni sa la ka'o/ /ar ka dang ni a ral ga / nA ga dan ti bi sha l+ye/ /ga bra ra sna bri sha la/ /a ba marga ka rany+dza/ /ka ka da ri ka rany+dza/ /gi ri kar gnyis iM gu dang / /a rkal sogs sde tshan 'di/ /bad kan tshil ches dug rnams sel/ /srin nad dang ni mdze nad 'joms/ /khyad par du ni rma la phan/ / zhes bya ba la/ arka la sogs pa'i sde tshan 'di ni bad kan dang / tshil ches pa dang / dug rnams sel bar byed pa dang / srin bu dang mdze nad 'joms par byed pa dang / khyad par mchog tu rma rnams la phan zhing sbyong bar byed pa yin no/ /ar ka ni rtag tu me tog 'byung ba ste ming gi rnam grangs su ru pi ka zhes bya'o/ /a ral ka ni shwe ta ku su ma ste me tog dkar po yod pa'o/ /nA ga dan ti ni sha ta gan d+ha ste me tog dkar po dril bu lta bu yod ba'o/ /bi sha l+ye ni lag la bshol lta bu'o/ /ga bra ni ga bar gyi'o/ /bi sha la ni a sta du ma'o/ /ming gzhan ni sar ba ta shi ka zhes bya'o/ /a ba marga ni pra dug pus pa'o/ /ka rany+dza ni pra gri rgya'o/ /ka ka da ri ni po ta te la'o/ /ka rany+dza ni gnyis/ ka rany+dza kar po ste/ ming gi rnam grangs gzhan yang na ga ta ma la zhes bya'o/ /gi ri kar ni gnyis las gcig ni ki ni hi gi ri kar ni zhes bya'o/ / gnyis pa ni ta ka byi zhes bya ba'i gir gi gar gi dkar po che ba'o/ /slob dpon gzhan dag ni kar ni gnyis pa ku ma ri zhes bya ba yin no zer ro/ /ing gu ta ni dka' thub pa'i shing ngo / /byi rug rnam gnyis ku the ra/ /ka la ma la byi dang ga /kha ra pa tra kad pa la/ /bri sha kar+Ni sha kun ti/ / ske tshe ka pid tha'i lo ma/ /ga bra mon sne'u ka mu ka / rkang mar bi sha muSh+Thi dang / /bu srin dang 'bam po'o/ /bye rug pa la sogs pa'i sde/ /bad kan tshil ches srin nad sel/ /cham pa yi ga 'chus lud pa/ /dbugs mi bde 'joms rma red sbyong / /zhes bya ba la/ byi'u rug pa la sogs pa'i sde tshan 'di ni bad kan tshil ches pa dang / srin nad 'joms par byed pa dang / de bzhin du cham pa la sogs pa 'joms pa dang / rma red pa sbyong zhing dag par byed pa yin no/ /bye'u rug pa rnam pa gnyis ni ser po dang nag po'i dbye bas phye ba'o/ /ku the ra ni ka ka ma tsi ta'o/ /ka mu ga ni ni di kan da ste/ ming gi rnam grangs gzhan a ti mug ta ka zhes bya'o/ /rkang mar ni a lam bu sa'o/ /bag sha mug ti ni ke sha muSh+Thi sti'o/ /bu srin ni gu ha bi na dza ga ste sa bon mi mngon pa'o/ /'bam po ni 'bu ta ge shi'o/ /mu ska ka dang snu ha dang / /'bras bu gsum dang tsi tra ka /pa la sha dang d+ha ba dang / /shing sha pa zhes bya ba rnams/ /skran dang gcin nad rde'u chags/ /skya rbab dang ni tshil ches nad/ /bad kan rgyas dang khu ba yi/ /nad rnams sel bar byed pa yin/ /zhes bya ba la/ mu ska ka la sogs pa'i sde tshan 'di ni/ skran la sogs pa nas khu ba'i nad kyi bar du sel zhing 'joms bar byed pa yin no/ /de la mu ska ka ni shing mong sha ka zhes bya ba'o/ /snu ha ni sud+ha ste shrI khaN+Da'i shing ngo / /ba la sha ni bra ma ta ru'o/ /d+ha ba ni shing sha pa'i ming gi rnam grangs mal da la pa ha zhes bya ba zlum pa zhig go/ /dug mo nyung dang mur ba dang / /bar gi dang ni bu tse shel/ /na le sham dang bong nga dkar/ /chu sgog sug smel pa tha dang / /yungs kar zir u ra lu/ /a za mo dang po son cha/ /shu dag zi ra nag po dang / /shing kun dang ni byi dang ga / pa shu gan+d+ha tsha ba lnga/ /rlung dang bad kan tshil ches dang / /cham pa skran dang rims dang gzer/ /gzhang 'brum gyi ni nad rnams sel/ /zhes bya ba la/ dug mo nyung la sogs pa'i sde tshan du gtogs pa'i sde 'di ni rlung nad dang / bad kan la sogs pa nas gzhang 'brum gyi bar 'joms shing sel bar byed pa yin no/ /dug mo nyung ni rnam grangs pa bad ka zhes pa'o/ /chu sgog ni gan di ri'o/ /u ra lu ni ga ka tang ka ste ma hA ni ma ba'o/ /shu dag ni tshigs drug pa'o/ /ba shu gan d+ha ni sra ti mi ru ra'o/ /tsha ba lnga ni pi pi ling dang / pi pi ling gi rtsa ba dang / dbyi mong dang / tsi tra ka dang / bca' sga'o/ /shu dag gla sgang thang shing dang / /dong gra bong nga a ru ra/ /ser po gnyis dang shing mngar dang / /kr-iSh+Na par+Ni dug mo yungs/ /shu dag yung ba la sogs sde/ /be'u snabs tshad pas 'khru smin gcod/ /tshil ches bad kan rgyas rlung 'khyil/ /nu ma'i nad rnams sel bar byed/ /ces bya ba la/ shu dag la sogs pa'i sde tshan 'di ni/ be snabs tshad bas 'khru ba smin par byed do/ /tshil ches pa dang bad kan rgyas pa la sogs pa sel bar byed do/ /sman rnams ni go bar zad do/ /pri yang ku dang ra gan dud/ /lig pu mig dang stang zil dang / / lcim rtsa pad+ma ge sar dang / /btsod dang ya ba sha ka dang / /shal ma li dang de'i khu ba/ /sa mang ga dang bu na ma/ /tsan+dan da ta ka'i me tog /am bsha dang shing mngar dang / /na ma ka ra tu ni shing / /rgya skyegs shing dang kad tshur/ /seng phrom bil rkang da ta ki/ /pad+ma'i ge sar ka tang ka / pri yang ar pash+tha sde gnyis/ /zhu ba'i tshad pa'i 'khru ba sel/ /'byor byed mkhris pa dag la phan/ /rma yang 'tsho bar byed pa yin/ /zhes bya ba la/ pri yang ku dang / am sha'i sde tshan 'di gnyis ni/ zhu ba'i tshad bas 'khru ba sel ba ste/ ma zhu ba'i be+e snabs med pa'i 'khru ba 'joms par byed pa dang / de bzhin du 'byor bar byed de/ rma 'tsho ba'i tshad pas 'khru ba gcod pa dang mkhris pa la phan zhing bde bar byed pa dang / de bzhin du rma yang 'tsho zhing 'byor pa la phan par byed pa yin no/ /de yang pri yang ku ni gan d+ha pri yang ku ste/ de'i me tog go/ / lcim rtsa ni pad+ma rtsa ra'o/ /pad+ma ge sar ni pad+ma'i ki na dza ga'o/ /btsod ni man dzi sh+tha'o/ /yab sha ka ni a nan ta'o/ /shal ma li ni man du ma'o/ /de'i khu ba ni shal ma'i khu ba ste/ de la mo tha ras zhes kyang bya'o/ /sa maM ga ni na ma kar dang rak+ta mU la zhes bya ba la/ rtsa ba dmar ba'o/ / bu na ma ni rak+ta ge sar ro/ /da ta ki ni ma da he tu ste tshang rtsi'o/ /am ba sha ni ba hu mU la ka ste/ rtsa ba mang po'o/ /na ma ka ra ni sa mang ga'o/ /tu ni shing ni nan ti br-i k+Sha'o/ /kad tshu ra ni ha ri zhes bya ba 'dab ma phra ba zhig go /ka tang ka ni a ru la ka'o/ /gla sgang shu dag kru trug tres/ / ser po gnyis dang kha ba gnyis/ /go bye ba tha 'bras bu gsum/ /bong nga dkar nag ru rta dang / /sug smel dang ni shu dag rnams/ /nu zho mngal nad dri ma sel/ /zhes bya ba la/ gla sgang la sogs pa'i sde tshan du byas pa ni/ nu zho'i nad bud med kyi nu zho'i skyon dang de bzhin du mngal gyi nad rnams dang dri ma ste/ 'phyen dang bshang gci la sogs pa'i nad smin cing sel bar byed pa yin no/ /kha ba gnyis las gcig ni pu tse shel lo/ /gnyis pa ka ka tig ta'o/ /gzhan ni go bar zad do/ /n+ya gro d+ha dang a shwad+tha/ /u dum+bA ra seng phrom gnyis/ /'dzam bu gnyis dang a rdzu na/ /ka pi ta dang kad pa la/ /p+lak+sha a mra lcang ma dang / /pi la ya dang pa la sha//nan te rgya shug ka dam pa/ /bi da shing mngar ma du ka /n+ya gro d+ha sogs sde tshan 'di/ /rma 'tsho 'khru gcod chag grugs 'byor/ /tshil ches khrag mkhris skom dad che/ /mngal gyi nad rnams sel bar byed/ /ces bya ba la/ n+ya gro d+ha la sogs pa'i sde tshan 'di ni/ rma 'tsho zhing 'byor bar byed pa dang / 'khru ba gcod pa dang / rkang lag gi chag grugs 'byor bar byed pa dang / tshil ches pa dang khrag mkhris la sogs pa'i nad sel bar byed pa yin no/ /n+ya gro d+ha ni ba shi ba da'o/ /a shwang+tha ni pi pa la'o/ /u dum+bAr ni sa dang pha rol la'o/ /'dzam bu gnyis las gcig ni ra dza 'dzam bu ste/ 'bras bu che ba zhig go/ /gnyis pa ni ka 'dzam bu'o/ /ardzu na ni ku ku ba'o/ /ka pi ta ni ba ra da'o/ / kang pa la ni so ma ba la ka'o/ /blag sha ni gar sha gan da'o/ /a mra ni tsu ta'o/ /lcang ma ni ban dzu la'o/ /pi ya la ni kha ra kan da'o/ /de bzhin du pa la sha ni king shu ka'o/ /shing nan ti ni du ni shing ngo / /rgya shug ni ba di ra'o/ /bi da ra la ni tin du khi'o/ /gzhan dag na re dirga na kha yin no zhes zer ro/ /ma du ka ni ma du puSh+pa'o/ /e la gnyis dang tu ru ka /ru rta gan+d+ha pri yang ku/ /spang spos pa la bya ma ka /spri ka tso ra tso tsa dang / /shing tsha gan+d+ha b+ha dra dang / /rgya spos po la s+the ne ya/ /rgya mtsho sbu ba chu srin sen/ /thang shing dang ni a ka ru/ /gur gum shi ri ba sa ka / tsan+dan gu gul lce bog dkar/ /bu na ma dang kun du ru/ /nA ga ge sar zhes bya'o/ /e la sogs sde rlung bad kan/ /dug rnams sel zhing mdog gsal byed/ /g.yan pa thor bu'i nad rnams dang / /sha bkra bas ldag sel bar byed/ /ces bya ba la/ e la la sogs pa'i sde tshan 'di ni/ rlung dang bad kan dang dug rnams sel bar byed pa dang / de bzhin du mdog gsal zhing dang bar byed pa dang / g.yan pa la sogs pa sel bar byed pa yin no/ /e la gnyis ni sug smel zhes bya ba/ e la phra mo dang / e la sbom pa'o/ / tu ru ka ni si la ra sa'o/ /gan+d+ha bri yang ku ni pha ni'o/ /bya ma ka ni de ba da d+ha'o/ /spri ka ni da ba li ste/ 'bu sug hang ngo / /tso ra ka ni ban d+ha thig kha na ste tsa ro'o/ /tso tsa ni sa ni ta ka ru ste/ ming gi rnam grangs na ta zhes bya'o/ /bo la ni dza ki ba ka'o/ /rgya mtsho sbu ba ni bya gra na ga ste/ sa mun tra na dza la zhes bya'o/ /thang shing ni thang shing ring po'i thang chu'o/ /tsan+dan ni pu shu na'o/ /gu gul ni ma hi sha g+ha'o/ /pog dkar po ni sardza ra sa ste/ lha'i spos zhes kyang bya'o/ /bu na ma ni rak+ta ke sa ra'o/ /kun du ru ni kha bur ra'o/ /sha ma dan ti dra ban ti/ /ku ta ra na kra mu ka / shang gi ni dang sa ta la/ /khron bu dang ni ga ba k+Shi/ /su d+ha k+Shi ra kam bi l+ya/ /sle tres dong ga ka rany+dza/ /baSh+Ta an tra shi kru dang / /a mra shing ro tsha'i 'bras bu/ /dur byid la sogs sde tshan 'di/ /skran dang dug dang yi ga 'chus/ /bad kan dang ni snying nad dang / /gcin sri ba yi nad rnams sel/ /zhes bya ba la/ sham la sogs pa'i sde tshan 'di ni skran la sogs pa'i nad rnams 'joms shing sel bar byed pa yin no/ /de la sha ma ni dur byid kyi bye brag ste/ ba li na ti zhes bya'o/ /dan ti ni mu ka la'o/ /dra ban ti ni mu sha ka ra ni'o/ /ku ta ra ni bod stang ste/ dur byid ces so/ /kra mu ka ni gla gor zho sha'o/ /shang gi ni ni ya ba tig ta'o/ /sa ta la ni tsar mas dang zhes bya'o/ /khron bu ni tig ta dug d+ha ga ste/ 'o ma kha bro ba yod pa'o/ /ga bak+sha ni bi sha la'o/ /su d+ha k+Shi ra ni su da'o/ /kam bi l+ya ni ra dza na kho'o/ / ka rany+dza ni pu ti ka rany+dza'o/ /baSh+Ta an tra ni bi sha gan+d+hi'o/ /shi kru ni ba ha la'o/ /shing ro tsha ni pi lu ste de'i 'bras bu'o/ /de ltar sum cu rtsa gsum bshad/ /sde tshan de dag ma rnyed na/ /de dang cha mtshungs gzhan yang sbyar/ /mi 'dra'i sbyor ba spang bar bya/ /de ltar zhes bya ba'i sgra ni rdzogs pa'i don nam rnam pa'i don no/ /de la rdzogs pa ni sde tshan sum cu rtsa gsum rdzogs pa'o/ /rnam pa'i don ni rnam pa 'dis sde tshan sum cu rtsa gsum yin gyi/ yang rnam pa gzhan du na sman gyi dbye ba la ltos na/ sde tshan mtha' yas pa yin no/ /de dag las sbyor ba dang rjes su mthun pa gang yin pa gzhan de dang de dag gi ma smos su zin kyang gzhug par bya la/ gang gzhan sbyor ba dang mi mthun pa de dag ni smos su zin kyang gdon par bya'o/ /de bzhin du sde tshan yang gzhan dag de dang mtshungs pa ste/ ro dang nus pa dang / 'ju ba'i tshul de dag mnyam pa'i sman gzhan dag sbyar zhing bsre bar bya'o/ /ci mdor bya ba bstan pa ni 'di tsam kho nar zad dam/ 'on te der bya ba gzhan 'ga' zhig kyang yod ce na/ de'i phyir smras pa ni/ mi 'dra ba'i sbyor ba spang bar bya ba yin te/ rdzas gang sbyor ba dang mi mthun zhing cha mi 'dra ba ste/ spangs shing dor bar bya'o/ /sde tshan de dag gnod dang gnad bya sogs ltos te/ /cho ga bskol dang snum dang bsdams pa la sogs ldan/ /btud dang snar gtong mas gtong dang ni phyi rol du/ /bsku zhing byugs pas shin tu gso dka'i nad kun 'joms/ / zhes bya ba la/ don gyi shugs kyis na nad la sogs pa la ltos pa ste/ sbyor ba dang rjes su mthun zhing cha 'dra ba ni gzhug par bya'o/ /zhes ston pa yin no/ /de bas na nad la sogs pa la ltos bas sde tshan ma lus pa gso bar gtogs pa'i nad rab tu zhi bar bya ba'i phyir sman sbyin par bya la/ gal te sde tshan gyi sman ma lus pa rnyed na kun sbyin par bya'o/ /gal te ma rnyed na de las sman gcig gam gnyis sam gsum ma ma bzhi'am lnga'am mang po'am/ ji tsam 'byor pa sbyin par bya'i 'dir sde tshan las smos pa'i sman ma lus pa med du mi rung ba ni ma yin no/ /de yang sman dpyad kyi gzhung gzhan las/ don gyi dbye ba la ltos na/ /phan pa'i sde tshan sbyar bya la/ /re re'am bsres pa ma lus pa/ /sde tshan so sor bsdu bar bya/ /zhes smos pa yin no/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las le'u bcwa lnga ba'i rnam par 'grel pa'o// //de nas snum gyi cho ga dpyad par bya ba'i le'u bshad par bya'o/ /zhes bya ba la/ sbyar ba la sogs pa'i sman gyi sde tshan gyi rjes la/ snum gyi cho ga bya ba'i le'u brtsams pa ni gang gi phyir skyug sman la sogs pas sbyor ba na/ snum dang dugs byas na slar gnod par 'gyur bas/ de'i 'og tu 'di bshad pa yin no/ /de la snum ni zhun mar dang / til mar dang / tshil dang rkang la sogs pa'o/ /de'i cho ga ni bya ba'i las kyi cho ga ste/ de'i le'u gang du bshad/ de'i sman gyi cho gar bya ba'i le'u ste/ de bshad par bya'o zhes bya ba'o/ /snum byed sman rnams phal cher ni/ /lci zhing bsil la khong 'khru snum/ /rngul dang bral la mnyen zhing brlan/ /de las bzlog pa rtsub byed yin/ / zhes bya ba'i phyir bstan pa 'di ni gzhung rtsom par byed pa dang / rtsub par byed pa'i sman rnams kyi mtshan nyid mdor bsdus nas bshad pa yin no/ /sman gang ci yang rung ba lci ba la sogs pa'i yon tan dang ldan pa de dag ni snum par byed pa dang ldan pa de ni yin la/ yon tan de las go bzlog pa yang ba dang / dro ba dang / bshang ba sri ba dang / rtsub pa dang / rno ba dang / sbom pa dang / sra ba dang / bska ba dang / mang ba'i yon tan dang ldan pa de ni rtsub par byed pa yin no/ /phal cher zhes smos pa ni snum par byed pa dang / rtsub par byed pa gnyis ka la yang sbyar bar bya ste/ de la go rims 'chol ba dag kyang yod par bstan pa'i phyir ro/ /de yang dper na ra'i 'o ma ni yang nas yang du snum par byed pa yin no/ /de bzhin du til mar ni snum par byed pa yin no/ /de bzhin du mon sran dkar po ni/ lci ba'i yon tan dang ldan yang yang bar byed pa yin no/ /zhun mar rkang dang tshil til mar/ /snum rnams kyi ni mchog rab 'dod/ /ces bya ba la/ zhun mar la sogs pa bzhi po ni/ snum thams cad kyi nang nas mchog rab bam/ gtso bo yin par sman pa mkhas pa rnams 'dod do/ /rang gi las myur du sgrub bar byed pa yin pa'i phyir ro/ /de dag las kyang zhun mar ni/ /sbyor rjes 'jug pas mchog yin no/ /zhes bya ba la/ bzhi po de dag gi nang nas kyang zhun mar ni mchog yin te/ ci'i phyir zhe na/ sbyor rjes 'jug pa zhes bya ba ste/ sman dang sbyar ba de'i rjes su 'jug cing mthun pas de'i phyir zhun mar ni snum thams cad kyi mchog yin gyi til mar ni ma yin no/ /de yang rgyu mnyam du zin kyang zhun mar ni bu ram la sogs pa rdzas kyi yon tan dro ba yod pa dang sbyar du zin kyang / rang gi mtshan nyid kyis bsil ba mdor bstan pas sbyor ba'i sman gyi rjes su mthun par 'jug gi / til mar ni de lta ma yin no/ /de ni tsan+dan la sogs pa sman gyi nus mthu bsil ba dang ldan par sbyar na yang / rang gi yon tan dro ba de rnams thams cad du 'dor bar mi 'gyur la/ de mi 'dor bas na khrag dang mkhris pa dang / me dbal la sogs pa la yang gnod par byed pa yin no/ /de dag sngon bzhin mkhris pa sel/ /phyi ma bzhin du cig shos sel/ /zhes bya ba la/ snum snga ma gang yin pa ni/ sngon bzhin zhes bya ba la/ gang zhig la gang las 'og mar gyur pa ni phyi ma bzhin zhes bya ba la/ phyi ma la ltos pa ni snga ma yin no/ /snga ma la ltos pa ni phyi ma yin no/ /de bas na 'di skad du/ bstan pa'i zhun mar la sogs pa'i snum bzhi po de dag las/ tshil dang rkang mar zhun mar zhes bya ba ni sngon bzhin til mar zhes bya ba'i snum ni ma yin te/ de las gong mar gyur pa med pa'i phyir dang / 'di gang zhig la ltos nas snga mas bdag nyid sgrub pa'i phyir phyi ma yang yod pa ma yin pa'i phyir ro/ /de bzhin du snum bzhi po de dag las rkang dang tshil dang til mar zhes bya ba la snum gsum po kho na phyi ma bzhi dang sbyor te/ zhun mar zhes bya ba'i snum la phyi ma yod pa ma yin no/ /de bas na snga ma bzhin du mkhris pa sel ba yin pas tshil dang rkang dang zhun mar ni mkhris pa sel bar byed pa yin no/ /de las kyang tshil ni mkhris pa sel bar byed pa yin no/ /rkang ni rab tu mkhris pa sel bar byed pa'o/ /zhun mar ni rab mchog mkhris pa sel bar byed pa'o/ /phyi ma bzhin du cig shos sel/ / zhes bya ba nas/ cig shos ni rlung dang bad kan gnyis te/ de dag snum gsum po rkang dang tshil dang til mar gyis rim bzhin sel bar byed pa yin te/ rkang ni rlung dang bad kan sel bar byed pa yin no/ /tshil gyis rlung dang bad kan rab tu sel ba'o/ /til mar gyis rlung dang bad kan rab mchog tu sel bar byed pa yin no/ /mar bas til mar lci de bas/ /tshil de tshil bas rkang lci'o/ /zhes bya ba ni/ 'di dag 'ju dka' ba'i rim pa yin te/ de yang mtho btsun dpal 'phel gyis byas pa'i gces pa btus pa las/ zhun mar bas ni til mar lci ba yin la/ til bas ni tshil lci zhing 'ju dka' ba yin no/ /tshil bas ni rkang 'ju dka' ba yin no zhes bshad pa yin no/ /snum rnams kyi ming dang ming can gyi 'brel pa bstan par bya ba'i phyir smras pa ni/ de las gnyis dang gsum dang bzhi/ /zung dang gsum pa che zhes bya/ /zhes bya ba yin te/ snum gnyis po mar dang til mar ni zung zhes bya ba'i snum yin no/ /zhun mar dang til mar dang / tshil gsum gsum pa zhes bya'o/ /de gsum rkang dang bcas pa bzhi po zhes bya'o/ /dugs bya sbyang bya chang bud med/ /rtsol chags sems las che ba dang / /rgan po byis pa stobs chung sbeg /rtsub dang khrag dang khu ba zad/ /rlung nad kyis nyen rab rab dang / /shin tu dbye dka' la snum bya/ /zhes bya ba la/ dugs bya bar 'os pa ni dugs bya ba'o/ /legs par sbyang bar 'os pa ni sbyang bar bya'o/ /chang dang bud med dang rtsol ba rnams la chags pa dang / de bzhin du sems las che ba dang / rgan po dang byis pa dang / stobs chung ba dang sbeg pa dang / rtsub pa dang / gang khrag dang khu ba zad pa dang / de bzhin du rlung nad kyis rab tu nyen zhing gdungs pa dang / de bzhin du yang rlung las rab rib dang / mig nad shin tu dbye dka' zhing / mig dka' bas dbye dgos pa gang yin pa ste/ de dag la snum gyi las bya'o/ /shin tu drod chung rab drod che/ /shin tu sbom dang rid pa dang / /brla rengs tshad 'khru ma zhu dang / /lkog nad dbyig dug dmu rdzing dang / /brgyal skyugs bad kan yi ga 'chus/ /skom dad chang nad kyis nyen dang / /dus min bu skyes sna sman dang / /mas gtong bkru sman byas la min/ /zhes bya ba ni/ shin tu drod chung ba la sogs pa la snum gyi cho ga mi bya'o/ /zhes bya bar sbyar ro/ /de drod shin tu che ba la snum gyi cho ga byas na me drod shin tu 'phel drags par 'gyur ro/ /shin tu sbom pa la yang me drod dang tshil cher 'phel bar 'gyur ro/ /rid pas ni 'ju mi nus par 'gyur ro/ /brla rengs la sogs pas nyen pa zhes bya bar sbyar te/ dus ma yin bar bu skyes pa yang snum gyi cho ga mi bya ste/ zla ba ma tshang bar bu skyes na 'dir sbyor ba'i stobs yin du zin kyang / snum gyi cho ga ma byas par sbyar ba'i cho ga bya'o/ /zhes ston pa yin no/ /dus ma yin par bu skyes pa yang snum gyi cho ga mi bya ste/ zla ba ma tshang bar du skyes pa yang snum gyi cho ga mi bya'o/ /de bzhin du sna sman la sogs pa las gsum po byas pa'i skabs su yang snum bcos kyi cho ga mi bya'o/ /de la blo dran yid gzhungs sogs/ /'dod pa rnams la zhun mar bsngags/ /zhes bya ba ni/ de la snum rnams kyi nang nas blo gros la sogs pa 'dod cing don du gnyer ba'i skyes bus snum bsten pa'i skabs la bab pas na/ zhun mar btung ba bsngags shing 'dod par bya ba yin te/ de'i nus pa de yin pa'i phyir ro/ /de la blo ni blo gros so/ /dran pa ni sngon nyams su myong ba dran pa'o/ /yid gzhungs pa ni shes pa ste/ gzhung 'dzin par nus pa dang ldan pa'o/ /sogs pa'i sgras ni skad gdangs mdog la sogs pa blta'o/ /rmen bu bad kan srin bu dang / /tshil ches rlung nad yod pa dang / /lus yang mkhrang 'dod lto srab pa'i/ /lus can rnams la til mar phan/ /zhes bya ba la/ rtsa nad la sogs pa'i nad rnams dang / de bzhin du bad kan dang / tshil ches pa dang / rlung nad can gyi skyes bu dang / de bzhin du lus yang bar 'dod pa dang / mkhrang bar 'dod pa dang / de bzhin du srab pa'i lus can rnams la til mar phan no/ /zhes bya bar sbyar ro/ /rlung dang nyi tshan lam bud med/ /khur dang rtsol bas lus zungs zad/ / rtsub nyon mongs bzod me drod rno/ /rtsa sgo rlung 'gags lhag ma phan/ /zhes bya ba la/ rlung dang nyi tshan la sogs pas lus zungs zad par 'gyur ba'i skyes bu gang yin pa dang / de bzhin du lus rtsub pa la sogs pa la/ snum lhag ma rkang dang tshil bu gnyis phan zhing bsngags pa yin no/ /nyon mongs bzod ces bya ba'i sgras/ nyon mongs shing dka' ba bsten mi bzod pas ni zhun mar dang til mar bsten par mi bya'o/ /zhes bkar ba yin no/ /me drod ni rno ba'i snum snga ma dag gis/ rkang dang tshil sbyin pa dang / dgar ba'i tshig yin no/ /rlung gis rtsa sgo kun 'gags shing chod pa 'di lta bu la tshil zos na phan no/ /de la tshil ni lhag par rus pa'i tshigs kha bye ba dang / rus pa chag pa dang / gnod snad pa dang / lto ba'i nang grol na ba dang / mes tshig pa dang / lus smas te rma byung ba dang / rkang lag gi tshigs bur ba dang / mo mtshan na ba dang / rna ba na ba dang / klad pa na ba dang / 'di lta bu la yang tshil phan no/ /zhes bya bar sbyar na yang tshil mchog tu yang phan pa yin no/ /da ni dus gang zhig btang ba bsngags pa bstan pa'i phyir smras pa ni/ til mar dbyar phan zhun mar ni/ /dbyar mtha' de bzhin dpyid kyang bsngags/ /zhes bya ba la/ 'dir dbyar zhes smos kyang dbyar smos pa'i dus tshigs thog ma la bya ste/ de nas dbyar zla 'bring po'o zhes bya ba'i skabs su sbyong ba byed na/ til mar bsngags pa yin no/ /dbyar mtha' zhes smos kyang / char 'bab pa'i mtha' rdzogs pa ston zla tha chungs la/ de'i tshe snum bya ba'i don du zhun mar bsngags pa yin no/ / gzhan zhes bya ba rkang dang tshil zhes bya ba'i snum ni dpyid zla 'bring po'i skabs su sbyong bar byed pa na snum gyi sbyor ba bsngags pa yin no/ /'di dag ni nad med pa'am/ nad pa gang yang rung ba sbyong ba byed pa'i gnas skabs bya ba'i phyir gzhung 'di brtsams pa yin no/ /nad med cing tha mal par gnas pa dag gis ji skad bshad pa'i dus tshigs kyi cho ga rjes su dpyad zin kyang dus las byung ba'i nad bsags pa dag yod srid par de'i 'og tu de las nad bsags pa gzhi 'khrugs par 'gyur la/ nad 'khrugs pas nad 'byung bar 'gyur ba yin te/ de bas na tshe'i rig byed kyi de kho na shes pa'i drang srong rnams kyis rang bzhin gyis byas pa'i rgyud so sor bde bar gnas pa dag gis sbyang ba dag bya ba nyid du bstan pa yin no/ /de bzhin du grang ba las byung ba'i nad bsags pa ni dpyid kyi tshe sbyang ba bshad pa 'dis cho ga lhag ma yod pa'i gzhung gis sbyar ba yin no/ /bkru sman la sogs pa'i sbyong ba rnams kyang snum dang dugs kyi cho ga bya ba sngon du 'gro bas bya ba yin gyi gzhan du ma yin no/ /de'i phyir grang ba las byung ba'i nad bsags pa ni dpyid kyi dus su gdon cing / grang ba na snum dang dugs bya ba dang / de'i tshe til mar bkag pa yin no/ /de bzhin du dbyar 'das pa na/ dbyar bsags pa'i nad 'byin pa nad dang por snum dang dugs nges par bya dgos la/ der yang snum thams cad kyis snum gyi cho ga byed de/ de yin pa'i phyir kun gyi byed pa dag srid mod kyi/ der gnas mod kyis mi bya'o/ /zhun mar gyi snum gyi cho ga bya ste/ 'di ni nad med pa'i yul la byas pa'i nges ba yin no/ /nad pa'i gnas skabs sbyang bar byas pa gso ba'i nad kyis nyen pa la til mar gyis gso dgos pa'i nad yin te/ de dang mi 'tsham du zin kyang / dbyar sbyang ba'i las byed pa na/ til mar nyid kyis snum gyi cho ga bya'o/ /snum gzhan gyis ni ma yin no/ /de bzhin du gzhan dag kyang nad kyi tshul dang sbyar te/ rang nyid kyi rjes su dpag par bya'o/ /'dir 'di ltar dbyar til mar gtang ngo / /dbyar gyi mtha' ni zhag dang tshil bu gtang ngo / /zhes bya ba'i tshul gyis nges pa bzhag pa ni gzhan la yang cung zad ltos pa yin pas/ nad de'i phyir smras pa ni/ thun mong dus la snum rnams ni/ /nyin mo nyi ma gsal tshe bsngags/ /zhes bya ba yin te/ thun mong du shin tu tshab ma yin te/ grang ba ma yin pa'i gnas skabs bar mar snum gyi cho ga byed pa na/ de'i tshe sbyang ba'i sngon du til mar la sogs pa snum gyi cho ga 'di'i don du sbyong ba de yang nyin par bya'o/ /mtshan mo ni ma yin no/ /de bzhin du nyi ma gsal ba ste/ nam mkha' ltar dri ma med cing sprin gyis nyi ma'i zer ma bsgribs pa'i tshe na bya ba yin no/ /de ltar na dus de rnams su nad bsags pa nges par 'joms pa'i cho ga bshad pa yin no/ /dbyar la sogs pa ma gtogs pa dus gzhan dag tu nad kyi dbang gis bsgyur te/ bya dgos pa'i sbyang bas bya ba yin du zin kyang bya ba'i mtshan nyid du 'gyur te de bzhin du nyi ma gsal ba ste/ nam mkha' ltar gang gi phyir de sbyong ba'i 'og tu snum gyi cho ga bya dgos la/ de la yang snum gyi nges pa bshad pas na snum gzhan gyi dgos pa bzhin byed par mi nus pa de la ji ltar bya/ bde ba bsten par bya ba smras pa ni/ rings la dgun yang til mar gtang / /tsha ba'i dus su'ang mar tshan gtang / /zhes bya ba la/ nad kyi gso ba'i rim thabs su bya dgos shing sbyang bas gso dgos pa'i nad la dgun stod dgun smad kyi tshe yang sbyang ba'i don du til mar gtang bar bya'o/ /yang zhes bya ba'i sgras ni til mar dbyar 'ba' zhig gi tshe gtang bar ma zad do/ /zhes nges par gzhag pa yin no/ /de bzhin du rings par gso dgos pa yin na/ gang gi tshe so ga'i tshe sbyong ba byed pa de'i tshe sbyang ba'i sngon du snum gyi cho gar gtang ba'o/ /yang zhes bya ba'i sgras ni til mar mtha' 'ba' zhig tu zhun mar gtang bar ma zad kyi dus 'di'i tshe na yang gtang ba yin no/ /snum thams cad nyin mo gtang ba yin mod kyi/ mtshan mo yang ring thabs la gtang du rung ngo / /mkhris pa rlung dang mkhris par bcas/ /ldan pa la yang mtshan mo nyid/ /ces bya ba la/ tsha ba'i dus su mar snum gyi cho ga sbyong ba'i sngar mtshan mo gtang du rung bas nges pa 'ba' zhig tu ma zad kyi 'di yang nges pa yin te/ mkhris pa'i nad yin te/ de dang 'byung ba'i nad dang / de bzhin du rlung 'khrugs pa'i nad dang / de las byung ba'i nad snum gyis gso bar bya la/ de zhi bar bya ba'i phyir tsha ba'i dus su sman dang sbyar ba'am ma sbyar ba zhun mar sbyin par bya'o/ /nyin mo ma yin pa la til mar dang / rkang dang tshil sbyin par bya'o/ /de bzhin du mkhris pa dang bcas pa'i ldan pa la mtshan mor sbyin par bya ste/ de yang ldan pa'i gnyis po mkhris pa shas che ba'i rlung mkhris kyi ldan pa dang / mkhris pa dang bad kan du ldan pa'am/ de las byung ba'i nad snum gyis gso bar bya la/ de zhi bar bya ba'i phyir zhun mar kho na mtshan mo gtang bar bya'i til mar la sogs pa'i snum gzhan yang mi gtang la/ nyin mo yang gtang bar mi bya'o/ /mkhris pa dang rlung zhes smos pa 'dis ni nad kyi mtshan nyid nye bar mtshon pa'i don shes par bya'o/ /mtshan mo las gzhan rlung bad kan/ /nyin mor sbyar bas mkhris nad 'gyur/ /zhes bya ba la/ 'di'i don ni 'di yin te/ zhun mar dang til mar gnyis btang ba de bzhin du grang ba'i dus su zhun mar btang na rlung dang bad kan gyi skyon du 'gyur ro/ /de bzhin du tsha ba'i dus su til mar nyin mo btang na mkhris pa'i nad du 'gyur ro/ /rkang dang tshil ni grang ba'i dus dang dro ba'i dus gnyi gar rings pa'i dus byung ba dag la sbyang ba'i sngon du snum gyi cho ga bya bar gzhung rtsom pas ma bshad de/ de gnyis ni tsha ba dang bsil ba'i nus pa dang gnyi ga yod pas/ de la bsil ba'i yon tan 'ba' zhig med de gzhan la rag las pa yin pa'i phyir dang de bzhin du sha dang rjes su mthun pa yin no zhes bshad do/ /de yang sman dpyad kyi lung las/ sems can tsha grang ci 'dra ba/ /rkang dang tshil bu 'dra bar bshad/ /ces 'byung ba yin no/ /de ltar snum gyis gtang ba'i dus gang dang gang yin pa nges par bshad nas/ da ni snum de ji ltar btang ba de bstan par bya ba'i phyir smras pa/ bza' sogs zas dang mas gtong dang / /sna nas gtang bsku mkhur bkang dbo/ /mgo bsku rna mig dgang ba yi/ /snum ni rigs par dpyad par bya/ /zhes bya ba la/ snum rigs par dpyad par bya zhe na/ bza' sogs zas dang zhes bya ba la sogs pa ste/ 'bras khur la sogs pa tshod ma la sogs pa lhan cig mid pa dang / lhan cig bza' ba dang / de bzhin du mas gtong ba gsum po bkru sman drag po mas gtong ba ni ru ha dang / bkru sman 'jam po mas gtong ba dang / 'jam rtsi mas gtong ba ste gsum dang / sna nas gtang ba dang / lus bsku ba dang / mkhur ba dgang zhing dbo ba dang / rna ba dgang ba dang / mig dgang ba ste/ 'di dag 'og nas bshad pa'i mtshan nyid can rigs pa zhes bya ba sbyor ba'i thabs la sogs pa'i mtshan nyid dang ldan par dus kyis bya ba bsam pa dang / lus kyi tshad dang / nad kyi tshul la dpags nas/ ran cing 'tsham par nye bar dpyad par bya'o/ /de bzhin du/ ro yi dbye ba re re yis/ /drug cu rtsa bzhi rnam par brtag /ces bya ba ste/ ro'i dbye bar re re dbri ba la sogs pa'i gzhung bstan nas/ drug cu rtsa gsum gyi grangs su chad pa dang / lhan cig snum sbyar ba dang / de bzhin du re re btang zhing phrad med par snum 'ba' zhig btang ba las/ drug cu rtsa bzhi rnam par brtag cing dpyad par bya'o/ /de ltar ro'i dbye ba re re las snum pa rnam par dpyad na drug cu rtsa bzhir 'gyur bar bshad pa na/ dgos pa ci zhig gi phyir dpyad pa 'di bshad ce na/ de'i phyir rigs pas gnyis smras pa ni/ snum ni gzhan gyis zil gnon cing / /chung ngu dgos pas rim pa bshad/ /ces bya ba la/ snum zhing chung ngu dgos pa'i phyir dang / de bzhin du gzhan gyi zil gyis gnon cing zas la sogs pa mang pos zil gyis mnan pa dang / de bzhin du ro'i dbye bas kyang zil gyis mnan te/ de ltar zil gyis gnon pas na/ de'i phyir de rnams ni de rnam par brtag pa zhes bya'o/ /de bas na zhun mar 'ba' zhig btung ba la ni rnam par dpyad mi dgos par bshad de/ de'i phyir smras pa ni/ ji skad bshad pa'i rgyu med pas/ /dngas ma btung la dpyad mi dgos/ /snum gyi las ni myur 'grub pas/ /snum de'i cho ga mchog yin no/ /zhes bya ba la/ ji skad bshad pa'i rgyu med pa ni sngar ji skad bstan pa'i rgyu med pa'i phyir dang / mang du dgos pa'i phyir 'di la dpyad mi dgos la/ de bas na snum gyi cho ga dngas ma btung ba de lta bu de ni mchog yin te/ rnam par dpyad dgos pa las khyad par yod pa'i phyir ro/ /ci'i phyir zhe na/ snum gyi las ni myur 'grub pa/ /zhes bya ba yin te/ snum gyi bya ba myur zhing rings par rdzogs par byed cing snum gyis gso ba'i nad zhi bar byed pa yin pas mchog yin no/ /dngas ma btung ba de snum gyi cho gar gtong ba'i tshad chung ngu dang / bar ma dang / chen por bshad pa ni pho ba'i me drod kyis 'ju ba las rjes su dpag pa las shes par bya dgos pa'i phyir/ 'dir smras pa yin te/ gang zhig thun ni gnyis dang bzhi/ /brgyad kyis rim bzhin 'ju 'gyur ba/ /tshad chung 'bring dang che ba ste/ /de las chung ngu bza' ba mchog /ces bya ba la/ snum de bza' ba'i zas ni chung dang 'bring dang chen po gsum du 'gyur te/ tshad gang zhig gis thun gnyis kyis 'ju bar 'gyur ba de ni chung ngu yin la gang thun bzhis rjes su 'ju bar gyur pa de ni bar ma zhes bya'o/ /gang zhig thun brgyad kyis 'ju ba de ni chen po zhes bya'o/ /de ltar tshad chung ngu dang 'bring dang chen po de rnams las gang zhig tshad chung ngu de ni mchog yin te/ sbyor ba thams cad dang 'tsham pa yin pa'i phyir ro/ /de yang tshad chung ngu de ni tshad chung ba gtang dgos pa la nye bar sbyar ba na skyon med pa yin la/ de bzhin du tshad 'bring dang chen po gtang dgos pa la btang du zin kyang skyon med pa nyid yin no/ /de nyid kyis na gzhung rtsom par byed pas/ nad la sogs pa brtags nas ni/ /thog mar shin tu chung ngu bza'/ /zhes smras pa yin te/ nad pa'i tshul dang yul dang / dus la sogs pa brtags shing dpyad nas thog mar te/ dang por kho nar thams cad du tshad ni shin tu chung ngu bza' bar bya zhing longs spyad par bya'o/ /des na 'di skad ston te/ nad dang yul la sogs pa las brtags nas tshad shin tu chung ba ni tshad bzhi par brtag par bya ste/ gang gi phyir skyes bu'i pho ba'i me'i tshad ma shes par snum mang du byin na de mi 'ju zhing srog kyang 'dor bar 'gyur ba srid pa yin no/ /da ni snum gyi tshad gsum po de dag gtang ba'i dus dang / gtang ba'i gnas bstan par bya ba'i phyir smras pa ni/ snga de'i zas ni zhu nyid dang / /sbyang phyir dngas ma mang du btung / /zhes bya ba yin te/ snga de zhag gi zas zhu ba tsam nyid kyi dus de nyid de/ zas ni zhu bkres pas ni nyen pa'i skabs su sbyang ba'i phyir/ snum mang du gtang ba nyid la zhun mar dngas ma 'ba' zhig btung bar bsngags pas na/ de'i phyir 'di nyid ces bya ba'i sgra nges par bzung ba'i don du smras pa yin no/ /snga de zhag gi zan zhu ba nyid na zhes pas chad kyi ltogs pa dang btung bar bya ba yin te/ de ni gang gi phyir myur ba nyid du 'ju bar byed de/ sbyang ba ma byas par me'i drod shin tu shas che ba yin pa'i phyir ro/ /de yang drang srong tsa ra kas/ lto ba rlung gi shas che zhing / /rtsol ba che ba'i ngang tshul can/ /me drod che ba'i sman rnams ni/ /mi 'khru nyid la myur du 'ju/ /zhes bshad pa yin no/ /da ni zhi bar bya ba'i snum gyi cho ga smras pa ni/ zhi bya ltogs bcas zas med par/ /'bring tshad tsam ni bsngags pa yin/ /zhes bya ba yin te/ zhi bar bya ba la snum zas ma zos par ltogs pa dang bcas pa'i skabs su gtang ba bsngags pa yin la/ de yang 'bring tshad tsam ste/ thun bzhis 'ju ba bsngags shing phan pa yin te/ de yang zas med pa dang ste/ zas gang dang yang ma bsres par gcig pu gtang ba bsngags pa yin no/ /brta ba'i snum gyi cho ga smras pa ni/ brta ba sha dang sha khu sogs/ /de yang 'bras chan nyung bcas pa/ /byis pa rgan po skom gyis gdungs/ /snum 'gras chang dang che ba dang / /bud med snum ni rtag bsten dang / /drod chung bde dang dka' mi bzod/ /lto snyi nad dkyil chung tsha dus/ /nyam chung ba la bsngags pa yin/ /zhes bya ba la/ brta ba'i snum gyi cho ga ni sha dang sha khu la sogs pa dang lhan cig gtang ba bsngags so/ /sha khu la sogs pa'i sgras ni bza' ba dang snum khur la sogs pa bsdu'o/ /da yang 'bras chan dang bcas pa ste/ bza' ba dang bcas par bya'i/ gang sbyang ba zhi ba zhes bya ba'i snum gyi cho ga gnyis so/ /sngar bshad pa dag ni zas dang bcas bar mi bya ste/ gnyi ga yang zas kyi dus su bza' ba bkag pa yin no/ /de yang nyung ngu ste chung ngu yin pa la yang de ni byis pa dang rgan po la sogs pa la yang phan pa yin no/ /de bzhin du skom gyis gdungs shing skom dad che ba dang / gang snum dang 'gras shing snum la mi dga' ba dang / chang dad che zhing rtag tu chang 'thungs pa dang / de bzhin du rtag tu bud med bsten pa dang / rtag par snum bsten pa dang / pho ba'i me drod chung ba dang / bde zhing skyid de 'dug pa dang / dka' ba mi bzod cing sdug bsngal bsten par mi nus pa dang / lto ba snyi ba dang / nad dkyel chung ba dang / tsha ba'i dus te so ga'i dus dang / nyam chung ba ste/ lung zungs zad pa rnams te/ de thams cad la brta ba'i snum bsags shing phan pa yin no/ /dang po bar dang zas rjes zos/ /lus kyi smad par stod las byung / /nad rnams sel zhing lus kyi stobs/ /skyed pa'i rim bzhin byed pa yin/ /zhes bya ba la/ brta ba zhes bya ba'i snum chung ngu zas kyi dang por btang na lus kyi ro smad las byung ba'i nad rnams sel bar 'gyur ro/ /zas kyi bar du btang na lus kyi bar gyi nad sel to/ /zas kyi rjes la btang na ro stod las byung ba'i nad rnams sel bar byed do/ /des na rim pa bzhin te/ go rims ma 'chol lus zhes bya bar ro stod dang ro smad kyi stobs skyed pa yin no/ /des na zas kyi dang por btang na ro smad du gtogs la/ rked pa la sogs pa'i lus kyi stobs skyed par byed pa yin no/ /zas kyi bar du btang na lus kyi bar ma lto ba dang snying ga la sogs pa'i stobs skyed par byed pa yin no/ /zas kyi rjes la btang na nam tshong yan chad kyi lus po la sogs pa'i stobs skyed pa yin no/ /da ni snum 'thung ba'i rjes la btung ba'i cho ga bstan par bya ba'i phyir smras pa ni/ de ni legs par smin phyir dang / /khar chags pa ni phyi ba'i phyir/ /snum dag 'thungs rjes chu tshan btung / /e ran ba la ta kar min/ /zhes bya ba la/ snum dngas ma 'thungs pa'i rjes la bde bar 'ju bar bya ba'i phyir smras pa ni/ de bzhin te/ de'i khar chags pa dag ma gos shing dag par bya ba'i phyir chu tshan btung bar bya'o/ /snum dngas ma btung ba thams cad la chu tshan btung bar bya ba'am/ 'on te 'ga' zhig la btung bar bya zhe na/ e ran ba la ta kar min zhes smras pa yin te/ e raN+Da dang ba la ta ka'i snum 'thungs pa'i skabs su ni/ chu tshan btung bar mi bya ste/ 'di gnyis ni nus pa chung ba dang ldan pa'i phyir/ de dag gi gnod pa skyed pa yin no/ /zhu 'am ma zhu'i dogs skye na/ /slar yang chu tshan btung bar bya/ /des ni sgregs pa dag 'gyur zhing / /de las khong yang yi gar 'ong / /zhes bya ba la/ snum dngas ma 'thungs pa'i tshe/ zhu'am ma zhu ba'i dogs pa skyes shing yid gnyis su gyur na/ slar zhing yang chu tshan btung bar bya ste/ chu tshan de dang des ni sgregs pa dag cing mnam pa med par 'gyur ba dang / de yang de las lus khong yang bar 'gyur ba dang / de bzhin du yi gar 'ong ba ste/ zas la 'dod pa skye bar 'gyur ro/ /nang par 'thung ngam 'thungs pa dang / /'thungs bar gyur tshe kha zas ran/ /gsher drod bad kan mi skyed dang / /shin tu snum min 'dres min bza'/ /zhes bya ba la/ snum 'thungs pa'i skyes bu des kha zas bza' bar bya ba la/ de yang ji lta bu zhe na/ phal cher gsher zhing rlan bag yod pa dang / dro ba'i bad kan mi skye ba dang / shin tu snum pa ma yin pa ste/ cung zad snum pa dang 'dres pa ma yin pa ste/ zas gnod pa dang 'dren mar ma yin pa bza' bar bya'o/ /de yang ci zhig byed pa'i tshe zhe na nang par te/ phyed de nyin na 'thung bar rtog pa'am/ yang de bzhin du nyin zhag de nyid kyis 'thung ba dang / de bzhin du dang por gang gis snum 'thungs pa de'i tshe/ kha zas 'di ltar bza' ba'o/ /kha lag chu tshan gyis bkru zhing / /bud med mi bsten mtshan mo nyal/ /shugs dgag drag shul las rnams dang / /khro dang mya ngan nyi tshan grang / /ser bu'i khar 'dug rta zhon 'gro/ /mang smra rab mtho'i stan la 'dug /sngas ni rab mtho rab dma' dang / /nyin nyal dud rdul gnas pa spangs/ /gang gis nyin mo 'thungs gyur pa/ /de ltar gzhan la spang bar bya/ /zhes bya ba la/ snum 'thungs pa'i skyes bus kha lag bkru ba la sogs pa/ chu'i bya ba chu dron pos bya ba dang / bud med bsten cing nyal po spang bar bya ba dang / de bzhin du mtshan mo nyal zhing bde bar gnyid log par bya ba dang / de bzhin du bshang gci la sogs pa shugs mi dgag pa dang / de bzhin du drag shul gyi las rnams dang khro ba nas dud pa dang rdul gyi nang du 'dug pa'i bar du spang bar bya'o/ /de la drag shul gyi las ni dus nub par byed pa'i du ma'o/ /rab mtho stan gcig mthon po la gcig pu yun ring du mi 'dug pa'o/ /mal dang mgo bo'i rten du gyur pa ni sngas zhes bya ba ste/ de yang rab tu mtho ba dang rab tu dma' ba spang bar bya'o/ /nyin par nyal ba ni nyin mo gnyid log pa ste/ de yang spang bar bya'o/ /dud pa ni grags par zad do/ /rdul ni rdul khrod de/ der gnas par mi bya'o/ /de bas na snum gyi cho ga byed pa na/ de thams cad spang bar bya'o/ /de yang sang gi nyin mo ste/ nyin zhag gang la skyes bu snum 'thungs par gyur pa des/ de srid kyi nyin zhag gzhan la'ang gong du smos pa'i thams cad spang bar bya'o/ /rim 'di las rnams thams cad dang / /nad zad pa la spyad par bya/ /zhes bya ba la/ bshad ma thag pa'i chu tshan btung ba la sogs pa'i las kyi rim pa bzhin 'di ni snum gyi cho ga dang / dugs dang snod la sogs pa nas me btsa' dang / thal sman rnon po gtang ba'i bar du/ de bzhin du nad kyis nyam chung bar gyur pa la yang bya ste/ snum gyi cho ga 'ba' zhig la 'di bya bar ma zad do/ /zhi ba'i snum gyi nyer spyad ni/ /bkru sman btang ba lta bur bya/ /zhes bya ba la/ zhi bar bya ba'i snum btang ba'i nye bar spyad pa zas la sogs pa'i rim pa ni bkru sman btang ba lta bu ste/ bkru sman btang ba na thug pa la sogs pa bya ba gang dag yod pa de dag thams cad zhi bar bya ba'i snum byas pa'i snum de zhu ba'i skyes bu la yang bya'o/ /lto snyi zhun mar zhag gsum btung / /lto sra ba yis zhag bdun btung / /yang na ji srid snum par btung / /de phan chad ni goms par 'gyur/ /zhes bya ba la/ skyes bu lto snyi bas zhun mar dngas ma zhag gsum btung bar bya la/ mi lto sra bas ni zhag bdun gyis btung ngo / /yang na gnyis po 'di dag kho na nges pa med de/ skyes bu khong snum par gyur pa nyid 'di'i tshad nges pa yin no/ /des na dus ji srid kyis legs par khong snum pa'i skyes bur gyur pa de srid par btung bar bya'o/ /zhes bya ba'i don no/ /de ltar legs par snum pa'i mtshan nyid du gyur phan chad snum dngas ma btung ba ni goms par 'gyur gyi/ sbyor ba'i bya ba mi byed do zhes bya ba'i don no/ /rlung ni bder rgyu me drod 'bar/ /bshang ba snum zhing mi sri la/ /snum mi 'dod cing snyom 'gyur la/ /snum legs yin te rtsub go bzlog /ces bya ba la/ skyes bu legs par snum gyis zhen par gyur pa ni rlung rgyu zhing lugs bzhin 'byung ba dang / pho ba'i me drod 'bar zhing bde ba dang / bshang ba snum par 'gyur gyi rtsub pa ma yin pa la/ de bzhin du mi sri ba ste/ phal cher snyi zhing brlan par gyur pa dang / de bzhin du snum sten par byed pa'i skyes bu/ snum mi 'dod cing snum la zhen par mi dga' bar 'gyur ba dang / de bzhin du snyi zhing snyi bag tu gyur pa ste/ de dag thams cad ni snum gyis legs par zhen pa'i mtshan nyid yin no/ /skyes bu snum med cing rtsub bar gyur pa ni de las go bzlog pa ste/ ji skad bshad pa'i mtshan nyid las bzlog par 'gyur ro/ /de yang rlung mi bde bar rgyu ba dang / me drod chung ba dang / bshang ba rtsub pa dang / bsgongs pa dang / snum la 'dod pa skye bar 'gyur zhing / snyom par mi 'gyur ro/ /snum drags pa yis skya ba dang / /sna dang kha rkub las 'dzag 'gyur/ / zhes bya ba la/ skyes bu snum ha cang drags par gyur pa ni/ skya bo bseng bseng por 'gyur ba dang / sna nas 'dzag pa dang / rkub nas 'dzag par 'gyur ro/ /tshad dang mi ldan dus min gnod/ /zas dang spyod lam log pa yis/ /snum chos byed skrang gzhang 'brum dang / / khong rmya rengs shing sems myos dang / /g.yan pa mdze dang rims skyug gzer/ /lto sbos mgo 'khor la sogs 'gyur/ /zhes bya ba la/ snum thams cad tshad dang mi ldan par zos pa dang / de bzhin du dus ma yin par zos pa dang / gnod pa ste gang zhig la gnod par 'gyur ba de zos pa dang / de bzhin du zas dang spyod lam log pa dang ldan pas spyad na skrang ba la sogs pa'i nad skye bar 'gyur ro/ /de yang tshad ni chung ngu dang 'bring dang chen po ste/ gsum po de dag nad lus zungs la ltos te gtong bar mi byed pa de ni tshad dang mi ldan pa'o/ /dus ma yin par gtong ba de ni dper na dgun gyi tshe mar gtong ba dang / mtshan mo gtong ba dang / so ga til mar gtong ba dang / nyin par gtong ba lta bu'o/ /gnod pa ni dper na bad kan gyi nad la mar gtong ba dang / mkhris pa'i nad la til mar gtong ba dang / zas ni kha zas tshad dang mi ldan par gang bshang ba de log par 'gyur zhing / phyin ci log gis tshe spyod par byed pa de'i tshe skyon du 'gyur ro/ /spyod lam ni chu'i bya ba chu tshan gyi bya ba la sogs pa bshad pa ste/ de log par spyod pa de dang mi mthun par spyod pa ste/ de dag gis skrang pa la sogs pa'i nad skyed par 'gyur ro/ /de la bkres skom skyug sman dugs/ /zas skom sman ni rtsub pa dang / /dar ba chang rnying tshod ma dang / /'bru rgod ci tshe khre rgod dang / /sbrang rtsi 'bras gsum pi pi ling / /ba gcin gu gul a ru ra/ /nad dmigs so so ji bzhin du/ / snum las nad gyur bcos thabs yin/ /zhes bya ba la/ snum gyi cho ga las gyur cing / snum gyi cho ga las nyams pas nad du gyur pa de la dpyad du bya ba ni bkres skom la sogs pas gso zhing bcos par bya'o/ /de la bkres pa ni ltogs par bya ste/ zas za ba la sogs pa'o/ /skom pa ni skom gyis gdungs pa ste/ tshar bcad pa'o/ /skyug sman ni slon btang ba'o/ /dugs ni 'og nas bshad pa'o/ /de bzhin du kha zas rtsub mo za ba dang / skom rtsub pa btung ba dang / sman rtsub pa bsten pa dang / dar ba rab tu ska ba dang / dar ba rnying pa dang / chang rnying pa dang / tshod ma ste/ rtsa ba dang 'bras bu las byas pa'i tshod ma'i rnam pa dang / 'bru rgod dang / 'bras bu'i bye brag ut+pal zhes bya ba dang / ci tse ste/ rtsa 'bru'i bye brag dang / khre rgod ste ga tra pa zhes bya ba dang / de bzhin du sbrang la sogs pa'i sman rnams nad dmigs so so ji lta ba bzhin nad gang gi sman gang yin pa de de la sbyin par bya'o/ /rtsub pa dag ni smyung byas dang / /shin tu byas dang 'dra ba yin/ /zhes bya ba la/ legs par rtsub par gyur pa dang / lhag par rtsub par gyur pa dag ni smyung ba drags pa'i mtshan nyid dang 'dra bar shes par bya ste/ ji ltar legs par smyung bar byas pa'i mtshan nyid gang yin pa de ni legs par rtsub chos byas pa'i mtshan nyid dang 'dra bar shes par bya/ de bzhin du shin tu smyung bar byas pa'i mtshan nyid dang 'dra bar shes par bya ba ste/ slon dro skom sa las byung snum/ /sha khu btung zhing dugs spyad bya/ /khrus byed pa 'am skyug sman gtang / /snum byas zhag gsum gnas par bya/ /nyin zhag gzhan pa gcig cig ni/ /de bskyed pa yis bad kan skyed/ /ces bya ba la/ slon zhing dro ba dang skams las byung ba yang yin/ snum pa yang yin pas/ slon dro skam sa las byung snum/ /zhes bya ba ste/ slon zhing dro ba dang / skam sa'i srog chags kyi sha las g.yos pa'i sha khu btung ba dang / dugs kyi bya ba kun tu spyad cing gnas par byed pa dang / snum gyi cho ga byas pas zhag gsum gnas par byas nas/ de'i 'og tu nyi ma bzhi pa la khrus bya'o/ /skyug sman yang nyin re bzhin du bya ste/ dang por snum gyi cho ga byas la/ de'i 'og tu skam sa'i sha rlon zhing dro ba las byung ba'i snum gyi sha khu 'thungs nas/ dugs byed cing zhag gcig gnas par byas la/ nyin de las gzhan pa nyin zhag gnyis pa las bad kan skyed cing 'phel bar bya ba'o/ /gang gis she na/ de skyed pa yis zhes bya ba ste/ bad kan de skyed par byed pa'o/ /'o ma dang nya la sogs pas bad kan bskyed la/ de'i 'og tu skyug sman gtang ngo / /sha che tshil che bad kan mang / / me yi 'ju drod mi snyoms dang / /snum la goms pa'i snum bya rnams/ /de ni sngon du rtsub chos bya/ /de nas snum byas sbyangs gyur na/ /de la snum nad mi 'byung ngo / /snum la goms par gyur pas na/ /dri ma 'thon par nus pa yin/ /zhes bya ba la/ sha che ba ni mi sha rgyas shing sbom pa'o/ /tshil che ba ni tshil gyis rgyas shing tsho ba'o/ /bad kan che ba ni bad kan mang ba'o/ /me'i 'ju drod mi snyoms pa ni pho ba'i me drod kyis 'ju ba mi snyoms pa'o/ /snum la sogs pa ni rtag tu snum za ba ste/ de lta bu'i snum chos gtang bar bya ba gang yin pa de ni sngon du ste/ thog mar rtsub pa ni zas dang sman gyis rtsub chos bya la/ de nas de ltar rtsub chos byas pa'i 'og tu/ snum chos byas la sbyangs par gyur na/ sha che ba la sogs pa de la snum mi 'byung ngo / /de bzhin du sha che ba la sogs pa rtsub chos byas la/ de'i 'og tu snum btang na/ /snum la goms par gyur pas na/ /dri ma 'thon zhing sbyor bar nus pa yin no/ /byis pa rgan po la sogs pa/ /snum spang bar ni mi nus la/ /skyo bar mi byed sbyor ba 'dis/ /'phral du snum ni sbyar bar bya/ /zhes bya ba la/ snum chos byas pa'i byis pa dang / rgan po la sogs pa sngar snum chos kyi chogs brta bar bya bar bshad pa rnams snum chos spang bar mi nus pa de lta bu la snum gyi cho ga bya ba'i phyir/ de skye zhing bsnan par mi 'gyur ba'i sbyor ba 'dis 'phral du de la snum gyi cho ga sbyar bar bya'o/ /de yang gang yin zhe na/ de la mar brngos sha khu dang / /mar brngos pa yi thug pa dang / /til phye snum bcas bu ram chur/ /bcas dang kri sa ra dang ni/ /'o thug mar mang dro ba'am/ /bu ram zho dang bcas pa 'am/ /thug pa snum ni bzhi pa la/ /lnga pa 'bras dang ldan par bya/ /bdun pa de dag 'phral snum bya/ /zhes bya ba la/ byis pa dang rgan po la sogs pa rnams la mar brngos pa'i sha khu la sogs pa'i sbyor ba bdun po 'di dag ni 'phral gyi snum gyi cho gar 'gyur ro/ /de la sha mang po mar dang brngos pa de'i khu ba ni sbyor bag yin no/ /yang mar mang po dang brngos shing btsos pa'i thug pa byas pa ni sbyor ba gnyis pa yin no/ /de bzhin du til gyi phye ma snum dang bcas pa dang / bu ram chu dang bcas par sbyar ba ni gsum pa yin no/ /'dir snum ni mar la sogs pa'o/ /bu ram chung ngu ni bu ram phra mo'o/ /de bzhin du kri sa ra zhes bya ba ni til dang 'bras la sogs pa las byas pa'i thug pa gar thug 'dra ba la snum gyi bu ram chung ngu btab pa ni bzhi pa'o/ /yang na 'o ma ni thug pa ste/ 'o ma dang btsos pa'i thug pa zhun mar mang po bcug pa dro ba ste lnga pa'o/ /yang bu ram zho dang bcas pa'i rin ni drug pa'o/ /yang na thug sna lnga pa zhes bya ba snum bzhi po zhun mar dang til mar dang rkang dang tshil dang / srang gnyis dang ldan pa yin pas na de'i thug pa ni bdun pa'o/ /sbyor ba 'di dag ni 'phral du snum gyi bya ba byed cing skyo ba dang sun par mi byed pa yin no/ /snum rnams lan tshwa cher btab pa/ /de ni bad kan skyed rtsub min/ /phra zhing dro la lus khyab byed/ /ces bya ba la/ de bzhin du snum bzhi po zhun mar dang til mar dang rkang dang tshil zhes bya ba lan tshwa cher btab pa ni/ 'phral du snum par byed pa yin te/ ci'i phyir zhe na/ lan tshwa btab pa de ni bad kan skye zhing 'dzag pa'i rang bzhin can yin pa dang / de rtsub pa ma yin zhing snum pa dang phra ba ste/ phra mo rnams la 'jug cing khyab par byed pa dang / dro zhing tsha ba'i nus pa dang ldan pa dang / lus khyab par byed pa ste/ lus ma lus par khyab nas smin cing 'ju ba'i don byed pa yin pas/ lan tshwa cher btab pa'i snum ni 'phral du snum chos su 'gyur ro/ /mdze dang skran nad gcin snyi la/ /bu ram bcas bza' 'o ma sha// til dang ma sha chang dang zho/ /snum bya'i don du mi bya'o/ /zhes bya ba la/ mdze nad la sogs pa yod pa la snum gyi cho gar bza' ba bu ram dang bcas pa 'di dag btang zhing sbyin par mi bya'o/ /de ltar snum gyi chogs ci zhig bya zhe na/ 'bras gsum pi pi ling gu gul/ /a ru ra la sogs bskol la/ /de dag snum la ji bzhin du/ /gnod pa med par sbyar bar bya/ /zhes bya ba la/ gong du smos pa'i mdze nad la sogs pa de dag la snum 'bras bu gsum dang / pi pi ling dang / gu gul dang / a ru ra la sogs pa nad dang ji ltar 'tsham pa bzhin du gnod pa med cing mi 'phrod pa med par legs par sbyar zhing gtang bar bya'o/ /nad kyis nyam chung gyur pa la/ /lus drod stobs skyed nus pa gtang / /zhes bya ba la/ nad kyis nyam chung zhing sbeg pa'i mi la/ snum gyi cho ga lus kyi me drod skyed par nus pa'i sman gtang bar bya'o/ /de yang lus me drod ni lus dro ba ste/ de gnyis skyed par nus pa'i snum de gtang ba ste/ lus kyi stobs skyed par nus pa ni rgyas shing 'phel bar 'gyur ro/ /drod kyi stobs skyed par nus pa ni pho ba'i me drod skyed par byed pa'o/ /skyes bu snum la brten par byed pa rnams/ /nang gi drod 'bar khong pa dag pa dang / /lus zungs 'phral brta stobs dang mdog bzang ldan/ /dbang brtan rgas sra lo brgya thub par 'gyur/ /zhes bya ba la/ lus kyi stobs dang pho ba'i me drod skyed par byed pa'i snum la brtan pa'i skyes bu dag gi lus la 'byung ba'i yon tan ni/ nang gi me drod kyis lus thams cad la khyab par 'bar ba dang / khong pa'i nang gi nad skyed par byed pa'i snyigs ma sogs dag par 'gyur ba dang / lus kyi zungs dang stobs gsar du rgyas shing 'phel