CLOSE WINDOW

D4267: de kho na nyid bsdus pa'i dka' 'grel
བོད་ཡིགe-texts based on the ACIP/ALL Input

@##/ /rgya gar skad du/ tatwa saM gra ha pany+dzi ka /bod skad du/ de kho na nyid bsdus pa'i dka' 'grel/ 'phags pa 'jam dpal gzhon nur gyur pa la phyag 'tshal lo/ /gang zhig shes bya'i rgya mtsho bsrubs pa'i stobs kyis gzhan don dmyal ba la sogs kyi/ / sdug bsngal zhi byed de nyid rtogs pa'i bdud rtsi thugs rjes 'gro ba tshim mdzad pa/ /de nyid rig mchog 'gro ba rnams kyi ston pa de la gus pas phyag 'tshal nas/ /de nyid bsdus pa 'di yi dka' 'grel ches rab gsal ba rab tu brtsam par bya / /bdag 'dra'i blo gros blun po rnams kyis sngon med dngos po nam yang brjod mi nus/ /mkhas pas nyin re lam 'di mang du ma dpyad pa yang 'ga' tsam gang na yod/ /'on kyang bsod nams 'phel bar 'dod pas rang don mchog gi bdag gi blo gros 'di/ /dge ba 'phel ba'i 'bras bu can gyi de nyid goms pas 'di byed pa la brtson/ /bstan bcos 'di la ni rtogs pa dang ldan pa rnams dang por brjod par bya ba dang / dgos pa nges par sngon du 'gro ba can gyi 'jug pa dang / chen po dag la rab tu dang ba ni legs pa thams cad 'thob pa'i rgyu yin no zhes nges par byas nas bcom ldan 'das la dang ba bskyed pa'i don dang / nyan pa po bstan bcos 'di la gus pas 'jug par bya ba'i phyir rang gi ston pa la mchod pa'i cho ga sngon du 'gro bas/ gang gis rten cing 'brel par 'byung / /zhes bya ba la sogs pa'i tshigs su bcad pa de nyid bsdu bar bya zhes bya ba 'di'i bar dag gis bstan bcos 'di'i brjod par bya ba dang dgos pa bstan to/ /'di ltar gal te 'di'i brjod par bya ba ma bstan na de'i tshe smyon pa la sogs pa'i tshig dang 'dra bar don med pa nyid srid pas rtogs pa dang ldan pa/ nyan pa la yang 'jug par mi 'gyur ba'i phyir 'di'i brjod par bya ba gdon mi za bar bstan par bya ba yin no/ /de bzhin du brjod par bya ba yod na yang mngon par 'dod pa'i dgos pa dang bral ba'i bstan bcos ni bya rog gi so brtag pa la sogs pa bzhin du rtog pa dang ldan ba nyan pa la yang gus par mi byed pa'i phyir/ de lta bas na dang por de la 'jug pa'i don du dgos pa brjod par bya'o/ /'jug pa'i yan lag la gtso bo nyid dgos pa yin te/ de don du gnyer bas nyan pa po'i skye bo bstan bcos la 'jug pa'i phyir ro/ /de yang brjod byas stong pa'i bstan bcos kyis bsgrubs par mi nus pa'i phyir/ bstan bcos kyi dgos pa'i thabs bstan pa'i don du brjod par bya ba smras so/ /dgos pa de yang rjes su mthun pa'i thabs can du bstan par bya ba'i phyir de bsgrub pa nyams su len par mi nus pa ni ma yin te/ de lta ma yin na dgos pa yod na yang 'jog po'i gtsug gi rims nad sel ba'i rin po che/ rgyan gyi man ngag gi bstan bcos bzhin du de bsgrub par mi nus par rig nas rtog pa dang ldan pa 'jug par mi 'gyur ro/ /de nyid kyi phyir/ 'brel pa dang ni rjes mthun thabs/ /skyes bu'i don ni rjod byed dag /yongs brtags dbang du byas yin gyi/ /de las gzhan pa'i dbang byas min/ /zhes bshad do/ /de lta bas na bstan bcos la 'jug par bya ba'i phyir brjod par bya ba la sogs pa bstan to/ /'on te rtog pa dang ldan pa rnams kyi 'jug pa ni nges pa nyid las yin zhing / nges pa yang tshad ma nyid las yin la/ 'dir dgos pa'i tshig 'di ni brjod par bya ba la sogs pa phyi rol gyi don la tshad ma ma yin te/ de dang de la 'brel pa med pa'i phyir te/ 'di ltar re zhig de'i bdag nyid kyi mtshan nyid kyi 'brel pa ni med de/ shin tu tha dad pa'i phyir ro/ /de las byung ba'i mtshan nyid kyi 'brel ba yang med de/ tshig ni 'dod pa tsam dang rjes su 'brel ba nyid yin pa'i phyir ro/ /tshig 'brel pa med pa'i phyir shes par 'dod pa'i don la shes pa skyed bzhin pa na tshad mar rigs pa yang ma yin te/ ha cang thal bar 'gyur ba'i phyir ro/ /tshig ni brjod par 'dod pa la tshad ma nyid yin mod kyi/ 'on kyang de rtog pa dang ldan pa 'jug pa'i yan lag ni ma yin te/ 'di ltar ji ltar brjod par 'dod pa gang dag yin pa de dag de kho na bzhin du sgrub pa'i dus su byed pa ni ma yin te/ dam bcas na yang slu ba'i bsam pas rnam pa gzhan du bstan bcos byed pa srid pa'i phyir ro/ /gzhan yang bstan bcos kyi dgos pa tshad ma gzhan gyis rtogs pa gang yin pa de la dgos pa'i ngag nye bar bkod pa don med pa nyid yin te/ de ni tshad ma gzhan kho na las 'jug pa'i phyir ro/ /gang yang bstan bcos kyi dgos pa tshad ma gzhan gyis gnod pa de la yang don med pa gsal rab pa nyid de/ de ni tshad ma gzhan gyis gnod pa nyid kyi phyir 'jug pa mi srid pa'i phyir ro/ /'di gnyi ga yang khas blangs nas brjod kyi/ gang gis 'di dag yod pa'am med par rtogs par 'gyur ba tshu rol mthong ba rnams kyis 'jug pa las sngar dgos pa la sogs pa'i sgrub par byed pa'am/ gnod par byed pa'i tshad ma ni cung zad kyang med de/ de ni 'jug pa las rtogs pa yin pa'i phyir ro/ /'on kyang bstan bcos kyi dgos pa la sogs pa ma rtogs pa gang yin pa de la ngag 'di brtsam par bya ba yin na/ rtog pa dang ldan pa de yang ngag 'di las the tshom nyid skye'i/ nges pa ni ma yin te/ tshad ma med pa'i phyir ro/ /the tshom de yang ngag nye bar bkod pa las sngar yang yod pa'i phyir ro / /dgos pa la sogs pa'i ngag nye bar bkod pa don med pa ma yin nam zhe na/ de lta bas na 'di la brjod par bya ste/ re zhig rtogs pa dang ldan pa rnams kyi 'jug pa ni nges pa nyid las yin zhing zhes smras pa gang yin pa de ni mi bden te/ zhing pa la sogs pa bzhin du the tshom las kyang 'jug pa mthong ba'i phyir ro/ /'di snyam du zhing pa la sogs pa'i 'byung bar 'gyur ba 'bras bu la the tshom za ba yin mod kyi/ 'on kyang de dag la 'di'i 'bras bu bsgrub pa'i nges pa yod pa nyid yin no/ /des na de dag nges pa sngon du 'gro bas 'jug go snyam du sems na/ de ni yang dag pa nyid ma yin te/ 'dir gang zhig gang gi don du 'jug pa de ni de la the tshom za na yang 'jug par 'gyur ro zhes bya ba de tsam zhig skabs su bab pa yin no/ /gang gis sgrub par byed pa'i yul la nges pa srid pa'i phyir nges pa sngon du 'gro ba can gyi 'jug par brjod pa zhing pa la sogs sgrub par byed pa'i don du de dag la 'jug pa yang ma yin no/ /'o na ci zhe na/ 'bras bu'i don du de dag de la 'jug la/ 'bras bu de la gegs byed pa la sogs pa srid pa'i phyir nges pa yod pa ma yin no/ /de lta bas na de dag the tshom sngon du 'gro ba nyid kyis 'jug pa yin no/ /yang dang po'i 'jug pa ni sgrub par byed pa nges pa'i don du 'jug pa gang yin pa de la yang sgrub par byed pa nges pa med de/ de'i don nyid kyi phyir de la 'jug pa'i phyir ro/ /gzhan yang de dag gi sgrub par byed pa nges pa yang 'byung bar 'gyur ba'i 'bras bu la ltos nas 'di 'bras bu ma 'ongs pa'i rnam pa de lta bu gdon mi za bar sgrub par 'gyur ba yin no zhes de lta bu'i ngo bo yin pa'am/ yang na gegs byed pa dang lhan cig byed pa ma tshang ba med pa yin na gdon mi za bar 'di mngon par 'dod pa'i 'bras bu bsgrub par nus pa de lta bu'i ngo bo yin grang / de la re zhig dang po ni rigs pa'i ngo bo ma yin te/ lhan cig byed pa mtshang ba dang gegs byed pa nye ba srid pa'i phyir 'ga' zhig dmigs kyang sA lu la sogs pa rnam pa de lta bu'i 'bras bu ma 'ongs pa la sgrub pa mi byed par mthong bas/ thams cad du dogs pa mi ldog pa'i phyir te/ tshogs pa'i 'bras bu nus pa rnams/ /'gyur ba dang 'brel 'bras bu la/ /ma nges pa ni nyid yin te/ /gegs byed pa dag srid phyir ro/ /zhes gang bshad pa yin no/ /ci ste gnyis pa'o zhe na/ de'i tshe 'di ni ches rigs pa ma yin te/ tshad ma sngon du 'gro ba can gyi 'jug pa thams cad ni de lta bu'i ngo bo yin pa'i phyir ro/ /de nyid kyi phyir slob dpon gyis/ 'di'i rung ba nyid ni gegs byed pa med na'o zhes de ltar rung ba nyid rjes su dpag pa la khyad par smra ba yin no/ /'on kyang 'bras bu yang tshul 'dis nges pa'i phyir sgrub par byed pa nyid ni nges pa ma yin no/ /de lta bu'i 'jug pa la don dam pa'i 'bras bu nges pa sngon du 'gro ba can gyi 'jug pa 'grub pa yang ma yin te/ tshu rol mthong ba rnams kyis gegs byed pa la sogs pa med pa nyid nges par mi nus pa'i phyir ro/ /'di snyam du don dam par gegs byed pa med par nges par mi nus mod kyi/ 'on kyang gal te gegs byed pa med pa yin na/ de'i tshe nges pa kho nar 'di las 'bras bu thob par nges pa yin no zhes bya ba rnam pa de lta bu nges pa tshad ma sngon du 'gro ba can gyi 'jug pa la yod pa nyid yin gyi/ tshad ma ma yin pa sngon du 'gro ba can la ni yod pa ni ma yin no/ /de lta ma yin na tshad ma dang tshad ma ma yin pa sngon du 'gro ba can dag gi 'jug pa la khyad par med par 'gyur ro/ /rnam pa de lta bu'i nges pa de yang tshig las phyi rol gyi don la 'byung bar mi 'gyur ba kho na ste/ de dang de la 'brel pa med pas tshad ma ma yin pa'i phyir ro snyam du sems na/ 'di ni bden te/ 'on kyang gal te tshig las rtogs pa dang ldan pa 'ga' zhig 'jug pa med pa de grub pa yin na de'i tshe de thams cad 'gyur ba yin no/ /ji tsam du mngon sum du ma gyur pa'i 'bras bu la 'ga' zhig gi 'jug pa dang ldog pa'i phan yon chen po dang ngan song dag thos pa'i phyir lung gi tshad ma lam brten par gnas par mi nus pa 'ga' zhig dag tshig gi 'jug pa mthong ngo / /de tsam gyis ni de dag rtogs pa dang ldan pa las nyams pa yang ma yin te/ thabs khyad par can nyid kyis 'jug pa'i phyir ro/ /gang gi phyir lung las ma rtogs pa'i shin tu lkog tu gyur pa'i don gyi yul la 'jug pa'i thabs gzhan yod pa ma yin te/ lung las gdon mi za bar 'jug par bya ba yin pa'i phyir ro/ /'gal ba'i lung yongs su 'dzin par byed pa na rtog pa dang mi ldan par 'gyur gyi/ gnod pa med pa'i lung la brten nas 'jug pa ni ji ltar rtog pa dang mi ldan par 'gyur te/ de nyid yang dag pa'i thabs yin pa'i phyir ro/ /lung khyad par du 'phags pa'i skyes bus byas pa nyid kyis don ji lta ba bzhin nges par bzung nas de la nges pa nyid kyis 'jug pa yin no zhes kyang brjod par mi rigs te/ khyad par du 'phags pa'i skyes bu nyid tshu rol mthong ba rnams kyis nges par mi nus pa'i phyir ro/ /rtog pa dang ldan pa yin na yang lung las mi 'jug pa yang ma yin pa de bzhin du 'di la yang gnod pa med pa'i dgos pa la sogs pa'i tshig thos pa las bstan bcos la 'jug pa rnams ni rtog pa dang mi ldan par mi 'gyur te/ thabs nyid kyis 'jug pa'i phyir ro/ /'di la 'jug pa'i thabs gzhan yod pa ma yin te/ 'jug pa las sngar bstan bcos kyi don shin tu lkog tu gyur pa'i phyir ro/ /tshig ni brjod par 'dod pa la tshad ma yin zhes bya ba la sogs pa smras pa gang yin pa de yang snying po med de/ gang gi phyir ji ltar brjod par 'dod pa'i don la bstan bcos kyis mthar phyin par dmigs so/ /de bzhin du 'di la yang res 'ga' ji lta ba bzhin du dam bcas pa'i don mthar phyin par 'gyur ba yin no snyam du rig nas rtog pa dang ldan pa 'jug pa gang gis bzlog med par dogs pas bzlog par rigs pa yang ma yin te/ don la the tshom zab las kyang 'jug pa'i phyir ro/ /gzhan du na tshad ma sngon du 'gro ba can gyi 'jug pa la yang 'bras bu med par dogs pa srid pa'i phyir su yang 'jug par mi 'gyur ro/ /gnod pa thob pa'i dogs pas kyang mi 'jug pa ma yin te/ bstan bcos las mi 'dod pa'i 'bras bu thob pa mi srid pa'i phyir ro/ /mngon par 'dod pa'i 'bras bu mi 'thob pa'i srid pa'i mtshan nyid kyi gnod pa thob par dogs pa yin no zhes kyang brjod par mi nus te/ de ni 'jug pa thams cad la mtshungs pa nyid kyi phyir ro/ /gang yang bstan bcos kyi dgos pa la sogs pa ma gtogs pa gang yin pa de la ngag 'di brtsam par bya ba yin no zhes gang smras pa kho bo cag kyang de skad du smra'o/ /'on kyang skyes bu de'i the tshom ni dgos pa'i ngag nye bar bkod pa las gang yang yod mod kyi/ de ni ci 'di dgos pa dang bcas pa yin nam/ 'on te ma yin zhes de ni dgos pa'i spyi la yin no/ /dgos pa tsam la the tshom za ba las 'jug par rigs pa yang ma yin te/ thams cad la 'jug pa nyid du thal bar 'gyur ba'i phyir dang / dgos pa tsam yang don du gnyer bar byas pa ma yin pa'i phyir ro/ /'on kyang so sor nges pa'i sgrub pa'i thabs nye bar len pa'i rgyu dgos pa'i khyad par gyi yul can gyi the tshom las 'jug pa mthong ste/ sgrub pa don du gnyer ba rnams 'ga' zhig kho na la 'jug pa ni dgos pa'i khyad par 'dod pa nyid yin pa'i phyir ro/ /gang gis bstan bcos gzhan yongs su spangs nas so sor nges pa'i bstan bcos yongs su 'dzin par byed pa dgos pa'i tshig las sngar dgos pa'i khyad par gyi yul la the tshom skyed pa'i rgyu 'ga' zhig yod pa yang ma yin no/ /'on te dgos pa'i khyad par don du gnyer ba nyid kyi skyes bu dgos pa'i khyad par la the tshom skye ba'i rgyu sngar yod pa nyid ma yin nam/ 'di ltar dgos pa'i khyad par don du gnyer ba'i yid dang ldan pa ches dang por ci 'di kho bo cag gis mngon par 'dod pa'i dgos pas dgos pa dang bcas pa yin nam/ ci ste gzhan gyis dgos pa dang bcas sam/ 'on te dgos pa med pa yin zhes de lta bur 'gyur ba nyid yin te/ de'i sgrub par byed pa dang gnod par byed pa'i tshad ma med na de rigs pas thob pa nyid yin pa'i phyir dang / dgos pa'i khyad par ston par byed pa'i bstan bcos gzhan dmigs pa'i phyir ro/ /des na dgos pa'i khyad par gyis yul la the tshom sngar yang yod pa nyid yin pa'i phyir dgos pa'i tshig nye bar bkod pa don med pa yin no zhe na/ de ni yod pa ma yin te/ dgos pa'i khyad par don du gnyer ba yang the tshom gyi khyad par gyi rgyur 'gyur ba yin mod kyi/ 'on kyang de thams cad la mngon sum du gyur pa ni ma yin te/ skyes bu'i don la mi mkhas pa rmongs pa'i blo can kha cig la mngon du mi 'gyur ba'i phyir te/ 'di ltar thar pa ni skyes bu'i don mchog nyid du grub mod kyi/ ci ste yang / gang dag mi mkhas pa kha cig skyes bu'i don gyi mchog de la skyes bu'i don nyid du mi shes pa yod de/ de la sngar dang po nyid du don du gnyer bar mi 'gyur ro/ /dgos pa'i khyad par 'dod pa mngon du ma gyur pa rnams ni dgos pa'i khyad par gyi yul la the tshom skye ba'i rgyur rigs pa yang ma yin te/ 'bras bu rnams ni rgyu yod pa la rag las pa'i phyir ro/ /'ga' zhig gi mngon sum du 'gyur ba yin mod kyi/ 'on kyang sgrub par byed pa gzhan spangs nas so sor nges pa'i sgrub pa nye bar len pa'i rgyu the tshom gyi khyad par gyi rgyur mi 'gyur ro/ /thams cad sgrub par byed pa dang gnod par byed pa'i tshad ma med pas de'i rgyu nyid du rigs pas thob pa'i phyir ro/ /de tsam gyis 'jug par rigs pa yang ma yin te/ thams cad la 'jug par thal bar 'gyur ba'i phyir ro/ /'ga' zhig gis kyang thams cad du 'jug par mi nus pa de'i phyir 'bras bu'i khyad par don du gnyer ba rnams kyis kyang so sor nges pa'i sgrub par byed pa yongs su 'dzin pa'i rgyu mtshan med pas yal bar 'dor bar bya'o/ /de'i phyir so sor nges pa'i sgrub pa yongs su 'dzin pa'i rgyud dgos pa'i khyad par gyi yul la the tshom bskyed pa'i phyir shin tu lkog tu gyur pa'i don gyi yul la lung byed pa bzhin du 'bras bu'i khyad par don du gnyer ba rnams so sor nges pa'i sgrub pa gzung ba'i phyir dgos pa'i ngag brjod par bya ba nyid yin te/ 'di ltar des ni bstan bcos 'di'i don gyi khyad par bstan gyi gzhan gyi ni ma yin no/ /des na 'dis so sor nges pa'i sgrub pa'i bsgrub bya 'bras bu'i khyad par gyi yul can gyi the tshom skyed par byed do/ /nyan pa po de yang res 'ga' bdag gi don gyi khyad par 'di sgrub par 'gyur ro zhes shin tu lkog tu gyur pa'i don la lung gis bskyed pa bzhin du dgos pa'i khyad par gyi yul can dgos pa'i tshig gis bskyed pa'i the tshom las 'jug pa yang yin pa'i phyir des na dgos pa'i ngag nye bar bkod pa yin no/ /'di ni gdon mi za bar de lta bu yin par shes par bya'o/ /de lta ma yin na shin tu lkog tu gyur pa'i don gyi yul can la lung byed pa yang don med par 'gyur te/ 'bras bu'i khyad par don du gnyer ba rnams ni sgrub par byed pa dang gnod par byed pa'i tshad ma med par sbyin pa la sogs pa la dang por yang the tshom de yod pa'i phyir ro/ /'on kyang the tshom ni mtho ris la sogs pa'i 'bras bu la mi mkhas pa rnams la mi skye ba nyid de/ de'i rgyur 'gyur ba'i 'bras bu'i khyad par don du gnyer ba mngon du ma gyur pa'i phyir ro/ /gang dag la skye ba de dag la yang rdo la sogs pa za ba thams cad du yang 'jug pa rgyu nyid du thams cad du thun mong ma yin pa'i phyir ro/ /de yongs su spangs nas sbyin pa la sogs pa so sor nges par yongs su 'dzin pa'i rgyur mi 'gyur ro snyam nas de'i don du lung byed pa po rnams kyis byed pa de bzhin du bstan bcos byed pa rnams kyis dgos pa'i ngag kyang bkod pa'i phyir glan ka 'di med do/ /gang gis de dmigs pa'i stobs kyis mngon par 'dod pa'i dgos pa'i khyad par gyi yul la the tshom du gyur pa shes par 'dod pa'i dgos pa'i khyad par ston par byed pa'i bstan bcos gzhan dmigs pa yang ma yin no/ / mngon par 'dod pa'i dgos pa'i khyad par sgrub pa'i bstan bcos gzhan srid pa yin na rtog pa dang ldan pa 'ga' zhig bstan bcos gzhan rtsom pa ni ma yin te/ rtog pa dang ldan pa nyid nyams par thal ba'i phyir ro/ /de'i phyir bstan bcos gzhan dmigs na yang brjod par 'dod pa'i dgos pa'i khyad par la the tshom gyi rgyur mi 'gyur ro/ /de lta bas na nyan pa po'i skye bo 'jug par bya ba'i don du dgos pa la sogs pa'i ngag nye bar bkod do zhes bya bar gnas so/ /gang yang nyan pa po'i skye bo 'jug pa'i don du dgos pa la sogs pa brjod pa ni ma yin te/ de las the tshom skye ba'i phyir la/ rtog pa dang ldan pa the tshom gyis 'jug pa mi srid pa'i phyir ro/ /'on kyang gang dgos pa dang bral ba'am/ don med pa de ni brtsam par bya ba ma yin te/ dper na bya rog gi so brtag pa dang smyon pa la sogs pa'i tshig bzhin no/ /bstan bcos 'di yang dgos pa dang bral ba yin no/ /des na mnyan pa'am bya ba brtsam par mi bya'o zhes bya ba de lta bu'i khyab par byed pa mi dmigs pas rtsod par byed pa gang yin pa de'i gtan tshigs ma grub par bstan par bya ba'i don du dang por dgos pa la sogs pa'i ngag nye bar bkod pa yin no snyam du sems na/ de ni yang dag pa ma yin pa lta bur mngon te the tshom gyis kyang 'jug pa nyid bsgrubs zin pa'i phyir dang / ma grub par bstan pa don med pa'i phyir ro/ /gal te pha rol po de tshig 'di las 'jug par 'gyur ba de lta na de don dang ldan par 'gyur ro/ /gang gis 'di 'jug par 'gyur ba'i ji tsam du ngag 'dis ma grub pa brjod du zin kyang rtog pa dang ldan pa tshig 'di las ji skad du bshad pa'i khyad par byed pa yod pa nyid la nges pa skye ba ma yin te/ snga ma bzhin du tshig tshad ma ma yin pa'i phyir dang / khyed kyi lugs kyis the tshom gyis kyang rtog pa sngon du gtong ba 'jug pa mi srid pa'i phyir ro/ /de'i phyir ma grub par bstan pa 'bras bu med pa nyid yin no/ /rtog pa dang ldan pa 'ga' zhig bstan bcos kyi lung mi shes pa glo bur du khyab par byed pa med par nges te/ gong gi rigs pa 'dis phyir rgol ba gzhan pa yang ma yin no/ /gang gis de dag 'jug pa'i don du ma grub pa brjod par bya bar 'gyur ba de la phyir rgol ba 'god pa'i phyir rang nyid kyis bstan bcos kyi dgos pa shes pa yang bstan bcos byed par rtsom pa'am/ nyan pa po rtog pa sngon du gtong ba rgyu mtshan med pa'i phyir rgol lan gdab rin mi chog gi ngag las ldog pa yang ma yin no/ /ci ste yang rtog pa sngon du mi gtong ba gang yin pa de glo bur du rgyu mtshan dang bcas par yang ji skad du bshad pa'i khyad par byed pa med pa len cing gzhan dag kyang len du 'jug ste / de'i phyir de la ma grub par bstan par bya'o snyam na de yang mi rigs te/ gal te de ngag de dag bstan bcos la 'jug pa'i yan lag ma yin pa de'i tshe de la ma grub par bstan pa dgos pa med pa nyid de/ de lta ma yin te ha cang thal bar 'gyur ro/ /'di ltar kha cig 'brel pa med pa ches mang du smra ba yang yod de / de dag la yang mi rigs pa brjod pa nyid bstan par bya ba'i phyir bstan bcos la 'jug pa'i nye bar mi mkho ba ches mang po dag kyang brjod par bya dgos par 'gyur ro/ /de lta bas na gdon mi za bar bstan bcos brtsam pa la gtan tshigs ma grub par bstan pa 'di ni 'bras bu med pa dang / ha cang thal bar 'gyur du 'ongs pas de ltar na 'bras bu ni nyan pa'i skye bo 'jug pa nyid yin par brjod par bya'o/ /de lta bas na gang yang khyab par byed pa mi dmigs pas mi rtsod pa dang / dgos pa ma thob par mi 'jug pa de la ci'i phyir don dang bcas par mi 'gyur te/ ji skad du sngar bstan pa bzhin no/ /de lta bas na nyan pa po'i skye bo 'jug pa'i don du brjod par bya ba la sogs pa bstan to zhes bya bar gnas so/ /rang gi don du yang ma yin te/ de las rang nyid mi 'jug pa'i phyir ro/ /de lta ma yin na smyon pa'i smre sngags la sogs pa bzhin du 'brel pa med pa kho nar 'gyur ro/ /gang yang slob dpon gyis rigs pa'i thigs pa rang nyid kyang de ltar rtogs par 'gyur zhes bsams nas/ rang gi don gyi rjes su dpag pa la yang sbyor ba 'di yin no zhes bshad pa de yang phyi rol gyi sbyor ba'i dbang du byas pa ma yin no/ /'o na ci zhe na/ nang du brjod pa'i bdag nyid kho na yin te/ rang gi don gyi rjes su dpag pa ni shes pa'i bdag nyid yin pa'i phyir ro/ /gang yang skye bo phal cher phal la chags shing zhes bya ba la sogs pa bshad pa de yang gzhan dag phrag dog la sogs pa'i dri mas nyams pa'i yid can snod du bya ba'i phyir bshad pa yin te/ spros pas chog go/ /ston pa la mchod par byed pa ni legs pa thams cad thob pa'i rgyu bcom ldan 'das la dang ba bskyed pa'i don du ste/ 'di ltar yon tan brjod pa'i sgo nas mchod pa byas pa 'dis bcom ldan 'das kyi che ba'i bdag nyid khyad par du 'phags pa dang ldan pa ston par byed do/ /de thos nas kyang re zhig dad pa'i rjes su 'brang ba rnams ni the tshom med par myur du bcom ldan 'das la dang ba skye'o/ /gang yang chos kyi rjes su 'brang ba de dag kyang de lta bu la gnod pa ma mthong ste/ shes rab la sogs pa'i yon tan goms pas khyad par du 'phags par 'gyur ba dang / 'chad par 'gyur ba'i dbang po las 'das pa'i don du sgrub par byed pa'i tshad mas rnam pa de lta bu'i mkhas par 'gro ba ni srid par nges so snyam du nges par bzung nas bcom ldan 'das la dang ba skyed par byed pa nyid yin no/ /de la dang bas kyang de'i yon tan mngon par 'dod pa rnams de'i gsung rab dang / de la brten pa'i bstan bcos la sogs pa la brtag pa sngon du 'gro bas 'dzin pa la sogs pa'i don du gus par byed do/ /de las thos pa las byung ba la sogs pa'i shes rab skye ba'i rim gyis legs pa'i mchog thob pa'i bar du 'gyur ba'i phyir chen po dag la dang ba ni legs pa thams cad thob pa'i rgyu'i gtso bo yin no/ /de nyid kyi phyir bstan bcos byed pa phal cher ston pa po rab tu grags pa la brten nas/ bstan bcos byed pa la bstan bcos kyi dang por re zhig rang gi ston pa la mchod pa byed pa yin te/ de ni de la 'jug pa'i yan lag gi cha tsam yod pa'i phyir ro/ /de nyid kyi phyir bstan bcos byed par 'dod pas rang gi ston pa'i che ba'i bdag nyid shes par bya ba'i phyir de la phyag 'tshal ba rtsom mo zhes bshad do/ /de lta na ston pa la mchod par byed pa ni don med pa ma yin no/ /de la phyag 'tshal nas shes bya ba'i bar gyis ni ston pa la mchod par brjod pa bstan to/ /de kho na nyid bsdu ba bya/ /zhes pa 'dis ni brjod par bya ba dang / dgos pa gnyis bstan te/ 'di ltar bstan bcos 'di'i brjod par bya ba ni rang bzhin la sogs pa'i byed pa dang bral ba'i de kho na nyid la sogs pa'i rten cing 'brel par 'byung ba'i khyad par gyi mtshan nyid kyi de kho na la sogs pa'i byed pa dang bral ba nyid yin no/ /de dag kyang de kho na nyid kyi sgras shugs kyis bstan pa kho na ste/ gzhan dag ni de kho na nyid kyi don nyid du mi 'thad pa'i phyir ro/ /'on te ngag nyid brjod par bya ba dang ldan pa yin gyi gzhan ni ma yin no zhes rigs pa ma yin nam/ bstan bcos mtha' dag ni ngag ma yin gyi/ 'on kyang ngag gi tshogs yin no/ /des na 'di la brjod par bya ba ga la srid ce na/ de ni yod pa ma yin te/ ngag tshogs pa'i bdag nyid bstan bcos yin mod kyi/ 'on kyang ngag de ni phan tshun ltos nas 'brel par gnas te/ de lta ma yin na smyon pa la sogs pa'i tshig gi tshogs bzhin du don 'brel pa med pa nyid du 'gyur ro/ /de lta bas na phan tshun 'brel pa can sgra du ma tshogs pa'i bdag nyid yin pa'i phyir de las gzhan pa'i ngag bzhin du bstan bcos ni ngag nyid yin no/ /tshig kho nas ngag rtsom pa yang ma yin gyi/ 'on kyang ngag gis kyang rtsom pa yin pa de bas na bstan bcos ni ngag chen po yin pa'i phyir brjod par bya ba dang ldan pa yin pa'i phyir klan ka med do/ /dgos pa ni bsdus pa'i tshig gis bstan te/ 'di ltar bstan bcos la 'jug par 'dod pa rnams kyi dgos pa nye bar bstan pa na de ltar gtogs pa nyid bstan par bya'i / gzhan du gtogs pa ni ma yin no/ /de lta ma yin na smra ba po 'brel pa med pa brjod pa nyid du 'gyur ro/ /smra ba po bstan bcos la sogs pa'i dgos pa brjod pa yang bstan bcos la gzhan dag gzhug par 'dod pas yin gyi zhes pas ni ma yin no/ /ji ltar na gzhan dag dgos pa bstan pas bstan bcos la 'jug par 'gyur ba/ gal te der gtogs pa nyid kyi dgos pa brjod pa yin gyi gzhan du gtogs pas ni ma yin no/ /gang gi phyir gzhan gyi dgos pa brjod pas rtog pa dang ldan pa gzhan la 'jug pa ni ma yin no/ /khyad par can gyi don ston par nus pa'i tshig ni bstan bcos su brjod kyi/ brjod par bya ba tsam yang ston pa lhur len pa ni ma yin la/ sgra tsam don ston pa'i nus pas ston pa yang ma yin no/ /de lta bas na brjod par bya ba la sogs par gtogs pa'i dgos pa ni bstan par bya ba ma yin no/ /gang yang slob dpon gyis yang dag pa'i shes pa ni skyes bu'i don thams cad 'grub pa'i sngon du 'gro ba can yin pas na zhes gang bstan pa de ni dgos pa bstan pa yin gyi brjod par bya ba'i dgos pa ni ma yin te/ yang dag pa'i shes pa rtogs pa nyid yang dag pa'i shes pa'i sgrar brjod par 'dod pa'i phyir te/ yang dag pa'i shes pa rtogs pa sngon du 'gro ba can zhes bya ba'i don to/ /de lta yin dang de bstan to/ /zhes bya ba 'di ni dgos pa brjod pa'i don du 'brel pa yin gyi/ de lta ma yin na 'brel pa med pa nyid du 'gyur ro/ /bstan bcos kyi dgos pa de yang rnam pa gsum te / bya ba'i ngo bo dang / bya ba'i 'bras bu dang / bya ba'i 'bras bu'i 'bras bu'o/ /'di ltar pha rol rtogs par bya ba'i don du brtsams pa'i bstan bcos ni byed pa nyid dam byed pa po nyid du 'gyur te/ byed pa po dang byed pa dag kyang sgrub par byed pa yin pa'i phyir ji skad du bshad pa'i dgos pa las ma gtogs pa'i dgos pa ni yod pa ma yin te/ sgrub par byed pa ni bya ba la ltos pa'i phyir dang / bya ba la sogs pa rnam pa gsum po de med na mi 'byung ba'i phyir de dgos pa nyid du rigs la/ dngos dang brgyud pas byas pa'i khyad par ni yod do/ /bya ba rtsom pa ni de'i don du yin pa'i phyir dgos pa ni 'bras bu de'i gtso bo yin no/ /de la ngag thams cad rang gi brjod par bya ba ston par byed pa'i mtshan nyid kyi bya ba ni thun mong ba yin no/ /de yang shin tu grags pa'i phyir dgos pa nyid du bstan par bya ba ma yin te/ de ni bstan bcos la 'khrul pa med pa'i phyir ro/ / gal te brjod par bya ba med par dogs pa bsal ba'i don du bstan par bya ba yin no zhe na ma yin te/ brjod par bya ba'i khyad par bstan pa nyid kyis dogs pa bsal zin pa'i phyir ro/ /brjod par bya ba'i khyad par bstan par 'dod pa'i don du de bstan pa yang ma yin te/ brjod par bya ba'i khyad par bstan pa nyid kyis de bstan zin pa'i phyir ro/ /de lta bas na gang thun mong ma yin pa'i bya ba de bstan par bya'o/ /de kho na nyid bsdu ba'i mtshan nyid de yang bstan bcos 'di la yod pa nyid yin no/ /gang gi phyir bstan bcos 'dis de kho na nyid de dag de dang der 'thor ba rnams nyan pa po'i blo gcig la 'god pa'i mtshan nyid kyi bsdu ba byed pa yin no/ /de'i phyir de nyid bsdu ba'i sgras bstan pa yin no/ /de kho na nyid bsdus pa'i bya ba 'di'i 'bras bu ni bstan par bya ba'i rgyud du gtogs pa'i de kho na nyid bde blag tu rtogs pa yin te/ de yang bsdus pa'i sgras bsal bar byas pa nyid yin no/ /de kho na nyid gcig tu bsdus pa ni rtogs pa pos bde blag tu rtogs par 'gyur gyi/ /rnam par 'thor ba ni dka' bas 'dzin pa'i phyir bde blag tu 'dzin pa'i rgyur bsdus pa'i sgras bsdus pa ston pa na de kho na nyid bde blag tu rtogs par bya ba'i don du 'di brtsams so zhes bstan pa yin no/ /de kho na nyid rtogs pa tsam ni 'di'i 'bras bu ma yin te / de lta na ni sngon gyi slob dpon dag gis de kho na nyid bstan zin pa'i phyir bstan bcos byed pa don med par 'gyur ro/ /de'i phyir pha rol rjes su 'dzin pa khyad par can med pa'i phyir dang / bstan bcos kyang gzhan gyi don du yin pa'i phyir ro/ / de'i phyir sngon gyi slob dpon rnams kyis de kho na nyid bstan zin na yang blo dman pas shin tu 'thor ba nyid kyis bde blag tu gzung bar mi nus pa gang yin pa de la bde blag tu gzung bar bya ba'i phyir de kho na nyid bsdus pa brtsam pa ni 'bras bu med pa ma yin par 'dod do snyam du bsams nas bstan bcos 'di brtsams so/ /de nyid kyi phyir de kho na nyid bsdus pa zhes bshad kyi/ gzhan du na/ de nyid gtan la dbab pa bya/ /zhes de skad du bstan par bya bar 'gyur ro/ /de ltar na brjod par 'dod pa'i don ji lta ba bzhin gsal por bstan par byas par 'gyur ro/ /de lta bas na bsdu ba byed pa'i 'bras bu ni de kho na nyid bde blag tu rtogs pa kho na yin no/ /bde blag tu rtogs pa de'i yang dgos pa ni yun mi ring bas mngon par mtho ba dang nges par legs pa thob pa yin no/ /de yang rab tu grags pa'i phyir ma brjod de/ de kho na nyid shes pa las mngon par mtho ba dang nges par legs pa 'thob par 'gyur ro zhes bya ba ni thams cad yod par smra ba rnams la grags pa'i phyir ro/ /yang na/ 'gro la phan pa mdzad bzhed pas/ /zhes bya ba'i 'og tu de yang bstan pa yin no/ /'di lta ste de gang gi don du zhe na/ 'gro la phan pa mdzad bzhed pas/ /de kho na nyid bsdu ba bya/ /zhes bya ba 'byung ngo / /ji ltar de kho na nyid bsdu ba'i bya ba 'gro la phan pa'i rgyur 'gyur zhe na/ gal te 'gro ba la phan pa sgrub pa ni de kho na nyid bsdu ba'i 'bras bu yin na 'gyur te/ dper na skom pas chu 'on cig ces bya ba 'di la chu 'thung ba de ni len pa'i bya ba'i 'bras bu yin par rtogs pa de bzhin du 'di la yang ngo / /de'i phyir 'gro ba la phan pa bsgrub pa'i don du de kho na nyid bsdus pa bya'o zhes bya ba'i don du gnas so/ /dgos pa 'di la rjes su mthun pa'i thabs can du bstan pa yin te/ 'di ltar mngon par mtho ba dang nges par legs par thob pa ni 'gro ba la phan par brjod la/ de'i rgyu ni phyin ci ma log pa yin te/ kun nas nyon mongs pa thams cad kyi rtsa ba ni phyin ci log yin pa'i phyir dang / 'gro ba la phan pa yang kun nas nyon mongs pa las bzlog pa yin pa'i phyir ro/ /de'i phyir de'i rgyu las bzlog pa 'di'i rgyu yin par gnas so/ /phyin ci ma log par yang las dang 'bras bu'i 'brel pa ji lta ba bzhin du yid ches pa dang / gang zag dang chos la bdag med par phyin ci ma log par rtogs pa yin te/ de yang rten cing 'brel par 'byung ba phyin ci ma log par ston par byed pa'i bstan bcos 'di las thos pa dang bsam pa dang bsgom pa'i rim gyis 'byung ba'i phyir/ des na de kho na nyid bsdu ba'i bya bas 'gro ba la phan pa yang sgrub pa yin no zhes bya ba yang khong du chud do/ /mngon par mtho ba dang nges par legs pa thob pa yin na mngon par 'dod pa'i don yongs su rdzogs pas skyes bu'i 'dod pa tsam chad pa'i phyir de las gong du dgos pa gzhan btsal bar bya ba ma yin pa'i phyir dgos pa yongs su ma rdzogs pa ma yin no/ /'brel pa yang 'bras bu med pa'i phyir brjod par bya ba dang / dgos pa dag las logs shig tu bstan par bya ba ma yin te/ 'di ltar de ston pa na bstan bcos dang dgos pa gnyis bsgrub par bya ba dang sgrub par byed pa'i ngo bo'i mtshan nyid bstan par bya ba yin gyi/ gzhan bla ma brgyud pa'i rim pa la sogs pa'i mtshan nyid ni ma yin te/ de ni don la 'jug pa'i yan lag ma yin pa'i phyir ro/ /bsgrub par bya ba dang sgrub par byed pa'i ngo bo de yang dgos pa brjod pa nyid kyis bstan te/ 'di ltar 'di ni 'di'i dgos pa yin no zhes bstan pa na 'di ni 'di'i sgrub par byed pa yin no zhes bstan par 'gyur ro/ /gang zhig gang sgrub par byed pa ma yin pa de ni de'i dgos pa ma yin te/ ha cang thal ba'i phyir ro/ /de lta bas na shugs kyis thob pa'i phyir 'di'i brjod par bya ba dang / dgos pa dag las logs shig tu brjod par mi bya'o/ /gang zhig gang brjod na yang mi rtogs pa ni dper na brjod par bya ba dang / dgos pa gnyis gang yang rung ba brjod kyang cig shos mi rtogs pa yin pa ltar de las logs shig tu bstan par 'os so/ /gang gi phyir dgos pa brjod kyang ji skad du bstan pa'i 'brel pa mi rtogs pa ni mi srid pa'i phyir/ brjod par bya ba dang dgos pa gnyis kho na brjod par bya'o/ /brjod par bya ba la sogs pa 'di dag kyang kho bo cag gis ngag gi don nyid du rnam par ma phye'i/ 'on kyang ngag las de'i don du cha shas bsdus nas phye ba yin no/ /ngag gi don ni ji skad du bshad pa'i bsdu ba byed pa nyid yin no/ / yang na brjod par bya ba la sogs pa phal par gyur pa yang ngag 'di las rtogs par bya ba yin pa'i phyir ngag gi don nyid du yang 'gal ba med pa nyid do/ /ngag gtso bos don du ma rjod par byed pa ni 'gal gyi/ gtso bo dang phal pa'i ngo bos ni ma yin no/ /ci ste yon tan gyi tshogs dpag tu med pa'i rten bcom ldan 'das la ci'i phyir rten cing 'brel par 'byung ba ston pa kho nas bstod pa brjod ce na/ klan ka 'di ni med de/ thams cad du brtag pa mtshungs pa'i phyir dang / yon tan dpag tu med pa brjod pa nyid kyis mchod par brjod par bya bar yang mi nus pa'i phyir / yon tan gyi phyogs gcig brjod pa nyid kyis de brjod do/ /des na rten cing 'brel par 'byung ba ston pa brjod pa nyid kyis de brjod pa'am/ yang na rnam pa gzhan du yin pa'i phyir khyad par cung zad kyang med do/ /de lta na yang khyad par brjod pa/ 'di ltar yon tan phun sum tshogs pa yang dag pa'i lta ba dang ldan pa'i phyir 'gro ba mngon par mtho ba dang nges par legs pa thob par mdzad pa'i phyir bcom ldan 'das ston pa yin no/ /de nyid mngon par mtho ba dang nges par legs pa don du gnyer ba rnams bcom ldan 'das la skyabs su 'gro ba la sogs pa'i rgyur brjod par bya'o/ /rten cing 'brel par 'byung ba ston pa nyid kyis kyang bcom ldan 'das mngon par mtho ba la sogs pa thob par mdzad pa yin te/ 'di ltar rten cing 'brel par 'byung ba phyin ci ma log par ston pa'i phyir/ de'i don nges par bzung ba las bde 'gro'i rgyu las dang 'bras bu phyin ci ma log pa la yid ches pa skye zhing / nges par legs pa'i rgyu gang zag dang chos la bdag med par rtogs pa yang thos pa dang bsam pa dang sgom pa'i rim gyis skye'o/ /de skyes na yang 'khor ba'i rgyu ma rig pa ldog go/ /de log na yang de'i tshe rtsa ba can nyon mongs pa dang shes bya'i sgrib pa mtha' dag ldog pa'i phyir sgrib pa thams cad dang bral bas byang grol thob par 'gyur ro/ /des na rten cing 'brel par 'byung ba ston pa'i bcom ldan 'das kyi gsung mngon par mtho ba la sogs pa 'thob par mdzad pa'i rin po che 'di ni gtso bo yin pa'i phyir rten cing 'brel par 'byung ba phyin ci ma log pa brjod pa nyid kyis bcom ldan 'das la bstod pa brjod do/ / rten cing 'brel par 'byung ba de yang gzhan dag gis mi mthun pa'i rgyu dang tshad ma dang 'gal ba'i dngos po la brten par 'dod de/ de lta bas na de bsal ba'i sgo nas bcom ldan 'das kyis ji lta ba bzhin du gsungs pa yin no zhes bstan pa'i don dang / 'chad par 'gyur ba'i bstan bcos mtha' dag gi brjod par bya ba'i don de kho na nyid bsdu ba'i phyir ji skad du bshad pa'i rten cing 'brel par 'byung ba khyad par mang po rnams bzung ba yin no zhes bya ba ni spyi'i don to/ /yan lag gi don brjod par bya ste/ de la/ gang gis rten cing 'brel par 'byung / / zhes bya ba ni/ rang bzhin dbang dang gnyi ga dang / /bdag sogs bya ba dang bral ba/ /zhes bya ba la sogs pa thams cad du sbyar bar bya'o/ /de la gang gis zhes bya ba la sogs pa la/ gang zhes bya ba spyir brjod du zin kyang sangs rgyas bcom ldan 'das la 'jug ste/ gzhan la ji skad du bshad pa'i yon tan mi srid pa'i phyir ro/ /rten cing 'brel par 'byung ba zhes bya ba ni rgyu dang rkyen la brten nas de yang dag par brten nas phung po la sogs pa rnams kyi skye ba gang yin pa de ni rten cing 'brel par 'byung ba'o/ /ji skad du rgyu dang rkyen gyi stobs kyis bskyed pa'i phung po la sogs pa gang gis gsungs pa zhes bstan pa yin no/ /'byung ba zhes bya ba tha dad pa lta bur bstan pa yin mod kyi/ 'on kyang rten cing 'brel par 'byung ba'i dngos po nyid khyad par gzhan spang ba tsam shes par 'dod pa la de skad du bstan to/ /yang na 'byung bar byed pas 'byung ba ste/ kr-i t+ya l+ya Tau bar ba hu laM zhes bya bar ba hu la zhes 'byung bar byed pa po'i rkyen g+ha yin no/ /de nas pra ti t+ya'i sgra dang bsdu ba bya ste/ su ba su pe ti ma yu rA b+h+yAM sa ka la sogs pa nyid byung ba'i phyir ro/ /yang na bsdu ba med pa kho na yin no/ /de ltar na sngar ni med pa kho na yin pas ma byas la/ phyis ni dgos sam sems nas bcug go/ /rang bzhin ni grangs can gyis kun tu brtags pa'i rdul dang mun pa dang snying stobs kyi rang bzhin te gtso bo'o/ /dbang ni dbang phyug go/ /gnyig ni de dag kho na gnyis so/ /bdag ni 'byin pa dang sdud par byed pa'i skyes bu ste de las gzhan yang 'khor ba yin no/ /sogs pa smos pas dus la sogs pa gzung ste/ de dag gi bya ba ni rgyu'i ngo bo'o/ /de dang bral ba ni de'i bya bas stong pa zhes bya ba'i don to/ /de la 'di ni bcom ldan 'das kyis myu gu de yang rang nyid kyis byas pa ma yin/ gzhan gyis byas pa ma yin/ gnyi gas byas pa ma yin/ dbang phyug gis sprul pa ma yin/ dus yongs su gyur pa ma yin/ rang bzhin las byung ba ma yin/ rgyu gcig la rag las pa ma yin/ rgyu med pa las skye ba yang ma yin no zhes gsungs so/ /'dis ni gtso bo dang / dbang phyug dang / gnyi ga'i rgyu can dang / sgra'i tshangs pa dang / bdag brtag pa rnams bstan to/ /ci ste de lta bur gyur pa'i rten cing 'brel par 'byung ba de ci skad cig ma ma yin par gsungs sam zhe na ma yin no zhes smras pa/ g.yo ba ste g.yo ba zhes bya ba ni mi brtan pa skad cig ma zhes bya ba'i tha tshig ste/ gzhan la ni g.yo ba nyid mi rung ba'i phyir ro snyam du bsams pa yin no/ /de la 'di ni bcom ldan 'das kyis/ 'dus byas thams cad skad cig ma/ /mi gnas bya ba ga la yod/ /'di dag 'byung ba de nyid ni/ /bya ba de nyid byed par brjod/ /ces gsungs so/ /'dis ni brtan pa'i dngos po brtag pa bstan to/ /gal te de lta na rten cing 'brel par 'byung ba la brten nas las dang 'brel bu'i 'brel pa la sogs pa'i rnam par gzhag pa thob par mi 'gyur te/ g.yo ba'i phyir ro zhe na/ de'i phyir las dang zhes bya ba la sogs pa smos te/ 'di yang phyis ston par 'gyur ro snyam du bsams pa'o/ /de la las ni dge ba dang mi dge ba'o/ /de'i 'bras bu ni 'dod pa dang mi 'dod pa'o/ /de dag gi 'brel pa ni bskyed par bya ba dang skyed par byed pa'i ngo bo'i mtshan nyid do/ /de'i rnam par gzhag pa ni yang dag par gnas pa dang tha snyad ces bya ba'i tha tshig go/ /sogs pa'i sgras ni dran pa dang / ngo shes pa dang / the tshom dang / nges pa dang / rang gis gtams pa len pa dang / don mthong ba la ngo mtshar dang bral ba dang / rgyu dang 'bras bu'i dngos po dang / de rtogs par byed pa'i tshad ma dang / bcings pa dang / thar pa la sogs pa'i rnam par gzhag pa gzung ngo / /de dag gi rten zhes tshig rnam par sbyar ro/ /de la bcom ldan 'das kyis kye dge slong dag 'di la las yod do/ /'bras bu yod do/ /gang chos su brdar btags pa ma gtogs pa phung po 'di 'dor zhing phung po gzhan nye bar len pa'i byed pa po ni mi dmigs so/ /de la chos su brdar btags pa ni 'di yin te/ 'di lta ste 'di yod na 'di 'byung zhes bya ba la sogs pa gsungs so/ /'dis ni las dang 'bras bu'i 'brel pa brtag pa bstan to/ /rten cing 'brel par 'byung ba 'di yang phung po dang / khams dang / skye mched rnams su yang blta bar bya ste/ de dag nyid rten nas byung ba yin pa'i phyir ro/ / 'on te rdzas dang / yon tan dang / las la sogs pa yang dag pa'i dngos po yang yod pa ma yin nam / de dag ci'i phyir ma yin zhe na/ yon tan zhes bya ba la sogs pa smos te/ yon tan dang / rdzas dang / bya ba dang / rigs dang / 'du ba dang zhes zlas dbye'o/ /rigs kyi sgras khyab pa dang / nyi tshe ba'i spyi rnam pa gnyis gzung ngo / /sogs kyi sgras brtag pa'i rang bzhin gyi khyad par rnams te/ gang dag gis chos can las tha dad pa'i chos 'ga' zhig brjod pa dper na tshig gi don drug po'i yod pa nyid dmigs pa dang bcas pa'i tshad ma'i yul yin no zhes bya ba de lta bu la sogs pa de dag gzung ngo / /yon tan la sogs pa yang de yin la khyad par te bye brag kyang yin no zhes bya ba ni khyad par gyi bsdu ba'o/ /de dag gis stong pa ni bral ba zhes bya ba'i don to/ /de la 'di ni bcom ldan 'das kyis gsungs te/ bram ze thams cad thams cad ces bya ba ni phung po lnga dang / skye mche da bcu gnyis dang / khams bco brgyad kyi bar dag go ces bya ba yin no/ /'dis ni tshig gi don drug brtag pa bstan to/ /'on te khyad par med na ji ltar rten cing 'brel par 'byung ba sgra dang rnam par rtog pa dag gis yul du byed de / de dag gi yul du ma byas na brjod par mi nus shing / khyad par med na sgra dang rnam par rtog pa dag 'jug pa yang med na de ji ltar bcom ldan 'das kyis bstan ce na/ sgro btags pas rnam pa zhes bya ba la sogs pa smos te/ sgro btags pa ni phyi rol nyid du sgro btags pa'i rnam pa'i rang bzhin sgra dang shes pa'i spyod yul gang la yod pa de la de skad ces bya'o/ /rten cing 'brel par 'byung ba gang la sgro btags pa'i rnam pa sgra dang shes pa'i spyod yul gyi yul yin pa de la de skad ces bya'o/ /shes pa zhes bya ba ni sgra dang nye ba'i phyir nang gi brjod pa'i bdag nyid kyi shes pa'i khyad par rnam par rtog pa yin par blta bar bya'o/ /de dag ni yul gcig la 'khrul pa med pa nyid kyis lhan cig spyod pa'i phyir ro/ /des na 'di skad du bstan pa yin te/ khyad par med pa yin mod kyi/ 'on kyang phan tshun ldog pa'i dngos po mthong ba'i sgo nas 'ongs pa'i phyi rol gyi ngo bo nyid du zhen pa rnam par rtog pa'i gzugs brnyan gyi bdag nyid sgra'i don de la yod pa yin no/ /'dir sgra rnams kyi spyod yul ni don dam par ma yin te/ de ni rnam par rtog pa thams cad las 'das pa'i phyir ro/ /'on kyang 'jig rten na ma brtags na nyams dga' bar sgra'i don grub pa ji lta ba de kho na ltar de kho na nyid kyi don btang snyoms su mdzad pa'i bcom ldan 'das kyis kyang glang po che'i lta stangs kyis don dam pa la 'jug pa'i don du brjod pa'i kun rdzob tu bstan te/ thabs gzhan med pa'i phyir ro/ /sgro btags pa'i rnam pa can yin na yang sgra'i don brgyud pas dngos po dang 'brel pa'i phyir/ de rtogs pa'i rgyu nyid yod pas rnam pa de lta bu'i dngos po de dag shugs kyis rtogs par 'gyur ba'i phyir slu ba mi srid do/ /de la 'di ni skyob pas/ ming ni gang dang gang dag gis/ /chos ni gang dang gang brjod pa/ /de ni chos rnams chos nyid do/ /de ni de la yod ma yin/ /zhes gsungs pa yin no/ /'dis ni sgra'i don brtag pa bstan to/ /yang ci 'di mu stegs byed kyis kun tu brtags pa'i dngos po bzhin du rtogs par byed pa'i tshad ma'i nor gyis dbul ba nyid kyis tshig bkod pa'i rtsom pa tsam snying por gyur pa yin nam/ 'on te 'di'i rtogs par byed pa'i tshad ma cung zad cig yod ce na/ smras pa/ yod do/ /gsal ba'i mtshan nyid ces bya ba la sogs pa la/ de ni mtshan nyid kyang yin la gsal ba yang yin pas zhes khyad par gyi bsdu ba'o/ /gsal ba'i mtshan nyid ni mi srid pa dang / ma khyab pa dang / ha cang khyab pa'i skyon dang bral ba'i phyir ro/ /mu stegs byed kyi tshad ma'i mtshan nyid ni mi gsal ba yin no zhes bstan pa'i don du gsal ba'i mtshan nyid ces bstan to/ /de dang ldan pa ni de dang yang dag par ldan pa'o/ /mngon sum dang rjes su dpag pa zhes bya ba'i tshad ma gnyis po gang yin pa des gtan la phab pa'o/ /'di yang brtag pa thams cad du ston par 'gyur ro/ /'di ni bcom ldan 'das kyang bzhed pa yin te/ ji skad du/ dge slong dag gam mkhas rnams kyis/ /bsreg bcad brdar bas gser bzhin du/ /yongs su brtags na nga yi bka'/ /blang bar bya yi gus phyir min/ /zhes gsungs pa bzhin no/ /de la mngon sum gyi mtshan nyid ni ma 'khrul pa dang rtog pa dang bral pa nyid de/ de yang bcom ldan 'das kyis/ mig gi rnam par shes pa dang ldan pas sngon po shes kyi sngon po'i snyam du ni ma yin no zhes gsungs te/ 'di ltar sngon po zhes bya ba 'dis ni phyin ci ma log pa'i yul can du bstan pa'i phyir ma 'khrul ba brjod la/ sngon po'o snyam du ni ma yin no zhes bya ba 'dis ni ming dang 'brel pa'i don 'dzin pa spangs pa'i phyir rtog pa dang bral pa nyid brjod do/ /rjes su dpag pa'i mtshan nyid kyang rjes su dpag pa'i rten rtags ston pa na gsungs te/ 'di ltar bsgrub par bya ba'i don med na mi 'byung ba'i rtags nges pa ni rjes su dpag pa'i shes pa'i rgyu yin no/ /de yang dge slong dag gang cung zad kun 'byung ba'i chos yin pa de thams cad 'gog pa'i chos can yin no zhes bya ba de lta bu bsgrub byas gtan tshigs la khyab ba bstan pas na gsal ba rab tu bstan pa nyid yin no/ /ji skad du/ med na mi 'gyur mtshan nyid can/ /rtags ni rjes dpag rten yin no/ /bsgrub byas gtan tshigs khyab pa ni/ /bstan pa de yang gsal bar bshad/ /ces gsungs pa bzhin yin no/ /rtags de yang rang bzhin dang 'bras bu dang / mi dmigs pa'i khyad par gyi bye brag gis rnam pa gsum du dbye ste/ de la dge slong gang dag cung zad skye ba'i chos can zhes bya ba 'dis rang bzhin gyis rtags bstan to/ /'bras bu yang / du ba las ni mer shes te/ /chu skyar las ni chu yin no/ /byang chub sems dpa' blo ldan gyi/ /rigs ni mtshan ma rnams las shes/ /zhes gsungs pas bstan pa yin no/ /mi dmigs pa'i khyad par yang mi dmigs pa tsam tshad ma yin pa spong ba na bstan pa nyid de/ ji skad du/ dge slong dag gang zag gis gang zag gi tshod ma 'dzin cig / dge slong dag gang zag gis gang zag gi tshod 'dzin pa ni nyams par 'gyur te/ nga'am nga dang 'dra bas gang zag gi tshod gzung bar bya'o zhes gsungs pa yin te/ 'dis ni rang bzhin gyis bskal pa la sogs pa la dmigs pa tsam tshad ma yin pa spangs pa yin no/ /nga'am zhes bya ba la sogs pa gsungs pas ni mi dmigs pa'i khyad par tshad ma yin no zhes bya ba 'di yang gsal bar rab tu bstan pa yin no/ /'dis kyang mngon sum dang rjes su dpag pa la sogs pa brtag pa bstan to/ /yang ci ste rten cing 'brel par 'byung ba 'di 'gyur ba smra bas ji skad du brjod pa bzhin du dngos po la sogs pa'i ngo bo 'ga' zhig gis rjes su 'gro ba dang bcas pa yin nam/ 'o na te ma 'dres pa'i ngo bo yin/ de las cir 'gyur/ rjes su 'gro ba dang bcas pa nyid yin na mngon sum la sogs pa'i mtshan nyid 'chol ba yin pa dang / rgyu dang 'bras bu dag kyang rang bzhin tha mi dad pa'i phyir bskyed par bya ba dang skyed par byed pa nyid ma yin no/ /de lta bas na gsal ba'i mtshan nyid dang ldan pa'i tshad ma gnyis kyis nges pa ma yin la/ rten cing 'brel par 'byung ba'i don yang rigs pa ma yin te/ rang gi ngo bo ma 'dres pa nyid yin na yang lhan cig byed pa rnams kyi bye brag khyad par med pa'i phyir skyed par byed pa ma yin par mngon par 'dod pa'i dngos po bzhin du don gyi bya ba gcig byed pa nyid du mi 'gyur ro/ /'dir smras pa/ gzhan gyi bdag nyid ces bya ba la sogs pa la/ 'dir 'di snyam du phyogs phyi ma nyid ma yin no snyam du bsams pa yin no/ /'di la ji skad du bshad pa'i skyon gyi go skabs med do zhes phyi nas bstan par bya'o/ /'bras bu la gzhan gyi bdag nyid dang 'dres pa ste/ 'chol ba zhes tshig rnam par sbyar ro/ /rgyu la sogs pa'i rang gi ngo bo gzhan 'bras bu la sogs pa gang la cha tsam yang rjes su 'gro ba med do zhes bya ba'i don to/ /phra rab kyis kyang zhes bya ba la kyang gi sgras ni yod pa dang zhes bya ba la sogs pa mang po 'ba' zhig tu ma zad shin tu phra bas kyang zhes bstan to/ /ngo bo gcig rjes su 'gro ba yin na yang bdag nyid thams cad rjes su 'gro bar 'gyur ro snyam du bsams pa yin no/ /'di yang phyis ston par 'gyur ro/ /de yang bcom ldan 'das kyis ji ltar myu gu rtag pa ma yin zhe na/ gang gi phyir myu gu yang gzhan sa bon yang gzhan yin la/ myu gu gang yin pa de nyid sa bon ma yin te/ de lta bas na sa bon 'dra ba las myu gu 'byung ngo zhes gsungs so/ /de lta bas na mi 'pho zhes bya ba'o/ /'dis kyang ma nges pa smras pa brtags pa bstan to/ /'on te ci phung po la sogs pa'i rang gi ngo bo ma 'dres pa rnams kyang thams cad yod par smra bar 'pho bar smra ba kha cig gis ji skad du smras pa bzhin du dus rnams su rang gi ngo bo mdor bar 'jug pa yin nam zhe na/ de lta ma yin no zhes smras pa/ mi 'pho zhes bya ba la/ gal te 'pho ba yin na de'i tshe bdag nyid thams cad kyis yod pa'i phyir cung zad kyang bskyed par bya bar mi 'gyur ba'i phyir rten cing 'brel par 'byung ba nyid mi rung ngo snyam du bsams pa yin no/ /gang la phung po la sogs pa rnams dus rnams su rgyu ba'i 'pho ba yod pa ma yin zhes tshig rnam par sbyar ro/ /'di las bcom ldan 'das kyis gsungs te/ ji skad du/ mig ni skye ba na yang gang nas kyang ma 'ongs/ 'gag pa na yang gang du yang thim nas mi 'gro ste/ dge slong dag mig ni ma byung ba las byung zhing byung nas kyang 'jig par 'gyur ro zhes gsungs so/ /'dis kyang dus gsum brtag pa bstan to/ / 'on te ci 'di ji ltar/ tshu rol mdzes pa pa rnams kyis/ /shi nas thal bar gyur pa la/ /slar skye ba lta ga la yod/ /ces smras pa ltar mthong ba'i dus tsam du 'byung ba yin nam zhe na/ ma yin no zhes smras pa/ thog ma tha med pa zhes bya ba la/ 'di la thog ma dang tha ma yod pa ma yin zhes tshig rnam par sbyar ro/ /'di yang bcom ldan 'das kyis dge slong dag 'khor ba'i skye ba ni thog ma dang tha ma med pa yin no zhes bya ba la sogs pa gsungs te/ thog ma zhes bya ba ni dang po la brjod la/ tha ma ni mthar brjod do/ /de dag bkag pas thog ma tha med pa zhes bya'o/ /'di yang 'phags pa'i lam ma skyes pa'i dbang du mdzad nas gsungs kyi/ 'phags pa'i lam skyes pa rnams la ni 'khor ba mtha' dang bcas pa nyid yin no/ /de nyid kyi phyir/ dam chos rnam par mi shes pa'i/ /byis pa rnams la 'khor ba ring / /zhes gsungs so/ / 'dis kyang 'jig rten rgyang phan pa brtag pa bstan to/ /'on te rten cing 'brel par 'byung ba 'di phyi rol gyi don gyi bdag nyid dam/ 'on te sems tsam gyi rang bzhin yin zhe na/ gzugs brnyan la sogs lta bu ste/ /zhes bya ba smos so/ /'dis ni sems tsam gyi bdag nyid yin no zhes bstan pa yin te/ 'di ltar 'di skad du ji ltar gzugs brnyan dang mgal me'i 'khor lo dang / dri za'i grong khyer la sogs pa sems tsam gyi rang bzhin yin pa de bzhin du 'di yang yin no zhes bstan pa yin no/ /'di yang bcom ldan 'das kyis/ ji ltar byis pa rnams brtags ltar/ / phyi rol don ni yod ma yin/ /bag chags kyis ni dkrugs pa'i sems/ /don du snang ba rab tu 'byung / /zhes gsungs so/ /'dis kyang phyi rol gyi don brtag pa bstan to/ /de'i phyir de ltar rten cing 'brel par 'byung ba ji skad du bshad pa'i don med pa'i rtog pa'i dra ba dang bral ba nyid bstan nas/ mjug bsdu ba'i phyir spros pa'i tshogs kun zhes bya ba la sogs pa smos te/ ji skad du bshad pa'i rang bzhin gyi rgyu can yin pa nyid la sogs pa spros pa thams cad kyi tshogs ni 'dus pa ste de las grol ba'o/ /'on te ci 'di khyab 'jug dang dbang phyug chen po dang dbyig gi snying po la sogs pa gzhan dag gis kyang de bzhin du rtogs sam zhe na/ ma yin no zhes smras pa/ gzhan gyis rtogs pa ma yin zhes bya ba la/ mu stegs byed thams cad ni ji lta ba bzhin nyid ma yin pa'i bdag tu lta ba la mngon par zhen pa'i phyin ci log 'di ni bcom ldan 'das nyid kyi ma 'dres pa'i mkhyen pa yin no zhes ba stan to/ /'di yang brtag pa thams cad du ston par 'gyur ro/ /ci ste de lta bur gyur pa'i rten cing 'brel bar 'byung ba 'di bcom ldan 'das rang nyid kyis mkhyen nas gsungs sam/ 'on te rgyal dpog pa rnams ji skad du/ /de phyir dbang po las 'das don/ /dngos su mthong ba yod ma yin/ /tshig ni rtag pa gang zhig gis/ /mthong ba de ni mthong ma yin/ /zhes smras pa ltar gzhan gyis mngon par 'dod pa'i skyes bus ma byas pa'i rig byed kyi tshig la brten nas mkhyen te gsungs she na/ de ltar ma yin no zhes smras pa/ rang dbang thos dang 'brel med cing / /zhes smos te/ rang dbang thos pa ni rang las tshad mar gyur pa ste tshig rtag pa zhes bya ba'i tha tshig go/ /de dang 'brel pa med pa ni mi gnas pa de la ltos pa med pa nyid kho na ste/ dngos su gzigs nas rten cing 'brel par 'byung ba gsungs pa zhes bya ba'i don to/ /skyes bus ma byas pa'i ngag kyang yod pa ma yin te/ ji skad du bcom ldan 'das kyis/ kun dga' bo de ltar na sngon gyi drang srong chen po de dag rig byed dag gi byed pa po dang / sngags rnams kyi 'jug par byed pa yin no zhes gsungs so/ /'di yang phyis bstan bar bya'o snyam du bsams pa yin no/ /'dis kyang thos pa brtag pa dang / rang las tshad ma brtag pa bstan to/ /ci ste bcom ldan 'das rang gi don phun sum tshogs pa ma lus pa thugs su chud na ci'i phyir rten cing 'brel par 'byung ba 'di ston par mdzad ce na/ 'gro phan mdzad par bzhed pa yis/ zhes bya ba smos te/ /'gro phan ni 'gro ba la phan pa'o/ /de yang rten cing 'brel par 'byung ba phyin ci ma log par rtogs pa'i thabs can nyon mongs pa dang shes bya'i sgrib pa ma lus pa spangs pa yin no/ /de mdzad par bzhed pa ni 'gro la phan par mdzad pa bzhed pa'o/ /de ni de ston pa'i rgyu yin no/ / 'di'i 'gro ba la phan par mdzad par bzhed pa de yang ga las byung zhe na/ bskal pa grangs med ces bya ba la sogs pa smos te/ gang la bskal pa grangs med pa mi nyung bar thugs rje chen po'i bdag nyid du gyur pa zhes tshig rnam par sbyar ro/ /bcom ldan 'das rang gi don phun sum tshogs pa ma lus pa brnyes na yang gzhan gyi don mdzad pa'i bya ba yongs su mi 'dor ba'i phyir thugs rje chen po de yang mnga' ba yin no/ /ci ste thugs rje chen po'i bdag nyid du 'gyur pa 'dis ci zhig mdzad ce na/ goms mdzad pa gang gis zhes bya ba smos te/ gang gis zhes bya ba spyi'i tshig yin yang sangs rgyas bcom ldan 'das la 'jug ste / gzhan la ji skad du bshad pa'i yon tan med pa'i phyir ro/ /rten cing 'brel par 'byung ba ni zhes bya ba ni rgyu dang rkyen la brten pa ste/ yang dag par kun nas brten pas yang dag par kun nas brten nas phung po la sogs pa 'byung ba dag go/ /de skad du rgyu dang rten gyi stobs las 'byung ba'i phung po la sogs pa gang gis gsungs ba zhes bstan par 'gyur ro/ /'di ltar yang 'brel par 'byung ba zhes bya ba tha dad pa nyid du bstan pa de lta na yang rten cing 'brel par 'byung ba kho na dngos po yin te/ tha dad pa gzhan dor ba tsam shes par 'dod pas de ltar bshad pa'o/ /yang na 'brel par 'byung bas na 'brel par 'byung ba ste/ mang po'i tshig gi byed pa'i rkyen sbyar te/ rten cing 'brel bar 'byung ba nyid yin pas na zhes bya ba'am/ bsdu ba med pa nyid yin te / 'di thams cad kyis bcom ldan 'das gzhan la phan pa bsgrub pa phun sum tshogs pa yang dag pa'i thabs can yin par gsal bar byas pa yin te/ 'di ltar rten cing 'brel par 'byung ba de lta bur gyur pa gang gis gsungs pa zhes bya ba 'dis bcom ldan 'das ji lta ba bzhin du gzhan la phan par sgrub pa yin par bstan to/ /bcom ldan 'das gzhan dag la mtho ris dang byang grol gyi lam phyin ci ma log pa ston pa gang yin pa 'di nyid phan pa sgrub pa yin te/ ji skad du/ de bzhin gshegs pa ston pa po/ /khyed cag nyid kyis bya ba yin/ /zhes gsungs pa bzhin no/ / gzhan la phan pa sgrub pa phun sum tshogs pa phyin ci ma log pa 'di'i thabs ni/ chos rnams dngos su gzigs pa dang / thugs rje chen po yin no/ /gang gi phyir snying rje can yin yang yang dag pa ji lta ba bzhin du mi shes na gzhan la phan pa yang dag pa ston par mi nus so/ / yongs su shes pa dang ldan pa yin na yang brtse ba las nyams pas ni mi ston pa yin la/ ston na yang mi phan pa ston par 'gyur ro/ /de lta bas na bcom ldan 'das kyi snying rje dang shes rab gnyi ga yang gzhan la phan pa yang dag par sgrub pa'i thabs yin no/ /dngos su gzigs pa de yang rang dbang can gyi thos pa dang ma 'brel pa nyid kyis bstan to/ /thugs rje chen po'i bdag nyid du gyur pa nyid kyis kyang thugs rje chen po dang ldan pa yin no/ /'on te rten cing 'brel bar 'byung ba phyin ci ma log pa ni byang chub sems dpa' dang nyan thos la sogs pas kyang ston pa ma yin nam/ des na bcom ldan 'das 'di la khyad par du 'phags pa ci zhig yod ce na/ smra rnams kyi dam pa zhes bya ba smos te/ nyan thos la sogs pa de dag rten cing 'brel par 'byung ba ston pa yin mod kyi/ 'on kyang bcom ldan 'das nyid de dag gi smra rnams kyi dam pa ste gtso bo yin no/ /chos kyi de kho na nyid bcom ldan 'das kyis bstan pa nyid kyis ston par byed pa'i phyir ro/ /gang gi phyir de dag ni rang nyid kyis ji skad du bshad pa'i rten cing 'brel par 'byung ba ston par nus pa ma yin te/ yon tan dang skyon thams cad 'phel ba dang 'grib pa mthar phyin pa la brten pa'i phyir/ bcom ldan 'das kho na mchog yin gyi/ gzhan dag ni ma yin te/ de dag ni de las bzlog pa yin pa'i phyir ro/ /'dis ni bcom ldan 'das nyan thos la sogs pa las khyad par can du bstan pas bag chags dang bcas pa'i nyon mongs pa dang shes bya'i sgrib pa ma lus pa spangs pa'i mtshan nyid can rang gi don phun sum tshogs pa bstan pa yin no/ /gal te de lta ma yin na bcom ldan 'das ji skad du bshad pa'i yon tan dang ldan pa ma yin na ji ltar de dag las khyad par can du 'gyur/ de nyid kyi phyir thams cad mkhyen pa zhes bya ba smos te/ 'dis ni thams cad mkhyen pa sgrub pa bstan to/ /ci ste de la phyag 'tshal nas ci zhig byed ce na/ de kho na nyid bsdu ba bya/ /zhes bya ba smos te/ ji skad du bshad pa'i khyad par du byas pa'i rten cing 'brel par 'byung ba kho na de kho na nyid de/ phyin ci ma log pa'i phyir ro/ /de dag de dang der rnam par 'thor ba rnams gcig tu sdud pa ni don bsdus pa ste/ don de stan par byed pa'i phyir gzhung la yang de skad du bstan te/ sI ta phrogs pa'i snyan dngags bzhin no/ /yang na yang dag par ram kun nas de kho na nyid rnams 'dis sdud par byed pas gzhung nyid la bsdus pa zhes bya ba'o/ /bya zhes bya ba ni rtsom pa na yongs su ma rdzogs pa'i dus la ltos nas da ltar gyi dus nyid bstan to/ /de la rang bzhin gyi bya ba dang bral ba'i de khon nyid bstan par bya ba'i phyir grangs can gyi lugs bstan pa'i don du/ nus pa ma lus dang ldan pa'i/ /zhes bya ba la sogs pa smos te/ ser skya pa rnams na ri chen po la sogs pa 'bras bu'i tshogs skyed par byed pa'i bdag nyid du gyur pa'i nus pa ma lus pa dang rab tu ldan zhing yang dag par ldan pa rdul dang mun pa dang snying stobs dag cha mnyam pa'i gnas skabs kyi mtshan nyid can ni gtso bo'o/ /de dag nyid las chen po la sogs pa 'bras bu'i bye brag de dag 'byung ngo zhes zer te/ gtso bo kho na zhes nges par bzung ba ni skyes bu la sogs pa rnam par bcad pa'i don du'o/ /'ba' zhig las zhes bya ba'i tshig ni dbang phyug dang bcas pa'i grangs can gyis brtags pa'i dbang phyug la sogs pa bsal ba'i don du'o/ /rab tu 'byung zhes bya ba ni dngos sam brgyud pas skyed ces bya ba'i don te/ 'di ltar de dag gi tha snyad ni dang por gtso bo las blo skye'o/ /blo las kyang nga rgyal lo/ /nga rgyal las sgra dang / reg bya dang / ro dang / gzugs dang / dri'i bdag nyid de tsam lnga dang / dbang po bcu gcig skye bar 'gyur te/ blo'i dbang po lnga ni/ rna ba dang / pags pa dang / mig dang / lce dang / sna'i mtshan nyid can no/ /las kyi dbang po lnga ni/ ngag dang / lag pa dang / rkang pa dang / rkub dang / mdoms so/ /bcu gcig pa ni yid do/ /de tsam lnga las 'byung ba lnga skye ste / sgra las nam mkha'o/ /reg las rlung ngo / /gzugs las me'o/ /ro las chu 'o/ /dri las ni sa'o zhes bya'o/ /ji skad du dbang phyug nag pos/ rang bzhin las chen de las nga rgyal te/ /de las tshogs ni rnam pa bcu drug go/ /bcu drug po ni de dag rnams las kyang / /lnga po rnams las 'byung ba chen po lnga/ /zhes bshad do/ /de la chen po zhes bya ba ni blo la brjod do/ /blo yang 'di bum pa'o/ /snam bu'i zhes yul nges pa'i mtshan nyid can no/ /nga rgyal ni bdag ni skal ba dang ldan pa'o/ /bdag ni lta na sdug pa'o zhes bya ba la sogs pa'i mngon pa'i nga rgyal gyi mtshan nyid can no/ /yid ni kun du rtog pa'i mtshan nyid can te/ 'di lta ste/ dper na byis ba 'ga' zhig gis grong gzhan na ston mo yod do zhes thos te/ der bdag 'gro bar bya na ci de na bu ram dang zho yod dam/ 'on te zho gcig pu yod ces de'i kun tu rtog par 'gyur ba de lta bu'i rtog pa 'jug pa ni yid ces bya'o/ /de lta bas na blo dang / nga rgyal dang / yid rnams kyi phan tshun gyi khyad par ni de lta bu yin par shes par bya'o/ /lhag ma ni go bar bla'o / /chen po la sogs pa 'di dag dang / gtso bo dang / skyes bu zhes bya ba 'di dag ni de kho na nyid nyi shu rtsa lnga yin te/ ji skad du/ de nyid nyi shu lnga shes na/ /ral pa'am mgo zlum cod pan can/ /gnas ni gang dang gar gnas kyang / /grol 'gyur 'di la the tshom med/ /ces bshad do/ /ji skad du bshad pa'i 'bras bu'i khyad par gtso bo las byung ba 'dis ni sangs rgyas pa la sogs pas 'dod pa bzhin du 'bras bu'i khyad par rnams ni rgyu las shin tu tha dad pa ma yin te/ 'on kyang de ni ngo bo nyid yin no/ /gang dag la de'i ste gtso bo'i ngo bo ste bdag nyid yod pa zhes tshig rnam par sbyar ro/ /yon tan gsum la sogs pa'i ngo bos rang bzhin gyi bdag nyid du gyur pa nyid ces bya ba'i tha tshig go/ /'di ltar 'jig rten na rgyu'i bdag nyid du gyur pa gang yin pa de'i bdag nyid du gyur pa'i 'bras bu dmigs te dper na/ snal mnag po dag las byas pa'i snam bu ni nag po dang / dkar po las byas pa ni dkar po yin no/ /de bzhin du gtso bo dang yon tan gsum gyi bdag nyid yin pa de ltar blo dang / nga rgyal dang / de tsam dang / dbang po dang / 'byung ba'i bdag nyid kyi gsal ba yang yon tan gsum yin par dmigs so/ /de'i phyir de'i ngo bo yin no/ /gzhan yang dbye ba med pa ni 'di ltar 'di dag ni snying stobs la sogs pa yin la/ 'di dag ni chen po la sogs pa gsal ba yin no zhes logs shig tu bya bar mi nus kyi/ 'on kyang yon tan gang dag yin pa de ni gsal ba yin la/ gsal ba gang yin pa de dag ni yon tan rnams yin no zhes bya'o/ /gzhan yang gsal ba dang mi gsal ba gnyi ga yang yul yin te/ longs spyod par bya ba'i rang bzhin yin pa'i phyir ro/ /spyi yang yin te/ skyes bu thams cad kyi yongs spyad par bya ba yin pa'i phyir gyad dang 'bangs mo bzhin no/ /sems med pa'i bdag nyid kyang yin te/ bde ba dang / sdug bsngal ba dang / rmongs pa lam du bya ba rig par byed pa yin pa'i phyir ro / /skye ba'i chos can yang yin te/ 'di ltar gtso bos ni blo skyed par byed do/ /blos kyang nga rgyal dang / nga rgyal las kyang de tsam lnga dang / dbang po bcu gcig go/ /de tsam gyis 'byung ba chen po skyed par byed pa yin no/ /de lta bas na yon tan gsum la sogs pa'i ngo bos 'bras bu'i khyad par 'di dag de'i ngo bo nyid du 'jug go/ /ji skad du/ yon tan gsum dang dbye ba med yul dang / /spyi dang sems med skye ba'i chos can ni/ /gsal ba dang ni de bzhin gtso bo ste/ /de bzhin de las bzlog pa'i skyes bu'o/ /zhes bshad do/ /gal te 'bras bu'i khyad par de'i ngo bo ma yin nam/ de'i phyir ci ltar bstan bcos su gsal ba dang mi gsal ba mtshan nyid tha dad par brjod/ 'di ltar dbang phyug nag pos/ rgyu ldan mi rtag ma khyab pa/ /byed bcas du ma rten pa ba rtags / / cha shas dang bcas gzhan dbang gsal/ /bzlog pa dag ni mi gsal ba'o/ /zhes bstan te/ de la don ni 'di yin te/ gsal ba nyid ni rgyu dang ldan pa yin te/ 'di ltar gtso bos rgyu dang ldan pa ni blo'o/ /blos rgyu dang ldan pa ni nga rgyal lo/ /nga rgyal gyis rgyu dang ldan pa ni de tsam lnga dang dbang po bcu gcig go/ /de tsam gyis ni 'byung ba rnams so/ /mi gsal ba ni de lta bu ma yin te/ de ni gang las kyang ma skyes pa'i phyir ro/ /de bzhin du gsal ba na mi rtag pa yin te/ skye ba'i chos can yin pa'i phyir ro/ /de ltar mi gsal ba ni ma yin te/ de ni skye ba dang mi ldan pa'i phyir ro/ / ji ltar gtso bo dang skyes bu de dag ni lha yul dang sa stengs dang / bar snang thams cad du khyab pa nyid kyis 'jug pa de bzhin du gsal ba ni 'jug ste/ 'on kyang de ni ma khyab pa yin no/ /ji ltar 'khor ba'i tshe blo dang / nga rgyal dang / dbang po'i mtshan nyid can byed pa rnam pa bcu gsum dang ldan pa phra ba'i lus la brten pa'i gsal ba 'khor ba de bzhin du mi gsal ba ni ma yin te/ de ni khyab pa nyid kyis bya ba dang bcas pa nyid du mi rung ba'i phyir ro/ /blo dang nga rgyal la sogs pa'i bye brag gis gsal ba rnam pa du ma dmigs la/ mi gsal ba ni ma yin te/ de ni gcig nyid du yod pa na 'jig rten gsum gyi rgyu yin pa'i phyir ro / /gsal ba ni rten pa yang yin te / gang zhig gang las skye ba de ni de la brten pa yin pa'i phyir ro/ /mi gsal ba ni de lta ma yin te/ de ni 'bras bu ma yin pa'i phyir ro/ /gsal ba ni 'gro ba yin te thim par 'gyur ba'i phyir ro/ /'di ltar 'jig pa'i dus na 'byung ba rnams ni de tsam la thim mo/ /de tsam ni dbang po lnga'o / /dbang po ni nga rgyal la'o/ /nga rgyal ni blo la'o/ /blo ni gtso bo la thim ste/ mi gsal ba ni de ltar gang la yang thim pa ma yin te/ de la rgyu med pa'i phyir ro/ /gsal ba ni cha shas dang bcas pa yang yin te/ sgra dang / reg dang / ro dang / gzugs dang dri'i bdag nyid kyi cha shas rnams dang ldan pa'i phyir ro/ /mi gsal ba ni de lta ma yin te/ gtso bo'i bdag nyid la sgra la sogs pa rnams mi dmigs pa'i phyir ro/ /gzhan yang dper na pha gson pa na bu la rang dbang yod pa ma yin pa de bzhin du gsal ba ni rgyu'i rnam pa thams cad la rag las pa'i phyir gzhan dbang yin no/ /mi gsal ba de lta ma yin te/ de ni rtag tu rgyu la rag ma las pa'i phyir ro/ /de lta bas na 'di thams cad dogs par byas nas yang dag tu zhes bya ba smos so/ /yang dag tu ste/ don dam par de'i ngo bo nyid yin gyi/ rang bzhin dang 'gyur ba'i bye brag gis ni yongs su gyur pa'i khyad par las tha dad pa ji skad du bshad pa la 'gal ba med do zhes bya ba'i don to/ /yang na yang dag tu zhes bya ba ni rang bzhin gyis yon tan gsum gyi ngo bos de'i ngo bo nyid du 'jug ste/ snying stobs dang / rdul dang / mun pa phra ba dang rags pa'i khyad par las chen po la sogs pa'i dbye ba 'khor ba sna tshogs pa 'gal ba med do zhes bya ba'i don to/ /de'i phyir 'dis ni 'bras bu rgyu'i bdag nyid du yod do zhes dam bcas pa yin no/ /de la ji ltar skyes pa las sngar 'bras bu yod do zhes rtogs par bya zhe na/ gal te zhes bya ba la sogs pa smos te/ gzhan dag gis 'bras bu yod pa nyid bsgrub par bya ba'i phyir gtan tshigs lnga smras te/ med pa mi byed pa'i phyir dang / rgyu len pa'i phyir dang / thams cad mi skye ba'i phyir dang / nus pa ni nus pa byed pa'i phyir dang / rgyu yod pa'i phyir 'bras bu yod pa yin no/ /de la gtan tshigs dang po bsgrub pa'i phyir 'di brjod de/ gal te rgyu yi bdag nyid la/ / 'bras bu nus pa yod min na/ /zhes bya ba la sogs pa la/ gal te rgyu'i bdag nyid la skyes pa las sngar 'bras bu yod pa ma yin pa de'i tshe nam mkha'i pad ma bzhin du de sus kyang byed par mi 'gyur ro/ /sbyor ba ni gang med pa de ni gang gis kyang bya ba ma yin te/ nam mkha'i pad ma bzhin no/ /gzhan gyi lugs kyis kyang 'bras bu ni skyes pa las sngar yod pa ma yin no zhes bya ba ni khyab par byed pa 'gal ba dmigs pa'i thal bar 'gyur ba'o/ /de lta yang ma yin te/ gang gi phyir til la sogs pas til mar la sogs pa'i 'bras bu gang zhig byed de/ de'i phyir sngar yang yod do zhes bya bar grub bo/ /nus pas zhes bya ba ni nus pa'i ngo bos yin gyi/ ser skya pa yang dag gsal ba'i ngo bos ni sngar yod par mi 'dod pa'i phyir ro/ /ngo bo med pa'i phyir zhes bya ba ni rang bzhin med pa'i phyir ro/ /gtan tshigs gnyis pa bsgrub pa don du med par mtshungs na zhes bya ba la sogs pa smos te/ gal te 'bras bu med pa yin pa de'i tshe skyes bu rnams so sor nges pa'i rgyu ngas len par mi 'gyur te/ 'di ltar sA lu'i 'bras bu don du gnyer ba rnams sA lu'i sa bon kho na len par byed kyi/ ko tra pa'i sa bon ni ma yin no/ /de bzhin du bdag sang bram ze la ston mo bya'o snyam nas zho don du gnyer ba 'o ma nyid lan gyi chu ni ma yin no/ /de la ji ltar sA lu'i sa bon la sogs pa dag la sA lu la sogs pa med pa de bzhin du ko tra pa'i sa bon la sogs pa la yang med pa yin pas/ des na ci'i phyir thams cad du sA lu'i 'bras bu la sogs pa med par mtshungs na yang so sor nges pa nyid kyi sA lu'i sa bon la sogs pa len gyi/ ko tra pa'i sa bon la sogs pa ni ma yin/ sA lu'i 'bras bu don du gnyer ba rnams kyis ko tra pa la sogs pa yang ci ste len par mi byed de/ khyad par med pa'i phyir ro/ /ci ste de'i 'bras bus stong pa nyid kyis de dag des len par mi byed pa gal te de lta yin na/ sA lu'i sa bon yang sA lu'i 'bras bu don du gnyer bas len par mi 'gyur te/ ko tra pa'i sa bon bzhin du de'i 'bras bus stong pa'i phyir ro/ /de lta na yang ma yin te/ de lta bas na de la de'i 'bras bu yod do zhes rtogs so/ /gtan tshigs gsum pa bsgrub pa'i phyir/ 'di na kun la zhes bya ba la sogs pa smos te/ gal te yang khyod kyi lugs kyis 'bras bu med pa skye'i zhes bya ba yin na de'i tshe/ rtswa dang / rdul dang / bong ba la sogs pa'i dngos po kun rtswa las gser dngul la sogs pa'i 'bras bu thams cad skye bar 'gyur ro/ /ci'i phyir zhe na/ de'i bdag nyid dang bral bar thams cad la khyad par med pa'i phyir ro/ /khyod kyi lugs kyis brjod par 'dod pa'i rtswa la sogs pa'i dngos po'i bdag nyid bral bar skye ba dang ldan pa'i dngos po thams cad la khyad par med pa'i phyir ro zhes bya ba'i don to/ /sngar ni rgyu'i sgo nas thal bar 'gyur ba brjod la/ da lta ni 'bras bu'i sgo nas yin no zhes bya ba ni bye brag go/ /thams cad las thams cad 'byung ba yang ma yin te/ de'i phyir de nyid la de yod pa yin no zhes bya bar 'di ni nges pa yin par rtogs so/ /'di snyam du so sor nges pa'i 'bras bu dag la rgyu rnams kyi nus pa nges pa yin te/ des na 'bras bu med na yang 'bras bu cung zad cig byed kyi/ nam mkha'i pad ma la sogs pa ni ma yin no/ /nus pa gang yin pa'i rgyu cung zad len par byed kyi thams cad ni ma yin no/ /'ga' zhig nyid 'ga' zhig las skye'i thams cad thams cad las ni ma yin no snyam du sems pa'i rtsod pa 'di bslang nas lan gdab pa'i zol gyis/ gtan tshigs bzhi pa bsgrub pa'i phyir/ /'di yi nus pa nges pa'i phyir/ /zhes bya ba la sogs pa smos te/ 'di'i zhes bya ba ni rgyur mngon par 'dod pa'i dngos po rnams kyi'o/ /de min zhes bya ba ni ji skad du bshad pa'i skyon du mi 'gyur ro zhes bya ba'i don to/ /sangs rgyas pa la sogs pa'i lam de 'di ni ma yin te/ ci'i phyir zhe na/ rgyu nus pa rnams kyang 'bras bu byed pa na bya bar nus pa nyid byed kyi mi nus pa ni ma yin no/ /'on te gang gis de khyed cag 'gegs par byed pa mi nus pa kho na byed do zhes bya ba 'di su zhig gis smras/ 'on te 'bras bu med kyang byed do zhes bya ba de tsam zhig brjod de/ de yang de dag gis bya bar mi nus pa yin no zhe na/ de'i phyir/ khyad par byar med gang yin pa/ /zhes bya ba la sogs pa smos so/ /'di snyam du sems te/ khyed kyis 'bras bu med pa byed pa nyid du khas blangs pa nyid kyis bya bar mi nus pa byed do zhes bstan to/ /'di ltar gang med pa de ni ngo bo med pa rang bzhin med pa yin la/ gang ngo bo med pa de ni ri bong gi rwa la sogs pa bzhin du khyad par byar med cing khyad par bsgrub tu med pa yin no/ /gang yang khyad par bsgrub tu med pa de ni nam mkha' bzhin du mi 'gyur ba yin no/ /khyad par gyi rang bzhin bsgrub tu med pa lta bu de ji ltar 'ga' zhig gis bya bar nus/ ci ste yang de ni yod pa'i gnas skabs thob pa'i phyir 'gyur ba nyid yin no snyam du sems na/ de'i phyir/ 'gyur ba bdag nyid nyams 'gyur phyir/ /zhes bya ba smos te/ gang gi phyir rnam par 'gyur bar 'dod pa gang yin pa de ni bdag nyid kyi rang bzhin gyis ngo bo med pa zhes bya bar brjod pa yin te/ de nyams par 'gyur ro/ /med pa'i rang bzhin yongs su ma spangs pa yin na yod pa'i ngo bo thob par rigs pa ma yin la/ yongs su btang na yang 'o na ni med pa nyid ma yin pa yod pa'i ngo bo thob po zhes bya ba 'grub par mi 'gyur ro/ /yod pa'i ngo bo ni gzhan yin la/ med pa'i ngo bo yang gzhan yin te/ de dag ni phan tshun spangs te gnas pa'i phyir ro/ /de lta bas na gang med pa de bya bar nus pa ma yin no/ /de lta bur gyur pa'i dngos po byed pa nyid khas blangs pa yin na ni rgyu rnams mi nus pa byed pa nyid kho nar khas blangs par 'gyur ro/ /nam mkha'i pad ma bzhin du gang gis kyang mi nus pa bya ba yang ma yin pa kho na'o/ /de'i phyir nus pa so sor nges pa'i phyir ro zhes bya ba 'di ni lan ma yin no/ /gtan tshigs lnga pa bsgrub pa'i phyir/ de ltar 'bras bu mi rung phyir/ /zhes bya ba la sogs pa smos te/ de ltar bshad ma thag pa'i rigs pas sam/ ji skad du bshad pa'i gtan tshigs bzhi kas 'bras bu med par smra ba la rnam pa thams cad du 'bras bu mi rung ba'i phyir ci zhig byed pa na sa bon la sogs pa rgyur 'gyur/ de'i phyir sa bon la sogs pa ni rgyu ma yin te/ 'bras bu med pa'i phyir nam mkha'i pad ma bzhin no zhes de skad du brjod par nus na de lta yang ma yin te/ de'i phyir skyes pa las sngar 'bras bu yod do zhes bzlog pas grub pa yin no/ /'di snyam du gal te 'bras bu yod pa zhes bya bar grub na yang 'bras bu'i khyad par 'di dag gtso bo nyid las rab tu 'byung ngo zhes bya ba 'di ji ltar 'grub ce na/ gsal ba 'di ni bde sogs kyi/ /zhes bya ba la sogs pa smos te/ de la gtso bo yod pa nyid du sgrub pa la ldan pa'i sbyor ba lnga smras te/ ji skad du/ khyad par tshad phyir rjes 'gro'i phyir/ /nus pa'i sgo nas 'jug pa'i phyir/ /rgyu dang 'bras bu dbyer yod phyir/ /rang bzhin sna tshogs dbyer med phyir/ /mi gsal ba yi rgyu yod do/ /zhes bshad pa lta bu'o/ /don 'di yin te/ gtso bo yod pa yin te/ khyad par rnams la tshad yod pa'i phyir ro / /'jig rten 'di na gang la byed pa po yod pa de la tshad yod par mthong ste/ dper na rdza mkhan dang ldan pas 'jim gong las bre lnga shong ba dang / bre do shong ba dang / bre bcu shong ba'i tshad dang ldan pa'i bum pa byed pa bzhin no/ /chen po la sogs pa'i gsal ba 'di yang blo gcig dang / nga rgyal gcig dang / de tsam lnga dang / dbang po bcu gcig dang / 'byung ba lnga zhes bya ba'i tshad dang ldan par mthong ngo / /de'i phyir gang las tshad dang ldan pa'i gsal ba skye bar byed pa'i gtso bo yod par rjes su dpag pas bsgrub par bya'o/ /gal te yang gtso bo med na gsal ba 'di tshad dang mi ldan par 'gyur ro/ /'di las kyang gtso bo yod de/ khyad par rnams rjes su 'gro bar mthong ba'i phyir ro/ /gang rigs dang ldan par dmigs pa gang yin pa de ni de'i bdag nyid kyi rgyu las byung ba yin te/ dper na bum pa dang kham phor la sogs pa'i khyad par 'jim pa'i rigs dang ldan pa de dag ni 'ji ba'i bdag nyid kyi rgyu las byung ba bzhin no/ /gsal ba'i khyad par 'di yang bde ba dang / sdug bsngal dang / rmongs pa la sogs pa'i rigs dang ldan par dmigs so/ /ga las she na/ rab tu dang ba dang / gdung ba dang / zhum pa la sogs pa'i 'bras bu dmigs pa'i phyir ro/ /'di ltar snying stobs kyi 'bras bu ni rab tu dang ba dang / yang ba dang / zhen pa dang / 'phel ba dang / dga' ba rnams yin no/ /bde ba zhes bya bas kyang snying stobs nyid brjod do/ /rdul gyi 'bras bu ni gdung ba dang / skem pa dang / tha dad pa dang / rengs pa dang / skyo ba rnams yin no/ /rdul yang sdug bsngal gyi sgras brjod do/ /mun pa'i 'bras bu ni zhum pa dang / sgrib pa dang / sdom pa dang / rnam par 'tshe ba dang / lci ba rnams yin no/ /mun pa yang rmongs pa'i sgras brjod do/ /chen po la sogs pa de dag thams cad kyi 'bras bu rab tu dang ba dang / gdung ba dang yang ba la sogs pa dmigs so/ /de lta bas na 'di ni bde ba dang / sdug bsngal ba dang / rmongs pa rnam pa gsum po rnams kyi gnas lugs kyi khyad par yin no zhes nges par bya'o/ /des na 'di dag ni rab tu dang ba la sogs pa'i 'bras bu las bde ba la sogs pa dang ldan pa nyid du grub cing de'i rjes su 'gro ba las kyang de'i bdag nyid kyi rang bzhin las byung ba nyid grub po/ /de grub pa na yang shugs kyis rang bzhin gang yin pa de ni gtso bo yin no zhes bya bar grub bo/ /gtso bo yod na tha dad pa dag rjes su 'gro bar mthong ba'i phyir ro/ /'di las kyang gtso bo yod pa yin te/ nus pa'i sgo nas 'jug pa'i phyir ro zhes bya ba 'di las kyang gtso bo yod pa yin no/ /'jig rten 'di na gang zhig don gang la 'jug pa de ni de la nus pa yin te/ dper na thag pa snam bu byed pa la 'jug pa bzhin no/ /de'i phyir gang gis gsal ba skyed par byed pa'i gtso bo'i nus pa yod do zhes bsgrub par bya'o/ /nus pa de yang rten med pa can ma yin te/ /de'i phyir gang la nus pa 'jug par byed pa'i gtso bo yod do/ /'di las kyang gtso bo yod pa yin te/ rgyu dang 'bras bu rnam par dbyer yod pa'i phyir 'jig rten 'di ni rgyu dang 'bras bu dag gi rnam par dbye ba mthong ste/ 'di lta ste dper na 'ji ba'i gong bu ni rgyu yin la bum pa ni 'bras bu yin pa'i rang bzhin no/ /de yang 'ji ba'i gong bu las tha dad pa'i ngo bo yin te/ 'di ltar bum pa ni sbrang rtsi dang chu dang 'o ma 'dzin par nus kyi/ 'jim pa'i gong bu ni ma yin no/ /de ltar na chen po la sogs pa'i 'bras bu 'di mthong nas gang las chen po la sogs pa'i 'bras bu 'di skyed par byed pa'i rgyu gtso bo yod do zhes bsgrub bo/ /'di las kyang gtso bo yod de/ rang bzhin sna tshogs dbyer med pa'i phyir ro/ /rang bzhin sna tshogs zhes bya ba ni 'jig rten gsum la brjod do/ /'di dag ni 'jig pa'i dus na 'ga' zhig tu dbyer med par 'gyur te/ 'di ltar 'byung ba lnga ni de tsam lnga la dbyer med par 'gyur ro/ /de tsam dang / dbang po dag ni nga rgyal la/ nga rgyal ni blo la/ /blo ni gtso bo la dbyer med par 'gyur ro/ /de'i phyir de ltar na 'jig pa'i dus su 'jig rten gsum dbyer med par 'gyur ro/ /dbyer med par zhes bya ba ni rnam par dbye bar mi nus pa'o/ /de lta bas na gang du chen po la sogs pa zhum par dbyer med par 'gro ba'i gtso bo yod pa yin no snyam du sems so/ /de lta bas na 'dir slob dpon gyis rjes su 'gro ba'i phyir zhes lhag ma rnams nye bar mtshon pa'i don du gtan tshigs kho na bstan to/ /de la bde sogs zhes bya ba la sogs pa'i sgras sdug bsngal dang rmongs pa gnyis gzung ngo / /gsal ba zhes bya ba ni chen po la sogs pa 'byung ba'i mthar thug pa'o/ /gsal bar snang zhes bya ba ni gsal bar dmigs zhes bya ba'i don to/ /ji ltar zhe na/ rab dang zhes bya ba la sogs pa smos te/ sogs pa'i sgra re re dang sbyar bar bya'o/ /'di ni kho bo cag gis dang po nyid du bshad zin to/ /de ltar rjes su 'gro ba'i phyir zhes bya ba'i gtan tshigs 'di grub par bstan nas/ tshad ma dgod pa'i phyir/ de bas de rigs zhes bya ba la sogs pa smos so/ /de rigs rjes 'gro mthong ba'i phyir/ /zhes bya ba ni gtan tshigs te/ yon tan gsum gyi mtshan nyid de nyid kyi rigs rjes su 'gro bar mthong ba'i phyir ro zhes bya ba'i don to/ /de'i dngos las byung zhes bya ba ni bde ba la sogs pa'i dngos po'i rgyu gang yin pa de las byung zhes bya ba'i don to/ /'dis kyang bsgrub bya bstan to/ /bum sogs bye brag bzhin zhes bya ba ni bum pa la sogs pa'i khyad par bzhin no/ /de'i rang bzhin gyi rgyu gang yin pa de ni gtso bo yin no zhes ser skya pa ste grangs can rnams smra bar byed do/ /de phyir 'di la zhes bya ba la sogs pas lan 'debs par byed pa yin no/ /de la re zhig gtso bo kho na las 'bras bu'i khyad par 'di dag de'i ngo bor rab tu 'byung ngo zhes gang smras pa de la 'di dpyad par bya ste/ gal te 'bras bu'i khyad par 'di dag gtso bo'i rang bzhin kho na yin na de'i phyir ji ltar 'di dag las 'bras bu nyid du 'jug par 'gyur/ gang zhig gang las tha mi dad pa de ni de'i 'bras bu'am/ rgyu nyid du rigs pa ma yin te/ rgyu dang 'bras bu dag ni mtshan nyid tha dad pa'i phyir ro/ /de lta ma yin na 'di ni 'bras bu'o/ /'di ni rgyu'o zhes bya ba'i ma 'dres pa'i rnam par gzhag pa byas pa gang yin par ji ltar 'gyur/ de'i phyir khyed cag gis rtsa ba'i rang bzhin ni rgyu kho na yin la/ 'byung ba dang dbang po'i mtshan nyid kyi tshogs bcu drug ni 'bras bu kho na yin zhing / blo dang / nga rgyal dang / de tsam rnams ni snga ma dang phyi ma la ltos na rgyu yang yin la 'bras bu yang yin no zhes rnam par gzhag pa byas pa gang yin pa der mi 'gyur ro/ /ji skad du/ rtsa ba'i rang bzhin 'gyur ba min/ /chen po sogs bdun rang bzhin 'gyur/ /bcu drug po rnams 'gyur ba ste/ / skyes bu rang bzhin 'gyur ba min/ /zhes bshad pa lta bu'o/ /phan tshun tha dad pa ma yin pa'i phyir thams cad rgyu 'am 'bras bu nyid du thal bar 'gyur ba'am / yang na rgyu dang 'bras bu'i dngos po ni ltos pa dang bcas pa nyid kyi phyir dang / ltos par bya ba ngo bo gzhan yang mi srid pa'i phyir/ skyes bu bzhin du thams cad rang bzhin yang ma yin la 'gyur ba yang ma yin par 'gyur ro/ /gzhan du na skyes bu yang rang bzhin dang 'gyur ba'i tha snyad du bya bar 'gyur ro/ /zho gang yin pa de 'o ma/ /'o ma gang yin de zho zhes/ /drag po len gyis bstan pa ste/ /de bzhin 'bigs byed gnas pa'ang 'chad/ /ces bshad do/ /yang rgyu dang ldan pa nyid la sogs pa'i chos dang ldan ni gsal ba yin la/ /bzlog pa ni mi gsal ba yin no zhes gang yin brjod pa de yang byis pa'i tshig nyid yin te/ gang zhig gang las rang bzhin tha mi dad pa de ni de las bzlog par mi rigs te/ bzlog pa'i mtshan nyid ni ngo bo gzhan yin pa'i phyir ro/ /de lta ma yin na tha dad pa'i tha snyad chad pa nyid du 'gyur ro/ /de'i phyir rdul dang / mun pa dang / snying stobs rnams dang / sems can rnams phan tshun tha dad par khas blangs pa rgyu mtshan med pa kho nar 'gyur ba dang / sna tshogs pa thams cad ngo bo gcig tu 'gyur ro/ /de'i phyir lhan cig skye ba dang 'jig par thal bar 'gyur ro/ /tha mi dad par rnam par gzhag pa'i mtshan nyid ni grub pa dang bde ba gcig pa yin pa'i phyir ro / /de lta bas na gsal ba'i ngo bo dang tha mi dad pa'i phyir mi gsal ba yang gsal ba'i ngo bo bzhin du rgyu dang ldan pa la sogs pa'i chos dang ldan par 'gyur ba dang / gsal ba yang mi gsal ba'i ngo bo dang tha mi dad pa'i phyir rgyu dang mi ldan pa la sogs pa'i chos dang ldan par 'gyur ro/ /de ni rang gi ngo bo bzhin du nges pa nyid yin te/ gzhan du na ha cang thal bar 'gyur ro/ /gzhan yang 'jig rten na rjes su 'gro ba dang ldog pa nges pa rtogs na rgyu dang 'bras bu'i dngos por 'grub kyi/ gang gis gtso bo las chen po dang / chen po las nga rgyal zhes bya ba la sogs pa 'grub par 'gyur ba gtso bo la sogs pa las chen po la sogs pa skye bar nges pa la rjes su 'gro ba dang / ldog pa rtogs pa 'ga' yang yod pa ma yin no/ /de'i phyir gtso bo la sogs pa las chen po la sogs pa skye ba'i tha snyad 'di ni rgyu mtshan med pa kho na'o/ /gang gis gtso bo las 'bras bu'i khyad par skyed pa nyid du 'grub par 'gyur ba rtag pa la ni rgyu'i dngos po yod pa yang ma yin te/ rtag pa ni rim dang rim ma yin pa dag gis don byed pa 'gal ba'i phyir ro/ /'di snyam du gang gis ngo bo tha dad med pa na de 'gal bar 'gyur ba kho bo cag ni snga na med pa'i rang bzhin skye bas rgyu dang 'bras bu'i dngos po mi 'dod de/ gang gi phyir gtso bo sprul 'khyil pa la sogs pa bzhin du chen po la sogs pa'i ngo bor yongs su 'gyur bar 'gro bas chen po la sogs pa de dag gi rgyu yin no zhes bstan la/ chen po la sogs pa de dag kyang gtso bo de yongs su gyur pa'i ngo bo yin pa'i phyir de'i 'bras bu nyid du bstan to/ /yongs su 'gyur ba yang dngos po gcig la gnas pa'i phyir tha mi dad kyang 'gal ba med do snyam du sems na/ de ni yang dag pa ma yin te yongs su 'gyur ba ma grub pa'i phyir ro/ /'di ltar yongs su 'gyur ba na snga ma'i ngo bo yongs su dor nas sam/ yongs su ma dor bar yin grang / gal te ma dor bar yin na de'i tshe gnas skabs 'chol bar 'gyur te/ rgan po nyid la sogs pa'i gnas skabs na yang long tsho nyid la sogs pa'i gnas skabs rnams dmigs par thal ba'i phyir ro/ /'on te yongs su dor nas yin na de'i tshe rang gi ngo bo las nyams par thal bar 'gyur ro/ / de'i phyir rang bzhin gzhan snga ma 'gag cing / snga na med pa'i rang bzhin gzhan skye ba yin pa'i phyir/ yongs su gyur pa 'ga' yang mi 'grub bo/ /gzhan yang yongs su 'gyur ba'i mtshan nyid ni de nyid gzhan du 'gyur bar brjod la/ gzhan du 'gyur ba de yang phyogs gcig gis sam/ bdag nyid thams cad kyis 'gyur ba yin grang / re zhig phyogs gcig gis ni ma yin te/ gcig la phyogs gcig mi srid pa'i phyir ro/ /bdag nyid thams cad kyis kyang ma yin te/ don gzhan skye ba na snga ma 'jig par thal ba'i phyir ro/ /de lta bas na de nyid gzhan du 'gyur bar rigs pa ma yin te/ de'i rgyu mtshan ni rang bzhin gzhan skye ba yin pa'i phyir ro/ /ci ste yang chos can rnam par gnas pa la chos gzhan log pas chos gzhan skye ba ni yongs su 'gyur bar brjod kyi/ rang bzhin gzhan du 'gyur ba nyid ni ma yin no snyam du sems na/ 'di ni yang dag pa ma yin te/ 'di ltar 'jug pa dang ldog pa'i chos de chos can las don gzhan du gyur pa zhig gam/ don gzhan du ma gyur pa zhig yin gal te don gzhan du gyur pa yin na de'i tshe/ chos can gyi gnas skabs de nyid yin pa'i phyir ji ltar 'di yongs su 'gyur ba zhes bya/ don gzhan du gyur pa'i snam bu dang rta dag skye ba dang 'jig pa na g.yo ba med pa'i bdag nyid kyi rang gi ngo bo'i bum pa la sogs pa yongs su 'gyur ba ni ma yin te/ ha cang thal bar 'gyur ba'i phyir ro/ /de lta na skyes bu yang yongs su 'gyur bar 'gyur ro/ /gal te de dang 'brel pa'i chos gnyis skye ba dang 'jig pas de yongs su 'gyur bar gzhag gi gzhan ni ma yin no zhe na/ ma yin te / yod pa dang med pa dag la 'brel pa med na de dang 'brel pa ma grub pa'i phyir ro/ /'di ltar 'brel par 'gyur na yod pa la 'am/ med pa la yin grang / re zhig yod pa la ni ma yin te/ de ni rang bzhin phun sum tshogs pa ma lus pa thob pas ltos pa med pa nyid kyis 'ga' la yang rag las par mi 'thad pa'i phyir ro/ /med pa la yang ma yin te/ de ni nye bar brjod pa'i mtshan nyid thams cad dang bral ba yin pa nyid kyis 'ga' la yang brten pa nyid du mi 'thad pa'i phyir ro/ /gang gi phyir ri bong gi rwa la sogs pa rnams ni 'ga' la yang brten par mi rigs so/ /chos gzhan tha dad pa skye ba dang 'jig pa na khyed cag gis yongs su 'gyur bar rnam par 'jog pa yang ma yin no/ /'o na ci zhe na/ gang la gnas skabs tha dad kyang bdag nyid du gyur pa'i rang bzhin gcig rjes su 'jug pa na de la khyed cag gis yongs su 'gyur bar rnam par gzhag la/ chos can las chos dag tha dad pa na rang bzhin gcig rjes su 'jug pa yod pa yang ma yin no/ /de dag gi gcig gi bdag nyid ni chos can nyid yin la/ chos las de yang tha dad pa'i phyir/ rang bzhin gcig gi bdag nyid du gyur pa rjes su 'jug pa ma yin no/ /'jug pa dang / ldog pa'i chos gnyis las tha dad pa'i chos can dmigs pa'i mtshan nyid du gyur pa mthong ba'i lam du 'jug pa ni 'ga' yang med pa'i phyir de 'dra ba ni mkhas pa rnams kyi med pa'i tha snyad kyi yul nyid yin no/ /ci ste don gzhan du ma gyur pa'i phyogs yin pa de lta na yang chos can gyi rang gi ngo bo gcig las tha mi dad pa'i phyir skye ba dang 'jig pa dang ldan pa'i chos gnyis kyang chos can gyi rang gi ngo bo bzhin du gcig nyid yin pa'i phyir gang zhig la brten nas chos can nam chos su 'gyur ba yin/ chos gnyis chos can gyi gnas skabs can las tha mi dad pa'i phyir gnas skabs can gyi rang gi ngo bo bzhin du ldog pa yang med/ skye ba yang med do/ /chos gnyis las chos can gzhan ma yin pa'i phyir chos kyi rang gi ngo bo bzhin du snga na med pa skye zhing snga ma 'jig pa yin pa'i phyir gcig 'ga' yang yongs su 'gyur bar mi 'grub po/ /de'i phyir yongs su 'gyur ba'i dbang gis kyang khyed cag gi rgyu dang 'bras bu'i tha snyad rigs pa ma yin no/ /skyon 'di ni gsal ba nyid yin pa'i phyir de yal bar dor nas 'bras bu med par smra ba'i skyon gzhan gyis smras pa gang yin pa 'di de la yang phyis 'chad par 'gyur ro snyam du bsams nas/ skyon mtshungs par bstan pa'i zol gyis/ re zhig 'bras bu yod par smra ba nyid sun 'byin par byed pa ni/ de'i phyir 'di la zhes bya ba la sogs pa'o/ /blo bzangs rnams zhes bya ba ni bde bar gshegs pa pa'o/ /de dag gis smras pa'i med pa mi byed pa'i phyir zhes bya ba la sogs pas rtsod pa lnga byas pa gang yin pa de ni yod pa la yang ste/ 'bras bu yod par smra ba'i phyogs la yang mtshungs pa yin te/ 'di ltar 'di la 'di skad du brjod par nus te/ yod pa mi byed pa'i phyir dang / rgyu len pa'i phyir dang / thams cad skye ba med pa'i phyir dang / nus pas ni nus pa byed pa'i phyir dang / rgyu yod pa'i phyir 'bras bu yod pa zhes bya ba la/ gang na yod pa'i 'bras bu yod pa ma yin no zhes bar du chod pa dang 'brel to/ /ci'i phyir zhe na/ yod pa mi byed pa'i phyir dang / rgyu len pa'i phyir zhes bya ba la sogs pa'i gtan tshigs gnyi ga'i skyon gang yin pa de gcig la klan kar rigs pa ma yin no snyam du bsams pa yin no/ /'on te 'dir med pa mi byed pa'i phyir zhes bya ba de lta bu'i rtsod pa yin la/ gzhan du yod pa mi byed pa'i phyir ro zhes bya ba de lta bu'i rtsod pa 'di ma yin nam/ ji ltar 'di mtshungs par 'gyur zhe na/ ma yin te/ bsam pa yongs su ma shes pa'i phyir ro/ /mi byed pa dang / nges pa'i rgyu len pa la sogs pa tsam brjod par 'dod nas 'di brjod la/ 'bras bu yod par smra ba la yang mi byed pa la sogs pa mtshungs pa'i phyir ro / /'bras bu yod par smra ba khyed cag gi rtsod pa'i len gang yin pa de ni 'bras bu med par smra ba blo bzangs te / sangs rgyas pa rnams kyi yang yin par 'gyur ro/ /'di ji ltar mtshungs she na/ gal te zho sogs zhes bya ba la sogs pa smos te/ 'di yod pa mi byed pa'i phyir zhes bya ba 'di bsgrub pa'i don du'o/ / gal te 'o ma la sogs pa'i bdag nyid la ste/ 'o ma la sogs pa rnams kyi rang bzhin la/ zho la sogs pa'i mtshan nyid kyi 'bras bu rnams rnam kun te/ ro dang / nus pa dang / rnam par smin pa la sogs pa bdag nyid thams cad kyi khyad par gyi dbye ba'i ngo bos zho la sogs pa'i gnas skabs bzhin du yod pa de'i tshe de dag yod na gang gis de dag 'o ma la sogs pa'i rgyus bskyed par bya bar 'gyur ba bskyed par bya ba'i ngo bo ci zhig yod/ rgyu la sogs dang 'dra bdag nyid/ /ces bya ba la/ rgyu la sogs pa dang 'dra ba'i bdag nyid gang la yod pa zhes tshig rnam par sbyar ro/ /rgyu ni rang bzhin no/ /sogs pa'i sgras ni sems pa can dang / de dag gi sgra ni zho la sogs pa'i gnas skabs yang bskyed par bya ba ma yin par grub pa'i ngo bo bzung ngo / /'dis ni rgyu dang 'bras bu med par thal bsgrub pa'i tshad ma gnyis bstan to/ /da ni tshad ma gsal bar bstan pa'i phyir/ 'bras de yod phyir rgyu yi sa ni/ /zhes bya ba la sogs pa smos te/ 'bras de zhes bya ba ni chen po la sogs pa dang / 'jig rten na grags pa zho la sogs pa'o/ /yod phyir zhes bya ba ni yod pa'i phyir ro/ /rgyu rig bzhin zhes bya ba la/ rgyu ni gtso bo dang / 'jig rten na grags pa ni 'o ma la sogs pa'o/ / rig pa ni sems pa can no/ /de dag dang mtshungs par 'jug pa'i phyir rgyu rig bzhin no/ /sbyor ba ni gang zhig rnam pa thams cad kyis yod pa de ni su zhig gis kyang bskyed par bya ba ma yin te/ dper na rang bzhin nam sems pa can bzhin no/ /gzhan gyi 'dod pas 'o ma la sogs pa'i gnas skabs su yang zho la sogs pa'i 'bras bu bdag nyid thams cad kyis yod pa yin no zhes bya ba ni khyab par byed pa 'gal ba dmigs pa'i thal bar 'gyur ba'o/ /gtan tshigs ma nges pa yang ma yin te/ khyad par bskyed par bya ba ma yin pa yang bskyed par bya ba nyid yin na thams cad bskyed par bya ba nyid du thal bar 'gyur ba dang / thug pa med par thal bar 'gyur ba ni gnod pa can gyi tshad ma ste/ bskyed zin pa yang bskyed par bya ba nyid du thal bar 'gyur ba'i phyir ro/ /de ltar na re zhig 'bras bu nyid du mngon par 'dod pa rnams 'bras bu ma yin par thal bar 'gyur ba bsgrubs nas/ da ni rgyur mngon par 'dod pa rnams rgyu ma yin pa nyid du thal bar 'gyur bar bsgrub par bya ba'i don du/ de phyir mngon 'dod rgyu min te/ /zhes bya ba la sogs pa smos so/ /mngon par 'dod pa'i dngos po zhes bya ba ni lhag ma'o/ /des na don ni 'di yin te/ rtsa ba'i rang bzhin la sogs pa dang / sa bon dang 'o ma la sogs pa mngon par 'dod pa'i dngos po rnams ni brjod par 'dod pa'i chen po la sogs pa dang zho la sogs pa'i rgyu ma yin te/ skyed par byed pa'i rgyu'i tha snyad du rung bar mi 'gyur ro zhes bya ba'i don to/ /ci'i phyir zhe na/ bsgrub par bya ba med pa'i phyir ro/ /'di la bsgrub bya yod pa ma yin pa'i phyir bsgrub bya med pa'o/ /de'i ngo bo ni bsgrub bya med pa nyid do/ /'di yang de ma thag tu brjod pa'i 'bras bu nyid bkag pa las grub ste/ de nyid kyi phyir de phyir zhes smos so/ /gzhan bdag bzhin zhes bya ba ni gzhan gyi rang bzhin bzhin te/ rgyu ma yin par mngon par 'dod pa'i dngos po'i rang bzhin bzhin no zhes bya ba'i don to/ /rgyu ma yin par 'dod pa'i dngos po yang sems pa can te/ skyes bu 'gyur min rang bzhin min/ /zhes smras pa'i phyir ro/ /sbyor ba ni gang zhig bsgrub bya med pa de ni rgyu ma yin te/ dper na sems pa can lta bu'o/ /mngon par 'dod pa'i dngos po yang bsgrub bya med pa can yin no zhes bya ba ni khyab par byed pa mi dmigs pa'o/ /'di gnyi ga yang thal ba sgrub pa yin te des na gnyi ga la grub pa'i dpes ci zhig bya/ gang yang grangs can rnams skyes bu la yang gzugs brnyan 'char ba'i tshul gyis longs spyod la byed pa po yin no snyam du sems pa de la de skad du bshad de/ 'di ni gzhan yang yin la bdag kyang yin te/ grol ba zhes bya ba'i don to/ /de ni grol ba yin pa'i phyir longs spyod par byed pa po gnyis ma yin pa'i phyir dpe ma grub pa ma yin no/ /'on te gsal sogs zhes bya ba la sogs pas/ gzhan gyi lugs kyis gtan tshigs ma grub pa dogs par byed de/ de la gal te gtan tshigs dang po mngon par gsal ba la sogs pa'i bdag nyid thams cad kyi ngo bo yod pa'i phyir zhes khyad par dang bcas pa byed pa de'i tshe ni ma grub ste/ kho bo cag gis mngon par gsal ba la sogs pa'i ngo bos kyang 'bras bu yod par ni mi 'dod do/ /'o na ci zhe na/ nus pa'i ngo bos so/ /ci ste spyir khyad par med pa yin pa de'i tshe ma nges pa yin te/ 'di ltar mngon par gsal ba la sogs pa'i mtshan nyid kyi khyad par ni bskyed par bya ba ma yin pa'i phyir/ des thams cad 'bras bu ma yin par thal bar mi 'gyur ro/ /de nyid kyi phyir gtan tshigs gnyis pa yang ma grub pa yin te/ bsgrub bya yod pa'i phyir ro/ /gsal sogs mtshan nyid ces bya ba la sogs pa'i sgras shas che ba dang shas chung ba la sogs pa'i gnas skabs kyi khyad par bzung ngo / /de zhes bya ba ni khyad par ro/ /tha snyad ces bya ba ni glan ka'o/ /de phyir mngon 'dod rgyu min te/ /bsgrub bya med phyir zhes bya ba la sogs pa'i nyes par mi 'gyur ro zhes bya ba'i tha tshig go/ /gal te de ltar sngar de yod ces bya ba la sogs pas lan 'debs par byed de/ de la rnam pa gnyis su brtag ste/ khyad par 'di mngon par gsal ba'i gnas skabs las sngar rang bzhin gyi gnas skabs 'ga' zhig gi tshe yang yod dam/ 'on te med/ gal te yod pa yin na de'i tshe khyed cag gis gtan tshigs gnyi ga yang ma grub pa la sogs pa la lan btab pa 'ga' yang med do/ /'on te sngar yod pa med pa de lta na yang khyad par de ltar rgyu de dag las 'byung bar 'gyur/ khyed kyi med pa mi byed pa'i phyir zhes bya ba rigs pa ma yin no snyam du dgongs pa'o/ /de ltar re zhig med pa mi byed pa'i phyir ro zhes bya ba'i gtan tshigs 'di bsgrubs nas/ da ni rgyu len pa'i phyir zhes bya ba la sogs pa'i gtan tshigs bzhi po bsgrub pa'i phyir/ de phyir bsgrub bya med pas na/ /zhes bya ba la sogs pa smos so/ /ji skad du bshad pa'i rigs pas bsgrub par bya ba med pa'i phyir rgyu len par mi 'gyur te/ bsgrub par bya ba'i 'bras bu de 'dod pa nyid kyis de dag rtog pa dang ldan pa rnams kyis len pa'i phyir ro/ /'o ma la sogs pa'i nges pa las zho la sogs pa skye'i zhes bya ba 'di yang mi 'gyur te/ bsgrub par bya ba med pa nyid kyi phyir ro/ /'dis kyang thams cad skye ba med pa'i phyir zhes bya ba 'di bsgrubs pa yin te/ 'di ltar thams cad las skye ba med pa nyid nges pa las skye ba zhes bya'o/ /de yang 'bras bu yod par smra ba'i phyogs la mi rung ste/ bsgrub bya med pa'i phyir ro / /de bzhin du nus pa ni nus pa byed pa'i phyir zhes bya ba 'di gnyis kyang rigs pa ma yin te/ bsgrub bya med pa nyid kyi phyir ro/ /gal te 'ga' zhig gis 'ga' zhig mngon par sgrub par byed pa de'i tshe sgrub par byed pa ni nus par gzhag la/ bsgrub par bya ba yang byed par grub kyi/ gzhan du ni ma yin no/ /de ston par byed pa ni/ /nus pa med cing bya ba'ang med/ /ces bya ba'o/ /dngos po rnams kyi rgyu yod pa yang rigs pa ma yin te/ bsgrub bya med pa'i phyir ro/ /de ston pa ni/ bdag nyid thams cad rdzogs pa'i phyir/ /zhes bya ba la sogs pa'o/ /'di yang rgyu yod pa'i phyir ro zhes bya ba'i gtan tshigs 'di bsgrubs pa yin no/ /de lta yang ma yin te/ de'i phyir 'bras bu yod pa ma yin no zhes gtan tshigs thams cad thal ba las bzlog par sbyar bar bya'o/ /yang skabs gzhan gyis 'bras bu yod par smra ba sun dbyung ba'i phyir/ /sgrub pa zhugs pa thams cad ni/ /zhes bya ba la sogs pa smos so/ /zhugs pa zhes bya ba ni 'jug pa'o/ /phyin ci log smos pas the tshom yang bzung ste/ 'di ni gnyi ga'i cha la dmigs pa nyid kyis sgro 'dogs pa nyid yin pa'i phyir ro/ /gang gi phyir sgrub par byed pa thams cad rang gi yul la 'jug pa na/ gnyis byed de/ gzhal bar bya ba'i don gyi yul la 'jug pa na/ phyin ci log dang the tshom zlog par byed pa dang / yul de la nges pa skyed par byed pa'o/ /'di ni 'bras bu yod par smra ba la rigs pas mi 'thad do/ /ji ltar zhe na/ the tshom dang ni phyin ci log /ces bya ba la sogs pa smos te/ 'di ltar khyed cag gi lugs kyis the tshom dang phyin ci log dag sems pa can gyi bdag nyid yin nam/ blo dang yid kyi rang bzhin yin / phyogs gnyi ga la yang de dag bzlog tu med pa yin te/ sems pa can blo dang yid rnams rtag pa nyid kyis de dag kyang rtag pa'i phyir ro/ /sgrub par byed pa las nges pa bskyed pa yang ma yin te/ gnas skabs thams cad du gnas pa'i rgyu 'di nyid kyi phyir ro/ /de'i phyir 'di la khyed cag gis sgrub par byed pa gang yin pa 'di smras pa de kun te thams cad don med pa yin no/ /'di ni rang gi tshig dang 'gal ba bstan pa yin te/ 'di ltar nges pa bskyed pa'i don du sgrub byed smra ba na nges pa yang med pa skye ba khas blangs pa yin la/ 'bras bu yod pa yin no zhes kyang dam bcas nas/ de bkag pa'i phyir rang gi tshig dang 'gal lo/ /ci ste sgrub par byed pa'i sbyor ba don med par 'gyur du 'ong bas nges pa yang dag pa ma yin pa de med pa nyid sgrub par byed pa las skye'o zhes khas blangs pa yin no/ /de lta na 'o na med pa mi byed pa'i phyir zhes bya ba la sogs pa'i gtan tshigs kyi tshogs mtha' dag ma nges pa nyid du 'gyur te/ nges pa bzhin du med pa yang skye ba 'gal ba med pa'i phyir ro/ /de'i phyir ji ltar nges pa med kyang byed pa dang / ji ltar de bsgrub par bya ba'i phyir sgrub par byed pa'i khyad par len pa dang / ji ltar de sgrub par byed pa ltar snang ba la sogs pa thams cad las 'byung ba ma yin pa dang / ji ltar 'di med na yang nus pa'i rgyu dag gis byed pa dang / ji ltar de la rgyu rnams kyi byed pa yod pa de bzhin du gzhan la yang 'gyur ro/ /ci ste sgrub par byed pa'i sbyor ba las sngar nges pa yod pa yin mod kyi/ 'on kyang sgrub par byed pa don med pa ni ma yin te/ 'di ltar de 'di sngar mngon par mi gsal ba las phyis sgrub par byed pa de dag las mngon par gsal bar sgrub par byed do/ /de'i phyir mngon par gsal bar bya ba'i don du sgrub par byed pa'i bya ba yod pas 'di dag don med pa ma yin no snyam du bsams na/ de ni rigs pa ma yin te/ gsal ba ma grub pa'i phyir ro/ /'di ltar gsal ba rang bzhin gyi khyad par skyed pa'am / yang na de'i yul can gyi shes pa'am/ de la dmigs pa'i sgrib pa bsal ba yin grang / de la re zhig rang bzhin gyi khyad par bskyed pa ni ma yin te 'di ltar rang bzhin gyi khyad par 'di nges pa'i rang gi ngo bo las tha mi dad pa 'am/ tha dad par gyur pa zhig yin grang / gal te tha mi dad pa yin na de'i tshe/ de ni nges pa las dbyer med pas tha mi dad pa'i phyir/ nges pa'i rang gi ngo bo bzhin du thams cad du gnas pas skye bar mi rigs so/ /ci ste tha dad pa yin na/ de lta na yang de'i 'di zhes bya ba'i 'brel pa mi 'thad do/ /'di ltar rten dang brten pa'i mtshan nyid kyi 'brel pa yin nam/ bskyed par bya ba dang skyed par byed pa'i mtshan nyid kyi 'brel pa yin/ re zhig dang po ni ma yin te/ phan tshun phan gdags par bya ba dang / phan 'dogs par byed pa ma yin pa la de med pa'i phyir ro/ /phan pa yin na yang phan 'dogs par byed pa de tha dad pa nyid yin na 'brel pa ma grub cing thug pa med pa thal bar 'gyur ba'i phyir ro/ /tha mi dad na yang sgrub par byed pa'i sbyor ba don med de/ nges pa nyid las phan gdags par bya ba tha mi dad pa'i khyad par skyed pa'i phyir ro/ /lus can ma yin pa'i phyir khyad par thur du ltung ba med pa'i phyir de la rten 'ga' zhig rigs pa yang ma yin te/ 'og tu ltung ba'i gegs byed pa nyid kyis rten du rnam par gzhag pa'i phyir ro/ /bskyed bya skyed byed kyi mtshan nyid kyi 'brel pa yang med de/ thams cad du nges pa zhes bya ba'i rgyu nye ba'i phyir/ khyad par rtag tu skyed par thal bar 'gyur ba'i phyir ro/ /sgrub par byed pa'i sbyor ba la ltos nas nges pa khyad par skyed par byed pa nyid du rigs pa yang ma yin te/ phan 'dogs par byed pa ma yin pa la ltos pa mi rung ba'i phyir ro/ /phan 'dogs na yang gong du skyon snga ma bzhin dang / thug pa med do/ /gzhan yang khyad par gang yin pa 'di tha dad par gyur pa yin na/ de ci med pa zhig gam/ 'on te yod pa zhig ces bya ba'i rnam par rtog pa gnyis po 'di yang 'jug pa nyid do/ /de la med pa yin na snga ma bzhin du sgrub par byed pa rnams ma nges pa nyid du 'gyur la/ yod na yang sgrub par byed pa don med par 'gyur ro/ /de la yang mngon par gsal bar 'dod pa na mngon par gsal ba 'di yang ci zhig ces thug pa med par thal ba bzlog par dka'o/ /de lta bas na tha dad pa'i phyogs la yang ma 'brel ba'i phyir te/ 'brel pa med pa'i phyir ngo bo'i khyad par skyed par mi rigs so/ /de'i yul la shes pa skyed pa'i mtshan nyid kyang gsal bar rigs pa ma yin te de'i yul rig pa ni rtag pa nyid kyi phyir te/ 'di ltar de'i yul yang dag par rig pa gang yin pa de 'bras bu yod par smra ba khyed cag gi lugs kyis rtag pa nyid yin pa'i phyir de ci zhig bskyed par bya bar 'gyur/ dmigs pa gnyis pa mi srid pa'i phyir yang / de'i yul can gyi shes pa skyed pa yang mngon par gsal ba'i mtshan nyid du mi rigs so/ /yang gi sgra ni sdud pa dang / rim pa gzhan du sbyar ba ste/ mi srid pa'i phyir zhes bya ba'i 'og tu blta bar bya'o/ /des na 'di skad du bstan pa yin te/ spro ba nas sdud pa'i bar du blo ni gcig yin no zhes bya ba ni grub pa'i mtha' yin pa'i phyir khyed cag gi lugs kyis rig pa ni gcig nyid yin pa la de nyid nges pa yin te/ gang zhig sgrub par byed pa rnams kyis byed par 'gyur ba de la dmigs pa'i gsal ba zhes bya ba gzhan ci zhig yod/ 'di snyam du de'i yul can gyi rig pa blo'i rang bzhin ni ma yin no/ /'o na ci zhe na/ yid kyi rang bzhin yin no snyam du sems na/ de ni yang dag pa ma yin te/ blo dang dmigs pa dang / nges pa dang / yid dang / yang dag par rig pa zhes bya ba la sogs pa rnams ni don gzhan ma yin pa'i phyir ro/ /'di yang phyis ston par 'gyur ro/ /de'i yul la dmigs pa'i sgrib pa zad pa'i mtshan nyid kyang gsal ba ma yin te/ rgyu rnam pa gnyis po de nyid kyi phyir ro/ /'di ltar de la dmigs pa'i sgrib pa gang yin pa de ni rtag pa'i phyir zad par 'gyur ba ma yin no/ /mi mngon pa'i mtshan nyid kyi zad pa yang rigs pa ma yin te/ sngar gyi ngo bo ma btang bar mi mngon pa srid pa'i phyir ro/ /dmigs pa gnyis pa yang med pa'i phyir dmigs pa'i sgrib pa ni yod pa ma yin no/ /med pa la ni sgrib pa mi rigs te/ de ni dngos po yod pa'i yul can yin pa'i phyir ro/ /de lta bas na de zad pa ni rigs pa ma yin no/ /yang na rtag pa'i phyir zhes bya ba ni de'i yul can gyi rigs pa ni rtag pa'i phyir sgrib pa med la/ de med pa'i phyir zad par mi rigs so zhes bya ba'i don 'di yin no/ /sgrib pa zad pa yang sus kyang bya ba ma yin te/ de ni rang bzhin med pa'i phyir ro/ /'bras bu yod par smra ba'i phyogs la sgrub par byed pa'i sbyor ba don med par 'gyur ba 'ba' zhig tu ma zad kyi/ bcings pa dang thar pa med par thal ba dang / 'jig rten gyi tha snyad thams cad chad par thal ba yang mi zlogs te/ 'di ltar khyed cag gi gtso bo dang skyes bu dag so sor dmigs pa'i mtshan nyid de kho na nyid shes pa skye ba na thar pa ni 'dod la/ de kho na nyid shes pa de yang thams cad du gnas pa nyid kyi phyir/ /lus can thams cad thar pa nyid du 'gyur ro/ /de'i phyir bcings pa med do/ /log pa'i shes pa'i dbang gis kyang bcings par 'dod la/ de ni thams cad du gnas pa nyid kyis thams cad du thams cad bcings pa'i phyir/ gang las thar pa yin/ 'jig rten yang phan pa dang mi phan pa thob pa dang / spong ba'i don du 'jug la 'bras bu yod par smra ba'i phyogs la yang cung zad thob par bya ba 'am spang bar bya ba med pa'i phyir/ 'gro ba byed pa med pa nyid du 'gyur ro/ /de lta bas na tha snyad thams cad chad par thal bar 'gyur ro/ /de ltar re zhig 'bras bu yod par smra ba bsal nas/ 'bras bu med par smra ba'i phyogs la yod pa'i skyon spang ba'i phyir/ yon tan gsum ldan dbyer med kyang / /zhes bya ba la sogs pa smos te/ 'bras bu yod pa bkag pa nyid kyi shugs kyis 'bras bu med pa yin par grub pa nyid de/ yod pa dang med pa dag ni/ phan tshun spongs te gnas pa'i mtshan nyid kyis rnam pa gzhan med pa'i phyir ro/ /de yang bshad pa don med do zhe na/ de lta na yang dag gzhan gyis bkod pa'i skyon ltar snang bar bstan pa'i phyir brjod par bya'o/ /de la re zhig de ni bya bar mi nus te/ /ngo bo med phyir zhes gang smras pa de ni ma grub ste/ dngos po'i rang bzhin nyid bya bar khas blangs pa'i phyir la dngos po'i ngo bo de yang ngo bo med par ma grub pa'i phyir ro/ /gal te de skyes pa las sngar rang bzhin med pa nyid yin no zhe na ma yin no / /de nyid rang bzhin med pa nyid du mi rigs pa'i phyir ro/ /rang bzhin nyid rang bzhin med par rigs pa ni ma yin te/ rang bzhin med pa nyid gyi mtshan nyid ni dngos po'i rang bzhin bkag pa yin pa'i phyir ro/ /gang gis de nyid rang bzhin med par 'grub par 'gyur ba skye ba las sngar bya ba'i dngos po de yod pa yang ma yin no/ /ci ste dngos po dang bral ba'i mtshan nyid kyi ngo bo med pa'i chos can phyogs su byas nas ngo bo med phyir zhes bya ba'i gtan tshigs su byed pa de'i tshe grub pa la sgrub ste/ dngos po dang bral ba ni sus kyang byed par khas ma blangs so/ /gzhan yang gtan tshigs ma nges pa yin te/ mi mthun pa'i phyogs la gnod par byed pa'i mtshan ma ma bstan pa'i phyir ro/ /'di ltar rgyu'i nus pa so sor nges pa'i phyir gang la skyed par byed pa'i rgyu yod pa'i med pa 'ga' zhig ni byed la/ nam mkha'i pad ma la sogs pa gang la rgyu med pa de ni mi byed pa'i phyir ma nges pa yin no/ /thams cad thams cad kyi rgyur mi 'dod cing gang dang gang med pa de dang de byed pa nyid do zhes bya ba'i khyab pa yang mi 'dod do/ /'o na ci zhe na/ gang byed pa de ni skye ba las sngar med pa nyid do zhes 'dod do/ /'di snyam du rgyu rnams med pa byed par mtshungs pa la/ ci'i phyir rgyu thams cad med pa thams cad kyi rgyur mi 'gyur snyam du sems na/ rtsod pa 'di ni khyed cag la yang yod par mtshungs pa la ci'i phyir rgyu thams cad yod par thams cad kyi rgyur mi 'gyur zhes mtshungs so/ /gang gis de mi byed pa khyed cag gi lugs kyis med pa ni cung zad kyang yod pa ma yin no/ /rgyu'i nus pa nges pa'i phyir yod pa yin na yang ri bong gi rwa la sogs pa mi byed do zhe na/ de ni cig shos la yang mtshungs so/ /gang gi yang dper na khyed cag gi yon tan gsum dang ldan pa thams cad du khyad par med na yang nus pa nges pa'i phyir/ thams cad thams cad byed pa ma yin no/ /thams cad kyi 'am 'di la 'bras bu thams cad kyi byed pa zhes tshig rnam par sbyar ro/ /de bzhin 'bras bu med pa 'am ngo bo 'ga' zhig rjes su 'gro ba med pa yin yang thams cad thams cad byed par ni mi 'gyur ro/ /gang yin de 'dra med na yang / /zhes bya ba 'di yang khas blangs nas brjod pa yin gyi mtshungs pa yang ma yin te/ 'di ltar bye brag yod na yang 'ga' zhig 'ga' zhig nyid kyi rgyur 'gyur te/ de lta bur gyur pa'i rang bzhin gyi khyad par nges pa ni rang gi rgyu brgyud pa las yang dag par 'ongs pa'i phyir 'gal ba med do/ /tha mi dad pa ni gcig la dus gcig tu rgyu dang rgyu ma yin pa phan tshun 'gal ba ji ltar srid pa yin te/ dngos po tha dad pa'i rgyu mtshan ni/ 'gal ba'i chos dang ldan pa yin pa'i phyir ro/ /de skad du yang / tha dad na yang 'ga' zhig ni/ /dngos chos nyid kyi byed por 'gyur/ /tha dad med na gcig de yis/ /bya ba byed pa 'gal bar 'gyur/ /zhes bshad do/ /nges pa grub pa ma rdzogs phyir/ /zhes bya ba la sogs pas gzhan dag nus pa nges pa med pa bstan pa'i don du rtsod par byed do/ /khyod kyi zhes bya ba ni 'bras bu med par smra ba sangs rgyas pa khyod kyi rgyu dag ni nus pa nges pa mi 'thad pa'o/ /ci'i phyir zhe na/ nges pa rnams te 'bras bur gyur pa rnams ma grub pa'i phyir ro/ /'bras bu med par 'bras bu rgyu dang ldan pa yod pa ni ma yin no/ /sbyor ba ni gang dag yod par gyur pa'i 'bras bu'i nges pas stong pa de dag ni nus pa nges pa ma yin te/ dper na ri bong gi rwa la sogs pa bzhin no/ /sA lu'i sa bon la sogs pa'i dngos po yang yod par gyur pa'i 'bras bu nges pas stong pa yin no zhes bya ba ni khyab par byed pa mi dmigs pa'o/ / rang gi phyogs legs par gnas par bstan pa'i phyir/ /yod na de yi nges pa ni/ /zhes bya ba la sogs pa smos te/ yod na ste/ 'bras bu rnams yod pa yin na zhes bya ba'i don to/ /de'i zhes bya ba ni nus pa'i'o / /de lta min zhes bya ba la sogs pas gtan tshigs ma nges pa nyid du brjod do/ /'di ltar nges pa de dag ma grub pa na gal te zho skyed pa la 'o ma nus so zhes bya ba'i tha snyad 'di med du zad mod/ gang yang rnam pa de lta bu'i khyad par thams cad kyis stong pa sgro ma btags pa'i dngos po sngar ma mthong ba gang gi de ma thag tu dngos po gzhan skye ba de la 'gag pa med do/ /'di snyam du gang la sgra dang rnam par rtog pa dag mi 'jug pa de la dngos po'i rang bzhin yang ldog pa nyid yin no snyam du sems na/ ming ni dngos po'i ngo bo min/ /zhes bya ba la sogs pa smos te/ khyad par byed pa'i rang bzhin nyid log na rang gi khyad par bya ba ldog par byed la/ rgyu log pa na yang 'bras bu ldog ste/ 'brel ba yod pa'i phyir ro/ /gzhan ni ma yin te/ ha cang thal bar 'gyur ba'i phyir ro/ /gang gis de log pa na rnam pa de lta bu'i dngos po ldog par 'gyur ba 'o ma la ni zho'i nus pa yod do zhes bya ba ni de lta bu la sogs pa'i ming ste/ tha snyad dngos po rnams kyi rang gi ngo bo'i rang bzhin ni yod pa ma yin no/ /gang gis de ldog pa na de lta bu'i rnam pa'i dngos po ldog par 'gyur ro/ /ming smos pa ni mtshon pa ste/ rnam par rtog pa yang de dang bsres la bzung ngo / /ngo bo smos pa yang mtshon pa ste ming dngos po rnams kyi rgyu yang ma yin te/ de med na yang dngos po yod pa'i phyir ro/ /'dir rgyu ni/ 'di ltar rnam rtog brjod pa ni/ /zhes bya ba la sogs pa smos te/ 'di ltar ni gang gi phyir te/ rnam rtog ni ming dang 'dres pa la brten pa'o/ /brjod pa yang sgra'o/ /rtog pa sna tshogs rnam pa du ma ni dbyer med cing cha shas med pa'i dngos po'i rang bzhin gcig la/ ji ltar goms pa bzhin du 'jug go/ /'di ltar sgra la sogs pa'i dngos po gcig kho na la rtag pa la sogs pa'i ngo bos gzhung lugs tha dad pa la gnas pa'i rgol ba rnams kyis rtog par byed cing rjod par byed do/ /sgra dang rnam par rtog pa de dag dngos po de'i bdag nyid dam de'i yul can yin na dngos po sna tshogs par 'gyur ba'am/ dngos po'i rang gi ngo bo bzhin du sgra dang rnam par rtog pa rnams/ gcig gi ngo bo nyid du thal bar 'gyur ro/ /gcig nyid sna tshogs pa yin no zhes ni rigs pa ma yin te / ha cang thal bar 'gyur ba'i phyir ro/ /de lta bas na nus pa nges pa'i phyir med pa 'ga' zhig byed kyi/ thams cad ni ma yin pas ngo bo med phyir zhes bya ba'i gtan tshigs ma nges pa yang yin no/ /de nyid kyi phyir rgyu len pa'i phyir zhes bya ba la sogs pa gtan tshigs bzhi po yang ma nges pa yin te/ 'di ltar gal te 'bras bu yod pa byas pa nyid nges pa'i rgyu len pa 'ga' zhig tu grub par gyur na de'i tshe de lta yin par gyur na/ ji srid du rgyu'i nus pa nges pas byas pa yang nges pa'i rgyu len par rigs pa ma yin no/ /rgyu'i nus pa nges pa kho na'i phyir yang thams cad thams cad las skye ba ma yin te/ thams cad don gyi bya ba thams cad byed pa'i rang bzhin med pa'i phyir ro/ /gang yang / khyad par byar med gang yin pa/ /zhes bya ba la sogs pa gang smras pa de yang bsam pa ma shes nas smras pa yin te/ gang gis 'gyur ba yin na de'i rang bzhin nyams par thal bar 'gyur ba kho bo cag gis ni med pa byed do zhes ma brjod do/ /'on kyang dngos po nyid byed do zhes sngar bstan zin to/ /dngos po de yang dmigs pa'i mtshan nyid kyis gyur pa las ma dmigs pa'i phyir dang grub pa yang 'bras bu nyid du mi 'thad pa'i phyir/ skye ba las sngar med pa yin no zhes bya'o/ /rgyu gang zhig nye ba tsam gyis de de lta bur gyur pa skyed pa na des de byed de zhes tha snyad du byas kyi/ bya ba dang 'brel pas 'ga' zhig gis 'ga' zhig byed pa ni ma yin te/ chos thams cad ni bya ba med pa nyid yin pa'i phyir ro/ /med pa zhes bya ba gang zhig cung zad yod pa 'am/ rnam par 'gyur ba ni ma yin te / med pa'i mtshan nyid ni dngos po'i rang bzhin bkag pa tsam yin pa'i phyir ro/ /gzhan yang gal te khyad par du byar med pa'i phyir med pa mi byed do zhes brjod la/ yod pa yang rang bzhin thams cad grub pa'i khyad par du byar med pa'i phyir de ji ltar byed/ de lta bas na nus pas ni nus pa byed pa'i phyir zhes bya ba 'di ni ma nges la/ 'bras bu med par smra ba la yang rgyu'i dngos po rigs pa yin pa'i phyir rgyu yod pa'i phyir zhes bya ba 'di yang ma nges pa yin no/ /yang na sngar yod pa 'bras bu nyid du mi srid par bstan pa'i phyir dang / 'bras bu med par smra ba kho na'i rgyu len pa la sogs pa'i nges pa rigs pa yin pa'i phyir/ rgyu len pa'i phyir zhes bya ba la sogs pa'i gtan tshigs bzhi po 'gal ba yin te/ bsgrub par bya ba las bzlog pa sgrub par byed pa'i phyir ro / /gal te khyed cag gi lugs kyis med pa nyid skye'o zhes bya ba ma yin nam/ de'i phyir ji ltar mdo las yod pa dang med pa'i skye ba bkag ste/ ji skad du/ blo gros chen po chos thams cad ni ma skyes pa ste/[ (]yon [,]yod[)] pa dang med pa ni ma skyes pa'i phyir ro zhes gsungs so zhe na/ 'di la skye ba dngos po'i ngo bo'ang zhes bya ba la sogs pa smos te/ 'ang gi sgra ni nges par bzung ba'i don to/ /khyad par gzhan spangs pas de tsam zhig shes par 'dod pa na/ dngos po rnams kyi sngon dang phyi ma'i mtha' stong pa skad cig ma tsam gyi gnas skabs kyi rang bzhin nyid la skye ba zhes brjod do/ /bye brag tu smra bas kun du brtags pa'i 'dus byas kyi mtshan nyid kyi skye ba ma yin te/ de ni dgag par bya ba yin pa'i phyir ro/ /bye brag pas yongs su brtags pa'i yod pa'i 'du ba skye ba 'am/ rang gi rgyu 'du ba yang ma yin te de dag kyang 'gegs par 'gyur ba'i phyir ro/ /gzhan gyi lugs kyis kyang de dag rtag pa'i phyir dang / brtag pa yang skye ba mi 'thad pa'i phyir ro/ /ji skad du/ yod pa rang rgyu dang 'brel pa/ /byed pas rgyu ni yin par grags / /yod pa de dang 'brel pa de/ /brtag pa 'di la 'bras bu gang / /zhes bshad do/ /de lta bu'i bdag nyid kyi skye ba de ni med pa dang de'i bdag nyid kyi 'brel pa ni med de/ yod pa dang med pa dag ni 'gal ba'i phyir ro/ /gang gi phyir med pa ni med par yang 'gyur ba ma yin no/ /yod pa dang med pa sngar byung ba dang 'brel pa med de/ /de ni sngar med pa'i phyir ro/ /de ni 'bras bu med par smra ba khyed cag la ji ltar zhe na/ brtags pa'i blos zhes bya ba la sogs pa smos te/ brtags pa'i blo byed pa por gyur pa'am byed par gyur pas med pa'i byed pa po dang sbrel ba 'ba' zhig tu zad de/ 'brel pa thob par byed ces bya ba'i don to/ /gang skye bar 'gyur ba med pa zhes bya ba ni cung zad kyang med de/ 'on kyang gang med pa skye ba zhes bya ba 'di ni btags pa'i tha snyad yin no zhes bya ba'i tha tshig go/ /yang gang gis 'di lta bu'i tha snyad 'di 'dod pas brtags pa'i sa bon gang zhig yin zhe na/ gcig gi rjes la dngos po yi/ /zhes bya ba la sogs pa smos te/ / gcig gi ste so sor nges pa'i dngos po gang yin pa 'ga' zhig gi de ma thag tu sngar ma mthong ba'i dngos po dmigs te/ de bar gyi gnas skabs las sngar yod pa ma yin te/ dmigs pa'i mtshan nyid du gyur pa las ma dmigs pa'i phyir ro/ /de lta bas na 'di ni sngar med pa skye'o zhes bya ba brtags pa 'dis sa bon yin no/ /ci'i phyir zhe na/ snga na yod pa zhes bya ba la sogs pa smos te/ bar gyi gnas skabs las sngar bar gyi gnas skabs bzhin du yod na ste/ bdog pa dngos po'i ngo bo yod pa yin na med pa skye'o zhes bya ba'i brtags pa'i rgyu mtshan 'di yod pa ma yin no/ /'di ltar skye ba zhes bya ba 'dis bar ma'i gnas skabs su 'byung ba nges pa'i ngo bo kho na brjod do/ /gal te de sngar yang yod pa yin na de'i tshe de bar gyi gnas skabs 'byung ba'i phyir bya ba'i rang gi ngo bo nges pa gang yin pa de nyams par 'gyur te/ nam mkha' bzhin du thams cad du gnas pa la sngar dang phyis dang bar gyi gnas skabs med pa'i phyir ro/ /de'i phyir thams cad du thams cad skye ba zhes bya ba de lta bu'i tha snyad du 'gyur te/ khyad par med pa'i phyir ro/ /gzhan yang 'bras bu yod par smra ba rnam pa gzhan gyis sun dbyung ba'i phyir/ 'o ma sogs la zho la sogs/ /zhes bya ba la sogs pa smos te/ khyed cag gis rgyu la 'bras bu yod do zhes gang brjod pa de ni don ci la bsams/ ci gsal ba'i ngo bos sam/ 'on te nus pa'i ngo bos yin grang / gal te gsal ba'i ngo bos yin na de'i tshe 'o ma la sogs pa'i gnas skabs na yang zho la sogs pa phyis bzhin du dmigs par thal ba'i phyir ro/ /ci ste nus pa'i ngo bos yin na/ de la yang nus pa'i ngo bo gang yin pa de ci dmigs pa'i mtshan nyid du gyur pa'i ngo bo zho la sogs pa'i 'bras bu las gzhan yin nam/ 'on te de nyid yin gal te de nyid yin na de'i tshe snga ma bzhin du dmigs par thal bar 'gyur ro/ /'on te gzhan yin no zhes bya ba'i phyogs yin na de'i tshe 'bras bu rgyu'i bdag nyid du yod pa yin no zhes bya'i phyogs btang bar 'gyur te/ 'bras bu las tha dad pa'i nus pa zhes bya ba'i dngos po gzhan yod par khas blangs pa'i phyir ro/ /'di ltar ro dang nus pa dang smin par byed pa la sogs pa'i yon tan dang ldan pa'i ngo bo'i khyad par gsal po gang yin pa de nyid zho la sogs pa'i 'bras bu zhes bya'o/ /de yang 'o ma la sogs pa'i gnas skabs su dmigs su rung ba las ma dmigs pa'i phyir med pa'i tha snyad kyi yul yin no/ /gzhan nus pa'i ngo bor yod pa gang yin pa de ni 'bras bu nyid ma yin no/ /gzhan yod pa na gzhan yod pa yang ma yin te/ ha cang thal bar 'gyur ba'i phyir ro/ /'on te mar ni tshe yin no/ /lteng ka'i chu ni rkang nad do zhes gzhan yod pa na gzhan du brjod par mthong ba ma yin nam zhe na/ ji ltar dngos su zhes bya ba smos te/ dngos su ste/ nye bar ma btags par zhes bya ba'i don to/ /rgyu la 'bras bu btags nas mar la tshe zhes brjod kyi dngos su ni ma yin no/ /gal te khyed cag kyang btags nas 'bras bus rgyu la yod do zhes brjod na de'i tshe ni 'gal ba cung zad kyang med kyi/ dngos su yin na ni 'gal bar brjod do/ /'di nyid dpe'i sgo nas bstan pa'i phyir snying stobs yod pas sdug bsngal dang zhes bya ba la sogs pa smos so/ /khyed kyis snying stobs kyi ngo bo gang yin pa de nyid sdug bsngal dang rmongs pa dag tu ma bzhag ste/ de dag ni phan tshun mtshan nyid tha dad par gnas pa'i phyir ro/ /da ni khyad par rnams rjes su 'gro bar mthong ba'i phyir ro zhes bya ba'i gtan tshigs 'di ma grub pa nyid du bstan pa'i phyir/ gsal ba'i snying stobs sogs ldan par/ /zhes bya ba la sogs pa smos te/ sgra la sogs pa'i mtshan nyid kyi gsal ba bde ba la sogs pa'i ngo bor nged la ste kho bo cag la ma grub ste/ gang gi phyir bde ba la sogs pa ni nang gi yin pas rig pa'i ngo bo yin pa'i phyir / sgra la sogs pa yang sems pa med pa nyid yin pas de'i phyir 'di dag ji ltar bde ba la sogs pa dang ldan par 'gyur ro/ /sbyor ba ni gang dag rig pa'i ngo bo ma yin pa de dag ni bde ba la sogs pa'i rang bzhin ma yin te/ dper na gzhan gyis khas blangs pa'i sems pa med pa'i skyes bu bzhin no/ /sgra la sogs pa yang rig pa'i ngo bo dang bral ba yin no zhes bya ba ni khyab par byed pa mi dmigs pa'o/ /'di snyam du gal te bde ba la sogs pa'i rang bzhin yin pa la rig pa'i ngo bos nyid kyis khyab pa grub par 'gyur na/ de'i tshe de log na sgra la sogs pa la bde ba la sogs pa'i rang bzhin nyid ldog par 'gyur ro/ /gang gi phyir de nyid ma grub ste/ skyes bu nyid rigs pa'i ngo bor 'dod pa'i phyir ro snyam du sems na/ de yi rang rig gsal phyir ro/ /zhes bya ba smos te/ de'i phyir bde ba la sogs pa rnams ni rigs pa'i ngo bo nyid du grub ste/ ci'i phyir zhe na/ bde ba la sogs pa rnams ni rang rig pa yin la rang rig pa yang gsal ba'i phyir ro/ / bde ba la sogs pa rnams dga' ba dang gdung ba la sogs pa'i ngo bos sgra la sogs pa'i yul nye bar yod dam med kyang rung gsal ba gzhan la mi ltos par rang gsal ba'i bdag nyid kyi mtshan nyid rang rig pa 'di'i khyad par ni gsal ba yin pa'i phyir ro/ /gsal ba gzhan la mi ltos pa'i sim pa la sogs pa'i ngo bo gang yin pa de rang nyid kyis grub ste/ de ni sems pa can dang bde ba dang rig pa dang / shes pa zhes bya ba la sogs pa'i rnam grangs dag gis bstan to/ /gal te bde ba la sogs pa rnams rig pa gzhan gyis nyams su myong bas myang ba zhes bya bar 'gyur na/ de'i tshe de dag rig pa yin pa sim pa ma yin pa la sogs pa'i ngo bor 'gyur te/ rang nyid de'i bdag nyid ma yin pa'i phyir dper na rnal 'byor pa dang rjes su dpog pa po gzhan gyi bde ba la sogs pa myong bar byed pa bzhin no/ /de lta ma yin na rnal 'byor pa la sogs pa de dag kyang / nad pa la sogs pa bzhin du dngos su bde ba la sogs pa nyams su myong bar 'gyur ro/ /yang na rnal 'byor pa la sogs pa bzhin du gzhan dag la yang phan pa dang gnod par mi 'gyur te/ khyad par med pa'i phyir ro/ /rig pa yang sim pa la sogs pa'i ngo bor khas blangs pa na bde ba la sogs rig pa'i ngo bo nyid du grub po/ / sim pa dang sim pa ma yin par myong ba gang yin pa 'di nyid kho bo cag gi bde ba dang sdug bsngal yin no/ /de lta bas na gtan tshigs ma nges pa ma yin no/ /ma grub pa yang ma yin te/ phyi rol gyi don yod par smra ba thams cad la sgra la sogs pa rig pa'i ngo bo dang bral bar grub pa'i phyir ro/ /gzhan du rnam par shes par smra ba'i lugs nyid khas blangs pa byas par 'gyur la/ de yang 'dod pa kho na'o/ /gtan tshigs 'gal ba yang ma yin te/ mthun pa'i phyogs la yod pa'i phyir ro/ /'di snyam du ji ltar rig pa ni sngon po ma yin pa la sogs pa'i ngo bo yin na yang phyi rol na gnas pa'i sngon po la sogs pa nye ba'i phyir/ sngon po la sogs pa'i ngo bor snang ba de bzhin du sim pa ma yin pa la sogs pa'i ngo bo nyid yin na yang phyi rol gyi bde ba la sogs pa'i nye bar len pa'i stobs kyis sim pa la sogs pa'i ngo bo bzhin du rlom mo/ /des na rig pa ni sim pa la sogs pa'i ngo bo nyid yin na yang bde ba la sogs pa rig pa'i ngo bo nyid du grub pa ma yin no/ /de'i phyir/ /rtsa ba'i gtan tshigs ma nges pa/ /yin no snyam du dogs pa la/ /sgra sogs gcig pu kho na la/ /zhes bya ba la sogs pa smos so/ /goms dang rigs kyi bye brag las/ /zhes bya ba la/ goms pa ni mang du byas pa'o/ /rigs ni rang gi rang bzhin no/ /de dag gi bye brag ni khyad par ro/ /chags pa la sogs zhes bya ba la/ chags pa ni mngon par zhen pa'o/ /sogs pa'i sgras dga' ba la sogs pa dang / sdang ba dang skyo ba la sogs pa dang / dman pa dang sgrib pa la sogs pa yon tan gsum dang ldan pa'i 'bras bu'i tshogs gzung ngo / /nges pa zhes bya ba ni gcig gi rnam pa ste/ 'di ltar goms pa'i khyad par gyis chang dang bud med la sogs pa rnams la sdug pa dang mi sdug pa'i mtshan mar goms pa'i 'dod pa la sogs pa rnams dang rigs kyi khyad par yang ste/ rta dang glang po'i phru gu la sogs pa so sor nges pa 'ga' zhig gi dga' ba la sogs pa 'byung ba yin gyi thams cad la ni ma yin no/ /sgra la sogs pa rnams bde ba la sogs pa'i ngo bo nyid yin pa na 