བོད་ཡིག

e-texts based on the ACIP/ALL Input

@##/ /rgya gar skad du/ kA byA daR+sha/ bod skad du/ snyan ngag me long / 'phags pa 'jam dpal gzhon nur gyur pa la phyag 'tshal lo/ /gdong bzhi gdong gi pad tshal gyi/ /ngang pa'i bu mo thams cad dkar/ /dbyangs can ma ni kho bo yi/ /yid la ring du gnas par mdzod/ / bstan bcos snga ma rnams bsdus shing / /sbyor ba rnams kyang nyer mtshon te/ /ji ltar nus bzhin bdag gis ni/ /snyan ngag rnams kyi mtshan nyid bya/ /'di na kun du mchog rnams kyang / /mchog gi rjes su bstan pa yi/ /tshig rnams nyid kyi drin gyis ni/ /'jig rten lugs la 'jug par byed/ / gal te sgra don snang ba ni/ /'khor ba'i bar du mi gsal na/ /'jig rten gsum po mtha' dag 'di/ /smag rum mun pa nyid du 'gyur/ /sngon gyi rgyal po grags pa'i gzugs/ /ngag gi rang bzhin me long thob/ /de dag nye bar mi gnas kyang / /rang nyid nyams pa med la ltos/ /mkhas pas yang dag rab sbyar ba'i/ /ngag ni ngag gi 'dod 'jor bshad/ /de nyid nyes par sbyar na slar/ /sbyor po ba lang nyid rjod byed/ /de phyir snyan ngag dag la skyon/ /chung bar gyur kyang ci zhig ltar/ /btang snyoms mi bya lus mdzes kyang / /skyon gcig gis ni skal ngan 'gyur/ /skye bo bstan bcos mi shes pas/ / yon tan skyon dag ji ltar dbye/ /gzugs kyi dbye ba dmigs pa'i skabs/ /long bdag la yod dam ci/ /de phyir mkhas pas skye dgu rnams/ /bye brag rtogs la mngon dgongs nas/ /rnam bkra lam ldan tshig rnams kyi/ /bya ba'i cho ga nges par sbyar/ /de rnams kyis ni snyan ngag gi/ /lus dang rgyan yang rab tu bstan/ /lus ni re zhig 'dod pa yi/ /don gyi rnam bcad tshig gi phreng / /de yang tshigs bcad lhug pa dang / /spel ma rnam gsum nyid du gnas/ /tshigs bcad rkang bzhi de yang ni/ /pr-it+ta dzA ti zhes rnam gnyis/ /de yi spros pa mtha' dag ni/ /sdeb sbyor gzhung du nges par bstan/ / rig de snyan ngag rgya mtsho ni/ /zab mo brgal 'dod rnams kyi gru/ /grol ba dang ni rigs dang mdzod/ /'dus pa zhes bya de 'dra yi/ /tshigs bcad rgya ches rgas bcings/ /cha shas rang bzhin phyir ma brjod/ /sargas bcings pa snyan ngag che/ /de yi mtshan nyid brjod par bya/ /shis brjod phyag bya dngos po ni/ /nges par bstan pa'ang de yi sgo/ /sngon byung gtam las gyur pa'am/ /cig shos legs pa la brten pa/ /sde bzhi 'bras bu'i dbang gyur dang / /mkhas shing yid 'ong 'dren pa dang / /grong khyer rgya mtsho ri dang dus/ /nyi zla 'char ba'i bsngags pa dang / /skyed tshal chu yi rol rtsed dang / /chang 'thung dga' ba'i dga' ston dang / /ma tshogs pa dang bag ma dang / /gzhon nu skye dang 'phel ba dang / /gros dang pho nya bgrod pa dang / /g.yul dang 'dren pa dar bas kyang / /brgyan par gyur cing mdor bsdus min/ /nyams dang 'gyur ba dag gis gtams/ / sarga shin tu rgya che min/ /mnyan 'os pr-it+ta legs mtshams sbyar/ /kun du sarga dag gi mtha'/ /tha dad ldan pas 'jig rten mdzes/ /snyan ngag dam pa'i rgyan ldan ni/ /bskal pa'i bar du gnas par 'gyur/ /gang zhig yan lag 'gas dman yang / /gal te sbyar rnams phun tshogs kyis/ /de rig mgu bar byed pas na/ /'di ni snyan ngag skyon ma yin/ /thog mar 'dren pa yon tan gyis/ /nye bar bkod nas de yis ni/ /dgra la gnod pa byed ces pa'i/ /lam 'di rang bzhin mdzes pa yin/ /rigs dang brtson 'grus thos sogs kyis/ /dgra bo la yang bsngags byas nas/ / de las rgyal phyir 'dren pa ni/ /khyad 'phags brjod pa'ang bdag dga' skyes/ /rkang pa med pa'i tshig rgyun ni/ /lhug pa brjod pa dag dang gtam/ /zhes pa de yi rab dbye gnyis/ /de la 'dren pa nyid kyis ni/ /brjod par bya ba brjod pa lo/ /gzhan ni 'dren pa'am gzhan gyis kyang / /rang gi yon tan bsgrags skyon 'dir/ /yang dag don bsngags phyir yod min/ /'on kyang nges pa ma mthong ste/ /der yang gzhan gyis brjod pa'i phyir/ /gzhan gyis brjod dam rang gis zhes/ /dbye ba'i rgyu ni ci zhig yod/ /gal te sgo dang gzhan sgo dang / /yid brten ldan nyid brjod pa ni/ /tha dad pa yi rtags yin na/ /zhar gyi gtam rnams dag la yang / /'phags pa sogs bzhin sgo dang ni/ /gzhan gyi sgo dag cis mi 'jug /lam+b+ha sogs sam a shrA sa'i/ /dbye ba mthong yang de las ci/ /de phyir gtam dang brjod pa zhes/ /ming gnyis dag gis rigs gcig mtshon/ /lhag ma brjod pa'i rigs rnams kyang / /'di nyid nad du 'dus par 'gyur/ /bu mo 'phrog dang g.yul dang ni/ /bslu dang dar ba la sogs pa/ /sargas bcings pa mtshungs pa nyid/ /de dag khyad byed yon tan min/ /snyan ngag mkhan gyis bsam byas rtags/ /gzhan du yang ni skyon mi 'gyur/ /'dod don bsgrub la sgo ru ni/ / mkhas pa rnams la cis mi 'gyur/ /spel ma zlos gar la sogs te/ /de dag rnams ni gzhan na rgyas/ /lhug pa tshigs bcad rang bzhin gang / /tsam bu zhes pa mngon par brjod/ /ngag gi rang bzhin de dag kyang / /legs sbyar de bzhin rang bzhin dang / /zur chag 'dren ma zhes pa ste/ /rnam pa bzhi ru mkhas pas gsungs/ /legs sbyar zhes pa lha yi ni/ /skad du drang srong chen pos gsungs/ /de skyes de mtshungs yul can zhes/ /rang bzhin rim pa du ma yod/ /yul 'khor chen po la brten skad/ /legs bshad rin can dag gi mtsho/ /se rus bcings pa rang bzhin gang / /rang bzhin mchog tu gyur par rig / sau ra se na gau Da dang / /lA Di gzhan yang de 'dra'i skad/ /rang bzhin nyid ces bya ba yi/ /tha snyad rnams la nye bar 'gyur/ /ba lang rdzi la sogs pa'i tshig /snyan ngag la zur chag ces gnas/ /bstan bcos rnams la legs sbyar las/ /gzhan pa zur chag nyid du brjod/ /legs sbyar sargas bcings la sogs/ /rang bzhin skan+d+ha ka sogs dang / /zur chag o sa ra sogs te/ /zlos gar la sogs 'dres pa'o/ /gtam sogs skad ni thams cad dang / /legs sbyar gyis kyang bcings pa ste/ /rmad byung don can rgya che'i gtam/ /'byung po'i skad kyi rang bzhin brjod/ /sgeg dang rol dang stabs la sogs/ /lta ba'i don yin cig shos kyang / /mnyan par bya ba nyid ces pa/ /'di yang lugs gnyis dag tu brjod/ /phan tshun dbye ba phra mo can/ /tshig gi lam ni du ma yod/ /de la phai dar+b+ha dang ni/ /gau Da'i khyad par gsal bar brjod/ /sbyar ba rab dngas mnyam nyid dang / /snyan dang shin tu gzhon pa dang / /don gsal ba dang rgya che dang / /brjid dang mdzes dang ting nge 'dzin/ /yon tan 'di bcu bai dar+b+ha'i/ /lam gyi srog tu bshad pa yin/ /'di dag phal cher bzlog pas ni/ /gau Da'i lam dag mtshon pa yin/ /sbyar ba srog chung yi ge mchog /lhod pa nyid kyis ma reg pa'o/ /lhod pa mA lA tI mA la/ /lo lA li ka li lA bzhin/ /gau Da pa yi rjes khrid blos/ /de 'dod mA la tI dA ma/ /laM g+hi taM b+h+ra ma raiHzhes/ /bai dar+b+ha yi sbyor lci byed/ /rab dang sa ldan pa grags don can/ /zla ba'i mtshan ma ut+pal gyi/ /'od kyis mdzes pa rgyas zhes pa/ /rtogs pa'i skal bzang ldan pa'i tshig /nges tshig yod phyir gau Da pa/ /shin tu grags pa min yang 'dod/ /shin tu dkar min chu las skyes/ /de 'dras mtshan pa 'od dkar can/ /mnyam pa sbyor ba mi mnyam dral/ /de ni 'jam rtsub par ma ste/ /sbyor ba 'jam rtsub par ma yi/ /yi ge bkod pa'i skye gnas can/ /khu byug ca co sgrog byed cing / /nyar ma rab 'thor dngas shing dngas/ /chu rgyun chu thigs kyis bran pa'i/ /ma la ya rlung bdag la 'ongs/ /tsan+dan gyis bsgos dri ldang zhing / /'jam pa ma la ya yi rlung / /bdag gi brtan 'gog dga' ma ni/ /mchog gi kha yi rlung dang 'gran/ /zhes pa mi mnyam ma brtags par/ /don dang rgyan gyi tshogs dag la/ /ltos nas shar phyogs pa dag la/ /snyan ngag lam 'di 'byung bar 'gyur/ /snyan pa nyams ldan tshig dang ni/ /dngos po la yang nyams gnas pa/ /sbrang rtsi spyod pa sbrang rtsis bzhin/ /gang gis blo ldan dga' byed pa'o/ /sgra ni gang dang ci yis kyang / /gang zhig mtshungs par nyams myang ba/ /de yi gzugs sogs tshig nye ba/ /rjes su khrid bcas nyams dang ldan/ /gang tshe bram ze dga' ba yi/ /rgyal po 'di yis dpal thob 'gyur/ /de nas bzung ste chos kyi ni/ /dga' ston 'jig rten 'di ru 'byung / /zhes 'di gau Da pa mi 'dod/ /de dag rjes su khrid la dga'/ /phal cher rjes su khrid pas kyang / /bai dar+g+ha ni 'di nyid 'dod/ /rkang ba rnams dang tshig rnams la/ /yi ge bskor ba rjes su khrid/ /gal te snga ma'i nyams myong ni/ /'du byed rtog byed mi ring nyid/ /ston mtshan dbu rgyan zla ba ni/ /kun+da'i phon por 'khrul pa la/ /mtshan ma in+d+ra nI la mtshungs/ /bung ba'i dpal ni yang dag 'dzin/ /mdzes ma mkha' la zla ba yi/ /dkyil 'khor mdzes pas bdag gi yid/ /yid srubs kyis mnan brtse med du/ /'joms par brtson pa 'di la ltos/ /zhes pa shin tu mi ring bar/ /thos pa dag ni rjes khrid 'dod/ /dga' ma bzhin gyi chu skyes dang / /mtshungs pa zla ba zhes mi 'dod/ /bdag gi lus dang khro ba phra/ /'dod pa rtsub cing mdza' bo ngan/ /khengs pa nyams shing chags pa rgyas/ /rmongs pa skyes te srog rnams song / /zhes sogs sbyor ba rtsub pa dang / /lhod pa yang ni ster bar byed/ /de phyir de lta'i rjes khrid ni/ /lho phyogs pa rnams mi sbyor ro/ /skor ba kho na tshogs pa yi/ /spyod yul zung dang ldan par rig /de yang gcig tu snyan pa min/ /de phyir phyi nas bshad par bya/ /nges par rgyan rnams kun la yang / /don gyi nyams dag sbyin par byed/ /de lta na yang grong pa nyid/ / min pa'i khur 'di phal cher 'dzin/ /'dod ldan bdag la gzhon nu ma/ /khyod ni ji ltar 'dod mi byed/ /ces 'di grong pa'i don bdag nyid/ /nyams dang bral ba kho nar byed/ /g.yon mig 'dod pa gtum po 'di/ /nges par bdag la brtse ba med/ /khyod la khro med dga' zhes pa/ /grong pa'i don min ro dang ldan/ /sgra la'ang grong pa nyid yod de/ /de ni legs pa'i cig shos grags/ /dga' ba'i dga' ston brjod pa la/ /ji ltar ya yig la sogs bzhin/ /tshig gi mtshams sbyor gyis zhugs dang / /slar yang dag don dag gis kyang / /nges par rtogs byed grod pa ste/ /yA b+haHba taHpri ya bzhin/ / gzhan la bsnun nas skyes bu ni/ /bir+Ya ldan pa'i bi shran+ta/ /gzhan la bsnun nas skyes bu ni/ /khu ba ldan pa rnam par ngal/ /de lta bu sogs lam dag ni/ /gnyis ka la yang bsngags ma yin/ /b+ha ga ba tI b+ha gi nI/ /zhes sogs kun du khas len nyid/ /de ltar snyan pa rnam par phye/ /shin tu gzhon pa bshad par bya/ /rtsub min yi ge mang ba 'di/ /shin tu gzhon pa nyid du 'dod/ /gang phyir thams cad mnyen pa ni/ /sbyor ba lhod pa'i skyon du bshad/ /sprin gyi phreng ba ldan dus su/ /snyan par sgrogs pa'i mgrin ldan pa/ /rma bya yi ni mjug ma dag /zlum por byas nas gar byed do/ /zhes pa don rgyas nyid ma yin/ /rgyan yang de 'dra yod min te/ /shin tu gzhon pa nyid kyi dpe/ /dam pa rnams kyi kha na gnas/ /gsal phyir gzhan dag phal cher ni/ /brjod par dka' ba dag kyang sbyor/ /n+yak+Sha sa rgyal rigs rnams kyi phyogs/ /skad cig gis ni nyams par byas/ /don gsal don brtag mi dgos nyid/ /'phrog byed kyis ni sa gzhi dag /rmig pas bcad pa'i klu khrag gis/ /dmar ba chu yi gter las phyung / /phag pa chen po dag gis sa/ /chu gter dmar po dag las phyung / /zhes pa 'di nyid bstan pa ni/ /brang 'gro'i khrag ni brtag dgos nyid/ /lam 'di gnyis ka dag la yang / /rtogs pa'i skal bzang mi ldan zhing / /sgra dang rigs pa las 'gongs pa/ /'di 'dra phal cher bzhed ma yin/ /gang du 'ga' zhig brjod pa la/ /khyad 'phags ldan pa'i yon tan rtogs/ /de ni rgya cher brjod de des/ /snyan ngag lam kun mgon dang bcas/ /slong ba rnams kyi bkren pa'i mig /lan cig khyod gdong la lhung ba/ /lha gcig gnas skabs de yis slar/ /gzhan gyi gdong la blta ma yin/ /zhes pa nyid kyi ngag 'di la/ /gtong ba khyad 'phags legs par mtshan/ /lam 'di nyid kyis gzhan dag kyang / /rigs pa mtshungs pas dpag par bya/ /bsngags par 'os pa'i khyad par dang / /ldan pa rgya cher 'ga' zhig 'dod/ /rol pa'i chu skyes rtse dga'i mtsho/ /gser gyi rgyan la sogs pa bzhin/ /brjid pa tshig sdud mang po nyid/ /'di ni lhug pa dag gi gsos/ /tshigs bcad la yang shar phyogs pa/ /'di nyid dpung dang gnyen du bzhed/ /de la lci dang yang ba rnams/ /mang dang nyung ba nyid spel bas/ /mtho dma' yi ni rnam pa de/ /brjod pa la sogs rnams la blta/ /nub kyi rim gor lhung ba yi/ /mtha' dag nyi 'od ma la stan can/ /mkhregs pa'i nu ma la gnas pa'i/ /gos dmar g.yo bzhin chu ldan ma/ /zhes pa brjid dang ldan pa'i tshig /tshigs bcad la yang shar pa