བོད་ཡིག

e-texts based on the ACIP/ALL Input

@##/ /rgya gar skad du/ pra mA Na brti kA lang+ka ra TI kA/ bod skad du/ tshad ma rnam 'grel gyi rgyan gyi 'grel bshad/ 'phags pa 'jam dpal gzhon nur gyur pa la phyag 'tshal lo/ /gang zhig spang dka'i nyes tshogs 'joms mdzad gsal zhing 'bar ba'i shes rab 'byung gnas gyur/ /brtson 'grus drag pos 'jig rten rmongs chen las 'don thugs rje brtan po rgya chen 'khrungs/ /shes rab nor gyis rab tu phongs pas ma rtogs phyir na sbas te gnas pa la/ /ma nor lam ston 'gro rnams bde skyong de ni dpal ldan chos kyi grags pa yin/ /'di na ri rab mtho min nam ci rgya mtsho chen po zab pa min nam ci/ /ma nyams sa gzhi brtan min nam ci mkha' yi dkyil 'khor dang ba min nam ci/ /de 'dra de rnams dang mtshungs khro ba chen po zhi byed rmongs nyid sel byed cing / /brang 'gro'i rgyal bos 'khyud min legs pa'i blo la'ang log pa'i lam nyid yin zhes par/ /rmongs pas rab tu smod par byed pa'ang ci 'dra ba yis legs pa yin pa smros/ /chen po rnams kyi lam ni chung ngu'ang chen po yin phyir shin tu brling ba nyid/ /legs par bstod pa'i blo can de yi lam la goms byed rtsom pa'i lus can ni/ /'gro ba'i nang na mi bsngags brjod bya min phyir 'chad byed bdag la'ang ci phyir smod/ /rgyal byed rigs pa'i don rtogs pa/ /rnams kyis cha tsam bstan pas kyang / /kun du rmongs pa chen po yang / /sel bar byed pa ngo mtshar zhing / /tshad ma rnam 'grel mdzad pa po dang / de'i bshad sbyar rtsom par 'dod pa bdag nyid kyang kha cig dag gi phyin ci log la zhen pa bsal bar 'dod nas tshad mar gyur pa zhes bya ba la sogs pa'i tshigs su bcad pa gnyis smos te/ de la sdug bsngal gyi rgyur gyur pa'i log pa'i shes pa can la y ang dag pa'i shes pa bstan pa dang 'dra bar slob dpon la brnyas pa'i kha na ma tho bas 'khrul pa'i skye bo yongs su bskyang bar 'dod pa'i thugs rjes de'i gzhung gis bshad par gyur pa tshad ma rnam 'grel mdzad pa yin no zhes zer ba de ni mi rigs te/ 'di la tshad ma med do/ /gang gi phyir de'i gzhung la kho bos bshad ces bya ba'i tshig med pa'i phyir ro/ /de'i lugs zhes bya ba la sogs pa yang / de zhes bya ba ni bcom ldan 'das sam rjes su 'dzin pa po zhes bya ba'i don to/ / de'i lugs ni 'dis ston pa ma yin te/ rtog pa dang bral ba nyid ces bya ba la sogs pa'i sngon gyi slob dpon brgyud pa'i lugs kyi bshad bya nyid nye bar blangs pa'i phyir ro/ /gdams ngag kyang thams cad tshad ma ma yin gyi gnod pa med pa can nyid yin no zhe na ma yin te/ de'i lugs kyang don gyis bshad pa'i phyir ro zhes bya ba'i gdams ngag yin gyi de'i lugs nyid ni ma yin te/ lung ni lhag par dor nas ni/ /zhes gang bstan pa'o/ /de'i lugs ni 'grel pa byed pa gzhan gyi lung ni ma yin gyi de'i lugs ni de yin no zhes bya ba'i nges pa yang med pa'i phyir ro/ /khyed kyi la yang nges pa ci zhig yod ce na/ gzigs pa po yi mdo ni kho bos rnam par dbye/ /zhes smos pa'i phyir ro/ /slob dpon nyid ni gzigs pa po ma yin te/ rigs pa sems pa'i bdag nyid kyi shes pa skyes pa'i phyir la sa thob pa yang mthong ba yin na de yang bdag nyid sa thob pa'i bar du thugs la dgongs shig ces bya ba la sogs pa gsal ba yin no/ /tshad ma la sogs pa rnams mthong ba yod kyang don yod pa yin la lugs kyang yin pa de'i zhes/ rnam pa thams cad gzigs pa ni 'dir don ma nyams pa gsungs pa yin gyi phyogs gcig mthong ba la ni ma yin no/ /phyogs gcig mthong ba nyid la 'di ltar brtags pa yang ma yin te/ de ltar bstan pa la dgos pa med pa'i phyir dang / gtso bo yod pa la yang yin pa la nye bar gdags pa mi rigs pa'i phyir ro/ /rtog pa dang ldan pa ni/ des bstan pa'i gzhung lugs la/ ltos pa med pa yin te/ byang grol la sogs pa don du gnyer ba la de'i thabs rig pa ni/ phyin ci ma log pa'i tshad mas rtogs par 'dod pa yin no/ /de yang rjes su bzung bas de la ltos pa dang bcas pa yang yin te/ 'khrul pa'i skye bos rab tu sbyar ba sun 'byin pa ltar snang ba gsal ba'i phyir dang / ji lta ba bzhin gyi sgrub pa nye bar bstan pa'i phyir de sgrub par rigs so/ /de la yang de lta bu'i shes pa 'grub pa'i rgyu dang 'bras bu yang med do zhes bya ba la sogs pa'i log par rtog pa rnam pa mang po rig pa yin no/ /ltos pa med pa'i ston pa po yang nyan pa po sbyong bar byed pa ma yin bzhin du smra ba yin na ni ji ltar smyon pa ma yin/ de'i gzhung lugs bshad pa'i sgo nas ltos pa dang bcas par sgrub par byed pa ni ma yin te/ 'chad pa dang nyan pas ches dub pa'i phyir yang ngo / /'on te dub pa nyid bzod du zin yang mi nus pas slob dpon la gus pa ma yin te/ slob dpon rnams ni mtha' yas pa'i phyir de rnams la ma gus pa yongs su dor nas kun du 'dod pa blang bar ni mi nus kyi rang nyid kyi'o zhe na ma yin te/ thams cad kyi 'dod pa nyid kyis rang nyid kyi yin pa'i phyir ro/ /slob dpon phyogs kyi glang pos rigs pa gsal bar mdzad pa la/ pha rol po dag des gsungs pa la skur ba 'debs pa spong bar byed do/ /de'i 'og tu pha rol po'i rnam par 'khrul pa spangs pa'i rigs pa'i lam skyon gyis ma gos pa'i rnam 'grel rang dbang du mdzad na/ de'i 'og tu slob dpon phyogs kyi glang pos ma shes par gyur to/ /slob dpon phyogs kyi glang po'i tshad ma ni 'di lta bu zhes brnyas par gyur te/ de'i gzhung la 'di lta bu'i rigs pa ma mthong ba'i phyir ro/ /slob dpon dbyig gnyen la sogs pa sngon byung ba rnams la ni pha rol po dag da ltar skur pa mi 'debs te/ des na de'i gzhung 'chad pa la brnyas pa spang bar mngon par 'dod pa med de/ mi nus pa ni thug pa med par 'gyur ba'i phyir ro/ / slob dpon gzhan la brnyas pa ni med de/ mngon par zhen pa med pas spong ba med pa'i phyir ro/ /mtho ris la sogs pa'i lam mi bslu ba can gyi tshad ma nyid la ni rtog pa dang ldan pa rnams ltos pa yin pa'i phyir de nyid brjod bya yin par gong du bstan pa yin no/ /yang 'di ltar de lta brnyas pa yongs su spang ba yang de'i mngon par 'dod pa'i tshad ma sgrub pa nyid kyi phyir de nyid bstan par bya ba yin no/ /bden te/ de'i 'dod pa 'ba' zhig ni rang dbang du tshig nyung ngu dag gis bstan pas don la sbyar ba la reg par dka' bas de'i gzhung la brten nas gzung bar mi nus pas smod par byed pa'i phyir de'i gzhung du bshad pa'i gdams ngag gi rnam pas tshad mas grub pa'i mngon par 'dod pa bstan pa yin no/ /de ni de'i gzhung lugs gang yin pa 'dis bshad pa ma yin gyi sngon gyi slob dpon brgyud pa las 'ongs pa rtog pa dang bral ba nyid ces bya ba la sogs pa bshad pa'i phyir slob dpon phyogs kyi glang pos 'dir yang rjes su brjod pa yin la/ de yang de kho na bzhin du bshad pa'i don du rnam 'grel mdzad pas kyang rjes su brjod pa yin no/ /de'i phyir de'i gzhung gi rnam par bshad pa la brten pa ma yin la/ de la brnyas pa'i rgyus de mngon par 'dod pa'i tshad ma rab tu sgrub pa'i phyir yang ma yin no/ /gang la yang thun mong ma yin pa'i phyir zhes bya ba la sogs pa smos pa de lta na de ji ltar don 'di 'chad pa yin de yang rang nyid don de brjod pas de'i gdams ngag de nyid rab tu bstan pa'i phyir kun du drangs pa yin no/ /don ni 'di ni de'i ma yin pa kho na ste/ gdams ngag brgyud pa las 'ongs pa'i phyir ro/ /phyogs kyi mtshan nyid la sogs pa gang du yang bstan pa de'i gzhung nyid la yang brjod pa'i phyir de'i don 'chad par byed la/ de yang drangs pa kho nar dgongs pa'o/ /bstan par sla ba'i phyir de ltar byas pa yin gyi de'i gzhung bshad pa'i phyir ni ma yin no/ /'di ltar yang / des bcol bas kyang ma yin la rnam par rig pa tsam gyi yul la nye bar bkod pa'i gtan tshigs ltar snang ba la sdang ba yang ma yin pa de'i phyir yang dang yang du rtsod pa la dgos pa med do/ /de nyid kyi phyir de'i gzhung bshad pa'i thabs su gyur nas rjes su dpag pa dang por bshad pa ni ma yin no/ /de'i don du tshigs su bcad pa dang po bshad pa yin par yang go bar mi bya'o/ /ci zhig bshad pas ma mdzad ce na/ yang dag par rdzogs pa'i sangs rgyas bcom ldan 'das chos dang chos ma yin pa ston par mdzad pa rnam par dpyad par bya ba ma yin pa sgrub par byed pa yin la de nyid ni thams cad kyis ltos par bya ba yin pa'i phyir de la ltos pa med par sgrub par byed pa yang rigs pa ma yin no/ /bcom ldan 'das de yang yang dag pa'i tha snyad la ltos nas rgyu dang 'bras bu'i gnas skabs kyi dbye bas rnam pa gnyis te/ rgyu'i gnas skabs ni byang chub sems dpa'i gnas skabs te/ de'i dus su yang thams cad rjes su dpag pas rtogs par byed pa'i phyir bcom ldan 'das kyis rjes su dpag pa thog mar gsungs so/ /lung rigs dag gis rnam dpyod pa/ /zhes rjes su dpag pa'i le'ur gang 'chad par gyur pa bstan pa ni/ 'gro la phan bzhed ston pa zhes bya'o/ /de bzhin du 'bras bu'i gnas skabs ni rang gi don dang gzhan gyi don dag phul du byung ba'i dbye bas rnam pa gnyis so/ /de la rang gi don phul du byung ba ni thams cad kyis rnam pa thams cad phyin ci ma log par mngon du mdzad pa'i phyir mngon sum gyi rang bzhin no/ /rnam pa du ma'i thabs mang po zhes gang 'chad par 'gyur ba bstan pa ni/ bde gshegs skyob pa zhes bya'o/ /gzhan gyi don phul du byung ba yang bcom ldan 'das ni de ji lta ba bzhin du mngon par 'dod pa'i lam gzhan rnams la ston par mdzad pa'i phyir gzhan gyi don gyi rjes su dpag pa'i rang bzhin no/ /de la rang gi don phul du byung ba rtsa ba yin pa'i phyir thog mar mngon sum mo/ /de'i dbang du gyur pa'i rjes su dpag pa yang tshad ma yin pas bsgrub bya ji lta bas khyab pa'i rtags dran par byed pa nyid kho nas tshig gi tha snyad la nye bar sbyor ba'i phyir rang gi don gyi rjes su dpag pa'i 'og tu gzhan gyi don gyi rjes su dpag pa bsgrub par 'dod/ nas de bstan pa ni skyob la zhes bya ba'o/ /tshad ma gsum po 'di'i yang spyi'i mtshan nyid med na/ rig byed la sogs pa tshad ma ma yin pa mtshan nyid dang bral ba can mi rtogs pa'i phyir tshad ma spyi'i mtshan nyid rab tu sgrub pa'i phyir le'u dang pos te de bstan pa ni tshad mar gyur pa zhes bya ba'o/ /spyi'i mtshan nyid kyi rnam par dbye ba'i tshig dag gi snga ma dang phyi ma'i nges pa ni med do/ /rnam par phye ba dag gis tshad ma ma yin pa rnam par bcad pa ni tshad ma rnam par nges pa ji lta ba bzhin no/ /spyi'i mtshan nyid kyis tshad ma ma yin pa rnam par bcad pa'am rnam par dbye ba 'di nyid du rnam par gcod pa ni/ rnam pa gnyis zhes bya ba la sogs pas rnam par dbye ba ston par 'gyur te/ bye brag gi mtshan nyid kyi yan lag yin pa'i phyir rnam pa gnyis so/ /des na dang po nyid ces bya ba ni nges pa'o/ /gang gi phyir rnam par dbye bas bzhag pa dag med na shin tu nges pa'i ngo bo rtogs par 'dod cing rtogs par byed par 'dod par yang mi nus so/ /'di lta bu'i tshad ma de la phyag btsal nas bshad par bya zhes bya bar sbyar ro/ /gzhan yang bcom ldan 'das kun rdzob dang don dam pa'i ngo bo gzhan gyi 'khrul pa sel ba 'dir bsgrub par bya ste/ bag chags dang bcas pa'i dri ma thams cad rab tu spangs pa'i phyir yon tan phun sum tshogs pa brnyes pas phul du byung ba dngos po ma lus pa gnyis su med par thugs su chud pa'i phyir mngon sum pa'i bdag nyid can ni don dam par ro/ /kun rdzob tu yang de dang rjes su mthun pa nyid kyi tshad ma yin par shes pa'i don du de la 'khrul pa med pa'i rnam par rtog pa dang tshig gi ngo bo rang gi don dang gzhan gyi don gyi rjes su dpag pa'i dbye bas bstan te/ des na rtsig pa la sogs pa las byung bas bstan pa rnams nyid la yang kho bo cag yid ches pa med do zhes zer ba'i gzhan gyi 'khrul pa bsal ba yin no/ /gang gi phyir mngon du mdzad pa der nges pa'i gtan tshigs nges pa de rtog pa po'am tshig la rtog pa dang ldan pa rnams yid mi ches par mi rigs zhes bya ba'i don to/ /lhag ma ni 'di la yang mtshungs so zhes bya ba ni le'u'i go rims so/ /de la tshad mar gyur pa la zhes bya ba'i dang po'i phyed ni bstod pa'o/ /tshad ma grub pa 'chad par byed pa yin gyi slob dpon gyis gzhung bshad pa'i phyir ma yin pa ni rnam 'grel mdzad pa'i dgongs pa bstan pa'o/ /de la yang gtan tshigs ni rtog ge ngan 'khrul zhes bya ba'o/ /gzhan yang kha cig bcom ldan 'das mar me bzhin du mya ngan las 'das kyang tshad ma nyid du sgrub pa'i phyir ro zhe na/ de la tshad mar gyur zhes bya ba la sogs pa smos so/ /skyon med pa'i dngos po dor bar rigs pa ma yin te mya ngan las 'das pa lta bu'o/ /de bzhin du thams cad mkhyen pa'i ye shes kyang ste de bstan pa ni bde gshegs zhes bya ba'o/ /de lta bu'i rang bzhin yin yang dngos po'i rgyun gyi rgyu med pa'i phyir mar khu la sogs pa zad pa'i mar me bzhin du zad pa ma yin nam zhe na/ phan bzhed pa ston pa zhes bya ba smos te/ 'dis kyang rgyu brtan po gzhal du med par bstan pa yin no/ /'on te de lta na yang 'ga' zhig nye bar sbyor bar mi byed cing 'dor la/ 'gal ba 'du ba'am rang nyid skye ba yin no zhe na/ tshad mar gyur pa zhes bya ba smos so/ /skye ba thams cad du phan pa nye bar bstan pas phan btags pa yin na/ de don med pa can ma yin gyi lan cig byung ba'i phan btags pa byas pa des kyang dgos pa ci zhig yod ce na/ mi rigs te phan gdags par bya ba mtha' med pa la phan gdags pa yang mtha' med pa'i phyir 'gro ba thams cad kyi don bya'o zhes kyang dam bcas pa'i phyir la/ de yang ma rdzogs pa'i phyir bcom ldan 'das nyid kyang yongs su ma rdzogs pa yin te/ de bstan pa ni tshad ma zhes bya'o/ /de la yang 'gal ba med par bstan pa ni yang dag ces bya ba'o/ /yang dag pa la yang dag pa ma yin pas gnod pa ma yin te/ nya phyis kyi shes pa la dngul gyi shes pas gnod pa ma yin no/ /yang dag pa la gnod par byed pa yang dag pa yin par ni mthong ste grang ba la sreg byed lta bu'o/ /de bzhin du 'dir yang snyoms par 'jug pa la sogs par 'gyur ro/ /de ni ma yin te/ gtan du 'gal ba ma yin gyi skad cig de la 'gal ba slar yang 'byung ba'i phyir te/ de bstan pa ni/ skyob pa zhes bya ba ste/ rgyun gyis gnas pa zhes bya ba'i don to/ /sprul pa nye bar bsdu ba tsam gyis yongs su mya ngan las 'das par bstan kyang thams cad du rnam par rgyal ba po bcom ldan 'das ni 'khor ba ji srid par bzhugs pa yin no/ /gang yang bcom ldan 'das ni rang gi rang nyid rgyu las dbang po la sogs pa'i mtshan nyid kyi tshad ma nyid kyi ye shes skyes pa yin gyi/ yon tan la sogs rgyu gzhan las ni ma yin no/ /de yod na yod pa nyid du nges pa med pa las na tshad ma nyid ma yin no/ /de tsam la ma yin na rgyu gzhan gyi skyon yin par nges par byed pa yin no zhes gzhan la ston to/ /ci'i phyir yon tan dang ldan pa'i dbang po rgyu ma yin pa ni rjes su dpag pa la mi snang ba'i phyir te gang gi phyir rjes su dpag pa na tshul gsum pa nyid du nges pa las skye ba yin gyi yon tan de las ni ma yin te nges pa med pa'i phyir ro/ /mngon sum yang shes pa'i rgyu nyid yin pa'i phyir tshad ma nyid kyi rgyu yin gyi gzhan ni ma yin no zhes zer ba ni cig shos rnams so/ /gzhan dag na re mig sman la sogs pas yon tan bskyed pa yin te/ de skyes pa nas brtsams nas yod pa yang ma yin la/ de'i dbang po yang tshad ma skyed par byed pa snang yang de la yon tan rnams ni med de rgyu med pa'i phyir ro/ /skye bas thob pa'i rab rib can gyi shes pa ji ltar yin/ de la mig sman la sogs pa'i sbyor bas skyon bsal bas dbang po nyid tshad mar gyur pa yin na/ sbyor bas skyon bsal bas yon tan skye bar byed pa de rnams las tshad ma nyid ma yin te/ 'di la tshad ma med pa'i phyir dang rab rib 'joms pa'i sbyor ba zhes kyang thos pa'i phyir ro/ /rtog pa'i nyes pa du ma de rnams kyi skyon sel bar byed cing yon tan yang skyed par byed la/ de'i phyir dbang po nyid tshad ma yin zhing tshad ma ma yin pa yang yin pa de las 'byung ba ma yin zhing / gzhan la ltos pa yin te/ 'di gzhan la ltos par yang mthong ba ni yon tan dam pa dang 'brel pa'i mig la zla ba gnyis kyi shes pa lta bu ste der yang yon tan la mi brten pa yang ma yin la/ tshad ma yang ma yin no zhes bstan pa yin no/ /'jig rten yang gang ji ltar rtogs pa de de bzhin du rjes su bsgrub ste/ der yang gzhan la ltos pa ma yin no/ /gzhan du yang 'gyur ro zhe na/ gzhan du yang dogs pa de lta na yang gzhan la ltos pa yin no/ /tha snyad pa yang yul la yongs su mi gcod cing rab tu 'jug pa ma yin no/ /yongs su bcad pa la yang gzhan la ltos pa ci zhig dgos/ slu bar dogs pa gzhan la ltos pa yin no zhe na/ de lta na yang slu bar byed pa'i rgyu rnams nyid ni ltos pa can yin la mi slu ba nyid du rtogs pas nges pa yin no/ /rig byed ni rang nyid tshad ma yin te/ de yang / rang nyid tshad ma thams cad kyi/ /tshad ma nyid du nges pa ste/ /rang nyid yod pa min pa ste/ /gang na'ang yod pa ma yin no/ /zhes bstan pa'o/ /gzhan gyi la ni de 'dra ba'i shes pa'i rgyu med pa'i phyir mi rigs te/ mig gis lan cig gzugs mngon du byas pas mthong ba dus yang gzhan du mi 'gyur te/ rgyu nges pa'i phyir ro/ /de yang / tshad ma nyid ni gcig gis kyang / /thams cad mkhyen par gang gis brtags/ /nges pa'i mig gis ro la sogs/ /thams cad shes par bya bar 'gyur/ /zhes bstan pa'o/ /de rtogs par byed pa'i tshad ma yang yod pa ma yin te/ gang gis gzhan du mi 'thad pa'i rgyur brtag par bya ste/ de yang / re zhig da ltar kun mkhyen gyi/ /bdag la sogs pa ma mthong ste/ /phyogs gcig na yang yod par ni/ /rtags med phyir na dpag bya min/ /zhes bstan pa'o/ /rig byed kyang tshad mar mthong ba'i phyir cung zad kyang brtag par bya ba ma yin pas/ mi mthong bar cung zad kyang dpyad par mi bya'o zhes bya ba ni dpyod pa pa rnams kyi yin no/ /'di la lan gdab pa ni tshad mar 'gyur ba la zhes bya ba ste/ re zhig rjes su dpag pa ni tshul gsum pa nyid du nges pa las skye ba yin gyi gzhan yon tan las ni ma yin no zhes gang smras pa de ni mi rigs te/ de nyid yon tan yin pa'i phyir de ma gtogs pa tshul gsum pa tsam ni phyin ci log tu 'dzin pa tshad ma ma yin pa skyed par byed pa ste/ 'di ltar/ skul byed sogs par skyes pa'i blo/ /tshad ma yin te skyon bral rgyus/ /bskyed phyir rtags dang yid ches pa'i/ /tshig dang dbang po'i shes pa bzhin/ /zhes pa lta bu'o/ /'di la skyon dang bral ba'i rgyus bskyed pa nyid kyi nges pa med kyang 'di las shes pa skye ba yin no/ /de'i phyir phyin ci ma log pa'i tshul gsum par nges pa'i rjes su dpag pa'i rgyu ma yin no/ /'on kyang tshad ma nyid kyi rgyu ma yin pa de'i phyir dbang po rnams la yang yon tan du brtags pa de ma nyams par mtshungs pa kho na yin no/ /yang mig sman la sogs pa'i sbyor bas skyon med pa yin gyi yon tan ni med de zhes gang smras pa de yang ma yin te/ gal te dbang po tsam tshad ma skyed par byed na ni thams cad du skyed par byed par 'gyur te rtag tu yod pa'i phyir ro/ /snang ba la sogs pas khyad par bskyed pa yin no zhe na/ de lta na gzhan nyid las tshad mar 'gyur ro/ / de yang / nyi ma'i zer gyis zil non phyir/ /mig gi nus pa 'chor ba ni/ /rim gyis rim gyis de bzhin du/ /bltas nas gsal bar 'gyur ba yin/ /zhes bstan par 'gyur ba'o/ /shes pa nyid ni yon tan dang skyon dag gis bskyed par bya ba ma yin gyi yon tan dang ldan pa dang skyon dang ldan pa ni dbang po yin te/ de dag med kyang 'byung ba'i phyir/ /dbang po tsam las byung ba skyon dang ldan pa yang bya ba la bye brag med pa'i phyir shes pa bzhin du tshad ma nyid du 'gyur ro/ /dbang po goms pa las byung ba'i zin po ni lugs la sogs pa rnams la bya ba byed pa yang mthong ste/ de yang / goms pas phyir zhing zin por gyur/ /sngo ma rnams ni mjug sdud cing / /yul chos tha dad min nyid dang / /tha dad nyid kyi dbyangs dang ni/ /thos pa'i pha rol son dang gang / /de la shin tu mkhas thob 'gyur/ /zhes gsungs pa'o/ /yang rab rib 'joms pa'i sbyor ba zhes kyang thos pa zhes gang smras pa de yang ma yin te/ da ltar rab rib med pa'i sgo nas yon tan thob par smra ba ni gzhan du yon tan thob par smras pa'i phyir te/ 'di ltar yang / byi la dang / rnga mo dang / spyang ki la sogs pa'i mig skams pa'i phye mas mig bskus na mtshan mo yang nyin mo bzhin du mthong la/ 'di la yang skyon bsal bas med pa ma yin pa'i phyir ro/ /yang slu bar dogs pas gzhan la ltos pa yin no zhes bya ba dang / mi slu ba nyid du rtogs pas nges pa yin no zhes gang smras pa yang / de la mi slu ba don du gnyer ba yang tshad ma nyid tshol ba la brtson pa yin no zhes 'og nas 'chad par 'gyur ro/ /tshad ma ni bcom ldan 'das phan par bzhed pa nyid ston pa po nyid kyi ngo bo'i rgyu tshogs pa nyid kyis bde bar gshegs pa nyid la sbyor ba'i phyir te/ de nyid kyis na rgyu mi dmigs par ma grub pa/ /skyob pa yin pa'i phyir 'bras bu mi dmigs pa yang ngo / /de ltar ci las shes she na/ tshad ma grub pa zhes bya ba la sogs pa smos te/ 'dir rgyu ni rtog ge ngan pa zhes bya ba'o/ /bstan pa las phyin ci log pa ni tshad ma ma yin no zhes bya bar shugs kyis bstan pa yin no/ /gang yang dang po'i phyed kyis bcom ldan 'das la phyag 'tshal nas/ gzhan gyi nyan pa po bstan bcos la 'jug pa'i don du brjod par bya ba dang / dgos pa la sogs pa rgyu dang bcas par bstan pa'am kun gyis kyang ngo / /de la brjod par bya ba ni 'chad par 'gyur ba'i mtshan nyid can gyi tshad ma 'jig rten pha rol pa don dam par rtogs pa'i rgyur bcom ldan 'das nyid 'jig rten pa'i tshad ma nyid yongs su rtogs pa ni 'bras bu dman pa yin pa'i phyir/ de yang chos dang chos ma yin pa rtogs par bya ba'i phyir de'i ngo bo dgos pa ni shugs kyis bstan to/ /yang na tshad ma'i rgyu mtshan grub pa'i de bzhin gshegs pa'i phun sum tshogs pa la nye bar sbyor ba gang yin pa ste/ 'grub par 'gyur ba ni 'gro ba'i don sgrub par byed pa can zhes bya bas de tshad ma'i sgrub pa'i sgo nas de nyid grub pa'i phyir tshad ma grub pa bshad par bya'o/ /yang na 'dis sgrub par byed pa ste sangs rgyas bcom ldan 'das tshad ma yin no zhes rgyu phun sum tshogs pa ste/ de rtogs pa'i thabs phun sum tshogs pa grub pa yang tshad ma'i grub pa'o/ /ji lta ba bzhin du sgrub par byed pa'o zhes bya ba 'dis nyan pa po dang rtsom pa po'i bya ba'i 'bras bu dang / bstan bcos kyi dgos pa dag gi thabs dang thabs las byung ba'i mtshan nyid ni 'brel pa'o/ /gtso bo smos pa'i shugs kyis bstan to/ /gzhan du don med pa'am mi nus pa'am 'dod par bya ba ma yin pa'i ngo bo don med par dogs pa la ni 'ga' yang 'jug par mi 'gyur ba des na/ / bstan bcos byed pa rnams rang nyid ngag dang po la rab tu sbyor ba yin te/ gzhan la phan par zhugs pa de rnams log par brjod pa la ni dgos pa med do/ / des na yang dag gi don la the tshom du 'gyur la des ni don du gnyer ba rnams 'jug pa yin no/ /don la the tshom za ba yang nges pa can bzhin du zhing gi las la sogs pa la 'jug par 'gyur ba mthong ba'i phyir ro zhes bya ba ni kha cig gis 'dod pa'o/ /bstan bcos byed pa log par smra ba ma yin par ci las shes she na/ smras pa/ gzhan bslu ba'i ched du log par byed pa ni rtog pa dang ldan pa rnams ni rang nyid slu bar mi byed pas gzhan bslu bar bya ba'i phyir bstan bcos kyi dang por log par brjod pa ni mi srid do/ /mkhas pa nyid du rab tu gnas pa'i ched du dang po nyid nas brtsams nas log par smra ba ni ji ltar 'dod pa la rab tu gnas pa 'jig pa yin pa'i phyir gzhan slu bar byed par 'dod pa las rang nyid bslus pa kho nar 'gyur bar rig pa'i phyir log par brjod pa ma yin no/ /de ltar na yang phyin ci log par don med pa ma yin te/ rigs pas nges bzhin pa'i don nyid ni nges pa yin pa'i phyir ji ltar don la the tshom du 'gyur ba med pa ni med pa'i ngo bo yin pa'i phyir ro/ /de ni ma yin te/ lam 'di na srog chags gdugs pa la sogs pa don med par 'gyur ba med par nges na gser la sogs pa'i don yod par nges par 'gyur ram ci/ srog chags gdug pa la sogs pa med pa dang gser la sogs pa ni tha dad pa'i phyir ro/ /'di la yang bya rog gi so la sogs pa'i bstan bcos gzhan du brjod par bya ba'i dgos pa med pa ma yin par nges na don med pa nyid kyang nges par 'gyur te/ de ma yin pa ni de nyid yin pa'i phyir ro/ /brjod par bya ba la sogs pa'i yul tshig las rnam par shes pa nges pa med pa'i rgyu mtshan las byung ba'i nges pa yang phyogs can yin pa sel bar mi byed pa'i brjod par bya ba la sogs pa nyid ni yod dam med par the tshom za ba yin gyi/ phyin ci log pa yang ma yin la de nyid du nges par yang mi byed pa ma yin nam/ nges pa med pa'i phyir de nyid don med pa ma yin par rigs pas nges de'i ngo bo'i don du nges pa'i phyir don med pa la the tshom za ba med par nges pa ni don med pa ma yin pa ma yin no zhe na/ de de ltar na yang don med pa la the tshom za ba med pa nges pa yin te/ yod kyang rung med kyang rung yod pa yin no zhe na/ tshig tsam kyi rig pa la ni mkhas na don med par nges pa yang ldog pa'i yul ma yin no/ /don med pa la med par nges pa yang don la nges pa nyid ces bya bar rigs pas nges pa nyid de the tshom med par don la 'jug pa yin no/ /bstan bcos ni rnam pa gnyis te sgra dang don to zhe na yang smras pa la/ sgra'i cha ni rang gi don rtogs par byed pa yin gyi dgos pa gzhan ni med do/ /don ni don med par yang snang ba'i phyir de'i dgos pa bstan pa ni/ sgra yod na 'byung ba ma yin te bstan bcos rdzogs pa la yang ma mthong ba'i phyir dang / brjod par bya ba yod na 'byung ba'i phyir ro/ /des na yang brjod par bya ba nyid do/ /de ni ma yin te sgra'i cha'i bya ba ni rang gi don rtogs par byed pa kho na ma yin te/ mngon par 'dod pa kho na la gtod pa'i phyir ro/ /mngon par 'dod pa nyid kyang rtog par byed par 'dod pa'i tshig rang gi don bzhin du byed pa ma yin gyi gang la gtod pa'i sgra'o/ /de nyid ni sgra'i don gyi gtso bo yin gyi rang gi don ni ma yin te/ de la mi gtod pa'i phyir ro/ /bud shing gi 'bar ba tsam ni bya ba rdzogs pa ma yin te/ de nyid kyi rim gyis 'tshed pa nyid la 'jug pa'i phyir tshig nyid kyi dgos pa ni de yin gyi kun las btus pa bshad pa'i phyir ni ma yin te/ yang dag pa'i shes pa la don gzhan gyi bya ba med kyang 'byung ba'i phyir ro/ /de lta yin na 'grel par dang po'i tshig smos par ji ltar yin 'chad par 'gyur ba'i bstan bcos ma lus pa'i don du dam bcas pa yin la/ de rnams kyang gzhan gyi don gyi rjes su dpag pa yin pa'i phyir sgra mi rtag ste zhes bya ba la sogs pa dang 'dra bar tshad ma yin te/ rjes su dpag pa'i yul bstan par dam bcas pa'i phyir rjes su dpag pa nyid yin pa de lta na ci'i phyir dgag / smras pa/ khyab par byed pa'i gtan tshigs la mi dgos pa'i phyir zhes 'chad par 'gyur ba'o/ /de nyid kyi rgyun phyi ma rnams kyang sgrub par byed par bstan pa'i phyir ro/ /yang dang yang du shin tu spros pas chog go/ /khyab par byed pa dgos pa med pa'i phyir zhes gtan tshigs 'chad par 'gyur ba'o/ /da ni rang nyid la log par sgro 'dogs pa bsal ba'i phyir smra ba po zhes bya ba la sogs pa smos so/ /de la sgro 'dogs pa ni rnam pa gnyis te/ da ltar ba dang 'das pa'o/ /re zhig da ltar ba bzhin du gsal bar byed pa'i 'grel pa dang 'grel bshad de/ khyed kyi don de 'grel pa med pas de yang gzhag go/ /'on kyang gzhan cung zad nyid rang gi shes rab kyi nyams bzhin du bi la si ta brjod par bya ste/ de la su zhig rtsi bar 'gyur/ /rnal ma'i lam ni dor nas ni/ /su zhig gol ba'i lam 'gror rigs/ / zhes 'brel pa la mngon par zhen pa'i 'gro ba sgro 'dogs shing grags pa ma yin pas nyan pa po sems 'joms par byed do/ /de bsal ba yang 'grel pa la sogs pa'i skyon bstan pa ma yin na mi 'byung ba'i phyir rigs pa dang 'jig rten dang 'gal ba smra bar bya ba'i tshig ma yin pa gzhan rjod par byed pa don chen po la don med par nges par sbyor ba la sogs pa de'i skyon rnams bstan pa ni phyed snga mas so/ /gzhan dag gis ni de las bzlog pas rang gi gzhung lugs ston par byed pa yin te/ brtsams pa'i dngos po rgyun du byed pa rnams phal che bas mi mthong zhes bya ba ni smra bar bya ba'i tshig ma yin pa smra ba'i smra ba po rnams kyis chen po'o/ /mi gsal bar rjod par byed pas skyon dang ldan pa nyid sbas pa ni lhad can gyi dngul dang 'dra bar ro/ /de rnams kyang phal cher 'grel bshad pa la yod pa ni rigs pa dang 'grel pa'o/ /de ltar 'di dag nyid kyis smra bar bya ba'i tshig ma yin pa ni gnas skabs ma yin pa ni rgyun las phyi rol du gyur pa dang / ma yin pa la sogs pa rab tu sgrub par byed pa'i tshul gyis bde ba la sogs pa bzhin du sngon po la sogs pa'i bdag nyid rig pas rtogs pa yin no/ /bdag nyid dang mtshungs par ser po la sogs pa rnam par gcod pa yin kyi mi dmigs pa'am gzhan yang rung ba la ltos pa ma yin no/ /dmigs byar gyur pa ma yin pa'i ser po yod pa yang mi dmigs pa la ltos pa yin la/ gzhan ni bde ba ni yod kyang mi snang la/ de gzhan la mi snang ba de bzhin du ser po yang ngo / /ser po la sogs pa rang dang gzhan la yang snang ba ma yin pa ni bde ba la sogs pa dang 'dra ba kho na snang ba la yang khyad par du gzhan la snang ba ni ser po la ltos pa yin la bde ba yang mtshungs pa yin no/ /de ji lta ba bzhin du bde ba yod pa de'i rgyud la sdug bsngal gyi tshor ba nyid mi myong ba'i phyir med pa yin no/ /gzhan gyi rgyud la yod pa la ni the tshom za'o/ /de bzhin du sngon po la yang ser po rig pa'i bdag nyid kyi ngo bo log pas med de/ /rgyud gzhan la yod pa la yang the tshom za'o/ /de'i phyir bde ba la sogs pa dang / sngon po la sogs pa bdag med pa mngon sum gyis grub pa'i phyir bye brag med pa la yang bye brag tu brtag par bya ba mngon sum gyis grub pa'i sgra'o/ /mngon sum gyi khongs su gtogs pa'i phyir 'jig rten ma yin pa'i don du bshad do/ /de bzhin du lkog shal la sogs pa can ni ba lang ngo zhes bya ba'i tha snyad bzhin du dgag pa de'i ngo bo la mi dmigs pa tsam las med do zhes bya ba'i tha snyad tsam bsgrub pa bstan pa ni/ dper na lkog shal la sogs pa las ba lang du gtogs pa bzhin no zhes rnam 'grel las bstan to/ /de la mi dmigs pas khyad par du med pa'i tha snyad du bya bar rtogs pa ni dman pa'i rang 'dod yin no/ / chen po'i tshig kyang 'jig rten dang mi 'gal ba yin la/ de 'di la med pa'i phyir 'jig rten dang 'gal ba yang ma yin no/ /rim pa ji lta ba bzhin du bstan pa de bzhin du sgrub pa ni gnas skabs so/ /skad cig ma nyid la sogs pa can thams cad mkhyen pa'i rgyu mtshan gyi don rgyas pa ni khyab pa la sogs pa bstan pa la the tshom med pa yin na de ni de dag gis ma byas so/ /rim dang cig car dag gi byed pa po nyid lan cig mthong ba de'i rgyu mtshan nyid khyab pa yin la/ rtag pa la yang rim pa dang rim pa ma yin pa 'gal ba'i phyir mi rtag pa nyid du rnam par gnas pa yin no/ /bden te de log pas ldog pa'i byed pa po nyid la mi rtag pa nyid kyis khyab pa yin gyi/ skad cig ma nyid kyis kyang ma yin la/ mi rtag pa nyid ni skad cig ma ma yin te/ zla ba dang lo la sogs pa yang mi rtag pa nyid kyi phyir ro/ /de ltar gnas pa ni rtag pa bzhin du rim dang rim pa ma yin pa 'gal ba ma yin te/ lhan cig tu mthong ba'i phyir ro/ /de ltar mthong ba ma yin pa gzhan du yang mthong ba med pa'i phyir/ srog chags la sogs pa bzhin du byed pa po bdag nyid kyang skad cig ma nyid yin pas rjes su 'gro ba ma yin zhing ldog pa ma yin pa'i phyir 'grel pa byed pa ni skabs kyi don rgyas par byed pa ma yin no/ /skad cig ma gnyis pa la sogs par mi gnas pa tha ma'i skad cig ma la dang po'i skad cig ma ltos pa yin gyi/ phyi ma ni ma yin pa'i phyir skad cig ma nyid ji ltar mi rtag pa yin/ rim dang cig car bdag nyid kyis don byed pa 'gal ba'i phyir ro zhes bya ba la sogs pa ni rnam 'grel gyi dgongs pa yang yin no/ /snang du mi rung ba brtag par dam 'cha' ba'am snang ba la yang rung ba'i dngos po la zhes skabs ji lta bar 'chad par 'gyur ro/ /lhag ma ni snga ma bzhin no/ /dam pa ni phyin ci ma log pa'i rang gi ngo bo rig pa'i mngon sum mo/ /de'i bya ba'i yul ji snyed pa'i tha dad pa dang cig shos te/ don de des bsdus pa ste bstan bcos kyi don thams cad de'i mthar thug pa nyid du rigs pas grub pa'o/ /dam pa'i don la 'dus par yang rung ste nye bar bsdu ba'o/ /brgyud pas sam dngos su yang rung ste/ bstan bcos ma lus pa de'i don yin pa'i phyir ro/ /de la blo ni re re'i rnam par 'grel par ston pa yin no/ /de rnams la ni de med de/ brgyud de 'ongs pa mi shes pas rig pa la mi snang ba'i phyir ro/ /don med pa ni snying po med pa'i rim pa ste spangs pa ni bor ba'o/ /chen po'i don la phyin ci log tu ston pa'o/ /de rnams gang yin pa la ni de med pa dang 'brel to/ /'dis kyang skra las byung ba yang bsal ba ston pa'i phyir zhes bya ba'i rna ba la sogs pa'i shes pa la/ rigs mi mthun pa'i shes pa ni mi slu ba ma yin pa'i phyir ma khyab pa'i skyon sel bar byed pa'i smra ba po rnams kyi bya ba zhes bya ba la sogs pa'i don mthun pa nyid du nges par sbyor ba'o/ /rang las rang gi ngo bo zhes bya ba 'di'i yang shes pa'i rang gi ngo bo kho na rang las rtogs pa yin gyi/ tshad ma nyid ni ma yin pa'i phyir skabs kyis gzhan las tshad ma nyid bsgrub par 'dod pa yin la/ de las bzlog pa rang las tshad ma nyid shes par bya ba'i phyir bshad pa yin no/ /gyur pa smos pa ni ma gyur pa zhes bya ba la sogs pa bstan bcos kyi brjod par bya ba'i bcom ldan 'das yin par bsgrub par bya ba'i 'bras bu'i gtan tshigs brjod par 'dod pa la/ skabs ma yin bzhin du tshigs bcad kyi gyur pa sgra bshad par 'dod pa nyid la 'jug pa yin no zhes bya ba la sogs pa chen po'i don la don med par zhugs nas smra ba yin na rang gi gzhung du ni ji skad smras pa'i skyon med par des na zhes bstan pa yin no/ /ro nyams zhes bya ba ni ji skad smras pa'i skyon ma lus pa med par mtshon par byed pa yin no/ /shin du zhes bya ba yang rim pa gzhan la gus pa ni 'bras bu phul du byung ba yin/ /skal bar ldan zhes bya ba la sogs pa ni de la dbang byed pa'i tshig go/ /skal ba dang ldan pa nyid ni ngo bo nyid kyis bskyed pa'i shes rab phun sum tshogs pa'o/ /mthong gyur ces bya ba ni mngon par sbyangs pa las byung ba can yin pa'am/ skal ba dang ldan pa nyid ni rigs phun sum tshogs pa yin la/ mthong gyur blo nyid ni ngo bo nyid can nam sbyangs pa can gyi shes rab phul du byung ba dang sbyar ro/ /yang na snga mas ni rigs phul du byung ba/ phyi mas ni sbyor ba phul du byung ba'o/ /grogs phun sum tshogs pa dang rigs phun sum tshogs pa yang rung / bsam pa phun sum tshogs pa dang sbyor ba phun sum tshogs pa yang rung bar go rims bzhin du sbyar bar bya'o/ /'dir ni de lta bu'i rnam pa nyid kyi bye brag 'dod pa 'am smras pa'i skyon rnams dor bar bya ba'i ched kyi dbang du byas pa'o/ /shin du dag pa ni nyon mongs pa dang shes bya'i sgrib pa thams cad bag chags dang bcas pa spangs pa'i phyir dri ma med pa'i blo thams cad mkhyen pa'i ye shes gnyis su med par thugs su chud pa'i ngo bo de bzhin gshegs pa'i shes rab ste 'bras bu'i rang bzhin sgrub par byed pa rigs pa sems pa'i rang bzhin can gyi blos so/ /yang dag pa ste sngar smras pa'i skyon yongs su spangs pas so/ /rab tu rnam 'byed kyi khyad par can du bshad par byed pa'o/ /khyad par can gyi don yin pa'i phyir yon tan ma lus pa yongs su bsdus pa bstan pa yin gyi 'grel pa la sogs pa'i bstan pa tsam sgrub par byed pa ni ma yin pas de ni ci yang ma yin te/ phyis bya ba nyams par mi 'gyur ro zhes bya ba'i don to/ /rnam 'grel mdzad pa skal ldan bdag nyid kyi 'dod pa shin tu zab mo gang yang rung ba la 'jug pa spong bar byed pa ni/ shes rab khyad par can dang ldan pa'i slob ma rnams kyis kyang 'dzin par mi nus par gzigs nas yid mi bde bas blo'i nus pa chung ba min pa dag gis zhes bya ba la sogs pa mdzad do zhes grag go/ /de yang da dung du yang bdag las lhag pa gzhan ma rnyed pa rnams la bshad par byed pas spong bar byed pa bstan pa'i skabs kyi don zhes bya ba la sogs pa yon tan dang ldan pa de rnams kyis ma mthong bas yid mi bde ba gang yin pa de ltar ni med do zhes dgag pa gnyis sbyar ba yin no/ /ci'i phyir zhe na/ gang gi phyir rnam 'grel 'di la skyon thams cad spangs pa'i bshad par byed pa'i sgo nas/ phyin ci ma log pa'i tshad ma yongs su gsal bas blo gros bzang po can rtogs par byed pa kho bos byas so zhes bya ba ni rgyu nye bar dgod pa'o/ /yang na rang nyid la'am yul la skyon yod pa srid pa mi 'jug pa'i yan lag skyon nye bar bstan bas rnam 'grel dang de'i bshad pa la yang go rims bzhin du tshad mar gyur pa zhes bya ba la sogs pa tshigs su bcad pa gnyis kyis gsal bar rtogs pa dang ldan pa rnams 'jug pa'i yan lag tu byed pa yin no/ /de dag las tshad mar gyur pa zhes bya bas ni yul te rnam 'grel la skyon yod pa srid pa gsal ba yin no/ /rtog ge ngan pa zhes bya ba ni rang nyid la'o/ /de nyid kyis na de'i bshad pa'i yul la yang skyon yod pa srid pa ma yin la/ rang nyid la yang ma yin par bstan pa ni/ phal che ba zhes bya ba'o/ /gzhan yang ci'i phyir rnam 'grel mdzad pas rigs byed la sogs pa rnam par 'grel par ma mdzad kyi/ sangs rgyas pa'i mdzad pa ni gang gi phyir log pa'i shes par bye brag med kyang / rigs byed la sogs pa gsal nas sangs rgyas pa'i lta bar phyogs gcig tu ltung bar mi rigs so snyam du sems pa la/ dam pa'i don la bslu ba dang mi slu bar byed pa sangs rgyas dang cig shos dag phyogs su ltung ba dang mi ltung ba bstan pa ni tshad mar gyur pa zhes bya ba'o/ /de nyid kyis ni yang de'i rnam 'grel mnyan pa dang bshad pa'i phyir bshad sbyar gyis nye bar bzung yang rigs kyi dpyod pa la sogs pa'i ni ma yin gyi bstan pa ni phal cher zhes bya ba'o/ /lhag ma ni snga ma bzhin no/ /bcom ldan 'das nyid tshad ma nyid du rab tu sgrub pa'i gnas skabs su phyag 'tshal ba byed pa ni bgegs med par bsam pa mthar phyin pa'i phyir yin no zhes kha cig zer ba de ni mi rigs te/ phyag 'tshal ba lus bgegs med pa yin zhes bya ba 'di la tshad ma med pa'i phyir ro/ /ya rabs rnams phyag 'tshal ba sngon du 'gro ba nyid kyis bstan bcos la 'jug pa na bgegs nye bar zhi bar 'dod par mthong ba yin la/ de ltar rtogs pa po 'di rnams 'jug pa yang tshad ma med par mi 'byung ba ma yin nam/ 'bras bu las rgyu ni thams cad mkhyen pa'i ye shes kyis rtogs pa yin la/ 'bras bu bgegs nye bar zhi ba ni phyag 'tshal ba'i 'bras bu yin no/ /tshad ma'i 'bras bu ma yin par yang 'jug pa yod do/ /mi rigs te rtog pa dang ldan pa rnams kyi 'jug pa ni tshad ma'i 'bras bu yin pa'i phyir ro/ /tshad ma'i 'bras bu nyid shes pa'i rtog pa dang ldan pa'i 'jug pa nyid mi shes pa las gcig pa las gcig nyen pa yin no/ /bden te tshad ma gang kho na las bcom ldan 'das thams cad gzigs par grub pa de kho na bsod nams kyi zhing bla na med pa yang yin no/ /des na de la phyag 'tshal ba bsgrub par 'dod pas de nyid la grub pa yin no/ /de lta na yang tshigs su bcad pa 'don pa la sogs par ma gtogs par yang a tha'i sgra rjes su bstan pa la sogs pa bzhin du/ dben par lus dang ngag la sogs pa rnams kyis bcom ldan 'das mngon par mchod nas 'jug pa yang 'dod pa 'grub pa'i phyir ro/ /de 'don pa ni 'bras bu med do/ /de lta na ci'i don du tshigs su bcad pa 'don/ gzhan gyi don du ste gzhan po rnams kyang bcom ldan 'das la dad pa med par yang blta bar 'dod pas bstan bcos la 'jug pa na/ ji lta bu'i 'dod pas kyang dang por phyag 'tshal ba skyo dub med par bsnyen pas bsod nams kyi snod du 'gyur te/ ji skad du/ ji ltar 'dod pa'am dngos kun min pas sam/ /gzhan rjes su 'brangs pa'am yid gnyis kyis kyang rung / /thub dbang zla ba khyod la gang zhig phyag byed pa/ /des kyang 'chi med phun sum tshogs pa thob par 'gyur/ /zhes bstan pa'o/ /de ltar gzhan gyi don du phyag byas pa la rang gi don gyi bgegs med pa yang zhar la grub po/ /yang na gang las 'di lta bu'i bstan bcos bya bar nus pa'i bsod nams kyi tshogs yin pa de las bgegs med pa yang yin pa ni gzhan gyi don nyid yin par bstan pa ni/ 'di la bstan bcos kyi dang por zhes bya ba ste/ bstan bcos kyi don nyid yin pa'i phyir zhes bya bar yang bstan bcos kyi don rtogs par bya ba ni ma yin te/ de la mod kyi dgos pa ste gzhan gyi don yin la de bstan bcos kyi don yin pa'i phyir ro/ /gang gi bstod pa yin pa de de bzhin du de'i bstan bcos yin pa bzhin du bstod pa yang gzhan gyi don yin no zhes bya ba'i don to/ /yang na phyag byas pa las bgegs med pas bstan bcos yongs su rdzogs pa yin la/ des na phyag 'tshal ba bstan bcos kyi don yin no/ /yang na tshigs su bcad pa 'don pa la sogs pa med par yang dben par bcom ldan 'das la mchod pa la sogs pas rang gi don 'grub pa yin la/ tshigs su bcad pa 'don pa ni bstan bcos kyi don yin pas gzhan gyi don yin no/ /gzhan rnams kyang ji ltar 'dod pas kyang rung ste bcom ldan 'das la phyag byed pa ni rang gi don thob par 'gyur ro/ /gzhan rnams kyang dbang byed pa dang dbang mi byed pa dag las dbang mi byed par rtogs pa bskyed par dka' ba'i phyir/ bstan bcos kyi dbang du byas nas bcom ldan 'das la bstod pa yin gyi/ gzhan ni ma yin no/ /de la bstod pa'i 'bras bu yang snga ma nyid yin no zhes bya ba'i bsam pas bstan bcos kyi don yin pa'i phyir zhes bya ba la sogs pa smos so/ /bstan bcos ni rtogs par bya ba yin pa'i phyir yang bstan bcos kyi don ni dam bcas pa'i ngo bo'i tshigs su bcad pa yin zhes bya ba'i don to/ /dad pa'i yul nyid la phyag bya bar bstan pas bcom ldan 'das nyid la ltos par rtog pa dang ldan pa rnams kyis rtogs par bya ba yin gyi/ slob dpon gyi gzhung ni ma yin no zhes bstan pa yin no/ /slob dpon gyi gzhung bshad pa'i sgo nas kyang bcom ldan 'das nyid rtogs par bya ba yin no snyam na/ de ltar rtogs par byed pa la dgos pa med pa'i phyir ro/ /gzhung de bshad pas 'phangs pa nyid las tshad ma nyid ji lta ba bzhin du rtogs par byed pa nyid du mi nus so zhes bstan pa ni/ tshul bzhin zhes bya ba'o/ /yang na phyed snga mas bcom ldan 'das nyid la ltos pa nyid do/ /phyed phyi mas kyang rgyu dang bcas par bstan to/ /de nyid kyis na ltos pa dang bcas pa'i phyir tshad ma grub pa nyid sgrub par 'gyur ba yin gyi/ slob dpon gyi gzhung ni ma yin no/ /phyed snga mas ni gtan tshigs so/ / phyi mas ni dam bcas pa'i 'dod pa'o/ /de ltar na yang phyag byas pas rang gi don dang gzhan gyi don nyid zhar la grub pa yin no/ /mngon sum la sogs pa rnams 'jig rten la grub pa ma yin nam/ de'i nang du 'dus pa bcom ldan 'das kyang grub pa nyid yin pa'i phyir brtag par bya ba ma yin no/ /log par rtogs pa la brtag pa yin no/ /mi nus pa'i phyir ma yin no/ /de rnams kyis brtag pa ni phan tshun brten pa yin no/ /gal te gzhan rnams kyis yin na de rnams kyis ji ltar yin/ gal te de las kyang gzhan pa rnams kyis yin na ni thub pa med par 'gyur ro/ /rab tu grub pa rnams kyis ma grub pa brtag pa yin no zhe na ma yin te zhes mtshan nyid mtshungs pa'i phyir de lta bu nyid bsgrub par bya bar mi nus so zhes bstan pa yin no/ /'o na ji ltar de yod pa gsal bar byas nas yod pa la yang dag par sbyor ba'i skyes bu'i zhes bya ba la sogs pa smras pa ji ltar yin/ phyin ci ma log pa'i mngon sum gyi rang gi ngo bo bstan pa de yongs su brtag pa ni ma yin no/ /yongs su brtag pa nyid dgag pa yin gyi/ yongs su brtag pa bzhin du mtshan nyid kyang ma yin no/ /'jig rten la grub pa de bzhin du rtogs pa la mi nus pa la de skad smra ba yin na ni/ yongs su brtag pa yang de bzhin du mi rigs te/ rab tu grub pas ma grub pa yongs su brtag pa yin par bstan pa ni/ gzhal bya rtogs pa ni tshad ma la rag las pa yin zhes bya ba ste/ tshad ma ma yin pa la rag las pa ni ma yin te/ tshad ma ma yin pa dang mtshan nyid mi 'dre ba nyid la tshad mar yongs su brtag pa nyid du shes par bya'o/ /ma 'khrul pa nye bar bstan pa'i mtshan nyid brjod pa de ma nges pa'i phyir lan gyi tshul gyis yongs su brtag pa'i shugs kyis bstan pas brjod bya ma yin nam/ ma yin te/ mtshan nyid brjod pa nyid log par rtogs pa bsal ba'i don du yongs su brtag pa yin gyi gzhan ni ma yin no/ /tshad ma rnams la yon tan dang mi slu ba'i shes pa la ltos nas yongs su brtag pa de ni mi rigs te/ thug pa med pa'i phyir ro/ /ma yin te de bkag pas tshad ma nyid dang cig shos kyi rnam par dbye ba med par thal bar 'gyur ro zhes 'chad par 'gyur ba'o/ /tshad ma la rag las pa yin gyi shes pa la rag las pa ni ma yin te/ myu gu ni sa bon la rag las pa yin gyi/ sa bon gyi shes pa la rag las pa ni ma yin no/ /de'i phyir rtogs pa nyid las yin gyi tshad ma nyid du ma rtogs pa las rtogs pa'i yul don du gnyer ba rnams 'jug pa yin gyi/ rtogs pa tsam ni 'jug pa'i yan lag ma yin te/ rmi lam la sogs pa dang mtshungs pa'i phyir ro/ /phrad par bya ba dang 'brel pa'i phyir ro zhe na/ de dang 'brel bas de yin pa de lta na'ang nyid las shes pa ma yin pa'i phyir/ gzhan nyid las yin par shes par bya ste/ sreg pa la sogs pa'i shes pa yang sreg pa la sogs pa grub pa'i ched kyi thabs nyid kyis 'dod pa yin gyi rang gi ngo bo ni ma yin te/ skyes bu'i don ma yin pa'i phyir dang phrad pa nyid mi 'jug par thal bar 'gyur ba'i phyir yang ngo / /'phrad par bya ba dang 'brel ba'i shes pa yang mi shes pa la phrad pa mi srid pa'i phyir/ 'dir 'di'o zhes phrad par bya ba dang 'brel pa rig pa yin gyi gcig po ni ma yin no/ /de nyid kyis bsal ba yin no/ /phrad par bya ba'i shes pa nyid las de don du gnyer ba po 'jug par 'gyur ba yin na/ de'i 'brel pa shes pa bar gyi sha ltag gis ci zhig bya/ phrad par bya ba rtogs pa yang gzhal bya rtogs pa yin gyi rang gi ngo bo tsam rtogs pa ni ma yin no/ /phrad par bya ba dang 'brel pa'i rang gi ngo bo rtogs pa de las de rtogs pa kho na 'brel pa rtogs pa yin no zhe na/ gcig rig pa las ni ma yin gyi 'brel pa rig pa las yin te/ du ba tsam rig pa las me dang 'brel pa rig pa ma yin gyi me mthong nas du ba ma mthong ba na mthong ba'i stobs dang ma mthong ba'i stobs las de las 'di'o zhes nges bzhin pa'i du ba ni 'brel pa can nyid du nges pa yin te/ mthong ba goms pa kho na las so/ /'dir yang phrad par bya ba la lta ba po rang gi ngo bo la dmigs pa ni/ de las 'di'o zhes de kho na bzhin du rtogs pa po goms pas kyang rang gi ngo bo mthong ba kho na las so/ /goms pa med pa la ni de'i 'grel pa gzhan nyid kho na las yin par shes par bya ba yin gyi/ rang gi ngo bo shes pa las ni ma yin no/ /de dag tsam na du ba las rang gi ngo bo'i bye brag ste/ 'bras bu du ba nyid las goms kyang rung ma goms kyang rung bas shes pa yin la/ rang gi ngo bo ni phrad par bya ba'i 'bras bu de nyid kyis so/ /'bras dang rgyu nyid kyi de nyid mthong ba yang rgyun gcig tu gnas pa'i skad cig ma rnams gcig tu 'dus pas gnas pa'i gzugs la sogs pa mthong ba yang ngo / /de ltar phrad par bya ba dang 'brel pa can gyi rang gi ngo bo shes pa de nyid ni phrad par bya ba'i shes pa ste/ de nyid kyang gzhal bya rtogs pa yin pa'i phyir/ tshad ma'i shes pa nyid ni gzhal bya rtogs pa yin no/ /tshad ma'i shes pa med na gzhal bya rtogs pa ga la yod/ yang na mtshan nyid ni rang gi ngo bo bstan pa yin gyi log par rtogs pa pos go ba de tsam ni ma yin no/ /sgrub par byed par rtogs pa yin no zhe na/ de lta yin na yongs su brtag pa zhes bya ba'i don la 'ongs pa yin no/ /yang na tshad ma zhes bya ba ni med pa kho na yin te/ ma 'khrul ba la sogs pa med pa'i phyir ro/ / des na yongs su brtag pa zhes bya ba cung zad kyang med do zhes tshad ma thams cad med par smra ba'i rgol ba rnams sems pa la gzhal bya rtogs pa ni tshad ma la rag las pa yin zhes bya ba smos te/ tshad ma ni yod pa yin te slu ba med par mthong ba la sogs pa'i phyir zhes bya ba'i don to/ /mngon sum ma yin pa'i tshad ma ni med ces bya bas/ rjes su dpag pa med par smra ba'i rgol ba po'i bye brag go/ /yang na bde bar gshegs pa'i gzhung lugs su rnam par rig pa tsam yin la de nyid du dngos su 'am brgyud pas kyang rung mthar thug pa yin la/ de la yang gzhal bya med pa'i phyir slu ba med pa nyid dam gzhan yang rung bas 'dis dpag par bya ba yin zhes de la dmigs pa'i tshad ma nyid mi srid do/ /rang gi ngo bo rig pas ni tshad ma nyid ma yin la phrad par bya ba'i don rig pa ni tshad ma nyid yin te/ ji skad du/ tshad ma nyid dam tshad ma min nyid dam/ /bsod nams sdigs pa sogs dang de 'bras bu/ /zhes bya ba la sogs de dag thams cad kyang / /don gyis stong pa'i blo la mi rigs 'gyur/ /zhes bstan to zhes zer ba 'di la/ tshad ma la rag las pa yin zhes bya ba smos te/ phrad par bya ba dang 'brel ba nyid ni 'jig rten pa'i tshad ma yin la/ de rig pa tsam yang khyad par can ma yin zhes bya ba'i don to/ /yin du zin kyang rig byed la sogs pa ni 'jig rten pha rol la sogs pa la tshad ma yin par 'jig rten du grub po zhes bya ba ni yongs su brtag pa'i go skabs med pa yin te/ 'di la bcom ldan 'das nyid ni/ /zhes bya ba smos so/ /de la zhes bya ba ni skabs kyi rgyu mtshan gnyis sam bsgrub par bya ba de la'o/ /de la yang dbye ba rnam pa bzhi yod de/ / bcom ldan 'das nyid chos la tshad ma yin pa'am gzhan nyid dam gnyi ga 'am gnyi ga ma yin pa zhig ces yongs su brtag pa tshol ba la/ 'dir rnam pa 'di bzhir byed par 'gyur ba ni/ de la phyogs gsum po bsal nas phyogs dang po yongs su bzung bar bstan pa ni/ tshad ma yang bcom ldan 'das nyid ces bya ba'o/ /gzhan nyid las skyes pa'i tshad ma nyid de yang rang gi 'bras bu la mi ltos pa nyid yin la/ 'bras bu yang de'i don ji lta ba la nges pa'am 'jug pa ma yin nam de la snga ma ni 'bras bu'i shes pa byung ba'i dus nyid la bar du mchod par skye bar mthong ba la 'jug par bya ba yang don ji lta ba la nges pa'i rgyu mtshan de yod na 'byung ba nyid yin te/ ltos pa gzhan yang rgyu'i yon tan gyi shes pa nyid yin no zhe na/ /de yang tshad ma yin na ltos pa yin gyi gzhan du ni ma yin la/ des na yang de'i yang ltos pa yon tan gyi shes pa gzhan yin la/ de'i yang gzhan yin pas thug pa med par 'gyur ro/ /'on te ltos pa las ltos byed tshad ma yin na ltos byed kyang gzhan las zhes pa la skyon med do/ /ma yin te phan tshun brten par thal bar 'gyur ro/ /bdag nyid thob pa la yang rgyu'i yon tan la ltos pa yin gyi rang gi 'bras bu la ni ma yin te/ bum pa la rdza mkhan la sogs pa lta bu'o/ /mi slu ba'i shes pa'i ltos pa la yang ste/ 'di nyid kyang sun 'don pa gnyis dang sbyar bar bya'o/ /skad cig ma'i rnam par shes pa ni yon tan mi slu ba'i shes pa'i dus su gnas pa ma yin no/ /de'i phyir tshad ma nyid du khas blangs pa'i tshad ma nyid ltos pa dang bcas par 'gal bas khas len par mi rigs pa'i phyir gyi shugs kyis ltos pa med pa nyid du grub po/ /de yang / gcig pu ltos med kho na nyid/ /mtshan ma nyid ni rgyu mtshan ste/ /ltos bcas nyid la yang dag par/ /gnas na de nyid rnam nyams 'gyur/ /gang phyir rtsa ba'i phyogs dor nas/ /su zhig rigs pa smra 'dod 'gyur/ /gang gis de sgrub pa'i thabs kyang / /rang gi tshig gis rnams nyams 'gyur/ /ltos bcas tshad ma nyid du ni/ /rnam par gzhag pa gang na yang med/ /ces bya ba dang / ji ste mi bslu'i snga ma yin/ /slu ba med can gnyis tshad nas/ / phan tshun yang dag brten nyid kyis/ /tshad mar brtag bya nyid nyams 'gyur/ /zhes kyang bstan pa yin no/ /'dir don ni 'di yin te/ ma 'khrul ba nyid ni tshad ma nyid yin la/ de yang shes pa'i don dang 'brel pa yin gyi/ der nges pa yang shes pa des sam shes pa gzhan gyis yin/ des yin na ni 'brel pa can du nges par sngon du 'gro ba can de ni shes pa yin te/ 'brel pa can du ma nges na 'brel pa mi shes pa'i phyir ro/ /'brel pa can yin na ni don la nges pas snga ma nyid kho na la 'jug par 'gyur na 'brel pa shes pas ci zhig bya/ 'on te 'brel pa nges pa las 'brel pa can don la nges pa yin na phan tshun brten par 'gyur ro/ /'on te don byed pa'i shes pa las yin na/ de yang don byed par 'brel pa shes na/ don byed par nges par byed pa yin te/ rmi lam la sogs pa don gyi byed pa de nyid shes pa yin na/ de la yang de las don byed pa'i shes pa gzhan brtsal bar bya dgos la/ de la yang gzhan las yin par 'gyur ro/ /'on te don byed pa'i shes pa gnod pa med par don byed par rig pa ni rang nyid las tshad ma yin no/ /snga ma yang de kho na bzhin du rang gi 'bras bu la ltos pa med pa'i tshad ma'o/ / de yang / dngos kun bdag nyid 'thob don du/ /rgyu la ltos pa nyid du 'gyur/ /bdag nyid thob par rang 'bras la/ /rang nyid 'jug par 'gyur ba yin/ /gal te rnam shes skyes gyur na'ang / /ji srid rgyu ni bdag nyid du/ /tshad ma gzhan gyis ma rtogs pa/ /ji srid don med par nges 'dzin/ /der ni shes gzhan skye ba yin/ /rgyu gzhan la ni bzhes pa yin/ /zhes smos so/ /de'i phyir ring por lon pa yang dang po pa bzhin du yongs su gcod pa tsam ni tshad ma nyid kyi bya ba yin gyi/ tshad ma nyid kyi shes pa phyi ma gzhan snga ma las bye brag tu byed pa ma yin no/ /don byed pa la gnod pa med pa'i shes pa bzhin du nges par byed pa'i shes pa yang rang nyid las kho na bzhin du tshad ma yin te bye brag med pa'i phyir ro/ /de yang / gang tshe rang las tshad ma nyid/ /de tshe gzhan nyid tshol min te/ /skyon rig pa las bcad med par/ /brdzun pa nyid ni rtog par 'gyur/ /zhes smos so/ /nya phyis la dngul du shes pa yang snga ma'i rnam par shes pa dang mtshan nyid mi 'dra ba tshogs pa gzhan la ltos pa las byung ba phyin ci log pa'i yul can yang de nyid la nges pa can gzhan la ltos pa yin la/ des na ldog pa'i yul yin pa'i phyir gzhan las yin par bstan te/ de yang / rang don tshad ma min pa yang / /tshad ma bzhin du blta bar bya/ /zhes smos pa'o/ /dper na yul phyi ma rtog pa tsam du byed pa'i tshad ma bzhin du snga ma yang de dang 'dra ba'o/ /cig shos ni rang las nges pa ma yin pa'i rang gi ngo bo ni gzhan la ltos pa yin zhes bya ba'i don to/ /rig byed las byung ba'i shes pa ni dngul gyi shes pa bzhin du 'di yang 'gyur ba ni ma yin no/ /brdzun pa skyed par byed pa las de bzhin pa'i don nyid la nges pa'i shes pa bden pa gzhan yod pa ma yin zhing skyon gyi shes pa yang ma yin te/ skyes bus byas pa ma yin pa'i phyir ro/ /rang du rtogs pa'i sgra nyid ni sor mo'i rtse mo la sogs pa'i ngag bzhin du don ji lta ba ma yin pa'i shes pa skyes pa'i skyon yang med do/ /lan cig kyang de'i rang bzhin las de'i rang bzhin ma yin pa shes par mi rigs te/ de las res 'ga' zhig don ji lta ba rtogs pa yin no/ /bden yang 'byung la de lta ma yin yang 'byung zhes gang smras pa la/ brdzun pa skyed par byed pa las bden pa mi 'byung la/ 'byung du zin kyang de las sgra rang nyid skyon can ma yin te/ 'on kyang skyes bu'i 'dus pa la yin la/ skyes bu yang blo sngon du 'gro ba'i tshig gi rim pa gzhan du yang byed pa'i phyir/ gcig pu slu bar byed pa yin gyi sgra ni ma yin no/ /rig byed la ni skyes bu med pa'i phyir/ des byas pa'i rim pa ma yin pa'i phyir/ slu bar dogs par mi bya ste/ de yang / re zhig sgra las skyon byung ba/ /smra ba po la ltos nas yin/ /zhes smos pa'o/ /de nyid ni gzhan la ltos pa'i tshad ma nyid yin gyi/ 'jig rten dang rig byed du yang tshad ma rnam par gzhag par 'gyur ba ma yin no snyam du sems pa la/ de la tshad ma'i mtshan nyid spyir ston pa ni zhes bya ba smos te/ 'dis mtshon par bya ba yin pas na mtshan nyid de rang las sam gzhan las kyang rung ba'i tshad mar brtag par bya ba ni 'di'i don to/ /tshad ma nyid ni yon tan gyis bskyed par bya ba yin zhes smras pa la/ bud shing la sogs pa'i grogs la ltos pa'i me la sogs pa ni du ba la sogs pa skyed par byed par snang la/ de bzhin du shes pa yang grogs la ltos pa yin dang / skad cig ma ji ltar ltos pa nyid yin/ me la sogs pa yang mtshungs pa'i phyir cung zad kyang yod pa ma yin gyi/ rgyun gyi dngos po la gcig pa nyid du zhen pas rgyu yin no/ / grogs byed pa'i phyir dang phan pa byed pa'i phyir me'i ltos pa shing yin par rigs pa ma yin nam/ shes pa yang yul nges pa'i phyir gzhan phan pa byed pa can yin no/ /shes pa ni yul rtogs pa'i ngo bo kho na ma yin nam/ de lta ni ma yin te/ rang gi ngo bo rtogs pa'i rang bzhin yin la/ de yang rang nyid las tshad ma yin te/ de yang shes pa thams cad kyi thun mong yin pa'i phyir/ shes pa thams cad tshad mar 'gyur te gnod pa med pa'i phyir ro/ /de yang ser po'am dngul du mi snang ba'i phyir gnod par 'gyur ba yin no/ /'di lta bu'i tshad ma'i dbang du byas pa ni ma yin te/ de'i yang phrad par bya ba'i 'bras bu dang 'brel pa ni tshad ma nyid yin la/ de yang rang gi ngo bo rtogs pas bcas pa ni ma yin te/ gzhan nyid las rtogs par bya ba yin pa'i phyir ro/ /gcig la gcig brten pa yang ma yin te/ 'di la 'di'o zhes don rtogs pa kho na tshad ma nyid yin te rtogs pa'i phyir ro/ /'dis ni dgos pa med pa'i phyir gsal ba yin la/ phrad par bya ba'i 'bras bu rtogs par yang rang nyid la kho na las ngo bo bzhin du the tshom med pa yin no/ /de dang 'brel pa ni ma rtogs te/ dmigs pa dang ma dmigs dag las khong du chud par bya'o/ /'bras bu rtogs pa tsam tshad ma ma yin nam/ de bzhin snga ma la yang cis mi 'gyur/ /ji tsam du rtogs pa de tsam du rang nyid kho na las yin par ni bden na/ 'bras bu la 'brel pa ni ma rtogs pa yin no/ /bskyed bya 'am skyed byed du yang cis ma rtogs/ bden te/ skyed byed dam bskyed byar ni rtogs na/ de kho na nyid kyis ni ma yin pa'i phyir thug pa med pa la sogs par rgal ba ni nam mkha' ltad pa dang 'dra'o/ /tshad ma nyid kyi shes pa las phyi ma yongs su gcod pa ni snga ma las bye brag med pa yang ma yin te/ de'i tshe bye brag mthong ba las dmigs pa rnam par gzhag pa'i phyir ro/ /de lta na rig byed las sgrub byed mchod sbyin las bsgrub bya mtho ris thob par bya bar shes pa nyid yin pa'i phyir tshad ma yin no/ /'phrad pa'i phyir 'jug par mi 'gyur ro/ /goms pa las phrad par bya ba nges pa yin na mngon sum las ji ltar 'jug pa yin/ nges pa rtogs pa'i don du 'jug pa yin pa'i phyir skyon med do/ /nges pa tsam 'di la yang rtogs pa khong du chud pa med do zhe na nges pa med do/ /khyed la yang ci las nges/ phrad par bya ba'i 'bras bu la rang gi ngo bo 'dzin pa yin pa'i phyir ro/ / phrad par bya ba'i rang gi 'bras bu'i rang gi ngo bo ni 'di la yang ngo / /ma yin te/ thob par bya ba ni dbang po las 'das pa nyid kyis de'i 'bras bu nyid shes pa med pa'i phyir ro/ /thob par bya ba'i 'bras bu'i shes pa ni rab rib can gyi shes pa bzhin du skyon las byung ba yin la rig byed la ni skyon med de/ byed pa po med pa'i phyir ro/ /'o na rab rib can nam/ gzhan yang rung ba'i mi bslu ba dang / slu ba yang nye bar dmigs pas tha dad pa ma yin nam/ de ni 'di la med de thob par bya ba ni dbang po las 'das pa nyid kyis de gnyis med pa'i phyir ro/ /slu ba ni skyon gyis bskyed pa ma yin nam/ de dag kyang skyes bu dang 'brel pa las yin gyi/ rang nyid las ni ma yin te/ 'bras bu dang rgyu'i ngo bor nges pa'i phyir ro/ /de med na skyes bu'i bya ba tshig gi rim pa ci ltar rigs/ de lta yin du zad mod ce na/ skyon dang des byas pa'i slu ba yang ci'i phyir glo bur du ma yin te mtshungs so/ /rig byed kyi rim pa gzhan nyid yin te/ byed pa po med pa'i phyir/ de'i skyon rnams kyang yod pa ma yin la/ shes pa yang skyed par byed pa yin pa'i phyir slu ba ma yin te byed pa med pa'i phyir ro/ / thob par bya ba'i shes pa la ni mig gi rnam par shes pa bzhin du byed pa'i skyon med par shin tu nges pa yin la/ gzhan du yang byed pa po med pa la ni sgra rang nyid la skyon yod pa'am gzhan las sam zhes bya ba'i dogs pa ldog pa ma yin no/ /rang nyid skyon can yin na nam du yang ji ltar bden pa nyid du 'gyur/ skyes bus byas pa ni de'i yon tan las bden pa nyid yin la/ yon tan rnams la ni skyon yod pa ma yin zhes bya ba gtam tsam yin te/ tshad ma med pa'i phyir phyin ci log par thal bar 'gyur ro/ /gang zhig gang las byung bar snang ba de las byung ba yin pa de'i phyir ro/ /yon tan las bden pa nyid dang / skyon las brdzun pa nyid du ni rig pa yin no/ /de ltar yang tshad mar gyur pa zhes bya ba la sogs pa der rgyas par bshad pa yin no/ /rig byed la ni skyes bu med pa'i phyir/ yon tan las byung ba ma yin la/ des na byed pa med pa'i phyir bden pa nyid ma yin no/ /'di skad bshad par 'gyur te/ shes pa phyi ma ni rang gi ngo bo kho na 'dod pa yin gyi/ de las gzhan pa ni ma yin pa'i phyir thug pa med pa ma yin la/ snga ma ni de'i thabs yin pa nyid kyis rang gi ngo bo las ma yin te/ rang nyid las rang gi ngo bo shes pa yin yang / de'i thabs nyid yin pas du ba bzhin du gzhan la nges pa yin no/ /rig byed ni rang gi ngo bo rtogs pa yin yang de'i 'dod pa rtogs pa ni ma yin no/ /de ma rtogs pa las na rang gi ngo bo ni de'i thabs nyid kyis rtogs pa ma yin te/ de nyid skyon med par nges pa yang med la so sor snang ba bzhin du skyes bu med pa'i nges pa yang med de/ rang nyid kyi skyon yin pa'i phyir ro/ /shes pa'i 'bras bu ni don la nges pa ma yin nam/ de ni de nyid kyi tshe yod pa yin la/ don du gnyer ba po rnams ni de'i rgyu mtshan la 'jug pa yin no/ /'o na gzhan du nges pas ci'i phyir 'jug pa yin/ thob par bya ba'i don du'o/ /thob pa ni lag pa la sogs pas nye bar thob pa nyid do/ /de ni snga ma nges pa yin no zhe na/ de'i cha ji ltar nges pa yin zhing 'jug pa yang yin/ nges pa ni yod kyang de ches don du gnyer ba ma yin te/ thob zin pa'i phyir ro zhe na/ de lta na 'di ni snga nas thob par bya ba dang 'brel pa can nyid yin par shes par bya'o/ /bden te phrad par bya ba la sogs pa'i shes pa la thug pa med pa ni ma yin te/ mngon par 'dod pa nyid kyi tshad ma nyid yin pa'i phyir ro zhes 'chad par 'gyur ba'o/ /de ltar 'gyur na ni shes pa kho na tshad ma yin par mi rigs te/ dbang po ma tshang pa nyid du gyur ba'i phyir ro/ /'o na ni dbang po ni yul thams cad la thun mong yin pa'i phyir thams cad la mtshungs pa kho nar 'bras bu 'byin par 'gyur te/ shes pa ni gang gi rnam pa yin pa de'i yul can kho nar 'gyur ro/ /de'i phyir dbang po ni tshad ma ma yin gyi/ 'on kyang tshad ma skyed par byed pa yin no/ /de ni ma yin te/ dbang po ni 'bras bu skyed par byed pa la bye brag med par kho bo cag gi phyogs la ji ltar 'gyur ba de bzhin du khyed kyi la yang tshad ma skyed par byed pa yin par bye brag med pa kho nar 'gyur ro/ /de yang / ji ltar tshad ma nyid yin pa/ /thams cad la 'bras 'byin 'gyur ba/ /tshad ma skyed byed nyid la yang / /de bzhin tshad ma skyed byed 'gyur/ /zhes smos pa'o zhes zer ba 'di la/ de yod na zhes bya ba smos te/ dbang po yod na yang yul la 'jal ba nyid ma yin gyi/ shes pa yod na de la nges par 'gyur ba yin no/ /des na shes pa kho na sgrub par byed pa dam pa yin gyi dbang po ni ma yin te/ bskal pa yin pa'i phyir khyab ches par 'gyur ba yang ma yin no/ /yang na tshad ma ni rang la yod pa bye brag tu gtogs pas yul bye brag byed pa yin gyi/ dbang pos ni ma yin te/ dbang po las 'das pa'i phyir ro/ /nye ba tsam gyis kyang bye brag tu byed pa ma yin la/ bye brag yod du zin kyang bye brag med par 'gyur ro/ /skyed par byed pa ni bye brag ma rtogs par yang nye ba tsam las nges par skyed par byed pa de ltar mthong ba'i phyir ro/ /des mtshungs pa ma yin no zhe na/ de yod na zhes bya ba smos te/ shes pa yod na yul yongs su gcod pa yin gyi dbang po ni ma yin te/ der rtogs pa'i bye brag mi shes pa'i phyir ro/ /shes pa la ltos pa med par yang skyed par byed pa yin no zhes bya ba'i don to/ /dbang po yang brgyud pas de nyid la bya ba byed pa'i phyir tshad ma ma yin nam/ de ni bden te/ de nyid kyis na de'i nye bar btags pa tsam yin par bstan pa ni/ dbang po dang don zhes bya ba'o/ /slu ba med pa can nyid ni 'dod pa'i don la ma 'khrul pa nyid kyi shes pa dang don dag 'brel pa ma yin nam/ de yang 'brel pa can ma bzung na mi 'dzin pa yin te/ ma bzung bas ni de la 'jug pa ma yin pas/ de bzung ba'i don du dang por don bzung ba yod na de nyid las 'jug par 'gyur ro/ /'on te don 'di nyid ces nges pa med na des ni de 'dzin pa la ltos pa yin gyi/ phan tshun rten par thal bar 'gyur ba ni ma yin no/ /ma 'khrul ba can nyid bzung ba las don bzung ba yin la/ de bzung ba las kyang ma 'khrul pa can nyid bzung pa yin no zhes bya ba la sogs pa'i skyon rnams kyis skyon can yin pa'i phyir slu ba med pa can nyid tshad ma nyid du mi rigs so/ /gnod pa med pa'i rtogs pa nyid ni rigs pa yin te/ skyon can ma yin pa'i phyir ro/ /de yang shes pa skyes pa'i dus su gnod pa can ma byung bar nges pa ni 'jug pa'i yan lag yin no/ /de yang skyon med par go bar mtshungs par shes pa'i phyir ro/ /mtshungs par go ba ni gnod pa med par rtogs pa yin no zhe na/ 'di la mi slu ba don du gnyer ba zhes smos te/ 'jig rten pa'i don gyi tha snyad kyi yan lag la ni skyon yod pa srid kyang / dor ba'i yan lag ma yin te/ tha snyad chad par thal bar 'gyur ba'i phyir ro/ /skyon rnams la yang lan gad ba pa ni/ tha snyad kyang dpyad par bya ba yin te/ gnod pa med pa nyid la don du gnyer ba'i skyes bu 'jug pa ni ma yin te/ de ni skyes bu'i don ma yin pa'i phyir te shes pa skyes pa'i dus nyid du thob pa'i phyir ro/ /'on te gnod pa med pa nyid du 'gyur ba don du gnyer ba yin pa de lta na ni/ sngar ma rtogs pa ji ltar 'jug pa'i yan lag yin/ des na de bzhin du skyon gnas so/ /de'i phyir 'jig rten ni skyes bu'i don du gnyer bas 'jug pa yin pa'i phyir ro/ /'jig rten pa ni de dang 'brel pa can nyid yin gyi/ gnod pa med pa can nyid ma yin no snyam du dgongs pa'o/ /de'i phyir/ mi bslu yon tan rnam shes la/ /lhag par mngon 'dod su zhig yin/ /de la dang po'i rag las par/ /gang gi stobs kyis 'gyur ba yin/ /zhes bya bas gsal ba yin no/ /de ltar ni 'gyur na/ 'jig rten na dam bcas pa'i don dang phrad par byed pa la ni mi bslu ba yin gyi dam bcas pa tsam ni ma yin no/ /de bzhin du shes pa yang bdag nyid du 'gyur ba'am/ gzhan la yang rung ba'i 'jug pa'i yul gyi don nye bar bstan pa dang phrad par byed pa ni mi bslu ba can yin gyi shes pa tsam ni ma yin no/ /de yang 'jug par byed pa na zhes smos pa'o/ /'jug pa'i yul ni sreg pa la sogs pa'i don byed pa can gyi shes pa'i yul yin gyi/ skad cig gam sgro btags pa yang rung bas shes pas bzung ba ni ma yin pa'i phyir 'jug pa'i yul ji ltar yul yin/ bden te snga ma dang phyi ma'i skad cig dag gcig pa nyid du zhen pa nyid kyis 'jug pa'i yul 'dzin pa yin te/ de yang yongs su bcad nas zhes smos pa'o/ /de ltar yang me la sbyin sreg byas pas mtho ris thob par 'gyur ro zhes bya ba'i rig byed las byung ba'i shes pa dang / dung la ser po la sogs pa'i yul can gyi shes pa tsam tshad ma yin par smras par 'gyur ro/ /'jug pa'i yul du nye bar bstan pa de dang phrad par byed pa ni ma yin te/ the tshom las dang ma yin pa las kyang ngo / / phrad par byed pa ni tshad ma yin te/ yongs su bcad pa'i yul la yang 'jug pa na/ phrad par snang ba'i phyir yongs su gcod par byed pa ni 'jug pa dang phrad pa de dag gi rgyu mtshan yin gyi gzhan las ni ma yin pa'i phyir/ yongs su gcod pa'i ngo bo nyid kho na tshad ma yin no/ / de nyid kyis na snga rol nyid du yongs su bcad pa ni rgyu yin no/ /de nyid kyis na yongs su bcad pa na tshad ma'i bya ba thams cad yongs su rdzogs pa yin no/ /de yang don rtogs pa ni 'bras bu yin zhes bya bas bstan to/ /de ltar yang mi bslu ba la sogs pa'i shes pa gzhan la ltos pa nyid ma yin par bstan pa yin te/ gang gi phyir de nyid kyis phrad pa'i bar gyi don rtogs pa yin no/ /mi bslu ba'i shes pas ni dgos pa med de bye brag med pa'i phyir ro/ /de nyid kyi yul yongs su gcod pa na tshad ma'i bya ba rdzogs pa yin la/ rang nyid kyis rtogs pa la gzhan yang yin nam zhes bya bar phyis byung ba yin par the tshom za bas de la gnod par byed pa ma yin no/ /des na phyi rol du gyur pa'i phyir dang / rnam grangs kyis nges par 'dzin pa'i phyir yang ngo / /de yang de dang ldan pa rnams de sa bsdus pa'i phyir nges par rtog pa yang yin zhes gsungs pa dang / yang gang dang gang rab tu dbye ba yod pa dag ni the tshom gyi rgyu yin la/ de dag gis ni dngos po thams cad bsdus pa'i phyir dang / de dag gcig par yang nges pa med pa'i phyir la/ de'i phyir the tshom gyi yan lag yin no/ /gal te de yang phung po gzhan du 'gyur ba de lta na yang bdag med pa nyid med nas nges par bdag dang bcas pa nyid du 'gyur grang na/ rnam pa gzhan du 'gyur ba yang srid pa'i phyir nges pa med par 'gyur ro/ /gnyis po dag las kyang rnam pa gcig tu nges pa med par mthong na the tshom du 'gyur gyi/ gzhan du na ni ma rtogs pa yin no/ /de bzhin du 'dir yang me mthong bar nges na gzhan du mthong ba'i phyir the tshom gyis tshad ma'i byad par nges pa la gnod par byed pa ma yin te/ de la gnod pa yin na rang nyid med par 'gyur ro/ /de yang 'dir byung ba gang gi phyir zhes ldog par 'gyur/ de'i phyir de tsam ni gzhan la ltos pa'i tshad ma yin gyi/ rang gi yul la nges pa ni ma yin no zhes bya ba'i bsam pas 'phangs pas mi slu ba can nyid de'i zhes zer ba la 'di la lan du/ shes pa'i rang gi ngo bo nyid/ /ces bya ba ste/ sngon po'i shes pa ni sngon po'i rang gi ngo bo yin la/ de rtogs pa yang de la tshad ma ma yin te/ dung la ser po'i shes pa yang de nyid du thal bar 'gyur ba'i phyir ro/ /dung la ser po'i shes pa la phrad par bya ba med pa'i phyir/ de rtogs pa ma yin zhes bya ba ni mi rigs te/ cig shos la yang mtshungs pa'i phyir ro/ /gcig par zhen par byed pa ni ser po'i shes pa la yang mtshungs so/ /de ltar zhen pas phrad par bya ba'i ser po med pa'i phyir der 'khrul pa yin no/ /gzhan la ni phrad par bya ba yod pa'i phyir tshad ma yin no/ /'di la yang phrad par bya ba yod pa'i tshad ma ci zhig yod/ zhen pas yin no/ /'di ni gzhan la yang mtshungs so/ /de la med par shes pa gzhan gyis dus phyis rtogs pa yin no/ /'di la yang der zhen pa phrad par bya ba med par yang mthong ba'i phyir/ yod pa dang med par zhen pa thun mong ma yin pa'i phyir the tshom yin no/ /de ni nges pa dang 'gal ba can ma yin te/ rim gyis nges pa'i ngo bo mthong ba'i phyir ro/ /the tshom dang nges pa dag tu mi 'gal zhes zer ba'i shes rab ma nor ba can gyi btsun pa nyon mongs so/ /the tshom la yang yod pa nyid dam med pa nyid du nges pa yin pa 'di la 'jig rten shin tu gcod par byed pa yin te/ 'jig rten ni nges pa ma bzung ba'i bdag nyid can gyi shes pa la the tshom zhes zer te/ sdong dum mam me zhes bya ba'i nges pa ma bzung ba'i phyogs gnyis kyi snang ba las the tshom za ba'i lam gyi sgras brdar byas pa'i don ni ma nges pa la mngon par dpyod pa yin te/ shes pa gnyis po de dag rim gyis skye ba'am/ rim pa las gzhan par skye yang rung ba'i shes pa ni rim gyis dngos po gnyis su ma nges pa la dpyod pa yin pa'i phyir/ mthong ba nges pa can ma yin te/ rim gyis sam gzhan du yang rung ste the tshom zhes bya'o/ /rim pa dang rim pa ma yin par 'byung bar nges pa'i sngon po la sogs pa'i rigs pa rnams ni the tshom nyid du thal bar 'gyur ro/ /de'i phyir phrad par bya ba sngon por zhen pa'i nges pa'i rgyu med pa'i phyir/ cha shas gcig par zhen pa yang rig byed bzhin du gzhan pa nyid du dogs pa ma bsal ba'i phyir the tshom nyid yin pas rang nyid las tshad ma ma yin no/ /de lta yin na ji ltar 'jug par 'gyur/ tshad ma ma yin pa nyid kyi phyir/ zhugs nas kyang shes pa gzhan nyid kyis nges par rtogs pa yin gyi/ snga ma nyid ni de la tshad ma ma yin no/ /snga mas kyang yul gyi nges pa ma bzung la/ shes pa phyi ma'i dus su yang rang bzhin mi 'dor bas yul nges pa can du mi 'gyur ro/ /the tshom ni phyis nges pa dang phrad pa can bzung bar 'dod pa ma yin no/ /de'i phyir gang dang gang gi 'brel pa 'dzin pa yin/ dus kyis kyang de dang 'dra ba mthong ba las 'jug pa ji ltar 'gyur ba yin/ sngon rol du nges pa bzung ba yin na de dag gi 'brel pa 'dzin pas de dang mtshungs pa'i rjes su dpag pas 'jug pa thams cad mtshungs pa yin no/ /bden te/ phyi ma 'ba' zhig nyid ni de'i tshe don med na mi 'byung ba nyid kyis gzung ba yin gyi/ sngar gyi ni ma yin pa'i phyir skyon med do/ /de dang ldan pa rnams des bsdus pa'i phyir zhes kyang gang smras pa la phung po gzhan med par bstan pas the tshom gyi yul dag gi gcig med na cig shos ma yin zhes bya ba ni don gyi nges pa'o/ /phung po gzhan nyid yod na ni de ltar mi 'gyur ro zhes bstan pa'i don du ste/ de ltar ma nges pa 'dzin pa la the tshom za bar rig pa yin no/ /de yang gnas ma yin pa la mngon par zhen pa tsam ste/ phung po gzhan med par bstan pa na the tshom gyi yan lag yin gyi/ nges pa'i yan lag ni ma yin no/ /de skad du yang / tshad ma rnam par nges pa las/ bdag yod pa dang rnam par bcad pa dag gis thams cad bsdus pa'i phyir/ thams cad khongs su gtogs pa ma yin par mi rigs te/ the tshom za ba yin no zhes kyang smos so/ /phung po gzhan med pa'i phyir ma rtogs pa yin no/ /de yang rtogs pa ni gnyi ga rtogs pa ma yin te/ the tshom gyi ngo bo nyid kyi phyir te/ de gnyi ga las phyi rol du gyur pa yin na ji ltar de'i khongs su gtogs pa yin zhes gsungs pa'o/ /de bstan pa ni gnyi ga las phyi rol du gyur pa ni med par shes par bya ste/ de med pa'am gnyi ga'i ngo bor the tshom za ba yin la/ de dag las gcig med par nges pa yin gyi/ yul gyi nges pa ma bzung ba'i the tshom gyi shes pa nyid ni gcig gi ngo bo la nges par mi 'gyur te/ de ma gtogs pa nyid ni phung po gzhan med pa la the tshom du 'gyur bar thal bar 'gyur ba'i phyir ro/ /'gal ba'i phyir ma yin no zhe na/ the tshom za ba la yang mtshungs so/ /de bas na dngos po gcig la nges pa'i phyir shes pa gzhan yin par bstan gyi the tshom nyid ni ma yin no/ /phyi ma nyid ni don med na ni 'byung ba'i phyir tshad ma yin gyi snga ma ni ma yin no/ /de yang ma yin te snga ma bzhin du phyi ma yang gcig pa nyid du zhen pa can yin yang / nges pa can ma yin pas gzhan pa nyid du rtogs pa nyid ma bsal ba yin no/ /'di la snga ma las bye brag ci zhig yod/ rab rib can gyi yang phyi ma la tshad mar thal bar 'gyur te/ de la yang / gcig la shes pa gnyis tshad ma ma yin par mi rigs so zhes bya ba la sogs pa la yang phan tshun rten pa dang / thug pa med pa la sogs snga ma dang mtshungs so/ /de lta yin na mi slu ba nyid ji ltar yin/ smras pa/ sreg pa la sogs par gtogs pa ni skyes bu'i don yin la/ rang gi ngo bos ni de nyid kyang phrad par bya ba yin te/ de'i don du yang skyes bu 'jug pa yin gyi/ phrad par 'dod pa'i phyir de las phyi ma tshol ba ni ma yin no/ /de dang ma phrad pa yin na de 'dod pas de'i thabs don du gnyer ba yin no/ /shes pa snga ma ni rang gi ngo bo rtogs pa yin yang phyi ma'i thabs nyid don du gnyer bar byed pa yin gyi rang gi ngo bo ni ma yin te/ skyes bu'i don ma yin pa'i phyir la/ 'di'i rang gi ngo bo ni du ba dang 'dra ba nges pa yin no/ /de'i thabs nyid ni goms pa med na du ba kho na bzhin du gzhan las nges par bya ba yin la/ goms pa yin na ni de nyid kho na las so/ /de'i 'bras bu yin par phyir de dang gcig pa nyid du zhen pa sa de dang yul mtshungs pa nyid dam/ de snga ma'i yul nyid yin yang rung / dung la ser po'i shes pa ni phrad par bya ba'i thabs nyid dam/ de dang gcig pa nyid du nges par byed pa nyid ma yin te/ rang gi ngo bo tsam ni me mthong ba po la du ba la nges pa lta bur nges par byed pa ma yin no/ /des na tshad ma ma yin pa dang thun mong ma yin pa'i phyir dang / nges pa skyes pa'i phyir the tshom za ba ma yin te/ me'i shes pa lta bu'o/ /rang gi ngo bo ni dang po mngon sum gyis nges pa dang goms pa yang yod pa las de dang 'brel pa can nyid dam/ de nyid la nges par byed pa'i phyir mngon sum tshad ma yin no/ /snga ma ni goms pa med pa la yang gi ngo bo nges pa yin te/ phrad par bya ba la the tshom za ba ni de rtogs na phrad par bya ba la the tshom za ba ldog pa yin la/ de log na rang gi ngo bo la nges pa yin te/ phrad par bya ba rtogs pa dang 'brel pa can nyid kyis nges par byed do/ /don 'dzin pa la the tshom za ba'i phyir te/ tshad ma ma yin yang shes pa'i ngo bo yin pa'i phyir/ phyi ma yang snga ma las bye brag med pa'i phyir 'brel pa rig pa ma yin no/ /de'i phyir yang don byed pa'i byed pa po nyid ma yin mod kyi/ 'on kyang grub pa ste bdag nyid thob pa la mi bslu ba'o/ /de dang 'brel pa can snga ma tshad ma yin te/ phrad par byed pa skyed par byed pa'i ngo bo'i de kho na nyid du rtogs pa de 'bras bu ste/ don rtogs pa ni 'bras bu'o zhes gang gsungs pa'o/ /de ltar yang de la ma 'khrul pa can gyi ngo bo de nyid kyis rtogs par byed pa'i phyir te/ de nyid kyis de ltar rtogs pa ni tshad ma nyid yin gyi de nyid kyi rgyu ni ma yin te/ me'i de ma thag pa'i du ba'i shes pa ni me'i shes pa yin pa de bzhin du phrad par bya ba la ma 'khrul pa can nyid kyi shes pa ni phrad par bya ba'i shes pa yin te/ ma 'khrul pa can nyid rtogs pa po tshad ma yin gyi/ rtogs par byed pa po nyid ni ma yin no zhes bya ba'i don to/ /de yang 'di'i don dang 'dra ba ni tshad ma nyid yin no zhes gsungs pa'o/ /phrad par bya ba dang 'dra ba phrad par bya ba la ma 'khrul pa can gyi ngo bo nyid kyi yul nges pa yin no zhes bya ba'i don to/ /de rtogs pa nyid ni phrad par bya ba rtogs pa yin la/ /rtogs pa yod na 'jug pa yin te/ rtogs pa dang 'jug pa dag ni rgyu dang rgyu can yin zhes bya ba la sogs pa thams cad phyogs 'di la rigs pa yin gyi/ khyed kyi phyogs la ni ma yin te/ de mi srid pa'i phyir ro/ /don yang so sor snang ba ma yin nam/ bden te/ de la nges pa'i rgyu med pa'i phyir the tshom can yin no/ /de de lta yin na rang gi ngo bo'i phyogs la yang mtshungs pa yin no/ /mtshungs pa ma yin te/ de ni rang nyid rigs pas nges pa can yin pa'i phyir ro/ / 'di la yang don la nges pa'i dus phyis skyes pa'i the tshom ni de dang 'gal ba can ma yin no/ /de lta na ni sgra las byung ba yang nges pa'i dus phyis de dang 'gal ba can ma yin par 'gyur ro/ /de nyid ni nges pa'i rgyu mtshan can ma skyes pa'i phyir gzhan nyid du the tshom za ba ma bsal ba yin no/ / de ni 'di la yang mtshungs so/ /de bzhin du phyi ma la yang bshad par bya'o/ /shes pa phyi ma ni don la nges par byed pa can yin te/ de ma thag tu don byed pa bskyed pa'i phyir/ don la nus pa can gyi mtshan nyid yin pa'i phyir ro/ /ma yin te/ de'i tshe nus pa mi shes pa'i phyir te/ gzugs nyid mthong ba na nges pa skyes pa ma yin te/ snga ma bzhin du the tshom za ba yin no/ /don byed pa'i shes pa ni don dang don byed pa yang rig pa yin zhes bya ba ni mi rigs te/ cig car ba ma yin pa'i phyir te/ rim pa med pa la rim pa dang ldan par rigs pa ni mi rigs so/ / don byed pa dang rjes su mthun pa tsam 'dod pa yin pa'i phyir don yin no/ /bden pa dang mi bden pa 'byed par byed na ni thug pa med pa la sogs par 'gyur ro/ /nges pa can las skyes pa yang glo bur du du ba las me'i shes pa gang yin pa gang 'brel pa nges pa med na tshad ma ma yin te/ de yang ches nges pa can ma yin pa las byung ba yin no/ /rjes su dpag pa la ni nges pa can las skyes pa nyid la sogs pa nges pa'i rgyu mtshan can gyis mngon sum la ni ma yin te/ de ni mthong ba nyid kyis don la nges pa yin no/ /dung la ser po la sogs pa shes pa'i yang mthong ba yod la/ nges pa can las skyes pa nyid las gzhan pa'i bye brag ni med do/ /de yang / don med na ni mi 'byung phyir/ /mngon sum la yang tshad ma nyid/ /ces gsungs pa ste/ don ni phrad par bya ba'o/ /de'i phyir gang zhig phrad par bya ba mi 'khrul ba can nyid du 'dzin pa de tshad ma yin gyi/ gzhan ni tshad ma ma yin te/ phyi rol gyi don du smra ba bzhin du rigs pas bstan pa las tshad ma rnam par gzhag pa ci yang med par nges pa yin no/ /sngon po'i shes pa ni don byed pa'i shes pa la sogs pa bzhin du sngon por rtogs pa byed pa ma yin nam/ de las gzhan pa rnam par gcod par byed par yang ma 'dres par so sor snang ba'i phyir ro/ /de yang de yongs su gcod par byed cing de las gzhan pa rnam par gcod par byed pa zhes gsungs pa'o/ /de las gzhan pa rnam par gcod pa dang gzhan nyid la the tshom med pa can gyi yul rtogs par byed pa yin no/ /rtogs par byed pa nyid spyir btang ba can gyi tshad ma nyid dmigs kyis bsal ba nyid dang 'gal ba can yin pas gsal ba'i phyir gzhan las tshad ma nyid yin zhes zer te/ de yang / de phyir rtogs pa'i bdag nyid can/ /gnyis kyis rtogs pa tshad mar 'gyur/ /gzhan min nyid rgyu las skyes pa'o// /skyon shes pa las des bzung byed/ /ces bstan to/ /dmigs kyis bsal ba med na sgrub pa'i ngo bo yin pa'i phyir tshad ma yin no/ /rtogs pa'i spyi ni ma yin te the tshom yin te 'gal ba can gyis sgrub pas bsal ba can yin pa'i phyir ro/ /bsal ba can ni yod pa ma yin te/ rang gi ngo bo rig pa la yang thal bar 'gyur ro/ /smras pa/ nges pa can gyi rgyu mtshan las byung ba'i shes pa ni rjes su dpag pa bzhin du 'di lta bu yin gyi/ cig shos cha shas gcig tu nges pa can yang de lta bu ma yin no/ /gang la the tshom mam phyin ci log pa yang rang nyid skyes pa yin na de 'di lta bu yin gyi gzhan ni ma yin no ma yin te/ de la yang bye brag ma mthong na rang nyid kho na skye ba'i phyir ro/ /bye brag kyang 'dir nges pa can las skyes pa nyid yin la/ der nges na nges pa yin la/ de la ma nges na the tshom za'am gzhan yang rung ba ni rnam par dbye ba'o/ /des ni/ ma skyes pa la'ang gnod pa can/ /tshol ba'i rmongs pa gang yin pa/ /de ni tha snyad thams cad la/ /yid gnyis ngo bos zad de 'gro/ /zhes zer ba de bsal ba yin te/ gang gi phyir bye brag tu mthong ba ni the tshom gyi rgyu yin gyi rmongs pa ni de'i rgyu ma yin te thal ches pa'i phyir ro/ /sdong dum mam zhes bya ba la sogs pa yang bye brag ma mthong ba'i rgyu nyid las byung ba'i the tshom yin no/ /rig byed las byung ba'i shes pa ni nges pa can las skyes pa nyid du nges pa ma yin no/ / 'on te tshig rnams dang / de'i don rnams dang / de dang 'brel pa yang brtag pa yin te/ skyes bus byas pa nyid du mi dran pa'i phyir ro/ /ba lang la sogs pa'i sgras brjod par bya ba la the tshom za ba yin na/ de'i brda'i tshig 'phel ba dang / a las air gyur pa dang 'dra bar dran par byed pa yin no/ /ba lang zhes bya ba 'di la don gang yin zhes the tshom za ba la lkog shal la sogs pa'i khyad par can gyi gzugs can yin no zhes smras pa la sogs pa dran par byed pa nyid ma yin nam/ gsal ba la sogs pa mtshan nyid mi 'dra ba'i gzugs can ni brjod par bya ba yin no zhes bya ba'i don to/ /dag nyid kyang brdar byed pa po yin no/ /de la drang srong ba ni yin no zhe na/ gzhan la yang rgad po kha cig dang bye brag med do/ /rang bzhin las byung ba la ni don gyi 'brel pa yod na du ba bzhin du tshig las kyang mi bslu bar 'gyur ro/ /ba lang rdzi'i bum pa'i du ba slu ba can yin pa de bzhin du/ sor mo'i rtse mo la sogs pa'i tshigs kyang de dag tsam gyi sgra las byung ba yang tshad ma ma yin pa ma yin te/ du ba gzhan bzhin no/ /du ba gzhan ni don las nges pa yin no/ /'dir yang tshig rnams ni tshig gi don rnams la nges pa yin te/ rang nyid nye ba las don nye bar byed pa yin la/ de nyid kyang gcig la gcig 'brel pa yod pa yin na ngag gi don yin no/ /lan du smras pa/ gang gi phyir du ba ni rang gi rgyus 'phangs pa'i rang gi don la nges par byed pa yin gyi/ tshig rnams ni de lta ma yin te/ skyes bu'i 'dod pas bsdu ba byas pa'i tshigs rnams ni ngag gi don gyi rgyu mtshan yin gyis gcig gis ni ma yin te/ bsdus pa yang 'di las 'di yin te/ 'di las ni 'di ma yin no zhes pa'i phyir skyes bus byas pa yin no/ /tshig gzhan rnams nyid la ni re res so/ /tshig gi don ni don gzhan dang ldan pa yin par smra ba'i phyir bsdus pa ni don rtogs pa'i yan lag ma yin te/ de rnams kyang brtags pa dang don dang 'brel pa can rnams ni skyes bus mngon par gsal bar byas pa 'ba' zhig yin no/ /de lta na yang tshig rnams ni du bzhin du rang dbang can ma yin te/ 'dod pa'i gzhan dbang yin pa'i phyir ro/ /mngon par gsal ba ma yin pa'i tshig gam de bsdus pa yang rung ste/ yod pa tsam gyis ni rtogs pa'i yan lag ma yin la/ de'i mngon par gsal ba yang skyes bu'i 'dod pa'i dbang gis yin gyi/ du ba mngon par gsal ba lta bu ni ma yin te/ rang gi rgyu'i dbang nyid yin pa'i phyir ro/ /bden te du ba ni don gyi dbang nyid kyis de la nges pa can yin gyi/ 'dod pa'i dbang gis mngon par gsal ba can gyi sgra ni don la nges pa can yin par mi rigs te/ de'i rang dbang can ma yin pa de la nges pa can yin zhes bya ba ni log par sgrub pa yin no/ /rtag pa nyid dang rang dbang can yin pa nyid kyis de'i dbang du gyur pa ma yin pa ni de rjod par byed pa nyid kyis kyang de la nges pa yin no zhe na/ rjod par byed pa nyid ni de rtogs pa skyed par byed pa nyid yin la/ de ltar na de nyid kyang sdong dum mam zhes bya ba la sogs pa bzhin du ma nges pa'i rgyu mtshan skyed par byed pa nyid sgra las byung ba la the tshom gyi rgyu mtshan yin pa'i phyir/ de ni tshad ma ma yin te/ rang dbang can yang yin la nges pa can yang yin pa ni rigs pa chen po can yin no/ /rang dbang can ni 'dod pa'i dbang nyid mngon par gsal ba'i don du ma yin nam rang gi ngo bo'i don du ni ma yin no bden te/ mngon par gsal bzhin pa'i ngo bo las gzhan par mi mthong ba'i phyir dang / de yang gzhan nyid yin pas ngo shes pa ma yin pa'i phyir 'dod pa'i dbang nyid kyis yin no/ /ngo shes pa nyid yin na yang 'dod pa'i dbang gis mngon par gsal ba nyid yin pa'i phyir 'dod pa'i dbang nyid de chog go/ /yang rang gi ngo bo la mngon par gsal ba'am mngon par brjod pa la ltos pa ma yin te/ de'i dbang gis ma yin pa dang / don gzhan du khrid pa'i phyir ro/ /rjod par byed pa nyid ni rtogs pa tsam gyi rgyu mtshan nyid yin gyi/ tshad ma'i yan lag ma yin par bstan to/ /des na shes pa tsam las don la nges pa ni ma yin te/ nges par byed pa ma yin pa'i phyir ro/ /brjod par bya ba rnams la skyes bu'i dbang byed pas 'jug pa can rnams ni dngos po mthong ba can ma yin te/ ji ltar goms pa'i rnam par rtog pa sad pa'i rgyus 'jug par sems pa yin na/ rang gi ngo bo la nges pa yin gyi de dag tsam gyis mgu ba ni min te/ rmi lam la sogs pa la yang yod pa'i phyir ro/ /phrad par bya ba dang 'brel ba can du nges pa yod na de nyid tshad ma yin no/ /phrad par bya ba nyid kyi rang gi ngo bo la nges par byed pa yin gyi/ phrad par bya ba dang 'brel pa can nyid kyis ni ma yin no bden te/ phrad par bya ba ma yin pa yang de'i 'bras bu ni de nyid las rtogs pa yin te/ nag pa'i bu la nag par shes pa lta bu'o/ /rnam pa mang po mthong ba nas rgyu la 'bras bu nyid du'am/ 'bras bu nyid la de nyid du sgro 'dogs pa ni 'dra ba las yin te/ mtshe ma dag la sogs pa lta bu'o/ /'di la yang phrad par bya ba'i 'bras bu nyid la de nyid du'o/ /de lta yin na 'di'i don dang 'dra ba ni tshad ma yin no zhes ci'i phyir gsungs/ de'i 'bras bu nyid kyi ngo bo ni de nyid dang 'dra ba yin te/ don gyi dngos nyid ma spangs pa zhes bya ba yin te/ 'dir de nyid brjod pa las 'di don dang 'dra ba'i ngo bo yin pa'i phyir ro/ /'di la yang 'dra ba can kho na yin no zhe na/ bsreg pa dang / btso ba la sogs pa rnams ni me dang 'dra ba nyid ma yin la/ de nyid 'bras bu nyid ni yin pa'i phyir phrad par bya ba'i don gyi ngo bo 'bras bu nyid gang gi yin pa'i don de nyid kyi ngo bo yin pa de lta na/ de kho na nyid rtogs pa 'bras bu yin no/ /de kho na nyid ni de rtogs pa rnam par gzhag pa'i rgyu yin pa'i phyir tshad ma nyid yin no/ / 'jig rten na yang dam bcas pa'i don dang phrad par byed pa ni mi slu bar byed pa po ma yin nam/ dam bcas pa tsam ni ma yin zhing gzhan dang phrad par byed pa po yang ma yin no/ /de bzhin du shes pa yang bde ba la sogs pa mi bslu ba can yin gyi/ rtogs pa tsam ma rtogs nas gzhan