'di yang mi rigs so/ /ci'i phyir zhe na/ dngos gcig rjes su 'brangs nas ni/ /zhes bya ba la sogs pa smos te/ de dag thams cad ni dngos po tha dad pa med pa'i yul can yin pa'i phyir/ sngon po la sogs pa'i yul can gyi rig pa bzhin du rig pa re re yang sna tshogs par thal bar 'gyur ro/ /'di snyam du dngos po gsum gyi bdag nyid yin mod kyi 'on kyang ma mthong ba la sogs pa la ste/ chos thams cad la sogs pa'i mtshan nyid kyi lhan cig skyed pa'i dbang gis 'ga' zhig 'ga' zhig gi ngo bor snang gi/ thams cad thams cad kyi ni ma yin no snyam du sems na/ sogs pa'i sgras ni goms pa dang rigs kyi bye brag dang len par 'dod pa la sogs pa gzung ngo / /gal te de lta bas na/ dngos po'i rjes su 'brang mi 'gyur/ /rig pa de dngos po la dmigs par mi 'gyur te / de'i rnam pas stong pa'i phyir ro snyam du bsam pa'o/ /de'i rnam pas stong pa de nyid bstan pa'i phyir/ dngos po'i ngo bo rnam gsum pa/ /zhes bya ba smos te/ snying stobs dang rdul dang mun pa'i ngo bo'o/ / de yi rig pa rnam pa gcig /ces bya ba'i skyes bu de dag gi rig pa ni yang dag par rig pa dag ste/ re re la yang zhen pa la sogs pa tsam ngo bo gcig nges pa'i phyir/ rnam pa gcig rig par 'gyur zhes bya ba'i don to/ /de dag ni zhes bya ba ni rig pa rnams so/ /de la zhes bya ba ni sgra la sogs pa la'o/ /yang dag ces bya ba ni don dam par zhes bya ba'i tha tshig go / ci'i phyir mi rigs she na/ de dang mi mthun zhes bya ba smos te/ de'i dmigs pa'i dngos po dang mtshan nyid mi mthun zhes bya ba'i don to/ /sbyor ba ni gang zhig gang gi rnam pa rig pa ma yin pa de ni de'i yul can ma yin te/ dper na mig gi rnam par shes pa sgra'i yul can ma yin pa bzhin no/ /ji skad du bshad pa'i rig pa yang gsum gyi bdag nyid kyi dngos po'i rnam pas stong pa yin no zhes bya ba ni khyab par byed pa mi dmigs pa'o/ /ha cang thal bar 'gyur ba ni/ bzlog pa la gnod pa can gyi tshad ma'o/ /'di snyam du ji ltar sgra la sogs pa'i dngos po rnams bdag nyid thams cad kyis mngon sum gyis bzung nas goms pa la sogs pa'i dbang gis skad cig ma la sogs pa 'ga' zhig nyid du nges pa skye bar 'gyur gyi/ thams cad la ni ma yin pa de bzhin du ma mthong ba la sogs pa'i dbang gis rig pa rnam pa gcig pa can du 'gyur ba yin no snyam du sems na/ de ni yang dag pa ma yin te/ kho bo cag ni skad cig ma nyid la sogs pa'i rnam par rtog pa yang don dam par dngos po'i yul can nyid yin par mi 'dod de/ dngos po ni rnam par rtog pa thams cad las 'das pa yin pa'i phyir ro/ /brgyud nas dngos po dang 'brel ba'i phyir/ rnam pa de lta bu'i dngos po thob pa'i rgyu nyid kyis de tshad ma nyid yin no/ /gzhan dag gis dga' ba la sogs pa ni don dam par dngos po'i yul can nyid yin par 'dod de/ rnam pa gzhan du na dmigs pa med pa nyid yin na bde ba la sogs pa'i bdag nyid kyi sgra la sogs pa rnams nyams su myong bas bde ba la sogs pa myong ba gsal ba der mi 'gyur ro/ /dga' ba la sogs pa de dag kyang rtog pa dang bcas pa yin pa'i phyir/ ma nges pa'i ngo bo cung zad kyang yod pa ma yin pas bdag nyid thams cad kyis nyams su myong ba gsal bar 'gyur ro/ /rang gi don rtogs pa gang yin pa de 'di nyid nges pa rnams kyi nges pa yin no/ /ji skad du rab tu dang ba dang gdung ba dang spong ba la sogs pa'i 'bras bu dmigs pa'i phyir sgra la sogs pa rnams bde ba la sogs pa dang ldan pa nyid du grub pa yin no zhes smras pa gang yin pa de ni ma nges pa yin no zhes bstan pa'i phyir/ skyes bu gcig la zhes bya ba la sogs pa smos te/ 'di ltar ser skya pa'i rnal 'byor pa rnams tha dad par skyes bu la sgom par byed pa na rnal 'byor pa legs par goms pa rnams skyes bu la dmigs nas rab tu dang ba dang dga' bar 'gyur ro/ /rnal 'byor lam goms pa ches myur bar ma mthong bas skyo bar 'gyur la/ yang gang dag rang bzhin gyis blo gros blun pa de dag la sgrib pa skye'i/ gzhan dag gis skyes bu de yon tan gsum gyi bdag nyid de'i ngo bor 'dod pa yang ma yin te/ de lta bas na rab tu dang ba dang gdung ba dang / spong ba la sogs pa'i 'bras bu dmigs pa'i phyir ro zhes bya ba 'di ni ma nges pa yin no/ /gal te dga' ba la sogs pa de dag kun du rtog pa las 'gyur gyi skyes bu las ni ma yin no zhe na/ 'di ni sgra la sogs pa la yang mtshungs so/ /de'i phyir kun du rtog pa tsam las byung ba nyid yod na phyi rol gyi bde ba la sogs pa mi 'grub ste/ kun du rtog pa ni rig pa'i ngo bo yin pa'i phyir ro/ /de nyid kyi phyir phyi rol gyi bde ba la sogs pa'i rgyu'i dbang gis rig pa sim pa la sogs pa'i ngo bo yin no zhes bya ba 'di yang 'khrul pa can yin te/ phyi rol gyi yul gyi nye bar len pa med na yang skyes bu la dmigs nas dga' ba la sogs pa rnams skye bar mthong ba'i phyir ro/ /gang yang 'dod pa dang / mi 'dod pa'i rnam par rtog pa las phyi rol gyi yul nye ba la mi ltos par bde ba la sogs pa rig pa yin par 'grub pa de ji ltar gzhan gyi nye bar len pa las 'gyur te/ gal te yon tan gsum gyi yid kyang de'i nye bar len pa las byung ngo zhe na/ ma yin te/ de la yang gsal ba gzhan la ma ltos par rang nyid kyis grub pa gang yin pa zhes bya ba la sogs pas rig pa'i ngo bo nyid du bstan pa nyid yin pa'i phyir ro/ /de lta bas na rjes su 'gro ba'i phyir zhes bya ba'i gtan tshigs ma grub pa yin no/ /da ni gtan tshigs grub par khas blangs nas yang ma nges par bstan pa'i phyir/ gsal ba zhes bya ba la sogs pa smos te/ gal te gsal ba yon tan gsum gyi bdag nyid du grub pa yin mod kyi/ 'on kyang de'i rgyu gtso bor 'dod pa gang yin pa de mi 'grub ste/ de lta bur gyur pa'i rgyu dang gang du yang gtan tshigs rjes su 'gro ba ma grub bo snyam du bsams pa yin no/ /'di ltar de'i rgyu yon tan gsum gyi bdag nyid gcig pu rtag pa khyab pa sgrub par 'dod pa yin la/ de lta bu'i rgyu dang gang du yang gtan tshigs dang 'brel pa ma grub pa yin no/ /'bras bu gang gi bdag nyid du gyur pa dmigs pa rgyu rnams kyang gdon mi za bar de'i bdag nyid du 'gyur bar bya dgos pa yang ma yin te/ rgyu dang 'bras bu dag ni tha dad pa'i phyir ro/ /'di ltar khyed kyis gsal ba zhes bya ba'i 'bras bu rgyu dang ldan pa nyid dang / mi rtag pa nyid dang / khyab byed ma yin pa la sogs pa'i chos dang ldan par 'dod la/ de'i rgyu ni de'i ngo bor 'dod pa yang ma yin no/ /de lta bas na gtan tshigs ma nges pa yin no/ /chos can gyi khyad par phyin ci log tu sgrub pa'i phyir 'gal ba yang yin no zhes bstan pa'i phyir/ de rgyu zhes bya ba la sogs pa smos te/ gcig pu dang / rtag pa dang / yon tan gsum gyi bdag nyid rgyur gyur pa'i chos can bsgrub par 'dod la/ de yang de lta bur gyur pa ma grub bo/ /'o na ci zhe na/ phyin ci log tu'o snyam du bsams pa'o/ /ci'i phyir zhe na/ de ni rigs gcig ldan ma yin/ /zhes bya ba smos te/ ni'i sgra ni rgyu'i don te/ gang gi phyir gsal ba zhes bya ba'i 'bras bu de gcig pu yon tan gsum gyi bdag nyid kyi rang gi ngo bor gyur pa'i rigs dang ldan par grub pa ni ma yin no/ /'o na ci zhe na/ du ma nyid dang / mi rtag pa nyid la sogs pa'i chos dang ldan pa nyid du dmigs so/ /gal te gsal ba ji skad du bshad pa'i rigs gcig dang ldan pa yin na/ de'i tshe de'i rgyu yang ji skad bshad pa'i chos kyi khyad par dang ldan pas grub po/ /ji srid du 'bras bu mi rtag pa nyid dang / du ma nyid kyi chos dang ldan par mthong ba'i phyir de'i rgyu yang de lta bu nyid du rjes su dpag par bya ste/ rtag pa ni rim dang rim ma yin pa dag gi don byed par 'gal ba'i phyir dang / 'bras bu sna tshogs pa ni rgyu tha dad pas byas pa'i phyir ro/ /de lta ma yin na rgyu med pa nyid du thal bar 'gyur ba'i phyir ro / /de lta bas na gtso bo rtag pa dang gcig pu'i ngo bor ma grub po/ /gal te yang rgyu mi rtag pa dang du ma'i ngo bo nyid la gtso bo zhes ming 'dogs na de'i tshe ming la mi rtsod do snyam du bsams pa yin no/ /yang ci'i phyir gsal ba rigs gcig dang ldan pa ma yin zhe na/ gsal ba thams cad lcags kyi ni/ /zhes bya ba la sogs pa smos te/ ji ltar lcags kyi rang bzhin gyi thur ma phan tshun ma 'byar ba de bzhin du sgra la sogs pa'i gsal ba 'di dag rang rang gi ngo bo la gnas pa nyid kyis yul dang dus dang nus pa dang snang ba la sogs pa tha dad pas phan tshun du ma 'dres pa yin no/ /'dis ni du ma nyid du bstan to/ /mi rtag pa nyid du bstan pa'i phyir rim pa dang 'brel pa'i lus zhes bya ba smos te/ skye ba'i rim pa dang 'brel pa ste/ yang dag par sprel ba'i lus gang la yod pa zhes tshig rnam par sbyar ro/ /'on ci ltar yod pa zhes bya ba la sogs pa gcig gi ngo bo dang / de bzhin du de nyid 'di yin no zhes dngos po rnams bstan pa'i rang bzhin dang ldan par nges pa yin zhe na/ rtog dang 'dres pa'i bdag nyid can/ /zhes bya ba smos te/ don rnams la gcig gi bdag nyid du 'dzin pa 'di ni log pa'i rnam par rtog pa yin no zhes bya ba'i don to/ /'di yang skad cig ma 'jig pa la sogs par phyis ston par 'gyur ro/ /de ltar re zhig rjes su 'gro ba'i phyir zhes bya ba'i gtan tshigs 'di ma grub pa dang 'gal ba dang ma nges pa nyid du bstan nas/ da ni bum sogs bye brag bzhin/ /zhes bya ba'i dpe la bsgrub bya dang sgrub byed kyi chos rjes su 'gro ba med par bstan pa'i phyir/ de bzhin 'ji ba'i 'gyur la sogs/ /zhes bya ba smos te/ sogs pa'i sgras ni gser la sogs pa'i 'gyur ba gzung ngo / /de bzhin zhes bya ba ni skyon gzhan sdud pa'am/ 'dre ba nyid yin no/ /khyad par rigs gcig ldan ma yin/ /zhes bya ba 'dis ni sgrub par byed pa'i chos dang bral bar bstan to / /rgyu mtshan gcig par ma grub ste/ /zhes bya ba la/ ma grub ces skabs dang sbyar ro/ /'dis kyang bsgrub bya'i chos rjes su 'gro ba med par bstan to/ /'on te 'ji ba'i gong bu dang gser la sogs pa gcig de dag gi rgyur grub pa nyid yin la/ de bzhin du 'ji ba dang gser la sogs pa'i rigs de dag gi rjes su 'gro bar mthong ba ma yin nam/ de ji ltar gnyis ka med pas yin zhe na/ 'jim gong la sogs tha dad phyir/ /zhes bya ba smos te/ 'jim gong la sogs pa'i yan lag can gcig ni yod pa ma yin te/ phyogs gcig bsgribs pa na thams cad bsgribs par thal ba'i phyir ro/ /rigs gcig kyang ma yin te/ gsal ba so so snang ba tha dad pa'i phyir ro/ /gzhan yang rjes su 'gro ba'i phyir zhes bya ba'i gtan tshigs 'di rang bzhin gyis ma nges pa yin no zhes bstan pa'i phyir/ skyes bu sems pa sogs ldan na'ang / /zhes bya ba la sogs pa smos te/ 'di ltar skyes bu ni sems pa can nyid dang / za ba po nyid la sogs pa'i chos tshad med pa rnams dang ldan par 'dod de/ khyed cag gis ni de dag rnam pa de lta bu'i rgyu gcig sngon du 'gro ba can du yang mi 'dod do/ /ci ste yang sems pa can la sogs pa dang ldan pa'i skyes bu rnams ni dngos su mi 'dod do/ /'o na ci zhe na/ nye bar btags pa yin no/ /gang gi phyir skyes bu thams cad sems pa can la sogs pa las ldog pa des na/ don gzhan las ldog pa'i ngo bo sems med pa can gyi rigs de'i rjes su 'gro bar btags pa yin gyi/ de ni de kho na nyid du gcig tu yod pa ni ma yin no snyam du sems na/ gal te de lta na bde ba la sogs pa dang ldan pa nyid de lta bur gyur pa'i rgyu gcig sngon du song ba nyid med na yang dngos ma yin pa'i skyes bu bzhin du gsal ba 'di la yang ci'i phyir mtshungs pa ste/ 'dra bar mi rtag /de lta bas na gtan tshigs ma nges pa yin no/ /skyes bu zhes bya ba ni nye bar mtshon pa yin no/ /de bzhin du rtsa ba'i rang bzhin gyi gnas skabs yod pa'i bde ba la sogs pa nyid yon tan nyid dang sems pa med pa nyid dang za ba pa la sogs pa rnams dang ldan pa dang / gtso bo dang skyes bu ni rtag pa nyid la sogs pa rnams dang ldan la/ de dag ni de lta bur gyur pa'i rgyu gcig sngon du 'gro ba can yang ma yin zhes bya ba 'dis ma nges pa nyid do/ /de ltar re zhig rjes su 'gro ba'i phyir zhes bya ba'i gtan tshigs 'di bkag go/ /da ni mjug bsdu ba'i thabs kyis gtan tshigs lhag ma sun dbyung ba'i phyir phyogs tsam zhig bshad pa/ de bas gtso bo'i rgyu med kyang / /zhes bya ba la sogs pa'o/ /de la re zhig tshad yod pa'i phyir dang / nus pa'i sgo nas 'jug pa'i phyir dang / rgyu dang 'bras bu dbyer yod pa'i phyir dang / gtso bo yod do zhes gang smras pa'i gtan tshigs 'di gsum char ma nges pa yin te/ bsgrub par bya ba las bzlog pa la gnod par byed pa'i tshad ma ma bstan pa'i phyir dang / gtso bo zhes bya ba'i rgyu med na yang tshad la sogs pa 'di dag mi 'gal ba'i phyir ro/ /'di ltar gal te re zhig rgyu tsam yod pa nyid du sgrub pa de'i tshe grub pa la sgrub pa yin te/ kho bo cag ni rgyu med par 'bras bu skye bar mi 'dod do/ /rgyu tsam la gtso bo zhes ming 'dogs pa ni cung zad kyang gnod pa med do/ /ci ste gsal ba tshad nges par skyed par byed pa dang / nus pa'i sgo nas 'jug par byed pa gang yin pa zhes bya ba de lta bu'i rtog pa dang ldan pa'i rgyu yod pa de ltar bsgrub pa yin na/ de'i tshe ma nges pa yin te/ rtog pa dang ldan pa'i byed pa po med na yang rang gi rgyu'i nus pa las tshad nges pa la sogs pa dang ldan pa skyed pa la 'gal ba med pa'i phyir ro/ /gtso bo ni rtog pa dang ldan par rigs pa yang ma yin te/ de ni sems pa can ma yin pa'i phyir dang / rtog pa yang sems pa can gyi rnam grangs yin pa'i phyir ro/ /gzhan yang nus pa'i sgo nas 'jug pa'i phyir zhes bya ba 'dis ni gal te tha mi dad pa'i nus pa dang ldan pa'i rgyu tsam sgrub pa de'i tshe grub pa la sgrub bo/ /'on te nus pa sna tshogs dang ldan pa'i rgyu tha dad pa gcig pu yin na/ de'i tshe gtan tshigs ma nges pa yin te/ de lta bur gyur pa dang gang du yang rjes su 'gro ba ma grub pa'i phyir ro/ /gtan tshigs ma grub pa yang yin te/ tha dad pa'i nus pa'i dbang gis rgyu 'ga' zhig 'bras bu 'ga' zhig la 'jug pa ma grub ste/ nus pa rnams ni rang gi bdag nyid du gyur pa'i phyir ro/ /gang yang rang bzhin dbyer med pa'i phyir zhes bya ba smras pa de yang ma grub ste/ rjes su 'gro ba med par 'jig pa'i chos nyid yin pa'i phyir ro/ /gang du yang thim pa ma grub ste/ 'di ltar thim par 'gyur ba rang gi ngo bo thams cad zhig pa la'am / ma zhig pa la yin grang / gal te re zhig zhig pa la yin pa de'i tshe rjes su 'gro ba med par 'jig par thal bar 'gyur ro/ /'on te ma zhig pa la yin na de'i tshe thim pa mi 'thad de/ ma tshang ba med pa'i bdag nyid kyi de kho na nyid nyams su myong ba la ni thim pa 'ga' yang mi 'thad de / ha cang thal bar 'gyur ba'i phyir ro/ /de'i phyir rang bzhin sna tshogs dbyer med pa'i phyir/ /zhes bya ba 'di ni phan tshun 'gal ba yin no/ /de lta bas na de ltar gtso bo rgyu med na yang rgyu'i nus pa'i khyad par las 'bras bu'i tshad la sogs pa'i ngo bo sna tshogs pa dang / rgyu dang 'bras bu'i rnam par dbye ba la sogs pa 'thad pa'i phyir gtan tshigs rnams ma nges pa yin no/ /sogs pa'i sgras nus pa'i sgo nas 'jug pa'i phyir zhes bya ba 'di gzung ngo / /yang na/ de bas gtso bo'i rgyu med kyang / /zhes bya ba la/ kyang gi sgra ni nges par gzung ba'i don to/ /des na don ni 'di yin te/ gtso bo'i rgyu med pa kho nar rgyu'i nus pa'i bye brag gis 'bras bu'i tshad la sogs pa'i ngo bo sna tshogs pa dang / rgyu dang 'bras bu la sogs pa'i rnam par dbye ba 'thad pa yin pa'i phyir/ gtan tshigs rnams ma nges pa yin no/ /'di ltar gang gi tshe gsal ba'i rgyu gtso bo yin na/ de'i tshe sna tshogs thams cad de'i bdag nyid yin pas de dang 'dra bar rdzas gcig tu 'gyur ro/ /de lta yin dang blo gcig dang / /nga rgyal gcig dang de tsam lnga/ /zhes bya ba la sogs pa'i tshad kyi rnam par dbye bar mi 'gyur ro/ /de lta yin dang 'gro ba tshad med pa kho nar 'gyur ro/ /de bzhin du rdza mkhan la sogs pa rnams bum pa la sogs pa byed pa na/ nus pa'i sgo nas 'jug pa ni gtso bo'i rgyu med pa kho nar 'thad kyi/ de yod na ni ma yin te/ nus pa med cing bya ba'ang med/ /ces sngar ji skad du bshad pa yin no/ /rgyu dang 'bras bu'i rnam par dbye ba yang gtso bo rgyu med pa kho na yin na rigs so zhes sngar nyid du shes par byas so/ /rang bzhin sna tshogs pa yang gtso bo yod na mi 'thad pa nyid de/ 'gro ba thams cad de'i bdag nyid yin pas de'i rang gi ngo bo bzhin du gcig nyid du thal bar 'gyur ro zhes bshad zin to / /de lta yin dang gang las 'di rnam par dbye ba med par 'gyur ba rang bzhin sna tshogs pa dang po nyid nas yod pa ma yin no/ /de kho na nyid bsdus pa'i dka' 'grel las rang bzhin brtag pa ste dang po'o// //da ni dbang phyug gi bya ba dang bral ba nyid bstan pa'i phyir/ gzhan dag skye ldan thams cad kyi/ / zhes bya ba la sogs pa smos te/ skye ba dang mi ldan pa nam mkha' la sogs pa la ni rtag pa'i phyir rgyu cung zad kyang yod pa ma yin pas/ de'i phyir skye ldan zhes bstan to/ /gzhan dag ces bya ba ni rigs pa can la sogs pa'o/ /dbang ni dbang phyug go/ /de la kha cig ni dbang phyug yon tan khyad par can dang ldan pa dag las/ gzhan 'gro ba thams cad kyi byed pa po thams cad shes pa yin no zhes zer ro/ /gzhan dag ni bdag las tha dad pa rtag pa gcig pu don thams cad kyi yul can gyi blo dang ldan pa nyid kyis yon tan tha dad pa'i phyir rdzas gzhan nyid yin no zhe'o/ /'on te chos dang / chos ma yin pa dang / rdul phra rab la sogs pa 'gro ba'i rgyu yod pa ma yin nam/ de ci'i phyir gzhan dbang phyug rgyu nyid du rtog par byed ce na de'i phyir/ sems pa med pa rang nyid kyis/ /zhes bya ba la sogs pa smos te/ chos la sogs pa rgyu yin mod kyi/ 'on kyang de ni sems pa med pa yin pa'i phyir byin gyis rlob pa po med par rang nyid kyis rang gi 'bras bu rtsom par nus pa ma yin no/ /des na de byin gyis rlob pa po 'ga' zhig byed pa por 'gyur bar bya dgos so/ /gang gi phyir sems pa med pa 'ga' zhig rang dbang can dang byin gyis rlob pa por ma mthong ngo / /sbyor ba ni gang sems pa med pa de ni byin gyis rlob pa po med par rang gi 'bras bu rtsom pa ma yin te/ dper na 'jim pa'i gong bu dang / dbyi gu dang / chu dang / skud pa la sogs pa rdza mkhan dang bral ba'i bum pa lta bu'o/ /chos la sogs pa yang sems pa med pa can yin no zhes bya ba ni khyab par byed pa 'gal ba dmigs pa'o/ /de lta bas na byin gyis rlob pa po gang yin pa 'di nyid dbang phyug yin par grub po/ /de ltar na chos dang chos ma yin pa la sogs pa don med pa yang ma yin te/ dbang phyug ni rgyu mtshan gyi rgyu yin pa'i phyir ro/ /'di snyam du chos dang chos ma yin pa dang 'du ba'i bdag gang yin pa de nyid byin gyis rlob pa po yin par 'gyur na/ de'i phyir dbang phyug brtags pas ci zhig bya snyam du sems na/ de ni yang dag pa ma yin te/ bdag de'i tshe shes pa med pa yin pa'i phyir ro/ /de ji srid du lus dang dbang po la sogs pa'i rgyu dang 'bras bu tshogs pa ma skyes pa de srid du 'di shes pa med pa yin la/ dmigs su rung ba yin na yang de srid du gzugs la sogs pa'i yul mi dmigs na/ dmigs su mi rung ba'i chos dang chos ma yin pa gang las dmigs par 'gyur/ ji skad du/ skye ba po 'di shes pa yod min te/ /bdag gi bde sdug bdag la rang dbang med/ /dbang phyug gis btang yang na mtho ris sam/ /g.yang sa dag tu 'gro ba kho nar 'gyur/ /zhes smras pa lta bu'o/ /'di la rnam phug pas dbang phyug sgrub pa las tshad ma gnyis bkod pa ni/ rang rtsom byed pa'i cha shas dag /ces bya ba la sogs pa smos te/ 'di skad du/ dbang po gnyis kyis gzung bar bya ba dang gzung bar bya ba ma yin pa'i blo mi mthun pa'i gzhi nyid du gyur pa ni blo dang ldan pa'i rgyu sngon du 'gro ba can yin te/ rang rtsom par byed pa'i cha shas kyi dbyibs kyi khyad par dang ldan pa'i phyir bum pa la sogs pa bzhin no/ /chos mi mthun pa ni rdul phra rab lta bu'o zhes smras te/ de la mthong ba dang reg pa'i don dbang po gnyis po de dag gis gzung ba chen po dang / rdzas du ma dang ldan pa dang / gzugs la sogs pa dmigs pa'i rgyu dang ldan pas sa dang / chu dang / me'i ming can rdzas rnam pa gsum ni mthong ba dang reg pa'i dbang po dag gis gzung bar bya ba ni / dbang po gnyis kyis gzung bar bya ba yin la/ rlung la sogs pa ni gzung bar bya ba ma yin pa'o/ /gang gi phyir chen po nyid dang / rdzas du ma dang ldan pa nyid dang / gzugs dang / 'du ba la sogs pa ni dmigs pa'i rgyur 'dod la/ de yang rlung la sogs pa la med do/ /ji skad du/ chen po dang rdzas du ma ni gzugs dang ldan pa'i phyir dang / gzugs yin pa'i phyir dmigs pa yin la/ rlung ni gzugs dang mi ldan pa'i phyir mi dmigs so/ /gzugs dang ldan pa ni gzugs dang 'du ba'o/ /rdul phra rab gnyis pa la sogs pa ni dmigs pa ma yin te/ chen po ma yin pa'i phyir ro zhes bshad pa lta bu'o/ /de la spyir dbang po gnyis kyis gzung bar bya ba dang gzung bar bya ba ma yin pa dang ldan pa'i rgyu sngon du 'gro ba nyid du sgrub par byed na grub pa la sgrub pa'i skyon yod de/ bum pa la sogs pa ni gnyi ga la grub pas rtsod pa med pa'i phyir dang / khas blangs pas gnod pa'i phyir dang / rdul phra rab dang nam mkha' la sogs pa rnams ni de ltar khas ma blangs pa'i phyir ro/ /de dag kyang rtag pa'i phyir mngon sum la sogs pas gnod do/ /de lta bas na de'i don du blo mi mthun pa'i rten du gyur pa smos te/ blo sna tshogs pa ni mi mthun pa ste log par rtog pa zhes bya ba'i tha tshig go/ /'di'i gzhir gyur pa ni rtsod pa'i rten du gyur pa zhes bya ba'i don to/ /de ltar yin na lus dang / dbang po dang / gnas la sogs pa nyid phyogs su byas pa yin pa'i phyir/ rdul phra rab la sogs pa la thal bar 'gyur ba med do/ /rgyu tsam sngon du 'gro ba nyid du sgrub na grub pa las sgrub par 'gyur du 'ongs pas blo dang ldan pa'i rgyu'i zhes smos so/ /grangs can la ldan pa'i don mi 'thad pas grub pa na sgrub pa ma yin no/ /grangs can gyi blo gtso bo las tha mi dad par 'dod la de de nyid kyis de dang ldan pa ni ma yin no/ /rang rtsom par byed pa'i cha shas kyi dbyibs ni bsags pa'i bdag nyid du sbyor ba'o/ /de khyad par dang ldan pa ni rnam par gcod pa'o/ /de yin pas na ste de'i phyir ro/ /cha shas bkod pa'i khyad par nyid ni ba lang nyid la sogs pas 'khrul pa yin no/ /de'i phyir rang rtsom byed pa zhes smos so/ /ba lang nyid la sogs pa nyid ni rdzas rtsom pa'i cha shas kyi dbyibs khyad par du gyur pa yin gyi/ rang rtsom par byed pa'i cha shas kyi dbyibs kyi khyad par ni ma yin no/ /des na blo dang ldan pa gang yin pa de nyid dbang phyug yin no/ /tshad ma 'di ni rang rtsom byed pa zhes bya ba la sogs pa'i tshigs su bcad pa gnyis kyis bstan to/ /rang rtsom par byed pa'i cha shas kyi dbyibs kyi khyad par gyis khyad par du byas pa de 'di la yod pa de la de skad ces bya ste/ des khyad par du byas pa zhes bya ba'i don to/ /'dis ni gtan tshigs kyi khyad par bstan nas phyogs kyi chos nyid la sogs pa bstan pa'i phyir/ dbang po gnyis gzung zhes bya ba la sogs pa smos te/ rtsod pa'i gzhi'o zhes bya ba ni rtsod pa'i rten du gyur pa zhes bya ba'i don to/ /des smras pa'i tshad ma gnyis pa bstan pa'i phyir/ de bzhin lus la sogs pa'i rgyu/ /zhes bya ba la sogs pa smos te/ lus la sogs pa ste/ lus la sogs pa'i nye bar len pa'i rgyur rdul phra rab la sogs pa sems pa can gyi rgyus byin gyis brlabs pa yod na rang gi 'bras bu byed ces 'brel to/ /gzugs sogs ldan phyir zhes bya ba ni gtan tshigs so/ /snal ma la sogs pa bzhin no zhes bya ba ni dpe'o/ /ji skad du lus dang / gnas dang / dbang po nye bar len pa sems pa can gyi byin gyis brlabs pa rnams ni rang gi 'bras bu rtsom par byed do zhes kho bo cag gis shes te/ gzugs la sogs pa dang ldan pa'i phyir snal ma la sogs pa bzhin no zhes bstan pa lta bu'o/ /gsal byed pa ni gnas pa la sogs pa'i rgyu gtso bo rdul phra rab dang ma mthong ba rnams ni rang gi 'bras bu skyed pa la khyad par du 'phags pa'i blo dang ldan pa'i byin gyis rlob pa po la ltos pa yin te/ bsdad nas 'jug pa'i phyir snal ma la sogs pa dang thag bzangs la sogs pa bzhin no zhes tshad ma ston par byed do/ /de 'dir ston pa ni/ chos dang chos min rdul phran kun/ /zhes bya ba smos te/ go sla'o/ /blo gros bzang pos kyang 'byin pa'i thog mar skyes bu rnams kyi tha snyad ni gzhan gyis nye bar bstan pa sngon du 'gro ba can yin te/ dus phyis rab tu byang ba dag don so sor nges pa'i phyir ro/ /dper na tshig gi tha snyad ma grub pa'i byis pa rnams la ba lang la sogs pa la tshig gi tha snyad don so sor nges pa ni ma la sogs pa'i nye bar bstan pa sngon du 'gro ba can bzhin no zhes zer ro/ /shes ldan dag la don nges phyir/ /zhes bya ba ni rab tu byang ba yod pa dag la don nges pa'i phyir zhes bya ba'i don to/ /tha snyad 'di de 'byin pa'i dang por gang zhig sngon du 'gro ba des ston par byed pa de ni dbang phyug go/ / 'jig pa'i dus na yang shes pa'i khyad par du 'phags pa mi 'jig go zhes bya bar grub po/ de ston pa ni / 'byin pa'i dang po skyes bu yi/ /zhes bya ba la sogs pa la/ 'byin pa ni 'byung ba dang skyed pa zhes bya ba'i tha tshig go/ /de'i dang po ni thog ma'i dus so/ /lhag ma ni go sla'o/ /de bzhin du tshad ma gzhan 'od byed pas bstan pa ni/ 'byung ba chen po la sogs pa'i gsal ba ni blo dang ldan pa'i rgyus byin gyis brlabs nas bde ba dang sdug bsngal gyi rgyu mtshan du 'gyur ba yin te/ sems pa can ma yin pa'i phyir dang / 'bras bu yin pa'i phyir dang / 'jig pa dang ldan pa'i phyir dang / gzugs la sogs pa dang ldan pa'i phyir / ste'u la sogs pa bzhin no zhes bya ba'o/ /'di dag ston pa ni 'byung ba che la sogs zhes bya ba la sogs pa'o/ /blo dang ldan pas byin brlabs zhes bya ba ni blo dang ldan pa pos byin gyis brlabs pa'o/ /de phyir zhes bya ba ni ji skad du bshad pa'i gtan tshigs kyi tshogs las so/ /de ni zhes bya ba ni 'gro ba'i rgyu dbang phyug go/ /ci ste gang gis mngon par mtho ba dang / nges par legs pa 'dod pa rnams kyis gus pa'i yul du 'gyur ba de thams cad shes pa nyid du ji ltar 'grub ce na/ kun gyi byed po nyid grub na/ /zhes bya ba la sogs pa smos te/ de skad du/ yang blo gros bzang po la sogs pas/ 'di gnas pa mtha' dag gi rgyu yin pa'i phyir thams cad shes pa nyid du grub ste/ byed pa pos ni 'bras bu dang / nye bar len pa dang / lhan cig byed pa dang / dgos pa dang / yang dag par sbyin pa shes pa'i phyir ro/ /'di la gang zhig gang gi byed pa po yin pa de ni de'i nye bar len pa shes pa yin te/ dper na kham gzhong la sogs pa'i byed pa po rdza mkhan gyis de'i nye bar len pa ni 'jim gong ngo / /lhan cig byed pa ni 'khor lo la sogs pa'o/ /dgos pa ni chu la sogs pa len pa la sogs pa'o/ /yang dag par sbyin pa ni gnyen yin par shes pa zhes bya ba 'di rab tu grub pa bzhin no/ /de bzhin du gnas pa thams cad kyi byed pa po dbang phyug gis de'i nye bar len pa rdul phra rab la sogs pa'i mtshan nyid do/ /de'i lhan cig byed pa ni chos dang / chos ma yin pa dang / phyogs dang dus la sogs pa'o/ /tha snyad kyi lhan cig byed pa ni spyi dang khyad par dang 'du ba'i mtshan nyid do/ /dgos pa ni nye bar longs spyod pa'o/ /yang dag par sbyin pa'i ming can ni skyes bu rnams shes pa yin no zhes bya ba'o/ /de'i phyir 'di thams cad shes pa nyid du grub pa yin no zhes smras so/ /'bras bu'i ngo bo la sogs shes/ /zhes bya ba ni gang 'bras bu'i ngo bo la sogs pa ni rang bzhin la sogs pa'o/ /sogs pa'i sgras nye bar len pa la sogs pa gzung ngo / /de dag gi shes pa zhes bya ba ni bsdu ba'o/ /ya dza ka la sogs pa'i tshogs ma rdzogs pa nyid kyi phyir ram/ las la aN gyi sgra'i rkyen bsgrubs nas rang gi don ka'i sgrub pa yin no/ /lhag ma ni go sla'o/ /de bzhin du de dag gis smras pa'i tshad ma'i tshogs gzhan sna tshogs par 'byung ba dang / rab tu g.yo ba dang / gzhi dang gzhi ma yin pa blo mi mthun pa'i gzhir gyur pa ni gnyis pa la sogs pa'i tshad ma lnga las tha dad pa'i tshad ma gzhan gyis gcad par bya ba yin te/ dngos po nyid la sogs pa yin pa'i phyir gzugs la sogs pa bzhin no/ /chos mi mthun pa ni rus sbal gyi spu la sogs pa bzhin no zhe'o/ /de la sna tshogs par 'byung ba ni yon tan gyi tshig gi don la brjod de/ 'di sna tshogs par 'byung ba yin pa'i phyir ro/ /rab tu g.yo ba ni las kyi tshig gi don to/ /de dag gi gzhi ni 'du ba'i rgyu ste rdzas so/ /gzhi ma yin pa ni yon tan la sogs pa nas 'du ba'i bar lnga po rnams so/ / gnyis pa la sogs pa'i tshad ma lnga ni rjes su dpag pa nas bzung nas dngos po med pa'i bar ro/ /de las tha dad pa'i tshad ma gzhan ni mngon sum mo/ /lhag ma ni go sla'o/ /de dag gis smras pa'i gtan tshigs gzhan 'di yang yin te/ yod pa la sogs pa khyad par med pa non pa dang ma non pa blo mi mthun pa gzhi'i ngo bor gyur pa 'ga' zhig ni mngon sum yin te/ yod pa'i phyir gzugs la sogs pa bzhin no zhe'o/ /de la yod pa la sogs pa khyad par med pa rnams drug pa ste/ yod pa dang / mi rtag pa dang / rdzas dang ldan pa dang / rgyu dang 'bras bu dang / spyi'i khyad par ldan pa zhes bya ba ni rdzas dang / yon tan dang / las rnams kyi khyad par med pa ni de dag gis non pa ste/ mnan pa ni ji ltar srid par rdzas dang / yon tan dang / las kyi bdag nyid kyi tshig gi don gsum mo/ /ma non pa ni spyi la sogs pa'o/ /lhag ma ni go sla'o/ /tshad ma'i tshogs de dag nyid ston pa ni/ mi mthun blo bzhi'i dngos po ni/ /zhes bya ba la sogs pa'o/ /'di la sgrub byed dang po yi/ /zhes bya ba la sogs pas phyogs phyi ma rtsom ste/ de la gang sems pa can ma yin pa de ni byin gyis rlob pa po med par rang gi 'bras bu rtsom pa ma yin te zhes bya ba la sogs pa'i sbyor ba la/ bsgrub par bya ba bzlog pa la gnod par byed pa'i tshad ma med pa'i phyir mi mthun pa'i phyogs la ldog pa la the tshom za ba nyid kyis gtan tshigs ma nges pa yin no snyam du bsams pa yin no/ /gang yang rang rtsom par byed pa'i cha shas kyi khyad par dang ldan pa'i phyir zhes bya ba'i sgrub par byed pa'i gtan tshigs kyi sbyor ba dang po ni ma grub bo/ /ci'i phyir zhe na/ gang gi phyir zhes bya ba la sogs pa smos te/ cha shas kyi dbyibs kyi sgras ni ldan pa'i khyad par mngon par 'dod pa'o/ /de'i khyad par du byas pa yang yan lag can zhes bya ba'i rdzas so/ /khyad par dang khyad par can de dag gnyi ga yang ma grub pa'i phyir gtan tshigs ma grub pa rnam pa gnyis so/ /yang ji ltar gnyi ga ma grub pa yin zhe na/ bltar rung nyid du zhes bya ba la sogs pa smos te/ de la mdor bsdus nas rang bzhin mi dmigs pa zhes pa nyid gnod par byed pa'i tshad mar bshad do/ /rgyas par ni 'di dag gi skyon tshig gi don drug brtag par ston par 'gyur ro/ /gnyi ga zhes bya ba ni dbyibs dang cha shas can du yang dag par 'dod pa'o/ /'di ltar dbyibs ltar rung ba nyid du khas blangs te/ grangs dang / tshad dang / tha dad pa nyid dang ldan pa dang / rnam par dbye ba dang / gzhan dang gzhan ma yin pa dag dang / las ni gzugs can dang 'du ba'i phyir mig gis gzung bar bya ba yin no zhes brjod pa'i phyir ro/ /cha shas can yang bltar rung ba nyid du 'dod de/ chen po ni du ma dang ldan pa'i phyir dang / gzugs yin pa'i phyir dmigs pa yin no zhes brjod pa'i phyir ro/ /gzugs la sogs pa las tha dad par ldan pa'am/ cha shas can snang du rung ba nyid du 'dod pa ni blo la snang ba ma yin pas/ de'i phyir dmigs pa'i mtshan nyid du gyur pa las ma dmigs pa'i phyir/ ri bong gi rwa bzhin du med pa'i tha snyad kyi yul yin no/ /rdul phra rab rnams dbang po las 'das pa'i phyir gzugs la sogs pa rnams mi dmigs par thal bar 'gyur ba yang ma yin te/ khyad par can rnams dbang po'i yul du khas blangs pas dbang po las 'das pa ma grub pa'i phyir ro/ /de nyid kyi phyir ldan pa dang cha shas can dag med pa'i phyir chos mthun pa'i dpe bum pa sgrub par byed pa'i chos dang bral ba yin no zhes ston par byed pa ni/ de lta bas na dpe 'di yang zhes bya ba la sogs pa'o/ /de ltar re zhig khyad par dang khyad par can ma grub pas gtan tshigs rang gi ngo bo ma grub pa nyid du bstan nas/ da ni gzhi'i phyogs gcig ma grub pas kyang ma grub pa yin no zhes ston par byed pa ni/ mig dang reg pa'i zhes bya ba la sogs pa'o/ /'di la chos can rnam pa gnyis bstan te/ dbang po gnyis kyis gzung bar bya ba dang / gzung bar bya ba ma yin pa'o/ /de la dbang po gnyis kyis gzung bar bya ba'i chos can ni cung zad kyang ma grub ste/ 'di ltar mig dang reg pa'i rnam par shes pa gnyis ka go rims bzhin du sngon po la sogs pa'i gzugs tsam snang ba can yin pa'i phyir dang / rtsub pa la sogs pa'i reg bya'i khyad par tsam snang ba can yin pa'i phyir tha dad pa snang ba can du nye bar skye'o/ /de lta yin dang mig dang reg pa'i rnam par shes pa de dag yul gcig pa nyid yod pa ma yin te/ tha dad du snang ba'i phyir dri dang ro la sogs pa'i rig pa bzhin no/ /sbyor ba ni gang dag tha dad du snang ba can gyi rnam par shes pa de dag ni yul gcig pa can ma yin te/ dper na dri dang ro'i rnam par shes pa gnyis bzhin no/ /mig dang reg pa'i rnam par shes pa gnyis kyang tha dad par snang ba can yin no zhes bya ba ni khyab par byed pa 'gal ba dmigs pa'o/ /snang ba tha dad pa can yang yul gcig pa nyid yin na gzugs dang sgra la sogs pa'i sems kyang yul gcig pa nyid du thal bar 'gyur ro zhes bya ba 'di ni 'dir gnod pa can gyi tshad ma'o/ /'o na gal te de dag yul gcig pa ma yin na de ji ltar ngas snang ba la mthong ba yin pa'i bum pa gang yin pa de nyid mun par reg go zhes bya ba'i nying mtshams sbyor ba'i rnam par shes par 'dir 'gyur/ de lta bas na dam bcas pa 'di rjes su dpag pas gnod pa yin no/ /de la 'od byed pas smras pa'i rjes su dpag pa ni 'di yin te/ yul dpyad par gyur pa'i mthong ba dang reg pa'i shes pa dag ni yul gcig pa yin te/ nying mtshams sbyor ba'i phyir ut+pal sngon po'i shes pa bzhin no zhes bya ba'o/ /de la/ bshad pa de dag mthu las yang dag byung / /zhes bya ba la sogs pa ste/ de dag ste kha dog dang reg pa tsam du snang ba'i mig dang reg pa'i rnam par shes pa dag gi mthu ni nus pa ste/ de las yang dag par byung ba'i rtog pa dang 'brel pa'i bdag nyid 'di la yod pas zhes tshig rnam par sbyar ro/ /de'i phyir 'dis ni nying mtshams sbyor ba'i shes pa mngon sum ma yin pa nyid du bstan pa yin te/ du ma la gcig tu zhen pa nyid kyis 'di 'khrul pa yin pa'i phyir dang rtog pa dang rjes su 'brel pa'i phyir ro/ /tshad ma gzhan yang yod pa ma yin te/ shes pa snga mas yongs su bcad pa'i yul nges pa nyid kyis bzung zin pa 'dzin pa'i phyir dang / 'khrul pa nyid yin pa'i phyir ro/ /de lta bas na nying mtshams sbyor ba'i phyir ro zhes bya ba'i gtan tshigs ma nges pa yin no/ /gal te nying mtshams sbyor ba'i shes pa tshad ma nyid du grub par gyur na/ de'i tshe gtan tshigs nges pa kho nar 'gyur na/ ji tsam du gzugs la sogs pa dag la thun mong ba'i nus pa bstan pa'i phyir bum pa la sogs par brda byas te/ bdag nyid ji lta ba bzhin du mig dang reg pa dag gis nyams su myong ba de dag la dus phyis ji ltar mthong ba'i yul can rjes su mthun pa'i brda byas pa'i 'du byed kyi khyad par gcig nyid du zhen pa 'khrul pa'i rang bzhin gyis dran pa'i shes pa 'di skye'o/ /'di ltar de ltar zhen pa de la sngon po la sogs pa'i kha dog snang gi / reg pa'i shes pa la ni kha dog snang bar rigs pa ma yin te/ de ni mig gi rnam par shes pa'i yul yin pa'i phyir ro/ /de lta bas na 'di ni slob dpon gyis mig dang reg pa dag gis bdag nyid ji lta ba bzhin du yul tha dad pa dmigs pa de dang lhan cig spyod pa'i spyi'i yul can gzhan tha mi dad pa dran pa'i shes pa skye'o zhes bshad pa gang yin pa de nyid rigs so/ /gal te spyi tha dad pa nyams su myong ba yin na de'i tshe dran pa 'di rigs kyi/ ji srid du khyed cag gang dag gis 'di nyams su myong bar 'gyur ba gzugs la sogs pa las tha dad pa'i spyi mi 'dod de/ gzugs la sogs pa nyams su myong ba la gzugs la sogs pa'o snyam par 'gyur gyi bum pa'o snyam du ni ma yin no/ /nyams su ma myong ba dran par mi rigs pa ma yin nam/ de ji ltar spyi'i yul can gyi dran pa'i shes pa 'di skye bar 'gyur zhe na/ de ni med de/ gang gis der 'gyur ba gzugs la sogs pa las gzhan spyi sngar myong ba yin no zhes ni mi brjod kyi/ 'on kyang chu la sogs pa 'dzin pa'i don bya ba byed pa gzugs la sogs pa de dag nyid tshogs pa dang bum pa zhes bstan pa yin no/ /dbang po'i shes pas so sor nyams su myong ba de dag la ji lta ba bzhin du brda byas pa'i khyad par bum pa zhes dran pa skye'o zhes brjod pa yin no/ /yang na spyi ni brtags pa yin te/ rtog pa'i shes pa'i bdag nyid yin pa'i phyir rig pa nyams su myong ba nyid yin no/ /de lta bas na ci'i phyir de'i dran pa mi 'thad/ de'i phyir rang rtsom par byed pa'i cha shas kyi dbyibs kyi khyad par dang ldan pa'i phyir ro zhes bya ba'i gtan tshigs 'di gzhi ma grub pa yin no/ /ci'i phyir zhe na/ ji skad du bshad pa'i chos can ni ma grub phyir na zhes bya ba smos te/ ji skad du bshad pa'i dbang po gnyis kyis gzung bar bya ba'i chos can ma grub pa'i phyir te/ rgyu'i phyir gzhi'i phyogs gcig ma grub pas gtan tshigs ma grub bo/ /des na de ltar na khyad par can dang / khyad par dang / gzhi ma grub pa'i phyir gtan tshigs ma grub pa rnam pa gsum bstan to/ /slob dpon gyis bstan pa'i ma grub pa rnam pa bzhi pa ni dbyibs kyi khyad par zhes bya ba la sogs pa smos so/ /gang zhig mthong bas byed pa po ma mthong ba dag kyang blo dang ldan pa'i rgyu rtogs par 'gyur ba lha khang la sogs pa la dbyibs kyi khyad par gang zhig rjes su 'gro ba dang ldog pa dag gis blo dang ldan pa'i skyes bu'i byed pa sngon du 'gro ba can nyid du 'jig rten na grub pa yin no/ /gal te de lta bur gyur pa lus dang / shing dang / ri la sogs pa bsgrub par bya ba'i chos can la gtan tshigs nyid du khas len na/ de'i tshe khyed cag gi 'dod pa'i bsgrub bya 'grub par 'gyur ro/ /rjes su 'gro ba dang ldog pa dag gis shin tu rnam par phye ba'i 'bras bu ni rgyu la 'khrul pa med de/ de rgyu med pa nyid du thal bar 'gyur ba'i phyir ro/ /de lta bur gyur pa'i dbyibs kyi khyad par ni shing la sogs pa la grub pa yang ma yin te/ dbyibs zhes bya ba'i ming tsam grub pa 'ba' zhig tu zad do/ /chos ni rang bzhin gyis phan tshun don gzhan nyid du gnas na yang sgra tsam gyis tha mi dad par gtan tshigs nyid du len pa na mngon par 'dod pa'i bsgrub bya sgrub par nus pa yang ma yin te/ bsgrub bya las bzlog pa yang de yod par 'gal ba med pa'i phyir ro/ /dper na chos can grog mkhar la rdza mkhan gyis byas pa nyid du bsgrub par bya ba la/ 'jim pa'i rnam par gyur pa tsam gtan tshigs nyid du khas blangs pa lta bu'o zhes bya ba ni spyi'i don to / / yan lag gi don yang brjod par bya ste/ gang mthong blo dang ldan rtogs pa/ /zhes bya ba ni dbyibs gang zhig mthong ba yod na blo dang ldan pa'i rgyu rtogs te/ rjes su dpog par 'gyur ro zhes bya ba'i don to/ /lus dang ri sogs zhes bya ba la/ lus ni lus so/ /ri ni ri bo'am shing ngo / / sogs pa'i sgras rgya mtsho la sogs pa gzung ngo / /ji lta bur 'dod pa zhes bya ba ni blo dang ldan pa sngon du 'gro ba'o/ /sgrub pa zhes bya ba ni sgrub pa'o/ /ji ltar rigs she na/ rjes su 'gro dang zhes bya ba la sogs pa smos te/ 'bras bu gang zhes bya ba ni du ba la sogs pa'o/ /gang gis zhes bya ba ni me la sogs pa'o / de mthong zhes bya ba ni du ba la sogs pa'i 'bras bu mthong ba yod na'o/ /de nges zhes bya ba ni me la sogs pa nyid du'o/ /gal te de lta na 'di la yang de kho na bzhin du 'gyur ro zhe na/ dbyibs kyi khyad par de lta bu zhes bya ba la sogs pa smos te/ 'o na dbyibs kyi sgra'i spyi grub pa gang yin pa de nyid gtan tshigs su 'gyur ro zhe na/ /de lta bu ni rab brjod na'ang / /zhes bya ba la sogs pa smos te/ de lta bu ni sgra tsam gyis tha mi dad pa'o/ /rdza mkhan gyis ni byas pa bzhin/ /zhes bya ba la/ 'ji ba'i rnam par 'gyur ba tsam nyid ces bya ba lhag ma'o/ /de lta bas na de ltar dbyibs kyi khyad par ni ma grub la/ dbyibs tsam yang ma nges pa yin na zhes bstan par 'gyur ro/ /chos kyi khyad par zhes bya ba la sogs pas gzhan gyi ltag chod rjod par byed de/ 'di ni 'bras bu dang mtshungs pa'i ltag chod yin no/ /'di ltar sgra ni mi rtag ste/ byas pa'i phyir ro zhes smras pa la/ ltag chod smra ba klan ka byed de/ ci 'di bum pa la sogs par gtogs pa'i byas pa nyid gtan tshigs su brjod dam/ ci sgrar gtogs pa'am/ 'on te gnyi gar gtogs pa yin grang / phyogs dang po ltar na gtan tshigs ma grub pa yin te/ 'di ltar chos gzhan gzhan du 'jug pa ni med do/ /gnyis pa la yang dpe sgrub byed dang bral ba yin la/ gsum pa la yang skyon de dag nyid yod pa yin pa'i phyir 'di 'bras bu dang mtshungs ba zhes bya ba'i ltag chod yin no zhes bstan to/ /ji skad du 'bras bu nyid gzhan gyi shan gyis grub par bstan pa gang yin pa de ni 'bras bu dang mtshungs pa'o zhes smras pa lta bu'o/ /gang gi phyir 'bras bu nyid kyi spyi bzung nas mi rtag pa nyid rjes su dpog par 'dod kyi/ khyad par ni ma yin no/ /des na spyi'i sgo nas sgrub byed du 'dod la/ chos kyi khyad par rnam par rtog pa'i sgo nas lan 'debs pa gang yin pa de ni 'bras bu dang mtshungs pa'i ltag chod ces rnam par gzhag go/ /'di yang chos kyi khyad par gyis rnam par rtog pa yin no/ /de phyir ltag chod yin no/ /de yis ngo bo min las log /ces bya ba la sogs pas lan 'debs pa'o/ /gang byas pa nyid tsam mi rtag pa nyid sgrub par byed do zhes bya ba 'di ni rigs te/ de la de'i bdag nyid kyi mtshan nyid kyi 'brel pa yod pa'i phyir ro/ /rang rtsom par byed pa'i cha shas kyi dbyibs kyi khyad par can nyid tsam gyi sgrub par byed pa 'di la 'di mi rigs te/ dbyibs kyi spyi la ni bzlog pa la gnod par byed pa med pas 'brel pa ma grub pa'i phyir ro/ /gang zhig dmigs pas byed pa ma mthong yang byas pa'i blor 'gyur ba de las byung ba'i mtshan nyid kyi 'brel pa grub pa'i khyad par gang zhig ma grub pa'i phyir ro snyam du bsams pa yin no/ /ci ste de las byung ba'i 'brel pa'i khyad par spangs nas spyi nyid rtags su brjod pa de'i tshe 'khrul pa yin no zhes bstan pa'i phyir/ du ba'i bdag nyid skya bo dag /ces bya ba la sogs pa smos te/ du ba'i bdag nyid kyi skya bo'i dngos po me med na mi 'byung bar mthong ba zhes bya ba de tsam gyis skya bo'i sgras brjod par bya ba tsam gyi spyi yin pa'i phyir/ /kha ba las kyang me de rtogs par 'gyur ro/ /'o na ji ltar 'bras bu dang mtshungs pa ltag chod du brjod ce na/ spyir 'brel pa la gang gi tshe/ /zhes bya ba la sogs pa la/ bsgrub bya dang lhan cig sgrub par byed pa'i chos spyir mi mthun pa'i phyogs la gnod par byed pa'i tshad ma 'jug pas 'brel pa grub na yang gang du chos kyi khyad par la brten nas klan na byed pa de ni ltag chod yin no/ /'di la ni spyir 'brel pa ma grub la/ gang la dbyibs la khyad par gyi 'brel pa yod pa dam grub pa'i phyir 'di ltag chod ma yin no/ /'on te 'brel pa med kyang spyi go bar byed pa yin na / de'i tshe ha cang thal bar 'gyur ro zhes bstan pa'i phyir / gal te rnam pa gzhan du na/ /zhes bya ba la sogs pa smos te/ de lta na mtho ris dang / phyogs dang / sa dang / ngag dang / mig dang / 'od zer dang / rdo rje dang / chu rnams kyang go'i sgras brjod par bya ba tsam yin pa'i phyir khu yu'i be'u la sogs pa bzhin du rwa can du rjes su dpog par thal bar 'gyur ro/ /'di snyam du byas pa la sogs pa bzhin du dbyibs kyi khyad par ldan pa 'di yang blo dang ldan pa'i rgyu sngon du 'gro ba nyid kyis 'brel pa yod pa nyid do snyam du sems na/ gal te 'di la 'brel pa ni/ /zhes bya ba la sogs pa smos so/ /'on kyang 'brel pa de nyid ma grub pa yin no zhes bstan pa'i phyir 'on kyang rtag gcig ces bya ba la sogs pa smos te/ khyed cag gis blo dang ldan pa sngon du 'gro ba nyid tsam bsgrub par 'dod pa ni ma yin te / 'on kyang dbang phyug ces bya brtag pa gcig pu thams cad shes pa'i blo rtag pa'i rten srid pa thams cad kyi rgyu blo dang ldan pa'i dngos po gang yin pa de sngon du 'gro ba can 'di bsgrub par 'dod pa yin te/ de nyid rtsod pa'i gzhir gyur pa'i phyir ro/ / de lta bur gyur pa de yang grub pa ma yin no/ /ci'i phyir zhe na/ bsgrub bya mtshang bas khyab pa ma grub pa'i phyir ro/ /bum pa la sogs pa chos mthun pa nyid kyi dpe la ji skad du bshad pa'i bsgrub bya'i chos ma tshang ba'i phyir/ de lta bur gyur pa'i bsgrub bya'i chos kyi gtan tshigs la khyab pa ma grub pa'i phyir ro zhes bya ba'i don to/ /dpe 'ga' zhig la yang ji skad du bshad pa'i bsgrub bya'i chos dang gtan tshigs 'brel pa yod pa ma yin no zhes bya ba'i tha tshig go/ /'di nyid bstan pa'i phyir/ 'di ltar skar khung zhes bya ba la sogs pa smos so/ /gzhan yang gtan tshigs ma grub pa dang ma nges pa 'ba' zhig tu ma zad de/ 'on kyang 'gal ba yang yin no zhes ston pa ni/ de nyid kyi phyir 'di zhes bya ba la sogs pa la de nyid kyi phyir zhes bya ba bsgrub bya las bzlog pa'i chos kyis khyab pa'i phyir ro/ /yang gi sgras ni sngar bshad pa'i tshul gyis ma grub pa dang ma nges pa 'ba' zhig tu ma zad kyi 'gal ba yang yin no zhes bshad do/ /'on te bzlog pa la 'brel ba yod na 'gal bar 'gyur na/ blo dang ldan pa sngon du 'gro ba tsam la yang 'brel pa med pa ma yin nam/ de ji ltar de'i khyad par 'gyur zhe na/ blo dang ldan pa tsam rgyu la / /zhes bya ba la sogs pa smos te/ dbang phyug rgyu smra ba khyod kyis blo dang ldan pa'i rgyu tsam dang 'brel par brjod la/ gzhan du spyi dang yang 'brel pa ma grub na/ ji ltar dngos po rnams dbang phyug gi rgyu can du 'grub par 'gyur/ de lta bas na khyed cag gis 'dod pa blo dang ldan pa sngon du 'gro ba tsam grub pa nyid du khas blangs nas/ khyed cag gis 'dod pa'i bsgrub bya'i khyad par las gnyis pa mi rtag pa du ma'i rnam par shes pa sngon du 'gro ba can gyi mtshan nyid 'dod pa las bzlog pa'i bsgrub par bya ba gnyis pa gang yin pa de la kho bo cag gis bsgrub bya'i khyad par dang / gtan tshigs kyi 'brel pa gsal bar brjod pa yin no/ / ji ltar 'di gsal bar brjod ce na/ rtag pa rim dang rim ma yin/ /zhes bya ba la sogs pa smos te/ dbang phyug la sogs pa rtag pa'i dngos po rnams ni 'bras bu byed pa ma yin te/ rtag pa ni rim dang cig car dag gis don byed par 'gal ba'i phyir ro/ /de lta bas na mi rtag pa kho na don gyi bya ba byed de/ de dag kyang skad cig re rer rang bzhin gzhan dang gzhan 'byung ba yin pas mi rtag pa nyid dang / du ma nyid kyi blo dang ldan pa'i byed pa po grub pa yin no/ /gang yang dbang phyug rtag pa gcig pu'i blo dang ldan pa nyid du dam bcas pa de yang rjes su dpag pa dang 'gal ba yin no zhes bstan pa'i phyir/ yul rnams rim can zhes bya ba la sogs pa smos so/ /shes bya rim can zhes bya ba la sogs pas tshad ma ston te/ gang rim pa can gyi shes bya'i yul can gyi shes pa de ni rim gyis 'byung ba yin te/ dper na lha sbyin la sogs pa'i me lce la sogs pa'i yul can gyi rnam par shes pa bzhin no/ /dbang phyug gi shes pa yang shes bya rim can gyi yul can yin no zhes bya ba ni rang bzhin gyi gtan tshigs so/ /'di ni thal ba bsgrub pa yin te/ des na gtan tshigs gzhi ma grub pa nyid du dogs par mi bya'o/ /spyi la sogs pa'i tshig gi don gyi yul can gyi lha sbyin la sogs pa'i shes pa ni sgrub par byed pa'i chos dang bral ba yin pa'i phyir/ me lce la sogs pa'i yul can dper brjod do/ /yang 'di la gnod pa can gyi tshad ma gang yin zhe na/ brjod pa/ gal te rim pa dang ldan pa'i yul gyi dbang phyug gi shes pa de sna tshogs su snang ba skye bar 'gyur na/ de'i tshe rim pa can du grub pa nyid do/ /gal te mi skye na de'i tshe nye ba'i rgyu mtshan med pa'i phyir de shes pa ma yin no/ /yul med na yang 'byung ba skye ba khas blangs pa'i tshad ma nyid nyams par 'gyur ro/ /zhig pa dang ma skyes pa'i yul can la yul med pa nyid du thal bar 'gyur ro zhes bya ba 'di ni 'dir gnod par byed pa'i tshad ma'o/ /gang yang / chos mi mthun pa rdul du 'dod/ /ces gang brjod pa de yang chos mi mthun pa'i dpe la bsgrub bya'i chos ldog pa med pa yin no zhes bstan pa'i phyir/ kho bo cag gis zhes bya ba la sogs pa smos te/ yan lag can rgyas par 'gegs par 'gyur ba'i phyir dang / bkag zin pas de'i phyir rdza mkhan la sogs pa rdul phra rab kho na'i byed pa po nyid du grub po/ /de'i phyir blo dang ldan pa sngon du 'gro ba can bsgrub bya'i chos chos mi mthun par bstan pa'i rdul phra rab dag las ldog pa med pa'i phyir bsgrub bya'i chos ldog pa med pa ni chos mi mthun pa'i dpe'i skyon yin no/ /'di snyam du gal te kho bo cag gis khyad par bsgrub byar 'dod pa yin na de'i tshe chos mthun pa'i dpe bsgrub bya dang bral ba sngar bstan par 'gyur/ ji tsam du spyir blo dang ldan pa sngon du 'gro ba tsam sgrub ste/ de grub pa na shugs kyis dbang phyug lus la sogs pa'i byed pa por 'grub po/ /bum pa la sogs pa bzhin du de dag gi byed pa po rdza mkhan la sogs pa ni ma yin te/ des ni spyir khyad par gyi mthar thug pa'i phyir dang / lus la sogs pa la yang byed pa po gzhan mi srid pa'i phyir shugs kyis khyad par bzung ba med par yang de dag gi byed pa por dbang phyug kho na yin par grub po snyam du sems na/ gal te spyir na blo ldan pa/ /zhes bya ba la sogs pa smos te/ de lta na ni grub pa la sgrub pa'i nyes pa yod do/ /de ci'i phyir zhe na/ ngo bo sna tshogs zhes bya ba la sogs pa smos te/ ngo bo sna tshogs ni sems can dang snod kyi 'jig rten sna tshogs pa'o/ /las las skyes zhes bya ba ni thun mong dang thun mong ma yin pa'i dge ba dang mi dge ba'i las las byung ba'o/ /de'i phyir dge ba dang mi dge ba'i las byed pa'i skyes bu blo dang ldan pa rnams 'di'i rgyu nyid du grub pas grub pa la sgrub pa'o/ /'o na khyad par bsgrub par bya'o snyam na/ rtag gcig blo can zhes bya ba la sogs pa smos te/ 'di sngar bstan zin na yang mjug bsdu ba'i don du yang mngon par brjod do/ /'di la blo gcig yod pas na blo gcig go/ / 'di ni rtag pa yang yin la blo gcig pa yang yin pas zhes tshig rnam par sbyar ba'am/ yang na 'di la rtag pa dang gcig pa'i blo yod ces bsdu bar bya'o/ /bsgrub byas stong pa nyid ces bya ba ni chos mthun pa'i dpe zhes bya ba'i lhag ma'o/ /'khrul pa yin zhes bya ba ni gtan tshigs zhes bya ba khong nas dbyung ngo / /ji ltar zhe na/ skar khung la sogs pa zhes bya ba la sogs pa smos te/ gang yang lus la sogs pa zhes bya ba la sogs pa gang smras pa de la sun dbyung 'di nyid ces bya ba la sogs pa smos te/ gzugs la sogs pa dang ldan pa'i phyir zhes bya ba la sogs pa'i sgrub par byed pa de dag la yang ji ltar rigs par sun 'byin pa 'di nyid brjod par bya'o/ /'di nyid ces bya ba ni ma grub pa nyid dang / 'brel pa med pa'i phyir 'khrul pa dang / 'brel pa yod na 'gal ba nyid dang / bsgrub bya ma tshang ba dang / spyir grub pa la sgrub pa la sogs pa'o/ /'di ltar gzugs la sogs pa dang ldan pa nyid sems dang ldan pas byin gyis brlabs pa ci 'dra ba de 'dra ba lus la sogs pa de la yang ma grub bo/ /gzugs la sogs pa dang ldan pa tsam dang 'brel ba ma grub pa'i phyir 'khrul pa yin no/ /'brel pa yod par khas len na 'dod pa las bzlog pa sgrub pa'i phyir 'gal ba yin la/ chos mthun pa'i dpe bsgrub bya dang bral ba yin te/ rtag pa dang gcig pu'i sems dang ldan pas byin gyis brlabs pa nyid kyis bsgrub bya'i chos rjes su 'gro ba ma grub pa'i phyir ro/ /spyir sgrub na grub pa la sgrub la/ khyad par ni 'khrul pa ste / bum pa la sogs pa la gzhan du mthong ba'i phyir zhes bya'o/ /de ltar gtan tshigs gzhan dag la yang sbyar bar bya'o/ /gang yang sdod nas 'jug pa'i phyir ro zhes bya ba'i sgrub par byed pa smras pa de la yang lhag pa'i sun 'byin pa ni / skad cig 'jig phyir zhes bya ba la sogs pa smos te/ dngos po thams cad skyes pa'i de ma thag tu 'jig pa nyid kyis skad cig tsam yang mi gnas pa'i phyir/ ga las sdod nas 'jug par 'gyur/ de lta bas na gtan tshigs phyir rgol ba la ma grub bo/ /dbang phyug de nyid kyis ma nges pa yang yin te/ gang gi phyir dbang phyug ni rim pa can gyi 'bras bu rnams la sdod nas 'jug pa yin mod kyi/ 'on kyang 'di sems dang ldan pas byin gyis brlabs pa ni ma yin te/ thug pa med pas thal bar 'gyur ba'i phyir ro/ /ci ste ji ltar blo gros bzang pos byas pa bzhin du sems pa med pa can zhes khyad par dang bcas pa gtan tshigs su byed pa de lta na yang mi mthun pa'i phyogs las ldog pa la the tshom za ba nyid kyis ma nges pa nyid mi zlogs pa kho na'o/ /gtan tshigs mi mthun pa'i phyogs las ldog par byed pa gang yin pa de nyid khyad par du rigs kyi/ mi mthun pa'i phyogs la the tshom zlog par mi byed pa gang yin pa khas blangs na yang med pa dang 'dra ba nyid yin no/ /khyad par dang bcas pa nyid yin na yang sngar bshad pa'i ma grub pa la sogs pa'i nyes pa'i gnas skabs so na 'dug pa yin no/ /gang yang / 'byin pa'i thog mar skyes bu yi/ /tha snyad ces bya ba la sogs pa de la/ 'jig pa'i tshe na skyes bu rnams/ / zhes bya ba la sogs pa smos te/ dus phyis rab tu byang ba rnams kyi zhes bya ba'i khyad par de ma grub po/ /'di ltar kho bo cag gi lugs kyis 'jig pa'i tshe na skyes bu rnams shes pa dang / dran pa 'jig pa dang / lus dang dbang po dang bral bar gnas pa ma yin te/ 'on kyang shes pa gsal ba khyad par du 'phags pa dang ldan pa'i 'od gsal la sogs pa'i lha'i ris de dag tu skye bar 'gyur ro/ /gang yang dmyal ba la sogs pa'i rnam par smin pa nges pa sgrub par byed pa'i las can de dag ni 'jig rten gyi khams gzhan dag tu skye bar 'gyur ro zhes 'dod la/ chags pa'i dus na yang 'od gsal la sogs pa de dag nyid nas shi 'phos nas/ 'dir shes pa dang dran pa mi 'jig pa nyid du 'byung ngo / /de lta bas na dus phyis rab tu byang ba rnams kyi zhes bya ba'i khyad par ma grub bo/ /gtan tshigs ma nges pa yin te/ mi mthun pa'i phyogs las ldog pa las the tshom za ba'i phyir ro/ /gzhan yang gzhan gyis nye bar bstan pa sngon du 'gro btsam sgrub na grub pa la sgrub ste/ thams cad kyi tha snyad thog ma med pa ni gzhan gyis nye bar bstan pa sngon du 'gro ba can nyid du 'dod pa'i phyir ro/ /'on te dbang phyug gi mtshan nyid kyi skyes bus nye bar bstan pa sngon du 'gro ba nyid du sgrub na/ de'i tshe gtan tshigs ma nges pa nyid yin te / gzhan du yang tha snyad srid pa'i phyir ro/ /dpe yang bsgrub par bya ba dang bral ba nyid yin no/ /skyon 'di yang spyir sngar bshad zin to/ /gtan tshigs 'gal ba dang dam bcas pa khas blangs pas gnod pa yin no zhes bstan pa'i phyir/ kha med pa yi ston pa po/ /zhes bya ba la sogs pa smos te/ gal te tha snyad dbang phyug gis bstan pa sngon du 'gro ba can srid pa yin na / de'i tshe gtan tshigs mi 'gal bar 'gyur na/ ji srid du 'di kha dang bral ba'i phyir ston pa por mi rigs la/ kha med pa de yang lus dang bral ba nyid kyis te/ lus dang bral ba'i phyir ro zhes bya ba'i don to/ /'di'i lus dang 'brel pa de yang ci ltar grub ce na/ chos dang chos min med phyir ro/ /zhes bya ba smos te/ lus kyi rgyu'i chos dang chos ma yin pa dang bral ba'i zhes bya ba'i don to/ /de skad du yang byed pas/ ji ltar dbang phyug gi blo la tshad ma yod pa de bzhin du chos dang chos ma yin pa la sogs pa'i rtag pa nyid la ni tshad ma yod pa ma yin no zhes bshad do/ /de lta bas na dbang phyug ston pa po mi srid pa'i phyir/ tha snyad de'i nye bar bstan pa sngon du 'gro ba can nyid du ma grub bo/ / 'on kyang dbang phyug las tha dad pa'i skyes bu gzhan gyis bstan pa sngon du 'gro ba can nyid yin no/ /de'i phyir 'dod pa la gnod par byed pa'i phyir gtan tshigs 'gal ba yin no/ /'on te dbang phyug ston pa po nyid du khas len par byed pa de'i tshe/ kha med pa nyid du khas blangs pa nyams pas khas blangs pa la gnod do/ /'byung ba che la sogs gsal ba/ /zhes bya ba la sogs pa'i sbyor ba la snga ma bzhin du gtan tshigs rnams ma nges pa yin te/ mi mthun pa'i phyogs la gnod par byed pa'i tshad ma med pa'i phyir ro/ /spyi sgrub na grub pa la sgrub pa nyid dang / khyad par dpe la bsgrub bya med pa zhes bya ba yang sbyar bar bya'o/ /de ltar dbang phyug sgrub par byed pa'i tshad ma rnams rgyas par bkag nas/ da ni khyab pa'i skyon brjod pa'i sgo nas de'i gnod par byed pa'i tshad ma rang gi phyogs bsgrub par bya ba'i don du bstan pa'i phyir/ sgrub byed kun la khyab pa ni/ / zhes bya ba la sogs pa smos te/ ji skad du bshad pa'i sgrub par byed pa thams cad la/ bsgrub par bya bas gtan tshigs la khyab pa gang yin pa de ni 'chad par 'gyur ba'i rjes su dpag pa dang 'gal lo/ /ci ste ci'i phyir dam bca' ba la rjes su dpag pa dang 'gal bar mi brjod ce na/ 'di snyam du sems te/ gal te dam bca' ba sgrub par byed pa'i yan lag yin na/ de'i tshe de'i nyes pa brjod par bya ba yod na/ ji srid du dngos sam brgyud pas 'di bsgrub bya 'grub pa'i yan lag tu 'gyur ba ma yin no/ /de lta yin dang sgrub par byed pa'i nyes pa brjod pa'i skabs su dam bca' ba'i skyon brjod pa gang yin pa de ni rgol ba tshar gcad pa'i gnas su 'gyur ro/ /de lta bas na sgrub par byed pa'i sbyor ba la dam bca' ba'i skyon brjod par mi bya'o/ /gang la 'ba' zhig tu dam bca' ba dang 'gal ba brjod pa de la de'i sgo nas khyab ba nyid la de sbyor bar byed do zhes gzung bar bya'o/ /yang na de sgrub par byed pa'i sbyor ba las gzhan du blta bar bya'o/ /ci ste khyab pa'i dus su yang ji ltar rjes su dpag pa dang 'gal ba brjod ce na/ 'gal ba'i chos kyis zhes bya ba la sogs pa smos te/ 'gal ba'i chos kyis zhes bya ba ni tshad mas gnod pas so/ /de tshad mas gnod pa de ni med pa yin pas med pa nyid kyi phyir khyab pa mi rigs te/ med pas khyab pa mi 'grub po zhes bya ba'i tha tshig go/ /gang gis khyab pa la gnod par 'gyur ba'i rjes su dpag pa de yang gang yin zhe na/ skye ba med phyir dbang phyug ni/ /zhes bya ba la sogs pa smos te/ gang skye ba med pa de ni 'ga' zhig gi yang rgyu ma yin te/ dper na nam mkha'i pad ma bzhin no/ /dbang phyug kyang skye ba med pa yin no zhes bya ba ni khyab par byed pa 'gal ba dmigs pa'o/ /'di ni thal bar 'gyur ba sgrub par byed pa yin te/ des na gzhi ma grub par brtsad par mi bya'o/ /gzhan du thams cad cig car 'byung / /zhes bya ba ni rgyu nus pa thogs pa med pa yin pa'i phyir/ dus gcig tu mngon par 'dod pa'i 'bras bu'i tshogs bzhin du thams cad cig car 'byung ngo zhes bya ba'i don to/ /'di la 'di gnod par byed pa'i tshad ma yin no/ /yang na 'di don brjod pa tsam yin no/ /thal bar 'gyur ba'i sgrub par byed pa 'di ltar bya ste/ gang zhig rgyu ma tshang ba med pa de ni 'byung ba kho na yin te/ dper na tha ma'i gnas skabs su phyin pa'i tshogs pa las rgyu ma tshang ba med pa'i myu gu 'byung ba lta bu'o/ /dbang phyug gi rgyu can gyi 'gro ba thams cad du rgyu ma tshang ba med pa yin pa'i phyir cig car 'byung bar 'gyur ro/ /'di snyam du dbang phyug 'ba' zhig rgyu ma yin gyi/ 'on kyang chos dang chos ma yin pa la sogs pa'i lhan cig byed pa'i rgyu gzhan la ltos nas byed de/ dbang phyug ni rgyu mtshan gyi rgyu nyid yin pa'i phyir ro/ /des na chos la sogs pa rgyu gzhan ma tshang bas rgyu ma tshang ba med pa nyid ma grub po snyam du sems na/ de ni yang dag pa ma yin te/ gal te de'i lhan cig byed pa rnams kyis phan gdags par bya ba 'ba' zhig yod na/ de'i tshe de lhan cig byed pa la ltos pa yin no/ /ji srid du rtag pa'i phyir gzhan gyis khyad par cung zad tsam yang byar med pa de ni lhan cig byed pa dag las thob par bya ba med pa'i phyir ci'i phyir de lta bur gyur pa'i phan pa mi byed pa de dag la ltos/ gzhan yang gang yang khyed kyi lhan cig byed pa de dag thams cad kyang dbang phyug la rag las te/ skye ba can nyid kyis rtag tu nye ba yin pa'i phyir ji ltar gtan tshigs ma grub pa yin / ma nges pa yang ma yin te/ rgyu ma tshang ba med pa nyid nyams par thal bar 'gyur ba'i phyir ro/ /rgyu ma tshang ba med pa yang mi skye na khyad par med pa'i phyir thams cad las mi skye bar thal bar 'gyur ba'i phyir ro/ /gsal byed pa na re/ dbang phyug ces bya ba rtag pa'i dngos po rnams rgyu ma tshang ba med pa rtag tu nye ba yin mod kyi/ 'on kyang cig car mi skyed de/ dbang phyug ni blo sngon du btang nas byed pa'i phyir ro / /gang gi phyir gal te dbang phyug yod pa tsam nyid kyis blo sngon du ma song bar yang dngos po rnams skyed par byed pa yin na de'i tshe klan ka der 'gyur ba yin na/ gang gi tshe blo sngon du btang ste byed pa de'i tshe skyon med de/ de ni rang gi 'dod pas 'bras bu rnams la 'jug pa'i phyir ro/ /de'i phyir gtan tshigs ma nges pa yin no zhes zer ro/ /'di yang mi rigs te/ gang gis dbang phyug ces bya ba rgyu nus pa thogs pa med pa rtag tu nye na yang de'i 'dod pa med pas 'jug par mi 'gyur ba 'bras bu rnams ni rgyu'i 'dod pa yod pa dang med pa la ltos nas 'jug pa dang ldog pa ni ma yin no/ /'o na ci zhe na/ dngos po rnams ni rgyu las yod pa'i nus pa yod pa dang med pa'i rjes su byed pa yin no/ /'di ltar byed pa po 'dod na yang mi nus pa mi skyed la/ mi 'dod na yang sa bon la sogs pa nus pas bskyed do/ /de la gal te dbang phyug ces bya ba'i rgyu 'bras bu skye ba'i dus bzhin du dngos po rnams kyi nus pa thogs pa med pa rtag tu gnas na de ci'i phyir/ gang gis skye ba'i dus bzhin du cig car skye bar mi 'gyur ba de'i phan pa mi byed pa'i 'dod pa de la ltos/ gal te cig car 'byung ba yin na de dag gis bdag nyid rgyu ma tshang ba med pa nyid du de ltar bstan pa yin na gang gis na 'dod pa la ltos par 'gyur ba gzhan gyis phan ma btags pa'i dbang phyug kyang ltos pa cung zad kyang med pa yin na/ gzhan yang blo las ma gtogs pa'i 'dod pa gzhan ni med la/ dbang phyug gi blo yang khyed kyis rtag pa gcig pur 'dod do/ /de lta yin dang dbang phyug blo sngon du gtong bar byed pa yin nam / yang ci'i phyir dngos po rnams cig car skye bar mi 'gyur te/ dbang phyug bzhin du de'i blo yang rtag tu nye ba'i phyir ro/ /gang gi tshe yang 'on te yang de'i blo mi rtag pa nyid du khas len par byed pa de'i tshe yang dbang phyug yod pas yod pa'i phyir te dbang phyug bzhin du rtag tu yod pa nyid yin no zhes bya ba'i nyes pa de nyid son 'dug pa yin no/ /de lta bas na blo dang ldan pa'i phyir zhes bya ba'i khyad par cung zad kyang mi byed pa kho na'i phyir gtan tshigs ma nges pa ma yin no/ /'gal ba nyid kyang ma yin te/ mthun pa'i phyogs la yod pa'i phyir ro/ /de ltar yod pa yang ma yin te/ de lta bas na bzlog pa'i sbyor ba ni/ gang zhig gang gi tshe mi 'gyur ba de ni de'i tshe rgyu ma tshang ba med pa ma yin te/ dper na sbyang na gnas pa'i sa bon gyi gnas skabs kyi skye bzhin pa ma yin pa'i myu gu lta bu'o/ /dngos po gcig skye pa'i dus na yang sna tshogs thams cad 'byung ba ma yin no zhes bya ba khyab par byed pa mi dmigs pa'o/ /sgrub pa la sgrub pa yang ma yin te/ dbang phyug rgyu yin na rgyu ma tshang ba mi 'thad par bsgrubs zin pa'i phyir ro/ /tshad ma gzhan yang / gang dag rim gyis 'byung ba yang / /zhes bya ba la sogs pa smos te/ rang rtsom par byed pa'i cha shas kyi dbyibs kyi khyad par dang ldan pa la sogs pa'i sgrub par byed pa ji skad du bshad pa dag las byung ba'i 'dod pa'i bsgrub bya'i chos kyi yul can blun po rnams de dbang phyug rgyur mngon par zhen pa rnams kyi yid ches pa ste/ nges pa bzhin no zhes bya ba'i don to/ /'on te ji skad du nyes pas sun dbyung ba'i phyir de dag las 'dod pa'i bsgrub par bya ba la yid ches pa mi skye ba'i phyir dpe'i chos can ma grub pa ma yin nam zhe na/ 'di ni bden te/ de nyid kyi phyir blun po yi/ /zhes bya ba smos te/ blun po rnams ni sgrub pa ltar snang ba 'byed par mi nus pa nyid kyis sgrub par byed pa ltar snang ba dag las kyang de dag yid ches skye ba nyid yin no/ /'on te de lta na yang dpe la bsgrub bya med pa yin te/ blun po'i yid ches pa de dag gi yang dbang phyug rgyu mtshan gyi rgyur 'dod pas de'i phyir/ de dag kyang zhes bya ba la sogs pa smos te/ de dag kyang zhes bya ba ni blun po'i yid ches pa'o/ / des byung zhes bya ba ni dbang phyug las byung bar 'dod na/ sgrub pa brjod pa don med de/ /sgrub byed rjod pa don med par 'gyur ro/ /dbang phyug kho na las de dag skye'o snyam du bsams pa'o/ /dbang phyug sgrub par byed pa brjod pa'i lhan cig byed pa la ltos nas de dag gi skyed par byed pa yin gyi/ 'ba' zhig pa ni ma yin te/ des na 'di 'bras bu med par mi 'gyur ba ma yin nam zhe na/ rtag phyir gsos 'debs med pa las / /zhes bya ba la sogs pa smos te/ gal te sgrub par byed pa brjod pa 'di dbang phyug 'di'i nus pa med pa'i rang bzhin bsal nas/ nus pa skyed pa de'i tshe lhan cig byed par 'gyur na/ ji srid du rtag pa'i phyir dbang phyug bskyed par bya ba ma yin zhing / bzlog par bya ba ma yin pa'i rang bzhin nyid kyis su zhig gis kyang gsos gdab par bya ba ma yin pas de 'di'i lhan cig byed par mi rigs so/ /gzhan yang ji ltar sgrub par byed pa'i rgyu nus pa yongs su mthong ba las ma gtogs par nus pa yongs su ma mthong ba'i rgyu nyid dbang phyug la yang rtog na khyed cag la ha cang thal bar 'gyur ba kho na ste/ gang gi phyir dbang phyug der yongs su rtog na dbyig pa la sogs pa yang brtag par bya ba nyid yin te/ khyad par med pa'i phyir ro zhes bstan pa'i phyir/ gang dag yod na zhes bya ba la sogs pa smos te/ 'byung gyur mthong bar zhes kha bskang ngo / /de'i rgyu gzhan nyid rtog ces bya ba ni ji ltar nus pa yongs su mthong ba'i rgyu dag las 'di'i rgyu gzhan yin pas rgyu gzhan te/ de'i dngos po ni rgyu gzhan nyid do/ / de rtog pa ni rtog pa zhes tshig rnam par sbyar ro/ /gang yang / kun gyi byed po nyid grub na/ /zhes bya ba la sogs pa smras pa de las byed pa po nyid ces bya ba la sogs pa smos te/ thams cad kyi byed pa po nyid yin pa'i stobs kyis 'di thams cad shes par khyed cag gis 'dod de/ des na de bkag pa'i phyir de'i thams cad shes pa yang 'bad pa med par mi dgos par bsal ba yin no/ /sgrub par byed pa rnams sun ma phyung bar khas blangs nas / skyon gzhan ji skad bshad pa'i nyes pa zhes bya ba la sogs pa smos te/ ji skad du bshad pa'i nyes pa ni/ rjes su dpag pa dang 'gal ba'i mthar thug pa rnams so/ /'di la bsdus pa'i don ni 'di yin te/ sgrub par byed pa de dag las lus dang ri la sogs pa rnams kyi byed pa po blo dang ldan pa yin par grub pa yin mod kyi/ 'on kyang 'di gcig gi rgyu gang yin pa de kho na gzhan gyi yang yin par ma nges pa nyid de/ 'bras bu so so la byed pa po yang tha dad pa srid pa'i phyir ro/ /skar khung la sogs pa gcig kyang rgyu mang pos byas par mthong bas/ de'i phyir byed pa po gcig ma grub po/ /ji srid du byed pa po gcig ma grub pa de srid du/ gang las thams cad shes par 'gyur/ 'di la blo gros bzang pos byed pa po gcig bsgrub pa'i phyir tshad ma byed de/ tshangs pa la sogs pa nas sha za'i bar ni gcig gis byin gyis brlabs pa yin te/ phan tshun khyad par du 'jug pa'i phyir ro/ /'di na gang dag phan tshun khyad par gyis 'jug pa de dag ni gcig la rag las par mthong ste/ dper na 'jig rten 'di'i grong dang / grong rdal dang / grong khyer dang / yul gyi bdag po rnams ni sa thams cad kyi mi'i bdag po gcig la rag las pa bzhin no/ /de bzhin du klu dang / srin po dang / gnod sbyin la sogs pa rnams kyang phan tshun khyad par gyis 'jug pa nyid de/ de dag kyang dbang phyug gcig gi gzhan gyi dbang yin no snyam du kho bo cag sems so/ /de 'dis gal te dbang phyug ces bya ba byin gyis rlob pa po gcig gis byin gyis brlabs pa zhes bya ba'i don 'di sgrub par 'dod pa de'i tshe gtan tshigs ma nges pa yin te/ bzlog pa la gnod par byed pa'i tshad ma med pas 'brel pa ma grub pa'i phyir ro/ /dpe yang bsgrub par bya ba dang bral ba nyid yin no/ /'on te byin gyis rlob pa po tsam gyis byin gyis brlabs pa yin no zhes sgrub na de'i tshe grub pa la sgrub pa yin te/ 'di ltar bcom ldan 'das yang dag par rdzogs pa'i sangs rgyas 'jig rten mtha' dag gi gtsug gi nor bus 'gro ba thams cad snying rje'i dbang gis byin gyis brlabs par kho bo cag 'dod pa kho na yin te/ gang gi stobs kyis de ltar yang dam pa dag mngon par mtho ba dang nges par legs pa'i phun sum tshogs pa sgrub par byed pa yin no/ /brjod pa'i sgrub byed gzhan 'di yang yin te/ srid pa bdun ni blo gcig gis sprul pa yin te/ dngos po gcig gi khongs su 'dus pa'i phyir/ khang pa gcig gi nang du gtogs pa'i khang mig bzhin te/ ji ltar khang pa gcig gi khongs su 'dus pa'i khang mig rnams thig mkhan gyi blo gcig gcig gis byas pa nyid du mthong ba de ltar srid pa bdun yang srid pa gcig gi khongs su 'dus pa yin te/ de'i phyir de dag kyang blo gcig gis byas par nges so/ /gang 'di dag blo gcig gis sgrub par byed pa de ni srid pa mtha' dag gi thig mkhan gcig pu ste/ legs ldan dbang phyug chen po yin no zhes bya'o/ /de'i phyir gtan tshigs ma grub pa yin te/ gnas dang khang pa dag ni dngos po gcig ma yin te/ tha snyad zor yang bar bya ba'i phyir mang po dag la ming 'di byas so/ /de nyid kyi phyir dpe yang sgrub par byed pa dang bral ba yin te/ khang pa gcig tu gtogs pa'i khang mig la sogs pa ni thig mkhan du mas byas par mthong ba'i phyir yang gtan tshigs ma nges pa yin no/ /de bzhin du sgrub par byed pa gzhan dag la yang ji ltar rigs pa sun 'byin pa brjod par bya'o/ /gang yang / mi mthun blo gzhi yi dngos po/ /zhes bya ba la sogs pa smos pa de la/ de bsgrub bya phyir sgrub smras pa/ /zhes bya ba la sogs pa smos te/ gal te spyir thams cad shes pa 'ga' zhig yod do zhes sgrub na de'i tshe kho bo cag la khyed kyis sgrub par byed pa 'di mdzes pa ma yin te/ grub pa la sgrub pa'i skyon yod pa'i phyir ro/ / 'on kyang gang dag thams cad mkhyen pa la skur pa 'debs pa'i rgyal dpog pa de dag la mdzes pa yin no/ /'on te dbang phyug tu brjod pa'i thams cad shes pa nyid sgrub na de ni mi rigs te/ 'brel pa ma grub pas gtan tshigs ma nges pa nyid yin no/ /dpe yang bsgrub par bya bas stong pa nyid yin no/ /de'i phyir kho bo cag la sgrub par byed pa 'di mdzes pa ma yin no snyam du bsams pa yin no/ /gang yang sna tshogs par 'byung ba/ /zhes bya ba la sogs pa chos can gyi khyad par bstan pa de gang du yang nye bar mi mkho ste/ khyed kyis gzhan mgo rmongs par bya ba'i phyir/ rang gi grub mtha' bsgrags pa 'di byas pa 'ba' zhig tu zad do/ /'di ltar rnam pa de lta bu'i chos can gyi khyad par med na yang / gal te sgrub par byed pa ma grub pa la sogs pa'i skyon dang bral ba de'i tshe mngon par 'dod pa'i bsgrub bya 'grub par 'gyur ba kho na'o/ /'on te sgrub par byed pa ma grub pa la sogs pa'i skyon gyis skyon can yin pa de'i tshe rnam pa de lta bu'i khyad par bzung na yang bsgrub bya mi 'grub pas/ rnam pa thams cad du khyad par don med do/ /gang yang mi mthun pa'i phyogs las gtan tshigs zlog par byed pa de nyid khyad par du rigs so/ /gzhan yang gtan tshigs gzhi ma grub ste/ ji skad du bshad pa'i khyad par gyis khyad par du byas pa'i chos can ni phyir rgol ba la ma grub pa yin no/ /de lta bas na bstan bcos la grags pa ni chos can du bya ba ma yin no/ /de kho na nyid bsdus pa'i dka' 'grel las dbang phyug brtag pa ste gnyis pa'o/ / //gnyi ga'i bya ba dang bral ba nyid du bstan pa'i phyir/ de ltar rang bzhin dbang phyug dag /ces bya ba la sogs pa smos te/ de la grangs can kha cig ni gtso bo 'ba' zhig las 'bras bu tha dad pa 'di dag 'jug pa ma yin te/ de ni sems pa med pa nyid kyi phyir ro/ /sems pa med pa ni byin gyis rlob pa po med pa rang gi 'bras bu rtsom par byed pa ma mthong la/ skyes bu byin gyis rlob pa por yang mi rigs te/ de'i tshe mi shes pa'i phyir ro/ /'di ltar blo nges pa'i don nyid skyes bus shes par byed de/ 'byin pa'i sngar blo 'di ni mi shes pa kho na ste/ nam yang don 'ga' yang shes pa ma yin no/ /don mi shes par yang 'ga' yang bya bar mi nus pas 'di byed pa po ma yin no/ /de lta bas na dbang phyug nyid gtso bo la ltos nas 'bras bu tha dad pa'i byed pa po yin gyi 'ba' zhig ni ma yin no/ /lha sbyin la sogs pa gcig pu skyed par byed pa ni ma yin la/ rdza mkhan 'ba' zhig kyang bum pa byed pa ma yin no zhes zer ro/ /rang bzhin dang dbang phyug dag so sor rgyu yin pa bkag pa'i phyir/ dbang phyug dang gtso bo zhes bya ba gnyi ga lhan cig pa 'di yang skye ba can te/ skye ba dang ldan pa'i byed pa ste/ skyed par byed pa zhes bya bar ma grub pa'o/ /'on te 'di dag so sor byed pa po nyid bkag mod kyi/ 'on kyang lhan cig pa ma bkag pa nyid de/ mig la sogs pa 'ba' zhig pa rnams ni mig gi rnam par shes pa skyed pa la nus pa med la/ lhan cig pa rnams mi 'gyur ba ni ma yin la zhes dogs pa la/ lhan cig de dag ces bya ba la sogs pa smos te/ lhan cig pa zhes bya ba ni lhan cig byed pa nyid do/ /de yang rnam pa gnyis te/ phan tshun khyab par byed pa'am/ don gcig byed pa yin grang / de la re zhig khyad par skyed par byed pa'i mtshan nyid kyi lhan cig byed pa nyid kyis brtag pa dang po ni rigs pa ma yin te/ ci'i phyir zhe na/ dbang phyug dang gtso bo de rtag pa nyid kyis 'gyur ba med pa'i phyir ro/ /rtog pa gnyis pa yang rigs pa ma yin te zhes skabs dang sbyar ro/ /ci'i phyir zhe na/ 'bras bu rnams cig car thal bar 'gyur ba'i phyir ro/ /nus pa thogs pa med cing ma tshang ba med pa'i dbang phyug dang gtso bo zhes bya ba'i rgyu rtag tu nye ba nyid kyis rgyu ma tshang ba med pa nyid kyi phyir ro/ /'dir yang snga ma bzhin du gang rgyu ma tshang ba med pa zhes bya ba la sogs pa'i thal ba'i sgrub par byed pa brjod par bya'o/ /ci ste brjod pa zhes bya ba la sogs pas gzhan gyi lugs kyis gang rgyu ma tshang ba med pa zhes bya ba'i gtan tshigs 'di ma grub pa nyid du rjod par byed do/ /rgyu gnyis po de dag rtag tu nye ba yin mod kyi/ 'on kyang rim gyis 'bras bu tha dad pa 'di dag la 'jug par 'gyur te/ 'di ltar dbang phyug gi lhan cig byed pa ni gtso bo la yod pa'i snying stobs la sogs pa'i yon tan gsum yin te/ de dag kyang rim gyis 'jug pa'i phyir de'i 'bras bu la yang rim gyis 'gyur ro/ /'di ltar gang gi tshe rdul shas cher 'phel ba dang ldan pa de'i tshe dbang phyug skye dgu rnams kyi 'byin pa'i rgyu yin te/ rdul ni 'byin pa'i rgyu yin pa'i phyir ro/ /gang gi tshe snying stobs shas cher 'phel ba la rten par byed pa'i tshe 'jig rten gnas pa'i rgyur 'gyur te/ snying stobs ni gnas pa'i rgyu yin pa'i phyir ro/ /gang gi tshe mun pa shas che ba'i nus pa dang ldan pa de'i tshe 'gro ba thams cad 'jig pa dang nyams par byed par 'gyur te/ mun pa ni 'jig pa'i rgyu yin pa'i phyir ro/ /ji skad du/ skye ba dang ldan rdul la rten / /snying stobs 'phel ba gnas pa yin/ /mun pa la reg skye dgu 'jig /skye med 'byin gnas 'jig pa'i rgyu/ /gsum gyi rang bzhin yon tan ni/ /gsum gyi bdag la phyag 'tshal lo/ /zhes smras pa lta bu'o/ /grag ces bya ba'i sgra ni mi srid pa'i don to/ /'dir bshad ces bya ba la sogs pas lan 'debs par byed do/ /de dag ces bya ba ni rang bzhin dang dbang phyug go/ /gcig byed tshe zhes bya ba ni 'byin pa dang / gnas pa dang / 'jig pa dag las gang yang rung ba gcig byed pa'i tshe de las gzhan pa'i 'bras bu gnyis skyed par byed pa'i nus pa ci yod dam/ 'on te med ces bya ba'i rnam par rtog pa gnyis so/ /de la gal te yod na de'i tshe 'byin pa'i tshe yang rgyu ma tshang ba med pa'i phyir gnas pa dang 'jig pa'i bdag nyid kyi 'bras bu gzhan gnyis kyang skye ba bzhin du 'gyur ro/ /de bzhin du gnas pa'i dus su yang skye ba dang 'jig pa thob par 'gyur la/ 'jig pa'i dus na yang skye ba dang gnas par 'gyur ro/ /de ltar yang rigs pa ma yin te/ phan tshun spangs te gnas pa dag ni chos can gcig la dus gcig tu srid par rigs pa yang ma yin no/ /'di snyam du 'bras bu gcig po de skye ba'i dus na rang bzhin dang dbang phyug de dag 'bras bu gzhan skye ba la ngo bo gzhan mi nye ste/ des na de'i tshe de dag tu thal bar mi 'gyur ro snyam du sems na/ de ni ngo bo gzhan zhig gis zhes bya ba la sogs pa smos te/ de ni zhes bya ba ni rang bzhin dang dbang phyug tu brjod pa'i rgyu'o/ /gzhan zhig gis zhes bya ba ni phyis kyi 'bras bu gnyis pa'o/ /gzhan zhig gi ngo bos ni ma yin te/ 'o na ci zhe na/ rang gi ngo bo kho nas rgyu yin no snyam du bsams pa yin no/ /'di snyam du gzhan gyi ngo bos byed pa ma yin mod kyi/ 'on kyang 'bras bu gcig skyed pa'i dus na 'bras bu lhag ma gnyis po skyed pa la 'di la nus pa med de/ des na de'i tshe 'bras bu gnyis po mi skyed do snyam du sems na/ de yi nus pa dang bral na/ /zhes bya ba la sogs pa smos te/ gzhan tshe zhes bya ba ni mngon par 'dod pa'i 'bras bu rtsom pa'i tshe'o/ /'di snyam du gtso bo las nus pa thams cad nye ba yin mod kyi/ 'on kyang gang kho na shas cher 'phel ba nyid rgyu yin par khong du chud par bya'i / gzhan ni ma yin no/ /des na 'bras bu rnams cig car 'byung bar mi 'gyur ro snyam na/ nus pa'i ngo bo shas cher yang / /zhes bya ba la sogs pa smos te/ snying stobs la sogs pa shas che ba'i ngo bos 'di ni re zhig rtag go zhes ni brjod par mi rigs te/ res 'ga' ba nyid yin pa'i phyir ro/ /de lta yin pas na dngos po 'di 'ga' zhig gi tshe rang bzhin dang dbang phyug tu brjod pa'i rgyu las sam/ rgyu gzhan las sam/ rang dga' ba yin zhes rnam par rtog pa gsum mo/ /de la phyogs dang po la ni shas che ba'i ngo bo de thams cad du 'gyur te/ rang bzhin dang dbang phyug ces bya ba'i rgyu ni rtag pa'i ngo bo nyid kyis rtag tu nye ba nyid kyi phyir ro/ /phyogs gnyis pa la yang / gzhan gyis gzhan dag mi 'dod pa/ /zhes bya ba la sogs pa smos te/ gang gis de gzhan las 'byung ba'i ngo bor 'gyur ba rang bzhin dang dbang phyug las ma gtogs pa'i rgyu gzhan 'dod pa ni ma yin no/ /phyogs gsum pa yang rigs pa ma yin no zhes bshad pa/ res 'ga' nyid ni srid pa'i phyir/ /zhes bya ba la sogs pa'o/ /ci ste rang dga' ba yin mod/ res 'ga' ba nyid ni ci 'gal zhe na/ rang las yin na zhes bya ba la sogs pa smos te/ rang las te rang bzhin las skye ba yin na rgyu med pa can nyid du nges par 'gyur ro/ /'on te rang bzhin las skye na ji ltar rgyu med par 'gyur/ ji srid du rang bzhin kho na nyid de'i rgyu yin par rtogs pa ma yin nam zhe na/ rang la byed pa 'gal ba'i phyir ro zhes bya ba smos te/ rang rang gi ngo bo la byed pa rgyu'i ngo bor 'gal ba'i phyir ro/ /'di snyam du rgyu med pa nyid yin la rag mod/ de lta na yang ci'i phyir res 'ga' bar mi rigs snyam du sems na/ dngos po rnams ni ltos pa yin / /zhes bya ba la sogs pa smos te/ dngos po rnams rang bzhin gzhan la rag las nas 'jug pa ni res 'ga' zhig rigs te/ de dag gi yod pa dang med pa dag ni gzhan yod pa dang med pa dang 'brel pa'i phyir ro/ /gang gi phyir gang dag gzhan la rag ma las par 'jug pa de dag ni ltos par bya ba 'ga' zhig kyang med pa'i phyir/ ci ste res 'ga' bar 'gyur/ 'on te yang rang la byed pa 'gal ba nyid ji ltar 'grub ce na/ 'di ltar zhes bya ba la sogs pa smos te/ dngos po bdag nyid skye ba yin na/ grub pa zhig gam/ ma grub pa zhig skye grang / re zhig grub pa ni ma yin te/ de'i gnas skabs na yang bdag nyid kyang grub pa'i ngo bo las/ tha mi dad pa nyid kyis rang gi ngo bo bzhin du rab tu grub pa'i phyir te yongs su grub pa'i phyir ro/ /de lta yin dang bskyed par bya ba med pa'i phyir dngos po 'di gang du byed par 'gyur/ ma grub pa yang ma yin no zhes ston pa ni/ bdag gi de nyid ma grub na/ /zhes bya ba la sogs pa la 'ga' zhig ces bya ba ni spyi'i tshig ste/ rang gi bdag nyid du gyur pa ma yin la/ gzhan gyi bdag nyid du gyur pa yang ma yin zhes bya ba'i don to/ /bya ba yod na grub pa'i bdag nyid kyi de kho na nyid du 'gyur te/ grub pa'i mtshan nyid ni de tsam yin pa'i phyir ro snyam du bsams pa yin no/ /de kho na nyid bsdus pa'i dka' 'grel las gnyi ga brtag pa ste gsum pa'o// //sogs pa'i sgras 'phangs pa rang bzhin smra ba'i rtsod pa ni brjod par bya ba nyung ba nyid kyis go rims la ma brten par sel bar byed pa ni rang bzhin smra ba zhes bya ba la sogs pa smos te/ rang bzhin smra ba ni sogs pa'i sgras dngos su ma 'phangs mod kyi/ 'on kyang rang bzhin rgyur smra ba'i lugs blangs nas bstan pa kho na'o/ /de la gang dag dngos po rnams rang nyid las skye ba yin no zhes smra ba de dag rang las byed par 'gal ba'i phyir ro zhes bya ba la sogs pa bkag nas da ni rang bzhin smra ba 'gegs so/ /de dag ni 'di skad du smra ste dngos po rnams rang las skye ba ma yin zhing gzhan las kyang ma yin no/ /'o na ci zhe na/ rgyu rnams kun la mi ltos par rang dang gzhan gyi rgyu la ltos pa med par zhes bya ba'i don to/ /'on te gang dag dngos po rnams rang nyid las skye ba yin no zhes smra ba de dag las 'di dag khyad par ci yod ce na/ de dag rang yang zhes bya ba la sogs pa smos te/ de dag ni rang bzhin du smra ba dag go/ /rang yang zhes bya ba ni rang gi ngo bo'o/ /yang gi sgras ni gzhan gyi ngo bo yang ngo / /snga ma ni rang bzhin rgyur 'dod la/ 'di ni de yang mi 'dod do/ /zhes bya ba ni khyad par ro/ /'di la rigs pa brjod pa gang zhig yod par mi dmigs pa de ni rtog pa dang ldan pa rnams kyi med pa'i tha snyad kyi yul yin te/ dper na ri bong gi rwa bzhin no/ /dngos po rnams kyi rgyu yang yod par mi dmigs so zhes bya ba ni rang bzhin gtan tshigs mi dmigs pa'o/ /gtan tshigs 'di ma grub pa yang ma yin no zhes bstan pa'i phyir/ 'dam skyes sogs kyi zhes bya ba la sogs pa smos te/ 'dam skyes ni pad+ma'o/ /de'i ge sar la sogs pa zhes tshig rnam par sbyar ro/ /sogs pa smos pas mgul pa dang / 'dab ma dang / ze 'bru la sogs pa dang / tsher ma'i rno ba la sogs pa gzung ngo / /sna tshogs zhes bya ba ni kha dog dang / dbyibs dang / rtsub pa la sogs pa'i bye brag go/ /gang gis byed ces bya ba ni sus kyang ma yin te/ dbang phyug la sogs pa'i rgyu mi dmigs pa'i phyir ro snyam du bsams pa'o/ /'di snyam du phyi rol gyi dngos po rnams kyi rgyu mi dmigs pa'i phyir rgyu med pa can du grub mod kyi/ sdug bsngal ba la sogs pa nang gi bdag nyid ci ltar grub snyam du sems na/ dper na tsher ma zhes bya ba la sogs pa smos te/ gal te mngon sum gyis sdug bsngal la sogs pa rgyu med pa can du ma grub pa yin mod kyi/ 'on kyang rjes su dpag pas grub pa kho na ste/ 'di ltar gang zhig res 'ga' ba de ni rgyu med par nges te/ dper na tsher ma rno ba la sogs pa lta bu'o/ /sdug bsngal la sogs pa yang res 'ga' ba yin no zhes bya ba ni rang bzhin gyi gtan tshigs so/ /gang zhig yod pa dang med pa na nges par 'ga' zhig yod pa dang med par 'gyur ba de ni de'i rgyu yin no zhes bya ba yang rigs pa ma yin te/ 'khrul pa'i phyir ro/ /'di ltar reg pa yod na mig gi rnam par shes pa 'byung la med na mi 'byung ba yin na yang 'di mig gi rnam par shes pa'i rgyu ma yin no/ /de lta bas na rgyu dang 'bras bu'i dngos po'i mtshan nyid 'di ni 'khrul pa yin pas de'i phyir/ rgyu rnams kun la mi ltos par/ /dngos po skye ba zhes bya bar grub bo zhe na/ 'dam skyes ge sar zhes bya ba la sogs pas lan 'debs par byed do/ /'di ni gtan tshigs ma grub pa dang / dam bca' ba'i don mngon sum dang 'gal bar ston te / pad ma'i ge sar la sogs pa'i rgyu mi dmigs so zhes gang smras pa de ni ma grub ste/ mngon sum dang mi dmigs pa dag gis sa bon dang / 'dam dang chu la sogs pa rjes su 'gro ba dang ldog pa dang ldan pas rgyu nyid du nges pa'i phyir ro/ /'di ltar gang zhig yod pa kho na gang zhig skye la/ gang zhig 'gyur bas gang 'gyur ba de ni de'i rgyu nyid du brjod do/ /de yang de lta bur gyur pa 'dam skyes kyi ge sar la sogs pa'i sa bon la sogs pa bong ba la sogs pa'i gnas skabs kyi khyad par thob pa la rjes su 'gro ba dang ldog pa dang ldan pa ste/ yod pa dang med pa dang ldan par mngon sum du mi dmigs pa dag gis nges pa'i phyir gtan tshigs ma grub po/ /gang yang rgyu dang 'bras bu'i mtshan nyid 'khrul lo zhes smras pa de yang ma grub ste/ reg pa yang gzugs kyi rgyu nyid kyis mig gi rnam par shes pa la yang rgyu mtshan gyi dngos por 'dod pa'i phyir ro/ /'di ltar reg pa ni 'byung ba dag la brjod la/ de dag la yang brten nas gzugs la 'jug go/ /de'i phyir mig gi rnam par shes pa la reg pa'i rgyu mtshan gyi dngos po yod pa nyid de/ dngos dang brgyud pas byas pa'i khyad par 'ba' zhig tu zad do/ /kho bo cag gis ni ldog pa tsam rgyu dang 'bras bu'i dngos po nges pa'i rgyu nyid du khas ma blangs so/ /'o na ci zhe na/ khyad par can nyid do/ /'di ltar nus pa'i rgyu gzhan gang dag yod na yod la/ gang zhig med pas gang mi 'byung ba de ni de'i rgyu yin no zhes smra'i/ gang zhig med par gang mi 'byung ba zhes bya ba'i ldog pa tsam ni ma yin no/ /de lta ma yin nam bag mar len par 'os pa'i yul du skye ba'i 'bra go / /ma bag mar len pa med na med pa'i phyir 'khrul par 'gyur ro/ /de lta bur gyur pa'i ldog pa la reg pas 'khrul pa med do/ /'di ltar gal te gzugs la sogs pa nye bar bstan nas/ reg pa gcig pu med pa'i phyir mig gi rnam par shes pa mi 'byung ngo zhes de ltar bstan na de'i tshe 'khrul par 'gyur na/ 'di yang bstan par mi nus te/ de'i phyir rgyu dang 'bras bu'i mtshan nyid kyi dngos po la 'khrul pa yod pa ma yin no/ /sa bon la sogs pa dngos po rnams kyi rgyu nyid du nges pa 'ba' zhig tu ma zad kyi/ so sor nges pa'i yul dang dus kyang nges pa yin no zhes ston pa ni/ yul dang dus kyi nges pa la 'ang / /zhes bya ba la sogs pa la/ gal te pad ma la sogs pa de'i rgyu nyid so sor nges pa'i yul dang dus rgyu nyid du mi 'gyur na ni/ de'i tshe gang 'di rdo la sogs pa'i yul spangs nas chu la sogs pa so sor nges pa'i yul la 'jug pa dang / gang dgun la sogs pa'i dus yongs su spangs nas sog la sogs pa'i dus su 'jug pa der mi 'gyur gyi/ 'on kyang yul thams cad dang dus thams cad du pad ma la sogs pa'i dngos po de dag 'byung bar 'gyur te/ de ni ltos pa med pa yin pa'i phyir ro/ /de lta bas na gang zhig de las gzhan pa'i yul dang dus yongs su spangs nas so sor nges pa'i yul la sogs par nges par 'jug pa de ni ltos pa dang bcas pa yin no zhes bya bar nges so/ /bsam pa med pa'i dngos po 'di dag ci la ltos [(]shen[,]she na[)]/ de ltos de ltar 'jug pa yin/ /zhes bya ba smos te/ de bzhin du de las gzhan pa'i yul la sogs pa spangs nas yul la sogs pa nges pa la 'jug pa gang yin 'di nyid ltos pa zhes bya ba'i bsam pa'i bdag nyid can ni ma yin no/ /'di snyam du de la ltos nas 'jug pa de de ltar grub mod kyi/ 'on kyang de'i 'bras bu nyid du ji ltar nges snyam du sems na/ ltos pa 'bras bu nyid du brjod/ /ces bya ba smos te/ de'i 'bras bu nyid gzhan ni med do/ /'o na ci zhe na/ de'i phyir rang bzhin smra ba'am/ de dag la rang bzhin smra ba'am/ de rang bzhin smra ba zhes bsdu ba'o / /gang 'di de ltar 'jug pa'i mtshan nyid kyi ltos pa de nyid de'i 'bras bu zhes bya'o/ /'di dag gi lta ba gnas pa de yang ji ltar grub ce na/ de ltar 'jug pa'ang mngon sum yin/ /zhes bya ba la sogs pa smos so/ /de'i phyir zhas bya ba ni de lta bas na'am/ de dag la ste/ pad ma la sogs pa la rang bzhin du smra ba dag ces bsdu'o/ /mngon sum gyis ni rab gnod 'gyur/ /zhes bya ba ni mi dmigs pa yang gzhan dmigs pa'i bdag nyid yin pas mngon sum gyi bdag nyid yin pa'i phyir ro/ /gang yang bde ba la sogs pa rnams rgyu med pa can du bsgrub pa'i phyir/ res 'ga' ba la sogs pa'i sgrub byed brjod pa de ni bsgrub bya las bzlog pa sgrub par byed pa'i phyir 'gal ba yin te/ ltos pa med pa'i phyir rgyu med pa ni res 'ga' ba nyid du mi 'thad pa'i phyir ro/ /dpe yang bsgrub par bya ba ma tshang ba yin no snyam du bsams pa'o/ /de ltar re zhig dam bcas pa'i don mngon sum dang 'gal ba dang / gtan tshigs ma grub pa nyid du bstan nas/ da ni gtan tshigs grub par khas blangs nas ma nges pa nyid du bstan pa'i phyir/ rgyu yod par ni grub pa la/ /zhes bya ba la sogs pa smos te/ gal te mi dmigs pa tsam gtan tshigs nyid du khas len pa de'i tshe ma nges pa yin no/ /'di ltar tshad ma med pa ste/ tshad ma med pa tsam gyi gtan tshigs kyis don med pa ste mi bdog par nges pa ma yin no/ /ci'i phyir ma yin zhe na/ gang phyir zhes bya ba la sogs pa smos te/ khyad par byed pa'i rang bzhin dang rgyu ldog na rang gi khyab par bya ba dang 'bras bu ldog par byed de/ de la de'i bdag nyid dang de las byung ba dag gis khyab par bya ba dang 'bras bu dag 'brel pa'i phyir ro/ /tshad ma ni don yod pa'i khyab par byed pa yang ma yin no/ /ci'i phyir zhe na/ tha dad pa ni yod pa'i phyir tha mi dad pa kho na khyab par byed pa yin te/ dper na shing sha pa'i shing lta bu'o/ /tha dad pa ni rgyu nyid kyi khongs su 'dus pa'i phyir ro/ /tshad ma dang don yod pa gnyis tha mi dad pa yang ma yin te/ snang ba tha dad pa'i phyir ro/ /tshad ma don gyi rgyu yang ma yin te/ 'khrul pa'i phyir ro/ /'di ltar yul dang / dus dang / rang bzhin gyis bskal pa'i don rnams tshad mas yul du ma byas na yang yod par mi 'gal ba nyid do/ /gang med par yang gang byung ba de ni de'i rgyur rigs pa yang ma yin te/ ha cang thal bar 'gyur ba'i phyir ro/ /rgyu nyid du khas len na yang rang gi phyogs btang ba yin no/ /de las byung ba'i phyir yang tshad ma ni don de yod pa'i rgyu ma yin no/ /'di ltar yul du gyur pa'i don nyid las tshad ma byung gi / tshad ma las gzhal bar bya ba'i don ni ma yin no/ /ci ste yang 'brel pa med par yang tshad ma don yod pa ldog par khyad par 'gyur ro zhe na/ gang dngos de lta'i rnam pa min/ /zhes bya ba la sogs pa smos te/ de lta'i rnam pa min zhes bya ba ni rgyu yang ma yin khyab par byed pa yang ma yin pa'o/ /'brel pa med pa'i chos log pas ni nges par gzhan log par rigs pa ma yin te/ ha cang thal bar 'gyur ba'i phyir ro/ /de lta na ni rta log pa na ba lang yang ldog par 'gyur ro/ /gzhan yang mi dmigs pa gtan tshigs nyid du khas len pa na skyes bu thams cad kyi dmigs pa log pa'i mtshan nyid len nam/ rang gi dmigs pa log pa'i mtshan nyid len grang / re zhig dang po ni ma yin te/ de ni tshu rol mthong bas nges par mi nus pa nyid kyis the tshom za ba'i phyir ro/ /gang gi phyir skyes bu thams cad kyis rma bya'i mdongs la sogs pa'i rgyu ma mthong ba'i mi dmigs pa zhes bya ba 'di la tshu rol mthong ba rnams kyi tshad ma cung zad kyang yod pa ma yin no/ /gang yang rung gis ma mthong ba ste/ the tshom 'khrul pa yin no/ /ci'i phyir zhe na/ ri'i phug la sogs pa'i nang na yod pa'i dUr ba dang / rtswa dang / rdo'i dum bu la sogs pa mi dmigs kyang yod pa'i phyir te/ yod pa mi 'gal ba'i phyir ro zhes bya ba'i don to / /yod pa nyid du nges pa ma yin te the tshom za ba'i phyir ro/ /gzhan yang 'di ltar khyed la brgal zhing brtag par bya ste/ ci dngos po rnams rgyu med pa zhes bya ba'i rang gi phyogs 'di grub par bya ba'i phyir / khyed gtan tshigs 'ga' zhig len nam/ 'on te ma yin / de la gal te mi len pa de'i tshe khyod kyi phyogs mi 'grub ste/ tshad ma med par don grub pa yod pa yin pa'i phyir ro/ /ci ste len pa de lta na yang khyed kyi phyogs mi 'grub po zhes 'chad par 'gyur ba dang 'brel to/ / ci'i phyir zhe na/ grub pa de rgyus skyed nyid phyir/ /zhes bya ba ni gzhal bya'i yul gyi don grub pa ste/ nges pa ni rgyu des bskyed par bya ba yin pa'i phyir ro/ /de skad du yang slob dpon dpa' bo'i zhal snga nas kyis/ rgyu dang bcas par smra ba rgyu med ces/ /dam bca' rang nyid kyis gnod ma yin nam/ /ci ste'ang gtan tshigs sgrub la snyom las na/ /dam bca' gcig pus 'di la ci zhig 'gyur/ /zhes bshad do/ /'di snyam du bdag gis shes par byed pa'i rgyur sbyar gyi/ byed pa po ni ma yin no/ /des na ci'i phyir bdag gi phyogs sgrub par mi 'gyur snyam du sems na/ 'di ltar zhes bya ba la sogs pa smos te/ shes byed gtan tshigs zhes bya ba ni rang gi don gyi rjes su dpag pa'i dus na tshul gsum pa'i rtags so/ /tshig ces bya ba ni gzhan gyi don gyi rjes su dpag pa'i tshe'o/ /de rab gsal byed ces bya ba ni gtan tshigs de gsal bar byed pa'o/ /grub pa'i zhes bya ba ni gzhal bar bya ba'i don nges pa'o/ /de lta ma yin na gal te grub pa'i rgyu mtshan gyi dngos por ma grub pa de'i tshe ji ltar de'i shes par byed par 'gyur/ /de lta na ni thams cad thams cad kyi shes par byed par 'gyur ro/ /gal te de lta na ji ltar slob dpon gyis byed pa po las shes par byed par mdzad de/ 'dir yang shes pa'i dbang gis don bstan gyi/ skyed par byed pa bzhin du yang dag pa'i don gyis ni ma yin no zhe na/ bsgrub bya skyed par mi byed phyir/ /zhes bya ba la sogs pa smos te bsgrub bya'i don skyed par mi byed pa'i phyir 'di shes par byed pa zhes bya ba'i byed pa po ni ma yin no/ /gang yang myu gu la sogs pa'i bsgrub par bya ba skyed bar byed pa de ni byed pa por brjod do zhes bya ba la skyon med do/ /'di thams cad kyis ni slob dpon dpa' bos bshad pa'i skyon gyi thog tu rtsod pa phab pa gang yin pa de'i lan btab pa yin no/ /'di ltar de la rtsod pa ni 'di yin te/ rgyu med do zhes rgyu dang bcas par smra ba la yang ci'i phyir dam bca' ba la gnod par byed/ de ni shes par byed pa'i rgyu smra zhing byed pa po ni spong ngo / /de'i phyir 'dir lan ni shes par byed pa yang byed pa nyid yin te shes pa'i rgyu yin pa'i phyir ro/ / 'dis ni rang gi tshig dang 'gal bar bstan to/ /rgyu med pa nyid la ni sgrub par byed pa'i gtan tshigs 'ga' yang yod pa ma yin te/ khyab pa la mngon sum la sogs pas gnod pa'i phyir ro/ /de'i phyir zhes bya ba la sogs pas mjug bsdu ba'i thabs kyis dam bcas pa'i don rjes su dpag pas gnod par ston par byed do/ /gzhan dag kyang zhes bya ba ni pad ma'i ge sar la sogs pa bsgrub par bya ba'i don gyi yul can gyi shes pa las ma gtogs pa rnams so/ /skye bar nges phyir ro zhes bya ba ni nges pa'i dngos po nye ba na zhes bya ba lhag ma'o/ /sbyor ba ni gang zhig so sor nges pa'i dngos po nye ba na skye bar nges pa de dag ni rgyu dang bcas pa yin te/ dper na khyed cag gis sgrub par byed pa nye ba na 'byung ba'i bsgrub bya'i don gyi yul can gyi shes pa lta bu'o/ /pad ma la sogs pa'i dngos po yang de bzhin no zhes bya ba ni rang bzhin gyi gtan tshigs so/ /de kho na nyid bsdus pa'i dka' 'grel las 'gro ba rang bzhin du smra ba brtag pa ste bzhi pa'o/ / //skye 'jig dag dang mi ldan pa'i/ /zhes bya ba la sogs pas sgra'i tshangs par smra ba'i gzhung bkod nas sun 'byin par byed do/ /de la sgra'i tshangs par smra ba rnams na re/ shar dang nub la sogs pa'i phyogs kyi cha dang bral ba / skye ba med pa/ 'jig pa med pa/ sgra'i rang bzhin gyi tshangs pa gang yin pa de'i yongs su 'gyur ba ni gzugs la sogs pa'i dngos po'i tshogs 'di yin no zhes nges par bya'o/ /ji skad du/ thog mtha' med pa'i tshangs pa ni/ /sgra yi de nyid yi ge gang / /gang las 'gro ba'i tha snyad 'byung / / don gyi dngos por yongs gyur pa/ /zhes bshad de/ de la thog ma ni skye ba'o/ /tha ma ni 'jig pa'o/ /de dag med pa'i phyir thog ma dang mtha' med pa'o/ /yi ge zhes bya ba ni a la sogs pa'i rgyu mtshan yin pa'i phyir ro/ /'dis ni rjod par byed pa'i ngo bos yongs su 'gyur ba bstan to/ /don gyi dngos por zhes bya ba la sogs pas kyang brjod par bya ba'i 'gyur ba bstan to/ /tha snyad ces bya ba ni khyad par ro/ / tshangs pa ni zhes bya ba ni ming yang dag par bsgrags pa'o/ /tshigs su bcad pa 'di nyid kyi don ston pa ni/ skye 'jig dag dang mi ldan pa'i/ / zhes bya ba la skye 'jig smos pa ni nye bar mtshon pa ste/ shar dang nub la sogs pa'i phyogs cha dang bral ba zhes bya ba 'di yang 'di ltar rtogs par bya ste/ thog ma dang tha ma nyid kyi cha med cing / shar dang nub kyi phyogs cha dang bral ba yang der bstan to/ /tshangs pa'i sgra'i rang bzhin ni sgra'i rang gi ngo bo de nyid kyi phyir 'di ni sgra'i de kho na nyid yin pas de ni sgra'i de kho na nyid ces bya'o/ /'di ni sgra'i phyin ci ma log pa'i ngo bo zhes bya ba'i don to/ /mchog ni zhes bya ba ni oM gyi bdag nyid de/ oM ni sgra thams cad dang don thams cad kyi rang bzhin yin par grags pas de yang rig byed yin te/ 'di ni yi ge dang tshig gi rim pa'i ngo bos gnas pa'i rig byed de rtogs pa'i thabs yin te/ de'i gzugs brnyan gyi tshul du gnas so/ /tshangs pa mchog gi bdag nyid de ni mngon par mtho ba dang nges par legs pa'i 'bras bu'i chos rjes su 'dzin pa'i nang gi byed pas mthong ba yin no zhes zer ro/ /'dir yang tshad ma byed de/ gang zhig gang gi rnam pa dang ldan pa de dag ni de'i rang bzhin yin te/ dper na bum pa dang kham phor dang blug ma la sogs pa 'ji ba'i rnam par 'gyur ba 'ji ba'i rnam pa'i rjes su byed pa dang / 'ji ba'i rang bzhin nyid du grags pa lta bu'o/ /dngos po thams cad kyang sgra'i rnam pa dang ldan pa yin no zhes bya ba ni rang bzhin gyi gtan tshigs so/ /gtan tshigs ma grub pa yang ma yin te/ gang gi phyir don thams cad sgra'i rjes su byed par mngon sum nyid kyis grub ste/ 'di ltar shes pa thams cad don la skye ba na sgra'i rnam pa dang ldan pa kho nar skye ste/ ji skad du/ sgra yi rjes 'jug ma gtogs gang / /shes de 'jig rten na yod min/ /shes pa thams cad sgra dang ni/ /ldan pa bzhin du gnas pa yin/ /zhes bshad pa lta bu'o/ /dngos po rnams kyi rang bzhin du gdags pa'i rgyu mtshan yang shes pa'i rnam pa yin no/ /de'i phyir 'di dag sgra'i rnam pa dang ldan pa nyid grub po/ /de grub pa na de'i rang bzhin yin pa nyid kyang grub pa kho na ste/ de'i rang bzhin nyid ni de tsam gyi ngo bo yin pa'i phyir ro zhes bya'o/ /de la brjod bya zhes bya ba la sogs pas re zhig dam bcas pa'i don sun 'byin par byed do/ /'dis 'gro ba sgra'i rang bzhin du bsgrub par 'dod pa/ res 'ga' sgra yongs su gyur pa'i ngo bo nyid yin pa'i phyir ram/ res 'ga' sgra las skyes pa'i phyir yin te/ dper na srog chags rnams ni zas las byung ba yin no zhes bya ba dang / rgyu'i don la rgyu ma yin pa brjod pa'i phyir dang / rgyu las byung ba'i rkyen du brjod pa'i phyir ro/ /de la re zhig phyogs dang po ni ma yin te/ yongs su 'gyur ba nyid mi 'thad pa'i phyir ro/ /'di ltar sgra'i bdag nyid kyi tshangs pa sngon po la sogs pa'i ngo bor 'gyur ba na res 'ga' rang nyid kyi sde rang gi ngo bo yongs su btang nas 'gyur ba'am/ ma btang nas 'gyur ba yin grang / de la gal te btang nas zhes bya ba'i dang po'i phyogs la brten pa de'i tshe/ thog mtha' med pa zhes bya ba'i tshig 'dis 'gyur ba med pa nyid mi 'jig pa nyid du khas blangs pa gang yin pa de nyams par 'gyur te/ sngon gyi rang bzhin zhig pa'i phyir ro/ /ci ste yongs su ma btang nas zhes bya ba de ma thag pa'i phyogs yin pa de'i tshe sngon po la sogs pa rig par byed pa'i dus na yang ma thos pas kyang sgra rig par 'gyur te/ sngon po la sogs pa'i rig pa bzhin du de las tha mi dad pa'i phyir ro/ /sbyor ba ni gang zhig gang las tha mi dad pa de ni de rig pa na rig pa yin te/ dper na sngon po la sogs pa rig pa'i gnas skabs na sngon po la sogs pa de'i bdag nyid bzhin no/ /sgra'i bdag nyid kyang sngon po la sogs pa las tha mi dad do zhes bya ba ni rang bzhin gyi gtan tshigs so/ /de lta ma yin na grub pa dang bde ba tha dad pa'i phyir / de'i rang bzhin nyid mi 'grub po zhes bya ba 'di ni 'dir gnod par byed pa'i tshad ma'o/ /'di nyid rgyas par bstan pa'i phyir gang gis thams cad ces bya ba la sogs pa smos pa la/ gang gis te/ gang gi phyir khyed cag gis dngos kho nar 'gro ba sgra'i rang bzhin no zhes rjod par byed do / ci'i phyir zhe na/ sgra yi ngo bos ma btang bar/ /zhes bya ba smos so/ /gal te dngos su sgra'i rang bzhin du gnas pa yin na de las cir 'gyur zhe na/ de ltar sngon po zhes bya ba la sogs pa smos te/ sngon po la sogs pa gcig nyid ces bya ba la/ sgra dang lhan cig ces bya ba lhag ma'o/ /de rig pa'i dus su ni zhes bya ba ni sngon po la sogs pa de dag rig pa'i gnas skabs na'o/ /ji ltar 'di rig yod ma yin/ /zhes bya ba ni de yang sngon po la sogs pa'i rang bzhin du dmigs pa'i mtshan nyid du gyur pa'i phyir te/ rig pa nyid du rigs so snyam du bsams pa'o/ /ci ste 'di rig pa nyid du mi 'dod pa de'i tshe sgra'i rang bzhin bzhin du sngon po la sogs pa yang mi rigs par thal bar 'gyur te/ gcig gi bdag nyid yin pa'i phyir ro/ /sngon po la sogs pa rnams ni sgra dang lhan cig gi rang bzhin nyid yin pa'i phyir zhes bya ba'i don to/ /de lta ma yin na sngon po la sogs pa rnams sgra dang lhan cig chos tha dad par khas len na shin tu tha dad par khas blang bar bya dgos so/ /ci'i phyir zhe na/ 'gal ba'i chos dang zhes bya ba la sogs pa smos te/ gcig dus gcig tu rtog pa po gcig la ltos nas 'dzin pa dang mi 'dzin pa ni mi rigs te gcig nyams par thal ba'i phyir ro/ /de lta ma yin na gal te 'gal ba'i chos dang ldan pa yang gcig nyid du 'gyur ba de'i tshe bum pa la sogs pa'i gsal ba tha dad pa brtag par 'dod pa'i gsal ba tha dad pa gang yin pa der yang mi 'gyur ro/ /yang gi sgra ni tshangs pa'i rang gi ngo bo tha dad pa med pa 'ba' zhig tu ma zad ces bya ba'o/ /gang gi phyir rang gi bdag nyid du rnam par gnas pa de la tha dad pa med de/ 'di ni 'gyur ba med pa'i rang bzhin yin pa'i phyir dang / tha dad pa med pa'i rang bzhin yin pa'i phyir ro zhes bya ba grub pa'i mtha' yin no/ /'di ltar de ni bum pa la sogs pa'i bdag nyid du thog ma dang tha ma med pa nyid du mi 'dod do/ /'o na ci zhe na/ mchog gi bdag nyid du ste/ bum pa la sogs pa snang bzhin pa na skye ba dang 'jig pa yongs su chad pa'i yul can rnams su dmigs pa tshangs pa yin no/ /ma thos kyang sgra gsal bar rig par 'gyur ro zhes bya ba'i thal bar 'gyur ba smras pa 'di gang yin pa de yang gal te tshangs pa'i ngo bo dmigs pa'i mtshan nyid du gyur par 'dod pa de'i tshe blta bar bya'o/ /gal te yang shin tu phra ba dbang po las 'das pa'i zhes smra ba de'i tshe skyon 'di med do/ /'on kyang sngon po la sogs pa yang de'i ngo bo yin pa'i phyir de'i rang gi ngo bo bzhin du mi 'dzin par thal bar 'gyur ro zhes bya ba'i skyon 'di brjod par bya'o/ /de lta yin dang tshu rol mthong ba rnams kyis skye ba dang 'jig pa dang ldan pa'i don tsam shes so zhes bya ba'i nges pa 'di mi 'thad do/ /'di snyam du ji ltar khyed cag gi skad cig ma nyid las sngon po la sogs pa tha mi dad la/ sngon po la sogs pa myong na yang mi myong ba de bzhin du sgra'i ngo bo la yang yin no snyam du sems na/ de ni yang dag pa ma yin te/ sngon po la sogs pa rig pa na skad cig ma nyid mi rig pa ni ma yin te/ 'on kyang rtog pa med pa'i shes pas gzung du zin kyang 'khrul pa'i rgyu mtshan gyis yon tan gzhan sgro btags pa'i phyir ma nges pa yin par brjod do/ /des na nyams su myong ba la ltos nas de bzung ba nyid yin la/ nges pa'i shes pa la ltos nas ni ma bzung ba yin pa'i phyir/ shes pa tha dad pas gcig bzung ba dang ma bzung ba nyid ni mi 'gal ba kho na'o/ /de ltar khyed cag gi phyogs la ni sgra bzung ba dang ma bzung bar rigs pa ma yin te/ shes pa thams cad rtog pa dang bcas pa nyid du khas len pa'i phyir dang / shes pa gcig gis kyang de'i bdag nyid thams cad nges pas ma bzung ba'i rang bzhin gzhan mi 'thad pa'i phyir ro/ /ji skad du/ nges pa rnams kyis ma nges gang / /de ni ji ltar de dag yul/ /zhes bshad do/ /ci ste rtog pa med pa'i shes pa yang cung zad cig khas len na 'o na/ sgra yi rjes 'jug ma gtogs gang / /shes de 'jig rten na yod min/ /zhes brjod par mi bya'o/ /sgra'i rnam pa dang ldan pa'i phyir zhes bya ba'i gtan tshigs kyang 'grub par mi 'gyur ro/ /de lta bas na tshad ma med pa'i phyir dngos po rnams sgra'i bdag nyid du gnas pa rgyu mtshan med pa can kho nar 'gyur ro/ /gzhan yang dngos po rnams kyi skad cig ma nyid ni tshad ma gzhan las grub pa'i phyir nyams su myong ba yang ma nges pa yin no zhes bstan gyi/ gang gis de rnam par 'jog par byed pa dngos po rnams sgra'i bdag nyid du ga las grub/ sun 'byin pa'i lan gzhan yang / gal te dngos po so so yi/ /zhes bya ba la sogs pa smos te/ sgra'i bdag nyid de yongs su gyur par 'gro ba na don tha dad par 'gyur ram/ ma yin par 'gyur grang / de la gal te tha dad pa med pa zhes bya ba'i phyogs yin na de'i tshe sngon po la sogs pa thams cad yul gcig pa nyid du 'gyur ro/ /yul gcig pa nyid du zhes bya ba ni mtshon pa yin te/ dus dang yongs su 'gyur ba dang / bya ba dang gnas skabs kyi khyad par la sogs pa yang gzung ngo / /'di rnams kyang gcig tu 'gyur ro/ /gcig gi rnam par rig par yang ste/ so so snang bar 'gyur zhing thob pa yin te/ sngon po la sogs pa thams cad sgra gcig gi ngo bor tha mi dad pa'i phyir ro/ /ci ste sgra'i bdag nyid 'dir rang gi mtshan nyid gsal ba so so tha dad pa nyid du khas len par byed pa de'i tshe/ tshangs pa du ma nyid du 'gyur te/ dngos po tha dad pa ni du ma'i ngo bo nyid du yin pa'i phyir ro/ /tha dad pa du ma'i dngos po'i bdag nyid dngos po du ma'i rang bzhin gyi ngo bo gang la yod pa zhes tshig rnam par sbyar ro/ /de'i dngos po ni de nyid de / tshangs pa mchog kyang gcig tu 'dod de/ des na dam bca' ba la khas blangs pas gnod pa yin no snyam du bsams pa'o/ /nyes pa gzhan yang / sgra yi rang bzhin rtag nyid ni / /zhes bya ba la sogs pa smos te/ sgra rtag pa las 'byung ba nyid de/ 'gro ba sgra rtag pa'i rang bzhin nyid yin na sgra'i ngo bo bzhin du dngos po rnams kyang rtag pa nyid du 'gyur ro/ /de lta yin dang dus thams cad du dngos po rnams sgra dang lhan cig cig car grub pa na ste/ grub pa'i phyir yongs su 'gyur bar mi 'gyur ro/ /de dag ces bya ba ni de'i phyir gyi don nam de dag ste sngon po la sogs pa de dag rnams kyi cig car te/ de dag cig car zhes tshig rnam par sbyar ro / /ci ste cig car ba grub na yang ci'i phyir yongs su 'gyur ba ma yin zhe na/ ngo bo gcig ni zhig 'gyur zhes bya ba la sogs pa smos te/ ni'i sgra ni go rims med pa la ni dngos po yongs su 'gyur ba 'grub par mi 'gyur ro zhes rim pa gzhan du bya'o/ /de ltar re zhig yongs su 'gyur bas byas pa'i dngos po rnams sgra'i rang bzhin nyid du mi rigs so/ /phyogs gnyis pa yang rigs pa ma yin no zhes bstan pa'i phyir/ ci ste yang zhes bya ba la sogs pa smos te/ de lta na yang sgra rtag pa nyid kyis 'gyur ba med pa'i phyir de las rim gyis 'bras bu skye bar mi 'gyur ro/ /thams cad la rgyu nus pa thogs pa med pa ma tshang ba med pa'i phyir cig car kho nar skye bar 'gyur ro/ /rgyu ma tshang ba'i phyir 'bras bu sdod pa yin na/ gang gis cig car bar mi 'gyur ba gal te de ma tshang ba med na des na ci'i phyir gzhan la ltos/ gzhan yang gal te rang bzhin gcig po de las sgra'i rang gi ngo bo gzhan tha dad pa skye bar khas len pa de'i tshe/ tshangs pa de don gyi ngo bor rnam par 'gyur ba yin no zhes bya ba 'di 'grub par mi 'gyur ro/ /don gzhan skye ba na gzhan de'i rang bzhin du mi 'jug pa de'i ngo bo rnam par 'gyur ba ni mi rigs so/ /de lta bas na thams cad du yang dam bcas pa'i don brtag par mi bya'o/ /sgra'i rnam pa dang ldan pa'i phyir ro zhes bya ba'i gtan tshigs kyang ma grub par bstan pa'i phyir/ de yi ngo bo min las log /ces bya ba la sogs pa smos te/ dngos po rnams la ni don dam par ngo bo gcig rjes su 'gro ba yod pa ma yin te/ thams cad rang rang gi ngo bo la gnas pa nyid kyis rigs mthun pa dang mi mthun pa las ldog pa'i rang bzhin yin pa'i phyir ro/ /'di dag la ni rtog pas zhen pa rigs mi mthun pa las ldog pas byas pa rnam pa gcig dang ldan pa nyid rnam par 'jog par byed de/ dper na bum pa dang kham phor dang / blug ma la sogs pa don dam par tha dad pa rnams la yang 'ji ba'i bdag nyid ma yin pa'i dngos po las ldog pas byas pa 'ji ba'i bdag nyid du rtog pa lta bu'o/ /de la sngon po la sogs pa 'di dag gis brtags pa de yang sgra'i rnam pa dang ldan pa nyid du srid pa ma yin te/ sngon po dang ser po la sogs pa rnams la sgra'i ngo bo ma dmigs la/ ma dmigs pa na yang ji ltar sgra'i bdag nyid ma yin pa rnam pas bcad pas byas pa'i sgra'i rnam pa dang ldan pa nyid rtog /de phyir rtog pa'ang sa bon med/ /ces bya ba ni gtan tshigs ma grub pa'o/ /gang yang / thams cad yul gcig nyid dang ni/ /gcig gi rnam par rig par 'gyur/ /zhes smras pa de la gzhan kyi lugs kyi dogs pa bsu ba ni/ 'on te tshangs pa'i de nyid ces bya ba la sogs pa'o/ /ci ste yang tshangs pa'i bdag nyid kyi de kho na nyid mi 'gyur ba dbyer med pa nyid du rtag tu don dam par gnas pa gang yin pa de ni don dam par yongs su 'gyur ba ma yin gyi/ 'on kyang ma rig pa'i ling tog gis blo'i mig nyams pa rnams sngon po la sogs pa'i dbye bas sna tshogs pa bzhin du rlom mo/ /ji skad du/ ji ltar nam mkha' dag pa la/ /rab rib kyis bslad skye bo yin / /rab rib sna tshogs dag dang ni/ /ldan pa bzhin du mngon par rlom/ /de ltar bdud rtsi 'gyur med pa'i/ /tshangs pa 'di ni ma rig pas/ /rnyog pa bzhin du 'gyur ba ste/ /tha dad ngo bor rnam par 'gyur/ /zhes bshad pa lta bu'o/ /des na thams cad yul gcig pa nyid du thal bar mi 'gyur te/ de dag ni dngos po med pa'i ngo bo nyid yin pa'i phyir ro/ /rig pa tha dad par yang mi 'gyur te/ de ni ma rig pas bslad pa byas pa nyid kyi phyir ro snyam du bsams pa yin no/ /de la'ang zhes bya ba la sogs pas lan 'debs par byed de gang gi phyir tshad ma'i dbang gis gzhal bya yod par rnam par 'jog pa yin la/ de lta bu'i ngo bo'i tshangs pa grub par bya ba'i phyir tshad ma cung zad kyang med do/ /'di ltar re zhig de ni mngon sum gyis de grub pa ma yin te/ sngon po la sogs pa phan pa dang mi phan pa thob pa dang spong ba'i rten las tha dad pa'i sgra'i ngo bo gzhan snang ba ni med la/ mi snang ba yang ji ltar de mngon du phyogs pa'i sems te/ rigs pa'i lam la gnas pas yod pa nyid du ma nges par 'gyur/ 'di snyam du shes pa'i bdag nyid kyi ngo bo bzhin du rang rig pa'i mngon sum kho nas de grub pa yin te/ 'di ltar de nyid gsal ba yin te/ sgra'i bdag nyid yin pa'i phyir dang / sems pa can gyi ngo bo yin pa'i phyir ro snyam du sems na/ 'di ni rang rig pa dang 'gal te 'di ltar yid gzhan la yang yengs kyang mig gis gzugs lta ba na/ mngon par brjod pa dang mi ldan pa sngon po la sogs pa'i shes pa nyams su myong ba kho na yin no/ /'di ltar rgyas par 'chad par 'gyur ro/ /des na/ shes de 'jig rten na yod min/ /zhes bya ba la sogs pa smras pa de yang bsal ba yin no/ /de lta bas na dbyer med pa'i sgra'i rang bzhin gyi tshangs pa mngon sum gyis grub pa ma yin te/ de lta bur gyur pa de mi snang ba'i phyir ro/ /rjes su dpag pas kyang ma yin te/ 'di ltar rjes su dpag pa yin na 'bras bu'i rtags yin pa'am/ rang bzhin gyi rtags yin grang / mi dmigs pa ni dgag pa'i yul can yin pa'i phyir sgrub pa la dbang du byed pa nyid ma yin no / /de la re zhig 'bras bu'i rtags ni ma yin te/ rtag pa las 'bras bu 'ga' yang mi skye ba'i phyir te/ rtag pa ni rim dang cig car dag gis don byed pa 'gal ba'i phyir ro/ /rang bzhin gyi rtags kyang yod pa ma yin te/ tshangs par brjod pa'i chos can de nyid ma grub pa'i phyir ro/ /chos can ma grub na de'i rang bzhin du gyur pa'i chos rang rgyud du grub par mi 'gyur ro/ /'o na gzhan rtags su 'gyur ro zhe na/ de dag las ni ma gtogs pa'i/ /zhes bya ba la sogs pa smos te/ rang bzhin dang 'bras bu las ma gtogs pa gzhan bsgrub bya'i don dang 'brel pa med pa'i phyir la/ 'brel pa med pa'i rtags kyang rigs pa ma yin te/ ha cang thal bar 'gyur ba'i phyir ro/ /gang yang dngos po rnams sgra'i ngo bo nyid du sgra'i rjes su 'gro ba nyid smras pa gang yin pa de ma grub pa'i phyir dang / brdzun pa nyid yin pa'i phyir don dam pa'i tshangs pa sgra'i ngo bo nyid du sgrub par nus pa ma yin la/ lung las kyang de grub pa ma yin te/ de mi gnas pa'i phyir ro/ /gang yang mi dmigs pa zhes bya ba'i rtags yod mod kyi/ de ni rang bzhin gyi gtan tshigs kyi khongs su gtogs pa yin no snyam du bsams pa'o/ /yang na yod pa sgrub par byed pa brjod par 'dod pa'i phyir ro/ / de nyid kyi phyir/ yod pa'i sgrub byed rtag yod min/ /zhes bya ba smos so/ /gzhan yang tshangs pa shes pa tsam gyi don byed par yang mi rung bar shes par gyis shig /de mi rung ba nyid kyis de'i ngo bo med pa ni dngos po med pa rnams kyi mtshan nyid yin no zhes bya'o/ /'di nyid ston pa ni shes pa go rims dang ldan pa ni zhes bya ba la sogs pa smos te/ 'di yang dang po nyid du dbang phyug rtag par bstan zin to/ /de las gzhan zhes bya ba blang ba dang dor ba'i rgyu mtshan can sngon po la sogs pa las gzhan tha dad pa zhes bya ba'i don to/ /yang na de las zhes bya ba ni mjug sdud pa'o/ /gzhan zhes bya ba ni de kho na nyid do/ /mo gsham gyi bu dang mtshungs pa zhes bya ba ni mo gsham gyi bu dngos po med pa nyid du rnam par 'jog pa la don bya ba byed par nus pa dang bral ba las ma gtogs pa rgyu mtshan gzhan yod pa ni ma yin no/ /ci ste 'di skad du/ tshangs pa mchog gi bdag nyid de ni mngon par mtho ba dang nges par legs pa'i 'bras bu'i chos rjes su 'dzin pa'i nang gi byed pa can rnal 'byor pa rnams kyis mthong ngo zhes brjod pa de yang mi 'thad do zhes bya ba la sogs pa la/ gal te rnal 'byor goms pa'i shes pa la de'i bya ba yod pa yin na de'i tshe rnal 'byor pas de'i ngo bo mthong ngo zhes bya bar 'gyur na 'di ni rigs pa ma yin te/ de tsam du ji skad du bshad pa'i rnam par shes pa la de'i bya ba med pa'i phyir ro/ /'di snyam du de'i yul can gyi shes pa skyed pas rnal 'byor pa rnams kyis de mthong ba ni ma yin te/ de las ma gtogs pa'i rnal 'byor pa dang / rnal 'byor pa'i shes pa med pa'i phyir ro/ /'on kyang rnal 'byor gyi gnas skabs na rang gi bdag nyid gsal ba'i ngo bo de gsal ba na rnal 'byor pa rnams kyis mthong bar brjod do snyam du sems na/ gal te de lta na sngar rnal 'byor pa ma yin pa'i gnas skabs na de'i ngo bo ji lta bu zhig yin pa brjod par bya'o/ /gal te rtag tu gsal ba'i ngo bo yin pa de'i tshe/ 'o na rnal 'byor pa ma yin pa'i gnas skabs nam yang yod pa ma yin te/ tshangs pa ni rtag tu bdag nyid gsal ba'i ngo bo yin pa'i phyir ro/ /de lta yin dang thams cad la 'bad pa med par thal bar 'gyur ro/ /ci ste yang / ji ltar khyed kyi rmi lam la sogs pa'i gnas skabs su shes pa gnyis su med pa yin na yang sna tshogs kyi rnam pa 'dzin par snang ngo / /de bzhin du de gnyis su med pa yin na yang ma rig pa'i dbang gis rgyud rnam par ma dag pa rnams la de ltar snang ba yin no snyam na/ de ni yang dag pa ma yin te/ gang dag la de de ltar snang bar 'gyur ba de las ma gtogs pa'i rnam par ma dag pa'i rgyud gzhan 'ga' zhig yod pa ni ma yin no/ /gal te tshangs pa nyid de ltar snang ba yin no zhe na/ de lta na 'o na thar pa med par thal bar 'gyur te / tshangs pa ni thams cad du gnyis kyi ngo bor snang ba'i bdag nyid yin pa'i phyir ro/ /kho bo cag la ni rnam par dag pa'i shes pa gzhan skye ba'i phyir grol bar rigs pa nyid yin la/ khyed cag la ni gang gi dbang gis de de ltar snang ba zhes bya bar 'gyur ba/ de las ma gtogs pa'i ma rig pa yod pa yang ma yin no/ /yang na tha mi dad pa'i ma rig pa de'i dbang gis de nyid de ltar snang ngo zhes bya ba 'di ni legs par bshad pa'o/ /ci ste yang ma rig pa'i dbang gis de gsal ba yin no zhes bya ba 'dis ni de'i ma rig pa'i bdag nyid gsal bar byas pa yin no snyam na/ gal te de lta na thar ba med par thal ba nyid ches shin tu gsal bar byas par 'gyur ro/ /gang gis ma rig pa dang bral bas grol bar 'gyur ba rtag pa gcig pu'i ngo bo tshangs pa ma rig pa'i bdag nyid du gnas pa yin na/ de'i bdag nyid kyi ma rig pa dang bral ba ni ma yin no/ /'on te ma rig pa tha dad par khas len par byed na de lta na yang rtag pa nyid kyi phyir khyad par byar med pa'i tshangs pa la de ni cung zad kyang mi byed pa'i phyir ma rig pa'i dbang gis de ltar snang bar mi rigs so/ /de lta yin dang ma rig pa dang lhan cig de 'brel pa med pa'i phyir 'khor ba med par thal bar 'gyur ro/ /de ni de nyid dang gzhan nyid du brjod par mi nus so zhes kyang brjod par mi rigs te/ dngos po'i chos la go skabs gzhan med pa'i phyir ro/ /de lta ma yin na dngos po'i chos nyid du mi 'gyur ro/ /dngos po med pa'i dbang gis de de ltar gsal bar yang rigs pa ma yin te/ ha cang thal bar 'gyur ba'i phyir ro/ /kho bo cag la ni de lta bur gyur pa'i don bya ba byed pa'i rang bzhin la yang dngos med ces ming byed na rtsod pa med de/ de kho bo cag la ji lta ba bzhin ma yin par zhen pa'i bag chags nyid ma rig pa yin te/ bag chags de yang ha cang zhes bya ba la/ nus pa yang rgyu'i bdag nyid kyi shes pa'i bdag nyid du gyur pa nyid yin no/ /des na ma rig pa'i bdag nyid kyi shes pa rgyur gyur pa snga ma snga mas ji lta ba bzhin ma yin par zhen pa'i 'bras bu'i shes pa phyi ma phyi ma skye ba'i phyir ma rig pa'i dbang gis de ltar gsal bar rigs so/ /ma rig pa de yang rnal 'byor goms pa'i phyir nus pa med pa'i skad cig gong nas gong du skye ba'i rim gyis bral ba las shes pa'i rgyud rnam par dag pa skye ba'i phyir byang grol thob pa/ des na bcings pa dang thar pa'i rnam par gzhag pa rigs pa dang ldan pa yin no/ /khyed la ni de lta bu yod pa ma yin te/ tshangs pa ni rtag pa gcig pu'i ngo bo nyid yin pa'i phyir ro/ /gnas skabs gnyis med pa'i tshangs pa ni gcig nyid yin pa'i phyir/ gcig thar pa na thams cad thar par thal bar 'gyur ba dang / gcig ma grol na thams cad kyang ma grol bar thal bar 'gyur ba mi zlogs so/ /rnal 'byor pa ma yin pa'i gnas skabs na bdag nyid gsal ba'i ngo bo nyid du sgrub par byed pa'i tshad ma 'di la cung zad kyang yod pa ma yin la/ shes pa ni gsal ba'i bdag nyid du rang rig pas grub po/ /de ltar sgra'i bdag nyid ni shes pa'i bdag nyid thams cad la rigs pa ma yin no zhes bya ba 'di ni bstan zin to/ /ci ste rnal 'byor pa ma yin pa'i gnas skabs na tshangs pa 'di bdag nyid gsal bar khas len par mi byed na/ de lta na yang sngar med pa'i gsal ba'i bdag nyid de tshangs pa sngar gyi ngo bo ma dor bar phyis rnal 'byor pa'i gnas skabs su ga las byung zhes brjod par bya'o/ /de lta bas na khyed kyis sgra'i tshangs pa smra ba ni log par smra ba yin pa'i phyir spros pas chog go/ / gtso bo yongs su 'gyur pa dang / /zhes bya ba la sogs pas sngar bshad pa'i skyon gyi lam 'di la yang bsgre bar byed do/ /de la/ 'bras de yod phyir rgyu yis na / /bskyed bya min te rgyu rig bzhin/ /de phyir mngon 'dod rgyu min te/ /bsgrub bya med phyir gzhan dag bzhin/ /zhes bya ba la sogs pa de lta bu'i skyon brjod par bya'o/ /de kho na nyid bsdus pa'i dka' 'grel las sgra'i tshangs pa brtag pa ste lnga pa'o// //rig byed smra ba'i gzhung lugs/ grub mtha' nyes par bshad pa'i zhes bya ba la sogs 'god par byed de/ de dag ni 'di skad du skyes bu gcig nyid 'jig rten mtha' dag 'byin pa dang / gnas pa dang / 'jig pa'i rgyu yin la/ 'jig pa na yang shes pa'i nus pa khyad par du 'phags pa mi 'jig go zhes zer te/ de skad du yang / snal ma rnams la ba thag bzhin/ /chu la chu shel ji bzhin dang / /lcug ma rnams kyi blag sha bzhin/ /de ni skye ldan kun gyi rgyu/ /zhes bshad do/ /de bzhin du gang yang byung bar gyur pa dang gang yang 'byung ba 'di thams cad kyi ni skyes bu nyid yin no zhes bya'o/ /dbang phyug chos mtshungs zhes bya ba ni dbang phyug dang chos mtshungs pa ste/ gnyi ga yang sna tshogs 'byin pa dang / gnas pa dang / 'jig pa'i rgyu mtshan yin pa'i phyir ro/ /'di tsam zhig ni khyad par yin te/ dbang phyug par smra ba rnams kyi dbang phyug las tha dad pa gzhan yang bdag la sogs pa dang / 'du ba la sogs pa rgyur 'dod la/ skyes bu smra ba rnams kyis ni/ / skyes bu kho na rgyur 'dod do/ /gnyi ga yang sna tshogs pa 'byin pa dang / gnas pa dang / 'jug pa'i rgyu mtshan gyi dngos por ni mtshungs so/ /grub mtha' nyes par bshad pa yi/ /rjes 'jug blo can zhes bya ba ni gang dag la grub mtha' nyes par bshad pa'i rjes su 'jug pa'i blo yod pa zhes tshig rnam par sbyar ro/ /bal gyi lte ba ni ba thag pa rkyong ngo / /'di dag la yang zhes bya ba la sogs pas sun 'byin pa rtsom mo/ dbang phyug bzhin zhes bya ba ni drug pa'i mtha' can las rang bzhin gyi rkyen yin no/ /de la yang 'di skad du skyes bu ni skye ba dang ldan pa'i rgyu ma yin te/ skye ba dang bral ba'i phyir nam mkha'i pad ma bzhin no/ /de lta ma yin na thams cad cig car bar 'gyur ro zhes bya ba'i nyes pa brjod par bya'o/ /yang ji ltar gzhan dag gis dbang phyug bsgrub pa'i phyir sgrub par byed pa brjod pa de ltar skyes bu smra ba rnams kyis skyes bu grub par bya ba'i phyir len par byed pa de'i tshe de bzhin du ma grub pa la sogs pa'i skyon brjod par bya'o/ /sun 'byin pa'i rnam pa gzhan yang 'di 'dra'i byed pa de dag ces bya ba la sogs smos te/ rtog pa sngon du gtong ba'i 'jug pa la dgos pa dang ldan pas khyab pa de bas na ci'i phyir skyes bu 'di yang 'gro ba 'god par byed pa 'di 'dra ba byed ces brjod par bya'o/ /gal te dbang phyug la sogs pa gzhan gyis bskul bas mi 'dod kyang byed pa de'i tshe 'di rang dbang can du khas blangs pa gang yin pa de nyams par 'gyur ro/ /ci ste snying rjes gzhan rjes su gzung ba'i don du byed pa de'i tshe/ dmyal ba la sogs pa sdug bsngal dang ldan pa'i sems can sprul par byed par mi 'gyur gyi/ gcig tu bde ba dang ldan pa kho na byed par 'gyur ro/ /gzhan yang 'byin pa ste skyed pa'i sngar brtse bar bya ba sems can med pa'i phyir/ rjes su brtse ba gang gi dbang gis 'di byed pa po dang 'byin pa por rtog pa ci la dmigs nas de'i rjes su brtse bar 'gyur/ gal te yang 'di rjes su brtse bas byed na lha dang mi la sogs pa gang dag rtag tu mngon par mtho ba dang ldan pa de dag ci'i phyir 'jig par byed de/ gang yang sdug bsngal dang ldan pa'i rgyud ngan song ba'i sems can de dag nyid 'jig par byed par nges so snyam du dgongs pa'o/ /ci ste yang rjes su brtse bar bya ba de dag gis ma mthong ba'i chos dang chos ma yin pa'i mtshan nyid gang yin pa de la ltos nas 'jig rten bde ba dang sdug bsngal dang ldan par byed do snyam na / de yang yod pa ma yin te/ de lta na ni rang dbang can du khas blangs pa nyams par 'gyur ro/ /nus pa yin na 'ga' la yang mi ltos pa'am/ nus pa med na ltos nas lha'i 'jig rten du skye ba'i phyir skyes bu 'di de'i rgyu nyid nyams par 'gyur ro/ /de ma mthong ba na ltos pa yin mod kyi/ 'on kyang yang ma mthong ba'i chos can ma yin pa'i bdag nyid kyi sdug bsngal gyi rgyu gang yin pa de la ltos na brtse ba dang ldan par mi rigs so/ /'on kyang de de la brtse ba'i gzhan dbang du gyur pa nyid la btang snyoms su bya ba nyid du rigs so/ /brtse ba dang ldan pa rnams ni gzhan gyi sdug bsngal gyi rgyu tshol ba ma yin te/ de dag ni gzhan sdug bsngal dang bral bar 'dod pa nyid kyis 'jug pa'i phyir ro/ /ci ste rjes su brtse bas byed pa ni ma yin no/ /'o na ci zhe na/ rtsed mo'i don du'o/ /'di yang yang dag pa ma yin te/ de lta na ni rtsed mo'i don du bskyed na 'di rang dbang can du mi 'gyur te/ skye ba dang / gnas pa dang / 'jig pa'i bdag nyid kyi rtsed mo'i rnam pa sna tshogs kyi thabs la ltos pa'i phyir ro/ /gzhan yang rtsed mo sna tshogs kyi thabs gang dag yin pa de byed pa la gal te 'di nus pa yin na/ de'i tshe de dag cig car kho nar byed par 'gyur la/ 'on te dang por de la nus pa med pa de'i tshe rim gyis kyang byed par mi 'gyur te/ mi nus pa'i gnas skabs dang khyad par med pa'i phyir ro/ /gcig dngos po gcig la nus pa'am mi nus pa phan tshun 'gal ba'i chos gnyis rigs pa ma yin no/ /ci'i phyir bya ba 'di 'dra ba rtsom zhes bya ba la sogs pa rtog pa sems cad dbang phyug la yang thun mong yin te/ de'i phyir gang blo gros bzang pos gzhan rjes su gzung ba'i don du dbang phyug 'jug ste/ dper na don byas pa thug pa kha cig bdag la phan pa dang mi phan pa thob pa dang spong ba'i don med na yang gzhan rjes su gzung ba'i don du 'doms par byed pa de bzhin du dbang phyug kyang bdag nyid kyi dbang phyug gi 'byor pa ston cing srog chags rnams rjes su 'dzin pa la 'jug par 'gyur ro zhes bya ba dang / yang na nus pa'i ngo bo nyid yin pa'i phyir dper na dus ni dpyid la sogs pa mngon par gsal ba la rnam grangs kyis rgyu ba dang mi rgyu ba'i rnam par 'gyur bskyed pa'i rang bzhin yin pa de bzhin du dbang phyug kyang 'byin pa dang / rjes su 'dzin pa dang / sdud pa'i nus pa rnams gsal ba la rnam grangs kyi srog chags rnams kyi skye ba dang / gnas pa dang 'jig pa'i rgyu nyid yin no zhes smras pa de yang 'di nyid kyis lan btab pa yin no/ /'di ltar gzhan rjes su gzung ba'i don du 'jug pa yin no zhes bya ba 'di la rjes su 'dzin pa lhur byed pa na 'gro ba gcig tu bde ba dang ldan pa byed do zhes bya ba la sogs pa 'di nyid lan yin no/ /nus pa'i rang bzhin yin pa'i phyir ro zhes bya ba 'di la yang / 'byin dang gnas dang sdud pa la/ /cig car nus pa gsal ba na/ /'gro ba cig car byed par 'gyur/ /de lta min na nus gsal min / /dbang phyug 'di ni nus gsal bar/ /rim gyis kyang ni 'thad ma yin/ /gal te nus gsal 'di las gzhan/ /dngos po gcig tu ji ltar 'gyur/ / zhes bya ba'i sun 'byin pa 'di nyid yin no/ /dus ni dpyid la sogs pa mngon par gsal ba la rnam grangs kyis 'jug pa la nyes pa 'di nyid yin no/ /grang ba dang dro ba tha dad pa gnyis bstan pa'i dngos po nyid skad cig re re la 'jig pa ni dus zhes bya ba 'di ni phyis ston par 'gyur ro/ / 'on te 'di 'byin la sogs pa/ /zhes bya ba la sogs pas gsal byed pa'i lugs kyi dogs pa bsu ba yin