བོད་ཡིག

e-texts based on the ACIP/ALL Input

@##/ /rgya gar skad du/ sam+ba n+d+ha pa rIk+Sha a nu sa ra/ bod skad du/ 'brel pa brtag pa'i rjes su 'brang ba zhes bya ba/ 'jam dpal gzhon nur gyur pa la phyag 'tshal lo/ /gang gis 'brel pa spangs gyur pa/ /'gro ba bdag dang bdag gi min/ /gzung 'dzin med pa can gsungs pa/ /kun mkhyen de la phyag 'tshal lo/ /tshad ma'i dbang du byed pa nyid dam gzhal bya'i dbang du byed pa nyid kyis rnam par dpyad pa rtsom pa yin te/ 'dir gzhal bya la brten pa rnam par dpyod pa la 'jug par byed pa nyid kyis 'di brtsam par bya ste/ gzhan dbang kho na 'brel pa na/ /grub na gzhan dbang ci zhig yod/ /de phyir dngos po thams cad la/ /'brel pa yang dag nyid du med/ /rab tu byed pa gsum ni 'jug pa sna tshogs pa nyid la yang tshad ma kho na rnam par gzhag par 'dod pas brtsams pa yin no/ /gtan tshigs thigs pa yang gtan tshigs kyi mtshan nyid rjod par byed pas tshad ma rnam par 'jog pa'i don can kho na yin no zhes ni ngag dang pos bstan to/ /rtsod pa'i rigs pa yang mngon sum dang rjes su dpag pa'i rang bzhin nyid kyis rjes su dpag pa'i tshad ma rnam pa gnyis las gzhan gyi don gyi rjes su dpag pa lhag mar gyur pa nyid kyis yang dag pa ma yin pa'i rnam par gzhag ba sun 'don par byed pa'i tshad ma nye bar ston par byed pa'i don can kho na yin no/ /de bzhin du rgyud gzhan sgrub pa ni rjes su dpag pa'i khyad par rnams la phyi rol gyi don du smra ba las don dam pa'i rigs pa mtshan nyid mi mthun pa can yin no/ /yang gzhan gyi sems rjes su dpog pa la mtshan nyid mi mthun pa med pa nyid yang dag par ston par byed pa'i don can nyid kyis tshad ma yang dag par ston par byed pa'i don can kho na yin no/ /'dir ni dngos po rnam par dpyod par bya ste/ gang gis dngos po de dpyod pa na 'joms par byed pa gcig gis pha rol gyi 'dod pa dngos po'i don thams cad sun 'don par byed pas de las bzlog par gyur pa rang gi 'dod pa'i dngos po grub pa yin no/ /yang na gzhal bar bya ba gtso bo rnam par dpyod par byed pa'i yan lag nyid kyis kyang dngos po 'di brtag par bya ste/ 'di ltar 'brel pa'i dngos po med par ston par byed pa la dgos pa ni bdag med pa rnam pa gnyis sgrub par byed pa kho na yin no/ /bya ba dang / longs spyod dang / byin gyis rlob pa la rang dbang med pa ni bdag gi bdag med pa yin te/ 'brel pa de med pa la bya ba 'du ba med pa'i phyir/ bya ba la rang dbang med pa'i phyir byed pa po bsal to/ /de nyid kyi phyir yang bde ba dang sdug bsngal dang 'du ba med pa'i ngo bo ni longs spyod par byed pa ma yin no/ /byin gyis brlab pa dang 'du ba med pa na yang byin gyis rlob pa po ma yin no/ /de'i phyir 'brel pa med pa na gang zag gi bdag med pa sgrub po/ /de bzhin du rang gi bdag nyid tsam la gnas pa gzhan gyi dbang nyid dang gzhan dang sbyor ba dang / ltos pa nyid la sogs pa med pa na gzung ba dang 'dzin pa'i dngos po med pa ni chos kyi bdag med pa yin no/ /de nyid kyi phyir tshig gi don drug kyang bkag pa yin te/ sbyor ba dang / 'du ba med pa'i phyir rdul phra rab rnams la yang dag par sbyor ba med pa na rdzas rtsom pa ma yin no/ /de rnams la 'du ba med pa na yang de'i dngos po med pa'i phyir de dang 'du ba can gyi rgyu nyid ma yin na ni rdzas ma yin no/ /rdul phra rab rnams kyang 'du ba med pa'i phyir bya ba dang yon tan la sogs pa'i rdzas kyi chos dang bral ba rnams kyang rdzas ma yin no/ /rdul phra rab rnams ni gzugs kho na yin gyi gzugs la sogs pa'i yon tan can gzhan cung zhig ni mang bas rdzas ma yin no/ /de bzhin du yon tan can dang / byed pa po dang / 'dra ba dang / mthar gyur pa'i rdzas la mi 'jug pa na yang 'du ba med pa'i phyir yon tan dang / las dang / spyi dang / khyad par rnams med pa yin no/ /de'i phyir dngos po brtag pa rtsom pa la rtog par byed par gyur pas brtag pa gcig po gang yin pa gzhan thams cad ma brtags pa ma yin te/ de mngon du dpyod pa rtsom pa na thams cad gzhan gyi dbang nyid kyis so/ /de la 'brel pa can gyis ji ltar 'brel par gyur pa de gang la 'brel pa zhes 'gyur ro/ /gzhan dbang tha mi dad par 'jug pa ni 'brel pa can dag tu 'gyur te/ phan tshun ltos pa'i ngo bo nyid yin pa'i phyir ro/ /gcig ni gzhan la ltos pa yin la pha rol po yang gzhan dbang yin no/ /de'i phyir phan tshun ma spangs pa'i chos dang ldan pa de dag ni 'brel pa can yin no/ /de ni de dag la 'brel par byas pas 'brel pa kho na gzhan gyi dbang nyid du brjod do/ /tha dad par 'jug pa gzhan dbang ma yin pa dag la yang 'brel pa yod na ma 'brel pa gzhan lhag mar gyur pa ni med do/ /de'i phyir gzhan gyi dbang nyid kho na 'brel pa can nyid yin la/ de yang 'brel pa las yin pas 'brel pa ni de kho na nyid yin no/ /gang gi phyir gzhan dbang nyid de 'brel pa yin pa/ de'i phyir yang dag pa nyid du 'brel pa cung zhig kyang yod pa ma yin la/ brtag par gyur pa yang yod pa ma yin no zhes rnam par 'jog par 'gyur ro/ /de gang las yin zhe na/ grub pa'i bdag nyid la gzhan gyi dbang nyid mi 'thad pa'i phyir de ni rang gi rgyu'i nus pa kho na las yin na/ de la ltos bas sam/ ma ltos pas yin/ de la gal te ltos pa med pa ni grub par gyur pa'i rang gi ngo bo yin na 'brel pa de ni tha dad pa'i dngos po 'di bkug nas gzhan gyi dbang nyid du len par byed pa ma yin no/ /ci ste de la ltos pas rang gi ngo bo ma grub par gyur pa de'i tshe de la rang gi ngo bo thob bas gang zhig gzhan las thob pa'i bdag nyid gzhan la gzhan dbang yin te/ de lta bu'i bdag nyid thob pa kho na de yin te/ de la 'brel pa mi dgos pa'i phyir ro/ /thob par gyur pa'i bdag nyid la ni 'brel bas gzhan dbang du byed pa tha dad pa ma yin pa'i ngo bor brjod par bya'o/ /de nyid kyi phyir grub pa la de brgal zhing brtag par bya ste/ de yan lag can rang gi ngo bo thob par gyur pa la rang gi ngo bo thob ma thag tu byung ba'i gzhan gyi dbang ni cung zhig kyang med do/ /'o na tha dad pa ma yin pa'i dngos po zhes bya ba ci zhe na/ grub pa'i tha mi dad pa kho na yin gyi gzhan 'brel pa la ltos par bya ba ni ma yin no/ /de la tha dad pa'i ngo bo'i rgyu las byung ba na tha dad pa'i dngos po yang gnas skabs gzhan skye ba'i mtshan nyid dang ldan pa ni skad cig pa'i phyogs yin na yang 'gyur gyi/ de med pa la ni de ji lta ba nyid du skyes pa de lta bu nyid du gnas pa de'i phyir 'di la gzhan gyi dbang nyid ci yod/ 'di ltar gal te de ni sems par byed par gyur na yan lag rnams la skyed par gyur pa/ de rnams las yang dag par langs nas gzhan du 'gro bar byed pa dang / zhig par gyur pa yangs la gnas par byed pa yin/ de'i phyir sems pa de ltar skyes par gyur pa gzhan du skyes pa'i rgyu ni 'dod pa kho na yin no/ zhig par gyur pa'i yang lci ba la sogs pa de yod pa nyid rgyu mtshan yin no/ /rang gi bdag nyid kyi rgyu can rnams nyid ni rim pa gzhan pa'i gnas skabs kyi khyad par dang ldan pa yang yin te/ a mra la sogs pa'i gnas skabs kyi khyad par bzhin no/ /de'i phyir gang ji ltar skyes par gyur pa de ni rang gi rgyu'i nus pa kho na las de ltar yin gyi/ gzhan du gnas skabs gzhan dang skad cig ma gzhan skyed par byed pa'i rkyen rnams las de ltar