dang phrad par byed pa po ni ma yin no/ /'o na ci zhe na/ rtogs nas phrad par byed pa yin te/ rtogs pa'i skad cig ma nyid dang phrad par bya ba rtogs pa yin par gcig pa nyid du zhen pa'i phyir ro/ /rtogs pa yod na phrad pa yod pa'i phyir rtogs pa nyid tshad ma yin gyi gzhan las ni ma yin no/ /gzhan las ma yin zhes bya de lta ni ma yin te/ phrad par bya ba don du gnyer ba de dang 'brel pa can kho na'i ngo bo tshad ma yin gyi rtogs pa tsam ni tshad ma ma yin no/ /de yang rtogs pa ma yin pa ni 'jug pa'i yan lag ma yin pa'i phyir rtogs pa ni de la ltos pa yin no/ /phrad par bya ba dang 'brel pa can gyi shes pa'i ngo bo yang rjes su dpag pa'i ngo bo bzhin du rang nyid kyis shes pa yin no/ /de nyid shes pa yin gyi de dang 'brel pa can ni ma yin no ma yin te nag pa'i bu la nag pa'i shes pa bzhin du de nyid shes pa'i yul ni 'brel pa yin pa'i phyir ro/ / des na de nyid ni tshad ma yin la de shes pa ni 'bras bu yin no/ /de yang don dang 'dra ba ni tshad ma yin la don rtogs pa ni tshad ma'i 'bras bu yin no zhes kyang gsungs pa'o/ /de'i phyir shes pa'i ngo bo la sgro btags pas 'jug pa yin gyi phyi rol la 'jug pa ni ma yin no/ /phyi rol la yang shes pa'i ngo bor sgro btags pa yin na/ mi 'jug pa kho na yin te/ don du gnyer ba ni su yang ma yin no/ /shes pa'i ngo bo dang phyi rol dag ni so so ba ma yin pa'i phyir 'jug pa yin no zhe na/ so so ba ma yin na phyi'i dngos po don du gnyer ba rnams ches shin tu yang mi 'jug pa'i phyir de gsal ba yin no/ /snang ba dang rnam par rtog pa dag gcig tu byas nas zhes bya ba la sogs pa de kho na nyid du 'dod pa de las byung ba nyid kyi yul can rnams de bzhin du bshad par bya'o/ /rtogs pa tsam yang tshad ma nyid yin na ni sgra las byung ba la yang 'gyur ro/ /sgra las byung ba yang phyi rol shes par byed pa ma yin nam/ shes bya dang shes byed las gzhan pa la ni 'brel pa med do/ /de lta ni ma yin te/ shes bya dang shes byed kyi dngos po nyid de dang 'brel pa yin gyi de'i shes pa tsam ni ma yin no/ /dngos po yang shes pa nyid ma yin nam/ nye bar dmigs pa ni yod pa zhes brjod do zhes gang gsungs pa'o/ /phrad par bya ba'i rang gi ngo bo'i nyams su myong ba ni dmigs pa yin gyi shes pa tsam ni ma yin no/ /rig byed la ni phrad par bya ba'i 'bras bu'i rig pa yod pa ma yin la/ yod na yang de don du gnyer ba rnams 'jug pa ma yin no/ /rig par byed pa ni yod la/ rig par bya ba ni med pa des na rig par bya ba don du gnyer ba rnams 'jug pa yin no/ /ma yin te/ rig par bya ba dang 'brel pa mi shes na 'jug pa med pa'i phyir ro/ /'dis ni nges par sbyor ba tsam las 'jug pa gsal ba yin no/ /nges par sbyor ba yang de nyid kyi tshe yod pa'i phyir 'jug pa ma yin no/ /nges par sbyor ba ni bsgrub par bya ba yin gyi de'i tshe ni med pa yin no/ /de lta na shes pa dang 'brel pa mi shes pa'i phyir de'i shes pa las 'jug pa ni ma yin no/ /des na phrad par bya ba la nges pa can nyid kyi shes pa ni de kho na nyid la nges pa can gyi tshad ma yin gyi gzhan las ni ma yin no/ /dbang po'i gzung bar bya ba nyid du thal bar yang ma yin te/ rang gi ngo bo la de kho na nyid du sgro 'dogs pa'i yul ma yin pa'i phyir ro/ /'bras bu tsam nyid la rgyu'i thams cad nyid du sgro gdags par bya ba ma yin no/ /'dra ba nyid ni gdags pa'i rgyu mtshan yin no/ /ma yin te/ de med pa yin yang gzugs dang reg pa dag gis reg pa'i 'bras bu gzugs yin pa'i phyir te/ rgyu'i rang gi ngo bo la de kho na nyid du sgro btags pa'i yul yin te/ de yang rgyu ma yin pa yul ma yin par bstan pa ni/ rigs pa shes pas shes pa'i rnam pa 'jog nus pa'i rgyu nyid la gzung bar shes kyang gsungs pa'o/ /shes pa'i rang gi ngo bo la rang gi rnam pa ste/ bdag nyid kyi ngo bor 'jog pa ste sgro 'dogs par ni rigs pa yin te/ phrad par bya ba ste rgyu la 'bras bu'i ngo bo nyid du sgro btags pa'i yul zhes bstan to zhes bya ba'i don yin gyi/ shes pa la rang gi rnam pa ste rang dang 'dra bar 'dogs par byed pa ni ma yin no/ /'bras bu nyid la de kho na nyid du sgro 'dogs pa yang kha cig la mthong ba las thams cad la ni ma yin par bshad zin to/ /'di skad bstan par 'gyur gyi bdag nyid kyi khongs su gtogs pa'i bde ba ji ltar rigs pa de bzhin du sngon po yang ngo / /bde ba ni gzhan rig pa ma yin te/ gzhan rigs pas ni rig pa ma yin pa'i phyir ro/ /sngon po la ni bde ba nyid yod pa yin no/ /ma yin te/ de ni sngon po bzhin du rig par bya ba yin pa'i phyir ro/ /de rig pa la yang sngon por sgro 'dogs pa ma yin pas bdag nyid rig pa ma yin pa nyid du mi shes pa'i phyir ro/ /gnyi ga la yang tshogs pa yod na sngon po la sogs pa bzhin du cig car 'byung ba'i phyir phyin ci log tu 'gyur ro/ /zhen pa yang goms pa la ltos pa yin gyi bde ba bzhin du sngon po ni dus der yul la 'jug pa ma yin zhing phrad par bya ba yang ngo / /rtogs pa las ni phrad par bya ba dang der 'brel pa ni gzhan nyid las shes par bya ba yin gyi de tsam las ni ma yin te/ the tshom yod pa'i phyir ro/ /de nyid kyis na nges pa yang yin no zhe na ma yin te/ rang gi ngo bo la nges pa yin pa'i phyir ro/ /dbang po dang yul la sogs pa rnams kyi rgyu mtshan las skyes pa'i rnam par shes pa ni 'brel pa gang yin pa las yul gyi rjes su byed pa yin gyi gzhan las ni ma yin te/ de nyid las de 'dzin pa yin gyi gzhan las ni ma yin no/ /de ltar na gcig las gcig tu brgyud pas dub pa yongs su 'dor bar 'gyur ba yin zhes gang smras pa de ni ma yin te/ 'bras bu ni rang gi rgyud las byung bas de'i rnam pa'am gzhan du yang 'byung ba yin la/ shes pa ni rang nyid rig pa yin gyi gzhan las kyang ni ma yin pa'i phyir de dang 'dra ba ma yin no/ /de dang 'dra ba la yang rang nyid rig pa yang bdag nyid sngon por rig pa rnyed par dka' ba ma yin no/ /de ltar yang de tsam thams cad la yang yod pas thob zin pa'i phyir yang 'jug pa'i yul ma yin no/ /de'i thabs nyid kyis ni rtogs pa dang ldan pa rnams ltos pa yin par gzhan nyid las shes par bya ba yin gyi/ rang nyid las ni ma yin pa'i phyir gzhan las the tshom ldog pa tsam ni ma yin no zhes bstan pa yin no/ /rnam pa las sngon po'o zhes rjes su dpog pa yin no zhe na/ phrad par bya ba las gzhan pa ma yin te/ sngon por ma dmigs pa'i phyir ro/ /ldog pa las 'grub par 'gyur zhes bya ba la sogs pa gsungs pa ni gal te mtshungs pa de ma thag rkyen las nges pa mi smra ba zhes bya ba ste/ de lta na yang yul mtshungs pa'i de ma thag pa yul du 'gyur ro zhes kyang ngo / /phrad par bya ba nyid dang rigs mthun pa la gzhan gyis bar du mchod pa 'di'i de ma thag pa ni mtshungs pa de ma thag pa'i shes pa zhes kyang bstan to/ /de lta yin na rang gi ngo bo bzhin du thams cad la yin pa'i phyir/ tshad ma ma yin pa mi srid par 'gyur ro ma yin te/ 'das pa'i de ma thag pa ni tshad ma ma yin te/ gzhan las bzlog pa zhes bya ba ni bya ba'i rnam par dbye ba'o/ /rgyu ma yin pa yul ma yin zhes bya ba ma yin nam/ bde ba la sogs pa rang gis rig pa ji ltar yul nyid yin te rgyu ma yin pa'i phyir ro/ /rang nyid grub pa'i rang gi ngo bo ni phrad par bya ba dang tha dad pa'i phyir/ ji ltar yul yin zhes ltos pa dang bcas pa la rgyu nyid la de kho na nyid du sgro btags pa'i phyir zhes bstan to/ /rang nyid rig pa las de'i bdag nyid yin pa 'dis tshad ma ma yin par gsal ba yin no/ /bar ma chad par smras pas chog go/ /phrad par bya ba'i 'bras bu nyid rang gi ngo bo yin pa ni de med na med pa'i phyir te/ du ba ni me'i 'bras bu nyid yin pa lta bu'o/ /sngar gang mthong ba nyid yod pa las phyis mthong bar 'gyur ba gang yin pa de ni de'i 'bras bu yin te/ des drangs pa'i phyir me'i du ba lta bu ma yin nam/ du ba mthong ba dag ldan pa tsam las ji ltar me dmigs par 'gyur/ de la 'das pa'i dus kyi me rjes su dpog par byed pa ni ma yin te/ slu ba yin pas tshad ma ma yin pa'i phyir ro/ /'byung bar 'gyur ba las mi slu ba yin gyi 'das pa la ni ma yin no/ /de nyid 'byung bar 'gyur ba yin no zhe na/ ma yin te/ 'gal ba'i phyir ro/ /'byung bar 'gyur ba la 'byung bar 'gyur ba yod pa ma yin no/ /de'i 'bras bu ma yin pa yang de la mi bslu ba can ma yin te/ /thal ches pa'i phyir ro/ /de dag gcig pa nyid du zhen pa las yin no zhe na/ de lta byung bar gyur pa la yang 'byung bar 'gyur ba nyid du zhen pa kho na yin no/ /rgyu la nye bar sbyor ba ma yin pa can ni mthar thug gi bar du yang nye bar sbyor ba can ma yin te/ skad cig kyang rgyun mi 'chad par rjes su 'jug pa la nye bar sbyor ba ma yin pa'i phyir ro/ /phrad par bya ba yang rang gi ngo bo yod na de mi zad pa yin te/ de yang rgyu la rgyu'i chos rjes su 'jug pa yin te/ thams cad rgyu yin par thal bar 'gyur ba yin no zhe na/ de lta bu ni 'das pa la yang mtshungs so/ /de lta ma yin te/ 'di yod na 'di 'byung zhes bya bar bye brag tu rtogs pa'i phyir ro zhe na/ de la yang mtshungs pa nyid yin te/ rgyu tshogs pa yis zhes bya ba la sogs pa yang / de ni rang bzhin yin par brjod/ /ces bya ba ste 'byung bar byed pas 'byung ba ste rgyu'o/ /rang gi 'byung byed ni rang gi rgyu zhes bya ba'i don to/ /tshogs pa nyid ni rung ba nyid du rjes su dpag pa yin par gsungs pa ma yin nam/ bden te/ gang la gegs byed pa med pa'i nges pa med na'o/ /de'i dgos pa ni de ltar 'das dus gcig rnams kyi ste ma 'ongs pa rnams kyi ni ma yin no zhes bya ba'i tshig las so/ /de med par nges pa yin na ma 'ongs pa'i 'bras bu dang byung ba las rgyu nyid shes pa yin te/ du ba las me lta bu'o/ /des na yang / nyon mongs pa dang bcas pa'i sems la sogs pa mthong ba las/ 'jig rten pha rol du 'byung bar 'gyur ba'i sems la sogs pa 'grub pa yin no/ /'di las 'jig rten gzhan dpog pa'ang zhes gang 'chad par 'gyur ba'o/ /thos pa dang bsam pa la sogs pa shin tu 'bad pa chen pos bsgrub par bya ba mthong ba'i lam la sogs par 'chi ba'i dus na med pa'i phyir gags byed pa med par nges pa yin no/ /nying mtshams sbyor nus ldan mthong gang / /de phyir gyur na phyis gang med/ /gang gis mtshams sbyor ldan med yin// /zhes gang 'chad par 'gyur ba'o/ /'di la yang / des na sgra las rgyu nyid du/ /dus gsum du yang shes bya min/ /zhes bstan pa'o/ /rung ba nyid du rjes su dpag pa la de'i rgyu nyid kyis nges pa med na gzhan gyi rgyu nyid kyis nges pa yod kyang dgos pa yod pa ma yin no/ /du ba ni me mthong ba na grub pa ma yin nam/ rang nyid yod na yod pa'i rang bzhin can gyi me la nye bar byed pa yin la/ rang gi ngo bo la yang phrad par bya ba grub pa yin gyi/ / de la rang gi ngo bo ni ma yin te/ ji ltar rang gi ngo bo yin pa der 'brel par nges pa yin/ bden te/ phrad par bya ba bzhin du de yang phrad par bya ba la ma 'khrul pa can nyid du gang gis ma shes pas shes par bya'o/ /shes pa yin kyang rang gi ngo bo la phrad par bya bar zhen pa las/ de'i 'bras bu nyid de kho na nyid du zhen pa'i rgyu mtshan du bstan te/ dung la ser po la sogs pa'i shes pa ni dbyibs la sogs pa'i cha la tshad ma yin no/ /kha dog ser pos don byed pa med na de'i sgo nas dbyibs kyis don byed pa med pa lta smos kyang ci dgos/ de'i tshe ser po med pa ni ma yin te snang ba'i phyir ro/ /gzhan du na sngon po yang med pa kho na yin no/ /ci ste sngon po gcig pu phrad par bya bar 'dod pa yin na 'di la yang dbyibs gcig pu 'dod pa yin te/ ser po dang dkar po thun mong ba thob par 'gyur ba kho na te kha dog ni ma yin no/ /'on te bdag nyid thams cad kho na nas tshad ma ma yin te/ cha shas kyis kyang tshad ma nyid yin na ni rjes su dpag pa'i rnam par rtog pa kho na tshad ma yin zhes ston par byed par mi 'gyur te/ tha na sgra pa'i rnam par rtog pa yang dngos po tsam gyi cha la mi bslu ba yin pa'i phyir ro/ /ma yin te/ mi bslu ba dang bslu ba tsam gyis tshad ma dang cig shos nyid du khas len pa'i phyir te/ 'dod pa dang phrad par yod na tshad ma yin la/ de med pa la ni gzhan du'o/ /ser po'i shes pa la dbyibs dang / 'gro ba'i shing mthong ba la shing dang / gnas gzhan na yod pa'i nor bu'i shes pa nor bu dang / bden pa'i rmi lam gyi bu rnams su 'dod pa yin gyi dus la sogs par ma yin pa de'i phyir/ mngon par 'dod pa'i cha shas la tshad ma nyid yin no/ /sgra las byung ba yang mngon par 'dod pa ston pa'i phyir zhes gang 'chad par 'gyur ba'o/ /rnam par rtog pa tsam ni dngos po'i cha shas la yang tshad ma ma yin te/ mngon par 'dod pa'i yul ma yin pa'i phyir ro/ /'dis ni ci nas kyang thob par byed pa ma yin par bshad zin to/ /mngon par 'dod pa'i yul ni rnam par rtog pa can gyi rjes su dpag pa yin no zhes bya ba ni rnam par dbye ba'o/ /cha shas kyis ni tshad ma dang cig shos nyid de/ mngon par 'dod pa dang cig shos yin pa'i phyir zhes bya ba'i don to/ /byed pa po la gnas pa'i bya ba ni bya ba la gnas pa nyid kyis nges pa can du shes par byed pa'i phyir de nyid dang por shes par bya ba yin te/ gal te de shes pa yin na byed pa po la gnas bas ci zhig bya/ de'i thabs yin pa nyid kho nas 'dod pa yin no zhes bya ba'i dgongs pas don byed gnas pa zhes bya ba smos te/ phrad par bya ba shes pa ni 'jug pa'i yan lag yin gyi rang gi ngo bo ni ma yin te/ byed pa po la gnas pa'i bya ba khas len pa nyid yin na/ rang gi ngo bo smras par 'gyur ro/ /phrad par bya ba la ltos pa'i rang gi ngo bo ni bya ba yin gyi rang gi ngo bo tsam ni ma yin te/ bden te/ rang gi ngo bo la ni tshad ma nyid ma yin te/ thal ches pa'i phyir ro/ /phrad par bya ba la ni tshad ma yin no zhes dgongs pa yin no/ /byed pa po la gnas pa'i bya ba khas len pa yang de nyid yin par dgongs pa yin gyi/ rang gi ngo bo la dmigs pa 'ba' zhig ni ji ltar phrad par bya ba la dmigs par 'gyur snyam du dogs pa bsal ba'i phyir/ phrad par bya ba'i byed pa po'i shes pa tshad ma yin par bstan te/ de de ltar yongs su gcod pa 'dis don go ba yin no/ /de la yang don ni 'di yin te rang gi ngo bo la dmigs pa la phrad par bya ba la dmigs par zhen pa yin no/ /'on te don byed pa zhes bya bas 'jig rten pa nyid kyi tshad ma bstan pa yin la/ dang por ni de 'grub pa'i thabs so/ /ma yin te/ de la don yin par smra na 'di yang shugs kyis 'grub pa'i phyir ro/ /skad cig ma dang po'i shes pa'am sgro btags pa yang rung ba ma yin nam/ 'di ni phrad par bya ba nyid ma yin te/ phrad par bya ba yongs su bcad pa'i phyir/ de'i don nyid ji ltar go bar 'gyur/ phrad pa'i shes pa ni phyi rol du zhen pa'i ngo bo nyid las rjes su dpag pa la yod pa yin te/ gang gi phyir phyi rol la phrad par bya bar zhen pa'i phyir ro/ /rang gi rnam pa 'di la phyi rol du zhen pa can yin no zhe na/ de lta yin na yang thams cad du phrad par bya bar zhen pa can yin no/ /de'i nang dang phyi rol yang ma yin no zhe na/ ma yin te/ phyi rol nyid du zhen pa'i phyir dang / grub pa'i mtha' med par thal bar 'gyur ba'i phyir yang ngo / /phyi rol ni grub pa'i mtha' la yin gyi gnyi ga ma yin pa la ma yin te/ de ni rang rig pa yin pa'i phyir/ rang gi rnam pa ma yin la/ mngon sum gyis gzhan du rig pa'i phyir/ des ni phyi rol yang ma yin no zhe na/ ma yin te/ phyi rol dang rang gi rnam pa dag la gcig pa nyid du zhen pas gnyi ga ma yin pa'i de kho na nyid du rig pa'i phyir ro/ /de nyid la phyi rol du sgro btags pa yin na ni yang de dang phrad pa'i phyir thug pa med par 'gyur ro/ /des na rjes su dpag pa la ltos pa ni phyir yongs su bcad zin pa zlos pa yin no/ /mngon sum la yang skad cig nyid la phrad par bya ba nyid yin pa'i phyir de rig pa yod pa yin no/ /'o na ni shes pa gnyis pa thob pa ma yin nam/ ma yin te/ gcig la shes pa gnyis rim gyis par mi rigs pa'i phyir ro/ /gnyis pa ni gzhan ma yin no zhe na/ de nyid de dang phrad pa yin gyi gzhan ma yin pa'i phyir ji ltar gnyis pa yin no/ /'jig rten pa'i ma yin pa'i phyir skad cig ma tha dad pa'i snga ma la yang de nyid dang phyi ma la yang de nyid du shes pa'i phyir gnyis pa nyid yin no/ /de lta na yang de la ltos pa ma yin te/ snga ma dang bye brag med pa'i phyir ro/ /brtan pa nyid yin no zhe na/ de ni ci yang ma yin no/ /des ni don byed nus par shes pa yin no zhe na/ ma yin te/ snga ma kho nas de dag tsam du shes pa'i phyir ro/ /mi gzhan gyi shes pa la ltos pas ni skad cig ma yang shes pa gnyis pa rung ba nyid yod pa'i phyir phrad par bya ba nyid ma nyams pa yin no/ /des na pha rol po'i bshad pa la ni zlos pa nyid spangs pa med do/ /de'i phyir yongs su bcad nas te/ don dang phrad par ni rang gi ngo bo la phrad par bya ba nyid du zhen pa ste/ phrad par bya ba la 'jug pa dang / phrad pa dag gi rgyu yin par gsungs pa'i phyir snga ma nyid dam pa ma yin no/ /mi bslu ba can nyid tshad ma nyid ma yin nam/ shes pa ni shes pa gzhan la mi bslu bas tshad ma yin la/ de yang shes pa gzhan las mi bslu bas thug pa med pa'i phyir mi srid pa yin no/ /de bzhin du rmi lam la sogs pa'i shes pa la yang yod pa'i phyir khyab ches pa yin te/ dgra la sogs pa'i yul la yang shes pa gzhan mi bslu ba med pa'i phyir khyab par byed pa ma yin no snyam du dogs pa la de gnas pa de zhes bya ba smos te/ gnas pa ni tshad ma ste mi g.yo ba yin la/ rmi lam la sogs pa'i shes pa ste/ sad pa'i gnas skabs la sogs pa las g.yo ba yin no/ /de'i phyir khyab ches pa ma yin no/ /rnam par gnas pa'i tshig ste/ gnas pa'i sgra smos pas ni mi srid pa nyid ma yin te/ don byed pa'i shes pa 'jug pa'i bar chad med pa nyid kyis rnam par gnas pa yin pa'i phyir shes pa gzhan la ltos pa ma yin pa de nyid kyi phyir khyab par byed pa ma yin pa ma yin te/ sgra la sogs pa'i rang gi ngo bo la dmigs pa nyid ni mthar thug par 'dod pa'i phyir ro/ /don byed pa'i shes pa ni dro ba la sogs pa nyams su myong ba mi bslu ba ma yin nam/ de yang de las gzhan pa gang yin pa ni med pa'i phyir gang la mi bslu ba can nyid yin/ bden te/ dngos po la dbye ba med kyang rtogs pa'i dbye ba la mi rtag pa nyid dam byas pa nyid dag gis gtan tshigs dang / gtan tshigs can nyid bzhin du mi bslu ba dang mi bslu ba can nyid du 'gyur ro/ /phrad par bya ba'i yul la tshad ma nyid ma yin nam/ snga ma la ni rigs na phyi ma la ni ma yin te/ phrad par bya ba la tha dad pa med pa'i phyir dang / tha dad pa ma yin pa yod pa yin la/ snga ma ni de lta bu ma yin te/ des na yang phyi ma tshad ma nyid du khas len pa yin la/ snga ma ni ma yin te/ de lta bu med pa'i phyir ro/ /bden te/ phyi ma nyid ni phrad par bya ba la bar du chod pa med pa'i phyir tshad ma yin la snga ma ni shes pa'i cha dang / shes bya'i cha dag dang gnyi ga'i yang tha dad par zhen pa yin pa'i phyir tha dad pa med pa kho nar tshad ma nyid kyi rgyu mtshan yin te/ de yang kha cig tu ni bden pa yin la/ kha cig tu ni sgro btags pa nyid yin no/ /rjes su dpag pa ni phrad par bya ba la tha dad pa med kyang sgro btags pa yin te/ mngon sum ma yin la/ gzhan gyi de ma thag pa gzhan mthong ba las 'byung ba'i phyir ro/ /mngon sum ni gal te yang rang gi ngo bo mthong ba las byung ba de lta na yang / phrad par bya ba dang de'i ngo bo dag rjes su dpag pa'i ngo bo dang phrad par bya ba bzhin du tha dad pa med par zhen pa'i phyir tshad ma log pa nyid yin no/ /'di dag tsam ni mngon sum dang rjes su dpag pa'i dbye ba yin no/ / mngon sum dang cig shos dag gi so sor snang ba dag gi rig par bya ba la ni tha dad pa yod pa kho na yin te/ phrad par bya ba nyid kyis rang gi ngo bo rig pa nyid ni mi bslu bar rig pa yin te/ mi bslu bar shes pa nyid ni tshad ma nyid yin no/ /des na du ba la sogs pa tshad mar thal bar 'gyur ba ni ma yin no/ /phrad par bya ba las tha dad pa'i mngon pa'i nga rgyal gyis de rig pa yang de rig pa ma yin pa'i phyir phrad par bya ba'i rang gi ngo bo la dbye ba med par rtogs na/ tshad ma nyid kyi yan lag yin no zhes bya ba'i dgongs pas gang la gzhan gyis don byed ces bya ba smos te/ sgro btags pa'i dbye ba med pa las bden pa'i dbye ba med pa phul du byung ba yin zhes bya ba'i don to/ /sgra las byung ba ste/ sgras skyed pa'i shes pa ni bslu ba ma yin pa'i bsam pas smra ba pos mngon par bsams pa rtogs pa'i don dang mtshungs pa'i rnam pa'i mngon par 'dod pa ston pa'i phyir/ gsal bar byed pa'i phyir zhes bya ba ni 'di'i don ma yin nam/ de'i phyir 'di la khyab par byed pa ma yin pa bsal bar/ ji skad bstan pa ji lta yin/ /gal te 'di yi don yin na/ /smra ba po yi bya ba yi/ /zhes bya ba la sogs pa'i don go bar 'gyur ro/ /'dis ni de nyid kyi don gsal bar byed pa yin no/ /'di nyid kyis chog mod mi gsal ba des ci zhig bya/ bshad bya dang / bshad byed nyid yin na yang don tha dad pa nyid yin na ni mi rigs so zhes bstan pa ni/ sgra'i yul can gyi shes pa ni zhes bya ba'o/ /gnod pa med pa can gyi rtogs pa ni pha rol po'i 'dod pa ma yin nam/ rang gi ngo bo rtogs pa tsam gyis zhes bya bas de rtogs pa tsam ji ltar dgag pa yin/ kun du rmongs pa 'jig rten pa ma yin pa'i don smra ba po'i 'dod pa bsal ba'i phyir yang ma yin te/ de rnams kyis kyang kun du rmongs pa la sogs pa dang bral bar rtogs pa'i yul du khas blangs pa'i phyir ro/ /de nyid gnod pa med pa can gyi rtogs pa zhes bya ba 'dis bstan pa'i bye brag med pa'i rtogs pa tsam tshad ma yin te/ de yang yon tan gyis bskyed pa ma yin te/ skyon las kyang skye ba'i phyir ro/ /skyon gyis bskyed pa yang ma yin te/ de med kyang 'byung ba'i phyir ro/ /dmigs kyis bsal bas 'ba' zhig dmigs kyis bsal ba yin pa'i phyir/ spyir btang ba las byung ba kho na tshad ma yin no zhes kha cig zer ro/ /de la rang gi ngo bo rtogs tsam gyis/ /zhes bya ba smos te/ de yang dmigs kyis bsal ba'i yul yongs su spangs pa las yin pa'i phyir/ spyir btang ba'i yul nyid mthar thug pa yin zhes bya ba'i don to/ /gnod pa can med pa tsam la bye brag yin gyi gzhan ni ma yin te/ shes pa'i khongs su gtogs pa ma yin nam/ des na don du gnyer ba po yul rtogs pa tsam las 'jug pa yin gyi bye brag las ni ma yin no/ /tshad ma ma yin pa la ni gnod pa can gyi shes pa gzhan nam/ phyi rol gyi bye brag la ltos par bya ba yin na/ 'di la yang de med pa ni bye brag yin no zhes bya bar ni mi rigs te/ gsog tu gyur pa'i phyir ro/ /skyes pa'i dus nyid ni rnyed par sla ba nyid kyis ltos pa med pa can yin pa'i phyir ro/ /skyes pa'i dus nyid na de med pa ni tshad ma ma yin pa la yang de yod pa yin te/ phrad pa'i dus na yang skyes pa'i dus shes pa ma yin pa'i phyir gnod pa can yod pa bzhin du de med pa la yang the tshom za ba yin na rtogs pa dang ldan pa rnams 'jug pa ma yin no/ /yul rtogs pa tsam las 'jug pa yang ma yin te/ tshad ma ma yin pa la yang yod pa'i phyir ro/ /phrad par bya ba'i yul rtogs par bya ba yin no zhe na/ ma yin te/ de sngar rang gi dus 'dzin pa las 'byung ba yin zhes bya bar ni mi rigs te/ mngon sum ni yod bzhin pa la dmigs par byed pa'i phyir ro/ /des na yang dngul du 'dzin pa ni yun ring po gnas pa nyid du 'dzin pa 'di ni legs par smras pa ma yin no/ /phrad par bya ba dang rang gi ngo bo dag la gcig pa nyid du zhen pa yod kyang / de ni de dag gi 'bras bu nyid kyi rgyu mtshan yin te/ de shes na 'byung ba yin pa'i phyir 'di lta bu'i yul rtogs pa las 'jig rten pa 'jug pa yin gyi/ khyed kyis smras pa'i rtogs pa tsam las 'jug pa ni ma yin no/ /rig byed la ni de mi srid do/ /dbang po'i yul las 'das pa nyid kyis phrad par bya ba'i 'bras bu nyid mi shes pa'i phyir ro/ /rjes su dpag pa la ni rtags de'i 'bras bu nyid shes pa las rtogs pa yin zhes bya ba la sogs pa bstan pa yin no/ /yang na 'di'i dpe nye bar dgod pa ni dper na rtogs pa tsam ni tshad ma ma yin pa de bzhin du gnod pa med pa'i rtogs pa yang khyab ches pa'i phyir snyam du dgongs pa'o/ /dper na rtogs pa tsam ni rab tu sbyor bar byed pa ma yin zhing mngon par 'dod pa ma yin la/ de bzhin du gnod pa med pa nyid kyang skyes bu'i don ma yin pa'i phyir/ rtogs pa dang ldan pa rnams rab tu sbyor bar byed pa ma yin no zhes bstan pa ni/ rtogs pa tsam dang 'brel pa ni zhes bya ba'o/ /de yang mtshungs pa nyid do zhes bya ba 'di yang rab tu sbyor bar byed pa ma yin pa nyid kyis zhes bya ba 'di la ltos par bya ba yin no/ /rab tu sbyor bar byed pa nyid ma yin du zin kyang khyab ches pa nyid ji ltar yin/ gnod pa med pa rtogs pa ni tshad ma yin te/ dngul la sogs pa'i shes pa ni gnod pa can yin la/ phyis 'di ma yin no zhes pa las/ de'i 'og tu yang nya phyis su ste de rnams las kyang bar mas dang po bsal nas tha mar nya phyis kyi shes pa nges par byed pa ma yin la/ nya phyis kyi shes pas kyang dang po'i dngul du shes pa bsal nas/ bar ma 'di ma yin no zhes bya ba nges par byed pa yin te/ des na phan tshun bsten pa ma yin no/ /de yang / re zhig tha mas dang po gnyis/ / bar mas de bzhin thog mtha' dag /yongs gcod dang po bsal nas ni/ /tha ma tshad ma nyid yin no/ /zhes smos pa'o/ /yang 'di rnams las gang la gnod par bya ba yin/ 'jug pa'i ngo bo 'bras bu la'o/ /'bras bu la ci zhig byas pa las gnod par byed pa yin/ gal te de byas pas gzhan gyis de la ci byar yod/ shing la sogs pa rgyun mi 'chad par 'bar ba la sogs par snang la 'bar ba la sogs pa de las gzhan btsal bar bya bar 'gyur bar thug pa med par 'gyur ro/ /de'i phyir 'bras bu la gnod pa byed pa kho na gnod pa yin te/ de yang / shes pa snga ma'i 'bras bu ni/ /rnam gcod phyi ma gnod byed yin/ /'bras bu 'joms pa gnod byed pa/ /yin gyi khyad par can gzhan min/ /zhes smos pa'o/ /yang yul 'phrog pa ni ma yin te de mi nus pa'i phyir ro/ /de skad du yang / 'das pa yang ni yul las kyang / /rnam gcod nyid ni nus min te/ /rkun pos nor blangs nas byed ba/ /de las dbrog par su yis nus/ /zhes smos pa'o/ /yang yul nges pa ni 'jug pa'i rgyu mtshan yin la/ rgyu mtshan la gnod pa med pa yin na/ ji ltar de la gnod par byed pa yin/ 'das pa'i yul med pa yang shes par byed par nus pa nyid kyi phyir yul 'phrog pa nyid gnod pa yin gyi gzhan ni ma yin no zhes bstan pa ni sad pa'i shes pas zhes bya ba'o/ /bye brag ma mthong ba las nya phyis la dngul gyi shes pa skyes pa yin la/ de la gnod par byed pa ni bye brag tu 'dzin pa can yin no/ /de yang nya phyis kyi shes pa dang / 'og tu yang de'i bya ba'i rjes su 'brangs pa can 'di ni ma yin no zhes bya ba ni 'jig rten pa'i tha snyad kyi shes pa'i rim pa yin pas pha rol smra ba ni ma yin no zhes bstan pa ni/ gnod pa zhes bya ba 'di ni ci zhig ces bya ba ste/ yul 'phrog par nus pa yin na/ de nyid gnod pa can yin no zhes bya ba 'di la gal te gzhan gyi yul med par zhes bya ba smos pa la don ni 'di yin te/ nya phyis kyi shes pa ni rang gi yul gyi ngo bo 'dzin pa la 'jug pa yin gyi gzhan du byed pa ni ma yin no/ /de yongs su gcod cing de las gzhan pa rnam par gcod pa ni rig pa yin no zhe na/ shes pa thams cad de lta bu yin pa'i phyir thams cad gnod pa can du 'gyur te/ de ltar yang 'chad par 'gyur ba yin no/ /de'i phyir don dam pa'i gnod par bya ba dang / gnod par byed pa nyid ni med pa yin la de med pa'i phyir/ gnod pa med pa can nyid kyang ma yin zhes bya ba 'dis khyab ches pa gsal bar gyur pa yin no/ /gal te 'dod pa dang phrad pa la nye bar sbyor ba nyid yin pa'i phyir gnod pa med pa nyid nges par khas blangs pa nyid yin na yang / de yang gnas pa ste mi g.yo ba yin no zhes bstan pa ni 'di ni don byed pa rnam par gnas pa ma yin te zhes bya ba'o/ /gnod pa med pa tsam nyid ni thug pa med pa'i phyir mi srid pa nyid yin par bstan pa ni gnod pa med pa nyid ces bya ba'o/ /'on te gnod pa med pa yin na/ don la nges pa skyed pa'i tshad ma nyid la 'jug pa'i yan lag ma yin nam/ de la yang gang gi tshe dmigs kyis bsal bar dogs pa de'i tshe snga ma las bzlog pa'i don 'dzin pa can gyi shes pa gzhan ni tshad ma yin la/ de la yang dogs pa yod na shes pa bar mas bzung ba'i don las bzlog pa 'dzin pa can gyi shes pa gsum pa de nyid las snga ma tshad ma nyid du nges pas 'di tsam gyis tha snyad brjod pa'i phyir shes pa gzhan btsal bar bya ba ma yin no/ /de yang / de ltar rtogs byed shes pa ni/ /gsum char gsal ba ma yin te/ /de phyir gnod pa skye min pa'ang / /gnod pa can du'ang dogs bya min/ /zhes smos pa'o/ /gnod pa can la yang gnod pa can du snang ba'i phyir/ gnod pa can du'ang dogs bya min/ /zhes ci'i phyir smras she na/ rang nyid gang la the tshom skyes pa de la ni shes pa gzhan las ltos pa yin gyi/ gang la ma skyes pa de la ni nan gyis bskyed par bya ba ma yin no/ /gzhan dag na re nan gyis kyang bskyed par bya ba yin te/ de yang shes pa gsum bzhi skyes bzhin pa tsam las ldog par gzhan du mthong ba yin la/ de bzhin du 'dir yang 'gyur ba yin te/ de kho na bzhin du mthong ba'i phyir ro/ /ma skyes pa la'ang gnod pa can/ /tshol ba'i rmongs pa gang yin pa/ /de ni tha snyad thams cad la/ /yid gnyis ngo bo zad de 'gro/ /zhes bya ba dang / kun ta'i bu rnams the tshom dang / /bcas la 'jig rten 'di dang gzhan/ /med ces the tshom bdag nyid can/ /khyab 'jug gis ni smad pa yin/ /zhes smos pa'o/ /rang gi ngo bo rang gis rig pas phrad par bya ba dang 'brel ba can rang gis rig pas tshad ma nyid du 'gyur ba ni ma yin te/ shes pa la snang bzhin pa thams cad phyi rol nyid du shes pa'i phyir rang gi ngo bo ma yin la ma yin pa nyid du nges pa yin no/ /phyi rol la yang kha cig la don med pa'i phyir/ des dben pa'i don gyis dmigs kyis bsal bar dogs pa dang bral ba yin na rang nyid las yin no/ /phyi rol nyid du snang bzhin pa ni rang gi ngo bo ma yin te/ thal ches pa'i phyir ro/ /dmigs kyis bsal bar dogs pa dang bral ba yin na/ shes par bya ba don ma yin pa ma yin te/ rang gi ngo bo la yang de bzhin du thal bar 'gyur ba'i phyir ro/ /de bzhin du shes par bya ba yang skad cig nyid ma yin te/ snga ma dang phyi ma'i dus 'gal ba med pa can nyid du snang ba'i phyir ro/ /gnod pa can du dogs pa ldog pa la mi bslu ba rgyu mtshan ma yin te/ gzhan nyid 'jig rten pa la yod pa'i phyir ro/ /de yang / gnod pa can don gnyer ba la/ /gang zhig gang la ltos pa yin/ /yul dus mi yi gnas skabs kyi/ /dbye rnams tha snyad nyid la nges/ /zhes smos pa'o/ /thag ring po na gnas pa nyid kyi phyir/ gang la ji lta ba bzhin mthong ba ma yin par dogs pa de la the tshom log pa'i mtshams srid du/ thag nye bar phyin pa nyid yin gyi dus gzhan la sogs pa la sdod pa ni ma yin te/ smig rgyu la sogs pa'i shes pa lta bu'o/ /de bzhin du dmag gi dus su ba lang ngam rta la sogs par the tshom za ba'am/ 'khrul pa gang yin pa de la nges par gsal bar 'gyur ba ni mtshams yin no/ /mtshan mo srin po me khyer yang / /me dang 'dra ba kun gyis mthong / /nyin mo gsal bar mthong nyid kyis/ /'khrul pa yin par go ba yin/ /de bzhin du/ zla ba gnyis dang phyogs rmongs dang / /rig byed yi ge dbyangs sogs rnams/ /skyes bu gzhan la legs dris las/ /gzhan pa nyid du nges 'dzin 'gyur/ /'dod chags zhe sdang myos dang smyo/ /bkres skom sogs kyis dbang nyams pas/ /shes bya don la log rtogs pa'i/ /phyin ci log rnams med pas so/ /de bzhin phra ba bskor ba las/ /'dra ba sogs rnams la 'khrul nyid/ /rgyu yi phyin ci log gyur las/ /gzhan pa nyid du nges 'dzin 'gyur/ /de ltar rgyu yi skyon rnams su/ /gang zhig gang la rtogs 'gyur ba/ /de nyid yod dang med pa las/ /de la bden dang brdzun blo dag /ces bya bar dogs pa la/ dang po gnod pa med pa ni/ /zhes bya ba smos te/ de nyams su myong ba'i rang gi ngo bo rig pa yin gyi/ gzhan yang rig par bya ba ni ma yin te/ rig pa med pa'am gzhan rig par bya ba nyams su myong ba yin na don rig pa ma yin par thal bar 'gyur ro/ /nyams su myong ba rig pa ni don rtogs pa yin no/ /nyams su myong ba'i don rig par ji skad bstan pa ste/ don gyis shes pa ni blo sgrub par byed pa khas len pa yin gyi blo ni ma yin no zhes bya ba la sogs pa'o/ /dbang po'i bya ba dang de'i nye bar zhi ba dag gi bar gyi gnas skabs gang yin pa ni nyams su myong ba yin no/ /de la tha dad pa ma yin pa nyams su myong ba'i rang gi ngo bo la ni dbye ba med pa'i phyir the tshom za ba ma yin la/ tha dad pa yin na ni 'gyur ro/ /byung bar gyur pa yang tshad ma gzhan gyis ldog par byed pa yin na mi rigs te bye brag med pa'i phyir ro/ /de nyid kyi de ni rang gi ngo bo bzhin du gsal bar nus pa ma yin te/ rang gi ngo bo ma yin pa'i phyir ro/ /de'i phyir 'gro ba thams cad kyis long la thob pa yin no/ /rang gi ngo bo dang phrad par bya ba dag rang nyid las nges pa yin no/ /mngon sum dang mi dmigs pa sgrub par byed pa la 'khrul pa med pa yin no/ /rang gi ngo bo nyid ni phrad par bya ba dang 'brel pa can nyid kyi yul dang dus dang ming dang gnas skabs kyi dbye bas ci nas kyang tha dad par byed pa yin gyi/ phyi rol gyi don med par rigs pa ma yin te/ de ni phrad par bya ba dang mtshan nyid mi 'dra bar shin tu ma mthong ba'i phyir ro/ /phrad par bya ba yang rang nyid rig par bya ba'i phyir ro/ /de'i phyir phyi'i don du smra ba la nam yang the tshom ldog pa yod pa ma yin te/ nges pa med pa'i phyir ro/ /med ces the tshom bdag nyid can/ /khyab 'jug gis ni smad pa yin/ /zhes bya ba la sogs pa yang dad pa tsam gyi rtsa ba can yin gyi/ 'dir yang dang yang bzlas par 'os pa ni ma yin te/ gnas skabs ma yin pa'i phyir ro/ /'di ltar yang shes pa gsum pa la gnod pa can du dogs pa yin gyi/ re zhig rang nyid ma skyes pa'i 'bras bu la ni ma yin te/ dang po ma skyes pa ni dang po shes pa la yang yod pa'i phyir ro/ /'dir ni phyis skyes pa yin no/ /de la yang phyis skye par mi 'gyur pa ji ltar yin/ 'o na ni bye brag mthong ba las yin no/ /ma yin te/ bye brag med pa'i phyir ro/ /de dag tsam gyi the tshom dang bral ba nyid ni dang por bsgrub par bya ba yin pa'i phyir dang / don la mi bslu bar yang khas mi len pa'i phyir ro/ /the tshom ma skyes pa zhes bya ba 'di yang rtogs pa dang ldan pa'i yul la mi srid pa'i phyir dang / bye brag ma mthong na dgag par bya ba ma yin pa'i phyir the tshom skyes pa yin no zhes bya ba'i don to/ /rang gi ngo bo yang gzhan la mi ltos par nyams su myong ba la cis the tshom med pa yin/ de nyid kyi ngo bo yin pa'i phyir ro/ /phyi rol la yang gzhan la ltos pas nyams su myong ba yang de nyid kyi ngo bo yin te/ phyi rol gyi shes pas go bar bya ba nyid las gzhan pa'i ngo bo yod pa ma yin no/ /yin du chug kyang de dag tsam gyis phyi rol nyid yin gyi/ de dag tsam gyis tshad ma nyid ma yin te// de dag tsam ni tshad ma yin pa la yang yod pa'i phyir ro/ /phyi rol tsam gyi don 'dis ni rtsa ba brjod pa yin te/ phyi rol gyi don du smra ba la tshad ma dang tshad ma ma yin pa'i rnam par dbye ba mi srid pa yin no zhes bya ba ni rtsod pa'i gzhi yin no/ /rang gi ngo bo dang phrad par bya ba dag gi rang nyid rig pa'i nges pa dag gi 'khrul pa med pa'i shes pa ni rjes su 'gro ba dang ldog pa las rnyed par sla ba yin par yang bstan zin to/ /dung la ser po la sogs pa'i shes pa ni ji ltar snang ba la mi bslu ba ma yin pa'i phyir rang nyid thams cad kyis tshad ma nyid ma yin pa kho na'o zhes bya ba de nyid bstan pa ni dung la ser po zhes bya ba la sogs pa ste/ gang yang tha snyad la 'jug pa po gang zhig ser po la sogs pa'i shes pa las/ lan cig min par mthong ba 'khrul pa can 'di snyam du spyod de/ gang du 'di lta bur snang ba der dbyibs kyis bsgrub par bya ba'i byed pa dang phrad par byed pa yin te/ de kho na bzhin du sngar mthong ba'i phyir ro/ /de bzhin du rab tu bsgrub pa yang rjes su dpag par bya ba nyid las 'das pa ma yin te/ de yang rjes su dpag par bya ba nyid yin pas rtogs pa po la ltos nas tshad ma dang cig shos nyid du rnam par gzhag pa kho na yin no/ /de nas khas blang ba bya ba 'di ni tha na slob ma'i rnam par rtog pa tsam yod pa tsam la mi bslu ba yang rtogs pa med pa 'dzin pa yin pa'i phyir ro/ /rnam par rtog pa dga' yang bdag nyid thams cad kyis ni tshad ma ma yin par khas blangs pa yin la/ de bzhin du ma 'khrul pa 'dzin pa las rtogs pa po la ltos nas ser po la sogs pa'i shes pa yang tshad ma la sogs pa'i shes pa nyid du rnam par gzhag pa yin no/ /ci ste gang zhig dngos po nyid la dbye ba gnyis med pa de ni tshad ma yin na/ de ltar na rjes su dpag pa ji ltar yin/ rjes su dpag pa ni 'khrul pa yin na yang 'brel pa yod pa las tshad ma yin no/ /mngon sum yang sngon po'i yul can ni ser po la sogs pa la tshad ma ma yin no/ /de yang / gzhan sgrub byed pa gzhan nyid la/ /sgrub byed ltar snang yin par bshad/ / ces 'byung ba'o/ /des na yang tshad ma dang cig shos kyi tha snyad chad par 'gyur ro/ /des na gang zhig 'dod pa'i cha la 'khrul pa can ma yin pa de ni ma 'khrul pa yin la/ gang zhig de la 'khrul pa yod pa de 'khrul pa can yin pa ni rnam par dbye ba yin no/ /des na mngon sum yang / dung la ser po la sogs pa'i shes pa cha shas kyis yin no zhes gzhan du bstan pa yin no/ /'dir yang rjes su dpag pa yin pa'i phyir rtsod pa med do/ /tshad ma ni dngos po yul la ma yin nam/ dbyibs nyid ni dngos po ma yin te/ du ma rnams la gcig tu snang ba'i shes pa ni shes pa'i bya ba'i rjes su 'jug pa ste dbyibs yin la/ kha dog la 'khrul pa yin na de yang 'khrul pa can yin no/ /ji skad du/ dbyibs ni so sor snang ba'i chos so zhes smos so/ /bden mod kyi dbyibs ni kha dog las tha dad pa can ma yin te/ kha dog gi bye brag nyid yin no/ /kha dog ces bya ba tsam ni shes pa'i rjes su 'gro ba can ma yin/ bum pa la sogs pa'i bye brag rnams snang ba'i phyir ro/ /de ltar yang rtsod pa'i rigs par yang / sor mo rnams brkyang ba las khu tshur gzhan ma yin no zhes bya ba la sogs pas rgyas par bstan pa yin no/ /de ni 'dus pa yin no zhe na/ de nyid dbyibs yin par kho bo cag gis go ba yin no/ /dung ser po'i dbyibs las dkar po'i dbyibs gzhan yin pas des na mi bslu ba ma yin no/ /sngon po'i skad cig 'dzin pa can gyi shes pa'i skad cig gzhan dang phrad pa la mi bslu bar med par 'gyur ro/ /sngon po ma yin pa las log pa'i phyir gcig nyid yin no zhe na/ 'di la yang dung gi dbyibs ma yin pa las log pa'i gcig nyid yin pa'i phyir mtshungs so/ /ser po med pa nyid ces bya ba yang mi rigs te/ dmigs pa ni yod pa yin no zhes bstan pa dang 'gal pa'i phyir ro/ /kha dog las ldog pa can ni dbyibs kyang ma yin la 'dus pa yang ma yin no/ /ljang gu la sogs pa'i kha dog tsam gyi dngos po yin no/ /de ltar na sngon po ni sngon po gzhan las tha dad pa ma yin par 'gyur la/ ser po yang ser po gzhan las so/ /shes pa gcig gi yul mang po rnams la shes pa'i bya ba gcig yin pa'i phyir/ de'i rjes su 'jug pa tsam ni dbyibs yin la/ rjes su 'jug pa la bye brag med pa'i phyir dbyibs la bye brag med pas 'gro ba rnams kyi sna tshogs par snang ba'i yul med par gyur ba'i phyir kha dog gi bdag nyid 'dus pa'i snang ba ni dbyibs yin la/ de yang kha dog gi bye brag 'dus bzhin pa yin no zhes de dag thams cad bstan pa ni gang gis nam yang zhes bya ba'o/ /'jug pa dang mi 'jug pa'i tha snyad kyi dbye ba las/ tshad ma dang cig shos pa tha dad pa yin pa de ltar ci las shes par bya ba snyam pa la/ ji ste 'di ni zhes bya ba ste rna ba'i rnam shes ni shes pa bzhin nam/ ser po'i shes pa bzhin du phrad par bya ba dang tha dad pa med kyang mngon par 'dod pa la 'jug pa'i mtshams su nges pas nyams su myong ba de'i tshe yod pa yin pa'i phyir ma khyab pa ma yin par bstan pa ni sgra'i yul can gyi zhes bya ba ste/ de lta nyid ni 'jig rten pa'i tha snyad la dpyod pa dang mthun pa yin par bstan pa ni/ glur blangs zhes bya ba ste/ drug ldan la sogs pa glu thos pa dang / rol mo la sogs pa mthong ba can gyis mnyan pa dang lta bar mngon par 'dod pa yin gyi/ gzhan ni ma yin no zhes bya ba'i don to/ /rnam par gnas par smra ba po gnas pa'i sgra smos pas thug pa med pa gsal ba bzhin du ma khyab pa gsal ba yin te/ dngos su na khyab pa can yin par bstan pa ni 'di rang gi ngo bo rig pa las gzhan pa zhes bya ba'o/ /sngon po la sogs pas bsgos pa la sogs pas bya ba'i mthar thug pa ni/ bden pa bzhin du rang rig pa'i mthar thug pa ma yin nam/ ma yin te/ rang gi ngo bo ni rang rig pa'i mthar thug pas dmigs pa yin gyi/ gzhan du ni ma yin no/ /rim gyis gzhan gyi mthar thug pa yin yang zhes bya ba 'di la mngon sum ni ma yin no zhes bstan pa ni/ gzugs la sogs pa la yang zhes bya ba ste/ gzhan la nges pa med na rang gi ngo bo rig pa tsam gyis ni mgu ba ma yin pa'i phyir tha snyad 'ga' yang med par 'gyur ro/ /tha snyad ma nyams par mthong ba nyid kyi phyir don dam pa'i tha snyad la gzhan du mi 'thad pas don dam pa pa'i bya ba'i mthar thug pa nyid 'dzin pa yin no/ /de'i rang gi ngo bo rang rig pa las zhes bya bas gzhan shes bzhin du gzhan la 'jug pa yin na ni thal ches par 'gyur ro snyam du dogs pa la lan du/ de'i phyir zhes bya ba ste/ mngon sum gyi bya ba ni rang gi ngo bo rig pa kho na yin la gzhan du nges pa'i rtogs pa ni de nyid la gnod pa can ma yin no/ /tha snyad ni so sor snang ba ma yin pa la 'byung bar 'gyur ba'i gzugs la sogs pa dang / reg pa la sogs pa'i yul gzhan la yang rtogs pa'i ngo bo'i rgyu nyid yin pa'i phyir dang / tshogs pa gcig la rag las pa las/ gcig pa nyid du zhen pa ni shes pa kho na de'i shes pa yin te/ rjes su dpag pa dang mthun pa'i tha snyad 'byung ba'i phyir/ don gyi shugs kyis zad pa yin zhing / thal ches pa yang ma yin no snyam du dgongs pa'o/ /sngar shes pa nyid phyis shes par 'gyur ba nyid ma yin nam/ dus kyi dbye bas ngo bo'i dbye bar snang ba ma yin pa'i phyir ro/ /de bzhin du mthong ba nyid reg par byed pa yin te/ mthong ba dang reg pa dag don gcig la 'dzin pa'i phyir ro zhe na/ de lta ni ma yin no/ /'das pa yin no zhe na/ rtogs par 'gyur bzhin pa la 'jug pa ni ma yin te/ so sor snang ba tha dad pa'i phyir ro/ /ji lta bur mthong ba la de lta bur reg par snang ba ni ma yin no zhes bstan pa ni/ 'byung 'gyur don zhes bya ba'o/ /de lta na reg pa'i yul la lhag par sgro btags pa yin gyi/ gzugs la ni ji ltar mthong ba phrad par bya ba yin pa'i phyir/ don dam pa pa nyid kyi tshad ma kho na yin no/ /ma yin te/ mthong ba tha dad pas snang ba tha dad pa las nyams su myong ba tha dad pa yang dngos po rnams kyi dbye ba yin par bstan pa ni/ ji ltar yang zhes bya ba ste/ mthong ba kho na la lta ba yin no zhes bya ba'i mngon pa'i nga rgyal can la ni gcig pa nyid yin la/ gzugs dang reg pa dag la yang mthong ngo reg go zhes bya bar shes par mtshungs pa yin gyi/ yan lag can la de bzhin du shes pa ni ma yin no/ /de dag nyid la de ltar dran pa las/ gzhan dang gzhan dran pa'i phyir zhes bstan pa ni lhag par sgro btags pas ni zhes bya ba'o/ /da ni lhag par sgro btags pa'i rgyu mtshan bstan pa ni/ de la 'byung bar 'gyur ba zhes bya ba ni/ so sor snang ba 'di'i rgyu 'byung bar 'gyur ba'i ngo bo nyid ni de'i rgyu yin pa des na de'i ngo bo nyid ni de nyid de/ gzugs skyed par byed pa'i tshogs pa reg pa dang lhan cig pa dang / reg pa skyed par byed pa yang gzugs dang lhan cig pa las 'byung bar 'gyur ba'i gzugs skyed par byed pa yin la/ des na gzugs bzhin du reg pa'i yang 'bras bu yin no zhes tshogs pa cig la rag las pa'i phyir/ gcig pa nyid du sgro btags pa yin pa'i phyir/ 'dir rig pa ni de rig pa kho na yin no zhes tha snyad pa la rig par bya ba dang rig par byed pa gcig pa nyid la mi bslu ba yin pa ni/ du ba la sogs pa thal ches par 'gyur ba ma yin te/ 'bras bu dang rgyu dag tha dad par mngon par zhen pa'i phyir ro/ /rjes su dpag pa dang rjes su dpag par bya ba dag la tha dad par mngon par zhen pa med pa'i phyir/ snga ma bzhin du gcig pa nyid kho na yin no/ /'byung bar 'gyur ba'i reg pa la sogs pa de'i bdag nyid la da ltar gyi reg pa la sogs pa de'i bdag nyid du sgro btags pa yin pa'i phyir/ da ltar gyi shes pa de'i shes par 'gyur pa yin no/ /rig pa gang yin pa kho na rgyu yin par 'byung bar 'gyur ba la sgro btags pa'i shes pa de la 'byung bar 'gyur ba'i shes pa brjod do/ /des na de ltar sngon por ston pa'i tshig ni nges par mngon par bsams pa'i dngos po rig pa yin na rang gi ngo bo rig pa mi bslu ba 'thob pa yin pa'i phyir/ gal te don rig pa tsam mi bslu ba yin pa de lta na/ smig rgyu la chur shes pa yang tshad mar 'gyur ro/ /'on te rgyu tha dad pa skyed par byed pa'i don rig pa yin na ni snam bu'i rigs pa las bum pa'i shes pa tshad mar 'gyur ro/ /'on te rgyu tha dad pa ma yin pa skyed par byed pa yang / nya phyis la dngul gyi shes pa phyi ma'i rgyun gyis skye bzhin pa ji snyed pa mi bslu ba can yin pa'i phyir tshad mar 'gyur ro/ /'chi kha ma'i dngos po'i shes pa yul de la rig pa phyi ma med pa la mi bslu ba can ma yin pa'i phyir tshad ma ma yin par 'gyur ro/ /de yang / lan cig skyes nas rnam 'jig pa'ang / /don la tshad ma nyid min 'gyur/ /rna ba'i shes pa'ang gzhan rnams dang / /'brel pa med pas tshad min 'gyur/ /'di ni rna ba'i shes gzhan la/ /mi bslu bas na tshad mar grub/ /ce na des bskyed reg byed kyang / /rnam shes gzhan dang 'brel phyir ro/ /zhes smos pa'o zhes pha rol pos gang smras pa de bsal ba'i phyir/ gang la don byed pa tha dad par mngon par 'dod pa zhes bya ba la sogs pa nas/ mngon par 'dod pa la mi bslu ba med pa'i phyir ro zhes bya ba'i bar gyis bstan pa yin no/ /mngon par bsam pa'i dngos po reg par rig pa ni mi bslu ba yin gyi rig pa tsam ni ma yin la/ rigs mthun pa dang rigs mi mthun pa'i rgyu skyed par byed pa rig pa tsam yang ma yin no/ /'chi kha'i shes pa ni rang gi ngo bo rig pa tsam la tshad ma nyid yin te/ de tsam gyi kho na rig pa yin pa'i phyir ro/ /phrad par bya ba la ni de med pa'i phyir tshad ma ma yin pa kho na'o zhes bya ba'i bsam pa ni bsdu ba'i tshigs su bcad pa'o/ /de ltar ni 'gyur na mi bslu ba can nyid ni tshad ma nyid yin la/ de yang kha cig tha dad pa ma yin pa la yang ldog pas byas pa'i tha dad pa yod la/ tha dad pa la yang mngon par 'dod pas byas pa'i tha dad pa med pa yod pa'i phyir/ khung bu du ma 'gegs pas nyam thag pa yin no/ /gnod pa med pa'i rtogs pa nyid ni gzhan la ltos pa ma yin pa'i phyir skyon 'di med do/ /de yang / tshad ma 'dzin pa'i sngon rol du/ /rang gi ngo bos rab tu gnas/ /rang don de la ltos bcas min/ /dpag bya dpags pas go ba yin/ /zhes smos pa'o/ /ci ste gnod pa can nyid ni tshad ma nyid ma yin te/ de yang gzhan la ltos pa yin no/ /ma yin te/ the tshom dang shes pa dag ni gzhan la mi ltos pa'i phyir ro/ /'on te log pa'i shes pa yin na de la yod pa ni bden mod kyi/ 'on kyang don gzhan shes pa yin gyi de nyid shes pa kho na ni ma yin te/ dngos po med pa'i shes pa'am/ rgyu la rkyen yod pa'i shes pa yang rung ste ltos par bya ba yin no/ /de yang rang nyid kho na las yin pa'i phyir mi mthun pa med pa yin no snyam du sems pa la/ gnod pa can gyi shes pa yang zhes bya ba smos so/ /'dir don ni 'di yin te/ dang po gnod pa med pa ni shes pa thams cad la yin la/ dus phyis gnod pa med pa yin na gnod pa med pa'i shes pa de la yang dus phyis gnod pa med pa'i shes pa gzhan la ltos par bya ba yin la/ de yang gzhan la yin pa'i phyir dang / 'jug pa'i mthar thug pa khas mi len pa'i phyir thug pa med pa nyid yin par bshad zin to/ /'di ltar yang / gnod par mi bya ba nyid ni gnod par bya ba ma yin pa yin la/ gnod par bya ba nyid kyang gzhan la ltos pa yin zhing / gzhan yang don gzhan shes pa kho na yin te/ skyon med pa dang shes pa dag gi bdag nyid thob pa yang de la ltos pa'i phyir ro/ /de nyid kyis na gang kho na shes pa snga ma yul log par 'dzin pa can la de thams cad gnod pa can du 'gyur ro/ /de bzhin du bum pa'i shes pa la yul la log par 'dzin pa can gyi snam bu'i shes pa dang / nya phyis la dngul du 'dzin pa'i shes pa bzhin du bum par 'dzin pa la yang gnod pa can du 'gyur te/ bye brag med pa'i phyir ro/ /'on te gnod par bya ba nyid du mngon par 'dod pa yin na/ yul gcig nyid gnod par bya ba nyid yin gyi thams cad la ni ma yin no/ /yul gcig nyid dam gnod par bya ba la mngon par 'dod pa can yin pa de lta na/ de la ltos pa yang gnod par bya ba ma yin pa nyid yin la de dang mthun pa yin pa'i phyir de ji ltar don dam pa pa yin// 'di ni de lta ma yin zhes bya ba'i shes pa dang lhan cig pa ni log par 'dzin pa la gnod pa can ma yin nam/ thams cad ni ma yin no/ / des na gal te min ces bya ba bas thal ches pa ma yin la/ don dam pa pa ma yin pa yang ma yin no snyam du sems pa la/ lan du min no snyam du shes pa de nyid ces bya ba ste/ men ces pa 'di yang log par 'dzin pa tsam gyi rgyu mtshan yin gyi/ gzhan ni ma yin no zhes bya ba'i don to/ /dngos po med pa'i tshad ma las 'di ni de lta ma yin no zhes 'gyur ba ma yin nam/ log par 'dzin pa las ni ma yin te/ de yang / tshad ma rnams kyis ma skyes pa/ /dngos po med pa'i tshad mar bstan/ /de bdag nyid yongs su gyur pa'am/ /rnam shes kyang rung dngos gzhan la/ /zhes pa'o/ /de yang 'di ni de lta ma yin zhes bya ba thams cad la skyed par byed pa ma yin te/ 'on kyang / yod pa nyid kyi dngos bzung bas/ /dran nas rab tu sbyor ba can/ /de la gnod pa nyid yin gyi/ gzhan la ni ma yin pa'i phyir thal ches pa ma yin no snyam du sems pa la/ dngos med mtshan nyid ces smos te/ pha rol po'i 'dod pa 'di ni mi rigs te/ dngos po med pa ni tshad ma ma yin te/ shes pa ma bskyed pa tsam bdag nyid yongs su gyur pa'i sgra'i brjod pa bya ba ni/ gnyid mthug po la sogs pa'i gnas skabs na yang yod pa'i phyir ro/ /dngos po ni gzhan gyi shes pa ni ma yin no/ /de yang / gzhan ni dngos po gzhan las yin la/ de shes pa ni dngos po med pa'i tshad ma ma yin te/ dngul gyi shes pa la nya phyis kyi shes pa bzhin du bye brag med par bum pa'i shes pa la yang de las gzhan pa'i shes pa gnod pa can nyid du thal bar 'gyur ba'i phyir ro/ /dgag pa yang dgag par bya ba dang 'brel pa shes par bya ba'i phyir tshad ma ma yin no/ /'di na bum pa med ces bya ba yang / sa phyogs 'di na bum pa yod par gyur pa gang yin pa de med pa yin gyi/ 'di na med ces sa phyogs dang 'brel pa can nyid ma yin te/ 'di sa phyogs kyi dgag pa ni ma yin no/ /yang na dgag par bya ba de nyid 'di na med do zhes yul gyi bye brag nyid kyi shes pa ni tshad ma yin pa'o/ /re zhig dgag par bya ba la dang po sa phyogs kyi mthar thug pa ma yin la/ yul gyi bye brag nyid kyis ma yin te 'brel pa med pa'i phyir ro/ /dngos po dang dngos po med pa dag gis phrad pa 'am 'du ba yang ma yin te/ de dag gi rdzas dang yon tan la sogs pa yul yin pa'i phyir dang gzhan yang med pa'i phyir ro/ /bye brag la sogs pa nyid kyang dmigs pa can zhes bya ba la sogs pa phrad pa la sogs pa'i rgyu mtshan las yin gyi/ 'brel pa las ni bye brag nyid yin te/ phrad pa la sogs pa mtshan nyid mi mthun pa de med pa'i phyir ro/ /yod du zin kyang phrad pa la sogs pa'i rtogs pa la don med pa'i phyir bye brag dang 'brel pa med pa'i dngos po yod pa la yang 'gyur ro/ /brjod par 'dod pa yang rgyu mtshan yod na yin te/ de tsam las byung ba ni dngos su ma yin pa'i phyir ro/ /'on te dngos po dang 'brel pa las yin na de'i dngos po med pa las kyang yin te/ pha dang 'brel pa ni bu las yin pa bzhin no/ /de ni bden mod kyi nye bar btags pa tsam yin la/ 'di ni don dam pa'i tshad ma'i dbang du byas pa yin no/ /grags pa ni gzhan du yin no zhes 'chad par 'gyur ro/ /dgag par bya ba'i yang ma yin te/ dgag pa'i dus su de med pa'i phyir ro/ /'brel pa can med na 'brel pa de nyid med pa yin te/ so sor snang ba ma yin pa'i phyir zhes dgongs pa'o/ /bum pa med do zhes dran bzhin pa na bum pa dang 'brel pa can dgag par shes par bya ba ma yin nam snyam du sems pa la/ dngos po med pa'i rang gi ngo bo zhes bya ba smos so/ /bum pa dran pa na gal te rang gi ngo bo shes pa yin pa de lta na/ de dang 'brel pa can nyid bkag pa ma yin par 'gyur te 'gal ba'i phyir ro/ /de'i rang gi ngo bo rtogs pa med na yang de dang 'brel pa nyid med pa yin la/ de rtogs pa ni yod la/ de ni med pa de lta na yang de dang 'brel pa can nyid ma yin la med pa las yod pa rtogs pa ma yin te/ de ni yul ma yin pa'i phyir ro/ /'on te bdag nyid kyis nyams su myong ba'i spyi dran pa yin na des 'phangs pa'i bye brag dngos po med pa'i tshad ma dang lhan cig tu dgag par byed pa yin no/ /de la ni ma rtogs pa las ni zhes smos te/ re zhig rang gi ngo bo bye brag 'phen par nus pa ni ma yin gyi/ spyir ni yin no/ /de'i tshe yang na dngos po med pa ni dngos po dang 'brel pa can nyid ma yin te/ ma rtogs pa'i phyir ro/ /rtog pa yin du chug kyang snga ma bzhin du thal bar 'gyur ro/ /bden mod kyi so sor snang ba can ni dngos po dang dngos po med pa dang 'brel pa ma yin pa nyid yin te/ kun rdzob tu 'bras bu dang rgyu nyid lta bu yin no/ /ji ltar yang / 'das pa dang ma 'ongs pa yang rung / rten 'brel las 'byung ba'i 'bras bu dmigs pa yin pa de bzhin du dngos po la dngos po med pa yin par yang sems pa la/ ji ste rgyu dang 'bras bu yi/ /zhes bya ba smos te/ 'bras bu nyid la sogs pa bzhin du dngos po med pa dang 'brel pa yang dngos po med par nges pa yin te/ cig car ma yin pa nyid du 'gal ba med do zhes bya ba'i don to/ /lan ni gtan med pa zhes bya ba ste/ yod pa'i dngos po med pa ni zhig nas med pa yin la/ 'byung bar 'gyur ba'i dngos po ni snga nas med pa yin pas/ 'bras bu nyid dang mtshungs par dmigs pa yin na yang gtan med par ji ltar yin te/ de shes pa la yang rig ba gzhan btsal bar bya ba yin la/ des na zhig nas med pa la sogs pa la yang de nyid kyis chog pa'i phyir/ 'bras bu nyid kyi rigs pa khyab par byed pa ma yin pas ci dgos zhes bya ba'i don to/ /gtan med pa yang gcig la gcig med pa nges pa yin gyi 'di nye bar btags pa ni ma yin te/ thams cad nye bar btags par thal bar 'gyur ba'i phyir ro/ /nye bar btags pa las gzhan pa nyid du ni gtso bo yin pa'i phyir khyab par byed pa ma yin pa 'ba' zhig ni ma yin te/ mi srid pa yang ngo bo zhes bstan pa ni/ gzhan yang rgyu 'bras dag gi zhes bya ba smos te/ me dang du ba dag la rim gyis dmigs pa la rjes su 'gro ba la sogs pa las 'bras bu la sogs par rtogs pa yin te/ tshad ma'i rtsa ba yin pa'i phyir ro/ /dngos po med pa dang 'brel pa rig pa ni tshad ma ma yin te/ dngos po med par rig pa'i rtogs pa las byung ba yin pa'i phyir zhes bya ba'i don to/ /dngos po dang 'brel pa bzhin du dngos po med pa'i rang gi ngo bo yang dngos po med pa rtogs pa yin no snyam du sems pa la/ gal te/ de la dngos po med pa yi/ /zhes bya ba ste/ 'bras bu ni gzhan du mi 'thad pa yin par rtogs pa'i rgyu nyid kyis mig la sogs pa la snang ba yin la/ de bzhin du dngos po med pa yang 'brel pa can yin pa kho nar dngos po med pa'i tshad mas rtogs pa yin no zhes bya ba'i don to/ /lan du gang gi dngos med ces bya ba la sogs pa ni bzhad gang du byed pa ste/ gzugs kyi shes pa ni rgyu ma gtogs par mi 'byung ba'i phyir/ mig ni de nyid la rjes su dpog par byed pa yin par ni rigs te/ 'bras bu ni de la mi 'khrul pa'i phyir ro/ /dngos po med pa ni de ltar ma yin te/ tshad ma med pa'i phyir ro/ /nges pa med pa'i shes pa'i rgyu mtshan las byung ba ni de lta ma yin no/ /tshad ma 'jug pa na don yod pa nyid du shes par byed pa yin la/ de ldog pa ni med pa nyid du shes par byed pa ma yin nam/ 'di ni de bsal ba yin te/ tshad ma yod pas gzhal bya yod pa khyab pa ma yin pa'i phyir ro/ /tshad ma thams cad log pa ni med par rtogs par byed pa ma yin pa ma yin nam/ 'on kyang gang la med do zhes bya ba'i shes pa skye ba de ni dngos po med pa'i tshad ma yin no/ /gnyid log pa la sogs pa la ni de med pa yin te/ de yang / dngos po med pa 'dzin pa ni/ /zhes smos pa'o/ /de dang gnyid log pa la sogs pa la bye brag ci yang med do/ /dgag par bya ba dran pa dang dngos po las gzhan pa 'dzin pa dag dor ba ste/ de dag ni de'i bye brag ma yin te/ rang bzhin med pa'i phyir ro zhes bstan pa ni/ de ni dngos po'i rigs med par zhes bya ba'o/ /rang bzhin med pa nyid kyang tshogs pa can nyid yin pas de dag gi bye brag yin te/ de la rtogs pa skyed par byed pa can gyi tshad ma ldog pa la lhan cig byed pa de dag yin pa de bstan pa ni/ gal te de 'dir tshogs pa can zhes bya ba ste/ yul la sogs pa'i dngos po gzhan 'dzin pa'i lhan cig pa yang tshad ma ldog pa ni de dang mthun pa'i yul yin gyi/ bskal pa pa'i yul la ni ma yin no zhes bstan pa yin no/ /de yang / yod pa nyid kyi dngos bzung nas/ /dran nas rab tu sbyor ba la/ / med pa nyid ces rtogs pa ni/ /dbang po la ltos min par skye/ /zhes smos pa'o/ /de lta bu'i tshad ma log pa ni shes pa gzhan nyid yin te/ mtshan nyid mi mthun pa'i phyir ro/ /de'i bum pa med pa nyid kyang de las gzhan pa nyid yin pa'i phyir tshad ma yang ma yin gzhal bya yang ma yin no/ /de bstan pa ni/ dngos po med par nges pa yin zhes bya'o/ /bum pa med pa nyid ni sa phyogs nyid ma yin pa la yin nam/ de ni bum pa yod kyang yod pa'i phyir ro/ /'ba' zhig pa nyid kyang sa phyogs las tha mi dad pa'i phyir de las tha dad pa yod pa ma yin pa nyid du rang gi shes pas 'dzin pa yin/ shes pa ldog pa ni shes pa gzhan las tha dad pa can du 'dis smras pa la/ 'di med ces bya ba'i shes pa ni zhes bya ba smos so/ /mi dmigs pa'i tshad ma ni gzhal bya bum pa med pa nyid yin te/ rang rang gi tshad ma ji lta ba rnams kyis nges par byed do/ /dang po ni mngon sum las yin la/ de'i 'og tu zhes bya ba ni khyab par byed pa mi dmigs pa'o/ /phyi rol nyid kyis ni shes pa dang shes bya dag ldog par nges pa'am/ gtan du ba'i shes par 'gyur ba yin gyi dngos po med pa zhes bya ba'i yul can mngon du bya ba ni 'ga' yang med pa nyid yin te/ 'o na ci zhe na/ de la ni tshad ma ldog par nges par bya ba yin zhes bya ba'i don to/ /mngon sum gyi bya ba'i rjes su 'gro ba can 'di ni sngon po'o zhes bya ba dang / rjes su dpag pa ste rnam par rtog pa rnam pa gnyis ni gzhan gyi bag chags tsam las 'byung ba nyid la tshad ma nyid yin grang na/ re zhig rjes su dpag pa ni ma yin te/ dngos po med pa ma mthong ba la khyab pa 'dzin pa ma yin pa'i phyir te/ dngos po med pa dang dngos po dag gi mngon sum gyis khyab pa 'dzin pa yin la/ de dag gi dngos po med pa dag gi yang khyab pa shugs kyis grub pa yin no/ /des na rjes su dpag pa'i shugs kyis kyang mi dmigs pa las dngos po med par rtogs pa ni de las gzhan pa dag kho na yin te/ de dang bral ba dag dmigs pa'i phyir de'i rang bzhin gyi dngos po med pa yin no/ /de dang bral yang mngon sum yin pa'i phyir khyab par byed pa mi dmigs pa ma yin no/ /de lta yin na rtsod pa'i rig pa las/ de mthong ba rnams la shes pa yod pas khyab pa'i phyir zhes bya ba ji ltar yin/ tshad ma rnam par nges pa las kyang / kho bos 'di ni ma dmigs pa 'am zhes bya ba'i rtogs pa yang dag 'byung zhes smos pa'o/ /dmigs pa dang mi dmigs pa'i rnam par rtog pa dag gis mngon sum ni byed pa dang bcas par bstan pa yin gyi/ 'di yod pa'i phyir 'di med do zhes bya ba 'di dag gis ni ma yin no/ /smras pa/ dmigs pa ni yod pa yin par bstan pa ni yod pa dang dmigs pa dag ni gcig pa nyid du bstan pa yin no/ /kho bos dmigs kho bos ma dmigs zhes bya ba'i skyes bu mchog gi tshig gis ni rang nyid kho na'i dmigs pa yin yang rung / ma yin yang rung ba'i mngon sum las grub pa yin gyi/ gzhan gyis ni ma yin no zhes bstan pa yin no/ /yod pa dang shes pa dag gi khyab pa yang mi rtag pa dang byas pa bzhin du ldog pas byas pa ni skyes bu mchog bzhin du rgyud gzhan gyis dmigs pa'i ngo bo'i yod pa rnam par bcad pa'i don du dmigs pa'i rig byar gyur pa'i snang ba zhes bya ba la sogs pa'i bye brag kyang 'di'i don nyid du dngos po mi snang ba mi shes pa'i ngo bo rnam par gcad par yin la/ de yod pa ni tshad ma ma yin no/ /gzhan la snang ba ji ltar yin/ /mi snang ba ni yul gzhan la sogs pa'i mthong bkag pa'i phyir ro/ /de'i phyir med pa las log pa'i yod pa dang mi shes pa las log pa ni shes pa yin la/ de bzhin du sngon po ma yin pa las log pa ni sngon po ste/ mi shes pa las log pa dang shes pa zhes bya ba gcig pa nyid yin pa 'di ni ldog pa'i rgyu mtshan gyi rnam par rtog pas tha dad pa'i de nyid bstan pa yin la/ de yang ma rmongs pa la ni de kho na bzhin du ste/ byas pa dang mi rtag pa lta bu'o/ /sa phyogs nyid la ni ldog pa las shes pa dang shes bya yang mngon sum yin no/ /de nyid ni bum pa dang de'i shes pa dang bral ba ni bum pa med pa dang / de'i shes pa med pa yang yin pa'i phyir mi dmigs pa ma yin no/ /de ltar rtogs par mi nus pa'i rmongs pa la ni de yang mi dmigs pa yin no/ /de yang rang bzhin kho na yin gyi khyab par byed pa ma yin te/ gzhan pa'i dngos po'i sa phyogs dang de'i shes pa dag gis de mi dmigs pa'i ngo bo dag la dbye ba med pa'i phyir mngon sum gyis grub pa'i phyir ro/ /grub kyang tha snyad du rung ba nyid du sgrub par byed pa'i phyir skyon med do/ /khyab par byed pa mi dmigs pa ni khyad par bya ba mngon sum nyid yin na ste/ khyab pa yod pa tsam las ni thams cad la yang 'gyur ro/ / de ni bum pa'i sa phyogs dang de'i shes pa dag las ni med do zhes bya bar 'gyur ba nyid ma yin no/ /sa phyogs kyi shes pa 'ba' zhig ni mi dmigs pa'i phyir ro zhes bya ba de lta bu'i bsam pas/ de ni gang las skyes pa yin/ /zhes bya ba la sogs pa nas/ de ltar min na mi dmigs pa zhes bya ba'i bar gyis bstan pa yin te/ rmongs pa ma yin pa'i mngon sum ni cig shos kyis mi dmigs pa yin no/ /'ba' zhig pa nyid kyang sa phyogs la sogs pa'i med pa bzhin du med pa gzhan med kyang rang nyid kho na las grub par bstan pa ni/ 'ba' zhig gang las zhes bya ba la sogs pa nas/ thug pa med do zhes bya ba'i bar yin no/ /de ltar 'gyur na ni gal te gzhan mi dmigs pa gzhan gyi dngos po med par sgrub par byed pa yin na bye brag med par 'gyur ro/ /nya phyis kyi shes pa ni dngul kho na'i med pa sgrub par byed pa ma yin te/ 'o na ci zhe na/ mtshan nyid mi mthun pa'i khams gsum po'i'o zhes bya ba'i bsam pas de nyid dran pa'i zhes bya ba smos so/ /dmigs par bya ba la mtshan nyid mi mthun pa med pa zhes bya ba nyid mtshan ma 'jug par byed pa ni bden mod kyi dngul du 'dzin par 'dod pa'i phyir med pa yin par gsal bar byed pa yin no zhes pa'i don to/ /dngul gyi shes pa yang nya phyis med do zhes gsal bar byed pa yin no snyam du sems pa la/ dngos po med pa zhes bya ba smos so/ /bden mod kyi/ 'di yang don dam pa yin mod kyi/ 'on kyang tha snyad du dngul med pa yin gyi/ nya phyis med pa ni ma yin pa'i phyir nya phyis kyi shes pa mi dmigs pa yin gyi/ cig shos ni ma yin no zhes bya ba'i don to/ /tha snyad pa bstan nas don dam pa bstan pa ni/ de'i phyir 'ba' zhig 'dzin pa zhes bya ba ste/ gnod par bya ba nyid kyang tha snyad pa nyid yin gyi dngos po nyid la ni ma yin pas/ de bkag pa'i ngo bo ni gnod par bya ba ma yin pa nyid kyang dngos po la ma yin par bstan pa'o/ /tha snyad pa nyid kyis ni mi bslu ba can nyid dang / gnod bya ma yin pa nyid dag la bye brag med kyang / ci'i phyir mi bslu ba can nyid kho na tshad ma nyid du bstan gyi/ gnod pa med pa nyid ni ma yin no snyam du sems pa la/ phrad par bya ba la 'jug pa'i mthar thug par 'dod pa ni khas ma blangs pa'i phyir dang / gnod pa med pa nyid tsam 'dod pa ma yin pa'i phyir/ 'jig rten pa ma yin pa nyid dang / tha snyad pa ma yin pa nyid du 'dod pas thug pa med pa yin te/ dang po la gnas pa med par ni bye brag med pa yin zhing phyi ma la ni the tshom za ba yin la/ de las kyang de'i phyi ma la yang de bzhin yin pa'i phyir gang du yang gnas pa med do/ /phrad par bya ba la yang gang gi stobs kyis thug pa med pa sel bar byed pa ni cung zad kyang med do zhes bya ba'i dgongs pas nye bar bsdus pa'o/ /de phyir sgra las byung ba yang / /zhes bya ba ste/ mngon par 'dod pa la mi bslu ba ni tshad ma nyid yin pa'i phyir/ khyab pa ma yin pa la sogs pa'i sun 'don gsal ba nyid yin par nye bar mtshon par byed pa ni de bsal ba yin zhes bya ba'o/ /de ltar yang gang bshad pa mi bslu ba ni don ji lta ba rtogs pa yin pa ste/ de ni don gyi chos so/ /shes pa ni de ltar rig pa ste de ni shes pa'i chos so/ /rjes su dpag pa la ni don ji lta ba yin pa dang / de rig pa dag med pa'i phyir don byed par rtogs pa'i mi bslu ba med pa yin te/ de ni don byed gnas pa zhes bya bas bstan pa yin te/ don byed par gnas pa rtogs pa yin no zhe na/ de ni mi rigs te sngar mthong ba'i me ni phrad par bya ba ma yin pa'i phyir ro/ /'dra ba'i phyir ro zhe na ma yin te/ de don du gnyer ba ma yin pa'i phyir ro/ /sreg pa la sogs pa don du gnyer ba yin no zhe na/ de ltar na sreg pa la sogs pa 'grub pa nyid phrad par bya ba yin la/ de yang mngon sum gyis sngar shes zin pa'i phyir mngon sum dang rjes su dpag pa dag ni mi bslu ba la bye brag med do/ /gnas pa rtogs ba ni sgra'i don ma yin te/ 'dug pa'i nag pa ni 'gro ba ma yin no/ /'dir yang 'dug pa dang / rnam par gnas pa dang / rnam par gzhag pa zhes bya ba'i 'jig rten pa'i tha snyad yongs su dor nas/ don gzhan yongs su bstan pa la yang dgos pa med pa'i phyir dang / mi nus pa'i phyir dang / rjod par byed pa ma yin pa'i phyir mi rigs pa nyid kyis bkag pa'i phyir yang ngo / /grags pa'i don blangs pa yin na/ dgos pa yin par bstan pa yin no/ /mi bslu ba can nyid tshad ma nyid ma yin nam/ de yang rtogs pa po'i mngon sum dang rjes su dpag pa la yang yod pa'i phyir/ de yod pa ni yul mtshungs pa can gyi thabs gzhan la gus pa ma yin no/ /bcom ldan 'das ni gzhan gyi mngon sum dang rjes su dpag pa yang ma yin gyi/ de dang ldan pa yin par ni/ /de ldan bcom ldan tshad ma nyid/ / ces 'chad par 'gyur ba ste/ gtso bo yod bzhin du nye bar btags pa don du gnyer ba ni su yang med pa'i phyir gus pa ma yin no/ /de yang / 'on kyang gnas skabs kyis cung zad/ /til mar 'bras can mar sogs bzhin/ /gang de kun gyis kun mkhyen pa/ /yid du zad mod mi 'gag go/ /zhes smos so/ /'on te 'u bu cag la sogs pa'i mngon sum la sogs pa'i yul ma yin pa 'jig rten pha rol la sogs pa la ni/ bcom ldan 'das 'dod pa yin na de yang ma yin te/ de la yang mngon sum la sogs pa'i ngo bo yul ma yin pa nyid kyis 'jug pa med pa'i phyir dang / dngos po gzhan med pa'i phyir ro/ /rtogs pa po la ltos nas kyang btags pa pa yin pa'i phyir/ mi 'jug pas de yongs su brtags pa ma yin no/ /sna tshogs pa can gyi 'jig rten las kyang 'jig rten pha rol la sogs pa rjes su dpag pa ni ji skad du/ las las skyes pa'i 'jig rten ni sna tshogs pa yin pa'i phyir/ rgyu tsam la rjes su dpag pa yin gyi/ bye brag tu ni bcom ldan 'das yin no zhes bya ba ni yul gyi dbye ba yin no zhes gang smras pa ni ma yin te/ de la de lta bu'i shes pa la rgyu med pa'i phyir dang por rjes su dpag pa ma yin te/ de ni spyi'i spyod yul can yin pa'i phyir ro/ /'on te mi bslu ba can nyid ni bcom ldan 'das kho na'i yin gyi/ mngon sum gyi ni ma yin te/ rang gi ngo bo tsam las nges pa'i phyir dang / rjes su dpag pa'i yang ma yin te/ de las byung ba nyid kyis khyab pa ma grub pa'i phyir ro/ /ma yin te/ sgrub par byed pa med par thal bar 'gyur ba'i phyir mngon sum dang rjes su dpag par yang de'i shes pa bskyed pa 'am/ go bar byed pa yang rung ba sgrub par byed pa yin la/ de dag med na de grub par mi 'gyur ba'i phyir rang nyid med pa yin no/ /mngon sum la sogs pa yang tshad ma yin la/ de nyid mi bslu ba dang 'bral ba yin pa'i phyir de nyid kyis chog gi gzhan ni ma yin te/ de nyams su myong ba med pa'i phyir 'u bu cag gis mi bslu ba'i yul de la ma yin te/ yul ma yin pa nyid kyi phyir ro/ /de lta bu thams cad ni btags pa ba kho na yin te/ de yang / nyung du shes pa'ang kun shes par/ /phal pa la 'jug ces brjod pa/ /zhes smos pa ste/ de bstan pa ni/ bcom ldan 'das tshad mar gyur pa zhes bya ba'o/ /de nyid ni/ de ldan bcom ldan 'das tshad ma nyid ces kyang 'chad par 'gyur ba ma yin nam/ der yang mngon sum la sogs pa dang / bcom ldan yul mtshungs pa nyid yin par dogs pa la de bzhin du/ bcom ldan 'das tshad ma yin gyi de nyid ni ma yin zhes yul gyi dbye bas tha dad par sgrub par byed par 'gyur ro/ /'on te 'di la mngon sum la sogs pa mi bslu ba can la sogs pa nyid kho na bde bar gshegs pa'i phyir de nyid kho na tshad ma yin gyi/ gzhan ma yin te/ mi bslu ba mi shes pa'i phyir zhes bya ba ni phyogs snga ma'o/ /de ltar dogs pa de la yang mngon sum la sogs pa bzhin du rnyed par sla ba mi bslu ba can gyi shes pa nyid kyis bcom ldan 'das nyid dam/ khyad par byed pa'i shes pa dang 'brel pa can nyid kyis mi bslu ba can nyid ni bcom ldan 'das kho na yin pa'am/ gzhan gyis de sgrub par byed pa dang rjes su mthun pa nyid dang / ji ltar yang 'chad par 'gyur ro/ /de dang ldan pa ni mi bslu ba la sogs pa dang ldan pa'i bcom ldan 'das nyid tshad ma yin no zhes bya ba'i don to/ /'on te mngon sum la sogs pa ni mi bslu ba shes pa yin pa'i phyir rigs nas bcom ldan 'das ni ma yin te/ rtogs pa'i ngo bo ma yin pa'i phyir la/ tshad ma ni rtogs pa yin no snyam du dogs pa la de dang ldan pa ste/ mngon sum la sogs pa dang ldan pa de'i bdag nyid kyis te/ des na bcom ldan 'das nyid tshad ma yin no zhes 'chad par 'gyur ba'o/ /der yang mngon sum la sogs pa nyid tshad ma'i gtso bo yin te rtogs pa'i bdag nyid can yin pa'i phyir ro/ /bcom ldan 'das ni tshad ma dang 'dra bas tshad mar gyur ba yin no zhes bya ba'i bsam pas dogs pa la/ khyab par byed pa rtogs pa'i bdag nyid yin pa'i phyir/ bcom ldan 'das kho na tshad ma'i gtso bo yin la/ gzhan ni de dang mthun pa nyid kyi gtso bo ma yin no zhes bstan to/ /gal te de'i yul tha dad pa ma yin pas tshad ma nyid ma yin no snyam pas yul gyi dbye ba las tshad ma nyid yin pa ni 'dir don yin no zhes zer ba de lta na/ mngon sum la sogs pa bzhin du yul gyi dbye bas tshad ma tha dad pa yin na tshad ma ni rnam pa gnyis te zhes bya ba nyams par 'gyur ro snyam du dogs pa la de ldan zhes smos pa yin no/ /gal te yang mthong ba dang ma mthong ba nyid kyis yul tha dad pa yin na/ de lta na yang de bzhin te/ mngon sum la sogs pa kho na bzhin du mi bslu bas bcom ldan 'das kyang bye brag med do zhes bya ba'i don 'o na ni mi bslu ba can nyid ni bcom ldan 'das nyid yin gyi/ gzhan ni ma yin no zhes bya ba ni 'dir don yin no/ /mngon sum la sogs pa med na de lta na de kho na nyid du bcom ldan 'das ci nas kyang mi 'grub bo snyam du dogs pa la/ mngon sum la sogs pa sgrub par byed par gyur pas de dang ldan pa'i bsgrub byar gyur pa yang bcom ldan 'das ma yin la/ de dang bral bas kyang ma yin zhes bya ba'i don du 'chad par 'gyur ro/ /gal te yang mngon sum ni mi bslu ba la sogs pas tshad ma ma yin pa de bzhin du bcom ldan 'das nyid khyab par byed pa de nyid yin pa'i phyir thams cad mi rigs te/ shes pa'i bdag nyid yin pa'i phyir mi bslu ba'i shes pa tshad ma yin te/ blo ni tshad ma yin zhes bya ba'i tshig las so/ /bcom ldan 'das ni yul rtogs pa'i shes pa ma yin la/ der zhen pa'i yang ma yin te/ de kho na nyid mi shes pa tsam gyi yang dbang med pa'i phyir ro snyam du dogs pa la de dang ldan pa ste/ mngon sum la sogs pa dang ldan pa'i tshad ma ni bcom ldan 'das yin te/ ji skad bstan pa'i mtshan nyid dang ldan pa'i mngon sum la sogs pa bcom ldan 'das la mnga' ba yin te/ de'i bdag nyid kyis zhes 'chad par 'gyur ba'o/ /gtso bo dang gtso bo ma yin pa nyid dang / khyab par byed pa dang khyab par byed pa ma yin pa nyid du bstan pa yin la/ 'dir ni shes pa dang mi shes pa nyid kyi bye brag la the tshom za ba la bye brag med do zhes bya ba ni grub pa'i mtha'o/ /bcom ldan 'das ni mthong ba'i yul la tshad ma ma yin te/ gang gis de'i yul rtogs pa'i mngon sum la sogs pas rtogs pa'i don la ni ma yin no/ /'o na ci zhe na/ 'u bu cag la sogs pa'i tshad ma yul ma yin pas mi mthong ba 'jig rten pha rol la sogs pa'o zhes bya ba'i dgongs pas lan du de ni med de/ rang dngos zhes bya ba la sogs pa'o/ /rjes su dpag pa ni rang gi ngo bo tsam 'dzin pa ma yin pa ma yin nam/ yin pa de ltar na mngon sum nyid du thal bar 'gyur ro/ /'on kyang phyi rol la yin no/ /des na de nyid 'jig rten pha rol la sogs pa'i yul can yang yin no/ /'byung rngub dbang po'i shes rnams kyis/ /skyes pa lus 'ba' zhig las min/ /zhes 'chad par 'gyur ba'o/ /'di la rjes su dpag pa ni zhes smos pa'o/ /dbugs rngub pa la sogs pa rnams goms pa las byung ba'i bye brag nyid yin te/ goms pas sngon du 'gro ba can du mthong ba ma yin nam/ skye ba la sogs pa la yang rang gi rigs kyis goms pa go bar byad pa yin pa'i phyir 'brel pa 'dzin pa'i sgo nas go bar byed pa yod pa yin no snyam sems pa la/ khyab pa can gyi 'brel pa 'dzin pa zhes smos te/ khyab pa can gyi 'brel pa ni khyab bya khyab byed kyi ngo bo ste/ mi mthun pa'i phyogs ma lus pa las log pa yin na 'dzin pa yin grang na/ tshu rol mthong ba pas ni de ltar mthong ba ma yin te/ mthong ba ni rang gi ngo bo mthar thug pa'i phyir ro/ /lhan cig pa nyid du yang dang yang du mthong ba las nges pa'i shes pa yin na ni skyon 'di yin te/ lan cig min par lhan cig pa nyid du mthong ba rnams kyi yang 'khrul par mthong bas don gyis go ba mi bskyed pa'i phyir ro/ /'bras bu nyid ni lan cig kyang mngon sum dang mi dmigs pa dag gis mthong na 'brel pa mi 'dzin pa'i skyon med do snyam du sems pa la/ tha snyad tsam du tshad ma yin gyi zhes smos so/ /mngon sum gyis 'dzin pa'i dpe'i don du ste/ dper na mngon sum ni rang gi ngo bo'i yul can yin yang 'byung bar 'gyur ba'i yul can du tha snyad kyis nges pa yin la/ de bzhin du rjes su dpag pa yang mngon sum du mi dmigs pa sngon du 'gro ba can gyi nges pa las 'bras bu nyid dang 'brel pa grub pa la brten pa yin gyi/ de bzhin du don dam pa pa dang 'brel pa ni ma yin no/ /de lta bu'i rjes su dpag pa ni thams cad mkhyen pa grub pa la 'gal ba can ma yin te/ de 'grub pa'i bsgoms pas 'grub pa'i phyir ro/ / yang na 'bras bu dang rgyu las byung ba'i rjes su dpag pa de nyid las de rtogs pa'i phyir zhes bstan pa ni/ thams cad mkhyen pa zhes bya ba'o/ /bstan bcos ni 'bras bu'i yul can ma yin nam/ 'bras bu mtho ris dang 'brel pa'i yul can yang yin gyi/ rang gi yul dang 'brel pa 'dzin pa la ltos pa ni ma yin te/ 'jig rten la grags pa'i dngos po dang 'brel pa tsam la ltos pa dang / 'dod pa la sogs pas phyi'i don rtogs par byed pa yin pa'i phyir ro/ /tshad ma ni the tshom med pa can gyi shes pa skyed par byed pa'i phyir dang / skyes bus byas pa ma yin pa nyid du nges pas rgyu'i skyon med par nges pa la phyin ci log tu dogs pa med pa'i phyir ro/ /mngon par 'dod pa dang phrad par byed pa nyid kyis phyir mi bslu ba can yin gyi/ de'i yul la bcom ldan 'das tshad ma ma yin te/ des rtogs pa yin no zhes bstan pa la zhes zer ba ni/ gal te rang gi ngo bo nyid ces bya ba la sogs pa'o/ /grub pa'i mtha' yang mdor bsdus pa ni sgra la ni du ba bzhin du don dang lhan cig pa'i rang bzhin can gyi 'brel pa med pa'i phyir smra ba po'i rgyud kyi shes pa'i yul gyi don brdar byas pa can la/ sgra las nyan pa pos rtogs par byed pa yin te/ de'i tshe sgra ni brtags so/ /don de rtogs pa can gyi smra ba po ni chos can no/ /rtogs pa'i yul gyi don ni bsgrub bya yin no/ /rtogs bzhin pa'i me bzhin du don de nye bar gnas pa ma yin pa'i phyir rtogs bzhin pa nyid ma yin pa la ji ltar rtogs kyang rung don med pa yin na ni sgra las byung ba yang ngo / /yid ches pas bstan pa yin na gzhan gyi don gyi rjes su dpag pa yin la/ smra ba po'i bsam pa la 'bras bu las byung ba'i yang dag pa'i rjes su dpag pa yin no/ /de ni 'dir skabs ma yin te/ don de yul bsam bya yin pa'i phyir ro/ /rtags kyang du ba las me rjes su dpog pa bzhin du phyogs kyi chos nyid la sogs pa'i nges pa med kyang / gang las go bar byed pa yin/ de la yang res 'ga' zhig du ba bzhin du de'i chos nyid la sogs pa 'dzin pa yod par rtogs pa'i don du blo la grub pa dang 'brel pa can gyi sgra las byung ba yang rjes su dpag pa yin no zhes bstan pa ni/ /smra ba po'i bya ba'i yul zhes bya ba la sogs pas bstan pa yin no/ /blo'i don yul nyid ni ji ltar thos pa don gyi de kho na nyid de don dam pa'i rgyu mtshan dang 'brel pa gang yin pa gang gi yin pa de ni rjes su dpag pa nyid ces bya ba'i don to/ /blo la grub pa dang 'brel pa can nyid ces bstan pa yin no/ /rgyas par ni sgra las byung ba rnam par bcad pa la ltos pa yin no/ /mngon par brjod pa'i bya ba log pa yin na smra ba po'i don dang mtshungs pa'i rnam pa smra ba po'i blo la gnas pa'i don rjes su dpag pa las rtogs pa ni 'jigs pa'i ma yin pa 'gegs pa bstan pa ni/ smra ba po'i byed pa ni brjod par 'dod pa'o zhes bya ba'o/ /nyan pa po ni smra ba po'i bsam pa la brjod pa'i don ji lta ba go bar byed la/ de bzhin du smra ba po yang nyan pa po'i blo la gnas par bya ba'i phyir smra bar byed do zhes bya ba'i don to/ /sgra ni mngon par brjod pa nyid kyi bya ba yin gyi gzhan ni ma yin la/ de lta yin na de'i rjes su dpag pa tshad ma gzhan nyid du 'gyur la/ kho bo cag gi phyogs la ni de rjes su dpag pa yin no zhes bstan pa ni/ sgra'i byed pa ni de nyid la zhes bya ba'o/ /gal te smra ba po'i brjod par 'dod pa'i yul gyi bstan bcos thams cad tshad ma yin na/ de las gcig kyang 'jug par byed pa nyid kyis tshad ma nyid yin gyi/ thams cad ni thams cad kyis nan tan du bya bar mi 'gyur ba zhig na/ 'di dag thams cad thams cad kyi yin pa kho na ste/ bye brag gi rgyu med pa'i phyir ro/ / gal te bstan bcos rnams kyi phan tshun 'gal ba'i don nyid kyis don dam pa pa'i 'jig rten pha rol gyi yul nyid ma yin pa de lta na gang zhig yul yin snyam pa la/ de phyir gal te smra ba po/ /zhes bya ba la sogs pa'o/ /thams cad rig pa can gyi bka' las kyang de bzhin ni min nam/ des na gal te smra ba po thams cad mkhyen pa ma yin nam gang phul du byung ba yin/ thams cad mkhyen pa'i bka' ni don gyi de kho na nyid kyi yul can nyid yin pas gzhan gyi don gyi rjes su dpag pa nyid yin la/ gzhan gyi ni rjes su dpag pa tsam yin pa'i phyir ro snyam du dgongs pa'o/ /skyes bus byas pa la ni skyon yod par dogs pas 'jug par mi byed pa nyid ma yin nam/ skyes bus byas pa ma yin pa la ji ltar yin/ sgra ni shin tu dri mi zhim pa can bzhin du rang bzhin gyis skyon dang ldan pa ma yin no/ /sgra'i don dang ma reg pa nyid kyang skyes bu'i skyon kho na yin no/ /skyon dang ldan pa'i skyes bu ni bsam pa'i skyon gyis gzhan du gnas pa'i don la gzhan du rab tu sbyor ba yin te/ rtswa mchog gi rtse mo la glang po che brgya lta bu yin te/ de lta bu'i tshig ni yid ches pa ma yin no/ /de yang tshig gcig gis dgag pa la rab tu sbyor na yid ches pa mi 'dor pa yin no/ /de bzhin du/ chu bo'i ngogs na 'bras bu rnams/ /zhes bya ba yang yid ches pa rab tu sbyor ba yin na bden pa yin la/ de nyid yid ches pa ma yin pas rab tu sbyor ba yin na brdzun par yang 'gyur ro/ /rang bzhin gyis skyon can yin na dus thams cad nyid du brdzun par 'gyur ro/ /gzhan dag na re 'brel pa 'dzin pa'i dus su rgan po rnams tha snyad du byed pa la/ drung na gnas pa dag sgra 'di'i don yin zhes shes pa yin gyi/ sngon nas don de yin par shes pa dang ldan pa yin no/ /des na dran par mi 'gyur ro/ /sgra de yang / don la sgra gzhan nye bar gyur pa'am ring yang rung / 'dod pa sngon du 'gro ba can gyis smras pa ni don gzhan dang 'brel pa can du rjod par byed pa yin te/ de ltar rtogs pa'i phyir ro/ /de ltar na tshig rnams ni don gzhan dang 'brel pa can gyi don nyid du rang bzhin gyis grub pa yin pa la skyes bu'i skyon gyis gzhan du byed pa'i phyir sgra'i skyon ma yin no/ /rig byed la ni skyes bu med pa'i phyir gzhan du bya ba ma yin pa'i phyir ji ltar 'jug par mi byed pa yin/ de yang yang na gang zhig ces smra ba rang 'dod pa nyid du brjod pa ste/ des na skul byed skyon med pa/ /brdzun pa nyid du 'gal ba yin snyam du sems pa la/ skyes bus ma byas pa la yang zhes smos te/ ji lta de ltar yin du zin kyang skul byed kyi blo ni thams cad du rang gi so sor snang ba nyid kyi don la tshad ma yin gyi gzhan la ni ma yin no/ /gzhan gyi don gyi rjes su dpag pa la ni don gyi de nyid rang bzhin gyis 'brel pa yin pa'i phyir ro/ /tshig ni rang nyid 'brel pa can ma yin yang 'brel pa can mtshon par byed pa yin te/ gtan tshigs kyi tshig rang nyid ni/ /nus med yin yang nus mtshon byed/ /ces smos so/ /brjod bya'i bye brag rtogs pa ni rjod byed rang nyid dang 'brel pa yin gyi gzhan du na mi 'thad pa las zhes bya ba ni mi rigs pa ste/ mngon sum bzhin du bye brag rtogs pa med pa'i phyir ro/ /gzhan gyi don rtogs pa'i tha snyad las rjod byed kyi shes pa mtshon par byed pa yin no zhe na/ gzhan gyi yang de'i shes pa ci las yin/ gzhan las so/ /de'i yang gzhan yin pa'i phyir long ba gcig la gcig lta bu nyid do/ /yi ge la tha dad pa can gyi sgra'i shes pa bzhin du mthong ba med na/ snang ba dang 'brel pa de bcos pa yin pa'i don ni sgra las byung ba rnam par bcad pa bstan pa yin no/ /mdor bsdus pa bstan nas/ 'di'i rgyas pa smra ba po rnams kyi 'dod pa'i dbye bas bstan par 'dod pas nges par sbyor ba'i ngag gi don ni zhes bya ba smos te/ mchod sbyin dang gtong ba las byas pa'i ling nga'i don gyi skad kyi dbyings kyi don te/ bsgom pa dang mtshan nyid mi mthun pa'i bsgrub bya'i ngo bo bdag nyid 'grub pa'i don du gzhan 'jug par byed pa'i phyir gcig tu 'dzud par byed pa ni nges par sbyor ba'i rang bzhin no/ /de nyid kyang 'bras bu dang 'brel pa can gyi 'dzud par byed pa'am/ de dang 'brel pa'i 'bras bu yang rung zhes bya ba'i ngag gi don nyid kyis bstan to/ /'khrul 'khor la skyon pa la sogs pa yang de'i dbye ba yin no/ /skyes bu kha cig la 'jug par gyis sgrub par gyis zhes bya ba ni de'i bsgrub pa'o/ /sgra ni 'jug pa dang / byed pa dang / sgrub pa de rnams kyi byed pa po dang / smra ba po yin pa'i phyir snga phyir ni ma yin no/ /sgra ni byed pa po yin la de'i byed pa ni bya ba la yin te/ bya bar gyur pa ni skyes bu'i bya ba'o/ /bshad pa thams cad la yod pa can la de du bar byed pa la sogs pa'i don du smra ba'o/ /bya ba nyid kyi byed pa ni byed pa po'i rang gi bya ba dang lhan cig 'brel pa'i shes pa yin pa bzhin bya ba gzhan no/ /skad kyi dbyings kyis rang gi don bstan pa yin la/ de yang mi shes pa 'jug pa'i yul nyid kyis shes par byed pa ni ling nga la sogs pa'i tshad ma gzhan bzhin du bsgrub pa yin no zhes bya ba ni gzhan no/ /skad cig dbyings kyis don nyid ni ling nga la sogs pa yod pa'i bsgrub bya nyid kyis rtogs ma yin no/ /rang dngos po las don du skyes bu 'jug pas 'phangs pa ni sgrub par bstan pa yin no zhes bya ba ni gzhan no/ /'di la nges par sbyor ba zhes bya ba smos te/ rnam pa du ma de dag thams cad blo la ji ltar snang bas nye bar bslad pa yin gyi/ don gyi de kho na nyid kyi rang bzhin las ni ma yin no/ /rang dngos po las don sgrub byed na ste 'dod pa sgrubs pa yin nam/ mi 'byung ni 'byung bar mi 'gyur ba ste/ skyes bu'i don ma yin pa'i phyir dang / skyes bu'i don gyi rgyu yang ma yin pa'i phyir dang ste bdag nyid med pa las don te/ 'dod pa'i sgrub byed de bya ba sgrub pa la byed pa med pa'i phyir de ni skyes bu don ma yin zhing de sgrub par byed pa yang ma yin te/ rnam par rtog pa tsam gyi yul la yang yod pa'i rig byed kyi don dam pa'i sbyor ba dang / mtho ris dag bdag nyid kyis yul ma yin pa la 'brel pa nye bar bstan pa nus pa ma yin no zhes bstan to/ /sgrub pa zhes bya ba ni re re la sbyar bar bya'o/ /de rnams thams cad 'dod pa'i rgyu nyid ma yin du zin kyang / gang kho na sgrub par byed par 'dod pa nyid rigs pas rtogs pa de kho na nyid dag gi don yin du zad mod/ 'di la de'i phyir zhes bya ba smos te/ de rnams las gcig kyang de'i rgyu nyid du mngon sum la sogs pa'i rigs pas rtogs pa ma yin te/ 'di'i rgyud pa'i 'brel pa thams cad du rnyed par sla bar rigs pa yin pa'i phyir bye brag med do/ /de bstan pa ni/ sgra de ni gang ji ltar brjod pa zhes bya ba'o/ /gsal bar rnyed pa nyid kyis 'jig rten gyi tshad ma yin gyi/ 'dod pa sgrub par byed pa nyid las ni ma yin no/ /gsal bar byas pa'i yul la dgos pa grub par byed pa nyid yin nam/ gzhan yin nam zhes 'gro ba byas nas 'jug par 'dod pa can 'jug pa'am mi 'jug pa yin gyi/ rig byed ni gsal bar byas pa'i yul yin na tshad ma'i bya ba rdzogs pa yin te/ yul la 'jug pa por rang bzhin gcig pa'i phyir ro/ /tshad ma rnams kyis yul la rnam pa gnyis te/ 'dod pa sgrub par byed pa dang / 'dzud pa por rang bzhin gcig par yin par 'dir smra ba ni/ nges sbyar nyid kyis 'jug ce na zhes bya ba ste/ nges par sbyor ba ni lag pas gnya' bzung byas pa dang / mtshungs par 'gro ba thams cad la thun mong yin te/ thams cad la yang shin tu drag pa'i rlung bzhin du mthar thug par 'dzud par byed pa yin pa ni gegs byed pa med pa'i phyir te/ phyin ci log pa la sogs pas gegs byed pa'i gegs byed pa rnams med pa zhes bya ba'i don to/ /de yang / de'i phyir rig byed sgron ma bzhin/ /kun gyi thun mong gnas yin te/ /log par rtogs bya nyid ma yin/ /zhes smos pa'o/ /slong mo la song thun mtshams kyi bya ba gyis zhes bya ba 'di la nges sbyor dbang byed pa ma yin nam/ sems dang bdag nyid kyi bya ba 'grub pa la skyes bu 'jug par byed pa yin gyi/ rab tu gtum pa'i gtse bo bzhin du ni ma yin te/ 'dod pa grub par byed pa lta bu'i 'jug pa'i rgyu mtshan no/ /bye brag tu ni dbye ba de'i tshe de las zlog pa yin no/ /nges sbyor ni rang gi shes pa las ltos nas nan tan du byed pa yin la/ de'i shes pa yang ci nas kyang phyin ci log pa can rig pa la spyod pa med pa las mi 'byung ba'i phyir de'i rang bzhin las su yang 'jug par mi 'gyur ro/ /de yang / gzhan bya yin pa'i chos la ni/ /rig byed kyis byed bdag nyid ni/ /zhes smos so/ /bya ba nyid kyi cha la dpyod pa po'i bstan bcos las rgyas par 'chad par 'gyur ro snyam du sems pa la phyin ci log dang ma log pa'i zhes smos te/ rig byed kyi don dpyod pa po'i bstan bcos kyi yan lag dang bcas pa yang phan pa dang mi phan pa dag blang ba dang dor ba dag gi yan lag ma yin pas rtogs pa dang ldan pa rnams 'jug pa la sbyor bar mi byed do/ /phyin ci log gi rang dang rjes su mthun pa'i bya ba yin pas dbang byed pa yin te/ rig byed kyi don ni 'jug par byed pa tsam yin la/ 'jug pa tsam yang rjes su mthun pa pa yin pa'i phyir de nyid la smyon pa dbang byed pa yin gyi gzhan ni ma yin no/ /dgos pa ma bstan na blun po yang 'jug par mi 'gyur ba'i phyir rtogs pa dang ldan pa rnams sam/ / nus pa yang rung ba'i rang bzhin du gnas pa rnams ni rig byed la dbang byed pa ma yin te/ mtshan nyid mi mthun pa'i phyir ro/ /dgos pa la sogs pa ma rtogs pa can gyi rigs gsum po'am gzhan yang rung ba ni de las bzlog pa'i rig byed dbang ma yin te/ nus pa med pa'i phyir ro/ /'di ni sdang bas mi 'jug pa zhes bya ba khas blangs pa yang 'di sdang bas mi 'jug pa ma yin te/ 'o na ci zhe na/ rtogs pa dang ldan pa nyid kyi dbang byed pa ma yin pa'i phyir ro/ /zhe sdang gi rgyus kyang 'jug par mi byed par mthong ba'i phyir de yang de ltar bstan pa yin no/ /gzhan rtogs pa sngon du gtong ba nyid yin yang dbang mi byed pa yang 'jug pa nyid kyi phyir phyin ci log nyid yin no/ /rtogs pa dang ldan pa rnams kyi dbang mi byed pa nyid 'di yang bdag nges par sbyar ro zhes bya ba la sogs pas gsal bar byed pa yin no/ /nges sbyor