sbyor/ /gzhan dag 'khrugs min mdzes pa yi/ /tshig rnams brjid par 'dod de dper/ /chu 'dzin ngos kyi phang na chags/ /mtshams kyi nyi 'od gos dang ldan/ /chu ldan ma yis su yi yid/ /'dod pas gzir bar byed mi 'gyur/ /mdzes pa 'jig rten don dag las/ /ma 'das 'gro kun la mdzes pa'o/ /de yang gtam gyi ma don brjod dang / /bsngags pa la sogs rnams la'ang sbyar/ /dka' thub phung po khyod 'dra yi/ /zhabs kyi rdul ni gtsang ma rnams/ /yang dag btab pa gang yin pa/ /de dag kho na nges par khyim/ / skyon med lus can khyod kyi ni/ /lag pa'i 'khri shing bar dag tu/ /nu ma rab rgyas 'di dag gi /go skabs rnyed par 'gyur ma yin/ /zhes pa khyad par brjod pa yi/ /legs sbyar de dag srid pa nyid/ /'jig rten lugs kyi rjes su ni/ /'brang ba thams cad mdzes par 'gyur/ /'jig rten 'das shing brjod 'dod kyis/ /don gang shin tu bkod gyur pa/ /de yis mkhas pa shin tu ni/ /tshim 'gyur cig shos ma yin dper/ /deng nas bzung ste bdag gi khyim/ /lha yi khyim bzhin bsten par 'os/ /khyod kyi zhabs rdul lhung ba yis/ /nyes pa dag ni ma lus bkrus/ /khyod kyi nu ma 'di lta bur/ /rnam par rgyas par gyur pa 'di/ /nges par ma brtags byed po yi/ /nam mkha' dag ni chung ngur sprul/ /'di ni ha cang brjod pas na/ /go Da pa mul mdzes par brjod/ /'jug pa snga ma gzhan gyi ni/ /lam la snying po nyid du bshad/ /gzhan gyi chos de gzhan dag la/ /'jig rten lugs kyi rjes 'brangs nas/ /gang du yang dag 'dzin byed pa/ /ting nge 'dzin du brjod de mud per/ /ku mu da ni mig 'dzums shing / /pad+ma dag kyang mig 'byed ces/ /mig gi bya ba bkod pa las/ /de yi rjod byed sgra dag thob/ /niSh+Thu ta dang ung+gIr+Na/ /skyugs sogs phal par 'jug bstan pa/ /shin tu mdzes te gzhan du ni/ /grong ba nyid kyi nus pa bstan/ /pad+mas nyi zer skyugs pa rnams/ /'thungs nas rdul dmar skyugs pa yi/ /kha yi dag byed zer ma rnams/ /shin tu skyug par byed pa bzhin/ /zhes pa mdzes te mi mdzes pa/ /chung ma skyug pa byed ces pa'o/ /cig car nyid du chos du ma/ /bkod pa dag kyang 'dod de dper/ /lci ba'i mngal khur gyis ngal zhing / /'khun par byed pa sprin gyi phreng / /'di dag g.yo med steng gi ni/ /phang pa dag tu yang dag nyal/ /grogs mo'i phang par nyal ba dang / /'khun dang lci ba nyid dang dal/ /zhes pa 'di ni mngal ldan ma'i/ /chos mang po rnams gzhan la bstan/ /ting 'dzin zhes bya'i yon tan gang / /'di ni snyan ngag bdog kun te/ /snyan ngag mkhan po don mthun gyi/ /tshogs kyang 'di nyid rjes su 'brang / /de ltar rang bzhin brtags pa las/ /lam ni 'di gnyis rnam par phye/ /de dag dbye ba snyan ngag mkhan/ /so so la gnas brjod mi nus/ /bur shing 'o ma bur sogs kyi/ /mngar ba nyid kyis khyad par che/ /de lta mod kyi de brjod par/ /dbyangs can mas kyang nus ma yin/ /rang bzhin gyis grub spobs pa dang / /mang du thos pa dri med dang / /mngon par sbyor ba mi dman pa/ /snyan ngag phun sum tshogs pa'i rgyu/ /gal te sngon gyi bag chags yon tan gyi/ /rjes 'brel spobs pa rmad byung med pa la'ang / /thos dang 'bad pa dag gis ngag bsten na/ /ci zhig ltar yang nges par rjes 'dzin byed/ /de phyir grags 'dod rnams kyis rtag tu ni/ /snyom las med par rim pas dbyangs can bsten/ /snyan ngag chung ngu la yang ngal byas mi/ /mkhas pa'i 'dun sa dag tu 'dug la dbang / /snyan ngag me long las le'u ste dang po'o/ / //snyan ngag mdzes par byed pa yi/ /chos rnams rgyan zhes rab tu brjod/ /de ni da lta'ang rnam rtog ste/ /de dag ma lus sus 'chad nus/ /'on kyang rnam rtog sa bon ni/ /sngon gyi slob dpon rnams kyis bstan/ /de nyid rab tu legs sbyar phyir/ /yongs su ngal 'di bdag gi'o/ /lam ni rnam par dbye don du/ /rgyan 'ga' zhig ni sngar yang bstan/ /thun mong dag tu rgyan gyi ni/ /rigs gzhan rab tu bstan par bya/ /rang bzhin brjod dang dpe dang ni/ /gzugs can gsal byed bskor ba dang / /'gog dang don gzhan bkod pa dang / /ldog pa can dang srid pa can/ /bsdus dang phul byung rab brtags dang / /rgyu dang phra mo cha dang rim/ /dga' dang nyams ldan gzi brjid can/ /rnam grangs brjod dang kun du phan/ /rgya che ba snyon dor sbyar ba dang / /khyad par mtshungs par sbyor ba dang / /'gal dang skabs min bstod pa dang / /zol stod nges par bstan pa dang / /lhan cig brjod dang yongs ba rjes shis/ /rab spel de nas dgongs ba can/ /'di dag tshig rnams dag gis ni/ /rgyan du sngon gyi mkhas pas bstan/ /dngos po rnams kyi rang bzhin dang / /gnas skabs sna tshogs dngos gsal byed/ /de ni rang bzhin brjod pa ste/ / dang po'i rgyan yin rigs sogs dper/ /mchu ni dmar zhing gug pa dang / /gshog pa ljang zhing mnyen pa dang / /mgrin pa kha dog sum phreng can/ /ne+e tso 'di dag tshig 'jam ldan/ /mgrin pa'i nang nas snyan sgrags shing / /mig ni kun du 'phrul pa yi/ /phug ron rtse 'dod dga' ma la/ / yongs su bskor nas mchu dag sbyor/ /dga' ma yi ni reg pa 'dis/ /lus la spu lang rgyas pa dang / /yid ni bde bar byed pa dang / /mig dag zum par byed cing 'jug /mgrin sngon lag na thod pa ni/ /gnas pa zla ba'i cod pan dang / /snum zhing dmar ba'i ral pa can/ /khyu mchog rgyal mtshan 'khrungs par gyur/ /rigs dang bya ba yon tan rdzas/ /rang bzhin brjod pa 'di 'dra ni/ /bstan bcos kun la rgyal srid nyid/ /snyan ngag la yang 'di dag 'dod/ /ji lta ci zhig ltar mtshungs par/ /gsal bar gang du rtogs byed pa/ /de ni dpe zhes bya ste de'i/ /spros pa 'di ni rab bshad bya/ /mdzes ma khyod kyi lag mthil ni/ /chu skyes bzhin du kun du dmar/ /zhes pa chos dpe dngos su ni/ /mtshungs pa'i chos dag bstan phyir ro/ /khyod kyi gdong ni pad+ma bzhin/ /mig dag ut+pal sngon po bzhin/ /zhes pa chos cig rtogs byed pa/ /de ni dngos po'i dpe nyid do/ /khyod kyi gdong bzhin pad+ma ni/ /rnam par rgyas par gyur zhes pa/ /de ni grags pa bzlog pa'i phyir/ /bzlog pa'i dpe zhes bya bar 'dod/ /khyod kyi zhal bzhin chu skyes te/ /chu skyes bzhin du khyod kyi zhal/ /zhes pa phan tshun khyad 'phags ni/ /rjod par byed 'di phan tshun dpe/ /khyod zhal pad+ma nyid dang mtshungs/ /gzhan ni 'ga' zhig dang yang min/ /zhes pa mtshungs pa gzhan bzlog phyir/ /'di ni nges par nyid kyi dpe/ /re zhig khyod gdong pad+ma yi/ /rjes 'gro gzhan yang de 'dra ba/ /gal te yod na de byed 'gyur/ /zhes pa 'di ni nges med dpe/ /khyod gdong mdzes pa kho na yis/ /zla ba'i rjes su 'gro min te/ /dga' bskyed las kyis kyang zhes pa/ /'di 'dra bsdus pa'i dpe yang yod/ /khyod kyi zhal ni khyod nyid la/ /mthong zhing zla ba mkha' la mthong / /'di nyid kho na tha dad de/ /gzhan med ces ni phul byung dpe/ /de yi bzhin dpal nga nyid la/ /yod ces zla ba snyems mi dgos/ /pad+ma la yang de yod phyir/ /zhes pa 'di ni rab brtag dpe/ /smin legs gal te pad+ma 'ga'/ /rnam par 'phrul pa'i mig ldan na/ /khyod kyi bzhin gyi dpal 'dzin te/ /zhes pa 'di ni rmad byung dpe/ /lus phra khyod gdong ri bong can/ /zhes btags khyod gdong bsam pa yi/ /zla ba 'di yang rjes su bsnyags/ /zhes 'di rmongs pa'i dpe ru bshad/ /pad nang bung ba 'khor ram ci/ /khyod gdong la mig g.yo 'am ci/ /bdag gi sems ni rnam par g.yo/ /zhes pa 'di ni the tshom dpe/ /zla ba skyengs byed mdzes pa 'di/ /zla bas tshar gcod pad+ma min/ / de phyir khyod kyi gdong nyid do/ /zhes 'di gtan la phebs pa'i dpe/ /bsil zer can gyi 'gran zla dang / /dpal dang ldan dang dri bzangs kyi/ /khyod kyi gdong ni chu skyes bzhin/ /zhes pa sbyar ba'i dpe ru bshad/ /mtshungs pa'i sgra yis brjod bya'i phyir/ /mnyam nyid dpe ste ji ltar na/ /skyed tshal phreng 'di bu mo bzhin/ /mdzes ldan sA la kA na na/ /pad+ma rdul mang zla ba 'dzad/ /de dag las ni khyod kyi bzhin/ /mtshungs pa la yang khyad par bcas/ /zhes pa smad pa'i dpe ru 'dod/ /pad+mas tshangs pa mchog tu bskyed/ /zla ba bde 'byung gtsug gis 'dzin/ /de dag khyod gdong mtshungs zhes pa/ /de ni bsngags pa'i dper brjod do/ /yon tan ldan yang skyon 'gyur yang / /zla ba khyod gdong mtshungs zhes pa/ /brjod 'dod bdag gi yid la yod/ /ces pa brjod 'dod dpe zhes rig /'dab brgya pa dang ston zla dang / /khyod kyi gdong dang gsum po ni/ /phan tshun rnam par 'gal zhes pa/ /de ni 'gal ba'i dpe brjod do/ /dri ma ldan zhing blun gyur pas/ /zla ba la ni khyod gdong dang / /'gran pa'i nus pa nam yang med/ /ces pa dgag pa'i dpe nyid do/ /khyod gdong ri dgas mig gis mtshan/ /zla ba ri dgas nyid kyis mtshan/ /de lta na yang 'di mtshungs nyid/ /khyad 'phags min zhes ngo bstod dpe/ /'di ni bzhin nyid pad+ma min/ /'di dag bung ba ma yin mig /ces pa rnam gsal mtshungs pa las/ /de ni de nyid brjod pa'i dpe/ /zla ba pad+ma dag gi ni/ /mdzes pa las 'das khyod kyi gdong / /bdag rang nyid dang mtshungs par gyur/ /zhes pa thun mong min pa'i dpe/ /pad+ma mdzes pa'i snying po kun/ /'ga' zhig dag tu bsdus pa bzhin/ /khyod zhal rnam par mdzes zhes pa/ /de ni 'byung min dpe zhes rig /zla ba'i gzugs las dug bzhin dang / /tsan+dan las ni me bzhin du/ /zhal 'di las ni rtsub mo'i tshig /ces pa srid pa min pa'i dpe/ /tsan+dan chu dang zla ba'i zer/ / zla shel sogs bzhin khyod kyi ni/ /reg pa bsil zhes khyad par dag /gsal bar byed pa mang ba'i dpe/ /lus phra khyod kyi bzhin ras ni/ /zla ba'i dkyil 'khor las bton bzhin/ /pad+ma'i nang nas phyung ba bzhin/ /zhes pa 'di ni rnam 'gyur dpe/ /'od kyis nyi bzhin nyi ma yis/ /nyin bzhin nyin gyis mkha' la bzhin/ /rnam par gnon pas khyod la dpal/ /'dzin zhes de ni phreng ba'i dpe/ /gang yang dag don nyid kyis ni/ /gal te ngag don nyer 'jal na/ /ngag don dpe de bzhin sgra ni/ /gcig dang du mas de rnam gnyis/ /khyod gdong mig ni mi brtan zhing / /so yi 'od zer rab gsal ba/ /'dam skyes bung ba g.yo ldan ni/ /ge sar dag gis mtshon bzhin mdzes/ /pad+ma can bzhin lus phra ma/ /pad+ma bzhin du de yi gdong / /sbrang rtsi spyod pas bzhin du ni/ /bdag gis 'thungs shing 'thungs shing rtses/ /dngos po 'ga' zhig nyer bkod nas/ /de yi chos mthun rab bkod pa/ /mnyam pa nyid du rtogs pa can/ /zla bo dngos po'i dpe yin dper/ /rgyal po rnams ni skyes gyur kyang / /da lta khyod 'dra gcig kyang med/ /yongs 'du dag la rkang 'thung ni/ /gnyis pa nges par yod ma yin/ /lhag pas dman pa bya ba yi/ /cho ga gcig la rab bsdus nas/ /gang smras de ni mtshungs pa dag / sbyor ba'i dpe ru bshad de dper/ /bu lo ma dgra mtho ris dang / /khyod kyis sa bsrung mel tshe byed/ /de yis dregs ldan lha min dang / /khyod kyis mi yi bdag po 'joms/ /rgyal po mdzes pas zla ba dang / /gzi byin gyis ni nyi ma dang / /brtan pas rgya mtsho'i rjes su byed/ / ces pa 'di ni rgyud per dran/ /blo ldan mi dgyes med gang la/ /nges par dpe yi skyon dag ni/ /tha dang rtags dang tshig la med/ /dman dang lhag pa nyid la'ang med/ /ma ning 'di 'gro bud med bzhin/ /bud med 'di smra skyes pa bzhin/ /bdag gi grogs 'di srog rnams bzhin/ /rig pa rnams bsgrub nor bzhin no/ /sa gzhi skyong ba khyod bzhin du/ /lha yi rgyal po rnam par mdzes/ /tsha zer can gyi nus pa la/ /mi bdag /gzi yis 'gong bar nus/ /zhes pa de lta bu la sogs/ /skal bzang nam yang gtang min nyid/ /sbyor ba 'ga' la ngag rig rnams/ /mi dgyes pa yod ji ltar na/ / ngang mo bzhin du zla ba dkar/ /mtsho rnams bzhin du mkha' dri med/ /khyi bzhin dpa' bo rje la gus/ /nyi ma bzhin du me khyer gsal/ /'di 'dra spangs te mkhas rnams kyis/ /rgyu yang 'dir ni bsam par byos/ /bzhin ltar lta bu ji ltar sgra/ /mthun mtshungs yang dag mtshungs dang mnyam/ /yang dag gsal dang nges par gsal/ /rab gsal gzugs kyi zla bo dang / /gnyen po dang ni dgra zla dang / /so sor rtog dang 'gal dang 'dra/ /blta bcas dang ni bslu ba dang / /rigs mthun rjes su smra ba dang / /gzugs brnyan dang ni so sor sdeb/ /gzugs mtshungs mnyam dang yang dag gzhal/ /mtshan nyid mthun 'dra mtshungs pa dang / /mthun phyogs dper byas dpe dang rtog /dman dang cung zad dman sogs dang / /rab tu smra dang so sor bzlag /rags mthun mnyam byas sgra dag dang / /gang yang dman min don can tshig /ri bong mtshan ma'i gdong can sogs/ /'bru mang po yi tshig sdud dang / /'gran dang rgyal dang sdang ba dang / /'khu dang mi mthun sgrogs pa dang / /'thab pa dang ni 