bar 'gyur ba dang / kha dog bzang zhing yid du 'ong bar 'gyur ba dang / dbang po brtan pa ste/ mig la sogs pa'i dbang po rang gi bya ba byed par nus shing / gsal bar 'gyur ba dang / rgas sra zhing skra dkar med par 'gyur ba dang / lo brgya 'tsho zhing gnas pas na/ lo brgya thub pa ste/ snum la brten pa'i skyes bu la yon tan 'byung bar drang srong rnams kyis bshad cing bstan pa'o/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las le'u bcu drug pa'i rnam par 'grel pa'o// // de nas dugs kyi cho ga'i le'u bshad par bya'o/ /zhes bya ba la/ dugs ni phal cher dang por snum chos byas nas 'dir bya dgos pas na/ de'i phyir snum gyi cho ga'i 'og tu dugs kyi cho ga'i le'u bshad cing bstan pa yin no/ /de yang drang srong tsa ra kas/ /dugs kyis gso bar bya ba'i nad/ /rlung dang bad kan bdag nyid can/ /snum gyi dngos su 'gro ba yi/ /dugs kyis rab tu zhi bar 'gyur/ /zhes bshad pa yin no/ /dugs kyi cho ga ni las su bya ba nyid de/ de'i tshul gyi le'u yin pas na dugs kyi le'u'o/ /de la dugs kyi cho ga ni dbye ba'i dbang du byas nas smras pa ni/ dugs bsro bcing dang tha mal pa/ /chu dugs dbye bas rnam pa bzhi/ /zhes bya ba yin te/ bsro ba dang / bcing ba dang / tha mal pa ste/ chu dugs zhes bya bar mtshams sbyar bar bya'o/ /des na dugs ni bsro ba la sogs pa'i dbye bas me'i lums rnam pa bzhir 'gyur ro/ /bsro ba gos dang lcags dang ni/ /lag mthil la sogs mer bsros bsro/ /zhes bya ba la/ bsro ba'i dugs ni gos la sogs pa me la bsros pas bsro bar bya ste/ gos ni bgo ba'i gos bal la sogs pa la bya'o/ /lcags ni lcags kyi spyad thong lcags lta bu la sogs pa'o/ /lag mthil ni lag pa'i mthil lo/ /sogs pa'i sgras ni bum pa dang / khar ba'i snod la sogs pa bsdu'o/ /bcing ba shu dag sbang ma dang / /thang shing sha ta puSh+Tha dang / /'bru kun dri rnams ra sna dang / /e raN+Da'i rtsa sha dag dang / /snum bag tsha dang dar ba dang / /'o mas sbrus shing tsha cher btab/ /rlung las byung ba 'ba' zhig sel/ /bad kan 'dres la bye'u rug sogs/ /mkhris pa 'dres la shug sogs kyis/ /glan pa zhes bya yang dang yang / /dkri ba snum zhing nus pa dro/ /spu 'jam lpags rul min pas dkri/ /ma rnyed rlung 'joms lo ma dang / /dar dang snam bu ras kyis dkri// mtshan mo dkris pa nyin mo 'grol/ /nyin par dkris pa mtshan mo 'grol/ /zhes bya ba la/ bcing ba'i dugs ni shu dag dang / sbang ma la sogs pa snum la sogs pa dang sbrus shing bsres pa dang / de bzhin du lan tshwa cher btab cing lan tshwa lhag par mang du btab pa dag rlung las byung ba'i nad 'ba' zhig ste/ nad gzhan dang ma 'dres pa'i rlung nad sel lo/ /bad kan dang 'dres pa'i rlung la ni bye'u rug pa la sogs pa phu ras rnam gnyis dang / ku the ra la sogs pa'i sde tshan du bshad pa dag gis bya'o/ /de bzhin du mkhris pa dang 'dres pa'i rlung ni shug la sogs kyis zhes bya ba la/ pad+ma dang phra phran ka la sogs pa'i sde tshan du bshad pas so/ /snum bag tsha dang dar ba dang / /'o mas sbrus shing tsha ches btab/ / ces bya ba ni/ gsum char dang sbyar bar bya ste/ dkri ba gsum po de dag rim pa bzhin du sbyar bar bya'o/ /de ni glan pa zhes kyang bya ste/ des yang dang yang du dugs bya'o/ /gzhan dag las kyang / nyams re ba sogs rlung 'joms bcas/ /sgyur dang gsher ba'i rdzas kun ldan/ /rlan can sha dang legs par btsos/ /snum kun dang ni yang dag ldan/ /dro 'jam lan tshwa shas cher dro/ /glan pa zhes ni bshad pa yin/ /zhes bya ba 'byung ba yin no/ /dkri ba dang ni dkris shing bcings pa na dkris pa zhes bya ste/ bcings pa la zhes bya ba'i don to/ /de bas na mang du byugs la snum pa dang nus pa dro ba dang / spu 'jam pa'i pags pa rul pa ma yin pas dkri bar bya'o/ /de ma rnyed cing med par gyur na/ rlung 'joms shing nus pa dang ldan pa'i rtswa shing gso ma la sogs pa'i lo mas bcings shing yan lag dkri ba ste/ mtshan mo dkris na nyin par 'grol bar bya ste/ de ni tsha ba med pa'i phyir bya'o/ /nyin mo dkri zhing bcing byas pa ni mtshan mo 'grol bar bya'o/ /la lar ni yul dang nad kyi dbang gis yan lag chag pa la sogs pa nyin zhag gnyis sam/ gsum gzhag par bya ba yang yod de/ sbang ma ni chang gi snyigs ma'o/ /'bru kun ni gra ma dang / gang bu can gyi sde tshan las bshad pa'o/ /dri rnams ni spang spos dang / ru rta dang a ru ra la sogs pa'o/ /e raN+Da ni rtsa ba'o/ /sha ni rlan gyi sha las tsho khu zhib mor brdungs pa'o/ /snum bag ni til mar la sogs pa'o/ /gzhan dag ni go bar zad do/ /tha mal pa ni khur ba dang / /bong ba gyo mo rdo sa phye/ /gso ma'i lo ma 'bru rnams dang / /lci ril phye ma phub ma rnams/ /thabs rnams du mas legs bsros pa/ /yul dang dus las dpags te sbyar/ /zhes bya ba la/ tha mal pa zhes bya ba'i dugs ni/ bal dang khur ba la sogs pas bya ste/ de yang nas dang mon sran gre'u dang / til la sogs pa btab nas sbrus te btsos nas khur ba lta bur byas nas/ dugs su bya ba'i thabs la sbyar ba gang yin pa de ni khur ba'i dugs zhes bya'o/ /bong ba dang gyo mo dang / rdob mer bsregs pa la me'i mdog can du byas la/ chu'am sham po'i nang du nub par byas la rlon pa de gos rim gcig gis dkris pas dugs bya'o/ /gso ma'i lo ma dang 'bru rnams pa lang la sogs pa'i lci ba dang / ril ma dang phye ma dang / phub ma rnams chu skyor mo dang bskol la/ gos kyi nang du bcug pas dugs bya'o/ /thabs rnams du mas legs bsros pa/ /zhes bya ba ni/ rdza ma dang sbu gu dang rdza skyogs dang / sla nga la sogs pa'i thabs kyis legs par bsros pa'i khu ba la sogs pa'i dugs rnams yul dang dus las dpags nas sbyar bar bya ste/ yul ni sa'i yul phyogs dang / lus kyi yan lag gi tshogs so/ /dus ni skad cig la sogs pa'i mtshan nyid dang / nad pa'i gnas skabs kyi mtshan nyid do/ / de las dpags pa ni de'i dbang du byas te/ dugs kyi sbyor ba 'di bya'o/ /de yang lus kyi yul ni dper na/ rlung ni ma zhu'i gnas zhugs dang / /zhes bya ba la sogs pa'o/ /sa'i yul las dpags pa ni/ yul rlan can du dugs bya dgos pa de ltar skam sar yin no/ / dus las ni dper na dgun gyi dugs gzhan dag bya dgos la/ so gar gzhan dag bya'o/ /nad pa las ni dper na dugs la la ni mkhris pa dang 'dres pa'i rlung la sogs pa'o/ /la la ni bad kan dang 'dres pa'i rlung la dgos la/ la la ni rlung 'ba' zhig la dgos pa'o/ /'bru rnams ni 'bru'i rigs lo ma dkrugs shing bcom pa'o/ /chu dugs shi kru ba ra na/ /e raN+Da dang ka rany+dza/ /bye'u rug pa dang ardza ka /shi ri sha dang ba sha ka /'od ma arga ma la ti/ /ya ba sha ka'i lo ma bkru /shu dag la sogs sman rnams dang / /gsher sa chur gnas sha rnams dang / / rtsa bcu nad dmigs ji bzhin du/ /so so 'am lhan cig sbyar na ni/ /snum ldan chang dang tshwa dang ni/ /'o ma chu sogs kyis btsos la/ /bum pa'am sbu gu ring po ni/ /bkang la nad kyis nyam thag pa'i/ /lus ni gos kyis dkris nas su/ /ci bde bar ni snum chu blugs/ /lus la rlung nad zhugs gyur pa/ /de nyid kyis 'dir bkang snod du/ /nad pa zhugs te gnas na ni/ /gcin sri gzhang 'brum sogs nad sel/ /zhes bya ba la/ shi kru nas brtsams te/ ya ba sha ka'i bar gyi sde tshan de rnams las/ lo ma rnams bkru zhing mnyes la/ de rnams dang de bzhin du shu dag la sogs pa'i sman sngar bshad pa rnams dang / de bzhin du gsher sa dang chu na gnas pa'i ro hi ta pa thi na la sogs pa'i nya dang / de bzhin du rtsa ba bcu pa zhes nad kyi dmigs ji lta ba bzhin du so so'am lhan cig btang ba ste/ so so re re nas gtang ba'am/ ma lus pa lhan cig sbyar zhing bsres nas nad dmigs ji lta ba bzhin du/ de dang rjes su mthun par sbyar bar bya'o zhes bya ba'i bar du'o/ /de bzhin du snum dang ldan pa ste snum yod pa'o/ /'di yang nad las dpags pa dang sbyar bar bya ste/ mar la sogs pa nad gang dang gang la phan pa'i snum de dang de dag dang ldan par bya ba dang / de bzhin du de dang mnyam pa'i chang la sogs pa dang btsos pa nad dmigs ji lta bu las dpags te/ blugs pa'i chu de bum pa mchu phra mo btod pa'i mchus blugs par bya ste/ sbu gu ni ring po kha gyen du bltas pa'i nang du bcug ste/ bkang la nad kyis nyam thag pa ste/ gzer la sogs pas nyon mongs par gyur pa'i lus gos kyis dkris la/ snum zhing rlung 'joms pa'i sman bskol ba blugs par bya ste/ de yang bde ba ste/ ci bde ba la reg par gyur pa'i tshul du bya ste/ 'dir lan 'ga' cung zad dro bas bya'o/ /lan 'ga' ni shin tu dro bas bya'o/ /de blugs pa ni chu'i rgyun gyi khyad par gang zhig gis rgyun mi 'chad par blugs shing chu la sogs pa'i gsher rdzas 'dzag par 'gyur bas na blugs pa zhes bya'o/ /chu'i dugs ni rnam pa gnyis te/ rgyun blugs pa dang chu la bcing ba'o/ /de ltar blugs pa bshad zin nas/ da ni chu la bcing ba bshad pa'i phyir/ lus la zhes bya ba la sogs pa bshad pa yin te/ nad pa lus kyi yan lag thams cad la rlung nad zhugs shing rlung gi bdag / de nyid kyis zhes bya ba sngar bshad pa'i sman tsho snod chen po bkang la/ bkang ba'i snod der nad pa bcug ste/ snying ga la sogs pa bsrung bzhin gnas par bya'o/ /snod ces smos pa ni spyi ming tsam du nye bar mtshon pa tsam ste/ zangs chen po'am/ gzhong pa ring po chen po sman chus bkang ba'i nang du 'jug cing bcings te gnas par bya'o/ /de bzhin du gzhang 'brum dang / gcin sri ba la sogs pa lus kyi phyogs gcig na bar gyur pa la ni nad la sogs tshul las dpags te sbyar bar bya'o/ /rlung med phyi nang snum bcas shing / /zas 'ju'i dus su dugs dpyad bya/ /nad dang nad pa yul dus kyi/ /dbang las chung 'bring chen por bya/ /zhes bya ba la/ rlung med pa'i sa phyogs su skyes bu'i lus phyi nang snum dang bcas par byas la/ kha zas sman dang zhu zin par gyur pa'i dus su dugs dpyad par bya la/ dugs de yang nad la sogs pa'i dbang gis chung ngu la sogs pa'i tshad gsum du 'gyur ro/ /de yang chung ngu dang 'bring dang chen po gsum du 'gyur la/ de bzhin du nad pa yang stobs la sogs pa la chung ngu dang 'bring dang chen po yod de/ yul rlan can dang / skam sa 'dren ma gsum yod do/ / lus kyi gnas mgo dang phrag pa dang / lto ba dang / byin pa la sogs pa'i dbye bas phye ba yin no/ /dus ni dro ba dang / grang ba dang / 'dres ma'i dbye bas phye ba yin no/ /dbang las zhes bya ba ni de dag gtso bor byas pa yin no/ /bad kan gyis nyen rtsub dugs bya/ /bad kan rlung la rtsub snum bya/ /zhes bya ba la/ bad kan gyis nyen cing bad kan shas che ba'i skyes bus dugs rtsub mo bya'o/ /de bzhin du skyes bu rlung las gyur cing bad kan yang yod pa dag gis dugs gzhan ltar dang por snum chos bya zhing / bad kan dang rlung yod pas rtsub pa dang / snum pa 'dren ma'i dugs sbyar bar bya'o/ /rlung ni ma zhu'i gnas zhugs dang / /bad kan zhu ba'i gnas brten la/ /gnas kyi dbang gis rtsub dugs dang / /de bzhin snum sngar 'gro dugs bya/ /zhes bya ba la/ rlung ma zhu'i gnas su zhugs la gnas pa'i nad la ni rtsub pa sngon du 'gro ba'i dugs spyad par bya'o/ /de bzhin du bad kan zhu ba'i gnas la gnas shing brten pa la ni snum sngon du 'gro ba'i dugs bya ste/ de dag ni gnas kyi dbang gis tshul de ltar bya dgos pa yin no/ /sta zur dag dang mig dang snying / /rlig par nyung ngu'am bya ba min/ /zhes bya ba la/ sta zur zhes bya ba lus kyi phyogs gcig brla dang / dpyi la brten pa'i nad la dugs nyung ngu bya'o/ /de bzhin du mig dang snying ga dang rlig par ni shin tu chung ba'i dugs bya'o/ /yang na bya ba min zhes bya ba ste/ gnas de dag tu ye mi bya'o/ /dugs kyis grang dang zug gzer bral/ /yan lag mnyen par gyur pa dang / /dal gyis mnyes la khrus byas la/ /de nas snum gyi cho ga bsten/ /zhes bya ba la/ dugs kyis skyes bu'i grang ba dang / zug gzer bral bas skyes bu'i lus legs par brlan zhing mnyen par 'gyur ba dang / de bzhin du yan lag mnyen zhing 'jam par 'gyur ba dang / dal gyis dang por mnyes la de'i 'og tu khrus bya ba de dang po lag pas yan lag mnyes la chu dron pos khrus byas nas/ de'i 'og tu snum chos kyi skabs nas bshad pa'i cho ga bsten cing spyad par bya ba dang / spang bar bya ba rnams dor bar bya'o/ /de dag kyang snum gyi cho ga'i skabs su zas dang spyod lam bstan pa bzhin du bya ba dang / thal sman rnon po dang / me btsa' btang ba dang / mes tshig pa la tsha ba zhi bar bya ba dang / tshad pas 'khru ba dang / slon pa la de bcad pa dang / mi dran cing myos pa la slar dran par bya ba'i cho ga bya'o/ /de bzhin du chu tshan gyi nye bar spyod pa la sogs pa spang bar bya'o/ /dugs drags pa yis khrag mkhris 'khrugs/ /brgyal skom skad 'gags yan lag 'jums/ /mgo 'khor tshigs na rims 'debs shing / /tshi gu dmar po tal til snang / /lums kyis skyug bro bar 'gyur te/ /zhes bya ba la/ dugs drags shing shas cher bsten pas khrag mkhris 'khrugs pa la sogs pa 'byung bar 'gyur ro/ /brgyal ba ni dran pa'o/ /skad dang yan lag 'jums pa ni/ skad gdangs dma' zhing rmya ba'o/ /mgo 'khor ba ni lam mi gnas pa'o/ /lhu tshigs na ba ni lhu tshigs na ba'o/ /tshi gu dmar po tal til snang bar gyur pa ni/ de lta bu 'byung bar 'gyur ba ste/ der ni zhi ba'i sman gyis gso/ /dugs dang thal sman me btsa' dang / /tshad 'khru skyug bro brgyal nad gso/ /zhes bya ba la/ dugs drags pa las byung ba'i nad khrag dang mkhris pa 'khrugs pa la sogs pa zhi bar bya zhing rtse gzhil ba'i sman bya ba dang bcos sbyar bar bya'o/ /dugs zhes bya ba la sogs pa 'di'i skabs su zhar la bshad pa yin te/ de dag kyang tshul 'di nyid la brten nas dugs gzhil ba la sogs pa'i sman bya ste/ dugs gzhil ba'i sman bya ba dang / thal sman rnon po btab pa la de'i tsha ba zhi bar bya ba'i phyir sman gtang ba dang / me btsa' la de'i tsha ba zhi bar bya ba'i phyir sman gtang ba dang / tshad pas 'khru ba la tshad pas 'khru ba gcod cing smin pa'i sman gtang ba dang / skyug bro ba la de zhi ba'i sman dang / brgyal ba la 'du shes rnyed bar bya ba'i thabs kyis gso'o/ /dugs ni phal cher lci dro rno/ /de las gzhan pa'i zhi byed yin/ /gsher zhing brtan 'khru snum pa dang / /rtsub cing sra ba dugs sman yin/ /'jam dang rtsub dang zhi 'byar bag /gsher bag de ni sel byed yin/ /mdor na phal cher kha ba dang / /bska dang mngar ba de sman yin/ /zhes bya ba la/ 'dis dugs de zhi bar bya ba'i cho ga spyir bshad pa yin te/ sman gang lci ba dro ba dang rno ba de thams cad ni dugs kyi sman yin la/ phal cher zhes smos pa ni/ la la rnam par 'gyur ba dag kyang yod par bstan pa yin no/ /de las gzhan pa go bzlog pa dang / yang ba dang / bsil ba dang / rtul ba ni zhi zhing rtse 'jil bar byed pa'i sman yin no/ /de bzhin du gsher ba la sogs pa dang ldan pa'i sman rnams ni dugs kyi sman yin la 'jam pa la sogs pa dang ldan pa'i sman ni zhi bar byed pa yin no/ /de bzhin du mdor bsdu na sman gang cung zad kha ba dang bska ba dang / mngar ba rnams ni de rtse gzhil bar byed cing zhi bar byed pa'i sman yin no/ /'di gnyis kyi mtshan nyid drang srong tsa ra kas bshad pa de ni/ zhi byed lci zhing dro ba 'joms/ /lums phyed rngul ni 'byin byed cing / /gso ba'i rdzas dag gang yin pa/ /rtse 'jil zhi bar byed pa yin/ /zhes 'byung ba yin no/ /zhi zhing rtse bcil stobs thob gyur/ /ji skad bshad pa'i nad rnams zad/ /ces bya ba ste/ skyes bu nad zhi zhing rtse bcil bas/ stobs thob par gyur na/ nad de rtse zhil zhing dugs drags pa'i skyon med par 'gyur ba yin la/ de bzhin du dugs drags pa las byung ba'i nad khrag dang mkhris pa 'khrugs pa la sogs pa ji skad bshad pa'i nad rnams zad na/ nad zhi ba bcos pa legs pa yin par shes par bya'o/ /bcil drags pags pa rtsa 'khums shing / /'dar snying kha 'gram nad du 'gyur/ /rkang mchu lag pa pags nag 'gyur/ /bcil drags pa yin nad du bshad/ /ces bya ba yin te/ dugs pa'i nad ha cang bcos drags te thal ches pa las nad du 'gyur ba ni pags pa dang rtsa 'khums pa la sogs pa yin par bshad do/ /de yang bcing zhing bcos drags pa pags pa dang rtsa 'khums shing lus po nyid 'dar zhing g.yo ba dang / snying ga dang / kha dang 'gram pa rnams 'gags shing rengs pa'i nad du 'gyur te/ tshig mi thon pa dang / rkang pa dang / mchu dang / lag pa dang / pags pa'i mdog nag por 'gyur ba ste/ de lta bu ni shin tu rtse bcil zhing drags pa'i nad yin par shes par bya'o/ /shin tu sbom dang rtsub pa dang / /nyam chung brgyal bar gyur pa dang / /dugs drags bcos dgos glo rdol dang / /skem dang chang nad kyis btab dang / /rab rib dmu rdzing shu ba mched/ /mdze nad 'or nad rlung mkhris dang / /'o ma zho dang mar sbrang rtsi/ /'thungs dang bkru sman btang ba dang / /lus nad tshigs dang gzhang nad yod/ /khro dang mya ngan 'jigs pas nyen/ /bkres skom mig ser skya rbab dang / /gcin nad mkhris nad zla mtshan 'dzag / sbrum dang bu skyes dugs mi bya/ /nad tshabs che na 'jam por bya/ /zhes bya ba la/ shin tu sbom pa dang / rtsub pa dang / bu btsas pa'i bar du dugs bya bar mi rung ngo / /de la nyam chung ba ni stobs chung ba'o/ /dugs drags te bcos dgos pa ni rtse bcil bar 'os pa'o/ /chang nad kyis btab pa ni chang drags pa'i nad na ba'o/ /rlung mkhris ni rlung dang mkhris pa'i ldan pa ste/ de dag la dugs mi bya'o/ /de bzhin du 'o ma la sogs pa 'thungs pa la yang dugs mi bya'o/ /de bzhin du bkru sman 'thungs pa la yang dugs mi bya'o/ /gzhang nad yod pa ni gzhang nad la sogs pa la yang mi bya'o/ /de bzhin du khro bas nyen pa dang / mya ngan gyis nyen pa dang / 'jigs pas nyen pa de dag la yang dugs byar mi rung ngo / /de bzhin du gcin nad dang mkhris pa'i nad dang / zla mtshan 'dzag ba dang / sbrum ma dang / bu skyes pa la sogs pa la yang dugs byar mi rung ngo / /gal te de dag la gsung pa la sogs pa'i nad tshabs che ba byung ste/ mi byar mi rung na/ 'jam por sbyar ba'i dugs dang lums mi drag pa 'jam po bya'o/ /lud pa cham pa dbugs mi bde/ /skyigs bu lto sbos bshang 'gags dang / /skad 'gags rlung gi nad rnams dang / /bad kan be snabs 'khyil zhing lci/ /lus rengs rked pa rtsib logs dang / /sgur dang lto nad 'grams nad dang / /rlig nad skrangs dang da rgan dang / /rtsol dang rlung nad kyis zug dang / /gcin 'gags thor bu rmen bu dang / /khu ba bkag dang rlung 'khyims la/ /de yi sman gyi dbye ba yis/ /dugs ni so so ji bzhin bya/ /zhes bya ba la/ lud pa dang cham pa dang rlung 'khyims ba'i bar la/ de'i sman ji lta bas legs par dugs bya ste/ la lar ni spro bas so/ /la lar ni bcings pas so/ /la lar ni tha mal pa zhes bya bas so/ /la lar ni chu'i dugs bya ba dang / de bzhin du de la phan pa'i rang gi sman gyi dbye ba'i cha so so gang la phan pa'i dbye ba 'og nas rang rang gi nad kyi gnas skabs su bshad pa'i sman gyi dugs so sor bya'o/ /de'i ni 'di skad ston pa yin te/ gang gi tshe lud pa la dugs bya dgos pa de'i tshe/ lud pa'i sman du bshad pas dugs bya'o/ /de bzhin du cham pa dang / dbugs mi bde ba la sogs pa la yang rang rang gi sman gyis dugs bya'o/ /zhes bya bar sbyar ro/ /da rgan dang / rtsol ba dang / rlung nad kyis zug pa ni 'og nas bshad pa'i rlung nad kyi nad gzhi las mtshan nyid ston to/ /khu ba 'gags pa ni khu chu bkag pa'o/ /rlung 'khyims pa ni tshil gyis bar bkag pa'o/ /dugs phan me yis bsro min pa/ /rlung nad tshil dang bad kan can/ /rlung med khang par rtsol ba dang / /gos lci ba dang 'jigs pa dang / /dkri dang stobs 'gyed khro ba dang / /chang mang bkres dang nyi tshan gzhag /ces bya ba la/ tshil dang bad kan gyis g.yogs pa'i rlung la ni mes mi bsro bar bya ba phan pa yin te/ de'i thabs ni rlung med pa'i khang par 'dug la/ rtsol ba de lus dub par bya ba dang / gos lci ba khur du longs pa bgo ba dang / de bzhin du 'jigs pa dang / de bzhin du sngar bshad pa'i dkri ba dang / stobs 'gyed pa ste lag par stobs 'gyed pa la sogs pa dang / khros 'khrugs pa dang / chang mang po btung ba dang / bkres shing ltogs pas nyen pa dang / de bzhin du nyi ma tsha ba la gzhag pa ste/ 'di dag bya'o/ /nad gang nang khrol gnas dang lus zungs dang / /rtsar song rkang lag rus pa'i nang song ba'i/ /nad de dugs kyis bsrung bar byas nas ni/ /khong du bsdus la sbyang bas dpyis dbyung bya/ /zhes bya ba la/ rlung la sogs pa khong par gnas shing nang khrol na 'dug pa'am/ khrag la sogs pa lus zungs la gnas pa rnams dang de bzhin gang rtsa rnams su khyab cing zhen pa dang / de bzhin du rkang lag gi nang du song ba ste/ lag pa la sogs pa'i rus pa la zhen pa'i nad de dag thams cad gnas de dag las bshad ma thag pa'i snum dang dugs kyis bsrung bar byas shing / 'dzag tu rung ba lta bu byas la/ de nas ji skad bshad pa'i dugs bzhi pos ji lta ji lta ba bzhin du bsrung zhing bzhu nas/ rkang lag la sogs pa nas khong pa'i nang du bsdus la/ de'i 'og tu 'og nas bshad pa'i bkru sman gyis dpyis dbyung zhing bton nas/ gdon pas phyir dbyung bar bya'o/ /rkang lag gi nang du song zhes bya ba ni de gnas pa'i nad ni shin tu dugs bya bar 'os pa yin no/ /zhes bstan pa yin no/ /yang na lus zungs su gtogs pa'i nad gang 'phel nas/ khong pa nas lus zungs su song ba dang rkang lag la gnas na ldang bar gyur pa yin pas na/ 'dir rkang lag dang rus par gnas pa ni gtso bor bzung ba'i don smos pa yin no/ /de bas na dugs kyis nad rnams bsrung ba byas la/ khong pa'i nang du bsdu dgos pa yin no/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las le'u bcu bdun pa'i rnam par 'grel pa'o// //de nas skyug sman dang bkru sman gtang ba'i cho ga'i le'u bshad par bya'o/ /zhes bya ba la/ dugs kyi cho ga'i 'og tu skyug sman dang bkru sman gyi cho ga'i le'u brtsams pa ni gang gi phyir/ nad de dugs kyis bsrung ba byas nas ni/ /khong du bsdus la sbyar bas dpyis dbyung bya/ /zhes 'das ma thag par bshad pa gang yin pa de/ spyad pa'i rang bzhin ji lta bu yin pas bstan par bya ba'i phyir bshad pa yin te/ skyug sman ni stod kyi nad bsal ba'i thabs yin la/ bkru sman ni smad kyi nad bsal ba yin te/ de gnyis kyi cho ga ni de dag gi nad las su rung bar bya ba yin te/ de tshangs pa la sogs pas gang du dran pa'i cho ga ni/ skyug sman dang bkru sman la sogs pa'i cho ga zhes bya ste/ de dag bshad cing bstan par bya ba'o zhes pa'o/ /bad kan nad dam 'dres pa yi/ /bad kan rgyas la skyug sman gtang / /de bzhin mkhris pa bkru sman bya/ /zhes bya ba la/ bad kan 'ba' zhig gi nad la skyug sman gtang bar bya'o/ /yang na ldan pa ste/ 'dres par gyur pa'i bad kan la rgyas par zhes bya ba bad kan gyi shas che ba'i nad dang mkhris pa 'dres pa'i nad ldan pa'am/ bad kan dang rlung 'dres pa'i ldan pa bad kan shas che ba la skyug sman gtang bar bya'o/ /de bzhin mkhris pa skyug sman gtang / /zhes bya ba la/ de dang 'dra bas na de bzhin te/ bad kan de dag tshul mthun par bya'o/ /de yang ji ltar bad kan 'ba' zhig la skyug sman bya ba yin pa'am/ bad kan shas che ba'i ldan pa'i nad la skyug sman bya ba de bzhin du mkhris pa 'ba' zhig la bkru sman gtang ba'am/ 'dres pa'i nad mkhris pa shas che ba/ mkhris pa dang bad kan 'dres pa'i nad dam/ mkhris pa dang rlung 'dres pa'i nad la bkru sman bya'o/ /rgyas pa zhes smos pas ni de 'ba' zhig bod pa'am/ rang gi gnas sam gnas gzhan du zhugs pa'i bad kan ni skyug sman bya la/ mkhris pa la ni bkru sman bya'o/ /rims sar tshad 'khru thur du ni/ /mkhris pa khrag 'khru glo gcong dang / /mdze dang gcin nad 'brum thor bu/ /rkang bam mi dran lud pa can/ /dbugs mi bde snying 'phar 'bras mched/ /nu ma'i nad dang ro stod nad/ /khyad par du ni skyug sman bya/ /zhes bya ba la/ rims sar pa dang tshad pas 'khru ba la sogs pa nas ro stod kyi nad kyi bar dag la khyad par ram mchog tu skyug sman gtang bar bya ste/ des nad 'di rnams chu dang bral ba'i 'bras ltar mchog tu zad cing dengs par 'gyur ro/ /de la rims sar pa ni dang por byung ba'i rims so/ /thur du khrag dang mkhris pa 'khru ba ni khrag mkhris kyi 'byung ba'o/ /thor bu ni 'bras kyi phreng ba'o/ /rkang bam ni rkang pa'i nad do/ /skyug sman mi gtang sbrum khong rtsub/ /bkres dang rtag tu sdug bsngal ba/ /byis pa rgan skem sbom snying na/ /glo skam smras dang nyam chung dang / /rtag tu slon dang mcher pa na/ /rab rib lto na srin bu yod/ /rlung khrag 'dres mar gyen du 'byung / /so na mas gtong skad 'dzer dang / /gcin sri dmu rdzing skran can dang / /slon dka' drod che gzhang 'brum can/ /rtug skam mgo 'khor rtsib logs sra/ /rtsib logs zug dang rlung can no/ /zhes bya ba la/ sbrum ma la sogs pa nas rlung nad can gyi bar dag la skyug sman mi gtang ngo / /de la khong rtsub pa la skyug sman btang na/ rlung gis yan lag la gnod par 'gyur te/ phal cher kha zas la sogs pa rtsub mo bsten pas rlung nad skyed pa'i phyir stobs zad par 'gyur ro/ /de bzhin du bkres pa dag la skyug sman btang na me'i stobs kyis stobs zad par 'gyur ro/ /rtag tu sdug bsngal ba ni/ khur dang rtag tu sdug byed pa'i dub pas stobs zad par 'gyur ro/ /de bzhin du bzhon pas dub cing nyam chung ba dag la yang stobs phrin shin tu khrag skye bar 'gyur ro/ /byis pa la sogs pas ni sman gyi stobs mi bzod pa'i phyir/ lus kyi stobs zad pas nang gi khong pa skem zhing gcong du 'gyur ba'i skyon yod pa yin no/ /na ba ni snying nad kyis nyen pa la byas na snying nad la gnod par 'gyur ro/ /rtag tu slon pa ni stod du rgyu ba'i rlung gis gyen du bteg pas de drags na srog zad par 'gyur ro/ /lto na srin bu yod pa ni sngar bkru ba ma byas na/ srin bu shin tu mang ba'i phyir ma lus pa 'byung bas/ snying shin tu gtses pas slon pa drags par 'byung bar 'gyur ro/ /rlung la sogs pa gyen du 'byung ba ni 'og tu gsal bar gyur pas gyen du drangs pas skyon du 'gyur ro/ /slon dka' ba ni khong pa 'gags shing slon dka' ba las shas cher drangs na khong pa'i nad thams cad slongs shing dkrugs pas/ me dbal dang rmongs bag dang / mi dran pa la sogs pa'i nad 'byung bar 'gyur ro/ /rtug skam la sogs pas nyen pa rnams dang / rtsib logs zug pa la sogs pa ni rang rang gi nad 'phel ba dang / 'chi ba dag tu'ang 'gyur ro/ /ci rnam pa thams cad du sbrum ma la sogs pa la skyug sman gtang bar mi bya'am/ 'on te gnas skabs la lar skyug sman bya zhe na/ de'i phyir smras pa ni/ de dag dug 'thungs ma zhu dang / /mi 'phrod zas zos ma gtogs so/ /zhes bya ba yin te/ sbrum ma la sogs pa de dag gis gal te dug dang sbyar ba'i dug 'thungs sam/ zas ma zhu ba ste gsud dam/ mi 'phrod pa'i zas zos bar gyur na ni ma gtogs te/ 'di dag ni myur du gsod par byed pa yin pas na/ dug 'thungs pa la sogs pa'i gnas skabs 'di lta bu ma gtogs pa gnas skabs gzhan du skyug sman mi gtang gi/ rkyen 'di dag byung na der skyug sman 'jam po gtang bar bya'o/ /rtag tu slon pa yan chad dang / phal cher ma zhu'i rims dag kyang / /ma zhu ba ni thams cad la/ /dud pas bdug pa'i las kun spangs/ /zhes bya ba la/ 'dir rtag tu slon zhing rgyun du skyugs pa'i skyes bu dang / gang sngar skyug sman gtang du mi rung bar bstan pa sbrum ma nas/ nyam chung ba'i bar de thams cad spang zhing dor bar bya'o/ /'di dag dud pas bdug pa'i bar gyi u0f85las kun spang bar bya bar ma zad kyi/ ma zhu ba'i rims kyi bar dag la'ang spang bar bya ste/ rims sar pa la ni nad 'khyims par 'gyur ba'i nyes pa yod pa'i phyir ro/ /de bzhin du ma zhu ba'i nad thams cad la yang sgyug sman gyi rjes la las kun te/ bkru sman dang / mas gtong ba dang / sna nas gtang ba dang / dud pas bdugs pa dang / mkhur ba bkang zhing dbo ba dang / mig sman dang / smin par bya ba'i bar gyi las spang bar bya ste/ ma zhu ba'i be'u snabs kyi 'jigs pa nyid kyis so/ /bkru sman gyis gso skran gzhang 'brum/ /'brum bu mig ser gzhogs phyed lci/ /rims rnying dmu rdzing dbyig dug dang / /skyug dang mcher nad skya rbab dang / /long nad rab rib sngon por gyur/ /mchi 'dzag zhu ba'i gnas na zug / mngal dang khu ba'i gnas kyi nad/ /khong nad gtogs dang srin nad rma/ /dreg nad nam tshong yan chad nad/ /gcin sri bshang ba 'gags pa dang / /slon bya mdze gcin nad sogs yin/ /zhes bya ba la/ skran la sogs pa nas rtug pa 'gags pa'i bar gyi nad rnams dang / de bzhin du slon par bya ba'i nad las/ mdze nad dang gcin nad nas ro stod kyi nad rnams kyi bar bkru sman gyis gso zhing sbyang bar bya ba yin te/ 'di dag la bkru sman byas pas mchog tu 'byang zhing 'jig par 'gyur ro/ / khrus mi bya ba rims sar dang / /drod chung khrag mkhris thur du 'byung / /rmas dang gzhang nad tshad pas 'khru/ /khong du mtshon lus lto sra dang / /snum ches pa dang skem ches pa'o/ /zhes bya ba la/ rims sar pa nas skem ches pa'i bar la ni khrus byar mi rung ngo / / de la rims sar pa yin du zin kyang / nad ma smin pa la khrus mi bya ste/ des nad slar skyed pa'i phyir ro/ /gzhang nad pa ni bshang sgo sogs la gnod pa'i nad skyed par 'gyur ba'i phyir ro/ /tshad pas 'khru ba dang khrag mkhris thur du dbyung ba gnyis la khrus byas shin tu 'khru drags pas ma rungs par 'gyur ro/ /drod chung ba la sogs pa ni sman gyi shugs mi bzod cing bsten mi nus pa yin no/ /chang nad kyis nyen pa la khrus mi bya ste/ des rlung gis srog la gcod par byed pa'i phyir ro/ /long kha'i gnas su rlung bsags pas phan tshun rgyu ba na nang du lto sbos pa skyed par byed do/ /khong du mtshon lus pa yang der rlung brten pas srog la gnod par 'gyur ro/ /lto sra ba ni sman bdo bas nad phyir phyin par ma nus pa dang / snying gar gzer ba dang / rtsib logs su zug pa dang / spo ba dang / slon pa dang / brgyal ba dang / rmya ba skyed de/ srog ma rungs par byed do/ /snum ches pa la khrus byas na yang ha cang drags par 'gyur ro/ /skem ches ba 'dir nad gcong chen po la bya ste/ gcong chen pos nyen pa ni lus zungs zad pas dri ma'i stobs kyis gnas pa yin pa las/ de phyung nas lus kyang 'jig par 'gyur ro/ /sbrum ma la sogs pa la khrus byas na yang nyes pa sngar bshad pa ltar 'gyur ro/ /de nas thun mong dus su ni/ /cho ga bzhin du snum gyis nyen/ /nya dang ma sha til sogs kyis/ /nang par slon bya'i bad kan skyed/ /mtshan mo gnyid log zas legs zhu/ /snga dro'i dang por bkra shis byas/ /zas ma zos pa'am cung zad snum/ /thug pa zhun mar ldan pa btung / /byis pa rgan po nyams stobs chung / /sman stobs chung ba nad dbang las/ /chang 'o bu ram shing sha khu/ / nad dmigs ji skad bshad pa bzhin/ /sbrang rtsi rgyam tsha dang ldan pa/ /sman tshad lto ba las dpags te/ /sman la sngags ni mngon bzlas la/ /lkog mar phyin pa'i bar du blud/ /tshangs pa skye dgu'i bdag dang tha skar bu/ /drag po dbang po nyi zla sa me rlung / /drang srong rnams kyi tshogs dang bcas pa dang / /'byung po'i tshogs kyis khyod ni bsrung bar shog /drang srong rnams kyi bcud kyis len pa dang / /lha rnams kyi ni bdud rtsi lta bu dang / /klu mchog rnams kyi bdud rtsi lta bur ni/ /khyod la sman 'di nye bar gnas gyur cig / oM na mo b+ha ga ba te/ b+hai Sha dz+ya gu ru bai DUr+ya pra b+ha rA dzA ya/ ta thA ga tA ya/ aR+ha te/ saM myaka sam bud d+hA ya/ tar+ya thA/ oM b+hai Sha dz+ye b+hai Sha dz+ye ma hA b+hai Sha dz+ye/ rA dza sa mung+ga te swA hA/ shar du kha bltas 'thung du gzhug /ces bya ba la/ de nas zhes bya ba ni bkra shis pa'i don du smos pa yin no/ /thun mong gi dus su ni dbyar zla tha chungs dang / dpyid zla 'bring po'o/ /cho ga bzhin du bya ba ni bya ba'i rim pa dang mthun par snum gyis zhen cing brlan par byas la/ nang par te de las gzhan pa'i nyi ma la/ skyug sman gtang bar bya ba'i skyes bu nub gcig snum gyi cho ga spyad la/ tshad dang ldan pa'i sman de btung ba ni sman pa nub tu kha bltas la nad pa shar du kha bstan te/ sngags ni mngon par bzlas la 'thung du gzhug go ces bya bar sbyar ro/ /skyug par bya ba ji lta bu la blud ce na/ bad kan glongs pa ste/ bad kan skyed pa de rang gi gnas nas gso bar bya'o/ /gang gis she na/ mon sran gre'u dang til la sogs pas so/ /sogs pa smos pa ni 'o ma dang / zho dang / til gyi 'ba' cha la sogs pa'i kha zas kyi bye brag rnams kyis so/ /mtshan mo gnyid log pa ni mtshan mo bde bar gnyid log pas gnas pa'o/ /rang gi zas legs par zhu ba ni kha zas bde mor zhu bar gyur pa'o/ /snga dro ni nyi ma'i cha dang po'o/ /bkra shis bya ba ni byin rlob cing dge ba ston par byed pa'o/ /de bzhin du zas ma zos pa ni kha zas longs spyad pa ma byas pa'o/ /yang cung zad snum pa ni snum gyi bya ba cung zad byas pa'o/ /thug pa ni nas thug go/ /de zhun mar cung zad btab la btung bar bya'o/ /de bzhin du byis pa dang rgan po la sogs pa rnams ni nad kyi dbang las chang la sogs pa lkog mar phyin gyi bar du 'thung du bcug la/ nad dmigs ji skad bshad cing gang la ji ltar 'os pa bzhin du sbrang rtsi dang rgyam tsha dag dang ldan zhing bsres la/ sman gyi tshan lto sra snyi rab 'bring tha ma'i tshad las dpags te/ lto snyi ba la sman 'jam po'am tshad chung ba'i sman sbyin no/ /'bring la 'bring ngo / /sra ba ni che ba dang che ba'o/ /sman la sngags kyis mngon par bzla ba ni/ dge slong bram ze rnams kyi shis par brjod par bya ba'i tshig rnams dang / de bzhin du tshangs pa ste skye dgu'i bdag dang zhes bya ba la sogs pa'i tshigs su bcad pa dang / sngags bzla bar bya'o/ /de la tshangs pa dang skye dgu'i bdag po myur du zhes bya ba dang / tha skar gyi bu gnyis dang / drag po lha chen po dang / dbang po ste brgya byin dang / sa'i lha dang / nyi ma dang / zla ba dang / me lha dang / rlung lha ste tshangs pa la sogs pa de dag gis khyed la bsrung zhing skyob par shog shig pa'o/ /'di dag 'ba' zhig tu ma zad kyi drang srong zhes bya ba rgyun shes la sogs pa sman gyi tshogs dang bcas pa ste/ sman gyi gnas yul lam sman gyi tshogs du ma dang bcas pa rnams dang / de bzhin du 'byung po'i tshogs te lha ma yin dang / nam mkha' lding dang mi'am ci la sogs pa 'byung po mthu bo che rnams kyis bsrung bar shog shig pa'o/ /yang khyed la sman 'di lta bur nye bar gnas par gyur cig pa ste/ drang srong rnams kyi bcud len dang / zhes bya ba drang srong 'pho ba zhes bya ba la sogs pas bcud kyis len du byas pa'i sman gyi tshogs lta bu dang / brgya byin la sogs pa lha rnams kyi bdud rtsi lta bu dang / klu yang yin la mchog kyang yin pas na/ klu mchog ste mtha' yas dang nor rgyas dang rigs ldan la sogs pa rnams kyi ste/ klu rnams kyi bdud rtsi rnyed par sla ba ma yin pas klu mchog ces smos pa yin te/ klu rnams kyi bdud rtsi ni lha'i bas cung zad dman pa yin te/ de dang khyed kyi sman 'di 'dra ba nyid du gnas par gyur cig pa'o/ / 'thungs nas de la sems dmigs te/ /yud tsam bsdad la dang gar 'khyil/ /mchil ma de las slon du gzhug /ma gnod par ni sor mos sam/ /yang na chu ba 'jam po yis/ /lkog ma lce'u chung ma snad bya/ /skyug mi bro bar mi drang ngo / /'byung bar ldog pa slon par bya/ /pus mo dang mnyam stan la gnas/ /zhes bya ba la/ sman 'thungs zin nas/ de la sems shing zhes pa slon bro ba'i sems bskyed la/ yud tsam zhes pa chu tshod gnyis kyi bar du bsdad cing 'dug la dang gar 'khyil ba dang / rngul 'byung bas nad zhi bar 'gyur ba dang / ba spu ldang bas gnas las bskyod par 'gyur ba dang / khong pa cung zad spo zhing 'khrugs pas ltor rgyu ba dang / rim gyis snying gar zug cing dang ga 'khyil ba dang / snying 'phar ba dang / mchil ma mang po khar 'byung ba dag gis nad de gyen du mngon par shes pa'i bar du yud tsam bsdad nas slon du gzhug go/ /gang la dang ga 'khyil ba dang mchil ma mang ba 'byung bar 'gyur ba de ni dang gar 'khyil ba dang / mchil ma mang ba zhes bya la/ de ltar gyur nas de slon du gzhug go/ /ji ltar slon par bya zhe na/ ma gnod par sor mo gnyis kyis slon zhing drang ba ste/ shin tu rtsol ba drag pos mi bya'o/ /yang na chu ba 'jam pos bya ste/ ut+pal sngon po la sogs pa'i chu sdong zlum pa 'jam zhing mnyen pas bya'o/ /lkog ma lce chung ma snad par/ / zhes bya ba ni/ de dag la gnod pa med par ro/ /de bzhin du skyug mi bro zhing 'byung bar mi ldog pa'i tshe drang zhing slon par mi bya'o/ /skyug bro zhing 'byung bar ldog pa na slon zhing skyug par bya'o/ /skyes bu slon zhing skyug bro ba'i tshe/ pus mo dang mnyam pa'i stan mthon po la gnas par gyur pas skyug tu gzhug go/ /de ni slon tshe glo gnyis dang / /dpral ba dag la brten par bya/ /de bzhin lte ba btsir ba dang / /rgyab nas gyen du mnye bar bya/ /zhes bya ba la/ mi de slon zhing skyugs par gyur pa na/ glo gnyis te rtsib logs gnyis dang / de bzhin du dpung pa nas gzung zhing brten par bya'o/ /de bzhin lte ba btsir bar bya ba dang rgyab nas gyen du btsir thabs kyis phul zhing lag pa gyen du bltas pas mnye bar bya'o/ /de ltar bad kan rno drod kha/ /mkhris pa mngar dang bsil bas slon/ /rlung 'dres bad kan snum pa dang / /skyur dang lan tshwa dag gis slon/ /ji srid bad kan rgyun chad pa'am/ /mkhris pa snang gi bar du skyug /ces bya ba la/ tshul de ltar bad kan ni sman rno ba dang dro ba dang kha bas slon zhing skyug tu gzhug go/ /de bzhin du mkhris pa dang bad kan rgyas pa 'dres pa'i nad la/ sman mngar ba dang bsil ba'i nus pa dang ldan pas slon du gzhug go/ /de bzhin du rlung nad 'dres shing 'dus pa'i bad kan rgyas pa la ni sman snum pa dang / skyur ba dang / lan tshwa'i shas che ba dag gis slon du gzhug go/ /de slon pa ni ji srid bad kan zad cing rgyun chad pa'am/ mkhris pa snang gi bar du skyug cing drang bar bya'o/ /shugs dal pi pi ling skyu ru/ /yungs kar rgyam tsha'i chu dag gis/ /yang dang yang ni slon du gzhug /ces bya ba la/ skyes bu slon pa'i shugs dal zhing / babs chung bar gyur na/ pi pi ling dang yungs kar btags pa'i lde gu dang / rgyam tsha'i chu dag blud la/ de yang dang yang du slon zhing skyug tu gzhug go/ /der ni slon par ma gyur pa'am/ /sdod pa dang bcas slon pa'am/ /sman ni 'ba' zhig byung gyur na/ /sbyor nyes de ni mchil ma mang / /g.yan pa thor bu rim sogs 'byung / /zhes bya ba la/ skyug pa'i gnas skabs der slon pa'i shugs ci'ang 'byung bar ma gyur pa'am/ yang na sdod pa'i gags dang bcas par slon pa'am/ sman 'ba' zhig byung bar gyur zhing nad ma phyin pa sman nyi tshe skyugs par gyur na/ 'di ni skyug sman gyi sbyor ba nyes shing ma rungs pa yin te/ sbyor ba nyes pa des mchil ma mang ba la sogs pa 'byung bar 'gyur ro/ /mchil ma ni bad kan mchil snabs mang du 'dzag pa'o/ /sogs pa zhes smos pa ni yi gar mi 'ong ba dang / lus lci ba dang tshigs na ba dang / rmya zhing snyom pa dang zug cing gzer ba dang / spu langs pa la sogs pa 'byung ba bsdu'o/ /bder skyug bad kan mkhris pa dang / /rlung ni rim gyis 'byung bar 'gyur/ /sbyor ba legs pa yin/ /zhes bya ba la/ skyug sman gyi sbyor ba legs pa'i mtshan ma yang bde bar skyug cing gzer ba dang / bad kan la sogs pa rim gyis 'byung bar 'gyur ba ste/ bad kan slon pa med par 'byung ba dang / de'i 'og tu mkhris pa/ de'i 'og tu rlung rim bzhin du 'byung ba dang / de bzhin du zug gzer chen po med pa dang / yid dga' zhing gsang bag la sogs pa 'byung bar 'gyur ro/ /skyug sman gyi sbyor ba legs pa yin no/ /sbyor ba drags pas/ /lbu ba tshon can khrag 'drar snang / /slon nas khong rmya lus tsha dang / /lkog skam mgo 'khor mig mi mthong / /rlung nad mi bzad ldang 'gyur zhing / /srog gi khrag 'byung 'chi bar 'gyur/ /zhes bya ba la/ skyug sman gyi sbyor ba drags par gyur pa yang / slon pa'i skyugs pa lbu ba dang / mdog tshon can rma bya'i mjug sgro ltar kha dog sna tshogs pa snang ba dang / khrag lta bur skyug par 'gyur bas na/ lbu ba tshon can khrag 'drar snang / /zhes bya'o/ /de bzhin du slon nas khong rmya zhing shin du nyam chung ba dang / de bzhin du yan lag thams cad tsha ba 'ur 'ur por gyur pa dang / lkog ma skam zhing gre ba zhum pa dang / mgo 'khor ba dang / mig gis mi mthong zhing mun pa lta bur snang ba dang / rlung nad mi bzad pa ste/ kha yo ba dang / rna ba gzer ba dang / tshig thogs pa dang / lce 'khums pa dang / mig 'gyur ba dang / 'gram pa 'thams pa dang / dran pa med pa dang / gnyid yar ba la sogs pa'i nad mi bzad pa dang ldan par 'gyur ro/ /yang na srog ces bya ba'i khrag 'og nas bshad pa'i mtshan nyid can/ slon nyes pa'i nad de 'byung bas 'chi bar 'gyur ro/ /sbyor ba legs pas slon pa ni/ /yud tsam ngal bso dud pa gsum/ /gang yang rung bas bdug pa dang / /de'i 'og snum gyi spyod pa bsten/ /zhes bya ba la/ skyes bu sbyor ba legs pas slon par gyur na rkang pa dang lag pa dang gdong dang mig legs par dag par byas shing phyis la/ yud tsam zhig la ngal gso zhing dub pa bsal la/ rdza yang la sogs pas dbugs byung zhing sems gso ba byas nas/ de'i 'og tu gso ba bdug pa gsum po bdug pa'i cho ga las 'og nas bshad pa rnon po dang bar ma dang / 'jam pa'i dbye bas phye ba'i gang yang rung ba de'i nus pa dang sbyar te/ ci rigs par rno ba dang bar ma dang 'jam pa dang gsum las gcig gis bdug par bya'o/ /de nas de'i 'og tu snum gyi cho ga'i spyod pa'i/ kha lag chu dron gyis bkru zhing / zhes bya ba la sogs pa bstan cing bslab par bya'o/ /de nas dgongs ka'am nad par ni/ /bkres tshe chu tshan gyis bkrus la/ /sA lu rtsa snar 'bras kyi ni/ /thug pa la sogs rim bzhin bsten/ /zhes bya ba la/ de nas slon zin pa dang / dgongs ka ste nyi ma nub nas sam/ yang na de phyi de zhag gi nang par tho rangs kyi slon gyis glongs pa'i lus zungs rnams rang gi gnas su legs par gnas par bya ba'i phyir/ sngar slon pas bkres shing bru ba tsha bar gyur na chu dron pos khrus byas shing gtsang sbra byas la/ sA lu rtsa snar gyi 'bras kyi thug pa la sogs pa 'og nas bshad pa'i rim pa 'di bsten cing spyad par bya'o/ /de la thug pa la sogs pa'i rim pa la bsten pa 'ba' zhig tu ma zad kyi/ 'bras rak+ta sha li zhes bya ba la sogs pa btsos pa'i 'bras chan snum dang lan tshwa dang kha ba shas chung ba dang / de'i 'tshal nan phal cher de dang rjes su mthun pa btung bar bya ste/ me'i drod kyi stobs las dpags te/ dgongs ka'am nang par ltogs par gyur pa'i dus su cho ga 'di spyad par bya'o/ /thug pa gar po g.yos su ma byas pa'i/ /yu sha sha khu gsum dang gnyis dang gcig /mchog dang bar ma tha ma'i sbyang bas sbyangs/ /mi yis zas kyi dus su rim bzhin spyad/ /ces bya ba la/ thug pa ni 'bras thug rkyang pa la cung zad ska ba'o/ /de bas kyang ska zhing thur ma la chags pa ni thug pa gar po'o/ /g.yos su byas pa'i yu sha ni bca' sga dang pi pi ling dang / se 'bru dang go snyod dang shing kun la sogs pa ma btab par mon sran sde'u mung+ga zhes bya ba la sogs pa la bskol ba'i khu ba'o/ /sran mung+ga la sogs pa de nyid bskol ba'i khu ba la bca' sga la sogs pa btab pa ni g.yos su byas pa'i khu ba'o/ / sha khu ni sha dag gi khu ba g.yos su byas pa'o/ /'dir byas pa ni/ der ni sha las khu ba ste/ 'bru las khu ba 'bras bu las/ /kha lo rtsa ba til tshigs skyur/ /phal cher skam pa la zhes bya/ /de dag snum sogs ldan dang med/ /g.yos byas ma byas yin zhes bya/ /zhes 'byung ba yin no/ /thug pa rkyang rkyang po la sogs pa rnam pa lnga po de dag rim bzhin du grangs ji lta ba bzhin du go rims ma 'chol bar gsum dang gnyis dang gcig tu byas nas/ zas kyi dus su mchog dang bar ma dang tha ma'i sbyang bas sbyang bar mi bya ste/ skyes bus spyad cing bsten par bya'o/ /mchog dang bar ma dang tha ma'i sbyang ba de dag gis sbyangs shing nad bsal ba'i mis zas kyi dus gsum por thug pa rkyang rkyang po nas sha khu ba'i rim pa bzhin du so sor spyad par bya'o/ /de yang thug pa gsum po nam sha khu'i bar du tshe tshad de/ mchog tu sbyang ba byas pa la gsum ste/ zas kyi dus su gsum bsten pa dang / sbyang ba 'bring gis sbyong ba la gnyis te/ zas kyi dus gnyis gnyis te bsten pa dang / de bzhin du sbyang ba thams sbyang ba la gcig ste/ zas kyi dus thug pa nas sha khu'i bar du re re spyad pas bsten par bya'o/ /de la nyi ma dang po'i dgongs ka thug pa btung bar bya'o/ /nyi ma gnyis pa la zas kyi dus gnyis su thug pa nyid btung bar byas te/ de ltar zas kyi dus gsum du thug pa spyad pa yin no/ /nyi ma gsum pa la zas kyi dus gnyis su thug pa gar po spyad par bya'o/ /de yang sla ba ma yin pa thur ma la bde blag tu chags pa bza' bar bya ste/ de ltar na zas kyi dus gsum du thug pa gar po longs spyod pa yin no/ /nyi ma bzhi pa'i dgongs ka'i zas kyi dus gcig tu g.yos su ma byas pa'i khu ba longs sbyad par bya'o/ /de yang nyi ma lnga pa'i zas kyi dus gnyis su g.yos su ma byas pa'i khu ba nyid btung bar bya ste/ de ltar na g.yos su ma byas pa'i khu ba zas kyi dus gsum du spyad pa yin no/ /zhag drug pa la zas kyi dus gnyis su g.yos su byas pa'i khu ba bsten par bya'o/ /nyi ma bdun pa'i nang par gyi zas gcig la g.yos su byas pa'i khu ba zas kyi dus gsum du spyad par bya'o/ /zhag bdun pa'i dgongs ka zas kyi dus gcig tu sha khu dang nye bar longs spyad par bya'o/ /zhag brgyad pa'i zas kyi bar dus gnyis su sha khu dang bsten par bya ste/ de ltar sha khu zas kyi dus gsum du bstan pa yin no/ /'di ni sbyang bar gyi thug pa rkyang rkyang po nas sha khu'i bar spyad pa'i rim pa yin no/ /de bzhin du sbyang ba che bas sbyangs pas zas kyi dus gnyis su thug pa la sogs pa spyad par bya'o/ /nyi ma bzhi pa'i nang par yang g.yos su ma byas pa nyid do/ /de'i dgongs ka ni g.yos su byas pa'i khu ba ste/ lnga pa'i nang par yang g.yos su byas pa dang spyad par bya'o/ /de'i dgongs ka ni sha khu ste/ nyi ma drug pa'i nang par yang sha khu dang spyad par bya'o/ /de'i dgongs ka phan chad ni zas nar mar bza' bar bya'o/ /de bzhin du sbyang ba tha mas sbyangs pas zas kyi dus gcig tu thug pa rkyang rkyang po la sogs pa spyad par bya ste/ nyin zhag dang po'i dgongs ka thug pa rkyang rkyang po spyad par bya'o/ /nyi ma gnyis pa'i nang par thug pa gar po dgongs ka g.yos su ma byas pa'i sha nyi ma gsum pa'i nang par g.yos su bya ba'i khu ba/ dgongs ka sha khu de phan chad ni zas nar ma thams cad spyad la rag go/ /thug pa rkyang rkyang po la sogs pa'i rim pas ci zhig byed ce na/ de'i phyir smras pa ni/ /dper na me chung rtswa dang lci sogs kyis/ /rnam par sbar nas rim gyis mched pa na/ /che zhing brtan la thams cad mched par nus/ /sbyangs pa'i nad med thug sogs kyis de bzhin/ /zhes bya ba yin te/ dper na me shing med cing phra ba cung zad cig gnas par gyur pa ni/ rtswa dang lci ba la sogs pa phra zhing zhib mor rnam par sbar zhing 'bud pa na/ rim gyis mched par gyur pa na chen por 'gyur ba dang / de bzhin du brtan zhing mi sod par 'gyur ba dang / thams cad mched par nus pa ste/ dngos po sra zhing lci ba'i zas kyi rigs rnams kyang smin pa dang tshos par nus par 'gyur ro/ /de bzhin du sbyangs par gyur pa'i pho ba'i nang gi me sbyangs pas nyam chung zhing stobs zhan pa thug pa rkyang rkyang po la sogs pas gsos par gyur pa ni rim gyis che ba dang brtan pa dang / 'ju zhing smin par byed nus par 'gyur ro/ /de la sbyang ba gsum po de gang zhig yin pa mi shes so zhe na/ de'i phyir smras pa ni/ slon tshad chung dang 'bring dang chen po ni/ /bzhi dang drug dang lan brgyad slon par 'dod/ /de gnyis bcu dang nyis ldab sum ldab 'khru/ /bre gang de bzhin nyis ldab bzhi ldab 'gyur/ /skyug sman mthar mkhris bkru sman las byed dang / /bad kan mthar byung 'khru ba mchog tu bshad/ /ces bya ba la sogs pa'i tshad chung ngu dang 'bring dang chen po go rims ji lta ba bzhin du slon shugs bzhi dang / drug dang brgyad slon pa dag tshe'i rig byed dran par byed pa dag mngon par 'dod cing ston pa yin no/ /de la slon pa chung tshad ni lan bzhi slon pa yin par 'dod do/ /slon tshad 'bring ni lan drug slon pa'o/ /slon pa che tshad ni lan brgyad slon pa'o/ / 'byung ba'i shugs de nyid bcu dang nyis ldab dang / sum ldab ni 'khru ba'i tshad chung ngu dang / 'bring dang chen po yin par drang srong de nyid 'dod do/ /de la 'khru ba chung ba'i tshad ni lan bcu 'khru ba'o/ /'khru ba'i 'bring tshad ni/ bcu gnyis ldab ste lan nyi shu 'khru bar 'dod do/ /'khru ba che tshad ni bcu'i sum ldab sum cu yin par 'dod do/ /de ltar na skyug sman dang bkru sman gnyis kyi 'byung ba'i grangs kyi tshad chung ngu dang chen po bshad pa yin no/ /bre la sogs pa'i tshad kyis gzhal ba'i tshad chung ngu dang / 'bring dang / chen po smras pa ni bre gang la sogs pa yin te/ 'khru ba'i tshad chung ngu dang 'bring dang chen po ni rim bzhin du bre gang dang / de nyid kyis nyis ldab dang / de nyid kyis bzhi ldab yin no/ /zhes bya bar sbyar ro/ /des na 'khru ba chung tshad ni bre gang ngo / /'bring ni bre do'o/ / chen po ni bre bzhi yin no/ /slob dpon gzhan dag ni/ skyug sman gyi mchog ni mkhris pa 'byung ba'i mthar thug pa yin par 'dod do/ /skyug sman gang gi mthar mkhris pa 'byung ba de ni/ skyug sman mthar ni mkhris pa'o/ /zhes bya'o/ /bkru sman gyi tshad bre gang du yongs su chung ba las phyed do/ /des na slon pa'i chung tshad ni bre phyed do/ /'bring ni bre gang ngo / /che tshad ni bre do'o/ /de bzhin du bad kan mtha' mar byung ba'i 'khru ba'i tshad ni mchog yin no/ /zhes srog bsrung ba'i slob dpon dag gis bshad do/ /'khru ba gnyis gsum bshad dang bcas mi gtogs/ /'khru ba gzhal te slon pa 'thungs ma gtogs/ /zhes bya ba la/ 'bring ni bre gang ngo / /'khru ba'i shugs gnyis sam gsum la ni 'khru ba'i gsum zhes bya ba la/ de bshang ba dang bcas par 'byung bas na/ bshang bcas te 'khru ba de gtogs shing tshad du bgrang bar mi rtsi zhing 'khru ba'i tshad la la gzhal zhing brtsis la 'khru ba'i grangs su bstan pa gang yin pa las de mi rtsi ste/ de'i 'og tu dngos po'i rigs gzhan de med pa 'khru ba'i shugs kyi dbang gis bshang ba'i sgo nas 'byung ba de nyid de'i 'og tu bre la sogs pa'i tshad kyis gzhal bar bya'o/ /de bzhin du slon zhing skyugs pa'i lus la slon pa'i phyir/ skyug sman chu la sogs pa rdzas gsher ba dang bsres te 'thungs pa gang yin pa kha nas slon te byung ba de skad du bshad pa'i grangs su mi rtsi'o/ /de'i 'og tu dngos po gzhan dag slon pa'i shugs kyis kha'i sgo nas byung ba de nyid phan chad gzhal zhing brtsi bar bya'o/ /de nas slon pa de la ni/ /slar yang snum dang dugs byas te/ /bad kan dus 'das lto shes nas/ /legs par bkru sman gtang bar bya/ /zhes bya ba la/ de nas zhes bya ba ni/ bkra shis pa'i don nam/ de ma thag pa'i don te/ de nas de'i 'og tu slon pa'i skyes bu de slar yang zhes bya ba phyis yang snum dang dugs byas shing bde bar gnas pa sngar bshad pa'i chogs byas la/ bad kan gyi dus 'das pa dang lto na kha zas med par shes shing rtogs nas sman gyi tshad ji ltar 'os pa las legs par bkru sman btang zhing 'thung du bcug la/ 'khru bar bya'o/ /mkhris pa mang zhing lto snyi la/ /'o mas kyang ni 'khru bar byed/ /rlung shas che zhing lto sran/ /dur byid sogs kyis kyang 'khru dka'/ /zhes bya ba la/ de la mkhris pa mang zhing lto snyi ba gang yin pa de ni 'o mas kyang 'khru bar byed do/ /'dir 'o ma smos pa ni nye bar mtshon pa tsam du zad do/ /des na bu ram shing gi khu ba dang dar ba skyur po dang / zho ga chu dang / bu ram dang / kri sar dang / zhun mar dang / chang dang / chu tshan dang / pi lu dang / rgun 'brum dang / gla gor zho sha la sogs pas kyang 'khru bar byed do/ /de la rlung shas che zhing lto sra la 'khru bar dka' ba ni dur byid dang 'bras bu gsum dang / nim pa dang / ni li ni dang / dan da'i 'bras bu la sogs pas kyang 'khru bar dka' zhing rtsol ba chen pos gdong 'khru ba yin no/ /bkru sman mkhris la mngar dang bska/ /bad kan la ni kha bas bya/ /rlung la snum dro lan tshwa can/ /zhes bya ba la/ mkhris pa'i nad kyi yul la ni bkru sman mngar ba dang / bska ba btang na bkru ba la bsngags so zhes bya ba ni tshig gi lhag ma'o/ /de bzhin du bad kan zhes bya ba la mkhris pa rgyas pa dang 'dres pa'i bad kan la ni sman kha bas bkru ba bsngags pa yin no/ /rlung dang mkhris pa 'dres pa la ni sman snum pa dang / dro ba dang / lan tshwa can gyi bkru sman gyis bkru ba bsngags pa yin no/ /mi 'khru na ni chu tshan blud/ /lag pa bsros pas de yi ni/ /lto ba legs par dugs bya'o/ /zhes bya ba la/ sbyang ba'i sman gyis 'khru bar ma gyur na/ sman gyi nus pa bskyed par bya ba'i phyir/ chu tshan blud pa dang / de bzhin du skyes bu lag pa bsros pas de'i