ni sgra gcig pu'i spyod yul ma yin nam/ bsgrub bya dpog pa la nges par sbyor ba na yul la sbyor ba zhes bya ba'i rnam par rtog pas bslad pa tsam yin no/ /tshad mas dpog pa la rang dbang dang / gzhan dbang la sogs pa'i rnam par rtog pas bsnyon par nus pa ma yin no/ / 'o na ci zhe na/ 'di dngos po'i chos yin pa'i phyir gnas skabs 'dir ma bor na rjes su bsgrub par bya ba nyid ni lung gi don zlos par byed pa rjes su bsgrub par bya bar mi 'gyur ro/ /mtho ris 'dod pas mchod sbyin gyis shig ces bya bar rtogs pa tsam gyis tshim pa ni ma yin no/ / gzung bya'i yul 'dzud par byed pa rnams kyis mtho ris 'dod pa'i skad kyi dbyings kyi don shes pa rnams kyi nye ba na gnas pa nyid rtogs bzhin pa de'i chos de grub pa yin na bsgrub byar 'gyur gyi rang dbang du ni ma yin no/ /de yang ma grub pa la ma grub pa'i rnam par rtog pa ma bor ba rjes su sgrub par byed par 'os pa ma yin no/ /re re chos nyid gsal ba yin na/ bsdus pa'i chos nyid bkag pa yin par dgongs pa'o/ /chos can ma grub na chos de la brten par mi 'gyur ba ma yin nam/ chos can ni rang dbang can yin pas de ma grub kyang 'grub pa yin te/ rgya shug gi 'bras bu'i sngo ba nyid ni ser po nyid med na med par mi 'gyur ro/ /de yang / A bir ba b+hA ti ro b+hA bI/ chos can rnams la rjes 'jug gang / /chos can zhes smos so/ /de ma grub kyang ma grub pa'i chos ni rjes su bsgrub par bya ba yin no snyam du sems pa la/ yongs su rdzogs pa ni rjes su bsgrub par nus pa ma yin no zhes smos so/ /de'i phyir nges par sbyar ba la rgya shug gi 'bras bu'i sngo ba ni ser po las shin tu gzhan pa kho na yin te/ rang gi dus 'dzin pa can gyi tshad ma yin pa nyid kyis de dang gcig pa nyid du ma rtogs pa'i phyir ro/ /snga ma 'dzin pa'i dus su phyi ma med pa'i phyir gzung ba ma yin te/ yod pa dang med pa tha dad pa'i phyir ro/ /gcig pa nyid yin na ni sna tshogs pa gcig tu 'gyur ro/ /shes pa phyi ma'i dus su ni snga ma byung zin pa'i phyir 'dzin pa yin no/ /gzhan du na bum pa'i shes pa 'das pa'i dus kyi khams gsum po 'dzin par 'gyur ro zhes bya ba'i don to/ /bya ba'i khyad par zhes bya ba ni dbyibs so/ /sngar bzung ba shes pa phyi mas 'dzin pa ma yin nam/ de ni shes pa snga mas byas pa'i shugs yin nam/ ma yin te/ thams cad du shes pa snga ma yod pa'i phyir de'i byas pa'i shugs las phyi ma'i ni thams cad 'dzin pa can nyid yin te/ de'i gnas yin no zhes bstan pa ni/ da ltar ba'i rang gi ngo bo 'dzin pa zhes bya ba'o/ /gang du dus tha dad pa las shes pa'i tha dad pa rtogs pa yin pa der snga ma 'dzin du zin pa yin kyang / gang du mig mi 'dzums pa la de tha dad kyang shes pa tha mi dad pa der phyi ma'i snga ma'i shes par 'gyur ro/ /des na dbang po las skyes zhes 'dir smos pa yin no/ /dus tha dad pa las shes pa tha dad pa ma yin no/ /nyin zhag la sogs pas khyab par can du byas pa'i shes pa de'i mthar bye brag gi shes pa las dbye ba med pa yin la/ de lta yin na nyin zhag la sogs pa bzhin du rtogs par thal bar 'gyur ro zhes bya ba'i don to/ /yul gyi chos nyid yin na yang zhes bya ba gzud par bya ba'i 'jug pa'i yul ni skad kyi dbyings kyi don yin no/ /de'i cha'i bya ba de yang bsgrub bya yin pas shes pa'i dus su yod pa ma yin pa'i phyir ro/ /de la brten pa'i nges par sbyor ba yang de'i tshe med par 'gyur ro zhes bya ba'i don to/ /'jug pa'i yul nyid ni skad kyi dbyings kyi don yin no/ /de yang rdzogs par bya ba nyid du yod pa ma yin par bstan pa ni/ rjes su sgrub par byed pa'am yul zhes bya'o/ /rjes su sgrub par byed pa'i yul nyid kyis zhes bya ba ni rim pa yin no/ /lan ni gang gis de ni yod pa yi zhes bya ba ste/ de'i tshe de rdzogs par bya ba nyid du med pa'i phyir de bzhin du rtogs par byed pa ma yin pa'i phyir ro/ /rjes su sgrub par byed pa'i yul nyid kyi skad kyi dbyings kyi don ni rdzogs par bya ba nyid kyi khyad par can gyi ngo bor yod pa ma yin pa des na rjes su bsgrub pa yin no/ /spyi'i ngo bor ni yod pa des na rtogs pa yin par smra ba ni/ de yi rtogs bzhin nyid grub cing / /zhes bya ba'o/ /der smra ba'i nges sbyor ni zhes bya ba'i bar gyi rjes su sgrub par byed pa ni rjes su bsgrub par bya'i/ yul gyi skad kyi dbyings kyi don rdzogs par bya ba nyid kyis rtogs na yin gyi gzhan gyis ni ma yin te/ bum pa rtogs pa yin na ni snam bu rjes su sgrub par byed pa ma yin no/ /bye brag la spyir 'khrul pa ma yin pa'i phyir de lta yin no zhe na/ ma yin te/ gtso bo dang dbang phyug la sogs pa'i spyi bzhin du 'di'i yang bye brag 'khrul pa'i phyir zhes bya ba'i don to/ /spyi ni rjes su bsgrub par bya ba nyid ma yin te/ de'i bye brag rtogs pa yin la/ de yang rjes su bsgrub par bya ba yin gyi spyi ni ma yin te/ grub zin pa'i phyir ro zhe na/ de yi rang gi ngo bo ni/ /zhes smos so/ /gal te yang bye brag can gyi ngo bo rjes su bsgrub par bya ba'i skad kyi dbyings kyi don la sogs pas rdzogs par bya ba ni 'jug par byed pa nyid du rtogs pa ma yin no/ /de lta na yang de'i spyi rtogs pa las bye brag la 'jug par byed do/ /shing du rtogs pa las shing sha pa la sogs pa bzhin du'o zhe na/ rtogs pa bzhin pa nyid tsam zhig na zhes bya ba smos te/ de rtogs pa yin yang bye brag tu rtogs pa med pa yin na ni de'i 'di'i zhes 'brel pa'i phyir khams gsum po'i ci'i phyir mi 'gyur zhes bya ba'i don to/ /'on te bye brag la spyir 'khrul pa ma yin pa'i phyir des 'phangs pas 'jug pa yin no snyam du sems pa la/ gal te rdzas su bsgrub par bya bar zhes bya ba smos so/ /bye brag ni spyis 'phangs pa yin la spyis 'phangs pa nyid kyis rjes su dpag pa yin no zhes bya ba'i don to/ /gtso bo dang dbang phyug la sogs pa spyi bzhin du spyi ni bye brag gi 'phen byed ma yin te/ 'khrul pa'i phyir ro zhes bstan pa ni/ spyir rigs yin na zhes bya ba'o/ /mchod sbyin byos zhes bya bas nges par sbyor ba ni mchod sbyin gyi chos nyid rtogs pa yod pa ma yin nam/ de la rigs pas gnod pa ma yin te/ de yang rig byed kyi tshig las/ don gyi shes pa ni mngon sum yin no zhes 'byung ba'o/ /rjes su dpag pa ni rigs pa yin la mngon sum dang 'gal ba'i rjes su dpag pa ni tshad mar gyur pa ma yin par smra ba ni/ gal te sbyin sreg la sogs pa zhes bya ba'o/ /rtogs pa ni mngon sum du byed pa ma yin te/ don nye ba na gnas pa ma yin pa'i phyir la 'byung bar 'gyur ba'i don ni 'di shes pa'i dus na yod pa ma yin te/ nye ba na gnas pa nyid ni mi mthun pa'i phyogs las ldog pa yin pa'i phyir dang / bdag nyid kyis khyab pa mngon du byed pa nyid kyang ldog par byed pa'i phyir nye ba na gnas pa ma yin pa nyid ni mngon du byed pa dang 'gal ba yin no/ /nye ba na gnas pa nyid ni yod bzhin pa nyid yin la/ de nyid mngon du byed pa yang yin no/ / dmigs pa ni yod pa nyid de dngos po'i rung ba nyid kyi mtshan nyid do zhes gang 'chad par 'gyur ba ste/ mngon du bya ba bzhin pa kho na dngos po yin gyi/ mngon du byed pa ni ma yin te/ tha dad pa ma rtogs pa'i phyir ro/ /de yod na dngos po yod pa yin te/ dngos su na de tsam yin pa'i phyir ro/ /gal te dngos po med na de yang med pa'i phyir rig byed kyi don ji ltar rtogs par byed pa yin zhes bya ba'i dgongs pa ni/ rtogs pa yod pa min na der zhes bya ba la sogs pa'i tshigs su bcad pa gnyis so/ /rang gi ngo bo nyid mngon du byed pa ni nye ba na gnas pa ma yin pa las ma yin par ci las shes she na/ gang zhig rang gi ngo bo yin/ /zhes smos pa'o/ /lkog tu gyur pa ma yin pa mngon du byed pa ni mngon sum yin la/ de yang yul nye ba can nyid do zhes bya ba'i don to/ /nye ba na gnas pa ma yin pa de yang yang dag pa ma yin pa'i phyir mngon du byed pa ma yin pas lkog tu gyur pa yin no zhes bstan pa ni/ rang gi ngo bo med pa la zhes bya ba'o/ /rtogs pa tsam ni yod pa yin la/ ma rtogs pa tsam ni med pa yin par dmigs pa ni yod pa nyid de/ dngos po'i rung ba nyid ni mtshan nyid do zhes bya ba 'dis brjod pa yin par bstan pa ni/ gang phyir dmigs pa yod pas de/ /zhes bya ba'o/ /mngon du byed bzhin pa nyid kho na ni yod pa ma yin te/ rjes su dpag pa dang bya ba med par thal bar 'gyur ba'i phyir ro/ /de'i yang rjes su dpag pa'i yul rtogs pa yin pa'i phyir yod pa yin te/ de la brten pa yang rung shes pa skye bar 'gyur ba 'chad pa gang yin pa'o/ /nye ba na gnas pa ma yin pa rtogs par ni mi rigs te/ rjes su dpag pa med par thal bar 'gyur ba'i phyir ro/ /'jug pa'i yul gyi dngos po la ltos pas kyang rjes su dpag pa ni 'khrul pa med pa yin la/ de yang 'byung bar 'gyur ba yin pa'i phyir ma rtogs pa nyid yin no snyam du sems pa la/ rtogs pa tsam gyi dngos po ni zhes bya ba la sogs pa'o/ /des na 'jug par byed pa ma yin pa'i phyir tshad ma nyid ma yin zhes de ltar shes par bya ba ni gzhung 'di'i rnam par dbye ba'o/ /re zhig rig las byung ba la rtogs pa ni rjes su dpag pa ma yin te/ gzhan rtogs pa la 'brel pa med pa'i phyir la sgra las byung ba ni ma yin te/ de yang phan tshun 'gal ba shin tu mang ba can yin pa'i phyir 'di la 'di tshad ma yin gyi gzhan ma yin no zhes bya ba'i rnam par dbye ba'i rgyu mtshan ma yin no/ /de'i so sor snang ba la ma 'khrul pa la sogs pa yod pas rang gi 'dod pas dam 'cha' ba yin la/ rtogs pa ni dam 'cha' ba 'grub pa la yin yang gzhan gyi 'dod pa rnams kyis rnam par 'byed pa'i rgyu mtshan gyis sbyor bar byed pa ma yin pa nyid don la ma 'khrul pa la ma yin par smra ba ni/ rig byed nyid las zhes bya ba'o/ /de la skyes bus byas pa ma yin pa'i phyir dbang po bzhin du rig byed pa ni 'khrul pa med pa yin la/ gzhan la ni skyes bu rnams kyi skyon la brten pa'i phyir don la reg pa med pa nyid yin no/ /de yang / re zhig sgra las skyon byung ba/ /smra ba po la rag las gnas/ /zhes smos pa'o/ /dbang po kho na bzhin du skyes bus byas pa ma yin pa nyid la 'brel pa med pa la sogs pa'i skyon yang rang bzhin gyis yod pa ma yin nam/ skyes bus byas pa ni skyes bu'i skyon med pa'i phyir tshad ma yin la/ dbang po ni skyes bu'i skyon med pa las tshad ma yin te/ rang la yod pa'i skyon gyis kha cig tu tshad ma ma yin pa'i phyir ro zhes bstan pa ni/ 'jig rten rjes 'brangs zhes bya ba'o/ /smra ba po nyid ni skyes bus byas pa yin la/ skyes bu rnams tha snyad 'dogs pa na drung na 'dug pa de rang bzhin gyis go ba 'di yang gtam tsam yin te/ sngon byas pa nyid la de bzhin du rtogs pa'i phyir ro/ /tshad ma yang 'dir du ba bzhin du ma rtogs pa yin la/ de bzhin du me'i sgra'i don 'di nyid khyed kyis ji ltar shes zhes dris pa na/ de shes pa yin zhes skyes bu gzhan tshad mar byed la de yang gzhan las yin pa'i phyir long ba gcig la gcig lta bu yin gyi/ de lta bu ni de kho na nyid rnam par gzhag pa ma yin no/ /de'i rjes su 'brang ba nyid kyis rig byed kyi don rtogs pa ni 'dod pas bslad pa bzhin du ji ltar rnam par bslad pa ma yin zhes bstan pa ni/ 'jig rten na zhes bya ba la sogs pa'o/ /tshig rnams ni tshig gzhan gyi don dang 'brel pa'i don rtogs par byed pa'i dag ma yin nam/ de rnams kyang de ltar 'jig rten la rab tu grags pa yin pa la yang skyes bu rnams rang gi skyon gyis nye bar bslad par byed pa yin no/ /rig byed la ni skyes bus byas pa ma yin pas gzhan du byed pa ma yin pa'i phyir dang / 'jig rten pa nyid kyis ni brjod byar bstan pa tsam 'jig rten gyi rjes su 'brang ba yin pas ji ltar nye bar bslad pa yin snyam du sems pas de la rmongs pa zhes bya ba la lan du der yang zhes bya ba ste/ rig byed kyang gal te 'brel pa can gyi don yin zhes zer na/ gang zhig gang dang zhes ma rtogs pa ste rang gi don gyi bye brag mi shes pa'o/ /'jig rten la grub pa'i rjes su 'brang ba yin na sgra ni 'jig rten pa'i don dang 'brel pa rjes su 'brang bas 'jig rten bzhin du rig byed kyang rnam par bslad par 'gyur bar 'jig rten na zhes bya bas bstan pa yin no/ /de la 'brel pa dang sgra yang 'jig rten pa'i rjes su 'brangs pa las yin na/ ches shin tu bslad par dogs par 'gyur ro zhes bstan pa ni 'jig rten zhes bya ba ste/ 'jig rten dag la gang dag kho na 'jig rten pa yin pa de dag kho na rig byed pa'i sgra'i don yin no/ /'jig rten pa'i rang gi don la goms pa snga ma snga ma'i rjes su 'brangs pas rig byed las don rtogs pa yin na ni 'ga' yang don la so sor nges par mi 'gyur zhes bya ba'i don to/ /skyes bus ma byas pa nyid ni don so sor nges pa'i yan lag ma yin no zhes bstan pa la mchod sbyin la sogs pa'i dngos po rtogs pa'i don du skyes bus rang nyid kyis mi nus pas ma gtogs pa'i don gsal bar byed pa nyid la rig byed tshad ma nyid ma yin no snyam pa'i bsam pas gal te rig byed ces zer ba la/ lan du 'di ni lung thams cad la zhes bya ba ste/ tshig gi don tsam du sbyar ba ni lung gzhan bzhin du skyes bus nus pa'i phyir/ skyes bu'i don gyi rjes su 'jug pa ma yin pa 'ga' yang gzhan na med do zhes bya ba'i don to/ /rig byed kyi don ni khyad par can du ma yin pa ma yin nam/ de rnams ni skyes bu med pas btang nas skyes bus byas pa la gus shing nan tan du byed pas ngag gcig pa nyid kyang ma yin no/ /de nyid kyis na 'khrul pa med do/ /de yang / chos kyi rtsa ba rig byed do/ /zhes smos pas/ dam pas brtsi ba min zhes zer ba la/ lan du phan tshun brten pa zhes bya ba smos te/ de rnams la ni rig byed kyi don skyes bu'i don dang 'brel par rtogs par nus pa med de/ rigs pa stong rig pas ji ltar ma mthong zhes bya ba yang lung thams cad kyi rigs pa rtogs par mtshungs pa yin te/ rig byed nyid las rtogs pa'i nges pa med pa'i phyir bsal ba yin pas phan tshun brten pa yin no/ /des na bram ze rnams kyang rig byed las don byed pa'i rim pa'i byed pa po ma yin no/ /bstan bcos gzhan la smod par byed pa'i gzhi med do/ /rigs las khyad par can dang khyad par can ma yin pa nyid ni skyes bu'i don nyid rig pa la dgongs pa ma yin zhing / tshad ma can nyid kyang ma yin par bstan pa ni/ bram ze skye gnyis pa dag kyang zhes bya ba'o/ /rigs gsum po rnams kyi 'khrul pa srid pa ma yin no zhes bya ba la sogs pa ni mi rigs te/ 'gal ba ma grub pa'i phyir ro/ /de kho na nyid shes pa ni 'khrul par 'gal ba yin no/ /rigs te rigs gsum po nyid ni rus te/ tshangs pa'i bu rnams ni bram ze rnams so/ /de bzhin du thos pa la tshangs pa'i kha las ni me dang / mi rnams las bram ze rnams sprul pa yin no/ /khyad par can dang rig byed dag ni don mngon du byed pa dang / nyams su myong ba dag tu grub pa ma yin te/ phan tshun brten pa 'bras bu yin pa'i phyir ro/ /de zhes bya ba'i sgras bstan to/ /rig byed kyi mngon du byed pa las khyad par can nyid ma yin te/ 'o na ni ci zhe na/ de spyod pa las so/ /de lta na mi shes pa rnams la dad pa med pa'i phyir ji ltar 'di de'i don nyid shes pa yin zhes bstan pa ni/ dam pa rig byed don spyod las/ /zhes bya ba'o/ /don dang 'brel pa can ni tshad ma yin la/ khyad par can gyi rigs gsum po nyid don dang 'brel pa la sbyor bar byed pa ma yin te/ ma nges pa yang yin par bstan pa ni/ skye gnyis pa dag kyang zhes bya ba'o/ /de rnams ni 'khrul pa mi srid pa'i phyir ro zhe na/ sdig pa la zhes bya ba smos te/ de kho na nyid shes pa dang / 'khrul pa ni 'gal ba yin gyi rigs gsum po nyid kyi 'khrul pa ni bkag pa ma yin no/ /lung gzhan 'khrul pa nyid yin pas tshad ma nyid ma yin la/ 'jug pa rnams ni skye gnyis pa nyid ma yin no zhe na/ phan tshun brten pa yin no zhe na/ bstan pa ni sdig las zhes bya ba'o/ /'khrul pa nyid dang khyad par can gyi rigs gsum po nyid du mi 'grub ste/ tshad ma med pa'i phyir ro zhes bstan pa ni/ rigs dang rus dang zhes bya ba ste/ rnam pa 'chol pa zhes bya ba ni ral pa can dang / 'dam 'byin la sogs pa'o/ /rus kyi mtshan nyid skye ba gnyis pa nyid yin pa nyid gsal ba yin no/ /thu yu zhes bya ba la sogs pa la gdams ngag la ltos pas mngon sum du nges pa ma yin par bstan pa ni/ mngon sum don la gzhan gyi ni/ /zhes bya ba ste/ sa 'og dang 'dra bar nam mkha' mthong ngo zhes bya ba'i rigs pa las so/ /mngon sum ni nges par byed pa ma yin la/ gdams ngag ni gdams ngag tu bya ba la nges pa yin gyi/ de bzhin du ni ma yin no snyam du sems pa la/ gdams ngag yod pa'i zhes bya ba smos te/ mngon sum tsam bzhin du gdams ngag yod pa tsam yang the tshom can nyid yin no zhes bya ba'i don to/ /gdams ngag gi bye brag nges pa can yin na/ mngon sum gyi bye brag kyang yin par bstan pa ni/ gal te bram ze zhes bya ba'o/ /mngon sum tsam du sems na gdams ngag tsam yang mtshungs pa yin no zhes bya ba bstan pa ni/ de lta yin no zhe na ni zhes bya ba'o/ /de lta na yang ut+pal sngon po bzhin du gnyi ga yin na ma 'khrul pa can yin no snyam du sems pa la/ de nyid kyi phyir zhes bya ba smos so/ /ut+pal dang sngon po dag ni phan tshun ltos pa ma yin te/ rang gi yul la rnam par 'jog pa yin yang mngon sum dang gdams ngag dag ni de lta ma yin te/ yul nges pa ma yin pa'i phyir ro zhe na/ gdams ngag med par zhes bya ba smos so/ /mngon sum la nges pa ma yin pa'i skad cig ma yang sngon pos nges pa la rjes su dpog par byed do/ /de bzhin du rigs kyang skyes bu mngon sum du gyur pa las der ma nges pa gdams ngag las dpog par byed pa yin no snyam du sems pa la gal te don grub ces bya ba smos te/ mngon sum gyi sngon po tsam du nges pa la/ de skad cig ma nyid du ma nges pa la rjes su dpag pas skad cig ma nyid du dpog par byed pa ma yin te/ skad cig ma nyid ma yin pa bzhin du de dang 'gal bas gzhi ma grub pa bzhin du go bar byed pa ma yin pa'i phyir ro/ /de bzhin du rigs pa dang bral ba'i dngos po mngon sum pa dang de sgrub par byed pa'i gdams ngag 'gal ba can yin zhes bya ba'i don to/ /mngon sum gyi dngos po tsam du rtogs pa la rjes su dpag pa dang gdams ngag gis skad cig ma nyid dang / skye ba gnyis pa nyid du yang rtog par byed do zhes bya ba ma nyams par cis mi 'gyur snyam du sems pa la/ re zhig dang por zhes bya ba smos te/ skad cig ma nyid dang rigs dang bral bar yang rtogs pa yin na mngon sum gyis sam gzhan gyis kyang rung ser po las sngon po bzhin du de dang ldan par rtogs par mi nus so zhes bya ba'i don to/ /des na gzhan gyis zhes bya ba de dang 'gal bas tshad ma gzhan la ltos pa yin no zhes bya ba'i don to/ /de'i phyir rjes su dpag pa'am gdams ngag kyang rung mngon sum gyis bcad pa nyid la nges par byed pa yin gyi de dang 'gal ba can ni ma yin te/ mi nus pa'i phyir ro zhes bstan pa ni/ gal te mngon sum gyis ma rtogs na zhes bya ba'o/ /'on te gdams ngag las dbang po las 'das pa'i rigs kho na can rtogs pa yin no zhe na/ ma shes par zhugs pa zhes bya ba smos te/ skyes bus byas pa ma yin pa las don rtogs pa ma yin te/ nges pa med pa'i phyir ro/ /skyes bus byas pa ni mngon sum la sogs pa la ma ltos par don rnams la tshad ma ma yin te/ nus pa med pa'i phyir ro zhes bya ba'i don to/ /rigs rgyun ma chad par ni dran pa rnam par ma chad pa las shes pa ma yin nam/ bu ni pha las pa yang rang gi pha las de yang rang gi pha las yin no snyam du sems na/ rus ni rnam par ma 'chad pa'ang / /zhes bya ba smos te/ des ma yin ni nges par ma gyur pa'o/ /rang nyid kyi pha nyid kyang dbang po las 'das pa yin pa'i phyir su yin pa'i nges pa med na de'i rus ji ltar nges pa yin/ dran pa ni sgro btags pa la sogs pa 'ga' las kyang 'khrul pa yin pa'i phyir sgrub par byed pa med pa yin no/ /rigs 'chol bar gsal ba nyid ni rnam pa chad pa yin par bstan pa ni/ su tA zhes bya ba ste de mthong ba las ma 'ongs pa'i phyir ma mthong ba la yang the tshom za ba kho na yin par bstan pa ni zhes bya ba'o/ /'di las 'di skyes par de'i mas shes so zhe na/ de ji ltar rang gi skyon bsal bar ston par byed/ de'i phyir de'i tshig ni yid ches par bya ba ma yin par bstan pa ni/ 'di ni thogs med ces bya ba'o/ /rig byed kyi don dang 'brel pa ma yin pa phyis 'brel pa yin na/ sgra dang don rtag pa yin la/ de ji srid gnas par 'brel pa yang rtag par 'gyur ba'i phyir 'gal ba nyid yin par bstan pa ni/ don med pa'i rig byed ces bya ba ste/ brdar byas pa can yang phyis ji ltar 'gyur/ 'brel pa can ma yin pa yang brda 'am gzhan las kyang rung / 'brel pa can du mi 'gyur ro snyam du sems pa la/ bya ba med pa'i rang bzhin ni zhes smos so/ /brda las 'brel pa can du 'gyur ro zhes smra ba ma yin nam/ 'o na ji lta zhe na/ brda yod pa yin na de'i bag chags sad pas brdar byas pa'i yul dran par 'gyur ba yin no/ /sad pa yang sgra kho na las ni ma yin te gzhan 'ga' las 'bad pa la sogs pa las kyang 'byung ba'i phyir ro/ /de ltar yang tshad ma rnam par nges pa las/ de las 'di rnams la lar cung zad kyang ma grub pa nye bar blangs pa med do zhes smos pa'o/ /mi rtag pa ni res 'ga' bar rang bzhin gyis 'gyur ba yin par bstan pa ni/ don yod pa dang med pa na zhes bya ba ste/ rig byed las don byed pa la don ni don dam pa'o/ /tshul ni lam mo/ /byed pa ni byed bzhin pa zhes bya ba ji ltar tha snyad mi bslu ba yin/ ma rtogs pa'i don gsal bar byed pa nyid do/ /'ga' zhig ni zhes bya ba ni rigs gsum po las gzhan pa ni de kho na nyid du don dang 'brel pa sgrub par byed pa ma yin te/ ma nges pa'i phyir ro zhes bya ba'i don to/ /mngon du byed pa dang 'brel pa rtogs pa med na rtogs pa tsam yin pa'i phyir tshad ma ma yin no zhes bstan pa ni/ yongs su ma brtags pa'i phyir zhes bya ba'o/ /spyi las rtogs pa yin na bye brag las rjes su bsgrub par bya ba yin zhes bya ba la sogs pa ni gsal ba yin zhes bstan pa ni/ grub pa ni gzhan la zhes bya ba ste/ gzhan du rtogs pa la gzhan la rjes su bsgrub pa ma yin la/ rtogs pa nyid rang gi ngo bos rjes su bsgrub pa yang ma yin te/ grub pa'i phyir ro zhes 'chad par gyur pa la yang blta bar bya ba'o/ /mthar thug pa med na 'jug pa'i mtshams med pa'i phyogs don med pa yin no zhes zer ba ni/ 'on te zhes bya ba la sogs pa ste/ mi bslu bar bya ba nyid ga las she na/ nges par sbyar ba dang bral ba zhes bya ba ste/ rtogs pa'i dus su yang yul nges par sbyar bya nyid rtogs par byed ces bya ba'i don to/ /yul nges par sbyar bya ma gtogs par nges par sbyor bar mi 'gyur bar ci las shes she na/ smras pa/ gang phyir nges sbyor 'dzud byed kyi/ /zhes bya ba ste/ yul la 'dzud par byed par 'gyur pa ni 'bras bu nyid do/ /rtogs bzhin pa ni 'dzud par byed pas byas pa yin pa des na/ de ni gzud par bya ba la ltos pa yin te/ 'bras bu mthong ba las zhes zer ba ni/ nges par sbyar bya'ang zhes bya ba ste/ de lta bu'i nges par sbyor ba de yang zhes bya ba nas mi 'gyur ro zhes bya ba'i bar ni rgol ba ste/ rang gi bya ba sgrub par byed par bsgrub pa yin no/ /phan tshun 'brel pa yang 'jug pa 'phen par byed pa nyid kyis nges par sbyor ba la nges par sbyor ba gzhan gyi don rtogs par 'gyur ro zhes bstan pa ni/ khams kyi don la sogs pa zhes bya ba'o/ /gzhan gyi ngo bos ni thun mong bas sam sgro btags pas kyang rung rtogs pa yin no zhe na/ gzhan gyi ngo bor zhes bya ba smos te/ gzhan gyi ngo bo zhes bya ba ni spyi rtogs pa ni ma yin zhes spyi ni dngos po thams cad kyi zhes bya ba der bstan zin to/ /sgro btags pa ni dngos po yod pa ma yin pa la rnam par rtog pas byas pa'i zhes pas phyi rol du rtogs pa ma yin no zhes bya ba 'di la yang spyi bzhin du thal bar 'gyur ro/ /gzung bya'i rnam pa'i rang rig pas rtogs pa yin yang de'i rtogs pa ma yin par bstan pa ni/ gzhan ni gzhan ngo bor zhes bya ba'o/ /'di ni chu yod ces bya ba'i gzung ba'i rnam pa'i de kho na nyid du mngon par sems par byed pa ni rtogs pas yin par smra ba ni de lta yin dang zhes bya ba'o/ /de rnams rtogs pas bsres pa yin zhes pa'i rigs pas rtogs pa nyid de lta bu'i bya ba rnams gzung ba'i rnam pa las shes par bya ba'i khongs su gtogs pa yin zhes bya ba'i don to/ /de bzhin du bya ba rtogs pa yin na phyi rol du snang ba ma yin yang de las gzhan par mngon par nga rgyal ba med pa'i phyir gzhan sel ba rtogs pa yin par bstan to/ /des na yang phyi rol la 'jug par bstan pa ni gzhan sel ba'i zhes bya ba'o/ /gzung ba'i rnam pa yang rang rig pa ma yin nam/ phyi rol bzhin du mngon par brjod pa las byung ba'i shes pa'i yul ni ma yin no/ /phyi rol nyid du zhen pa'i yul nyid du zhen pas sgro btags pa'i brjod bya yin te/ tshad ma rnam par nges pa las/ rang gi so sor snang ba ni don ma yin pa la don du zhen pa zhes smos te/ don ma yin pa nyid ni sgro btags pa nyid ni gzung ba'i rnam pa las gzhan ma yin no zhes bstan pa ni/ mchod sbyin la sogs pa gyis shig ces bya ba'o/ /phyi rol gyi don byed pa ni sgra las nges par byed pa yin gyi sgro btags pa ni ma yin no/ /de nyid kyis ni 'jug pa yin gyi sgro btags pas rang dbang du gtogs pa yin na ni phyi rol la 'jug pa ma yin no/ /tshad ma rnam par nges pa las/ 'di ni bum pa zhes shes la kha dog snang phyir ro zhes smos pa'o/ /sna tshogs pa nyid ma rtogs pa ni sgro btags pa'i phyi rol nyid do zhes pa'i mngon par zhen pas 'jug pa yin na/ gzung ba'i rnam pa nyid kyi phyi rol du zhen pa ni btags pa pa yin la/ gzhan gyi ni phyi rol nyid du sgro btags pa nyid yin yang de la yang gzhan nyid yin gyi phyi rol ni ma yin la/ slar yang btags pa yang gzhan nyid yin na thug pa med pa'i phyir rtogs pa med pas phyi rol la 'jug pa med do/ /rtogs pa yin na yul ni de'i bdag nyid kyis phrad pa yin zhes bya ba'i don to/ / phyi rol gyi shes pa yin na de nyid rtogs pa dang 'jug pa'i yul yin du zad mod/ gzung ba'i rnam pa 'dzin pas ci zhig bya ba bstan pa ni byed pa po nyid kyang zhes bya ba ste/ rtogs pa po tsam yin gyi nye ba na gnas pa ma yin zhes bya ba'i don to/ /gang dag byung gyur de nyid las zhes bya ba'i rigs pas de nyid ji ltar ma yin zhe na/ rtogs pa'i dus na zhes bya ba smos te/ byed pa po ma yin pa las cig shos ni gzhan yin no zhes bya ba'i don to/ /de lta min na bya ba'i dngos po nye ba ma yin pa nyid rtogs par byed pa ni sgra yin te/ de yang / yang na gang zhig smra ba po/ /zhes rang dbang du brjod pa ste snyam du sems pa la/ sgras sngar ma rtogs pa zhes bya ba smos te/ 'brel pa ma bzung bar ni sus kyang sgra las don rtogs pa ma yin no/ /'on te tshig nyid ni ngag ma yin te/ tshig gi don las 'brel pa mi shes pa rnams the tshom dang ldan pa rnams las ngag gi don shes pa yin gyi/ de'i 'brel pa 'dzin pa la ltos pa ni ma yin no snyam du sems pa na/ gang gis sngar zhes bya ba smos so/ /byed pa po'i tshig las bya ba dang bcas pa'i tshig gi don sngar rtogs pa kho na rtogs bya yin gyi gzhan du ni ma yin te/ byed pa po nyid du mi 'thad pa'i phyir ro/ /de lta yin dang byed pa po yang 'phangs pa yin no/ /de ltar sngar dmigs pa'i phyir ro/ /de bzhin du 'phangs pa'i bye brag can ni nye ba na gnas pa'i bya ba 'phen pa yin par ci las shes she na/ de bzhin du sngar dmigs pa'i phyir te/ de lta na nye ba ni gnas pa dang rung ba la ltos pa nyid ni tshogs pa ste/ de nyid ni de las gzhan pa las tha dad pa yin zhes bya ba ni sngon dang phyi ma nyid do/ /des na ngag gi don yang sngar mthong ba la brten pa nyid du shes par bya zhes bya ba'i don to/ /sngar mthong ba'i rjes su 'brang ba med na sgra las rtogs pa yang med pa kho na yin pa'i phyir sgro btags pa'am/ phyi rol yang rung rang dbang du 'dzin pa ma yin par bstan pa ni gzhan ni ma yin no zhes bya ba'o/ /snga ma'i rjes su 'brangs nas mthong ba dang snang bzhin pa thun mong pa nyid kyis rtogs pa yin gyi/ thun mong ma yin pa'i yul can ni ma yin te/ thun mong ma yin pa ni dngos po yin te/ de ma thag tu dmigs pa dang gzhan pa'i dngos po'i don byed par mthong ba'i phyir ro/ /de yang de ma yin pa las log pa'i ngo bo'i rjes su 'brang ba can ni thun mong ba'i shes pa yin te/ rang gi snang ba'i rnam pa don med pa don las gzhan pa la gcig nas gcig tu brgyud pa don mthong ba las 'ongs pa la don nyid du mngon par zhen pas skyes bu 'jug par byed pa'i phyir cha gang gis dngos por 'gyur ba ma yin pa des der mngon par zhen pas 'jug par byed pa yin pa'i phyir gzhan sel ba'i yul can du bstan pa yin no zhes bstan pa ni/ snga ma'i rjes su 'brangs nas zhes bya ba smos so/ /nges pa can las skyes pa'am/ nges pa can gyi sgra las skyes pa yang rung ba'i rnam par shes pa yang gzhan las log pa'i ngo bos 'jug pa'i yul ni dngos po yin par rnam par gzhag pa yin na gzhan sel ba'i yul can du 'gyur ro/ /'di ni tshig tsam las byung ba dngos po la reg pa ma yin pa'i snang ba ni 'jug pa'i yul la de ltar rjod par byed pa'i phyir ji ltar gzhan sel ba'i yul can yin snyam du sems pa la mi 'da'o zhes bya ba smos te/ nges pa can las byung ba la sogs pa nyid gzhan sel ba'i yul can yin par ni bden mod kyi/ 'di ni de lta bu ma yin yang brgyud pas dngos po mthong ba sngon du 'gro ba can yin pa'i phyir de ltar bstan par nus pa yin no zhes bya ba'i don to/ /sngar mthong ba'i dngos po rnams bsgrub bya nyid dam/ sgrub byed nyid kyis rjes su 'brangs nas tshig gi dngos po la reg pas dngos su bya ba'i bsgrub bya dang / sgrub byed nyid kyis ngo bos rtogs par byed pa ma yin nam/ de dag tsam gyis ltos pa dang bcas pa 'jug pa yin gyi 'jug pa'i yul mtho ris sgrub par byed pa la/ de'i byed pa po nyid dam tshad mar bstan pa la mi 'jug pa ni ma yin no snyam du sems pa la thams cad du zhes bya ba smos te/ gal te yang 'dod par bya ba yin pa'i phyir mtho ris ni bsgrub bya nyid yin la skyes bu'i bya ba'i bye brag yin pa'i phyir mchod sbyin ni sgrub byed nyid yin par sngar rtogs pa yin yang / 'di dag phan tshun 'brel pa'am/ rang bzhin gcig pa'i 'brel pa yang rung ba sngon du mngon sum las sam/ gzhan las kyang rtogs pa ma yin te/ de nyid kyis na 'dod pa tsam gyis bsdus pa'i tshig gi don rnams kyi tshogs pa 'di ni 'khrul pa yin te/ mo gsham gyi bu 'gro ba bzhin du snang ba tsam yin no/ /skyes bus byas pa ma yin pa la bsdus pa ma yin par ji ltar shes pa yin zhe na/ tshig gi don rnams ni 'jig rten gyi rjes su 'brangs nas rtogs pa nyid ni bsdus pa rtogs pa'i rgyu mtshan nyid yin gyi/ rig byed skyes bus byas pa ma yin pa ni ma yin te/ don gyi bye brag la rjes su sbyor ba ma yin pa'i phyir zhes bya ba'i don to/ /thams cad du zhes bya ba ni skyes bus byas pa'am skyes bu byas pa min pa yang zhes bya ba'i don to/ /byed pa por rtogs pa zhes bya ba ni mthong ba'i rjes su 'jug pa'i tshig gi don rtogs pa yin gyi/ 'dus pa'i bye brag ni ma yin te/ de la mngon sum la sogs pa'i tshad ma mi 'jug pas so zhes bya ba'i don to/ /byed pa po nyid la sogs pa rnams kyi yang tshig don du bstan pa ni mngon sum la sogs pa'i yul nyid yin pa'i phyir sngar mthong ba'i rjes su 'jug pa can ma yin par bstan pa ni mngon sum las ni sngar byed pa po nyid du rtogs pa yang ma yin te zhes bya ba'o/ /nye ba na gnas pa'i dngos po'i rang bzhin tsam 'dzin pa'i mngon sum yin pa'i phyir yul dang dus gzhan du 'byung bar 'gyur ba ni gzhan bye brag can gyi ngo bo'i bsgrub bya nyid dam/ sgrub byed nyid du mi rung bas de'i bye brag gi ngo bo yang mi rung ba'i phyir 'dzin pa yang ma yin zhes bya ba'i don to/ /gal te yang mngon sum gyi bya ba ni don mthong bar byed pa la gnas pa yin pa'i phyir/ don byed nus pa'am gzhan de med pa yang mthong bar byed pa ma yin te/ don mthong ba yin yang gzhan las mi srid pa thun mong ma yin pa'i don byed pa dmigs pa gnyis po de dag gis bya ba'i rjes su 'brang ba'i nges pas dmigs pa'i don ni nus pa can nyid yin par rnam par 'jog par byed la/ dus gzhan du don byed par mi dmigs pa yang de nyid kyi ngo bo'i rjes su 'brang ba rnams nus pa can yin par nges par byed pa ni gnod pa can med na'o/ /yod na ni nus pa can ma yin te/ rmi lam lta bu yin no snyam du sems pa la/ tha snyad pa'i mngon sum zhes bya ba smos te/ nyams su myong ba'i don tsam ni bya ba'i mthar thug pa yin te/ yod pa'am med pa'i rnam par dbye ba byed pa ni ma yin gyi/ dbye ba byed pa ni de'i rjes su 'brang ba'i nges pa pa yin la de nyid dbye ba byed pa yin zhes smra ba ni/ btags pa pa'i nyams su myong bas grub pa nyid du smras par 'gyur ro zhes bya ba'i don to/ /nges par sbyor ba ni rang dbang dang cig shos nyid kyis rnam par dpyod nas rang gi ngo bos dpyod pa ni rung ba nyid ni dbang byed pa can nyid ma yin te/ 'on kyang nges par sbyar ba nyid yin no snyam du sems pa la/ dpyod pa'i yul las zhes bya ba smos te/ rnam dpyod la ni dpyod rnams kyi/ /zhes bya ba ni/ lung phog pa'i sgrub pas 'phangs pa'i rnam par dpyod pa la 'jug pa la yang slob dpon gyi man ngag la sogs pa thabs ma yin pa nyid kyis gus par bya ba nyid ma yin zhes bya ba'i don to/ /'bras bu dag pa'i zhes bya ba la sogs pas ni nges par sbyor ba'i rnam par rtog pa rnam pa bcu gnyis te/ skyes bu'i 'jug pa 'phen par byed pa nyid du nges par sbyor ba'i mtshan nyid la bye brag med pa'i phyir ro/ /de yang skul byed ces bya ba la 'jug par byed pa tshig yin te zhes bya ba ni 'di'i don to/ /des na yang 'bras bu mngon par brjod pa nyid nges sbyor yin par 'jig rten du rtogs pa zhes bya ba ni de las de tha snyad las so/ /da ltar ba'i 'bras bu'i yul la nges par sbyar ba dang 'brel pa sgrub ces bya ba'i don yin la/ de la mngon par rjod par byed pa 'dis nges par sbyor bar byed pa ni/ nges sbyor te ling nga la sogs pa'o/ /des na yang zhes pa'i yang ni go rims bzlog pas 'jig rten du yang zhes bya bar sbyar ro/ /des na 'jig rten du rig byed la yang zhes gsal bar byed pa yin no/ /de nyid bstan pa ni/ gang phyir nges sbyor rkyen don dang / /zhes bya ba'o/ /'jug pa'i yul yin pa'i phyir 'bras bu'i sgras brjod pa yin par smras pa ni 'bras bu'i rang bzhin zhes bya ba'o/ /ling nga la sogs pa'i don ni 'dzud par byed pa la sogs pa'i ngo bo ma yin nam/ gzhan ni ma yin no zhe na/ de yi khyad par gzhan dag ni/ /zhes bya ba smos te/ de'i bya ba'i ngo bo 'dzud byed ni de las tha mi dad pa yin te/ shing gi 'bar ba lta bu'o/ /de ni 'dzud par byed pa la sogs pa bzhin du bye brag nyid ni 'bras bu'i khongs su gtogs pa ma yin no zhes zer ba ni/ 'dir ni de'i khyad par du/ /'dod pa'i 'dzud byed ces bya ba smos te/ 'dzud par byed pa'i dngos po'i bya ba ni 'dzud byed yin zhes bya ba'i don to/ /'dzud byed nyid ni skyes bu'i bya ba ste/ bya bar 'os pa nyid kyi khongs su gtogs pa yin te/ 'bras bu ni nges sbyor ma yin te/ de'i rang bzhin med pa'i phyir ro zhes zer ba ni/ 'dzud byed dag pa nges sbyor du/ /zhes bya ba ste/ thams cad du gtong ba dang / mchod sbyin gyi zhes bya ba la sogs pa ling nga dang la sogs pa yang ngo / /'dzud byed dang de'i bdag nyid kyis 'brel pa nyid 'bras bu'i gtso bo yin pa'i phyir nges sbyor du brjod do zhes zer ba ni/ 'di ni nga'i 'bras bu zhes bya ba'o/ /'bras bu dang de'i bdag nyid kyis 'brel pas gtso bo yin pa ni nges sbyor yin no zhes zer ba ni/ 'dir ni 'gar yang 'bras med par/ / skyes bus bskul bar bya ba min/ /zhes bya ba'o/ /da ni sgrub pa'i don las gzhan pa'i bsgrub bya de nyid kyis 'bras bu'i sgra'i brjod bya bzung ba nyid yin zhes zer ba ni/ 'bras bu 'dzud byed yul yin gyi/ /zhes bya ba ste/ bsgrub pa'i don gyi bya ba'i yul ni las yin pa'i phyir 'bras bu yin te/ yul gyi ngo bo nyid du sgro btags pa nyid ces bya ba'i don to/ /de nyid kyis na yul la yul can du nye bar btags nas yin par blta bar bya'o/ /sgrub pa'i don ni rang gi bya ba ni bya ba dang de dang ldan pa dag tha dad pa las tha dad pa'i rang gi bya ba'i yul lam/ gzhan yang rung ba la ltos nas 'jug pa'i yul nyid kyang de lta de ltar bstan pa yin gyi/ de bzhin ling la sogs pa rnams kyis rtogs pa ni ma yin no/ /de'i phyir yod pa gcig po de nges sbyor tha ma thams cad kyi rjes su 'jug pa yin te/ ling la sogs pa'i brjod bya ma yin zhes zer ba ni/ gang phyir grub cig tshangs pa ni/ /zhes bya ba'o/ /yul la brten pa'i skyes bu ni 'khrul 'khor la gnas par bstan pa yin nam de nyid kyang / 'di ni nga yi spyad bya zhes/ /zhes bya bar yang rtogs par byed pa yin no snyam du sems pas/ longs spyad bya ba skyes bu la/ /ltos nas bsgrub bya nyid du gnas/ /de nyid kyis ni gnyis las gcig /'jug byed yin pa ni gzhan las ma yin pa'i phyir zlos pa ma yin no zhes zer ba ni/ 'di ni nga yi spyad bya zhes/ /zhes bya ba'o/ /de bzhin du longs spyad par bya ba la ltos nas longs spyod par byed pa'i skyes bu bstan pa yin zhes zer ba ni 'di nga'i 'bras bu zhes bya ba'o/ /gzud par bya ba la sogs pa la gcig gi ngo bo yang nges pa can du go bar bya ba ma yin no/ /des na rnam pa brgyad du 'gyur ba'i phyir rnam rtog gis byas pa yin no zhes bstan pa ni/ nges par sbyor ba tshad ma'am ci zhes bya ba ste/ de lta bu'i rnam par rtog pa rnams las gcig gi ngo bo yang 'gal ba can du ma mthong ba yin zhes bya ba'i don to/ /'bras bu dag pa la sogs pa'i phyogs bsal nas bsdus pa'i nges sbyor gyi phyogs sun dbyung ba'i don du/ 'bras bu 'dzud byed dang bral ba zhes bya ba smos te/ 'dzud par byed pa ni skad kyi dbyings kyi yul nyid kyis 'dzud par bya ba tshogs par byed pa nyid kyi 'jug pa la ltos par byed pa nyid yin no/ /yan 'gar ba ni 'jug par byed pa yang yin pa'i phyir 'bras bu dag pa ni 'dzud byed dang bral ba nyid kyis 'jug par byed par brjod pa'i nges par sbyor ba'i sgras bstan pa yin no zhes zer ba ni/ gang tshe 'bras bu dag pa la/ /zhes bya ba'o/ /de bzhin du gzud bya dang bral ba'i 'bras bu ni gang la ltos nas 'jug pa'i 'jug par byed pa yin zhes zer ba ni/ gang du skyes bu 'bras bu la/ / zhes bya ba'o/ /'bras bu nyid la 'dzud par byed pa ni skyes bu'i chos yin la/ 'bras bu rtogs pa dag ni rtogs pa las so zhes zer na/ 'jig rten rtog pa'i nges sbyor 'di/ /zhes bya ba smos so/ /'dzud pa po ni 'dzud par byed par bya ba'i ngo bo yin pa'i phyir chos yin la/ de lta na yang de ni 'phen byed ma yin te/ dag pa nyid nyams par thar bar 'gyur ba'i phyir ro/ /'bras bu'i ming ming can la 'dzud pa po'i chos ni 'dzud byed yin no zhes bya ba'i don to/ /'dzud pa po'i bya ba nges sbyor rdzogs par bya ba nyid ni 'bras bur brjod pa yin no zhes zer ba ni/ de nyid 'bras bu nyid yin zhe na zhes bya ba'o/ /grub pa yin yang yul mthar thug pa nyid kyis nges sbyor bsgrub bya yin gyi/ rang nyid 'grub pa la skyes bu 'jug pa la ltos par byed pa nyid ni nges sbyor du bstan pa yin no zhes zer ba ni/ bsgrub bya nyid du nyer brjod ces bya ba'o/ / 'bras bu nges sbyor gyi yul la nye bar btags pa nyid du 'gyur ro zhes bstan pa ni/ de yi yul la nyer btags pas/ /zhes bya ba ste/ btags pa'i nges sbyor nyid kyang 'bras bu yin pa kho nas ri bong gi rwa bzhin du yod pa ma grub pa yin pas 'dzud pa po 'ga' yang med par bstan pa ni/ de ni ma grub pa yin na zhes bya ba'o/ /rtogs pa ni mngon du byed pa yin la rang gi ngo bo ma grub pa la ni mi srid pa yin par bstan pa ni/ bsgrub bya rab tu ma grub dang / /zhes bya ba'o/ /shes pa zhes bya ba ni rnam par rtog pa'o/ /bsgrub pa'i don dang de'i bya ba dag gi ngo bo 'dzud pa po dang 'dzud pa dag gis re res bsdus pa'i phyogs bsal nas da ni nges sbyor de gal te tshad ma yin na gzhal bya yin par mi rigs la/ 'on te gzhal bya yin na tshad ma ma yin te/ 'gal ba'i ngo bo gnyis su dus gcig par mi rigs pa'i phyir ro zhe na bstan pa ni/ gal te nges sbyor dag don na/ /zhes bya ba'o/ /ji ste ngag gi don yin pa des gzhal bya yin na skyes bu ni rdzogs par byed pa nyid yin pas de'i bya ba skad kyi dbyings kyi don gyi yul rtogs par byed pa nyid kyis mchod sbyin la sogs ni de'i thabs yin pa nyid kyis 'dzin pa yin la/ nges sbyor ni 'dzin par byed pa nyid yin pas tshad mar yang 'gyur ba yin no snyam du sems pa la/ gal te nges sbyor de nyid du/ /skyes bu'i zhes bya ba smos te/ ling nga la sogs pa'i sgra dang / 'dzud byed dang skyes bu'i bya ba ma gtogs pa de rnams kyis bsgrub pa'i don 'dzin pa po ni rang dbang ngam gzhan dbang yang rung rtogs par byed pa gzhan ni med do zhes bya ba'i don to/ /skyes bu'i bya ba nges sbyor ni bsgrub bya yin pa'i phyir sgra'i bya ba ni 'jug pa'i yul grub par bya ba nyid yin pa'i phyir la/ sgra'i bya ba ni de nyid kyi tshe sgra nyid kyis sgrub par byed pa nyid kyi phyir de'i sgrub byed du yang mi rigs par bstan pa ni/ de ni sgra nyid las 'gyur bas zhes bya ba'o/ /'on te 'dzud par byed pa'i bya ba ni sgra'i ma yin te/ 'o na ci zhe na/ sgra'i brjod bya'i bsgrub pa'i don gyi yin no snyam du sems pa la/ 'di ni ji ltar sgra las ni/ /zhes bya ba smos te/ sgra las ni de'i brjod bya 'dzud par byed pa'i bya ba dang ldan pa gzhan dmigs pa med pa nyid ces bya ba'i don to/ /'bras bu'i mthar thug pa'i sgra'i bya ba ni nges sbyor yin pa'i phyogs la yang dmigs bya med pa nyid yin par bstan pa ni/ sgra yis bskul na de yi blo/ /zhes bya ba ste/ shes pa'i dus su longs spyad par bya ba med pa'i phyir longs spyod par byed pa po yang de'i mthar thug pa'i ngo bor med pa'i phyir de'i rtogs pa ni dmigs bya med pa nyid yin no/ /gzhan yang de ni ma grub pa yin na/ ji ltar sgrub byed rang bzhin yin/ /zhes bya ba la sogs pa sun dbyung ba rgyas par bstan pa ni/ de bzhin du 'khrul 'khor du zhugs pa la sogs pa zhes bya ba'o/ /gal te 'byung bar 'gyur ba'i rtogs par bya ba ni de'i tshe med pa'i phyir 'jug par mi byed pa yin la/ de'i rtogs pa yang dmigs bya med pa yin na/ mngon sum dang rjes su dpag pa las kyang 'byung bar 'gyur ba'i phrad bya la snang bzhin par zhen pa ni snang ba rtogs pa nyid la de rtogs pa yin par zhen pas 'jug par mi 'gyur te/ de ni med pa nyid kyis dmigs par bya ba med do snyam du sems pas smras pa ni/ rtogs pa'i dus na thams cad ni/ /zhes bya ba'o/ /der yang 'byung bar 'gyur ba'o/ /yod pa ma yin pa ni bden mod kyi nges pa nye bar dmigs par mthong ba 'ba' zhig gi rjes su 'brangs nas/ nges pa'i yul du nges par bzung bas 'jug pa na mi bslu ba dang 'brel pa can yin no/ /des tha snyad pa'i tshad ma nyid du 'di dag tu gnas pa yin no/ /rig byed la ni de lta bu'i nges pa cung zad kyang mthong ba med pas tha snyad pa'i tshad ma nyid du 'dod pa yang ma yin no zhes bya ba'i don to/ /nges sbyor sun dbyung ba ni bya ba la yang yin te/ phyogs snga mar snga ma bstan pa'i phyir sbyar ba'i ched du/ da ni bya ba dpyad par bya'o zhes bya ba smos te/ sgra'i bdag nyid kyi bya ba ni/ kun gyi skyes bu'i don te/ bsgrub par bya ba gang yin pa de la de skad ces brjod do/ /bsgrub pa'i rdzogs pa'i cha nyid kyis rjes su sgrub par 'os pa yin pa ni bya ba'i ngag gi don yin no/ /dgag pa yang 'dod chags la sogs pa la 'jug pa bkag pa la yal bar gnas par mi bya zhes zer ba ni/ sgras ni skyes bu'i bya ba zhes bya ba'o/ /sgra'i bya ba ni 'bras bu'am brjod bya zhes bya ba'i rnam par rtog pa gnyis po sgra'i brjod bya zhes bya ba la sogs pa dang / ci ste rtogs par byed pa po zhes bya ba la sogs pas go rims bzhin du bstan pa las 'bras bu'i phyogs sun dbyung ba bstan pa ni/ gal te sgra'i bya ba yin na zhes bya ba ste/ 'brel pa 'dzin pa ni 'di la du ba bzhin du shes par byed pa'i yan lag la ltos par byed pa yin te/ sgra ni khyed cag gi 'di la bya ba'i byed pa po ma yin zhes bya ba'i don to/ /ci ste 'brel pa 'dzin pa ni 'dzud byed la ltos pa yin la/ 'dzud byed de yang sgra nye ba yin par rtogs pa yin gyi 'das pa ma yin zhing rtag pa ma yin la gzhan las skyes pa yang ma yin te/ sgra las skyes pa yin te/ des na byed pa po nyid kyang shes par byed pa yin pa'i phyir 'brel pa rtogs pa la ltos pa yin no zhes bya ba'i bsam pas/ 'dzud par byed pa dang gsol ba 'debs pa dag kho na ling la sogs pa la ltos pa yin pa'i phyir de dag kyang skyes bu'i bsam pa yin pa'i phyir sgra las skyes pa ma yin zhing / byed pa po nyid kyi yan lag gi brda 'dzin pa yang ma yin la/ gang gi phyir brda 'dzin pa ma yin par bstan pa ni 'dzud par byed pa ni sgra'i byed pa yin la/ bya ba'i skyes bu'i byed pa la 'jug pa'i bsam pa can ni byed pa po ma yin no/ /'dzud par byed pa las bzlog pa ni gsol ba 'debs pa yin no/ /'dzud byed la sogs pa ni bye brag yin te/ thu yu lta bu ma yin nam ling gi don ni spyi yin te ba lang nyid lta bu'o/ /de yang / 'jug byed nyid ni sgra yi don/ /thams cad du ni ma bor phyir/ /zhes smos pa'o/ /'di la/ de ma rtogs na zhes bya ba smos te/ ba lang nyid kyang thu yu la sogs pa las gzhan pa ma yin te/ sgra rnams kyi phyi rol gyi don la de ma yin pa las log pa'i phyir ro zhes bya ba'i dgongs pa'o/ /gsol ba 'debs pa la sogs pa rnams kyis gnod bzhin pa yin no zhes bya ba'i don to/ /yang na/ de ma rtogs pa zhes bya ba ni pags pa can du phyugs nyid la bye brag med kyang / byed pa po nyid 'jug pa med pa'i phyir la/ rig byed la ni skyes bu med pas bsam pa med pa'i phyir de'i bye brag nges par sbyor ba nyid med ces bya ba'i don to/ /da ni 'jug par 'dod pa'i bsam pa can gyi yul yang 'bras bu'i bya ba byed pa'i go skabs kyi ngo bo de'i tshe med de/ 'byung bar 'gyur ba nyid yin par bstan pa ni nges par sbyor ba nyid ces bya ba'o/ /yul dang da ltar ba ma yin pa'i phyir mngon sum da ltar ba'i yul can ma yin du chug kyang der yang shes pa gzhan du 'gyur ba yin pa'i phyir ji ltar 'bras bu med pa yin snyam du sems na/ ji ltar rab tu sbyor byed de/ /zhes bya ba smos te/ rjes su dpag pa la ni 'byung bar 'gyur ba yang med pa mi 'byung bas 'jug par byed pa yin la/ sgra las byung ba ni skyes bu'i bya ba med pa ma yin no/ /de lta mod kyi rtogs par byed pa yin gyi rtogs pa'i dus na de yod pa ni ma yin la/ 'dir med na mi 'byung ba yang ma yin no/ /skyes bus byas pa ma yin pa nyid la yang med na mi 'byung bar ma nges pa yin te/ de ltar khas len pa ni lung thams cad kyi thun mong yin pa'i phyir ro/ /skyes bus byas pa yang don dang 'brel pa ma yin pas/ rig byed rnams ni go bar byed pa ma yin pa'i phyir la go ba yang skyes bus byas pa dang 'brel pa'i rgyu mtshan yin pa nyid kyis de'i tshig gi don rnams don dam pa pa ma yin pa'i phyir dang / de'i rjes su 'jug pa'i ngo bo yin pa'i phyir ngag gi don yin no/ /de yang tshig gi don gyi sgo nas skyes bu blo nyid kyi bya ba yin no/ /rig byed ni tshig dang ngag gi bdag nyid can nyid kyi nye ba yin la/ tshig gi don rnams ni nye ba can du rung ba nyid yin yang phan tshun mi ltos pa'i phyir sgra rnams ni phyi rol gyi don la tshad ma nyid yin no snyam du dgongs pas so/ /gnod bya rtogs pa can yin na zhes bya ba ni mngon sum dang 'gal bas 'brel pa med pa yin te/ rtogs par bya bzhin pa med kyang 'byung bas zhes bya ba'i don to/ /'bras bu la bya ba med pa'i gnas skabs de'i tshe med pa yin zhing / 'byung bar 'gyur ba la 'brel pa 'dzin pa yang med pa yin zhes bya ba'i don to/ /rtogs bzhin pa med na lhan cig byed pa med par rtogs pa'i shes pa cung zad kyang ji ltar skye zhe na/ sgra ni blo don zhes bya ba smos te/ de nyid gsal bar byed pa ni/ ji ltar rab tu sbyor bar byed pa'i zhes bya ba'o/ /rab tu sbyor bar byed pa rtogs pa ni nges sbyor rtogs pa yin no/ /rab tu sbyor bar byed pa zhes bya ba ni gang na smra ba po yod pa'o/ / rab tu sbyor bar byed pa rtogs pa zhes bya ba ni gang na de med pa'o/ /'di ltar bdag gis rtogs zhes bya ba la sogs pas 'chad pa po dang nyan pa po'i zhen pa'i dbang gis te/ sgra las byung ba'i sgra'i don gyi rjes su dpag pa nyid yin gyi gzhan gyi don gyi rjes su dpag pa ni ma yin te/ phyi rol med pa'i phyir ro zhes ston par byed pa ni/ bdag gis ni re zhig 'di ltar rtogs so zhes bya ba ni/ skyes bus byas pa ma yin pa'i yul la/ skyes bus byas pa'i bye brag ni rig byed la yang mthong ba'i phyir skyes bus byas pa nyid yin te/ rig byed kyi don ni skyes bu'i blo las byung ba yin par bstan pa ni/ yang na brjod pa de nyid las shes bya ste/ de zhes bya ba ni gang 'jig rten la 'di'o/ /de brjod ces bya ba ni de bstan pa las zhes bya ba ste/ 'jig rten pa'i ngag gi bye brag 'brel pa nyid rig byed du bstan pa yin no/ /yang na de dang khyad par med pa'i phyir zhes bya ba la sogs pas kyang skyes bus ma byas pa nyid ni rgyu don med par yang 'byung ba'i phyir ma nges pa nyid yin par bstan pa ni/ skyes bus byas pa dbang po las 'das pa'i phyir tshig de ni skyes bus ma byas pa zhes bya ba ni sangs rgyas pa la sogs pa'o/ /skyes bus ma byas pa nyid yin na bcom ldan 'das kyis chos bstan to zhes thos pa don med par 'gyur te/ brjod byas stong ba'i phyir ro zhe na/ don med par yang de bzhin du 'gyur ba'i phyir zhes bya ba nas/ de la zhes bya ba'i bar du'o/ /lan du yang rig byed la yang 'di mtshungs zhes bya ba'o/ /nges brjod rig byed ri bong byas/ /snyan tshig rig byed mnyam rig ces/ /zhes bya ba dang / nges brjod dang snyan tshig shes pa rnams kyi tshig yin par drang srong pra ba ha na'i bu 'dod pa yin no zhes bya ba yang mi rtag pa'i 'brel par thos pa yod la/ skyes bus ma byas pa yin na/ de la don med pa yin no/ /tha snyad pa rnams kyi nan tan du bya ba don du gnyer ba yin pa'i phyir nan tan du bya ba bstan pa ni don gzhan yin la/ nan tan du bya ba la gnas par bstan pa don gzhan yin na de dang rjes su mthun pa'i rtogs par byed pa yin la/ des na shes pa yin zhes bya ba ni bstod pa tsam yin gyi/ drang srong pra ba ha na'i bu zhes bya ba yang pra ba ha na'i bu ma yin mod kyi rtag pa nyid cung zad yod pa'i phyir don med pa ma yin no/ /'di la don gzhan nyid la rtog na ni zhes smos te/ bcom ldan 'das kyis gsungs pa de la yang dran pa yin zhes bya ba 'di yang / bcom ldan 'das dang 'brel pa nyid kyis dam pa'i chos la yang bstod pa kho na yin te/ rigs pa mtshungs pa'i phyir zhes bya ba'i don to/ /don med pa nyid dang / skyes bus byas pa ma yin pa nyid dang / rtogs pa nyid dang don gzhan gyi yul la zhes bya ba re re la dang zhes bya bar sbyar bar bya'o/ /don gzhan du brtag na zhes bya ba'i dri ba de nyid la lan gzhan yin pa'i phyir zlos pa ma yin no/ /rig byed kyi dang po'i don gyi bya ba la brten nas rtogs par bya ba yin la/ des na de'i don ni dang po'i shes pa bzhin du dbang po'i bya ba yin la/ gnyis pa ni rigs pa rjes su dran pa'i ngo bo'i rnam par dpyod pa la brten nas rnam par rtog pa'i shes pa bzhin du brda dran pa las yin la/ des na rig byed kyi don ma yin no zhes zer ba ni 'di ltar dang po'i zhes bya ba'o/ /ci ste yang skyes bus byas pa ma yin pa'i rig byed ni thog ma med pa ma yin pa'i phyir rgyud pa'i rjes su 'brangs nas/ dang po dang bcas pa'i don nyid du mi rigs pas rang nyid kyi don gzhan nyid yin no/ /sngon dang phyi ma dran pa ni/ /sgra yi blo gzhan byas pa yin/ /zhes bya ba la sogs pa'i rigs pa las 'gyur ba yin no snyam du sems pa la/ de yang rig byed don yin zhes/ /zhes bya ba smos te/ thos bzhin pa'i don gyi rjes su 'brangs nas dang po dang ldan pa nyid dang sgrub pa'i don brjod pa dag las gcig la yang gnod pa med par bstan pa ni/ khyed kyi 'di la tshad ma med/ /ces bya ba smos so/ /dang po ma yin pa nyid du go ba yin na don 'di yang go bar byed pa yin no zhes bya ba'i bsam pa ni/ rig byed dbang gi skyes pa'i phyir zhes bya ba'o/ /de'i tshe yang rig byed kyi bya ba las dang por rtogs par byed pa yin la/ de la ltos pas dmigs bya nyid med pa kho nar bstan pa ni/ dang po ci phyir min zhes bya ba la sogs pa smos so/ /don gzhan du rtogs pa la ni bden pa dang mi bden pa dang phrad par mthong ba las/ me la sbyin sreg la sogs pa don gcig pa'i ngag rnams la yang the tshom za bas tshad ma nyid ma yin par bstan pa ni/ de lta yin yang zhes bya ba'o/ /ci ste the tshom za ba yin zhe na/ rig byed kyi don zhes bya ba smos so/ /gal te nyi ma gnya' shing yin la zhes bya ba la sogs pa la/ dang po pa'i don bor nas don gzhan du rtogs pa ni/ don gzhan nyid kyis ston pa'i don yin pa'i phyir 'gal ba med pa yin la/ bsgrub pa nye bar bstan pa ni don gzhan nyid kyis ston pa ma yin pa des na ji ltar dang po pa'i don yongs su 'dor ba yin nges pa rtogs pa yin pa ni de lta bu'i mi bden pa'i don la dmigs pa ma yin pa'i phyir ji ltar the tshom pa yin snyam du sems pa la/ da ltar ba'i ba lang khra bo ni mchod sbyin gyis zhes bya ba'i skul byed ni don med par mthong ste/ char dbab par 'dod pas lag pas bzhos pa'i 'o ma pho ba bzhin du/ 'di yang da ltar ba'i yin gyi 'jig rten pha rol gyi 'bras bu ni ma yin no/ /nges sbyor las byung ba'i 'bras bu ni de ma thag tu sgrub byed med pas mngon sum du ma dmigs pa'i phyir gnod byed med pa ma yin te/ lo thog skams pa ltar gso ba'i phyir char dbab pas yongs su 'phel bar bya bar 'dod pa'i cho ga la dus ma nges pa nyid ni mi rigs so/ /rgyal po ni/ rgyal bu skye ba'i mchod sbyin byed/ /ces bya ba la sogs pa rigs kyi bye brag dang rjes su 'brel pa la brten pa bzhin du dus kyi bye brag la brten nas de ma thag pa'i 'bras bu nyid kho na yin na/ 'di la ni de lta bu'i 'bras bu 'byung ba ma yin no zhes bstan pa ni/ phyugs 'dod pas ba khra bo'i mchod sbyin bya'o zhes bya ba'o/ /ma yin te/ tshad ma med pa'i phyir ro zhes bya ba 'di la don ni 'di yin te/ rgyu'i dngos po ni tshad ma 'ga' zhig gi du ba'i me bzhin du rtogs la/ 'bras bu med pa yin na rjes su mthun pa ma yin par rtogs par byed pa yin te/ phyugs la ba lang khra bo rgyu nyid yin pa ni tshad mas grub pa ma yin no/ /ngag de nyid de ma thag pa'i 'bras bu med pas da dung du yang tshad ma nyid ma yin pa dang tshad ma gzhan yang ma dmigs pa'i phyir ro/ /bden te/ da ltar ba nyid de ma thag par yang res 'ga' mthong ba'i phyir 'bras bu sgrub par byed pa ni mngon sum dang 'gal ba ma yin no/ /res 'ga' de yod kyang mi 'byung ba ni 'ga' zhig gi phyed zos pa na sngon gyi las kyis gegs byas pa'i phyir zhes bya ba'i rigs pas las gzhan gyis gegs byas pa yin pa'i phyir de dang bral na 'byung ba yin no/ /de nyid kyis na ma byas pa'i las rnams kyi yang de'i 'bras bu 'byung ba yin gyi/ 'di dag tsam gyis da ltar ba nyid 'joms pa ni ma yin no/ /yod na 'byung ba tsam gyis de sgrub par byed pa ni ma yin te/ 'o na ci zhe na/ de med na mi 'byung ba las yin la/ ba lang khra po la sogs pa la ni de dag med pa yin te/ da ltar ba'i 'bras bu la yang sgra kho na sgrub byed kyi dngos por mthong bar byed pa ma yin te/ de lta bu'i dngos po ni mngon sum gyi yang yul yin pa'i phyir ro/ /gzhan du na da ltar ba nyid med par thar par 'gyur ba'i phyir rig byed la slu ba'i mngon sum gnod pa can du grub po/ /de ltar gnas pa yin la nges sbyor las byung ba'i 'bras bu dus ma nges pa can du 'gyur ro zhes bya ba la sogs pa thams cad skyes bu'i blo las byung ba kho na yin par bstan pa ni/ don gzhan rtogs pa ni zhes bya ba'o/ /rtags dang sgra ma gtogs par rjes su dran pa tsam las te/ snga ma rjes su dran pa'i ngo bo las dang po'i don rtogs pa yang yin par bstan pa ni/ rig byed las bdag nyid ces bya ba'o/ /sgra ni dbang po bzhin du rang bzhin gyis don go bar byed pa ma yin te/ 'o na ci zhe na/ don gyi de ma thag nyid kyis 'dzin pa yin na'o/ /de ltar 'dzin pa yang 'phel ba dang / yon tan la sogs pa bzhin du sngar zhugs pa la brten pa yin te/ rig byed rtogs pa ni skyes bu'i blo'i nus pa las yin te/ sgra'i nus pa las ni ma yin no zhes bya ba'i don to// /nges par sbyor ba ni zhes bya ba la sogs pas ni nges sbyor dang bya ba dag mtshungs par sun bton pa yin yang nges sbyor sun bton pa'i dus su ma bstan pa brjod par bya ste/ 'di la don gyi rigs pa 'ba' zhig 'gal ba can ma yin te/ 'on kyang sgra'i rigs pa yang ngo zhes bya ba'i don to/ /yang de phyis de las te bya ba rtogs pa las so/ /gal te lha sbyin dang mchod sbyin dag gis re lde byed ces bya ba 'di la/ las te bya ba gcig pa'i phyir bya ba gcig pa nyid de tshig gcig gi rgyu mtshan du khas len par byed pa de lta na re lde byed pa dag ces pa 'di la yang gcig gi tshig tu 'gyur bar bstan pa ni/ gcig phyir zhes bstan pa'o/ /'on te 'di la byed pa po tha dad pas bya ba tha dad pa'i phyir gnyis kyi tshig yin na byed do zhes bya ba 'di la yang tha dad pas tha dad pa'i tshig tu 'gyur bar bstan pa ni/ de 'dra'i dbye bas zhes bya ba ni tha dad pa las so/ /lha sbyin dang mchod sbyin dag ces bya ba'i skad kyi dbyings kyi don ni las kyi bya ba yin gyi/ byed pa po'i bya ba ni ma yin te/ de yang byed pa po tha dad pa las 'byed pa ni ma yin te/ de'i bya ba ma yin pa'i phyir 'dir ni las byed pa'i yi ge las yin te/ lha sbyin dang mchod sbyin dag gi 'dug pa'o zhes bya ba lta bu yin no zhes zer ba ni/ skad kyi dbyings kyi don tha mi dad pa'i phyir zhes bya ba'o/ /skad kyi dbyings ni byed pa po'i bya ba ma lus pa'i rjod byed ma yin nam/ sgra dang skyes bu dag gi yang bya ba rjod par byed pa yin te/ des na ji ltar byed pa po tha dad pa las tha dad pa ma yin snyam pa'i bsam pas/ ling la sogs pa'i sgra'i bya ba ni re zhig skad kyi dbyings kyi don la mi 'byung ste/ ling la sogs pa med cing skad kyi dbyings kyang med par yang 'byung ba'i phyir ro/ /des na ling la sogs pa'i brjod bya ni rkyen yin no zhes zer ba ni/ de yang zhes bya ba'i yang gi sgra nges par sbyor ba'i zhes pa'i mthar sbyar la/ ma yin zhes bya ba yang de zhes bya ba'i mthar blta bar bya'o/ /des na don ni 'di yin te nges par sbyor ba yang de ma yin pa'i skad kyi dbyings kyi don to/ /'o na ci zhe na/ de las gzhan pa'o/ /de lta yin na/ skyes bu'i bya ba skad kyi dbyings kyi don yin te/ /de skad du yang gtso bo nyid yin pas skad kyi dbyings kyis bstan pa'i bya ba dang ldan pa ni byed pa po yin no zhe na/ de yang ste zhes bya ba ni byed pa po bsgrub bya yin pas zhes bya ba'o/ /re zhig nges sbyor ni bsgrub bya ma yin te/ rang gi ngo bor grub pa'i phyir dang / byed pa po las bya ba gzhan yin pa'i phyir yang ngo / /de nyid kyis ni skad kyi dbyings kyi don ma yin no/ /de la gnas pa yang de dang de ma yin pa'i bya ba yin pa'i phyir ro/ /bya ba gzhan las btus pa'i de'i bya ba yul can du byed pa yang bdag nyid bzhin du rkyen gyi brjod bya nyid yin la/ de yang byed pa po tha dad pa las tha dad pa yin te/ des na gnyis kyi tshig yin la des na skad kyi dbyings kyi don dang / skyes bu'i bya ba dag gi brjod bya dag tha dad pa'i phyir byed do zhes bya ba dang / byed pa dag go zhes bya bar 'gyur la/ bya ba yan 'gar ba zhes bya ba ni/ rang gis bsdus pa'i tha dad pa dang bral ba zhes bya ba'i don to/ /yang na dngos po bshad pas brjod pa yin pa'i phyir bshad pa thams cad las 'byung ba'i skyes bu'i bya ba ni ling la sogs pa yod na bsgrub bya rtogs pa yin gyi/ rang nyid 'grub pa ni skyes bus 'phangs pa yin pa'i phyir nges sbyor du brjod do/ /des na rkyen ni brjod bya yin no/ /byed pa po tha dad pa las bya ba tha dad pa yin na/ skad kyi dbyings kyi don la yang tha dad par 'gyur te/ de sgrub par byed pa'i sgo nas bya ba bsgrub bya yin par bstan pa ni/ gal te 'brel phyir tha dad na/ /zhes bya ba'o/ /byed pa po ma bstan pa'i dbang du byas nas byed pa po'i gsum par mi 'gyur zhes bya ba'i don to/ /brjod 'dod gzhan dbang phyir zhes bya ba la sogs pa bsdu ba bstan pa ni/ gang tshe bya ba'i don de ni zhes bya ba la sogs pa'i tshigs su bcad pa gnyis so/ /de yang skad kyi dbyings kyi don nges sbyor yin zhes bya ba la sogs pas nges sbyor gtso bo'i don yin pas rkyen gyi don nyid yin la bya ba ni de'i yul nyid yin pas de'i yan lag nyid yin no snyam du sems pa la/ da ni bya ba nyid 'jug pa'i yul nyid yin pas gtso bo'i don nyid yin la/ nges sbyor ni de la skyes bu 'jug par byed pa nyid kyis sbyor bar byed pa nyid yin pa'i phyir yan lag yin no/ /de ltar yang bya ba rkyen gyi don nyid yin na yan lag dang yan lag can nyid rigs pa yin te/ gzhan du ni ma yin no snyam du sems pa la/ gang gi tshe byed pa po'i bya ba zhes bya ba smos so/ /gal te 'jug pa'i yul rang gi bya ba rkyen rtogs par byed pa yin la/ de nyid las 'jug par 'gyur ba nyid yin na nges sbyor gyis ci zhig bya snyam pa'i bsam pas zer ba ni/ bya ba ni nges par sbyor ba khyad par can yin pa'i phyir zhes bya ba ste/ nges par sbyor ba med na bya ba ni bsgrub bya nyid ma rtogs bzhin 'jug pa ma yin zhes bya ba'i don to/ /skyes bu'i don ma rtogs par nges par sbyor ba po yang ji ltar 'jug pa yin snyam pa'i bsam pas 'bras bu 'ba' zhig kho na rtogs pa dang ldan pa'i 'jug par byed pa po ma yin te/ 'on kyang rang gi bya ba shes pa yang yin no zhes zer ba ni/ 'di rang gi bya ba rtogs pa zhes bya ba'o/ /nges par sbyor ba yod kyang nga'i bya ba 'di yin zhes 'bras bu dang 'brel pa med na mi shes pa yin par bstan pa ni 'bras bu med par nges par nga'i bya ba nyid ces bya ba ste/ de ltar re zhig bya ba'i ngag gi don nyid khas len pas de dang de bstan nas/ da ni bya ba tshad mas rtogs pa ma yin par bstan par 'dod nas/ sbyin byed ces bya ba smos te/ sbyin byed ni mchod sbyin no/ /grub zin pa'i phyir yod kyang las med pa can yin pa nyid kyis rab tu sbyar bar bya ba'i brjod bya nyid kyis/ sbyor bar byed pa po'i bya rgyu'i bya ba med pa'i phyir sgra las gzhan las kyang rung / skad kyi dbyings kyi don las tha dad pa'i bya ba rtogs pa ma yin zhes bya ba'i don to/ /gal te mchod sbyin la sogs pa las tha dad pa'i bya ba med pa yin na/ mtho ris 'dod pas mchod sbyin gyis zhes bya ba'i mtho ris dang / mchod sbyin dag bsgrub bya dang / sgrub byed dag gi de nyid kyis rtogs bzhin pa dag gi yang bsgrub bya gzhan las dang / sgrub byed gzhan las rnam par bcad nas 'brel par byed pa po med pa'i phyir phan tshun 'brel pa med par 'gyur ba zhig na/ de yang mthong ba'i phyir 'brel pa can gyi bya ba ni don shugs kyis 'phangs pa yin no/ /de lta ni ma yin te/ mchod sbyin dang mtho ris dag gi rung ba yin na/ nye ba na gnas pa'i bye brag gis rang bzhin gyis 'brel pa kho na yin pa'i phyir bya ba 'phen par byed pa ma yin te/ gzhan du na de dang lhan cig pa'i 'brel pa byed pa po gzhan yin la/ de'i yang gzhan yin pa'i phyir thug pa med do/ / 'gyur yang skyon ci yod ce na/ 'di yang mi rigs te rang gi ngo bo rtogs pa med na rtogs pa tsam yin te/ de yang brtag bya ma grub na/ /de la dbang ba'i gzhi ma grub pa'i phyir de yang mi rigs pa'i phyir thug pa med pa ni skyon yin no zhes bya ba'i don to/ /sgra gzhan nyid kyis don gzhan nyid la yin na thug pa med pa ni bshad pa las bstan pa yin no/ /ci byed ces pa'i don ci zhig yin zhes the tshom za ba'i yul rnams la mchod sbyin la sogs pa rnams la grong la sogs pa rnams su bzhin du 'gro bar byed ces bya ba'i don gyi yul can du rtogs par byed pa yin la de nyid bya ba yin pa brjod do/ /gal te ci byed ces 'dri bar byed pa na lan du/ byed don mchod sbyin byed don dag /ces bya ba ste/ rkyen gyi don ni bya ba byed pa yin no zhes bya ba 'di la yang / mchod sbyin byed ces bya ba la sogs pa bzhin du skad kyi dbyings kyi don yin te/ des na zhes bya ba'i tshig gi don ni skad kyi dbyings kyis gri nya'i don zhes bya ba nyid do/ /gal te/ the tshom za na 'tshed par byed/ /ces bya ba la sogs pa ji ltar lan du rjod par byed ces bya ba'i don to/ /yang na ci byed ces bya ba'i gri nya'i don gyi yul nyid la the tshom za ba'i ngo bo ni ci zhes bya ba ni don du bstan te/ mchod sbyin la sogs pa la the tshom za ba zhes bya ba'i don to/ /spyi'i rang bzhin zhes bya ba ni khyad par gyi yul la yang the tshom za ba ni/ spyi'i yin par tha snyad 'dogs pa yin te/ khyad par ma 'khrul pas tha mi dad par btags nas zhes bya ba'i don to/ /gal te yang spyi rtogs pa tsam las ma 'khrul pa ma yin na/ khyad par ma rtogs pa la yang the tshom za ba yin na/ thal ches par bstan pa ni/ khyab par med par spyi yin/ /zhes bya ba'o/ /ma 'khrul pas kyang du ba las me bzhin du spyi las khyad par rtogs pa las the tshom za bar mi rigs pa bstan pa ni/ de lta na/ de yang zhes bya ba'o/ /'brel ba can yang mthong ba nyid la sogs pa'i spyi dang 'gal ba khyab par mi dmigs pa ni nye bar bzhag pa la the tshom za ba'i rgyu mtshan yin par bstan pa ni/ spyi de nyid ces bya ba'o/ /thams cad mkhyen pa la sogs pa bzhin du khyad par med pa'i dmigs pa tsam ni yod pa dang med pa thun mong ba yin pa'i phyir the tshom gyi rgyu mtshan yin gyi/ spyi ni mngon sum nyid ma yin par bstan pa ni/ spyir mi dmigs pa zhes bya ba la sogs pas so/ /dmigs pa'i rigs byar gyur pa zhes bya ba 'dis ni bye brag med pa'i mi dmigs pa'i med pa smra ba yin no/ /khyad par gyi nges pa ma bzung ba'i dran pa nyid ni the tshom za ba yin no zhes zer ba ni khyad par dran pa'i phyir zhes bya ba'o/ /khyad par dran pa la sogs pa'i tshogs pa las byung ba yin par de la bye brag med pa'i phyir zhes bstan pa ni/ khyad par dran pa las the tshom gzhan ma yin te zhes bya ba'o/ /de'i khyad par nges par ma bzung ba'i phyir spyi yin par bstan pa ni/ de'i phyir byed pa zhes bya ba de nyid ces bya ba ste/ khyad par nges pa ma bzung ba thun mong gi tshig yin par dgongs pa'o zhes bya ba'i don to/ /yul nges pa can ma yin pa'i mi dmigs pa tsam las ni nges par bzung ba med pa yin la/ yul nges can ni spyi mngon sum du gyur pa nyid las ma yin snyam du sems pa la/ la lar ni dngos po dang dngos po med pa'i zhes bya ba smos te/ snang ba mi gsal ba'am thag ring ba la yang rnam pa mi gsal ba yin la/ de'i gnas skabs kyi mi snang ba'i bye brag gis dben pa'i blo 'di nyid ni mi dmigs pa yin no zhes bya ba'i don to/ /sa phyogs la sogs pa 'ga' zhig tu mi snang ba'i dngos po sa dben pa dmigs pa'i dngos po yang mi dmigs pa yin par bstan pa ni/ dmigs par bya ba'i don gyi rang bzhin zhes bya ba ste/ ma 'khrul pa nyid kyi du ba dang me bzhin du spyi las bye brag rtogs pa yin no/ /gal te sngon po dmigs pa yod na de'i ming dran pa las sngon po'i zhes bya ba'i rnam par rtogs pa yin pa de bzhin du/ nges pa ma bzung ba'i dmigs pa la de'i ming la sogs pa dran pa las/ mtho yor yin pa'am/ gzhan yin pa'i rnam par rtog pa'i yid ni nges par gzung ba med par 'byung ba yin no/ /ma yin te/ dang po nyid ni de'i ming la sogs pa dran pa med pa'i phyir ro/ /dang po yang nges par gzung ba med par khyad par ma dran pa'i yul de la ji ltar 'gyur ba yin/ khyad par dran pa yin na 'gyur ro zhe na/ de nyid khyad par dran pa nges par gzung ba med na the tshom za ba ma yin nam/ de las gzhan pa ni ma yin te/ 'di ni khyad par nges pa ma bzung ba'i bdag nyid yin pa'i phyir ro/ /des na khyad par dran pa dang lhan cig pa'i dbang po sa de yin pa ni mi rigs te/ de nyid khyad par dran pa nges par gzung ba med par ci las 'byung ba yin/ khyad par gnyis thun mong ba'i ngo bo nyid dmigs pa las yin te/ rtag pa dang mi rtag pa dag gzhal bya yin pa lta bu'o/ /de lta mod kyi mthon po ma yin pa las log par ni nges pa can yin la/ mtho yor la sogs pa'i bye brag nges par ma bzung ba ni dran pa'i rgyur 'gyur ba yin no/ /de nyid las nges pa can nyid ma yin nam/ ci la the tshom za ba yin/ sngon por nges pa la ni ser por the tshom za ba'am/ de'i rgyu yang ma yin no/ /mi dmigs pa las kyang mtho yor ram/ mi dag kho nar the tshom za ba ma yin no/ /'o na ci zhe na/ gcig pa de bor nas thams cad 'gyur ro/ /'brel pa las ni de'i khyad par la nges pa yin gyi spyi ni ma yin te/ thag ring ba bzhin du nye ba la yang de'i shes par thal bar 'gyur ba'i phyir ro/ /de'i phyir mi dmigs pa la log pa can mtho yor nyid dam/ mi nyid du nges pa can ma yin pas nges pa ma bzung ba'i phyir nges par bzung ba med pa'i bdag nyid ni spyi yin la de'i shes pa yang the tshom yin no/ /khams gsum po la thal bar 'gyur ba ma yin te/ de ma yin pa las ldog par byed pa nyid du nges pas khyad par can yin gyi yul du nges pa ma bzung ba ni khongs su gtogs pa yin pa'i phyir ro/ /de nyid kyis na blo nyid ces bstan pa de'i rnam pa ma yin pas dben pa ni the tshom gyi shes pa yin no/ /de ma yin pa las ldog par byed pa yin yang yul nges pa can gyi khyad par gyi nges pa ma bzung ba yin te/ dngos po dang dngos po med pa thun mong gi bdag nyid can ni the tshom ste/ yid gnyis kyi rgyu yin pa'i phyir the tshom yin no zhes pa'i don to/ /de yang de ma yin pa las ldog par byed pa'i ngo bos snang ba mi dmigs pa yin pa'am/ de'i khyad par la ltos nas kyang snang ba mi dmigs pa yin no/ /dmigs par bya ba'i don gyi rang bzhin zhes bya ba ste/ rtogs par bya ba'am/ mi de ma yin pa las ldog par byed pa khyad par nges pa ma bzung ba snang ba dang cig shos kyi mi dmigs pa'i bdag nyid ni the tshom za ba'i rgyu yin pa'i phyir the tshom yin no/ /de lta na the tshom gyi shes pa ni dbang po'i don las 'byung bar ma gyur tam/ de lta ni ma yin te/ don byed pa can gyi dbang po'i don nye ba na gnas par rung ba nyid kyi stobs las skyes pa zhes bstan pas/ don byed pa can ma yin pa thag ring ba na gnas pa'i stobs las byung ba las/ the tshom za bar thal bar 'gyur ba ma yin te/ thag ring po nas gnas pa nyid ni rab rib bzhin du 'di lta bu shes pa la nus pa yin la/ dbang po'i don ni de'i rjes su 'jug pas nye ba na gnas pa tsam la nus pa can yin no/ /de yang mig gis ni thag ring po la ma yin zhes bstan pa yin no/ /don mthong na zhes bya ba ni mi rigs te/ de la don byed pa can ma mthong ba'i phyir ro/ / gang du de byed pa can gyi sa phyogs la sogs pa mthong ba yin na/ de ltar lkog tu gyur pa'i me la sogs pa las skyes bus the tshom za ba ma yin la/ gang du dngos po gzhan la 'jug pa ma yin pa'i bye brag gis dngos po'i mi dmigs pa dang / mi dran pa yin la/ de dang 'dra ba nyid kyi don byed pa ni de byed pa can ma yin pa las ldog par byed pa yang dmigs pa yin na ni/ de la phyin ci log pa yin te/ nya phyis la dngul gyi shes pa lta bu'o/ /gang gi tshe 'dra ba la dmigs pa de'i tshe tha dad par mthong ba'i phyir de nyid du sgro 'dogs pa med pa ma yin nam/ 'on te de nyid yin par dmigs pa yin na dbang po las skyes pa ji ltar phyin ci log ma yin/ don byed pa can du nyams su myong ba cung zad mthong na ni phyin ci log ma yin la/ gnyi ga nyid du nges pa ma bzung na ni snang ba ma yin te/ gang yang rung ba med par nges pa'i phyir/ nges pa med pa ni the tshom za bar thal bar 'gyur ro/ /'dra ba'o zhes bya ba'am de nyid do zhes bya bar dmigs pa ma yin du zin kyang / 'on kyang 'dra ba'i dmigs pa dang 'dra ba yin pa'i phyir/ 'dra ba nyid du ma dmigs pa la dgos pa ci zhig yod/ sngon po zhes nye bar mtshon pa ma yin pa'i sngon por mthong ba/ sngon po'i shes pa skyed par byed pa ji ltar yin pa de bzhin du 'dra ba mthong ba yang 'dra ba'o zhes bya bar skyed par byed par 'gyur ro/ /khyad par nye bar mtshon pa yin pa la ni de dang 'dra ba zhes bya ba med pa'i phyir de las 'di ji ltar yin/ de'i ngo bo mthong ba'i bag chags las/ zin por gyur pa'i de 'di'o zhes bya bar 'gyur ba ni dbang po las skyes pa ma yin pa ste/ dbang po las skyes pas ni 'dra ba'i don byed par mthong ba las/ de'i ngo bo ni yid kyis sgro btags pas brda yod na de 'di yin no zhes tha snyad 'dogs pa yin gyi gzhan du ni ma yin no/ / gnyi ga'i bye brag ma mthong ba de mthong ba'i bag chags las zin por gyur pa ma yin pa la ni/ thag ring ba nyid la sogs pa'i dbang gis dbang las skyes pa nyid rnam par rtog pa'i mthong ba yin te/ gnyi ga'i bye brag dang mtshan nyid mi mthun pa'i cha'i don byed pa gnyi ga ma yin pa tha dad pa can dngos po la med pa'i phyir ro/ /tshad ma'i yul du gyur pa'i sngon po la sogs pa skad cig ma dang skad cig ma ma yin pa'i ngo bor ma nges pa yang don byed pa'i gzhal bya nyid mngon sum pa yin no/ /ma nges pa skad cig ma nyid la sogs pa'i nges pa med pa'i bdag nyid can ni the tshom 'di'i rgyu yin no zhes bya ba ni rnam par dbye ba'o/ /de lta bu'i blo'i go bar bya ba ni/ de ma yin pa las log par byed pa'i dbyibs ma yin nam/ gnyis kyi bye brag nges par ma bzung ba yin yang don byed pa'i ngo bo dngos po las tha dad par mngon sum pa yin te/ skad cig ma la sogs pa'i bye brag nges par ma bzung ba yang sngon po la sogs pa'i ngo bo bzhin du yod pa nyid na/ de yod pa'i phyir de ji ltar dbang po las skyes pa ma yin par the tshom za ba yin zhes pa'i bsam pas/ gal te dbyibs zhes bya ba la lan du skyes bu dang mtho yor gyi zhes bya ba ste/ gal te de don byed pa yin na thag ring ba'am/ nye ba la yang sngon po bzhin du khyad par nges par ma bzung ba dmigs par 'gyur ba yin no/ /thag nye ba la ni de lta bur dmigs pa ma yin te/ des na khyad par gyi rnam pa nges par ma bzung ba'i khyad par snang ba nyid de yin no/ /khyad par gyi nges pa rnam par ma bzung ba'i khyad par du snang ba nyid de yin par bstan pa ni/ spyi'i don gzhan pa nyid yin na zhes bya ba'o/ /gal te khyad par gyi rnam pa'i nges pa ma bzung ba yin na snang ba de ji ltar de'i yin snyam du sems pas/ gal te khyed kyi phyogs la yang / /zhes bya ba la sogs pa nas/ don mi gsal bar snang ba min/ /zhes bya ba'i bar du'o/ /lan du/ gal te de rnams can min pa'i/ /zhes bya ba ste/ de ste/ nges pa bzung ba 'di'i rnam pa ste/ gang la rnam pa de yod pa ma yin pa ste/ las de khyad par las thag ring ba nyid kyi lhan cig byed pa de las skyes par 'gyur ba nyid kyis de las skye bas de 'dzin pa nyid du brjod do/ /'di skad bstan pa yin te/ khyad par gyi rnam pa nges pa ma bzung ba'i khyad par 'dzin pa can ni/ /khyad par gyi rnam pa'i kun du bzung ba la ltos na mi gsal ba yin par brjod do/ /de lta bu'i blo ni rgyu med pa'i phyir nye ba las mi skye ba yin yang thag ring pa'i lhan cig byed pa'i khyad par las skye ba yin la/ spyi ni rdzogs pa yin te thag ring por yang rang gi ngo bo dmigs pa yin no/ /nye ba las ni chos shin tu gsal bar dmigs par 'gyur ro/ /mi dmigs pa'i rgyu yod na dmigs par dang dmigs pa'i rgyu yod na mi dmigs par ni mi rigs te/ khyad par dang spyi dag gi dmigs par byed pa la ni bye brag cung zad kyang med do/ /khyad par las spyi gzhan ma yin pa ni bden te/ gzhan gyi snang ba ni gzhan la mi gsal bar brjod pa ni ma yin te/ de lta mod kyi khyad par gyi rnam pa ma bzung ba'i bye brag gi ngo bo ni khyad par gyi rnam pa dang thun mong ba yin pa'i phyir spyi yin par brjod par bya ba yin no snyam du sems pa las/ 'on te de nyid spyi yin na zhes zer ba la/ lan ni/ blo de las zhes bya ba la sogs pas bstan pa yin te/ khyad par nges par ma bzung ba ni gzhan las ma yin pa'o/ /gzhan yang gzhan las kyang 'dir brjod par bya ste/ bye brag nges par ma bzung ba'i kha dog dang dbyibs blo la snang ba de dang bral ba ni spyi yin par 'dod pa yin no/ /don gang dag kho bos mthong ba de dag gi mthong ba nyid kyi tshad kyi chos gang dag yin pa'i phyir de dang 'dra ba ni chos 'di yin te/ 'dra ba'i rnam pa bskyed par bya ba ni dmigs par bya ba ste/ de dag gi don la the tshom za ba yin la/ 'dra ba don ni spyi'i don yin no snyam du sems pas/ gal te snang ba ni kha dog dang dbyibs nyid yin la zhes bya ba ste/ thun mong yin pa'i phyir zhes bya ba ste 'dra ba'i phyir ro/ /lan du/ kha dog dbyibs de'i rang bzhin ni/ /zhes bya ba ste/ de'i 'dra ba ni 'di'i chos yin gyi/ de nyid ni ma yin na ji ltar de las de dag la the tshom za ba yin/ gnyi ga'i thun mong ba la gcig pa med pa'i phyir 'dra ba nyid kho nar sgro btags pas de nyid 'di yin no zhes zer ba ni mi rigs te/ 'khrul pa nyid du thal bar 'gyur ba'i phyir ro zhes bstan pa ni/ blo ni 'khrul par thal bar 'gyur/ / zhes bya ba ste/ chos dag gi gcig pa nyid du 'dzin par byed pa'o/ /des na gnyi ga'i thun mong ba la gcig tu snang ba gnyi ga mi dmigs pa yin la/ gnyi ga la nges par 'dzin pa med par byed par mi 'gyur ro zhes bya bar nye bar bsdu ba ni/ gal te kha dog dang dbyibs gzhan du rtogs na zhes bya ba'o/ /yang na mtho ba nyid ni spyi ma yin te/ mtho ba'i tshad du gnas pa can yin pa'i phyir/ de yang nges par bzung ba'i phyir ro/ /mtho ba nyid kyi chos kyang ma yin te/ de ni tha dad pa las spyi'i ngo bo ma yin pa'i phyir ro/ /kha dog dang dbyibs kyi spyi ni gcig pa yin te/ bdag nyid du 'gyur ba'i khyad par gnyi ga thun mong ba yin pa'i phyir dang / spyi ni the tshom du byed pa yin no snyam du sems pas/ kha dog dang dbyibs dag gi de nyid ces zer ba la/ lan ni/ kha dog dbyibs de'i rang bzhin ni/ /zhes bya ba la gzhan pas te/ tha dad pa'i rang bzhin las mtho yor dang mi la yod pa'i kha dog dang / dbyibs rtogs pa la tha mi dad pa 'dis/ de las de dag gcig pa nyid ji ltar ma 'khrul pa yin/ des na spyi ni mngon sum pa ma yin la/ mngon sum ni 'khrul pa can ma yin no/ /de'i phyir mtho yor dang mi la yod pa'i kha dog dang dbyibs tha dad pa'i nges pa ma bzung ba la sogs pa las spyi ma yin par brjod de/ dus ma yin pa'i phyir dang / mi dmigs pa yin pa'i phyir dang / 'khrul pa nyid du thal bar 'gyur ba'i phyir yang ngo / /kha dog dang dbyibs gcig pa ma yin du zin kyang / yan lag can yin la de yang bar mtshams su ni gcig tu snang ba yin la/ de'i yang 'khyog po bu ga can la sogs pa'i bye brag tu byed pa gang yin pa rnams dang / lag pa la sogs pa de rnams su thag ring ba la sogs pa mthong ba ma yin la/ kha dog la sogs pa'i khyad par ni yan lag can ma yin te/ de mi 'dzin pa yang dngos po'i nye bar bsgyur bas yan lag can shel du 'dzin pa'i phyir la/ shel ni gzhan pa nyid du der skyes pa ma yin te/ de'i tshe yang snga ma nyid du ngo shes pa'i phyir te/ des na bye brag nges par ma bzung ba nyid spyi yin par mi rigs so snyam du sems pas/ 'on te der yan lag can snang ba zhes bya ba la sogs pa smras pa la/ lan ni/ kha dog dbyibs kyi rang bzhin las/ /zhes bya ba ste/ kha dog tsam ni rdzas ma yin te/ thams cad kyang de'i ngo bo nyid du bye brag med par thal bar 'gyur ba'i phyir la/ rdzas kyang de'i ngo bo nyid kyis bye brag tu 'byed pa ma yin no/ /dbyibs la bum pa nyid la sogs par bye brag tu 'byed par byed pa yin no zhe na/ 'di yang kha dog la yang mtshungs te/ kha dog 'dzin pa na yang nye ba na gnas pa la sogs pa'i dbyibs tsam 'dzin pa'i phyir rdzas 'dzin pa yang ma yin la/ dbyibs tsam ni don byed pa ma yin no/ /rdzas kyang de las gzhan pa las tha dad pa ma yin par ma dmigs pa ma yin nam/ ji ltar don byed pa yin/ dbyibs dang de la rjes su dpog pa'i kha dog gis khyad par can gyi don byed pa yin no zhe na/ mi rigs te/ dpag bya kha dog dang khyad par can gyi dbyibs las tha dad pa'i rdzas ma dmigs pa'i phyir ro/ /snang ba'i kha dog dang khyad par can nyid kyang rdzas bzhin du dbyibs la yang 'khrul pa'i phyir/ mkhas pa ma yin pa'i de ni brdzun pa yin la/ mkhas pa rnams kyi tha dad pa'i blo yin no zhes bya ba'i rigs pas so/ /ci las shes zhes bya ba ni re zhig dbang po las kyang ma yin la/ thag ring ba nyid dang / rab rib dang / nye bar bsgyur ba las kyang ma yin te/ mi dmigs pa'i rgyu yin pa'i phyir ro/ /mi dmigs pa'i rgyu yin na gsal bar dmigs pa yin la/ nye bar bsgyur ba la sogs pa dmigs pa'i rgyu yod na ches shin tu dmigs par 'gyur ro/ /yon tan yin pa'i phyir kha dog dang dbyibs nyid rten pa nyid yin pas rten gyi rdzas 'phel ba yin par bstan pa ni/ de dag las ni gzhan pa yin zhes bya ba ste/ dbyibs kyi dngos po las gzhan pa ma dmigs pa'i phyir mi rten pa nyid yin te/ dmigs par bya ba ni yon tan yin pa'i phyir ro/ /khyab par byed pa dang 'gal ba mngon sum pa yin te/ de sgrub par byed pa ni mig ma yin pa'i mngon sum pa nyid la sogs pa gnod pa can yin te/ spyi la sogs pas me nges pa ma yin no/ /de las gzhan pa nyid kyis khyad par la yang blo yin par 'grub pa'i gtan tshigs nyid yin gyi du ba bzhin du dngos su ba ni ma yin no zhes bya ba'i don to/ /ljang gu dang ser po la sogs pa'i kha dog dang chung ngu dang chen po nyid la sogs pa'i dbyibs kyang gzhan dang gzhan du 'gyur ba ma yin nam/ rgya ltar gyi 'bras bu ni ma yin te/ de nyid ni gnas skabs thams cad du dmigs pa'i phyir ro/ /gang zhig 'gyur na yang gang mi 'gyur ba de ni de las tha dad pa yin la/ kha dog dang dbyibs 'gyur yang rdzas ni mi 'gyur ba yin pa'i phyir rjes su 'gro ba dang ldog pa'i tshad ma yin no snyam du sems pa la/ sngon po nyid la sogs pa'i kha dog gi rang bzhin nyid ces bya ba smos te/ sngon po'i kha dog dang dbyibs dmigs pa'i dus su de'i yan lag bzhin du rdzas dmigs pa can ni ma yin no/ /de bzhin du ser bo la sogs pa'i kha dog dang dbyibs dmigs pa'i dus su don gzhan la dmigs pa ni yang dag pa ma yin par bstan par bya ba yin la/ rjes su 'gro ldog dag kyang yin te/ de'i don gcig byed pa'i byed pa po nyid dam/ de sgra gcig gi brjod bya nyid yin yang don gzhan la sbyor ba dag gi ma yin te/ de lta mod kyi de don gcig byed pa'i byed pa po nyid ni mang po rnams la yang gcig nyid kyi tha snyad kyi rgyu mtshan yin te/ nags dang ba lang gi sgra la sogs pa yang rnam pa mang po yin par 'jig rten du snang ba yin te/ grangs dang / nags dang / dmag la sogs pa'i sgra rnams kyi brjod bya la/ bye brag med par ltung ba'i phyir dang / don byed pa'i yul yin pa'i phyir yang / grangs kyang bgrang bya la dgos pa nyid du nye bar blangs nas/ mang po rnams la tshig mang por thal bar 'gyur ro/ /rdzas bzhin du grangs la sogs pa la yang kha dog dang dbyibs las tha dad pa can ma yin te/ de 'dzin pa'i mngon sum la de dang 'dra ba'i snang ba med pa'i phyir yod pa ma yin te/ rgyu mtshan de dag nyid tha dad par rnam par 'byed pa dang / tshig gi dbye ba la sogs pa rnams ni brjod par 'dod pa'i yul la rnam par gnas pa yin no/ /kha dog dang dbyibs ni tha dad par mi dmigs pa yin la/ phyis mngon sum gyi dus su de nyid dang / rjes su 'brel pa'i ngo bor ma yin nam/ rjes su 'jug pa nyid kyi rdzas yin la/ de nyid las log pa nyid kyi gnas skabs ni yon tan yin no snyam du sems la/ de las tha dad pa'i rdzas gzhan zhes bya ba'o/ /de'i rjes su 'gro ba'i ngo bor rdzas ma yin nam/ dbyibs dang kha dog gi rten yin la/ de la brten pa de dag ni kun du dmigs pa yin pa'i phyir la de bzhin du ma dmigs pa yang grub pa yin no snyam du sems pas/ 'on te kha dog dang dbyibs dang ldan pa'i rdzas yin no zhe na/ lan du ma yin te/ de las tha dad par zhes bya ba ste/ ljang gu dang ser po'i kha dog dang de'i dbyibs su snang ba'i dus su snang ba yin no/ /sngar mthong ba ngo shes pa yang mthong ba'i yul la yin la/ de'i yul dang log par 'dzin pa'i phyir mthong ba nyid kyis gnod pa yin no/ /gnod par byed pa las kyang khyad par gyi rnam pa'i nges pa ma bzung ba'i khyad par tsam mam/ thag ring ba nyid kyang snang ba yin gyi rdzas sam cig shos ni ma yin no/ /de'i gnas skabs na yod bzhin pa gnas skabs gzhan du 'gyur ba ma yin par bstan pa ni/ gsal ba dang mi gsal ba zhes bya ba la sogs pa ste/ snga ma'i kha dog dang dbyibs gzhan yin pa nyid dam/ gzhan du yang rtogs pa ni mi gsal ba nyid du tha snyad 'dogs pa med par thal bar 'gyur ro zhes bya ba'i don to/ /mthong ba dang phrad par byed pa mthong ba ni tshad ma yin/ phrad par byed pa yang reg pa'i dbang pos 'dzin pa ma yin nam/ de'i phyir mthong ba dang reg pa dag gis don gcig 'dzin pa yin pa'i phyir gzugs dang reg bya la sogs pa gcig pu ni rdzas yin te/ de med na mngon sum nyid tshad ma nyid du mi 'gyur ro snyam du sems pas/ 'on te yang kha dog de ni thob pa min zhes bya ba'o/ /lan ni/ de nyid du na gal te de/ /zhes bya ba'o/ /ji ltar yang mthong ba la gzugs dang dbyibs kyang snang ba yin la/ rdzas kyang de'i rtogs bya yin pa'i phyir de kho na bzhin du snang bar 'gyur ro/ /de bzhin du reg pas dmigs par bya ba yin na/ 'jam pa dang rtsub pa la sogs pa bzhin dang / de'i dpag bya kha dog dang dbyibs bzhin du de las gzhan pa'i rdzas su dmigs par 'gyur te/ rang gi ngo bo de bzhin du ma dmigs pa la dmigs pa yin par smra bar mi rigs so zhes bya ba'i don to/ /de lta yin na reg bya thob byed yin pas mthong ba ji ltar tshad ma yin snyam du sems pa la/ rjes su sbyor ba ni zhes bya ba smos te/ yul gzugs mthong ba ni thob bya rang gi 'bras bu'i ngo bo la de nyid la de'i 'bras bu nyid du sgro btags pas de nyid mthong ngo zhes mngon par zhen pas thob par bya ba yin la/ reg bya la ni de dang tshogs pa gcig pa'i 'bras bu yin pa nyid kyis rnam par rtog pas sprul pa'i yul gcig pa nyid kyis tha snyad pa yin gyi rdzas ni yul ma yin te/ 'o na ci zhe na/ yul ni gzugs dang reg bya dag yin te/ de ltar nges pa yin pa'i phyir ro/ /de yang / kha dog so sor snang ba las/ /'di ni bum min shes pa la/ /zhes gsungs pa'o/ /'di nyid kyi dgongs pas ni de 'dzin pa med na de'i shes pa med do zhes gsungs pa'o/ /de ni rjes su 'gro ba'i mthar thug pa yin te/ thal bar 'gyur ba dang phyin ci log pa la brten pa'i phyir ro/ /des na de'i kha dog dang dbyibs 'dzin pa na/ de dang de ma yin pa'i bdag nyid kyi blo ni gcig gi blo yin te/ tha dad pa dang tha dad pa ma yin pa'i rdzas sam gzhan yang rung ba'i blo ni ma yin te/ gcig nyams su myong ba gang yin pa 'di de nyid kha dog dang dbyibs nyams su myong ba yin no zhes bya ba'i don to/ /dkar po dang dung ni rnam par gcad bya dang rnam par gcod byed yin pas rdzas dang yon tan dag mngon sum yin pas/ dang po'i dbang po'i dus de nyid du snang ba yin pa'i phyir/ rdzas mi dmigs pa ma grub pa yin no snyam du sems pa la/ sngar bstan pa'i rim pas dbyibs las gzhan pa gcig pu'i bye brag tu bya ba'am/ thun mong ba'i ngo bo med pa'i phyir khyad par gyi rnam pa'i nges pa mi 'dzin pa nyid spyi yin no zhes nye bar bsdus pa yin no/ /de'i phyir thun mong ba zhes bya ba'o/ /mchod sbyin la sogs pa'i bye brag rnams kyis byed pa'i don ni nges par 'dzin pa med pa kho na yin par bstan pa ni/ de bas na byed pa zhes bya ba'o/ /nges par sbyor ba'i yul gyi skad kyi dbyings kyi don dang / byed pa'i don dag ni rtogs pas phye ba yin no/ /de lta mod kyi yul med pa ni ma yin no snyam du sems pa la/ rang gi bya ba dang zhes bya ba smos te/ snga ma'i bag chags dang don yang shes pa de'i rgyu mtshan yin gyi/ re re'i ni ma yin no/ /gtan med pa'i don la sgra ni shes pa'i byed pa yin no snyam du sems pas smra ba ni/ mngon sum ni zhes bya ba ste/ gtan med ba zhes bya ba ni da ltar ba ma yin pa 'byung bar 'gyur ba dang byung zin pa'i ngo bo zhes bya ba'i don to/ /lan du mthong ba med pa'i don de ni zhes bya ba ste/ da ltar ba ma yin pa'i yul la yang sgra'i shes pa 'byung ba ni don yod pa'i ngo bor grub pa yin na ni bden na/ rtogs pa 'di nyid la don yod pa ni ma yin te/ rang gi ngo bor rig pa'i phyin mthong ba med pa zhes bya ba'i don yin no/ /'bras bu la bya ba byed pa po'i ngo bo mi shes pa yin na/ de'i byed pa med la sbyin sreg byas pas mtho ris thob po zhes bya ba'i shes pa rtogs par byed pa ma yin par bstan pa ni/ me'i sbyin sreg la sogs pa la ni 'bras bu'i rgyu nyid ces bya ba'o/ /mi 'jug pa 'jug par byed pa nges sbyor ma yin nam/ skyes bu ni de la sbyar bya yin pa nyid kyis de dang 'brel pa can yin gyi byed pa po nyid kyis ni ma yin no/ /skad kyi dbyings kyi don ni yul nyid kyi 'brel pa can yin gyi byed pa nyid kyis ma yin la/ de ling la sogs pa'i bya ba ni ma yin te/ 'dzud par byed pa'i bya ba nyid dang / tshad ma gzhan gyi spyod yul yin pa'i phyir dang / ma bcad pa gcod pa po nyid med par thal bar 'gyur ro/ /'di ni rdzogs bya nyid kyi 'bras bu yang yin la/ 'jug pa la phyogs pa'i gegs byed pas dgag pa yang yin te/ skyes bu'i 'dzud byed dang / sgrib byed dag gi bsgrub pa dang dgag pa'i don dag ni de tsam gyis kyang rdzogs pa yin gyi/ 'bras bu dang bya ba la sogs pa'i rtogs pa byed pa ni ma yin no