'phya ba dang / /sma 'bebs byed dang smod pa dang / /co 'dri ba dang 'gog pa dang / /rgod dang phrag dog mi bzod dang / /de yi skal bzang 'phrog byed dang / /de yi mdzes pa zum byed dang / /de dag 'gran las tshar gcod dang / / de dag mtshungs las lhag par mdzes/ /de yi rjes su rkang 'jog dang / /de yi nus pa la 'jug dang / /de yi rjes 'gro rjes su 'ching / /de yi ngang tshul de 'gog dang / /de yi rjes su byed ces pa'i/ /sgra rnams mtshungs pa gsal byed yin/ /tha dad snang min gyur pa yi/ /dpe nyid dag ni gzugs can 'dod/ /dpung pa 'khri shing lag pa ni/ /pad+ma sor mo yal 'dab bo/ /lag pa'i 'khri shing sor mo rnams/ /yal 'dab sen mo'i 'od zer ni/ /me tog tu gyur dpyid kyi dpal/ /khyod ni nged la mngon sum rgyu/ /zhes pa 'di ni ma bsdus te/ /snga ma bsdus pa'i gzugs can no/ /bzhin zla 'dzum pa'i zla 'od ces/ /gzugs can bsdus dang ma bsdus pa'o/ /sor mo dmar ba'i 'dab phreng dang / /sen mo'i 'od kyi ge sar can/ /khyod kyi zhabs kyi chu skyes ni/ /sa skyod rnams kyi spyi bor 'dzin/ /sor mo la sogs 'dab sogs dang / /rkang pa pad+ma nyid byas nas/ /de 'os gnas su rnam bkod pa/ /'di ni mtha' dag gzugs can no/ /gtum mo glo bur nyid du ni/ /khyod gdong mchu yi yal 'dab g.yo/ /rdul gyi chu yi thig pa yi/ /dog pa mu tig 'od can 'dzin/ /'di ni rdul chu dog par byas/ /mchu yang yal 'dab nyid byas kyi/ /gdong ni rnam pa gzhan ma byas/ /de phyir cha shas gzugs can no/ /gdong pa'i 'dam skyes smin 'khyog cing / /rdul gyi chu ni zags pa dang / /mig dag kun du dmar ba 'di/ /myos pa'i gnas skabs gsal bar byed/ /'dir ni gdong ba'i cha shas dag /rnam 'gyur ma byas gdong pa nyid/ /pad+mar bkod byas des na 'di/ /cha shas can gyi gzugs can no/ /mdzes ma myos pa'i mkhur tshos dmar/ /mig gi ut+pal dmar po can/ /khyod kyi gdong gis skye bo ni/ /'dir yang dmar ba'i rang bzhin byas/ /'di ni yan lag gcig gzugs can/ /de ltar 'dir ni gnyis sogs kyi/ /yan lag rnams kyang rtogs par bya/ /ldan dang mi ldan tha dad byed/ /gdong 'di 'dzum pa'i me tog 'bar/ /g.yo ba'i mig gi bung ba can/ /zhes pa me tog bung ba dag /'grogs pas ldan pa'i gzugs can no/ /gdong 'di 'dzum gsher zla 'od dang / /snum pa'i mig gi ut+pal can/ /zla 'od ut+pal mi ldan pas/ /ldan min zhes pa'i gzugs can no/ /yan lag can dang yan lag rnams/ /gzugs byas gzugs su ma byas la/ /brtan pas mi mnyam pa zhes pa'i/ /gzugs can mdzes pa yin te dper/ /myos pa'i mkhur tshos rab dmar zhing / /smin ma'i 'khri shing gar byed pa/ /khyod gdong zla ba yid srubs kyis/ /'jig rten gsum po gzhom par nus/ / 'phrog byed rkang pa dzah+nu yi/ /bu mo'i chu gos rtse la btags/ /lha min dogs med lha dga' ba'i/ /dga' ston rgyal mtshan rgyal gyur cig /gang zhig tog gi khyad par gyis/ /tshogs kyi gzugs ni 'di 'dra ba/ /de ni rkang pa la bkod 'di/ /khyad par dang bcas gzugs can no/ /pad+ma rnams ni mi 'dzum zhing / /nam mkha' la yang mi 'gro ba/ /khyod gdong zla bas bdag gi ni/ /srog rnams 'phrog pa nyid du blta/ /zla ba'i bya ba bya min dang / /gzhan gyi bya ba'i bya ba 'dir/ /yang dag bstan te de yi phyir/ /'gal ba zhes bya'i gzugs can no/ /khyod ni zab pas rgya mtsho ste/ / brling ba nyid kyis ri bo yin/ /'jig rten rnams la 'dod pa ni/ /ster phyir dpag bsam rkang 'thung ngo / /'di ni zab pa la sogs pa'i/ /rgyu rnams dag gis rgya mtsho ri/ /dpag bsam shing yang byed pas na/ /'di ni rgyu yi gzugs can no/ /grogs mo khyod kyi gdong pad ni/ /rA dza haM sas nyer spyad 'os/ /dri zhim bung bas don gnyer 'os/ /zhes pa sbyar ba'i gzugs can no/ /gtso bo dang ni phal ba la/ /chos mthun chos mi mthun mthong bas/ /dpe dang ldog pa can zhes pa'i/ /gzugs can rnam pa gnyis 'dod dper/ /myos pas kun du dmar ba yis/ /bkab pa bzhin gyi zla ba 'di/ /'char ka'i dmar ba phun tshogs pa'i/ /zla ba la ni rab tu 'gran/ /lha rnams kyis ni zla ba dang / /bdag gis khyod gdong zla ba 'thung / /'di ni gang ba ma yin yang / /'di ni rtag tu dkyil 'khor rdzogs/ /mdzes ma khyod gdong zla bas ni/ /'di ltar gzhan dag gdung byed pas/ /zla ba nyid du brjod min zhes/ /'di ni 'gog pa'i gzugs can no/ /gtum mo khyod gdong zla bas kyang / /brtse ba med par bdag sreg pa/ /bdag gi skal ba nyid kyi skyon/ /zhes 'di mnyam 'jog gzugs can no/ /khyod gdong 'dam skyes dor 'dir/ /smin ma'i 'khri shing gar mkhan ma/ /rol sgeg dga' bas gar byed do/ /zhes pa gzugs can gyi gzugs can/ /'di ni gdong min 'di pad+ma/ /'di dag mig min 'di bung ba/ /'di khyod so yi 'od zer min/ /'di rnams ge sar nyid yin no/ /gdong la sogs pa nyid bzlog ste/ /pad+ma la sogs gzugs byas pas/ /yon tan khyad 'phags gsal byed pa/ /de nyid bsnyon dor gzugs can no/ /gzugs can dpe yi rnam rtog rnams/ /mtha' yod ma yin de yi phyir/ /phyogs tsam bstan la blo ldan rnams/ /ma brjod rjes su dpag par bya/ /rigs dang bya ba yon tan rdzas/ /tshig gcig la ni gnas pa yis/ /gal te ngag kun la phan na/ /de ni gsal byed du brjod dper/ /lho yi rlung gis 'khri shing ni/ /'dab ma rnying ba lhung bar byed/ /dud pa'i lus can rnams kyi yang / /khengs pa gsar du 'joms par nus/ /rgyu'o chu gter bzhi dogs kyi/ /skyed mos tshal du so can te/ /khor yug ri bo'i khongs su yang / / khyod kyi yon tan kun+da dkar/ /sngo bsangs nyid do phyogs rnams ni/ /dbyar skyes sprin gyi phreng ba yis/ /sa yang rtswa sngon gsar pa ni/ /shin tu gzhon pa'i phreng bas so/ /khyab 'jug rnam gnon la gnas pas/ /dA nu'i bu yi 'byor ba dag /gang du btang zhing lha rnams kyi/ /phun tshogs gang na gnas pa blangs/ /zhes pa dang po'i gsal byed bstan/ /de bzhin bar dang mtha' yi yang / /tshig dag bdag gis bstan par bya/ /de dag 'ga' zhig 'di lta ste/ /gar byed ni tsu la phang du/ /glu yang lan no mjug sgro can/ /dga' bas rgyas pa'i mig dag kyang / /chu 'dzin la ni gtod par byed/ /dri bzhon dal bu 'gyur byed de/ /zla ba dag kyang me ru 'gyur/ /tsan+dan byug pa lhung ba yang / /mtshon lhung 'khyams pa rnams la'o/ /chu 'dzin gyis ni rab gtor chu/ /khyim gyi gtsug phud ldan pa'i tshogs/ /glog gi thag pa g.yo ba yang / /me tog gzhu can dag gis dpung / /khyod kyi ut+pal rna ba la/ /'dod pa'i mda' ni mda' stan la/ /ngas kyang sems ni 'chi ba la/ /gsum po 'di ni mnyam du byas/ /dkar phyogs kyis ni 'od dkar can/ /'phel byed de yis mda' lnga pa/ /des kyang chags pa chags pas kyang / /na chung dga' ba'i dga' ston dpal/ / zhes sogs gsal byed yin mod kyang / /snga ma snga ma la ltos pa'i/ /ngag gi phreng ba rab ldan phyir/ /de ni phreng ba'i gsal byed 'dod/ /rlung gis gtsubs pa'i chu thigs can/ /sprin gyi lus med dag gis ni/ /a ba le ba 'phel bar byed/ /rdul gyi dag ni sel bar byed/ /'dir ni sprin gyi tshig dag dang / /a ba le ba'i tshig dag gis/ /bya ba 'gal ba ldan pa de/ /'gal ba'i don gyi gsal byed do/ /chu 'dzin dag gi phreng ba 'dis/ /phyogs rnams kyi ni go skabs phrog /skar ma yi ni tshogs rnams bzung / /deng yang bdag gi srog rnams len/ /gang phyir chu 'dzin phreng ba yi/ /bya ba gcig nyid gsal byed 'dir/ /du ma'i sgra yis nyer blangs pa/ /de phyir don gcig gsal byed do/ /dri yi bzhon pa yid 'ong mtho/ /sngo bsangs ta ma la yi 'od/ /sprin ni mkha' la rgyu byed de/ /glang chen 'di dgas la'o/ /'dir ni chos rnams tha dad min/ /sprin dang glang po rnams dag kyang / / rgyu ba nyid kyis 'brel ba'i phyir/ /sbyar ba'i don gyi gsal byed do/ /rnam pa 'di nyid kho na yis/ /gsal byed la ni rnam rtog pa/ /lhag ma rnams kyang rjes mthun par/ /mkhas pa rnams kyis rtogs par bya/ /gsal byed kyi ni gnas nyid du/ /don skor dang ni tshig skor dang / / gnyis ka bskor ba zhes pa yi/ /rgyan gsum po dag 'dod de dper/ /ka dam+ba ni rnam par rgyas/ /kuT dzod+ka ma rab gsal/ /kan+da l+ya ni rab tu bye/ /ka ku b+ha yang gyes par gyur/ /sprin gyi phreng ba dag gis ni/ /rma bya'i tshogs rnams 'dod ldan byed/ /chu srin rgyal mtshan can gyis ding / /na chung rnams yid 'dod ldan byed/ /kun las rgyal nas de ring khyod/ /btsun mo rnams dang rtse bar byed/ /khyod kyi dgra sde mtho ris song / /lha mo rnams dang rtse bar byed/ /dgag pa brjod pa 'gog pa ste/ /dus gsum la ltos rnam pa gsum/ /de nas de yang dgag bya yi/ /dbye ba mtha' yas phyir mtha' yas/ /lus med kyi ni me tog gi/ /mda' ldas kun las rgyal bar gyur/ /zhes pa mi srid yang na ni/ /dngos po'i nus pa rnam par bkra/ /zhes pa 'di ni rgyu stobs kyis/ /lus med rgyal bar mi rigs blo/ /de ltar gyur bkag de yi phyir/ /'di 'dra de ni byung ba 'gog /snyan sgrogs ma dag ci yi phyir/ /rna ba la ni up+tal 'dzud/ /las 'di la ni mig zur dag /yongs rdzogs min par sems sam ci/ /'ga' zhig dkar min ut+pal la/ /rna bar byed la mdza' bo yis/ /de ltar bstod pas 'gog byed pa/ /'di ni mngon gyur 'gog pa'o/ /jo bo bden par smra bo bdag /gzhan dang tsum+ba nas 'phos pa'i/ /rgya skyegs kyis dmar mig gis ni/ /nam yang mthong bar 'gyur ma lags/ /sngar nyid shin tu khengs ldan mas/ /nam zhig 'di yi gnod pa dag /'byung ba de ltar 'gog byed pa/ /'di ni 'byung 'gyur 'gog pa'o/ /lus phra khyod kyi yan lag rnams/ /'jam pa nyid du gnas pa brdzun/ /gal te bden par 'jam pa na/ /glo bur du bdag ci la gdung / /gang phyir de ltar 'dod ldan gyis/ /de dang 'gal ba'i chos kyis 'dir/ /bud med lus ni 'jam pa dag /'gog pa 'di ni chos 'gog pa'o/ /de ni mdzes sam ma yin zhes/ /rnam rig 'di ni ci las skyes/ /der ni 'od tsam g.yo ba nyid/ /mthong bar 'gyur gyi rten ma yin/ /gang phyir gzugs can ma'i ngo mtshar/ /brjod pa 'dod pas 'od ces pa'i/ /chos 'di khas blangs chos can dag /'gog 'di chos can 'gog pa'o/ /khyod kyi mig dag dmar gyur cing / /mchu yi yal 'dab g.yo ba dang / /smin ma 'khyog ste de lta na'ang / /nyes pa med pas bdag mi 'jigs/ /gang phyir mdza' mo mkhas pa yis/ /'jigs pa yi ni rgyu yi gtso/ /rang gi nyes pa 'gog byed pa/ /'di dag 'dir ni rgyu 'gog pa'o/ /mdza' bo dag ni ring na gnas/ /chu 'dzin bgrod ldan 'di ni 'ongs/ /ni tsu la yang rgyas par mthong / /bdag shi min pa 'di ci gang / /de rgyu chu 'dzin bgrod pa sogs/ /mi bzad pa dag nyer bkod nas/ /'bras bu 'chi ba bzlog pa'i phyir/ /de ni 'bras bu 'gog pa'o/ /gal te gshegs na gshegs par mdzod/ /khyod kyi bgrod pas bdag la ni/ /gdung ba yun ring 'byung mi 'gyur/ /'di la khyod ni dogs mi 'tshal/ /zhes pa 'chi ba gsal byed pas/ /rjes gnang nyid kyi sgo nas ni/ /mdza' bo'i bgrod pa 'gog byed pa/ /de ni rjes gnang 'gog pa'o/ /nor ni mang po rnyed 'gyur zhing / /lam du yang ni bde zhing dge/ /bdag srog la yang the tshom med/ /'on kyang mdza' bo 'gro mi bya/ /mdza' bo 'gro bar sbyor ba yis/ /rgyu rnams dag ni rab bshad nas/ /dbang nyid kyis ni de 'gog pa/ /'di 'dra dbang gis 'gog pa'o/ /bdag ni gson re stobs dang ldan/ /nor gyi bsam pa stobs ldan min/ /mdza' bo gshegs sam bzhugs lags sam/ /rang gi gnas skabs smos pa lags/ /gang phyir 'di ni chags ldan mas/ /ma gus bzhin du tshig sbyar nas/ /mdza' bo'i bgrod pa 'gog byed pa/ /'di ni ma gus 'gog pa'o/ /mdza' bo gal te gshegs na bzhud/ /khyod kyi lam ni shis gyur cig /gang du khyod ni gshegs pa der/ /bdag kyang skye ba nyid gyur cig /de ltar shis brjod lam gyi gang / /rang gi gnas skabs gsal byed mas/ /mdza' bo'i bgrod pa 'gog byed pa/ /'di ni shis brjod kyis 'gog pa'o/ /gal te khyod 'gro bden nyid na/ /khyod kyis gzhan pa 'ga' zhig tshol/ /bdag ni glags 'tshol 'chi ba yis/ /de ring nyid du 'gog par 'gyur/ / gang phyir mdza' ba'i dbang gyur mas/ /mdza' bo'i bgrod pa 'gog byed pa/ /tshig rtsub yi ge sngon 'gro can/ /de ni rtsub mos 'gog pa'o/ /gal te gshegs na myur du bzhud/ /phyi nas gnyen 'dun 'khrugs pa'i khas/ /bsgrags pa'i cho nges 'gro ba yi/ /gegs gyur khyod kyi rna bar 'ong / /gang phyir 'dir ni mtha' gcig tu/ /chags mas grogs nyid byed pa yis/ /mdza' bo'i bgrod pa 'gog pa 'di/ /grogs nyid kyis ni 'gog pa'o/ /bzhud ces khyod dgyes brjod 'dod kyang / /bdag nyid dga' bar byed pa'i tshig /ma gshegs zhes pa kha nas ni/ /byung bar gyur la bdag ci byed/ /mi 'dod dngos la 'bad byas pas/ /'bras bu phyin ci log bskyed pa'i/ /don med nye bar