lto ba legs par dugs bya zhing bsro bar bya'o/ /ma 'khrus de zhag ldang zas zos/ /nyi ma gnyis par slar yang btung / /zhes bya ba la/ sman des cung zhig 'khru ba'i nad bde mor ma phyin na mal nas langs la/ phyi rol gyi sar dri ma gdon pa'i phyir 'gro bar byas la/ de nas de zhag gcig zan zos la/ nyi ma gnyis pa zhes bya ba phyi de nyin yang 'khru bar bya ba'i phyir yang sman btung bar bya'o/ /lto ba rab sra snum dag ni/ /zhag bcu'i bar du yang btung bas/ / slar yang snum dang dugs kyis ni/ /lus sbyangs nas ni bkru sman gyi/ /sbyor ba legs par brtags pa dang / /sngar gyi nyes pa dran par bya/ /zhes bya ba la/ gang gi snum gyis zhen par ma gyur cing ma bslan bas rab tu sra ba zhig na/ zhag bcu'i bar du slar yang snum gyi cho ga byas la/ lus nye bar sbyang zhing snum gyi dugs kyis btsos nas bkru sman gyi sbyor ba nad la sogs pa'i tshul la legs par brtags te bya ba dang / de bzhin du sngar gyi nyes pa ci yang dran zhing ngos zin par byas la/ ma yengs par bkru sman btung bar bya'o/ /bkru sman gyi sbyor ba nyes pa'i mtshan nyid ni/ snying dang lto na yi ga 'chus/ /bad kan mkhris pa glongs pa dang / /g.yan pa lus tsha thor bu dang / /cham pas 'debs shing bshang rlung 'gags/ /sbyor ba nyes pa'i mtshan nyid yin/ /zhes bya ba yin te/ bkru sman btang ba ma legs na/ snying dang lto ba na zhing mi dga' bar 'gyur ba dang / yi ga 'chus pa ste zas la 'dod pa med pa dang / de bzhin du bad kan dang mkhris pa glongs shing bskyod par 'gyur ba dang / lus g.ya' zhing lus tsha ba sna tshogs kyis 'debs pa dang / yan lag dang nying lag tu thor bu 'byung ba dang / cham pas 'debs pa dang / de bzhin du bshang ba thur du 'byung ba'i rlung 'gags par 'gyur ba ni sbyor ba nyes pa'i mtshan nyid yin par bshad do/ /sbyor legs ji skad bshad go bzlog / ces bya ba la/ bkru sman gyi sbyor ba legs na ji skad bshad pa'i mtshan nyid snying dang lto ba na ba la sogs pa las go bzlog pa ste/ snying dang lto ba dag cing sang bag tu 'gyur ba dang / zas yi gar 'ong ba la sogs par 'gyur ro/ /bshang ba mkhris pa bad kan rlung / /rim gyis 'khru zhing 'byung ba na/ /bad kan mkhris pa med chu 'khru/ /skya zhing gnag dang khrag dang bcas/ /yang na sha bkrus lta bu'am/ /tshil gyi dum bu 'dra nyid dam/ /gzhang 'byung skom dad che ba dang / /mgo 'khor mig ni phugs su bros/ /bkru sman drags las 'byung ba yin/ /de bzhin skyug sman drags nad 'gyur/ /zhes bya ba la/ skyes bu shin tu 'khru drags pa la/ gnod pa 'di dag 'byung bar 'gyur te/ bshang ba la sogs pa 'byung ba na/ bad kan dang mkhris pa ni med pa'i dri ma'i chu 'ba' zhig 'byung ba dang / de bzhin du skya zhing dkar ba dang / gnag cing snag tsha 'dra ba dang / khrag dang bcas pa ste/ yang na sha bkrus pa lta bu ste/ bkrus pa'i sha 'dra ba dang / de bzhin du tshil gyi dum bu dang 'dra zhing mtshungs pa dang / de bzhin du gzhang 'byung zhing 'thon pa dang / de bzhin du skom dad che zhing skom pas gdungs pa dang / mgo 'khor ba dang / de bzhin du mig phugs su bros shing rkongs su zhugs pa ste/ 'di dag ni shin tu 'khru drags pa las 'byung bar 'gyur ro/ /de bzhin du skyug sman drags pa'i nad kyi tshul sngar bshad pa ltar yang 'byung bar 'gyur te/ lus skem zhing rmya ba dang / lus kyi khong tsha ba dang / lkog ma bskams pa dang / mig gis mi mthong nas 'chi ba'i bar du 'byung bar 'gyur ro/ /legs par 'khrus pa de la ni/ /dud pas bdug pa ma gtogs pa'i/ /cho ga skyug sman dang mtshungs pas/ /de nas slon dang 'dra bar bya/ /zas la rim gyis spyad nas ni/ /de 'og nar ma'i kha zas bsten/ /zhes bya ba la/ legs par 'khru zhing khrus kyi sbyor ba ji skad du bshad pa ltar 'khru ba'i skyes bu de la dud pas bdug pa'i cho ga ma gtogs pa/ cho ga gzhan skyug sman gyi skabs su bshad pa dang mtshungs shing 'dra bar nye bar sbyar bar bya ste/ 'dir khyad par ni dud pas bdug pa 'ba' zhig ma gtogs pa sngar bshad pa thams cad bya'o/ /de nas de'i 'og tu slon dang 'dra bar bya ba ste/ ji ltar slon pa'i skabs su bshad pa bzhin du rim pa nyid kyis khrus btang ba'i 'og tu thug pa rkyang rkyang po la sogs pa sbyin pa'i kha zas kyi cho ga rim gyis spyad cing bsten nas/ de'i 'og tu nar ma'i kha zas min pa'i dbang du byas nas bshad pa'i zas kyi cho ga bsten par spyad par bya'o/ /sman 'thungs me drod chung ba dang / /ma dag nad kyis rmya ba dang / /zhu ba'i mtshan ma ma mthong na/ /de yi nyin par smyung byas la/ / snum dang dugs dang sman rnams kyis/ /glongs pa'i nad kyis nyen mi 'gyur/ /zhes bya ba la/ skyes bu sman 'thungs shing spyad nas/ me'i drod chung zhing me'i stobs chung ba dang / ma dag pa ste/ nad ma phyin la legs par sbyangs pa'i mtshan nyid ma skyes pa dang / nad kyis rmya ba ste/ nad kyi dugs sman rnams kyis nyam chung ba dang / zhu ba'i mtshan ma mthong ste/ sman legs par zhu ba'i rtags mi snang na/ snum dang dugs la sogs pas glongs pa'i nad kyis gnod par mi 'gyur te/ de yang nad gang snum gyis glongs shing bskyod pa dang dugs kyis glongs shing bskyod pa dang / sman gyis glongs pa'i dbang gis nad bskyod pa de smyung ba byas nas des nyen zhing gnod par mi 'gyur ro/ /sbyangs dang khrag ni dbyung ba dang / /snum chog la sbyar smyung ba yis/ /me drod zhen pa nyid 'gyur te/ /de bas thug sogs rim gyis spyad/ /ces bya ba la/ slon dang khrus la sogs pas sbyangs pa la sogs pas pho ba'i me drod zhen zhing stobs chung bar 'gyur ba yin te/ de bas na thug pa la sogs pa rim gyis spyod cing bstan par bya'o/ /de la sbyangs pa ni skyug sman btang ba dang / bkru sman btang bas nad phyin par byas pa'o/ /khrag dbyung ba ni gtar ga la sogs pas khrag dbyung ngo / /snum gyi cho ga la sbyar ba ni snum gyi cho ga bstan pa'o/ /smyung ba ni zas bcad pa'o/ /de yang sman dpyad kyi lung las smyung ba khyad par med pas bshad par zhes 'byung ba yin no/ /bad kan mkhris pa 'bri zhing chung / /chang 'thungs rlung dang mkhris pa che/ /de la thug pa mi blud kyi/ /brta ba la sogs rim pa phan/ /zhes bya ba la/ gang gi bad kan dang mkhris pa chung zhing phri bas chung bar gyur pa de ni bad kan mkhris pa bri zhing chung ba zhes bya'o/ /de bzhin du gang chang 'thung ba la goms pa de ni chang 'thungs pa'o/ /de bzhin du rang bzhin gyis rlung dang mkhris pa'i shas che ba de la thug pa mi drud kyi/ gsum po de dag la brta ba la sogs pa'i rim pa phan te/ zas kyi dang por brta ba'i cho ga 'bras bu'i yos kyi phye las byas pa'i skyo ma sbyin par bya ste/ thug pa'i skabs su brta bar byed pa'i 'bras kyi skyo ma sbyar bar bya'o zhes bya ba'i don to/ /skyug sman ma zhu bar nad 'byin/ / bkru sman zhu nas 'byin pa yin/ /de yi phyir na skyug sman dag /zhu ba la ni bsdad mi dgos/ /zhes bya ba la/ skyug sman btang na ni ma zhu ba'i nad 'byin par byed do/ /bkru sman zhu zhing smin nas nad 'byin cing sel bar byed de/ de'i phyir skyug sman dag btang nas zhu ba la bsdad mi dgos te gang yud tsam bsdad pa ma byung na yang myur ba nyid du slon zhing drang bar bya'o/ /steng dang 'og tu 'byung rigs pas/ /gang tshe phyin ci log gyur na/ /de tshe skyugs la rkang par ni/ /chu dron dag gis blugs par bya/ /lus kyi stod ni chu grang blugs/ /'khru ba la ni de las bzlog /ces bya ba'i tshigs su bcad pa 'di ni/ yan lag brgyad pa bsdus pa las/ la la zhig gis 'dir bcug pa yin no/ /de'i don ni 'di yin te/ skyug sman gyis steng du 'byung ba dang / bkru sman gyis 'og tu 'byung ba'i rigs pa las/ gang gi tshe rgyu 'ga' zhig gis phyin ci log tu gyur te/ rkyen des skyug sman btang ba na/ 'khru bar gyur pa dang / bkru sman btang ba na slon par gyur pa de'i tshe/ 'khru ba las phyin ci log tu gyur te/ slon par gyur pa ni/ chu dron po rkang par blugs la/ chu grang mo ro stod du blugs par bya'o/ /gang gi tshe 'khru sman phyin ci log tu gyur pa las go bzlog pa'i dpyad bya ste/ rkang par chu grang mo blugs par bya la/ ro stod du chu dron mo blugs par bya'o/ /gang zhig nyam chung nad mang dang / /nad smin pa yis rang nyid ni/ /'khru bar byed la 'khru ba ni/ /kha zas byin la der 'khrur gzhug /ces bya ba la/ gang zhig nyam chung ba la sogs pa dang / nad smin te rang nyid 'khru ba de la ni kha zas kyis 'khrur gzhug gi / 'khru ba'i sman sbyin par mi bya'o/ /sngar sbyangs pas ni nyam chung dang / /nad kyi dkyel chung lus zad ni/ /lto yi sra snyi mi shes la/ /sman ni 'jam zhing chung ngu blud/ /de mang 'thungs pa mchog yin gyi/ /gzhan du dgos par bcas mi rung / /zhes bya ba la/ slar sbyang ba byas pa lus nyam chung bar gyur pa dang / de bzhin du nad kyi dkyel chung ba dang / lus kyi sha zad cing sbeg pa dang / de bzhin du lto sra snyi'i bye brag mi shes pa dag la/ sman 'jam zhing chung ba blud par bya ste/ gang gi phyir sman de dgos pa la ltos nas lan mang du 'thungs pa ni mchog yin gyi gzhan du na lan cig mang du blud pa dgos pa dang bcas pas ni mi rung ste/ sbyor ba nyes pa'i skyon yod pa'i phyir ro/ /nyam chung ba ni nad mang po/ /g.yos gyur cung zad cung zad cig /sman ni 'jam pos lan mang zhig /de ni nyung 'gyur zhi bar bya/ /ma bsal de ni yun ring du/ /nyon mongs pa'am gsod par 'gyur/ /zhes bya ba la/ skyes bu nyam chung ba'i nad mang po g.yos par gyur ba ni/ cung zad cung zad cig sman 'jam pos yang dang yang du bsal bar byas nas/ nyam chung ba'i nad g.yos par gyur pa de nyung ngur gyur pas ma bton par zhi bar byas pas zhi bar bya ste/ gang gi phyir zhe na/ mang po de dag g.yos pa nyung ngu nas bsal zhing zhi bar byas na/ nad de yun ring du nyon mongs shing / sdug bsngal bar 'gyur ba'am/ gsod cing 'joms pa nyid du byed par 'gyur ro/ /me drod chung dang lto sra la/ /thal sman rgyam tsha mar bcas pas/ /me yi drod ni bskyed nas su/ /rlung dang bad kan bsal bar bya/ /zhes bya ba la/ de bzhin du skyes bu me drod chung bar gyur pa sbyang ba'i skabs la bab na thal sman rnon po dang bcas pa'i mar ji skad bshad pas pho ba'i me drod bskyed nas sbyang ba bya'o/ /de bzhin du sra ba la rgyam tsha dang mar dang bcas pas rlung dang bad kan bsal la sbyang bar bya'o/ /rtsub cing rlung mang lto sra dang / /rtag tu rtsol ba'i tshul can dang / /me drod rab tu che la sman/ /mi 'khru bar ni zhu bar 'gyur/ /de la sngar ni 'jam rtsi gtang / /de nas snum pa'i bkru sman bya/ /sman ni rnon po'i reng bu yis/ /bshang ba cung zad dbyung bar bya/ /dri ma legs par 'khrus nas ni/ /snum 'khru bde bar 'byung bar 'gyur/ / zhes bya ba la/ skyes bu rtsub pa la sogs pa dang ldan pa dang / de bzhin du me drod rab tu che zhing sman de 'khru ba'i sman mi 'khru ba'i bya ba mi byed pa nyid du zhu zhing dengs par 'gyur ro/ /de bas de'i 'og tu snum pa'i bkru sman ni/ ni li ni'i mar la sogs pa las btang ba sbyin par bya'o/ /yang na mi de lta bu de la sman rnon po'i reng bu byas pas bshang ba cung zad ces pa nyung shas cig phyung la/ de'i 'og tu bkru sman gtang ngo / /de yang gang gi phyir reng bu mas gtong bas/ sman gyis bshang ba la sogs pa phyung ba'i 'og tu bkru sman snum po btang na 'khru ba bde bar 'gyur ro/ /dug gis phog dang thor bu byung / /mdze nad 'or nad me dbal dang / /mig ser skya rbab za gus nyen/ /ha cang snum ches sbyang mi bya/ /kun la bkru sman snum bag btang / /snum gyis zhen la rtsub pa btang / / zhes bya ba la/ dug gis phog pa nas gcin nad za gus nyen pa'i bar gyi nad pa la snum ha cang chen po sbyin par mi bya'i/ nyams las dpags la/ snum cung zad byin te/ gang la ji ltar 'tsham pa'i bkru sman phal cher rtsub pas khrus bya'o/ / dug gis phog pa la sogs pa 'dir smos pa ma gtogs pa gzhan kun te/ thams cad la bkru sman snum bag can e raN+Da'i mar la sogs pa'am/ yang na bkru sman dang bskol bas sbyang bar bya'o/ /ji lta bu la snum gyi khrus sman des sbyang zhe na/ 'das ma thag pa'i snum gyis bsgo bar bstan pas rtsub pas bsgos shing yun ring por rdzas rtsub pos lus bskyed pa zhes bya ba'i bar de la/ snum pa'i bkru sman btang ngo / /de la yang rtsub pa'i khrus sman du dur byid la sogs pa'i snum gyis bsgos pa'i me yun du snum gyis bskyed pa la gtang ngo / /skyug sman la sogs las rnams la/ /slar yang bar skabs bar skabs su/ /snum dang dugs kyi cho ga bya/ /snum rjes la ni stobs bskyed bya/ /lus las nad rnams bsal ba ni/ /gos kyi dri ma 'khru dang mtshungs/ /zhes bya ba la/ skyug sman la sogs pa'i las rnams byed pa na/ bar skabs bar skabs te/ mdo mdor snum dang dugs kyi cho ga bya ste/ skyug sman btang nas de'i zhag kha cig 'das pa'i skabs su snum dang dugs byas la/ de'i 'og tu khrus bya'o/ /de ltar khrus byas nas yang 'dus te 'das pa dang / snum dang dugs byas la/ de'i 'og tu mas gtong bar bya'o/ /de nas bar skabs su snum dang dugs byas la/ de'i 'og tu mgo nad kyi sbyang ba bya'o/ /de ltar mgo'i nad sbyang ba sna sman la sogs pa byas nas/ snum 'ba' zhig stobs bskyed pa'i phyir gtang bar bya ste/ skyug sman la sogs pas stobs bri ba gang yin pa de bskyed par bya ba'i phyir de sbyin par bya ste/ gang gi phyir dri ma dang bcas pa'i lus nad dang 'dres par gyur pa las/ nad de bsal zhing gdon par bya ste/ de ltar na lus bsrung bar 'gyur ro/ /ji ltar nad kyi dri ma dbyung zhe na/ gos dang mtshungs par te/ dper na dri dang bcas pa'i gos la dri ma med de spang ba la sogs pa'i rnam pas 'khrud par byed pa de bzhin du snum dang dugs la sogs pas nad kyi dri ma slong ba'i thabs kyis nad slongs la/ de'i rjes la nad dbyung bar bya'o/ /snum dang dugs dag ma byas par/ /gang zhig sbyang ba'i las byed pa/ /shing skam 'gugs par byed pa ltar/ / de yi lus ni ma rungs 'gyur/ /zhes bya ba la/ gang snum dang dugs dag mang po byas shing ma bsten par gang zhig sbyang ba'i las skyug sman dang / bkru sman la sogs pa byed par gyur pa dag ni/ nad des lus 'jig cing ma rungs par 'gyur ba ste/ dper na shing skam po 'gugs shing sgur por byed pa chag pa dang 'dra'o/ /sbyang ba legs par nye bar bstan pas ni/ /blo gros gsal zhing dbang po stobs dang ldan/ /lus zungs brtan zhing khong pa'i me drod 'bar/ /na tshod dag kyang ring du 'jog par byed/ /ces bya ba la/ sbyang ba zhes bya ba skyug sman la sogs pa nas sna la sogs pa mgo bo sbyang ba'i bar legs par cho ga ji lta ba bzhin du yang dag par byas pas nye bar bsten zhing kun tu spyad pas blo gros te/ shes rab gsal zhing rno bar 'gyur ba dang / de bzhin du mig la sogs pa dbang po rnams kyi stobs rang rang gi yul la legs par 'jug nus pa dang / de bzhin du lus zungs te dngas ma la sogs pa brtan zhing sra ba dang / de bzhin du khong pa'i me drod 'bar ba'i shing nyid du byed pa dang / de bzhin du na tshod de lus kyi na tshod gzhon pa dag tu'ang yun ring du 'jog par byed cing gnas par byed de/ byed ces bya ba thams cad dang sbyar bar bya'o/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slon dpon zla ba la dga' bas rnam par sbyar ba las le'u bcwa brgyad pa'i rnam par 'grel pa'o// //de nas mas gtong ba'i cho ga'i le'u bshad par bya'o/ /zhes bya ba la/ 'di brtsams pa'i dgos pa ni bad kan bsal ba'i phyir skyug sman bshad pa yin la/ mkhris pa bsal ba'i phyir ni bkru sman bshad pa yin la/ gnas skabs 'dir rlung bsal ba'i phyir/ mas gtong ba bshad pa'i skabs yin te/ de bas na de yongs su shes par bya ba'i phyir/ le'u 'di brtsams pa yin no/ /bshang sgo nas gtong ba las su bya ba yin pas na/ mas gtong ba'i cho ga ste/ cho ga ni cho gar bya ba 'di ltar bya'o/ /zhes bya ba'i tshul gyi le'u ste/ de bshad par bya'o zhes bya ba ni bstan par bya'o zhes pa'o/ /rlung shas che ba'i nad rnams sam/ /rlung la mas gtong bsngags pa ste/ /de ni gso ba thams cad kyi/ /mchog ste de yang rnam pa gsum/ /bkru drags 'jam rtsi mas gtong ngo / /zhes bya ba la/ nad thams cad kyi nang na rlung gi shas che zhing rlung nad bdo ba'am/ rlung la zhes pa rlung 'ba' zhig ldang ba la yang mas gtong ba de nyid kyis gso ba dang / de bzhin du 'jam rtsi zhes bya ba snum gyi 'jam rtsi mas gtong ba 'dod cing bsngags pa yin no/ /de ni gso ba ste/ rlung gi nad gso ba thams cad kyi nang na mchog ste/ dam pa nyid do/ /ci'i phyir zhe na/ myur du bde ba 'phel ba la sogs pa'i rgyur gyur pa'i phyir ro/ / mas gtong ba de yang rnam pa gsum ste/ mas gtong ba drag po ni ru ha zhes bya ba dang / mas gtong ba a nu ba sa ste/ 'jam rtsi dang mas gtong ba gong ma ste/ ud da ra ti zhes bya ba'o/ /de la ni ru ha ni nges par 'don pa ste/ nad ma lus pa 'byin par byed pa'o/ /a nu ba sa ni rjes su gnas par byed pa ste/ bkru sman drag pos nad rnams rang gi gnas las bskyod cing glongs pa gang yin pa de dag gang gi rjes su ste de'i 'og tu rang gi gnas su gnas shing bde bar 'jog par byed pa de ni a nu ba sa ste 'jam rtsi'o/ /mas gtong ba gong ma ni bshang ba'i sgo la sogs pa'i mar gyur pa pho ba'i dbang po zhes bya ba de nas sam/ der gtong bar byed pa de ni ud ta ra ba ti ste/ mas gtong ba gong ma zhes bya'o/ /de yis gso bya skran dang ni/ /lto sbos dreg nad mcher ba dang / /'khru ba 'ba' zhig gzer nad dang / /rims rnying bying dang cham pa dang / /khu ba rlung dang dri ma 'gags/ /rlig rlugs rde'u nad zla mtshan 'jig /rlung gi nad ni mi bzad gso/ /zhes bya ba la/ bkru sman drag po des gso bar bya ba ni/ skran la sogs pa nas rlung gi nad mi bzad pa'i bar du gso zhing btso bar bya'o/ /dreg nad ni rlung dang khrag 'dres pa las gyur pa'i rkang nad do/ /'khru ba 'ba' zhig ni be'u snabs la sogs pa dang / ma 'dres par 'khru ba'o/ /rims rnying pa ni yun ring du lon pa'i rims bying bag tu 'dug pa'o/ /khu ba dang rlung dang dri ma 'gags pa ni de dag thogs pa'o/ /rlig rlugs ni de 'phel ches pa'o/ /zla mtshan 'jig pa ni zla mtshan med pa'o/ /rlung gi nad mi bzad pa ni gso bar dka' ba'i rlung nad do/ /bkru drags mi bya snum drags dang / /glo rdol shin tu skem pa dang / /be'u snabs 'khru dang slon bro dang / /sbyang byas sna sman gtong ba dang / /dbugs mi bde lud cham gzhang 'brum/ /skyigs bu lto sbos me drod chung / /gzhang skrangs kha zas zos zin dang / /lto 'gags bu ga chu yod dang / /mdze dang gcin nad sbrang mdog dang / /sbrum ma zla bdun yan chad do/ /zhes bya ba la/ bkru sman drag po gtang du mi rung ba ni snum shin tu drags pa la sogs pa nas sbrum ma dang / zla ba brgyad pa'i mgo zug pa'i bar du'o/ /shin tu skem pa ni ha cang sbeg ches pa'o/ /be'u snabs 'khru ba ni ma zhu ba be'u snabs dang bcas par 'khru ba'o/ /slon bro ba ni skyug pa dag dang ldan pa'o/ / sbyang ba byas pa ni 'khru sman dang skyug sman btang pa'o/ /sna sman btang ba ni sna nas sman gyi sbyor ba byas pa'o/ /gzhang skrangs pa ni bshang ba'i lam skrangs pa dang ldan pa'o/ /kha zas zos zin pa ni zas la longs spyod pa'o/ /de bzhin du lto 'gags pa dang / lto na bu ga yod pa dang / lto na chu mang po yod pa dang / gcin nad sbrang mdog ni sbrang rtsi'i mdog lta bu'i gcin nad kyis nyen pa'o/ /de la snum drags pa la bkru sman drag po mas gtong na/ bsdus shing bsrul ba'i nad slongs pas dmu rdzing chags pa dang / skrangs pa'am/ brgyal bar byed par 'gyur ro/ /glo rdol ba dang shin tu skem pa la ni/ des lus shin tu dkrugs shing slongs bas zug gzer drag po myur du skyed par 'gyur ro/ /slon dang khrus byas pa la ni lus stong pa ste de skems par me ltar bsreg par 'gyur ro/ /sna sman btang ba la ni steng gi rtsa sgo shin tu phye bas gnod pa byed par 'gyur ro/ /rtag tu slon pa la sogs pa ni rlung gis bkru sman drag po gyen du 'dren par 'gyur ro/ /gzhang 'brum yod pa la ni rgyu ma'i lam 'gags pas thur du rgyur mi ster ba'i phyir srog la gnod par 'gyur ro/ /zas zos zin pa'i phyir la ni rang nad 'phel zhing ma zhu ba la sogs pa las 'chi bar 'gyur ro/ /lto sbos pa dang lto 'gags pa la sogs pa ni rlung gis shas cher 'gags pas 'chi bar 'gyur ro/ /sbrum ma'i nyes pa ni sngar bshad pa yin no/ /bkru drag bya nyid 'jam rtsi bya/ /khyad par du ni me drod che/ /rtsub dang rlung nad gcig pus nyen/ /zhes bya ba la/ gang la bkru sman drag po gtang bar bya ba de nyid la/ 'jam rtsi bya ste/ de dag nyid la snum gyi cho ga mas gtong bar bya'o/ /de las kyang khyad par du me drod che zhing khong pa'i drod che ba dang / de bzhin du khong rtsub pa dang / rlung nad gcig pus nyen cing nad gzhan dang ma 'dres pa'i rlung nad kyis gzir zhing gnod pa la 'jam rtsi bya'o/ /'jam rtsi mi bya ba'ang de nyid do/ /de bzhin skya rbab mig ser dang / /tshil che cham btab zas ma zos/ /bshang ba 'khru bar byed pa dang / /lto lci lto nad bad kan can/ /mchil ma mang dang shin tu sbom/ /lto na srin yod rlung 'khyims dang / /dug dag 'thungs dang 'brum bus btab/ /rkang bam lkog ma'i lba ba can/ /zhes bya ba la/ 'jam rtsi mi bya ba'i yul yang / gang sngar bkru sman drag po byar mi rung bar bshad pa de nyid yin no/ /gzhan de bzhin du 'jam rtsi byar mi rung ba ni/ skya rbab dang mig ser la sogs pas btab pa dag la yang byar mi rung ngo / /rlung 'khyims pa ni tshil gyi nang du zhen pa'i rlung ngo / /'brum bu ni 'bras kyi phreng ba'o/ /de gnyis sbu gu gser sogs dang / /shing rus 'od ma las byas pa/ /ba lang mjug 'dra bug rdol med/ /'jam zhing drang la kha zlum pa/ /zhes bya ba la/ bkru sman drag po mas gtong ba dang / 'jam rtsi btang ba de gnyis kyi sbu gu ni 'di ltar bya ste/ gser la sogs pa zhes bya ba gser dang dngul dang zangs dang zha nye dang / ro nye las byas pa'o/ /de bzhin du dbyibs ni ba lang gi mjug ma ltar rim gyis phra ba'o/ /bug rdol med pa ni spel med pa'o/ /'jam pa ni rtsub pa med pa'o/ /drang ba ni ma yo ba'o/ /kha zlum pa ni rtse mo mi rno ba'o/ /lo gcig ma lon par sor lnga/ /lo tshad lo bdun pa yi bar/ /tshad ni sor drug yin par bshad/ / lo bdun pa yi bdun nyid de/ /bcu gnyis pa la sor brgyad bya/ /bcu drug yan chad sor dgu ste/ /nyi shu yan chod sor bcu gnyis/ /lo gzhan dag la na tshod dang / /stobs dang lus tshad brtags nas ni/ /tshad ni mngon par bskyed par bya/ /zhes bya ba la/ byis pa lo gcig ma lon pa la gtong ba'i sbu gu ni srid sor lnga bya'o/ /lo tshang ste lo gcig lon pa'i byis pa nas lo bdun pa'i bar gyi byis pa'i gce'u'i tshad ni sor drug pa bya ba yin par bshad do/ /de nas byis pa lo drug lon pa la gce'u sor drug pa bya'o/ / lo bdun rdzogs pa'i tshe ni sor bdun pa nyid bya'o/ /lo bcu gnyis lon pa la ni gce'u sor brgyad pa bya'o/ /lo bcu drug lon pa nas lo bcu dgu lon pa'i bar la gce'u sor dgu pa bya'o/ /lo nyi shu lon pa phan chad ni gce'u sor bcu gnyis pa bya la/ yang lo gzhan de dag gi tshe na stobs dang lus kyi tshad brtags nas gce'u'i tshad mngon par skyed cing 'phel bar bya'o/ /de yang lo gcig ma lon pa la gce'u'i tshad sor lnga bya bar bshad la/ de rdzogs nas lo bcu drug lon pa'i bar la sor drug bya bar bshad pas/ de'i lo gzhan dag la ni tshod gang yin pa dang / de bzhin du stobs dang lus kyi tshad de brtags te bar skabs der na tshod la sogs pa skye ba bzhin du gce'u yang bskyed par bya'o/ /de bzhin du lo gzhan dag ni na tshod kyi bar gyi lo la yang bsgre bar bya'o/ /rtsa ba rang gi mthe bong mnyam/ /rtse mo mthe'u chung tshad du bya/ /zhes bya ba la/ gce'u'i rtsa ba'i gnas su rang gi mthe bo'i tshad ces pa/ nad pa'i mthe bong dang sbom gyi tshad mnyam par bya'o/ /rtse mo ste gce'u'i kha'i phyogs nad pa'i mthe'u chung dang sbom mnyam par bya'o/ /lo gcig lon sor nas gzung ste/ /de yi phyed phyed kyis bskyed bya/ /gang zhig rtsa ba'i bu ga'i tshad/ /sor mo gsum rtse shong ba mchog /mung+ga ma sha sran ma btsos/ /rgya shug 'bras shong rim bzhin bya/ /zhes bya ba la/ na tshod ji skad bstan pa'i rim pas gce'u'i tshad bstan pa'i rim pa las ma 'chol bar byas/ byis pa lo gcig lon zhing tshang ba'i sor tshad nas bzung ste/ de'i phyed phyed bskyed par bya zhing / ji srid du bu ga sor gsum par gyur pa de srid kyi bar du bskyed par bya ste/ de ni bu ga'i che tshad ste mchog yin pas na/ de las kyang lhag par mi bya ste/ lo gcig ma lon pa la ni rtsa ba'i bu ga sor gcig pas chung bar bya'o/ /rtse mo yang sran mung+ga shong ba bas cung zad chung bar bya/ de'i phyed phyed ces bya ba la/ de yi zhes bya ba ni sor tshad la snyegs la/ des na sor gyi phyed phyed kyis bskyed cing / 'phel bar bya ba ni/ ji srid rtsa ba'i bu gar sor gsum shong bar gyur pa de srid kyi bar du bskyed par bya'o/ /rtse mo'i bu ga ni lo gcig lon pa'i gce'u'i bu ga sran mung+ga ste/ mon sran sde'u shong ba nas rgya shug gi bar du rim bzhin du bskyed par bya'o/ /mchog ces bya ba ni 'dir yang sbyar bar bya ste/ gang rgya shug gi 'bras bu shong ba'i tshad du byas pa'i gce'u'i bu ga ni che tshad yin pas de las lhag par ni mi bya'o/ /de bas na lo gcig lon pa nas lo drug pa'i bar gyi gce'u'i rtse mo'i bu ga'i tshad ni mung+ga shong ba tsam bya'o/ /lo bdun pa nas lo bcu gcig pa'i bar gyi gce'u'i bu ga ni ma sha shong ba'o/ /lo bcu gnyis pa nas bcwo lnga'i bar gyi ni sran ma skam po shong ba'o/ / lo bcu drug pa nas bcu dgu pa'i bar du ni sran ma btsos pa shong ba'o/ /nyi shu lon pa yan chad ni gce'u'i bu ga ni rgya shug gi 'bras bu chung ngu shong ba tsam bya'o/ /rtsa ba'i bu ga'i tshad kyi ni/ /mthar ni bu ga 'gegs par bya/ / zhes bya ba la/ mthar zhes bya ba rtse mor rtsa ba'i bu ga'i tshad ji lta ba las de'i gag pa 'khor lo lta bu gang shing bsgrub par bya'o/ /rtse mor kha bkag ces bya ba ni gce'u de'i rtse mo'i kha ras bal la sogs pa'i sdong bu lta bus kha bkab ste/ rlung la sogs pa nang du zhugs pa dgag pa'i phyir de ltar bya'o/ /gce rtsa rang gi sor gnyis kyis/ /chod par 'gag pa gnyis pa bya/ /zhes bya ba la/ de bzhin du gce'u de'i rtsa ba'i phyogs su rang gi zhes pa nad pa bdag nyid kyi sor gnyis kyis chod par 'gag pa gnyis pa bya ste/ de la rkyal bu gdags shing bcing dgos pa'i phyir ro/ /der ni rkyal bu gdags bya ba/ /ra lug ma he la sogs pa'i/ /lgang pa legs mnyes sra ba dang / /dmar btsos bu ga thag thug med/ /dri nga rtsa ris med srab par/ /sman ni legs par blugs byas la/ /srad bus dam par bcing bar bya/ /zhes bya ba la/ gag pa gnyis kyi bar du lug la sogs pa'i lgang ba'i rkyal bu legs par mnyes pa dang / de bzhin du sra ba ste ma gas pa dang dmar por btsos te tshon gzhan gyi kha dog med pa thag thug med cing mdud pa chags pa med cing rul ba la sogs pa'i dri nga ba med pa rtsa'i ri mo med pas srab ste mthug pa ma yin pa/ de lta bur sman bde bar blugs shing gzhag la/ srad bu sra bas legs par dam du bcing bar bya'o/ /lgang med rkyal pa'i dpung pa'am/ /byin pa'i lpags sam ras stug bzang / /zhes bya ba la/ gong du smos pa lta bu'i lgang pa med na rkyal pa'i dpung pa bcad pa'am/ byin pa'i pags pa legs par mnyes pa de la bcing zhing gdags par bya'o/ /yang na ras stug cing bzang la bu ga med pa spra tshil la sogs pas bskus la/ chu thub pa las sman blugs pa'i snod bya'o/ /ni ru ha tshad dang po ni/ /lo gcig pa la srang gcig mchog /ji srid srang ni bcu gnyis bar/ /lo re srang res bskyed par bya/ /bcu gnyis pa nas bcwa brgyad bar/ /de yang bdun cu'i bar tshad 'di/ /de phan srang tshad nyi shu nyid/ /ces bya ba la/ ni ru ha ste bkru sman drag po mas gtod ba'i tshad ni lo gcig lon pa la srang gcig mchog ste/ che tshad yin no/ /lo gcig ma lon pa srang gcig tu cung zad ma longs pa tshad yin no/ /de phan chad lo re re zhing srang re res bskyed de/ lo bcu gnyis pa'i bar la srang bcu gnyis gtang ba'i bar du bskyed par bya'o/ /ni ru ha srang bcu gnyis byas pa de phan chad kyi lo re bzhin srang gnyis bskyed par bya'o/ /lo bcu gnyis lon pa nas/ bcu bdun lon pa'i bar la bya'o/ /bcwa brgyad pa ni srang nyi shu rtsa bzhi che tshad yin te/ de yang ni ru ha tshad 'di ni lo bcu bdun lon pa'i bar gyi tshad yin no/ /lo bdun cu lon pa phan chad kyi ni srang nyi shu nyid che tshad yin no/ /zhes bya ba ni 'dir nges par bzung ba'i don no/ /che tshad srang nyi shu kho na yin gyi de las lhag pa mi bya'o/ /zhes bya ba'i don no/ /bkru sman drag tshad ji lta ba/ / de yi bzhi cha 'jam rtsi'i tshad/ /ces bya ba la/ bkru sman drag po ni ru ha'i tshad ni tshod gang dang gang las ji ltar yin pa de dang de'i bzhi cha 'jam rtsi zhes bya ba/ snum gyi cho ga mas gtong ba'i tshad yin no/ /de yang lo dang po la ni ru ha'i tshad srang gcig yin la/ tshad de'i bzhi cha zho gnyis la ni 'jam rtsi lo gcig pa la gtang ba'i tshad yin no/ /de bzhin du bcu gnyis pa la srang bcu gnyis ni ru ha'i tshad yin pa las/ de'i bzhi cha srang gsum 'jam rtsi'i tshad do/ /de bzhin du lo bcwa brgyad lon pa'i tshad nyi shu rtsa bzhi yin la/ de'i bzhi cha ni srang drug ste/ de bzhin du thams cad la yang sbyar bar bya'o/ /bkru sman drag bya snum dugs bya/ /sbyang byas nas kyang stobs thob pa/ /'jam rtsi gtang bar 'os pa nas/ /thog ma nyid du 'jam rtsi gtang / /zhes bya ba la/ ni ru ha zhes bya ba bkru sman drag po gtang bar bya zhing 'os pa ste/ snum dang dugs bya ba ste/ dang po snum gyi cho ga byas la/ de'i 'og tu dugs bya'o/ /de bzhin du sbyang bar bya ba ste/ bkru sman dang / skyug sman byas nas kyang slar stobs thob cing / nyams stobs brtags pa dag 'jam rtsi gtang bar 'os shing rigs par shes nas/ dang po thog ma kho nar bkru sman drag po mas gtong ba'i 'jam rtsi gtang bar bya'o/ /dgun dpyid nyin par btang de las/ /gzhan du mtshan btang la la 'dod/ /ces bya ba la/ dgun zhes bya ba grang ba'i dus spyir grang ba ste/ dgun stod dang dgun smad kyi dus su 'jam rtsi nyin par gtang bar bya'o/ /de las gzhan du zhes pa gong ma las gzhan pa'i dus so ga dang / dbyar dang ston ka mtshan mo'i dus su 'jam rtsi gtang bar bya'o/ /zhes srog 'tsho ba'i slob dpon la la 'dod do/ /sku byug khrus byas sngon thang las/ /bzhi gsum phan zhing yang ba dang / /snum dang rtsub ches ma yin bza'/ /khu ba la sogs zos rjes btung / / bcags la bshang gci bsal nas ni/ /mal du bde bar gnas byas la/ /mtho dman med par mgo smad de/ /glo g.yon gyis ni phab nas su/ /rkang pa g.yas pa bkug nas ni/ /rkang pa g.yon pa brkyang bar bya/ /zhes bya ba la/ dang po bsku byug byas la/ de'i 'og tu khrus bya ba yin pas na/ nad pa de bsku byug dang khrus bya'o/ /de nas sngon bsten zhing goms pa'i tha ma la bzhi cha gsum ste/ nar mar bza' ba'i thang las bzhi cha phri la/ bza' ba ni yang ba dang / ha cang rtsub ches pa dang / snum ches pa ma yin pa/ snum rtsub ran pa phan zhing gnod pa med pa'i zas bza' bar bya'o/ /de'i 'og tu 'tshal nan btung ba ni mung+ga'i khu ba la sogs pa gnod pa med cing rjes su mthun pa btung bar bya'o/ /de bzhin du bcags pa ste/ cung zad cig phan tshun bcags pa dang / bshang ba dang / gci ba legs par bsil zhing dor ba dang / de bzhin du rlung med pa'i khang pa'i nang du mal bde ba shin tu mtho ba dang / shin tu dma' ba ma yin pa mgo smad pa ste/ rkang pa'i phyogs cung mtho bar glo g.yon pa legs par phab la/ rkang pa g.yas pa bkug nas rkang pa g.yon pa legs par brkyang ba'i tshul de ltar gnas par byas la/ de nas de la gce'u gzhag par bya'o/ /de yang ji lta zhe na/ de nas de la gce'u kha dang / /gzhang sgo snum gyis bskus nas ni/ /gce'u lgang pa'i dbugs bton la/ /kha bcings lag pa mi 'dar bar/ /rgyab kyi phyogs su 'dug nas ni/ /shin tu myur dang dal min dang / /ha cang shugs drag dal min par/ /ran par lan cig kho nar btsir/ / rlung ni lhag par gnas pa na/ /lhag ma cung zad lus par bya/ /zhes bya ba la/ de nas de'i 'og tu skyes bu de la gce'u gzhug pa'i thabs ni/ gce'u kha ste rtse mo snum gyis bsku ba dang / gzhang zhes bya ba bshang ba'i lam yang snum gyis bskus te/ dbugs bton zhes pa lgang pa'i nang gi dbugs bton la/ gce'u'i kha bcings shing bsdams nas/ lag pa mi 'dar zhing brdabs bag tu ma gyur pas rgyab kyi phyogs nas de la mngon par phyogs par 'dug ste gtang bar bya'o/ /de'i 'og tu shin tu myur ba dang / shin tu bul ba dang / dam pa ma yin pa dang / ha cang shugs drag pa dang / ha cang dal bar ma yin par lan cig kho nar btsir bar bya'o/ /yang nas yang du ni ma yin no/ /de yang lgang pa de'i zhabs na sman gyi lhag ma cung zad lus par bya'i/ rnam pa thams cad nas thams cad du btsir bar mi bya'o/ /de ci'i phyir zhe na/ sman gyi lhag mar rlung yod pa'i phyir ro/ /de yang / lgang pa de'i zhabs sman gyi lhag /ma lus par ni blugs pa yis/ /rlung zhugs nas ni rnam 'khrugs pas/ /gzer dang nad rnams skyed par 'gyur/ /zhes bshad pa yin no/ /btang nas lus ni gan rkyal gzhag /rkub tsos lag pas brdab par bya/ /rting pas mjug tsos brdung bya zhing / /rting pa bteg la lan gsum gsig / ces bya ba la/ 'jam rtsi btang nas de'i lus gan rkyal du bzhag la/ 'jam rtsi btang ba de'i rkub tsos lag pas brdab par bya zhing bsnun par bya'o/ /de bzhin du nad pa'i rting pa gnyis kyis mjug tsos brdung zhing brdeg par bya'o/ /de bzhin du mal nas rting pa yar bteg ste/ lan gsum gyi bar du gsig cing gyen du drang bar bya'o/ /de nas lus ni brkyang nas ni/ /sngas dang bcas pa'i rting par ni/ /khu tshur gyis brdungs lus kyang ni/ /snum gyis bskus la mnye bar bya/ /tshor bas nyen pas snum dag ni/ /myur du phyir 'byung mi byed do/ /gal te myur du phyir byung na/ /phan mi byed pas gzhan dag gtang / /zhes bya ba la/ de nas de'i 'og tu nad pa'i lus brkyang bar 'gyur ba dang / de bzhin du sngas bcug pa la rting par khu tshur gyis brdungs la/ yan lag snum gyis byugs nas mnye bar bya ste/ gang gi phyir tshor ba mi bde bas nyen pas mas gtong ba'i snum ste/ myur ba kho nar phyir 'byung zhing 'dzag par mi byed do/ /gal te myur du phyir 'byung zhing ldog par gyur na/ 'jam rtsi gnyis pa sbyar zhing gtang bar bya ste/ gang gi phyir snum nang du chags na/ nad pa'i rlung la sogs pa'i nad sel ba'i bya ba byed par 'gyur bas/ de myur du byung na bya ba de mi byed pa'i phyir/ gzhan dag gis bsnan dgos so/ /me drod che zhing snum byung na/ /dgongs ka kha zas yang ba sbyin/ /zhes bya ba la/ me drod shin tu che zhing snum phyir byung bar gyur na/ dgongs ka ste nyin par gyi mthar kha zas yang mo dag sbyin par bya'o/ /dbyung ba'i dus kyi dam pa ni/ /thun gsum yin te de phan chad/ /nyin mtshan gcig ni bsdad nas su/ /de yi 'og tu reng bu yis/ /snum dbyung phyir ni 'bad bya ba/ /mas gtong ba ni rnon po bya/ /zhes bya ba la/ 'jam rtsi dbyung ba'i dus kyi dam pa'am/ mchog ni thun gsum yin te/ de phan chad ces bya ba'i 'og tu nyin mtshan gcig 'das kyi bar du byung bar ma gyur na/ nyin mtshan gcig gi bar du bsdad nas/ de'i 'og tu reng bu sbyar bas 'jam rtsi snum dbyung bar bya ba'i phyir/ sman pas 'bad par bya ba'am/ mas gtong ba'i sman rnon po bya ba la 'bad par bya'o/ /shin tu rtsub pas ma byung zhing / /snyom bag la sogs nad med na/ /btang snyoms su ni gzhag par bya/ /zhes bya ba la/ shin tu lus kyi khong rtsub pa'i phyir/ snum ma byung zhing slar 'dzag par ma gyur la/ gal te snyom bag gam/ rmongs bag la sogs pa'i nad kyi nyes pa yang med na btang snyoms su gzhag par bya'o/ /de byung ba la 'bad par mi bya'o/ /de nas mtshan 'das nang par ni/ /bca' sga 'u su bskol chu 'am/ /yang na chu tshan 'ba' zhig btung / /zhes bya ba la/ de nas de'i 'og tu mtshan mo bde bar gnas pas 'das par byas la/ nang par gyi dus su bca' sga dang 'u su bskol ba'i chu tshan dro 'jam tsam btang ba'am/ yang na chu bskol ba tshan te 'ba' zhig btung bar bya ste/ de'i snum gyi lhag ma zhu ba dang / rlung dang / bad kan zhu ba'i phyed bya ba yin no/ /'jam rtsi btang nas nyin gsum mam/ /nyin lnga lon nas slar btang ba'am/ /ji srid snum ni 'ju 'gyur ba'am/ /yang na rlung ni shas che dang / /rtag tu rtsol byed me drod che/ /khong rtsub pa la nyin re btang / /zhes bya ba la/ de ltar 'jam rtsi btang nas mi de nyi ma gsum mam/ nyi ma lnga nas slar yang 'jam rtsi gtang bar bya'o/ /yang na dus ji srid cig gis snum de bde bar 'ju bar 'gyur ba de'i tshad kyis btang ngo / /yang nyin re yang btang du rung ste/ de nyid kyis na rlung shas che ba la sogs pa yin te/ rlung gi shas che zhing rlung nad bdo ba dang / de bzhin du rtag tu rtsol ba byed pa ste/ rgyun mi 'chad par las su bya ba'i rtsol ba drag pa byed pa dang / de bzhin du me drod che ba dang / skyes bu khong shin tu rtsub pa la nyin re ste zhag re rgyun mi 'chad par gtang bar bya'o/ /de ltar snum ni gsum mam bzhis/ /snum gyur rtsa sgo sbyang ba'i phyir/ /mas gtong khrus kyis sbyang ba dang / /snum med lus ni snum gyur gtang / /zhes bya ba la/ de ltar rim pa 'dis nad la sogs tshul la dpags te/ 'jam rtsi'i snum gsum mam bzhis skyes bu'i lus kyi snum gyur nas rtsa sgo sbyang ba'i phyir zhes pa rtsa snum gyi rgyu ba rnam par dag par bya ba'i phyir/ ni ru ha ste bkru sman drag po dang / sbyang zhing zhi bar bya ba dang / rlung shas che bas lus snum med par gyur pa'i lus la snum par bya zhing khong brta bar bya ba'i phyir snum gyi cho ga gtang bar bya'o/ /nyi ma gsum mam nyin lnga na/ / tshes grangs bzang zhing dge ba la/ /nyin phyed cung zad yol ba'i tshe/ /gtor ma bkra shis cho ga bya/ /snum bsku dugs bya bshang gci ni/ /bsal zhing shin tu bkres min la/ /skyes bu'i nad dmigs sman la sogs/ /'bad de shes par byas nas ni/ /sman pas de la mkhas pa ni/ /mang dang lhan cig mas gtong sbyar/ /zhes bya ba la/ de nas 'jam rtsi mas gtong ba'i nyi ma gsum mam nyi ma lnga na bya ba bsgrub cing bsngags pa'i tshes grangs dang / byed pa dang / thang cig dang / rgyu skar bzang po dang / nyin dge ba la nyi ma'i phyed cung zad yol zhing 'das pa'i tshe gtor ma dang bkra shis kyi cho ga dag ji lta ba bzhin du byas shing shis pa brjod pa dang / bde legs la sogs pa dge sbyong dang bram zes byas nas/ sman bkru sman drag po mas gtong zhing brtsam par bya ste/ de yang de la mkhas shing mas gtong ba'i cho ga'i sbyor ba la mkhas pa'i sman pa mang po dang lhan cig gros bya ba dang / skyes bu nad pa'i nad kyi dmigs la sogs pa yang shes par byas la/ lus snum gyis bsku bar bya ba dang / de bzhin du dugs bya ba dang / bshang ba dang gci ba bsal zhing dor ba dang / shin tu bkres pas ma yin zhing ltogs pas nyen pa ma yin pa dang / de bzhin du nad dmigs dang sman la sogs pa 'bad cing btsal bas shes shing rtogs par byas nas sman pas mas gtong ba'i cho ga la sbyar zhing brtag par bya'o/ /sman gyi srang ni nyi shu dang / /po son cha brgyad lhan cig bskol/ /zhes bya ba la/ rtsa ba bcu pa la sogs pa'i sman srang nyi shu 'og nas mas gtong ba'i cho ga'i skabs nas smos pa bskol ba dang / de bzhin du po son cha'i 'bras bu brgyad lhan cig bskol bar bya ste/ po son cha brgyad la ni srang gcig tsam yod do/ /de ltar na sman srang nyi shu rtsa gcig dang / sman gyi bcu drug 'gyur gyi chu dang sbyangs la de legs par bskol bar bya'o/ /de nas cha lugs dang bskol ba'i sman chu de/ brgyad cu rtsa bzhi 'byung bar 'gyur ro/ /bskol ba de yi bzhi cha yi/ /sman mar rlung la rjes su sbyar/ /mkhris pa bde bar gnas drug cha/ /bad kan shas cher brgyad cha gcig / ces bya ba la/ de ltar bskol ba de las snum gyi mar bzhi cha gcig rlung gi nad la rjes su sbyar zhing gtang bar bya'o/ /mkhris pa'i nad la ni bskol ba de las snga ma'i tshad las drug cha ste/ srang bcu bzhi gtang bar bya'o/ /de bzhin du bde bar gnas shing tha mal par 'dug pa la yang drug cha nyid gtang bar bya'o/ /bad kan shas che zhing rgyas pa'i nad la ni de'i brgyad cha ste/ srang bcu gtang bar bya'o/ /yang na kun la sman gyi ni/ /brgyad cha gcig gam/ zhes bya ba la/ sbyar bar bya'o zhes bya ba 'dir yang sbyar bar bya ste/ kun la zhes bya ba rlung dang mkhris pa dang / de bzhin du bad kan te bde bar gnas pa la sman gyi brgyad cha gcig ste/ bskol ba'i gang brgyad cha gcig tu gyur pa srang bcu thams cad la sbyin par bya'o/ /ci nas kyang / /mas gtong ska slar mi 'gyur bya/ /zhes bya ba la/ yang na thams cad du sman bskol ba'i brgyad cha gcig sbyin pa yin no/ /gzhan du sman gyi phye ma'am/ lde gu'i cha las mas gtong ba'i sman shin tu ska zhing 'byar ba yang ma yin la/ shin tu sla zhing 'dzag ches par yang mi 'gyur ba de ltar sbyar bar bya'o/ /bu ram dag ni srang gcig dang / /zhes bya ba la/ rlung dang mkhris pa dang / bad kan dang / bde bar gnas pa'i mas gtong ba thams cad la/ bu ram srang gcig gzhug par bya ste smos pa ni/ de las yid ches pa'am/ chung ba yang rung ba'i don no/ /rigs pas sbrang rtsi rgyam tsha sogs/ /lhag ma/ zhes bya ba la/ rjes sbyar ba dang kun la zhes bya ba la 'dir yang sbyar bar bya ste/ de la rigs pa ni sbyor ba ste/ bya ba'i thabs yin no/ /de lta bu'i rigs pa dang ldan pas sbrang rtsi dang rgyam tsha'am/ lce myang tsha la sogs pa lhag ma gang yin pa bkru sman drag pa'i yan lag tu gyur pa tshad ma bstan pa de thams cad la sbyar zhing gtang bar bya'o/ /sogs pa'i sgras ni sbrang rtsi dang rgyam tsha las gzhan pa zho ga chu dang / rang skyur gyi rtsab mo dang / 'o ma dang / ba gcin la sogs pa bkru sman drag po mas gtong ba'i sde tshan du gtogs pa gzhan dag kyang bsdu'o/ /de kun snod gcig blugs/ bum par chu bskol rlangs pa yis/ /bsro zhing gzar bus dkrugs nas ni/ /rkyal bu'i nang blugs mjug mar ni/ /gtong tshe shin tu tsha grang min/ /shin tu snum min rtsub pa min/ /shin tu rno min 'jam pa min/ /shin tu ska min sla ba'ang min/ /shin tu mang nyung tshad med pa'am/ /tsha che skyur ba'ang de dang 'dra/ / zhes bya ba la/ gong du smos pa de thams cad ma lus pa snod gcig tu blugs la/ bum par bskol ba'i rlangs pas bsro zhing tsha bar bya ba dang / de bzhin du gzar bu'am skyabs kun dkrugs shing bskyos par lug dang / ma he la sogs pa'i lgang pa las byas pa'i rkyal bu'i nang du blugs la sman de mas gtong ba'i don du mjug ma nas gtong zhing 'jud par byed pa'i tshe/ shin tu tsha ba ma yin pa dang / shin tu grang pa ma yin pa dang / de bzhin du shin tu rtsub pa ma yin pa dang / de bzhin du ba gcin dang / yungs kar la sogs pa shas che ba shin tu rno ba ma yin pa dang / 'o ma mang po gtong bas shin tu 'jam pa ma yin pa dang / de bzhin du shin tu ska ba ma yin pa dang / shin tu sla ba ma yin pa dang / shin tu mang ba ma yin pa dang / tshad las shin tu nyung ba ma yin pa dang / de bzhin du shin tu tsha med pa'am/ che bar yang mi bya ba dang / de bzhin du kan dzi rang skyur la sogs pa skyur ba med pa'am/ de shas che ba'am/ de dang 'dra ste/ mi bya'o zhes bya ba'i don no/ /de la mkhas pa gzhan smras pa/ /snum dang sbrang rtsi gnyis so sor/ /srang ni gsum gsum byas nas ni/ /rgyam tsha dag ni zho gnyis dang / /nad med la btang sman srang gnyis/ /khu ba'i sman ni lhag ma kun/ /srang bcu yongs su sbyar bar bya/ /zhes bya ba la/ mas gtong ba'i cho ga la mkhas pa'i sman pa gzhan dag gis ni/ mas gtong ba'i cho ga gzhan dag 'chad cing ston te/ til mar la sogs pa'i snum dang / de bzhin du sbrang rtsi dag ni tshad srang gsum gsum du so sor bya ba ste/ snum srang gsum dang de bzhin du sbrang rtsi srang gsum dang / de bzhin du rgyam tsha zho gnyis sbyar ba 'di ni nad med pa ste/ bde bar gnas pa la gtang ba yin no/ /zhes smras so/ /de bzhin du sman srang gnyis dang / ku ba bskol ba'i sman lhag ma srang bcur yongs su sbyar bar bya'o/ /de ltar na spyir srang bcwa brgyad mas gtong ba'i tshad yin par 'dod do/ /sbrang rtsi rgyam tsha snum rnams dang / /sman phye khu ba'i rim pa ni/ /mas gtong rkyal par bcug byas te/ /'di ni sbyor ba'i cho gar bshad/ /ces bya ba la sogs pa'i sman gyi khu ba rim gyis bcos shing sbyang ste/ dang po sbrang rtsi sbyar zhing gzhug par bya'o/ /de nas ni rgyam tsha'o/ /de nas ni snum mo/ /de nas ni sman gyi phye ma'o/ /de nas ni sman gyi khu ba gzhug par bya ste/ gang gi phyir sman drag po mas gtong ba'i sbyor ba 'di ni sbyor ba'i cho ga gcig tu bsres pa yin no zhes drang srong dag gis bshad do/ /gan rkyal bzhag nas btang ma thag /sngas kyis brten te mas gtong la/ /yid ni gzhan du ma yengs pas/ /zhes bya ba la/ gan rkyal du bzhag nas sngas kyis brten te/ bkru sman drag po mas gtong ma thag 'das pa'i dus gzhan gang du yang ma yengs pas mas gtong ba drag po'i nus pa lus la khyab pa'i phyir/ ni ru ha de la ma yengs par bya ste/ gang 'di nga la bkru sman drag po mas gtong ba ji tsam na slar 'byung bar 'gyur zhig gu zhes bsam par bya'o/ /'khru ba tsog bus gtang bar bya/ /zhes bya ba la/ de'i rjes thogs la 'khru ba 'byung bar 'gyur zhing bkru sman drag pos phyir 'byung bar nye bar phyogs par gyur na/ tsog bus 'dug la/ khu drag po'i shugs btang zhing dor bar bya'o/ /'ong dus dam pa yud tsam ste/ /de las gzhan du 'chi byed yin/ /zhes bya ba la/ bkru sman drag po mas gtong ba de phyir 'ong zhing 'byung ba'i dus kyi dam pa'am mchog ni yud tsam ste/ chu tshod gnyis kyi nang yin pa las/ de las gzhan zhing 'das pa'i dus su sdod par byed na/ ni ru has 'chi bar 'gyur bar byed pa yin no/ /de la bcos pa'i thabs gyur snum/ /thal sman pa gcin khu skyur sbyar/ /myur bas snum rno dro ba yi/ /mas gtong gzhan dag gtang bar bya/ /yang na sman gyi reng bu dang / /btang zhing dugs la sogs pa bya/ /zhes bya ba la/ bkru sman drag po mas gtong ba de phyir 'ong bar gyur ba la bcos shing gso ba'i thabs ni myur zhing rings par mas gtong ba snga ma las gzhan pa snum pa dang rno ba dang / dro ba'i mtshan nyid can dang / de bzhin du thur du 'byin par byed pa'i snum dang / thal sman rnon po dang / ba gcin la sogs pa dang sbyar ba dag kyang gtang bar bya'o/ /yang na de myur du 'khru ba'i phyir sman gyi reng bu myur du gzhug par bya'o/ /de la sman gyi reng bu ni po son cha'i 'bras bu las byas pa'o/ /de bzhin du sngangs shing skrag par bya ba dang / dugs la sogs pa'i rnam pa yang myur du dbyung bar bya ba'i phyir ro/ /rang nyid 'ong bar gyur na ni/ /mas gtong gnyis pa btang ba'am/ /lan gsum lan bzhi'i bar du ste/ /ji srid legs par gyur par gtang / /zhes bya ba la/ de rang nyid 'ong zhing mas gtong ba gcig 'ong bar gyur na/ mas gtong ba gnyis pa dang / de bzhin du lan gsum pa'am/ lan bzhi pa'i bar du yang gtang bar bya'o/ /yang ji srid legs par 'khru bar 'gyur ba'i bar du gtang ste/ grangs nges par chad pa med de/ mas gtong ba de dag tsam du ma zad kyi/ bkru sman drag po legs par 'byung ba'i mtshan nyid bskyed par bya ba'i phyir mang po yang gtang bar bya ba yin no/ /de yi sbyor legs bkru sman dang / /'dra bar shes bya/ zhes bya ba la/ bkru sman drag po mas gtong ba de'i rjes la bkru sman gyi sbyor ba legs pa dang / sbyor ba nyes pa la sogs pa'i mtshan nyid ji lta ba bzhin du bkru sman drag po mas gtong ba'i sbyor ba 'di la yang de dang 'dra bar shes par bya'o/ /sbyor ba nyes pa las snying dang lto ba ma dag pa dang / yi ga 'chus pa la sogs pa yin la/ sbyor ba legs pa las ji skad bshad pa'i skyon med pa'o/ /sbyor ba drags pa ni bad kan dang / mkhris pa dang bshang gci skyed pa la sogs pa'i mtshan nyid can no/ /sbyor legs na/ /chu dron 'jam pos bkrus nas ni/ /sha khu 'bras chan cung zad sbyin/ /zhes bya ba la/ yang dag pa'i sbyor ba'am/ sbyor ba legs par gyur na/ skyes bu de cung zad dro bas bkrus la skam sa'i sha'i khu ba dang 'bras chan nyung zad cig sbyin par bya'o/ /mas gtong drag po'i nad rnams kyi/ /dri ma bskyod bar byung gyur pa/ /de ni chu dron gyis bkru dang / /kha zas tshul bzhin zos pas 'byang / /zhes bya ba la/ skyes bu bkru sman drag po mas gtong ba'i nad rnams kyi dri mas bskyod cing 'byung bar bya'o/ /nad de chu dron po 'jam pos bkru ba dang / de bzhin du kha zas tshul bzhin du zos pas byang zhing dag par 'gyur ro/ /gal te rlung gis nyam thag na/ /slar yang 'phral du 'jam rtsi gtang / /zhes bya ba la/ gal te rlung gi nad kyis nyam thag cing gnod par gyur na/ slar yang 'phral du dus de'i tshe nyid 'jam rtsi gtang bar bya ste/ snum gyi ji lta bu bzhin du gso zhing bcos pa nyid du bya'o/ /de ni legs dang ma legs dang / /drags pa snum 'thungs 'drar shes bya/ /zhes bya ba la/ 'jam rtsi'i sbyor ba legs pa dang / ma legs pa dang / drags pa rnam pa gsum/ snum 'thungs pa dang tshul 'dra bar 'gyur te/ de yang 'di ltar/ rlung ni bde rgyu me drod 'bar/ /bshang ba snum zhing mi sril/ /snum mi 'dod cing snyoms gyur pa/ /snum legs yin te rtsub mo bzlog /snum drags pa yis skya rbab dang / /sna dang kha rkub las 'dzag 'gyur/ /zhes bya ba la/ 'di dag gi sbyor ba legs pa dang / ma legs pa dang / drags par gyur pa yin no/ /gang zhig dus ni cung zad gnas/ /bshang dang bcas par 'byung 'gyur zhing / /thur du dbugs dang snum lhan cig /'byung 'gyur 'jam rtsi legs pa yin/ /zhes bya ba la/ snum gang zhig dus cung zad cig gnas nas bshang ba dang bcas par lhan cig 'byung bar 'gyur zhing de bzhin du dbugs kyi rgyu ba legs par 'byung bar 'gyur na/ 'jam rtsi'i sbyor ba legs pa yin no/ /bad kan la ni mas gtong ba'i/ /'jam rtsi gcig gam gsum gtang bya/ /mkhris pa la ni lnga 'am bdun/ /rlung la dgu 'am bcu gcig gtang / /zhes bya ba la/ bad kan gyi nad la ni mas gtong ba'i snum gyi 'jam rtsi gcig gam gsum zhig gtang bar bya'o/ /mkhris ba'i nad la ni 'jam rtsi lnga'am bdun gtang bar bya'o/ /rlung las gyur pa'i nad la ni dgu'am bcu gcig gtang bar bya'o/ /slar yang de las zung min pa/ /mas gtong rjes la bya ba yin/ /zhes bya ba la/ bad kan shas che ba'i nad la gcig gam gsum btang bas sbyor ba legs pa'i mtshan nyid ma byung na yang mas gtong ba de'i rjes la bya la/ de yang zung ma them par bya ste/ gcig dang gsum dang lnga dang bdun dang dgu dang / bcu gcig la sogs pa ni zung ma yin no/ /gnyis dang bzhi dang drug dang brgyad la sogs pa ni zung ste/ zung ma yin pa zhes bya ba la sogs la sbyar bar bya'o/ /de ltar 'jam rtsi btang ba'i rjes la sbyor ba legs par gyur na yang mas gtong ba'i cho ga bya'o/ / bad mkhris rlung la rim bzhin zas/ /yu sha 'o ma sha khu gtang / /zhes bya ba la/ bad kan gyi nad dang ldan pa la ni/ de'i zas yu sha ste sran mung+ga'i khu ba la sogs pa g.yos byas pa dang lhan cig gtang bar bya'o/ /mkhris pa'i nad yod pa la ni zas 'o ma dang lhan cig gtang bar bya'o/ / rlung gi nad yod pa la ni zas sha khu dang lhan cig gtang bar bya'o/ /rlung 'joms sman ni legs bskol ba/ /dur byid rgyam tshar bcas par bya/ /snum mngar skyur sha khu dron sbyar/ /mas gtong gcig ni rlung la phan/ /zhes bya ba la/ rlung nad la ni mas gtong gcig tu bshad/ de yang rlung 'joms pa'i sman ni bi da ri la sogs pa legs par bskol ba las byas pa dur byid dang / rgyam tsha gnyis kyi lde gu dang bcas shing sbyar ba dang / de bzhin du til mar la sogs pa'i snum dang ldan pa dang / de bzhin du sman mngar ba dang skyur ba dang ldan pa dang / de bzhin du sha khu dron po dang sbyar ba'i mas gtong bas rlung sel bar byed pa yin no/ /n+ya gro d+ha sogs sde tshan bskol/ /shug sogs kha ra dkar dang bcas/ /mngar bsil bu ram shing khu mar/ /'o ma sbrang rtsir bcas mkhris sel/ /zhes bya ba la/ mkhris pa'i nad la ni mas gtong ba gnyis te/ n+ya gro d+ha la sogs pa'i sde tshan bskol ba dang / shug pa la sogs pa'i sde tshan khar dkar po'i lde gu dang bcas pa la de bzhin du mngar ba dang bsil ba dang / bu ram shing gi khu ba dang mar dang / 'o ma dang sbrang rtsi dang bcas pa gnyis kyis mkhris pa sel bar byed pa yin no/ /dong ga la sogs bskol ba dang / /dug mo nyung sogs bcas pa gsum/ /rtsub dang sbrang rtsi ba gcin bcas/ /rno zhing dro kha bad kan sel/ /zhes bya ba la/ bad kan gyi skabs su mas gtong ba gsum yod de/ dong ga bskol ba'i dug mo yungs la sogs pa'i lde gu dang bcas pa gsum la/ de bzhin du rtsub pa dang sbrang rtsi dang ba gcin dang bcas pa rno ba dang / kha ba'i sman rnams so/ /gsum po 'dus pa'i nad la yang / /gang phyir rim bzhin sel ba yin/ /zhes bya ba la/ 'dus pa'i nad la ni mas gtong ba gsum nyid du bshad de/ sngar bshad pa'i rlung