snyam du sems pa ni/ 'on te bdag gi nus pa zhes bya ba ste/ bya ba'i 'bras bu'i byed pa po dang / de dang 'brel pa dang mtshan nyid mi mthun pa'i ling gi don te/ rtogs bya yin pas 'bras bu yin pa ni nges sbyor yin no zhes bya ba'i don to/ /'bras bu'i rgyu nyid mi shes pa yin la/ bskul yang rtogs pa dang ldan pa rnams 'jug par mi 'gyur bar bstan pa ni/ gal te de ni mtho ris kyi rgyu min par ni zhes bya ba'o/ /'bras bu nyid ni snga ma'i rjes su 'brangs nas/ lung thams cad du rtogs pa'am phyir rig byed dang rig byed ma yin pa dag la bye brag ci yang med pa yin la/ skyes bus byas pa la ni de lta bu'i las med pa ma yin no zhes bya ba'i don to/ /'brel pa ni skyes bus byas pa yin pa'i phyir rig byed rang nyid kyi shes pa skyed par byed pa ma yin pas skyes bus byas pa'i 'brel pa'i rjes su 'brangs pas rtogs pa yin na/ the tshom can yin gyi/ 'ba' zhig gis ni ma yin no/ /mthong bya dang brtag bya dag gi don gcig tu byas nas 'jug par byed pa'i phyir 'khrul pa nyid yin par bstan pa ni snang ba dang / rnam par brtag pa gcig tu byas nas shes par bya'o/ /mngon sum la sogs pa'i shes pa ni rgyu yod la rkyen med pa yin na/ tshad ma nyid skyed par byed pa ma yin nam/ rig byed la yang de dag tsam gyis sbyor bar byed pa ni yod pa nyid yin la/ skyon rnams ni tshad ma nyid ma yin pa la sbyor bar byed pa yin te/ skyes bus ma byas pa nyid kyi phyir mi srid pa yin no/ /mngon sum la sogs pas rtogs pa'i don nyid ni tshad ma nyid la sbyor bar byed pa ma yin pa des na de med kyang skyon med pa yin no/ /don ji lta ba bzhin la nges pa yin na skyon med pa ma yin nam/ nges pa yang don byed pa la mi bslu ba nyid kyi phyir te/ snga ma la skyon mi dmigs pa tsam ni the tshom gyi rgyu yin na/ mi bslu ba yang skyes bu'i don nyid la 'jug pa'i mtshams yin pa'i phyir the tshom za ba yin na tshad ma nyid la sbyor bar byed pa ma yin no/ /sngar gyi gnod pa med pa can yang snga ma bzhin du the tshom can yin no/ /'jug pa la yang slu ba can nyid yin na/ mi bslu ba dang slu ba dag kho na tshad ma nyid dang / tshad ma ma yin pa nyid la sbyor bar byed pa nyid yin gyi/ rig byed la ni tshad ma nyid la sbyor bar byed pa'i tshad ma gzhan mi bslu ba yod pa ma yin la/ de'i tshe slu ba nyid ni yod pa yin te/ 'byung bar 'gyur ba la yang ma 'khrul ba'i rgyu mtshan med pa'i phyir srid pa yin no/ /skyes bus byas pa ma yin pa nyid la ni mi bslu ba la sbyor bar byed pa dang / rang bzhin pa'i yang 'brel pa med pa'i phyir nam mkha' bzhin du go bar byed pa nyid ma yin no/ /des na yang / skyon med shes pa las byung ba'i/ /mngon sum gyis bsgrubs skyes bu ni/ /min pa'i bye brag skul byed blo'i/ /brjod bya med smra rnams kyi yin/ /zhes bya ba ni mi rigs pa nyid yin pa'i nye bar bsdu ba ni/ de'i phyir 'chad pa po'i byed pa'i yul zhes bya ba ste 'di skad bstan par 'gyur te/ re zhig tshad ma nyid shes pa ni dbang po la sogs pa'i rgyu'i ngo bos bskyed par bya ba ma yin te/ rang las tshad ma thams cad kyis/ /tshad ma nyid du gzung bya yin/ /rang las te bdag nyid kyi rgyu kho na las yin gyi/ rgyu gzhan las ni ma yin te/ rgyu yi rang gi ngo bo ni/ /tshad ma min la 'ang yod pa'i phyir/ /zhes gang gsungs pa'o/ /tshad ma nyid du yang ma shes pa ni don yongs su gcod pa'i 'bras bu'am/ 'jug pa'i ngo bo'i 'bras bu yang byed pa ma yin te/ shes pa'i snga rol du byung ba dang phyis 'byung ba la yang bye brag med pa'i phyir te/ dngos po rnams kyi bdag nyid 'thob la rgyu la ltos pa nyid yin te/ bdag nyid 'thob pa rang 'bras la/ /rang nyid kho na 'jug par 'gyur/ /zhes smos pas/ yongs su gcod pa tsam ni tshad ma yin pa tsam la yang yod pa'i phyir ro/ /de ltar yang / de phyir blo'i bdag nyid kyis ni/ /blo yis tshar ma nyid 'thob na/ /don gzhan nyid rgyu las byung ba'i/ /skyon shes pa las sel pa yin/ /zhes smos pa'o/ /dmigs kyis bsal ba'i yul btang nas spyir btang ba la 'jug par bya ste/ des na shes pa'i rgyu'i bye brag can tshad ma ma yin pa med pa can gyis tshad ma nyid bskyed par bya ba yin gyi bye brag de yang shes pa'i rang gi ngo bo byed pa ni ma yin te/ de med par yang 'byung ba'i phyir ro/ /de nyid kyis ni rang gi ngo bo yongs su gcod pa tsam ni tshad ma nyid kyi 'bras bu ma yin te/ tshad ma ma yin pa la yang yod pas the tshom can yin pa'i phyir ro/ /bye brag ma mthong na thag ring po la mtho yor dang mir lta ba po rnam par dpyod pa na/ skyon gyis shes pa ma skyes phya na/ /tshad ma yin pa'i dogs pa med/ /ces bya ba tsam gyis bsal bar nus pa ma yin no/ /de lta bu'i yul rang nyid kho na skye bar rnam par dpyod pa yin no zhe na/ yongs su gcod pa tsam la yang khyad par ma mthong bar bye brag med pa yin te/ dang po ni gnod pa can med pa'i khyad par du ma nges pa yin la/ dus phyis 'jug pa'i dus su ni yod pa ma yin pa'i phyir the tsho ma yin no/ /goms pa'i yul la ni lan cig min par 'jug pa po 'thob pa'i yod pa dang med pa dag gis mtshon pa ni ma 'khrul ba'am/ cig shos kyi ngo bo nyid na khyad par yod pa'i phyir the tshom skye ba ma yin no/ /gnod pa can ma dmigs pa tsam las ni/ gnod pa can yod pa dang med pa'i thun mong ba las ma yin no/ /de ltar na/ rgyu'i skyon ma dmigs pa la yang brjod bya 'jug pa yin te/ dang po rgyu'i skyon ma dmigs pa'i ma nges pa yin la/ phyis ni snga ma ma grub pa yin no/ /kha cig tu lan cig min par 'jug pa dang / thob pa dag gis shes pa ni ma 'khrul pa'i ngo bo nyid yin pa ni bye brag yin pa'i phyir de mthong ba la 'jug pa ni gnod par byed pa'i rgyu skyon ma dmigs pa las 'jug pa ma yin te/ de'i phyir dang por yongs su bcad pa ni don dang don ma yin pa'i thun mong ba yin pa'i phyir the tshom yin yang / de'i tshe de nyid la 'jug pa yin te/ de ltar 'jug par yang mthong ba'i phyir ro/ /dus phyis ni ma 'khrul pa'i shes pa las/ shes pa'i rang gi ngo bo nyid kho na las 'jug pa yin te/ rang gi ngo bo 'dzin par byed pa'am/ don byed pa 'dzin par byed pa la gzhan la ltos pa yin yang thug pa med pa ma yin te/ don byed pa'i bde ba la sogs pa'i ngo bo nyid yin pa dang / rang gi ngo bo shes pa las tha dad pa ma yin pa dang / rang rig pa'i mngon sum yin pa nyid kyis the tshom bsal ba'i phyir ro/ /mngon sum la yang re zhig don gyi rang gi ngo bo snang ba can la sogs pa med na the tshom kho na yin na/ rig byed la ni don gyi rang gi ngo bo la reg par byed pa ma yin pa rnam par rtog pa tsam la ni smos kyang ci dgos te/ dbang po las 'das pa'i yul can nyid kyis goms pa mi srid pa'i phyir/ de dag tsam gyi rgyu bskyed par bya ba'i shes pa ni don byed pa ma yin pa nyid kyis/ dang po'i shes pa las khyad par med pa'i phyir rig byed la yang rjod par byed pa'i rjes su 'jug pa'i blo ni rnam pa brgyar 'gyur ba'i phyir pha rol po'i phyogs ni rjes su mthun pa ma yin la/ pha rol po rnams kyis mi bslu ba shes pa zhan pa tsam ni de dag tsam gyi rgyu bskyed byar brjod pa ma yin no/ /de lta mod kyi grang ba ldog par byed pa la sogs pa rang nyid rig par bya ba yin no/ /des na pha rol po'i dngos pos stong pa 'dren par 'dod pa tsam ni gus par bya ba ma yin no/ /goms pa med pa'i dus kyi tshad ma nyid ni gzhan gyi rjes su 'brang ba'i bdag nyid can gyi 'bras bu can yin te/ 'bras bu dang rgyu tsam du ni tshad ma dang cig shos mtshungs pa des na phrad par bya ba med na mi 'byung ba'i ngo bo ni goms pa las rtogs pa yin la/ mthar thug par gnod pa mthong ba'am/ gzhan yang rung ba la 'grub pa la 'khrul pa ma yin pa nyid kyi phyir/ de nyid ma rtogs las byung ba/ /spyi yin smra rnams 'di la gnas/ /rgyal ba can de'i ji ltar yin/ /tshig tu brjod pa de smra yin/ /zhes bya ba'o/ /bcom ldan 'das nyid chos la sogs pa rnams la tha snyad pa ma yin pa'i tshad ma yin gyi/ cig shos ni ma yin no zhes dang por khas blangs pa ma yin nam/ gang gi phyir de ni dbang phyug la sogs pa'i yul nyid yin no snyam sems pa yin na/ de ni dgag par bya ba yin no/ /kun rdzob ni mi 'dod ces bya ba ji ltar yin/ sngar mthong ba ngo shes pa ni chos la sogs pa'i yul nyid yin/ de dang bsgrub pa ma yin te/ rtogs pa nyid yin pas skabs ma yin pa ma yin te/ mngon sum dang rjes su dpag pa'i ngo bo nyid dag gis gnyi ga'i ngo bo yin pa'i phyir dang / bcom ldan 'das kyang las dang 'bras bu 'brel ba mkhyen pa la rnam par rtog pa gtso bo yin pa'i phyir/ dor ba la sogs pa'i rnam par rtog pa med par nyams su myong ba tsam gyis 'jug pa ma yin pa'i phyir yang rjes su mthun pa yang yin no/ /'on te nyams su myong ba'i ngo bo'i bcom ldan 'das ni bdag nyid dam/ gzhan yang rung ba'i dus su rig pa yin la/ rnam par rtog pa ni de dang de ma yin pa'i dus su rig par byed pa yin pa'i phyir de dang 'gal ba can yin pa'i phyir gsal bar bya ba yin no/ /ma yin te/ nyams su myong ba de ma yin pa'i yul can nyid yin na/ de la rag las pa'i rnam par rtog pa yang 'dzin par byed par mi 'gyur ro/ /de la rag mi las pa nyid yin na de yod na 'byung ba ni sngon po'i rnam par rtog pa bzhin du mi 'gyur ba'i phyir nyams su myong ba yang zhen pa'i bdag nyid kho na yin par shes par bya'o/ /de ma yin pa'i dus su rig pa ni shes pa nyid kho na nyid yin no/ /goms par bya ba'i yul la rjes su 'jug pa la sbyangs pa yin na/ mig phye ba'i mod la de nyid rtogs pa rnam par rtog pa can ma yin pa yod pa yin te/ de la dran pa'i rjes su 'jug pa la sogs pa srid pa ma yin no/ /ma'am pha la yang tha snyad la bslabs pa la sogs pas goms par gyur pa ni mthong ba tsam gyis mi shes pa ma yin no/ /de ni 'dra bar rtogs pa yin zhes bya bar ni mi rigs te/ sbyangs pa'i zin po ma yin na 'dra bar rtogs pa med pa'i phyir/ de la zin po yin na 'dra bar rtogs pa bzhin du de kho na nyid rtogs pa bsal bar byas pa ma yin pa nyid yin no/ /snga ma'i rjes su 'brangs pa med na 'dra bar rtogs pa yin no/ /sngar nyams su myong ba'i yul nyid 'dzin pa kho na yin pa 'di ni de kho na nyid shes pa yin zhes bya ba'i rnam par rtog pa med pa can ni sngar mthong ba ngo shes pa yin la/ rnam par rtog pa yang de'i 'og tu de nyid 'di yin no zhes bya ba ni sngon por nyams su myong ba'i rnam par rtog pa kho na bzhin du sngar mthong ba ngo shes pa ni rnam pa gnyis te/ rnam par rtog pa dang cig shos kyi ngo bos yin pa'i phyir nyams su myong ba'i bdag nyid bcom ldan 'das ni skad cig ma nyid la sogs par rig pa po ma yin zhing / rnam par rtog pa yang ma yin pa'i phyir tshad ma ma yin la sgra ni yin te/ sngar mthong ba ngo shes pa las sgra dang don dag gi rtag pa nyid du grub pas 'brel pa yod pa'i phyir ro/ /yang na nyams su myong ba ni rang gi dus su rig pa yin gyi dus gzhan du ni ma yin la/ rnam par rtog pa ni de dang de'i dus ma yin par yang rig par byed pa yin te/ nyams su myong ba las ni 'ba' zhig 'byung ba yin gyi/ de'i bya ba'i yul la yul du byed pa ni ma yin te/ de yang / dang po dag pa'i dngos po las/ /byung ba'i mig gi rnam shes yod/ /ces smos pa'o/ /dang po zhes bya ba ni rgyu mtshan yin te/ rang gi yul la gtod par byed pa ni ma yin te/ de ni dag pa'i dngos po las skyes pa zhes zer ba'o/ /rnam par rtog pa ni yul gzhan la yin te/ de yi 'og tu dngos de yang / /rigs stsogs rnams kyi chos rnams dang / /bcos pa'i blo gang gis nges pa/ /de yang tshad ma nyid du 'dod/ /ces bya ba ste/ mngon sum ma yin zhing rtags med pa'i phyir rjes su dpag pa yang ma yin no/ /nyams su myong ba khyad par can rig pa dang 'gal ba yang ma yin te/ des bsgrub pa nyid rnam par rtog pas brtags pa nyid du rtogs pa'i phyir ro/ /rtag par rigs pas kyang nyams su myong ba de dang 'gal ba yang ma yin te/ dngul gyi shes pa la yang nya phyis kyi shes pa lta bu'o/ /de ltar dang po la gnod pa med pas phyi ma skye bar yang rigs pa'i phyir gnyi ga'i bdag nyid can gyi dngos po la nyams su myong bas mi rtag par rtogs la/ rnam par rtog pas rtag par rtogs pa'i phyir rjes su dpag pa las gzhan pa'i tshad ma gnyis grub pa yin no/ /mngon sum dang sngar mthong ba yang ngo / /'di skad bstan par 'gyur te/ nyams su myong ba nyid rnam par rtog par 'gyur la/ phyis ni dran pa gzhag par ni mi 'thad par shes pas rang nyid kyang goms par byas pa'i yul rtogs pa yin te/ de yang da ltar ba tsam 'dzin pa can rtog pa med pa yin la/ de'i nus pa las rnam par rtog pa gzhan sngar mthong ba ngo shes pa yin no/ /snga ma dang phyi ma'i shes pa thams cad du gzhi mthun par mtshungs pa nyid du rtogs pa la bsnyon par nus pa ma yin no snyam du sems pa la/ gal te don byed par gnas pa zhes bya ba smos te/ sngar mthong ba ngo shes pa zhes bya ba la sogs pa'i sgras ni yan lag can la sogs pa'i shes pa bzung ngo / /lan ni/ 'dir brjod pa zhes bya ba ste/ /re zhig nyams su myong ba nyid nges pa pa'i bdag nyid can yin par gang smras pa de ni mi rigs te/ rta'i rnam par rtog pa mthong ba'i dus su yang ba lang mthong ba las rta yin par rnam par rtog pa'i phyir dang mthong ba dang rtogs pa dag bye brag med par thal bar 'gyur ba'i phyir dang / bye brag kyang rtogs pa las grub pa'i phyir dang / don gyis go ba yin pa'i phyir yang ngo / /ji ltar mthong ba de bzhin du rnam par gzhag pa yin na/ gnod pa med pa yin te/ mthong ba sgrin po nyid yin na dran pa skye ba'i phyir mthong ba ni rnam pa gnyis te/ ches mang rtul ba 'gro ba po'i rtsa'i reg pa bzhin du ma goms pa'i dus su dang / de las bzlog pa ches zin bo yin pa'o// /de la yang de'i mtshan nyid kyi dran pa skye bo la mtshan nyid kho na ni nges pa ma yin te/ dran pa dang cig shos dag gi mthong ba dang kun rdzob dag tha dad pa'i phyir ro/ /'on te goms pa la pha la sogs par sbyangs pa'i zin po yin pa'i phyir dang po nyid snang ba na mthong ba tsam gyis go ba yin no/ /de la/ de nyid 'di yin no snyam pa zhes bya ba smos te/ pha la sogs pa dang po nyid mthong ba las rtogs pa dang / de la dgos par rtogs pa yang ma yin te/ dang po bzhin du nye ba gnas pa nyid kyis pha ni rtogs pa la sogs pa'i yul yin te/ dang po pha la sogs pa'i tha snyad la/ snga ma nyid ltos pa ma yin la/ de la dgos pa yang ltos pa ma yin no/ /rnam par rtog pa ni der nye ba na gnas pa'i pha la sogs pa'i yul la gzung ba la 'dzin pa yin te/ nye ba na gnas pa mthong ba'i yul can yin pa'i phyir/ de nyid 'di yin no zhes bya ba de la yang pha yin par rtogs pa 'di la yang yin no zhes bya ba'i don to/ /yang na de nyid 'di yin no zhes bya ba ni de dang 'dra ba yin no zhes bya ba'i don to/ /'dra ba nyid kyi rgyu mtshan las de nyid 'di yin no zhes bya bar 'gyur ba yin nam/ ba lang dang 'dra ba ni ba men no zhes bya ba lta bu'o/ /bden te/ de nyid 'di yin no zhes bya ba blun po rnams la ni 'dra ba nyid la de lta bu'o zhes bya bar 'gyur te/ ba lang lta bu'i ba lang ma yin no zhes bya ba lta bu'o/ /shin tu 'dra ba nyid la de nyid 'di yin no zhes bya ba ni skra dang sen mo la sogs pa breg pa yang skye ba lta bu'o/ /de la bar tshigs su mgo zlum du mthong ba ni gcig pa nyid la gnod pa can yin la/ 'di la yang snga ma dang phyi ma dag gi mthong ba dag la mthar thug pa dang 'dzin pa gnod pa byed pa yin gyi ma yin no zhes bya ba ni/ byed pa 'dzin pa nyid kyis rjes su bsgrub byar byed pa yin no/ /'dra ba'i shes pa yang mthong ba tsam la med pa yin la/ sbyangs pa'i zin po la ni 'byung ba yin no/ /zin po de la de dang gcig pa nyid du 'dzin par cis mi byed pa yin/ rang gi dus su 'dzin pa nyid ni goms pa yod pa la yang mthong ba'i chos yin la/ 'dra ba yang yin no/ /rang gi dus su dang 'dra ba la zhes bya ba mthong ba la ji ltar yin zhe na/ de lta bu med kyang 'dra bar rtogs pa la sngon po lta bu'o/ /de kho na nyid du ni de'i yul ma yin pa'i phyir brgyar goms pas kyang rtogs pa ma yin te/ mi mthun pa'i mtshan nyid dang / mthun pa'i mtshan nyid dag gi goms pa yin yang bzang po ma yin pa'i mtshan nyid dang mi mthun pa ma yin pa'i mtshan nyid kyang 'dra bar brjod pa ni ma yin no/ /de nye ba yin yang de'i gcig pa nyid ni nye ba ma yin la/ de dang mtshan nyid mi mthun pa'i ma yin pa nye ba yin yang / de ni ma yin pa'i phyir de dag 'dzin pa ma yin na/ mngon sum ji ltar rtogs pa yin/ de bzhin du mtshan nyid mi mthun pa yang ngo / /dngos po kun la tha dad dang / tha dad min gzhan ldog pa nyid ni rang gi ngo bo tsam rig pa las so/ /des na yang rdzas re re zhing tha dad pa'i ngo bor dmigs pa'i phyir 'di yongs su nyams par 'gyur ro/ /de'i phyir gzung ba 'dzin pa las snga ma dang phyi ma'i yul can yin pa'i phyir mthong ba kun rdzob ma yin pa ni rnam par rtog pa ma yin par dgongs pa'o/ /de nyid la 'di yin no zhes bya bar rtogs par byed pa yin zhing 'di yin no zhes bya ba yang de nyid yin no/ /des na shes pa gnyis dag gi yul gcig nyid yin na ji ltar 'dra ba'i yul can nyid dam/ mtshan nyid mi mthun pa'i yul can nyid yin shes pa'i gcig pa nyid dam du ma nyid kyang dgongs pa can ma yin te/ rtogs bzhin pa ni gcig pa nyid la log par rtogs pa'i phyir de yang bsal ba yin pa ni 'on te snga ma dang lhan cig gcig tu rtogs so zhes zer ba la/ lan du/ de ni mi rigs te zhes bya ba ste/ gcig pa nyid du rtogs pa ni mngon sum du mi 'gyur ro zhes bstan pa ni/ mngon sum las sngon rig med na zhes bya ba'o/ /rnam par rtog pa ni yin te/ goms pa yin na snga ma snga ma brdzun pa'i bag chags kyi dbang gis don gcig byed pa nyid kyis rgyu mtshan byas nas/ yi ge ga la sogs pa rnams la go ba'i sgrar shes pa lta bu'o/ /de la yang yi ge ga la sogs pa las ldog par dmigs pa nyid ni gnod pa can yin la/ de ni 'di la yang bye brag med par yin pa can bstan pa ni/ des na snga ma snga ma yi/ /rtogs la kun rdzob pa zhes bya ba ste/ rnam par rtog pa ni gcig par rung ba nyid ma yin te gcig pa ni dngos po'i chos yin pa'i phyir la/ de yang bdag nyid thams cad kyis mngon par rung ba'i phyir zhes bya ba'i don to/ /'di skad bstan par 'gyur te/ sngon po mthong ba'i 'og tu sngon po'o zhes pa'i rnam rtog ni gzung ba tsam la 'dzin pa yin la/ bum pa'o zhes bya ba yang brda'i bag chags la brtan nas mthong ba nyid kyis gzugs la sogs pa tshogs pa la rnam par rtog par byed pa yin te/ pha la sogs par yang goms pa la de nyid du mthong ba nyid yin par ni/ gzung ba 'dzin pa'i phyir zhes bya ba la sogs pas bstan to/ /snga ma snga ma'i bag chags tsam las 'byung ba'i rnam par rtog par go bar byed pa nyid kyi dgongs pas gsungs pa ni/ kun rdzob ni zhes bya ba la sogs pa'o/ /rnam par rtog pa kha cig ni tshad ma ma yin te/ gang gi phyir gzung ba la 'dzin pa ste kun rdzob pa zhes bya ba'i don to/ /gzhan yang ni ma yin no/ /yang na mngon sum ni mthong ba tsam las tshad ma ma yin te/ mthong ba rnam pa thams cad yul yin pa nyid kyi bye brag med pa'i phyir ro/ /khyad par can gyi rnam par nges pa ni yul nyid yin no/ /nges pa yang chos dang rtags dang 'brel pa la sogs pa rnams kyi mngon sum ma yin pa nyid kyi rjes su dpag pa las yin no/ /mngon sum ni tha dad pa ma yin par nges pa med kyang so sor snang bzhin pa'i don la nges pa skyed par byed pa'i phyir tshad ma yin no/ /'di mthong ngo zhes bya ba ni mngon sum gyi bya ba ni mngon sum gyi bya ba'i rjes su 'brang bas nye bar rtogs pa'i bya ba btang nas rnam par rtog pa skye ba ni/ 'di ni sngon po yin gyi ser po ni ma yin no zhes ldog pa gcig gsal por byed kyi gzhan ni ma yin te nges pa med pa'i phyir ro/ /mngon sum ni de skyed par byed pa las tshad ma yin te/ de gsal bar byed pa rnams kyi yul du de gnas pa yin na zhes bya ba ni ldog pa gcig la nges pa'i mthar thug pa yin la/ 'di'i yang bya ba ni rjes su dpag pa yin no/ /gzhan du na sngon po'i yod pa nyid skad cig ma yin pa nyid kho na nges pa'i phyir skad cig ma nyid du sgrub par byed par mi 'gyur te 'gal ba'i phyir ro/ /'ga' zhig kyang ma yin te/ ma grub pa'i phyir de skad cig ma nyid dang bral ba ni tshad mar nges pa ma rtogs pa gcig la thug pa can ni tshad ma'i bya ba la don byed nus pa'i cha yul la 'jug par byed pa yin gyi yul gzhan la ni ma yin no/ /des na yul gyi cha sngon po la 'jug par byed pa yin pa'i phyir skad cig ma ma yin pa nyid du nges pa can yang de'i yul ma yin no/ /des na tshad ma gzhan gyis gnod par bya ba yin no/ /de ltar na mngon sum dang 'gal ba yang ma yin te/ 'di'i nus pa'i cha'i mthar thug pa yin pa'i phyir ro/ / mngon sum ni yul la rnam par rtog pa'i gzhan yin la/ bcom ldan 'das kyang mngon sum gyi bdag nyid yin gyi/ rnam pa thams cad kyi yul la mthong ba kho na bzhin du ni ma yin no snyam du sems pa la/ shes de dag gi bzung don la/ /zhes bya ba smos te/ rnam par rtog pa nyid ni mthong ba'i gzhan dbang yin gyi/ mthong bas rnam par gzhag pa ma yin pa'i cha la ni de'i ming la sogs pa dran pa med na/ de la sbyor ba byed pa'i bdag nyid rnam par rtog pa mi 'byung ngo / /ma mthong ba ni sbyor bar byed pa ma yin pa'i phyir rnam pa thams cad pa'i yul mthong ba yin yang / ches zin pa ni rnam pa gang dang gang la de'i ming la sogs pa dran pa nyid kyis nges par skyed par byed pa ni rnam pa de la tshad ma yin gyi/ rnam pa tshogs pa rnams la tshad ma gcig nyid ma yin no/ /gang gis don byed pa'i nus pa can nyid du mthong ba yod pa yang skad cig ma ma yin pa nyid du nges pa yin la/ yod pa nyid dang skad cig ma ma yin pa nyid du yang so sor nges pa kho na yin pa'i phyir ji ltar yod pa 'ba' zhig gi gtan tshigs ma yin zhing ji ltar 'gal ba nyid yin te/ skad cig ma ma yin par nges pa la tshad mas gnod pa'i phyir ro/ / gang cha shas mthong ba la mi zin pa de la nges pa'i rgyu mtshan rjes su dpag pa yin la/ de la rtags med na tshad ma ma yin pa'i phyir ro/ /rang nyid dam gzhan yang rung ba'i rjes su dpag pas nges pa'i dngos po la goms pa phul du byung pas/ rim gyis rnam pa thams cad pa'i mngon sum rtogs pa med pa de lta ba bzhin du 'byung bar 'gyur ro/ /mthong ba'i bya ba ni yan lag med pa'i phyir gcig yin yang du ma nyid du rnam par gzhag par bya ba ste/ nges pa skyed par byed pa dang mi byed pa bzhin du'o zhes bya ba'i don to/ /de ltar na de gnas skabs pa'i tshad ma nyid dang 'gal ba nyid kyis rnam par rtog pa tshad ma ma yin par bstan nas/ de med kyang de dang rjes su mthun pa mthong ba la yin te/ tshad ma nyid mthong ba'i phyir ro snyam du sems pa zlog par byed pa smra ba ni/ gal te snga ma dang phyi ma zhes bya ba la sogs pa'o/ /mthong ba ni goms pa med na 'jug par byed pa ma yin la/ rnam par rtog pa ni mthong ba la snga ma gcig pa nyid du 'dzin pa can ni 'jug par byed pa ma yin nam/ de yang yul de la de bzhin du goms pa na mthong ba'i yul du gyur pa yin na goms pas 'jug par byed pa yin gyi/ mthong ba ni ma yin te/ snga ma bzhin du bye brag med pa'i phyir ro/ /brtag bya 'dzin pa las gzhan pa de'i bye brag ni 'jug pa'i yan lag ma yin te/ rnam rtog 'ba' zhig ni goms pa med na rang nyid kho na 'jug pa'i yul rtogs par byed pa yin la/ goms pa na ni de'i yul nyid 'dzin par nus pa mthong bar sgro 'dogs pa log pa'i phyir gnyi ga la yang 'jug pa'i rnam par rtog pa'i nus pa yin gyi/ mthong ba'i ni ma yin te/ brtag bya yul ma yin pa nyid kyis rjes su 'gro ba la sogs med pa'i phyir goms pa na yang da ltar ba tsam 'dzin par byed pa'i phyir mthong ba'i snga ma dang gcig tu ji ltar snang bar byed pa yin/ goms pa'i yul yin pa las goms bya yang de nyid yin la goms pa ni snga ma'i shes pa de'i yul mthong ba la de nyid mthong zhes bya bar brjod pa yin gyi/ gzhan la goms pa las gzhan mthong zhes bya ba ni mi rigs te/ sngar mthong ba log na des mthong bya nyid dam/ de'i dus kyi de nyid ldog pa yin gyi/ da ltar ba'i yul ji ltar yin/ yang ji ltar ma 'khrul pa ma yin/ dngos po med pa ma yin pa las rtogs pa grub pa'i phyir dang / gnod pa can med pa'i phyir zhes bya ba ni dngos po med pa ma yin pa las ni ma 'khrul pa nyid ma yin la/ ma 'khrul pa las kyang de med pa ma yin pa yin pa'i phyir gcig pa la gcig pa yin na/ da ltar gyi yul mthong ba de'i yul can ji ltar yin/ de la goms pa yin na rnal 'byor pa'i shes pa bzhin du 'das pa la sogs pa'i yul nyid mthong ba la 'gal ba med do/ /rnal 'byor ba'i shes pa ni gzhal bya de la de bzhin du 'dzin par byed pa yin la/ mthong ba yang rnam par rtog pa'i phyir bye brag med do/ /rnam par rtog pa ni rjes su dpag pa yang ma yin te/ rtags las skyes pa ma yin pa'i phyir ro/ /de nyid ni de'i don byed pa'i byed pa po nyid ni de'i ngo bo mthong ba las grub pa'i phyir gzhal bya nyid yin no/ /ma yin te/ de'i ngo bo 'dzin pa nyid rnam par rtog pa yin pa'i phyir de yang gzhal bya nyid yin na thug pa med par 'gyur ro/ /de dang 'dra bas de yin no zhe na/ ma yin te/ de nyid 'dzin pa ma yin na de dang 'dra ba yang 'dzin pa ma yin pa'i phyir ro/ /rtags 'dzin pa la rtags las byung ba grub pa yin pa dang dbang po las skyes pa ma yin pa'i phyir mngon sum yang ma yin te/ dbang po ni sems pa can ma yin pa'i phyir snga ma dran pa ma yin la sbyor bar byed pa yang ma yin no/ /skyes bu ni thag nye ba la de bzhin du 'dzin par byed pa yin te/ sems pa can yin pa'i phyir zhes bya ba ni bdag las skyes pa'i rnam par rtog pa yin no/ /de yang bdag la gnas shes ni/ /de 'dir rtogs byed yin zhes bya/ /dran pa la yang nus ldan zhing / /'brel pa sogs dang ldan pa'ang yin/ /zhes smos pa'o/ /snga ma dang phyi ma mthong ba'i bag chags las byung ba'i phyir yin no/ /bdag las skyes pa nyid dam yid nyid kyang rung thams cad du thal ba ma yin te/ rnal 'byor pa'i shes pa bzhin du 'am rjes su dpag pa bzhin du 'jug par byed pa nyid kyis mi bslu ba'i phyir yang kha cig kho na tshad ma yin pa'i phyir gzhan du mthong ba gzhan du rnam par brtag par bya ba yin no/ /med pa'i rtog pa ji lta bu yin zhe na/ mthong ba snga ma dang phyi ma'i mthong bya nyid gcig nyid du rtog pa'i phyir skyon med do/ /gcig pa nyid du mthong ba la ji ltar rtog par byed pa yin/ mthong bya ma yin pa yang 'bras bu nyid bzhin du brtag bya yin pa'i phyir mthong bya yin no/ /des na de dag tsam gyis ni mthong ba'i yul gyi khyad par du 'gyur ba yin gyi/ cig shos ni ma yin la/ rnam par rtog pa la khyad par med pa yin na/ goms pa la ni 'bras bu nyid kho na bzhin du mthong ba'i yul yang bye brag ma yin no/ /de'i 'bras bu nyid ni nye ba'i phyir snang ba yin no zhe na/ de'i bye brag ma yin pa yang nye ba yin pa'i phyir bye brag med do/ /de ni nye ba ma yin no zhe na/ de'i 'bras bu nyid la yang mtshungs so/ /'bras bu nyid ni nye ba yin no/ /bye brag ma yin pa yang de lta bu yin pa'i phyir bye brag med do/ /goms pa yin yang mthong bas de 'dzin pa ma yin na/ de don du gnyer ba po rnams 'jug par mi 'gyur te/ rnam par rtog pa yang de 'dzin par byed pa ma yin pa'i phyir ro/ /de lta yin na de 'dzin pa ma yin yang rjes su dpag pa bzhin du 'jug par byed pa mi rigs te/ rjes su dpag pa ni de la nges pa las 'jug pa'i phyir 'dzin pa dang / nges pa pa dag yul la 'jug pa'i yan lag yin no/ /goms pa ma yin pa la ni de gnyi ga yang med pa'i phyir 'jug par mi 'gyur ro/ /de'i phyir goms pa yin na/ mthong ba de 'dzin par byed pa yin te/ 'jug par byed pa'i phyir ro/ /rjes su brjod pa nyid ma yin te/ de nyid da ltar mi 'dzin pa'i phyir ro/ /da ltar ba yi yod pa nyid/ /snga ma'i blo yis rtogs pa min/ /snyam du sems pa la/ gang de yang 'byung bar 'gyur ba'i zhes bya ba smos te/ sngon mthong ba ji lta ba nyid da lta mthong ba ma yin la de bzhin du goms pa la yang sngon gyi nyid da ltar ba'i ma yin te/ da ltar ba'i yul nyid yin pas bye brag med pa'i phyir ro/ /goms pa mthong ba'i yul ni 'bras bu nyid du yin no zhe na/ ma yin te/ 'bras bu nyid ni nye ba yin pa'i phyir ro/ /de la nges pa'i ngo bo'i 'bras bu ni gzhan la ltos pa yin gyi/ 'di nyid kyi gcig pa nyid ni de bzhin du ma yin te/ nye ba nyid ni gcig pa nyid de nyid kyi ngo bo yin pa'i phyir thams cad du nye ba 'dzin par byed par mthong ba'i yul ni de nyid ma yin no/ /goms pa las byung ba'i rnal 'byor ba'i shes pa ni mthong bar byed pa yin yang ji ltar 'das pa 'dzin pa yin/ de yang nye ba nyid mthong bar byed pa yin la/ 'das pa la sogs pa de'i yul nyid yin pa ni 'u bu cag la sogs pa la ltos nas yin no zhes 'chad par 'gyur ro/ /'das pa la sogs pa mi 'dzin pa yin na ji ltar 'jug par byed/ ji ltar 'das pa dang da ltar ba la yang 'jug pa ma yin nam/ phrad par 'dod pa po ni da ltar ba la med/ de dang gcig pa nyid du shes pa yin na 'jug pa yin no zhe na/ ma yin te/ phrad pa ni rtogs pa'i ngo bo nyid yin pa'i phyir la/ de ni grub zin pa'i phyir don du gnyer ba ma yin no/ /'byung bar 'gyur ba rtogs pa'i don du 'jug pa yin no zhe na/ de lta yin pa ni bden na/ de da ltar ni med pa yin na/ ji ltar mthong bas 'dzin par byed/ sngon mthong ba de'i ngo bo ma mthong ba las 'dir rjes su rtogs par byed pa yin no zhe na/ mi rigs te/ de'i ngo bo 'dzin pa na de rtogs par ma mthong ba'i phyir ro/ /de ni 'byung bar 'gyur ba de la yin no zhe na/ de de lta yin na/ goms pa yod pa'i mthong ba'am/ gzhan gyis kyang rtogs pa ji ltar 'jug pa'i yul yin/ 'di skad bstan par 'gyur te/ da ltar ba mthong ba ni sngon mthong ba ma yin te/ the tshom yin pa'i phyir la/ gnyis pa la yang goms pa med pa yin na/ de nyid yin pa'i rnam par rtog pas 'jug par byed par mi 'gyur te/ thob zin pa nyid kyi phyir ro/ /thob pa ni rtogs pa'i ngo bo yin pa'i phyir de ni 'byung bar 'gyur ba nyid kyi rnam par rtog pas 'jug pa ma yin te/ 'byung bar 'gyur ba nyid la yang thob pa nyid don du gnyer ba ma yin pa'i phyir ro/ /don byed pa yang de nyid dpags pa yin na/ ji ltar 'jug pa'i yul yin/ don byed pa ni gzhan de dang 'dra ba yin la/ des na don du gnyer ba po'i ngo bo la yang snga ma las gzhan pa nyid yin no zhe na/ da ltar ni gcig pa nyid kyi gtam tsam yang med par song yang kho bo cag gi ngo bo de nyid don byed pa yin par smra'o/ /ma goms pa la rnam par rtog pas de nyid mi 'dzin pa'i phyir 'jug pa'i nus pa med pa yin na/ goms pa la yang mthong bas nus par sgro btags kyang 'jug par byed pa nyid ga la yin/ mthong ba ni don byed pa yang de'i tshe mi rigs pa yin la/ rjes su dpag pa yang de rig par bya ba ma yin pa'i phyir de don du gnyer ba po rnams ji ltar 'jig pa yin/ de dang 'brel pa can nyid shes pa las yin no zhe na/ mthong ba ni de dang 'brel pa can nyid rig pa ma yin no/ /goms pa yin na rjes su dpag pa yin no zhe na/ de nyid med la de nyid kyi rtogs pa yin par 'gyur ro/ /ma goms pa'i dus su de yod par 'gyur pa yin no zhe na/ de lta yin na shi zin pa'i khyim bya yang sgra sgrogs par 'gyur ro/ /gang gi tshe de yod pa de'i tshe de rig pa yin gyi gzhan gyi tshe ji ltar yin/ des 'phags pa'i sbyangs pas mthong ba ni de rig pa yin no zhe na/ ma yin te/ yul ma yin pa la mi 'jug pa'i phyir ro/ /gzhan du na goms pa la du ba las thag ring ba'i me ni rjes su dpag pas rtogs pa yin te/ goms pa la ni mngon sum gyis yin no/ /'di nyid ni de dang 'brel pa can nyid nye ba yin pa'i phyir ro/ /rjes su dpag pa la yang mtshungs pa yin par brjod do/ /du ba thu pa'i ngo bo ni me'i bskyed bya yin gyi/ goms pa la ni mthong bas nges pa yin yang me'i ngo bo ni ma yin no/ /de bzhin du 'di la yang don byed pas bskyed bya'am/ skyed byed kyi ngo bo mthong ba nyid kho na las goms pa yin na/ don byed par nges pa ma yin pa la skyon med do/ /rtogs pa med na ji ltar nges pa yin/ ma yin te/ nges pa'i sgras ni yongs su gsal bar rjod par byed pa'i phyir ro/ /rjes su dpag pas ni don byed pa'i rang gi ngo bo nyid nges pa yin la/ mthong bas ni de'i bskyed bya dang skyed byed kyang yin no zhes bya ba'i khyad par ro/ /rang gi ngo bo nges pa las rjes su dpag pa 'jug par byed pa yin la/ rang gi ngo bo dang 'brel bar nges pa las ni mthong ba yin no zhes bya ba'i don to/ /rjes su dpag pa la ni rang gi ngo bo 'dzin pa med do/ /rang gi ngo bo las nges pa ni yod do zhe na/ 'di la yang rang gi ngo bo dang 'brel par nges pa yod pa'i phyir 'jug par byed pa nyid nyams pa ma yin no/ /rnam par rtog pa med kyang zhes bya ba ni rnam par rtog pa'i bag chags med par yang zhes bya ba'i don to/ /ci las shes she na/ goms pa med pa gang yin pa der zhes bya ba smos so/ /rjes su dpag pa ni rnam par rtog pa kho na ma yin nam/ de'i phyir der rjes su dpag pa nyid ces bya ba ji ltar lan yin/ 'di skad bstan par 'gyur te/ de nyid 'dzin pa'i rnam par rtog pa yin gyi/ de nyid yod pa ni ma yin la 'jug par byed pa yang ma yin te/ yul thob pa'i phyir ro/ /de yang gzung ba la 'dzin pa'i phyir zhes bstan pa yin no/ /des na de'i nus pas mthong ba spangs pa ni ma yin te/ des na goms pa la yang rnam par rtog pa ni 'jug par byed pa ma yin pa'i phyir rnam par rtog pa ni nus pa can ma yin no/ /ma goms pa la ni rjes su dpag pa la ltos nas gzhan du yang de nyid min zhes bya ba'i mi rigs te/ mthong ba dang rjes su dpag pa dag gi yul ni tha dad pa yin pa'i phyir blo nyid 'jug par byed pa'i phyir tshad ma yin no/ /mi bslu ba can nyid tshad ma nyid du bstan pa yin nam/ de yang rnam par rtog pa ni ma yin te/ phrad pa dang phrad par byed pa yin pa'i phyir ro/ /snga ma dang phyi ma'i mthong bas yul du byas pa ni de dag nyid phrad par byed pa yin la/ de dag gi gcig pa nyid ni rnam par rtog pas yin no/ /blo'i ni ma thob pa'i don byed pa'i ngo bo thob par byed pa'i phyir tshad ma nyid yin par bstan par bya ba yin na/ 'jug la de gtso yin phyir dang / /zhes ci'i phyir bstan/ 'jug par byed pa nyid ni gnas skabs ma yin te/ de 'gegs par byed pa la yang de nyid rab tu bsgrub par bya ba yin no/ /bden te/ mi bslu ba can nyid de kho na 'jug par byed pa yin na ni 'gyur gyi/ rnam par rtog pa la ni de med pa yin te/ phrad pa dang phrad par byed pa yin pa'i phyir zhes bya ba'i bsams pas skyon med do/ /de bstan pa ni/ de ltar na re zhig ces bya ba'o/ /de nyid dam mi bslu ba'i rgyu mtshan 'jug par byed pa nyid ni rtog pa'i ngo bo'i 'bras bu'i yul gyi rnam par dbye bas go bar byed pa'i don du yul gyi rnam pa'i dbye bas shes gsungs pa yin no zhes kha cig zer ba ni dam pa ma yin te/ re zhig cig ni rnam par rtog pa las blo mtshan nyid mi mthun pa nyid ni tha snyad pa yin par bstan nas/ da ni mtshan nyid mi mthun pa gzhan rtogs pa tha dad pa'i blo nyid kyis kyang rnam par rtog pa las ni ma yin no/ /'di dag tsam du bsams pa yin te/ de yang 'jug par byed pa nyid kyi rgyu mtshan nam/ cig shos kyang zhes bya ba ni 'dir skabs ma yin no/ /yongs su bcad nas 'jug bzhin pa zhes bya ba la sogs pa la yang rgyu mtshan nyid rtogs par byed pa ni rnam par rtog pa la sogs pa las mtshan nyid mi mthun pa kho na yin par bsams te/ tshad ma gzhan dgag pa'i skabs nyid yin pa'i phyir zhes bya ba'i dgongs pas/ da ni rtogs pa'i 'bras bu zhes bya ba smos so/ /gal te rnam par rtog pa ni snang bzhin pa'i don la snga ma nyid 'dzin par byed pa las 'jug pa ma yin pa'i phyir tshad ma nyid ma yin no/ /blo ni 'jug par byed pa nyid kyis tshad ma nyid yin pa'i phyir rnam par rtog pa las mtshan nyid mi mthun pa nyid yin na/ gang gi tshe 'jug par mi byed pa de'i tshe tshad mar mi 'gyur ro snyam du sems pas/ mtshan nyid mi mthun pa nyid gzhan rtogs par byed pa yang yul gyi rnam pa zhes bya ba la sogs pa la 'jug par bya ba yin par bstan pa ni/ 'jug par byed pa las ni tshad ma ma yin gyi zhes bya ba la sogs pa'o/ /gal te shes pa la yul gyi rnam pa yin na de yang yul bzhin du rtogs pa ma yin pa'i ngo bor 'gyur ro zhes bya ba ni glen chen gyi gtam rgyud lta bu 'gegs par byed pa bstan pa ni/ 'di'i yul gyi rnam pa lta bu zhes bya ba'o/ /'brel pa gang gis mig la sogs pa'i tshogs pas bskyed par bya ba'i shes pa ni yul nyid kyi rjes su byed pa ma yin nam/ mig la sogs pa'i ni ma yin no/ /bu ni za ba bor nas pha ma dag gi rjes su byed pa lta bu'o/ /des ni yul nyid 'dzin par byed pa yin no/ /de bzhin du dang po rnam par rig pa yin la/ de nas yul rig par byed pa'am/ rnam par rig par byed pa nyid kyang rung / de rig par byed pa yin pa'i phyir gcig nas gcig tu brgyud pas dub pa dang nye bar btags pa yang spangs pa yin te/ brgyud pa'am nye bar btags pa nan gyis sgro 'dogs pa 'ga' yang med de/ de lta mod kyi dngos po'i nyams su myong ba la dpyod par byed pa yin no/ /sngon po ni bde ba bzhin du rang rig par byed pas rtogs pa yin gyi/ gzhan gyis ni ma yin te mi dmigs pa'i phyir ro/ /des na de'i shugs las de nyid yul rig par byed pa kho bo cag smra'o/ /yul dang 'dra ba nyid ces bya ba ji ltar yin/ 'dra ba'i phyir rnam par shes pa'i yul la 'dzin par byed pa ma yin te thal ches pa'i phyir ro/ / gzugs kyi shes pa ni reg bya la tshad mar mi 'gyur te mi 'dra ba'i phyir ro/ /de'i phyir don ni 'di yin te/ gzugs kyi shes pa ni phrad bya yul gzugs sam reg bya las 'byung bas sngon po'o zhes bya ba'am me'o zhes bya bar de nyid yin par sgro 'dogs par byed pa yin no/ /des bskyed par bya ba yin pa'i phyir nag pa'i bu la der shes pa lta bu dang / bregs pa las skyes pa'i skra la sogs pa bzhin du 'dra ba nyid la de nyid yin par bsam pa'i phyir skyon med do/ /de'i phyir gang gi yul gyi rnam pa yin pa de ni yul gyi rnam pa yin no zhes bstan pa yin no/ /yul gyi rnam pa dang 'dra ba'i rnam pa gang gi yin pa de ni yul gyi rnam pa yin te/ yul gyi bskyed par bya ba nyid yin pa ni de nyid du sgro 'dogs pa'i rgyu mtshan yin zhes bya ba'i don to/ /shes pa ni gal te bdag nyid la gnas pa'i yul gyi rnam pas yul rig par byed pa yin na/ yul gyi rnam pa ji ltar rig pa yin/ gzung bya'i rnam pa can ni 'dzin par byed pa ma yin la/ rnam pa gzhan du rtog pa yin na thug pa med do snyam du sems pa la/ de tha dad pa ni yul gyi rnam pa tha dad ces bya ba smos te/ bdag nyid kyi rnam pa kho nas yin gyi rnam par gzhan la ltos pa ni ma yin no zhes bya ba'i don to/ / yang na gal te des bskyed bya nyid la de nyid du sgro 'dogs pa'i rgyu mtshan gyis rang gi ngo bos bskyed par bya ba'i shes pa ni ma yin te/ ji ltar de nyid du sgro 'dogs pa yin zhes bya ba de la yul lta bu'i rnam pa tha dad pa ni zhes bya ba smos te/ yul la mngon par phyogs pa nyid ni rang gi ngo bo la mngon par phyogs pa nyid yin te/ rang gi ngo bo rtogs pa zhes bya ba'i don to/ /yang na gzugs kyi shes pa ni phrad bya gzugs kyi tshad ma yin zhes 'di la dang po sbyar bar bya zhing / reg bya la sogs pa la tshad ma yin zhes bya ba 'di la gnyis pa'o/ /yul dang 'dra ba nyid dam yul la mngon du phyogs pa'am zhes mngon du phyogs pa de la des bskyed bya yin pas de nyid du sgro 'dogs pa yin no/ /de nyid bstan pa ni/ yul gyi rnam pa de yang shes pa'i bdag nyid du gyur pa yin te zhes bya ba ste/ yul gyi rnam pa ni phrad par bya ba'i rnam pa ste/ phrad bya nyid ces bya ba'i don to/ / bya ba dang byed pa po dag gi rang gi ngo bo'i rnam pa yang gnas pa'i phyir rnam par gzhag bya dang rnam par 'jog byed kyi ngo bos tshad ma dang 'bras bu nyid ni tha dad pa la yang 'gal ba med pa yin gyi/ 'bras bu dang rgyu'i ngo bo nyid ni ma yin no/ /des na/ ji ltar seng ldeng bcad pa na/ /pa la sha yi 'chad pa min/ /de bzhin sta re dang gcad bya/ /'jig rten la ni gcig pa min/ /zhes bya ba yang sun 'don pa ma yin te/ 'bras bu dang rgyu'i ngo bo yang bya ba dang 'bras bu dag las 'byed pa ma yin te/ byung ba gang rnams kyi bya ba/ /de nyid byed po nyid du brjod/ /ces bya ba ni 'gal ba med do/ /yul mngon par phyogs pa nyid kyi shes pa ni de'i rnam pa ma yin nam/ yul gyis bskyed par bya ba'i shes pa'i bdag nyid ni de nyid kyi rig pa las gzhan pa de las mngon par phyogs pa nyid ma yin te/ rig bya'i de nyid tshad ma yin la/ yul rig pa ni 'bras bu yin zhes bya ba ni rnam par dbye ba'o/ /yul dang 'brel ba can nyid mi bslu ba can nyid ma yin nam/ de yang bskyed bya nyid de de nyid du sgro 'dogs pa'i yul yin pa'i phyir mi bslu ba las gzhan pa'i yul gyi rnam pa nyid ma yin no/ /bden pa yin mod kyi de'i bskyed bya nyid mi bslu ba can nyid dang / de nyid du sgro btags pa ni de'i rnam pa nyid yin zhes bya ba ni bsdus pa'o/ /mig la sogs pa rnams 'bras bu skyed par byed pa nyid yin na thams cad yul yin pa'i phyir thal ches pa ni tshad ma skyed par byed pa po nyid la yang mtshungs pa yin no snyam pa'i bsam pas zer ba ni/ ji ltar de rnam par shes pa la bdag nyid ces bya ba ste/ thams cad du skyed par byed pa zhes bya ba ni dus thams cad du rmi lam la sogs pa la dmigs pa yod pa'i phyir 'bras bur 'gyur ro zhes bya ba ni thal ches pa'i don yin te/ yul la ni ma yin no/ /shes pa gzhan yod na thams cad du 'byung ba yin zhes bya ba ni rnam pa'i bye brag yin par bstan pa ni/ de yod na 'di yod pa nyid ces bya'o/ /tshad ma mi bslu can shes pa/ /zhes bya ba der ni shes pa tsam bye brag tu bstan pa yin la/ 'dir ni de'i rnam pa'i khyad par yin no zhes bya ba ni bye brag go/ /rtogs pa tsam ni tshad ma ma yin zhing de sgrub par byed pa yang ma yin te/ thal ches pa'i phyir ro/ /phrad bya'i mthar thug pa yin na ni 'gyur te/ bye brag mthong ba ni phrad bya'i bdag nyid dam/ de dang 'brel pa can gyi bdag nyid yin te/ mi bslu ba can yin pa'i phyir tha dad pa ma yin no/ /gal te de las gzhan pa yin na ni de tshad ma ma yin par tshad ma mi bslu ba can zhes bya bas bstan pa yin no/ /da ni de yang rang las sam gzhan las yin zhes rnam par dpyad par bya ba yin te/ bskyed pa la ltos nas tshad mar gyur pa las zhes bya ba der rnam par dpyad zin to/ /mi bslu ba can nyid ni rtogs pa yin na rang gi 'bras bu byed pa nyid yin la/ de'i shes pa yang rang nyid las ma grub pa yin na gzhan la ltos pa yin zhes bya ba yang tshad ma mi bslu ba can zhes bya ba 'dis mtshon pa nyid yin na/ da ltar lhag pa ci byar yod/ /gang las rang dngos rang las rtogs pa can/ /zhes bya ba la sogs pas sems par byed pa yin/ rang rig pa'i shes pa'i bdag nyid ni tshad ma yin la/ des na rang nyid las rig pa nyid ni de nyid yin no zhes rtogs pa yin no/ /rang gi ngo bo yin zhes bya ba ni mi rigs te/ tshad ma mi bslu ba can zhes bya ba 'dis gzhan las tshad ma nyid du sgrub par byed pa dang 'gal ba'i phyir ro/ /des ni tshad ma nyid kyi ngo bo bstan pa yin la/ gzhan las shes zhes bya bas ni tha snyad las ni tshad ma nyid de don byed pa'i ngo bos nges par byed pa'o/ /de lta na yang rang gi ngo bos zhes bya ba ni/ rang las shes pa rjod par byed pa nyams pa yin no/ /rtogs pa la ltos nas rang nyid ces rjod par byed pa yin la/ nges pa la ltos na cig shos zhes bya ba la ni 'gal ba med do/ /de lta na yang gzhan las zhes brjod pa nyid kyis rang gi ngo bo rtogs pa yin pa'i phyir de'i don du tshad ma mi bslu ba can zhes bya ba tshig lhag tu song ngo snyam du sems pa la/ rang las rang gi ngo bos rtogs/ /zhes bya ba la sogs pas don gzhan nyid dogs pa sngon du 'gro bas smra ba ni/ gal te shes pa 'di thob par byed pa yin no zhes bya ba la sogs pa nas/ mngon sum dang ni rjes dpag las/ /gzhan gyi tshad ma yod ma yin/ /zhes bya ba'i bar gyis tshad ma gnyis po ma rtogs pa las ni don dam pa pa'i tshad ma nyid ma yin no snyam du sems pa la/ lan ni/ 'dir smras pa/ zhes bya ba la sogs pa'o/ /ji ltar mthong ba las de nyid du rnam par gzhag pa'i phyir de nyid don dam pa pa ma yin pa nyid du khas len pa yin te/ tha snyad pa rnams kyis 'da' bar mi bya ba yin pa'i phyir ro/ /de'i phyir mi bslu ba can nam cig shos kyi shes pa yang rang rig pa 'byung ba'i dus su shes par byed pa ma yin par bstan pa ni/ rang rig pa'i mngon sum gyis zhes bya ba la sogs pa nas the tshom du yang mi 'gyur ro zhes bya ba'i bar du ste/ de bzhin du gnod pa med pa nyid kyi mtshan nyid kyang rang las yin no snyam pa sngon du 'gro bas zer ba ni 'on te gnod pa med pa nyid ces bya ba la sogs pa nas/ tshad ma gzhan ni yod ma yin/ /zhes bya ba'i bar gyis so/ /don gyis go bas shes pa de'i zhes bya ba ni don yongs su bcad pa la gzhan du mi 'thad par rtogs pa'i shes pa ni/ tshad mar gyur pa nyid du shes pa yin zhes bya ba'i don to/ /tshad ma nyid kyis shes pa bzhin du dngos po yang rang nyid kho na las yin no zhes zer ba ni/ gzhan yang rnam par shes pa ni rgyu las skyes pa yin la zhes bya ba'o/ /rang nyid las zhes bya ba ni shes pa'i bdag nyid kho na'i rgyu las yin no zhes bya ba'i dgongs pas/ gal te rang las tshad ma nyid/ /ces bya ba smos te/ dbang po la sogs pa'i rang gi ngo bo'i shes pa bzhin du tshad ma nyid la yang bya ba yin no zhes bya ba'i don to/ /'on te rtag pa'i rang bzhin yin pas rang nyid las yin gyi/ rgyu las ni ma yin no zhes bya ba'i bsam pas/ de la yang smra ba ni/ ci ste bdag shes rang bzhin phyir/ /zhes bya ba la sogs pa/ /de gzhan du 'gyur yod ma yin/ /zhes bya ba'i bar du ste/ rgyu'i skyon la sogs pa'i dbang gis rtag pa gzhan nyid du 'gyur ba ma yin zhes bya ba'i don to/ /skyon lhan cig byed pa can yin pa'i dbang po rjes su 'gro ba dang ldog pa'i rjes su byed pa'i rnam par 'gyur ba ni tshad ma nyid ma yin pa'i dngos po yin la/ de ni rtag pa la yang min pa'i phyir gzhan du 'gyur ba'i shes pa'i ngo bo rtag pa nyid yin na yang 'gal ba med do zhes zer ba ni/ gal te skyon can rgyu yod pas/ /zhes bya ba'o/ /rjes su 'gro ba dang ldog pa'i bye brag las tshad ma nyid kyang yon tan gyis byas par 'gyur bar bstan pa ni/ yon tan ldan rgyu dang 'brel phyir/ /zhes bya ba'o/ /yon tan rnams kyi bya ba las ni skyon med pa nyid dang gzhan du grub pa ni/ rjes su 'gro ba dang ldog pa dag yin no zhes zer ba ni/ gal te nyes pa med pa'i phyir/ /zhes bya ba'o/ /skyon rnams kyi bya ba las ni yon tan med pa nyid dang / gzhan du 'grub pa ni rjes su 'gro ba dang ldog pa dag yin par bstan pa ni/ yon tan med phyir tshad min par/ /zhes bya ba'o/ /rtogs pa'i ngo bo nyid kyis bdag nyid kyis dmigs pa yin na rtag pa'i phyir gnyid log pa la sogs pa yang mi ldog pa'i phyir rig par byed par 'gyur bar bstan pa ni/ gal te de rtogs ba dag 'don na/ /zhes bya ba'o/ /gal te rang la mi bslu ba can nyid du shes pa ma yin la/ shes pa gzhan las ni shes par byed pa nyid yin par bstan pa ni/ gal te mi bslu ba'i shes pa de zhes bya ba'o/ /sgrub par byed pa'i shes pa ni rang nyid kho na las tshad ma yin te/ rtogs pa'i bya ba rdzogs pa'i phyir ma yin nam/ de'i 'og gi the tshom ni de dang 'gal ba can ma yin te/ gang gi phyir rim gyis nges pa'i don 'dzin pa ni the tshom yin no/ /'ba' zhig ni don byed pa'i shes pa las ldog pa yin snyam du sems pa la/ sgrub par byed pa'i shes pa'i yang zhes bya ba smos te/ 'di'i yul ni the tshom yin la de'i ngo bo nyid yin pa de'i phyir the tshom du bya ba yin pas the tshom yin te/ don la don byed pa nyid du nges par 'dzin pa yin na/ nges par mi 'dzin pa'i bdag nyid ni the tshom yin la/ cung zad kyang rnam par 'jog par byed pa ma yin zhes bya ba'i don to/ /gnod pa med pa'i don zhes bya bar yang nye bar dgod pa ni/ btsun pa'i 'dod pa'i dbang gis yin no/ /gzhan sgrub par byed pa'i rigs pa bzhin du don byed pa rig pa yang yod pa dang med pa mtshungs pa'i phyir mtho nyid bzhin du mi nyid yin pa la the tshom za ba nges pa ma bzung ba'i bdag nyid can kho na yin par bstan pa ni/ tshad ma sngar grub med pa gang / /zhes bya ste/ ji ltar rtogs pa'i bdag nyid sgrub par byed pa'i shes pa ni yod pa dang med par ram bye brag med pa'i phyir yul rnam par 'jog par byed pa can ma yin pa de bzhin du don byed pa'i shes pa yang don byed pa dang cig shos thun mong ba'i phyir zhes bya ba'i don to/ /de ni zhes bya ba tshad ma'i thun mong ba nyid kyis the tshom gyi yul can gyi'o/ /de las zhes bya ba ni thun mong ba nyid kyis the tshom gyi yul can don byed pa'i shes pa las so/ /gal te tshad ma sngar grub na zhes bya ba la sogs pas ni me dang du ba bzhin du go bya go byed kyang ngo / /des na rang dbang du tshad mar grub pa yin gyi gzhan du ni ma yin no/ /lkog shal la sogs pa las ba lang nyid bzhin du don byed pa las tshad ma nyid du nye bar mtshon pa yin gyi/ go bar bya ba ma yin pa des na 'brel pa 'dzin pa la ltos pa ma yin no snyam du sems pas smra ba ni/ don byed pa las shes de ni/ /zhes bya ba'o/ /tshad ma dang cig shos thun mong ba'i don byed pa ni tshad mar nye bar mtshon par byed pa ma yin par bstan pa ni/ don byed par ni byung ba de/ /zhes bya ba ste/ tshad ma min par rtogs pa ni tha na reg pa'i shes pa las so/ /tshad ma kho na las don byed pa yin gyi ser po'i shes pa las ni ma yin te/ ji ltar mthong ba dang phrad pa ma yin no snyam du sems pa ni/ de las don byed de min na/ /zhes bya ba'o/ /tshad ma las 'jug pa'i don byed pa bzhin du tshad ma ma yin pa las kyang 'gyur ro zhes bstan pa ni/ gzhan las kyang ji ltar 'dod ces bya ba ste/ gzhan du'ang zhes bya ba ni tshad ma la yang kha cig tu ma phrad pa yod do zhes bya ba'i don to/ /sngar med na mi 'byung ba'i ngo bor mthong ba yin na goms par 'gyur gyi/ gzhan du ni ma yin no zhes zer ba ni/ goms las rnam pa mi mthun pa/ /zhes bya ba'o/ /mngon sum las med pa mi 'byung ba'i ngo bo mthong ba ma yin du zin kyang rjes su dpag pa las yin no zhes zer ba ni/ de mthong nyid na zhes bya ba'o/ /mngon sum med na 'brel pa 'dzin pa med pa'i phyir rjes su dpag pa yang mi srid do zhes bstan pa ni/ rjes dpag de yang zhes bya ba'o/ /'on te rig pa las gzhan pa'i rig bya med pa yin la/ des na sgrub par byed pa dang don byed pa yang rig pa'i khongs su gtogs pa nyid yin pa'i phyir de dang 'brel pa bde bar gshegs pa nyid yin no snyam du sems pa la/ rang dngos rang dmigs rnam pa ni/ /zhes bya ba smos te/ rang gi ngo bo tsam rig pa dag gi gzhan dang gzhan du rig pa ma yin pa las de gnyis las yod pa'i 'brel pa rig par byed pa ni ma yin no zhes bya ba'i don to/ /'ba' zhig ni 'brel pa 'dzin par mi nus pa mngon sum 'ba' zhig ni ma yin la/ de'i khyad par 'dzin par mi nus pa yin par bstan pa ni/ yul dang dus gzhan khyab par ni/ /zhes bya ba ste/ gang du 'brel pa 'dzin par byed pa yin pa der yang khyab pa ma bzung ba las tshad ma ma yin na/ gang du 'brel pa yang mi 'dzin pa la ni smos kyang ci dgos zhes bya ba'i dgongs pas/ khyab min lhan cig 'gyur gang yin/ /zhes smos so/ /lhan cig pa nyid du re zhig 'di dag gis mthong ba ma yin nam/ gang du yang 'khrul par ni ma mthong ngo / /mthong bar 'gyur ba yin no zhe na/ nges pa med do/ /de nyid kyis na the tshom yin no zhe na/ 'khrul par ma mthong ba khyad par can dang lhan cig pa ma mthong ba mang po las de ltar 'gyur ba ma yin no/ /'di ni 'di la nges pa yin no zhes nges pa yin pa des na/ don gyis go ba dang lhan cig pa'i mngon sum la khyab pa nges par 'gyur ba yin no snyam du sems pa la/ yul sogs bzung ba med par ni/ /zhes bya ba smos te/ 'khrul pa ni gal te ma bzung ba yin yang yul ma bzung ba yin na de'i med pa nyid rig par byed pa ma yin no/ /yod kyang rig bya ni ma yin no/ /de nyid kyis na the tshom yin/ /zhes bya ba'i don to/ /de'i bya ba ni yul la sogs pa'o/ /de lta na yang tha snyad pa rnams kyis 'da' bar bya ba ma yin pa'i phyir rtogs par byed pa nyid dang / de las bzlog pa tshad ma ma yin pa nyid las gzhan pa ma mthong ba'i phyir khas blang bar bya ba yin par tshigs su bcad pa gnyis kyis go rims bzhin du bstan pa ni/ de phyir rang las tshad ma nyid/ /ces bya ba'o/ /de la re zhig gnod pa med pa'i rtogs pa nyid tshad ma yin na/ skyes pa'i dus su tshad ma dang cig shos dag mtshungs pa yin par bstan pa ni/ gnod pa med pa tsam gyis ni/ /zhes bya ba ste/ 'jug pa'i dus phyis gnod pa med pa nyid du ni sngar ma nges pa yin na/ ji ltar 'jug pa'i rgyur 'gyur zhes bstan pa ni/ thob pa'i dus su 'ang zhes bya ba'o/ /don byed pa la mi bslu ba nyid kyang tshad ma yin la/ 'jug pa'i snga rol du nges pa med pa ni 'jug pa'i yan lag ma yin pa kho na'o zhe na/ de yang rang dngos so zhes bya ba smos so/ /tha snyad pa rnams kyis 'da' bar mi bya ba nyid yin zhes bya ba la rigs pa cir yang med la/ rigs pas brtags pa na rang las sam gzhan las kyang rung tshad ma nyid du rnam par gnas pa ma yin zhes pa ni phyogs snga ma'o/ /grub pa'i mtha' ni shes pa'i rang gi ngo bo skad cig ma nyid du shes pa tsam nyid la sogs pa la/ thar pa 'dod pa rnams kyis gzhal bya la/ gzhan la ltos pa med pa nyid kyis rang rig pas nges pa ni rang nyid las te don dam pa pa'i tshad ma nyid yin no/ /phyi rol la ni thob bya dang 'brel pa la sogs pa gzhan la ltos pa'i phyir rang rig pa ma yin pa la thog ma med pa'i bag chags las skyes pa'i tha snyad kyi ming can gyi rnam par rtog pa de gtso bor 'gyur ba'i rjes su dpag pas rtogs pa ni gzhan las te/ don dam pa ma yin pa ste/ mngon sum la sogs pa'i tshad mas rtogs pa ma yin pa'i phyir ro/ /'di las ni ji ltar mthong ba las de kho na nyid du rnam par gzhag pa'i phyir gnyi ga tsug kyang rigs pa yin par bstan pa ni/ 'dir bstan pa/ rang las rang gi ngo bo rtogs/ /zhes bya ba'o/ /shes pa'i rang gi ngo bo nyid tshad mar grub pa yin par ni mi rigs te/ gzhan gyi ngo bo'i yang sngon po la sogs par ni bde ba la sogs pa rigs pa'i dus su rig pa'i phyir ro/ /bde ba bzhin du shes pa'i rang gi ngo bo rig pa nyid ni sngon po la sogs pa'i don byed pa ma yin te/ phyi rol nyid ni gang las de'i byed po nyid yod pa yin zhes bya bar mi 'gyur ba'i phyir ro/ /gang las rang gi ngo bo rig pa las gzhan pa de la don byed pa gang yin pa de'i don du tha snyad 'dogs pa po rtogs pa yang 'jug pa yin la/ de la ltos pa'i byed pa po nyid yin pa ni rig par byed pa'i byed po las gzhan nyid yin pa'i phyir bde ba dang mtshan nyid mi mthun pa gzung bya sngon po'i ngo bo bzhin du rtogs pa med pa don dam pa pa nyid yin no snyam du sems pa la/ rang las ni rang gi ngo bo nyid rtogs kyi zhes bya ba smos te/ bde ba bzhin du sngon po yang rang rig pa kho na yin te/ bye brag med pa'i phyir ro/ / phan tshun pa'i bya ba med pa'i phyir rang rig pa nyid las mi gzhan pa'i don byed pa ni bde ba bzhin du rang gi rgyud kyi don byed pa la 'gal ba med do zhes bya ba'i don to/ /ci las shes she na/ dbang po la brten pa ni mngon sum mo zhes bya ba'i don ni brten pa nyid yin par bsgrubs pa yin yang mngon sum gyi sgra ni mngon du byed pa'i mtshan nyid du ston pa yin la/ mngon du byed pa yang lkog tu gyur pa ma yin pa nyid yin gyi/ yang dag par rig pa las gzhan pa dang / dus gzhan pa yang phyi rol ni lkog tu ma gyur pa mi srid par bstan pa ni/ mngon sum ni mngon du rtogs pa yin no zhes zhes bya ba'o/ /skad cig ma nyid kyi shes pa tsam la sogs pa bzhin du thob bya dang 'brel pa can nyid kyang shes pa'i rang gi ngo bo nyid yin pa des na/ ji ltar mngon du mi byed pa zhes bya ba yin snyam du sems pa la/ thob par bya ba'i don ma bzung bar ni zhes bya ba smos so/ / yul la sogs pa la me dang 'brel pa can nyid bzhin du shes pa yang phrad bya dang 'brel pa can nyid ni gzhan la ltos pa'i phyir rang gi ngo bo ma yin la/ de nyid rig pa ma yin la/ rig par byed par mi 'gyur ba nyid kyis rang las sam gzhan las kyang rung tshad ma nyid yin pa mi srid do/ / 'di skad bstan par 'gyur te/ gang zhig gang gi tshe yod pa de'i tshe de yod par nges pa yin gyi/ gzhan gyi tshe ni ma yin no/ /lkog tu gyur pa rnams ni yod par nges pa ma yin te/ 'byung bar 'gyur ba'i thob bya la gnod par byed pa de'i med pa yang / dus de nyid kyi tshe yin pa des na sngar ni gnod pa med pa nyid kyis mtshan nyid can gyi tshad ma nyid dang / cig shos kyang rang las rtogs pa ma yin no/ /de lta mod kyi rang gi ngo bo nyid ces bya ba yin no/ /thob bya'i don 'dzin pa med na de dang 'brel pa 'dzin pa yang med pa'i phyir la/ des na de la thob bya dang 'brel pa yin la/ thob bya yang der nye ba yin par bstan to/ /'on te tshad ma nyid rang gi ngo bo yin na/ 'brel pa can gyi ngo bo nyid du brjod do/ /'brel pa can tsam ni 'brel pa yin zhes bya ba ni zlos pa nyid ma yin pa ma yin no/ /lan ni/ thob bya'i rang bzhin dang 'brel pa'i/ /shes pa'i ngo bo zhes bya ba ste/ gang la 'brel pa yod pa de ni 'brel pa can yin te/ gzhan gyis nye bar byas pa'i dngos po yin gyi/ dngos po tsam ni ma yin zhes bya ba'i don to/ /gzhan gyis nye bar byas pa med na shes pa tsam ni tshad mas rnam par gzhag pa mi thob pa yin par bstan pa ni/ rang gi ngo bo tsam zhig ni zhes bya ba ste/ de zhes bya ba ni tshad ma nyid do/ /thob bya nye bar byas pa ma yin na shes pa'i ngo bo nyid du yang mi rigs pa ma yin nam/ 'di shes pas shes pa'am/ 'di shes par byed pas shes pa zhes shes bya la gnas pa nyid yin zhes rjod par byed pa'i phyir ji ltar rang gi ngo bo nyid tshad ma yin zhing / ji ltar de'i ngo bo nyid tshad ma ma yin snyam du sems pa la/ shes pa'i rang gi ngo bo ni tshad ma ma yin te zhes bya ba smos te/ shes pa ni rang nyid dam/ rang gi yul yang rung / de dag tsam gyis ni ma yin te/ de tsam ni thams cad la yod pas tshad ma dang cig shos kyi rnam par dbye ba med pa'i phyir la/ thob bya yod pa dang med pa dag gis rnam par dbye ba las de dang 'brel pa nyid tshad ma nyid yin la/ gzhan ni gzhan du yin zhes rnam par gzhag par byed pa yin te/ der yang bshad zin to zhes bya ba'i don to/ /gal te thar pa'i don du tshad ma la sogs pa'i rnam par dbye ba ci'i don du 'bad nas spong bar byed ce na/ de las 'jug pa dang ldog pa zhes bya ba smos so/ /gzhan yang gnod pa med pa nyid ni tshad ma nyid ma yin te/ 'jig rten pa ma yin pa'i phyir la/ mi bslu ba can nyid ni tha snyad pa yin pa'i phyir 'gyur ba yin par ni/ tshad ma mi slu ba can zhes bya ba 'dis bstan pa yin no zhe na/ de ni mi rigs te/ mi slu ba can nyid ni phyi rol gyi don la ma yin te/ the tshom yin pas rnam par gzhag pa med pa'i phyir ro/ /rnam par rig pa tsam du smra ba la yang ma yin te/ snga ma dang phyi ma dag gi shes pa dag gi 'brel pa ni de dag gis sam gzhan gyis kyang shes par mi nus pa'i phyir ro/ /gnod pa med pa nyid kyi shes pa ni rang nyid kho na las nges pa yin gyi/ gzhan sgrub par byed pa ni ma yin no/ /sngon po'i zhes bya bar 'dzin pa'i bdag nyid la nang du 'jug pa yin pa'i phyir gzhan la gnas pa ma yin sngon por rtogs par byed pa yin no/ /dbang po'i bya ba las snga ma ni phyis 'byung ba'i dngos po las mtshan nyid mi mthun pa ma yin nam/ des na bar du 'byung ba'i ngo bo lkog tu ma gyur pa ni 'di'o zhes brjod do/ /bden te/ gal te de yang de dang 'dra ba'i nga rgyal med na/ de tsam gyi nga rgyal byed pa gnyis kyi ngo bo las 'di la gnyis dag tu rjod par byed pa ma yin te/ de yang gang gi phyir de ni spyi'i yul dang 'brel pa can sngon mngon sum du dmigs par byed pa yin la/ phyi'i yul yang 'dzin par byed pa la ltos nas yin te/ de'i phyir phyi rol zhes 'dir 'di/ /'dzin byed cha las phye ba yin/ /rig bya sngon po ser po sogs/ /mngon sum la sogs par bstan yin/ /zhes smos pa'o/ /phyi rol nyid ni 'dzin par byed pa la ltos nas yin la/ de 'dzin pa med na ji ltar gzung byar 'gyur/ phyi rol nyid kyis yin no zhe na/ mi rigs te/ phyi rol nyid rig pa ni 'dzin pa po'i nyams su myong ba la ltos pa yin la/ de'i nyams su myong ba yang de'i rig pa las yin pa'i phyir ro/ /de lta ni ma yin te/ sngon po bzhin du bdag go zhes 'dzin par byed pa ni rtogs pa nyid yin te/ sngon por bdag gis shes so zhes nyams su myong ba po'i nyams su myong bar bya ba las gzhan pa nyid kho nar yod pa yin no/ /ci las shes zhe na/ re zhig gnyi ga rig par byed pa yin te/ rgyu yang de'i shugs kyis rtogs par byed pa yin la/ de bzhin du sngon por nyams su myong ba'i mtshan nyid ni du ba ni me'i bya ba yin pa bzhin du goms pa yin na mthong ba kho na las nges pa yin te/ bsnyon par 'os pa ma yin no/ /'di nyams su myong ba'i bdag nyid kho na ma rig pa'i dbang gis phyi rol bzhin du 'jog par byed pa yin zhes bya ba 'di yang mna' skyel bas bsgrub par bya ba yin te/ gnyis nyid nyams su myong ba'i phyir ro/ / nyams su myong ba med na yang / bag chags med na ma rig pa mi 'byung ba'i phyir ro/ /tha dad pa'i de lta bu'i bag chags kyis bskyed bya ni rnam par rtog pa ma yin nam/ de yang des bskyed bya yin zhes phan tshun rgyu nyid yin te/ sa bon dang myu gu lta bu'o/ /de ltar yang mthong ba ni dngul ma yin pa la dngul du shes pa la'o/ /dngul gyi rnam pa ni de la don med pa'i phyir dang gnyi ga ma yin pa med pa'i phyir shes pa'i bag chags yod pa'i dbang gis phyi rol bzhin du zhes bya ba ni mi rigs te/ bden pa'i dngul gyi rnam pa bzhin du 'di'i yang shes pa las phyi rol nyid du rtogs pa'i phyir bden pa dang mi bden pa'i rnam par dbye ba nyid nye ba dang nye ba ma yin pa dag gis de bstan pa yin te/ dbang pos 'thob min par bdag 'dod/ /ces bya ba yin te/ nye ba ma yin pa ji ltar dmigs pa yin/ gal te don nye ba ma yin pa de lta na kho bo cag gi phyogs la ci'i phyir ldog par 'gyur/ bden pa'i shes pa la ni so sor snang ba nye ba dgos pa can yin gyi/ rang gi ngo bos nye ba ma yin no/ /bden pa'i rgyu dmigs pa ni mi bden par mngon par 'dod pa la yang de ma nyams pa'i phyir bag chags kyi nus pa shes pa ma yin no/ /de lta na shes pa las snga ba'i dngos po yod pa las tshad ma yod pa ma yin te/ shes pa'i dus tsam na byung ba ni shes pa kho na bzhin du 'gyur ro/ /ma yin te/ gang gi phyir sngon po'i dngos po ni res 'ga' zhig rtogs par byed pa yin gyi/ de dbang po tsam las byung ba ni ma yin te/ de yod kyang res 'ga' med pa'i phyir dang / de nyid kyis na yul gzhan pa tsam las byung ba yang ma yin no/ /des na de bzhin du dbang po dang / yul gzhan mtshan nyid mi mthun pa dang / bag chags dang mtshan nyid mi mthun pas sngon po sgrub par byed pa rtogs pa yin na/ sngon po rtogs pa yin gyi de med pa las thal ches pa ni ma yin te/ de'i yang yul gzhan nyid yin pas ma yin pa dgag pa yin pa'i phyir ro/ /de bzhin nye ba'i dngos po ma rtogs pa yang dbang po'i dbang gis rtogs par 'gyur la/ bag chags kyi dbang gis nye ba ma yin pa yang ngo zhes bya ba ni rnam par dbye ba'o/ /de yang / don dang shes pa dag gis 'dir/ /gang zhig tshad ma dang 'brel pa/ /rgyu dang 'bras bu'i ngo bo 'di/ /gzhan du de ltar mthong ba min/ /'di skad bstan par 'gyur te/ bag chags dang dbang po la sogs pa tshogs pa'i dbang gis don rtogs pa nyid kyi mtshan nyid ni khyad par can du 'gyur ba yin no/ /de las gzhan du mi 'thad pa'i bdag nyid kyang shes pa po'i ngo bo dbang po la sogs pa'i bya ba'i ngo bo ni shes par byed pa yin la/ de ni blo yin par brjod do/ /so sor snang ba nye ba yang de'i kun tu sbyor ba las skyes pa ni mngon sum yin la/ cig shos ni mngon sum ltar snang ba'am tshad ma gzhan yin pa ni gnod pa can med pa dang yod pa dag las rtogs par byed pa yin no/ /gnod pa can gyi shes pa thob pa ni sngar gnod pa med pa yin na mi srid do/ /de yod pa'i phyir tshad ma ma yin par rtogs pa yin na phan tshun rten pa ma yin no/ /bag chags las skyes pa'i shes pas ni nye ba la dngul du rtogs par byed pa yin na nye ba ma yin pa ji ltar yul nyid yin/ de nyid kyis na phyin ci log yin par gsal ba yin la/ de lta yin par gnod pa can gyis rtogs par byed pa yin no/ /sngar dngul yod pa nyid la de ltar rtogs la/ dus phyis de lta ma yin pa'i shes pas de bzhin du mthong na med par 'gyur ro/ /de mthong ba la ni mi rigs pa ma yin na/ /de ma yin pa la yang de'i ngo bor rtogs pa'i phyir dang / de'i med pa rtogs pa'i phyir dran pa med pa las 'jig rten pa'i rnam par rtog pa ni mi rigs so/ /de yang / 'gal ba rnams ni rigs pa la yang gcig pa yang mi srid de/ gcig gi rnam par gcig 'gyur zhes/ /dbang phyug gis ni bstan pa min/ /zhes smos pa'o// /gang zhig ji lta ba nyid du dmigs par bya ba de lta de ltar khas blangs bar bya ba yin no/ /de'i phyir sngon po ni shes pa'i ngo bo ma yin te/ nyams su myong bar bya ba nyid las rtogs pa'i phyir dang / shes pa mi 'dzin pa la 'dzin pa'i phyir dang / de mi 'dzin pa la shes pa 'dzin pa'i phyir ro/ /de'i tshe bdag gi don cung zad kyang bzung bar dran pa med do zhes bya ba ni/ gzung bya'i ngo bo ma rtogs pa'i 'dzin byed skyes par dran pa'o/ /bzung ba'i don cung zad kyang zhes bya bas don nyid kyi spyi dran pa yin zhes bya bar yang mi rigs te/ don la the tshom za ba'i phyir dang / nges pa med pa'i phyir dang / 'dzin par byed pa la phyin ci log pa yin pa'i phyir ro/ /de'i rnam pa ma yin pa ji ltar 'dzin par byed pa yin zhe na/ de'i rnam pa nyid kyang ci'i phyir yin zhes mtshungs pa yin no/ /de las skye ba'i phyir ro zhe na/ dbang po'i rnam pa nyid kyang yin par 'gyur ro/ /de las skye bar bye brag med kyang don gyi rnam pa nyid yin te/ nye ba yin pa'i phyir ro/ /de lta yin na de nyid kyi nye ba yin pas 'ga' zhig kho na 'dzin par byed pa yin gyi/ thams cad kyi ni ma yin zhes rnam par gzhag pa 'grub pa'i phyir de'i rnam pa nyid ni ma yin no/ /de'i rnam pa nyid kho na nye ba yin nam/ dbang po la sogs pa la ni de yod pa ma yin no/ /de bzhin du nyams su myong ba lkog tu gyur pa nyid dam/ de ma yin pa'i rnam pa nyid yin na/ ji ltar don lkog tu ma gyur pa yin/ de nyid la yang shes pa de nyid yin pa'i phyir ji ltar phyin ci log yin/ 'di la smras pa/ dbang po 'am bdag nyid kyi yul du byung ba ni blo de'i stobs kyis nyams su myong ba'i ming ni gnas skabs kyi bye brag tu byung ba yin pa'i phyir shes pa ni de'i rnam pa nyid ma yin la mngon sum nyid kyang ngo / /don shes pa nyid yin na thag ring ba dang nye ba dag gi rtogs pa po dag la thag ring ba dang nye ba nyid lkog tu gyur pa dang / lkog tu ma gyur pa nyid du mi 'gyur ro/ /de nyid kyis na don dang shes pa dag gis rnam pa'i dbye ba rang nyid las grub pa yin la/ yul gyi shes pa bzhin du yul gyi shes pa de nyid shes pa dag gi bye brag tu yang 'gyur ro/ /rtogs pa'i don zhes bya ba ni nyams su myong ba dran pa'i gnas skabs kyi don nyid yin gyi shes pa'i ma yin te/ don dang shes pa dag gi rjes su 'gro ba dang ldog pa dag gi phyir ro/ /de yang gzhan dang rjes su mi mthun pa ma yin pa la yang / de'i rjes su mi mthun pa yin na med pa'i phyir grub pa yin no/ /des na skyes nas 'jig pa yin pa'i phyir rtsod pa med do/ /skad cig ma yang zhes bya ba la sogs pa ni skad cig ma nyid du sgrub par byed pa'i tshad ma med par bsams pa yin gyi/ skad cig ma nyid du khas blangs nas 'bras bu dang rgyu'i ngo bo med par bsams pa ni ma yin no/ /rtag tu yod pa'am med pa'ang rung rgyu med pa zhes bya ba'i rigs pas skye ba'i dus nyid na 'jig pa'am cis ma yin te/ 'jig pa'i rgyu med pa'i phyir zhes bya ba la ma mthong ba tsam la 'jig par sems pa'i phyir ro/ /mthong ba la sogs pa nyid las ma mthong ba ni ma yin te/ dus gzhan na yang yod pa'i phyir ro/ /de'i phyir dmigs pa ni yod pa yin la/ mi dmigs pa ni med pa yin no zhes bya ba'i rgyu zhig na 'bras bu 'byung ba zhes bya ba ste/ rgyu mi dmigs pa yin na 'bras bur 'gyur zhes pa'i don to/ /des na rgyu'i zhig pa ni rgyu las tha dad pa'i phyir des na de'i dus su 'byung ba'i 'bras bu ni rgyu'i dus su yin par 'gyur zhes bya ba yang sel bar 'gyur ba yin no/ /des na skad cig ma nyid la snga ma dang phyi ma'i skad cig ma rnams kyi 'bras bu dang / rgyu nyid kyi ngo bo'i bag chags bsal bar byed par mi nus so/ /'bras bu ni med pa'i bdag nyid thob pa'i don ni rgyu la ltos pa yin la/ de la ltos pa'i dus su rgyu'i yod pa ni rgyu nyid yin gyi 'bras bu'i dus su ni ma yin te/ ltos pa med pa'i phyir ro snyam du dgongs pa'o/ /gzung ba dang 'dzin pa dag gcig pa nyid du gang smras pa yang / de yang gcig 'dzin pa ni gnyis kyi rnam pa 'dzin pa ni skye ba dang 'jig pa dag la rung ba dang mi rung ba nyid ni 'dzin par byed pa las gzhan pa yod pa dang med pa la sogs pa'i rgol ba la/ /de'i lan ni/ shes pa'i cha tha dad pa dang / snga ma dang phyi ma'i shes pa tha dad pas kyang gzung ba dang 'dzin byed nyid kyi nye bar blangs pas/ de gsha' mar byed pa'i blo'i rgyu ni gzung bya dang 'dzin byed gcig par 'dod pa yin na/ gcig pa nyid kyi bdag nyid la dpe ni khyed la gang na yang yod pa ma yin no zhes bya ba'i gzhan gyi 'dod pa nye bar brjod nas/ de la nus pa can dang / dpe med par nges par bstan pa zhes bya ba la sogs pa yang rnal 'byor spyod pa'i theg pa dang rjes su mthun pa ma yin te/ nges bzung med pas nges 'dzin med/ /ces bya ba ni/ gzung 'dzin gyis stong pa'i shes pa ni de kho na nyid gcig pu yin no zhes bya ba ni de rnams kyi lta ba yin pa'i phyir ro/ /dmigs pa dang bcas par nges la/ /sngo dang de blo tha dad min/ /zhes bya ba dang / gzung 'dzin gyi rnam pa tha dad pas stong pa ni de kho na nyid yin te/ tha mi dad par nye bar dmigs pa'i phyir ro zhes bya ba'i don to/ /stong pa nyid du gang bshad pa ji ltar yin/ kho bo cag gis rnam pa'i dbye ba ma mthong ba'i phyir gzung ba dang 'dzin pa'i bdag nyid gang yin pa rnam par dbye ba khas blangs pa de ni med pa yin no zhes bya ba'i don to/ /de'i phyir nyams su myong ba nyid kho na sa sngon po la sogs pa de las ldog pa yang de'i rnam pa dang bral bar mthong ba'i phyir tha mi dad par sgrub par byed pa ni mngon sum dang 'gal ba yin no/ /bsgrub bya dang 'brel par ma mthong na sgrub byed kyi rjes su dpag pa la 'jug pa yin pa'i phyir rtags la sogs pa 'dzin par byed pa'i mngon sum la rjes su dpag pa ltos pa yin te/ des na de dang 'gal ba yin gyi mngon sum ni de lta ma yin no/ /de ni bdag nyid don gyi de ma thag par nges par byed na/ rang gi yul la rnam par gzhag par byed pa ma yin te/ gang gis de lam 'grub par the tshom za ba yin na/ rjes su dpag pa la ltos par 'gyur ro/ /'o na ci zhe na/ so sor snang ba nyid las so/ /'di sngon po'i zhes bya ba ni so sor snang ba la the tshom za ba ma yin no/ /de yang ka ba'o zhes bya ba'am rtsig pa'o zhes bya bar shin tu nges pa'i blo ji ltar phyin ci log par 'gyur zhes smos pa'o/ /dang po la ni legs par dpyad pas lan thebs pa yin no/ /gang las 'gro ba thams cad kyi nyams su myong bar bya ba nyid du snang ba yin la/ des na/ bud med cig gi lus la yang / /dka' thub pa dang 'dod ldan khyi'i/ /ro dang 'dod bya bza' ba ste/ /rnam par rtog pa rnam gsum 'byung / / rnam pa thams cad pa'i dngos po la nges pa'i bag chags kyi dbang gis thams cad don thams cad 'dzin pa ni ma yin no/ /de bzhin du/ skar ma rgyu skar tshes grangs rnams/ /zhes bya ba la sogs pa'i rtags kyi bye brag 'dzin pa ni/ sgra'i dbye ba'i thabs can dang / dbyibs dang / skye gnas kyis kyang 'grib pa dang 'phel ba dang de gnyi ga'i dngos po'i tshul gyi rtags rnams kyis brjod par 'dod pa'i dbang gis sbyor ba ji lta ba bzhin du nges pa nyid 'dzin pa yin gyi/ thams cad kyis thams cad ni ma yin no/ /des na de ltar nges pa'i ngo bo gzhan 'dzin pa ni gzhan sgrub par byed pa ma yin pa gnod pa med pa don dam pa pa ni gzhan la mi ltos pa'i phyir ro/ /mi bslu ba can nyid ni de lta ma yin te/ 'jig rten pa nyid ma yin pa la yang skyon med de tshad ma can nyid yin pa'i phyir ro snyam du sems pa la/ rang las rang gi ngo bos rtogs/ /zhes bstan pa yin te/ sngon po rang gi ngo bo nyid ni rang nyid las rtogs par bya ba yin gyi/ de'i gzung ba nyid dam 'dzin pa nyid las ni ma yin no/ /bde ba la sogs pa bzhin du 'di ni sngon po'i shes gzhan nyid las rtogs pa yin no zhe na/ bden te/ mthong ba ni gzhan nyid las go ba ma yin la/ rnam par rtog pa ni sngon po de la sngon po ma yin par rnam par gcod pas sam mi shes pa rnam par gcod pas rjes su 'gro ba dang ldog pa dag las gcig bzung nas tha dad pa'am gzhan du yang snang bar byed pa ni bag chags kyi stobs yin par brjod de/ tha dad par yang 'dzin par byed pa yin no/ /de ni don yang dag par rig par byed pa yin la/ bdag nyid dang sre bar byed pa ni bdag nyid don du so sor snang ba'i stobs kyis don bzhin du bdag nyid kyang de'i bya ba'i rjes su 'brangs nas/ bdag gis 'di rig go zhes bya bar 'gyur ro/ /nyams su myong ba'i myong ba ni don nyams su myong ba yin no/ / nyams su myong ba la mi ltos pa yin na thug pa med pa'i phyir don nyams su myong bar mi 'gyur ro/ /lkog tu ma gyur pa yang dag par rig pa ni nga rgyal gyi yul yin la/ de'i rgyu yang dbang po la sogs pa yin pa'i phyir de dag tsam ni bdag gi dngos po yin gyi cig shos ni ma yin te/ mi rtogs pa'i phyir/ de yang skad cig ma re re la gzhan dang gzhan yin te/ rgyu nye bar dmigs bzhin pa la 'khrul pas 'di nyid ni phyi rol lo/ /'di nyid ni phyi rol lo zhes nye bar rtogs pa yin gyi/ des phyi rol gyi phyogs su 'jog pa yin yang phyi rol bar so sor snang ba ni ma yin te/ mthong ba la de lta bu mi snang ba'i phyir ro/ /sngon por mthong ba ni phyi rol rig pa ma yin te/ tha mi dad par rtogs pa'i phyir ro/ /sngon po nyid ni shes pa ma yin te/ de med na yang ser po la sogs pa yod pa'i phyir ro/ /ma yin te/ de dag tha dad pa yin na de las ldog pa ma yin pa'i shes pa khyad par can yang tha dad par 'gyur ro/ / khyad par can yang sngar ni de dang bral ba yin la/ dbang po la sogs pa'i stobs kyis 'gyur ba yin no/ /ma yin te/ gnas skabs de ni gang nas kyang rnyed pa ma yin te/ khyad par can gyi phyi rol yin pa'i phyir ro zhe na/ ma yin te/ gcig la gcig brten par 'gyur ba'i phyir te 'dir phyi rol yin pa'i phyir khyad par can nyid du grub pa yin la/ grub pa de yang 'di'i phyi rol nyid yin no/ /dbang po dang yul las gzhan pa yod par gyur kyang gang med na so sor snang ba mi 'byung ba yin la/ de ni 'di'i yin gyi shes pa'i ni ma yin te/ de ma yin pas drangs pa nyid kyi phyir ro zhe na/ mi rigs te/ de ma thag pa'i shes pa las gzhan pa de las gzhan rtogs pa med pa'i phyir ro/ /sngon po'i shes pa'i de ma thag pa'i ser po'i shes pa ji ltar yin/ ma yin te/ de la yang ser po'i shes pa nyid de ma thag pa yin pa'i phyir 'ba' zhig po de ni nye ba ma yin te/ 'das pa yin no/ /de yang mtshungs pa ni yod pa ma yin la/ de ma thag pa ni bar chod pa med pa yin te/ 'di ni rigs mtshungs pa'i de ma thag pa yin no/ /de lta bu las byung ba ni bag chags las byung ba yin par brjod de/ snga ma dang phyi ma'i skad cig ma rnams kyi 'bras bu dang / rgyu nyid bag chags yin la/ skad cig ma nyid yin par yang sgrub par byed par 'gyur ro/ /dran pa ni 'das pa'i nyams su myong ba las 'byung ba ste bag chags las 'byung ba zhes brjod do/ /sad pa po med na ji ltar bag chags las byung ba yin khyed la yang mtshungs so/ /kho bo ni yul dang dus la sogs pa'i rgyu mtshan du 'dod do zhe na/ kho bo yang der snang ba'i shes pa rgyu mtshan yin no/ /de ci las yin/ khyed kyi yang ci las yin/ rang gi rgyu las so/ /kho bo'i rang gi bag chags yin no/ /smon lam la sogs pa 'jig rten pa nyid kyis sad pa'i rgyu ni rnyed par dka' ba yin no/ /de skad du yang / gal te mtshungs pa de ma thag /rkyen las nges par mi smra na'o/ /zhes gsungs pa'o/ /mthong ba ni gzung bya nyid kyi sa rnam par rtog pa las de'i yul la sngon po'i rnam par rtog pa las bzhin du rtogs par 'gyur gyi/ rtag pa'i rnam par rtog pa las ni ma yin te/ 'khrul pa'i phyir ro/ /de la gzhan du mthong ba ni gnas pa can yin no/ / gzung bya 'dzin pa zhes bya ba 'di la yang mtshungs so/ /nyams su myong ba ni rjes su dpag pa'i bsgrub bya ma yin no/ /de lta yin na shes pa la tha dad pa nyams su myong ba med pa'i phyir de'i bag chags sam/ rnam par rtog pa yang med do/ /ma yin te/ rnam par rtog pa gzhan gyis nyams su myong ba'i phyir la/ de yang bag chags gzhan las yin zhing / de yang rnam par rtog pa gzhan las yin te thog ma med do/ /mthong ba ni rang gi bag chags las 'byung ba ma yin la/ de bzhin du rnam par rtog pa yang ngo zhes stobs mtshungs pa'i phyir gang gis gang la gnod pa yin/ gnyi ga dag gis gnyi ga 'grub pa yin na/ gnyis med pa nyid dam cig shos su 'gyur ro/ /ma yin te/ dngul gyi rnam par rtog pa bzhin du mthong ba'i yul la rtogs par byed pa yin la/ gnyis med par mthong ba ni nya phyis bzhin du gnod pa can yin no/ /de bzhin du bzlog pa de dang 'dra ba'i ngo bo ni rnam par rtog pa nyid kyis rtogs par 'gyur ro zhe na/ ma yin te/ mthong ba'i yul yang de las bzlog pa yin pa'i phyir ro/ /bya ba las yin no zhe na/ de lta yin na rnam par rtog pa byed pa por gyur ba'i phyir gcig pa can chen po nyid du gsal bar byas pa yin no/ / gcig dngos gcig gi rnam pa zhes/ /dbang phyug gis ni bstan pa min/ /zhes bya ba yin no/ /ma yin te/ tshad mas grub pa'i phyir ro/ /gnyi ga shes pa yin no zhe na/ ma yin te/ rang dbang du mi rtogs pa'i phyir ro/ /rgyab rten gang gis mthong ba gnod par byed pa yin/ re zhig don ni med pa yin la/ bag chags kyang gnyi ga la mtshungs pa yin no/ /mthong bas rang gi yul la rnam par 'jog par byed na bzlog pa sel bar byed pa'i phyir dang / ma gsal ba yin na rnam par 'jog pa med pa yin no/ /mthong bas ngo bo gzhan ma mthong ba nyid ni rnam par rtog pa'i yul yin gyi/ rang dbang ni ma yin te/ de nyid ni ngo bo gzhan la rtogs par byed pa'i phyir ro/ /ma yin te/ ngo bo gnyis phan tshun rjes su 'jug pa ma yin pas gcig ma yin pa'i phyir des rtogs pa zhes bya ba ni rang dbang ma yin pa'i phyir gnod bya nyid yin no/ /rnam par brtag bya'i bzlog pa ni mthong ba las gzhan pa nyid du rtogs pa ma yin pa'i phyir mi 'gyur ro/ /mthong ba'i bya ba'i rjes su 'jug pa can ni sngon po'i rnam par rtog pa las yin pa bzhin du/ de ma yin pa yongs su spangs nas 'jug pa ni 'gal ba ma yin no/ /de nyid ni thog ma med pa'i bag chags las byung ba'i rnam par rtog pas phyi rol nyid du sgro btags pa na mthong ba na med do zhes zer ba ni/ bye brag tu rab tu ma grub pa la sogs pa rnams kyis dmigs par bya ba ma yin no/ /'dir smras pa/ de ni rtogs byed brjod bya nyid/ /tshad ma pa la rigs ma yin/ /tshad ma la ltos mi de nyid/ /de la ltos pa med par gnas/ /zhes bya ba de yongs su rtogs par byed pa'i slob ma rnams la gtan tshigs kyis ston par byed pa yin no/ /blo la brten nas nye bar dmigs pa ni sgrub byed bzhin du 'jug par byed pa ma yin te/ mngon sum dang 'gal ba'i phyir ro/ /sgrub byed kyis ni bsgrub bya la dmigs pa las bye brag med pas dmigs pa med par dam 'cha' ba la gnod par byed pa ma yin te/ de ma yin pa'i ngo bo yongs su spangs pas rnam par rtog pa rnams 'jug par mthong ba'i phyir dang / phyi rol snang ba ma yin pa'i phyir dang / mngon par 'dod pa tsam gyis de'i yul nyid du khas blangs pa dang mi 'gal ba'i phyir te/ rang nyid la dmigs pa ma yin pa nyid yin na khas blangs pa nyams pa yang ma yin no/ /rang nyid la byed pa 'gal bas su yang de ltar khas mi len pa'i phyir ro/ /de nyid gsal ba'i ngo bo gzhan la mi ltos pa mi dmigs pa med pa'i phyir mi dmigs par 'dod do/ /de ltar na chos dang chos can dang gtan tshigs dang dpe la sogs pa'i dbye ba ni rnam rtog gi sprul pa ni dor bya ma yin te/ 'gal ba med pa'i phyir ro/ /bde ba la sogs pa ni 'dzin byed yin la/ gzung bya ni sngon po la sogs pa yin no zhe na/ ma yin te/ rnam par rtog pa med pa de dag gi de lta bu nyid nyams su mi myong ba'i phyir gnyis po zhes bya ba ni 'di ltar sngon po dang ser po bzhin du gzung bya dang 'dzin byed ma yin la/ rnam par rtog pa ni mi slu bas tshad ma yin no/ /de dag nyid la mi slu ba ni ma yin la/ bzlog pa la ni mthong ba'i phyir mi slu ba yin no/ /de ltar na phyi rol nyid ma grub pa'i phyir don gyi shugs kyis 'dzin par byed pa'i rnam par rtog pa spangs pa yin no/ /rgyur brtags pa las ni dbang po 'am bag chags kyang rung rgyu yin no zhes byar bar yang bzung ba ci yang zhes bya bas bshad zin to/ /the tshom ma nges pa ma yin pa yin na/ shes pa'i ngo bo'i nges pa las don gyi dbye ba ni mi rigs te/ gzung ba zhes bya ba'i spyi tsam du nges pa yin la/ ci yang zhes bya ba ni khyad par gyi ngo bor ma nges pa yin pa'i phyir ro/ /spyi tsam du nges pa yin yang gdon mi za bar khyad par du nges pa ni ma yin no/ /thag ring por shing du nges pa yin yang / shing d+ha ba la sogs par nges pa ma yin no/ /shes pa yang shes bya rnams kyi thun min la/ spyi ni de ma yin pa la sa log pa'i phyir de dang ldan pa las gzhan ma yin no/ /gal te mi shes pa las log pa ni shes pa las gzhan med na ji ltar yin/ ma yin te/ rtog pa'i nyams su myang bya yod pa'i phyir ro/ /med pa'i rtog pa ci 'dra zhig /rtog pa yod na dngos por 'gyur/ /zhes bya ba yin no zhe na/ 'di la smras pa/ rtag pa dang dbang phyug la sogs pa'i rnam par rtog pa bzhin du med pa la yang rtog ba skye ba yin no/ /de bzhin du ro dang 'dod pa bya ba dang bza' ba dang bud med dang skyes pa dang ma ning la sogs pa'i tha snyad rnams ji ltar goms pas de ma yin pa'i ngo bo spangs nas 'jug pa yin par bshad par bya'o/ /tshogs pa snga ma can nyid ni/ /shes bcas yul gyi skad cig ma/ / snang bar bcas pa'i gzugs bzhin byed/ /des na lhan cig rig par 'gyur/ /zhes bya ba yin no zhe na/ de las cir 'gyur/ gzung bya la sogs pa'i rnam par rtog pa bkag pa yin la/ rnam par rtog pa med pa ni gnyis las skyes pa bzhin du/ phan tshun byed pa ma yin pa'i phyir de ni gnyis med par 'gyur ro/ /rnam par rtog pa'i gzung bya ni/ phyi rol yang yin/ nang yang ma yin pa ma yin nam/ de bzhin du rtog pa med pa la yang yin no/ /de'i 'di ni gong du rkun po byed pa las dgon par skyobs su re ba lta bu yin te/ rtog pa med pa'i gzung bya la bsnyon par byed na rnam par rtog pa la ci zhig khur chen po yin/ mngon par 'dod pa tsam ni mngon par 'dod bzhin pa'i yul nyid yin pa la bar chad yod pa yin te/ bar chad yod pa'i yul gzhan mi dmigs pa'i phyir ro/ /de ltar na shes pa nyid kyang bde ba la sogs pa bzhin du gcig gi lkog tu ma gyur kyang gzhan gyi lkog tu gyur pa yin te/ de ma yin pa'i rgyud la yod pa'i phyir ro/ /thag ring ba dang nye ba gnas pa dag gi gsal ba dang cig shos su snang ba du ma nyid yin la/ gcig tu mngon par 'dod kyang de'i bya ba mi byed pa rnam par bcad pas/ skyes bu nyid kyi bde ba yin pa la skyon med do/ / de nyid kyis na rang las gzhan gyi nyams su myong ba ma yin pa'i phyir ram/ nyams su myong ba la yang rung shes pa'i dus kyi shes pa thams cad thun mong ba nyid yin pas/ 'jug pa'i yul ma yin pas/ phrad bya ma mthong ba las the tshom yin pa'i phyir gnod pa med pa nyid med pas de dang 'brel pa can nyid kho na 'jug pa'i yan lag gi tshad ma nyid yin te/ tshad mas grub pa yin snyam du dgongs pa'o/ /yang na tshad ma mi slu ba can zhes bya ba ste/ gzhan las tshad ma nyid yin pa rab tu bsgrubs nas/ rang las tshad ma thams cad kyi/ /tshad ma nyid ces gzung bar bya/ / zhes pa sel bar byed pa bstan pa ni rang las rang gi ngo bo rtogs zhes bya ba yin te/ tshad ma nyid kyis ni ma yin no/ /sngar bdag nyid rig pa ni dus phyis 'brel pa can nyid mi rigs pa yin na phyi ma yang de bzhin du ma yin nam/ gzhan las yin no zhe na yang / de yang de 'dra ba kho na yin no/ / de 'dra ba ma yin na de dang 'dra ba snga ma yang yin pa'i phyir gnod pa med pa nyid ji ltar tshad ma nyid ma yin/ phyi ma dang 'brel pa can nyid snga ma'i rang gi ngo bo yin pa'i phyir de rig pa nyid kyis rig pa ma yin nam/ de'i tshe 'di'i nges pa 'ba' zhig ni med pa'i phyir shes pa phyi mas nges par byed pa yin gyi 'dzin par byed pa ni ma yin no/ /don gyis rang gi ngo bo gcig /bdag nyid mngon sum yin pa la/ /tshad ma rnams kyis brtag bya gang / /ma mthong cha gzhan ci zhig yod/ /de phyir dngos po mthong ba yis/ /yon tan mtha' dag mthong ba nyid/ /ces 'chad par 'gyur ba'o/ /des na 'di ltar goms pa yod na rtogs par nges pa ni/ rang nyid kho na las yin pa'i phyir de la nges pa'i don du yang gzhan la ltos pa ma yin la/ gang du gzung ba la yang phyin ci log tu nges pas bsgribs pa ni nya phyis la dngul gyi shes pa bzhin dang / mi rtag pa la rtag pa'i shes pa bzhin du de las gzhan pa nyid tshad ma yin gyi snga ma ni ma yin te/ bya ba yongs su ma rdzogs pa'i phyir ro/ /'di yang / gzugs chos mthun pa mthong ba las/ /nya phyis la dngul rnam pa ltar/ /gal te 'khrul pa'i rgyu mtshan gyis/ /yon tan gzhan sbyor mi byed na/ /'khrul pas nges par mi byed pas/ /sgrub pa rab tu 'jug pa yin/ /zhes kyang 'chad par 'gyur ba'i the tshom ni tshad ma'i bya ba la gnod par byed pa ma yin no/ /de lta yin na du ba dang ldan pa las me dang ldan pa nyid la mer mi rig pa ni rang nyid las shes pa yin par 'gyur ro/ /'on te me la ltos nas de dang ldan pa nyid yin la/ de mi 'dzin pa nyid yin na 'dzin par byed pa ma yin te/ gzhan la ltos pa'i rig pa ni phyin ci log tu sgro btags pas bar du bsgribs pa yin no/ /de lta yin na phyin ci log tu sgro btags pas bar du chod pas de dang ldan pa nyid rig pa ji ltar ma bsgribs pa zhes bya ba yin/ thag ring ba la ni shin tu 'dzin pa yin yang de'i bye brag shing d+ha ba dang shing pa la sha yin zhes bya ba la ni/ the tshom gyis non pas gzhan la ltos pa nyid kyi the tshom tsam mam/ de las gzhan gyis spong bar byed pa ma yin te/ shing d+ha ba la sogs par sngar ma rig pa'i phyir ro/ /de nyid shing d+ha ba yin no zhe na/ ma yin te/ de nyid du zhen pa med pa'i phyir ro/ /phyis zhen pa yin no zhe na/ gang mthong ba las de bzhin du zhen pa yin la/ de ni bye brag gzhan yin te/ mthong ba nyid mthong ba las lag pa la sogs pa lta bu'o/ /mthong ba nyid du rig pa ni lag pa la sogs pa rig pa ma yin te/ the tshom med par thal bar 'gyur ba'i phyir ro/ /gcig nyid la ni de bzhin du 'gyur la/ 'di ni nya phyis kyi shes pa bzhin du 'gyur te/ nya phyis la yang dngul las bye brag yin la/ dngul la'am de las bye brag tu bzung ba yin na/ gnod pa can gyi shes pa bzhin du sgro btags pa med par thal bar 'gyur ro/ /de'i phyir gang las phyis 'byung ba ni bye brag 'dzin pa la nges pa yin gyi/ de la sngar ni de 'dzin pa med pa yin te/ drug ldan la sogs pa 'dzin pa lta bu ste/ ma goms pa na rdul ldan la sogs pa'i bye brag rig pa ma yin no/ /de'i tshe rig pa ma yin na dbang po'i bya ba yod kyang phyis ji ltar rig par byed pa yin te/ bye brag med pa'i phyir ro/ /dbang po'i bya ba bye brag tu mi 'gyur du zin kyang yid ni goms pa yin na/ bye brag chen por 'gyur ro/ /dbang po las skyes pa ni mngon du byed pa yin na/ ji ltar yid kyis byed pa yin/ mthong ba'i phyir spangs pa ma yin no/ /dbang po med kyang 'byung ba ni gzhan gyi tshe yang yin na des bskyed par ji ltar 'gyur/ bden te/ 'di'i tshe yang yid nyid dngos kyi rgyu yin la/ dbang po ni rjes su 'jug pa yin no/ /de ni des chog go/ /de skad du yang / tshad ma rnam par nges pa las/ de ltar rab tu bsgrubs pa ni rjes su dpag pa nyid 'dor ba ma yin te zhes smos pa la/ mi slu ba la sogs pa'i khyad par yod pa'i sgo nas thob par bya ba la tshad ma nyid ni rjes su dpag par bya ba yin gyi/ mngon sum du ni ma yin te/ gzhan la ltos pa'i phyir ro/ /gong du yang mi slu ba dang / slu ba la sogs pas dmigs pa ni gzhan gyi dbang yin par bstan pa de la yang skyon yod par bstan pa yin no zhes bya ba'i don to/ /de lta yin na bye brag de sngar shin tu ma bzung ba yin no/ /de lta ni ci zhig bzung ba yin/ spyi yin no/ /ci da ltar gyi khas len pa yin nam/ bden te/ de nyid shes pa'i so sor snang ba khyad par du ba'i thun mong ba'i spyi yin te/ thag ring por yal