gyur pa 'di'i thob pa ni 'ga' zhig las cung zhig yod pa ni ma yin no/ /de'i phyir grub pa'i bdag nyid la gzhan gyi dbang nyid cung zhig kyang med do/ /rgyu'i rjes su 'gro ba dang bzlog pa'i rjes su byed pa'i chos ni 'di yin gyi thob pa'i bdag nyid la khyad par gyi rgyu mtshan du 'gyur ba'i dngos po gzhan gyis rnam par gzhag pa ni ma yin no/ /rgyu kho na las 'di yul skyes pa yin gyi/ rgyu gzhan gzhan du gyur pa'i dngos po'i rgyu med pa na de ltar mi 'gyur ba ni ma yin no/ /des na de ltar skyed pa'i de ma thag pa dang gzhan du gyur pa'i dngos po rdzogs par byed pa las/ /sngar gyur pa'i dbus na cung zhig bsgrub par bya ba ni med na gang du lhan cig pa'i dngos po'i 'brel pa kho na ni der nye bar mkho ba dang ldan par 'gyur ro/ / thag pa la sogs pa rnams kyang shing la sogs pa rnams kyi tha mi dad pa'i dngos po la rgyu kho na yin gyi de ltar skyes pa rnams la de rnams las gzhan pa sbyor ba ni cung zhig kyang med do/ /de'i phyir tha mi dad par grub pa'am rten dang brten pa'i dngos po ni 'brel pa rjes su 'dren par byed pa ma yin no/ /'du ba med na yang yan lag rnams bar ma chad pas yan lag can skyes pa na de'i yul nyid kyis skyes pa'i tha snyad grub pas tha dad pa med par grub pa 'thad pa'i phyir ro/ /rten dang brten pa'i dngos po yang gnas pa sna tshogs pa nyid yin no/ /'di la zhes pa'i rtogs pa'i rgyu yang dngos po de dag nyid yin gyi 'brel pa ni ma yin no zhes 'chad par 'gyur ro/ /gzhan gyi dbang nyid du thob pa'i rgyu 'brel par 'gyur na de yang med do zhes bshad zin to/ /gal te na 'du ba can dag gi yang tha dad pa'i dngos po thob pa'i rgyur 'gyur te/ dper na sbyor ba can gyi bzhin du yin la/ de'i tshe 'di ni de las de drangs pa na tha dad par nus pa ni ma yin te/ sbyor ba can bzhin no/ /de'i phyir yan lag can ni yan lag rnams las bteg nas lag tu gzhag par bya bar 'gyur na de yang med pa yin no/ /des na med pa kho na de la rgyu mtshan yin no/ / gal te na de la 'brel pa nus par 'gyur la de yod pas ches gzhan pa zhig pa na 'di ni srung bar yang byed par yang 'gyur te/ des na rgyu'i dngos po med pa kho na 'dir rgyu mtshan yin gyi 'brel pa ni ma yin no zhes pa nyid yang dag pa yin no/ /'o na 'dres par gyur pa nyid 'brel pa can nyid yin la de yang 'brel pa'i rgyu mtshan can dag la yod pa yin pas 'dres pa kho nas 'brel pa yin no/ /de'i phyir dngos po rnams la ngo bor 'dres pa ni sbyor ba la sogs pa'i rang bzhin can 'brel pa yin no zhe na/ ma yin no zhes smras pa gang gi phyir/ /ngo bo 'dres pa 'brel yin na/ /de yang gnyis las ji ltar 'gyur/ /de phyir rang bzhin tha dad las/ /'brel pa yang dag nyid du med/ /sbyor ba can dag la gzhan gyi dbang nyid ni yod pa ma yin te/ 'dod par gyur pa ci lta ba'i tha dad pa'i yang dngos po yin pa'i phyir ro/ /gang gi tshe yang dag pa'i sbyor ba can yod pa de'i tshe 'dres par gyur pa'i bdag nyid 'da' bar byed pa ma yin no/ /de'i phyir ngo bo 'dres pa tsam 'brel pa yin no/ /gang gi phyir yang ngo bo 'dres pa 'brel pa yin pa de'i phyir tha dad pa'i dngos po rnams la don dam par 'brel pa yod pa ma yin te/ tha dad pa la ngo bo 'dres pa med pa'i phyir ro/ /rang rang gi ngo bo tsam la gnas par gyur pa/ phan tshun bdag nyid rjes su 'du ba las phyi rol du gyur pa dag la 'dres pa 'di ci yin/ gang gi phyir 'di dag la de nyid yod na dngos po gzhan med pa'i rang bzhin gyi bdag nyid can 'brel par 'gyur na/ de'i phyir 'dres par gyur pa kho na 'brel pa can nyid ni ma yin te/ de'i don ni mi srid pa'i phyir ro/ /des na 'dres pa ni 'brel pa ma yin no/ /gal te rang gi ngo bo tsam la gnas pa na 'dres pa ma yin no zhes rdul phra rab rnams la yang mi 'gyur na/ des na ji ltar drug gi cig car sbyor ba'i rnam par brtag par bya zhe na/ ma yin te bar ma chad pa tsam la brten pa phan tshun reg pas de'i thal bar 'gyur ba'i phyir ro/ /de nyid 'brel ba can du gyur pa yang ma yin te/ dngos po'i khyad par ma grub pa'i phyir ro/ /phan tshun bdag nyid khongs su 'dus pa na ni de nyid gcig ma yin pa las gcig tu gyur pa'i dngos po'i khyad par du gyur na 'di ni yod pa ma yin te/ gnyis nyid ma spangs pa'i phyir ro/ /gal te bar dang bcas pa rnams las bar med par 'byung ba nyid khyad par nyid la de nyid yang 'brel pa can du 'gyur ba yin no zhe na/ khyad par 'di ni rang gi ngo bo'i bdag nyid tsam du gyur pa yin gyi/ gzhan la gnas pa ni ma yin pas ji ltar gcig ma yin pa la gcig tu gyur pa ma yin no/ /phan tshun du gyur pa'i khyad par ni 'brel pa can nyid yin te/ gzhan la ltos pa nyid kyi phyir ro/ /de yang de ltar rab tu ma grub pa ste/ des na tha dad pa rnams la ngo bo 'dres pa'i 'brel pa med de/ dngos po med pa'i phyir ro/ /gal te bar ma chod pa'i bdag nyid dag ni rang gi bdag nyid tsam du grub pa las 'brel pa can nyid gzhan la ltos pa ni med kyi/ de'i tshe gzhan la ltos pa kho na 'brel pa can nyid de yang gzhan la ltos par gyur pa ni 'brel pa kho na yin te/ de'i de tsam don dam pa nyid yin pa'i phyir ro/ /de dag la gzhan ltos pa'i bdag nyid kyi dngos po'i chos med pa'i phyir ro/ /de'i phyir gzhan la ltos pa kho na 'brel pa yin no zhe na/ de ni mi rigs te/ de lta bur gyur pa'i dngos po'i rang bzhin mi srid pa'i phyir ro/ /gang gi phyir/ gzhan ltos pa ni 'brel pa can/ /de med ji ltar ltos par byed/ /yod pa kun la ltos med pa'i/ dngos po ji ltar ltos par byed/ /gal te dngos po gzhan la ltos pa nyid ces pa dngos po la 'thad pa ni de la 'di don dam pa'i ngo bo 'brel pa'i rang bzhin du 'gyur te/ dper na ba lang nyid srid pa na de'i dngos po la ba lang nyid kyi mtshan nyid dngos po la yod pa nyid du bstan par bya ba yin te/ de bzhin du gzhan la ltos pa'i bdag nyid can gyi dngos po'i don gyi rang bzhin srid par yod pa ma yin no/ /gang gi phyir 'brel pa gzhan la ltos pa de yang yod pa'am med pa la srid pa ma yin pa'i phyir de'i dngos po med pa kho nar gyur pa yin te/ de lta na ni med pa ltos par byed pa ma yin te/ med pa'i phyir thams cad kyi rang bzhin can gyi chos kyis stong pa'i phyir ro/ /'di ltar thob pa'i rang bzhin ltos par byed pa de'i tshe thob pa'i bdag nyid yin pa'i phyir/ 'di la ltos pas thob par bya ba'i rang bzhin gyi yul ni yod pa ma yin no/ /gang 'di rang bzhin nyid grub pa'i bdag nyid thob pa na de la 'di ltos pa cung zhig kyang med do/ /gang yang rang bzhin du gyur pa med na de la ji ltar yang thob/ nus pa ni med de grub pa dang ma grub pa'i bdag nyid srid pa ma yin pa'i phyir ro/ /de'i phyir 'ga' zhig la cung zhig kyang ltos pa med de/ /yod pa dang med pa'i gnas skabs dag la 'gal ba'i phyir ro/ /des na phan tshun ltos pa'i 'brel pa can dag yod pa yin na gang gis de dag gi ltos pa gzhan kho na'i 'brel par 'gyur/ des phan tshun rang bzhin gyis 'jug pa can rang rang gi ngo bo tsam la gnas par mngon par shes pa'i 'brel pa can dag ni med do/ /de'i phyir gzung ba dang 'dzin pa'i dngos po gsal bar bya ba dang gsal bar byed pa'i dngos po la sogs pa yang med do/ /gzung ba la ltos pa ni 'dzin par byed pa nyid yin no/ /gzung ba med na 'dzin pa'i nus pa 'di cung