te/ des smras pa/ legs ldan byed ni rtsed mo'i don du 'jug pa ni ma yin gyi/ 'on kyang ji ltar sa la sogs pa'i 'byung ba chen po rnams rang gi 'bras bu la 'jug pa gang yin pa ni rang bzhin nyid de 'dra ba yin te/ de bzhin du dbang phyug kyang yin no zhe'o / /de yang 'di mi rigs te/ de lta na dngos po thams cad de'i bya ba tsam du 'byung ba'i rgyu nus pa ma tshang ba med pa nye ba'i phyir cig car skye bar 'gyur ro/ /blo dang ldan pa'i khyad par yang rigs pa ma yin no zhes kho bo cag gis dang po nyid du bstan zin to/ /gal te de lta na me la sogs pa'i 'bras bu yang ci'i phyir cig car 'byung bar mi 'gyur zhe na/ rang rgyu'i stobs las byung ba yi/ /zhes bya ba la sogs pa smos te/ de dag gi zhes bya ba ni me la sogs pa'i 'o/ /'ang gi sgra ni dbang phyug kho nar ma zad ces bya'o/ /nges pa 'di zhes bya ba ni rang gi rgyu'i stobs kyis byas pa'o/ /'di snyam du bal gyi lte ba can ci'i phyir rang gi 'bras bu brgya la sogs pa la ngo bo nyid kyis 'jug pas cig car mi byed na/ bal gyi lte ba'am rang bzhin gyis/ /zhes bya ba la sogs pa smos te/ ba thag pa rkyong yang rang bzhin gyis 'jug pa ma yin no/ /'o na ci zhe na/ srog chags za bar 'dod pa'i phyir/ /res 'ga' yin pa'i phyir dang / nges pa'i rgyu las byung ba'i phyir ro snyam du dgongs pa'o/ /'di ni rtag pa dang gcig pu'i ngo bo ma yin te/ de la yang rang gi rgyu'i stobs las byung ba'i nus pa res 'ga' ba yin no/ /ci ste yang brtse bas kyang ma yin la/ rtsed mos kyang ma yin te/ 'on kyang blo dang mi ldan pa gang du 'gro bas ci zhig ltar 'jug pa yin no snyam na/ gal te ji zhig ltar zhes bya ba la sogs pa smos te/ de lta na ni shin tu mi shes pa nyid kyis nya pa la sogs pa tha mal pa'i skyes bu las 'di'i tshig ji ltar rtog pa dang ldan pas gzung bar 'os par 'gyur/ blo ldan zhes bya ba ni rtog pa dang ldan pa'o/ /nya pa ni nya shor ba'o/ /skyes bu sun 'byin pa 'di nyid kyis gang yang dpa' bo'i bu la sogs pa gzhan dag gis 'gro ba'i byed pa por brtags pa de dag kyang gsal bar shes par bya'o zhes ston pa ni/ dpa' bu bdag skyes zhes bya ba la sogs pa'o/ /de la dpa' bu ni khyab 'jug go/ /bdag skyes ni tshangs pa'o/ /sogs pa'i sgras gzhan gyis 'dod pa'i blo dang ldan pa'i dus gang yin pa de gzung ngo / /ji skad du/ dus kyis 'byung ba min par byed/ /dus kyis skye dgu sdud par byed/ /dus kyis gnyid log sad par byed/ /dus ni 'da' bar dka' ba yin/ /zhes smras pa lta bu'o/ /gnyid log pa la zhes bya ba ni 'jig pa'i dus 'jig rten na thim pa zhes bya ba'i don to/ /de lta bur gyur pa blo ngan pas kun du brtags pa gzhan dag kyang sogs pa smos pas bsdu'o/ /de kho na nyid bsdus pa'i dka' 'grel las skyes bu brtag pa ste drug pa'o// //bdag gi bya ba dang bral ba nyid du bstan pa'i phyir/ gzhan dag kyang ni zhes bya ba la sogs pa smos te/ gzhan dag kyang ni zhes bya ba ni rigs pa can dang / bye brag pa rnams so/ /de dag ni lus dang dbang po dang blo las tha dad pa'i bdag ces bya ba'i rdzas 'dod pa dang / sdang ba dang 'bad pa dang / bde ba dang / sdug bsngal dang / shes pa dang / chos dang / chos ma yin pa dang / 'du byed rnams kyi rten 'du ba'i rgyu sems med pa'i ngo bo mi 'jig pa thams cad du 'gro ba/ dge ba dang mi dge ba'i las tha dad pa rnams kyi byed pa po de'i 'bras bu 'dod pa dang mi 'dod pa'i za ba por yongs su rtog par byed do/ /de lta ma yin te gal te bdag med par 'gyur na de'i tshe shi nas las kyi 'bras bu la longs spyod pa de su yin/ gzhan gyis byas pa gzhan longs spyod pa ni ma yin te/ de lta na ni ma byas pa dang phrad pa'i skyon du 'gyur te/ byed pa po ma yin pa nyid 'bras bu dang 'brel pa'i phyir ro/ /byas pa chud gson par yang 'gyur te/ byed pa po 'bras bu dang 'brel pa med pa'i phyir ro/ /de ltar 'dod pa yang ma yin te/ de lta bas na gdon mi za bar gang kho na byed pa po de kho na za ba por khas blang bar bya ba yin no zhes yongs su rtog par byed do/ /des na byed pa po dang za ba po gang yin pa de ni bdag yin no/ /yang gal te 'di sems kyi ngo bo ma yin na de'i phyir ji ltar mi shes pa byed pa por rigs she na/ sems 'brel phyir zhes bya ba la sogs pa smos te/ 'di sems dang 'brel ba'i phyir shes par byed pa yin pas sems yin gyi/ ji ltar ser skya pa skyes bu'i rang gi ngo bo sems can yin no zhes rjod par byed pa ltar sems kyi ngo bo nyid yin pa'i phyir rang gi ngo bo ni ma yin no/ /'o na gal te rtag pa 'di nyid ji ltar byed pa po dang zab po ma yin pa'am/ ji ltar de'i skye ba'am/ 'chi ba'am/ gson pa rnam par 'jig ste/ rtag pa dang gcig pu'i ngo bo la ni 'di thams cad rung ba ma yin te/ dper na nam mkha' bzhin no zhe na/ shes dang zhes bya ba la sogs pa smos te/ shes pa dang / 'bad pa dang / byed par 'dod pa la sogs pa rnams bdag de la 'du ba ni byed pa po nyid do/ /bde ba la sogs pa nyams su myong ba dang 'du ba ni za ba po nyid do/ /ris mthun pa khyad par can dang / lus dang / dbang po dang / blo dang / tshor ba snga na med pa dag dang 'brel pa ni/ bdag de'i skye ba yin par brjod do/ /ris mthun pa ni lha dang mi la sogs pa'i bye brag go/ /tshor ba dag dang zhes bya ba la/ dang gi sgras lus dang dbang po dag sdud par byed do/ /de la lus dang dbang po dang yang dag par ldan pa'i mtshan nyid ni de'i 'brel pa'o/ /blo dang tshor ba dag ni 'du ba'i mtshan nyid do/ /ji ltar ldan pa dang ldan zhe na/ de la yang ldan pa dang ldan pa yod do/ /de'i ma mthong bas mngon par 'dus byas pa'i rna ba'i bu ga ni bdag dang ldan la / de dang yang nam mkha'i bdag nyid kyi rna ba dang ldan no/ /sngar thob pa ste/ sngon nye bar blangs pa'i lus dang / dbang po dang / blo dang / tshor ba rnams dang bral ba ni 'di'i 'chi bar brjod do/ /de'i gson pa ni lus dang bcas pa chos dang chos ma yin pa la ltos pa'i yid dang ldan pa gang yin pa'o/ /'tshe ba ni lus dang mig la sogs pa la gnod pa'i phyir bdag 'di la 'tshe bar rtog ste brjod do zhes bya ba'i don to/ /de bzhin du yang 'bras bu'i rten dang byed pa po la gnod pa ni 'tshe ba yin no zhes bya ba ni mdo yin no/ /'bras bu'i rten ni lus te/ bde ba la sogs pa 'bras bu'i rten yin pa'i phyir ro / / byed pa po ni dbang po yin te/ yul dmigs pa'i byed pa po yin pa'i phyir ro/ /yang ji ltar bdag 'di yod pa nyid du shes par bya ba zhes bya ba 'di la/ re zhig rna ma phug pa tshad ma byed pa ni bdag cag gi yod pa la sogs par khyad par med pa'i yul dang / yul ma yin pa'i shes bya'i yul can bdag gi mngon sum dang rjes su dpag pa dang / nye bar 'jal ba dang / sgra dang / dran pa dang / ngo shes pa dang / grub pas mthong ba dang / gtsug lag dang / the tshom dang / phyin ci log dang / ma nges pa dang / rmi lam dang / rmi lam gyi mtha'i shes rab kyi khyad par rnams ni bdag gi lus la sogs pa las tha dad pa'i rig par byed pas rig par bya ba yin te/ rang gi rgyu la rag las pa dang / skye ba dang ldan pa dang / spyi dang khyad par dang ldan pa dang / rtogs pa'i bdag nyid dang / shin tu myur ba dang / 'jig pa nyid dang / 'dus byas skyed par byed pa nyid dang / shes pa nyid yin pa dag gi phyir skyes bu gzhan gyi shes pa bzhin no/ /chos mi mthun pas ni zhig pa'i bum pa la sogs pa bzhin no zhes bya ba yin no/ /de la yod pa la sogs par khyad par med pa ni sngar bshad pa drug go/ /yod pa la sogs pa drug po da dag gi yul ni rdzas dang / yon tan dang / las rnams so/ /yul ma yin pa ni spyi dang / khyad par dang / 'du ba rnams so/ /de gnyi ga'i bdag nyid kyi shes bya'i yul can mngon sum la sogs pa'i shes rab kyi khyad par gang dag la yod pa de dag la de skad ces bya'o/ /mngon sum dang / rjes su dpag pa dang / nye bar 'jal ba zhes bya ba la sogs pa ni zlas dbye bar bstan to/ /grub pas mthong ba ni gang skar ma shes pa'i bstan bcos la sogs pa ston pa ste/ de ni grub pa rnams kyi mthong ba'am/ mthong ba grub pa yin pas grub pa mthong ba zhes bya'o/ /gtsug lag ni spobs pa'i shes pa ste/ dper na sngar bdag gi spun zla'i ngo shes zhes bya ba lta bu'o/ /de yang phal cher drang srong rnams las 'byung bas gtsug lag ces bya'o/ /the tshom ni yid gnyis so/ /phyin ci log ni bzlog pa'o/ /ma nges pa ni yul ma nges pa'o/ /dang po rmi lam gyi gnas skabs su byung ba'i shes pa ni rmi lam mo/ /rmi lam gyi mtha' ni de'i yul la rmi lam na yang shes pa gzhan 'byung ba gang yin pa de yin te/ shes rab kyi khyad par ro/ /lhag ma ni go bla'o / /tshad ma de don gyis bstan pa'i phyir/ bdag gi zhes bya ba'i shes pa la zhes bya ba la sogs pa smos te/ lus la sogs pa zhes bya ba 'di la sogs kyi sgras blo dang / dbang po dang / tshor ba rnams gzung ngo / /shes phyir zhes bya ba ni mtshon pa ste/ rgyu la rag las pa dang / skye ba dang ldan pa la sogs pa de las kyang gzhan pa dag kyang gzung bar bya'o/ /bde byed bdag po yang tshad ma rnam pa gzhan du byed de/ 'dod pa la sogs pa ni 'ga' zhig la brten pa yin te/ dngos po yod pa'i 'bras bu yin pa'i phyir gzugs la sogs pa bzhin no zhes bya ba ste/ de ston pa ni 'dod pa la sogs zhes bya ba la sogs pa'o/ /dngos po smos pa'i phyir zhes bya ba la sogs pas dngos po yod pa'i zhes bya ba'i khyad par 'bras bu dang bcas par ston par byed do/ /gsal byed pas tshad ma sbyor ba ni lha sbyin gyi gzugs dang / ro dang / dri dang / reg pa'i shes pa rnams ni gcig dang du ma rgyu mtshan can te/ bdag gis zhes bya ba'i shes pas mtshams sbyor bar byed pa'i phyir dang / brda byas pa rnams gar mkhan gyi smin ma bskyod pa la cig car skyes bu du ma'i shes pa bzhin no/ /'di'i don ni 'di yin te/ dper na gar mkhan smin ma bskyod ma thag tu kho bo cag gis gos 'phang bar bya'o zhes bya ba de lta bu brdar byas pa mang po rnams kyi byed pa po du ma shes pa du mar gyur pa'i rgyu mtshan ni smin ma bskyod pa gcig yin pa'i phyir bdag gis mthong ngo / /bdag gis mthong ngo zhes mtshams sbyor bar byed do/ /de bzhin du 'di la yang sna tshogs pa'i yul can gyi shes pa'i rgyu mtshan gcig nyid kyi phyir mtshams sbyor ba yin te / rgyu mtshan gcig po gang yin pa de ni bdag ces bya'o/ /dang por mtshams sbyor ba ngas mthong ngo / /ngas thos so zhes bya ba de lta bu la sogs pa'i shes pa rnams shes pa gcig gi rgyu mtshan gyis byas pa yin la/ gar mkhan gyi smin ma bskyod pa ni shes pa rnams yul gcig pa nyid du bstan pa ni mtshams sbyor ba yin no/ /rnam pa thams cad du don gcig rgyu mtshan du byas pa gang yin pa shes pa rnams kyi 'brel pa ni mtshams sbyor ba zhes brjod do/ /tshad ma de 'di nyid kyis bstan pa'i phyir/ gzugs sogs shes pa zhes bya ba la sogs pa smos te/ go bar sla'o/ /'di ni de'i sbyor ba gzhan yin te/ bdag go zhes bya ba'i tshig ni lus dang / dbang po dang / yid dang / blo dang / tshor ba'i tshogs las ma gtogs pa rjod par byed pa yin te/ rnam grangs nges pa las tha dad pa nyid yin pa na gcig gi tshig yin pa'i phyir bum pa la sogs pa'i sgra bzhin no/ /de 'chad pa ni 'di ltar bdag ces bya ba la sogs pa ste/ rnam grangs nges las tha dad na/ /zhes bya ba ni blo dang dbang po la sogs pa rnam grangs grub pa'i blo la sogs pa gang dag yin pa de dag las tha dad pa yin pa na zhes bya ba'i don to/ /ji skad bstan pa'i chos kyis ni/ /zhes bya ba ni blo la sogs pa las tha dad pa'i don brjod pa nyid kyis so/ /gang yang de ltar yongs nges pa/ /zhes bya ba ni rnam grangs nges pa las tha dad pa'i gcig gi tshig nyid kyis so/ /yang de nyid ldog pa'i sgo nas bdag grub par bya ba'i phyir gtan tshigs sbyor bar byed pa ni/ gson pa'i lus 'di ni bdag med pa ma yin te/ srog la sogs pa dang mi ldan par thal bar 'gyur ba'i phyir bum pa la sogs pa bzhin no zhes bya ba'o/ /de ston par byed pa ni/ gson po yi ni zhes bya ba la sogs pa'o/ /'di la bdag med ces bya ba ni gson po'i lus 'di la'am/ yang na bdag 'di la bdag med pa dang rang bzhin med pa med kyi/ 'on kyang yod par grub po zhes bya ba'i don to/ /ci ste rtag pa nyid dang khyab bdag nyid du ji ltar rtogs par bya zhes bya ba 'di la/ re zhig rnam phug pa tshad ma ston pa ni/ de ma yin pa'i dus su nga'i rab tu shes pa ni/ ma'i lto nas byung ma thag pa'i dus kyi bdag gi dang po'i rig par byed pa'i rab tu shes pa dag gis rig par bya ba yin te/ nga'i rab tu shes pa yin pa'i phyir bdag gi dang po'i rab tu shes pa bzhin no/ /de bzhin du sdug bsngal la sogs pa yang phyogs su bya'o/ /'di yang rtag pa nyid du rjes su dpag pa'o/ /da 'di nyid ston par byed pa ni/ shes pa phyi ma thams cad ni/ /zhes bya ba la sogs pa'o/ /de dang po bzhin zhes bya ba ni dus phyis byung ba'i shes pa de'i dang po ni de'i dang po'o/ /de nyid kyi khyab pa nyid bsgrub pa'i phyir tshad ma ston pa ni/ sa dang / chu dang / me dang / yid log par rtogs pa'i yul du gyur pa'i ches ring du gnas pa rnams ni nga'i bdag dang lhan cig 'brel pa yin te/ lus can nyid dang / shugs dang ldan pa dang / gzhan nyid dang / gzhan ma yin pa nyid dang / phan tshun yang dag par sbyor ba dang / rnam par dbye ba dang ldan pa dag gi phyir nga'i lus po bzhin no zhes bya'o/ /de ston pa ni yul thag ring por 'jug pa'i zhes bya ba la sogs pa'o/ /de ltar zhes bya ba la sogs pas mjug sdud pa'o/ /de'i phyir re zhig ces bya ba la sogs pas lan 'debs par byed do/ / sgrub byed dang po zhes bya ba ni nga'i zhes bya ba'i shes pa dang zhes bya ba la sogs pa de la grub pa la sgrub pa nyid de/ khyed cag gi shes pa rnams kho bo cag gis khyed kyi lus la sogs pa las tha dad pa thams cad mkhyen pa dang / nyan thos dang / rang sangs rgyas la sogs pa dang / de las gzhan pha rol gyi sems shes pa rnams kyis nyams su myong bar khas blangs pa'i phyir ro/ /gang yang skyes bu gzhan gyi shes pa bzhin no zhes bya ba'i chos mthun pa'i dpe de bsgrub par bya ba dang bral ba yin no zhes bstan pa'i phyir/ gsal bar byed pa ltos med par/ zhes bya ba la sogs pa smos te/ gang gi phyir skyes bu gzhan dang 'brel ba'i shes pa yang gsal bar byed pa gzhan la mi ltos par rang rig pa'i ngo bo nyid du skye ste/ des ni lus la sogs pa las tha dad pa'i rig par byed pas rig par bya ba nyid kyi bsgrub byas dpe 'di stong pa nyid yin no/ ci ste yang gzhan dag gis sems tsam dper brjod par mi 'dod mod kyi/ 'on kyang yul la sogs pa'i shes pa gang las yongs su 'dzin pa'i shes pa de'i rnam pa skye ba de 'dir dper brjod par 'dod do snyam na/ de yi rnam par nyer bsgyur bas/ /zhes bya ba la sogs pa smos te/ de lta na yang gang rang rig pa'i ngo bo nyid kyis shes pa rig par byed pa'i shes pa gzhan dang bral ba skye la/ des na the tshom du 'gyur te/ gtan tshigs ma nges pa yin no zhes bya ba'i tha tshig go/ /ci ste de yang rang las tha dad pa'i rig par byed pas rig par bya ba yin te/ skye ba dang 'jig pa'i chos dang ldan pa nyid dang / gzhal bya nyid dang / dran par bya ba yin pa'i phyir yul bzhin no zhes bya bar 'dod na de'i phyir 'di la yang bsgrub par bya ba las bzlog pa la gnod par byed pa med pa'i phyir bzlog pa ma nges so/ /shes pa phyi ma phyi mas nyams su myong na yang thug pa med do/ /gsal ba mi gsal ba can ni yul du mi 'grub ste/ de'i phyir yul gcig bsgrub pa'i phyir shes pa'i rgyud pa khas blangs na skyes bu'i tshe mtha' dag dgos so/ /ci ste yang thug pa med pas 'jig pas shes pa cung zad cig rang rig pa'i ngo bor skye'o zhes bya bar 'dod na/ de'i tshe de dag nyid kyi skye ba dang 'jig pa'i chos dang ldan pa'i phyir zhes bya ba la sogs pa'i gtan tshigs rnams ma nges pa yin no/ /de bzhin du shes pa gzhan dag la yang rang rig pa nyid khas len pa la sdang du ci yod/ ci ste yang de ni rig pa ma yin pa'i ngo bo nyid du 'dod na/ de lta na yang ma grub pa na shes pa snga ma snga ma thams cad la sgrub ste/ gsal ba mi gsal ba can yin pa'i phyir ro/ /de lta yin dang yul yang 'grub par mi 'gyur ro/ /rnam par shes par smra ba gang dag shes pa thams cad ni gzung ba dang 'dzin pa dang bral ba'i phyir rang nyid gsal ba yin gyi/ shes pa gzhan gyis rtogs par bya ba ni ma yin no zhes 'dod pa de la bsgrub par bya ba ma tshang ba'i nyes pa g.yo ba med pa nyid do/ /da bzhin du rgyu la rag las pa dang / skye ba dang ldan pa la sogs pa'i sgrub par byad pa gzhan dag la yang grub pa la sgrub pa la sogs pa'i skyon brjod par bya'o/ /gang yang yod pa la sogs pa zhes bya ba la sogs pa chos can khyad par du byas pa de yang snga ma bzhin du don med pa yin no/ /'di yang skabs su bab pa'i bsgrub bya sgrub pa la yan lag ma yin te/ 'di ltar nga'i mngon sum la sogs pa'i shes pa ni nga'i lus la sogs pa las tha dad pa'i rig par byed pas rig par bya ba yin te zhes bya ba 'di cam zhig gis ci zhig ma rtogs / mngon sum dang rjes su dpag pa la sogs pa'i rnam par dbye bas chos can rab tu dbye ba yang don med pa nyid yin te/ nga'i shes pa zhes bya ba de tsam zhig kho nas rtogs pa'i phyir ro/ /ji skad bshad pa'i khyad par gyis khyad par du byas pa'i chos can phyir rgol bdag lam grub pa nyid yin pa'i phyir gtan tshigs rnams gzhi ma grub pa kho na'o/ /ci ste yang 'bras bu med pa'i khyad par blangs nas/ de bsgrub pa'i don du sgrub byed gzhan nyid brjod pa de lta yin na/ skabs kyi don las skabs ma yin pa ma 'brel pa'i don can don gzhan ni tshar gcad pa'i gnas su 'gyur ro/ /gang yang 'dod pa la sogs pa/ /zhes bya ba la sogs pa smras pa de la/ 'di ltar 'dod pa la sogs pa / /zhes bya ba la sogs pa smos te/ de la 'dod pa la sogs pa'i rten rgyu tsam zhig sgrub na/ de'i tshe grub pa la sgrub ste / kho bo cag 'dod pa la sogs pa rgyu med par ni mi 'dod de/ gzhi yi sems dang sems byung rnams/ /zhes bshad pa'i phyir ro/ /yongs su rtog na ni zhes bya ba ni smra bar byed na zhes bya ba'i don to/ /ci ste gzhi'i mtshan nyid kyi rten sgrub na de'i tshe dam bcas pa'i don rjes su dpag pas gnod pa'i phyir des gtan tshigs la khyab pa mi 'grub po zhes ston pa ni / gal te de rten ni zhes bya ba la sogs pa'o/ /'dod pa la sogs pa de dag gi gzhi ni de'i rten yin no/ /dngos po lus can thur du ltung ba'i chos can yin na ltung ba'i gegs byas pas rten du brtag na/ gang dag bde ba la sogs pa ltung bas stong pa de dag la 'og tu ltung ba mi srid pa'i phyir/ ci zhig byed pa na bdag la sogs pa rten du 'gyur/ 'on te dper na bum pa la sogs pa cung zad mi byed pa rnams kyang rgya shug la sogs pa'i rten ma yin nam/ de bzhin du bde ba la sogs pa'i rten du 'gyur ro zhe na/ rgya shug 'bras bu zhes bya ba la sogs pa smos te/ ltung ba'i gegs dag byed phyir ram/ /zhes bya ba ni skad cig ma ma yin pa'i phyogs la'o/ /khyad par skyed par byed phyir ro/ /zhes bya ba ni skad cig ma'i phyogs la'o/ /khyad par skyed par byed pa ni nye bar len pa'i rgyu dang yul mtshungs par skyed par byed pa'o/ /'dod pa la sogs pa de dag la rnam pa 'di gnyi g.yang mi srid pa'i phyir/ de dag la rten 'ga' yang rigs pa ma yin no/ /gang yang dngos po yod pa'i zhes bya ba'i khyad par de ni don med pa nyid yin te/ rnam par gcad par bya ba med pa'i phyir ro zhes bstan pa'i phyir/ 'jig pa'i ngo bo med pa la/ /zhes bya ba la sogs pa smos te/ gal te 'jig pa'i 'bras bu yin par gyur na de'i tshe rnam par gcad par bya ba'i phyir/ dngos po yod pa'i zhes bya ba'i khyad par don dang bcas par 'gyur na/ ji tsam du de dngos po med pa'i phyir rgyu dag gis cung zad kyang bya ba ma yin pa'i phyir ji ltar rgyu dang ldan par 'gyur/ sbyor ba ni gang dngos po med pa de ni 'ga'i yang 'bras bu ma yin te/ dper na ri bong gi rwa bzhin no/ /'jig pa yang dngos po med pa yin no zhes bya ba ni khyab byed 'gal ba dmigs pa'o/ /'bras bu yin na dngos po nyid du thal bar 'gyur te/ bde ba la sogs pa bzhin no zhes bya ba 'di ni 'dir gnod pa can gyi tshad ma'o/ /gzhan yang khyed cag khas blangs pa dang 'gal ba yang yin te/ 'di ltar 'bras bu zhes bya ba ni rang gi rgyu dang 'du bas sam/ yod pa dang 'du bas bdag thob pa zhes brjod pa ni khyed cag gi nges pa yin no/ /rdzas la sogs pa'i rang bzhin dang bral ba'i 'jig pa la ni rang gi rgyu la 'du ba 'am/ de la yod pa dang med pa yang ma yin te/ de ni ngo bo med pa yin pa'i phyir ro/ /de lta ma yin na 'di na 'di rdzas la sogs pa bzhin du ston pa dang dngos por yang 'gyur ba'i phyir gtan tshigs kyi khyad par gyis rnam par dpyad par bya ba cung zad du yang mi 'gyur ro/ /de'i phyir dngos po yod pa zhes bya ba'i khyad par don med do/ /gzugs sogs shes pa zhes bya ba la sogs pa la/ ma rig pa yis zhes bya ba la sogs pa smos te/ ngas mthong ngo / / ngas thos so zhes bya ba de lta bu'i shes pa po gcig gi rgyu mtshan gyis shes pa rnams sbyor ba'i mtshan nyid kyi mtshams sbyor ba gang yin pa de 'di ma nges pa yin te/ 'di ltar dngos po skad cig ma rnams la yang 'khrul pas byed pa po gcig tu mngon par rlom pas mtshams sbyor ba srid pa'i phyir ro/ / de lta bas na de lta bur gyur pa'i mtshams sbyor ba las dngos po rnam par 'jog par rigs pa ma yin no/ /yang ji ltar skad cig ma mang bo mtshams sbyor ba'i rgyu mtshan du 'gro ba yin zhe na/ nus pa'i dbye bas tha dad kyang / /zhes bya ba la sogs pa smos te/ nus pa'i khyad par las don du ma yin yang gcig gi rnam par mtshams sbyor ba la sogs pa 'bras bu gcig ni rgyu mtshan gyi rgyur 'gyur te/ dper na sle tres la sogs pas rims la sogs pa zhi bar byed do zhes bya ba 'og nas rgyas par ston par 'gyur ro/ /ci ste yang 'di'i 'khrul pa nyid ji ltar nges she na/ gzugs dang sgra sogs zhes bya ba la sogs pa smos te/ gal te bdag la sogs pa rtag pa gcig pu snga ma dang phyi ma'i dus su rjes su 'gro ba'i 'bras bu sngon po la sogs pa'i shes pa de dag yin par gyur na/ de'i tshe de dag gis rim gyis 'byung ba dang 'gal te/ rgyu ma tshang ba med pa nyid kyis cig car kho nar skye bar thal bar 'gyur ba'i phyir ro/ /rtag pa ni gzhan la ltos pa yang ma yin te/ de ni 'ga' zhig gis phan gdags par bya ba ma yin pa'i phyir ro/ /gzhan yang gal te spyir gcig rgyu sngon du 'gro ba tsam sgrub na / de'i tshe grub pa la sgrub pa yin no zhes ston pa ni/ rnam shes gcig gi mjug thogs su/ /zhes bya ba la sogs pa smos te/ 'di ltar shes pa gcig gi mjug thogs su ste/ mtshungs pa de ma thag pa'i rkyen gcig las mig la sogs pa'i rnam par shes pa drug po skye ba gsal por shes te/ 'di ltar gang kho na'i tshe gar mkhan gyi gzugs mthong ba de kho na'i tshe rnga zlum la sogs pa'i sgra thos shing / ut+pal la sogs pa'i dri snom pa dang / ga phur la sogs pa'i ro myang ba dang / bsil yab kyi rlung la sogs pa'i reg bya nyams su myong bar 'gyur zhing / yid kyis gos sbyin par bya'o snyam du sems par byed do/ /mgal me'i 'khor lo mthong ba bzhin du mthong ba myur bar rgyu ba'i phyir ro zhes brjod pa yang mi rigs te/ mi gsal bar snang bar thal ba'i phyir ro/ /'di ltar khyed cag gis mthong ba la sogs pa rnams mtshams sbyor ba la cig car bzung bar mngon par rlom pa 'di brjod pa yin te/ mtshams sbyor ba yang dran pas byas pa yin la/ de yang 'das pa'i yul can yin pa'i phyir mi gsal ba yin no/ /cig car gzugs la sogs pa snang ba 'di ni gsal ba kho nar rig go/ /gzhan yang sa ra la sogs pa yi ge 'dzin pa'i shes pa rnams skye ba yod pa'i phyir sa ra ra sa la sogs pa de la yang chos cig car 'dzin par rlom par 'gyur ro/ /de lta yin dang 'ga' zhig bzung yang rim par nges pa ma yin te/ 'di yang 'og nas rgyas par 'chad par 'gyur ro/ /'di ni gsal ba zhes smos pas lan phyogs tsam zhig bstan pa yin no/ /ci ste rtag pa dang / gcig pu'i dngos po'i rgyu nyid yin pa'i phyir / 'di dag ni gcig gi rgyu mtshan nyid du sgrub par byed na de'i tshe khyab pa rjes su dpag pas gnod pa nyid du ston pa ni/ rim bzhin pa ni zhes bya ba la sogs pa ste/ de ma thag tu zhes bya ba ni gcig rjes shugs las zhes bya ba la sogs pas so/ /de la gnod par byed pa'i rjes su dpag pa 'di yin te/ gang dag rgyu nus pa thogs pa med pa nye ba de dag ni cig car 'byung ba yin te / dper na tshogs pa tshang ba cig car 'byung ba'i myu gu la sogs pa lta bu'o/ /lha sbyin gyi gzugs la sogs pa'i yul can gyi shes pa yang rgyu nus pa thogs pa med pa nye ba yin no zhes bya ba ni rang bzhin gyi gtan tshigs so/ /de ltar 'gyur ba yang ma yin te/ de'i phyir bzlog pa yin no/ /dpe yang bsgrub bya dang mi ldan pa yin no zhes ston pa ni/ gar mkhan gyi smin ma zhes bya ba la sogs pa'o/ /gar mkhan gyi smin ma bskyod pa la sogs pa ni gcig ma yin te/ de ni rdul phra rab du ma 'dus pa'i bdag nyid yin pa'i phyir ro/ /gal te de lta na ji ltar de sgra gcig gi yul du 'gyur zhe na/ de la gcig tu btags pa'i phyir/ /zhes bya ba smos so/ /'on te btags pa'i rgyu mtshan yang gang yin zhe na/ 'bras bu gcig la nyer sbyor phyir/ /zhes bya ba la sogs pa smos te/ gang gi phyir smin ma bskyod pa 'di mig gi rnam par shes pa la sogs pa 'bras bu gcig la nye bar sbyor te/ de lta bas na tha dad kyang sgra gcig gi yul du 'gyur ro/ /ci ste yang kho bo cag gis rnam pa de lta bu'i rtag pa gcig bsgrub par bya bar 'dod de/ des na dpe bsgrub bya dang bral bar mi 'gyur ro zhe na/ gal te bsgrub bya yang zhes bya ba la sogs pa smos te/ de lta na ni grub pa la sgrub ste/ shes pa gcig gi rgyu mtshan gyi 'du byed snga ma dang phyi mar gyur pa rnams gcig tu yod par gdags pa'i yul yin pa'i phyir ro/ /gang yang ji ltar bdag ces bya ba'i tshig ces bya ba la sogs pa de la/ nged kyi blo dang sems sogs kyi/ /zhes bya ba la sogs pa smos te/ tshig gcig yin pa'i phyir zhes bya ba'i gtan tshigs ma nges pa yin te/ 'di ltar blo dang / dbang po dang / tshor ba dang / lus kyi rnam grangs ni blo ni sems dang shes pa'o/ /dbang po ni a k+Shi dang / tshor ba ni rig pa'o/ /lus ni sku dang lus so zhes bya ba la sogs pa yin te/ tshig gcig yin pa'i phyir na yang kho bo cag gi lugs la de las tha dad pa'i dang po'i dngos po brjod par bya ba ma yin pa'i phyir/ des na gtan tshigs mi mthun pa'i phyogs las ldog par ma grub pa'i phyir ma nges pa nyid yin no/ /'on te 'di nyid dogs par byas nas/ rnam grangs nges par grub pa las tha dad pa zhes bya ba'i gtan tshigs de'i khyad par brjod pa ma yin nam/ de ji ltar ma nges par 'gyur zhe na/ de lta bas na 'di la brjod pa/ gtan tshigs kyi khyad par 'di ni ma grub po/ ci'i phyir zhe na/ sems kyi rnam grangs su gnas pa'i phyir ro/ /bdag ces bya ba'i tshig 'di sems kyi rnam grangs nyid du rnam par gzhag pa'i phyir ro/ /ji skad du/ sems nyid nga rgyal gyi rten yin pa'i phyir/ bdag ces btags pa yin no zhes bshad do/ /nye bar btags te tha snyad du byas zhes bya ba'i don to/ /des na gang yang gsal byed pas dngos kyi don mi srid pa'i phyir nye bar btags par mi rigs so zhes bshad pa de ni bsam pa yongs su ma shes pa'i phyir ro zhes gzung bar bya'o/ /'di nyid brjod ces bya ba 'dis gsal bar byed do/ /de lta bas na gtan tshigs kyi khyad par ma grub po/ kun rdzob tu yul dang bcas pa nyid du khas blangs nas gtan tshigs 'di ma nges pa nyid du bstan to/ /gal te don dam par blo la sogs pa las tha dad pa'i don rjod par byed pa nyid du sgrub na/ de'i tshe khyab pa rjes su dpag pas gnod pa'i phyir gtan tshigs 'di rigs pa ma yin no zhes bstan pa'i phyir/ don dam du zhes bya ba la sogs pa smos te/ sgra'i tha snyad thams cad kyi yul ni sgro btags pa'i don yin pa'i phyir ro zhes 'og nas ston par 'gyur ro/ /de'i phyir bdag gi sgra 'di yul med pa yin pas/ ji ltar gtan tshigs bsgrub byas khyab par 'gyur snyam du dgongs pa'o/ /khyad par dang bcas pa yin na yang gtan tshigs ma nges pa yin no zhes bstan pa'i phyir/ nam mkha'i dkyil gyi pad+ma sogs/ /zhes bya ba la sogs pa smos te/ dper na nam mkha'i me tog la sogs pa gtan med pa la 'ga' zhig gis byed pa po la sogs pa'i tshig sbyor ba de'i tshe gnyi ga la grub pa'i lus la sogs pa'i rjod par byed pa'i sgra tha dad pa yin na tshig gcig yod de/ lus la sogs pa las tha dad pa'i dngos po'i yul nyid ma yin pas gtan tshigs ma nges pa yin no/ /yang ji ltar nye bar brjod pa med pa la sogs pa'i tshig sbyor bar nus she na/ brda tsam gyis ni 'jug pa yi/ /zhes bya ba smos te/ rang dbang can 'dod pa tsam gyis yod pa brda de tsam gyis 'byung ba'i tshig 'di dag ji ltar de 'ga' zhig tu 'jug pa'i rgyun bzlog par 'gyur/ ci ste yang gtan tshigs kyi don de yang rang bzhin gyi tshig gcig yin pa'i phyir zhes bya ba 'di brjod par 'dod do / /des na 'khrul par mi 'gyur ro zhe na/ bdag la sogs pa'i tshig dag kyang / /zhes bya ba la sogs pa smos te/ sgra rnams brda med par rang bzhin gyis don gsal bar byed pa ma yin te/ ma byang ba yang de las don rtogs par thal ba'i phyir dang / rang gi 'dod pas sbyor ba med par thal ba'i phyir dang / brda don med par thal ba'i phyir ro/ /de lta bas na bdag la sogs pa'i tshig rnams ni ngo bo nyid kyis don gsal bar byed pa grub pa ma yin pa'i phyir gtan tshigs ma grub pa yin no/ /ci ste snang bral gyis khyad par med pa'i gzhi'i dngos po gzhan du gyur pa'i shes bya'i yul yin pa zhes bya ba'i khyad par gzhan med par byed pa de lta na yang ji skad du bshad par khyad par ma grub pa'i phyir gtan tshigs ma grub pa dang / khyab pa med pa'i phyir ma nges pa yin no/ /gang yang gson po'i lus po 'di/ /zhes bya ba la sogs pa smos pa de la/ gal te bdag dang lhan cig tu/ /zhes bya ba la sogs pa smos te/ gal te srog la sogs pa bdag dang lhan cig de'i bdag nyid kyi mtshan nyid dam/ de las byung ba'i mtshan nyid kyi 'brel pa 'ga' zhig grub pa yin zhe na/ de'i tshe bdag log pa na lus la srog la sogs pa ldog par thal ba rigs pa dang ldan par 'gyur gyi/ de lta ma yin na 'brel pa med pa log na gzhan ldog par thal ba 'brel pa med pa nyid du 'gyur te/ ha cang thal bar 'gyur ba'i phyir ro/ /mo gsham gyi bu log pa na de dang 'brel pa med pa srog la sogs pa ldog pa ni ma yin no/ /de'i phyir ji ltar mo gsham gyi bu log pa na de dang 'brel pa med pa'i srog la sogs pa rnams kyang ldog par 'gyur te/ bum pa la sogs pa bzhin no zhes kha cig gis thal ba sgrub par byed pas na ma nges par 'gyur ba de bzhin du khyod la yang bdag log pa na srog la sogs pa ldog par thal ba ni ma nges pa nyid yin no / /'brel pa ma grub pa'i phyir ro snyam du dgongs pa yin no/ /yang ji ltar 'brel pa ma grub pa yin snyam na/ 'di la re zhig de'i bdag min/ /zhes bya ba la sogs pa smos so/ /de dag tha dad khas len phyir/ /zhes bya ba ni bdag dang srog la sogs pa de dag la de'i bdag nyid kyi mtshan nyid kyi 'brel pa yod pa ma yin te/ rang bzhin tha dad par khas len pa'i phyir ro/ /'di ltar srog la sogs pa ni mi rtag pa dang / ma khyab pa dang / lus can ma yin pa yin la/ bdag ni de dag las bzlog pa yin no/ /de las byung ba'i mtshan nyid kyang ma yin te/ srog la sogs pa rnams rgyu ma tshang ba med pa nyid kyis cig car bar thal bar 'gyur ba'i phyir ro/ /de dag las ma gtogs pa'i 'brel pa gzhan yang yod pa ma yin no/ /de'i phyir 'brel pa dang bral ba'i srog la sogs pa lus de gson pos khyad par du byas pa'i lus la ci'i phyir ldog ste mi ldog pa nyid do/ /des na gtan tshigs ma nges pa yin no snyam du dgongs pa yin no/ /'dis ni 'dod pa dang / sdang ba dang / 'bad pa dang / sdug bsngal dang / bde ba dang / shes pa la sogs pa dag gi rtags nyid du gzhan dag gis smras pa gang yin pa de dag bkag par blta bar bya ste/ 'brel pa ma grub pa'i phyir ro/ /sbyor ba ni gang dag gang dang 'brel pa med pa de dag ni de'i go bar byed pa ma yin te/ dper na til la sogs pa la chu skyar 'gro ba la sogs pa bzhin no/ /srog la sogs pa yang bdag la 'brel pa med pa yin no zhes bya ba ni khyab par byed pa mi dmigs pa'o/ /ma grub pa yang ma yin te/ 'brel pa rnam pa gnyis ka yang gong du bkag zin pa'i phyir ro/ /ma nges pa yang ma yin te/ thams cad thams cad kyi go bar byed pa nyid du thal bar 'gyur ba'i phyir ro/ /'gal ba yang ma yin te/ mthun pa'i phyogs la yod pa'i phyir ro zhes bya ba'o / /gang yang byed pa grub pa'i phyir byed pa po grub pa ma yin no zhes smras pa de yang ma grub pa ste/ mig la sogs pa rnams ni don dam par byed pa nyid du ma grub ste/ thams cad mig gi rnam par shes pa skyed pa la rgyu'i dngos por mtshungs pa'i phyir dang / byed pa po dang byed pa'i las kyi tha snyad ni rang gi 'dod pa tsam gyis yongs su brtags pa'i phyir ro/ /byed pa po tsam sgrub na grub pa la sgrub ste/ lus la sogs pa brtags pa'i byed pa po 'dod pa'i phyir ro/ / don dam pa'i byed pa po nyid sgrub par byed na ma nges pa yin te/ de lta bur gyur pa'i byed pa po 'ba' zhig tu yang mig la sogs pa rnams 'brel par ma grub pa'i phyir ro/ /gang yang / skyes ma thag pa'i dang po'i shes/ /zhes bya ba la sogs pa smras pa de la / de ltar sgrub byed thams cad kyis/ /zhes bya ba la sogs pa smos te/ dang po'i shes pa bzhin nga'i lus bzhin no zhes bya ba'i dpe smras pa gang yin pa de ji skad du bshad pa'i bsgrub bya'i chos dang bral ba yin te/ bdag ma grub pa'i phyir ro/ /de bas na gtan tshigs ma nges pa yin no/ /gzhan dag ces bya ba las yang gsal bar byed pa dang / legs ldan pa la sogs pa'i lugs kyis dogs pa bsu ba yin te/ de dag 'di skad ces smra ste/ bdag mngon sum nyid kyis grub ste/ 'di ltar rtags dang rtags can gyi 'brel pa dran pa la ltos pa med par nga'o snyam pa'i shes pa ni/ gzugs la sogs pa'i shes pa bzhin du mngon sum yin no/ /'di yang gzugs la sogs pa'i yul can ma yin te/ de'i shes pa las tha dad du snang ba'i phyir ro/ /de lta bas na bdag kho na yul yin no snyam na/ de ni mi rigs zhes bya ba la sogs pas lan 'debs par byed do/ /bdag nga rgyal gyi yul nyid du ma grub ste/ de'i rnam pas stong pa'i phyir ro/ /sbyor ba ni gang zhig gang gi rnam pas stong pa de ni de'i yul can ma yin te/ dper na mig gi shes pa sgra'i yul can ma yin pa bzhin no/ /nga'o snyam pa'i shes pa yang bdag gi rnam pas stong pa yin no zhes bya ba ni khyab par byed pa mi dmigs pa'o/ /gtan tshigs 'di ma grub pa yang ma yin no zhes ston pa ni/ de la rtag dang khyab byed sogs/ /zhes bya ba la sogs pa'o/ /'di ltar bdag ni rtag pa dang / khyab pa dang / sems pa med pa can la sogs pa'i yon tan dang ldan par 'dod la/ nga'o snyam pa'i shes pa 'di la rtag pa la sogs par snang ba yang mi mngon no/ /'on kyang tha dad par bdag dkar sham mo/ /mi gzhan pa'o/ / rid pa'o/ /tshor ba drag pos gzir ba'o zhes bya ba la sogs pa lus kyi gnas skabs kyi reg pas bskyed pa'i phyir kha dog dkar sham la sogs pa'i mtshan nyid du snang ba'i rnam pa'i nga rgyal can 'dir shes te/ de'i phyir lus la sogs pa'i gnas skabs kyi reg pas bskyed pa'i nga rgyal lus la sogs pa la dmigs pa yin no zhes bya bar shes so/ /gsal bar zhes bya ba ni gsal por te 'khrul pa med par 'jug pa'i phyir ro/ /de lta yin dang gang yang gsal byed pa la sogs pa rnams kyis longs spyod pa'i gnas kyi lus la bdag 'di nye bar 'dogs te/ dper na rjes su mthun pa'i g.yog la rgyal pos smras pa nga gang yin pa de kho na bdag gi g.yog po 'di yin no zhes bya ba lta bu'o zhes smras pa de gsal ba yin no/ /'di ltar gal te 'di phal pa yin par gyur na de'i tshe 'khrul pas 'jug par 'gyur te/ 'jig rten na seng ge dang bram ze'i khye'u dag la dngos dang btags pas de gnyi ga yang seng ge'o snyam du blo mi 'khrul par 'jug par mi 'gyur ro/ /nga'i lus la sogs pa zhes tha dad par mthong ba'i phyir lus la sogs pa la nga'o snyam pa ni 'khrul pas 'jug pa yin te/ bdag la yang 'khrul pas 'jug pa nyid du thal bar 'gyur pa'i phyir ro/ /de la yang nga'i bdag ces tha dad par mthong ba yin no/ /'di la btags pa'i tha dad pa yin no zhe na/ gcig shes pa la yang mtshungs so/ /'o na bdag dkar sham mo zhes bya ba la sogs pa'i shes pa 'di dngos yin la rag mod/ de lta na yang ci'i phyir bdag 'di'i yul du mi 'gyur zhe na/ de'i ngo bor zhes bya ba la sogs pa smos te/ dkar sham la sogs pa'i rang bzhin te/ de la gzugs la sogs pa'i yon tan med pa'i phyir ro/ /de ltar re zhig de'i rnam pas stong pa'i phyir nga rgyal gyi yul bdag yin par mi rigs par bstan to/ /de la rtsod pa med par thal bar 'gyur ba'i phyir yang mi rigs so zhes ston pa ni/ gal te skyes bu yang bdag tu/ /zhes bya ba la sogs pa ste/ de yod sogs zhes bya ba ni bdag de'i yod pa dang rtag pa dang khyab pa la sogs pa'o/ /'di snyam du ji ltar khyed cag gis mngon sum du byas kyang sngon po la sogs pa de'i rang bzhin las tha mi dad pa'i skad cig ma la sogs pa la rtsod pa 'jug pa de bzhin du bdag la yang 'gyur ro snyam du sems na/ 'di ltar zhes bya ba la sogs pa smos te/ sngon po la sogs pa mngon sum gyis gzung na yang de las tha mi dad pa'i skad cig ma la sogs pa rtsod pa rigs te/ mngon sum de ni rtog pa med pa nyid kyis ma nges pa'i bdag nyid yin pas skad cig ma nyid la sogs pa ma nges pa'i phyir ro/ /khyed kyi phyogs la ni mi rigs te/ nga'o snyam pa'i shes pa rtogs pa dang bcas pa nyid kyis nges pa'i bdag nyid yin pas bdag nges pa'i phyir ro/ /gang gis rtsod par 'gyur ba nges pas yul du byas pa'i dngos po la ni de las bzlog pa'i rnam pa 'dzin pa'i sgro 'dogs pa'i shes pa 'jug pa yod pa yang ma yin te/ de dag ni lhan cig mi gnas pa nyid kyis gnod par bya ba dang / gnod par byed pa'i ngo bo yin pa'i phyir ro / /de nges pa gang yin pa 'di nyid nges pa rnams kyi rang rang gi don rtogs pa yin no/ /gal te de dag nges pa dang ldan pa ma yin nam ma bzung ba kho nar 'gyur ro/ /de'i phyir de ltar gzhan gyi phyogs bsal bas rang gi phyogs gzhag pa'i phyir/ de'i phyir zhes bya ba la sogs pa smos so/ /sbyor ba ni gang dag rim gyis skye ba de dag ni bdag dang 'du ba ma yin te/ dper na sa bon dang myu gu la sogs pa bzhin no/ /bde ba la sogs pa yang rim gyis skye ba yin no zhes bya ba ni 'gal bas khyab pa dmigs pa'o/ /bdag dang 'du ba nyid dang 'gal ba bdag med pa dang 'du bas rim gyis skye ba la khyab pa'i phyir ro/ /rgyu ma tshang ba med pa nye ba'i phyir cig car skye bar thal bar 'gyur ba ni bzlog pa la gnod pa can gyi tshad ma'o/ /yang na gang dag dngos po nyid dang / byas pa nyid dang / skye ba dang ldan pa nyid la sogs pa'i chos dang ldan pa de dag thams cad ni bdag med pa yin te/ dper na phyi rol gyi bum pa la sogs pa bzhin no/ /nang gi srog dang lus dang / yid dang blo dang sdug bsngal dang / bde ba la sogs pa yang dngos po nyid la sogs pa'i chos dang ldan pa yin no zhes bya ba ni rang bzhin gyi gtan tshigs so/ /yang ji ltar 'di la khyab pa grub ce na/ bdag bcas nyid na zhes bya ba la sogs pa smos te/ gal te bdag dang bcas pa nyid yin te/ lus la sogs pa bdag gis byin gyis brlabs pa nyid yin na/ de'i tshe 'di dag gi rgyu bdag yin par 'gyur ro/ /rgyu ma yin pa ni byin gyis rlob pa por rigs pa ma yin te/ ha cang thal bar 'gyur ba'i phyir ro/ /de lta yin dang de'i rgyu can te/ bdag gi rgyu can gyi lus la sogs pa rnams rgyu ma tshang ba med pa nyid kyis rtag pa nyid dang / rim can ma yin par thal bar 'gyur ro gal te 'di snyam du 'di dag rtag pa nyid du thal ba yin mod kyi/ 'on kyang dngos po nyid la sogs pa mi ldog pa kho na'o snyam du sems na/ rtag pa yang zhes bya ba la sogs pa smos te/ rtag par yod pa'i lus la sogs pa rnams don byed nus pa ma yin par thal bar 'gyur ro zhes bya ba'i skabs ni shugs kyis tshig yongs su bsgyur nas sbyar bar bya ste/ rtag pa ni rim dang cig car dag gis don byed par 'gal ba'i phyir ro snyam du dgongs pa yin no/ /don byed par nus pa log na yang dngos po nyid ldog ste/ dngos po'i mtshan nyid ni don byed nus pa yin pa'i phyir ro / / dngos po nyid log na dngos po'i chos yod pa la sogs pa yang ldog pa'i phyir khyab pa grub po/ /gsal byed pas 'on te yang bdag med pa zhes bya ba'i don ci zhig bsgrub bya nyid du 'dod/ gal te re zhig bdag la phan 'dogs par byed pa ma yin no zhes bya ba yin na dpe med de/ bdag la phan 'dogs par byed pa ma yin pa ni 'ga' yang yod pa ma yin no/ /'on te lus bdag ma yin no zhes bdag 'gegs na su zhig gis lus bdag tu 'dod/ med pa ni tshig phyi ma'i yul can yin pa'i phyir bdag dang bcas pa zhes bya ba yang gang zhig yin pa brjod par bya'o/ /dper na sbrang bu med do zhes bya ba lta bur med pa'i sbyor ba tshig phyi ma med par ma mthong ngo / /ci ste lus la bdag 'gegs na grub pa la sgrub pa yin te/ lus la bdag yod par su zhig 'dod/ yang lus bdag dang 'brel pa ma yin no zhes bya ba yin na yang dpe yod pa ma yin no/ /'di thams cad ni khyad par bkag pa yin la/ khyad par bkag na yang spyi rtogs pa ma yin no/ /de lta yin na gang dgag par bya ba de rjes su gnang ba byas par 'gyur ro/ /ci ste bdag gi sgra ni mi rtag pa'i yul can yin te sgra yin pa'i phyir ro zhes sgrub pa de lta na yang rtag pa'i sgras ma nges pa yin no/ / lus la sogs pa rnams ni nye bar btags nas bdag gi sgras brjod par bya ba yin pa'i phyir grub pa la sgrub pa yin no/ /gal te lus la sogs pa las tha dad pa mi rtag pa'i dngos po yin pa nyid kyis bdag gi sgra'i yul mi rtag pa yin par sgrub par byed na/ de lta na yang gzugs la sogs pa las tha dad pa'i yul khas blangs pa'i phyir 'gal ba yin no zhes smras pa/ de 'di la lan 'debs par byed pa ni/ bum sogs la yang mtshungs zhes bya ba la sogs pa smos te/ klan ka de 'di ni khyed la yang mtshungs te/ 'di ltar khyed cag gis kyang phyi rol gyi bum pa la sogs pa rnams la bdag gis byin gyis brlabs pa med pa nyid dang / de nye bar longs spyod pa'i gzhi ma yin pa nyid kyis bdag med par 'dod pa kho na'o/ /de lta ma yin na gson po'i lus ni bdag med pa ma yin te/ srog la sogs pa dang mi ldan par thal bar 'gyur ba'i phyir bum pa la sogs pa bzhin no zhes bya ba'i thal bar 'gyur ba'i dpe nyid du de dag mi len par 'gyur ro/ /de lta yin dang bum pa la sogs pa de la yang ji ltar de dag bdag med pa yin/ gal te re zhig bdag la phan 'dogs par byed pa ma yin zhes bya ba la sogs pa la klan ka mtshungs pa yin no/ /de'i phyir bdag gis byin gyis brlabs pas sam/ de nye bar longs spyod pa'i gzhi ma yin pa'i rnam pa gang gis phyi rol gyi bum pa la sogs pa de dag thams cad la khyed cag dang yang bdag med pa nyid thun mong du grub la/ gang yang gson po'i lus 'di ni bdag med pa ma yin te zhes khyed cag gis gson po'i lus la 'gegs te/ gang zhig bkag pas gson po'i lus kho na bdag dang bcas par rtogs kyi/ shi ba'i lus dang bum pa la sogs pa ni ma yin no/ /de nyid kho bo cag gis gson po'i lus ni bdag med pa ma yin te/ dngos po nyid la sogs pa'i phyir ro zhes sgrub par byed do/ /de lta bas na bdag la phan 'dogs par byed pa ma yin no zhes bya ba la sogs pa'i rnam par rtog pa ni gzhi med pa kho na yin te/ khyed cag la yang med par rab tu grub pa'i phyir ro / /gzhan yang re zhig bdag la phan mi 'dogs par grub pa'i dpe med do zhes gang smras pa de yang yang dag pa ma yin te/ 'di ltar sgrub par nus pa kho na ste/ gang zhig gang gis rang bzhin gyi khyad par skyed par byed pa ma yin pa de ni de'i phan 'dogs par nus pa ma yin te/ dper na gangs can dang 'bigs byed dag lta bu'o/ /lus la sogs pa yang bdag rtag pa dang gcig pu'i rang bzhin gyi khyad par skyed par byed pa ma yin no zhes bya ba ni khyab par byed pa mi dmigs pa'o/ /gtan tshigs ma grub pa yang ma yin te/ rang bzhin gyi khyad par ni bdag las tha mi dad pa'i phyir ro/ /de byed na bdag kho na'i byed par 'gyur te/ de lta na mi rtag par thal bar 'gyur ro/ / rang bzhin gyi khyad par tha dad pa yin na yang 'brel pa'i rgyu mtshan med pa'i phyir de'i 'di zhes bya ba'i 'brel bar mi 'gyur ro/ /de lta bas na rtag pa la cung zad kyang phan 'dogs par byed pa ma yin te/ des de la cung zad kyang mi byed pa'i phyir ro/ /gang yang su zhig gis lus bdag tu 'dod ces smras pa de yang yang dag pa ma yin te/ de skad du smra ba kha cig kyang yod de/ dper na rig byed smra ba rnams ltar gang dag lus la sogs pa rnams ni bdag yongs su 'gyur ba'i ngo bo yin par smra bar byed do/ /de lta bas na de la brten nas dgag pa byed do/ /gang yang med pa ni tshig phyi ma'i yul can yin pa'i phyir bdag dang bcas pa yang gang zhig yin pa brjod par bya'o zhes smras pa de yang 'brel pa med de/ tshig phyi ma'i don yod pa kho na dgag par bya ba ma yin te/ 'o na ci zhe na/ sgro btags pa yin te/ yod pa dgag par mi nus pa'i phyir ro/ /de lta bas na gzhan gyis 'khrul pas sgro btags pa'i don gang yin pa de nyid tshig phyi ma'i don yin no/ /'di lung de nyid rjes su brjod nas gzhan gyi log pa'i shes pa nyid du brjod par bya ba 'gegs par byed do/ /de lta ma yin na sgron ma la sogs pa skad cig ma ma yin no zhes bya ba la sogs par sangs rgyas pas kun du btags pa'i skad cig ma nyid khyed kyis 'gegs par byed na dgag pa'i sbyor ba tshig phyi ma med pa la mthong ngo zhes bya ba'i rtsod pa 'di 'byung ba kho na'o/ /gang yang lus la bdag yod par su zhig 'dod ces smras pa de yang yang dag pa ma yin te/ 'di ltar gang dag gi lta ba la bdag ces bya ba mthe bo'i ri mo sngo bsangs 'dra ba'i 'bras bu phyed kyi tshad yin pa de dag gi lugs kyis bdag lus can yin pa'i phyir lus la gnas par yod pa nyid yin pas de dgag par rigs pa nyid yin no/ /gang yang lus bdag dang 'brel pa 'gegs na dpe med do zhes bya ba yang ma grub ste/ phan tshun phan gdags par bya ba dang phan 'dogs par byed pa med pa'i phyir gangs can dang 'bigs byed bzhin du bdag dang lus gnyis 'brel pa med do zhes snga ma bzhin du bsgrub par nus pa'i phyir ro/ /gang yang khyad par bkag na spyi rtogs pa yin no zhes bya ba de ni ma nges te/ khyed cag gis sgron ma la sogs pa rnams skad cig ma nyid yin pa bkag na yang skad cig ma'i spyi 'ga' zhig khas mi len pa'i phyir ro / /ci ste yang kho bo cag gis dus yun mi ring bar gnas pa'i rgyu mtshan gyis sgron ma la sogs pa skad cig ma'i sgra 'jug par 'dod pa kho na yin te/ de lta bas na spyir skad cig ma nyid grub pa yin no snyam na/ gal te de [(]ltan [,]lta na [)]bdag gi sgra 'jug pa yang kho bo cag gi nga rgyal gyi rten sems yin par 'dod pa nyid yin pas spyir bdag grub po/ /gang yang ci ste bdag gi sgra ni mi rtag pa'i yul can yin te zhes bya ba la sogs pa phyogs gnyis smras ba de yang 'brel pa med pa nyid de/ khas ma blangs pa'i phyir ro/ /rang gis 'khrul par 'gyur ba bdag gi sgra la don dam par yul 'ga' zhig kyang khas ma blangs la/ gzugs la sogs pa las tha dad pa yang ma yin no/ /rtag pa'i sgra yang don dam par dngos po rtag pa 'ga' zhig la 'jug par grub pa yang ma yin no/ /lus la sogs pa la bdag gi sgra nye bar btags nas 'jug pa ma yin te/ 'khrul pa med par rtogs pa'i phyir ro zhes bstan te/ des na grub pa la sgrub pa ma yin no/ /de'i phyir de ltar na bdag ces bya ba'i chos can tshad mas gnod pa nyid kyis ma grub pa'i phyir de la khyed kyis byed pa po nyid dang za ba po nyid kyi tha snyad btags pa gang yin pa de mo gsham gyi bu bzhin du rten med pa yin pa'i phyir 'di'i sun 'byin pa logs shig tu mi byed de/ /rten bkag pa nyid kyis 'di dag spangs pa'i phyir ro / /byas pa chud zos pa dang ma byas pa dang phrad pa'i skyon yang ji ltar mi 'byung ba de ltar las dang 'bras bu'i 'brel pa brtag par ston par 'gyur ro/ /de kho na nyid bsdus pa'i dka' 'grel las rigs pa can dang bye brag pas kun du brtags pa'i skyes bu brtag pa ste bdun pa'o// //dpyod pa pas yongs su brtags pa'i bdag gsal bar bya ba'i phyir/ gzhan dag kyang ni ldog pa dang / /zhes bya ba la sogs pa smos te/ ldog pa ni bde ba dang sdug bsngal la sogs pa'i gnas skabs dag gi phan tshun tha dad pa'o/ /rjes su 'jug pa ni sems pa can gyi rdzas dang / yod pa la sogs pa rjes su 'gro ba'o zhes pa dang / rjes su 'jug pa 'di dag bdag gi ngo bo gang la yod pa zhes tshig rnam par sbyar ro/ /'di skad du bstan pa yin te/ gzhan dag rgyal dpog pa rnams ni bdag bde ba la sogs pa'i ngo bos ldog cing / yod pa la sogs pa'i ngo bos rjes su 'jug pa sems pa can gyi ngo bor rjod par byed do/ /sems pa can de yang ji ltar grangs can pas 'dod pa ltar blo las tha dad pa gzhan ni ma yin no/ /'o na ci zhe na/ sems pa can blo'i mtshan nyid yin zhes bya bas blo nyid do zhes bstan pa yin no/ /blo'i mtshan nyid ni blo'i rang gi ngo bo zhes bya ba'i don to/ /blo las tha dad pa'i sems kyi ngo bo gzhan ma gtogs so snyam du dgongs pa yin no/ /yang ji ltar bdag gcig pu la ldog pa dang rjes su 'jug pa'i bdag nyid kyi phan tshun 'gal ba'i rang bzhin gnyis rigs pa yin zhe na/ dper na sbrul bdag ces bya ba la sogs pa smos te/ ji ltar sbrul gcig yin na yang 'khyil pa la sogs pa'i gnas skabs log nas drang po'i gnas skabs 'byung ba'i gnas skabs gnyi ga la yang sbrul nyid rjes su 'jug pa de bzhin du bdag kyang sems pa can gyi rang bzhin rtag pa gcig pu yin na yang rang bzhin ma lus pa dang bral ba ma yin na/ rigs pa can la sogs pas kun du brtags pa'i bdag bzhin du rang bzhin ma lus pa rjes su 'jug pa yang ma yin te/ 'o na ci zhe na/ bde ba la sogs pa'i gnas skabs ldog pa dang 'jug pa yang yin la/ sems pa can gyi ngo bo ni thams cad du rjes su 'gro ba yin no zhes bya ba 'di mi 'gal lo zhes grag ste bsdus pa'i don to/ /yan lag gi don yang brjod par bya ste/ sems pa can rtag pa'i rang bzhin zhes bya ba ni sems pa can gyi rang bzhin rtag pa gang la yod pa zhes tshig rnam par sbyar ro/ /kun gyi zhes bya ba la ngo bo zhes bya ba lhag ma'o/ /rjes su 'jug pa zhes bya ba la ma yin zhes skabs dang sbyar ro/ /de dag ces bya ba ni bde ba dang sdug bsngal la sogs pa'i gnas skabs so/ /ci ste yang ci'i phyir ji ltar sangs rgyas pa rjes su 'gro ba med pa'i 'jig pa smra ba dag gis 'dod pa bzhin du gcig tu nges par gcig tu ldog pa'i phyogs sam/ ji ltar rigs pa can la sogs pa rnams kyis rten pa bzhin du gcig tu nges par mtha' gcig tu rjes su 'gro ba la mi rten ce na/ gtan du 'jig na zhes bya ba la sogs pa smos te/ gal te 'jig pa rjes su 'gro ba med pa yin na de'i tshe las byas pa chud zos par 'gyur te/ byed pa po 'bras bu dang 'brel pa med pa'i phyir ro / /ma byas pa dang phrad par yang 'gyur te/ byed pa po ma yin pa 'bras bu dang 'brel pa'i phyir ro / /bdag ngo bo gcig nyid yin na bde ba dang sdug bsngal la sogs pa longs spyod par mi 'gyur te/ nam mkha' bzhin du za ba po ma yin pa'i gnas skabs las za ba po'i gnas skabs la khyad par med pa'i phyir ro/ /de skad du yang / gzhon nu ma len gyis / de phyir gnyi ga dor nas ni/ /ldog dang rjes 'jug bdag nyid can/ /skyes bu zhig ni khas blang bya/ /'khyil pa sogs la sbrul bzhin no/ /zhes bshad do/ /'on te gnyi ga'i ngo bo'i skyes bu'i gnas skabs byed pa po gang yin pa de za ba po ma yin pa'i phyir byas pa chud zos pa dang ma byas pa dang phrad pa de dag 'di la'ang 'ong ba ma yin nam zhe na/ skyes bu'i byed po za po ni/ /zhes bya ba la sogs pa smos te/ skyes bu byed pa po dang za ba po dag gnas skabs la rten pa ma yin gyi/ /'on kyang skyes bu nyid la'o/ /'di ltar skyes bu nyid byed pa dang longs spyod pa yin gyi/ gnas skabs ni ma yin no/ /de'i phyir te/ de lta bas na gnas skabs can skyes bu ni/ de nyid phyir te/ sngar gyi ngo bo yongs su ma btang ba'i phyir/ byed po nyid kyis de'i 'bras bu ste / las de'i 'bras bu thob pa de'i phyir skyon med do/ /yang 'di la bdag 'di yod pa nyid du sgrub par byed pa'i tshad ma ci yod ce na/ ngo shes pa yi ngo bo'i phyir/ /zhes bya ba la sogs pa smos te/ /nga kho nas shes par 'gyur ro/ /nga kho nas rig par byed do zhes bya ba de lta bu byed pa po gcig nyid kyis yul can ngo shes pa'i ngo bo'i phyir te/ yod pa'i phyir te bdag grub po/ /'di nyid kyis te/ ngo shes pas sangs rgyas pa la sogs pas kun brtags pa'i bdag med par smra ba la gnod pa yang grub po/ /ji skad du/ des na ngo shes pa tshad mar bsgrubs pa des na 'jig rten thams cad kyis nges par bzung ba'i ngo shes pa 'dis bdag med par smra ba la gnod par 'gyur ro zhes bshad do/ /yang ji ltar ngo shes pa'i shes pas 'di gnyis ka grub par 'gyur zhe na/ ngas rig ces bya'i zhes bya ba la sogs pa smos te/ ngas rig go zhes bya ba 'di nga'i shes pas shes pa po 'di rtogs par 'gyur ro zhes bya ba 'di la rtsod pa med pa nyid yin te/ ngas rig go zhes bya ba byed pa po'i rkyen gzhi mthun pa nyid yin pa'i phyir ro/ /shes pa po de yang yin na bdag tu gyur ba zhig gam/ khyed cag gis kun brtags pa'i gcig tu 'jig pa'i ngang can skad cig ma'i shes pa yin zhes bya ba'i rnam par rtog pa gnyis so/ /de la gal te bdag ces bya ba'i phyogs yin na de'i tshe thams cad 'tshams te thams cad mdzes so zhes bya ba'i don te mngon par 'dod pa grub pa'i phyir ro/ /'on te shes pa'i phyogs yin na de'i tshe thams cad shin tu 'brel par dka' ste/ 'di ltar ngas shes par gyur to/ /ngas da ltar rig go zhes ngo shes pa'i byed pa po gcig la brten nas nga'i blo gang yin pa 'di 'byung ste/ de'i yul shes pa'i skad cig yin par rtog pa na/ res 'ga' 'das pa'am/ yang na da ltar te da ltar byung ba'am/ gnyi ga'am te / 'das pa dang / da ltar dag gam/ yang na rgyun yin zhes bya ba phyogs bzhi'o/ /de la dang po ste 'das pa'i shes pa'i yul nyid du rtog par byed na shes par gyur to zhes bya ba de ltar rnam pa'i nges pa 'di rigs te/ des sngar shes pa'i phyir ro/ /da ltar shes so zhes bya ba 'di mi rigs te/ 'das pa'i shes pa'i skad cig 'di ni da ltar te/ da ltar byung ba'i dus na rig pa ma yin te/ /de ni sngar 'gags zin pa'i phyir ro/ /ci ste da ltar yul yin no zhes bya ba'i phyogs gnyis pa de'i tshe/ ngas rig go zhes bya ba 'di rigs te/ da ltar de rig par byed pa'i phyir ro/ /shes par 'gyur zhes bya ba de lta bu'i rnam par 'dzin par ni mi rigs so/ /gang phyir 'di ni sngar yod min/ / 'di ni zhes bya ba ni da ltar byung ba'i shes pa'o/ /de nyid kyi phyir blo 'di sgo gnyis nas 'jug pa'i phyir 'das pa dang / da ltar ba'i shes pa 'dis ma bzung ngo zhes bya bar rigs so/ /da ltar dang 'das pa gnyis ka'i shes pa'i skad cig shes par gyur pa ma yin la/ da ltar shes pa yang ma yin no/ /'o na ci zhe na/ shes par gyur pa gcig yin la/ gzhan ni shes pa yin no/ /de nyid kyi phyir rgyun yang nga'i blo de nyid kyis gzung bar bya ba ma yin te/ gnyis pa ste 'das pa dang da ltar gyi shes pa'i bya ba gnyis med pa'i phyir ro/ /'di ltar rgyun 'di sngar shes par gyur pa ma yin zhing / da ltar shes pa yang ma yin te/ de ni brtags pa nyid kyis dngos po ma yin pa'i phyir ro/ /dngos po med pa'i shes pa po yang yod pa ma yin te/ de ni dngos po'i chos yin pa'i phyir ro/ /de lta bas na ji skad du bshad pa'i shes pa ma gtogs par yul gang la nga rgyal 'di 'jug pa gang yin pa de ni bdag yin no zhes bya bar grub bo/ /ci ste 'di dag shes pa'i ngo bor ji ltar 'grub ce na/ 'das pa'i nga rgyal gyis zhes bya ba la sogs pa smos te/ gang zhig nga'i shes par rtogs par bya ba de ni da dung yang 'jug pa yin te/ dper na da ltar ba'i rtogs pa bzhin no/ /'das pa'i nga rgyal gyi yul rtogs pa yang nga'i shes pas rtogs par bya ba yin no zhes bya ba ni rang bzhin gyi gtan tshigs so/ /rnam pa gcig tu na gang zhig shes pa po yin pa'am/ nga'i shes pas gzung bar bya ba de ni 'das pa'i nga rgyal gyis gzung bar bya ba yin te/ khar tshang gi shes pa po bzhin no/ /da ltar ba'i blo 'di yang shes pa po dang nga'i shes pas rtogs par bya ba yin no zhes bya ba ni rang bzhin gyi gtan tshigs so/ /'di zhes bya ba ni da ltar ba'i rtogs pa'o/ /de nyid las sam zhes bya ba ni nga'i shes pas rtogs par bya ba'i phyir ro/ /de ltar shes pa po chos can du byas nas sbyor ba gnyis bstan te / /da ni nga'i shes pa bsgrub par bya ba'i chos can du byas nas sbyor ba gzhan bstan pa'i phyir/ shes pa de dag ces bya ba la sogs pa smos te/ de dag ces bya ba ni 'das pa dang / da ltar gyi nga'i shes pa bsgrub bya ste/ bsgrub bya'i chos can nyid ces bya ba'i don to/ / ji ltar zhe na/ rgyud gcig dang 'brel zhes bya ba la sogs pa smos te/ khar tshang dang ni de ring yod pa kun gyi nga'i shes pa zhes bya ba 'di ni bsgrub bya'i chos can ston pa'o/ /don mtshungs can zhes bya ba ni bsgrub bya'i chos te/ yul gcig pa can zhes bya ba'i don to/ /lha sbyin la sogs pa'i rgyud gcig dang 'brel pa'i shes pa po'i don bdun pa der ram/ de'i nga'i shes pa gang yin pa de dag ni rgyud gcig dang 'brel pa'i shes pa po'i nga'i shes pa'o/ /de'i dngos po ni de nyid de/ 'di yang gtan tshigs ston pa'o/ /nga'i shes pa nyid tsam ni skyes bu gzhan gyi nga rgyal la 'jug pas de'i phyir ma nges pa spang ba'i don du rgyud gcig dang 'brel pa'i shes pa po'i yul nyid gtan tshigs kyis khyad par du byas so/ /blo gcig bzhin zhes bya ba ni dpe ste/ nga'i shes pa de dag nyid kyi nang nas blo gcig tu brjod par 'dod pa bzhin zhes bya ba'i don te/ /de'i phyir 'di la zhes bya ba la sogs pas phyogs phyi ma rtsom par byed do/ /gal te rtag pa dang gcig pu'i ngo bo sems pa can khas len par byed na/ de'i tshe blo yang sems pa can gyi ngo bo las tha mi dad pa'i phyir rtag pa dang gcig pu'i ngo bor 'gyur ro/ /de ltar yang mi 'dod de/ de'i phyir dam bca' ba khas blangs pa dang 'gal ba yin no/ /'di ltar bshad sbyar byed pas/ de ni skad cig ma yin te/ blo gzhan gyi dus na mi gnas so zhes bshad do/ /de bzhin rgyal dpog pas kyang yod pa dang 'brel pa na skyes bu'i dbang po'i blo skye ba de ni mngon sum mo zhes bshad de/ rtag pa nyid yin na skye bar mi rung ba'i phyir ro/ /gzhon nu ma len gyi yang rang gi tshig dang 'gal ba yin te/ ji skad du de nyid kyis/ gang gis phyi nas don 'dzin par/ /dbang po bzhin du bya byed pa/ /de ni skad cig kyang 'dod la/ /tshad ma med par skye ba min/ /zhes bshad do/ /blo gcig yin pa'i phyir tshad ma drug khas blangs pa dang yang 'gal lo/ /de bzhin du mngon sum dang 'gal ba yang yin te/ bar med par sgro 'dogs pa rnam pa du ma sems pa na skye ba dang 'jig pa dang 'brel pa'i blo rnams shin tu gsal bar nyams su myong ba'i phyir ro/ /gzhon nu ma len gyis 'gal ba'i phung po 'di thams cad mthong nas/ blo dag kyang ni zhes bya ba la sogs pa smos te/ blo rnams dang skyes bu ni rtag pa nyid dang / gcig pa nyid du 'dod de/ ci'i phyir zhe na/ sems pa can gyi rang bzhin yin pa'i phyir ro/ /skyes bu ni blo'i mtshan nyid kyi sems pa can gyi rang bzhin yin pa'i phyir/ kho bo cag ste/ nged kyi lugs kyis zhes bya ba'i don to/ / 'o na ji ltar gzugs kyi blo ro'i blo zhes bya ba la sogs pa tha dad du rtogs par 'gyur zhe na/ yul rten tha dad yin zhe na/ /zhes bya ba la sogs pa smos te/ zhe na'i sgra ni gzhan gyi lugs khas len pa ste/ gal te de ltar rtog na zhes bya ba'i don to/ /'di snyam du gal te blo rtag pa dang gcig pu yin na de'i tshe ci'i phyir gzugs la sogs pa'i yul rim gyis rtogs par 'gyur/ gang gi phyir cig car kho nar rtogs par 'gyur te/ khyad par med pa'i phyir ro snyam du sems na/ dper na rang gi ngo bos me/ /zhes bya ba la sogs pa smos te/ dper na me rtag tu sreg pa'i bdag nyid yin par grag na yang thams cad thams cad kyi tshe sreg pa ni ma yin no/ /'o na ci zhe na/ nye ba ste bsnyen pa kho na sreg go /de la yang bsreg par bya ba gang kho na sreg par nus pa de kho nas sreg gi /sprin la sogs pas ni ma yin pa'i phyir bsreg bya zhes smos so/ /dper na me long zhes bya ba la sogs pas dpe gzhan bshad pa yin te/ dri ma can la gzugs brnyan snang ba med pa'i phyir dang ba zhes bya ba smos so/ /nyer gzhag pa zhes bya ba ni drung du bzhag pa zhes bya ba'i don to/ /de bzhin zhes bya ba ni don la nye bar bstan pa yin no/ /skyes bu khyab par byed pa yin mod kyi/ 'on kyang ma mthong ba'i dbang gis lus 'di nyid la 'jug pa na mig la sogs pa'i dbang pos byas pa'i gzugs la sogs pa'i yul 'dzin pa yin gyi/ gzhan du ni ma yin no/ /sems pa can gang yin pa de nyid kho bo cag gi blo ste/ blo gros yin gyi grangs can gyi bzhin du sems pa can las tha dad pa ni ma yin no/ /gal te de lta na ji ltar 'di'i blo 'jig pa zhes bya bar 'grub par 'gyur zhes bya ba 'di dogs par byas nas bshad pa/ de'i phyir dbang po'i zhes bya ba la sogs pas rgyu ston pa nyid nye bar bstan pa na blo 'jig pa nyid sgrub par byed do/ /dbang po ste gzugs la sogs pa'i yul thob par byed pa mig la sogs pa'o/ /de dag gi rtsom pa ni bya ba ste/ de 'jig phyir te/ rnam par 'jig pa'i phyir/ blo 'jig par mngon gyi/ 'di rang las 'jig pa ni ma yin no/ /gal te rang las 'jig pa ma yin na/ de'i tshe'o na don thams cad rtogs par 'gyur ro zhes bya ba'i klan ka'i gnas skabs de nyid yin no zhe na/ de'i phyir/ dper na rtag tu sreg byed me/ /zhes bya ba la sogs pa smos te/ de bzhin du blo ni rtag tu don thams cad dmigs pa ma yin te/ dus thams cad du mi nye ba'i phyir ro snyam du bsams pa yin no/ /ci ste 'di'i blo rtag pa nyid ji ltar rtogs par bya zhe na/ de la zhes bya ba la sogs pa smos te/ de la zhes bya ba ni ngag nye bar dgod pa'o/ /rtogs pa'i bdag nyid yin pas blo blo zhes bya bar ngo shes par bya ba yin pa'i phyir sgra bzhin du blo rtag pa yin no/ /gal te de lta na 'di ni glang po che'i blo'o / /shing rta'i blo'o zhes bya ba blo rnams mtshan nyid mi mthun pa'o/ /'di ci ste 'jig rten na rtogs pa gzhan du 'gyur zhe na/ bum pa zhes bya ba la sogs pa smos te/ de'i dbye bas zhes bya ba ni glang po la sogs pa tha dad pa'i phyir ro/ /'di nyid don tha dad pa'i zhes bya ba la sogs pas gsal bar byed do/ /don tha dad pa'i rjes 'brang bas/ /zhes bya ba ni rtogs pa po rnams kyis so/ /'dis ni blo'i blo tha dad pa ni rjes su 'gro ba dang ldog pa dag gis don tha dad pa nyid kyis byas pa yin no zhes ston par byed de/ ngo shes pa yod pa ma yin no zhes bya ba'i don to/ /'on te glang po zhes bya ba la sogs pas lan 'debs par byed de / gal te blo tha dad pas byas pa kho na yin na de'i tshe gang dag glang po la sogs pas stong pa'i sar rim gyis rta dang glang po la sogs pa mi gnas pa'i sgro 'dogs par byed pa'i shes pa rnams 'jug pa de dag la tha dad par rtogs pa ci la rten par 'gyur/ tha dad pa rnam par gzhag pa'i rten 'ga' yang yod pa nyid ma yin no zhes bya ba'i tha tshig go/ /'di ltar rang las tha dad pa yod pa ma yin te/ blo thams cad gcig nyid du khas blangs pa'i phyir ro/ /khyad par du byed par 'gyur ba'i yul sna tshogs pa'i phyir yang ma yin te/ der khyad par du byed pa'i don 'ga' yang med pa'i phyir ro/ /'di snyam du don gyis stong pa nyid ma grub ste/ de skad du yang gzhon nu ma len gyis/ rmi lam la sogs shes pa la/ /phyi rol rnam kun med mi 'dod/ /yul dus gzhan gyi bdag nyid can/ /phyi rol kun la dmigs pa yin/ /zhes bshad do zhes bya ba de'i dogs pa bsu ba ni/ gal te yul sogs gzhan yod pa'i/ /zhes bya ba la sogs pa smos te/ rgyu mtshan yin zhes bya ba ni blo rnam par gzhag pa la rgyu yin no zhes bya ba'i don to/ /yul dang dus rnam pa gzhan gyi bdag nyid de/ rnam pa gzhan gang la yod pa de la de skad ces bya'o/ /yang na yul dang dus dag gis sam gzhan gyi bdag nyid gang la yod pa zhes tshig rnam par sbyar ro/ / 'on te de dag ces bya ba la sogs pas lan 'debs pa yin no/ /yul gang la rim pa gang gis sgro 'dogs pa'i gsal ba de dag snang ba de'i tshe/ yul de dang yul gzhan dang dus gzhan gnas pa rnams 'brel pa med pa nyid ma yin zhing / de bzhin du rim pa des yod pa ma yin no/ /de ci'i phyir zhe na/ rang gi 'dod pas sgro btags pa'i ngo bo des snang gi/ /gzhan ngo bo gzhan gyis snang bar ni rigs pa ma yin te/ ha cang thal bar 'gyur ba'i phyir ro/ /de lta yin na thams cad shes pa thams cad kyi yul du thal bar 'gyur ro/ /de lta yin dang so sor nges pa'i don gyi rnam par gzhag pa chad pa kho nar 'gyur ro/ /gzhan yang khyed cag spyod pa'i lugs kyis snang bzhin pa'i rnam pa de ni blo ma yin gyi/ 'on kyang 'di phyi rol gyi don gyi rang bzhin du brjod de / rnam pa dang ldan pa ni phyi rol gyi don yin la/ blo ni rnam pa med pa yin no zhes bshad pa'i phyir ro/ /gal te de ltar gyur na de las cir 'gyur zhe na/ brjod par 'dod pa'i yul na ni/ /zhes bya ba la sogs pa smos te/ brjod par 'dod pa'i yul ni gang du sgro btags pa byas pa ste/ de lta bas na yul dang dus gang dang 'brel pa glang po la sogs pa de dag yul de dang 'brel pa nyid du snang ba yin na/ rang dang bral pa'i yul dang dus gzhan du ci'i phyir snang / de lta bas na shes pa de dag ni don dam par ma 'dres pa'i rang bzhin dang g.yo ba'i bdag nyid yin te/ res 'ga' ba yin pa'i phyir ro zhes bya bar grub po/ /de'i rang bzhin gyi skyes bu yang du ma nyid dang / mi rtag pa nyid du grub po/ /'di snyam du shes pa ni skyes bu de'i chos yin la/ des na de tha dad na yang skyes bu tha dad pa ma yin te/ de ni chos can nyid yin pa'i phyir ro zhes bya bar 'dod na/ de ni mi rigs te/ rtogs pa dang / sems pa can dang / blo dang / shes pa zhes bya ba ni don gzhan ma yin pa'i phyir ro/ /ming tha dad pa tsam nyid kyis dngos po rnams rang bzhin tha dad pa ni ma yin no/ /gzhan yang ming tha mi dad na yang shes pa de dag gi sems pa can gyi bdag nyid gcig rjes su 'gro ba'i ngo bor 'dod pa kho na'o/ /sems pa can de tha mi dad pa na de'i rang bzhin gyi shes pa rnams kyang cha med pa nyid yin no/ /de lta ma yin na 'gal ba'i chos dang ldan pa'i phyir gcig tu tha dad pa kho nar 'gyur ro/ /shes pa dmigs pa med par bstan pa 'di nyid kyis blo mngon sum ma yin pa yang sun byung ba yin te/ 'di ltar yongs su gsal ba'i rnam pa de ni phyi rol ma yin par bsgrubs pa yin no/ /de lta yin dang de ltar yongs su gsal ba'i rnam pa de'i bdag nyid du gyur pa nyid du rtogs pa na rang nyid gsal ba'i ngo bo nyid yin pa'i phyir blo rnams rang rig pa'i ngo bor gyur pa yin no/ /gang yang / dper na rang gi ngo bos me/ /zhes bya ba la sogs pa smras pa/ de sun dbyung ba'i phyir/ 'di nyid du nye bar bsag pa bstan pa ni/ gal te blo ni rtag gnas dang / /zhes bya ba la sogs pa ste/ gal te blo'i gnas skabs don thams cad rtogs pa'i ngo bo dang rtag tu ba yin na/ de'i tshe don thams cad du rig par thal bar 'gyur ro/ /ji ltar zhe na/ blo ni sgra yi yul can gang / /zhes bya ba la sogs pa smos te/ 'di ltar sgra'i yul can sgra'i rnam pa can gang yin pa de nyid ro dang gzugs la sogs pa'i yul can yin gyi/ gzhan ni ma yin no/ /de lta yin dang don gcig nyams su myong ba'i dus na don thams cad nyams su myong bar thal bar 'gyur te/ de la dmigs pa'i bdag nyid kyi blo thams cad du gnas pa'i phyir ro/ /gang yang / blo gcig gis ni du ma yi/ /rnam shes de ni cig car nyid/ /khyad par med phyir rim gyis kyang / /mi 'gyur de khyad med phyir ro/ /zhes bshad do/ /min zhe na zhes bya ba ni gal te sgra'i yul can gyi blo de nyid kyi ro la sogs pa'i spyod yul can du khas len par mi byed na/ de lta na blo rnams kyi tha dad pa khyod kyi rang gi tshig nyid kyis bstan par 'gyur ro/ /me dper byas pa nyid gang yin pa de yang ma grub po zhes bstan pa'i phyir / me yang bsreg bya ma lus pa'i/ /zhes bya ba la sogs pa smos te/ bsreg par bya ba thams cad sreg pa'i rang bzhin gyis sreg par byed pa rtag tu gnas pa ni ma yin no/ /de lta ma yin na bsreg bya mtha' dag thal bar byas par 'gyur te/ sreg par byed pa 'bar ba dang 'brel pa'i bsreg par bya ba bzhin du rang sreg par byed pa nyid du rtag tu nye ba'i phyir ro/ /yang gi sgras ni blo don thams cad rtog pa'i rang bzhin ma yin pa 'ba' zhig tu ma zad ces ston par byed do/ / gal te de lta na mi rtag tu sreg par byed pa'i bdag nyid du mi 'gyur na/ 'o na ji ltar don nye ba yang sreg par byed ce na/ bsreg par bya don nye nyid na/ /zhes bya ba la sogs pa smos te/ de lta yin na zhes bya ba ni de ma thag tu brjod pa'i don khas blangs pa na/ don thams cad cig car sreg par thal bar mi 'gyur te/ thal bar 'gyur ba mi 'byung ngo zhes bya ba'i don to/ /gang yang dper na me long dang ba'am zhes bya ba la sogs pa smras pa la/ me long la sogs pa de yang rtag pa dang gcig pu'i ngo bo nyid yin na mi rigs so zhes bstan pa'i phyir/ ut+pal sngon po sogs 'brel las/ /zhes bya ba la sogs pa smos te/ shel dang me long la sogs pa skad cig re rer 'jig pa yin na ut+pal sngon po la sogs pa dang phrad pas phyin ci log pa'i shes pa skye ba'i bdag nyid du 'gyur ro/ /de lta ma yin na gal te skad cig ma ma yin pa de'i gzugs brnyan 'dzin par 'gyur na/ de'i tshe nye bar bsgyur pa dang bcas pa'i gnas skabs gang yin pa de kho na de nye bar sgyur ba med pa'i gnas skabs yin pa'i phyir sngon po la sogs pa'i nye bar sgyur ba dang bral ba la yang sngon po la sogs pa'i gzugs brnyan yang dag par dmigs par 'gyur te/ sngar gyi ngo bo yongs su ma btang ba'i phyir ro/ /yang na nye bar bsgyur ba'i gnas skabs na yang sngon po la sogs pa'i rnam pa dang bral bar mthong bar 'gyur te/ sngar gyi ngo bo dang khyad par med pa'i phyir ro/ /'dis ni skad cig ma ma yin pa'i phyogs la spyir shel dang me long la sogs pa thams cad kyi gzugs brnyan rtogs pa bstsal ba yin no/ /da ni skad cig ma dang skad cig ma ma yin pa dag gis phyogs la gzugs brnyan rtogs pa re re sel bar byed pa ni brtan pa'i phyir zhes bya ba la sogs pa'o/ /brtan pa'i phyir te/ skad cig ma ma yin pa'i phyir sngar bzhin du me long gi ngos kyi gzugs brnyan 'dzin pa ma yin no zhes 'brel te/ skad cig ma ma yin na yang cha med pa'i phyir 'dzin pa ma yin zhes sbyar bar bya'o/ /'di ltar khron pa'i nang du chud pa'i chu bzhin du me long gi ngos la gzugs brnyan nang du chud par dmigs na me long gi ngos la bu ga yod pa ma yin te/ dbyibs kyi yan lag ches bar mtshams med pa nyid yin pa'i phyir ro/ /de lta bas na 'di ni 'khrul pa yin no/ /yang na med pa ni snga ma dang phyi ma'i gnas skabs sna tshogs pa med pa ste/ 'di la rgyu ni bstan pa'i phyir/ /zhes bya ba yin no/ /des na don 'di yin te/ bstan pa nyid kyis cha med pa'i phyir te/ snga ma dang phyi ma'i gnas skabs dang bral ba'i phyir ro zhes bya ba'i don to/ /gzhan yang / lus can ldan cig mi gnas phyir/ /me long ngos kyi gzugs brnyan dag /'dzin pa ma yin zhes sbrel bar bya'o/ /'di ltar me long gi ngos la yul de kho nar ri la sogs pa'i gzugs brnyan dmigs te/ lus can gyi dngos po rnams ni nam yang yul gcig pa nyid du mi 'gyur te/ bdag nyid gcig tu thal bar 'gyur ba'i phyir ro/ /'di yang skad cig ma dang skad cig ma ma yin pa'i thun mong gi sun 'byin pa yin no/ /shel la yang yang dag par nye bar bsgyur ba'i gzugs brnyan rtogs pa ma yin no zhes ston pa ni/ zur gnyis na ni gnas pas kyang / /zhes bya ba la sogs pa smos te/ 'di ltar gang kho na'i tshe rtogs pa po mdun na gnas pas thang gi pad+ma dang phrad pas shel dmar por dmigs pa kho na'i tshe gang dag zur gnyis na gnas pa de dag gi shel rdo mtha' dag shin tu dkar bar dmigs kyi/ cha shas kyis ni ma yin no/ /de lta yin dang gal te de'i gzugs brnyan 'dzin par 'gyur ba de'i tshe mdun na gnas pa'i skyes bu bzhin du zur gnyis na gnas pa'i rtogs pa po dag gis kyang dmar por snang ba 'dzin par 'gyur ro/ /'di yang skad cig ma dang skad cig ma ma yin pa dag la yang thun mong ba'i skyon yin no/ / gal te gzugs brnyan de 'dzin pa la sogs pas ni skad cig ma yin pa'i phyogs kyi skyon bshad de/ gal te don dam par shel la sogs pa'i yul gyi gzugs brnyan 'dzin par 'gyur na/ de'i tshe go rims bzhin du 'byung ba'i yul gyi gzugs brnyan rnams kyi rang bzhin tha dad pa'i phyir gcig gi bdag nyid du mi 'gyur ro/ /de bzhin du de'i bdag nyid kyi shel la sogs pa la yang bsgyur bya dang / sgyur byed la so so'i sgyur byed tha dad par thal bar 'gyur ro/ /gal te yang 'di 'khrul pa yin no zhes khas len par byed na de'i tshe 'di nyid la nyes pa 'di med do zhes shes par byed pa'i don du de nyid du yod na zhes smos so/ /gang gi phyir yang de ltar phyogs gnyis ka la yang gzugs brnyan 'dzin pa mi 'thad de/ de phyir 'di ni 'khrul pa yin no zhes bya bar gnas so/ /gal te de lta na ci'i phyir shel la sogs pa kho na la 'khrul pa der 'gyur gyi/ rtsig pa la sogs pa la ni ma yin zhe na/ de phyir bsam gyis mi khyab pa'i/ /nus pa sna tshogs zhes bya ba smos te/ sna tshogs ni rnam pa du ma bsam gyis mi khyab pa'i nus pa dag gang dag bkod pa de la de skad ces bya'o/ /dngos po rnams kyi nus pa so sor nges pa ni brgal zhing brtag par 'os pa ma yin te/ de ni rang gi rgyu brgyud pas byas pa'i phyir ro/ /cha 'di la khyed cag dang rtsod pa med de/ ji skad du/ me ni sreg byed nam mkha' min/ /'di la brtsad du ci zhig yod/ /ces bshad pa lta bu'o/ /gal te de lta na 'o na blo la yang yul gyi gzugs brnyan 'dzin pa 'khrul pa yin mod/ gzugs brnyan 'dzin par 'gyur ba ni ma yin no zhe na/ blo 'khrul ngo bo yang zhes bya ba la sogs pa smos te/ blo la 'khrul pa srid par rigs pa ma yin te/ yang gi sgras ni/ gzugs brnyan 'dzin par mi rigs pa 'ba' zhig tu ma zad ces bya'o/ /ci'i phyir zhe na/ tha dad pa dang bral phyir te/ tha dad pa med pa'i phyir ro/ / shel la sogs pa dag la ni 'khrul par rigs te/ de dag las tha dad pa'i 'khrul pa'i blo yod pa'i phyir ro/ /de bzhin du blo la 'khrul pa'i ngo bo'i blo gzhan yod pa ni ma yin te/ /'di ltar blo gcig kho nar 'dod do/ /blo ni rang nyid kyis 'khrul pa'i ngo bor skye'o zhes brjod par yang mi rigs te/ blo rtag pa nyid du khas blangs pa'i phyir ro/ /gang yang rtag pa nyid dang gcig pu nyid bsgrub pa'i don du/ /de la rtogs pa'i bdag nyid du/ /blo ni ngo shes par byed de/ /zhes smras pa de la/ rtogs med ngo bo las ldog pa/ /zhes bya ba la sogs pa smos te/ ngo bo shes pa 'di ni ma nges pa yin te/ 'di ltar rtogs pa med pa'i ngo bo bum pa la sogs pa las ldog pa tha dad pa sgro btags nas blo thams cad ni sna tshogs pa yin na yang ngo shes pa 'jug pa 'gal ba med pa kho na'o/ /gang sna tshogs pa nyid yin pa ngo shes pa 'di ni rigs mi mthun pa las ldog pa'i rgyu mtshan gyis byas pa yin no zhes bya ba 'di ni gdon mi za bar shes par bya'o/ /sna tshogs pa nyid ma yin pa kho na bya ba ni ma yin no/ /'di ltar dmigs pa med pa'i sgro btags pa'i blo la don tha dad pa la mi rten na yang ngo mi shes pa yod pa nyid do/ /de la gang kho na la glang po'i blo 'gyur ba de nyid la rta dang shing rta'i blor 'gyur ba de lta bu ni yod pa ma yin no/ /blo 'di dag ni dmigs pa med pa yin no zhes bsgrubs zin pas yang mi brjod do/ /des na gang / tha dad don la mi rten par/ /ngo shes med pa yod ma yin/ /zhes smras pa de ni ma grub bo zhes gzung bar bya'o/ /gzhan yang gal te khyed cag gis rtag pa dang gcig pu'i ngo bo'i bdag 'dod pa de'i tshe bde ba la sogs pa'i gnas skabs tha dad par mi 'gyur ro/ /'on te bde ba la sogs pa'i gnas skabs tha dad pa khas len na 'o na 'di ni rtag pa dang gcig pu'i ngo bo nyid khas blang bar mi bya'o/ /gcig la tha dad pa dang tha mi dad pa phan tshun 'gal ba'i rang bzhin rigs pa ni ma yin no/ /rtsod pa 'di spang ba'i don du gzhon nu ma len gyis smras pa gang yin pa de re zhig sun dbyung ba'i phyir bstan pa ni/ gnas skabs tha dad tha dad pas/ /zhes bya ba la sogs pa smos te/ bde ba la sogs pa'i gnas skabs rnams kyi tha dad pa ste/ sna tshogs pa nyid de/ des tha dad pa skyes bu sna tshogs pa nyid de/ des sdong zhes bsdu'o/ /gnas skabs sna tshogs pa yin na yang rang bzhin gcig go zhes bya ba'i don to/ /'di la rgyu bstan pa'i bdag nyid ces bya ba smos te/ brtan pa brtag pa'i bdag nyid de rang bzhin gyi bdag gang yin pa de la de skad ces bya'o/ /yang na gnas skabs tha dad pa ni gnas skabs kyi khyad par te/ bde ba la sogs pa'o/ /de dag las mtha' gcig tu tha dad pa ste logs shig pa'i ngo bo des stong pa ste de dang tha mi dad pa yin na yang zhes bya ba'i don to/ /yongs su brtags pa de ci zhig yin zhe na/ bde sdug la sogs zhes bya ba la sogs pa smos te/ rtogs pa yin na yang zhes bya ba shes pa yin na yang ngo / /mi zhes bya ba ni bdag go/ /sems can rdzas yod nyid sogs la/ /zhes bya ba la/ sogs pa'i sgras shes bya nyid dang / gzhal bya nyid dang / byed pa po nyid dang / za ba po nyid la sogs pa'i spyi'i chos gzung ngo / /khyad par gyi chos shin tu chad pa yang ma yin zhes bstan pa'i phyir/ gnas skabs gzhan ni zhes bya ba la sogs pa smos te/ snga ma zhes bya ba ni bde ba la sogs pa'i gnas skabs so/ /gal te de lta na bde ba la sogs pa'i gnas skabs na yang ci'i phyir sdug bsngal la sogs pa mi myong zhe na/ phyi ma'i rjes su mthun bya'i phyir/ /zhes bya ba la sogs pa smos te/ rang gi ngo bo nyid kyis gnas skabs na phyis kyi sdug bsngal gyi gnas skabs mi 'byung bas de'i phyir/ sems pa can dang rdzas la sogs pa'i mtshan nyid can gnas skabs thams cad du rjes su 'gro ba'i spyi'i bdag la de thim pa yin te/ phyis kyi sdug bsngal gyi gnas skabs skye ba dang rjes su mthun par 'gyur bas de'i don du de de la thim pa yin no/ /gal te de lta yin na gnas skabs gzhan bzhin du spyi'i bdag la yang gnas skabs thim pa mi rigs te/ 'gal ba'i phyir ro zhes dogs pa la gnas skabs rang gi ngo bo yis/ /zhes bya ba la sogs pa smos te/ bde ba dang sdug bsngal la sogs pa'i rang gi ngo bos gnas skabs rnams phan tshun 'gal ba'i phyir phan tshun thim par mi rigs so/ /gang gis 'di de la mi 'gyur ba gnas skabs can spyi'i bdag la ni thim pa la 'gal ba ci yod/ 'di ltar spyi'i bdag 'di gnas skabs thams cad du 'gal ba med par rjes su 'jug par mthong ste gnas skabs thams cad la sems pa can la sogs pa dmigs pa'i phyir ro/ /de la zhes bya ba la sogs pas lan 'debs par byed do/ /gal te skyes bu las gnas skabs rnams nges par tha dad par mi 'dod na/ de'i tshe de dag skye ba dang 'jig pa na ste/ gnas skabs de dag skye ba dang 'jig pa yin na skyes bu 'di la yang de dag ste/ skye ba dang 'jig pa dag tu 'gyur ro/ /gcig tu zhes bya ba'i tshig ni cung zad tha mi dad pa yin yang gnas skabs bzhin du skye ba dang 'jig par thal ba bzlog par dka'o zhes shes par bya ba'i phyir ro/ /sbyor ba ni gang zhig gang las tha mi dad pa de ni de skye ba dang 'jig pa na skye ba dang 'jig pa dag tu 'gyur te / dper na bde ba la sogs pa'i rang gi ngo bo'i de dag nyid bzhin no/ /skyes bu la yang bde ba la sogs pa dang tha mi dad pa'i rang bzhin yin no zhes bya ba ni rang bzhin gyi gtan tshigs so/ / gtan tshigs 'di ma nges pa yang ma yin no zhes bstan pa'i phyir / 'gal ba'i chos dang ldan na ni/ /zhes bya ba la sogs pa smos te/ gal te gnas skabs dag kho na skye ba dang 'jig pa yin gyi/ skyes bu ni ma yin no zhes bya ba de lta bu skye ba dang mi skye ba'i mtshan nyid 'gal ba'i chos dang ldan pa khas len na/ de'i tshe tha dad par thal bar 'gyur te/ dper na skyes bu mang po rnams kyi phan tshun rang nyid so sor nges pa'i bdag nyid kyi rang bzhin gyis phan tshun tha dad pa bzhin no/ /tha dad pa'i tha snyad kyi rgyu mtshan ni 'di tsam du zad pa'i phyir ro snyam du dgongs pa yin no/ /skyes gu yang dngos po la sogs pa'i ngo bos phan tshun tha dad pa med pas de'i phyir bsgrub bya ma tshang ba bzlog pa'i ched du bdag nyid so sor nges pa zhes bya ba smos so/ /bdag nyid so sor nges pa'i ngo bo 'di dag ni nges par tha dad pa yin te/ de lta ma yin na nyams su myong ba dang dran pa la sogs pa so sor nges pa med pa'i phyir rnam par gzhag pa 'chol bar 'gyur ro/ /sbyor ba ni gang dang gang grub pa dang bde ba gcig pa ma yin pa de ni de dang lhan cig tha mi dad pa ma yin te/ dper na phan tshun so sor nges pa'i bdag nyid kyi ngo bos skyes bu bzhin no/ /bde ba la sogs pa'i gnas skabs kyang skyes bu dang lhan cig grub pa dang bde ba tha dad pa yin no zhes bya ba ni khyab par byed pa mi dmigs pa'o/ /gang yang / gnas skabs gzhan ni skye 'gyur tshe/ /snga ma gtan du 'jig mi 'gyur/ /zhes bya ba la sogs pa smras pa de la/ gal te khyod kyi skyes bu la/ /zhes bya ba la sogs pa smos te/ spyi'i gnas skabs la thim pa na rang gi ngo bo nyid kyis sam/ gzhan gyi ngo bos thim pa yin grang / de la gal te rang gi ngo bos yin na de'i tshe bde ba la sogs pa 'byung na yang ste/ bde ba la sogs pa'i gnas skabs nyams su myong ba na yang de sdug bsngal la sogs par nyams su myong bar 'gyur te/ dmigs pa'i mtshan nyid du gyur pa'i phyir ro/ /'on te gzhan gyi ngo bos zhes bya ba'i phyogs yin na/ de la gzhan gyi ngo bo zhes bya ba la sogs pa smos so/ /gzhan yang skyes bu la sdug bsngal la sogs pa 'pho ba de'i bdag nyid du 'dod de/ de lta yin dang sdug bsngal la sogs pa bzhin du de las tha mi dad pa'i phyir/ bdag de skyes na skye ldan te/ /skye ba dang ldan par 'gyur ro/ /gang la/ skyes bu byed po za po ni/ /gnas skabs la ni mi rten zhes smras pa de la/ gal te byed po za ba po/ /zhes bya ba la sogs pa smos te/ gal te byed pa po nyid la sogs pa skyes bu kho na la rten par gyur na/ de ni snga ma'i ngo bo ma btang ba'i bdag la srid pa ma yin no/ /sbyor ba ni gang zhig byed pa po dang za ba po ma yin pa'i gnas skabs yongs su ma btang ba de ni byed pa ma yin la/ za ba yang ma yin te/ dper na nam mkha' bzhin no/ /skyes bu yang thams cad du byed pa po dang za ba po ma yin pa'i gnas skabs yongs su ma btang ba yin no zhes bya ba ni khyab byed 'gal ba dmigs pa'o/ /slob dpon phyogs kyi glang po'i zhal snga nas kyis/ skyes bu'i blo ni skye ba na / /gal te 'gyur na mi rtag nyid/ /'on te 'gyur ba ma yin na/ /bdag gzhan 'jal byed mi dmigs so/ /zhes bya ba gang yin pa 'di bshad pa na/ de la gzhon nu ma len gyis/ mi rtag sgra yi brjod bya nyid/ /bdag ni zlog par byed ma yin/ /rnam par 'gyur ba tsam brjod phyir/ /de tsam gyis 'di chad mi 'gyur/ /zhes smras te/ /de 'dir mjug bsdu pa'i thabs kyis skyon bshad pa'o/ /de ste de'i phyir/ rtag pa'i sgra'i brjod bya nyid kho bos ma bzlog ste/ rang gi nye bar len pa sngon du song ba'i skad cig re rer 'jig pa'i sems pa can 'khor ba ji srid par rgyun mi 'chad pa'i phyir ro/ /'on kyang rang gi ngo bo ste/ rang bzhin 'gyur ldan phyir te/ nges pa snga ma'i rang bzhin yongs su btang nas rang bzhin gzhan skye ba'i phyir chad pa ste 'di'i 'jig pa gsal rab pa nyid du 'gyur ro/ / gang yang sprul la sogs pa dpe nyid du blangs pa de yang rtag pa dang gcig pu'i ngo bo nyid du ma grub po zhes bstan pa'i phyir/ sprul yang zhes bya ba la sogs pa smos te/ ji ltar skyes bu bstan pa gcig pu'i ngo bo yin pa'i phyir/ gnas skabs gzhan 'byung ba rigs pa ma yin pa de bzhin du sprul la yang mi rigs pa yin no/ /gang gi tshe yang 'di skad cig ma 'jig par 'gyur ba'i tshe gnas skabs gzhan 'byung ba rigs pa yin te/ gnas skabs gzhan 'byung ba'i mtshan nyid ni rang bzhin gzhan skye ba yin pa'i phyir ro/ /gang yang ngas/ rig ces bya ba'i bdag gi blos / /shes pa po nyid rtogs par 'gyur/ /zhes smras pa de la ma grub po zhes bstan pa'i gnas skabs dmigs pa med pa nyid kyis ni zhes bya ba la sogs pa smos te/ nga rgyal 'di la ni gang gis 'di'i yul shes pa po yin par 'gyur ba don dam par dmigs pa cung zad yod pa yang ma yin no/ /gal te de lta na 'di skye ba'i rgyu mtshan gang yin zhe na/ thog med ces bya ba la sogs pa smos te/ sems can du lta ba ni 'jig tshogs la lta ba'o/ /de'i sa bon ni bag chags te nus pa zhes bya ba'i don to/ /thog ma med pa yang de yin la sems can du lta ba'i sa bon yang yin no zhes tshig rnam par sbyar ro/ /de'i stobs ni bdag po'o/ / 'ga' zhig la zhes bya ba ni nang gi bdag nyid du nges pa nyid kyi skye mched drug la'o / /'on te ci'i phyir thams cad du mi 'jug ce na/ 'du byed 'ga' zhig ces bya ba la sogs pa smos so/ /de yi ngo bor nges byas la/ /zhes bya ba ni/ snga ma dang phyi ma'i dus su 'jug pa'i shes pa po'i ngo bo nges pa'i nga rgyal la'o/ /kun du zhes bya ba ni rgyud gzhan dang bum pa la sogs pa rnams la'o/ /gzhan yang nga rgyal gyi dmigs pa bdag yin na yang ci'i phyir bdag gzhan la yang 'jug par mi 'gyur zhes bya ba'i brgal zhing brtag pa mtshungs so/ /nus pa so sor nges pa'i phyir de lta ma yin no zhe na/ gal te de lta na kho bo cag la yang nus pa nges pa'i phyir nang gi dngos po 'ga' zhig kho na la 'jug gi / thams cad la ni ma yin no zhes bya ba'i rnam par gzhag pa thams cad 'chol pa med pa nyid do/ /'di snyam du rnam par gzhag pa 'di yin la rag mod/ 'on kyang 'di'i dmigs pa med pa nyid ji ltar 'grub snyam du sems na/ rtag par dmigs pa'i phyogs la ni/ /zhes bya ba la sogs pa smos te/ 'di ltar 'di'i dmigs par 'gyur ba rtag pa'am/ mi rtag pa zhig yin grang / gal te rtag pa yin na de'i tshe nga rgyal thams cad de/ nga rgyal rnams cig car du 'gyur te/ rgyu ma tshang ba med pa'i phyir ro/ / rgyu ma yin pa ni dmigs par mi rigs te/ ha cang thal bar 'gyur ba'i phyir ro/ /nus pa'i rgyu ni lhan cig byed pa dag la ltos pa yang ma yin no zhes bya ba 'di ni lan cig ma yin par dpyad zin to/ /nga rgyal 'di ni gcig kho na yin no zhes kyang brjod par mi nus te/ res 'ga' ba nyid kyis du ma nyid du grub pa'i phyir ro/ /'di ltar gnyid stug po log pa dang / myos pa dang / brgyal ba'i gnas skabs su nga rgyal rigs pa ma yin la/ yang gzhan gyi tshe rigs pa yin pa'i phyir thams cad du ma dmigs pas 'di res 'ga' nyid du grub bo/ /res 'ga' ba nyid kyis kyang du ma yin no/ /de'i phyir nga rgyal thams cad de yod pa tsam na yod pa rnams cig car skye bar 'gyur ro/ /yang mi rtag pa dmigs pa yin no zhes bya ba'i phyogs yin na / de'i tshe mig la sogs pa'i rnam par shes pa bzhin du nga rgyal thams cad ches gsal bar snang bar thal bar 'gyur te/ rang gi mtshan nyid kyi dngos po dngos su 'dzin pa'i phyir ro / /de'i phyir ni de lta bas na'o/ /gzhan gyi zhes bya ba ni gzhon nu ma len la sogs pa mu stegs byed pa dag gis shes pa'i skad cig de'i yul du ci zhig rtog ces bya ba la sogs pa 'di'i dmigs pa brgal zhing brtag pa don med do/ /de la nga rgyal 'di ni dmigs pa med pa kho na yin te/ thog ma med pa'i 'jig tshogs la lta ba'i bag chags kyi stobs kyis 'khrul pa 'jug pa yin no zhes gang smras pa/ 'di la gzhon nu ma len gyis brjod pa'i sun 'byin pa 'dogs par byed pa ni/ shes pa po la zhes bya ba la sogs pa smos te/ bag chags ni shes pa po'i yul la ngo shes pa'i byed pa por 'os kyi/ de min la ste/ shes pa po ma yin pa la/ de zhes te shes pa po zhes shes pa ste/ ngo shes pa'i bag chags byed pa por 'os pa ma yin no zhes sbrel bar bya'o/ /ci'i phyir zhe na/ 'di ni 'khrul pa'i rgyu ma yin gyi/ 'on kyang 'di ni ji ltar nyams su myong ba'i rgyu yul gyi don nyid la shes pa skyed par byed pa yin gyi/ 'khrul pa ni ma yin no zhes bya ba'i don to/ /de lta bas na nga rgyal 'di ni bag chags kyis bskyed pa'i phyir dang / gnod par byed pa'i tshad ma med pa'i phyir 'khrul par rigs pa ma yin no/ /gal te sgra ni gnod med phyir/ /zhes bya ba 'di'i mjug thogs su rim pa bzhin du blta bar bya'o/ /ma yin zhes bya ba la sogs pas len 'debs pa yin no/ /bshad ma thag pa'i rigs pa ni/ rtag pa dmigs pa'i phyogs la ni/ /zhes bya ba la sogs pa smras pa dang / gang yang / bag chags 'khrul pa'i rgyu ma yin/ /zhes smras pa/ de ni ma nges pa yin no zhes bstan pa'i phyir/ dbang phyug sogs la zhes bya ba la sogs pa smos te/ gal te bag chags 'khrul pa'i rgyu ma yin na/ de'i tshe dbang phyug skye ba dang ldan pa thams cad rgyu thams cad shes pa blo rtag pa'i rten yin no zhes bya ba la sogs pa'i 'khrul pa ji ltar bag chags tsam yod pas 'byung bar 'gyur/ 'di ltar gzhon nu ma len gyis kyang dbang phyug la sogs pa 'gro ba'i byed pa po yin pa bkag pa kho na'o/ /bag chags tsam gyi ngo bo las/ /zhes bya ba la tsam smos pa ni/ de lta bur gyur pa'i dmigs pa'i don rnam par bcad pa'i don du'o/ /de lta bas na nga rgyal dmigs pa med pa'i phyir des gzung bar bya ba'i shes pa po 'ga' zhig grub pa yod pa ma yin pas de'i phyir bdag grub pa ma yin no/ /gang yang / 'das pa'i nga rgyal gyis gzung bya/ /zhes bya ba la sogs pa rtag pa nyid du sgrub par byed pa smras pa/ de la de'i phyir tshad ma zhes bya ba la sogs pa smos te/ 'ga' yang zhes bya ba ni rtag pa'am mi rtag pa'i shes pa po dpe'i chos can yod pa ma yin pas dpe ma grub bo/ /'di ltar sbyor ba dang po dang gyis pa dag la chos can ma grub pa'i dpe'i skyon yin te/ da ltar dang khar tshang gi nga'i shes pas rtogs par bya ba'i shes pa po 'ga' yang med pa'i phyir ro/ /sbyor ba gsum pa la yang blo gcig bzhin no zhes bya ba'i dpe bsgrub par bya ba dang sgrub par byed pa ma tshang ba yin te/ mngon par 'dod pa nyid gyi blo gcig rgyud gcig dang 'brel pa'i shes pa po nga'i shes pa nyid dam/ yul gcig /nyid du ma grub pa'i phyir ro/ /de bas na chos gnyis ma grub pa'i sgo nas 'di yang ma grub pa nyid du bstan to/ /ji ltar rigs pa bstan pa yin/ /zhes bya ba la/ bstan pa ni sngar nye bar bkod pa'i gtan tshigs gang dag yin pa de dag ji ltar rigs par te/ ji ltar srid pa gzhi ma grub pa yin no zhes bya ba'i don to/ /'di ltar sbyor ba dang po dang gnyis pa dag la gtan tshigs gsum ka yang gzhi ma grub pa yin te/ nga'i shes pas gzung bar bya ba'i chos can shes pa po 'ga' yang ma grub pa'i phyir ro/ /sbyor ba gsum pa la ni chos can shes pa rnams grub pa'i phyir gzhi ma grub pa ma yin mod kyi/ 'on kyang de dag la rgyud gcig dang ma 'brel pa'i shes pa po'i yul nyid kyis khyad par ma grub ste/ dmigs pa med pa nyid du bsgrubs zin pa'i phyir ro/ /de'i phyir ji ltar rigs par zhes bshad do/ /de kho na nyid bsdus pa'i dka' 'grel las dpyod pa bas kun du brtags pa'i bdag brtag pa ste brgyad pa'o/ / //da ni grangs can gyis kun du brtags pa'i bdag dgag par bya ba'i phyir/ gzhan dag ces bya ba la sogs pa smos te/ gzhan dag ces bya ba ni grangs can rnams so/ /de dag ni sems pa can bdag gi rang gi ngo bo blo las tha dad par rtog par byed de/ 'di ltar blo ni gtso bo'i rang bzhin yin la/ sems pa can ni skyes bu nyid kyi rang gi ngo bo yin no zhes bya ba ni de dag gi gzhung lugs yin no/ /skyes bu de yang dge ba dang mi dge ba'i las kyi 'bras bu gtso bos drangs pa'i za ba po yin gyi/ las rnams kyi byed pa po ni ma yin te / 'gro ba thams cad kyi yongs su 'gyur ba ngo bo'i rang bzhin nyid byed pa po nyid du 'dod pa'i phyir ro/ /'dir yang tshad ma dag ston pa ni/ gang zhig 'dus pa'i ngo bo nyid kyis dngos po yin pa de ni gzhan gyi don byed par mthong ste/ dper na mal cha dang stan la sogs pa'i yan lag bzhin no/ / mig la sogs pa yang bsags pa'i ngo bo yin no zhes bya ba ni rang bzhin gyi gtan tshigs so/ /gzhan gang yin pa de yang shugs kyis bdag yin no zhes bya bar grub po zhes bya ba ni gzhan gyi bsam pa'o/ /de la yang zhes bya ba la sogs pas re zhig dam bca' ba'i don sun 'byin par byed de/ 'di ltar sems pa can skyes bu'i rang gi ngo bo yin no zhes smra ba na/ sems pa can rtag pa dang gcig pu'i ngo bo yin no zhes bya bar dam bcas par 'gyur te/ rtag pa dang gcig pu'i ngo bo'i skyes bu las de tha mi dad pa'i phyir ro/ /'di yang mngon sum dang 'gal ba yin no/ /gang gi phyir gzugs dang sgra la sogs pa'i sems rang rig pa'i ngo bo tha dad pa dang ldan pa rang bzhin tha dad pa ches gsal bar shin tu gsal ba nyid du rig ste/ de yang sems pa can gcig yin na 'thad pa ma yin no/ /khas blangs pa dang 'gal bar yang bstan pa'i phyir sems pa can gyi ngo bo gcig ces bya ba la sogs pa smos te/ bdag ngo bo gcig pa yang yin la/ don rnam pa sna tshogs pa'i za ba po yang yin no zhes ji ltar phan tshun 'gal ba yin te/ za ba po ma yin pa'i gnas skabs dang khyad par med pa'i phyir ro / /blta bar 'dod pa la sogs pa dang ldan par 'gal ba med do zhe na/ blta 'dod la sogs zhes bya ba la sogs pa smos te/ gang dag gzugs la sogs pa la lta bar 'dod pa dang nyan par 'dod pa la sogs pa de'i phan tshun tha dad pa la longs spyod pa'i rgyu mtshan nyid du brtags pa de dag kyang bdag 'di la 'gyur ba min te/ 'byung ba ma yin no/ /gal te 'byung na de'i tshe de ltar de tha dad par skye ba yin na ni skyes bu skye ba dang ldan pa yin par 'gyur te/ blta bar 'dod pa la sogs pa bzhin du de dag las tha mi dad pa'i phyir ro/ /'di nyid gsal bar byed pa ni/ /sems pa can las ma gtogs pa'i/ /zhes bya ba la sogs pa smos so/ /tha dad pa yin na ni 'di 'di'i zhes bya ba'i 'brel ba ni mi 'thad de/ 'brel pa'i rgyu mtshan phan 'dogs pa med pa'i phyir ro/ /'di zhes bya ba ni skye ba dang 'jig par 'gyur ba'o/ /sbyor ba ni gang zhig gang gi ngo bor rnam par 'jog pa'i rgyu mtshan med pa de ni rtog pa dang ldan pas de'i ngo bor rnam par 'jog pa ma yin te/ nam mkha' lus can nyid bzhin no/ /skyes bu'i blta bar 'dod pa la sogs pa la yang za ba por 'jog pa'i rgyu mtshan med pa yin no zhes bya ba ni rgyu mi dmigs pa'o/ /gtan tshigs 'di ma grub pa yang ma yin no zhes bsgrubs zin to/ /byed pa po med pa'i phyir de'i za ba po 'di yang rigs pa ma yin no zhes bstan pa'i phyir/ gal te dge dang mi dge'i las/ /zhes bya ba la sogs pa smos te/ ma byas pa'i las kyi 'bras bu longs spyod pa ni 'ga' yang yod pa ma yin te/ ma byas pa dang phrad pa la sogs pa'i skyon du thal bar 'gyur ba'i phyir ro/ /'di la yang gzhan gyi lan gyi dogs pa bsu ba ni/ gal te 'dod dang rjes mthun par/ /zhes bya ba la sogs pa smos te/ skyes bu las rnams kyi byed pa po ma yin mod kyi/ 'on kyang rang bzhin 'di'i ji ltar mngon par 'dod pa'i don gtod par byed pa de la 'di longs spyod do zhes bya bas nyes pa med do/ /'on te rang bzhin sems pa can ma yin na/ gang gis 'di ji ltar mngon par 'dod pa'i las kyi 'bras bu skyes bu la sgrub par byed la/ ji ltar dge ba la sogs pa'i las rnams kyi byed pa por 'gyur zhe na/ de dag zha bo long ba bzhin/ /zhes bya ba la sogs pa smos pa yin te/ ji ltar long ba mig dang ldan pa'i skyes bu dang 'brel ba las don la 'jug par 'gyur ba de bzhin du chen po la sogs pa thim par 'gyur ba sems pa can gyi skyes bu dang phrad pa las sems pa can bzhin du chos la sogs pa'i 'bras bu la nges par byed pa yin no zhes bya ba la skyon med do/ /de skad du yang / skyes bu mthong ba'i don du dang / /de bzhin gtso bo 'ba' zhig don/ /zha long bzhin du gnyi ga'i yang / /'brel pa de yis 'khor ba byas/ / zhes bshad pa yin no/ /gal te de ltar zhes bya ba la sogs pas len 'debs par byed do/ /gal te rang bzhin ni ma byas pa'i yang las kyi mngon par 'dod pa 'bras bu gtod par byed par 'gyur na/ de'i tshe thams cad du 'dod pa don du gnyer ba na skyes bu'i mngon par 'dod pa'i don thams cad ci'i phyir 'grub par mi 'gyur/ 'di snyam du de'i rgyu chos med pa'i phyir/ 'grub par mi 'gyur ro snyam na/ ci'i phyir na rang bzhin ni zhes bya ba la sogs pa smos te/ rang bzhin gyi 'bras bu ni chos yin te/ de yang de las tha mi dad pa'i phyir rtag tu yod pa nyid yin pas mngon par 'dod pa'i 'bras bur 'gyur ro/ /'di ltar thams cad ni 'di kho na ste/ 'di lta ste rang bzhin dang skyes bu dag go/ /de dag kyang rtag tu nye bas des na rtag tu 'bras bu nyid du 'gyur ro/ /gzhan yang gal te mngon par 'dod pa'i rang bzhin gyis ster bar byed pa de'i tshe ci'i phyir mi 'dod pa ster bar byed/ mi 'dod pa ni 'ga' yang don du gnyer ba ma yin no/ /gzhan yang rang bzhin gyis 'di la don gtod par byed pa med kyi/ 'on kyang 'di za ba po nyid du rigs pa ma yin te 'gyur ba med pa'i phyir ro zhes ston par byed pa ni/ don longs spyod dus rtag tu zhes bya ba la sogs pa ste/ gal te bde ba dang sdug bsngal la sogs pas sim pa dang / yongs su gdung ba la sogs pa'i ngo bo'i 'gyur ba ster bar mi byed pa de'i tshe/ nam mkha' bzhin du 'di zab po nyid du mi 'gyur ro/ /rang bzhin phan byed mi 'gyur ro/ /zhes sbyar te/ rang bzhin 'gyur ba med pa yin na phan pa bya bar mi nus pa'i phyir ro/ /ci ste 'gyur ba nyid du khas len na de'i tshe rtag pa nyid nyams par thal bar 'gyur ro/ /'di ltar mi rtag pa nyid la de'i gnas skabs ma yin pa nyid du smra ba na/ de yang 'gyur ba na yod pas ji ltar 'di rtag pa nyid du 'gyur te/ rtag pa nyid ni de'i gnas skabs kyi ngo bo yin pa'i phyir ro/ /gal te yul gyi rnam can blo/ /zhes bya ba la sogs pas gzhan gyi lugs kyis rnam pa gzhan du zab po nyid du dogs pa bsu ste/ 'di rnam par 'gyur bar gyur nas za ba po nyid du 'dod pa ni ma yin no/ /'o na ci zhe na/ blos nges par byas pa'i don gyi gzugs brnyan 'char ba'i sgo nas shes pa'i phyir te/ 'di ltar blo'i me long la zhugs pa'i gzugs brnyan me long gnyis pa lta bu'i skyes bu la 'pho ba de nyid 'di'i za ba po yin gyi/ rnam par 'gyur bar gyur pa ni ma yin no/ /gzugs brnyan tsam 'pho ba na yang skyes bu'i rang gi ngo bo 'dor ba ni ma yin te/ me long bzhin du de'i gnas skabs yin pa'i phyir ro / /des na za ba po ma yin pa'i gnas skabs kyi las khyad par med pa zhes bya ba'i sbyor ba 'di la gtan tshigs ma nges pa yin no/ /brjod pa zhes bya ba la sogs pas lan 'debs par byed pa yin te/ blo'i me long la zhugs pa'i don gyi gzugs brnyan me long gnyis pa lta bu'i skyes bu la skye ba gang yin pa de yin no zhes bya bar 'dod de/ de gal te skyes bu las tha mi dad pa de'i tshe de ma thag tu bshad pa'i skye ba dang 'jig pa dang ldan par thal bar 'gyur ba so na 'dug pa yin te/ skye ba dang ldan pa'i gzugs brnyan gyi ngo bo bzhin du de las tha mi dad pa'i phyir ro/ /ci ste tha dad pa zhes bya ba'i phyogs yin na de'i tshe za ba po nyid du mi 'gyur te/ za ba po ma yin pa'i gnas skabs la khyad par cung zad kyang med pa'i phyir ro / /skyes bu don gyi gzugs brnyan dang lhan cig 'brel pa las za ba po nyid du rigs pa yang ma yin te/ phan tshun phan par byed pa ma yin pa dag ni 'brel pa ma grub pa'i phyir ro/ /gzhan yang gal te gtso bos skyes bu'i blta bar 'dod pa la sogs pa shes na de'i tshe de de dang rjes su mthun par skyes bu don la 'jug par rigs na/ ji srid du bems po'i ngo bo yin pa'i phyir/ sems pa can dang 'brel pa yod na yang zha bo dang long ba bzhin du 'jug par mi rigs so/ /'di ltar long bas lam ma dmigs mod kyi/ 'on kyang 'di zha bo'i brjod par 'dod pa rigs pa nyid ma yin te/ de ni sems dang ldan pa yin pa'i phyir ro/ / de ltar gtso bo ni skyes bu'i blta bar 'dod pa la sogs pa rigs pa ma yin te/ de ni sems pa med pa'i bdag nyid yin pa'i phyir ro/ /phan tshun du phan pa byed pa ma yin pa de dag ni zha bo dang long ba bzhin du 'brel ba yod pa yang ma yin no/ /ci ste gtso bo ni skyes bu'i blta bar 'dod pa la sogs pa rigs pa yin no zhes 'dod pa de lta na yang 'di za ba po nyid du thal bar 'gyur ro/ /byed pa nyid du shes pa gang yin pa de ji ltar za ba yang shes par mi 'gyur/ de lta bas na byed pa shes pa za ba mi shes so zhes bya ba 'di las mi rigs pa gzhan ci yod de/ cung zad kyang med do zhes bya ba'i don to/ /byan po tshod ma la sogs pa'i byed pa po yin la/ de za bar ni mi shes pa ste/ za ba nyid du mi shes pa zhes bya ba la/ 'di la zhes bya ba'i sgra zhig khong nas dbyung ngo / /gtso bo blo dang ldan pa'i phyir/ /zhes bya ba la sogs pas gzhan gyi lan gyi dogs pa bsu ba yin no/ /'di zhes bya ba ni gtso bo'o/ /kun zhes bya ba ni lta bar 'dod pa dang rjes su mthun par 'jug pa'o/ /'di skad du bstan par 'gyur te/ gtso bo sems pa'i ngo bo ma yin pa de lta mod kyi/ 'on kyang nges pa'i mtshan nyid kyi blo dang ldan pa'i phyir skyes bu la gnas pa'i blta bar 'dod pa la sogs pa shes nas/ 'jug par 'gyur bas de'i phyir thams cad 'gal ba med pa yin no/ /de la lan smras pa ni/ blo ldan nyid na zhes bya ba la sogs pa ste/ gal te gtso bo blo dang ldan par khas len par byed na/ de'i tshe 'di skyes bu bzhin du sems pa can nyid du thal bar 'gyur te/ blo la sogs pa rnams ni sems pa can gyi rnam grangs yin pa'i phyir ro/ /'di ltar gang zhig gsal ba'i bdag nyid kyis rang rig pa'i ngo bo gsal ba gzhan la mi ltos pa de ni sems pa can zhes bya ba'o/ /de la ni blo la yang yod pa'i phyir de sems pa'i ngo bor 'gyur ro/ /gang gis de las tha dad pa'i skyes bu 'grub par 'gyur ba kho bo cag gi blo las ma gtogs pa'i sems pa'i ngo bo gzhan dmigs pa yang ma yin no/ /'dir gzhan gyi blo sems kyi ngo bo las tha dad pa sgrub pa'i phyir/ sgra dri ro la sogs pa bzhin/ /zhes bya ba la sogs pa smos te/ sbyor ba ni gang dang gang skye ba dang 'jig pa la sogs pa'i chos dang ldan pa de ni sems pa med pa can yin te ro la sogs pa bzhin no/ /blo yang de bzhin no zhes bya ba ni rang bzhin gyi gtan tshigs so/ /rang rgyud sgrub par byed par 'dod na zhes bya ba la sogs pas lan 'debs pa yin te/ res 'ga' 'di rang rgyud kyis sgrub par byed dam/ thal bar 'gyur ba'i sgrub par byed pas yin grang / de la gal te rang rgyud kyis na de'i tshe gtan tshigs gang yang rung ba la ma grub pa yin te/ 'di ltar snga na med pa skye ba'i mtshan nyid kyi rnam pa ji lta bu'i skye ba dang ldan pa dang / gtan nas 'jig pa'i bdag nyid kyi 'jig pa nyid sangs rgyas pa la grags pa'i rnam pa de lta bu ni khyed cag grangs can la ma yin te/ de dag ni khyed cag gis yongs su 'gyur ba dang / mi gsal ba'i ngo bo nyid du khas len pa'i phyir ro / /khyed cag gis ji lta ba de lta bu ni sangs rgyas pa la ma grub pas de'i phyir gtan tshigs gang yang rung ba lam grub pa yin no/ /sgra tsam grub pa na gtan tshigs grub pa yang ma yin te/ dngos po las dngos po 'grub pa'i phyir te/ dngos po kho na gtan tshigs yin pa'i phyir ro/ /ji skad du/ de nyid 'khrul la sogs yin na/ /sgra ni 'khrul pa med na yang / /sgrub byed skyon ldan shes bya ste/ /dngos las dngos po grub phyir ro/ /zhes bshad pa lta bu'o/ /ci ste thal ba la bsgrub pa zhes bya ba'i phyogs yin na de'i tshe yang bsgrub par bya ba la bzlog pa la gnod pa can gyi tshad ma nye bar ma bstan pa'i phyir/ gtan tshigs ma nges pa yin no/ /gang sems pa can la skye ba dang ldan pa dang 'jig pa dag tu mi 'gyur ba zhes bya ba 'di la 'brel pa ci zhig yod/ gang yang / 'di rtog pa/ ji ltar 'o ma shes pa med na yang / /be'u 'phel ba'i rgyu mtshan yin pa ltar/ /de ltar gtso bo skyes bu rnam grol ba'i/ /rgyu mtshan nyid du 'jug par 'gyur ba yin/ /zhes bya ba de yang rtog pa nyid ma yin no/ /'o ma ni rang dbang du be'u 'phel ba'i rgyu mtshan du 'jug pa ma yin no/ /'o na ci zhe na/ so sor nges pa'am/ res 'ga' ba'i rang gi rgyu dang rkyen dag las skye ste/ de ba skyes pa na be'u skyed pa'i rgyu mtshan du 'gyur ba yin pas shes pa med kyang 'jug pa yin no zhes bstan to/ /de ltar gtso bo 'jug pa ni mi rigs te/ 'di ltar rtag pa'i phyir dang / de las gzhan pa'i rgyu med pa'i phyir/ re zhig res 'ga' ba'i rgyu nye ba la rag las pa de'i nus pa res 'ga' ba rigs pa ma yin la/ rang bzhin yang ma yin te/ rgyu ma tshang ba med pa rtag tu nye ba nyid kyis mngon par mtho ba dang nges par legs pa'i mtshan nyid kyis skyes bu'i don thams cad cig car skye bar thal bar 'gyur ba'i phyir ro/ /ci ste yang blo dang sems pa can tha mi dad pa yin du chug mod/ de lta na yang 'di'i bdag ma bkag pa nyid do zhe na/ sems pa can la bdag gi sgrar/ /zhes bya ba la sogs pa smos te/ kho bo cag gis sems pa can la bdag gi sgras 'dogs pa tsam ni ma bkag go/ /'o na ci zhe na/ de la rtag pa'i mtshan nyid du sgro btags pa'i chos gang yin pa de bkag go/ / ci'i phyir zhe na/ dbang po dang snang ba dang yid la byed pa la sogs pa 'bras bu dang bcas pa'i phyir ro/ /de lta ma yin te/ gal te sems pa can rtag pa brtan par gyur na de'i tshe dbang po la sogs pa 'bras bu med pa kho nar 'gyur te/ de dag ni de skyed pa'i don du yin pa'i phyir dang / rtag pa yang skye ba mi srid pa'i phyir ro/ /'di nyid la dpe bshad pa/ gal te me ni rtag gyur na/ /zhes bya ba la sogs pa ste/ gal te me rtag par gyur na/ de'i tshe skye bo me'i don du bud shing sog pa nyid du mi 'gyur ro/ /de lta bas na sems pa can rtag pa dang gcig pu'i ngo bor rigs pa ma yin no/ /ji skad du 'dus pa'i ngo bo gang yin pa de ni gzhan gyi don du mthong ste zhes bya ba la sogs pa smras pa gang yin par 'dod ces bstan pa'i phyir/ mal cha stan gyi dpe dang ni/ /zhes bya ba la sogs pa smos te/ bya ba'i khyad par du 'dod pa yin nam/ yang na bya ba'i khyad par ma yin pa'i ngo bo yin pa'i phyir mi 'gyur ba'am/ rnam pa gcig tu na spyir gzhan gyi don tsam ma brtags na nyams dga' ba bsgrub par bya ba yin zhes bya ba rnam par rtog pa gsum mo/ /de la phyogs dang po yin na grub pa la sgrub ste/ 'di ltar mig la sogs pa de dag kho bo cag gis rnam par shes pa la phan 'dogs par 'dod de/ mig dang gzugs la brten nas mig gi rnam par shes pa skye ba nas/ lus dang rig bya la brten nas lus kyi rnam par shes pa skye bar 'gyur ro zhes bya ba'i bar du gsungs pa'i phyir ro/ /'on te phyogs gnyis pa yin na de'i tshe gtan tshigs 'gal ba yin no zhes bya ba bstan pa'i phyir/ 'gyur ba med pa'i phan pa nyid/ /ces bya ba la sogs pa smos te/ 'gyur ba med pa ste/ rtag pa'i phan pa nyid ni 'gyur ba med pa'i phan pa nyid do/ /de mig la sogs pas sgrub na dpe la bsgrub par bya ba las bzlog pa nyid kyis gtan tshigs la khyab pa'i phyir 'gal ba nyid do/ /'di ltar mal cha dang stan la sogs pa de dag ni g.yo ba nyid de/ mi rtag pa kho na phan pa rigs pa yin te/ 'gyur ba med pa la bogs dbyung bar mi nus pa nyid kyi phyir ro/ /ci ste spyir bya ba'i khyad par dang / bya ba'i khyad par ma yin pa'i rnam par rtog pa bsal nas gzhan gyi don tsam grub pa zhes bya ba'i phyogs gsum pa yin na/ de'i tshe yang grub pa la sgrub pa yin te/ mig la sogs pa rnams sems la phan 'dogs par 'dod pa'i phyir ro/ /ji ste ji ltar rigs pa can gyis khas blangs pa bzhin du sems kyang bsgrub bya'i chos can nyid du khas len par byed pa de lta na yang khyed cag gi 'dod pa mi 'grub ste/ bdag sems las tha dad du mi 'dod pa'i phyir ro/ /rigs pa can gyis mngon par 'dod pa'i don yang ma grub ste/ phan tshun phan pa byed pa nyid kyis mig la sogs pa rnams gzhan la phan 'dogs pa nyid du 'dod pa'i phyir ro/ /gzhan nyid ni pha rol dang tshu rol bzhin du ltos pa can yin pa'i phyir ro/ /sems ni rgyu du mas byas pa'i phan pa 'dzin pa nyid kyis skye ba'i phyir dang / 'dus pa nyid ni brtags pa yin pa'i phyir gtan tshigs kyang ma grub pa yin no/ /de kho na nyid bsdus pa'i dka' 'grel las ser skya bas kun du brtags pa'i bdag brtag pa ste dgu ba'o/ / //nam mkha'i gos can gyis kun du brtags pa'i bdag dgag pa'i don du/ rgyal dpog pa bzhin rgyal ba pa / /zhes bya ba la sogs pa smos te/ rgyal ba pa zhes bya ba ni nam mkha'i gos can dag go/ /de dag ni 'di skad du bdag ni sems kyi mtshan nyid kho na yin te/ de yang rdzas kyi ngo bos gnas skabs tha dad la gnas skabs can tha mi dad pa'i phyir rjes su 'gro ba'i bdag nyid yin la/ rnam grangs kyi ngo bos ni gnas skabs re re la tha dad pa'i phyir log pa'i bdag nyid yin par smra'o/ /bdag gi tshul gnyis po 'di yang mngon sum nyid kyis grub pa'i phyir tshad ma gzhan gyis bsgrub par mi bya'o/ /'di ltar bde ba la sogs pa'i gnas skabs tha dad kyang gnas skabs pa'i bdag nyid gang yin pa'i sems pa can gnas skabs thams cad la dmigs pa de ni rdzas yin no/ /rnam grangs ni rim gyis 'byung ba'i bde ba la sogs pa'i gnas skabs tha dad pa rnams so/ /de dag kyang mngon sum gyis grub po zhes bya ba ni gzhan gyi bsam pa'o/ /de la yang zhes bya ba la sogs pas lan 'debs par byed de/ 'di la phyogs gnyis te/ sems pa can gyi bdag nyid gang yin pa'i rdzas te/ rnam grangs dag dang 'brel pa na res 'ga' 'gyur ba med pa ste/ sngar yod pa ma dor ba'i sems pa can la sogs pa rang gi ngo bo dang 'brel pa yin nam/ sngar gyi ngo bo dor ba dang 'brel pa yin/ de la gal te phyogs phyi ma yin na de'i tshe rtag pa nyid nyams par thal bar 'gyur te/ gnas skabs can 'ga' yang med pa'i phyir ro/ /ci ste mi 'gyur ba'i ngo bo zhes bya ba'i phyogs dang po yin na de'i tshe snga ma dang phyi ma'i gnas skabs dag de la khyab par te/ gzhan nyid du yod pa ma yin pa'i phyir/ sems pa des yongs su 'gyur bar mi 'gyur zhes mi 'thob ste/ yongs su 'gyur ba ni gzhan du 'gyur ba'i mtshan nyid can yin pa'i phyir/ yongs su 'gyur bar 'dod pa yin no/ /sbyor ba ni gang zhig snga ma dang phyi ma'i gnas skabs su khyad par med pa de ni yongs su 'gyur bar mi 'gyur te nam mkha' bzhin no/ /sems pa can gang gnas skabs thams cad du khyad par med do zhes bya ba ni khyab par byed pa mi dmigs pa'o/ / yul dang dus dang rang bzhin dag /ces bya ba la sogs pas gzhan gyi lugs kyi gtan tshigs ma grub pa'i dogs pa bsu ba yin te/ 'di ltar gal te gcig tu rnam grangs dag las rdzas tha dad pa yin na/ de'i tshe khyad par med par 'gyur na ji srid du yul dang dus dang rang bzhin tha mi dad pa'i phyir rdzas dang rnam grangs dag gcig tu 'dod la/ grangs la sogs pa'i bye brag ni tha dad de/ de la grangs ni gcig dang mang po nyid la sogs pa'o/ /'di ltar rdzas ni grangs gcig dang ldan la / bde ba la sogs pa rnams ni grangs du ma'i khyad par can yin no/ /mtshan nyid kyang tha dad pa yin te/ 'di ltar rdzas kyi mtshan nyid ni rjes su 'jug pa yin la/ rnam grangs kyi mtshan nyid ni ldog pa yin no/ /ming ni ming du btags pa'o/ /don ni 'bras bu'o/ /de skad du yang / yul dang dus dang rang bzhin tha mi dad pa'i phyir chos dang chos can tha mi dad pa yin no/ /grangs dang / ming dang mtshan nyid dang / 'bras bu tha dad pa'i phyir na tha dad de/ 'di lta ste dper na/ gzugs la sogs pa rnams bum pa lta bu'o zhes bshad do/ /'di ltar bum pa las gzugs la sogs pa de dag yul la sogs pa dag gis tha mi dad de/ bum pa'i yul dang rang bzhin gang yin pa de nyid gzugs la sogs pa rnams kyi yin no/ /grangs la sogs pa dag gis ni bum pa la sogs pa las de dag tha dad pa yin te/ 'di ltar bum pa ni gcig yin la/ gzugs la sogs pa ni mang po yin no zhes bya ba ni grangs tha dad pa'o/ /bum pa la sogs pa'i rdzas ni rjes su 'jug pa'i mtshan nyid yin no/ / gzugs la sogs pa'i rnam grangs ni ldog pa'i mtshan nyid yin no zhes bya ba ni mtshan nyid tha dad pa'o/ /bum pas chu len pa'i bya ba byed la/ gzugs la sogs pa ni gos dmar po la sogs pa zhes bya ba ni 'bras bu tha dad pa'o/ /de bzhin du sems pa can gyi bdag nyid kyi bdag gi rdzas dang / bde ba dang / sdug bsngal la sogs pa rnam grangs dag la yang sbyar bar bya'o/ /'bras bu tha dad pa ni 'di ltar rtogs par bya ste/ sems pa can gyis ni don nyams su myong bar byed la/ bde ba la sogs pa ni phan pa dang gnod pa yin no zhes brjod do/ /de ston pa ni/ gzugs sogs bum pa zhes bya ba la sogs pa ste/ grangs dang ming ni tha dad nyid/ /ces bya ba ni rdzas dang rnam grangs dag ces 'chad par 'gyur ba dang 'brel zhing / 'bras bu rjes 'jug ldog pa dag /mtshan nyid don gyi tha dad nyid/ /ces bya ba ni ci rigs su sbyar bar bya ste/ 'bras bu'i tha dad pa ste don gyi tha dad pa nyid dang / rjes su 'jug pa dang ldog pa dag ni mtshan nyid tha dad pa'o zhes sbyar bar bya'o/ /rdzas dang rnam grangs dag ces bya ba 'dir bcad do/ /de ltar zhes bya ba la sogs pas gtan tshigs ma grub pa mjug sdud par byed do/ /de ltar byas na rdzas ni gcig tu khyad par med pa ma yin gyi/ 'on kyang rnam grangs kyi ngo bo tha dad pas khyad par du 'gyur ba yin te/ des na rnam grangs dag las rdzas gcig tu tha mi dad pa'i phyir ro zhes bya ba ni gtan tshigs ma grub pa yin na / /rang bzhin dbyer med ces bya ba la sogs pas lan 'debs par byed do/ /gal te rdzas dang rnam grangs dag tha mi dad par khas len par byed na de'i tshe bdag nyid thams cad kyis tha mi dad pa yin du chug mod/ de las bzlog pa tha dad par ji ltar 'gyur/ gcig la gcig gi cho sgrub pa dang dgag pa phan tshun 'gal ba regs pa ma yin te/ 'di ltar gcig ces bya ba 'dis tha dad pa bkag pa med na mi 'byung ba'i rang bzhin tha dad pa brjod do/ /rang bzhin tha mi dad pa de yin na de nyid kyi tshe ji ltar de bkag pa'i bdag nyid kyi tha dad par 'gyur/ sbyor ba ni gang la tha dad pa med pa de la/ de las bzlog pa'i tha dad pa'i go skabs rnyed pa ma yin te/ dper na rnam grangs de dag nyid dang / so sor nges pa'i thun mong ma yin pa'i bdag nyid kyi ngo bo'i rdzas gang yin pa de'i rang bzhin las tha mi dad pa bzhin no/ /rdzas dang rnam grangs dag gi rnam par gzhag pa yang tha mi dad pa yin no zhes bya ba ni khyad par byed pa 'gal ba dmigs pa'o/ /de lta yin dang don dam par rdzas dang rnam grangs dag tha mi dad na mtshan nyid tha dad par yang mi 'gyur ro zhes ston pa ni/ de ltar rdzas dang rnam grangs dag /ces bya ba la sogs pa la/ gang ldog pa'i ngo bo dang tha dad pa'i rang bzhin de ni ldog pa dang ldan pa yin te/ rnam grangs dag gi rang bzhin bzhin no/ /rdzas kyang ldog pa dang ldan pa'i ngo bo las tha mi dad pa yin no zhes bya ba ni rang bzhin gyi gtan tshigs so/ /yang na gang zhig rjes su 'jug pa'i bdag nyid kyi ngo bo dang tha mi dad pa de ni rjes su 'jug pa'i bdag nyid yin te rdzas kyi ngo bo bzhin no/ /bde ba la sogs pa rnam grangs rnams kyang rjes su mthun pa'i bdag nyid kyi ngo bo dang tha mi dad pa'i rang bzhin yin no zhes bya ba ni rang bzhin gyi gtan tshigs kho na'o/ /de lta ma yin na grub pa dang bde ba tha dad pa'i phyir ro/ / tha dad pa kho nar mi 'gyur ro/ /'gal ba'i chos dang ldan pa yang gcig yin na tha mi dad pa'i tha snyad chad pa kho nar 'gyur ro zhes bya ba ni bzlog pa la gnod pa can gyi tshad ma'o/ /de'i phyir zhes bya ba la sogs pas mjug sdud par byed de/ bdag la sogs pa kho nar zhes bya ba la sogs pa'i sgras bum pa dang 'bru la sogs pa gzung ngo / /skye ba dang 'jig pa zhes bya ba la sogs pas thal ba bsgrub pa'i gnyis pa'i 'bras bu 'chad de/ rdzas de yang rnam grangs kyi ngo bos skye ba dang 'jig pa dang ldan par 'dod pa'i phyir ro/ /de'i phyir thal bar bsgrub pa bsgrub bya ma tshang bar 'gyur du dogs pas nges pa'i bdag nyid bzhin zhes bshad de/ 'di ni nges pa yang yin la/ rdzas la sogs pa'i ngo bo'i bdag ste rang bzhin yang yin no zhes khyad par bsdu ba'o/ /de'i phyir rjes 'gro med 'jig pa/ /zhes bya ba la sogs pas mjug sdud par byed do/ /rnam grangs las tha mi dad pa'i rang bzhin nyid kyi phyir rdzas kyi ngo bo'i rjes su 'gro ba'i bdag nyid ma grub pa 'ba' zhig tu ma zad kyi/ 'di las kyang ste rnam grangs las tha dad pa dmigs pa'i mtshan nyid du gyur pa las mi dmigs pa'i phyir 'di ni med pa'i tha snyad kyi yul nyid yin no zhes bstan pa'i phyir/ rnam grangs rjes 'gro'i bdag nyid kyi/ /zhes bya ba la sogs pa smos te/ des na rjes su 'jug pa'i rdzas kyi bdag nyid mngon sum nyid kyis grub po zhes gang smras pa de ma grub ste/ mngon sum du 'dod pa'i shes pa 'ga' zhig la rnam grangs las tha dad pa'i lus so sor snang ba rjes su 'jug pa ro gcig pa'i rdzas kyi bdag nyid ni snang bar mi mngon no/ /gal te de lta yin na gang gi tshe rnam grangs las tha dad pa'i rdzas kyi bdag nyid yod pa ma yin pa de'i tshe grangs la sogs pa'i tha dad pa ji ltar grub ce na/ rnam pa sna tshogs don byed rung / /zhes bya ba la sogs pa smos te/ gzugs la sogs pa rnam grangs rnams ni thun mong dang thun mong ma yin pa tha dad pa'i phyir rnam pa sna tshogs pa du ma'i rnam pa'i don byed pa yin no/ /de la thun mong ba ni chu 'dzin pa la sogs pa'i mtshan nyid do/ /thun mong ma yin pa ni gos kha bsgyur ba dang mig la sogs pa'i shes pa skyed pa'i mtshan nyid do/ / der rung ba ni nus pa'o zhes tshig rnam par sbyar ro/ /de la thams cad cig car thun mong ba'i 'bras bu la nye bar sbyor ba'i phyir thams cad rgyu nyid du shes par bya'i don du tha mi dad pa'i rdzas kyi ngo bo med na yang tha dad pa de dag nyid bum pa zhes bya ba la sogs pa'i sgras grangs gcig gi khyad par brjod do/ /thun mong ma yin pa'i 'bras bu nye bar sbyor ba nyid brjod par 'dod pa la ni/ grangs sna tshogs pa ni/ de dag la grangs tha dad pa dang 'bras bu tha dad pa yang gzhag par bya'o/ /'o na ji ltar mtshan nyid tha dad pa yin zhe na/ mtshungs sogs shes bya'i rgyur gyur pa/ /zhes bya ba smos te/ rjen pa dang smin pa la sogs pa'i gnas skabs dag tu skad cig re rer 'jig na yang dbyibs kyi khyad par 'dra ba nyid du skye ba na rtog pa med pas nyams su myong ba'i yul nyams su myong nas gnas skabs thams cad du bum pa zhes bya ba la sogs pa'i 'dra ba'i shes pa'i rgyur gyur pa yin no/ /ljang gu dang dmar po la sogs pa'i kha dog mi mthun par skye ba na mi 'dra ba'i shes pa'i rgyu yin pa de lta na ngo bo gcig rjes su 'gro ba med na yang mtshungs pa dang / mi mtshungs pa'i rgyur 'gyur ro/ /rjes su 'jug pa dang ldog pa'i tshul du rnam par gzhag go zhes bya ba'i mtshan nyid tha dad par rnam par gzhag pa'o/ / mtshungs sogs zhes bya ba la sogs pas mi 'dra ba'i shes pa gzung ngo / /'o na ci ltar ming tha dad ce na/ rnam pa de lta'i zhes bya ba la sogs pa smos te/ rnam pa de lta'i ste/ rnam pa sna tshogs pa'i don byed par rung ba 'dra ba la sogs pa'i shes pa'i rgyu gzugs la sogs pa'i yul gyi dngos po bum pa zhes bya ba dang / gzugs la sogs pa zhes bya ba'i brda gang la yod pa de la de skad ces bya'o/ / rnam pa de lta bu'i don gang la sgra dang shes pa yod pa de dag la de skad ces bya ste/ de dag gi spyod yul zhes tshig rnam par sbyar ro/ /des na dngos po rnams kyi bdag med pa mngon sum nyid kyis grub po zhes mjug sdud pa'i sgo nas ston pa ni/ skye dang 'jig pa zhes bya ba la sogs pa'o/ /rnam grangs dag ces bya ba ni gzugs la sogs pa dang rang rig pa'i rang bzhin gyi sdug bsngal la sogs pa'o/ /'ba' zhig ces bya ba ni tha mi dad pa'i rdzas gcig gi ngo bo dang bral ba ste/ rtag pa ni rim dang cig car dag gis don byed par 'gal ba'i phyir ro/ /'di dag skye ba dang mi skye ba'i chos can nyid yin/ don bya ba byed pa nyid rigs pa yin te/ de'i phyir 'di dag bya ba byed pa'i mtshan nyid kyi yod pa'i rtags las bdag med par rjes su dpag pa las kyang grub po/ /gang yang rdzas ni dmigs pa'i ngo bo nyid snang ba med de zhes bya ba la sogs pa smras pa de la 'on te zhes bya ba la sogs pas gzhan gyi len gyi dogs pa bsu ba yin te/ 'dres pa ni gcig gi ngo bor gyur pa'o/ /de'i phyir rdzas kyi ngo bo yod du zin kyang rnam par phye na mi snang ngo snyam du bsams pa'o/ /'dres pa nyid la rgyu bshad pa ni de'i phyir tshul gnyis cha med pa zhes bya ba la sogs pa ste/ de'i phyir te bdag la sogs pa'i dngos po gang gi phyir tshul gnyis pa yin na yang mi'i seng ge bzhin du cha med par 'dod de/ de lta bas na cha med pa'i phyir de ni 'dres pa ste/ gnyi ga'i ngo bo yin pa'i phyir logs shig tu mi dmigs so/ / de 'di ni khyed kyis phan tshun 'gal ba brjod pa yin no zhes bstan pa'i phyir/ 'on te tshul gnyis zhes bya ba la sogs pa smos te/ gal te cha med pa yin na de'i tshe tshul gnyis zhes bya ba 'di 'gal ba yin te/ tha snyad 'di ni don sna tshogs pa'i rgyu mtshan can yin pa'i phyir ro/ /ci'i phyir zhe na/ tshul gyi sgras rang bzhin rjod par byed pa'i phyir ro / /'di ltar tshul gnyis te / rang bzhin gnyis la yod pa de ni tshul gnyis kyi ngo bo zhes bya'o/ /rang bzhin gcig la gnyis rigs pa ma yang ma yin te/ gcig nyid nyams par thal bar 'gyur ba'i phyir ro/ /khyed kyis rang bzhin gnyis bstan pa kho nar zad kyi/ dngos po gcig la tshul gnyis yod pa yang ma yin te/ gcig dang du ma nyid dag ni phan tshun spangs te gnas pa'i mtshan nyid yin pa'i phyir ro / /gang yang mi'i seng ge de yang gcig pur te tshul gnyis su mi 'grub po zhes ston pa ni/ mi'i seng ge yang zhes bya ba la sogs pa smos te/ yang gi sgras ni rtsod pa'i rgyu gzhir gyur pa mi 'thad ba 'ba' zhig tu ma zad ces bya ba'o/ /de ni zhes bya ba ni mi'i seng ge'o/ /de ltar zhes bya ba ni yan lag sna tshogs kyis ches rgya che ba'i yul gnon pa'i ngo bor ro/ /gzhan du na de ltar snang bar mi 'gyur te/ sbrang bu'i rkang rjes tsam gyis bsgribs na yang de'i rnam pa de lta bus bsgribs par thal bar 'gyur ba'i phyir ro/ /'dis ni nor bu gzi'i kha dog sna tshogs pa la sogs pa yang gsal ba yin no/ /'di yang rgyas par yan lag can dgag par ston par 'gyur ro snyam du bsams pa yin no/ /de kho na nyid bsdus pa'i dka' 'grel las nam mkha'i gos can kyis kun du brtags pa'i bdag brtag pa ste bcu pa'o/ / //gzhan gnyis med par lta ba la dmigs pa'i gsang ba pa rnams ni sa la sogs pa yongs su gyur pa'i ngo bo shes pa rtag pa dang gcig pu'i rang bzhin du rtog par byed de/ de'i phyir de dag gi gzhung bstan pa'i phyir/ sa dang zhes bya ba la sogs pa smos te/ de'i bdag nyid ces bya ba na sa la sogs pa yongs su gyur pa'i ngo bo rtag pa dang / gcig pu'i shes pa'i bdag nyid ces bya ba'i don to/ /gzhan dag ces bya ba ni gsang ba par smra ba dag go/ /'di'i tshad ma gang yin zhe na/ gzung ba'i mtshan nyid ces bya ba la sogs pa smos te/ gang gis de dag snang bar 'gyur ba sa la sogs pa shes pa las ma gtogs pa'i gzung ba'i mtshan nyid du gyur pa yod pa ma yin te/ yan lag can dang rdul phra rab rnams med pa'i phyir ro / /de lta bas na shugs kyis sa la sogs pa 'di dag ni rnam par shes pa la snang ba'i ngo bo kho na yin no zhes nges par byed de/ 'di dag ces bya ba ni sa la sogs pa'o/ /de dag ces bya ba la sogs pas lan 'debs par byed do / nyes pa chung ldan zhes bya ba ni/ shes pa tsam rigs pa dang ldan pa khas len pa'i phyir ro/ /gal te de lta na ci'i phyir de la nyes pa chung ngu yang brjod ce na/ rtag pa nyid brjod phyir zhes bya ba smos so/ /yang ci'i phyir rtag pa nyid du khas blangs ba mi rigs pa yin zhe na/ gzugs sgra la sogs zhes bya ba/ /la sogs pa smos te/ rtag pa zhes bya ba ni de'i gnas skabs la brjod la/ de'i gnas skabs ma yin pa ni mi rtag pa nyid do/ /rnam par shes pa'i gnas skabs gcig thams cad nyid du gzugs dang sgra la sogs pa snang bar nyams su myong ba yang ma yin gyi 'on kyang rim gyis res 'ga' gzugs snang la/ yang gzhan gyi tshe sgra la sogs pa snang ngo / /de'i phyir gal te sgra la sogs pa 'di dag rtag pa dang gcig pa'i shes pa la snang ba'i bdag nyid du gyur na de'i tshe gos khra bo snang ba bzhin du cig car snang bar 'gyur te/ de snang ba'i bdag nyid kyi shes pa ni rtag tu gnas pa'i phyir ro/ /ci ste yang rim gyis sgra la sogs pa snang ba'i shes pa skye ba ni gnas skabs gzhan nyid yin te/ des na cig car sgra la sogs pa rig par mi 'gyur ro snyam na/ rtag na gnas skabs gzhan yang med/ /ces bya ba smos te/ gnas skabs dag ni gnas skabs can las gzhan ma yin pa'i phyir/ gnas skabs bzhin du gnas skabs can yang skye ba dang 'jig par 'gyur ba'am/ gnas skabs can bzhin du gnas skabs rnams kyang rtag pa nyid du thal bar 'gyur ro/ /gnas skabs rnams tha dad pa yin na yang 'di'i 'di zhes bya ba'i 'brel pa mi 'grub ste/ phan 'dogs pa med pa'i phyir dang rtag pa dang gcig pu'i shes pa tsam khas len pa 'gal ba'i phyir ro/ /gzhan yang shes pa'i bdag nyid rtag pa mngon sum gyis grub pa'am/ rjes su dpag pas sgrub par 'gyur grang re zhig mngon sum gyis ni ma yin no zhes ston pa ni/ gzugs la sogs pa rigs las shes / /zhes bya ba la sogs pa'o/ /gang gis mngon sum gyis grub par 'gyur ba rim gyis snang ba'i gzugs la sogs pa rigs pa las ma gtogs pa'i rtag pa dang gcig pu'i ngo bo'i gnas skabs pa'i shes pa nyams su myong ba ni med de/ gzugs la sogs pa rigs pa de yang rim gyis nyams su myong bas skad cig re rer 'jig par grub na tha mi dad pa gzhan ci zhig yod ces brjod par bya'o/ /de lta bas na rnam pa de lta bu'i shes pa'i bdag nyid dmigs pa'i mtshan nyid kyir gyur pa mi dmigs pa'i phyir med pa'i tha snyad kyi yul yin no snyam du bsams pa'o/ /rjes su dpag pas kyang mi 'grub po snyam ste/ 'di ltar rjes su dpag pa yin na rang bzhin gyi rtags sam/ 'bras bu'i rtags yin grang / re zhig rang bzhin ni ma yin te/ de lta bur gyur pa'i chos can 'ga' yang ma grub pas de'i rang bzhin ma grub pa'i phyir ro/ /chos can shes pa tsam grub na yang de la rtag pa nyid kyi bsgrub bya'i chos kyis 'ga' la yang khyab pa ma grub pa'i phyir ro/ /'bras bu'i rtags kyang ma yin te/ rtag pa ni rim dang cig car dag gis don byed par mi 'thad pa'i phyir dang / de'i 'bras bu 'ga' yang med pa'i phyir dang / de las tha dad pa'i 'bras bu gzhan khas ma blangs pa'i yang phyir ro/ /des na de lta yin na de lta bur gyur pa'i shes pa'i bdag nyid la sgrub par byed pa'i tshad ma 'ga' yang yod pa ma yin la/ gnod par byed pa ni mngon sum la sogs pa yod pas shes pa rtag pa'i rnam par 'gyur ba yin par mi rigs so/ /gzhan yang phyogs 'di la bcings pa dang thar pa'i rnam par gzhag pa yang mi 'gyur ro zhes ston pa ni/ phyin ci log dang zhes bya ba la sogs pa'o/ /gang gis skad cig re rer 'jig cing skyes bu so so'i shes pa du ma rgyud tha dad pa 'jug pa yin no zhes bya ba de'i phyogs la phyin ci log dang phyin ci ma log pa'i shes pa'i rgyun skye ba'i dbang gis bcings pa dang thar pa'i rnam par gzhag pa rigs pa dang ldan pa ma yin te/ [ (]rnam [,]rnal [)]'byor goms pa'i rim gyis kyang yongs su dag pa'i shes