dang mkhris pa dang bad kan sel ba'i gsum po nyid yin par bstan no/ /de yang gang gi phyir mas gtong ba rnams kyis rlung dang mkhris pa dang bad kan rim bzhin du sel zhing 'joms te/ de la mas gtong ba gcig btang bas ni rlung sel te/ gnyis pas ni mkhris pa'o/ /gsum pas ni bad kan no/ / gsum po de las gzhan pa yi/ /mas gtong gso zhes gzhan mi 'dod/ /gang phyir slar yang sbyin bya yi/ /nyes pa bzhi po yod ma yin/ /zhes bya ba la/ mas gtong ba gsum po de dag las gzhan pa'i mas gtong ba bzhi par ni gso ba shes shing sman dpyad kyi lung la mkhas pa'i srog 'tsho ba'i slob dpon gzhan dag mi 'dod cing khas len par mi byed de/ gang gi phyir sngar bshad pa'i nad dmigs gsum la mas gtong ba grangs ji lta ba bzhin yin pa'am/ slar yang gang zhig gso bar bya ba'i sbyin pa'i nyes pa'am/ nad bzhi pa yod pa ma yin pa'i phyir ro/ /nad bskyod dag par byed pa dang / /zhi bar bya ba'i rim pa yis/ /mas gtong gsum po nyid brtag ces/ /de skad gzhan dag smra ba yin/ /zhes bya ba la/ sman pa gzhan dag ni mas gtong ba gsum po nyid du brtag par bya'o/ /zhes de skad smra ba yin te/ mas gtong ba gcig ni nad rnams bskyod pa la brtag cing sbyar bar bya'o/ /gnyis pa ni nad rnams dag par byed pa yin no/ /gsum pa ni nad rnams zhi bar byed pa yin no/ /de ltar nad bskyod cing bsdu ba dang / nad sbyong zhing dag par byed pa dang / nad rnams zhi bar byed pas na zhi ba ste/ de ltar gsum yin no zhes zer ro/ /nad dang sman sogs stobs las ni/ /'di dag thams cad tshad mas gzhal/ /zhes bya ba la/ slob dpon la la ni gzhung tshad ma can yin la/ la la'i gzhung tshad ma med pa ni ma yin te/ gzhan du na thams cad tshad mas gzhal ba yin no/ /ji lta zhe na/ nad dang nad sman sogs las ni/ /zhes bya ba ste/ nad kyi stobs la sman gyi stobs las dpags pa yin te/ sogs pa'i sgras ni yul dang dus dang lus kyi stobs dang lus tshad dang kha zas dang goms pa dang snying stobs dang / rang bzhin gyi stobs kyi nus pa las dpags pa yin te/ gzhung 'di ni kun la kha bskang dgos pa'i lhag ma yin par shes par bya'o/ /gang gso ba shes pa'i slob dpon mas gtong ba gzhan du 'dod pa de thams cad kyi gzhung yang 'di nyid yin gyi gzhan ni ma yin no/ /bkru sman drag btang legs mtshan ma/ /ma mthong bar du 'phro mi bcad/ /ces bya ba la/ ji srid bkru sman drag po btang ba'i mtshan ma legs par ma mthong zhing / ma byung ba de srid kyi bar du ni ru ha btang ba'i 'phro bcad par mi bya ste/ de na ji srid mtshan ma legs par mthong bar gyur pa de srid kyi bar du bkru sman drag po gtang bar bya'o/ /zhes ston pa yin no/ /'di dag ni nye bar mtshon pa tsam ste/ 'jam rtsi gtong ba'i tshe na yang ji srid 'jam rtsi legs par gyur pa'i mtshan ma ma byung ba de srid kyi bar du mas gtong ba 'phro mi bcad kyi/ de byung gi bar du 'jam rtsi gtang bar bya'o/ /gang nye bar mtshon pa tsam du gzhan pa 'di 'jam rtsi la yang bya ba'i phyir/ gzhung rtsom par byed pas 'dir yan lag brgyad pa bsdus pa las 'di skad smras pa yin te/ dang por snum gcig tha mar lnga/ /bkru sman drag po bcu gnyis te/ /'jam rtsir bcas pa mas gtong ba'i/ /las ni sum cur bshad pa yin/ /zhes bya ba la/ bkru sman drag po mas gtong ba gnyis pa dang bzhi pa dang drug pa dang / brgyad pa dang / bcu pa dang bcu gnyis pa dang / bcu bzhi pa dang / bcu drug pa dang / bcwa brgyad pa dang / nyi shu pa dang / nyi shu rtsa gnyis pa dang / nyi shu rtsa bzhi bzhes bya ba dang / de bzhin du bkru sman drag po mas gtong ba bcu gnyis te/ gsum pa dang / lnga pa dang / bdun pa dang / dgu pa dang / bcu gcig pa dang / bcu gsum pa dang / bco lnga pa dang / bcu bdun pa dang / bcu dgu pa dang / nyi shu rtsa gcig pa dang / nyi shu rtsa gsum pa dang / nyi shu rtsa lnga pa zhes bya ba dang / 'jam rtsir bcas pa zhes bya ba ste/ cho ga 'dis ni mas gtong ba'i las sum cur bshad pa yin no/ /dus ni bco lnga 'dir gcig ni/ /thog ma'i snum ste tha mar gsum/ /dugs dang mas gtong lnga par bshad/ /ces bya ba la/ mas gtong ba'i dus ni bcwa lnga ste/ ji lta zhe na/ thog mar te dang po snum gyi gcig dang / mtha' ma snum gyi lan gsum ste/ bcu gsum pa dang / bcu bzhi pa/ bcwa lnga pa dang / de bzhin du sman drug ste/ gnyis pa dang / bzhi pa dang / drug pa dang / brgyad pa dang / bcu pa dang / bcu gnyis pa zhes bya ba dang / ji lta bu zhe na/ mas gtong ba'i 'jam rtsi lnga ste/ gsum pa dang / lnga pa dang / bdun pa dang / dgu pa dang / bcu gcig pa zhes bya bas bar du bcad cing chod pa'i bkru sman drag po mas gtong ba ste/ de ltar na mas gtong ba'i dus bcwa lnga yin no/ /mas gtong sbyor 'dir brgyad yin te/ /ni ru ha dang snum gsum dang / /thog ma tha ma gnyi ga'o/ /zhes bya ba la/ mas gtong ba'i sbyor ba 'dir brgyad yin te/ sbyor ba 'di thog ma dang tha ma gnyi ga ste/ dang po dang brgyad pa zhes bya ba'i snum gyi las dang / ni ru ha gsum ste/ gnyis pa dang / bzhi pa dang / drug pa dang / snum gsum ste/ gsum pa dang / lnga pa dang / bdun pa zhes bya ba ste/ de ltar na spyir brgyad ni sbyor ba yin no/ /'jam rtsi'am bkru sman mas gtong drag /gcig pu lhag par bsten mi bya/ /'jam rtsis nad glongs me drod 'joms/ /ni ru has rlung skyed 'jigs yod/ /de bas snum rjes bkru drag gtang / /khrus drag btang nas 'jam rtsi bya/ /de ltar rim pas snum sbyang bya/ /mas gtong las ni nyes gsum sel/ /zhes bya ba la/ de ltar na ni ru ha ste bkru sman drag po mas gtong ba'i thog mar 'jam rtsi bya la/ de'i 'og tu bkru sman drag po mas gtang bar bya la/ de'i 'og tu 'jam rtsi'i rgyun mi 'chad par ni ru ha gcig pu bsten par mi bya zhing / 'jam rtsi 'ba' zhig rgyun mi 'chad par ha cang drags par mi bya zhing / bsten par mi bya ste/ gang gi phyir 'jam rtsi rgyun du bsten drags pas ni/ nad glongs pas khams 'khrugs par 'gyur ba dang / de bzhin du me'i drod 'joms pas pho ba'i me drod kyis zas 'ju mi nus par 'gyur ro/ /de bzhin du ni ru ha bsten drags pas rlung nad skyed par byed do/ /rlung gi nad ldang ba'i 'jigs pa yod do zhes bya ba'i don no/ /de bas na bkru sman drag po mas gtong bar bya ba'i skyes bu la ni/ 'jam rtsi gsum gyi sbyor ba mas gtong bar bya la/ gang 'jam rtsi bya ba de la ni bkru sman drag po gtang bar bya dgos te/ nad glongs pa dang me drod 'joms pa des bsal bar bya ba'i phyir ro/ /de ltar na rigs pa 'di'i rim pas snum gyi mas gtang ba byas pa dang / de'i 'og tu ni ru ha bya la/ de lta bu'i sbyang ba byas nas/ mas gtong ba'i las des nad gzhi gsum gyi nyes pa sel bar 'gyur ro/ /snum gyi tshad ni chung ngu yi/ /tshad dang de ni mnyam byas pa'i/ /snum tshad 'jam rtsi'i tshad du bshad/ /de ni byis rgan lam dang khur/ /bud med rtsol zhen pas du ba dang / /rlung nad kyis gzhom me drod chung / /rgyal po phyug po la bde ba/ /yin pas rtag tu bsten par bya/ /nad 'joms yang ba med pa dang / /stobs skyed bshang ba bde bar 'byung / /zhes bya ba la/ snum las zhun mar 'ba' zhig btung ba'i chung ngu thun gnyis kyis 'ju bar 'gyur ba'i mtshan nyid can gyi tshad dang mnyam par byas pa'i snum gyi tshad/ 'jam rtsi'i tshad du bshad de/ de ni 'jam rtsi'i chung tshad ces bya ba la tshad de ni byis pa dang rgan po la sogs pas dus rtag tu rgyun mi 'chad par bsten cing goms par bya'o/ /de bsten cing goms par byed pa ni nad med par byed pa dang / bde ba yin pas byis pa la sogs pa la yang gtong du rung bas goms par spyad par bya'o/ /de bzhin du nad 'joms pa ste/ rlung dang mkhris pa dang bad kan yang 'joms shing sel bar byed do/ /de bzhin du yang 'di ni yang ba med par byed pa dang / kha lag chu dron gyis bkru zhing / /zhes bya ba la sogs pa'i gzhung gis sngar bshad pa'i 'dam ga mi dgos pa yin la/ de nyid kyis na byis pa la sogs pa la bde ba'i bdag nyid can yin no/ /de bzhin du stobs skyed par byed pa yin te/ nus pa skyed pa yin no/ /de bzhin du bshang ba bde bar 'byung bar byed pa yin no/ /gang zhig btang bas bshang ba bde blag tu 'byung bar byed pa de la de skad ces bya'o/ /mas gtong bud med ro smad kyi/ /mngal dang mo mtshan nad rnams la/ /bkrus drags gnyis gsum gyis dag par/ /mas gtong gong mas gtong bar bya/ /zhes bya ba la/ 'dir mas gtong ba'i lus kyi yan lag gi phyogs gcig 'bab pa'i phyogs nas gtang ba ste/ de ni gcin sri ba la sogs pa'i nad gang dag yod pa'i skyes pa dang / bud med dang ma ning gi mtshan nas gtang ba gong ma gtang bar bya'o/ /de dag thams cad kyang lan gnyis sam lan gsum du bkru sman drag po mas gtong bas dag cing skyon bsal ba la/ mas gtong ba gong ma gtang bar bya'o/ /de yi gce'u nad pa yi/ /sor tshad bcu gnyis tshad du bya/ /snum zhing ba lang mjug ma 'dra/ /rtsa ba dbus su gag pa gdags/ /rtse mo yungs kar shong ba tsam/ /'jam pa gser la sogs las byas/ /kun da sri zhing so ma na/ /me tog rtse mo ltar zlum phra/ /zhes bya ba la/ de'i zhes bya ba ni/ 'das ma thag pa'i mas gtong ba gong ma la snyegs te/ de'i gce'u ni nad pa gang yin pa'i tshad kyis gzhal la/ de yang sor bcu gnyis su bya'o/ /de bzhin du zlum pa dang / ba lang gi mjug ma ltar rtse mo rim gyis phra ba dang / de bzhin du rtsa ba dang / dbus te bar du gag pa gdags par bya ste/ 'dir gag pa gcig ni dbus su bya/ de yang tshad nang du nub pa'i tshad las thal bar gags byed nus pa tsam la/ gnyis pa rtsa bar gnas par bya ba ni rkyal bu la gdags pa la sogs pa yin no/ /yang de bzhin du de'i rtse mo'i bu ga'i tshad yungs kar shong ba tsam la bya'o/ /'jam bag ni rtsub bag med pa'o/ /gser la sogs pa las byas pa ni mas gtong ba dag gi tshe rgyu dang mtshungs par bya'o/ / de bzhin du me tog kun da la sogs pa'i rtse mo kha ma phye ba ltar byin gyis phra zhing zlum pa'o/ /gang la me tog dang 'bras bu chags pa'i de'i rtsa ba phra mo ste de la bya'o/ /de yi rkyal bu 'jam zhing yang / /zhes bya ba la/ mas gtong ba gong ma de'i rkyal bu ni/ ra skyes la sogs pa'i lgang pa 'jam zhing mnyen la yang zhing chung ngu gdags par bya'o/ /tshad srang phyed dam gang rigs bya/ /zhes bya ba la/ 'jam rtsi gong ma de'i tshad ni snum gtong ba na srang phyed bya ba'am gang rigs par bya ba ste/ nad la sogs pa'i tshad las dpags nas ji ltar 'os pa bya ba ste/ des na nad kyi tshod las dpags te/ srang phyed pas chung bar yang bya'o zhes bya ba'i don no/ /de nas khrus byas zan zos la/ /'jam rtsi gtong ba'i cho ga bya/ /khri stegs pus mnyam 'jam pa la/ /drang zhing bde bar 'dug nas ni/ /pho mtshan bteg cing drang bar bya/ / sbubs sbyang phyir ni thur ma ni/ /'jam pa rim gyis gzhug par bya/ /de dag pho mtshan dang 'tsham pa/ /'bras bu'i mthar thug par btang ba/ /mi 'dar 'jam rtsi gtong ltar bya/ /btsir te btang la snum rjes bya/ /'jam rtsi'i rim pa bzhin du bya/ /zhes bya ba la/ de nas de'i 'og tu legs par khrus byas shing zan ran par zos pa'i skyes bu de'i pho mtshan du dang por thur ma phra mo bcug la/ de'i 'og tu gce'u gzhug par bya'o/ /'jam rtsi gtong ba'i chogs bya ba ste/ sngar bshad pa'i mas gtong ba'i chogs bya ba'o/ /de bzhin du khri'i stegs pus mo dang dpangs mnyam zhing 'jam pa'i steng du/ drang zhing lus ma yo bar bde bar 'dug pa de bzhin du pho mtshan dga' bas bteg cing ldang bar byas la/ drang zhing ma yo bar byas nas gci ba'i lam gyi sbubs dag par bya ba'i phyir thur ma 'jam po rim gyis dal bar gzhug par bya'i/ cig car gzhug par mi bya'o/ /de nas thur ma des pho mtshan gyi sbubs dag par byas pa'i rjes la/ pho mtshan dang 'tsham pa'i gce'u 'bras bu'i mthar thug pa'i bar du gtang bar bya la/ de yang lag pa mi 'dar bar mjug mar 'jam rtsi gtong ba dang tshul 'dra bar byas la btsir ba dang / btang ba dang snum gyi rjes la bya ba dag ni/ 'jam rtsi'i rim pa ji lta ba bzhin du bya ba 'di la phan pa yin no/ /de yi rim pa 'di yin te/ /btang nas lus ni gan rkyal gzhag /rkub tsos lag pas brdab par bya/ /zhes bya ba la sogs pa yin no/ /mas gtong cho ga 'di yis ni/ /gsum mam bzhi yi bar du gtang / /zhes bya ba la/ ji skad bshad pa'i cho ga 'dis mas gtong ba'i cho ga gong ma lan gsum bzhi'i bar du gtang bar bya'o/ /lhag ma 'jam rtsi ji lta bar/ /'di la thams cad sbyar bar bya'o/ /zhes bya ba la/ cho ga thams cad 'jam rtsi dang 'dra bar bya ba ste/ sbyor ba legs pa dang sbyor ba ma legs pa dang / sbyor ba drags pa dang / de bzhin du de'i gnod pa bsal ba'i sman la sogs pa gang dag yin pa 'di la yang sbyar bar bya zhing shes par byas la brtag par bya'o/ /bud med zla mtshan dus su ni/ /mngal bye ba las chags par 'gyur/ /de phyir de tshe gtang bar bya/ /rab na dus min par yang gtang / /mo mtshan nyams dang gzer ba dang / /mngal khrag rtag tu 'byung gtang ba/ /zhes bya ba la/ bud med zla mtshan 'dzag pa'i dus su 'jam rtsi gong ma gtang bar bya'o/ /zla mtshan dang po 'dzag pa nas zhag bcu gnyis kyi bar du bud med kyi zla mtshan gyi dus yin te/ dus de'i bar du de'i mas gtong ba'i las bya'o/ /ci'i phyir zhe na/ dus de'i tshe mas gtong ba gong ma nas snum gtang ba gang yin pa de mngal bye bas der chags par 'gyur zhing len par 'gyur te/ de'i tshe bud med gyi mngal gyi kha bye nas gnas pa yin no/ /de ji ltar de'i tshe mngal chags par 'gyur ba de bzhin du mas gtong ba yang de'i tshe chags kyi gzhan gyi tshe ni ma yin no/ /de yang gzhung las dper na nyi ma nub gyur na dus ma yin te/ zla mtshan rgyu ba'i dus ma yin yang mas gtong ba gong ma gtang bar bya'o/ /mo mtshan nyams par gyur pa la sogs pa la yang gtang bar bya ste/ mo mtshan nyams pa las ni gnas de las 'chugs shing zhig pa'o/ /de bzhin du mngal na ba ste/ mngal gyi nad rnams mang po 'byung ba dang / de bzhin du mo mtshan gzer zhing zug pa dang / de bzhin du mngal nas rtag tu khrag 'dzag cing / kha dog sna tshogs pa'i khrag dus ring por 'dzag pa'i nad ni/ mngal khrag rtag tu 'byung ba ste/ de la yang gtang bar bya'o/ / gce'u sor bcu rtse mo yi/ /bu ga mung+ga shong sor bzhi/ /mngal gyi gnas su gtang bar bya/ /sor gnyis gcin 'bab lam du gtang / /gcin 'gags pa yi nad rnams la/ /bu mo rnams la sor gcig gtang / /zhes bya ba la/ mngal chags su rung ba'i bud med thams cad dang / chags su mi rung ba'i bu mo gzhon nu'i mas gtong ba'i gong ma'i gce'u tshad ni spyir sor bcu bya'o/ /gcin 'gags pa'i nad yod pa'i bu mo shin tu chung ngu rnams la gcin 'bab pa'i lam du sor gcig gtang bar bya zhing gzhug par bya'o/ /'bring tshad srang ni gcig pa ste/ /bu mo rnams la srang phyed nyid/ /ces bya ba la/ bud med rnams kyi mas gtong gong ma'i 'bring tshad ni srang phyed bya'o/ /bu mo rnams te bu mo chung ngu rnams kyi 'bring tshad ni srang phyed nyid yin no/ /mal du gan rkyal 'dug nas ni/ /brla ni legs par bskum nas su/ /pus mo brtod de nyin zhag ni/ /gcig la lan gsum lan bzhi btang / /de ltar mas gtong zhag gsum la/ /snum gyi tshad ni bskyed par bya/ /de nas zhag gsum ngal bso nas/ /slar yang zhag gsum gtong bar bya/ /zhes bya ba la/ bud med de mal du gan rkyal du byas te/ 'dug cing gnas pa dang / de bzhin du brla legs par bskum pa dang / pus mo legs par brtod de/ de la nyin zhag gcig la lan gsum mam lan bzhi'i bar du mas gtong ba gong ma bya'o/ /de bzhin du zhag gnyis sam gsum gyi rim gyis ci rigs par nyin re zhing snum chad bskyed par bya'o/ /de nas zhag gsum ngal bso zhing 'phro bcad la/ slar yang cho ga 'di nyid kyis zhag gsum gtong bar bya'o/ /skyug sman byas zla phyed bkru sman/ /de nas zla phyed nas bkru drag /bkrus drag 'phral la 'jam rtsi gtang / /khrus btang zhag bdun nas 'jam rtsi/ /zhes bya ba la/ sngon du skyug sman byas nas zla ba phyed 'das pa dang / bkru sman bya'o/ /de nas bkru sman btang ba'i zla ba phyed nas bkru sman drag po gtang bar bya'o/ /bkru sman drag po mas gtong ba bya ste/ 'phral de ring por mi thogs par 'jam rtsi btang ngo / /bkru sman btang nas zhag bdun lon nas 'jam rtsi gtang bar bya ste/ de ltar na bkru sman btang ba dang / ni ru ha gtong ba'i bar du 'jim rtsi gtang ngo / /zhes bya ba'i don no/ /dper na le brgan sogs btsos pa'i/ / gos ni chu las tshos len ltar/ /de bzhin bangs par byas lus la/ /mas gtong bas ni nad rnams 'byin/ /zhes bya ba la/ dper na le brgan rtsi la sogs pa dang bsres pa'i chu la sogs der ras tshos len par byed cing chu 'dor bar byed pa de bzhin du lus snum la sogs pas bangs par byas pa las mas gtong bas na nad kyi gnod pa rnams sel zhing 'byin par byed cing lus gnod pa med pa la sbyor bar byed do/ /lus kyi yan lag nang grol dag tu song nad dang / /gnad dang lus stod yan lag kun khyab nas/ /gang zhig yod pa de las skye ba'i rgyu/ /rlung ma gtogs pa gzhan dag yod ma yin/ /zhes bya ba la/ lus kyi yan lag ni khrag la sogs pa'i lus zungs rnams nas/ pags pa'i bar dang / de bzhin du lag ngar la sogs pa'i lus kyi yan lag nang grol ma gtogs pa kun la bya'o/ /de bzhin du nang grol gyi phyogs thams cad du khyab cing song ba'i nad dag dang / de bzhin du gnad dang lus kyi stod na gnas pa'i nad pa'i yan lag dngos su na lus kyi stod yan lag gi gnad thams cad la khyab cing gnas pa'i nad gang dag yod pa'i nad de rnams skye ba'i rgyu'am/ 'byung ba'i rlung ma gtogs pa gzhan gang yod pa ma yin te/ nad kyi rgyu gnyis pa med do zhes bya ba'i don no/ /ci'i phyir zhe na/ de'i phyir smras pa ni/ bshang dang bad kan mkhris sogs nad sogs pa/ gang phyir 'thor zhing sdud par byed pa yin/ /de ni rab 'phel gyur la zhi bya'i phyir/ /'jam rtsi ma gtogs sman gzhan gang yang med/ /de bas gso ba ma lus las ma btang / /gso ba'i phyed yin zhes ni la la 'dod/ /de bzhin nad rnying glo bur skyed byed la/ /gtar ga khrag dbyung sman nyid 'gyur ba yin/ /rnam pa de gnyis byed pa na/ /'thor zhing sdud par byed pa yin/ /zhes bya ba la/ bshang ba dang bad kan mkhris pa la sogs pa gang yin pa de ni/ bshang ba dang bad kan mkhris pa la sogs te/ sogs pa smos pa ni/ lus kyi tshad gtogs pa dngas ma la sogs pa'o/ /de dag nyid kyis ni lus dri ma can du byed pas na nad do/ /de rnams la sogs pa ni bshang ba la sogs pa 'phel bar byed pa yin te/ gang gi phyir 'thor zhing rgyas par byed la/ nad rnying pa'i tshigs su gnas pa phan tshun 'thor zhing 'byed par byed pa dang / sdud par yang byed de/ phan tshun 'thor te gnas pa rnams phung po gcig tu byed pa'o/ /de lta bu'i rlung de rab tu 'phel zhing rnam par 'khrugs pa ldang bar gyur pa zhi zhing bsal bar bya ba'i phyir dpyad bya na/ 'jam rtsi la sogs pa mas gtong ba ma gtogs pa'i sman gzhan dag yod pa ma yin no/ /snum dang dugs gzhan dag yod na yang nus pa chung ba yin no/ /gang gi phyir 'jam rtsi yon tan de lta bu yod pa de bas na/ rgyu de'i phyir gso ba ma lus shing mtha' dag las mas gtong ba ni gso ba'am nad bcos pa'i thabs kyi phyed yin no zhes bshad de/ ci'i phyir zhe na/ bshang ba dang / gci ba dang / bad kan dang / mkhris pa dag gtar ga bya ba'i nad rnams kyang rtsa ba nas 'byin to/ /de bas na de las brtsams te/ nad ma lus pa dang rlung gi nad rnams thams cad mas gtong bas gso zhing bcos par bya'o/ /zhes bya ba'i don no/ /de'i phyir tshe'i rig byed shes pa'i srog 'tsho ba'i slob dpon gzhan dag ni gso ba'i thabs ma lus pa mas gtong bar 'dug pas khas 'che'o/ /la la dag ni mas gtong ba'i gso ba'i phyir yin no/ /zhes zer ro/ /de bzhin du gtar gas khrag dbyung ba yang / nad rnying pa dang glo bur bas btab pa'i nad rnams la gtar gas dbyung ba'i gso ba'i phyed dam/ gso ba ma lus par gyur pa yin no/ /zhes zer ro/ /de bzhin du rnying gzhi gnas pa dang / glo bur ba gsar du byung ba dag la ni nad rnying glo bur ba zhes bya ste/ de dag skyed par byed pa yin pas na skyed byed de/ khrag la bya la de rab tu zhi zhing bsal ba la ni gtar gas khrag dbyung zhing khrag 'don pa nyid sman du 'gyur ba yin pas na khrag las gyur pa'i nad kyi gso ba'i phyed dam/ gso ba rangs pa ni gtar gas khrag dbyung ba yin no/ /zhes bya ba ni sdud par byed pa ste/ mas gtong ba 'ba' zhig gso ba yin par ma zad de/ gtar gas khrag dbyung ba yang gso ba phyed dam/ ma lus pa yin no/ /zhes bya ba'i don no/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las le'u bcu dgu pa'i rnam par 'grel pa'o// // de nas sman sna nas gtang ba'i cho ga'i le'u bshad par bya'o/ /'di brtsams pa'i 'grel pa 'di yin te/ gang gi phyir skyug sman la sogs pas lus kyi nang na yod pa'i nad ji ltar sel bar byed pa de bzhin du sna nas gtang ba'i sman yang sna'i sgo nas btang bas lus kyi nang na song ba'i nad de phyir 'byin par byed de/ des skyug sman la sogs pa bzhi po nad phyir 'byin par byed pa yin pa de bzhin du sna nas gtang ba zhes bya ba'i lnga pa yang dag pa'i bya ba byed pa yin no/ /yang na lus ni yan lag thams cad la khyab pa yin pas de gso ba sngar bshad pa yin la/ de ni thur mas bcos pa'i rgyud kyi le'u ston pa yin la/ de las 'dir ni sna nas gtong bar byed pa'i sman yin pas na sna sman te/ sna nas sman gtang ba dang sna'i las dang sman sna nas gtang ba zhes bya ba'i ming 'thob pa yin no/ /de'i cho ga ni 'di ltar bya'o zhes bya ba'i tshul te/ de'i le'u bshad par bya'o zhes bya ba'i don no/ /nam tshong yan chad nad rnams la/ /lhag par sna nas gtang ba phan/ /sna ni glad pa'i sgo yin te/ /des na de nas nad de 'joms/ /zhes bya ba la/ nam tshong yan chad kyi nad rlung dang mkhris pa dang bad kan las gyur pa gang dag yod pa'i yul de thams cad la lhag pa'am khyad par du sna nas gtang ba phan pa yin no/ /yang der skyug sman la sogs pa'i thabs med pa ma yin mod kyi khyad par ram lhag par sna nas gtang ba mchog tu gyur pa yin no/ /de ci'i phyir zhe na/ sna ni glad pa'am mgo bo'i sgo nas 'jug pa'i gnas de'i rgyu des na sna nas gtang ba zhes pa'i lam de nas sman bsten cing btang na/ rna ba'i gsang gi bar du phyin nas/ glad pa dang / rna ba dang / lkog ma la sogs pa'i rtsa'i sgo rnams khyab pas/ nam tshod yan chad kyi nad ma lus pa de 'joms te/ mgor khyab pa'i nad sel ba yin no/ /de ni rnam pa gsum ste/ bkru ba dang brta ba dang zhi bar byed pa'o/ /de las kyang bkru ba ni/ /bkru sman glad pa'i nad rnams dang / blong bag lkog nad mchi ma 'dzag /skrang dang thor bu srin rmen bu/ /mdze smyo cham pas btab la gtang / /zhes bya ba la/ bkru sman sna nas btang ba ni glad pa'i nad la sogs pa la gtang bar bya'o/ /bkru sman ni mgo bo'i nad bkru zhing sbyang ba'i sman no/ /blong bag ni sems mi gsal ba'o/ /mchi ma 'dzag pa ni mig nas rdzi bor 'byung ba la sogs pa'o/ /srin bus spyi bo dang mtshul bar khyab pa'o/ / cham pa ni sna'i nad do/ /brta ba rlung las byung gzer dang / /glad pa phyed na skad 'gags dang / /sna dang kha skam tshig mi thon/ /mig dbye dpung pa bskyod dka' gtang / /zhes bya ba la/ sna nas btang ba'i sman brta bar bya ba gang yin pa ni/ rlung las byung ba'i mgo bo'i gzer nad rnams dang / de bzhin du nyi ma phyed kyi bar du glad pa na ba dang / skad 'gags shing nyams pa dang / de bzhin du kha dang sna skam pa dang / tshig mi thon zhing skad brda sprod mi nus pa dang / mig dbye bar dka' ba'i mig nad dang / de bzhin du rlung gi nad dpung pa bskyod par dka' ba dag la btang zhing sbyar bar bya'o/ /zhi ba mig sngon gdong lpags nad/ /skra yi skyon mig dmar la gtang / /zhes bya ba la/ sna nas gtang ba zhi bar byed pa gang yin pa de ni/ 'og nas rgyud phyi ma las bshad pa'i mig gi nad sngon por gyur pa la sogs pa'i nad la yang gtang bar bya'o/ /dang por rang sbyor ji lta'i snum/ /sman gyi lde gu sogs bskol dang / /shing mngar rgyam tsha chang rnying sogs/ /ci rigs par ni bskol la gtang / /zhes bya ba la/ sna nas gtang bar bshad pa'i sman dang po ni rang gi sbyor ba ji lta ba gang dang 'phrod cing 'tsham pa'i snum rnon po yungs mar la sogs pa dang ci rigs par bskol zhing mgo bo'i bkru sman rnams dang ci rigs par bskol ba dang / de bzhin du sman phye dang sman khu la sogs pa mgo bo'i bkru sman las 'brel pa las ci rigs par sla ba dang zhib pa dang / lde gur bsres shing sbyar ba dang / de bzhin du shing mngar dang rgyam tshwa dang / chang rnying la sogs pa dang sbyar te/ bskol ba gtang bar bya'o/ /brta ba 'u su'i khu ba dang / /sha khu khrag dang thang chu sbyar/ /zhes bya ba la/ sna nas gtang ba'i sman brta bar byed pa ni 'u su'i khu ba de bzhin du sha khu dang khrag dang de bzhin du kha pu ra zhes bya ba'i thang chu dang sbyar la gtang bar bya'o/ /'ang zhes bya ba sbyor ba'i sgras ni rang sbyor ba ji lta ba'i snum mngar ba dang / snum pa'i sman la btsos pa brta ba'i sman sna nas gtang ba las sbyar bar bya'o/ /zhes bya ba'i don to/ /zhi ba snga ma 'o ma dang / /chu dang bcas pa sbyar bar bya/ /zhes bya ba la/ sna nas gtang ba'i sman zhi ba ni snga ma zhes bya ba'i sngar bshad pa'i rang gi sbyor ba ji lta ba'i snum dang / rang gi sman gang dag yin pa'i khu ba la sogs pa dang / de bzhin du 'o ma dang chu dang bcas pa sbyar bar bya'o/ / tshad can dang ni tshad phran te/ /'di yi snum tshad rnam pa gnyis/ /zhes bya ba la/ sna nas gtang ba'i sman gsum po 'di la snum gyi sman mar gtang ba'i khyad par gyi tshad ni/ tshad kyi dbye ba las rnam pa gnyis te/ tshad can dang / tshad med do/ /lde gu la sogs btsir ba yi/ /rno de spyi bo'i bkru sman yin/ /zhes bya ba la/ lde gu dang sman bskol ba'i khu ba la sogs pa sbyar ba'i sman ras bal gyi ye'u la sogs pas gtong ba de ni btsir ba zhes bya'o/ /gzhan dag na re lde gur byas pa'i sman btsos pa las khu ba btsir te/ 'dzag par byas pa las bya'o/ /zhes zer ro/ /btsir ba de sman rnon po'i lde gu bskol ba la sogs pas btang ba ni spyi bo'i bkru sman zhes bya'o/ /phye ma bud pa'i bkru sman te/ /sbu gu sor drug kha gnyis pa/ /nang na sman dang bcas pa dag /kha yi dbugs kyis bus te gtang / /des ni mgo nad mang po yang / /phye ma yin bas 'byin par byed/ /ces bya ba la/ 'khru bar 'gyur ba'i sman las sbyar ba'i phye ma ni bud par bya ba yin pas na bud pa'i bkru sman zhes bya ste/ phye ma de kha'i rlung gis bus la sna nas gtang bar bya'o/ /gang gis btang zhe na/ sbu gu sor drug yod pa kha gnyis yod pa dang / de bzhin du nang na sman dang bcas shing sman phye ma blugs pa de kha'i dbugs kyis bus te gtang ngo / /bud pa'i bkru sman des ni mgo bo'i bad kan las byung ba mang po yang phyi nas 'byin cing / nang nas phyir 'don par byed do/ /mdzub mo'i tshigs ni gnyis pa'i bar/ /smyugs pa phyir phyung gyur pa las/ / thigs pa bcu 'am brgyad dam drug /ji srid 'dzag par gyur pa dag /sna nas gtong tshad che 'bring chung / /rim pa de nyid kyis shes bya/ /lde gu la sogs thigs pa ni/ /gnyis kyis phri ste gtang bar bya/ /zhes bya ba la/ mdzub mo ni mthe bong la nye ba'i sor mo ste/ de'i tshigs gnyis kyi bar du/ dang po smyugs shing spyings la phyir phyung ste/ bteg par gyur pa las thigs pa'i tshad ji tsam zhig 'byung bar 'gyur ba de la thigs pa zhes bya la/ thigs pa de las snum gyi tshad che chung du bya ba ni thigs pa bcu ni che tshad yin la/ thigs pa brgyad ni 'bring tshad la/ thigs pa drug ni chung tshad do/ /tshad 'di dag nyid las che dang 'bring dang chung ngu ni rim gyis thigs pa gnyis kyis chung zhing phra ba'i lde gu la sogs pa'i sman gyi khu ba snar blugs pa yin par shes par bya'o/ /chu dang chang dang sbyar dug mar/ /'thung ba'am 'thung bar 'dod pa dang / /kha zas 'dod dang mgo bkrus dang / /'khru bar 'dod dang gtar ga byas/ /cham sar shugs 'ongs kyis gzir dang / /bu btsas lung pa dbugs mi bde/ /sbyang byas mas gtong cho ga byas/ /de bzhin dus min yul rmugs la/ /sna sman gtang bar mi bya ste/ /tshabs che'i nad sogs ma gtogs so/ /zhes bya ba la/ sman sna nas byar mi rung ba ni chu dang chang dang dug dang mar 'thungs pa nas/ mas gtong ba'i cho ga byas pa'i bar dang / de bzhin dus ma yin pa'i yul rmugs pa la gtang bar mi bya ste/ dus ma yin pa'i yul rmugs pa ni dbyar ma gtogs pa'i dus gzhan gyi tshe/ yul rmugs shing rlung dang grang lhags dang char 'bab par 'khrigs pa'i nyin mo ni dus min yul rmugs zhes bya'o/ /ci de dag gi tshe rnam pa thams cad du gtang bar mi bya'am zhes rtogs na/ de'i phyir smras pa ni/ tshabs chen nad sogs ma gtogs so/ /zhes bya ba yin no/ /de gso bar byed pa'i nad tshabs po che ma gtogs te/ nad tshabs che ba'i tshe na ni chu dang chang dang dug dang mar la sogs pa 'thungs su zin kyang gtang bar bya'o/ /zhes bya bar sbyar ro/ /des na dus gang gi tshe sna nas btang bas smin par bya zhe na/ /de nas sna nas sman btang ba/ /bad kan nad par mkhris nyin phyed/ /rlung can phyi 'phred mtshan mo gtang / /zhes bya ba la/ 'dir de nas zhes bya ba'i sgra ni/ bkra shis pa ston par byed pa yin par sbyar ro/ /de la sna sman gtang ba'i dus ni bad kan nam/ bad kan las gyur pa'i nad ni bad kan gyi dus nang par gyi tshe nyid sna nas gtang ba'i sman gtang bar bya'o/ /mkhris pa 'khrugs sam de las byung ba'i nad rnams la mkhris pa'i dus nyi ma phyed kyi tshe gtang bar bya'o/ /rlung gi nad dam/ de las byung ba'i nad rnams la rlung ldang ba'i dus phyi 'phred de/ phyi dro dang mtshan mo'i dus su sman sna nas gtang bar bya'o/ /nad med pa la ston ka dang / /dpyid kyi tshe na snga dro gtang / /dgun ni phyed dus so ga'i tshe/ /phyi 'phred dbyar ni nyi dron bcas/ / zhes bya ba la/ nad med cing tha mal par gnas pa la ni ston ka dang dpyid ka'i tshe snga dro ste/ nyi ma'i snga dro'i cha la gtang bar bya'o/ /nad med par gnas pa la dgun gyi tshe ste/ dgun stod dang / dgun smad grang ba'i dus su ni/ nyi ma phyed la sman sna nas gtang bar bya'o/ /de bzhin du so ga'i tshe ni phyi 'phred de phyi dro'i dus su ni sman sna nas gtang bar bya'o/ /de bzhin du dbyar gyi nyi ma dron po dang bcas pa'i skabs su nad med pa la sna nas gtang bar bya'o/ /glad pa rlung nad kyis thebs dang / /skyigs bus btab dang mgo 'dar dang / /gnye'u rengs skad ni 'gags pa la/ /nyin re nang par dgongs ka gtang / /zhes bya ba la/ glad par rlung nad zhugs shing mgo bo rlung gi nad kyis thebs pa dang / de bzhin du mgo 'dar zhing 'dar ba zhes bya ba'i rlung gi mgo nad dang / gnye'u rengs shing 'gyur mi shes pa dang / skad 'gags shing skad gdangs nyams pa la/ nyin re zhing nang par dgongs ka ste/ snga dro dang phyi dro sna nas sman gtang bar bya'o/ /gzhan la nyin res bar bcad la/ /nyi ma bdun du de spyad bya/ /zhes bya ba la/ glad pa gang nad kyis thebs pa dang / skad 'gags shing skad la sogs pa'i nad ma gtogs pa gzhan dag la ni/ nyin re zhing sna nas gtang ba'i sman mi bya'o/ gzhan du na nyin re res bar bcad pa ste/ nyi ma re res bar bcad cing thag chod par byas la/ sman gtang bar bya ste/ tshul 'di lta bus sna nas gtang ba'i sman zhag bdun gyi bar du gtang bar bya zhing spyad par bya'o/ /rtag tu bya ba'i las byas nas/ /dang por mgo snum bsku dugs byas/ /rlung med mal du gnas nas ni/ /nam tshong yan chad dugs kyang bya/ /de nas gan rkyal lus drang brkyang / /rkang pa lag pa legs brkyang la/ /rkang pa cung zad bstod nas su/ /mgo bo yid tsam smad par bya/ /sna bug gcig ni rab bkag la/ /rim gyis yongs su blugs bya ba/ /sman ni chu dron gyis bsros la/ /sbu gu'am ras bal gyis blugs bya/ /zhes bya ba la/ de nas sna nas gtang ba la 'os pa'i skyes bus/ rtag tu bya ba la sogs bshang ba dang gci ba dang por byas la/ yang dang por mgo bo snum gyis bskus la/ de'i 'og tu mgo bo'i dugs ran pa tsam byas pa dang / de bzhin du rlung med pa'i gnas su mal bting ba la gnas shing 'dug nas/ nam tshong yan chad dugs kyang byas la/ de nas de'i 'og tu gan rkyal du 'dug ste/ lus drang zhing ma yo bar brkyang la/ rkang pa dang lag pa yang legs par brkyang bar gyur pa dang / sna nas sman gtang bar bya'o/ /yang de bzhin du de'i rkang pa cung zad bstod de/ gang gi rkang pa mtho bar gyur pa de lta bur khri la sogs pa bca' bar bya'o/ /de nyid kyis na mgo bo yang yid tsam smad par gyur pa dang / sna khung gcig bkag cing bcad la/ sna khung gnyis pa gdangs shing phye ste/ gnas pa la sna nas gtang ba'i sman blugs par bya'o/ /de bzhin du sna khung gnyis par yang rim gyis sna sman sbu gu mchu can nam/ srin bal gyi ye'us blugs par bya'o/ /blugs nas rkang mthil phrag pa dang / /lag pa rna ba la sogs mnye/ /rim gyis brngubs la glo gnyis su/ /mchil mdor ba de nas ni/ /sman ni zad par gyur gyi bar/ / lan gnyis lan gsum snar btang spyad/ /ces bya ba la/ der sman blugs pa dang / rkang mthil dang phrag pa dang / lag pa dang rna ba la mnye bar bya zhing / de nas de'i 'og tu rim gyis brngubs la/ glo g.yas g.yon gnyis su mchil ma dor bar bya'o/ /de nas sna g.yas nas bcug pa'i sman brngubs pa'i mchil ma g.yon logs su dor bar bya la/ g.yon gyi ni g.yas su'o/ /de ltar 'dis sman sna nas gtang ba la lan gnyis lan gsum du spyad par bya'o/ /gal te brgyal gyur bsil ba'i chus/ /mgo bo ma gtogs gtor bar bya/ /zhes bya ba la/ sman sna nas gtong ba na/ gal te brgyal zhing mi dran par gyur te/ sman gyi stobs ma goms pas brgyal bar gyur te/ mgo bo ma gtogs par gzhan du chu bsil bas kyang gtor bar bya'o/ / bkru sman 'og tu snum dag ni/ /nad sogs tshul las dpags te gtang / /zhes bya ba la/ sna sman btang ba'i bkru sman byas pa'i 'og tu/ sna nas gtang ba snum pa gtang bar bya'i/ rtsub pa ni ma yin la/ de yang nad la sogs pa'i tshul las dpags shing shes par byas la/ de dang rjes su mthun pa'i sman til mar la sogs pa gang yang rung ba gtang bar bya'o/ /sna sman btang mthar gan rkyal du/ /grangs brgyar de la bsdad par bya/ /dud pas brngubs la chu dron 'jam/ /gre ba mtshul pa dag phyir bya/ /zhes bya ba la/ skyes bu sna nas sman byas shing btang zin nas/ mthar gan rkyal du grangs brgya rdzogs kyi bar du bsdad par bya'o/ /de'i 'og tu phan par byed cing rjes su mthun pa'i yon tan dang ldan pa'i dud pa brngubs la/ chu cung zad dro ba 'jam po mkhur bar bcang ba gre ba dang mtshul pa dag pa'i phyir ro/ /snum btang legs gyur dbugs bde rgyu/ /gnyid log sad de dbang po gsal/ /zhes bya ba la/ de la spyir snum btang ba legs par gyur na dbugs bde bar 'byin pa sngon du 'gro bas dbugs rgyu ba dang / de bzhin du bde bar gnyid log cing bde bar sad pa dang / dbang po rnams bde zhing rnam par gsal bar 'gyur ro/ /nyes pas mgo rtsub mi 'gyur skam/ /sna dang kha skam klad stong snyam/ /zhes bya ba la/ snum gyi sna sman nyes pas mgo rtsub cing mi 'gyur bar har har por 'dug par 'gyur ba dang / skam pa dang / de bzhin du sna dang kha skam par 'gyur ba dang / klad pa stong pa snyam sems par 'gyur ro/ /snum drags g.yan dang lci ba nyid/ /mchil mang cham 'debs yi ga 'chus/ /zhes bya ba la/ spyi bor sna nas snum btang drags par gyur na/ shin tu g.ya' bar 'gyur ba dang / mgo lci ba nyid dang / mchil ma dang snabs mang ba dang / cham pas 'debs shing yi ga 'chus par 'gyur ro/ /legs bkrus mig gsal yang ba dang / /kha dang skad ni dag par 'gyur/ /'khrus nyes nad ni 'phel bar 'gyur/ /bkrus drags khong ni rmya bar 'gyur/ /zhes bya ba la/ mgo bo'i bkru sman legs shing sbyor ba phyin ci ma log par gyur na/ mig gsal zhing yang ba dang / kha dang skad gdangs dag cing gsal bar 'gyur ro/ /mgo de'i bkru sman nyes shing ma legs par gyur na/ nad kyi dkyel 'phel zhing slar sogs par 'gyur ro/ /mgo bo'i khrus shin tu drags par gyur na/ khong rmya zhing nyam chung bar 'gyur ro/ /tshad chung glo rdol rid pa dang / /byis pa rgan po skyid par gnas/ /dus min char 'bab par yang gtang / /zhes bya ba la/ sna nas gtang ba'i sman tshad chung ngu ni/ glo rdol ba la sogs pa la yang gtang bar bya la/ de bzhin du dus ma yin par yul rmugs pa la yang gtang du rung ngo / /de la glo rdol ba ni glo nas khrag byung ba'am/ brang gi sha zad pa'o/ /rid pa ni mi ro skam po ltar skem pa'o/ /byis pa ni lo bcu drug man chad do/ /rgan po ni bdun cu yan chad lon pa'o/ /skyid par gnas pa ni rtag tu bde zhing gzhon sha can du gnas pa'o/ /de ni cham pas drag btab dang / /chang 'thungs rna ba 'on pa dang / /glad rgyas srin bu zhugs pa dang / /nad bsdus phyir ni ma phyung la/ tshad chung ba ni gtang mi bya/ /zhes bya ba la/ sna nas gtang ba'i sman tshad chung ngu de ni cham pa drag pos btab pa dang / de bzhin du chang 'thungs pa ste/ gang gis dus de nyid kyi tshe 'thungs pa dang / de bzhin du rna ba 'on zhing sgra 'dzin pa la zhen pa dang / de bzhin du glad rgyas la srin bu zhugs pa dang / de bzhin du nad mang po khong du bsdus pa'am/ spyir nad mang bar gyur pa dang / nad bsdus nas phyir ma byung bar gyur pa la yang gtang bar mi bya ste/ gang gi phyir tshad chen po nas chung ba ni dman pa nyid yin pa'i phyir nus pa chung ba yin no/ / nyin mtshan zas zos slon gnyid nyal/ /mtha' dang bud med la mngal dub/ /mgo bskus mkhur bkang dbo ba'i rjes/ /bshang gci mig sman btang rjes dang / /so shing gi rjes dgod pa yi/ /rjes la thigs pa gnyis pa gtang / /lnga yis dbang po'i bu ga dag / gsum gyis rim bzhin ngal ba sel/ /lnga bos mig ni gsal bar byed/ /so brtan rlung nad zhi bar 'gyur/ /zhes bya ba la/ tshad chung ngu btang ba'i dus ni bcwa lnga pa 'di dag ste/ mtshan mo zas zos pa'i rjes la sogs pa la gtang bar bya la/ tshad chung ngu 'di ni thigs pa gnyis te/ lan gnyis thigs pa'i tshad yin la/ de yang dang po'i lnga'i mtha' mar btang na bu ga rnams sbyangs shing dag par byed de/ de yang mtshan mo'i mtha' dang / zas zos pa'i mtha' dang / slon pa'i mtha' dang / nyin par nyal ba'i mthar btang na dbang po'i bu ga rnams gsal zhing dag par 'gyur ro/ /gsum gyis rim bzhin ngal ba sel/ /zhes bya ba la ni/ bud med kyis dub pa'i mtha' dang lam gyis dub pa'i mtha' dang / ngal chad pa'i mtha' ste/ mtha' gsum por btang na ngal ba de gsum sel bar 'gyur ro/ /lnga btang mig ni gsal bar 'gyur/ /zhes bya ba la/ mgo bkrus pa'i rjes dang / mkhur ba bkang nas pho ba'i rjes dang / bshang ba btang ba'i rjes dang / gci ba btang ba'i rjes dang / mig sman btang ba'i rjes la btang na mig gsal zhing stobs dang ldan par 'gyur ro/ /so shing zos pa'i rjes la btang na so brtan par 'gyur ro/ /dgod pa'i rjes la thigs pa gnyis btang na rlung zhi bar 'gyur ro/ /sna sman lo bdun ma lon dang / /brgyad cu 'das la gtang mi bya/ /bco brgyad ma lon dud mi bdug / mkhur bkang lnga ma lon la min/ /lo bcu ma lon sbyang mi gtang / /bdun cu 'das la'ang mi bya'o/ /skyes nas rgas pa'i bar du ni/ /tshad chung mas gtong lta bur bsngags/ /de ni rtag tu bsten gyur na/ /tshad che ba ltar yon tan skyed/ /'di la bdam pa gang yang med/ / gnod las tshad chen ltar 'jigs med/ /ces bya ba la/ sman sna nas gtang ba ni/ byis pa lo bdun ma lon pa dang / lo brgyad cu yan chad 'das pa'i nad pa la gtang bar mi bya'o/ /bco brgyad ma lon dud mi bdug /ces bya ba ni/ mi lo bco brgyad ma lon pa man chad ni dud pas bdug pa'i sman gtang bar mi bya'o/ /de bzhin du mkhur ba bkang nas dbo ba'i sman yang lo lnga ma lon pa man chad la gtang bar mi bya'o/ /de bzhin du lo bcu ma lon pa la bkru sman gyis sbyang ba mi bya'o/ /de bzhin du lo bdun cu yan chad 'das pa'i na tshod dang ldan pa la sbyang ba mi bya'o/ /dgag pa 'di bkru sman btang ba'i skabs yin par shes par bya'o/ /skyug sman ni ma yin te byis pa ni phal cher 'o ma dang mar za bas bad kan las byung ba'i nad yod pas na nad thams cad bkru sman bsngags pa ma yin no zhes bshad pa'i phyir ro/ /yang tshad rab tu chung ba thigs pa gnyis pa ni 'di ni skyes nas zhes bya ba byis pa lo gcig ma lon pa nas/ 'chi ba nas rgas pa'i mthar thug pa'i bar la tshad chung ngu bsten pa bsngags pa yin te/ de yang ji ltar mas gtong ba skyes nas rgas pa'i bar du gtang du rung zhing bsngags pa yin pa dang 'dra bar tshad chung ngu 'di bsngags pa yin no/ /tshad chung ngu de rtag tu bsten cing rgyun du goms par byas na/ thun tshad che ba dang 'dra bar yon tan skyed par byed pa yin te/ de bas na skyes nas rgas kyi bar du bsngags pa yin no/ /sna nas gtang ba'i sman chung ngu 'di la ni sngar gyi tshad du bstan pa'i che 'bring chung gsum ltar bdam pa yod pa ma yin te/ snum gyi cho ga'i skabs nas bshad pa'i cho ga lta bu bsten cing bsrung mi dgos so/ /yang tshad chen po btang ba las gnod pa 'byung ba'i 'jigs pa yod pa ltar 'di ltar 'di la de lta bu'i gnod pa'i 'jigs pa 'byung bar mi 'gyur ro/ /sna sman don du til mar nyid/ /rtag tu bsten pa bsngags pa yin/ /mgo ni bad kan gnas yin phyir/ /snum gzhan bder gnas la mi bsngags/ /zhes bya ba la/ bde bar nad med par gnas pa'i skabs su sna nas gtang ba'i sman gyi don du til mar nyid bsngags pa yin gyi/ mar la sogs pa'i snum gzhan rtag tu bsten pa bsngags pa ma yin no/ /de ci'i phyir zhe na/ mgo bo ni bad kan gyi gnas yin pa'i phyir snum gzhan mi bsngags kyi til mar ni bad kan sel ba yin bas/ de'i phyir snum gzhan mar la sogs pa nad med pa'i skabs su gtang ba bsngags pa ma yin no/ /myur byed ring zhig byed pa dang / /yon tan che dang chung byed pa'i/ /khyad par tshad chen tshad chung dang / /gal te med par gyur na ni/ /gang zhig spang bcas gnod bcas pa'i/ /tshad chen dag ni su zhig ston/ /snum dngas btung ba rtag bshad du/ /spyil bu rlung dang tshad par gnas/ /'jam rtsi tshad can mas gtong tshad/ /de dang 'dra bar rnam par bstan/ /zhes bya ba la/ 'di ni yan lag brgyad pa bsdus pa las gzhung rtsom par byed pas bshad pa/ 'dir la la zhig gis bcug pa yin mod kyi/ 'on kyang 'dir bshad par bya ste/ gal te tshad che ba sngar rnam pa gsum du bsten pa dang / tshad chung ngu thigs pa gnyis pa de dag la khyad par med par gyur na/ spang bar bya zhing nyes dmigs dang bcas pa'i tshad chen pos nad pa gso bar glen pa su zhig byed de/ tshad chung 'dis chog mod/ /des na 'di gnyis la yon tan gyi khyad par ci yod ce na/ de'i phyir myur byed ces bya ba la sogs pa smras pa yin te/ tshad che ba dang chung ba gnyis ni/ gnyis pa khyad par grangs ji lta ba bzhin du myur du byed pa dang / ring zhig na byed pa dang / yon tan che ba dang / chung bar byed pa'i khyad par mchog ste tha ma dag yod pa ma yin te/ de yang che tshad gsum po ni snum gyi las la sogs pa myur du byed pa yin no/ /de bzhin du 'di nyid yon tan shas che bar byed pa yin/ de bzhin du chung zhing dman par yang byed pa ste/ de lta bu'i yon tan gyi khyad par yod pa la brten nas/ tshad chen por bshad pa gsum pa ni spang ba dang bcas shing gnod pa dang bcas su zin kyang / tshad chen po dag bya ba kho na ston pa yin te/ de bzhin du skabs kyis gzhan dag kyang bshad pa yin te/ snum dngas ma btung ba ni spang bar bya ba dang bcas shing / mi mthun pa'i skabs gnod pa'i skabs spang ba med pa ma yin yang / 'on kyang zhun mar la sogs pa'i snum dngas ma bsten par bshad pa ni myur du byed pa dang / yon tan che ba'i phyir ro/ /de bzhin du spyil bur gnas nas bcud kyis len nye bar bsten pa dang / de bzhin du rlung dang / tshad par gnas nas rlung dang nyi tshan gyi cho gas bcud kyis len bsten par byed pa de gnyis la khyad par med par gyur na spyil bur gnas pa'i cho ga spang ba dang / gnod pa dang bcas pa su zhig ston par byed na/ gang gi phyir spyil bu la gnas pa ni myur bar byed pa dang / yon tan che ba yin la/ rlung dang tshad par gnas pa ni ring zhig na byed pa dang / yon tan chung ba yin te/ tshad 'di gnyis kyi khyad par yang de dang 'dra'o/ /de bzhin du 'jam rtse mas gtong ba'i tshad kyang de dang 'dra bar bshad pa yin te/ des na 'jam rtsi mas gtong ba ni myur du byed pa dang / yon tan che ba yin la/ 'jam rtsi tshad shin tu chung ba'i mas gtong ba ni ring zhig na byed pa dang / yon tan chung ba yin na/ de bas na khyad par 'di gnyis la brten nas 'jam rtsi tshad dang ldan pa dag ni spang bar bya ba dang / gnod pa dang bcas su zin kyang bshad pa yin gyi/ mas gtong ba chung ngu chung ngus byed pa gcig bu ma bshad de/ 'di gnyis ni 'bras bu khyad par yod pa yin no/ /dza la sgron shing dzi ban ti/ / gla sgang shing tsha pu shel tsi/ /go bi tsan+dan skyer pa'i rtsa/ /shing mngar gla ba a ka ru/ /nye'u shing bil ba puN+Da rI/ /ut+pal mu ra par+Ni gnyis/ /bri ha ti gnyis byi dang ga /gan+d+ha b+ha dra sug smel dang / /ha re Nu ka pad+ma yi/ /ge sar dang ni ba la ste/ / sman ni 'di rnams cha snyoms la/ /char pa'i chus ni bskol bar bya/ /til mar las ni sman gyi khu/ /bcu 'gyur lhag byas de las ni/ /til mar chu dang bskol bya ba/ /lan bcu nyid ni bskol nas ni/ /tshos pa yi ni bcu cha la/ /de mnyam ra yi 'o ma blugs/ /snar btang til mar yon tan che/ /thigs phran zhes bya 'di bsten bya/ /zhes bya ba la/ dza la zhes bya ba ni rtswa sman pa la ka'o/ /dzi ban ti ni grags par zad do/ /go bi ni shi ri ba'o/ /gla ba ni ba ri pe la'o/ /nye'u shing ni sha ta pa ri'o/ /puN+Da rI ni pra puN+Da rI ka'o/ /ut+pa la ni ut+pal sngon po'o/ /mu ra ni gan da mu ra'o/ /par+Ni gnyis ni sa la par+Ni dang / kr-iSh+Na par+Ni'o/ /bri ha ti gnyis ni bri ha ti dang / kaN+Da ka ri'o/ /ha re Nu ka ni re Nu ka'o/ /pad+ma'i ge sar ni pad+ma'i snying po'i ge sar ro/ /ba la ni grags par zad do/ /sman 'di rnams legs par cha snyoms la/ de'i brgyad 'gyur gyi char pa'i chu dang bskol ba ji srid til mar gyi bcu 'gyur lus par 'gyur gyi bar du bskol bar bya'o/ /de ltar sman gyi khu ba til mar gyi bcu 'gyur lus par byas la/ de'i 'og tu bskol ba'i chu til mar gyi bcu 'gyur yod pa la/ de la til mar cha gcig dang / lan bcu'i bar du bskol bar bya'o/ lhag pa'am ma tshang ba ma yin no/ /'di nyid ces bya ba nges par gzung ba smos pa yin no/ /de la til mar chos pa'i tshad ni ci nas sman bskol ba'i chu de bcu cha re re dang so sor bskol bas rdzogs kyi bar du bskol nas/ til mar de tshos par gyur pa de ltar bya'o/ /tshos pa bcu cha de dang mnyam pa'i ra'i 'o ma blugs par bya ste/ gang dang mnyam zhe na/ til mar dang bskol ba'i chu dang mnyam par bya'o/ /de yang 'di skad ston pa yin te/ dza la dang sgron shing la sogs pa'i sman cha mnyam srang sum cu rtsa gnyis pa phrag brgya ste/ sum stong nyis brgya bskol la bskol ba'i sman khu lhag ma srang sum cu nyi shu lus par byas te/ de'i bcu cha sman khu srang sum cu rtsa gnyis dang / til mar srang sum cu rtsa gnyis bskol bar bya'o/ /de bzhin du bskol ba bcu po'i skabs su til mar dang mar dang mnyam pa'i ra'i 'o ma srang sum cu rtsa gnyis gzhug par bya'o/ /sna nas gtang ba'i til mar 'di ni yon tan che zhing bsten par bya ba yin par drang srong rnams kyis bshad la/ 'di'i ming ni thigs phran zhes bya ste/ mgo bo'i cha'i rtsa phran rnams su thigs pa phra mos nang du 'jug par nus pa'i phyir/ til mar 'di la thigs phran gyi til mar zhes don dang ldan pa'i ming btags pa yin no/ /sna nas gtang ba'i sman bsten pas/ /phrag pa mgrin pa dpung mgo ni/ /mkhregs shing mtho la pags mdog gsal/ /dbang brtan skra dkar med par 'gyur/ /zhes bya ba la/ de ltar bstan pa'i sna nas gtang ba'i sman bsten cing goms par byas pas ni/ skyes bu de phrag pa dang / mgrin pa dang dpung mgo mtho zhing sra la mkhregs par 'gyur ba dang / pags pa'i mdog gsal zhing dngas par 'gyur ba dang / de bzhin du mig la sogs pa'i dbang po brtan zhing yul 'dzin par nus pa dang / skra dkar med cing rgas sra ba nyid du 'gyur ba kho na yin no/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u nyi shu pa'i rnam par 'grel pa'o// //de nas sman gyi dud pa gtang ba'i cho ga'i le'u bshad par bya'o/ /zhes bya ba la/ 'di brtsams pa'i 'grel pa ni 'di yin te/ sngar bshad pa'i sman sna nas gtang ba'i rjes la/ dud pa brngubs te/ mkhur ba bkang nas dbo bar bya'o/ /zhes sngar bshad pas na/ dud pa de'i cho ga 'di dang 'di ltar bya'o zhes bya ba'i tshul gyis le'u bshad pa yin no/ /nam tshong yan chad bad rlung las/ /byung ba'i nad rnams mi skye dang / /skyes pa rnams ni bsal ba'i phyir/ /mkhas pas rtag tu dud pa brngub/ /ces bya ba la/ nam tshong yan chad kyi bad kan las byung ba'i nad dang / rlung las byung ba'i nad dang / de bzhin du bad kan dang rlung las byung ba'i nad rnams mi 'byung ba'i phyir dang / de bzhin du skyes shing byung ba rnams bsal zhing gzhom bar bya ba'i phyir skyes bu mkhas pa bdag la phan par 'dod pas rtag par dus thams cad du dud pa'i sman brngub cing btung bar bya'o/ /de ni 'jam dang bar ma rno/ /rlung dang bad rlung bad kan la/ /zhes bya ba la/ dud pa de ni 'jam pa dang bar ma dang / rno ba'i dbye bas rnam pa gsum yod do/ /de las 'jam zhing snum pa ni/ bad kan cung zad dang ldan pa'i rlung nad la gtang bar bya'o/ /bar pa ni rlung dang bad kan 'dres pa'i cha mnyam pa la gtang bar bya'o/ /rnon po ni bad kan la gtang bar bya'o/ /de la 'jam pa ni brtas par byed pa dang / snum pa dang / 'jam pa zhes bya ba rnam grangs yin no/ /bar ma ni zhi bar byed pa dang / sbyor ba can zhes bya ba rnam grangs yin no/ /rno ba ni sbyor ba dang bkru ba zhes bya ba rnam grangs yin no/ /gtang ngo mkhris khrag gis nyen dang / / khrus btang dmu rdzing za khu dang / /rab rib sbos dang stod rlung nad/ /lkog nad mas gtong byas pa dang / /nya dang chang dang 'o ma zho/ /sbrang rtsi mar dang dug 'thungs sogs/ /mgo nad skya rbab nad can ni/ /mtshan gnyid ma log la mi gtang / /zhes bya ba la/ dud pa de ni mkhris pa dang khrag gi nad kyis nyen pa dang / bkru sman btang ba la sogs pa la gtang bar mi bya'o/ /stod kyi rlung nad ni ro stod kyi rlung nad do/ /lkog nad ni lkog ma 'gags pa la sogs pa'o/ /nya dang chang 'thungs pa la sogs pa mtshan mo gnyid kyis ma log pa la du ba'i sman gtang bar mi bya'o/ /gal te dud pa cher brngubs na/ /khrag dang mkhris 'phel 'on long dang / /skom dang brgyal dang rmongs par byed/ /der ni bsil ba'i cho ga phan/ /zhes bya ba la/ dud pa gsum po dus ma yin par brngubs pa dang / bkag pa'i gnas la brngubs pa dang / sbyor ba nongs pas brngubs pa dang / /cher brngubs shing lhag par brngubs pa ni/ khrag dang mkhris pa 'phel bar 'gyur ba dang / de bzhin du 'on ba ste rna ba'i dbang po la gnod par 'gyur ba dang / mig long zhing mthong ba nyams pa dang / skom pa dang / de bzhin du brgyal zhing 'bog pa dang / rmongs shing myos par byed do/ /khrag dang mkhris pa 'phel ba la sogs pa der ni bsil ba'i cho ga ste/ sman kha nas btang ba dang / mig bsku ba dang / mig sman dang / chus gtor ba dang / zas dang skom pa'i cho ga thams cad bsil bar byas pas phan no/ /bkres sbrid glal dang bshang gci bsal/ /bud med bsten dang gtar ga btab/ /dgod dang so shing bcas pa yi/ /mthar ni dud pa 'jam po gtang / /zhes bya ba la sogs pa brgyad kyi mthar/ dud pa 'jam po rngub cing gtang bar bya'o/ /dus 'di dag nas mtshan zas zos/ /sna sman rjes la bar ma brngub/ /ces bya ba la/ dus brgyad po 'di dag nyid kyi tshe dang mtshan mo'i mtha' dang zas zos pa'i mtha' dang / sna sman btang ba'i rjes la dud pa bar ma brngub tu rung ste/ dud pa 'jam po gtang ba'i dus brgyad dang mtshan mo'i mtha' la sogs par du ba brngub par bya'o/ /gnyid log sna sman mig sman khrus/ /slon pa'i rjes la rnon pos bkru/ /zhes bya ba la/ gnyid log pa la sogs pa'i rjes la sman rnon pos mgo bo bkrus pa'i dud pa brngub par bya'o/ /mas gtong gce'u 'drar byas pa yi/ /dud gce'u sbubs gsum drang por bya/ /rtsa ba mtheb shong rtse mo ni/ /rgya shug shong ba'i tshad du bya/ /zhes bya ba la/ du ba brngub ba'i gce'u ni/ mas gtong ba'i gce'u'i rgyu dang 'dra bar bya la/ de bzhin du sbubs gsum po ste/ nang gi khong sbubs dang kha gsum par bya ba dang / drang zhing ya yo med par bya ba dang / de bzhin du rtsa ba'i sbom mthe bo shong ba tsam bya ba dang / rtse mo'i bu ga rgya shug gi 'bras bu shong bar bya'o/ /de yi tshad ni rngub byed pa'i/ /sor ni nyi shu sum cu gnyis/ / bzhi bcu rno dang bar ma dang / /'jam po la ni rim bzhin bya/ /zhes bya ba la/ rnon po la sogs pa'i du ba gsum la/ de'i gce'u'i tshad ni rim pa bzhin/ du ba rnon po gtong ba la rngub par byed pa'i nad pa'i sor nyi shu rtsa bzhi