zhig kyang med de/ de'i phyir gzung ba la ltos pa yin na med pa'i gnas skabs nyid ni ma yin no/ /dngos po yod pa thams cad yongs su rdzogs pa'i rang bzhin ni gzung ba la ltos par byed pa ma yin no/ /gal te yod pa'i gnas skabs kho na ltos pa dang ldan pa'i phyir yod pa nyid 'dzin par byed pa yod pa nyid kyi gzung ba 'dzin pas de ltar gzhan pa la yang blta bar bya'o zhe na/ gang gi phyir de yod pa na 'ga' zhig gi rang bzhin gyis ma grub pa la de ltos pa nyid ma yin no/ /'di ni gzung bar bya ba 'dzin par byed pa dang gsal bar bya ba mngon par gsal bar byed pas de ni ltos pa yin no zhe na/ de gang 'di 'dzin par byed pa zhes bya ba de gang gang gi gzung bar bya ba yod par 'gyur na 'gyur te 'di yang srid pa ma yin no/ /yod pa'i bdag nyid la 'ga' zhig gi ngo bo'i grub pa ni 'gal ba'i phyir ro/ /'di ltar 'dzin pa zhes bya ba ni cung zhig kyang med do zhe na/ 'o na 'di 'dzin par byed pa po ni ma yin no/ /ci ste rang gi rgyu kho na las 'dzin pa po'i rang bzhin skyes so snyam na/ 'o na gzung bya la ltos pa'i 'dzin pa ni ma yin te/ 'di yang 'thad par bya ba ma yin no/ /de ltar 'brel pa can dag gi yang blta bar bya ba yin no/ /gzhan la ltos pa can nyid 'brel pa can nyid yin na gcig kho na ni 'brel pa ma yin pa 'brel par gyur pa ni med do/ / de'i phyir gal te gzhan yod pa na 'brel pa can gyi dngos po yongs su rdzogs pa de ni yongs su rdzogs pa'i bdag nyid du ma skyes pa 'di yin na/ thob pa'i bdag nyid la rdzogs par bya ba mi srid pa'i phyir ro/ /ci ste yongs su rdzogs par byed pa la ltos pa byed pa ma yin na/ gzhan yod pa na yang 'brel pa can nyid du 'gyur ba ni ma yin no/ /de'i phyir gzhan la ltos pa'i bdag nyid can 'brel pa ni 'ga' zhig kyang med do/ /ci ste 'brel pa can gyi rang gi ngo bo yongs su dpyad pas 'brel pa thob par bya ba ni ma yin la/ 'brel pa can dag gi 'brel pa 'di ni 'ga' zhig tu bdag nyid kyis tshad mas nges par gyur pa yin no zhes brjod do zhe na/ de 'di yang dngos po rtogs par byed pa rnams kyi yul ma yin pa ma yin te/ 'di ltar/ gnyis la gcig gis mngon 'brel pas/ /gal te de gnyis la 'brel yod/ /'brel pa ci yin thug med dang / /de ltar 'brel pa'i blo med do/ /'brel pa brjod pa dngos po gcig yod pa'i phyir 'brel pa can gnyis yin no zhes brtag par bya ba la 'brel pa can gnyis kyis 'brel pa gang yin pa ni 'brel pa gcig dang lhan cig tu zhes bya ba'i don to/ /sbyor ba can gyi 'brel pa can dag la 'brel pa dang 'du ba'i 'brel pa yod na/ de ltar na nye bar rtogs pa na thug pa med par 'gyur ba dang / 'du ba dang sbyor ba can dag la yang 'brel pa gzhan nye bar rtogs par thal bar 'gyur ro/ /de ltar de'i yang zhes thug pa med pa thob par byed do/ /ci ste 'du ba 'jug pa'i phyir 'brel pa la ltos par byed pa ma yin te/ de lta bu'i rnam pa can gyi 'brel pa gzhan med pa'i phyir gang gis na yang dag par sbyor ba las 'du ba'i 'jug pa ni ma yin no/ /gang gi phyir yon tan du gyur pa yang dag pa'i sbyor ba ni rdzas la 'jug pa nyid kyi rdzas ma yin pa'i 'du ba la 'jug par byed pa ma yin no/ /de'i 'du ba yang gcig nyid yin pa'i phyir 'brel pa can gyi 'du ba la yod pa ma yin te/ 'du ba gzhan med pa'i phyir ro/ /de'i phyir 'jug pa'i rang bzhin nyid kyis 'du ba 'jug par byed pa yin gyi 'jug pa gzhan la ltos ba dang bcas pa nyid kyis ni ma yin te/ 'brel pa can du dper na sgron ma gsal bar byed pa'i rang bzhin nyid kyis rang gi bdag nyid gsal bar byed pa na gsal ba gzhan la ltos par byed pa ma yin te/ /bum pa bzhin no zhe na/ de ni gzegs ma zos pas nye bar bcom pa'i shes rab lha chen po'i mchog ster ba thob pa las skyes par gyur pa'i mngon pa'i nga rgyal gyis thob pa rnams la 'khrul pa brjod pa 'di yin te/ phyin ci log gi rmi lam bzhin no/ /gang gi phyir dngos po'i rang bzhin kho nas gzhan gang gzhan la 'brel pa la ltos pa med par 'jug par byed pa ma yin zhes pa 'di yin nam tshad mas de ltar rtogs par gyur pa yin/ gzhan gzhan la 'jug pa zhes pa ni de 'brel pa med pa la de ltar 'jug par byed do zhes ji ltar yin/ gzhan du 'brel pa med na dngos po gnyis tsam nyid de ltar brjod par 'gyur ba ma yin nam/ gzhan la yang de ltar dngos po gnyis kho na yin no/ /de'i phyir ha cang thal bar 'gyur ba spang ba'i don du 'jug pa ni/ gzhan gyi gzhan du 'jug pa'i phyir 'brel pa khas blang bar bya ba yin no zhes dngos po gnas pa 'di yin no/ /de ni snga ma dang phyi ma rnam par dpyad pas stong par gyur pa'i rang gi tshig kho nas spangs pa'i 'jug pa yin te/ rang gi ngo bos 'di la 'jug par byed do zhes pa'o/ /gal te 'jug pa'i rang bzhin nyid kyis 'jug pa'i nus pa yod na spyi la sogs pa rnams kyang de'i rang bzhin ma yin no zhes lha rnams dga' bas gang las rtogs pa yin/ gsal ba'i dpe nye bar bstan pa gang yin pa de ni/ don dam par ma rtogs pa nyid yin te/ gang gi phyir 'ga' zhig ni 'bras bu cung zhig byed pa na lhan cig byed pa la rten par byed de bum pa la sogs pa'i yul rnam par shes pa skyed pa na snang ba'i lhan cig byed pa las dbang po'i nus pa yin gyi sgra la ltos pa'i shes pa bskyed pa ni ma yin no/ /de ltar snang ba la ltos pa'i rnam par shes pa skyed par byed pa la yang mig ni snang ba gzhan lhan cig byed pa la ltos pa med pa gang rnam par dbye ba de ni mngon sum gyis nges par 'gyur ba yin no/ /gsal ba nyid ces bya ba gzhan ni med de/ de yang rgyu sna tshogs pa 'di mngon sum gyis nges pa yin gyi 'brel pa can rnams la rnam par dbye ba 'ga' zhig mthong ba ma yin na gang gis 'di 'brel pa gzhan la ltos pa la 'jug par byed pa 'di ni gzhan no zhes bya ba'i rnam par dbye bas nges par 'gyur ba yin no/ /sbyor ba'i 'jug pa ni 'du ba'i bdag nyid kyis mngon sum nyid ma yin pa'i phyir ro/ /de nyid kyi phyir 'du ba yang 'jug pa la ltos pa dang bcas pa'i 'jug par byed pa'am ltos pa med pa'i yang yin no zhes bya ba ni ma grub pa yin no/ /rjes su dpag pa la yang tha dad pa 'jug pa la ltos pa med pas khyab pa'i chos grub pa ma yin no/ /rtog pa'i nus pas 'brel ba grub pa ma yin no zhes kyang 'chad par 'gyur ro/ /'du ba ni 'jug pa kho na yin no zhes pa ni 'jug pa'i rang bzhin yin pa'i phyir 'jug pa la ltos pa med pa yin te/ dper na gsal ba nyid yin pa'i phyir rab tu gsal ba gzhan la ltos pa med pa yang zhes pa 'di nyid kyis gsal ba yin te/ gsal ba nyid ma grub pa'i phyir ro/ /'jug pa'i rang bzhin nam 'brel pa'i rang bzhin zhes pa ni ji ltar shes pa ni shes pa nyid yin pa'i phyir/ shes pa gzhan la ltos pa med pa de ltar 'gyur ro/ /de'i phyir 'brel pa gzhan la ltos pa na thug pa med pa yin no/ /des na gnyis la gcig gis mngon 'brel phyir/ /'brel pa yin zhes pa ni rigs pa ma yin no/ /gal te mngon sum nyid yin pa yang 'du ba de la de'i bdag nyid yin pa'i 'jug par khas len pa la 'jug pa'i rtogs pas nges pa nyid du bya ba yin no/ /'di ltar yang 'dir spyi dang khyad par dag la'am/ sbyor ba can dag la 'du ba zhes pa ni rtogs pa la yang yin no/ /gal te 'brel pa med na khar gzhong 'di la rgya shug rnams dang snal ma 'di rnams la snam bu zhes bya bar ji ltar 'gyur zhe na/ ji ltar gyur pa'i 'brel ba rnam par