ga la sogs pa can du snang ba lta bu'o/ /de yang / rtags ni spyi yi yul can du/ /sngar bstan tha dad min gnas phyir/ /zhes bya ba dang / gzugs chos mthun pa mthong ba las zhes kyang gsungs pa'o/ /gang du rig par byed pa ni gzhan la ltos pa ma yin te/ skad cig ma nyid kyi shes pa tsam la sogs pa la'o/ /de la ni mngon sum nyid las tshad ma yin la/ thog ma med pa la sogs pa'i dus kyi ma rig pa'i sa bon gyi rjes su 'brangs nas tha snyad 'dogs pa po yul mthong nas yul can la 'jug par byed pa ni skyed byed nyid du rjod par byed pa nyid la 'jug pa lta bu yin pa'i phyir snga na med pa sgrub par byed pa ni ma yin no/ /'di la yang tshad ma rnam par nges pa las/ gzhan nyams su myong ba'i yul rnams las zhes smos pa ste/ yul rig par byed pa la gzhan la ltos pa med pa rnams las zhes bya ba'i don to/ /yul yang rang gi ngo bo nyid yin no/ /de nyid ni/ don gyi rang gi ngo bo gcig ces bya ba la sogs pa yang don 'di nyid yin par shes par bya ba'i rang dbang du ni ma yin no zhes bya ba ni/ 'dir 'di'i don yin zhes bya ba'i don te/ gcig ste gzhan la mi ltos pa'i don gyi rang bzhin te rang gi ngo bo'i khongs su gtogs pa ni mngon sum ste/ rab tu gsal ba'i ngo bo la skad cig ma nyid la sogs par rtogs pa yin na/ gzhan te/ ngo bo gzhan ma rtogs pa'i rgyu mtshan yod pa ma yin pa ni gang shes par byed pa'i mtshan ma gzhan btsal dgos pa'o/ /de lta yin na su zhig tshad ma gzhan tshol bar byed pa yin pa ldog pa'i sgo nas bstan pa ni/ mi byed na zhes bya ba la 'khrul pa'i rgyu mtshan gyi te/ me la sogs pa dang bral ba'i ri la sogs pa mthong ba las sam/ thag ring bar shing d+ha ba la sogs pa'i khyad par dang bral ba'i shing tsam du mthong bas sam/ phyi ma dang 'brel pa dang bral ba'i snga ma mthong bas kyang rung ste/ de las gzhan pas mi gnod pas phyin ci log tu sgro 'dogs pa yin na khyad par du 'dod pa bsgrub pa'i don du tshad ma gzhan tshol bar byed pa yin zhes bya ba'i don to/ /gang du yang gzhan la mi ltos pa der yang thog ma med pa'i phyin ci log gi bag chags las byung ba'i mngon par 'dod pas bslus pa yin pas tha dad du mi byed pa tha snyad la 'jug par byed pa yin par bstan pa ni/ de phyir dngos po mthong ba yis/ /yon tan tha dad mthong ba nyid/ /'khrul pas nges par mi byed pas/ /bsgrub pa rab tu 'jug pa yin/ /zhes gsungs pa'o/ /de'i phyir phyi ma dang 'brel ba can nyid ni snga ma'i rang gi ngo bo ma yin zhing rang las ni mi rigs pas rig par byed pa la ltos pa yin gyi/ de yang yod pa ma yin pa'i phyir tshad ma dang cig shos kyi rnam par dbye ba nus par 'gyur ro snyam du sems pas/ 'o na ji ltar tshad ma nyid ces bya ba la smras pa la/ lan du/ tha snyad las ni tshad ma nyid/ /ces bya ba smos te/ 'jig rten pa'i tha snyad ni 'khor ba bzhin du yod pa yin la/ tshad ma dang cig shos kyi rnam par dbye ba yang yod pa'i phyir de ni de las 'grub par brjod pa yin no/ /mngon sum la sogs pa ni tha snyad kyi gzhi ma yin te/ des grub pa ni tshad mas rig pa ma yin pa'i phyir bag chags nyid ni gzhi yin no/ /de yang rnam par rtog pa'i bag chags kyis gzhag pa yin zhes bstan zin to/ /bag chags las byung ba yin yang nyams su myong ba nyid ni snga ma nyid dam/ phyi ma nyid kyis u le kha ti sre bar byed ba'am/ 'byed par byed pa yang rung ste/ bag chags dang nyams su myong ba dang 'brel ba'i phyir ro/ /nyams su myong ba dang 'brel par ci las yin zhes bshad zin to/ /nyams su myong ba dang 'brel pa'i bag chags las byung ba ni ji ltar nyams su myong ba 'dzin pa yin gyi rnam par rtog pa'i bag chags las ni ma yin te/ brdzun pa 'dzin pa'i nus pa las so/ /rang gi ngo bo ma 'dres pa/ /de rnams rtogs pas 'dres par byed/ /ces bstan pa yin no/ /de lta bu de ni phyi ma dang 'brel pa can gyi snga ma nyid kyi'am/ de dang bral ba nyid kyang rung ste/ tha snyad kyi rnam par rtog pas grub pa yin gyi/ tshad mas ni ma yin no zhes bya ba'i don to/ /rang gi ngo bo zhes bya ba shes pa'i yin gyi tshad ma nyid kyis ni ma yin no zhes bya ba'i don rigs pa gang las shes pa yin zhe na/ de'i tshe tshad ma nyid kyi rang gi ngo bo rjod par byed pa nyid kho na rigs pa dang 'gal ba nyid du 'gyur gyi/ shes pa'i rang gi ngo bo rjod par byed pa ni ma yin par bstan pa ni/ gzhan yang tha snyad pa'i tshad ma zhes bya ba ste/ tha snyad las ni tshad ma nyid/ /ces bya ba 'dis ni tshad ma nyid kyi rang gi ngo bo nyid ni tha snyad las grub par bstan pa yin no/ /de ma yin na de rjod par byed pa don med pa can du 'gyur ro/ /de ltar rjod par byed pa nyid las tshad ma nyid ni rang gi ngo bo las gzhan pa yin no/ /rang gi ngo bo rtogs bzhin pa de dang 'brel pa can chos can gyi shes pa'i ngo bo nyid du bstan pa yin no/ /gzhan ni dbang byed pa ma yin zhes bya ba'i don to/ /nges par bzung ba gnyis pa bstan pa ni/ 'di ltar gal te tshad ma nyid ces bya ba'o/ /gang gis de ma thag tu don byed pa nyams su myong ba de'i shes pa ni/ de dang 'brel pa can nyid tshad ma nyid yin par tha snyad ces bya bar rnam par rtog pa gang yin pa las grub pa yin la/ gang la de med pa de la ji ltar tha snyad kyis grub pa yin snyam du sems pa la/ de phyir tha snyad tsam du zhes bya ba smos te/ de yang tha snyad tsam ste/ don byed pa dang 'brel pa 'dzin par byed pa'i rnam par rtog pas rab tu grub pa ste/ bskyed pa ni de dang 'dra bar mthong ba'i rtags las byung ba rjes su dpag pa'i tshad ma gang yin pa de la brten nas grub pa ni don byed pa 'brel pa ste/ gzhal bya la brten nas 'jug pa yin zhes bya bar sbyar ro/ /de ni 'di yin no zhes bya ba ni tshad ma'i ngo bo bstan pa yin la/ mthong bas zhes bya ba ni gzhal bya bstan pa yin te/ mig gi rnam par shes pa la snang ba 'das pa'i don byed pa la dmigs nas sa phyogs de nyid kyi de sgrub par byed pa nyid du rjes su dpog pa yin na 'jug pa'i yul du gyur pa yin zhes bya ba'i don to/ /gal te snang ba'i don byed par sgrub par byed pa nyid du rtogs nas 'jug pa yin zhes bya bar ni mi rigs so/ /'o na ci zhe na/ de nyid mthong ba de nyid phrad bya yin no zhes nges pas 'jug par byed pa yin pa'i phyir ro/ /'on te mthong ba'i bya ba'i rjes su 'brangs nas tha dad par rnam par dpyod pas bsgrub bya nyid dang / sgrub byed nyid du brjod do/ /de lta na yang mthong ba ni rang gi ngo bo'i mthar thug pa yin pa'i phyir sgrub par byed pa nyid ni ma yin te/ des rtogs par bya ba'i tshad ma ni sgrub byed nyid kyi shes pa yin no snyam du sems pa ni/ gal te mthong bas ni zhes bya ba'o/ /gzhan yang tha snyad du ni gcig pa'i phyir zhes bya ba'o/ /gal te yang mthong bas ni de sgrub par byed pa'am cig shos kyang rung rtogs par byed pa ma yin yang mthong ba dang lhan cig byed pa'i bag chags las byung ba nyid ni me dang du ba bzhin du rjes su 'gro ba dang ldog pa yin par rtogs par byed pa yin la/ de nyid ni de sgrub par byed pa yin te/ de dang tshogs pa gcig pa'i sgrub byed nyid dam de dang yul gcig pa la sogs kyi rgyu mtshan la brten nas de dang gcig par tha snyad 'dogs pa po sems pa yin la/ de'i bsam pas mthong ba de nyid/ 'thob bya de nyid yin par brjod do/ /rtog ge ba'i rnam par rtog pa tsam gyi yul ni rjes su 'gro ldog las byung ba de sgrub par byed pa yin la/ pha rol pos brtags pa'i yan lag can la sogs pa 'gegs par byed pa yang yin gyi/ gang du 'di lta bu'i rgyu mtshan dang bral ba rnam par rtog pa tsam ni/ me'i sbyin sreg las mtho ris thob pa yin zhes zer ba bzhin du/ de ni tshad ma ma yin zhes bya ba'i don to/ /mngon sum la sogs pa tshad mar mngon par 'dod pa'i rang gi ngo bo nyams su myong ba yin na/ don byed pa nyams su myong ba ni/ rig byed la sogs pa'i rnam par rtog pa las bye brag tu bstan pa ma yin nam/ de yang res 'ga' ba nyid yin pas rnam par rtog pa tsam las mi srid do/ /khyab pas tshad mar mngon par 'dod pa de la yang / de yod pa ma yin pa'i phyir bye brag med pa yin no snyam du sems pas zer ba ni/ gal te don byed pa thob par byed pa nyid kyis shes par bya ba'o/ /tshad ma'i thob par byed pa nyid ni shes par byed pa nyid ma yin nam/ de ji ltar byed pa po nyid yin par sems pa ni/ don med na ni med pa'i phyir zhes bya bas don med na mi 'byung ba can nyid yin par sems pas de lta na yang don gyi 'bras bu zhes bya bar smra bar rigs pa yin la/ ji ltar don gyi byed pa po yin zhes bya ba'o/ /gdon mi za bar 'byung bar 'gyur ba'i 'bras bu ni rgyu nyid yin no zhes bya ba'i bsam pa yin pas skyon med do/ /de'i phyir don med na mi 'byung ba nyid shes pa'am/ don med na mi 'byung ba nyid kyang ngo zhes bya ba'i dgongs pas/ shes par byed pa po dang / don byed pa po zhes bya ba'i rnam par dbye ba med do/ /gcig gis 'dod pa'i lan ni/ 'bras la the tshom yod ces te/ /zhes bya ba yin no/ /'di ni chu yin no zhes bya ba tsam ni tha snyad ma yin te/ khrus tsam mam/ btung ba'am zhes bya bar yang mthong ba'i phyir ro/ /de lta yin na de nyid du/ de dang 'brel pa can nyid rig par 'gyur gyi/ chu bo zhes bya ba ni ma yin no/ /ma yin te/ khrus la sogs pa la nus pa can du brjod pa'i phyir dang / gzhan 'dod pa ma yin pa'i phyir ro/ /mi 'dod pa ni rgan po rnams kyi yang tha snyad kyi yul ma yin no/ /de yang / de rnams thar pa sgrub byed par/ /rtag par rig byed las rtogs te/ /de dang 'dra bas chos nyid yin/ /zhes kyang smos pa'o/ /de lta yin na 'di ni chu'o zhes bya ba la sogs pa'i shes pa'i yul ni don byed nus pa'i dngos po yin gyi don byed pa ni ma yin pa'i phyir ro/ /ji ltar de dang 'brel pa'i tshad ma nyid yin/ dngul gyi shes pa ni nya phyis la mi slu ba can ma yin la/ nor bu'i 'od la nor bu'i shes pa ni don byed pa la mi slu ba yin pa'i phyir tshad ma nyid du 'gyur ro/ /'on te don ni sreg pa la sogs pa yin la byed pa ni bya ba byed pa yin no/ /byed pa po nyid ni me'i ngo bo yin la/ de la yang mngon sum la sogs pa mi slu ba can nyid yin te thal ches pa ni ma yin no/ / lan ni/ 'bras la the tshom yod ces te/ /zhes bya ba ste/ 'dod pas thabs nyid shes pa ni 'jug pa'i yan lag yin te/ thabs las byung ba las the tshom za ba yin yang thabs nyid la ma nges pa nyid ma yin te/ mthong ba gnyis la sogs pa'i de'i ngo bo nyid la nges pa yin pa'i phyir ro/ /the tshom la ni tshad ma nyid du khas mi len pa yin no/ /'dir smras pa/ skyes bu 'jug dang ldog byed kun/ /zhes bya ba ste/ thabs nyid la nges pa las tshad ma nyid yin na ni rig byed las byung ba la yang 'gyur ro/ /mngon sum la snang ba nyid kyis tshad ma yin la/ rjes su dpag pa can mthong ba las sgrub byed du nges pa las so/ /rig byed las byung ba ni dngos su mthong ba las ma yin la/ nges pa can mthong ba las nges pa yang ma yin no zhe na/ ma yin te/ me'i phung po la sogs pa mtho ris kyi thabs nyid du nges pa'i phyir de'i nges pa yang kha cig tu mthong ba las nges pa mthong ba yin pa'am/ kha cig tu rgyu skyon can ma yin pa'i phyir rgyu'i skyon med pa ni rig byed skyes bus byas pa ma yin pa'i phyir ro/ /nges pa can mthong ba kho na las nges pa ni ma yin te/ gzhan du yang mthong ba'i phyir ro/ /mthong ba yang tshad ma yin pa ni thabs las byung ba la the tshom yin yang de ni don gyis thabs nyid rig pa yin no/ /ji ltar nges par byed ce na/ de ni cig shos la yang mtshungs so/ /de la thabs las byung ba kha cig tu mthong ba yin la/ gzhan du ni de dang 'dra ba mthong ba las nges par byed pa yin no zhe na/ de lta yin la thabs las byung ba nges pa nyid las tshad ma nyid du gyur pa yin la/ rig byed las ni thabs las byung ba ma mthong ba las na thams cad ji ltar nges par byed pa yin/ 'on te gnyi ga yang rig byed nyid las nges pa yin la/ rgyu'i skyon med pas rjes su dpag pa bzhin du tshad ma yin no/ /ma yin te/ rjes su dpag pa ni mthong ba dang chos mthun pa nyid kyis tshad ma yin pa'i phyir ro/ /rig byed la ni mthong ba dper bya ba gang na yang med do/ /sngar mthong ba kho na mthong ba nyid yin no zhe na/ ma yin te/ rang gi ngo bo ma mthong ba'i phyir ro/ /mngon sum la yang don byed pa'i ngo bo mthong ba ma yin no/ /de dang 'brel pa nges par byed pa yin no zhes sngar bstan pa yin te/ 'brel pa ni don byed pa'i ngo bo nye ba yin la/ de nyid kyis na tha snyad grub pa yin no/ /de lta yin na rig byed la yang de'i ngo bor tha snyad las grub pa'i phyir mi mthun pa med do/ /rgyu'i skyon med par ji ltar nges pa yin/ skyes bus byas pa ma yin pa nyid kyis de'i skyon 'pho ba ni mi srid pa'i phyir ro/ /rab rib can gyi shes pa la yang skyon 'pho ba med pa'i phyir tshad mar 'gyur ro/ sgra la ni rig pa 'di yin te/ 'di ltar skyes bu'i skyon yod pa dang med pa dag gis tshad ma dang cig shos nyid yin la/ bdag nyid la ni gzhan du yin no zhe na/ de lta ni ma yin te/ skyes bus byas pa la ni de'i skyon med pa dang yod pa dag gis tshad ma dang / cig shos dag rigs pa yin na/ skyes bus ma byas pa'i rig byed las byung ba'i mngon sum la sogs pa la ni rang la skyon med pa dang yod pa dag kho nas tshad ma dang cig shos nyid yin pa'i phyir skyes bus ma byas pa nyid la yang rang la yod pa'i skyon med par ma nges pa ma yin no/ /sgra las byung ba nyid kyis mtshungs pa yin yang skyes bus byas pa ma yin pa las ni ma yin no zhe na/ shes pa nyid kyis yin par ni mtshungs pa yin la/ rab rib can las shes pa ni ma yin te/ rig byed kyis rigs pa rab rib can la yang yin par 'gyur ro/ /thabs kyi nges pa can nyid kyis 'jug pa'i yan lag ma yin pa ni rtogs pa'i mtshan nyid kyis nges par rtogs pa la yang 'jug pa ma yin te/ 'jug par mi 'dod pa med par thal bar 'gyur pa'i phyir ro/ /'on te don byed pa'i ngo bo mi rtogs pa'i phyir de'i don du 'jug pa yin no zhe na/ ji ltar gzhan du rtogs pa la gzhan la 'jug pa yin/ des na de'i nges pa nyid ni 'jug pa la sbyor bar byed pa yin gyi/ thabs rtogs pa ni ma yin no/ /'di ni yod pa ma yin pa'i phyir 'jug pa la sbyor bar byed pa ma yin la/ sbyor bar byed pa ma yin pa thabs de ma yin pa nyid kyi nges pa gzhan dag yod kyang dgos pa ci yang med do zhes bya ba'i don to/ /don byed pa sgrub par byed pa'i shes pa las dus phyis 'byung bar 'gyur ba tshogs pa gzhan la ltos pa ni res 'ga' yin gyi/ sgrub par byed pa'i shes pas nges par byed pa ni mi nus pa ma yin nam/ nus pa yin na ni sgrub par byed pa nges pas don byed pa la 'jug par byed pa yin gyi/ gzhan du nges la gzhan la ji ltar 'jug pa yin zhes bya ba brjod bya ma yin te/ dran pa dang mngon par 'dod pa dag gi skyed byed yin na 'jug par byed pa nyid yin pa'i phyir ro/ /de yang tha snyad 'di ni srog dang bcas pa tsam yin no zhes smos pa'o/ /sgrub par byed pa dmigs pa yin na de las dran no/ /de las 'dod pa dang 'jug pa dang phrad pa yang yin no snyam du sems pas tshad mas ni don shes par bya ba yin gyi zhes zer ba la lan du/ gang gi don du 'di rtsom pa/ /zhes bya ba'o/ /gal te nyams su myong ba la dran pa yin na/ ji ltar de la 'dod pa'am 'jug pa yin/ de sgrub par byed par 'dod pa yin no zhe na/ de yang thob pa ma yin no/ /'on te des bsgrub par bya ba don byed pa la yin na/ de'i nges pa can ma yin na de la dran pa'am 'dod pa ji lta yin pa bsam dgos so/ /ma grub pa de ma nges pas/ /bsgrub bya ste don byed pa'i ngo bo dang 'brel pa gang gi yin pa de ltar ro/ /sgrub par byed pa nges pa yin yang don byed pa la the tshom za ba las ni 'jug pa nyid ma yin te/ thob bya don byed pa la sgrub par byed pa nyid du ma nges pa'i phyir dang / rig byed kyi shes pa las kyang me'i sbyin sreg sgrub byed nyid du nges pa yin na/ 'byung bar 'gyur pa mtho ris kyi don byed pa la the tshom za bzhin du 'jug par thal bar 'gyur ro/ /de dang 'dra ba'i rjes su dpag pa las 'jug pa yin no zhe na/ ma yin te/ 'das pa'i don byed pa sgrub par byed pa nyid ni mngon sum yin pa'i phyir ro/ /gang la 'jug pa de la tshad ma ma yin pa'i phyir thabs kyis nges pa ni 'jug pa la sbyor bar byed pa ma yin no zhes bya ba'i dgongs pas/ gal te gsal bar byas pa'i zhes bya ba smos so/ /'on te byung bar gyur pa'i rjes su 'brangs nas 'byung bar 'gyur ba'i don byed pa sgrub par byed pa nyid kho na sgrub byed kyi shes pas nges par byed pa yin no snyam du sems pa ni/ gal te don bya ba byed pa zhes bya ba'o/ /don sgrub par byed pa'i dngos po ni 'byung bar 'gyur ba'i don byed pa sgrub par byed pa'o/ /don byed pa ni sngon po la sogs ngo bo mthong ba las 'byung bar 'gyur ba'i dngos po gzhan yin nam/ me la sogs pa la ni reg pa yin la/ chu la sogs pa la ni btung ba dang / kun du reg pa dag yin te/ de lta bu thams cad sgrub par byed pa'i shes pa nyid kyis ston pa yin no/ /de lta mod kyi de ni snang bzhin pa'i don nges par byed pa nyid kyis tshad ma yin la/ ma nges pa la ni skad cig ma nyid bzhin du 'jug par byed pa ma yin pa'i phyir tshad ma yin no/ /nges pa yang 'di ni sngon po'i zhes skad cig ma gang la mthong ba de'i rgyun yul yin pa'am/ de dang tshogs pa gcig pa can gyi bskyed bya'i rgyun yul yin pa'o/ /mthong ba ni de skyed par byed pa las de dang mtshungs pa'i yul la tshad mar 'gyur ba yin gyi/ de ni bdag nyid dam yul yang rung ste rjes su dpag pa bzhin du thob bya'i de ma thag par nges par byed pa las ni tshad ma ma yin no/ /'o na ci zhe na/ so sor snang bzhin pa'i don la nges par byed pa nyid kyis yin no/ /de nyid kyis na mngon sum ni rjes su dpag pa las tha dad pa yin no snyam du sems pa la/ gang gis 'jal bar byed cing zhes bya ba smos te/ bden te/ 'di ni sngon po'o zhes bya ba ni sngon po ma yin pa las log pa ma yin yang sngon po ni sngon po gzhan las kyang log par nges par byed pa yin no/ /'di ni dung la ser po la sogs pa'i shes pa la yang mtshungs so/ /'on te de ni gnod bya yin la/ gnod bya ma yin pa ni tshad ma yin te/ gnod pa can med pa las 'khrul par ma grub pa'i phyir ro/ /'byung bar 'gyur ba'i yul mi 'dzin pa kho na 'di'i gnod bya nyid ma yin nam/ de 'di tshad mar mngon par 'dod pa la yang mtshungs so/ / 'on te 'dzin pa yin yang gnod bya nyid du ni mi bden pa yin la/ gnod bya ma yin pa nyid du ni bden pa nyid yin no/ /gal te de'i tshe nyid thob bya rtogs pa yin na ci'i don du 'jug par byed/ 'on te thob bya ma rtogs pa yin na de lta mod kyi nges pa yin pa ma rtogs pa de lta na yang nges pa yin pa'i phyir ji ltar 'dod pa dang nges pa dag gi yul gcig nyid yin/ 'on te rtogs pa'i rnam par dpyod pa'i nges pa rjes su dran pa las de lta bur nges pa yin no zhe na/ de lta yin du zin kyang rnam par dpyad pa'i yul la rtogs pa'i bya ba la de ni rtog pa med pa las 'byung ba yin gyi/ nges pa rtogs pa dang lhan cig yul gcig pa ni ma yin no zhes bya ba'i don to/ /byed par nges pa ma yin yang don tsam las nges pa yin na 'jug pa yin la/ rig byed las kyang mtho ris la ma nges pa yin yang / me'i sbyin sreg la nges pa yin na bye brag med pa las 'jug par 'gyur ro zhes bya ba'i don to/ /de lta yin na mngon sum bzhin du rig byed las byung ba yang tshad mar 'gyur ro/ /don byed pa'i ngo bor sngar mngon sum gyis mthong ba yin na de dang 'dra bar mthong ba las srid pa ni de'i rang gi ngo bo yin pa'i phyir de'i rigs su 'gyur gyi/ rig byed la ni de ltar mthong ba'am/ de'i rigs yin pa'am/ srid par byed pa ma yin te/ mthong ba med pa nyid kyi phyir ro/ /de med pa la de srid pa ni ri rab kyi steng na ri bong gi rwa srid pa bzhin du the tshom yod pa'i phyir tshad ma ma yin no/ /de bstan pa ni/ rang gi ngo bo don byed pa'i/ /nges pa rig pa ma yin phyir/ /zhes bya ba'o/ /'di skad du bstan pa yin te rnam par shes pa la ni thams cad du don byed pa dang 'brel pa kho na yin par rtogs par byed pa yin no/ /'di sngon po'o zhes bya ba ni don byed par nus pa'i ngo bo yin gyi dngos po tsam ni ma yin te/ nus pa nyid kyang 'brel pa kho na yin la/ de nyid ni de kho na nyid kyis shes pa'i yul yin zhes bya ba yang de dang der bstan zin to/ /shes pa la ni gang la nges pa can gyi don byed pa thob pa de la de'i 'bras bu nyid dam/ de'i rgyu nyid dam/ de'i rang bzhin nyid las tshad ma nyid yin no/ /de lta yin na gang la de'i tshe kho na don byed pa med pa'i shes pa de ji ltar tshad ma yin/ ji ltar yang ma yin te/ de yang don gyi bya ba byed pa gal te don gsal bar byed pa ma yin na/ de dang rab rib can gyis mthong ba'i skra shad la sogs pa don med pa dang khyad par ci zhig yod ces bya ba la sogs pa gsungs pa yin no/ /de'i phyir rig byed la don byed pa nyid la mi slu ba med do/ /mngon sum la sogs pa la ni don byed pa la slu bar byed pa med do/ /de lta bar bstan pa ni/ mi slu ba med pa'i rig byed la sogs pa las rjes su dpag pa la sogs pa'i khyad par dang tshad ma thams cad la skur pa 'debs pa sel bar byed pa yang bstan pa yin no/ /don de sreg pa la sogs par byed pa ste/ byed pa po nyid yin par bshad pa yin na/ khyad par ma bstan par 'gyur ro/ /don yongs su bcad nas zhes bya bas don rtogs pa'i phyir ro/ /don zhes bya bas kyang nus pa'i ngo bo bstan pa ni/ don byed nus pa gang yin pa/ /de'i 'dir don dam yod pa yin/ /zhes bya ba'i tshig gis so/ /de'i phyir don byed pa la mi slu ba nyid ni thams cad du rtogs pas grub pa yin la/ de yang / kha cig tu de bden pa der ni tshad ma nyid yin la/ gzhan du ni mi bden pa yin pa'i phyir tshad ma nyid ma yin no/ /de yang gzhan nyid las de tha snyad kyi ming can las grub pa yin pa'i phyir gzhan las zhes brjod la/ don rtogs pa nyid du ni rang rig gi ngo bo rig pa kho na yin par nges pa'o/ /de'i phyir rig byed bzhin du don byed pa la tshad ma ma yin te/ rtsod pa'i gzhir gyur pa yin par bstan to/ /slu bar byed pa ma yin pa zhes bya ba ni da lta bar nye bar bstan pa kho nas yin zhes dgongs pa'o/ /mi slu bar nges pa can yang rgyun du 'byung ba'i shes pa rgyu mtshan 'ga' zhig gis ni tshad ma ma yin na/ mi slu ba ma yin pa lta ci smos zhes bya ba'i don to/ /don yongs su bcad nas zhes bya ba ni don byed pa dang 'brel pa rtogs pa yin par bstan pa yin no/ /don byed pa la slu bar byed pa ma yin pa zhes bya ba ni de dang 'brel par bden pa nyid kyi tshad ma nyid du bstan pa yin no/ /gzhan gyis bshad pa yang mi bden pa'i don du 'gyur ba ma yin nam/ de lta na 'brel pa can dag gi gnyis po dag kyang yod pas 'brel pa bden pa nyid du bstan pa yin gyi/ rab rib can gyis mthong ba'i skra shad la sogs pa dang bye brag med pa'i phyir gzhan gang yang rung ba ni ma yin no/ /don yongs su bcad na zhes bya ba sgrub byed dang don byed pa'i zhes bya ba bsgrub bya dang / 'jug bzhin pa zhes bya bas ni mi slu ba'i rgyu mtshan bstan pa yin/ 'jug pa tsam gyi 'bras bu la tshad ma ma yin la/ rig byed las byung ba ni 'jug pa tsam 'bras bu yin la/ de ni skye ba 'di 'am/ /skye ba gzhan nyid du don byed pa 'thob pa'i rgyu ma yin te/ ma mthong ba'i phyir dang / the tshom za ba'i phyir yang ngo / /rtogs par byed pa nyid tshad ma nyid yin yang / de yang 'byung bar 'gyur ba'i skyes bu'i don te/ yul la mngon sum dang rjes su dpag pa dag la yod pa yin gyi/ rig byed la sogs pa la ni ma yin no zhes bstan pa yin no/ /'di dag gis ni ma yin no zhes bya ba ni me la nges pa nyid kyi du ba'i shes pa las me la nges pa ni me ma yin pa dgag pa med na ma yin no zhes bya ba'i don to/ /thabs las byung ba la 'jug pa la sbyor bar byed pa nyid ni nges pa yin par bstan pa ni/ don byed pa'i shes pa gang yin pa zhes bya ba ste/ de don byed pa zhes bya ba ni 'di nyid don byed pa yin la/ sgrub par byed pa yang de yin la shes par byed pa yang de yin no/ /thabs las byung ba ni 'byung bar 'gyur ba nyid yin pa'i phyir sngar med pa nyid ma yin nam/ de'i tshe de ji ltar shes pa yin snyam du sems pa la/ sngar gyi sgrub par byed pa'i shes pa zhes bya ba smos te/ gal te 'di lta bur dmigs nas de dang phrad pa'i dus su 'byung bar mthong ba yin na/ des na 'dir yang phrad pa'i dus su 'byung ba yin la/ gal te don de bstan pa nyid du nges par 'gyur bar byed pa ma yin na/ sngar gyi sgrub par byed pa don yin te/ tha dad pa'am cig shos kyi shes par de'i tshe 'gyur zhes bya bar sbyar ro/ /nges par gzung ba ni nges pa ma yin nam/ mngon sum ni 'byung bar 'gyur ba la snga ma rang bzhin du nges par gzung bar 'gyur bar byed pa ma yin te/ nye ba'i snang ba yin pa'i phyir ro zhe na/ snga ma'i rang bzhin ni zhes bya ba smos te/ ji ltar sngon po'i shes pa ni de yod na gdon mi za bar yod pa ni de'i rang bzhin yin la/ de bzhin du 'byung bar 'gyur ba yang snga ma yod na gdon mi za bar yod pas rang bzhin kho na yin te/ rang bzhin gyi tha snyad ni de dag tsam gyi rgyu mtshan las yin no zhes bya ba'i don to/ /dngos su na zhes bya ba ni de yod na gdon mi za bar yod pa kho na rang bzhin tha snyad kyi rgyu mtshan yin te/ gcig pa nyid la sogs pa med pa'i phyir ro/ /gcig ces bya ba ni cung zad kyang med de rgya che bar mthong ba las steng dang 'og gi cha la sogs pa rnams kyi yul dang phyogs la sogs pa'i gcig las gcig gi dbye bas rang bzhin tha dad par rig pa yin na/ gcig nyid kyi tha snyad kyi yul med par thal bar 'gyur ba'i phyir ro/ /de las 'byung ba'i mthu yis ni/ /zhes bya bas bshad par 'dod nas/ yang na gdon mi za bar 'byung ba zhes bya ba smos te/ ji ltar snang ba ni snga ma dang phyi ma dag gis tha dad pa yin gyi gcig nyid ni ma yin no/ /de lta mod kyi snga na yod na 'byung ba'i phyir phyi ma ni 'bras bu nyid yin no/ /de lta yin na 'dzin pa dang mi 'dzin pa la gcig pa dang du ma'i tha snyad gang la yin/ gang la 'dzin pa na gang zhig gdon mi za bar 'dzin par byed pa de ni de las tha mi dad pa yin la gzhan ni tha dad pa yin no/ /'dzin pa yin yang yul dang rnam pa la sogs pa'i dbye ba ni tha dad par byed pa ma yin te/ 'dzin pa dang mi 'dzin pa'i go skabs med pa nyid kyis don med pa can nyid du thal bar 'gyur ba'i phyir ro/ /'byung bar 'gyur ba ni snga ma bzung ba yin yang mi 'dzin pa'i phyir de'i rang bzhin ma yin no/ /de lta mod kyi de la ma 'khrul pa'i phyir 'bras bu ni ma yin no/ /de lta yin dang rgyu las 'bras bu rtogs par 'gyur ba zhig na/ de ni mi rigs te rgyu rnams ni gdon mi za bar de dang ldan pa ma yin zhes bya ba ni 'khrul pa yin par khas blangs pa'i phyir ro/ /bye brag can gyi rgyu ni 'bras bu la mi 'khrul pa can yin no zhe na/ de lta ma yin na rgyu'i bye brag de 'bras bu bzhin du ma 'khrul pa can yin pas 'bras bu nyid yin no/ /gzhan gyis gzhan las ma 'khrul ba ni de las byung ba las gzhan ma yin no zhes rjes su dpag pa la rtogs par bya ba yin par ni/ gzhan du gzhan ni gzhan dag dang / /nges par yod pa'i nges pa gang / / zhes bya ba dang / rgyu dang 'bras bu'i dngos po las sam zhes bya bas bstan pa yin no/ /khyab pa'i phyir zhes bya ba ni de nyid la yod na yod pa'i phyir 'bras bu nyid du 'gyur ro zhes bya ba'i don to/ /'byung bar 'gyur ba'i ngo bo nges par 'byung zhes bya ba ci las yin/ yul mtshungs pa la de ltar nges pa yang ji ltar yin/ 'di mngon sum ni yul ni ma yin pas mngon sum gyi yul ring por gnas pa'i 'dzin byed kyang ji ltar yin snyam pa'i dgongs pas/ tha dad pa'i khyab par byed pa gang yin pa zhes bya ba smos te/ khyab par byed pa ni 'di 'byung ba'i phyir ro/ / 'byung bar 'gyur ba'i yod pa ni gnyi ga dag gis kyang khas blangs pa yin yang de ji ltar rtogs pa yin te 'di nyid la log par rtogs pa yin no zhes bya ba'i don to/ /gang gi tshe 'byung bar 'gyur ba bskyed bya yin pa de'i tshe snga ma yod pa ma yin nam/ de ni thams cad la 'dod pa ma yin pa'i phyir gang gis kyang bskyed bya ji ltar yin/ gang gi tshe ji ltar 'byung bar 'gyur ba bskyed pa yin na/ de'i tshe yang snga ma zhig yin na ji ltar skyed byed yin/ 'on te gang gi tshe de nyid bskyed bya yin pa de lta na gnyi ga yang med la/ gang zhig gang gis bskyed bya yin snyam du sems pas/ ma skyes pa ji ltar rgyu yin zhes zer ba la/ lan ni/ skyes pa yang zhes bya ba ste/ snga ma ni rang gi rgyu las skyes bzhin pa na 'byung bar 'gyur ba'i dngos po la ltos pa yin te/ gzhan du na 'di de nyid la ji ltar 'byung ba yin zhes bya ba'i don to/ /gal te de yod na 'byung ba zhes bya ba de dag tsam ni rgyu mtshan nyid ma yin no/ /de lta mod kyi gang gis yod pa dang / skye ba dang / sgrub par byed pa dang bya ba yang rung ba gtso bor byas nas 'byung ba des drangs pa lta bur gang 'gyur ba de'i rgyu de yin no snyam du sems pas/ 'di yod na 'di 'byung zhes pa la/ de yod na 'byung ba nyid ces bya ba 'di ni rgyu'i mtshan nyid kyi yod pa nyid bye brag yin te/ skye ba la sogs pa rnams ni 'di nyid kyi khongs su gtogs pa'i phyir ro zhes bstan pa ni/ yod dang skye sogs dngos po yi/ /zhes bya ba ste/ ji ltar 'di rnams kyi bye brag rtogs par grub pa yin pa de bzhin du khongs su gtogs pa la yang zhes bya ba'i don to/ /gnyid stug pos non pa'i yang / rmi lam rtsom pa na 'byung ba'i sems bye brag ma lus pa dang bral bas nye bar mtshon pa 'gro ba'i tshe rtswa la kun du rig pa'i rnam par shes pa bzhin du bsam pa tsam skye ba yin la/ de las sad pa ni sems skye ba yin no snyam pa'i dgongs pas lus la sogs pa'ang zhes bya ba smos te/ goms pa las 'byung bar 'gyur ba'i bye brag rjes su 'gro ba dang ldog pa'i rjes su byed pa can gyi rnam par rtog pa'i shes pa ni de'i bye brag med pa las lus la sogs pa bzhin sems tsam skye ba ma yin no zhes bya ba'i don to/ /gang gi phyir khongs su gtogs pa de'i phyir 'di yod na 'di 'byung zhes bya ba la sogs pa'i shes pa'i yul ni de dag tsam yin par bstan pa ni/ des na rang gi ngo bo las/ /zhes bya ba ste/ shes pa 'di sngar yod pa'i dus su 'byung bar 'gyur ba ni ma yin te/ de'i tshe phyi ma med pa'i phyir dang / gnyi ga la brten pa'i phyir ro/ /phyi ma'i dus su 'byung ba de'i tshe ni 'byung bar 'gyur ba yin no/ /snga ma med pa yin pa'i phyir 'byung bar 'gyur ba dang / byung bar gyur pa la yang med pa nyid du bye brag med do zhes bstan pa'i don du/ 'bras bu'i dus su ni zhes bya ba smos so/ /'byung bar gyur pa ni de rtogs pa'i dus su yod pa ma yin du zin pa de ltar na yang / de yod pa nyid na 'byung 'byung ba zhes bya ba ste/ nges par 'byung pa'i phyir phyi ma 'bras bu nyid yin no/ /'di ni snga ma la yang mtshungs pa yin par bstan pa ni/ med na mi 'byung ba tsam zhes bya ba ste/ 'byung bar 'gyur ba la zhes bya ba ni/ yul 'byung bar 'gyur ba la med na mi 'byung ba tsam gyi rgyu la yang zhes bya bar sbyar ro/ /mthong ba 'am snga ma nyid kyang rung / de yod na 'byung ba nyid rgyu yin gyi 'ba' zhig ni ma yin no snyam du sems pas/ 'on te mthong ba gang yin pa de zhes zer ba la de yod na 'byung ba nyid ces bya ba ni rgyu nyid du ma nges pa yin no/ /gzugs bzhin du mthong ba'am snga ma nyid ni ma yin no zhes zer ba la/ lan du/ mthong ba rang gi ngo bo yis/ /zhes bya ba smos te/ sgro btags pas ni nges pa ma yin pas so/ /de yod na 'byung ba nyid ces bya ba 'di la de yod na zhes bya ba ni nges pa can yin la/ yod pa ni ma nges pa can yin te/ de yod pa'am/ gzhan du yang zhes bya bar shes par bya ba yin te/ / gzhan du na nges par bzung ba don med pa yin no/ /de ltar rtogs pa ni sgro btags pa nyid yin par bstan pa ni/ de'i tshe de 'byung ba dang 'byung ba'i zhes bya ba'o/ /de dmigs pa yin na de dmigs pa dang de ma dmigs pa yin na/ de mi dmigs pa dang / de mi dmigs pa'i tshe/ de mi dmigs pa zhes bya ba mngon sum dang / mi dmigs lnga po rgyu nyid dang / 'bras bu nyid la sgrub par byed pa ma yin nam/ de nyid dam rgyu nyid la sogs pa yin pas nges pa nyid dang / ma nges pa nyid dang / 'bras bu dang rgyu nyid ces ji ltar brjod pa yin snyam du sems pa la/ gzhan du 'byung ba'i rang bzhin zhes bya ba smos so/ /mngon sum la sogs pa lnga po me dang du ba bzhin du de las gzhan pa dang du ba dag kyang yod pa de la/ de las gzhan pa med kyang me yod na du ba de 'byung ba yin zhes bya ba 'di kho na ltar brjod par bya ba yin la/ de lta yin na rgyu ni khyad par byed pa ma nges pa yin la/ 'bras bu ni cig shos yin zhes bya ba'i thog tu 'ong ba yin no zhes bya ba'i don to/ /mthong ba la ni snga ma nyid du sgro btags pa yin na rgyu nyid ma yin nam/ ma mthong bar 'byung bar 'gyur ba la ni ma yin no snyam du sems pas/ 'on te rang bzhin gang gis shes zer ba la/ 'byung bar 'gyur ba'i 'bras bu las rgyu ni 'byung bar 'gyur ba nyid du rtogs pa'am mthong ba yin la/ de bzhin du rtogs par 'gyur ba dang / mthong bar 'gyur ba yang yin no zhes bya bar bye brag med par bstan pa ni/ 'byung bar 'gyur ba'i rang bzhin zhes bya ba'o/ /mthong ba ni de ltar nus par nges pa yin la/ mthong bar 'gyur ba ni ma yin te/ lta ba'i yul ma yin pa'i phyir ro snyam du sems pas/ mthong bar 'gyur ba ji ltar zhes bya ba la/ lan du/ de'i tshe med pa'i phyir mthong ba las zhes bya ba ste/ de'i tshe zhes bya ba ni 'byung bar 'gyur ba'i dus su ste/ gang du khyab pa 'dzin pa na'o/ /mthong ba ni de ltar rtogs pa yin na 'byung bar 'gyur ba rtogs pa nyid yin la/ de ma rtogs pa yin na mthong ba nyid kyang de bzhin du ma rtogs pa yin zhes bya ba'i don to/ /snga ma de bzhin du rtogs pa ni rgyu nyid kho nas yin gyi/ 'bras bu nyid kyis ni ma yin pa ma yin nam/ phyi ma yang 'bras bu nyid kho nas yin gyi/ rgyu nyid kyis ni ma yin na ji ltar 'byung bar 'gyur ba rtogs pa yin gyi rgyu nyid rtogs pa yin snyam du sems pas/ yod pa'i phyir zhes zer ba la de ltar rgyu tsam rtogs pa zhes bya ba bden mod kyi bye brag can gyi rgyu ni nges par 'byung bar 'gyur ba'i 'bras bu la rgyu nyid du 'dzin pa yin yang / 'bras bu khongs su gtogs pa nyid du rtogs pa yin gyi/ gzhan du na rgyu'i bye brag nyid ni shes par mi 'gyur ro zhes bstan pa ni/ mthong bar 'gyur ba la yang zhes bya ba smos te/ de zhes bya ba ni khyab par byed pa nyid kyi rgyu nyid du rtogs pa yin no/ /de'i phyir thams cad rang gi rgyu las skye bzhin pa na rang gi 'bras bu las kyang skye ba yin te/ de la ltos pas rgyu'i bye brag yin par bstan pa ni/ de'i tshe ma yin no zhes bya ba 'di ni gnyi ga la yang mtshungs so zhes bya ba'o/ /snga ma dang phyi ma nyid ni rgyu nyid dang 'bras bu nyid dag la sbyor bar byed pa ma yin no zhes bya ba la/ snga ma nyid do zhe na zhes bya ba smos te/ gal te sbyor bar byed pa'i bye brag yod pa yin no zhes rgol ba yin na/ 'di ni shin tu chung ba yin par brjod de/ sngon po ni 'bras bu'am rgyur yang mthong ba yin na/ ser po de bzhin du ji ltar 'gyur zhes bya ba 'di yang brtsad byar 'gyur ro zhes zer ba ni/ 'on te gcig ni sngon gyi rang bzhin du zhes bya ba la sogs pa nas/ 'gar yang dgos pa med ces bya ba'i bar du'o/ /ci tsam zhig dgos pa yin/ gang med na mi 'byung ba zhes bya ba smos te/ de yod pa nyid na 'byung ba ni de yod na yod pa nyid yin zhes bya ba yang 'bras bu nyid la'am rgyu nyid la rgyu mtshan yin zhes bya ba'i don to/ /bye brag can gyi rgyu la ni rgyu mtshan gnyis yod pa'i phyir gnyis ka ltar yang yod par bstan pa ni/ rgyu snga ma med na zhes bya ba ste/ gdon mi za bar 'byung ba ni nges par 'byung ba ste/ 'bras bu gang gi rgyu yin pa de ni de bzhin no/ /rgyu mtshan mtshungs phyir gnyi ga yang / /zhes bya ba la sogs pa tshig rkang gsum gyis bar skabs kyi nye bar bsdu ba yin no/ /khyad par can gyi rgyu las 'bras bu nyid rtogs pa'i dgos pa bstan pa ni/ 'jig rten pha rol zhes bya ba'o/ /rgyu mthong ba las 'bras bu rjes su dpog par byed pa ni ma yin te 'khrul pa'i phyir ro/ /rung ba nyid kyi rjes su dpag pa yang 'bras bu nges pa can rtogs pa yin par ni mi rigs te/ nges pa ni rjes su dpag pa nyid yin no zhes bya ba'i don to/ /khyad par can gyi rgyu nye bar mtshon pa yang / de mthong nyid na mthong rnams la/ /zhes bya ba la sogs pas de dang der bstan pa yin no zhes zer ba la/ gal te don skyed shes pa de/ /zhes bya ba smos te/ de yod pa nyid dag ste/ de lta bu'i rnam pa can gyi rnam par rtog pa'i shes pa tha snyad kyi brjod pa yin par bstan pa ni/ khyab pa de yi bdag nyid dang / /zhes bya ba'o/ /rnam par rtog pa'i shes pa 'di mngon sum gyi bya ba'i rjes su 'brangs pa yin pa'i phyir mngon sum ma yin nam/ gal te rjes su dpag pa yin na ni 'brel pa la sogs pa 'dzin pa la ltos par 'gyur ro/ /gal te de nyid yin na gcig la gcig brten par 'gyur ro/ /gal te rjes su dpag pa las gzhan yin na thug pa med par 'gyur la tshad ma gzhan ni mi srid do/ /de'i phyir rang nyid las mngon sum yin te/ so sor snang bzhin pa'i don la nges par byed pas yul la rnam par 'jog par byed pa yin la/ rjes su dpag pa la ltos pa yin na ni gcig la gcig brten pa yin te/ mngon sum ni rjes su dpag pa yod na yul la rnam par 'jog par byed pa yin la/ des na rtags dang 'brel pa la sogs pa can gyi rnam par 'jog pa yin na rjes su dpag pa yin no snyam du sems pas zer ba ni/ gal te ji srid ces bya ba'o/ /gal te yang mngon sum ni sngon po la sogs pa'i rang gi ngo bos rnam par 'jog par byed pa yin gyi/ don byed par nus pa can dang cig shos kyis byed pa ni ma yin pa'i phyir rnam par 'byed par byed pa ni rjes su dpag pa la ltos pa nyid yin te/ des na khyed kyi la yang de nyid gcig la gcig brten pa yin no snyam sems pas zer ba ni/ 'on te rjes su dpag pas shes bya ba'o/ /don byed pa'i shes pa ni gal te mngon sum yin yang snga ma la brten pa yin la/ de yang de las gzhan pa la yin na thug pa med pa ma yin nam/ rjes su dpag pa yin yang de bzhin du gcig la gcig brten pas yin no/ /de la don byed pa'i shes pa ni zhes bya ba'o/ /snga ma'i shes pas ni sngon por rnam par 'jog pa yin la/ de tsam gyis de'i bya ba rdzogs pa yin te/ bya ba gzhan med pa'i phyir ro/ /shes pa'i bya ba ni yul rnam par 'jog pa las gzhan ma yin te/ shes pa'i bya ba rdzogs pa yin na/ don byed pa la shes pa'i nus pa'am cig shos dag la the tshom za bas don med kyang 'byung ba nyid du the tshom za ba ni tshad ma'i bya ba ma yin te rang nyid la grub pa yin no/ /the tshom de yang las ci zhig gi bye brag mthong ba las ni ldog pa yin no/ /thag ring ba la the tshom za ba ni nye ba yin na ldog pa yin no/ /don byed par nyams su ma myong bar the tshom skye ba ni de nyams su myong ba las so/ /rjes su dpag pa'am mngon sum yang rung ba ni de tshad ma nyid du rnam par 'jog par byed pa la ltos par bya ba ma yin te/ des na thug pa med pa dang gcig la gcig brten par yang thal bar 'gyur ba ma yin zhes bya ba'i don to/ /de la gang 'das ma thag tu bstan pa'i gang las ci zhig gis the tshom ldog pa yin zhes bya ba la 'di las ldog pa yin zhes bya ba ste/ 'di la gsungs pa ni/ the tshom zhig ces bya ba'o/ /the tshom log pas ni 'ga' yang ste/ don du gnyer ba po des 'jug par byed pa ma yin no/ /thob pa las kyang tshad ma'i bya ba yongs su rdzogs pa'i phyir 'jug par byed par mi 'gyur ro/ /de lta yin na ci zhig las 'jug par byed par 'gyur 'jug pa'i yul nges pas zhes bya ba'i don to/ /bye brag can mthong ba kho na 'jug pa'i yul nges pa can ma yin nam/ de lta na de nyid 'jug pa'i yan lag yin la de yang sngar yod pa ni ma yin no/ /don byed pa nyams su myong ba la sogs pa'i bye brag can mthong ba ni sngar med pa'i phyir ji ltar 'jug pa'i yul nges pa can yin/ de'i 'og gi the tshom yang ji ltar yin/ yul nges pa yin pa la yang the tshom za ba ni ma yin te/ phyi ma la yang the tshom za bar 'gyur ba'i phyir ro/ /de'i phyir ji ltar bye brag mthong ba yin pa na the tshom med pa de bzhin du snga ma yang the tshom du mi 'gyur ba zhig na yod pa yang yin te/ des na bye brag mthong ba ma yin no/ /de lta mod kyi mthong ba tsam gyi bya ba rdzogs pa'i tshad ma'i bye brag mthong ba'i bya ba rdzogs pa ma yin no zhes zer ba ni/ gal te don byar snang de nyid/ /ces bya ba'o/ /ji ltar phyi ma mthong ba de bzhin du snga ma yang ma yin nam/ des na 'di dag la ni bye brag ci yang med do snyam du sems pa la/ mngon sum mam ni rjes dpag las/ /zhes bya ba ste/ gal te snga ma bzhin du bye brag med na dus kyis kyang the tshom ldog par mi 'gyur zhes bya ba'i don to/ /bye brag mthong ba yin na the tshom ldog pa la yang skye ba ni snga ma las de bzlog pa ji ltar mthong ba yin zhe na/ de gal te de ni mngon sum gyi dngos yin zhes bya ba smos so/ /'on te bye brag 'di de nyid kyi yin par phyis mthong ba gang yin pa'o/ /des na the tshom de nyid de las ldog pa yin par bstan pa yin no zhes bya ba'i bsam pas/ 'dir ni the tshom de ldog pas/ /zhes bya ba ste/ sngar 'jug pa'i dus su the tshom ldog pa ma yin na/ dus phyis kyang mi 'jug pa yin na/ de ldog pa la don ci zhig yod/ sngar don mthong ba las 'jug par byed pa yod pa thom yin nam/ de la the tshom bzlog pa la dgos pa ci yod ces bya ba'i bsam pas/ shes pa kun gyi don dang ni/ /zhes bya ba'o/ /don dang 'brel pa can gyi ngo bo'i nges pa can ni bye brag mthong ba yin la/ de ni sngar yod pa ma yin no/ /gang la don byed par 'byung bar 'gyur ba de la sngar don yod pa yin no/ /de gang gis mthong ba yin/ re zhig snga ma'i shes pa sa ni ma yin te/ don med pas dben pa'i don ma mthong ba'i phyir ro/ /mthong ba tsam ni don dang cig shos kyi dbye ba ma mthong bas the tshom nyid yin te/ de dag tsam nyid ni the tshom nyid yin no zhes bya ba'i don to/ /gal te de lta na sngar bye brag can gyi don ma mthong ba yin na/ don byed pa nyams su myong ba yin yang de bye brag can du ji ltar 'gyur/ ji ltar don byed pa dang 'brel ba rnam par rtog pas sprul pa yin pa de bzhin du de'i bye brag kyang / des na tha snyad las tshad ma yin zhes bshad do/ /tshad ma'i mthong ba ni tha snyad las grub pa'i phyir ram ma grub pa la yang rung ste/ de dpag bya yin pa tsam las 'jig rten pa'i tha snyad las grub pa'i phyir dang / ma mthong ba'i don yang de dang mtshungs pa nyid kyis rjes su 'jug pa bde bar byed pa nyid kyi phyir mtshan nyid byed pa la nye bar sbyor bar byed pa ma yin te/ de yang tha snyad nyid kyis rjes su 'jug pa yin la/ tha snyad la rmongs pa la sogs pa ma yin na/ de'i thabs kyi mtshan nyid las ldog par 'gyur ba ma yin te/ tha snyad pa rnams kho na gcig las gcig gi rmongs pa ldog pa'i phyir ro/ /rang gi rig pa ni gzung ba dang 'dzin pa la sogs pa'i dbye ba dang bral ba'i phyir de ni bsgom pa la mngon par brtson pa ni mthong ba las byung ba'i nyon mongs pa rnams kyi gnas med de/ bsgoms pa las byung ba'i bstan pa nyid ni phyin ci log 'gog par byed pa ste/ drung 'byin par byed pa ma yin pa'i phyir mthong zin pa yin pas tshad ma gzhan la ltos pa ma yin no/ /de dang de ma yin pa'i bsgom pa rnams la yang de kho na bzhin du yin pa'i phyir sbyin pa la sogs pa rnams dang / mtho ris la sogs pa rnams sgrub pa la mngon sum la sogs pa'i yul ma yin pa nyid kyis gsung rab dang de'i rnam par 'grel pa dang tshad ma gzhan tshol bar byed pa yin no/ /ma yin te/ de la yang rgyu mthun pa'i 'bras bu mthong ba yin no/ /rnam par smin pa ma mthong ba yin no zhe na/ ma yin te/ de la tshig gi 'brel ba med pas tshad ma yin pa'i phyir ro/ /de skad du yang / don gyi de nyid rgyu mtshan min/ /zhes bstan pa'o/ /thams cad mkhyen pa'i gsung ni don gyi de nyid kyi rgyu mtshan can yin no zhe na/ gal te de ni phul du byung bar shes nus don 'di 'dod pa yin skad cig ma dang rnam par rig pa tsam gyi ngag gi phyogs gcig rnams bden pa nyid du mthong bas gzhan la yang de nyid du go ba yin no zhe na/ ma yin te/ 'brel pa med pa'i phyir ro/ /du ba ni me dang 'brel ba can nyid du mthong ba yin na/ rang nye ba yin pa las de nye ba yin par mtshon par byed pa yin te/ 'brel ba'i phyir ro/ /don gyi gtso bo la mi slu ba can gyi tshig kyang bden pa nyid du rjes su rtogs par 'jig rten du mthong ba yin no zhe na/ de lta yin na tha snyad nyid las/ de kho na nyid rjes su rtogs par 'byung ba'i phyir rnam 'grel dang / gsung rab kyang grub zin pa la sgrub par 'gyur ro/ /rnam par rig pa tsam nyid la sogs pa la de kho na bzhin du sbyin pa la sogs pa'i ngag bden pa nyid du grub pa'i don du mi slu ba'i yul de nges par bstan pa yin no zhe na/ de lta yin na de tsam la bcom ldan pha rol gnod pa yin pa'am de la yang ma yin pa ste/ rig byed la sogs pa dang thun mong ba nyid kyis so/ /'di skad bstan par 'gyur te/ mngon sum pa'i yul la ni bstan bcos dgos pa ma yin no/ /mngon sum gyi don la gzhan gyi man ngag gces pa ma yin te/ gzhan la yang bstan bcos gzhan yod pa'i phyir ro/ /mchod rten la phyag bya ba la sogs pa de'i yul ma yin pa yang rang mchod bya yin par bstan pa'i ched du bshad pa srid pa'i phyir gsung rab dang de'i rnam par 'grel pa yang dgos pa cung zad kyang yod pa ma yin no snyam du sems pa la/ gal te de ltar tha snyad tshad ma nyid yin na zhes zer ba la lan du/ bstan bcos rmongs pa zlog byed yin/ /zhes bya ba smos te/ rnam par rig pa tsam la sogs pa bsgom pa dang de'i yan lag bsgom pa yang thar pa sgrub par byed pa nyid du 'dod pa yin pa ni bden te/ mngon sum gyi rjes su 'gro ba dang ldog pa dag gi yul nyid yin no/ /'khru ba sgrub par byed pa la a ru ra za ba yin pa de bzhin du de kho na nyid gzigs pa'i gsung nyid gzhan gyi blo'i yul du 'gyur ba yin gyi gzhan du ni ma yin no/ /tshig med na tshad ma'i yul yin zhes bya ba kho nas dngos po 'jig rten pa'i blo la gnas par 'gyur ba ni ma yin la/ gzhan 'ga' zhig nyid ni de la de bzhin du byed pa ma yin te/ grangs la sogs pa rnams la tha snyad pa rnams kyis de ltar mi nus pa'i phyir ro/ /kha cig la nus pa yod pa yang yin no zhe na/ de lta ma yin na de nyid yang dag pa'i sangs rgyas yin pa'i phyir 'di ni 'jig rten las phul du byung ba chen po yin no/ /de ltar des nye bar bstan pa yang dman pa rnams ni tshul bzhin pa rtogs par byed pa ma yin pa'i phyir tshul bzhin yid la byed pa'i don du rnam par 'grel pa yin no/ /rkyen gnyis ni dge ba skyed par byed par gsungs la/ rgyu gnyis dang rkyen gnyis kyang dge ba'i chos rnams skyed pa'i don du 'di lta ste/ gzhan gyi ngag las sam/ nang gi bdag nyid tshul bzhin yid la byed pa yang yin no/ /de la gzhan gyi ngag ni gsung rab yin la/ tshul bzhin yid la byed pa ni rnam par 'grel pa can yin no/ /'di la yang / don gzigs phyir na brdzun pa min/ /nyon mongs med phyir mi mthun min/ /legs par sbyar phyir go byed pa'i/ /khyed gsung dus gsum dge ba yin/ /zhes gsung la bstod pa bstan pa'o/ /sbyin pa dang rnam par 'tshe ba las ldog pa'i sems las byung ba'i gsung rnams dang / de'i bshad pa yang don gyi gtso bo la mi slu bas tshad ma nyid yin pa'i phyir 'jug par byed pa nyid yin par bstan pa'i phyir/ bstan bcos rmongs pa zlog byed yin/ /zhes bya ba gsungs pa yin no/ /de ltar na rnam par 'grel pa'i mtshan nyid yin par ni/ gal te tha snyad las tshad ma'i rang bzhin rtogs pa yin na zhes bya ba nas/ bstan bcos de yis zlog par byed/ /ces bya ba'i bar gyis bstan pa yin no/ /de nyid kyi phyir thams cad mkhyen pas gsungs pa'i bstan bcos kho nas zhes bya ba la sogs pa ni gsung rab kyi yin la/ des na tha snyad las ma yin zhes bya ba ni tha snyad tsam las ma yin zhes bya'o/ /tha snyad nges par rtogs pa'i phyir/ /zhes bya ba'i khyad par can gyi tha snyad de/ de kho na nyid la kun du reg pa can rtogs pas so/ /'di'i bye brag ci zhig yin zhe na/ 'di la/ tshad ma mi slu can shes pa/ /zhes gsungs pa ste/ de yang mngon sum rjes su dpag pa'o/ /de dang mtshungs pa'i thams cad mkhyen pa'i ye shes sam/ de'i gsung yin gyi rig byed la sogs pa ni ma yin te/ rig byed la ltos nas mngon sum dang thams cad mkhyen pa la sogs pa'i khyad par soms shig /de nyid kyi phyir zhes bya ba ni mngon sum la sogs pa la ltos nas kyang / thams cad mkhyen pa'i khyad par bstan pa ni/ de nyid kyi phyir zhes bya ba ste/ tha snyad rtogs nas rig byed la sogs pa ji lta ba kho na las mngon sum la sogs pa'i khyad par de lta bu kho na la yin la/ de las kyang thams cad mkhyen pa'i ye shes zhes bya ba'i don to/ /tha snyad kyi bye brag de nyid mngon sum las 'di rtogs pa yin par bstan pa ni/ gzhan ni tshad ma ma yin te/ /zhes bya ba la/ lhan cig pa'i khyad par can yin te/ 'jig rten gyis rtogs par mi nus pa yin yang 'jig rten pa la de sgrogs par byed do zhes bya ba'i don to/ /de lta ni yin na mi slu ba can nyid ni sngar mthong ba ngo shes pa la yang yod pa yin na/ de yang snang bzhin pa la mthong ba nyid du sre bar byed pa ni mi slu bar byed pa nyid do/ /ma yin te/ don byed pa zhes bya ba ni khyad par las yin no zhe na/ ma yin te/ 'di sngon po la sogs pa zhes don byed nus pa nyid du rtogs pa'i phyir ro/ /nus pa nyid kyang 'brel pa yin par brjod de/ don byed pa dang snang bzhin pa dang 'brel pa nyid sngar mthong ba nyid dang sre ba ni/ sngar mthong ba ngo shes pa zhes bya ba'i don to/ /de lta na snga ma dang phyi ma dag gi gzung ba dang sre ba ni de las yin no zhe na/ yin na yang skyon ci yod tshad ma'i mtshan nyid kyis ma yin par dgag pa ma yin te/ rgyun du byung ba'i shes pa 'dis bstan pa yin no/ /'on te 'jug par byed pa ni phrad par byed pa yin no zhe na/ dang po mthong ba kho na de lta bu yin pa'i phyir sngar mthong ba ngo shes pa ni mi slu bar byed pa ma yin te/ goms pa la ma mthong ba'i phyir ro/ /rjes su 'gro ba dang ldog pa dag gis nus pa'i rjes su 'jug pa nyid yang rgyun du 'byung ba'i shes pa gsal bar ni mi nus so/ /rtogs pa'i don la ni mi slu ba 'am gzhan yin pa bsal dgos so/ /ma rtogs pa la ni ma yin no/ /de'i phyir ma rtogs pa rtogs par byed pa nyid ni tshad ma'i sngar byung ba'i bya ba yin pa'i phyir de nyid tshad ma'i mtshan nyid du rigs pa yin la/ de nyid kyang mi 'dod pa bsam pa yang rnyed par bla ba yin no/ /'di lta bu'i bstan bcos ni don dang ldan pa'i bstan bcos de ni ma mthong ba la tshad ma yin no zhes bya ba'i tshig las/ lkog tu gyur pa las tshad ma yin na thams cad mkhyen pa'i shes pa ni tshad ma gzhan la rung ba'i shes pa tsam nyid la sogs pa mthong bar byed pa yin yang / 'di lta bu ma yin pa'i phyir tshad ma ma yin no/ /rjes su dpag pa ni gang zhig gang gi tshe mthong bar byed pa de ni de'i tshe de nyid yin pa'i phyir 'di la mtshan nyid kyi rjes su mi 'jug pa'i skyon med do/ /bstan bcos kyis mthong ba'i don nyid dam phyi rol rig pa ni gnod pa med pa las yin la/ mi slu ba yang slu ba med pa ni gnod pa can med pa kho na ste/ gnod pa can dang bral ba don rig pa kho na don byed pa rig pa yin pa'i phyir skyes bu'i don rjes su mi 'jug pa'i skyon yang spangs pa yin no snyam du sems pa la/ re zhig shes pa gnyis pa ni shes pa snga mas ma bsgrub pa yin/ / de tsam la ni dgos pa med pas mi slu ba can ma yin pa'i phyir mtshan nyid ni khyab ches pa ma yin no/ /de tsam gyi dgongs pas gzung ba la 'dzin pa'i shes pa bsal bar nus pa yin la/ mi slu ba can 'dzin pas ni ma yin la/ sngar yod pa tsam gyis rtogs par byed pa nyid kyang ma yin te/ skyes bu'i don la mkho ba ma yin pa ni tshad ma'i mtshan nyid sems pas brtson par bya ba ma yin pa'i phyir de spangs nas rtogs pa dang ldan pa rnams don bzhin du mi slu ba can nyid la brtson par byed pa yin na ni/ de lta bu la skyon ci yang med do/ /gzhan gyis smras pa tsam 'ba' zhig kyang khas blang bar bya ba yin pa la skyon med par bstan pa ni/ ma shes don gyi gsal byed kyang / /zhes bya ba ste/ mngon sum la sogs par rung ba'i dngos po la yang thams cad mkhyen pa'i yi shes mthong bar byed pa yin zhing / 'jig rten la tshad ma nyid yin te/ de med na mngon sum la sogs pa tsam gyis mi rtogs pa'i phyir dang / ma rtogs pa la yang rtogs par byed pas tshad mar 'dod do/ /rig byed las byung ba'i shes pa ni go bar byed pa yin yang / rab rib can gyi shes pa bzhin du de'i rtogs bya'i don nyid ma rtogs pa'i phyir tshad ma ma yin pa nyid do/ /don byed pa la bya ba byed pa'i dngos po ni don yin no/ /de yang rig byed la ni go bar dka' ba yin te/ don byed par ma mthong ba'i phyir ro/ /don byed pa dang 'brel pa ni mi slu ba yin pa'i phyir mi slu bas ni don nyid la ma nges pa ma yin la/ de nyid kyang de las nus pa can gyi ngo bo'i sgra rnams kyis brjod par bya ba yin no/ /bum pa zhes bya ba ni dngos po gzhan gyis bsgrub par bya ba ma yin pa'i 'bras bu la/ bya ba byed pa'i ngo bo yin par brjod par bya ba yin gyi/ de lta bu ni kun rdzob la yod pa ma yin la/ rig byed la sogs pa'i rtogs bya ni de la nus pa med pa'i phyir kun rdzob tu yod pa yin du chug kyang de la don byed pa med pa'i phyir mi slu ba ma yin par ni mi rtogs pa yin zhing mi slu bas don nyid rtogs pa yang ma yin te/ mi slu ba la yin yang kun rdzob tu yod pa rnams kyis don nyid ma grub pa'i phyir zhes bya ba la sogs pa'i don ci las dgongs pa yang mi shes so/ /'on te snga ma dang phyi ma'i shes pa la sogs pa las de dag dang 'brel pa'am gzhan yang rung ste bag chags las byung ba'i rnam par rtog pa las/ tha snyad du mngon par brjod pas shes bzhin pa ni kun rdzob tu yod pa yin no/ /de la yang 'brel pa can dag kho na de ma yin pa rnam par gcod par byed pa'i ngo bo'i nus pa can nyid yin pa'i phyir don nyid ma nyams pa yin no/ /tha snyad pa'i tshad ma dang gzhal bya yang rung ba ni skabs ma yin la/ des na mi slu ba ni don nyid gsal bya ma yin pa ma yin no/ /'on te gzugs la sogs pa rnams la yan lag can gcig tu 'dzin pa dang snga ma phyi ma yang rung / gcig tu 'dzin pa yin pa'i phyir kun rdzob tu yod pa yin no/ /ma yin te/ de lta bu ni rab rib can gyis mthong ba'i skra shad la sogs pa bzhin du nus pa can ma yin pas kun rdzob 'ba' zhig nyid du yang yod par mi rigs pas so/ /'ba' zhig ni de ltar rtogs par byed pa ma yin la/ des na yod pa yin no zhe na/ zla ba gnyis pa la sogs pa la yang de bzhin du 'gyur te/ de la yang rtogs par byed pa 'ga' yang med pa'i phyir ro/ /rtogs pa zhes bya ba yang don byed pa la 'ga' zhig gi rjes su rtogs pa yin pa'am/ de'i med pa rjes su rtogs pa yang rung ba'o/ /gang gi bya ba yin pa de yod pa yin la/ gang zhig de lta ma yin pa de ni gzhan du yin no/ /rtogs pa zhes bya bas ni kun rdzob tu yin te/ de de bzhin du rtogs par byed pa'i phyir kun rdzob yin la/ rang yang dag par rig pa tsam du rtogs par bya ba ni don dam pa pa yin zhes bya ba ni don dam par ro/ /gang gi phyir bum pa la sogs pa'i shes pa ni/ gcig pa nyid la sogs pa la slu ba can yin la/ de'i don byed pa'i byed pa po nyid la sogs pa la ni mi slu bas tshad ma nyid yin zhes bya ba 'di ni gzhan gyi 'dod pa nyid yin no zhes bya ba'i don to/ /rang gi 'dod pa nyid du ni de lta bu'i tshad ma nyid rang dbang yin pa ni don dam pa la ltos nas yin la/ de la ni don nyid rtogs pa la ltos par bya ba cung zad kyang med pa yin te/ rang yang dag par rig pa nyid du grub pa'i phyir ro/ /rig byed la sogs pa la ni de lta bu'i tshad ma nyid rjes su mthun pa ma yin pa nyid ma yin te/ de yang / don gang blo la gsal ba ni/ /de la sgra ni tshad ma nyid/ /ces gsungs pa'o zhes bya ba'i dgongs pas/ yang na 'dir don gyi sgras ni zhes bya ba smos te/ gsal byed ces bya ba ni nyams su myong ba'i bdag nyid kyis lkog tu gyur pa ma yin zhes bstan pa yin la/ des kyang rang bzhin dang rgyu'i dngos po nyid 'dzin par byed pa'i bdag nyid dang / 'dzin pa'i bdag nyid kyang bkag pa yin no/ /ma shes pa zhes bya ba ni gzung bya nyid do/ /gzung bya nyid ces bya ba la sogs pa dang bral ba yin yang gcig pu ni ma yin te/ rgya che ba la dmigs pa'i phyir ro/ /yul tha dad pa la dmigs pa ni gcig pa ma yin te/ yul gyi dbye bas 'gal ba'i chos dang 'dre ba'i phyir ro/ /du ma yang ma yin te/ yang mi dmigs pa rjes su dpag pas rdul phra rab kyi ngo bor yang med pa'i phyir ro/ /ji snyed dmigs pa de snyed pa yul tha dad pa yin pas/ gcig pa'am du ma nyid ni cung zad kyang med pa'i phyir dngos po med pa de nyid kyis na de'i dgag pa yang med pas dngos po dang dngos po med pa'i rtog pa zad pa ni mya ngan las 'das pa yin no zhes bya ba gcig gi yin no/ /de la don zhes bya ba smos te/ gang gi phyir shes pa ni rang rig pa'i khongs su gtogs pa nyid kyis de'i bye brag can yin gyi/ yul gyi dbye bas 'byed pa ni ma yin te/ yul yang de'i bye brag can yin pas tha mi dad pa'i phyir ro zhes bya ba'i don to/ /de'i phyir shes pa ni tshad ma nyid yin te/ mi slu ba can nyid dang ma shes pa'i don rig pa can nyid dang / rang yang dag par rig pa yang rung mthong ba dang cig shos la dgos pa can nyid yin pa'i phyir ro/ /rtogs par byed pa nyid ni ma yin te/ tshad ma ma yin pa dang cig shos la thun mong ba nyid yin pas dgos pa med pa'i phyir ro/ /gnod pa med pa nyid ni mi slu ba can nyid kho na yin te/ gzhan la ni mi srid pa nyid dang / dgos pa med pa can nyid du bstan pa la gtod pa yin par shes par bya'o/ /de lta yin na ni mthong ba las ma shes pa ni snang bzhin pa na mthong ba nyid dam/ phyi rol nyid la yang de nyid 'di yin no zhes sngar mthong ba ngo shes pas rtogs pa yin no/ /de'i don byed pa la mi slu bar yod pa ma yin te/ de'i rang gi ngo bo las tha dad pa med pa ni rnam par shes pa bzhin du ste/ rnam par shes pa la yang rang gi ngo bo rig pa las gzhan pa'i don byed pa med pa yin la/ re zhig mthar don byed pa 'di ni yod pa yin te/ 'di ltar rang gi shes pa skyed par byed pa yin la/ de nyid ni rang gi shes pa yin pa'i phyir de nyid don byed pa yin pas spyi yod pa yin la/ mthong ba nyid ni rang gi shes pa ma yin te/ des na gang mthong ba de nyid de'i rang gi shes pa ma yin no zhes/ spyir ni sngar mthong ba ngo shes pas mthong ba nye bar dmigs pa'i mtshan nyid ni 'di'i yod pa yin la/ yod pa yang dbang po dang mthong ba dag gi rung ba nyid yod kyang / rnam par rtog pa nyid kyis go ba yin la/ des na spyi'i shes pa ni tha snyad pa'am don dam pa'i tshad mar 'gyur ro snyam du sems pas/ gal te ma shes pa'i don gsal bar byed pa'i tshad ma yin na zhes bya ba ste/ spyi la sogs pa yod pa yin pas de'i yul bstan bcos kyang tshad mar 'gyur ro zhes bya ba'i don to/ /lan ni/ rang gi mtshan nyid ma shes pa/ /zhes bya ba ste/ re zhig snang ba de nyid mthong bas nya phyis la dngul nyid bzhin du phyin ci log tu 'dzin pas gnod pa yin zhes bstan zin to/ /gnyi ga'i bdag nyid kyang ma yin te/ mthong bas de kho na nyid du ma nges pa'i phyir dang / snang ba yang de la mi rung ba nyid du mi rigs pa'i phyir rung ba nyid yin na snang ba nyid kyi khyad par gzhan du/ spyi yang mthong ba'i yul yin pa'i phyir gzung ba la 'dzin pa'i rnam par rtog pa yin no zhes bya ba 'di yang ngo / /de ltar ni ma bzung ba la 'dzin pa nyid du khas blangs nas brjod pa yin no/ /spyi'i shes pa ma bzung ba shes pa yin yang spyi ni snga ma dang phyi ma dag gis gcig pa nyid dam/ phyi rol nyid kyang rung don cung zad kyang byed pa ma yin la/ shes pa tsam don byed pa la ni rmi lam gyi shes pa bzhin du 'ga' yang de la 'grus par byed pa ma yin no/ /de la gcig tu zhen pa yin yang de la don med na/ de don du gnyer ba po 'jug par byed pa ma yin te/ de gcig pa nyid dam phyi rol nyid kyis kyang de'i byed pa'i mtshan nyid las 'jug pa'i phyir ro/ /mi rigs te/ de byed pa nyid kho nas de gcig pa nyid dam phyi rol nyid du mtshon par bya ba'i phyir de med na 'jug pa nyid du mi rigs pa'i phyir zhes bstan pa ni/ shes kyang gal te de'i rang gi mtshan nyid ma shes na zhes bya ba ste/ de'i ste/ de'i gcig pa nyid dam phyi rol nyid tsam gyis rang gi mtshan nyid kyi don gyi bya ba byed pa nyid de/ de'i gcig pa nyid kyang de'i byed pa nyid kho na yin par bstan pa ni/ rang gi mtshan nyid shes na ni/ /zhes bya ba'o/ /rang gi mtshan nyid ma yin pa'i ngo bo'i gcig pa nyid dam phyi rol nyid shes pa yin yang 'jug pa ma yin la/ rang gi mtshan nyid kyi ngo bo la ni yin no zhes bya ba'i don to/ /sgra rnams kyi yul ni rnam par rtog pa rnams kyis don gyi bya ba byed pa'i yul yin te/ rtog pa dang ldan pa'i 'dod pa yin pa'i phyir gzhan las ni ma yin zhes bstan zin to/ /don dam pa'i phyogs la ni shes bya'i shes pa nang nyid yin pa'i phyir spyi'i ni shes bya ma yin la/ de'i shes pa yang ma yin pa'i phyir gang la tshad ma yin zhes bstan pa ni/ gang gi tshe gnyis su med pa de'i tshe zhes bya ba'o/ /gang gi tshe rang gi mtshan nyid dam ci yang rung nang na yod pa'i shes pa ni rang rang gi ngo bo la gnas pa yin pa'i phyir gzhan rtogs par byed pa ma yin la/ de'i tshe de dag gi snga ma dang phyi ma dag nyid de dag las gzhan pas shes par bya ba ma yin par bstan pa ni/ rang gi mtshan nyid rtogs pa'i 'og tu zhes bya ba'o/ /gal te snga ma phyi ma nyid la tshad ma med na de dag gis rtogs pa ma yin yang grub pa ji ltar yin snyam du sems pa la/ shes gang rig med ces bya ba smos te/ re zhig tha mi dad pa ni mngon sum gyis kyang rtogs par byed pa yin la/ tha dad pa ni rnam par rtog pa kho nas yin te/ 'di ni don nye ba la mi ltos pa'i phyir dang / 'dod pas bzlog par nus pa'i phyir dang / brdzun pa 'dzin pa'i bag chags las byung ba'i phyir yid tsam gyi rgyal po yin pa'i rnam rtog bzhin du shes pa de ni tshad mar 'gyur ba ma yin no zhes bya bar sbyar ro/ /gnyis med pa'i rnam par rtog pa ni de lta bu nyid yin yang tshad mas grub pa'i ngo bo la slu byed ma yin pa nyid kyis bye brag can ma yin par bstan pa ni/ 'dir ni shes pa thams cad rang gi mtshan nyid ces bya ba ste/ gal te yang 'u bu cag la sogs pa'i mngon sum ni dbye ba 'dzin pa ma yin la/ thams cad mkhyen pa'i ye shes ni dbye ba 'dzin pa can yin zhing / de bzhin du de'i gsung yang phung po la sogs pa'i dbye ba la 'bab pa yin no snyam du sems pa ni/ 'o na ci'i phyir bcom ldan 'das kyis zhes bya ba ste/ de'i bsam pa las zhes bya ba ni dbye ba byas pa'i lnga pa'o/ /gal te gnyis med pa nyid du gdul bya'i bsam pa las gsungs pa yin zhes bya bar cis mi 'gyur snyam du sems pa la/ rang rig pa'i mngon sum gcig po nyid ces bya ba smos so/ /de lta yin na gnyis su med pa'i mngon sum de nyid gdul bya la bshad par bya ba yin la/ gnyis kyis ci dgos she na/ ji lta ji ltar zhes bya ba smos te/ dbye ba thams cad la 'dzin pa ldog pa ni gnyis kyis dben pa ni 'jug pa yin te/ de la re zhig bdag dang yan lag can dang spyi la sogs pa 'dzin pa las ldog par nye bar bstan pas gzung ba dang 'dzin pa dag gi phyogs gcig dang bral ba nyid la 'jug pa yin la/ de nas kyang phung po la sogs pa dang bral ba nyid ces bya ba'i don to/ /phung po la sogs pa bstan pa ni/ bdag la sogs pa dang bral ba'i phyir de kho na nyid bstan pa nyid du ci'i phyir mi 'gyur zhes dogs pas de ga las shes zhes zer ba la lan du/ rang gi mtshan nyid de don dam pa rnam par dpyad pa'i phyir ro/ /bdag la sogs pa rnam par dpyod bzhin pa ni de kho na nyid ma yin pa'i phyir dor ba yin par ni phung po la sogs pa la yang mtshungs pa yin no zhes bya ba'i don to/ /de lta yin na bdag la sogs pa dang phung po la sogs pa yang lan cig nyid rnam par dpyad par bya ba yin na/ ci'i phyir dor ba nyid la sogs pa'i bye brag las rim gyis yin snyam du sems pa la/ de nyid bcom ldan 'das kyis zhes bya ba smos so/ /dbye ba yang nga rgyal gyi gzhi dang cig shos kyis mngon sum du grub pa kho na yin no snyam du sems pa la/ phyi dang nang zhes shes pa yin zhes smos so/ /gal te gnyis su med pa yin na sngon po la sogs pa ji ltar rgyal gyi gzhi ma yin/ res 'ga' ba'i nye bar dmigs pa nyid yin pa'i phyir zhes kho bo smra ba ni/ gang zhig rtag tu dmigs pa de ni nga rgyal gyi gzhi yin te lus lta bu'o/ /bdag gi lus zhes bya ba 'di la yang rnam par shes pa dang tshor ba la sogs pa tha dad pa 'dus pa la ltos nas/ tsan+dan gyi dri zhes bya ba lta bu'o/ /de bstan pa ni/ phyi dang nang zhes shes pa yin/ /zhes bya ba'o/ /de yang zlum po yin la 'di yang yin no zhes zlum po nyid du gcig pa la/ don du mi gnyer ba yang mthong ba nyid kho nas rtogs pa yin la/ don gyi bya ba byed pa nyid ma yin te/ dbyibs la sogs pa'i bye brag ni mi rtogs par brjod pa ma yin no/ /ji ltar 'di ni ma yin pa las khyad par can yin pa de bzhin du de las gzhan pas kyang yin no zhes bya ba ni mthong ba'i nus pa yin no/ /gcig pa nyid du rtogs pa ni gnyis su med par byed pa yin pa des na de bzhin du rtogs pa nyid kyi phyir de la byed pa po nyid kho na de dag gi gcig pa yin zhes bya ba'i don to/ /de dang 'dra ba ni de bzhin du yin no zhes bya ba'i 'dra bar brjod pa po med pa'i phyir dang / gyur pa'i sgra ni ma gyur pa las ldog pa'i don nyid kyis de'i rjod byed ma yin pa'i phyir dang / kun du ldog pa'i dgos pa med pa'i phyir mi rigs pa yin la/ de 'di la yod ces de dang ldan par 'chad par 'dod pas phyogs snga ma byed par bcud pa ni/ 'o na ji ltar bcom ldan 'das tshad ma yin zhes bya ba'o/ /'di skad bstan par 'gyur te/ rang gi ngo bo ni thob bya dang 'brel pa de nyid yin la/ thob bya yang 'byung bar 'gyur ba nyid yin pas nye ba ma yin pa'i phyir sgro btags pa'i yul 'ba' zhig ste/ tha snyad pa kho na yin gyi bcom ldan 'das ni de lta ma yin te/ gang gi phyir bcom ldan 'das ni sgro btags pa ma yin no/ /gzhan du na de'i yul 'jig rten pha rol la sogs pa la rtogs pa dang ldan par mi 'jug par thal bar 'gyur ba'i phyir ro/ /mthong ba la ni thob par nus pa yin na/ ji lta ji ltar yang 'jug pa gsal bya ma yin te/ 'jig rten pha rol the tshom yang / /mkhas pas mi dge spang bya yin/ /gal te med na ci yis dge/ /gal te yod na med ste phung / /zhes pas ma mthong ba la yang de'i mtshan nyid ni tshad ma kho na yin no zhe na/ bden te/ mngon sum la sogs pa las kyang sgro btags dang cig shos nyid kyis bcom ldan 'das 'ba' zhig khyad par can du dam 'cha' ba ni/ gzhal bya khyab bya min pa'i phyir/ /gzhan ni tshad ma nyid ma yin/ /ma khyab pa na 'bras sogs dang / /ldan pa yongs su 'dzin pa min/ /zhes bya bas so/ /khyad par de ni rtogs pa dang ldan pa shin tu 'jug par byed pas tshol bar byed pa yin no/ /mi srid pa tsam gyis gcig kyang ma shes pa yin na/ ma nyams pa bsgrub par mi rigs pa ma yin nam/ mthong ba la ni sgro btags pa las kyang 'jug pa yin te nus pa'i phyir ro/ /ma mthong ba la shes pa de sgro btags par 'dod pa ma yin te/ mi nus pa'i phyir ro zhes bya ba'i don to/ /sngar dris pa'i khyad par rtogs par byed par 'dod nas/ de ldan bcom ldan tshad ma nyid/ /ces bya ba smos te/ sgro btags pa ma yin pa'i 'jug pa'i yul rab tu shes pa bcom ldan 'das kho na'i khyad par yin gyi gzhan gyi ni ma yin la/ 'di'i khyad par de yang skabs ma yin pa'i phyir ji ltar rtogs pa pos sgra de las skabs yin par rjes su rjod par byed pa yin/ gal te de ni phul byung bar/ /shes nus don 'di 'dod pa yin/ /zhes bya ba la sogs pa de dang der ni skabs kho na yin no/ /phul du byung ba yang sgro btags pa ma yin pa'i shes pa'i ngo bo ni/ 'u bu cag la sogs pa rnams las khyad par du 'gyur ba kho na yin no/ /de lta bu ni 'dir skabs ma yin no/ /'chad par 'gyur ba ni rtogs bya ma yin pa nyid yin la/ blo la gnas pa ni rtogs bya nyid yin no zhe na/ blo la gnas pa nyid ci las shes par bya ba yin zhes bya ba de nyid dris pa yin no/ /rtogs pa las yin no zhe na/ ma yin te/ ma nges pa'i phyir ro/ /phul du byung ba nyid ni rtogs bya nyid yin no zhes sus smras/ 'o na ci zhe na/ don byed pa la mi slu ba can nyid dam/ ma shes pa'i don gsal bar byed pa nyid tshad ma'i mtshan nyid kyi skabs yin la/ de yang bcom ldan 'das 'di'i yin gyi gzhan du ni ma yin no/ /de ni 'u bu cag la sogs pa la yang yod pa ma yin nam/ de'i phyir ji ltar bcom ldan 'das 'gro ba kho na'i yin/ de lta yin dang de ni de las gzhan las khyad par can yin pas de kho na yin par brjod do/ /dper na bram ze rnams yod pa yin na yang / phul du byung ba bstan pa'i phyir 'ga' zhig la 'di ni 'gro ba 'di ni bram ze yin no zhes rjod par byed pa de bzhin du 'dir yang 'u bu cag la sogs pa las 'di phul du byung ba sgro btags pa ma yin pa'i ye shes nyid yin par bstan pa ni/ bcom ldan 'das ni mngon sum gyi rang bzhin nyid kyi tshad ma yin te zhes bya ba'o/ /'di zhes bya ba ni sgro btags pa ma yin pa'i shes pa'o/ /rig byed la sogs pa 'u bu cag la sogs pa la yang mtshungs pa ma yin na/ de ci las ma mthong ba la tshad ma nyid yin zhes bstan pa ni/ de'i phyir de nyid ces bya ba'o/ /rnam 'grel ni bshad bya'i ngo bor byas pa ma yin pa'i phyir rang dbang yin pa'i phyogs la 'dra ba'i don yang rnyed sla ba yin par bstan pa ni/ yang na don dam par zhes bya ba ste/ gang gi phyir 'jig rten pa'i tshad ma ni gnyis kyi ngo bor bstan te/ rang las rang gi ngo bor rtogs/ /zhes bya ba dang / tha snyad las ni tshad ma nyid/ /ces bya ba yang ngo / /de bzhin du ma mthong ba'i don la yang tshad ma ni gnyis kyi ngo bo kho na yin no zhes bya ba'i don to/ /rang yang dag par rig pa tsam ni de kho na nyid ma yin nam/ skad cig ma nyid kyang zhes bya ba la sogs pas de kho na nyid du gsungs pa ni/ 'bras bu'i rang bzhin yin pa las rgyu ni yang dag pa ji lta ba shes pa rtogs pa yin no/ /de'i phyir nye bar bstan pa ni rmongs pa las kyang 'byung ngo zhes bya ba ni rig byed la sogs pa ni 'ga' yang don dang 'brel pa med pas tshad ma ma yin na zhes bya ba la sogs pa nyid kyis gsal ba yin la/ 'di nyid kyi dbang phyug la sogs pa yod par smra ba la yang gsal ba'i phyir rtsod pa cung zad kyang med pa yin na/ tshad ma rtag pa nyid yod min/ /zhes bya ba la sogs pas gzhan btsal bya ci zhig yod/ de ni ci yang ma yin te/ tshad ma'i stobs kyis gzhan yang rtogs pa'i phyir ro/ /de lta yin na de nyid yang dag pa nyid du gsungs pa las shes pa ni rtag par 'gyur ro/ /'gyur du zin kyang pha rol po'i phyogs yin no/ /dbang phyug la sogs pa gzhan nyid nye bar 'phen par byed pa'am/ 'gegs par byed pa yang ma yin la/ de bzhin du/ tshad ma rtag pa nyid yod min/ /zhes bya bas rtag nyid chos nye bar blangs pa sel bar byed pa yin gyi chos can ni ma yin zhing / gzhan btsal bya ci zhig yod ces bya ba yang ngo / /yang dag pa nyid du gsungs pas dpag pa yang zhes bya ba 'di yang yin du zad mod/ gzhan ci zhig dgos/ rab tu grub pa las gzhan pa nyid kyi rtag pa nyid kho na rab tu grub pa'i rtag pa nyid yin pa'i phyir dang / thams cad byed pa po yin pa'i phyir dang / yang dag pa nyid du gsungs pa'i byed pa po nyid ma nyams pa yin no/ / yang na shed bu la sogs pa'i dag las bzhin du yang dag pa nyid du gsungs pa las kyang / rjes su dpag par bya ba'i rig byed rtag pa nyid yin du chug kyang snang bzhin pa la ni de lta bu med pa'i phyir ro/ /shed bu la sogs pa dang bcom ldan 'das pa yin te/ dran pa po yin pa'i phyir la des gsungs pa yang byed pa por thun mong ba yin pa'i phyir rjes su dpag pa tshad mar 'gyur ro/ /'gal ba yin pas mngon sum ni ltos pa med pa ma yin te/ rtag pa las phyi rol pa nyid la sogs pa dang rig byed 'gal ba'i phyir thams cad g.yo 'gul dang dran pa lta bu yin no zhe na/ 'di thams cad tshangs pa'i rnam shes ni ma yin te/ mtshungs pa zhes bya ba dang bsnyen gnas pa zhes bya ba yang 'gal ba nyid kyis tshad ma nyid ma yin no zhes zer ba ni/ rig byed rtag pa tshad ma ma yin te zhes bya ba'o/ /lan ni/ tshad ma rtag pa nyid yod min/ /zhes bya ba ste/ skad cig ma nyid kyi shes pa tsam nyid la sogs pa ni yang dag pa nyid du gsungs pas de dang phyin ci log tu rtogs par byed par 'gal ba yin te/ rtag pa nyid dang byas pa nyid lta bu'o/ /tshad ma gzhan yang yod pa ma yin te/ de nyid bstan pa ni/ tshad ma med pa'i phyir ro zhes bya ba ste/ 'dis ni sgrub par byed pa med par bstan to/ /the tshom yang yod pa ma yin te/ gnod par byed pa yin no zhes bstan pa ni/ gzhan yang dngos po yod pa yin/ /zhes bya ba ste/ pha rol pos smras pa rnams ni/ /sgrub par byed pa ma yin par/ /'dod 'jug ces bya ba la sogs pas 'chad par 'gyur ba yin te/ shes pa nyid ni tshad ma yin te/ don yang dag par rig pa'i bdag nyid yin pa'i phyir ro/ /tshad ma'i gtso bo ni mi slu ba can gyi shes pa yin par bsgrubs pa yin la de yang kun rdzob yin no/ /lus dang sa la sogs pa'i shes bya 'dzin par byed pa nyid kyis de la gnas pa de'i rang gi ngo bo'i rjes su byed pa ste/ de yod pa dang med pa'i rjes su byed pa po yod pa dang med pa yang mi rtag pa yin la/ de bzhin du dbang phyug la sogs pa la yang shes bya mi rtag pa nyid kyis de yang mi brtan pa yin no zhes bya ba ste/ de nyid ni gal te shes bya mi rtag pas shes pa mi rtag pa nyid yin no zhes bya ba 'di ga las shes she na/ zhes bya ba'i dri ba sngon du 'gro ba can gyis sgrub par byed pa yin no/ /'u bu cag la sogs pa rnams kyi yang shes pa ni shes bya yod pa dang med pa'i rjes su byed pa yin par ci las shes pa yin/ de ni shes bya las skyes pa'am shes bya'i bdag nyid kyang ma yin no/ /'o na ci zhe na/ shes bya'i bya ba las 'dzin par byed pa kho na yin no snyam du sems pa ni/ gal te shes bya mi rtag pas/ /zhes bya ba'o/ /gang gi phyir shes bya'i bdag nyid dam/ skye bzhin pa ni gzhan las yin pa ji lta ba kho na bzhin du bya ba byed pa po yang yin par bstan pa ni/ shes bya'i rang bzhin la bya ba byed pa zhes bya ba'o/ /de la gal te zhes bya ba smos te/ shes pa ni shes bya med na bya ba med pa yin la/ de yod kyang de'i ngo bo yin na ji ltar 'dzin byed yin/ des na shes bya dang bral ba bya ba byed pa po ma yin pa las shes bya'i dus su bya ba byed pa ni gzhan yin na/ /shes pa ni dang ba dbye ba med pa ma yin nam/ me long bzhin du shes pa de dang de nye ba yin na gzugs brnyan 'dzin pa yin te/ gzugs brnyan yod pa dang cig shos kyi dus dag gu de'i bye brag tu yod pa ma yin no snyam du sems pa ni/ 'on te de ni me long gi / zhes bya ba'o/ /de lta yin na thams cad du 'gro ba de'i shes bya thams cad la nye ba yin pa'i phyir thams cad mkhyen pa nyid du 'gyur ro/ /'on te thams cad du 'gro ba yin yang mig la sogs pa'i tshogs pa ltos nas yin te/ de ni yul nges pa yin pa'i phyir nges pa 'dzin pa yin no/ /dang por nges pa ma yin pa ni nye ba las nges pa can du mi 'gyur te rtag pa'i phyir ro/ /gzhan pa de ni de las 'byung ba yin par ni rigs so zhes bya ba'i dgongs pas/ 'o na ni rang gi tshogs pa zhes bya ba smos te/ rang gi tshogs pa las te mig la sogs pa las de ltar te/ shes pa'i ngo bo ni de nyid la rjes su 'gro ba dang ldog pa dag gis mig la sogs pa nyid kyi nus pa las rtogs pa'i phyir ro/ /ji ltar mig gi bya ba med pa yin yang don rtogs pa nyid ni de la ltos pa yin pa de bzhin du shes pa yang yin no snyam du sems pa ni/ 'on te mig mi 'gul bar phye ba zhes bya'o/ /shes pa nyid ni bya ba gzhan med kyang rjes su 'gro ba la sogs pa'i nus pa can du rtogs pa yin no/ /ma yin te/ de la ldog pa med pa'i phyir ro/ /rjes su 'gro ba yod pa yin no zhe na/ ma yin te/ de med na gzhan yod kyang mi 'byung zhes bya bar mi 'grub na/ de'i rjes su 'gro ba'i nus pa mi rtogs pa'i phyir ro zhes lan du bstan pa ni/ rjes su 'gro dang ldog pa las/ /zhes bya ba'o/ /de'i phyir dbang phyug la yang don gyi shes pa ni de'i mig la sogs pa'i rjes su 'gro ba dang ldog pa'i rjes su byed pa yin gyi/ de las gzhan pa rtag pa rtogs pa'i ngo bo ni bskyed bya ma yin par nye bar bsdu ba ni/ de'i phyir de ltar 'gyur ba de ni don nyid yin gyi zhes bya ba'o/ /mig la sogs pa las byung ba'i don rtogs pa nyid tha mi dad pa'i phyir 'dzin par byed pa yin pa ni bden mod kyi/ de yang rtogs pa nyid bzhin du de dang yang rtag pa dang 'brel pa can nyid yin no/ /de'i phyir des kyang 'dzin pa yin gyi/ phrad pa dang de'i bdag nyid dag la bye brag ci yang med do snyam du sems pa ni/ 'on te don de tshad ma yin mod ces bya ba ste/ re zhig don ni rtogs pa nyid dang tha mi dad pa'i phyir don gyi 'dzin pa por 'gyur la/ phan pa mi byed pa gzhan ni nye ba tsam gyis nam mkha' bzhin du 'dzin par byed pa ma yin zhes bya ba'i don to/ /'brel pa ni phan par byed pa nyid yin te/ phan pa ni mkho ba'o/ /nye ba yin par bye brag med kyang don de nye bar ston pa yin gyi/ gzhan du ni mi 'thad pas de nyid kyis don ston pa yin par shes par bya ste/ nam mkha'i ni ma yin no snyam du sems pa la/ mkha' la don de bstan med phyir/ /zhes bya ba smos so/ /ji ltar yang rtogs pa'i don ni de las sam gzhan las kyang zhes bya ba'i ldog pa med pa'i phyir dbang po la sogs pa bzhin du nges par byed pa ma yin no/ / de bzhin du nye bar bstan pa yang yin te/ lan bstan pa ni/ bstan pa'i tshig yin de yi phyir/ /zhes bya ba'o/ /ji ltar snal ma la sogs pa rnams ni tshig pa la sogs pa med na snam bur 'grub pa yin la/ yod na ni 'grub par byed pa ma yin nam/ de bzhin du de yang lhan cig byed pa med na mi byed pa yin la/ de yod na byed pa yin no snyam du sems pa la/ rnam pa kun du ldog med la/ /zhes bya ba smos te/ snal ma rnams ni tshig pa la sogs pa med na mi byed pa yin zhes bya ba ni mi rigs te/ tshig pa la sogs yod kyang snal ma med na snam bu la sogs pa med pa'i phyir 'di la ni mig la sogs pa yod kyang / de med na 'bras bu med par snang ba ma yin no/ /des na de'i rgyu nyid rtogs pa yin gyi/ shes bya ba bzhin du de dang tha mi dad pa'i phyir rtag pa ma yin la/ de'i rgyu yang rtag pa dang tha mi dad pa yin zhes bya ba la sogs pa'i rigs pas rtag pa nyid ma yin zhes bya ba'i don to/ /de'i phyir de ltar don rtogs pa nyid las shes pa gzhan ni khyab pa yin par ma mthong la rtogs pa nyid kyang shes bya dang tha mi dad pa yin te/ shes bya tha dad pa yin na tha dad pa yin no/ /de ni dbang po bzhin du rtogs pa nyid kyi rgyu yang ma yin te/ dbang po la sogs pa tsam nyid las de grub pa'i phyir ro/ /gzhan mi nus pa'i phyir ro zhes bstan zin to/ /da ni de me long dang 'dra ba yin na yang de lta na yang de'i nye ba ni 'das pa dang ma 'ongs pa ni de dang nye ba ma yin pa'i phyir ji ltar de'i gzugs brnyan yin par bstan pa ni/ don gang 'das dang ma 'ongs zhes bya ba'o/ /'on te shes bya tsam de ltar snang ba yin gyi nye ba dang cig shos kyi rnam par dbye ba ni ma yin no snyam du sems pa la/ 'das pa nyid du ma shes par/ /zhes bya ba smos te/ nye ba la 'dzin pa yin na de'i tshe gzhan du 'u bu cag la sogs pa'i gnas skabs kyang thams cad mkhyen par 'gyur te/ de'i ngo bo la bye brag med pa'i phyir ro/ /'on te 'dod chags la sogs pas gos pa'i 'u bu cag la sogs pa'i shes pa ni me long dri ma can bzhin du/ nye ba na gnas pa las gzhan pa rig par byed pa ma yin no zhe na/ me long du ni 'pho ba yin/ /zhes bya ba smos so/ /gang gi phyir me long dri ma med pa de bzhin du nye ba nyid kho na snang ba yin na/ nye ba ma yin pa ni ma yin no zhes bya ba thams cad mkhyen pa nyid ni de lta ma yin no/ /me long yang don yod pa la ni de bzhin du 'gyur bas mi rtag pa yin pa'i phyir rtag pa dang 'gal bar bstan pa ni/ de lta bu yi snang ba ni/ /zhes bya ba'o/ /rtag pa dang 'brel pa can gyi so sor snang ba ni gang gi yang bskyed bya ma yin te/ shin tu sgro ma btags pa yin pa'i phyir ro/ /rnam par 'gyur ba'i shes pa'i ngo bo ni 'di'i rtag pa yin yang 'gal ba med do zhe na/ nam mkha' la sogs pa dag kyang zhes smos so/ /brten pa phul du byung ba nyid yin yang nam mkha' 'am gzhan yang rung ba dang bye brag med de/ nges pa can gyi don rjod par byed pa'i tshig kyang don thams cad mthong ba yin no phyin ci log gis khyab pa bstan pa ni/ don rnams thams cad mthong ba de'i/ /zhes bya ba ste/ thal bar 'gyur ba ni phyin ci log la 'bab pa yin par bstan par bya'o/ /sna tshogs pa la rung ba ni/ /zhes bya ba yang rigs pas nges par 'jug pa'i yul nye bar ma bstan pa'i phyir/ de'i tshig ni 'jug par byed pa ma yin par bstan pa ni/ don kun mthong ba las byung ba'i/ /zhes bya ba smos so/ /don thams cad ma thob pa'i rgyu mtshan las byung ba'i tshig kyang don la nges pa yin te/ brjod par 'dod pa'i nges pa las byung ba'i phyir 'gal ba med do snyam du sems pa la/ brjod 'dod nges pa zhes bya ba smos te/ don thams cad mthong ba yin yang don la nges pa'i brjod pa 'dod pa nyid du ji ltar 'gyur zhes bya ba'i don to/ /don du ma mthong ba'i brjod par 'dod pas nges par/ smra ba po yang mthong ba kho na yin no zhe na/ brjod 'dod de dag ces bya ba smos te/ brjod par 'dod pa dang mthong ba de rnams kyang rim gyis 'byung ba yin par bden na/ gzhan gyi snga ma dang phyi ma gcig pa nyid kyis 'ba' zhig ni ma yin no zhes bya ba'i don to/ /gal te yang brjod par 'dod pa dang mthong ba las tha dad pa ni yod pa ma yin yang de'i ngo bo gcig pa nyid du 'gyur ro snyam du sems pa la/ brjod par 'dod pa dang mthong ba zhes bya ba smos te/ brjod par 'dod pa ni smra bar 'dod pa yin la/ gzhan pa ni mthong ba ste de dag rnam par rtog pa dang gzhan nyid kyis gsal ba kho nar tha dad pa yin no zhes bya ba'i don to/ /brjod par 'dod pa dang mthong ba zhes bya ba la sogs pa ni rang rig pa la ltos nas rtog pa med pa nyid ma yin nam/ ji ltar rnam par rtog pa dang cig shos su tha dad par ji ltar 'gyur snyam du sems pas/ gal te de yang yang dag tu/ /zhes bya ba la sogs pa'i tshigs su bcad pa smras pa la/ lan ni/ rang bzhin gcig nyid rim gyis ni/ /zhes bya ba ste/ rang rig pa gnyis rim gyis 'byung ba bor nas dus dang yul la sogs pa ni phan tshun gcig pa nyid du rtogs par byed pa ma yin zhes bya ba'i don to/ /phyi rol la rim pa dang ldan pas de ni 'di yin no zhes gcig par rang ngam gzhan gyis kyang rung / ngo shes par byed pa ma yin no/ /de bzhin du nang yang ma yin no snyam du sems pa la/ sngar mthong ba ngo shes pa la gnod pa can bstan pa ni/ dngos gang de 'ang gzhan du na/ /zhes bya ba'o/ /dbang phyug ni dbang phyug gi yon tan brgyad dang 'brel pas phul du byung ba can yin la/ bdag nyid snga ma dang phyi ma nyid la phyi rol bzhin du 'das pa la sogs pa nyid du rtogs par byed pa kho na yin no snyam du sems pas/ 'on te bdag de rang nyid ni/ /zhes bya ba'o/ /rang rig pa'i snga ma dang phyi ma'i ngo bo ni da ltar ba bzhin du/ da ltar ba nyid kho nar 'gyur ro zhes bya ba ni lan du smras pa yin te/ de ni de ltar yin no zhes bya ba'o/ /don dam pa'i phyogs la yang shes pa ni rang rig pa yin te/ snga ma dang phyi ma'i cha dang bral ba yin na mi rtag pa kho na yin la/ snga ma la sogs pa ma rig pa'i phyir de'i khyad par dang bral ba nyid ji ltar rig par 'gyur ba yin zhe na/ de dang gcig kyang rtag pa nyid ni de 'dzin pa med na 'dzin par mi 'gyur ro/ /des na rtag pa ma yin la mi rtag pa yang ma yin pa'i phyir de lta bu ni de bzhin gshegs pa nyid kyi rang bzhin yin te/ gzhan ni ma yin no/ /de yang / rang las rang gi ngo bo rtogs/ /zhes gsungs pa ste/ de bstan pa ni/ rang rig nyid las gzhan pa ni/ /zhes bya ba ste/ sngar ni bsgrub pa yin zhes bya ba ni de de lta na dbang phyug gi shes pa rtag pa yin la/ de nyid kho na dbang phyug yin par khas blangs nas mi rtag pa nyid bstan pa yin no/ /shes pa las gzhan pa'i bdag ni dbang phyug ma yin nam/ shes pa ni ma yin no/ /de'i shes pa ni shes bya'i yul la 'u bu cag la sogs pa bzhin du gzhan kho na yin no/ /'u bu cag la sogs pa'i bdag dang yid dang dbang po la sogs pa'i yul nges pa can yin la/ 'di'i ni yid tsam las yul thams cad pa yin zhes bya ba 'ba' zhig bye brag yin no/ /bdag ni rtag pa nyid yin te/ /nyin zhag gzhan la mthong ba la yang nyin zhag phyi ma la 'di dag gis mthong ba yin no zhes bya bar 'gyur ba yin zhes gang smos pa ste/ mthong ba po yod pa'i sngar ngo shes pa ni rtag pa nyid du rig par byed pa yin la/ dbang phyug kyang mthong ba po yin pa des na rtag pa yin no snyam du sems pa la/ rim bzhin skye ba can dag ni/ /rtag las skye ba mi 'thad phyir/ /zhes bya ba smos so/ /re zhig nam mkha' bzhin du 'ga' la yang phan pa mi byed pa'i bdag ni khas blangs pa ma yin no/ / 'o na ci zhe na/ don gyi shes pa'i rgyu mtshan ni ma yin no/ /de'i de kho na nyid kyang ci nas kyang mi rigs yin te/ rtag pa'i phyir ro/ /de ni 'di'i zhes bya ba'i sngar mthong ba yang 'chad par 'gyur ba yin zhes bya ba'i don to/ /de nyid kho na nam mkha' ltar rtag pa khyab pa zhes bya ba la sogs pas sgrub par byed pa yin no/ /shes bya ni rim gyis 'byung ba'i phyir mi rtag pa yin pas/ shes pa yang rim gyis 'byung ba yin par ni mi rigs pa ma yin nam/ bdag dang yid phrad pa las byung ba dang / 'byung bar 'gyur ba dang / da ltar ba'i yul la gcig pa nyid du shes pa ni don gcig 'dzin par byed pa dus gcig kho na skyes pa yin no/ /de ltar skyes pa yang 'jig pa'i rgyu med pas mi 'jig pa yin pa de la rim par skyes pas ci zhig dgos snyam du sems pa la/ rtag pa khyab pa zhes bya ba smos so/ /gal te bdag dang yid phrad pa ni de lta bu'i shes pa bskyed par nus pa yin/ 'u bu cag la sogs pa la yang de yod pa'i phyir de lta bu'i shes par 'gyur bar bstan pa ni/ gal te rang bzhin de nyid kyis/ /zhes bya ba'o/ /thams cad kyi tshe zhes bya ba ni 'u bu cag la sogs pa'i gnas skabs na yang ngo / /'on te ma rig pa la sogs pa'i dri ma dang bral bas phul du byung bar gyur pa can gyi bdag dang yid phrad pa las de lta bu'i shes par gyur gyi/ gzhan gyi tshe ni ma yin no snyam du sems pa la/ khyad par yod na zhes bya ba smos so/ /bye brag can ma yin pa'i bdag la ni bden na/ bdag por gyur pa la sogs pas dbang phyug du gyur pas rang nyid las grub pas khyad par can du byed pa de lta bu 'ba' zhig tu shes pa yin la/ 'u bu cag la sogs pa la ni de med pa'i phyir ma yin no snyam du sems pa ni/ 'on te khyad par med pas kyang / /zhes bya ba'o/ /lan ni ma yin te/ ltos pa mi rung ba'i phyir zhes bya ba'o/ /phul du byung ba'i chos kyi bskyed bya bdag por gyur pa la sogs pa'i yon tan rnams kho na rang bzhin gyis phul du byung ba'i shes pa skyed par byed pas rgyu yin gyi dbang phyug ni rgyur mi 'gyur ro/ /de lta na yon tan de rnams 'dus ba'i dbang phyug gi sgras brjod par bya ba rtag pa rgyur 'gyur ba yin no snyam du sems pa la/ de la ltos nas de yang zhes bya ba smos te/ de'i zhes bya ba yon tan can gyi ste/ de la ltos nas zhes bya ba yon tan de rnams la ltos nas/ yon tan rnams la brten pa nyid kyis rgyu nyid yin te/ 'ba' zhig pa rnams ni ma yin te/ ma mthong ba'i phyir/ de'i phyir yon tan rtag pa ni rgyu nyid du mi rigs so zhes bya ba'i don to/ /gal te khyab bdag bzhin du rten la ltos bzhin pa yang rtag pa nyid yon tan nyid yin no zhe na/ ltos pa de dang de zhes bya ba smos te/ ltos pa'i sas phan mi byed pa yin na/ ji ltar ltos pa yin zhes bya ba'i don to/ /'on te dbang phyug nyid dang 'brel ba can ni bdag dang yid phrad pa las byung ba yin la/ skye ba dang ldan pa thams cad ni 'jig par mthong ba'i phyir skye ba yod na 'jig pa dang 'brel ba'i phyir ci zhig gis 'jig par byed par 'gyur/ / de lta yin dang skad cig phyi ma la mi shes par 'gyur ro/ /de'i rang bzhin gyis thams cad bskyed bya yin pas de'i tshe nyid 'byung ba'i phyir rim par byed pa ma yin par bstan pa ni/ rtag pa ni thams cad kyi tshe zhes bya ba smos te/ yang na dbang phyug ces bya ba de rtag pa'i tshad ma yin na rang rig pa'am/ rig par byed pa gzhan go bar bya ba yin grang na/ re zhig rang rig pa ni ma yin te/ de'i nye ba nyid kyis mi rtag pa yin no zhes bstan pa ni/ tshad ma rtag pa nyid yod min/ /zhes bya ba'o/ /rig par byed pa yin pa'i phyir rig par bya ba gzhan go bar 'gyur na/ de yang ma yin par bstan pa ni/ dngos yod rtogs pas te tshad ma mthong ba nyid yin la/ mthong ba de ni snang ba'i yul yin te/ de'i