bya'o/ /bar ma la sogs sum cu rtsa gnyis so/ /'jam po la ni rim bzhin bya/ de ltar gce'u ring pos ni thag ring po nas 'jug pa'i gce'u'i sbubs nas/ phra mo rim gyis gzhug pas khyab cing bde bar byed par 'gyur ro/ /drang por 'dug cing de la sems/ /kha gdangs nas ni lan gsum brngub/ /sna khung re re bkag nas ni/ /snar ni dud pa brngub par bya/ /zhes bya ba la/ dud pa gtong ba'i tshe drang por 'dug cing / ma yo bar gnas par bya ba dang / de bzhin du de la sems pa ste/ dud pa brngub pa la sogs pa la ma yengs pa dang / de bzhin du kha gdangs shing mchu dang so phye nas du ba lan gsum brngub cing btang la/ sna khung ya gcig bkag nas sna khung gcig nas dud pa brngub pa'o/ /de bzhin du sna khung gnyis re re nas bkag cing lan gsum brngub par bya'o/ /mgo dang snar gtogs nad bskyod pa/ / dang por sna nas brngub par bya/ /bskyod pa'i don du kha nas brngub/ /gre bar gtogs pa de las bzlog /ces bya ba la/ mgo dang snar gtogs pa'i nad bskyod cing bsdus la/ rang nyid bskyod pa'i nad la ni/ dang por te thog mar sna nas brngubs la/ phyis kha nas brngub par bya'o/ /gre ba'i nad la ni de las bzlog pa'i tshul gyis brngub par bya ste/ gre ba'i nad bskyod cing glongs pa la ni dang por kha nas dud pa brngubs la/ phyis sna nas brngub par bya'o/ /gre ba'i nad ma bskyod cing ma bsdus pa ni/ de bskyod par bya ba'i phyir dang po sna nas dud pa brngubs la/ phyis kha nas brngub par bya'o/ /du ba kha nyid nas slon gyi/ /snar slon mig la gnod par byed/ /ces bya ba la/ sna nas brngub pa'i dud pa dang / kha nas brngub pa'i dud pa ni gnyi ga yang kha nyid nas slon phyir gdon par bya'i mig la 'jigs pa yod pa'i phyir sna nas slon par mi bya'o/ /dud pa brngub dang 'byin pa yis/ /lan ni gsum gsum brngub par bya/ /zhes bya ba la/ du ba brngub pa ni lan gsum gsum brngub pa dang / 'byin pa'i tshul gyis brngub par bya'o/ /'jam po nyin gcig lan cig gtang / /bar ma lan gnyis sbyor ba ni/ / lan gsum lan bzhi gtang bar bya/ /zhes bya ba la/ du ba 'jam po ni nyi ma rangs pa la rang gi gtang bar bya ba'i nad rnams la lan cig gtang bar bya'o/ /de bzhin du sbyor ba'i dud ba rnon po ni nyin gcig la rang gi gtang bar bya ba'i nad rnams la lan gsum mam bzhi gtang bar bya'o/ /der sman gu gul a ka ru/ /gla sgrang rdo dreg s+tho ne ya/ /spang spos u shir ba la ka /shing tsha ko na ti shing mngar dang / /bil rkang e la ba lu ka /pog dkar shi ri pe sta ka /bya ma ka gla ba sbra tshil/ /pog nag gur gum ma sha dang / /kun tu ru dang nas dang til/ /snum bcas 'bras bu snying po dang / /tshil dang rkang dang zhag dang mar/ /zhes bya ba la/ de la sman gyi du ba gsum po de dag gi nang nas du ba 'jam po'i sman 'phrod ni/ gu gul nas mar gyi bar yin no/ /rdo dreg ni shel la yang ste/ pha bong gi drag pa'o/ /yang na brag zhun la bya'o/ /s+tho ne ya ni te la pa to ka'o/ /spang spos ni na la ka'o/ /kon ti ni ta re nu ka'o/ /bil ba'i rkang ni bil ba'i nang ngo / /e la ba lu ka ni hi ri ba lu ka'o/ /shi ri be+e tsusta ka ni shi ri be+e sta ka ste/ thang shing gi thang chu'o/ /pog dkar po ni sardza ra sa'o/ / bya ma ka ni da ba d+hag d+ha'o/ /gla ba ni man bya ma'o/ /pog nag po ni sa la ki'o/ /ma sha ni mon sran gre'u'o/ /snum dang bcas pa'i 'bras bu ni star ga'i 'bras bu la sogs pa'o/ /de bzhin du snying po ni shing sA la dang / a ka ru dang / thang shing dang / shing sha pa la sogs pa'i snying po'i khu ba'i snum mo/ /yang de bzhin du tshil dang rkang dang zhag dang mar dang sbyar ba las dud pa'i sman bya'o/ /zhi ba pog nag rgya skyegs dang / /rgun 'brum pad+ma ut+pa la/ /n+ya gro d+ha dang a shwad+tha/ /u dum+bAr blag sha dang / /seng phrom shun pa ka ra dang / / shing mngar klu shing shug pa btsod/ /dri las rgya spos ru rta bskol/ /zhes bya ba la/ zhi bar byed pa'i du ba'i sman ni pog nag po dang / rgya skyegs la sogs pa la bya ste/ n+ya gro d+ha la sogs pa shing lnga'i shun lpags las sbyar ro/ /klu shing gi shun lpags ni nA ga ge sar gyi shing gi shun pa'o/ /shug pa ni he ma pad+ma kha'o/ /btsod ni man dzi ta'o/ /dri'i rdzas rnams las rgya spos dang / ru rta bskol ba ma gtogs par byas pa'i dri'i rdzas thams cad do/ /rnon po dzo ti sma ti dang / /skyer pa dang ni rtsa ba bcu/ /ldong ros ba bla rgya skyegs dang / /gi ri gar dkar 'bras bu gsum/ /dri yi sman la ro rno ba'i/ /mgo bo'i bkru sman sde tshan no/ /zhes bya ba la/ du ba'i sman rnon po la/ dzo ti la sogs pa'i sman rnams yin te/ dzo ti sma ti ni grang gu ni ka'o/ /rtsa ba bcu ni rtsa ba lnga pa che chung gnyis so/ /dri'i sman ro rno ba ni ru rta la sogs pa'i dri rno ba'i rdzas so/ /mgo bo'i bkru sman gyi sde ni u shi ra dang / a pa marga dang / tsha ba gsum la sogs pa'i sman sngar sman gyi sde tshan du bshad pa'o/ /de dag zhag gcig chur sbangs la/ /du ba'i sman rnams btags nas ni/ /thur ma sor ni bcu gnyis la/ /lan lnga'i bar du byug par bya/ /gdar bu mthe bo tsam sbom la/ /nas kyi dbyibs dang 'dra bar bya/ /zhes bya ba la/ sman de dag sbyar ba ni/ de dag nyid zhag gcig chur bcug ste sbangs la/ du ba'i sman rnams chu thags su legs par btags la 'dam bu la sogs pa'i thur ma sor bcu gnyis pa la zho gnyis gnyis tsam gyi lde gus lan lnga'i bar du byug par bya ste/ de yang grib ma la skam zhing lan lnga'i bar du byugs la/ gdar bu de sbom mthe bo tsam du gyur gyi bar du bsnan cing / de bzhin du nas kyi dbyibs dang 'dra bar gyur par bya'o/ /grib mar skam zhing khong stong med/ /snum gyis ji bzhin bskus byas la/ /brngub phyir me yis bsregs nas ni/ /du ba'i gce'u dang sbyar bya/ /zhes bya ba la/ gdar bu de ltar grib ma la bskams pa ste khong stong med par byas la/ snum gang ji ltar 'phrod pa mar la sogs pas ji lta ba bzhin du bskus la/ dud pa brngub pa'i phyir mes bsregs la/ du ba'i gce'u'i sbu gu dang sbyar bar bya'o/ /kham phor kha sbyar bu gar ni/ /gce'u sor bcu'am sor brgyad pa/ / bcug nas kha nas dud pa ni/ /lud pa can gyis brngub par bya/ /zhes bya ba la/ kham phor sbyar ma ni/ kham phor gnyis kha sbyar ba ste/ de la bu ga der 'od ma la sogs pa'i gce'u sor brgyad pa'am/ sor bcu pa bcug la lud pa can gyi skyes bus brngub par bya'o/ /'di skad ston te/ lud pa 'joms par byed pa'i sman gyi phye ma'am/ ri lu me mdag du ba med pa rgyun ring ba 'bar bzhin pa lta bur kham phor legs par bzhag pa bkang la/ kham phor gnyis pa zhabs su bu ga zlum po btod pas bkab la/ der gce'u btsugs te/ kha nyid du du ba brngub par bya la/ de brang du phyin pa dang / kha nas slar bton cing slon par bya'o/ /du ba zhi na yang / sman bcug cing brdungs la/ nad de byang ba la lus yang bar 'gyur gyi bar du gtang ngo / /dud pa brngubs la lud pa dbugs mi bde/ / skad 'gags rnag dang dri mi zhim gdong skya/ /skra skyon rna mig 'dzag g.ya' rmongs bag dang / /snyom dang skyigs bu cham pa'i nad mi 'byung / /zhes bya ba la/ skyes bu dud pa brngub pa'i cho ga la brten par byed pa la/ lud pa dang dbugs mi bde ba la sogs pa'i nad rnams 'byung bar mi 'gyur ro/ /rnag ni sna nas 'dzag pa'o/ /dri mi zhim pa ni kha nas so/ /skya ba ni gdong skya zhing khye ma chags pa'o/ /skra'i skyon ni spyi ther dang / mdog 'gyur ba la sogs pa'o/ /'dzag pa ni gsum char dang sbyar bar bya ste/ rna ba nas 'dzag pa dang / mig nas 'dzag pa dang / kha nas 'dzag pa'o/ /snyom pa ni gnyid kyis myos pa ltar yul 'dzin mi nus pa'o/ /gzhan dag ni grags par zad do/ /nad de dag 'byung bar mi 'gyur ba'o/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u nyi shu rtsa gcig pa'i rnam par 'grel pa'o// //de nas sman gyi khu bas mkhur ba dgang ba la sogs pa'i cho ga'i le'u bshad par bya'o/ / zhes bya ba la/ 'di brtsams pa'i dgos pa ni sna nas btang ba'i rjes la/ thog mar dud pa brngub par bya la/ de'i 'og tu chu dron gyis mkhur ba bkang bar bya'o zhes bshad pa yin pas na/ de gnyis kyi 'og tu 'di brtsams pa yin no/ /sman gyi khu bas mkhur ba bkang ba ni kha bkang ba ste/ de la sogs pa gang yin pa ni/ mkhur ba bkang ba la sogs pa zhes sman mur ba dang / gdong bkru ba dang / spyi bor snum gyis byug pa dang / rna ba bkang ba bsdu'o/ /de rnams kyi cho ga ni 'di ltar bya'o zhes bya ba'i tshul te/ de la le'u bshad par bya'o zhes pa'o/ /mkhur bkang rnam pa bzhi yin te/ /snum dang zhi byed sbyong rma 'tsho ba/ /ces bya ba la/ sman gyi khu bas mkhur ba bkang ba ni rnam pa bzhi yin te/ snum zhing 'jam pa dang / zhi bar byed pa dang / sbyong zhing 'khru bar byed pa dang / rma 'tshob par byed pa'o/ /de dag gi ming ni rnam grangs gzhan du na 'joms par byed pa dang / rtse 'jil bar byed pa dang / dag cing gsal bar byed pa dang / 'byor par byed pa zhes bya'o/ /de las gsum ni rlung la sogs/ /gsum gtang tha ma rma la phan/ /zhes bya ba la/ mkhur ba bkang ba bzhin nang nas dang po'i mkhur ba bkang ba gsum ni rlung dang mkhris pa dang bad kan gyi nad la rim bzhin du gtang bar bya ste/ snum gyi sman gyi khu bas mkhur ba bkang ba ni/ rlung la gtang bar bya'o/ /zhi bar byed pa'i sman gyi khu ba ni mkhris pa la gtang bar bya'o/ /sbyong bar byed pa'i sman gyi khu ba ni bad kan la gtang bar bya'o/ /tha ma'i sman khus kha bkang la/ rma 'tsho ba zhes bya ba'i rma la phan pa yin te/ kha'i nang na gnas pa'i rma'i nad sel bar byed do/ /'dir sman mngar skyur lan tshwa dang / / tsha dang snum ni bskol ba yin/ /zhi byed kha bska mngar sman bskol/ /sbyang ba kha dang tsha dang skyur/ /rma 'tsho byed pa kha ba dang / /bska ba'i sman ni bskol bar bya/ /zhes bya ba la/ 'dir mkhur ba bkang ba ni/ sman mngar ba dang / skyur ba dang / lan tsha dang / tsha ba rnams snum dang bskol zhing btsos pa'o/ /zhi bar byed pa'i mkhur ba bkang ba ni sman kha ba dang / bska ba dang / mngar ba bskol ba'i khu ba'am lde gu gtang bar bya'o/ /sbyong ba'i mkhur ba bkang ba ni/ sman kha ba dang / tsha ba dang skyur ba bskol ba'am/ lde gu gtang bar bya'o/ /rma 'tsho ba'i mkhur ba bkang ba ni sman kha ba dang bska ba rnams bskol ba'am/ lde gus bya'o/ /de la snum dang 'o ma dang / /sbrang rtsi chu dang tshwa dang chang / /ba gcin 'bru yi khu ba rnams/ /sman ni ji lta ji lta dang / /lde gur byas pa'am bskol ba ni/ / ji tsam bzod pa rnam par sbyar/ /zhes bya ba la/ 'di dag ni sman khus mkhur ba bkang ba spyi'i cho ga yin te/ de las kyang snum zhes bya ba sha khu dang til gyi lde gu'i chu dang 'o ma ni snum gyis mkhur ba bkang ba yin no/ /sbrang rtsi dang chu dang 'o ma dang mar ni zhi bar byed pa'i mkhur ba bkang ba yin no/ /tshwa dang chang dang 'bru'i khu ba skyur po ni/ sbyong ba'i mkhur ba bkang ba yin no/ /sbrang rtsi'i chu dang 'o ma ni rma 'tshob ba'i mkhur ba bkang ba yin no/ /ji lta ji lta ba zhes bya ba ni/ sngar bshad pa'i sman gyi lde gu dang sbyar ba'am/ yang na bskol ba'am/ ci tsam bzod pa rnam par sbyar bar bya ste/ de la rlung la ni dron po'o/ /mkhris pa la ni grang mo'o/ /bad kan la ni rab tu tsha ba'o/ /so brtse so ni 'gul ba dang / /rlung las gyur pa'i kha nad la/ /dro 'jam tsam mam bsil ba yi/ /til chus mkhur ba bkang ba phan/ /zhes bya ba la/ til gyi lde gu dang bsres pa'i chu ni til gyi lde gu'i chu ste/ de dro 'jam tsam mam bsil bas mkhur ba bkang ba ni/ so brtse ba dang so 'gul ba'i nad 'og nas bshad pa dag dang / kha'i nad rlung las gyur cing rlung shas che ba la phan pa yin no/ /rtag tu mkhur ba bkang ste 'jog /til mar dag gam sha khu bsngags/ /zhes bya ba la/ 'di ni bsdus pa las byung ba yin te/ rtag tu zhes bya ba dus thams cad du nad med par gnas pa'i skabs su mkhur ba bkang ste 'jog pa'i sman du til mar sha khu bsngags shing phan pa yin no/ /kha drod che tsha tshos pa dang / /'phral du rma ni byung ba dang / /dug dang thal sman mes tshig la/ /zhun mar dag gam 'o mas dgang / /zhes bya ba la/ kha'i nad smin cing tshos pa la drod che zhing tsha ba dang ldan pa dang / de bzhin du kha'i rma 'phral du byung zhing glo bur gyis thebs pa dang / de bzhin du khar dug gis phog pa dang / de bzhin du thal sman rnon po dang / me de dag gis tshig par gyur pa la/ zhun mar ram 'o mas mkhur ba bkang la gzhag par bya'o/ /sbrang rtsi mkhur bkang byas pas ni/ /kha yi dri ma sbyong byed cing / /kha yi rma ni 'tsho ba byed yin/ /kha tsha skom dad rab zhi byed/ /ces bya ba la/ sbrang rtsis mkhur ba bkang bas ni/ kha'i dri ma sbyong zhing dag par byed pa dang / de bzhin du kha'i nang gi rma 'tshob par byed cing 'byor bar byed pa dang / de bzhin du kha tsha ba dang skom dad rab tu zhi bar byed pa'o/ /ro mi tshor dang dri ma che/ /kha mnam 'bras rtsabs bkang bas sel/ /zhes bya ba la/ 'bras kyi rtsab mo ni 'bras bu rang skyur kan dzi zhes bya ba ste/ des kha bkang ba 'jog pas dri mi zhim pa mnam pa dang / dri ma dang ljan ljin gyis gos pa dang / ro mi tshor zhing mi gsal ba sel bar byed pa yin no/ /de nyid cung zad tsha bcas bsil/ /kha skams sel ba'i dam pa yin/ /zhes bya ba la/ 'bras bu'i rang rtsabs de nyid cung zad tsha dang bcas shing bsil ba kha skams pa sel ba'i dam pa'am mchog yin no/ /thal sman rnon khus mkhur bkang ba/ /bad kan sogs pa myur du sel/ /zhes bya ba la/ thal sman rnon po'i chu ni thal sman rnon po sbangs pa'i dngas ma ste/ / des kha bkang nas 'jog pas ni/ bad kan sogs shing sdud pa myur zhing rings par sel bar byed do/ /chu tshan dro 'jam mkhur bkang bas/ /kha ni yang zhing bde bar byed/ /ces bya ba la/ chu tshan dro 'jam ran pa tsam gyis mkhur ba bkang ba 'jog pas ni/ kha yang zhing bde bar byed de/ rlung dang bad kan sel zhing sbyor bar byed do zhes bya ba'i don no/ /rlung med nyi tshan bcas par ni/ /phrag pa mjing par dugs byas mnye/ /mkhur ba bkang nas gdong pa ni/ /cung zad bteg ste ji srid na/ /bad kan gyis ni kha gang ba'ang / /sna mig 'dzag pa'i bar du gzhag /ces bya ba la/ mkhur ba bkang ba gtang ba na/ rlung med cing ser bus ma phog pa nyi tshan nam me dang bcas pa'i gnas su 'dug la/ phrag pa dang mjing pa mnyes shing dugs byas la/ mkhur ba bkang nas gdong pa cung zad bteg ste/ ji srid cig na bad kan gyi mchil snabs kyis gang bar gyur pa'am/ sna nas snabs 'dzag par gyur gyi bar du gzhag par bya ste/ don de ni ji srid mkhur ba bkang ba legs pa'i mtshan ma du ba brngubs pa dang 'dra ba 'byung bar gyur gyi bar du lan lnga'am bdun gyi bar bya'o/ /de'i mtshan nyid ni bsdus pa las rang gi don gyi bya ba byed pa dang / mi byed pa las shes par bya ba ston to/ /ro mi tshor ba dang / yi ga 'chus pa dang / mchil snabs mang ba dang / khar chags pa las ni sbyor ba nyes par bya'o/ /kha skam pa dang kha'i nang tshos shing smin pa dang / rmya ba dang / yi ga 'chus pa dang / snying 'dzag pa dang / skad gdangs nyams pa las ni mkhur ba'i sbyor ba drags par bya'o/ /zhes bshad do/ /de rnams kyi gso ba yang rang rang gi ji lta ba bzhin du bya'o/ /kha bkang mi sbo bzhag mkhur bkang / /gzhan du khar brngub par 'gyur ro/ /zhes bya ba la/ kha'i nang snum dang 'o ma bskol ba la sogs pas yongs su bkang nas g.yas g.yon du mi sbo bar bzhag pa de ni mkhur ba bkang ba zhes bya la/ gzhan du khar brngub pa zhes bya ste/ sman bskol bas kha cung zad ma gang bar bkang la/ mkhur ba dang lkog ma spo zhing dkrugs pa ni/ khar brngub pa'am 'gram pa spo ba'i khyad par yin no/ /khar brngubs pa yis khyad par gso ba ni/ /gnye'u rengs mgo mig rna nad kha nad dang / /mchil mang gre nad snying ga sra ba dang / /snying 'phar snyom dang cham pa yi ga 'chus/ /zhes bya ba la/ mkhur ba bkang ba'i dbye ba khar brngub pa zhe'am/ mkhur ba spo ba zhes bya bas khyad par du gso zhing dpyad du bya ba'i nad ni gnye'u rengs la/ sogs pa yin te/ des de gso bar nus pa yin no/ /de la gnye'u rengs ni nad kyis tshigs chu ba gnyis rengs pa la bya'o/ /gzhan dag ni go bar zad do/ /myur ba'am gzhibs pa'i cho ga ni/ /mkhur bkang bshad pa'i sman rnams kyi/ /lde gu sman khu phye ma ste/ /khar mur bya ba rnam gsum yin/ /de ni bad kan nad la gtang / /zhes bya ba la/ mur bar bya ba ni gsum ste/ lde gu dang sman khu dang phye ma'o/ /de la lde gu ni sman rlon pa btags pa'i zhib mo byas pa la bya'o/ /sman khu ni lde gu'i sman rlon pa de dag rtsom pa dang lde gu ska mo byas pa bldag par bya ba lta bu'i khu ba'i sbyor ba la bya'o/ /phye ma ni skam po nyid btags pa'o/ /de gsum char yang bad kan gyi nad mchil ma mang ba dang / skyug ldang byed pa dang / lkog ma'i nad la sogs pa la ci rigs par gtang bar bya'o/ /gang gis shes she na mkhur ba bkang ba bshad pa'i sman las de dag sbyar bar bya'o/ /gdong bskus gsum ste nad sel dang / /dug sel kha dog bzang byed pa'o/ /zhes bya ba la/ gdong bsku ba ni rnam pa gsum ste/ nad sel zhes bya ba rlung dang mkhris pa dang / bad kan gyi nad 'joms par byed pa dang / dug sel ba zhes bya ba dug 'joms pa dang kha dog bzang bar byed pa ste/ mdog mdzes par byed pa'o/ /de drod bad kan rlung la bsngags/ /lhag ma la ni rab bsil ba/ /zhes bya ba la/ gdong bsku ba de la dro ba'i rlung dang bad kan gyi nad la bsngags pa yin no/ /rlung dang bad kan zhes smos pa ni/ spyi dang khyad par dag yin par shes par bya ste/ des na rlung dang bad kan so so la yang dro bar bya la/ rlung dang bad kan 'dres pa la yang dro ba nyid bya'o/ /de las lhag ma mkhris pa sel ba dang / dug sel ba dang / kha dog bzang bar byed pa gsum la ni/ gdong bsku ba shin tu bsil ba bsngags pa yin no/ /de yi tshad dpangs sor bzhi cha/ /sum cha phyed de rnam pa gsum/ /zhes bya ba la/ gdong bsku ba de'i tshad ni rnam pa gsum ste/ dpangs su sor gyi bzhi cha dang / sum cha dang / phyed do/ /de ltar na dpangs sam mthug sor bzhi cha'i chung tshad do/ /dpangs su sor gyi sum cha ni gdong bsku ba'i 'bring tshad do/ /dpangs su sor gyi phyed ni gdong bsku ba'i che tshad do/ /ma bskams bar du de gzhag gi/ /bskams na pags pa la gnod 'gyur/ /zhes bya ba la/ gdong bsku ba de ji srid ma bskams kyi bar du gzhag par bya'i/ bskams nas ni btang snyoms su mi gzhag ste/ gang gi phyir de bskams na pags pa la gnod cing ma rung bar byed do/ / de ni sbangs nas bkru bar bya/ /de yi rjes la bsku byug bya/ /zhes bya ba la/ gdong bskus pa de bskams ma thag sbangs la bkru zhing phyi bar bya'o/ /de'i rjes la ni mar la sogs pas bskus la dril bar bya'o/ /nyin par gnyid log mang smra khro/ /me tshan nyi tshan mya ngan spang / /zhes bya ba la/ gdong bsku ba byas nas nyin par gnyid log pa dang / kha don la sogs pa mang du smra ba dang / me tshan dang nyi tshan gyis gdungs pa dang / khros shing 'khrugs pa dang / mya ngan dang yid mi bde bar gyur pa spang zhing dor bar bya'o/ / de ni cham pa sna sman gtang / /ma zhu 'gram 'thams yi ga 'chus/ /mtshan gnyid ma log la mi gtang / /zhes bya ba la/ gdong bsku ba de cham pas btab pa dang / sna sman btang ba dang / zas ma zhu ba dang / 'gram pa 'thams pa'i rlung nad dang / mtshan mo gnyid kyis ma log pa dag la gtang du mi rung ngo / /de ni legs par spyad pa yis/ /dus min skra dkar po khabs dang / /gnyer ma rab rib mig sngo sel/ /zhes bya ba la/ gdong bsku ba de legs par spyad cing / phyin ci ma log par btang bas dus ma yin pa'i skra dkar byung ba la sogs pa 'joms shing sel bar byed do/ /dus ma yin pa'i skra dkar ni na tshong yod bzhin du skra dkar byung ba'o/ /rgya shug snying po ba sha'i rtsa/ /seng phrom yungs kar dkar po rnams/ /sing hi'i rtsa ba til nag dang / /skyer pa'i shun pa rme'u rnams/ /'jag rtsa tsan+dan ur shir/ /shing sha sha ta puSh+pa 'bras/ /ku mu da ut+pal ka la ha/ /dUr ba shing mngar tsan+dan rnams/ /ka li ya ka u shir ti/ /spang spos rgya spos shug pa rnams/ /da lis kun dra puN+Da rI/ /shing mngar rgya spos a ka ru/ /de ltar tshigs bcad phyed kyis bshad/ /bsku ba dgun stod sogs drug sbyar/ /zhes bya ba la/ de ltar rgya shug gi snying po la sogs pa bshad ma thag pa'i rnam pas tshigs bcad phyed kyis bshad pa'i sman gyis gdong bsku ba dgun stod la sogs pa'i dus drug po ste/ dgun stod dang / dgun smad dang / dpyid dang / so ga dang / dbyar dang / ston zhes bya ba'i dus rnams dang / rim bzhin du sbyar bar bya'o/ /rgya shug gi snying po ni rgya shug bar da'i tshi gu'o/ /ba sha'i rtsa ba ni ba sha ka'i rtsa ba'o/ /seng phrom ni drang srong dkar po'o/ /yungs kar dkar po ni dngos su zad de/ de rnams ni dgun stod kyi gdong bsku ba'i sman no/ /sing hi'i rtsa ba ni bri ha ti'i rtsa ba'o/ /til ni nag po las bya'i dkar po las mi bya'o/ /skyer pa'i shun pa dang rme'u ni sbun pa med pa'i nas so/ /gzhan dag ni dgun smad kyi gdong bsku ba'i sman no/ /gzhan dag la yang de bzhin du sbyar ro/ /'bras ni 'bras sA lu'o/ /ut+pal ni ut+pal sngon po'o/ /ka la ha ri ni gan d+ha so ma'o/ /da lis ni da lis kyi lo ma'o/ /kun dra ni ka pi khi ta pa ka tshul lo/ /puN+Da rI ni puN+Da rI ka'o/ /gdong bsku ba la goms pa rnams/ /mthong ba brtan par 'gyur ba dang / /gdong ni yongs su mi rnying la/ /'jam zhing pad+ma 'dra bar 'gyur/ /zhes bya ba la/ gdong bsku zhing byug pa la goms shing rtag tu bsten pa rnams ni mig gis mthong zhing blta ba brtan zhing mi nyams par 'gyur ba dang / gdong yongs su mi rnying la mdangs yal bar mi 'gyur ba dang / de bzhin du 'jam zhing rtsub bag med pa dang / pad+ma 'dra bar 'gyur ro/ / bsku dang blugs dang ras bal can/ /pags pas g.yogs dang rnam pa bzhi/ /de ni spyi bo'i til mar te/ /phyi bzhin du ni yon tan che/ /zhes bya ba la/ spyi bor til mar byugs pa la sogs pa dbye bas rnam pa bzhi yod do/ /bsku ba ni gdong bsku zhing byug pa'o/ /blugs pa ni steng nas blugs pa'o/ /ras bal can ni ras bal can sran khung ltar zlum po chung ngu byas te/ spyi bor glan pa'o/ /pags pas g.yogs pa ni 'di nyid kyi 'og nas bshad pa'o/ /de dag ni spyi bo'i til mar zhes bya ste/ phyi ma phyi ma bzhin du yon tan che ba yin no/ /de la bsku ba ni yon tan can yin no/ /de bas kyang blugs pa yon tan che ba yin no/ /de bas kyang ras bal can yon tan che ba yin no/ /thams cad las mgo bo pags pas dkri ba yon tan rab mchog tu che ba yin no/ / spyi bo'i til mar zhes bya ba ni nye bar mtshon pa tsam du zad do/ /de bas na zhun mar gyis bskus pa yang phyi ma bzhin du yon tan che bar shes par bya'o/ /de la byug pa rtsub pa dang / /g.ya' dang dri ma can la sbyar/ /zhes bya ba la/ byug pa la sogs pa rnams kyi nang nas byug pa ni lus rtsub pa la sogs pa la sbyar bar bya'o/ /blugs pa glog pa glad gzer dang / /tsha dang rma smin rnags la gtang / /zhes bya ba la/ snum blugs pa la sogs pa ni glog pa'i nad rnams la sbyar bar bya'o/ /ras bal snum can skra 'byi dang / gza' zhugs mig ni rengs la gtang / /zhes bya ba la/ ras bal snum can ni skra 'byi ba la sogs pa dang / de bzhin du mig rengs pa ste/ mig har har por 'dug cing 'dzums mi shes pa la sbyar bar bya'o/ /pags bcings mgo bo tshor ba med/ /kha yo gnyid ni yar ba dang / /kha dang sna skam rab rib dang / /mi bzad mgo nad dag la sbyar/ /zhes bya ba la/ pags pas g.yogs nas bcings pa ni mgo bo tshor ba med pa la sogs pa la sbyar bar bya'o/ /de yi cho ga 'dug pa la/ /khri'u pus mnyam 'jam pa la/ /lus bkrus bsku zhing dugs byas la/ /dgongs ka ba 'am ma he yi/ /pags pa mgo bo dang mnyam la/ /rgyar ni sor ni bcu gnyis pa/ /rna ba'i mthar thug bar bcing ba/ /dpral ba gos kyis dkris pa ni/ /gos sam lan bus bcings byas la/ /ma sha'i lde gus bsku bar bya/ /zhes bya ba la/ mgo bo pags pas g.yogs te/ bcing ba'i cho ga ni 'di ltar bya ba ste/ skyes bu 'dug par bya ba la/ mgo pags pas dkri bar bya'o/ /de yang ji lta bu la 'dug ce na/ /khri'u'i dpangs su pus mo dang mnyam pa rgyab rten 'jam zhing 'bol ba la/ dang po khrus byas nas de'i 'og tu bskus la dugs byas nas dgongs ka ste/ nyi ma nub pa'i tshe ba lang ngam ma he'i pags pa mtha' 'khor ba mnyam pa/ rgyar sor bcu gnyis pa rna ba'i mthar thug par bcings la/ de yang dpral ba gos kyis dkris shing lan bus kyang bcings la/ yang sran ma sha'i lde gus bsku zhing byug par bya'o/ /de nas nad dmigs ci 'dra la/ /snum bskol ba ni dro 'jam tsam/ /de ni spyi bo man chad nas/ /skra drung sor gcig nub tsam blugs/ /kha dang sna ma tshul phyin par gzhag / de ni rlung sogs nad rnams la/ /stong phrag bcu dang brgyad drug gzhag /nad med pa la stong phrag gcig /mar bsal phrag pa la sogs mnye/ /de ltar zhag bdun blugs par bya/ /zhes bya ba la/ de nas mgo bo pags pas g.yogs pa'i 'og tu nad dmigs kyi rnam pa ci 'dra ba dang sbyar la/ snum bzhi po las ci rigs par bskol ba dro 'jam ste/ cung zad dro ba de ni spyi bo man chad nas skra drung gi bar du sor gcig tsam nub pa'i tshad tsam gyi bar du blugs par bya'o/ /yang snum de bzhag pa'i tshad ni/ kha'i nad dang sna'i mtshul par phyin cing gsher 'dzag pa'i bar du gzhag par bya'o/ /yang snum de rlung las gyur pa'i nad rnams la se gol bskor zhing gtogs pa'i tshad stong phrag bcu ste/ khri'i bar du gzhag par bya'o/ /mkhris pa las gyur pa la ni brgyad stong gi bar du gzhag par bya'o/ /bad kan gyi nad la ni drug stong gi bar du gzhag par bya'o/ /nad med cing tha mal par gnas pa la ni stong phrag gcig gi bar du gzhag par bya'o/ /de nas de'i 'og tu mar zags su bcug la/ phrag pa la sogs pa mnye bar bya ste/ phrag pa dang mgo bo dang gnya' ba dang ltag pa dang / dpral ba la sogs pa dal bus mnye bar bya'o/ /de ltar snum gyi dam pa ste zhag bdun gyi bar du blugs par bya'o/ /rna bar bkang bar blugs te gzhag /rna ba'i rtsa ba mnye bar bya/ /nad rtse zhil kyi bar bya zhing / /rna ba se gol brgya par gzhag / ces bya ba la/ rna ba na bar gyur pa la ni snum rna ba gang bar blugs la bzhag nas/ rna ba'i rtsa ba mnye bar bya ste/ de yang se gol grangs brgya'i bar du gzhag par bya zhing / nad de rtse zhil gyi bar du rna ba bkang ba'i snum bya'o/ /pus mo g.yas pa'i lha nga ni/ /lag rtses bskor ba'i bar dag dang / /mig 'byed 'dzums dang mnyam pa yi/ /yun ni grangs kyi tshad du bshad/ /ces bya ba la/ grangs su gzung ba'i tshad ni/ pus mo g.yas pa'i lha nga lag pa'i sor mo'i rtse mos kun nas bskor ba'i bar dang / de bzhin du mig gnyis 'byed pa dang 'dzums pa'i dus dang mnyam pa'i dus kyi yun ni/ grangs kyi tshad yin par mkhas pa rnams kyis bshad do/ /spyi bor til mar sbyar ba bskus pas ni/ /skra dkar dmar ser skra 'byi gza' zhugs dang / / mgo bo'i rlung nad sel zhing dbang po gsal/ /skad gdangs 'gram pa mgo bo'i stobs skyed byed/ /ces bya ba la/ til mar spyi bor blugs shing bskus pas ni/ skra dkar ba dang / skra dmar ser du 'dug pa dang / skra 'byi ba dang / gza' zhugs shing skra kha gyes pa dang / mgo bo'i rlung gi nad sel zhing 'joms par 'gyur ro/ /de bzhin du mig la sogs pa'i dbang po rnams gsal zhing rang gi yul 'dzin par nus pa dang / de bzhin du skad gdangs dang / 'gram pa dang / mgo bo'i stobs skyed cing 'phel bar byed pa yin no/ /yan lag brgyad pa'i snying po bsdus pa'i rnam par 'grel pa tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u nyi shu gnyis pa'i rnam par 'grel pa'o// //de nas sman gyi thigs pa mig tu blugs pa dang / sman gyis mig bsku ba'i cho ga'i le'u bshad par bya'o/ /zhes bya ba la/ 'di brtsams pa'i 'grel pa ni 'di yin te/ /gang gi phyir bshad ma thag pa'i spyi bo'i til mar gyis ni dbang po rnams gsal bar byed par bshad la/ dbang po thams cad kyi nang nas dbang po'i gtso bo ni mig yin pas/ de'i phyir de bsrung ba'i don du de'i 'og tu le'u 'di brtsams pa yin no/ /mig gi sman gyi thigs pa gang zhig blugs pas mig gi skyon kun 'dzag par 'gyur bas/ mig gi sman gyi thigs pa mig la bsku ba zhes bya ba ste/ de'i 'og tu cho ga ni 'di ltar bya'o/ /zhes pa'i las kyi tshul te/ cho ga de bshad par bya'o/ /mig nad dag ni thams cad la/ /dang por sman thigs blugs pas ni/ /zug na g.ya' drud mchi ma 'dzag /mig tsha mig dmar rnams la phan/ /zhes bya ba la/ /mig gi nad ma lus pa thams cad la/ dang po thog ma kho nar mig sman thigs pa la sogs pa blugs nas/ mchi ma 'dzag cing khrus bya ba phan no/ /de yang mig rdol la thug pa ltar na ba dang / zug cing na ba la sogs pa sel bar byed pa yin no/ /de yang zug pa ni rgyun du gzer zhing na ba'o/ /na ba ni sna tshogs pa'i tshul gyis na ba'o/ / g.ya' ba ni mig shas cher g.ya' ba'o/ /drud pa ni mig mchu gnyis phan tshun reg pa na mig la drud pa snyam byed cing na ba'o/ /mchi ma 'dzag pa ni rgyun du mig chu 'dzag pa'o/ /tsha ba ni tsha 'ur 'ur bor byed pa'o/ /mig dmar ba ni mig dmar po sle sle bor 'dug pa ste/ 'di rnams la mig bkru ba'i sman blugs pas phan pa yin no/ /rlung la dron po bad dro 'jam/ /khrag mkhris la ni de bsil bsngags/ /zhes bya ba la/ mig sman gyi thigs pa de rlung gi nad la dron po ste/ dro ba'i bag tu byas pa phan no/ / bad kan gyi nad la ni dro 'jam ste/ cung zad dro ba phan pa yin no/ /khrag dang mkhris pa las gyur pa'i mig nad la ni/ sman gyi thigs pa bsil ba phan pa yin no/ /rlung med gnas su 'dug nas ni/ /lag pa g.yon pas mig phye la/ /nya phyis nang sbyar ras bal ni/ /bsnyad pa'i thigs pa blugs bya ba/ /sor gnyis tsam dpangs las mig grwa/ /thigs pa bcu 'am bcu gnyis blugs/ /zhes bya ba la/ skyes bus rlung med pa'i gnas su 'dug nas sman pa'i lag pa g.yon pas de'i mig legs par phye la lag pa g.yas pa nya phyis kyi nang du sman sbyar ba ras bal ye'u bsnyad pas/ cung zad 'phyang bar byas la thigs pa blugs par bya ba ni sor gnyis tsam gyi dpangs las mig grwa sna dang / nye ba'i mig gi zur nas thigs pa bcu'am bcu gnyis blugs par bya ste/ de las rnam pa gzhan du byas na mig dmar ba la sogs pa'i nad skyed par 'gyur ro/ /de nas gos 'jam dag gis phyi/ /rlung dang bad kan can dag la/ /gos 'jam gzhan ni chu dron la/ /sbangs pas dugs ni 'jam po bya/ /zhes bya ba la/ de ltar mig tu blugs pa'i rjes la/ gos 'jam zhing reg na bde bas mig phyi zhing sbyang bar bya'o/ de'i 'og tu gos 'jam pos phyi ba las gzhan pa dag chu dron la sbangs pas mig 'jam tsam du dugs bya'o/ /de yang chu dang bad kan dag la zhes bya ba rlung nad dang bad kan gyi nad yod pa la dugs bya'o/ /mkhris pa'am khrag can la ni/ de ltar dugs byar mi rung ste/ de gnyis la ni sbyang zhing phyi ba tsam bya'o/ /dugs mi bya'o/ /mig sman blugs pa rab tsha rnos/ /na zhing mig dmar rtul bar 'gyur/ /shin tu grang bas zug pa dang / /'dzums mi shes dang na bar 'gyur/ /drags pas mig mchu dmar dang drud/ /rtsub cing mig ni 'byed dkar 'gyur/ /shin tu chung bas nad dkyel skyed/ /ma pho bas ni thu bar byed/ /ces bya ba la/ mig tu sman gyi thigs pa blugs pa rab tu tsha ba dang / rnon pos blugs pas ni na zhing zug par 'gyur ba dang / mig dmar bar 'gyur ba dang / mig rtul zhing mi gsal bar 'gyur ro/ /gal te mig tu blugs pa'i sman shin tu bsil zhing grang ba blugs na/ mig gi nad rab tu zug cing rdol la thug pa snyam pa 'byung bar 'gyur ba dang / 'dzums mi shes shing rengs bag har har por gnas pa dang / na ba ste rgyun mi 'chad par zug cing na bar 'gyur ro/ /mig sman gyi thigs pa mang por blugs te drags pas ni mig mchu dmar zhing 'byar bag dang / rnyog ma can gyi mdog can du byed do/ /de bzhin du mig mchu phan tshun du drud pa dang / de bzhin du mig shin tu dbye dka' bar 'gyur ro/ /mig sman blugs pa shin tu chung zhing chung ngu ma phyin pas ni/ nad kyi dkyel skyed cing 'phel bar 'gyur gyi/ nad de zhi bar byed mi nus so/ /mig gi sman ma btsags shing gos kyi tshags las ma gton pa'am/ mig tu blugs pa slar ma pho bas ni/ slar thu bar byed cing mchi ma 'dzag pa dang / mig zug pa dang / mig rnyog pa can du 'gyur ro/ /bskus lags nad rtsa sna sul dang / /kha yi sbubs su sman gyis khyab/ /spyi bor gtogs pa'i nad kyi ni/ /dri ma dpyis ni 'byin par byed/ /ces bya ba la/ mig tu blugs pa'i sman legs par blugs na/ nad kyi rtsa rnams dang / sna'i sul rnams dang / kha'i sbubs na yod pa'i rtsa rnams su khyab cing phyin par 'gyur bas/ spyi bor gtogs shing mgo khyab par byed pa dri ma ste/ nad rnams sel zhing 'byin par byed do/ /bzlog par nus so zhes bya ba'i don to/ /de nas lus sbyang mig sman bsku/ /mig tsam la ni gnas gyur pa/ /cung zad skrangs dang shin tu g.ya'/ /rngu ma chags pas smin shes shing / /cung zad drud dmar mchi ma 'dzag /mig rngu stug la gtang bar bya/ /bad kan dang ni khrag mkhris dang / /mchog tu rlung gis gzir la bsku/ /zhes bya ba la/ de nas mig sman gyi thigs pa blugs pa'i 'og tu lus sbyangs shing skyug sman la sogs pas nad bsal nas/ mig sman gyis bsku ba ni mig tsam brten cing gnas par gyur pa'i nad gang yin pa de smin cing cung zad rnying par gyur pa'i mtshan ma 'byung ba'i mig sman bsku bar bya'o/ /smin pa de cung zad skrangs pa dang / de bzhin du shin tu g.ya' ba dang / mig gi rngu ma chags par gyur pa las smin pa yin par shes shing rtogs pa dang / de bzhin du cung zad drud pa snyam pa dang / dmar ba dang mchi ma 'dzag pa ste/ mig gang shas chung bar drud pa snyam byed cing mchi ma 'dzag pa dang / mig rngu stug cing che ba chags pa la mig bsku zhing byug par bya'o/ /yang de bzhin du bad kan dang khrag dang / mkhris pas nyen cing gnod pa'i mig nad la gtang bar bya'o/ /de bzhin du mchog gam khyad par du ni rlung nad kyis nyen pa dag la mig sman bsku zhing byug pa gtang bar bya'o/ /mig sman phyi dang rma gso dang / /gsal bar mthong ste rnam pa gsum/ /zhes bya ba la/ bsku zhing byug pa'i mig sman de yang rnam pa gsum ste/ gcig ni phyi zhing bsal ba'o/ /gnyis pa ni rma 'tshob cing gso ba'o/ /gsum pa ni mig gsal bar byed pa'o/ /de yang phyi ba ni ling tog la sogs pa'i mig nad kyi rigs mig gi mtshon spyad kyis phyi zhing bdar ba ltar byed pas na phyi ba'o/ /yang na mig sman shin tu rno bas nad kyi khams 'bru zhing 'byin pas na bsal ba zhes bya ba'o/ /rma gso ba ni gang gis 'tshob cing 'byor bar byed pas na rma gso ba'o/ /gsal bar mthong ba ni gsal zhing dri ma med par mthong bar byed do/ /de la byi ba'i mig sman ni/ / bska dang skyur dang tsha dang kha/ /rma gso sman ni kha ba ste/ /gsal sman mngar dang bsil ba yin/ /zhes bya ba la/ mig sman de rnams kyi nang nas/ phyi ba'i mig sman ni bska ba la sogs pa'i ro bzhi las sbyar ba'i mig sman ni/ ling tog dang sprin gyis g.yogs pa la sbyar ro/ /rma gso ba'i mig sman ni ro kha ba dag las sbyar te/ de ni mchi ma la sogs pa la gtang ngo / /mig gsal ba'i sman ni ro mngar ba dang bsil ba yin te/ de ni mig snad pa dang nad med par gnas pa'i skabs su gtang bar bya'o/ / thur ma sor bcu'i dbus phra la/ /rtse mo sri shing kha 'bus 'dra/ /phyi ba'i thur ma zangs kyi bsngags/ /rma gso lcags nag byas sor tsam/ /bzang po gsal bar byed pa ni/ /gser dang dngul las byas pa bsngags/ /zhes bya ba la/ mig sman bsku ba'i thur ma ni/ srid sor mo bcu'i tshad la dbus kyi phyogs phra ba/ rtse mo gnyis sri shing gi me tog kha 'bus pa 'dra bar cung zad sbom zhing / thur ma de phyi ba'i dpyad du ni zangs ma las byas pa bsngags so/ /rma gso ba'i thur ma ni lcags nag po las byas pa/ mdzub sor tsam gyi srid yod pa bzang zhing bsngags so/ /gsal bar byed pa'i mig sman bsku ba'i thur ma ni gser dang / dngul las byas pa bzang ba yin no/ /gdar bu khu ba phye mas te/ /mig sman rnam gsum nyid du brtag /de ni mig nad lci 'bring dang / /yang ba la ni rim bzhin sbyar/ /zhes bya ba la/ mig sman sbyar ba'i thabs ni rnam pa gsum kho na ste/ gdar bu dang khu ba dang phye ma'o/ /de la gsher gyis sbrus shing btags nas/ reng bur byas pa ni gdar bu zhes bya ba'i sgrar brjod de/ /khu ba ni sman khu bskol ba las skan ter gyur pa las byas pa'o/ /sman skam por btags pa'i mig sman ni phye ma'o zhes bya'o/ /mig sman de dag kyang snga ma bzhin du stobs che ba yin te/ de bas na nad shin tu stobs dang ldan pa la ni reng bu gtang bar bya'o/ /mig nad tshabs 'bring tsam la ni khu ba gtang bar bya'o/ /mig nad yang zhing stobs dang ldan pa la ni phye ma gtang bar bya'o/ /de ltar rim bzhin du sbyar bar bya'o/ /mtshan mo nyal dang nyi ma'i gung / /zos 'thungs nyi ma tsha ba yis/ /mig gi nad ni 'phel ba dang / /dkyel ni skye dang 'khrugs par 'gyur/ /de bas de zhi phyir na dgongs/ /nyi ma sprin bral dus su bsku/ /zhes bya ba la/ mtshan mo nyal bas nad 'phel zhing skye bar 'gyur ba dang / de bzhin du nyi ma'i gung la zas zos shing skom 'thungs pas dkyel skye zhing gyen du 'phel bar byed pa dang / de bzhin du nyi ma gung la yang / nyi ma tsha ba'i zer gyis mig nad myur du 'khrugs shing g.yo bar 'gyur te/ de bas na de zhi bar bya ba'i phyir te/ de nub mo'i nad kyi skyon zhi bar bya ba'i phyir/ nang par gtang bar bya la/ de bzhin du nyi ma gung gi skyon zos pa dang / 'thungs pa dang / nyi ma tsha bas dkyel skye zhing gnod pa dang 'khrugs par 'gyur ba'i nyes pa spang ba'i phyir dgongs ka bsku'o/ /yang na phyi 'phred kyi dus sprin dang bral zhing yul rmus pa med pa'i skabs su bsku'o/ /gzhan dag smra ba nyin par ni/ /mig sman rnon po gtang mi bya/ /bkrus pas nyam chung gyur pa'i mig /nyi mar bltas na gnod par 'gyur/ /zhes bya ba la/ yang slob dpon gzhan dag 'di skad zer te/ nyin par gyi dus su mig sman rnon po btang zhing bsku bar mi bya ste/ ci'i phyir zhe na/ mig sman rnon pos bskus pas bkrus shing 'dzag par byas pas/ nyam chung zhing stobs zhan pa'i mig gis nyi mar bltas na gnod par 'gyur zhing nyam chung bar 'gyur ro/ /mtshan mo gnyid ni log pa dang / /zla dus yin pas brtas 'gyur te/ /mig ni me yi rang bzhin pas/ /bsil bas gnod med brtan par 'gyur/ /zhes bya ba la/ yang slob dpon de ni mtshan mo'i dus su mig sman rnon po gtang bar bya'o/ /zhes zer te/ ci'i phyir zhe na/ mtshan mo gnyid kyis log cing nyal ba ni/ zla ba'i rang bzhin yin pa dang / dus kyang zla ba'i dus yin pas brtas shing tshim par 'gyur ba nyid kyis/ mig ni me'i rang bzhin bsil bas brtan par 'gyur zhing stobs rnyed par 'gyur ro/ /mig nad bad kan shas che ba'am/ /phyi zhing bsal bar bya ba la/ /rab tsha min pa'i nyin par yang / /mig sman rnon po blugs par 'dod/ /ces bya ba la/ gal te bad kan gyi mig nad shin tu shas che zhing bdo ba dang / de bzhin du phyi zhing bsal bar bya ba'i mig gzer ram ling tog la sogs pa nyin mo yang des gso bar bya ba'i nad la mig sman gtang du rung la/ de yang nyi ma shin tu mi tsha ba la/ mig sman rnon po dag kyang blugs su rung bar 'dod cing khas len pa yin no/ /dris pa mig ni me'i rang bzhin yin la/ mig sman rnon po yang me'i rang bzhin can yin pas/ nyi ma tsha ba dang chos mthun pa yin na/ 'di la 'gal ba ci yod ce na/ de'i phyir smras pa ni/ lcags ni rdo las 'byung ba yin/ /rno ba de nyid las byung yang / /de nyid kyis ni gnod byed nus/ /mig gi rang bzhin de dang 'dra/ /zhes bya ba yin te/ ji ltar lcags rnams ni rdo'i khams rnams las byung zhing skyes pa yin la/ gang yang lcags de nyid rno ba nyid kyang rdo de nyid las byung ba yin mod kyi/ gang lcags de'i rno ba nyid la gnod cing 'jig par byed pa'am/ yang na rnam pa thams cad nas thams cad du med par byed pa ni rdo de nyid las byung zhing gzhan las ma yin no/ /de bzhin du mig gi mthong ba'i rang bzhin du me'i khams las byung la/ de nyid kyis na rno ba'i phyir de nyid kyis gnod par byed de/ cung zad tsam mthong ba'am/ rnam pa thams cad du mi mthong bar 'gyur ro/ /dgun tshe mtshan mo mig sman ni/ /rnon po phan pa ma yin te/ /'dzag mi 'gyur bas mig rengs dang / /g.ya' dang mi gsal la sogs skyed/ /ces bya ba la/ dgun gyi tshe/ mtshan mo yang mig sman shin tu rno ba phan zhing bde bar byed pa ma yin te/ ci'i phyir zhe na/ dus de'i tshe mig sman rnon po btang yang grang ba'i nyes pas mig las mchi ma la sogs pa'i nad 'byin cing 'dzag par byed mi nus te/ slar zhing mig sman des mig rengs shing har bag tu 'dug pa dang / g.ya' ba dang / mig mi gsal ba la sogs pa skyed par 'gyur ro/ /sogs pa'i sgras ni skrang ba dang / mig rdul chags pa dang / mig dmar ba la sogs pa skyed par 'gyur ro/ /mig sman mi gtang 'jigs dang slon/ /khrus btang zas zos shugs kyis nyen/ khros dang rims btab mig phyir byung / /glad nad mya ngan gnyid ma log /nyi ma ma mthong mgo bkrus dang / /chang 'thungs du ba brngubs pa dang / /kha zas ma zhu nyi tshan gdungs/ /nyin nyal skom pa la mi gtang / zhes bya ba la/ skyes bu 'jigs shing sngangs par gyur pa la/ mig sman gtang du mi rung ngo / /de bzhin du slon zhing skyug pa dang / bkru sman btang zin pa dang / zas zos shing 'grangs ma thag dang / bshang ba dang gci ba la sogs pa'i shugs kyis nyen pa dang / khro zhing rngam pa dang / rims kyis btab pa dang / mig phyir byung zhing glo ba dang / glad nad kyis gzer ba dang / mya ngan dang bcas pa dang / mtshan mo gnyid ma log pa dang / mgo bkrus shing gsher ba dang / de bzhin du chu 'thungs shing du ba brngubs pa dang / de bzhin kha zas ma zhu ba dang / nyi tshan gyis gdungs pa dang / nyin par nyal zhing gnyid log pa dang / skom gyis nyen pa la mi gtang ngo zhes mi gtang ba kun la sbyar bar bya'o/ /mig sman rab rno 'jam dang nyung / /mang sla ska dang rtsub pa dang / /shin tu bsil dang tsha ba yi/ /mig sman bsku bar mi bya'o/ /zhes bya ba la/ rab tu rno ba ni ro tsha ba dang / skyur ba dang / lan tshwa las sbyar bar mi bya'o/ /de bzhin du rab tu 'jam pa ni ro mngar ba nyi tshe las byas pa'o/ /nyung ba chung ches pa'o/ /mang ba ni ches drags pa'o/ /de bzhin du shin tu sla ba dang / shin tu ska ba dang / shin tu rtsub cing reg na mi bde ba dang / de bzhin du shin tu bsil ba dang / shin tu tsha ba'i mig sman btang zhing sbyar bar mi bya'o/ /des na mig ni ma phye bar/ /dal gyis nang du khyab par bya/ /zhes bya ba la/ des na de'i 'og tu mig sman nang du zhugs shing khyab par bya ba'i phyir/ mig gi 'bras bu dal gyis bskyod cing bsgul la/ sman gyis khyab par bya'o/ /ci zhig byas nas she na/ ma phye bar zhes bya ste/ mig ma dbye bar mig 'bras nad du bsgul bar bya'o/ /mig sman byugs nas mig mchu ni/ /cung zad bskyod la mig sman ni/ /rnon pos myur du khyab 'gyur bas/ /dbye dang 'dzums par mi bya'o/ /mig mchu gnyis ni bsdam pa dang / /bkru ba dag ni mi bya'o/ /zhes bya ba la/ mig sman mig tu bcug gam/ byugs nas mig gi mchu cung zad tsam dal bus bskyod par gyur na/ mig sman rnon pos myur du khyab par gyur bas 'phral du de'i mod la mig sman bcug ma thag mig dbye ba dang btsums par mi bya'o/ /de bzhin du de'i mod la mig sman gnyis bsdam zhing btsir bar yang mi bya la/ 'phral du mig bkru bar yang mi bya'o/ /gang tshe mig sman gyis bskus pa'i/ /sman gyi rtsol ba zhi gyur na/ /nad kyi dmigs dang mthun pa yi/ /chu yis de tshe bkru bar bya/ /zhes bya ba la/ gang gi tshe mig gi sman bskus pa'am byugs pa'i rjes la/ sman gyi nus pa'i mthu rtsom pa zhi bar gyur la/ tsha ba la sogs pa med par gyur cing / de nyid kyis na bde bar gyur ba de'i tshe/ nad kyi dmigs dang mthun pa'i chu bsil ba dang / dro ba dang / bar ma'i rang bzhin can la sogs pas ci bder bkru bar bya'o/ /de nas gos 'jam bcas pa yi/ /mthe bo dang ni mdzub mo gnyis/ /mig ni ci ran phye ste phyi/ /g.yon pas g.yas pa phyi bar bya/ /gzhan du mig sman blugs pa yis/ /mig mchu khyab pas nad skyed 'gyur/ /zhes bya ba la/ de nas de ltar bkrus pa'i rjes la g.yas pa'i mtheb mos gos 'jam po dang bcas/ mig g.yon pa'i mig mchu gong ma bzung la ci ran tsam du phyi zhing bsal bar bya'o/ /g.yon pa'i mthe bo gong dang bcas pas ni/ g.yas pa'i mig mchu gong ma bzung nas phyi bar bya'o/ /de las gzhan du mig sman blugs pa'i rjes la sbyang zhing phyi ba ma byas na mig sman blugs pas nad kyis mig mchur khyab cing phyin pas/ nad kyi gnod pa skyed par 'gyur ro/ /de bas na mig sman btang ba'i rjes la/ mig mchu bkru ba dang phyi bar bya'o/ /sman gyis g.ya' ba'am rtul gyur na/ /rnon po'i dud pa brngub par bya/ /zhes bya ba la/ mig sman bcug nas mig g.ya' ba'am rtul bar gyur na/ mig sman rnon po'i du ba brngub par bya'o/ /mig sman rnon pos tsha gyur na/ /slar 'chos mig sman bsil byed gzhug /ces bya ba la/ mig sman rnon po byugs pas mig rab tu tsha bar gyur na/ tsha ba de nye bar zhi bar bya ba'i phyir bsil zhing grang ba'i phye ma'i mig sman gzhug par bya'o/ /mig sman de ni slar 'chos shing bsal bar byed pas na/ mig sman slar 'chos pa zhes bya ba'o/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba slob dpon zla ba la dga' bas nges par sbyar ba las/ le'u nyi shu gsum pa'i rnam par 'grel pa'o// //de nas mig brta ba'i cho ga dang / mig sman gyi thur ma bsreg cing btsos pa'i khu ba mig tu blugs pa'i cho ga'i le'u bshad par bya'o/ /zhes bya ba la/ 'di brtsams pa'i 'grel pa ni 'di yin te/ mig sman rnon pos tsha bar gyur na slar 'chos pa'i mig sman gyi phye ma bsil ba gzhug par bya'o/ /zhes bshad pas mig brta zhing tshim par bya ba yang phal cher de dang 'dra bar 'dir bshad pa yin no/ /de la mig brta ba dang / bsreg cing btso ba'i cho ga gzhung gang du ston par byed pa'i le'u bshad cing bstan par bya'o zhes bya'o/ /mig 'dzums mi shes rengs bag dang / /skam dang rtsub dang snad pa dang / /rlung mkhris nad gyur zhum bag dang / /rdzi ma byi zhing g.yogs par mthong / /dbye dka' rtsa ni brtse ba dang / /mig ni brtse 'gyur mi mthong dang / /dmar zhing mchi 'dzag glad phyed na/ /rlung nad kun 'gro ling tog can/ /mig nad rtse zhil mchi ma 'dzag /na zhing dmar la mig rngu chags/ /thun mong dus su nang par ram/ /dgongs ka gan rkyal nyal nas ni/ /lus dang mgo sbyang rlung med pa'i/ /gnas su brta ba'i sman gtang ngo / /zhes bya ba la/ mig na zhing 'dzums mi shes pa dag la mig brta ba'i sman blugs par bya'o/ / rengs bag ni bskyod cing 'gul mi shes pa'o/ /skam pa ni yongs su bskams pa'o/ /rtsub pa ni snum pa'i mdangs kyi yon tan dang bral ba'o/ /snang ba ni 'bras bu mngon par snang ba'o/ /rlung dang mkhris pa'i nad ni de gnyis las gyur pa'i nad kyis nyen pa'o/ /zhum bag ni rlung gi dbang gis mig yon por gyur pa'o/ /rdzi ma byi ba ni mig gong gi rdzi ma rnams nad kyis byi bar gyur pa dang / de bzhin du g.yogs par mthong ba ni/ sprin gyis g.yogs pa dang 'dra bar mi gsal bar mthong ba'am/ yang na sngon dmar du mar mthong ba ste/ de la brta ba'i sman gtang bar bya'o/ /de bzhin dbye dka' ba la sogs pas nyen cing na ba la sogs pa mig nad rnams dang yang mig nad la sogs pa rtse zhil zhing cung zad bri ba dang / yang dus gang thun mong du gyur cing / grang dro ran pa dang / dpyid dang ston gyi dus de'i tshe na yang nang par ta nam langs pa dang / dgongs ka ste nyi ma nub pa'i dus su skyes bu gan rkyal du nyal nas sngar lus dang mgo bo sbyangs shing bkru sman btang zhing sbyar ba la/ rlung med pa'i gnas su brta ba'i mig /sman gtang bar bya'o/ / nas sam ma sha'i rjen zan gyis/ /mig sbubs mtha' skor mnyam pa ni/ /dpangs su sor gnyis brtan byas la/ /nad dmigs ji bzhin sman bskol ba/ /zhun mar chu tshan la bsros te/ /mig ni btsums par blugs par bya/ /zhes bya ba la/ nas kyi rjen phye sbrus pa las/ sman mi 'pho ba'i rten byas la/ zhun mar mig tu blugs par bya'o/ /bskor ba de yang mig sbubs kyi phyi rol nas bskor bar byas/ de yang mnyam zhing snyoms par bya'i/ mi mnyam par ni mi bya ba dang / dpangs kyi tshad sor gnyis su bya ba dang / de bzhin du brtan pa ste gas med par byas la/ de'i 'og tu bskor ba der nad dmigs ji bzhin zhes bya ba rlung la sogs pa'i nad gang las gyur pa sel ba'i sman dang bskol zhing btsos pa'i zhun mar chu tsha ba la bsros shing bzhus te dro grang ran par byas pa'i zhun mar de mig btsums par blugs par bya'o/ /mtshan mo mi mthong rlung rab rib/ /dbye dka' sogs la tshil zhun blugs/ /rdzi ma'i rtse nub par bkang la/ /de nas bskyod cing dbye ba ni/ /de ni dal gyis byed du gzhug /tshad bgrang bya ba/ zhes bya ba la/ mtshan mo mi mthong ba la sogs pa'i mig nad kyis btab pa la rang rang gi sman gang yin pa dang / btsos pa'i tshul gyi zhun mar snga ma ltar bsro ba blugs par bya'o/ /de la rdzi ma'i rtse mo nub par gyur kyi bar dang / smin ma'i spur phyin gyi bar du dgang bar bya'o/ /de nas blugs zin pa'i rjes la/ mig bskyod cing dbye ba skyes bu de dal gyis bags kyis byed du gzhug la/ de'i grangs kyi tshad bgrang zhing gzung bar bya'o/ /de la ni/ mig mchu mig 'gram dkar nag nad/ /grangs brgya sum brgya lnga brgya dang / /brgya phrag bdun dang brgyad rim bzhin/ /dkrugs dang rlung la grangs stong ste/ /mkhris pa nad med la drug brgya/ /bad kan la ni lnga brgya gzhag /ces bya ba la/ de la grangs bgrang ba'i tshul ni/ mig mchu'i nad la grangs brgya'i tshad kyi bar du gzhag par bya'o/ /mig 'gram gyi nad la ni grangs sum brgya'i bar du gzhag go /mig gi 'bras bu dkar po'i cha la nad yod pa la ni grangs bdun brgya'i bar du gzhag par bya'o/ /nag po mthong ba'i cha la nad yod pa la grangs brgyad brgya'i bar du gzhag par bya/ de bzhin du mig dkrugs pa snyam sems pa dang rlung gi nad la ni grangs stong gi bar du gzhag go /mkhris pa'i nad dang nad med cing tha mal par gnas pa'i skabs su btang ba la ni grangs drug brgya'i bar du gzhag par bya'o/ /bad kan gyi nad la ni grangs lnga brgya'i bar du gzhag par bya'o/ /de nas mig 'gram 'dzag sgo bya/ /sman mar snod du gzags par bya/ /dud pa brngubs nas nam mkha' dang / /gzugs 'tsher ba ni lta mi bya/ /zhes bya ba la/ grangs bgrang ba rdzogs pa de'i rjes la brta ba'i snum blugs pa gang yin pa de/ dbo zhing gzags par bya'o/ /de yang ji ltar zhe na mig 'gram rna ba dang nye ba'i phyogs su mig zur gyi 'dzag pa'i sgo'i bu ga byas la sman mar snod bzed par bya'o/ /des na de'i 'og tu snum gyis glongs pa'i bad kan zhi bar bya ba'i phyir du ba brngub par bya'o/ /de nas de'i mod la nam mkha' la mi lta ba dang / me dang nyi ma la sogs pa gzugs 'tsher ba la blta bar mi bya'o/ /de ltar rlung la nyin re bya/ /mkhris par nyin re'i bar du gcod/ /bad kan bder gnas gnyis par bcad/ / tshim par 'gyur gyi bar du gtang / /zhes bya ba la/ de ltar bshad pa rnams rlung gi nad dang ldan pa la ni nyin re la btang la/ tshim par 'gyur gyi bar du mi gcad par bya'o/ /mkhris pa las gyur pa'i mig nad la ni/ tshul 'di nyid kyis nyi ma gcig gi bar du bcad cing nyin res chod par byas la gtang ngo / /bad kan dang bde bar gnas pa'i skabs su ni nyi ma gnyis gnyis kyi bar du bcad cing gtang ste/ tshim par 'gyur gyi bar du gtang / /zhes pa ni thams cad la gtang ngo / /tshim pas gsal bar mthong nus shing / /bde zhing mig yang dri ma med/ /ma tshim pa las go bzlog yin/ /tshim drags bad kan nad skyed 'gyur/ /zhes bya ba la/ mig legs par tshim zhing brtas par gyur na dngos po gsal bar mthong bar nus pa dang / de bzhin du bde zhing nad med pa dang / yang bag dang legs par brtas par byas pas mig rang bzhin gyis dri ma med cing dag la/ rab rib la sogs pa'i nyes pa dang bral bar 'gyur/ gal te yang tshim par ma gyur na/ bshad ma thag pa'i legs par tshim pa'i mtshan nyid la sogs pa bsal bar mi nus pas na dri ma dang bcas pa'i bar du 'gyur ro/ /tshim drags shing brtas par byas drags na/ bad kan las byung ba'i nad rnams bskyed cing 'byung bar 'gyur ro/ /de ni lus kyi snum 'thungs ltar/ /mi gsal mthong ba nyam chung 'gyur/ /de bas brta ba'i rjes la ni/ /mthong ba'i stobs ni skyed byed pa/ /sngar bshad pa yi mig nad la/ /phur ma btsos pa sbyar bar bya/ /zhes bya ba la/ tshim par byas pa'i mig ni mthong ba'i stobs zhan par 'gyur te/ dper na lus kyi khong du snum 'thungs pa na/ nyam chung zhing cung zad brgyal/ stobs chung ba dang 'dra bar mig sman 'thungs pas kyang stobs chung zhing mi gsal bar 'gyur ro/ /de bas na mig brta tshim par byas pa'i rjes la mthong ba'i stobs gsal bar byed pa dang / skyed par nus pa'i mig sman phur ma btsos pa'i khu ba mig gnyis su blugs par bya zhing sbyar bar bya'o/ /de