brtag par bya'o/ /de ltar gyur pa'i 'brel pa'i rtogs par byed pa'i tshad ma yod pa ma yin no/ /'di ltar yang dag par sbyor bar gyur pa rtogs pa'i rgyu mtshan mngon sum pa sbyor bar 'dod de ji ltar khar gzhong 'di na zho yod do zhes khar gzhong la zho sbyor ba ni mngon sum gyi gzung bar bya ba yin te/ rten du gyur pa'i khar gzhong dang brten par gyur pa zho yin no/ /de yang yang dag par sbyor ba brten pas khyad par du gyur pa 'di la rtogs pa'i yul yin na 'dir gzhan sbyor ba zhes pa mngon sum pa ni cung zhig kyang med do/ /'di la zhes pa ni khar gzhong rten du bstan pa yin la khar gzhong zhes pa ni 'di ni gzhi mthun pa yin no/ /de lta bu'i rnam pa'i dbang du byed pa ni 'di ni rjes su brjod pa'i rang bzhin 'byed pa'i tshig yin no/ /zho zhes pa ni brten pa yin no/ /de'i phyir rtogs pa 'di la dngos po'i ngo bo 'di tsam ni gang rjod par byed pa'i ngo bo'i tshig 'di rnams yin no/ /tha dad par gyur pa'i rtogs par bya ba yod par bya ba ni tha dad par gyur pa de nyid la rtogs pa yod na yang ji ltar rjod par byed pa tha dad pa spong bar byed pa de'i phyir rten dang brten pa spang pas sbyor ba zhes bya ba ni rtogs par gyur pa ma yin no/ /kho bo cag gi dbang po'i bya bas rtogs par gyur ba ni/ mngon sum gyis rab tu grub pa yin par 'gyur la 'di las kyang gang zhig khar gzhong dang zho'i rnam pa can gyi rtogs pa las mtshan nyid mi mthun pa de nyid yang tha dad par gyur pa'i sbyor ba'i yul gyi ngo bo la de ni yan lag ma yin no/ /'di la rten dang brten pa tsam zhig gsal bar bya'i de dag gi sbyor ba ni ma yin no/ /de'i phyir rten dang brten pa'i rang bzhin nyid ni rten dang brten pa'i ngo bo yin par ma chad pa nyid yin no/ /de nyid kyi phyir khar gzhong dang zho tsam la mtshan nyid mi mthun pa'i dmigs pa can gang yin pa'i rtogs pa yin te/ gnas skabs tha dad pa thob pas khar gzhong dang zho'i bdag nyid la mi mthun pa'i mtshan nyid thob pa'i phyir ro/ /gzhan du ni khar gzhong tsam gyis rtogs pa yin la gzhan du ni zho'i rten du gyur pa'i khar gzhong rtogs pa yin te/ dper na gzhan ni skyes bu'i rtogs pa yin gzhan yang lang tsho la sogs pa'i sbyor bar gyur pa de'i rtogs pa bzhin no/ /de'i phyir gnas skabs kyi khyad par gnas par gyur pa'i dngos po rtogs pa kho na rten dang brten pa'i rtogs pa yin gyi sbyor ba'i rtogs pa ni ma yin no/ /de'i phyir yang brten pa'i khyad par can du gyur pa yang dag pa'i sbyor ba yin no zhes pa ni 'brel pa med pa yin no/ /des khyad par du gyur pa khyad par du bya ba'i gnas skabs la gnas par gyur pa de'i gzhi'i bzhin du rtogs pa rtogs pa dang bcas pa'i rnam par shes pa la mi brten pa nyid kyi phyir ji ltar dbyug pa rtogs pa la skyes bu ni rtogs pa'i khyad par du brjod par bya ba yin no/ /khyad par du bya ba'i khyad par du gyur pa'i shes pa so sor snang ba med pa la mngon sum nyid kyang ma yin no/ /de bzhin du yang dag pa'i sbyor ba'i khyad par du byed pa nyid so sor snang ba ma yin pa nyid yin na yang mngon sum nyid ma yin no/ /de'i phyir khar gzhong 'di na zho yod do zhes bya ba ni yang dag par rtogs pa ni ma yin gyi khyad par du gyur pa'i gnas skabs kyi dngos po dag gi rtogs pa nyid yin no/ /de ltar steng dang 'og na gnas par yang chad pa ma bskal pa'i dngos po gnyis kyi rtogs pa la yang yang dag par sbyor bar gyur pa'i rtogs pa yin gyi de ltar gnas pa dngos po gnyis las tha dad pa ni ma yin no/ /de'i phyir yang dag par sbyor bar gyur pa'i rtogs pa'i rgyu mtshan du gyur pa sbyor ba ni cung zhig kyang med do/ /gzhan yang dngos po rnams kyi yul du byed pa ni gsal ba nyid yin gyi don rtogs pa zhes bya ba ni cung zhig med do/ /de yang mngon sum rnams kyi yang gzhan du gyur pa yin la rjes su dpag pa rnams kyi yang gzhan du gyur pa yin no/ /de ni sor mo gnyis mngon sum du gyur pa gsal ba yang dag par sbyor ba rtogs pa la khyad par gyi gnas skabs la gnas pa de'i ngo bo nyid las tha dad pas gsal bar bya ba'i yang dag par sbyor ba gsum pa ni de'i ngo bo bzhin du gsal bar byed pa ni cung zhig kyang med do/ /de 'di sbyor bar gyur pa'i rtogs pa ni de'i gsal ba'i rjes su 'brang ba'i dngos po nyid yin no/ / 'di dag la yang dag pa'i sbyor ba zhes bya ba yang tha dad pa mngon sum dag la snang ba ma yin pa'i phyir ro/ /de yang tha dad par grub pa ma yin no zhes bya ba la sogs pa rgyas par ni spyi nyid la rnam 'grel gyi rjes su 'brang bar ston pa'i phyir/ yang dag par sbyor ba zhes mngon sum gyis grub pa ni cung zhig kyang med do/ /snang ba yin na yang mngon sum snang ba tsam nyid yin gyi 'brel pa dang 'brel pa can dag gi rang bzhin ni ma yin no/ /de ltar snang ba yod na yang ji ltar dngos po dpyod pa brjod par 'gyur bas bkag par gyur pa de lta bu'i rnam par rig pa'i ngo bo la 'khrul pa nyid yin gyi sgrub par byed pa mngon sum ni ma yin te/ dper na zas nye bar longs spyod pa la sogs pa'i stobs las gzhan du mthong ba dang / rdul phra rab dang rags pa la sogs pa mi srid pa la gzugs la sogs pa'i shes pa dang lus la sogs pa'i gnas par gyur pa'i rtogs pa yin no/ /de'i phyir yang dag par sbyor ba mngon sum pa ma yin no/ /'di nyid kyi phyir 'du ba yang des dpe grub pa can gyi rjes su dpag par bya ba ma yin te/ gang zhig gang gis smras pa snal ma 'di rnams la snam bu zhes 'dir 'di la'i rtogs pa ni 'brel pa'i 'bras bu yin te/ gnod pa med par gyur pa nyid yod na 'di la'i rtogs pa nyid yin pa'i phyir khar gzhong 'di na zho yod pa zhes pa'i rtogs pa bzhin no zhes pa 'dir dper grub pa ma yin te/ /khar gzhong 'di na zho yod do zhes pa ni 'brel pa'i 'bras bu nyid ma yin pa'i phyir te/ gnas skabs kyi khyad par rnam par gnas par gyur pa'i dngos po dmigs pa can gang yin pa ni de'i 'bras bu nyid yin no/ /gal te yang snal ma 'di rnams la snam bu zhes pa'i rtogs pa ni 'du ba'i dmigs pa can yul de la de'i dmigs pa can nyid de'i 'bras bu nyid yin no/ /de'i phyir grub pa bsgrub bya nyid dam bca' ba'i skyon yin te/ sgra la mnyan par bya ba yin no zhes bya ba bzhin no/ /gang la grub pa de la bsgrub par bya ba ma yin pa'i phyir ro zhe na/ ma yin te/ 'di la mi rtogs pa nyid la sgrub pa'i rang bzhin yin pa'i phyir gang la de grub pa de la ma grub pa nyid med pa'i phyir ro/ / ma grub pa nyid na yang chos can ma grub pa yin no/ /de lta yin na yang 'du ba mngon sum pa nyid du thal bar 'gyur na de yang yod pa ma yin te/ 'du bar gyur pa 'di dag ces rang gi ngo bo gsal ba'i bdag nyid can gyi 'jig rten pa'i rtogs pa med pa'i phyir ro/ /gal te 'du ba'i dmigs pa can ma yin na de'i tshe ji srid du dmigs pa na 'di'i rang gi ngo bo grub pa la de las tha dad pa'i 'bras bu nyid kyis khyab pa ma grub pa yin no/ /khar gzhong 'di la rgya shug rnams so zhes pa ni 'brel pa'i 'bras bu nyid kyis khyab pa yin no zhe na/ gal te rtogs pa 'di ni 'brel pa'i dmigs pa can yin la de'i tshe snal ma rnams la snam bu brten pa nyid kyis 'di la'i rtogs pa de'i dmigs pa can yin par 'gyur ba yin te/ sngon po'i rtogs pa'i sngon po'i yul can nyid la sngon po ma yin pa'i rtogs pa ma yin no/ /de ltar gyur pa de'i phyir chos