bstan pa'i phyir/ /de ni 'bad pas 'gog pa'o/ /skad cig lta la gegs byed pa'i/ /rdzi ma bskyod pa la khro ba/ /khyod kyis mdza' la 'gro ba smos/ /bdag ni de yi 'dod pa 'dod/ /gang phyir mdza' ba'i gzhan dbang mas/ /don 'dir nye bar gsal byas nas/ /mdza' bo'i bgrod pa 'gog byed pa/ /'di ni gzhan dbang 'gog pa'o/ /mgon po 'bral ba bzod par bgyi/ /gang gis mig bsgos dag la ni/ /'dod pas bsnun du mi mthong ba'i/ /mthong min mig sman bdag la stsol/ / 'tsho ba'i thabs ni dka' ba dag /nye bar bkod nas bdag po ni/ /'gro ba 'gog par byed pa'i phyir/ /'di 'dra thabs kyis 'gog pa brjod/ /jo bo khyod kyi zhal nas tshig /bdag 'gro zhes pa nges par byung / /mdza' ba dman pa khyod kyis da/ /ma phyin na yang bdag la ci/ /mdza' ba rgyas pas ma bsdams pa'i/ /bdag nyid khro bas mdza' bo yi/ /'gro ba rtsom pa bzlog pa gang / /de ni khro bas 'gog pa'o/ /ma bsnom bu mo'i rna ba la/ /ma byas chang la ma btab par/ /khyod kyi dgra yi rdzing nyid du/ /ut+pal sngon po zegs par gyur/ /mya ngan bcas shing ut+pa la/ /de 'os las ni bzlog byas nas/ /mya ngan 'os pa'i skabs ston phyir/ /'di ni mya ngan gyis 'gog pa'o/ /don 'di 'ga' yang tshogs ma byas/ /rig pa 'ga' yang ma bsgrubs phyir/ /dka' thub 'ga' yang ma bsags pa/ /na tshod mtha' dag song bar gyur/ /gang phyir 'di ni tshe song bas/ /don bsgrub la sogs 'gog pa ni/ / 'gyod pa gtso bor ston byed pa/ /'di ni 'gyod pas 'gog pa'o/ /ci 'di ston dus chu 'dzin nam/ /yang na ngang pa'i tshogs sam ci/ /sgra ni rkang gdub kyi 'dra ba/ /thos pas de ni chu 'dzin min/ /chos 'di ngang pa la yod cing / /sprin gyi rigs la ma reg pas/ /gang zhig the tshom zlog byed pa/ / 'di ni the tshom 'gog pa'o/ /bdud rtsi'i bdag nyid pad+ma la/ /sdang zhing snum pa'i dkar 'bras can/ /khyod gdong zla ba 'di yod bzhin/ /zla ba gzhan gyis ci zhig bya/ /phal pa'i zla ba la brten pa/ /de mtshungs yon tan bstan byas nas/ /gtso bo'i zla ba 'gog byed pa/ /rnam pa de ltar sbyar pa'i 'gog / thams cad mnan yang khyod kyis ni/ /rnam gnon tshim pa med pa mtshar/ /'on kyang sreg za 'bar ba la/ /tshim pa dag ni nam zhig mthong / /gang phyir 'dir ni don gzhan dag /de yis chos mtshungs bstan byas nas/ /ya mtshan rtsom pa 'gog byed pa/ /'di ni don gzhan 'gog pa'o/ /sbyin pa po zhes nam yang ni/ /mi dbang khyod la mi bstod de/ /gang phyir slong bas khyod kyi nor/ /rang gi nyid du bsams nas len/ /zhes pa la sogs 'gog pa ni/ /rgyu 'gog pa zhes bshad pa ste/ /phyogs 'di nyid kyis rnam par rtog /gzhan pa dag kyang dpag par nus/ /gang zhig dngos 'ga' rab bkod nas/ /de yi sgrub byed nus pa can/ /dngos po gzhan dag 'god pa de/ /don gzhan bkod par shes par bya/ /kun khyab khyad par la gnas dang / /sbyar ba can dang 'gal ba can/ /mi 'os byed dang 'os pa'i bdag /'os dang mi 'os ldog pa'o/ /'di yi dbye ba de lta sogs/ / sbyor ba rnams la rab tu mtshon/ /'di rnams rang bzhin gsal bya'i phyir/ /dper brjod phreng ba bstan par bya/ /legs ldan 'gro ba rnams kyi mig /nyi ma dang ni zla ba yang / /nub par gyur pa nyid la ltos/ /nges pa la ni su zhig 'gongs/ /chu 'dzin 'di dag lus can gyi/ /yongs su gdung ba 'phrog par byed/ /bdag thob min nam chen po rnams/ /gzhan gyi sdug bsngal zhi slad du'o/ /ma la ya yi rlung gis ni/ /'jig rten dga' ba skyed par byed/ /dAk+Shi N+ya dang yang dag ldan/ /kun gyi snying sdug ma yin nam/ /mtshan mor byed 'di dri ma dang / /ldan yang 'gro ba dga' ba skyed/ /gnyis skyes dbang po skyon ldan yang / /gzhan dag rjes su 'dzin par nus/ /sbrang rtsi 'thungs pa'i mgrin snyan las/ /byung ba bung ba'i sgra dag kyang / /rna bar rtsub pa nyid 'gyur ba/ /'dod ldan rnams kyi sdig 'di 'dra/ /chu skyes 'dab ma'i mal stan 'dis/ /bdag gi lus 'di gdung bar byed/ /bsreg pa'i bdag nyid sreg za dang / /'dra bas rigs pa ma yin nam/ /bsil zer can gyis nyams byed mod/ /dpyid kyis bdag ni ci la gdung / /dri ma can gyis spyod pa'i las/ /dag pas mi 'os pa min nam/ /ku mud ldan yang sreg byed na/ /pad+ma'i 'byung gnas cis mi byed/ /zla bas bzung rnams rtsub pa na/ / nyi mas bzung ba 'jam mi 'gyur/ /sgra 'jug pa'am rtogs pa yis/ /dngos po gnyis ni mtshungs gyur pa/ /de yi dbye ba brjod pa gang / /de ni bzlog pa can zhes brjod/ /brten dang che ba'i bdag nyid dang / /lA ba N+ya sogs yon tan gyis/ /khyod dang rgya mtsho mtshungs tha dad/ /khyod lus 'di 'dra nyid kyis so/ /gcig la gnas pa'i chos kyis ni/ /gnyis ka la gnas tha dad dag /rtogs pa'i yul du gyur pa'i phyir/ /'di ni gcig gi ldog pa can/ /chu yi phung po dag dang khyod/ /mtshams las mi 'dab zab pa ste/ /'di ni mig sman dang mtshungs la/ /khyod ni gser gyi 'od can no/ /gang phyir 'dir ni gnyis ka yis/ /'byed byed yon tan nag po dang / /ser po dag ni tha dad bstan/ /'di ni gnyis ka'i ldog pa can/ /khyod dang rgya mtsho du rbA rau/ /ma hA satwa te dzaHbcas/ /'di yi khyod gnyis tha dad de/ /de ni chu bdag khyod mkhas so/ /'di ni sbyar ba'i tshul ldan phyir/ /sbyar ba can zhes gzung bar mdzod/ /'gog pa can dang gtan tshigs can/ /gnyis po de yang bstan par bya/ /lugs dang ldan zhing brtan pa dang / /rin chen 'byung gnas yin mod kyang / /dri ma ldan pa chu srin gnas/ /khyod kyi 'gran zla 'gyur ma yin/ /ri gling rgya mtshor bcas pa yi/ /sa gzhi mtha' dag 'dzin mod kyang / / lag 'gro rnams kyi rjer gyur phyir/ /lhag ma can ni khyod pas dman/ /sgra dag 'jug par mtshungs pa yi/ /ldog pa can ni 'di 'dra ste/ /rtogs par gyur pas mtshungs pa yang / /yod pa de ni rjes su bsgrub/ /khyod kyi gdong dang pad+ma ste/ /'di gnyis kyi ni khyad par yang / /pad+ma chu las skyes pa dang / / khyod gdong khyod la bstan pa'o/ /ri dgas mig la smin sgeg dang / /myos pa'i dmar bas reg pa med/ /khyod kyi mig ni gnyis po 'di/ /yon tan de dag nyid kyis brgyan/ /snga mar dbye ba tsam zhig bstan/ /'di ni lhag pa nyid bstan to/ /slar yang mtshungs pa'i ldog pa can/ /gzhan dag rab tu bstan par bya/ /khyod kyi gdong dang pad+ma dkar/ /rgyas shing dri bzang ldan pa ste/ /pad+ma la ni bung ba 'khor/ /khyod kyi gdong la mig rab g.yo/ /zla ba 'di ni mkha' yi rgyan/ /ngang pa 'di ni chu yi rgyan/ /mkha' 'di rgyu skar phreng ba can/ /chu 'di ku mud rgyas pa can/ /'dir ni zla ba ngang pa dag /dkar ba nyid sogs rtogs pa dang / /mkha' dang chu ni dag pa yang / /rtogs par mtshungs pa'i dbye ba byas/ /snga ma la ni sgra ldan mtshungs/ /gnyis ka la yang tha dad dbye/ /bung ba mig la sogs pa mtshungs/ /de phyir mtshungs pa'i ldog pa can/ /rin can snang bas mi 'phrogs shing / /nyi ma'i 'od kyis mi bzlogs pa/ /lang tsho las byung na chung gi /mun pas lta ba 'gog par byed/ /mun pa'i rigs las mun pa 'di/ /lta ba 'gog pa nyid kyis mtshungs/ /gzhan dag gis ni tha dad bstan/ /'di ni rigs mthun ldog pa can/ /rab tu grags pa'i rgyu bzlog nas/ /gang zhig rgyu gzhan cung zad dam/ / gang du rang gi ngo bo nyid/ /ston pa de ni srid pa can/ /ma 'thungs myos pa'i kA dam+pa/ /ma phyis dri ma med pa'i mkha'/ /drungs par ma byas dngas pa'i chu/ /'gro ba'i yid ni 'phrog par byed/ /sman ma bskus par dkar min mig /mnan pa min par smin ma dma'/ /tshon ma bskus par dmar ba ni/ / mdzes ma khyod kyi mchu 'di'o/ /gang phyir ma 'thungs la sogs skyes/ /myos pa nyid sogs rgyu gzhan can/ /rgyu med dag kyang brjod 'dod pa/ /de la 'dir ni 'gal ba med/ /bsgos pa med par kha dri zhim/ /bcos pa med par lus po mdzes/ /rgyu med dag tu zla ba dgra/ /rgyu mtshan med par 'dod pa grogs/ /bsgos pa med sogs tshig gis 'dir/ /rgyu ni dngos su rab bzlog cing / /dri zhim nyid sogs 'bras bu brjod/ /de phyir de ni srid pa can/ /dngos po 'ga' la bsam byas nas/ /de dang mtshungs pa'i dngos po gzhan/ /bsdus pa'i tshul gyis rjod byed pa/ /de ni bsdus pa brjod par 'dod/ /bung ba ji ltar 'dod pa bzhin/ /pad+ma rgyas la sbrang rtsi 'thungs/ /dri zhim rgyas pa ma yin yang / /me tog kha ma bye sbyor ltos/ /chags ldan bud med dar ma la/ /dga' ba'i rtse dgas bcings pa dag /bu mo 'ga' zhig dag la yang / /'dod pa 'phel ba ston par byed/ /khyad par can tsam tha dad cing / /khyad par rnam pa mtshungs pa'ang yod/ /khyad par tha dad tha dad min/ /'di ni gzhan pa dag kyang yod/ /rtsa brtan 'bras bu'i khur gyis ni/ /slong rnams rtag tu rgyas par byed/ /grib ma snum pa'i ljon pa che/ /'di ni bdag gis yang dag thob/ / yal ga'i khyon ni mi chung zhing / /me tog 'bras bu phun sum tshogs/ /dam pa'i grib bsil brtan ldan pa'i/ /shing 'di bdag gi skal bas rnyed/ /gnyis ka la yang skyes bu 'ga'/ /ljon pa nyid kyis nye bar bsngags/ /chos rnams thams cad snga ma la/ /thun mong gzhan la rnam pa gnyis/ / sprul ngan 'grogs pa dang bral zhing / /rang bzhin gyis ni mngar ba'i nang / /kye ma chu yi gter 'di ni/ /dus kyis yongs su skam par gyur/ /rgya mtsho la ni de mtshungs pa/ /skyes bu'i ldog pa gsal byed cing / /snga ma'i chos ni bzlog pa'i phyir/ /'di ni sngon med bsdus par brjod/ /khyad par gyi ni brjod 'dod gang / /'jig rten mtshams las brgal gyur pa/ /phul du byung bar brjod pa 'di/ /rgyan gyi dam pa yin te dper/ /mal+li kA yi phreng tshogs can/ /lus kun khyab pa'i tsan+dan gsher/ /dkar ba'i gos can sngon 'gro ma/ /zla ba'i 'od la mtshon ma yin/ /zla ba'i 'od ni lhag pa nyid/ / khyad 'phags ldan brjod de bzhin du/ /the tshom phul byung la sogs kyang / /gsal phyir cung zad bstan par bya/ /dga' ma khyod kyi nu ma dang / /dpyi yi bar na rkang pa ni/ /yod dam med ces bdag gi ni/ /the tshom da dung bzlog ma gyur/ /ni tam+bi ni khyod la ni/ /rked pa yod ces nges par nus/ /'o ma 'dzin pa'i khur gnas pa/ /rnam pa gzhan du srid ma yin/ /khyod kyi grags pa'i phung po ni/ /dpag nus min yang 'dir shong ba/ /sa skyong srid pa gsum gyi ni/ /khongs dag e ma shin tu yangs/ /rgyan ni gzhan pa dag las kyang / /ngag gi dbang pos mchod gyur ba/ /phul byung zhes ni brjod pa 'di/ /gcig pu nyid ni mchog tu brjod/ /sems ldan dag gam cig shos kyi/ /rnam pa gzhan du gnas pa'i tshul/ /gang du rnam gzhan rab rtogs pa/ /de ni rab rtog tu rig dper/ /nyin gung nyi mas gdungs pa yi/ /glang po dag ni mtshor 'jug pa/ /nyi ma'i phyogs gyur pad+ma rnams/ /gzhom par 'dod pa yin nam snyam/ /khrus dang btung dang pad rtsa dag /bza' phyir lag ldan chur 'jug pa/ /de ni 'khon lan blan phyir zhes/ /snyan ngag mkhan gyis rab brtags brjod/ /'di ni bdag gi ring ba dag /'gog byed rna ba'i rgyan zhes te/ /khyod kyi mig gis rna ba yi/ /ut+pal dag la 'gongs pa 'dra/ /mig zur char ni lhung gyur pa/ /mig gi 'od kyis ut+pal la/ /reg pa min yang snyan ngag mkhan/ /de ltar rab tu brtags te brjod/ /mun pa lus la 'byug pa bzhin/ /mkha' ni mig sman char 'bebs bzhin/ /zhes 'di yang ngo rab rtog gi /mtshan nyid ldan pa shin tu mang / /'dir ni bzhin gyi sgra yis 'ga'/ /dpe 'di nyid du 'khrul pa bskyed/ /ting nga'i mtha' yis dpe ma yin/ /zhes pa yid ches gsung bzlas nas/ /dpe dang dper bya nyid dag ni/ /mtshungs pa'i chos la ltos pas na/ /'byug pa dang ni mun pa la/ /chos 'di mngon par gyur tam ci/ / gal te 'byug pa nyid 'dod na/ /'byug ces bya ba gzhan pa ci/ /de nyid chos dang chos can yang / /zhes pa ma myos 'chad ma yin/ /gal te byed pa nges yin na/ /bya tshig la 'di dbang bral 'gyur/ /rang gi bya bsgrub mi nus pa/ /gzhan gyi ltos byar mi 'gyur ro/ /gang gis 'byug pa 'di dang ni/ /mun pa mtshungs zhes smra na yang / /lus la zhes pa ma 'brel te/ /de yang yon tan mtshungs pa blta/ /dper na khyod gdong zla ba bzhin/ /zhes pas mdzes pa rtogs 'gyur te/ /de bzhin 'byug pa 'di la ni/ /'byug pa las gzhan rtogs ma yin/ /de phyir 'byug pa 'di dang ni/ /mun pa byed po lus kyang las/ /nye bar sbyar don skyes bu yis/ /de ltar rab brtags zhes 'dod bya/ /snyam dang dogs dang nges dang 'dra/ /min nam zhes pa la sogs pa'i/ /sgra yis rab brtags gsal bar byed/ /bzhin gyi sgra yang de dang 'dra/ /rgyu dang phra mo cha dag ni/ /tshig rnams dag gi rgyan gyi mchog / rgyu ni byed po shes byed de/ /de dag rnam pa du ma dper/ /ma la ya yi rlung gis ni/ /tsan+dan ljon pa