pa gong nas gong du skye ba'i phyir yongs su ma dag pa'i shes pa'i rgyun log pa las byang grol thob par 'gyur ba'i phyir thar pa thob par bya ba'i don gyi phyir 'bad pa 'bras bu dang bcas pa yin no/ /gang yang khyed cag gis bdag rtag pa dang gcig pu'i shes pa'i rang bzhin zhes bya ba de'i phyogs de la ni ji ltar shes pa gcig gi bdag nyid kyi skyes bu la bcings pa dang thar par 'gyur/ 'di ltar gal te shes pa rtag tu phyin ci log gi rang bzhin yin na de'i tshe gnas skabs gzhan logs shig pa med pa'i phyir thar pa rnam par gzhag par mi 'gyur ro/ /ci ste yang phyin ci ma log pa yin pa de'i tshe rtag tu yongs su dag pa'i rang bzhin yin pa'i phyir bcings par mi 'gyur ro/ /kho bo cag la ni rgyun tha dad pas kun nas nyon mongs pa can dang / dag pa rnams rnam par rig par 'dod de de'i phyir bcings pa dang thar pa'i rnam par gzhag pa'i rigs pa ma yin no/ /ji skad du/ kun nas nyon mongs rnam par dag /de ni drir bcas dri ma med/ /gal te nyon mongs de ma gyur/ /lus can thams cad grol bar 'gyur/ /gal te rnam dag de ma gyur/ /'bad pa 'bras bu med par 'gyur/ /zhes gsungs pa lta bu'o/ /ci ste yang bcings pa dang thar pa ni btags pa kho na yin mod/ don dam pa ni ma yin no snyam na/ de la btags pa la yang rgyu mtshan brjod par bya dgos so/ /shes pa mi rtag pa'i phyogs la ni rgyu mtshan bstan zin to/ / de lta yin dang khyed cag byang grol thob par bya ba'i phyir dang / 'khor ba las 'da' bar bya ba'i phyir de kho na nyid sgom pa'i 'bad pa gang yin pa de ni 'bras bu ngal ba 'ba' zhig tu zad do zhes bya ba ston pa ni/ rnal 'byor goms pa'i zhes bya ba la sogs pa ste/ gal te rnal 'byor pa de kho na nyid bsgoms pas cung zad cig zlog pa'am 'jug par byed pa de'i tshe 'di 'bad pa 'bras bu dang bcas par 'gyur na/ 'di ltar re zhig 'di phyin ci log par mi byed de/ gang gi phyir phyin ci log 'di de'i bdag nyid yin te/ shes pa rtag pa'i bdag nyid yin pas de'i phyir spang bar mi nus te/ rtag pa ni mi 'jig pa nyid kyis 'dor ba mi srid pa'i phyir ro/ /de kho na nyid kyi shes pa bsgoms pas sgrub par byed pa yang ma yin te / de'i bdag nyid yin pa'i phyir te/ shes pa rtag pa'i bdag nyid yin pas de kho na nyid kyi shes pa thams cad kyi tshe gnas pa'i phyir ro/ /de lta bas na 'di ni rigs pa ma yin no/ /de kho na nyid bsdus pa'i dka' 'grel las gsang ba ba'i bdag brtag pa ste bcu gcig pa'o// //gnas ma'i bu pas kun du brtags pa'i gang zag dgag pa'i phyir/ la la zhes bya ba la sogs pa smos te/ la la zhes bya ba ni gnas ma'i bu pa dag go/ /de dag ni bdag nyid bde bar gshegs pa'i sras su rlom na yang bdag gang zag gi thabs kyis phung po dag las de nyid dang gzhan du brjod du med pa rtogs par byed do/ /gang dag bcom ldan 'das bdag med pa gsung ba'i bde bar gshegs pa'i sras nyid du khas len pa de dag ji ltar de kho na nyid ma yin pa'i bdag tu lta ba la mngon par zhen par 'gyur zhes bstan pa'i phyir bzhad gad du byed pa'i tshig gis ston par byed pa ni/ bde bar gshegs pa par rlom yang zhes bya ba smos so/ /'di ltar dge ba dang mi dge ba'i las tha dad pa rnams kyi byed pa po dang / rang gis byas pa'i las kyi 'bras bu 'dod pa dang mi 'dod pa'i za ba po dang / gang yang phung po snga ma yongs su dor nas phung po gzhan len pas 'khor ba pa dang grol ba gang yin pa de bdag yin no zhes pa 'di ni bdag gi mtshan nyid do/ /'di thams cad kyang gang zag la 'dod pa'i phyir ming la rtsod pa 'ba' zhig tu zad do/ /ci ste yang gang zag pa brjod du med pa nyid la rigs pa gang yin zhe na/ mu stegs zhes bya ba la sogs pa smos te/ de ni gang zag phung po dag las tha dad pa yin na de ni mu stegs byed kyis kun du brtags pa'i bdag tu lta bar 'gyur ro/ /de lta yin dang bdag rtag par thal bar 'gyur ro/ /bdag rtag pa ni byed pa po dang za ba po la sogs par mi rigs te/ de ni nam mkha' bzhin du thams cad du khyab par med pa'i phyir ro/ /bcom ldan 'das kyis kyang bdag rtag pa'i mtha' bkag pa dang / chos thams cad bdag med pa'o zhes gsungs pa dang 'gal lo/ /'o na gzhan ma yin pa yin la rag mod ce na/ du ma sogs 'gyur zhes bya ba la sogs pa smos te/ gal te gang zag gzugs la sogs pa'i phung po nyid yin par gyur na/ de'i tshe phung po mang po dag las gzhan ma yin pa'i phyir de'i rang gi ngo bo bzhin du gang zag du ma nyid du 'gyur na gcig tu yang 'dod de/ ji skad du 'jig rten skye ba na gang zag gcig skye ste/ / 'di lta ste dper na de bzhin gshegs pa bzhin no zhes bshad pa lta bu'o/ /sogs pa'i sgras ni mi rtag pa nyid la sogs pa gzung ngo / /de lta yin dang gang zag kyang phung po bzhin du chad par 'gyur ro/ /de lta bas na byas pa chud zos par thal bar 'gyur ro/ /bcom ldan 'das kyis kyang chad pa smra ba dgag pa mdzad pas de'i phyir brjod du med pa'i gang zag yod do zhes bya bar grub po/ /de dag la brjod ces bya ba la sogs pas khyed cag gis brjod du med pa'i phyir zhes bya ba'i rang gi tshig nyid kyis gang zag dngos por yod pa ma yin par bstan pa yin no zhes ston par byed pa yin no/ /sbyor ba ni gang zhig dngos po las de nyid dang / gzhan dag tu brjod par bya ba ma yin pa de ni dngos po ma yin te nam mkha'i pad+ma bzhin no/ /gang zag kyang brjod par bya ba ma yin no zhes bya ba khyab par byed pa mi dmigs pa'o/ /chos mi mthun pa ni tshor ba la sogs pa'o/ /yang ji ltar 'di la khyab pa grub ce na/ dngos po gzhan zhes bya ba la sogs pa smos te/ dngos po ni dngos po las de nyid dang / gzhan nyid las mi 'da' ste/ go skabs gzhan med pa'i phyir ro/ / de lta ma yin na gzugs la sogs pa rnams kyang phan tshun brjod du med pa nyid du 'gyur ro/ /de lta bas na ngo bo med pa rang bzhin med pa la brjod du med par brtags kyi dngos po la ni ma yin no/ /ji ltar zhe na/ tha dad tha dad med rnam rtog /ces bya ba la sogs pa smos te/ dngos po nyid la tha dad pa dang tha mi dad pa'i rnam par rtog pa rten gyi/ dngos po med pa la ni ma yin no/ /des na de nyid dang gzhan nyid la sogs par brjod du med pa ni dngos med nyid la ste/ rang bzhin dang bral ba nyid la rigs kyi dngos po la ni de nyid dang gzhan nyid la sogs par bstan du med par rigs pa ma yin no zhes sbrel te/ de la tha dad pa dang tha mi dad pa dag las go skabs gzhan med pa'i phyir ro/ /yang ji ltar go skabs gzhan med ce na/ gang 'di zhes bya ba la sogs pa smos te/ 'di ltar gang zag gzugs la sogs pa'i rang bzhin ma yin no zhes bya ba gang yin pa 'di ni de la med ces dgag pa de ni gzugs la sogs pa de dag las gzhan nyid du brjod pa yin te/ dngos po la dngos po gzhan dgag pa ni rang bzhin gzhan sgrub pa med na mi 'byung ba yin pa'i phyir ro / /sbyor ba ni dngos po gang zhig gang gi rang bzhin dang bral ba de ni de las gzhan yin te tshor ba la gzugs bzhin no/ /gang zag tu brjod pa'i dngos po yang gzugs la sogs pa'i rang bzhin dang bral ba yin no zhes bya ba ni rang bzhin gyi gtan tshigs so/ /gang yang dngos 'di de nyid min pa bkag pa ni de'i ngo bo ma yin pa bkag pa yin te/ de ni de nyid dang tha mi dad pa kho na brjod pa yin te/ dngos po yod pa la don gzhan bkag pa ni de nyid sgrub pa med par mi 'byung ba'i phyir ro/ /de lta ma yin na gal te de ni rang bzhin 'ga' yang brjod pa ma yin pa de'i tshe rang bzhin thams cad bkag pa'i phyir dngos po med pa kho nar 'gyur ro/ /dngos po med pa nyid kyi mtshan nyid ni rang bzhin thams cad bkag pa yin pa'i phyir ro/ /sbyor ba ni dngos po gang zhig gang las/ don gzhan nyid bkag pa'i bdag nyid kyi de nyid yin pa de ni de kho na yin te/ dper na gzugs rang gi rang bzhin las don gzhan nyid bkag pa'i bdag nyid kyi de nyid yin pa bzhin no/ /gang zag kyang gzugs la sogs pa las don gzhan nyid bkag pa'i bdag nyid kyi de nyid yin no zhes bya ba ni rang bzhin gyi gtan tshigs so/ /dngos po ni dngos po de las de nyid dang gzhan nyid las mi 'da' ba'i phyir rtsa ba'i gtan tshigs kyi khyab pa grub po/ /de ltar re zhig brjod du med pa nyid du khas blangs pa na gang zag rtags su yod par 'gyur ro zhes bstan to/ /de ni gang zag dngos po nyid du khas len na yang brjod du med par rigs pa ma yin te/ de lta ma yin na dam bcas pa rang gi tshig dang 'gal bar 'gyur ro snyam du bsams nas mjug sdud par byed pa ni/ gang zag phung po las gzhan min/ /zhes bya ba la sogs pa'o/ /gzhan yang khyed cag gang zag brjod du med pa yin no zhes smra ba na/ gang zag phung po dag las gzhan nyid du ches gsal por 'thon pa'i sgras brjod pa yin no zhes ston pa ni/ 'gal ba'i chos dang 'brel pa ni/ /zhes bya ba la sogs pa'o/ /sbyor ba ni gang zag phan tshun spangs te gnas pa'i chos dang ldan pa de dag ni phan tshun tha dad pa yin te/ dper na lus can dang lus can ma yin pa'i chos dang ldan pa'i gzugs dang tshor ba dag lta bu'o/ /phung po dang gang zag dag kyang brjod par bya ba dang brjod du med pa la sogs pa phan tshun 'gal ba'i chos dang ldan pa yin no zhes bya ba ni rang bzhin gyi gtan tshigs so/ /gtan tshigs 'di ma grub pa yang ma yin no zhes bstan pa'i phyir/ 'di ltar tshor ba la sogs las/ /zhes bya ba la sogs pa smos te/ 'di ltar gang zag ni tshor ba dang 'du shes la sogs pa dag las de nyid dang gzhan dag tu brjod du med par 'dod la/ gzugs dang tshor ba la sogs pa ni tshor ba la sogs pa de dag las phan tshun gzhan nyid du brjod pas de'i phyir gtan tshigs ma grub pa ma yin no/ /'di las kyang 'gal ba'i chos dang ldan pa grub bo zhes ston pa ni/ gzugs la sogs pa'i phung po dag /ces bya ba la sogs pa la/ 'dus byas thams cad ni mi rtag pa'o zhes gsungs pa'i phyir gzugs la sogs pa ni mi rtag pa nyid du brjod par bya ba yin no/ /gang zag ni de ltar mi rtag pa nyid du brjod par bya ba ma yin par 'dod de/ de ni rnam pa thams cad du brjod du med pa'i phyir ro / /gtan tshigs ma nges pa yang ma yin te/ tha dad pa'i tha snyad kyi rgyu mtshan ni 'di tsam du zad pa'i phyir ro/ /de lta ma yin na sna tshogs pa thams cad dngos po gcig tu 'gyur ro/ /de lta yin dang lhan cig skye ba dang 'jig par thal bar 'gyur ro/ /de nyid dang gzhan dag tu brjod du med pa'i phyir gang zag dngos po ma yin no zhes bstan pa 'ba' zhig du ma zad kyi/ 'di las kyang ste/ mi rtag pa nyid du brjod du med pa nyid kyi phyir dngos po med pa yin no zhes bstan pa'i phyir/ yod pa nyid kyi mtshan nyid ni/ /zhes bya ba la sogs pa smos te/ 'di nyid ni yod pa nyid kyi mtshan nyid de/ dngos po nyid kyi rang bzhin ni 'di yin te/ 'di lta ste don byed par nus pa'o/ /dngos po med pa nyid kyi mtshan nyid ni nus pa thams cad dang bral ba yin pa'i phyir ro zhes bya ba'i shugs kyis don byed par nus pa'i mtshan nyid can ni dngos po nyid du gnas pa yin no/ /don byed pa de yang skad cig ma rnams kho na la nges pa yin te/ skad cig ma nyid kyis khyab po zhes bya ba'i tha tshig ste/ rtag pa ni rim dang cig car dag gis don byed pa 'gal ba'i phyir ro/ /de'i phyir de ltar skad cig ma nyid du gang zag brjod du med na dngos po yod pa ma yin te/ de la de'i khyab par byed pa skad cig ma nyid ldog pa'i phyir shing nyid log pa na shing sha pa nyid ldog pa bzhin no/ /ji skad du/ mi rtag nyid du brjod min gang / /de ni 'ga'i yang rgyu ma yin/ /zhes gang bshad pa yin no/ /gal te 'di snyam du gang zag rtag par gyur na/ de'i tshe de ni rim dang cig car dag gis don byed pa 'gal bar gyur na/ gang gi phyir 'di ltar mi rtag pa nyid du brjod du med pa de ltar rtag par yang yin pas so/ /de'i phyir 'di don dam par nus pa 'gal ba med pa nyid do snyam du sems na/ de ni yang dag pa ma yin te/ 'di ltar rnam pa gnyis ka dang bral ba'i dngos po'i rang gi mtshan nyid ni rigs pa ma yin te/ rtag pa dang mi rtag pa dag ni phan tshun spangs te gnas pa'i mtshan nyid yin pa'i phyir ro/ /dngos po'i rnam pa gcig gtong ba dang yongs su len pa dag ni de las gzhan gyi rnam pa yongs su gzung ba dang btang ba med na mi 'byung ba'i phyir ro/ /kho bo cag gis ni gang zag brjod du med pa'i sgrar mngon par zhen pa na ma bkag ste/ rang dbang can 'dod pa tsam la rag las pa ni sus kyang dgag par mi nus pa'i phyir ro/ /'on kyang gang zag ces bya ba'i dngos po rang bzhin thams cad du yod dam/ 'on te med ces bya ba dngos po'i rang bzhin 'di 'dir dpyad par bya'o/ /gal te yod na de'i tshe rtag pa nyid yin te/ rtag pa zhes bya ba gzhan 'ga' yang ma yin te/ 'on kyang rang bzhin rtag tu gnas pa 'jig pa med pa gang yin pa de ni rtag pa zhes bya ste/ ji skad du/ gang gi rang bzhin 'jig med pa/ /de la mkhas rnams rtag ces brjod/ /ces bshad pa bzhin no/ /ci ste med do zhes bya ba'i phyogs yin na de'i tshe 'di mi rtag pa nyid yin te/ mi rtag pa'i mtshan nyid ni mi gnas pa'i rang bzhin yin pa'i phyir ro/ /de'i phyir skad cig ma dang skad cig ma ma yin pa dag las ma gtogs pa'i phung po gzhan med pa'i phyir la/ skad cig ma yin pa ni rim dang cig car dag gis don byed par 'gal ba'i phyir skad cig ma nyid kyis don bya ba byed pa nus pa'i mtshan nyid kyi yod pa la khyab pa'i phyir / gang zag la skad cig ma nyid log pa na yod pa ldog par grub po/ /gal te gang zag med pa de lta yin na ci'i phyir bcom ldan 'das kyis srog gang yin pa de lus yin nam/ srog kyang gzhan la lus kyang gzhan yin zhes zhus pa la/ 'di ni lung du mi ston pa yin no zhes gsungs / gang gi phyir med pa nyid do zhes ci'i phyir ma gsungs she na/ lung dang 'gal ba dag la ni/ /zhes bya ba la sogs pa smos te/ gal te chos can gang zag grub par gyur na de'i tshe de'i chos de nyid dang gzhan nyid la sogs pa lung bstan par 'os na ji tsam du chos can de nyid ma grub na de ji ltar med pa de'i chos ston par 'gyur/ ri bong gi rwa la sogs pa med pa la ni gang gis 'di lung bstan par 'gyur ba rno ba la sogs pa srid pa ma yin no/ /de'i phyir gang zag brtags su yod pa nyid gsal bar bya ba'i phyir bcom ldan 'das kyis 'di ni lung du mi ston pa yin no zhes gsungs kyi/ med do zhes ni ma gsungs te/ gzhan gyi chos can gyi rang bzhin mi 'dra ba'i phyir ro/ /yang na brtags su yod pa yang med pa mngon par zhen pa spang ba'i don du stong pa nyid bstan pa'i skal ba dang mi ldan pa'i gdul bya'i skye bo'i bsam pa la ltos nas med do zhes de skad du ma gsungs so/ /ji skad du/ lta ba'i mche bas smas pa dang / /las rnams 'jig pa la ltos nas/ /stag mos phru gu khyer ba ltar/ /rgyal bas chos rnams bstan pa mdzad/ /ces bya ba de lta bu slob dpon dbyig gnyen la sogs pas mdzod dang don dam pa bdun cu pa la sogs par dgongs pa gsal bar byas pa'i phyir ro/ /brtson pa byas pa yin na de'i phyir rtogs pa de nyid du go bar bya'o/ /'dir ni gzhung mangs kyis 'jigs nas ma bris so snyam du bsams pa'o/ / gal te de lta na/ rdzus te byung ba'i sems can yod do zhes bya ba 'di ji ltar drang zhe na/ med pa pa dag dgag pa'i phyir/ /zhes bya ba la sogs pa smos te/ sems can yod par brjod pa brtse ba dang ldan pa sna tshogs pa ston pa ni 'gal ba med do zhes bya ba ni tshig gi lhag ma'o/ /sems kyi rgyud gang las sems can btags pa de ni 'khor ba rgyun mi 'chad pa la dgongs nas bcom ldan 'das kyis sems can yod do zhes gsungs so/ /de lta ma yin na rgyu dang 'bras bu'i skad cig ldog pa med pa brgyud pa'i 'du byed rnams kyang med par go ba'i phyir 'jig rten pha rol med pas 'jig rten pha rol ma grub po zhes gdul bya med par blta bar 'gyur ro/ /'o na dge slong dag khur yang bstan par bya'o/ /khur len pa dang khur 'dor ba dang / khur khyer ba yang bstan par bya ste/ de la khur ni nye bar len pa'i phung po lnga po rnams so/ /khur len pa ni srid pa'o/ /khur 'dor ba ni thar pa'o/ /khur khyer ba ni gang zag go zhes gang gsungs pa de ji ltar drang / khur nyid khur khyer bar rigs pa ni ma yin no zhe na/ tshogs pa la sogs zhes bya ba la sogs pa smos te/ de la tshogs pa nyid du brjod par 'dod pa dus mtshungs pa'i phung po rnams kho na tshogs pa'i tha snyad rten pa yin te/ rgyu dang 'bras bur gyur pa de dag nyid cig car mi 'byung ba la rgyun zhes bstan te/ rnam pa gcig tu rtog pa'i rgyur gyur pa'i rgyun dang tshogs pa dag gi sgras bstan pas des na tshogs pa la sogs pa'i thugs kyis te/ tshogs pa la sogs pa'i dgongs pas khur dang de khyer ba la sogs pa bstan pa la 'gal ba med do zhes bya ba ni lhag ma'o/ /sogs pa'i sgra dang pos rgyun la sogs pa gzung ngo / /gnyis pas ni khur la sogs pa'o/ /de la phung po tshogs pa de dag nyid rgyun la sogs pa'i ngo bos brjod par 'dod pas gang zag khur khyer ba zhes bstan te/ de nyid la 'jig rten na gang zag tu rlom pa'i phyir ro/ /de nyid kyi phyir bcom ldan 'das kyis khur khyer ba'i gang zag gang yin zhes smras pa la/ tshe dang ldan pa gang zag 'di'i rigs ni 'di lta bu/ rus ni 'di lta bu/ zas ni 'di lta bu zhig za za/ bde ba dang sdug bsngal ni 'di lta bu zhig myong / 'di ltar tshe ring zhes bya ba la sogs pas gang zag bstan pa yin no/ /phung po tshogs pa'i mtshan nyid de nyid la ci nas kyang btags par yod pa shes par bya ba yin gyi/ gzhan gyis kun du brtags pa'i rtag pa rdzas su yod pa gzhan ni shes par mi bya'o zhes bstan pa'i don du'o/ /gdon mi za bar de ltar shes par bya ste/ de lta ma yin na khur len pa yang phung po dag las logs shig tu bstan pa'i phyir gang zag bzhin du phung po'i nang du ma gtogs par 'gyur ro/ /de'i phung po gzhan de dag bskyed par bya bar 'jug pa'i phyir phung po snga ma de dag nyid khur zhes bya bar gsungs la/ gang dag 'bras bur gyur pa'i skye ba de dag ni khur khyer ba zhes gsungs pas 'di ni shes par byed pa ma yin no/ /gsal bar byed par smras pa/ bdag khas mi len na de bzhin gshegs pa'i gsung 'di don dang ldan par gzhag par mi nus te/ gang gi phyir btsun pa gzugs bdag ma lags/ btsun pa tshor ba dang / 'du shes dang / 'du byed rnams dang / rnam par shes pa bdag ma lags/ de bzhin du dge slong dag gzugs 'di ni khyod ma yin/ tshor ba dang / 'du shes dang / 'du byed rnams dang / rnam par shes pa ni khyod ma yin zhes bya ba 'di gsungs te/ 'dis ni gzugs la sogs pa'i phung po rnams nga rgyal gyi yul nyid bkag la 'di ni khyad par bkag pa yin gyi/ spyi bkag pa ni ma yin no/ /bdag khas mi len na yang spyi nyid dgag par bya ba yin gyi/ khyod nyid dang / bdag nyid ni ma yin pa'i phyir khyad par dgag pa ni gzhan sgrub pa med na mi 'byung ba yin te/ dper na mig g.yon pas mi mthong ngo zhes brjod pa na g.yas pas mthong ngo zhes go ba nyid yin no/ /des kyang mi mthong na g.yon pa smos pa don med de mi mthong ngo zhes bya ba kho na brjod par 'gyur ro/ /de bzhin du 'di la yang gzugs bdag ma yin pa nas rnam par shes pa bdag ma yin zhes bya ba'i bar du gsungs pa na/ de dang mi mthun pa'i bdag yod do zhes ston par 'gyur ro/ /de yang brjod du med pa'am gzhan yin du chug mod/ thams cad du bdag yod do zhe'o/ /'dir smras pa/ khyad par dag ni dgag pa yang / /zhes bya ba la sogs pa la/ 'di skad du bstan pa yin te/ 'jig tshogs la lta ba'i ri'i rtse mo nyi shu mtho ba blo gros ngan pa rnams la 'jug pa 'di lta ste/ gzugs bdag yin pa nas rnam par shes pa bdag yin pa'i bar dang / gzugs la bdag gnas pa nas rnam par shes pa la bdag gnas pa'i bar dang / bdag gzugs dang ldan pa nas bdag rnam par shes pa dang ldan pa'i bar dang / gzugs bdag gi yin pa nas rnam par shes pa bdag gi yin pa'i bar du zhes bya ba'o/ /de la lta ba dang po lnga dgag pa'i phyir/ de'i lta ba can la khyad par gyi tshul gyis bkag pa mdzes pa yin no/ /gzugs bdag yin zhes bya ba la sogs pa'i lta ba de dag gang dag la yod pa de dag ni de'i lta ba can te/ blo gros blun po'i dogs pa'i gnas gang kho na yin pa de kho na rjes su brjod nas bzlog pa yin gyi/ 'di la sgrub pa 'ga' zhig bzhed pa ni ma yin no/ /de lta ma yin na nyan pa po legs par mi sbyor ba'i tshig smra ba na ston pa po rtog pa dang ldan par mi 'gyur ro/ /de kho na nyid bsdus pa'i dka' 'grel las gnas ma'i bu pa'i bdag brtag pa ste bcu gnyis pa'o/ / //g.yo ba zhes bya ba'i khyad par 'di bsgrub pa'i phyir/ yang na zhes bya ba la sogs pa smos te/ dngos po mtha' dag la khyab pa'i skad cig mar 'jig pa bsgrub pa nyid kyis gzhan gyis kun du brtags pa'i rang bzhin dang dbang phyug la sogs pa dngos po mtha' dag gi tshogs sgrub pa gcig gis gsal ba yin na yang kho bo cag gis gzhung shin tu rgyas par bkod pas tshig re re nas brjod nas sun 'byin pa rtsom pa gang yin pa de ni ngal bar byed pa 'ba' zhig tu zad de/ thabs sla la nyung ba nyid kyis de sun 'byin pa'i phyir ro snyam du dgongs pa yin no/ /'di ltar gzhan kha cig dag gis rang bzhin la sogs pa thams cad ni skyes ma thag tu 'jig pa'am rjes su 'gro ba med par bkag pa'i chos can du mi 'dod do/ /de lta bas na 'di dang dngos po mtha' dag gi khyab par byed pa'i mtshan nyid kyi skad cig mar 'jig pa bsgrubs pa nyid kyis bsal ba yin no snyam du bsams nas/ kho bo cag gis rang bzhin la sogs pa nas gang zag gi mthar thug pa bshad zin pa dang / 'chad par 'gyur ba'i rigs dang / yon tan dang / rdzas la sogs pa dang sgra dang / don dag dang / tshad ma dang / gzhal bya dag dang / nor bu'i gzi lta bur kha dog sna tshogs pa'i dngos po dang / dus gsum du 'jug pa'i ngo bo dang / tshu rol mdzes pa pas khas blangs pa'i 'byung ba bzhi dang / rgyal dpog pas 'dod pa'i rig byed kyi sgra'i tshogs khyad par med par gsal bar bya ba'i phyir skad cig mar 'jig pa bsgrub par bya'o/ /gsal bar zhes bya ba ni de sgrub par byed pa'i tshul gsum pa'i gtan tshigs ston pa'i phyir ro / /de'i phyir bstan pa'i dngos po brtags pa 'di nyid la bstan bcos mtha' dag gi don yongs su rdzogs pa yin no zhes bstan par 'gyur ro/ /'di ji ltar bsgrub par bya zhe na/ byas dang ma byas nyid sgo nas/ /zhes bya ba la sogs pa smos te/ 'di ni rigs pa can la sogs rnams skad cig ma'i dngos po gcig kyang yod pa ma yin no snyam du sems pa na/ byas pa dang ma byas pa nyid kyi sgo nas dngos po rnams phung po gnyis kho nar rnam par 'jog par byed do/ /de la kha cig ni byas pa yin te bum pa la sogs pa lta bu'o/ /la la ni ma byas pa yin te/ rdul phra rab dang nam mkha' la sogs pa lta bu'o/ /gzhan dag gis te/ gnas ma'i bu pa la sogs pa dag gis ni skad cig ma dang skad cig ma ma yin pa nyid kyis dngos po rnams phung po gnyis su 'dod de/ 'di ltar de'i 'dod pas blo dang sgra dang me lce la sogs pa skad cig ma dag yin la/ sa dang nam mkha' la sogs pa dag ni skad cig ma ma yin pa dag yin no zhe'o/ /de'i phyir de ltar lta ba'i dbye bas gnas pa na re zhig gang dag byas pa nyid du 'dod pa de dag phyogs su byas nas tshad ma brjod par bya'o zhes bstan pa'i phyir/ de la zhes bya ba la sogs pa smos so/ /thams cad kyi 'jig pa rgyu gzhan la ltos pa med pa nyid kyis gnas pa'i phyir zhes bya ba 'dis mtshan nyid gsum pa'i gtan tshigs ston to/ /de nyid gsal bar bya ba'i phyir/ dngos gang zhes bya ba la sogs pa smos te/ sbyor ba ni gang dag dngos po gang la ltos pa med pa de dag ni de'i ngo bor nges pa yin te/ dper na de ma thag pa'i 'bras bu'i tshogs pa rang gi 'bras bu skyed pa la nges pa bzhin no/ /skye ba dang ldan pa'i byas pa'i dngos po rnams kyang 'jig pa la ltos pa med pa yin no zhes bya ba ni rang bzhin gyi gtan tshigs so/ /rgyu gzhan zhes bya ba'i rang bzhin gtan tshigs de yang ni skyed par byed pa las tha dad pa'o/ /nges pa zhes bya ba 'di la rgyu smras pa/ de ltar rang gi rgyu las skye'i/ /zhes bya ba la sogs pa la/ de ltar zhes bya ba ni der nges pa'i ngo bos skye ba'i phyir ro zhes bya ba'i don to/ /yang na gang dag gang du yang ma nges pa de dag ni de la ltos pa med pa yang ma yin par 'gyur te/ dper na bum pa la sogs pa so ma btang ba so btang ba dag la sogs pa dag tu 'gyur ba bzhin no zhes bya ba 'di ni 'dir chos mi mthun pa'i dpe'o/ /'on te gtan tshigs 'di ma nges pa nyid ma yin nam/ 'di ltar dngos po rnams 'jig pa la rgyu gzhan la ltos pa med pa de lta yang yin mod kyi/ 'on kyang gnas nas yul dang dus gzhan du dngos po 'jig pa srid pa'i phyir ro / /'di dag skyes ma thag tu 'jig pa nyid du bsgrub par 'dod pa ma grub pa'o/ /gal te 'di ni ltos med na/ /zhes bya ba la sogs pa smos te/ 'di zhes bya ba ni 'jig pa'o/ /de la ltos pa med pa nyid kyi phyir zhes bya ba ni yul dang dus gzhan la ltos pa med pa'i phyir ro/ /gang zhig gang la ltos pa med pa de ni 'ga' zhig tu 'am res 'ga' 'gyur na de'i tshe de'i yul dang dus la ltos pa'i phyir/ ltos pa med pa nyid du mi 'gyur ro/ /de'i phyir ga las ma 'khrul pa yin / 'di ltar yul dang dus gcig yongs su spangs nas yul dang dus la sogs pa gzhan du 'jug pa na / ji ltar mi ltos pa zhes bya ba yin/ 'di ltar de'i ltos pa ni de ltar gnas pa nyid yin gyi/ 'dod pa ni ma yin te/ de ni bsam pas stong pa'i phyir ro/ /'o na gal te rnam pa thams cad du ltos pa med pa'i phyir ro zhes bya ba gtan tshigs kyi don yin par 'dod na/ 'o na gtan tshigs ma grub ste/ 'di ltar 'ga' zhig dag 'jig pa la thob pa la sogs pa la ltos par mthong ste/ bum pa la sogs pa bzhin no/ /gang yang blo dang sgra la sogs pa ltos pa med pa nyid du grags pa de dag kyang gal te tho ba la sogs pa la mi ltos pa de lta na yang yul dang dus la ltos pas de'i phyir gtan tshigs ma grub pa yin no zhes dogs par byas nas lan gdab par bya ba'i phyir/ skye ba can kun 'jig pa la/ /zhes bya ba la sogs pa smos te/ thams cad du zhes bya ba ni yul dang dus la sogs pa thams cad du skye ba dang ldan pa rnams 'jig pa'i rgyu la mi ltos so zhes bya ba'i don to/ /'jig pa'i rgyu nyid du khas blangs pa rnams cung zad kyang mi byed pa'i phyir te/ phan mi 'dogs pa'i phyir ro/ /phan mi 'dogs pa yang ltos par mi rigs te/ ha cang thal bar 'gyur ba'i phyir ro/ /ji ltar cung zad kyang mi byed pa yin zhe na/ 'di ltar zhes bya ba la sogs pa smos te/ 'jig pa byed na res 'ga' dngos po'am dngos po med pa yin grang / de la gal te dngos po yin na de'i tshe 'jig pa dang ldan pa 'di dngos po las don gzhan du ma gyur pa byed dam/ don gzhan du gyur pa byed/ dngos po yod pa la ni rnam par rtog pa gnyis las mi 'da' ba'i phyir/ gnyi ga'am gnyig ma yin pa'i phyogs ni rigs pa ma yin te/ dngos po gcig gtong ba dang yongs su len pa dag ni de las gzhan yongs su gtong ba dang len pa med na mi 'byung ba'i phyir ro/ /gcig la sgrub dang dgag pa mi rung ba'i phyir ro zhes bstan zin to/ /de la re zhig don gzhan du gyur pa ma yin pa zhes bya ba'i phyogs ni ma yin te/ dngos po'i rang bzhin ni rang gi rgyu kho na las skye ba'i phyir te/ mi mthun pa dang rgyu med par mi 'byung ba'i phyir ro/ /de yang dngos po'i rang bzhin bzhin du de las tha mi dad par grub pa'i phyir ro/ /grub pa yang byed par mi rigs te/ rgyu ldog pa med par thal bar 'gyur ba'i phyir ro/ /'di snyam du dngos po 'di rang gi rgyu kho na las bdag nyid thams cad grub pa ni ma yin te/ de'i phyir rgyu gzhan gyis 'jig par brjod pa'i rang bzhin gzhan thob pa yin no zhe na/ dngos po'i bdag nyid ces bya ba/ / la sogs pa smos te/ gang gis na cha shas kyis 'grub par 'gyur ba gcig gi rang bzhin la gnyis yod pa ni ma yin no/ /'on kyang dngos po'i cha shas med pa kho na yin la/ de yang rang gi rgyus bskyed pa na bdag nyid thams cad kyis bskyed pa'i phyir/ ji ltar de'i dus phyis rgyu gzhan gyis rang bzhin gzhan byed par 'gyur/ gang zhig grub pa na gang ma grub pa de ni de'i rang bzhin du rigs pa ma yin te/ tha mi dad pa'i mtshan nyid ni grub pa dang bde ba gcig pa yin pa'i phyir ro/ /de'i phyir gang zhig dus phyis skye ba'i 'jig pa'i dngos po de ni rang bzhin no/ /gang na gang yin pa de yang ji ltar der 'gyur ba yin te/ de'i phyir 'di ni ci yang ma yin no/ /ci ste don gzhan du gyur pa zhes bya ba'i phyogs yin na de la yang 'jig pa'i rgyus ni dngos po la ci yang mi byed pa nyid do zhes ston pa ni/ dngos po las ni tha dad pa'i/ /zhes bya ba la sogs pa smos te/ gzhan byed pa na phan btags pa zhes bya ba ni ma yin te/ ha cang thal bar 'gyur ba'i phyir ro/ /de dang 'brel pa'i 'jig pa byed pa'i phyir dngos po la phan btags par 'gyur ro zhes kyang brjod par mi rigs te/ 'brel pa ma grub pa'i phyir ro/ /'di ltar tha dad par khas blangs pa'i phyir de'i bdag nyid kyi mtshan nyid kyi 'brel ba med la/ de las byung ba'i mtshan nyid kyang med de/ de ni 'jig pa'i rgyu nyid las skye ba'i phyir ro/ /dngos po'i 'brel pa gzhan yang yod pa ma yin no/ /'brel pa yod na yang dngos po gzhan pa'i phyir/ de kho na bzhin du 'bras bu dmigs pa la sogs par thal bar 'gyur ro/ /dmigs pa nyid 'bras bu yin pas dmigs pa'i 'bras bu'o/ /sogs pa'i sgras ni chu 'dzin pa dang / rje ngar gcog pa la sogs pa gzung ngo / /'jig pa tha dad pa des bsgribs pa'i phyir dang / gegs byas pa'i phyir dmigs pa la sogs pa'i 'bras bu byed pa ma yin no zhe na/ de'i gnas skabs zhes bya ba la sogs pa smos te/ dngos po'i rang bzhin gyi khyad par nyams par mi byed pa'am/ skyed par mi byed pa de la sgrib par byed pa'am/ gegs byed par rigs pa ma yin te/ ha cang thal bar 'gyur ba'i phyir ro/ /de lta bas na mdor ba sgrib pa med pa gegs byed pa med pa sngar gyi rang bzhin yin pa'i phyir de'i sgrib pa dang gegs byed pa mi rigs so/ /'di snyam du snga ma bzhin du dmigs pa la sogs pa thal bar 'gyur ba ma yin te/ 'jig pa tha dad pa des dngos po 'jig pa'i phyir ro zhe na/ 'jig pa'i ming can dngos po yis/ /zhes bya ba la sogs pa smos te/ 'jig pa dngos po'i 'jig pa byed pa na ci gzhan nam/ gzhan ma yin pa'am/ yang na zhig pa'i mtshan nyid kyis 'jig par byed pa na 'jig par byed ces 'di la yang tho ba la sogs pa bzhin du rnam par rtog pa mtshungs pa nyid la'ang rjes su 'jug ste/ de la yang nyes pa bshad zin pa dang / 'chad par 'gyur ba yin no/ /don de la yang zhes bya ba ni gang 'di 'jig pas 'jig pa gzhan byed na de la yang 'jug pa'i phyir ro zhes bya ba ni gzhan nyid la sogs pa'i rnam par rtog pa dag rjes su 'jug pa'i phyir ro zhes bya ba'i don to/ /de ltar re zhig dngos por gyur pa mi byed do zhes bstan nas dngos po med par gyur pa yang ma yin no zhes bstan pa'i phyir / gal te dngos po med pa'i bdag /ces bya ba la sogs pa smos te/ dngos po'i rgyur 'gyur gyi dngos po med pa la ni ma yin no/ /rang bzhin mtha' dag dang bral ba'i mtshan nyid yin pa'i phyir de la rgyu mtshan du bya ba bskyed par bya ba'i ngo bo cung zad kyang med do/ /de'i phyir dngos po med pa'i bdag nyid de/ dngos po bkag pa'i bdag nyid kyi 'jig pa 'ga' zhig gis byed pa ma yin te/ bong bu'i rwa bzhin du dngos po med pa'i phyir ro/ /de lta ma yin na 'bras bu yin pa'i phyir myu gu la sogs pa bzhin du dngos po nyid du 'gyur ro/ /sbyor ba ni gang 'bras bu yin pa de ni dngos po yin te myu gu la sogs pa bzhin no/ /'jig pa yang 'bras bu yin no zhes bya ba ni rang bzhin gyi gtan tshigs so/ /'di yi khyab pa bsgrub pa'i phyir/ /rgyu yi nus pas skyed phyir ro/ /zhes bya ba smos te/ rgyu'i nus pas thob pa'i bdag nyid kyi khyad par gang yin pa de nyid la 'bras bu zhes bya ba ste/ sgrub pa'i bdag nyid kyi khyad par nyid dngos po yin no/ /don 'di la rigs pa can la sogs pa la yang rtsod pa med de/ 'di ltar yod pa dang 'du ba 'am/ rang gi rgyu dang 'du ba ni 'bras bu nyid du brjod la/ 'jig pa la ni yod pa dang 'du ba 'am/ rang gi rgyu la 'du ba med de/ de ni rdzas la sogs pa bzhin du yod pa nyid dang rten pa nyid du thal bar 'gyur ba'i phyir ro/ /gal te de lta na 'jig pa dngos po nyid la rag mod/ de la nyes pa ci yod ce na/ de ltar dngos med gang yin pas/ /zhes bya ba la sogs pa smos te/ yang ji ltar med pa sgrub par byed ces dogs te la 'di skad du/ ma yin dgag rten zhes bya ba smos te/ ma yin par dgag pa la rten pa'i phyir ro zhes bya ba'i don to/ /brjod par 'dod pa'i dbang gis dngos po 'ga' zhig las mtshan nyid mi mthun pa'i dngos po nyid dngos po med pa zhes bya ba brjod do/ /de la yang sngar bshad pa'i nyes pa tha dad pa la sogs pa'i rnam par rtog pa yang rjes su 'jug go/ /ci ste nyes pa 'dis 'jigs nas ma yin par dgag pa'i bdag nyid kyi 'jig pa dngos po med pa'i rgyu dag gis byed pa ni ma yin no/ /'o na ci zhe na/ med par dgag pa'i bdag nyid do zhes khas len par byed na/ de la yang khyed cag gis 'jig pa'i rgyu cung zad mi byed pa nyid gsal rab pa nyid du bstan to zhes bstan pa'i phyir/ /'on te dngos po mi byed pa nyid ces bya ba la sogs pa smos te/ 'di ltar med par dgag pa yin na dgag pa byed pa dang 'brel pa'i phyir med pa byed pa ni dngos po mi byed do zhes bya ba bkag pa'i phyir 'jig pa'i rgyu byed pa po nyid ma yin par bstan par 'gyur ro/ /gang yang byed pa po ma yin pa de ji ltar rgyur 'gyur / de'i phyir 'jig pa'i rgyu 'ga' yang med do/ /'di rna ma bug pas smras pa'i 'jig pa rgyu dang ldan pa nyid du sgrub pa la tshad ma dag bstan par 'dod na/ dngos po yod pa'i dus dag tu/ /zhes bya ba la sogs pa smos te/ 'di ltar dngos po yod pa'i dus su 'jig pa ni ma yin te/ skad cig tsam yang gnas pa med par thal bar 'gyur ba'i phyir ro/ / skyes pa las sngar yang ma yin te/ ma skyes pa 'jig par mi rigs pa'i phyir ro/ /mo gsham gyi bu la sogs pa ma skyes pa nyid 'jig pa ni ma yin no/ /phyis yun ring po nas kyang ma yin te/ skad cig ma gsum pa la sogs pa rnams su zhig pa ni yang 'jig par mi rung ba'i phyir te/ thal bar byas pa las 'bar ba bzhin no/ /'on kyang dngos po'i de ma thag tu skad cig gnyis pa la 'jig pa yin no/ /de ltar na myu gu la sogs pa bzhin du dus nges pa'i phyir 'jig pa rgyu dang ldan pa zhes bya ba grub po/ dus nges pa zhes bya ba ni res 'ga' ba yin pa'i phyir ro zhes bya ba'i don to/ /'di yis khyab pa bsgrub pa'i phyir/ /ltos pa med par gyur pa la/ /zhes bya ba la sogs pa smos te/ ltos pa med pa ni res 'ga' ba nyid du rigs pa ma yin te/ rtag tu yod pa la sogs par thal bar 'gyur ba'i phyir ro/ /de lta bas na res 'ga' ba nyid yin pa'i phyir 'di ni rgyu dang bcas pa nyid du grub po/ /'di las kyang 'grub po zhes bstan pa'i phyir/ dngos po'i de ma thag byung phyir/ /zhes bya ba la sogs pa'o/ /de'i phyir de ltar gtan tshigs gsum po 'di dag smras te/ 'jig pa rgyu dang bcas pa yin te/ res 'ga' ba yin pa'i phyir dang / dngos po skye ba'i de ma thag tu 'byung ba nyid du sangs rgyas pas kyang khas blangs pa'i phyir dang / ma byung ba'i bdag nyid thob pa'i phyir skad cig gzhan bzhin no/ /chos mi mthun pas ni ri bong gi rwa la sogs pa'o/ /'dir gsal byed pas smras pa'i rigs pa yang gzhan yang zhes bya ba la sogs pa smos te/ de 'di skad du smras te 'jig pa la rgyu med do zhes smra ba la brgal zhing brtag par bya ste/ ci rgyu med pa'i phyir nam mkha'i ut+pal la sogs pa bzhin du 'jig pa med pa yin nam/ 'on te rgyu med pa'i phyir nam mkha' la sogs pa bzhin du rtag pa nyid gcig yin/ khyed kyi phyogs la rgyu med pa gnyis dmigs te/ rtag pa dang med pa'o/ /'di ltar yod pa dang med pa las ma gtogs pa'i rnam pa gzhan med do/ /de la gal te rgyu med pa'i phyir 'jig pa med pa yin na/ de'i tshe dngos po thams cad rtag pa nyid du thal bar 'gyur te/ 'jig pa med pa'i phyir ro/ /gzhan yang 'dus byas thams cad 'jig pa yin no zhes bya ba'i nges pa 'di rgyu mtshan med pa can du 'gyur te/ med pa la 'ong ba dang 'gro ba zhes bya bar 'gyur ba ma yin no/ /ci ste rtag pa yin na de'i tshe dngos po 'jig pa dang lhan cig gnas par 'gyur te/ thams cad du gnas pa'i phyir ro/ /de yang rigs pa ma yin te/ dngos po dang dngos po med pa dag ni phan tshun spangs te gnas pa'i mtshan nyid can yin pa'i phyir ro/ /'on te yang lhan cig gnas par mi 'dod na de'i tshe 'bras bu skye bar mi 'gyur te/ de'i sgrar gyur pa 'jig pa rtag tu gnas pa nyid kyi phyir ro/ /de lta yin dang ma skyes pa 'jig par yang mi rigs te 'jig rten na ri bong gi rwa la sogs pa ma skyes pa 'jig par 'gyur ro zhes grags pa ni med do/ /des na ma skyes pa 'jig go zhes bya ba'i tshig rig pa dang ldan pa ma yin no/ /de'i phyir 'di la zhes bya ba la sogs pas thams cad kyi lan 'debs pa yin te/ 'jig pa ni rnam pa gnyis te/ sgrub pa dang / dgag pa'i mtshan nyid do/ /'di ltar skad cig mar gnas pa'i chos rnams kyi ngo bo'i rang bzhin nyid kyi g.yo ba ni 'jig pa yin pa'i phyir 'jig par brjod pa 'am/ yang na dngos po'i rang bzhin bkag pa'i mtshan nyid zhig pa'i ming can gzhan gyis 'jig pa la 'jig pa zhes bya ba la/ de 'jig pa snga ma la gal te ji skad bshad pa'i gtan tshigs dag gis rgyu dang ldan pa nyid du sgrub pa'i brgal zhing brtag pa 'di byed na de'i tshe grub pa la sgrub pa nyid do/ /grub pa la sgrub pa de nyid dngos gang zhes bya ba la sogs pas ston par byed do/ /gal te de lta na ji ltar khyed la 'jig pa rgyu med par grags she na/ gzhan med phyir na rgyu med can/ /zhes bya ba smos te/ gzhan med pa po las tha dad pa dus phyis kyi tho ba la sogs pa 'jig par byed pa med pa'i phyir/ rgyu med can du 'dod ces skabs dang sbyar ro/ /de lta bur gyur pa'i 'jig pa'i chos can 'di yang res 'ga' ba yin pa'i phyir dang / sngar ma byung ba'i bdag nyid thob pa'i phyir zhes bya ba'i gtan tshigs 'di gnyis grub po/ dngos po'i de ma thag tu byung ba yang gal te spyir brjod par 'dod pa yin na de'i tshe grub pa nyid yin te/ dngos po 'di rgyur gyur pa'i dngos po'i de ma thag tu grub pa'i phyir ro/ /ci ste 'di 'jig pa'i bdag nyid du gyur pa'i dngos po'i de ma thag tu 'byung ba nyid 'di brjod par 'dod pa yin na de'i tshe gtan tshigs ma grub pa yin no zhes ston pa ni/ dngos po'i de ma thag byung nyid/ /ces bya ba la sogs pa'o/ /de 'dra zhes bya ba ni dngos po g.yo ba'i rang bzhin las tha mi dad pa'o / /gang gis 'di de ma thag tu 'byung bar 'gyur ba cha shas med pa'i dngos po la ni cha shas yod pa ma yin te/ de'i rang bzhin bzhin du de las tha mi dad pa'i 'jig pa de grub na grub pa'i phyir ro/ /de lta ma yin na de de'i rang bzhin nyid du mi 'gyur ro zhes bstan to/ /gang yang 'dus byas thams cad 'jig pa'i nges pa yang rgyu mtshan med pa can zhes smras pa de yang de nyid kyi phyir spangs pa yin no zhes bstan pa ni/ de'i phyir zhes bya ba'o/ /dngos po skad cig mar gnas pa'i chos de ltar nges par byas pa'i lus can rnams ni blo de'i rgyu mtshan yin pa'i phyir rgyu mtshan med pa nyid thal bar mi 'gyur ro/ /'on te zhig pa'i mtshan nyid kyi 'jig pa'i chos can mngon par 'dod pa de'i tshe gtan tshigs gsum char yang ma grub pa yin no zhes bstan pa'i phyir/ zhig pa nyid ni zhes bya ba la sogs pa'o/ /de ma thag tu byung ba nyid la sogs pa'i chos ni dngos po kho na la rten gyi ri bong gi rwa la sogs pa dngos po med pa la ni ma yin no/ /zhig pa yang bdag med ba ste/ rang bzhin med pa de ji ltar 'di de ma thag tu byung ba la sogs pa srid par 'gyur/ ma byung dngos po ldan pa'ang med/ /ces bya ba la 'ang gi sgras res 'ga' ba nyid gzung ngo / /gal te de lta na zhig pa la de ma thag tu byung ba nyid med pa de'i tshe ji ltar dngos po zhig par 'gyur ro zhes brjod pa gang zhig mi 'gyur ba de 'gyur ro zhes bya bar dogs pa la/ zhig gyur zhes bya ba la sogs pa smos te/ zhig pa grub pa nyid du ston pa yin mod kyi/ 'o na kyang dngos po bkag pa nyid ston par byed kyi/ don dam par dngos po'i rang bzhin 'ga' zhig sgrub pa ni ma yin no/ /'on te nag pa'i bur 'gyur ro/ /zhes bya ba la sogs pa lta bur 'gyur ba'i sgra sbyor ba'i phyir de la yang dngos po nyid sgrub par byed pa ma yin nam zhe na/ mi 'ga' zhig la zhes bya ba la sogs pa smos te/ dngos po rnams la sgra sbyor ba tsam gyi rjes su byed pa'i yod pa dang med pa dag ni yod pa ma yin te/ de ni 'dod pa tsam dang 'brel pas 'jug pa'i phyir ro/ /de lta ma yin na skyes bu 'ga' zhig la 'ga' zhig gi 'dod pa'i dbang gis bong bu zhes bya ba'i ming sbyor bar byed pa na/ de la bong bu'i chos thams cad yod par thal bar 'gyur ro/ /bA le kA dang rA sa b+ha'i sgra dag ni bong bu'i rnam grangs dag go/ /gdon mi za bar 'di ltar shes par bya ste/ dngos po'i rang bzhin bkag pa nyid yin gyi sgrub pa ni cung zad kyang yod pa ma yin no/ /de lta ma yin na zhig pa zhes bya ba dngos po gzhan sgrub na dngos po la cung zad kyang skye ba med pa'i phyir/ dngos po de'i phyir ldog par 'gyur/ gang yang med pa yin na 'jig med phyir zhes bya ba la sogs pa smras pa de la/ dngos po'i ngo bo dang bral bas/ /zhes bya ba la sogs pa smos te/ de ltar zhes bya ba ni dngos po'i rang bzhin dang bral ba'i ngo bo yin pa'i phyir ro/ /dngos po'i rang bzhin du yod pa'i rang gi ngo bo log pa'i phyir ni med pa tsam ste/ de ltar na dngos po thams cad rtag pa nyid du 'gyur ro/ / gal te 'di dag gi rang bzhin bkag pa'i mtshan nyid kyi 'jig pa med par gyur na/ de'i phyir 'di dag rtag par 'gyur na/ ji srid du rang bzhin bkag pa'i mtshan nyid kyi 'jig pa rang nyid med pa'i ngo bo yod pa nyid yin no zhes bya ba yin na/ ji ltar rtag par 'gyur/ 'dus byas thams cad 'jig par nges pa nyid kyis rgyu mtshan yang brjod pa kho na'o/ /gang yang rtag pa nyid na 'jig pa dang lhan cig gnas te zhes bya ba la sogs pa smras pa de la/ 'di la rtag pa'i ngo bo nyid/ /ces bya ba la sogs pa smos te/ ldog par 'gyur ro zhes bya ba'i tshig 'dis kyang zhig pa 'di la sgrub pa'i ngo bo ldog pa'i ngo bo brjod pa ni ma yin no/ /gang gi phyir 'di la sgrub pa'i ngo bo cung zad kyang yod pa ni ma yin no/ /'o na ci zhe na/ dngos po'i rang gi ngo bo skad cig las phyis rang bzhin 'jug pa bkag pa yin no/ /de lta bas na 'di ni gcig bu dngos po'i ngo bo nyid yin pa'i phyir/ rtag pa'i rnam par rtog pa'i gnas ma yin pa nyid do/ /rang bzhin med pa nyid kyis rtag tu gnas pa'i ngo bor mi rung ba'i phyir te/ rtag pa dang mi rtag pa'i chos dag ni rang bzhin la rab tu 'brel pa nyid yin pa'i phyir ro/ /gang yang khyed cag gi rgyu med pa ni rnam pa gnyis te/ rtag pa dang med pa'o zhes smra ba ni gzhan gyi grub pa'i mtha' mi shes pa nyid yin te/ 'di ltar rigs pa smra ba sangs rgyas pa rnams kyi rgyu med pa ni med pa kho na yin te/ ji skad du bcom ldan 'das kyis chos la chos kyi rjes su lta zhing gnas pa'i byang chub sems dpa' des kyang rten cing 'brel par 'byung ba las ma gtogs pa'i chos gang yin pa de yang dag par rjes su ma mthong ngo zhes gsungs pa lta bu'o/ /bye brag tu smra ba gang dag nam mkha' la sogs pa dngos po yod pa nyid du rtog par byed pa de dag ni khyed cag gi phyogs su blan par bya ba ma yin te/ shAkya'i sras ma yin pa'i phyir de dag gi lugs kyi dngos po ni bzang po ma yin te / de ltar 'jig pa'i rgyu thams cad cung zad kyang mi byed pa'i phyir gtan tshigs ma grub pa ma yin no/ /'di las kyang 'jig pa'i rgyu rnams cung zad kyang mi byed par brjod par bya ste/ 'di ltar dngos po rang gi rgyu las skye bzhin pa na rang bzhin gyis rang nyid 'jig pa'i bdag nyid du skye bar 'gyur ram/ mi 'jig pa'i bdag nyid du skye bar 'gyur grang / gal te 'jig na de la 'jig pa'i rgyus cung zad kyang byas pa med de/ rang nyid de'i rang bzhin yin pa nyid kyis 'jig pa'i phyir ro/ /gang zhig gang gi rang bzhin yin pa de ni rang gi rgyu las skye ba ni de 'dra bar 'gyur gyi/ yang de'i dngos po'i rgyu gzhan la ltos pa ni ma yin te/ dper na snang ba dang / zhu ba dang / dro ba dang / sra ba la sogs pa de'i bdag nyid du skyes ba slar yang snang ba la sogs pa nyid du skye ba rgyu gzhan la ltos pa ni ma yin no/ /'di snyam du dper na sa bon la sogs pa myu gu la sogs pa skyed par byed pa'i rang bzhin yin na yang 'ba' zhig pa ni skyed par mi byed de/ chu la sogs rgyu gzhan la ltos pa'i phyir ro/ /de bzhin du dngos po 'jig pa'i rang bzhin yin na yang 'jig pa rgyu gzhan la ltos par 'gyur ro snyam du sems pa na/ 'di ni yang dag pa ma yin te/ mtha'i gnas skabs thob pa nyid skyed par byed pa'i rang bzhin du khas blangs pa'i phyir / gzhan ni ma yin no/ /des na gang 'di de'i rang bzhin yin pa de ni skyed par byed pa kho na yin gyi 'di gzhan la ltos pa ni ma yin no/ /gang sbyang la sogs pa la gnas pa skyed par byed pa ma yin na de ni de'i rang bzhin ma yin te/ rgyu'i rgyu yin pa'i phyir de la yang rgyu zhes tha snyad du byas kyi dngos su ni ma yin pa'i phyir 'khrul pa med do/ /ci ste mi 'jig pa'i bdag nyid ces bya ba'i phyogs yin na/ de'i tshe yang 'jig pa'i rgyus cung zad kyang mi byed pa kho na ste/ de ni sus kyang rang bzhin gzhan du bya bar mi nus pa'i phyir ro/ /'di ltar gal te dngos po de skyes ma thag tu 'jig par mi 'gyur na/ de'i tshe phyis kyang de'i gnas skabs gnas pa'i chos kyi rang bzhin de nyid yin pa'i phyir/ gang gis 'jig par 'gyur ba de la 'jig pa'i rgyus ci zhig bya/ yang ci'i ste ji ltar zangs la sogs pa sra ba'i ngo bo nyid yin na yang me la sogs pa dang phrad pa las rnam pa gzhan du 'gyur te/ de bzhin du dngos po yang mi 'jig pa'i rang bzhin yin na yang 'jig pa'i rgyus rnam pa gzhan nyid du byed de/ des na 'jig pa'i rgyu thob nas 'jig par byed do snyam pa de 'di ni yang dag pa ma yin te/ de nyid gzhan du gyur pa ni ma yin te/ rnam pa gzhan nyid ni rang bzhin gzhan skye ba'i mtshan nyid yin pa'i phyir ro/ /'di ltar rnam pa gzhan nyid ces bya ba gang yin pa de ci dngos po las don gzhan yin nam/ 'on te dngos po nyid yin/ re zhig dngos po nyid ni ma yin te/ de ni rang gi rgyu kho na las sngar grub zin pa'i phyir ro/ /ci ste don gzhan yin pa de lta na dngos po mi 'pho ba'i chos can de kho na bzhin du gnas pa yin pa'i phyir de la rnam pa gzhan du 'gyur ba med do/ /zangs ma la sogs pa'i dpe yang ma grub pa nyid de/ 'di ltar zangs ma la sogs pa'i sngar gyi skad cig sra ba la sogs pa rang gi ngang gis 'gag pa'i phyir 'jig pa na rang gi nye bar len pa dang / me la sogs pa'i lhan cig spyod pa las tshogs pa gzhan zhu bar brjod pa'i rang bzhin gzhan nyid skye ba kho na'o/ /slar yang zhu ba la sogs pa'i rang bzhin rang gi ngang gis 'gag pa nyid kyis 'jig pa na rang gi nye bar len pa'i rgyu dang / grang ba la sogs pa'i lhan cig byed pa'i rgyu gzhan las sra bar brjod pa'i rang bzhin gzhan nyid skye ba'i phyir gcig la gzhan du 'gyur ba nyid yod pa ma yin no/ /de lta bas na rnam pa thams cad du 'di la 'jig pa'i rgyus cung zad kyang mi byed pa'i phyir gtan tshigs ma grub pa ma yin no/ /'gal ba yang ma yin te mthun pa'i phyogs la yod pa'i phyir ro/ /ma nges pa yang ma yin te/ sngar bsgrubs zin pa'i phyir ro/ /'di snyam du dper na nam mkha' lus can nyid du gzhan la ltos pa med pa de lta yin na nges pa ni ma yin no/ /de bzhin du dngos po byas pa yin na 'ga' zhig kyang 'jig par nges par mi 'gyur ro snyam du sems na de 'di ni yang dag pa ma yin te/ gzhan gyis mi rtag par mi 'dod pa gang yin pa'i byas pa de ni 'ga' yang yod pa ma yin te/ rgyu dang ldan pa thams cad mi rtag pa nyid du khas blangs pa'i phyir ro / /de dag nyid 'dir phyogs su byas kyi gzhan ni ma yin pas ma nges pa nyid du ga las 'gyur/ gang dag byas pa nyid yin na yang mi 'jig pa nyid kyis rtag pa nyid du 'gyur ro snyam du bsam pa/ de dag don dam par ma byas pa'i phung por 'dus pa nyid kyis de bkag par shes par bya ba yin pas skyon med do/ /nam mkha' la sogs pa lus can nyid la sogs pa'i chos la ltos pa med pa nyid ma grub ste/ gang la chos gang med pa de ni de la ltos pa dang bcas pa kho na'o/ /dngos po rnams kyi thob pa'i chos la 'ga' zhig ltos pa med pa nyid du rnam par 'jog pa ni ma yin no/ /'o na ci zhe na/ ma thob pa nyid la yin pa'i phyir dpe ma grub po/ /da ni ma byas pa'i phung po'i dbang du byas nas/ gang dag nam mkha' zhes bya ba la sogs pa smos te/ gal te nam mkha'i la sogs pa dngos po yin par grub par gyur na de'i tshe de dag la skad cig ma nyid la sogs pa'i chos kyi bsam pa 'jug par 'gyur na/ chos rnams rang dbang du byas grub pa yod pa ni ma yin no/ /de lta ma yin na de dag gi chos nyid nyams par 'gyur ro/ /nam mkha' la sogs pa ma byas pa'i chos can du grub pa yang ma yin te/ de dag ni nus pa thams cad dang bral ba nyid kyis mo gsham gyi bu bzhin du med pa'i tha snyad kyi yul yin pa'i phyir ro/ /sbyor ba ni gang nus pa thams cad kyis stong pa de ni dngos po med pa yin te mo gsham gyi bu bzhin no/ /nam mkha' la sogs pa yang nus pa thams cad kyis stong pa yin no zhes bya ba ni rang bzhin gyi gtan tshigs sam/ dngos su khyab par byed pa mi dmigs pa yin no/ /gtan tshigs ma nges pa yang ma yin te/ med pa'i tha snyad ni de tsam gyi rgyu mtshan can yin pa'i phyir ro/ /ma grub pa yang ma yin no zhes phyis bstan par bya'o/ /mthun pa'i phyogs la yod pa'i phyir 'gal ba yang ma yin no/ /yang ci'i phyir dngos po med pa la skad cig dang skad cig ma ma yin pa'i rnam par rtog pa mi 'jug ce na/ skad cig mar gnas ngo bo yi/ /zhes bya ba la sogs pa smos te go sla'o/ / gsal byed pas smras pa/ skad cig ma zhes bya ba ldan pa'i don mi 'thad de/ 'di ltar gal te nges pa'i tshig gi tshul gyis ni zad pa ni skad cig go/ /de 'di la yod pas na skad cig ma'o zhes sgrub na/ de rigs pa ma yin te dus tha dad pa'i phyir ro/ /gang gi tshe zad pa de'i tshe zad pa can med pa'i phyir dus tha dad pa dag la ni ldan pa'i don ma mthong ngo / /yang ci ste dngos po nyid de ma thag tu 'jig pas khyad par du byas pa la skad cig ces brjod pa de lta na yang de de nyid kyis de dang ldan par mi 'gyur ba'i phyir ldan pa'i don mi rigs so/ /'on te skad cig tu gnas pa'i dus ni skad cig ma ste/ thams cad kyi mtha'i dus ni skad cig go/ /de gang la gnas pa de dag ni skad cig ma yin na 'di yang mi rigs te ming tsam du dus khas blangs pa'i phyir ro/ /ming tsam dngos po'i khyad par nyid du mi rigs so zhe'o / /'dir smras pa/ skyes ma thag tu mi gnas pa'i/ /zhes bya ba la sogs pa la/ dngos po skyes ma thag tu 'jig pa'i rang bzhin ni skad cig ces bya ba la de gang la yod pa de ni skad cig ma yin no/ /de skad du yang / bdag thob ma thag tu 'jig pa ni skad cig go/ /de gang la yod pa de ni skad cig ma'o zhes bshad do/ /'on te de lta na yang rang bzhin don gzhan ma yin pa'i phyir de 'di la yod do zhes bya ba'i tha dad pa'i rgyu mtshan can gyi shes pa mi 'thad pa ma yin nam zhe na/ don la tha dad med na yang / /zhes bya ba la sogs pa smos te/ dper na nam mkha'i rang bzhin dang mchi gu'i lus zhes bya ba la sogs pa la dngos po tha dad pa med na yang blos kun du brtags pa'i tha dad pa la brten nas tha dad pa'i rnam par dbye bar 'gyur ba de bzhin du 'di la yang 'gyur ro/ /tshig dngos po'i rang bzhin gyi rjes su byed pa ma yin gyi/ 'o na ci zhe na/ smra ba po'i 'dod pa'i rjes su byed pa yin no/ /gzhan yang ji lta bu'i don la smra ba po rnams kyis ji snyed cig sbyar ba'i sgra de snyed pa de ni don de la brda'i dbang gis rtogs par byed kyi/ don dam par rang bzhin nam rkyen ni yod pa ma yin no/ /skad cig ma zhes bya ba'i sgra 'di yang mkhas pa rnams kyis skyes ma thag tu mi gnas pa'i dngos po tsam la sbyar ba yin no/ /de la de lta bur gyur pa'i dngos po la skad cig ma'i sgras brjod par 'dod pa na rkyen dang bcas pa skad cig ma'i sgra'am rkyen dang bral ba yang sbyar bar bya'o/ /kho bo cag ni 'dod pa tsam gyi ngor byed pa'i brda tsam gyi tshig 'di la shin tu gus pa ma yin no zhes ston pa ni/ skyes ma thag tu mi gnas pa'i/ /zhes bya ba la sogs pa la/ de ltar zhes bya ba la/ skad cig ma zhes bya ba 'dis so/ / rkyen dang lhan cig ldan pa'i don gyis 'jug pas na rkyen bcas so/ /de ltar nam mkha' la sogs pa byas pa nyid du khas blangs pa na nges pa med pa'i tha snyad kyi yul yin no zhes bstan nas/ da ni yod pa nyid du khas blangs pa na 'di dag skad cig ma nyid du thal bar 'gyur ro zhes bsgrub pa'i phyir gal te nam mkha' zhes bya ba la sogs pa smos te/ byas pa bzhin zhes bya ba ni byas pa lta bu'o zhes bya ba'i don to/ /'dis ni yod pa'i phyir ro zhes bya ba'i gtan tshigs 'di zur gyis bstan pa yin no/ /de nyid gsal bar bya ba'i phyir bshad pa/ 'di ltar zhes bya ba la sogs pa'o/ /sbyor ba ni gang yod pa de thams cad ni skad cig ma yin te/ dper na de ma thag tu bsgrub pa'i skad cig ma'i dngos po rnams bzhin no/ /khyed cag gis dngos por 'dod pa'i nam mkha' la sogs pa yang yod pa yin no zhes bya ba ni rang bzhin gyi gtan tshigs so/ /de ltar grub ces bya ba ni skad cig ma nyid du'o/ /'dis ni bsgrub bya ma tshang ba'i dpe yin par dogs par mi bya bar bsgrubs zin pa'i phyir ro zhes ston par byed do/ /khyed kyis yong bar 'dod ces bya ba 'dis ni 'di thal bar sgrub pa yin no zhes ston par byed do/ /de lta ma yin na gtan tshigs gang yang rung ba la ma grub par 'gyur ro/ /yang ji ltar gtan tshigs 'di'i khyab pa grub ce na/ skad cig ma dang bral ba na/ /zhes bya ba la sogs pa smos te/ 'di la don byed nus pa'i mtshan nyid kyi yod pa gtan tshigs nyid du 'dod la/ de yang skad cig ma log pa na ldog ste/ 'di ltar dngos po rnams don bya ba byed pa na rim gyis byed dam/ cig car du byed/ rim dang cig car dag las rnam pa gzhan srid pa ni ma yin te/ de dag ni phan tshun rnam par gcod pa'i ngo bo yin pa'i phyir ro / /'di yang mngon sum nyid kyis grub ste/ 'di ltar bum pa sbrang rtsi dang chu la sogs pa dang de las gzhan pa'i rdzas dag tha mi dad par ma 'dres par rim gyis 'dzin pa dang / rang gi shes pa dang chu 'dzin pa cig car byed par mngon sum nyid kyi yongs su gcod do/ /de la gang gi tshe bum pa 'am rdza mkhan 'bras bu'i khyad par kham phor dang blugs ma la sogs pa rim gyis byed pa dmigs pa de nyid kyi tshe de dag cig car skyed par mi nus so/ /gang kho na'i tshe rang gi yul can gyi shes pa la sogs pa cig car skyed par dmigs pa de kho na'i tshe de dag rim gyis ma yin no zhes 'di thams cad mngon sum nyid kyis nges so/ /de'i phyir rim pa ni cig car rnam par gcad pa nyid kyis yongs su gcod pa'i phyir dang / cig car yang rim pa rnam par gcad pa nyid kyis yin pa'i phyir tshad ma gcig 'jug pa na gnyis las gzhan yongs su gcod cing de las gzhan mi mthun pa rnam par gcod la/ rnam pa gzhan yang med par ston pa yin pas mngon sum gyi tshad ma nyid kyis nges te/ 'di dag ni phan tshun spangs te gnas pa'i mtshan nyid kyis 'gal ba yin no/ /des na phung po gsum pa med pa'i phyir rim dang cig car dag gi don byed pa la khyab la/ de yang bstan pa'i dngos po rnams la rang gi khyab par byed pa ldog pa na de'i mtshan nyid kyi yod pa bzlog bzhin par ldog par byed pa'i phyir khyab pa grub po/ /dus kyi dngos po tha dad pa khas ma blangs pa'i phyir dngos po rnams kyi rim dang cig car ba nyid ma grub ces bya ba 'di ni brjod par mi nus te/ kho bo cag ni dngos po rnams kyi rim dang cig car don gzhan du gyur ba'i dus kyi dngos pos byas par mi smra'o/ /'o na ci zhe na/ de lta de ltar skyes pas byas pa yin te/ 'di ltar gang kho na'i tshe gcig yod pa nyams su myong ba de kho na'i tshe gzhan gang yin pa yang de bzhin du de'i rjes su 'jug ste / de dag thams cad nyid de bzhin du skye ba na rim ma yin pa'i tha snyad kyi rgyu mtshan yin te/ 'di lta ste dper na tshogs pa'i tshogs las myu gu mang po skye ba lta bu'o/ /bzlog pa ni rim pa'i tha snyad la brten pa yin te/ myu gu dang sdong bu dang 'dab ma la sogs pa bzhin no/ /'di dag kyang mngon sum nyid kyis grub la/ skye bo rnams kyis kyang de kho na bzhin du tha snyad du byed do/ /de lta bur gyur pa'i don gyi yul gyi dngos po yang rgyu'i bya ba yin la/ de'i yul yin pa nyid kyis rim dang cig car dag gi tha snyad kyi byed pa yin pas rtsod pa 'di med do/ /'on te brten pa'i dngos po grub par gyur na de'i tshe de la rim dang cig car log na don byed par nus pa ldog par 'grub par 'gyur ba ma yin nam/ dper na chos can gyi phyogs 'ga' zhig tu shing log na shing sha pa ldog pa bzhin no/ /de lta ma yin te chos can sa phyogs ma grub na gang du shing sha pa med par rtogs par byed/ 'di grub pa yang ma yin te/ de nyid dgag par 'dod pa'i phyir ro/ /ci ste yang grub par khas len na 'o na de spang bar mi rigs te/ de chos can gyi ngo bor grub par khas blangs pa'i phyir ro/ /de lta yin dang yod pa'i phyir zhes bya ba 'di yang gtan tshigs ma nges pa kho na yin te/ mi mthun pa'i phyogs la'ang 'jug pa'i phyir ro snyam na/ de ni yod pa ma yin te/ kho bo cag gis rang rgyud kyi tshad ma nyid kyis bkag pa sgrub par byed pa'i khyab byed mi dmigs pa 'di sbyor bar byed pa ni ma yin no/ /'o na ci zhe na/ gzhan la thal ba sgrub par byed pa yin no/ /gal te khyed cag 'di dag brtan pa'i dngos po nyid du khas len par byed na de'i tshe don byed nus pa yang khas blang bar mi bya ste/ de la rim dang cig car dang ldan pa de'i khyab par byed pa med pa'i phyir ro/ /khyab par byed pa log pa na khyab par bya ba gnas par nus pa ni ma yin no/ /de lta ma yin na de dag khyab par bya ba dang khyab par byed pa'i dngos po nyid du mi 'gyur ro/ /de lta na yin dang don byed par nus par log na de dag gi yod pa yang khas blang bar mi bya ste/ yod pa'i mtshan nyid ni don byed nus pa yin pa'i phyir ro zhes bya ba'i thabs 'dis de dag med pa nyid du bstan to/ /chos mi mthun pa can gyi dpe yang gdon mi za bar dngos por gyur pa'i chos la brten par bya ba yang ma yin te/ de la bsgrub par bya ba log na sgrub par byed pa ldog pa tsam bstan par 'dod pa'i phyir ro/ /de yang khyab par bya ba dang khyab par byed pa'i chos dag khyab par byed pa'i dngos por grub na/ chos can gyi khyad par yongs su bzung ba med pa nyid du spyir khyab par byed pa med na khyab par bya ba yang med par 'gyur ro zhes tshig tsam nyid kyis rtogs par 'gyur te/ dper na shing med na shing sha pa med pa yin no zhes bya ba lta bu'o/ /ji skad du/ de'i phyir chos mi mthun dpe la/ /nges par 'di la gzhi mi 'dod / /de dag med na de med ces/ /brjod pa las kyang de rtogs phyir/ /zhes bshad pa lta bu'o/ /re zhig bstan pa'i dngos po rim gyis don byed par rigs pa ma yin no zhes ston par byed pa ni/ rgyu rnams nye ba ma yin phyir/ /zhes bya ba la sogs pa la/ 'bras bu rang gi 'dod pas yod pa dang med pa ni ma yin te/ 'on kyang de'i yod pa dang med pa dag ni rgyu yod pa dang med pa'i rjes su byed pa yin no/ /de la gal te brtan pa gcig bu'i ngo bo 'di thams cad du 'bras bu 'di thams cad kyi skyed pa'i rgyu'i ngo bos gnas pa yin na de'i tshe ci'i phyir de yod pa tsam don du gnyer ba 'bras bu thams cad cig car skyed par mi byed/ gang gis na rim gyis 'byung bar 'gyur/ 'gor ba zhes bya ba ni sdod pa'o/ /des na de'i 'bras bu phyis 'byung par 'gyur ba yang dang po nyid du 'gyur te/ rgyu nus pa thogs pa med pa'i phyir mngon par 'dod pa'i 'bras bu bzhin no snyam du dogs pa'o/ /'on te yang zhes bya ba la sogs pas gzhan gyi las kyi dogs pa bsu ba ste/ brtan pa'i dngos po thams cad 'bras bu thams cad kyi rgyu nyid du nye ba yin mod kyi/ 'on kyang de'i lhan cig byed pa rim gyis nye bar 'gyur te/ de'i phyir 'di de la ltos nas 'di rim gyis 'bras bu skyed par byed par 'gyur ro zhe na de legs zhes bya ba la sogs pas lan 'debs par byed de/ rtag pa de la lhan cig byed pa 'ga' yang yod pa ma yin te/ 'di ltar dper na sa bon bang ba la sogs pa'i gnas skabs kyi khyad par byed pa'i lhan cig byed pa la sogs pa lta bur khyad par byed pa'i lhan cig pa yin nam/ ji ltar phye ba tsam gyis gzugs mthong ba la mig dang gzugs la sogs pa lta bur don gcig byed pa yin/ de la re zhig phyogs dang po ni ma yin te/ 'di ltar khyad par 'di de'i lhan cig byed pa dag gis byed pa na res 'ga' rang bzhin de las tha mi dad par gyur pa'am/ tha dad pa'am/ yang na nam mkha'i gos can pa dag smra ba bzhin du gnyi ga'am/ gnyi ga ma yin pa'i ngo bo yin zhes bya ba phyogs bzhi'o/ /de la re zhig phyogs dang po ni ma yin te/ de'i rang gi ngo bo bzhin du de las tha mi dad pa nyid kyis de yang rtag tu gnas pa'i phyir dang / yod pa yang byed par mi rigs pa'i phyir ro/ /de byed na yang de kho na bzhin du dngos po yang byed par thal bar 'gyur ba'i phyir ro/ /de lta bas na rtag pa nyid nyams so/ /'on te phyogs gnyis pa yin na de'i tshe khyad par kho na las 'bras bu skye ba'i phyir dngos po rgyu nyid ma yin par thal bar 'gyur ro/ /'di zhes bya ba ni rtag pa'i dngos po'o/ /'di nyid gsal bar byed pa ni de yod pa na 'bras bu dag ces bya ba la sogs pa'o/ /de yod pa na zhes bya ba ni khyad par yod pa na'o/ /de zhes bya ba ni khyad par ro/ /de ltar na zhes bya ba ni der gtogs pa'i rjes su 'gro ba dang ldog pa'i rjes su byed pa'i phyir ro/ /'on kyang zhes bya ba la sogs pas 'di nyid la gzhan gyi dogs pa bsu ba yin no/ /de dang zhes bya ba ni khyad par dang ngo / /de la yang zhes bya ba ni rtag pa la'o/ /de dang 'brel pa zhes bya ba la sogs pas lan bshad do/ /'brel pa gang yin te/ cung zad kyang ma yin no zhes bya ba'i don to/ /'brel pa ni gnyis kho na ste/ de'i bdag nyid dang / de las byung ba'o/ /de la re zhig de'i bdag nyid kyi mtshan nyid ni ma yin te/ tha dad du khas blangs pa'i phyir ro/ /de las byung ba'i mtshan nyid kyang ma yin te/ lhan cig byed pa dag kho na las de skye ba'i phyir ro/ /ci ste de las de skye bar khas len par byed na/ de'i tshe de tsam de las byung ba yin pas khyad par rnams cig car nyid du skye bar 'gyur ro/ / de lta yin dang 'bras bu thams cad cig car skye bar thal bar 'gyur te/ khyad par dang ldan pa'i rgyu thams cad du gnas pa'i phyir ro/ /ci ste khyad par skyed pa de la yang lhan cig byed pa'i rgyu la ltos pa'i phyir khyad par rim gyis skyed pas 'bras bu rnams cig car 'byung bar mi 'gyur ro snyam du sems na ni mi rigs te/ de lta na ni thug pa med par 'gyur ro/ /'di ltar lhan cig byed pa rnams khyad par gzhan byed pa'i phyir lhan cig byed pa nyid brjod par bya dgos so/ /khyad par de yang tha dad pa nyid yin na 'brel ba grub bo/ /de las byung ba yin na cig car skye bar thal bar 'gyur ro/ /de la yang lhan cig byed pa la ltos so snyam pa 'di nyid yang 'jug go/ /de lta yin dang thug pa med pa yin na res 'ga' yang khyad par dang lhan cig ste 'brel pa grub par mi 'gyur la/ de ma grub na de las 'bras bu skye ba ma yin te/ khyad par nyid las 'bras bu skye ba'i phyir ro/ /ci ste yang de ni khyad par dang lhan cig de las byung ba'i mtshan nyid kyi 'brel pa ma yin no/ / 'o na ci zhe na/ de ni 'du ba'i mtshan nyid yin la/ rtag pa'i chos can de la khyad par de 'du ba'i phyir ro/ /de 'dir rigs pa ma yin no zhes bstan pa'i phyir/ de la yang zhes bya ba la sogs pa smos te/ de ltar min zhes bya ba ni phan par byed pa ma yin pa de la de'i 'du bar byed do zhes bya ba dang sbyar ro/ /de la phyogs dang po la phan 'dogs pa ni phan gdags par bya ba las tha mi dad pa'i phyir de las byung ba'i mtshan nyid kyi 'brel pa de nyid khas blang bar bya bar 'gyur na/ de yang de ma thag tu bsal zin to/ /'on te phyogs gnyis pa yin na de'i tshe khyad par med pa'i phyir thams cad thams cad kyi 'du bar 'gyur ro/ /de ston par byed pa ni gal te de ni 'di la yang zhes bya ba la sogs pa'o/ /de nyid bzhin zhes bya ba ni mngon par 'dod pa'i dngos po bzhin du phan mi 'dogs pa nyid du khyad par med pa'i phyir ro/ /gnyi ga dang gnyi ga ma yin pa'i phyogs kyi dbang du byas nas/ tha dad tha dad med ces bya ba la sogs pa smos te/ phyogs re re bsal ba nyid kyis gnyi ga'i bdag nyid kyi phyogs kyang bsal ba yin te/ de las ma gtogs pa gnyi ga'i bdag nyid phyogs med pa'i phyir ro/ /gzhan yang rnam pa gcig len pa dang gtong ba dag ni de las gzhan gyi rnam pa gtong ba dang len pa med na mi 'byung ba yin pa'i phyir ro/ /dngos po yod pa la ni gnyi ga dang gnyi ga ma yin pa'i ngo bo nyid rigs pa ma yin no/ /gcig la gcig gi tshe sgrub pa dang dgag pa phan tshun 'gal ba gnyis rigs pa yang ma yin te/ gcig pa nyid nyams par thal bar 'gyur ba'i phyir ro/ /'di yang gang zag la sogs pa brtag par bstan zin pa dang / de ston pa ni gang zag la sogs pa'o/ /ci ste don gyi bya ba gcig byed pa la de'i lhan cig byed pa yin no zhes phyogs gnyis pa la brtan pa yin na ji skad du kha cig 'di lhan cig byed pa la ltos pa ma yin la/ lhan cig byed pa dang bral ba la 'bras bu'i byed pa po yang med de/ 'di ltar gang gi phyir lhan cig byed pa'i rgyu mtha' dag nye ba na mtha'i rgyu bzhin du byed pa po yin gyi/ 'ga' zhig pa ni ma yin pa de'i rang bzhin 'di 'dra ba thog ma med pa nas grub pa yin no/ /des na de yod na yang thams cad du 'bras bu skyed par thal bar mi 'gyur ro zhes zer ba de 'dir ston par byed pa ni/ rtag pa lhan cig byed pa'i zhes bya ba la sogs pa'o/ /ma yin zhes bya ba ni byed pa po zhes bya ba 'di dang sbrel bar bya'o/ /mtha' rgyu bzhin zhes bya ba ni chos mi mthun pa'i dpe'o/ /yang na 'og gi byed pa po nyid yin zhes bya ba 'di dang sbrel la chos mthun pa'i dper bya'o/ /bzhin ni drug pa'i mtha' can du bya'o/ /de yod nyid na zhes bya ba ni dngos po'i rang bzhin de yod na yang ngo / /de lta yin mod ces bya ba la sogs pas lan 'debs par byed de/ de ltar brtag pa de yin du chug mod/ 'on kyang 'dir 'di dpyad par bya ste/ de'i lhan cig byed pa tshang ba'i gnas skabs kyi rang bzhin gang yin pa de nyid ci ma tshang ba'i gnas skabs yin nam/ 'on te gzhan yin/ gal te de nyid yin na de'i tshe lhan cig byed pa rnams dang rtag par 'gyur ro/ /ji ltar zhe na/ de 'brel rang bzhin zhes bya ba la sogs pa smos te/ lhan cig byed pa de dag dang 'brel pa'i rang bzhin gang la yod ces tshig rnam par sbyar ro/ /de dag kyang zhes bya ba ni lhan cig byed pa rnams te/ lcags su bcug pa'i skyes bu bkug na/ lcags kyang bkug pa bzhin du de dag kyang rjes su 'jug pa'i phyir ro/ / de lta yin na ni de nyid rang bzhin snga ma ma btang bar rjes su 'jug par 'gyur ro/ /gal te lhan cig byed pa'i rgyu dang 'brel pa'i rang bzhin mi 'dor na de dang 'brel pa'i rang bzhin ma dor ba na shugs kyis lhan cig byed pa rnams kyang mi 'dor te/ 'brel pa can nyid ni gnyis pa la ltos pa'i phyir ro/ /de lta ma yin na de nyid de'i rang bzhin du mi 'gyur ro/ /'on te gzhan yin no zhes bya ba'i phyogs yin na/ de la smras pa/ gal te ma tshang zhes bya ba la sogs pa'o/ /gal te 'di'i lhan cig byed pa ma tshang ba'i ngo bo gzhan yin no zhes bya bar 'dod na/ de'i tshe rtag pa nyid nyams par thal bar 'gyur te/ ngo bo dngos po las tha mi dad pa'i phyir ro/ /de lta bas na lhan cig byed pa'i rgyu la ltos pa yin na yang bstan pa/ rim gyis don byed par rigs pa ma yin la/ cig car yang ma yin no zhes ston pa ni/ de yi 'bras bu cig car du/ /zhes bya ba la sogs pa'o/ /gzhan gyis rtag pa'i dngos po'i 'bras bu cig car ba nyid du mi 'dod de/ 'di ltar rtag pa dag gi 'bras bu ni 'di dag yin par brjod par bya ste/ bdag gi bde ba dang sdug bsngal la sogs pa'o/ /nam mkha'i ni sgra'o/ /yid kyi ni shes pa rim pas 'jug pa rnams so/ /rdul phra rab rnams kyi ni rdul gnyis pa la sogs pa'i rim gyis rags pa rnams so/ /dus dang phyogs dang dbang phyug rnams kyi ni skye ba dang ldan pa thams cad do/ /'di dag kyang rim gyis skye bar mngon sum nyid kyis grub po/ /de'i phyir de ltar cig car bar khas blangs na mngon sum dang 'gal ba dang / khas blangs pa dang 'gal bar yang bstan par 'gyur ro/ /da ni rjes su dpag pa dang 'gal bar bstan pa'i phyir/ gal te 'bras bu mtha' dag ces bya ba la sogs pa smos te/ 'di ltar 'bras bu mtha' dag cig car byas nas gang gis dus phyis kyang 'bras bu dag skyed par mi byed pa de'i don byed pa'i rang bzhin te ldog pa yin nam/ 'on te rjes su 'jug par 'gyur zhes bya ba phyogs gnyis so/ /de la gal te ldog par 'gyur ro zhes bya ba'i phyogs yin na/ de'i tshe de'i skad cig ma 'jig pa nyid grub ste/ skad cig re rer rang bzhin gzhan dang gzhan skye ba'i phyir dang / snga ma snga ma'i rang bzhin rang gi ngang gis 'jig pa'i phyir ro/ /'on te phyogs gnyis la rten par byed na de'i tshe de'i ngo bo nus pa'i bdag nyid rjes su 'jug pa na yang 'bras bu skyed par byed par 'gyur te/ sngar gyi gnas skabs bzhin du sngar gyi rang bzhin ma dor ba'i phyir ro/ /de ltar yin dang de nyid rim gyis skyed pa yin pa'i phyir cig car bar khas blangs pa rjes su dpag pa dang 'gal lo/ /ci ste yang de rim dang cig car dag gis don byed pa ma yin du chug mod/ de lta na yang 'di nus pa yod pa nyid do snyam na/ cung zad mi byed ces bya ba la sogs pa smos te/ dngos po rnams kyi nus pa rnam par 'jog pa'i rgyu mtshan ni 'bras bu skyed pa yin na/ gang yang cung zad kyang mi byed pa de nus par ji ltar 'gyur/ de lta ma yin na nam mkha'i pad+ma la sogs pa yang ci'i phyir nus par rnam par mi 'jog /gal te 'di snyam du 'di la nus pa ldog pa de lta na yang yod pa nyid ldog pa med do/ /de lta yin dang yod pa'i phyir ro zhes bya ba'i gtan tshigs ma nges pa yin no snyam du sems na/ skad cig ma yin thams cad med/ /ces bya ba la sogs pa smos te/ dngos po'i mtshan nyid ni 'di lta bu yin te/ 'di lta ste/ don byed par nus pa'o/ /gal te de ldog na ji ltar de'i mtshan nyid kyi dngos po nyid de dag la gnas pa rnyed par 'gyur/ de'i phyir de ltar skad cig ma nyid ma yin par 'dod pa'i nam mkha' la sogs pa rnams rim dang rim ma yin pa dag gis don byed par nus pas stong pa'i phyir/ mo gsham gyi bu la sogs pa bzhin du med pa'i tha snyad du byar rung ba yin no zhes bya bar grub po/ /ci ste yang gal te dngos po'i mtshan nyid don byed par nus pa kho na yin par gyur na de'i tshe 'di thams cad mdzes pa yin no/ /gal te de lta ma yin na dngos po'i mtshan nyid gzhan gang yin pa brjod dgos te/ 'di ltar ri bong gi rwa la sogs pa gang dngos po med par 'dod pa de la rgyu mtshan ni don byed par nus pa dang bral ba kho na yin te/ dngos po dang dngos po med pa dag ni phan tshun rnam par gcod pa'i ngo bo yin pa'i phyir/ shugs kyis dngos po med pa'i mtshan nyid las bzlog pa don byed par nus pa kho na'i dngos po'i mtshan nyid du gnas so snyam du dgongs pa'o/ /'di la gzhan gyi lan gyi dogs pa bsu ba ni/ gal te dngos po'i mtshan nyid ni zhes bya ba la sogs pa'o/ /dngos po'i mtshan nyid don byed par nus pa ni ma yin no/ /'o na ci zhe na/ yod pa dang 'brel pa ste/ yod pa dang 'du ba zhes bya ba'i tha tshig go/ /de min zhes bya ba la/ dngos po'i mtshan nyid du rigs pa zhes bya ba lhag ma'o/ /ci'i phyir zhe na/ 'du ba la sogs pa ma grub pa'i phyir dang / sogs pa'i sgras ni yod pa gzung ngo / /gal te yod pa'am yod pa dang 'du ba grub par gyur na de'i tshe dngos po'i mtshan nyid yod pa dang 'du ba yin par 'gyur na/ gang gi phyir de dag nyid bsgrub par bya ba nyid kyi skabs yin pa'i phyir dang / 'chad par 'gyur ba'i gnod par byed pa'i tshad ma yod pa'i phyir ro/ /yang na sngar bshad pa nyid kyis gnod par byed pa'i phyir tshad ma yod pa'i phyir 'du ba ma grub po/ /yod pa ni 'ga' zhig dang lhan cig 'brel pa ma grub pa de ni phan gdags par bya ba ma yin pa'i phyir ro/ /phan tshun du phan mi 'dogs pa dag ni 'brel par rigs pa ma yin te/ ha cang thal bar 'gyur ba'i phyir ro zhes bstan to/ /gzhan yang yod pa dang 'du ba de dag ni mtha'i khyad par dag gi yang dngos po nyid la mtshan nyid gang yin zhes bya ba brjod par bya'o/ /'du ba dang khyad par dag la yod pa dang 'du ba ma yin zhing / yod pa yang ma yin no/ /'o na ci zhe na/ rdzas dang yon tan dang las rnams la ste/ dngos po gsum yod par byed pa ni yod pa yin no zhes bya ba'i gzhung gi phyir ro/ /de ltas na dngos po'i mtshan nyid 'di ni mi la khyab pa yin no/ /yod pa la sogs pa grub pa yin du chug mod/ de lta na yang yod pa dang 'du ba mtshan nyid du rigs pa ma yin te/ don gzhan yin pa'i phyir ro/ /gang gis de de'i mtshan nyid du 'gyur ba don gzhan ni gzhan gyi ngo bo ma yin no/ /'di ltar dngos po'i rang gi ngo bo ma shes pas blo gros blun po tshad ma dang ldan pa la gang gis dngos po de nyid kyi ngo bo nyid kyis 'dzin par byed pa de'i mtshan nyid kyi rang bzhin nyid 'ga' zhig las ldog par rtogs pa mtshan nyid nyid du brjod par bya ste/ dper na sra ba nyid kyis sa bzhin no/ /dngos po gzhan gyi ngo bo ni ma yin te/ gzhan nyid nyams par thal bar 'gyur ba'i phyir ro/ /de ji ltar de'i mtshan nyid yin te/ mtshan nyid kyi sgras ni rang bzhin rjod par byed pa'i skabs yin pa'i phyir ro/ /kha cig na re gang dang gang yod pa de thams cad skad cig ma yin no zhes thams cad nye bar bsdu ba'i khyab pa 'di grub par 'gyur ba dngos po gang zhig tha na thams cad mkhyen pa'i ye shes kyang skyed par byed par mi byed pa de ni de 'dra ba yod pa nyid la gnod par byed pa'i tshad ma ci yod/ de yongs su ma shes pa na thams cad mkhyen pa nyid nyams pa yang ma yin te/ de ni shes bya mtha' dag kho na la dbang ba'i phyir te/ shes par rung ba'i dngos po ma shes na/ thams cad mkhyen pa ma yin par 'gyur na/ de ni shes bya ma yin te/ de ni shes pa skyed pa la yang mi nus pa'i phyir ro zhes zer ro/ /de la bshad pa don byed don / /zhes bya ba la sogs pa'o/ /don dngos po tsam la yod pa nyid dang / med pa nyid du spyod pa gang yin pa de thams cad ni don byed pa don du gnyer bas yin gyi chags pas ni ma yin te/ gzhan du na smyon par 'gyur ro/ /des na dngos po'i tshogs gang kho na don byed pa don du gnyer ba 'ga' zhig la ci ltar dngos sam brgyud pas yul 'ga' zhig tu dus res 'ga' nye bar sbyor ba de nyid la rtogs pa dang ldan pa dngos po nyid du rnam par 'jog pa rigs pa yin gyi/ /gzhan la ni ma yin te/ rgyu mtshan med pa'i phyir dang dgos pa med pa'i phyir ro snyam du bsams pa yin no/ /sogs pa smos pas me dang chu la sogs pa'i don gyi khyad par dag la spyod pa gzung ngo / /de lta yin dang rtog pa sngon du gtong ba rnams kyis gang kho na don byed pa de kho na dngos po yin no zhes bya ba gang yin pa de grub po/ /de'i ngo bo nyid kyi don bya ba byed pa'i ngo bo de nyid kho bo cag gis skad cig ma nyid du bsgrub ste/ de na don byed par nus pa'i mtshan nyid kyi yod pa gtan tshigs nyid du mngon par 'dod pa'i phyir 'khrul pa med do/ /de lta bur gyur pa'i gtan tshigs de la bsgrub par bya bas thams cad nye bar sdud pas khyab pa grub pa'i phyir ro/ /phyogs dang mthun pa'i phyogs kyi rnam par dbye ba ma byas par spyir gtan tshigs kyi khyab pa bstan pa gang yin pa de ni thams cad nye bar bsdu ba'i khyab pa'o/ /ci ste don byed par nus pas stong na yang ci'i phyir dngos po nyid du mi 'dod ce na/ nus pa mtha' dag gis stong gang / /zhes bya ba la sogs pa smos te/ thams cad mkhyen pa'i thugs la yang / /zhes bya ba la/ yang gi sgra ni rigs 'dra ba'i skad cig dang / chu skyor ba la sogs pa'i 'bras bu 'ba' zhig tu ma zad ces bya ba'o/ /ngo bo 'bras sogs ma mthong phyir/ /zhes bya ba ni rgyu mtshan med pa can gyi gtan tshigs te/ ngo bo ni de'i rang bzhin no/ /'bras ni de'i 'bras bu'o/ /sogs pa'i sgras de'i yul dang dus dang / gnas skabs kyi khyad par yang gzung ngo / / de lta bu'i ngo bo de ni ri bong gi rwa la sogs pa dag las khyad par 'ga' yang med do snyam du bsams pa yin no/ /de lta bur gyur pa'i dngos po de la skad cig ma nyid du bsgrubs pas don byed pa don du gnyer ba la dgos pa cung zad kyang med de/ de ni mthong ba dang ma mthong ba dag tu phan pa dang mi phan pa thob pa dang spong bar mi rung ba'i phyir ro/ /ji skad du/ don byed nus pa ma yin la/ /de 'dod brtags pas ci zhig bya/ /ma ning gzugs bzang mi bzang zhes/ /'dod ldan rnams kyis brtags ci phan/ /zhes bshad pa bzhin no/ /de nyid kyi phyir skad cig ma de la 'di ji ltar rtogs par bya zhes bya ba la sogs pas brgal zhing brtag pa'i phyir rgol bas byed pa'i 'bras bu med pa nyid de/ de ni rgol bas skad cig ma nyid du bsgrub par bya ba mi 'dod pa'i phyir ro/ /da ni gzhan gyi don byed par nus pa yang dngos po'i mtshan nyid du mi rigs te/ ha cang khyab ches pa'i phyir ro zhes ston par byed pa ni/ 'on te nam mkha'i pad+ma zhes bya ba la sogs pa'o/ /'di ltar nam mkha'i pad+ma la sogs pa las nam mkha'i pad+ma nam mkha'i pad+ma snyam pa la sogs pa'i shes pa skye ba'i mtshan nyid kyi don byed pa la nus pa yin la/ de dag don dam par yod pa ma yin te/ de'i phyir dngos po'i mtshan nyid ni nus pa yin no zhes bya ba 'di khyab ches pa yin no/ /'di la lan du/ nam mkha'i pad+ma la sogs la/ /zhes bya ba la sogs pa smos te/ nam mkha'i pad+ma la sogs pa rnams la don byed par nus pa ma grub ste/ de'i rnam par rtog pa rnams ni rang gi rnam par rtog pa'i bag chags yongs su smin pa tsam kho na las skye bas dmigs pa med pa'i phyir ro/ /ci ste nam mkha'i pad+ma la sogs pa las skye ba la gnod par byed pa'i tshad ma ci yod ce na/ med pa rgyu nyid yin na ni/ /zhes bya ba la sogs pa smos te/ nam mkha'i pad+ma la sogs pa med pa rgyu gang la yod pa de la de skad ces bya ste/ de'i dngos po ni de nyid do/ /de yod na nam mkha'i pad+ma la sogs pa'i shes pa de thams cad du 'byung ba ste/ skye bar 'gyur te/ rgyu ma tshang ba med pa rtag pa'i phyir ro/ /gang gis rgyu ma tshang bas res 'ga' mi skyed pa zhes bya bar 'gyur ba gzhan gyi phan gdags par bya ba ma yin pa de ni ltos par rigs pa yang ma yin no/ /skad cig ma yi dngos rnams la/ /zhes bya ba la sogs pas btsun pa sbyor ba'i sde'i lugs dogs par bya ba yin te/ des smras pa/ dngos po rnams skad cig ma yin na yang rim dang cig car dag gis don byed pa 'gal ba nyid yin te/ 'di ltar de dag rang nyid nus par 'gyur ram mi nus/ gal te nus na de'i tshe lhan cig byed pa'i rgyu la ltos par mi 'gyur te/ nus pa ni 'ga' la yang ltos par rigs pa ma yin no/ /ci ste mi nus pa de lta na yang de dag gi de la ltos pa de rigs pa dang mi ldan pa gsal rab pa nyid de/ 'di ltar tshogs pa dang po'i nang du chud pa'i lus gang yin pa de dag ni phan tshun du khyad par thob par byed pa ma yin te/ skyes ba dang ma skyes pa'i gnas skabs dag gis yod pa dang med pas phan gdags par bya ba dang phan 'dogs par byed pa med pa'i phyir ro/ /de lta yin dang dngos po'i gnas skabs la de dag gis khyad par med pa'i phyir/ de las khyad par can skad cig gzhan skye bar mi 'gyur ro/ /khyad par med pa de dag las skad cig gzhan gyi khyad par skye na/ 'bras bu yang ci'i phyir skyed par mi byed/ khyad par can de dag ni tshogs pa snga ma las byung ngo zhes brjod par rigs pa yang ma yin te/ tshogs pa de'i nang du gtogs pa rnams kyang de nyid kyi phyir phan tshun khyad par med pa'i phyir ro/ /de dag kyang khyad par gzhan las skye na ni thug pa med par 'gyur ro/ /de'i phyir de ltar khyad par med pa'i phyir de ji ltar rgyu'i tshogs pa khyad par med pa las 'bras bu skye bar 'gyur/ khyad par med pa las kyang skye na thams cad thams cad las 'gyur ro/ / de lta yin dang rim dang cig car dag gis de ltar don byed pa mi 'gal na yang ji ltar de dag don bya ba byed par 'gyur ba de bzhin du rtag pa yang yod par 'gyur ba'i phyir de dag gi skad cig ma nyid la rten pa don med do/ /des na yod pa'i phyir ro zhes bya ba'i gtan tshigs ni ma nges pa nyid yin no snyam du bsams pa yin no/ /rgyun gyi gnas skabs khyad par thob pas 'bras bu skye bar 'gyur gyi/ thams cad du ni ma yin no zhes kyang brjod par mi rigs te/ ji skad du bshad pa'i rigs pas lhan cig byed pas byas pa'i khyad par med pas rgyun thams cad du khyad par med pa'i phyir ro/ /rgyun ni rang gi nye bar len pa'i rgyu tsam dang ldan pa'i khyad par yin no zhes kyang brjod par mi rigs te/ mthong ba dang 'gal ba'i phyir ro/ /'di ltar lhan cig byed pa rnams yod pa dang med pa dag las 'bras bu gsal ba dang bral ba mthong ste/ gal te rang gi nye bar len pa tsam dang ldan pa'i khyad par du 'gyur na de'i tshe lhan cig byed pa la ltos pa med pa kho nar skyed par byed pa nyid du 'gyur ro/ /gzhan yang ji skad du bshad pa'i rigs pas rgyun la thams cad du khyad par med pa'i phyir/ bum pa la sogs pa rnams la gyo mo la sogs pa'i khyad par skye bar mi srid pa'i phyir rigs 'dra ba'i skad cig rgyun chad pa'i mtshan nyid kyi 'jig pa gal te rgyu med pa can du 'gyur na/ de'i tshe ltos pa med pa'i phyir dang po nyid du 'gyur ro/ /'on te dang po mi 'gyur na phyis kyang mi 'gyur te/ snga ma bzhin du khyad par med pa'i phyir ro/ /gzhan yang gal te dngos po rnams kyis 'jig pa la rang gi rgyu las tha dad pa gzhan rgyur mi 'dod na de'i tshe me la sogs pa dang grang ba la sogs pa rnams la ji ltar 'gal bar 'gyur/ cung zad kyang mi byed pa ni 'gal bar rigs pa ma yin te/ ha cang thal bar 'gyur ba'i phyir ro/ /de lta na ni thams cad thams cad dang 'gal bar thal bar 'gyur ro/ /de lta yin dang 'gal ba'i sgo nas mi dmigs pa'i sbyor ba dang / srog gcod pa la sogs pa'i rnam par gzhag pa yang ches 'brel par dka'o snyam du bsams pa'o/ /smras pa zhes bya ba la sogs pas lan 'debs par byed pa yin te/ nus pa kho na las 'bras bu skye zhing lhan cig byed pa don med pa yang ma yin te/ 'di ltar lhan cig byed pa ni rnam pa gnyis te/ don gyi bya ba gcig byed pa dang / phan tshun phan pa byed pa nyid kyis so/ /de la bar du ma chod pa'i 'bras bu la ltos nas don gyi bya ba gcig byed pa nyid yin gyi/ phan tshun du phan pa byed pa nyid ni ma yin te/ skad cig gcig la cha med pa nyid kyis khyad par bskyed par mi nus pa'i phyir ro/ /chod pa'i 'bras bu la ltos na ni phan tshun du khyad par can gyi skad cig gong nas gong du skye ba'i phyir/ rgyun la ltos nas phan tshun du phan 'dogs pas chod pa'i 'bras bu skyed par byed pa'i phyir phan tshun phan pa byed pa'i phyir mtshan nyid lhan cig byed pa nyid yin no/ /de la dang po'i gnas skabs su byung ba rnams la gal te yang phan tshun khyad par med pa de lta na yang de dag gis lhan cig byed pa 'gal ba med pa nyid de/ don gyi bya ba gcig byed pa'i phyir ro/ /de dag ni de ma thag tu khyad par can gyi skad cig skye ba la khyad par med pa yang ma yin te/ rang gi rgyu dang rkyen snga ma dag kho na las rnam pa de lta bu'i 'bras bu'i tshogs skyed pa na nus pa rnams so sor skyes pa'i phyir ro/ /rgyu dang rkyen de dag kyang rang gi rgyu dang rkyen gzhan dag las yin la/ de dag kyang gzhan dag las yin pa'i phyir/ rgyu'i brgyud pa thog ma med pa nyid du 'dod pa'i phyir/ thug pa med kyang sun mi phyin pa nyid do/ /nus pa so so yin na yang gzhan 'di dag don med pa yang ma yin te/ rang gi rgyu'i stobs kyis de dag de ltar skye ba'i phyir ro/ /de dag tha dad pa'i ngo bor yod pa ma yin te/ rnam pa de lta bu'i rgyu'i dngos po med pa'i phyir ro/ /phyis kyi skad cig ma nyid yin pa'i phyir tshogs pa logs shig tu skyed pa yang ma yin te/ skad cig gnyis par 'byung ba'i tshogs pa re re skyed pa'i nus pa zhes bya ba'i don to/ /rang gi nye bar len pa smos pa ni dang po'i gnas skabs su byung ba'i lhan cig byed pas byas pa'i nye bar sbyor ba 'gegs pa lhur len pa yin par blta bar bya'o/ /rang gi nye bar len pa tsam las byung ba'i 'bras bu 'ga' zhig yod pa ni ma yin te/ thams cad ni tshogs pa las 'byung ba'i phyir ro/ /ci skad du/ 'ga' yang gcig las gcig ma yin/ /thams cad tshogs pa nyid la 'byung / /zhes bshad pa lta bu'o/ /de las brtsams nas zhes bya ba ni dus phyis skad cig gnyis pa nas bzung nas zhes bya ba'i don to/ /des byas pa'o zhes bya ba ni lhan cig byed pas byas pa'i khyad par gyi rgyus byas pa'o/ /ci'i phyir zhe na/ de'i ngo bo'i rang bzhin yin pa'i phyir te/ de rnams te de'i ngo bo khyad par lhan cig byed bas byas pa'i khyad par gyi rgyus bskyed par bya ba'i rang bzhin te/ ngo bo nyid gang la yod pa de la de skad ces bya'o/ /de la nyer sbyor zhes bya ba ni/ de yi ngo bo'i rang bzhin phyir/ /zhes bya ba dang sbrel bar bya'o/ /de la nyer sbyor te zhes bya ba 'dir dang gi sgra mi mngon par byas par bstan pa yin no/ /des na don 'dir 'gyur te/ de las gnas skabs gsum par 'byung ba'i 'bras bu la skad cig gnyis par 'byung ba'i khyad par gang dag rgyu'i dngos pos nye bar sbyor te/ de la nye bar sbyor ba de dag kyang lhan cig byed pas byas pa'i khyad par gyi rgyus bskyed par byas pa'i 'bras bu skyed par rung ba'i rang bzhin yin pa'i phyir ro/ /de'i phyir skad cig gsum pa la sogs pa 'byung ba'i khyad par nges byas pa yin no zhes bya ba'o / /'di dag gi nges pa 'di yang ji ltar 'byung ba yin zhe na/ nus nges zhes bya ba la sogs pa smos te/ dngos po rnams kyi rang bzhin ni brgal zhing brtag par 'os pa ma yin te/ me'i sreg par byed pa mi rtogs pa nyid lta bur de dag gi rang bzhin tha dad pa ni rang gi rgyu dang rkyen brgyud pas bskyed pa nyid kyi phyir ro/ /gang gi phyir de dag rkyen gzhan dang gzhan gyi sbyor bas skad cig re re la nus pa tha dad par skye ste/ de'i phyir 'di mtshungs pa 'ga' zhig las 'dra bar shes par byed pa yin mod kyi/ 'on kyang 'di dag gi rang bzhin tha dad pa kho na'o/ /des na 'ga' zhig 'ga' zhig gi rgyu yin gyi/ thams cad thams cad kyi ni ma yin/ ci'i phyir 'di ni ci yang ma yin no/ /'byung ba'i zhes bya ba ni skye ba'i zhes bya ba'i don to/ /gang yang / gal te 'jig pa rgyu med 'gyur/ /zhes smras pa de la bshad pa/ rgyun chad ngo bo gang yin pas/ /zhes bya ba la sogs pa ste/ 'jig pa ni rnam pa gnyis te/ rgyun chad pa'i ngo bo dang / rgyun mi 'dra bar skye ba'i mtshan nyid do/ /de la gal te rgyun chad pa'i ngo bo'i 'jig pa'i dbang du byas nas smra na/ de mi rigs te/ de ni mthar yang yod pa ma yin zhes bya ba la/ ngo bo med pa'i phyir/ de ni mthar yang ji ltar 'gyur/ /zhes bya ba de ci ste rjod par byed/ de lta bas na 'di ni res 'ga' yang yod par khas ma blangs pa'i phyir dang po dang mthar dngos po med par thal ba gang yin pa de 'brel pa med pa nyid do/ /de bzhin du tshe rigs 'dra ba'i skad cig gzhan mtshams sbyor bas skye ba 'byung ba de la bkag pa 'ba' zhig yin te/ bum pa la sogs pa 'chad par 'gyur ba na/ de nyid mi 'byung ngo zhes bya ba'i don yin gyi / de la cung zad sgrub par ni ma yin no/ /ci ste mi 'dra ba'i skad cig skye ba'i mtshan nyid kyi 'jig pa gnyis pa mngon par 'dod na de ni rgyu med pa nyid du ma grub ste/ dngos su de ni tho ba la sogs pa'i rgyu'i stobs kyis skye bar khas blangs pa'i phyir ro/ /de nyid kyi phyir 'di dang por mi skye ste/ rang gi rgyu tho ba la sogs pa de'i dus su med pa'i phyir ro/ /'gal ba'i rnam par gzhag pa bsgrub pa'i phyir/ skad cig ma yi dngos rnam gnyis/ /zhes bya ba la sogs pa smos te/ dngos po kha cig 'ba' zhig gi nyam chung ba dang / che ba dang / ches cher chung ba'i skad cig skyed pa'i rim gyis bskum pa gang yin pa de la rgyur 'gyur te/ dper na grang ba la sogs pa'i me la sogs pa bzhin no/ /gzhan ni de lta min pa ni 'grib pa'i rgyu ma yin pa ste / 'di lta ste dper na du ba la sogs pa rnams kyi me la sogs pa de dag nyid bzhin no/ /de la dang por bstan pa'i bskum pa'i rgyu dag la rgyu dang 'bras bu'i dngos po yin na yang shes pa'i snang ba mi shes pa'i rab rib kyis bsgribs bzhin pa'i 'jig rten 'gal ba nyid du mngon par rlom mo/ /rnam pa du ma zhes bya ba ni grang ba dang 'gal ba me dang / sgron ma'i rlung dang / snang ba'i mun pa zhes bya ba la sogs pa'i bye brag gis so/ /don dam par dngos po rnams la gnod par bya ba dang gnod par byed pa'i dngos po yod pa ni ma yin te/ yod pa ni bdag nyid thams cad kyis grub pas rang bzhin gzhan du bya bar mi nus pa'i phyir ro/ /de ni tha dad pa dang tha mi dad pas brtags pa na gnyi ga ltar yang byed pa mi srid pa'i phyir ro/ /med na yang dngos po ma yin pa nyid kyis cung zad kyang mi byed pa'i phyir gnyi ga ltar yang 'gal ba ni cung zad kyang med do/ /de nyid kyi phyir slob dpon gyis rgyu ma tshang ba med par 'byung ba la gzhan yod na med pa'i phyir 'gal bar rtogs so zhes bshad de/ 'gal bar rtogs pa ni 'gal bar nges pa yin gyi/ 'gal ba de kho na nyid ni ma yin no snyam du dgongs pa yin no/ /yang gi sgras ni dang gi don dang rim pa gzhan du sbyar ba yin te/ de nyid phyir zhes bya ba 'di'i mjug tu blta bar bya'o/ /'on te de nyid ces bya ba la sogs pa ni rgyal dpog pa la sogs pa'i gzhung gis skad cig ma 'jig par dam bcas pa mngon sum gyis gnod pa nyid kyi dogs pa bsu ba yin te/ 'di ltar ri dang lus dang khang bzangs la sogs pa la de nyid 'di yin no snyam pa'i mngon sum gyis byed pa'i mjug thogs su ngo shes par brjod pa'i mngon sum gyi tshad ma dngos po rnams kyi skad cig ma 'jig pa 'joms par byed pa skye'o/ /bregs nas yang skyes pa'i sen mo dang skra dang rtswa la sogs pa la ngo shes par mthong ba yin mod kyi/ 'on kyang rdo rje la sogs pa'i yul can gyi ngo shes pa tshad ma ma yin par dmigs pa yin te/ gnod pa med pa'i yul can nyid yin pa'i phyir ro/ /de nyid kyi phyir/ g.yo ba med cing gnod med pa'i/ /zhes bya ba smos te/ rab rib kyis nyams pa'i mig gis bskyed pa'i skra shad kyi shes pa tshad ma ma yin pa'i dmigs pa yin pa de tsam gyis tha mal pa'i mig gis bskyed pa'i bden pa'i skra shad kyi yul can gyi mig gi rnam par shes pa yang tshad ma ma yin no zhes sems rnal du gnas pas brjod par rigs pa ni ma yin no snyam du bsams pa yin no/ /de la g.yo ba med pa nyid kyis the tshom med pa'i ngo bo nyid brjod pa yin te/ de nyid 'di yin nam 'on te gzhan yin zhes bya ba rnam pa de lta bu'i the tshom med pa'i phyir ro/ /gnod pa med pa zhes bya ba 'dis ni phyin ci ma log par bstan to/ /ngo shes pa'i shes pa ni zhes bya ba la sogs pas lan 'debs par byed de/ de la re zhig 'di ni mngon sum nyid du mi 'grub ste/ 'di ltar dngos po'i rang gi mtshan nyid rjes su 'gro ba med pa nyid kyis brda bya bar mi nus pa'i phyir de 'dzin pa'i shes pa rnams mngon par brjod pa med pa nyid yin te/ 'brel pa ma bzung ba'i don sgra dang lhan cig sbyar nas 'dzin par mi srid pa'i phyir ro/ /de'i phyir mngon sum ni yod pa'i rang gi mtshan nyid ni yul can nyid yin pa'i phyir gdon mi za bar rtog pa dang bral ba dang / tshad ma yin pa'i phyir ma 'khrul par 'gyur bar bya dgos so/ /de nyid kyi phyir mkhas pa rnams kyis/ mngon sum rtog bral ma 'khrul pa'o/ /zhes bya ba rigs pa'i rjes su 'gro ba 'di mngon sum gyi mtshan nyid du rjod par byed do/ /ngo shes pa ni rtog pa dang bral ba yang ma yin te/ de nyid 'di yin no zhes bya ba de lta bu'i brjod pa'i rnam pa nyid kyis rigs pa'i phyir ro/ /ma 'khrul pa yang ma yin te/ tha dad pa la tha mi dad par nges par 'jug pa'i phyir ro/ /ji ltar zhe na/ 'di ni sngar rtogs zhes bya ba la sogs pa smos te/ gal te 'di sngar dmigs pa'i don gyis yul can yin par gyur na de'i tshe sngar nyid du skye par 'gyur te/ de yul yin pa nyid kyis rgyu ma tshang ba med pa nyid kyi phyir sngar gyi shes pa bzhin no/ /de don can phyir zhes bya ba ni de ni sngar rig pa'i dngos po don yul du gang la yod pa de ni don can de'i dngos po ni de'i don can nyid do/ /de lta yang ma yin zhes bya ba ni thal ba las bzlog pa 'chad pa'o/ /sbyor ba ni gang zhig gang du ma tshang ba med pa yod na yang mi 'gyur ba de ni de'i yul can ma yin te/ dper na ma tshang ba med pa'i gzugs yod na yang de la rna ba'i rnam par shes pa mi 'byung ba bzhin no/ /rdo rje la sogs pa'i shes pa de'i dus su ngo shes pa yang ma tshang ba med na mi 'byung ba'i phyir zhes bya ba ni khyab par byed pa mi dmigs pa'o/ /de'i phyir de ltar rdo rje la sogs pa gzhan la ltos pa med pa rtag pa nyid yin na de'i yul can gyi shes pa ni rgyu ma tshang ba med pa nyid kyi phyir sngar nyid du 'gyur na de lta yang ma yin te/ de lta bas na 'di mi rtag pa nyid du grub po/ /de lta yin dang tha dad pa dag la tha mi dad par nges pas 'jug pa'i phyir sgyu ma'i ri lu'i rnam par shes pa bzhin du 'di ni 'khrul pa yin no zhes bya ba 'di ni ma tshang ba med pa nyid yin no/ /de nyid kyi phyir gnod pa med pa'i yul can yang ma grub pa yin te/ 'khrul pa nyid du grub pa ji skad du bshad pa'i gtan tshigs las gnod pa'i yul can yin pa'i phyir ro/ /'di yang bzung zin pa 'dzin pa'i phyir 'di tshad ma ma yin te/ dran pa bzhin no zhes bstan pa'i phyir grub zin pa don gyi zhes bya ba la sogs pa smos te/ gang gi phyir gang kho na gzhal ba'i bya ba grub pa la khyad par can gyi phan 'dogs par byed pa de kho na grub par byed pa dam pa'i byed pa po tshad ma zhes bya'o/ /gal te ngo shes pa tshad ma snga mas bzung zin pa'i don gyi yul can du gyur na/ de'i tshe gzhal bar bya ba grub pa'i don la 'jug pas sgrub par byed pa dam pa nyid med pa'i phyir ji ltar tshad ma nyid du 'gyur/ gzhan du na dran yang tshad ma nyid du 'gyur ro/ /tshad ma'i dngos por gyur pa ma yin na gnod par byed pa nyid du rtog pa yang ma yin te/ ha cang thal bar 'gyur ba'i phyir ro/ /'di snyam du 'di logs shig tu tshad ma nyid du ma gyur mod/ de lta na yang snga ma'i don yul yin pa nyid kyis 'di skad cig ma 'jig pa la gnod par byed pa nyid yin no snyam du sems na/ de ni yang dag pa ma yin te/ 'di la don dam par snga ma'i yul yin pa nyid yod pa ma yin te/ brjod pa dang bcas pa'i phyir ro/ /yul med na yang 'khrul pa'i stobs kyis sngar mthong ba'i don la nges pa skye ba'i phyir nges pa'i dbang gis sngar mthong ba'i don yul yin no zhes brjod pa 'ba' zhig tu zad do/ /de'i phyir rang bzhin gyis 'khrul pa'i ngo shes pa 'di las skad cig ma 'jig pa sel bar ga la 'gyur/ da lta'i dus su yod pa nyid ces bya ba la sogs pas gzhon nu ma len gyi lugs kyis bzung zin pa 'dzin pa nyid kyis ma grub par ston par byed pa yin te/ des smras pa/ mngon sum snga mas don da lta'i dus su yod pa nyid du rtogs pa ni ma yin te/ de ni de nyid 'di yin no zhes bya ba'i rnam pa 'dzin par mi 'thad pa'i phyir ro/ /de lta bas na ngo shes pa 'di la dran pa las khyad par yod do/ /ji ltar zhe na/ snga rol gzhan pa tsam zhes bya ba la sogs pa smos te/ dran pa ni de'o snyam pas shes pa snga ma'i rnam pa 'dzin pa nyid kyis 'jug la/ ngo shes pa ni 'di'o snyam pa de lta bu'i tha dad par yang don gyi rnam par 'dzin pa skye ste/ de'i phyir dran pa las khyad par du gyur pa yin te/ bye brag can yin no zhes bya ba'i don to/ /de lta bas na gang dag the tshom dang phyin ci log yin pa de dag la gnod par byas nas ngo shes pa tshad ma nyid du thob par 'gyur ba yin no/ /gang las 'di dag la gnod pa yin zhes bya ba 'di la rgyu bshad pa ni/ rtogs pa la ni yod min phyir/ /zhes bya ba la/ rtogs pa'i don la de dag med pa'i phyir me 'bar ba'i tshogs chen po dang ldan pa'i dus su grang ba lta bu'o/ /'on te ji lta bu la sogs par rtogs pa'i sngo bsangs la sogs pa bzhin du ji ltar rjes su dpag pas bsgrubs pa'i don la dus gzhan yang mngon sum gyis gnod pa gzhan nyid du 'gyur ba de bzhin du 'di la yang ma yin nam/ gal te ngo shes pas rtag pa nyid kyi don grub pa de lta na yang dus phyis de'i 'bras bu'i rim pas de'i rim pa rjes su dpag pas grub pa'i phyir gzhan nyid du 'gyur ba nyid ma yin na/ de ji ltar skad cig ma 'jig pa nyid la gnod par byed ces dogs pa la/ cig shos kyis ni zhes bya ba la sogs pa smos te/ cig shos kyis zhes bya ba ni dper na de ni sngo bsangs yin te/ de'i bu yin pa'i phyir/ de'i bu snang ba bzhin no zhes bya ba'i rjes su dpag pa la sogs pa dag gis so/ /mngon sum gyis ni gzhan du 'gyur/ /zhes bya ba ni mngon sum du gyur pas gzhan du ste/ rjes su dpag pa la sogs pas gzhal ba'i rnam pa las phyin ci log tu 'gyur ro zhes bya ba'i don to/ /bcas pa zhes bya ba ni yul du byas pa zhes bya ba'i don to/ /cig shos skye ba srid pa min/ /zhes bya ba ni mngon sum las cig shos kyi rjes su dpag pa la sogs pa gnod par byed pa nyid du skye ba srid pa nyid ma yin no zhes bya ba'i don du'o/ /ci'i phyir zhe na/ tshad ma'i thu bo zhes bya ba la sogs pa smos te/ gang gi phyir rjes su grub pa'i don la mngon sum gyis gzhan nyid du byed pa zhes bya ba ni rigs te/ de ni tshad ma thams cad kyi thu bo yin pa'i phyir ro/ /rjes su dpag pa la sogs pas mngon sum gyi grub pa'i don gzhan nyid bya bar nus pa ni ma yin te/ da dag stobs chung ba'i phyir ro/ /brtan po yis zhes bya ba ni the tshom dang / phyin ci log dag dang dral bas so/ /bzlog par zhes bya ba ni gzhan nyid du'o/ /gal te zhes bya ba la sogs pas len 'debs par byed pa yin te/ ngo shes pa'i yul da lta'i dus su yod pa nyid gang yin pa de ci mngon sum snga mas bzung ba'i yod pa nyid las tha dad dam/ 'on te de nyid yin/ gal te tha dad na de'i tshe rang gi tshig nyid kyis tha dad du bstan pa'i phyir khyed cag gis khas blangs pa nyams par 'gyur la/ kho bo cag gi ni 'dod pa grub pa yin no/ /'on te gzhan ma yin no zhes bya ba'i phyogs yin na de'i tshe gang gis snga ma'i blo yis rtogs pa yin zhes brjod pa de ji ltar blo snga mas mi rtogs/ 'di snyam du gal te sgra la sogs pa las skad cig ma nyid tha mi dad pa yin na yang de bzung na ma bzung bar brjod pa de bzhin du 'di yang 'gyur ro snyam du sems na/ de ni mi rigs te/ chos can sgra bzung na yang de las tha mi dad pa'i skad cig ma nyid ma bzung ngo zhes rnam par gzhag par ni mi bya'o/ /'on kyang de bzung du zin kyang nges pa skye ba'i rgyu med pa'i phyir ma nges so zhes brjod par bya'o/ /nyams su myong ba nyid tsam las nges par 'gyur ba ni ma yin te / de ni don du ga nyer ba dang goms pa dang drin du gzo ba la sogs pa la ltos pa'i phyir ro/ /khyed la ni de lta bu srid pa ma yin te/ mngon sum snga ma yang nges pa'i bdag nyid yin pa'i phyir te/ des kyang dngos po'i rang gi ngo bo nges pa na de las tha mi dad pa'i da lta'i dus su yod pa nyid kyang nges pa nyid yin no/ /de ma nges na dngos po'i rang gi ngo bo yang de bzhin du ma nges pa'i ngo bo las tha mi dad pa'i phyir ma nges pa nyid du thal bar 'gyur ro/ /gang yang the tshom za ba'i dngos po yod pa na gtan la phab pa'i rgyu mtshan gyi ngo shes pa tshad ma nyid yin no zhes zer ba de yang 'di nyid kyis bsal ba yin no/ /'di la the tshom za ba'i dngos po yod pa na gtan la phab pa yod pa yang ma yin te/ 'dra ba gzhan dang gzhan skye ba na yang skra la sogs pa bzhin du ngo shes pa mthong ba ni the tshom mi za ba'i phyir ro/ /gang yang / cig shos kyis ni don rtogs pa'ang / /zhes bya ba la sogs pa smras pa de la/ rjes su dpag pa la sogs zhes bya ba la sogs pa smos te/ de'i bu yin pa'i phyir zhes bya ba la sogs pa rjes su dpag pa la sogs pa gang gi spyod yul te/ yul la mngon sum gyis gnod pa srid pa yin na/ de tshad ma nyid ma yin te/ gnod bzhin du yul yin pa nyid kyis don la mi slu ba med pa'i phyir rab rib can la sogs pa'i shes pa bzhin no/ /nges na/ cig shos kyis ni don rtogs la / /mngon sum gyis ni gzhan du 'gyur/ /zhes gang smras pa de ni ma 'brel pa nyid de/ mi srid pa'i phyir ro/ /gang yang mngon sum thu bo nyid du brjod pa de yang 'brel pa med pa yin no zhes bstan pa'i phyir/ don la mi slu zhes bya ba la sogs pa smos te/ tshad ma rnams kyi tshad ma nyid ni 'di nyid yin te/ don thob par nus pa'o/ /de yang tshad ma thams cad la khas blang bar bya ste/ des na ci'i phyir mngon sum 'di thu bo nyid du 'gyur yang ci ste mngon sum kho na don la mi slu ba nyid yin gyi/ rjes su dpag pa la sogs pa ni ma yin no snyam na/ de yod min na zhes bya ba la sogs pa smos te/ de'i don la mi slu ba nyid de med pa yin na/ rjes su dpag pa la sogs pa tshad ma ma yin pa nyid du 'gyur te/ tshad ma'i tha snyad kyi rgyu mtshan ni don la mi slu ba nyid yin pa'i phyir la/ de yang 'di la med pa'i phyir ro/ /gal te rjes su dpag pa 'dis/ /zhes bya ba la sogs pa snang bral gyis smras pa'i tshad ma dag dogs par byed de/ rjes su dpag pa de gang yin zhe na/ brjod 'dod nyi ma zhes bya ba la sogs pa smos te/ des smras pa/ blo mi mthun pa'i gzhir gyur pa'i dngos po brjod par 'dod pa'i nyi ma dang / zla ba dang / gza' dang / rgyu skar la sogs pa'i shes pa rnams ni/ de'i dus su bcad pa'i zla ba dang / nyi ma dang / gza' dang / rgyu skar dang / skar ma la sogs pa'i yul nyid yin te/ sa dang 'brel pa nyid du mi dmigs pa'i nyi ma dang / zla ba dang / gza' dang / rgyu skar dang / skar ma la sogs pa'i shes pa'i sgra'i brjod par bya ba nyid yin pa'i phyir/ dus dang por byung ba'i lha sbyin gyi zla ba dang nyi ma dang / gza' dang / rgyu skar dang / skar ma la sogs pa'i shes pa bzhin no zhe'o/ /brjod par 'dod pa'i nyi ma la sogs pa yul yin no zhes bya ba ni nyi ma'i gzi brjid la sogs pa'i rdzas yul yin pa'o/ /sa dang 'brel pa nyid du mi dmigs pas zhes bya ba'i khyad par ni ri mo la sogs par gtogs pa'i nyi ma la sogs pa'i yul can gyi shes pa dag gis 'khrul pa la sogs pa'i don du'o/ /gzhan zhes bya ba ni de las gzhan te/ de ma yin pa'i dus shes zhes bya ba'i don to/ /de nyid kyi tshad ma gzhan 'di yang yin te gang dag gzugs nyid la sogs pa spyi la brten pa dang / gang yang de'i rten dang / gang yang de'i yul can gyi mngon sum dang / rjes su dpag pa dang / nye bar 'jal ba dang / sgra dang / dran pa dang / ngo shes pa dang / dpyod pa dang / grub pas bstan pa dang / the tshom dang / phyin ci log dang / ma nges pa dang / rmi lam dang / rmi lam gyi mtha'i shes rab kyi khyad par de dag thams cad ni bdag nyid thob ma thag tu 'jig par 'gyur ba ma yin te/ shes bya nyid dang / gzhal bya nyid dang / brjod bya nyid dang / yod pa dang / med pa gang yang rung ba nyid dang / yod pa dang / med pa las tha dad pa'i shes bya'i yul can gyi shes pas gcad par bya ba ma yin pa nyid dang / gzung bar bya ba ma yin pa'i yul 'dzin pa'i gzung bar bya ba ma yin pa nyid dang / brjod par bya ba ma yin pa'i rjod par byed pas brjod par bya ba ma yin pa nyid dang / rigs mtshungs pa dang mi mtshungs pa'i rdzas ldan pa dang rnam par dbye ba las skyes pa sgra'i 'bras bu'i sgra'i brjod par bya ba yin pa'i phyir/ snga na med pa la sogs pa bzhin no/ /de la gzugs nyid la sogs pa spyi la brten pa ni gzugs la sogs pa'o/ /gzugs la sogs pa de dag gi rten ni de'i rten no/ /de dag kyang gang zhe na/ bum pa la sogs pa'o/ /grub pas bstan pa ni rnal 'byor ba'i shes pa'o/ /lhag ma ni snga ma bzhin du bshad par bya'o/ /yod pa dang med pa yang gang rung ba ni yod pa nyid dam med pa nyid do/ /yod pa dang med pa dag las tha dad pa'i shes bya med pa nyid kyi phyir/ de'i yul can gyi shes pa yang med do/ /de yang med pa nyid kyi phyir des gcad par bya ba ma yin pa nyid grub po/ /de bzhin du gzung bar bya ba ma yin pa'i yul 'dzin pa med pa nyid kyi phyir de yi sa gzung bar bya ba ma yin pa nyid grub po/ /de bzhin du gang la brjod par bya ba yod pa ma yin pa de ni rjod par byed pa ste brjod par bya ba ma yin pa'o/ /des brjod par bya ba ma yin pa nyid sgrub ste/ don med pa nyid kyi phyir ro/ /rigs mtshungs pa'i rdzas ni chu dang sa la sogs pa ste/ byas pa nyid la sogs par mtshungs pa'i phyir ro/ /rigs mi mtshungs pa ni nam mkha' la sogs pa ste/ de dag phan tshun ldan pa dang rnam par dbye ba de dag gis bskyed pa'i sgra dang po gang yin pa de'i brgyud pa'i 'bras bur gyur pa rna ba'i lam du phyin pa gang yin pa des brjod par bya ba yin pa'i phyir ro/ /'di ltar 'di dag gi tha snyad ni 'di yin te/ sgra'i dang po'i skye gnas ni ldan pa dang rnam par dbye ba'o/ /de las pho long rdeb pa'i tshul du sgra gzhan dag skye'o/ /de dag las kyang so sor sgra re re las zhan pa dang / ches zhan pa dang / ches cher zhan pa'i rim pas skye ste/ de la gang zhig rna ba'i sbubs kyi dbus kyi nam mkha'i yul du phyin pa de dmigs kyis/ cig shos ni dmigs pa ma yin no zhe'o/ /des na 'di'i tshad ma'i tshogs ston pa ni/ gzugs nyid la sogs don kun dang / /zhes bya ba la sogs pa'o/ /gzhal bya nyid dang brjod bya nyid smos pa ni nye bar mtshon pa yin te/ de las gzhan pa'i gtan tshigs dag kyang blta bar bya'o/ /mkha' ste nam mkha'i pad+ma ni nam mkha'i pad+ma ste nam mkha'i pad+ma bzhin no zhes bya ba'i tha tshig go/ /gsal byed pas smras pa/ log par rtogs pa'i cig car ba ma yin pa'i dus kyi shes pa rnams ni yul gcig yin te/ de'i shes pa gzhi mthun pa ma gsal ba mtshungs pa'i sgra'i brjod par bya ba yin pa'i phyir da ltar gyi skad cig la skyes bu du ma'i shes pa bzhin no/ /de la gnod par byed pa'i tshad ma'i dbang gis bsal ba ste/ gzhan du bya ba'i ngang tshul 'di la yod pas bsal ba'o/ /bsal ba ma yin pa ni ma bsal ba'o/ /bum pa la sogs pa'i shes pa de dag gi gzhi mthun pa ni de'i shes pa gzhi mthun pa'o/ /'di ni ma bsal ba yang yin la de'i shes pa gzhi mthun pa yang yin pa de la de skad ces bya'o/ /gzhi mthun ba la gnod pa med pa zhes bya ba'i don to/ /khyad par 'di yang sgron ma la sogs pa'i shes pa dag gis 'khrul pa bsal ba'i don du ste/ mtshungs pa'i sgra'i brjod par bya ba nyid ni nag pa'i shes pa zhes bya ba la sogs pa'o/ /de 'di ston pa ni/ gang dag rnam pa rtsod pa'i zhes bya ba la sogs pa la sgrogs pa ste zhes bya ba ni dam bca' bar byed pa'o/ /gcig la bsten pa ste gzhi mthun par gnod pa med na de gnod pa yod pa ma yin pa yang de yin la / gcig la brten pa yang yin zhes tshig rnam par sbyar ro/ /'di la len 'debs par byed pa ni re zhig ces bya ba la sogs pa ste/ gtan tshigs dang po zhes bya ba ni/ de shes nyid du brjod pa'i phyir/ /zhes bya ba 'di la zla ba la sogs pa'i shes pa dang po yang de'i dus su gcod pa'i zla ba'i yul can du mi 'gyur te/ rgyur gyur pa nyid yul yin pa'i phyir ro/ /dus mtshungs pa yang rgyu dang 'bras bu nyid du mi 'thad pa'i phyir te/ ji skad du/ med pa sngar nus med phyir dang / /phyis kyang nye bar mi sbyor phyir/ /rgyu rnams thams cad sngar yod yin/ /de phyir rang blo bcas don min/ /zhes bshad pa bzhin no/ /gang tshe zhes bya ba la sogs pas sa dang 'brel ba nyid du mi dmigs pa zhes khyad par dang bcas pa yin na yang gtan tshigs ma nges pa yin no zhes ston pa yin no/ /gtan tshigs gnyis pa'i tshogs la chos can rigs la sogs pa med pa nyid kyis skad cig ma 'jig pa mi 'dod pa'i phyir/ de la de med pa sgrub na grub pa la sgrub pa yin no zhes ston pa ni rigs la sogs pa zhes bya ba la sogs pa'o/ /sogs pa'i sgras ni de la brten pa'i gzugs dang ldan pa la sogs pa dang / de'i yul can gyi shes pa rnams gzung ste/ ji skad du bshad pas khyad par du byas pa'i khyad par can 'di dag kyang med pa nyid do/ /de'i phyir de dag la de'i skad cig ma 'jig pa nyid med par bsgrub par bya ba'i phyir sgrub par byed pa smras pa gang yin pa de ni log pa yin te/ de la rtsod pa med pa'i phyir ro snyam du dogs pa yin no/ /'di la yang zhib tu dpyad pa ma byas te/ gal te de byed na de'i tshe de la skyon gyi tshogs ches mang ba 'jug ste/ 'di ltar 'di yod pa dang med pa gang yang rung ba sgrub byed du smras pa gang yin pa'i rnam pa de ni bsgrub par bya ba'i chos can dang dpe'i chos can la ma grub ste/ gang yang rung ba'i sgra ni rnam par rtog pa'i yul yin pa'i phyir rnam par rtog pa yang dngos po du ma srid pa yin na 'gyur gyi/ gcig la ni ma yin no/ /bsgrub par bya ba'i chos can gcig la yod pa dang med pa gnyis srid pa ma yin te/ de la ni dngos po'i ngo bo yin pa nyid kyis yod pa kho na srid pa'i phyir ro/ /dpe'i chos can la yang gnyis srid pa ma yin te/ de ni dngos po med pa nyid kyis med pa kho na yin pa'i phyir ro/ /gtan tshigs kyi khyad par yang don med pa yin te/ 'di ltar sgra'i brjod par bya ba yin pa'i phyir zhes bya ba'i de lta bu sbyor ba yang 'dir re zhig mi rigs te/ brjod par bya ba nyid smos pa nyid kyis sgrar grub pa'i phyir ro/ /gang yang rigs mtshungs pa zhes bya ba la sogs pa'i tshig dag gi khyad par de ni shin tu stobs chung ba nyid yin no/ /de ltar gtan tshigs kyi khyad par gzhan yang don med pa nyid do zhes gzung bar bya'o/ /gtan tshigs 'di dag thams cad kyang ma nges pa dag yin te/ 'di dag bsgrub par bya ba las bzlog pa la gnod pa byed pa'i tshad ma ma bstan pa'i phyir ro/ /'di yang phyis ston par 'gyur ro/ /gang yang gang dag rnam par rtsod pa'i yul zhes bya ba la sogs pa smras pa de la/ mtshungs pa'i sgra'i zhes bya ba la sogs pa smos te/ mar me'i shes pa mar me'i shes pa'o snyam pa mar me la sogs pa'i shes pa yul can tha dad pa yin na yang mtshungs pa'i sgra 'jug par mthong ba'i phyir ro/ /de'i phyir des na ste sgron ma la sogs pa'i shes pa'i yul can mtshungs pa'i sgras brjod par bya ba nyid kyis mtshungs pa'i sgras brjod par bya ba'i phyir zhes bya ba'i gtan tshigs 'di 'khrul pa can yin no/ / yang na bzlog pa'i gnod pa ste/ de'i phyir de dag la 'jug pa'i phyir gtan tshigs 'di khyod kyi 'khrul par 'gyur ba ma yin nam ste/ 'on kyang 'gyur ba'i don te / /de dag la ni gzhi mthun phyir nyid ces bya ba gzhan gyi lugs kyi dogs pa bsu ba yin te/ de'i shes pa gzhi mthun pa ma bsal ba zhes bya ba'i gtan tshigs kyi khyad par ni sgron ma la sogs pa'i shes pas 'khrul ba bsal ba'i don kho nar byas pa yin te/ mar me la sogs pa shes pa de dag ni yul gcig pa can gnod pa nyid kyi phyir te/ 'di ltar de'i skad cig nyid la mar me rtse mo mtho ba dang rtse mo dud pa dang / gsal ba dang ches gsal ba dmigs te/ de'i phyir/ rtsa ba'i gtan tshigs 'khrul par ga la 'gyur zhes bya ba ni gzhan gyi bsam pa'o/ /de'i khyad par 'di ma grub po zhes bstan pa'i phyir/ brjod 'dod la yang zhes bya ba la sogs pa smos te/ de la gang bsgrub bya'i chos can nyid kyis brjod par 'dod pa de la yang gnod pa ci'i phyir ma mthong / 'di ltar nag pa la sogs pa la yang byis pa dang gzhon nu dang dar la bab pa la sogs pa'i bye brag gis 'gyur ba'i rnam pa nyid kyi shes pa skye'o/ /dril sogs pa la grang ba dang dro ba'i ngo bos de las mar me la sogs pa bzhin du 'di dag gi rnam pa gzhan gsal rab pa nyid du grub ste/ de lta ma yin na gang kho na grang ba dang 'brel pa de kho na grang ba dang gal te phyis kyi dro ba dang 'brel pa yin par 'gyur na/ de'i tshe grang ba dang dro ba'i gnas skabs gnyi ga dmigs par 'gyur ro/ /de dang 'brel ba'i rang bzhin yod na de dag kyang yod par thal bar 'gyur te/ lcags su bcug pa'i skyes bu bkug na lcags bkug pa bzhin no zhes 'di ni phal cher bshad zin to/ /de'i phyir khyad par dang bcas pa'i gtan tshigs kyang ma grub po/ /rjes su dpag pas gnod pa'i yang / /rtsod pa'i gzhi la gnas pa yi/ /zhes bya ba la sogs pa smos te/ sbyor ba ni gang rim gyis 'byung ba de ni rgyu ma tshang ba med pa rtag tu nye ba ma yin te/ glog dang mar me la sogs pa'i blo bzhin no/ /rtsod pa'i gzhir gyur pa'i blo rnams kyang rim gyis 'byung ba yin no zhes bya ba ni khyab byed 'gal ba dmigs pa'o/ /gtan tshigs ma nges pa nyid kyang ma yin te/ dngos po gcig gi yul can yin na rgyu ma tshang ba med pa ni rim gyis 'byung bar mi 'thad pa'i phyir ro/ /rgyu gzhan la ltos pa yang ma yin te/ rtag pa na des phan gdags par bya ba ma yin pa'i phyir ro/ / phan gdags par bya ba ma yin pa yang ltos par mi rigs te/ ha cang thal bar 'gyur ba'i phyir ro/ /phan 'dogs na yang rtag pa nyid nyams par thal bar 'gyur ro zhes bya ba lan brgyar dpyad zin to/ /sbyor ba thams cad la gtan tshigs dag ma nges pa nyid yin te/ mi mthun pa'i phyogs la gnod par byed pa'i tshad ma med pa'i phyir ro zhes bya ba bstan pa ni/ gtan tshigs de dag ces bya ba la sogs pa ste/ rtogs par zad do/ /de kho na nyid bsdus pa'i dka' 'grel las brtan pa'i dngos po brtag pa ste bcu gsum pa'o// //da ni las dang de 'brel pa'i/ /rnam par gzhag la sogs pa'i rten/ /zhes bya ba 'di bsgrub pa'i phyir/ rtsod pa nye bar bkod pa sngon du 'gro ba bshad pa/ dngos po thams cad ces bya ba la sogs pa'o/ /skad cig ma'i mi rtag pa smos pa ni dus gzhan du gnas pa'i mi rtag pa rnam par gcad pa'i don du'o/ /skad cig mar yod pa'i mi rtag pa nyid ni skad cig ma'i mi rtag pa'o/ /des khyab pa ni yang dag par bsnan pa'o/ /gal te khyed cag gis dngos po'i tshogs thams cad mi rtag par dam 'cha' bar byed pa de'i tshe las dang 'bras bu'i 'brel pa la sogs pa gang dag 'jig rten dang bstan bcos dag la grags pa de dag ji ltar bsgrub par 'gyur/ sogs pa smos pas rgyu dang 'bras bu'i dngos po rtogs pa'i tshad ma dang / nyams su myong ba ni ngo shes pa dang / gzhan du mthong ba'i don gzhan la mngon par 'dod pa dang bcings pa dang / thar pa dang / dran pa dang / the tshom sngon du 'gro ba can gyi gtan la phab pa dang / rang gis bcol ba len pa dang / mthong ba'i don la tshor ngas dang bral ba zhes bya ba'i rnam pa de lta bu blo ngan pas kun du brtags pa'i kla na ka'i phung po dag gzung ngo / /'jig rten dang bstan bcos la grags pa'i don dang 'gal ba'i dam 'cha' bar byed pa na don grub pa grub pa ma yin pas de'i phyir dam bca' ba'i nyes pa la khas blangs pa grags pas gnod pa yin no snyam du bsams pa yin no/ /'di ltar dge ba dang mi dge ba la sogs pa'i las gang kho na byas pa de kho nas de'i 'bras bu longs spyod do zhes 'jig rten na grags te/ lha sbyin gyis byas pa'i dge ba dang mi dge ba'i las de'i 'bras bu 'dod pa dang mi 'dod pa mchod sbyin gyis longs spyod do zhes bya bar grags pa ni med la/ bstan bcos la yang ma yin te/ ji skad du/ 'di nyid kyis byas pa'i las gzhan gang zhig gis nyams su myong bar 'gyur zhes bshad pa lta bu'o/ /de 'di yang skad cig ma'i phyogs la 'gal te/ las dang 'bras bu 'dzin pa po'i byed pa gcig med pas byas pa chud zos pa dang ma byas pa dang phrad pa'i skyon du thal bar 'gyur ba'i phyir ro/ /ji ltar zhe na/ dge sogs skabs kyi zhes bya ba la sogs pa smos te/ rjes su 'jug pa nyid ma yin/ /zhes bya ba ni/ de ni skyes ma thag kho nar 'gag pa'i phyir ro/ /byed po gcig gis ma bzung phyir/ /zhes bya ba ni byed pa po gcig gis las dang 'bras bu de dag yongs su ma bzung ba'i phyir ro zhes bya ba'i don to/ /byed pa po 'bras bu dang 'brel pa med pa'i phyir/ byas pa chud zos pa dang byed pa po ma yin pa 'bras bu dang ldan pa'i phyir ma byas pa dang phrad par 'gyur ro/ /shin tu 'gal bar thal bar 'gyur/ / zhes bya ba ni de lta bu ni 'jig rten dang bstan bcos dag tu ma mthong ba'i phyir ro snyam du bsams pa'o/ /de ltar re zhig 'jug pa khas blangs nas byas pa chud zos pa dang ma byas pa dang phrad par thal bar 'gyur ba brjod nas/ da ni gzhon nu ma len gyi lugs bkod pa'i sgo nas 'jug pa nyid mi srid do zhes bya ba ni/ bdag med smra ba'i phyogs la yang / /zhes bya ba la sogs pa smos te/ dngos po thams cad skad cig ma nyid du khas blangs pa na bdag med pa nyid khas blangs par 'gyur te/ rgyu'i gzhan gyi dbang nyid kyis thams cad rang dbang ma yin pa'i phyir ro/ / de lta yin na rtog pa dang ldan par bya ba la 'jug pa'i dang po nyid du ste/ sngar rtogs te nges par 'dzin par byed do/ /de ci zhig ce na kho bo zhig pas zhes bya ba la sogs pa smos te/ kho bo zhig pas phyis bdag gi 'bras bu med de/ 'bras bu skye ba'i dus su bdag med pa'i phyir ro/ /ci ste yang 'bras bu yod na de'i tshe kho bo las skad cig gzhan la yod do snyam du sems na/ rtogs pa dang ldan pa 'jug pa nyid du yang mi 'gyur na/ 'jug pa sngon du 'gro ba can gyi las kyis bskyed pa'i 'bras bu 'byung ba lta ci smos te/ de ni mi srid pa nyid kyi ring ba nyid kyis gnas pa'i phyir ro/ /de ltar las dang 'bras bu'i 'brel pa mi 'thad do zhes bstan nas/ da ni gzhon nu ma len gyi lugs kyis rgyu dang 'bras bu'i dngos po mi 'thad pa nyid du bstan pa'i phyir/ dngos rnams bya ba byed nus pa/ /zhes bya ba la sogs pa smos te/ de srid kyi zhes bya ba ni skyes nas dus ji srid du 'bras bu 'grub par byed pa'i dus de srid du mi gnas te/ skad cig ma yin pa'i phyir ro snyam du bsams pa yin no/ /ma 'ongs pa min zhes bya ba la sogs pa go rims bzhin du bsgrub pa'i phyir ro / /bdag nyid ma thob pa'i zhes bya ba la sogs pa smos te/ ma 'ongs pa'i zhes bya ba ni bdag gi de nyid ma thob pa gang yin pa la brjod la/ gang yang bdag gi de nyid ma thob pa de yang med pa yin la/ med pa gang yin pa de yang nus pa ma lus pas stong pa yin no/ /gang nus pa ma lus pa dang bral ba de ji ltar gzhan gyi yan lag tu rtogs par byed de/ gzhan la rgyu yi dngos por 'gyur/ /zhes bya ba'i don to/ /nus pa kho na rgyu'i dngos pos nges pa'i phyir ro/ /de bzhin du zhig pa yang nus pa thams cad kyis stong pa'i phyir/ gzhan gyi yan lag tu brtag min/ /zhes 'brel te/ gang 'bras bu bya ba dang 'bras bu byed par nus par 'gyur ba da ltar yang gnas pa ma yin no/ /gzhan yang gal te skad cig snga ma rjes su 'gro ba med par 'jig par 'gyur ro zhes rtog par byed na de'i tshe rgyu mtshan med pa'i phyir phyis kyi skad cig skye bar mi 'gyur ro/ /'di snyam du dper na srang mda'i mthon dman dang mtshungs pa yin pa de bzhin du rgyu dang 'bras bu dag gi 'jig pa dang skye ba dag kyang 'dod de/ de'i phyir da ltar byung ba ma zhig pa nyid las 'bras bu skye bar 'dod pa'i phyir/ de rgyu mtshan med par skye bar mi 'gyur ro snyam du sems na/ skye dang 'jig pa dus mtshungs na/ /zhes bya ba la sogs pa smos te/ skye ba dang 'jig pa dag dus mtshungs na yang ste 'dra bar rtog na yang 'jig pa dang skye ba dag gam/ de dang ldan pa rgyu dang 'bras bu nyid du yod pa ste srid pa ma yin te/ de dag ni phan tshun ltos pa med pa'i phyir ro/ /ji ltar ltos pa med ce na/ /de yi bya ba ma 'dzin phyir/ /zhes bya ba smos te/ de'i ste 'jig pa'am/ de dang ldan pa'i bya bas 'bras bu mi 'dzin pa'i phyir te ma bzung ba'i phyir ro zhes bya ba'i don to/ /'dzin pa ni ngo bo med pa'i phyir te bya ba med do/ / rgyur mngon par 'dod pa'i dngos po ni 'bras bu yod pa'i dus su nye ba ma yin pa'i phyir bya ba med do zhes bya bar bsams pa'o/ /'di snyam du bya ba med na yang de ma thag tsam gyis rgyu dang 'bras bu'i dngos por 'gyur ro snyam du sems na/ bum pa'i gzugs ni zhes bya ba la sogs pa smos te/ gal te gang zhig gang gi de ma thag tu skye ba de de'i 'bras bu zhes bya ba yin no/ /de'i tshe bum pa la sogs par rtogs pa'i gzugs kyi skad cig gi de ma thag tu rigs 'dra ba'i gzugs kyi skad cig bzhin du tshogs pa de'i khongs su gtogs pa nyid kyi dri la sogs pa skye ba'i phyir de yang de'i 'bras bur 'gyur ro/ /de ma thag yin na yang de'i 'bras bur mi 'dod de/ rgyu tha dad pa'i phyir 'bras bu rnams ji lta ba bzhin du 'byung ba las gyur pa rnams ni phan tshun rgyu dang 'bras bu'i dngos po yang yod pa ma yin no zhes gzhan dag sems so/ /gzugs gzhan la yang de bzhin no/ /zhes bya ba ni rigs 'dra ba'i gzugs kyi skad cig gzhan ni gzugs kyi de ma thag pa tsam gyis de'i 'bras bu nyid du gzung bar bya ba ma yin te/ ha cang thal bar 'gyur du 'ong bas so snyam du bsams pa yin no/ /de'i phyir de ltar de ma thag pa tsam rgyu dang 'bras bu'i dngos po'i rnam par gzhag pa'i rgyu mtshan du rigs pa ma yin no zhes bstan nas/ rang gi phyogs nye bar bsdus pa'i sgo nas ston pa ni de'i phyir zhes bya ba la sogs pa'o/ /mjug thogs 'byung ba tsam ma yin zhes bya ba ni/ rgyu dang 'bras bur rnam par gzhag pa'i rgyu mtshan zhes bya ba lhag ma'o/ /ji skad du bshad pa'i don nyid mdor bsdus te bstan pa'i phyir/ 'di ni mdor bsdus pa yin zhes bya ba la sogs pa smos te/ 'di la rtog pa gnyis te/ rgyu zhig pa las 'bras bu 'byung ngam/ ma zhig pa las 'byung / zhig pa dang ma zhig pa las ma gtogs pa'i dngos po med pa'i phyir ro/ /de la re zhig phyogs dang po ni ma yin te/ zhig pa ni med pa nyid kyis de las skye bar khas len pa na/ 'bras bu rgyu med pa nyid du thal bar 'gyur ba'i phyir ro / /de lta yin dang rtag tu yod pa la sogs par thal bar 'gyur ro/ /gnyis pa yang yod pa ma yin te/ skad cig ma du mar gnas pa nyid kyis dngos po rnams skad cig ma ma yin par thal bar 'gyur ba'i phyir ro/ /ji ltar nyams par 'gyur ba min/ /zhes bya ba ni nyams pa kho na'o zhes bya ba'i don to/ /'di ltar re zhig dang por dngos po skye'o/ de nas bya ba la 'jug go/ /de las 'bras bu bskyed nas phyis 'jig par 'gyur ro zhes bya ba de lta bu dngos po gcig la skad cig ma du ma yod pa'i phyir skad cig ma nyams par 'gyur ro/ /de ltar rgyu dang 'bras bu'i dngos po mi 'thad par bstan nas de'i rtog pa po'i tshad ma mi 'thad par bstan pa'i phyir/ skad cig gnas pa'i bum pa sogs/ /zhes bya ba la sogs pa smos te/ rgyu dang 'bras bu'i dngos po sgrub par byed pa ni mngon sum dang mi dmigs pa yin la/ dngos po rnams skad cig ma nyid yin na rang gi shes pa'i dus su yang mi gnas pa'i phyir dngos po de mngon sum yin pa kho na ste rgyu dang 'bras bu'i dngos po dus mtshungs pa mi 'thad pa'i phyir ro/ /de lta yin dang mngon sum dang mi dmigs pa dag med pa kho na'o/ /gzhan dang ma 'dres pa'i dngos po la dmigs pa'i bdag nyid kyi ngo bo nyid yin pa nyid kyis ngo bo yin pa yang mngon sum gyi bye brag gis bdag nyid yin pa'i phyir ro/ /de'i phyir dngos po dmigs pa med na de yang mi 'thad pa'i phyir/ ji ltar mngon sum dang mi dmigs pa rgyu dang 'bras bu'i dngos po'i sgrub byed du 'gyur/ dngos po dmigs pa yin du chug mod de lta na yang skad cig snga ma dang phyi ma dag mtshams sbyor ba gcig pa ni 'ga' yang med pa'i phyir 'brel pa 'grub par mi 'gyur ro zhes bstan pa'i phyir/ rnam par 'jig pa'i byed pa sus/ /zhes bya ba la sogs pa smos te/ shes pa ni dmigs pa'o/ /'di ni rim pa dang ldan pa yang yin la shes pa yang yin pas rim ldan shes pa'o/ / de dag sus mtshams sbyor bar byed de/ sbyor bar byed pa de sus kyang ma yin no/ /gal te la la me 'di dmigs pas du ba la sogs pa 'di dmigs la/ 'di ma dmigs na mi dmigs so zhes bya ba de lta bu'i rim pa dang ldan pa'i shes pa la byed po gcig gis mtshams sbyor bar 'gyur na/ de'i tshe rgyu dang 'bras bu'i dngos po grub na khyed kyi lugs kyis mtshams sbyor ba po de yang yod pa ma yin pa'i phyir rgyu dang 'bras bu'i dngos po 'grub par 'gyur ba ma yin no zhes bya ba'i don to/ /da ni ngo shes pa mi 'thad par bstan pa'i phyir/ skad cig gis 'jig ces bya ba la sogs pa smos te/ ngas sngon mthong ba'i don gang yin pa de nyid da lta mthong ba 'di yin no snyam pa de lta bu'i snga ma dang phyi mar mthong ba dag yul gcig pa nyid dang / shes pa po gcig pa nyid du go ba de ni ngo shes pa yin no/ /de yang dngos po thams cad skad cig mar 'jig pa nyid yin na mi 'thad de/ shes pa po dang shes par bya ba gcig po 'ga' yang med pa'i phyir ro/ /lha sbyin gyis mthong ba'i don khyab 'jug bshes gnyen gyis ngo shes pa ni med do/ /skyes bu gzhan gyis zhes smos pa ni nye bar mtshon pa'i don du ste/ don gzhan ngo shes par byed pa yang ma yin no zhes bya bar yang blta bar bya'o/ /'on te skra dang sen mo la sogs bregs pa yang skyes pa rnams bzhin du tha dad pa na yang 'dra ba'i phyir ngo shes par 'gyur ro zhes dogs pa bsu nas/ shes pa gcig yin pa'i phyir zhes bya ba la sogs pa smos te/ gal te shes pa po gcig tu 'gyur na de'i tshe mtshams sbyor ba po'i dbang gis shes bya tha dad na yang 'dra bas byas pa'i ngo shes par 'gyur ro/ /tha dad na ni ste shes pa po dang shes bya gnyis tha dad pa ni tha dad pa'o/ /de lta yin na ngo shes pa'i rgyu mtshan med pa nyid yin no/ /gzhan yang mtshams sbyor ba po'i skyes bu gcig po 'ga' yang med na de'i tshe/ gang 'di ma du lung ga'i 'bras bu la sogs pa'i gzugs mthong ba na gzugs de med na mi 'byung ba'i dri dang ro la sogs pa la dran pa sngon du song ba'i 'dod pa dang longs spyad par bya ba'i phyir 'jug pa der ji ltar 'gyur te/ gzhan gyis mthong ba la gzhan gyis mngon par 'dod pa la sogs par 'gyur ba ni ma yin no/ /bcings pa dang thar par yang mi 'gyur ro zhes bstan pa'i phyir/ srid pa'i btson rar zhes bya ba la sogs pa smos te/ 'dod chags la sogs pas bcings pa'i skad cig kyang gzhan yin la grol ba yang gzhan yin no zhes bya ba 'di rtogs pa ma yin te srid pa ma yin no zhes bya ba'i tha tshig go/ /srid pa'i btson ra zhes bya ba la/ srid pa ni 'khor ba'o/ /de nyid btson ra ste/ 'ching ba ni btson dong ngo / /thar pa don du gnyer ba'i 'bad pa yang don med pa yin te/ thar pa med pa'i phyir ro zhes bstan pa'i phyir/ gang phyir bcings pa zhes bya ba la sogs pa smos so/ /'on te ma bcings pa kho na thar bar 'gyur mod/ de lta bas na 'di la 'gal ba ci zhig yod ce na/ lcags la sogs pa zhes bya ba la sogs pa smos te/ bcings pa gang yin pa de nyid grol lo zhes 'jig rten na grags pa dang / mthong ba yin te/ ma bcings pa grol lo zhes dam bca' ba ni 'jig rten gyi grags pa dang mngon sum gyis gnod pa yin pa'i phyir/ dam bca' ba mngon sum dang grags pa dang 'gal ba yin no snyam du bsams pa yin no/ /rjes su dpag pas gnod pa yang bshad pa ni/ bcings pa dang grol ba de dag ni zhes bya ba la sogs pa la/ sbyor ba ni gang bcings pa dang thar pa yin pa de dag ni gzhi gcig yin te/ 'jig rten pa'i bcings pa dang thar pa dag bzhin no/ /rtsod pa'i gzhir gyur pa'i bag la nyal dang de dang bral ba'i mtshan nyid de dag kyang bcings pa dang thar pa yin no zhes bya ba ni rang bzhin gyi gtan tshigs so/ /de dag ni zhes bya ba ni bcings pa dang thar pa dag go/ /de ltar gnas phyir ro zhes bya ba ni