can gsal bar gyur pa dam bca' ba'i skyon yin no/ /gtan tshigs la yang gzhi ma grub pa nyid dang 'gal ba nyid yin no/ /gal te 'brel pa dmigs par bya ba ma yin pa la yang 'di la'i rtogs pa 'jug pa de'i tshe dpe la 'brel pa'i yul nyid du ma grub pa yin no/ /gnod pa med pa nyid yod pa yang khyad par du byed pa ma grub pa yin te/ 'jug pa mi 'thad pa'i phyir de'i bdag nyid kyis de mi rigs pa'i phyir ro/ /'brel pa 'dzin pa'i ngang tshul can gyi tshad ma yod na yang ji ltar thug pa med pa ma yin na de ltar 'gyur te/ gal te de nyid kyis 'brel pa 'dzin pa'i ngang tshul can gyi tshad ma'i tshad ma nyid du 'gyur ba ni ma yin no/ /de'i phyir 'brel pa'i blo yod do zhes rnam par gnas par 'gyur ba yin no/ /de bzhin du 'du ba'i gcig pa nyid la sogs pa gzhan rnams kyang brjod pa yin te/ 'di la'i rtogs pa'i khyad par ma yin pa'i phyir gcig pa nyid la gal te 'di la'i rtogs pa'i khyad par gcig pa nyid sgrub par byed pa ni rjes su 'gro ba med pa'i rjes su dpag pa yin no/ /'di la rtogs pa'i 'brel pa gcig gi 'bras bu nyid kyi khyab pa grub pa ni ma yin no/ /de'i khyab pa ma grub pa la ji ltar 'di la'i rtogs pa rtogs pa'i khyad par yin/ de ltar yang ji ltar gcig pa nyid yin/ yang dag par sbyor ba la'i rtogs pa tha dad pa med de khar gzhong 'di la rgya shug rnams dang khri 'di la lha sbyin 'dug pa dang / rtog pa 'di la me tog rnams dang / khang pa 'di la ba lang rnams yod do zhes mngon sum gyis yang dag par sbyor ba tha mi dad par grub par 'gyur ro/ /de ltar rten du ma la brten pa'i du ba tha dad pa la yang / 'di na me yod do zhes pa'i rtogs pa'i khyad par med pa yin no/ /ma byas pa nyid kyang ma grub pa yin te/ gang dag nyid rten gyi rgyu can de dag nyid du 'du ba'i rgyu can ma yin no zhes pa ni mna' med pa rtogs pa med pa'i phyir ro/ /tshad ma la ma brten pa'i khyad par du byas pas dngos po grub pa ni med do/ /rten 'jig pas 'jig par grub pa la ma byas pa nyid grub pa ni yod pa ma yin no/ /de'i phyir gzegs zan rnams kyi rtog ge 'di snying po med pa yin no/ /shin tu rgyas pas sun dbyung bar bya ba ma yin te spros par thal bar 'gyur ba'i phyir ro/ /de'i phyir 'brel pa'i blo yod do zhes pa rigs pa ma yin no/ /de'i phyir yang / dngos de dag dang de las gzhan/ /de kun bdag nyid la gnas pa/ /de phyir rang bzhin 'dres med pa/ /de rnams rtogs pa sre bar byed/ /dngos po'am tshad ma las 'brel pa rnam par gnas pa ma yin no/ /gnyis la dngos po gcig khas blangs na yang 'brel pa can de gnyis dang 'brel pa yang ni rang gi bdag nyid la gnas par 'gyur ro/ /de'i phyir dngos po thams cad la ni ma 'dres pa'i bdag nyid can yin no/ /dngos po de ltar gyur pa rnams la yang rnam par rtogs pa sre bar byed de 'di 'di'i zhes rtogs par byed pa yin no/ /'di la 'di'i zhes pa rtogs pa 'di yang de nyid sre bar byed pa yin no/ /gnyis po'i yang rang gi bdag nyid tsam gnas pa nyid yin na cung zhig 'ga' zhig kyang med do/ /ci ste yang cung zhig 'di'i zhes rtog pa'i phyir rang gi bdag nyid kho na'i de yod pa nyid ma yin gyi de'i zhes des sre ba'i dngos po yin no/ /'di la yang 'brel pa tha dad pa ni 'ga' zhig la snang ba ma yin te/ 'ga' zhig brtags par gyur na gang gis dngos po rnams ni 'brel pa ma yin gyi brtags par gyur pa ni yod do zhes dpal chos kyi grags pa'i dgongs pa ma rtogs par gyur pa smra bar 'gyur ro/ /dngos po dngos po gzhan dang 'dres par gyur pa 'ba' zhig gsal gyi 'dres pa gzhan 'brel pa gang yin par ni mi 'gyur te/ yang dag par sbyor bar gyur pa rtogs pa la ji skad du bshad pa yin no/ /'brel pa can las tha dad pa'i 'brel pa rtogs pa yin na ni 'brel pa can du 'gyur gyi 'brel pa ni ma yin no/ /'o na 'brel pa gang la yod pa ni 'brel pa can no zhes pa de nyid kyi phyir tha dad pa'i 'brel pa 'phangs pa yin te skyes bu la dbyug pa can gyi rtogs pa bzhin no zhe na/ ma yin te/ de dang ldan pa tha dad pa'i 'di la tshad ma gzhan gyis rtogs pa'i phyir de rtogs pa gang zhig de dang ldan pa'i dngos po yin no/ /tha dad pa'i 'brel ba ni rtogs pa med kyi gnas skabs kyi khyad par sbyor ba la yod la 'brel pa de nyid kyang de dang ldan pa'i dngos po rtogs pa'i spyod yul yin no/ /de nyid kyi phyir yang rnam 'grel du 'brel pa rang gi sgra'i brjod par bya ba nyid ma yin par gsungs so/ /de bzhin du ldan par gyur pa'i sor mo'am sor mo'i ldan pa zhes khyad par gzhan spangs pa dang ma spangs pa nyid tsam du gsungs so/ /de nyid kyi phyir yang don gcig pa nyid yin par 'gyur ro/ /des na 'brel pa zhes bya ba brtags par gyur pa ni med do/ /de yang gzhan par khas len na de nyid gzhan gyis mngon sum du smra bar 'gyur ro/ /de la yang rtogs pa med pa la sogs pa'i sgrub par byed pa la rtsol ba dka' bar 'gyur ro/ /rtogs pa 'di yang nya phyis la sogs pa'i rtogs pa bzhin du rtogs par byed pa ma yin te/ de'i phyir nya phyis su myong ba'i rjes su 'gro ba nyid du rigs pa yin zhes ji skad du bshad pa nyid rigs so/ /de nyid la rjes su byed pa rnams kyis/ dngos po tha dad rtogs don du/ /bya dang byed pa po yi tshig /rjod par byed rnams sbyor bar bya/ /rtogs pas byas pas bsres pa'i dngos po'i rjes su 'tsho ba'i sgra rnams kyang bsres pa'i dngos po'i rjes su byed pa yin no/ /'di ltar yang 'dir bya bas khyad par du gyur pa'i byed pa po brjod pa'i brdar gyur pa'i sgra'i stobs kyi bya ba dang byed pa po'i rtogs pa ni bskyed par bya ba yin no/ /de la yang bya ba dang byed pa po dag gi 'dres pa'i ngo bo rtogs pa yin no/ /ji ltar rgyal po'i skyes bu zhes bya ba la sogs pa la 'dres par rtogs pa ni de'i gnas skabs kyi khyad par gyi rtogs pa grub pa yin pa de ltar bya ba dang byed pa po dag la ni ma yin te/ rnam pa thams cad du yod pa ma yin no/ /'on kyang de lta bu dngos po sna tshogs pa nyid kyi rtogs pa kho na yin no/ /byed pa po dang las dag las ches gang yang rung ba la brten pa nyid kyis de ltar gyur pa'i bya ba rtogs par bya ba de ni de'i ngo bo rtogs pa'i gnas skabs kyi khyad par la brten pa rtogs pa'i bya ba sgro btags pa yin te dper na 'gro ba zhes bya ba yul de dang der gyur pa 'gro ba po'i yin la 'bras chan 'tshod par byed do zhes bya ba yang 'bras chan la brten pa'i rnam par 'gyur ba'i khyad par yin no/ /gang zhig bya bar sgro btags pa de yang wa ya ka ra la sogs pa'i gzhung gi rtsa ba can yin gyi/ bag chags tsam la brten pa ni ma yin te/ gtso bo la sogs pa rnam par rtog pa bzhin no zhes gzhan du rgyas par smras so/ /'o na dngos po tha dad pa rtogs pa'i don du zhes pa ni sel ba'i rtogs pa'i don du yin no zhes rigs so/ /bya ba dang byed pa po dag la tha dad pa dang tha dad pa ma yin pa dag gis dngos po rnams la med pas de ma yin pa la ldog pa ma grub pa'i phyir ro/ /sngon po nyid dang skad cig ma nyid la sogs pa rnams ni tha mi dad par yod pa yin no/ /de'i phyir de la brten pa nyid kyis gzhan la sel ba'i yul can nyid du rigs pa yin no zhe na/ bya ba dang byed pa po dag la ni rang gi ngo bos brjod par bya ba nyid du gyur pa bkag pa yin la/ dngos po la brten pa nyid brten par bya ba'i don gyis dngos po tha dad du rtogs don du zhes