gsar pa yi/ /yal 'dab skyod par byed pa 'di/ /kun gyi dga' ba skyed par byed/ /dga' ba bskyed par 'os pa yi/ /rang bzhin nye bar sbyar ba 'di/ /rgyan nyid du ni rab bstan te/ / ldog pa dag kyang de dang mtshungs/ /ma la ya yi chu rgyun la/ /reg cing tsan+dan nags bskyod pa/ /rlung 'di 'gron po rnams dag ni/ /nyams par byed phyir nye bar gnas/ /de ltar 'byung ba'i rlung gis ni/ /'bral ba'i rims las byung gyur pa/ /yid 'ong la sred skye bo la/ /nyams pa sgrub par byed par nus/ /'grub par byed dang rnam 'gyur la/ /de nyid la ltos rgyu nyid do/ /'thob pa'i las la phal cher ni/ /bya ba la ltos rgyu nyid do/ /'grub par byed pa'i rgyu dag ni/ /bstan te lhag ma gnyis po yi/ /dper brjod gnyis ni bkod byas nas/ /shes par byed pa bstan par bya/ /lo 'dab gsar 'khrungs nags tshal dang / /'dab brgya rab tu rgyas pa'i rdzing / /zla ba rgyas pa 'dod pa yis/ /'gron po lta ba'i dug tu byas/ /khengs pa goms par bya'o zhes/ /grogs mo mdza' ba'i gnas bkod la/ /bu mo smin 'khyog mig yon gyis/ /mchu ni g.yo zhing lta bar byed/ /nyi ma nub gyur zla ba mdzes/ /'dab chags rnams ni gnas su song / /zhes pa 'di yang dus kyi skabs/ /go bar byed pa legs pa nyid/ /grogs mo 'dod pas gzir ba'i yid/ /zla ba'i 'od kyis mi bzlogs shing / /tsan+dan chu yis mi bzod pa/ /lus kyi drod kyis gdung bar 'dzin/ /zhes pa'i sbyor ba rnams la ni/ /yid 'ong shes byed rgyu dag mtshon/ /dngos med rgyu ni yid 'phrog pa/ /'ga' zhig rab tu bstan par bya/ /rig pa rnams ni ma goms dang / /blo ldan rnams dang ma 'grogs dang / /dbang po rnams ni ma bsdams pas/ /mi rnams rab tu gdung bar 'gyur/ /'dod pa'i gtam gyis myos pa song / /lang tsho yi ni rims dag nyams/ /rmongs pa zad cing sred pa 'phos/ /bsod nams gnas la yid dga' byas/ /nags tshal 'di dag khyim ma yin/ /chu klung 'di dag bud med min/ /ri dgas 'di dag bu tsha min/ /de phyir bdag ni yid dga'o/ /shin tu ma brtags spyod pa ni/ /'phags pa rnams la yod ma yin/ /de phyir de dag rnams kyi ni/ /phun tshogs thams cad rtag tu 'phel/ /skyed tshal sa hA kA ra rnams/ /snye ma ma 'khrungs pa min na/ /'gron po rnams kyi bud med ni/ /til bcas khyor chu sbyin byar 'gyur/ /yod dang med pa'i rang bzhin gyi/ / 'bras bu skyed pa dag la 'dir/ /sngar med la sogs rang bzhin gyi/ /dngos po yi ni rgyu nyid do/ /ring 'bras de dang lhan cig skyes/ /de bzhin 'bras ma thag skyes dang / /rigs min rigs pa byed ces pa/ /mtshar ba'i rgyu rnams grangs med do/ /'di rnams sbyor ba'i lam rnams la/ /btags pa'i 'jug pa la brten pa/ /shin tu mdzes pa dag mthong ste/ /de yi dper brjod ji ltar na/ /lus can khyod mig zur ces pa/ /rgyal byed lus med dag gi mtshon/ /gang de gzhan la rab 'phangs pa/ /de yis bdag gi yid kyang bcom/ /skyes bu lus skyes kyis myos pa'i/ /rnam 'phrul sna tshogs lhan cig nyid/ /bud med rnams la bu mo ni/ /yongs su nub pa'i na tshod skyes/ /sngar nyid ri dgas mig can ma'i/ /chags pa'i rgya mtsho rgyas par gyur/ /phyis nas 'od zer rab 'phro bas/ /zla ba yi ni dkyil 'khor shar/ /lha gcig khyod kyi zhabs gnyis po/ /dmar ba'i nyi gzhon la reg pas/ /rgyal po rnams kyi lag pa yi/ /pad+ma zum par byed pa ci/ /khyod kyi zhabs sen zla ba yi/ /'od zer kun+da dri med rnams/ /sa skyong rnams kyi lag pa yi/ /pad+ma zum par byed la dbang / /zhes pa rgyu yi rnam rtog rnams/ /lugs ni 'di 'dra dag tu bstan/ /zur dang rnam pas mtshon pa'i don/ /phra phyir phra mo zhes par brjod/ /nam zhig 'u cag 'grogs 'gyur zhes/ /tshogs su brjod par ma bzod pa'i/ /mdza' bo rig nas bud med kyis/ /rtse dga'i pad+ma zum par byed/ /lus skyes dag gis gzir ba yi/ /mdza' bo dbugs dbyung 'dod pa yis/ /pad+ma zum par byas pa las/ /'dir ni mtshan mo 'grogs pa bstan/ /glu yi 'dun sar khyod la mig /gtad pa de gdong chu skyes la/ /dmar zhing gsal ba rgyas pa yi/ /mdzes pa ci yang byung bar gyur/ /'dir yang rang bzhin ma brjod par/ /dga' ba'i dga' ston 'dod pa dag /nges par gnas pa nyid gyur pa/ /phra mo nyid las brgal ma yin/ / cha ni cha yi dngos po yi/ /rang bzhin nges par gsal ba sgrib/ /dper brjod nyid kyis 'di yi ni/ /rang bzhin nges par gsal bar bya/ /rgyal po'i bu mo la chags bdag /spu long rgyas pa srung ba pos/ /rig par gyur la kye ma tshal/ /bsil ba'i rlung ldan yin par shes/ /ci ltar bu mo mthong nyid na/ /bdag la dga' ba'i mchi ma byung / /rlung gis gtsubs pa'i me tog gi /rdul gyis bdag mig sun phyung ngo / /zhes pa la sogs skabs su ni/ /rgyan 'di shin tu mdzes pa yin/ /kha cig cha la smad pa'am/ /bstod par byas la cha zhes brjod/ /gang yid g.yul gyi dga' ston la/ /'dod pa'i dga' ston las kyang chags/ /gzi ldan lang tsho yon tan can/ /rgyal 'di khyod kyi bdag por 'os/ /brtson 'grus khyad 'phags bstod pa 'dir/ /smad pa nyid de longs spyod la/ /rgyun du spyod 'dod bu mo yi/ /bsam pa dag ni bzlog par nus/ /gnod pa rab gzhil nyid kyi phyir/ /gang gis snyan par smra ba bslab/ /skye bo 'di ni brtse med g.yo/ /grogs mo de yis bdag la ci/ /skye bo grogs mos rab bstan khengs/ /chags phyir byed par ma nus nas/ /skyon ltar snang bas yon tan gang / /snyan par smra ba nyid kyang bstan/ /dngos po rab tu bstan pa rnams/ /rim pa bzhin du rjes ston pa/ /grangs dang rim pa bzhin zhes pa/ /grangs bzhin zhes par rab tu brjod/ /khrus la chur ni rab zhugs ma/ /khyod kyi 'dzum mig gdong mdzes ni/ /ku mud ut+pal pad+ma yis/ /bskus par nges so gzugs can ma/ /dga' ba mchog tu dga' bar brjod/ /nyams ldan yid 'ong nyams dang ldan/ /gzi brjid nga rgyal skyes pa ste/ /de gsum khyad 'phags dag dang ldan/ /go bin+da khyod khyim 'ongs pa/ /deng bdag dga' ba skyes pa gang / /dga' ba 'di ni slar yang khyod/ /dus kyi 'ongs na 'byung bar 'gyur/ /de 'dra'i dga' ba bi du ras/ /gzhan las min zhes rigs par smra/ /de la gus pa tsam gyis ni/ /rab brtan 'phrog byed shin tu dges/ /zla ba nyi ma rlung sa mkha'/ /sbyin sreg byed dang me dang chu/ /zhes pa'i gzugs rnams rab 'das nas/ /lha khyod lta bar nged kyis ci/ /mngon sum byas pa'i lha la ni/ /rgyal po dga' ba'i go cha yis/ /dga' ba rab tu gsal byas gang / / de yang dga' bar rjes rtogs bya/ /shi ba zhes pa pha rol du/ /gang dang 'grogs phyir bdag 'chi 'dod/ /a ban+ti de bdag gis ni/ /skye 'di nyid la ci ltar 'thob/ /dga' ba nyid ni sngar bstan te/ /dga' ba sgeg pa nyid 'gyur 'di/ /gzugs mang dag dang ldan pas na/ /'di ni nyams dang ldan pa'i tshig / gang gis nag mo bdag mdun nas/ /skra nas bzung ste drangs gyur pa/ /bsten dka' sdig can thob pa 'di/ /skad cig 'tsho bar 'gyur ram ci/ /zhes pa 'jigs sde dgra dag la/ /lta ba'i khro ba mchog gi mthar/ /'dzegs pa drag po'i bdag nyid 'gyur/ /'di ni ro dang ldan pa'i tshig / mtshor bcas sa las ma rgyal zhing / /rnam mang mchod sbyin ma byas la/ /slong la nor rnams ma sbyin par/ /sa skyong du bdag ci ltar 'gyur/ /zhes pa spro ba khyad 'phags dag /dpa' bo'i nyams kyi bdag nyid gnas/ /nyams ldan nyid du nus pa la/ /tshig 'di dag ni dbang ba yin/ /lus 'jam gang la pad+ma yi/ /mal stan dag kyang rtsub byed na/ /lha mo de ni ro khang dag /sreg za ldan par ji ltar nyal/ /zhes pa snying rje rgyas pa yi/ /rgyan nyid du ni rab tu bshad/ /de bzhin gzhan yang ngam pa dang / /bzhad gad rmad byung 'jigs rung ngo / /rgyu mas brgyan pa'i srin po rnams/ /mgo med ro dang lhan cig tu/ /lag pa sbyar bas khyod dgra'i khrag /'thung zhing 'thung zhing gar byed do/ /grogs mo me tog ma rnyings ma/ /khyod kyi nu ma'i ngos la ni/ /sen rjes gsar pa chags pa 'di/ /stod g.yogs kyis ni sgrib par mdzod/ /dga' tshal ljon pa 'di rnams kyi/ /'dab ma gsar pa gos bzang dang / /me tog do shal la sogs rgyan/ /yal 'dab khang par gyur pa mtshar/ /rtse mo dag la me gnas pa/ /brgya byin gyi ni rdo rje gang / /'di ni dran na lha min gyi/ /bud med mngal ni lhung bar byed/ /snyan pa grong ba nyid min skyes/ /brjod bya yi ni nyams dag bstan/ /'dir ni nyams brgyad dbang byas te/ /tshig rnams nyams dang ldan par bshad/ /bdag ni gnod pa byed po zhes/ /khyod kyi snying la 'jigs ma byed/ /bdag gi ral gris phyir phyogs rnams/ /nam yang gzhom par 'dod ma yin/ /zhes pa skyes bu dregs ldan 'gas/ / g.yul du gzhan ni bkag byas nas/ /gtong ba de lta bu la sogs/ /gzi brjid ldan pa shes par bya/ /'dod don dngos su ma brjod par/ /de nyid 'grub par bya ba'i phyir/ /rnam pa gzhan dag brjod pa gang / /de ni rnam grangs brjod par 'dod/ /sa hA kA ra'i snye ma rnams/ / gzhan gyi gsos 'dis za bar byed/ /de ni bdag gis bzlog par bgyi/ /khyed gnyis dal gyis 'dug par mdzod/ /grogs mo skyes phran phrad byas nas/ /de dag dus sar dga' ba yi/ /dga' ston bsgrub tu gzhug 'dod pas/ /'ga' zhig de nas song bar gyur/ /bya ba 'ga' zhig rtsom pa la/ /skal pa yi ni stobs las kyang / /de yi sgrub byed phun tshogs gang / /de ni kun du phan par brjod/ /khengs pa gzhom phyir de yi ni/ /rkang pa dag la phyag 'tshal ba/ /bdag la phan phyir skal pa yi/ /'brug gi sgra ni grags par gyur/ /bsam pa'am ni 'byor ba yi/ /chen po nyid ni bla med gang / / de ni rgya che zhes pa yi/ /rgyan du mkhas pa rnams kyis brjod/ /rA ma Na yi mgo gcod pa'i/ /bya ba'i khur yang bzod pa gang / /rA g+hu'i bu des bla ma yi/ /bka' las 'da' bar nus ma gyur/ /rin chen rtsig pa las 'phos pa'i/ /gzugs brnyan brgya yis bskor gyur pa/ /lang+ka'i dbang phyug de kho na/ /any+dza na bus dka' bas shes/ /snga mar bsam pa'i bdag nyid che/ /'dir ni mngon par 'byor pa brling / /rgya che gnyis po 'di dag kyang / /rab tu gsal bar mtshon pa yin/ /bsnyon dor dag ni bsnyon byas nas/ /don gzhan cung zad ston pa ste/ /'dod pa dag ni mda' lnga pa/ /ma yin sgro ldan stong phrag yod/ /tsan+dan zla 'od dal bu yi/ /lho phyogs dri yi bzhon pa 'di/ /me yi rang bzhin spro ba ste/ /gzhan gyi ngor ni bsil zhes grags/ /'dod ldan gyis ni gzhan la de/ /bsil ba khas blangs bdag nyid la/ /tsha ba nyid du rab bstan phyir/ /'di ni yul la bsnyon pa'o/ /bdud rtsi zags pa'i 'od zer can/ /zla ba zhes par bdag cag 'dod/ /don gyi bdag nyid 'di ni gzhan/ /dug zag zer dang ldan pa nyid/ /ces pa zla ba'i zla ba nyid/ /bzlog nas don gzhan bdag nyid ni/ /'dod pas gzir bas brjod pa'i phyir/ /'di ni rang bzhin bsnyon dor ro/ /bsnyon dor des ni sngar nyid du/ / dper brjod rnams la rab bstan to/ /'di yi bsnyon dor dbye ba rnams/ /mtshon bya dag la rgya cher mtshon/ /sbyar ba gzugs gcig ldan pa'i tshig /du ma'i don can nyid du 'dod/ /de tshig tha dad min pa dang / /tha dad tshig 'dra rnam pa gnyis/ /u da ya gnas mdzes pa can/ /dkyil 'khor la chags rgyal po 'di/ /mr-i du ka raH'jig rten gyi/ /yid ni rab tu 'phrog par byed/ /rgyal rigs lam la mi gnas pa/ /rgyal po skyon gyi 'byung gnas dang / /bsdongs nas skyon mang dag gis bdag /dga' med 'di ltar cis ma mnar/ /rgyu skar lam la rab gnas pa/ /mtshan mor byed pa dang bsdongs nas/ /srod la yis ni bdag 'di ltar/ /dga' ba med par cis ma mnar/ /dpe dang gzugs can 'gog pa dang / /ldog pa can sogs spyod yul can/ /sbyor ba gang du bstan zin te/ /gzhan pa 'ga' zhig bstan par bya/ /'ga' zhig bya ba tha dad min/ /gzhan pa bya ba 'gal min yod/ /'gal ba'i las can dag kyang gzhan/ /sbyar ba des pa can yang yod/ /nges pa 'gog pa'i gzugs brjod dang / /'gal med 'gal ba can yang ste/ /de dag rnams kyi rang bzhin yang / /dpar brjod dag las gsal par 'gyur/ /'khyog cing yid 'ong rang bzhin can/ /chags pa gsal bar ston byed ma/ /mdzes mas bskul ba'i mig dang ni/ /pho nya mos kyang mdza' bo 'gugs/ /yid 'ong chags pa 'phel bar byed/ /'jam zhing myos pa'i gdangs snyan can/ /khu byug sgra ni thos gyur te/ /dkar min mig can dag la 'khyud/ /chu ma dang sbyor 'phel ba yi/ /dmar ba rab tu ston byed cing / /tsha zer can ni nub gyur te/ /lus skyes dag ni rnam par rgyas/ /ral gri nyid la nis+t+riM sha /gzhu nyid la ni 'khyog po nyid/ /mi bdag 'di yi mA rga Na/ /mda' rnams nyid la gnas pa yin/ /khyod kyis bsrungs la tsher ma ni/ /pad+ma'i yu ba nyid la mthong / /'on kyang chags can 'khrig pa la/ /'khyud par gyur pa rnams la'ang