yang sngar bshad pa'i mig nad mig dbye bar dka' ba la sogs pa la phur ma btsos pa'i khu ba gtang bar bya'o/ /de ni rlung la snum can te/ /bad kan bcas te phyi ba phan/ /mthong nyams rlung dang mkhris bcas dang / /khrag mkhris bder gnas la gsal byed/ /ces bya ba la/ mig sman btsos pa'i khu ba de ni rlung las gyur pa'i mig nad la snum can gtang bar bya'o/ /de bzhin du bad kan dang bcas pa'i rlung la ni phyi ba'i mig sman phan pa yin no/ /mthong ba nyams shing mig mi gsal ba dang / rlung dang mkhris par bcas pa dang / khrag dang mkhris pa'i nad dang / bde bar gnas shing nad med pa'i skabs la ni gsal bar byed pa'i mig sman gyi phur ma btsos pa'i thigs pa mig tu blugs par bya'o/ /khung gnas mthus tshol rlan can gyi/ /tshil dang rkang dang zhag sha rlon/ /'o ma dag dang btags pa dang / /'tsho byed dag dang sbyar ba'i snum/ /zhes bya ba la/ khung na gnas pa ni sa la brten cing phug na gnas pa ste/ sram dang phyi ba la sogs pa'o/ /mthus tshol ba ni bya rgod dang / khra la sogs pa'o/ /rlan can la gnas pa ni ngang pa dang chu skyar la sogs pa ste/ de rnams kyi tshil dang / de bzhin du rkang dang zhag dang / de bzhin du sha rlon pa rnams 'o ma dang lhan cig tu btags pa dang / de bzhin du sman 'tsho byed la sogs pa dag 'o ma dang btags shing sbyar ba'i snum gyi khu ba rnams mig tu blugs pa'i sman khu'i thigs pa'i don du brtag par bya'o/ /ri dgas bya yi mcher pa sha /mu tig lcags zangs rgyam tsha dung / /rgya mtsho'i lbu ba lig bu mig /ba bla zho ga chur sbyar bya/ /zhes bya ba la/ ri dgas ni sha bkra la sogs pa'o/ /bya ni la ba la sogs pa ste/ de rnams kyi mcher pa dang / sha rlon pa dang / de bzhin du mu tig dang / lcags kyi phye ma dang / zangs kyi phye ma dang / rgyam tsha dang / lce myang tsha dang / dung dang / lig bu mig ste/ so tan dza na dang / rgya mtsho'i lbu ba dang / ba bla ste/ 'di rnams zho ga chu dang btags la blugs pa'i mig sman phyi zhing bsal ba'i don du brtag par bya'o/ /ri dgas bya yi mcher pa rkang / /lto tshil rgyu ma snying dang sha/ /mngar bag mar bcas nu zhor sbyar/ /btags pa gsal bar byed pa yin/ /zhes bya ba la/ ri dgas dang bya ni sngar bshad par zad de/ de rnams kyi mcher pa la sogs pa dang / de bzhin du sman mngar bag 'tsho byed la sogs pa dang bcas pa rnams nu zho zhes bya ba bud med kyi nu zho dang sbyar zhing btags pa'i sman gyi phur ma btsos pa'i khu ba ni mig gsal bar byed pa zhes bya ba'i don no/ /sha dang sman gyi lde gu ni/ /gong bu srang gcig so sor byas/ /e raN n+ya gro d+ha pad+ma'i/ /lo ma snum pos rim bzhin du/ /dkris la 'jim pas byugs nas ni/ / da ba dgon pa'i lci ba'i me/ /'bar bar yongs su bsreg par bya/ /tshos nas de yi khu ba btsir/ /mig tu brta ba'i sman ltar blugs/ /zhes bya ba la/ sngar bshad pa'i sha dang / sman gyis so sor srang re re tsam zhig byas la/ sman dang sha'i lde gu'i gong bu gcig tu bsres shing bsdus pa'i gong bu e raN+Da dang / n+ya gro d+ha dang / pad+ma'i lo mas dkris par byas te/ de yang snum gyis snum btsos pa'i e raN+Da'i lo mas dkri bar bya'o/ /de bzhin du phyi zhing bsal ba'i sman gyi phur ma btso ba ni/ n+ya gro d+ha'i 'dab mas dkri bar bya'o/ /de bzhin du gsal bar byed pa'i sman gyi phur ma ni pad+ma'i lo mas dkri bar bya'o/ /de ltar dkris pa'i 'og tu 'jim pas byugs te/ shing da ba dang / dgon pa'i lci ba'i me gang rnyed pa sbar bas ji srid du me mdog ltar snang gi bar du btsos la/ de ltar tshos par shes nas khu ba de btsir te/ mig tu brta ba'i sman gyi khu ba blugs par bya ste/ ji ltar mig brta ba'i sman mig tu ldugs pa na/ nas dang mon sran gre'u'i rjen zan gyis bskor nas ldugs pa de bzhin du sman gyi phur ma btsos shing bsregs pa'i khu ba blugs nas mig dal bus bskyod par bya'o/ /phyi dang snum dang bsal ba la/ /brgya phrag gcig gnyis gsum car gzhag /dang po dro 'jam phyi bsil blugs/ /de gnyis rjes la dud pa brngub/ /des ni sbyar ba brta dang mtshungs/ zhes bya ba la/ phyi ba'i sman gyi thigs pa mig tu blugs pa na/ tshad kyi grangs brgya'i bar du gzhag par bya'o/ /snum gyi phur ma btsos pa la ni/ nyis brgya'i bar du gzhag par bya'o/ /bsal bar bya ba'i sman btsos pa'i thigs pa blugs pa ni sum brgya'i bar du gzhag par bya'o/ /dang po zhes bya ba sngar bstan pa'i phyi ba dang / snum par bya ba gnyis la ni dro 'jam zhes bya ba/ cung zad tsam dro ba mig tu blugs par bya ste/ phyi ma ste tha ma bsal bar bya ba'i sman gyi thigs pa bsil zhing grang ba blugs par bya'o/ /de gnyis zhes bya ba phyi ba dang snum par bya ba'i mig sman btang ba'i rdzas de mthar dud pa brngub par bya'i gsum pa gsal bar byed pa'i sman blugs pa la ni ma yin no/ /yang sman gyi phur ma btsos pa'i thigs pa mig tu blugs pa gsum po'i skabs der sbyor ba ste/ legs pa dang ma legs pa dang drags pa'i sbyor ba gsum ni brta ba'i sbyor ba bshad pa dang 'dra zhing mtshungs so/ /zhes bya ba'i don de gsal bar mthong ba nas bad kan gyi nad du gyur pa'i bar du gong ma bzhin du shes par bya'o/ /brta dang phur btsos thigs pa blugs/ /sna sman mi bya la mi gtang / zhes bya ba la/ brta ba dang sman gyi thigs pa gnyis ka yang sna sman gtang du mi rung ba'i skyes bu la gtang bar mi bya'o/ /ji srid dus ni sman gtang ba/ /de yi nyis 'gyur 'phrod pa bza'/ /zhes bya ba la/ brta ba dang mig sman gyi thigs pa blugs pa 'di gnyis ka dus ji ltar te/ nyin zhag gi grangs su sman btang ba'i nyin zhag de nyis 'gyur gyi dus kyi bar du 'phrod pa bza' zhing / phan pa'i zas dang spyod lam bsten par bya'o/ /me tog dzA ti ma li kas/ /mig bcings mtshan mo gnas par bya'o/ /zhes bya ba la/ me tog dzA ti ni so ma na'o/ /ma li ka ni me tog brtsegs ma can te/ me tog des skyes bu'i mig bcings te mtshan mo gnas par bya'o/ /sna sman mig sman brta ba la sogs pas/ /mig mthu skyed phyir kun tu 'bad par bya/ /mthong ba nyams na 'gro ba sna tshogs pa'ang / /mun pa'i rang bzhin tshul gcig nyid du 'gyur/ /zhes bya ba la/ kun tu'am/ rnam pa thams cad du mig gi mthu skyed cing mig bsrung bar bya ba'i phyir/ 'bad cing brtson par bya'o/ /gang gis she na sna sman la sogs pa ste/ sman sna nas gtang ba dang / mig sman bsku ba dang / brta ba dang / sman gyi phur ma bsregs pa'i khu ba mig tu blugs pa la sogs pas mthu bskyed par bya'o/ /ci'i phyir zhe na/ 'di ltar mthong ba nyams shing gsal bar lta ba dang bral na/ 'gro ba sna tshogs pa tshul tha dad pa 'di dag kyang mun pa'i rang bzhin du gyur pas tshul gcig pa nyid du 'gyur ba ste/ mun nag gi rang bzhin du tha dad cing rab rib kyi mun pas khebs pas snang ba'i tshul dang bral zhing bye brag tu shes pa med par 'gyur ro/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ le'u nyi shu rtsa bzhi pa'i rnam par 'grel pa'o// //de nas cha spyad kyi cho ga'i le'u bshad par bya'o/ /zhes bya ba la/ 'di brtsams pa'i dgos pa ni 'di yin te/ sman mas gtong ba nas/ mig sman gyi bar gyi rang rang gi cha spyad gang dag yin pa bshad nas/ de'i 'og tu zug rngu dbyung ba la sogs pa'i cha spyad sna tshogs pa gang dag dgos pa de bstan par bya ba'i phyir/ de'i 'og tu 'di brtsams pa yin la/ de'i cho ga gang dag yin pa bstan pa sman pa ni/ zug rngu rnam pa sna tshogs dang / /lus ni sna tshogs gnod byed pa/ /'byin pa'i thabs su gang gyur pa/ /spyad yin de bzhin gzhang 'brum dang / /mtshan par rdol sogs lta ba dang / / gtsags bu thal sman me btab pa'i/ /yan lag lhag ma bsrung phyir dang / /mas gtong la sogs spyad ma gtogs/ /bum bu ku bar dang ni/ /'dzam bu'i mchu la sogs spyad yin/ /zhes bya ba la/ skyes bu'i lus la gnod par byed pa'i zug rngu ni/ mtshon gyi dum bu nang du lus pa rnam pa sna tshogs shing dbyibs dang las du mar gyur pa dang / de bzhin du lus kyi phyogs rnam pa sna tshogs pa rnams su gnod par byed cing khong du zug pas lus kyi phyogs du ma dang / nad rnam pa sna tshogs skyes pas gnod par byed cing / nye bar 'joms par byed pa rnams 'dzin cing lus kyi phyogs kyi nang na gnas pa rnams 'dren par byed pa'i thabs su gyur pa gang yin pa de la ni cha spyad ces bya la/ de 'ba' zhig tu ma zad kyi gzhang 'brum dang / mtshan par rdol ba la sogs pa'i nad tshol zhing rtogs par byed pa dang / mtshon du de bzhin du gtsags bu dang / thal sman rnon po dang / me btsa' gdab par bya ba'i nad de gzhang 'brum dang mtshan par rdol ba'i nad kyis nyen pa blta ba'i spyad dang / gtsags bu dang thal sman rnon po dang me gdab par bya ba'i rigs par gtogs pa yan lag lhag ma nad kyi gnod pas nyen pa de bsrung zhing bskyang bar bya ba'i phyir dang / de bzhin du mas gtong ba la sogs pa'i las rnams kyi spyad ma gtogs pa gnas skabs gzhan dag tu dgos pa'i cha spyad bum bu dang ku ba dang / rngabs rwa dang / 'dzam bu'i mchu 'dra ba la sogs pa'i cha spyad kyi dngos po thams cad ni cha spyad ces bya ba yin no/ /'dzam bu'i mchu ni thal sman 'ju bar byed pa'o/ /spyad de dag ni 'dzin cing sdud pas zug rngu la sogs pa gang gis 'byin par byed pa de la cha spyad ces bya'o/ /gang phyir cha spyad cho ga bzhin/ /sna tshogs tshul du brdung bya ba/ /blo yis rnam dpyad bya ba ni/ /rags rim tsam zhig bstan pa yin/ /zhes bya ba la/ gang gi phyir zug rngu 'byin pa la sogs pa'i cha spyad/ lus kyi cho ga gang ji ltar dgos pa bzhin du sna tshogs pa'i tshul dbyibs du mar na ba dang / mi'i lus la phan par byed nus pa'i tshul sna tshogs par brdung bar byas la/ de yang lus kyi tshul las blos rnam par dpyad la brtags nas ci rigs par brdung bar bya ba yin la/ de dag las kho bos ni rags rim tsam zhig ste/ mdo tsam zhig bstan pa yin gyi/ de dag ni grangs 'di tsam zhig bya'o zhes tshad nges par bstan pa ma yin no/ /seng ge kang ka dom bya rog/ /ri dgas bya sogs kha 'dra ba'i/ /mchu can cha spyad byas nas ni/ de yi ming yang gdags par bya/ /phal cher lcags kyi rgyu las ni/ /srid du sor ni bco brgyad bya/ /skam pa sbrel ba'i mtshams su ni/ /sran chung lta bu'i gzer btab pa/ /rtsa ba lcags kyu ltar bkug pa'i/ /cha byad bde legs yin zhes bya/ /rtse mo g.yung drung lta bu'o/ / zhes bya ba la/ seng ge dang dom la sogs pa ri dgas dang bya rnams kyi mchu dang 'dra zhing mtshungs pa'i cha byad byas la cha spyad de dag kyang de'i ming gdags par bya ste/ gang gi mchu dang gang 'dra ba de la de'i ming gdags par bya ste/ dper na kang ka'i mchu dang / bya rog gi mchu lta bu zhes bya ba la sogs pa'o/ /de dag kyang phal cher ram mang lcags kyi rgyu las bya la/ tshad ni phal cher sor bco brgyad par bya'o/ /skam pa de dag gi sbrel ba'i mtshams kha'i 'og tu sran chung lta bu ste/ rtse mo sran chung ltar zlum po'i gzer bu legs par btab la/ de bzhin du rtsa ba de lag pas gzung ba'i phyogs su lcags kyu lta bur bkug cing 'khyog par bya ba'i cha spyad de ni ming bde legs zhes bya ba yin te/ rtse mo g.yung drung lta bu bya'o/ /de ni brtan por rus zug pa'i/ /zug rngu 'byin la sbyar bar bya/ /zhes bya ba la/ bde legs zhes bya ba'i cha spyad brtan zhing mi 'jigs pas rus par zug rngu gang yin pa de 'byin cing dbyung ba la sbyar bar bya'o/ /gzer btab rtse mo gyes pa dang / /skam pa yin te sor bcu drug /de ni pags pa rtsa rgyus shar/ /zhen pa'i zug rngu 'byin la sbyar/ /zhes bya ba la/ skam pa ni gnyis bya ste/ de las gcig ni rtse mo'i phyogs su gzer bu btab cing bsdam pa dang bcas pa'o/ /gnyis pa ni rtse mo gyes shing rtse mo gzer bus ma btab la/ kham bsdams pa'o/ /skam pa de gnyi ga yang srid sor bcu drug bya'o/ / de gnyis ni pags pa la sogs par nub cing zhen pa'i zug rngu de dbyung zhing 'dren pa la sbyar zhing gtang bar bstan no/ /skam pa sor drug zug rngu phra/ /rdzi ma ma rung 'byin la sbyar/ /zhes bya ba la/ skam pa de las gzhan pa srid sor drug yod pa kha gyes pa nyid du bya la/ des na zug rngu phra ba ste/ mig gi rma la sogs par gtogs pa dang / de bzhin du rdzi ma ma rung ba ste/ mig gi rma'i nang du zhugs pa 'byin pa la sbyar ro/ /so phra drang zhing rtsa ba ni/ /gdu bus brgyan pa mu tsa ti/ /des rma gting du zug pa dang / /mig mdzer gting du lus la sbyar/ /zhes bya ba la/ cha spyad gang so phra mo btod pa byas pa de yang drang zhing rtse mo gnyis drang por bya'o/ /de'i tshad ma smos pas 'das ma thag pa'i sor drug nyid yin par shes par bya'o/ /de'i rtsa ba ni lag pas gzung ba'i phyogs der gdu bus brgyan pa zhes bya ba dam du bsdam pa'i phyir lcags kyi khyud mos gdu bu lta bur brgyan pa zhes bya'o/ /de'i ming ni mu tsa ti zhes bya la/ des rma gting du zug pa dang de bzhin du mig mdzer gting du lus te gdon pa la sbyar bar bya'o/ /bzhi po de dag ni cha spyad skam pa zhes bya ba yin no/ /nya mgo 'dra ba sor bcu gnyis/ /cha spyad gnyis pa gcig pa bya/ /nya mgo lta bu zhes bshad de/ /rna khung zug rngu 'byin la sbyar/ /zhes bya ba la/ drang srong gi cha spyad nya mgo lta bu ni gnyis yod par bshad de/ de gnyi ga yang nya mgo dang 'dra zhing sor bcu gnyis pa yin la/ de yang nya mgo'i lkog ma 'dra bas na/ nya mgo'i mgul pa lta bu zhes bya ba'i don no/ /de la nya mgo gnyis 'dra ba yod pa dang / gcig 'dra ba yod pa ste/ des na gcig ni rta'i mgul pa lta bu gnyis dang ldan pa'o/ /gnyis pa ni nya'i mgul pa lta bu gcig dang ldan pa'o/ /de gnyi gas kyang rna khung na gnas pa'i zug rngu 'byin pa'i las la sbyar bar bya ste/ de na gnas pa'i zug rngu de gnyis kyis dbyung bar bya'o/ /cha spyad sbu gu can smras pa ni/ cha spyad sbu gu can khong stong / /rtse mo gcig gam mang po bya/ /des ni bu ga'i zug rngu dang / /nad yod blta dang dbyung ba dang / /bya ba bla ba bya phyir dang / /dgang bar bya ba'i don du bya/ /de yi zheng dang sbom srid tshad/ /bu gu'i tshad las dpag par bya/ /zhes bya ba la/ cha spyad sbu gu can ni nang khong stong du byas la rtse mo kha gcig pa'am/ kha mang po ba dgos pa du ma'i dbang las byas la/ des ni gre ba la sogs pa bu ga na gnas pa'i zug rngu rnams dang / de na gnas pa'i nad yod pa dag blta bar bya ba'i phyir dang / de bzhin du bya ba ste/ zug rngu dbyung ba dang gtsags bu gdab pa dang / thal sman dang me btsa' gdab pa la sogs pa'i las kyi bya ba bla bar bya ba'i phyir dang / de bzhin du dgang bar bya ba'i phyir bya ste/ de'i zheng ste sbom dang / srid de dpangs kyi tshad ni bu ga'i tshad las/ zhes bya ba la/ gang gi bu ga gang du btod pa de'i tshad las dpags nas ci rigs par bya'o/ de yang zhes bya ba la/ logs gcig nas gcig tu phyin pa'i tshad la bya la/ sbom ni 'khyud pa'i tshad yongs su chad pa la bya'o/ /srid ni dpangs te/ sngar bshad pa'i cha spyad las ring bar bya'o/ /srid du sor bcu sbom sor lnga/ /gre ba'i zug rngu rtog byed yin/ /rtse mo lnga pa bu ga can/ /rtse mo bzhi la spyi mdud bya/ /cha spyad thur ma gnyis pa ni/ /bu ga gsum pa de'i tshad bya/ /cha spyad bya ba rang gi dbyibs/ /sbom dang mchu yi tshad mnyam pa'i/ /sbu gu de 'dra gzhan dag kyang / /cha spyad shes par byed du gzhug /ces bya ba la/ cha spyad sbu gu can bya'o/ /zhes bya bar sbyar ro/ /de'i tshad dang srid du sor bcu bya la/ de nyid kyis na de'i sbom gyi tshad sor lnga par bya'o/ /'dis rtog cing blta bar byed pa yin pas na rtog par byed pa ste/ gre ba'i nang du zug rngu blta bar bya ba'i don du bya'o/ /yang na sbu gu gzhan rtse mo lnga pa'i sbu gu la yang de lta bu ni rtse mo bzhi pa'i spyir bsdu bar bya ste/ mda' la sogs pa nang du zhugs pa brtag pa'i phyir thur ma rtse mo can btod pa ni thur ma zhes bya'o/ /de bzhin du cha spyad thur ma rtse mo gnyis pa ni sbu gu can bu ga gsum pa can bya ste/ de yang snga ma'i tshad du bya'o/ /cha spyad pa rang gi de'i dbyibs dang sbom pa dang mchu'i tshad dang mnyam pa'i sbu gu bya la/ yang sbu gu de dang 'dra ba na/ stong pa rtse mo gnyis pa dang / rtse mo mang po yod pa gzhan dag kyang zug rngu blta zhing brtag par bya ba'i phyir cha spyad la mkhas pa gzhan dag byed du gzhug go/ /rtse mo pad+ma'i snying po 'dra/ /srid du sor ni bcu gnyis pa/ /bzhi cha khong stong byas sbu gu/ /zug rngu 'byin pa yin par bshad/ /ces bya ba la/ zug rngu 'byin pa'i cha byad mi 'gul ba'i zug rngu dbyung bar bya ba'i phyir/ /rtse mo mgo bo'i phyogs pad+ma'i snying po kar ni ka'i dbyibs 'dra zhing mtshungs pa tshad srid du sor bcu gnyis yod pa bzhi cha khong stong yod pa ste/ sor gsum gyi bar khong stong du byas pa de ni zug rngu 'byin pa yin par 'dod do/ /gzhang 'brum cha spyad pa yi ni/ /nu sor 'dra ba sor bzhi pa/ /skyes pa'i sor lngas 'khyud pa ste/ /bud med sor drug gis 'khyud bya/ /nad pa lta ba la bu ga gnyis/ /las la bu ga gcig pa bya/ /dbus kyi bu ga sor gsum pa/ /mthe bo shong ba tsam du bya/ /de steng rtse mo zlum po ni/ /dpangs su sor ni phyed pa bya/ /zhes bya ba la/ gzhang 'brum 'chos pa'i cha spyad ni/ ba'i nu sor dang dbyibs 'dra ba byas la/ srid sor bzhi yod pa/ skyes pa la stong pa'i sbom sor lngas 'khyud pa byas la/ bud med kyi gzhang 'brum gso ba'i cha spyad ni sor drug gis 'khyud pa'i sbom yod par bya'o/ /nad blta ba ni gzhang 'brum gyi nad rtog pa'o/ /bu ga gnyis ni ngos gnyi ga la bu ga yod par byas pa'o/ /de bzhin du gzhang 'brum dang bcas pa dang / thal sman rnon po gtong ba'i las rnams kyi cha spyad ni/ snga ma lta bu la bu ga gcig par bya'o/ /de lta na mngon du blta ba'i phyir ni bu ga gnyis pas bya/ gtsags pa dang / thal sman dang / me btsa' gdab par mi 'gyur bar bya ba'i phyir ni bu ga gcig par bya'o/ /cha spyad 'di'i dbus kyi bu ga ni srid du sor gsum par bya'o/ /mthe bo'i lto shong ba ste/ rgyar mthe bo'i lto dang zheng mnyam par bya'o/ /yang bu ga de'i rtse'am steng ma ni dbyibs 'dra ba la/ dpangs sor phyed yod pa/ sor tshad du bstan pa de'i steng du lhag ma sor phyed yod par lte ba zlum po sor phyed bya ba'i don no/ /khar dkrol de 'dra'i bu ga med/ /cha spyad gzhang 'brum btsir la sbyar/ /zhes bya ba la/ khar dkrol lta bu zhes bya ba'i cha spyad ni bu ga'i rnam pa bshad ma thag pa'i gzhang 'brum gyi rnam pa 'dra ba la/ bu ga med pa ste/ ngos gnyis su bu ga btod pa med pa'o/ /de lta bu'i cha spyad ni gzhang 'brum gyi nad btsir ba'i don du bya'o/ /mtshan par rdol la rnam kun du/ /bu ga yan chad bsal bar bya/ /zhes bya ba la/ mtshan par rdol ba'i nad gso ba'i cha spyad ni rnam pa thams cad nas thams cad du bu ga yan chad kyi lte ba de bsal zhing med par bya ste/ cha spyad 'di las ni dbus ma'i lte ba med par bya ba'i don no/ /sna yi shu ba'i 'brum pa la/ /bu ga gcig pa sor gnyis bya/ /zheng du mdzub mo'i tshad tsam la/ /mtshan par rdol gyi spyad 'drar bya/ /sor mo bsrung phyir ba so 'am/ /shing gis shu bas ni sor bzhi bya/ /ba yi nu 'dra bu ga gnyis/ /de yi kha ni dbye bar bya/ /zhes bya ba la/ sna'i nang gi 'brum pa bsal zhing gcad pa'i cha spyad ni/ bu ga gcig pa bya la/ dpangs su sor gnyis pa/ zheng gi tshad mdzub mo tsam la mtshan mar rdol gyi cha spyad dang 'dra bar dbus ma'i lte ba med par bya'o/ /de stong par byed pa na sman pa'i sor mo bskum zhing gnod pa med par bya ba'i phyir ba so las byas pa'am/ shing las byas pa'i shubs dpangs su sor bzhi yod pa/ bu ga gnyis pa yod par byas la/ cha spyad de'i rnam pa ni ba'i nu ma 'dra bar bya'o/ /yang cha spyad de'i kha bye zhing gyes par byas la/ mkhrig mar srad bus dam du bcing bar bya'o/ /mo mtshan rma brtag dbus su ni/ /khong stong sor ni bcu drug pa/ /phyogs bzhir gdu bus bcing bar bya/ /rtse mo pad+ma kha zlum 'dra/ /thur ma bzhi ni mnan pa yi/ /rtsa ba bsdams na kha dbye bya/ /zhes bya ba la/ mo mtshan nam mngal du rma byung ba brtag cing blta ba'i cha spyad ni dbus khong stong du byas pa srid sor bcu drug yod par gdu bu 'dra ba'i khyud kyis bcings pa'i phyogs bzhir thur ma bzhi yod par bya zhing / sprul pa'i 'dra bas bcings pa dang / de bzhin du pad+ma kha zlum pa'am ma phye ba 'dra ba'i rtse mo yod pa thur ma bzhi yod pa'i lag pas gzung ba'i phyogs su bsdams shing btsir na kha 'bye zhing gyes par 'gyur bar bya'o/ cha spyad 'jam rtsi'i sbubs 'dra la/ /rtsa ba mtheb shong rtse sran shong / /rtse mo gag pa med pa la/ /rtsa bar pags 'jam rkyal bu bcing / /rma yi phug ni 'chas pa dang / /rma bkru ba la sbyar bar bya/ /zhes bya ba la/ cha spyad srid du sor drug yod pa gnyis bya ste/ bu ga can gyi rtsa bsku ba'i phyir dang / bkru ba'i phyir dgos so/ /ji lta bu zhe na/ 'jam rtsi'i sbu gu 'dra ba ste/ 'jam rtsi'i sbu gu dang cha 'dra zhing mtshungs pa gang yin pa de ni/ 'jam rtsi'i sbu gu 'dra ba'o/ /de'i bu ga ni rtsa ba mthe bo shong ba tsam la rtse mo sran ma shong ba tsam rtse mo'i cha la gag pa med pa byas la/ rtsa ba'i gnas su pags pa 'jam po'i rkyal bu snum dang 'khrud pa'i sman gyi snod kyi rkyal bu bcings pa de lta bu'i cha spyad dag gis rma'i phug 'chas pa dang / rma bkru ba la sbyar zhing dpyad du bya'o/ /'od ma'i sbu gu'am sgro rtsa ni/ /'dra ba kha gnyis dmu rdzing spyad/ /ces bya ba la/ dmu rdzing gi nad gso ba'i sbu gu kha gnyis pa 'od ma la sogs pa las bya ba'am/ sgro rtsa ste rma bya la sogs pa'i sgro'i rtsa ba las sbu gu chu gzags pa'i don du kha gnyis pa bya'o/ /dud pa mas gtong la sogs spyad/ /rang rang gi ni skabs su smras/ /zhes bya ba la/ dud pa gtang ba'i cha spyad ni/ /sman gyi dud pa sna nas brngub pa'i skabs su bshad pa yin la/ 'jam rtsi'i cha spyad ni mas gtong ba'i skabs su bshad pa yin no/ /stsogs pa ni mtshan ma la sogs par bshad de/ cha spyad de dag rang rang gi le'u bshad pa'i skabs su smras zin pa de las shes par bya'o/ /rngabs rwa kha zheng sor gsum pa/ /dpangs su sor brgyad pa'am bcu/ /rtse mo'i bu ga yungs kar shong / /legs bkab nu sor dbyibs 'dra bya/ /zhes bya ba la/ rngabs rwa'i tshad ni kha zheng du sor gsum pa ste/ sor mo gsum gshibs pa'o/ /de yang nu zho'i nad la sogs pa gzhib pa'i phyir bya ste/ de'i dpangs kyi tshad ni sor brgyad pa'am/ sor bcu pa byas la/ rtse mo ste rwa'i rtse phyogs kyi bu ga ni yungs kar shong ba tsam du bya la/ de bzhin du gnas de legs par g.yogs pa ste/ pags pa srab mo la sogs pas kha bkag cing g.yogs pa'o/ /de bzhin du dbyibs ni nu sor gyi tshul du byin gyis phra bar bya'o/ /ku ba srid du sor bcu gnyis/ /khyung khor sor ni bco brgyad pa/ /kha zlum sor ni gsum mam bzhi/ /nang 'bar bad kan khrag 'dren byed/ /ces bya ba la/ ku ba ni srid dam dpangs su sor bcu gnyis yod pa la/ khyud 'khor gyi kha zheng zlum por bskor ba ni sor bco brgyad kyis 'khor bar bya la/ de bzhin du bde phyogs kyi kha ni zlum po la sor gsum mam bzhi pa bya ste/ de ltar na kha zlum po la sor gsum pa'am sor bzhi pa zlum po kha phyogs su bya ba dang / de bzhin du nang na 'bar ba ste/ de'i nang du gro ga'am 'jag ma'am/ rtsa bal ba dza'am/ ras bal 'bar ba bcug pa glan pa bcug pa ni bad kan 'khrugs pa'am/ khrag nad can 'dren cing 'byin par byed pa yin pas na/ de'i phyir bad kan 'dren byed ces bya'o/ /de bzhin bum pa de 'dra ba/ /glan pas skran yang 'ju bar byed/ /ces bya ba la/ bum pas sngags 'debs pa yang ku ba dang 'dra bar bya ba ste/ srid sor bcu gnyis la/ khyud 'khor sor brgyad pa kha zlum zhing / sor gsum pa'am sor bzhi yod pa nang na gro ga'am/ rtsa 'jag gam sog ma'i me 'bar ba dang bcas pa de glan pa ni/ skran 'ju bar byed cing 'bri bar byed pa yin no/ /yang zhes bya ba'i sgras ni sngar bshad pa'i ku ba dang 'dra bas bad kan dang khrag 'dren par byed do zhes bya ba'i don no/ /thur ma zhes bya'i cha spyad ni/ /las dang dbyibs ni sna tshogs pa/ /ci rigs pa yi tshad ldan bya/ /zhes bya ba la/ cha spyad kyi rnam pa thur ma zhes bya ba ni las sna tshogs byed pa dang / de bzhin du dbyibs kyi khyad par ring thung la sogs pa sna tshogs par gnas pa ni ci rigs pa'i tshad dang ldan par bya ste/ sbom dang ring thung gang du gtong ba de yang 'tsham par bya'o/ /de la rma tshol las la gnyis/ / srin bu gan du pa ta'i dbyibs/ /zhes bya ba la/ thur ma'i cha spyad de rnams kyi nang nas thur ma gnyis po srin bu gan du pa ta'i dbyibs ltar 'dug pa gnyis ni/ rma tshol gyi las la sbyar bar bya ste/ rma dang bu ga'i gting btsal zhing brtag pa la sbyar ro/ /srin bu gan du pa ta zhes bya ba ni/ char 'bab pa'i rjes thogs la srin bu dmar po ring po thur ma phra mo lta bu zhig 'byung ba la bya ste/ ming gi rnam grangs gzhan du mi ta la zhes bya'o/ /bu ga'i nang gi zug rngu 'byin/ /kha ni sran chung phye 'dra gnyis/ /sor brgyad pa dang dgu pa'i tshad/ /ces bya ba la/ yang de bzhin du thur ma'i cha spyad gnyis po kha sran chung phye ba 'dra ba ste/ rtse mo sran chung bkas pa 'dra bar gyur par bya la/ de yang gre ba la sogs pa bu ga'i nang gi zug rngu dbyung zhing 'byin pa'i don du sbyar ro/ /tshad ni sor brgyad pa dang dgu pa bya ste/ de la gcig gi tshad ni srid sor brgyad yod par bya la/ gnyis pa'i tshad ni sor dgu par bya'o/ /thur ma drug ste de las gnyis/ /sor ni bcu drug bcu gnyis pa/ /thal sman gtong ba sbrul kha 'dra/ /gnyis po bcu gnyis sor bcu pa/ /zhes bya ba la/ yang phur pa 'dra ba'i thur ma drug bya'o zhes bya ba ni tshig gi lhag ma'o/ /de las gnyis ni tshad sor bcu drug pa dang bcu gnyis par bya'o/ /de yang thal sman la sogs pa gtong zhing bsku ba la ni sbrul gyi kha 'dra bar bya ba ste/ gnyi ga yang sbrul gyi kha 'dra ba'i dbyibs byas pa de'i tshad ni/ gcig ni bcu gnyis pa bya la/ gcig ni bcu pa bya ba'o/ /bskul spyad kha ni mda' ltong 'dra/ /'byin pa'i cha spyad lcags kyu'i dbyibs/ /zhes bya ba la/ thur ma de la zug rngu bskul ba'i cha spyad kyi kha ni/ yang mda'i ltong 'dra bar bya la/ yang phur pa 'dra ba'i thur ma'i zug rngu 'byin pa'i don du cha spyad lcags kyu'i dbyibs ltar rtse mo cung zad gug par bya'o/ /thur ma rtse mo gug pa ni/ mngal gyi phur pa zhes bya ste/ /srid du sor brgyad byas pa des/ /bud med mngal du bu shi dbyung / /zhes bya ba la/ thur ma phur pa lta bu rtse mo sgu bor gug pa ni/ ming mngal gyi phur pa zhes bya ste/ de yang tshad srid du sor brgyad pa byas la/ mngal gyi phur pa des bud med mngal du bu shi ba'i ro/ /rdo dang bong ba lta bu de sbrum ma'i lus las dbyung zhing gdon par bya'o/ /rde'u 'byin cha spyad sbrul mgo yi/ /gdengs ka 'dra la rtse gug pa'o/ /zhes bya ba la/ chu so'i nad rde'u 'byin pa'i cha spyad ni sbrul mgo lta bu ste/ rtse mo sbrul mgo'i ya thod 'dra ba la rtse mo gug pa bya'o/ /mda' ltong 'dra bar sor bzhi pa/ /so dbyung ba la sbyar bar bya/ /zhes bya ba la/ cha spyad dbyibs mda' ltong 'dra bar byas pa de yang sor bzhi pa mtha' ma sbom zhing zlum pa bya ste/ de ni so dbyung ba la sbyar bar bya'o/ /rtse mo ras bal gyis dkris pa'i/ /phyi bsal thur ma drug bya'o/ /zhes bya ba la/ thur ma drug byas la/ de thams cad kyi rtse mo'i cha ras bal gyis dkris shing g.yogs pa byas la/ des rma rnags pa dang thal sman la sogs pa sbyang ba'i bya ba bya'o/ / gzhang gi nye ring nang la gnyis/ /sor bcu pa dang bcu gnyis pa/ /zhes bya ba la/ thur ma sor bcu pa dang bcu gnyis byas la/ de ni gzhang gi nang phyi ba la sbyar bar bya'o/ /sna yi sor drug bdun pa gnyis/ /rna ba'i sor brgyad dgu pa gnyis/ /zhes bya ba la/ /yang thur ma sor drug pa dang / bdun pa gnyis byas la/ de ni sna dang kha'i nad kyi ljan ljin nye ba dang ring ba na yod pa phyi ba'i don du bya'o/ /yang de bzhin du thur ma sor brgyad pa dang / /dgu pa gnyis byas la/ rna ba'i rma dang 'tsham pa des thal sman la sogs pa phyi ba dang / byug pa bya la/ de yang nye ba dang ring bar gnas pa'i bye brag gnyis bya ba yin te/ de ltar na thur ma drug pa'i dbye ba smras pa yin no/ /rna ba bsal la a shwad tha'i/ /rtse 'am blugs gzar kha 'dra bya/ /zhes bya ba la/ rna ba bsal zhing sbyang ba'i cha spyad ni rtse mo shing a shwad tha'i lo ma 'dra ba'am/ de bzhin du rtse mo blugs gzar gyi kha dang 'dra bar bya'o/ /thur ma 'dzam bu'i thor to 'dra/ /thal sman me btsa' so sor gsum/ /rim gyis phra sbom sbyar bar bya/ /zhes bya ba la/ thur ma shing 'dzam bu'i thor to 'dra bar/ sor gsum gsum bya ste/ de ltar na thal sman rnon po'i thur ma 'dzam bu'i mchu 'dra ba'i rtse mo can gsum bya la/ de bzhin du me btsa'i las la yang gsum po ste/ de dag phra ba dang / sbom pa'i dbye bas sbyar bar bya'o/ /rgyu ma'i las la thur ma ni/ /'khar ba 'dra zhing dbus zlum pa/ /rtsa ba zla ba phyed 'dra bya/ /zhes bya ba la/ rgyu ma'i gnas su gtong ba'i thur ma ni/ rgyu ma'i nad kyi khyad par la sbyar bar bya ste/ rtsa ba'i phyogs zla ba phyed pa dang 'dra bar snum bag tu 'dug pa la dbus su zlum pa rtse mo thur mar byas shing zlum pa sbyar bar bya'o/ /rgya shug tshi gu bkas 'dra ba/ /sna yi thor to 'brum sreg byed/ /ces bya ba la/ thur ma rtse mo rgya shug gi rtse mo bkas pa 'dra ba ni/ sna'i nang du thor bu dang 'brum bu sreg pa yin no/ /sor brgyad pa la rtse mo ljon/ /gsum pa thal sman sman rim la/ /mthe'u chung gung mo srin lag gi/ /sen mo lta bu'i so byas pa'o/ /zhes bya ba la/ thur ma gsum srid du sor brgyad yod pa rtse mo ljon shing gzar bu 'dra ba byas pa ni thal sman gyi las te thal sman k+sha ra sbyar ba dang / sman gyi rim pa ste/ dug la sogs pa bsku ba la mthe'u chung dang / gung mo dang srin lag gi sen mo lta bu'i dbyibs pa'i so'am rtse mo bya'o/ /pho mtshan sbyang dang mig sman sogs/ /cha spyad rang rang le'ur bshad/ /ces bya ba la/ pho mtshan sbyang ba la sogs cha spyad ni rang rang gi le'ur sngar bshad zin pa yin no/ /nye ba'i cha spyad khab long dang / /thag pa ras dang tho ba dang / 'breng bu rgyu ma lce rta rnga/ /yal ga sen mo kha so dang / /dus dang smin dang lag rkang dang / /'jigs dang dga' ba de'i bya ba'i/ /bye brag thabs ni shes pa'o/ /mkhas pas blo yis dpyad par bya/ /zhes bya ba la/ cha spyad dang 'dra zhing de'i bya ba rdzogs par byed nus pa/ rdo khab len la sogs pa nye ba'i cha spyad ces bya'o/ /khab len ni nor bu'i bye brag go/ /thag pa ni muny+dza la sogs pa las byas pa'o/ /gos ni ras kyi rnam pa'o/ /tho ba ni shing las byas pa'i sbom po'am thung ba'o/ /'breng bu ni pags pa las byas pa'o/ /rgyu ma dang lce ni dngos su zad do/ /rta rnga ni rta'i rnga ma'am rngog ma'o/ /yal ga ni shing gi'o/ /dus ni skad cig ma la sogs pa nye bar mtshon pa'o/ /smin pa ni tshos pa'o/ /dga' ba ni sems rangs pa ste/ /dbye ba ni de'i las la nye bar sbyor ba yin la/ bya ba'i thabs des cha spyad kyi las rdzogs par byed pa'i thabs shes shing sbyor ba'i bye brag la mkhas pa'i sman pas cha spyad gang la 'os pa de la sbyar bar bya zhing / des blos legs par brtags shing dpyad la sbyar ba'o/ /de yang slob dpon gyis bsdus pa las/ 'di dag lus ni thams cad dam/ /lus kyi yan lag bskyod dang 'gyur ba dang / /tshigs dang nang grol rtsa bo che/ /ci rigs par ni sbyar bar bya/ /zhes bya ba yin no/ /cha spyad brdung bsrub dgang dang rgyun srang dag bya dang / /thal sman gdab dang mtshon dbyung bcing dang btsir ba dang / /gzhib dang smad dang bstod dang bskyod dang bcag pa dang / /bzlog dang drang por bya ba cha spyad las rnams yin/ /zhes bya ba la/ brdung ba la sogs pa ni cha spyad kyi las yin te/ brdung ba ni bsnun cing brdeg pa'o/ /bsrub pa ni mdas btsugs shing dkrugs pas bsrub pa zhes bya'o/ / dgang ba ni 'dis dgang bar byas pa'o/ /rgyun srang dag par bya ba ni bu ga rnams dang gre ba la sogs pa'i sbubs rnams ma dag pa dag par byed cing brdeg pa'o/ /gdab pa ni thal sman rnon po la sogs pa bsku ba'i khyad par ro/ /mtshon dbyung ba ni zug rngu la sogs pa 'byin cing 'dren pa'o/ /bcing ba ni chag grugs la sogs pa 'dis sdom par byed pa'o/ /btsir ba ni 'dis rnag la sogs pa 'byin par byed pa'o/ /gzhib pa ni cha spyad gang gis khrag dang chu ser la sogs pa brngub pa'o/ /smad pa ni cha spyad gang gis yan lag la sogs pa'i phyogs smod pa'o/ /bstod pa ni cha spyad gang gis 'debs shing mtho bar byed pa'o/ /bskyod pa ni g.yo bar byed pa ste/ mi 'gul ba g.yo zhing 'gul bar byed pa'o/ /bcag pa ni dngos po gcig du mar byed pa'o/ /bzlog pa ni cha spyad gang gis gzhan du bzlog cing bsgyur ba'o/ /drang por bya ba ni yon por gnas pa'i dngos po bsal zhing rnal du gnas par byed pa'o/ /de ltar na brdung ba la sogs par bstan pa gang yin pa de dag ni mdor na/ cha spyad kyi las rnams yin par shes par bya ste/ legs par zug cing 'byin par byed pa dang / /gzung bya blangs nas 'byin par byed phyir dang / yan lag kun la gnod pa med pas na/ /cha spyad kun gyi mchog ni kang ka'i mchu/ /zhes bya ba la/ gong du smos pa ni cha spyad thams cad kyi nang na/ kang ka'i mchu lta bu'i cha spyad ni/ gtso bo yin te/ ci'i phyir zhe na/ de legs par zug cing kun du bskor du 'dod pa dang / de bzhin du gzung bar bya ba'i zug rngu bde blag tu zin cing blangs nas kyang zug rngu 'byin cing 'don par byed pa'i phyir dang / zug tu dbyung bar bya ba'i lus kyi yan lag kun la gnod pa med cing las de bde blag tu sgrub par byed pa yin pas na/ de'i phyir cha spyad thams cad kyi mchog ni kang ka'i mchu lta bu yin no/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas nges par sbyar ba las/ /le'u nyi shu rtsa lnga pa'i rnam par 'grel pa'o// //de nas gtar spyad kyi le'u bshad par bya'o/ /zhes bya ba la/ 'di brtsams pa'i dgos pa ni 'di yin te/ cha spyad phal cher ni lcags las byed pa yin la/ 'di phal cher lcags las byed pa'am/ las kyi rnam pa ris mthun pa'i phyir te/ de'i 'og tu 'di brtsams pa yin no/ /mgar ba mkhas pas cho ga bzhin/ /brdungs pa'i gtar spyad nyi shu drug /spu ni chod par nus pa dag /phal cher sor ni drug pa bya/ /gzugs legs so ni legs pa dang / /gzung bar bde ba nyid du bya/ /ya yo med cing 'thar legs pa/ /shing tu rno ba'i lcags las byas/ /rtse mo shin tu legs brdungs pa/ /ut+pal sngon po'i mdog 'dra ba/ /rang ming rjes su mthun gzugs ni/ /rtag tu nye bar gzhag par bya/ / rtse mo re re dag la yang / /rang tshod sor phyed gnyis dang bzhi/ /phal cher gnyis dang gsum du bya/ /de gnas khyad par dag la sbyar/ /zhes bya ba la/ gtsags bu nyi shu rtsa drug bya ba yin la/ de yang gang gis bya zhe na/ mgar ba mkhas pas/ zhes bya ba ste/ bya ba la mkhas shing byang bar gyur pa'i lcags mgar gyis brdungs shing rdzogs par bya'o/ /ci ltar bya zhe na/ cho ga bzhin te/ tshad la sogs pa'i rnam pa ji skad bshad pa bzhin du brdung ba'o/ /rno tshad ji tsam zhe na/ spu ni chod par nus pa dag /ces bya ba ste/ gang gis spu chod pa'i las byed nus pa tsam du bya ba'o/ /tshad ci tsam du bya zhe na/ phal cher zhes pa mang du srid sor drug phar byas pa dang / gzugs legs shing ji skad bshad pa'i rnam par dbyibs dang ldan pa dang / de bzhin du so legs pa ste/ rno zhing snyoms pa dang / de bzhin du gzung bar bya ba bde ba nyid de bzung ba'i phyogs bde blag tu gzung bar bya ba dang / de bzhin du ya yo med pa ste/ so snyoms shing rnga rngo med pa dang / de bzhin mthar legs shing brdung ba zhag pa dang / shin tu rno ba'i lcags las byas pa gang yin pa de las brdungs pa dang / de bzhin du rtse mo shin tu legs par brdungs pa ste/ lcags legs par bskol ba tho bas ma gas par brdung zhing khyad par du rtse mo'i gnas brdung zhag par byas pa dang / de bzhin du ut+pal sngon po'i mdog 'dra zhing 'jam pa dang / de bzhin du rang gi ming dang rjes su mthun pa'i gzugs sam/ dbyibs yod pa gtsags bu'i kha 'bras 'dra bar byas pa la ni/ gtsags bu 'bras kyi kha'am/ 'bras kyi rtse mo zhes btags pa lta ba la sogs pa'o/ /de bzhin du rtag tu ste/ dus thams cad du cha spyad dang gtsags bu de dag nye bar gzhag par bya zhing sta gon du bya ba dang / de bzhin du rang gi tshad de/ gtsags bu de'i srid kyi tshad las rtse mo'am/ kha cha phyed kyi tshad dang / la la bzhi tshad du bya ba dang / de dag kyang phal cher grangs gnyis dang gsum du bya ba la yang gtsags bu de dag gnas kyi khyad par dang / nad kyi khyad par la sbyar bar bya'o/ /de las dkyil 'khor 'dra ba'i rtse/ /mdzub sen nang gi dbyibs 'drar bya/ /de ni rnyil skyes lkog ma yi/ /sha lhag la sogs bzhar bcad sbyar/ /zhes bya ba la/ gtsags bu de rnams kyi nang nas gtsags bu dkyil 'khor 'dra zhes bya ba'i rtse mo kha'i dbyibs mdzub mo'i nang gi dbyibs dang 'dra bar bya ba la/ de ni rnyil gyi lhag ma skyes pa la sogs pa phyi zhing bzhar ba dang / sha lhag bcad pa la sbyar bar bya'o/ /'phel gtsags spu gri'i dbyibs lta bu/ /gcod dang dral dang 'byin la sbyar/ /rtse drang skrangs nad mtho ba dang / /zab pa la sbyar de las gzhan/ /ltag pa ring zhing rtse gug pa/ /so thung nad tshul ji bzhin sbyar/ /zhes bya ba la/ gtsags bu 'phel gtsags zhes bya ba'i gzugs ni spu gri'i dbyibs lta bu ste/ de ni gcod pa ste gshags pa dang 'byin pa ste rmen bu dang / /thor bu la sogs pa gdon pa la sbyar ro/ /de las kyang rtse mo drang po ste so'i gnas drang por 'dug pa ni/ skrangs nad mthon por 'dug pa dang / rngams stug cing zab pa la sbyar ro/ /rtse mo drang po de las gzhan pa ste/ de dang mi mthun pa ltag pa'am/ rgyab ring zhing rtse mo gug pa so'am kha zheng thung ba dag ni nad kyi tshul ji lta ba bzhin bya zhing / lus kyi gnas kyi dbang las mtshon la skrangs pa ha cang mtho ba yang ma yin la/ ha cang zab cing dma' ba yang ma yin pa mnyam por gnas pa la sbyar bar bya'o/ /ut+pa la dang so phyed kyis/ /dral dang de bzhin gcad par bya/ /zhes bya ba la/ ut+pa la'i 'dab ma 'dra ba dang / so phyed lhag tsam yod pa'i gtsags bu gnyis ni/ dral ba ste gshags pa dang / gcad pa ste dum bur dbye ba la sbyar bar bya'o/ /sbrul kha rtse sor phyed rna ba/ / sna yi thor bu bcad la sbyar/ /zhes bya ba la/ gtsags bu sbrul gyi kha zhes bya ba rtse mo ste gtsags bu'i 'bras bu'i phyogs tshad sor phyed yod pa de ni sna dang rna ba la thor bu'am/ 'brum chen byung ba gcad pa la sbyar bar bya'o/ /rma tshol 'jam po rta bla ba'i/ /mgo bo 'dra gzhal brtag par bya/ /zhes bya ba la/ rma'i lam kun tshol zhing rtog par byed pa gang yin pa de la ni rma tshol zhes bya la/ des ni thag ring por song ba'i rma'i phug dang / sbubs tshol ba'i skabs su sbyar bar bya'o/ /de yang 'jam rtsi rtsub bag med pa dang srin bu rta bla ba zhes bya ba gan du pa ta'i mgo bo 'dra ba dag gis gzhal zhing brtag par bya'o/ /de las gzhan pa khab rtse 'dra/ /rtse bug can ni dbug la sbyar/ /zhes bya ba la/ snga ma de las gzhan pa'i rma tshol gnyis pa khab kyi rtse mo 'dra zhing / rtse mo rno ba bu ga'am mig yod pa dag ni dbug cing brtol ba la sbyar bar bya'o/ /ljang pa'i lo 'dra 'bigs la sbyar/ /zhes bya ba la/ ljang pa'i lo ma dang dbyibs 'dra ba'i gtsugs bu ni 'bigs pa la ste/ rtsa dbug pa'i las bya'o/ /sha ri'i mchu 'dra mda' bug ni/ /kha 'dra rtse gsum khrag gzags la/ /zhes bya ba la/ gtsags bu bya sha ri ka'i mchu 'dra ba dang / mda' bug ni kha 'dra ba dang / rtse gsum pa'am/ pir kha bsdus pa 'dra ba ni khrag gzags 'byin pas gso bar bya ba'i nad la sbyar ro/ /'jag rtse a ta'i mchu 'dra ba/ / 'bras bu sor gnyis khrag 'byin la/ /zhes bya ba la/ gtsags bu 'jag ma'i rtse mo 'dra ba dang / a ta'i mchu 'dra ba gnyis bya ba la/ des khrag gzags pa'i nad la sbyar la/ gnyis pa de dag la 'bras bu'am/ rtse mo ni sor gnyis kyi tshad du bya'o/ / de 'dra'i so ni nang du blta/ /gtsags 'bras zla ba kham pa 'dra/ /sor ni phyed dang gnyis yod bya/ /zhes bya ba la/ de gnyis dang dbyibs 'dra bas na de 'dra ste/ khyad par ni so nang du blta ba dag tu khrag gzags pa la snga ma bzhin du sbyar bar bya la/ gtsags bu kha nang du bltas pa de'i gtsags 'bras kha ni zla ba kham pa ste/ zla ba phyed pa 'dra zhing kha zheng sor phyed dang gnyis par bya'o/ /rtse mo 'bras dang 'dra ba la/ /sor ni phyed dang gnyis yod dag /de ni rtsa lto'i nad la sbyar/ /zhes bya ba la/ rtse mo ste gtsags 'bras phyogs 'dra ba de bzhin du tshad sor phyed dang gnyis yod pa de ni rtsa dbug pa dang lto ba'i nad la sbyar bar bya'o/ /sta re'i dpangs 'dra ba lang so/ /'dra ba'i gtsags 'bras sor phyed pa/ /de yi yu ba gyen bstan la/ /rus pa'i steng gnas rtsa la gdab/ /ces bya ba la/ dpangs dang srid sta re yu ba can 'dra zhing gtsags bu'i rtse mo'am/ kha sor phyed yod pa'i gtsags bu des rus pa'i steng na gnas pa'i rtsa la gdab cing dbug par bya'o/ /ci lta zhe na/ 'debs pa'i tshe yu ba gyen du bstan la rtsa dbug par bya'o/ /zangs ma'i thur ma rtse gnyis pa/ /rtse mo me tog kha 'bus 'dra/ /de yis mthong nyams mig spris dbug /ces bya ba la/ mthong ba nyams pa'i mig nad spris yod pa de dbug cing bsal bar bya ba'i phyir/ zangs las byas pa'i thur ma rtse mo gnyis pa ste/ ya tog ma tog gnyis ka rtse mo yod pa rtse mo me tog kha 'bus pa 'dra bar bya ste/ des mthong ba nyams shing sgrib pa med pa'i mig spris dbug par bya'o/ /rgya 'dra'i gtsags bu bya ba ni/ /sor gdub 'dra la kha byung ba/ /gtsags 'bras rgyar ni sor phyed pa'i/ /rigs pas 'phel gtsags lta bu 'am/ /dkyil 'khor lta bu'i rtse 'drar bya/ /de ni mdzub mo'i thor to la/ /gdags su rung ba'i rgya 'dra bya/ /srad bus brtod la gre ba'i nang / /nad rnams gcad dang dral la sbyar/ /zhes bya ba la/ rgya 'dra ba'i gtsags bu bya ba ni mtshan nyid 'di ltar bya ste/ sor gdub 'dra bar byas pa nyid las kha btod pa'am/ byung ba'am/ de bzhin du gtsags 'bras de'i kha phyogs su rgya sor phyed yod pa/ rigs pas zhes pa mtshon gyi las bya ba dang 'tsham par byas pa dang / dbyibs 'phel gtsags lta bu'am/ dkyil 'khor lta bu'i gtsags bu dang / rtse mo 'dra ba byas la/ de yang mdzub mo'i thor to ste/ tshigs dang po la gdags su rung ba'i ran pa'i sor gdub lta bu'i rnam pa de lta bur bya'o/ /de yang skud pa dmar pos btags te/ mkhrig ma'i gnas su gdags par bya la/ de nas de'i 'og tu gre ba'i nang du gzhug cing / de'i nang gi nad rnams gcad pa dang dral bar bya'o/ /gre ba'i sha lhag thor gtsug 'dzin/ /lcags kyu rtse mo legs gug bya/ /zhes bya ba la/ gre ba'i nad kyi sha lhag dang thor bu dang 'bras la sogs pa sla zhing gzung ba'i phyir/ lcags kyi rtse mo lcags kyu lta bu la bya zhing rtse mo shin tu gug par bya'o/ /rus pa gcod pa'i sog le ni/ /srid du sor bcu zheng sor gnyis/ /so rnams phra zhing rab tu rno/ /yu ba chang zungs legs par bya/ /zhes bya ba la/ rus pa gcod pa'i mtshon ni/ sog le zhes bya bas bya la/ de'i tshad ni srid kyi dpangs su sor bcu zheng du sor gnyis yod pa byas la/ de yang so rnams rab tu phra zhing rno la rtsub par bya ba dang / yu ba'i chang zungs legs shing mdzes par bya'o/ /rma yi chu rgyus skra gcad pa'i/ /chan pa chan pa 'dra bar bya/ / zhes bya ba la/ gtsags spyad kyi rnam pa chan pa zhes bya ba ni/ rma'i chu rgyus dang skra gcad pa'i don du bya la/ de yang chan pa 'dra ba ste/ cha gsum 'og tu dgug par bya la/ lhag ma cha bzhi pa so sor bya'o/ /so yo so drang kha gnyis pa'i/ /sen mo'i 'dreg spyad sor dgu pa/ /zug rngu phra dbyung gcad pa dang / /dral dang dbug dang phyi bar bya/ /zhes bya ba la/ gtsags spyad khab sregs su yod pa dang kha 'dra ba ste/ kha gnyis yod par bya la/ de ni sen mo 'dreg pa'i gtsags spyad ces bya ste/ de'i srid ni sor dgu par bya'o/ /des kyang zug rngu phra mo zug pa dbyung ba dang / sen mo la sogs pa gcad pa dang dral ba dang / dbug pa dang / phyi bar sbyar bar bya'o/ /zur bzhi pa la sor gcig pa/ /dbyibs ni kun tu gcig 'dra ba/ /so phyi ba yi gtsags spyad des/ /so yi dreg pa phyi bar bya/ /zhes bya ba la/ phyi ba zhes bya ba'i gtsags spyad zur bzhi pa/ so gcig par byas pa la dbyibs kyi rnam pa kun tu 'brel zhing gcig 'dra bar bya la/ de lta bu'i so phyi ba'i gtsags spyad de so'i dreg pa dang / so la skyon byung ba phyi zhing bsal bar bya'o/ /khab ni mgo zlum mig zabs che/ /mkhrang pa gsum bya/ zhes bya ba la/ khab gsum po mgo zlum zhing 'jam pa dang / skud pa 'jug pa'i phyogs kyi mig zabs che ba dang / mkhrang zhing srab pa bya'o/ /de las ni/ /sha che ba yi phyogs su ni/ /zur gsum srid du sor gsum pas/ / zhes bya ba la/ rma btsem pa la gsum po de dag gi nang nas sha che ba'i phyogs kyi rma btsem pa la ni zur gsum pa yod/ srid sor gsum pas bya'o/ /sha chung ba dang rus tshigs na/ /rma yod pa la srid sor gnyis/ /zhes bya ba la/ rma sha chung ba'i phyogs dang rus pa dang / tshigs la rma yod pa btsem pa la ni khab srid du sor gnyis pa bya'o/ /zhu dang ma zhu'i gnas nad rma'i/ /khab rtse 'bras dbyibs gzhu ltar sgu/ /srid du sor ni phyed dang gsum/ /zhes bya ba la/ khab gsum pa ni khab rtse 'bras 'dra zhing gzhu ltar sgur po la sor phyed dang gsum yod par bya ste/ des ni zhu ba'i gnas dang / ma zhu ba'i gnas na rma yod pa dang / gnas rnams na rma yod pa la bcom par bya'o/ /zhes sbyar bar bya'o/ /khab ni bdun nam brgyad kun kyang / /zlum po sor ni legs sbams la/ /khri gcig la btsugs pir 'dra ba/ /brtsan sngon gdong nad thig le nag /skra 'byi ba la gtsags par bya/ /zhes bya ba la/ khab ni bdun nam brgyad kun kyang zlum por byas la/ tshad sor bzhi pa de legs par sbams shing bsdus la khri'u 'am/ gzhi gcig la btsugs te/ pir 'dra bar bya zhing legs par bcing bar bya ste/ gtsags spyad 'di ni khab kyi pir zhes bya ste/ de ni brtsan sngon po byung ba dang / gdong gi nad thig le nag po chags pa dang / skra 'byi ba'i nad la gtsags par bya'o/ /khab brgyad zlum po sor phyed pa/ /gcig tu sbams la gzar bu 'dra/ /lag pa gnyis kyis btsugs nas ni/ /de yis sna yi khrag dbyung ngo / /zhes bya ba la/ tshal pa khre'u phyogs brgyad du gnas pa dang ldan pa'i dbyibs zlum po tshad sor phyed pa gcig tu sbams pa gzar bu 'dra ba byas la/ gzar bu des lag pa gnyis dang gtsags bur gyur pa las/ sna'i khrag dbyung zhing gdon par bya'o/ /rna shal dbug pa'i smyung bu ni/ /yu thi ka ni kha 'bus 'dra/ /zhes bya ba la/ rna shal dbug cing 'bigs pa'i cha spyad smyung bu ni/ me tog yu ti ka khab 'dra bar byas pa'o/ /smyung bu sor ni phyed par bya/ /de yi tshad dbug de yan chad/ /zur bzhi byas pa de yis ni/ /skrangs smin ma smin dogs la dbug /rna drung sha ni stug po dbug /ces bya ba la/ smyung bu zhes bya ba ni/ gtsags spyad kha zlum po sor phyed yod pa/ de'i tshad du dbug cing gzhug par bya la/ zlum po sor phyed pa de yan chad ni dbyibs zur bzhi par bya'i zlum por mi bya'o/ /de lta bu gtsags spyad des ni/ skrangs pa 'di smin pa yin nam/ ma smin pa yin zhes dogs shing som nyir gyur pa la dbug par bya'o/ /gzhan yang des rna drung gi sna shal stug po yod pa dag dbug par bya'o/ /smyung bu kha ni sbom po la/ /sum cha sbu gu yod byas la/ /sor gsum pa yis rna ba dbug /ces bya ba la/ yang rna shal mthug po yod pa la/ smyung bu'am khab sbom pos dbug pa bsngags pa yin/ de yang sum cha'i tshad tsam du bu ga yod par byas la/ srid sor gsum pa khong stong gis dbug par bya'o/ /pad+ma thal sman me btsa' dang / /mching bu rdo dum sen mo sogs/ /lcags ming gtar spyad phra mo ste/ /de yang de bzhin sbyar bar bya/ /cha spyad 'khrul 'khor sogs pas kyang / /mkho ba nad kyi dmigs dang sbyar/ /zhes bya ba la/ pad+ma dang thal sman la sogs pa ni mkho ba'i cha spyad yin la/ sogs pa ni ku ra pin dang / shing gi yal ga dang / phyugs kyi rmig pa dang / lo 'dab rtsub mo dang / rgya mtsho'i lbu ba dang / lci ba skam po la sogs pa bsdu'o/ / de dag gi lcags ma yin pa'i gtar spyad phra mo ste/ de yang blos snga ma bzhin du 'og nas bshad pa'i tshul gyis sbyar bar bya'o/ /yang 'di bzhin du cha spyad gzhan dag 'khrul 'khor la sogs pas kyang nye bar sbyar bar bya'o/ /de bzhin du mkho ba'i cha spyad gzhan dag kyang nad kyi dmigs las dpags te sbyar bar bya'o/ /'dren dang 'byin dang dral dang 'drub/ /dmigs tshol phyi bsal zhal zhal gdab/ /gtsags bcad gshegs dbug btsugs pa dang / /gzung bsreg de yis bya ba yin/ /zhes bya ba la/ 'dren pa dang 'byin pa zhes bya ba nas/ sreg pa'i bar bya/ re re zhing smos pa ni/ gtsags spyad de bya ba'i las yin no/ /gcad dang dral dang phyi ba'i phyir/ /spyad kyi gtsags 'bras rtsa ba'i bar/ /mdzub mo gung mo mthe bo yis/ /ma yengs pa dang legs par gzung / / zhes bya ba la/ gtsags spyad gcad pa'i don dang / dral ba'i don dang / phye ba'i don gyi bya ba byed pa'i phyir/ des las byed pa na gtsags spyad de rnams kyi gtsags 'bras dang / rtsa ba'i bar nas las de dag bya ba'i phyir gzung ba ni/ der mdzub mo dang / gung mo dang / mthe bo ste/ sor mo gsum gyis gzung bar bya'i/ lag pa thams cad kyis mi gzung ngo / /'dzin pa na yang blo gzhan du ma yengs pa dang / nor pa med par legs par gzung bar bya'o/ /gtar ga gdab phyir rtse mo'i drung / /mdzub mo dang ni mthe bos gzung / / zhes bya ba la/ gtar ga gdab cing khrag gzags pa'i don du ni/ gtsags bu'i rtse mo drud mtshams nas mdzub mo dang mthe bos gzung bar bya'o/ /'bras 'dra ba yi yu ba ni/ /chang par bcug ste rtse mos gdab/ /ces bya ba la/ gtsags bu 'bras kyi dbyibs 'dra ba'i yu ba zlum po chang bar bcug ste/ rtse mo ste kha'i phyogs nas gzung ste gdab par bya'o/ /dbyung don yu ba nas bzung bya/ /zhes bya ba la/ zug rngu la sogs pa 'byin pa'i don gyi cha spyad ni yu ba ste/ rtsa ba'i phyogs nas bzung zhing gdon par bya'o/ / cha spyad sngar smos pa rnams kyang de bzhin du shes par bya'o/ /gzhan dag bya ba gang bder bya/ /zhes bya ba la/ gtsags spyad gzhan dag ni/ bya ba la ji ltar bde ba bzhin du ci rigs par bya'o/ /gtar spyad sna tshogs dag gi snod/ /gso ras bal snam men tri 'am/ /pags 'jam du gu la las byas/ /rab tu stug pa zheng sor dgu/ /srid du sor ni bcu gnyis pa/ /bal gyis bar gcad spyad bcug la/ /legs par gzhag ste drub pa dang / /thur mas kha ni brgyu bar bya/ /zhes bya ba la/ gong du smos pa'i gtar spyad sna tshogs dag gi snod gso ras sam bal gos sam/ men tri la sogs pas byas pa'am/ pags pa 'jam po'am/ du gu la las byas pa/ rab tu stug pa mkhregs pa dang / zheng sor dgu ste/ ngos gcig nas gcig tu sor dgu pa yod pa/ srid sor bcu gnyis pa/ de bzhin du bal gyis gtsags spyad kyi bar du bar gcad cing / bcug la ma 'dres par legs par gzhug ste/ drub pa dang / de bzhin du snod kyi kha'i bu ga thur mas legs par brgyu bar bya zhing kha sbyar ba dang / bcas pa de bsag cing bsdu bar bya'o/ /srin bu pad pa bder gnas pa/ /khrag dbyung phyir ni sbyar bar bya/ /zhes bya ba la/ srin bu pad pa zhes bya ba/ chu na gnas pa'i 'bu'i rigs dza lu ka ni/ skyes bu bde bar gnas pa dag khrag dbyung ba'i phyir sbyar bar bya'o/ /chu nang nya dang sbal sogs dang / /mi ro'i dri ma rnams las byung / /dmar dang dkar dang shin tu gnag /mi srun sbom dang 'brel ba dang / /'ja' tshon dang 'dra ro stod bkra/ /spu yod de rnams dug can yin/ /spang bya des ni khrag gzhibs na/ /g.ya' rnag 'dzag rims mgo 'khor skyed/ /de la dug khrag mkhris gso bya/ /zhes bya ba la/ srin bu pad pa chu nang las byung ba dang / nya dang sbal pa la sogs pa dang / mi ro dang dri ma rnams las byung ba/ kha dog dmar ba dang / shin tu gnag pa dang / mi srun zhing rang bzhin g.yo ba dang / /sbom zhing lus che ba dang / bsil ba dang / 'ja' tshon dang 'dra bar kha dog sna tshogs yod pa dang / ro stod bkra zhing ra ris 'dug pa dang / spu yod pa de thams cad dug can yin pas spang bar bya'i/ gtar ga gdab pa'i don du mi sbyar ro/ /ci'i phyir zhe na/ des khrag gzhibs nas g.ya' ba la sogs pa skye bar 'gyur la/ g.ya' ba la sogs pa skyes pa de la ni/ dug dang khrag dang mkhris pa'i gso ba bya'o/ /chu mdog rnam par gsal ba dang / /dug med nya lcibs med las byung / /rtsa snar ro stod sngo bkra zlum/ /rgyab ni ngur smrig 'dra lus phra/ /lto ni cung zad ser ba bzang / /zhes bya ba la/ chu'i mdog rnam par gsal zhing dang ba las byung ba dang / dug med cing nya lcibs med pa las byung ba dang / mdog cung zad rtsa snar sngo bag tu 'dug pa dang / ro stod sngo bkrar 'dug pa dang / dbyibs zlum pa dang / rgyab ngur smrig ltar ser ba dang / lus phra zhing srab pa dang / lto cung zad ser por gnas pa gang yin pa de thams cad bzang ste dug