bcings pa dang thar pa'i bdag nyid du gnas pa'i phyir te/ bcings pa dang thar pa'i ngo bo yin pa'i phyir ro zhes bya ba'i don to/ /de lta bas na gzhi gcig pa'i bdag nyid du grub pa'i phyir ro/ /thams cad de las dang 'bras bu'i 'brel pa la sogs pa shin tu mdzes par gnas te/ shin tu rigs pa dang ldan par gnas zhes bya ba'i don te/ ji skad bshad pa'i nyes pa med pa'i phyir ro/ /rnam pa 'di dag nyid kyis ni/ /zhes bya ba ni/ byed pa po gcig med pa'i phyir sngar bshad pa'i dran pa dang / nges pa dang / rang gis bcol ba len pa la sogs pa mi srid par rtogs par bya'o/ /de la yang gzhi tha dad pa nyid yin na mthong ba la sogs pa dang 'gal bar thal bar 'gyur ba'i phyir ro/ /nag pas nyams su myong ba dang / the tshom za ba dang / bcol ba dang / 'dod pa dag la byams ldan gyis dran pa dang / nges pa dang / len pa dang / tshor ngas dang bral ba la sogs pa srid pa ni ma yin no/ /'di la brjod pa zhes bya ba la sogs pas lan 'debs par byed de/ bdag med pa yin na yang dngos po rnams la las dang 'bras bu'i 'brel pa'i rnam par gzhag pa 'di ni rgyu dang 'bras bu nyid du rab tu dbye ba yin la/ rgyu dang 'bras bu'i dngos po yin pa na yang thams cad dang 'gal ba med pa yin pa'i phyir cung zad kyang nyams pa med do/ /'di snyam du bdag med na yang rgyu dang 'bras bu'i nges pa de nyid mi 'thad de snyam du dogs pa la/ myu gu sogs la sa bon sogs/ /zhes bya ba smos te/ ji ltar byin gyis rlob pa po'i bdag med na yang sa bon la sogs pa myu gu la sogs pa nus pa nges pa de bzhin du nang gi dngos po la yang 'gyur ro/ /sa bon la sogs pa ni lus bzhin du longs spyod pa'i rten nyid kyi bdag gis byin gyis brlabs pa ni ma yin te/ de lta ma yin na gson po'i lus 'di ni bdag med pa ma yin te/ srog la sogs pa dang mi ldan par thal bar 'gyur ro zhes bya ba 'di mi 'thad de/ bum pa la sogs pa la bdag ldog pa na srog la sogs pa ldog par mthong ngo zhes grags pa'i ldog pa can gyi gtan tshigs grub par mi 'gyur ro/ /gal te bum pa la sogs pa yang bdag dang bcas par gyur na/ de'i tshe ji ltar gtan tshigs 'di ldog pa can du 'gyur/ rjes 'gro'i bdag dang bral ba na'ang / /zhes bya ba ni rjes su 'gro ba'i rang bzhin 'ga' zhig dang bral na yang zhes bya ba'i don to/ /yang na gnas pa 'di gang yin zhe na/ dngos sam yang na zhes bya ba la sogs pa smos te/ ji ltar phyi rol gyi rgyu dang 'bras bu'i rnam par gzhag pa nges pa de bzhin du nang gi 'du byed kyi phung po la yang rgyu'i nus pa nges pas dge ba dang mi dge ba'i las 'ga' zhig las skad cig brgyud pas 'dod pa dang mi 'dod pa'i nges pa'i 'bras bu gsal por 'gyur ro/ /gzugs la sogs pa nyams su myong ba las dran pa dang the tshom las nges pa dang bcol ba las len pa dang / 'dod pa las don mthong ba dang / de las tshor ngas dang bral ba zhes bya ba thams cad 'gal ba med do/ /sangs rgyas pa dag la ni dngos po gcig rjes su 'gro ba nyid kyis dran pa la sogs pa gang du yang ma grags so/ /'o na ci zhe na/ rkyen nyid 'di pa tsam ste/ ji skad du las yod do/ /'bras bu yod do/ /chos su brdar btags pa las ma gtogs pa phung po 'di dor nas phung po gzhan len pa gang yin pa'i byed pa po ni ma dmigs so/ / de la chos su brdar brtags pa ni 'di yin te/ 'di yod na 'di 'byung / 'di skyes pas 'di skye zhes gsungs so/ /de'i phyir las 'bras la sogs pa'i/ /zhes bya ba'i sogs pa'i sgras dran pa la sogs pa bzung ngo / /'brel pa ni bskyed par bya ba dang skyed par byed pa nyid do/ /'o na gal te de lta na ji ltar 'jig rten dang bstan bcos las gang zag de dang de'i dbang du byas nas 'di nyid kyis byas pa'i las su zhig gis nyams su myong bar 'gyur zhes brjod ce na/ byed pa po la sogs zhes bya ba la sogs pa smos te/ mi shes pa'i rab rib kyi tshogs shin tu chen pos ye shes kyi snang ba nyams par byas pa'i 'jig rten pa bdag la de nyid dang / gzhan nyid yod pa la sogs pa'i rnam par dpyad pa spangs nas khyad par can gyi rgyu dang 'bras bu'i dngos po'i ngo bo nges pa'i rgyun gcig nyid du nges nas de nyid 'di yin pa dang bdag gis byed do zhes tha snyad byed pa dang / thar pa'i don du yang 'jug pa de'i mngon pa'i nga rgyal gyi ngor bcom ldan 'das de bzhin gshegs pas gdul bya'i skye bo chad pa'i lta bar ltung ba las bsrung ba'i don du rgyu gcig tu ston pa na byed pa la sogs pa rnam par gzhag pa mdzad do/ /rnam pa de lta bu'i rnam par bzhag pa nyid las dngos po grub po zhe na/ de nyid gnas la yan lag min/ /zhes smos te/ byis pa'i skye bo de kho na nyid brtag pa la rgyab kyis phyogs pas kun rdzob tu ltung ba rnams kyi mngon par zhen pa'i dbang gis de kho na nyid rnam par gzhag par mi nus te/ de'i mngon par zhen pa la ni bdag med pa'i skad cig 'jig pa sgrub par byed pa'i tshad mas gnod pa'i phyir ro/ /sa bon la sogs pa la rjes su 'gro ba'i bdag nyid dang / bral bar ma grub pa'i phyir/ dpe ma grub par grags par sems pa na gzhan gyi klan ka dogs par byed pa ni/ rjes su 'gro ba med pa ni zhes bya ba la sogs pa smos te/ rjes su 'gro ba ni rjes su 'jug pa'o/ / rang bzhin 'ga' zhig ces bya ba ni lhag ma'o/ /'di snyam du sa bon la sogs pa la yang rjes su 'gro ba yod pa kho na ste/ byis pas de la yang sa bon la sogs pa'i cha shas gang yin pa de dag kyang bkod pa snga ma yongs su btang nas bkod pa gzhan 'thob ste/ bkod pa gzhan thob pa na yang sa'i khams chu'i khams kyis bzung nas nang mes smin pa na ro'i rdzas sgrub par byed la/ ro dang bcas pa'i snga ma'i cha shas dag dang lhan cig myu gu la sogs pa'i dngos po sgrub par byed do zhes smras pa/ des na ji ltar de la cha shas phra mo yang med do zhes rjod par byed snyam na/ zhing sogs khyad par med pa na/ /zhes bya ba la sogs pa smos te/ 'di skad du bstan pa yin te/ gal te sa la sogs pa phyis dbyibs 'jug pa na snga ma'i rang gi rang bzhin ma btang ba kho nar 'jug na/ de'i tshe de dag gi sngar gyi bkod pa btang ba dang / bkod pa gzhan thob pa po mi 'thad de / de'i bdag nyid yin pa'i phyir snga ma bzhin no/ /de lta yin dang sa bon dang myu gu la sogs pa phan tshun tha dad par mi 'gyur te/ rang bzhin gcig yin pa'i phyir ro/ /ci ste myu gu la sogs pa tha dad du khas len par byed na de'i tshe nges par zhing la sogs pa snga ma'i rang bzhin yongs su spangs pa na bkod pa snga ma btang nas bkod pa gzhan thob par yang khas blang bar bya dgos so/ /de lta ma yin na tha dad pa nyid du mi 'gyur ro zhes bstan to/ /de lta bas na rang bzhin gzhan dang gzhan skye ba'i phyir rjes su 'gro ba nyid gal yod/ gang gi phyir de ltar rgyu dang 'bras bu'i dngos po bsgrubs pa na las dang 'bras bu'i 'brel pa la sogs pa thams cad 'thad pa yin la sun 'byin pa yang mi 'thad pa yin no/ /de'i phyir las dang 'bras bu la sogs pa'i yod pa bsgrub par bya ba'i phyir/ rgyu dang 'bras bu nyid bsgrub pa la gzhan gyis 'bad pa bya ste/ dam pa'i gzhung lugs kyi rjes su 'brang ba ni mchog yin pa ste sangs rgyas pa zhes bya ba'i tha tshig go/ /de dag gi med pa bsgrub par bya ba'i phyir rgyu dang 'bras bu de nyid kyi med pa sgrub pa la gzhan gyis te mu stegs pas 'bad pa bya'o zhes bya ba'i don to/ /rgyu dang 'bras bu sgrub pa la zhes bya ba 'di lan gnyis su bzlas la gcig la dgag pa'i tshig dbye bar bya'o/ / 'di la gzhan gyis byas pa'i zhig pa dang ma zhig pa gang dag yin pa de bsal ba'i sgo nas rnam par gzhag pa thams cad kyi rtsa ba rgyu dang 'bras bu'i dngos po bsgrub par bya ba'i phyir/ /de la brjod bya zhes bya ba la sogs pa smos te/ rgyu ma zhig pa kho na las 'bras bu 'byung ngo zhes bya ba ni kho bo cag gi phyogs yin no/ /cig car bar thal ba yang ma yin te/ 'di ltar skad cig ma dang por byung ba'i rgyu'i bdag nyid thob pa ma zhig pa kho na la brten nas skad cig gnyis pa la 'bras bu skye ste/ de yang de ltar skye ba na ma zhig pa nyid las skye ste skad cig ma dang po la de ma zhig pa'i phyir ro/ /'bras bu yod pa'i dus su rgyu rjes su 'jug pa yang ma yin te/ skad cig ma nyid kyis mi gnas pa'i phyir ro / /rjes su 'jug pa yin na yang de ni de'i dus na rgyu nyid ma yin te/ de'i 'bras bu grub pa la cung zad kyang mi byed pa'i phyir ro/ /cung zad kyang mi byed pa de nyid ston pa ni/ skyes zin pa yang zhes bya ba la sogs pa'o/ /gzhan du gnas ma yin zhes bya ba ni/ gzhan du gnas par te nges par mi 'gyur te/ thug pa med par 'gyur ro zhes bya ba'i tha tshig go/ /gal te skyes pa yang bskyed par bya ba yin na de'i tshe khyad par med pa'i phyir de ni slar yang skyed par byed par thal bar 'gyur ro/ /de lta bas na skye ba rnams thug pa med par 'gyur la/ rgyu rnams kyang bya ba dang mi 'bral ba yin no/ /rgyu rnams kyang bskyed par bya ba nyid du thal bar 'gyur te/ khyad par med pa'i phyir ro/ /de lta yin dang 'di ni rgyu'o/ /'di ni 'bras bu'o zhes bya ba'i rnam par gzhag par mi 'gyur ro/ /de'i phyir zhes bya ba la sogs pas mjug bsdus nas gnas pa'i phyogs sun phyin par ston pa yin no/ /khas ma blangs pa nyid kyi phyir zhig pa'i rnam par rtog pa yang mi rigs te/ 'di ltar gcig ni 'das pas 'byin par byed ces ji ltar bye brag tu smra bas khas blangs pa bzhin du gal te skad cig ma gsum pa la sogs pa la 'bras bu 'byung ngo zhes khas blangs pa yin na de'i tshe rgyu zhig pa las 'bras bu skye bar khas blangs pa byas par 'gyur ro/ /phyogs 'di la yang kho bo cag gi ma yin te/ rigs pa dang mi ldan pa'i phyir ro/ /cig car bar thal bar 'gyur ba yang gang gi tshe 'gyur zhe na/ ji ltar bye brag tu smra ba de dag nyid kyis lhan cig 'byung ba'i rgyu 'dod pa bzhin du gal te skad cig ma dang po nyid la 'bras bu 'dod pa na'o/ /de 'di yang mi rigs te/ ci'i phyir zhe na/ med pa sngar nus zhes bya ba la sogs pa smos te/ lhan cig 'byung ba 'bras bu skyed pa na rgyu ma skyes pas sam/ skyes pas skyes pa yin grang / re zhig ma skyes pas ni ma yin te/ de ni 'bras bu skye ba'i sngar med pa'i phyir la/ med na yang nus pa mtha' dag gis stong pa'i phyir ro/ /'o na gang gi tshe skyes pa de'i tshe nus pa'i phyir/ skyed par 'gyur ro zhe na/ nus pa'i tshe na 'bras byung phyir/ /zhes bya ba smos te/ gal te de skyes pa'i gnas skabs na nus pa yin na de'i tshe de'i rang gi ngo bo bzhin du 'bras bu yang skyes pa'i phyir 'di nus pa gang du nye bar mkho bar 'gyur/ de lta bas na rgyu dang 'bras bu cig car bar khas len pa ni/ rjes su dpag pa'i tshad ma dang 'gal lo/ /'on te rgyu dang 'bras bu'i ngo bo ni las dang byed pa po ma yin nam/ de yang dus tha dad par 'gal te/ bum pa dang rdza mkhan dag cig car ma yin pa na las dang byed pa po'i dngos po ma mthong ngo zhe na/ gang phyir cig car bar 'gyur zhes bya ba la sogs pa smos te/ gal te sos 'dzin pa'i tshul gyis rgyus 'bras bu bskyed pa la bya ba yin pa'am/ 'bras bu yang chung ma la 'khyud pa bzhin du rang gi rgyu las 'byar bas rang skyed pa'i bya ba la sgrub par byed pa yin na/ de'i tshe nges par lhan cig 'byung bar 'gyur ro/ /ji srid du sna tshogs pa de ni bya ba byed pa ste/ don dam par chos su brdar btags pa las ma gtogs par byed pa po'am las 'ba' zhig yod pa ni ma yin zhes bya ba ni spyi'i don to/ /rang bzhin ni zhes bya ba ni rgyu'o/ /gal te rgyu'am 'bras bu bya ba dang bral ba de lta yin na/ de'i phyir ji ltar smra ba po dag me ni du ba skyed par byed la du ba ni me la brten nas skye'o zhes shes par 'gyur ro zhe na/ rang rgyus bslang ba'i nges pa'i phyir zhes bya ba la sogs pa smos te/ rang gi rgyu dang rkyen gyis kun nas bslang ba'i rgyu'i nus pa so sor nges pa'i rgyu'i phyir/ 'bras bu gang zhig skad cig ma dang po la byung ba'i rgyu gang las byung ba'i khyad par ci 'dra ba zhe na/ skad cig ma gnyis pa 'byung ba gang yin pa ste/ skad cig ma gnyis pa la 'byung ba ste yod pa ga la yod ces tshig rnam par sbyar ro/ /rgyu de 'bras bu de'i skyed par byed pa yin no zhes bya ba'o/ skyed byed yin zhes bya ba ni nye bar mtshon pa ste/ de ni de la brten nas skye'o zhes bya ba yang shes par bya'o/ /yang de ltar smra ba de dag gang dag yin zhe na/ 'dod pa tsam las zhes bya ba la sogs pa smos te/ phyi rol gyi don la ltos pa med par brjod par 'dod pa las byung ba'i brda'i rjes su byed pa'i tha snyad du 'dogs pa po dag de ltar smra'o zhes bya ba'i don to/ /gal te dngos po skyes zin pa bya ba dang mi ldan pa ma yin nam/ de ji ltar rgyur 'gyur zhe na/ skye ba las ni dus gzhan pa'i/ /zhes bya ba la sogs pa smos te/ rgyu yod pa'i de ma thag nyid du 'bras bu 'grub pa'i phyir/ rgyu skye ba las dus phyis byung ba'i bya ba ni 'bras bu la rgyu cung zad kyang mi byed pa nyid yin no/ /'di ltar rgyu'i bya ba zhes gang la bya zhe na/ gang gi mjug thogs nyid du 'bras bu skyed pa sgrub par byed pa'o/ /rgyu yod pa'i mjug thogs nyid du yang 'bras bu 'byung ba yin pa'i phyir yod pa nyid bya ba'i sgras brjod par bya ba yin la rag mod skye ba las ma gtogs pa'i bya ba brtags pas ci zhig bya/ gal te dngos po rnams kyi bya ba med pa de lta yin na/ 'bras bu ni rgyu la ltos la rgyu yang 'bras bu la byed do zhes bya ba 'di ji ltar rjod par byed ce na/ de ma thag par nges pa gang / /zhes bya ba la sogs pa smos te/ 'bras bu'i rgyu la ltos pa ni 'di nyid yin te/ mjug thogs su 'byung ba nyid gang yin pa'o/ /rgyu'i yang 'bras bu la bya ba ni 'di nyid yin te 'bras bu skye ba'i dus su rnam pa thams cad du nye ba nyid gang yin pa'o/ /gzhan yang bya ba'am/ bya ba dang ldan pa'i dngos po 'bras bu la rgyu'i dngos po khyed cag gis de yod pa na yod pa kho na'i phyir 'bras bur gzung bar bya'o/ /rjes su 'gro ba dang ldog pa dag las gzhan rgyu dang 'bras bu'i dngos po rtogs pa'i thabs yod pa ma yin te/ de'i phyir de ltar yin na dngos po tsam yang ci'i phyir rgyu'i dngos por 'dzin par mi byed/ 'bras bu ni dngos po tsam du gtogs pa'i rjes su 'gro ba dang ldog pa'i rjes su byed pa nyid las ma grags pa ni ma yin no/ /de'i phyir gang du gtogs pa'i rjes su 'gro ba dang ldog pa'i rjes su byed pa nyid 'bras bu yin par grub pa nyid de dngos po tsam mchog ste/ yod pa la rag mod ces ston pa ni/ de yod pa na zhes bya ba la sogs pa'o/ /kun du brtags pa yin zhes bya ba ni/ gzhan nam gnyi ga'am gnyi ga ma yin pa'i ngo bo'i bya ba gang yin pa de ni khyed cag gis kun du brtags pa yin no zhes bya ba'i don to/ /de ldan zhes bya ba ni bya ba dang ldan pa ste/ de yod pa na 'byung ba tsam las rgyu nyid do zhes skabs dang sbyar ro/ /de nyid ces bya ba ni mi mthun pa'i bya ba dang bral ba'i dngos po tsam rgyu yin la rag mod ces bya ba'i don to/ /gang gis mchog tu rjod par byed pa de la khyad par ci yod ce na/ sa bon zhes bya ba la sogs pa smos te/ yod pa ste dngos po tsam nas bon la sogs pa bya ba gzhan dang ldan pas stong pa na zhes bya ba'i don to/ /'dis ni 'bras bu rnams dngos po tsam du rtogs pa'i rjes su 'gro ba dang ldog pa'i rjes su byed pa nyid du grub kyi/ bya bar rtogs pa'i rjes su 'gro ba la sogs pa'i rjes su byed pa nyid ni ma yin no zhes bstan pa yin no/ /'di snyam du 'bras bu bya bar rtogs pa'i rjes su 'gro ba la sogs pa'i rjes su byed par ma grub mod kyi 'on kyang de'i rgyu'i dngos por 'gyur ro snyam du sems na/ nus pa ma mthong zhes bya ba la sogs pa smos te/ de lta yin na bya ba yang rgyur brtags nas gzhan yang brtag par bya bar 'gyur te/ nus pa ma mthong ba nyid du khyad par med pa'i phyir ro / /de lta yin dang thug pa med par 'gyur ro/ /ci ste rgyu mtshan med pa'i phyir gzhan mi brtag pa de'i tshe bya ba yangs rtag par bya bar mi 'gyur te/ de la yang rgyu mtshan med par mtshungs pa'i phyir ro/ /gzhan yang bya ba 'di 'bras bu skyed par byed pa de ci bya ba gzhan dang ldan pas sam/ 'on te yod pa tsam gyis yin gal te bya ba gzhan dang ldan pas yin na de'i tshe bya ba gzhan kho na rgyu nyid du 'gyur gyi bya ba ni ma yin no/ /de la yang bya ba gzhan rgyu nyid du brgal zhing brtag pa mtshungs so/ /de la yang gal te bya ba gzhan dang ldan pa rgyu'i dngos por rtog par byed na de'i tshe thug pa med par 'gyur ro/ /ci ste yod pa tsam gyis zhes bya ba'i phyogs yin na de'i tshe bya ba bzhin du dngos po yang yod pa tsam nyid kyis 'bras bu bskyed par 'gyur ba'i phyir bya ba brtags pa don med do zhes ston pa ni/ ji ltar gzhan zhes bya ba la sogs pa'o/ /ji ltar bya ba gzhan te bya ba gzhan myu gu yang me la sogs pa'i 'bras bu'i rgyur 'dod pa de bzhin du dngos po gzhan la yang mi mthun pa'i bya bas stong pa nyid rgyur ci ste mi 'dod/ ci ste yang dngos su bya ba 'bras bu la byed pa ma yin no/ /'o na ci zhe na/ bya ba dang ldan pa'i dngos po nyid yin no zhe na/ yang na dngos la zhes bya ba la sogs pa smos te/ rgyur 'dod do zhes skabs dang sbyar ro/ /bya ba dang ldan pa'i dngos po la yang 'di rgyur 'gyur ba na/ bya ba gzhan dang ldan pa dang bral ba nyid du 'gyur ba'i phyir de nyid dper 'gyur ro snyam du bsams pa'o/ /yod pa la ma gtogs pa'i bya ba'i dngos po yod pa ma yin te/ dmigs pa'i mtshan nyid du gyur pa mi dmigs pa'i phyir ro zhes ston pa ni/ snang rung nyid du zhes bya ba la sogs pa la/ khyed cag gis ni bya ba snang rung nyid du bstan te/ ji skad du gzhon nu ma len gyis/ de'i phyir 'bras grub snga rol du/ /gang gi bya ba mthong gyur pa/ /zhes bya ba la sogs pa bshad pa bzhin no/ /gzhan yang bya ba'i bdag nyid kyi dngos po de bya ba dang ldan pa'i dngos po de las don gzhan du gyur pa zhig gam/ don gzhan du gyur pa ma yin pa zhig yin grang / dngos po yod pa la rnam pa gzhan med pa'i phyir gnyi ga dang gnyi ga ma yin pa'i rnam par rtog pa ni mi srid pa nyid do/ /de la gal te don gzhan du gyur pa yin na de'i tshe dngos po rgyu nyid du mi 'gyur te/ de las tha dad pa'i bya ba nyid rgyu yin pa'i phyir ro/ /de la yang bya ba dang 'brel pa'i phyir rgyu nyid du 'gyur ro zhe na/ ma yin te phan tshun du phan 'dogs pa ma yin pa ni 'brel par mi 'grub pa'i phyir ro/ /ci ste dngos pos bya ba la phan 'dogs par byed pa yin no snyam na/ de yang mi rigs te/ gang gis bya ba la phan 'dogs par byed pa de la bya ba gzhan yod pa ni ma yin no/ /de lta ma yin na thug pa med pas na bya ba rnams nyid phan tshun byed pa'i phyir dngos po dang lhan cig bya ba 'brel pa nam yang 'grub par mi 'gyur ro/ /ci ste bya ba gzhan med pa kho nar dngos po bya bar phan 'dogs so zhes bya ba yin na de'i tshe bya ba bzhin du 'bras bu yang bya ba dang bral ba'i yod pa nyid tsam gyis ci'i phyir mi byed de/ gang gis na bya ba don gzhan du gyur pa rtogs par byed/ 'bras bu la yang de yod pa tsam gyis phan 'dogs par byed pa la 'gegs pa 'ga' yang yod pa ni ma yin no/ / de lta bas na don gzhan du gyur pa'i bya ba rigs pa ma yin no/ /ci ste don gzhan du gyur pa ma yin pa zhes bya ba'i phyogs yin na/ de'i tshe yod pa nyid bya ba yin no zhes 'grub ste/ dngos po'i rang bzhin nyid yod pa'i sgras brjod par bya ba yin pa'i phyir ro/ /de lta yin dang skye ba las tha dad pa nyid bya bar ma grub po/ /gzhan yang ji ltar blo skye ba na bya ba dang bral yang yod pa tsam gyis don yongs su gcod par byed pa de ltar dngos po thams cad la yang rgyu nyid du dus phyis 'byung ba'i bya ba med na yang 'byung ngo zhes bya ba 'di ston pa ni ji ltar blo ni zhes bya ba la sogs pa ste/ blo la skye ba las ma gtogs pa'i bya ba yod pa ma yin te 'di ltar yod pa dang 'bral ba la skyes bu'i dbang po'i blo skye ba ni mngon sum mo zhes bya ba'i mdo 'di la skye ba smos pa'i dgos pa rjod par byed pa'i gzhon nu ma len gyis/ blo ni skye ba zhes brjod la/ /skye bzhin pa na tshad ma nyid/ /skye ba las ni ma gtogs par/ /rgyu rnams bya ba mthong ba yin/ /tshad ma'ang de ltar 'gyur 'ong zhes/ /de ltar skye bar brjod par 'dod/ /ces smra'o/ /de'i rgyu nyid du zhes bya ba ni/ de'i rgyu ste skye ba'i rgyu gang dag la yod pa de dag la de skad ces bya ba'o/ /de'i dngos po ni de nyid do/ /'di snyam du blo la bya ba med par rigs te/ de'i dus phyis gnas pa ma yin te/ skad cig ma nyid yin pa'i phyir ro snyam na/ ji ltar blo ni zhes bya ba la sogs pa smos te/ bsgrubs zhes bya ba ni sngar bstan pa'i dngos po brtag par dngos po mtha' dag la khyab pa'i skad cig ma 'jig pa nyid bsgrubs zin pa'i phyir ro/ /de bzhin du zhes bya ba ni blo nyid bzhin du'o/ /de'i phyir zhes bya ba ni skad cig ma yin pa'i phyir ro/ /sbyor ba ni gang dag skad cig ma yin pa de dag ni skye ba las tha dad pa'i bya bas stong pa yin te/ blo bzhin no/ /sa bon la sogs pa la yang sngar skad cig ma nyid du bsgrubs zin to zhes bya ba ni rang bzhin gyi gtan tshigs so/ /phyis gnas pa ma yin pas rten med pa'i bya ba mi rigs pa ni gnod pa can gyi tshad ma'o/ /de lta bas na rgyu dang 'bras bu rnam par 'jog pa'i rgyu mtshan ni de ma thag pa tsam nyid yin gyi bya ba ni ma yin no zhes bya ba 'dis gnas pa yin no/ /gang yang ro la sogs pa skye bzhin pa zhes bya ba la sogs pa smras pa de la yang 'khrul pa ma yin no zhes bstan pa'i phyir/ rgyun gyis 'jug pas zhes bya ba la sogs pa smos te/ rgyun la ltos nas gzugs dang rol sogs pa phan tshun lhan cig byed pa'i rgyu'i dngos por 'dod pa nyid yin te/ ji skad du/ nus pa 'jug pa med par ni/ /ro med de nyid gzhan gyi rgyu/ /de ltar 'das dus gcig rnams rtogs/ /de ni 'bras bu'i rtags las skyes/ /zhes bshad pa bzhin no/ /'on te med bzhin du res 'ga' ba lang dang rta la sogs pa'i de ma thag tu yang du ba 'byung ba ma yin nam/ de ji ltar de ma thag pa 'khrul pa ma yin zhe na/ gzhan gyi de ma thag byung na'ang zhes bya ba la sogs pa smos te/ kho bo cag ni rgyu dang 'bras bu'i dngos por rtogs pa'i rgyu mtshan de ma thag pa tsam yin par ni mi smra'o/ / 'o na ci zhe na/ nges pa gang yin pa'o/ /'di ltar gang zhig gang kho na'i de ma thag tu 'byung ba de ni de'i rgyu yin par 'dod la/ du ba ni ba lang la sogs pa nyid kyi de ma thag tu 'byung ba ni ma yin te/ /ba lang la sogs pa med na yang de yod pa'i phyir ro/ /gzhan yang 'di la brten pa'i dngos po smra ba khyed cag la yang ci'i phyir du ba ba lang la sogs pa'i mjug thogs su 'byung na yang de rgyu ma yin na zhes bya ba'i rtsod pa 'di 'jug pa yin no/ /'dir gzhan gyis/ gal te gang zhig 'bras gang la/ /zhes bya ba la sogs pa smos pa la gang la gang zhig ces bya ba la sogs pas rang gi phyogs la lan bshad do/ /de ltar re zhig dngos po rnams skad cig ma nyid yin na yang rgyu dang 'bras bu'i dngos po bsgrubs nas/ da ni de'i rtogs pa po'i tshad ma bsgrub pa'i phyir/ mngon sum dang ni zhes bya ba la sogs pa smos te/ ji ltar khyed cag gi brtan pa'i dngos po dmigs pa yin par grub pa de ltar kho bo cag gi skad cig ma yang 'grub par 'gyur te/ 'di ltar dngos po dmigs par 'gyur ba na/ rnam pa dang bcas pa'i shes pas sam/ rnam pa med pas yin grang / de la gal te rnam pa dang bcas pas yin te/ de'i tshe rang gi rnam pa nyams su myong ba nyid kyi shes pa don nyams su myong ba yin pa'i phyir brten pa dang mi brten pa'i phyogs dag la khyad par 'ga' yang med do/ /ci ste rnam pa med pas yin na de'i tshe lang khyad par med pa nyid yin te/ 'di ltar gang gi dus mnyam du 'byung ba'i gzugs la sogs pa kho na rtogs kyi gzhan ni ma yin pa rang gi rgyu snga ma dag kho na las de'i shes pa de lta bu nye bar skye ba yin te/ de ni de rtogs pa bdag nyid kho nas skyes pa'i phyir ro/ /de'i phyir dus mtshungs par 'byung ba'i gzugs la sogs pa rtogs pa'i rang bzhin gyi shes pa khas len par byed pa na brtan pa dang mi brten pa'i don la khyad par 'ga' yang med do/ /gang gis dus mnyam pa'i ngo bo nyid du mtshungs na yang gzugs la sogs pa nyid shes pas gcod kyi dbang pos ni ma yin pa zhes bya bar 'gyur ba khyed cag gis rgyu snga mas byas pa nyid kyi dus mtshungs par 'byung bar nges pa'i gzugs la sogs pa 'dzin pa'i rang bzhin gyi shes pa khas blang bar bya gor ma chag go/ /de yang dngos po rnams skad cig ma nyid yin na yang mtshungs pa yin pa'i phyir 'di ni ci yang ma yin no/ /gal te rnam shes rnam pa dang / /zhes bya ba la sogs pas pha rol po gnyi ga la klan ka byed de/ gal te shes pa rnam pa dang bcas pa yin na/ de'i tshe za 'og gi gding ba la sogs pa la shes pa sna tshogs du ma nyid du 'gyur ro/ /gcig la sna tshogs pa nyid rigs pa yang ma yin te/ ha cang thal bar 'gyur ba'i phyir ro/ /ci ste rnam pa med pa yin na de'i tshe/ 'di ni sngon po rig pa yin gyi/ ser po rig pa ni ma yin no zhes bya ba'i rnam par gzhag pa 'grub par mi 'gyur te/ thams cad du rtogs pa'i ngo bo nyid du khyad par med pas nye ba'i rgyu mtshan med pa'i phyir ro/ /'di la zhes bya ba la sogs pas len 'debs par byed do / /klan ka 'di ni gnyis ka la yang mtshungs te/ gang gi phyir khyed cag gis kyang gdon mi za bar rnam pa dang bcas pa dang / rnam pa med pa'i phyogs dag las gang yang rung ba'i phyogs zhig khas blang bar bya dgos te/ gzhan du na don 'dzin pa'i shes pa 'grub par mi 'gyur ro/ /gang gis na shes pas don 'dzin par 'dod pa'i phyogs 'di gnyis las ma gtogs pa'i rnam pa gzhan yod pa yang ma yin no/ /gnyi ga'i skyon gang yin pa de yang gcig la klan kar rigs pa ma yin no/ /des na 'di la khyed cag gi lan gang yin pa de ni kho bo cag gir yang 'gyur te/ 'di ltar rnam pa dang bcas pa'i phyogs la/ khyed kyis gdon mi za bar rnam pa rnams brdzun pa nyid dam lhan cig dmigs pa nges pa'i phyir tha dad pa yin na yang shes pa gcig dang tha mi dad pa nyid yin no zhes lan gdab par bya dgos la/ de nyid kho bo cag gi lan yang yin no/ / rnam pa med pa'i phyogs la yang shes pa rgyu snga mas byas pa nyid kyi nges pa'i don rtogs pa'i rang bzhin du brjod par bya dgos la/ de nyid kho bo cag shes pa rnam pa med par smra ba'i sangs rgyas pa rnams kyi yang lan du 'gyur bas 'di ni klan ka ma yin no/ /lan zhes bya ba ni lan gdab pa'o/ / de lta bas na de ltar rgyu dang 'bras bu'i dngos po rtogs pa'i tshad ma bstan nas/ byas pa chud zos pa dang ma byas pa dang phrad pa'i skyon spang bar bya ba'i phyir / gal te 'bras bur 'dod pa rgyus/ /zhes bya ba la sogs pa smos te/ gal te don dam par byed pa po'am za ba po 'ga' zhig 'dod par gyur na de'i tshe skad cig 'jig pa nyid du khas len pa byed na byas pa chud zos pa la sogs par thal bar 'gyur ro/ /gang gi phyir sna tshogs pa ni rkyen nyid 'di pa tsam ste/ byed pa po 'ga' zhig gis cung zad byas pa ma yin la longs spyad pa yang ma yin na de'i phyir ji ltar byas pa chud zos pa la sogs par thal bar 'gyur/ ci ste sngon gyi dge ba la sogs pa'i sems pas bsgos pa'i 'dod pa dang mi 'dod pa'i 'bras bu skyed par byed pa'i nus pa zhig pa dang sngon gyi las kyis ma bsgos pa'i nus pa'i khyad par gyi rgyu las 'bras bu skye ba'i phyir/ go rims bzhin du byas pa chud zos pa dang ma byas pa dang phrad pa'i skyon du thal bar 'gyur ba brjod na de ni mi rigs te/ sngon gyi las kyis bsgos pa'i nus pa'i rgyun la bdag med pa dang lhan cig 'gal ba 'ga' yang yod pa ma yin te/ 'di ltar rgya skyegs la sogs pa'i khu bas bcus pa'i sa bon la sogs pa'i rgyun rjes su 'jug pa nyid yin pa de bzhin du sngon gyi las kyis bsgos pa'i nus pa'i khyad par yang yin te/ gang gi phyir dus phyis yongs su smin pa thob pa las 'dod pa'am mi 'dod pa'i 'bras bu skye ba yin gyi/ sngon gyi las kyis ma bsgos pa'i 'du byed kyi rgyun las 'bras bu skye bar 'dod pa yang ma yin pas de'i phyir gang las ma byas pa dang / phrad pa'i skyon du 'gyur/ gsal byed pa na re brtan pa'i phyir sems pa las dag gis dgos pa yod pa ma yin no zhes zer te / de ni mi rigs te/ snga ma'i rang bzhin yongs su ma dor ba'i brtan pa la bag chags zhes bya ba yod pa ma yin no/ /brtan pa ma yin pa la ni rang bzhin gyi khyad par gzhan skyed pa nyid bag chags yin no/ /gang yang bstan bcos las/ brtan lung ma brtan bsgo bya ba/ / zhes bshad pa de ni rgyun gyis brtan pa las dgongs pa yin no/ /gang rgyun chad pa de'i dus ches ring bar 'byung ba'i 'bras bu skye ba'i dus su nye ba med pa'i phyir rgyu nyid yod pa ma yin no/ /des na de'i rnam pa de lta bur 'bras bu skye ba la bag chags kyi rten mi rigs so zhes bya bar dgos pa'o/ /de lta bas na 'dis gang cung zad brjod pa de ni gzhan gyi grub pa'i mtha' mi shes pa nyid yin pa'i phyir btang snyoms su bya bar 'os so/ /gzhon nu ma len na re kho bo cag ni byed pa po 'ga' zhig gis byas pa'i las 'jig pa'i phyir byas pa chud zos shing ma byas pa dang phrad par ni mi smra'o/ /khyed cag gi gzhung gis byed pa po 'ga' zhig yod pa ni ma yin no/ /'o na ci zhe na/ las dang de'i 'bras bu dag skye ba dang 'jig pa rjes su 'gro ba med pa khas blang ba'i phyir/ byas pa chud zos pa dang / ma byas pa dang phrad par thal bar 'gyur bar smra'o zhes zer ro/ /de'i phyir 'di la rnam pa de lta bu'i byas pa chud zos pa dang / ma byas pa dang mi 'dod pa thob par mi rigs so zhes bstan pa'i phyir/ skad cig gis 'jig rnam rtog gis/ /zhes bya ba smos te/ las kyi skad cig snga ma rjes su 'gro ba med par zhig pa'i phyir byas pa chud zos pa dang / 'bras bu'i skad cig snga ma med pa nyid skye ba'i phyir ma byas pa dang phrad pa zhes bya ba de lta bu skad cig tha dad pa'i rnam par rtog pas byas pa chud zos pa la sogs pa'i rtsod pa de ni 'dod pa nyid yin no/ /rjes su 'gro ba'i dngos po'i cha nyung ngu 'ga' zhig kyang yod pa ma yin no zhes bstan par bya'o/ /gang yang / de phyir rtog pa dang ldan rnams/ /'bras bu 'dod pas rjes 'jug min/ /zhes smos pa de la/ sems can yod lta ma nyams pas/ /zhes bya ba la sogs pa smos te/ re zhig gang dag lhan cig skyes pa las gzhan pa'i 'jig tshogs la lta ba la sogs pa ma spangs pa de dag la skad cig ma tha dad pa'i rnam par rtog pa 'di med pa nyid de/ 'di ltar rgyun la gcig pa nyid du zhen nas bdag cag bde bar 'gyur ro zhes yongs su dga' bar byas nas las la 'jug par 'gyur ro/ /gang dag so so'i skye bo dge ba de dag ni de ltar rigs pa dang lung dag gis ji lta ba bzhin du skad cig ma dang bdag med pa dag rtogs pa'i phyir de kho na nyid mngon par rtogs pa de dag kyang / de ltar rten cing 'brel par 'byung ba'i chos nyid rtogs par 'gyur te/ snying rje la sogs pa sngon du 'gro ba'i sbyin pa la sogs pa dag las bdag dang gzhan la phan par 'byung bar byed pa'i 'du byed skad cig ma nyid gzhan du brgyud pa skye'i / 'tshe ba la sogs pa dag las ni ma yin pas des na de dag rgyu dang 'bras bu'i so sor nges pa bzung nas dge ba la sogs pa'i bya ba dag la 'jug par 'gyur ro/ /ji skad du/ ji srid de ni bdag la ni/ /srid pa yongs su ma bcom par/ /de srid sdug bsngal sgro btags nas/ /rang bzhin du ni gnas mi 'gyur/ /grol ba bo ni med na yang / /log par sgro 'dogs gzhom phyir rtsom/ /zhes bshad pa lta bu'o/ /rgyu dang 'bras bu'i dngos po de rtogs pa po tshad ma ji ltar grub pa de ltar bstan zin pa kho na'o/ /gang yang / skad cig 'jig pa'i dngos rnams la/ /ngo shes pa yang 'thad par dka'/ /zhes smras pa de la/ sems rnams 'ga' zhes bya ba la sogs pa smos te/ 'bras bu 'bras bu can nyid ces bya ba ni 'di la 'bras bu yod pas 'bras bu can te/ rgyu zhes bya ba'i don to/ /'bras bu dang 'bras bu can gyi dngos po ni 'bras bu dang 'bras bu can nyid de/ rgyu dang 'bras bu'i dngos po zhes bya ba'i don to/ /'di ltar gang gis nyams su myong ba gang kho na de nyid kyis dran pa zhes bya bar 'gyur ba dran pa po don dam par yod pa nyams su myong ba ni 'ga' yang yod pa ni ma yin no/ /'on ci zhe na/ rgyun gang la nyams su myong ba shin tu gsal pos gong nas gong du shin tu ches khyad par can gyi skad cig skye bas dran pa la sogs pa'i sa bon bsgos pa de nyid la dran pa la sogs pa skye bar 'gyur gyi gzhan du ni ma yin te/ rgyu dang 'bras bu'i dngos po ni so sor nges pa'i phyir ro zhes bya ba spyi'i don to/ /ji skad du/ gzhan gyis dran dang longs spyod sogs/ /thal bar 'gyur ba'ang gnod byed min/ /de yis 'ga' yang ma dran phyir/ /'di ltar myong las dran pa 'byung / /zhes bshad pa lta bu'o/ /ngo shes pa la sogs pa skye ba yang dran pa la sogs pa sngon du 'gro ba can yin pa'i phyir 'gal ba med do/ /gang gis blo tha dad na yang rgyu mtshan med ces brjod/ ngo shes pa la sogs pa'i rgyu mtshan shes pa po gcig pu 'ga' zhig grub pa yod pa yang ma yin te/ thams cad du rgyu dang 'bras bu'i dngos po tsam gyis de khas blangs pa'i phyir ro/ /gang yang srid pa'i btson rar 'dod chags la sogs zhes bya ba la sogs pas bcings pa dang / thar pa'i rnam par gzhag pa mi 'thad do zhes bya ba smras pa de la/ ma rigs la sogs pa zhes bya ba la sogs pa smos te/ kho bo cag la ni skyes bu gcig la brten pa'i bcings pa dang / thar pa dag gang du yang ma grub ste/ bcing bar bya ba dang grol bar bya ba 'ga' yang ma grub pa'i phyir te/ ma rig pa la sogs pa 'du byed rnams nas rga shi'i mthar thug pa'i sdug bsngal skye ba'i rgyu nyid kyis bcings pa zhes tha snyad du byed pa 'ba' zhig tu zad do/ /de skad du yang / de lta na sdug bsngal gyi phung po chen po 'di 'ba' zhig skye bar 'gyur ro zhes gsungs so/ /ma rig pa la sogs pa de dag kyang de kho na nyid shes pa las bral ba ni dri ma dang bral ba'i blo gang yin pa de ni grol ba zhes bya ste/ ji skad du/ gang phyir chags sogs nyon mongs bas/ /bsgos pa'i sems nyid 'khor ba ste/ /de nyid de dag las grol ba/ /srid mthar phyin ces brjod pa yin/ /zhes bya ba gsungs pa yin no/ /gang yang bcings dang grol ba de dag ni/ gzhi gcig ces bya ba la sogs pa smras pa de la yang dpe la bsgrub bya ma tshang ba yin no zhes bstan pa'i phyir/ bcings pa dang thar ba 'di dag ni zhes bya ba la sogs pa smos te/ gang gis tshe dngos po thams cad skyes ma thag kho nar 'jig pa yin no zhes bsgrubs pa de'i tshe bcings pa dang thar pa de dag gzhi gcig pa nyid gang du yang grub pa yod pa ma yin pa'i phyir dpe ma grub bo/ /de'i phyir de ltar rang gi phyogs rnam par bzhag nas/ bdag la kun du zhes bya ba la sogs pas gzhan gyi phyogs 'gegs par byed do/ /gal te 'dod chags la sogs pa nyon mongs pa dang / de kho na nyid bsgom pa la sogs pa dag gis bdag la khyad par 'ga' zhig byed na/ de'i tshe de'i bcings pa dang thar pa la sogs pa'i rnam par gzhag par 'gyur na/ gang gis rgyu dang 'bras bu nges pa'i mtshams kyi mtshan nyid can gyi bcings pa dang thar pa la sogs pa'i rnam par gzhag pa 'di 'dra ba 'di byed par 'gyur ba gang gi phyir rtag pa nyid kyis de la khyad par sgrub par byed pa yod pa ma yin pa de'i phyir nges par rgyu dang 'bras bur 'dod pa'i mtshan nyid bcings pa dang thar pa rnam par gzhag pa byed pa ma yin te/ dper na nam mkha' bzhin no snyam du bsams pa yin no/ /gzhan du zhes bya ba ni gal te bdag la khyad par skyed pa yin na de'i tshe khyad par bdag nyid du 'gyur ba yin pa'i phyir la/ bdag kyang de las tha mi dad pa'i phyir khyad par bzhin du mi rtag pa nyid du 'gyur ro/ /khyad par gzhan du gyur pa ni mi rigs te/ 'brel pa ma grub pa'i phyir ro zhes bya ba 'di ni lan brgyar brtags zin to/ /de kho na nyid bsdus pa'i dka' 'grel las/ las dang 'bras bu'i 'brel pa brtag pa ste bcu bzhi pa'o// //da ni/ yon tan rdzas dang las rigs pa/ /'du sogs khyad par gyis stong pa/ /zhes bya ba de bsgrub par bya ba'i phyir tshig gi don drug brtag pa nye bar 'god par byed pa ni/ rkang mig pa dang zhes bya ba la sogs pa smos te/ rkang mig pa la sogs pa rnams na re/ sngar bstan pa'i dngos po brtag par/ rigs la sogs pa dngos med phyir/ /skad cig 'jig par 'dod pa min / /zhes bya ba 'dis sngar rig pa la sogs pa rang bzhin med pa nyid dang ldan pa gang yin pa de ni mi rigs te/ gang gi phyir rdzas dang / yon tan dang / las dang / spyi dang / bye brag dang / 'du ba zhes bya ba tshig gi don drug dam pa'i don du rdzas su yod do zhes zer ro/ /rkang mig gi slob ma yin pa'i phyir rkang mig pa ste/ rigs pa can rnams so/ /bye brag pa rnams ni gzegs zan gyi slob ma ste gzegs zan pa zhes bya'o/ /lung tsam dag ces bya ba ni 'di dag la rigs pa dang bral ba lung tsam yod pa yin pas lung tsam pa dag go/ /de la re zhig sa la sogs/ /zhes bya ba la sogs pas/ re zhig rdzas kyi tshig gi don dgag par bya ba'i don du de'i rnam pa dbye ba 'chad de/ tha dad du rnam par phye na bde blag tu sun dbyung ba brjod par nus pa'i phyir ro snyam du bsams pa yin no/ /rnam pa dgu zhes bya ba ni/ mdo las sa dang chu dang / me dang rlung dang / nam mkha' dang / dus dang phyogs dang / bdag dang yid ces bya ba ni rdzas dag yin zhes bya'o/ /de la yang / /sa dang chu dang me dang rlung / /zhes bya ba'i rdzas kyi grangs bzhi po 'di ni/ rtag pa dang mi rtag pa'i khyad par gyi bye brag gis rnam pa gnyis te/ 'dir rnam pa gnyis po 'di bstan pa'i phyir/ re zhig gang dag ces bya ba la sogs pa smos te/ sa la sogs pa rdul phra rab kyi bdag nyid rnams ni rtag pa yin te/ rdul phra rab rnams rtag pa nyid yin pa'i phyir ro/ /de la sogs pas brtsams pa ni mi rtag pa ste/ rgyu dang ldan pa ni mi rtag pa'o zhes bya bar rigs pas so/ /de sogs kyis zhes bya ba rdul phra rab dag la sogs pa de dag gang la yod pa'i rdul phra rab gnyis 'byar ba gnyis pa la sogs pa de dag ni de sogs so/ /nam mkha' la sogs pa ni rtag pa kho na'o snyam du bsams pa'o/ /re zhig rdzas kyi grangs bzhi po de 'dir dgag par 'dod nas/ de la zhes bya ba la sogs pa smos te/ de la sa la sogs pa 'di dag /rdul phra rab rtag pa'i rang bzhin du brjod pa gang yin pa de dag la ni dngos po mtha' dag la khyab pa'i skad cig ma 'jig pa bsgrubs pa'i phyir rtag pa'i ngo bo med par bsgrubs pa nyid yin no/ /gang yod pa de thams cad ni skad cig ma yin te/ skad cig ma ma yin pa ni rim dang cig car dag gis don byed pa 'gal pa'i phyir/ de'i mtshan nyid can gyi yod pa nyid nyams pa yin no zhes khyab pa bsgrubs zin to/ /'di la yang gnod par byed pa'i tshad ma bshad pa ni/ rtag na zhes bya ba la sogs pa ste/ gal te ri la sogs pa rags pa rnams la rgyur gyur pa'i rdul phra rab dag rtag par yod pa ni yin no zhes khas len par byed pa de'i tshe/ de'i 'bras bu rags pa rnams rgyu ma tshang ba med pa'i phyir cig car kho nar skye bar 'gyur ro/ /sbyor ba ni gang dag rgyu'i tshogs pa thogs pa med pa can de dag ni cig car 'byung ba yin te/ mtshungs par skyes pa'i myu gu mang po dag bzhin no/ /rdul phra rab rtag pa'i 'bras bu nyid du mngon par 'dod par gas pa'i dngos po rnams kyang rgyu'i tshogs pa thogs pa med pa can yin no zhes bya ba ni rang bzhin gyi gtan tshigs so/ /rgyu tshogs kyang mi skye na khyad par med pa'i phyir thams cad kyi tshe mi skye bar thal bar 'gyur ro zhes bya bar ni gnod par byed pa'i tshad ma'o/ /'di snyam du rgyu rnam pa gsum du 'dod de/ 'du ba'i rgyu dang / 'du ba ma yin pa'i rgyu dang / rgyu mtshan gyi rgyu'o/ /de la gang la 'bras bu gang 'du ba de ni de'i rgyu ste/ dper na rdul phra rab gnyis pa la rdul phran gnyis lta bu'o/ /gang zhig gang la mi 'du ba'i rgyu'i dngos po tsam du gyur pa de ni 'du ba ma yin pa'i rgyu yin te/ dper na yan lag can gyi rdzas tsam po las yan lag gi ldan pa lta bu'o/ /rgyu lhag ma'i rgyu mtshan gyi rgyu ste/ dper na chos la sogs pa'o zhes bya ba 'di ni 'di dag gi rnam par dbye ba yin no/ /de la ldan pa la sogs pa la ltos par 'gyur ba ni mi nya ba'i phyir rgyu ma tshang ba nyid du ma grub ste/ de'i phyir gtan tshigs ma grub bo zhes dogs pa la/ /de dag ldan pa la sogs la/ /zhes bya ba la sogs pa smos te/ gal te rdul phra rab rnams la ldan pa la sogs pas khyad par 'ga' zhig byed na de'i tshe de dag la ltos par 'gyur na/ ji srid du rdul phra rab rnams rtag pa'i phyir/ gzhan dag gis khyad par du byar med pa nyid yin na de ji ltar na de dag ldan pa la sogs pa ltos par 'gyur/ lus dang sa la sogs pa rags pa rnams cig car skye ba yod pa yang ma yin te/ lus la sogs pa rim gyis skye bar mthong ba'i phyir ro/ /de lta bas na bzlog pa'i sbyor ba ni/ gang dag 'bras bu rim pa dang ldan pa'i rgyu yin pa de dag ni mi rtag pa yin te/ rim pa dang ldan pa'i myu gu la sogs pa'i 'bras bu 'grub par byed pa'i sa bon la sogs pa bzhin no/ /rdul phra rab rnams kyang de bzhin no zhes bya ba ni rang bzhin gyi gtan tshigs so/ /rnam phug pas rdul phra rab rnams rtag pa nyid du sgrub pa'i phyir tshad ma smras pa/ rdul phra rab rnams skyed par byed par mngon par 'dod pa ni/ yod pa'i chos dang ldan pa ma yin te/ yod par sgrub par byed pa'i tshad ma'i yul ma yin pa'i phyir/ bong bu'i rwa bzhin no zhe'o/ /yod pa ste bdog pa'i chos ni yod pa'i chos te yod pa nyid do/ /de dang ldan pa ni thob pa ste/ yod pa zhes bya ba'i tha tshig go/ /de bkag pa 'di ni rdul phran skyed byed de/ rdul phra rab rnams skyed par byed pa'i rgyu med do zhes bya ba'i don to/ /tshad ma de dag 'di dogs pa bsu ba sngon du 'gro ba can bstan pa'i phyir/ gal te rdul phran skyed byed 'dod/ /ces bya ba la sogs pa smos te/ rdul phra rab skyed par byed pa'i chos dang ldan pa ma yin par 'dod ces sbrel lo/ /yod pa dmigs pa ste/ rtogs pa de'i don te dgos pa tshad ma gang la yod pa de la de skad ces bya'o/ /lhag ma ni rtogs par bla'o/ /'dis ni rdul phra rab rnams mi rtag pa nyid du dam bcas pa la rjes su dpag pas gnod pa nyid bstan te/ yod pa rgyu dang mi ldan rtag /ces bshad pa'i phyir rgyu med pa nyid kyis rdul phra rab rnams rtag pa nyid du grub pa'i phyir ro/ /min te ma grub phyir zhes bya ba la sogs pas gtan tshigs ma grub pa nyid du bshad do/ /'on te thag pa la sogs pa snam bu la sogs pa kho na'i rgyu nyid du grags pa ma yin nam/ rdul phra rab rnams kyi ni ma yin na/ de ji ltar rdul phra rab rnams kyi rgyu thag pa la sogs pa mthong zhes bya zhe na/ gang phyir snam bu sogs zhes bya ba la sogs pa smos te/ 'di yang 'og nas ston par 'gyur ro snyam du bsams pa'o/ /gzhan yang yul dang dus dang / rang bzhin gyis bskal pa'i don rnams dmigs par byed pa'i tshad ma log na yang yod par mi 'gal ba'i phyir/ des na gtan tshigs ma nges pa yin no zhes ston pa ni/ yod 'dzin zhes bya ba la sogs pa smos te/ don med pa la nges pa med/ /ces bya ba ni sha za la sogs pa bzhin no snyam du bsams pa'o/ /de ltar re zhig rgyu'i rdzas bkag nas/ 'bras bu'i rdzas dgag par bya ba'i phyir/ des brtsams zhes bya ba la sogs pa smos te/ yon tan ni gzugs la sogs pa'o/ /yan lag ni snal ma la sogs pa'o/ /de 'di yod pas na de skad ces bya'o/ /de lta bur gyur pa yon tan dang yan lag las tha dad pa yan lag can de ma dmigs te/ snam bu la sogs pa'i mtshan nyid kyi yan lag can gyi rdzas dkar po la sogs pa'i yon tan thams cad dang snal ma la sogs pa yan lag dag las don gzhan du gyur pa gang du yang mig la sogs pa'i rnam par shes pa la mi snang ngo / /de'i phyir 'dir yon tan dag las don gzhan du gyur pa'i rdzas mi dmigs pas yon tan dang yon tan can du smra ba dang / /yan lag las ma gtogs pa'i yan lag can mi dmigs pas yan lag can du smra ba bsal to/ /sbyor ba ni gang dmigs pa'i mtshan nyid du gyur pa gang na ma dmigs pa de ni de na med pa yin te/ dper na phyogs kyi bye brag 'ga' zhig na bum pa la sogs pa mi dmigs pa lta bu'o/ /yul de nyid du yon tan dang yan lag las don gzhan du gyur pa'i snang ba nyid du mngon par 'dod pa'i yon tan can dang yan lag can yang mi dmigs so zhes bya ba ni rang bzhin mi dmigs pa'o/ /gtan tshigs ma grub pa yang ma yin te/ chen po dang rdzas du ma dang ldan pa nyid dang / gzugs ni dmigs pa yin no zhes bshad pa'i phyir snang rung nyid du mngon par 'dod pa'i phyir ro/ /nye bar bsgyur dang phrad pa na/ /zhes bya ba la sogs pas gsal byed pa dang snang bral la sogs pa rnams gtan tshigs ma grub pa nyid du ston par byed de/ de dag gis smras pa / yon tan las ma gtogs pa'i yon tan can yang dag par dmigs pa kho na ste/ de'i gzugs la sogs pa'i yon tan ma bzung na yang de 'dzin pa'i phyir ro/ /'di ltar nye bar sgyur ba nye ba'i gnas skabs kyi shel rdo'i ri la yod pa'i dkar po'i yon tan ma dmigs na yang mthong ba nyid do/ /chu skyar la sogs pa yang mtshan mo nyung zad nyung zad snang ba na yang der gtogs pa'i skye bo la sogs pa'i gzugs ma mthong yang bzung ba kho na'o/ /de bzhin du lus rkang pa'i bar du ral gas g.yogs pa'i skyes bu la/ de'i sngo bsangs la sogs pa'i gzugs ma bzung bar yang skyes pa skyes pa zhes rtogs pa skye ba yin no/ /ngur smrig dang gur gum la sogs pas gos dmar po la de'i ngo bo 'dres pa'i ngo bo nyid kyis zil gyis mnan pa ma dmigs na yang gos kyi blor 'gyur ba yin no/ /de'i phyir re zhig de ltar mngon sum nyid kyis yon tan dang yon tan can tha dad par grub par bstan nas/ da ni rjes su dpag pas kyang grub po zhes bstan pa'i phyir/ pad+ma sogs la zhes bya ba la sogs pa smos te/ pad+ma la sogs pa las gzugs la sogs pa yon tan yin te/ pad+ma'i gzugs la sogs pa zhes bya ba de lta bu'o/ /pad+ma la sogs pa de yis gzugs la sogs pa de ni rnam par gcod pa'i phyir te/ dper na nag pa'i rta zhes nag pas bdag po gzhan dag las rnam par gcod pa na rta de las tha dad pa yin pa bzhin no/ /de bzhin du sbyor ba gzhan ni sa dang chu dang me dang rlung gi rdzas rnams ni so sor gzugs dang / ro dang dri dang reg pa'i yon tan dag las tha dad pa yin te/ gcig gi tshig dang mang po'i tshig gi yul yin pa'i phyir / zla ba dang rgyu skar rnams bzhin no zhes bya ba lta bu'o/ /gang gi phyir ji ltar zla ba zhes bya ba ni gcig gi tshig yin la/ rgyu skar rnams zhes bya ba mang po'i tshig ste/ zla ba dang rgyu skar rnams tha dad pa'i rgyu mtshan du dmigs pa de bzhin du 'di la yang sa zhes bya ba ni gcig gi tshig go/ /gzugs dang / ro dang / dri dang / reg pa rnams zhes bya ba ni mang po'i tshig go/ /de bzhin du chu la sogs pa la yang sbyar bar bya'o/ /rgyu skar tha dad pa ni rgyal la sogs pa'o/ /de ltar yon tan dang yon tan can tha dad par bsgrubs nas/ yan lag dang yan lag can tha dad par bsgrub par bya ba'i phyir/ de bzhin snam snal tha dad de/ /zhes bya ba la sogs pa smos te/ sbyor ba rnams ni/ snam bu ni spyad pa'i yul du gyur pa'i snal ma dag las gzhan yin te/ byed pa po tha dad pa'i phyir/ bum pa la sogs pa bzhin no/ /snal ma dang snam bu dag ni gzhan yin te/ nus pa tha dad pa'i phyir/ dug dang gnyen po bzhin no/ /dus dang snga dang phyis 'byung ba'i phyir yang ste/ pha dang bu bzhin no/ /tshad ma tha dad pa'i phyir te/ ut+pal dang skyu ru ra dang bil ba la sogs pa bzhin no zhes bya ba'o/ /'di dag gi khyab pa bsgrub pa'i phyir/ 'gal ba'i chos dang ldan pas na zhes bya ba smos te/ dngos po rnams phan tshun tha dad pa'i rgyu mtshan ni 'gal ba'i chos dang ldan pa tsam yin te/ ka ba la sogs pa bzhin no/ /de yang yan lag can dag la yang yod de/ 'di ltar snal ma dag gi byed pa po ni bud med yin la snam bu'i ni tha ga pa'o/ /snam bu ni grang ba sel ba la sogs pa'i 'bras bu nus kyi snal ma rnams ni ma yin no/ /snal ma rnams ni dang por dmigs te/ dus sngar byung ba'i phyir ro/ /snam bu ni phyis thag pa la sogs pas byed pa'i dus phyis dmigs pa'i phyir dus phyis byung ba nyid yin no/ /snam bu'i zheng dang srid du tshad ji tsam yod pa de tsam snal ma re re la yod pa ma yin pa'i phyir tshad tha dad pa yin no/ / de'i phyir gtan tshigs rnams ma nges pa ma yin no snyam du bsams pa yin no/ /de ltar re zhig rjes su dpag pas yan lag dang yan lag can dag tha dad par bsgrubs nas/ mngon sum gyis kyang tha dad par bsgrub pa'i phyir/ rags pa'i don zhes bya ba la sogs pa smos te/ gal te yan lag can med par gyur na thams cad mi 'dzin par thal bar 'gyur te/ rdul phra rab rnams ni dbang po las 'das pa yin pa'i phyir ro/ /rags pa med pa na rdul phra rab ces bya ba'i tha snyad nyid du yang mi 'gyur te/ ci'i phyir zhe na/ rags pa'i dngos po la ltos nas zhes bya ba la sogs pa smos te/ rtogs par bla bar zad do/ /'on te shel la sogs zhes bya ba la sogs pas lan 'debs par byed de/ shel la sogs pa rang la yod pa'i yon tan la dmigs nas yang 'ba' zhig la dmigs so zhes gang smras pa de ni ma grub ste/ de'i shes pa ni don ji lta ba bzhin ma yin pa nyid kyis 'khrul pas yul med pa yin pa'i phyir ro/ /'di ltar/ thad skyes kyi me tog la sogs pas nye bar sgyur bas shel rdo med pa nyid kyi dmar po la sogs pa'i ngo bo dmigs la/ chu skyar dang lha khang la sogs pa dkar po yin na yang sre bo'i ngo bor mthong ste/ de dag de'i dngos te dmar po la sogs pa'i ngo bo nyid de kho na nyid du yod pa yang ma yin te/ ci'i phyir zhe na/ rang gi phyogs 'jig par 'gyur ba'i phyir te/ gal te de dag de'i dngos nyid de kho na nyid du gyur na de'i tshe de'i ngo bo ma bzung na yang de dag 'dzin pa yod pa ma yin no zhes khyed kyis de ma thag tu brjod pa gang yin pa'i phyogs de 'jig par 'gyur ro/ /'di snyam du dmar po la sogs pa'i ngo bo las ma gtogs pa'i shel la sogs pa yang dmigs pa kho na'o snyam na/ de'i ngo bo zhes bya ba la sogs pa smos te/ dmar po la sogs pa'i ngo bo de las tha dad pa shel la sogs pa'i mtshan nyid bdag gi rang bzhin ma mthong ste/ dmar po la sogs pa'i ngo bo kho nar dmigs pa'i phyir ro/ /gal te shel la sogs pa de'i ngo bo ma yin pa yang dmar po la sogs pa'i ngo bos dmigs pa yin no zhe na/ gzhan rnam rig blo'i zhes bya ba la sogs pa smos te/ gang gi phyir rnam pa'i dbang gi shes pa don so sor nges pa'i yul can du 'jog ste/ gal te gzhan gyi rnam pa can gyi shes pa yang gzhan gyi yul can du 'gyur ba de lta yin na gzugs kyi shes pa yang sgra la sogs pa'i yul du 'gyur te khyad par med pa'i phyir ro/ /gzhan yang shes pa gzhan gyi rnam pa can yang gzhan gyi yul can yin du chug mod/ de lta na yang 'dod pa 'grub par 'gyur ba ma yin no zhes bstan pa'i phyir/ de bzhin dkar sogs zhes bya ba smos te/ 'di ltar dkar po la sogs pa kho de las ma gtogs pa'i yon tan can gyi dngos po dang bral ba de ltar dmar po la sogs pa'i rig go zhes bya ba de lta bu yang srid par 'gyur na de lta na yang yan lag can mi 'grub po/ /'ang zhes bya ba ni rim pa bzhin du sbyar ba dang nges par bzung ba yin te/ dkar sogs zhes bya ba 'di'i de ma thag tu blta bar bya'o/ /'di 'khrul pa zhes bya ba ni don ji lta ba bzhin ma yin pa'i phyir ro zhes bya ba lhag ma'o / /gang yang / ral ga'i nang gnas skyes bu la/ /zhes bya ba la sogs pa smras pa de la yang mngon sum ma yin te/ rtog pa dang bcas pa'i phyir dang / rnam pa mi gsal ba'i phyir ro/ /'o na ci zhe na/ shes pa 'di ni rjes su dpag pa yin no/ /gzugs la sogs pa 'dus pa tsam gyi mtshan nyid kyi skyes bu yul can yin pas de'i phyir yan lag can ma grub po zhes ston pa ni/ de'i rgyu can zhes bya ba la sogs pa smos te/ skyes bu gzugs la sogs pa'i tshogs pa tsam gyis bdag nyid de gnas lugs gang la rgyur yod pa de la de skad ces bya ba la de'i rgyu can gyi gnas lugs te/ dbyibs kyi khyad par ral ga gang la yod pa de la de skad ces bya'o/ /'dis ni 'bras bur brjod pa'i rtags kyi khyad par gyis bskyed pa'i rjes su dpag pa'i shes pa yin par bstan pa yin no/ /gang yang gos dmar la ni go zhes smras pa de la/ ngur smrig gur gum zhes bya ba la sogs pa smos te/ de la gos skad cig ma yin pa'i phyir dkar po la sogs pa sngar rang bzhin zhig pa ni/ tshogs pa gzhan gyi stobs kyis snga ma med pa'i gzugs la sogs pa skye ba yin te/ de mngon sum gyis bzung ba na/ phyis brda ji lta ba bzhin du goms pa'i khyad par gyi spyi'i yul can gos so gos so zhes bya ba'i mngon sum gyi rjes la byung ba'i kun rdzob pa don dam par yul med pa nyid kyi sred pa'i shes pa skye ba'i phyir 'di la mngon sum nyid ma grub po/ /'di rjes su dpag pa yang ma yin te/ mngon sum snga mas bzung zin pa yul yin pa'i phyir dang / rtags med pa'i phyir ro/ /de lta bas na 'di la zil gyis gnon pa'i dngos po cung zad kyang yod pa ni ma yin no/ /'di snyam du gal te gos kyi dkar po la sogs pa'i gzugs ma nyams pa med pa nyid yin na de ltar bkrus pa la sogs pa'i gnas skabs su yang dmigs par 'gyur snyam na/ slar yang chu sogs zhes bya ba la sogs pa smos te/ ji ltar lcags la sogs pa me dang 'brel pa las 'bar ba la sogs pa'i ngo bor skye la/ yang sngon po la sogs pa'i ngo bor skye ba de bzhin du dkar po la sogs pa'i gzugs gzhan nyid skye ba'i phyir 'gal ba med do/ /'di snyam du gzugs gzhan kho na skye'i snga ma'i rang bzhin zil gyis mnan pa'i phyir snga ma mi dmigs pa yin la/ phyis zil gyis gnon pa med pa'i phyir dmigs par 'gyur ba ma yin no zhes bya ba 'di ji ltar rtogs par bya snyam du sems na/ gzugs ni gnas skabs de nyid na/ /zhes bya ba la sogs pa smos te/ sbyor ba ni gang zhig zil gyis ma mnan pa'i rang bzhin yongs su ma dor ba de ni/ gzhan gyi zil gyis gnon pa ni ma yin te/ sngar gyi gnas skabs de nyid bzhin no/ /zil gyis gnon pa'i gnas skabs kyi gzugs kyang zil gyis ma mnan pa'i rang bzhin yongs su ma dor ba yin no zhes bya ba ni khyab par byed pa 'gal ba dmigs pa'o/ /zil gyis ma mnan pa'i rang bzhin yang yongs su 'dor ba khas len par byed na 'di gzhan nyid du grub po/ /pad+ma sogs la gzugs la sogs/ /zhes bya ba la/ tha dad tshig dang drug la sogs/ /zhes bya ba la sogs pa smos te/ gal te drug pa la sogs pa rnams dngos po ji lta ba bzhin du 'jug par gyur na de'i tshe las dngos po grub par 'gyur na/ ji srid du rang dbang gi 'dod pa tsam gyis 'byung ba 'di dag phyi rol gyi dngos por gtogs pa'i tha dad pa la sogs pa la ltos pa ma yin na de ji ltar 'di dag las don 'grub pa yin/ de la tshig tha dad pa ni gzugs la sogs pa rnams zhes bya ba'o/ /drug pa ni snam bu'i zhes bya ba'o/ /sogs pa smos pas snam bu 'di la gzugs la sogs pa zhes bya ba bdun pa dang / snam bu'i dngos po ni snam bu nyid do zhes bya ba de la phan pa zhes bya ba la sogs pa bzung ngo / /'di ltar gzhan gyis zhes bya ba la sogs pas ma nges pa nyid sgrub par byed de/ 'di ltar tshig gi don drug po rnams kyi yod pa nyid dang drug po de dag gi sde tshan zhes bya ba la sogs pa la dngos po'i tha dad pa med na yang drug pa la sogs par 'gyur ba kho na'o/ /khyed cag gis ni tshig gi don drug las ma gtogs pa'i yod pa nyid mi 'dod do/ /'di ni nye bar mtshon pa ste/ de bzhin du/ btsun mo rnams bye ma rnams zhes bya ba la sogs pa mang po'i tshig yod na yang don tha dad pa ma mthong ngo / /nam mkha'i rang bzhin nam mkha' nyid/ /ces bya ba la yang rang bzhin gzhan du mi 'dod do/ /yod par shes byed ces bya ba la sogs pas gzhan gyi len gyi dogs pa bsu ba yin te/ yod par shes par byed pa'i tshad ma'i yul ni dngos po'i de kho na nyid yin te/ yod pa la dmigs pa'i byed pa'i tshad ma'i yul nyid ces bya ba ni drug po rnams la chos gzhan yod pa nyid 'dod do zhes bya ba'i don to/ /de'i phyir 'khrul pa med do snyam du bsams pa yin no/ /'dir lan bshad pa/ khyed la drug las gzhan tshig gi don khyed la thal zhes bya ba lhag ma ste/ tshig gi don bdun par 'gyur ro/ /de lta yin dang tshig gi don drug tu khas blangs pa nyams par 'gyur ro snyam du bsams pa yin no/ /'dod pa'i phyir skyon med do zhe na/ gal te de lta na ji ltar tshig gi don drug go zhes brjod ce na/ de drug chos can du brjod de/ /zhes bya ba smos te/ dngos po gang dag chos can gyi ngo bo nyid yin pa de dag tshig gi don drug go zhes brjod de/ chos kyi ngo bo ni tshig gi don drug las ma gtogs pa 'dod pa kho na'o/ /ji skad du tshig gi don la 'jug pa'i gzhung las/ de ltar chos las ma gtogs pa'i chos can dag bstan par byas so zhes bshad pa lta bu'o/ /de dang de 'brel zhes bya ba la sogs pas lan bshad do/ /de dang zhes bya ba ni tshig gi don drug po dag dang ngo / /de zhes bya ba ni yod pa nyid la sogs pa'i chos so/ /gang gis chos 'di de dag gi yin par 'gyur ba 'brel pa gang zhig yin/ 'brel pa med par ni chos dang chos can gyi dngos por rigs pa ma yin te/ ha cang thal bar 'gyur ba'i phyir ro/ /de lta yin na ni thams cad thams cad kyi chos su 'gyur ro/ /de dag dang lhan cig 'brel pa 'ga' yang med de 'di ltar 'brel ba ni gnyis kho na ste/ /ldan pa'i mtshan nyid dang 'du ba'i mtshan nyid do/ /de la re zhig ldan pa'i mtshan nyid ni ma yin te/ de ni yon tan yin pa nyid kyis rdzas kho na la nges pa'i phyir ro/ /'du ba'i bdag nyid kyang ma yin te/ de ni dngos po bzhin du gcig nyid du 'dod pa'i phyir ro/ /'du ba'i bdag nyid la yang 'du bas 'brel pa yin na 'du ba gnyis pa khas blang bar bya bar 'gyur ro/ /'brel pa med par yang chos dang chos can gyi dngos por 'gyur ro zhe na/ 'brel pa mi 'thad ces bya ba la sogs pa smos te/ de lta na ha cang thal bar 'gyur ro zhes bshad zin to/ /ci ste tshig gi don drug po de dag gis chos skyed pa'i phyir de dag gi chos 'di 'brel par brjod do zhe na/ 'o na gal te de lta na de las byung ba'i 'brel pa tsam nyid las chu la sogs pa gzhan la yang 'khar gzhong rnam pa de lta bu la sogs pa dang 'brel par 'gyur ro/ /de lta yin dang de dag la ldan pa dang 'du ba zhes bya ba'i 'brel pa gzhan brtags pa don med par 'gyur ro/ /gzhan yang / drug po dag la yod pa nyid/ /ces bya ba'i chos gzhan yod du chug mod/ /de lta na yang 'khrul pa kho na ste/ 'di ltar de la yang ste yod pa nyid la yod pa yin te/ dngos po yin pa'i phyir ro/ /de lta yin dang de la tha dad pa'i rgyu mtshan gyi rnam par dbye bar ji ltar 'gyur/ ci ste de la yang yod pa nyid gzhan khas len par byed na de'i tshe thug pa med par 'gyur ro/ /'dod pa'i phyir thug pa med pa mi gnod do zhe na/ chos gzhan zhes bya ba la sogs pa smos te/ thams cad phyi ma phyi ma'i chos dang ldan pa'i phyir chos can nyid du 'gyur ro/ /de lta na yang drug po 'di de dag ni chos can kho nar brjod pa zhes bya ba 'di mi 'thad de/ tshig gi don drug las tha dad pa'i chos can gzhan dag kyang yod pa'i phyir ro snyam du bsams pa yin no/ /yang ci ste chos can gyi ngo bo gang dag yin pa de dag kho na drug nyid du nges par bzung ngo snyam pa 'di yang snying po med do/ /de lta na ni yon tan dang las dang spyi dang khyad par dang / 'du ba rnams mi ston par 'gyur te/ 'di dag ni chos can gyi ngo bo kho na ni ma yin no/ /'o na ci zhe na/ chos kyi ngo bo nyid kyang yin te/ 'di dag ni rdzas la brten pa'i phyir ro/ /'di nyid las zhes bya ba ni chos gzhan dang ldan pa las so/ /yang gzhan gyi drug po rnams yod pa nyid yin te/ yod pa dmigs par byed pa'i tshad mas rtogs par bya ba yin pa'i phyir ro/ /rtogs par bya ba yang tshig gi don drug gi yul can gyi shes pa gang yin pa ste/ de yod pa'i tha dad 'jug pa'i phyir ro/ /de bzhin du/ shes byas bskyed pa'i shes pa ni/ /zhes bya ba nyid yin la rjod par byed pas bskyed pa ni brjod par bya ba nyid yin no/ /de'i phyir tha dad pa'i rgyu mtshan gyi drug par 'gyur ba yin la/ thug pa med pa yang ma yin zhing tshig gi don drug las ma gtogs pa'i tshig gi don gzhan du thal bar 'gyur ba yang ma yin no zhes zer ba de la yang 'di ni rnam par rtog pa tsam nyid yin te/ gal te tshig gi don drug po dag la don byed par nus pa'i dngos po'i bdag nyid kyi bdag gi de kho na nyid med par 'gyur na de'i tshe de dag nam mkha'i pad+ma lta bur 'gyur te/ don byed pa dag la nus pa med pa'i phyir ro/ /de lta yin dang yod pa dmigs par byed pa'i tshad mas rtogs par bya par mi 'gyur ro/ /ci ste 'di dag la rnam pa de lta bur gyur pa'i bdag nyid kyi de kho na nyid yod pa yin pa de'i tshe don byed par nus pa de dag dngos po nyid khyad par gzhan spangs pa tsam shes par 'dod pa la de dag gi yod pa nyid ces bya ba de lta bu gal te tha dad pa'i rnam par dbye bas ston par 'gyur ba de'i tshe 'gal ba ci yod/ rang gi ngo bo tha dad pa med pa de yang blos de la brten nas tha dad pa lta bur brjod pa 'gal ba med pa nyid de/ tshig ni 'dod pa tsam gyis 'jug pa'i phyir ro/ /bcos ma'i gtam nye bar sbyar ba rnams la byis pa dang dpa' bo la sogs pa'i chos yongs su brtags pa lta bu yin pa'i phyir 'di ni cir yang mi 'gyur ro/ /byed par nus sogs tha dad phyir/ /zhes bya ba la sogs pa la/ gal te dang po'i snal ma las zhes bya ba la sogs pa smos te/ gal te snam bu'i ming yang dag par thos pa'i gnas skabs dang por byung ba'i snal ma dag las snam bu tha dad par sgrub na de'i tshe grub pa la sgrub ste/ dngos po thams cad skad cig ma nyid kyis rdzas snal ma dag las snam bu'i sgras brjod par bya ba'i snal ma rnams de dang mi 'dra ba'i dngos po med na yang skye bar khas len pa'i phyir ro/ /ci ste gang dag snam bu dang dus mtshungs par 'byung ba'i snal ma de dag las snam bu gzhan nyid du sgrub na/ de'i tshe gtan tshigs rnams ma grub pa yin no zhes bstan pa'i phyir/ bya ba nyid gcig ces bya ba la sogs pa smos te/ gal te de'i dus su snal ma las ma gtogs pa de dang dus mtshungs par 'byung ba'i snam bu grub par gyur na/ de'i tshe de snal ma la ltos nas byed pa po tha dad pa la sogs pa'i chos 'grub par 'gyur na/ gang gi phyir snal ma las tha dad pa'i snam bu de nyid 'dir ma grub ste/ de dag las tha dad pa nyid bsgrub par bya ba yin pa'i phyir ro/ /snam bu dang snal ma rnams zhes bya ba'i ming tsam las dngos po rnams tha dad pa yang ma yin te/ dgos pa gzhan gyi dbang gis kyang ming gzhan sbyor ba'i phyir ro/ /'di ltar snal ma kha cig khyad par can gyi gnas skabs thob pa ni grang ba la sogs pa don gcig byed par nus pa yin gyi/ gang dag byed pa po cung zad yin pa gzhan ni ma yin no/ /de la tha snyad 'dogs pa po rnams kyis tha snyad ma 'chol bar bya ba'i phyir/ don gzhan med na yang don gcig byed pa la nye bar mkho ba'i snal ma khyad par can rnams bstan par 'dod nas snam bu zhes sgra gcig nye bar sbyor ro/ /yang ci'i phyir sgra gcig nye bar sbyor zhe na/ sgra re re zhes bya ba la sogs pa smos te/ so sor sgra re rer brjod na dka' ba'i skyon yod de/ 'di ltar de la brjod par 'dod pa'i dngos po 'bras bu gcig sgrub par byed par rung ba'i dngos po ji snyed pa la sgra de snyed sbyar bar bya ba yin pa'i phyir dka' ba'i skyon no/ /'di dag gi thun mong ma yin pa'i ngo bo bstan par mi nus pa'i phyir yang mi nus pa'i skyon no/ /rloms te spyi'i rnam pas ston pa na/ sgra gcig nyid bstan pa mchog yin gyi/ so so so sor ston pa'i sbyor ba 'di la 'bras bu 'ga' yang ma dmigs pa'i phyir 'bras bu med pa'i skyon no/ /dngos po mtha' dag brjod par 'dod pa na don ma lus pa brjod par byas na tha snyad sla ba yon tan yin te/ 'gro ba dang / srid pa gsum dang / sna tshogs pa'i sgra bzhin no/ /brjod pa gcig ces bya ba ni snam bu zhes bya ba tshig gcig ces bya ba'i don te/ byed pa po dang nus pa dang / yongs su gyur pa la sogs pa'i chos kyang yin pas de dag la de skad ces bya'o/ /de nas tha dad pa'i sgra dang khyad par gyi bsdu ba byas nas bstan par bya'o/ /gang yang rags pa'i don yod ma yin no zhes bya ba la sogs pa de la/ gang dag rdul phran zhes bya ba la sogs pa smos te/ rdul phra rab rnams dbang po las 'das pa nyid ma grub ste/ khyad par can gyi gnas skabs thob pa rnams kyi dbang pos gzung bar bya ba yin pa'i phyir ro/ /gang gi phyir rdul phra rab rnams rtag pa yin no zhes bya ba'i phyogs de la rdul phra rab rnams khyad par med pa'i phyir thams cad du dbang po las 'das pa nyid du 'gyur gyi kho bo cag la ni ma yin no/ /phan tshun du lhan cig ces bya ba ni gcig la gcig grogs byas pa zhes bya ba'i don to/ /sngon po la sogs zhes bya ba la sogs pa dbang po spyod yul de nyid ston par byed do/ /'on te rdul phra rab rnams shar dang nub la sogs pa'i phyogs kyi dbye bas gnas par 'dod kyi de dag de'i ngo bos mtshon pa ni ma yin na/ de'i phyir ji ltar 'di dag mngon sum nyid yin zhe na/ gal te'ang 'di dag shar nub tu zhes bya ba la sogs pa smos te/ mngon sum gyi gnod pa med pa ni mngon sum gnod pa med pa'i zhes bsdu ba'am/ 'di bsdu ba med pa yin te/ gnod pa yod pa ma yin pa'i phyir gnod pa med pa ste/ sbyar ba'i btung ba la sogs pa bzhin du mngon sum nyid du gnas so zhes bya ba'i don to/ /'di ltar sbyar ba'i btung ba dang / rdo tshan dang chu dang gser la sogs pa la 'dres pa'i rdul phra rab rnams de ltar dmigs te/ rigs mi mthun pa rnams rdzas mi rtsom pa'i phyir de la yan lag can gyi rdzas yod pa ma yin la rdul phra rab las tha dad pa'i ldan pa mthong ba yang mi 'thad de/ rten ma mthong ba'i phyir ro/ /gang du ldan pa can gcig kyang ma mthong ba de la ldan pa mthong ba ma yin te/ dper na sha za dang bum pa'i ldan pa dang zla ba'i dkyil 'khor dang / nam mkha'i phyogs dang yul gyi ldan pa bzhin no/ /yang gang du rdul phra rab kyi bdag nyid kyi thams cad kyi ldan bcad ma mthong ba der ji ltar de la brten pa'i ldan pa mthong bar 'gyur/ gal te de lta na rnam pa thams cad kyis ma nges na/ ji ltar 'di dag mngon sum nyid du rigs pa dang ldan pa yin zhe na/ kun las log pa'i zhes bya ba la sogs pa smos te/ tshul rol mthong ba rnams kyi dngos po mngon sum gyis bzung na yang rnam pa thams cad du nges pa ni gang na yang med de/ ji tsam du dngos po don gzhan las ldog pas byas pa'i ngo bos de nges pa de tsam du mngon sum mo zhes rnam par 'jog pa yin gyi rnam pa thams cad kyis ni ma yin no/ /rnam pa gzhan bzung du zin kyang nges pa mi 'thad pas tha snyad du mi rung ba nyid kyis ma bzung ba dang 'dra ba'i phyir ro/ /de bzhin du zhes bya ba ni ji ltar dngos po nyams su myong ba bzhin du'o/ /'on te dngos po ni cha med pa nyid kyis bdag nyid thams cad kyis mngon sum gyis nyams su myong ba'i phyir ci'i phyir bdag nyid thams cad kyis nges mi 'gyur zhe na/ rang gi mtshan nyid cha med ces bya ba la sogs pa smos te/ dbang po la yod pa ni dbang po can te/ dbang po'i shes pa zhes bya ba'i don to/ /rtog pa yod pa ma yin pa ste rtog pa med pa de yin la dbang po can yang yin no zhes tshig rnam par sbyar ro/ /des rtogs bya ni rtog pa med pa'i dbang po'i shes pas rtog par bya ba zhes bya ba'i don to/ /gang las tha dad nges pa zhes bya ba ni gang las tha dad pa ste ldog pa ni gang las tha dad pa'o/ /der nges pa ni gtan la phab pa'o/ /de'i rgyu ni goms pa dang / nye ba dang ches cher nye ba dang blo gsal ba zhes bya ba la sogs pa'o/ /nyams su myong ba tsam kho na nges pa'i rgyu ni ma yin gyi/ 'on kyang goms pa la sogs pa yang yin no/ /des na gang na de dag yod pa der nges pa skye bar 'gyur ro zhes bya ba'i don to/ /'di thams cad kyang rdul phra rab rnams grub cing phyi rol gyi don mngon sum gyis grub pa nyid du khas blangs nas brjod de/ rnam par shes par smra ba gang gi ltar na phyi rol gyi don sngon po la sogs pa'i ngo bor mngon sum gyis ma grub ste/ rmi lam la sogs pa'i phyi rol gyi don med par yang rnam pa de lta bu'i sngon po la sogs pa snang bar dmigs pas the tshom za ba'i phyir ro/ /sngon po la sogs pa'i ngo bo de yang gcig dang du ma'i rang bzhin gyis stong pa nyid kyis 'khrul pa'i shes pa snang ba'i bdag nyid yin pa'i phyir ro/ /rdul phra rab rnams kyang grub pa ma yin te/ de dag shar dang gzhan du gnas pa nyid kyis phyogs cha tha dad pas gcig tu mi 'grub pa'i phyir ro/ /de la ji ltar sngon po la sogs pa'i ngo bos rdul phra rab rnams mngon sum nyid yin/ shar dang gzhan du yang shes par mi nus te/ 'khrul pa'i rgyu mtshan gyis don gzhan sgro btags pa'i phyir ro zhes brjod par nus so/ /'di snyam du gal te yan lag can med par 'gyur na/ de'i tshe ji ltar rdul phra rab mang po dag la/ mig byed pa dag dang ldan pa ro gcig ces nges par 'gyur snyam du sems na/ ji ltar 'bar mtshungs 'byung ba'i zhes bya ba la sogs pa smos te/ ji ltar mar me la sogs pa tha dad pa yin na yang 'bar ba la sogs pa'i dngos po bar med pa 'dra ba gzhan dang gzhan 'byung ba'i phyir/ gcig nyid du 'khrul par 'gyur ba de bzhin du ches phra ba'i dngos po du ma bar med par rigs pas gcig nyid du 'khrul pa de'i phyir skyon 'di med do/ /gal te de lta na tha dad du mi dmigs pa na ji ltar rdul phra rab rnams mngon sum gyis grub par 'gyur ba yin zhe na/ rnam dbye mi ldog pa zhes bya ba la sogs pa smos te/ gal te rnam par phye nas nges par ma bzung na mngon sum du mi 'dod na/ de'i tshe mar me la sogs pa snga ma dang phyi ma'i rnam par dbye ba ma shes pa na/ de ji ltar mngon sum nyid du mthong ba yin/ yan lag can yang yan lag rnam par dbye bas ma bzung ba gang yang yod/ de bzhin du ci'i phyir mngon sum nyid du 'dod/ de'i phyir 'di ni ma nges so/ /'di tsam zhig tu 'gyur zhes bya ba la sogs pas rgol bar 'dod pa gzhan dag la slob par byed pa'o/ /'di dag ces bya ba ni rdul phra rab rnams so/ /de yang zhes bya ba ni rdul phra rab rnams rnam par phye nas mi shes pa gang yin pa de yang rdul phra rab tu gtogs pa'i sngon po la sogs pa mi 'dzin pa'i rgyu ma yin te gzhan las kyang nges pa skye bar 'gyur ba'i phyir te/ 'di ltar re zhig phyi rol gyi don yod par smra pas shes pa 'di yul med par 'dod par mi bya ste/ gzhan du na rnam par shes pa tsam nyid du lta ba kho nar 'gyur ro/ /rags pa'i ngo bo nyid kyis snang ba'i gzugs la sogs pa'i yul 'di yang gcig yin nam du ma yin grang / gcig yin na yang yan lag rnams kyis brtsams pa zhig yin nam/ ma brtsams pa zhig yin de la re zhig 'di ni gzugs sogs gnyi ga'i bdag gcig tu rigs pa ma yin te/ mngon sum la sogs pa dang 'gal ba'i phyir ro/ /'gal ba 'di gang zhe na/ rags pa gcig gi rang bzhin na/ /zhes bya ba la sogs pa smos te/ gal te rags pa gcig yin na/ de'i tshe phyogs gcig bsgribs pa na thams cad bsgribs pa dang / phyogs gcig kha bsgyur ba na thams cad kha bsgyur bar 'gyur te/ bsgribs pa dang / ma bsgribs pa dang / kha bsgyur ba dang / ma bsgyur ba dag la khyed cag gi 'dod pas tha mi dad pa'i phyir ro/ /gcig la phan tshun 'gal ba'i chos dang ldan pa rigs pa yang ma yin te/ ha cang thal bar 'gyur ba'i phyir ro/ /de ltar na/ sna tshogs rdzas gcig tu 'gyur la/ /de'i phyir lhan cig skye ba la sogs par thal bar 'gyur ro/ /phyogs gcig bsgribs pa na thams cad bsgribs par mthong ba yang ma yin pa'i phyir mngon sum dang 'gal lo/ /de bzhin du rjes su dpag pa dang 'gal ba yang yin te/ 'di ltar gang zhig phan tshun 'gal ba'i chos dang ldan pa de ni gcig ma yin te/ dper na ba lang dang ma he bzhin no/ /rags pa yang dmigs pa dang mi dmigs pa'i ngo bo dang / bsgribs pa dang ma bsgribs pa'i ngo bos 'gal ba'i chos dang ldan pa yin no zhes bya ba ni khyad par byed pa 'gal ba dmigs pa'o/ /thams cad gcig nyid du thal bar 'gyur ba ni gnod pa can gyi tshad ma'o/ /gsal byed pa na re gcig la tha dad pa med pa'i phyir thams cad kyi sgra sbyor ba mi 'thad do zhes zer te/ de 'di 'on te gcig gi rang bzhin zhes bya ba la sogs pas dogs pa bsu ste/ 'di ltar thams cad kyi sgra don du ma'i yul can yin zhing yan lag can ni du ma'i bdag nyid ma yin pa'i phyir/ de la ji ltar gang gis thams cad bsgribs par thal bar 'gyur ro zhes brjod pa thams cad kyi sgra sbyor bar byed/ gang dag ces bya ba la sogs pas lan 'debs par byed de/ 'jig rten na gos dang lus la sogs pa grub pa gang yin pa de kho na khyed cag gis yan lag can nyid du brtags te/ de la yang 'jig rten na thams cad dang phyogs gcig gi sgra dag 'jug par grub pa kho na'o/ /de skad du yang gos thams cad dmar por zhes bya ba la sogs par smra ba por 'gyur ba yin no/ /rnam pa de lta bu'i brjod par 'dod pa'i 'jig rten gang yin pa 'di/ yul shin tu ches yangs pa non par gnas pa'i ras yug la sogs pa'i dngos por rtogs pa'i dmar po la sogs par bstan par 'dod pa de la yang kho bo cag gis kyang grags pa'i rjes su 'brangs nas khyed cag la 'gal ba bsgrub pa'i phyir/ thams cad la sogs pa'i sgra sbyor bar byed pa yin no/ /khyed cag rags pa gcig nyid du khas len pa la skyon 'di 'ong gi / kho bo cag la ni ma yin no/ /kho bo cag gis ni rags pa gcig nyid du 'dod pa ma yin no/ /'di snyam du kho bo cag la yang skyon med pa kho na ste/ 'di ltar btags nas te/ 'di ni nye bar btags pa yin te/ snal ma la sogs pa'i yan lag rnams la de'i rgyu nyid kyi snam bu la sogs par brjod de/ des na thams cad la sogs pa'i sgra sbyor bar 'gyur ro snyam du sems na/ gal te de lta na tshig tha dad de/ thams cad rnams/ gos rnams dmar po rnams zhes thams cad du mang po'i tshig tu thal bar 'gyur te/ khyed cag ni mang po rnams la tshig gcig 'dod pa ma yin no/ /ci ste yang yan lag can du gtogs pa'i grangs gcig blangs nas yan lag rnams la rang gi brjod par bya ba la gnas pa'i rtags kyi grangs gos la sogs pa'i sgra mdor ba kho nar 'jug pa yin no snyam du sems na/ de yang mi rigs so zhes bstan pa'i phyir/ dngos dang btags par 'dod pa dag /ces bya ba la sogs pa smos te/ gal te bstan pa 'di brtags pa yin na de'i tshe dngos dang btags pa'i yul la blo tha dad pa'i blo ste/ mi 'dra ba 'khrul pa'i rtogs pa dang / ma 'khrul pa'i rtogs pa nyid du 'gyur na tha dad pa yang yod pa ma yin te/ 'di ltar gos thams cad dmar po zhes bya ba 'di la gos dmar ba yin gyi/ 'on kyang de'i rgyur gyur pa'i snal ma rnams la dmar po'o zhes bya ba de lta bu'i blo 'jug pa ma yin no/ /yang gi sgra las khyed cag gis gos la thams cad kyi sgras brjod par bya bar 'dod pa ma yin te/ de gcig yin pa'i phyir de ji ltar de'i grangs blangs nas thams cad kyi sgra gos la sogs pa dang lhan cig yan lag rnams la 'jug par 'gyur/ yang na dngos dang btags par 'dod pa dag gi blo tha dad pa ni sna tshogs pa nyid de/ de ni 'di la yod pa ma yin te/ gzugs dang ro la sogs pa bzhin du snal ma dang snam bu dag ngo bo tha dad par mi dmigs pa'i phyir ro / /ngo bo tha dad dag tu mi dmigs pa dag la ni dngos dang btags pa nyid yod pa ma yin no/ /'on te ldan pa zhes bya ba la sogs pas bde byed bdag pos lan 'debs pa'i dogs pa bsu ba ste/ des smras pa ngur smrig dang gur gum la sogs pa'i rdzas dang ldan pa'i gos ni dmar por brjod la/ ldan pa yang ma khyab par 'jug ste/ des na gcig dmar ba na thams cad dmar bar ni mi 'gyur la/ gos la sogs pas kyang lus kyi phyogs gcig bsgribs pa na thams cad bsgribs pa ma yin no zhe'o/ /de 'di ni mi rigs so zhes bstan pa ni/ ci ste cha shas med ces bya ba la sogs pa ste/ gal te snam bu la sogs pa rdzas gcig nyid yin na de'i tshe gang gis ldan pa ma khyab par 'jug par 'gyur ba cha shas med pa'i rdzas de la ngur smrig la sogs pas ma khyab pa ci zhig yod/ ci ste ma khyab pa'i rang bzhin gyi gnas skabs rnams khas len par byed na/ de'i tshe de'i gnas skabs na/ de nyid kyi phyir tha dad par grub ste/ khyab pa dang ma khyab pa dag 'gal bas rang bzhin gcig nyid du mi rung ba'i phyir ro/ /gcig yul shin tu ches yangs par gnas pa yang rigs pa ma yin te/ cha shas med pa'i phyir ro/ /gzhan du chu'i skye bo dang glang po che la sogs pa thams cad gcig pa nyid kyis khyad par med pa'i phyir/ rags pa dang phra ba la sogs pa'i bye brag tu mi 'gyur ro/ /yan lag nyung ngu dang ches mang bas brtsams pa la sogs pas byas pa'i khyad par yod do zhe na/ 'o na yan lag rnams nyid nyung ngu dang ches mang ba dag de lta de ltar skye ba na rags pa dang phra ba'i rnam par gzhag pa'i rgyu mtshan yin la rag mod/ de brtsams pa'i yan lag can gyis ci zhig bya ste/ de'i nus pa ma mthong ba'i phyir ro/ /yan lag rnams la nyung ba nyid dang mang ba nyid yod na yang gang gis rags pa dang phra ba la sogs pa'i bye brag tu 'gyur ba yan lag can rnams cha shas med pa nyid kyis phan tshun du khyad par 'ga' zhig yod pa ni ma yin no/ /de dag la yan lag mang ba dang nyung ba nyid bzung bas byas pa'i khyad par yod na yang yan lag can nyid du khas blangs par 'gyur te/ de nyid la rags pa la sogs par tha snyad byas pa'i phyir ro/ /de lta yin dang rdul phra rab tsam nyid mthong ba nyid du khas blangs par 'gyur te/ rags pa dang phra ba la sogs pa las ma gtogs pa gzhan ma mthong ba'i phyir ro/ /gzhan yang ldan pa ma khyab par 'jug pa yin no zhes bya ba don ci yin/ gal te rdzas thams cad la ma khyab pa yin no zhes bya ba'i don yin na/ de mi rigs te rdzas la thams cad kyi sgra'i yul ma yin pa nyid du khas blangs pa'i phyir ro/ /ci ste don gyi phyogs gcig la/ 'jug pa'o zhes bya ba yin na de yang mi rigs te/ de la phyogs gcig med pa'i phyir ro/ /de rtsom par byed pa'i yan lag la 'jug pa yin no zhe na/ gal te de lta na yan lag rnams nyid dmar po yin pa'i phyir la/ yan lag can gyi ngo bo dmar po ma yin pa'i phyir dmar po dang dmar po ma yin pa mtshungs par mthong bar 'gyur ro/ /gzhan yang gang yang de'i rtsom par byed pa'i yan lag 'di gal te yan lag can gyi ngo bo yin na/ de'i tshe de la yang ldan pa'i phyogs gcig tu 'jug pa nyid do zhes brgal zhing brtags pa mtshungs so/ /ci ste rdul phra rab kyi ngo bo yin na de'i tshe rdul phra rab rnams dbang po las 'das pa yin pa'i phyir/ de la brten pa'i ldan pa yang dbang po las 'das pa yin pa'i phyir dmar por dmigs par mi 'gyur ro/ /'di snyam du dper na sor mo'i gzugs khyab pa rten dmigs pa kho na na dmigs par 'dod pa de bzhin du ldan pa ni rten dmigs pa kho na na dmigs pa ma yin pas des na 'di ma khyab par 'jug par brjod pa yin no snyam du sems na/ de ni yang dag pa ma yin te/ dper na bum pa dang sha za ba'i ldan pa bzhin du rten dmigs pa'i ldan pa dmigs pa yod pa ma yin no/ /de lta yin dang dmar po yang rten ma dmigs par mi mthong la rten dmigs pa nyid na dmigs pa yin pa'i phyir/ de ltar de yang khyab par 'jug par 'gyur ro/ /'di snyam du dmar po ma yin pa'i yan lag gzhan la 'du ba'i rdzas dmigs na yang ldan pa'i bdag nyid kyi dmar po dmigs pa ma yin no/ /des na 'di rten dmigs pa na dmigs pa ma yin no snyam du sems na/ de yang mi rigs te/ de ltar na dmar po dang dmar po ma yin pa la 'du ba'i yan lag can ni gcig yin pa'i phyir dmar po'i yan lag la yang de'i sgo nas dmar po mi dmigs par thal bar 'gyur te/ rten dmigs na yang de ma dmigs pa'i phyir ro/ /rten dmigs pa las gzhan pa'i ldan pa 'dzin pa'i thabs yod pa ma yin no/ /de lta bas na ngo bo gcig pa yul yin par rigs pa ma yin no/ /du ma'i ngo bo yin na yang shugs kyis rdul phra rab 'dus pa'i bdag nyid kho nar gnas pa yin te/ yan lag gi yod pa ni gcig nyid du mi rung ba'i phyir ro / /de'i phyir bum pa la sogs pa rnams rdul phra rab kyi ngo bo nyid du grub la/ des na sngon po la sogs pa rdul phra rab kyi rnam pa yin par grub ste/ gzhan yul gcig med pa'i phyir ro/ /gang yang / rdul phran brjod pa la'ang med par 'gyur/ /zhes smos pa de la/ de nyid don ni mi shes pa'i/ /zhes bya ba la sogs pa smos te/ brtags pa de la ltos pa can/ /zhes bya ba ni brtags pa'i rags pa de la ltos pa gang la yod pa zhes tshig rnam par sbyar ro/ /lan gzhan bshad pa ni yang na rgyu mtshan zhes bya ba la sogs pa ste/ de 'dra'i zhes bya ba ni cha med pa la thogs pa dang bcas pa la ste/ dper na dbul po la yang phyug po'i ming sgra brda'i dbang gis phyug por brjod pa'i rgyu mtshan med par yang 'jug pa de bzhin du rdul phra rab kyi sgra 'di yang zhes bya ba la skyon med do/ /re zhig de ltar spyir yan lag rnams kyis brtsams pa'am ma brtsams pa yang rung ste/ rags pa'i rdzas gcig mi 'thad do zhes bsgrubs nas da ni gang gis yan lag dag gis brtsam par 'dod pa de'i khyad par sun dbyung ba'i phyir/ snal ma dang ni zhes bya ba la sogs pa smos te/ sbyor ba ni gang du ma yin pa de ni rdzas gcig gis rjes su 'jug pa ma yin te/ dper na rtsig pa la sogs pa mang po rnams rdzas gcig gis rjes su 'jug pa ma yin pa bzhin no/ /snal ma dang lag pa la sogs pa 'di yang du ma yin no zhes bya ba ni khyab byed 'gal ba dmigs pa'o/ /yang na gang gcig yin pa de ni rdzas du ma la brten pa ma yin te/ rdul phra rab gcig bzhin no/ /yan lag can gyi ming can gyi rdzas kyang gcig yin no zhes bya ba ni khyab par byed pa 'gal ba dmigs pa'o/ /'di ni thal ba bsgrub pa yin no/ /sbyor ba gnyis ka la yang bzlog pa la gnod par byed pa'i tshad ma bshad pa ni/ 'jug par ni mi rigs gnod pa'i tshad ma yin zhes bya ba'o/ /yan lag rnams la yan lag can 'jug pa gang yin pa de mi rung bar tshad ma dag gis bsgrubs pa de ni 'dir gnod pa can gyi tshad ma'o/ /yang ji ltar mi rung zhe na/ de gcig la 'jug rten zhes bya ba la sogs pa smos te/ rdzas gcig po de yan lag gcig gis bzung ba de'i gang yin de nyid kyi yan lag las yan lag gzhan dag la 'jug par 'gyur ba'am/ gzhan gyis yin zhes bya ba phyogs gnyis so/ /dngos po la ni de nyid dang gzhan dag las ma gtogs pa'i rnam pa gzhan yod pa ma yin no/ /de la re zhig phyogs dang po ni ma yin te/ rdzas de ni yan lag gcig gis bzung ba'i phyir/ rdzas 'di nyid kyi tshe yan lag gzhan la 'jug pa'i go skabs yod par ga la 'gyur/ gzhan du na gal te gzhan la 'jug par 'gyur ba de'i tshe 'dir mngon par 'dod pa'i rdzas nyid du bdag nyid thams cad kyis 'jug par mi 'gyur te/ gang gis gzhan la yang 'jug par 'gyur ba de la rang bzhin gzhan yod pa ni ma yin te/ gcig nyid nyams par thal bar 'gyur ba'i phyir ro/ /tshad ma dgod pa'i phyir/ dper na bu chung zhes bya ba la sogs pa smos te/ sbyor ba ni gang dngos po gcig gis bzung ba'i dngos po de ni de nyid kyi tshe gzhan du 'jug pa ma yin te/ dper na ma ma gcig gis pang du blongs pa'i bu chung ma ma gzhan gyis pang du blangs pa mi bsten pa bzhin no/ /rdzas kyang yan lag gcig gis yongs su bzung ba yin no zhes bya ba ni khyab par byed pa 'gal ba dmigs pa'o/ /rdzas ni gzhan la rten ma yin/ /zhes bya ba ni tshad ma'i 'bras bu ston pa'o/ /bsgrub bya las bzlog pa la gnod par byed pa'i tshad ma 'di bshad pa de dang 'brel pa'i rang bzhin can zhes bya ba la sogs pa la/ mngon par 'dod pa'i yan lag dang 'brel ba'i rang bzhin gyi rdzas de min yul du ste yan lag can la gal te 'jug par 'gyur na/ de'i tshe yan lag de dag yul gcig pa nyid du 'gyur ro / /de lta yin dang gcig bdag nyid de yan lag rnams rang bzhin gcig tu 'gyur ro/ /de ci'i phyir zhe na/ dbyer med phyir te/ rnam par ma phye ba'i ngo bo nyid kyis gnas pa'i phyir ro/ /de lta ma yin na rnam par phye ba'i ngo bor gnas pa na yul gcig pa nyid du mi 'gyur ro/ / ci ste rang bzhin gzhan gyis zhes bya ba phyogs gnyis pa yin na/ de'i tshe gcig du ma la gnas pa zhes bya ba 'grub par mi 'gyur te/ rang bzhin gzhan du 'jug pa'i phyir te/ dngos po tha dad pa ni rang bzhin tha dad pa'i bdag nyid yin pa'i phyir ro / /gsal byed pa na re yan lag rnams yan lag can 'jug go zhes bya ba 'di ni rten dang brten pa'i chos bstan pa tsam yin te/ khyab par 'jug pa ni brten pa'i dngos po'i mtshan nyid 'du ba'i ngo bo la brjod do zhes zer ba de la/ de de rnams zhes bya ba la sogs pa smos te/ de la yang ste rnam pa de lta bu'i 'jug pa la ci yan lag gcig la 'du ba'i rang bzhin de nyid kyis yan lag gzhan dag la 'jug gam 'on te gzhan gyis yin zhes bya ba de ma thag tu bstan pa'i rnam par dpyad pa 'di blo gros ngan pas bkod pa'i skyon gyi dra ba 'di mi bzod pa na khros pa bzhin du snyeg go/ /de ltar re zhig ma lus pa dang phyogs gcig gi rnam par rtog pa byas nas 'jug pa bsal nas/ da ni nye bar btags pa sgrub pa'i rnam pas 'jug pa dgag pa'i phyir/ yang na zhes bya ba la sogs pa smos te / res 'ga' rdzas de yan lag re re la bdag nyid thams cad kyis sam/ phyogs gcig gis 'jug par 'gyur grang gal te bdag nyid thams cad kyis na de'i tshe yan lag rnams ji snyed pa de snyed kyi de'i bdag nyid thob par 'gyur ro/ /yan lag re re la de'i rang bzhin tha dad pa na bdag nyid thams cad kyis 'jug pa yod pa ma yin no / /yod pa ma yin pa'i bdag nyid kyis 'jug pa mi srid pa'i phyir ro/ /de lta bas na bdag nyid thams cad kyis cig car 'jug pa'i phyir 'khar gzhong la sogs pa du ma na gnas pa'i ut+pal la sogs pa bzhin du yan lag can rnams du mar 'gyur ro/ /yang phyogs gcig gis zhes bya ba'i phyogs yin na de'i tshe phyogs gcig pa rnams thug pa med par 'gyur te/ 'di ltar rdzas de phyogs gcig po gang dag gis yan lag rnams la 'jug la/ de dag kyang de'i phyogs gcig la zhes bya la/ de dag la yang 'dis 'jug par bya dgos la/ de kho na bzhin du gzhan dag la yang yin pa'i phyir mtha' med do/ /yang ci ste 'di phyogs gcig po gang dag gis yan lag rnams la 'jug pa de dag de'i rang gi bdag nyid du gyur pa kho na yin/ don gzhan du gyur pa ma yin la/ de las ma gtogs pa'i phyogs gcig po gzhan med pas des na mthar thug par mi 'gyur ro snyam du dogs pa bsu nas/ de gcig min pa'am zhes smos te/ de lta yin na yan lag can gcig ces bya bar mi 'gyur te/ de'i yan lag 'dus pa tsam gyi ngo bo yin pa'i phyir ro/ /de lta yin dang 'di ma mthong ba'i lag pa la sogs pa'i tshogs 'dus ba tsam gyi bdag nyid yin la rag mod/ de'i bdag nyid du gyur ba'i yan lag can gzhan kun du brtags pas ci zhig bya/ skyon gzhan yang bshad pa/ gang du'ang min zhes bya ba ste/ 'jug par gyur pa zhes bya ba lhag ma'o/ /'di skad du bstan pa yin te/ gal te yan lag can re re phyogs gcig tu gyur na/ de'i tshe yan lag rnams la yan lag can 'jug par 'gyur ro/ /gang gi phyir yan lag can re re phyogs gcig pa ma yin na/ de dag gi phyogs gcig pa nyid nyams par thal bar 'gyur ba'i phyir ro/ /yan lag can gzhan gyi ngo bos kyang yod pa ma yin na de'i phyir ji ltar 'di yan lag rnams la 'jug pa zhes bya ba/ 'on te rang rgyud ces bya ba la sogs pas bde byed bdag po'i dogs pa bsu ba ste/ des smras pa/ rang rgyud dam thal bar 'gyur ba'i sgo nas sgrub par byed pa gang yin pa de rang nyid dmigs pa yin na 'thad par 'gyur gyi de lta ma yin na ma grub pa'i skyon du 'gyur ro/ /khyed cag gis ni gcig du ma la ma lus pa dang phyogs gcig dag gis 'jug pa gang du yang mi dmigs te/ gang gi 'jug pa yod pa ma yin pa'i phyir yan lag can gyi rdzas med par 'gyur ba'am yod pa yin na gzhan du'ang ste/ yan lag gam yan lag can du yang 'gyur ro/ /kha cig tu gang gi yod pa ma yin pa'i phyir zhes 'don pa der ni 'di ltar sbyar te/ ci rigs par gang gi 'jug pa yod pa dang gang gi 'jug pa yod pa ma yin pa na rdzas med par 'gyur ba'am/ de gzhan du'ang ste yan lag gam yan lag can du 'gyur ro zhe'am / ci ste la lar rnam pa de lta bu'i 'jug pa dmigs par gyur na/ de'i tshe de bzhin du de'i rdzas la sogs pa la yang 'gyur ba'i phyir dgag tu med do/ /'on te yang 'jug pa ma mthong na de'i tshe ci phyogs gcig gis sam/ 'on te bdag nyid thams cad kyis zhes bya ba de lta bu phye ste dri bar mi rigs so/ /chos can grub na khyad par 'gag par rigs kyi/ gang gi tshe chos can nyid ma grub pa de'i tshe de nyid dgag pa bzang ngo / /des na 'jug pa nyid med do zhes bya ba de tsam zhig brjod par bya'i/ khyad par dgag pa ni ma yin no/ /de yang mi rigs te/ mngon sum kho nas yan lag rnams la yan lag can 'jug par grub pa'i phyir ro/ /mngon sum ci 'dra ba las zhe na/ 'di la 'di zhes pa'i mngon sum blo yis zhes bya ba smos te/ snal ma 'di la sogs pa 'di zhes bya ba'i de lta bur gyur pa'i mngon sum las zhes bya ba'i don to/ /yang ci ste blo 'di mngon sum nyid du ma grub po snyam na/ gal te de lta na gang las mngon sum nyid ma yin par 'gyur ba 'di la gnod par byed pa'i tshad ma cung zhig brjod dgos so / /ci ste gnod par byed pa'i tshad ma med par yang mngon sum nyid du mi 'gyur na/ 'o na de lta na khyed cag gi gzugs la sogs pa'i shes pa yang mngon sum nyid du mi 'gyur te khyad par med pa'i phyir ro/ /'di la zhes bya ba la sogs pas lan 'debs par byed de/ de gcig la 'jug rten zhes bya ba la sogs pas spyir gcig du ma la 'jug pa sngar bsal zin te / /gang yang 'di la 'di'o snyam pa'i blo'i mngon sum nyid kyis 'jug pa grub bo zhes 'di brjod pa de yang 'jig rten dang mi mthun te/ 'jig rten na rwa can 'di la ba lang snal ma 'di la snam bu zhes bya ba de lta bu'i rnam par rtog pa'i blo yang ji ltar 'jug pa ma yin no/ /'o na ci zhe na/ /ba lang 'di la rwa snam bu 'di la snal ma rnams snyam pa yin no/ /mngon sum gyi blo la snal ma la sogs pa 'du ba de las tha dad pa'i gos la sogs pa'i rang bzhin snang ba yang ma yin la/ rnam par phye nas mi snang ba ni 'di 'di las 'jug go zhes bya ba'i blor 'gyur ba yang ma yin no/ /khar gzhong la sogs pa la chu phye nas mi snang ba na 'di na chu'o zhes shes par 'gyur ba ma yin no/ /gang yang ma lus pa'am/ phyogs gcig gis 'jug pa gang du'ang ma dmigs nyid ces smras pa de la/ ma lus phyogs gcig sgra dag gis/ /zhes bya ba la sogs pa smos te/ ma lus pa'i sgras dper na snod 'ga' zhig tu bzhag pa'i dpal gyi 'bras bu la sogs pa dmigs pa bzhin du/ ci rang gi ngo bo cha shas med pa ci 'dra ba de lta bu kho na'i cha shas med pa'i yan lag thams cad nyid kyis de la 'jug pa zhes bya ba'i don 'di bstan pa yin nam/ 'on te phyogs gcig gi sgras dper na gnas mal du ma na nyal ba'i nag pa la sogs pa dmigs pa bzhin du rnam pa gzhan du zhes bya ba 'di bstan pa yin zhes bya ba yin pas 'di ni cir yang mi rung ngo / /gang yang gsal byed pa na re yan lag can gcig la ma lus pa dang phyogs gcig gi sgra 'jug pa mi srid pa'i phyir ci phyogs gcig gis 'jug gam/ 'on te ma lus pas 'jug ces bya ba'i dri ba 'di rigs pa ma yin no/ /ma lus pa zhes bya ba ni mtha' dag rjod par byed la/ phyogs gcig ces bya ba yang du ma nyid yin na yang 'ga' zhig brjod pa yin no/ /ma lus pa dang phyogs gcig gi sgra de dag yan lag can gcig la mi 'thad do zhes zer ba de yang 'di nyid kyis bsal ba yin no/ /de skad du 'jig rten na snam bu 'di ma lus pa'am/ phyogs gcig gis gzhong pa na gnas so zhes bya bar snam bu la sogs pa la ma lus pa dang phyogs gcig pa'i sgra 'jug pa mthong ba nyid yin no/ /'di nye bar btags pa yin no zhes bya ba yang rigs pa ma yin te/ 'khrul pa med par 'jug pa'i phyir ro zhes bya ba 'di ni sngar bshad zin to/ /de ltar rlung gi mthar thug pa'i rdzas rnam pa bzhi po bsal te / bdag ces bya ba ni bdag rtag par dang po nyid du bsal nas/ da ni nam mkha' dang dus dang phyogs dang yid rnams dgag pa'i phyir/ 'jig pa la sogs gtan tshigs kyis/ /zhes bya ba la sogs pa smos te/ de la re zhig gzhan dag gis nam mkha' zhes bya ba'i rdzas sgrub par byed de/ nam mkha' zhes bya ba'i rdzas rtag pa gcig pu sgra'i rtags can yod do/ /'di'i rtags ni sgra yin te yon tan yin pa'i phyir ro/ /sbyor ba ni gang dag 'jig pa dang skye ba dang ldan pa la sogs pa'i chos dang ldan pa de dag 'ga' zhig la brten pa yin te/ bum pa dang mar me la sogs pa bzhin no/ /sgra 'di dag kyang de bzhin te/ de lta bas na 'di dag gis 'ga' zhig la brten par 'gyur bar bya dgos so/ /gang 'di dag gi rten de ni shugs kyis nam mkha' ste nam mkhar 'gyur ba yin no/ /de ltar sgra 'di ni sa la sogs pa bzhi po rnams kyi yon tan du rigs pa ni ma yin te/ mngon sum nyid yin pa na yon tan gyi rgyu sngon du 'gro ba can ma yin pa'i phyir dang / rdzas ji srid du 'byung ba ma yin pa'i phyir dang / rten las gzhan du dmigs pa'i phyir ro/ /reg pa dang ldan pa'i yon tan dag ni ji skad du bshad pa'i chos las bzlog pa yin par mthong ngo / /mngon sum nyid yin pa na zhes bya ba'i khyad par ni rim par 'byung ba'i rdul phra rab tu gtogs pas ma nges pa nyid bsal ba'i don du'o/ /phyi'i dbang po'i mngon sum yin pa'i phyir dang / bdag gzhan gyis gzung bar bya ba yin pa'i phyir/ nga rgyal gyis rnam par phye nas 'dzin pa'i phyir bdag gi yon tan ma yin te/ bdag gi yon tan bde ba la sogs pa rnams ni de las bzlog par mthong ba'i phyir ro/ /rna bas gzung bar bya ba yin pa'i phyir phyogs dang dus dang yid kyi ma yin no/ /des na lhag par gyur pas yon tan du gyur pa'i nam mkha'i rtags yin no/ /nam mkha' de yang sgra'i rtags can du khyad par gyi rtags med pa'i phyir gcig yin na/ yon tan thams cad du dmigs pa'i phyir khyab pa yin no/ /yon tan can yin pa'i phyir dang brten pa ma yin pa'i phyir rdzas so/ /ma byas pa'i phyir rtag pa'o zhes bya ba 'di ni gzhan dag gi tha snyad yin no/ /sngon dang phyis sogs zhes bya ba la sogs pas dus dgag pa'i phyir bshad pa ste/ rdzas kyi sgras gnyer ma dang skra dkar la sogs pa gzung bar bya'o/ /sngon ni pha'o/ /phyi ma ni bu'o/ /cig car dang / yun ring mo dang myur du dang byed pa dang / byas pa dang / byed par 'gyur ba zhes bya ba gang yin pa 'di sngon dang phyis la sogs pa'i shes pa de ni nyi ma la sogs pa'i bya ba dang / rdzas las tha dad pa'i rgyu mtshan can yin te/ gnyer ma dang skra dkar la sogs pa'i shes pa dang mi 'dra ba'i phyir/ bum pa la sogs pa'i shes pa bzhin no/ /'di'i rgyu gang yin pa de yang shugs kyis dus yin no/ /'di ltar re zhig sngon dang phyi ma'i shes pa 'di yul gyis byas pa ma yin te/ phyi ma'i phyogs cha na gnas pa'i rgan po la sngon zhes shes pa skye ba'i phyir dang / de bzhin du snga ma'i phyogs cha na gnas pa'i gzhon nu ma yang phyi ma zhes bya ba yin pas so/ /skra dkar dang gnyer ma la sogs pas byas pa yang ma yin te/ de'i shes pa dang 'dra ba'i phyir ro/ /bya ba byas pa yang ma yin te/ de'i shes pa dang mi 'dra ba nyid kyi phyir ro/ /de skad du yang mdo las 'phyi ba dang / snga ba dang cig car ba dang cig car ma yin pa dang / yun ring po dang / myur du zhes bya ba ni dus kyi rtags dag yin no zhes 'byung ngo / /'di'i mi rtag pa nyid dang gcig nyid la sogs pa'i chos rnams ni nam mkha' bzhin du rtogs par bya'o/ /phyogs bsgrub pa'i don du shar dang nub la sogs blo rnams las zhes bya ba smos te/ lus can gyi rdzas kyi dbang du byas nas lus can gyi rdzas dag kho na la de las 'di ni shar ro/ /lho dang / nub dang / byang dang / shar lho dang / lho nub dang / nub byang dang / byang shar dang / 'og dang steng la sogs pa zhes bya ba shes pa bcu po 'di dag las byung ba de ni phyogs zhes bya'o/ /de skad du yang mdo las/ 'di'o snyam pa gang las yin pa de ni phyogs kyi rtags yin no zhes 'byung ngo / /gang las 'di'o zhes bya ba ni khyad par gyi shes pa yin la/ khyad par gyi shes pa yang glo bur bar rigs pa ma yin no/ /phan tshun du lus can gyi rdzas la ltos pa yang ma yin te/ phan tshun bsten pa nyid kyis gnyi ga med par thal bar 'gyur ba'i phyir ro/ /de'i rgyu mtshan gzhan med pa'i phyir rtags 'di dag ni phyogs kyi yin no/ /phyogs de'i yang gcig pa nyid dang / rtag pa nyid dang / khyab pa nyid la sogs pa'i yon tan rnams ni dus gzhan du shes par bya'o/ /phyogs gcig yin na yang 'bras bu'i khyad par las shar la sogs pa'i bye brag gis sna tshogs pa nyid yin no/ /sbyor ba ni gang 'di shar dang nub la sogs pa'i shes pa de ni lus can gyi rdzas las tha dad pa'i dngos po'i rgyu mtshan can yin te/ de'i shes pa dang mi 'dra ba'i phyir bde ba la sogs pa'i shes pa bzhin no/ /yid kyi rtags bshad pa/ shes pa rim gyis zhes bya ba la sogs pa smos te/ dbang po dang don du ma phrad pa cig car nye bar yod na yang shes pa rim gyis skye bar mthong ba'i phyir ro/ /gang zhig nye ba dang mi nye ba dag las shes pa skye ba dang / mi skye bar 'gyur ba dbang po dang don las ma gtogs pa'i rgyu gzhan yod pa yin no/ /de'i phyir shes pa rim gyis skye ba na ste shes pa 'byung bas yid rjes su dpog par byed do/ /de skad du yang mdo las shes pa cig car mi skye ba ni yid kyi rtags so zhes 'byung ngo / /sbyor ba ni gang 'di gzugs la sogs pa rtogs pa de ni/ mig la sogs pa las ma gtogs pa'i rgyu la ltos pa yin te/ rim gyis skye ba'i phyir/ shing rta la sogs pa bzhin no zhes bya ba'o / /zin sogs zhes bya ba la sogs pas lan 'debs par byed de/ gal te spyir sgra 'di dag brten pa yin pa tsam zhig sgrub na de'i tshe gtan tshigs grub pa la sgrub pa yin te/ 'di ltar sgra rnams ni zin pa dang ma zin pa'i 'byung ba chen po'i rgyu can du 'dod pa yin te/ de dag kyang 'byung ba rnams la de'i 'bras bu nyid kyis brten pa kho na yin te/ de dag la zhes bya ba ni zin pa la sogs pa de dang 'brel pa'i bdag nyid thob pas 'bras bu rnams ni rgyu rnams la brten pa'i phyir ro/ /zin pa ni sems dang / sems las byung ba rnams kyis bdag gir byas pa'o/ /sogs pa'i sgras ma zin pa'i 'byung ba chen po'i rgyu can nyid bzung ngo / /de dag la zhes bya ba ni zin pa la sogs pa'i 'byung ba chen po rnams la'o/ /phyir zhes bya ba ni de'i phyir zhes bya ba'i don to/ /snga ma zhes bya ba ni/ sgra rnams 'ga' zhig la brten te zhes bya ba la sogs pa gang smras pa de ni grub pa la sgrub pa'i skyon yod pa'i phyir sgrub byed ma yin no/ /snyam du bsams pa yin no/ /ci ste lus can ma yin pa rtag pa gcig pu khyab pa'i rdzas dang 'du ba nyid kyis 'di dag khyad par can la brten par sgrub par 'dod na/ de'i tshe bsgrub bya rjes su 'gro ba'i dpe med pa'i phyir/ gtan tshigs gis ma nges pa yin no zhes bya ba 'di ston pa ni nam mkha' gcig ces bya ba la sogs pa'o/ /'di dag ces bya ba ni 'grub min zhes bya ba snga ma dang 'brel to/ /dam bca' ba yang rjes su dpag pa dang 'gal ba nyid yin no zhes ston pa ni/ de bzhin rim min sogs thob 'gyur/ /zhes bya ba'o/ /'di dag ni ji skad du bshad pa'i nam mkha' dang 'du ba mi 'grub bo zhes 'brel to/ /gal te 'di dag rtag pa dang gcig pu'i nam mkha'i rdzas dang 'du bar gyur na/ de'i tshe cig car skyes pa'i sgra du ma bzhin du de ma yin pa'i 'dus pa'i sgra dag kyang mngon par 'dod pa'i dus kho nar 'gyur te/ rgyu ma tshang ba med pa'i phyir dang / rten gcig pa'i phyir ro/ /rtag pa 'di gzhan la ltos pa yang ma yin no zhes bya ba 'di ni bstan zin to/ /phan 'dogs par byed pa ma yin pa yang 'du ba nyid du mi rigs te/ ha cang thal bar 'gyur ba'i phyir ro/ /de'i phyir de ltar rim can ma yin par thal bar 'gyur ro/ /sogs pa'i sgras ni skyes bu thams cad kyis 'dzin pa la sogs pa'i skyon du yang thal bar 'gyur ro/ /'di ltar rna ba ni nam mkha'i bdag nyid yin la/ nam mkha' yang gcig nyid yin te/ de lta yin dang der phyin pa'i sgra rnams thams cad kyis kyang thos par 'gyur ro/ /de ni cha shas med pa nyid kyis 'di ni bdag gi rna ba'o/ /'di ni gzhan gyi'o zhes bya ba ni so sor nges pa 'di ni mi rigs so/ /'di snyam du gang gis ma mthong ba'i 'du byed kyis rna ba'i sbubs su der yongs su gcod pa'i nam mkha' ni rna ba nyid yin te/ de nyid kyi phyir kha dang sna la sogs pa'i bu ga'i nang du sgra dmigs pa 'byung ba yin no/ /rna ba'i sbubs de nyid la gnod pas 'on pa la sogs par gzhag go zhes bya bar 'dod na/ 'di yang mi rigs pa kho na ste/ nam mkha' ni cha med pa nyid kyis rnam pa de lta bu'i dbye ba mi rung ba'i phyir ro/ /kun du brtags pa'i yan lag gi rnam par dbye ba rnams ni don dam par dngos po'i rnam par dbye ba sgrub par byed pa don byed pa sgro btags pa'i dbang gis bsgrub par nus pa ma yin te/ chu la me zhes nye bar btags pa na 'bar ba'am sreg par byed pa ni ma yin no/ /ci ste nam mkha'i phyogs gcig ces bya ba ni/ ldan pa ma khyab par 'jug pa nyid brjod pa yin par 'dod do zhes bya ba 'di yang spangs pa nyid yin no/ /gzhan yang bum pa dang rna ba'i sbubs la sogs pa yang tha mi dad pa'i nam mkha' gcig dang 'brel pa nyid kyis yul mtshungs pa nyid du 'gyur ro/ /nam mkha'i rang bzhin gang yin pa kho nas gcig dang 'brel pa de kho nas gzhan la yang yin no / /de ltar na gzhan na yod pa'i bum pa la sogs pa yang mngon sum 'dod pa'i yul du 'byung ba kho nar 'gyur te/ de dang 'brel pa'i rang bzhin gyi nam mkha' dang ldan pa'i phyir/ de'i yul na gnas pa'i bum pa la sogs pa bzhin no/ /de nyid kyi phyir sgra rnams kyang yul gcig pa nyid du 'gyur ro/ /de lta yin dang dngos po 'ga' zhig shin tu nye ba dang ring ba'i yul tha dad na gnas par shin tu grags pa gang yin pa de 'gal bar 'gyur ro zhes bya ba de lta bu la sogs pa'i nyes pa mang po 'jug par 'gyur ro/ / de bzhin du dus dang phyogs sgrub par byed pa dag la yang spyir grub pa la sgrub la khyed par du gtan tshigs rjes su 'gro ba ma grub cing dam bca' ba yang rjes su dpag pa dang 'gal ba yin no zhes ston pa ni/ khyad par can gyi brda 'byung ba'i zhes bya ba la sogs pa'o/ /khyad par can gyi brda ni mdun dang rgyab la sogs pa las skyes pa'i don rnams la mdun dang rgyab kyi brda'o/ /de las byung ba'i yid la byed pa ni rtsol ba'o/ /de 'di la rgyu mtshan du yod pa de la de skad ces bya'o/ /de nyid kyi phyir phan tshun bsten pa'i nyes pa med de/ shes pa 'di ni khyad par can gyi dngos po'i brda'i rgyu mtshan yin pa'i phyir ro/ /de'i phyir rgyu tsam sgrub na grub pa la sgrub pa yin no/ /khyad par grub na rjes dpag pas gnod pa dang / rjes su 'gro ba med pa yang snga ma bzhin no zhes ston pa dang / gtan tshigs kyang 'dod pa las bzlog pa sgrub par byed pa'i phyir 'gal ba nyid yin no zhes ston pa ni/ cha med dngos gcig ces bya ba la sogs pa'o/ /de dag ces bya ba ni dus dang phyogs dag go/ /mdun rgyab la sogs pa'i shes pa dus dang phyogs zhes bya ba dngos po cha med pa gcig pa zhig rgyu mtshan can du 'dod/ de yang ma grub ste/ 'di ltar rang gi rnam pa'i rjes su byed pa'i shes pa skyed par byed pa'i yul yin te gang gis mdun dang rgyab la sogs pa'i [(]shas [,]shes [)]pa des byas par 'gyur ba cha shes med pa la ni mdun dang rgyab la sogs pa'i rnam par dbye ba yod pa yang yin no/ /de'i phyir 'dod pa las bzlog pa sgrub par byed pa'i phyir gtan tshigs 'gal ba yin no/ /gal te 'brel ba can tha dad ces bya ba 'dis gzhan gyi len dogs par byed do/ /ci ste yang gang phyogs dang dus dang 'brel pa can gyi phyi dang nang gi dngos po me mar dang lus la sogs pa de dag la mdun dang rgyab la sogs pa yod pa yin te/ des na dus dang phyogs de dag kyang 'brel pa can du gtogs pa'i mdun rgyab la sogs pa 'di bstan pa yin te/ de'i phyir gtan tshigs 'gal ba ma yin no snyam du 'dod pa yin no/ /'dir lan smras pa/ de lta na ni/ de dag don med ma yin nam/ /zhes bya ba ste/ de ltar rtog na dus dang phyogs de dag med par 'gyur ba yin te/ de'i bsgrub par bya ba mngon par 'dod pa'i 'bras bu 'brel pa can de nyid kyis bsgrubs pa'i phyir ro/ /'di ltar dus ni/ snga ma dang / phyi ma dang / skad cig dang / thang cig dang / mig btsums pa dang / mthar dang / cha dang / yud tsam dang / nyin zhag dang / zla ba phyed dang / zla ba la sogs pa'i shes pa skye ba'i rgyu yin la/ phyogs kyang shar dang nub la sogs pa rnam par 'jog pa'i rgyur 'dod de/ tha dad pa 'di mtha' dag kyang de dag gi bdag nyid la yod pa tha dad pa dag la yang yod pa'i phyir tha dad pa dag la yang yod par kun du rtog pa de ni don med do/ /yid sgrub par byed pa'i gtan tshigs kyang spyir rgyu tsam sgrub na grub pa la sgrub pa yin no zhes ston pa ni/ mig la sogs pa las gzhan pa zhes bya ba la sogs pa'o/ /khyad par du rtag pa gcig pu'i yid sgrub par byed na rjes su 'gro ba med pa dang / dam bca' ba la rjes su dpag pas gnod pa dang / gtan tshigs kyang 'gal ba yin no zhes ston pa ni/ yid ni rtag na zhes bya ba la sogs pa ste/ 'dod pa la gnod pa byed par 'gyur zhes bya ba ni/ mig la sogs pa las tha dad pa'i mi rtag pa'i rgyu la ltos pa dang bcas pa nyid du sgrub par byed pa'i phyir ro/ /de lta ma yin te rgyu rtag pa nyid yin na rgyu ma tshang med pa'i phyir shes pa rnams rim gyis skye ba 'gal bar 'gyur ro/ /gtan tshigs 'gal ba de nyid bzhad gad du byed pa sngon du 'gro bas bstan par bya ba'i phyir/ bde gshegs pa dang zhes bya ba la sogs pa smos te/ de nyid kyi phyir bde bar gshegs pa dang / mu stegs byed dag 'dod pa'i yid grub pa dang ma grub par bya ba'i phyir/ shes pa cig car mi skye ba ni yid kyi rtags ma yin no zhes bya ba'i mdo 'di byas pa yin te/ phyogs gcig la dgag pa'i tshig gdon par bya ba'i phyir ro snyam du sems te/ bsdus pa'i don to/ /yan lag gi don brjod pa/ bde gshegs pa dang phyi rol pa ste mu stegs pa de dag gis bstan pa yang de dag yin la/ yid kyang yin zhes tshig rnam par sbyar ro/ /de dag go rims bzhin du grub pa dang ma grub pa'am/ yang dag par grub pa'am/ lhan cig pa'i grub pa de'i phyir te/ de'i rgyu mtshan du'o/ /de yang ji ltar mdo gcig gis don 'gal ba gnyis go bar byed ce na dgag bcas zhes bya ba la sogs pa smos te/ dgag pa dang lhan cig tu 'jug pa zhes bya ba gzhan gyi yid ma grub par bya ba'i phyir rtags ma yin no zhes dgag pa'i tshig bton nas bstan la/ bde bar bshegs pa pa'i yid grub par bya ba'i phyir gzhan du dgag pa med pa zhes bya ba'i don to/ / yang 'on te ji ltar tshig gcig la dgag pa dang bcas pa dang dgag pa med pa gnyis 'grub par 'gyur zhe na/ bzlas pa yis zhes bya ba la sogs pa smos te/ 'di bzlas pa'i tshul gyis zhes bya ba'i tha tshig go/ /de kho na nyid bsdus pa'i dka' 'grel las/ rdzas kyi tshig gi don brtag pa ste bco lnga pa'o/ / //yon tan la sogs pa rnams dgag pa'i phyir rdzas rnams zhes bya ba la sogs pa smos te/ rdzas rnams bkag pa nyid kyis yon tan dang las la sogs pa khyad par gyi mthar thug pa rnams bsal ba yin te/ de dag ni de la brten pa nyid yin pa'i phyir ro/ /rten med pa na yang brten pa rnams gzhan gyi dbang nyid kyis gnas pa mi 'thad pa'i phyir ro/ /der brten pa ste de ltar 'dod pa zhes bya ba ni dngos sam brgyud pas rdzas la brten pa nyid du 'dod pa'o/ /'di ltar yon tan dang las dag ni dngos kho nar rdzas la brten pa nyid du 'dod de/ de skad du yang mdo las/ yon tan gyi mtshan nyid ni rdzas la brten pa/ yon tan gyi ldan pa dang / rnam par dbye ba dag la rgyu ma yin pa ltos pa med pa zhes bya'o/ /las kyi mtshan nyid ni rdzas gcig pa can yon tan med pa can ldan pa dang rnam par dbye ba dag la ltos pa med pa'i rgyu ma yin pa zhes bya ba'o/ /rdzas gcig pa zhes bya ba ni rdzas gcig la brten pa zhes bya ba'i don to/ /yon tan kha cig ni rdzas du ma la 'jug pa yin te/ ji ltar ldan pa dang rnam par dbye ba la sogs pa lta bu'o/ /spyi dang bye brag rnams kyang kha cig ni rdzas la 'jug pa kho na yin te/ dpe nas nyid la sogs pa bzhin no/ /yon tan dang las nyid la sogs rdzas dang 'brel pa'i yon tan dang las kyi tshig gi don la 'jug go/ /spyi chen po yod pa zhes bya ba ni rdzas la sogs pa tshig gi don gsum la 'jug go/ /de lta bas na rdzas bkag nas 'bad mi dgos par yon tan la sogs pa yang bkag par 'gyur ba'i phyir tshig gi don lhag ma brtags pa'i 'bras bu ni rdzas brtag pa nyid du rdzogs pa yin no zhes bstan pa yin no/ /'o na 'du ba dgag pa logs shig tu brtsam par bya dgos so zhe na/ 'du ba'ang gang du gang gi yin/ /zhes bya ba smos te/ tshig gi don lnga la 'jug pa'i ngo bo ni 'du ba yin par brjod de/ rdzas la sogs pa 'brel pa can rnam pa lnga bsal ba yin na gang du gang gis 'du ba yin te/ gang du yang 'ga' yang ma yin no zhes bya ba'i don te/ rten dang brten pa thams cad bkag pa'i phyir ro/ /de la re zhig yon tan rnams khyad par du dgag pa brjod par bya ste/ de la mdo las gzugs dang / ro dang / dri dang / reg pa rnams dang / grangs dang / tshad dang / so so pa nyid dang / ldan pa dang / rnam par dbye ba dang / gzhan dang / gzhan ma yin pa nyid dang / blo rnams dang / bde ba dang / sdug bsngal dag dang / 'dod pa dang / sdang ba dag dang / 'bad pa ni yon tan dag go zhes 'byung ste/ dang gi sgra las lci ba nyid dang / gsher ba nyid dang / snum pa dang / 'dus byas pa dang / chos dang chos ma yin pa dang / sgra rnams gzung ngo / /de la gzugs ni mig gis gzung bar bya ba ste/ sa dang chu dang me la gnas so/ /ro ni lce'i dbang pos gzung bar bya ba ste/ sa dang chu la gnas so/ /dri ni snas gzung bar bya ste/ sa la gnas so/ /reg pa ni lus kyi dbang pos gzung bar bya ste/ sa dang / chu dang / me dang rlung la gnas so/ /'di dag gi gzugs la sogs pa dang po bzhi dgag pa'i phyir/ rags pa'i rdzas la zhes bya ba la sogs pa smos te/ rags pa nyid kyi rdzas la 'du ba rnams ni dmigs pa'i mtshan nyid du 'gyur ba nyid yin te/ de'i phyir rags pa la zhes bshad do/ /rdzas de la yang sngon po la sogs pa rnam pa bzhi po gal te gcig pa nyid de cha shas med par 'dod na/ de'i tshe sgo gseb la sogs pa'i bu gar 'jug pa'i sgron ma la sogs pa'i snang ba phra mos kyang khang pa'i phugs la sogs par gnas pa'i bum pa la sogs pa'i rdzas ches che ba dang 'du ba'i sngon po la sogs pa'i ngo bo mngon par gsal ba na rdzas ji snyed pa mtha' dag la gnas pa'i gzugs la sogs pa mngon par gsal ba dang dmigs par 'gyur te/ cha shas med pa'i phyir ro/ /gang gis phyogs gcig gis mngon par gsal bar 'gyur ba gcig la cha yod pa yang ma yin no/ /bu ga'i snang bas zhes bya ba ni mtshon pa ste/ sa'i phyogs gcig tu chus mngon par gsal ba na phyogs gzhan du yang mngon par gsal ba dang dmigs par thal bar 'gyur ro/ /me la sogs pa dang a mra'i 'bras bu la sogs pa'i phyogs gcig gi shan tsam reg pa dang myangs pa na/ rdzas de la 'du ba de snyed pa'i reg pa dang / ro dmigs par 'gyur ro/ /'di snyam du sngon po la sogs pa mtha' dag dmigs pa dang / mngon par gsal bar 'gyur ba kho na'o snyam du sems na/ yangs pa'i yul du zhes bya ba la sogs pa smos te/ de tshe zhes bya ba ni de'i dus na'o/ /de'i zhes bya ba ni bu ga'i snang bas so/ /de'i ni zhes bya ba ni sngon po la sogs pa rdul phra rab rnams tha dad par khas len pa nas la sogs pa'i rdul phra rab kyi rdzas bzhin du rdul phra rab tshad dang ldan pa'i phyir rdzas kyi rang bzhin nyid du 'gyur gyi/ yon tan nyid ni ma yin no/ /de lta bur gyur pa'i rdul phra rab tha dad pa rnams la yon tan du tha snyad byed na ming la rtsod pa med do/ /rdul nyid yin na yang brten pa nyid las yon tan nyid du rig pa ni ma yin te/ yod pa dang med pa la rten mi 'thad pa'i phyir dang / ha cang thal bar 'gyur ba'i yang phyir ro/ /'di ltar yan lag can gyi rdzas kyang yan lag gi rdzas la brten pa'i phyir de yang yon tan du 'gyur ro snyam du bsams pa yin no/ /de la gcig la sogs pa'i tha snyad kyi rgyu gcig nyid la sogs pa'i mtshan nyid kyi grangs te/ de yang rdzas gcig pa dang rdzas du ma pa yin no/ /de la gcig gi grangs ni rdzas gcig pa yin la/ gnyis nyid la sogs pa ni rdzas du ma pa yin no/ /de la rdzas gcig pa la ni rtag pa nyid dang / mi rtag pa nyid dag tu sgrub par chu la sogs pa'i rdul phra rab la sogs par gtogs pa'i gzugs la sogs pa bzhin du rtogs par bya'o/ /rdzas du ma ni du ma'i yul can gyi blo dang lhan cig pa'i gcig las grub pa la ltos pa'i blo 'jig pas 'jig pa dang / la la rten 'jig pas kyang 'jig pa yin te zhes rtogs par bya'o/ /gzhan dag grangs rnam pa gnyis po 'di yang mngon sum nyid kyis grub pa dang / /khyad par gyi blo yang rgyu mtshan gzhan la ltos pa'i phyir rjes su dpag pas kyang grub par sems so zhes grag go/ / de la 'di'i 'gegs pa bshad pa/ de min ngo bo las ldog pa/ /zhes bya ba la sogs pa smos te/ bsdus pa la sogs pa las ldog pa'i glang po la sogs pa gang dag la ming sbyor ba de las ma gtogs pa'i dmigs pa'i mtshan nyid du chud pa'i grangs zhes bya ba yod pa ma yin pa'i phyir/ de ri bong gi rwa bzhin du med pa'i tha snyad kyi yul yin no/ /'di ltar 'di ni snang du rung bar 'dod de/ de skad du yang mdo las grangs dang tshad rnams dang / so so ba nyid dang / ldan pa dang / rnam par dbye ba dag dang / gzhan dang gzhan ma yin pa nyid dang / las ni gzugs can gyi rdzas dang 'du ba'i phyir/ mig gis gzung bar bya ba yin no zhes 'byung ngo / /khyad par gyi blo las grangs 'grub pa yang ma yin no zhes bstan pa'i phyir/ 'dod pas rab tu sbyar ba'i zhes bya ba la sogs pa smos te/ 'di ltar shes pa gcig go/ /shes pa gnyis so zhes bya ba la sogs pa la grangs m ed par yang gcig la sogs pa'i blor 'gyur ba de bzhin du grogs la sogs pa med pa'i bum pa la sogs pa'i dngos po rnams la yang gcig ces bya ba la sogs pa rang gi 'dod pas brda byas pa de la yid la byed pa gang yin pa gzo pa de'i rjes su 'gro ba'i shes pa gcig 'byung bar 'gyur bas 'di ma nges pa yin no/ /shes pa de dag la ni grangs yod pa ma yin te/ de dag rdzas ma yin pa'i phyir dang / grangs ni yon tan nyid yin pas rdzas la brten pa'i phyir ro/ /ci ste shes pa 'di dag la 'di ni nye bar btags pa yin te/ ci lta bu ni gcig yin te/ 'dir chos mthun pa yang grogs med pa'i phyir ro snyam du 'dod na shes/ de zhes bya ba smos te / shes pa 'di ni btags pa yin par mi rigs pa ma yin te/ shes pa 'di ni 'khrul pa med par 'jug pa'i phyir ro/ /dper na khung bu pa la ba lang zhes shes pa 'khrul pa ste/ ba lang lta bu ni ba lang yin gyi ba lang nyid ni ma yin te/ nog la sogs pa med pa'i phyir ro zhes bya ba de bzhin du shes pa gcig la sogs pa 'di 'khrul pa gcig lta bu ni gcig dang 'dra ba yin gyi gcig nyid ni ma yin no zhes bya ba ni ma yin no/ /'o na ci zhe na/ bum pa la sogs pa la ci 'dra ba'i blo ma 'khrul bar 'gyur ba de 'dra ba shes pa la sogs pa yang ma yin no/ /'di snyam du shes pa 'di 'dra ba la ltos nas brjod pa ma yin gyi 'on kyang de dag gi rten du gyur pa'i rdzas gang yin pa der gtogs pa'i gcig nyid la sogs pa las don gcig la 'du ba'i phyir/ yon tan dang las dang 'du ba la sogs pa la gcig la sogs pa'i shes pa 'dir 'gyur ba yin no zhes bya ba 'di'i dogs pa bsu ba ni/ don gcig la ni 'du ba'i phyir/ /zhes bya ba la sogs pa smos so/ /'dir lan smras pa/ de ltar zhes bya ba la sogs pa ste/ gal te shes pa 'di rdzas de dang 'du ba'i gcig nyid la sogs pa las shes pa gcig dang bde ba la sogs pa gcig gi bdag nyid kyi rdzas dang 'du ba rnams la de'i tshe de ltar shes pa gcig go zhes bya ba yin du chug mod/ shes pa gnyis dang gsum dang bzhi zhes bya ba la sogs pa'i shes pa la rgyu ci zhig yod/ gcig gi bdag nyid du gyur pa de la gnyis nyid la sogs pa yod pa ma yin no/ /gang yang tshig gi don drug dang / bde ba dang sdug bsngal dag dang / 'dod pa dang sdang ba dag dang / las rnam pa lnga dang / gzhan dang gzhan khyab pa dang ma khyab pa'i spyi rnam pa gnyis dang ma yin pa'i spyi rnam pa gnyis dang / dngos po gcig dang / 'du ba gcig ces bya ba 'di brjod pa de la rgyu ci zhig yod/ de la don gcig la 'du ba'i grangs ni yod pa ma yin te/ de lta bas na khyab par byed pa ma yin pa'i phyir 'di yang brtag par mi rigs so/ /gzhan yang gal te don gcig la 'du ba'am gzhan yang rung ste/ rang gi blos brtags pa'i rgyu brjod pa de lta bu yang don gcig la 'du ba la sogs pa las skye ba'i shes pa 'di brtags par 'gyur te/ dngos po gzhan med pa'i phyir ro/ /de lta yin dang 'khrul par 'gyur ro/ /de 'jug pa'i rgyu mtshan med pa'i phyir dper na bram ze'i khye'u la me'i shes pa bzhin no/ /de ltar yang ma yin te/ de'i phyir gang bshad pa'i nyes pa las mi 'da' ba kho na'o/ /glang po la sogs shes pa las/ /zhes bya ba la sogs pas grangs grub par bya ba'i phyir rna ma phug pas smras pa'i tshad ma dogs par byed do/ /des smras pa/ dmag gi shes pa ni glang po che dang rta dang shing rta la sogs pa las ma gtogs pa'i rgyu mtshan can yin te/ glang po la sogs pa'i shes pa dang mi 'dra ba'i phyir gos sngon po'i shes pa bzhin no zhe'o/ /de las gzhan las byung zhes bya ba ni/ glang po che dang rta dang shing rta la sogs pa de las gzhan ni de las gzhan no/ /de las byung ba gang la yod pa zhes tshig rnam par sbyar ro/ /'dod pas sbyar ba'i zhes bya ba la sogs pas lan 'debs par byed de/ glang po la sogs pa las tha dad pa'i brda'i yid la byed pa la sogs pa nang gi rgyu mtshan can du 'dod pa'i phyir grub pa la sgrub pa nyid do/ /sogs pa'i sgras brda dran pa la sogs pa bzung ngo / /ci ste brda gzo ba la sogs pa las tha dad pa'i dngos po rgyu mtshan can nyid du bsgrub par 'dod na/ de'i tshe ma nges pa yin no zhes thal bar 'gyur ba brjod pa'i thabs kyis ston pa ni/ 'di nyid kyis / blo la sogs pa'ang grangs su 'gyur/ /zhes bya ba smos te/ de'i shes pa dang mi 'dra ba'i phyir zhes bshad pas de nyid kyis/ gcig gi blo dang gnyis kyi blo dang las lnga zhes bya ba la sogs pa yang grangs su 'gyur te/ gcig la sogs pa'i blo de la yang de'i shes pa dang mi 'dra ba'i phyir ro/ /de lta yang ma yin te/ de lta bas na ma nges pa yin no snyam du bsams pa yin no/ /gzhan yang gnyis nyid la sogs pa'i grangs rdzas du ma gang yin pa de'i blo du ma dang lhan cig pa'i gcig nyid las grub par khyed cag gis smras pa gang yin pa de ni rgyu mtshan med pa yin no/ / zhes ston pa ni/ gal te blo la ltos pa las zhes bya ba la sogs pa smos te/ tsam smos pas gcig nyid dang gnyis nyid la sogs pa de'i spyi dang 'brel ba can gyi shes pa rnam par gcod pa'i don du'o/ /blo de zhes bya ba ni bgrang bar bya ba dag la gnyis dang gsum dang bzhi zhes bya ba la sogs pa'i blo brda gzo ba tsam gyis ci'i phyir mi 'dod/ de lta na ni nus pa mthong ba rgyu nyid du brtags par mi 'gyur ro/ /de lta ma yin na gtan tshigs rnams thug pa med par 'gyur ro/ /'di ltar ltos pa'i blo yod na yod pa'i phyir de dang de med na yang med pa'i phyir der gtogs pa'i rjes su 'gro ba dang ldog pa'i rjes su byed pa'i phyir ro/ /de kho na brtag par rigs kyi gzhan du ni 'khru sman dang phrad nas lto 'khru bar byed do zhes bya ba yang brtag par 'gyur ro/ /bsdu ba la sogs pa las ldog cing dngos po las tha dad pa dmigs pa'i mtshan nyid du gyur par mngon par 'dod pa'i gnyis nyid la sogs pa snang ba'am 'thad pa yang ma yin te/ gcig du ma la 'jug pa bkag pa'i phyir dang / spyi dang 'du ba yang 'gog par 'gyur ba'i phyir snyam du dgongs pa'o/ /che dang ring sogs zhes bya ba la sogs pas tshad dgag pa'i phyir bshad pa tshad kyi tha dad kyi rgyu ni med do/ /de yang chen po dang rdul phra rab dang / ring po dang / thung ngu zhes bya ba rnam pa bzhi ste/ de la chen po ni rnam pa gnyis te/ rtag pa dang mi rtag pa'o/ /rtag pa ni nam mkha' dang / dus dang phyogs dang bdag rnams la ni mchog tu chen po nyid do/ /mi rtag pa ni rdul phra rab gsum pa la sogs pa'i rdzas rnams la'o/ /de bzhin du rdul phra rab kyang rnam pa gnyis te/ rtag pa dang / mi rtag pa'o/ /rtag pa ni rdul phra rab dang / yid la zlum pa'i mtshan nyid can no/ /mi rtag pa ni rdul phra rab gnyis pa nyid do/ /ut+pal dang / skyu ru ra dang / bil ba la sogs pa chen po la yang / khyad par du 'phags par 'byung ba'i dngos po la ltos nas btags nas rdul phra rab tu brjod de/ skyur ru'i che ba'i tshad ci 'dra ba de 'dra ba'i ut+pal ma yin no zhes bya ba ste/ de bzhin du gzhan la yang sbyar bar bya'o/ /ci ste rdul phra rab gsum pa la sogs pa la 'jug pa'i chen po dang ring ba dag dang / rdul phran gnyis 'byar ba'i rdul phra rab dang / thung du dag pa khyad par ci yod ce na/ brjod pa de la chen po nyid dang ring po nyid dag la phan tshun khyad par yod de/ chen po rnams las ring po 'on cig /ring po rnams las chen po 'on cig ces bya ba'i tha snyad tha dad pa mthong ba'i phyir ro/ /rdul phra rab dang thung ngu dag gi khyad par yang de mthong ba'i rnal 'byor pa rnams kyi mngon sum nyid do zhes bya ba 'di ni gzhan dag gi lugs yin no/ /gzhan dag ni chen po la sogs pa 'di yang gzugs la sogs pa las don gzhan du gyur pa nyid du 'grub pa ste/ de'i shes pa dang mi 'dra'i blos gzung bar bya ba yin pa'i phyir / bde ba la sogs pa bzhin no zhes sems te/ de la re zhig gal te gzugs la sogs pa'i yul can gyi dbang po'i blo dang mi 'dra ba'i mngon sum gyi shes pas gzung bar bya ba'i phyir ro zhes bya ba gtan tshigs kyi don du 'dod na/ de'i tshe gtan tshigs ma grub pa nyid yin te/ de ltar gnas pa'i gzugs la sogs pa'i dngos po las ma gtogs par chen po la sogs pa'i tshe [#(]dbabang [,]dbang [)]po'i blo la snang ba bzhin par ma dmigs so/ /ci ste rdul phra rab dang chen po'i zhes bya ba ste/ de lta bu rnam par rtog pa'i blo gang yin pa de de'i shes pa dang mi 'dra ba'i blos zhes bya bar 'dod na/ de lta na yang gtan tshigs ma nges pa nyid yin te/ mi mthun pa'i phyogs la gnod par byed pa'i tshad ma med pa'i phyir ro/ /'di la don dam par gzung bar bya ba cung zad kyang yod pa ma yin te/ rtog pa dang bcas pa'i phyir ro/ /phyogs gcig tu mngon du phyogs pa la sogs par 'jug pa'i gzugs la sogs pa mthong ba de dag la/ de dang mi 'dra ba'i gzugs la sogs pa las tha dad par bstan par bya ba'i phyir brda byas pa'i dor chen po zhes nges pa skye ba 'ba' zhig tu zad do/ /de'i phyir dngos po gzhan grub pa ma yin no/ /de nyid kyi phyir 'di gzugs la sogs pa las ma gtogs pa'i nges pa yod pa ma yin pa'i phyir gtan tshigs kyang ma grub pa yin no/ /dam bca' ba yang mngon sum gyis gnod pa yin te/ mngon sum du 'dod pa'i chen po la sogs pa gzugs la sogs pa las ma gtogs par mi dmigs pa'i phyir ro/ /de lta bas na tshad de yang phyogs gcig tu phyogs pa la sogs par 'jug pa'i gzugs la sogs pa'i don la don de de lta bur gyur pa ma yin pa las tha dad pa la brton nas de'i bdag nyid du ci ste mi 'dod/ de lta na ni ma mthong ba dang mi rigs pa'i dngos po brtag par bya mi dgos par 'gyur ro/ /tha dad nyid kyis ni zhes nyid kyi sgras bstan to/ /'di ltar phyogs gcig tu mngon du phyogs par 'jug pa'i gzugs la sogs pa mang po mthong ba'am/ rig pa na ring po'o zhes tha [(]snyid [,]snyad [)]du byed la/ de la ltos pa'i nyung ngur skye ba la thung ngo zhes bya ba'o / /de bzhin du chen po la sogs pa de dag la yang sbyar bar bya'o/ /gzugs la sogs pa bkag pa bzhin du gcig dang du ma'i rnam par rtog pa dag las chen po la sogs pa dgag pa yang brjod par bya'o/ /gzhan la yang bsgrub par bya ba med pa la gtan tshigs 'jug pa mthong ba'i phyir ma nges pa nyid du gsal rab pa nyid do zhes bstan pa'i phyir ji ltar khang bzangs zhes bya ba la sogs pa smos te/ khyed kyi kun du brtags pa'i chen po nyid la sogs pa med na yang khang bzangs kyi phreng la sogs pa dag la chen po la sogs pa'i shes pa skye bar nyams su myong ba yin no/ /gang kho nar khang bzangs la sogs pa la phreng zhes bya ba'i yon tan dang 'du ba de la chen po la sogs pa yang yin te/ des na don gcig la 'du ba'i stobs las de bzhin du chen po zhes bya ba de lta bur de'i phreng ba la sogs par tha snyad du byas pa yin no zhes bya ba de skad du yang brjod par mi nus te/ de yang rang gi gzhung dang 'gal lo zhes bstan par bya ba'i phyir/ brjod par 'dod pa'i zhes bya ba la sogs pa smos te/ khyim rnams la zhes bya ba ni khang bzangs la sogs pa dag la'o/ /brjod par 'dod pa zhes bya ba ni rgyang grags dang rgyang grags kyi phyed la sogs pa'i tshad do/ /ci'i phyir med ce na/ khang bzangs zhes bya ba la sogs pa smos te/ 'di ltar khyed cag gis ni khang bzangs ldan pa'i bdag nyid kyi yon tan du 'dod kyi/ yan lag can gyi rdzas ni ma yin te/ rigs mi mthun pas rdzas mi rtsom pa'i phyir ro/ /yon tan rnams ni yon tan med pa yin no zhes bya ba'i gzhung yin pas yon tan de yang tshad dang ldan pa ma yin no/ /de lta yin dang khang bzangs la sogs pa'i yon tan rnams la phreng ba zhes bya ba'i yon tan gzhan med pa'i phyir khang bzangs kyi phreng zhes bya ba 'di nyid du mi 'gyur na chen po dang thung ngu zhes bya ba la sogs par lta ga la 'gyur/ 'di ltar phreng ba ni grangs kyi rang bzhin du 'dod la grangs kyang yon tan yin pa'i phyir/ rdzas kho na la brten gyi yon tan la ni ma yin no/ /ci ste yang phreng ba yan lag can gyi rang bzhin du 'dod pa de lta na yang rdzas kyi rten ni rdzas kho na yin gyi yon tan ni ma yin pa'i phyir phrang ba khang bzangs la brten pa nyid mi rigs so/ /ci ste phreng ba rigs kyi rang bzhin du khas len par byed na de lta na yang rigs rten so so la bdag nyid thams cad kyis yongs su rdzogs pa'i phyir gcig kyang khang bzangs kyi phreng bar brjod par 'gyur te/ shing ljon pa bzhin no/ /ji skad du/ gal te'ang khyim ni ldan pa yin/ phreng ste de la ji ltar 'gyur/ /gal te rigs yin khyim gcig la'ang / /phreng zhes brjod 'gyur ljon shing bzhin/ /zhes bshad pa bzhin no/ /gcig dang ring po dang chen po la sogs pa tha snyad du byed pa mi 'thad pa yang de'i gnas skabs kho na ste/ phreng dang de'i rten khang bzangs la sogs pa la gcig nyid la sogs pa'i yon tan med pa'i phyir dang / shing la sogs pa la yang brjod par 'dod pa'i ring po la sogs pa med pa'i phyir ro/ /khang bzangs kyi phreng mang po rnams la phreng ba phreng ba zhes rjes su 'gro ba'i tha snyad du mi 'gyur te/ rigs la rigs med pa'i phyir ro/ /dris pa/ phreng mang po la de yi sgra/ /ji ltar rigs la rigs med phyir/ /zhes gang bshad pa yin no/ /des na btags pa'i rten de 'dzin pa'am/ yang rten de gnas pa mi rigs so zhes bya ba'i don to/ /phreng la sogs pa la chen po la sogs pa'i shes pa 'di 'khrul pas 'jug pa yang ma yin te/ de lta bas na nye bar brtags par rigs pa ma yin no/ /dngos kyi shes pa dang khyad par med pa ni brtags par rigs pa ma yin te/ ha cang thal bar 'gyur ba'i phyir ro/ /ji skad du/ phreng la sogs la che nyid sogs/ /nye bar btags pa gang 'dod pa/ /btags min dngos dang khyad med pa'i/ /shes pa'i bzung bya yin phyir ro/ /zhes gang bshad pa yin no/ /de la gang gi dbang gis 'di 'di las so so ba nyid yin no zhes ldan pa'i rdzas las logs su byed pa de ni logs su byed pa'i rgyu so so ba nyid ces bya ba yin no/ /de yang bum pa la sogs pa las don gzhan du gyur pa yin te/ de'i shes pa dang mi 'dra ba'i blos gzung bar bya ba yin pa'i phyir zhes bya ba ni snga