mthong / /sa 'dzin ka Ta ka mang zhing / /gzi brjid ldan pa des par dar/ /mkhas pa skye dgu'i bdag 'byung ste/ /rje bo nus pa 'dzin yang de/ /nyams med yin yang chos sbyong min/ /rgyal po yin yang zad mi shes/ /bde byed yin yang lag 'gro med/ /lha nyid yin yang rnam sad min/ /khyad par rab tu bstan pa'i phyir/ /yon tan rigs dang bya ba sogs/ /gang du ma tshad nyid bstan pa/ /de ni khyad par brjod par 'dod/ /me tog gzhu can dag gi mtshon/ /rtsub pa ma yin rno ba'ang min/ /de ltar na yang 'di yis ni/ / sa gsum dag las rgyal bar 'gyur/ /'di dag lha yi bu mo min/ /dri za'i rigs las byung ba'ang min/ /de lta mod kyi tshangs pa'i yang / /dka' thub gzhom pa bsgrub par nus/ /khro gnyer dag ni ma bsdus shing / /so yi g.yogs kyang ma bskyod la/ /mig kyang dmar por ma gyur pa/ /dgra yi rigs ni nyams par byed/ /shing rta med cing glang po'ang med/ /rta med rkang thang med par yang / /zur mig nyid kyis bud med rnams/ /'gro ba gsum po dag las rgyal/ /shing rta 'khor lo gcig pa dang / /kha lo pa nyams rta mi mnyam/ /de lta na yang gzi byin can/ /nyi mas 'gro ba gsum po mnan/ /gzi byin can zhes khyad par las/ /'dir ni rgyu yi khyad par brjod/ /rim pa 'di yis gzhan gyi ni/ /dbye ba rnams kyang brtag par bya/ /brjod 'dod yon tan khyad 'phags dang / /mtshungs par byas nas 'ga' zhig ni/ /bstod smad don du bsgrags pa gang / /de ni mtshungs par sbyor ba bshad/ /gshin rje lus ngan chu lha dang / /mig stong pa dang khyod nyid kyang / /'jig rten skyong ba zhes pa'i sgra/ /yul gzhan med par rnam par 'dzin/ /ri dgas mig dang 'grogs pa dang / /glog gi rtse dga' dag dang ni/ /sprin gyi rtsom pa'ang rang bzhin gyis/ /skad cig gnyis par mi gnas so/ /'gal zla sgrub byed slad du ni/ /gang du dngos po 'gal ba rnams/ /yang dag 'grogs par rab bsten pa/ /de ni 'gal ba bshad de dper/ /ngang pa'i rgyal po rnams dag ni/ /myos pa'i gdangs snyan ca co 'phel/ /rma bya rnams kyi sgra dag ni/ /yid 'ong nyid dang bral bas nyams/ /dbyar skyes chu 'dzin dag gis ni/ /nam mkha' yul ngan lta bur spyod/ /chags pa yis kyang 'gro ba yi/ /yid ni kun du chags par gyur/ /rked pa phra zhing ro smad sbom/ /mchu dmar mig ni dkar ba min/ /lte ba dma' zhing nu ma mtho/ /bud med lus kyis su ma bcom/ /pad rtsa'i lag pa chu shing brla/ /pad+ma'i gdong dang ut+pal mig /khyod kyi gzugs kyis bdag cag rnams/ /gdung nus min nam lus can ma/ /skyed tshal rlung gis rab bskyod pa/ /tsUta tsam pa ka yi rdul/ /reg pa min yang 'gron po yi/ /mig las mchi ma 'dzag par byed/ /snyan par sgrogs ma khyod kyi mig / nag dkar rjes su dmar ba yang / /rna ba dag la brten pa ni/ /su yi yid brtan nyid du 'gyur/ /nag mo snyan sgrogs khyod kyi mig /srid sgrub la chags lta byed kyang / /rna can dag la brten pa ni/ /su yis yid brtan nyid du 'gyur/ /de ltar rgyan 'di rnam pa ni/ /du ma nyid du rab rtogs bya/ /skabs min 'dod pas bstod pa ni/ /skabs su ma bab bstod pa yin/ /gzhan mi bsten pa'i ri dgas rnams/ /'bad med rnyed par sla ba'i nor/ /chu dang rtswa yi myug sogs kyis/ /nags rnams su ni bde bar 'tsho/ /rgyal po'i rjes 'brang nyon mongs pa/ /skyo ba'i yid dang ldan pa yis/ / skabs su ma bab nyid du 'dir/ /ri dgas spyod tshul 'di dag bsngags/ /gal te smad pa bzhin bstod nas/ /skyon ltar snang ba'i yon tan nyid/ /gang du nye bar thob gyur pa/ /'di ni zol gyis bstod pa bshad/ /rA ma dka' thub pa yis kyang / /'byung po'i 'dzin ma 'di las rgyal/ /de nyid rgyal po khyod kyis kyang / /'di la khyod ni rgyags ma mdzad/ /sngon gyi skyes bu las bcad nas/ /dpal 'di khyod kyis yongs su spyod/ /rgyal po bu ram shing pa'i rgyud/ /khyod kyis 'di ni rigs sam ci/ /khyod kyi btsun mo sa gzhi ni/ /lag 'gro'i longs spyod dag la chags/ /ci slad khyod kyi nga rgyal ni/ /mchog gi mtha' ru 'dzegs par gyur/ /de ltar nye bar mtshon pa las/ /sbyar ba can dang gzhan dag gi /zol gyis bstod pa'i rnam pa rnams/ /rab tu rgya che mtha' dang bral/ /gal te don gzhan 'jug pa yis/ /de dang mtshungs pa'i 'bras bu 'ga'/ /mchog gam mchog min ston byed pa/ /de ni nges par bstan pa yin/ /nyi ma 'char ba nyid kyis ni/ /pad+ma rnams la dpal ster byed/ /phun tshogs rnams kyi 'bras bu dag /grogs po rjes 'dzin bstan pa'i phyir/ /zla ba'i zer gyis reg pa na/ /mun pa'i phreng ba nub par gyur/ /'phral la rgyal po dang 'gal rnams/ /ngan pa'i mthar gyur gsal bar byed/ / yon tan las rnams lhan cig gi/ /dngos po brjod pa lhan cig brjod/ /don rnams bsnol ba gang yin pa/ /yongs brjes yin te de dag dper/ /da ni mtshan mo 'di dag rnams/ /bdag gi dbugs dang lhan cig ring / /zla ba'i rgyan ldan ma rnams kyang / /bdag lus nyid dang lhan cig skye/ /'gron po rnams kyi rmongs pa dang / /lhan cig tsU ta'i dog pa rgyas/ /de dag mchi ma dang mnyam du/ /ma la ya yi rlung dag 'bab/ /khu byug sgrogs pa'i skal bzang dang / /nags kyi rlung ni dri bzang dang / /dpyid nyid skye bo'i kun dga' rnams/ /lhan cig dag tu 'phel bar 'gyur/ / de ltar lhan cig brjod pa yi/ /dper brjod 'ga' zhig 'dir byas te/ /yongs su brjes pa'i rang bzhin yang / /nges par bstan pa cung zad bya/ /sa spyod rnams la mtshon bsnun pa/ /ster byed khyod kyi lag pa yis/ /de dag grags pa ku mud dkar/ /yun ring dag tu bsgrubs pa phrog /mngon par 'dod pa'i dngos po la/ /smon pa shis brjod ces bya dper/ /ngag yid spyod yul ma yin pa'i/ /snang ba dam pas khyod la srungs/ /rjes 'gro med dang the tshom can/ /dag ni dpe rnams nyid la bstan/ /dpe yi gzugs can dag kyang 'dir/ /gzugs can rnams la nges par bsgrags/ /rab rtog cha shas 'di yang ni/ /rab rtog dag gi dbye ba nyid/ /tha dad rgyan rnams bsres pa ni/ /spel ma dag tu brjod pa ste/ /yan lag yan lag can dngos kyi/ /skabs dang thams cad stobs mtshungs nyid/ /ces pa'i lugs gnyis spel ma yi/ /rgyan dag la ni mtshon par bya/ /mdzes ma khyod kyi bzhin gyi dpal/ /pad+ma dag gis 'gog par byed/ /mdzod dang yu ba phun tshogs pa/ /'di la bya dka' ci zhig yod/ /rang bzhin brjod dang 'khyog brjod ces/ /ngag gi ngang bzhin tha dad gnyis/ /'khyog por brjod pa thams cad la/ /phal cher sbyar bas dpal rgyas byed/ /snyan ngag mkhan bsam dgongs pa ste/ /snyan ngag grub par gang gnas pa/ /rab sbyor yul gyi yon tan can/ /de ni dgongs pa can zhes brjod/ /dngos po yis ni tshig rnams kun/ /phan tshun phan par byed pa nyid/ /don dang bral ba'i khyad par rnams/ /ma byas gnas su bsngags pa dang / /brjod rim stobs las dngos po ni/ /zab mo dag kyang gsal ba ste/ /de kun dgongs pa'i dbang gyur phyir/ /de dag dgongs pa can zhes rig /gang yang mtshams sbyor yan lag dang / /'jug pa'i yan lag mtshan nyid sogs/ /lung gzhan dag tu brjod 'di yang / /rgyan nyid du ni bdag cag 'dod/ /rgya che mtha' yas rab bsdus tshad du gyur pa yi/ /rgyan rnams dag gi lam 'di nyid ni rnam par phye/ /brjod pa'i yul las 'das par yongs su gnas pa yi/ /khyad par rnams ni goms pa rnams kyis dbye bar nus/ /snyan ngag me long las le'u ste gnyis ba'o// // bar ma chod dang bar chod bdag /yi ge tshogs pa bskor ba ni/ /zung ldan de yang rkang pa yi/ /dang po bar mtha' spyod yul can/ /gcig gnyis gsum bzhi rkang pa yi/ /zung ldan rnams kyi rnam rtog ni/ /thog ma bar mtha' bar dang mtha'/ /bar dang thog ma thog mtha' kun/ /kun du dbye ba las gyes pa/ /de dag dbye ba shin tu mang / /de la bya sla bya dka' yang / /'ga' zhig dag ni bstan par bya/ /grogs mo mdza' bo'i skye bo la/ /khengs pa 'di dang 'grogs ma byed/ /bslus pa'i mgrin pa nas 'khyud la/ /de nyid ngo tsha ldan par gyis/ /ngang pa rnams kyi dregs 'joms pa/ / sprin gyi sgra yis myos byed ni/ /dga' ma dang bcas bud med kyi/ /khengs bral yid la 'jug par byed/ /chu gter bzhi yi ske rags can/ /sa yi lag dpya 'dzin la mkhas/ /khyod nyid thob nas da lta ni/ /skye dgu rgyal po bzang ldan gyur/ /rkang thang shing rta glang po dang / /rta dang bral ba khyod kyi dgra/ / 'ga' zhig nags dang gzhan dag ni/ /lha rnams dag gi gnas su song / /chu skyes gdong ldan mig gnyis kyi/ /rnam 'phrul yid 'ong 'di la ni/ /dpyid kyi bung ba'i rnam 'phrul gyis/ /co 'dri byed pa ci yin smros/ /'dod pa g.yul du dpa' bo yi/ /glang po'ang bzung dka' rta med kyis/ / gang phyir bdag cag mthar byas pa/ /de phyir khyod kyi rnam gnon mtshar/ /g.yul du rno bas mdzes pa yi/ /mi bdag khyod 'dra nor 'dzin ni/ /rgyal bar gyur te nor 'dzin gyis/ /tshim pa dag kyang thob par gyur/ /sa hA kA ra'i me tog gsar/ /bdag yid mchog tu sred ldan byed/ /khu byug myos pa dag gi sgra/ /yid du 'ong ba 'dis kyang ngo / /khyod la dmigs pa'i re ba dang / /ma bral 'di la de 'dra yi/ /gnas skabs lus ni 'jig byed pas/ /bud med 'dzeg nus ji ltar min/ /yal 'dab gsar pas mdzes pa yi/ /ljon pas drangs pa'i gzhon nu rnams/ /pad+mar mngon phyogs bung ba yis/ /mig nas bzung ste 'gugs par byed/ /myos pa'i bzhad ni rab 'jug pa/ /rdzing gi chu la dkar ba yi/ /ngang pa 'di yi ca co yis/ /bdag ni mthar byed zas su byed/ /dri bral zla ba'i cha dag dang / /lhan cig ma la ya yi rlung / /bdag dga' mi byed 'dod pa ni/ /mi bzad dug gi rjes su 'gro/ /bdag bstan mi 'dod khengs pa can/ /do shal dang ldan 'phrog byed ma/ /lus med nyid kyi dngos po khyod/ /phra 'gyur bdag 'grogs bde rgyas mdzod/ /khyod kyi gdong gis bdag las rgyal/ /chu yi rgyun gyur bung ba can/ /'dab ldan pad+ma gtam med las/ /ji ltar mi rgyal bdag dga' ma/ /nyi ma'i 'od kyis dmar gyur pa'i/ /chu lha mo bzhin pA Ta la/ /dmar ba'i gos can dri bzang gnas/ /bdag gi dga' ma dga' bar bya/ /de ltar rkang pa'i thog ma yi/ /zung ldan bar chod med rnam rtog /de ni bar du chod pa yi/ /rnam rtog 'ga' yang bstan par bya/ /sa hA kA ra las 'khrungs nyid/ /yid 'ong dri bzang ldan pa yi/ /dpyid kyi e Na'i mig can gyi/ /khengs pa sgra yi lhag mar byed/ /dga' ma'i lag pa shin tu dmar/ /rgyud mangs la bsnun rnam 'phrul la/ /phrag dog ldan par mdza' bo la'ang / /rna ba'i ut+pal gyis snun byed/ /rlung gis gar bsgyur sprin gyi phreng / /mtha' dag chu ni 'thor bar byed/ /de rjes mjug ma rab bslangs pa'i bye/ /mjug sgro ldan pa gar dag byed/ /'dod ldan ma dag khyod kyi yid/ /khengs rtsod rang nyid nyams 'gyur te/ /nI pa'i kA li kA mthong nas/ /gnas skabs ci la reg gyur tam/ /rtse dga'i ri yi zla shel gyi/ /thang 'di la ni rab 'dzegs nas/ /mdongs mtha' mchog tu mdzes pa yi/ /gtsug phud can 'di gar byed do/ /gang zhig sbrul mchog steng gnas shing / /phag pas bzung ba'i sa 'di ni/ /rgyal po'i tshogs las rab blangs nas/ /da lta khyod kyi lag pas bzung / /g.yul du dgra yi glang po rnams/ /khyod kyi lag pa mthar byed kyis/ /bsnun pas khrag ni rab zags pa/ /thun mtshams dag gi sprin bzhin mdzes/ /rlung gis ri yi 'khri shing bzhin/ /gzhan gyi sde ni dpa' bas bcom/ /mtha' ni gshed song ba bzhin/ /rdul gyis nam mkha' khyab par gyur/ / legs ldan chu 'dzin gsar pa'i 'od/ /lha min dag gi rigs nyams byed/ /sbyin ldan glang po mchog bcom pa/ /khyab 'jug des khyod rtag tu srungs/ /khyod kyi mag skra bung ba 'dra/ /gdong ni pad+mar phrag dog byed/ /dpal gyi bzhin du rab myos pa/ /khyod kyis su zhig rtsi mi byed/ /rgya che rin chen rgyan dang ldan/ /rgyags pas mig 'khor dza g+ha na/ /chung ba min pas mdza' bo ni/ /dga' ba ldan pa bya bar bzod/ /gzhan gsos rnams kyis bsgrags pa dang / /khyod kyis brjod pa'i sgra dang ni/ /lho yi phyogs kyi rlung gis kyang / /bdag yid 'phrogs so pho nya mo/ /rked pa phra zhing rdul zags pas/ / gdong gi zla ba rab mdzes pa/ /bud med chang gis ngo tsha bcom/ /skyes pa'i lus la 'dzeg par byed/ /de ltar bar chod zung ldan gyi/ /rab tu dbye ba 'di yang bstan/ /bar chod mchod bdag nyid kyi/ /rnam rtog kyang yod 'di lta ste/ /kA li ka 'phyang yal ga can/ /sA la blta bar des mi nus/ /ba ku lar chags bung ba dang / /grogs mos pad+ma can yang min/ /sprin nag chen po ldan pa'i dus/ /snang dang rgyu skar kun mi mtshon/ /gsang mthor dga' ba sgrog byed pa'i/ /dus 'dra su yis lta bar nus/ /thun gsum dbang gyur ring ba yi/ /mtshan mo 'di yis bdag shi zhig /gang la bdag song