gsungs so/ /de dag lhan cig dngos min phyir/ /rgyu dang 'bras bu'i dngos po yang / /ji ltar gnyis la gnas par grub/ /gnyis gnas min na ji ltar 'brel/ /gal te yang rgyu dang 'bras bu'i dngos po khas blangs par gyur na/ gzhan gyi dbang nyid kyi 'brel pa ji ltar spang bar bya/ /yang na 'bras bu rgyu'i bdag nyid la gzhan gyi dbang nyid du gyur pa'i phyir dang / rgyu yang 'bras bu'i byed pa la yin pa de ltar 'bras bu skye ba rgyu la ltos pa yin te/ de'i phyir rgyu dang 'bras bu'i dngos po 'brel pa ma yin par ji ltar 'gyur/ rgyus ni 'bras bu zhes bya ba yin pa'i phyir ji ltar gnyis la 'brel pa med pa yin na de'i phyir 'brel pa can rgyu dang 'bras bu'i bdag nyid can gyi dngos po dag yod pa yin no zhe na/ de yang rigs pa ma yin te/ gang gi phyir 'brel pa ni gnyis la gnas pa yin no zhes brjod par bya ba yin na de 'bras bu dang rgyu'i dngos po yang ji ltar gnyis la gnas pa yin/ de bzhin du yang ji ltar 'brel pa yin no/ /ji ltar yang gnyis la gnas pa ma yin/ ji srid du rgyus 'bras bu bya ba yin pa'i phyir rgyu dang 'bras bu gnyis kho na yin no/ /de'i phyir 'di ji ltar gnyis la gnas pa ma yin na zhe na/ de ltar yang gnyis la gnas pa grub pa ma yin te/ de dag lhan cig pa ma yin pa'i phyir ro/ /gal te yang rgyus 'bras bu bya ba de ltar yang de dag lhan cig pa'i dngos po ma yin te/ gang gi tshe rgyu yod pa de'i tshe 'bras bu med pa'i phyir dang / gang gi tshe yang 'bras bu yod pa de'i tshe rgyu'i dngos po thams cad skad cig ma nyid yin pa'i phyir ro/ /de'i phyir 'di gnyis la gnas pa ma yin pas 'brel pa ma yin gyi 'bras bu dang rgyu dag kho na yin no/ /de ltar 'bras bu dang rgyu'i dngos po bkag pa ni ma yin gyi/ 'brel pa ma yin no zhes pa yin no/ /'brel pa de yang gzhan du dogs pa ma yin gyi 'on kyang rgyus 'bras bu byed pa'i phyir 'di nyid la 'brel par 'khrul pa yin no/ /gzhan po bkag pa ni snga ma bzhin gyis grub po/ /rgyu dang 'bras bu de dag nyid la rgyu dang 'bras bu'i ngo bo nyid kyis 'brel pa can nyid 'ba' zhig tu gyur na de nyid de bzhin du dgag par bya'o/ /'bras bu dang rgyu dag la lhan cig pa'i dngos po med pa nyid kyis 'brel pa nyid yod pa ma yin no/ /'di ltar/ rim gyis gcig la dngos po ni/ /'jug yin gzhan la ltos med de/ /de med na yang yod phyir ro/ /de phyir gcig 'jug can 'brel min/ /rgyu dang 'bras bu dag gi rim gyis pa'i dngos po nyid ni ji skad du bshad zin to/ /de'i phyir yang rgyu'i mtshan nyid kyi dngos po yul dang dus gcig tu 'jug pa 'bras bu la ltos pa med pa ni 'brel pa ma yin no/ /'brel pa tha dad pa med pas 'brel pa can nyid du brjod la de med pa'i phyir yang 'brel pa'i ngo bo med pa yang yin no/ /de lta bu'i dngos po yin na yang gcig la 'jug pa nyid du thal bar 'gyur ba las 'brel pa de lta bur 'gyur ba yang ma yin te/ 'bras bu'i dngos po la yang rgyu'i dngos po med pa'i phyir ro/ /de bzhin du 'bras bu ltos pa med pas kyang rim gyis dngos po rnams ni rgyu la ltos pa med pa yin la rgyu med pa na yang yod pa yin no/ /de ltar yang 'brel pa can nyid ma yin te/ 'brel pa gcig la 'jug pa ni bkag pa'i phyir ro/ /'di ltar 'bras bu la ltos pa rgyu nyid yin la rgyu la ltos pa yang 'bras bu nyid yin pa'i phyir ltos pa yin la de las kyang 'brel pa yin no zhes brjod do zhe na/ de yang ma yin te/ gang gi phyir/ de dag gi gcig la ltos nas/ /gal te gzhan pa de 'jug na/ /'phen byed ltos par bya yin na/ /med pa ji ltar ltos par byed/ /phan tshun ltos pa nyid du rnam par gnas pa na gnyis la ltos pa'i 'brel pa byed pa 'jug pa yin la 'brel pa yang 'jug pa yin te/ de dag gi nang nas gcig la ltos nas gzhan du 'jug par byed do/ /de nyid 'di ltos pa yod la 'gyur na de nyid ni 'brel pa ma yin te/ gang gi phyir rgyu 'bras bu la ltos pa yin no zhes pa ni 'bras bu la ltos pa yongs su rdzogs pa'i rgyu nyid yin la 'gyur na/ de la ltos pa med pa rang dbang du grub pa la ni 'bras bu la ltos pa nyams pa yin no/ /de bzhin du 'bras bu yang 'bras bu nyid la bdag nyid yod pa'i dus kyi dngos po can ni gal te rgyu la ltos pa yin la de'i tshe de la ltos pa nyid du 'gyur na sngar rang gi ngo bo yod par grub pa las ltos pa nyid 'thad pa ma yin te/ med pa la ltos pa med pa'i phyir ro/ /de ltar phan pa yod pa la de ltos par 'gyur na med pa yang ji ltar phan par byed pa yin 'bras bu rang gi yod pa'i dus na yod pa'i 'bras bu nyid ni rgyu med par ji ltar ltos nas rdzogs pa yin rgyu'i rgyu nyid kyang ngo / /de'i phyir ltos pa'i don cung zhig kyang med do/ /rgyu med na 'ba' zhig pa'i 'bras bu ni srid pa ma yin pas ltos pa'i tha snyad yin gyi dngos po yod pa la ltos pa'i don ni cung zhig kyang med do/ /de'i phyir ltos pa'i dngos po med pas 'brel pa nyid med na 'brel pa 'ga' zhig kyang med do/ /gal te yang / rgyu dang 'bras bu'i 'brel pa ni/ /cis na ltos par bya ba yin/ /gang gis rgyu dang 'bras bu nyid la 'brel pa khas blangs pa thal bar brjod zin to/ /cis na 'brel pa'i ngo bo kho na rgyu dang 'bras bu nyid yin/ rgyu dang 'bras bu nyid du gnas pa dngos po de dang de med na mi 'byung bar nye bar gnas pa ni 'brel pa yin no zhe na/ de la/ /gal te don gcig dngos 'brel phyir/ /de dag la rgyu 'bras nyid na/ /gnyis nyid dang ni dngos 'brel pas/ /g.yas g.yon rwa la thob par 'gyur/ /gnyis gnas gang zhig 'brel yin na/ / de mtshan de las gzhan pa min/ /'brel pa'i don gcig gis sbyor ba kho na gal te/ rgyu dang 'bras bu nyid yin na/ de'i tshe gnyis nyid du brjod pa'i phyir yang g.yas pa dang g.yon pa'i rwa de'i dngos por mi ldan pa dag la yang rgyu dang 'bras bu nyid yod par 'gyur te/ dus mtshungs pa can gyi rwa rgyu dang 'bras bu ma yin pa dag yang grangs kyi rang bzhin gnyis yod do/ /de'i phyir don gcig dang mngon par 'brel pa kho na rgyu dang 'bras bu nyid du rigs pa ma yin no/ /gal te don gnyis nyid don gcig yin na yang grangs nyid yin pa'i phyir 'brel pa'i rang bzhin ma yin no zhe na/ gnyis la gcig 'jug pa las tha dad pas gzhan 'brel pa nyid ces pa ci yin/ 'di rnams kyi rang gi ngo bo las gzhan tha dad pa ni sngon po dang ser po bzhin du yod pa ma yin no/ /gang gis 'brel pa gcig las kyang rwa gnyis zhes rtogs par 'gyur te/ 'di ni grangs nyid yin na gang gi phyir 'di'i 'di rwa yin no zhes 'brel pa yin no zhe na 'di nyid brgal zhing brtag par bya ste/ gzhan gyi rang bzhin nyid ci yin zhes spyi brtags par bshad zin to/ /yod dang med pa'i khyad par can/ /sbyor ba gal te rgyu 'bras nyid/ /sbyor ba'i khyad par de dag nyid/ /rgyu 'bras nyid du 'dir cis min/ /tha dad phyir zhes gal te 'di/ /sgra yin sbyor ba po la brten/ /gal te phyogs gzhan yang rgyu dang 'bras bu'i dngos po nyid du gnas pa na de'i tshe rgyu dang 'bras bu'i dngos po zhes 'brel pa 'phangs pa yin la 'ga' zhig yod na yod pa gang yin pa de med na yang med pa ni rgyu dang 'bras bu'i ngo bo yin la de khyad par du gyur pa 'di 'brel pa ni rgyu dang 'bras bu'i dngos po yin no/ /gal te de la 'di 'dod par 'gyur zhe na/ de'i tshe 'brel pa'i khyad par du byed pa nyid kyis gang zhig yod pa dang med par 'dod pa de dag nyid rgyu dang 'bras bu'i