ma bzhin du gzhan gyi bsam pa'o/ /de la yang tshad bzhin du gtan tshigs ma grub pa nyid dang / ma nges pa bzhin no zhes zhe la bzhag nas so so ba'i rgyu nyid las zhes bya ba la sogs pa smos te/ 'di ltar 'di la yang gzugs la sogs pa las dben pa don gzhan du gyur pa gzhan so so ba nyid ces bya ba mngon sum gyi blo las mi snang ba'i phyir/ 'di la de'i shes pa dang mi 'dra ba'i blos gzung bar bya ba nyid ma grub po/ /de nyid kyi phyir dmigs pa'i mtshan nyid du gyur pa nyid du mngon par 'dod pa de ni mi dmigs pa'i phyir med pa nyid yin no/ /so so ba zhes bya ba de rnam par rtog pa'i shes pa'i dbang gis grub pa yang ma yin te/ gang gi phyir gzugs la sogs pa'i dngos po de dag nyid rang rang gi ngo bo la gnas pa'i phyir/ dngos po thams cad rigs mthun pa dang mi mthun pa las ldog pa'i bdag nyid kyis ltos pa na so so zhes bya ba'i tha snyad kyi rgyu mtshan du 'gyur bas de'i phyir dngos po gzhan ma grub po/ /de lta bas na gang dag logs shig gi tha snyad de brjod pa 'di so so ba nyid kyi rgyu las yin par brjod pa de ci'i phyir/ rigs mthun pa dang mi mthun pa las tha dad pa'i rang bzhin gyi ngo bo dngos po'i mthar thug par mi 'dod de/ de'i mthar thug pa nyid rigs pa ma yin no snyam du dgongs pa'o/ /'dis ni gtan tshigs ma nges pa nyid du bstan pa yin no/ /tha dad pa'i bdag nyid de rang bzhin gang dag la yod pa de dag la de skad ces bya'o / /de dag kyang yin la dngos po yang yin te/ de dag la mthar thug pa ste/ yongs su rdzogs pa gang la yod pa zhes tshig rnam par sbyar ro/ /bsgrub par bya ba'i mi mthun pa'i phyogs la yang gtan tshigs kyis 'jug pa mthong ngo zhes bstan pa'i phyir/ ji ltar phan tshun tha dad pa'i/ /zhes bya ba la sogs pa smos te/ bde ba la sogs pa yon tan rnams la so so ba nyid kyi yon tan yod pa ni ma yin te/ yon tan rnams la yon tan med pa'i phyir ro/ /ci ste yang phun tshun ldog pa'i bdag nyid kyis de dag so so zhes brjod par 'gyur na/ de la yang logs shig gi tha snyad kyi yan lag gi rgyu mtshan ston par byed pa de bzhin du rdzas su mngon par 'dod pa'i bum pa la sogs pa/ gzhan la yang rang las tha dad pa'i so so nyid kyi ming can gyi yon tan gzhan med par yang 'gyur ro/ /de dag las shes pa 'di btags pa yang ma yin te/ dngos kyi shes pa dang khyad par med pa'i phyir ro snyam du bsams pa yin no/ /yang na logs shig gi tha snyad ni tha dad pa'i bdag nyid kyis dngos po'i rgyu mtshan can du bstan par bya ba'i phyir dam bca' ba rjes su dpag pas gnod pa bshad pa ni ji ltar phan tshun zhes bya ba la sogs pa'o/ /sbyor ba ni gang dag phun tshun du ldog pa'i bdag nyid de dag ni rang gi tha dad pa'i so so ba nyid la brten pa ma yin no / /bde ba la sogs pa bzhin no/ /bum pa la sogs pa yang phan tshun ldog pa'i bdag nyid yin no zhes bya ba ni rang bzhin gyi gtan tshigs so/ /gcig la du ma yod pa ma yin zhing / 'du ba yang 'gegs par 'gyur ba'i phyir 'brel pa mi 'thad pa dang / bde ba la sogs pa la de'i tha snyad med par thal bar 'gyur ba ni gnod pa can gyi tshad ma'o/ /de la ldan pa dang rnam par dbye ba dag sun dbyung ba'i phyir/ gzhan gyis zhes bya ba la sogs pa smos te/ go rims bzhin du rdzas rnams la ldan pa dang rnam par dbye ba'i shes pa'i rgyu ma phrad pa dag gi phrad pa dang / phrad pa rnams kyi ma phrad pa'i rang bzhin gang yang rung ba dang / gnyi ga'i las las byung ba dang / ldan pa las byung ba dang / ldan pa las byung ba'i ldan pa dang / rnam par dbye ba dag yin no zhes bya ba ni gzhan gyi lugs so/ /'di yang gzhung lugs tsam yin gyi/ 'di dag dngos po de nyid du sgrub pa la tshad ma cung zad kyang yod pa ni ma yin pas de'i phyir gzhan gyis de dag brtags pa ni don med pa nyid yin no/ /sbyor ba ni gang la sgrub par byed pa'i tshad ma cung zad kyang med pa de ni rtogs pa dang ldan pa rnams kyi yod pa'i tha snyad kyi yul ma yin te/ mo gsham gyi bu la sogs pa bzhin no/ /gzhan gyi ldan pa dang rnam par dbye ba dag la yang sgrub par byed pa'i tshad ma med do zhes bya ba ni khyab par byed pa mi dmigs pa'o/ /'on te ldan pa yod min na/ /zhes bya ba la sogs pas ni gsal ba'i lugs bstan pas gtan tshigs ma grub pa nyid du dogs par byed do/ /de smras pa/ gal te ldan pa zhes bya ba don gzhan du 'gyur ba med par gyur na/ de'i tshe zhing dang sa bon dang chu la sogs pa khyad par med pa'i phyir thams cad kyi tshe myu gu la sogs pa'i 'bras bu med par gyur na de lta na yang ma yin te/ de lta bas na thams cad kyi tshe 'bras bu mi rtsom pa'i phyir zhing la sogs pa myu gu la sogs pa'i 'bras bu skyed pa la rgyu gzhan la ltos pa dang bcas pa yin te/ dper na 'jim gong dang dbyug gu dang chu dang skud pa la sogs pa bum pa la sogs pa byed pa la rdza mkhan la sogs pa la ltos pa dang bcas pa bzhin no/ /ltos pa dang bcas pa gang yin pa 'di ni ldan pa yin no zhes bya bar grub po/ /gzhan yang ldan pa 'di rdzas dag gi khyad par nyid du rtogs par bya ba yin pa'i phyir de las don gzhan nyid du mngon sum nyid kyis grub po/ /'di ltar 'ga' zhig la la las ldan pa'i rdzas long shig ces brjod pa na/ rdzas gang dag gi ldan pa kho na dmigs pa de kho na len gyi rdzas tsam ni ma yin no/ /gzhan du na gang yang rung ba len par 'gyur ro/ /'di dag thams cad bzlog nas rnam par dbye ba sgrub pa la yang sbyar bar bya'o/ /gzhan yang gal te ldan pa dang rnam par dbye ba 'di dag dngos po 'di las don gzhan du gyur par mi 'gyur na/ khyad par med par yang dngos po 'di ni bar med pa yin la/ 'di ni bar dang bcas pa yin no zhes bya ba'i blo tha dad par ji ltar rigs par 'gyur/ khyad par gyi shes pa ni dngos po'i khyad par med par skye par 'os pa ma yin te/ thams cad du thams cad kyi tshe yod par thal bar 'gyur ba'i phyir ro/ /gzhan yang rdo ba dang seng ldeng la sogs pa shin tu ring ba na gnas pa na yang yul thag ring po na gnas pa'i skyes bu la bar med par nges pa'i blo gang yin pa 'di 'byung ba dang / gang yang shing gi rtse mo phra mo la 'brel pa na chu skyar la sogs pa cung zad rtse mo phra mo dang bar med pa yin yang bar dang bcas par nges pa gzhan 'di yang yang 'byung ste/ rnam pa gnyis po 'di yang de ma yin pa la de lta bu'i ngo bos 'jug pa'i phyir 'di ni log pa'i blo yin no/ /log pa'i blo ni dngos kyi don nyams su myong ba med par gang du yang 'byung ba ma yin te/ ba lang mthong ba nyams su myong ba med par ba men gyi dngos po mthong ba las 'di ni ba lang ngo snyam du 'khrul pa ma yin no/ /de lta bas na 'khrul pa'i blo 'di'i rgyu mtshan dngos kyi don 'ga' zhig brjod par bya dgos gor ma chag go/ /de brjod na yang ldan pa dang rnam par dbye ba de nyid grub la/ de dag las ma gtogs pa'i blo 'di'i rgyu mtshan gzhan sgrub par nus pa ni ma yin no/ /gzhan yang lha sbyin rna cha can zhes bya ba'i blo 'di skye ba na rgyu mtshan gang gis skye ba yin zhes brjod par bya dgos so/ /skyes bu dang rna cha tsam du 'byung bas bskyed par 'os pa ma yin te/ der thams cad du lha sbyin dang rna cha dag gi de yod par thal bar 'gyur ba'i phyir ro/ /gzhan yang gang kho na 'ga' zhig gis 'ga' zhig tu yod par dmigs pa de kho na gzhan du sgrub pa dang dgag pa'i sgo nas 'jig rten na tha snyad 'jug par mthong ste/ gal te yang khyed cag gis ldan pa nam yang ma dmigs na de'i phyir 'di nag pa rna cha med pa'am/ rna cha can zhes bya ba de lta bu'i rnam par dbye ba'i tha snyad du 'gyur ro/ /'di ltar 'di la nag pa rna cha med pa zhes bya ba 'dis rna cha bkag pa ni ma yin te/ yul dang dus kyi bye brag gis yod par nges pa'i lus can de ni dgag par mi nus pa'i phyir ro/ /nag pa yang ma yin te/ de ni de dang grub pa dang bde ba mtshungs pa'i phyir ro/ /de lta bas na nag pa rna cha dang ldan pa 'gegs pa yin no/ /de bzhin du nag pa rna cha can zhes bya ba sgrub pa'i ngag 'dis kyang nag pa dang rna cha dag gang yang rung ba sgrub pa ni ma yin te/ de dag grub zin pa'i phyir ro/ / lhag mar gyur pas ma grags pa'i ldan pa nyid sgrub pa yin par go'o/ /de lta bas na gang gi dbang gis nag pa rna cha can dang ma yin no zhes bya ba la sogs pa dgag pa dang sgrub pa la sogs pa rab tu rnam par phye ba nas rtog par 'gyur ba ldan pa la sogs pa'i dngos po yod pa kho na'o/ /sogs pa'i sgras khyad par nyid du blangs pa zhes bya ba la sogs pa sngar bshad pa gzung ngo / /brjod pa zhes bya ba la sogs pas lan 'debs par byed de/ khyad par med pa'i phyir sa bon la sogs pa rtag tu 'bras bu byed par 'gyur ro zhes gang smras pa de la sa bon la sogs pa khyad par med pa nyid du ma grub ste/ skad cig 'jig pa nyid kyi dngos po thams cad khyad par can gyi gnas skabs thob pa nyid skyed par byed pa yin pa'i phyir ro/ /gang yang / zhing dang sa bon chu sogs rnams/ /zhes smras pa de la yang spyir ltos pa nyid tsam zhig sgrub na grub pa la sgrub pa'o zhes bstan pa'i phyir/ yod na yang zhes bya ba la sogs pa smos te/ yod na yang sa bon la sogs bar chad med pa la sogs pa'i gnas skabs gzhan la ltos pa dang bcas pa myu gu la sogs pa'i 'bras bu 'grub par nus pa ni kho bo cag gis kyang 'dod pa nyid yin pas grub pa la sgrub pa yin no/ /de la bar chad med pa la sogs pa'i gnas [(]skab [,]skabs [)]kyi khyad par rnams gang dag gnas skabs gzhan la yod pa de la de skad ces bya'o/ /sogs pa'i sgras ni 'gal ba med pa'i rkyen gyis gnod pa med pa la sogs pa gzung ngo / /gnas skabs gzhan gang la bar te/ ring ba na gnas pa dang 'gal bas gnod pa zhes bya ba la sogs pa 'bras bu skye ba la gegs byed pa med pa zhes bya ba la sogs pa'i don to/ /gnas skabs kyang rang bzhin las tha mi dad pa'i phyir don gzhan du gyur pa'i ldan pa ma grub bo/ /ci ste khyed cag gis mngon pa'i 'dod pa'i ldan pa zhes bya ba dngos po gzhan zhig la ltos pa dang bcas pa nyid sgrub par 'dod na de'i tshe rnam pa de lta bu'i chos kyis gtan tshigs la rjes su 'gro ba ma grub pa'i phyir ma nges pa nyid dang / dpe yang bsgrub bya ma tshang ba yin no snyam du bsams pa'o/ /'di snyam du khyed chag la gang gi phyir ltos pa dang bcas pa nyid tsam sgrub na grub pa la sgrub par 'gyur na/ gnas skabs kyi khyad par gzhan la ltos pa'i zhing la sogs pa'i 'bras bu skyed pa'i rgyu yin gyi/ don gzhan du gyur pa'i ldan pa la ltos pa dang bcas pa ni ma yin no zhes bya ba 'di ji ltar rtogs par bya zhes dogs pa la/ gal te chu la sogs pa rnams zhes bya ba la sogs pa smos te/ gal te ldan pa tsam la ltos pa dang bcas pa yin par gyur na de'i tshe dang po btab pa nyid kyi zhing la sogs pa'i 'bras bu skye bar thal bar 'gyur te/ phyis gzhan du rgyu ma tshang ba med pa'i phyir ro/ /ci ste dang por btab pa'i tshe mi 'byung na rgyu ma tshang ba nyid kyis skyed par byed pa ma yin pa'i gnas skabs dang khyad par med pa'i phyir/ snga ma bzhin du phyis kyang mi skyed par thal bar 'gyur ro/ /zhing la sogs pa ni phan 'dogs par byed pa ma yin pa'i ldan pa la ltos pa rigs pa ma yin te ha cang thal bar 'gyur ba'i phyir ro/ /ldan pa rnams ni res 'ga' ba nyid du rigs pa yang ma yin te/ de'i rgyu zhing la sogs pa rnams rtag tu nye ba nyid kyi phyir ro/ /ci ste ldan la bskyed par bya ba de yang zhing la sogs pa'i las la sogs la ltos pa dang bcas pa nyid du 'dod na ma yin te/ de la yang brgal zhing brtag pa mtshungs pa'i phyir ro/ /'di ltar las de yang ci'i phyir skyed par mi byed ces brgal zhing rtog na ci zhig brjod par bya bar 'gyur/ de'i rgyu skul bar byed pa med pa'i phyir ro zhe na/ de la ci'i phyir med ces rgyu rtag par khas len pa la thams cad du brgal zhing brtag pa mtshungs so/ /gang gi ltar na dngos po thams cad mi rtag pa yin pa de'i ltar na rgyu'i rgyud pa thog ma med pa'i phyir dngos po thams cad cig car skye bar thal bar 'gyur ba ma yin te/ rgyu snga ma snga ma la rag las par 'gyur ba'i phyi ma phyi ma de dag thams cad cig car ba'i rgyu ma tshang bas mi nye ba'i phyir ro/ /de lta bas na khyed cag gi lta ba kho na la zhing la sogs pa thams cad du myu gu la sogs pa'i 'bras bu skye ba'i rgyu nyid du thal bar 'gyur ba'i phyir zhing la sogs pa ldan pa gzhan la ltos pa dang bcas pa ni ma yin no zhes bya ba grub po/ /gang yang / de yang khyad par nyid yin phyir/ /zhes bya ba la sogs pa smras pa de la/ bar chad med par skyes pa'i zhes bya ba la sogs pa smos te/ gang gis de mthong ba las khyad par can gyi rdzas len par byed pa ldan pa can gyi dngos po las don gzhan du gyur pa'i ldan pa rtogs pa po'i mthong ba'i lam du 'jug pa ni ma yin no/ /'o na ci zhe na/ sngar byung ba'i bar dang bcas pa skye ba'i gnas skabs gang yin pa de las khyad par can bar med pa skye ba'i dngos po gang dag yin pa de dag kho na ldan pa'i sgra'i brjod par bya ba yin te/ ldan pa'i sgra ni gnas skabs kyi khyad par las byung ba nyid yin pa'i phyir ro/ /de nas rnam pa de lta bu'i dngos po ldan pa'i sgra'i yul gyi dngos por gyur pa mthong ba gang yin pa de dag kho na lan par byed kyi gzhan dag ni ma yin no/ /rtog pa dang ldan pa rnams sgras ma bskul ba'i don la sgras 'jug pa ni ma yin no/ /gang yang / gal te 'di na de med ces bya ba la sogs pa smras pa de la bar chod gzhan nyid du zhes bya ba la sogs pa smos te/ blo tha dad pa'i rgyu mtshan ni de lta de ltar skye ba'i dngos po gzhan nyid yin te des na 'di ni ma nges pa yin no zhes bya ba ni spyi'i don no / /de la bar chod par skye ba'i dngos po gang yin pa de ni bar chad dang bcas pa'i shes pa'i rgyu mtshan yin no zhes sbrel lo/ /gzhan nyid du zhes bya ba ni bar med par skye ba gang yin pa zhes sbyar ro/ /khyim dang 'bigs byed gangs ri bzhin/ /zhes bya ba ni 'di dag nyid kyi ci rigs su dper brjod pa yin te/ 'di ltar gzhan gyi lugs kyis kyang bar ma chad par skyes pa'i khang pa rang nyid ldan pa'i bdag nyid dag la bar med pa'i blo'i rgyu mtshan ldan pa gzhan yod pa ma yin la/ bar chad nas skyes pa de dag nyid la yang bar chad dang bcas pa'i blo'i rgyu mtshan gyi rnam par dbye ba yang yod pa ma yin te/ yon tan rnams la yon tan med pa'i phyir zhes bya ba 'di ni bstan zin to/ /gangs can dang 'bigs byed dag la yang bar chad dang bcas pa'i blo'i rgyu rnam par dbye ba yod pa ma yin te/ phrad pa sngon du 'gro ba can gyi ma thob pa ni rnam par dbye ba yin no zhes bya ba ni gzhung lugs yin pa'i phyir ro/ /gang yang / bar chad bcas la bar med par/ /zhes bya ba la sogs pa smras pa des/ log pa'i shes pa zhes bya ba la sogs pa smos te/ log pa'i blo thams cad chos mthun pa 'dzin pa las skye ba yin no zhes bya ba 'di ni ma grub ste/ 'ga' zhig chos mthun pa la ltos pa med par yang dbang po nyams pa tsam gyis skye bar mthong ba'i phyir te/ dper na rnam par rtog pa'i sems gzhan du song ba yang mdun na gnas pa'i zla ba gcig gi bdag po tsam gyis rab rib kyis byas pa'i dbang po nyams pa las zla ba gnyis kyi rnam pa'i rjes su byed pa shin tu gsal bar snang ba rtog pa'i cha shas kyis ma sbags pa'i blo skye ba bzhin no/ /gzhan du gyur pa'i sems can la zhes bya ba 'dis ni zla ba gnyis kyi blo las rnam par rtog pa med pa nyid kyi blo brtan pa yin no/ /rnam par rtog pa med pa'i sems la ni chos mthun pa 'dzin pa yod pa ma yin te/ de ni sngar dang phyis mthong ba'i dngos po gcig nyid du zhen pa'i bdag nyid kyis sngar nyams su myong ba brjod pa'i bdag nyid yin pa'i phyir ro/ /ci ste yang na log pa'i blo thams cad gtso bo'i don 'phen par byed pa nyid du chug mod/ de lta na yang 'dod pa 'grub par 'gyur ba ma yin no zhes ston pa ni/ yang na bar med sogs zhes bya ba la sogs pa la sogs pa smos pa ni bar chad med cing skye ba'i dngos po gzung ngo / /dngos po de nyid bar chad pa dang bar ma chad par skye ba ni de'i rigs can ma yin pa spangs nas 'jug pa'i don du ches dang por sbyar ba'i rnam par dbye ba la sogs pa'i brjod pa nyid kyis dngos su yod pa'i phyir khyed cag gi 'dod pa grub pa ma yin no/ /rna cha can zhes bya ba yang zhes bya ba la sogs pa gang smras pa de la/ bshad pa rna cha can zhes blo 'di yang / /zhes bya ba la sogs pa la/ ji ltar nag pa dang rna cha dag gi gnas skabs kyi khyad par thob pa ni ldan pa skye'i thams cad du ni ma yin pa de bzhin du gnas skabs kyi khyad par gyi rgyu mtshan can du gyur pa rna cha can zhes bya ba'i blo 'di yin na ci'i phyir thams cad du 'gyur/ nag pa dang rna cha gang dag la gnas skabs kyi khyad par skyes pa de dag la de skad ces bya'o/ /gang yang / gzhan du mthong ba'i dngos po ni/ /zhes bya ba la sogs pa smras pa de la/ de 'dra ba'i gnas skabs khyad par de zhes bya ba la sogs pa smos te/ gnas skabs kyi khyad par gang zhig blo 'di'i rgyu mtshan du brjod pa/ dmigs pa'i mtshan nyid du gyur pa de gnas skabs gzhan du ma dmigs par dgag pa sgrub par byed kyi/ khyed cag gis kun du brtags pa'i ldan pa de/ ldan pa can gyi dngos po las dben pa gang du yang blo la mi snang ba'i phyir ni ma yin no/ /de lta bas na gtan tshigs ma grub pa nyid ma yin no/ /gal te 'di snyam du kho bo cag la ldan pa la sgrub par byed pa'i tshad ma med na khyed cag la gnod par byed pa'i tshad ma ci zhig yod snyam du sems na/ ldan pa'i dngos po blo zhes bya ba la sogs pa smos te/ sbyor ba ni gang ldan pa'i blo gang yin pa de ni khyed cag gis kun du brtags pa'i ldan pa'i gzhi med par dngos po'i khyad par tsam las byung ba yin te/ khang bzangs la sogs pa'i ldan pa bzhin no/ /nag pa rna cha can zhes bya ba la sogs pa yang ldan pa'i blo nyid yin no zhes bya ba rang bzhin gyi gtan tshigs so/ /rnam pa gcig tu na dngos po du ma nye ba na skye ba de ni khyed cag gis kun du brtags pa'i ldan pa dang bral ba dngos po du ma ldan pa tsam las byung ba yin te/ so sor nges pa'i gnas skabs rnal ma du ma'i yul can bzhin no/ /ldan pa'i blo 'di yang de bzhin no zhes bya ba ni rang bzhin gyi gtan tshigs so/ /ldan pa'i blo zhes bya ba ni ldan pa'i shes pa zhes bya ba'i don to/ /tshad ma gnyis po 'di nyid rnam par dbye ba dgag pa la brjod par bya ste/ rnam par dbye ba'i blo yin pa'i phyir ram dngos po du ma nye ba la rag las te/ byung ba'i phyir/ gzhan gyis mngon par 'dod pa'i rnam par dbye ba dang bral ba'i dngos po'i khyad par tsam rgyu mtshan can yin te/ dper na lug la sogs pa la rnam par dbye ba'i blo'am/ thag shin tu ring ba na gnas pa'i khyim gnyis kyi yul can nam/ 'bigs byed dang gangs can gyi blo bzhin no zhes bya ba dang ldan pa ma yin pa'i blo yin no zhes bya ba ni ci rigs pa'i don to/ /ci ste gang gis gtan tshigs mi mthun pa'i phyogs la 'jug pa'i dogs pa ldog par 'gyur ba 'di la bsgrub par bya ba las bzlog pa la gtan tshigs gnod pa can gyi tshad ma ci yod ce na/ gcig ni du ma la 'jug pa zhes bya ba la sogs pa smos te/ ji ltar gcig du ma la 'jug pa mi rigs pa de ltar de gcig la 'jig rten ngo bos zhes bya ba la sogs pas yan lag can dgag par rgyas par bstan pa'i phyir yang 'dir rgya mi bskyed do/ /gzhan nyid dang gzhan ma yin pa dag nyid sun 'byung bar bshad pa/ gzhan dang gzhan min brjod la sogs/ /zhes bya ba la sogs pa ste/ gang las 'di ni gzhan no/ /'di ni gzhan ma yin pa'o zhes bya ba'i brjod pa dang rtogs pa dag tu 'gyur ba gzhan dang gzhan ma yin pa de'i rgyu mtshan ni go rims bzhin du gzhan nyid dang gzhan ma yin pa nyid yin par grub po/ /sogs pa'i sgras rtogs pa bzung ngo / /sbyor ba ni gang 'di gzhan dang gzhan ma yin pa'i blo de ni bum pa las tha dad pa'i don gzhan du gyur pa'i rgyu mtshan can ma yin te/ de'i shes pa dang mi mthun pa'i phyir bde ba la sogs pa'i blo bzhin no zhes bya ba'o/ /'di ltar phyogs gcig na gnas pa'i gang bu dag la gzhan dang gzhan ma yin zhes bya ba'i blo 'jug pa'i phyir / re zhig 'di phyogs kyi rgyu mtshan can ma yin la/ dus kyi rgyu mtshan can ma yin te/ da ltar ba'i dus gcig la da ltar bar gnas pa phyogs dang yul ma nges pa dang ldan pa'i gzhon nu dang gnas brtan dag la rnam par dbye nas gzhan dang gzhan ma yin pa'i blo 'jug pa'i phyir te/ de khyad par med na yang khyad par yod pa'i phyir ro snyam du bsams pa yin no/ /blo 'di'i rgyu mtshan gzhan brjod par yang mi nus te/ de lta bas na 'di'i rgyu mtshan gang yin pa de ni gzhan nyid dang gzhan ma yin pa nyid do zhes bya bar grub po/ /phyogs dus de yi rgyu mtshan min/ /zhes bya ba ni phyogs dang dus kyis phyogs dang ldan pa'i nye ba dang bskal pa'i dngos po la rgyu mtshan can ma yin no zhes bya ba'i don to/ /phyogs dang dus kyi sgra dag gis btags nas phyogs dang dus kyi yul phyogs dang ldan pa dag bstan to/ /'di ltar gzhan gyis gzhan nyid dang gzhan ma yin pa nyid rnam pa 'di gnyis kyang phyogs dang dus kyis byas pa yin no zhes brjod de/ de la phyogs kyis byas pa'i skye bo ni 'di lta bu yin te/ phyogs gcig na gnas pa'i gang bu dag la lta ba po gcig nye ba'i dbang du byas nas/ 'di ni de las bskal pa yin no zhes gzhan nyid la mi brten pa'i blo skye la/ de'i phyir de la ltos nas phyogs kyi phyogs gcig gzhan dang ldan pa las gzhan nyid skye ba dang / bskal pa'i dbang du byas nas 'di ni 'di las nye ba yin no zhes gzhan ma yin pa nyid la dmigs pa'i blo skye ste/ de la ltos nas phyogs kyi phyogs gcig gzhan dang ldan pa las gzhan ma yin pa nyid skye ba yin no/ / dus kyis byas pa'i skye ba'i rim pa yin te/ 'di ltar da ltar ba'i dus kyi dang yul ma nges pa phyogs dang ldan pa'i gzhon nu dang / gnas brtan dag gi nang nas gang zhig skra dkar dang gnyer ma dang sma ra spyi cer la sogs pas nyi ma shar ba dang nub pa mang ba nyid rjes su dpag pa'o/ /de la lta ba po gcig la gzhon nu'i dbang du byas nas bskal pa'i blo skye ste/ de la ltos nas dus kyi phyogs gcig gzhan dang ldan pas gzhan nyid skye ba dang / gnas brtan gyi dbang du byas nas kyang gang zhig spyi cer ma yin pa la sogs pas nyi ma 'char ba dang nub pa dag nyung ba nyid rjes su dpag pa de las gzhon nu nye ba'i blo skye ste de la ltos nas dus kyi phyogs gcig gzhan dang ldan pas gzhan ma yin pa nyid skye'o zhes bya'o/ /gzhan nyid dang gzhan ma yin pa nyid sgrub par byed pa 'di ni ma nges pa yin te bsgrub par bya ba las bzlog pa la yang gtan tshigs 'jug pa'i phyir ro zhes ston pa ni/ ji ltar sngon po la sogs gzugs/ /zhes bya ba la sogs pa'i / /'byung ba ni skye ba ste/ de dang lhan cig gnas pa'o/ /zhes tshig rnam par sbyar ro / /'di skad du bstan pa yin te/ dper na sngon po la sogs pa dag la rim gyis skye ba'i phyir dus kyi khyad par dang rim gyis gnas pas/ phyogs kyi khyad par yon tan rnams la yon tan med pa'i phyir gzhan nyid dang gzhan ma yin pa nyid kyi mtshan nyid kyi yon tan med na yang sngon po gzhan ni sngon po gzhan ma yin no zhes bya ba gzhan dang gzhan ma yin pa bstan pa yin no/ /de bzhin du bum pa la sogs pas yang ci'i phyir mi 'dod/ 'dis ni 'di bstan pa yin te/ gal te 'di la don gzhan du gyur pa'i rgyu mtshan nyid tsam sgrub par 'dod na de'i tshe gtan tshigs ma nges pa yin te/ de ni bsgrub par byas pa las bzlog pa la yang 'jug pa'i phyir ro/ /ci ste rtag par gyur pa'i dus dang phyogs kyi dngos po'i rgyu can gyi khyad par gang yin pa de blo'i rgyu mtshan du bsgrub par 'dod na/ de'i tshe dpe med la dam bca' ba yang rjes su dpag pas gnod pa yin no/ /'di ltar brjod par nus te/ gang gzhan dang gzhan ma yin pa'i blo yin pa de ni gzhan gyis brtags pa'i yon tan dang bral ba'i don tsam gyis byas pa'i rim gyis skye bar gnas pa'i rgyu mtshan can yin te/ gzhan dang gzhan ma yin pa'i blo yin pa'i phyir/ gzugs la sogs pa la gzhan dang gzhan ma yin pa'i blo bzhin no/ /bum pa la sogs pa la yang gzhan dang gzhan ma yin pa'i blo 'di yin no zhes bya ba ni rang bzhin gyi gtan tshigs so/ /gal te sngon po la sogs pa rnams la don gcig la 'du bas gzhan nyid dang gzhan nyid ma yin pa'i blo 'di ni nye bar btags pa yin te/ des na gtan tshigs ma nges pa yin no/ /sngon po la sogs pa la yang brgyud nas gzhan nyid la sogs pa'i rgyu mtshan yod par khas blangs pa'i phyir dpe la bsgrub par bya ba ma tshang ba yin no zhe na ma yin te/ blo 'khrul pa med pa'i phyir nye bar btags pa nyid du mi rigs so zhes 'di ni bsal zin to/ /rang gi rten la yang de dag dmigs pa med pa'i phyir de'i stobs kyis shes pa rigs pa ma yin na/ de'i phyir gang las gzugs la sogs pa la de'i rgyu mtshan du 'gyur/ dus snga ma dang phyi mar 'byung ba'i bde ba la sogs pa dag la yang ci zhig brtag ste/ de la ni don gcig la 'du ba yod pa ma yin no/ /gzhan yang dus dang phyogs dag sngar bkag pa nyid kyis med pa'i phyir de'i rgyu can gyi gzhan nyid dang gzhan ma yin pa nyid dag kyang med pa'i phyir gang gis gtan tshigs ma nges par 'gyur ba gang las de'i rgyu mtshan can nyid du dgos / gang gis ltos pa'i blo dang lhan cig pa'i de dang ldan pa las gzhan nyid la sogs pa skye bar 'gyur ba phyogs dang dus dag ni phyogs gcig yang dag par yod pa ma yin te/ de dag ni gcig gi bdag nyid kyis cha shas med pa'i phyir ro/ /yan lag tha dad pa nye bar btags pa ni don byed pa'i rjes su byed par yang rigs pa ma yin te/ de ni dngos po'i rang bzhin dang rjes su 'brel pa'i phyir dang / nye bar btags pa de yang brdzun pa yin pas de'i phyir ma nges pa nyid ma yin no/ /gzhan gyi gtan tshigs kyang snga ma bzhin du ma grub par brjod par bya'o/ /grangs dang ldan pa zhes bya ba la sogs pa gzhan dag ni skabs su bab pa'i grangs la sogs pa'i yon tan gyi dngos po sgrub par byed pa de dogs pa bsu ba yin no/ /ji skad du bshad pa'i grangs la sogs pa'i yon tan 'di thams cad ni rdzas las tha mi dad pa ma yin te/ de dag ni rdzas de rnam par gcod pa'i rgyu nyid yin pa'i phyir ro/ /gang zhig gang gzhan las rnam par gcod par byed pa de dag ni de las tha mi dad pa ma yin te/ lhas byin gyi dbyig pa la sogs pa bzhin no/ /de'i phyir 'di la rdzas las tha mi dad pa bkag pa tsam sgrub na dam bca' ba grub pa la sgrub pa'i skyon yod de/ kun rdzob tu yod pa thams cad ni dngos po med pa nyid kyis de nyid dang gzhan dag tu brjod par bya ba ma yin pa nyid du 'dod pa'i phyir ro/ /'on te zhes bya ba la sogs pa 'dir rna ma phug pa'i lan dogs par byed de/ des smras pa/ tshogs pa dang rgyun dang gnas skabs kyi khyad par rnams ni/ de nyid dang gzhan dag tu brjod par bya ba ma yin pa ma yin te/ so sor nges pa'i chos dang ldan pa'i phyir/ gzugs dang ro la sogs pa bzhin no zhe'o/ /de ni de kho na nyid du zhes bya ba la sogs pas lan 'debs par byed de/ gal te don dam pa'i chos dang ldan pa nyid gtan tshigs su 'dod na/ de'i tshe gtan tshigs ma grub ste/ sangs rgyas ba la ni rgyun la sogs pa kun rdzob tu yod pa rnams la don dam par nges pa'i don dang ldan pa nyid du ma grub po/ /'on te spyir gtan tshigs yin te/ de ni nam mkha'i pad ma la sogs pa dag la yang med pa nyid dang / lus can ma yin pa nyid kyi phyir la sogs pa brtags pa'i nges pa'i chos yod pa'i phyir gtan tshigs ma nges pa nyid yin no/ /de skad nyid du brjod pa na zhes bya ba ni/ spyir brtags pas nye bar brjod pa med pa dang ldan pa'i chos ma spangs par brjod pa yin no zhes bya ba'i don te/ 'di'i gtan tshigs 'di ni ma nges pa yin te/ gang gi phyir tha dad pa ste gzhan nyid dang / tha dad med pa ste gzhan ma yin pa nyid 'di dag ni dngos po kho na la rnam par gnas kyi gzhan du ma yin no/ /rgyun la sogs pa yang btags par yod pa nyid kyis dngos por yod pa ma yin na de'i phyir ji ltar 'di dag dngos po las tha dad pa dang tha mi dad pa grub par 'gyur/ de'i phyir de ltar sbyor ba dang po la grangs la sogs pa rdzas las tha mi dad pa bkag pa tsam sgrub na grub pa la sgrub po zhes bstan pa yin no/ /yang ci ste tha mi dad pa bkag pa tsam sgrub pa ni ma yin no/ /'o na ci zhe na/ dgag pa nyid kyis sgrub pa go bar byed pa yin pa'i phyir/ dgag pa gnyis kyis rdzas las tha dad pa nyid bsgrub par bya ba yin no snyam na/ de 'dir gal te rdzas la sogs pa yang zhes bya ba la sogs pa dogs par byas nas/ grangs la sogs pa ma grub phyir/ /zhes bya ba la sogs pas 'gegs par byed do/ /de ltar zhes bya ba ni rdzas las tha dad med pa ni ma yin no/ /'o na ci zhe na/ gzhan nyid do zhes bya ba'i don to/ /grangs la sogs pa'i rten ma grub pa de nyid ston pa ni/ bsdu ba sogs la zhes bya ba la sogs pa'o/ /de ltar brjod pa yin zhes bya ba ni gcig go gnyis dag go mang po rnams so zhes bya ba de lta bu la sogs pa'o/ /'di snyam du rdzas kyi bdag nyid du yod pa'i grangs la sogs pa tha dad du bsgrub par bya ba gzhan nyid do snyam du sems na/ rang gi ngo bo las zhes bya ba la sogs pa smos te/ dngos po la rang gi ngo bo las tha dad pa yod pa ma yin te/ de rang bzhin med pa nyid du thal bar 'gyur ba'i phyir ro/ /'gal bar 'gyur zhes bya ba ni phan tshun 'gal ba ste/ tha dad pa dang tha mi dad pa dag la ni phan tshun spangs te gnas pa'i mtshan nyid kyis cig car gcig la 'gal ba'i phyir ro/ /de lta na re zhig gzhan nyid dang gzhan ma yin pa nyid kyi mthar thug pa'i yon tan rnams bkag nas/ blo la sogs pa 'bad pa'i mthar thug pa rnams ni bdag la brten pa nyid du 'dod de / de dag kyang bdag bkag pa nyid kyis bkag par blta bar bya'o/ /'di dag bdag la brten par rigs pa yang ma yin te/ 'di ltar 'di dag gi skye ba'i rgyu nyid kyis bdag la brten par 'gyur ram gnas pa'i rgyu nyid kyis yin/ re zhig skye ba'i rgyu'i rgyu nyid kyis ni ma yin te/ bde ba la sogs pa rgyu mtshang ba med pa nyid kyis thams cad kyi tshe skye bar thal bar 'gyur ba'i phyir ro/ /gzhan gyi bogs dbyung du med pa ni lhan cig byed pa la ltos pa 'ga' yang yod pa ma yin no zhes bya ba 'di lan brgyar dpyad zin to/ /rtag pa ni 'bras bu skyed par nus pa yang ma yin te/ de ni rim dang cig car dag gis khyab pa'i phyir la/ rtag pa yang rim dang cig car dag gis don byed pa 'gal bar bstan zin pa'i phyir ro/ /gnas pa'i rgyu nyid kyis kyang rigs pa ma yin te/ gnas pa ni gnas pa po las tha mi dad pa'i ngo bo nyid yin pa'i phyir / de'i rgyu yin na gnas pa po'i rgyu nyid brjod par 'gyur ro/ /de yang de ma thag tu bkag pa yin te/ gnas pa po de yang yongs su mthar thug pa'i bdag nyid kyi ngo bo yin pa'i phyir/ rgyu 'ga' yang yod pa ma yin te/ de de la cung zad kyang mi byed pa'i phyir ro/ /gnas pa las gnas pa tha dad pa yin na yang des cung zad kyang ma byas te/ don gzhan du gyur pa'i gnas pa'i rgyu yin pa'i phyir ro/ /de lta yin dang cung zad kyang mi byed pa ji ltar de'i rten du 'gyur/ de dang 'brel pa'i gnas pa'i rgyu yin pas 'di de'i phan 'dogs par byed pa yang rigs pa ma yin te/ de'i 'brel pa nyid ma grub pa'i phyir ro/ /gnas pa la rgyu nyid rigs pa yang ma yin te/ rtag pa ni gang du yang nus pa mi 'thad pa'i phyir ro zhes bstan zin to/ /gzhan yang gnas par bya ba'i dngos po 'di rang nyid bstan pa ma yin pa'i rang bzhin yin nam/ brten pa'i rang bzhin zhig tu 'gyur/ gal te brtan pa ma yin pa'i ngo bo yin na/ de ji ltar gzhan gyis gnas par nus te/ de'i rang bzhin nyams par thal ba'i phyir ro/ /ci ste brten pa'i rang bzhin yin na de lta na yang gnas pa po cung zad kyang mi byed pa nyid de/ rang nyid brtan pa'i rang bzhin yin pa nyid kyis de rang nyid gnas par grub pa'i phyir ro/ /gzhan yang re zhig lus can gyi dngos po gang dag yin pa de dag 'og tu ltung ba'i gegs byed pa nyid kyis brten pa yin na bde ba la sogs pa 'di gang dag yin pa de dag lus can ma yin pa nyid kyis 'og tu 'gro ba yod pa ma yin pa'i phyir ci zhig byed pa na de dag gang rten du 'gyur/ yod pa dang med pa ni cha med pa dang de bas nye bar brjod pa med pa nyid kyis rten du mi 'thad pa'i phyir ro/ / de ltar bde ba la sogs dang gzhan dag kyang ci rigs par rten nyid du ma grub pa'i phyir yon tan zhes bya ba med do snyam du bsams pa'o/ /gzhan yang gzhan dag gis blo shes pa rang bzhin du khas blangs pa yin te/ ji skad du blo dang / dmigs pa dang shes pa zhes bya ba ni don gzhan du gyur pa ma yin no zhes bshad pa yin no/ /de yang de lta bu'i ngo bo yin na yang gzhan dag gis rang rig pa'i ngo bor ni mi 'dod kyi/ 'on kyang blo gzhan gyis rtogs par bya ba nyid yin te/ de lta bur gyur pa ni gzugs la sogs pa bzhin du rang las ma grub pa'i phyir blo nyid du rigs pa ma yin no zhes ston par 'gyur ro/ /bde ba dang / sdug bsngal dang / 'dod pa dang / sdang ba dang / 'bad pa rnams kyang shes pa ma yin pa'i ngo bo nyid du 'dod pa yang tshad ma'i mtshan nyid brtag par 'gegs par 'gyur ro/ /lci ba nyid dang gsher ba nyid dang snum pa la sogs pa bzhin du dgag pa bsgrub par bya'o zhes bya ba de ltar nges par byas nas 'di dag gi dgag pa ma byas par 'dus byas pa dgag pa ni/ shugs brjod ces bya ba la sogs pa smos so/ /'dus byas pa ni rnam pa gsum ste/ shugs dang / bag chags dang / gnas pa 'jig pa'o/ /de la shugs zhes bya ba ni sa dang chu dang me dang rlung dang yid de lus can gyi rdzas lnga po dag la 'bad pas bcom pa'i khyad par la ltos pa las skyes pa yin te/ de yang phyogs kyis bya ba nges pa'i rgyun dang reg pa dang ldan pa'i rdzas dang ldan pa dang 'gal ba yin no/ /de bzhin du mda' la sogs pa gang gi dbang gis mda' bar du ltung bar mi 'gyur ba 'bad pa'i khyad par gyis skyed pa las kyi khyad par gyi rgyu can yin no/ /de nyid kyi phyir 'di ni phyogs kyi bya ba nges pa'i 'bras bus rjes su dpag pa yod pa nyid du grub po/ /yal ga la sogs pa la ni bor bas snang ba las byung ba las skyes pa'o/ /goms pa'i ming can ni bdag gi yon tan shes pa las skyes pa shes pa'i rgyu gang yin pa 'di brjod do/ /de yang mthong ba dang thos pa dang nyams su myong ba dag la dran pa dang / ngo shes pa'i 'bras bus dpag pas yod pa nyid du grub po/ /gnas pa 'jig pa ni lus can gyi rdzas kyi yon tan gang zhig 'bad pas gzhan du byas pa mkhrang ba'i cha shas bkod pa'i khyad par dus gzhan du gnas pa can rang gi rten du snga ma bzhin du ji ltar gnas pa bzhin du 'jig par byed pa ste/ dper na ta la'i lo ma la sogs pa dus yun ring mor bltab pa brkyang bas grol ba yang de lta bu kho nar gnas pa bzhin no/ /gzhu dang yal ga dang rwa la sogs pa dang gos la sogs pa thur du bkug pa dag la de'i 'bras bu mngon pa nyid yin no/ /mtha' dag ces bya ba rnam pa gsum char yang ngo / /de la shugs zhes bya ba ni las kyi rgyun brjod pa'i 'bras bur ma grub ste/ dngos po'i tshogs mtha' dag la khyab pa'i skad cig ma 'jig pa bsgrub zin pa'i phyir ro/ /de lta bas na de ru rang gi ngo bo thob pa las phyis dngos po thams cad med pa'i phyir 'di bya ba gang gi rgyun gyi rgyur 'gyur ba bya ba 'ga' yang yod pa ma yin no/ /'on te rang gi nye bar len pa'i yul yongs su spangs nas dngos po rnams yul la khyab par skye ba nyid kyi bya ba'i rgyun 'dod na/ de'i tshe yang ma nges pa nyid yin te/ de lta bu'i rnam pa'i bdag nyid du gyur pa'i rgyun las de ltar skye ba'i dngos po rgyu dang rkyen sngon du 'gro ba nyid rjes su dpog par byed kyi/ ji skad du bshad pa'i 'dus byas pa ni ma yin te/ de dang lhan cig rjes su 'gro ba gang du yang ma grub pa'i phyir ro/ /gzhan yang gal te rnam pa de lta bu'i 'dus byas pa'i stobs kyis mda' la sogs pa mi ltung bar gyur na de'i tshe de dag nam yang ltung bar mi 'gyur te/ thams cad du ltung ba'i gegs kyi rgyu shugs kyis gnas pa'i phyir ro/ /de lta yin dang khyad par med pa'i nam mkha'i yul du 'phangs pa'i mda' glo bur du ltung bar dmigs pa gang yin de ji ltar 'thad par 'gyur/ lus can rlung la sogs pa dang phrad pas nus pa nyams par byas pa'i phyir shugs zhig pas ltung ba yin no zhes brjod par nus pa yang ma yin te/ dang po nyid du ltung bar thal bar 'gyur ba'i phyir ro/ /de dang 'gal ba'i rlung dang phrad pa ni thams cad du yod pa nyid yin no/ /ci ste yang shugs ni nges pa kho nar dang po stobs dang ldan pa'i phyir 'gal na yang rlung dang phrad pa khyad par du bsad nas 'di mda' yul gzhan du khyed par byed pa yin no snyam na/ gal te de lta na gang gis yul shin tu thag ring bar yang de khyer bar mi byed pa phyis de stobs chung bar sus byas/ thams cad du khyad par med pa'i rlung dang phrad pa dang ldan pa'i nam mkha'i dkyil du 'phangs pa'i mda' yang bar du ltung bar mthong ba yin no/ /phyis shugs gzhan du gyur par yang brjod mi nus te/ gzhan du skye ba'i rgyu med pa'i phyir ro/ /mda' la sogs pa de ni thams cad du 'du ba'i rgyun med pa kho na'o/ /las zhes bya ba'i rgyu phyis khyad par du 'gyur ba yin no zhes brjod par rigs pa yang ma yin te/ de la yang brgal zhing brtag pa mtshungs pa'i phyir ro/ /shugs kyis gzhan du gyur na yang snga ma 'jig pa'i rgyu med pa'i phyir de'i gnas skabs nyid yin pas mda' mi ldud ba kho nar 'gyur ro/ /de'i 'jig pa'i rgyu rlung dang phrad pa yang ma yin te/ dang po nyid du ltung bar thal bar 'gyur ba'i phyir ro zhes bya ba 'di ni bstan zin to/ /rlung thams cad du khyad par goms pa zhes bya ba sun dbyung ba'i phyir/ goms par brjod pa'i zhes bya ba la sogs pa smos te/ gal te dran pa la sogs pa'i 'bras bu las phyir goms pa tsam bsgrub na/ de'i tshe 'grub pa la sgrub pa yin te/ 'di ltar sngar nyams su myong bas bsgos pa'i nus pa'i mtshan nyid kyi rang gi bdag nyid du gyur pa'i dngos po de dang phrad pa yang khyad par med pa de'i phyir 'di na ni ci yang ma yin no/ /gang la bag chags zhes bya bar grags pa dran pa la sogs pa'i rgyur 'dod pa kho na'o/ /ci ste bdag gi yon tan gyi rang bzhin gyis dngos po bsgrub par 'dod na/ de'i tshe rnam pa de lta bu dang lhan cig gang du yang dran pa la sogs pa rjes su 'gro ba ma grub pa'i phyir gtan tshigs ma nges pa nyid dang / dam bcas pa yang rjes su dpag pa dang 'gal ba yin te/ de'i rten gyi bdag sngar bkag pa nyid kyis med pa'i phyir/ de yang med par grub pa'i phyir ro/ /sbyor ba ni gang zhig gang la brten pa de ni de med pa na gnas pa thob pa ma yin te/ rtsig pa la sogs pa med pa la ri mo bzhin no/ /gzhan gyi lugs kyis 'dus byas pa yang bdag la brten pa yin no zhes bya ba ni khyab par byed pa 'gal ba dmigs pa'o/ /ma grub pa yang ma yin te/ bdag de ni sngar bsal zin pa'i phyir ro/ /de lta bas na 'dus byas ni sems kyi bag chags kyi bdag nyid du rigs kyi bdag gi yon tan ma yin no zhes bya ba ni tshad ma'i 'bras bu ste/ gcig ni tshad mas grub pa'i phyir la/ gzhan ni bzlog pa'i phyir ro snyam du bsams pa yin no/ /gsum pa yang sun dbyung ba'i phyir/ gnas pa zhes bya ba la sogs pa smos te/ 'di ltar 'di dngos po gnas pa gang yin pa 'jig par byed pa res 'ga' 'di rang nyid mi brtan pa'i rang bzhin nyid yin pa'am/ yang na brtan pa'i rang bzhin yin zhes bya ba phyogs rnam pa gnyis so/ /gal te mi brtan pa'i rang bzhin yin na de'i tshe 'di skad cig las phyis med pa'i phyir/ 'di gang gi 'jig pa por 'gyur/ 'on te phyogs gnyis pa yin na de'i tshe dngos po la ste brtan pa'i don rnams kyang yod pa la de'i ngo bo ste/ rang bzhin gyis brtan pa'i ngo bo yin pa'i phyir ro/ /gnas zhes bya ba ni gzhan gyis kun du brtags pas cung zad kyang mi byed pa'i 'jig pa pos ci zhig bya zhes snga ma bzhin du sun 'byin pa brjod par bya'o/ /ci ste yang dngos po thams cad skad cig ma yin na yang skad cig ma gcig tu gnas pa'am/ rgyun gyis rjes su 'jug pa la de'i nus par brjod do snyam du sems na/ 'di la yang rang gi rgyu nyid las zhes bya ba la sogs pa smos te/ rang gi rgyu nyid las 'grub pa na skad cig gcig gnas pa grub ste/ 'di ltar 'di dag gi gnas pa ni bdag nyid thob pa'i mtshan nyid la brjod kyi/ rang nyid g.yo ba'i bdag nyid kyi dus phyis gnas pa med pa'i phyir yod pa'i bdag nyid thob pa rnams dus phyis bdag gi ngo bo 'dzin pa'i mtshan nyid ni ma yin no/ /gnas na yang nam yang mi ldog bar thal bar 'gyur te/ snga ma bzhin du phyis kyang khyad par med pa'i phyir dang / de'i rang bzhin ma yin pa de nyid du thal bar 'gyur ba'i phyir ro/ /phyi ma phyi ma'i 'bras bu skye ba ni snga ma snga ma'i rgyu'i nus pas byas pa'i phyir rgyun la yang 'dus byas pa'i nus pa 'grub pa ma yin no/ /'o na skad cig ma yin pa 'di 'jig pa por 'gyur ro zhe na/ gzhan du zhes bya ba la sogs pa smos te/ skad cig ma ma yin pa gang yin pa de ni gzhan du 'gyur ba mi srid pa'i phyir rang nyid kyis gnas pa ma yin pas ci zhig byed na 'di de'i 'jig pa por 'gyur zhes bya ba 'di ni bstan zin to/ /yang ji ste 'di 'jig par byed pa por ma gyur mod/ 'on kyang skad cig ma nyid skyed par byed par 'gyur ro snyam na/ 'di'i rgyu nyid ma mthong na zhes bya ba la sogs pa smos te/ gzhal bya'i de kho na nyid rnam par 'jog pa ni tshad ma la rag las pa yin no/ /gang gi de'i tha snyad du 'gyur ba gos la sogs pa la 'di'i rab tu grags pa'i rgyu las ma gtogs pa mngon sum dang mi dmigs pa dag gis sam/ mig la sogs pa bzhin du 'bras bu ldog pa las rgyu nyid du mthong ba ste/ nges pa ni ma yin no/ /ci ste nus pa ma mthong ba yang rgyu nyid du rtog par byed na/ de'i tshe 'dus byas pa'am gzhan dbyug pa la sogs pa yang skye ba'i rgyur 'gyur te/ brtag par bya'o zhes bya ba lhag ma'o/ /gang gis khyed cag nus pa yongs su ma nges pa'i 'dus byas pa'i bdag nyid gcig yongs su brtags pas yongs su tshim par 'gyur ba nus pa ma mthong ba nyid du ni khyad par 'ga' yang med do/ /'di khyed cag gi skye ba'i rgyur 'dod pa yang ma yin te/ 'on kyang gos la sogs pa skyes pa yod pa'i dus phyis 'jig par 'gyur ba'i yon tan du 'dod do/ /de la yang 'di ni cung zad kyang mi byed do zhes dang por brjod zin to/ /skye ba'i rgyu nyid du khas blangs nas nyes pa 'di brjod pa yin te/ res 'ga' la rang gi gzhung lugs kyi lugs las 'das nas 'di ltar rtogs par byed do snyam du bsams pa yin no/ /de ltar zhes bya ba la sogs thams cad kyi don nye bar sdud par byed do/ /chos dang chos ma yin pa'i mtshan nyid kyi yon tan sun dbyung ba'i phyir/ yid dang ldan pa zhes bya ba la sogs pa smos te/ ma mthong ba'i byed pa po ni 'bras bu ster ba bdag gi yon tan bdag dang yid ldan pa las skyes pa rang gi 'bras bu dang 'gal ba med pa'o/ /de yang chos dang chos ma yin pa'i bye brag gis rnam pa gnyis so/ /de la chos ni byed pa po la 'dod pa dang phan pa dang thar pa'i rgyu'o/ /chos ma yin pa ni mi 'dod pa dang mi phan pa dang 'ching ba'i rgyu'o zhes gzhan dag gis ma mthong ba'i mtshan nyid smras pa de 'di ni bdag dang yid dad de dag gi ldan pa de'i rgyu nyid du 'dod pa sngar bkag pa'i phyir rgyu med pas med do zhes bya bar grub pa/ /sgra ni nam mkha'i yon tan nyid du 'dod de/ de ni dang po nyid du rim sogs thos zhes bya ba la sogs pas bsal zin pa'i phyir yang 'di'i sun 'byin pa mi brjod do/ /de kho na nyid bsdus pa'i dka' 'grel las/ yon tan gyi don brtag pa ste bcu drug pa'o// //las kyi tshig gi don dbyung ba'i phyir/ skad cig gis 'jig ces bya ba la sogs pa smos te/ mdo las/ 'degs pa dang / 'jog pa dang / bskum pa dang / brkyang ba dang / 'gro ba zhes bya ba rnams ni las yin no zhes 'byung ngo / /de la 'degs pa ni steng dang 'og gi phyogs dag dang ldan pa dang rnam par dbye ba'i rgyu las skye ba gang yin pa ste/ dper na lus kyi yan lag gam de dang 'brel pa'i lus can gyi rdzas bod pa la sogs pa la nam mkha' la sogs pa'i steng dang 'og dang thad ka'i cha'i khyad par dag dang ldan pa'i rgyu 'og phyogs kyi cha rnam par dbye ba'i rgyu 'bad pa la sogs pa'i dbang gis las skye ba gang yin pa de ni 'degs pa zhes bya'o/ /'di las bzlog pa'i ldan pa dang rnam par dbye ba'i rgyu'i las ni 'jog pa'o/ /rdzas drang po 'khyog pa nyid kyi rgyu ni bskum pa ste/ ji skad du dpung pa la sogs pa'i rdzas drang po'i sor mo la sogs pa rtse mo'i yan lag gang dag yin pa de dag nam mkha' la sogs pa'i rang dang ldan pa dag dang rnam par dbye ba dang bdag nyid rtsa ba'i yul dag dang ldan pa na las gang gis dpung pa la sogs pa'i mtshan nyid kyi yan lag can gug por grub par byed pa de ni bskum pa zhes bya'o/ /'di las bzlog pa'i ldan pa dang rnam par dbye ba skyed pa las gang gis yan lag can drang por sgrub par byed pa de ni brkyang ba'o/ /yul dang phyogs ma nges pa'i bum pa la sogs pa dang rnam par dbye ba'i rgyu gang yin pa de ni 'gro ba'o/ /'degs pa la sogs pa las rnam pa bzhi ni yul dang phyogs nges pa'i nam mkha' la sogs pa dag dang ldan pa dad rnam par dbye ba'i rgyu yin la/ 'gro ba ni ma nges pa'i phyogs dang phyogs kyi chos thams cad dang ldan pa dang rnam par dbye bar byed do/ /de nyid kyi phyir las rnam pa lnga kho nas 'gyur te/ 'khyam pa dang g.yo ba dang spro ba la sogs pa rnams ni 'gro ba nyid kyi khongs su 'dus pa'i phyir ro/ /las rnam pa lnga po 'di yang lus can gyi rdzas la gnas pa'i ldan pa dang rnam par dbye ba'i 'bras bus dpag pas yod pa nyid du grub po/ /ldan pa dang rnam par dbye ba'i khyad par gyi thun mong gi 'bras bu yin te/ de'i phyir 'di 'bras bu las grub po/ /de bzhin du mngon sum gyis kyang yin te/ ji skad du grangs dang tshad dang so so ba nyid dang ldan pa dang rnam par dbye ba dag dang gzhan nyid dang / gzhan ma yin pa nyid dag dang / las rnams ni gzugs can dang 'du ba'i phyir mig gis gzung bar bya ba yin no zhes bshad do/ /de lta bas na 'di dag ni mdor bsdus pas gzhan gyi gzhung lugs bstan pa'o/ /de'i phyir 'di la ldan pa dang rnam par dbye ba dag ni sngar bkag pa'i phyir de'i 'bras bu nyid ma grub bo/ /ci ste bar ma chad par skye ba tsam gyi mtshan nyid kyis ldan pa dang rnam par dbye ba dag de'i 'bras bu yin pa nyid kyis rgyu nyid du brjod na de lta na yang gtan tshigs ma nges pa yin te/ rnam pa de lta bu'i las dang de dag gang du yang rjes su 'gro ba ma grub pa'i phyir ro/ /bsgrub par bya ba las bzlog pas gtan tshigs la khyab pa'i phyir 'gal ba yang yin no/ /rgyu rtsam yod pa nyid du sgrub na yang grub pa la sgrub pa yin te/ rlung la sogs pa rnam pa de lta bu'i ldan pa dang rnam par dbye ba'i rgyu nyid du 'dod pa'i phyir ro/ /khyad par sgrub pa yang dam bca' ba la rjes su dpag pas gnod pa yin te/ 'di ltar bya ba dang 'du ba'i dngos po skad cig ma yin pa'am/ skad cig ma ma yin pa yin/ re zhig skad cig ma ni ma yin te/ de ni skye ba'i yul nyid du zhig pa'i phyir te/ nyams pa'i phyir yul gzhan du phyin par mi srid pa'i phyir ro/ /sbyor ba ni gang dag yul gang du zhig pa de ni de'i dus phyis de las yul gzhan du phyin pa ma yin te/ sgron ma la sogs pa bzhin no/ /brjod par 'dod pa'i dngos po thams cad kyang skye ba'i yul nyid du zhig pa yin no zhes bya ba ni khyab par byed pa 'gal ba dmigs pa'o/ /gtan tshigs ma nges pa yang ma yin no zhes bstan pa'i phyir/ shin tu myur bar zhes bya ba la sogs pa smos te/ ches myur du 'jig par 'dod pa gang yin de dag de lta bu yin no/ /yang ches myur du 'jig par 'dod pa'i sgron ma la sogs pa yang skye ba'i dus phyis kyi bya ba yin te/ 'di ni skad cig drug tu gnas pa nyid kyis skad cig ma ma yin pa'i phyir/ ci ltar zhe na/ 'di ltar zhes bya ba la sogs pa smos te/ 'di ltar re zhig rang gi rgyu dang 'brel ba'i dus ni dang po yin no/ /de nas phyis spyi gsal ba'i dus so/ /de nas yan lag gi las kyi dus so/ /de'i mjug thogs su yan lag rnam par dbye ba'i dus so/ /de nas rang rtsom par byed pa'i yan lag gi ldan pa zhig pa'o/ /de nas rdzas 'jig pa'o zhes bya ba sgron ma la sogs pa'i dngos po yang skad cig ma drug tu gnas par 'dod de/ de'i phyir dngos po skad cig la 'gro ba dang ldan pa 'ga' yang med pa'i phyir bya ba dang ldan pa thams cad ni skyes pa las dus phyis byung ba nyid kyi bya ba yin no/ /gtan tshigs ma grub pa yang ma yin te/ /gzhan ni skad cig ma nyid du mi rung ba'i phyir ro/ /ci ste yang gal te kho bo cag gis kyang dngos po rnams skad cig ma nyid du 'dod de/ de lta na yang 'di dag gi bya ba skye ba'i dus nyid du 'byung bar ci'i phyir mi 'gyur snyam na/ rgyab dang mdun zhes bya ba la sogs pa smos te/ gang gi rgyab kyi yul dang bral la mdun yul dang 'jug pa dang / phrad pa ni 'gro ba po yin pa'am/ /rgyab tu brkyang ba la sogs pa'i rten yin gyi gzhan du ni ma yin te/ dper na nam mkha' la sogs pa bzhin no/ /gang gis sngar gyi yul yongs su spangs pa sngon du 'gro ba can rgyab kyi yul non par 'gyur ba skad cig gcig tsam du 'byung ba 'di tsam zhig sdod pa ni yod pa yang ma yin no/ /yod pa'i dus su yang 'jig pas dbang byas pa'i phyir yul gzhan du phyin par mi nus so/ /de lta bas na skye ba'i dus su 'byung ba'i bya ba yang rigs pa ma yin no/ /sngon dang phyi ma dag gi mthar yang ma yin te/ de ni de'i dus na nye bar brjod pa med pa yin pa'i phyir ro/ /de'i phyir skad cig kyang med pa gang yin pa de yul shin tu thag ring par phyin par 'gyur ba lta re zhig zhog /'on kyang rdul phra rab tsam gyi yul phyogs su phyin pa yang med pa'i phyir skad cig ma la bya ba ga la yod skad cig ma ma yin pa la yang med do zhes ston pa ni/ dngos po brten na zhes bya ba la sogs pa'i rtag tu gcig gi ngo bo'i dngos po ni skad cig ma ma yin pa zhes bya ba la/ de ni bya ba dang mi 'du ba gsal rab pa nyid de/ nam mkha' bzhin du thams cad du khyad par med pa'i phyir ro/ /sbyor ba ni gang thams cad du khyad par med pa'i de la ni bya ba srid pa ma yin te/ nam mkha' bzhin no/ /skad cig ma ma yin par 'dod pa'i dngos po yang thams cad du khyad par med pa yin no zhes bya ba ni khyab par byed pa 'gal ba dmigs pa'i thal bar 'gyur ba'o/ /gal te 'di snyam du skad cig ma ma yin pa'i dngos po khyad par med pa de lta na yang rang bzhin gyis de 'gro ba po la sogs pa'i ngo bo yin pa'i phyir bya ba dang ldan pa nyid du 'gyur bas de'i phyir gtan tshigs ma nges pa yin no snyam du sems pa'i dogs pa bsu nas/ gal te zhes bya ba la sogs pa smos so/ /gal te lha sbyin la sogs pa skad cig ma ma yin pa nyid du 'dod pa 'di dag rang bzhin gyis 'gro ba dang / 'degs pa la sogs pa dang ldan pa yin na de'i tshe nam yang mi gnas par mi 'gyur te/ thams cad du 'gro ba po la sogs pa'i ngo bo yin pa'i phyir ro/ /de lta yin dang 'gro ba la sogs pa dang ldan pa'i lha sbyin la sogs pa'i 'di mi g.yo ba'i gnas skabs su 'gro ba la sogs pa med na yang de dag ste 'gro ba la sogs thob par 'gyur te/ 'gro ba la sogs pa rtsom pa'i dus bzhin du ngo bo ma dor ba'i phyir ro/ /ci ste skyon 'dis 'jigs nas 'di 'gro ba po ma yin pa la sogs pa'i ngo bo nyid du khas len par byed pa de lta yin na thams cad kyi tshe mi 'gro ba la sogs par 'gyur te/ gcig gi ngo bo nyid yin pa'i phyir nam mkha' bzhin no/ /sogs pa'i sgras/ 'degs pa la sogs pa gzung ngo / /de lta yin dang 'gro ba la sogs pa yod na yang de mi g.yo ba kho nar 'gyur te/ 'gro ba po ma yin pa'i ngo bo ma dor ba'i phyir mi g.yo ba'i gnas skabs bzhin no/ /g.yo ba'i las 'di la yod pas g.yo ldan no/ /g.yo min ngo bo'i dus bzhin no/ /zhes bya ba la bzhin ni bdun pa'i mtha' can no/ /ci ste yang 'di gcig gi ngo bo ma yin no/ /'o na ci zhe na/ 'gro ba po la sogs pa dang 'gro ba po ma yin pa la sogs pa'i ngo bo nyid kyis gnyi ga'i ngo bo yin pas de'i phyir ji skad du bshad pa'i skyon du thal bar mi 'gyur la/ gtan tshigs kyang ma grub pa yin no zhes dogs pa bsu ba ni gal te gcig ces bya ba la sogs pa'o/ /gcig tshe'ang zhes bya ba la/ 'ang gi sgra ni rim pa tha dad pa ste/ yang zhes bya ba'i mjug tu blta bar bya'o/ /yang gzhan du yang zhes bya ba'i don to/ /gzhan du zhes bya ba ni 'gro ba po zhes bya ba'i don to/ /de lta na ni 'gro ba po nyid dang 'gro ba po ma yin pa nyid la sogs pa 'gal ba'i chos dang ldan pas gcig nyid nyams par thal bar 'gyur ro/ /de nyid kyi phyir de skad cig ma nyid du grub po zhes bstan pa'i phyir/ de dag shin tu zhes bya ba la sogs pa smos te/ de dag ces bya ba ni g.yo ba dang mi g.yo ba'i gnas skabs su 'byung ba dag go/ /g.yo dang mi g.yo dngos po bzhin/ /zhes bya ba ni lcug ma dang re lde la sogs pa bzhin no/ /de ltar re zhig dam bca' ba la rjes su dpag pas gnod pa bsgrubs nas/ mngon sum gyis gnod pa yang bsgrub pa'i phyir/ mthong ba nyid du zhes bya ba la sogs pa smos te/ gang zhig dmigs pa'i mtshan nyid du gyur pa yin pa ma dmigs pa de ni rtog pa dang ldan pa rnams med pa'i tha snyad 'jug pa yin te/ dper na phyogs 'ga' zhig na bum pa ma dmigs pa bzhin no/ /gzugs la sogs pa las ma gtogs pa'i las kyang mi dmigs so zhes bya ba ni rang bzhin mi dmigs pa'o/ /de lta de ltar yul gzhan bdag gir byed pas skye ba'i gzugs la sogs pa las ma gtogs pa'i las ni dbang po'i shes pa la snang bar rtogs pa ma yin no/ /gang yang 'degs pa dang 'jog pa po snyam pa'i brjod pa dang ldan pa'i blo 'di skye ba de ni brjod pa dang bcas pa'i phyir mngon sum ma yin no/ /'di ni las kyi tshig gi don nyams su myong ba'i stobs kyis 'byung bar yang rigs pa ma yin te/ gzugs la sogs pa nyid de lta de ltar skye ba mthong ba'i phyir/ brda ji lta ba bzhin du de dag kho na la zhen nas 'jug pa'i phyir ro/ /'di yang rtag pa dang mi rtag pa dag la 'gro ba la sogs pa med pa'i phyir zhes de ma thag tu bstan zin to/ /des na mngon sum kho na las grub pa yin no zhes gang smras pa 'di ni ma grub po/ /ji skad du bshad pa nyid kyi don nye bar bsdu ba'i phyir/ de ltar zhes bya ba la sogs pa'o/ /de ltar zhes bya ba ni de ma thag tu brjod pa'i mngon sum dang / rjes su dpag pa dag gis bsal zin pa'i phyir ro/ /bye dang phrad pa mi rigs phyir/ /zhes bya ba ni sngon ma dang bye ba mi rigs pa'i phyir la/ rgyab ma dang phrad pa mi rigs pa'i phyir zhes go rims bzhin du sbyar ro/ /'o na gal te ji ltar 'jig rten na 'gro ba'i tha snyad du 'gyur zhe na/ 'dra ba gzhan gyi zhes bya ba la sogs pa smos te/ 'dra ba gzhan gyi dngos rnams zhes bya ba ni de dag ni 'dra ba yang yin la gzhan yang yin no zhes bsdu ba byas la de dag kyang yin la dngos po yang yin zhes tshig rnam par sbyar bar bya'o/ /'dra ba gzhan gyi dngos po de dag bar chad med par rang gi nye bar len pa'i rgyu'i yul spangs nas skye ba yod pa gang yin pa de'i skye ba dmigs pa'i rgyu'i phyir de nyid 'gro ba 'di yin no zhes 'khrul par 'gyur te/ dper na 'ga' zhig tu nges pa'i sgron ma yul gzhan du 'gro ba yin no zhes bya ba blo'i rgyu nyid du 'gyur ba bzhin te/ sgron ma de nyid yul gzhan du phyin pa ni ma yin te/ de ni skad cig ma drug tu gnas pa nyid du mngon par 'dod pa'i phyir ro/ /dngos po'i rang bzhin nyid sngon dang phyi ma'i mthas stong par skye'o zhes brjod de/ des na de ni dmigs pa nyid du rigs pa kho na'o/ /rnam pa gcig tu na skye ba zhes bya ba 'di ni lnga pa'i mtha' can te/ bar med par skye ba las 'dra ba gzhan gyi dngos po rnams yul gzhan du dmigs pa'i phyir zhes sbyar ro/ /de kho na nyid bsdus pa'i dka' 'grel las/ /las kyi tshogs kyi don brtag pa ste bcu bdun pa'o/ / //rdzas la sogs pa zhes bya ba la sogs pas spyi dang khyad par dbyung ba rtsom mo/ /rigs rnams zhes bya ba ni spyi rnams so/ /de dag kyang rdzas dang yon tan dang las kyi bdag nyid kyi tshig gi don gsum la brten pa'i phyir de bsal ba nyid kyis spangs pa yin no/ /rten med par ni gang du yang brten pa rnams gnas pa yod pa ma yin te/ mi brten pa nyid du thal bar 'gyur ba'i phyir ro/ /rigs smos pa ni nye bar mtshon pa ste bye brag kyang mtha'i rdzas la 'jug pa'i phyir brten pa nyid du 'dod do/ /de'i phyir de dag kyang brten brtsam pa nyid kyis spangs pa de lta na yang slar yang khyad par du sun dbyung ba brjod par 'dod pa rang gi ngo bo nges par shes pa sun dbyung bar nus pa'i phyir/ re zhig spyi dang bye brag dag gi rang gi ngo bo bstan pa'i phyir/ de la zhes bya ba la sogs pa smos te/ de la spyi ni rnam pa gnyis te/ mchog dang mchog ma yin pa'o/ /mchog ni yod pa zhes bya ba ste/ de yang rdzas dang yon tan dang las gsum po mtha' dag la 'jug pa'i shes pa'i rgyu yin pa nyid kyi phyir/ spyi kho na yin gyi bye brag ni ma yin no/ /mchog ma yin pa ni rdzas dang yon tan dang las nyid la sogs pa'i mtshan nyid de/ de yang rang gi rten rdzas la sogs pa la 'jug pa'i shes pa'i rgyu yin pa nyid kyi phyir spyi zhes bya ba la/ rang gi rten rigs mi mthun pa dag las ldog pa'i shes pa'i rgyu nyid kyis khyad par du byed pa'i phyir spyi yin na yang bye brag ces brjod do/ /'di ltar yon tan la sogs pa la rdzas ma yin pa dang yon tan ma yin pa zhes bya ba la sogs pa bzlog pa'i blo 'di skye ba sgrub par byed pa gang yin pa de la yon tan nyid dang rdzas nyid la sogs pa 'di dag nyid kyi rnam par gnas kyi gzhan gyi ni ma yin te/ rdzas ma yin pa nyid ces bya ba gzhan ni yod pa ma yin no/ /ltos pa tha dad pa'i phyir gcig dang spyi dang khyad par gyi dngos por mi 'gal ba kho na'o snyam du bsams pa'o/ /bye brag gzhan gyi mtshan nyid bshad pa/ bye brag dag kyang kha cig nyid ces bya ba la sogs pa'o/ /kha cig ni bye brag kho nar 'dod kyi spyi ni ma yin te/ ldog pa nyid yin pas ldog ste/ ldog pa'i shes pa nyid kyi rgyu zhes bya ba'i don to/ /de dag gang zhe na/ rtag pa'i rdzas zhes bya ba la sogs pa smos te/ de skad du yang rtag pa'i rdzas la 'jug pa'i mtha' ni bye brag go zhes bshad do/ /rtag pa'i rdzas la 'jug pa zhes bya ba ni rdul phra rab dang nam mkha' dang dus dang phyogs dang bdag dang yid la 'jug pa'i phyir ro/ /'gro ba 'jig pa dang rtsom pa'i mthar gyur pa'i phyir dang / grol ba'i bdag dang grol ba'i yid ni 'khor ba'i mthar gyur pa'i phyir mtha' nyid yin no/ /de'i phyir de dag la yod pa ni mtha' zhes bya ba ste/ de dag la gsal bar mi dmigs pa'i phyir ro/ /'jug pa ni 'di dag rdul phra rab la sogs pa rtag pa'i rdzas la 'jug pa yin no/ /de nyid kyi phyir rtag pa'i rdzas la 'jug pa dang / mtha' zhes bya ba gnyi ga gzung ngo / /de dag kyang phan tshun du tha dad pa'i blo'i rgyu nyid yin pa'i phyir rang gi rten gzhan las khyad par byed pas bye brag ces bya'o/ /yang 'di dag ga las grub ce na/ gang gi stobs kyis zhes bya ba la sogs pa smos te/ ji ltar bdag cag la sogs pas ba lang la sogs pa la byad gzugs dang yon tan dang bya ba dang yan lag dang ldan pa'i rgyu mtshan rta la sogs pa'i shes pa mthong ste 'di ltar ba lang dang dkar po dang myur bar 'gro ba dang nog rgyas pa zhes bya ba dang go rims bzhin no/ /de bzhin du bdag cag las khyad par du gyur pa'i rnal 'byor ba rnams/ byad gzugs dang yon tan dang bya ba mtshungs pa'i rdul phra rab rtag pa rnams dang grol ba'i bdag dang yid rnams la rgyu mtshan gzhan med pa na gang gi stobs kyis rten so so la 'di dang mi 'dra'o snyam pa'i shes pa gang las ldog pa'i yul dang dus dang bskal pa ma mthong ba la de nyid 'di yin no zhes bya ba'i ngo shes pa rnal 'byor pa rnams la 'byung ba khyad par gyi shes pas dpag pa'i yod pa mtha' dang khyad par grub bo/ de dag kyang bdag nyid ji lta ba bzhin du rten so so la brten pa yin la/ rnal 'byor pa rnams kyis ni mngon sum nyid kyis grub bo/ /ci ste rigs rnams ji ltar grub ce na/ yod dang zhes bya ba la sogs pa smos te/ gang zhig gang du gtogs pa'i rjes su 'gro ba dang ldog pa'i rjes su byed par 'gyur ba de ni de las byung ba yin no zhes rnam par gzhag par bya ba yin la/ rdzas la sogs pa la yod pa la sogs pa'i shes pa skye ba yang dbang por gtogs pa'i rjes su 'gro ba dang ldog pa'i rjes su byed pa ni/ de las gzhan pa'i dbang po'i shes pa bzhin du ci'i phyir dbang pos bskyed par bya ba'i tha snyad 'jug par mi byed de de lta ma yin na ha cang thal bar 'gyur ro/ /rjes su dpag pas kyang 'di dag gi yod pa nyid bsgrub pa'i phyir rjes su dpag pa zhes bya ba la sogs pa smos te/ shes pa'i bye brag ni zhes bya ba ni rdzas la sogs pa'i dngos po dang mi 'dra ba'i rnam pa'i shes pa'o/ /rgyu mtshan gzhan las byung ba can ni rgyu mtshan gzhan las byung ba ste skyes pa de 'di la yod pa'i phyir ro/ /sbyor ba ni dngos po gang gi rnam pa dang mi 'dra ba'i shes pa gang yin pa de ni de las ma gtogs pa'i rgyu mtshan gzhan las byung ba yin te/ gos dang pags pa dang bal la sogs pa la dmar po la sogs pa'i shes pa bzhin no/ /rdzas la sogs pa la yod pa la sogs pa'i shes pa 'di yang de bzhin no zhes bya ba ni rang bzhin gyi gtan tshigs su gzhan dag sems so/ /tshad ma'i don 'di nyid/ ba lang glang chen la sogs zhes bya ba la sogs pas dngos po rnam par 'byed pa la sogs pas bkod pa'i tshad ma ston pa yin te/ de dag dngos po rnam par 'byed pas smras pa/ ba lang dang phag dang glang po che la sogs pa la ba lang la sogs pa'i shes pa dang brjod pa'i khyad par rnams ni/ brda dang cha byad dang gong bu las tha dad pa'i rang gi ngo bo dang rjes su mthun pa'i 'dra ba'i rgyu mtshan gzhan gyi rgyu mtshan can yin te zhes smras te/ ba lang la sogs yul nyid yin pa na/ gong bu la sogs par rang gi ngo bo'i shes pa dang brjod pa las tha dad pa'i shes pa dang brjod pa yin pa'i phyir ro/ /ba lang la sogs pa de dag nyid la be'u dang bcas pa'i ba lang khal bkal ba'i ma he zug rngu dang bcas pa'i phag / lcags kyu dang bcas pa'i glang po zhes bya ba la sogs pa'i brjod pa dang shes pa'i khyad par bzhin no/ /chos mi mthun pa ni gong bu la sogs pa'i rang gi ngo bo brjod pa dang shes pa'i khyad par rnams so/ /gang dag rgyu mtshan gzhan yin pa de dag ni ba lang nyid la sogs pa yin par grub po/ /de la brjod pa ni sgra'o/ /shes pa ni shes pa dang brjod pa zhes bya ba'i don to/ /shes pa brjod pa dag nyid khyad par gyi bsdu ba'o/ /brda ni brdar byas pa'o/ /byad gzugs ni dbyibs so/ /gong bu ni rdzas so/ /sogs pa'i sgras gzugs la sogs pa gzung ngo / / de dag las tha dad pa'i rang gi ngo bo rang gi brjod pa dang shes pa so so la rjes su mthun pa dang khyad par yin pa'i phyir 'dra ba'i rgyu mtshan gzhan rnams gang dag yin pa de dag rgyu mtshan du gang dag la zhes tshig rnam par sbyar ro/ /yang na de dag ni brda la sogs pa las tha dad pa yang yin la yod pa la sogs pa'i shes pa dang brjod par rang gi ngo bo'i rjes su byed pa dang 'dres pa yin zhes tshig rnam par sbyar bar bya'o/ /lhag ma ni snga ma bzhin no/ /smras ste zhes bya ba ni dam bca' ba'o/ /ri bong gi rwa la sogs pa'i shes pas 'khrul par dogs pa la de yongs su spang ba'i don du ba lang la sogs pa yul nyid yin pa na zhes khyad par du byas so/ /gong bu la sogs pa'i rang gi ngo bo'i brjod pa dang shes pa las tha dad pa'i brjod pa dang shes pa gang la yod pa de'i dngos po ni de nyid do zhes tshig rnam par sbyar ro/ /chos mi mthun pa'i gong bu la sogs pa'i rang gi ngo bo'i yul can gyi brjod pa dang shes pa'i khyad par zhes bya ba de la sogs pa las tha dad pa'i rgyu mtshan gzhan med pa na ji skad du bshad pa'i gtan tshigs kyang med pa'i phyir ro/ /'od byed pas smras pa/ ba lang la sogs pa la rjes su 'jug pa'i shes pa ni gong bu la sogs pa las tha dad pa'i rgyu mtshan las byung ba yin te/ bye brag dang ldan pa'i phyir/ sngon po la sogs pa'i shes pa bzhin no/ /de bzhin du ba lang nyid ni ba lang la don gzhan yin te/ shes pa tha dad pa'i yul yin pa'i phyir/ gzugs dang reg pa la sogs pa bzhin no/ /de'i shes bya'i tha snyad kyi yul yin pa'i phyir/ dper na nag pa'i rta bzhin no zhes bya ba ni nag pa las tha dad par bstan pa yin no/ /'di nyid bstan pa ni ba lang la sogs la zhes bya ba la sogs pa ste go bar zad do/ /de kun snying po med pa ste zhes bya ba la sogs pas lan 'debs par byed de/ gang yang yod pa la sogs pa'i shes pa ni dbang po'i bya ba yod pa'i phyir dbang po la brten pa yin no zhes smras pa de la/ gal te dngos su dbang po'i bya ba'i de ma thag tu 'byung ba'i phyir zhes bya ba gtan tshigs kyi don du 'dod na de'i tshe gtan tshigs ma grub ste rtog pa dang bcas pa nyid kyis brda gzo ba dang dran pa la sogs pas bar chod pa'i phyir ro/ /rjes su 'gro ba gcig med par phan tshun zlog pa'i bdag nyid kyi dngos po rnams brgyud pas kyang tha mi dad pa rnam pa'i shes pa'i rgyu mtshan du rigs pa ma yin zhes bya ba 'di yang brjod par rigs pa ma yin te zhes dogs pa la dper na zhes bya ba la sogs pa smos te/ ji ltar skyu ru ra la sogs pa phan tshun shin tu tha dad pa'i lus can rnams kyang re re'am tshogs pas rjes su 'gro ba med pa yang nad rnam pa sna tshogs pa bzlog pa dang ldan pa yin no/ /de la spyi nyid rnam pa de lta bu'i don bya ba byed pa sgrub par byed do zhes kyang brjod par mi rigs te/ gang gi phyir de dag la don byed pa sna tshogs pa sgrub par byed pa'i spyi yod pa ni ma yin no/ /gal te yod na de'i tshe gang 'di 'ga' zhig tu res 'ga' skyu ru ra la sogs pa myur ba dang 'gor bar nad la sogs pa zhi bar byed pa'i nus pa dmigs pa der mi 'gyur te/ spyi gcig gi ngo bo yin pa'i phyir ro/ /zhing dang 'o mas bcus pa la sogs pa'i 'du byed pa'i khyad par bsgrub pa'i spyi nyid don bya ba sna tshogs sgrub par byed pa yin no zhes rigs pa ni ma yin te/ de ni rtag pa nyid kyis zhing la sogs pa'i khyad par las kyang gzhan gyis rnam par 'gyur bar ma skyed pa las ni khyad par 'ga' yang med de/ gcig gi ngo bo yin pa'i phyir ro/ /skyu ru ra la sogs pa mi rtag pa rnams ni zhing la sogs pa khyad par las khyad par dang bcas pa yod pas de'i phyir de nyid nad la sogs pa zhi ba la sogs pa zhi ba'i nus pa dang ldan pa yin no/ /de lta yin dang bum pa la sogs pa dngos po gzhan yang de bzhin te/ rgyu dang rkyen dag las de ltar skye ba'i phyir rang bzhin gyis rnam pa gcig gi ngo shes pa la sogs par 'gyur ba yin pa'i phyir skyon med do/ /'dra bar shes pa la sogs pa'i zhes bya ba la sogs pa la sogs pa'i sgras chu 'dzin pa la sogs pa'i don byed par nus pa gzung ngo / /yang ji ltar 'di dag gi brda gzo ba la sogs pa bar du chod pa nyid 'grub pa yin zhe na/ 'bras bu tsam la zhes bya ba sogs pa smos te brda ma bzung ba rnams la yod pa la sogs pa'i shes pa skye ba ma yin te/ gzhan du na brda byed pa don med par 'gyur ro/ /de lta bas na gcig gi rnam par zhen pa 'di la bar du chod pa'i don byed par nus pa tsam bstan par 'dod pa khyad par gzhan ma spangs par yong pa zhes sgra sbyor bar byed pa yin no/ /brda byed pa'am ji ltar dga' bar gzhan la yang zhes bya ba ni gzhan dngos po'i sgra'o/ /de bzhin ba lang la sogs pa'i khyad par gyi sgra yang 'gal ba la sogs pa'i nus pa'i khyad par shes par 'dod pa na brda byed pa yin no zhes sbyar bar bya'o/ /de lta yin dang brda'i dus su phyis tha snyad kyi dus su mthong ba'i ba lang la sogs pa la yang sngar brda gzo/ /de las de dran par bya'o / /de'i 'og tu yod pa la sogs pa'i shes pa skye ba yin zhes gsal ba rab tu shes pa yin no/ /shin tu goms pa 'ga' zhig ni/ ches myur bar skye ba'i phyir 'di dag gi rim pa mi 'dzin la/ goms pa zhan pa ni gsal rab tu 'dzin par byed pa nyid yin no/ /de'i phyir zhes bya ba ni mjug sdud pa ste/ de'i phyir ni de lta bas na ste/ de'i phyir de ltar na brda gzo ba la sogs pas bar du chod pa'i phyir dngos su mi skye bas 'di dag mngon sum nyid du ma grub po/ brgyud nas skye ba na yang mngon sum nyid du rigs pa ma yin te ha cang thal bar 'gyur ba'i phyir snyam du bsams pa'o/ /dran pa yin pa'i phyir de las gzhan pa'i dran pa bzhin du yod pa la sogs pa'i shes pa ni mngon sum nyid du rigs pa ma yin no zhes bya ba 'di las kyang ngo zhes bstan pa'i phyir/ dang por rtog pa med ces bya ba la sogs pa smos te/ rang gi mtshan nyid la brda mi byed pa'i phyir mthong ba'i don la mi rtogs pas/ dngos po'i rang gi mtshan nyid yul yin pa nyid kyis brjod pa dang 'dres pas dben pa'i chos dang por yod pa'i rnam par shes pa dbang po la brten pa skye'o/ /de las te phyis mthong ba'i dngos po de nyid la brda gzo'o/ /de'i 'og tu brda ji lta ba bzhin du mthong ba'i don gyi yul de nges pa nyid kyis mthong ba'i don de nyid la brjod pa'i yod pa la sogs pa'i shes pa skye ba ci ltar dran pa nyid sgrub par mi 'gyur/ de las kyang zhes bya ba ni ji ltar mthong ba nges pa las so/ /de dag go zhes bya ba ni yod pa la sogs pa'i shes pa'o/ /yang gang las shes pa rnams kyi skye ba'i rim pa 'di nges pa yin zhe na/ gzhan du zhes bya ba la sogs pa smos te/ gang gi phyir yod pa la sogs pa'i shes pa de dag rim pa 'dis skye ba de nyid kyis gzhan du ste yul gzhan du song ba'i sems ni/ sems yengs pa'o/ /mdun na gnas pa'i dngos po mthong ba dngos po'i brda yid la byed pa la sogs pa 'jug pa mngon du phyogs pa ches dang por khyad par thams cad kyi dben pa'i dngos po tsam mthong bar 'jug go/ /de lta ma yin te gal te rnam par shes pa thams cad rtog pa dang bcas pa yin na de'i tshe yid gzhan du song bas khyad par thams cad kyis stong pa'i dngos po ji ltar mthong bar 'gyur/ dus gcig tu cig car rnam par rtog pa gnyis rigs pa ni ma yin te/ de lta bas na de ltar dngos su dbang po'i rjes su 'gro ba dang rtog pa'i rjes su byed pa nyid ma grub po/ /de la/ ba lang glang chen la sogs la/ /zhes gang smras pa de la/ de dag brda la gzo ba las zhes bya ba la sogs pa smos te/ gal te spyir rjes su byed pa'i 'brel pa'i rgyu mtshan gzhan tsam 'di dag gi rgyu mtshan du grub pa yin te/ 'di ltar ba lang la sogs pa'i shes pa tha snyad rnams kyi rjes su mthun pa'i 'brel pa can ni ba lang la sogs pa'i brda gzo ba kho na yin no/ /'di ltar de yod na 'byung la rigs mi mthun pa'i yid la byed pa yod na mi 'byung ba de'i phyir rjes su 'gro ba dang ldog pa dang ldan pa de nyid 'di dag gi rgyur grub ste/ der gtogs pa'i rjes su 'gro ba dang ldog pa'i rgyu 'di 'grub pa ni/ de yod pa dang med pa'i rjes su 'gro ba dang ldog pa nyid kyi rjes su byed pa'i phyir ro/ /de'i phyir gtan tshigs kyi sbyor ba ni ngal ba ni 'bras bu med pa yin no/ /ci ste brda nyid la byed pa 'di ni phyogs nyid kyi khongs su 'dus pa'i phyir de dag las ma gtogs pa'i rjes su 'gro ba rtag pa dang gcig pu'i spyi zhes bya ba'i 'brel pa can 'di dag gi rgyu mtshan du sgrub na/ de'i tshe dpe bsgrub par bya ba ma tshang ba yin no/ /de lta bur gyur pa dang gang du yang rjes su 'gro ba ma grub ste/ gang yang be'u dang myu gu la sogs pa 'di dag be'u dang bcas pa la sogs pa brjod pa dang shes pa'i rgyu nyid du brjod de/ de dag kyang de'i rgyu can nyid du ma grub ste/ rang gi mtshan nyid thob pa can gyi dngos po 'di rnams ni dngos su brjod pa dang shes pa'i khyad par gyi rgyu nyid du yod pa ni ma yin no/ /rang gi mtshan nyid ni ngag dang rnam par rtog pa thams cad kyi spyod yul las 'das pa'i ngo bo yin pa'i phyir ro/ /de'i phyir dpe bsgrub bya ma tshang ba yin no/ /brgyud pas rgyu nyid du rtogs par byed na ha cang thal bar 'gyur te/ thams cad thams cad la brgyud pas nye bar sbyor ba yin pa'i phyir ro/ /'o na gal te de lta na phyi rol gyi lcags kyu la sogs pa 'di rgyu nyid du ji ltar nges par byed ce na/ nang tsam la ni brten nas zhes bya ba la sogs pa smos te/ re zhig lcags kyu la sogs pa brtags pa nye bar len pa'i rang gi mtshan nyid gang yin pa de ni rnam par rtog par rigs pa ma yin no zhes bstan zin to/ /kun rdzob pa gang yin pa de ni rnam par rtog pa'i bzo bos sprul pa'i bdag nyid kyi ngo bo yin pa nyid kyis nang tsam la yod pa nyid yin gyi/ phyi rol ni ma yin no/ /skye bos mthong ba dang rnam par brtag pa dag gi rnam par dbye ba mi shes pa nyid kyis de'i rnam pa phyi rol lta bur zhen pa na phyi rol gyi dngos po nyid la rgyug pas de'i phyir lcags kyu la sogs pa rnams phyi rol gyi ngo bo nyid du ma grub bo/ / lcags kyu sogs zhes bya ba dang / dmigs nas zhes bya ba snga ma dang sbrel bar bya'o/ /phyi rol gyi ngo bo nyid du nges pa'i nang tsam du yod pa'i lcags kyu la sogs pa la dmigs nas phyi rol la 'jug pa yin no zhes bya ba'i don to/ /nang tsam ni blo'o/ /gang yang / ba lang la sogs yul nyid na/ /zhes khyad par du byas pa de yang mi rigs pa nyid de/ rnam par gcad par bya ba med pa'i phyir ro zhes bstan pa'i phyir dngos po med pa'i zhes bya ba la sogs pa rgyu nyid smos te/ khyed cag gi bya ba dang / yon tan gyi tha snyad med pa nyid kyang med pa'i shes pa'i rgyu nyid du brjod pa de yang mi rigs so zhes bya ba'o/ /bya ba la sogs pa med pa rgyu nyid du brjod do/ /'di ltar 'bras bu skyed par byed par nus pa rgyu nyid du brjod la/ nus pa de yang dngos po la brten pa nyid yin pa'i phyir ro/ /gal te dngos med pa yang rnam pa de lta bu'i nus pa dang ldan par 'gyur na/ de'i tshe ji ltar dngos po nyid du sgrub par mi byed de/ dngos po'i rgyu mtshan nyid de tsam nyid yin pa'i phyir ro/ /de lta yin dang med pa'i ngo bo nyid spong bar 'gyur te/ med pa ni dngos po'i rang gi ngo bo nyams pa nyid yin pa'i phyir ro/ /gzhan yang gal te bya ba dang yon tan med pa med pa'i shes pa'i rgyu nyid du 'gyur na/ de'i tshe yod pa la sogs pa yang med pa rgyu nyid du 'gyur ro/ /de la yang ri bong gi rwa la sogs pa bzhin du bya ba yang yon tan gyi tha snyad med pa'i phyir ro/ /gtan tshigs kyang ma grub po zhes bstan pa'i phyir gong bu gzugs zhes bya ba la sogs pa smos te/ gang gis 'di dag de'i shes pa las gzhan nyid du 'gyur ba ba lang la sogs pa'i shes pa rnams ni gong bu la sogs pa las ma gtogs pa'i don gzhan du gyur par nges pa yod pa ni ma yin no/ /dam bca' ba yang rjes su dpag pas gnod pa yin no zhes bstan pa'i phyir/ gang phyir rjes 'gro zhes bya ba la sogs pa smos te/ khyed cag gis rjes su 'gro ba'i shes pa gong bu la sogs pa las tha dad pa'i rgyu mtshan dmigs par gyur pa sgrub par 'dod na de yang mi rigs te/ de mi snang ba'i phyir dang mi mthun pa'i kha dog dang dbyibs snang ba'i phyir ro/ /'di ltar khyed cag gis kha dog dang dbyibs dang yi ge dang rnam pas stong pa ni ba lang nyid la sogs pa'i spyi yin par brjod la/ rnam par shes pa la yang kha dog la sogs pa snang ba dang ldan par nyams su myong ste/ de'i phyir ji ltar 'di'i dmigs pa yi ge la sogs pas stong pa ma yin par 'gyur/ gzhan gyi rnam pa can gyi shes pa ni gzhan dmigs pa yin par rigs pa ni ma yin te/ ha cang thal bar 'gyur ba'i phyir ro/ /sbyor ba ni gang zhig gang dang mi 'dra ba'i don snang ba shes pa de ni de 'dzin pa ma yin te/ dper na sgra'i shes pa gzugs 'dzin par byed pa ma yin pa bzhin no/ /rjes su 'gro ba'i shes pa yang rigs dang mi 'dra ba'i kha dog la sogs pa snang ba yin no zhes bya ba ni khyab par byed pa 'gal ba dmigs pa'o/ /sgra dang gsal bar snang ba can/ /zhes bya ba la/ sgra ni ba lang ngo zhes bya ba la sogs pa'i tha snyad dang / gsal ba ni kha dog dang dbyibs kyi bdag nyid do/ /de dag snang ba ni gsal ba'o/ /de 'di la yod pas de dang ldan pa'o/ /yi ge ni pa dang la la sogs pa'o/ /bde byed bdag pos smras pa/ sngon po la sogs spyi ni sngon po la sogs pa rnam pa nyid yin te/ gzhan du na sngon po zhes bya ba de lta bu'i rnam pa rjes su 'jug pa'i shes par mi 'gyur ro/ /de lta yin dang gtan tshigs ma yin la rjes su dpag pa yang mi 'gal lo zhe na/ de lta bas na 'dir spyi yang zhes bya ba la sogs pa smos te/ de lta na ni sngon po la sogs pa'i yon tan las sngon po nyid la sogs pa'i spyi bye brag yod par mi 'gyur te/ rnam pa tha mi dad pa'i phyir ro/ /'di snyam du sngon po la sogs pa yon tan ni rjes su 'gro ba ma yin la/ spyi ni yul dang dus tha dad pa'i gsal ba la rjes su 'gro bas des na rnam pa tha dad pa yod do snyam na/ gcig nyid ces bya ba la sogs pa smos te/ mngon sum gyi sngon po la sogs pa'i yon tan la ma gtogs pa'i sngon po la sogs pa'i rnam pa'i rjes su 'gro ba gzhan sngon po nyid la sogs pa rjes su 'jug pa snang ba ni ma nges te/ thun mong ma yin pa'i sngon po la sogs pa gcig snang ba'i phyir ro/ /rnam par rtog pa'i sems la yang sngon po nyid la sogs pa gnyis pa snang ba ma yin te/ mthong ba ji lta ba bzhin du des nges pa'i phyir ro/ /'di snyam du ji ltar khyed cag gi skad cig ma nyid snang yang zhen pa rnams kyis rnam par phye nas mi mtshon pa de bzhin du spyi 'di yang yin no snyam du sems na/ de yang mi rigs pa kho na ste/ de mthong ba'i stobs kyis gsal ba tha dad pa'i sgra dang blor 'gyur ba yin no zhes gang brjod pa de mi 'thad de/ khyad par byed pa ma mtshon par khyad par du bya ba la blo skye ba ni ma yin te/ dper na dbyig pa ma mthong bar dbyig pa can no snyam pa'i shes pa mi 'byung ba de bzhin du 'di la yang 'gyur te/ 'di ltar khyed cag gis khyad par rang la sgra dang shes pa'i spyod yul las 'das par brjod pa la / rang las blo dang sgra'i yul las 'das pa'i lus can khyad par de dag kyang spyi mthong ba'i stobs kyis rtogs pas shes pa ji ltar de nyid mi mtshon pa zhes bya ba/ gzhan yang gang gi ltar na mngon sum rtogs pa med pa yin pa de'i ltar na snang yang ma mtshon to zhes bya ba 'di brjod par rigs te/ mtshon pa ni nges pa'i shes pa'i bya ba nyid yin pa'i phyir ro/ /khyed cag gang gi mngon sum thams cad rtog pa dang bcas pa yin no zhes bya ba'i phyogs de'i mi mtshon pa nyid mi rigs te/ mi 'dzin par thal bar 'gyur ba'i phyir ro/ /rang gi don rtogs pa gang yin pa 'di nyid nges pa rnams kyi nges pa yin no/ /de dag nges pa dang ldan pa ma yin no zhe na/ de ni 'dzin par byed pa nyid ma yin par 'gyur ro/ /sngon po la sogs pa las tha dad pa'i don gzhan du gyur pa grub par khas blangs nas kyang khyed cag gi 'dod pa grub pa ma yin te/ mngon par 'dod pa'i bsgrub par bya ba'i don rjes su dpag pas gnod pa nyid kyi phyir ro/ /des na khyab pa ma grub po zhes bstan pa'i phyir/ rgyu mtshan gzhan nyid ces bya ba la sogs pa smos te/ mi brtan pa las dben pa'i zhes bya ba ni mi rtag pa las dben pa ste/ rtag pa zhes bya ba'i tha tshig go/ /ci'i phyir mi 'grub ce na/ rim gyis 'byung ba'i phyir te/ ba lang la sogs pa'i brjod pa dang shes pa rnams zhes bya ba lhag ma'o/ /gal te rnam pa de lta bu'i spyi'i chos 'di dag gi rgyu nyid du gyur na/ de'i tshe 'di dag rim gyis skye bar mi 'gyur gyi/ rgyu ma tshang ba med pa'i phyir cig car skye bar 'gyur te/ cig car skye ba'i dngos po du ma bzhin no/ /gzhan gyis phan gdags par bya ba ma yin pa la ni ltos pa 'ga' yang yod pa ma yin no/ /da ni gtan tshigs grub pa nyid du khas blangs nas 'khrul pa nyid du bshad pa ni/ tshig gi don sgra zhes bya ba la sogs pa ste/ gang gi tshig gi don zhes rjes su 'gro ba'i shes par 'gyur ba tshig gi don drug po rnams la tshig gi don nyid ces bya ba gzhan yod pa ni ma yin no/ /de bzhin du gang gis de dag la yod ces bya ba'i shes par 'gyur ba yod pa dang spyi dang bye brag dang 'du ba dag la yod pa ni ma yin no/ /yod pa ni rdzas dang yon tan dang las rnam pa kho na la gnas pa'i phyir ro/ /rdzas la sogs pa la spyi'i rgyu mtshan nyid kyi tha snyad gzhan dgag par 'dod pa'i phyir de'i sgo nas 'khrul pa ma brjod do/ /'di snyam du yod pa la sogs pa 'di la yang yod pa dmigs pa'i tshad ma nyid kyi yul chos yod de/ de'i phyir 'di la yang tha snyad 'di gzhan gyi rgyu mtshan can yin pa'i phyir 'khrul pa med pa kho na'o snyam du sems na/ de la gzhan chos zhes bya ba la sogs pa smos te/ chos gzhan rgyu mtshan nyid du khas len na 'khrul pa'i skyon de'i gnas skabs nyid yin no/ /gang gi phyir chos gzhan de la yang chos de yod do zhes yod pa'i blo yod pa kho na'o/ /de la yang chos gzhan len na thug pa med par thal bar 'gyur ro/ /gzhan dag kyang chos gzhan gyi rten yin pa'i phyir chos can nyid du thal ba yin no/ /de lta yin dang chos can ni tshig gi don drug kho na'o zhes bya ba'i drug gi grangs nges par mi 'gyur ro/ /ci ste thug pa med pas 'jigs nas chos gzhan mi brten pa de'i tshe tshig gi don rnams la yod pa la sogs pa'i chos 'jug pa'i shes pa 'di dag gis gtan tshigs 'khrul pa yin no/ /'di thun mong gi ma nges pa ma yin mod ldog pa the tshom za ba gang gis spang zhes bya ba 'di bshad pa ni thams cad nye bar sdud pa'i zhes bya ba la sogs pa'o/ /chos can thams cad du gtan tshigs la bsgrub byas khyab pa ston pa ni thams cad nye bar sdud pa'o/ /'di snyam du 'dir khyab pa rigs pa nyid yin te/ rgyu mtshan gzhan med na dngos po de'i shes pa mi 'dra bar ji ltar 'thad par 'gyur/ shes pa mang po yul mi gcig pa rnams mi 'dra ba yod pa ma yin no/ /gal te yod na de'i tshe gzugs dang ro la sogs pa'i shes pa rnams kyang yul tha dad par grub par mi 'gyur ro/ /yul tha dad pa rnam par 'jog pa ni shes pa tha dad byas pa'i phyir ro snyam du sems na/ de yang mi rigs te/ don dam par spyi'i shes pa dngos po'i rang gi mtshan nyid kyi yul gcig tu rigs pa ma yin te/ brjod pa dang 'dres pa'i shes pas rang gi mtshan nyid yul du mi byed pa'i phyir ro/ /'on kyang dngos po gcig po de gang las ldog pa de'i rgyu mtshan can de la brda ji lta ba bzhin du goms pa'i dngos po de yang nyams su myong ba'i sgo nas 'ongs pa rnam par rtog pa dang brjod pa spyi med na yang gal te rnam par rtog pa 'jug na de'i tshe 'gal ba ci zhig yod/ de'i phyir khyab pa med do zhes brjod de/ gang yang / ba lang sogs la rjes 'gro ba'i/ /zhes bya ba la sogs pa la de'i 'og tu bstan pa'i zhes bya ba la sogs pa smos te/ 'di nyid kyis zhes bya ba ni de ma thag tu bshad pa'i gtan tshigs sun 'byin pa nyid kyis te/ de la skyon mtshungs pa'i phyir ro/ /'di ltar 'dod pa sgrub pa la sogs pa 'di la yang mtshungs so/ /sogs pa'i sgras dpe bsgrub byas stong pa dang gtan tshigs ma grub dang / 'khrul pa la sogs pa gzung ngo / /rnam pa gzhan gyis kyang 'khrul pa nyid du bshad pa rjes su 'jug pa zhes bya ba la sogs pa sogs pa smos pa ste/ gang gis 'tshed pa po dang 'don pa po zhes bya ba rjes su 'jug pa'i shes par 'gyur ba de la gcig rjes su 'gro ba'i rgyu mtshan 'tshed par byed pa nyid dang 'don par byed pa nyid la sogs pa ni yod pa ma yin no/ /de bzhin du snga na med pa la sogs pa med pa gzhi la med pa'o snyam pa'i shes pa ji ltar 'jug par 'gyur/ de la yang spyi yod pa ni ma yin te/ de ni dngos po la brten pa nyid kyi phyir ro/ /'dod pas sbyar ba'i ngo bo rgyal po zla ba gzir ba la sogs pa dang / nam mkha'i dkyil du brtags pa'i khang pa dkar po la sogs pa dang zhig pa dang ma skyes pa'i rgyal po mang pos bkur ba dang dung la sogs pa'i blo gcig rjes su 'gro ba med par ji ltar 'gyur/ de la yang spyi yod pa ni ma yin te/ de ni gsal ba la brten pa'i phyir ro/ /'tshed pa po'i zhes bya ba la sogs pas 'tshed pa po la sogs pa shes pa sgrub par byed pa ma yin no/ /'tshed pa po la sogs pa dag la las kyis rgyu mtshan can gyi blo yin no zhes brjod par rigs pa ma yin te/ las de yang gsal ba re re la gsal ba bzhin du tha dad pa khas blangs pa'i phyir ro/ /tha dad pa dag la rjes su 'gro ba med par rjes su 'gro ba'i shes pa mi 'thad pa'i phyir/ khyed cag gis gsal ba thams cad la rjes su zhugs pa'i spyi brtags pa yin no/ /gal te las rjes su 'gro bas stong yang tha mi dad pa'i shes pa dang brjod pa'i rgyur 'gyur na/ de'i tshe gang gis de dag yongs su spangs nas spyi de'i rgyu nyid du rtog par byed pa gsal ba dag la ci zhig gsung / gzhan yang gal te 'tshed pa po la sogs pa la shes pa las kyi rgyu mtshan can du 'gyur na de'i tshe bya ba dang bral ba ste 'tshed par mi byed pa la 'tshed pa po zhes bya ba shes par mi 'gyur ro/ /gang gis bya ba dang bral ba la yang shes par 'gyur bo khyed cag gis rigs pa bzhin du las rtag tu nye bar 'dod pa ni ma yin no/ /gang zhig gang gi rgyu mtshan yin pa de ni de med par 'byung bar 'os pa ma yin te/ ha cang thal ba'i phyir te/ de lta na thams cad thams cad kyi rgyur 'gyur ro/ /'das pa dang ma 'ongs pa'i las ni de'i shes pa'i rgyu mtshan du rigs pa ma yin te/ 'das pa la sogs pa de dag med pa'i phyir ro/ /med pa yang rgyur mi 'thad pa'i phyir ro/ /bde byed bdag po na re/ 'tshed pa po la sogs pa rjes su 'jug pa'i shes pa de'i las kyi rigs dang 'brel pa'i bya ba dang ldan pa de las 'gyur te/ des na bya ba dang bral ba la yang bya bas bstan pa'i rgyu mtshan pa'i phyir/ 'tshed pa po la sogs pa'i shes pa zhes nges par byed pa yin no zhes zer te/ de ston pa ni gal te zhig pa'i zhes bya ba la sogs pa'o/ /des zhes bya ba ni bya bas so/ /bstan pa'i rgyu ni bya ba nyid kyis rigs so/ /'on te zhes bya ba la sogs pas lan 'debs par byed de/ rang gi rten ni bya ba'i rigs te/ de nyid bya ba yin no/ /rten 'dzin pa med par rigs 'ba' zhig 'dzin pa'am gnas pa ni yod pa ma yin te/ mi brten pa nyid du thal bar 'gyur ba'i phyir ro/ /'di snyam du lan cig rigs mtshon pa nyid kyi phyir las dang bral na yang de'i rgyu mtshan gyi shes pa de'i rten la 'jug go snyam du sems na/ dbyig pa zhes bya ba la sogs pa smos te/ de lta na ni ha cang thal bar 'gyur ro/ /dbyig pa la sogs pa'i rigs rnams lan cig mtshon pa'i phyir lha sbyin la sogs pa dbyig pa la sogs dor ba de dag la yang dbyig pa can dang rna cha can zhes bya ba la sogs pa'i blor 'gyur ro/ /'tshed pa po nyid la sogs pa'i rigs 'di la yang yod do zhes bya bar yang mi rigs te/ deng skyes pa la yang rigs yod pa'i phyir 'tshed pa po la sogs pa'i blor 'gyur ro/ /'di snyam du dper na yod pa zhes bya ba'i blo 'byung ba'i rgyu mtshan yod pa yin na yang thams cad du mi 'gyur ba de bzhin du rigs kyang rten gyi khyad par dang 'du ba can du 'gyur na yang thams cad du mi 'gyur ba'i phyir/ des na deng skyes pa'i gnas skabs su rigs dang 'du ba nyid du mi 'gyur ro/ /'du ba can zhes bya ba ni mtshon pa ste/ gsal ba ma yin pa zhes bya ba yang shes par bya'o/ /'o na de lta na nam yang de de dang 'du bar mi 'gyur te/ 'di ltar ches dang por rigs dang rdzas de dag de dang 'brel pa'i rang bzhin dang mi mthun pa'i phyir 'du ba mi skye la/ phyis kyang de dang mi mthun pa de'i gnas skabs nyid yin pa'i phyir/ ji ltar 'du bar 'gyur/ gang gis de phyis khyad par can du 'gyur ba khyed cag gi lugs kyis rdzas skad cig ma ni ma yin no/ /de bzhin zhes bya ba ni 'du ba can no/ /de dag gi zhes bya ba ni rigs dang rdzas dag gi'o/ /de bdag nyid ces bya ba ni snga ma'i rang bzhin mi mthun pa'i ngo bo ma dor ba nyid pa'o / /ji ste rdzas mi rtag pa nyid du khas len na de'i tshe yang nyes pa yod do zhes bstan pa'i phyir/ gal te gsal ba zhes bya ba la sogs pa smos te/ gal te mi rtag pa nyid kyis gsal ba khyad par du 'gyur ba yin na rigs rtag pa'i phyir sngar bzhin du phyis kyang de dang 'du ba'i mi mthun pa'i ngo bo yod pa'i phyir phyis kyang 'du ba can du ji ltar 'gyur/ dus phyis 'byung ba'i rdzas 'du ba dang mi mthun pa'i ngo bo nyid yin la rigs ni thams cad gnas pa yin no zhes brjod par yang mi nus te/ de dang 'brel ba'i rang bzhin gyi rigs rtag tu gnas pa'i phyir rdzas kyang rtag pa nyid du thal bar 'gyur ba'i phyir ro/ /'brel pa can gnyis pa med na/ de dang 'brel pa'i rang bzhin mi mthun par rigs pa ma yin no/ /'tshed pa la sogs zhes bya ba la sogs pas 'od byed par smras pa'i lan dogs par byed pa yin te des smras pa/ 'di ni gtan tshigs kyi don brjod pa yin te/ 'tshed pa po la sogs pa'i sgras rjes su 'jug pa yang yin la/ /'tshed pa po nyid ces bya ba'i spyi yod pa ni ma yin no/ /de bzhin du ba lang la sogs pa la rjes su 'jug pa'i shes pa zhes bya ba ste/ 'di ltar khyad par gyi shes pa glo bur ba ma yin pas des na 'di'i gtan tshigs kyi don gong bu'i shes pa las ma gtogs pa'i shes pa rgyu mtshan gzhan las skye ba zhes bya ba 'di yin gyi/ rjes su 'jug pa'i shes pa thams cad spyi nyid las byung ba ni ma yin no/ /de ltar yin na 'tshed par bya ba'i gtso bo'i sgrub byed gang yin pa de 'tshed pa po'i sgras brjod pa/ gtso bo de yang 'tshed pa po gzhan la yang yod pa'i phyir skyon med do zhe na/ gtso bo zhes bya ba la sogs pas lan 'debs par byed de/ gtso bo zhes bya ba 'di ci zhig /gal te nus pa yin na de mi rigs te/ de'i rten so so la nges pa nyid kyis gsal ba gzhan la rjes su mi 'gro ba'i phyir ro/ /rdzas la sogs pa'i bdag nyid kyi rang bzhin rang dbang can yang ma yin te/ rdzas su 'gro ba med pa de nyid kyi phyir ro/ /sogs pa'i sgras ni tshig gi don drug las tha dad par 'dod pa'i chos bzung ngo / /gang yang rgyu mtshan gzhan las skye ba zhes bya ba 'di yin gyi zhes smras pa de la/ spyi brtsal nas rgyu mtshan gzhan cung zad cig yod do zhes sgrub par byed na/ grub pa la sgrub ste/ brda yid la byed pa rgyu mtshan du 'dod pa'i phyir ro/ /khyad par sgrub na rjes su 'gro ba ma tshang ba dang / 'tshed pa la sogs pa'i shes pas 'khrul pa yang yin no/ /des na zhes bya ba la sogs pas 'jug sdud par byed de/ des na ste de'i phyir ro/ /gang gi phyir rgyu mtshan gzhan rnam par dpyad pa na 'tshed pa po la sogs pa'i yul la mi 'thad pa de'i phyir brda ji lta ba bzhin du 'tshed pa po'i zhes bya ba de lta bu'i rnam pa dang ldan pa rigs mi mthun pa rnam par gcod pa'i dngos po tsam nges pa tha dad pa'i dngos po 'tshed pa po la sogs pa la yang tha mi dad pas blo ste shes pa skye ba yin te/ thams cad du rigs mi mthun pa rnam par gcod pa yod pa'i phyir ro/ /gang gi phyir de ltar spyi med na yang ba lang la sogs pa la brda ji lta ba bzhin du rnam pa tha mi dad pa'i nges pa'i shes pa dag 'byung ba'i phyir gtan tshigs ma nges pa yin no/ /de ltar yang zhes bya ba la sogs pas med pa la med pa'i blo zhes bya ba de sgrub par byed do/ /'di nyid spyi'i shes pa'i rgyu mtshan la khyab pa yin te/ 'di lta ste brda gzo ba'o/ /de lta ma yin na mo gsham gyi bu la sogs pa la med pa'o zhes par rjes su 'jug pa'i sgra dang blo gang gis 'gal bar 'gyur/ 'di la rigs pa ni yod pa ma yin te/ de ni dngos po dang 'du ba nyid yin pa'i phyir ro/ /ci'i phyir mi 'gal zhes bya ba 'di la rgyu bshad pa/ de dag don med pa'i ni brda'i rjes su 'jug pa'i phyir ro zhes bya ba ni rigs la sogs pa'i don med pa brda gang la yod pa de la de skad ces bya'o/ /de'i rjes su 'jug pa'i phyir ni rjes su 'gro ba'i phyir ro/ /de dag ni shes dang sgra dag ste brda tsam gyis rjes su 'gro ba dang ldog pa'i rjes su byed pa'i phyir ro zhes bya ba'i tha tshig go/ /'di ni bum pa zhes bya ba la sogs pas 'dir bde byed bdag po'i lan gyi dogs pa bsu ba yin te/ des smras pa/ dngos po med pa de dag la khyad par med pa'i shes pa mthong ba ni ma yin no/ /'o na ci zhe na/ bum pa'i snga na med pa'o/ /bum pa'i zhig nas med pa zhes bya ba de lta bu thams cad du med pa'i shes pa dngos po khyad par can nyid la med pa dmigs pa yin te/ de lta bas na de'i blo thams cad du khyad par du gtogs pa'i spyi'i dbang gis 'jug pa'i phyir 'khrul pa med do/ /de ni zhes bya ba ni blo ste rnal ma dang sbrel lo/ /de ltar min zhes bya ba la sogs pas lan 'debs par byed do/ /mi 'dra ba dang lhan cig de la brten pa med pa zhes bya ba tshig rnam par sbyar ba'am/ gcig tu bsdu ba'i zlas dbye ba yin no/ /mi 'dra ba'i phyir dang de la brten pa med pa'i phyir de ltar mi rigs so zhes bya ba'i don to/ /de la re zhig mi 'dra ba'i phyir zhes bya ba 'di rgyas par bsgrub pa'i phyir/ bum pa zhes bya ba la sogs pa smos te/ khyad par gcig rnam pa tha mi dad pa'i blo'i rgyu mtshan du rigs pa ma yin te/ gcig nyid kyis spyi thams cad kyi 'bras bu bsgrubs zin pa'i phyir/ spyi du ma rtog pa don med par thal bar 'gyur pa'i phyir ro/ /de lta bas na bum pa nyid la sogs pa'i spyi'i dbang gis bum pa zhes bya ba la sogs pa'i blor 'gyur du chug mod/ shin tu mi 'dra ba'i dngos po med pa zhes bya ba la sogs pa ni ji ltar de'i rgyu mtshan du 'gyur/ yod pa'i dbang gis ba lang nyid la sogs pa'i blor 'gyur ba ni ma yin no/ /dngos po rnam par 'byed par smras pa/ rgyu mtshan dang rjes su mthun pa'i shes pa thams cad du 'dod pa ni ma yin te/ 'di ltar glang po dang rta dang rda ba dang seng lding la sogs pa 'dus pa dang mang po nyid kyi grangs dmag dang nags la sogs pa'i blo rnams kyi rgyu mtshan yin la/ btung ba skyur po la sogs pa rnams kyi rgyu mtshan ni rigs mi mthun pa'i rdzas sbyar ba yin no/ /de lta ma yin na mang po sbyar ba zhes bya ba'i shes pas 'gyur ro zhes bya ba/ gal te blo ni zhes bya bas dogs par byas nas/ gal te tha dad ces bya ba la sogs pas lan 'debs par byed do/ /'di zhes bya ba ni spyi'i blo'o/ / brda'i tha dad ni khyad par ro/ /yang gang gis de skad du brjod pa 'di la khyad par du 'phags pa ci zhig yod ce na/ khyad par shes na zhes bya ba la sogs pa smos te/ rgyu'i dngos po ni rjes su 'gro ba dang ldog par rtogs par bya ba yin no/ /de yang spyi'i blo la 'dod pas sbyar ba'i brda gzo ba tsam du nges pa yin te/ 'di ltar re zhig dang por khyad par gyi yul la nyams su myong ba'i shes pa skye'o/ /de skyes pa na brda byed par 'dod pa 'byung ngo / /'dod pa de las brda de byed pa ste byas pa'o/ /de nas de nyid tha snyad kyi dus su thos pa ste mnyan pa'o/ /'di thos pa las thos pa ji lta ba bzhin du brda'i yul la dus phyis gzo ba'o/ /de las te gzo ba las tha dad pa de dag nyid la de nges pas 'jug pa las bum pa'i snyam pa la sogs pa'i blo skye ba sgrub par byed pas gnag rdzi'i bar la 'di tsam zhig blo 'di'i rgyu nyid du nges pa yin no/ /nus pa ma mthong ba'i spyi rgyu nyid du rtogs pa na ha cang thal bar 'gyur ro/ /de yang rtog na nus pa ma mthong ba nyid du mtshungs pa'i phyir gzhan yang ci'i phyir mi rtog 'di rgyas pa'i phyir / 'dre ba rjes su mthun zhes bya ba la sogs pa smos te/ rjod par byed pa khyed cag gis spyi'i blo la sogs pa'i rgyu mtshan tha dad pa spangs nas ngo bo ma yin pa'i dmigs pa zhes bya ba'i spyi rtogs par byed pa yin no/ /gal te yang brtags pa'i spyi de yang gzhan gyi rnam pa can gyi blo skye ba de'i tshe ji skad du bshad pa'i nus pa mthong ba brtags par 'gyur ba nyid mchog yin no/ /de lta na ni ma mthong ba'i brtag pa byas par mi 'gyur ro/ /gzhan yang tha mi dad pa'i spyi ji ltar mi 'dra ba'i blo spyad par byed ces dris pa na/ 'di lta ste/ 'di ni dngos po rnams gyis nges pa so sor nges pa yin te/ gal te gcig yin na yang rnam pa du ma'i shes pa skyed par bya bar nus pa yin no zhes bya bar gdon mi za bar brjod par bya dgos so/ /gal te de lta na nus pa shes pa mthu nges pa'i tha dad pa de dag nyid la nus pa nges pa ci'i phyir rtog par mi byed/ de lta yin na nyams su myong ba dang mi gsal ba rjes su bsgrubs par 'gyur ro/ /'di snyam du spyi yang rjes su 'gro ba dang ldog pa dag gis nus pa nges pa yin no snyam du sems na/ rjes su 'gro ba'i zhes bya ba la sogs pa smos te/ med pas ma skyes pa'i phyir yod pa dang med pa la sogs pa'i shes pa 'di dag der gtogs pa'i rjes su 'gro ba'i rjes su byed pa nyid rigs pa ma yin no/ /gal te 'di spyi'i rjes su byed par 'gyur na/ de'i tshe spyi thams cad du gnas pas ci'i phyir rtag tu mi 'gyur/ spyi ni 'ga' zhig la ltos pa ma yin te/ de'i khyad par gzhan gyis bogs dbyung du med pa'i phyir ro/ /de'i phyir 'di dag der gtogs pa'i rjes su 'gro ba'i rjes su byed pa ma yin la/ ldog pa'i rjes su byed pa yang ma yin te/ 'di ltar gang gi tshe yod pa la sogs pa'i shes pa 'di skye ba de'i tshe der spyi med pa rgyu yin no zhes bya ba ni brjod par mi nus te/ rtag pa rnams rtag tu gnas pa nyid kyis ldog pa mi srid pa'i phyir ro/ /de'i phyir 'di dag la der gtogs pa'i ldog pa'i rjes su byed pa yang yod pa ma yin no / /gang gi phyir de bzhin du rgyu mtshan gzhan khas blangs pa na spyi la sogs pa'i blo'i nyes pa y in pa de lta bas na gzhan gyi yon tan la sogs pa la rdzas ma yin pa dang las ma yin pa la sogs pa'i shes pa'i rgyu yon tan nyid la sogs pa'i spyi'i khyad par yod pa la sogs spyi la spyi zhes bya ba'i rjes su 'gro ba shes pa'i rgyu mtshan don du ma dang 'du ba yin no zhes gang brjod pa de yang bsal ba yin no zhes bya ba 'di bshad pa ni/ rdzas la sogs pa min pa zhes bya ba la sogs pa smos te/ 'di brtags pa na yang ha cang thal bar 'gyur ro zhes bstan pa'i phyir/ de'i phyir spyi'i blo zhes bya ba la sogs pa smos te/ gal te spyi'i blo'i gcig gi rgyu mtshan don du ma la 'du ba yin na/ grangs dang ldan pa dang rnam par dbye ba dang yan lag can gyi rdzas la sogs pa la rdzas du ma ston pa nyid yod pa'i phyir de dag la yang spyi'o snyam pa'i blo'i rgyu mtshan 'gyur ba yin te/ khyad par med pa'i phyir ro/ /yod pa la sogs pa'i blo gcig gi rgyu nyid kyang yod pa la sogs pa'i rnam pas rang gi bdag nyid la nges pa'i phyir spyi gzhan la brten pa ma yin no/ /de ltar yin dang de'i stobs kyis kyang spyi dag la spyi'i snyam pa'i rjes su 'jug pa'i shes pa skye ba ma yin no/ /de ltar na/ de phyir tha dad dag la gcig /'jug pa'i rgyu mtshan gang yin te/ /yod pa sogs la spyi sgra'am/ /yang na blo gcig byed pa yin/ /zhes ku mA ra ri las smras pa 'di yang 'brel pa med pa yin no/ /de ltar re zhig mi 'dra ba'i phyir zhes bya ba ste bshad zin to/ /de la brten pa med phyir ro/ /zhes bya ba de 'chad par 'dod nas/ bum pa nyid la sogs pa zhes bya ba smos te spyi bum pa la sogs pa dag la 'du ba med pa dag la ni ma yin te de dag ni dngos po med pa'i phyir ro/ /de'i phyir ji ltar med pa de dag la bum pa la sogs pa de las gzhan la 'du bas spyi'i rnam pa'i rjes su byed pa'i shes par 'gyur/ rta la sogs pa gcig gi rnam pa shes pa'i rgyu mtshan ni glang po nyid la sogs pa ma yin no/ /'on te 'di lta ste dper na ro mngar ro/ /nub mo bsil lo/ /lci'o zhes bya ba lta bur gzhan du 'jug pas kyang gzhan du shes pa skye bar mthong ba ma yin nam zhe na/ de la smras pa/ 'dir don gcig la brten pa min zhes bya ba la/ rdzas gang kho na la mngar ba nyid 'du ba de kho na la bsil ba nyid la sogs pa yang yin pa'i phyir don gcig la 'du ba'i stobs kyis 'dir gzhi mthun par 'gyur gyi/ med pa bum pa nyid la sogs pa'i spyi dang lhan cig gang du yang rdzas gcig la 'du ba ni ma yin te/ nye bar brjod pa med pa de ni gang du yang 'du ba mi rung ba'i phyir ro/ /'dir gal te khyad par zhes bya ba la sogs pas 'od byed pa'i lan gyi dogs pa bsu ba yin te/ des smras pa/ bum pa nyid la sogs pa'i spyi na bum pa la sogs pa dang lhan cig 'du ba'i mtshan nyid kyi 'brel pa yin la/ med pa rnams ni khyad par dang khyad par can gyi dngos po'i mtshan nyid yin no/ /de lta yin dang spyi dang med pa dag don gcig la 'du ba'i 'brel pa 'di la yang tha snyad kyi rgyu yod pa kho na'o zhe'o/ /de la lan gdab pa'i phyir/ 'brel pa gzhan ni yod pa na/ /zhes bya ba la sogs pa smos te/ dngos po rnams kyi phan tshun khyad par dang khyad par can gyi dngos po ni 'brel pa gzhan gyis bskyed pa yin te/ 'di lta ste/ dper na dbyig pa dang lha sbyin dag dang rgyal po dang skyes bu dag gi rje khol gyi dngos po la sogs pa'i 'brel pa la brten nas khyad par dang khyad par can yin no/ /khyad par dang khyad par can gyi dngos po la rgyu mtshan du gyur pa'i 'brel pa gzhan de med pa la khyad par can dang khyad par de ci ltar 'gyur/ gzhan du na ha cang thal bar 'gyur te/ de lta na ni thams cad thams cad kyi khyad par du 'gyur ro/ /da ni ji ltar 'brel pa med par 'jig rten na bum pa'i snga na med pa zhes bya ba la sogs pa khyad par dang khyad par can gyi dngos po rtogs she na/ bum pa 'di'i zhes bya ba la sogs pa smos te/ sngar med par gyur nas yod pa zhes bya ba'i don de tsam zhig shes par 'dod pa la blo 'di brtags pa yin te/ dngos po las don gzhan du gyur pa lta bu dang 'brel pa lta bu'i snga na med pa rtog pa skye ba yin no/ /de'i bsam pa'i dbang gis 'dir khyad par dang khyad par gyi dngos po yin gyi don dam pa ni ma yin no/ /ji ltar rtogs pa'i bzo bos bcos pa'i dpa' ba la sogs pa'i chos kyi khyad par nyid nye bar bzung ba yin te/ gang du khyed cag gis dngos po la brten pa'i khyad par dang khyad pa can gyi dngos po bzung ba der gdon mi za bar 'brel pa gzhan btsal bar bya ba yin no/ /gzhan du na rnam par gzhag pa nges par mi 'gyur ro/ /gzhan yang bde byed bdag pos smras pa'i lan 'di ni klan ka dang rjes su mthun pa nyid ma yin no zhes bstan pa'i phyir med pa med pa zhes bya ba la sogs pa smos te/ gang 'di bum pa med pa dang snam bu med pa dang ri bong gi rwa la sogs pa med pa la med pa'i snyam pa'i rje su 'gro ba'i shes pa 'jug pa'i shes pa de la kho bo cag gi spyi med na yang rjes su 'gro ba'i shes pa mthong ba'i phyir gzhan du spyi rtog pa don med do zhes klan ka byas kyi/ bum pa la sogs pa rigs mthun pa mang po rnams kyis gang snga na med pa la sogs pa'i shes pa gang yin pa de la ni ma yin no/ /gal te de lta yin na de las cir 'gyur zhe na khyad par la ni gnas pa'i spyi zhes bya ba la sogs pa smos te/ bum pa la sogs pa'i khyad par la gnas pa'i spyi bum pa nyid la sogs pa gang yin pa de'i rten bum pa la sogs pa nyid la 'jug gi snam bu la sogs pa rten gzhan la ni ma yin no/ /de ji ltar snga na med pa la sogs pa la rigs mi mthun pa'i snam bu la sogs pa la yod pa de las shes par 'gyur zhes bsams pa'o/ /thams cad du rjes su 'gro ba'i spyi gcig yod do zhe na/ de dag la ni rjes su 'jug / ces bya ba la sogs pa smos te/ gang las 'di'i shes par 'gyur ba rigs mi mthun pa'i dngos po du ma bum pa la sogs pa mtha' dag la khyab pa'i spyi gzhan yod pa ni ma yin no/ /'di snyam du de'i stobs kyis med pa'i shes par 'gyur ba yod pa zhes bya ba'i spyi chen po yod do snyam na/ de mi rigs te 'khrul pa'i phyir ro/ /'di ltar tshig gi don drug las ma gtogs pa'i so sor brtags pa'i 'gog pa la sogs pa'i tshig don gzhan med pa'i phyir khyed la med pa'i blo gang dag kun du rgyu ba dang / gang yang brtags pa'i gtam rgyud slu ba pa la sogs pa rdzas ma yin pa'i rang bzhin rnams kyi don dam pa med pa zhes bya ba'i blo rnams de dag la khyad par du gtogs pa'i spyi gang yin pa de'i rgyu mtshan du 'gyur ba gang yin khyed kyi lugs kyis so sor brtags pa la sogs pa 'di dag la yod pa nyid yod pa ni ma yin no/ /'dis ni gzhon nu ma len gyis/ /snga na med pa la sogs spyi/ /dngos po mi 'dod ma yin nam/ /'di la spyi med sogs ngo bo/ /yod pa nyid ni spyi yin no/ /zhes gang smras pa/ de yang bsal ba yin te/ la sogs ngo bo ni skye ba med pa la sogs pa'i khyad par zhes bya ba'i don to/ /de la yang nyes pa 'di nyid yin te/ gang gis de med pa'i shes par 'gyur ba gzhung lugs gzhan gyi dngos po rnams dang brtags pa'i gtam rgyud rnams la ni yod pa ma yin no/ /de nges pa'i brtags pa'i yod pa de la phyi rol gyi don gyis stong par rtogs pa yin no zhe na/ gal te de lta na sgra'i don mtha' dag rtag pa gcig pu'i yod pa dang bral ba rnam par rtog pa tsam gyi bdag nyid du ci'i phyir mi 'dod/ de lta ma yin te/ rtag pa dang gcig pur yod pa la sogs pa'i don khas len na yod pa dang skye ba tha mi dad de/ bogs dbyung du med pa'i phyir ro/ /ji ltar tha dad pa'i ngo bor rtogs par 'gyur zhes bya ba'i klan ka spang dka' ba nyid du 'gyur ro/ /da ni 'dod pas bkod pa'i ngo bo dang / zhig pa'am ma skyes pa rnams la zhes bya ba de bsgrub pa'i phyir / 'dod pas sbyar ba'i gzugs kyi zhes bya ba la sogs pa smos te/ 'dod pas sbyar ba'i ngo bo ste rang bzhin gang la yod pa de la de skad ces bya'o/ /de dang por gang la yod pa zhes tshig rnam par sbyar ro/ /sogs pa'i sgras ni zhig pa dang ma skyes pa la sogs pa gzung ngo / /gang gis de'i rgyu mtshan can de dag la blos 'gyur ba brtags pa la sogs pa la spyi yod pa ni ma yin no/ /'di snyam du brtags pa la spyi med mod/ 'das pa dang ma skyes pa la ni de'i rgyu mtshan can gyi blor 'gyur ro snyam du sems na/ de ni log pa yin te/ rten med par 'ba' zhig pa mi gnas pa gang yin pa 'di ni brten pa rnams kyi chos yin te/ mi brten pa nyid du thal bar 'gyur ro/ /'ba' zhig pa rnams gnas su chug mod/ de lta na yang nyes pa yod pa kho na ste/ spyi 'ba' zhig 'dzin par khas mi len pa'i phyir ro/ /de skad du yang / spyi rtogs pa ni rang gi rten dang dbang po phrad pa la ltos pa yin no zhes bshad pa yin no/ /spyi 'ba' zhig pa yang 'dzin na spyi'i blo las gsal ba nges par mi 'gyur te/ de'i tshe gsal ba med pa'i phyir ro/ /'di ni gsal ba rnams kyi spyi yin no zhes bya ba'i 'brel par yang mi 'gyur te/ rgyu mtshan med pa'i phyir ro/ /'di ltar/ 'brel pa'i rgyu mtshan yod na spyi de'i gsal bya yin pa'am/ de'i bskyed par bya ba nyid yin pa'am/ de 'dzin pa la ltos na 'dzin pa yin grang de lar zhig des gsal bar byas pa'i phyir spyi de dang 'brel pa ma yin te/ rtag pa nyid kyis gzhan gyis phan gdags par bya ba ma yin pa ni khyad par med pa'i phyir gsal bya nyid du mi 'thad pa'i phyir ro/ /gang zhig gang gi phan 'dogs par byed pa ma yin pa de ni de'i gsal bar byed pa ma yin te/ 'bigs byed kyi gangs can bzhin no/ /spyi'i gsal ba yang de bzhin no zhes bya ba ni khyad par byed pa 'gal ba dmigs pa'o/ /phan 'dogs par byed pa ma yin pa yang gsal bar byed pa nyid yin na ha cang thal bar 'gyur te/ thams cad thams cad kyi gsal bar byed par 'gyur ro/ /de nyid kyi phyir mi rtag pa nyid du khas blangs pa'i phyir de dag la skye ba'i gzhan gyi dbang du rigs pa ma yin la 'ba' zhig 'dzin pa'i phyir de shes pa'i gzhan gyi dbang yang ma yin pas phyogs gsum char yang srid pa ma yin no/ /de ltar yin dang spyir rtogs pa ni rang gi rten dang dbang po phrad pa la ltos pa yin no zhes gang brjod pa de mi rigs te/ rten nyid mi rung ba'i phyir de la yod pa dang dbang po phrad pa la sogs pa la ltos par ga las 'gyur/ sogs pa smos pas bdag dang yid phrad pa dang / /snang ba la sogs pa gzung ngo / /rtogs pa nyid kyis khyad par gzhan gyis bogs dbyung du med pa'i phyir 'di 'ga' zhig tu gzhan la ltos pa ni ma yin no/ /de lta yin dang gal te de rang gi yul can gyi shes pa skyed par nus na de'i tshe thams cad du de bskyed par 'gyur la/ ci ste mi nus na nam yang bskyed par ci 'gyur ro/ /de'i nus pa'am mi nus pa'i rang gi ngo bo de sus kyang gzhan du bya bar mi nus te/ rtag pa nyid nyams par 'gyur ba'i phyir ro/ /ci skad du/ de yis nus pa'am mi nus pa'i/ /rang bzhin gyis ni gnas pa gang / /rtag par khyad par byar med 'di/ /de dag su yis bshig par nus/ /zhes bshad pa lta bu'o/ / gang yang / ba lang nyid ni ba lang las/ don gzhan yin te zhes bya ba la sogs pa smras pa de ni 'tshed pa po la sogs pa dag gis ma nges pa yin no zhes ston pa ni/ ba lang nyid ni zhes bya ba la sogs pa'o/ /'di ltar 'tshed pa po la sogs pa dag las 'tshed pa po nyid la sogs pa la don gzhan du gyur pa med na yang 'tshed pa po 'tshed pa po zhes bya ba blo tha dad pa'i yul nyid du 'gyur ba kho na'o/ /lhas byin gyi 'tshed pa po nyid ces tha dad pa'i rnam par dbye ba yang 'gyur bas des na gtan tshigs thun mong gi ma nges pa yin no/ /rtags ngan gzhan yang zhes bya ba ni ku mA ra ri las smras pa ste/ de la rtags dan de dag ni 'di dag tu brjod de/ ba lang gi gong bu tha dad pa dag la/ ba lang gi blo gang yin pa 'di ni ba lang nyid gcig gi rgyu mtshan can yin te/ ba lang du snang ba'i phyir dang / gcig gi rnam pa can yin pa'i phyir ba lang gi gong bu gcig gi yul can gyi blo bzhin no/ /yang na ba lang gi blo gang yin pa 'di ni khra bo las byung ba ma yin pa'am/ de las ma gtogs pa don gzhan du 'gyur ba la dmigs pa yin te/ de med pas yang 'byung ba'i phyir bum pa la sa'i blo bzhin no/ /de'i thams cad du song ba ci ltar 'grub ce na/ brjod pa/ ba lang gi blo gang yin pa 'di ni re re la 'du ba'i don gyi yul can yin te/ gang bu re re la dngos po'i rnam pa ma lus pa'i ngo bo yin pa'i phyir bsal ba so so'i yul can gyi blo bzhin no/ /'di gcig nyid du yang grub pa kho na ste/ 'di ltar gal te yang so so la spyi'i bdag nyid thams cad kyis yongs su rdzogs pa de lta na yang de ni gcig kho na ste/ gcig gi rnam pa can gyi blos gzung bar byas pa'i phyir dgag pa dang ldan pa'i ngag dag la bram ze la sogs pa ldog pa bzhin no/ /tha dad pa dag la tha mi dad pa'i rnam pa can gyi shes pa gang yin pa de ni 'khrul pa yin te/ des na de'i stobs kyis dngos po'i de kho na nyid rnam par 'jog pa 'brel pa med pa yin no zhes bya ba 'di yang brjod par mi nus te/ 'di ltar 'di la rgyu'i nyes pa med la gnod par byed pa'i shes pa bstan pa yang ma yin no/ /de lta bas na log pa nyid kyi rgyu mtshan med pa'i phyir 'di ni mi rigs so zhe'o/ /ji skad du/ tha dad gong bu ba lang blo/ /ba lang nyid gcig rgyu mtshan can/ /ba lang snang dang gcig nyid phyir/ /ba lang gong bu gcig blo bzhin/ /khra bos ba lang blo min pa'am/ /de las gzhan pa dmigs pa'ang yin/ /de med par ni yod pa'i phyir/ /bum pa la ni sa blo bzhin/ / ba lang blo ni re re la/ /'du ba'i don yul can yang yin/ /so sor ma lus ngo bo'i phyir/ /gsal ba so so'i blo bzhin no/ /rigs ni re rer 'du ba'ang yin/ /re re ba yi blo yin phyir/ /dgag pa dang ldan ngag rnams la/ /bram ze la sogs zlog pa bzhin/ /ba lang nyid la gcig ngos blo/ / log par brjod par nus ma yin/ /'di la gnod pa'i shes pa'am/ /rgyu yi nyes pa yod ma yin/ /zhes kyang bshad do/ /de'i phyir 'dir re zhig bsgrub bya ma tshang ba yin te/ ba lang gcig nyid ma grub pa'i phyir de'i rgyu mtshan can gyi ba lang gcig gi blo yang grub pa yin no/ /ji ste phyir rgyu mtshan gcig nyid sgrub pa de'i tshe grub pa la sgrub pa yin te/ rigs mi mthun pa rnam par gcod pas ba lang gi ldog pa gcig brtags pa rgyu mtshan du 'dod pa'i phyir ro/ /ba lang gi blo khra bo las ma yin no zhes pa 'di yang dngos su de la skye ba dgag pa sgrub na grub pa la sgrub pa yin te/ de ni rang gi mtshan nyid nyams su myong ba dang yid la byed pa la sogs par bar du chod pa'i phyir ro/ /'di de brgyud nas kyang de las mi 'byung ngo zhes sgrub na de'i tshe dam bca' ba nyams su myong ba dang 'gal ba dang dpe yang bsgrub bya ma tshang ba yin no/ /gzhan la dmigs pa nyid sgrub na yang khro bo nye ba na 'di ni ba lang ngo zhes blo skye ba gang yin pa de gal te de las gzhan la dmigs pa'o zhes bsgrub na 'di'i tshe 'di la yang nyams su myong ba dang 'gal te/ 'di ltar de ni gong bu nye ba nges pa na 'jug la dpe yang bsgrub bya ma tshang ba yin no/ /ci ste de med cing khu yu la sogs pa nye ba na de ltar 'jug pa'i blo gang yin pa de las gzhan la dmigs so zhes bya bar bsgrub na de'i tshe grub pa la sgrub bo/ /gal te dngos po yod pa la dmigs pa'o zhes sgrub na de'i tshe ma nges pa yin no/ /'di ni don dam par dngos po yod pa la dmigs pa ni cung zad kyang yod pa ma yin no zhes bstan zin pa'i phyir ro/ /gang yang re re la yongs su rdzogs pa'i don gyi yul can nyid du bsgrub pa de la yang spyir sgrub pa la grub pa sgrub pa yin te/ dngos po re re la de ma yin pa'i ngo bo las log pa'i dngos po'i ngo bo nges par 'jug pa'i phyir ro/ /'on te spyi zhes bya ba rtag pa gcig pu re re la yongs su rdzogs pa'i dngos por gyur pa'i tshig gi don can nyid sgrub na de'i tshe dpe bsgrub bya ma tshang zhing gtan tshigs kyang ma nges pa yin te/ rnam pa de lta bu'i chos kyis gang du rjes su 'gro ba ma grub pa'i phyir ro/ /gcig bdag nyid thams cad kyis mang po dag la yongs su rdzogs pa nyid yin na gsal ba phan tshun tha dad pa thams cad ngo bo gcig nyid du 'gyur te/ gsal ba gcig gi mthar thug pa'i rang bzhin gyi spyi'i dngos pos reg pa'i phyir gsal ba gcig gi ngo bo bzhin no/ /yang na spyi du ma nyid du 'gyur te/ cig car dngos po du ma la yongs su rdzogs pa'i bdag nyid kyi ngo bo yin pa'i phyir yul ches ring ba na gnas pa'i snod na yod pa'i ches mang ba'i bil ba la sogs pa'i 'bras bu bzhin no zhes bya ba ni rjes su dpag pas gnod pa'o/ /des na 'di la gnod par byed pa'i shes pa yod pa yang ma yin no zhes gang smras pa de ni ma grub ste / gnod pa sngar bshad zin pa'i phyir dang / 'chad par 'gyur ba'i phyir ro/ /gal te yang rigs gcig nyid du sgrub na yang rigs re re dang 'du ba nyid du ma grub pa'i phyir blo gcig gis gzung bar byas pa nyid du ma grub pas gtan tshigs gzhan ma grub pa yin no/ /bram ze la sogs pa zlog pa yang don dam par dngos po du ma yin te/ dngos po ma yin pa'i phyir zhes bya ba ni dpe bsgrub bya ma tshang ba yin no/ /btags pa'i gcig nyid sgrub na grub pa la sgrub pa yin te/ btags pa'i sel ba'i ngo bo gcig tu 'dod pa'i phyir ro/ /gang yang 'di la rgyu'i nyes pa yod pa yang yod pa ma yin no zhes brjod pa de yang ma grub pa nyid de/ ma rig pa'i bag chags thog ma med pa'i mtshan nyid kyi rgyu'i skyon yod pa'i phyir ro/ /de'i phyir de ltar tshul 'dis rtags ngan 'di dag sun dbyung bar bya'o/ /de ltar re zhig gzhan gyis smras pa'i spyi'i sgrub byed rnams rgyas par sun 'byin pa brjod nas spyi'i gnod par byed pa'i tshad ma brjod par 'dod nas gzhan yang zhes bya ba la sogs pa smos te/ gdon mi za bar spyi tha dad pa dag la 'jug par 'dod par bya dgos te/ de lta ma yin na ji ltar de dag la de'i rgyu mtshan can gyi gcig gi rnam pa can gyi blo nges par 'grub par 'gyur/ de la 'di'i 'jug pa gnas pa'i mtshan nyid yin pa'am/ de mngon par gsal ba'i mtshan nyid yin/ gnas pa yang rnam pa gnyis te/ rang gi ngo bo mi 'jig pa'i mtshan nyid yin pa'am/ thur du ltung ba'i mtshan nyid gegs byed pa'i mtshan nyid yin grang / de la re zhig dang po ni ma yin te/ rtag pa'i phyir rang nyid kyis rang bzhin mi 'jig par grub pa'i phyir ro/ /gnyis pa yang ma yin te/ lus can ma yin pa dang thams cad du song ba dag gi phyir bya ba med pa nyid kyis thur du ltung ba mi srid pa'i phyir ro/ /de'i phyir rten rnams de'i gegs byed pa nyid du mi rigs so/ /tha dad pa dag pa spyi gnas pa gang yin pa de ni gnas pa yin no zhes bya ba 'di yang lan ma yin pa nyid de/ 'du ba de nyid dpyad par bya ba yin pa'i phyir ro/ /'di ltar rten dang brten pa logs shig ma yin par grub pa'i ngo bo'i mtshan nyid de ni 'du ba zhes bya'o/ /spyi'i brten pa de yang de dang 'brel pa'i gnas pa nyid kyis sam/ des gsal bar bya ba nyid kyis yin zhes bya ba 'di nyid dpyod pa rtsom pa yin no/ /phan tshun ma 'dres pa'i bdag nyid rnams kyi cung zad kyang mi byed pa don gzhan du 'gyur ba rigs pa ni ma yin te/ ha cang thal bar 'gyur ba'i phyir ro/ /de lta na ni thams cad thams cad kyi 'du bar 'gyur ro/ /'di ltar phan tshun ldog pa'i lus can gyi dngos po sre bar byed pa gang yin pa de 'du bar brtags te/ don gzhan du gyur pa yod na yang rang gi bdag nyid la gnas pa'i phan tshun tha dad pa rang bzhin 'brel pa yod pa yang ma yin te/ rang gi ngo bo nyams par thal bar 'gyur ba'i phyir ro/ /don gzhan du gyur ba de la 'du ba po zhes mi byed na ni rtsod pa med pas don gzhan du gyur pa'i gnas pa rigs pa ma yin no/ /'bo ba'i gegs ni zhes bya ba la sogs pas spyi la rten du rtog pa shin tu 'brel pa med par ston pa yin no/ /'bo ba med pa ni 'bo ba dang bral ba rnams te/ lus can ma yin pa dang thams cad du song ba dag gis 'bo ba med pa'i phyir ro/ /des na gsal ba'i mtshan nyid kyi gnas pa yang rigs pa ma yin te/ 'di ltar des gsal ba ni de'i yul can gyi shes pa skyed par byed pa nyid yin gyi/ rtag pa gzhan du byed pa mi srid pa'i phyir/ rang bzhin yongs su rgyas pa'i mtshan nyid ni ma yin no/ /de lta yin dang gal te rang nyid kyis shes pa skyed par nus na de'i tshe ci'i phyir gsal ba'i rgyu la ltos par 'gyur/ 'on te mi nus na de'i tshe yang gzhan gyis khyad par bogs dbyung du med pa'i phyir de la ltos pa rigs dang ldan pa ma yin no/ /gzhan gyis khyad par du byed par khas len na yang mi rtag pa nyid du thal bar 'gyur te/ de lta na gsal ba bzhin du thun mong ma yin pa'i phyir spyi dngos por mi 'gyur ro snyam du bsams pa'o/ /de lta bas na brjod pa dang sgra dag yod pa'i phyir ma lus pa nyid ni spyi'i tshig gi don yin par brjod do/ /sbyor ba ni gang zhig gang la 'jug pa'i rgyu mtshan cung zad med pa de ni de la 'jug pa ma yin te/ 'bigs byed la gangs can bzhin no/ /spyi yang tha dad pa dag la 'jug pa'i rgyu mtshan cung zad kyang med do zhes bya ba ni khyab par byed pa mi dmigs pa'o/ /bum sogs zhes bya ba la sogs pa skyon gzhan yang 'chad do/ /bum pa la sogs pa'i rigs tha dad pa ni bum pa nyid dang sa nyid la sogs pa ste/ thams cad du song ba nyid du brjod pa na res 'ga' rang gi rten tsam la khyab pa nyid du brjod pa'am/ yang na gang gsal bas stong pa'i yul thams cad na yod pa yin zhes bya ba rnam par rtog pa gnyis so/ /mchog gi rigs bzhin zhes bya ba la mchog ces bya bas yul chen po nyid kyis yod pa brjod do/ /'di yang yul chen po nyid tsam du mtshungs pa nyid kyis dper byas kyi gsal ba'i bar na gnas pa'i yul la khyab pa nyid kyis de yang de'i tshe chos ma gtogs pa ni ma yin no/ /de la phyogs dang po la nyes pa bshad pa/ de la dngos po zhes bya ba la sogs pa'o/ /bum pa la sogs pa'i gsal bas stong pa'i yul du bum pa la sogs pa'i dngos po skyes pa na de dag de rigs kyi bye brag bum pa la sogs pa rnams ji ltar de la ste bum pa la sogs pa la 'jug pa'am mthong bar 'gyur zhes bya ba la sogs pa'o / /mi shes te khong du mi chud do zhes bya ba'i tha tshig go/ /ci ltar zhe na/ rtag phyir zhes bya ba la sogs pa smos te/ 'di ltar de dag bum pa la sogs pa gsal ba tha dad pa dang lhan cig skye bar 'gyur ba'am/ de na snga nas gnas par 'gyur ba'am/ yul gzhan nas 'ongs par gyur pa de'i tshe der mthong ba'am 'jug par 'gyur/ gang gang gi phyir de dag skye ba ma yin te/ rtag pa'i phyir ro/ /snga nas gnas pa yang ma yin te/ thams cad du khyab pa ma yin pa'i phyir ro/ /yul gzhan nas 'ongs pa yang ma yin te/ bya ba med pa'i phyir ro/ /de lta bas na ji ltar de dag la de dag 'jug pa'am dmigs par 'gyur/ sbyor ba ni gang zhig gang du skye ba ma yin zhing snga nas gnas pa yang ma yin zhing phyis yul gzhan nas 'ongs pa dang ldan pa yang ma yin pa de dag der dmigs pa'am 'jug pa ma yin te/ ri bong gi mgo la de'i rwa bzhin no/ /bum pa la sogs pa'i dngos po la des stong pa'i yul du skye ba dang ldan pa'i spyi yang de bzhin no zhes bya ba ni khyab par byed pa mi dmigs pa'o/ /gtan tshigs ma nges pa yang ma yin te/ de la 'jug pa dang dmigs pa dag gi rnam pa gzhan med pa'i phyir ro/ /phyogs gnyis pa la yang nyes pa bshad pa/ rang rten zhes bya ba la sogs pa smos te/ rang gi rten dang dbang po ldan pa la sogs pa'i dmigs pa'i rgyu la ste/ sogs pa'i sgras ni bdag dang yid phrad pa la sogs pa gzung ngo / /de'i phyir gsal ba tha dad ba gcig la rigs tha dad pa de dag 'dzin pa na rigs mi mthun pa gsal ba tha dad pa'i bar thams cad du yang dmigs par 'gyur te/ de dag bdag nyid ji lta ba bzhin du ngo bo gcig nyid kyis re re la gzung ba'i ngo bo las tha mi dad pa'i phyir ro/ /'di nyid gsal bar bya ba'i phyir/ gal te shes las zhes bya ba la sogs pa smos te/ ji ltar mthong ba'i gsal ba dang 'du ba'i spyi'i ngo bo shes zin pa las gsal ba'i par na gnas pa'i spyi'i ngo bo tha dad pa yin no zhe na/ de'i tshe de yang 'dzin par 'gyur te/ bzung zin pa'i rang gi ngo bo bzhin du bzung zin pa las tha mi dad pa'i phyir ro/ /ji ste de 'dzin pa ma yin pa de lta yin na ma gzung ba'i ngo bo dang tha mi dad pa'i phyir/ de bzhin du mthong ba'i gsal ba dang 'du ba yang 'dzin par mi 'gyur ro / /ci ste gnyi ga'i ngo bo nyid du khas len par bying na de'i tshe/ phan tshun 'gal ba'i chos dang ldan pa'i phyir rang bzhin tha dad par thal bar 'gyur ro/ /'dzin pa dang mi 'dzin pa phan tshun 'gal ba'i chos dang ldan pa yang yin la gcig kyang yin no zhes sems rnal du gnas pas brjod par rigs pa ma yin te/ ha cang thal bar 'gyur ba'i phyir ro/ /de lta na ni sna tshogs rdzas gcig tu 'gyur la/ de lta yin dang lhan cig skye ba dang 'jig pa la sogs par thal bar 'gyur ro/ /de lta ma yin na gcig ces bya ba ming tsam du 'gyur la ming la ni rtsod pa yang med do/ /de'i phyir de ltar rigs rnam pa thams cad du sun phyung nas sbyor ba dgod pa'i phyir/ shing sogs shes pa zhes bya ba la sogs pa smos te/ gang dag rim can nyid dag rjes su 'jug pa nyid dang / dngos po nyid dang / skye ba dang ldan pa nyid la sogs pa'i chos dang ldan pa de dag ni gzhan gyis kun du brtags pa'i rtag pa dang gcig pu dang thams cad du song ba'i spyi las byung ba ma yin te/ 'tshed pa po la sogs pa'i shes pa bzhin no/ /shing ljon pa la sogs pa'i shes pa 'di dag kyang de bzhin no zhes bya ba ni 'gal bas khyad pa dmigs pa ste/ de rtag pa'i dngos po dang 'gal ba mi rtag pa'i dngos pos rim can nyid la sogs pa la khyab ba'i phyir ro/ /rtag pa ni rim dang rim ma yin pa dag gis don byed pa 'gal ba'i phyir gtan tshigs ma nges pa yin no/ /dpe la bsgrub bya ma tshang ba yang sngar rgyas par bsgrubs zin pa'i phyir dpe ma grub pa ma yin no/ /gnod par byed pa gzhan yang bshad pa/ yang na ldan pa zhes bya ba la sogs pa ste/ de la ldan pa sun 'byin pa na gcig nyid du ma la 'jug pa mi rigs gnod byed tshad ma'o zhes bya ba 'dis gnod par byed pa brjod do/ /de ni ji ltar gcig du ma 'jug pa mi rigs pa de bzhin du yan lag can sun 'byin pa na de gcig 'jug pa bstan pa'am zhes bya ba la sogs pas de ltar zhes bya ba la sogs pas mjug sdud par byed de/ gang dag bye brag pa la sogs pas gsal ba las rigs gcig tu tha dad par 'dod pa de dag la nyes pa 'di brjod kyi/ yang gang dag rgyal ba pa dang rgyal dpog pa dang grangs can pa la sogs pa rigs tha mi dad pa'am gnyi ga'i ngo bor 'dod pa de dag gis brjod pa'i rigs nam mkha'i gos can gyi zhar la 'gegs par 'gyur ro/ /'di ni bye brag pa dang rigs pa can gyis brtags pa'i rigs dgag pa'i skabs yin pas sun ma phyung ste/ skabs ma yin pa'i phyir ro snyam du bsams pa yin no/ /de kho na nyid bsdus pa'i dka' 'grel las spyi'i tshig gi don brtag pa ste bco brgyad pa'o/ / //bye brag ba sun dbyung ba'i phyir gang yang zhes bya ba la sogs pa smos te/ re zhig khyad par gyi mtshan nyid rtag pa'i rdzas la 'jug pa nyid dang / mtha'i rdzas la 'byung ba nyid gang yin pa de ni mi srid pa'i skyon gyis sun phyung ba'i phyir mtshan nyid ma yin pa kho na'o/ /rtag pa'i rdzas ni cung zad kyang yod pa ma yin te/ de ni sngar rdzas rtag par bkag zin pa'i phyir te ji ltar 'di dag gis 'jug pa de 'grub par 'gyur/ gang yang rnal 'byor pa rnams kyi khyad par gyi shes pa'i stobs kyis 'di dag yod pa nyid du sgrub pa de la yang ma nges pa yin no zhes ston pa ni/ de'i gal te rdul phran zhes bya ba la sogs pa'o/ /'di ltar rdul phra rab la sogs pa'i ngo bo rang rang gi ngo bo la gnas pa'i phyir phan tshun sil bur 'gyur ba'am/ 'dres par 'gyur ba yin grang / gal te phyogs dang po yin na de'i tshe rang nyid kyis dngos po ma 'dres par dmigs pa las de dag la rnal 'byor pa rnams kyi phan tshun mi 'dra ba'i blor gyur pa'i phyir bye brag gzhan brtags pa don med do/ /ci ste phyogs gnyis pa yin na de'i tshe ji ltar bye brag gi tshig gi don gzhan nye ba na yang phan tshun tha dad pa'i ngo bo dag la rnal 'byor pa rnams la mi 'dra ba'i shes pa ma 'khrul ba skye bar 'gyur/ de ni 'khrul pa nyid du 'gyur te/ de ma yin pa la de ltar 'jug pa'i phyir ro/ /de lta yin dang rnal 'byor pa nyid ma yin par 'gyur ste / 'khrul pa'i shes pa dang ldan pa'i phyir ro snyam du bsams pa yin no/ /gzhan yang gal te bye brag ces bya ba tshig gi don gzhan med par mi 'dra ba'i blo mi skye na de ji ltar bye brag de dag nyid la mi 'dra ba'i blor 'gyur/ de dag la bye brag gzhan yod pa ni ma yin te/ thug pa med par thal par 'gyur ba'i phyir dang / bye brag la mi 'jug pa'i phyir rtag pa'i rdzas la 'jug pa dang mtha' yin no zhes khas blangs pas nyams par yang thal bar 'gyur ba'i phyir ro/ /ci ste rang nyid kyis de dag phan tshun mi 'dra ba'i blo'i rgyu nyid du khas len par byed na de'i tshe rdul phra rab la sogs pa rnams kyi yang de'i rgyu nyid rang nyid las yin la rag mod/ gang gis de dag rang nyid kyis phan tshun ldog pa'i lus can gyi yod pa yang rdul phra rab la sogs pa phan tshun mi 'dra ba'i shes pa skyed pa'i rgyu mi 'dod pa 'dir de dag la sdang ba ci zhig yod/ bye brag rnams la yang 'dod pa zhes bya ba 'di la rmongs pa las ma gtogs pa 'di la rgyu cung zad kyang ma mthong ngo / /ji ltar khyi sha zhes bya ba la sogs pas 'di la bkra shis blo gros kyi lugs kyi lan gyi dogs pa bsu ba yin te / des smras pa/ ji ltar khyi sha la sogs pa rang nyid kyis mi gtsang ba nyid yin la de dang 'brel pas gzhan dag kyang yin te/ de bzhin du 'di la yang de'i bdag nyid kyis bye brag gzhan dag la rang nyid kyis ldog pa'i shes pa'i rgyu yin la de dang 'brel bas rdul phra rab dag kyang yin no/ /gzhan yang de'i bdag nyid la yang shes pa gzhan gyi rgyu mtshan gzhan can du 'gyur ba nyid yin te/ dper na/ sgron mas bum pa la sogs pa la yin gyi sgron ma la bum pa la sogs pa dag gis ni ma yin zhes bya bar nges pa bzhin no/ /'di ni zhes bya ba ni bum pa la sogs pa'o/ /'di de bzhin zhes bya ba ni mi 'dra ba mtshon pa ste/ rdul phra rab la sogs pa rnams ni bye brag rnams kho na las yin la bye brag rnams rang nyid kyis so zhes bya ba'i don to/ /'on te mi gtsang zhes bya bas lan 'debs par byed de/ dngos po rnams kyi mi gtsang nyid/ /ces bya ba ni rtogs pas sbyar ba yin gyi nges pa med pa'i phyir don dam pa ni ma yin te/ 'di ltar rdzas gang kho na gtsang sbra can la sogs pa 'ga' zhig mi gtsang ba nyid du snang ba de kho na gzhan ro sreg mkhan la sogs pa