rnam pa nyid kyis rnam par gzhag par byed pa yin te/ shes bya gang yin pa'i mi rtag pa nyid kyis de'i bdag nyid du mthong ba yang mi rtag par bstan pa ni/ shes bya mi rtag pa nyid kyis/ /de ni mi brtan nyid yin pa'i phyir ro/ /des na de lta bu mthong bas rnam par gzhag par snang ba skye bar byed pa yin la/ skyed par byed pa de yang so sor snang ba kho na yin te/ rim bzhin 'byung ba'i shes dus de nyid kyi tshe'i shes bya rtogs pa'i phyir rtag pa nyid yin par bstan pa ni/ rim bzhin skye ba can dag ni/ /rtag las skye ba mi 'thad phyir/ /shes pa yang shes bya las skye ba nyid yin pa ni/ de'i rnam pa dang ldan pa nyid kho na yin pa'i phyir/ des bskyed pa ni de'i rnam pa nyid yin gyi/ rim gyis 'byung ba'i shes pa ni rtag pa'i rnam pa yod pa ma yin no zhes bya ba'i don to/ /mi rtag pa ni skad cig tsam 'byung ba yin pa nyid kyis dus gzhan na med pa'i phyir rim bzhin dang 'gal ba ma yin nam/ rtag pa ni ma yin te/ lan cig mthong ba yang nye bar dmigs par srid pa'i phyir ro/ /yul gzhan dang dus gzhan du nye bar dmigs pa ni bden mod kyi sngar mthong ba kho na yul nyid dang gcig pa nyid du ma rtogs pa'i phyir dang / tha dad pa yang nye bar dmigs pa tha dad pa tsam gyi rgyu mtshan nyid kyis mi rtag pa yin pa'i phyir yul dang dus la sogs pa la ltos pas rtag pa ni rim bzhin par mi rigs par bstan pa ni/ ltos pa mi rung ba'i phyir zhes bya bas te/ dus dang yul gcig pa'i dus dang yul gzhan gyi bye brag nyid la ltos par mi rigs te/ tha dad par thal bar 'gyur zhes bya ba'i don to/ /ji ltar mar me gcig pu yang yul gzhan du 'od 'phro ba dang mar dang sdong bu zad pa zhes bya ba la sogs pa bya ba du ma byed pa de kho na bzhin du gcig nyid dus tha dad pa la du ma byed pa yin pas bye brag med pa yin snyam du sems pa la/ ltos pa zhes bya ba smos te/ mar me'i rang bzhin gang kho nas bya ba gcig byed pa kho nas gzhan yin no zhes ltos pa med pa'i phyir zhes bya ba'i don to/ /yul tha dad pa la du mar 'dzin pa ltar byed pa yin zhe na/ mthong ba'i phyir skyon med do/ /de'i rang bzhin gyi sdod pa la mar me la sogs pa la mthong ba'i phyir brtag par mi bya'o/ /yang na sgra las byung ba'i tshad ma ni rtag par rig pa'i bdag nyid du yod pa ma yin nam/ rang bzhin gzhan ni shed bu la sogs pa bzhin du/ de'am de'i don las yang dran pa por 'gyur ro/ /ji skad du mthong ba'i don ni gzhan ma yin pa'i phyir brtag par mi bya'o/ / gnas skabs kha cig tu 'tshed par byos zhes bya ba'i sgra dmigs nas de'i rang gi ngo bo la gos pa med pa'i phyir 'bras bu dang ldan pa nye ba la 'bras bu med pa de'i yan lag yin zhes rigs pa'i phyir dang / rung ba'i phyir 'bras bu dang ldan pa'i tha snyad kyi yan lag gi don rtogs par byed pa yin la/ sgra dang de'i yan lag dang yan lag can nyid du go bar byed pa yin no/ /'bras bu dang ldan pa'i tha snyad kyi yan lag tu gyur pa'i don rtogs pa'i yan lag nyid la/ sgra 'bras bu med pa nyid yin na/ rung ba nyid du go bar byed pa ma yin te/ don rtogs pa'i rigs pas grub pa'i yan lag nyid kyis rtag pa nyid khyab par byed pa yin par rnam par gzhag pa na/ mi rtag pa nyid dang 'gal ba can yin pa'i phyir gnod pa can no/ /mi rtag pa nyid la ni sgra don rtogs pa'i yan lag ma yin no/ /'brel pa ma bzung bas ma rtogs pa'i phyir ro/ /'di 'di'i brjod bya yin zhes bya bar bzung nas/ de nyid kyi rjes su 'brangs nas rtogs par byed pa'am/ rtogs par byed pa la 'dzud pa yin la/ de ltar na rtag pa nyid kho na/ /don 'brel pa mthong na rjod byed/ /nus ldan mi 'gyur de lta na/ /snga na med pa'ang der 'gyur te/ /kun yang kun la gsal byed 'gyur/ /gsal ba nyid ni nye ba tsam gyis gsal bar byed pa yin na/ mi rtag pa la yang 'gal ba ma yin te/ mi ni mngon sum gyi gzhal bya yin pa'i phyir de nyid la yang gsal bar byed pa ma yin no/ /du ba bzhin du sgra yang gsal bar byed par 'gyur ro zhe na/ bden te/ 'brel pa 'dzin pa nyid yin na 'gyur la/ du ba'i 'brel pa ni rjes su 'gro ba dang ldog pa dag yin no/ /sgra ni de dag nyid dang bral ba'i go byed nyid yin te me lta bu'o/ /sgra la ni de rang 'dzin pa 'ba' zhig la ltos pa yin la/ me ni de lta ma yin zhes bya ba'i bye brag mthong ba nyid kyi phyir cung zad kyang gnod par byed pa ma yin no/ /mi rtag pa la ni de 'dzin pa mi srid do/ /lan gnyis gsum du ma mthong ba ni mthong ba tsam las 'brel pa can nyid go bar byed par mi 'gyur te/ skad cig ma nyid la ni sgras de bzhin du rtogs pa mi srid do/ /don ldan sngar mthong yin zhe na/ /de ni de tsam long yod min/ /lan gnyis lan gsum ma mthong ba/ /don dang ldan par rtogs pa min/ /rtag pa'i phyogs la yang mthong ba ni rang gi dus tsam yul yin pas ther zug pa nyid du mi rtogs pa'i phyir ji ltar 'brel pa 'dzin par 'gyur/ yang dang yang du mthong ba yin na de'i shugs kyis 'di 'di dang lhan cig par nges pa'am/ 'di 'di'i rjod byed yin zhes bya bar yang 'gyur bar shes pa'o/ /'di la yang kha cig mngon sum du 'dod la/ gzhan dag ni don gyis go bar 'dod do/ /shes pa 'di la yang nges bya nges byed dam brjod bya rjod byed du yang dus dang yul dag las ma nges par rtogs pa yin pas rtag par brjod do/ /gang zhig /dus dang yul la sogs pa las/ /ma nges pa yi dngos yod pa/ /de ni rtag dang khyab bdag 'dod/ /bdag ni khyab bdag nyid du brjod/ /ces gang smos pa'o/ /mthong ba ni nges pa la 'jug pa'i phyir phyin ci log tu rtogs pa'i gnod pas sgra tsam las nges par gnas pa ni ma yin no/ /yongs su bcad pa ni gdong gi ring ba nyid la sogs pa bzhin du gsal bar byed pa'i chos su gnas pa yin te/ gsal byed sgra la rag las phyir/ /de yi yul la 'dzin byed de/ /sgra rnams kyis ni nus pa min/ /nam mkha' bar mtshams med khyab min/ /de phyir ma bcad dngos nyid kyis/ /'di ni gzhan du rtogs byed min/ /'di mthong ba yang gcig yin pa yang thag ring ba nyid dang / khyab nyid la sogs pa'i dbang gis nyi ma bzhin du yul sna tshogs par mthong bar shes pa yin no/ /gang gi tshe skyes bu gcig shar du bltas pas nyi ma mthong ba de'i tshe lho phyogs nyid na gnas pas kyang rang las bltas par mthong la de bzhin du gzhan rnams kyis kyang yin gyi/ gnyis su mthong ba ni ma yin te/ de'i gcig nyid yul sna tshogs pa yin par shes par bya'o/ /ji ltar yang lha sbyin rim gyis yul sna tshogs par phyin kyang tha dad par mi 'gyur ro/ /de bzhin du sgra yang ngo / /'di ci bzhin du shes pa ni/ /gcig nyid yang dang yang mthong ba/ /dus kyi dbye bas tha dad min/ /de bzhin sgra ni yul las min/ /'di'i gcig pa nyid du bsre ba ni spyi'i yul ma yin te/ cha shas med pa nyid kyis gong bu las gzhan med pa'i phyir ro/ /de'i phyir spyi'i shes pa yin yang gong bu yul nyid yin no/ / des na ba lang gi sgra chen po'am/ chung ngu yang zhes bya bas chen po dang chung ngu yin pa'i phyir gsal bar byed pa'i shes pa yang chen po dang chung ngu nyid kho nar gnas pa yin la/ gling bu dang rdza rnga la sogs pa gsal bar byed pa'i sgra rnams chen po la sogs par mthong ba yang yin no/ /sgra de rnams ni sgra nyid yin no zhes bya ba ni kha cig gi'o/ /yi ge dang yi ge ma yin pa'i bdag nyid kyis sgra ni rnam pa gnyis yin pa'i phyir/ rkan la sogs pa rlung rnams kyis nye bar bskyod pa las yi ge bdag nyid du mngon par gsal bar byed pa yin te/ nye bar bskyod pa ni gzhan yin no zhes bya ba ni gzhan rnams kyi'o/ /gzhan dag ni rlung rnams nyid gnas nye bar bskyod pa dang / nye bar bskyod pa ma yin pa dag gis yi ge dang yi ge ma yin pa dag tu mngon par gsal bar byed pa ni gsal ba dang mi gsal ba'i sgra gsal ba yin par smra'o/ / de yang yan lag dang bcas pa yin pa'i phyir chen po nyid la sogs pa dang 'brel pa can rnams gsal bar byed pa la blo de skyed par byed pa yin no/ /sgra rnams rna bas go byed par/ /kha cig smra ste de yi phyir/ /de rnams rlung gis bskul ba nyid/ /rna ba legs par sbyangs pa yin/ / rnga pa Ta ha la sogs pa rnams la dbyig pa la sogs pas mngon par bsnun pa'i rlung gis bskul bas/ rna ba'i yul du 'ongs pa rnams de legs par sbyangs pa las bdag nyid 'dzin par byed du 'jug pa ni rkan la sogs pa bskyod pa med pa'i phyir yi ge'i bdag nyid kho na thos pa yin zhes bya ba'i don to/ /des nye bar bskyod pa ni yi ger mngon par gsal bar byed pa yin te/ de la yang / yi ge gsal ba mthong ba'i phyir/ /de rnams ma mthong bar brtag min/ /zhes smos pa'o/ /yang 'dod pa gzhan bstan pa ni/ /rkan sogs phrad dang dbye ba yi/ /bskul bas gsal ba yi ge ni/ /gsal byed yin 'dod gzhan dag ni/ /sgra nyid kun dang 'brel 'dod pa/ /de phyir yul la sogs pa tha dad pa dang / chen po dang chung ngu nyid la sogs pa yang bor nas sgra tsam la dmigs bzhin pa'i rnam par rtog pa la ni bsnyon par 'os pa ma yin no/ /de la bsnyon par byed pa yin na ni rjes su dpag pa la sogs pa med par thal bar 'gyur ro/ /gang gi phyir de med na khyab pa 'dzin pa med do/ /phyogs 'ga' na yod par mthong ba ni khyab pa 'dzin par byed pa ma yin te/ khyab pa ni de las bzlog pa yin pa'i phyir ro/ /gong bu rnams kho na rnam par rtog pa des rnam par ma bcad pas rtogs par byed pa ni ma yin te/ de rnams kyi de ma yin pa'i ngo bo nyid yin na 'khrul par thal bar 'gyur ba'i phyir ro/ /gnod pa can med pa las ni 'khrul pa mi 'grub pa'i phyir rnam par bcad pa de rnams kyi rnam par bcad pa med pa yin la/ des na 'khrul pa ma yin no/ /de lta yin na sgra'i rtag pa nyid dang khyab bdag nyid du 'gyur ba yin no snyam du sems pa la/ tshad ma rtag pa zhes smos pa ni sgra'i ngo bo'o/ /nyid yod min ni nye bar ma dmigs pa'o/ /ba lang gi sgra ni re re la brjod par tha dad nyid du nye bar dmigs pa yin gyi/ nye bar dmigs pa la rnam par rtog pas gnod pa yang ma yin te/ dngos po yul ma yin pa'i phyir ro/ /dngos po ni rnam par rtog pa'i yul ma yin pa nyid de/ yid tsam gyi la thu rnams ni dngos po ma yin pa'i phyir ro/ / mthong ba'i rjes su 'brangs nas de yul yin no zhe na/ de lta na de'i yang mthong ba nyid nye bar dmigs par byed pa yin pa'i phyir mthong ba'i dbang gis rnam par rtog pa can gyi tshad ma yin no/ /de yang blta bya so sor snang bas khyab par byed pa ni ma yin te/ 'on kyang zhen pas ni ma yin no/ /mthong ba ni so sor snang ba yin la/ de ni gang yang so sor snang bas 'dzin pa yin gyi nges pas ni ma yin no/ /nges pa rnams kyis ma nges pa/ /de ni ji ltar de dag yul/ /de'i phyir de lta bu'i don gyi ngo bo 'dzin par mthong ba la ni de dang mi 'dra ba'i rnam par rtog pas gnod pa ma yin no/ /gnod pa yin yang dngos po spangs nas blang bya la sogs pa'i rnam par dbye ba med pas 'gro ba rnams 'jug pa dang ldog pa mi byed par 'gyur ro/ /rnam par rtog pa ni dngos po mthong ba can ma yin te/ mngon sum gyis mthong ba las ji ltar yang de nyid las sam/ gzhan las kyang rung brda'i rjes su 'brangs pa'am cig shos dag gi rnam par brtag pa'i phyir ro/ /de skad du yang / gzung ba 'dzin phyir kun rdzob ni/ /mi 'dod ces gsungs pa'o/ /de'i de lta bu yang rtag pa las byung ba ma yin te/ rim can min las rim skye med/ / ces bya bas 'gegs par 'gyur ba yin no/ /'di la ni mthong ba zhes bya ba'i rnam par dbye ba'i rnam par dbye ba yin no/ /shes bya ba'i so sor snang ba mi rtag pa nyid kyis de'i bdag nyid mthong ba yang mi rtag pa yin gyi/ rtag par 'dzin pa ni ma yin par bstan pa ni/ shes bya mi rtag pa nyid kyis zhes bya ba la sogs pa'o/ /mi rtag pa yang rtag par 'dzin pa ma yin par bstan pa ni/ rim bzhin skye ba zhes bya ba ste/ mi rtag pa ni rtag pa las skye bar mi 'thad pa'i phyir rtag pas rang gi so sor snang ba skyed par byed pa'i sgo nas mthong ba bskyed pa ni de'i 'dzin byed du 'gyur ro/ /des bskyed par bya ba'i so sor snang ba ni rtag pa ma yin pa'i phyir de ji ltar 'dzin pa yin/ rang gi so sor snang ba skyed par byed pa nyid ni gzung bya nyid yin no/ /ji skad du/ rigs shes pas/ shes pa'i rnam par 'jog nus pa/ /rgyu nyid la ni bzung bar shes/ / zhes gsungs pa'o/ /de rtag pa yang gsal bar byed pa'i dbang gis yin par ni nges pa can ma yin te/ gsal bar byed pa'i sgra ni so sor snang ba la rag las pa'i phyir ro/ /de 'dzin pa ni yul de la ltos pa yin no zhe na/ ltos pa mi rung ba'i phyir zhes bya ba smos so/ /gsal byar byed pa ni snang ba la ltos nas sgra tha dad par mthong ba la bsnyon par byed na ri bong la rwa yod par khas blangs pas bsnyon par mi byed pa ma yin/ yul dang dus la sogs pa'i nges pas sgra so sor snang ba yang gzhan du yin pa nyid du ji ltar srid par 'gyur/ glo bur ba'i snang ba 'di bum pa la sogs pas kyang ji ltar spong bar byed/ 'on te rkan la sogs pa'i bya ba yod na sgra gar 'dod pa de ltar snang ba yin la/ des na rtag pa dang khyab pa can du yang gang dang gang gzung ba'i yul de thams cad na sgra yod pa yin no/ /de bzhin du rgyu yod na bum pa la sogs pa yang yin no/ /yan lag dang bcas pa yin pa'i phyir de rnams rtag pa ma yin zhe na/ yul la sogs pa'i rnam par dbye ba bzhin du cha shas la sogs pa'i rnam par dbye ba yang gsal bar byed pa'i rgyu mtshan du cis rtogs par mi byed/ chos thams cad du mthong bar khas len par byed pa yin la/ shes pa dang 'dod pa la sogs pa bdag gi chos rnams de'i gnas skabs cha shas med pa yin yang ji ltar rtag par khas len pa yin/ de'i phyir mthong ba tshad mar byed na bum pa la sogs pa bzhin du sgra mi rtag par khas blang bar bya dgos so/ gzhan du na thams cad rtag pa nyid dam thams cad med par 'gyur ro zhes bya ba 'di ni nges pa yin no/ /bum pa la sogs pa rnams kyis mi rtag pa nyid kyang spyi rtag pa yin pa'i phyir tha snyad ni de nyid kyi rjes su 'brangs pa las skye bar 'gyur ba yin la sgra la ni ma yin te/ spyi med pa'i phyir ro/ /sgra la spyi med pa yin par tshe dang ldan pa khyod kyis ci las shes/ cha shas med pa yin no zhe na/ ma yin te/ rjes su dpag pa la mngon sum gyi spyi shes pas gnod par byed pa'i phyir shes pa dang 'dod pa la sogs pa rnams kyi cha shas med pa'i spyi med pa ma yin te/ gnyi ga'i so sor snang bas spyi dang khyad par dag ma bkag pa'i phyir sgra nyid kyis so sor snang bzhin pa'i spyi ni yod pa ma yin no/ /de lta na de nyid tha snyad kyi rgyu mtshan yin no/ /ma yin te/ mthong ba la spyi mi snang ba'i phyir ro/ /spyi ni rnam par rtog pas kyang tha dad par go bar byed pa ma yin te/ snang ba kho na la de nyid la sogs par zhen pa'i phyir dang / de ltar mthong ba dang 'gal ba'i phyir dang / de'i don gcig tu bya ba nyid de nyid du rnam par gnas pa yin pa'i phyir spyir thal ba'i skyon med do/ /gong bu de rnams nyid rnam par rtog pas de mi byed par rnam par bcad pas yul la nges par rtogs pa yin te/ spyi la nges pa yin yang gong bu ma nges pa yin tha snyad med pa'i phyir ro/ /des na gong bu'i mtshan nyid kyis tha snyad la dang po nyid du de ltar 'gyur ba'i phyir spyi ni grub pa la nye bar 'god pa yin pas dgos pa med bzhin du skyed par byed pa yin no/ /gong bu ni gcig kho na ma yin te/ so sor mngon du phyogs pas du ma'i sgrar nye bar dmigs pa'i phyir ro/ /nyi ma bzhin du cig car ba nyid yin no zhe na/ de yang gcig pa yin par ci las shes/ lha sbyin ni snga dro shar du bltas pa na nyi ma mdun na gnas par mthong la/ de'i g.yas phyogs na gnas pa gnyis kyis rang gi da ltar ba dang / g.yon phyogs kyi lha sbyin gyi zhes gnyis su mthong ba med pa'i phyir gcig yin no zhe na/ de lta yin la gang la gnyis su mthong ba de la ji ltar de bzhin du gcig gi bdag nyid yin pa ni sgra dag la gnyis su mthong ba yin no/ /'bras bu'i yul rnams nyid ni tha dad pa yin yang sgra ni ma yin no zhe na/ yul bzhin du de'i yul can yang tha dad pa nyid du snang ba yin no/ /de'i phyir 'di yang / yul gyi dbye bas tha dad nyid/ /yin par 'di yang dpag bya yin/ /de nyid 'di zhes mngon sum pa'i/ /shes pa de la gnod byed yin/ /zhes bya bas bsal ba yin no/ de'i phyir de ltar na sgra ni skad cig re re zhing du ba bzhin du tha dad pa yin yang / snang bzhin pa'i rnam par rtog pa bskyed pa yin na/ des na yang de bzhin du zhen pa las rjod byed du 'gyur ro/ / rjod byed nyid du grub pa la gang yang brjod btsam gyis 'jig pa ni don rtogs par byed par mi nus pa'i phyir gzhan gyi don du rjod par byed par mi 'gyur zhes rgol ba dang / 'ga' yang don dang ldan pa ma yin te/ thams cad don med pa'i phyir ro zhes rgol ba gang smra ba 'di yang bsnyeg pa tsam yin te/ de ni 'brel pa 'dzin pa'i dus su de dang gcig tu bsre bas thams cad 'brel pa can yin pas 'dzin pa'i phyir ro/ /gcig tu bsre ba'i rgyu mtshan ni 'dra bar bstan pa yin gyi/ gnod pa can gyi rgyu mtshan ni ma yin no/ /des na don dang ldan pa ste/ 'dra ba la don rtogs pa yin no zhe na zhes bya ba ni/ gzhan gyi 'dod pa yin par dogs pa ma yin no/ /des na sgras brjod pa las gcig pu rtogs pa yin te/ 'brel pa 'dzin pa'i phyir ro/ /de bzhin du phyi ma las kyang ngo zhes gang bstan pa'o/ /de yang 'dra ba las rjod byed yin pa ni ma yin no/ /'on te 'di don yod pa yin yang su yang 'dzin par byed pa ma yin no/ /phyi ma'i yang de dang mtshungs pa yin pa'i phyir/ 'dra ba yin na cis rjod byed ma yin zhes bya bar pha rol po'i yang mthun pa nyid yin no/ /mang po rnams ba lang gi sgra rnams su brjod pa na de nyid la de'o zhes shes pa ma yin nam/ de dang 'dra ba nyid kyis shes pa ni ma yin no/ /'dra ba nyid du ma shes na de'i sgo nas kyang rjod byed ma yin te/ 'dra ba rnam pa gnyis la gcig par de nyid shes pa'i go bya yin la/ gzhan ni 'dra ba'i shes pa skyed par byed pa yin no/ / gcig pa nyid du mthong ba dang 'gal ba'i phyir 'khrul pa nyid yin no/ /brda la sogs pa yin na sgra ni lcags kyu bzhin du dran byed yin gyi/ rang bzhin gyis rjod byed du ni mi 'gyur ro zhe na/ ji ltar snang ba de ltar yin du zad mod sgra ni du ba bzhin nam/ gsal ba bzhin du brjod bya la nges pa can dang gsal bar byed pa ma yin pa de ltar mthong ba yin no/ /sgra dang don yang rtag par 'gyur du zin yang phan tshun ltos pa med pa'i phyir de dag las bdag gang nam mkha' bzhin du 'brel par bstan pa ni ltos pa mi rung ba'i phyir zhes bya ba ste/ gzhan la ltos pa 'brel pa yin/ / de med ji ltar ltos pa yin/ /yod na'ang thams cad 'dod min na/ /dngos po ji ltar ltos byed nyid/ /ces bya'i tshig gi ltos pa'i mtshan nyid ni 'brel pa yin no/ /sgra ni me dang 'dra ba rang bzhin gyis gsal byar byed pa yin no zhe na/ de lta yin na rtag pa nyid du sgrub pa la don med do/ /de 'brel pa 'dzin pa'i yan lag yin no zhe na/ 'dzin pa med na rtag pa yin/ /zhes bya ba'i 'brel pa 'dzin par byed pa ma yin la/ de bzhin du 'dzin pa yang mthong ba las ma yin te/ rnam par rtog pa yang mthong ba'i rjes su 'brangs nas rtag pa nyid du rig pa ma yin te/ 'on kyang de mi byed pa rnam par gcod par byed pa na rang gi mtshan nyid kho nas yin la/ de la ni dgos pa med la gzhan du yang rig pa yin no/ /de'i phyir sgra rtag pa nyid du sgrub par byed pa ni/ nga ni mi chen po'o zhes bya ba tsam yin no/ /de lta yin na don dang 'brel pa ni du ba bzhin rang bzhin gyis mi rtag pa yin te/ don gyis sam skyes bus phan gdags par bya ba yin pa'i phyir ro snyam du sems pa la/ rnam 'gas phan gdags bya min phyir/ /zhes bya ba ste don gyis so/ /de nye ba la ma ltos par byed pa'i yon tan dang / smra bar 'dod pa dag gi dbang gis 'byung ba'i phyir ro/ /me bzhin du gsal bar byed pa nyid kyang de bzhin du 'dzin pa ma yin na mi 'gyur ro/ /rang bzhin gyis gsal bar byed pa yin na me dang 'dra ba de bzhin du 'dzin pa la phan par byed pa ma yin zhes kyang bstan pa yin no/ /'brel pa can ma yin pa yang rang bzhin gyis 'brel pa can du byed pa ni skyes bu yin no zhe na/ ma yin te/ de'i rang bzhin la des de ltar byed par mi nus pa'i phyir ro/ /ma yin te/ nas ni khre'i myu gu dang 'brel pa can du bya bar mi nus so/ /phrad par byed par nus pa yin no zhe na/ ma yin te/ sgra dang don dag rdzas ma yin pa nyid kyis phrad pa med pa'i phyir ro/ /'du ba 'bras bu'i rjod byed nyid ma yin pa go byed nyid du byed pa ni yin no/ /rjod byed ma yin pa ji ltar de ltar byed pa yin/ de ltar ma yin na mes du ba'i byed pa dang go byed kyang ji ltar yin/ bden te/ mes bskyed bya de nyid yin pa ni rjes su 'gro ba dang ldog pa'i rjes su byed pa las/ rang bzhin gyis go bar byed pa min la/ sgra ni de bzhin du don gyis bskyed bya dang de'i rjes su 'gro ba dang ldog pa'i rjes su byed pa can ma yin te/ brjod par 'dod pa la sogs pa las byung ba'i phyir ro/ / de las byung ba yin yang mngon par bsam pas rjod byed yin no zhe na/ rjod byed nyid dam brjod bya nyid ni dngos su ba ma yin pa'i phyir rtsig pa la ri mo bzhin du sgrar grub pa yin na rjod byed du 'ongs pa yin no/ /skyes bus 'dus byas pa'i dngos por byed pa yin no zhe na/ ma yin te/ de lta bu'i rkyen las gzhan par ma mthong ba'i phyir ro/ /rkyen rtogs bzhin pa 'phangs pa yin no zhe na/ nam mkha'i me tog la sogs pa yang da ni dngos por thal bar 'gyur ro/ /de'i phyir rjod byed nyid ni smra ba pos de ltar rnam par gzhag pa yin pas blo'i chos yin gyi/ dngos po'i chos ni ma yin no/ /ji skad du de ni rnam par rtog pa yin pas med pa'i phyir byed bzhin pa'i yang 'brel pa ni sgra dang lhan cig byed pa ma yin te/ sgra dang 'brel pa dang de'i tha snyad du byed pa rnams rim bzhin 'byung ba nyid kyis lhan cig byed bar mi nus pa'i phyir ro/ /sgra brjod pa dang 'brel byed dang / /tha snyad par ni byed pa rnams/ /rim gyis 'byung ba'i rang bzhin phyir/ /gang du cig car byed sus nus/ /zhes smos pa'o/ /sgra brjod pas kyang 'brel pa byed pa ma yin te/ byed pa'i dus su sgra zhig pa'i phyir ro/ / byas pa yin na yang de la dgos pa ci yang med do/ /re zhig sgra yis ma brjod na/ /'brel par byed pa ci las yin/ /brjod pa tsam gyis zhig pa la/ /'brel pa dgos pa med pa yin/ /rnam par brtag pa la ni byed pa'am ston pa nyid la de bde bar byed pa nyid yin no/ /de la ltos nas/ dngos po rang nyid ma 'dres pa/ /de rnams rnam rtog gis 'dres byed/ /ces bya ba'i tshig gis ni da thams cad bslad pa yin no/ /de'i phyir/ zhig med da ltar ba rnams la/ /brjod pa srid pa ma yin no/ /zhes bya ba 'di la ni 'brel pa med pa yin te/ zhig pa la sogs pa'i sgra rnams la ni de byed pa ma yin pa rnam par gcod pa'i bdag nyid kyi rnam par rtog pas zhen pa'i sgra rnams la brten nas/ 'brel pa rnam par gzhag pa dang brjod pa dag yod pa'i phyir ro/ /gang zhig gang gis byed pa'am/ /rjod par byed pa yin zhe na// ma grub pa yi grub pas so/ /gang dag grub pa yin pa ni brjod par dka' ba yin no zhe na/ legs par sbyangs pa rnams kyis brjod pa'i sgras ni 'di brjod sla ba kho na yin no/ /yul a d+ha la sogs pa'i rang skad kyi sgras legs par sbyar ba'i skad kyi don go bar mthong ba yin no/ /legs par sbyar ba kho na sgra ma yin nam/ skad ces bya ba 'ga' yang yod pa ma yin te/ go'i sgra kho na brjod par 'dod kyang mi nus pa ni/ g+ha ba'i sgra la sogs pa rjod par byed do/ /don dang ldan pa gzhan ni 'dra ba nyid la rjod byed ma yin no/ /des na mi nus pas kyang shugs kyis go ba'i sgra brjod pa yang yin la/ brjod kyang go'i sgra nyid yin no/ /'dra ba nyid la rjod byed nyid yin na/ ga'u ra'i sgra las kyang lkog shal la sogs pa'i don rtogs par 'gyur ro/ /g+ha bi la sogs pa yang go'i blo/ /rtsa ba'i sgra yi rjes 'brangs yin/ /'di yi rgyu mtshan 'dra ba las/ /ga'u ra'i sgra las nges par 'gyur/ /smras pa/ tsA gI bi dang / a bi zhes bya ba la sogs pa'i sgra rnams go'i sgra dran par byed pa yin la/ de las go nyid du shes pa yin nam/ 'on te go'i sgra nyid de bzhin du rtogs pa'i rjod byed yin par 'gyur grang na/ re zhig dran par byed pa ni ma yin te/ kla kli la sogs pa bzhin rnams kyi tha snyad pa'i go'i sgra la sogs pa ni dran pa ma yin pa'i phyir ro/ /legs par sbyar ba rigs pa rnams kyang skad kyi tha snyad kyi dus su legs par sbyar ba dran pa las bar du chod pa ma rtogs pa'i phyir ro/ / go'i sgra nyid ni de ltar rtogs pa ma yin te/ snang ba tha dad pa'i phyir ro/ /ga bi la sogs pa rab tu sbyor ba la yang go'i sgra nyid rjod byed ma yin te/ ma rtogs pa ni rjod byed ma yin pa'i phyir ro/ /de ltar yin na sgra rnams kyi de nyid du thal bar 'gyur ba'i phyir ro/ /de'i phyir gtsang sbra can rnams kyi rnam par spros pa des chog go/ /de'i phyir gang zhig la gang grags pa de ni de'i rjes su 'brangs nas sam tha snyad mthong ba las gzhan du rtogs pa yin gyi/ don dam pa pa ni ma yin zhes bya bar gnas so/ /de la/ mi rtag pa la'ang tshad med nyid/ /ces bya ba smos so/ / 'bras bu la rtag pa lhan cig byed pa la ltos pa ci las yin te mi rigs so/ /gang gi phyir lhan cig byed pas byas pa phul du byung ba yin na/ rtag pa yang rim gyis byed par 'gyur ro snyam du sems pa la/ rnam 'gas phan gdags bya min phyir/ /zhes bya ba smos te/ lhan cig byed pas byas pa rnams kyi gnas skabs nyid byed pa po yin pa'i phyir de'i sgo nas gnas skabs pa'i bya ba nyid yin na/ bya ba dang cig shos dag la bye brag med par byed pa po nyid yin la/ bye brag med na yang thug pa med pa yin te/ gnas skabs nyid kyi rjes su 'gro ba la sogs pa'i rjes su byed pa'i 'bras bu yin gyi/ gnas skabs pa'i ma yin pa'i phyir rtag par byed pa po ma yin no/ /lhan cig byed pa nyid du phul du byung ba yin gyi/ gzhan ni ma yin pa ma yin nam de yang res 'ga' ba yin pa'i phyir 'bras bu yang res 'ga' ba yin gyi/ des na rtag pa ni 'ga' yang khyad par du byed pa ma yin te/ byed pa yin na yang de yang ji ltar yin/ khyad par gzhan byed pa yin na yang thug pa med pa yin no/ /de'i phyir mtha'i gnas skabs bzhin du lhan cig byed pa po nyid kho na rgyu nyid yin gyi/ khyad par du byed pa po nyid ma yin no snyam du sems pa la/ rnam 'gas phan gdags bya min phyir/ /zhes bya ba smos so/ /de lta yin na dang po'i gnas skabs gang yin pa can lhan cig byed pa'i dus su yang gnas skabs de nyid yin pas phan gdags pa ma yin pa'i phyir dang po bzhin du khyad par can mi bskyed pa yin la/ dus phyis kyang yal bar 'jug pa yin zhes bya ba'i don to/ /'bras bu ni lhan cig byed pa kho na las byung ba yin no/ /de lta yin na gzhan na lhan cig byed pa yod kyang ci mi 'byung ba yin/ de lta yin na dang po skyed byed ma yin pa'i ngo bo de bcad pa yin no/ /yang na/ gal te rtag pa dus gzhan na yang yod pa rim bzhin byed pa po nyid ma yin na skad cig ma ni ches shin tu ma yin te/ skad cig phyi ma la reg pa ma yin pa'i phyir rim gyis ma yin no snyam du sems pa la/ rnam 'gas phan gdags bya min phyir/ /zhes bya ba smos te/ mi rtag pa la'ang rim bzhin pa la tshad ma med ces bya ba la/ min zhes bya ba dang sbyar ro/ /ci las shes she na/ mi rtag pa la rnam pa 'gas phan gdags par bya ba nyid yin pa'i phyir ro/ /sa la sogs pa rnams kyis sa bon la rim gyis phan pa byed pa mthong bas thug pa med pa yang yin te/ skad cig dang po la nye bar 'gro ba'i rgyu rnams kyis tshogs par khyad par can skyed par byed pa yin pa'i phyir ro/ /gnas skabs de kho na 'bras bu skyed par byed pa ni ma yin te/ phyi ma bzhin du dang po yang yin par thal bar 'gyur ro/ /bshad par byed pas bshad pa ni/ /tshad ma rtag pa nyid yod min/ /zhes bya ba ni ther zug pa'i rtag pa ni/ dus 'di dang dus phyi mar yang gcig pa'i bdag nyid yin la/ de las bzlog pas khyab pa yin pas mi shes pa'i phyir yang dag nyid du gsungs zhes bya bas bsal nas/ da ni rgyun gyis rtag pa ni sems kyi rang bzhin rnams kyi sems dang ldan pa dang sems dang mi ldan pa bzhin du skyon gyi gnyen po yon tan gyi rgyu ston par byed pas yang dag nyid gsungs ni tshad ma nyid yin la/ de las byung ba ma yin pas ni des nus pa mthong bas ston pa ni de las byung ba ma yin pa'i phyir go bar byed pa ma yin no zhes bstan pa ni/ rnam 'gas zhes bya ba la sogs pa'o/ /mnyes pa yin na 'dod chags la sogs pa nye bar zhi ba'i rgyu yin pas 'di'i nus pa 'di 'byung ba yin no/ /mnyes pa yin na dug zhi ba dang ri lu dang mig sman la sogs pa grub par mthong ba yin no snyam du sems pas/ 'on te mnyes par bya ba'i rim gyis zhes bya ba la sogs pa zer ba la lan ni/ de bshad rjes su sgrub pa yis/ /'jig rten rjes 'dzin zhes bya ba ste/ 'dod chags la sogs pa nye bar zhi ba'i ngo bo gang gis rtogs pa'i srog chags sdig pa'i dug zhi bar nus pas/ klu'i rgyal po 'jog po'i dug sel ba'i nus pa shes par mi rigs te/ skyes bu'i don bag tsam byed par nus par mthong ba las/ phul du byung ba'i yon tan phun sum tshogs pa ma lus pa phul du byung ba dang 'brel pa can bla na med pa'i bsod nams la sogs pas bsgrubs pa'i mya ngan las 'das pa'am de ster ba'i nus pa rtogs pa ni ma yin te/ thal ches pa'i phyir skyes bu'i don bag tsam byin pa'i nus pa gang yang yod pa ma yin zhes bya ba'i don to/ /mngon sum la sogs pa ni 'jug pa'i yul nye bar 'thob par byed pa nyid kyis phan par byed pa yin pa'i phyir tshad ma ma yin nam/ phan gdags par bya ba yin pa'i phyir ni ma yin no/ /de'i phyir tshad ma nyid la phan gdags par bya ba nyid yin pa ni 'gal ba med do snyam du sems pa la/ gang zhig ci zhig rnam pa ltar/ /zhes bya ba smos te/ mi mthun pa'i phyogs mthong nas gnyen po dmigs pa na/ nus pa nye bar dmigs pa las ston par byed pa ni gzhan gyi tshad ma yin no/ /gzhan du na nus pa ma shes pa yin na mi mthun pa dang gnyen po dag ji ltar ston par byed pa yin zhes bya ba'i don to/ /'dod chags dang bral ba nyams su myong bas ni de'i lam mam/ de las bzlog pa yang shugs kyis go ba kho na yin no zhe na/ de la ni 'di 'dra ba'i bya ba yod pa ma yin te zhes bya ba smos so/ /ci yang yod ces bya bar ni/ shugs kyis go ba ni bden no/ /ci yang med ces rnam shes pa/ /mi rnams la ni gang du dgos/ /'dod chags dang bral ba ji lta ba bzhin du don thams cad mthong ba yang 'di'i yong pa ma yin nam/ ji ltar nus pa yongs su gcod pa yin snyam du sems pas zer ba ni/ 'on te de'i thams cad ces bya ba'o/ /lan ni de ni mi rigs te/ 'dod chags la sogs pa nyams su ma myong na zhes bya ba'o/ /gzhan la ltos pa'i 'dod chags la sogs gzung bya nyid du rigs pa yin te/ rjes su 'dzin pa dang nye bar 'joms pa bdag nyid kyis ni ma yin te/ 'di ni rang gi rig pa yin pa'i phyir/ de nyid kyi ngo bo rang mtshan nyid yin gyi gzhan ni ma yin no zhes bya ba'i don to/ /rang rig pa nyid nyams su myong ba nyid kyis grol ba ma yin par bstan pa ni/ nyams su myong na ni zhes bya ba'o/ /'on te 'dod chags la sogs pa dang ldan pa 'di dbang phyug nyid la sogs pa dang ldan pa ni 'dod chags dang bral ba ma yin snyam du sems pa na/ 'on te 'dod chags pa zhes bya ba'o/ /gal te 'dod chags la sogs pa dbang phyug nyid kyi mi mthun pa'i phyogs ma yin na gzhan la yang de'i gnyen po ston pa la don med pa yin no/ /de kho na bzhin du de dang 'brel pa la yang dbang phyug nyid yod pa'i phyir ro zhes lan du brjod pa ni/ gal te 'dod chags la sogs dang / /ldan yang zhes bya ba smos so/ /gang dag 'dod chags la sogs pa dang ldan pa de dag gis de spangs pa yin na dbang phyug nyid du 'gyur ba yin la/ ma spangs na ni ma yin te/ rang nyid las grub pa med pa'i phyir ro/ /rang nyid las grub pa yin na ni 'gal ba med do snyam du sems pas/ 'on te 'di ni dngos po'i gnas lugs yin te zhes bya ba ste/ 'dod chags dang bral ba dang 'brel pa can bdag por gyur pa la sogs pa yon tan rnams 'dod chags dang bcas pa la ni ma yin te/ 'gal ba'i phyir ro zhes bya ba'i don to/ /lan ni/ gal te de ltar chags bral sogs/ /zhes bya ba smos te/ de lta yin na de yang 'dod chags la sogs pa dang 'gal ba 'dod chags dang bral ba la sogs pa bsgom pa dang 'brel pa can dbang phyug nyid la sogs pa rnams yin no zhes bya ba'i don to/ /du ba dang me dag gi bskyed bya du ba'i dbye ba bzhin du goms pas bskyed bya dang cig shos tha dad par 'gal ba yin no zhe na/ 'dod chags dang bral ba la sogs pa gnyen po la sogs pa zhes bya ba smos te/ dang po goms pa las byung ba las de las gzhan pa de las 'byung ba yin pa ni me las byung ba'i du ba las gzhan pa'i du ba zhes bya bar ni rigs so zhes bya ba'i don to/ /'on te rnal 'byor pa'i nus pa bsam gyis mi khyab pa'i phyir 'dod chags la sogs pa dang 'brel pa yin yang yon tan rnams 'byung ba yang ji ltar yin/ de lta yin na de dang 'brel pa gzhan yang de'i nus pa nyid las yon tan de rnams su 'gyur la/ de la yang 'dod chags dang bral ba'i bsgom pa bstan pa la dgos pa ci yod snyam du dgongs pas/ gang gis dbang phyug bsgrub pa dang / /zhes bya ba smos so/ /'on te gzhan gyi 'dod chags la sogs pa dang 'gal ba las 'dod chags dang bral ba dang 'brel pa can gyi yon tan du bya bar mi nus na ni rang la yang de rnams kyis 'gal bar byed pa ji ltar nus snyam du sems pa bzhin du bstan pa ni/ 'on te de la nus pa de/ /med na zhes bya ba ste/ gzhan yang ste/ rang la yang byed par nus pa ji ltar yin/ de dag tsam ni de'i rang gi don dang gzhan gyi don phun sum tshogs pa dang bral bas de'i skyes bu'i don nyid tshad ma ma yin par bshad nas/ da ni rjes su 'dzin pa'i nus pa can de lta bu'i dbang phyug la ste/ gang la tshad ma med pa de zhes 'bru mang po pa'i bsdu ba'i don du bshad par byed pa ni rjes su 'dzin pa'i zhes bya ba ste/ de nyid rnam par dbye ba ni/ /'di yang don yin te zhes bya ba la sogs pas so/ /zhi ba pa dang phyugs bdag la sogs pa'i grub mtha' las/ 'bras bur gyur pa las byed pa po kA dam pa ni snyan dngags la sogs pa bzhin du go ba yin la/ de yang de ltar go ba ni grub pa'i mthas rjes su 'dzin pa bzhin du dbang phyug la sogs pa rjes su 'dzin par byed pa yang srid pa yin no/ /gzhan du na 'di nyid ci'i phyir byed pa yin/ de ltar gnas pa yin na gang de de bzhin du mi byed pa de la mi nus pa'i phyir zhes go ba yin no snyam du sems pa ni/ 'on te ma nyes par byas pa la sogs pa zhes bya ba'o/ /rjes su 'dzin par byed pa de ltar ma yin na zhes bya ba ni bshad pa nyid med na'o/ /lan ni/ des bshad rjes su bsgrubs pa yis/ /zhes bya ba ste/ de'i byed pa yin yang rjes su 'dzin gzhan byed par ci las nges pa yin/ srid pa las nges pa yin no zhe na/ de las bzlog pa nyid du cis mi srid pa yin te/ res 'ga' ni shin du slu ba kho na'i don du de ltar byed pa yin no/ /'on te lung la sogs pa las de go ba yin te/ rjes su 'dzin pa gzhan du byed par 'dod pas 'di byed pa yin gyi/ slu ba'i don du ni ma yin no snyam du sems pa ni/ des bshad ces bya ba'o/ /rjes su 'dzin pa bzhin byed par 'gyur zhes bya ba'o/ /tshig kyang mngon sum la sogs pa'i rjes su 'dzin pa med na/ de'i grub pa po nyid sgrub par byed pa ma yin zhes lan du brjod pa ni/ de lta na phan tshun brten par 'gyur zhes bya ba'o/ /de nyid gsal bar byed pa ni/ /des bshad phyir des lung yin la/ /zhes bya ba ste/ rjes su 'dzin pa'i byed pa po nyid kyi tshig tshad ma yin pa ni/ des bshad pa la nges pa can du de byed pa po nyid kyis byas pa kho na yin pa'i phyir nges pa yin gyi gzhan du ni ma yin no zhes bya ba'i don to/ /de ltar na 'bras bu mi dmigs pa bstan pa yin no/ /rgyu mi dmigs pa bstan pa ni/ /de yi nus pa 'di 'dra ste/ /zhes bya ba ste/ thams cad rjes su 'dzin pa nyid dang / thams cad mkhyen pa nyid kyi ngo bo'o/ /yul dang dus dang rnam pa la nges pa'i ngo bo rgyu rkyen ma yin par ni mi rigs so/ /snga ma snga ma'i rgyud du byung ba tsam zhes bya ba ni snang bzhin pa ma yin pa rtogs pa ma yin te/ thal ches pa'i phyir ro zhes bya ba'i don to/ /sbyin pa la sogs pa'i thabs la goms pa'i rgyu las 'bras bu 'byung ba ni kho bo cag gi ni ma yin te/ rgyu med pa'i phyir ro zhes bstan pa ni/ de yi thams cad mthong ba dang / /rjes su 'dzin zhes bya ba'o/ /ji ltar rgyu mthong ba las 'bras bu srid pa de bzhin du/ nges pa can me la sogs pa'i rang bzhin mthong ba las kyang / de'i rang bzhin gzhan srid par mthong ba kho na yin snyam du sems pa ni/ 'dir de lta bu byung ba'i dngos po'i zhes bya ba'o/ /lan ni/ gal te rang bzhin mngon sum du/ /zhes bya ba ste/ nges pa'i rang bzhin mthong ba las gzhan yang nges pa can gyi rang bzhin tsam gang cung zad ces bya bar 'gyur la/ de yang thams cad mthong ba dang / rjes su 'dzin pa'i ngo bo dang / cig shos zhes bya bar ci las nges pa yin/ de nges pa yin na 'di la dngos po'i rang bzhin nyid ces bya ba la sogs pa lan yin la/ ma nges pa la ni ma yin no/ /gal te mthong ba'i yul la'ang 'di ji ltar lan yin/ gal te mthong ba nyid kyis sreg par byed pa yin na/ 'byung ba nyid kyang mthong ba yin pa'i phyir/ dngos po des kyang sreg par byed par 'gyur ro/ /de'i phyir nam mkha' yang sreg byed 'gyur ba'i phyir/ mthong ba nyid ni ma nges pa can yin no/ /de'i phyir nges pa'i ngo bos sreg byed yin par ni rigs la/ de ni mthong ba dang ma mthong ba la yang bye brag med do snyam du sems pa ni/ gal te 'byung ba nyid kyis zhes bya ba'o/ /nges pa can ni mthong ba na de lta bu yin no zhes smra bar nus pa yin na/ mthong bas ji ltar yin lan ni mi mtshungs te/ me ni mthong ba'i phyir dang / zhes bya ba ste/ ma mthong ba las de ltar smra ba yin na ni thal ches par bstan pa ni/ bdag nyid mngon 'dod 'ga' zhig ces bya ba'o/ /ji ltar rtag pa tshad ma yin par tshad mas rtogs pa ma yin pa de bzhin du/ khyed kyis 'dod pa'i mi rtag pa yang yin te/ gang gi phyir phan byed ni phan bya slob ma bzhin du mi rtag pa'i phan byar mi 'gyur ba yin te/ gzhan du ni mi rtag pa nyid du mi rigs pa'i phyir/ rtag pa yang mnyes pa la ltos nas rjes su byed pa yin na ni/ mnyes pas rjes su bya ba dang ma mnyes pas slar gnod par bya ba yang ma yin te/ 'ba' zhig de ni de yod na phan par byed pa'am/ gnod pa byed pa yin snyam du sems pa na/ rnam 'gas phan gdags bya min phyir/ /zhes bya ba smos te/ mi rtag pa la'ang tshad ma ma med nyid ces gang bstan pa de la/ min zhes bya ba dang sbyar te/ mi rtag pa yang rgyu'i dbang gis 'byung ba yin na 'u bu cag la sogs pa'i phan pa byed pa yin pa'i phyir/ mngon sum bzhin du tshad ma yin no zhes bya ba'i don to/ /yang na rtag pa tshad ma ma yin te ma rtogs pa'i phyir ro/ /mi rtag pa yang tshad ma ma yin te phan bya ma yin pa'i phyir ro/ /'bras bu la sogs pa nyid ni snga na med pa mngon sum du mthong bar rang tsam rig pas ma rig pa'i phyir ro/ /'on te yang / don 'di la lung ni skad cig ma las sam/ skad cig ma ma yin pa las kyang tshad ma ma yin par bstan pa ni/ rnam 'gas phan gdags bya min phyir/ /zhes bya ba'o/ /yang na ji ltar rtag pa ma rtogs pa'i phyir/ tshad ma ma yin pa de bzhin du mi rtag pa ni nyan thos dang rang sangs rgyas kyi tshul la tshad mar grub pa yin yang / kho bo cag gi tshad ma ma yin te/ phan pa byed pa ma yin pa'i phyir ro/ /de ni bla na med pa'i chos ston pa'i sgo nas bdag cag la phan pa byed pa ma yin te/ rang gis bdag nyid tsam gdul bar byed pa yin no zhes bstan pa ni/ rnam 'gas phan gdags bya min phyir/ /zhes bya ba ste/ bla na med pa'i chos bstan pas bdag cag la sogs pa la phan gdags par bya ba 'di la med ces bya ba ni/ phan gdags bya ba min pa ste/ /de'i ngo bo ni de nyid de/ de'i phyir ro/ /rig byed kyi mtha' rig pa pa rnams dang / ji srid tshol ba la sogs pa rnams kyi mngon par 'dod pa'i tshad ma yang rigs pa 'di nyid kyis bsal ba yin par rig par bya ba'o/ /de lta mod kyi re zhig bdag dam pa gcig po ni thams cad shes pa dang byed pa po yin la/ 'u bu cag rnams kyi bdag ni de'i phyogs gcig gi rang bzhin yin la/ ma rig pa rnam par gcod pas nam mkha' la bum pa la sogs pas rnam par gcod pa bzhin du rtog pa yin no/ /de las rnam par gcod pa'i yod pa dang med pa dag gis bcings pa dang / grol ba dang rtag pa dang mi rtag pa la sogs pa rnam par gzhag pa yin te/ gnas skabs tha dad pas gnas skabs can du yod pa'i ngo bo tha dad pa ni ma yin te/ thams cad du gcig pa'i ngo bo nyid yin pa'i phyir/ de kho na nyid de nyid yin te/ de'i ngo bo 'dzin pa la ma 'khrul pa'i phyir ro/ /bum pa 'dzin pa bzhin du de'i 'dzin pa yang snam bu 'gegs pa ma yin te/ ma 'khrul pa can nyid tshad ma ma yin no/ /de yang / med pa'i dngos po yod pa min/ /yod pa'i dngos po med pa min/ /zhes smos te/ med pa bum pa la sogs pa'i yod pa ni med de/ rmi lam bzhin du 'khrul pa yin pa'i phyir ro/ /yod pa ste yod pa'i ngo bo med pa ni med de/ ma 'khrul pa yin pa'i phyir ro zhes bya ba'i don to/ /'di nyid dang cig shos kyi ngo bo nye bar ston pa yin par bstan pa ni/ 'byung po rnams kyi mtshan mo gang / /de ni legs gdams rab sad yin te/ yod pa'i ngo bo la zhes bya ba'i don to/ /'byung po rnams kyi rab sad gang / /de ni thub pas mtshan mor mthong ste/ bum pa la sogs pa'i dbye ba'i spros pa zhes bya ba'i don to/ /gzhan dag na re bdag dam pa rtag pa las bdag cag la sogs pa'i bdag ni spros pa yin te/ lcags kyi gong bu las 'phros pa bzhin du skye ba yin no/ /des na rtag pa dang mi rtag pa la sogs pa rnam par gzhag pa yin zhes tshangs pa rig pa po rnams so/ /ngo tsha med pa pa rnams ni srog gcig kho na rim pa dang rim pa ma yin pa 'byung bas dngos po sna tshogs pa rtogs pa gnas skabs can ni/ khyad par gyi dbye bas 'byed pa na/ rtag pa yang rnam pa 'gas mi rtag pa yang yin zhes rnam par gzhag par byed pa yin te/ dper na yi ge ga dang a'u dang tsheg drag rnams kyang rang nyid rtag pa dang / rim pa med pa yin yang / rkan la sogs pa rnams dang / de la mngon par gsal ba'i skad gdangs rnams kyis mngon par gsal ba yin pa ni rang nyid rtag pa dang rim pas mi rtag pa ni tshad ma yin la/ gang gi phyir rim pa med na de rnams rjod byed ma yin te/ de la ltos pa med pa yin na/ ra sa las ra sa bzhin du bye brag mi shes pa'i phyir ro/ / yi ge kho na rim pa dang ldan pa yin gyi gzhan du ni ma yin no zhe na ma yin te/ de med kyang yi ge ga la sogs pa ngo shes pa'i phyir ro/ /rim pa ni gsal ba'i ngo bo bzhin du de nyid gsal byed kyi rjes su 'brang bar byed par mi nus te/ de log na ldog pa'i phyir ro/ /'das pa nyid ni ngo shes pa las yin par mi rigs so/ /shi ba yang tshogs pa yod na 'gyur ba yin la/ mes po la sogs pa la ni tshogs pa med pa yin no zhe na/ ma yin te/ de nyid la 'chi bas gnod par byas pa'i phyir ngo shes pa las de dang gcig pa nyid du ni/ rkan la sogs pa'i tshogs pa dang / de dang gcig par byed pa'i don du yang rnam par gnas te/ de dang don gcig par byed pa la sogs pa'i yul la ngo shes pa'i tha snyad du brjod pa yin la/ 'di nyid kyis steng g.yogs dang khang khyim yang bshad pa yin te/ zhig pa bzhin du yang dang yang du phub pa'i khang khyim ni/ byas pa re re zhing gzhan yin yang / de tshogs pa gcig pa la sogs pa'i yul du ngo shes pa las gcig par smra ba yin la/ des na 'di ni tha snyad las/ /ther zug min pa'ang rtag par 'gyur/ /rim bzhin byed bzhin pa yang gang su yang rung bas byed pa ma yin te/ 'o na ci zhe na/ rgan pos ji ltar mthong ba yin no/ /zhig pa ji ltar byed pa yin 'dra ba'i tshos pa las de yin pa la skyon med do/ /smra po 'ga' yang rang dbang du/ /rim pa byed pa ma yin te/ /gzhan gyi ji ltar 'di brjod pa/ /de lta nyid du 'di rjod byed/ /yi ge la yang ngo shes pa ni de dang tshogs pa gcig pa'i yul ma yin nam/ de dang don gcig par byed pa'i yul la yang ci'i phyir ma yin/ de la rkan la sogs pa'i tshogs pa dang / de'i don byed pa med pa ma yin no/ /bden te/ gcig pa nyid med pa yin na/ ngo shes pa ni tshogs pa la sogs pa'i yul dang / rigs la sogs pa'i yul la rnam par gnas pa yin la/ rim pa dang ldan pa'i yi ge rnams la ni gcig pa nyid mi srid pa ma yin te/ tshig gzhan la yang de kho na bzhin du ngo shes pa'i phyir ro/ /rim pa la ni de lta bu mi srid pa yin te/ gzhan gyis smras pa bdag smra zhes/ /brjod 'dod 'di 'dra las smra na/ /des na rtag pa nyid du ltung / /rgyu mtshan gzhan ni khyod la med/ /tshogs pa la sogs mtshan ma gzhan ni brtag par bya ba ma yin te/ gcig pa nyid yin pa'i phyir zhes bya ba'i don to/ /dus kyi chos yin pa'i rim pa la ni yi ge rnams rta'i bang mi la med pa bzhin du phan 'dogs par byed pa med pa yin te/ gcig la gcig brten pa yin pa'i phyir/ dus kyi rim pa las de'i rim pa yin pa dang / de las kyang dus kyi rim par 'dod pa ma yin te/ dngos rnams kyi rim pa med na dus kyi rim pa med pa yin te/ rang las de'i rim pa ma yin pa'i phyir ro/ / des na/ rta yi bang bzhin gzhan gyi ni/ /chos la'ang yan lag nyid du brjod/ /ces bya ba 'di yang gsal ba yin no/ /gzhan gyi chos la yang ni dus kyi chos la yang ngo / /dngos po gang dag kho na rim pa dang ldan pa 'am/ gzhan ni dus yin no/ /nyin zhag la byas pa dang myur du byas pa zhes bya ba dang / byas pa las gzhan yin par rtogs pa yin no/ /bya ba rigs pa nyid ni myur ba ma yin te/ de'i shes pa dang mi mthun pa'i phyir ro/ /bya ba kha cig nyid la myur ba zhes brjod kyi/ ma mthong ba ni brtag bya ma yin te/ bye brag nyid du mi rigs pa'i phyir ro/ /khyad par ma bzung na khyad par can la blo mi skye ste/ rang gi shes pas gzhan la rgod par byed pa ni khyad par zhes bya ba yin no/ /ba zhos tsam du 'dug ces bya ba ni bya ba nyid bya ba gzhan yongs su gcod pa tsam du snang ngo zhes de ltar yang brtag par mi bya'o/ / de bzhin du gcig dmigs bya yin na/ gzhan dmigs nas zhig pa ni 'das pa yin la rgyu'i tshogs pa can mthong ba las byung ba ni ma 'ongs pa yin zhing / nye bar dmigs bzhin pa ni da ltar ba yin pa'i phyir/ dngos po nyid dus su brjod par bya ba yin no/ /gzhan khyab bdag rim pa ma yin pa ni 'das pa nyid la sogs pa yin pa mi srid do/ /de'i phyir yi ge rim pa dang ldan pa gsal bzhin pa rnams kho na rjod byed yin te/ skyes bu skyon can rjes su zhugs pas gzhan du byed pa yang ma yin te/ rim pa snga ma snga ma'i rjes su 'brangs pa'i phyir ro/ /'di yis rtogs par byed bzhin pa'ang / /yi ge de rnams rim pa yi/ /rtogs byed ma yin 'dra min te/ /sngar grub yongs su 'dzin phyir ro/ /mi rtag pa'i rim pa dang ldan pa'i mi rtag pa'i yi ge rnams rjod byed yin zhes bya ba'i don to/ /dngos po'i bdag nyid thams cad kho na rnam pa 'gas ni 'jig pa yin la/ rnam pa 'gas ni gnas pa yin pa'i phyir gtan zhig pa ma yin no/ /kha cig tu yod pa 'di ni rtag pa yin par brjod do/ /kha cig tu yod pa 'di ni rtag pa ma yin par brjod do/ /gal te skye ba can yin no/ /mi rtag nyid dang 'jig nyid brjod/ /bye brag can du ma grub pas/ /de phyir 'di las mi mthun 'gyur/ /'on te sgra ni snga ma'i gnas skabs las rnam pa gang gis kyang gzhan du 'gyur ba yin na/ de las grub pa la sgrub pa yin te/ mngon par gsal ba yin pa'i gnas skabs la/ mngon par gsal ba'i gnas skabs su rnam pa 'gas mi rtag pa nyid du khas blangs pa'i phyir zhes bya ba ni phyogs gzhan gyi rnam par rtog pa yin par bstan to/ /ji ltar rnam 'gar 'dod yin na/ /mi rtag pa ni brjod bya nyid/ /mngon par gsal min gnas skabs las/ /de ni gsal ba'i gnas skabs 'dod/ /de yang gsal ba 'di mthong ba dang brjod par yang bstan pa yin la/ de yang don gyis shes pa'i yan lag yin pa'i phyir gzhan gyi don du rtag pa nyid du sgrub par byed cing mi rtag pa nyid du dam 'cha' ba la gnod par byed pa yin no/ /mi rtag pa'i phyogs la ni rang gi don du smra ba'i nus pa med de/ 'brel pa la ltos pa yin pa'i phyir ro zhes bya bas rang gi tshig dang khas blangs pa dang 'gal bar smras pa yin no/ /des na don gyis shes thob phyir/ /rtag pas mi rtag la mngon yin/ /don brjod pa yi shugs kyis ni/ /khas blangs pa ni sgrub par byed/ /dang por khas blangs pa yis ni/ /mi rtag nyid la gnas par byed/ /rnam 'jig nyid du sgra gang gis/ /sgrub par byed pa smra dgos te/ /yon tan gsum 'di 'am gang zag gam/ /yang na nam mkha'i yon tan nam/ /yi ge las gzhan pa'am de dag nyid/ /rlung gis dngos sam mi brjod pa'am/ / tshig dag bdag nyid gsal byed pa'am/ /'dra ba'i dngos las mi ldog pa 'am/ /zhes gang smras pa de rnams yin na ni bsgrub bya nyid sgrub pa dang / bzhi kho bo lam grub pa'i gtan tshigs su 'gyur ro/ /kho bo cag 'dod pa'i sgra'i chos 'di de bzhin du khyed kyis khas blangs pa kho na yin no zhes bya ba la sogs pa'i sun 'don byed pa de ni rtsed mo tsam yin te/ 'jig rten la grags pa'i chos dang / chos can dpe khas blangs pa tsam gyis tha snyad mthun pa ni gzhan du mi 'grub pa'i phyir ro/ /gong bu rnams nyid kho na 'jig rten na sgra'i brjod bya yin te/ rtogs pa dang ldan pa 'jug don byed par nus pa la gnas pa'i phyir ro/ /ji ltar de la gnas pa yin zhe na/ rtog ge pa rnams dpyod par byed pa yin pas smra ba ni/ spyi yis zhes bya ba ste/ bstan bcos la grags pa'i chos khas blangs pas tha snyad 'ga' yang 'grub pa ma yin no/ /de nyid bstan pa ni/ rang nyid ces bya ba ni bstan bcos la ltos pa ma yin par khas len par ston par byed pa yin no zhes gsungs pa'o/ /de'i phyir gong bu'i sgra'i tshig gis ni brjod par nus pa ma yin no zhes bya ba de ni mi rigs te/ thams cad kyis go'i sgra cig car brjod pa ni/ ba lang thams cad shes pas rtogs pa'i phyir rnam pa brjod pa nyid yin gyi mi rtag pa brjod pa zhig pa ni/ rnam par 'brel par bya bar mi nus te/ rnam pa'i bye brag la nges par rtog pa'i dus kyi bar du mi gnas pa'i phyir/ sa yi rdzas kyi yod la sogs/ /mjug ma nyid sogs 'dus phyir dang / /rab tu sbyor ba mang ba'i phyir/ /ba lang nyid du nges bzung min/ /'dir mi rtag pa la sgra ni mthong bas zhig pa'i phyir/ 'brel par bya bar mi nus zhes bya ba'i rtag pa la nus pa yin no zhes bya bar shes pa yin te/ mig g.yon pas mthong ba bkag pa yin na/ mig g.yas pa yin par sgrub par shes pa lta bu'o/ /mi rtag pa la ni don dang 'brel pa dang ldan par kha cig tu 'gyur ba yin gyi/ thams cad la ni ma yin no/ /des na 'brel par byed pa yod par khas blangs pa'i phyir rtag pa zhes bya ba 'di'i don yin gyi/ 'brel pa ni bcos ma yin pa'i phyir rtag pa ma yin no/ /des na 'di bstan pa yin no/ /'brel pa bcos ma nyid yin te/ /de yi sbyor nyid shes pa'i phyir/ /gong bu de gcig la gnas phyir/ /thams cad du ni 'gro ba min/ /zhes bya ba'o/ /ma yin te/ sbyor ba dman pa spangs nas gzhan du de'i sbyor ba mthong ba'i phyir 'ga' yang don dang ldan pa ma yin no zhes bya ba'i rigs pas 'brel pa med pa kho na yin par 'gyur gyi/ gong bu gcig la gnas pa nyid ni ma yin no/ /yang na ba lang gi sgra'i rjod par byed pa nyid kyis rjes su 'gro ldog nges pa'i brjod bya nyid ni mi rtag pa nyid dang 'gal ba can du brjod par bya ba yin no/ /yan gar go sgra brjod pa nyid/ /ring nas rtogs par byed yin la/ /de srid bar du bstan pa ni/ /phyis ni gang gis 'jig 'gyur yin/ /yang rnam pa ni dpag bya nyid yin pas gzhan la sgra gcig pus bstan par bya ba brjod bya yin la/ de'i rgyu las snga rol du ma rtogs pa'i phyir 'brel pa byed par nus pa ma yin par smra ba ste/ go'i sgra lan brgyad nyid brjod pa yin zhes zer ba ni grangs med pa'i phyir go'i sgra brgyad ma yin te/ gang du lan grangs kyi sgra yin pa der ngo shes pa nges par 'byung ba yin te/ bya ba'i spyi la'ang de la brten pa la des de nye bar brjod pas ngo shes pa nyid du mtshon pa yin la/ ngo shes pa las kyang smra ni rtag pa yin no zhes bya ba'i don to/ /de yang / sbyor ba 'dis ni ngo shes la/ /nye bar mtshon par byed pa yin/ /zhes smos pa'o/ / shin tu 'dra ba'i phyir gzhan nyid du mi rtogs pas/ de nyid 'di yin zhes bya ba'i las bzhin du 'gyur ba yin no zhe na/ 'dra ba nyid du ma rtogs pa yin na de'i rgyu mtshan ji ltar yin/ 'dra ba nyid du rtogs pa yin pa ni cung zad ma rtogs pa las de nyid 'di zhes bya ba 'byung ba 'di 'khrul pa can yin no/ /rtag tu 'dra ba nyid ces pa/ /gang la gnas pa'i blor 'gyur te/ /de zhes bya bar ngo shes pa/ /de la 'khrul pa yin par brtag /sna tshogs pa nyid dang / 'dra ba nyid du ma rtogs pa kho na de ltar 'gyur ba ma yin nam/ bden te/ de rtogs pa yin yang rgyu mtshan brjod par ji ltar 'gyur res 'ga' dmigs pa nyid yin no zhe na/ ma yin te/ ba lang gi sgra rnams la de lta bu nyid du ma rtogs pa'i phyir ro/ /'di la rtag tu de nyid ces/ /rnam shes brtan po skye 'gyur na/ /de tshe yod nyid rtag pa las/ /de yis tshad ma nyid bsgrubs 'gyur/ /go'i sgral de nyid du shes pa ni 'dra ba nyid kyi rgyu mtshan nyid du mi shes pa ma yin nam/ las su ni shes pa kho na yin no/ /yul gsal ba tha dad pa las rigs pa tha dad pa ma yin te/ thal ches pa'i phyir ro/ /mtshan nyid dang ldan pa la gnod pa yod na de'i mtshan nyid kho na sun phyung ba yin gsungs pa ste/ re zhig rjes su dpag pa la sogs pa las ni sngar mthong ba ngo shes pa ma yin te/ spyi'i yul can yin pa'i phyir ro/ /mthong ba dang snang bzhin pa'i ngo bo gcig pa nyid yul yin te/ de lta bu'i gcig pa nyid ni 'dir rtag pa nyid kyi dbang du byas pa yin no/ /de yang mngon sum nyid kyi bye brag kho na las sngar mthong ba ngo shes pa yin par shes par bya'o/ /de'i bye brag can gyi mngon sum gyi yin gyi yan gar bas ni ma yin no/ /des na de nyid rtag pa dang mi rtag par 'dod pos bsgrub par bya ba'am/ dgag par bya ba yin gyi de tsam ni ma yin no/ /ngo shes pa la ma ltos pa'i mngon sum gyis ni ci zhig dgos/ de'i phyir de dag ni mngon sum ma yin no/ /'on te nga ni mngon sum dag rtag pa kho na yin no zhes bya ba ni/ 'dir 'di'i don yin no/ /mngon sum gyi bye brag can gyi sngar mthong ba ngo shes pa ni rtag pa nyid du sgrub par byed pa yin te/ bye brag can gyi yul yin pa'i phyir gzhan ni ma yin te/ spyi'i yul can yin pa'i phyir ro/ /mngon sum bkag pa yin yang de'i bye brag can gyi sngar mthong ba ngo shes pa ni bkag pa ma yin no/ /mngon sum yin pa'i rdzas la yod pa'i las kyi mngon sum pa dang / dbang po'i bya ba'i mtshan nyid kyi blo yang mi shes pa ni/ rjes su dpag pa las rtogs pa yin no zhes bya ba la sogs pas bstan zin to/ /dbang po las 'das las gnas gang / /de ni mngon sum min zhes brjod/ / mngon sum min pa'i blo yis ni/ /stong par smra bas nges par brtags/ /mngon sum pa'i rdzas la yod pa'i las sam/ gzugs la sogs pa yang yi ge bzhin du mngon sum gyis sngar mthong ba ngo shes pa las rtag pa yin par gsal bar byed pa'i chos kyi rjes su byed pa las kyang / myur ba dang dal ba la sogs pa'i rnam par dbye ba ni myur ba la sogs pa'i rnam par dbye ba bzhin du yi ge rnams kyi rang bzhin can ma yin pa zhes bya ba 'di kho na legs par rtogs pa ste/ yang ba'i phyir ro/ /gsal ba dang rigs dang de'i byed pa po'i gsal ba dang tha dad pa dang rtag pa nyid rnams kyi so so'i gzhung lugs la sogs pa ni ma mthong ba'i rtog pas nyam thag pa la tshad ma gang yang yod pa ma yin no/ /mngon sum rdzas la yod rnams kyi/ /bya ba gang zhig snang gyur pa/ /de rnams yi ge bzhin du ni/ /ngo shes pa las rtag nyid 'dod/ /de yi gsal byed med rnams kyi/ /rtag tu yod par ma mthong nyid/ /de ltar de nyid kyi sgo nas/ /brjod bya dkar sogs kyang rtag nyid/ /'dres pa'i dbye ba tsam gyis ni/ /de la'ang tha dad blo ru 'gyur/ /rang gi dngos la de nyid ces/ /rigs su su zhig rtogs byed 'gyur/ /zhes bya ba'o/ /sgra dang las dang gzugs la sogs pa sngar mthong ba ngo shes pa las gcig pa nyid yin du zin kyang / blo ni rang rig pa'i ngo bo yin te/ rtogs bya re re zhing tha dad par yang dag par rig bzhin pa ma yin nam/ ji ltar gcig pa nyid du rjod par byed/ de yang sems can gyi bdag nyid tha mi dad pa'i phyir gcig nyid yin no/ /shes bya yod pa dang med pa'i dus rtag tu bye brag med pas/ shes bya'i dus su yang yal bar 'dug pa nyid kyi phyir ji ltar de yang dag par rig par rnam par gzhag par 'gyur zhe na/ ji ltar me long la gang dang gang nye bar byas pa de dang de'i gnas skabs la yang snang ba yin pa dang / ji ltar me ni sreg par nus pa can yin yang nye ba'i bsreg bya kho na sreg par byed pa nyid yin gyi gzhan ni ma yin no/ /ji ltar me ni rang ngo bos/ /rtag tu sreg byed las can ni/ /nye don bsreg bya sreg byed kyi/ /gzhan min gzhan gyi dus su 'ang min/ /ji ltar dang ba'i me long ngam/ /ji ltar shel sgong dang ba la/ /gang dag nye bar gyur pa de'i/ /de yi gzugs brnyan snang ba yin/ /de bzhin du sems kyi rang bzhin yang ma rig pa'i dri mas g.yogs pa'i skyes bu ni shin tu gnyid log pa lta bur 'dug pa yin la/ gang gi tshe de chos dang chos ma yin pas bskul ba'i dbang po la sogs par byed pa'i grong khyer bum pa la sogs pa la nye bar byed pa de'i tshe/ rtogs par byed pa yin la bya ba de nye bar zad na'ang de kho na ltar shin tu gnyid log pa bzhin du 'dug pa'i phyir/ lhan cig byed pa'i dbang dang nye bar byed pa po'i dbang gis nam zhig 'bras bu mthong ba yin na yang rtag pa'i 'bras bu nyams pa ma yin no/ /de bzhin rtag tu sems bcas pa'i/ /skyes bu rnams kyi lus gnas pa/ /gzugs sogs byed pas blangs nas ni/ /'dzin pa 'di ni blor 'dod do/ /de yang 'di ni shes bya gzhan dang gzhan nye bar bzung ba'i dbang gis tha mi dad pa yin na yang tha dad pa bzhin du snang ba yin te/ bum pa glang po sogs blo nyid/ /de tha dad par 'jig rten 'dod/ /des na de nyid tha dad don/ /rjes 'brang rnams kyi blor 'dod do/ / yul gyi dbye ba yongs su dor nas dag pa'i yang dag par rig pa kho na rtogs par byed na 'byung ba ni de nyid yin no zhes sngar mthong ba ngo shes pa yin no/ /tha dad don la brten min na/ /sngar mthong ngo shes yod ma yin/ /bum pa rig pa tha dad pa ma yin pa yang snam bu'i dus su yul ches tha dad pa yin pa'i phyir de nyid yin par rtogs par mi byed pa na tha dad par rtogs pa yin te/ de bzhin du don dam pa ni ma yin no zhes bya ba'i don to/ /de gang las ma rig pa'i dri ma dang bral ba yin na nye ba ma yin pa yang sna tshogs pa sna tshogs pa'i ngo bor snang ba yin la/ des na 'di thams cad mthong bar 'gyur ba yin no/ /de'i 'dod pa'i dbang gis mngon par 'byung ba yin pa'i phyir sna tshogs pa'i byed pa po yin no/ /de yod pa dang med pa'i dus dag tu 'di la bye brag med pas nam mkha' bzhin du mi shes pa ni byed pa por mi 'gyur ba ma yin nam/ sna tshogs pa kho na rang gi rgyus de lta de ltar 'gyur zhes bya ba yang yin no/ /smras pa yod pa'i ngo bo rigs pa dang de snang ba ni rmi lam bzhin du mi shes pa ni byed pa por mi 'gyur skye ba snang ba'i bdag nyid gzhan dang gzhan du yang 'dod pa'i ngo bo ma yin te/ srog ni phyi rol gyi rig pa'i bdag nyid kyi tha dad pa yin yang rig pa'i bdag nyid ni ma yin te/ shes pa'i ngo bo'i rnam pa ni rtag pa yin yang 'gal ba med pa ni/ mngon par gsal min gnas skabs las/ /de mngon par gsal bdag nyid 'dod/ /ces bya ba'i tshig gis rtag pa dang cig shos kyi bdag nyid ces bya ba'i bye brag med pa'i skyon med do/ /sgra dang blo la sogs pa yang yod pa'i phyir skad cig ma nyid ma yin nam/ yod pa ni don byed pa'i byed pa po yin no/ /rim dang cig car nyid yod na dmigs pa yin la/ de dag gis khyab pa yin pa'i phyir de dag log na ldog pa ni mi rtag pa rnams la yang gnas pa yin te/ rtag pa la rim gyis 'bras bu 'byung ba ma yin te/ shin tu ltos pa med pa'i phyir ro/ /lhan cig byed pa nyid shin tu res 'ga' ba yin pa'i phyir de nyid las 'bras bur 'gyur ba ni de dang 'dra ba'i phyir ro/ /gzhan gyi tshe de yod kyang ci'i phyir mi 'byung ba yin/ de lta yin yang de'i dus su snga ma pa'i ngo bo skyed par byed pa bcad pa yin no/ /bcad pa dang cig shos kyang de bzhin du rtogs pa yin no zhe na/ ma yin te/ bcad pa las cig shos tha dad pa yin pa'i phyir/ byed pa po ma yin pa nyid du de gnas so/ / ma yin te/ bcad pa nyid la ma bcad pa yin zhes rtogs pa la skyon med pa'i phyir ro/ /rtogs pa ni brgal zhing brtag par byas pa ma yin te/ mi rtag par gcig pa'i ngo bo nyid la ni mngon sum med pa yin te/ mthong ba dang rtag pa nyid mi 'gal ba'i phyir ro/ /rtag pa la skad cig gcig la mthong bar mi 'gyur ba ma yin la/ de tsam mthong bas snga ma dang phyi ma'i skad cig dag la med pa yang ma yin te/ spyi la yang de ltar thal bar 'gyur ba'i phyir ro/ /spyi ni snga ma dang phyi ma dag la med par 'gyur ba ni ma yin no/ /'dir ni spyi gang cung zad kyang / /kun gyis rtag par rtogs par byed/ /mi rtag nyid na gong bu rnams/ /gang la'ang khyab pa can mi 'gyur/ /mthong ba tsam mam/ de tsam las byung ba yang dngos po ma yin te/ de gcig gis mthong ba las dngos po ma yin na gzhan gyis ma mthong ba las dngos po ma yin par 'gyur ro/ / de'i phyir rang gi tshogs pa las byung bar mthong bas snang ba yin no/ /de ltar yang mthong ba'i dus kyi nges pa dang ldan par mthong ba ni tshad ma ma yin te/ nges pa yang sngon po nyid la yin gyi/ skad cig ma nyid la ni ma yin no/ /gal te sngon po nyid bzhin du de la yang yin na ni/ 'khor ba thog ma med pa la skad cig par yang nges pa kho nar 'gyur ro/ /de yang ma mthong ba tsam gyis med pa yin par go nas zhig pa yin par brtag par byas pa ma yin gyi/ tshad ma ma yin pa nyid du rig pa nyid yin/ med pa yin zhes bya bar go ba yin no/ /des na de bzhin du mthong ba dang rtag pa nyid 'gal ba med pas de nyid la de nges pa'am mthong ba nyid ni tshad ma yin te/ ma mthong ba la dran pa mi 'gyur pa'i phyir nges pa med do zhes bya ba ni gzhan gyi 'dod pa'o/ /rgyu med par 'jig pa yin na/ de ma thag kho nar 'gyur ro zhe na/ de bzhin du snga ma la yang 'gyur te/ rgyu med pa nyid kyis rtag tu bar thal bar 'gyur ro/ /nges pa yin yang de nyid du rgyu yin pa'i phyir zhig pa ni 'bras bu nyid yin no/ /de yod pa yin na yang de'i gnas skabs can nyid dngos po yin pa'am/ dngos po med po'i rgyu/ dngos por bya bar nus pa nyid ma yin pa la sogs pa gzhan la rang nyid kyis smras pa'i skyon thob pa yin no/ /de ma thag tu zhig par snang ba ni ma yin te/ gang gi tshe mthong ba de'i tshe yang rgyu la rag las pa yin pa'i phyir mthar zhig pa mthong ba las snga na yod pa nyid du rjes su dpag pa ma yin te/ de'i tshe de'i rgyu med pa'i phyir ro/ / zhig pa 'bras bu nyid yin na 'jig pa'i zhig pa las dngos por ldang ba ni zhig pa'i rgyu med pa'i phyir ro/ /de ltar byas kyang dngos por byung ba ci dgos she na/ des na dngos po cung zad kyang byed pa ma yin te/ de'i rgyus dngos po de byas pa yin zhes bya bar gsal ba ni nye bar btags nas dngos po med pa'i tha snyad du byed pa yin te/ de dag tsam gyis dngos po zhig pa yin no/ /sgra dang blo la sogs pa rnams kyi ni de lta bu'i 'jig pa ma yin te/ yan lag la mi ltos pa'i phyir ro/ /snal ma la sogs pa'i yan lag la ltos pa'i rnam bu la sogs pa ni/ de'i phan tshun sbrel ba bkrol ba'am/ de zhig pas 'jig par 'gyur pa yin par rtogs pa yin no/ /yan lag gam yan lag can gzhan yang rung ba yod pa ma yin te/ 'brel par snang ba med pa'i phyir ro/ /rlung sgra nyid du gyur pa yin no zhe na/ ma yin te/ sgra la sogs pa la reg pa la sogs pa'i yan lag dang / 'brel pa mi snang ba yin la/ de'i phyir 'di lta bu'i ngo bo gang yin pa ni 'jig par 'gyur ba ma yin te/ de ltar rtogs pa'i phyir ro/ /skad cig ma gnyis pa la dmigs bya ma yin pa nyid zhig pa yin no zhe na/ de'i tshe de yin du zin kyang ci zhig 'ongs nas gang gis snga ma 'jig par 'gyur/ de lta yin na de ni de la nges pa can yin na/ de'i bskyed bya ni dngos po las tha dad pa'am gzhan du ni mi rigs te/ dgos pa med pa'i phyir ro/ /de'i byed pa la sogs pa'i skyon du thal bar 'gyur bas 'ga' zhig gis nye bar dmigs pa la yang / gzhan gyis ma dmigs pa'i phyir med par 'gyur ro/ /dmigs pa thams cad ldog pa'i phyir med pa yin no zhe na/ me yin te/ thams cad kyi dmigs pa ldog pa yin zhes bya ba 'di ni go bar dka' ba yin no/ /gzhan rgyu ma tshang ba med pas rung ba'i mi dmigs pa med pa nyid du shes pa'i 'bras bu can ni cig shos ma yin no zhes bya ba 'di ni go bla ba yin no zhe na/ ma yin te/ de nyid 'di yin no zhes shes pa'i phyir ro/ /ji lta ba kho na'i sngon po'i zhes bya ba mngon sum gyi rjes su 'brang ba'i rnam par rtog pa ni/ mngon sum nyid yin la 'gal ba med pas tha snyad mthun pa yin no/ /de bzhin du de nyid 'di yin zhes bya ba 'di las kyang yin no/ /gzhan du na mthong ba dang rnam par rtog pa dag mi mthun pa'i phyir/ tha snyad med par 'gyur ro/ /sngon po dang rtag pa'i rnam par rtog pa dag la yang phul du byung ba ma yin te/ mthong ba dang bag chags las skyes pa las khyad par med pa'i phyir ro/ /de skad du yang tshad ma'i thu bo mngon sum yod kyang / tshad ma ma yin pa nyid du 'gyur ba ni ma yin no zhes smos pa'o/ /nges pa las ni mthong ba'i yul yin la/ sngon po bzhin du mi rtag pa nyid ni ma yin te/ tha snyad med pa'i phyir ro/ /de bzhin du rtag pa nyid ni ma yin no/ /de nyid rtogs pa las rjes su dpag pas nges pa yin no zhe na/ mngon sum dang 'gal ba yin na/ rjes su dpag pa tshad mar 'gyur ba ma yin no/ /don byed pa po nyid yod pa nyid ni rim dang cig char la mi ltos pas des khyab pa yin nam/ ltos pa dang bcas pa nyid la lan cig kyang de yod na med pa'i phyir rtag pa ni rim pa ma yin te/ dus gzhan 'byung bar 'gyur ba'i dngos po yang de'i tshe kho na 'byung bas sdod par 'gal ba'i phyir ro/ /sdod pa ni rim pa yin no/ /rim pa med pa ni ma yin te/ sdod par mthong ba'i phyir ro/ /de nyid dus gzhan la yang yul gzhan bzhin du kun du rgyu ba yin no zhe na/ rang bzhin de ma bor na kun du rgyu ba zhes bya ba ma yin no/ /gnas skabs tha dad pa la yang gnas skabs can ni mi rgyu ba yin te/ gnas skabs de yin pa'i phyir ro/ /de ma yin pa'i gnas skabs yin na phyogs nyams pa yin no/ / gnas skabs gzhan khas blangs pa la yang skyon de dang mtshungs pa yin no/ /shi ba kho na 'byung ba yin pas kun du rgyu ba yin no zhe na/ snga ma dran pa med pa'i phyir dang / de nyid kyis na phyi ma yang ma yin no/ /gcig po dus gcig gi tshe yod pa dang med pa yang ma yin no/ /'chi ba dang skye ba dag skad cig ma nyung zad du gnas pa yang ma yin te/ mthong ba rgyun chad pa dang 'gal ba'i phyir/ kho bo'i phyogs la snga ma'i shi ba phyi ma nyid yin pa la skyon med do/ /de lta de ltar rtag pa las bzlog pa la rim pa nye bar dmigs pa de dang 'gal ba yin no zhes 'dir gsungs pa yin no/ /skad cig nyid du mthong ba ni ma yin no/ /des na rim pa dang ldan pa dang yod pa nyid ni bzlog pa dang 'gal ba med do/ /ldog pa nye bar dmigs pa ni phyin ci log tu sgro 'dogs pa 'joms par byed pa ma yin te/ 'gal ba'i phyir ro/ /de nyid nye bar dmigs pa yin na/ / rim pa dang ldan pa dmigs pa la sogs pa nyid dang skad cig pa nyid du 'gal ba yin te/ phyin ci log pas khyab pa'i phyir ro/ /ma grub pa ni ma yin te/ mthong ba'i rjes su 'brang ba'i rnam par rtogs pas rtag pa nyid bzhin du rnam par gzhag pa nyid yin pa'i phyir ro/ /de rtogs pas bzlog pa ma rtogs pa yin na 'gal ba yin te/ gnyi ga'i ngo bor rtogs pa yin na 'gal ba med pa'i phyir ro/ /blo la mi gnas pa ji ltar 'gal ba can yin zhe na/ sgro btags pa yin pa'i phyir skyon med do/ /de lta yin yang dngos su ba'i 'gal ba ma yin pa ma yin te/ phyin ci log tu rtogs pa dngos su ba yin pa'i phyir ro/ /de lta yin yang gnod pa can gyi bzhi po dag don gcig pa nyid du rtogs pa'i don nyid ma yin te/ thun mongs ba dang cig shos kyi dbye bas yul tha dad pa'i phyir shing ma yin pa dang me ma yin pa bzhin du phyin ci log tu ma grub pa yin yang / ldog par ma nges pa ni ma yin te/ nye bar dmigs pa yul du rnam par gzhag pas phyin ci log spangs pa'i phyir/ dro ba dang dro ba ma yin pa nyid bzhin du 'gal ba grub pa'i phyir ro/ /thams cad rig pa rnams kyi rang gi ngo bo la nges pas rim pa 'dzin pa med pa ni ma yin no/ /bag chags kyi dbang gis byung bas 'das pa rig pa dran pa'i rnam par rtog pas rig pa'i phyir ro/ /bag chags kyang de dang 'dra ba'i rnam par rtogs pa gzhan gyis bskyed par bya ba yin pa ni dgag par bya ba ma yin no/ /rnam par rtog pa yang kha cig ni sngon po'o zhes gzung ba'i rjes su 'brangs pa yin la/ kha cig la ni de'i khyad par gyi rim pa'o/ /kha cig ni de yod na 'byung ba nyid dam/ 'bras bu dang rgyu zhes bya ba yang ngo / /rtogs pa de yang mtshams sbyor bar byed pa gzhan shugs kyis rtogs par byed pa ni ma yin no/ /bag chags yod na de las bdag gis 'di mthong ngo zhes bya ba bzhin du rtag pa srid dam/ mi rtag pa srid par rtogs pa ni tshad ma yin te/ rnam pa gsum gzhan dmigs pa'i phyir ro/ /de lta bur ma mthong ba yin na/ dmigs bzhin pa las yod par khas blangs pa dgag par nges par mi nus te/ ma bskal ba yin pa'i phyir ro/ /de nyid 'di yin zhes bya bas/ /'di'i de nyid dran bya ba ma yin/ dbang po'i stobs bya ba ni ma yin te/ dngos po'i rang gi ngo bo yul yin pa'i phyir te/ de'i thog ma mthong ba lta bu'o/ /de lta yin na de nyid rig pa 'di ni mi slu ba'i bdag nyid can gyi yid kyi yin gyi/ dngos su ba ni ma yin no/ /shes pa snga ma'i yul ma yin pa'i phyir ram/ de'i khyad par can rig pa'i shugs kyis don nyid de'i ngo bo yin pa yang rung ba sngar mthong ba ngo shes go bar byed pa yin te/ de'i ngo bo nyid ma yin na gnod pa med pas de ltar rtogs pa mi rigs pa'i phyir ro/ /dran pa dang nyams su myong ba dang ldan pa rtogs pa'i don rtogs par byed pa ni sngar mthong ba ngo shes pa las so/ /de kho na bzhin du nang gi rtogs pa yang yin no/ /sngar rtogs pa dus phyis rtogs pa na de nyid 'di yin no zhes bya ba'i dran pas nyams su myong ba'i yul du gyur par nges pa yin no/ /dang po mthong ba bzhin du dngos po tsam ji lta ba bzhin du rtogs pa de lta bu'i dngos po ma yin nam/ de 'grub pa ni de la ltos pa'i phyir ro snyam du sems pa la/ de'i phyir mi rtag na yang ste/ yang gi sgras rtag pa yang zhes bya ba smos so/ /de gnyis ka'i ngo bo yang khas blangs pa yin na ni tshad ma ste/ 'di'i go byed kyi tshad ma nyid med do/ /ci las shes she na/ smras pa/ rnam 'gas te/ rnam pa gang gis kyang / rtag pa la min zhes bya ba'i don te/ phan gdags par bya ba yod pa min pa ni/ snang ba dang 'brel pa can nyid kyis sam/ de nyid du sgro btags pa'i yul nyid kyis 'di la de bskyed par bya ba de lta bu nyid kyi phyir ro/ /sgra dang blo la sogs pas rtag pa'i rnam pa 'dzin par snang ba ma yin te/ der snang ba can ma yin pa'i phyir ro zhes bya ba'i don to/ /rnam par rtog pa ni mthong ba dang snang bzhin pa dag la 'bar ba dang / bregs pa'i sgra'i skye ba bzhin du 'dra ba'i yul du rnam par gnas pa yin te/ de nyid la ni phyin ci log tu 'dzin par mthong pas 'gal ba'i phyir/ mthun pa ma yin par thal bar 'gyur ro/ /spyi bzhin du de ltar 'gyur ba ni ma yin te/ khas blangs pa ma yin pa'i phyir ro/ /ba lang ngo zhes bya ba'i rnam par rtog pa ni/ ji ltar gcig de byed pa ma yin par rnam par gcod par byed pa'i bdag nyid du rtogs pa de bzhin du gzhan yang yin pa'i phyir/ de ni de rnams kyi spyi yin par brjod do/ /des ni 'dir spyi gang cung zad kyang rtag par thams cad kyis brtags pa bkag pa yin no/ /zhig pa bzhin du 'di yang 'gyur ba ma yin nam/ zhig pa ni snga ma dang phyi ma yang mi dmigs pa yin yang / de'i tshe kho na skyed par byed pa ni ma yin te/ skye ba dang ldan pa thams cad kyi 'jig pa mthong bas de zhig pa yin na/ dngos por ldang bar thal bar 'gyur ro/ /gang la rgyu yod de 'jig pa'ang / /myu gu bzhin du mthong ba yin/ /zhig pa la ni 'jig med pa/ /de phyir byas pa ma yin no/ /byas pa yang rgyu med pa las 'jig pa ma yin par ni mi rigs te/ yun ring por ma mthong ba rnams kyang yang 'byung bar mthong ba'i dngos po lta bu'o/ /srid bzhin pa yin pa'i phyir yod pa dang med pa dag bdag nyid thams cad kyi mtshungs pa nyid ma yin no/ /de nyid kyis nam byung ba yang snga na med pa'i 'jig pa yin no zhe na/ de lta yin na byas pa nyid dam cig shos kyang zhig pa nyid du'am/ gzhan du yang nges pa ma yin no/ /zhig pa'am snga ma med pa'am de med kyang 'byung ba'i phyir ro/ /dngos po nyid kyi bye brag ni 'khrul pa can ma yin no zhe na/ de bzhin du dngos po la yang 'khrul par dogs pa yin na/ bye brag gis skyob pa ma yin no/ /de'i phyir 'jig pa'i rgyu med pa can yin no/ /rgyu btsal ma thag nyid du dmigs pa yin gyi/ snga ma dang phyi ma ni ma yin pas 'khrul pa'i phyir de'i byas pa nyid dam med pa nyid mi 'grub bo/ /zhig pa ni gnas skabs las snga ma dang phyi ma yod pa'i gnas skabs ma yin nam/ de'i tshe zhig pa ni ma yin te/ dngos po dang 'gal ba'i phyir ro/ /de'i tshe kho na 'byung ni ji ltar rgyu med pa yin te/ nges pa ni rgyu la rag las pa'i phyir dang / de la rag lus pa ma yin na rgyu la nges par mi rigs pa'i phyir ro/ /de yod na 'byung ba'i dngos po'i rgyus ci zhig byas pa yin/ gang gis sngar bzhin du 'byung bar mi 'gyur ba ni de dag 'gal ba yin zhes bya ba ni mi rigs te/ cung zad kyang mi byed pas 'gal ba med pa'i phyir ro/ /rgyus de'i rang gi ngo bo nyams pa kho na byas pa yin no zhe na/ de yin na yang / dngos po yang rjes su 'jug par 'gyur ro/ /'gal ba'i phyir ma yin no zhe na/ cung zad kyang mi byed pas ji ltar 'gal ba yin zhes pa de nyid slar khyod la dri bar bya'o/ /dngos po'i zhig pa yin no zhe na/ de yang bya ba'i rgyu ma yin te dngos po dang 'gal ba'i phyir dang / thug pa med pa'i phyir ro/ /de yod na dngos po rang gi ngo bo nyid med pa yin te/ de las cung zad kyang 'byung bar mi 'gyur ro zhe na/ de yod kyang de dang 'dra ba 'di sngar bzhin du phyis kyang / don byed pa nyid du thal bar 'gyur pa yin te/ bye brag med pa'i phyir ro/ /de nyid bye brag yin no zhe na/ 'di la de yod kyang de ci zhig byas pa yin zhes smras zin to/ /kho bo'i phyogs la ni de med pa yin la/ de ni gzhan kho na skyes pa yin te/ dus gzhan na yod pa ni ma yin no zhes bya ba'i don to/ /de lta yin na mi skye ba de nyid med pa yin no zhe na/ de'i zhig pa la ltos nas/ de lta bu'i tha snyad yin par bden mod kyi gzhan skye ba la ni ma yin te/ 'gal ba med pa'i phyir ro/ /de lta mod kyi ma dmigs pa ni med pa ma yin te/ yod pa la yod pa'i phyir ro/ /rung ba yang ma yin te/ sgrub byed med pa'i ngo bo yin pa'i phyir ro/ /de'i phyir de lta bu'i dmigs pa yod pa nyid kyis khyab pa'i phyir de log pas sdog pa grub pa yin pa'i phyir ma dmigs pa ni med pa ma yin no/ /gal te dmigs pa med pa bzhin du rung ba'i med pa yang rang las rtogs par cis mi 'dod/ de lta bu'i med pa ni ma nges pa ma yin no/ /de lta bu'i rtogs par dka' ba yin no zhe na yang / dmigs par ji ltar nye bar mtshon pa yin no/ /de'i yang ma rtogs pas ma rtogs pa'i phyir med pa ni ma yin no/ /de'i phyir rung ba dang dmigs pa yang ma rtogs pa ni/ de ma yin pa rtogs pa yin na/ gzugs bzhin du brjod pa dang 'dre ba la ltos pa med pa dbang po'i bya ba bskyed pa'i shes pas shes par byed pa yin no/ /de nyid kyis na rang bzhin thams cad dang bral ba'i mtshan nyid ma yin te/ dngos po med pa'i rang bzhin du mngon sum la sogs pas grub pa'i phyir ro/ /nus pa thams cad dang bral ba ma yin te/ shes pa'i rgyu yin pa'i phyir ro/ /yod pa dang zhig pa dag gi rgyu tha dad pa'i phyir gzhan nyid yin zhes bya ba la sogs par shes par bya'o/ /ma yin te/ de la de'i rtogs pa dgag pa'am/ de'i mi skye ba'i ngo bo'am gzhan rtogs pa yang yin zhes bya ba de dag tsam gyi dbye bas yod pa yin te/ de'i bral ba ni de'i ma 'dres pa nyid yin zhes bya ba la sogs pa yang de'i mi skye ba kho na yin gyi gzhan ni ma yin no/ /gzhan shes pa yin na ma rtogs pa po 'ba' zhig ni yod pa ma yin par bstan pa yin la/ de bstan pas yod pa las bzlog pa gzhan ni ma yin no/ /de bzhin du gzhan gyi mngon sum yin na/ de'i tha snyad yin pa'i phyir med pa mngon sum du grub par brjod do/ /ma rtogs pa nyid ma yin par khas blangs na/ mtshan nyid mi mthun pa'i nus pa rtogs pa po'i rtogs pa dang 'gal ba med pa yin te/ de lta bu'i rtogs pas rtogs bya rtogs pa nyid ni de'i tha snyad kyi rgyu yin pa'i phyir ro/ /dmigs su rung ba ma rtogs na/ rgyu gzhan tshogs pa yin na yang med pa yin par bstan pa yin no/ /dmus long gnyis tha snyad 'dogs pa ni sngon po la sogs pa la de yod pa ma yin no/ /de bzhin du 'jig pa la rgyu med pa nyid du smra ba pos ma rtogs pa tsam du bstan pa yin gyi/ tha snyad du yod pa ni ma yin no/ /des na de bzhin du mthong ba ni sgra la'am/ blo la snga ma dang phyi ma'i de'am de la rung ba'i rang bzhin rtogs par byed pa ma yin te/ sngar med pa'i byas pa nyid phyis yod pa'i ngo bo ni mi rtag pa yin zhes de dag gi 'brel pa nges pa yin te/ snga na med pa la sogs pa gzhan med pa'i phyir ro/ /de yang skad cig mar gnas pa'i chos can gyi dngos po nyid ni 'jig pa yin no zhes gsungs pa dang / de yang gzhan las rang bzhin gyis mi skye ba'i mtshan nyid ni zhig pa yin gyi/ rang bzhin yongs su 'dor ba'i mtshan nyid ni ma yin te/ rang bzhin gyis zums pa dang / bsdus pa dang / ma rtogs pa dang / mi 'dzin pa rnams ni don tha dad pa ma yin no/ /gnyid stug pos non pa la sogs pa'i ma rtogs pa ni med pa'i tha snyad sgrub par byed pa ma yin te/ rang gi ngo bo nye bar bsdus pa'i rang bzhin ni de sgrub par byed pa'i phyir ro/ /rgyu gzhan tshang ba yin na rung ba'i ma rtogs pa nyid kyi 'bras bu ni/ med pa nyid kyi shes pa yin gyi/ gzhan gyi ni ma yin pa'i phyir bye brag tu bstan pa yin no/ /khyab byed log pas khyab bya ldog pa ni ma yin no/ /de bzhin du tha snyad ni shes pa la yod pa yin la/ khyad par can du ma rtogs pa ni med pa'i blo sgrub par byed pa yin par gcig dmigs pa nyams su myong ba la sogs pa zhes bya bas bstan pa yin no/ /'di ngas ma mthong ngo zhes bya ba skyes bu'i mchog gi tshig la yang shes pa kho na bzhin du 'di yang de lta bu yin no snyam du dgongs pa yin gyi de log pas ni ma yin no/ /des na de ltar snga ma nyid la sogs pa la 'di 'am/ de 'dir rang bzhin nye bar bsdus pa las/ de las bzlog pa'i rang bzhin rnams la ni skad cig ma ma yin pa med pa yin zhes smras pa yin no/ /des na/ skad cig min la med de rnams/ /rim dang rim min 'gal phyir ro/ /zhes bya ba yang legs par gsungs pa yin no/ /des na sngon po ni de med pa rnam par gcod par byed pa yin zhes bya ba'i tshig gi rang bzhin gyi 'dus bsgrub par byed pa yin gyi gzhan la ni ma yin no zhes blta bar bya'o/ /de nyid kyis na mngon sum gnod pa can yin par bstan pas rjes su 'gro ba la sogs pa ma grub pa ma yin no/ /rtsa ba dang chu la sogs pa bzhin du skad cig ma yin pa'i sgra yang rang gi nye bar len pa las skye ba ma yin nam/ de'i bya ba las skyes ba ni ma yin no/ /nye bar dmigs pa'i rgyu yang rnam pa gnyis te/ dbang po la sogs pa rnams kyang sgra rnams kyang rtsa ba dang chu la sogs pa la/ dbang po dang sa la sogs pa'i sgrib g.yogs med pa ji lta ba bzhin du/ de dag tsam yin gyi de'i bya ba'i bskyed bya ni ma yin te/ rang gi nye bar len pa las byung ba'i skyes bu'i bya ba 'ba' zhig rgyu mtshan tsam yin no/ /de'i bya bas gsal byar ni/ /byas pa'am rtsa ba chu sogs kyi/ /gsal byas byas pa nyid kyang rung / /de rnams brkos sogs kyis bskyed min/ /bud shing span spun la sogs pa'i rtse mthong bas rtsa ba la sogs pa yod pa nyid du rjes su dpag pa/ skyes bu'i bya bas gsal bar byed pa yin par brjod pa yin la/ sgra ni snga na yod pa nyid du dpag par bya ba ma yin te/ sngar mthong ba ngo shes pa ni mthong ba dang snang bzhin pa dag kho na'i gcig pa nyid du yin gyi/ de'i tshe yod pa ni ma yin no/ /de'i tshe yod pa ma yin na gcig pa nyid du yang mi 'gyur ro/ /zhe na/ gcig pa nyid ni 'dra ba nyid kyis kyang yin pa'i phyir don gyis go ba ni ma yin no zhes bya bar 'dod pa'o/ /snga na yod na brtsams ma thag /byung ba'i shes pa nges mi 'byung / /zhes bya ba yang ngo / /de nyid ni rtag par rung ba med na rgyu mi dmigs pa yin te/ thog med bag chags las byung ba'i/ rnam par rtog pas yongs bsgrubs pa ni chos dang chos can te phyin ci log tu rtogs pa de dgag par rtogs pa ni 'bras bu yin pa'i phyir/ ma grub pa nyid la sogs par smra ba ni 'brel pa can ma yin no/ /'ba' zhig po yod kyang ma mthong ba ni yul ma 'ongs pa yin pa'i phyir ro/ /de'i phyir rang nyid las phyis gnas pa ma yin zhes bya ba ma grub pa yin no/ /yang na rtag pa ni dbang po bzhin du rung ba nyid ma yin te/ dbang po 'ba' zhig ni rjes su dpag pa'i yul yin gyi cig shos ni ma yin te/ khas blangs pa tsam du grub pa'i phyir ro/ /'gro ba dang 'bras bu 'dis kyang rgyur gyur pa 'phangs pa yin no snyam du sems pa la/ rnam 'gas phan gdags bya min phyir/ /zhes smos te/ dbang po'i nus pa ni rim pa dang ldan pa'i 'bras bus rim pa can nyid du rtogs par byed pa yin la rtag pa ni de lta ma yin te/ rim pa med pa'i phyir ro/ /gcig tu nye bar bsdus pa gzhan las skyes pa'i ngo bo ni gzhan la 'gyur ba ma yin no/ /rnam 'gas kyang rim pa med pa nyid kyis bsgyur ba ma yin pa'i phyir dang / phan gdags pa ni rnam par bsgyur ba tsam nye bar mtshon pa nyid kyi phyir ro/ /'on te rtogs pa ni rim pa med pa yin yang lhan cig byed pa'i rigs las rim gyis bya ba byed pa ni mar me lta bu ste/ mar me ni ji ltar gcig nyid kyang lhan cig byed pa'i dbye ba las rnam par shes pa dang / sdod bu'i 'gyur ba dang / 'bar ba'i rgyun phyi ma rnams kyi byad pa yin la/ de tha dad pa ni ma yin te/ dus dang ngo bo dang yul rnams tha mi dad pas tha mi dad pa nyid du tshad mas grub pa'i phyir ro/ /gcig nyid nus pa'i bye brag gis de rnams skyed par byed pa ni ma yin te/ so sor nges pa'i rang bzhin gyi 'brel pa med na/ de rnams kyi thams cad du skye ba sngar ma mthong ba'i phyir ro/ /rang bzhin gang gis sdong bu'i 'gyur ba'i rgyu yin pa de kho nas 'bar ba dang / nye bar dmigs dag gis yang ma yin te/ sdong bu'i 'gyur ba bzhin du de dag kyang de'i rang bzhin du thal bar 'gyur ba'i phyir ro/ /lhan cig pa nyid kho na rjes su 'gro ldog dag gis thams cad du rgyu nyid du rtogs pa yin gyi/ gcig gi ngo bo ni ma yin te/ rgyu'i rang bzhin tha dad pa med pa yin na/ 'bras bu tha dad pa glo bur pa can nyid du thal bar 'gyur ba'i phyir ro/ /de lta yin na sna tshogs pa'i tha dad pa'i ngo bo nyid la rgyu med par 'gyur ro/ /lhan cig byed pa de rnams kyis 'di la cung zad kyang byed pa ni ma yin te/ de rnams kyi phul du byung ba'i bye brag tu byas par ma rtogs pa'i phyir ro/ /zhing la sogs pa rnams sa bon la sdod pa bzhin du thal bar 'gyur ro/ /de dang ldan pa ma tshang ba 'ba' zhig ni ma tshang ba med pas gsal ba yin te/ 'gal ba'i phyir ro/ /rtag pa ni de bzhin du cig car byed pa ma yin te/ lhan cig byed pa rnams kyi rang gi rgyu ma tshang ba nyid kyis cig car ba nyid ma yin pa'i phyir ro/ /de bzhin mar me bzhin dang mtha'i tshogs pa bzhin du lhan cig byed pa rnams kyi ma tshang ba bsal bas/ ma nyams pa'i bdag nyid kyi rtag pa ni rim gyis byed pa yang yin no snyam du sems pa la/ rnam 'gas zhes bya ba smos te/ rnam pa 'gas kyang ste lhan cig byed pa rnams kyis phan gdags par bya ba nyid ma yin pa'i phyir te/ ma tshang ba nyid med kyang de de'i dus nye bar mtshon pa'i byed pa po ma yin pa'i ngo bo ma spangs pa'i phyir ro/ /ma tshad ba nyid kho na mi byed pa ni ma yin te/ de nye bar mtshon pa yang de dang mtshungs pas de dang 'brel ba nyid yin no/ /rgyu'i rang bzhin kho na yin yang / de'i 'bras bu mi 'byung ba yin no zhe na/ 'bras bu la gegs byed pa yin na/ de la gnas pa'i byed pa po nyid la gegs byas pa yin gyi/ ji ltar mar me la yin/ de'i yang ma tshang bar nye bar mtshon pa yin na/ tshang ba yin yang ma tshang ba bzhin du nyams pa yin no/ /mtha'i tshogs pa ni re re zhing de'i 'bras bu la nus pa can yin te/ rgyu'i dbang gis de bzhin du 'byung ba yin no/ /lhan cig byed pa gcig nye bar gyur pas bsgrub par bya ba 'bras bu yang rgyun tu 'byung ba'i shes pa la sogs pa nus pa tha dad pa las rang bzhin tha dad pa ni gzhan gyi bye brag can ma yin te/ skad cig ma'i dbye ba tsam skyed byed yin pa'i phyir ro/ /mar me la sogs pa'i mi rtag pa la yang sdong bu'i 'gyur ba dang shes pa dang / 'bar ba'i rgyun phyi ma 'bras bu'i byed pa po la so so'i lhan cig byed pa'i rkyen gyis byed pa po ma yin pa'i ngo bo ma nyams pa yin pa la yang / tshad ma yod pa ma yin na/ rtag pa gcig pu'i ngo bo'i rang bzhin la lta ci smos zhes bya ba'i don to/ /de'i phyir rang gi rgyu tshogs pa las 'bras bu du ma byed pa'i tshogs pa phyi ma gzugs dang ro la sogs pa bzhin du/ ji ltar mthong ba khas blang bar bya ba yin no/ /nye bar len pa dang lhan cig byed pa la sogs pa nyid ni/ ci nas kyang gang gi yang yin no/ /kha cig tu ni bstan bcos kyi rnam par dbye ba ji lta ba kho na yin pa'i phyir ro/ /shin tu snying po med pa blo gros ngan pa'i spros pa ring du bsrings pas chog go/ /skad cig ma nyid la snga ma nyid tsam las rgyu nyid ji ltar yin te/ thal ches pa ma yin nam/ dri la dri dang gzugs dag snga ma nyid las bye brag med do/ /bya ba la yin no/ /zhe na/ skad cig ma la bya ba med do/ /skye bzhin pa'i dri la sogs pa ni gang gi tshe gzugs zhig pa de'i 'bras bu mi 'dod pa gang yin pa de bzhin du/ gzugs gzhan rnams kyang yin no/ /rtag pa ni dus gzhan du yang rjes su gnas bzhin pa yin pas bya ba byed par nus pa yin pa'i phyir rgyu yin no/ /de'i phyir sngar 'bras grub pa la/ /gang gi bya ba mthong ba ni/ /de nyid de yi rgyu yin gyi/ /de ma thag pa tsam nyid min/ /gal te bya ba yin yang rgyu yin zhes ci las shes rgyu nyid kyis rtogs pa'i phyir ro/ /'di la yang de'i 'bras bu nyid yul yin pa de nyid kyis rtogs pa ni/ lha sbyin gyi bu la lha sbyin du shes pa bzhin du/ gang la yod pa de nyid rgyu yin gyi/ gzhan gyi ma yin no zhes bya ba'i rnam par dbye ba'o/ /'bras bu la rang bzhin gyis rjes su 'gro bar nges pa rgyu nyid yin te/ dri la ro'i ni ma yin no/ /ji ltar ji lta bas rgyu ni ma yin te/ gang zhig gang las kyang thal bar 'gyur ba'i phyir nges pa ma yin par ma mthong ba la thal 'gyur yang ma yin te/ de ni mthong ba'i rjes su 'brang ba yin pa'i phyir ro/ /'jig rten pa ni 'ga' la yang skad cig ma nyid du zhen pa med do/ /de'i phyir rgyu khas blangs pa yin na/ snga ma snga ma'i rgyur 'gyur ro/ /mtshan nyid mi mthun pa ni ma yin te/ de lta bur ma rtogs pa'i phyir ro zhes brjod pa na mtshan nyid mi mthun pa nye bar gnas pa'i gnas skabs gang yin zhes bya ba'o/ /gting dpag dka' 'di gting thag ni/ /blo dman bdag gis mi chod cing / /'di la'ang shing rta che'ang dub na/ /ches dman la gtam ga la yod/ /de lta bu'i tshad ma nyid du sgrub pa la/ /yang dag nyid gsungs shes pa las gzhan pa rjes su dpag pa yin zhes smos pa yin la/ rtsod pa'i gzhi ni nye bar dmigs pa dang ldan pa'i rgyu can yin te/ skye ba dang ldan pa nyid kyi phyir ro/ /sems dang mi ldan pa nye bar dmigs pa can nyid yin pa'i phyir gos la sogs pa lta bu'o/ /gang kho na gzhan gyi blo dang ldan pa nyid kyi rgyu can yin par 'gegs par byed pa de kho na rtsod pa'i yul du brjod pas rtogs pa yin la/ bsgrub bya'i bye brag brjod pas ni bye brag grub pa'i phyir ro/ /ma yin te/ bsgrub bya la sogs pa rnam par gzhag pa ni rtsod pa'i zla bo la ltos pa'i phyir ro/ /rang bzhin pa nyid yin na/ rang gi ngo bo bzhin du phyogs nyid la sogs pa yang ji srid rdzas yod kyi bar du yin par 'gyur la/ smra ba po gzhan la ltos nas gzhan du mi 'gyur zhing / de bzhin du bsam pa'i bskyed byar yang 'gyur ro/ /tshad mas ma bkag pa'i bsam pas bskyed pa ni de log kyang log pa ma yin te/ gang gi phyir rdza mkhan ldog pa yin yang / de las gzhan pa'i bum pa med pa ma yin no/ /bsam pa yang phyi rol gyi skyed byed nyid yin na/ bkag pa yang skye bar byed par 'gyur te/ rang gi ngo bor bor ba dang / bar du chod pa dag med pa'i phyir nges pa med pa yin na/ gtan tshigs nyid phyin ci log tu gyur pa'i phyir/ 'khrul pa can du 'gyur ba'i phyir rgyu dang de'i snang ba dag tu rnam par gzhag pa chad