dngos por 'gyur mod/ 'brel pa ci rgyu dang 'bras bu la gzhan rgyu dang 'bras bu'i ngo bo'i 'brel pas ci yin/ rgyu dang 'bras bu'i dngos po thob pa dag la gzhan 'brel pas de snyed pa nyid kyang dngos po mthar thug pa las ci yin/ de lta bu'i rnam pa 'di rang bzhin thob pas ni 'brel pa spangs par shes pa ni rigs pa yang ma yin la nyams su myong ba yang ma yin pas 'di mi rigs so/ /gal te rgyu dang 'bras bu dag la 'brel pa zhes pa ni tha dad pa las rtogs par bya ba yin la/ de ltar gyur pa dag la yang 'brel pas yin no zhe na/ de ni mi rigs te/ gang gi phyir 'di ni sgra yin gyi nyams su myong ba ni ma yin la de yang tha snyad sbyor ba po'i gzhan gyi dbang gi don la brten pa yin pas de lta bu la sogs pa'i dngos po rnam par gnas pa ma yin no/ /de dag kho na rgyu dang 'bras bu nyid yin no zhes rigs kyi gzhan 'brel pa ni ma yin te/ 'di ltar ma mthong skye bo ni/ /mthong dang ma mthong bar byed pas/ /mthong dang de ma mthong ba la/ /ston byed na yang 'bras bur shes/ /me la sogs pa'i tshogs pa'i rgyu gcig mthong bar byed pa'i rtogs pa po ni dmigs pa'i rig byar gyur pa dmigs pa gang zhig mthong ba na/ de ma mthong na dmigs pa ma yin pa de ni me la sogs pa'i 'bras bu nyid du rtogs par byed do/ /'di la ci 'di ji tsam du 'jug pa yin nam/ /gzhan du yin zhes nges par byed pa po me mthong ba tsam dang / shing yod pa tsam dang / shing mthong ba tsam gyis ma yin no/ /me yod pa na yang / ma mthong bar byed pa ni de tsam la 'bras bu nyid du nges par byed do/ /'chad pa pos stong pa'i rtogs pa 'di ni rnam par rtog pa med pa'i mngon sum nyid yin la/ gal te yang rtogs pa rnams ni las su bya ba nyid kyi 'bras bu nyid du rtogs par byed de dper na bum pa la sogs pa rnams la rdza mkhan gyi lag pa la sogs pa'i skul bar byed pa'i dbang gis cung zhig cung zhig mngon du 'jug pa nyid dang / de bzhin du sems med pa'i sa bon la sogs pa yin na yang myu gu la sogs pa rnams rim pa las mngon du 'jug pa nyid kyis de'i tshogs pa'i las su bya ba nyid du rtogs par byed do/ /de ltar yang las su bya ba nyid la de can nyid de kho na yin gyi/ 'di zhes bya ba ni ma yin te/ rtogs par byed pa rnams kyis 'di las 'di rnams kyi rtogs pa 'di yin no zhes rtogs par byed de/ de rnams kyis de ltar ma rtogs na/ yang dbang ba'i bya ba yang 'jig rten pa'i rtogs pa'i yul ma yin pa yang rtogs pa med pa kho na las rtogs pa yin par gzhag go/ /mthong dang ma mthong ma rtogs par/ /'bras bu'i blo ni mi srid phyir/ / 'dir ni 'bras bu la sogs sgra/ /spang ba'i don du 'jug pa yin/ /mthong ba dang ma mthong ba mngon sum dang mi dmigs pa dag spangs nas gzhan 'bras bu'i blo yod pa ni ma yin gyi/ de dag kho na ji skad du bshad pa yin no/ /gang gi tshe yang mthong ba dang ma mthong ba dag 'bras bu'i blo yin pa de'i tshe de dag gis yul du byas pa gang yin pa de 'bras bu yin la de dag kyang 'ga' zhig yod pa dang med pa na yod pa dang med pa dag kho na yin no/ /de ltar gyur pa'i 'bras bu la yang yan lag dang yan lag gi nges pa'i tshig spangs nas de lta bu'i khyad par du gyur pa yod pa dang med pa'i tshig ni 'bras bu'i sgrar byas pa yin no/ /de yod yod phyir 'bras bu ni/ /rtogs pa 'ga' zhig brjod bya ste/ /brda yi yul du brjod pa ste/ /lkog shal la sogs glang rtogs bzhin/ /gal te yang mthong ba dang ma mthong ba dag kho na 'bras bu'i blor 'gyur na/ 'on kyang yod pa dang med pa dag ni 'bras bu yin na de yang yod pa ma yin te/ yod pa dang med pa dag gis 'bras bu nyid du sgrub par byed pa'i phyir ro/ /de'i phyir gzhan kho na 'bras bu nyid yin la 'bras bu'i blo yang gzhan yin no zhe na/ de ni rigs pa ma yin te/ yod pa dang med pa dag gi 'bras bu'i rtogs pa gang zhig brjod par bya ba ni yod pa dang med pa tha snyad du bya ba dag la 'bras bu nyid kyis de rjod par byed de/ dper na lkog shal la sogs pa tshogs pa'i bdag nyid kyi ba lang gi rtogs pa bzhin no/ /'di yang gzhan du rgyas par bshad zin to/ /bltar gyur pa tha snyad kyi yul brjod pa tsam 'di de yod pas yang dag par smras pa yin gyi/ de yod pa dang med pas 'bras bu'i rtogs pa ni ma yin te/ gang gi phyir/ dngos po yod na de yod pa/ /yod pa nyid na'ang yod gyur pa/ /mngon sum mi dmigs pa dag las/ /rgyu 'bras nyid du rab tu grags/ /mngon sum dang mi dmigs pa dag las ni rgyu dang 'bras bu nyid rtogs par bya'i de yod pa dang med pa dag las ni ma yin no/ /de dag ni yod pa dang med pa kho na yin te/ 'di ltar me la sogs pa'i dngos po yod pa na du ba yod pa ni mngon sum gyis rtogs par 'gyur la me la sogs pa de dag yod pa nyid na yang du ba yod par 'gyur ba yin gyi sngar yod pa nyid ni ma yin pas mi dmigs pas rtogs par 'gyur ba yin te/ me yod pa las sngar du ba dmigs pa'i rig byar gyur pa'i dngos po rtogs pa med pa'i phyir ro/ /gang kho na yang yod pa na yod pa dang med pa na de yod pa 'di ni de nyid rgyu dang 'bras bu dag gi rgyu dang 'bras bu nyid yin no/ /de phyir de tsam yang dag don/ /rgyu dang 'bras bu spyod yul can/ /rtogs pa rnams ni log don rnams/ /'brel pa 'dra ba'i don ston byed/ /mngon sum dang mi dmigs pa tsam gyis rtogs par gyur pa yod pa dang med pa don dam pa ba rgyu dang 'bras bu'i spyod yul can rnam par rtog pa de ltar gyur pa yang de rnams ni don yod pa ma yin pa'i don gyi rang gi ngo bo rnams ston par byed/ yang de rnams kyi yod pa ma yin pa'i dngos po'i ngo bor gyur pa gang yin zhe na/ gang gi 'di 'brel par gyur pa rnams kyi snang ba dang 'dra bar 'di'i 'di rgyu yin/ 'di'i 'di 'bras bu yin no zhes pa'i 'brel pa yang mi bden pa nyid yin te/ 'di ltar/ tha dad pa la 'brel pa gang / /tha mi dad na'ang rgyu 'bras ci/ /gzhan yod pa dang 'dres med pa/ /de dag ji ltar 'brel par 'gyur/ /gal te rgyu dang 'bras bu dag gi bdag nyid kyi rang bzhin mthar thug pa tsam gyi ngo bo yod kyi de dag gi phan tshun pa ni cung zad kyang med do/ /'o na rgyu dang 'bras bu'i ngo bo de phan tshun pa yin no zhe na ma yin te/ de'i bdag nyid yod pa las tha dad pas gnyis la phan tshun pa'i don mi 'thad pa'i phyir ro/ /gang gi tshe 'bras bu yod pa de'i tshe rgyu yod pa ma yin pas de'i de cung zhig kyang ma yin no/ /gang gi tshe yang rgyu yod pa de'i tshe 'bras bu yod pa ma yin pa de yang gang gi yang ma yin no/ /'o na ji ltar rgyu dang 'bras bu'i ngo bo yin zhe na/ yang dag pa'i sbyor ba'i spangs pa'i bdag nyid yin te/ de'i rang bzhin yod par bden pa'i phyir ro/ /'brel pa de las gzhan pa gang yin pa dngos po'i rang gi ngo bo na rgyu dang 'bras bu'i ngo bo yin no/ /gal te de ltar 'brel pa'i dbang nyid kyis 'di'i gang yod pa de ni tha mi dad pa yin no zhe na/ de tha dad pa med pa la de tha dad pa med pa ni rgyu dang 'bras bu nyid du mi 'thad pa yin te/ nges par grub pa'i rang bzhin yin pa'i phyir ro/ /gal te de ltar rgyu dang 'bras bu sbyor ba tsam du gyur pa dag la yang dag par sbyor ba gcig yod pa yin te/ ji ltar me dang du ba bzhin dang 'du ba can dag la yang 'du ba yod de ji ltar rdzas dang yon tan dag bzhin te/ de la yon tan so sor sbyor ba can gyi rgyu nyid yin pa'i phyir ro/ /de'i phyir yang