gtsang ba nyid du snang ngo / /gcig la phan tshun 'gal ba'i ngo bo du ma tshogs pa rigs pa yang ma yin te/ gcig nyid nyams par thal bar 'gyur ba'i phyir ro/ /rnam pa gcig tu na dngos po rnams dngos su mi gtsang ba yin du chug mod de lta ma yin na 'di dpe dang mtshungs pa ma yin te/ 'di ltar zas la sogs pa'i dngos po khyi sha la sogs pa mi gtsang ba'i rdzas dang phrad pa las sngar gyi gtsang ba'i rang bzhin dor nas mi gtsang ba gzhan nyid skye ba yin no/ /des na 'di dag gi gzhan gyi rgyu mtshan can gyi mi gtsang ba nyid rigs pa yin no/ /de bzhin du gang gis 'di dag gi mi 'dra ba gzhan gyi rgyu mtshan can du 'gyur brdul phra rab la sogs pa dag la rgyu mtshan cung zad kyang yod pa ma yin no/ /rdul phra rab la sogs pa rtag pa de dag ni skye ba med pa'i phyir de 'byung ba med pa'i phyir ro/ /de bzhin sgron ma'i dpe la yang gzhan gyi rgyu mtshan can bum pa la sogs pa'i shes pa skyed pa'i rgyu nyid sbyar bar bya'o/ /mi mthun blo ni zhes bya ba la sogs pas bye brag gis gnod par byed pa'i tshad ma bshad pa yin te/ 'di la yang snga ma bzhin du rang gi ngo bo dang 'brel pa brjod par bya'o/ /de kho na nyid bsdus pa'i dka' 'grel las bye brag gi tshig gi don brtag pa ste bcu dgu ba'o// //'du ba sun dbyung ba'i phyir/ snal ma 'di la zhes bya ba la sogs pa smos te/ rten dang brten par gyur pa so so ma yin par grub pa rnams kyi 'di'i blo'i rgyu'i 'brel pa gang yin pa 'di de yang snal ma 'di la snam bu zhes bya ba la sogs pa 'di la blo'i khyad par las don gzhan du rtogs te/ dper na yod pa dang rdzas nyid la sogs pa rnams rang gi rten la bdag dang rjes su mthun pa'i shes pa'i phyir rang gi rten la sogs pa dag dang phan tshun las don gzhan du gyur pa yin pa de bzhin du 'du ba yang tshig gi don lnga la snal ma 'di dag la snam bu/ rdzas 'di rnams tshig la yon tan dang las dag /rdzas dang yon tan dang las 'di dag la yod pa/ rdzas 'di la rdzas nyid yon tan 'di la yon tan nyid las 'di la las nyid/ rdzas 'di la mtha'i bye brag ces bya ba la sogs pa bye brag gi shes pa mthong ba'i phyir tshig gi don lnga po dag las don gzhan du 'gyur ba nyid yin par shes so/ /sbyor ba ni gang dag la gang gi rnam pa dang mi 'dra ba'i shes pa de ni de las don gzhan du 'gyur ba'i rgyu mtshan can yin te/ lha sbyin la dbyig pa can gyi shes pa bzhin no/ /tshig gi don lnga la 'di la zhes bya ba'i shes pa 'di yang de bzhin no zhes bya ba rang bzhin gyis gtan tshigs su sems so/ /'di ni 'brel ba bstan pa'i phyir 'di ltar de med ces bya ba la sogs pa smos te/ rgyu mtshan med par 'byung na rtag tu yod pa la sogs pa thal bar 'gyur ba ni gnod pa can gyi tshad ma'o/ /de ltar re zhig bye brag pa la sogs pa'i lugs kyis 'du ba 'di la blo'i rtags kyi rjes su dpag par bya ba yin la rigs pa can gyi lugs kyis ni 'di la blo'i mngon sum gyis rtogs par bya ba nyid yin te/ 'di ltar de dag ni mngon sum gyi bya ba yod pa na snal ma 'di dag la snam bu zhes bya ba la sogs pa'i shes pa skye ba'i phyir mngon sum nyid yin par smra'o/ /'du ba de yang ji ltar ldan pa 'brel pa can dag la tha dad pa de bzhin du tha dad pa ni ma yin no/ /'o na ci zhe na/ dngos po bzhin du ste/ yod pa bzhin du de'i rtags khyad par med pa'i phyir dang / khyad par gyi rtags pa med pa'i phyir thams cad du 'du ba gcig nyid yin no/ /ldan pa bzhin du zhes bya ba ni chos mi mthun pa'i dpe yin te/ rgyu med pa nyid kyi phyir yod pa nyid bzhin du rtag pa nyid du grub pa la/ tshad mas rgyu ma dmigs pa'i phyir rgyu med pa nyid du grub po/ /'di ni 'di la'i zhes bya ba la sogs pas sun 'byin pa rtsol te/ de'i phyir 'dis gtan tshigs gzhi ma grub par bshad do/ /snal ma 'di dag la snam bu zhes bya ba la sogs pa'i blo rnams rang gi grub pa'i mtha' la rjes su chags pas brtags pa nyid yin gyi/ 'jig rten na de bzhin du skye ba rigs pa ni ma yin pas de'i phyir bsgrub bya'i chos can ma grub pa yin no/ /rten dang brten par zhes bya ba la sogs pas chos can ma grub pa de nyid sgrub par byed pa yin te/ de dag la sna tshogs pa nyid mtshon par 'gyur ba de dag nyid brten par 'gyur ba yin na 'jig rten pa 'di la'i blo 'byung bar mthong ste/ dper na kham gzhong 'di na bil ba zhes bya ba la sogs pa lta bu'o/ /snal ma dang snam bu dag la sna tshogs pa nyid mtshon pa'am yod pa yang ma yin te/ de ji ltar de ltar de la 'di la'i blor 'gyur/ 'di snyam du gal te kho bo cag gis 'di la'i blo 'di grub mtha'i stobs kyis brtags pa yin pa de lta na yang khyed cag gis 'di'i rgyu mtshan brjod par bya dgos so snyam du sems na/ rang gi 'dod pas zhes bya ba la sogs pa smos te/ gang dag gang gi rgyu nyid du mi 'dod pa de ni ji ltar rang nyid kyis 'bras bur brtags nas de'i rgyu brgal zhing brtag par byed gang gis 'dod pa'i dbang gis 'bras bur brtags nas de'i rgyu brgal zhing brtag par byed pa khyed cag gis 'dod pa'i dbang gis 'bras bu 'di rtog par byed pa khyed cag bdag nyid la brgal zhing brtag par bya'o/ /dngos po'i rang bzhin ni 'dod pa'i rjes su byed pa yang ma yin te/ 'di dag ni rang dgar 'jug pa'i phyir de las dngos po grub pa ma yin te/ thug pa med par thal bar 'gyur ba'i phyir ro/ /'di ltar khyed cag gis kun du brtags pa'i dngos po la 'ga' zhig gzhan du yang brtags par nus pa'i phyir ro/ /gzhan yang snal ma 'di la snam bu zhes bya ba la sogs pa'i blo 'jig rten na ma grub pa 'ga' zhig tu ma zad kyi/ 'on kyang de las bzlog pa nyid du grub po zhes bstan pa'i phyir/ shing la yal ga zhes bya ba la sogs pa smos te/ shing la yal ga ri la brag ces bya ba la sogs pa de lta bu 'jig rten na mthong gi /yal ga la shing / brag dag la ri zhes ni ma yin no/ /shing la yang yal ga zhes bya ba la sogs pa'i blo de yang 'du ba'i dbang gis ma yin gyi/ 'on kyang mi 'gro ba zhes bya ba gang yin pa'i brjod par 'dod pa'i yal ga dang brag dag las tha dad pa ma rtogs pa nyid du gnas pa'i lhag ma'i phrag pa la sogs pa'i yan lag de dag ni bar med par dmigs pa'i phyir ro/ /'dir mi 'gro ba'i sgras 'gro ba med pa'i phyir shing dang ri la 'dod do/ /de dag la yang zhes bya ba ni brag dang yal ga dag la'o/ /'di dag ces bya ba ni ri dang shing dag go/ /'o na bum pa 'di la gzugs so/ /dri'o/ /ro'o/ /reg go/ /g.yo ba'o zhes bya ba 'jig rten na rab tu grags pa'i shes pa gang yin pa 'di 'du ba ma gtogs pa gzhan gang zhig yul zhe na/ bum pa la zhes bya ba la sogs pa smos te/ de'i bdag nyid ni shes pas gzugs la sogs pa rnams bum pa'i rang bzhin du rtogs te/ 'jig rten na zhes bya ba lhag ma'o/ /bum pa las gzugs ni bum pa'i rang bzhin gyi gzugs te/ bum pa la sogs pa'i bdag nyid ces bya ba'i don to/ /gzugs la sogs pa mang po dag la thun mong ma yin pa'i nus pa'i khyad par bstan par 'dod nas de las gzhan pa'i gzugs la sogs pa rnam par bcad nas bum pa la sogs pa'i sgra sbyor te/ bum pa la sogs pa'i sgra ni re re la thun mong ma yin pa'i mig gi rnam par shes pa la sogs pa'i 'bras bu 'grub pa'i nus pa gsal bar bya ba'i don du sbyor bar byed ces de'i phyir bum pa la sogs pa'i sgra'i khyad par tha dad 'phen par byed pas gzhi mthun pa med pa'i phyir gzhi tha dad pa nyid kyis de'i bdag nyid kyis de'i bdag nyid du rtogs pa yin no/ /ci'i phyir gnyi ga sbyar zhe na/ gzugs dang bum pa zhes bya ba la sogs pa smos te/ 'di ltar gzugs la sogs pa'i sgra ni gzugs la sogs pa'i gnas skabs thams cad kyi rjod par byed pa yin te/ 'di ltar ji ltar bum pa'i bdag nyid du gnas pa'i gzugs la sogs pa ni gzugs la sogs pa zhes brjod pa de bzhin du snam bu la sogs pa'i bdag nyid du gnas pa dag la yang yin no/ /de ltar na gzugs la sogs pa sgra 'ba' zhig las gzugs la sogs pa'i gnas ci yin pa zhes bya ba'i khyad par rtogs pa ma yin no/ /bum pa la sogs pa zhes bya ba de lta bu sbyor ba na de dag ni bum pa'i bdag nyid yin no zhes rnam par bcad nas rtogs so/ /de bzhin du bum pa'i sgra yang dkar po dang ser po dang g.yo ba zhes bya ba la sogs pa bum pa'i gnas skabs thams cad brjod pa yin te/ de'i phyir 'ba' zhig pa las khyad par rtogs pa ma yin no/ /bum pa la gzugs dkar po zhes bya ba la sogs pa sbyor ba na ni de las gzhan pa'i gzugs la sogs pa bcad nas rtogs par 'gyur te/ de lta yin dang de ltar 'gyur ba'i khyad par de brjod pa'i phyir de bzhin de bum pa la sogs pa la gzugs zhes bya ba gang dag sbyar te/ sgra zhes bya ba lhag ma'o/ /sgra de dag la brten nas bum pa la sogs pa 'di dag la bum pa la gzugs la sogs pa zhes bya ba la sogs pa'i rnam pa des shes pa 'jug gi /'du ba la brten nas 'jug pa ni ma yin no zhes 'brel to/ /'di'i rgyu smras pa ni thams cad kyis khyad par ma mthong ba'i phyir ro zhes bya ba ste/ gang gis blo 'di 'du ba'i rgyu mtshan can du 'gyur ba 'du ba dang bum pa dang gzugs la sogs pa thams cad phan tshun tha dad du dmigs pa ni ma yin no/ /'dis ni gtan tshigs ma nges pa nyid dang dam bcas pa la rjes su dpag pas gnod pa nyid bstan to/ /gang yang 'di la'i blo khyad par med pa'i phyir zhes bya ba la sogs pa smras pa de la/ gal te dngos po zhes bya ba la sogs pa smos te/ gal te 'jig rten gsum na 'du ba gcig yod par gyur na de'i tshe gyo mo dag la snam bu'o zhes bya ba la sogs pa'i blor 'gyur zhing / rta la sogs pa yang ba lang nyid la sogs pa yod pa'i phyir de ltar 'gyur ro/ /de lta yin dang khra bo la sogs pa'i bye brag bzhin du glang po la sogs pa la yang ba lang la sogs pa'i shes par 'gyur ro/ /'di ltar gang gi phyir 'du ba'i stobs kyis snal ma dag la snam bu'o snyam pa'i rtog par brjod pa snam bu'i 'du ba 'di gyo mo la sogs pa yang yod pas ci'i phyir de ltar rtogs par mi 'gyur/ 'di snyam du gyo mo dag la snam bu brten pa ni ma yin te/ des na de la de ltar rtogs par mi 'gyur ro snyam du sems pa de yang log pa yin te/ 'di ltar gang gi snal ma dag kho na la snam bu yod cing de la blo mi 'gyur ba 'du ba'i dbang gis snal ma dag la yang snam bu brten pa zhes bya bar brjod pa gang yin pa'i 'du ba de gyo mo dag la yang ci ste med/ 'on kyang snal ma snam bu'i 'du ba zhes bstan pa gang yin pa de kho na bum pa'i gyo mo dag la yin te/ de'i phyir ji ltar 'tshol bar mi 'gyur/ des na de'i phyir blo bar chad med pa ste bar chad dang bral bar 'gyur ro/ /de'i phyir rdzas dang yon tan dang / las rnams kyi rdzas nyid dang / yon tan nyid dang / las nyid la sogs pa'i khyad par rnams kyi 'brel pa gcig yin pa'i phyir tshig gi don la rnam par dbye ba med par 'gyur ro/ /de ltar zhes bya ba la sogs pas glang po la sogs pa la ba lang la sogs pa'i blor thal bar 'gyur ba sgrub par byed do/ /de kha cig na yang zhes bya ba la sogs pas bkra shis blo gros kyi lan dogs par byed pa yin te/ des smras pa/ gal te yang 'du ba gcig yin pa de lta na yang rten dang brten par nges pa'i phyir tshig gi don lnga 'chol bar 'gyur ba ma yin te/ /'di ltar rdzas dag kho na la rdzas nyid dang / yon tan dag kho na la yon tan nyid dang / las dag kho na la las nyid ces bya ba de lta bu la sogs pa so sor nges pa'i rten rnam par bcad nas rtogs pa skye ba yin no/ /'o na de lta na tshig gi don re re la 'du ba tha dad par 'gyur ro zhe na/ 'di la zhes bya ba la sogs pa smos te/ 'di la zhes bya ba'i 'du ba'i rgyu mtshan gyi shes pa thams cad du tha mi dad pa'i rnam pas rjes su mi 'gro bar mthong ba'i phyir thams cad du 'du ba ni gcig yin no zhes bya bar rtogs so/ /gcig nyid yin na yang rdzas nyid la sogs pa'i rgyu mtshan gyi blo so sor nges pa'i rten rnam par bcad nas ldog pa ste/ rjes su mi 'gro bar mthong ba'i phyir rdzas la sogs pa'i rigs rnams ldog pa nyid du shes te/ des na tshig gi don lnga 'chol bar mi 'gyur ro/ /yang ji ltar 'brel pa khyad par med na yang 'di dag gi rten dang brten pa so sor nges par rigs she na/ dper na zhes bya ba la sogs pa smos te/ ji ltar kham gzhong dang zho dag gi ldan pa gcig yin na yang rten dang brten pa nges par 'gyur ba de bzhin du rdzas la sogs pa rnams kyi 'du ba gcig yin na yang gsal bya dang gsal byed kyis nus pa tha dad pa'i phyir rten dang brten pa so sor nges pa yin no/ /de zhes bya ba ni rten dang brten pa nges pa'o/ /gcig na zhes bya ba la sogs pas lan 'debs par byed de/ kho bo cag la ni gzugs la sogs pa nyid gzugs la sogs pa la brten pa'i nges pa ma grub kyi 'on kyang khyed cag nyid la yin no/ /'du ba de yang thams cad du gcig nyid du khas len pa na 'thad par dga'o zhes thal bsgrub par byed de/ 'di ltar rdzas kho na la rdzas nyid ces bya ba de lta bu'i nges par 'dod pa gang yin pa de ni 'du ba'i stobs nyid las yin no/ /rdzas nyid la sogs pa de'i yang 'du ba gang yin pa de kho na yon tan la sogs pa la yang yod de/ yon tan nyid la sogs pa de dag dang 'brel pa'i phyir ro/ /gal te 'brel pa yod pa de lta na yang de nyid de la 'du ba yin no zhes ji ltar nges she na/ de dag gi 'di zhes bya ba la sogs pa smos te/ de dag gi zhes bya ba ni rdzas nyid dang yon tan nyid la sogs pa rigs dag gi'o/ /de lta yin dang rgyu mtshan tha mi dad pa'i phyir de 'chol bar thal bar 'gyur ba bzlog par dka'o snyam du bsams pa'o/ /gzhan du zhes bya ba la/ gal te rdzas la rdzas nyid kyi 'du ba gang yin pa de kho na yon tan la sogs pa dag la yon tan nyid la sogs pa mi 'gyur na de'i tshe ldan pa bzhin du rten so so la 'du ba tha dad par 'gyur ro/ /gang yang rdzas nyid sogs rgyu mtshan gyi zhes bya ba la sogs pa smos pa de la rdzas nyid la sogs pa zhes bya ba la sogs pa smos te/ rgyu mtshan ma tshang ba med pa yod pa na 'bras bu ldog pa ste med pa mi rigs te/ de'i 'bras bu ma yin pa nyid du thal bar 'gyur ba'i phyir ro/ /de lta na blo ldog par mi rung ba'i phyir rten dang brten pa de'i nges pa mi rigs so/ /'on te rdzas kho na rdzas nyid rten te gnas so zhes bya ba la sogs pa'i tha snyad las nges par 'gyur ba ma yin nam zhe na/ de la brten pa zhes bya ba la sogs pa smos te/ khyed cag gis 'du ba de nyid las brten pa nyid la sogs pa'i rnam par gzhag pa brjod de/ de yang thams cad la khyad par med pa na ji ltar nges pa 'di rigs pa yin/ 'di lta bas na rten dang brten pa'i dngos po de'i brten pa la sogs pa 'di yang rigs pa ma yin te/ 'di dag ni rten dang brten pa dang lhan cig grub pa dang bde ba gcig pa'i phyir ro/ /'o na gsal bya gsal byed kyi nus pa nges pa las nges par 'gyur ro zhe na/ gsal bya zhes bya ba la sogs pa smos te/ rdzas la sogs pa rnams ni rdzas nyid kyi spyi gsal bar byed pa gang brjod pa de ni 'du ba'i stobs nyid kyis yin te/ 'di ltar gang kho na las rdzas nyid rdzas la 'du ba de kho na las des de gsal ba'o zhes brjod do/ /gzhan las zhes bya ba ni bde bar gshegs pa pas brjod pa las te/ shes pa skyed par rung ba'i rang bzhin skyed pa las so/ /gang gi phyir yod pa la sogs pa'i rtag pa rnams kyang 'du bar 'dod la/ rtag pa rnams skye bar rigs pa yang ma yin no/ /'di nyid mar me la sogs zhes bya ba la sogs pas sgrub par byed de/ gang yang kham gzhong dang zho'i ldan pa dpe nyid du smras pa de yang kho bo cag la ma grub po zhes ston pa ni/ kham gzhong zhes bya ba la sogs pa'o/ /gong bu zhes bya ba ni ldan pa'i tshig gi don sun dbyung bar 'gyur ro/ /ldan pa gcig yin du chug mod de lta na yang thal bar 'gyur ba mtshungs pa kho na'o zhes ston pa ni de las zhes bya ba la sogs pa ste/ de las zhes bya ba ldan pa las so/ /ha cang thal bar 'gyur ba ni zho la kham gzhong zhes bya ba ldan pa'i tshig gi don la sogs pa'i blor thal bar 'gyur ba ste ldan pa'i rgyu mtshan khyad par med pa'i phyir ro/ /gang yang rgyu ma dmigs pa'i phyir 'du ba rtag pa yin no zhes smras pa de la/ 'di ni rtag pa zhes bya ba la sogs pa smos te/ gal te 'du ba rtag pa nyid du gyur na de'i tshe rang gi rten dag la de dag rtag tu gnas pa'i phyir bum pa la sogs pa rnams kyang rtag par thal bar 'gyur te/ 'di ltar 'du ba yod pa nyid las 'di dag rang gi rten dag la gnas par 'dod la/ 'du ba de yang rtag pas ci'i phyir 'di dag rtag tu gnas par mi 'gyur/ rang gi rtsom byed ces bya ba la sogs pas gzhan gyi lan gyi dogs pa bsu ba yin no/ /'di snyam du bum pa la sogs pa rang rtsom par byed pa'i yan lag gang dag yin pa de dag bye ba'am zhig pas bum pa la sogs pa 'jig pa yin te/ dper na snam bu'i 'khal ba dang 'thag pa dag gi bya ba la sogs pa reg pa dang ldan pa'i rdzas la sogs pa dag las 'jig pa bzhin no/ /ji skad du reg pa dang ldan pa'i rdzas dang 'brel pa dang 'bras bu dang 'gal ba las 'jig go zhes bshad pa lta bu'o/ /de bzhin du blo ni blo gzhan gyis 'jig pa la sgra yang sgra gzhan gyis so zhes bya ba ni gzhan gyi lugs yin no/ /des na 'du ba yod na yang gnas pa'i rgyu lhan cig byed pa'i rgyu gzhan med pa'i phyir dang / 'gal ba'i rkyen dang phrad pas bum pa la sogs pa rtag par thal bar mi 'gyur ro zhes bya ba ni gzhan gyi bsam pa'o/ /de lta ma yin zhes bya ba la sogs pas len 'debs par byed pa yin no/ /'di ni mi rigs te/ 'di ltar gyo mo la sogs pa rang rtsom par byed pa'i yan lag de dag rang rtsom par byed pa'i yan lag gzhan la 'du la/ de dag kyang gzhan dag la ste rdul phra rab kyi bar du 'dod la/ rdul phra rab de yang rtag pa'i phyir gzhan du 'gyur ba yod pa ma yin no/ /de lta yin dang thams cad kyi rang rtsom par byed pa'i yan lag rnams la 'du ba thams cad du yod pa'i phyir 'jig pa'am bye bar gal 'gyur/ kyang gi sgras ni de rtsom par byed pa'i rdzas rnams 'ba' zhig tu ma zad bya ba la sogs pa rnams kyang yin no zhes bstan to/ /gal te rang rtsom par byed pa'i yan lag rnams 'jig par khas len na de'i tshe 'du ba 'di yang nges par 'jig par 'gyur te/ ci'i phyir zhe na/ 'brel pa can ni ldog pa na/ /zhes bya ba la sogs pa smos te/ 'di nyid bsgrub par bya ba'i phyir 'brel pa can ni zhes bya ba la sogs pa smos te/ de lta yin dang 'brel pa can zhig pa'i phyir ldan pa zhig pa bzhin du 'du ba la mi rtag pa'o zhes bstan par 'gyur ro/ /yang na ma zhig pa'i ldan pa'i rdzas gnyis bzhin du 'brel pa ma zhig pa'i phyir 'brel pa can rnams gnas par 'gyur ro/ /de lta ma yin na gnyi ga yang de dang 'brel pa'i rang bzhin nyams par thal bar 'gyur ro/ /'brel pa can gcig ces bya ba la sogs pas gzhan dag rtsod par byed do/ /'di snyam du sems te/ gal te gtan tshigs dang po 'brel pa can mtha' dag zhig pa'i phyir zhes bya ba gtan tshigs kyi don du 'dod na de'i tshe gtan tshigs phyogs kyi phyogs gcig la ma grub ste/ gang du yang 'brel pa can 'di dag 'jig pa yod pa ma yin te/ 'jig pa'i dus na yang rdul phra rab rnams lus pa'i phyir ro/ / ci ste ji zhig ltar 'brel pa zhig pa nyid srid pa'i dbang du byas nas gtan tshigs su brjod na de'i tshe ma nges pa yin te/ gal te 'brel pa can gcig 'ba' zhig tu zhig pa de lta na yang 'brel pa can gzhan gyi rgyu mtshan can 'di'i gnas par 'gyur ro/ /de lta na tshul 'dis ldan pa yang rtag pa nyid du 'gyur ro zhes dogs par byas nas gzhan dag len 'debs pa ni ldan min tha dad phyir zhes bya ba smos te/ ldan pa ni ldan pa can so so la tha dad pa yin te/ des na 'di mi rtag pa nyid du rigs kyi 'du ba ni 'gro ba 'di la zhes bya ba'i shes pa'i rgyu mtshan can tha mi dad pa'i phyir gcig kho na'o/ / des na 'di mi rtag pa nyid du mi rigs te/ gzhan du yang 'brel pa can gzhan la de dmigs pa'i phyir ro/ /gal te de ltar zhes bya ba la sogs pas lan 'debs par byed de/ 'di ltar gang dag rang gi rgyu la sogs pa dang 'du ba'i bum pa la sogs pa de dag zhig pa na de dag ni rang gi rgyu dag la 'grub pa'i bdag nyid kyi 'du ba 'di brtags pa de nyid ci/ de dag zhig pa na 'brel pa can gzhan dag la yod dam 'on te dper na ldan pa can so so la ldan pa can mang po tha dad pa de bzhin du gzhan nyid yin/ sogs pa'i sgras ni bye ba bzung ngo / /de la gal te phyogs dang po yin na de'i tshe sngar gyi gnas skabs bzhin du 'jug pa ma zhig pa'i phyir bum pa la sogs pa gnas pa kho nar 'gyur la/ bum pa la sogs pa de dag kyang mi gnas na 'jug pa mi gnas pa'i phyir 'du ba mi gnas par 'gyur te/ de lta ma yin na 'jug pa'i bdag nyid du mi 'gyur ro/ / yang na de lta bur gyur pa'i rang dbang can phan mi 'dogs pa la 'du ba 'jug go zhes tha snyad 'dogs na ming tsam du 'gyur gyi de ltar dngos po yod pa ma yin no/ /de lta na zhes bya ba ni de la 'jug pa'i bdag nyid can zhes bya ba de lta yin na de'i phyir ming tsam nyid yin gyi skyon gang yin pa brtag pa ni de'i phyir zhes bya ba la sogs pa'o/ /'brel pa can zhig pa las sngar yang 'brel pa can ma zhig pa'i gnas skabs na yang zhes bya ba'i tha tshig go/ /bum pa la sogs de dag rang gi rten la 'jug pa'i 'du ba de yod pa'i phyir te/ yod pa'i stobs kyis 'grub par mi 'gyur ro/ /phyis bzhin te/ 'du ba'i rgyu zhig pa bzhin du don dam par 'jug pa med pa'i phyir ro/ /'di ltar zhes bya ba la sogs pa gtan tshigs kyi don ston pa yin no/ /ci ste gzhan nyid yin pa zhes bya ba'i phyogs gnyis pa yin na de'i tshe ldan pa la sogs pa bzhin 'du ba mang po nyid du 'gyur te/ de lta yin dang 'du ba tha dad pa dang ldan pa ma yin no zhes bya ba 'di'i khas blangs pa nyams pa yin no/ /de lta bu sogs zhes bya ba la sogs pa'i sgras rgyu don med pa dang / mngon sum la sogs pa dang 'gal ba dang / dngos po thams cad rim ma yin par skye ba zhes bya ba la sogs pa'i nyes pa gzhan gzung ste/ 'di ltar rang gi rgyu dang 'du ba'am dad pa dang 'du ba ni skye bar brjod la/ 'du ba yang rtag pa'i phyir gang du yang 'bras bu skye ba las rgyu rnams nus pa med do zhes bya ba ni rgyu don med pa'o/ /de bzhin du ldan pa ni las gang yang rung ba las skye ba dang gnyi ga'i las las skye ba dang / ldan pa las skye ba yin te/ dbang po dang don phrad pa las skyes pa'i shes pa zhes bya ba la sogs pa skye bar ston pa'i mdo dang 'gal ba dang / de bzhin du mngon sum la sogs pas rtog pa'i rgyu sA lu dang mig la sogs pa dang 'gal ba dang / de bzhin du 'du ba'i mtshan nyid kyi skye ba ni rtag pa nyid kyis rim pa yod pa ma yin pa'i phyir dngos po rnams rim gyis skye bar mthong ba dang 'gal ba dang / de lta yin dang shes pa cig car mi skye ba ni yid kyi rtags so zhes bya ba'i rang gi grub pa'i mtha' dang 'gal ba dang / skye ba rtag pa'i phyir 'gro ba la phan gdags par bya ba dang phan 'dogs par byed pa ma yin pas bstan bcos rtsom pa don med do zhes bya ba la sogs pa ches mang po dag gis 'brel pa med pa ste/ 'thad par 'gyur ba ma yin no/ /de kho na nyid bsdus pa'i dka' 'grel las 'du ba'i tshig gi don brtag pa ste nyi shu pa'o// //sgro btags rnam pa'i sgra dang shes pa'i spyod yul can/ /zhes bya ba bsgrub pa'i don du skabs dgod pa'i phyir ro / /gal te zhes bya ba la sogs pa smos te/ bsgrub pa sgra'i don du smra ba rnams kyi lta ba ni don dam pa'i dngos po nyid sgra'i gzung bar bya ba ste/ des na sgra dag gis dngos su sgrub pa dang dgag pa dag gis dngos po'i rang bzhin ston par byed pa'i phyir sgrub pa nyid sgra'i don no zhes bya ba yin no/ /sel ba smra ba rnams kyi lta ba ni don dam par sgra rnams kyi brjod par bya ba dngos po'i rang gi ngo bo cung zad kyang yod pa ma yin te/ tha mi dad pa'i don dag la tha dad pa'i rnam par zhen pas 'jug pa'i phyir sgra las byung ba'i shes pa thams cad ni 'khrul pa nyid yin no/ /'khrul pa nyid yin na yang gang du brgyud pas dngos po dang 'brel pa der don la mi slu ba yin no zhes bya ba yin no/ /de la rnam par rtog pa'i blos don tha mi dad pa dag la sgro btags pa'i ngo bo gang yin pa de ni gzhan las ldog pa'i dngos po nyams su myong ba'i stobs kyis 'ongs pa'i phyir dang / rang nyid kyang gzhan las ldog pa nyid du snang ba'i phyir dang / gzhan las ldog par brjod pa'i 'khrul pa dang lhan cig gcig nyid du nges pa'i phyir dang / gzhan sel ba'i dngos po rtogs pa'i 'bras bu can yin pa'i phyir gzhan sel zhes brjod do/ /des na sel ba sgra'i don yin no zhes bya bar grub po/ /de la sgrub pa smra ba rnams rtsod par byed de/ gal te khyed cag gi rdzas dang / yon tan dang / las dang / spyi dang / bye brag dang / 'du ba'i mtshan nyid kyi khyad par de bye brag dag don dam par sgra 'jug pa'i rgyu mtshan du yod pa ma yin na/ de'i phyir ji ltar 'jig rten na rdzas la sogs pa'i khyad par gyi rgyu mtshan dang dbyig pa can zhes bya ba la sogs pa'i brjod pa dang yongs su rtog par 'gyur/ 'di ltar 'jig rten na dbyig pa can dang rwa can zhes bya ba la sogs pa'i sgra dang blo dag rdzas kyi khyad par can du grags la/ dkar po nag po zhes bya ba yon tan gyi khyad par can dang / g.yo'i 'khor ro zhes bya ba las kyi rgyu mtshan can dang / yod do snang ngo zhes bya ba yod pa'i rgyu mtshan dang / ba lang dang / rta dang / glang po zhes bya ba spyi dang bye brag gi khyad par can dang / snal ma 'di dag la snam bu zhes bya ba 'du ba'i stobs kyis yin te/ de la rdzas la sogs pa 'di dag med na dbyig pa can zhes bya ba la sogs pa'i sgra dang blo dag yul med par 'gyur ro/ /sogs pa smos pa re re dang sbyar bar bya ste/ des na re re zhing dbyig pa can dang rwa can zhes bya ba la sogs pa rigs mthun pa'i sgra blo dag gzung ba yin no/ /mtha'i bye brag ni rnal 'byor pa rnams kho na'i gzung bar bya ba yin pa'i phyir de dag ni sogs pa'i sgras mi gzung ngo / /de dag rgyu mtshan med par yang mi rigs te/ de dag thams cad thams cad kyi khyad par med par 'jug par thal bar 'gyur ba'i phyir ro/ /de dag dbye ba med par 'jug pa yang ma yin te/ de lta bas na rdzas la sogs pa yod do zhes bya ba ni gzhan gyi'o/ /sbyor ba ni gang dang gang phan tshun ma 'chol bar 'jug pa de dag ni rgyu mtshan dang bcas pa yin te/ rna ba la sogs pa'i shes pa bzhin no/ /dbyig pa can la sogs pa'i sgra dang shes pa dag kyang 'chol ba med par 'jug pa yin no zhes bya ba ni rang bzhin gyi gtan tshigs so/ /rgyu mtshan med pa nyid yin na thams cad du khyad par med par 'jug par thal bar 'gyur ba ni gnod pa can gyi tshad ma'o/ /smras pa zhes bya ba la sogs pas lan 'debs par byed de/ de la gal te 'di dag dngos su phyi rol gyi yul du gyur pa'i rgyu mtshan gyis rgyu mtshan dang bcas pa nyid du sgrub par 'dod na bsgrub par bya ba las bzlog pa la gnod par byed pa'i tshad ma med pa'i phyir gtan tshigs ma nges pa yin no/ /ci ste gang ci yang rung ba'i rgyu mtshan gyis rgyu mtshan dang bcas pa nyid du 'dod na de'i tshe grub pa la sgrub ste/ 'di ltar kho bo cag gi 'di dag rgyu mtshan gang gi brjod pa'i bag chags sad par 'dod pa nyid yin gyi/ yul du 'gyur ba ni ma yin te/ 'khrul pa nyid kyis sgra las byung ba'i shes pa thams cad yul med pa nyid yin pa'i phyir ro/ /nad tsam la gnas zhes bya ba ni rnam par shes pa la gnas pa'i bag chags zhes bya ba'i tha tshig go/ /'di dag nyid lung gi khungs kyis bstan pa'i phyir sgra rnams gang dang zhes bya ba la sogs pa smos te/ yul du gang dang gang zhes bya ba ni rang gi mtshan nyid dang spyi la sogs pa'o/ /de ni chos nyid yin zhes bya ba ni de'i rang bzhin yin pa ste/ dngos po rnams kyi rang bzhin ni ngag gi lam thams cad las 'das pa yin no zhes bya ba'i tha tshig go/ /ji skad du/ ming ni gang dang gang gis ni/ /chos ni gang dang gang brjod pa/ /de ni de na yod min te/ /de ni de rnams chos nyid yin/ /zhes gsungs so/ /ci ste sgra las byung ba'i shes pa 'khrul pa nyid dang / yul med bdag la tshad ma ci yod ce na/ gang tha dad pa dag la tha mi dad par zhen nas 'jug pa'i phyir sgra las byung ba'i shes pa 'di thams cad 'khrul pa yin no zhes pa 'di la kho bo cag gis tshad ma bshad zin to/ /'di ltar gang zhig yin de yin pa la de'o snyam du shes pa de ni 'khrul pa yin te/ smig rgyu la chur shes pa lta bu'o/ /don tha dad pa dag la tha mi dad par zhen pa'i sgra las byung ba'i shes pa 'di yang de bzhin no zhes bya ba ni rang bzhin gyi gtan tshigs so/ /gang gis gtan tshigs ma grub bo zhes bya bar 'gyur ba 'di'i gzung bar bya ba spyi dngos por gyur pa yod pa yang ma yin te/ de ni sngar rgyas par bkag zin pa'i phyir ro/ /yang na spyi yod du chug mod de lta na yang de ni tha dad pa dag las don gzhan du gyur pa nyid yin na tha dad pa dag la tha mi dad par zhen pa ni 'khrul pa nyid yin no/ /de dag ldan pa zhes bya bar 'gyur gyi gzhan dang gzhan du mtshungs pa ni rigs pa ma yin no/ /spyi don gzhan du gyur pa nyid ma yin na yang don dam par sna tshogs pa thams cad dngos po gcig yin du chug mod/ de la spyi'i shes pa ni 'khrul pa nyid yin la mtshungs pa'i shes pa ni dngos po gcig gi yul la ma yin te/ de ni tha dad pa 'dzin pa sngon du 'gro ba can yin pa'i phyir ro / /'khrul pa 'di nyid du grub pa na yul med par yang grub ste/ rang gi rnam pa gtad nas skyed par byed pa'i dmigs pa'i mtshan nyid du gyur pa'i don 'ga' yang med pa'i phyir ro/ /rnam pa gcig tu na yul med pa nyid rnam pa gzhan du bsgrub par bya ste/ sgra rnams gang kho na la brda byas pa de kho na de dag gi yul du rigs kyi gzhan ni ma yin te/ ha cang thal bar 'gyur ba'i phyir ro/ /'di dag dngos po 'ga' zhig la don dam par brda yang dag yod pa ma yin pas de'i phyir blo dang sgra ni yul med pa yin no/ /sbyor ba ni gang zhig gang la dngos su brda ma byas pa de dag ni don dam par de brjod pa ma yin te/ nog la sogs pa dang ldan pa'i gong bu la rta'i sgras brda ma byas pa bzhin no/ /yang dag par dngos po thams cad la sgra thams cad brda byas pa ma yin no zhes bya ba ni khyab par byed pa mi dmigs pa ste/ brda byas pa nyid rjod par byed pa la khyab pa'i phyir la de 'di la med do/ /gtan tshigs 'di ma grub pa yang ma yin no zhes bstan pa'i phyir gang phyir zhes bya ba la sogs pa smos te/ 'di ltar brda bzung ba'i dngos po sgra'i don nyid du rnam par 'jog pa na res 'ga' rang gi mtshan nyid de thun mong ma yin pa'am/ rigs sam/ de 'brel te rigs de dang 'brel pa'am/ rigs dang ldan pa'i dngos po pa'am / blo'i rnam pa zhig rnam par 'jog par byed ces brtag grang / de la thams cad la brda mi srid pa'i phyir sgra'i don nyid du mi rigs so/ /de nyid du zhes bya ba 'dis ni kun rdzob pa'i sgra'i don ma bkag par bstan pa yin te/ de'i phyir rang gi tshig dang 'gal bar mi 'gyur ro/ /de lta ma yin na dam bca' ba rang gi tshig dang 'gal bar 'gyur te/ 'di lta rang gi mtshan nyid la sogs pa 'di dag sgras bstan nas 'di dag sgra'i don ma yin pa nyid du bstan par mi nus te/ de bstan par 'dod nas sgras rang gi mtshan nyid la sogs pa ston pa ni 'di dag sgra'i don nyid du khas blangs par 'gyur la/ yang dam bca' ba de nyid 'gegs pa'i phyir rang gi tshig dang 'gal lo/ /'dis ni 'od byed pas/ sgra rnams rjod byed ma yin na/ /dam bca' gtan tshigs 'gal ba yin/ /zhes gang smras pa de yang gsal ba yin no/ /kho bo cag ni rnam pa thams cad du sgra'i don la skur pa 'debs par mi byed de/ de ni gnag rdzi'i bar la shin tu grags pa'i phyir ro/ /'on kyang de la gzhan gyi sgro btags pa de kho na nyid du yod pa'i chos gang yin pa de 'gegs par byed kyi chos can ma yin no/ /de la re zhig rang gi mtshan nyid la brda med par bstan pa'i phyir sgra'i don ma yin pa nyid bstan pa'i don du de la zhes bya ba la sogs pa smos so/ /re zhig sgra rnams kyis/ rang gi mtshan nyid rjod pa min/ /zhes bya ba ni de la brda byas pa med pa'i phyir ro snyam du bsams pa'o/ /ji ltar brda med pa yin zhe na/ brda dang zhes bya ba la sogs pa smos te/ brda dang tha snyad dag tu phyin pa ste thob pa'i dus gang yin pa der khyab pa ste/ khyab par byed pa de dang bral ba'i rgyu'i phyir rang gi mtshan nyid de la brda med do zhes bya ba lhag ma'o/ /'di skad du bstan pa yin te/ brda ni tha snyad kyi don du byed kyi zhen pas ni ma yin no/ /des na gang kho na'i brda dang tha snyad du phyin pa'i dus su khyab pa nyid yod pa de kho na la tha snyad 'dogs pa po rnams brda byed par rigs kyi gzhan du ni ma yin no/ /rang gi mtshan nyid la ni brda dang tha snyad du phyin pa'i dus su khyab par byed pa nyid yod pa ma yin te/ de lta bas na de la brda byed pa ma yin no/ /yang ci'i phyir rang gi mtshan nyid la brda dang tha snyad du phyin pa'i dus su khyab par byed pa nyid med ce na/ yul dus zhes bya ba la sogs pa smos te/ yul la sogs pa tha dad pas khra bo la sogs pa'i gsal ba tha dad pa phan tshun shin tu ldog pa'i lus can 'di dag ni phan tshun rjes su 'jug pa ma yin te/ de la gcig la brda byas pa'i skyes bus gzhan la tha snyad du byed par mi 'gyur ro/ /snang ba la sogs pa zhes bya ba la sogs pa'i sgras kha dog dbyibs dang skad cig ma nyid la sogs pa gzung ngo / /tha snyad mthong ba ma yin zhes bya ba ni des na de la brda med pa'i phyir gtan tshigs ma grub pa ma yin no snyam du bsams pa'o/ /ma nges pa yang ma yin no zhes bsten pa'i phyir / brda ma bzung ba zhes bya ba la sogs pa smos te/ gang la brda gzung ba de la de skad ces bya la/ brda gzung ba med pa de ni brda ma bzung ba'o/ /sgra las zhes bya ba ni ming las so/ /gzhan du zhes bya ba ni rigs mi 'dra ba'i don bzhin no/ /'di skad du bstan pa yin te/ gal te sgras brda ma bzung ba'i don ston par byed na de'i tshe ba lang gi sgra yang brda ston par byed par 'gyur la/ brda byed pa yang don med pa nyid du 'gyur ro/ /de lta bas na ha cang thal bar 'gyur ba ni gnod par byed pa'i tshad ma yin pa'i phyir khyab pa grub po/ /brda ma byas pa nyid la sogs pa'i gtan tshigs 'di nyid slob dpon phyogs kyi glang pos/ sgra yis tha dad nam yang ni/ /brjod pa ma yin mtha' med phyir/ /zhes bya ba 'dis bstan te/ 'di ltar mtha' med pa'i phyir zhes bya ba 'dis brda med pa nyid bstan to/ /des na 'od byed pas/ gal te sgra phyogs su byed na de'i tshe mtha' med pa'i phyir zhes bya ba 'di dngos po'i chos yin pa'i phyir gzhi tha dad pa'i gtan tshigs yin no/ /'on te tha dad pa rnams nyid phyogs su byed na de'i tshe rjes su 'gro ba can dang ldog pa can gyi dpe yod pa ma yin pa'i phyir mtha' med pa gtan tshigs ma yin no zhes gang smras pa de yang bsal ba yin no/ /yang de nyid kyis smras pa dag gi ltar na khyad par med pa'i tha dad pa rnams sgra dag gis rjod par byed pa de'i ltar na nyes pa 'di yin gyi/ kho bo cag ni yod pa'i khyad par gyis rdzas dang yon tan dang las rnams brjod pa yin te/ 'di ltar gang dang gang na yod pa la sogs pa'i spyi mthong ba de dang der yod pa la sogs pa'i sgra sbyor la/ yod pa la sogs pa'i spyi ni gcig nyid yin te/ de'i phyir spyis mtshon pa'i don dag la brda byed pa srid pa'i phyir mtha' med pa rgyu ma yin no zhes bya ba de yang dag pa ma yin te/ yod pa la sogs pa dngos por gyur pa'i spyi de dag las tha dad pa'am tha mi dad pa yin no zhes bya ba 'di bsgrubs zin to/ /yang na spyi yod du chug mod de lta na yang tha dad pa gcig la spyi du ma yod pa'i phyir yod pa la sogs pa'i sgra ma 'chol bar sbyor bar mi 'gyur ro/ /yod pa la sogs pa sgras ma bstan par yod pa la sogs pa des tha dad pa gzhan mtshon par bya ba'i phyir brda byed par nus pa yang ma yin la/ brda ma byas pa'i yod pa la sogs pa la sgra 'jug pa yod pa yang ma yin te/ de lta yin dang phan tshun bsten pa'i skyon du 'gyur ro/ /ci ste yang rtog pa po rjes su 'gro ba dang ldog pa dag las rang nyid tha snyad du byed pa dmigs pa'i phyir yod pa la sogs pa'i sgra dag gis brda ston par byed do snyam na/ de yang yang dag pa ma yin te/ mtha' med pa tha dad pa'i yul can gyi tha snyad ma lus pa 'ga' zhig dmigs par 'gyur ba ni ma yin no/ /gcig gi tshe yod pa la sogs pa dang ldan pa'i tha dad pa dag la lan cig ma yin par tha snyad dmigs nas de'i rigs can ma mthong ba dag la yang sgra de sbyor bar byed pa yin no zhe na ma yin te/ ma mthong ba'i phyir ro/ /ma mthong ba'i 'das pa la sogs pa'i bye brag gis tha dad pa mtha' yas pa'i tha dad pa dag la brda srid pa ma yin te/ ha cang thal bar 'gyur ba'i phyir ro/ / rnam par rtog pa'i blos sgro btags pa dag la ston par byed do zhe na/ 'o na de lta na rnam par rtog pas sgro btags pa'i don gyi yul nyid la sgra sbyor gyi don dam par tha dad pa dag la ma yin no zhes bya ba thob ste/ 'di ltar 'das pa dang ma 'ongs pa dag gis med pas mi nye ba nyid kyi phyir de la rnam par rtog pa'i blor 'gyur ba ni yul med pa nyid yin pa'i phyir zhes sgro btags pa ni med pa nyid yin no/ /de lta yin dang de la brda med pa'i phyir ji ltar don dam pa dngos por gyur pa yin te/ spros pas chog go/ /mthun pa'i phyogs la yod pa'i phyir gtan tshigs 'gal ba yang ma yin pa'i phyir sgra rnams kyi yul rang gi mtshan nyid ma yin par grub po/ /'di snyam du gang dag ri gangs can la sogs pa'i dngos po de dag bstan pa dang gcig pu'i ngo bo yin pa'i phyir yul dang dus la sogs pa'i tha dad pa srid pa ma yin te/ de'i phyir brda dang tha snyad phyin pa'i dus su khyab pa'i phyir de la brda srid pas de'i phyir gtan tshigs phyogs kyi phyogs gcig la ma grub pa yin no snyam du sems na/ gang yang gangs ri zhes bya ba la sogs pa smos te/ sogs pa'i sgras ni ri ma la ya la sogs pa gzung ngo / /gang gi phyir 'di dag ni rdul phra rab tu ma tshogs pa'i rang bzhin yin te/ de'i phyir 'di dag gi yan lag ma lus pa bzung bas brda byed pa yod pa ma yin la/ skyes ma thag tu 'jig pa yang bsgrubs zin te/ des na de dag la yang brda'i dus su mthong ba tha snyad kyi dus su rjes su 'gro ba yod pa ma yin pa'i phyir gtan tshigs ma grub pa yin no/ /de ltar re zhig rang gi mtshan nyid la tha snyad mi 'thad pas brda don med par thal bar 'gyur ba'i phyir brda mi srid do zhes bstan nas/ de ni brda bya bar mi nus pa'i phyir mi srid do zhes bstan pa'i phyir/ rang gi mtshan nyid 'di dag kun zhes bya ba la sogs pa smos te/ dngos po thams cad skyes ma thag tu 'jig pa ni sngar bsgrubs zin te/ de dag la brda byed pa na res 'ga' ma skyes pa la byed pa'am skyes pa dag la byed/ de la re zhig ma skyes pa rnams la brda rigs pa ma yin te/ med pa ni shes pa dang brjod pa thams cad dang bral ba nyid kyis gzhir mi 'thad pa'i phyir ro/ /yang dag pa smos pa ni kun rdzob pa dgag pa'i don du ste/ des na bum pa la sogs pa ma skyes pa la yang brda mthong ba'i phyir mthong ba dang 'gal ba ma yin te/ de'i yul ni rnam par rtog pas sprul pa'i don nyid yin pas med pa yin pa'i phyir ro/ /rta'i rwa bzhin no zhes bya ba ni bdun pa'i mtha' can gyi 'dra ba yin no/ /skyes pa la yang brda rigs pa ma yin te/ 'di ltar nyams su myong ba skyes pa de la de sngon du 'gro ba can gyi ming ni khyad par dran pa na brda byed kyi gzhan du ni ma yin te/ ha cang thal bar 'gyur ba'i phyir ro/ /de lta yin dang ming gi khyad par dran pa'i dus na skad cig 'jig pa nyid kyis rang gi mtshan nyid 'gags nas ring du lon pa'i phyir ma skyes pa bzhin du dngos po skyes pa rnams la yang brda yod pa ma yin te/ brda byed pa'i dus na yang gnyi ga yang mi nye ba'i phyir ro/ /'di ltar re zhig nyams su myong ba'i gnas skabs na yang de'i rgyu yin pa nyid kyis rang gi mtshan nyid skad cig ma nye ba yod pa can du mi 'gyur na/ nyams su myong ba'i dus phyis 'byung ba'i ming gi bye brag gzo ba dang dran pa skye ba'i dus na 'byung bar 'gyur ba lta smos kyang ci dgos/ ci ste yang de'i nus pa'i mthu las byung ba de'i rigs can brda byed pa'i dus na 'byung ba'i skad cig ma la brda byed par 'gyur ro snyam na/ de'i phyir gang yang zhes bya ba la sogs pa smos te/ gal te yang brda byed pa'i dus na nye ba'i skad cig gzhan yod pa de lta na yang brda gzo ba mi srid pa'i phyir brda mi rigs te/ 'di ltar rta dmigs na de'i ming drang ba'i rim pa sngon du 'gro ba can gyi brda byed pa na de'i dus na nye ba'i ba lang la sogs pa la gzo ba'i yul du byas nas brda byed pa 'ga' zhig rta'o zhes brda byed pa ni ma yin no/ /ci ste yang rang gi mtshan nyid kyi skad cig thams cad 'dra ba yin te/ des na gcig nyid du zhen par byas nas brda byed par 'gyur snyam na/ de'i phyir/ 'dra ba nyid kyang brtags pa yin/ /zhes bya ba smos te/ 'dra ba ni rnam par rtog pa'i blos sgro btags pa yin te/ de sgra rnams kyis ston na rang gi mtshan nyid brjod par bya ba ma yin pa nyid du 'gyur ro/ /de'i phyir de ltar rang gi mtshan nyid la brda srid pa ma yin no/ /sgra rang gi mtshan nyid kyi brda yang yod pa ma yin te/ de ltar brda byed pas gzhan pa nyid kyi ming gi khyad par don la sbyor bar byed la/ don dam pas dran pas nyams su myong ba nyid kyi brjod par 'jig par nus pa yang ma yin te/ de 'gags nas ring du lon pa'i phyir ro/ /gang yang brjod pa de ni sngar nyams su myong ba'i phyir de dran pa ma yin la/ yul du ma byas pa des 'dzin par nus pa yang ma yin te/ des na dran pas gzhag pa'i rnam par rtog pa'i rgyu mtshan gyis mtshams sbyor ba rnams ni rang gi mtshan nyid ma yin pa nyid kyi phyir rang gi mtshan nyid kyi brda ma yin no/ /de lta bas na rang gi mtshan nyid ni bstan par bya ba ma yin no zhes bya bar grub po/ /rang gi mtshan nyid brjod par bya ba ma yin pa 'di nyid bsgrub par bya ba'i phyir tshad ma gzhan bshad pa ni dro ba la sogs zhes bya ba la sogs pa'o/ /ji ltar dro ba la sogs pa'i don gyi yul can gyi dbang po gsal bar snang bar rig pa de bzhin du dro ba la sogs pa'i sgra las byung ba ni ma yin no/ /ji ltar mig la sogs pa ma nyams pa'i dbang po'i blo dag gis nyams su myong ba bzhin du mig dang lce dang sna la sogs pa nyams pas ma tu lung ga la sogs pa'i sgra thos pa las gzugs dang ro la sogs pa nyams su myong bar 'gyur ba ma yin no/ /ji skad du/ me dang 'brel pas bsreg bya ba/ /tshig par shes pa gzhan yin la/ /tshig pa'i sgra yis tshig pa'i don/ /yang dag gsal ba gzhan yin no/ /zhes bshad pa lta bu'o/ /de yi don can dbang shes bzhin/ /zhes bya ba ni chos mi mthun pa'i dpe yin no/ /dro ba la sogs pa'i don gyi yul de gang la yod pa de la de skad ces bya la/ 'di ni de'i don yang yin la dbang po'i shes pa yang yin no zhes tshig rnam par sbyar ro/ /gal te de de lta bu ma yin pa de lta na yang ci'i phyir sgra'i don rang gi mtshan nyid du mi 'gyur zhe na/ gang zhig des byas zhes bya ba la sogs pa smos te/ sbyor ba ni gang zhig gang gis byas pa'i shes pa la mi snang ba de ni de 'i don ma yin te/ gzugs kyi sgras bskyed pa'i shes pa la ro bzhin no/ /sgra las byung ba'i shes pa la yang rang gi mtshan nyid mi snang ngo zhes bya ba ni khyab par byed pa mi dmigs pa'o/ /'dir yang ha cang thal bar 'gyur ba ni gnod pa can gyi tshad ma ste/ 'di ltar sgra des rjod par byed pa nyid ni yul can gyi shes pa skyed pa nyid la brjod kyi gzhan ni ma yin no/ /rnam par shes pa gang zhig gang gi rnam pas stong pa de ni de'i yul can du rigs pa ma yin te/ ha cang thal bar 'gyur ba'i phyir ro/ /gang gis mi gsal ba dngos por gtogs pa nyid kyi ngo bo'i sgra rnams rjod par byed do zhes bya bar 'gyur ba dngos po gcig la gsal ba dang mi gsal ba'i ngo bo gnyis yod pa ni ma yin te/ gcig la gnyis kyis 'gal ba'i phyir ro/ /gzhung lugs tha dad pa la gnas pa rnams kyang / phan tshun 'gal ba'i rang bzhin du bsgrub pa'i phyir ro/ /rigs pa can rnams ni gsal ba dang rnam pa dang rigs rnams kyi tshig gi don no zhes smra ste/ tshig gi don ni tshig gi don te sgra'i don zhes bya ba'i tha tshig go/ /de la gsal ba'i sgras ni rdzas dang / yon tan gyi khyad par dang / las rnams brjod do/ /de skad du yang mdo las yon tan gyi khyad par gyi rten gyi lus can ni gsal ba'o zhes 'byung ngo / /re zhig 'di'i don rnam 'grel byed pa'i lugs kyi brjod pa/ khyad par du byed pas khyad par can la yon tan dag las khyad par ni yon tan gyi khyad par te las la brjod do/ /khyad par gyi lus kyi rten ni lus can gcig bsdus pa byas pas 'di la yon tan gyi khyad par gyi sgra gnyis pa yang bstan te/ des na yon tan gyi tshig don gzung ngo / /de dag ni yon tan yang yin pas yon tan gyi phyir khyad par ro/ /khyad par smos pa ni rnam par gsal ba'i don du ste/ 'di ltar rnam pa ni ldan pa'i khyad par gyi rang bzhin yin pas/ /ldan pa yang yon tan gyi tshig gi don gyi khongs su 'du ste/ de lta yin dang khyad par ma smos pa rnam pa yang bzung bar 'gyur ro/ /de'i gsal pa'i khongs su 'du bar mi 'dod de/ de ni sgras logs shig tu gzung ba'i phyir ro/ /rten gyi sgras ni rdzas brjod de/ yon tan gyi khyad par de dag gi rten ni de'i rten te rdzas zhes bya ba'i don to/ /'dir ni de'i sgra mi mngon par byas nas bstan to/ /'di ltar tshig rnam par sbyar bar bya ste/ yon tan gyi khyad par rnams zhes bya ba yon tan khyad par dag ste/ yon tan gyi khyad par dag dang de'i rten ni yon tan gyi khyad par gyi rten no/ /'di ni gcig tu bsdus pa'i zlas dbye ba ste/ rtags ni 'jig rten la brten pas de'i phyir ma ning gi rtags su ma bstan to/ /des na don ni 'di yin te gzhi yon tan khyad par la brten pa ni gsal ba dang lus can zhes bya bar yang brjod de/ de la gang gi tshe rdzas la lus can gyi sgra yin pa de'i tshe gnas bzhi bsgrub par blta bar bya ste/ 'di la yan lag gsal bas lus can no/ /gang gi tshe gzugs la sogs pa la yin pa de'i tshe byed pa po sgrub pa yin te/ rdzas la 'jug pa ste 'du bas gzugs la sogs pa lus can no/ /lus can gyi sgra rdzas la las su sgrub pa yin la/ gzugs la sogs pa la byed pa sgrub pa yin no/ /bshad par byed pa'i lugs kyis mdo'i don ji ltar thos pa bzhin du yin te/ yon tan gyi khyad par rnams kyi rten rdzas nyid gsal ba dang lus can yin no zhes de 'dod de/ ji skad du yon tan gyi khyad par gzugs dang / ro dang / dri dang / reg pa dang / lci ba dang / gsher ba nyid dang / mkhrang ba nyid dang / 'dus byas pa rnams dang / khyab pa'i tshad rnams kyi khyad par gyi rten ni ji ltar srid par de'i rdzas yin la/ yan lag gsal pa'i phyir lus can zhes bya'o/ /rnam pa'i sgras srog chags kyi yan lag la sogs pa'i cha shas sor mo la sogs pa'i ldan pa brjod de/ de skad du yang mdo las/ rnam pa ni rigs kyi rtags su brjod ces 'byung ngo / /'di'i bshad pa ni gang gis rigs dang rigs kyi rtags su brjod pa ni rnam par rig par bya ste/ de yang sems can gyi yan lag rnams dang / de'i cha shas rnams kyi bkod pa nges pa las gzhan ma yin no/ /bkod pa'i sgras ni ldan pa'i khyad par brjod ces nges pa smos pas bcos ma'i ldan pa bsal te/ de la rigs kyi rtags ni srog chags kyi yan lag ni mgo bo dang lag pa la sogs pa ste/ de dag gis ba lang nyid la sogs pa'i mtshan nyid kyi rigs mtshon no / /rnam pa ni res 'ga' dngos su rigs gsal bar byed de/ gang gi tshe mgo bo dang lag pa la sogs pa'i gnas lugs mthong ba las ba lang nyid gsal ba na'o/ /res 'ga' ni rigs kyi rtags te/ gang gi tshe rwa la sogs pa'i yan lag so so ba'i cha shas kyi gnas lugs kyi gsal ba rnams kyis ba lang nyid la sogs pa gsal ba kho na'o/ /des na rnam pa ni rigs dang rtags gsal bar byed pa yin no/ /rigs kyi sgras ni tha mi dad par brjod pa dang shes pa skye ba'i rgyu mtshan gyi spyi brjod pa yin te/ de skad du yang mdo las/ mtshungs pa skye ba'i bdag nyid can ni rigs yin no zhes 'byung ste/ mtshungs pa'i shes pa skye ba'i rgyu ni rigs yin no zhes bya ba'i don to/ /de la gsal ba dang rnam pa dag ni rang gi mtshan nyid sgra'i don yin pa gsal ba 'di gnyis kyi sgra'i don yin pa gsal bar rtogs par bya'o zhes bstan pa'i phyir rnam pa 'di dag nyid kyis ni zhes bya ba la sogs pa smos te/ rigs kyang phyis sel bar 'gyur ro snyam du dgongs pa'o/ /gsal zhes bya ba ni sgra'i don nyid yin pa zhes bya ba lhag ma'o/ /ci'i phyir zhe na/ gang phyir zhes bya ba la sogs pa smos te/ de dag ces bya ba ni gsal ba dang rnam pa dag go/ /des na ji ltar rang gi mtshan nyid la brda ma byas pa'i phyir sgra'i don ma yin pa de dag kyang yin pas de'i phyir brda ma byas pa'i phyir zhes bya ba'i gtan tshigs 'di ma grub pa yin zhing ma nges pa yang ma yin no snyam du bsams pa yin no/ /gzhan yang gsal ba'i rdzas dang yon tan gyi khyad par dang las kyi mtshan nyid yin la rnam pa yang ldan pa'i bdag nyid yin te/ rdzas la sogs pa 'di dag kyang nyid du bkag zin pas na 'di las kyang 'di dag med pa'i phyir yang dag par sgra'i don nyid du rigs pa ma yin no zhes ston pa ni/ rdzas la sogs pa zhes bya ba la sogs pa'o/ /de ltar re zhig dang gi mtshan nyid la brda mi srid par bstan nas/ rigs la sogs pa gsum la brda mi srid par bstan pa'i phyir rigs dang 'brel pa dag ni zhes bya ba la sogs pa smos te/ de'i 'og ces bya ba ni rang gi mtshan nyid kyi 'og tu bshad pa ste/ rigs dang de dang 'brel pa dang / /zhes bya ba'o/ /rigs dang ldan pa mi srid pa'i phyir de dang ldan pa yang mi srid pa yin te/ de'i tha snyad ni de dag gis byas pa'i phyir ro/ /de dang ldan pa yang rang gi mtshan nyid kyi bdag nyid yin pa'i phyir de'i phyogs la 'byung ba'i skyon mtshungs pa kho na'o snyam du bsams pa yin no/ /tsam pa'i bu ni rigs sgra'i don yin no zhes zer zhing / bya chen gyi bu'i rdzas yin no zhes zer la/ drang srong ba ni gnyi ga'o/ /zhes zer ba de yang 'di nyid kyis bsal ba yin no/ /rigs mi rung ba'i phyir dang / rdzas kyang rang gi mtshan nyid kyi bdag nyid yin pa'i phyir de'i phyogs la 'byung ba'i skyon mi 'dogs pa'i phyir ro/ /mjug bsdu ba'i phyir/ de'i phyir zhes bya ba la sogs pa smos te/ de'i phyir ni de lta bas na'o/ /ngo bo nyid med do zhes bya ba ni rang bzhin med pa nyid do/ /blo'i rnam pa la yang brda mi srid par bstan pa'i phyir/ blo gnas zhes bya ba la sogs pa smos te/ blo'i rnam pa ni de'i bdag nyid yin pas blo la gnas pa'i phyir 'di ni blo de'i ngo bo bzhin du bstan par bya ba'i phyir don nam blo gzhan la rjes su 'jug pa ma yin no/ /de lta yin dang brda dang tha snyad du phyin pa'i dus su ma khyab pa'i phyir rang gi mtshan nyid bzhin du de la yang brda srid pa ma yin no/ /tha snyad kyi dus su rjes su 'gro ba yin du chug mod/ de lta na yang de la tha snyad 'dogs pa po rnams brda byed par rigs pa ma yin te/ 'di ltar sgra tha dad pa las don byed pa don du gnyer ba'i skyes bu don byed par nus pa'i don shes nas 'jug ste/ de dag la'o snyam du sems pa'i tha snyad 'dogs pa po rnams kyis rjod par byed pa sbyor bar byed kyi zhen pas ni ma yin no/ /rnam par rtog pa'i blo'i rnam pa 'di ni grang ba sel ba la sogs pa mngon par 'dod pa'i 'bras bu de don du gnyer bar bsgrub pa ma yin te/ de nyams su myong ba skyes na yang de med pa'i phyir ro/ /des na de la yang brda med pa'i phyir brda ma byas pa'i phyir ro zhes bya ba'i gtan tshigs ma grub pa ma yin no/ /'di snyam du yod pa'i don la sogs pa sgra'i don gzhan yod de/ de lta bas na de la brda srid pa'i phyir gtan tshigs ma grub pa nyid yin no snyam du sems na/ 'dis bsal nyid ces bya ba smos te/ rang gi mtshan nyid la sogs pa sgra'i don yin pa bkag pa nyid kyis te / de dag gi rang gi mtshan nyid la sogs pa kho na'i khongs su byas pa'i phyir ro snyam du bsams pa yin no/ /yod pa'i don la sogs pa de dag kyang gang yin zhe na/ bstan pa'i phyir/ sgra kun zhes bya ba la sogs pa smos te zhes bya ba'i rim pa gzhan du ste/ don zhes bya ba'i mjug tu sbrel bar bya'o/ /des na don 'di yin te/ yod pa'i don zhes bya ba 'di rtogs pa gang yin pa de ni sgra thams cad kyi brjod par bya ba ste rtogs par bya ba'i mtshan nyid de sgra'i don gyi mtshan nyid do zhes bya ba'i tha tshig go/ /des na yul du gyur pa'i don la ba lang la sogs pa la ba lang la sogs pa'i sgra rtogs par bya ba gang yin pa de ni snga na med pa dang lha dang mtho ris dag dang mtshungs so zhes smra'o/ /snga na med pa la sogs pa'i sgra'i don dang de dag mtshungs so zhes bya ba de bzhin du smras so zhes bya ba'i don no/ /ji ltar snga na med pa la sogs pa'i sgra rnams don gyi rnam pa'i yul can gyi blo rnams la 'jug pa ma yin gyi/ gang dag la snga na med pa la sogs pa'i sgra sbyor ba'i don 'ga' zhig yod do zhes bya ba de tsam zhig rtogs pa 'ba' zhig tu zad do/ /de bzhin du mthong ba'i don can ba lang la sogs pa'i sgra la yang mtshungs te/ gang gi phyir de dag las kyang 'di ltar rtogs te/ ba lang la sogs pa'i sgras brjod par bya ba ba lang nyid kyi spyi'am 'brel pa zhes bya ba don 'ga' zhig yod do/ /gang du de la rnam pa'i khyad par yongs su 'dzin pa 'ga' zhig 'byung ba de dag gi de ni grub pa'i mtha'i stobs las yin gyi sgra las ni ma yin no/ /sogs pa'i sgras bzung ba yod pa'i don bstan pa'i phyir/ yang na kha cig ces bya ba la sogs pa smos te/ kha cig ni bram ze la sogs pa'i sgra dag gis bsdu ba dang rnam par brtag pa dag med par yang dka' thub dang / rigs dang / thos pa la sogs pa'i tshogs pa brjod par gyur pa yin no zhes smos te/ dper na nags tshal la sogs pa'i sgra dag gis da ba la sogs pa bzhin no/ /'di ltar nags tshal zhes brjod pa na da ba'am/ seng ldeng ngam/ pa la sha zhes rnam par brtags pas rtogs par 'gyur ba ma yin la/ da ba dang / seng ldeng dang / pa la sha zhes bsdu bas rtogs pa yang ma yin te/ 'on kyang da ba la sogs pa mtha' dag rtogs pa yin no/ /de bzhin du bram ze zhes brjod pa na dka' thub bam / rigs sam/ thos pa zhes bya ba'am/ dka' thub dang / rigs dang / thos pa zhes pas kyang rtogs par 'gyur ba ma yin gyi/ 'on kyang gzhan dang 'brel pa rnam par bcad nas dka' thub la sogs pa'i tshogs pa mtha' dag rtogs pa yin no/ /de la rnam par brtag pa ni tshogs pa las mang po dag la gcig gi khyad par ma nges par 'dzin pa'o/ /bsdu ba ni gcig la gcig mngon par 'brel par nges pa du ma'i ngo bo'o/ /gang la rnam par brtag pa dang bsdu ba yod pa ma yin pa de la de skad ces bya'o/ /gzhan dag ni rdzas nyid la sogs pa nges par gzung ba'i ngo bo dag dang 'brel pa'i rdzas la sogs pa gang yin pa de sgra'i don yin te/ de yang 'brel pa can dag gi sgra'i don yin pa nyid kyis med pa'i phyir med pa zhes bya'o/ /yang na yi ge gcig bzhin du gcig tu mi snang ba'i phyir dka' thub dang thos pa la sogs pa 'di dag phan tshun med pa sre ba yin te/ 'di ltar 'di dag ni re re'am bsdus nas rang gi ngo bos dmigs pa ma yin te/ 'on kyang mgal me'i 'khor lo bzhin du 'di dag gi tshogs pa ni rang rang gi ngo bo las 'das pa snang ba yin no / /gzhan dag ni med pa'i khyad par can gyi yod pa gang yin pa de ni sgra'i don yin no zhes zer ro/ /de la sgra'i don nyid kyis med pa'i khyad par gyi bye brag gdu bu dang sor gdub la sogs pa rnams tha dad pa thams cad kyi rjes su 'jug pa gser la sogs pa'i spyi'i bdag nyid kyi yod pa gang yin pa de'i med pa'i khyad par can gyi yod pa ni sgra'i rgyu mtshan nyid yin zhes bya ste/ sgra 'jug pa'i rgyu mtshan brjod bya zhes bya ba'i don to/ /gzhan dag ni mngon par brjod par gyur pa'i sgra nyid sgra'i don yin no zhes zer ro/ /de la mngon par brjod pa zhes bya ba 'di ci zhig ce na/ de la 'di zhes bya ba la sogs pa smos te/ sgra nyid don yin no zhes de ltar sgra la don zhugs pa ste/ de 'di la zhes 'brel pa de'i phyir te/ rgyu'i phyir gang gi tshe sgra don dang lhan cig tu byas pa'i ngo bo yin pa'i don gyi rnam pa bdag gir byas pa'i sgra de ni mngon par brjod pa zhes brjod do/ /gzhan dag gis blo la yong pa nyid kyi rnam pa phyi rol gyi dngos po'i yul can phyi rol gyi dngos po nyid du bzung ba blo'i ngo bo nyid du rnam par ma phyed pa sgra'i don du smra'o/ /de ston pa ni/ kha cig don dag ces bya ba la sogs pa te/ blo'i yul zhes bya ba ni blo la 'jug pa ste/ blo la gnas pa zhes bya ba'i tha tshig go/ /phyi'i dngos po'i rgyu mtshan can zhes bya ba ni yod pa dang med pa'i phyi'i dngos po'i rgyu mtshan yi ge'i mtshan ma lta bu rang gi ngo bo bstan pa'i don du 'jug pa gang la yod pa de ni phyi'i dngos po'i rgyu mtshan can no/ /phyi'i dngos po zhes 'dzin te zhes bya ba ni blo'i ngo bo nyid du rnam par ma phyed pa ste/ phyi rol nyid du nges pa zhes bya ba'i don to/ /'di ltar ji srid du blo'i ngo bo nyid kyi don la mi 'jog pa de ni blo'i ngo bo nyid do snyam du de kho na nyid sgom pas 'dzin pa de srid du de sgra'i don nyid du ma nges te/ de la bya ba'i khyad par dang 'brel pa med pa'i phyir ro/ /ba lang khrid de shog cig /zho 'thung shig ces bya ba la sogs pa'i bya ba de 'dra ba'i blo'i ngo bo la srid pa ma yin la/ bya ba dang ldan pa srid pa'i don yang sgra rnams kyis brjod pa yin no/ /de'i phyir blo'i ngo bo nyid du bzung ba 'di ni sgra'i don ma yin no/ /gang gi tshe phyi rol gyi dngos po la 'jog pa de'i tshe de la rtog pa po phyi rol nyid du phyin ci log yin te/ de bya bsgrub par byed nus par sems pa'i phyir sgra'i don yin no/ /'on te sel ba smra ba'i phyogs dang 'di la khyad par ci zhig yod/ 'di ltar sel ba smra ba rnams kyis kyang blo'i rnam pa phyi rol gyi ngo bo nyid du bzung ba sgra'i don du 'dod pa kho na ste/ ji skad du/ de yi ngo bos sgro btags rtogs/ /gzhan las ldog pa'i blo rtogs kyang / /sgra don don de nyid yin zhes/ /brjod pa la ni 'gal ba med/ /ces bshad do zhe na/ de ni yod pa ma yin te/ blo'i rnam par smra ba 'di ni phyi rol gyi dngos po la ma 'khrul pa yul dang bcas pa rdzas la sogs pa don dam pa la yang dag par blo'i rnam par ma nges pa ni sgra'i don du 'dod kyi/ tha dad pa dag la tha mi dad par zhen nas 'jug pa'i 'khrul pa phan tshun ldog pa'i rgyu mtshan can 'dod pa ni ma yin no/ /gal te/ de ltas don la gcig bdag tu/ /'dzin pa'i rnam rtog 'di 'khrul pa/ /ming don gang ldan phan tshun du/ /tha dad pa 'di'i sa bon yin/ /zhes ji ltar kho bo cag bzhin du brjod pa de'i tshe grub pa la sgrub ste/ de skad du yang / /gal te phan tshun tha dad 'di'i/ /sa bon 'di ni nged kyi phyogs/ /zhes 'chad par 'gyur ro/ / sel ba smra ba rnams kyis don dam par sgra rnams kyi don phyi rol lam / blo'i rnam pa'am/ gzhan cung zad 'dod pa yang ma yin no/ /'di ltar gang kho na sgra las byung ba'i shes pa la nges pa nyid du snang ba de ni sgra'i don yin gyi/ blo'i rnam pa ni sgra las byung ba'i shes pa de la nges par 'gyur ba ni ma yin no/ /'o na ci zhe na/ don bya ba byed pa'i phyi rol gyi dngos po nyid do/ /des don dam par phyi rol nges par 'gyur ba yang ma yin te/ de kho na ji lta ba bzhin du ma nges pa'i phyir dang / ji ltar nges pa bzhin du de kho na nyid ma yin pa'i phyir ro/ /de'i phyir sgro btags pa kho na sgra'i don yin la/ /sgro btags pa gang yin pa de yang ci yang ma yin pa'i phyir sgra dag gis yang dag par cung zad kyang brjod pa med do/ /yang sgra'i don gang yin zhe na/ don de nyid do zhes smras pa gang yin pa de ni don dang mtshams sbyar nas sgro btags pa nyid yin la/ /blo'i rnam pa smra ba rnams kyis ni don dam par blo'i rnam pa brjod byar 'dod pa'i phyir khyad par che'o/ /gzhan dag gis goms pa'i phyir sgra spobs pa'i rgyu yin gyi phyi rol gyi don rjod par byed pa ni ma yin no zhes zer ro/ /de ston pa ni/ sgra rnams thams cad ces bya ba la sogs pa'o/ /sgra yul 'ga' zhig la yang nas yang du 'jug par mthong ba ni goms pa yin la/ nges pa'i sgrub par byed pa rnam par bcad pa'i bya ba'i rtogs par bya ba dang rjes su mthun pa'i shes rab ni spobs pa yin no/ /de ni sbyor ba mthong ba'i 'jug pa dang lhan cig pas bskyed par bya ba yin la/ ngag so so dang skyes bu so so la de tha dad pa yin no/ /de'i tha dad pa ni tshad med de/ sgra'i tha snyad mtha' yas pa'i phyir brjod par mi nus so snyam na / mdor bsdus nas zhes bya ba smos so/ /'di la dpe bshad pa dper na don rtogs byed ces bya ba la sogs pa ste/ dper na lcags kyu la sogs pas btab pa'i glang po la sogs pa rnams kyi don rtogs pa'i bya ba la sogs pa'i rgyur 'gyur ba bzhin no/ /de bzhin du shing la sogs pa'i sgra don dang ldan par 'dod pa thams cad gom pa ji lta ba bzhin du spobs pa tsam nye bar sdud pa'i rgyur 'gyur gyi dngos su don ston par byed pa ni ma yin no/ /de lta ma yin na ji ltar phan tshun 'gal ba'i tshig tha dad pa dang / gtam brgyud sar pa rang gi rnam par rtog pas bkod ba'i dngos po'i khyad par gsal bar 'gyur zhe na/ de la zhes bya ba la sogs pa lan 'debs par byed de/ gal te yod pa'i don sngar bshad pa'i rang gi mtshan nyid la sogs pa'i rang bzhin du 'dod na de'i tshe sngar bshad pa'i skyon du thal bar 'gyur la/ gzhan yang yod pa'i don ni khyad par gyi ngo bo bzlog pa'i phyir de 'ba' zhig sgra dag gis ston par byed pa na ba lang dang / ba men dang / glang po la sogs pa'i tha dad pas tha snyad du byed par mi 'gyur te/ de ni sgras ma bstan pa'i phyir ro/ /ba lang nyid sgra'i khyad par don zhes bya ba la sogs pas gzhan gyi lan gyi dogs pa bsu ba yin te/ 'di snyam du ba lang nyid dang sgra dag gis khyad par gyi don yod pa tsam khra bo la sogs pa'i tha dad pa dang bral ba sgras rtogs te rtogs pa'i rgyu yin pa'i phyir de yin te tha dad pa'i tha snyad du 'gyur ro snyam du sems na/ 'o na de lta na ji ltar yod pa'i don tsam sgra'i don du 'dod/ gang gi phyir ba lang la sogs pa'i khyad par rtogs pa nyid yin no zhes dogs nas gzhan gyis lan smras pa ni rwa dang dbyibs zhes bya ba la sogs pa'o/ /rwa la sogs pa'i khyad par sgra las mi gsal te mi rtogs pa'i rgyu'i phyir de rtogs par bya ba'i don 'ga' zhig yod do zhes bya ba de brjod kyi/ khyad par du 'gyur ba'i ba lang nyid la sogs pa'i sgra dag ma rtogs pa ni ma yin pa'i phyir skyon med do zhe na/ de lta na ni zhes bya ba la sogs pas lan 'debs par byed de/ gal te ba lang nyid la sogs pas khyad par can gyi don tsam brjod do zhes bya bar 'dod na/ de'i tshe de dang ldan pa'i don brjod par khas blangs par byas par 'gyur ro/ /de la yang rigs de dang 'du ba bkag pa'i phyir de dang ldan pa'i don mi srid do zhes sngar bshad pa'i skyon yod do/ /gzhan yang de dang ldan pa'i don ni rang gi mtshan nyid kyi bdag nyid yin pa'i phyir brda mi byed pa nyid dang / tha snyad med pa nyid dang / gsal bar snang bar thal ba snga ma bzhin du 'byung ba kho na'o/ /yod pa'i don ni rang gi mtshan nyid las tha dad pa yin no zhe na/ yod don gzhan yang mthong ma yin/ /zhes bya ba smos te/ rang gi mtshan nyid la sogs pa la tha dad pa'i yod pa'i don gzhan dpyod pa na blo'i spyod yul du 'jug pa ma yin no/ /bsdu ba brjod pa'i phyogs la skyon bshad pa/ bsdu ba brjod pa yin na yang / /zhes bya ba la sogs pa smos te/ bsdu ba brjod pa'i phyogs la rigs dang dka' thub la sogs pa'i khyad par brjod pa gsal por khas blangs pa'i phyir so sor brjod pa'i phyogs la 'byung ba'i nyes pa bsdu ba brjod pa la thams cad cig car 'byung bar 'gyur ro/ /med pa'i khyad par zhes bya ba la sogs pa'i phyogs gnyis kyi skyon bshad pa ni/ nges par ma bzung zhes bya ba la sogs pa ste/ sngar tshig gi don drug brtag par ldan pa dang 'du ba'i mtshan nyid kyi 'brel pa bsal ba'i phyir grangs can pa'i tha mi dad pa'i spyi dang / tshig gi don drug brtag par tha dad pa yang bsal ba'i phyir med pa'i ldan pa dang med pa'i khyad par gyi spyi yang brjod par bya ba ma yin no/ /mngon par brjod pa'i phyogs la yang / /tha dad rigs sogs zhes bya ba la sogs pa smos te/ gal te sgra la don 'ga' zhig yod na de ni de dang lhan cig gcig tu 'gyur na/ ji srid du rang gi mtshan nyid la sogs pa'i ngo bo sgra'i don du mi srid par sngar bstan te/ de ji ltar de dang gcig tu byed par 'gyur/ gzhan yang mngon par brjod pa 'di ni blo la gnas pa kho na yin te/ 'di ltar phyi rol gyi sgra dang don dag dbang po tha dad pas gzung bar bya ba'i phyir 'di dag las tha dad par 'dod pas de dag don dam par gcig tu byed par 'gyur ba rigs pa ma yin no/ /de'i phyir sgra dang don blo la gnas pa kho na blos gcig tu rtogs pa'i phyir gcig tu byed par rigs te/ 'di ltar brjod bya'i rnam pa 'dzin pa sgra'i rang bzhin bsgribs pa blo la gsal ba sgra'i bdag nyid kyi rang gi ngo bo dang rjes su mthun pa'i don rnam par ma phye bas nang du 'jug pa ni mngon par brjod pa zhes bya'o/ /de yang blo'i bdag nyid du rtog pa'i rnam par rigs kyi/ phyi rol ni ma yin te/ de ni gcig tu phan tshun dben pa'i rang bzhin yin pa'i phyir ro/ /de lta yin dang de ma thag tu brjod pa'i blo sgra'i don yin pa'i phyogs las 'di la bye brag ci yod de ci yang med do/ /gnyi ga la yang blo la snang ba kho na don yin no/ /sgra don gcig tu byas pa zhes/ /bya 'di tsam zhig tha dad la/ /shes las tha dad ma yin pa'i/ /ji ltar don gzhan 'brang bar 'gyur/ /zhes bya ba'i skyon ni mtshungs pa kho na'o/ /de nyid ston pa ni/ de phyir de ma thag ces bya ba la sogs pa'o/ /spobs pa'i phyogs la skyon bshad pa ni/ gal te phyi'i don zhes bya ba la sogs pa ste/ gal te spobs pa don dam par phyi rol gyi don gyi yul can yin na/ de sgra la sogs pa dngos po gcig la gzhung lugs 'gal ba la gnas pa'i spobs pa sna tshogs par mi 'gyur te/ gcig la rang bzhin du ma mi srid pa'i phyir ro/ /ci ste yul med pa yin na de'i tshe don la 'jug pa dang rtogs pa dag tu mi 'gyur te/ de'i sgra'i yul ma yin pa'i phyir ro/ /ci ste rang gi snang ba don med pa la don du zhen nas 'khrul pas 'jug pa dang shes pa de dag tu 'gyur ba de'i tshe sgra'i don 'khrul pa nyid du 'gyur te/ 'khrul pa de'i sa bon te rgyu brjod par bya dgos so/ /gzhan du 'khrul pa sa bon med pa yin na thams cad du thams cad kyi tsher 'gyur te/ gal te dngos po rnams kyi phan tshun tha dad pa nyid 'di'i sa bon yin par khas len na de'i tshe kho bo cag gi phyogs nyid khyed kyis sgrub par byed pa'i phyir grub pa la sgrub po/ /da ni phyogs thams cad la mtshungs pa'i skyon bshad pa ni/ gal te 'di dag ces bya ba la sogs pa'o/ /rang gi mtshan nyid dang rigs la sogs pa 'di thams cad skad cig pa'am/ skad cig ma ma yin grang / de la phyogs dang po la brda'i dus su mthong ba tha snyad kyi dus su rjes su mi 'gro ba'i phyir de la brda byed pa ma yin no/ /skad cig ma ma yin pa'i phyogs la yang rim ma yin pa las rim can 'byung ba med pa'i phyir sgra'i don gyi shes pa rim can med par thal bar 'gyur ro/ /gzhan du zhes bya ba ni skad cig ma ma yin no/ /gzhan dag ni sgras don brjod par 'dod pa rjes su dpog par byed do zhes zer te/ ji skad du/ brjod par 'dod pa rjes dpog pa/ / sgra las gzhan pa yod ma yin/ /zhes bshad pa lta bu'o/ /de la bshad pa/ 'di nyid kyis ni zhes bya ba la sogs pa smos te/ gal te don dam par brjod par 'dod pa don dam pa po sgra'i don gyi yul du 'dod na/ de ma grub ste rang gi mtshan nyid la sogs pa'i sgra'i don 'ga' yang mi srid pa'i phyir ro/ /de'i phyir don dam par don 'ga' zhig la brjod par 'dod pa ma yin te/ rjes su 'gro ba can gyi don mi srid pa'i phyir ro/ /de ston par byed pa'i sgra yang yod pa ma yin te/ thos pa gang zhig ces bshad pa yin te/ thos pa ni sgra'o/ /brjod par 'dod pa ste rtogs par bya ba la thos pa ste sgra las phyi rol la 'jug par mi 'gyur te/ de ma brjod pa'i phyir don gzhan bzhin no/ /ci ste brjod par 'dod pa gsal ba'i gzugs la sogs pa'i don gang yin pa dang phyi rol gang yin pa de dang 'dra ba yod pa yin te/ des na 'dra ba'i phyir ma brjod na yang phyi rol gyi don la 'jug par 'gyur te/ mtshe ma bzhin no zhes bya bar 'dod de/ des na 'dra phyir zhes bya ba smos so/ /de lta na ni thams cad phyi rol la 'jug par mi 'gyur te/ res 'ga' brjod par 'dod pa gsal ba brjod pa la yang 'jug par 'gyur te mtshe ma dag nyid bzhin no/ /gang yang bye brag tu smra ba rnams sgra'i yul ming du brjod pa dang mtshan mar brjod pa don gyi ngo bo ldan pa ma yin pa'i 'du byed du 'dod pa de yang 'dis sun phyung bar blta bar bya'o/ /'di ltar ming la sogs pa de gal te skad cig ma yin na de'i tshe rjes su 'gro ba mi rung la/ skad cig ma ma yin na shes pa rim can du mi 'thad pa dang / phyi rol la 'jug pa med par thal bar 'gyur ba dang / 'du ba'i phyir na thams cad du mi 'gyur ro zhes bya ba sun 'byin pa gang yin pa thams cad nyams pa med par 'jug go/ /yang na 'dis ni zhes bya ba ni ji ltar srid pa rang gi mtshan nyid la sogs pa sun phyung bas so/ /'di ltar de la yang 'di skad du brjod par bya ste/ gzhan la brten min bdag nyid kyi/ /ming sogs rnams la brda nus min/ /de phyir de dag ci zhig ltar/ /brjod bya nyid du 'thad ma yin/ /zhes bya ba'o/ /brjod par 'dod pa la yod pa'i don gsal bar byed pa na sgra rnams phyi rol la 'jug par mi 'gyur ro zhes gang smras pa 'di la gzhan gyi len gyi dogs pa bsu ba'i phyir/ brjod 'dod rjes su dpag ces bya ba la sogs pa smos te/ brjod par 'dod pa yang smra ba po'i rgyud la 'jug la brjod par 'dod pa de'i rjes su dpag pa ni nyan pa po'i rgyud la yod pa'i phyir brjod par 'dod pa dang rjes su dpag pa de dag bsres pa sbrel ba de snang zhes bya ba'i don to/ /rnam pa de phyi rol nyid du nges na smra ba po dang nyan pa po dag 'di la ste phyi rol la 'jug par gyur to/ /'di skad du bstan pa yin te/ don dam par rang gi snang ba nyams su myong ba la smra ba po 'di ltar zhen par 'gyur te/ bdag gis 'di la phyi rol gyi don nyid bstan to/ /nyan pa po yang 'di lta ste/ bdag la 'dis phyi rol nyid ston par byed do zhes de'i phyir rab rib can nyid la zla ba gnyis snang ba bzhin du sgra las byung ba'i tha snyad 'di thams cad de lta bu yin no/ /gal te de lta na kho bo cag gi phyogs su lhung ba'i phyir grub pa la sgrub po/ / sngar spobs pa'i sgo nas song bas de'i phyir yang zhes bshad do/ /de'i phyir de ltar brda ma byas pa'i phyir zhes bya ba'i gtan tshigs 'di ma grub pa ma yin la/ ma nges pa nyid dang 'gal ba nyid dag ni dang po nyid du brtsal zin to/ /de lta bas na sgras ji skad du bshad pa'i sel ba byed do zhes bya bar grub po/ / 'dir gzhan dag sel ba'i sgra thos pa las blo skrag ste/ brjod par 'dod pa'i sel ba'i ngo bo mi shes pas dam bca' ba grags pa la sogs pa dang 'gal bar bstan pa'i phyir/ 'on te khyed kyi phyogs la sgras/ /gzhan sel byed bar brjod min nam/ /zhes bya ba rgyas par smras te/ sgras gzhan sel byed pa zhes bya ba 'dir zhes bya ba'i sgra khong nas dbyung bar bya'o/ /sgras gzhan sel bar byed ces bya ba de ltar ji ltar rjod par byed ces bya ba'i don to/ /ci'i phyir brjod par mi bya zhe na/ snang ba 'di la zhes bya ba la sogs pa smos te/ gzhan sel ba ni dgag pa tsam nyid du 'dod par grags la/ sgra las byung ba la snang ba 'di la dgag pa tsam du rtogs pa ni med do/ /'o na ci zhe na/ dngos po'i ngo bo nges pa nyid kyis sgra las byung ba'i blo 'jug par dmigs la/ sgra las byung ba'i shes pa la mi snang ba gang yin pa de'i sgra'i don du rigs pa yang ma yin pa de ha cang thal bar 'gyur ba'i phyir ro/ /de'i phyir dam bca' ba grags pa dang 'gal ba yin no/ /gal te ba lang zhes bya ba la sogs pa'i tshigs su bcad pa gsum gyis shes chen gyi lugs kyis grags pa la sogs pa dang 'gal ba ston par byed pa yin te/ gal te ba lang gi sgra gzhan rnam par gcod pa ston par byed pa lhur len pa yin na de'i tshe de nyid la don byas pa'i phyir nog la sogs pa'i dngos po ba lang gi sgra las rtogs par mi 'gyur te/ de lta yin dang nog la sogs pa ldan pa'i dngos po'i yul la ba lang gi blo skyed par byed pa'i sgra gzhan brtsal bar bya dgos par 'gyur ro/ /'di snyam du ba lang gi sgra gcig nyid kyis blo gnyis bskyed pa'i phyir sgra gzhan brtsal bar mi bya'o snyam du sems na/ sgra ni zhes bya ba la sogs pa smos te/ sgrub pa'i yul can dang dgag pa'i yul can gyi 'bras bu shes pa gnyis gang dag la yod pa de dag la de skad ces bya'o/ /de la cir 'gyur zhe na/ gcig la zhes bya ba la sogs pa smos te/ sgra gcig la sgrub par byed pa'am/ dgag par byed pa rnam par shes pa gnyis kyi mtshan nyid kyis 'bras bu cig car ma yin te/ mi dmigs pa zhes bya ba lhag ma'o/ /dgag pa dang sgrub pa 'bras bu'i shes pa phan tshun 'gal bas rigs pa ma yin no/ /gang gis zhes bya ba la sogs pas gtan tshigs bla lhag 'chad de/ gal te ba lang gi sgras dngos su ba lang ma yin pa las ldog pa ston par byed pa yin na de'i tshe ba lang gi sgra thos ma thag tu nyan pa pos ches thog mar ba lang ma yin pa zhes bya ba 'di rtogs par 'gyur ro/ /sgra las bar mchod par shes pa skye ba gang yin pa de nyid sgra'i don du rnam par gzhag ste/ bar du mchod par ba lang ma yin pa rnam par gcod pa'i blo skye ba yang ma yin no/ /de'i phyir ba lang gi blo mi skye bar thal ba dang / ches dang por ba lang ma yin par rtogs par thal bar 'gyur ba'i phyir gzhan sel ba sgra'i don ma yin no zhe'o/ /gang gis ba lang mi ldog pa'i/ /zhes bya ba la sogs pas gzhon nu ma len gyi lugs kyi dam bca' ba'i skyon ston pa yin te/ de ni 'di skad du smras te / gzhan sel ba'i mtshan nyid kyi spyi brjod par bya ba nyid du brjod par bya ba na res 'ga' ma yin par dgag pa'i mtshan nyid dam/ med par dgag pa'i mtshan nyid brjod pa yin grang / de la phyogs dang po dam bcas pa grub pa la sgrub pa'i skyon yin te/ 'di ltar ba lang nyid du brjod pa'i spyi ba lang gi sgra'i brjod bya nyid du 'dod la/ khyed cag kyang ba lang ma yin pa ldog pa'i mtshan nyid kyi spyi ba lang gi sgras brjod do zhes smra ba na de nyid sgra gzhan gyis brjod pa'i phyir ming rtsod pa 'ba' zhig tu zad do/ /yang ji ltar de nyid sgra gzhan gyis brjod pa yin zhe na/ 'di ltar dngos med ces bya ba la sogs pa smos te/ 'di ltar de gang gi phyir snga na med pa la sogs pa'i mtshan nyid kyi dngos po med pa rnam pa bzhi po thams cad ni dngos po gzhan gyi bdag nyid du rnam par gnas te/ ji skad du/ zho sogs 'o ma la med gang / /de ni snga na med par brjod/ /zho la 'o ma med pa nyid/ /zhig nas med pa'i mtshan nyid yin/ /rta sogs ba lang la med gang / /gcig la gcig med par brjod de/ /mgo yi yan lag dma' ba dang / /ri bong rwa sogs ngo bo yis/ /'phel dang mkhrang ba spangs pa ste/ /gtan nas med par brjod pa yin/ /tha dad de dag dngos med par/ /mi 'gyur nges 'di dngos po nyid/ /ces bshad pa yin no/ /'di ni 'o ma la sogs pa zho la sogs pa'i ngo bor med pa ni snga na med pa la sogs par bstan pa'i rten yin no zhes bstan pa yin no/ /ba lang ma yin pa las ldog pa yang gcig la gcig med pa yin te/ de ni rtags la sogs pa rnam par gcod pa'i ngo bo yin pa'i phyir ro/ /de lta bas na de'i dngos po yin no/ /de la de ltar dngos po med pa ni dngos po gzhan gyi bdag nyid yin par gnas pa na/ khyed cag gi rta la sogs pa las ldog pa rang bzhin gyi dngos po zhes pa 'di ci zhig la 'dod pa smros shig /'di snyam du 'dir ci zhig smra bar bya ste/ 'di ni ba lang la sogs pa'i rang gi mtshan nyid kyi bdag nyid yin no zhes bya bar 'dod na/ re zhig ces bya ba la sogs pa smos te/ thun mong ma yin pa'i khyad par gang yin pa de ni khyed cag gis rta la sogs pa las ldog pa'i bdag nyid du mi 'dod do/ /ci'i phyir zhe na/ /bshad pa/ rtog pa med phyir te/ de la rnam par rtog pa thams cad spangs pa'i phyir ro/ /spyi kho na rnam par rtog pa'i shes pa'i spyod yul du 'dod la/ thun mong ma yin pa'i don ni rnam par rtog pa thams cad kyi spyod yul ma yin te/ ji skad du/ dbang po'i spyod yul ngo bo ni/ /rig bya bstan du med pa'o/ /zhes bshad pa lta bu'o/ /bye brag gi bdag nyid la rgyu ni thun mong min pa'i bdag nyid de/ thun mong ma yin pa'i bdag nyid kyis khyad par gang yin pa zhes bya ba'i don to/ /de ltar bye brag med pa bshad nas/ da ni don de nyid bye brag tu bshad pa ni/ de bzhin du ni zhes bya ba la sogs pa'o/ /ji ltar khyed cag thun mong ma yin pa'i khyad par rta la sogs pa las ldog pa bdag nyid ba lang gi sgra'i brjod byar mi 'dod pa de bzhin du khra bo la sogs pa khra bo la sogs pa'i sgra brjod par bya ba nyid du mi 'dod do/ /rta la sogs pa las ldog pa'i bdag nyid kyi dngos po zhes bya ba 'di la yang rjes su 'jug go/ /ci'i phyir zhe na/ spyi ma yin par thal 'gyur phyir/ /zhes bya ba smos te/ gal te 'dod pa de'i tshe spyi'i sgra'i brjod par bya ba nyid du mi 'gyur te/ de ni rjes su 'gro ba med pa'i phyir ro/ /gang kho na'i phyir rta la sogs pa las ldog pa'i bdag nyid kyi dngos po thun mong ma yin pa mi 'thad pa de lta bas na kun la ste/ rigs mthun pa'i khra bo la sogs pa'i gong bu la gang zhig re re la yongs su rdzogs pa'i ba lang gi blo ni de'i rgyu mtshan can yin te/ de yang ba lang nyid ces bya ba'i spyi nyid yin no/ /de la ba lang ma yin pa sel ba'i sgras brjod pa'i phyir ming 'ba' zhig gzhan yin pas de'i phyir dam bca' ba grub pa la sgrub pa'i skyon yin no/ /ci ste med par dgag pa'i mtshan nyid do zhes bya ba'i phyogs de la/ gal te dgag tsam zhes bya ba la sogs pa smos te/ med pa sgra'i brjod bya zhes bya ba na sgra ba lang ma yin pa sel ba'i mtshan nyid kyi med pa rjod par byed pa yin la/ sgra de'i brjod bya phyi rol gyi don gyis stong pa nyid du 'gyur te/ dngos po'i ngo bo la ston pa'i phyir ro/ /gzhan gyi rnam par shes pa tsam/ /zhes bya ba ni sngar rnam par shes pa tsam du sgra ba dgod pa'i dus su khyed cag gis bkod la kho bo cag gis kyang bsal zin to/ /yang sgra'i don bsam pa'i skabs 'dir grags pas grub pa'i don bkag pa'i phyir de nyid gzhan sel ba'i thabs kyis bstan to/ /de las skyon cir 'gyur zhe na/ de la yang zhes bya ba la sogs pa smos te/ de la ste stong pa nyid kyi brjod bya la sgra las byung ba'i rta la sogs pa blo'i bdag nyid kyi cha shas 'dzin par 'gyur te/ phyi rol gyi dngos po'i ngo bo mi 'dzin pa'i phyir ro/ /de lta yin na skyon ci yod ce na/ der ni zhes bya ba la sogs pa smos te/ de la de ltar na gnas pa na sel ba brjod bya nyid ni brdzun par khas blangs par 'gyur te/ phyi rol gyi don la mi ltos pa'i blo'i rnam pa ni sgrub pa'i ngo bo nyid kyis sgra'i don du 'gyur ba'i phyir ro/ /de lta yin dang dam bca' ba la khas blangs pas gnod pa yin no snyam du bsams pa'o/ /de nyid ston pa ni/ blo'i rnam pa zhes bya ba la sogs pa'o/ /blo'i rnam pa nyid kyi dngos po'i ngo bo'i sgra'i don du 'gyur ro zhes 'brel to/ /'di snyam du blo de dmigs pa med pa yin na yang ba lang la sogs pa'i blo dag las rigs mi mthun pa dag las ldog pa'i ngo bor 'jug ste/ des na gzhan sel ba brtags pa mi rigs pa kho na'o snyam du sems na/ blo de zhes bya ba la sogs pa smos te/ blo de zhes bya ba ni dmigs pa med pa'i rta la sogs pa'o/ /sgra'i don la zhes bya ba ni rta la sogs par zhen pa dag la'o/ /dngos po'i ngo bo zhes bya ba ni sgrub pa'i ngo bor zhen pa'o/ /dngos po nyid ces bya ba ni rta la sogs pa'i gong bur nges pa'i blo'i bdag nyid do/ /nges par bzung ba'i 'bras bu ston pa ni/ blo ni mi sel ba'i zhes bya ba ste/ brjod par bya ba gang la sel ba yod pa ma yin pa rta la sogs pa'i blo'i bdag nyid kyi dngos po de la de skad ces bya ste/ blo'i sel ba med pa'i blo mi sel ba ste/ blo gzhan sel ba dang bral ba/ /zhes bya ba'i don to/ /rnam pa gcig tu na sel bar byed pas sel ba ste/ sel ba med pa ni mi sel ba'o/ /blo'i sel ba med pa ni blo mi sel ba zhes bsdu'o/ /'di skad du bstan pa yin te/ gal te blo gzhan las rnam par bcad pa de lta na yang de blo gzhan rnam par gcod par nges par skye ba ma yin no/ /'o na ci zhe na/ rta la sogs pa'i don la sgrub pa'i ngo bos zhen pa yin no/ /des na dngos po sgrub pa'i ngo bo nyid brjod byar rtog pa rigs pa dang ldan pa yin gyi gzhan sel ba ni ma yin te/ blo gzhan gyis blo gzhan mi sel ba'i phyir ro/ /gzhan yang khyed cag gis sel ba'i tshig gi don nyid du brtags pa gang yin pa de ni ngag las btus nas brtags pa'i tshig gi don du 'dod la/ ngag gi don ni snang ba'i mtshan nyid kho na ste/ ji skad du/ tshig ni ngag las btus pa la/ /rnam par dben pas don 'di yin/ /ngag don 'di ni snang bar brjod/ /des na 'di ni bskyed bya yin/ /zhes smras pa bzhin no/ /'dir smras pa/ ji ltar phyi rol don med kyang / /zhes bya ba la sogs pa la/ ji ltar phyi rol gyi don sgra'i brjod bya nyid du med na yang khyed cag gi ngag gi don snang ba'i mtshan nyid du brjod kyi gzhan sel ba'i mtshan nyid ni ma yin pa de bzhin du tshig gi don yang dag gi don bzhin du snang ba'i mtshan nyid du 'gyur bas de'i phyir sel ba sgra'i don nyid du ci'i phyir rtogs par byed/ tshig dang ngag gi don gnyi ga yang sgrub pa'i ngo bo nyid yin la rag mod snyam du bsams pa'o/ /'di snyam du snang ba yang snang ba gzhan gnyis pa las rnam par bcad pa yod pa'i phyir sel bar rtog go snyam du sems na/ de'i phyir blo ni gzhan zhes bya ba la sogs pa smos te/ gal te 'di rtogs pa de lta na yang yod pa nyid do zhe na/ rang gi ngo bo zhes bya ba la sogs pa smos te/ gal te yang blo blo gzhan las ldog pa yod pa de lta na yang de la sgra'i bya ba yod pa ma yin te/ 'di ltar blo 'di sgra las skye bzhin pa na rang gi ngo bo skyed pa la ma rtogs pa gzhan gyis rnam par bcad pa 'di mtshan nyid sgra las zhen pa'i cha 'dzin par mngon par ma yin no/ /'o na ci zhe na/ sgrub pa'i ngo bor zhen pa nyid skyed par byed do zhes bya ba'i don te/ sgras ma zhen pa'i dngos po'i cha yang sgra'i don du rigs pa ma yin te/ ha cang thal bar 'gyur ba'i phyir ro/ /de lta bas na dam bca' ba grags par gnod pa yin no snyam du bsams pa yin no/ /yang thal bar 'gyur ba sgrub pas grags pa dang 'ga' ba nyid bstan pa'i phyir/ gal te gzhan la zhes bya ba la sogs pa smos te/ gang dag ba lang rta la sogs pa tha dad pa'i spyi brjod pa dang / yang gang dag khra bo la sogs pa bye brag brjod pa de dag thams cad khyed la rnam grangs par 'gyur te/ don tha dad pa med pa'i phyir shing ljon pa dang rtsa bas 'thung la sogs pa bzhin no/ /yang ci'i phyir don tha dad pa med ce na/ 'dres dang zhes bya ba la sogs pa smos te/ dngos po kho na la bsre ba nyid dang / gcig nyid dang / sna tshogs pa la sogs pa'i rnam par rtog pa srid pa yin gyi dngos po med pa la ni ma yin no/ /gzhan sel ba rnams ni dngos po med pa'i phyir phan tshun 'dre ba la sogs pa'i rnam par rtog pa rigs pa ma yin no/ /de'i phyir ji ltar 'di dag gi phan tshun tha dad pa 'grub par 'gyur/ ci ste de dag tha dad khas len par byed na/ de lta yin na nges par dngos po nyid du 'gyur ro zhes ston pa ni/ gal te thun mong zhes bya ba la sogs pa'o/ /dngos po yin zhes bya ba ni bsgrub bya ston pa'o/ /sbyor ba ni gang dag phan tshun tha dad pa de dag ni dngos po yin te/ rang gi mtshan nyid bzhin no/ /gzhan sel ba yang phan tshun tha dad pa yin no zhes bya ba ni rang bzhin gyi gtan tshigs so/ /de lta yin dang dngos po nyid yin na sgrub pa kho na sgra'i don yin no zhes bya bar grub po/ /'dis ni dam bca' ba la rjes su dpag pas gnod pa bstan pa yin no/ /yang sel ba rnams dngos po med pa nyid du khas len pa ni de'i tshe sna tshogs pa nyid med pa'i phyir snga ma bzhin du rnam grangs pa nyid du thal bar 'gyur ro zhes bya ba 'di ni nges so/ /'dir gzhan gyis sangs rgyas pa'i len gyi dogs pa bsu ba ni/ 'on te gsal bya zhes bya ba la sogs pa ste/ ji skad du/ bsal bya'i dbye bas tha dad don/ /rang don tha dad rtogs pa blun/ /zhes bshad pa bzhin no/ /de lta yin dang rang las tha dad pa med na yang gsal bar bya ba'i rta la sogs pa tha dad pas ba lang ma yin pa las ldog pa'i ngo bo'i sel ba tha dad du grub pa na rnam grangs pa 'di nyid du mi 'gyur ro/ /de ni rang las khyad par med/ /ces bya ba la sogs pas gzhan dag sun 'byin pa yin te/ sel ba de ni rang las khyad par te sna tshogs pa nyid yod pa ma yin te/ med pa ro gcig pa'i phyir ro/ /'di gzhan las yin na yang kun brtag pa nyid du 'gyur gyi/ don dam pa pa ni ma yin no/ /rang las tha dad pa med pa de ni gzhan las srid pa rigs pa ma yin no/ /ci'i phyir rigs pa ma yin zhe na/ gang phyir rten ni zhes bya ba la sogs pa smos te/ 'di ltar 'dren pa ni 'brel pa ste khra bo la sogs pa nang gi yan lag yin na yang sel ba 'di ni ngo bo ste rang bzhin gyis dbye bar mi nus te/ khra bo la sogs pa mang po dag la yang ba lang ma yin pa rnam par gcod pa'i mtshan nyid kyis sel ba gcig 'jug par 'dod pa'i phyir ro/ /de ji ltar phyi rol gyi yan lag tu gyur pa gsal bar bya ba rta la sogs pa dag gi tha dad par 'gyur/ gang zhig nang gi yan lag gis kyang don tha dad par byed pa ma yin pa de phyi rol gyi yan lag gis 'gyur ba ma yin te/ phyi rol gyi yan lag nyams par thal bar 'gyur ba'i phyir ro/ /de lta bas na 'di ni khyad par dang ldan par btags pa yin no zhes bzhad gad du byed pa yin no/ /'o na de lta na nang gi yan lag rten dang 'dres pa tha dad du byed par 'gyur ro zhe na/ de bzhin zhes bya ba la sogs pa smos te/ 'di ni zhes bya ba ni gzhan sel ba'o/ /ci'i phyir mi rigs she na/ 'brel pa can ni zhes bya ba la sogs pa smos te/ de ni rang bzhin med pa'i phyir dngos po med pa gang yin pa 'brel pa can tha dad do zhes bya ba re zhig lta zhog /ji srid du dngos po la yang 'brel ba can tha dad pa tha dad par mi dmigs pa kho na ste/ 'di ltar lha sbyin la sogs pa dngos po gcig yin na yang rim mam cig car gyis sten la sogs pa du ma dang 'brel pa can tha dad pa mi sgrub pa nyid du dmigs so/ /gang zhig gzhan las ldog pa'i dngos po ma yin pa dngos po ma yin pa'i phyir gang du yang ma 'dres pa ste ma 'dres pa dngos po med pa nyid kyis gzhan dag las te rigs mi mthun pa las ldog pa ma yin pa lta smos kyang ci dgos/ de nyid kyi phyir khyad par gyi cha shas ma gtogs pa de de 'dra ba'i 'brel pa can tha dad pas kyang ji ltar tha dad par 'gyur/ gzhan yang 'brel pa can tha dad pas tha dad pa yin du chug mod/ de lta na yang gang zhig tha dad pas de tha dad par rtogs pa spyi dngos por gyur pa khas mi len na khyed cag gi sel ba'i rten 'brel pa can de nyid mi 'grub po zhes bstan pa ni/ 'dra ba nyid du ma grub pa zhes bya ba la sogs pa ste/ gal te ba lang la sogs pa'i dngos por gyur pa'i 'dra ba grub par gyur na de'i tshe 'di dag gi rta la sogs pa sel ba'i rten nyid khyad par med par 'gyur gyi gzhan du ni ma yin no/ /de lta yin dang 'di dag sel ba'i yul can du 'dod na gdon mi za bar 'dra ba khas blang bar bya dgos la/ de nyid spyi dngos por gyur pa sgra'i brjod byar 'gyur ba'i phyir sel ba brtags pa don med pa yin no snyam du bsams pa yin no/ /yul gyi sgra ni 'dir rten rjod par byed pa yin te/ dper na nya yi yul ni chu yin no zhes bya ba lta bu'o / /gang dag gsal bya tha dad du rtog pa de dag ni de yang spyi dngos por gyur pa med par 'grub par mi 'gyur ro zhes bya ba ston pa ni/ gsal bar bya ba'i zhes bya ba la sogs pa ste/ gal te rta la sogs pa thams cad la thun mong pa'i chos gcig po 'ga' zhig rjes su 'gro bar gyur na de'i tshe de dag thams cad la ba lang la sogs pa'i sgra dag gis gsal bar 'gyur gyi gzhan du ni ma yin te/ khyad par yongs su ma shes pa'i phyir ro/ /thun mong pa'i chos khas len na yang sel ba brtags pa don med par 'gyur ro/ /des na ste de'i phyir sel ba mi 'grub po/ /gzhan yang khyed cag gis sgra dang rtags dag gis sel ba rtogs par byed do zhes bya bar 'dod la/ sgra dang rtags de dag spyi dngos por gyur pa med par 'jug par mi rigs te/ de lta bas na gang gis sel ba rtogs par byed ces bya ba 'di ston pa ni/ rjes su 'gro ba dang bral zhes bya ba la sogs pa ste/ rjes su 'gro ba dang bral zhes bya ba ni rjes su 'gro ba med par zhes bya ba'i don to/ / de dag ces bya ba ni sgra dang rtags dag med na sel ba med de rtogs pa zhes bya ba lhag ma'o/ /rang gi mtshan nyid kyis rjes su 'gro ba byas nas sgra dang rtags dag 'jug par 'gyur ro zhe na/ thun mong min la rjes 'gro med/ /ces bya ba smos te/ rang gi mtshan nyid thun mong ma yin pa gzhan la mi brten pa de ji ltar des rjes su 'gro bar 'gyur/ de'i phyir de ltar sel ba brtags pa na sgra dang rtags dag 'jug pa nyid du mi 'gyur ro/ /'jug pa yin du chug mod/ de lta na yang 'di dag la tshad ma nyid du khas len pa nyams par 'gyur ro zhes ston pa ni/ sel ba yang ni zhes bya ba la sogs pa ste/ rtogs par bya ba'i don la ma 'khrul pa yin na sgra dang rtags dag tshad ma nyid du 'gyur ro/ /rtogs par bya ba'i don yang khyod kyis sel ba la 'dod la/ de yang dngos po med pa'i phyir ma grub ste/ rang bzhin med pa nyid yin no/ /de lta bas na sgra dang rtags dang lhan cig spyod pa ste ma 'khrul pa gang du ste yul gang la yin pa smros shig / smras pa/ des cig zhig bya zhe na/ de dag ces bya ba la sogs pa smos te/ de dag ces bya ba ni sgra dang rtags dag go/ /de la zhes bya ba ni lhan cig spyod pa la'o / /tshad ma'i mtshan nyid ni mi slu ba'i phyir ro snyam du bsams pa'o/ /ci ste yang rigs mi mthun pa ma mthong ba tsam gyis sgra dang rtags dag gis lhan cig spyod pa ma bzung bar rang gi don rtogs par 'gyur ro snyam na/ de dag ma mthong ba zhes bya ba smos te/ tsam smos pa ni rjes su 'gro ba mthong ba rnam par bcad pa'i don du'o/ /ci'i phyir mi 'gyur zhe na/ thams cad ni zhes bya ba la sogs pa smos te/ thams cad la ste rigs mthun pa dang / rigs mi mthun pa dang / rang gi don la'o/ /de lta yin dang 'di ni rang gi don no/ /'di ni gzhan gyi don no zhes bya ba de lta bu rtogs pa ste/ shes pa khyad par du mi 'gyur ro/ /rang gi don yang mi rtogs na de la yang ma mthong ba'i phyir gzhan gyi don bzhin zhes bya ba'i tha tshig go/ /la lar rtogs par bya ba zhes 'don pa der ni rtogs par bya ba ste brjod par bya ba'i don khyad par du 'gyur ba ma yin no zhes bya ba'i don to/ /de'i phyir de ltar sgra dang rtags dag gi 'jug pa dang tshad ma khas blangs pa nyams par thal bar 'gyur ba'i phyir sel ba sgra'i don du rigs pa ma yin no/ /gang yang 'dra ba nyid du ma grub po zhes bya ba la sogs pa smos pa de la gzhan gyi len gyi dogs pa bsu ba ni/ 'on te 'dra ba nyid med kyang zhes bya ba la sogs pa ste/ gal te 'dra ba med par khra bo la sogs pa sel ba rtogs par 'gyur na de'i tshe ba lang dang rta yang ci'i phyir rtogs par mi byed de/ khyad par med pa'i phyir ro/ /ba lang dang rta la sogs la yang zhes bya ba 'di'i mtshan nyid brjod pa'i phyir bram zes ba lang dang rta dag gi zhes bshad do/ /khyad par med pa de nyid ston pa ni/ khra bo las zhes bya ba la sogs pa ste/ gang du ba lang min sel 'jug /ces bya ba la/ ji ltar khra bo las mi 'dra ba'i phyir rta la mi 'jug pa de bzhin du ser zal la yang de dang mi mthun pa yod pa'i phyir de la yang 'jug par mi 'gyur ro/ /de bzhin du khra bo la sogs pa la yang sbyar bar bya ste/ thams cad du mi 'dra bar khyad par med pa'i phyir ro/ /gzhan yang ji ltar rang gi mtshan nyid la sogs pa la brda mi srid pa'i phyir sgra'i don du mi rigs pa de bzhin du sel ba la yang ngo zhes bstan pa'i phyir/ ba lang min sel dbang pos kyang / /zhes bya ba la sogs pa smos te/ rang gis nges pa'i don la brda byed pa pos brda byed pa yin te/ gzhan sel ba ni su zhig gis kyang dbang po dag gis nges pa ma yin no/ /dang por te/ tha snyad kyi dus las sngar ming dang ming can 'brel pa'i dus su zhes bya ba'i don to/ /de ni dngos po ma yin pa'i phyir la dbang po rnams ni dngos po'i yul can yin pa'i phyir ro snyam du bsams pa yin no/ /'di snyam du gzhan las ldog pa'i rang gi mtshan nyid dmigs nas sgra sbyor bar byed do snyam du sems na/ gzhan la sgra 'jug ma yin zhes bya ba smos te/ gzhan sel ba las gzhan rang gi mtshan nyid la zhes bya ba'i don to/ /sel ba dngos pos nges pa ma yin mod kyi rjes su dpag par 'gyur ro zhe na/ sngar bstan pa'i zhes bya ba la sogs pa smos te/ de la sngar bstan pa'i rnam pa rjes su 'gro ba dang bral ba'o/ /sgra dang rtags dag 'jug pa ma yin zhes bya ba la sogs pa'o/ /'brel pa nyams su myong ba zhes bya ba la sgra dang lhan cig ces bya ba ni lhag ma'o/ /sngar bstan pa'i mi 'dra ba la sogs pa mi 'thad pa 'ba' zhig tu ma zad ces yang gi sgra bstan to/ /de na ni de'i phyir ro/ /de'i phyir de ltar brda ma byas par yang sel ba yang sgra 'jug par khas blangs pa'i phyir brda ma byas pa'i phyir zhes bya ba'i gtan tshigs 'di ma nges pa nyid du bstan nas/ yang sel ba la brda mi srid par bstan pa'i phyir/ ba lang min pa'i sgras brjod bya/ /zhes bya ba la sogs pa smos te/ ji ltar rta la sogs pa ba lang ma yin pa'i sgra'i brjod par bya ba nyid de/ ba lang gi sgras brjod par bya ba ma yin par/ khyed cag gis rtogs par bya'o zhes bya ba 'di khyed cag gis brjod par 'os so/ /sangs rgyas pas smras pa/ gang du 'brel pa zhes bya ba la sogs pa la 'brel pa nyams su myong ba'i tshe zhes bya ba ni brda rtogs pa'i dus na zhes bya ba'i don to/ /'o na ba lang zhes bya ba la sogs pas pha rol po sun 'byin pa 'chad de/ gal te brda nyams su myong ba'i dus na dmigs pa gang yin de las gzhan du ba lang gi sgra 'jug par mi 'dod pa de'i brda'i yul du byas pa'i khra bo la sogs pa'i ba lang gi gong bu gcig la gzhan gang yin pa ser zal la sogs pa de yang ba lang sel bar 'gyur ro/ /de lta yin dang spyi brjod par bya ba yin no zhes bya ba mi 'grub po/ /phan tshun bsten pa'i skyon du thal bar 'gyur ba zhes bya ba 'di las kyang sel ba la brda bya bar mi nus so zhes bya ba bstan pa'i phyir grub na yang zhes bya ba la sogs pa smos te/ ba lang ma yin pa rnam par bcad nas ba lang rtogs la/ ba lang ma yin pa de yang ba lang bkag pa'i bdag nyid yin no/ /de lta yin dang gang gis ba lang ma yin pa zhes bya ba 'di la ba lang dgag pas 'gegs par 'gyur ba lang ma yin pa zhes bya ba 'di la tshig phyi ma'i don brjod par bya dgos so/ /rang gi ngo bo mi shes pa ni dgag par nus pa ma yin no/ /ci ste yang 'di la ci zhig brjod par bya/ 'di'i ba lang zhes bya ba ni ba lang ma yin pa las ldog pa'i bdag nyid yin no snyam na/ gal te de ni zhes bya ba la sogs pa smos te/ de ni zhes bya ba ni ba lang ngo / /'di ltar ba lang ma yin pa las ldog pa'i rang bzhin yin pa'i phyir ba lang ni ba lang ma yin pa rtogs pa'i sgo nas rtogs pa la/ ba lang ma yin pa yang ba lang dgag pa'i bdag nyid yin pa'i phyir ba lang rtogs pa'i sgo nas rtogs pa'i phyir phan tshun bsten pa gsal bar rab tu 'jug pa yin no/ /ci ste yang ba lang ma yin pa'i sgras ba lang gang yin pa 'gegs pa na ba lang ma yin pa rnam par gcod pa'i mtshan nyid kyi sel ba grub par bya ba'i don du sgrub pa'i ngo bo de nyid sel ba'i don du grub ste/ des na phan tshun bsten par mi 'gyur ro snyam na/ de'i phyir grub mtha' la'ang zhes bya ba la sogs pa smos te/ gal te de lta yin na sgra thams cad sel ba'i don can zhes bya ba de lta bu'i sel ba rtogs pa don med pa yin te/ sgrub pa'i ngo bo don yang yod pa'i phyir ro/ /de lta bas na grub pa'i ngo bo 'ga' zhig sgra'i don du grub par khas blang bar bya dgos te/ de khas mi len na yang phan tshun bsten pa'i nyes pa bzlog par dka'o/ /phan tshun bsten pa'i nyes pa de nyid mjug bsdu ba'i phyir/ ba ma grub na zhes bya ba la sogs pa smos te/ de med ces bya ba ni ba lang ma yin pa med na'o/ /slob dpon phyogs kyi glang pos khyad par dang khyad par can gyi dngos po bsgrub pa'i phyir ut+pal sngon po la sogs pa'i sgra ni don gzhan la ldog pa'i sgra khyad par can brjod do zhes bya ba bshad pa de ni mi rigs so zhes bstan pa'i phyir/ rten dang brten pa zhes bya ba la sogs pa smos te/ gang zhig gang dang lhan cig dngos po pa'i 'brel pa yod pa de ni des khyad par du byas pa yin no zhes bya bar rigs la/ sngon po dang ut+pal dag gi sngon po ma yin pa dang ut+pal ma yin pa rnam par bcad pa'i ngo bo nyid kyis dngos po med pa dag la ni rten dang brten pa la sogs pa'i 'brel pa srid pa ma yin te/ ngo bo med pa'i phyir ro/ /sogs pa smos pas ni ldan pa dang 'du ba dang don gcig la 'du ba la sogs pa'i 'brel pa gzung ngo / /dngos po ba'i 'brel pa med na des khyad par du byas pa rtogs par rigs pa yang ma yin te/ ha cang thal bar 'gyur ba'i phyir ro/ /ci ste yang gang las skyon 'dir 'gyur ba kho bo cag ni sngon po ma yin pa las rtogs pas khyad par can gyi ut+pal la sogs pa rnam par gcod pa ni ma yin no/ /'o na ci zhe na/ sngon po la ma yin pa dang ut+pal ma yin pa dag las ldog pa'i dngos po nyid de ltar rnam par gnas la/ de las don gzhan las ldog pa'i khyad par can brjod do zhes bya ba'i don 'dir 'dod do snyam na/ de'i phyir thun mong min pa'i zhes bya ba la sogs pa smos te rang gi mtshan nyid ni brjod par bya ba ma yin pa'i phyir dang / de dang ldan pa'i phyogs la yod pa'i skyon du thal bar 'gyur ba'i phyir ro snyam du bsams pa yin no/ /thun mong ma yin pa'i dngos po go bar bya ba yin la rag mod/ de lta na yang de gzhan las ldog pas khyad par can nyid du mi 'grub po zhes ston pa ni/ dngos po dang ni zhes bya ba la sogs pa ste/ dngos po ni thun mong ma yin pa'o/ /dngos med ni sel ba'o/ /dngos po dang dngos po med pa dag la 'brel pa rigs pa yang ma yin te/ de'i rten ni dngos po gnyis yin pa'i phyir ro/ /'brel ba yod du chug mod/ de lta na yang sel ba khyad par nyid du mi rigs so zhes ston pa ni/ rang gi ngo bo zhes bya ba la sogs pa'o/ /sngon po la sogs pa yod pa tsam gyis ut+pal la sogs pa'i khyad par du 'gyur ba ni ma yin no/ /'o na ci zhe na/ shes pa yin na ste/ gang zhig rang gi rnam pa'i rjes su byed pa'i blos khyad par can gsal bar byed pa de ni khyad par zhes bya'o/ /sel ba ni rnam pa 'di yod pa yang ma yin no zhes ston pa ni/ rta la sogs pa zhes bya ba la sogs pa'o/ /rta la sogs pa'i blos ni sel ba nges pa ma yin no/ /'o na ci zhe na/ dngos po nyid de/ de ltar yin dang sel ba'i rtogs pa med pa'i phyir blo des rta la sogs pa gsal bar byed pa ma yin no/ /'di snyam du sel ba ma shes na yang khyad par du 'gyur ba yin no snyam du sems na/ 'di la zhes bya ba la sogs pa smos te/ khyad par ma bzung bar ni khyad par can gyi blor 'gyur ba ma yin te/ khyad par mi shes pa gang la yod pa de la de skad ces bya ba'o / /blo la yod pa'i sel ba yin du chug mod/ de lta na yang dngos po la de'i rnam pa'i blo med pa'i phyir de de'i khyad par du rigs pa ma yin no zhes bstan pa'i phyir/ gzhan gyi ngo bo zhes bya ba la sogs pa smos te/ khyad par thams cad ni khyad par can la rang gi rnam pa rjes su byed pa'i blo skyed par byed pa mthong gi /khyad par mi 'dra ba ni khyad par can la mi 'dra ba'i blo skyed par byed pa ma yin no/ /sngon po ni ut+pal dmar po zhes bya ba las/ dbyig pa ni rna cha can zhes bya ba'i blo skyed par byed pa ma yin pa ltar 'di rta la sogs pa la med pa dang rjes su mthun pa'i sgra las byung ba'i blo skye ba ma yin no/ /'o na ci zhe na/ dngos po'i rnam par zhen pa yin no/ /'di snyam du mi 'dra ba'i shes pa skyed par byed pa yang khyad par du brjod do snyam du sems na/ ji ltar zhes bya ba la sogs pa smos te/ mi 'dra ba zhes bya ba ni khyad par dang rjes su mi mthun pa'o/ /gal te yin na skyon ci yod ce na/ ci ste zhes bya ba la sogs smos te/ ci ste gal te khyed cag gi khyad par rjes su mthun pa nyid kyi khyad par can la rnam pa gzhan du gnas na yang khyad par du rtogs pa yin na/ de lta na ni sngon po la sogs pa thams cad thams cad kyi khyad par du 'gyur ro/ /de lta yin dang rnam par mi gnas par 'gyur ro/ /ci ste yang sel bas kyang rang gi blos khyad par du byas pa'i dngos po gsal bar byed pa kho na'o snyam du sems na/ med pas go bya zhes bya ba la sogs pa smos te/ med pa ni sel ba'o/ /med pa des go bar bya ba ni med pas go bya'o/ /med pas go bar bya ba'i rang bzhin rang gi ngo bo khyad par du bya ba'i dngos po gang la yod pa de la de skad ces bya'o/ /gal te med pa'i ngo bos dngos po rtogs par 'gyur na de'i tshe de dngos po nyid du mi 'gyur te/ dngos po dang dngos po med pa dag ni 'gal ba'i phyir ro/ /dkyus ma nyid mjug bsdu ba'i phyir/ de phyir sel bas zhes bya ba smos so/ /'di snyam du gzhan las ldog pa nyid kyi dngos po la sgra dang rtags dag 'jug par mthong gi gzhan sel ba dang bral ba la ni ma yin no/ /des na sgra dang rtags dag gis sel ba bstan par bya ba ma yin no zhes brjod kyi/ med par dgag pa tsam bstan pa las ni ma yin no/ /des na grags pa la sogs pa dang 'gal ba ji skad du bshad pa thams cad du 'gyur ro snyam du dogs pa bsu nas/ gal te sel ba zhes bya ba la sogs pa smos te/ gal te dngos po de gzhan las ldog pa yin pa de lta na yang de la sgra dang rtags las byung ba'i rtogs pa skye ba na gzhan las zlog pa yin na yang dmigs pa ni ma yin no/ /'o na ci zhe na/ dngos po'i cha nyid la mngon par rgyugs pa yin te/ de la rjes su chags pa'i phyir ro/ /dngos po'i cha gang kho na sgra'am rtags las byung ba'i shes pas nges pa de kho na'i yul yin gyi/ yod na yang ma nges pa ni ma yin no/ /me tog ma li ka la sogs pa'i sgra ni dri la sogs pa yod pa nyid kyis kyang brjod bya nyid du rnam par 'jog pa ni ma yin no/ /gang zhig gzhan las ldog pa'i dngos po la sgra dang rtags dag 'jug pa yin no zhes bya ba de yang rigs pa ma yin no zhes ston pa ni/ thun mong ma yin zhes bya ba la sogs pa ste/ gzhan las ldog pa'i dngos po yin na khyed kyi lugs kyis rang gi mtshan nyid thun mong ma yin pa nyid du 'gyur te/ de ni sgra dang rtags las byung ba'i blo la gsal ba yang ma yin no/ /khyed kyi lugs kyis de rtogs pa med pa'i blo gzung bar bya ba yin pa'i phyir dang / sgra dang rtags las byung ba'i blo'i yul yang spyi'i mtshan nyid yin pa'i phyir ro/ /ci ste yang 'di rang gi mtshan nyid kyi yul can du khas len pa de yang rigs pa dang 'brel pa ma yin no zhes bstan pa'i phyir/ rnam rtog med pa pa zhes bya ba la sogs pa smos te/ thun mong ma yin pa'i dngos po ni sgra dang rtags las skyes pa'i shes pa rtogs par bya ba ma yin te/ der rtogs pa thams cad nub pa'i phyir ro/ / 'di ltar rtogs pa ni rigs la sogs pa'i khyad par la reg pa nyid kyis 'jug gi dag pa'i dngos po 'dzin pas ni ma yin no/ /yang ci ste sgras go bar bya ba ma yin pa'i thun mong ma yin pa'i dngos po yang ldog par khyad par can du brjod do snyam na/ sgra'i rtogs bya ma yin zhes bya ba la sogs pa smos te/ rnam pa gzhan gyis kyang spyi dngos po nyid du bsgrub pa'i phyir/ gang tshe zhes bya ba la sogs pa smos te/ gsal ba rnams zhes bya ba ni thun mong ma yin pa'i dngos po rnams te/ brjod bya ma yin pa'i phyir bsal bar bya ba ma yin te/ ma brjod pa ni bsal bar bya bar mi nus pa'i phyir ro/ /de tshe spyi ni bsal bya yin/ /zhes bya ba ni brjod par bya ba yin pa'i phyir ro snyam du bsams pa yin no/ /'di snyam du gal te spyi bsal bar bya ba yin pa de lta na yang ji ltar de dngos po nyid du 'grub par 'gyur snyam du sems na/ de'i phyir/ med pa rnams ni bsal bya min/ /zhes bya ba la sogs pa smos te/ med pa rnams zhes bya ba ni gzhan sel ba rnams so/ /gal te yin na dngos po nyid du 'gyur ro/ /'di la 'thad pa smras pa/ med pa'i med pa spangs phyir ro/ /zhes bya ba la/ med pa rnams kyi med pa'i ngo bo der ba'i phyir ro zhes bya ba'i don to/ / 'di skad du bstan pa yin te/ gal te sel ba rnams bsal bar bya ba nyid du 'gyur na/ de'i tshe 'di dag gi med pa'i ngo bo bkag pa nyid du 'gyur ro/ /de bkag pa yin na yang med pas med pa'i ngo bo nyid dor bar 'gyur ro/ /de lta bas na sel ba'i mtshan nyid kyi med pa nyid kyi ngo bo do yang dor ba'i phyir dngos po nyid du 'gyur ro zhes kha cig zer ro/ /gzhan dag na re / med pa'i med pa spangs phyir ro/ /zhes bya ba ni med pa rnams kyi med pa'i phyir ro/ /med pa'i rang bzhin gyi sel ba ni bsal bar bya ba mi rigs te/ dgag pa ni dngos po'i yul can yin pa'i phyir ro zhes bya ba'i tha tshig go/ / de lta bas na sel ba gzhan la ste/ rta la sogs pa la sel ba gzhan ba lang la sogs pa'i sel ba bsal ba ste gsal po yin te/ spyir gyur pa nyid do zhes nges pa yin no/ /de'i phyir spyi'i dngos po nyid du grub ste bsal bar bya ba yin pa'i phyir ro/ /gzhan yang gzhan sel ba rnams phan tshun mi 'dra ba'am 'dra ba yin grang / de la re zhig phyogs dang po la nyes pa bshad pa ni med pa'i zhes bya ba la sogs pa ste/ med pa ste ba lang ma yin pa'i sgra'i brjod par bya ba'i med pa gang yin la ni ba lang gi sgra'i brjod par bya ba'i don to / /gal te sngar bshad pa'i med pa de las mi 'dra ba ste/ gzhan zhes bya ba'i don to/ /de'i tshe dngos po nyid du 'gyur te/ dngos po ni dngos po med pa ldog pa tsam gyi ngo bo yin pa'i phyir ro/ /gal te mi 'dra ba ma yin na de'i tshe khyed cag la ba lang yang ba lang ma yin par thal bar 'gyur te/ de dang mi 'dra ba ni de'i bdag nyid du rtogs pa ma yin no/ /'di snyam du ba lang dang rta la sogs pa'i sgra dag gi rang gi mtshan nyid phan tshun ldog pa yin gyi sel ba gzhan ni med do/ /des na bsal bar bya ba nyid yin pas de dag dngos po nyid du thal bar 'gyur ba ni mi 'dod pa ma yin no snyam du bsams na/ de'i phyir gal te yang zhes bya ba la sogs pa smos te/ gal te yang yod pa'i sgra las gzhan pa ba lang la sogs pa'i sgra la dngos su ri la sogs pa bsal bar bya ba grub kyi yod pa'i sgra ni med par brjod pa'i bsal bar bya ba las gzhan ba'i bsal bar bya ba yod pa ma yin no/ /med pa kho na bsal bar bya ba ma yin no zhes bya ba'i don to/ /yod pa'i sgra ni med pa rnam par bcad nas 'jug pa'i phyir ro/ /de las skyon cir 'gyur zhe na/ de la med pa'i zhes bya ba la sogs pa smos te/ snga ma bzhin du med pa'i med pa spangs pa'i phyir med pa'i sel ba dngos po nyid du 'gyur ro/ /de lta yin dang sel ba smra ba rnams kyis med pa yang dngos po nyid du thal bar 'gyur ba zhes bya ba'i khas blangs pa dang 'gal bas kye ma dka' ba chen por lhung ba yin no/ /med pa yang yin la dngos po nyid kyang yin la rag mod ce na/ de ma grub na zhes bya ba la sogs pa smos te/ med pa de ma grub na dngos po 'ga' zhig gi yang yod pa 'grub par mi 'gyur te/ khyed cag gi lugs kyis de'i mtshan nyid med pa rnam par bcad nas gnas pa'i phyir ro/ /dngos po med pa de bsal bar bya ba nyid yin na dngos po nyid du thal bar 'gyur bas rang gi ngo bo ma grub pa'i phyir med pa yang mi grub ste/ de ni med pa rnam par gcod pa'i ngo bo yin pa'i phyir dang / yod pa yang ji skad du bshad pas mi rung ba'i phyir ro/ /bsal bya phyi rol gnas pa yis/ /de ni 'byed ces bya ba la sogs pa sngar smras pa gang yin pa dang / gang yang / sel ba rnams kyi tha dad pa/ /yod min dngos po min phyir ro/ /zhes bya ba la sogs pa smras pa de la sangs rgyas pa kha cig gis lan smras pa/ bsal bar bya ba tha dad pa'i rten tha dad pas sel ba rnams tha dad pa ni ma yin gyi/ 'on kyang thog ma med pa'i dus nas 'jug pa sna tshogs pa don ji lta ba bzhin ma yin pa'i rnam par rtog pa'i bag chags kyi khyad par gyi rjes su 'gro bas de kho na nyid du yul med na yung yul tha dad pa lta bur dmigs pa'i shes pa dag gis phyi rol gyi don tha dad pa dag la tha dad pa lta bu dang don gyi bdag nyid lta bu'i rang bzhin med pa'i sel ba sgro 'dogs par byed de/ de dag kyang de dag gis de ltar sgro btags pa'i tha dad pa dang yod par snang la/ des na sel ba rnams bag chags tha dad pas tha dad pa dang yod pa'i ngo bor 'gyur ro zhes bya ba 'di la yod pa'i ngo bo'am zhes bya ba la sogs pa smos te/ 'di snyam du dngos po med pa la ni bag chags zhes bya ba yod pa min no snyam du sems te/ yul med pa'i shes pa ni 'ga' yang yod pa ma yin no zhes bya ba 'di ni rnam par shes pa smra ba dpyad par gtan la phab zin to/ /de lta yin dang don ji lta ba bzhin ma yin pa'i rnam par rtog pa rnams mi rung ba'i phyir des bsgom pa'i bag chags su yang ga las 'gyur/ med la zhes bya ba ni dmigs par 'gyur ba'i dngos po med pa la ste/ yul med pa'i shes pa mi rung bas bag chags 'jog par byed pa'i rnam par shes pa med pa'i phyir bag chags ga la yod ces bya ba'i don to/ /de lta yin dang bag chags med pa'i phyir bag chags kyis byas pa'i sel ba rnams kyi tha dad pa'am yod pa'i ngo bor ga las 'gyur zhes bya bar dgongs pa'o/ /de ltar re zhig brjod par bya bar mngon par 'dod pa'i sel ba bsal nas rjod par byed par mngon par 'dod pa yang bsal bar bya ba'i phyir/ /khyed kyi zhes bya ba la sogs pa smos te/ sgra dag gi tha dad pa spyi brjod pa dang khyad par brjod pa phan tshun du tha dad pa ni sgra'i dbye ba'o/ /de'i rgyu mtshan can zhes bya ba ni bag chags tha dad pa'am brjod par bya ba [(]sal [,]sel [)]ba tha dad pa'i rgyu mtshan can de rgyu 'di la yod pas de'i rgyu mtshan can no/ /'on te sgra rnams kyi rgyu tha dad pa'i phyir dang / 'gal ba'i chos dang ldan pa'i phyir tha dad du mngon sum nyid kyis grub pa yin na zhe na/ thun mong min sgra zhes bya ba la sogs pa smos te/ rjod par byed pa'i sgra'i dbang du byas nas 'di brjod de/ gang zhig rna ba'i rnam par shes pas gzung bar bya ba'i rang gi mtshan nyid thun mong ma yin pa'i sgra ni rjod par byed pa ma yin no/ /ci'i phyir zhe na/ sngar ma mthong ba'i phyir ra zhas bya ba smos te/ tha snyad kyi dus su gnas pa'i sgra gang yin pa de ni tha snyad kyi dus su sngar brda'i dus su ma mthong la/ ma mthong ba gang yin pa de ni 'gags nas yun ring du lon pa'i phyir ro/ /des na tha snyad du byed pa ma yin la/ brda'i dus na ma mthong ba gang yin pa des tha snyad du byed pa rigs pa yang ma yin to / ha cang thal bar 'gyur ba'i phyir ro/ /de lta bas na rang gi mtshan nyid rjod par byed pa nyid ma yin te/ 'di la ni khyed cag dang yang rtsod pa yod pa ma yin no/ /ji skad du/ don dang sgra yi khyad par ni/ /brjod bya rjod byed nyid mi 'dod/ /de ni snga rol ma mthong phyir/ /spyi nyid nye bar bstan pa yin/ /zhes bshad do/ /de lta bas na rjod par byed pa'i sgra'i dbang du byas nas brjod pa'i phyir skyon med do/ /de la de ltar gnas pa la ji ltar don gzhan [(]sal [,]sel [)]ba'i don gyi spyi yin pa bzhin du gal te sgra gzhan sel ba sgra'i don spyi yin pa de'i tshe/ 'dres dang gcig nyid sna tshogs kyi/ /zhes bya ba la sogs pa sngar bshad pa'i tshul gyis brjod bya'i sel ba bzhin du sgra'i sel ba yang phan tshun tha dad pa grub pa ma yin te/ ngo bo med pa'i phyir ro/ /ji ltar rjod par byed pa rnams phan tshun tha dad pa mi 'thad pa de bzhin du brjod par bya ba dang rjod par byed pa phan tshun gcig la gcig tha dad du mi 'thad de/ rang bzhin med pa'i phyir ro/ /'di snyam du bsal bar bya ba tha dad pas tha dad par 'gyur ro snyam du sems na/ bsal bar bya ba tha dad pa zhes bya ba la sogs pa smos te/ ji ltar bsal bar bya ba tha dad pas kyang tha dad du mi 'thad pa de ltar ni/ de ni rang las khyad par med/ /ces bya ba la sogs pas bstan zin to/ /de'i phyir de ltar dam bca' ba la grags pa dang khas blangs pas gnod par bstan pa yin no/ /da ni brjod par bya ba dang rjod par byed pa med pas thal bar 'gyur bas khas blangs pas gnod pa la sogs pa'i skyon bstan par 'dod nas tshad ma dgod pa'i phyir/ khyed kyi phyogs la zhes bya ba la sogs pa smos te/ gang dag dngos po med pa de dag la ni go bar bya dang go bar byad pa ma yin te/ nam mkha'i me tog dang ri bong gi rwa bzhin no/ /khyed cag gi brjod par bya ba dang rjod par byed pa'i sel ba yang dngos po med pa yin no zhes bya ba ni khyad par byed pa 'gal ba dmigs pa'o/ /'on te sprin med pa las char ba med par rtogs pas gtan tshigs ma nges pa ma yin nam zhe na/ gal te char dang sprin med pa zhes bya ba la sogs pa smos te/ char dang sprin dag med pa ni yod pa ma yin pa ste / med pa zhes bya ba'i tha tshig go/ /bstan pa ni dngos po gtso bo yin pa'i phyir ro/ /char 'bab pa dang sprin med pa de dag mthong na ste/ go bya go byed ces bya ba'i dbang du byas pa'o/ /gal te sangs rgyas pa dngos po med pa'i phyir zhes bya ba'i gtan tshigs ma nges so zhes smra ba de yang rigs pa ma yin te/ 'di ltar de dag gis dben pa'i nam mkha' dang snang ba'i bdag nyid kyi dngos po 'dor nged kyi phyogs la char 'bab pa dang sprin med pa'i sbyor ba la yang yod pa nyid de/ med pa ni dngos po nyid du bsgrubs zin pa'i phyir ro/ /khyed cag sangs rgyas pa'i phyogs la 'di lta ste/ char 'bab pa dang sprin med pa dag go bar bya ba dang go bar byed pa ga las te ma yin pa nyid do/ /'ang gi sgra ni rim pa gzhan du 'di zhes bya ba'i mjug tu 'brel par bya'o/ /des na don 'dir 'gyur te/ khyed cag gi rtsod pa gzhir 'gyur ba'i sel ba dag go bar bya ba dang go bar byed pa nyid du mi rigs pa 'ba' zhig tu ma zad/ char mi 'bab pa dang sgrin med pa 'di dag kyang go bar bya ba dang go bar byed pa nyid du mi rigs pa kho na'o zhes bya ba min no / /gzhan yang khyed cag gi gang zhig rjes su 'gro ba gtso bo ma yin zhing ldog pa gtso che ba'i sgra dang rtags dag rang gi yul rtogs par byed pa nyid du smra ste/ gang yang / ma mthong gzhan gyi sgra don la/ /rang don cha yang mthong ba'i phyir/ /sgra yi 'brel pa nges pa'i phyir/ /'khrul pa yod pa'ang ma yin no/ /zhes bya ba la sogs pa smras pa de gzhan sel ba khas len na mi rigs so zhes bya ba 'di bsgrub pa'i phyir/ gang gis bsgrub pa'i zhes bya ba la sogs pa smos te/ de sngon 'gro zhes bya ba ni sgrub pa sngon du 'gro ba'o/ /ldog pa ni sgrub pa las ldog pa'i mtshan nyid yin pa'i phyir ro snyam du bsams pa yin no/ /gzhan yang sel ba smra ba rnams kyi ut+pal sngon po la sogs pa'i sgra dag gi khyad par dang / khyad par can gyi dngos po dang gzhi mthun pa'i 'jig rten na grags pa gang yin pa de la bsnyon par 'gyur ro/ /de yang 'di skad du khyad par can dang gzhi mthun pa bsgrub pa'i phyir/ gsal bya'i dbye bas phye ba'i don/ /rang don tha dad rtogs la blun/ /gcig phyir 'bras bu tha dad phyir/ /khyad par khyad par can dag gi / de tsam zhig ni 'dod pa'i phyir/ /rang spyis tha dad spangs pa yin/ /the tshom za phyir mi 'dzin pa/ /de dag mtshungs pas don gcig nyid/ /ces brjod pa ni de mi 'thad do zhes bstan pa'i phyir/ gal te gzhan sel ba tsam zhig ces bya ba la sogs pa smos te/ sngar don dag gi khyad par dang khyad par can gyi dngos po bkag nas/ da ni sgra dag gi yang 'gegs pa'i phyir zlog pa ma yin no/ /de la phan tshun rnam par gcad par bya ba dang gcod par byed pa'i dngos po ni khyad par dang khyad par can gyi dngos po yin no/ /de yang dper na ut+pal sngon po zhes bya ba lta bu'i ngag nyid la rnam par gzhag la/ de bzhin du gzhi tha dad pa la yang yin te/ dper na rgyal po'i skyes bu zhes bya ba la sogs pa lta bu'o/ /'dug pa'i rgyu mtshan tha dad pa'i sgra dag don gcig la 'jug pa ni gzhi mthun pa'o/ /de yang ut+pal sngon po la sogs pa lta bur bsdu ba nyid la 'jog go/ /de la tshogs pa'i don brjod pa'i ut+pal sngon po la sogs pa'i sgra dag la de'i gzhi mthun pa gang yin pa de nyid mi 'grub ste/ tshogs pa'i don ni sna tshogs pa'o/ /ji skad du/ tshogs pa brjod par bya ba'i phyir/ /de ni sngon po 'ba' zhig min/ /ut+pal gcig pu'ang ma yin te/ /zhes bshad pa lta bu'o/ /ci'i phyir 'grub par mi 'gyur zhe na/ sngon po min pa zhes bya ba la sogs pa smos te/ gang gi phyir sngon po ma yin pa nyid bkag pa na ut+pal ma yin pa bkag pa ma yin la/ de la ut+pal ma yin pa bkag pa na cig shos sngon po ma yin pa bkag pa yang ma yin no/ /la lar cig shos ma zhes mo rtags su 'don pa de ni gsal ba'i sgra la ltos par blta bar bya ste/ cig shos sngon po ma yin pa bkag pa min zhes bya ba'i don to/ /'di dag la phan tshun rten dang brten pa'i 'brel pa yang yod pa ma yin te/ ngo bo med pa'i phyir zhes bya ba'i tha tshig go/ /'brel pa med par yang khyad par dang khyad par can gyi dngos po rigs pa ma yin te/ ha cang thal bar 'gyur pa'i phyir ro zhes bstan zin to/ /'di ni khyed kyi lugs kyi sgra rnams tshogs pa'i don brjod pa nyid ma yin te/ thams cad kyang med pa rjod par byed pa'i phyir ro zhes bstan par 'gyur ro/ /de lta bas na khyad par dang khyad par can gyi dngos po rigs pa ma yin no/ /'di snyam du don dag khyad par dang khyad par can gyi dngos por ma gyur mod/ de rjod par byed pa'i sgra'i sgra dag ci'i phyir mi 'gyur snyam du sems na/ brjod par bya la zhes bya ba la sogs pa smos te/ brjod par bya ba'i sgo nas de rjod par byed pa'i sgra dag gi khyad par dang khyad par can gyi dngos por btags pa yin gyi/ de'i bya ba med na rjod par byed pa yang ga las yin/ gzhi mthun pa sun dbyung ba'i phyir bshad pa/ tha dad phyir zhes bya ba la sogs pa smos te/ don gcig la 'jug pa yin na gzhi mthun par 'gyur gyi/ ut+pal dang sngon po'i sgra dag ni don gcig la 'jug pa srid pa ma yin te/ de'i brjod par bya ba ut+pal ma yin pa dang sngon po ma yin pa rnam par gcod pa'i mtshan nyid kyis sel ba dag ni tha dad pa'i phyir ro/ /'di ltar khyed cag nyid kyis na / /gsal bya'i dbye bas tha dad don/ /zhes bshad do/ /sbyor ba ni sngon po dang ut+pal la sogs pa'i sgra dag ni gzhi mthun pa'i tha snyad kyi yul can ma yin te/ yul tha dad pa'i phyir bum pa dang snam bu la sogs pa'i sgra bzhin no/ /ci ste yang don gang kho na la ut+pal ma yin pa rnam par gcod par 'jug pa kho na la sngon po ma yin pa rnam par gcod pa yang gnas pas de'i phyir sngon po dang ut+pala'i sgra'i brjod par bya ba'i sel ba dag don gcig la 'jug pa'i phyir sgra dag kyang don gyi sgo can gzhi mthun par bstan par bya'o snyam na/ de'i phyir gal te don las zhes bya ba la sogs pa smos te/ de zhes bya ba ni gzhi mthun pa'o/ /de dag ces bya ba ni sngon po ma yin pa dang ut+pal ma yin pa bkag pa dag go/ /de dag gi rten dang brten pa dngos po ba ni 'ga' yang yod pa ma yin te/ ngo bo med pa la gang du yang rten mi srid pa'i phyir mo gsham gyi bu bzhin no/ /gzhan yang ut+pal sngon po la sogs pa dag la de dag rten dang brten pa yin pa de lta na yang de yod na yang sgra dag gis bstan par bya ba ma yin no zhes ston pa ni/ thun mong min dngos zhes bya ba la sogs pa smos te/ gang gi phyir re zhig ut+pal sngon po la sogs pa'i dngos po de nyid sgras go bar bya ba ma yin te/ der rnam par rtog pa thams cad nub pa'i phyir zhes bstan zin to/ /de lta yin dang rten du gyur pa'i dngos po de la shes par de'i rten gyi sel ba dag de'i don nyid du ji ltar gzung bar nus/ chos 'dzin pa ni chos can 'dzin pa med pa na 'byung ba yin pa'i phyir ro snyam du bsams pa yin no/ /yang ci ste thun mong ma yin pa las ldog pa de dag las gzhan pa'i rten nyid yod de / des na skyon 'dir mi 'gyur ro snyam na/ khyed la gzhan yang zhes bya ba la sogs pa smos te/ khyed la zhes bya ba ni khyed cag gi'o/ /'di snyam du gal te don gcig la rtog pa de na yang dngos po gnas pas gnas pa yin no snyam na/ go bya min pa zhes bya ba la sogs pa smos te/ don gcig ces bya ba ni gzhi mthun pa nyid la'o/ /gang du nye bar mkho zhes bya ba ni gang du yang ma yin no zhes bya ba'i don te / yod na yang mi shes pa ni sgra'i tha snyad la yan lag ma yin pa'i phyir ro/ /ci ste yang gal te ldog pa tsam sgras brjod pa de'i tshe skyon 'dir 'gyur te/ gang gi phyir ldog pa dang ldan pa'i dngos po brjod bya yin te/ de'i phyir ldog pa gnyis kyi khyad par dang ldan pa'i sgra dag sel ba dang ldan pa'i dngos po gcig la 'jug pa'i phyir gzhi mthun pa nyid yod pa kho na'o snyam na de'i phyir/ ci ste yang zhes bya ba la sogs pa smos te/ de la yang zhes bya ba ni sel ba dang ldan pa'i dngos po brjod bya nyid du khas len na sngon po la sogs pa tha dad pa dag dang ut+pal la sogs pa dag gi sngon po la sogs pa'i sgra dag gis khyad par de 'phen pa rnyed par dka'o/ /ci'i phyir zhe na/ sngon po la sogs pa'i sgra ni gzhan dbang yin pa'i phyir ro/ /de ni bzlog pa nye bar mtshon pa'i phyir de dang ldan pa'i don brjod pa yin gyi/ dngos su ni ma yin no/ /des na dngos su ma brjod pa'i phyir de la yod pa'i khyad par 'phen pa yod pa ma yin te/ mngar ba'i sgras dkar ba la sogs pa bzhin no/ /gal te yang dkar po la sogs pa la mngar ba la sogs pa'i khyad par gnas pa yod pa de lta na yang sgras dngos su brjod pa'i don la yod pa'i khyad par 'phen par nus kyi/ gzhan gyi dbang la don la yod pa ma brjod pa ni ma yin no snyam du bsams pa'o/ /de lta yin dang sngon po la sogs pa'i sgras de la yod pa'i khyad par mi spong ba'i phyir ut+pal la sogs pa rnams la de'i khyad par nyid yod pa ma yin no/ /de'i khyad par nyid ma yin na gzhi mthun pa nyid du mi 'gyur te/ de ni rigs dang ldan pa tsam gyi phyogs la/ sgra yis de ldan rjod byed min/ /rang dbang can gyi yin pa'i phyir/ /zhes khyed kyis skyon brjod pa gang yin pa de ldog pa dang ldan pa tsam gyi phyogs la yang mtshungs so zhes bstan pa yin no/ /'di ltar rigs dang ldan pa tsam gyi sgra'i don la rigs kyi rang gi ngo bo nye bar mtshon pa'i rdzas brjod kyi dngos su ni ma yin pa'i phyir de la yod pa'i bum pa la sogs pa'i khyad par mi 'phen pa'i phyir de'i khyad par nyid ma yin pa na gzhi mthun pa med par thar bar 'gyur ba smras pa de ni ldog pa dang ldan pa tsam gyi phyogs la yang mtshungs so/ /de la yang yod pa'i sgras ldog par nye bar mtshan pa'i rdzas brjod kyi/ dngos su ni ma yin pa'i phyir de la yod pa'i tha dad pa mi 'phen pa'i 'di la yang mtshungs pa kho na ste/ 'dir rigs dang ldan pa dang ldog pa dang ldan pa dag la khyad par ci zhig yod/ skyon gzhan smas pa ni/ rtags dang zhes bya ba la sogs pa smos te/ rtags ni pho dang / mo dang / ma ning dag go/ /grangs ni gcig dang / gnyis dang / mang po nyid la sogs pa'o/ /sogs pa'i sgras ni bya ba dang dus la sogs pa'i 'brel pa gzung ngo / /sel ba ni dngos po ma yin pa'i phyir 'di dag dang 'brel pa med la/ rtags la sogs pas dben pa'i dngos po ni sgras brjod par bya ba ma yin te/ de'i phyir dam bca' ba la grags pas gnod par thal bar 'gyur ro snyam du bsams pa yin no/ /ci ste yang gsal ba ldog pa'i rten du gyur pa dngos po yin pa'i phyir rtags la sogs pa dang 'brel pa yod la/ de'i phyir de'i sgo nas sel ba la yang rnam par gzhag go snyam na/ gsal ba yang zhes bya ba la sogs pa smos te/ bsal ba de ni rtogs pa med pa'i phyir rtags dang grangs la sogs pa dang 'brel pas bstan par mi nus te/ de'i phyir ji ltar sel ba de'i sgo nas de rnam par gzhag pa grub par 'gyur/ sel ba sgra'i don du rnam par gzhag pa ma khyab par bstan pa'i phyir/ kun bshad dag la zhes bya ba la sogs pa smos te/ kun bshad dag ste ti ngan nye 'tshed do/ /'gro'o zhes bya ba la sogs pa bya ba gtso bo'i sgra dag la gzhan sel ba yod pa ma yin no/ /ci'i phyir zhe na/ de la ma yin par dgag pa'i zhes bya ba la sogs pa smos te/ dper na su pa'i mtha' can bum pa la sogs pa'i sgra dag la bum pa ma yin pa la sogs pa grub pa'i ngo bo ma yin pa dgag par bya ba yod pa de bzhin du 'tshed pa la sogs pa dgag par bya ba yod pa ma yin te/ grub pa 'ga' zhig kyang yod pa ma yin pa'i phyir ro/ /'di snyam du mi 'tshed pa ma yin zhes bya ba de lta bu la sogs pa dag la ma yin par dgag pa'i ngo bo dgag par bya ba yod par ma gyur mod/ 'tshed do zhes bya ba la sogs pa'i med par dgag pa'i dgag par bya ba yod par 'gyur ro snyam du sems na/ min pa min zhes bya ba la sogs pa smos te/ blo bskyed par bya ba yin pa'i phyir mi 'tshed pa ma yin no zhes bya ba de lta bu brjod na yang med par dgag pa'i dgag pa nyid brjod par 'gyur ro/ /de las skyon cir 'gyur zhe na/ 'tshed do zhes bya'i dgag med pa/ /zhes bya ba la sogs pa smos te/ dgag pa gnyis kyi yul sgrub pa yin pa'i phyir 'tshed do zhes bya ba ni rang gi ngo bo nyid kyis rig par bya ba'i ngo bor gnas pa'i phyir sgrub pa nyid sgra'i don du 'gyur ro/ /gzhan yang 'dir 'tshed do zhes bya ba la sogs par bya ba gang zhig yan lag kha cig grub la yan lag kha cig ma grub pa de ni snga ma dang phyi mar gyur pa'i yan lag gi bya ba bsgrub bya nyid du shes pa'i yul yin pa ni bsgrub bya nyid du rtogs la/ /de bzhin du 'byung ba dang 'byung bar 'gyur ba la sogs pa la byung ba la sogs pa'i dus kyi khyad par rtogs pa yod kyi sel ba ni bsgrub bya nyid la sogs pa'i dus kyi khyad par rtogs pa srid pa ma yin te/ med par ro gcig pa nyid kyis grub zin pa'i phyir ro/ /de lta bas na sel ba sgra'i don yin pa'i phyogs la bsgrub bya nyid du shes pa dang / byung ba la sogs pa shes pa ni rgyu mtshan med par 'gyur ro zhes bya ba ni gnod pa'o/ /byung sogs ngo bo zhes bya ba ni byung ba la sogs pa nges pa 'dzin pa'i shes pa zhes bya ba'i tha tshig go/ /yang ma khyab pa nyid du bstan pa'i phyir grags pas gnod pa nyid ston pa ni/ sgrub pa la sogs pa zhes bya ba la sogs pa ste/ sogs pa smos pas mgron du bos pa dang / bod pa la sogs pa gzung ngo / /'di la gzhan sel ba'i gzhan rnam par gcod pa des par byed pa yod kyi/ de la ma yin par dgag pa'i ngo bo'i dgag par bya ba yod pa ma yin pa'i phyir zhes bya ba sngar bshad pa 'di nyid 'dir rgyu yin no snyam du bsams pa yin no/ lha sbyin mi 'tshed pa ma yin no zhes bya ba la sogs pa la dgag pa'i thog tu 'gag pa sbyor na sel ba ci 'dra 'gyur ba yin zhe na/ ci yang ma yin te/ dgag pa gnyis kyis sgrub pa nyid la reg pa'i phyir ro/ /gzhan yang dang la sogs pa tshig gi phrad dang nye bar bsgyur ba dang las brjod pa la sogs pa rnams tshig tu 'dod la/ yod pa rjod par byed pa ma yin pa'i phyir 'di dgag pa dang 'brel pa yang ma yin te/ 'di ltar ji ltar bum pa la sogs pa'i sgra rnams bum pa ma yin pa zhes bya ba la sogs pa'i dgag pa dang 'brel pa yin na don gzhan bum pa la sogs pa yongs su gzung ba'i phyir rnam par bcad pas dgag pa dang bral ba'i bum pa'i sgra'i don du rtog pa de ltar dang la sogs pa dang ma yin pa la sogs pa'i dgag pa dang 'brel pa yod pa ma yin pa la/ dgag pa dang ma 'brel ba yang