par 'gyur ro/ /smra ba po'i 'dod pa tsam las byung ba nyid kyis dngos su ba ma yin pa'i phyir/ dngos su khyab pa can gyi 'brel pa'i rjes 'byung bar byed pa'i gtan tshigs yin gyi/ de'i rnam par gzhag pa'i rjes su 'jug pa ma yin te/ des na gtan tshigs la sogs pa'i rnam bzhag 'grub pa yin pa'i phyir/ bsgrub bya'i bye brag kho na rtsod pa 'dzin pa yin gyi gzhan la rtsod pa ni ma yin no/ /de 'dzin pa yin na gnas skabs mi shes pas pham par 'gyur ba yin no/ /bsgrub bya'i tshig 'di yang bsgrub bya dngos su grub pa'i yan lag ma yin te/ gtan tshigs smras pa la don med par 'gyur ba'i phyir ro/ /sgrub byed la dad pa bskyed pa'i don du 'dod pa 'dzin pa ni ma yin no/ /khyab pa can ni sgrub byed med na nges pa med pa'i phyir ro/ /yul shes par byed pa'i don du yin no zhe na/ ma yin te/ de'i shes pa ni de lta bu'i sgrub byed brjod pa kho nas grub pa'i phyir ro/ / gang byas pa de mi rtag pa yin te/ bum pa la sogs pa lta bu zhes brjod pa la phyin ci log tu dogs pa ma yin no/ /rtag pa la byas pa nyid rjes su 'gro bar brjod pa ni ji ltar 'khrul pa nyid yin no zhe na/ de lta yin na/ de nyid kyis rtag pa la phyin ci log tu brjod pa yin par cis mi 'gyur/ byas pa nyid ni gang gis nam mkha' la sogs pa la rtag pa nyid kyis khyab par rjod par byed pa yin pa des na sgra la yang rtag pa nyid du 'dod par 'gyur ro/ /bsgrub bya dang sgrub byed dang chos can dang / dpe dang rjes su 'gro ba rnams kyi yul ni bye brag yin no zhe na/ ma yin te/ 'gal ba can la yang mtshungs pa'i phyir ro/ /bsgrub bya dang 'gal ba'i chos can dpe la ni phyin ci log gi khyab pa can du rtogs pa'i shugs kyis gtan tshigs ni bsgrub bya phyin ci log tu sgrub par byed pa ni bya bar sla ba nyid do/ /nam mkha' la sogs pa la ni byas pa nyid med pas bsgrub par bya ba ma tshang ba nyid kho na pham pa'i gzhi yin gyi/ phyin ci log pas khyab pa can ni ma yin te/ bum pa la sogs pa'i rtag pa nyid la sogs pa spangs pa yongs su brtags pa'i yul nyid yin pas de'i tshe ring nas rtogs pa yin pa'i phyir ro/ /bsgrub bya'i tshig med na rjes su 'gro ba'i tshig ni gnyi ga la mtshungs pa'i phyir/ phyin ci log pa can las de kho na nyid smra ba po la khyad par can du rtogs par mi 'gyur ro/ /gang zhig gang gi rjes su 'gro ba'i nges pa can med pas shugs kyi phyin ci log gis khyab par nges par bzung ba med pa'i phyir/ 'dod pa'i bsgrub bya bstan pa la ni/ yid mi ches pa med pa yin te/ ngag gi bye brag gi yon tan dang skyon brjod pas de slong bar byed pa'i bsam pas nyid kyi phyin ci log pa dang / phyin ci ma log pa nyid grub pa yin la/ gzhan gyis ni ma yin te/ de bsgrub pa la tshad ma med pa'i phyir ro/ / de bstan pa la yang chos can gyi tshig ni gnyi ga la mtshungs pa ma yin nam/ chos kyi tshig ni mthong ba kho na bzhin du 'khrul pa'i rgyu mtshan yin te/ lan gnyis brjod pas 'khrul pa ma yin no/ /zhe na/ de lta yin na gtan tshigs la sogs pa la 'khrul par dogs pa med par mi 'gyur te/ gzhan la de med pas gzhan la yang de bzhin du 'gyur ba ma yin no/ /lhag pa'i skyon du yang thal bar 'gyur te/ 'khrul pa srid pa yang yang brjod pa yang ma bsal ba'i phyir/ ngag gi bye brag las de lta bu'i bsam pas rtogs pas yon tan dang skyon sems pa yin pa ni 'khrul par dogs pa ma yin no/ /zhe na/ cig shos la yang mtshungs pa yin no/ /'gal ba can la ji ltar 'khrul bar rtogs pa yin/ ma yin te/ de la yang / smras pa sems pa nyid yin no/ /'ba' zhig ni khyab pa grub pa las phyin ci log par brjod bzhin pa la spyod par byed na/ 'khrul pa'i shes pa yin no/ /phyin ci log pa'i gtan tshigs ni bsgrub bya dang / 'gal ba'i chos can gyi dpe la rjes su 'gro ba yin no/ /de dag tsam gyis ni sngar rab tu grub pa la dpyod par byed pa yin te/ phyin ci log pas khyab pa la rtogs pa med pa'i phyir ro/ /de la dpyod pa la gnyi gar yongs su rtogs pas du ba la de dang 'dra ba yod pa'i phyir dang / de'i tshe nyid bsgrub bya phyin ci log pa la khyab pa'i blo can gyis/ phyin ci log pa'i ngag brjod par mi nus pa nyid kyis mi srid pa'i phyir dang / gang byas pa de ni rtag pa nyid yin te/ nam mkha' lta bu'o zhes dper brjod pa nyid yin la/ rab tu grub pa las phyin ci log par brjod pa yin na/ myur bar phyin ci log par khyab pa nyid du blo la snang ba'i phyir/ bsgrub bya phyin ci log tu sgrub par byed pa'i skyon nyid yin no/ /sgrub byed ma tshang ba ni ma yin te/ ring nas rtogs pa yin pa'i phyir ro/ /phyogs bstan pa las gzhan pa'i gnas skabs ma yin te/ gang las bsgrub bya'i bye brag sgrub pa yin zhes gang smras pa de ni ma yin te/ gang cung zad bstan pa sgrub par byed pa'i sbyor ba ni ma yin te/ de ltar 'jug pa ni smyon pa'i tshig bzhin du lhur blang bar bya ba ma yin par thal bar 'gyur ro/ /gang gis kyang rtsod pa byed pa ni 'dri ba po nye ba yin na/ de'i sbyor ba 'byung ba ni gnas skabs kyi rjes thogs su 'byung ba yin la/ spyi'i gnas skabs la ni sgrub pa'i bye brag sbyor bar byed pa ma yin te/ lhur blang bar bya ba ma yin pa nyid du thal bar 'gyur ba kho na'o/ /de'i phyir smras pa'i khyab pa can la gtan tshigs kyi nus pas bsgrub bya grub pa yin na/ de bstan pa lhag pa nyid yin no/ /khyab pa 'di la mkhas pa rnams la ni gtan tshigs 'ba' zhig brjod byar byed ces gsungs pa'o/ /yongs su rtogs pas dub pa rnams la gsal ba'i don du bsgrub bya brjod par bya ba yin te/ gzhan du na khyab pa bye brag med pas sgrub byed tsam las bsgrub bya mtshon par rtogs pa yin na/ mi 'dod pa'i bsgrub bya yang 'phan pa'i phyir/ de nyid du smra ba dang 'gal ba smra ba dag la bye brag med par 'gyur ro/ /'dis bsgrub par bya ba dang / sgrub par byed pa 'os pa zhes bya bas/ bsgrub bya dang sgrub byed dag tu nye bar bkod pa'i phyir thal ches pa ma yin no zhe na/ de lta yin na 'gal pa'i gtam tsam yang nub par 'gyur ba yin no/ /'khrul pas yod pa yin no zhe na/ de lta yin na dgag pa'i don du 'dod pa'i tshig smos pa ma yin no/ /thams cad du gos pa med pa yin na phyogs kyi mtshan nyid byed pa ni nga rgyal can gyi skyes bu'i bya ba tsam du 'gyur ro/ /de'i bsgrub bya dang bsgrub bya ma yin pa'i dngos po shes par byed pa ni 'bras bu yin no zhe na/ gtan tshigs tsam sbyor ba yin na phyin ci log pa dang / de kho na nyid du smra ba po'i khyad par rtogs par mi 'gyur ro/ /de'i phyir de nges par brjod pa ma yin zhes bya bas nges par bkag pa ma nges pa sgrub par byed pa yin gyi/ rang gi ngo bo 'gegs pa ni ma yin no/ /de lta na dpe la med na mi 'byung bar nges pa'i gtan tshigs nye bar sbyor ba ni/ phyogs la khyab par byed pa nyid du grub pa yin na/ bsgrub bya la nges par byed pa'i phyir/ de la nye bar sbyor ba ni sgrub par byed pa'i yan lag yin no/ /gzhan du na nges pa can bsgrub par bya ba mi rigs pa'i phyir ro/ /bden te/ dam bca' ba smras pa'i gtan tshigs la chos can rjes su 'gro ba grub pa yin na/ yang brjod pa la dgos pa med par 'gyur ro/ /de la 'brel pa can ma yin pa yang / mig gis gzung bar bya ba nyid la sogs pa de ltar brjod par mthong ba ma yin nam/ ji ltar de dag tsam las de rjes su 'gro ba nges pa yin/ de'i nye bar sbyor ba las kyang ji ltar nges pa yin/ med pa la yang de yod pa'i phyir ro/ /med pa la yang sbyor bar byed pa ni gtan tshigs la yan lag lnga dang ldan par mi sbyor ba ni ma yin te/ de ltar gzhung lugs su byas pa'i phyir ro/ /de'i phyir chos can dang 'brel par bstan pa yang / tshad ma las de nyid dang cig shos su nges par rtogs pas gtan tshigs dang / gtan tshigs ltar snang ba dag med na mi 'byung ba bzhin du rnam par gzhag pa yin gyi tshig tsam las ni ma yin no/ /dam bca' ba sngon du 'gro ba can gyi gtan tshigs la/ /de dang 'brel pa'i shes pa ma nyams pa yin te/ nye bar sbyor ba sngon du 'gro ba can gyi med na mi 'byung ba brjod pa las rjes su 'jug pa'i dngos po can nyid yin pa'i phyir rjes su 'jug pa rnams nyid kyi rjes su 'gro ba dag gi mjug bsdu ba las yin no zhes bya ba yang gtam tsam yin te/ de med kyang nye bar bsdu ba'i mthar thug pa can gyi rjes su 'gro ba rtogs pa'i phyir ro/ /khyab pa sngon du 'gro ba can gyi sbyor ba las phyis nye bar sbyor ba ni rang gi don gyi rjes su dpag pa'i rjes su 'brang ba yin la/ de la yang khyab pa nyid kyi rjes su 'brangs nas de nyid nye bar brjod nas rtogs pa yin te/ gang byas pa de mi rtag pa yin te/ dper na bum pa lta bu'o/ /sgra yang byas pa nyid yin no zhes bya ba'o/ /dpe tsam dang lhan cig pa'i gtan tshigs brjod pa kho na las bsgrub bya 'grub pa yin na gnod pa can sbyar ba med par thal bar 'gyur ro/ /de ma sbyar ba las yang sgrub par byed pa'i nus pa med pa'i phyir/ sgrub par byed pa'i yan lag ma yin par brjod pa ni pham pa'i gnas yin no/ /de'i phyir mi mthun pa'i phyogs la gnod pa can gyi tshad ma nye bar bkod pa ni 'bras bu'i sgo nas mjug bsdu ba yin te/ de'i don ni gnod pa can gyi 'bras bu yin pa'i phyir ro/ /mi mthun pa'i phyogs la med pa tsam las ni thun mong ma yin pa bzhin du bsgrub bya grub pa ma yin pa'i phyir phyogs la sogs pa yod par brjod pa yin no/ /gnod pa can dngos su ma bstan pa mjug sdud ma yin nam/ gal te 'bras bu las yin no zhes zer ba ni gnod pa can gyi 'bras bu med na mi 'byung ba'i dag la yang yod pa yin pa'i phyir te/ des na de skad bstan pa yin no/ /rjes su 'gro ba tsam brjod pa la mjug sdud kyis ci dgos she na/ de lta ma yin te/ kha cig tu kha cig gis ni nges pa brjod pa las/ nges pa yang phyogs med na de med par yang gnod pa can gyi dbang gis mi mthun pa'i phyogs yin pa'i dogs pa rnam par bcad pa yin na/ nges par 'gyur ba yin pa'i phyir rang yang nye ba'i mi mthun pa'i phyogs rnam par bcad pa'i nges pa ni rgyu nges pa las nges pa yin la/ nges pa de'i tshad ma 'jug pa'i yul mthong bar byed pa'i dpe yin pa'i phyir/ 'di las lhag pa'i bya ba byed par mjug sdud pa ni ma yin no/ /'dis ni gnod pa med pa'i yul nyid mjug sdud kyi don yin te/ gnyen po dang bcas pa ma yin pa nyid du nye bar sbyor ba bcang pa yin no/ /'di ni 'di las yin no zhes gnod pa can gyis nges pa yin na/ gnod par bya ba nyid du mi srid pa yin te/ de nyid mi mthun pa'i phyogs yin pa'i phyir/ bsgrub bya phyin ci log pa la'am/ des khyab pa la yang slar sgrub par byed pa mi srid pa yin te/ de nyid kyis spangs pa yin pa'i phyir ro/ /gzhan dag na re rang gi don gyi rjes su dpag pa la chos can sa phyogs la sogs pa la du ba la sogs pa'i rtags mthong la/ de las kyang 'brel pa dran pa yin la/ de las me yod do zhes bya ba la sogs pa'i shes par 'gyur ro/ /de rnams la chos can mthong ba ni dam bca' ba'i tshig gis brjod pa yin te/ gzhi ma grub pa nyid spangs pa'i phyir ro/ /de yang chos can tsam bshad par bya ba yin la/ grub pa'i bsgrub bya nyid yin pa spags pa'i don du bsgrub bya'i chos dang bye brag can nyid kyis brjod pa yin la/ gtan tshigs kyis kyang rtags kyi sgrub byed nyid brjod pa yin no/ /gal te yang dpes bsgrub bya dang ldan pa nyid brjod pa yin na yang / de lta na yang sgrub byed ma brjod pa yin no/ /bsgrub bya sgrub par byed pa la yang sbyar bya nyid dam sbyor byed nyid du dpes brjod par bya ba yin te/ mi rtag pa nyid la byas pa nyid ni sbyor byed yin pas rtags yin la/ me la du ba ni sbyar bya yin no zhes sbyar bya dang sbyor byed nyid du shes pa can gyi bsgrub bya chos can la yang yod par brjod pa'i mjug bsdu ba ni ma grub pa bsal ba'i phyir yin no/ /dam bca' ba'i 'og tu gtan tshigs kyi tshig las chos can la yod par go bar byed pa ni ma yin te/ chos can gyi bye brag gi dpe la rjes su 'gro ba med par thal bar 'gyur ba'i phyir ro/ /des na gtan tshigs kyi tshig la gnas skabs la ltos pa med do/ /med na mi 'byung ba'i shes pa ni chos can la nye bar sbyor ba yin no/ /de'i bye brag thun mong ma yin pa nyid du dogs pa de bsal ba'i don du mjug sdud pa yin no/ /thun mong ma yin pa phyin ci log tu thal bar 'gyur ba bsal bas/ bsgrub bya nye bar gzhag par byed pa ni ma yin no/ /de ni de lta ma yin te/ rang gis rtogs pa yin na ni sngar med na mi 'byung bar mthong ba de las/ chos can la med na mi 'byung ba mthong ba yin na/ de las bsgrub bya rtogs pa yin no/ /chos can la du ba ma mthong ba yin na mi 'byung ba dan pa'i dus phyis/ de nyid 'di yin no zhes med na mi 'byung ba shes pa ma yin nam/ sngar ni ma yin no/ /de lta ni ma yin te/ de'i ngo bo mi shes na dran pa nyid med pa'i phyir ro/ /de'i phyir 'dzin pa'i shes pa ni gzhan ma yin no/ /rang gi rtogs pa kho na bzhin du gzhan gyis rtogs pa'i don du yang brjod pa ni gang byas pa de mi rtag pa yin te bum pa lta bu'o/ /sgra yang byas pa yin no zhe na bya ba kho na yin no/ /de rnams su yang sgra yang byas pa yin no zhes bya ba gzhi ma grub pa nyid yin pa dang / rang gi ngo bo ma grub pa yin pa yang bkag pa yin no/ /lhag mas ni de'i bsgrub bya'i nges pa nyid du brjod pas thun mong ma yin pa nyid dang / thun mong ba nyid dang / phyin ci log gis khyab pa yang bkag pa yin no/ /sgrub par byed pa nyid nges pa can nyid kho na yin pa de brjod na/ brjod pa nyid yin pa'i phyir/ dam bca' ba dang / gtan tshigs dang mjug bsdu ba rnams brjod pa don med pa yin no/ /'on te yang rang gi rtogs pa yin na chos can la yod par mthong ba dang / med na mi 'byung ba dran pa la sogs pa'i rim pa yin na/ 'di la yang dam bca' ba'i sgrub byed kyi gzhi ma grub pa nyid bkag pa yin par bstan to/ /sgrub byed nyid ni gtan tshigs kyis bkag pa yin na ji ltar ma grub pa nyid yin par dogs pa yin gang gis nye bar sbyor ba'i gnas skabs su 'gyur/ chos can gyi bye brag gi dpe la rjes su 'gro ba ji ltar yin zhe na/ ma yin te/ chos can la yod pa shes pa yin zhes kho bo cag smra'i/ chos can gyi bye brag tu byas pa'i de nyid yin no zhes ni ma yin no/ /bsgrub bya med na mi 'byung ba brjod pas kyang / sbyar bya la sogs pa nyid brjod na thun mong pa ma yin pa dang / cig shos nyid la sogs pa 'dogs pa ma yin pa'i phyir mjug bsdu ba don dang ldan pa ma yin no/ /des na yan lag gsum mam/ yan lag gnyis pa'i ngag yin pa 'di dag tsam gyis rtogs pa rdzogs pa yin pa'i phyir ro/ /'jig rten na yan lag lnga'i dag gi tha snyad byed par mthong ba yin no zhe na/ mkhas pa'i tha snyad kho na lhur blang bar byas pa yin pa'i phyir shin tu 'brel pa med pa/ byis pa rnams dga' bar byed pas chog go/ /gcig de lta bu nyid du mi rigs pa'i phyir/ mtshan nyid gsum pa'i gtan tshigs kyang ji ltar yin zhe na/ mi mthun pa'i phyogs rnam par bcad pa yin na/ bsgrub bya dang sgrub byed kyi rjes su 'gro bar 'gyur ba yin gyi/ lhan cig pa tsam ni ma yin pa'i phyir rjes su 'gro ba kho na ldog pa yin la/ ldog pa kho na rjes su 'gro ba yin par tha mi dad pa yang / de dang de las ldog pa'i dbye ba las yin pa'i phyir de ltar brjod pa yin no/ /'brel pa can yang kha cig tu ma dmigs pa yin na rtogs pa'i yan lag ma yin pa'i phyir/ gtan tshigs ni mtshan nyid gsum pa kho na yin gyi/ bzhi dang lnga dang gcig gi mtshan nyid can ni ma yin no/ /de lta na ni khang chen la sogs pa sems dang mi ldan pa'i nye bar len pas bskyed pa ni/ blo dang ldan pa'i byin rlabs yod pa yin na/ 'grub par 'gyur ba yin gyi/ de yod pa ma yin pa nam mkha' la sogs pa ni ma yin pa des na de la nges pa can yin no/ /de la tshad ma yin pa yang byas pa nyid bzhin du dang / mi rtag pa nyid ni khyim la sogs pa lta bu'o/ /sa gzhi la sogs pa la byin gyis rlob pa po ma mthong ba las kyang ma mthun pa'i phyogs nyid yin par 'khrul pa ma yin te/ dbang po bzhin du ma mthong ba kho na'i byin gyis rlabs pa po yin pa'i phyir ro/ /dpe dang mi mthun pa yang ma yin te/ blo dang ldan pa tsam la khyab par byed pa nyid du rtogs pa'i phyir dang / de las gzhan pa'i rnam par dbye ba ni brjod par 'dod pa ma yin pa'i phyir ro/ /mi snang ba'i byin gyis rlob pa po sems pa can ci las rtogs pa yin/ nye bar len pa rnams sems pa can ma yin pa'i phyir ro/ /khyim la sogs pa bzhin du sa gzhi la sogs pa'i nye bar len pa rnams sems pa can yin par bye brag ci yang med do/ /des na sems med pa'i byed pa po rnams bsam pa dang ldan pa la ltos pa yin par gnyi ga la yang mtshungs pa'i phyir zhing la sogs pa la byin gyis rlob pa po sems pa can yin par grub pa yin gyi/ de'i phyir chos can rnams kyi dbye bas 'byed pa yang ma yin te/ yul de ni de la bye brag can du byed pa ma yin no zhes bya ba'i rigs pas so/ /gang gi phyir byas pa nyid dam mi rtag pa nyid kyang sgra dang bum pa'i dbye bas 'byed pa ma yin no/ /de'i phyir de ltar sems pa can dang thun mong du grub pa ni me'i spyi'i bzhin du/ rang gi bsgrub pa dang mi 'gal ba can gyi bye brag 'phen par byed pa yin no/ /khyim la sogs pa'i sgrub par byed pa po sems pa can ni/ 'di'i byin gyis rlob pa'i nus pa can ma yin la/ de kho na bzhin du lus kyi bya bas byin gyis rlob pa po nyid kyang ma yin te/ thug pa med pa la sogs pa'i skyon yod pas thun mong du grub pa 'gal ba'i phyir ro/ /ji ltar yang bdag cag la sogs pa sems pa can ni lus la 'du ba can ni bya ba med na lus gzhan ma rtogs pa de yongs su shes pa tsam mam/ 'dod pa tsam gyis byin gyis rlob par byed pa po ma yin pa de bzhin du 'di la yang 'gyur ro/ /khyim la sogs pa sgrub par byed pa po ni shing dang so phag la sogs pa 'di dag tsam gyis 'di rdzogs pa yin no zhes nges par byed pa ma yin nam/ de lta na ni sa gzhi la sogs pa la yang ci'i phyir nges par byed pa ma yin/ rdul phran gnyis can la sogs pa dbang po las 'das pa rnams kyi bya ba rnams yod pa la tshad ma cung zad kyang med do/ /'on te re zhig sems pa can gyis byin gyis rlob par byed pa po yod pa ni/ ci las shes pa po yod pa yin pa'am/ khyad par las kyang rung 'di la 'gegs pa po ma yin no/ /de de ltar sems pa can spyi ni 'phangs pa dang mi 'gal ba'i khyad par te/ dbang phyug gi sgras brjod par bya ba yin pa'i phyir/ de'i brjod bya ma yin pa'i phyir skyon spangs pa yin no/ /de da ni gcig gam du ma yin zhes bsam par bya ba yin no/ /gang gi phyir 'bras bu'i gcig pa nyid dam/ du ma nyid la ni de'i gcig nyid dam/ du ma nyid kyis tshad ma yod pa ma yin te du ma las kyang gcig yin la gcig las kyang du ma yin te/ bzo bo mkhas pa las mthong ba'i phyir ro/ /smras pa du ma yin na gcig la gcig rnam par nyams par bya bar 'dod pa rnams/ rang dbang gis phar 'dren tshur 'dren byed pas 'bras bu mi mthong bar thal bar 'gyur ba'i phyir gcig yin par nges pa yin no/ / du ma nyid yin na yang bsam pa mthun pa rnams kyi ni 'bras bu grub pa nyid du mthong ba yin no zhe na/ bden mod kyi de lta bur rtog pa ni rtog pa mang por 'gyur te/ de rnams kho na tha dad pa'i nus pa can rnams dang / tshogs pa la sogs pa rnams kyi nyon mongs pa'i 'jigs pas gcig yin par rtog pa yin no/ /gang yang gang du nges pa can ma yin pa de ni de'i go byed ma yin te/ ji ltar 'jig ba'i 'gyur ba nyid ni rdza mkhan gyi 'bras bu nyid yin pa ni mdog skye ba nyid dang me'i ni ma yin no/ /de med na yang khyim gyi rab dang ba gam la sogs pa dang khang chen dkar po la sogs pa la yang yod pa'i phyir ro/ /'bras bu yang byed pa po dang / byed pa dang las sngon du 'gro ba can gyi bum pa la sogs pa mthong ba yin pa'i phyir/ sa gzhi la sogs pa la yang 'bras bu yin te/ yan lag dang bcas pa'i phyir de lta bur 'gyur pa yin no/ /rang dbang can gyi byed pa po nyid ni sems pa can kho na yin pa'i phyir/ 'phags pa'i bye brag can gyi spyi ni rjes su dpag pa'i yul yin par grub pa yin no/ /de bzhin du rjes su mi 'jug pa'i skyon yang med pa yin te/ rjes su dpag pa thams cad chad par 'gyur ba'i phyir dang shugs kyis grub pa'i bye brag nyid kyi phyir ro/ /shugs ni tshad ma gzhan yang ma yin te/ rjes su dpag pa nyid ni de tsam du lhur blangs pa yin pa'i phyir ro/ /gzhan du na spyi tsam yul yin pa nyid kyis grub pa la sgrub pa yin nas rjes su dpag pa tshad ma ma yin par thal bar 'gyur ro/ /'dis ni mngon sum yul gzhan la sogs pa las ldog pa'i bye brag rnam par 'jog par byed pa yin par bshad pa yin no/ /de rnam par 'jog par byed pa ma yin na ni/ 'jug pa'i yul nye bar ma mthong bas tshad ma ma yin par 'gyur ro/ /byed pa po'i nus pa thams cad yongs su shes pa'i mtshan nyid can gyi byed pa po nyid ni 'das pa la sogs pa la mthong ba nyid yin te/ de la rdza mkhan la sogs par brtag pa ma yin te/ de yang rang gi 'bras bu la byed pa po'i nus pa thams cad kyis shes pa mthong ba'i phyir ro/ /de yang de ltar mthong ba'i bye brag gi yul gyi khyab par gyis phul du byung bas na thams cad mkhyen pa nyid du brjod pa yin no/ /khyad par de nyid ma mthong ba'i phyir ji ltar 'brel pa 'dzin pa yin zhing / ji ltar rjes su dpog pa yin zhe na/ de lta yin na gzugs la sogs pa rnam par rig pa tsam las ji ltar mig la sogs pa'i rjes su dpag pa yin na mig la sogs pa rnams ni byin gyis rlob pa'i ngo bo nyid ma yin no/ /de'i nye bar dmigs pa las bya ba ni byed pas sgrub par byed pa ma yin par mthong bar bya ba yin no zhe na/ rnam par rig pa la yang bya ba las byed pa grub pa yin la/ bye brag la yongs su dpyod pas byed pa po'i bye brag grub pa yin pa de bzhin du byed pa po'i bsgrub bya'i bya ba ma mthong ba dang / bya ba'i bye brag la yongs su dpyod pas byed pa po'i bye brag grub pa'i phyir log par rtogs par bya ba ma yin te/ bye brag grub pa yin yang bye brag thams cad grub pa ni ma yin te/ gang sgrub par byed pa ji snyed pa'i don rtogs pa la khyab par byed pa yin la/ de las de rnyed pa kho na nges pa yin gyi/ don gzhan ni ma yin te/ gang gi phyir mes khyab pa'i du pa'i bye brag tsam du sgrub pa yin yang / rtswa la sogs pa'i ngo bo'i bye brag ni grub pa ma yin no/ /de ma grub na cig shos bye brag grub kyang / don byed pa don du gnyer ba mi 'jug pa ni ma yin te/ de'i phyir 'byung ba chen po la sogs pa rnams la de'i nye bar len pa dang nye bar byed pa la sogs pa'i rang bzhin shin tu bskal pa yin pa'i phyir/ tshu rol mthong bas de yongs su shes pa sngon du 'gro ba can gyi sbyor bar byed pa po nyid mi srid pa'i phyir ro/ /de'i mngon par 'dod pa'i bye brag ni de'i sgrub byed brjod pa kho na las thams cad du 'grub pa'i phyir bye brag dang 'gal ba can rnams nub pa yin no/ /las rnams kyi sa bon rnams la de grub pa'i phyir grub pa la sgrub pa yang ma yin no/ /gang gi phyir sems pa can yin pa'i las ni sems pa can ma yin pa'i byin gyis rlob pa po ma yin te/ bsam pa med pa nyid kyis yul la sogs pa'i nges pa med pa nyid kyis 'bras bu skyed par byed pa med pa'i phyir dang / byed pa po nyid ni nye bar len pa la sogs pa la yod pa'i nus pa yongs su shes pa'i mtshan nyid yin pa'i phyir ro/ /'on te sems pa can gyi las yin pa de lta na yang de tshu rol mthong ba rnams kyis sa gzhi la sogs pa'i rgyu la sbyor bar byed pa ni ma yin te/ spyod yul ma yin pa'i phyir ro/ /don thams cad rig pa po'i sems yin no zhe na/ ma yin te/ /de ni byed pa po nyid yin par khas mi len pa'i phyir la khas len pa yin na ni de nyid dbang phyug byed pa po yin no/ /be'u la sogs pa phal cher bskyed pa'i don du'o ma la sogs pa byin gyis brlabs pa med na ji ltar cher skye ba yin zhe na/ ma yin te/ de la yang byin gyi rlabs kyis bsgrub pa'i phyir ro/ /gzhan du na be'u shi ba'am cher skyes pa na'ang / 'o ma 'phel ba'i phyir rgyun mi 'chad par thal bar 'gyur te/ sems med pa'i phyir ro/ /des na de ltar rjes su dpag pa ni spyi'i yul can nyid yin pas/ bye brag la ltos pa yin pas 'gal ba can bzhin du/ dpe la bsgrub bya ba tshang ba nyid bsal bar bya ba yin te/ rjes su dpag pa thams cad la bye brag 'phel ba'i phyir ro/ /ji lta bur mthong ba de lta bur yin no/ /bden te/ 'di la yang mthong ba nyid yin te/ 'bras bu shin tu chen po nyid yin pa'i phyir/ rgyu yang de bzhin yin no zhes 'ba' zhig 'dzin pa ni ma yin no/ /de ltar na med na mi 'byung bar rab tu grub pa'i rjes su dpag pas thams cad byed pa por de yongs su shes pa dang ldan par yang grub pa yin na 'bras bu 'byung ba chen po la sogs pa'i byed pa po dbang phyug ma yin te/ gzhal bya yin pa'i phyir/ bum pa la sogs pa bzhin du rjes su dpag pa gzhan bsal ba yin te/ de la bsgrub bya ma tshang ba'i phyir dang / phyogs kyi bye brag ma grub pa'i phyir ro/ /byed pa po'i dgos pa ci zhig yin zhe na/ dgos pa'i bsam pas med par ni/ /rmongs pa'ang 'jug pa ma yin no/ /gzhan gyi don byed par 'dod pas 'jug pa ni/ gzhan du mi 'thad par grub pa yin la/ 'jug pa yang 'bras bu las gzhan du mi 'thad pa'i phyir/ gzhan gyi don gyis bskul bas bde ba kho na skyed par byed pa yin gyi/ sdug bsngal ba ni ma yin no/ /zhe na/ chos dang chos ma yin pa'i thabs sna tshogs pa can gyi byed pa po ni/ 'bras bu sna tshogs pa mthong ba las/ rjes su dpog pa yin pa'i phyir skyon med do/ /'di de bzhin du byed pa rang gi don yin pa dang / don ma yin pa rnam par bcom pa gang yin/ gang yang ma yin no/ /ci'i don du de ltar byed pa yin gyi/ ji ltar nyi ma rang bzhin gyis gsal bar byed pa'i rang bzhin de kho na bzhin du 'jug pa yin no zhe na/ 'di sems pa can yin pas ci zhig du 'gyur ba yin zhe na/ don rnams kyi skye ba'i rgyu ji snyed yin pa de snyed pa kho na la byin gyis rlob pa las byed pa po rjes su dpog pas dpog par byed pa yin gyi/ gzhan rnams kyi ni ma yin la/ sems pa can yin pa dang 'gal ba med do/ /de'i phyir yod pa la dmigs par byed pa'i tshad ma ldog pa yang ma yin no/ /don 'di la mig sna tshogs dang / kha sna tshogs dang / lag pa sna tshogs dang / rkang pa sna tshogs pa can te lag pa dag gis bus pa las phun sum tshogs pa dang / rig byed gsum po dang / mtho ris dang / sa gzhi rnams skyed par byed pa'i lha cig yin zhes/ lung las kyang 'byung ba yin la drang srong rgyas pas kyang / skyes bu'i mchog gzhan ni/ dam pa'i bdag nyid ces brjod pa/ /gang yin khams gsum nang bzhugs pas/ /dbang phyug rtag pas byas pa yin/ /zhes smras pa'o/ /chos la sogs pa'i rang gi ngo bo bzhin du/ lung ni thams cad du rang gi ngo bo rtogs pa'i yul can yin te/ de'i yul can nyid yin la/ de ma rtogs pa yin na/ de la 'jug pa med par thal bar 'gyur ba'i phyir dang / tshad ma rnams ni rtogs par byed pa nyid tsam bya ba ma yin pa'i phyir ro/ /de la skyes bu'i don nyid ni dbang phyug gi rang gi ngo bo rtogs pa bsgrub pa yin la de nyid rig nas 'chi ba las rgal bar 'gro ba yin gyi/ gang gis byang grol sgrub par 'gro bar byed pa'i lam gzhan yod pa ni ma yin no/ /thams cad shes pa ma yin pa rnams kyis thams cad shes pa yin par ji ltar shes pa yin zhes bya ba yang mi rigs pa yin te/ /gang gi phyir 'jig rten gyi rdza mkhan la sogs pa'i byed pa po rnams kyis de'i shes bya dang / shes pa dang ldan pa rnams kho nas de mkhas pa yin par go ba ni ma yin te/ sna tshogs pa rig pa zhes bya bar phyis kyang de rtogs par grub pa yin no/ /de bzhin du lung las kyang thams cad shes pa bsnyen pa las/ me'i sbyin sreg mtho ris sgrub par byed pa yin pa bzhin du byang grol sgrub par byed pa nyid du sgrub pa ni thams cad shes pa la gsol ba btab pas/ sngon gyi las sad pa ni mchog sbyin pa yin par mi rigs te/ de rab tu sad pa las kyang skyes bu'i don ni de'i tshig las 'grub pa'i phyir ro/ /lung las rna ba la sogs pa la rtag pa nyid du rtogs pa bzhin du de la 'gal ba yod pa ni ma yin la/ rtag pa nyid la yang ma yin no/ /de ma thag de'i zhal rnams las/ /rig byed bzhi po rnams 'phros pa/ /dus gzhan re re nyid la ni/ /thos pa gzhan ni sgrub byed yin/ /zhes smos pa'o/ / /rig byed dang i ti ha sa la sogs pa rnams la bcos ma nyid du dran pa'i phyir/ bye brag can gyi skyes bu byed pa po nyid du grub pa'i phyir skyes bu ni dbang phyug yin no/ /lung las grub pa'i rdzas ni gtsang sbra dang gtsang sbra ma yin pa bzhin du/ rjes su dpag pas kyang bsal ba ma yin te/ yul thams cad la de'i shes pa ni rjes su dpag pa dang / lung dang sna tshogs pa rig pa yin zhes bya ba la sogs pas kyang rtogs pa yin no/ /de lta bu las kyang de lta bu'i byed pa rtogs pa yin na yang / rtog pa chen por 'gyur ba'i phyir rtag pa nyid la tshad ma dang 'gal ba med do/ /lung las kyang / byed pa po nyid yin yang / bzhi po lhan cig grub pa ni/ /bde dang shes pa mtha' yas tshangs/ /zhes bya ba'o/ /thos pa las kyang / lag pa rkang pa yod med bzhin/ /'dzin dang mig med bzhin mthong dang / /rna ba med bzhin thos pa ni/ /sna tshogs rig pa de yin la/ /gzhan ni de rig pa med do/ /zhes bya ba dang / skyes bu'i che mchog de skad smra/ /zhes smos pas kyang / byed pa rnams bkag pas rtag pa nyid kho nar grub pa yin la/ blo de yang mngon sum gyi tshad ma yin no/ /dbang po dang don du phrad pa med na de nyid ji ltar yin zhes zer na yang / de lta bu'i kho bo cag la sogs pa rnams kyi mngon sum ma yin te/ 'di ni de nyid ma lus pa dngos su rtogs pa'i bdag nyid can ni mtshan nyid gzhan kho na yin no/ /'di'i chos ni 'dod pa bzhin du bya ba'i nus pa ma nyams pa yin par brjod pa yin gyi/ sgrub pa nan tan du bya bas bsgrub par bya ba'i bsod nams ni ma yin te/ dgos pa med pa'i phyir ro/ /sdug bsngal med pa'i phyir chos ma yin pa yang spangs pa yin no/ /de dag med pas 'dod chags dang bral ba dang / rab tu ldang ba yang med do/ / de yang bdag cag la sogs pa'i bdag dang mi skye bar 'brel bas/ las rnams kyis byin gyis brlabs pa'i sa gzhi la sogs pa rnams kyi byed pa po nyid du rjes su dpag pa kho nas grub po/ /'dir sbyor bar byed pa med pa nyid kyang ma yin te/ phyogs la khyab par byed pa'i rjes su 'gro ba dang ldog pa can ni sbyor bar byed pa nyid ma yin na/ rjes su dpag pa thams cad la yang bye brag med pas/ de kho na bzhin du 'gyur ro snyam du sems pas/ gal te tshad ma yod pa yin te/ /sdod 'jug dbyibs kyi khyad par dang / /zhes pa nas/ dper na bum pa la sogs pa bzhin no zhes bya ba'i bar gyis/ thams cad dbang phyug sgrub par byed pa yin par nye bar mtshon pa yin no/ /lan du/ sdod 'jug dbyibs kyi khyad par dang / don byed pa la sogs rnams la/ /zhes bya ba ste/ sogs pa'i sgras ni bskyed pa dang sems can ma yin pa'i nye bar len pa nyid la sogs pa bzung ba yin te/ rigs pa mtshungs pa'i phyir ro/ /gang 'di sems can ma yin pa'i nye bar len pa nyid dang / de'i khyad par can bskyed pa yang khyim la sogs pa'i ngo bo ni/ sa gzhi la sogs pa las ldog pa de dang 'dra ba'i 'bras bu gzhan dang thun mong ba'i khyim dang / bum pa la sogs pa'i sgra'i khyad par gyis nye bar mtshon pa'am/ bya ba ma mthong ba yang byas par blos nye bar mtshon pa yang / de'i blo dang ldan pa med na mi 'byung ba yin te/ de'i blo ni chos shin tu mkhas pa de'i blo'i rjes su 'brangs pa'i bye brag nyid yin pa'i phyir/ ri mo gzhan lta bu'o/ /sa gzhi la sogs pa la ni de lta bu'i ngo bo yod pa ma yin no/ /khyim zhig pa'i shing dang so phag la sogs pa'i phung po'i ngo bo bzhin du mtshan nyid mi mthun pa yin pa'i phyir/ byas pa yin zhes bya ba'i bsgrub bya'i shes pa mi 'byung ngo / / rgyu mtshan gang gis de nyid kyi ngo bo yin zhe na/ byas pa rnams kyang re zhig dngos po re re'i rang gi ngo bo'i rnam pa tha dad pa kho na yin nam byas pa rnams lta ci smos/ 'jig rten pa la byas pa dang ma byas pa'i rnam par dbye ba dgag bya ma yin no/ /'on te byas pa nyid ma byas pa bzhin du snang ba yin te/ dngul chu zhugs pa'i gser lta bu'o/ /de lta na yang the tshom can gyi sa gzhi la sogs pa'i ngo bo las ni/ rlangs pa la sogs pa'i ngo bor the tshom za ba'i du ba las me bzhin du/ bsgrub bya mi 'grub pa'i phyir ma grub pa nyid dam/ the tshom za ba'i ma grub pa yin par ni/ dpe ma grub ces bya bas bstan pa yin la byas par nges pa la ma byas pa nyid du the tshom za bar 'gyur ba ma yin te/ gzugs la sogs pa'i so sor snang ba la yang / phyin ci log par ldog pas tha snyad thams cad nus par thal bar 'gyur ba'i phyir ro/ /'ji pa'i gong bu las bum pa khyad par med par sems dang ldan pa 'ga' yang nges par byed pa ma yin no/ /de yang de lta bu'i ngo bo sa gzhi la sogs pa la mi srid pa'i phyir blo dang ldan pas khyab pa can nye bar dmigs pa'i phyir/ de dang ldan pa nyid du sgrub par byed do/ /gang yang sems pa can ma yin pa'i nye bar lan pa nyid tsam sgra'i brjod bya'i bdag nyid du mtshungs pa de ni de bzhin du khyab pa can ma yin te/ blo phul du byung ba dang cig shos dag gis phul du byung ba dang / cig shos su ma mthong ba'i phyir ro/ / gal te khyim dang cig shos dag gi nye bar len pa rnams sems pa can ma yin pa nyid du khyad par med pa yin na/ gcig la de ltos pa yin gyi cig shos ni ma yin zhes ji ltar rnam par dbye ba yin/ de lta na bum pa dang snam bu dag gi de'i nye bar len pa nyid la bye brag med kyang / ji ltar rdza mkhan dang thag pa la sogs pa'i bye brag la ltos pa yin gyi/ thag pa'i blo las byung ba'i bye brag ni gzhan las ni ma yin no zhe na/ gzhan la yang blo las byung ba'i bye brag ni nye bar len pa tsam las ni ma yin no/ /de ma yin pa las byung bar cis mi 'gyur/ bsam pa med pa'i bya ba'i nye bar len pa las ji ltar yul la sogs pa'i nges pa can gyi 'bras bu ji ltar bskyed pa yin zhe na/ de'i bsam pas las kyang ji ltar yin te/ bye brag med par mtshungs pa'i phyir ro/ /ma mthong ba la sogs pa'i lhan cig byed pa'i dbye ba las yin no zhe na lhan cig byed pa'i dbye bas de nyid la de nges par 'gyur du zin kyang / gang gi phyir nges pa ni blo'i bskyed bya ma yin te/ lhan cig byed pa po yod pa dang / med pa'i rjes su byed pa yin pa'i phyir dang / dri ba la sogs pa dang bde ba la sogs pa rang gi ngo bo'i nges pa bzhin du yul la sogs pa'i nges pa yang de nyid kho nas rnyed par bla ba'i phyir ro/ /de yang brtags pa yin pa ni ji snyed pa rnams bskyed pa'i don rgyu rnams yod na/ de rnams kyi byin gyis rlob pa po yin gyi/ rdza mkhan bzhin du rang dbang gis cung zad bya ba'i nges pa byed pa ni ma yin te/ las kyi bya ba rdzogs pa ni sgrub par byed pa'i rigs pa las 'das pa yin pa'i phyir ro/ /des ni de rnams kyi nus pa'i shes pa ni 'ga' yang phul du byung bar sgro 'dogs pa ma yin te/ rdza mkhan gyis de shes pa yin na/ de'i blo las byung ba'i bye brag grub pa'i bye brag chen po yin no/ /des ni nan gyis de yongs su bsgyur ba yin na/ dbang phyug ni de bzhin du nan gyis byed pa ni ma yin te/ dge ba gcig gcig 'byin par thal bar 'gyur la/ de'i nus pa phul du byung ba las de'i nye bar len pa rnams tshogs pa ni byed pa po yin no zhe na/ ma yin te de rnams nyid rang gi rgyu rnams kyis bsdus pa rnams rang gi nus pa nyid kyis skyed par byed pa'i phyir/ re zhig de'i shes pa ni dgos pa can ma yin te/ nus mthu ni lhan cig byed pa rnams kho na'i las rnams su brtags pa yin par bstan pa ni/ 'dod pa sgrub pa'am zhes bya ba smos so/ /byed pa po dang / byed pa la sogs pa sngon du 'gro ba can gyi 'bras bu dmigs pa yin no zhe na/ 'di la bye brag la sogs pa zhes smras pa yin te/ byed pa po'i tsam ma ma byed pa can ma yin pa yang shing rnams sreg byed bzhin du 'gyur ro/ /sems pa can mthong ba yin no zhe na/ des byas pa'i 'bras bu yang gzhan nyid kho na yin no/ /sa gzhi la sogs pa bskyed pa'am/ 'bras bu nyid ni nam mkha' la sogs pa la blo dang ldan pa med pas 'byung ba ma yin no zhe na/ yod pa ma yin yang mi 'byung ba yin te/ gang gi phyir de ni gos la sogs pa la yod pa ma yin par bstan zin to/ /dpe ma grub ces bya ba ni bsgrub par bya ba ma tshang ba nyid yin zhes bya ba'i don to/ /de bzhin du du ba dang byas pa nyid la sogs pa ni dpe dang dpe can la ltos nas chos can tsam gyis gzhan du phye ba ma rtogs pa gzhan ma yin no/ /de lta bu de yang dpe la rjes su 'gro ba med pa ni mi mthun pa'i phyogs lam mthong ba tsam gyis sgrub byed ma yin te/ 'khrul par dogs bzhin pa'i phyir 'khrul pa yin par mthong ba lta bu'o/ /ji ltar skye ba nyid tsam ni me la'am 'ji ba'i 'gyur ba tsam nyid ni rdza mkhan gyi bya ba nyid la sgrub byed ma yin te/ de la yang ma 'khrul pa'i nges pa'i med pa'i phyir ro/ /de bstan pa ni/ yang na the tshom za ba yin/ /zhes bya ba'o/ /chad pa la sogs pa'i byed pa sngon du 'gro ba can gyis bya ba mthong ba ma yin nam/ rnam par rig pa'i bya ba ni ji ltar mig la sogs pa'i dbang po las 'das pa rtogs par byed pa yin pa de bzhin du 'di la yang bya ba las dbang po 'das pa'i byed pa po grub pa yin no zer ba de la/ 'dod pa sgrub pa 'am zhes bya ba smos te/ dbang po bzhin du sems pa can ma yin pa nyid du grub pa'i phyir ram/ shes pa'i bskyed bya'i bye brag med pa'i phyir smra ba po'i 'dod pa grub pa yin no/ /thams cad shes pa ma yin pa'i byed pa po sngon du 'gro ba nyid ni phyin ci log du sgrub par byed pa ma yin pa ni 'gal ba can ma yin te/ 'bras bu nyid tsam la sogs pa dang / blo dang ldan pa tsam gyis khyab pa ma grub pa'i phyir ro/ /grub pa yin na ni 'gyur ba kho na yin te/ dper na mig la sogs pa ni gzhan gyi don byed pa yin te/ 'dus pa yin pa'i phyir mal cha dang stan la sogs pa bzhin no/ /mal cha la sogs pa nyid la gzhan gyi don nyid kyis khyab pa mthong ba yin no/ /ji ltar mthong ba bzhin du 'dus pa'i bye brag kho na gzhan gyi don nyid sgrub par byed pa yin na/ 'dod pa las bzlog pa sgrub par byed pa'i phyir 'gal ba can yin no/ /mthong ba'i bye brag gi rjes su 'brang bar byed pa'i phyir 'phen par byed pa yin no/ /chos can gyi rigs kyi bye brag bzhin du chos kyi rigs ni tha dad pa ma yin te/ rang gi ngo bo bzhin du khyad par yang mthong bar byed pa yin pa'i phyir ro/ /mthong ba'i dbyig pa dang mtshan nyid mi mthun pa'i mig ni ji ltar rjes su dpog pa yin zhe na/ ma yin/ mthong ba kho na'i byin rlabs de'i nus pa tsam gyi 'bras bu las byin gyis brlabs pa'i dbang po nyid yin na/ thob par byed pa nyid du go bar byed pa yin te/ de'i phyir thag ring ba dang / nye ba la sogs pa'i dbye ba la sogs pa'i dbye bas 'dzin pa dang / mi 'dzin pa rnam par gzhag par mi 'gyur te/ ma thob par bye brag med pa'i phyir 'di yang gtam tsam yin no/ /thob par byed pa nyid ni bdag yin te/ dus dang phyogs la sogs pa thob pa yod pa'i phyir ro/ /gsal bar byed pa'i rlung dang phrad pa dang / bral ba dang 'brel bas/ rna ba ni de rnams kyi yang 'dzin byed du 'gyur ro/ /rung ba ma yin pa'i phyir ma yin no zhe na/ thob bya ma yin pa yang rung ba ma yin pa'i phyir/ thag ring ba la 'dzin par byed pa ma yin te/ yul ji snyed pa la shes pa skyed par byed pa de skyed la rung ba yin te/ de ni 'bras bu'i go byed yin pa'i phyir ro/ /zla ba'i cha gzhan ma mthong ba ji ltar rjes su dpog pa yin/ /des na skye ba la sogs skye ba gzhan rjes su dpog par yang mi rigs so/ /mthong ba'i cha'i skye ba dang mtshungs pas dbye ba med pa'i phyir ro/ /sngon gyi las ma mthong ba las ji ltar yin zhe na/ de ci da ni gseng yod pa'i phyir gtun shing yang shong ba yin nam/ 'bras bu sna tshogs pa mthong ba las rgyu sna tshogs pa nyid yin pa la ni ches ngo mtshar bar bya ba ma yin no/ /de dag tsam gyis 'dod par 'grub pa yin no/ /de las gzhan par rtogs par byed na ngo mtshar byed par 'gyur ro/ /de'i phyir 'bras bu la sogs pa tsam gyis khyab pa ma grub pa yin te/ ma 'khrul bar ma nges pa'i phyir ro/ /de la dpe la/ yang na the tshom za ba yin/ /zhes bya ba smos te/ bshad pa byed pas ni sems pa can gyi las ni byin gyis rlob pa po nyid yin par khas blangs par 'dod pa grub par bstan pa ni/ sems pa can la sems pa can gzhan ni dgos pa med pa yin no/ /dpe la ni de bzhin du ma grub pa'i phyir dbang phyug de nyid ni don byed pa'i byed pa po nyid la sogs par ma nges pa nyid yin te/ de la gzhan byin gyis rlob par byed pa nyid gzhan yod pa ma yin te/ de bstan pa ni/ yang na the tshom za ba yin/ /zhes bya ba'o/ /de'i phyir 'dir sa gzhi la sogs pa la blo'i bskyed bya'i bye brag med pa'i phyir dang / dbang phyug gis byas par mi rigs so/ /de khas len na/ tha dad dngos la rab grub pa/ /sgra mtshungs pas tha dad med phyir/ /zhes bya ba dang ma 'brel par 'gyur ro/ /de'i phyir yul la sogs pa'i nges pa tsam mthong bas de'i rgyu ma mthong ba tsam yod par go ba yin gyi de yang sems pa can ma yin te/ de'i bskyed bya'i bye brag ma mthong ba'i phyir/ /sems pa can gyi rjes su 'gro ba nyid yin la/ gzhan ni ma yin no zhes bya ba'i don 'di la yang tshad mar cung zad kyang med la/ /las la ni byed pa po thams cad kyi nus pa nyid kyi shes pa yang mi srid pa yin no/ / re zhig 'bras bu'i nges pa mthong ba las nges par byed pa ma mthong ba la sogs pa go ba yin zhes gang smras pa de ni rigs pa yin no/ /bsnyems pa de bor nas sems pa can gyi bye brag sgrub par byed pa gang yin pa de la 'di spyad par bya ste/ re zhig sa gzhi la sogs pa 'u bu cag la sogs pa'i longs spyad par bya ba la sogs pa bzhin du las kyi nye bar bsgrubs pa yin par go ba yin no/ /las kyang gnas la sogs pa don du gnyer ba'i snying po can nam/ byed pa la sogs pa don du gnyer ba'i snying po can te/ bdag lha'am klur gyur cig ces bya ba'i sems nyid yin no/ /des na 'bras bu dang rgyu dang de'i 'bras bu la sogs pa thams cad du lhag par zhen pa rnams bag chags kyi sgo nas gnas pa ni byin gyis rlob pa por rtogs pa yin no/ /'dis ni bsod nams kyi blo'i nus pa bshad pa yin no/ /gal te yang rnam pa thams cad ma mthong ba de lta na yang de sna tshogs pa/ rig pa yin zhes thams cad shes par yongs su shes pa bzhin du thams cad du lhag par zhen pa can gyi so sor snang ba'i byin gyis rlob pa po por nas de la gzhan du rtogs pa la ni tshad ma cung zad kyang med do/ /de ltar na byed pa med pa'i blo rtogs bya ma yin pa rtag pa ni rang bzhin nyid kyis byin gyis rlob pa po nyid yin zhes bya ba la sogs pa ma mthong ba du ma'i rtogs pas yongs su du ba pa yang bsal ba yin no zhes dgongs pa'o/ /nges pa can tsam sgrub pa yin na grub pa la sgrub pa nyid yin no/ /sems pa can gyi bye brag grub pa yin na mnyan bya nyid bzhin du rjes su 'gro ba med pa'i phyir 'khrul pa srid pas lhag pa dang ldan par 'gyur zhes bya ba'i don to/ /sems pa can ma yin pas byin gyis brlabs pa'i byed pa po rnams ni bya ba brtsams par byed pa por cis mi 'gyur zhe na/ mig la sogs pa dang me la sogs pa rnams ni ji snyed pa tshogs pa yin na/ rnam shes dang du ba la sogs pa'i bya ba brtsams pa yang rtsom par byed pa kho na yin la sa gzhi la sogs pa dang snam bu la sogs pa'i bya ba la ni brtsam pa byas pa yang / snal ma dang rdul phra rab la sogs pa rnams kyis rtsom par byed pa ma yin te/ ma mthong pa la sogs pa nges pa can gyi lhan cig byed pa med pa'i phyir dang / byed pa po rnams kyi nus pa ni 'bras bu la rtogs par bya ba yin pa'i phyir/ ci'i phyir 'jug pa ldog pa yin zhes brgal zhing brtag pas ci zhig bya/ du ba la sogs pa rnams ni gtan tshigs yin gyi/ de dag ni ma yin par bstan pa ni/ gang gi phyir de dag yod kyang zhes bya ba ste/ 'dod pa ni grub pa nyid yin no/ /rtsod pa'i gnas yin pa'i phyir ji ltar chos can bye brag tu byed pa de bzhin du/ nye bar dmigs pa dang ldan pa chos nyid dang bye brag tu bya ba yin no/ /gzhan du na grub pa la sgrub pa yin no zhes bstan pa ni/ gang la rtsod pa yod pa de zhes bya ba smos so/ /dbang phyug la skul byed yin pa ni 'di'i 'grub par 'gyur ro zhes kun tu rtog pa yin la/ chos la sogs pa'i bye brag nyid kyis ni ma yin te/ dbyig pa la sogs pa bzhin du sems pa can ma yin pa'i phyir ro/ / des nye bar dmigs pa can gyis rgyu nyid du dam bcas pa nyid kyis sems pa can ma yin pa bsal ba yin no/ /de'i phyir bsgrub bya grub pa ma yin no snyam du sems pa ni/ las las skyes pa nyid yin no zhes bya ba ni/ /bsgrub bya ma yin pa ma yin no zhes bya ba'o/ /las khas len pa yin na de nyid kyis chos sems pa can tsam du khas len pa yin pas rtog pa yang bar du 'gyur ba yin la dbang phyug la ni de dang chos can gyi rtog pa yang zhes bya ba yin pas lci la yin par bstan pa ni/ gal te sems pa can gyi rang bzhin gyi las yod na zhes bya ba smos so/ /de nyid 'di yin pa ni sems pa can dang / cig shos dang / byed pa po dang byed pa po zhes bya ba gnyis po khyed kyi las yin par bshad pa dang / bdag gi byed pa po yin zhes bya ba ming tsam gyis phye ba ma yin nam snyam du sems pa la/ de la sems pa med pa rnams zhes bya ba smos so/ /gang gi phyir ming tsam gyis tha dad par khyed ji ltar 'dod pa yin/ khyed kyis kyang las ni khas blangs pa yin la/ de la yang sems pa can du lhag par kho bos brjod pa yin la/ des na tha dad pa'i dbang phyug dgag pa yin par bstan pa ni/ las kyi rang bzhin sems pa nyid/ /ces bya ba ste/ bshad pa'i rigs pas las kyis bskul ba byin gyis brlabs par grub pa yin na/ sems pa can gzhan lhag pa kho na yin te/ de'i bya ba lhag pa med pa'i phyir ro/ /bum pa la sogs pa la rdza mkhan la sogs pa'i lhag ma lta bu yin par bstan pa ste/ 'dod pa grub pa nyid la gtan tshigs sam dpe la ma grub pa yin zhes sbyor bar byed pa ni/ de lta na yang dpe ma grub ces bya ba ni sems pa can la yang sems pa can gzhan du rtog pa yin na'o/ /rdza mkhan la sogs pa la yang rang gi bya ba'i yul shes pa yin pas thams cad shes pa las bye brag med do zhes bya ba'i don to/ /byis pa nyid kyi gnas skabs las bye brag yin par smra ba ni/ 'on te rdza mkhan la sogs pa de yang zhes bya ba'o/ /de'i tshe yang rgan po rnams las de'i sgrub pa mthong ba'i phyir/ dbang phyug gi gnas skabs med par bstan pa ni/ byed po grub na kun shes nyid/ /ces bya ba'o/ /mthong ba'i yul la skye ba po rang nyid dbang byed pa yin par ni bden na/ ma mthong ba la ji ltar yin/ rgan po rnams kyang de la dbang med pa nyid yin te/ dbang po las 'das pa'i phyir ro snyam du sems pa la/ gal te de thams cad shes pa yin zhes bya ba smos te/ da ltar ba bzhin du dpyod pa med pa'i bya ba mthong ba las phyin ci log par go ba ma yin no/ /zhes bya ba'i don to/ /dpyod pa med pa'i 'bras bu ni dpyod pa dang 'gal ba yin par mi rigs te/ gdams ngag dam pa dang 'tsham pa'i 'bras bu sbyin pa dag gi rnam par dpyod pa'i bya ba yin pa'i phyir ro snyam du sems pa ni/ 'on te/ don dam pa nyid kyi nye bar bstan pa nyid ces bya ba'o/ /lan du dpyod pa med pa'i bya ba byed pa'i phyir dpyod pa med pa'i bya ba nyid yin par bstan pa ni/ 'di ni chos min pa la'ang zhes bya ba ste/ chos yod bzhin chos ma yin pa la 'jug par byed pa ni/ dpyod pa med pa can gyi bya ba yin la/ de'i bya ba yang de'i 'bras bu ster ba yin zhes bya ba'i don to/ /chos ma yin pa nyid ni chos ma yin pa'i 'bras bu skyed par byed pa ma yin nam/ dbang phyug ni ma yin te/ des na dpyad pa med pa'i bya ba'i las su ster ba ma yin no/ /snyam du sems pa ni/ 'on te 'di chos ma yin pa zhes bya ba'o/ /de lta na yang sdig pa dgag par bya ba yin pa na/ de'i 'bras bu ster ba ni dpyod pa med pa'i bya ba kho na yin par bstan pa ni/ dbang phyug gzhan ni nus med pas/ /zhes bya ba smos te/ gal te dbang phyug gzhan bzhin du na 'di yang sdig pa dgag pa la nus pa med pa yin na/ de lta na sdig pa dgag pa la bzhin du/ sdig can rnams la dgos pa byed pa nyid kyi chos dang / de'i 'bras bu byed pa po nyid du mi 'gyur ba'i phyir/ dbang phyug gi byed pa po ma yin par thob par bstan pa ni/ sdig bzhin thams cad dbang phyug gis/ /zhes bya ba'o/ /gal te yang sdig pa dang sdig pa dgag pa dang de'i sgo nas chos dang de'i 'bras bu rnams 'byed pa ma yin te lta na yang / bdag nyid thams cad kyi byed pa po ma yin te/ sdig pa'i 'bras bu byed do snyam du sems pa la/ dbang phyug med na 'jig rten pa zhes bya ba smos te/ ji ltar de med kyang chos ni rang gi rgyu kho na las skye ba yin la/ de bzhin du de'i 'bras bu yang yin pa'i phyir/ rgyu bzhin du 'bras bu yang des byas pa mi srid pa yin te/ dpyod pa med pa can gyi bya ba nyid ni dpyod pa can gyi grub pa dang 'gal ba'i phyir ro/ /zhes bya ba'i don to/ / chos ma yin pa ni chos kyi 'bras bu nyams su myong ba la bar du gcod par byed pa yin la/ de zad pa'i don du de'i 'bras bu nyams su myong bar byed du 'jug pa ni/ bde ba'i don du ma yin nam/ de ji ltar dpyod pa med pa'i 'bras bu can nyid yin du sems pa ni/ 'on te de med par ni 'gal/ /zhes bya ba'o/ /lan ni/ rtogs pa dang ldan ji ltar na/ /zhes bya ba ste/ des ma byas pa las ni chos ma yin pa'i 'bras bu mi 'byung la/ chos ma yin pa rnams kyis kyang bar du bcad pas/ chos kyi 'bras bu mi 'byung ba'i phyir/ 'bras bu gnyi ga med pa ni srog chags kyi thar pa nyid skyes bu'i don gyi gtso bo yin pa'i phyir/ dpyod pa yod pa chos ma yin pa'i 'bras bu ster ba po nyid byed pa po ma yin pa nyid ni/ dpyod pa'i 'bras bu yin la byed pa po nyid ni dpyod pa dang 'gal ba'i 'bras bu can yin zhes bya ba'i don to/ / rtogs pa dang ldan pa ni dpyod pa dang ldan pa'o/ /rtsed mos byed pa ni dpyod pa yod na 'gal ba'i 'bras bu yin pas mi bya ba yin par bstan pa ni/ rtog pa sngon byed ga la yin/ /zhes bya ba'o/ /tshig ni shes pa sngon du 'gro ba can du mthong ba ma yin nam/ de'i yang tshig ni me'i sbyin sreg la sogs pa'i yul la shes pa sngon du 'gro ba can yin pa'i phyir/ shes pa'i bye brag dang 'brel pa can nyid du grub pa yin na/ de las bzlog pa gang yin pa bsal ba yin no/ /chos ma yin pa'i 'bras bu ni rang las sam/ gzhan las 'byung bar 'gyur ro/ /snyam du sems pa la/ gal te bstan bcos gzhan pa kun/ /zhes bya ba smos te/ gcig la gcig gcad bya dang gcod byed nyid kyis 'brel pa can dang / byed par nus pa can gyi dngos po nye bar ston pa yin na/ shes pa sngon du 'gro ba can gyi tshig yin te/ 'brel ba can ma yin pa ni ma yin no/ /tshig 'di ni me'i sbyin sreg gis mtho ris sgrub par byed pa dang / cig shos dag ni 'gal ba yin te/ dor ba dang blang ba'i yul can ma yin pa nyid kyis smyon pa'i tshig bzhin du dpyod pa med pa sngon du 'gro ba can yin gyi/ dpyod pa la rnam par 'jog byed pa ma yin no/ / stobs mtshungs pa dang 'gal ba yin na rnam par rtog par 'gyur ba ma yin nam/ cha bcu drug pa'i 'dzin pa dang mi 'dzin pa bzhin du ches mtshan mo'i dus su cha bcu drug pa can 'dzin pa'am/ ches mtshan mo cha bcu drug can mi 'dzin pa zhes bya ba'o/ /'di la yang mtshungs pa yin te/ bar chad yod pas bkag pa ni de'i tshe nyid mngon pa la sgrub pa tsam las sgrub par byed par 'gyur zhes go ba ma yin te/ phan tshun 'gal bas tshad ma nyid ma yin pa kho na'i rjes su mthun pa'i phyir ro/ /gzhan du na ma mthong ba'i don gyi tshig tshad ma ma yin par mi 'gyur ro zhes bya ba'i don to/ / sangs rgyas pa la sogs pa'i bstan bcos ni gzhan gyis byas pa ma yin nam/ des na 'gal ba ma yin pa'i phyir la/ mi 'gal ba ni rjes su 'grub par rung bar nye bar ston par byed pa ni dpyod pa dang ldan pa kho na yin no snyam du sems pa ni/ 'on te bstan bcos mtha' dag byed pa las ma yin no zhes bya ba'o/ /sa gzhi la sogs pa dang rig byed la sogs pa ni dpyod pa dang ldan pa'i rgyu can yin te/ 'bras bu yin pa'i phyir zhes bya ba ni ma nges pa yin te/ de rgyu ma yin pa la yang yod pa'i phyir/ /zhes bstan pa ni/ de'i tshe bstan bcos gzhan bzhin du zhes bya ba'o/ /ma rig pa'i gzhan dbang gi sems pa can gyi 'bras bu mthong ba'i phyir/ de las kyi ngo bo nyid kho nar grub pa yin gyi gzhan ma yin pa'i phyir 'dod pa grub pa kho na tshad mas grub pa yin pa'i nye bar bsdu ba ni/ de la skye bo tha mal pa thams cad ces bya ba'o/ / ri la sogs pa shin tu chen po thams cad kyi bya ba la bdag cag la sogs pa thams cad kyi bdag byed pa po ma yin nam/ de bzhin du byed pa po nyid ma mthong ba'i phyir dang / mi nus pa'i phyir ro/ /'di'i phyir 'bras bu'i bye brag mthong ba las bdag cag la sogs pa gcig pu dang mtshan nyid mi mthun pa dbang phyug yin no snyam du sems pa ni/ bdag kun byed po min zhe na/ /zhes bya ba'o/ /bden te gcig pu las mtshan nyid mi mthun par go ba na/ du ma las kyang yin gyi phul du byung ba gcig pu ni ma yin no zhes lan 'debs pa ni/ de'i thams cad kyi zhes bya ba ste/ de'i ni phul du byung ba'i'o/ /thams cad kyi ni sa gzhi la sogs pa'i'o/ /phul du byung ba dang bral ba'i bdag nyid kho na rang gi las kyis byin gyis brlabs pa rnams kyis mthong ba las thams cad kyi byed par khas len pa yin na/ phul du byung ba dang ldan pa du mar rtogs pa ni skyon cis te ma yin zhes bya'i don to/ /ji ltar mthong ba de nyid du rnam par gzhag pa yin no/ /bdag cag la sogs pa'i bdag rnams rang gi las kyis byin gyis brlabs pa rnams kyi sa gzhi la sogs pa thams cad byed pa yin par yang 'gyur ba yin nam/ srog chags rnams la mchog sbyin pa la sogs pa'i legs pa ni/ dbang phyug gcig pu mnyes pa med na mi 'grub pa'i phyir legs pa'i don du gnyer ba rnams kyis mnyes par bya ba'i don du 'di 'dod par bya ba yin gyi/ thams cad kyi byed pa'i don du ni ma yin no snyam du sems pa ni/ 'on te gzhan du kun shes nyid/ /ces bya ba ste/ de'i 'di lta bu nyid la ni lung tshad ma yin no zhe na/ ma grub pas ma grub pa sgrub par byed pa yin no/ /don byed pa dang don mi byed pa 'dres pa'i phyir 'khor ba bzhin dang dug dang zan 'dres pa bzhin du 'di dor ba'i phyogs su bcug pa kho na yin no zhes bya bar lan 'debs pa bstan pa ni/ don ni don med byed nus pa/ /zhes bya ba ste/ phan byed pa min phyir ni gnod pa byed pa yin no/ /'di ji srid du legs par sbyin pa sbyin par byed pa nges pa med pa de srid du/ bsnyen bkur la sogs pa la 'jug pa ma yin par bstan pa ni/ kun shes nyid du grub pa ni/ /zhes bya ba'o/ /rtogs pa thams cad nyid ni mthong ba'i rjes su 'brangs pa las 'byung ba yin la/ de las bzlog pa'i dbang phyug la ni ma yin par bstan pa ni/ thams cad shes min byed pa po/ /zhes bya ba'o/ /bum pa la sogs pa la rdza mkhan la sogs pa'i nus pa mthong ba las yin gyi rtogs pa gzhan ni ma yin par bstan pa ni/ rang gi bya ba rdza mkhan sogs/ /zhes bya ba'o/ /sa gzhi la sogs pa'i las kyi nus pa tsam du rtogs pas don rtogs pa ma yin par bstan pa ni/ las kyi nus pas grub 'gyur na/ /zhes bya ba'o/ /gal te mi shes pa med pa tsam kho nas rdza mkhan la sogs pa 'jug pa yin na/ dus thams cad du 'jug par 'gyur ba ma yin nam/ de lta ni ma yin pa de'i phyir/ 'ga' zhig gis brtsad par bya ba yin par sems pa ni/ gal te shes kyang rdza mkhan sogs/ /zhes bya ba'o/ /'dzud byed du yang dus thams cad du cis mi 'gyur ba yin zhes bya ba'i lan du/ khyad par med par dbang phyug kyang / /zhes bya ba smos te/ 'on te gang gi tshe kho na dbang phyug gi bdag nyid kyi thams cad shes pa nyid la sogs pa'i dbang phyug nyid yin par gzhan rnams kyis go bar 'dod pa de'i tshe/ skul bar byed pa yin la/ de med na ni skul byed ma yin pa'i phyir res 'ga' ba'i skul byed yin par rigs pa yin no snyam du sems pa ni/ 'on te bdag nyid kun shes par/ /zhes bya ba'o/ /rdza mkhan la sogs par yang gang gi tshe 'dod pa de'i tshe byed pa yin par cis mi 'gyur ba bstan pa/ de ni de ltar gang gis shes/ /zhes bya bas/ skyes bu yis ni mchog gzhan ni/ /dam pa'i bdag nyid ces brjod pa/ /gang gis khams gsum na bzhugs pas/ /dbang phyug rtogs pas byas pa yin/ /zhes zer ba bsal ba yin pa'i phyir/ /bsdad nas 'jug pa ma nges pa nyid yin no/ /yang na the tshom za ba yin/ /zhes bstan pa bshad pa ni/ /bdag nyid brtags nas byed pa gang / /zhes bya ba'o/ /bstan bcos kyi don la sogs pa'i yul blo ni ma goms pa'i yul la gzhan dang gzhan sngar ma byung ba'i rgol ba dang / lan gyi rnam pa can bsres pa dang / mi shes pa dang yid la mi 'dod pa rnams kyis rang nyid skyed par byed par nus pa ma yin gyi/ gzhan gyi bskyed bya nyid yin no zer ba ni/ kun gyi blo nyid dbang phyug las/ / zhes bya ba ste/ goms pa dang ldan pa'i sngar ma byung ba'i rgol ba dang lan du snang ba ni snga ma snga ma'i rgan po'i tha snyad la goms pa yin pa'i shugs kyis dbang phyug rgyu mtshan yin par mi 'gyur ro zhes bya ba'i don to/ /de de ltar sa gzhi la sogs pa ni sems pa dang ldan pa'i 'bras bu nyid ma yin par bsgrubs pa la/ grangs can gyis dmigs nas dpe de nyid kyis bum pa la sogs pa la yang yin par bsgrub par 'dod pas zer ba ni/ shing sogs rnams kyi dbyibs sems pa'i/ /zhes bya ba ste/ bum pa la sogs pa yang 'ji ba'i gong bu la sogs pa la/ bum pa la sogs pa la phra ba'i gnas skabs kyis bcug pa nyid kho na mngon par byung ba yin te ji ltar shing ni shing gis bcug pa'i sa bon las yin pa lta bu'o/ /shing gis bcug pa nyid kyang gzhan dag gi ni shing gzhan las ni sa bon yin la/ sa bon las kyang shing gzhan zhes bya ba'i bsam pas yin la grangs can rnams kyis sa bon la gnas pa'i shing phra mo las yin zhing phra ba'i ngo bo de nyid gtso bo yin zhes zer la/ rdza mkhan la sogs pa ni gar mkhan gar la sbyor ba la 'khor 'dus pa bzhin du/ dpang po yin gyi 'di 'di'i ngo bos byed pa po ni ma yin te/ 'ji ba'i gong bu las gzhan pa yang skyed byed du thal bar 'gyur ba'i phyir/ skyes bu'i 'dod pa las 'byung ba la nges pa med do zhes bya ba'i don to/ /sa bon gyi rgyu'i shing las sa bon yin la/ de'i 'bras bu shing gi dbyibs dang kha dog la sogs pa so sor nges pa yin no zhe na/ sa bon gyi rgyu'i shing ni zhes bya ba smos so/ /snang bzhin pa'i sa bon la sogs pa la ni rgyu nyid yod pa ma yin nam/ rgyu la yod pa des ji ltar dgos snyam du sems pa la/ dbang phyug kyang ma yin te zhes bya ba smos so/ / gal te sa bon la sogs pas sam gzhan gyis kyang med par byed pa yin na/ sa bon gzhan las cis mi byed/ mi nus pa'i phyir ro zhe na/ 'bras bu'i ngo bo nyid nus pa yin no/ /gzhan ni ma yin no zhe na/ gzhan las ci'i phyir mi 'byung zhes mtshungs par rjes su skyar ba yin no zhes bya ba'i don to/ /mar mes gsal ba ni snga na med par bya ba ma yin/ de bzhin du rdza mkhan gyis yin pa'i phyir/ ji ltar nus pa med pa yin snyam du sems pa la/ des na rdza mkhan la sogs pa'i skyes bu zhes bya ba smos te/ re zhig gsal ba ni dngos po las tha dad pa ma yin te/ snga ma bzhin du bye brag med par thal bar 'gyur ba'i phyir ro/ /tha dad pa ma yin na yang ci yang ma byas par 'gyur ro/ /snga ma dang phyi ma dag gcig pa nyid du shes pa'i phyir/ gzhan du byas pa yang ma yin la/ de dang gzhan gcig pa yang ma yin te/ 'gal ba'i phyir ro/ /de'i phyir gtso bo kho na chu bzhin du rlabs dang / cig shos nyid kyi 'bras bu dang cig shos nyid du gnas pa yin gyi/ rdza mkhan la sogs pa ni ma yin no zhes bya ba'i don to/ /gtso bo kho na'i rgal ba dang 'bying ba yin pas 'bras bu skye ba dang 'jig pa dag yin zhes ston par byed pa ni/ skyes bu'i nye bar longs spyod pa zhes bya ba ste/ gang gi phyir rgal ba dang bying pa yin na/ skye ba dang 'jig pa dag yin la de'i phyir yang sems pa can dang cig shos kyi rgyu'i nus pa nyid med par nye bar sdud pa yin no/ /des na blo dang ldan pa yin zhes bya ba'o/ /skyes bu'i 'dod pas gtso bor mngon par gsal ba ma yin nam/ 'dod pa yang mthong ba'i yul la yin zhing mthong ba yang 'ji ba'i gong bu la sogs pa'i gnas skabs su gsal ba ma yin na bdag cag la sogs pa mi 'byung ba'i phyir/ mthong bar byed pa po'i dbang po las 'das pa mthong ba po 'ga' zhig thob pa po nyid ni 'di la yang yin no snyam du sems pa ni/ 'on te skyes bu so so ni zhes bya ba ste/ 'bras bu'i rang bzhin 'dod pas dbang phyug rgyu yin par grub po zhes bya ba'i don to/ /nus pa can gyi tshogs pa las rjes su dpog pa yin na/ 'dod pa 'byung ba yin par smra ba ni 'di la bshad zin to zhes bya ba'o/ /de'i 'dod pa yang gtso bo ni sems pa can ma yin pa ma yin nam/ mi shes pa nyid ni mi 'jug pa'i phyir la sems pa can ni 'jug par byed pa yin no snyam du sems pas zer ba ni/ mi shes phyir ni 'o ma ni/ /zhes bya ba ste/ sems pa can ma yin pa 'dug par mthong ba yin na gzhan 'jug par byed pa nyid ni ma yin te/ ji lta ba mthong ba de nyid la gnas pa'i phyir ji lta ba ma mthong ba la yang ches thal bar 'gyur ro zhes bya ba'i don to/ /de ltar na 'di tsam gyi nus par byed pa la sogs pa bstan nas/ da ni gong bu rnams kyi rjes su 'gro ba bstan pa yin par brjod pa ni bum pa dang kham phor la sogs pa rnams ni 'ji ba'i rjes su 'gro bar mthong ba'i phyir/ 'ji ba'i ngo bo ni rgyun yin la/ de bzhin du 'ji ba dang chu la sogs pa rnams kyang rjes kyi rjes su 'gro ba'i phyir de'i ngo bo yin la/ de las kyang de'i ngo bor rtogs na mthar bde ba la sogs pa'i rjes su 'gro ba mthong ba'i phyir/ de'i bdag nyid can gyi gtso bo'i ming can du gnas pa yin no zhes bya ba'i bsam pas zer ba ni de'i phyir/ mthar bde ba la sogs pa zhes bya ba'o/ /gtso bo dang dbang phyug kyang ci'i phyir ma yin snyam du sems pa la/ gnyi ga bsdus pa la gnod pa can bstan pa ni/ don rnams rtogs pa sngon 'gro can/ /zhes bya ba ste/ sems pa med pa'i bskyed bya/ sa gzhi la sogs pa 'bras bu'i ngo bo dmigs pa yin no zhes bya ba'i don to/ /sems pa can gyi bskyed bya khyim la sogs pa'i ngo bo la de las gzhan pa dang mtshan nyid mi mthun pa yod pa nyid ma yin nam snyam du sems pa la/ don rnams rgyu ni rtogs pa dang / /mi ldan pa ni zhes bya ba ste/ sa gzhi dang bum pa la sogs pa'i ngo bo'i gzugs nyid du bye brag med do zhes bya ba'i don to/ /sems pa can ma yin pa'i 'bras bu'i ngo bo mthong ba las/ sems pa can ma yin pa rgyu gang yang yod pa ma yin nam/ gtso bo'am cig shos zhes ci las nges pa yin snyam du sems pas zer ba la/ de lta na gtso bo nyid ces bya ba ste/ 'bras bu'i rjes su 'gro ba las yin par rtogs pa ni de'i ngo bo gtso bo kho nar 'gyur ba yin gyi gzhan ni ma yin no zhes bya ba'i don to/ /gal te khyim dang bum pa la sogs pa'i bye brag rnams dang / sa gzhi dang chu bo la sogs pa rnams kyang bde ba dang sdug bsngal ba dang gti mug rnams kyi bdag nyid kyi rjes su 'gro bar mthong ba'i phyir/ de'i bdag nyid can gyi rgyu yin na/ bde ba la sogs pa rnams dang skyes bu rnams kyang dngos po nyid kyi rjes su 'jug pa yin yang / de'i ngo bo rgyu ma yin pa'i phyir/ rjes su 'gro ba mthong ba ma nges pa yin par bstan pa ni/ dngos po nyid phyir bde sogs dang / / zhes bya ba ste/ de nyid ni dngos po nyid dam/ sems pa can nyid do/ /gang yang bye ma dang rdo ba la sogs sa la bum pa dang dbyibs la sogs pa med po dang / mi skye ba ni 'ji ba'i gong bu la yod pa dang / skye bar go bar byed pa yin la/ de yang yod pa dang skye ba dag gi rjes su 'gro pa med na/ yod pa med pa'i phyir ma yin no zhes bzlog pa nges pa med pa'i phyir mi rigs pa yin par bstan pa ni/ yang dag par na gtso bo la dbyibs dang mdog sogs zhes bya ba ste/ bye ma la sogs pa la ni rgyu med pas 'bras bu mi 'byung ba yin gyi 'bras bu med pa las ni ma yin te/ khyed kyi 'dod pa ltar na gtso bo'i bdag nyid kyi 'bras bu de la yang yod pa'i phyir ro zhes bstan pa ni/ ji ltar gtso bo kha dog la sogs pa'i 'bras bu zhes bya ba'o/ /gtso bo yang bya ba re re zhing tha dad pa yin la/ bye ma la ni 'ji ba la sogs pa lta bu yod pa ma yin pa ma yin nam snyam du sems pa ni/ ji ste nus pa'i rang bzhin gyis/ /zhes bya ba ste/ der ni zhes bya ba la yang de la mthong ba'i 'ji ba la sogs pa'i nus pa yod na bsal ba yin la/ ma mthong ba'i rtogs pa la ni tshad ma yod pa ma yin par bstan pa ni/ gzhan bzhin mthong med de la ni/ /zhes bya ba'o/ /bden te gang gi tshe 'ji ba gong bu kho na las bum pa yin pa de'i tshe gtso bo ma yin la/ gang gi tshe yang 'ji ba la sogs pa rgyu min pa de las kyang / de'i rgyu zhes bya ba la sogs pa'i rtogs pa yin na/ mtha'i rgyu gcig pu gnas pa yin la/ gang las 'di spros pa de gtso bo yin par brjod de/ de yod par mthong ba yin na ji ltar ma mthong bar 'gyur ba yin zhes bya ba la skyon med do snyam du sems pa la/ /'bras bu 'bras bu gzhan las te/ /zhes bya ba smos te/ /de'i tshe yang mthong ba'i rjes su 'brangs nas rtogs pa la yang de mi rtag pa nyid du 'gyur ro/ /de lta yin na 'bras bu ni 'bras bu gzhan sngon du 'gro ba can kho na mthong ba yin no zhes bya ba'i don to/ /gang gi phyir 'bras bu ni mthong ba'i bye brag gi bye brag can kho na rgyu yin par rtogs par byed kyi shin tu ma mthong ba'i rtag pa nyid kyi bye brag can yin no zhes dgongs pas rgyu med pa'i rgyu ni ma dmigs so zhes pas rnam par 'grel pa yin no/ /dbye ba rnams kyi 'gro ba mthong ba las rgyur rtogs pa na rjes su dran pa gzhan yod na mi rtag par 'gyur ba ma yin nam/ /med na mi rtag pa kho na yin te/ rgyur rtogs pa la tshad ma med pa'i phyir ro snyam du sems pa ni/ 'on te tha dad pa rnams rjes su 'gro ba'i phyir zhes bya ba'o/ /dbye ba rnams kyi rjes su 'gro ba ma mthong ba ni mo nges pa yin pas rgyu'i go byed pa ma yin no/ /de lta mod kyi 'bras bu ni yin no/ /de yang mthong ba'i bye brag kho na yin gyi ma mthong ba'i bye brag ni ma yin no zhes lan 'debs pa ni/ snying stobs la sogs pa dang zhes bya ba'o/ /de lta yin na bde ba la sogs pa rnams dang / sems pa can rnams la dngos po nyid kyi rjes su 'gro ba las/ dngos po'i ngo bo gcig yin la/ de nyid ni gtso bo yin no snyam du sems pa ni/ yang na rgyu gzhan gcig nyid ces bya ba'o/ /de lta yin na yon tan gsum gyi bdag nyid kyi gtso bo sgrub pa la dbye ba rnams kyi rjes su 'gro ba mthong ba ni de las bzlog pa'i dngos po nyid tsam gyi bdag nyid bsgrub pa yin pa'i phyir 'dod pa la gnod par byed pa'i 'gal ba yin par bstan pa ni/ yon tan gsum rdzogs rang bzhin du/ /zhes bya ba'o/ /ji ltar 'dod pa la gnod pa yin dngos po nyid kyi rjes su 'gro ba las dngos po'i bdag nyid du grub pa yin na ji lta ba la sogs pa'i yon tan gsum gyi bdag nyid yin no snyam du sems pa ni/ dngos po rjes su 'gro ba'i phyir/ /zhes bya ba'o/ /thams cad kyi bdag nyid can ni yon tan gsum gyi bdag nyid dam nus pa thams cad kyi bdag nyid yin te/ spro ba la sogs pa la gnas pa yin no zhes bya ba'i don to/ /ji lta ba bzhin pa'i de nyid la rnam par gzhag pa las mtshan nyid mi mthun pa 'am/ cig shos rgyu yin la mtshan nyid mi mthun pa ma yin par rtogs pa yin no/ /de tsam gyi nus pa mthong bas gnod pa can dang / rtogs pa lci ba dang thal ches par 'gyur ro zhes bya ba'i lan du/ ngo bo nyid kyi rnam kun tu/ /zhes bya ba smos so/ /rgyu nyid la tshad ma gang yin/ gang gis ma mthong ba las rtogs pa ni rjes su 'gro ba dang ldog pa dag la gnod par byed pa yin no snyam du sems pa la/ mtshan nyid mi mthun pa ma yin pa'i rgyu nyid la mngon sum sgrub byed ma yin zhing / rjes su dpag pa yang ma yin te/ 'brel pa med pa'i phyir zhes bstan pa ni/ gal te 'dra ba dang zhes bya ba'o/ /de lta na ni 'o na 'ga' yang ma nges pa zhes bya bar mi 'gyur te/ zhes bya ba'i bre brag gis sam/ phyogs su byed pas 'khrul pa bsal ba yin no/ /blo la grub pa'i tshul gsum nyid ni phyogs dang mthun pa'i phyogs gang yang rung ba nyid lta bu yin na/ cung zad kyang ma nges pa yin par mi 'gyur ro zhes bya ba'i don to/ /rjes su 'gro ldog med pa yin na ji ltar las rtogs pa yin no snyam du sems pa ni/ 'di ni las kyis yongs su gyur/ /zhes bya ba'o/ /sa gzhi la sogs pa tsam las 'bras bu sna tshogs pa mi srid pas don gzhan du rtogs par byed la/ des na de'i rtogs pa la rjes su 'gro ba la sogs pa mi 'gal ba yin pa 'chad par 'gyur ba yin par bstan pa ni 'di ni re zhig gzhag ste zhes bya ba'o/ /de de ltar dbyibs la sogs pa gtso bos byas pa nyid la tshad ma med pas bsal ba yin na/ dbang phyug gis byas pa nyid kho nar 'gyur ba yin yang / de la yang bde ba dang mi bde ba la sogs pa'i 'bras bu sna tshogs pa nyid mthong ba ni rnam par dpyod pa dang / snying rjes la sogs pa dang ldan pa'i dbang phyug pa la byed pa po nyid yin na/ 'gal bas khyab pa yin par ni gal te 'di thams cad shes pa nyid yin na/ mi shes pa'i 'gro ba rnams med pa'i tha snyad la/ ci'i phyir 'jug par byed pa yin zhes bstan zin pa yin la/ rnam par dpyod pa dang snying rje la sogs pa dang bral ba'i dbang phyug gi phyogs la yang / 'dod chags la sogs pa'i gnyen po bstan pa don med par 'gyur ro zhes bya ba la sogs pas kyang bstan zin to/ / da ni 'dod chags la sogs pa rnams kyi mi mthun pa'i phyogs ma yin pa nyid kyis/ dbang phyug nyid dang mi 'gal ba'i phyir gnyen po bstan pa ni/ blo sngon du 'gro ba ma yin pa'i phyir mi rigs so zhe na/ blo sngon du 'gro ba ma yin du zin kyang rtsod pa dang slu ba la sogs pa sngon du 'gro ba de ni yod pa kho na yin no snyam du sems pas smras pa ni/ 'dod chags la sogs pa dang lan yang zhes bya ba la sogs pa 'dod chags dang zhe sdang la sogs pa dang / rigs pa dang 'dod chags dang bral ba nyid la sogs pa'i bskyed bya 'bras bu sna tshogs pa nyid mthong ba'i phyir/ de lta bu'i ngo bo gcig pu kho na yin zhes bya bar rjes su dpog par byed pa yin zhes bya ba'i don to lan ni/ mi shes chags pa dang ldan rnams/ /zhes bya ba ste/ de lta bu'i las yod na shugs kyis de lta bu gzhan mi 'thob po zhes bya ba'i don to/ /de lta bu'i las kyis rtogs pa'i don yin yang / dag pa ma yin pa ma yin no zhe na/ smras pa dag pa'i bdag nyid min/ /zhes bya ba smos te/ rang bzhin gyis sam/ dmyal ba la sogs pa'i 'jigs pas dag pa ni/ rtsed mo la sogs pa la rgyu dang 'gal ba yin zhes bya ba'i don to/ /dmyal ba'i sdug bsngal la sogs pa dang ldan pa ni las ma yin nam/ dbang phyug ni ma yin na/ de ji ltar des rtogs pa'i don yin/ de yang rang gi 'bras bu bskyed pa la byed pa po la ltos pa'i phyir ro snyam du sems pa ni/ de la 'jig pa de med pas/ /zhes bya ba'o/ / las yod na 'dod chags la sogs pa'i 'bras bu 'byung ba bzhin du dbang phyug la yang 'gyur te/ rgyu yod la gegs med na 'bras bu'i nges pa khas blangs pa'i phyir ro zhes bstan pa ni/ gal te 'dod chags la sogs kyis/ /zhes bya ba'o/ /'on te 'di sngags dang sman la sogs pas gegs byed pa yod pa des na/ mi 'gyur ba yin no snyam du sems pa la/ bsgoms pa'i stobs las yang dag byung / /zhes bya ba smos te/ btang snyoms can nyid bsgoms pas phul du byung bar son pa ni/ sdug bsngal nyams su myong ba la gegs byed pa yin gyi/ gzhan ni ma yin par yang 'chad par 'gyur ro zhes bya ba'i don to/ /'di'i btang snyoms de nyid ni bsgom pa med kyang rang bzhin nyid kyis yin no/ zhes bya ba 'di la tshad ma yod pa ma yin te/ 'bras bu ni rgyu la nges pa'i phyir ro zhes bstan pa ni/ de ni de ltar nyid gyur pa/ / zhes bya ba'o/ /de'i btang snyoms can nyid ni/ bsgom pa mi 'byung ba yin par ci las shes she na/ smras pa/ dbang phyug dbang phyug las 'gyur zhing / /zhes bya ba ste/ gang gi phyir 'bras bu ni rgyu dang 'brel pa can yin pas de med na mi 'byung ba'i phyir/ re zhig dbang phyug nyid rgyu yin par go bar byed pa yin la/ de la bsgom pa gang gis bskyed bya'i bye brag yin pa ni de'i bsgom par rtogs par byed pa yin la/ gzhan ni gzhan du rtogs par byed pa yin zhes bya ba'i don to/ /khyad par dang ldan pa'i dbang phyug nyid ni rgyu'i khyad par med na mi srid pa yin par bstan pa ni/ brgya byin tshangs pa nyid srid pas/ /yon tan khyad 'byung srid na ni/ /zhes bya ba'o/ /brgya byin nyid la sogs pa'i dbang byed pa ni bye brag dang ldan pa gzhan nyid yin la/ bye brag dang mi ldan pa 'di yang gzhan nyid yin snyam du sems pa ni/ 'on te de yang med nyid na/ /zhes bya ba'o/ /gang kho na khyad par dang ldan pa phul du byung ba yod na 'byung ba de kho na khyad par med do zhes bya ba gzhan ma yin par bstan pa ni/ gang zhig 'di la skur 'debs pa/ /zhes bya ba ste/ gang gi phyir de lta yin na 'khor ba ni 'di'i 'bras bu nyid yin pas yod pa'i phyir 'khor ba pa yin la/ de med pa yin zhes bya bar sbyar ro/ /tshad ma la yod pa'i don la skur ba 'debs pa ni/ khas mi len pa yin na de las bzlog pa ni ches shin tu yang khas mi len par bstan pa ni/ gang zhig skye bo dam pa ni/ /zhes bya ba'o/ /de de ltar dbyibs kyi bye brag dang ldan pa nyid kyang 'dod pa kho na'i sems can byin gyis rlob pa por sgrub par byed pa mjug sdud pa ni/ dngos po dbyibs dang 'brel pa'i phyir/ /zhes bya ba'o/ /sems pa can tsam ni shin tu che ba'i sa gzhi dang / ri la sogs pa'i 'bras bu la byed pa po ma yin pa ma yin nam/ des na 'bras bu'i bye brag mthong ba las rtogs pa'i byed pa po'i bye brag ji ltar tshad ma can ma yin snyam du sems pa la/ rgyu med yon tan ldan par go/ /zhes bya ba ste/ khyad par can gyi sems pa can nye ba tsam gyis byin gyis rlob pa po yin gyi/ 'bras bu'i bye brag byed pa nyid kyis ni ma yin te/ de nyid kho na las de la yang khyad par ma yin la/ de'i phyir des de dag go ba'i don yin zhes bya ba'i don to/ /'bras bu la ma yin du zin kyang srid pa yin no zhe na/ yon tan ches khyad par can du mthong ba'i phyir zhes bya ba ste/ khyad par dang ldan pa'i rgyu la khyad par dang ldan pa'i 'bras bu mthong nas rgyu'i bye brag srid pa ni 'bras bu'i bye brag srid pa yin gyi/ rgyu ma yin pa la ni med do zhes bya ba'i don to/ /yon tan ches khyad par can zhes bya ba ni khyad par dang ldan pa'i 'bras bu mthong bar bstan pa yin no/ /mngon par brtson pa zhes bya ba ni/ rgyu'i khyad par mthong ba'o/ /nus pas ni ma mthong ba srid pa'i yul bstan pa yin no/ /rtag pa la ni rgyu srid pa med pa'i phyir/ de srid pa ma yin par bstan pa ni/ shin tu mtshan nyid mi mthun pa/ / zhes bya ba ste/ rgyu mi dmigs pa'am/ rgyu 'gal ba dmigs pa yin zhes bya ba'i don to/ /de de ltar dbyibs kyi gzhan du mi 'grub pa nyid bstan nas/ ma grub pa nyid bstan pa ni/ dbyibs zhes bya ba 'di dngos po'o zhes bya ba'o/ /dbyibs ni ring ba dang sbom pa'i tshad du grub pa kho na ma yin nam snyam du sems pa la bshad pa ni/ rdul phra rab dag las tha dad pa'i lus zhes bya ba ste/ rdul phra rab gzhan dang gzhan ma rtogs pa sbom pa nyid kyi dbyibs ni ma yin te/ gcig la gnyis pa nye ba yin par brjod pas rdul phra rab rnams las tha dad pa'am/ cig shos kyi dbyibs ni ma mthong ba yin par bstan zin to/ /dngos po'i chos ma yin du zin kyang grags pas grub pa nyid yin no snyam du sems pa ni/ 'on te de'i 'jig rten gyi grags pa zhes bya ba'o/ /sor mo brkyang ba dang / khu tshur gyi dbye ba bzhin du 'du ba 'ba' zhig gi dbye bas 'bras bu tha dad pa yin pa'i phyir/ dbyibs yod pa kho na yin no snyam du sems pa ni/ 'on te rdul phra rab bdag nyid ces bya ba'o/ /de lta yin na rdul phra rab rnams mi mthun pa'i phyogs ma yin te/ 'o na ci zhe na phyogs yin pa dbyibs kyang 'bras bu'i bye brag yin te/ mthun pa'i phyogs kyi phyogs gcig la 'jug pa yin par bstan pa ni/ de lta yin na rdul phra rab rnams kyang zhes bya ba ste/ dbyibs kyi khyad par dang ldan pa nyid kyi phyir/ 'di 'bras bu nyid kho na yin no/ /'bras bu'i bdag nyid kho na dgod pa ni 'brel pa yod pa'i phyir la/ gzhan du ni ma yin te/ de med pa'i phyir ro zhes bya bar sbyar ro/ /gang gi 'dod pa la gnyis nyid bzhin du dbyibs ni 'bras bu ma yin te/ de'i ngo bo yang ma grub pa kho na yin no/ /'on te de la yang de lta bur gyur pa'i rtogs pa skyed par byed pa rnams kyi/ de skyed byed ma yin pa rnams dang mtshan nyid mi mthun pa de ltar brjod pa yin no snyam du sems pa ni/ 'on te de lta bur 'khrul pa zhes bya ba'o/ /de la rtogs pa ma rtogs pa rdul phra rab rnams la 'bras bu med par bstan pa ni/ gal te rdul phran dngos su na/ /zhes bya ba'o/ /'bras bu med na don med pa'i bya ba bsnyon pa yin par bstan pa ni/ gal te nges par brtags na ni/ /zhes bya ba'o/ /'on te rig pa can gyi bsam pas dbyibs 'bras bu yod des na 'jug pa yin no/ /pha rol pos khas blangs pa yin yang rang nyid ma mthong na/ de'i rigs su ji ltar byed pa yin snyam du sems pa nyid la/ 'on te dbyibs ni gzhan dag gi/ /zhes bya ba ste/ gzhan gyis khas blangs pa'i khas blangs ni/ gzhan gyis khas blangs pa'o/ /gong du ma grub pa la'am dpe la ni zhes bya ba'i 'grel pa byas pa de la ltos nas/ yang na dpe la the tshom za ba yin no zhes smos pa yin no/ /sems pa can gyi rgyu nyid du sgrub pa yin pa la/ des na bsgrubs pa'i bya ba'i dus na ma nges pa nyid yod pa ma yin pa'i phyir/ ji ltar sgrub par byed pa'i skyon yin/ chu bo 'gyur nas rags brtsigs pa la dgos pa med pa yin no snyam du sems pa la/ dbang phyug de ni bsdad cing bsdad cing zhes bya ba smos so/ /bsgrub bya la nges pa'i sgrub byed rang gis rtogs pa yin na/ gzhan gyi don la yang de lta bu'i sems pa can ma yin pa'i blang bya yin la sems pa can sngon du 'gro ba nyid la yang sgrub byed kyi nges pa med do/ /de'i phyir sgrub byed nyid du 'gal ba can ma yin pa'i bye brag la ltos pa can ni 'dod pa las bzlog pa'i sems pa can gyi khyad par 'phangs par grub pa la sgrub par byed pa yin no/ / ma 'phangs pa'i khyad par gyi spyi ni rjes su dpag pa'i yul ma yin te/ 'jug par byed pa'i phyir dang / 'dod pa'i khyad par dang 'gal ba'i phyir ro/ /de nyid kyis ma nges pa yin pas khyad par dang 'gal ba'i phyir khyad par 'phangs pa ma yin zhes bya ba'i don to/ /de la yang khyad par du bsgrub par bya ba la rang nyid mi nus pa nyid yin na/ dbyibs dang ldan pa nyid khyad par can sgrub par byed pa kho na yin no/ /snyam du sems pa ni/ 'on te 'di ni rang nyid nus pa yin/ /zhes bya ba'o/ /khyad par dang bcas pa'i gtan tshigs thun mong ma yin pa'am/ ma grub pa yang yin par bstan pa ni/ rdza mkhan la sogs pa yang zhes bya ba ste/ sogs pa'i sgras ni las brjod pa yin la/ las yod pa yin na nus pa nus pa can gyi rgyu med pa nyid du ma grub pa yin gyi/ dper na rdza mkhan yod pa yin zhes bya ba'i don to/ /mngon sum dang rjes su dpag pa dag gis rdza mkhan dang las la nus pa mthong bas bsgrub bya don gzhan la gzhan grub pa nyid yin par bstan pa ni/ dbang phyug la yang dbang phyug dam par zhes bya ba'o/ /yang na thug pa med pa yin na rtsa ba ma grub pas bsgrub bya la rjes su 'gro ba med pa'i phyir ma nges pa nyid yin la/ de bzhin du phan tshun rten pa yang yin zhes bya ba'i don to/ /'on te bsgrub par bya ba'i chos can la ji ltar yang dbyibs su 'dod pa yin/ de la bye brag med pa'i phyir/ rdul phra rab rnams la yang 'gyur ba'i phyir/ ldog pa ma grub pa dang the tshom za ba nyid yin par bstan pa ni/ rdul phran dag la dbyibs med ces/ /zhes bya ba'o/ /re zhig dngos po rnams ni mtha' yas pas 'jig pa med pa ma yin nam/ ri rab bzhin du cha tsam yang mi dpogs pa nyid du 'gyur ba'i phyir/ mthar dngos po med pa yang ma yin te/ med pa las dngos po skye bar thal bar 'gyur ro/ /de'i phyir rdul phra rab ni cha shas med pa yin snyam du sems pa ni/ rags pa gang yin pa de ni/ /zhes bya ba ste/ rdul phra rab gnyis pa'i pha rol ni cha shas dang bcas pa ma yin te/ mtha' yas pa nyid kyis dpag tu med par thal bar 'gyur ro zhes bya ba'i don to/ /snang ba las phyi ma'i ngo bo ni tshad mas rtogs pa ma yin par bstan pa ni/ rdul brgyad pa las pha rol gyi/ /zhes bya ba ste/ mtha' med pa de bsgrub pa la rdul phran brgyad pa kho nas tshad ma yin te/ de med na 'di'i ngo bo nyid kho na med par 'gyur ro snyam pa'i dgongs pas/ 'di rdul brgyad pa'i rang bzhin nam/ /zhes bya ba'o/ /snang ba'i dngos po ni rags pa nyid kho na yin pa las rdul phran gyi go bar byed pa yin nam/ grangs kyi dbye bas so sor snang bas ci zhig bya snyam du sems pa ni/ 'on te shin tu de rags des/ /zhes bya ba'o/ /kha cig la ltos nas kha cig rags pa yin pa 'di la ni snang ba las gzhan pa ma mthong ba la ltos bya yin pa'i phyir/ de ma grub pa yin par bstan pa ni/ gang tshe rdul gnyis can sogs pa/ /zhes bya ba'o/ /dngos po rnams mtha' yas pas/ 'jig pa med par mi dpogs pa nyid du bstan pa ma yin nam/ mthar dngos po med pa la yang dbye ba med na dbye bar mi rigs pa'i phyir/ gang mthar 'jig pa de rdul phra rab du dpog par byed pa yin snyam du sems pa ni/ rjes su dpag pa la ltos na/ /zhes bya ba'o/ /rjes su dpog bzhin pa yang de ji ltar mthong ba kho na yin pa'i phyir/ mtshan nyid mi mthun pa yang ma yin la/ dpag tu med pa yang ma yin te/ cha shas med kyang blo la sogs pa 'jig par mthong ba'i phyir/ dbye ba nyid kyis 'jig par nges pa ma yin la/ rgyu ni snang ba gzhan gyi snang ba kho na yin no/ /spro ba la sogs pa la mi snang ba yin no zhe na/ ma yin te 'jig rten gyi khams kyi gzhan gyi snang ba yin pa'i phyir ro/ /de nyid la tshad ma gang yin spros pa la yang gang yin zhes mtshungs pa yin par bstan pa ni/ thug pa med par thal bar 'gyur/ /zhes bya ba ste/ snang ba'i dngos las gzhan pa la ni/ mngon sum ma yin zhing rjes su dpag pa yang ma yin zhes bya ba'i don to/ /bong ba ni dgos pa na phyis shing phyis shing je chung 'gro ba ma yin nam/ gang la chung ngur 'gyur du mi btub pa'i mchog tu phra ba de la rdul phra rab ces bdag cag rnams zer ro/ /de yang cha shas dang bcas pa nyid yin na cha shas de'i yang cha shas rnams dang de'i cha shas kyi yang cha shas rnams zhes bya ba'i rtogs pa 'di yang thug pa med pas mtha' ma mtha' med pa'i phyir/ /rdzas rnams thams cad kyi tshad dang lci ba nyid dag gi grangs dang 'bras bu dang rgyu dag gi mtshungs pa'i tshad nyid la sogs par mi 'gyur ro/ de ltar yang bgrang du med pa'i phyir phra ba'i phra ba nyid kyang ldog par 'gyur ro/ / 'on te dbye byed ni mtha' med pa ma yin te/ de lta mod kyi zad pa'i mtha'i bar du yin no snyam na yang / de yang mi rigs te/ dbye bya zad na dbye byed mi 'thad pa'i phyir ro/ /dbye ba ni zhig pa yin pa la dbye bya med na ni mi rigs so/ /de'i phyir re zhig sa phyogs rgya chen po la nye bar dmigs par snang ba ni/ cha shas dang bcas pa kho na yin pas sa phyogs dang bcas pa'i don dang phrad pa yin te/ don dang rdzas su phrad pa yin gyi de rgya che ba ni ma yin no/ /gzhung lugs des chog ste tshad ma la 'jug pa'i rjes su 'brang bar bya'o/ /yul nges pa la dngos por mthong bar byed na tshad ma ni 'jig rten 'jug par byed pa yin gyi/ phrad pa ni ma yin te/ de'i phrad pa ni de la nye ba las de yang nye ba yin pa de lta min pa de nyid kyis na rgya che ba de ni du ba bzhin du yin gyi cha shas dang bcas pa'i snang ba ma gtogs pa cha shas dang bcas pa'am/ cig shos nye bar dmigs pa ma yin no/ /don gyi go bas kyang dmigs pa ma yin te/ gzhan du yang yod pa'i phyir ro/ /de ltar na bum pa byed pa'i rgyu dang bcas pa las kham phor dmigs pa yin te/ bum pa ni 'jig pa'i dngos po'i chos nyid kyis 'jig pa yin te/ kham phor yang de dang bcas pa las de las gzhan bskyed nas 'jig pa yin la/ de yang de las gzhan par tha ma'i snang ba rnam par 'byed pa'i lhan cig byed pa med pa'i phyir 'dra ba'i 'bras bu skyed par byed pa yin no/ /rig pa'i bye brag dang ldan pa gzhan dang phrad pa las 'bras bu gzhan rtsom par mi byed par rang nyid dngos po'i chos nyid kyis gzhig pa yin gyi cha shas su phye ba nyid zhig pa ma yin te/ sgra dang blo la sogs pa la ma mthong ba'i phyir ro/ /rigs pa 'di rdzas nyid la ni ma yin te/ shing la me dang phrad pa las zhig pa la ma mthong ba'i phyir ro/ /gang gi phyir me ni phru ba la sogs pa dum bur byed pa ma yin pa ni gzhung lugs yin la/ de'i phyir thug pa med pa'am de nyid phra mor byas pa yang ma yin pa'i phyir/ thams cad zhig pa yin na ji ltar phrad pa yin/ rdul phra rab rnams yod pa yin na de rnams mthong ba zhes pa de yin par 'gyur ro/ /dngos po'i bskyed pa ni rgyu med na med pa yin no/ /ma yin te/ thams cad 'jig par khas ma blangs pa'i phyir dang / 'ga' yang de ltar reg pa dang ldan pas reg par khas ma blangs pa'i phyir ro/ /gang zhig bdag nyid thams cad kyis zhig pa de las 'bras bu 'byung bar mi 'gyur ro/ /shin tu'o/ /de dang 'dra ba yod pa las de dang 'dra ba skye ba la ni thams cad du skyon med do/ /de ltar na de nyid snang ba'i ngo bo ni rdul phra rab yin te/ snang ba gzhan med pa'i phyir ro zhes khas len na/ de dbyibs dang ldan pa nyid yin no snyam du sems pa nyid ni/ /'on te mthong ba'o zhes bya ba'o/ /snang ba'i ngo bo ni rdul phra rab ma yin pa ma yin nam/ gzhan yang tshad ma med pa can yin pa'i phyir/ /rgyu med pas cha shas can ma yin no/ /gal te snang ba nyid kyi ngo bo rdul phra rab yin la/ de'i tshe yang de rnams nyid mang por snang ba yin la/ de'i phyir cha shas can du 'gyur ba ma yin no zhes snang ba dang mi snang ba'i rdul phra rab sgrub pa dang / dgag pa 'bras bu yin par nye bar bsdu ba ni/ gal te rdul phran grub min na/ /zhes bya ba'o/ /cha shas med pa'i rdul phra rab dang / rags pa ni 'gal ba'i 'bras bu yin par bstan pa ni/ phyogs gcig gis ni reg na de zhes bya ba ste/ rdul phra rab rnams phrad pa med na 'bras bu rtsom pa ma yin te/ phrad pa dang cig shos dag la dbye ba med par thal bar 'gyur ro/ /bdag nyid thams cad kyi phrad pa yang ma yin te/ cha shas med pa'i rdul phra rab rnams ni dbyer med pa nyid kyis rdul phra rab gzhan la chu la 'o ma bzhin du rjes su 'jug par mi rigs pa'i phyir la phyogs gcig gis kyang ma yin te/ cha shas med pa'i phyir zhes bya ba'i don to/ /phyogs ni gcig nyid kyis zhes bya bas ni de bdag nyid thams cad kyis zhes bya bar nye bar mtshon pa yin no/ /'on te phyogs gcig gis ma yin la/ bdag nyid thams cad kyis kyang ma yin te/ cha shas med pa nyid la cha shas su rtogs pa mi srid pa'i phyir/ rags pa 'ba' zhig bskyed par mthong ba las/ mtha'i rgyu rnams kyi phrad pa tsam yod par go ba yin no snyam du sems pa la/ thams cad phyogs kyi gcig nyid kyis/ /zhes bya ba 'di la yang bdag nyid thams cad kyis zhes bya bar nye bar mtshon pa yin te/ gang gi phyir phrad pa yong na 'bras bu skye bar mthong ba'i phyir de rtogs bzhin pa ni ji ltar snang ba'i mthong ba'i bye brag yin gyi/ gzhan yin la bye brag med pa'am/ ma mthong ba'i bye brag can gyi spyi ni rjes su dpag pa'i yul ma yin par bstan pa'i phyir zhes bya ba'i don to/ /rdul phra rab ma yin la/ khyad par gyi rigs gzhan yang ma yin no/ /phrad pa'i lhan cig pa'i rdul phra rab rnams 'bras bu rtsom par byed pa ma yin nam/ 'di lta ste/ 'byar ba dang cig shos kyi dbye bar mi 'gyur la/ de'i tshe de rnams gcig la gcig 'byar ba yang ma yin te/ 'byar ba yang phrad pa yin na 'bras bu la phrad pa gzhan ltos pa yin pa'i phyir thug pa med pa yin pas 'bras bu gzhan du mi 'gyur ro snyam du sems pas/ 'on te yang rdul phra rab gnyis kyis ni zhes bya ba'o/ /lan ni gal te ma reg par yang ni zhes bya ba ste/ rang gi ngo bo nyid ni rdul phra rab rnams phan tshun reg pa ni phrad pa yin pa de lta na thug pa med pa yang ma yin no/ /tha dad par yin no de kho na de ste kun tu reg pa'i bdag nyid yin gyi rdul phra rab ma yin no/ /de lta yin na skyon ci yod ce na/ ji ltar gong bu'i rnam pa gcig /ces bya ba ste/ 'byar ba'i bdag nyid kyi phrad pa yin na/ de'i ngo bo dang bral ba'i rdul phra rab rnams la de ltar rtogs par mi 'gyur te/ gzhan gyi ngo bo gzhan du 'gyur ba ma yin no zhes bya ba'i don to/ / 'on te cha shas can rnams phrad pa'i 'byar ba'i bdag nyid kyi rdul phra rab rnams 'dus pa shes pa de'i yul yin gyi rdul phra rab ni yul ma yin no snyam du sems pa ni/ 'on te yan lag can gzhan der zhes bya ba ste/ rdul phra rab rnams la gcig tu shes pa ni rdul phra rab tu gnas pa'i dngos po'i yul yin pa'i phyir/ gzhan du grub pa yin no zhes bya ba'i don to/ /de lta yin na de yod pa'i dus su rdul phra rab rnams kyang ma zhig pa yin la/ yul du rung ba yin yang cis mi snang ba yin zhes bstan pa ni/ rtogs pa'i phyir na mthong bar 'gyur/ /zhes bya ba'o/ /gal te yang rung ba'i yin yang de rnams kyi rang gi ngo bor ni rung ba ma yin no snyam du sems pa la/ gal te 'u cag la sogs kyis/ /zhes bya ba smos te/ dbang phyug la ltos nas sna tshogs pa yin no zhes bya ba'i don to/ /'du ba can dag gi dang 'du ba so