med pa yin no/ /de yang legs par ma skyugs dang / /rtag tu 'thung du bcug pa dag/ /chu nang zhugs te nub pa ni/ /khrag gis myos pa yin pas spang / /zhes bya ba la/ dug med pa'i srin bu de nad khrag 'thungs nas legs par ma skyugs pa dang / chu'i nang du phyin te nub pa ni khrag gis myos pa zhes bya ba yin pas de yang spang bar bya'o/ / de nas cig shos skyer pa btags/ /chur sbyar ba yi nang du gzhug /kan dzi'am dar ba'i nang du gzhug /slar yang chur ni dbugs phyung nas/ /mar ram sa zhag nu zho'am/ /khrag gi thigs pas bskus 'thung gzhug /ces bya ba la/ de nas srin bu dug med pa skyer pa btags pa'i phye ma dang chur sbyar ba'i nang du bcug pa'am/ rtsab mo rang skyur ram/ dar ba'i nang du bcug la/ de nas slar yang chur bcug pas dbugs phyung la 'thung du gzhug ste/ de yang mar la sogs pa bskus par 'thung du gzhug ste/ 'thung tshe ro stod mthor gyur na/ /ras ma srab mos g.yogs par bya/ /zhes bya ba la/ srin bu de ro stod bteg ste 'thung na/ gos srab mos g.yogs par bya'o/ /khrag ni bzang ngan 'dres pa las/ /pad pa dang por nad khrag ni/ /'thung ste ngang pas 'o ma dang / /'dres chu'i 'o ma len dang mtshungs/ /zhes bya ba la/ srin bu pad pa des ni bzang po dang / ngan pa 'dres pa las nad khrag 'jibs te/ de dper na chu dang 'o ma 'dres pa las ngang pas ni 'o ma len pa dang 'dra'o/ /so yis 'debs pa'am g.ya' gyur na/ /de ni slar dbyung skyug tu gzhug /rgyam tsha til mar gyis kha bsku/ /phye ma 'jam pos rgyab tu gtor/ /zhes bya ba la/ srin bu pad pas 'jibs pa na/ sos 'debs pa'am g.ya' bar gyur na/ nad med pa'i khrag bsrung ba'i 'bu de gdon par bya'o/ /bton nas kyang khrag skyug tu gzhug go/ /de bzhin du rgyam tsha dang / til mar sbyar bas kha bsku bar bya'o/ /de bzhin du phye ma 'jam pos kyang gtor bar bya zhing / mjug ma nas yar btsir te slon du gzhug par bya'o/ /slar yang zhag bdun bar du ni/ khrag myos bsrungs la 'thung mi gzhug /ces bya ba la/ de ltar sngar byas nas zhag bdun gyi bar du 'jib tu mi gzhug go/ /srin bu pad pa legs skyugs na/ /sngon bzhin khong grims brtan par 'gyur/ /drags na dal zhing snyom 'chi 'gyur/ /skyugs ma legs na rengs myos 'gyur/ /zhes bya ba la/ /srin bu pad pa skyugs legs na khrag ma 'thungs pa'i sngon bzhin du khong grims shing brtan par 'gyur ro/ /de skyugs drags na lus snyom pa'am 'chi bar 'gyur ro/ /skyugs ma legs na ni rengs shing myos par 'gyur ro/ /bum pa chu dang sa blugs pa/ /gzhan dang gzhan du gzhag par bya/ /kha chu rul bag sbyang phyir bya/ /gzhan du dug dang bcas par 'gyur/ /zhes bya ba la/ pad pa de ni bum pa dang / chu dang sa gtsang ma blugs pa/ de lta bu mi mthun pa gzhan dang gzhan dag tu gzhag par bya ste/ de kha chu dang rul bag spang ba'i phyir yin no/ /de ltar ma byas na ni rgyu des dug can du 'gyur ro/ /ma dag pa 'am khrag ma dbyung / /skyer pa bu ram sbrang rtsis bsku/ /zhes bya ba la/ khrag ma dag par gyur na srin bu de bskyed la/ skyer pa la sogs pas bsku bar bya'o/ /lan brgyar dkrugs mar ras bal gyi/ /ye'u sa byugs la sman bsil bsku/ /zhes bya ba la/ khrag gzhibs zin nas mar lan brgyar dkrugs shing bzhus pa/ /ras bal gyi ye'us bsku ba dang / sman bsil bag gis bsku bar bya'o/ /nad kyi khrag dang bral gyur na/ /'phral du rtsa dmar nad med 'gyur/ /zhes bya ba la/ nad khrag ma lus par phyin par gyur pa dang / de'i mod la rtsa dmar ba dang / nad du gyur pa zhi bar 'gyur ro/ /ma dag gnas nas bskyod gyur pa/ /rma yi gnas su 'dug pa'i khrag /zhag lon na ni rnag par 'gyur/ /de bas de ni slar dbyung ngo / /zhes bya ba la/ khrag ma dag cing nad dang bcas pa rang rang gi gnas nas bskyod cing 'phos te rma'i gnas su 'dug pa ni mtshan mo 'das shing zhag lon na rnag par 'gyur ro/ /de bas na khrag de slar dbyung bar bya zhing bsal bar bya'o/ /mkhris rgyas khrag gi nad la ni/ /ku ba bum pa sbyar mi bya/ /de gnyis me dang bcas pa yin/ /rlung dang bad kan la sbyar bya/ /zhes bya ba la/ mkhris pa rgyas shing shas che ba las byung ba'i khrag gi nad la ni/ khrag de dbyung ba'i phyir sngar bshad pa'i ku ba dang / bum pa glan cing sbyar bas khrag dbyung bar mi bya ste/ gang gi phyir gnyis pa de dag ni nang na me dang bcas pa yin pa'i phyir/ khrag gi skye gnas mkhris pa dang / nus pa mthun pas gnod pa yin no/ /rlung dang bad kan shas che ba'i nad la ni/ ku ba dang bum pa sbyar bas khrag dbyung bar bya ste/ de gnyis kyi gnyen por gyur pa yin pa'i phyir ro/ /bad kan las gyur nad khrag ni/ /ska bas rngabs rwas gzhib mi bya/ / rlung dang mkhris pa las gyur khrag /rngabs ras gzhibs te dbyung bar bya/ /zhes bya ba la/ bad kan las gyur pa'i nad khrag ni/ /ska zhing lci bag can yin pas/ /rngabs rwas gzhib cing dbyung bar mi bya la/ rlung dang mkhris pa las gyur pa'i khrag ni sla ba yin pas rngabs ras gzhib cing dbyung bar bya'o/ /lus kyi gong du srad bu 'am/ /ras kyis dam du bcings nas ni/ /chu ba tshigs rus gnad rnams ni/ /dor te zhal zhal gdab par bya/ /gyen du dbyung ba'i thabs kyis ni/ /thur du 'bab par gdab par bya/ /zab dang nye dang 'phred mi gdab/ /btab pa'i gnas su'ang gdab mi bya/ /zhes bya ba la/ zhal zhal gdab par bya ba'i lus kyi gong phyogs su srad bu'am/ ras gang yang rung bas dam du bcings nas chu ba la sogs pa dor zhing spangs nas gtsags bus zhal zhal gdab par bya la/ de yang gyen du dbyung zhing gdab pa'i thabs kyis khrag thur du 'bab par gdab par bya'o/ /de bzhin du nang du zab par yang mi bya ste/ nye zhing bar mtshams med par yang mi gdab/ 'phred 'gros kyis kyang mi gdab po/ /de bzhin du gtsags bu btab zin pa'i gnas su gnyis pa gdab par yang mi bya'o/ /zhal zhal bya ba phyogs gcig 'dus/ /rtsa mdud srin bus khrag dbyung zhing / /bem bem por gyur rwa sogs gdab/ /nad khrag lus khyab gtar ga gdab/ /ces bya ba la/ phyogs gcig tu 'dus pa'i khrag ni/ zhal zhal gdab pas dbyung bar bya'o/ /de bzhin du rtsa mdud dam/ rmen bur 'dus pa'i khrag ni srin bu pad pas dbyung bar bya'o/ de bzhin du khrag gi khrag bem bem por gyur cing tshor ba med pa ni rtsa sogs te/ rngabs rwa dang / ku ba dang / bum pa dag gis nad dmigs ji bzhin du dbyung bar bya'o/ /de bzhin du nad khrag gis lus kun tu khyab par gyur pa de ni gtar ga gdab pas dbyung bar bya'o/ /khrag nad 'dus pa zhal zhal bya/ /gting na yod pa pad pas dbyung / /lpags gnas ku bum rngabs rwas dbyung / /lus khyab khrag la gtar ga nyid/ /ces bya ba la/ khrag nad 'dus shing gong por 'dril ba la ni/ zhal zhal gdab par 'os pa yin no/ /de bzhin du khrag gting na yod cing nang du zhen pa dag ni srin bu pad pas dbyung bar bya'o/ /khrag pags par gnas shing rgyas par gyur pa ni/ ku ba dang / bum pa dang / rngabs rwas dbyung bar bya'o/ /lus thams cad khyab cing rgyas pa'i nad khrag ni gtar ga'i thabs nyid kyis dbyung bar bya'o/ /rlung sogs gnas la rngabs rwa dang / /pad ba ku bas rim bzhin dbyung / /zhes bya ba la/ rlung la sogs pa'i nad kyi gnas la gnas pa'i khrag de ni gnas de las rngabs rwa la sogs pa thabs gsum gyis khrag dbyung bar bya ste/ des ni rlung gi gnas kyi khrag ni rngabs rwas dbyung bar bya'o/ /mkhris pa'i gnas kyi khrag ni srin bu pad pas dbyung bar bya'o/ /bad kan gyi gnas kyi khrag ni ku bas dbyung bar bya'o/ /khrag phyung bsil bskus la sogs pas/ /rlung ni rnam par 'khrugs gyur te/ /rma na g.ya' zhing skrangs gyur na/ /de la zhun mar dron pos bsku/ /zhes bya ba la/ skyes bu'i lus las khrag dbyung zhing bton par gyur pa dag la ni/ bsil ba'i sman gyi lde gus bsku ba dang / blugs pa la sogs pas rlung rnam par 'khrugs par gyur te/ rma na ba dang / g.ya' bde la zhun mar dron pos bsku zhing byug par bya'o/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas nges par sbyar ba las/ le'u nyi shu rtsa drug pa'i rnam par 'grel pa'o// //de nas gtar ga gdab pa'i cho ga'i le'u bshad par bya'o/ /zhes bya ba la/ 'di brtsams pa'i dgos pa ni 'di yin te/ lus khyab pa'i khrag la gtar ga gdab par bya'o/ /zhes sngar bshad pas ni/ de'i 'og tu 'di brtsams pa yin te/ rtsa rnams dbug cing gdab pa'i las ni gtar ga gdab pa ste/ de'i cho ga 'di dang 'di ltar bya'o/ /zhes bya ba ni las kyi tshul yin te/ de'i le'u bshad par bya'o/ /cung zad mngar zhing tshwa bro la/ /grang dang tsha min ska ba min/ /pad+ma lham bu chu gsher dang / /btsod dang ri bong khrag ltar dmar/ /dag cing dmar bar 'byung ba ni/ /de nyid kyis ni lus gnas byed/ /ces bya ba la/ khrag dag cing nad med pa ni/ cung zad ro mngar ba dang / cung zad ro lan tshwa bro ba dang / de bzhin du grang ba dang / tsha ba gnyi ga ma yin pa tsha grang snyoms par gnas te zla ba dang / me'i rang bzhin gnyi ga'i yon tan dang ldan pa dang / de bzhin du ska ba ma yin zhing / bde blag tu 'dzag pa dang / de bzhin du pad+ma dang / srin bu me khyer la sogs pa ltar dmar zhing dang bar 'byung ba ni skyon med pa yin la/ nad med pa'i khrag de nyid kyis ni lus gnas shing 'jug par 'gyur ba yin no/ /de ni phal cher bad mkhris kyi/ /nad kyis 'khrugs pas/ zhes bya ba la/ khrag dmar zhing dngas pa de ni phal cher te mang du bad kan dang mkhris pa skyed par byed pa'i kha zas dang / spyod lam dang sman gyis nad 'khrugs par 'gyur zhing ldang bar byed pa yin no/ / phal cher zhes smos pas ni lan 'ga' ni rlung gis kyang ldang bar byed pa yin no/ /gnod skyed pa/ me dbal 'bras dang mcher nad dang / /skran dang me drod 'bri dang rims/ /kha dang mig dang mgo nad dang / /myos dang skom dang tsha bro dang / /mdze nad dreg nad mkhris khrag dang / sgregs pa skyur zhing mgo 'khor byed/ /ces bya ba la/ de'i 'og tu nad khrag des gnod pa skyed par byed pa ni/ me dbal la sogs skyed par byed pa yin no/ /kha la sogs pa gsum ni/ /nad ces bya ba dang sbyar ro/ /dreg nad ni rlung dang khrag 'dres pa'o/ /bsil dro snum dang rtsub sogs dang / /nad gang gsos par gyur ba na/ /legs par 'chos par ma gyur ba/ /de ni khrag 'khrugs las gyur yin/ /zhes bya ba la/ bsil ba dang dro ba dang snum pa dang / rtsub pa dang / lci ba dang / yang ba la sogs pa'i thabs sman dpyad las ji ltar 'byung ba bzhin du rlung dang mkhris pa dang bad kan gyi nad gang sos shing bcos par gyur pa na/ legs par 'chos par ma gyur cing nye bar ma zhi na nad de ni khrag 'khrugs las gyur pa yin par shes par bya ste/ me dbal la sogs pa sngar bshad pa 'ba' zhig tu ma zad do/ /khrag bdor gyur pa de las ni/ /gtar ga gdab pas dbyung bar bya/ /zhes bya ba la/ sngar bshad pa'i nad khrag bdo bar gyur pa de las khrag dbyung bar bya ba'i phyir/ gtar ga gdab par bya'o/ /de yang bcu drug ma lon dang / /bdun cu 'das la khrag mi dbyung / /nyam chung dugs drags dugs ma byas/ /rlung gi nad kyis nyen pa dang / sbrum ma bu btsas zan ma zhu/ /khrag mkhris lud pa dbugs mi bde/ /tshad 'khru rims dang skyugs pa dang / /skya rbab yan lag kun skrangs dang / /snum 'thungs pa la sbyor ba dang / /de bzhin las lnga byas la min/ /zhes bya ba la/ gtar ga gdab pa de la byis pa lo bcu drug ma lon pa dang / rgan po lo bdun cu 'das pa dag la gtar gas khrag dbyung zhing gdon par mi bya'o/ /de bzhin du nyam chung zhing khong rtsub pa dang / dugs drags pa dang / dugs ma byas pa nas snum 'thungs pa sbyor ba'i skyes bu'i bar dang / de bzhin du las lnga po skyugs sman dang / bkru sman drag po dang mas gtong ba dang / 'jam rtsi dang / mgo bo'i bkru sman btang ba ste/ las lnga po byas pa la gtar ga gdab par mi bya'o/ /ma bsdams gtar ga mi gdab cing / /yon po'am mi snang la mi gdab/ /tshabs chen nad ni ma gtogs pa/ /grang la tsha char rlung dus min/ /zhes bya ba la/ chings mas ma bsdams pa gtar ga gdab par mi bya'o/ /de bzhin du yon por bya ba'am/ rtsa mi snang bar yang gtar ga gdab par mi bya'o/ /nad tshabs che ba des gso bar bya ba bshol du med pa ma gtogs pa/ gzhan dag grang ba dang / tsha ba dang / char dang rlung gi dus su gdab par mi bya ste/ nad tshabs che ba la ni de dag gi tshe yang bya bar 'byung ngo / /mgo dang mig gi nad rnams la/ /dpral ba'i rtsa la gtar ba'am/ /mig 'gram sna drung rtsa la gdab/ /ces bya ba la/ mgo dang mig gi nad rnams la ni/ dpral ba'i steng na yod pa'i rtsa'am/ mig 'gram mam/ sna drung na yod pa'i rtsa la gdab par bya'o/ /rna ba'i nad la rna ba'i rtsa/ /zhes bya ba la/ rna ba'i nad rnams la ni rna ba dang nye bar gnas pa'i rtsa la gdab par bya'o/ /sna yi nad la sna rtser ro/ /zhes bya ba la/ sna'i nad rnams la ni sna'i rtse mo'i cha la gnas pa'i rtsa la gdab par bya'o/ /cham pa sna dang dpral rtsar gdab/ /ces bya ba la/ cham pa'i nad la lan 'ga' ni sna rtsar gdab na phan no/ /lan 'ga' ni dpral rtsa'o/ /lan 'ga' ni gnyi ga gdab par bya'o/ /kha nad rnams la lce dang ni/ /mchu dang rkan gyi rtsar gdab po/ /ces bya ba la/ kha'i nad rnams la ni lce la brten pa'i rtsa dang / de bzhin du mchu dang rkan gyi rtsa la gdab na phan no/ /nam tshong yan chad rtsa mdud 'gul/ /rna ba mur 'gram spyir gnas gdab/ /ces bya ba la/ nam tshong yan chad kyi nad rtsa mdud dang / rmen bu la sogs pa'i nad la rna ba la brten pa'i rtsa dang / mur 'gram dang spyi bor gnas pa'i rtsa la gdab par bya'o/ /smyo byed mig 'gram brang dpral rtsa/ /zhes bya ba la/ smyo byed kyi nad la ni mig 'gram rtsa dang / brang gi rtsa dang / dpral ba'i rtsa la gtar ga bya'o/ /brjed byed 'gram pa'i mtshams su gdab/ /ces bya ba la/ brjed byed kyi nad la 'gram pa gnyis kyi mtshams na yod pa'i rtsa la gdab po/ /yang na kun la smin mtshams gdab/ /ces bya ba la/ sngar bshad pa'i nad mgo dang mig la sogs pa'i nad ma lus pa kun la/ smin mtshams kyi bar na yod pa'i rtsa gang yin pa de la gdab par bya'o/ /'bras dang rtsib logs zug pa la/ /rtsib logs nu ma'i bar rtsa gdab/ /ces bya ba la/ 'bras mched pa'i nad dang / rtsib logs gnyis su zug cing gzer ba'i nad la rtsib logs dang / nu ma'i bar na yod pa'i rtsar gdab par bya'o/ /nyin gsum pa la phrag mtshams gdab/ /nyin bzhi pa la ltag pa'i 'og /ces bya ba la/ rims nyin gsum pa la phrag pa gnyis kyi bar mtshams kyi nang gi rtsar gdab par bya'o/ /rims nyin bzhi pa la ni ltag pa'i 'og na gnas pa'i rtsa gang rung bar gdab par bya'o/ /'khru ba gzer dang ldan pa la/ /mjug to'i gong ma sor gnyis bar/ /zhes bya ba la/ tshad pas 'khru bas nye bar gtses shing gzer dang ldan pa dag la mjug to'i rtsa mjug ma sor gnyis gong du gzhal bar gdab par bya'o/ /khu ba'i mtshan nad pho mtshan rtsa/ /zhes bya ba la/ khu ba 'gags pa la sogs pa'i nad dang pho mtshan nyid kyi nad la ni/ pho mtshan la brten pa'i rtsa la gtar ga bya'o/ /lkog ma'i lba bar brla rtsar gdab/ /zhes bya ba la/ lkog mar lba ba skye ba'i nad la brla'i rtsa bar gnas pa'i rtsa la gtar ga bya'o/ /gzugs 'khums pus mthil 'og gam ni/ /gong gi sor bzhi pa la gdab/ /ces bya ba rlung gi nad gzugs 'khums shing 'jas pa la ni/ pus mo'i mthil gyi 'og dang / gong du sor bzhi gzhal bar gdab par bya'o/ /'bras kyi phreng bar byin pa'i nywa'i/ /'og tu sor gnyis par gdab po/ /zhes bya ba la/ 'bras kyi phreng ba'i nad la ni/ byin ba'i nya gnad ces bya ba'i 'og sor gnyis gzhal bar gtar ga gdab po/ /rkub tshos pus mo'i lha nga'i steng / /nad la long mo'i ltag sor bzhir/ /zhes bya ba la/ rkub tshos kyi rlung nad dam/ pus mo'i lhang steng gi nad la long mo ltag tu sor bzhi bcal bar gtar ga bya'o/ /rkang tsha 'theng dang sbrid pa dang / /rting rdol rlung nad mdzer pa dang / /rkang sor snags su chad pa la/ /rgya tshigs las gong sor gnyis gdab/ /ces bya ba la/ rlung gi nad rkang pa tsha ba zhes bya ba dang / rkang pa sbrid pa dang / rting pa rdol ba rlung nad kyi mdzer pa dang / rkang pa'i sor mo snags su chad pa zhes bya ba'i khrag las gyur pa'i sor mo'i nad rnams la/ rgya tshigs las gong du sor gnyis gzhal bar gdab par bya'o/ /'khums la rkang 'khums lta bur gdab/ / ces bya ba la/ rlung nad 'khums pa byi sha tse/ /zhes bya ba la/ pus mo'i gong sor bzhi par gdab par bya'o/ /ji skad bshad pa ma mngon na/ /gnad ma gtogs par gar nye ba'i/ /phyogs gzhan dag tu gtar ga gdab/ /ces bya ba la/ gong du ji skad bshad pa'i rtsa rnams mngon par ma gyur na/ nad 'phel bar 'gyur ba'i dbang gis nad pa la gtar ga rings par bya dgos na/ gnad ma gtogs shing gnad la ma phog par/ nad gang dang gdab pa nye zhing 'brel ba'i phyogs gzhan dag gi rtsa bshad pa dag kyang mngon na gdab par bya'o/ /de nas lus snum gtar ga yi/ /yo byad kun bsags stobs dang ldan/ /bkra shis byas shing kha zas ni/ /snum zos khu ba 'thungs pa dang / /me dang nyi tshan gyis dugs byas/ /pus mnyam mtho ba'i stan la 'dug /skra rtsa ras ni 'jam pos bcings/ / pus mo'i lha dar gru mo gzugs/ /khu tshur nang du glod bcug pas/ /mgul ba dam du btsir bar bya/ /so bsdams lud pa dang / /mkhur ba gnyis ni bud par bya/ /zhes bya ba la/ de nas zhes bya ba'i don ni/ bkra shis pa'i don yin par shes par bya'o/ /gtar ga bya ba'i skyes bu snum gyis zhen par bya ba dang / sman pas gtar ba la dgos pa'i yo byad kun bsag cing nyer bsdogs su bya ba dang / de bzhin du stobs dang ldan zhing nyam chung ba la ma yin pa dang / dge slong dang bram ze bkra shis dang bde legs brjod pa dang / de bzhin du kha zas snum zhing sha khu la sogs pa dang ldan pa byin pa dang / de bzhin du me tshan dang / nyi tshan gyis dugs bya ba dang / pus mo dang mnyam pa tsam gyi mtho ba'i stan la 'dug pa dang de bzhin du skra'i rtsa ba ras kyi tshal pa 'jam pos bcings shing bsdams pa dang / de bzhin du pus mo gnyis kyi lha ngar gru mo brtan po btsugs nas/ rang gi khu tshur nang du gos kyi glod bcug pas/ mgul pa'i ngos gnyis nas dam du btsir bar bya ba dang / de bzhin du so bsdams shing btsir la mkhur ba gnyis su de gnas par bya'o/ / de la rgyab nas btsir ba dang / /gos kyis dkris shing mdzub mo ni/ /g.yon pa lkog mar bcug nas su/ /nang du legs par gzhug par bya/ /zhes bya ba la/ nad pa de la skyes bu gzhan gyis rgyab nas btsir zhing bsdams pa dang / gos kyis dkris pa ltag par bcug nas/ lkog ma dang gos kyi bar du lag pa g.yon pa'i mdzub mo bcug nas dbugs dgag pa la mi gnod pas de bsdam par bya'o/ /'di ni nang du kha bltas rtsa/ /ma gtogs bsdam pa'i cho ga yin/ /zhes bya ba la/ bsdam pa'i cho gar bshad pa gang yin pa de ni rtsa kha phyi rol du bltas pa bsdam pa'i cho ga yin gyi/ kha nang du bltas pa'i rtsa bsdam pa'i cho gar bshad pa ni ma yin no/ /kha nang du bltas pa'i rtsa bsdam pa ni/ /lce bteg bzlog ste sos mnan la/ /zhes 'og nas bshad pa yin no/ /de 'og sman pa'i mthe bo las/ /gung mo btang bar gyur pa yis/ /rtsa byung mngon la gdab byas nas/ /reg pa'am mthe bos mnan byas la/ /lag pa g.yon pas bzung ba yi/ /gtsags bu sta res dbus su gdab/ /gtsags bu'i kha phyogs mi yo gtang / /de bzhin gdab pa'am btsir ba yi/ / bem rtol brdabs la khrag dbyung ngo / /zhes bya ba la/ de ltar byas pa'i 'og tu sman pas mthe bo'i sor mo las gung mo btang bar gyur bas rtsa la gdab par bya'o/ /rtsa de byung zhing g.yo bar gyur pa reg pas shes par bya ba'am/ mthe bos mnan pas shes par bya'o/ /de'i 'og tu gtsags bu sta re lta bus rtsa'i dbus mtshan ma btab la/ lag pa g.yon pas gzung ba'i gtsags bu sta re ltar yu ba gyen du bstan te/ lag pa 'dar ba med bar byas la/ snga ma bzhin du mthe bo las gung mo btong ba'i bem rtol brdabs pas khrag dbyung bar bya ba'am/ mthe bo'i ltos mnan te gtar ga gdab par bya'o/ /sna drung gi ni rtsar gdab pa/ /rtse mo mthe bos bteg nas ni/ /gtsags rtse 'bras 'dra gdab par bya/ /zhes bya ba la/ sna dang nye ba na gnas pa'i rtsar gdab pa na/ sna'i rtse mo mthe bos bteg nas gtsags bu rtse mo 'bras 'dra bas gdab par bya'o/ /lce bteg bzlog ste sos mnan la/ /lce 'og rtsar ni gdab par bya/ /zhes bya ba la/ lce bteg cing bzlog pa'i ste/ rkan gyi thog tu bsdus la/ sos rnam par mnan nas/ lce'i 'og gi rtsa la gtar ga gdab par bya'o/ /nu ma yan chad bsdams nas ni/ /mgul par gnas pa'i rtsar gdab po/ /zhes bya ba la/ nu ma yan chad ras kyis legs par bsdams nas mgul par gnas pa'i rtsar gdab cing gtar ga bya'o/ /lag pa gnyis su rdo bcangs te/ /lag pa pus mor brten te bcangs/ /mchan khung man chad mnyes nas ni/ /gong du bcings la lto rtsar gdab/ /ces bya ba la/ lag pa gnyis kyi nang du rdo ba bcangs pa de lta bu'i lag pa pus mor brten te brkyang ba dang / de bzhin du mchan khung man chad legs par mnyes te/ lag pa de'i 'og tu bcings la lto rtsar gdab par bya'o/ /lag ngar rtsa ni bder 'dug ste/ /gdab pa'i sor bzhi gong gi ni/ /phyogs su ras kyis dam bcings la/ /mthe bo chang par bcug nas ni/ /lag ngar brkyang la gdab par bya/ /zhes bya ba la/ lag ngar gnyis kyi rtsar gdab pa ni/ dang po bde bar 'dug ste/ gar gdab pa'i sa sor bzhi'i gong du ras kyis dam por bcings la/ mthe bo chang par bcug nas sor mo rnams kyis bsdams te/ lag ngar legs par brkyang la gdab par bya'o/ /rtsib logs rtsa ni dpung pa gnyis/ /thur du dpyangs te gdab par bya/ /zhes bya ba la/ rtsib logs gnyis su gtar ga gdab pa/ dang por nad pa'i dpung pa gnyis thur du dpyangs la gdab par bya'o/ /pho mtshan rtsa ni bteg ste gdab/ /ces bya ba la/ pho mtshan gyi rtsa ni bteg cing las su rud bar byas nas gdab par bya'o/ /byin rtsa pus mo ma bkug par/ /zhes bya ba la/ byin pa'i rtsa ni pus mo ma bkug par brkyang ste gdab par bya'o/ /rkang pa legs bzhag pus mo la/ /'og tu lag pa gnyis kyis ni/ /long mo'i bar du dam btsir la/ /rkang pa de steng gnyis pa ni/ /cung zad bkug ste bzhag pa yis/ /mnan la de nas lag pa ltar/ /rtsar gdab/ ces bya ba la/ rkang pa'i rtsar gdab pa'i thabs ni/ de yang rkang pa legs par bzhag la/ bus mo'i tshigs kyi 'og tu/ lag pa gnyis kyis dam du long mo'i bar du btsir la/ rkang pa de'i steng du rkang pa gnyis cung zad bkug ste bzhag la/ cung zad tsam mnan nas sngar lag pa'i rtsar 'debs pa bzhin du gtar ga gdab pa'i 'og tu sor bzhi tsam gyi ras la sogs pas dam du bsdams la rtsar gdab par bya'o/ /de ltar ma smos pa'i/ gzhan dgal yang gdab bya la/ /thabs shes gtsags spyad de dang des/ /phyogs ni de dang de ru gdab/ /ces bya ba la/ de ltar rnam pa de dag gis rtsar gdab pa'i gnas ma smos pa'i phyogs gzhan dag la yang gdab par bya ba yin pas na/ thabs shes shing rtogs pa'i sman pas/ gtsags spyad de dang de rang gi blos legs par dpags la gnas kyi phyogs de dang der gdab par bya'o/ /sha che ba yi phyogs su 'debs/ /'bras 'dra 'bras kyi srid tsam gdab/ /rus pa'i steng rtsa sta re 'dras/ /nas kyi phyed tsam gdab par bya/ /zhes bya ba la/ sha che ba'i phyogs su 'bras 'dra ba'i gtsags bus 'debs par byed na/ gtsags bu dbyibs 'bras 'dra zhing 'bras kyi tshad tsam gdab par bya'o/ /rus pa'i steng rtsa la 'debs na sta re 'dra ba'i gtsags bus nang du nas kyi phyed tsam nub par gdab par bya'o/ /gtar ga gdab pa thams cad la yang kha sbub pas shin tu gting ring bar mi bya ba dang / drang zhing ma 'chol ba dang / snyoms shing gnod pa med par rtsa dbus su gtsags bus myur du gdab par bya'o/ /legs par btab nas khrag gzags te/ /chings ma bkrol nas gzags mi bya/ /zhes bya ba la/ de ltar gtar legs par btab nas khrag gi rgyun gzags par bya'i/ /chings ma bkrol nas ni khrag gi rgyun yang gzags par mi bya'o/ /de yang bsdus pa las/ lan cig btab pas khrag gi rgyun/ /gang zhig 'dzag par gyur pa na/ /yud tsam bsdams pa byas pa ni/ /de ni legs par btab ces bya/ /zhes bshad pa yin no/ /btab ma legs pas dus cung zad/ /nyung zad 'byung ba til phye gdab/ /ces bya ba la/ gtar ga btab pa ma legs te/ nyes par gyur pas dus cung zad cig khrag gi rgyun nyung zad 'byung bar 'gyur te/ de la til zhib tu btags pa'i phye ma rtsa'i sgor gdab par bya'o/ /gdab drags sgra dang bcas par ni/ /'byung zhing bcad kyang dkar bar 'gyur/ /zhes bya ba la/ gtar ga btab pa med pa'am/ drags pa'i khrag gi rgyun sgra dang bcas par 'gyur la/ rgyun 'byung ba de gcad cing dgag pa yang shin tu dka' bar 'gyur ro/ /dngang dang 'bog par 'gyur ba dang / chings lhod mtshon rtul 'grangs drags dang / nyam chung shugs nyen dugs ma byas/ /khrag mi 'byung ba'i rgyu yin no/ /zhes bya ba la/ legs par btab tu zin kyang / dngang ba dang 'bog cing brgyal bar 'gyur ba ni/ khrag gi rgyun mi 'byung ba'i rgyu yin no/ /de la dngang ba ni skrag pa'o/ /'bog pa ni brgyal zhing mun par zhugs pa lta bur gyur pa'o/ / chings ma lhod pa ni dam du ma bsdams pa'o/ /mtshon rtul ba ni rtse mo rtul lam chag pa'o/ /'grangs drags pa ni zas bsten drags pa'o/ /nyam chung ba ni rid pa'o/ /shugs kyis nyen pa ni bshang gci 'byung la khad pa'o/ /dugs ma byas pa ni legs par ma bsros pa'o/ /khrag ni legs par ma byung na/ /byi dang tsha gsum skyer pa dang / /rgya spos rgyam tsha khyim dud bcas/ /til mar btags la rma la bsku/ /zhes bya ba la/ khrag legs par ma byung zhing gtar ga nyes par gyur na/ byi dang ga dang tsha ba gsum la sogs pa btags pas rtsa'i sgo bsku bar bya ste/ des ni legs par 'byung bar 'gyur ro/ /khrag ni legs byung til mar dang / /rgyam tsha sbyar la dro 'jam bsku/ /zhes bya ba la/ khrag legs par 'byung zhing rgyu bar gyur na/ bad kan dang rlung nye bar zhi zhing khrag gcad par bya ba'i phyir til mar dang rgyam tshar sbyar la/ dro 'jam tsam gyis rma'i sgo bsku bar bya'o/ /leb rgan rtsi las tshon ser ltar/ /dang por nad khrag 'byung bar 'gyur/ /zhes bya ba la/ gtar ga btab ba ni khrag bzang ngan 'dres pa la/ dang por nad dang bcas pa'i khrag dbyung zhing 'bab par gyur te/ dper na leb rgan rtsi'i tshon ser po dang dmar po 'dres par gyur pa la/ gos 'tshod pa na dang po ser po 'byung bar 'gyur ba dang 'dra'o/ /legs par 'byung na rang nyid 'chad/ /khrag bzang byung na'ang dbyung mi bya/ /zhes bya ba la/ legs par btab ste 'byung ba rang nyid 'chad par 'gyur la de ltar rang chad nas dbyung bar mi bya'o/ /de bzhin du khrag bzang po nad med par gyur nas kyang dbyung bar mi bya ste/ khrag ni srog gi rten yin ba'i phyir ro/ /brgyal gyur na ni chings ma dgrol/ /rlung yab kyis g.yab slar khrag dbyung / /slar 'bog gyur na nyi ma ni/ /gnyis pa'am gsum pa dag la gdab/ /ces bya ba la/ gang zhig khrag gzags nas brgyal bar gyur na/ gtar ga'i chings ma de bkrol la/ rlung yab kyis rlung g.yabs te/ brgyal ba de bsangs te/ de'i 'og tu slar khrag dbyung bar bya'o/ /de ltar byas kyang slar 'bog par gyur na/ de tshe bcad la nyi ma gnyis pa'am/ gsum pa'i tshe gtar ga gdab cing nad khrag dbyung bar bya'o/ /rlung khrag gnag cing dmar la rtsub/ /shugs drag gsal zhing lbu ba can/ /mkhris khrag ser la rtsa gnag mnam/ /spyi bag dro zhing tshon can yin/ /bad kan khrag ni 'jam zhing skya/ /rgyun can 'byar zhing ska ba yin/ /'dres pa'i mtshan ma 'dren ma yin/ /nyes gsum dri ma rnyog ma can/ /zhes bya ba la/ de la rlung gi nad las ni khrag mdog gnag pa la sogs pa 'byung bar 'gyur te/ gnag pa ni nag nog can la cung zad tsam sngo ba'o/ /dmar ba ni rtsa dmar zhing 'tsher ba'o/ /rtsub pa ni snum bag med pa'o/ /shugs drag po ni shugs kyis 'byung ba'o/ /mdog gsal ba ni gsal ba'o/ /lbu ba can ni lbu ba dang bcas pa'o/ /de bzhin du mkhris pa las gyur pa'i khrag ni mdog ser ba dang / gnag par gyur pa dang / mnam zhing dri nga ba dang / spyi bag ste tsha bas 'thas shing mkhrang bag tu 'gas pa dang / dro zhing tsha ba 'ur 'ur por 'dug pa dang / tshon can te rma bya'i mjug sgro ltar snang ba yin no/ /bad kan las gyur pa'i nad khrag la ni 'jam zhing snum pa dang / mdog skya ba dang / rgyun can nal nal po kha 'dra bar snang ba dang / 'byar zhing sla bag med pa dang / ska zhing 'dril ba yin no/ /'dres pa ni nad gzhi gnyis kyi ldan pa las gyur pa'i khrag ste/ de ni 'dren ma ste/ gang dang gang 'dres pa de gnyi ga'i mtshan ma dang 'dres pa zhes bya'o/ /nad gzhi'i nyes pa gsum char 'dus pa'i khrag gang yin pa de ni dri ma can te/ dang bag med pa dang / rnyog pa dang ldan zhing nag nog gi shas che ba yin no/ /khrag ngan pa ni nyams che la/ / tshad las lhag par dbyung mi bya/ /khrag phyung drags na 'chi ba 'am/ /rlung nad mi bzad 'byung bar 'gyur/ /zhes bya ba la/ skyes bu nyams che ba zhig yin na yang / khrag ngan pa'am/ nad khrag tshad de srang bcu drug pas dbyung bar mi bya ste/ ci'i phyir zhe na/ khrag dbyung zhing gzags pa drags na myur du 'chi bar 'gyur ba'am/ yang na rlung nad shin tu gso dka' ba 'byung bar 'gyur ro/ /de la bsku byug 'o ma khu/ /khrag bcud blud pa sman yin no/ /zhes bya ba la/ khrag bton drags pa de la sman ni/ bsku byug bya ba dang / 'o ma dang sha khu blud pa dang / ri dgas dang ra lug la sogs pa'i khrag bton te blud par bya'o/ /khrag phyung nas ni chings ma dag /dal gyis bkrol la chu ba sil gyis/ /bkrus la til mar gyis byugs pa'i/ /gos 'jam gyis ni rma kha dkri/ /zhes bya ba la/ khrag dbyung zhing gzags nas chings ma dal gyis klod de bkrol la/ chu bsil bas khrag rjes bkrus la/ /rtsa'i sgo til mar gyis byugs pa'i gos 'jam pos rma kha g.yogs la/ de'i 'og tu bcing bar bya'o/ /khrag nad yod na phyi 'phred dam/ /phyi de nyin par slar yang dbyung / /shin tu gnod pa'i khrag zla phyed/ /snum gyis brtas pa'i lus las dbyung / /zhes bya ba la/ khrag ma dag cing nad yod par gyur na/ phyi 'phred kyis slar yang dbyung bar bya'o/ /yang na phyi de nyin de/ nyi ma gnyis par bskyar bar bya'o/ /shin tu gnod pa'i khrag yod na zla ba phyed nas snum gyis brta zhing zhen par bya ba'i lus las dbyung bar bya'o/ /khrag ngan cung zad lus kyang ni/ /nad ni lhag par mi bskyed pas/ /de phyir lhag ma yod gyur yang / /gzhag gi shas cher mi dbyung ngo / /zhes bya ba la/ gang gi phyir khrag nad can ngan pa cung zad lus par gyur kyang / de las byung ba'i nad lhag par mi bskyed cing bya ba la rgal te/ gnas gzhan du mi 'gro bas de'i phyir lhag ma cung zad yod du zin kyang shas cher mi 'byung gi / lhag ma dang bcas par gzhag ste/ /khrag ni srog gi rten yin pa'i phyir ro/ /de yang drang srong legs mthong gis/ /mkhas pas nad bcas khrag kyang ni/ /lhag ma cung zad yod bya yi/ /lhag par dbyung bar mi bya ste/ /lhag ma zhi bas bsal bar bya/ /nad khrag lhag ma cung zad lus/ /nad ni shas cher mi skyed de/ de bas lhag mar bcas gzhag gi / sbyor ba drags pa mi bya'o/ /zhes bshad pa yin no/ /lhag ma rngabs ru stsogs gdab pa'am/ /yang na spyod bsil khrag mkhris bsal/ /sbyang dang skam pa'i bye brag ni/ /gso bas de ni dang bar bya/ /zhes bya ba la/ nad khrag lhag ma lus pa de/ rngabs rwa gdab pa la sogs pas bsal bar bya ba'am/ yang na spyod lam bsil ba ste/ chu bsil ba blugs pa la sogs pas khrag dang mkhris pa bsal zhing gso ba'i thabs dang zas dang sman snum pa dang / mngar ba bsten pa dang sbyang ba ste/ slon dang khrus kyi tshul dang / skam pa ste/ smyung bar gnas pa la sogs pa'i bye brag gi gso bas dang bar bya zhing bsal bar bya'o/ /nad khrag rab rgyas ma gyur pa'am/ /de 'dra'i thabs kyis gso bar bya/ /zhes bya ba la/ nad khrag shin tu rgyas shing rab tu gyur pa la'ang / spyod lam bsil bar bya ba la sogs pa de dag gis gso bar bya zhing dang bar bya'o/ /nad khrag rgyas par gyur pa la ni gtar ga gdab pa la sogs pa khrag dbyung ba'i thabs kyis dbyung bar bya'o/ /khrag gi rgyun ni ma chod na/ /gcad pa'i sbyor ba myur bar bya/ /zhes bya ba la/ khrag gi rgyun byung ba ma chod cing bde bar gnas par ma gyur na/ gcad pa'i sbyor ba myur zhing rings par bya'o/ /seng phrom rma shing pri yang ku/ /ma sha shing mngar yug snam btsag /gyo du ma zar ma snag tsha dang / /'o ma can shing shun lo ma/ / btags pa'i phye ma rma khar gdab/ /shug sogs chu grang sbyar la blud/ /ces bya ba la/ de ltar khrag gcad par bya ba'i phyir/ seng phrom la sogs pa'i phye ma rma'i sgor gdab pa dang / shug pa la sogs pa'i sde tshan dang sbyar ba'i chu grang blud par bya'o/ /'o ma can gyi shing ni n+ya gro d+ha dang / /a shwad+tha la sogs pa'i shun pa dang lo ma'o/ /gzhan ni go bar zad do/ /yang na rtsa btab de gong gi /rtsa de nyid la gtar ga gdab/ /yang na thur ma bsregs pa yis/ /rma kha myur du bsreg par bya/ /zhes bya ba la/ gcad pa'i sbyor ba gzhan yang sngar bcad pa'i rtsa de nyid kyi gong rol du gtar ga gdab par bya'o/ /yang rnam pa thams cad du khrag chod par ma gyur na/ thur ma mer bsregs pas rma kha myur du bsreg par bya'o/ /bcing ba nyes pas lam log la gnas te/ /nad ni rgyas pas khrag ni 'khrugs gyur pa/ /rang gi gnas su slar phyin ma gyur pa/ /de srid zas dang spyod lam phan pa bsten/ /zhes bya ba la/ gtar ga'i bcing ba nyes shing ma legs pa rlung dang mkhris pa dang bad kan gyi nad gang rang gi gnas nas rgal te/ lam log par gnas pas na khrag tu gyur pa de rang gi gnas su phyin par ma gyur cing / rang gi lam gnas par ma gyur pa de srid kyi bar du zas dang spyod lam la sogs pa phan zhing gnod pa med pa la brten par bya'o/ /lus dang ngag dang yid kyi spyod pa la 'dir spyod lam zhes bya'o/ /shin tu tsha grang ma yin yang drod bskyed/ /khrag sel byed pa'i bza' dang btung ba phan/ /de tshe lus dang khrag bder mi gnas pas/ /khyad par du ni me las bsrung bar bya/ /zhes bya ba la/ khrag dbyung zhing gzags nas zas dang skom shin tu tsha ba dang / shin tu grang ba na gnod pa yin te/ shin tu tsha na ni slar khrag bskyed par 'gyur la/ shin tu grang ba ni me drod nyams par byed pa yin te/ de bas na gnyi ga ma yin pa bsten pa dang / de bzhin du rang bzhin gyis g.yos su byas pa'i bza' btung dang / pho ba'i me'i drod bskyed pa'i zas skom yang sbyin par bya ste/ gang gi phyir de'i tshe lus la bde bar mi gnas pas yang de ni mkhris pa'i gnas yin la/ mkhris pa ni mes bskyed de/ de'i phyir khyad par du me las bsrung bar bya zhing rnam pa du mas bskyang bar bya'o/ /mdog dang dbang po gsal zhing dbang po yul/ /'dod cing zas 'ju shugs kyang bde bar 'ju/ / bde dang ldan zhing stobs rgyas phun sum tshogs/ /mi yi nad khrag dag pa yin par bshad/ /ces bya ba la/ skyes bu 'di lta bu nad khrag med pa yin par drang srong rnams kyis bshad cing bstan to/ /de yang skyes bu de'i lus kyi mdog dang / dbang po rnams gsal zhing dang ba'i bdag nyid can yin pa dang / de nyid ni dbang po'i yul 'dod cing yul la dga' ba dang / zas 'ju ba ni pho ba'i me drod la bya la/ de'i shugs ni nus pa la bya ste/ zas 'ju ba de thogs pa med pa dang / zil gyis mi non par bde bar 'byung ba dang / de bzhin du bde ba dang ldan pa ste/ nad med pa dang ldan pa dang / de bzhin du stobs dang lus rgyas pa phun sum tshogs pa dang ldan pa'i mi ni nad khrag yongs su dag pa yin no zhes bshad do/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas nye bar sbyar ba las/ le'u nyi shu rtsa bdun pa'i rnam par 'grel pa'o// //de nas zug rngu dbyung ba'i cho ga'i le'u bshad par bya'o/ /zhes bya ba la/ 'di brtsams pa'i 'brel pa ni 'di yin te/ nad khrag tu gyur pa gang yin pa/ de ni gtar ga gdab pa'i thabs kyis dbyung dgos pas gong du bshad pas na de'i 'og tu khong du mtshon lus pa zug rngu zhes bya ba yang dbyung dgos pas de'i 'og tu 'di brtsams pa yin no/ /zug rngu'i bgrod pa rnam lnga ste/ /yo drang thad ka steng dang 'og /ces bya ba la/ zug rngu ste mtshon lus pa'i bgrod pa'i lam ni/ yo ba la sogs pa'i rnam pas rnam pa lnga yod par shes par bya'o/ /kha gnag skrangs dang nad dang bcas/ /yang dang yang du khrag 'dzag la/ /rma yi nye 'khor mtho zhing glo/ /chu bur lta bu'i thor bu 'byung / /sha ni 'jam gyur lus mdor na/ /khong na zug rngu yod shes bya/ /zhes bya ba la/ khong pa'i nang na mtshon yod pa'i mtshan nyid ni/ mdor na 'di ltar shes par bya zhing khong du chud par bya'o/ /ji lta bu zhe na/ rma'i sgo kha gnag cing dri ma can dang / de bzhin du rma skrang zhing na ba dang bcas pa dang / de bzhin du yang dang yang 'dzag cing 'byung ba dang / de bzhin du rma'i nye 'khor dpangs su mtho zhing glo ba dang / chu'i chu bur lta bur thor bu 'byung ba dang / de bzhin du sha mdangs 'jam zhing sha snyi bar gyur pa yin no/ /khyad par du ni pags par na/ /mtshon lus mdog nyams srab dang / /skrangs par 'gyur ro/ /zhes bya ba la/ khyad par ram bye brag tu pags pa'i nang du mtshon lus pa ni pags pa'i mdog mi sdug par 'gyur pa dang / sra zhing mkhrang bag tu gnas pa dang / chur skrangs par 'gyur ro/ /shar gnas pa/ /nad dang skrangs pa lhag par 'phel/ /bcir bar mi bzod smin pa dang / /rma yi sgo ni 'drub mi shes/ /zhes bya ba la/ sha'i dum bu lus pa/ sha la gnas pa ni lhag par na zhing skrangs pa'i tshabs lhag par 'phel ba dang / btsir zhing mnan par mi bzod pa dang / mtshon gang na gnas pa der smin zhing rnags pa dang / zug rngu zug pa'i rma'i kha 'dru bcing 'tsho mi shes pa yin no/ /nya yi nang zug shar zug dang / /'dra las skrangs bag med pa yin/ /zhes bya ba la/ byin pa la sogs pa'i nya'i nang du gnas pa'i zug rngu'i mtshan nyid ni sha la zug pa dang 'dra ba las skrangs bag med de/ de ma gtogs pa yin no/ /de la lus la nya zhes bya ba'i sha lnga brgya yod par 'og nas bshad de/ sha'i char gtogs pa zla ba tshes pa la sogs pa'i dbyibs can la nya zhes bya'o/ /chu ba'i dra ba'i nang lus pa'i/ / chu ba las ni dbyung dka' zhing / /bsgul dka' bskyod tshe rengs shing na/ /zhes bya ba la/ chu ba'i dra ba'i nang du mtshon lus pa ni/ chu ba las dbyung bar dka' ba dang / bsgul bar dka' zhing na ba dang / bskyod pa'i tshe lhag par mi bzod pa dang / shing ltar rengs shing 'jas pa dang / na ba lhang lhang por byed pa yin te/ zug rngu 'di ni lhag par 'byung dka' bar 'gyur ro/ /rtsa la brten pa rtsa skrangs 'gyur/ /zhes bya ba la/ zug rngu rtsar gnas pa ni rtsa skrangs shing spom bag tu 'gyur ba'o/ /bu ga'i sbubs gnas sbubs kyis ni/ /rang gi las dang yon tan nyams/ /zhes bya ba la/ bu gar gnas pa'i zug rngu ni rang gi gnas dang / yon tan las nyams par 'gyur ro/ /de yang bu ga'i sbubs ni dbugs dang / lus zungs dang / dri ma dang chu rnams rgyu ba'i gnas bcu gsum mo/ /de dag rang gi las dang / de bzhin du yon tan nyams shing 'jig par 'gyur ro/ /rtsa chen gnas pa dbugs dang khrag /lbu ba can du 'byung 'gyur zhing / /sgra dang bcas par 'byung ba dang / /snying dang yan lag na bcas 'gyur/ /zhes bya la/ rtsa chen po sbubs can du gnas pa'i zug rngu ni/ sbubs dang khrag 'dres pa lbu ba can du 'byung bar 'gyur ba dang / dbugs dang rlung de sgra dang bcas par 'gyur ba dang / snying ga na zhing mer mer por sems pa dang / yan lag na zhing snyom pa dang bcas par 'gyur ro/ /rus tshigs bog rer mtshon lus pa/ /rus brtse tshabs cher na bar 'gyur/ /zhes bya ba la/ rus pa'i tshigs kyi bog rer mtshon gyi dum bu lus pa ni rus pa shin tu brtse zhing zug pa dang / bskyod cing bsgul ba na shas chen por na bar 'gyur ro/ /rus gnas nad mang skrang bar byed/ /ces bya ba la/ mtshon gyi zug rngu rus pa'i nang na gnas pa ni/ nad mang po sna tshogs pa skyed par byed de/ phal cher chag pa dang / grum pa dang / 'dar ba dang / gnod cing zug par 'gyur ba dang / de bzhin du skrang par byed par yang 'gyur ro/ /tshigs la gnas pa de dang 'dra/ /bskyod par dka' ba dag tu 'gyur/ /zhes bya ba la/ tshigs la gnas pa'i zug rngu ni rus par gnas pa dang 'dra bar 'gyur ba dang / de bzhin du bskyod par dka' zhing bsgul mi bzod par 'gyur ro/ /nang grol nang yod 'khrugs pa dang / /spo zhing kha zas ngan skyugs gcin/ /rma yi khar ni 'byung bar 'gyur/ /zhes bya ba la/ nang grol gyi nang du lus pa'i mtshon ni/ 'khrug cing rgyu ma'i sgra krug krug zer ba dang / spos shing dbugs kyis rgyas pa dang / de bzhin du kha zas dang / ngan skyugs dang / gcin rma'i khar 'byung zhing snang bar 'gyur ro/ /gnad kyi nang du mtshon lus pa/ /gnad zug mtshan nyid las shes bya/ /zhes bya ba la/ gnad rnams kyi nang du mtshon lus pa'i zug rngu ni gnad du zug cing bsnun pa'i mtshan nyid gang dag bshad pa de'i tshul las shes par bya'o/ /pags pa la sogs rang rang gi /ji ltar 'dzag las shes par bya/ /zhes bya ba la/ pags pa la sogs pa nas gnas kyi nang du mtshon gyi dum bu lus pa dag sngar bstan pa'i mtshan nyid de dag las shes par bya ba 'ba' zhig tu ma zad kyi rang rang gi gnas las ji ltar 'dzag pa las kyang zug rngu yod par shes par bya'o/ /skyon med lus kyi rma 'tsho ste/ /de ni gnod pa med par gnas/ /nad 'khrugs snad pa la sogs kyis/ /gongs nas slar yang gnod pa skyed/ /ces bya ba la/ skyes bu lus la nad kyi skyon med pa'i zug rngu de rjes mthun par gnas pa dag gi rma yang 'tsho bar byed cing gnod pa med par 'gyur mod kyi/ rma 'tsho zin nas kyang nad gzhi 'khrugs pa dang / snad pa dang / rtsol bas bskyod pa la sogs pa'i dbang gis glongs pa dang / slar yang lus la gnod pa skyed cing nad du 'gyur ba yin no/ /gang yang rung bar pags pa nyams/ /bsku dang mnye dang dugs byas nas/ /mdog dmar na zhing tsha la 'khrug /yang na gang du mar bzhag 'ju/ /lde gus byugs pa myur du bskams/ /gnas der zug rngu bcas shes bya/ /zhes bya ba la/ zug rngu pags pa'i nang du zug cing mi mngon par 'gyur ba ni lus kyi phyogs gang du zug par pags pa nyams pa dang / bsku ba la sogs pa byas pas ni mdog dmar ba dang / na zhing zug pa dang / tsha ba dang 'khrug cing bskyod pa na na bar 'gyur te/ de lta bu'i gnas de ni/ zug rngu dang bcas pa yin par shes par bya'o/ /yang na pags pa'i phyogs gang du na sar mar bzhag na myur du 'ju bar 'gyur pa'am/ lde gus byugs pa myur du bskams par gyur na/ gnas de yang zug rngu dang bcas par shes par bya'o/ /shar lus sbyang ba byas pa yis/ /skem byas lhongs gyur bsgul ba dang / /btsan dmar sogs kyis shes par bya/ /zhes bya ba la/ zug rngu sha'i nang du lus pa mi snang bar gyur pa ni sbyang ba bya ba ste/ slon sman dang bkru sman la sogs pa byas pas lus bskam zhing sbeg par byas la/ skems par byas pa des lhongs shing yang bag tu gyur pa dang bskul ba dang / btsan dmar po yod pa dang / na ba la sogs pa'i zug rngu yod par shes par bya'o/ /nya dang rus tshigs nang grol gyi/ /zug rngu'ang de bzhin shes par bya/ /zhes bya ba la/ nya dang rus pa'i tshigs la gnas pa dang / nang grol na gnas pa'i zug rngu ni slon sman la sogs pa'i sbyang bas skems por byas te/ lhongs par gyur pa pa dang / bsgul ba dang / btsan pa la sogs pas na bar gyur pa gang na yod pa de na zug rngu yod par shes par bya'o/ /sha la zug rngu dang 'dra bar shes par bya ste/ rus pa zug rngus ma rungs 'gyur/ /rus pa bsku dang dugs bya zhing / /mnye dang btsir las shes par bya/ /zhes bya ba la/ rus pa'i nang du lus pa'i mtshon mi mngon par gyur pa ni/ rus pa ma rungs shing mdog nyams pa dang / rus pa bsku ba la sogs pa bya ba na gnod pa yod pa las shes par bya'o/ /rus tshigs gnas pa rus 'dra dang / /brkyang dang bskum pas shes par bya/ /zhes bya ba la/ rus pa'i tshigs la gnas pa'i zug rngu mi mngon pa ni/ rus pa dang 'dra bar bsku ba dang / dugs bya ba la sogs pas shes par bya ba dang / brkyang ba dang / bskum ba'i bsgul bskyod las shes par bya'o/ /chu ba rtsa dang rtsa chen sbubs/ /zug rngu mi mnyam la ma 'gro dang / /shing rta chag pa'i rta dang ni/ /ldan par nad pa bskyon nas su/ /myur du drangs nas de nas ni/ /bskyod pas zug rngu shes par bya/ /zhes bya ba la/ chu ba la sogs par nub cing mi mngon pa'i zug rngu ni/ mi mnyam pa'i lam ni lam mtho dma' can du shing rta 'khor lo chag pa/ rtas drangs pa la bskyon nas de'i 'og tu myur du drangs te/ gnas gzhan du bskyod pas/ de nas bskyod pa des rtsa dmar ba dang / rtsa ba la sogs pa nas/ zug rngu gang na yod pa shes par bya zhing brtag par bya'o/ / gnad zug logs shig ma bshad de/ /de rnams sha sogs la gnas yin/ /zhes bya ba la/ gnad du zug cing mi snang bar gyur pa'i zug rngu'i mtshan nyid ni logs shig tu ma bshad de/ de rnams ni sha la sogs pa nyid la gnas par sngar bshad pas logs shig tu dgar med do/ /spyir ni zug rngur bcas bskyod pa'i/ /bya bas nad bcas las shes bya/ /zhes bya ba la/ spyir na lus kyi phyogs gang na zug rngu yod cing nang na mtshon lus pa dang bcas pa ni bskyod pa'i bya bas shes pa glang po che'i rgyab dang / rta la bskyon pa dang / shing la 'dzeg pa dang / rta rgyug pa dang / myur ba dang / mda' 'phen pa dang / glal dang / sbrid pa dang / sgregs pa dang / lud pa lu ba dang / mchil ma drag tu 'dor ba dang / dgod pa dang / dbugs rngub pa dang / 'byung ba dang na ba dang bcas pa las shes par bya'o/ /mdor na zlum dang gyes pa dang / /zur bzhi pa dang zur gsum pa'i/ /rma yi dbyibs las zug rngu ni/ /mi mngon rnam par shes par bya/ /zhes bya ba la/ mdor bsdu na/ mi mngon pa'i zug rngu brtag ces bya ba'i thabs ni/ rma'i kha zlum pa dang / gyes shing ngos gnyis tha dad par bye ba dang / zur bzhir gnas pa dang / zur gsum par gnas pa'i rma'i dbyibs las zug rngu'i dbyibs dang / rnam par mi mngon pa dag shes par bya zhing rtogs par bya'o/ /de rnams dbyung ba'i thabs gyur gnyis/ phyir drang ba dang mdun nas drang / /zhes bya ba la/ zug rngu ste thams cad dbyung ba'i thabs ni gnyis kho na ste/ phyir drang ba dang mdun nas drang ba'o/ /rtse nas drang dang rtsa nas drang / /de las bzlog pas dbyung bar bya/ /zhes bya ba la/ de gnyis las bzlog pa'i thabs yin pas na/ go bzlog pa'i tshul gyis dbyung bar bya'o/ /de bas na sna nas drang ba dang rtse mo nas drang ba'i thabs gnyis kyis drang bar bya ba yin te/ mdun nas drang ba ni rtsa ba nas drang bar bya'o/ /de yang de bzhin du thur du zug pa'i zug rngu'i rtse nas drang bar bya la/ gyen du zug pa ni rtsa ba nas drang bar bya'o/ /de ltar na gcig la gcig bcos pa'i thabs kyis zug rngu dbyung bar bya ste/ /dbyung sla gang na yod dral te/ /de nas thad kar drang bar bya/ /zhes bya ba la/ mtshon 'phred du zug pa dag ni/ lus kyi phyogs gang na yod par dral te/ dbyung sla bar bya la de nas gnas de las thad kar drang zhing / de dbyung bar bya'o/ /mtshon ni brang dang mchan khung dang / brla drung rtsib logs zug pa dang / /mdun drang rtse mo mngon gcad bya/ /kha zheng che drang mi bya dang / /zhes bya ba la/ zug rngu brang na gnas shing zug pa dang / de bzhin du mchan khung dang / brla drung na gnas pa dang / rtsib logs su zug pa rnams stobs kyis dbyung bar bya'o/ /de bzhin du mdun nas drang bar mi bya'i phyir drang bar bya ba dang / rtse mo 'bur 'bur por phyir mngon pa dang / kha gcad par bya ba dang / kha zheng che ba gang yin pa de ni stobs kyis drang bar mi bya'o/ /zug rngur ma gyur mde'u dang / /mi mngon gnod med pa mi dbyung / /zhes bya ba la/ zug rngur ma gyur cing gnad du ma zhen la/ gdeg pa dang / bdar ba dang / bzhag pa ste gnad gsum du zhugs pa'am/ mtshon mi mngon zhing mi snang yang gnod pa med de/ skrang ba dang na ba dang rnags pa med par gyur na/ zug rngu de dbyung bar mi bya'o/ /de nas lag pas zin gyur na/ lag pa gnyis kyis drang bar bya/ /zhes bya ba la/ de nas zhes bya ba ni bkra shis pa'i don te zug rngu'i rnam pa lag pas zin cing gzung du rung ba ni/ lag pa gnyis kyis drang zhing gzung bar bya'o/ /snang gzhan seng ge chu srin dang / /bar mi ta ka'i mchu yis drang / /zhes bya ba la/ zug rngu gang snang bar yang gyur cing snga ma las gzhan pa ste/ lag pas zin par ma gyur pa dag ni/ seng ge'i mchu 'dra ba la sogs pa'i cha spyad kyis drang bar bya'o/ /mi mngon rma yi dbyibs las ni/ /gal te dbyung bar nus gyur pa/ /kang ka bring ga khrung khrung dang / / bya rog shar bya'i mchus drang / /zhes bya ba la/ gang zug rngu nyid ni mi mngon la/ rma bya'i dbyibs las lus gang na gang gnas pa'i phyogs de las gal te dbyung du rung zhing nus pa yin na lus kyi phyogs de las kang ka la sogs pa'i mchu 'dra ba'i cha spyad kyis drang bar bya'o/ / pags sogs la gnas skam pas drang / /khong stong nang nas nya mgos dbyung / /zhes bya ba la/ pags pa la sogs par gnas pa'i zug rngu ni/ skam pa 'dra ba'i cha sbyad gnyis pos drang bar bya'o/ /sogs pa'i sgras ni sha la sogs pa bsdu'o/ /gang khong stong gi sbubs can gyi nang gi pags pa la gnas pa ni/ nya mgo lta bu'i cha spyad kyis dbyung bar bya'o/ /sbu gur gnas pa 'dam bu 'dras/ /zhes bya ba la/ bu ga'i phyogs su gnas pa'i zug rngu ni 'dam bu 'dra ba'i cha spyad kyis dbyung bar bya'o/ / lhag ma gzhan gyis ci rigs drang / /zhes bya ba la/ zug rngu lhag ma snga ma de dag gis dbyung bar mi nus pa de dag ni cha spyad gzhan 'dir smos pa dang / ma smos pa'i thur ma la sogs pas ci rigs par drang bar bya ste/ gang zhig gang dang 'tsham pa des de dbyung bar bya'o/ /yang na dang por mtshon gyis dral/ /zhes bya ba la/ de lta na yang rang drang bar ma nus na gtsags spyad kyis drang por dral zhing sha la sogs pa bcad de/ de'i 'og tu dbyung bar bya'o/ /de nas rma yi khrag bsal ba/ /byas la mar gyis dugs bya zhing / /bcings te spyod pa bsten par bya/ /zhes bya ba la/ de nas de'i 'og tu lus kyi phyogs la zug rngu phyung zin pa dang / rma'i kha'i khrag bsal zhing phyis la mar gyis rma legs par dugs bya zhing bcings te/ de'i 'og tu spyod pa sngar snum gyi cho ga'i skabs su bshad pa'i kha zas dang / spyod lam dag bsten par bya'o/ /rtsa dang chu bar mtshon lus pa/ /thur mas bskyod de dbyung bar bya/ /zhes bya ba la/ rtsa dang chu bar zhen cing chags pa'i mtshon lus pa'i zug rngu ni/ dang por thur mas bskyod cing bskul la/ de'i 'og tu dbyung bar bya'o/ /snying gar gnas pa'i zug rngu ni/ /chu grang gtor bas sngangs byas la/ /gnas gzhan phyin cing 'phags gyur na/ /ci rigs par ni dbyung bar bya/ /zhes bya ba la/ snying ga'i phyogs su gnas pa'i mtshon gyi zug rngu ni dang por chu grang mo gtor zhing btab pas sngangs shing skrag par byas la/ sngangs pas de gnas gzhan du 'chugs shing / 'phags par gyur na ci rigs par dbyung bar bya ste/ cha spyad gang 'tsham pas dbyung ngo zhes bya ba'i don to/ /rma yi sgo nas dbyung dka' ba/ /gzhan dag la yang de bzhin bya/ /zhes bya ba la/ mtshon dang po gang du zug pa'i rma'i sgo nas dbyung zhing gdon par dka' ba gzhan dag la yang zug rngu de gnas gzhan du bskyod la dral te/ dbyung bar bya'o/ /rus par zug la rkang pa ni/ /gnyis kyis mnan la drang bar bya/ /zhes bya ba la/ zug rngu gang zhig rus par zug par gyur pa'i mi zug rngu can de rkang pa gnyis kyis mnan la/ zug rngu de cha spyad kyis drang zhing gdon par bya'o/ /de ltar ma nus stobs che ba'i/ /g.yog gis dam du bzung ste dbyung / /zhes bya ba la/ de ltar rnam pa des zug rngu dbyung ba ma nus na shin tu stobs che zhing nus pa dang ldan pa'i g.yog bsgo ba bzhin du byed pas cha spyad kyis shin tu dam du bzung ste dbyung bar bya'o/ /'on kyang ma nus mde'u'i rtsa/ /bkug la gzhu rgyud dam btags la/ /rta srab kyi ni kha lcags mthar/ /ma yengs pa yis dam btags te/ /yan lag lnga po legs bsdams nas/ /rta ni lcag gis gzhus nas su/ /brdeg cing mgo bo bteg nas ni/ /shugs kyis ci bzhin bstod nas ni/ /de ltar zug rngu dbyung ba'am/ /zhes bya ba la/ de lta na yang zug rngu dbyung bar ma nus na/ mde'u'i rtsa ba dam du bkug la/ gzhu rgyud kyi phyogs gcig la dam du btags shing bcings te/ gzhu rgyud kyi phyogs gcig rta srab kyi kha lcags kyi yang mig la sman pas gzhan du ma yengs par dam du btags te/ rta'i yan lag lnga po legs par bsdams shing dul bar byas shing de'i 'og tu rta lcag gis gzhus na/ ci nas kyang mgo drag tu bteg pa'i shugs kyis zug rngu 'byin par nus pa de ltar bya'o/ /yang na shing gi yal gar gdags/ /zhes bya ba la/ yang na rnam pa gong ma ltar gzhu rgyud kyi rtse mo gcig mde'u la brtod de/ rtse mo gcig shing gi yal ga btud pa la brtod de/ btang bas zug rngu dbyung bar bya'o/ /mde'u rtsa phra bar srad bu dag /btags te zug rngu dbyung bar bya/ /zhes bya ba la/ zug rngu gang gis mde'u rtsa ba phra zhing chad par gyur du dogs pa yin na srang bu phra mo btags te dbyung bar bya'o/ /rma skrangs mde'u rtsa mi snang na/ /skrangs pa legs