rgyu dang 'bras bu dag ni 'brel pa can du 'gyur ba yin no zhe na/ de ni mi rigs te/ /rgyu dang 'bras bu'i bdag nyid thob pa dag la yang gcig yod na 'dres pa nyid med pa'i phyir te/ bdag nyid ma 'dres pa nyid yin pa'i phyir ro/ /'dis ni sbyor ba can dag dang / /'du ba can sogs kun dpyad de/ /phan tshun phan 'dogs med pa'i phyir/ /de ni de 'dra'i 'brel can min/ /gang gi phyir rgyu dang 'bras bu'i dngos po ni 'brel pa ma yin te/ de'i mtshan nyid mi mthun pa'i phyir/ 'di nyid kyi phyir sbyor ba can nam 'du ba can rgyu yin pa bkag ste/ rgyu dang 'bras bu'i gnas skabs dag ni phan tshun phan 'dogs pa la gzhan gyi dbang nyid kyis sam/ 'dres pas sam ltos pas kyang ma yin pa'i phyir te/ gcig nye ba na gzhan ma grub pa'i phyir ro/ /de ltar gang yang dngos po las phan 'dogs par byed pa dang bral bar gyur pa de ni 'brel pa can ma yin no/ /'bras bu 'du ba can gyi yang / /'ga' zhig skyed par byed yin na/ /de tshe 'du ba can de min/ /de las ma yin thal 'gyur phyir/ /gzhan gyi tshe yang 'brel yin la/ /gzhan gyi tshe yang skyed pa yin no zhes rgyu 'brel pa can nyid du brjod pa ma 'brel pa yin te/ 'di ltar 'du ba can yin pas 'bras bu'i skyed par byed pa yod pa na yang gang gi tshe 'dis 'bras bu skyed pa de'i tshe des 'du ba ma yin no/ / de la de'i tshe med pas des 'du ba can nyid med pa'i phyir ro/ /gang gi tshe yang de la yod par gyur pa de'i phyir yang de la 'du ba yod pa de'i tshe skyed par byed pa ma yin no/ /de'i phyir 'du ba can yod pa dag ni rgyu nyid ma yin te/ 'du ba can nyid yin pas sngar nyid yod pa'i phyir ro/ /rgyu yod pa'i yang phyir 'du ba can nyid yin na yang 'du ba can rgyu nyid ma yin no/ /ci ste 'du ba kho na las rgyu nyid yin no zhe na/ de'i tshe spyi yang rdzas la 'du bar 'gyur ba yin te de'i phyir de la yang rdzas kyi rgyu nyid du thal bar 'gyur ro/ /de'i phyir de yod pa na sngar med pa 'di rang bzhin yod pa kho na skyed pa yin no/ / de yod pa ni de 'du ba nyid do zhes pa yin gyi 'du ba can rgyu yin no zhes pa ni cung zhig kyang med do/ /gzhan yang 'brel pa can nyid yod na don rnams las 'brel pa yod par 'gyur na phan tshun mthar thug pa'i rang bzhin yod pa ma yin na yang ji ltar 'brel pa can nyid yin/ de'i phyir yang 'di cung zhig byed pa nyid la phan tshun phan par 'gyur te de'i phyir phan par byed pa'i dngos po ni 'brel pa can nyid yin no/ /de dag phan min pa la yang / /'du ba 'am ni gzhan pa la/ /gal te sbyor yin sna tshogs pa/ /phan tshun 'du ba can du 'gyur/ /'brel pa can dag gi phan par byed pa ma yin pa la yang yang dag par sbyor ba'am/ 'du ba la yang gal te 'brel par 'dod na de'i tshe sna tshogs pa yang 'du ba can du 'gyur ba 'di ni nye bar mtshon pa yin te de'i sbyor ba can du yang 'gyur ro/ /sbyor bas sam 'du bas 'brel pa brjod pa'i phyir 'brel pa can du 'gyur ro zhes brjod pa yin no/ / 'brel pa med pa la yang gal te 'brel par 'gyur na thams cad la 'gyur ro/ /sbyor ba skyed par byed na yang / /de phyir sbyor ba can nyid dag/ /'dod yin la sogs sbyor thob phyir/ /gnas pa'ang so sor brjod pa yin/ /de ltar yang 'gyur na phan tshun phan pa byed pa nyid ma yin pa la yang 'brel pas skyed par byed pa nyid kyi 'brel pa can nyid do zhes gang dag gi 'di cung zhig sbyor ba skyed par byed pa la 'brel pa can nyid du 'gyur ba'i phyir shin tu thal bar 'gyur ba ma yin pa'i phyir ro zhe na/ de ni mi rigs te/ gal te skyed par byed pas 'brel pa'i 'brel pa can nyid yin pa de'i tshe ches gzhan pa'i la sogs pa las skyes pa'i sbyor ba'i las la sbyor ba yod par 'gyur te/ /de'i de skyed par byed pa 'di nyid yin pa'i phyir ro/ /gal te yang rdzas sam las la yang dag par sbyor ba yod pa de'i tshe yon tan la sogs pa rnams la yang 'gyur ro/ /gal te rdzas kho na 'di 'dus pa yod pa yin gyi skyed par byed pa'am las la ni ma yin no zhe na/ de ni mi rigs te/ 'du ba'i mtshan nyid la phar phan par byed pa ma yin par gnas pa la bkag pa'i phyir ro/ /sbyor ba 'ba' zhig la phan par byed par 'dod na de yang spangs zin to/ /yang dag par sbyor ba la yang sbyor ba can nyid du 'gyur na sbyor ba las skyes pa la yang sbyor ba khas blangs pa zhes pa de nyid stsogs pa'i sgra'i don yin no/ /rnam par dbye ba rnams ni bya bas sbyor ba skyed pa ma yin te 'on kyang sbyor ba la sogs rten pa na/ /rung mi rung bar de las skyes/ /rung ba'i rang bzhin rtags yin na/ /de ma tshang ba 'gal phyir ro/ /sbyor ba dang rnam par dbye ba'i bya ba la brten pa na rung ba ma yin pa'i dngos po rung bar sbyor ba la sogs pa la 'di skye ste/ de'i phyir de tsam nyid khas blang bar bya ba nyid yin no/ /gang gi rnam par dbye bar 'gyur ba rnams la sbyor ba nye bar skye na de'i tshe de la rung ba nyid ma yin pa rnams la de rung ba nyid skye ba de tsam khas blang bar bya'o/ /gzhan du na bdag tu yod pa nyid kyis rung ba rnams la re 'ga' de ma tshang bar 'gyur ba ma yin no/ /de'i phyir de rung brjod bya ba/ /byed dang sbyor bar gyur ba yi/ /gzhan la 'gro la sogs rnams kyis/ /'di yi rang bzhin brjod nyid cing / /gang gi tshe yang de la rung ba'i dngos por skye bar khas blang bar bya ba de'i phyir dngos po'i rung ba nyid kyis rang bzhin du brjod par bya ba yin no/ /de'i phyir yang de kho na rnam par dbye ba dang sbyor bar gyur pa'i sgra rnams kyis nges pa gnyis brjod par 'gyur ba nyid yin la rnam par dbye ba la sogs pa gzhan rnams kyi don 'ga' zhig ni ma yin no/ /gang gi tshe gang gi gnas skabs rnam par dbye ba la sogs pa'i skyed par byed pa'i rung ba rnams skye ba de'i tshe de'i gnas skabs de rnams kho nar rnam par dbye ba la sogs pa sgrar brjod par bya ba yin gyi/ rnam par dbye ba la sogs pa rnams ni cung zad kyang med de/ bar dang bcas pa rnams ni rnam par dbye bar skyed par byed pa'i rung ba nyid yin la/ bar med pa rnams kyang yang dag par sbyor ba'i'o/ /tha dad pa'i yul can rnams kyang bya bas zhes pa de rnams kho na de'i sgras brjod par bya ba yin no/ /de yod pa rnams kyang de'i zhes/ /'brel pa ma grub pa yi phyir/ /de phyir rang bzhin tha dad gang / /so so'i skad cig skyes de yis/ /yang dag par sbyor ba la sogs pa tha dad pa rnams la yang dag par sbyor bar gyur pa la sogs pa rnams kyis ji skad du brjod pa'i rigs pas 'brel pa ma grub pa'i phyir yang dag par sbyor ba nyid la sogs pa ma grub pas ji ltar brjod pa'i rang bzhin tha dad pa kho na yin par rigs so/ /de yang dngos po skad cig ma so sor skye ba rnams kho na'i yin no zhes grub pa'o/ /dpal dga' byed pa'i tsha bo ste/ /rgya 'phel byed pa'i bde byed pa/ /dga' ba yis ni 'brel pa 'di/ /dpal 'phel bu la brtse bas byas/ /'di la bdag gis gsal bar byas pa de nyid don/ /bde gshegs rigs pa zla ba'i gzugs brnyan mtshon byed pa/ /ches rgya che ba'i blo la rnams gzigs bya bar ni/ /blo yi chu bo 'phel phyir myur bar 'byung bar 'gyur/ /'brel pa brtag pa'i 'grel pa bram ze shaM ka rA nan+tas mdzad pa rdzogs so// //rgya gar gyi paN+Di ta chen po pa ra he ta'i zhabs la zhus nas/ bod kyi sgra sgyur gyi lo tsA ba dge slong dga' ba'i rdo rjes bsgyur ba'o// //

CLOSE WINDOW