srog gzir 'gro/ / de ni blo med bdag gis bcom/ /zhes rkang dang po zung ldan gyi/ /rnam rtog lugs ni 'di 'dra ste/ /'di lta kho nar zung ldan gyi/ /rnam rtog gzhan pa rnams kyang ngo / /spros pas 'jig phyir dbye ba ni/ /mtha' dag brjod par mi 'dod de/ /de la bya dka' mngon 'dod gang / /'ga' zhig dag ni bstan par bya/ / brtan dang dbang po rab bsdoms pa/ /khyod ni sdom brtson phyir mi nyams/ /sgyu med khyod kyi bde 'jig par/ /mi 'gyur 'di snyed ched du'ang 'gyur/ /rgyal po mdun sar sa yi lha rnams dag gi zhal/ /chang gis ma bcom nor gyis mdzes pas rab bstod pa'i/ /khyod kyi yon tan rab gsal chags bdag skye dgu la/ /phung po nyid gyur lha rnams su ni mi 'gro min/ /dam pa'i spyod lam bag med khyod kyi dga' ma gang / /dga' ba'i dga' ston dga' ba'i khyad par du myos ma/ /de yis 'dir ni 'od ldan rgyan rnams gzung bar 'os/ /bdag la mdzes ldan nyid kyi 'bras bu 'ga' yang med/ /mgon po khyod ltas dud pa'i ro ni mi mkhyen te/ /dman pa nyid dang mchog nyid dag ni nges par 'gal/ /gang zhig dman pa rnams ni khyod la mgos 'dud cing / /de dag kho na dman pa'i ro des mchog tu gyur/ /rol pa'i 'dzum dkar dag dang 'jam por smra ba dang / /chung ngu'i lta ba dang ni lci ba'i 'gro ba dang / /kun du glal dang dza g+ha na dag ston pa des/ /bsnun pa des na bdag ni 'tsho bas dman par gyur/ /dpal ldan mi shod brtan ldan gang gi bdag nyid ni/ /'chi med lam dang mnyam pa'i tshad ldan rab dud pa'i/ /'gro ba rgyas byed mchod ldan tshad med ming can ni/ /'jal byed tshad med mang po bkod la phyag dag mdzod/ /bcud la zhugs te brang gis dga' byed cing / /snying por gyur pa'i bcud mang rab tu 'dzin/ /bzhad kyi rjes mtshungs sgra ldan dril chung can/ /des na bcud len snying po min pa rig /brtan rgyas tshul dang tshul min brtag pa 'di yis ni/ /tshul med dge ba'i thabs la long rnams rnam par thul/ /bzhon pas ma 'gro rgyal ba'i theg 'gro dag gis gang / /tshul ma thob rnams thob pa dag la brten pa bskyed/ /mtshungs med lci ba'i mtshon ldan g.yul du sa skyes ni/ /rgyal mtshan la gnas dpa' bo bya yi sgra yis bros/ /nyi ma bzhin du drag po'i 'phrog byed 'di mdun du/ /'jigs rung g.yul du dgra rnams lugs dang mtshungs par rig /mtshan mo tshad med thun ldan dpal med tshad med cing / /mthar ni bgrod bya min pas zad nad la brten pa/ /cha yi rang bzhin nad can 'bral ba'i nad kyis gzir/ /skal ldan ma 'di snying rje'i rang bzhin 'bral med mdzod/ /ngal med khyod kyi blo la mnyam nyid bzlog pa nyid/ /ma yin bla med rjes su mi mthun 'gro ma yin/ /gdung med kyis thob mchog gi rjes su mthun pa nyid/ /dga' med 'dod med rnams kyi bzhed pa dag las rgyal/ /dus kyi dus kyi mgrin nag ngo nag nag po nyid dag 'dzin/ /snyan sgrog dag gi sgrog byed bung tshogs sprin nag dus ltar gnag / dus kyi mi pa zung dus cha'i gtso bo chu 'dzin gyis mdzes su/ /dka' bas 'tsho ba'i bud med len bu'i phreng bas mgo nag bsten/ /rkang pa gnyis kyi mtha' thog ni/ /rab sbyar zung ldan gnas skabs 'di/ /brjod pa'i khongs su 'du mod kyang / /rang dbang nyid kyis 'dir bshad do/ /myos pas chags pa nye bar gnas kyang bud med des/ /bdag nyid ma sbyar bdag gi sdig pas khro ba yi/ /ro dang sbyar te lus med dag gis gdungs gyur kyang / /bdag ni 'di snyed gdung ba'i slad du ma bsdad do/ /phyed bzlas yang dag sbyar ba yin/ / 'di la dbye ba gsum du 'dod/ /rkang pa bzlas pa'ang du ma yi/ /bdag nyid de dag dpes gsal bya/ /skyes bu brtan gang snying stobs can/ /khengs pa rab spangs spang bya ste/ /khyod kyis mchog tu 'bad pa yis/ /yid brten bya'o 'bad med ma/ /khyod kyi bgrod pa khyab bdag gzi byin gyis/ /yang yang rab sbyar mdzes pa med pa yi/ /mi rnams tshul dang nga rgyal nyams byas nas/ /gdungs shing kye ma byas zos rnam par bcom/ /sgra yis sprin bgrod dbyar skyes rma bya yi/ /tshogs rnams mdzes pa nyid du nye bar 'gyur/ /rlung gi tshogs stug bral ba chur sgrogs kyang / /tshogs rnams sgra dang bral ba nyid du gyur/ /'tsho ba'i dbang phyug dud pa'i brang la kho mo ni/ /dman zhing khengs pa nges par bsgrub pa'i dbang gyur ma/ /brtse ba spang ba'i bdag nyid yid kyi 'o ma 'dzin/ /gnyis po nye bar gtad nas kun du ma 'khyud do/ /lha rnams 'dun sar stobs med rnam par brgyan pa ru/ /khyod kyi yon tan pad rtsa dri ma med pas 'dzegs/ /de ni phyi nas grong bzang rnams kyis phun sum tshogs/ /brgyan pa'i bud med dag dang rnam par rtse zhing spyod/ /snyan par smra dang lus rked dud dang nu gnyis mas/ /khyod las gzhan pa su zhig ma bcom de yi phyir/ /'byung po lus ldan skyon las grol ba khyod la sogs/ /bgrang ba la ni ming med nye bar 'gro ma yin/ /khyod kyi dmag dpung khyab 'jug lta bu go bgos pa/ /mtshon rnon ldan pa dpa' bo dag gis phyogs rnams su/ /grags pa dang ni rdul dag rgyas byed g.yul gyi ni/ /dgra rigs lus bral gzi med rgyags pa nyams par byed/ /dran ldan bdag las phan pa'i tshig gcig mnyan par mdzod/ /khyod kyi lag pa dpal dang lhan cig lag 'gro yis/ /sa yi dkyil 'khor rnam 'dzin de phyir sa gzhi 'dzin/ /rang lag rig nas rgyags par rgyas pa yod mi byed/ /'dod pa'i me gang khengs pas rab bsgrubs pa/ /skad cig dang mnyam rgyas te pad+ma'i mig / ro med khyod kyi bde ba de dag ni/ /kun nas nyams pa nyid du cis mi byed/ /mdud khyod ni 'jig rten bdag gyur tshe/ /mthu yis mthu ldan rin chen mang gis btud/ /de phyir gsar ba'i btung ldan mchod sbyin ni/ /nges pa nyid du chad par ma gyur to/ /dpung gi glang po rnams ni gzhan dang gzhan/ /stobs ldan sgra sgrogs rab tu brgyud pa yis/ /thang la rdul sgrub nam mkha' 'gog byed cing / /g.yul gyi stobs ldan mchog tu gzhan la rgyug /khyod ltar mnyam par ma bzhag srid par ni/ /rnam gnyis mi mnyam phan pa med rnams tshig /log par gyur pa sgrub byed mi mnyam pa/ / sbrul bgrod mtshungs la mi dad ngo tsha med/ /dgra yi mdzes nyams rgyal po'i sde yis btud/ /skyes mchog u mas phan rje dpal med min/ /go bgos u mas btud pa mda' 'dra ste/ /mchod thob dam pa rdul med mi mdzes min/ /de ltar rkang pa lan cig dang / /gnyis dang gsum dang bzlas pa bstan/ /tshigs bcad gnyis dang ldan pa'i don/ /tshigs bcad bzlas pa yin te dper/ /zlum zhing rgyas pa'i lag pa can/ /grogs min rab tu 'joms byed pa/ /rnam 'dren khyod kyis bstan pa'i sa/ /mi mtshungs pa 'di 'jigs pa med/ /'dren pa dag dang bral gyur cing / /lag pa sreg khang nye gyur pa/ /rang grogs kyis btang dgra yis ni/ /mtshungs med ba 'di mngon par bsten/ /rkang bzhi rnam pa gcig pa gang / /zung ldan chen por brjod pa yin/ /de la'ang bzlas pa mthong ste de/ /zung ldan bya ba gzhan yin no/ /mnyam med dpal ldan mtshungs med ma/ /khengs ldan ngal ba dag dang ni/ /khengs pa mnyam ldan tshul min dag /dor ba'i tshad 'dis 'grogs su chug /'dzin ma 'dzin ma'i rnam 'dzin 'dzin ma spyod rnams kyi/ /lag pa rnam gnon mi dman 'phral la dgra 'joms pa/ /myur ba dang ldan mchod pa'i khur ni brten pa yis/ /sa gzhi dag ni rim pas bsrung bar bzod pa yin/ /rkang phyed tshigs bcad spyod yul can/ /lugs las bzlog pas bskor ba ni/ /zung ldan lugs las bzlog pa'i phyir/ /lugs las bzlog pa zhes pa bshad/ /gang la 'bad byas phra mo nyid/ /de ni bdag gis thob mdza' bo/ /re 'dod med pas byed med lha/ /bstod nas 'ongs khyod 'gro gyur cig / nA da ldan bdag rang gi blo/ /myos min 'dod pa 'ga' yang med/ /dul ba 'joms pa'i 'dod pa yis/ /rang dbang gdung ba dag kyang med/ /yid 'gro bdud skyong lcags mi dman/ /gang zhig dbang gyur skye bo 'joms/ /gang la bdag song skye bo brgya'i/ /dbang gyur de la byon zhes smras/ /ston 'di yis ni gzir gyur cing / /brten mi shes pa de yis ni/ /nyin mo'i nad dag ma thob min/ /mya ngan bral slad khengs ma byed/ /gal te phyed kyi yi ge rnams/ /gcig gis bar chod gzugs gcig nyid/ /de ni bya dka'i de nyid rig /ba lang gcin zhes smras te dper/ /chang 'dra'i mig ldan zur mig gi/ /mtshon gyis 'dod pa 'di rgyal te/ /gal te bdag kyang sdig zad na/ /'dod pa la ni thal mo sbyor/ /gal te tshigs bcad phyed 'khor na/ /phyed du 'khor ba zhes par brjod/ /gal te kun du 'khor ba na/ /kun du bzang po zhes par 'dod/ /ma dud yid 'byung khyod dar phyir/ / sde ni khangs ldan ma yin min/ /yang na 'jigs las dpag med na/ /bdag cag sdig pa'i rang bzhin no/ /zla dang nad ring cis min gang / /dga' ma bdud kyi rgyar ma lhung / /bgrod bzlog sgra med dpal med ma/ /stobs ldan sgyu gnas 'chi slad du'o/ /dbyangs dang gnas dang yi ge rnams/ /nges pa gang 'di bya dka' la/ /bzhi la sogs pa rab bstan 'di/ /gzhan ni bya sla dag tu 'dod/ /rig byed rnam thar tshig smras pa'i/ /glu dang dga' ba yams nad 'jigs/ /longs spyod nad dang dga' dang rmongs/ /dge ba'i yul du sems 'dod zung / /sa las rnam rgyal brtan pa sgrub byed pa'i/ /brtul zhugs la dga' mchog rtogs ku ru pas/ /g.yul du rang gi rigs kyi dgra rnams ni/ /che bar bkag cing lci bar 'dar bar byas/ /dpal gzi ngo tsha grags dang / /blo lugs tshig dang dga' dag /khyod la 'phel ba nyid gang / /'di gnyis lha dbang la med/ /zla dang nad ring cis min gang / /dga' ma bdud kyi rgyar ma lhung / / bgrod bzlog sgra med dpal med ma/ /stobs ldan sgyu gnas 'chi slad du'o/ /'dren byed kun dga'i skyed byed ma/ /rgyu skar tshogs rnams dag gi gnas/ /sprin med mkha' la lus can ma/ /lan cig mig gnyis sbyin pa mdzod/ /nu sdug khyod gdong len bu yi/ /'khri shing bung ba ltar sngo zhing / / 'dren byed pad+ma'i gzugs brnyan can/ /zla ltar mdzes pas su ma bcom/ /rtag tu sdig med kun dga' mchog /lus dud dag dang 'grogs la chags/ /btsun mo lus med kyis 'gongs te/ /'jigs pa du mas reg par 'gyur/ /ha ha mi sgrogs mkha' 'gros mtshan/ /ri 'gro dbang 'khyog ldan mi chags/ /'khyog sgrogs gang+gA'i chur 'jug sdig /bya rog 'joms pa mtho ris 'gro/ /kyai kyai sgra sgrogs ru ru'i brang / /'joms sdig pa ri ri char 'gro/ /nga can ma 'ong bdag gi ma/ /bya rog rma bya'i sgra bsgyur ci/ /lha rnams dga' bar byed pa'i lha/ /rig byed la smod 'gog pa pos/ /lha min dga' byed bcom pa na/ /sgra yis mtho ris gang bar gyur/ /mkhas pa lha dang lha min la/ /'gro stobs ldan pa'i byin legs can/ /chang gi ro ldan gshol 'dzin de/ /bzhad kyi sgra ldan mtsho ru song / /'di yis bdag cag rnams kyi bzhin/ /bzhin gyis nges par ma bcom min/ /bdag srog mi dman 'di dang sbyor/ / rje bo skyes min sdig med min/ /de ltar bya dka'i lam la yang / /rim pa cung zad kun du bstan/ /gab tshig dag gi rnam pa yi/ /lugs kyang rab tu bstan par bya/ /rtsed mo'i 'dun sar bzhad gad dang / /de shes tshogs su gsang smre dang / /pha rol kun du rmongs byed la/ /gab tshig dag ni nyer mkho ldan/ /tshig mtshams sbyar bas don sbas pa/ /kun du tshogs pa zhes par brjod/ /gzhan la grags pa'i sgra dag gis/ /gang du slu ba slu byed nyid/ /sbyor ba shin tu 'khrugs pa yis/ /rmongs byed rim pa bral ba ste/ /gang la don rtogs dka' ba yi/ /tshig phreng de ni rab bcom yin/ /phal ba'i don bkod tshig dag gis/ / bsdebs pa dag ni mthun pa'i gzugs/ /mtshan nyid yod tsam nges tshig dang / /bden pa'i tshig ni rtsub mo'o/ /gang du grangs kyis kun rmongs par/ /byed pa grangs nyid ces bya ste/ /gang du ngag don rnam pa gzhan/ /snang ba de ni rab brtags nyid/ /gang du ming la sna tshogs don/ /btags de ming du 'dus pa nyid/ /tshig ni chos mtshungs la reg pas/ /don gzhan bsgrib pa bsgrib pa'o/ /sgra yi rnam grangs bkod pa yis/ /bsgrub pa dag ni mthun pa'i sgra/ /gang zhig mngon sum don bstan yang / /rmongs phyir de ni rmongs zhes bya/ /gang la sbyor phreng bdag nyid can/ /de ni yongs su 'phrog ces bya/ gang du rten ni gsal byed de/ /brten pa sbas pa gcig bsgrib pa'o/ /gang du gnyis ka sbas gyur pa/ /de ni gnyis ka bsgrib pa'o/ /gang la mtshan nyid sna tshogs 'dres/ /de ni yongs su 'dres zhes bya/ /'di rnams gab tshig bcu drug ste/ /sngon gyi slob dpon rnams kyis bstan/ /gab tshig ngan pa gzhan dag kyang / /bcu bzhi de dag rnams kyis brjod/ /ngan pa mtshan nyid med gang de/ /skyon gyis yongs bgrang bya min par/ /rig nas slar yang bdag cag gis/ /legs pa kho na brjod par bya/ /mA yAHgo ra sems kyis ni/ /shes pa med la