par btsir nas dbyung / /zhes bya ba la/ rma yi kha skrangs pas zug rngu'i mde'u rtsa ba mi snang bar gyur na/ skrangs pa de legs par btsir zhing mnan nas dbyung bar bya'o/ /dong bu tho bas brdungs pa yis/ /mtho zhing snang bar gyur na dbyung / /zhes bya ba la/ zug rngu mtho zhing 'phags par snang bar gyur na cha spyad dong bu zhes bya ba tho bas brdung pas dbyung bar bya'o/ /lam ma yin par byung ba gang / / de nyid kyis ni rmar dbyung bya/ /zhes bya ba la/ tho ba de nyid kyis zug rngu bskyod la/ lam ma yin pa las rang gi rgyu ba'i lam rma'i sgo dang nye bar drangs la/ de'i 'og tu lam ji lta ba las dbyung bar bya'o/ /mde'u zur bcum ste dbyung ba 'am/ /dong bu'i kha yis dbyung bar bya/ / zhes bya ba la/ mde'u zug rngu'i zur can nam rna ba can yod na rna ba de bcum zhing bsdus la/ lhod par byas te/ dbyung ba'am dong bu'i khas legs par dbyung bar bya'o/ /rna ba med cing rma kha dbye/ /drang 'dug khab long bstan pas dbyung / /zhes bya ba la/ zug rngu'i mde'u rna ba med pa dang / rma kha bye zhing phye ba dang / drang por 'dug cing thad kar gnas pa dag ni/ khab long zhes bya ba'i nor bu'i khyad par bsten pas dbyung bar bya'o/ /zhu ba'i gnas song zug rngu ni/ bkru sman nyid kyis dbyung bar bya/ /zhes bya ba la/ zhu ba'i gnas long kha chad kyi nang du zhugs pa'i zug rngu phra mo ni bkru sman btang ba nyid kyis dbyung bar bya'o/ /rlung gnod dug dang nu zho dang / /khrag dang chus gnod gzhibs pas bsal/ /zhes bya ba la/ rlung gnod pa bskyed pa la sogs pa dag ni zug rngu dang 'dra bar lus la gnod par byed pa yin la/ de ni gzhibs pas bsal zhing gdon par bya'o/ /gre ba'i nang zhugs zug rngu la/ /skud pa gre bar gzhug bya ste/ /pad+ma'i rtsa bar skud pa gdags/ /pad rtsa zug rngu lhan cig drang / /zhes bya ba la/ gre ba'i sbubs kyi nang du zug cing der zhugs pa'i zug rngu ni/ srin bal la sogs pa'i skud pa gzhug par bya la/ de yang pad+ma'i rtsa ba la skud pa btags te btang la de'i 'og tu pad+ma'i rtsa ba dang zug rngu lhan cig drang bar bya'o/ /lcags bsregs mig chur bcug pa yi/ /lcags thur brtan por byas nas ni/ /rgya skyegs can nam rgya skyegs med/ /rgya skyegs kyis bsgos zug rngu dbyung / /zhes bya ba la/ zug rngu rgya skyegs can dag gre ba'i sbubs las gdon pa'i thabs ni/ cha spyad sbubs can gre bar bcug la/ gre ba'i tshigs pa bsrung bar bya ba'i phyir/ chu bsil mo lcags bsregs pa'i thur ma la blugs pas de gdon par bya'o/ /rgya skyegs med pa'i zug rngu yang lcags bsregs pa'i thur ma'i rtse rgya skyegs kyis bsgos pa'i smyig ma'am/ dong bur bcug ste chus btab pas dbyung bar bya'o/ /skra shad 'dzings pa 'thungs pa dang / /gsher bas tsher ma zug pa gdon/ /'phral du srad bu thogs pa yis/ /slon par bya'o des cig shos/ /zhes bya ba la/ skra'i tshogs bsdus pa'i gong bu ni skra shad 'dzings pa zhes bya la de 'thungs pa dang / gsher ba'i rtswas chu la sogs pa'i tsher ma ste/ nya rus sam/ gzhan yang de lta bu'i rus pa'i zug rngu dbyung zhing gdon par bya'o/ /de yang 'phral du ste/ de'i mod srad bu la zug rngu thogs par gyur pas de slon par bya zhing / srad bu'i phyogs gcig tu zug rngu 'byar ba de drang bar bya'o/ /yang tsher ma des ni cig shos te/ skra shad de drang bar bya ste/ srad bu btags shing gsher bag 'thungs pas slon par bya'o/ /kha snar drang bar ma nus na/ gzhan du thur du mid par bya/ /zhes bya ba la/ gal te kha snar gyen du zug rngu drang bar ma nus na/ gzhan du na thur du mid cing nang du drang bar bya'o/ /zhes bya ba'i don to/ / zas kyis brnangs pa'i zug rngu ni/ /chu btung phrag par brdegs pas gzhug /ces bya ba la/ zas kyis brnangs shing lkog mar chags pa'i kha zas nyid ni zug rngu 'byed bsad pas zug rngu zhes bya la/ de ni chu btung bar phrag par khu tshur brdeg pas nang du zhugs par bya'o/ / mig gi rma yi zug rngu phra/ dar ram bal lam chu yis bsal/ /zhes bya ba la/ mig gi rma'i zug rngu phra mo ni/ dar la sogs pa gsum gyis bsal zhing gdon par bya'o/ /mi ni chus gang kha sbub ste/ /sprugs pa'am brkyang la btsir slon ba'am/ / thal khung brkos te mi yi ni/ /ske yi bar du nub par gzhug /ces bya ba la/ mi chus khyer ba'am/ /chur lhung pa'i tshe nang du chus gang bar gyur na/ kha sbub ste legs par sprugs pa'am/ de bzhin du yang kha sbub ste brkyang la btsir ba'am/ slon sman gyis skyug tu gzhug go/ /rna ba chus gang lag pa yis/ /mnyes la til mar rgyun blugs la/ /rna ba thur du bstan nas ni/ /brdabs pa'am yang na brngub par bya/ /zhes bya ba la/ rna ba chus gang bar gyur na/ lag pas legs par mnyes la/ til mar gyi rgyun blugs pa dang / de bzhin du rna ba thur du bstan nas lag pas brdabs pa'am/ brngub cing gzhib par bya'o/ /rna ba'i nang du 'bu zhugs na/ /rna ba tshwa chus bkang ba'am/ /tshwa chu dro 'jam nyid kyis dgang / /shi nas 'bu ro dbyung thabs bya/ /zhes bya ba la/ rna ba'i bu ga'i nang du rkang brgyad pa la sogs pa'i 'bu zhugs na rna ba chu tshan gyi chus dgang ba'am/ tshwa chu dro 'jam dag gis kyang dgang bar bya ste/ don du tshwa chu'am/ tshwa chu dro 'jam du bsros pas rna ba dgang bar bya'o/ /gal te 'bu ro dbyung ba'i thabs rna spabs bsal ba la sogs pa'i cho ga 'og nas smos pa dag bya'o/ /rgya skyegs can dang gser dngul sogs/ /'byung khungs las byung yun rings gnas/ /mtshon ni phal cher lus kyi me/ /drod kyis 'ju bar byed pa yin/ /zhes bya ba la/ zug rngu rgya skyegs can dang / gser dngul gyi rang bzhin can la sogs pa 'byung khungs las byung ba'i mtshon ni/ lus kyi me drod kyis 'ju bar nus pas yun ring du gnas na/ mtshon de dag 'ju bar 'gyur ba yin no/ /sa dang 'od ma shing rwa rus/ /so dang skra dang rdo ba 'ju/ /zhes bya ba la/ sa la sogs pa'i zug rngu dag kyang lus kyi me drod kyis 'ju bar nus pa yin no/ /rwa dang 'od tshal lcags ta la/ /shing tshal zug rngu ring pos kyang / /phal cher de dag tshos 'gyur la/ /khrag dang sha yis tshos par byed/ /ces bya ba la/ rwa'i zug rngu dang 'od ma'i zug rngu dang shing gi zug rngu phal che ba dag kyang lus kyi mes tshos shing 'drul bar 'gyur ro/ /de dag kyang sha dang khrag gis tshos shing 'ju bar byed do/ /zug rngu sha yi gting du zug /phyogs de tsha ba'am med gyur na/ /de nas de ni snang bya'i phyir/ /mnye dugs sbyang dang sha 'bri brta/ /sman rnon bcings dang zas skom sbyin/ / mtshon gyis gdab cing gtsags pa yis/ /smin par byas nas rma dbral dang / /btsal dang phye bas zug rngu dbyung / /zhes bya ba la/ zug rngu'i rnam pa sha'i gting du zug cing nang du zug pa ni lus kyi yan lag gi phyogs de tsha zhing tshos par 'gyur te/ der gnas pa'i zug rngu ste mnye ba la sogs pa'i thabs kyis smin par byas nas dbyung bar mi bya'o/ /mnye ba ni lag pas mnye ba'o/ /bkru snan dang slon sman la sogs pas sbyang ba dang / smyung ba la sogs pas sha dbri ba dang / sha dbri thabs la sogs pas brta ba dang / sman tsha zhing rno bas bcing ba dang / zas skom rnon po sbyin pa dang / mtshon gyis btab cing gtsags pas snang bar byas nas dang po thabs de bzhin du de dag gis smin par byas la/ de'i 'og tu rma 'dral ba dang / chu tshol gyis btsal ba dang / dbye zhing gshags pas zug rngu de dbyung bar bya'o/ /zug rngu'i gnas dang cha spyad kyi/ /tshul ni mang pos legs brtags te/ /blo ldan thabs ni de dang des/ /shes par byas la zug rngu dbyung / /zhes bya ba la/ zug rngu de rwa dang 'od ma la sogs pa gnas te/ zug pa'i gnas pags pa dang / sha la sogs pa dang cha spyad ces cha spyad bkra shis la sogs pa de rnams kyi tshul mang po'am/ rnam pa sna tshogs pas legs par brtags te shes par byas la blo dang ldan pa'i mkhas pas 'dir bshad pa dang / ma bshad pa'i thabs dang de'i bye brag shes par byas la/ zug rngu'i rnam pa yang ji ltar gnas pa shes par bya ba dang / de bzhin du de dang de nyid kyis dbyung zhing gdon par bya'o/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas rnam par sbyar ba las/ /le'u nyi shu rtsa brgyad pa'i rnam par 'grel pa'o/ / //de nas gtar ga gdab pa'i las kyi cho ga'i le'u bshad par bya'o/ /zhes bya ba la/ 'dir bshad pa ni 'di yin te/ zug rngu la la ni dbral nas dbyung bar bya'o/ /zhes gong du bshad pas de'i phyir de'i 'og tu 'di brtsams pa yin no/ /gtsags spyad kyis gtar ga gdab cing rma'i las su bya ba byed pas na gtar ga gdab pa'i las te/ de'i cho ga ni 'di dang 'di ltar bya'o/ /zhes bya ba'i tshul te de bshad par bya'o/ /rma ni phal cher dang po ni/ /skrangs dang smin las 'byung bar 'gyur/ / de bas de nyid gso bya ste/ /de bsil byug blugs khrag dbyung dang / /legs par sbyang ba la sogs pa/ /smin par 'gyur las 'bad de bsrung / /zhes bya ba la/ rma'i mtshan nyid phal cher mang du dang po skrangs shing smin pa las rma 'byung bar 'gyur ro/ / de bas na skrangs pa de nyid gso zhing zhi bar bya ba dang / smin par 'gyur ba las bsrung bar bya ste/ ci nas kyang skrangs pa de smin cing rnags par mi 'gyur ba de ltar 'bad pa dang ldan pas bsrung bar bya'o/ /de ji ltar bsrung bar bya zhe na/ de ni bsil dang zhes bya ba la sogs pa ste/ skrangs pa de tsan+dan gyi lde gu la sogs pa bsil sman gyis byug pa dang / bsil sman la sogs pa'i chu'i rgyun blugs pa dang / de bzhin du gtar ga gdab cing khrag dbyung ba dang / skyugs sman dang bkru sman la sogs pa btang bas legs par sbyang bar byas la/ rlung la sogs pa'i nad dmigs ji lta ba dang mthun pa'i gso dpyad kyis smin cing rnags par gyur pa las bsrung bar bya'o/ /thor bu ma smin skrangs drod chung / /mdog 'dra sra zhing brtan par gnas/ /zhes bya ba la/ thor bu'am skrangs pa'i tshabs chung ba dang / drod dam tsha bar shas chung ba dang / de bzhin mdog ni 'dra ba ste/ pags pa'i mdog ma nyams shing mnyam pa dang / sra zhing mnyen bag med pa dang / brtan zhing mi yo bar gnas pa yin no/ /smin tshe mdog ni 'gyur ba dang / / dmar zhing rkyal bu'i dbyibs ltar 'dug /gas pa lta bu'i nad bcas dang / /yan lag snyom zhing glal bcas dang / /lus grugs 'khrugs tsha yi ga 'chus/ /rims 'debs skom dad gnyid med dang / /mar 'khyags bzhag na 'ju ba dang / /rma ltar reg na mi bzod do/ /zhes bya ba la/ skrangs par gyur pa de smin par byed pa'i tshe ni/ mdog 'gyur zhing pags pa'i mdog dang mi 'dra ba dang / de bzhin du mdog rtsa dmar dang / rkyal bu'i dbyibs ltar 'dug ste/ rlung gis khengs shing mi 'gyur bar gnas pas na rkyal pa bus pa lta bur 'dug pa dang de bzhin du gas pa lta bu ste/ bcag pa'am bkas pa lta bu'i tshul dang ldan pa dang / nad dang bcas pa de khab kyis gtsags pa snyam du sems pa dang / de bzhin du yan lag thams cad glal 'byung ba dang bcas par gnas pas lus grugs shing dkrum pa lta bur sems pa dang de bzhin du lus 'khrugs pa la sogs pa dang ldan pa ste/ 'khrugs pa ni tshig brjod par mi nus pa'i nad kyi tshor ba rang gi nyams kyis myong ba'i tshul du ma dang ldan pa'i khams 'khrugs pa'i nad 'byung ba'o/ /tsha ba ni lus dang yan lag thams cad mi bzad par tsha ba'o/ /yi ga 'chus pa ni zas la 'dod pa med cing / mngon par mi dga' bar 'gyur ba dang / rims kyis 'debs pa dang / skom dad kyis gdungs pa dang / gnyid med cing yer ba ste/ de dag dang ldan par 'gyur ba dang / de bzhin du mar 'khyags shing 'thas par gyur pa de'i steng du bzhag na 'ju bar 'gyur ba dang / de bzhin du rma byung ba ltar skrangs pa smin par byed pa de'i tshe/ reg na mi bzod pa yin no/ /smin gyur na ba'i shugs chung zhing / /rnyid cing skya la gnyer ma 'du/ /mtha' ma 'jum zhing dbus su mtho/ /g.ya' dang skrangs pa la sogs chung / /rkyal pa yi ni chu lta bur/ /reg na rnag ni phan tshun rgyu/ /zhes bya ba la/ skrangs pa de smin cing rnags par gyur na na ba'i shugs chung ba ste/ nad kyi rtsom pa shas chung ba dang / de bzhin du rnyid cing snyi ba dang / mdog skya zhing dkar ba dang / gnyer ma'i tshogs 'du ba dang / de bzhin du mtha' ma thog thag 'jum zhing dma' la dbus ma'i phyogs mtho zhing 'phags par 'gyur ba dang / de bzhin du g.ya' ba dang / skrangs pa la sogs pa chung zhing zhi ba dang / rkyal pa'i nang du chu blugs pa ltar gnas shing / reg cing mnan na rnag gi tshogs phan tshun rgyu zhing 'khrugs pa yin no/ /rlung min min mkhris min tsha/ /med de bad kan med mi skrang / /khrag med dmar bar mi 'gyur te/ /de bas nad khrag dang bcas smin/ /zhes bya ba la/ smin cing rnags pa de la rlung ma yin zhing / rlung nad med pa ni/ na zhing zug par mi 'gyur la/ mkhris pa ma yin par ni tsha zhing drod bag mi 'byung zhing / bad kan med pas ni skrangs pa 'byung bar mi 'gyur la/ khrag med dmar bar ni mi 'gyur te/ de bas na rgyu de'i phyir na zhes pa rlung dang mkhris pa dang / bad kan dang khrag dang bcas na/ skrangs shing smin par 'gyur ro/ /smin pa thal drags khong stong dang / /nad kyis zos pas bags pa srab/ /gnyer ma 'jum zhing mdog gnag la/ /ba spu rnams ni 'byi bar 'gyur/ /zhes bya ba la/ skrangs smin zin nas thal drags shing dus shin tu 'das pa ni/ skrangs pa'i gnas na khong stong du 'gyur ba nad las byung ba'i rnag gis zos shing zad par byas pa dang / pags pa srab cing rdol bar nye ba dang / gnyer ma 'jum zhing pags pa 'dus pa dang / mdog gnag cing dri ma can du gnas pa dang / ba spu rnams kyi tshogs 'byi zhing 'byung bar mi 'gyur ba yin no/ /bad kan shas che'i skrangs pa ni/ /smin pa gting ring khrag gis gang / /de bas smin rtags gsal ma yin/ /skrangs pa gang du bsil gyur cing / /pags mdog mi 'gyur nad tshabs chung / /rdo ltar reg na sra ba yin/ /mkhas pas the tshom med par de/ /khrag gi smin pa zhes bshad bya/ /zhes bya ba la/ yang bad kan las byung ba'i skrangs pa la ni/ smin pa gting ring zhing zab pas brtag par dka' ba dang / khrag gis gang bar gyur pa yin te/ de bas na de'i smin pa'i rtags sam/ mtshan ma ni gsal ba ma yin te/ shes par dka' ba yin no/ / yang skrangs pa'i rnam pa gang du skrangs bag bsil zhing reg na grang bar gyur la/ pags pa'i mdog kyang gzhan du ma 'gyur te/ cha 'dra ba dang / nad tshabs chung ba dang / rdo ltar reg na sra zhing mkhrang bag tu gnas pa gang yin pa de ni mkhas pas the tshom dang dogs pa med pa nyid du khrag las gyur pa'i rma smin no zhes bshad cing the tshom med pa nyid du bya'o/ /snying stobs nyam chung byis pa dang / /thor bu smin pa'i tshabs che ba'am/ /gnad dang rus tshigs la sogs par/ /'byung ba ma gtogs gzhan dag dral/ /zhes bya ba la/ snying stobs chung zhing phog snya zhan pa dang / de bzhin du nyam chung ba dang / byis pa lta bu mtshon gdab mi bzod pa dang / smin pa'i tshabs che zhing thal drags pa dang / de bzhin du gnad dang rus tshigs la gnas pa'i skrangs pa la ni/ rno ba dang tsha ba'i sman gyis brtol zhing dral bar bya'o/ /de yang 'di nyid kyi rgyud phyi ma las/ gu gul zar ma ba las so/ /khron bu dang ni phug ron rtug /thal sman 'phrod dang thal sman rno/ /skrangs pa smin gyur brtol bar bya/ /zhes bya ba bshad pa yin no/ /gzhan zhes bya ba skrangs pa'i rnam pa gong du smos pa ma gtogs pa gzhan dag ni gtsags bus dral ba nyid du bya'o/ /ma smin brtol na rtsa rgyus la/ /gnod cing khrag ni mang du 'byung / /nad tshabs rab 'phel rma gyes pa'am/ /rma 'byung thor bu 'byung bar 'gyur/ /zhes bya ba la/ skrangs pa ma smin pa brtol zhing dral na/ /rtsa dang rgyus pa la gnod cing ma rungs par 'gyur ba dang / de bzhin du khrag gi tshogs mang du 'byung zhing 'bab pa dang / de bzhin du nad tshabs rab tu 'phel zhing tshor bar 'gyur ba dang / rma'i kha gyes shing bye bar 'gyur ba ba'am/ yang na rma rdol ba las byung ba'i thor bu'am/ me dbal gyi nad du 'gyur ro/ /rnag ni nang du gnas gyur pa/ /'phel bas rtsa rgyus sha dang ni/ /khrag rnams myur du sreg byed de/ /rtswa skam la ni me dang mtshungs/ /zhes bya ba la/ skrangs pa de smin pa thal drags kyang / dral zhing brtol ba ma byas par nang du gnas par gyur pa rnam par 'phel bar 'gyur bas rtsa la sogs pa bsreg cing za bar byed de/ dper na me mched pas rtswa'i tshogs bsregs pa dang 'dra'o/ /gang zhig ma smin brtol ba dang / /gang zhig smin kyang btang snyoms 'jog / khyad par mi shes de dag ni/ /sme sha can 'drar shes par bya/ /zhes bya ba la/ sman pa gang gis skrangs pa ma smin pa dag kyang mi shes pa'i dbang gis brtol zhing dral bar byed la yang sman pa gang zhig skrangs pa de smin zin kyang mi shes pa nyid kyis btang snyoms su 'jog cing brtol bar mi byed pa nyid de/ de gnyi ga yang khyad par mi shes shing ma brtags par byed pa yin pas sme sha can te/ khyi sha za ba'i rigs ngan dang 'dra bar dmad par bya ba yin no/ /rma brtol ba yi dang por ni/ /kha zas phan ba sbyin par bya/ /tshor ba mi bzad bzed 'gyur bas/ /chang 'thung pa la chang blud bya/ /zas zos pas ni mi brgyal zhing / /nang du mtshon btab tshor mi 'gyur/ /zhes bya ba la/ rma brtol zhing gtsags bu 'debs pa'i las byed pa'i dang por re zhig 'di dag ma byas pa'i mtshon gyi las mi bya ste/ de yang thog ma kho nar nad pa de'i stobs bskyed pa'i phyir/ kha zas phan zhing mngon par dga' ba sbyin pa dang / yang mtshon gyis btab pa'i tshor ba mi bzad pa drag po de bzod par 'gyur bas/ chang 'thung ba zhig yin na chang rnying pa blud par bya'o/ /de ltar na das zan zos shing longs spyad pas ni brgyal zhing 'bog par mi 'gyur la/ de bzhin du chang rnying pa rnon po 'thungs pas ni nang du mtshon gyis btab cing brtol ba tshor bar mi 'gyur zhing / de'i sdug bsngal ba rnags nus par 'gyur ro/ /rum du bu shi rde'u chags dang / /kha nad dmu rdzing can ma gtogs/ /zhes bya ba la/ nad pa rum du bu shi ba la sogs pa ni ma gtogs te/ bud med rum du bu shi ba dang / gcin nad rde'us 'gags pa dang / kha'i nad rnams yod pa dang / lto dmu rdzing can la mtshon gdab par mi bya'o/ /de nas yo byad kun bsags te/ /nad pa shar du kha bstan la/ /sman pa mngon phyogs bsdams nas ni/ /gnad sogs ma gtogs gtsags bus gdab/ /sha shugs rjes mthun shin tu rno/ /gtsags bu rnag phyin bar du gdab/ /de ni cig car gdab bar bya/ /zhes bya ba la/ de nas zhes bya ba ni/ bkra shis pa'i don du smos pa yin te/ yo byad kun bsags te zhes bya ba ni/ de'i tshe dgos pa'i yo byad thams cad bsags pa ste/ cha spyad rnams dang / gtsags spyad rnams dang / thal sman dang / 'dzum bu'i ma mchu dang / ras bal dang / chu'am ras bal sbangs pa'i gos kyi dum bu dang / lo ma dang / srad bu dang / bags pa dang / sbrang rtsi dang / snum dang / ska ba'i lde gu dang / til gyi lde gu dang / ldugs pa'i sman dang / chu'i bum pa dang / chu tshan dang / chu dron dang / zas dang / bsil yab la sogs pa rma la dgos pa'i yo byad thams cad bsag cing nyer bsdogs su bya'o/ /de nas nad pa kha shar du bstan te/ sman pa de la mngon par phyogs shing bltas nas/ legs par bsdams te/ gtsags bu myur du gdab par bya'o/ /de yang nad la sogs par gdab pa ste/ gnad dang / rtsa dang / chu ba dang / rus pa'i tshigs dang / rtsa bo che rnams spang bar bya'o/ /de yang sha shugs dang rjes su mthun par byas la/ shin tu rno ba'i gtsags bu gdab pa ni/ rnag phyin zhing snang bar gyur gyi bar du btang la/ de yang cig car te/ lan cig kho na gdab par bya'o/ /smin pa chen po yod kyang ni/ /rma zheng sor gnyis dral ba'am/ /sor gnyis pa'i zabs sor gsum gdab/ /ces bya ba la/ smin pa shin tu che ba la ni/ rma zhing sor gnyis gdab par bya ba'am/ sor gnyis pa'i bar ram zabs brtags la sor gsum par gdab par bya'o/ /mdzub mo chu ba spu dag gis/ /gnas phyogs ji bzhin brtags pa'am/ /rma tshol gyis ni legs btsal zhing / /kun tu legs par brtag par bya/ /zhes bya ba la/ rma tshol gyis kun tu legs par btsal zhing brtags la bya ba'am/ mdzub mo la sogs pas gnas dang phyogs gang na ji ltar yod pa legs par brtag cing btsal bar bya ste/ rma'i kha bye zhing gyes pa'i phyogs su mdzub mo g.yon pas brtag par byas la/ kha shin tu bye ba ni ma yin la/ sha'i gting zab pa dag ni/ rma tshol gyi thur mas legs par btsal bar bya la/ gzhan dag la ni smyug ma'i sbu gu'am/ pad+ma'i chu ba la sogs pas brtag par bya la/ kha shin tu zlum pa la ni phag gi sbus brtag cing btsal nas rma btod par bya'o/ /gang nas gang du 'gro 'gyur ba/ /gang du mtho ba shes byas la/ / de dang der ni rma btod de/ /legs phye phug ni med par bya/ /chu dang zheng du ci nas kyang / /nad ni gnas par mi 'gyur bya/ /zhes bya ba la/ lus kyi phyogs gang du rma tshol 'gro bar 'gyur ba'i lus kyi phyogs der rma btod par bya'o/ /yang na gang du skrang ba'i phyogs mtho bar snang bas shes par byas la/ phyogs de dang der rma btod par bya'o/ /de yang legs par phye ba ste/ logs phan tshun gyi bye brag legs par shes shing / phyed par 'gyur bar btod pa dang / de bzhin du phugs 'chas pa ste/ rnag la sogs pa brten pa'i gnas med par 'gyur ba dang / de bzhin du chu ste srid dang / zheng ste rgyar ci nas kyang rnag la sogs pa'i nad gnas par mi 'gyur zhing / chags par mi 'gyur ba'i mtshan nyid dang ldan pa ste de ltar bya'o/ /sman pa dpa' brtan las la myur/ /mtshon rno mi rtul mi 'dar la/ /kun tu rmongs par ma gyur pa/ /gtsags bus 'debs pa'i las la bsngags/ /zhes bya ba la/ sman pa dpa' ba la sogs pa dang ldan pa ni/ sman dpyad kyi mtshon gyi las byed pa la bsngags shing 'dod par bya ba yin no/ /de la dpa' ba ni rtul phod pa'o/ /brtan pa ni bag tsha ba med cing mi 'gyur ba'o/ /las la myur ba ni lag bzo bas gtsags bu'i las myur du byed pa'o/ /mtshon rno ba ni legs par bdar ba dang / kha snyoms shing legs pa'o/ /mi rtul ba ni las chud mi 'dza' ba'o/ /mi 'dar ba ni lag pa mi 'dar ba'o/ /kun tu ma rmongs pa ni bya ba la mkhas pa'o/ /gyen du gcad rtsa 'phral smin rtsa/ /rnyil dang ske rtsa lto spos dang / /mchan khung dang ni mig sbubs mchu/ /mkhur tshos brla drung chu so rtsa'o/ /zhes bya ba la/ dpral ba la sogs pa'i rtsa ni gtsags bu kha drang por bstan te gyen du gdab par bya'o/ /gzhan dag gyen du bcad na ni/ /rtsa dang chu ba ma rungs 'gyur/ /zhes bya ba la/ phyogs gzhan dag tu rtsa gyen du bcad na/ rtsa dang chu ba ma rungs par 'gyur ro/ /gtsags bus btab nas nad pa ni/ /tshig snyan chu ni bsil ba yis/ /dbugs phyung nas ni de'i 'og rma/ /sor mos kun nas btsir ba dang / /ska ba'i chu yis legs bkru zhing / /sman chur bcug pa'i gos kyis phyi/ /gu gul yungs kar a ka ru/ /shing kun ka ra rgyam tsha dang / /shu dag nim pa'i lo ma ni/ /mar du sbyar bas bdug par bya/ /zhes bya ba la/ gtsags bu btab zin kyang de'i 'og tu nad pa la de'i tshe smra bar 'os pa'i tshig snyan pa brjod pa dang / de bzhin du chu bsil ba gtor ba la sogs pas dbugs phyung nas/ de'i 'og tu rnag la sogs pa'i skyon bsal bar bya ba'i phyir rma de sor mos kun nas bcing bar bya'o/ /de'i 'og tu nad dmigs ji ltar 'tsham pa'i sman chu ska ba la sogs pas legs par bkru zhing sbyangs nas/ de'i rjes la ras la sogs pa'i gos kyis chu legs par bsal zhing / de nas rma de gu gul nas nim pa'i lo ma'i bar gyi sman mar dang sbrus shing sbyar ba'i bdug pas bdug par bya'o/ /til gyi lde gu mar sbrang rtsi/ /rang gi sman ni ji lta bas/ /byugs shing de nas rma tshangs gzhug / de nyid kyis ni de g.yogs la/ /mar dang phyer sbrus bsku ba dang / /de'i 'og kog tse stug po ni/ /gzhag ste shin tu ma yengs pas/ /gos kyis legs par bcings byas te/ /glo dang g.yas dang g.yon dag gam/ /steng dang 'og tu ma song bya/ /zhes bya ba la/ de nas de'i 'og tu rma'i nang du gro mde'u tshul du ras gtsang ma'i rma tshangs su byas pa dang / ras bal la sogs pa'i sdong bu rma'i nang du gzhug tu rung ba bcug la/ de'i 'og tu nad dmigs ji lta ba'i sman gyi lde gu byug cing bsku bar bya ba dang / de bzhin du til gyi lde gu dang / mar dang / sbrang rtsi bsku zhing til gyi lde gu dang mar dang sbrang rtsi de nyid kyis/ rma'i nang na gnas pa'i rma tshangs rmar bcug pa'i ras dum la sogs pa de nyid kyis g.yogs par bya'o/ /de 'ba' zhig gis de g.yogs par ma zad kyi/ snod kyi nang du phye dang mar dang chur sbrus shing lag pa'i rtse mos mnyes pa'i zan gyis kyang g.yogs par bya'o/ /de'i 'og rma'i tho skor gyi steng du gos rim pa mang po las byas pa mthug po gzhag pa/ shin tu ma yengs pas gos kyi dum bus legs par bcing zhing dkri bar bya la/ de yang glo g.yas sam g.yon du ma 'phyugs par bya ba dang / rma'i steng ngam dbus su ma song bar drang zhing ya yo med par rma dkri zhing bcing bar bya'o/ /rma tshangs kog tse dkris mar bcas/ /phra zhing sra la gtsang ba la/ /spos kyis bdugs shing 'jam la mnyen/ /kham khum med cing rma la phan/ /zhes bya ba la/ gong du smos pa'i rma tshangs nang du gzhug pa'i ras dang / kog tse dang / dkri ba'i ras ni sra zhing mi 'chad pa dang / gtsang zhing bkrus pa las byas la/ de yang gu gul la sogs pa'i spos kyis bdug pa dang / 'jam zhing reg na bde ba dang / mnyen zhing 'jar ba dang / kham khum med cing blta ba tshigs dang bral ba'i rma la phan pa de lta bu dag bya'o/ /bcings nas de yi 'og tu ste/ /gnod pa bzlog phyir bsrung bar bya/ /de rnams la ni gtor ma sbyin/ /lag smi gu ha a ti gu ha/ /spang spos pra ma tsa ri ni/ /tsha tra a ti tsha tra dang / /dU ra ba shu dag yungs kar dag / rtag tu de yi spyi bor gdags/ /zhes bya ba la/ rma bcing ba'i bar gyi las de dag byas nas/ de'i 'og tu nad pa de dag la gdon la sogs pa'i gnod pa bzlog pa'i phyir bsrung bar bya'o/ /yang gnod sbyin la sogs pa de rnams la gtor ma'i kha zas ci rigs par sbyin pa dang / rtag par dus thams cad du sman 'di dag spyi bor gdags par bya ste/ lag smi zhes bya ba sha mi dang / gu ha zhes bya ba kr-iSh+Na pa r+Ni dang / a ti gu ha zhes bya bas la pa r+Ni dang / spang spos zhes bya ba man ji ste/ ming gi rnam grangs dzA ti la zhes bya ba dang / pra ma tsa ri zhes bya ba bram aSh+Ti ka zhes bya ba'i shing dang / shu dag ste sman pa tsa dang / tsha tra zhes pa sha ta puSh+pa dang / a ti tsha tra zhes bya ba bi sha ni ki dang / dUr ba dang / yungs kar rnams gdags par bya'o/ /de nas snum gyi cho gar bshad/ nyin re'i kun spyod bshad pa bstan/ /zhes bya ba de'i 'og tu skyes bu dman ma de la snum gyi bshad pa zhes pa snum btung ba'i cho ga'i skabs su bshad pa/ kha la chu dron gyis kun tu spyod pa bya ba la sogs pa dang / nyin re zhing spyad par bya ba'i le'u'i skabs su bshad pa'i kun tu spyod pa ston cing bsgo bar bya'o/ /nyin par gnyid log rma g.ya' zhing / / kha dmar na skrangs rnag 'khyims 'gyur/ /zhes bya ba la/ sman ma smin par gnyid log pa ni rma g.ya' ba dang / na ba dang / skrangs pa dang / rnag 'khyims par byed par 'gyur ro/ /bud med dran nam reg pa'am/ /mthong bas khu ba byung gyur na/ /ma phrad na yang 'khrag pa las/ /byung ba'i skyon ni 'thob par 'gyur/ /zhes bya ba la/ bud med dang ma phrad du zin kyang / de dran pa la sogs pa nyid kyis khu ba byung bar gyur na/ 'khrig pa las byung ba'i skyon rma bye ba la sogs pa 'byung zhing 'thob par 'gyur ro/ /kha zas dag ni gang goms las/ / nas dang gro dang drug cu pa/ /sran chung mud ga tu ba ri/ /ni shan na ga dzi wan ti/ /la phug gzhon nu bar ta ka /rgya sne'u tan du li ya ka /ka ra be+e la kar ko ta/ /ka tu ka la ba to la/ /rgyam tsha se 'bru skyu ru ra/ /chu bskol ba ni bsgrangs pa dang / /'bras rnying chang dang snum nyung zad/ /zos rjes chu tshan btung ba dang / skam sa'i sha ni zos gyur na/ /rma ni myur du 'tsho bar 'gyur/ /zhes bya ba la/ nad pa sman ma de rjes su mthun zhing goms pa'i kha zas zos pas myur zhing rings par rma 'tsho zhing bde bar gnas par 'gyur ro/ /de la nas la sogs pa ni bza' ba'i don du'o/ /sran chung la sogs pa ni sran khu yu sha dang tshod ma'i don du sbyar ro/ /tu ba ri ni sran ma a ru ka'o/ /ni shan ni ka dang / dzi ba na ti la sogs pa ni tshod ma'i don du'o/ /rgyam tsha dang se 'bru la sogs pa spos kyi don du'o/ /chu bskol ba bsgrangs pa ni btung ba'i don du'o/ /'bras rnying pa ni lo gcig ma lon pa'i 'bras de'i chan no/ /snum can ni snum cung zad yod pa'o/ /de'i rjes la 'tshal nan ni chu tshan btung bar bya'o/ /de bzhin du skam sa'i sha 'ur bya la sogs pa'i sha bza' ba ste/ de dag gis rma myur du 'tsho zhing 'byang bar 'gyur ro/ /dus su ran par bza' ba dang / /phan pa zos na bde 'ju 'gyur/ /zhes bya ba la/ de ltar rjes su mthun pa'i kha zas ji ltar 'os pa'i dus su ran zhing 'tsham par bza' ba dang / phan pa zos na bde blag tu 'ju zhing smin par 'gyur ro/ /ma zhu ba yis rlung la sogs/ /ldang zhing nad ni stobs chen 'gyur/ /de las skrangs dang rnags ba dang / /tsha dang spos par 'gyur ba yin/ /zhes bya ba la/ kha zas ma zhu zhing smin par ma gyur pa las ni/ rlung la sogs pa ldang zhing stobs dang ldan pa nad tshabs chen por 'gyur ro/ /de ldang ba de las rma skrangs pa dang na ba la sogs pas nad pa nyen par 'gyur ro/ /'bru sar til dang ma sha dang / /chang dang rlan can las byung sha /'o ma bu ram shing las gyur/ /skyur dang lan tshwa tsha ba dang / /gzhan gang 'khru ba gcod byed dang / /tsha dang bsil dang lci ba yang / / zhes bya ba la/ 'bru sar pa la sogs pa'i sde tshan rma yod pa'i skyes bus spang bar bya'o/ /de bzhin du chang dang srog chags gsher sar gnas pa'i sha dang / 'o ma las gyur pa dang / zho dang / dar ba dang / phrum dang / thud la sogs pa dang bu ram shing las gyur pa ste/ bu ram phra mo la sogs pa dang / skyur dang / lan tshwa dang / tsha ba'i bza' btung dang / gzhan yang gang dag 'khru ba gcod cing 'gags par byed pa dang / tsha ba'i shas che ba dang / bsil ba dang / grang ba dang / lci ba de dag kyang spang zhing dor bar bya'o/ /'bru sar la sogs sde tshan 'di/ /rma dang ldan pa'i nad kun skyed/ /ces bya ba la/ bshad ma thag pa'i 'bru sar pa la sogs pa'i sde tshan 'di ni rma dang ldan pa'i skyes bu dman pa'i nad kun skyed pa ste/ nad gzhi gsum char skyed pa'am/ rma red cing 'drul ba la sogs pa nad skyed par byed pa yin no/ /chang ni rno ba tshe rtsub 'gyur/ / rma la myur du gnod par byed/ /ces bya ba la/ 'bru sar pa la sogs pa'i sde tshan 'di ni bshad ma thag par chang spang bar bya ba nyid yin par bstan zin pa las/ 'dir yang chang spang bar bstan pa ni shin tu nyes pa che ba'i phyir yang smos pa yin te/ 'bru sar pa la sogs pa zos pas rma la gnod par 'gyur mod kyi/ de bas kyang chang ni rno ba dang / tsha ba dang / rtsub pa dang / skyur ba yin pas de la gnod pa'i rang bzhin can yin pa'i phyir rma la shin tu myur bar gnod par byed kyi/ gzhan dag ni de lta ma yin no/ /yang chang khyad par can rno ba dang / rtsub pa dang / skyur ba gang yin pa de nyid ni rma la shin tu myur bar gnod par byed pa yin gyi/ snum pa la sogs pa'i yon tan dang ldan pa gzhan dag ni de lta ma yin no/ /de yang rgyud gzhan las/ phal cher snum bcas mngar ba dang / shin tu rno dang rtsub ma yin/ /dngas shing btung bar sla ba dag /rgun chang dag las de mchog yin/ /zhes bshad pa yin no/ /de bas na chang snum pa la sogs pa'i yon tan dang ldan pa ni/ dman ma lan 'ga' zhig nyung zhing byin pa ni rma la gnod par mi 'gyur gyi/ chang rno ba dang tsha ba la sogs pa'i yon tan dang ldan pa 'di ni shin tu gnod pa yin no/ /zhes bshad par bya ba'i phyir/ 'dir yang smos pa yin no/ /ba la ur shi ras g.yab cing / /'di ni bskyod par mi bya la/ /drag shul mi gzugs 'phrug mi bya/ /bskyod pa'i tshe na bag bya'o/ /zhes bya ba la/ rma de sman ba la ka dang / ur shi ras g.yab pa dang / rma 'di bskyod cing bskul bar mi bya ba dang / drag shul du gzugs shing brdeg par mi bya ba dang / sen mo la sogs pas 'phrug par mi bya'o/ /yang de bzhin du bskyod cing bskul ba'i tshe na yang bya ba thams cad du rma legs par bsrung zhing bag bya'o/ /mdza' dang bram ze rgan sogs kyi/ /gtam ni yid la dga' ba mnyan/ /nad las thar ba'i re bcas pas/ /rma ni myur du 'tsho bar 'gyur/ /zhes bya ba la/ grogs mdza' ba dang / bram ze dang / rgan po la sogs pa'i gtam yid la dga' ba dag mnyan pa dang / nad las myur du thar bar 'gyur ro/ /zhes re ba dang bcas shing dga' bas rma myur du 'tsho bas 'byang bar 'gyur ro/ /nyin gsum lon tshe rma yi tshas/ /slar yang bkru sogs las rnams ni/ /snga ma bzhin bya/ zhes bya ba la/ de ltar byas na nyi ma gsum lon pa'i tshe slar yang rma'i las snga ma bzhin du bya ste/ gong gi bshad pa dang mthun par bya'i/ cho ga ji lta ba bzhin du bya'o/ /de bzhin du/ nyin zhag gnyis par mi bya'o/ /tshabs cher na zhing mi 'byar la/ /rma ni yun ring zhig na 'tsho/ /zhes bya ba la/ snga ma bzhin du nyi ma gnyis pa la rma bkrol zhing bkru ba la sogs pa'i las mi bya ste/ de ltar byas na rma tshabs cher na zhing / mi bzad par na ba dang / rma mi 'byar zhing rmen bu skye ba dang / rma yun ring du zhig na 'tsho zhing 'drub par 'gyur ro/ /rma tshangs sam ni lde gus glan/ /snum ches rtsub ches dam pa dang / /lhod drags bzhag nyes mi bya ste/ /zhes bya ba la/ rma'i nang du zhugs pa'i rma tshangs ras la sogs pa'i gos kyi dum bu rma'i nang du gzhug tu rung ba de snum ches pa dang / rtsub ches pa dang / de bzhin du dam zhing drag tu bcing ba dang / lhod drags pa dang / bzhag nyes pa dag mi bya'o/ /de bzhin du sman gyi lde gus rma glan pa yang / snum ches pa dang dam ches pa dang / lhod ches pa dang / bzhag nyes par mi bya'o/ /snum ches rma ni red par 'gyur/ /rtsub ches sha chad shin tu na/ /gas shing khrag ni 'byung bar 'gyur/ /dam dang lhod drags bzhag nyes pas/ /rma yi kha ni 'drud par 'gyur/ /zhes bya ba la/ snum shin tu drags shing shas che na rma red par 'gyur zhing rnag dang chu ser 'phel bar 'gyur ro/ /de bzhin du rtsub ches pa ni sha bcad pa dang / shin tu na bar 'gyur ba dang / de bzhin du pags pa gas pa dang / khrag 'bab cing 'byung bar 'gyur ro/ /de bzhin du rma tshangs dang lde gu shin tu dam pa dang / shin tu lhod drags pa dang / bzhag nyes pas ni/ rma'i kha phan tshun 'drud cing 'dar ba dang thug par 'gyur ro/ /rma ni rnag bcas skrangs shing mtho/ /rgyu bcas rnag phugs 'chas pa dag /rma tshangs 'jam po nang gnas pa/ rma yi skyon ni dag par byed/ /ces bya ba la/ rma gang rnag dang bcas par gnas pa dang / de bzhin du skrangs shing mtho bar gnas pa dang / rgyu ba dang bcas pa ste/ sha la sogs pa rnag gis zos pas bu ga'i rnam pa ring du 'gro ba las/ rgyu dang bcas pa zhes bshad do/ /rnag ni phugs nang na 'chas shing 'thums pa yod pa ni rnag phugs 'chas pa ste/ de lta bu'i rma gang yin pa dag /rma tshangs 'jam po nang na gnas shing bcug pas rma'i skyon de dag dag cing sbyong bar byed pas de'i phyir/ de'i rma'i nang du gzhug par bya'o/ /skrangs pa ha cang ma smin brtol/ /smin zhing rnags par 'gyur ba spyad/ /phan pa'i sman dang zas sbyin dkri/ /shin tu rmar mi gnod pas gso/ /zhes bya ba la/ skrangs pa ha cang ma smin pa la legs par ma brtags par gal te skrangs pa de mtshon gyis brtol bar gyur na/ smin cing rnags pa'i thabs kyis yang dag par gso bar bya ste/ de yang phal cher lan tshwa dang / skyur ba dang / tsha ba dang / dro ba'i lde gu'i sman rnams dang / de bzhin du zas smin cing rnags par 'gyur ba'i bza' ba dang / de bzhin du smin par 'gyur ba'i lo ma la sogs pa dag gis gso bar bya la/ de dag kyang rma la shin tu mi gnod par bya ba ste/ lan 'ga' rma smin par bya ba'i phyir/ rma la cung zad gnod pa btang du zin kyang skyon du mi 'gyur ba ni yod do/ /snad pa'i rma ni gsar du byung / /ral zhing kha bye 'phral du btsem/ /rmen bu chen po bkas pa dang / /rna shal bu ga chad pa btsem/ /zhes bya ba la/ rma de'i mod kho na la mtshon gyis dral zhing snad pa las byung ba ral zhing kha bye ba dang / de bzhin du rmen bu chen po bkas pa las byung ba dang / de bzhin rna shal gyi bu ga chad pa'ang btsem par bya'o/ /mgo dang mig phugs sna dang mchu/ /mkhur tshos rna ba dpung pa brla/ /mgul pa dpral ba rlig pa dpyi/ /pho mtshan gzhang dang lto ba sogs/ /phugs ring ba na gnas rnams dang / /sha che mi 'gul ma yin dang / /chu so mchan khung la sogs dang / /sha chung mgul pa'i rma dag dang / /dbugs dbyung zug rngu yod pa dang / /thal sman dug med tshig mi btsem/ /zhes bya ba la/ mgo bo dang mig phugs la sogs par gnas pa'i rma btsem par mi bya'o/ /de bzhin du so dang / mchan khung la sogs pa'i lus kyi gnas kyi rma btsem par mi bya'o/ / de bzhin du sha chung ba dang / mgul pa'i rma dag kyang btsem par mi bya'o/ /de bzhin du dbugs rgyu zhing rgyu ba dang / nang na zug rngu yod pa'i rma yang btsem par mi bya'o/ /de bzhin du thal sman dang / dug dang mes tshig pa'i rma yang btsem par mi bya'o/ /btsem pa rus dum khrag skam dang / /rtsa dang spu rnams bsal nas ni/ /sha chad dum bu 'phyang ba yang / /rang gi gnas su glan pa dang / /rus tshigs bcug cing khrag gzags la/ /skud pa shing shun rgyus pas btsem/ /zhes bya ba la/ btsem par bya ba ni rus tshigs gsum du gnas las goms pa gang yin pa dang / khrag skam po la sogs pa lag pas bsal zhing bton la/ de bzhin du sha chad mtshon gyis dbral te dum bur 'phyang ba de yang rang gi gnas su glan zhing sbyar ba dang / de bzhin du rus pa dang tshigs la sogs pa byung zhing 'bur ba slar gzhug pa dang / khrag gi rgyun gzags shing spyad la/ ci rigs par ras kyi skud pa'am/ shing shun a sman ta ka dang mur ba dang / gso ma la sogs pa'i skud pa 'jam po'am/ rgyus pa las byas pa'i skud pas legs par btsem par bya'o/ /srubs ni nye ba'am ring mi bya/ /blang ba che ba'am chung mi bya/ / zhes bya ba la/ de ltar btsem pa na/ rma las ha cang nye ba'am/ thag ring ba nas btsem par mi bya'o/ /de bzhin du rma'i gnas las srubs kyi blang ba kham chung bar mi bya'o/ /de nas spro bsring byas nas mthar/ /rma ni sbrang rtsi mar sbyar dang / /skyer pa zar ma'i dud pa dang / /'bras bu gsum dang sa la ki / seng phrom mngar dang snum bcas pas/ /bskus la bcing sogs sngon bzhin bya/ /zhes bya ba la/ de ltar btsem pa'i rjes thogs la/ nad pa spro bsring zhing dbugs phyung ste/ de nas de'i 'og tu rma kha sbrang rtsi dang mar sbyar ba'i skyer pa dang / zar ma la sogs pa'i lde gu byug cing bsku ba dang / de'i 'og tu bcing ba dang / dud pas bdug pa la sogs pa snga ma bzhin du sbyar bar bya'o/ /rma kha khrag ni med gyur gang / /de ni cung zad brud byas te/ /rma 'byor pa nyid khrag yin pas/ /phyung ste legs par drub par bya/ /zhes bya ba la/ rma gang zhig kha'i phyogs na khrag med par gyur pa de ni cung zad tsam brud cing / mtshon gyis gtses la khrag dbyung ba dang btsem par bya ste/ ci'i phyir zhe na/ rma 'di 'byor zhing 'tsho bar byed pa ni khrag nyid yin pas na/ de phyung ste drub par bya ste/ de la bcing ba yul la sogs/ /brtags nas nges par sbyar bar bya/ /zhes bya ba la/ 'dis rma bcing zhing dkri bar bya ba yin pas na bcing ba ste/ de ni yul la sogs pa zhes pa/ yul dang nad gzhi dang lus zungs la sogs pa la brtags nas/ rang gi blos legs par sbyar bar bya'o/ / bal gos pags pa dar gsum dro/ /zar ma'i ras ni bsil ba yin/ /zhes bya ba la/ bal gyi gos yin pas na bal gos te/ snam bu dang la ba'o/ /pags pa'i rnam pa 'jam zhing dro ba'o/ /dar ni zab dar te/ bcing ba gsum po 'di dag ni nus pa dro ba yin no/ /zar ma'i ras dang gsor sa ni bsil ba yin no/ /dro grang ran pa shing bal 'dab/ /ras bal rgyus pa shing shun yin/ /zhes bya ba la/ dro ba dang grang ba gnyis ka'i rang bzhin ran pa ni shing bal 'dab ma dang / ras bal dang rgyus pa dang / shing shun las byas pa'i chings ma ste/ rgyu de dag las skud pa'i tshul du byas pa'i rnam pas dkris pa'o/ /zangs lcags zha nye ro nye yis/ /bad kan tshil ches rma la glan/ /chag thur shing byang pags pa dang / /shing shun smyig tshal sogs pas bcing / /zhes bya ba la/ bad kan dang tshil ches pa'i rma la ni/ zangs ma dang lcags la sogs pa glan zhing bcing bar bya'o/ /rkang lag gi rus pa chag grugs su gyur pa la ni/ shing byang la sogs pas bcing bar bya'o/ /dbyibs ni rang ming mthun pa yi/ /chings ma bcwa lnga rnams bya ste/ /shubs dang bkra shis lhod par bcing / /mthar chags bcing dang zlum por bcing / /mda' lcags khri dang dam bcing dang / /sgye'u bla re lkog shal dang / /'ur mthil zung glan zlum pa dang / /yan lag lnga pa zhes bya sbyar/ /zhes bya ba ni/ dbyibs kyi rnam pa rang gi ming ji skad btags pa dang / rjes su mthun pa'i chings ma sgye'u dang / bkra shis nas yan lag lnga'i bar bcwa lnga po de dag bcing ba'i don du sbyar bar bya'o/ /de dag kyang shubs ni mdzub shubs 'dra ba ste/ sor mo'i tshigs gsum pa la sbyar bar bya'o/ /bkra shis ni g.yung drung lta bu zur bzhi pa ste/ rus pa'i tshigs dang / smin ma dang / nu ma'i bar dang / mchan khung dang / rna bar glan bar bya'o/ /lhod par bya ba ni/ rtswa la sogs pa las lhas bar bya ste/ de dag ni mgul ba dang / pho mtshan la sogs pa la rma byung ba la glan par bya'o/ /mthar chags su bcing ba ni ras bal la sogs pa zheng chung la ring ba ste/ de ni ming gi grar sbyar bar bya'o/ /zlum por bcing ba ni srad bu ste/ de ni yan lag thams cad bcing ba la sbyar bar bya'o/ /mda' lcags ni gang ring por byas pa ste/ de yang lag ngar la sogs pa la sbyar bar bya'o/ /khri ni khri rkang bzhi par byas pa ste/ de ni 'gram pa dang mur 'gram dang mkhur tshos snad pa la sbyar ro/ /dam du bcing ba ni khyad par du 'dug mi shes par bcing ba ste/ de ni lto ba dang brla'i rgyab tu glan zhing bcing bar bya'o/ /sgye'u ni so rtsi la sogs pa'i 'jud pa'i sgye'u phran te/ de ni sor mo dang pho mtshan gyi rtsa la nad yod pa dang / gcin nad za khu can la sbyar bar bya'o/ /bla re ni nyi tshan la sogs pa'i gnod pa bzlog pa'i phyir/ ras bal la sogs pas khebs pa lta bu ste/ pho mtshan skrangs pa la sogs pa la sbyar bar bya'o/ /ba lang gi lkog ma lta bu ni/ lkog mar lkog shal ltar 'phyang ba ste/ de ni lus kyi yan lag 'phyang ba las gyur bar sbyar bar bya'o/ /'ur mthil lta bu ni zhing pa rnams bya skrod pa'i phyir/ 'ur rdo 'phen pa'i rdo'i gnas su byed pa 'ur mthil zhes bya'o/ de ni rna dang chu dang ko sko nad pa la sbyar zhing bcing bar bya'o/ /zur du glan pa ni gang du byang gcig dbus su skabs btod de/ rma gnyi ga 'dab chags su bcing du rung ba'o/ /de ni rma gnyis 'dab chags su byung ba la glan par bya'o/ /zlum po zhes bya ba ni dkyil 'khor ltar zlum por byas pa ste/ de ni yan lag zlum bor snang cing chag pa la glan par bya'o/ /yan lag lnga pa ni/ shing byang la sogs pa gang yan lag bzhi po yod cing gyen du dbyung ba bya ste/ de ni nam tshong yan chad snad pa la sbyar bar bya'o/ /de las gang zhig gang legs 'byor/ /de ni de ru legs par sbyar/ /zhes bya ba la/ bcing ba de dag gi nang nas/ chings ma gang zhig lus kyi phyogs gang dang legs par 'byor zhing 'byar la 'tsham pa'i chings ma shugs la sogs pa de dag ni/ lus kyi phyogs de ru legs par sbyar zhing bcing bar bya'o/ /brla dang mjug tsos mchan khung dang / /chu so spyi bor dam du bcing / /zhes bya ba la/ brla dang mjug tsos la sogs pa ni lus kyi phyogs su rma byung ba la ni dam zhing sra bar bcing bar bya'o/ /lhod par bcing bar mi bya'o/ /lag ngar gdong dang rna ba dang / /rgyab dang rtsib logs mgul pa lto/ /pho mtshan rlig pa ran par bcing / /zhes bya ba la/ lag ngar la sogs pa'i lus kyi phyogs su ni bcing ba dam lhod ran par bya la/ de bzhin du pho mtshan dang rlig pa yang ran pa tsam du bcing bar bya'o/ /mig dang tshigs su lhod par bcing / /zhes bya ba la/ mig gi phyogs dang rus pa'i tshigs rnams su chings ma lhod par bcing ngo / /lhod bcings rma ni bad kan dang / /rlung shas che la ran par bcing / /zhes bya ba la/ lhod par bcing ba mig dang tshigs la rma bad kan dang rlung gi shas che ba yod na lhod par na tsam du bcing ngo / /ran zhing gnas su dam du bcing / / dam zhing shin tu dam par bcing / /zhes bya ba la/ ran par bcing pa'i gnas lag ngar la sogs par/ bad kan dang rlung gi shas che ba'i rma yod na/ ran par mi bcing gi dam du bcing bar bya'o/ /dam du bcing ba'i gnas brla dang mjug tsos la sogs pa'i rma bad kan dang rlung las byung ba yin na/ shin tu shas cher dam du bcing bar bya'o/ /dgun dang de bzhin dpyid kyi tshe/ /zhag ni gsum gsum dag nas dgrol/ /zhes bya ba la/ bad kan dang rlung gi shas che ba'i rma de gnyis las dgun zhes bya ba dgun stod dang dgun smad/ de bzhin du dpyid kyi tshe ste/ zla ba drug la ni zhag gsum nas dgrol zhing bcing bar bya'o/ /khrag mkhris shas che'i rma dag ni/ /dam bcing gnas su ran par bcing / /ran bcing gnas su lhod par bcing / /lhod bcing gnas su bcing mi bya/ /zhes bya ba la/ khrag dang mkhris pa shas che ba'i rma la ni dam du bcing ba'i gnas brla la sogs par dam du mi bcing ran bar bcing bar bya'o/ /ran par bcing ba'i gnas lag ngar la sogs par ni lhod par bcing bar bya'o/ /lhod par bcing ba'i gnas mig dang tshigs su khrag dang mkhris pa shas che ba'i rma byung na de bcing bar mi bya'o/ /de gnyis so ga ston gyi tshe/ /snga dro phyi dro dgrol bar bya/ /zhes bya ba la/ khrag dang mkhris pa las byung ba'i rma de gnyis la so ga dang ston ka'i tshe ni nyin re zhing snga dro dang phyi dro'i dus su dgrol zhing bcing bar bya'o/ /ma bcings sha sbrang sbrang bu dang / /lhags pa ser bu sogs pas gnod/ /rma red gyur cing der snum dang / /sman ni yun rings gnas mi 'gyur/ /sbyang pa'am 'tsho bar dka' ba dang / /'tsho ba kyang mdog ni mi sdug 'gyur/ /zhes bya ba la/ rma ma bcings na sha sbrang la sogs pas gtses par 'gyur zhing / de dang reg pa'i dbang gis 'tshe ba la sogs kyis gnod par 'gyur ba dang / de bzhin du rma de bcing ba med par snum gyis bskus na yang sman de yang yun ring du gnas par mi 'gyur zhing / sman gyi lde gu la sogs pa bskus pa yang yun ring por mi thogs par bskams pa'am lud par gyur pa'am/ de bzhin du legs bar bcos su zin kyang rma 'tsho zhing 'drub par dka' ba dang / gal te 'tsho zhing 'drub kyang sha mdog mi sdug par 'gyur ro/ /bcings na chag cing phye mar 'gyur/ /'phres sam 'bur gyur dral gyur tam/ /rtsa dang rgyus pa chad gyur kyang / /rma ni myur du bde bar 'tsho/ /ldang dang nyal ba la sogs pa'i/ /spyod lam kun la gnod pa med/ /ces bya ba la/ rma legs par bcings shing bsdams pas ni/ chag cing phye mar grugs pa'am/ 'phres shing gnas pa las 'phyugs pa'am/ /'bur zhing mtho ba'am/ dral zhing gas par gyur pa'am/ rtsa dang rgyus pa chad par gyur kyang / rma bde blag tu myur du 'tsho bar 'gyur ro/ /de bzhin du ldang ba dang mal na nyal ba la sogs pa'i spyod lam kun la yang gnod pa med par 'gyur ro/ /rma kha skyes mtho mi mnyam dang / /sra zhing rab na 'tsho bar dka'/ / 'jam zhing mnyam la na ba med/ /rma ni myur du dag cing 'tsho/ /zhes bya ba la/ rma gang kha cher skyes shing mtho ba'i zlum po yod pa dang / mtho dman mi mnyam pa dang / sra zhing mnyen bag med pa dang / rab tu na zhing tshor ba drag pa dang ldan pa'i rma de lta bu ni 'tsho zhing 'byang bar dka' ba yin no/ /rma gang 'jam zhing mnyen pa dang / na ba med pa ni myur du dag cing 'tsho bar 'gyur ro/ /rma ni yun ring sha chung dang / /rtsub pas 'byor bar ma gyur na/ /nad gzhi dus tshigs ji bzhin du/ /sman dang lo mas dgab par bya/ /ma rnyings gzhon zhing bu ga med/ /kun nas legs par khebs pa dang / /phyis shing mi rtsub lo ma ni/ /'o ma can shing stag pa dang / /ardzu na dang ka dam pa'i/ /lo ma yis ni g.yogs par bya/ /zhes bya ba la/ rma yun ring zhing dus ring po lon te/ rnyings pa dang / sha chung zhing zad pa dang / rtsub par gyur pa'i rgyus 'byor zhing 'tsho bar ma gyur na/ nad gzhi ji lta ba'i tshul dang mthun pa dang / dus tshigs dang ji ltar mthun pa bzhin du rma'i sman lde gu dang / snum la sogs pa rma la phan par byed pa dag bsku bar bya ba dang / shing 'o ma can la sogs pa'i lo mas dag bcing gso bar bya ste/ de yang 'di ltar rlung las gyur pa'i rma grang ba'i dus su snum pa dang dro bas gso ba dang mkhris pa shas che ba'i rma dang / de bzhin du dro ba'i dus su ni bsil bar gso ba dang / bad kan shas che ba'i rma dang / grang ba dang dro ba'i dus su ni phal cher rtsub pa dang / grang bas gso bar bya ste/ 'gres 'dis thams cad la sbyar bar bya'o/ /de bzhin du lo ma rnyings shing dengs pa ma yin pa dang / gzhon zhing gsar pa dang / bug rdol med pa dang / de bzhin du kun nas thams cad du legs par khebs shing legs par gzhag pa/ phyis shing dri ma med par bkrus pa dang / mi rtsub cing sra ba ma yin pa'i lo ma 'o ma can gyi shing la sogs pa las byung bas legs par g.yogs par bya'o/ /mdze dang me yis tshig pa dang / /'bus zos gcin nad sbrang rtsi 'dra/ /byi ba sbrul gyi dug dang ni/ /thal sman rno dang dug gis phog /rma ni bcing bar mi bya zhing / /sha 'drul gzhang khar mi bzad rnags/ /'drul shing tsha dang na bcas par/ /skrangs skams me dbal mi bcing ngo / /zhes bya ba la/ mi mdzes btab pa dang / de bzhin du mes tshig pa'i rma bcing bar mi bya'o/ /de bzhin du 'bus zos pa'i rma nas dug gis phog pa'i rma yang bcing bar mi bya'o/ /de bzhin du sha rul zhing 'drul ba nas me dbal gyi bar gyi rma yang bcing bar mi bya'o/ /rma gang legs par ma bsrungs par/ /sbrang ma srin bu 'jug byed de/ /de yis zos pas na ba dang / /skrang dang rnag khrag 'dzag par byed/ /ces bya ba la/ rma gang zhig legs par ma bsrungs shing / /ma btsas pas 'jug pa la sogs pa'i gnod pa 'byung ngo / /deng ni bkru dang dag par ni/ /bye'u rug la sogs sde tshan sbyar/ /zhes bya ba la/ 'bu zhugs pa'i rma der ni bye'u rug pa la sogs pa'i sde tshan sbyar bas bsku zhing sbyar ba dang dag ste bskrad par bya'o/ / sab ta par+Ni ka rany+dza/ /ar ka dang ni nim pa dang / /rwa tsha dang ni shing tsha rnams/ /ba gcin dang ni btags ba yi/ /lde gu de la bsku ba dang / /thal sman chu ni blugs pas phan/ /zhes bya ba la/ yang rma der sab ta par+Ni la sogs pa dang / ba gcin btags pa'i lde gu bsku bar bya'o/ /de bzhin du thal sman rnon po'i chu blugs pa yang phan pa yin no/ /yang na sha rlon gyis g.yogs la/ /de ni myur du dbyung bar bya/ /zhes bya ba la/ yang na rma de sha rlon rma'i tshad dang dbyibs 'dra ba'i sha'i dum bus bkag cing g.yogs la/ 'bu de de la chags pa na myur zhing rings par gdon par bya'o/ /'di ni nang na skyon bcas pas/ /myur du 'tsho ba bar mi bya ste/ /de ni gnod pa chung ngus kyang / /slar zhing 'grams par byed pa yin/ /zhes bya ba la/ rma 'di ni nang na skyon dang bcas shing rnags la sogs pas khyab pas sman pas rings shing myur bar 'drubs shing 'byar bar bya ba'i phyir/ 'tshob pa'i sman bsku bar mi bya ste/ gang gi phyir sman de na ngan gnod pa dang bcas pas rma de 'tsho zhing 'byar yang sla zhing 'grams pa dang 'jig par 'gyur ba yin no/ /'tshob par gyur kyang ma zhu dang / /drag shul bud med bsten sogs spang / /zhes bya ba la/ rma 'tshob cing 'byor bar gyur kyang nad pa des ma zhu ba dang drag shul la sogs pa spang ngo / /zla ba drug gam bdun gyi bar/ /cho ga 'bad pas bsrung bar bya/ /zhes bya ba la/ ma zhu ba dang / bud med dang phrad pa la sogs pa'i cho ga 'di ni rma 'tshob nas zla ba drug gam bdun gyi bar du bsrung zhing bsdam par bya'o/ /gnas skabs de dang der ni byung gyur tshe/ /nad gzhi la sogs stobs kyis rjes 'brangs te/ /phyi ma nas bshad rgya cher legs brtags la/ /thabs ni de dang de yis 'bad de gso/ /zhes bya ba la/ rma'i gnas skabs gsal bar ma bstan pa'i tshul dang ming gang dag yin pa de dag byung zhing skyes par gyur pa na/ sman pas rlung la sogs pa'i nad gzhi la sogs pa'i stobs kyis rjes su 'brangs nas/ 'di nyid kyi rgyud phyi ma nas rgya cher bshad pa de legs par brtags shing dpyad la/ rma de gso ba'i thabs de dang des 'bad pa dang ldan pas gso bar bya'o/ / blos gzhung la ma brtags pa'i rang dga' dang / 'bad pa med pa'i sgyid zhan pas ni mi bya'o/ /yan lag brgyad pa'i snying po bsdus pa'i rnam par 'grel pa/ tshig gi don gyi zla zer zhes bya ba/ slob dpon zla ba la dga' bas nye bar sbyar ba las/ le'u nyi shu rtsa dgu pa'i rnam par 'grel pa'o/ /

CLOSE WINDOW