sel bar rigs pa ma yin no/ /de'i phyir dang la sogs pa sel ba yod pa ma yin te/ sel ba med do zhes bya ba'i don to/ /gzhan yang ngag gi don khra bo'i dngos po ni khra bo'i glang du 'dod de/ de'i phyir de la gzhan las ldog par bstan par mi nus te/ grub pa'i ngo bo'i dgag pa ma rtogs pa'i phyir ro/ /gang yang nag pa ba lang khrid de shog cig ces bya ba la sogs pa la nag pa ma yin pa la sogs pa rnam par gcod pa'i ngo bo gzhan ldog pa'i yan lag yongs su 'dzin pas brjod pa de ni tshig gi don du 'gyur gyi ngag gi don ni ma yin no/ /yan lag ma yin pa de ni da ltar rnam par dbye bar mi nus pa'i phyir de la sgra'i don ma khyab par rnam par gnas so/ /gzhan yang gzhan sel ba ma yin gzhan sel ba yin zhes bya ba la sogs pa sgra la sgrub pa'i ngo bo las gzhan pa'i brjod par bya ba mthong ba ma yin te/ ma dmigs so zhes bya ba'i don to/ /'di ltar sel ba'i ngo bo tsam brjod bya nyid du mi rtogs te/ dgag pa gnyis kyis sgrub pa nyid nges pa'i phyir ro/ /sogs pa'i sgras gzhan las ldog pa dang gzhan rnam par gcod pa zhes bya ba'i rnam grangs dang gzung ngo / /'on te dgag pa yang dgag pa dang ldan zhes bya ba 'di nyid kyi go ba'i phyir 'di zlog pa ma yin nam zhe na/ 'di ni bden mod kyi/ 'on kyang gzhan sel ba sgra'i don yin no zhes bya ba de lta bu la sogs pa smra ba'i rang gi nyid kyis sgrub par 'dod do zhes shes par bya ba'i don du yang brjod do/ /'di ltar sel ba'i sgra ni sgra'i don gzhan sel ba ma yin pa rnam par gcad par bya ba yin la/ de yang sgrub pa las gzhan du mi mngon no/ /gang dag gzhal bya dang shes bya dang brjod bya la sogs pa'i sgra de dag la bsal bar bya ba yod pa ma yin te/ thams cad gzhal bya la sogs pa'i rang bzhin yin pa'i phyir ro/ /'di ltar gang yang 'di dag la rnam par gcad par bya ba cung zad cig rtogs par byed de/ thams cad rnam par gcad par bya ba'i rnam pas dmigs par bya ba yin pa na shes bya la sogs pa'i rang bzhin nyid du gnas te/ yul du ma byas pa ni rnam par gcad par bya ba mi nus pa'i phyir ro/ /de lta yin dang 'di dag la bsal bar bya ba med pa'i phyir sgra'i don ma khyab pa nyid du rnam par gnas so/ /'on te rgyu'i sgro nas bstan pa'i shes bya ma yin pa gang zhig brtag par byas nas de rnam par bcad nas shes bya nyid du rjes su dpog pa'i phyir de ji ltar sgra'i don ma khyab pa nyid du rnam par gnas she na/ bsal bar bya ba rtogs na zhes bya ba la sogs pa smos te/ gal te shes bya nyid yin na yang bsal bar bya ba shes bya ma yin pa nyid du yang yang dag par rtogs par byed pa de'i tshe dngos po nyid de 'jig rten gyis nges pa gang yin pa'i sgrub pa nyid sgra'i don du rtog pa mchog yin no/ /de lta na ni ma mthong ba sgro 'dogs pa dang mthong ba'i don la bsnyon par bya bar mi 'gyur ro snyam du bsams pa'o/ /de nyid kyi phyir mchog ces bshad do/ / gang dag sgra thams cad kyi don ni rnam par rtog pa'i gzugs brnyan nyid yin la/ de nyid kyang brjod par bya ba dang rnam par gcad par bya ba dang rtogs par byed pa yin no zhes zer ba de dag la shes pa'i rnam pa bkag pa'i phyir zhes bya ba la sogs pa 'di smos te/ blo ni rnam pa med pa yin la phyi rol gyi ni don ni rnam pa dang ldan pa yin no/ /de phyi rol gyi yul la 'brel pa gsal por dmigs so zhes bya ba de lta bu kho bo cag gis shes pa'i rnam pa bkag pa de'i phyi nang gi blo la yod pa'i rnam pa ni med pa'i phyir de rjod par byed pa nyid kyi sgra dag kyang rigs pa ma yin la/ med pa nyid kyi phyir nang gi don de bsal bar bya ba nyid du rigs pa yang ma yin no/ /de la zhes bya ba ni gzhal bya la sogs pa'i sgra dag la'o/ /gang yang de lta bu dang zhes bya ba la sogs pa'i sgra de dag la yang bsal bar bya ba cung zad kyang ma dmigs te/ kha cig gi sbyor ba ni ma yin par dgag pa'i ngo bo med pa'i phyir ro/ /ci ste yang de lta bu ma yin no zhes bya ba la sogs pa med par dgag pa'i ngo bo'i dgag par 'gyur ro snyam du sems na/ 'dir 'di ni rigs pa ma yin te/ 'di ltar 'di la yang de ltar min zhes bstan na/ dgag pa 'gegs par byed pa ste/ de ltar zhes bya ba ma bkag na/ rang gi ngo bo nyid kyis gnas/ /zhes bya ba sngar bshad pa'i tshul de nyid 'jug pa yin no/ /'di thams cad ku mA ra ri las bshad pa nye bar bkod pa yin no/ /da ni thams cad sgra'i zhes bya ba la sogs pa ni 'od byed pas smras pa'i sel ba sun 'byin pa'i dogs pa bsu ba yin te/ des smras ba sel ba'i sgra'i don zhes bya ba 'di ni rigs pa yin te/ khyad par byed pa ma yin pa'i phyir ro/ /gang du phung po gnyis yod pa der gcig bkag pas cig shos rtogs pa yin te/ ji ltar ba lang ba lang ma yin zhes bya ba'i tshig la ba lang rtogs pa na ba lang ma yin pa bkag pa yin pa / thams cad kyi tshig la ni 'di yod pa ma yin te/ gang zhig thams cad kyi sgras bzlog par bya ba ma yin pa zhes bya ba 'ga' yang yod pa ma yin no/ /ci ste 'di snyam du gcig la sogs pa thams cad ma yin pa de thams cad kyi sgras zlog par byed do snyam du sems na de ni ma yin te/ rang gi don la skur ba btab pa'i skyon du thal bar 'gyur ba'i phyir ro/ /de lta na thams cad kyi sgra gcig la sogs pa sel bar 'jug pa na yan lag bkag pa'i phyir la/ yan lag can tha mi dad par khas mi len pa'i phyir don med par 'gyur ro/ /yan lag gi sgras phyogs gcig brjod do/ /de ltar na tshogs pa las ma gtogs pa tshogs pa can gzhan khas mi lan pa'i phyir phyogs gcig bkag pa'i ngo bos 'jug pa'i tshogs pa'i sgra thams cad don med par 'gyur ro/ /gnyis la sogs pa'i sgra yang tshogs pa'i yul can yin pa'i phyir la/ gcig la sogs pa'i don bkag pas tshogs pa'i don bkag pa'i phyir don med pa nyid yin no/ / de ston pa ni/ rnam pa de ltar 'gyur ma yin/ /zhes bya ba ste rnam pa ji lta bur 'dod pa'i tshogs pa'i yul can de dag ni rnam pa de lta bur mi 'gyur ro zhes bya ba'i don to/ /gang yang ba lang gi sgra'i don ba lang ma yin no zhes bya ba'i ba lang ma yin pa'i sel ba 'di ci dngos po'am/ yang na dngos po med pa yin/ gal te dngos po yin na de ci ba lang yin nam yang na ba lang ma yin pa zhig yin zhes bya/ gal te ba lang yin na ming la rtsod pa yin no/ /ci ste ba lang gi sgra'i don ba lang ma yin pa zhes bya ba yin no / /sgra'i don la shin tu mkhas so/ /ci ste dngos po med pa yin na/ de ni mi rigs te/ skul bar byed pa dang yang dag par rtogs pa'i yul ma yin pa'i phyir ro / /dngos po med pa la sgra thos pa las skul ba dang rtogs par mi 'gyur ro/ /de ston pa ni / med pa 'di yang mi rigs te/ /zhes bya ba la sogs pa smos te/ skul bar byed pas na skul ba ste/ ston pa pos nyen pa po don la sbyor ba'o/ /de yang ston pa po'i chos yin la/ yang dag par rtogs pa ni nyan pa po'i chos yin no/ /sogs pa'i sgras bzho ba dang dgal ba la sogs pa'i dngos po'i chos thams cad gzung ngo / /gzhan yang sgra'i don ni shes pas rtogs pa yin la/ ba lang gi sgra las 'ga' zhig kyang med pa rtogs pa yang ma yin no/ /gzhan yang sel ba ni bya ba'i ngo bo yin pa'i phyir yul du brjod par bya dgos la/ de la ba lang ma yin pa ma yin no zhes bya ba'i sel ba 'di ba lang gi yul la'ang / ba lang ma yin pa yul ma yin/ gal te ba lang yul yin na ba lang ba lang med par ji ltar 'gyur/ 'on te ba lang ma yin na sel ba yul gzhan sel bar ji ltar 'gyur te/ seng ldeng bcad pa na shing pa la sha 'chad par 'gyur ba ma yin no/ /ci ste ba lang ni ba lang ma yin pa ma yin no zhes bya bar ba lang la ba lang ma yin pa 'gegs na/ gang zhig dgag par bya ba gang gis ba lang ma yin par brtags zhes bya ba'o / / de'i phyir 'di la rnam par rtog pa dang po gnyis shin tu 'brel pa med do snyam du bsams nas/ gsum pa nyid bstan pa'i phyir/ ci'i phyir zhes bya ba la sogs pa smos te/ 'ong gi sgra ni bsdu ba'o/ /ci'i phyir khyed cag ba lang zhes bya ba 'di'i sgra'i don ba lang ma yin no zhes bya ba'i sel ba'i mtshan nyid 'di brjod ces bya ba ni ngag gi don no/ /yang ci'i phyir brjod par bya ba ma yin zhe na/ gang gis zhes pa la sogs pa smos te/ sel ba'i rnam par rtog pa mi 'thad pa'i phyir 'di las kyang mi rigs te/ 'di ltar gang 'di ba lang ba lang ma yin pa sel ba de ci ba lang las tha dad pa yin nam/ 'on te tha mi dad pa yin/ de ci brten pa yin nam/ 'on te mi brten pa yin/ gal te brten pa yin na de'i tshe brten pa yin pa'i phyir yon tan du 'gyur te/ de lta yin dang ba lang gi sgras yon tan nyid brjod kyi ba lang ni ma yin pa'i phyir ba lang gnas so/ /ba lang 'gro'o zhes bya ba'i gzhi mthun par mi 'gyur ro/ /ci ste mi brten pa yin na de'i tshe don gang gis ba lang gi sel ba zhes drug par 'gyur / 'on te tha mi dad na 'di ba lang nyid yin pa'i phyir cung zad kyang byas pa ma yin/ sel ba 'di yang dngos po so so la gcig yin pa'am du ma yin par brjod par bya/ gal te gcig yin na de'i tshe ba lang ni rdzas du ma dang 'brel pa 'di ni ba lang nyid du mi 'gyur ro/ /ci ste du ma yin na de'i phyir gong bu bzhin du mtha' med pa'i phyir brjod par mi 'thad pas brjod bya ma yin pa nyid du 'gyur ro/ /gzhan yang ci gzhan sel ba brjod par bya ba yin nam 'on te brjod par bya ba ma yin zhes bya ba 'di re zhig khyod la dri bar bya ste/ brjod par bya ba yin na sgrub pa'i ngo bos brjod par bya ba yin nam/ gzhan las ldog pa'i sgo nas yin/ de la gal te sgrub pa'i ngo bos yin na/ de'i tshe gzhan sel ba sgra'i don yin no zhes bya ba'i sgra'i don gcig tu nges pa ma yin no/ /'on te gzhan las ldog pa'i sgo nas so zhes bya ba'i phyogs yin na/ gzhan rnam par gcod pa de yang gzhan rnam par gcod pa'i ngo bo gzhan gyis brjod pa'i phyir la/ de la yang gzhan yin pas thug pa med par 'gyur ro/ /ci ste brjod bya ma yin pa yin na de'i tshe sgras sgra'i don gzhan sel bar byed do zhes bya ba dang 'gal bar 'gyur ro/ /'di thams cad 'od byed pas smras pa nye bar bkod pa yin no/ /de la slob dpon phyogs kyi glang pos thams cad la tha dad pa med pa'i phyir dang / rten rgyun mi 'chad pa'i phyir dang / don ma lus pa yongs su rdzogs pa'i phyir go rims bzhin du gcig nyid dang / rtag pa dang / so so la yongs su rdzogs pa'i mtshan nyid kyi rigs kyi chos sel ba nyid la gnas te/ de lta bas na yon tan gyi khyad par khyad par du 'phags pa'i phyir gzhan sel ba nyid sgra'i don du legs par gnas par yin no zhes bshad pa de dogs par byas nas ku mA ra ri las bzhad gad du bya ba'i phyir mjug sdud pa ni gzhan yang zhes bya ba la sogs pa smos so/ /dgag ldan pa/ de 'ba' zhig kho na la zhes bya ba ni grong gi phag ni bza' bar bya ba ma yin no zhes bya ba la sogs pa la'o/ /rang gi bdag nyid ces bya ba ni rang gi ngo bo nyid de mi 'dra ba'o/ /gzhan du zhes bya ba ni dgag pa dang bral ba'o/ / de ltar gtso bo ji lta ba bzhin du gzhan gyi lugs kyi dogs pa bsu nas/ de ltar gzhan sel ma shes phyir/ /zhes bya ba la sogs pas lan 'debs pa rtsom mo/ /ma yin dgag dang med pa'o/ /zhes bya ba ni ma yin par dgag pa med pa ste/ ma yin par dgag pa'i mtshan nyid dang med par dgag pa'i mtshan nyid ces bya ba'i tha tshig go/ /blo dang don bdag dbye bas zhes bya ba ni blo'i bdag nyid kyi dbye ba dang don gyi bdag nyid dbye bas zhes bya ba'i don to/ /de la blo'i bdag nyid ni blo la snang ba'i don dag la rjes su 'jug pa gcig gi ngo bo nyid du nges pa'o/ /don gyi bdag nyid ni don gyi rang bzhin te rigs mi mthun pa las ldog pa'i don rang gi mtshan nyid ces bya ba'i don to/ /'di dag gi ni tha dad pa ni dbye ba zhes bsdu'o/ /de la blo'i bdag nyid kyi rang gi ngo bo bstan pa'i phyir/ sre bar byed pa gcig ces bya ba la sogs pa smos te/ sngar zhes bya ba ni gong du spyi dgag pa ji ltar da tI dang mi 'jig pa zhes bya ba la sogs pas bshad pa ste/ ji ltar a ru ra la sogs pa mang po rnams spyi med par yang rims la sogs pa zhi ba'i mtshan nyid kyi 'bras bu gcig byed pa bzhin du khra bo la sogs pa yang don tha dad na yang spyi dngos por gyur pa med kyang rang bzhin gcig pa can gyi sre ba'i shes pa'i rgyur gyur pa yin no/ /'jigs med sogs mtshungs zhes bya ba ni a ru ra la sogs pa dang mtshungs pa ste/ don gcig byed pa nyid du 'dra'o/ /de la brten nas zhes bya ba ni mi 'jigs pa la sogs pa d ang mtshungs pa'i don de la brten nas te rgyur byas nas de nyams su myong bar stobs kyis skyes pa'i rnam par rtog pa'i shes pa gang yin pa de la don gyi rnam pa nyid kyi don gyi gzugs brnyan gang yin pa de'i bdag nyid du don gyi rnam pa snang ba de la gzhan sel ba zhes bya ba'i ming 'di brtags so zhes 'grel to/ /rtog can gyi zhes bya ba ni rtog pa dang bcas pa zhes bya ba'i tha tshig go/ /'di yang shes pa zhes bya ba dang gzhi mthun pa yin no/ /don bdag med na yang zhes bya ba'i phyi rol gyi don gyi bdag nyid med par yang ngo / /nges pa zhes bya ba ni zhen pa'o/ /ci ste de la ji ltar gzhan sel ba zhes bya ba 'di bstan zhe na/ snang ba gzhan las tha dad phyir/ /zhes bya ba la sogs pa smos te/ rgyu mtshan bzhis 'di sel zhes bshad pa yin te/ dngos su ni rnam par rtog pa gzhan gyis sgro btags pa'i snang ba gzhan las tha dad pas rang nyid snang ba'i phyir te/ bsal bar byas na sel ba yin la/ gzhan las sel ba zhes bshad pa'i phyir ro/ /btags pa pa ni rgyu gsum gyis te/ rgyu la 'bras bu'i chos btags pa ste / gzhan las ldog pa'i dngos po ni/ thob pa'i rgyu phyir zhes gang bshad pa yin no/ /'bras bu la rgyu'i chos btags pa'i phyir yang ste/ de ston pa ni ma 'dres pa'i / dngos po'i sgo nas 'ongs pa'i phyir/ /zhes bya ba la ma 'dres pa ni gzhan dang ma 'brel ba gzhan las ldog pa zhes bya ba'i tha tshig go/ /de nyid dngos po'i sgo ste thabs so/ /de nyams su myong ba'i stobs kyis rnam pa de lta bu'i rnam par rtog pa skyes pa'i phyir ro/ / rigs mi mthun pa sel ba'i dngos po dang lhan cig tu 'khrul pa'i phyir dang / rtogs pa po dag gis zhen pa'i phyir zhes bya ba'i rgyu bzhi pa ston pa ni rigs mi mthun pa zhes bya ba la sogs pa ste/ 'di zhes bya ba ni rnam par rtog pa'i blo la yod pa'i don gyi gzugs brnyan no/ /rgyu mtshan dang bcas zhes bya ba ni/ snang ba gzhan las tha dad phyir/ /zhes bya ba la sogs pa rgyu mtshan bzhi dang lhan cig 'jug pa'i phyir rgyu mtshan dang bcas pa'o/ /don gyi bdag nyid kyis sel ba'i don rang bzhin bstan pa'i phyir/ de'i rgyu rang gi mtshan nyid la ldog pa de yod pa'i phyir te/ rgyu mtshan dang bcas pa'o/ /gzhan sel zhes bya ba'i ming 'di btags zhes skabs dang sbyar ro / /de la rgyu mtshan bshad pa/ gzhan ma 'dres pa yod phyir zhes bya ba ste/ gzhan las te rigs mi mthun pa las ma 'dres pa ste/ ldog pa de yod pa'i phyir te/ rigs mi mthun pa dang ma 'dres pa yod phyir zhes bya ba'i tha tshig go/ /'dis ni rang gi mtshan nyid gzhan sel bar bstan pa ni dngos yin no zhes bstan pa yin no/ /med par dgag pa'i mtshan nyid kyi gzhan sel ba'i rang bzhin bstan pa'i phyir/ med par dgag pa zhes bya ba la sogs pa smos te/ de'i phyir de ltar sel ba rnam pa gsum bstan nas/ skabs kyi sgra'i don la sbyar ba'i phyir/ de la gzhan sel dang po 'di/ /zhes bya ba la sogs pa smos te/ dang po zhes bya ba ni ji skad du bshad pa'i don gyi gzugs brnyan gyi bdag nyid do/ /'di la rgyu bshad pa ni/ phyi rol don du zhes bya ba la sogs pa smos te / gang kho na sgra las byung ba'i shes pa la snang ba de kho na sgra'i don du rigs kyi/ 'di la dgag pa nges pa yod pa ma yin la/ dbang po'i shes pa bzhin du rang gi mtshan nyid snang ba yang ma yin no/ /'o na ci zhe na/ sgra las byung ba'i blo'i phyi rol gyi don du zhen pa nye bar skye ba 'ba' zhig tu zad do/ /des na don gyi gzugs brnyan de nyid sgra las byung ba'i shes pa la dngos po de'i bdag nyid du snang ba'i phyir/ sgra'i don du rigs kyi gzhan gyi ma yin no snyam du bsams pa yin no/ /gang yang sgra'i don dang lhan cig brjod par bya ba dang rjod par byed pa'i dngos po'i mtshan nyid kyi 'brel pa grub pa de ni rgyu dang 'bras bu'i dngos po'i bdag nyid kho na yin no zhes ston pa ni/ blo de'i ngo bo zhes bya ba la sogs pa ste/ phyi rol gyi dngos po'i mtshan nyid du nges pa de'i ngo bo ste rang bzhin gang la yod pa de la de skad ces bya ste/ de'i ngo bo yang yin la gzugs brnyan yang yin zhes bsdu'o/ /blo'i de'i ngo bo'i gzugs brnyan de'i 'brel pa nyid sgra las skyes pa na ste 'byung ba na rjod par byed pa'i mtshan nyid kyis dngos po'i mtshan nyid de dpyad pa na rgyu dang 'bras bu'i dngos po bdag nyid kho nar grub ste 'di ltar sgra ni gzugs brnyan de skyed par byed pa'i phyir rjod par byed pa brjod la/ gzugs brnyan de yang sgras bskyed par bya ba yin pa'i phyir brjod bya'o/ /de'i phyir sgra las byung ba'i shes pa la/ dgag pa tsam 'dir snang ba min/ /zhes gang smras pa de ni 'brel pa med pa yin te/ dgag pa tsam sgra'i don du khas ma blangs pa'i phyir ro snyam du bsams pa yin no/ /de ltar re zhig gzugs brnyan gyi mtshan nyid kyis sel ba ni dngos su sgras bskyed par bya ba yin pa'i phyir dngos kyi sgra'i don yin no zhes bstan nas/ sel ba lhag ma rnams kyang sgra'i don nye bar btags par brjod pa na 'gal ba med pa nyid do zhes bstan pa'i phyir de ltar rnam pa zhes bya ba la sogs pa smos te/ de ltar zhes bya ba ni bskyed par bya ba yin pas so/ /yang ci'i phyir shugs kyis med par dgag pa rtogs zhes bstan pa'i phyir/ de'i bdag ces bya ba la sogs pa smos te/ de'i ste ba lang la sogs pa'i gzugs brnyan gyi bdag nyid de ni gzhan te rta la sogs pa'i gzugs brnyan gyi bdag nyid de rang bzhin ma yin pa'i phyir ro/ /de ltar rtogs pa ni med par dgag pa'i mtshan nyid kyis sel ba med na mi 'byung ba yin pa'i phyir brtags nas sgra'i don nyid du bstan nas/ rang gi mtshan nyid kyang bstan pa'i phyir/ dngos po dag dang 'brel pa na/ /zhes bya ba la sogs pa smos te/ de la 'brel pa ni sgra dngos po la brgyud nas rgyu dang 'bras bu'i mtshan nyid kyi 'brel pa ste 'di ltar thog mar ji ltar gnas pa'i dngos po nyams su myong ngo / /de las brjod par 'dod do/ /de nas rkan la sogs pa yongs su 'gul lo/ /de las sgra'o zhes bya ba de lta bu'i rgyud pa gang gi tshe sgra phyi rol gyi me la sogs pa'i dngos po dang 'brel par gyur pa de'i tshe 'brel pa de yod na rigs mi mthun pa las ldog pa'i dngos po yang don gyis go bas rtogs par 'gyur ro/ /de'i phyir med par dgag pa dang gzhan las ldog pa'i dngos po'i bdag nyid kyi sel ba rnam pa gnyi ga yang sgra'i don yin no zhes nye bar btags pa yin no/ /'di zhes bya ba ni rang gi mtshan nyid kyi bdag nyid do/ / yang gi sgra las med par dgag pa'i bdag nyid kyang ngo / /de'i phyir slob dpon phyogs kyi glang po la 'od byed pas/ gal te sgra'i brjod par bya ba'i don gzhan sel ba yin pa de'i tshe 'di'i brjod par bya ba'i don las tha dad pa'i rang gi don brjod par bya ba dgos la/ ci ste de nyid 'di'i rang gi don yin pa de lta na yang / sgra sgra'i don gzhan sel ba na rang gi don byed pa rjod par byed do zhes bya'o zhes bya ba 'di dang 'gal te/ de'i tshe na 'di'i ngag gi don 'di yin te rjod par byed pas rjod par byed pa'o zhes gang smras pa de ni ngag gi don yongs su ma shes nas smras pa yin no zhes bstan pa'i phyir slob dpon gyi ngag mi 'gal bar ston pa ni/ sgra ni don gzhan zhes bya ba la sogs pa smos te/ rang gi mtshan nyid kyang brtags nas rang gi don zhes bstan te/ de'i phyir rang gi mtshan nyid kyi bdag nyid kyi don de la don gzhan rnam par bcad pa'i gzugs brnyan gzhan las ldog pa'i gzugs brnyan gyi bdag nyid kyi sel ba byed ce na te skyed par byed pa sgra rjod par byed do zhes brjod pa'i slob dpon gyi tshig dang mi 'gal lo/ /gang gis 'di ni zhes bya ba la sogs pas slob dpon gyi tshig 'di 'chad do/ /slob dpon gyi dgongs pa ni 'di yin te/ sgra la phyi rol gyi don du zhen pa'i rnam par rtog pa'i gzugs brnyan bskyed pa la ma gtogs pa gzhan phyi rol brjod pa'i bya ba yod pa ma yin te/ chos thams cad ni bya ba med pa yin pa'i phyir ro/ /de'i phyir phyi rol gyi don du zhes pas 'jug pa'i rnam par rtog pa'i gzugs brnyan skyed par byed pa ni sgra rang gi don rjod par byed pa zhes bya'o/ /tha dad pa ste rigs mthun pa dang rigs mi mthun pa las ldog pa'i rang gi mtshan nyid la 'di dag reg pa ni ma yin te/ cung zad kyang mi byed pa'i phyir ro/ /cha shas de tsam ma rtogs pa'i/ /zhes bya ba ni rnam pa de lta bu'i gzugs brnyan skyed par byed pa las ma gtogs pa sgra'i byed pa yod pa ma yin no zhes bya ba'i don to/ /de ltar gzhan sel ba'i rang gi ngo bo nyid brjod nas/ da ni gzhan gyis smras pa'i sun 'byin pa bsal ba'i don du rtsom par byed do/ /de la gal te ba lang zhes bya ba'i sgra zhes bya ba la sogs pa gang smras pa de la/ de'i gzugs brnyan zhes bya ba la sogs pa smos te/ sgras ba lang gi blo nyid skyed par byed / gzhan dang ma 'dres pa'i shugs kyis rtogs pa yin te/ sgra las ni ma yin no/ /de'i ba lang gi gzugs brnyan ni snang ba gzhan gyi bdag nyid dang bral ba'i phyir ro/ /gzhan du na nges pa'i ngo bo de rtogs par mi 'gyur ro/ /des na ba lang gi blo skyed pa'i sgra gzhan btsal mi dgos te/ ba lang gi sgra de nyid kyis ba lang gi blo bskyed par bya ba yin pa'i phyir/ sgra ni shes pa'i 'bras can te/ /zhes bya ba la sogs pa la/ nyin mo za ba zhes bya ba la sogs pa smos te/ dper na lha sbyin tshon po nyin par zan mi za'o zhes bya ba'i ngag 'di ni dngos su nyin mo za ba bkag la/ rang gi don brjod pas mtshan mo za ba shugs kyis bsgrub pa yin gyi dngos su ni ma yin pa de bzhin du ba lang zhes bya ba la sogs pa'i rjes su 'gro ba ston pa'i sgra'i dngos kyi 'bras bu ni rjes su 'gro ba shes pa yin la/ ldog pa rtogs pa'i shugs las yin no/ /de la rgyu bshad pa ni/ gang gi phyir zhes bya ba la sogs pa ste/ gang gi phyir rjes su 'gro ba sgrub pa ni ldog pa dang mi ldan pa la yod pa ma yin no/ /'o na ci zhe na/ rigs mi mthun pa rnam par gcod pa la mi 'khrul pa nyid yin no/ /rigs mi mthun pa las mi ldog pa ni 'ga' yang yod pa ma yin te/ des na sgra gcig gi 'bras bu gnyis 'gal ba med pa kho na'o/ /de ci'i phyir zhe na/ de'i phyir rang don zhes bya ba la sogs pa smos te/ gal te sgra gcig dngos su sgrub pa dang dgag pa'i shes pa'i mtshan nyid 'bras bu gnyis cig car 'dod par gyur na / gang gi tshe na nyin mo za ba'i tshig bzhin du gcig dngos su dang gzhan shugs kyis thob pa'i 'bras bu shes 'dod pa de'i tshe 'gal ba med do/ /gang yang / gang gis ba lang min dgag phyir/ /zhes bya ba la sogs pa smras pa de yang bsal ba yin te/ khas ma blangs pa'i phyir ro/ /kho bo cig gis ni sgras dngos su ba lang ma yin pa dgag pa byed do zhes khas blangs so/ /'o na ci zhe na/ shugs kyis so zhes bstan zin to/ /gang gis ba lang min ldog pa'i/ /spyi ni brjod bya zhes gang smras pa de la/ de 'dra'i zhes bya ba la sogs pa smos te/ de 'dra zhes bya ba ni phyi'i ngo bo nyid du zhen pa'i blo'i rnam pa'o/ /'di la 'thad pa bshad pa ni khra bo la sogs zhes bya ba la sogs pa ste / khra bo la sogs pa thams cad la ba lang zhes mtshungs pa'i ngo bo nyid du nges pa'i phyir de dag gi de spyi zhes brjod do/ /phyi'i dngos po'i ngo bo nyid kyang 'khrul pa'i shes pa'i dbang gis tha snyad du byed kyi don dam par ni ma yin no zhes ston pa ni/ dngos po snyam du zhen pa'i phyir/ /zhes bya ba'o / /gal te phyi rol gyi dngos po la brten pa'i spyi dngos por gyur pa dngos po zhig res 'ga' dmigs par gyur na/ de'i chos mthun pa mthong ba las de la spyir 'khrul bar 'gyur te/ ji srid du khyed la dngos kyi don mi srid pa na de nyid spyir 'khrul pa mi 'thad pa ma yin no zhes dogs pa bsu nas/ shes te rang gi ngo bo la/ /zhes bya ba la sogs pa smos te/ skad cig gis ni zhes bya ba chos mthun pa mthong ba la sogs pa la ltos pa med pas zla ba gnyis la sogs pa'i shes pa bzhin du nang gi bslad pa kho na las de'i shes pa skye ba yin te/ 'khrul pa thams cad chos mthun pa mthong ba nyid las 'byung ba ni ma yin no/ /'o na ci zhe na/ nang gi bslad pa las kyang yin pa'i phyir skyon med do/ /des na grub pa la sgrub pa'i skyon du mi 'gyur ro zhes bstan pa'i phyir ro/ /de yi rnam pa de nyid kyang / /zhes bya ba la sogs pa smos te/ phyi rol nyid du zhen pa'i blo'i rnam pa de nyid gzhan sel ba zhes bya ba dang / sgra'i don zhes phyi rol gyi spyi dngos por gyur pa bzhin du brjod do/ / de la rgyu bshad pa/ de ltar 'khrul pas nges phyir ro/ /zhes bya ba ste/ de ltar zhes bya ba ni spyi'i ngo bo nyid dang dngos po'i ngo bo nyid du zhen pa'i phyir ro/ /sgra'i don nyid dang sel ba'i ngo bo nyid dag gi rgyu ni/ phyi rol don du zhen pa yis / blo ni sgra las 'byung phyir ro/ /snang ba gzhan la tha dad phyir/ / zhes bya ba la sogs pas dang po nyid du bshad zin to/ /yang ci'i phyir don dam par de spyir mi 'gyur zhe na/ yang dag tu na zhes bya ba la sogs pa smos te/ don dam par blo las tha mi dad pa 'di dag gis don gzhan du gyur nas spyir 'gyur ba de ci ltar don gzhan gyi rjes su 'brangs pa yin/ ji skad du/ shes las tha dad ma yin pa/ /ji ltar don gzhan 'brang bar 'gyur/ /zhes bshad pa bzhin no/ /de lta bas na grub pa la sgrub pa'i skyon du mi 'gyur ro/ /khyed cag gis ba lang nyid ces bya ba'i spyi rnam pa dngos por 'gyur ba ma yin pa'i ngo bor ni mi 'dod do/ /'o na ci zhe na/ phyi rol gyi khra bo la sogs pa la gnas pa gcig rjes su 'gro ba don dam pa pa'i ba lang nyid la sogs pa'i spyi btags pa yin te/ de'i phyir grub pa la bsgrub pa ma yin no snyam du bsams pa yin no/ /gal te dgag pa tsa ma ngo bo nyid ces bya ba la sogs pa gang smras pa de ni khas ma blangs pa nyid kyi phyir skyon med do/ /gang yang rta sogs blo rnams kyi/ /zhes bya ba la sogs pa smras pa gang yin pa de la/ gal te yang zhes bya ba la sogs pa smos te/ go bar zad do/ /gang yang sgra don du 'gyur na don la mi ltos pa'o zhes bya ba smras pa de la/ de ni don la zhes bya ba la sogs pa smos te/ gang la brgyud nas dngos po la 'brel pa yod pa'i rnam par rtog pa de ni 'khrul pa yin yang no ra bu'i 'od la nor bu'i bzhin du phyi rol gyi don la ltos pa med pa nyid ma yin te/ de'i phyir phyi rol gyi don la ltos pa med pa nyid ma grub po/ /gang yang / blo de sgra yi don dag la/ /zhes bya ba la sogs pa smras pa de la/ bdag nyid de yis zhes bya ba la sogs pa smos te/ gal te yang blo dngos po'i ngo bo yin pa de lta na yang de phyi rol gyi bdag nyid de dang blo gzhan gyi bdag nyid kyis dngos po nyid ma yin no zhes/ de bdag gzhan gyi bdag nyid min/ /zhes bya ba la sogs pas bstan zin to/ /des na blo ni mi sems pa'i / /dngos nyid brjod pa nyid du brtags/ /zhes bya bar mi 'grub ste/ shugs kyis rtogs pa'i phyir ro snyam du bsams pa yin no/ /ji ltar phyi rol don med kyang / /zhes bya ba 'di la/ gzugs brnyan bdag nyid ces bya ba la sogs pa smos te/ ji ltar gzugs brnyan gyi bdag nyid snang ba zhes bya ba'i sel ba kho bo cag gis ngag gi don du brjod pa de bzhin du tshig gi don yang yin te/ gang gi phyir tshig las kyang gzugs brnyan gyi bdag nyid kyi sel ba 'thad pa nyid yin no/ /de'i phyir kho bo cag gi gzugs brnyan gyi bdag nyid sel ba yin no/ /yang gi sgra ni ngag gi don 'ba' zhig tu ma zad kyi/ tshig gi don yang zhes bya'o/ /des na log par rtog pa med pa'i phyir klan ka mi rigs so snyam du bsams pa'o/ /blo ni blo gzhan pa dag las/ /rnam par gcod pa rtogs ma yin/ /zhes bya ba 'di la / rang gi ngo bo skyes tsam las/ /zhes bya ba la sogs pa smos te/ gang kho na'i phyir rang gi ngo bo skye ba tsam las gzhan gyi cha blo des mi 'dzin pa de kho na'i phyir rang rang gi ngo bo la gnas pas blo blo gzhan las rnam par gcod pa rtogs par 'gyur ba yin no/ /de lta ma yin te/ gzhan gyi ngo bo 'dzin na ji ltar de las rnam par bcad pa rtogs par 'gyur/ des na zhes bya ba ni rang las tha dad pa'i dngos po'i rang gi ngo bo nyid nges par mi 'dzin pas so/ /gal te gzhan sel brjod bya na/ /zhes bya ba la sogs pa la ji ltar zhes bya ba la sogs pa smos te/ ji ltar gzhan sel ba rang bzhin med pa'i phyir yod pa ma yin pa'i ngo bo la phan tshun tha dad pa med par brjod pa de bzhin du tha dad med pa yang yin pas de'i phyir ji ltar tha mi dad pa'i don med na rnam grangs pa nyid du thal bar byed/ 'di nyid gsal por bya ba'i phyir/ /tha dad med pa'ang dngos gcig nyid / /ces bya ba smos so/ /gal te med pa dag la dngos po gcig med pa de lta na yang ci'i phyir rnam grangs pa nyid du mi 'gyur zhe na/ don gcig nyid na zhes bya ba la sogs pa smos te/ gal te 'di snyam du med pa dag la gcig gi ngo bo nying yang dag par med pa de lta na yang brtags pa po yod de/ des na rnam grangs pa nyid du thal bar 'gyur bar rigs so snyam du sems na/ de'i phyir/ ji ltar ngo bo med na yang / /zhes bya ba la sogs pa smos te/ ngo bo med na yang zhes bya ba ni/ rang bzhin med na yang zhes bya ba'i don to/ /gal te de lta na ji ltar sgra dag ni rnam grangs pa yin pa'i rnam par gzhag pa sgrub snyam na/ rjod byed dngos su zhes bya ba la sogs pa smos te/ gal te don dam par sgra rnams kyi brjod par bya ba tha dad pa'am tha dad pa ma yin pa'i dngos po 'ga' zhig tu gyur na de'i tshe rnam grangs par 'gyur na/ ji srid du 'di dag gi brjod par bya ba cung zad yod pa ma yin no zhes/ gang phyir rang gi mtshan nyid rigs/ /de 'brel rigs ldan de bzhin du/ zhes bstan zin to/ /'o na ji ltar rnam grangs la sogs par rnam par gzhag ce na/ 'on kyang zhes bya ba la sogs pa smos te/ de la spyi med na yang spyi'i sgra rnam par gzhag pa'i rgyu mtshan ni 'di yin te/ mang po rnams kyi don bya ba gcig byed pa gang yin pa'o/ /dngos po kha cig ni rang bzhin gyis mang po yin na yang don gyi bya ba gcig byed par 'gyur la/ don gcig byed par nus pa de dag bstan pa'i phyir tha snyad 'dogs pa po rnams kyis tshegs chung bar bya ba'i phyir gcig gi ngo bor sgro btags nas sgra gcig sbyor ba yin te/ dper na sbrang rtsi dang chu la sogs pa sbyor ba'i mtshan nyid kyi don gcig byed par nus pa'i gzugs la sogs pa mang po dag la bum pa zhes bya ba'i sgra 'di sbyor ba bzhin no/ /de'i yang ci'i phyir rjes su 'gro ba gcig med par mang po dag la sgra gcig sbyor bar byed ce na/ dper na rjes 'gro gcig med na yang zhes bya ba la sogs pa smos te/ 'dod pa tsam la rag las te sgra rnams don la sbyor te/ 'di ltar gzugs kyi rnam par shes par 'bras bu gcig pa can gyi ming dang gzugs dang snang ba dang yid la byed pa dag la gal te 'ga' zhig 'dod pa'i dbang gis rjes su 'gro ba'i spyi gcig med na yang tshang zhes bya ba la sogs pa'i sgra sbyor bar byed de/ des na su zhig de 'gegs par 'gyur ro/ /mig la sogs pa de dag la mig gi rnam par shes pa skyed par byed pa'i spyi gcig yod pa ma yin te/ 'di ltar khyed cag gis spyi dang bye brag dang 'du ba dag kyang ming gi rnam par shes pa skyed par byed par 'dod de / de dag la spyi dang 'du ba yod pa ma yin te/ spyi ni spyi med pa yin pa'i phyir dang / 'du ba yang 'du ba gnyis pa med pa'i phyir ro/ /'on te bum pa la sogs pa ji ltar 'bras bu gcig par byed par brjod/ ji srid du de'i 'bras bu chu 'dzin pa la sogs pa dang 'dzin pa'i shes pa ni rang gi mtshan nyid tha dad pas tha dad pa yin no zhe na/ gal te yang zhes bya ba la sogs pa smos te/ gal te yang rang gi mtshan nyid tha dad pas de dag gi 'bras bu tha dad pa de lta na yang / re zhig shes pa zhes bya ba'i 'bras bu don gcig tu zhen pa'i sre ba'i shes pa'i rgyu nyid kyis gcig ces brjod la/ shes pa de'i rgyu'i dngos po yin pa'i phyir don kyang yin te/ sbrang rtsi dang chu la sogs pa 'dzin pa la sogs pa'i mtshan nyid kyi bum pa la sogs pa'i mtshan nyid kyang tha dad med pa zhes brjod do/ /de ston pa ni/ de bzhin de yi rgyu yi phyir/ /zhes bya ba'o/ /rjod pa yin zhes bya ba'i rnal ma'i tshig yongs su bsgyur nas mang po'i tshig gi mtha' can du sbyar bar bya la/ yang gi sgra ni rim pa tha dad ba ste/ don zhes bya ba'i 'og tu sbrel bar bya'o/ /des na don gyi bya ba gcig byed pa 'thad pa nyid yin no / /'on te de lta na thug pa med par 'gyur ba ma yin nam/ 'di ltar 'di'i sre ba'i shes pa gang yin pa de yang rang gi mtshan nyid tha dad pas tha dad par 'gyur pa'i phyir gcig nyid du mi 'grub la/ de lta yin dang de la yang gcig nyid du bsgrub par bya ba'i phyir ro/ /gcig gi rnam pa can sre'i 'bras bu gzhan gyi rjes su 'brang bas thug pa med par 'gyur ro/ /de lta bas na 'bras bu gcig pa nyid du mi gnas pas gang du yang sgra gcig sbyor bar 'grub par mi 'gyur ro zhe na/ de ni yod pa ma yin te/ sre ba'i shes pa 'bras bu gcig pa nyid kyis gcig pa brjod pa ni ma yin no/ /'o na ci zhe na/ don gcig tu zhen pa nyid kyis so/ /des na thug pa med par mi 'gyur te/ sre ba'i shes pa thams cad don gcig tu zhen pa nyid du rang nyid las grub pa'i phyir ro/ /des na don 'di yin te/ rnam pa gcig pa can gyi sre ba'i shes pa'i rgyu yin pa'i phyir ro/ /shes spang zhes bya ba'i 'bras bu gcig ces bya la/ de'i rgyu'i dngos po yin pa'i phyir bum pa la sogs pa'i don yang gcig nyid du tha snyad du bya ba'i snod yin na/ /de'i phyir spyi dngos por gyur pa med na yang bum pa la sogs pa spyi brjod par grub par 'gyur ro zhes mjug bsdu ba'i phyir/ /de la zhes bya ba la sogs pa smos so/ /dngos po gcig la spyi dang bye brag med na yang sgra du ma ma 'chol bar 'jug par 'gyur ba nyid yin no zhes bstan pa'i phyir/ de bzhin zhes bya ba la sogs pa smos te/ 'ga' zhig gcig yin na yang rang bzhin gyis tshogs pa gzhan gyi nang du gtogs pa'i dbang gis don gyi bya ba du ma byed par 'gyur ba yin te/ de la spyi dngos por gyur pa la sogs pa'i chos tha dad pa med na yang de'i 'bras bu ma yin pa'i dngos po las tha dad pa mang po ste chos du ma sgro btags pa las sgra du ma sbyor bar byed pa yin no/ /'di la dper brjod pa bshad pa ni dper na zhes bya ba la sogs pa ste/ gzugs ni rang gi yul du gzhan 'byung ba'i gegs byed pa'i phyir thogs bcas zhes bya la/ bstan pa ni mig gi rnam par shes pa yin la de bskyed pa'i phyir/ de dang lhan cig tu 'jug pas bstan du yod pa'o/ /dper brjod pa gnyis pa yang ston pa ni/ dper na sgra ni zhes bya ba la sogs pa ste/ dper na sgra gcig yin na yang rna ba'i rnam par shes pa'i 'bras bu can yin pa'i phyir/ mnyan par bya ba yin la/ mnyan pa ni sgra ste/ nyan pa'i shes pa zhes bya ba'i tha tshig go/ /de la snang ba nyid kyis de'i dngos po ni mnyan par bya'o/ /yang na mnyan pas gzung bar bya ba yin pa'i phyir mnyan par bya ba yin la brtsal ma thag tu 'byung ba'i shes pa 'bras bu can yin pa'i phyir brtsal ma thag tu 'byung ba'i shes pa zhes brjod do/ /de ltar de'i 'bras bu ma yin pa las tha dad pas gcig la yang sgra du ma sbyor ro zhes ston to / da ni de ma yin pa las tha dad pas kyang 'ga' zhig tu sgra sbyor bar byed do zhes ston pa ni/ de rgyu min las tha dad pas/ /zhes bya ba la sogs pa smos te/ sbrang bu las byung zhes bya ba ni ra ro bar byed pa'i sbrang rgod las byung ba'i sbrang rtsi las ldog pa'o/ /de ltar de'i 'bras bu dang rgyu ma yin pa'i dngos po las tha dad pas dngos po gcig la sgra tha dad par bstan to/ /da ni de'i 'bras bu dang rgyu'i dngos po rnam par bcad pa tsam bstan par 'dod nas spyi med par yang sgra tha dad pas sbyor bar bstan pa'i phyir ro/ /de 'bras zhes bya ba la sogs pa smos te/ sngar bshad pa'i rgyu dang 'bras bu de dag gang dag la yod pa de dag la de skad ces bya'o/ /de dag ma 'dres pa ni ldog pa'o/ /yang sgra 'di yang gang zhig ce na/ gzugs ni mnyan bya min zhes bya ba la sogs pa smos te / 'bras bu mnyan pa'i shes pa rnam par bcad pa'i sgo nas gzugs mnyan par bya ba ma yin zhes brjod la de bzhin du rtsol ba'i rgyu bum pa'i dngos po rnam par bcad nas glog gi rtsol ba las ma byung ba'o zhes brjod do/ /de ltar spyi la sogs pa dngos por gyur pa med par yang sgra rnams tha dad du sbyor ba ni ldog pas byas pa nyid yin no zhes bstan nas/ rnam grangs pa nyid thal bar 'gyur ba med par bstan pa'i phyir/ de lta bu sogs zhes bya ba la sogs pa smos te/ sogs pa smos pas gnas skabs kyi khyad par rjod par byed pa byas pa la sogs pa'i sgra dang bdag med pa la sogs pa'i sgra gzung ngo / /tha dad don gyi rgyu mtshan can/ /zhes bya ba ni tha dad pa ni de dang de las ldog pa'i rgyu mtshan ldog pa gang dag la yod pa de dag la de skad ces bya'o/ /de bzhin zhes bya ba'i ldog pa bzhin no/ /de'i mthar thug ces bya ba ni ldog pa'i don gyi mthar thug pa ste/ 'ol phyir rnam pa de lta bu'i dngos po rtogs pa'i rgyu nyid yin pa'i phyir ro/ /mnyan pa zhes bya ba ni sgra rnams so/ /'di snyam du don tha dad du btags pa'i phyir 'di dag rnam grangs pa nyid du ma gyur mod/ spyi dang bye brag med par 'di dag gi spyi dang bye brag gi rnam par gzhag pa ji ltar 'grub par 'gyur snyam du sems na/ de'i phyir mang dang nyung zhes bya ba la sogs pa smos te/ shing gi sgra ni seng ldeng dang da ba dang pa la sha la sogs pa thams cad la shing ma yin pa rnam par bcad pa tsam gyi gzugs brnyan skyed par byed pa yin no/ /des na 'di'i yul mang po yin pa'i phyir spyi brjod byar brjod la/ da ba la sogs pa'i sgra ni seng ldeng la sogs pa shing gi ldog pa cung zad cig zhen pa'i rnam par rtog pa skyed pa'i phyir khyad par brjod byar brjod do / /'on te bsal bya tha dad pas/ /zhes bya ba la sogs pa la/ rnam rtog bzo yis zhes bya ba la sogs pa smos te/ gal te don dam par bsal bar bya ba tha dad pa dang rten tha dad pas sel ba tha dad par 'dod par 'gyur na de'i tshe skyon der 'gyur na/ ji srid du rnam par rtog pas rigs mthun pa dang rigs mi mthun pa'i dngos po las tha dad pa'i rgyu mtshan can gyi ldog pa tha dad pa rtog par byed kyi don dam par ni ma yin no/ /de dag kyang rtog pa'i dbang gis dngos po las tha dad pa nyid snang gi don dam par ni ma yin no zhes ston pa de dag ces bya ba la sogs pa'o/ /ci'i phyir yang dag pa ma yin zhe na/ tha dad tha dad med pa ni/ /zhes bya ba la sogs pa smos so/ /don dam par rnam par rtog pa kho na tha dad par 'gyur ba yin no zhes ston pa ni/ /shing gi sa bon zhes bya ba la sogs pa ste/ sa bon yang thog ma med pa'i rnam par rtog pa'i bag chags yin la du ma dang ma 'dres pa'i dngos po yang yin la/ brda yang yin no zhes tshig rnam par sbyar ro/ /'di dag gi nus pa ni mthus te de las rigs mi mthun pa'i dngos po du ma las ldog pa'i dngos po nges pa'i rnam par rtog pa tha dad par 'gyur gyi/ don ni ma yin te/ 'di ltar/ shing la sogs pa spyi'i ngo bos da ba la sogs pa gcig gi bdag nyid du mi rtogs la/ skad cig ma dang bdag med pa la sogs pa'i chos tha dad pas phyir dum bu dum bur 'byed par 'gyur ba yang ma yin/ /rnam par rtog pa nyid du de ltar bslab pa 'ba' zhig tu zad de/ don ni ma yin no/ /ji skad du/ dam pa'i don gyi don rnams ni/ /rang gis 'dre pa tha dad med/ /de la ngo bo gcig pa dang / /du ma blo yis bslad pa yin/ /zhes bshad pa bzhin no/ /gang yang / 'dra ba nyid du ma grub pa'i/ /zhes bya ba la sogs pa smras pa de la/ chos gcig rjes 'gro ba zhes bya ba la sogs pa smos te/ bsal bar bya ba dang sel ba'i spyod yul zhes tshig rnam par sbyar ro/ /de ltar bsal bar bya ba ni rta la sogs pa ste/ ba lang gi sgra ni de bsal nas 'jug pa'i phyir ro/ /sel ba'i spyod yul ni khra bo la sogs pa ste/ sel ba'i yul ni de yin pa'i phyir ro / /des na gal te yang spyi'i ngo bo rjes su 'gro ba gcig med pa de lta na yang 'dra ba nyid du grub pa gang dag yin pa 'di dag ni gcig tu rtog pa'i shes pa'i rgyu yin la/ bzlog pa gang dag yin pa de dag ni phyin ci log yin no/ /'di snyam du spyi gcig med par yang don tha dad pa dag ji ltar gcig tu rtogs pa de'i rgyur 'grub par 'gyur snyam du sems na/ de'i phyir/ gcig ste rtog pa'i shes pa las / /zhes bya ba la sogs pa smos te/ ji ltar spyi med par yang sta tri la sogs pa'i don gyi bya ba gcig byed par 'gyur ba de bzhin du dngos po tha dad pa 'ga' zhig kyang gcig tu rtog pa'i rgyur 'gyur ba yin no zhes bya ba 'di ni spyi brtag par bstan zin to/ /rjes su 'gro ba dang bral ba'i/ /zhes bya ba la sogs pa smras pa de la/ de min ngo bo las ldog pa'i/ /zhes bya ba la sogs pa smos te/ gal te yang spyi dngos por gyur pa med pa de lta na yang rigs mi mthun pa las ldog pa'i rang bzhin mtshan nyid tsam nyid kyis rjes su byed par 'gal ba med do/ /ji ltar zhe na/ gang na zhes bya ba la sogs pa smos te/ gang na zhes bya ba ni sa phyogs gang na'o/ /'di na yang du ba ma yin pa las tha dad pa'i rang gi mtshan nyid yod pa yin no zhes bya ba ni phyogs la chos nye bar bstan pa'o/ /de'i phyir zhes bya ba la sogs pa tshad ma'i 'bras bu nye bar ston pa'o/ /yang na rang gi mtshan nyid kyis rjes su 'gro ba byed pa na yan lag lnga yang bstan par nus pa yin no zhes bstan to/ /'di yang 'bras bu'i gtan tshigs bshad pa'o/ /rang bzhin gyi gtan tshigs smras pa/ mi'i rwa sogs zhes bya ba la sogs pa smos te/ med pa las ldog pa'i rang gi mtshan nyid gang yin pa de thams cad ni de'i ngo bo nyid ma yin pa'i phyir bstan pa las kyang ldog pa yin te/ blo dang sgron ma la sogs pa bzhin no/ /de bzhin du sgra la sogs pa'i rang gi mtshan nyid 'di yang med pa'i ngo bo ma yin no zhes bya'o / /de'i phyir rigs pa 'dis khyad par la ma reg pa'i phyir rang gi mtshan nyid kyis rjes su 'gro ba byed pa na mi 'gal lo/ /'di yang yod pa'i phyir zhes bya ba'i gtan tshigs 'di ni rjes su 'gro ba bstan pa yin no/ /gal te rang gi mtshan nyid kyi rjes su 'gro ba de lta na/ da ni ji ltar rjes su dpag pa'i spyi'i mtshan nyid yul can du 'grub par 'gyur zhe na/ de'i phyir/ khyad par brjod par mi 'dod pa'i/ /zhes bya ba la sogs pa smos te/ rang gi mtshan nyid de nyid khyad par brjod par mi 'dod pa ni spyi'i mtshan nyid ces bya ste/ khyad par yongs su mi 'dzin pa'i spyir mtshon cing nges par byed pas spyi'i mtshan nyid do/ /gzhan yang ma yin zhes bya ba ni mu stegs byed kyis mngon par 'dod pa ste/ de mi 'dod pa'i phyir ro / /ji skad du/ de nyid rang gzhan ngo bo yis/ /rtogs phyir gzhal bya gnyis su 'dod/ /ces bshad pa bzhin no/ /de bzhin du gzhan yang / de min rang bzhin las ldog pa'i/ /dngos po tsam zhig rab bsgrub phyir/ /rtags spyi'i yul can du brjod de/ /khyad par gnas pa med phyir ro/ /zhes bshad do/ /de yang sgra dang rtags dag gi lhan cig spyod pa yang rang gi mtshan nyid kyis bstan te/ kho bo cag gis ma mthong ba tsam gyis mi mthun pa'i phyogs la gtan tshigs med par nges par byed pa ma yin no/ /'o na ci zhe na/ mi dmigs pa'i khyad par las so snyam du bsams pa yin no / /gang yang / khra bo las ni tha dad nyid/ /ces bya ba la sogs pa smras pa gang yin pa de la khra mo'i bu las zhes bya ba la sogs pa smos te/ ser skya'i bu dang rta gnyis khra mo'i bu las tha dad par mtshungs na yang ci'i phyir rta yongs su spangs nas khra mo la sogs pa de dag nyid la ba lad nyid 'jug gi rta la ni ma yin zhes bya ba 'di khyed cag gis brjod par 'os so/ /'di snyam du 'di la ci zhig brjod par bya/ de'i ba lang nyid de mngon par gsal ba la khra bo la sogs pa nyid nus kyi/ rta la sogs pa ni ma yin te de'i phyir de nyid la 'jug gi gzhan la ni ma yin no/ /ci'i phyir de mngon par gsal ba la khra bo la sogs pa nyid nus pa yin gyi gzhan ni ma yin no zhes bya ba 'di yang brgal zhing brtag par rigs pa ma yin te/ 'di ltar 'di ni dngos po'i rang bzhin so sor nges pa yin no/ /dngos po rnams kyi rang bzhin la ni brgal zhing brtag par 'os pa ma yin te/ de dag gi rang bzhin tha dad pa so sor nges pa ni rang gi rgyu brgyud pas byas pa nyid kyi phyir ro/ /'dir smras pa/ gal te de gsal zhes bya ba la / de zhes bya ba ni ba lang nyid do/ de nyid ces bya ba ni khra bo la sogs pa ste rta ni ma yin no/ /gal te de lta na tha dad kyang spyi med par yang mtshungs par rtog pa skyed pa la khra bo la sogs pa kho na nus kyi/ rta ni ma yin no zhes bya ba 'di kho bo cag gi phyogs la mi 'gal ba kho na'o/ /de las cir 'gyur zhe na/ dngos po gang la zhes bya ba la sogs pa smos te/ khra bo la sogs pa'i dngos po gang la ba lang ngo zhes bya ba de lta bu'i gcig tu rtog pa'i shes pa skye ba de nyid la dngos por gyur pa'i ba lang gi rigs med na yang ba lang ma yin pa sel ba gzugs brnyan gyi bdag nyid 'jug pa yin no/ /ba lang min sel dbang pos kyang / /zhes bya ba la sogs pa gang smras pa de ni ma grub po zhes bstan pa'i phyir / ba lang min ldog ces bya ba la sogs pa smos te/ de la re zhig rang gi mtshan nyid kyi sel ba ni dbang pos nges par bya ba kho na'o/ /gang yang don gyi gzugs brnyan gyi bdag nyid kyi sel ba de ni don dam par blo'i rang bzhin yin pa'i phyir rang rig pa'i mngon sum nyid kyis grub po/ /kyang gi sgra ni ma bshad pa'i don sdud pa ste/ des na med par dgag pa'i bdag nyid kyang shugs kyis rtogs par byed pa yin te/ de'i bdag nyid ni gzhan gyi bdag nyid ma yin no zhes bstan pa yin no/ /de'i phyir rang gi mtshan nyid la sogs pa'i ngo bo'i sel ba 'di nyid mthong na ste shes nas 'jig rten gyi sgra sbyor gyi spyi dngos por gyur pa la ni ma yin te/ de med pa'i phyir dang / mi snang ba'i phyir ro / /gang kho na mthong nas 'jig rten gyi sgra sbyor ba de nyid kyis de'i 'brel pa rtogs kyi gzhan gyis ni ma yin te/ /ha cang thal bar 'gyur ba'i phyir ro/ /ba lang min pa'i sgras rjod byed/ /ji ltar yang ni go bar bya/ /zhes gang smras pa 'di la/ dngos po gang la de 'dra ba'i/ /zhes bya ba la sogs pa smos so/ /gang yang / grub na 'ang ba lang min bsal bya/ /zhes bya ba la sogs pa smos te/ /ba lang la sogs pa'i dngos po rnams ni rang nyid kyis tha dad du rtogs pa'i shes pa skyed par byed pa na yang rnam par phye nas yang dag par nges pa yin la/ de la tha snyad kyi don du tha snyad 'dogs pa po rnams kyis ji ltar 'dod pa bzhin du ma grub pa'i sgra sbyor ba yin no/ /'di ltar gal te dngos po tha dad pa'i rang gi ngo bo rtogs par bya ba'i don du dngos po gzhan 'dzin pa la ltos pa de'i tshe phan tshun bsten pa'i skyon du 'gyur na/ ji srid du gzhan 'dzin pa med pa kho nar dngos po'i tha dad pa rigs pa yin la/ de la tha dad pa'i rnam par rtog pa can gyi rgyu yin pa nyid kyis rnam par phye nas grub pa na ba lang dang ba lang ma yin pa zhes bya ba ji ltar 'dod par brda byed pa'i phyir ji ltar/ phan tshun bsten pa nyid du 'gyur/ /rig pa la zhes bya ba rig pa'i don du'o/ /gang yang / rten dang brten par 'jug sogs kyi/ /zhes bya ba la sogs pa smras pa de la/ sgra las byung ba'i blo 'di ni/ /zhes bya ba la sogs pa smos te/ don dam par sel bar bya ba'i khyad par 'ga' zhig sgra dag gis brjod pa ma yin te/ gang gi phyir ji ltar sgras dngos po 'ga' zhig la yang reg pa ma yin te/ gang du yang brda ma byas pa'i phyir ro zhes bya ba 'di ni bshad zin to/ /'di ltar sgra las byung ba'i blo'i phyi rol gyi don yul ma yin na yang rang gi gzung ba ste/ rang gi rnam pa phyi rol nyid du nges pa skyed par byed kyi don dam par dngos po'i rang bzhin la reg pa ni ma yin te/ de kho na nyid ji lta ba bzhin ma nges pa'i phyir ro/ /gal te de lta ji ltar slob dpon gyis ut+pa la sngon po la sogs pa'i sgras don gzhan las ldog pa'i khyad par can gyi don brjod do zhes bshad ce na/ de'i phyir/ mtshan nyid byed pa dag gis ni/ /zhes bya ba la sogs pa smos te/ 'di brjod par 'dod pa yang gang zhig ce na/ dngos gang gzhan las zhes bya ba la sogs pa smos te/ don ni rnam pa gnyis te/ phyi dang blo la yod pa'o/ /de la phyi rol ni don dam par sgra rnams kyis brjod pa ma yin gyi/ de nges par byed pa'i rnam par rtog pa skyed pa'i phyir nye bar btags nas sgra'i don du brjod pa 'ba' zhig tu zad do/ /btags pa'i dgos pa yang rigs brjod pa sel bar byed pa yin no zhes bya ba ni spyi'i don to // // yan lag gi don brjod par bya ste/ gzhan las gzhan zhes bya ba ni gzhan las gzhan nyid de ldog pa'o/ /gzhan las gzhan pa'i rgyu'am lhan cig byed pa des shing la sogs pa'i dngos po'i khyad par nges te/ gzhan las ldog pa des zhes bya ba'i tha tshig go/ /'dis ni/ don gzhan la ni ldog pa yis/ /khyad par can zhes bya ba yi/ /tha tshig 'di la ldog pa yis/ /gsum pa'i don du bshad pa yin/ /zhes bya ba'o/ /sgra yis zhes bya ba ni ming gis so/ /blo la yod pa'i don gang yin pa de ni dngos su sgra dag gis brjod pa yin no zhes ston pa ni/ gang yang blo la zhes bya ba la sogs pa ste/ 'di zhes bya ba ni sgra'o/ /'di dag gis don gzhan las ldog pa'i khyad par can nyid ji ltar sbyar bar bya zhe na/ 'di'i ldog pas zhes bya ba la sogs pa smos te/ de ma thag tu zhes bya ba ni/ dngos gang gzhan las gzhan pa yin / /zhes bya ba la sogs pa ste/ /blo la yod pa'i don de dag kyang gzhan las ldog pa nyid du snang ba'i phyir ro/ /gal te sgras dngos po'i cha 'ga' zhig kyang mi rtogs pa ma yin nam/ de ji ltar slob dpon gyis don gzhan las ldog pa'i dngos po'i cha 'ga' zhig rtogs par 'gyur zhes bshad ce na/ de'i phyir/ don gzhan las ni ldog pa yis/ /zhes bya ba la sogs pa smos so/ /'on te gzugs brnyan ni blo'i chos yin pa'i phyir ji ltar dngos po'i cha nyid du 'thad ce na/ don gzhan las ni zhes bya ba la sogs pa smos te/ don gzhan la ldog pa'i dngos po mthong ba rig pa'i phyir dang / don gzhan ldog pa'i dngos po de la 'khrul pas de'i bdag nyid du sgro btags pa'i phyir/ gzugs brnyan de nyid nye bar sgro btags nas dngos po'i cha zhes bstan to/ /'di yang don gzhan las ldog pas zhes gsungs pa'i don du sbyar ba'i phyir/ rgyu'i don na ma zhes bya ba la sogs pa smos te/ snga ma bzhin du zhes bya ba ni ji ltar don gzhan las ldog pa'i khyad par brjod do zhes bya ba 'dir/ dngos gang gzhan las gzhan pa yi / /zhes bya ba la sogs pas bstan pa de bzhin du 'dir yang sbyar bar bya'o zhes byi ba'i don to/ /yang na 'di thams cad du de lta bur gyur pa'i mtshan nyid gsum pa yin no zhes ston pa ni bdag nyid des zhes bya ba'o/ /'on te don gzhan las ldog pa'i phyi rol gyi dngos po'i chos ma yin nam de ji ltar gzugs brnyan rtogs pa'i rgyu'i dngos po'am/ byed pa'i dngos por 'gyur zhe na/ de'i phyir/ gal te rigs mi mthun las dngos/ /zhes bya ba la sogs pa smos te/ gal te dngos po rigs mi mthun pa'i dngos po las ldog par 'gyur na de'i tshe/ de ste gzugs brnyan gyi bdag nyid de/ de bzhin te rigs mi mthun pa las ldog pa'i dngos po'i bdag nyid du mi 'gyur na / /de lta bas na don gzhan las ldog pa'i dngos po'i byed pa'i dngos po'i rig pa yin no snyam du bsams pa'o/ /gzhan gyi ngo bo'i khyad par ni/ /mi 'dra'i shes pa byed pa min/ /zhes bya ba la sogs pa la/ ba lang min pas ldog gzhan nyid/ /ces bya ba la sogs pa smos te/ gal te gzhan las ldog pa med pa'i ngo bo dngos po'i khyad par nyid du mngon par 'dod par gyur na/ de'i tshe sun 'byin pa 'di thams cad 'thad pa yin na/ ji srid du gzhan las ldog pa dngos po'i khyad par nyid du nye bar len pa yin te/ des na khyad par can khyad par dang rjes su mthun pa nyid kyi blor 'gyur ba nyid yin no/ /'di ltar ba lang ma yin pa las ldog pa'i ba lang du brjod pa gang yin pa de rta la sogs pa las gzhan pa nyid kyi ba lang gang yin pa ni de'i rang bzhin nyid yin gyi gzhan ni ma yin no/ /de lta yin dang gang yang khyad par gzhan spangs pa tsam gzhan shes par 'dod pa la/ 'di tha dad pas ba lang ma yin pa las ldog pa'i ba lang zhes brjod pa de lta na yang don dam par de ba lang de'i bdag nyid du rtogs pa kho na yin te/ dper na gzhan nyid bzhin no/ /gzhan nyid ces bya ba gzhan pa'i dngos po las gzhan ni ma yin gyi 'on kyang de nyid yin te de lta ma yin na dngos po de de las gzhan du 'grub par mi 'gyur ro/ /de ni ste de las khyad par gyi dngos po yin na yang gzhan las ldog pa ni khyad par can la dngos po ni blor 'gyur ba nyid yin no/ /'di snyam du 'jig rten na khyad par can la khyad par tha mi dad par grags te/ dper na skyes bu dang dbyig pa bzhin no/ ldog pa yang dngos po yin na/ des na 'di ji ltar 'di de'i khyad par du rigs snyam du sems na/ tha dad pa med na yang zhes bya ba la sogs pa smos te/ don dam par 'ga' zhig gi khyad par 'ga' yang rigs pa ma yin te/ phan 'dogs par byed pa ma yin pa ni khyad par nyid du 'gyur ro/ /phan 'dogs par byed pa nyid du khas len par byed pa na yang 'bras bu'i dus na rgyu mi gnas pa'i phyir dus cig car 'byung ba ma yin pa ni khyad par dang khyad par can gyi dngos por rigs pa ma yin no/ /dus cig car 'byung na yang de'i tshe bdag nyid thams cad yongs su rdzogs pa'i phyir/ phan tshun phan 'dogs par byed pa med pas khyad par dang khyad par can gyi dngos po'i rigs pa ma yin no/ /de ltar na dngos po thams cad rang rang gi ngo bo la gnas pa nyid kyis lcags kyi thur ma dang mtshungs pa'i phyir/ 'di dag rtog pas bsre bar byed pa 'ba' zhig tu zad do/ /des na gal te yang don dam par rtog pa dang de dang ldan pa tha mi dad pa de lta na yang rtags bkod pa'i tha dad pa la brten nas khyad par can dang khyad par gyi dngos por 'gyur ba yin no/ /gang yang / gang tshe gsal ba rnams sgra yi/ / brjod bya min phyir gsal bya min/ /zhes bya ba la sogs pa smras pa de la snang ba yang zhes bya ba la sogs pa smos te/ gsal ba rnams brjod par bya ba ma yin pa'i phyir zhes bya ba ma grub ste 'di ltar kho bo cag gis gsal ba rnams brjod par bya ba ma yin par brjod pa gang yin pa de ni don dam pa bsams pa na yin gyi kun rdzob tu yang ma yin no/ /kun rdzob tu ni ma brtags na nyams dga' ba nyid kyis gsal ba rnams nyid brjod par bya ba nyid yin par grags pa'i phyir gtan tshigs ma grub pa yin no/ /snang ba ni phyi rol te rang gi mtshan nyid kyi bdag nyid do/ /brtags pa ni rnam par rtog pa'i shes pa la gnas pa'i snang ba'o/ /ci ste don dam par brjod par bya ba ma yin pa nyid gtan tshigs nyid du khas len par byed na/ de'i tshe gsal ba rnams kyi gsal bar bya ba nyid kyang don dam par mi 'dod pas de'i phyir grub pa la bsgrub pa yin no zhes ston pa ni/ de nyid du na zhes bya ba la sogs pa'o/ /de ltar zhes bya ba la sogs pas gtan tshigs ma grub pa nyid mjug sdud par byed do/ /gang yang / de'i tshe spyi ni gsal bya nyid/ /de ni gsal bya'i dngos po nyid/ /ces smras pa de la yang / bsal bar bya ba yin pa'i phyir zhes bya ba'i gtan tshigs 'di ma grub pa dang / ma nges pa nyid yin no zhes ston pa ni spyi ni zhes bya ba la sogs pa smos te/ sel ba ma yin te zhes bya ba ni bsal ba rnams kyi sel ba bstan zin pa'i phyir ro/ /sel ba yang dngos po nyid ma yin zhes bya ba ni bsgrub par bya ba las bzlog pa la gtan tshigs gnod pa can gyi tshad ma med pa'i phyir ro zhes bstan pa yin no/ /gang yang / med pa rnams ni gsal bya min/ /zhes bya ba la sogs pa smras pa de la/ de ltar med pa zhes bya ba la sogs pa smos te/ gang gis med pa'i ngo bo nyid dor bar bya bar 'gyur ba med pa ma yin no zhes bya ba de lta bu'i med pa gsal bar bya ba ma yin no/ /'o na ci zhe na/ dngos po gang yin pa de bsgrub pa'i ngo bo yin pa'i phyir med pa'i ngo bos dben par gnas pas shugs kyis med pa de gsal bar bya ba nyid du 'dod do/ /'di nyid gsal por bya ba'i phyir/ /gang zhig gang gi zhes bya ba la sogs pa smos so/ /de sel ba na zhes bya ba ni med pa de nyid sel ba na dngos po nyid du 'gyur ba ma yin no/ /'dir gnyi ga'i phyogs la grub pa'i dpe bstan pa'i sgo nas ma nges pa nyid bsal bar bya ba'i phyir/ rang bzhin dbang phyug ces bya ba la sogs pa smos te/ 'di ltar khyed cag spyod pa pa rnams kyis kyang rang bzhin dang dbang phyug dang dus la sogs pas dngos po rnams byas pa nyid du 'dod do/ /de 'gegs pa yin na yang ji ltar dngos po nyid du mi 'gyur ba bzhin du med pa bsal bar bya ba nyid yin na yang dngos po nyid du 'gyur ba ma yin pa'i phyir ma nges so/ /de la med pa'i dngos po nyid ces bya ba ni ngal ba chen por 'gyur zhes smras pa de yang ma nges par bstan pa 'di nyid kyis bsal ba yin no zhes ston pa ni/ de'i phyir med pa'i dngos po nyid / /ces bya ba la sogs pa smos te / de ma grub na yod pa med/ /med pa'ang grub pa ma yin no/ /zhes bya ba 'di la/ de grub na yang yod ces bya ba la sogs pa smos te/ dngos po med pa de ji skad du bshad pa'i rnam par grub pa na med pa'i yod pa grub pa nyid yin te/ de ni rang rang gi ngo bo la gnas pa'i phyir ro/ /gang yang dngos po med pa ji skad du bshad pa'i rnam pas grub pa de kho na med pa'o zhes grub pa yin no/ /'di yang len gdab pa mtshungs pa'i phyir 'dir gsal ba yin no/ / da ni go rims ji lta ba bzhin du lan gdab pa'i phyir bshad pa/ de la/ med pa'i med pa gang yin pa/ /zhes bya ba la sogs pa gang smras pa/ de la dngos po nyid du 'gyur/ /zhes bya ba 'di mi 'dod par 'gyur ba ma yin te/ 'dod pa'i phyir ro/ /'di ltar ba lang ma yin ba'i ngo bo rta la sogs pa las ba lang gi dngos po'i khyad par gyi ngo bo nyid mi 'dra bar 'dod kyi/ med pa'i bdag nyid ni ma yin te/ des na dngos po nyid du 'gyur ro/ /ba lang ma yin pa las kyang ba lang mi 'dra bar 'dod pa'i phyir ba lang ma yin pa ba lang du thal bar mi 'gyur ro/ /gang yang / med la bag chags med pa'i phyir/ /zhes smras pa de ni ma grub pa dang ma nges pa yin no zhes bstan pa'i phyir/ dngos med yul lam zhes bya ba la sogs pa smos te/ dngos po med pa'i yul la sems pa med do zhes bya ba 'di ma grub ste/ 'di ltar sems pa ni btags pa'i gtam rgyud kyi yul dngos po med pa dngos po'i rnam par sgro btags pas 'jug pa yin te/ de yang don la rigs mthun pa'i rnam par rtog pa ma 'ongs pa bskyed par bya ba'i phyir/ mjug thogs kyi sems la bag chags 'jog pa nyid yin te/ gang gi phyir yang rgyud yongs su smin pa'i dbang gis sad par byed pa'i skyon bsgrubs nas rnam pa de lta bu'i sems pa skye ba yin la/ de sel ba rnams kyang phan tshun du tha dad pa dang yod pa'i ngo bo nyid rtogs pa'i dbang gis 'byung bar 'gyur ba'i phyir ma nges pa nyid yin no/ /yan lag gi don ni go sla ba'i phyir rnam par mi phye'o/ /gang yang / khyed kyi de yi rgyu mtshan can/ /sgra yi dbye bas rnyed ma yin/ /zhes smras pa de la/ ci 'dra'i zhes bya ba la sogs pa smos te/ ci 'dra'i zhes bya ba'i gzugs brnyan gyi bdag nyid de/ de yang gzugs brnyan gzhan las tha dad par gsal bar rab tu rig par bya ba yin pas de'i phyir rgyas par smras pa gang yin pa de thams cad 'brel pa med pa yin no snyam du bsams pa yin no/ /sel dag go bya go byed min/ /zhes bya ba la sogs pa'i sbyor ba la lan 'debs pa ni dngos po nyid du zhes bya ba la sogs pa'o/ /gal te dngos po med pa'i phyir/ /zhes bya ba spyir len par byed na de'i tshe gtan tshigs ma grub pa yin te/ gang gi phyir gzugs brnyan gyi bdag nyid kyi brjod par bya ba dang / rjod par byed pa'i sel ba dag 'khrul pas dngos po nyid kyi brjod byar nges pa'i phyir kun rdzob tu dngos po nyid yod pa kho na'o/ /ci ste don dam par dngos po med pa la brten nas gtan tshigs su brjod pa de'i tshe grub pa la bsgrub pa yin te/ kho bo cag gis don dam par brjod par bya ba dang rjod par byed pa cung zad 'dod pa ni ma yin no/ /'di nyid ston pa ni dam pa'i don du zhes bya ba la sogs pa smos so/ /khyab par byed pa dang bral phyir/ /zhes bya ba ni rang gi mtshan nyid skad cig ma nyid yin na yang brda dang tha snyad du phyin pa'i dus su khyab par byed pa nyid med pa'i phyir ro zhes bya ba'i don to/ /'di snyam du kho bo cag de kho na nyid kyi brjod par bya ba dang rjod par byed pa'i dngos po 'gog pa ni ma yin no/ /'o na ci zhe na/ sel ba dag gis te / de kho na nyid du dngos po med pa la brten nas sel ba dag ni kun rdzob nyid kyis go bar bya ba dang go bar byed pa 'gegs kyi yang dag pa pa ni ma yin no/ /des na gtan tshigs ma grub pa ma yin la/ dam bca' ba grub pa la bsgrub pa'i skyon du 'gyur ba yang ma yin no/ /gnyi ga yang kun rdzob dang de kho na nyid la brten na skyon 'di gnyis su 'gyur ba yin no zhe na/ de'i phyir de ni go bya go byed ces bya ba la sogs pa smos so/ /de ltar yin na gtan tshigs ma nges pa nyid yin no/ /rtogs pas sbyar ba'i don rgyal po dkar chen la sogs pa dang / de rjod par byed pa'i sgra dag la/ don dam par dngos po nyid med na yang kun rdzob tu brjod bya dang rjod byed du mthong ba'i phyir ro/ /de ston pa ni rtogs pas sbyar ba zhes bya ba la sogs pa'o/ /'di snyam du rgyal po dkar chen la sogs pa de la yang don dam spyi'i brjod par bya ba dang rjod par byed pa yod pa nyid yin te/ des na de dag gis 'khrul pa ma yin no snyam du dogs pa bsu nas/ de dag brjod bya'i zhes bya ba la sogs pa smos te/ spyi ni spyi rtag par rgyas par bkag zin pa'i phyir/ de dag la brjod par bya ba'am rjod par byed pa yod pa ma yin pa'i phyir gtan tshigs ma nges pa ma yin no/ /de'i zhes bya ba ni spyi'o/ /rjod byed ces bya ba 'dir yang spyi zhes rnal ma dang sbyar ro/ /'di snyam du gal te yang de la dngos por gyur pa'i brjod bya med mod/ rjod par byed pa ni dkar chen la sogs pa'i sgra rang gi mtshan nyid yod pa nyid do snyam du sems na/ de'i phyir sgra'i zhes bya ba la sogs pa smos te/ dngos po thams cad la khyab pa'i skad cig ma 'jig pa bsgrubs zin pa'i phyir/ sgra rang gi mtshan nyid rjod par byed pa nyid du rigs pa ma yin te/ skad cig 'jig pa nyid kyis de la brda byed pa mi srid pa'i phyir dang / tha snyad kyi dus su rjes su mi 'gro ba'i phyir ro zhes bstan zin to/ /de'i phyir zhes bya ba la sogs pas mjug sdud par byed do/ /de gnyis zhes bya ba'i brjod par bya ba dang rjod par byed pa'o/ / gzugs brnyan la sogs pa zhes bya ba'i sgra ni shes pa rnam pa med par khas len na yang / rnam par shes pa don med pa la don du zhen pa'i ngo bo nyid rang la yod pa'i nges pa gzhan cung zad cig gdon mi za bar khas blang par bya dgos so zhes bstan pa yin no/ /de dag rnams la zhes bya ba ni rtog pas bkod pa'i don dag la'o/ /de'i zhes bya ba ni de'i phyir ram de'i gtan tshigs 'khrul pa nyid ni de'i 'khrul pa nyid do/ /gang zhig bsgrub pa'i ngo bo yang sgra'i don du khas mi len zhes bya ba 'di la/ sgrub pa'i ngo bo zhes bya ba la sogs pa smos te/ gang gi mi 'dod par thal bar sgrub pa 'di byed pa kho bo cag thams cad kyis thams cad du sgrub pa'i ngo bo sgra'i don du khas mi len pa ni ma yin no/ /gang gi phyir sgra las don nges pa'i shes pa skye ba'i phyir kun rdzob tu sgrub pa'i ngo bo sgra'i don du mngon par 'dod pa nyid yin la/ de kho na nyid du ni sgra rnams la brjod par bya ba cung zad kyang yod pa ma yin pa'i phyir de kho na nyid kyi sgrub pa'i ngo bo 'gegs pa yin gyi sgrub pa'i ngo bo sgra'i don du 'dod pa'i phyir/ /kun rdzob pa ni ma yin no/ /rang don brjod na ste sgrub pa'i ngo bo yin /gzhan las ldog pa shugs kyis rtogs pa'i phyir/ sgrub pa sngon du 'gro ba'i ldog pa ni rigs pa nyid yin no/ / gal te 'di snyam du sgrub pa'i ngo bo sgra'i don du khas len par byed na/ 'o na gtan tshigs kyi sgor mtshan nyid mdzad pa sgrub pa mi srid do zhes bstan pa de ci ltar zhe na/ de'i phyir/ spyi la sogs pa mi srid phyir/ /zhes bya ba la sogs pa smos te/ don dam par spyi dang rang gi mtshan nyid la sogs pa'i brjod par bya ba dang rjod par byed pa mi srid pa'i phyir/ sgra rnams dang rnam par rtog pa rnams dngos su ste/ don dam par yul med pa nyid kyi phyir don dam pa la brten nas slob dpon gyis sgrub pa mi srid par bstan to zhes bya ba mi 'gal lo/ /gal te gzhan sel ba tsam zhig /brjod bya nyid du khas len na/ /zhes bya ba la sogs pa la/ ut+pal sngon po zhes bya ba la sogs pa smos te/ sngon po ma yin pa dang ut+pal ma yin pa las ldog pa'i don gyi rnam pa gcig nyid gnyi ga'i ngo bo'i gzugs brnyan ut+pal sngon po sgra skyed kyi med pa tsam ni ma yin no/ /de'i phyir zhen pa'i dbang gis ut+pal sngon po la sogs sgra rnams kyis sna tshogs pa'i don nges pa nyid yin pas de'i ngo bor gzhi mthun pa nyid 'thad pa yin no/ /ci ste gzhan sel ldan dngos po / /brjod bya yin zhes rjod byed na/ /zhes gang smras pa de la/ nged kyi zhes bya ba la sogs pa smos te/ gal te ldog pa'i dngos po la ldog pa zhes bya ba gzhan yin par gyur na/ de'i tshe de dang ldan pa'i phyogs la brjod pa'i skyon du thal bar 'gyur na/ ci srid du kho bo cag gis gzhan las ldog pa'i dngos po las ldog pa gzhan ni ma yin gyi 'on kyang ldog pa'i dngos po nyid khyad par gzhan spangs pa tsam shes par 'dod pa la de skad du brjod pa yin no/ /des na ji ltar gtsor rigs brjod par bya ba yin na de dang ldan ba gzhan gyi dbang gis brjod pa'i phyir der rtogs pa'i khyad par ma 'phags pas de dag dang lhan cig gzhi mthun pa la sogs pa med par thal bar 'gyur ba brjod pa de ltar sel ba'i phyogs la mi 'jug ste/ gzhan sel ba dang ldan pa tha dad pa ma brjod pa'i phyir ro/ /de ston pa ni/ des ni gzhan dbang nyes pa sogs/ /zhes bya ba la sogs pa'o/ /des na zhes bya ba ni de'i phyir ro/ /blo gros bzang pos gsungs pa yis / /zhes bya ba ni blo gros rnam par dag pa'i slob dpon phyogs kyi glang pos gsungs pa'i gzhan sel ba'i sgra'i don la'o/ /'di la rgyu smras pa/ logs min phyir zhes bya ba la gzhan sel ba'i mtshan nyid kyi sgra'i don te gzhan sel ba'i dngos po las logs shig pa ma yin pa'i phyir te/ tha mi dad pa'i phyir zhes bya ba'i tha tshig go/ /ji ltar gzhi mthun pa la sogs pa mi 'gal ba de ltar bstan pa'i phyir/ sngon po'i sgra sogs zhes bya ba la sogs pa smos te/ 'di ltar sngon po zhes brjod pa na ser po la sogs pa las ldog pa'i dngos por nges pa'i bung ba dang khu byug dang mig sman la sogs pa la the tshom za bzhin pa'i ngo bo'i rnam par rtog pa'i gzugs brnyan skye la de yang ut+pala'i sgras khu byug la sogs pa las rnam par bcad nas ut+pal ma yin pa las ldog pa'i yul can du rnam par 'jog pa ni nges pa'i bdag nyid du rtogs pa yin no/ /des na phan tshun du ji skad du bshad pa'i blo'i gzugs brnyan la ltos nas rnam par gcad par bya ba dang gcod par byed pa'i dngos po yin pa'i phyir sngon po dang ut+pa la'i sgra dag khyad par dang khyad par can gyi dngos por mi 'gal lo/ /gnyi gas kyang sngon po ma yin pa dang ut+pal ma yin pa las ldog pa'i gzugs brnyan gyi bdag nyid kyis dngos po gcig ston par byed pa'i phyir/ don gcig la 'jug pa nyid kyi gzhi mthun pa nyid du 'gyur ro zhes bya ba ni spyi'i don to/ /yan lag gi don brjod par bya ste/ yid gnyis kyi zhes bya ba ni gnas pa mi rnyed pa ste/ the tshom gyi ngo bo zhes bya ba'i tha tshig go/ /snyan sgrogs zhes bya ba ni khu byug gi rnam grangs so/ /lhag ma ni go bar zad do/ /'di snyam du kho bo cag gi phyogs la yang gzhi mthun pa la sogs pa mi 'gal ba kho na'o snyam du sems na/ de'i phyir gzhan gyi phyogs la zhes bya ba la sogs pa smos te/ rnam par gzhag pa zhes bya ba ni gzhi mthun pa la sogs pa'i rnam par gzhag pa'o/ /ji ltar 'thad par dka' zhe na/ 'di ltar zhes bya ba la sogs pa smos te/ sgrub pa sgra'i don yin par smra ba'i phyogs la sngon po la sogs pa'i sgra gcig nyid kyis ut+pal sogs pa'i rang gi mtshan nyid brjod pa na/ ci ut+pal yin nam 'on te mig sman yin zhes bya ba de lta bu khyad par gzhan la mi shes par 'gyur te/ dngos po de'i bdag nyid thams cad kyis bstan pa'i phyir ro / /gcig la gcig gi tshe rtog pa po gcig la ltos nas shes pa dang mi shes pa nyid 'gal ba'i phyir ro/ /de ston pa ni/ ci phyir ldog gzhan la blo med/ /ces bya ba la blo med pa ni mi shes pa'am/ blo gros dman pa'i blo med pa ste/ the tshom dang phyin ci log ces bya ba'i don to/ /de lta yin dang the tshom dang phyin ci log med pa'i phyir/ ut+pal la sogs pa'i sgra gzhan la sbyor ba pos sbyor bar 'dod par mi 'gyur ro zhes bya ba de ston pa ni/ gang gi don du zhes bya ba la sogs pa ste/ gang gi don du zhes bya ba ni blo med pa gang zhig bzlog pa'i don du zhes bya ba'i don to/ /ci ste yang dngos po de phyogs gcig gis brjod kyi bdag nyid thams cad kyis ni ma yin no/ /des na rang bzhin gzhan brjod pa'i phyir sgra gzhan brtsal bar bya ba nyid yin no snyam na/ de'i phyir gal te rnam kun zhes bya ba la sogs pa smos te/ gang gis phyogs gcig brjod par 'gyur ba dngos po gcig la phyogs gcig yod pa ni ma yin no/ /gcig nyid dang du ma nyid dag ni phan tshun spangs te gnas pa'i mtshan nyid yin pa'i phyir ro/ /de lta yin dang khyed kyi dngos po phyogs gcig pa ji snyed pa de snyed bstan pa kho nar zad pas gcig du mar 'grub par mi 'gyur ro/ /'di snyam du sngon po'i sgras rdzas brjod pa ma yin no/ /'o na ci zhe na/ sngon po zhes bya ba'i yon tan nam/ de dang 'du ba'i sngon po nyid kyi rigs yin la/ ut+pa la'i sgras kyang ut+pal nyid kyi rigs kho na brjod kyi rdzas ni ma yin no/ /des na don tha dad pa brjod pa'i phyir/ ut+pal la sogs pa'i sgra gzhan 'dod par rigs nyid do snyam du sems na/ /ut+pal rigs zhes bya ba la sogs pa smos te/ ut+pal rigs gzhan zhes bya ba 'di ni gzhan yang yin la ut+pa la'i rigs kyang yin no zhes bsdu'o/ /des na zhes bya ba ni nges par bya'o/ /ut+pala'i sgra las zhes bya ba lnga pa'i sgra can no/ /phyogs 'di la gzhi mthun pa mi 'thad pa ches bsal ba yin te/ ba ku la dang ut+pa la'i sgra dag bzhin du don gcig la sngon po dang ut+pala'i sgra dag 'jug pa med pa'i phyir ro/ /ut+pal ba ku la zhes bya bar 'gyur ba ni ma yin no/ /'di snyam du gal te yang sngon po'i sgras rigs dang yon tan dang bye brag rjod par byed pa de lta na yang de'i sgo nas sngon po'i yon tan dang de'i rigs dag dang 'brel pa'i rdzas kyang des brjod pa yin la/ de bzhin du de ut+pala'i sgras kyang rigs kyi sgo nas rdzas de nyid brjod pa yin pas des na de dag don gcig la 'jug pa srid pa'i phyir gzhi mthun par 'gyur bas ba ku la dang ut+pala'i sgra dag ni ma yin no snyam du sems na/ de'i phyir gal te zhes bya ba la sogs pa smos te/ sngon po zhes bya ba'i yon tan yang yin la sngon po nyid ces bya ba'i rigs kyang yin pas yon tan de'i rigs te/ de dag dang 'brel pa zhes tshig rnam par sbyar ro/ ut+pal sgra don med par 'gyur zhes bya ba ni rdzas de sngon po'i sgra nyid kyis bstan pa'i phyir ro/ /'di nyid ston pa ni/ gang nyid de dag ces bya ba la sogs pa ste/ de dag ces bya ba ni yon tan dang de'i rigs dag go/ /'di snyam du gal te yang sngon po'i sgra yon tan de'i rigs dang ldan pa'i rdzas brjod pa de lta na yang sngon po de don gcig la 'jug pa mthong ba'i phyir rtog pa po'i blo ut+pala'i don la nges pa'i ngo bor skye ba ma yin te/ khu byug la sogs pa yang sngon po yin pa'i phyir ro/ /de'i phyir don gzhan du the tshom zab bcad pa'i don du ut+pala'i sgra sbyor ba don dang bcas pa kho na'o snyam du sems na/ de ni yang dag pa ma yin te/ skabs kyi don mi shes pa nyid kyis brjod pa'i phyir ro/ /sgra'i don sgrub pa yin pa'i phyir gsal ba gzhi mthun pa la sogs pa mi 'thad do zhes bya ba 'dir skabs yin no/ /gal te ut+pala'i sgra the tshom bcad pa'i don du brjod kyi rdzas rtogs par bya ba'i phyir ni ma yin no / /'o na sgrub pa sgra'i don du mi 'gyur te/ ut+pa la'i sgra 'khrul par sgro btags pa'i rnam par bcad pa tsam nyid ston par byed pa'i phyir ro/ /sngon po'i sgras ut+pal la sogs pa'i rdzas brjod kyi / yang rtogs pa po de res pa mi skye'o zhes bya ba 'di ni phan tshun 'gal ba brjod pa yin no/ /gang la the tshom skye ba de ni sgra'i don du rigs pa ma yin te/ ha cang thal bar 'gyur ba'i phyir ro/ /nges par yul du bya ba'i dngos po la ni the tshom gyi go skabs rnyed pa yang ma yin te/ nges pa dang sgro 'dogs pa'i yid ni gnod par bya ba dang gnod par byed pa'i dngos po yin pa'i phyir ro/ /'di snyam du gal te yang sngon po dang ut+pa la'i sgra dag ni don gcig la 'jug pa med mod/ de'i don yon tan dang rigs dag ni rdzas gcig la 'jug pa yod pa de'i don can 'di dag gzhi mthun pa nyid du 'gyur ro snyam du sems na/ 'di ni mi rigs te ha cang thal bar 'gyur ba'i phyir ro/ /de lta na ni gzugs dang ro'i sgra dag kyang gzhi mthun par 'gyur te/ de'i don gzugs dang ro dag ni sa la sogs pa'i rdzas gcig la 'jug pa'i phyir ro/ /gzhan yang ut+pal sngon po zhes bya ba'i don gcig gi yul can gyi blo der yang mi 'gyur te/ rdzas gcig la 'du ba'i yon tan dang rdzas kyi rigs dag ni gnyis kyi so sor brjod pa'i phyir ro/ /don gcig gi yul can gyi shes pa ma skyes pa na sgra dag gi gzhi mthun pa yod pa ma yin no/ /spros pas chog go/ /'di snyam du gang kho na sngon po'i yon tan dang de'i rigs dag dang 'brel pa'i dngos po de nyid ut+pa la'i sgras brjod pa ni ma yin no/ /'o na ci zhe na/ gzhan nyid yin te/ des na ut+pala'i sgra don med par mi 'gyur ro snyam du sems na/ de'i phyir yon tan de yi rigs/ /zhes bya ba la sogs pa smos te zhe na zhes bya ba 'dir bcad do/ /rten ni tha dad du yang 'gyur/ /zhes bya ba ni/ gzhi tha dad par 'gyur zhes bya ba'i don to/ /yang ci ste gal te yang rdzas de nyid sngon po'i sgras brjod cing ut+pa la'i sgras kyang yin sngon po'i sgras ni ut+pala'i rigs dang 'brel pa'i ngo bor rdzas brjod pa ni ma yin no/ /'o na ci zhe na/ sngon po'i yon tan dang de'i rigs dang 'brel pa'i ngo bo nyid kyis te/ des ni 'di'i sngon po dang ut+pal nyid kyis rigs dang 'brel pa'i ngo bo nyid brjod par 'dod nas ut+pa la'i sgra 'jug pa na don med par mi 'gyur ro zhes bya ba 'di dogs pa bsu nas len 'debs pa ni/ ci ste sngon po zhes bya ba la sogs pa smos te/ ci ste sngon po zhes bya ba'i sgra ut+pal nyid dang 'brel pa'i ngo bo nyid kyi yon tan dang de'i rigs dang 'brel pa'i rdzas mi brjod nas zhes 'brel te / de ni yang dag pa ma yin te/ gang gis sngon po dang de'i rigs dang 'brel pa'i ngo bo nyid brjod pa na ut+pal nyid kyi rigs dang 'brel pa'i ngo bo nyid kyis rdzas brjod par mi 'gyur ba sngon po'i yon tan dang de'i rigs dang 'brel pa'i ngo bo nyid las ut+pal nyid kyi rigs dang 'brel pa'i ngo bo nyid gzhan nyid ni ma yin te/ ci tsam du rdzas gcig la 'brel pa can nyid kyis ngo bo gnyi ga yang tha mi dad pa'i phyir ro/ /de bzhin du de dag kyang gcig nyid yin no zhes bya ba ni rigs pa ma yin te/ ngo bo gcig brjod pa na ngo bo gzhan ma brjod pa'i phyir ro/ /gzhan yang khas blangs nas kyang brjod de/ ut+pal nyid dang 'brel pa'i ngo bo nyid ni sngon po dang de'i rigs dang 'brel pa'i rang bzhin las gzhan nyid yin du chug mod/ de lta na yang ut+pa la'i sgra ni don med pa nyid yin te/ 'di ltar ut+pal dang 'brel pa'i dngos po'i cha gang yin pa de nyid sngon po'i yon tan dang de'i rigs dag gnyi ga dang 'brel gyi gzhan ni ma yin no/ /de yang cha med pa'i phyir bdag nyid thams cad kyi sngon po'i sgra nyid kyis brjod la/ nges pa'i bdag nyid kyi sgra las byung ba'i blos kyang yul du byas pa'i phyir gang zhig brjod pa'i don du ut+pa la'i sgra don dang bcas par 'gyur ba 'di'i rang gi ngo bo ma brjod pa gzhan ci zhig yod/ /'od byed pas smras pa/ cha med pa'i dngos po la bdag nyid thams cad kyis yul du byas kyi yul cha shas kyis ni ma yin no zhes bya ba'i rnam par rtog pa 'di 'jug pa ma yin te/ thams cad kyi sgra ni don du ma'i yul can yin pa'i phyir dang / gcig gi sgra ni cha shas la 'jug pa'i phyir ro zhes bya ba 'di dogs pa bsu nas len 'debs pa ni/ gal te zhes bya ba'o/ /cha shas las grol zhes bya ba ni cha med pa'i dngos po zhes bya ba'i don to/ /ma lus cha'i rnam rtog ces bya ba ni bdag nyid thams cad kyi yul du byas kyi phyogs gcig gis ni ma yin no zhes bya ba de lta bu ma lus pa dang cha dag gi rnam par rtog pa ni/ ma lus cha yi rnam rtog go/ /'di ni ngag gi don yongs su ma shes nas brjod pa yin te/ 'di ltar/ dang po nyid du sngon po'i sgras/ /bdag nyid thams cad kyis de bsal/ /zhes bya ba'i don 'di brjod par 'dod pa yin te de'i dngos po ci 'dra ba de 'dra ba nyid brjod pa yin gyi gang zhig brjod pa'i don du sngon po'i sgra sbyor bar byed pa de'i rang bzhin 'ga' zhig dor ba ni ma yin te dngos po de ni cha med pa'i phyir ro/ /de lta bas na 'di ni tshig gi don tsam ma yin no/ /de bzhin du ji ltar ut+pala'i sgra don med pa de ltar sgra'i mi rtag pa la sogs pa gzhan dag kyang sbyor ba don med par 'gyur ro/ /sbyor ba yin na yang rnam grangs pa nyid du 'gyur te/ shing dang rtsa ba mthun pa la sogs pa'i sgra bzhin no zhes bsgre bar bya ba'i phyir/ rnam pa 'di dag nyid kyis ni/ /zhes bya ba la sogs pa smos te/ brjod pa zhes bya ba ni sbyor ba'o/ /brjod pa zhes bya ba ni smra ba'o / /brjod na zhes bya ba ni smra ba'o/ /de ni/ gzhan du dngos po gcig pu la/ /sgra'am blo gcig gis khyab na/ /gzhan yul ma yin de yi phyir/ /rnam grangs pa ni nyid du 'gyur/ /zhes bshad do/ /'di snyam du khyed kyi phyogs la yang skad cig gis brjod pa'i dngos po'i khyad par la the tshom dang phyin ci log med par thal ba dang / sgra gzhan mi 'jug par thal bar ci'i phyir mi 'gyur snyam du sems na/ de'i phyir kho bo cag ni zhes bya ba la sogs pa smos so/ /de dag gnyis kyis zhes bya ba ni sgra dang shes pa de dag gis so/ /phyi ma zhes bya ba ni dus phyis so/ /ci ste sgra'i don du kun rdzob pa la yang ci'i phyir gzhi mthun pa la sogs pa med pa'i skyon 'di 'byung bar mi 'gyur zhe na/ de'i phyir sgra yis rnam rtog ces bya ba la sogs pa smos te/ sngon po'i sgras ches dang por sngon po ma yin pa'i dngos po las ldog pa'i ut+pal la sogs pa la yid gnyis kyi ngo bo nyid kyis de dag mi spong ba phyi rol gyi ngo bor zhen pa'i rnam par rtog pa'i gzugs brnyan skyed par byed la/ yang ut+pa la'i sgras de nyid ut+pal ma yin pa las ldog pa'i phyi rol gyi dngos po dang gcig gi ngo bo sgro 'dogs pa skye'o/ /de'i phyir rigs pa des sngon po ma yin pa dang ut+pal ma yin pa las ldog pa'i phyi rol dang gcig gi ngo bor zhen pa'i 'khrul pa'i rnam par rtog pa'i gzugs brnyan skyed pa'i phyir de'i ngor byas nas kun rdzob tu gzhi mthun pa la sogs par rigs pa nyid yin no/ /ci'i phyir don dam par mi rigs pa yin zhe na/ dam pa'i don du zhes bya ba la sogs pa smos so/ /rtags dang grangs sogs 'brel pa ni/ sel ba la ni yod ma yin/ /zhes gang smras pa 'di ni/ rtags dang grangs sogs zhes bya ba la sogs pa smos te/ rtags dang grangs la sogs pa 'di dag ni dngos po'i chos nyid du ma grub ste/ rang dbang can mi 'dod pas 'dod pa bkod pa'i brda tsam las byung ba'i phyir ro/ /bsal ba rnams la yang zhes bya ba'i yang gi sgra las sel ba yang ngo / /sbyor ba ni gang zhig gang gi rjes su 'gro ba dang ldog pa'i rjes su mi byed pa de ni de'i chos can ma yin te/ me'i grang ba nyid bzhin no/ /rtags dang grangs la sogs pa gang yang dngos po'i rjes su 'gro ba dang ldog pa'i rjes su mi byed do zhes bya ba ni khyab par byed pa mi dmigs pa'o/ /gtan tshigs 'di ma grub pa yang ma yin no zhes bstan pa'i phyir/ mtha' ma 'gram pa dogs rnams kyis/ /zhes bya ba la sogs pa smos te/ gal te rtags dngos por gtogs pa'i chos yin na de'i tshe 'gram zhes bya ba 'di dngos po gcig la 'gram pa dang / mtha' ma dang dogs zhes bya ba'i rtags gsum dang ldan pa'i sgra 'jug pas dngos po gcig ngo bo gsum du thal bar 'gyur ba'i phyir ro/ /gcig la pho dang mo dang ma ning zhes bya ba'i rang bzhin gsum rigs pa yang ma yin te/ gcig nyid nyams par thal bar 'gyur ba'i phyir ro/ /'gal ba'i chos dang ldan pa yang gcig nyid ni sna tshogs thams cad gcig nyid du 'gyur te/ de ltar yin dang lhan cig skye ba dang 'jig par thal bar 'gyur ro/ /gzhan yang dngos po thams cad sgra gcig gis sam/ sgra gzhan gyis rtags gsum ston par mthong ba'i phyir/ de'i yul can gyi shes pa thams cad nor bu gzi la sogs pa bzhin du khra bor snang bar thal bar 'gyur ro/ /yang ci ste dngos po thams cad rtags gsum dang ldan pa yin na yang ston pa po ngo bo gang zhig brjod par 'dod pa de tsam zhig brjod par 'dod pa'i dbang gis snang ba shes pa 'byung bar 'gyur gyi/ khra bor snang ba ni ma yin no snyam na/ de'i phyir/ brjod 'dod rjes su byed na yang / / zhes bya ba la sogs pa smos so/ /brjod par 'dod pa'i rjes su byed pa nyid yin na yang ste/ shes pa rnams kyis zhes bya ba ni lhag ma'o/ /gal te brjod par 'dod pas gcig gi ngo bo la sems pa gcig gi ngo bor 'gyur ro zhes khas len par byed na/ de'i tshe shes pa de dag dngos po gsum gyi bdag nyid kyi yul can du mi 'gyur te/ de'i rnam pas stong pa'i phyir mig gi rnam par shes pa'i yul du sgra bzhin no/ /de'i dbang gis zhes bya ba ni brjod par 'dod pa'i dbang gis so/ /gang yang 'di snyam du 'jig pa dang / skye ba dang gnas pa rnams la go rims bzhin du mo dang pho dang ma ning nyid du rnam par gzhag pa zhes bya ba de yang rigs pa ma yin no zhes bstan pa'i phyir/ gal te gnas dang zhes bya ba la sogs pa smos te/ gnas par gyur na zhes bya ba 'dir bcad do/ /gal te gnas pa la sogs pa la brten pa'i rtags rnams gnas pa ste/ rtags rnam par gzhag par 'gyur na de'i tshe 'gram dang lu gu rgyud la sogs pa bzhin du dngos po thams cad la rnam par ma phye bar rtags gsum du 'gyur te/ thams cad la 'gram la sogs pa bzhin du gnas pa la sogs pa yod pa'i phyir ro/ /de lta ma yin na 'gram pa dang mtha' ma dang dogs zhes bya ba la sogs pa la yang rtags gsum du mi 'gyur te/ khyad par med pa'i phyir ro/ /de lta bas na mtshan nyid ha cang thal ba'i skyon yin no/ /'khrul pa mthong ba'i phyir yang ma khyab pa yin no zhes bstan pa'i phyir/ med pa zhes bya ba la sogs pa smos te/ ri bong gi rwa la sogs pa med pa'i ngo bo dag la gnas pa la sogs pa med na yang med pa dang nye bar brjod pa med pa dang gsol ba zhes bya ba la sogs pa'i sgra dag gis rtags gsum ston par mthong ba'i phyir ro/ /rtags rnam par gzhag pa ma khyab pa ma yin pa yin no/ /'di las kyang ma khyab pa ma yin te/ gnas pa la sogs pa de dag nyid re re la rtags gsum dang ldan pa'i sgra 'jug par mthong ba'i phyir te/ 'di ltar skye ba ni 'byung ba la brjod do/ /'jig pa na nyams pa'o/ /bdag gi rang gi ngo bo ni gnas pa'o/ /de la skye ba dang gnas pa dang 'jig pa med pa'i phyir/ ji ltar skyed pa dang 'byung ba dang skye ba zhes bya ba la sogs pa mo dang pho dang ma ning gi rtags kyi sgra 'jug par 'gyur ro/ /de bzhin du 'jig pa la gnas pa dang skye ba dag med pa'i phyir ji ltar 'jig pa dang zhig pa dang nyams pa zhes bya ba la sogs pa'i sgra dag gis bstan par 'gyur/ yang gi sgras ni 'jig pa zhes bya ba yang rang gi sgras ji ltar ston zhes ston pa yin no/ /de bzhin du gnas pa la 'jig pa dang skye ba dag med pa'i phyir gnas pa dang rang bzhin la sogs pa'i sgra dag gis gnas pa de rgyu gang gis zhes brjod par bya dgos so/ /ci ste yang gnas pa la sogs pa 'di dag phan tshun rnam par dbye ba med pa'i ngo bo yin pa'i phyir 'di dag re re la rtags gsum dang ldan pa nyid du 'gyur ro snyam na/ de'i phyir/ ci ste 'di dag dbyer med pa'i/ /zhes bya ba la sogs pa smos te/ gal te 'di dag phan tshun du dbye ba med pa'i ngo bor gyur na de'i tshe don dam par rtags gcig kho nar 'gyur gyi rtags gsum ni ma yin no/ /gzhan dag na re gal te mo la sogs pa spyi dang khyad par rnams ni ba lang nyid la sogs pa bzhin no zhes zer ba de la/ gal te mo la sogs pa zhes bya ba la sogs pa smos te/ sngar spyi brtag par spyi dang bye brag bsal zin pa'i phyir ro/ /de'i ngo bo'i mo nyid la sogs pa mi srid pa'i phyir/ mtshan nyid mi srid pa yin no/ /gzhan yang spyi dang bye brag de dag nyid la spyi dang bye brag gzhan med na yang rigs dang yod pa dang spyi zhes bya ba la sogs pa'i mo dang pho dang ma ning gi rtags kyi sgra 'jug par mthong ba'i phyir mtshan nyid ma khyab pa ma yin no zhes ston pa ni/ rigs dang yod dang zhes bya ba la sogs pa'o/ /spyi rnams la yang gzhan pa yi/ /spyi ni rigs ba ma yin no/ /zhes bya ba ni spyi med pa yin no zhes bya ba ni grub pa'i mtha' yin pa'i phyir ro/ /'di yang bye brag pa'i grub pa'i mtha' la brten nas brjod pa yin gyi/ gang gi tshe brda sprod pa pa rnams kyi spyi la yang spyi gzhan yod do zhes brjod do / /ji skad du/ don gyi rigs ni brjod na yang / /thams cad rigs ni rjod byed yin/ /gang phyir dngos rnams bya ba yi/ /mtshan nyid du ni gnas pa yin/ /zhes bshad do/ /bstan bcos gzhan du mthong ba'i rigs rnam par gzhag pa'i nges pa ni brda sprod pa rnams kyis khas blang bar bya ba ma yin te/ rigs rnams ni shes pa dang brjod pa'i rjes su 'gro bar bya ba'i 'bras bus dpags pa'i ngo bo yin te/ de dag la nges pa 'ga' yang yod pa ma yin no/ /des na ji skad du bshad pa'i 'bras bu ma mthong ba'i phyir spyi'i rten gyi rigs ni rigs mthun pa zhes bya ba'i sgra'i rgyu mtshan yin no zhes bya ba ni bya ba'i mtshan nyid can yin te/ brjod pa dang shes pa'i bya bas rnam par gzhag pa'i mtshan nyid can yin no zhes bya ba'i don to/ /spyi gsal ba yang de 'dra ba de dag gsal ba kho na yin zhes de ma thag pa'i skyon nyid yin no/ /thun mong ba'i skyon 'di yang bshad pa/ med pa dang zhes bya ba la sogs pa ste/ ri bong gi rwa la sogs pa med pa dag la rigs yod pa ma yin te/ de ni dngos po'i chos yin pa'i phyir ro/ /des na de dag la med pa la sogs pa'i sgra sbyar bar mi 'gyur ro/ /de lta bas na rtags rnam par gzhag pa ni ma khyab pa can yin no/ /des na rtags gsum rnam par gzhag pa 'di ni 'dod pas sbyor ba'i brda tsam las byung ba nyid yin no zhes bya bar grub po/ /grangs kyang dngos por gtogs pa'i rjes su 'gro ba dang ldog pa'i rjes su byed pa med par bstan pa'i phyir grangs kyang zhes bya ba la sogs pa smos te/ grangs kyang brda las byung ba nyid yin gyi dngos po pa ni ma yin te/ btsun mo rnams la sogs pa dag la dngos po tha dad pa med kyang rjod par 'dod pa'i dbang gis nye bar rtogs pa'i phyir ro/ /de'i phyir gtan tshigs ma grub pa ma yin te/ 'di ltar mang po nyid dang gcig nyid la sogs pa'i grangs ni dngos por gtogs pa'i tha dad pa dang tha mi dad pa'i mtshan nyid can yin la/ de la chu rnams dang / btsun mo rnams dang / bye ma rnams dang / char pa rnams zhes bya ba la sogs pa la dngos po tha dad pa med par yang mang po nyid kyi grangs 'jug cing / de bzhin du nags dang / sa phug dang / 'gro ba dang grong khyer drug ces bya ba la sogs pa la don tha dad pa yod na yang gcig nyid kyi grangs su ston pa yin no/ /de'i phyir gtan tshigs ma grub pa ma yin la/ ma nges pa yang ma yin te/ thams cad thams cad kyi chos nyid du thal bar 'gyur ba'i phyir ro/ /mthun pa'i phyogs la yod pa'i phyir 'gal ba yang ma yin no/ /gal te gsal ba dang zhes bya ba la sogs pas gzhon nu ma len gyi lugs kyi gtan tshigs ma nges pa nyid du dogs pa bsu ba ste/ de smras pa btsun mo rnams la sogs pa'i sgra res 'ga' rigs la sbyor la/ res 'ga' ni gsal ba la sbyor te/ de la gang gi tshe rigs la yin pa de'i tshe gsal bar rtogs pa'i grangs blangs nas 'jug ste/ gsal ba rnams kyang bud med mang po yin no/ /gang gi tshe gsal ba la sbyor ba de'i tshe gsal ba de'i cha shas lag pa dang rkang pa la sogs pa mang po nyid kyi grangs blangs nas 'jug go/ /nags kyi sgras d+ha ba dang seng ldeng dang pa la shal sogs pa'i mtshan nyid kyi gsal ba rnams de dang 'du ba'i shing nyid kyi rigs su gtogs pa'i grangs kyi khyad par can ston par byed pa yin te/ des na nags zhes gcig gi tshig tu 'gyur te/ rigs su gtogs pa'i grangs gcig gi khyad par can gyi rdzas brjod pa'i phyir ro/ /yang na rta la sogs pa'i gsal ba la brten pa'i rigs nyid nags kyi sgras brjod do/ /des na gcig gi tshig tu 'gyur ba yin te/ rigs gcig yin pa'i phyir ro zhes so / /'on te rnam pa 'di yis ni/ /zhes bya ba la sogs pas len 'debs pa yin te/ ji skad du bshad pa'i rnam pa 'dis shing dang bum pa zhes bya ba la sogs pa gcig gi tshig thams cad nyams par 'gyur ba ni/ chad par 'gyur ba ste thams cad du rigs pa 'di mtshungs pa'i phyir ro/ /'di ltar 'di la yang de la rigs dang gsal ba la gal te shing la sogs pa sbyor ro zhes bya ba la sogs pa de lta bu brjod par nus so/ /ci ste shing la sogs pa gzhan du gsal ba dang yan lag rnams la grangs su brjod par 'dod pa med par 'dod na gal te de lta na dngos por rtogs pa'i rjes su 'gro ba la sogs pa'i rjes su byed pa'i grangs med de brjod par 'dod pa kho na'i rjes su 'gro ba dang ldog pa'i rjes su byed pa'i phyir ro/ /de lta yin dang brjod par 'dod pa de nyid btsun mo rnams zhes bya ba la sogs pa la mang po'i tshig 'di'i rgyu mtshan yin la rag mod tha dad pa med na yang dngos po gcig kyang mang po nyid kyi brjod par 'dod pas de'i phyir gtan tshigs ma grub pa ma yin no/ /gang yang / nags kyi sgra yang gsal mang po/ /rigs dang grangs kyi khyad par ram/ /zhes gang smras pa de la rigs la zhes bya ba la sogs pa smos te/ rigs la ni grangs yod pa ma yin te/ des ni rdzas la brten pa'i phyir ro/ / ci ste de ltar bye brag pa'i grub pa'i mtha' la mi brten pa de'i tshe grangs med pa na de ji ltar d+ha ba la sogs pa'i gsal ba khyad par can du 'grub par 'gyur/ 'di snyam du 'brel pa dang / 'brel pa las sam de dang 'brel pa las 'grub pa yin te/ 'di ltar gang gi tshe grangs rigs dang tha dad pa de'i tshe d+ha ba la sogs pa gsal ba rnams grangs gcig nyid dang 'brel pa'i rigs dang 'brel pa'i phyir/ brgyud pas de d+ha ba la sogs pa'i gsal ba khyad par du byed pa yin no/ /gang gi tshe grangs rigs dang tha mi dad pa nyid yin pa de'i tshe dngos su 'brel pa'i phyir/ des khyad par du byed pas de'i phyir rigs dang grangs kyi khyad par can du grub po/ /gal te de lta yin na zhes bya ba la sogs pas len 'debs par byed de/ gal te 'brel pa dang 'brel pa las sam de dang 'brel pa las d+ha ba la sogs pa'i gsal ba rnams la nags kyi sgra 'jug pa de'i tshe shing gcig kyang de ltar nags zhes brjod par 'gyur te/ 'jug pa'i rgyu mtshan yod pa'i phyir ro/ /'di ltar d+ha ba la sogs pa mang po rnams la yang rigs dang grangs dang 'brel pa nyid las nags zhes brjod kyi gzhan la ni ma yin no/ /'brel pa de yang shing gcig la yang yod pa'i phyir ci'i phyir de ltar rjod par mi byed/ yang na gsal ba mang po la brten pa rigs pa yin no zhe na/ de'i phyir gsal ba mang po zhes bya ba la sogs pa smos te/ phyogs 'di la yang shing gcig kyang nags zhes brjod par 'gyur te/ 'di ltar gsal ba mang po la brten pa'i rigs nags kyi sgras brjod pa gang yin pa de nyid d+ha ba la sogs pa'i gsal ba gcig la yang gnas te/ de ltar yin dang d+ha ba'i blo de'i rgyu mtshan thams cad du mtshungs pa'i phyir te de 'ang shing gcig la yang ci'i phyir nags kyi blor mi 'gyur/ rjes su 'gro dang ldog pa las/ /zhes bya ba la sogs pas gtan tshigs kyi don nye bar sdud par byed do/ /de 'khrul pa'i phyir zhes bya ba ni don de'i 'khrul pa'i phyir ro/ /rtags dang grangs sogs 'brel pa ni/ /sel ba la ni yod ma yin/ /zhes bya ba 'dir bya ba dang dus la sogs pa 'brel pa bstan pa ni/ de la bya ba dus sogs zhes bya ba la sogs pa smos te/ las dang bya ba la sogs pa'i tshig gis don dang po nyid du bkag pa na bya ba la sogs pa dang ldan pa bsal ba'i phyir 'di dag gi dngos po'i chos nyid kyang rigs pa ma yin no/ /brda las byung ba ni brda yis byas pa'o/ /yang na 'di dag dngos po'i chos nyid yin du chug mod/ de lta na yang gzugs brnyan gyi bdag nyid kyi sel ba 'khrul pas phyi rol gyi gsal ba'i bdag nyid du len pa'i phyir/ zhen pa'i dbang gis kyang bsal ba'i sgo nas rtags dang grangs la sogs pa'i 'brel par 'gyur ba yin la/ des na/ gsal bya bstan bya ma yin phyir/ /'di de'i sgo nas kyang yod min/ /zhes gang smras pa de ni ma nges pa yin no/ /kun rdzob kyi phyogs la yang ma grub pa yin no zhes ston pa ni rnam pa gcig tu zhes bya ba la/ /bsal ba'i zhes bya ba la sogs pa ste/ sel bar brjod ces bya ba la sgras zhes bya ba lhag ma'o/ /de'i phyir zhes bya ba ni de lta bas na'o/ /'di la zhes bya ba ni sel ba la'o/ /kun bshad dag la gzhan dag min / /zhes bya ba la sogs pa smras pa de la/ /blo la mngon par 'dod pa ni/ /zhes bya ba la sogs pa smos te/ kun bshad dag la gzhan las ldog pa shes pa yod pa ma yin no zhes bya ba ma grub ste/ 'di ltar shes par 'dod pa ni don gang zhig la tha snyad 'dogs pa po rnams kyis nyen pa po'i blo bskyed pa'i phyir sgra sbyor gyi zhen pas ma yin no/ /de bas na mngon par 'dod pa'i don bstan pa na shugs kyis mi 'dod pa rnam par bcad pa rtog pa nyid yin te/ 'dod pa dang mi 'dod pa dag ni phan tshun rnam par gcod pa'i ngo bo yin pa'i phyir ro/ /thams cad mngon par 'dod pa yin no zhe na/ thams cad ces bya ba la sogs pa smos te/ gal te thams cad 'dod pa nyid du 'gyur na de'i tshe sgra'i don so sor nges par mi 'gyur ro/ /de lta yin dang don 'ga' zhig yongs su spangs nas nyan pa po don 'ga' zhig la rigs yod pa ma yin pa zhig la sgra las 'jug pa gang yin pa der mi 'gyur ro/ /de lta bas na thams cad 'dod pa yin no zhes bya ba 'di mi rigs so/ /de'i phyir de lta bas na 'tshed pa la sogs pa'i sgra rnams shugs kyis mi 'dod pa gcod par rtogs pa gsal rab pa nyid yin no/ /'di ltar zhes bya ba la sogs pas shugs kyis rtogs par bya ba mi 'dod pa gcod pa de nyid ston pa yin no/ /de lta bas na 'tshed do zhes bya ba 'di ni btang snyoms su 'dug pa dang gzhan yang za ba'am/ rgyan po 'gyed pa la sogs pa'i bya ba gzhan ma yin par dgag pa'i bdag nyid kyis gsal bar bya ba yod de des na/ de la ma yin dgag pa min / /ngo bo yod pa ma yin no/ /zhes gang smras pa de grub pa'o/ /ma yin dgag bdag bsal bya ba/ /zhes bya ba ni ma yin par dgag pa'i mtshan nyid kyang yin la/ gsal bar bya ba yang yin no zhes tshig rnam par sbyar ro/ /nges pa gang dang gang 'dod pa/ /zhes bya ba ni btang snyoms su 'dug pa la sogs pa'i ma yin par dgag pa'i bdag nyid kyi bsal bar bya ba de dang de yod do zhes 'brel to/ /gang yang / mtshed do zhes la dgag med par/ /rang gi ngo bor gnas pa yin/ /zhes smras pa de la gzhan la rang gi tshig dang 'gal bar bstan pa'i phyir 'tshed do zhes bya ba la sogs pa smos so/ /yang 'di ji ltar phan tshun du 'gal ba yin zhe na/ gzhan gyi ngo bo dgag pa 'di/ /zhes bya ba la sogs pa smos te/ 'tshed do zhes bya ba 'di'i don du rang gi ngo bo nyid kyi gnas so zhes bya ba'i nges par bzung ba 'dis nges par bzung ba 'di'i ngo bo bstan pa yin te/ 'tshed do zhes bya ba 'di gzhan gyi ngo bor bkag nas bdag nyid gnas so zhes bstan pa yin no/ /de lta ma yin na rang gi ngo bo nyid kyis zhes bya ba khyed cag gis sbyar ba'i nges par bzung ba 'di don med par 'gyur te/ rnam par gcad par bya ba med pa'i phyir ro/ /'di ni bsgrub bya nyid du shes/ /zhes bya ba la sogs pa gang smras pa de la nye bar brjod med ces bya ba la sogs pa smos te/ gal te khyed cag gzhan sel ba nye bar brjod pa med pa'i rang bzhin nyid du 'dzin na / de ji ltar grub pa yin pa'i phyir zhes bya ba 'di rjod par byed/ nam mkha'i ut+pal la sogs pa rnams la grub pa 'ga' zhig yod pa ni ma yin te/ de dag ni nye bar brjod pa thams cad dang bral ba'i mtshan nyid can yin pa'i phyir ro/ /'di snyam du gal te yang 'di don dam pa'i nye bar brjod pa med pa yin pa de lta na yang rtogs pa po 'khrul pas phyi rol gyi dngos po'i ngo bo nyid du zhen pa'i phyir sel ba'i nye bar brjod pa dang bcas pa nyid du snang ba yin no snyam du sems na/ 'dir smras pa/ de las cir 'gyur zhes bya ba ste/ gal te 'di nye bar brjod pa nyid du snang ba de lta na yang 'dir skabs kyi don dang rjes su mthun pa ci zhig thob ces bya ba'o/ /'dir gzhan gyis smras pa/ dngos po dang 'di ni chos mtshungs pa rtogs par 'gyur zhes bya ba ste/ des na ji ltar dngos po grub pa'i ngo bor rtogs pa de bzhin du sel ba yang dngos po rnams dang chos mtshungs pa nyid du snang ste/ grub pa bzhin du rtogs pa'i phyir ro zhes bya ba'i tshig drug pa yin no/ /gal te de ltar khyed cag nyid kyis bsgrub bya nyid du shes pa dang / byung bar gyur pa la sogs pa'i shes pa'i rgyu mtshan du bstan pa'i phyir/ rgyu mtshan med par thal bar 'gyur ro zhes bya ba 'di brjod par mi bya'o/ /de bstan pa'i phyir/ de'i phyir bsgrub bya nyid shes dang / /zhes bya ba la sogs pa smos te/ de'i rgyu mtshan zhes bya ba ni dngos po rnams dang chos mtshungs pa nyid du nges pa'i rgyu mtshan no/ /sgrub pa sogs don gnyer gtsang sbra gzhan sel brjod pa ma yin no zhes gang smras pa de la/ sgrub pa sogs la zhes bya ba la sogs pa smos te/ sgrub pa la sogs pa'i don dgag pa la sogs pa nyid kyis gnas pa'i phyir/ de bstan pa na med pa la sogs pa brjod par mi 'dod pa shugs kyis 'gegs pa'i phyir 'di la yang gzhan sel bar brjod pa yin no/ /dgag pa la yang dgag ldan na/ /zhes bya ba 'di la yang / de bzhi zhes bya ba la sogs pa smos te/ de bzhi yod pa zhes bya ba ni dgag pa bzhi yod na'o/ /de ci 'dra ba zhig rtogs par bya ba yin zhe na/ dgag pa zhes bya ba la sogs pa smos te/ don gyi sgra ni sgrub pa'i sgra dang 'brel par bya'o/ /de'i 'brel pa ni dgag pa de'i dgag pa'o/ /de dgag bya phyir zhes bya ba ni dgag pa gsum pas bstan pa sgrub pa dang bral ba dgag pa'i phyir zhes bya ba'i don to/ /bzhi pa zhes bya ba ni bzhi pa'o/ /brjod par 'dod pa de la ni/ /zhes bya ni dgag pa bzhi pa sbyor ba de la zhes bya ba'i don to/ /de yis zhes bya ba ni dgag pa bzhi pas so/ /gzhan las rtog pa rtogs zhes bya ba ni dgag pa gsum pas bstan pa'i dgag pas dben pa sgrub pa'i ngo bo'i don gzugs brnyan ston par byed pa'i phyir ro/ /'di dag nyid dpe dag gis bsal bar bya ba'i phyir/ 'di ni mi 'tshed pa min zhes bya ba la sogs pa smos te/ 'di ni des dben pa'i zhes bya ba ni btang snyoms su 'dug pa la sogs pa las dben pa'o/ /sgrub pa'i ngag dang gzhan las ldog par mtshungs/ /zhes bya ba ni ji ltar 'tshed do zhes bya ba la sogs pa sgrub pa'i ngag gi shugs kyis btang snyoms su 'dug pa la sogs pa las ldog pa rtog pa de bzhin du dgag pa gnyis pa la yang yin pa'i phyir 'di la yang gzhan las ldog par grub pa'o/ /bsal bar bya ba'i phyir dgag pa bzhi pa dper brjod do/ /dang la sogs pa dgag pa dang / /ldan pa med phyir zhes bya ba 'di la/ /dang la sogs pa sdud la sogs/ /zhes bya ba la sogs pa smos te/ sogs pa'i sgra sa'am gyi ni rnam par rtog pa'i don yin la/ yang gi sgra ni dngos po srid pa dang 'jig pa la sogs pa'o/ /ni'i sgra ni khyad par yin la nyid ni nges par gzung ba'i zhes bya ba la sogs pa bzung ngo / /de las gzhan pa zhes bya ba ni bsdu ba la sogs pa de las gzhan pa'o/ /de yis zhes bya ba ni dang la sogs pas so/ /ngag gi don la gzhan ldog pas/ /bstan par nus pa ma yin no/ /zhes bya ba 'di la ngag gi don la zhes bya ba la sogs pa smos te/ lhan cig pa zhes bya ba ni phan tshun rgyu dang 'bras bu'i dngos pos 'brel pa zhes bya ba'i don to/ /de dag ces bya ba ni dngos po rnams so/ /'on te tshig gi don gzhan yin la/ ngag gi don yang gzhan ma yin nam/ de ji ltar tshig gis gsal bar bya ba gang yin pa de nyid ngag gi don nyid yang yin no zhes brjod ce na/ de'i phyir de ni dag pa gzhan med ces bya ba smos te/ tshig gi don las ma rtogs pa cha med pa'i khra bo'i bdag nyid dam/ /'dres pa'i kha dog dang mtshungs pa'i ngag gi don yod pa ni ma yin no/ /dmigs pa'i mtshan nyid du gyur pa de 'dra ba ma dmigs pa'i phyir ro snyam du bsams pa yin no/ /'di nyid dper brjod pa'i sgo nas gsal bar bya ba'i phyir/ nag pa ba lang zhes bya ba la sogs pa smos te/ ngag 'di la nag pa la sogs pa'i dngos po las don gzhan pa blo la snang ba ma yin te/ nag pa la sogs pa'i don rtog pa na/ yang shugs kyis nag pa ma yin pa la sogs pa gcod pa rtogs pa yin no/ /de lta ma yin te gal te byed pa po la sogs pa gzhan rnam par gcod par mi 'dod par 'gyur na/ de'i tshe nag pa la sogs pa blangs pa don med pa nyid du 'gyur ro/ /de lta yin dang 'ga' zhig la 'ga' zhig gi tha snyad med pa'i phyir 'gro ba'i ngag gi g.yo ba med par 'gyur ro/ /gzhan sel min pa'i sgra sogs la/ /brjod bya mthong ba ma yin no/ /zhes bya ba 'di la gzhan sel min pa'i sgra zhes bya ba la sogs pa smos te/ 'dir don dam par khyed cag gis 'dod pa'i rigs la sogs pa'i mtshan nyid sgra'i don sgrub pa'i ngo bo nges pa ma yin te/ rigs la sogs pa de dag sngar spyi brtag par rgyas par bkag pa'i phyir ro/ /'o na ci zhig nges par byed ce na/ 'on kyang zhes bya ba la sogs pa smos te/ de lta na gal te sel ba'i sgra'i don 'gegs pa'i blo skye'o zhes bya ba la 'dod na 'o na sel ba sgra'i don du khas blang bar mi bya ste/ de 'gegs pa'i phyir ro zhe na de'i phyir/ de ni slu byed min zhes bya ba smos te/ de ni zhes bya ba ni sel ba ma yin pa'i sgra la sogs pa'o/ /slu byed yin zhes bya ba ni mi slu bar mi byed pas na slu byed dam 'di la mi slu ba med pas slu byed do/ / ci'i phyir zhe na/ dngos po dang 'brel pa nyams phyir te/ de lta bur gyur pa'i dngos po dang 'brel pa med pa'i phyir la/ sngar rigs la sogs pa'i mtshan nyid kyi sgra'i don dngos po bkag pa'i phyir ro/ /'on gal te de lta na gzhan sel ba ma yin pa'i sgra la sogs pa las sel ba'i sgra'i don bkag pa la ji ltar blo skye ba yin zhe na/ sgra las byung ba'i shes pa kun/ /zhes bya ba smos te/ sgra las byung ba'i shes pa 'ga' zhig ni ji lta ba bzhin ma yin pa'i rnam par rtog pa goms pa'i bag chags kyi mthu nyid kyis yang dag pa ma yin pa'i don mngon par zhen pa skye ba nyid kyi phyir de'i dbang gis dngos po rnams yod pa dang med par 'gyur ba ma yin no/ /gzhal bya zhes bya'i sgra sogs kyi/ /zhes bya ba la sogs pa gang smras pa de la/ gzhal bya zhes bya'i sgra sogs pa smos te/ gzhal bya la sogs pa'i sgra'i bsal bar bya ba med do zhes gang la rjod par byed/ re zhig gal te dag la mi gnas pa 'ba' zhig pa tshig gzhan dang 'brel pa dang bral ba'i gzhal bya la sogs pa'i sgra la brten pa brjod pa de'i tshe grub pa la sgrub ste/ don med pa'i phyir 'ba' zhig la sbyor ba med pa'i phyir ro/ /de ston pa ni/ rtog ldan rnams kyis glo bur du/ /zhes bya ba la/ 'ba' zhig ces bya ba ni sgra gzhan dang 'brel pa'o/ /glo bur du zhes bya ba skabs las gzhan du'o/ /gang gi phyir rtog pa dang ldan pa rnams kyis sgra sbyor ba ni nyan pa po'i skye bo rjes su gzung bar bya ba'i phyir yin gyi zhen pas ni ma yin no/ /'ba' zhig la sbyar bas nyan pa po 'ba' zhig the tshom dang phyin ci log pa bzlog pa'i mtshan nyid kyi rjes su 'dzin par byas par 'gyur ba ma yin no/ /'di ltar gal te ston pa po nyan pa po de 'ba' zhig la the tshom dang phyin ci log gi blo skyes pa bzlog nas the tshom med pa'i shes pa skyed pa'i phyir yin na/ de lta na des 'di rjes su gzung bar byas par 'gyur gyi/ gzhan du ni ma yin no/ /'ba' zhig la sbyar bas de ltar rjes su gzung bar nus pa yang ma yin no/ /de lta bas na the tshom la sogs pa bzlog pa dang / nges pa skyed pa na nyan pa po rjes su gzung ba'i phyir sgra sbyor ba 'bras bu dang bcas pa 'di dag la gnas pa nyid sbyor ba yin no zhes bya ba ston pa na 'on kyang zhes bya ba la sogs pa smos te/ the tshom dang ni yid gnyis so/ /la la zhig ces bya ba ni don la'o/ /de bzlog bya'i phyir zhes bya ba ni the tshom dang phyi ci log de dag bzlog pa'i don du'o/ /de dag gis zhes bya ba ni rtog pa dang ldan pa rnams kyis so/ /des zhes bya ba ni shes par bya ba la sogs pa'i tshig gis so/ / ci ste ngag la gnas pa nyid/ /ces bya ba la sogs pa'i sgra'i dbang du byas nas brjod na/ de ni ma grub po zhes ston pa ni/ de la zhes bya ba la sogs pa'o/ /de la ngag la gnas pa'i gzhal bya la sogs pa'i sgras/ blo gros blun po rnams te shes pa blun po rnams kyis dogs pa'i gnas su 'dod pa gang yin pa de nyid bzlog pas de'i phyir gzhal bya la sogs pa'i sgra rnams la bzlog par bya ba med do zhes bya ba ni ma grub po / /gzhan du na zhes bya ba ni gal te blo gros blun po rnams kyis dogs pa zlog par mi byed na zhes bya ba'i don to/ /'di snyam du nyan pa po la dogs pa cung zad kyang med do zhe na/ 'di la cung zad ces bya ba la sogs pa smos te/ gal te nyan pa po don 'ga' zhig la the tshom du mi 'gyur na/ de ci'i phyir gzhan gyis gdams pa la ltos par 'gyur/ gzhan nges pa don du gnyer ba 'dri bar byed kyi gzhan du na bsnyon par 'gyur ro/ /gal te 'di snyam du nyan pa po'i dogs pa'i gnas yod pa de lta na yang de sgras zlog par mi byed do snyam na/ ji ltar rang bzhin du gnas blo/ /zhes bya ba la sogs pa smos te/ de ste nyan pa po'i mi shes pa la sogs pa zlog pa'i mtshan nyid kyi 'du byed do / /ngag gang la de'i 'du byed yod pa ma yin pas de nyid 'du mi byed pa'o/ /brjod ces bya ba ni ston pa po'o/ /ji ltar rang bzhin du gnas blo/ /zhes bya ba ni bsnyon pa nyid du 'gyur ro zhes bya ba'i don to/ /sgra rnams ni nyan pa po 'du byed pa'i don du sbyor ba'i phyir ro/ /ci ste ngag gang la gang zhig bzlog par bya ba blo gros ma nges pa'i dogs pa'i gnas gang zhig yin zhes dogs pa la/ gzugs sogs zhes bya ba la sogs pa smos te/ de yis zhes bya ba ni gzugs ni mig gi rnam par shes pas shes par bya ba yin no zhes bya ba'i ngag 'dis so/ /'du bya ba de med pa ni 'du byed pa gang la yod pa'i 'du byed do/ /brjod nyid ces bya ba'i sgrub pa po tha mal pa'i blo can ji ltar zhes bya ba bsnyon pa nyid du 'gyur bar byed ces bya ba'i don to/ /slob ma 'du byed pa kho na'i sgra rnams sbyar ba yin pa'i phyir ro/ /'on te gang la rmongs pa'i blo can yid gnyis kyi gnas yin pas sel ba de ci zhig yin zhe na/ shes pa'i shes byar zhes bya ba la sogs pa smos te/ des ni zhes bya ba mig gi rnam par shes pa'i shes par bya ba ni gzugs yin no zhes bya ba'i ngag 'dis so/ /de la ji ltar sgro btags pa de la gang yin zhe na/ mig la brten pa zhes bya ba la sogs pa smos te/ rna ba la brten pa'i shes pa rtag pas sngon po la sogs pa'i ngo bor rig par bya ba yin no zhes bya ba de lta bu grangs can la sogs pa'i blo gros rmongs pas sgro btags pa gang yin pa de gzugs ni mig gi rnam par shes pa'i shes par bya ba yin no zhes bya ba'i ngag 'dis 'gegs pa yin no/ /gzugs ni mig la brten pa'i rnam par shes pas shes par bya ba yin gyi/ rna ba la sogs pa'i rnam par shes pas shes par bya ba ni ma yin no zhes bya ba'i don to/ /de bzhin du ci chos thams cad skad cig ma dang bdag med pa'i ngo bor shes par bya'am 'on te ma yin/ ci thams cad mkhyen pa'i thugs kyis gzung bar bya ba'am 'on te ma yin/ ci gang dag shes pa'ang mi skyed pa'i nye bar brjod pa thams cad bral ba'i mtshan nyid kyi dngos po med pa rnams kyang shes bya yin nam zhes the tshom du gyur pa la/ chos thams cad ni skad cig ma nyid la sogs pa'i ngo bo shes par bya la/ de bzhin du chos thams cad thams cad mkhyen pa'i ye shes kyis shes par bya ba yin zhing / dngos po med pa rnams kyang shes par bya ba yin no zhes bya ba 'di brjod do/ /de la chos rnams la skad cig ma nyid ma yin pa la sogs par shes bya nyid la sogs pa'i ngo bor sgro btags pa gang yin pa de la bzlog par bya ba yin no/ /ji ltar de tshig tsam gyis bzlog par nus she na/ de 'dra'i zhes bya ba la sogs pa 'di smos te/ de 'dra'i zhes bya ba ni skad cig ma nyid la sogs pa'i ngo bos te/ de ni tshad mas grub pa'i phyir ro/ /ci ste dngos po med par shes bya nyid du ji ltar 'grub ce na/ med pa yang zhes bya ba la sogs pa smos te/ bdag nyid 'di yis zhes bya ba ni med pa'i ngo bos so/ /dngos po med pa rnams kyang ci zhig ltar blos rnam par 'jog pa'i phyir shes bya nyid yin te/ de lta ma yin na de la tha snyad nyid du mi 'gyur ro snyam du bsams pa yin no/ /'on te ci sgra rnams mi rtag pa nyid kyis gzhal bya yin nam/ 'on te ma yin zhes bya ba'i skabs su gzhal bya zhes sbyor ba na/ de la skabs mi shes pa gang yin pa rtog pa po de yang gzhal bya 'ba' zhig pa'i sgra thos pa las sgra la sogs pa dag la yid gnyis dang bcas pa'i ngo bo'i blo nye bar skye ba nyid yin la/ de gal te 'ba' zhig pa'i sgra don med pa nyid yin na de ji ltar don rtogs par 'gyur zhe na/ de'i phyir/ de ltar dag la gnas pa'o/ /zhes bya ba la sogs pa smos te/ 'dir bsdus pa'i don ni 'di yin te/ 'ba' zhig pa'i sgra thos pa las don rtogs pa nyid ni ma yin gyi/ /'on kyang dag dag la dmigs pa'i don dang ldan pa'i sgra ni 'dra bas blo 'khrul pa 'ba' zhig pa'i sgra thos pa las don rtogs par rlom pa yin te/ 'di ltar ngag gang dag la gzhal bya'i sgra dmigs pa'i nyan pa po'i don la blo de rab tu mi gnas pa yid gnyis kyis ngo bo nye bar skye ba yin no/ /de yang bum pa la sogs pa'i sgra dag la yang mtshungs te/ 'di ltar ci bum pas chu lan nam 'on te snyim pas yin zhes sbyor ba na skabs mi shes pa dag ji snyed cig la des bum pas zhes sbyor ba mthong ba de snyed kyi don la ngag snga ma'i rjes su 'brangs nas/ 'dod pa dang ldan pa'i rtog pa skye ba yin no/ /de lta bas na ji ltar bum pa la sogs pa'i sgra rnams khyad par can gyi don rjod par byed pa de bzhin du gzhal bya la sogs pa'i sgra rnams kyang yin no zhes ston pa ni/ de'i phyir zhes bya ba la sogs pa'o/ /gang yang gsal bar rtogs na yang / /zhes bya ba la sogs pa smras pa de la/ gang nyid brjod par 'dod pa yi/ /zhes bya ba la sogs pa smos te/ gang nyid brjod par 'dod pa'i dngos po nyid ni zhe na pa'i dbang gis kho bo cag gis sgra'i don nyid du brtags kyi dngos po med pa ni ma yin no/ /des na de rtogs pa na shugs kyis brjod par mi 'dod pa sel te ldog pa rtogs pa nyid kyi phyir sgra'i don rnam par gzhag pa la ma khyab pa ma yin no/ /blo gros rmongs pa'i dogs pa'i gnas gang yin pa de nyid kyi dbang du mdzad nas slob dpon gyis shes bya ma yin pa brtags pa byas nas/ de rnam par bcad nas shes bya rjes su dpog par byed do zhes bshad do/ /shes pa'i rnam par bkag pa'i phyir/ /zhes bya ba la sogs pa la/ rang nyid rig phyir zhes bya ba la sogs pa smos te/ nus ma yin zhes bya ba la/ bya bar zhes bya ba lhag ma'o/ /ji ltar shes pa'i rnam par rang gis rig par byas pa nyid du grub ce na/ dmigs pa med ba zhes bya ba la sogs pa smos te/ rmi lam la sogs pa la don med par yang dmigs pa med de don gyi rnam pa kun nas 'dzin pa'i sgro btags pa'i shes pa gnag rdzi'i bar du rang rig pa nyid du mngon sum gyis shin tu gsal bar grub po/ /yul dang dus gzhan du gnas pa'i don rang gi ngo bos rig par bya ba yin no zhes kyang brjod par mi rigs te/ de la de'i ngo bo med pa'i phyir ro/ /gzhan gyi ngo bos gzhan yang dag par rig pa yang ma yin te/ ha cang thal bar 'gyur ba'i phyir ro/ /gzhan yang gang gis rtogs pa'i ngo bor mtshungs na yang yul so so la 'di ni sngon po'i rigs pa yin gyi ser po ni ma yin no zhes shes pa rnam par phye nas 'jog par 'gyur/ khyed kyis shes pa'i bdag nyid du rtogs pa'i don gyis byas pa'i khyad par 'ga' zhig khas blang bar bya dgos pa gor ma chag go/ /de khas blangs nas yang shugs kyis shes pa rnam pa dang bcas pa nyid du khas blangs par 'gyur te/ rnam pa las ma gtogs pa gzhan rang bzhin gyi khyad par nyid du nges par bzung bar mi nus pa'i phyir ro/ /de'i phyir khyed cag gi rang bzhin gyi khyad par zhes bya ba de nyid kho bo cag gis sgra gzhan rnam pa dang snang ba zhes bya ba la sogs pa'i sgras brjod pa'i phyir ming la rtsod pa 'ba' zhig tu zad do/ /de ltar zhes sogs sgra dag gis/ /zhes bya ba la sogs pa la/ /de ltar zhes sogs zhes bya ba la sogs pa smos te/ 'di ni de lta bu'i yin gyi de lta bu ni ma yin no zhes rnam pa gzhan sgro btags pa de lta bu zhes zhes bya ba la sogs pa'i sgras rnam par bcad pa gsal rab tu nges pa nyid yin pa'i phyir sgra'i don rnam par gzhag pa ma khyab pa can yin no/ /de ltar ku mA ra ri las smras pa'i skyon bsal nas da ni 'od byed pas smras pa sel bar byed do/ /de la/ thams cad sgra yis don gang zhig / rnam par gcad par bya bar rtogs / /zhes gang smras pa de la tha snyad ni zhes bya ba la sogs pa smos te/ 'di la yang zhes bya ba la sogs pa'i tshig bzhin du 'ba' zhig pa'i thams cad kyi sgra mi sbyor ba'i phyir rtag tu ngag la gnas pa nyid la sbyor bas blo gros rmongs pa'i dogs pa'i gnas gang yin pa de nyid bzlog par bya ba yin no/ /bsgrub par 'dod pa yin zhes bya ba ni brjod par 'dod pa'o/ /brjod par 'dod pa'i don de yang gang yin zhe na/ chos rnams thams cad ces bya ba la sogs pa smos so / /cha shas bsam par bya ba gang zhig yin zhe na/ phyi rol zhes bya ba la sogs pa'o/ /gcig sogs thams cad min zhe na/ /zhes bya ba la sogs pa la/ cha shas thams cad dgag pa ni/ /zhes bya ba la sogs pa smos te/ gal te tha snyad la sbyor ba'i ngag la gnas pa'i sgra de thams cad cha shas thams cad dgag par brjod par 'dod na/ de'i tshe rang gi don sel bar 'gyur na/ gang gi phyir blo gros rmongs pa'i dogs pa'i gnas gang yin pa de nyid dgag par bya ba yin pa'i phyir rang gi don la skur pa 'debs pa nyid kyi skyon du thal bar ga la 'gyur/ de bzhin gnyis la sogs pa'i sgra dag la yang brjod par bya'o/ /gang yang / de ci dngos po'am dngos po med/ /ces bya ba la sogs pa smras pa de la/ /sel ba'i dngos po dang zhes bya ba la sogs pa smos te/ ci'i phyir dngos po ma yin zhe na/ 'di ni ji ltar nges pa bzhin/ zhes bya ba la sogs pa smos te/ 'di ni 'khrul pas phyi rol nyid du mngon par zhen la/ 'di de ltar gnas pa yang ma yin pas de'i phyir phyi rol gyi ngo bo nyid du med pa'i phyir dngos po ma yin no/ /yang ci'i phyir dngos po med pa ma yin zhe na/ dngos por zhe na phyir med pa min/ /zhes bya ba smos te/ phyi rol gyi dngos po nyid du nges pa'i phyir gcig tu dngos po med pa yin no zhes kyang brjod par mi nus so/ /yang ci'i phyir tha dad pa nyid la sogs pa'i mtshan nyid ma yin zhe na/ tha dad tha mi dad ces bya ba la sogs pa smos te/ tha dad tha mi dad la sogs pa ni tha dad la sogs pa'o/ /sogs pa'i sgras rten nyid la sogs pa gzung ngo / /'di dag ni dngos por rtogs pa'i chos yin na ji ltar rtogs pa'i bzo bos byas pa'i lus can gyi sel ba gnas pa rnyed par 'gyur/ gang yang sel ba ni bya ba'i ngo bo yin pa'i phyir yul brjod par bya dgos so zhes bya ba de ni ma grub pa ste/ sgra'i brjod par bya ba'i sel ba ni gzugs brnyan gyi bdag nyid yin pa'i phyir dang gzugs brnyan de yang phyi rol gyi dngos po'i ngo bor zhen pa'i phyir dgag pa tsam ni ma yin no/ /de nyid kyi phyir ci ba lang gi yul can yin nam 'on te ba lang ma yin pa'i yul can zhes bya ba'i rnam par rtog pa 'di gnyis 'thad pa ma yin te/ de ni ba lang gi yul can nyid kyis bsgrub pa'i ngo bor zhen pa'i phyir ro/ /gang gis 'di la bsal bya ba/ /su yis ba lang ba min brtags / /zhes smras pa de la/ sgra yis dngos su don gzhan pa/ /zhes bya ba la sogs pa smos te/ gal te gzhan las ldog pa nyid gtsor sgras bstan par bya ba yin na de'i tshe 'dir 'gyur na/ ji srid du don gyi gzugs brnyan gyi bdag nyid yin te/ gang cung zad brjod pa de ni/ ji skad du/ dang po kho nar sgra yis ni/ /don gyi gzugs brnyan byed pa yin/ /de rtogs na yang shugs kyis ni/ / gzhan las ldog pa rtogs pa yin/ /zhes ji skad du bshad pa'i grub pa'i mtha' mngon par mi shes pas yin no zhes bya ba ni bsdus pa'i don to/ /lhag ma ni don go bar zad do/ /tha dad la sogs pa'i rnam par rtog pa ni dngos po nyid du bsal zin to/ /gzhan sel ba ni 'di brjod bya'am zhes bya ba la sogs pa gang smras pa de la/ gzhan sel ba yi brjod bya nyid/ /ces bya ba la sogs pa smos te/ de la gzhan sel ba'i brjod par bya ba'i rnam par rtog pa gal te gzhan sel ba'i sgra'i dbang du byas nas byed na/ de'i tshe 'di bsgrub pa'i ngo bo nyid kyi sgra des brjod par bya ba yin no zhes khas blangs pa'i phyir mi 'dod pa thob par rigs pa ma yin te/ 'di ltar ci sgrub pa sgra'i don nam 'on te gzhan sel ba yin zhes bya ba'i skabs su gzhan sel ba sgra'i don yin no zhes brjod pa na/ rtog pa pos ji skad du bshad pa'i gzugs brnyan gyi mtshan nyid kyis sel ba nges pa skye ba yin la/ shugs kyis sgrub pa sgra'i don yin pa bkag pa yin no/ /ci ste bum pa la sogs pa'i sgra'i dbang du byas nas yin na/ de la yang ji skad du bshad pa'i gzugs brnyan gyi mtshan nyid sel ba dngos su bum pa la sogs pa'i sgra dag gis bskyed par bya ba yin pa'i phyir sgrub pa'i ngo bo nyid de dag gis bstan la shugs kyis ni gzhan las ldog pa rtog pa'i phyir mi 'dod par 'gyur ba ma yin pa'i phyir la/ thug pa med pa'i skyon yang med de/ shugs kyis gzhan las ldog pa rtogs pa'i phyir te/ brjod par bya ba nyid kyis ni ma yin no/ /brjod par bya ba ma yin pa'i phyogs ni khas ma blangs pa'i phyir de'i phyogs la yod pa'i skyon 'byung ba'i skyon gyi go skabs med do zhes ston pa ni/ brjod bya min phyogs zhes bya ba smos so/ /gzhan yang nye bar brjod med pa'i/ /zhes bya ba la sogs pa la/ rtog pa gcig pu zhes bya ba la sogs pa smos te/ gal te don dam par gcig nyid la sogs pa nye bar brjod par byas par 'gyur na/ de'i tshe khyed cag bzhad gad byed pa nyid du 'gyur na/ gang gi tshe 'khrul pa'i rtog pa po'i ngo bo slob dpon gyis 'di rtog pa nyid du brjod pa de'i tshe ji ltar mkhas pa rnams bzhad gad du byed pa 'jug par 'gyur/ 'on kyang brjod par 'dod pa mi shes par sun 'byin par khyed cag la mkhas pa rnams shin tu bzhad gad kyi gnas su 'gyur ba yin no/ /de phyir gang dag dgag ldan pa/ /de dag 'ba' zhig kho na la/ /zhes bya ba la sogs pa la/ nges par bzung ba'i shugs kyis ni/ /zhes bya ba la sogs pa smos te/ gang du dgag pa'i sbyor ba der gzhan las ldog pa'i cha rtog pa 'ba' zhig tu ma zad/ gang du dgag pa sbyor ba med pa der yang rtog pa nyid yin no zhes rang gi bdag nyid kho na rtogs so zhes nges par gzung bar byed pa na khyed cag gi rang gi tshig nyid kyis 'di bstan pa yin no/ /de lta ma yin na nges par gzung ba don med par 'gyur ro/ /de lta bas na gang du rang gi bdag nyid kho na rtog pa der nges par gzung ba'i shugs kyis gzhan sel ba yang rtogs so zhes gsal rab tu nges pa yin no/ /'o na zhes bya ba la sogs pa gzhan dag sel ba'i sgra'i don du rnam par gzhag pa ma khyab pa yin par ston pa yin te/ 'di ltar mo gsham gyi bu la sogs pa'i sgra gang zhig phyi rol gyi bum pa la sogs pa'i dngos po gzhan las ltos pa ni sel ba la brten pa med pa de ci la gnas nas sel ba brjod par bya ba yin par brjod/ gdon mi za bar sel ba ni dngos po la gnas par 'gyur bar brjod par bya dgos te/ de ni gzhan sel ba'i dngos po dang tha mi dad pa'i phyir ro/ /med pa rnams la zhes bya ba la sogs pas len 'debs par byed de/ mo gsham gyi bu la sogs pa med pa rnams la rang bzhin gyi ngo bo 'ga' zhig med pa'i phyir/ de'i yul can gyi sgra rnams rigs la sogs pa rjod par byed pa nyid du dogs par mi bya ste/ dngos po la 'jug pa'i sgra rnams ni ci'i ngo bo brjod pa yin nam/ 'on te gzugs brnyan yin zhes dogs par 'gyur gyi med pa ni dngos pos dben pa'i mtshan nyid can yin pa'i phyir de la 'jug pa'i sgra rnams ji ltar dngos po'i yul can nyid du dogs par 'gyur/ de'i phyir de la sgra rnams ni gzugs brnyan tsam skyed pa'i phyir yul med pa nyid du gsal rab tu nges pa'i phyir dogs pa'i gnas med do/ /de nyid ston pa'o / /don gyis stong pa zhes bya ba la sogs pa'o/ /sgra rnams kyis zhes bya ba ni mo gsham gyi bu la sogs pa'i sgra dag gis so/ /yang gang dag dngos po'i yul can gyi sgra de dag gzugs brnyan tsam rjod par byed pa bsgrub pa'i phyir tshad mas dgod par byed pa ni/ the tshom dang bcas zhes bya ba la sogs pa smos te/ gang dag brda la ltos pa dang bcas pa de dag don gyis stong pa'i mngon par brjod pas bsgos pa'i bag chags tsam gyis sprul pa'i rnam par rtog pa'i gzugs brnyan tsam gyi don gsal bar byed pa yin te/ dper na mo gsham gyi bu la sogs pa'i sgro btags pa'i don rjod par byed pa rnams bzhin no/ /the tshom dang rtsod pa'i gzhir gyur pa'i bum pa la sogs pa'i sgra rnams kyang brda la ltos pa dang bcas pa yin no zhes bya ba ni rang bzhin gyi gtan tshigs so/ /de ltar rang nyid kyis rang gi phyogs bsgrubs nas/ /gzhan gyi phyogs dgag pa'i don du tshad ma dgod pa'i phyir/ sgra rnams gzhan gyi khas blangs pa'i/ /zhes bya ba la sogs pa smos te/ tha dad rang gi mtshan nyid do/ /sogs pa'i sgras ni rigs la sogs pa gzung ngo / /de'i phyir zhes bya ba ni brda la ltos pa dang bcas pa'i phyir ro/ /de bzhin nyid du zhes bya ba ni brtags pa'i don brjod pa bzhin no/ /gtan tshigs gnyi ga yang ma nges pa nyid spang pa'i phyir/ tha dad pa la sogs 'di pa/ /zhes bya ba la sogs pa smos te/ brda bya bar mi nus pa'i phyir dang gzhan la brten pa ma yin pa'i phyir ro zhes sngar rang gi mtshan nyid la brda mi srid pa dang brda don med pa bsgrubs zin pa'i phyir ro/ /des na ste de'i phyir gtan tshigs gnyi ga yang mi mthun pa'i phyogs la ldog pa la the tshom za ba ma yin no/ /'on te zhes bya ba la sogs bas gzhan dag gtan tshigs dang po ma nges pa nyid du ston pa yin to/ ji ltar rang gi mtshan nyid la sogs pa la brda mi srid pa dang / don med pa de bzhin du gzhan sel ba'i phyogs la yang mtshungs te/ de lta yin dang brda mi srid pa'i phyir sgra rnams de tsam gsal bar byed pa nyid du yang mi rigs pa'i phyir gtan tshigs ma nges pa yin no/ /de ni zhes bya ba ni brda'o/ /ji ltar 'bras bur bcas zhes bya ba la srid pa zhes bya ba lhag ma'o/ /yang ji ltar de la brda mi srid pa yin zhe na/ 'chad pa po dang zhes bya ba la sogs pa smos te/ ni'i sgra ni rgyu'i don te/ gang gi phyir gzugs brnyan gyi bdag nyid kyis sel ba brda'i yul gang yin pa de 'chad pa po dang nyan pa po gnyis la cig car grub po/ /ci'i phyir zhe na/ shes pa de ni zhes bya ba la sogs pa smos te/ tshu rol mthong ba rnams kyi shes pa ni so sor rang gis rig par bya ba nyid yin te/ gzhan gyi shes pa ni tshu rol mthong ba gzhan gyis rig par bya ba ma yin no/ /don dam par shes pa las tha mi dad pa gzugs brnyan gyi bdag nyid kyi mtshan nyid ni sel ba yin te/ de lta yin dang 'chad pa po dang nyan pa po gnyi ga la brda'i yul gyi don gcig po 'ga' zhig ma grub pa'i phyir/ gang du brda byed pa'am 'dzin pa yin/ dngos po ma grub pa la smra ba por brda bya bar nus pa ma yin la/ nyan pa pos gzung bar nus pa yang ma yin te/ ha cang thal bar 'gyur ba'i phyir ro/ /'di ltar rang gi rnam par shes pa yod pa'i don gyi gzugs brnyan nyan pa pos rtogs pa gang yin pa de 'chad pa pos rig pa ma yin la/ gang yang 'chad pa pos rig pa de ni nyan pa pos ma yin te/ rang rang gi snang ba rig pa'i phyir ro/ /don med pa nyid du bstan pa'i phyir/ brda'i dus su zhes bya ba la sogs pa smos te/ 'chad pa po'am nyan pa po brda'i dus su gzugs brnyan nyams su myong ba de tha snyad kyi dus su nyams su myong ba ma yin te/ de ni skad cig gis 'jig pa nyid kyi 'gags nas ring du lon pa'i phyir ro/ /gang yang tha snyad kyi dus su nyams su myong ba de brda'i dus su mthong ba ma yin te/ de'i tshe na gzhan nyid nyams su myong ba'i phyir ro/ /gzhan du brda byas nas gzhan gyi tha snyad du byed par rigs pa ma yin te/ ha cang thal bar 'gyur ba'i phyir ro/ /rang dang rang gi zhes bya ba la sogs pas len 'debs par byed pa yin te/ gang gis de la brda mi srid pa'i skyon gyis klan ka byed pa don dam par shes pa'i rnam pa yang sgra rnams kyis brjod par bya ba'i don nyid du 'dod pa ma yin te/ de'i phyir sgra las byung ba'i tha snyad 'di thams cad rang gi snang ba'i ngo bor rab rib can gnyis kyis zla ba gnyis mthong ba bzhin du 'khrul bar 'dod de/ don gyis stong pa'i brjod pa'i bag chags sad pa las sgra las don nges pa'i rnam par rtog pa tsam skye ba kho nar zad pa'i phyir bskyed pas gzugs brnyan de bskyed pa'i phyir sgra rnams kyis brjod par bya ba yin no zhes brjod kyi/ brjod pa nyid kyis ni ma yin no/ /de la gal te yang 'chad pa po dang nyan pa po dag gis don dam par rang rang gi snang ba rig pa de ltar yang rab rib can gnyis bzhin du 'khrul pa'i sa bon mtshungs pa'i phyir 'chad pa po dang nyan pa po de dag kyang phyi rol gyi don zhen pa nyid du mtshungs so/ /'di ltar 'chad pa po 'di snyam du ngas rtog pa'i don gang yin pa de nyid 'dis rtogs so snyam du bsam pa 'dis 'jug la de bzhin du nyan pa po la yang sbyar bar bya'o/ /ji ltar 'chad pa po dang nyan pa po 'di dag phan tshun du don gcig tu zhen pa nyid du shes she na/ ma yin te gal te don dam par mi shes pa de lta na yang 'khrul pa'i sa bon mtshungs pa'i phyir/ don dam par rang gi snang ba'i ngor byas nas kyang rab rib can gnyis bzhin du tha snyad 'di 'khrul pa nyid du yod pa yin no zhes bya ba 'di ni bstan zin to/ /des na don gcig tu zhen pa'i dbang gis brda byed par 'thad pa nyid do/ /'dir dpe smras pa dper na rab rib kyis nyams zhes bya ba la sogs pa ste/ rang dang mtshungs pas zhes bya ba ni bdag dang 'dra bas te/ rab rib can gzhan dang zhes bya ba'i don to/ /brda don med pa yang ma yin no zhes ston pa ni/ de'i khyab par byed pa 'di zhes bya ba ste brda dang tha snyad du phyin pa'i dus su khyab par byed pa nyid kyi 'chad pa po dang nyan pa po de dag gis nges pa'i don gyi gzugs brnyan de zhen pa'i dbang gis 'dod kyi/ don dam pa ni ma yin te/ tha snyad kyi dus su yang 'chad pa po dang nyan pa po dag sngar dang phyis mthong ba'i don dag gcig tu mngon par zhen pa'i phyir ro/ /yang ci'i phyir don dam pa nyid du mi 'dod ce na/ sgra yis sprul pa'i zhes bya ba la sogs pa smos so/ /de kho na nyid bsdus pa'i dka' 'grel las sgra'i don brtag pa ste nyi shu rtsa gcig pa'o// //

CLOSE WINDOW