ci slad khro/ /gnas min du ba 'di yis ni/ /ci byed kun du mig dmar ma/ /kub+dza bstan pa khyod kyi ni/ /dga' ba ji ltar 'phel gyur pa/ /'chi med bu mor co 'dri la/ /mi mo sbyad pas de lta min/ /yu bar 'o byed pad can gyi/ /ngang pa tsher ma rtsub mo can/ /zhal la sgra snyan sgrogs byed cing / /lus ni 'dar bar byed cing mchus/ /bu mo khyod kyi rkang mdzes la/ /rkang gdub rgyas pa sgra snyan sgrogs/ /mngon sum nyid du gyur pa 'dir/ /bdag gi srog ni brtan ma yin/ /gang gi yal ga yal 'dab la/ /me tog dmar po'i dog pa can/ /'khri shing yal 'dab lnga pa ni/ /skyed mos tshal 'dir bdag gis mthong / /lha rnams lha yi khang pa ru/ /so so'i 'od kyis dul bur rgyu/ /dri bzang rdzing bur myos byas pa/ /de rnams da ni rgan mo bzhin/ /sna ldan dbus na gsal byed bzhis/ /yongs su rnam par brgyan pa yi/ /grong khyer 'ga' yod gang zhig na/ /mi bdag mi brgyad ming can yod/ /chig rnams rab tu 'khrugs pa dang / /mgo bo dud cing mig dman pa/ /'dug kyang 'dar ldan bdag la ni/ /rgan mo rjes su mi brtse'am/ /mig mi brtan ma sa ldan 'ga'/ /dang po rA dza zhes par sgrogs/ /sa nA ta na yang ste 'di/ /rgyal po ma yin khyab 'jug min/ /rdzas bral mi ni btang byas nas/ /nor ldan rnams can bgrod pa gang / /sna tshogs skyogs brgyas 'jig rten 'gugs/ / gzung dka' smad 'tshong ma yin no/ /khyod kyi sa min ming mthun gang / /rab gyur skra ming can las rgyal/ /de yis ding bdag mchog tu ni/ /sred ldan byed do snyan sgrogs ma/ /'dod ldan dag ni mal stan la/ /khro bas phyir bzlog nyal bar 'gyur/ /chags pas de bzhin nyid nyal te/ / dal bu yis ni kha dag sbyor/ /bya rgyal zas skyes dgra yis ni/ /bla ma'i 'od kyis bcom skye'o/ /kha 'joms grogs min 'dzin pa yis/ /khyab pa'i mkha' la mngon par dga'/ /nam yang mtshon dang bud med kyi/ /nu ma'i dkyil 'khor la ma reg /mi ma yin pa 'ga' zhig ni/ /lag ni 'bras med yin no lo/ /su zhig gang dang 'gogs pa yis/ /bya ba thams cad nye bar ni/ /thob cing zas kyi dus dag tu/ /gal te mthong na 'dor bar byed/ /ha ya ga dza b+ha Ta can/ /sde 'di gal te ma rgyal na/ /mA tri ka med nged kyi bu/ /'di ni yi ge shes kyang blun/ /de ni ming du 'dus par bsres/ /bslus pa yi ni gzugs dang ldan/ /de bzhin nyid du gzhan gyi yang / /'dres pa'i rim pa shes par bya/ /don nyams don 'gal don gcig pa/ /the tshom can dang rim pa nyams/ /sgra nyams gcod mtshams nyams pa dang / /sdeb sbyor nyams dang mtshams sbyor bral/ /yul dus sgyu rtsal 'jig rten dang / /lung rigs dag dang 'gal ba ste/ /skyon bcu de dag snyan ngag la/ /snyan ngag mkhan gyis spang bar bya/ /dam bca' gtan tshigs dpe nyams pa/ /zhes pa 'di yang skyon min nam/ /phal cher dpyad par dka' ba nyid/ /sbyor ba de yi 'bras bu ci/ /tshogs pa'i don gyis stong pa gang / /de ni don nyams zhes par 'dod/ / myos pa smyon pa byis pa yi/ /brjod las gzhan du de skyon no/ /'di ni rgya mtsho 'thung byed de/ /bdag ni de ring rgas pas gzir/ /sprin 'di rab tu sgrogs byed de/ /'phrog byed sa srung dag la dga'/ /'di sems rnal du mi gnas pa'i/ /mngon par brjod la smad min te/ /gzhan du de lta bu la sogs/ /snyan ngag mkhan po su zhig sbyor/ /ngag gcig gis ni rab sbyar ba/ /snga ma phyi ma gzhan 'joms pa/ /'gal ba'i don can nyid kyi skyon/ /don 'gal zhes par rab tu brjod/ /dgra rigs mtha' dag 'joms pa dang / /sna tshogs khur ni rgyal gyur cig /'byung po kun la brtse ba can/ /khyod la dgra ni su yang med/ / mngon par chags ldan sems la ni/ /skabs de 'ga' zhig yod pas na/ /gang la 'gal ba'i don can gyi/ /tshig kyang mngon par 'dod par 'gyur/ /gzhan gyi bud med la sred pa/ /'phags pa dag gis ga la rigs/ /de yi so sgrib g.yo ba dag /bdag ni nam zhig 'thung 'gyur ram/ /don nyid dam ni sgra la yang / /khyad par med par sngar brjod pa/ /gal te slar yang rab bsgrags pa/ /de ni don gcig par 'dod dper/ /sred pa sred byed bu mo rnams/ /de yi len bu'i 'od zer can/ /chu 'dzin glog dang ldan pa dang / /zab mo sgra sgrogs 'di dag go/ /rjes su brtse sogs khyad par las/ /gal te 'ga' zhig brjod 'dod na/ /yang brjod pa la skyon med de/ /'di ni rgyan du rigs pa yin/ /'dod pa skabs min 'khon pa yis/ /bud med mchog 'di bcom par gyur/ /yan lag kun mdzes bcom par gyur/ /'jam par sgrog ma bcom par gyur/ /nges pa'i don du rab sbyar ba'i/ /tshig rnams nyid kyis gal te na/ /the tshom skyed par byed na 'di/ /the tshom can zhes rab tu brjod/ /re 'dod dga' ba lta ba yi/ /ro la mig g.yo grogs mo dag /rgyang na 'dug pa'i ma ma 'dis/ /'di 'dra blta bar bzod ma yin/ /'di 'dra the tshom slad nyid du/ /gal te 'ga' zhig tu sbyar na/ /'di ni rgyan nyid du 'gyur gyi/ / de la skyon med 'di lta ste/ /ma smad de ni lus skyes kyi/ /'jigs pas gzir zhing rtsub mo yi/ /dus nyid kyis ni bzung ba mthong / /bdag cag khyod la re ba ci skye/ /'dod pas gzir ram tsha bas gdungs/ /zhes pa nges med byed pa'i tshig /rtsed 'jos skyes pa 'khrugs par ni/ /bya phyir pho nya mos smras so/ / mdor bstan rjes su yon tan don/ /gal te rjes bstan ma byas na/ /rim pa nyams par mngon brjod pa'i/ /skyon du de ni bshad de dper/ /'gro ba rnams kyi gnas pa dang / /sprul dang 'jig rgyu ma skyes pa/ /bde 'byung sred med chu skyes kyi/ /skye gnas can gyis khyed rnams srungs/ /'brel pa nges par shes pa'i rgyur/ /gang yang gal te 'bad byas na/ /rim pa bzlas kyang skyon min par/ /mkhas pa rnams ni smra ste dper/ /gnyen gtong ba dang lus gtong dang / /yul gtong zhes pa gsum po la/ /dang po tha ma nyon mongs ring / /bar pa skad cig gdung ba'o/ /mtshon bya mtshan nyid lam la mtshon/ / tshig sbyor mchog min 'dod pa ni/ /sgra nyams yin te mchog rnams dag /'dod pa nyid ni skyon ma yin/ /sa gzhi rgya mtsho'i ska rags can/ /rgyal chen khyod la dpung pas srungs/ /zhes pa shes 'dod med pas na/ /tshig 'di la ni nyams yod min/ /lho yi ri las nyer btud pa'i/ / rlung gis tsU ta'i rkang 'thung ni/ /yal 'dab rol par bskyod pa yis/ /myu gu mdzes dang ldan par byed/ /ces sogs bstan bcos bdag nyid che/ /lta la g.yel ba'i sems ldan pas/ /sgra nyams bzhin du snang mod kyi/ /skal bzang nam yang gtang ma yin/ /tshigs bcad rnams la nges pa'i gnas/ / tshig gi gcod mtshams ngal gsor rigs/ /de nyams gcod mtshams nyams pa ste/ /nyan po dga' min skyed de dper/ /bud med rnams kyis yang dag brjod pa'i cho ga ro nyams med la 'dir/ /mchog rnams dang 'grogs mi dbang nyi ma'i rigs 'dis lta byed la sogs skyon/ /bya dang bya min ma tshang med la lung nyid kyis ni lta byed cing / /mi bdag 'di yi dbang gyur sa 'dzin zhes pa de ltar sbyor ba yod/ /ji ltar tshig mtha' phyis pa la/ /lhag ma tshig nyid du nges pa/ /de bzhin mtshams sbyor rnam 'gyur mtha'/ /tshig nyid ces ni brjod pa yin/ /de lta na yang rna bar rtsub/ /snyan ngag mkhan rnams mi sbyor te/ /rgyal po de yi rgyal mtshan gyi/ /tog gi chu 'dzin bskul zhes 'di'o/ /gang du yi ge chad lhag dang / /lci yang ji lta bzhin mi gnas/ /de ni sdeb sbyor nyams pa ste/ /skyon 'di shin tu smad pa'o/ /zla ba'i 'od zer rab bsil bas/ /reg ces yi ge nyung ba nyid/ /sa hA kA ra'i lo 'dab gsar pa rnams/ /snum zhes yi ge lhag pa'o/ /'dod pas mda' rnon ri dgas mig can la/ /rnam par 'phong zhes lci ba ji bzhin min/ /mdzes pa'i mig can dag la myos byed kyi/ /mda' rnon lhung zhes yang ba ji bzhin min/ /bsdus pa brjod par mi 'dod ces/ /tshig la mtshams sbyor med pa dang / /ya phyis la sogs rgyu med pa/ /de ni mtshams sbyor bral zhes bstan/ /mkha' dang bdag gi yid la yang / /rlung ni dal bur rgyu ba yis/ /bud med 'gram pa'i dkyil 'khor la/ /rdul gyi chu rgyas sel bar byed/ /mtshan mo 'di la zhes 'di 'dra/ /mkhas pas nyams par rigs mi byed/ /ri nags yul 'khor la sogs yul/ /nyin mtshan dus drug la sogs dus/ /'dod pa'i don la bstan pa yi/ /gar dang glu sogs sgyu rtsal te/ /'byung ba rgyu dang mi rgyu ba'i/ /'jug pa 'jig rten ming can no/ /rigs pa gtan tshigs rigs bdag nyid/ /thos bcas gsungs pa lung nyid de/ /snyan ngag mkhan po bag med las/ /de der ji ltar grags pa bzhin/ /min par gal te rab zhugs na/ /'di ni yul sogs 'ga' zhes brjod/ /ga bur rkang 'thung la reg pa'i/ /ma la ya rlung dri bzang can/ /ka ling ka yi nags skyes pa'i/ /glang po dag ni ri dgas rigs/ /tso la kA pa ri ngogs pa/ /a ka ru ni nag po sngo/ / zhes pa yul dang 'gal ba yi/ /tshig gi 'jug pa 'di 'dra ste/ /pad+ma can ni mtshan mo rgyas/ /nyin par ku mud ldan pa gsal/ /dbyid ni ni tsu la rab rgyas/ /sos ka dag ni sprin gyis gtibs/ /ngang pa'i sgra ni dbyar mnyan 'os/ /ston ni rma bya myos pa ste/ /dgun ston nyi ma dri ma med/ /dgun ni tsan+dan bsngags par 'os/ / zhes pa 'di 'dra dus dang ni/ /'gal ba'i lugs dag bstan pa yin/ /sgyu rtsal dag dang 'gal ba'i lam/ /cung zad bstan par bya ste dper/ /dpa' ba sgeg pa dag gi dngos/ /brtan pa khro dang ya mtshan no/ /dbyangs bdun rdzogs pa 'di dag ni/ /tha dad lam du rab tu 'jug /'di ltar sgyu rtsal drug cu bzhir/ /'gal ba legs par rtogs par bya/ /sgyu rtsal yongs su bcad pa las/ /de yi rang bzhin gsal bar 'gyur/ /glang po dag ni ral pa g.yo/ /rta yi rwa ni rno ba yin/ /e raN+Da ni snying pos lci/ /seng ldeng ljon pa snying po med/ /ces pa 'di ni 'jig rten pa/ /nyid dang 'gal ba kun gyis smad/ /rigs pa zhes bya gtan tshigs kyi/ /rig pa dang 'gal bstan par bya/ /bde gshegs 'dus byas 'jig par ni/ /gsungs pa bden mod de lta na'ang / /tsa ko ra yi mig can de/ /bdag gi snying la da dung gnas/ /ser skyas gnas la yod min nyid/ /rab tu skye bar nye bar brjod/ /med pa nyid ni bdag cag gis/ /rab tu skye bar mthong gang phyir/ /rigs pa dag dang 'gal ba yi/ /lugs ni kun du bstan par bya/ /de nas lung dang 'gal ba yi/ /'jug pa dag ni bstan par bya/ /me ni bzhag pa ma yin yang / /bu skyes bram ze ma nyams pa'i/ /spyod pas brgyan pa 'di dag ni/ /be+e shwa na ri mchod sbyin byed/ /'di ni cho ga ma byas kyang / /bla ma dag las rig byed bklags/ /rang bzhin dag pa'i shel dag ni/ /'du byed gzhan la ltos pa med/ /skyon ni mtha' dag 'di la yang / /res 'ga' snyan ngag mkhan mkhas pas/ /skyon gyi grangs las rab 'das nas/ /yon tan lam ni rnam par 'dzin/ /rgyal po de yi mthu yis ni/ /de yi skyed tshal lha rnams kyi/ /ljon pa yal 'dab gos dmar dang / /ldan pa dag gi gnas su gyur/ /rgyal po 'jigs pa gsal byed pa/ /ka dam pa yi rdul dang 'grogs/ /'dab bdun las 'khrungs skyod byed cing / /drag po yi ni rlung dag rgyu/ /khyogs kyis rab bskul skrag pa yi/ /skye bo bud med khas brjod glu/ /stabs mi mnyam pas 'dod ldan gyi/ / chags pa dag ni 'phel bar byed/ /zla ba'i 'od zer rab bsil bas/ /bsreg bya 'dzin pa 'dod ldan ni/ /bud med dang bral nyon mongs kyis/ /'khrugs pa 'di yis rtsi bar byed/ /gzhal bya yin yang gzhal bya min/ /cha ldan yin yang cha ldan min/ /gcig nyid yin yang gcig nyid min/ /sna tshogs gzugs khyod la phyag 'tshal/ /skya bseng bu lnga dag gi ni/ /chung ma lnga len bu mo ste/ /dag pa rnams kyi mchog tu 'gyur/ /'di 'dra lha yi sgrub byed do/ /sgra don rgyan ni bkra ba dang / /bya sla bya dka' dag gi lam/ /snyan ngag rnams kyi yon tan skyon/ /de ltar mdor bsdus rab tu bstan/ /sgrub byed bstan pa'i lam 'dis skyon dang yon tan dag / rab tu rtogs pa'i blo can skal bzang dbang gyur pa'i/ /tshig dang mngon par 'grogs byas chang mig ma dag dang / /lang tsho can bzhin dga' dang grags pa thob par gyur/ /snyan ngag me long las le'u ste gsum pa'o// //slob dpon dbyug pa can gyis mdzad pa'i snyan ngag me long gi gzhung 'di phul du byung ba'i yon tan dpag tu med pas spras pa bla ma dam pa chos kyi rgyal po rin po che ba dang / dpon chen shAkya bzang po'i bka' lung gis rgya gar gyi mkhan po snyan ngag mkhan chen po shrI la k+Sh+mI ka ra dang / bod kyi lo tsA ba dge slong shong ston gyis dpal sa skya'i gtsug lag khang chen por bsgyur cing zhus te gtan la phab pa/ de rjes dpang lo tsA ba blo gros brtan pas go dka' ba'i cha shas su gyur pa rnams dang don che ba rnams la 'gyur bcos bgyis pa la phyis snye thang blo brtan bzhi pas legs par 'gyur bcos bgyis pa lags so// //

CLOSE WINDOW