sor mthong ba yin na/ tha mi dad par grub pa dag gi 'brel pa ni 'du ba yin par mi 'gyur bar bstan pa ni/ mthong na 'du ba ji ltar yin/ /zhes bya ba ste/ gang gi phyir tha mi dad par grub pa rten dang brten pa nyid ni/ snal ma dang snam bu dag gi/ snal ma'i cha dang / snal ma dag la brten pa'i phyir mi srid do/ / tha dad par rtogs pa dang ldan pa nyid ni de la rung ba'i ngo bo yin la/ de yang ji ltar snang bas tha dad pa kho na yin te/ dbang phyug la ltos nas thams cad de ltar yin pa'i phyir/ tha mi dad par grub pa ma yin no zhes bya ba'i don to/ /gzugs dang sgra dag gi don gcig la 'du ba can dang / snal ma dang snam bu dag gi 'du ba yang 'u bu cag la sogs pa rnams kyis tha dad par ma mthong ba yang tha mi dad par grub pa ma yin no snyam du sems pa la/ gzhan du ni/ mthong ba 'khrul pa nyid du 'gyur/ /zhes bya ba ste/ 'u bu cag la sogs pa ni snal ma dang snam bu dag du ma yang tha dad par snang ba ma yin no/ /snal ma rnams ni snam bu ma yin pa ma yin nam/ gcig dang du ma so sor snang ba'i bdag gi yul tha dad pa'i phyir ro/ /gcig tu snang ba ma yin te/ gzhan du na de'i sgra ni brda'i rjes su 'brang ba'i rtogs pa yin pa'i phyir/ de bzhin du dbang phyug gis tha dad par mthong la/ 'u bu cag la sogs pa thams cad kyis tha mi dad par mthong bas gnod pa yin te/ 'du ba med pa yang de dang 'dra ba kho na yin no zhes bya ba'i don to/ /gal te snang ba'i mtha' ma ni de las gzhan pa dang cha gcig gis phrad pa yin na/ de'i cha gcig kyang de bzhin yin pa'i phyir/ mthar thug pa med pas phra mo dpag tu med par 'gyur ba'i phyir/ de dang skyon mtshungs so snyam du sems pa la/ rags pa cha shas nyid du sngon du 'gro ba can/ zhes bya ba smos te/ gang la cha shas phrad pa sngon du 'gro ba can nyid du mthong ba de la de ltar 'gyur du zin kyang dper na 'ji ba'i gong bu sngon du 'gro ba can gyi bum pa dang / snal ma sngon du 'gro ba can snam bu lta bu'o/ /snang ba'i mtha' ma ni de lta bu nyid du mthong ba ma yin pa'i phyir cha shas sngon du 'gro ba can nyid du ci las shes/ gang gis dpag tu med par 'gyur/ /zhes bya ba'i don to/ /cha shas dang phrad pa med kyang cha shas dang bcas par mthong ba yin par bstan pa ni/ wa Ta'i sa bon shin tu chung / /zhes bya ba ste/ gang gi tshe snga na yod pa'i yan lag rnams ni ma dmigs pa'i yod pa ma yin la/ de'i tshe de rnams phrad pa'i sgo nas yan lag can rtsom par byed pa ma yin par bstan pa ni/ yan lag can yang ga la yin/ /zhes bstan pa'o/ /shing wa Ta'i myu gu yang snang ba'i tha ma bzhin du yan lag sngon du 'gro ba can nyid kyi phyogs kho na ma yin nam snyam du sems pa ni 'on te nam mkha'i phyogs zhes bya ba'o/ /de lta yin na shing wa Ta rnams kyi nus pa ma yin te/ ma mthong ba'i bye brag gis lhan cig byed pa'i rdul phra rab rnams nyid myu gu la sogs pa'i rgyur 'gyur ro/ zhes lan du bstan pa ni gnas pa la sogs par byed dam ci zhes bya ba ste/ myu gu ni shing wa Ta la sogs pa'i sa bon la ltos pa yin gyi/ ma mthong ba'i yan lag tshogs pas 'phen par byed pa ma yin te/ thal ches par 'gyur ro zhes bya ba'i don to/ /ji ltar yan lag dang bcas pa'i snam bu ni yan lag tshogs pa yin na 'gyur ba de bzhin du snang ba'i tha ma'am/ shing wa Ta'i myu gu zhes rtogs pa yin na/ yan lag bzhin du yan lag can yod pa kho nar 'byung bar 'gyur ro snyam du sems pa kho nas zer ba ni/ 'on te med kyang dpe las ni/ zhes bya ba'o/ /'di mthong ba yod pa nyid kho na gang mi gsal ba ni mar me la sogs pa rnams kyis gsal bar byed pa yin pa ni sgron ma'i dpe'i stobs kyis na zhes bya ba'o/ /mar me gsal bar byed pa nyid kho na dbang phyug med na gsal bar byed par mi 'gyur ram snyam du sems pa la/ de yang sems pas byin brlabs na/ /zhes bya ba ste ci'i phyir/ gzhan de mi mi byed pa yin zhes bya ba'i don to/ /thams cad kyang yod bzhin pa nyid kyis bya ba med pa'i phyir/ sems pa can gzhan yang rung byed pa po ma yin par bstan pa ni/ de de dang de las yin/ de'i phyir snang ba'i tha ma'am/ myu gu ni ji lta bu'i mi rtag pa las sam/ sems pa can ma yin pa las skye ba yin la/ de nyid de la nus pa yin gyi rdul phra rab rnams kyi'am/ dbang phyug gi ni ma yin pa'i phyir de tsam gyi rgyu mtshan nyid ni rgyu mtshan med pa dang 'gal ba yin par nye bar bsdu ba ni/ des na gang gang gang gang las/ /zhes bya ba'o/ /dbang phyug la yang ma mthong ba yod do zhes bya ba ni kha cig gi'o/ /'on te/ de las tshad ma ma yin na/ dbang phyug la yang mi 'gyur ro/ /zhes bstan pa ni/ mngon sum gnod pas min zhe na/ /zhes bya ba ste/ pha rol po'i 'khrul pas sgro 'dogs pa dgag pa yin gyi/ khyad par ma grub pa nyid la sogs pa rnams su bsgrag par bya ba ma yin no/ /sa gzhi la sogs pa sems pa can ma yin pa'i nye bar len pa nyid dam/ cig shos ni nges pa can yin gyi nges par byed pa tsam du go bar byed pa yin gyi sems pa can ni ma yin no/ /zhes bstan zin to/ /de ltar ci las shes she na/ dbyibs sogs ci 'dra byin rlob po/ /yod med ces bya ba smos te/ gang gi phyir nges pa ni yod pa dang med pa dag gis nges par byed pa tsam gyi rjes su sgrub par byed pa yin gyi/ sems pa can ni ma yin te/ de'i phul du byung ba dang / cig shos dag gi phul du byung ba dang / /cig shos dag med pa'i phyir ro/ / de yang ci 'dra ba las ji lta bur gang dmigs pa de 'dra ba nyid rjes su dpog par byed do zhes bstan pa'o/ /yang na nges pa can tsam ni nges par byed pa tsam du go bar byed pa yin par 'dod pa grub pa zhes bya ba la sogs pas bstan zin to/ /nges pa can gyi bye brag gis sems pa can la sogs pa nges pa'i bye brag ni nges pa'i bye brag mthong ba yin na go bar byed pa yin gyi/ nges pa can tsam ma yin zhing nges pa'i bye brag ma rtogs pa la yang ma yin par bstan pa ni/ ci 'dra ba las ji lta bur gang dmigs pa ni zhes bya ba ste/ gzhan du ni ma yin no zhes dpe dang bcas pa'i ldog pa bstan pa ni/ tha dad dngos por rab sgrub pa/ /zhes bya ba la sogs pa ste/ ldog pa'i nges pa can bstan pa nyid kyi shugs kyis rjes su 'gro ba bstan par go ba yin no zhes bya ba'i don to/ /de lta yin na rig byed dang a ti ha sa'i gtsug lag la sogs pa dang / khron pa rnying pa dang lha rten la sogs pa rnams kyis yang byed pa po dran bzhin pa ma yin pa ni/ blo phul du byung ba la sogs pa'i rjes su byed pa yin gyi sems pa can tsam la ni mi srid pa ni de'i bye brag ste/ dbang phyug nyid la sogs pa'i bye brag rjes su dpog pa yin la/ de lta bu'i shes pa phul du byung bas dgos pa yin te/ bsnyen bkur gyi gnas yin pa'i phyir te gzhan gyis ci dgos/ 'u cag la sogs pa'i sems pa can tsam las ni/ de lta bu'i 'byung ba ma yin te/ dbang po la 'das pa dang mi las 'phags pa las de'i don rang bzhin yin pa'i phyir de kho na tshad ma yin no zhe na/ yod med rjes 'jug can grub pa/ /zhes bya ba'o/ /snyan dang gas la sogs pa yang ma yin pa tsam las byung ba ma yin la/ bum pa la sogs pa yang rung ste thams cad kyis de'i byed pa ma yin la/ de dag tsam gyis thams cad phul du byung ba'i sems pa can du sgrub pa ma yin te/ de'i phyir goms pa'i bye brag dang ldan pa'i 'u bu cag la sogs pa 'ga' kho na rdza mkhan la sogs pa bzhin du rjes su dpog par byed pa yin gyi/ shin tu dbang po las 'das pa'i nus pa can ni ma yin no/ /de lta bu'i phul du byung ba med na ji ltar dbang po las 'das pa'i yul nye bar ston pa yin te/ de 'di ni bskyed bya'i dngos po 'bras bu la yang mtshungs pa yin no/ /de la brdzun pa yin gyi rig byed la ni ma yin te/ grub pa'i mtha' pa thams cad dang / rigs thams cad kyang tha snyad la mi slu bas tshad ma nyid yin pa'i phyir ro/ 'di yang par sig rnams dang thod pa can la sogs pa mang po rnams kyi rang rang gi lung rnams la tha snyad mi slu ba'i phyir/ mtshungs pa yin te/ don la mi slu ba ni gnyi ga la yang med pa'i phyir/ 'di dang mi 'dra ba'i byin gyis rlob pa po 'grub pa ni ma yin no zhes bya ba'i don to/ / rig byed rtag pa nyid yin pas dag byed dang dag byed ma yin pa'i rdzas nyid kyis shes pa bzhin dang / me'i sbyin sreg la sogs pa sgrub par byed pa'i shes pa bzhin du dbang phyug gi rang gi ngo bo'i shes pa yin la/ de yang byang grol sgrub par byed pa'i phyir/ skyes bu'i don grub par byed pa yin no zhe na/ yod med rjes 'jug can grub pa/ /zhes bya ba smos te/ gal te rig byed rnams rtag pa nyid yin na/ dbang phyug rtag pa nyid rig byed rtag pa nyid brjod byar 'gyur te/ 'on kyang byed pa po las ma byung ba ma yin pa'i phyir/ 'gal ba'i 'bras bu blo'i rjes su 'brang ba'i sbyor ba'i bye brag mthong bas rtag pa bkag pa de'i phyir/ dogs pa'i skyon des dbang phyug ma grub bo zhes bya ba'i don to/ /yang na yul stong pa la sogs pa la byed pa po mi dran pa'i lha rten rnying pa la sogs pa mthong nas/ de dang 'dra ba'i byed pa po mthong ba yin na/ ji ltar mthong ba las byed pa po rjes su dpag par rigs pa yin gyi/ sa gzhi la sogs pa'i dbyibs la sogs pa rnams la ni de lta bu yod pa ma yin te/ de lta bu ni blo las byung ba nyid kyis ma mthong ba'i phyir ro zhes bstan pa ni/ yod med rjes 'jug can grub pa/ /zhes bya ba'o/ /blo sngon du 'gro ba can gyis sngar mthong nas/ lha rten rnying pa la sogs pa dag la de nyid kyi rjes su byed pas/ blo la rjes su dpog par byed pa ma yin nam/ gzhan du ni ma yin la de 'di ni sa gzhi la sogs pa yang mtshungs pa yin la/ de la ni bskyed pas sam/ sems pa can gyis nye bar len pa nyid kyi rjes su mi byed pa ni ma yin no/ /mngon sum gyi rtogs byar tha dad pa kho na yin no zhe na/ de ni gzhan la yang mtshungs so/ /phyogs la khyab par byed pa mthun pa'i phyogs la yod la/ mi mthun pa'i phyogs las log pa khyab pa ma tshang ba'am/ sbyor byed nyid kyang ma yin pa ma yin te/ gtan tshigs nyid du 'dod pa las yang de lta bu nyid du thal bar 'gyur ro snyam du sems pa la/ tha dad dngos la rab grub pa/ /zhes bya ba smos te/ bum pa dang lha rten la sogs pa'i ngo bo ni phul du 'byung ba'i sems pa can gyi rjes su 'gro ba dang / ldog pa'i rjes su byed pa'i phyir des khyab pa yin la/ sems pa can ni de la khyab byed du nges pa yin te/ du ba la me lta bu de nyid las 'grub par 'gyur gyi/ khyab pa can ma yin pas gzhi la sogs pa'i ngo bo las ni ma yin no/ /ldog pa tsam las khyab pa tsam du grub pa ni ma yin te/ rtag pa nyid la mnyan par bya ba nyid lta bu'o/ /bum pa la sogs pa'i ngo bo nyid ni de'i ngo bo ma yin te/ gang gi rjes su 'gro bar 'gyur/ bum pa dang lha rten la sogs pa'i ngo bo ni chos can gyi dbye ba ma rtogs pa'i tha snyad pa ma yin te/ du ba dang byas pa lta bu'o/ /skad cig ma'i dbye ba la yang rjes su dpag pa la dgos pa yod pa ma yin te/ rjes su dpag pa la sogs pa'i tha dad kyang yul nges pa can yin pa'i phyir ro/ /nges pa can yang de dang gcig pa nyid yin la/ de bzhin du sa gzhi la sogs pa'i ngo bo ni de la nges pa ma yin no/ /de'i phyir nges sems pa can nyid du nges par 'gyur ba ma yin te/ mdog skya ba nyid me la nges pa ma yin pa lta bu'o/ /mthun pa'i phyogs dang mthun pa'i phyogs ma yin pa dag la yod pa dang med pa tsam ni rjes su 'gro ba dang ldog pa dag ma yin te/ rjes su 'gro ba la sogs pa'i sgra rnams ni nges par rjod par byed pa yin pa'i phyir/ khyab pa can las ni grub pa yin la/ khyab pa can ma yin pa las ni mi 'grub po zhes bya ba'i don to/ /yang na ji ltar na sa gzhi la sogs pa'i ngo bo nges pa dang ldan pa ni nges par byed pa'i las kyis 'phangs pa yin pa de bzhin du/ bum pa'i ngo bo bzhin du sems pa can yang ci'i phyir ma yin zhe na/ tha dad dngos la rab grub pa/ /zhes smos pa yin te/ dngos su ba'i 'brel pa'i rjes su 'brangs nas/ gang yang rung ba cung zad kyang go bar byed pa yin gyi skyes bu'i 'dod pa'i dbang gis ni ma yin no/ /de nyid kyis ni gzhan du ni ma yin no zhes bya bas bstan pa yin te/ khyab par byed pa sgrub par byed pa yin gyi gzhan du sgrub par byed pa ni ma yin no zhes bya ba'i don to/ /mdog skya ba nyid ni me sgrub pa la ma nges pa ma yin nam/ zla ba dang me tog kun da la sogs pa la de la de med kyang yod pa'i phyir ro/ /de bzhin du sems pa can ma yin pa'i nye bar len pa'am bskyed pa ni blo dang ldan pa ma yin pa nam mkha' la sogs pa la yod pa ni ma yin no zhes brgal ba byed pa ni/ 'on te 'gyur na yang / gal te khyad par dang bral ba'i mdog skya ba nyid las zhes bya ba'o/ /lan ni/ gnod pa med pa tsam gyis ni/ /zhes bya ba ste/ ji lta ba kho na ni mdog skya ba nyid ni me med kyang yod pas ma 'khrul bar me nges pa'i phyir sgrub byed ma yin la/ de bzhin du sa gzhi la sogs pa'i ngo bo yang blo dang ldan pa yin na/ bum pa la sogs pa la 'brel pa can du dmigs pa ma yin te/ gzhan mthong ba yin na de'i mthong ba ma yin te/ dbang phyug ma yin pa byed pa po nyid du thal bar 'gyur ba'i phyir ro zhes bya ba'i don to/ /thal ches pa'i de nyid bstan pa ni/ de lta min la rdza mkhan gyis/ /zhes bya ba ste/ 'ji ba'i 'gyur ba can gyi bum pa'i ngo bo ni rdza mkhan gyi bskyed byar dmigs nas/ gzhan du de'i bya ba ji lta ba kho na ma mthong ba yang de dang 'dra bar mthong ba las go ba yin la/ de bzhin du grog mkhar la sogs pa la yang go bar 'gyur ro/ /khyim gyi ra ba dang mkhar gyi ba gam la sogs pa des ma byas pa la yang mthong ba'i phyir ro/ /'di yang ma nges pa kho na yin no zhe na/ sems pa can ma yin pa'i nye bar len pa yang be'u cher bskyed ba'i ched du'o/ /'o ma la sogs pa'i 'jug pa mthong ba'i phyir/ ma nges pa can nyid kho na'o/ /'di yang phyogs su byed pa'i phyir skyon med do zhe na/ de lta yin na mthong bzhin pa ma yin pa'i byed pa po gzhan nyid yin na/ 'ji ba'i 'gyur ba yin pa'i phyir zhes bye brag can du smras par 'gyur ro/ /bye brag dang 'khrul ba'i yul phyogs su byed pa dag la bye brag ci yang med do/ /bum pa la sogs pa dang sa gzhi la sogs pa bum pa byed pa'i byed pa po nyid ldog pa la yang bye brag can gyi 'ji ba'i 'gyur ba nyid mi ldog pa'i phyir 'khrul pa ma yin nam/ ma yin te/ grog mkhar nye bar mtshon pa nyid kyis de nyid phyogs yin pa'i phyir ro/ /chu dang me la sogs pa rnams kyang phyogs yin na ni khyad par byed pa ma yin no zhe na/ ma yin te sa 'jim tsam phyogs yin pa'i phyir ro/ /bye brag can nyid kyis 'khrul pa med pa kho na yin par bstan pa ni/ grog mkhar rdza mkhan gyis byas pa la ni zhes bya ba ste/ grog mkhar gyi nye bar mtshon pas sa gzhi la sogs pa nyid phyogs su byed par yang bstan pa ni/ 'bras bu de la ma mthong zhes bya ba'o/ /bye brag gi 'khrul pa spangs pa yin par yang brtag par dka'o zhe na/ khyed kyi yang phyogs su byed pa yin pas 'khrul pa'i yul spangs dka' bar mtshungs pa yin par bstan pa ni/ de dbang phyug la yang med dam ci zhes bya ba'o/ /byed pa po'i rjes su 'jug pa'i ngo bo'i rgyu ni grog mkhar la sogs pa bzhin du sa gzhi la sogs pa la yang ma grub pa nyid yin par bstan pa ni/ gal te de lta yin na/ khyed kyi 'di ches zhib tu rtogs pa yin te zhes bya ba'o/ /gzhan yang the tshom za ba'i ma grub pa ma yin par bstan pa ni/ sa 'dzin nyer mkho med pas dbyibs/ /zhes bya ba la sogs pa'o/ /bum pa la sogs pa bzhin du sa gzhi la sogs pa'i ngo bo yang blo dang ldan pa'i 'khrul pa kho na ma yin nam/ de ltar rab tu grags pa'i phyir drang srong ngan spong la sogs pa rnams kyis/ kun gyi ston pa khyad par can/ /phra ba las kyang phra ba ni/ /'od gsal rmi lam blo yi yul/ /rigs pa'i mthar thug skyes mchog ste/ /'di ni 'byung ba thams cad la/ /mtshungs par mngon khyab lus rnams kyi/ /skye dang cher skyes 'jig rnams kyis/ /rtag tu 'khor lo bzhin 'khor byed/ /ces gang bstan pa'i 'jig rten yang de ltar brjod pa yin te/ gling gzhan nas sam/ rgya mtsho'i nang nas sam/ phyogs kyi mtha' gnas glo bur du sgrub par byed cing mngon par 'dod pa la mngon par phyogs par byed pas 'jug par byed pas sgrub par byed pa nyid ni rig byed kyis byed pa yin pa'i phyir byed pa ma mthong ba la yang / byas pa'i blo 'di la yang ma nyams pa yin no/ /de'i phyir bdag cag la sogs pa dang mtshan nyid mi mthun pa'i blo can ni/ nye bar dmigs pa'i ngo bo'i bye brag mthong ba'i me'i bye brag bzhin du 'jig rten gyis spang par bya ba ma yin te/ dang po nyid kyi gnod pa'i blo bsal ba'i yul yin pa'i phyir ro/ /dang po'i dngul gyi blo la yang bye brag mthong ba las nya phyis kyi blos gnod par byed pa yin la/ 'di la ni bum pa la sogs pa dang sa gzhi la sogs pa'i bye brag gnod par byed pa ma yin te/ gnyi ga la yang bsgrub bya grub pa la gnod pa med pa'i phyir dang / rjes su dpag pa/ gzhan yang 'di la gnod par byed pa ma yin te/ 'jig rten thams cad la grags pas gnod pa'i phyir ri bong can zla ba ma yin zhes bya ba lta bu'o snyam du sems pa ni/ skyon 'di 'bras mtshungs ma yin nam/ /zhes bya ba'o/ /lan du 'bras la zhes bya ba smos te/ 'bras bu nyid la sogs pa la sgrub par byed pa ni gtan tshigs so/ /spyis kyang ni bum pa dang sa gzhi la sogs pa thun mong pa'i ngo bos kyang ngo / /yang gtan tshigs 'di ci las shes she na/ bsgrub byas rjes 'gro phyir zhes bya ba ste/ bsgrub par bya ba'i bye brag nges par byed pa tsam gyis sa la sogs pa'i lhan cig byed pas 'bras bu'i nges pa'i ngo bo'i rjes su 'gro ba las/ 'brel pa can ni tha dad phyir te bum pa dang sa gzhi la sogs pa tha dad pa'i phyir tha dad par nye bar bkod pa ni 'bras bu mtshungs pa'o/ /dper na 'bras bu nyid de sgra bsgrub par bya ba la btsal ba'i 'bras bu sgrub byed ni spyis te bskyed pa dang mngon par gsal ba thun mong ba'i ngo bos kyang ngo // /gtan tshigs la zhes pa ni yul gyi bdun pa ste/ tha dad par brjod ba'i skyon gyi yul can la ltos nas so/ /de lta yin na yang sgrub byed yin par ci las shes/ rtag pa la ni shin tu rag las par bya ba ma yin pa'i phyir/ mngon par gsal ba yin par mi rigs zhes bya ba'i phyogs la bsgrub byas zhes bya ba 'bras bu nyid la sogs pas de tsam gyis rjes su 'gro ba'i phyir zhes bya ba rjes su 'jug pa'i phyir yin te/ gzhan du na ma nges pa yin no/ /bskyed pa dang mngon par gsal bar rjod byed nyid kyis 'bras bu ma yin pa thun mong pa'i phyir ro zhes bya ba'i dgongs pas spyis kyang sgrub par byed pa la zhes bya ba bye brag yin no zhes dpe la gnas pa nyid kyis gsal bar byed pa yin gyi/ sems pa can gyis byin gyi brlabs pa'i sgrub byed la 'bras bu dang mtshungs pa ma yin te/ nus pa la sogs pa dang thun mong ba'i ngo bo nyid ni sems can phul du byung ba'i rjes su byed pa nyid kyis de'i rjes su 'gro ba'i phyir ro/ /sa gzhi la sogs pa'i ngo bo ni de dang mtshan nyid mi mthun pa nyid kyis rjes su 'gro ba ma yin no/ /'jig rten du ni bdag gis sngon byas pa'i las so zhes smra ba ni/ las kho na la 'byin byed dang / dbang phyug ces smra ba yin no/ / lung yang don 'di la rigs pa yin gyi/ gzhan la ni ma yin te/ slu ba yin pa'i phyir ro/ /'dis ni ji ltar bum pa la sogs pa sems pa can yod kyang las sgrub pa yin pa de bzhin du/ sa gzhi la sogs pa la las yod kyang byin gyis rlob pa po sems pa can cis sgrub par mi byed ces pa bsal ba yin te/ des byin gyis brlabs pa'i ngo bo ma mthong ba'i phyir ro/ /'dus pa nyid la gzhan gyi don nyid kyis khyab pa yin la/ gzhan la 'gyur zhing de la yang don de nyid yin pas thug pa med pa'i phyir/ de tsam du yang 'grub par mi 'gyur te/ /dper na du ba las du ba'i ngo bo'i me lta bu'o/ /de'i phyir sgrub byed las bzlog pa'i bsgrub bya la sgrub byed gnas pa yin pa'i phyir/ gzhan 'dus pa ma yin pa nyid yin te/ du ba'i ngo bo ma yin pa'i me lta bur rnam par gnas pa yin no/ /de ltar grub pa yin na shugs kyis grub pas rjes su 'gro ba med pa'am/ 'gal ba nyid dam bsgrub bya ma tshang ba nyid kyi skyon yang med pa yin te/ rjes su dpag pa thams cad chad par thal bar 'gyur ba'i phyir ro/ /shugs kyis grub pa'i me dang rjes su 'gro ba la sogs pa rnams med pas ma yin no snyam du sems pa la/ bsgrub byas zhes bya ba smos te/ spyi'i ngo bos kyang rjes su 'gro ba las 'bras bu la ni du ba la sogs pa la ste/ nye bar mtshon pa'i don yin pa'i phyir byas pa nyid kyang ngo / /bye brag tu bsgrub par nus pa'i sgrub byed yin yang sa phyogs la gnas pa'i me sgrub pa ni ma yin no/ / 'gal ba nyid dang bsgrub bya ma tshang ba nyid du thal bar 'gyur ba'i phyir zhes bya ba la sogs pa 'di ni 'brel pa can tha dad pas bsgrub bya'i khyad par tha dad pa'am/ rjes su 'gro ba med pa'am/ 'gal ba nyid dam/ bsgrub par bya ba ma tshang ba rnams rjod pa nye bar bkod pa de kho na 'bras bu mtshungs pa'i skyon ma yin nam/ gang gi phyir 'bras bu yang rang bzhin gyis bsgrub bya dang rtag tu 'brel pa yin pa'i phyir tha mi dad pa kho na yin la/ 'brel pa med na ni tha dad pa kho na yin no/ /de bzhin du phyin ci log dang ma tshang ba nyid kyang med pa'i rnam grangs nyid yin pa'i phyir/ tha dad pa'i sgra'i brjod bya yin te/ dper na lus kyi tha dad pa la sogs pa lta bu'o/ /'di skad bstan par 'gyur te mthong ba dang 'dra ba'i bye brag nyid ni du ba zhes bya ba'am/ me zhes bya ba'i rnam par rtog pas bskyed bya nyid dam/ skyed byed nyid kyis yul can du byas pa ni spyi yin la/ mtshan nyid mi mthun pa ma yin te/ de'i skyed byed ma yin pa nyid kyi de'i yul ma yin pa nyid kyi phyir brda lta bu'o/ /spyis kyang rjes su 'gro ba las bsgrub bya'i bye brag grub pa la mtshan nyid mi mthun pa'i bye brag nye bar bkod pas de ma yin pa 'grub pa'i gnas skabs gang yin/ des na bye brag thams cad 'grub pa ni ma yin te/ rjes su dpag pa'i phyag rgya'i dbye ba nye bar bkod pa 'brel pa med pa'i phyir ro/ /'dus pa ste gzhan la yang mthar thug pa med pa ma yin te/ sgrub byed thams cad la mthar thug pa med pa'i phyir ro/ /rigs pa de nyid kyis de las kyang gzhan dang gzhan du 'gyur ba yin no zhe na/ yin du zad mod skyon ci yod de/ 'bras bu du bas 'bras bu ma yin pa'i me mi 'grub pa'am/ mtha' med pa yang ma yin la 'di ni sems pa can du sgrub pa la yang mtshungs pa yin te/ de la yang mtshan nyid mi mthun pa'i khyad par grub pa'i phyir las grub pa kho na yin no/ /mthong ba kho na'i bye brag gi yul nges pa tsam snga na med pa'i rjes su dpag pa la yin la/ de la ni de dang yang bye brag gzhan yang yin pa'i phyir tha dad pa yin no/ /bskyed pa dang mngon par gsal ba bsgrub byar mtshungs pas kyang btsal ma thag tu byung ba nyid rjes su 'jug pa'i phyir/ 'bras bu nyid kyi ngo bo'i bsgrub bya 'grub pa yin par 'dod pa yin no/ /mngon par gsal ba rang bskyed pa dag tha dad pa'i bsgrub bya'i 'brel pa can gyi dbye ba yin na ni/ gtan tshigs kyi rjes su mi 'gro ba dang 'gal ba dang ma tshang ba'i dbye ba nye bar bkod pa'i skyon rnams/ rkang mig pa'am/ slob dpon bdag nyid kyi'am/ skal ldan rnam 'grel mdzad pa rnams kyi yang 'bras bu mtshungs pa'i skyon yin par go bar bya'o/ /bskyed pa dang mngon par gsal ba'i dbye ba las 'bad pa'i 'bras bu du ma yin par gang bstan pa de la/ 'bras bu gzhan nyid yin na ni ste/ 'bras bu du ma nyid yod pa yin na gang du 'bras bu gzhan nyid mi dmigs pa la/ rgyu tha dad pa ni bsgribs pa yin par 'thad pa'o/ /de la rtsol ba rgyu nyid ma yin pa ni 'bras bu nyid la ma nges pa'i phyir ro/ /sgra la ni bum pa la/ rtsig pa la sogs pa dbang po'i gzung byar mtshungs pa bzhin du/ sgrib byed med pa yin la des na gtan tshigs kho na yin no zhes bstan pa ni/ 'bras bu gzhan nyid yin na zhes bya ba la sogs pa'o/ /sgrib g.yogs med du zin kyang mngon par gsal ba dang mngon par gsal ba ma yin pa'i bdag nyid kyis khyad par yod pa kho na yin no snyam du sems pa la/ sgra la ni zhes bya ba ste/ bar du chod pa yod pa dang med pa dag kho nas mngon par gsal ba dang mngon par gsal ba yin pa'i spyi dang khyad par dag gi dngos po gzhan la gzhan du bum pa la sogs pa yang 'ji ba'i gong bu la sogs pa las mngon par gsal ba kho nar thal par 'gyur ro zhes bya ba'i don to/ /rtsa ba dang chu la sogs pa yang brkos pa la sogs pas mngon par gsal ba ni snga na yod pa la tshad ma 'jug pa kho nas rtogs pa ma yin nam/ sngar mthong ba ngo shes pa'i tshad ma de ni sgra la yang yod pa yin gyi/ 'ji ba'i gong bu la bum pa yod pa ni tshad ma med do/ /des na mngon par gsal ba de ji nas kyang ma yin no/ /sgra la yod pa ma yin zhes bya ba tshad ma gang las shes pa yin/ bzlog pa la ni rtogs pa yin no zhes bya ba'i don bstan pa ni/ sgra la'ang zhes bya ba smos te/ rtag pa la'ang zhes bya ba ni gcig gi rang bzhin du gnas pa'o/ /sngar mthong ba ngo shes pa ni snga na yod par grub pa la tshad ma ma yin nam/ ma dmigs pa'i dus na ni yod pa ma yin te/ /sgrib pa med pa'i phyir ro/ /bsgribs pa ni dbang po'i gzung byar mtshungs pa yin la/ sgra las gzhan pa nyid la rna ba'i dbang pos gzung bar bya ba med do/ /mngon par gsal ba ni phul du byung ba la rag las pa ma yin te/ phul du byung ba ni tha dad pa dang tha mi dad pa dag la phul du byung ba ma yin pa dang / mi rtag pa nyid la sogs pa'i skyon yod pa'i phyir ro zhes bya ba'i rigs pas ma dmigs pa'i tshe na/ med pa byas pa nyid las nye bar dmigs pa yin par grub pa yin te/ sngar mthong ba ngo shes pa ni de dang 'dra ba'i rigs la rnam par gnas pa yin te/ rang gi ngo bos 'khrul pa nyid yin no snyam du dgongs pa ni/ sgra la'ang zhes bya ba ste/ skyes pa ni byung ba'o/ /ma dmigs pa'i rgyu bar du chod pa la sogs pa rnams sam/ phul du byung ba la rag las pa yang mi srid pa ni rjes su dpag pa yin no/ /sngar mthong ba'i ngo shes pa ni mngon sum yin la mngon sum dang 'gal ba'i rjes su dpag pa ni/ tshad mar mi 'gyur ba'i phyir ma dmigs pa'i gnas skabs na yang yod par grub pas/ ma dmigs pa'i rgyu ni ji lta bu yang yod par brtag pa yin no zhe na/ lan du sgra la 'ang bar chod la sogs pa zhes bya ba smos te/ khyed kyi la yang ma dmigs pa'i tshe na yod par sngar mthong ba ngo shes pa nyid kyis khas blangs pa yin par bstan pa ni/ bum pa la sogs pa la yang zhes bya ba smos te/ brgyud nas zhes bya ba ni gzhan yod pa yin la/ des dmigs pa la bdag gis mthong ba kho na yin gyi gzhan ma yin zhes bya ba la sogs pa'i rjes su 'brang ba yin no/ /sngar mthong ba ngo shes pa la ni thams cad bdag nyid kyis rig bya yin gyi brgyud pas ni ma yin no zhes zer ba ni/ rang nyid ngo shes pa las dngos su ni ma yin no zhes bya ba'o/ /gzhan yang de'i tshe yod pa shes pa tsam gyis dmigs par byed pa ma yin te/ 'o na ci zhe na/ sngar mthong ba ngo shes pa kho na yin no zhes pa'i brgyud pas nyam thag pa dang / sngar mthong ba ngo shes pa yang yin zhes bya ba de nyid ni 'bad pa ches yin par bstan pa ni/ gzhan gyis kyang ni ngo shes las/ /zhes bya ba ste/ gang gi phyir 'bras bu mtshungs pa'i skyon la/ rkang mig pa'i lan ni mi rigs pa de'i phyir/ 'di lta ste 'bras bu mtshungs pa'i skyon la/ thams cad mi rtag par smra bas khyad par can yin pas spyis kyang sgrub par byed pa la ste/ gnyi ga ltar yang sgrub par byed pa ste/ 'bras bu mtshungs pa'o/ /gnyi ga ma yin pa ltar yang sgrub par byed pa ste/ 'bras bu mtshungs pa'o/ /gnyi ga ma yin pa ltar sgrub par byed pa yin na ni ma nges pa nyid yin no zhes sngar brjod pa nyid lan yin no/ /'bras bu nyid ni byas pa nyid de bsgrub bya dang cig shos kyi chos can dang / khyad par can nyid kyis gzhan nyid yin pa ni/ de'i cha yin gyi rang gi ngo bo ni ma yin te/ de'i bsgrub byas khyab pa'i phyir ro/ /rnam gsum zhes bya ba ni bum pa la yod pa'i byas pa nyid ni sgra la ma grub par snang ba dang / bum pa la yod pa'i mi rtag pa nyid kyis khyab pa'i phyir sgra la yod par 'gal bar snang ba dang / sgra la yod pa bum pa las ldog pa ni rtag pa las kyang ldog par 'gyur ba yin no snyam du dgongs pas/ thun mong ma yin pa'i phyir ma nges par snang ba yin no/ /chos can tha dad pa'i rtogs pas chos tha dad par rtogs pa ni rnam par rtog par mtshungs pa ci las mi 'gyur snyam du sems pa la/ rnam par rtog pa mtshungs pa ni zhes bya ba smos so/ /bum pa dang sa gzhi la sogs pa'i chos can tha dad pas dbyibs la sogs pa'i dbye bar rtog pas slob dpon gyi mtshan nyid dang ldan pa'i phyir 'bras bu mtshungs pa la sun 'don pa ma yin nam snyam du sems pa ni/ gal te 'dir yang dbyibs nyid ces bya ba'o/ /lan ni/ dbyibs la sogs pa dag gi spyi/ /zhes bya ba ste/ gal te dbyibs kyi spyi la sems pa can gyis khyab par grub pa yin pa de lta na/ chos can tha dad pa las/ tha dad par rtog pa ni 'bras bu mtshungs par 'gyur ro/ /ji snyed pa'i bum pa dang khyim la sogs pa rnams kyi dbyibs ni sems pa can sngon du 'gro bar dmigs pa yin te/ byed pa ma mthong ba yin yang de nyid yin par sngar mthong ba ngo shes pa las sems pa can sgrub par byed pa yin pa'i phyir spyir 'gyur ba yin no/ / sa gzhi la sogs pa'i dbyibs ni de bzhin du spyir 'gyur ba ma yin no zhes bya ba'i don to/ /de bzhin du ma mthong ba yang res 'ga' ba yin pa'i phyir/ 'bras bu ni rgyu'i rtogs byed yin na/ sems pa can gyi rtogs byed ma yin nam/ gang gi phyir 'bras bu ni byed pa po dang byed pa dang las rnams sngon du 'gro ba can du mthong ba yin te/ dper na bum pa la sogs pa'i bya ba dbyig pa la sogs pa'i byed pa sngon du 'gro ba can du mthong ba yin la gzugs nye bar dmigs pa yang bya ba kho na yin pa'i phyir mig gi dbang po'i rtog pa yin no snyam du sems pa la/ de ni shing sogs gzhan la yang / /zhes bya ba smos te/ mthong ba tsam gyis rgyu yod na 'byung ba'i phyir/ byed pa po gzhan don med do zhes bya ba'i don to/ /shing sogs zhes bya ba ni dpe yin no/ /khyim dang bum pa la sogs pa'i dbyibs kyi spyi/ sems pa can gyis khyab pa'i dbyibs kho na yin no zhes 'dzin pa nas gzhi la sogs pa'i rjes su 'jug ba kho na 'dzin pa ma yin nam/ gang gi phyir de lta bu'i shes pa la de la yod pa'am cig shos zhes bya ba'i dbye ba med do snyam du sems pa la/ 'brel pa can gyi khyad par ni/ /zhes bya ba smos te/ gang gi phyir khyad par mthong ba las byung ba yin na/ de bzhin du shes pa ni thams cad thun mong ba'i yul du mi 'gyur ro/ /du ba mthong ba las 'bras bu nyid du shes pa ni/ 'bras bu tsam gyis yul can ma yin no zhes bya ba'i don to/ /'brel ba can ma yin pa nyid tsam la/ dpe ni mi rtag ces bya ba la sogs pa'o/ /bya rog gi nag po nyid dang chu skyar gyi dkar po nyid ces bya ba/ byA ka ra Na'i bshad pa byed pa'i tshig yin pa'i phyir bsdu ba med do/ /de la yod pa'i yon tan rnams kyis drug pa'i yon tan yin gyi/ de'i bye brag rnams kyis ma yin no zhes bya ba ni rnam par 'grel ba'i tshig las/ da ltar nye ba bzhin du'am/ 'bad dang gus ba'i bsdu ba lta bu'i bsdu ba kho nar 'gyur ro/ /'di'i blo sngon du 'gro ba yang yin la byed pa yang yin pa'i byed pa ni byas pa nyid/ de'i rjes su 'gro ba ni gzhan du mthong ba las/ gzhan du byed pa ma mthong yang rjes su 'jug bzhin pa nyid yin no/ /gal te yang byas pa nyid kyis rjes su 'jug pa ma yin yang dbyibs yin no zhes bya bar rjes su 'jug pa kho na yin no/ /gang gi ngo bos rjes su 'jug pa ma yin pa de nyid kyi ngo bo ni med do/ /des na sgrub byed ma yin no zhes don la the tshom za ba ni/ gal te blo sngon du byed pa'i zhes bya ba'o/ /lan ni/ rtogs pa tsam gyis sbyor ba'i chos/ /don dang 'brel pa dang bral las zhes bya ba'i tshig rkang gnyis kyis go rims bzhin du/ 'jal byed dang gzhal bya ma grub par bstan pa yin la/ de las don 'byung ba ste/ yod pa yin na dbyibs zhes bya ba gcig nyid la tha dad pa mthong bas mngon sum gyis gnod pa yin no zhes bya ba'i don to/ /'dir yang rigs gzhan zhes bya ba'i bsdus pa'i don yin te/ rigs gzhan la ni zhes bya ba ste/ bum pa la sogs pa dbyibs la ste khyab bya la khyab byed nyid du sems pa can grub ba yin no/ /yang na/ rigs gzhan la rab grub pa/ zhes bya ba ste/ bum pa la sogs pa'i dbyibs kyi rigs la rab tu ma grub pa ni dbang phyug yin te/ 'dus pa ma yin pa 'di la yang go rims bzhin du dpe ni go'i sgra yin pa'i phyir zhes dang po'i don du gsal ba yin la/ gnyis pa la ni rwa lta bu'o/ /'dir tshig la sogs shes pa'i sogs pa'i sgras gsal bar byed par 'gyur bas rwa dang mtshan nyid mi mthun pa cung zad bstan pa yin par blta bar bya'o/ /grangs can gyi yang gsal ba dang gsal ba ma yin pa nyid kyis zhig pa dang / cig shos kyi tha snyad kyi yul ni dngos su bar gnas pa kho na ma yin nam/ ji skad du/ gsal ba rnams kyi nang nas ni/ /mi gsal sogs par byung ba rnams/ /zhes smos pa yin no snyam du sems pa la/ mi rtag pa nyid grangs can la zhes bya ba'o/ /mi gsal ba ste ma dmigs pa tsam la sogs pa gang gi yin pa de rnams ni de ltar yin no zhes bsgrubs pas/ de'i ste grangs can gyi mi gsal ba ste/ bye brag med pas ma dmigs pa yin gyi/ rjes su 'gro ba zhig pa ni ma yin no/ /rjes su 'gro ba med pa zhig pa ma yin pa ni ma lus par zhig pa ma yin te/ snang ba mi dmigs pa ma yin zhes bya ba'i don to/ /mngon par mi gsal ba snang ba dang / cig shos kyi mi dmigs pa'i spyi mthong ba tsam ni mi rtag pa'i tha snyad kyi yul ma yin te/ de yang ma yin pa'i tha snyad du rung ba la yang yod pa'i phyir ro zhes bstan pa ni/ ri bong gi rwa la sogs pa dang zhes bya ba ste/ dbang po la sogs pa'i bskyed byar mthong ba ni snang ba nyid yin la/ de yang dngos po'i gnas skabs su gyur pa dang tha mi dad pa yang ma yin no zhes bya ba ni kha cig gi'o/ /tha dad pa dang shes pa'i ming can yin no zhes bya ba ni gzhan gyi'o/ / des na 'dod pa de gnyis rnam par dpyad pa'i don du snang ba zhes bya ba 'di ci zhig ces dris pa'o/ /dngos po'i bdag nyid du mthong ba log na/ de'i gnas skabs kyi dngos po nyid ldog par bstan pa ni/ gal te don gyi rang gi ngo bo zhes bya ba ste/ snang ba'i dngos po yod kyang mi snang ba nyid ni mi srid do zhes bya ba'i don to/ /tha dad pa ma mthong ba'i phyogs la yang de nyid zhig pa dang rjes su 'gro ba yin par bstan pa ni/ 'on te snang ba'i bdag nyid ces bya ba'o/ /mthong ba log pa ni mngon sum gyis grub pa ma yin nam/ snang ba'i ldog pa yang khongs su 'dus pa med do zhes bya ba'i tha snyad du byed pa yin no snyam du sems pa la/ gzhan med na zhes bya ba smos te/ re zhig mthong ba ni snang ba'i khyab byed ma yin te/ tha dad pa'i phyir ro/ /rgyu yang ma yin te/ 'bras bu yin pa'i phyir ro/ /'bras bu yin pa gos pa med pa yin na 'brel pa cung zad kyang med pa yin te/ de nyid 'jug pa dang ldog pa yang yin gyi dngos po ni ma yin pas/ dngos po mi rtag pa nyid ma yin te/ 'brel pa med pa'i phyir ro zhes bya ba'i don to/ /dngos po'i 'bras bu ji lta ba mthong ba med na mi 'byung ba'i phyir la/ de bzhin du dngos po'i rgyu yang yin te/ de med pa yang de'i snang ba'i dngos po med pa'i phyir ro snyam du sems pa la/ de yang thams cad kyi tshe zhes bya ba smos te/ de dang 'dra ba ma yin pa ni rig par bya ba ma yin pa'i phyir/ dngos po'i de bzhin pa nyid kho na rig pa ma yin zhes bya ba'i don to/ /'chi ba'i sgra 'jug pa tsam nyid ces bya ba ni sangs rgyas pa la ltos nas yin no/ /ci las shes she na/ rnam shes la sogs 'gags pa ni/ /zhes bya ba smos so/ /shing rnams la ni yod pa ma yin nam/ de'i phyir de med na ci las mi 'gyur snyam du sems pa la rnam par shes pa 'gags pa ni zhes bya ba ste/ rnam par shes pa med pa tsam ni 'chi ba ma yin te/ de lta mod kyi zhig pa ni yin te/ de yang yod pa sngon du 'gro ba can gyi yin gyi shing rnams la ni yod pa nyid med do zhes bya ba'i don to/ /rnam shes med na de zhig pa'i 'chi ba med du chug kyang shing rnams la shes pa med pa'i bdag nyid kyi tshe ni yod pa yin la/ de zhig pa'i 'chi ba ni 'di la yang yod do snyam du sems pa la/ tshe yang de bzhin te zhes bya ba smos te/ 'gags pa yin no zhes bya bar sbyar ro/ /rnam par shes pa dang tshe 'di gnyis ni mi 'bral ba yin te/ bdag gcig med na cig shos kyang med pa yin no zhes bya ba'i don to/ /mi 'bral ba nyid bstan pa ni/ tshe ni srog yin drod dang ni/ /zhes bya ba'o/ /mtshan nyid kyi rnam grangs srog nyid kyang 'brel pa ni/ drod ni rnam shes rten zhes bya ba'o/ /'di'i phyir phyogs gcig nyid kyis 'chi ba yang shing rnams la yod pa ma yin par bstan pa ni/ 'chi ba'i khas len na zhes bya ba'o/ /de lta yin na shing rnams la sangs rgyas pa rnams 'jig rten pa bzhin du 'chi ba'i tha snyad ji ltar byed pa yin snyam du sems pa la/ des na 'di shing dag la zhes bya ba smos te/ 'di zhes bya ba ni sangs rgyas pa'o/ / gal te 'chi ba'i sgra'i rgyu mtshan skams pa yin na 'dam la sogs pa cis ma yin/ des na sgra nges pa can yin pa'i phyir skams pa las gzhan pa/ dngos por gyur pa'i 'chi ba yin no snyam du sems pa ni/ 'chi ba'i sgra 'jug pa'i phyir zhes bya ba'o/ /skams pa rjod par byed pa yang yin pa'i sgra ni rgan po rnams kyi shing la sogs pa la nges pa yin pas/ 'dam las skyes pa bzhin du yul nges pa can yin zhes lan du bstan pa ni/ 'di la brjod par 'dod pa'i gzhan dbang phyir zhes bya ba bstan zin to/ /ci brjod par 'dod pa'i sems pa las sam/ 'on te don gyi nges pa las yin zhes the tshom za ba yin no snyam du sems pa ni/ 'on te don mthong bas zhes bya ba'o/ /skams pa ma gtogs pa gang gis shing rnams 'chi ba'i sgra'i brjod byar ma grub pa yin na/ ji ltar the tshom za ba yin/ /gnyi ga'i khyad par dran pa'i ngo bo yin pa'i phyir ro zhes bya ba 'di'i lan du/ 'chi ba grub na zhes bya ba smos te/ mngon sum la sogs grub pa med na brda 'dzin pa med pa'i phyir/ sgra ni don gyi 'jog byed ma yin no zhes bya ba'i don to/ /dbang po la sogs pa'i sgra bzhin du dbang po las 'das pa'i yul can ni/ rtag tu sgra'i dpag bya ma yin nam snyam du sems pa ni/ 'on te sgra dang don gyi 'brel pa zhes bya ba ste/ skya bo ma yin pa las ldog pas me sgrub pa bzhin du dbyibs ma yin pa las log pa'i dngos po ma yin pa nyid ni sems pa can gyi sgrub byed ma yin te/ de tsam la des ma khyab pa'i phyir ro zhes/ tha dad dngos la rab grub pa/ /zhes bya bas bstan zin to/ /rigs gzhan la ni rab grub pa zhes bya ba 'dis ni dngos pos stong pa'i sgra gcig pu mthong ba las ni bsgrub bya 'grub pa ma yin pa'i phyir/ /zlos pa ma yin par ni/ don gcig na yang skya bo las/ /zhes bya bas bstan zin to/ /ji ltar skya bo nyid de mi byed pa rnam par gcod pa'i bdag nyid kyis dngos po yin la/ de bzhin du dbyibs sam bskyed pa yang ma yin nam/ de'i phyir ji ltar sgra tsam mtshungs pa yin/ don la 'khrul pa can yin par byas pas sgra la yang ma yin nam/ gang gis de ltar log par rtogs par byed ji ltar sgra ma nges pa yin pa de bzhin du/ dngos po yang nges brjod pa ma yin par bstan pa yin no zhe na/ skya bo nyid la sogs pa nyid kyis bstan pa kho na yin no/ /ldog pas tha dad pa rjod par byed pa ma yin pa'i sgra bsdus pa rjod par byed pa'i sgrub byed du khas len pa yin na/ skyon 'di brjod pa yin no zhe na/ ma yin te/ dngos po yod pa'i phyir ro/ /gang gi phyir bskyed pa ni sgra tsam ma yin la/ brtags pa'i skyon rnams ni 'di dag tsam mam zhe'am/ yang dag pa ma yin no/ /de lta yin na de'i sgra gcig yod pas don gcig yod par rlom sems pas nye bar dgod par byed pa yin te/ skya bo ma yin pa las ldog pa bzhin du/ dbyibs ma yin pa las ldog pa ni ma nges pa yin la/ de'i bye brag nyid la sems pa can gyis khyab pa'i phyir ro zhes bstan pa la/ de'i sgra gcig nyid kyis yang de'i bye brag med par rtogs pa de la de skad bstan pa yin te/ sgra gcig nyid yin yang don gcig nyid ma yin te/ go'i sgra gcig nyid la yang de'i brjod bya lkog shal la sogs pa dang ldan pa dang / tshig la sogs pa rnams tha dad pa'i phyir ro/ /de bzhin du bskyed pa la sogs pa ni dngos po ni dbye ba ma yin no zhe na/ ma yin te/ de la yang rdza mkhan kho na las bum pa la sogs pa'i bskyed pa dang / sa gzhi la sogs pa bskyed pa yang rang gi ngo bos phan tshun mtshan nyid mi mthun pa nyid kyis sgra tsam nyid tha mi dad pa yin no/ /de bzhin du bum pa dang snam bu la sogs pa rnams kyi bskyed bya'i dngos po gcig rjes su 'jug pa ni sa gzhi la sogs pa rnams las ldog pa yin la/ de bzhin sa gzhi la sogs pa rnams kyang yin pa'i phyir/ des kyang rigs mi mthun pa'i dngos po nyid yin la/ 'dis ni skya bo nyid kyang nges pa yin no/ /'grel pa yang de lta bu nyid du bshad par bya'o/ /rang gi ngo bos tha dad pa ni rang rig par bya ba yin pa'i phyir/ de'i rang gi ngo bo'i dbye ba'i sgo nas sngar lan bstan pa ni ma yin no/ /bden te/ sgra la dbye ba med pas de'i dbye ba ni shing bzhin du mi srid pas 'di bstan pa'i phyir skyon med do/ /'dis ni 'dus pa dang / 'dus pa ma yin pa dag dang las dang rdza mkhan la sogs pa rnams dang / dbang phyug la sogs pa rnams kyis gzhan sems pa can la sogs pa'i sgra gcig nyid yin yang / dngos su ni rigs mi mthun pa nyid yin par bstan par rig par bya'o/ /'dus pa yin pa'i phyir dang rdza mkhan la sogs pa'i bskyed bya'i ngo bo'i bye brag las kyang rigs gzhan gang yin pa ste/ sgrub byed gzhan la de khyab par byed pa nyid du grub pa'i 'dus pa can ma yin pa dbang phyug la sogs pa ni/ de'i rigs su ma grub pa yin no zhes bya ba'i don to/ /de'i rigs su grub pa'i sgra tsam gyi spyi las sgrub byed bsgrub byar mi rigs so/ /lkog shal la sogs pa dang ldan pa nyid du grub pa'i rwa la sogs pa 'dus pa'i ngo bo nyid la/ go'i sgra spyi las tshig la sogs pa rnams kyis sogs pa'i sgra ni gsal bar byed pa yin pa'i phyir/ rwa la sogs pa la yang sbyar bar bya'o/ /des na rwa la sogs pa rnams kyi bzhin du tshig la sogs pa rnams kyang go ba'i sgra las yin no zhes bya ba'i don to/ /de bzhin du sgrub byed dam bsgrub bya'i ngo bo yang mtshan nyid mi mthun par mngon sum gyis nges pa yin pas tshig gcig sbyar bas gcig par 'gyur ba ma yin te/ de dang 'gal ba'i phyir ro zhes bstan pa yin no/ /sgra de dang 'gal bar cis mi 'gyur/ de yang gsal bar byed pa nyid yin par khyad par med pa'i phyir ro zhe na/ 'dod pa'i dbang gis mngon par gsal ba nyid kyis don la gzhan dbang nyid med pa'i phyir/ nye bar gnas par byed pa ma yin par bstan pa ni/ brjod par 'dod pa'i gzhan dbang phyir/ /zhes bya ba'o/ /dbang po las skyes pa bzhin du sgra las byung ba tshad ma yin te/ don mthong ba'i phyir ro zhe na/ ma yin te/ don gyi rang gi ngo bo ma mthong ba yin te/ de la yang mngon sum gyis gzhan du mthong ba'i phyir ro/ /shes pa thams cad kyi rang gi ngo bo rig pa ni dngos su ba yin la/ thob bya'i don rig pa ni des bskyed par bya ba yin pa nyid kyis de dang 'brel ba yin pa'i phyir de'i bdag nyid du nye bar bstan pa yin no/ /de las byung ba ma yin pa la sgra las byung ba la ni rigs pa 'di ma yin no/ /dmigs bya nyid tsam ni rgyu nyid ma yin te/ zla ba gnyis la sogs pa rnams la yang de yod pas shes pa de tshad ma nyid du thal bar 'gyur ba'i phyir ro/ /de ni dbang po las skyes pa yin pa yang phrad pa med pa'i phyir kho bo cag tshad mar mi 'dod do/ /'di skad bstan par 'gyur te/ yul gang du dus gang gi tshe rnam pa gang dang ldan pa'i dngos por des kun du mthong bar byas pa de lta bu med do zhes bya ba'i don to zhe na/ yul gzhan la sogs pa la yang des mthong ba ma yin no/ /gzhan gyis mthong ba ma yin no zhe na/ de lta yin na de'i yul yin gyi gzhan gyi yul ma yin pa'i phyir yul med par 'gyur ba des na yang de nyid dpag bya yin na ji ltar dbang po dang mi 'phrad pa yin/ rnam pa gang gis dpog pa de de la med pa'i phyir ro zhe na/ gang du snang ba de na med pa yin na gzhan na yang de bzhin du med pa yin te/ mi snang ba'i phyir ro/ /med pa yang ma yin te/ snang ba dang 'gal ba'i phyir ro/ /des na shes pa'i rang gi ngo bo kho na yin no/ /de'i phyir dmigs bya ma yin pa nyid dam/ rgyu nyid kyi phyir snang bas bye brag med pa'i phyir/ bdag nyid kho na shes pa rnams kyi snang ba kho na yin no/ /de yang phrad bya dang 'brel ba'i phyir gnod pa med pa yin la/ de med na gnod pa med pa'i phyir tshad ma nyid dam cig shos rnams su rnam par gzhag pa yin no/ /de ltar ni sgra rnams ni tshad ma nyid ma yin te/ 'brel pa med pa'i phyir ro/ /de bzhin du sgra gcig nyid la yang don gcig pa ma yin te/ tha dad par snang ba dang 'gal ba'i phyir ro zhes bstan nas/ da ni rgol ba dang / phyir rgol bdag las gang yang rung ba dang khas len pa dang 'gal ba'i phyir yang / don mi 'grub pa ni sgrub byed ma yin par bstan pa ni/ sems pa med pa dang mi rtag pa la sogs pa'i gtan tshigs las dang / sems pa can dang shun pa bshus na 'chi ba'i phyir zhes dpyad pa yin no zhes bya bar sbyar ro/ /blo ni sems pa can ma yin te/ mi rtag pa'i phyir zhes bya ba'i mngon par grub pa tsam ni rgol ba grangs can la mi rtag pa nyid kyi 'jig pa'i ngo bo ma grub pa yin no/ /shing rnams ni sems pa can yin te/ shun pa thams cad bshus na 'chi ba'i phyir zhes bya ba ngo tsha med pa'i sbyor ba las phyir rgol ba sangs rgyas pa'i rnam shes la sogs pa 'gag pa 'chi ba'i dngos po ni ma grub pa yin la/ sgra ni gcig pu gnyi ga la grub pa yin yang sgrub byed dam sgrub byed du 'dogs par byed pa yang ma yin no/ /gal te de lta yin na dbyibs sam/ bskyed pa bum pa la sogs pa dang mtshan nyid mi mthun pa ni sa gzhi la sogs pa sems pa can du sgrub par byed pa ma yin la/ zhig pa nyid la yang sgrub par byed par mi 'gyur ro/ /bskyed pa la sogs pa'i sgra'am rtogs pa yang gcig pa'i phyir/ gcig nyid kho na yin pa'i phyir/ gnyis su med pas gnod pa ma yin na/ /de 'di ni sems pa can du sgrub par byed pa la yang mtshungs pa yin na/ ji ltar de spong bar byed ces zer ba ni/ gal te khyad par yongs su brtags pas zhes bya ba'o/ /de bzhin du mi rtag pa nyid ni grangs can rgol ba las ma grub pa yin no/ /'chi ba ni phyir rgol ba sangs rgyas pa la ma grub pa yin te/ de'i phyir yan gar ba la ma grub pa yin no/ /sgrub byed kyi skyon yin na bsgrub bya dang sgrub byed dang chos dang chos can gyi rang gi ngo bo dang / de'i bye brag gi rjes su 'gro ba la sogs pa'i yang / yan gar ba la ma grub pa'i skyon du 'gyur ro/ /sgrub byed kho na skyon can yin la/ /bsgrub bya la sogs pa ni mi rigs te/ rigs pa mtshungs pa'i phyir ro/ /phyogs kyi chos nyid ma grub pa la ji lta ba kho na phyir rgol ba'i gtan tshigs mi 'thob la/ de bzhin du rjes su 'gro ba dang ldog pa dag la sgra'i chos can gyi yon tan gsum la sogs pa la sangs rgyas pa la sogs pa la ma grub pa'i bye brag can gyi phyogs yin zhing gzhi ma grub pa'i gtan tshigs yin no/ /sangs rgyas pa mngon par 'dod pa'i chos can la ni/ phan tshun ma grub bye brag dang / /gzhi ma grub pa'i gtan tshigs 'gyur/ /'on te bdag gi 'dod phyogs na/ /rang nyid 'di ni gnyis su 'gyur/ /de bzhin du mi rtag pa nyid kyi 'jig pa nyid/ /gal te nges pa can brjod na/ /de phyir 'di las gnyen por 'gyur/ /khyad par du yang ma grub pa'o/ /nges pa can gyi rnam rtog kyang / /ldog dang 'dzin pa dag tu ni/ /gong du yang ni khas blangs pa/ / grangs can rgyal dpog dag tu 'gal/ /de ltar na gtan tshigs dang 'brel ba la sogs pa'i rnam par rtog pas ma grub pa dang / ma nges pa la sogs pa'i skyon yin na/ tha snyad pa rnams kyi yul dra bi ra pa dang / 'phags pa dag bzhin du phan tshun mi mthun pa'i phyir/ 'gro ba rnams tha snyad med par 'gyur ro/ / /de bstan pa ni/ rgol ba gzhan la ltos pas sam rnam par brtag pas zhes bya ba'o/ /de nyid kyang go bzhin du rnam par 'grel ba ni/ nam mkha'i yon tan sgra yi chos/ /zhes bya ba'o/ /'di la lan du/ dngos po'i ngo bor ma grub la/ /zhes bya ba ste/ bsgrub bya gang gis nges pa'i ngo bo gang yin de ma grub pa la tshul 'di ni dpe dang dpe can dag tha dad pa'i rnam rtog gi ngo bo'i skyon yin no/ /gang gi phyir sems pa can dang rjes su 'gro ba can gyi ngo bo bum pa la sogs pa la yod pa'i ngo bo ni sa gzhi la sogs pa'i chos can la yod pa ma yin te/ 'jig pa can du nges pa ni gtan tshigs gzhan gyis grub pa snga ma nyid dang bral ba ni bum pa bzhin du sa gzhi la sogs pa la yang yul la sogs pa'i nges pa dang ldan pa de nyid las yin la/ de la yang chos la sogs pa'i bye brag gi rnam par rtog pa ni skyon ma yin te/ bsgrub bya la nges pa las 'dod pa grub pa la gnod pa med pa'i phyir ro/ /sbyor byed ma yin pa'i bye brag gi ngo bo ma grub pa yin yang / bsgrub bya la nges pa can gyi spyi'i ngo bo tsam gyi rgyu mtshan can gyi rjes su dpag pa la/ nam mkha'i yon tan nyid ma grub pa bzhin du gzhi'i skyon ci yang med do/ /lung las grags pa'i zhes bya ba la/ dpe rnam par 'grel pa ni/ khyad par yongs su rtogs pa la yang zhes bya ba ste/ grub na khyad par gnod pa can ma yin la/ ma grub na yang zhes rnam par 'chad pa ste/ bum pa dang sa gzhi la sogs pa'i ngo bo yongs su rtogs pa ni/ mi rtag pa nyid la sbyar bar byed pa ma yin zhes bya ba'i don to/ /sems pa can du sgrub pa la ni de'i rtogs pa sbyor byed kho na yin te/ nges pa dang cig shos rnam par dpyad pa'i phyir yin no zhes bstan pa ni/ dngos po'i ngo bor ma grub la tshul 'di zhes bya ba la ste/ de rnam par 'grel pa ni/ dbyibs la sogs pa la ni zhes bya ba'o/ /yang na grangs can la sogs pa la ltos nas mi rtag pa nyid la sogs pa gang yang rung ba ma grub pa'i skyon min la/ chos dang chos can gyi rjes su 'gro ba la ltos nas kyang / de ltar rtogs pa yin na/ gang yang gtan tshigs nyid du mi 'gyur ro snyam du sems pa la/ dngos po'i ngo bo ma grub la/ /tshul 'di zhes bya ba smos te/ rgol ba 'am phyir rgol ba'i dngos po'i ngo bo bsgrub bya'am/ sgrub byed dam rjes su 'gro ba la sogs pa gang la ma grub pa de la gcig la ma grub pa'i skyon ni/ rigs pa 'di ni rnam par dpyad par bya ba'i yul yin te/ khyod kyis ni gnyi ga la grub pa'i chos can la sogs pa la gcig pa la ma grub pa yin par/ ma grub pa'i bye brag dang / gzhi ma grub pa'i gtan tshigs 'gyur zhes bya ba la sogs pas smras pa yin no/ /de bstan pa ni/ lung las grags pa ni zhes bya ba'o/ /de bzhin du byas pa nyid kyang dpe dang dpe can rnams kyi gsal ba rnams las mi gzhan pa'am/ sna tshogs pa gsal ba re res tha dad pa de rnams las gal te/ dpe la yod pa nye bar bzung na ma grub pa yin te/ gal te dpe can la yod pa yin na ni/ thun mong ma yin pa nyid yin no/ /bsgrub byas stong pa'i rjes su 'gro ba dang / phyogs kyis stong pa dang mthun phyogs la med pa'i phyir ma tshang ba'i sgrub byed yin pa dang / sna tshogs pa dang gsal ba so so la gcig nyid pa rnams ni/ sangs rgyas pa dang dpyod pa pa la sogs pa la ma grub pa yin no/ /gzhan gsal ba so so ba'i gcig pa yang sangs rgyas pa dang / bye brag pa la sogs pa la ma grub ba yin no/ /dbang las byung ba nyid la sogs pa la dngos po'am ci zhes nges par rtogs pa'i bya ba ni gsal ba rnams las tha mi dad pa'am/ sna tshogs pa nyid kyi tha dad pa dang tha mi dad pa rnams gsal ba yin no/ /de la thun mong ma yin pa dang ma grub pa dang bsgrub bya ma tshang ba dang mthun pa'i phyogs nyid la ma tshang ba nyid kyi rjes su 'brangs nas brjod par bya ba yin no/ /rgol ba la ltos nas zhes bya ba la sogs pa ni sun 'byin pa'i lam dngos po gnyis su med par bsgrub pa la/ grub pa'i mtha' tha dad pa la brten par mi rigs pa'o zhes bya ba'o/ /grub pa la yang / khyab par gnod min zhes bya ba la sogs pas bstan pa yin par bstan pa ni/ de bzhin du khyad par yongs su rtogs pa la yang zhes bya ba'o/ /ma nges pa'am zhes bya ba ni thun mong ma yin pa'o/ /thun mong ma yin pa nyid kyis zhes bya ba ni phyogs dang mthun pa'i phyogs mtshungs pa nyid kyis thun mong gi ma nges pa'o/ /nam mkha'i yon tan nyid dang yon tan gsum nyid la sogs pa'i khyad par ma grub pa yin na/ sgra ni rang gi ngo bo'i chos can nyid kyis grub pa kho na yin par mi rigs pa ma yin nam/ gang gi phyir khyad par med pa spyi la ni ma mthong ba'i phyir ro snyam du sems pa la/ chos can nyid ni tshad mas grub pa'i phyir zhes bya ba smos te/ grub pa'i mtha' las grags pa'i khyad par ma grub pa yin yang / mngon sum gyi tshad mas grub pa'i dngos po ni yod pa kho na yin no zhes bya ba'i don to/ /lung las grags pa'i bye brag med kyang snang ba las byung ba'i shes pa'i gzung bya'i ngo bo kho nas/ don gyi bya ba byed pa yin par bstan pa ni/ khyad par yongs su rtogs pa yang / /zhes bya ba'o/ /byas pa nyid la sogs pa'i gsal ba rnams las gzhan pa ma yin pa'am/ sna tshogs pa'am gzhan ma yin pa yang gsal ba so so las tha dad pa'am/ tha mi dad pa yang rung ba'o/ /de bzhin du sna tshogs pa nyid la yang brjod nas thun mong ma yin pa nyid la sogs pa brjod bya ma yin nam snyam du sems pa la/ de la gdon mi za bar zhes bya ba smos so/ /gal te rgol ba dang cig shos la ltos pas ma yin pa de lta na/ rgyu gang yin zhes bstan pa ni/ mi rtag pa dang zhes bya ba'o/ /khyad par rab tu grub pa ni zhes bya ba ste/ rgol ba la sogs pa la ltos nas so/ /de'i khyad par med na spyi nyid med par 'gyur ba ma yin nam snyam du sems pa la/ tshad mas grub pa'i khyad par gzhan yin par bstan pa ni/ rgyu'i de ma thag ces bya ba'o/ /de'i phyir bsgrub bya'i spyi zhig pa nyid la sogs pa yon tan la sogs pa la skya bo nyid bzhin du bskyed pa dang ldan pa nyid la sogs pa ni sgrub byed kho na yin la/ de'i khyad par la ni de tsam du ma nges pa'i phyir nges pa can gyi khyad par gyi rnam par rtog pas sgrub par byed pa nyid yin te/ me la skya bo nyid kyi bye brag lta bu'o/ /sgra yod na don yod pa ma yin te/ de lta bu'i rjes su 'gro ba ma mthong ba'i phyir mi rtag pa dang 'chi ba la sogs pa ni rgol ba dang phyir rgol ba dag gis khas blangs pa ma yin no/ /ji ltar phyogs dang mthun pa'i phyogs thun mong ba ma yin pa ni sgrub byed ma yin par rjes su 'gro ba med pa'i phyir ro/ /de bzhin du rgol ba dang phyir rgol ba thun mong ma yin pa yang ma yin te/ ma rtogs pa'i phyir dang / de'i sgrub byed ma yin pa'i phyir ro/ /sgra la gcig nyid med kyang don la gcig med pa'am gtan tshigs nyid ma yin pa yang ma yin no zhes gnas skabs kyi rjes su 'jug pa yin par bstan pa ni/ sgra ma grub kyang ste med kyang / / dngos po grub na ste yod na'o/ /grub par 'gyur ba ni bsgrub bya'o/ /gal te yang bsgrub bya yul gcig pa nyid kyis sgra grub pa ma yin pa de lta na yang / don gcig pa'i lus nyid yod pa'i phyir rdul phra rab rnams cha shas dang bcas pa'am/ mi rtag pa 'grub par mi rigs pa ma yin nam/ lus nyid kyis byas pa'i mi rtag pa nyid la sogs pa ni/ bum pa la ma yin no/ /'o na ci zhe na/ byas pa nyid kyis sbyar ba yin no/ /des na lus nyid ni sbyor byed ma yin no/ /gzhan du grub pa'i bsgrub bya la rab tu sbyar ba yod pa'i phyogs 'di la ma grub pa'i phyir/ ma grub pa yin no/ /de lta yin na gtan tshigs ltar snang ba thams cad ma grub pa kho na yin no/ /rgyu mtshan gzhan yod pa las mi gzhan thob pa yin te/ 'di ltar phyogs dang mthun pa ma yin pa dag la nges pa'i phyir thun mong gi ma nges pa yin te/ phyin ci log pa dag nges pa'i phyir 'gal ba yin no/ / phyogs gnyi ga dang 'brel ba'i phyir gnas skabs mtshungs pa yin no/ /gnod par byed pa'i yul yin pa'i phyir dus las 'das par smra pa'o// /'di ni rgyu mtshan gzhan med pa'i phyir ma grub pa kho na yin no snyam du sems pa la/ de lta na yang des mngon par 'dod pa'i don zhes bya ba smos te/ 'di'i sbyor byed gang yin du ba la me bzhin du rgyu mtshan nyid la/ rab tu sbyor ba nyid kyang du ba bzhin du rgyu mtshan nyid yin no/ /de lta na ro ni gzugs la sogs pa'i sbyar bya'am sbyor byed ma yin no/ /de bzhin du shing nyid las shing sha pa nyid do// /'on te med na mi 'byung ba byas pa nyid la sogs pa sbyor byed nyid dam cig shos yin no/ /de 'di ni lus nyid la sogs pa yang mtshungs so/ /'on te rgyu rdul phra rab rnams ni rags pa nyid las gzhan du mi 'thad pa nyid kyis rjes su dpag bya rnams kyi cha shas dang bcas pa nyid kyis mtha' med pa'i phyir ri rab dang yungs kar dag gi bong tshod dang lci yang nyid mnyam par 'gyur ro/ /de'i phyir cha shas med pa'i phyir la mi rtag pa nyid yin yang rgyu'i rtsa ba med pa'i phyir dngos po med pa las dngos po skye bar 'gyur ro zhes bya ba'i rjes su dpag pa ni mi rtag pa nyid la sogs pa'i sgrub byed kyi lus nyid la gnod par byed pa nyid yin te/ de med na chos can mi 'grub pas 'di'i 'jug pa yang med pa'i phyir ro/ /bden mod kyi chos can tsam sgrub par byed ba la ltos nas cha shas dang bcas pa dang / mi rtag pa yang sgrub par byed pa'i phyir skyon med do/ /bong tshod dang lci yang mnyam pa yin pa dang / thams cad dngos po med pa las dngos po skye bar 'gyur zhes bya ba yang / ji ltar mthong bas de nyid du rnam par 'jog pa'i phyir dang / dngos po gzhan yang de kho na 'dra bar dus gzhan nyid khas blangs pa'i phyir yang ngo / /ma grub pa nyid kyis sam khyad par la yang rgyu mtshan gzhan yod pa'i phyir ming gzhan 'jug par mi rigs so/ /'di nyid kyi myur du go ba nyid kyis pham pa'i gzhi nyid kyis mthar thug pa yin te/ rgyu mtshan gzhan la med pa'i phyir ro zhes bya ba'i don to/ /ji ltar sgrub byed la sgra'i dbang nyid du the tshom du gyur pa de bzhin du/ bsgrub bya la yang yin no zhes zer ba ni/ gal te ji ltar zhes bya ba ste/ don la ste/ dbyibs la sogs pa la brten pa'i dpyad pa ni/ bum pa dang sa gzhi la sogs pa la tha dad par ro/ /dngos po'i 'khrul pa zhes bya ba ni/ dngos po ni don de'i'o/ /de bzhin du sgra gcig gi yod pa dang med pa dag gis sgrub byed gcig gi yod pa dang med pa dag gi tshigs su bcad pa gnyis kyis bkag pa yin no/ /de'i yod pa dang med pa dag gis bsgrub bya yod pa dang med pa ni ma yin te/ de ltar ldog par rtogs pa med pa'i phyir ro/ /dbyibs kyi tsam ni sgrub byed ma yin pa nyid de zhes bya ba de la sgrub byad gcig nyid ces pa ltos pa yin no/ /de bzhin du sgra yod kyang mi 'byung la med kyang 'byung ba'i phyir/ sgrub byed ni de'i dbang ma yin no zhes zer bas bsgrub bya ni sgrub byed med na sgra yod kyang mi 'grub pa la/ de med kyang sgrub byed yod na 'grub pa yin pas de'i dbang du 'gyur ba yin no zhes bstan par 'gyur ro/ /de'i phyir gang la yang sgra rtag pa yin te/ gzhal bya yin pa'i phyir ro/ /mi rtag pa yang yin te/ mig gis gzung bar bya ba yin pa'i phyir zhes bya ba la sogs pa la gzhal bya nyid la sogs pa'i sgra ni rang gi brjod bya nye bar 'jog par byed pa nyid kyis gcig bsgrub bya'i chos la ma 'khrul pa yin la/ de dag la yang sgrub byed 'khrul pa'i phyir dang / ma grub pa'i phyir bsgrub bya ni de'i dbang du mi 'gyur ba'i phyir/ skyon de kho nas skyon can yin la/ sgra'i yon tan gyis yon tan ma yin par bstan pa ni/ de nyid 'khrul la sogs yin na/ /zhes bya ba ste/ sgrub byed kyi yon tan ji lta ba kho nas yon tan yin la/ sgra'i skyon gyis skyon ma yin te/ ji skad du sgra ma grub kyang dngos po ni zhes smos pa'o/ /de bzhin du de nyid de sgrub byed kyi skyon gyi skyon yang yin gyi/ de'i tshe yon tan dang ldan pa nyid skyob byed ma yin no zhes bya ba'i don to/ /sgra'i dngos po'i dbye ba gang yin nas/ gang gis de ltar yin pa bstan pa ni/ dngos las shes bya'i sgra ni sgrub byed kyi yul la yin gyi/ bsgrub bya'i yul la ni ma yin no/ /de lta yin na ni sgrub byed kyi sbyor ba med par thal bar 'gyur ro/ /des na sgrub par byed pa la dbang bar grub pa yin pas/ de'i skyon kho nas skyon can yin no zhes bya ba ni zhar la byung ba yin no/ /rigs gzhan la ni rab grub pa/ /zhes bya ba dang / sgra ma grub kyang dngos po ni/ /zhes bya ba'i tshigs su bcad pa gnyis kyis sgrub byed la sgra dbang byed pa ma yin par bstan pas bsgrub bya la sgrub byed dbang byed par gsungs pa yin la/ dngos la dngos ni grub phyir ro/ /zhes bya ba 'dis rjes su sgrub pa yin no/ /gang dbang byed pa de kho na'i skyon gyis bsgrub bya 'grub pa la gnod pas sgrub byed kyi sbyor ba skyon can yin gyi sgra'i yon tan ni skyob byed ma yin no zhes bya ba 'di la gtan tshigs nyid kyis rnam par 'grel pa ni/ ji ltar sgra ma grub kyang zhes bya ba ste/ sgrub byed kyi yul ma yin pa nyid kyis bsgrub bya la reg pa ma yin no zhes bya ba'i don to/ /gal te yang sgra bsgrub bya la dngos su reg pa ma yin yang sgrub byed kyi sgo nas reg pa kho na yin no zhe na/ sgra ni bsgrub bya la dngos su reg par nus pa ma yin te/ sgrub byed kyi sbyor ba don med par thal bar 'gyur ba'i phyir ro/ /sgrub byed kyi sgo nas kyang ma yin te/ de ni 'khrul pa la sogs pa'i skyon gyis sgrub byed ma yin pa'i phyir ro zhes bstan pa ni/ re zhig dngos po 'khrul pa la sogs par gyur na zhes bya ba ste/ dngos po'i ngo bor ma grub pa la 'di yin zhes bya bas sems pa can bzhin du mi rtag pa nyid la yang bskyed pa la sogs pa tsam sgrub byed du mi 'gyur ro/ /rgol ba la sogs pa la stos nas sam gcig la ma grub pa ni ma grub pa bzhin du grub kyang / grub mtha' tha dad pa la brten par 'gyur ro zhes bya ba'i thal ches pa bsal ba yin no/ /bsgrub bya'i rjes 'gro phyir 'bras la/ /zhes bya ba 'dis kyang sems pa can la dbyibs la sogs pa'i dpe dang dpe can dag tha dad pa yin par gsungs pas/ ltag chod du sbyar ba yin no zhes rgol ba ni bsgrub bya 'bras bu nyid la btsal ma thag tu 'byung ba nyid ni bskyed pa la yod pa'am/ mngon par gsal ba la yod pa la ltag chod du bstan pas gsal ba yin la/ sems pa can gyi khyad par ma grub pa'am/ rjes su dpag pa thams cad la khyad par ma grub pa'i thal bar 'gyur ba gsal ba yin pa'i phyir zlos pa ma yin no/ /bum pa dang ri la sogs pa la bskyed pa'am dbyibs kyang rung ste/ rigs mi mthun pa nyid kyis tha dad pa yin te/ de'i phyir bum pa la yod par ma grub pa'am/ yang na zhes bya ba 'dis ri la sogs pa la yang yod pa thun mong ba dang / yang na dpe la the tshom za ba yin zhes bya ba bstan nas/ da ni mi rtag pa nyid la sogs pa bzhin du/ gzhal bya nyid de tsam du thun mong ba yin par bstan pa ni ji ltar dngos po de zhes bya ba ste/ ji ltar de ni dbyibs la sogs pa tsam mo/ /dngos po zhes bya ba ni khyad par la ltos pa ma yin par bstan pa'o/ /rgyu ni nye bar dmigs pa'i 'bras bu la tshad ma yin te/ bum pa la sogs pa la de tsam gyi sems pa can tsam dang lhan cig par mthong ba'i phyir de kho na bzhin du/ ri la sogs pa la sems pa can dang lhan cig par ma mthong ba'i phyir rgyu ma yin te/ tshad ma ma yin pa la ma nges pa yin zhes bya ba'i don to/ /phyogs kyi 'khrul pa yin na gang la rjes su dpag pa ma yin pa ma yin/ mngon sum nyid kyang nam mkha' la sogs pa phyogs su byed pas mi rtag pa nyid du sgrub byed du 'gyur ro/ /de'i phyir phyogs su byed pa ni 'dod pas sprul pa yin pa'i phyir/ des dngos su ba'i ma nges pa nyid gsal ba ma yin no/ /gang gi tshe de lta yin pa de'i tshe de ni ste/ dbyibs tsam ni rgyu gang gis tshad mar 'dod cing / rgyu gang gis rgyu ma yin par mi 'dod/ gzhal bya nyid rgyu yin zhes bya bar sbyar bar bya ste/ rigs pa mtshungs pa'i phyir ro/ /yang na dbang phyug la rgyu nyid 'dzin par byed pa med pa yin la/ rgyu nyid 'dzin par byed pa'i tshad ma ni yod pa yin par bstan pa ni/ ji ltar de ni dbang phyug yin par bshad la rgyu nyid kyis shes 'dod pa ni/ gnas skabs kyi ri la sogs pa la yin gyi/ de'i cha shas la sogs pa la ni ma yin no/ /de lta nyid de de'i rgyu ma yin par lha sbyin la sogs pa 'dod pa yin gyi cha shas la sogs pa ni ma yin te/ de las byung ba nyid du mi shes pa'i phyir ro/ /de ni ste/ dbang phyug ces bya ba kho na gang gis rgyu yin par 'dod cing / gang gis rgyu ma yin par mi 'dod/ de lta na ni lha sbyin la sogs pa yang rgyu yin par thal bar 'gyur te/ de las byung ba nyid du shes pa ma yin pa nyid du bye brag med pa'i phyir ro/ /cha shas la sogs pa'i rgyus lha sbyin la sogs pa rgyu nyid du bsgrun bzod pa ma yin te/ de las byung ba nyid du shes pa yod pa dang med pa dag gis bye brag med pa'i phyir ro zhes kyang bstan pa ni/ ji ltar de ni cha shas la sogs pa'i dngos po ste/ rgyu'i yin te de las byung ba nyid du shes pa'i phyir ro/ /de bzhin du de rgyu ma yin par yang grub pa yin te/ de las byung ba yin par shes pa'i phyir ro/ /gang gi tshe de lta yin pa de'i tshe de ni ste/ dbang phyug ces bya ba de las byung ba ma yin par shes pa na/ gang gis rgyur 'dod cing gang gis rgyu ma yin par mi 'dod/ de lta yin na lha sbyin la sogs pa la yang rgyu yin par bye brag med par snga ma bzhin du sbyar bar bya'o/ /gal te de las byung ba nyid du shes pa med kyang dbang phyug de rgyu yin na lha sbyin la sogs pa yang de bzhin du 'gyur ro/ /gzhan du na ni rdza mkhan gyis zhes bya bas 'di thal bar 'gyur du bsgrubs pa yin na/ ci'i phyir bstan zhe na/ gong du ni 'ji ba'i rgyur 'gyur ba nyid bye brag dang bcas pa ni dbang phyug las bzlog pa yin par sgrub par byed par bstan pa yin la/ 'dir ni de kho na'i dbyibs la yin pa'i phyir bzlog pa ma yin no/ / yang na dbyibs la sogs pa gnas skabs mtshungs pa yin par bstan pa ni/ ji ltar zhes bya ba la sogs pa ste/ de ste dbang phyug ces bya ba gang gi rgyu yin pa ste/ de lta nyid de dngos po'i dbyibs la sogs pa la mi rten pa'i bye brag go/ /rgyu min ni rgyu ma yin pa ste/ de rgyu ma yin pa gang gis yin pa de yang bye brag med pa'i dbyibs yin no/ /'di'i rgyud dbang phyug gam cig shos yin zhes dpyod par byed pa yin zhes de'i phyir gtan tshigs ltar snang ba yin no/ /the tshom gyi rgyu yin yang ma nges pa ni ma yin te/ mngon sum ltar snang bas kyang ma nges pa nyid thob pa'i phyir ro/ /de'i phyir gnyi ga'i mthar nges pa can ni ma nges pa yin gyi gzhan ni ma yin no/ /rtag pa'i chos mi dmigs pa bzlog pa las dmigs pa'i ngo bo ni khyad par dang bcas pa ni gtan tshigs ltar snang ba ma yin pa ma yin nam/ de bzhin du mi rtag pa'i chos nye bar dmigs pa yang ngo / /'on te ma dmigs pa tsam ni ma nges pa kho na yin te/ yod pa dang med pa thun mong pa nyid kyi phyir ro/ /de ltar de bzhin yin na dbyibs tsam ni ma nges pa yin gyi/ khyad par nges pa can yin no/ /de ltar yin yang dbyibs la sogs pa ni sgrub byed ma yin no zhes bya ba'i don to/ /bshad pa mdzad pa po ni dbang phyug rtag par khas len pa yin na/ mi rtag pa la'ang tshad ma med/ ces bya ba'i 'ang gi sgra mtshon pa yin la/ de ni nam mkha' la sogs pa dang rtag pa nyid du khyad par med pas rgyu nyid dang cig shos nyid dag la dbye ba med par 'gyur ro zhes 'chad pa yin no/ /de yang de las byung ba nyid kyis shes pa med par bye brag med pa kho na yin pa'i phyir/ rtag pa dang mi rtag par khas len pa dag la bye brag ci yang med do/ /de bzhin du/ mtshon dang sman sogs dang 'brel las/ /zhes bya ba la sogs pa ni/ yul nges par ston pa yin no/ /gzhan du na shin du 'brel par mi 'gyur ro zhes bya ba la mi mgu bas/ yang na ji ltar bskyed pa las sngar zhes bya ba smos so/ /rtag las skye ba mi 'thad phyir/ /zhes bya ba ste/ rtag pa nyid yin pas 'bras bu yod pa dang med pa'i dus su bya ba med par 'dug pa yin par bstan nas/ 'dir ni 'dod chags la sogs pa dang bral ba'i phyir/ rtag pa dang mi rtag par khas len pa dang mtshungs pa ni bye brag go/ /bshad pa 'di la ni rgyu yin pa dang / rgyu ma yin pa nyid du 'dzin par/ mtshon dang sman sogs zhes bya ba 'dis bstan pa yin no/ /rgyu nyid ni 'ga' zhig gis mngon sum nyid kyis mi shes pa ma yin nam/ 'bras bus kyang dbang po la sogs pa de bzhin du de'i shes pa 'byung ba'i phyir zhes bya ba ni/ sdod 'jug ces bya bar sems pa de la lan ni/ sems pa can dang cig shos dag gi 'bras bu mtshan nyid mi mthun pa yin gyi/ sems pa can la bye brag med par go bar byed pa ma yin no zhes bstan pa yin no/ /da ltar ni sems pa can ma yin pa'i 'bras bu ri la sogs pa gang yin pa de yang rgyu gcig gis bskyed bya ma yin te/ /de lta mod kyi tshogs pa can gyi bskyed bya yin la/ de la ni sna tshogs pa'i bdag nyid yin pa'i phyir sems pa can yang nang du 'dus par 'gyur bar srid pa yin te/ dbang po las 'das pas shes par dka' ba'i phyir dang / med par nges pa med pa'i phyir ro/ /yod pa srid pa ni 'bras bu mthong ba las dgag bya ma yin te/ shin tu yun ring por ma mtshon pa rnams kyang yang nye bar mtshon par dmigs pa'i phyir ro/ /'bras bu'i dbye ba yang sems pa can la rjes su mi mthun pa ma yin te/ 'bras bu'i bskyed byar 'dod pa tsam las byung bas mi mtshungs pa'i phyir ro/ /'di la ma grub pa'am zhes bya ba 'dis ma grub pa nyid de/ the tshom za bas ma grub pa nyid dam lan btab pa ma yin nam/ sems pa can du grub par nges pa yin na/ de kun dbyung bar bden pa yin na 'dir ni de srid pa ni/ 'bras bu tsam mthong ba las 'byung pa yin no zhe na/ 'on te 'gyur na yang dbang phyug kyang brgya zhig la zhes bya ba la sogs par the tshom za ba ni/ 'bras bu la des byas pa'i khyad par med pas gsal ba yin no/ /de skad du yang / rang bzhin no 'bras bu ste/ de'i dbye ba des byas pa ni khyad par te de med na sems pa can gyi byed pa srid par ni mi rigs te/ dbang po las 'das pa'i byed pa'i bya ba ni des byas pa'i 'bras bu'i khyad par mthong na mig gis gzugs shes pa bzhin du nges pa ma yin la/ bye brag med na de yang med pa yin te/ dper na de nyid la ro 'dzin bzhin no/ /ji ltar de nyid la ro 'dzin gyi srid pa ma yin pa lta bu'o/ /dbang po las 'das pa rnams kyi bya ba yang des byas pa'i khyad par yod pa dang med pa dag gis yod pa dang med pa dag gi nges pa ni rang gi ngo bo bzhin du bya bar dka' ba ma yin zhes bya ba'i don to/ /da ni 'grel pa rnam par 'byed pa yin te/ sgrub byed ni gzhan du mi 'thad pa yin gyi/ nam mkha' yod kyang de dang mtshungs pa'i yon tan can de ma yin pa'i gnas las sam gzhan las grub pa ma yin te/ gzhan du grub pa'i phyir ro zhes bstan pa ni/ ji ltar dbang phyug khyab pa nyid dang rtag pa nyid la sogs pa ste/ nam mkha' la sogs pa dang mtshungs pa'i yon tan can gzhan du grub pa la gzhan du sems pa ni/ 'on te de ni zhes bya ba'o/ /de la yang ste shes pa la yang mtshungs pa'i phyir ro dbyibs bzhin du shes pa la yang nam mkha' nyid rgyu yin no zhes bya ba'i don to/ /mthong ba'i rjes su 'brangs nas kyang rtog pa yin na byed par 'dod pa tsam gyi rgyu ma yin pa'i phyir bor nas rdzas tsam gyi mthar thug pa yin pa'i phyir/ nam mkha' kho na la yod pa yin no zhes bstan pa ni/ byed par 'dod pa tsam gyis ni zhes bya ba ste/ gal te yang sems pa can gyi khyad par gyis 'bras bu ni las la sogs par mthar thug pa yin par bstan pa ni/ gal te las la sogs zhes bya ba ste/ bsal nas ni spangs nas so/ /de lta min na zhes bya ba ni/ las la sogs pa'i nus pa nyid yod kyang gzhan du rtogs pa yin na gcig tu mi 'gyur te/ /'on kyang thams cad du 'gyur la/ de yang gcig gi ma yin te 'on kyang thams cad kyi'o/ /'bras bu ni rgyu'i bya ba yod na 'byung ba yin gyi de dang bral ba la ni 'gal ba'i 'bras bu yin par bstan pa ni/ 'dod chags la sogs pa thams cad ces bya ba'o/ /'dod chags la sogs pa spangs kyang las kyi bya ba dang bcas par 'gyur ba yin no snyam du sems pas/ 'jig rten gyi las zhes bya ba'o/ /las kyi gzhan dbang nyid yin yang rgyu tsam 'grub pa yin gyi byed pa po ni ma yin te/ rang dbang med pa'i phyir ro zhes bstan pa ni/ pha rol las kyi gzhan dbang zhes bya ba'o/ /'di ni pha rol las kyi gzhan dbang ma yin te/ 'on kyang snying rjes yin no/ /des na rang dbang med pa ma yin no snyam du sems pa ni/ de la brtse tshul zhes bya ba'o/ /brtse ba dang ldan pa yin na dge ba gcig pu'i skyed byed du 'gyur la/ mi dge ba ni 'gal ba'i 'bras bu yin par bstan ba ni/ dmyal sogs zhes bya ba'o/ /'on kyang 'jig rten la mi dge ba'i las yod kyang 'di la byin gyis brlabs pa med na/ 'bras bu bskyed par nus pa med pa'i phyir 'di 'ba' zhig byin gyis rlob pa po yin gyi/ byed pa po ni ma yin no snyam du sems pa ni/ 'jig rten las nyid ces bya ba'o/ /des byin gyis ma brlabs na 'bras bu med la/ byin gyis brlabs pas ni 'bras bu dang ldan par byas pa yin gyi/ 'phags pa ni ma yin te/ 'dod chags la sogs pa dang ldan par 'gyur ro zhes bstan pa ni/ 'di 'phags pa min zhes bya ba'o/ /'dod chags dang bral ba yin yang gzhan gyi don la 'jug pa ni mi dge ba'i las la bde bar bya bar mi nus pa'i phyir/ mi bde bar byed pa yin no zhe na/ 'phags pa gal te zhes bya ba'o/ /las de la ji ltar bya ba bstan pa ni btang snyoms nyid ces bya ba'o/ /'on te 'gro ba sna tshogs pa ni bde ba can dang sdug bsngal can la sogs par byed pa po med na las bzhin du ma grub pa de lta bur go bar byed pa yin no snyam du sems pa ni/ 'on te tshul 'di zhes bya ba'o/ /las yod na dbang phyug yod kyang gzhan du sna tshogs pa nyid 'grub par bstan pa ni/ 'di bdag nyid la yang dbang med pa'i phyir zhes bya ba ste/ rang gi las te dge ba'i lam mi dge ba'i 'tsham pa'i las kyi spyod pa byed pa dang / thob pa'i ngo bo gang yin pa de de bzhin no/ /las kyis ma 'phangs pa 'bras bu med pa ma yin nam/ las med kyang dge ba gcig pu skyed byed du thal bar 'gyur ba'i phyir ro/ /'phen byed ma yin pa ni gnyi ga la ma grub pa yin par bstan pa ni/ dbang phyug gis bskul na zhes bya ba'o/ /sa dang sa bon la sogs pa'i tshogs pa la yod pa yang phan tshun rten pa'i phyir/ phul du byung bar sgro btags pa ma yin nam snyam du sems pa la/ gcig kyang ni zhes bya ba ste/ dbang phyug ni rtag pa nyid kyi phyir sgro btags pa phul du byung ba ma yin la/ sa bon ni yin no zhes bya ba'i don to/ /'on te tshul 'di ni 'di lta bu zhes bstan pa nye bar bsdu ba ni/ gal te dbang phyug la ni nus pa med na zhes bya ba ste/ med na zhes bya ba ni ma yin nam zhes bya ba'i don to/ /'gro ba las kyis bsgrub par 'gyur/ /zhes bya bar blta bar bya'o/ /legs pa'i las kyis bsgrubs pa ni dge ba'i las kyi 'bras bu ste/ dbang phyug gis phyin ci log tu byed ces bya ba'i don to/ /'on te 'jig rten yang phyin ci log pa kho na yin la/ des na dbang phyug kyang de bzhin du yin no snyam du sems pa la 'jig rten rang dbang zhes bya ba ste/ 'di ni 'jig rten no/ /rang dbang ni phyin ci log tu'o/ /lan ni las smra ba nyid ces bya ba'o/ /yang na snga ma dang 'di yang bsdus nas bstan pa ni/ gal te dbang phyug la ni nus med na zhes bya ba ste/ nan gyis byed pa yin pa de lta na dge ba mang po skyed par byed par 'gyur ro/ /gal te de zhes bya ba dbang phyug rang dbang du byed pa ste/ dge ba dang mi dge ba la sogs pas sna tshogs pa yin pa de lta na las nyid sna tshogs pa yod pa'i phyir sna tshogs pa gzhan la don med do zhes bya ba'i don to/ /ci ste yang zhes bya ba la sogs pa'i rgol ba'i lan du de de lta na 'o na ni zhes bya ba smos so/ /rgyun gyis sam zhes bya ba la sogs pas phyed snga ma rnam par 'grel pa yin no/ /de'i dbang du byas nas bstan pa ni/ ji ltar rdza mkhan la sogs pa zhes bya ba'o/ /ldog pa'i phyir zhes bya ba ni 'bras bu med pa'i dus na med pa ni ldog pa yin la/ de'i dus na yod pa'i rtag pa ni der mi 'gyur ro zhes bya ba'i don to/ /'di lta bu'i ldog pa dang mtshan nyid mi mthun pa ni/ gnyi ga'i de yod na 'byung ba tsam ma yin par bstan pa ni/ gang dag yod na zhes bya ba ste/ rjes su 'jug pa med pa ste/ tshad ma med pa can no/ /rtog pa ni yon tan can gyi rgyu mthong nas gzhan du rtog pa yin pa de la yon tan can du mthong nas gzhan du rtog par 'gyur ro/ /brtags pa'i nus pas kyang gzhan du rtog pa ma yin na/ mthong ba de bzhin kho na yin gyi gzhan du rtog pa ni ma yin no zhes bya ba'i don to/ /gegs zhes bya ba ni bar du gcod pa'o/ /thug pa med pa la sogs pa zhes bya bas ni ma mthong ba'i rtog pa yin na mthong ba nyams pa yin no zhes bya ba'i don to/ /rtag tu gnas pa zhes bya ba ni des byas pa'i 'bras bu med pa'i dus kyi med pa med par bstan pa yin te nye bar mtshon pa la sogs pa'i bar du yin no/ /gshol gyi byed pa'i khyad par zhes bya ba ni rgyu'i khyad par te/ de'i bskyed bya med na nges par mi 'byung ngo zhes bstan pa yin no/ /'gyur ba zhes bya ba ni des byas pa'i 'bras bu la yod pa'i khyad par te/ rgyu nyid du shes par byed pa bstan to/ /mig dang gzugs kyi khyad par las zhes bya ba'i tshigs su bcad pas 'bras bu dang rgyu phul du byung ba rtogs par byed pas rtag pa rnams kyis 'bras bu med pa'i dus na med pa nyid kyi rgyu nyid ni de go bar byed pa'i 'bras bu'i khyad par bzhin du mi srid do zhes yang yang brjod pa dang lhan cig brjod pas khyad par ji lta bas 'dir yang bstan pa kho na yin par nye bar bsdu ba ni des na zhes bya ba'o/ /yang dag par bstan pas gzhan gyis sam yang dag par rig pas dbyibs la sogs pa rnams kyi tshad ma 'di'i rang gi ngo bo 'dzin pas rtogs par bya ba ma yin nam/ rang gi dus tsam 'dzin pas ni rtag pa nyid spangs par thal bar 'gyur ro/ /des na/ dngos yod rtogs pas tshad yin phyir/ zhes bya ba la sogs pa ni gnod pa can ma yin no/ / tshad ma la snang ba'i skad cig ma zhes bya bar rnam par gzhag par mi nus te/ de nyid kyi phyir sgrub pa po med do/ /gzhal bya med pa'i rtag par rtogs pa tsam 'ba' zhig yin te/ rtogs pa tsam ni tshad ma nyid ma yin te/ gang gis rang gi ngo bo 'dzin pa nyid skad cig ma yin/ /'brel pa can las rtogs pa yin na de mi 'dzin pa la sogs pa'i skyon du yang 'gyur ro/ /'di la ni rang gi ngo bo ma gtogs pa 'bras bu'i bya ba yang med do/ /rtog pa de rmongs pa nyid las shes par yang mi rigs te/ sgrub byed dang gnod byed med pas the tshom gyi yul can yin pa'i phyir dus gcig la nges pa dus gzhan la ji ltar 'gyur ba yin zhes bya ba'i rtsod pa yang ma yin te/ yul dang dus la sogs pa'i khyad par nyid kyi phyir ro/ /de ltar na rtag pa zhes bya bar rtog par rnam par gcod par byed pa'i khyad par yod pa tsam ma gtogs pa bye brag gang yang mi snang ngo / /de lta bu mi zad pa yin la/ 'di lta bu'i 'gro ba thams cad mngon par dbyung ba yang yin pa'i phyir de yang rgyur brjod do/ /'di la/ bar ma chod pa yod pa can/ /dngos gang yul dang dus la ni/ /de ni rtag dang khyab bdag 'dod/ /de'i phyir bdag ni khyab bdag brjod/ /ces smos pa'o/ /ldog pa ma grub pa yang ma yin te/ de ni thams cad du yod pas de med na 'bras bu yod par mi 'grub pa kho na yin te/ ldog pa yin pa'i phyir ro/ /rjes su 'gro ba ni de yin na res 'ga' 'byung ba las so/ /thams cad du de yod pa las 'bras bu yang de bzhin du yod pa ma yin te/ de yod na 'byung ba kho na yin no zhes 'bras bu nyid kyi rgyu mtshan de yin pa'i phyir ro/ /de yod na 'byung ba de kho na ma yin nam/ gcig kho na rgyu ma yin te/ 'on kyang tshogs pa ni skyed byed ma yin te/ lhan cig byed pa rnams kyang mi rtag par 'dus pa yin pa'i phyir ro/ /lhan cig byed pa rnams kyis de la cung zad kyang byas pa med do/ /ma tshang ba nyid du snga na yod pa de tshang bas ldog pa kho na yin pa'i phyir de rgyu yin na des byas pa'i khyad par snang ba yin no zhes bya ba ni mi rigs te khyad par thams cad dbang po'i yul ma yin pa'i phyir ro/ /de lta bu'i phul du byung ba des byas pa yod na yang 'u bu cag la sogs pa'i spyod yul ma yin la/ de'i phyir rang gi ngo bo bzhin du rgyu 'di nyid kyang dor bya ma yin te/ the tshom can gyi de nyid lta bu'o/ /lan ni/ rtag la ldog pa med pa'i phyir/ zhes bya ba ste/ gang sngar bya ba byed pa de'i 'bras bu 'das pa yin yang / de ther zug tu yod pa yin na cis 'bras bu mi 'byung ba yin/ rgyu med pa ma yin pa ni med par mi rigs so/ /snga ma bzhin du lhan cig byed pa med na mi byed pa yin no zhe na/ de lta yin na byed pa po nyid nyams pa yin pa'i phyir de ji ltar rtag tu yod par 'gyur/ gang gi 'bras bu med pa'i dus su med par shes pa de 'bras bu'i dus na yod na rgyu nyid yin te/ dper na lhan cig byed pa lta bu ste yod pa tsam gyis ma yin te/ thal ches pa'i phyir ro/ /de'i phyir 'bras bu med pa'i dus su med pa nyid kyis rgyu nyid yin la rtag pa nyid ni de'i dus su yod pa yin pas 'gal ba yin na/ ji ltar khas len par byed sngar 'bras bu 'byung ba'i dus su de bya ba med par 'dug pa'i 'bras bu dus su skyed par byed pa'i ngo bo ni/ rtag pa nyid bya ba med pa'i ngo bo dang 'gal ba yin par bstan pa yin no/ /de'i phyir zlos pa nyid ma yin no/ /ldog pa med pa'i phyir 'bras bu med pa'i dus na de med pa ma yin pa'i phyir/ de'i khyad par gyi mi nus pa nyid kyis rgyu nyid yod pa yin zhes bya ba'i don to/ /'bras bu med pa'i dus na rgyu med pa nyid yin pa'i phyir rgyu med pa nyid ni khyab byed yin par bstan pas/ de med na ste rgyu yod pas khyab bya 'bras bu med pa yang ldog pa ni/ 'bras bu yod pa kho na yin pa'i phyir rjes su 'gro ba sgrub pa yin gyi/ yod pa tsam ni ma yin no zhes bstan pa ni gang dag yod na zhes bya ba'o/ /'di skad bstan par 'gyur te nus pa can dang nus pa can ma yin pa tha mi dad pa la ltos nas gcig tu bsre ba yin la/ de yod na 'byung ba kho na rgyu rnams gdon mi za bar de dang ldan par mi 'gyur ro zhes bya ba la sogs pa yang shes par bya'o/ /nus pa can rgyu yin na 'bras bu 'byung ba kho na yin la/ de med pa'i dus na rgyu yang med pa kho na yin te/ de yod kyang mi 'byung ba'i phyir/ de la dbang byed pa ma yin pa'i phyir ro/ /gang la de la dbang byed pa ma yin pa de thams cad rgyu la khyab pa'i phyir/ thug pa med pa'i phyir thal ches pa yin te/ 'di rgyu yin gyi 'di ni ma yin no zhes rnam par gnas pas ma yin zhes bya ba'i don to/ /yang na mthong ba'i rgyu 'di lta bu'i yon tan can yin par dmigs nas/ rgyu gzhan du rtogs pa yin na/ de lta na brtag bya de 'di lta bu zhe 'am/ de bzhin du gzhan du rtogs par byed pa yang yin te/ rgyu mtshan la bye brag med pa de'i phyir thug pa med par 'gyur ro/ /'on te rtogs par mi byed pa de dag tsam gyis mgu ba yin na/ yongs su mgu ba'i rgyu yon tan gzhan de dag tsam du 'gro ba can rnams nyid la yang yod pa'i phyir/ mgu bar 'gyur ro/ /yon tan can gzhan yang rgyu nyid du brtags pa rnams las gzhan du rtogs pa nyid kyis sar par de'i gnas pa na rgyu nyid kyi rnam par gnas pa yin la/ de ma yin pa ni thug pa med pa yin no/ /mthong ba rnams kyi rgyu rnams kyi de nyid kyi thug pa med pa dang / mthong ba'i nyams pa dang ma mthong ba'i rtog pa rnams yin no/ / yang na brtags pa bzhin du'am rtogs bzhin pa la yang thal bar 'gyur ba'i phyir/ brtags pa dang brtag bya thams cad kyi rgyu rnams med pa kho na yin no/ /de'i phyir dngos po rnams rgyu med pa can du 'gyur ro/ /de dag las gzhan pa'i rtogs pa yin na yang rigs pa mtshungs pa nyid kyis brtags pa dang / rtogs bzhin pa la yang thal bar 'gyur ba la thug pa med pas rgyu rnams dang de'i 'bras bu thams cad las sar pa ma yin pa ste/ rtag par nam mkha' la sogs pa bzhin du gnas par 'gyur gyi/ 'jig pa dang skye ba dag tu mi 'gyur ro zhes bya ba'i don to/ /rtag tu yod pa 'am med pa'am rgyu med par zhes bya ba la sogs pa'i rigs pa ni/ 'di la mtshon byed yin par bya'o/ /rjes su 'gro ba dang ldog pa yang 'bras bu med pa'i dus na med pa'i ngo bo'i rgyu nyid ni de'i dus na yod pa rtag pa'i ngo bo 'gal ba yin par bstan to/ /sa gzhi la 'di ni ma mthong la 'di myu gu la sogs pa'i rgyu ma yin pa yang ma yin te/ de ltar rtogs pa'i rtag tu gnas pa ni 'bras bu med pa'i dus na yang yod do snyam du sems pa la/ myu gu bskyed la sa la sogs/ /zhes bya ba ste/ yongs su gyur pa'i sa gzhi ni myu gu la sogs pa'i rgyu yin gyis tsam ni ma yin la/ yongs su gyur pa yang 'bras bu med pa'i dus na med pa yin no/ /de lta bu yod na 'bras bu med par 'gal ba yin te/ de'i khyad par yod na 'bras bu'i khyad par mthong ba'i phyir yongs su gyur par grub pa yin no/ /yang na 'bras bu'i rang bzhin rgyur byas pa'i khyad par gyis 'ga' zhig gi rgyu nyid du rtogs pa yin gyi ri la sogs pa'i khyad par 'ga' yang las kyis byas pa'i 'bras bu'i nges pa la sogs pa ma gtogs pa dbang phyug gis byas pa ni ma yin no zhes bya ba ni mi rigs te/ ma nges pa'i phyir ro/ /'bras bu la khyad par rag las pa kho na yin pa'i phyir rgyu nyid mthong ba ma yin la/ gang gi phyir sa gzhi la myu gu la sogs pa'i 'bras bu'i bye brag 'ga' yang rag las par mthong ba ma yin zhing / de rgyu ma yin pa yang ma yin no snyam du sems pa la/ 'bras bu thams cad la rgyus byas pa'i khyad par thams cad mthong ba la/ myu gu bskyed la sa la sogs/ /rang bzhin yongs su gyur nas ni/ /zhes bya ba ste/ 'bras bu la yod pa'i khyad par la rag las pa kho na yin zhes bya ba'i don to/ /'di ci las shes she na/ de'i gshol la sogs pas byas pa'i dbyibs yin na/ de'i khyad par te 'bras bu'i khyad par mthong ba'i phyir/ dbang phyug gi khyad par gyis khyad par du snang ba ni ma yin te/ dmigs bya ba ma yin pa'i phyir te/ de'i khyad par la rag las pas dbang phyug rgyu nyid ma yin no zhes bya ba'i don to/ /'dis ni sman du ma las byung ba'i 'bras bu la rgyus byas pa'i khyad par mtshon pa bsal ba yin te/ rjes su 'gro ba dang ldog pa dag gi rgyu'i bye brag gis de'i khyad par nye bar mtshon pa ni bya bla ba nyid kyi phyir khyad par rjes su mtshon pa ma yin yang / rgyu nyid yin na srid pa ni rtsa ba med pa'i phyir ro/ /de bzhin du 'bras bu med pa'i dus na med pa ni rgyu yin la/ de nyid khyad par kho nas shes pa yin no zhes bya ba 'di la phyi rol bstan nas nang gi dpe bstan pa ni/ gal te ji ltar yul dbang po/ /zhes bya ba ste/ 'bras bu med pa'i dus na mi 'byung ba'am 'bras bu la yod pa ma yin na/ 'bras bu tsam mthong ba las dbang po la sogs pa rgyu yin la/ de ltar dbang phyug la sogs pa go bya yin no zhe na/ lan ni min zhes bya ba'o/ /ci las she na/ de la yang ste dbang po la sogs pa'i rgyu 'am 'bras bu rnam shes la khyad par yod pa kho na yin no/ /khyad par de nyid lhan cig brjod pas bstan pa ni/ de la dbang po la sogs pa rnams so sor nus pa med pa rnams tshogs kyang / nus pa med kyang 'gyur la/ de'i tshe yang de'i rang gi ngo bo mi dor ba'i phyir ro/ /sdod par mi byed pa rnams kyi yang nye bar 'gro ba'i rgyu rnams kyis bya ba med par 'dug pa nyams pa rnams kho nar nye bar 'gro bar bya ba'i phyir/ rgyun gyi khyad par yin la/ gzhan rnams kyi ni phan tshun gyis yin zhes bya ba ni rnam par dbye ba'o/ /khyad par de yang gal te khyad par gzhan gyis ma yin na ni thug pa med pas rgyu ma yin pa nyid do/ /gal te gzhan du yin na 'bras bu nyid ci ste mi byed/ smras pa nye bar 'gro ba'i khyad par gyi khyad par yin na/ lhan cig byed pa po nyid yin gyi khyad par gzhan gyis ni ma yin no/ /'bras bu la ni khyad par gyis de ltar ma mthong ba'i phyir ro/ /byed pa po nyid kyang rnam pa gnyis te/ khyad par dang / lhan cig pa dag go/ /rgyun gyi khyad par med pa ni lhan cig byed pa po tsam khas len pa yin na 'bras bu brjod pa tsam la yang 'gyur ro/ /tshogs pa skyon gyis bsgribs pa bsal bar byed pa yin gyi khyad par ni ma yin no zhe na/ de yang de'i tshe kho na yin pa'i phyir ji ltar 'bras bu dus gzhan la yin/ nus pa yod pa'i phyir skyon yod kyang cis mi byed/ de'i phyir byed pa po nyid ma yin pa gzhan gyis bsal ba yin la/ byed pa po nyid kyang de'i tshe kho na mngon par 'byung ba yin pas snga na yod pa ma yin pa'i phyir 'bras bu med pa'i dus na mi 'byung ba'i mi rtag pa rnam gyi khyad par grub pa yin gyi/ 'di rtag pa rnams la ni mi srid do/ /de bzhin du khyad par ni rigs pa'i rtogs bya 'ba' zhig kyang ma yin te/ de lta mod kyi snang ba nyid yin par bstan pa ni/ mig dang gzugs kyi khyad par las zhes bya ba'o/ /don 'di rnam 'grel las/ yongs su gsal ba'i phyir 'grel pa mkhan gyis ma bshad do/ /'bras bu'i ngo bo'i khyad par las bzhin du rgyu nyid ces shes par bya ba yin/ ma byas pa de'i bye brag kyang de nyid shes pa'i rgyu mtshan ma yin pa zhes bya ba ni mi gsal ba'i phyir 'di 'chad par byed pa ni/ mig la sogs pa rnams ni 'bras bu'i rang bzhin gyis zhes bya ba la sogs pas so/ /khyad par nyid la zhes bya ba ni 'bras bu la yod pa las so/ /'bras bu rnam par shes pa ni mig gis gzugs 'dzin par so sor nges pa yin la/ yul las de rnam pa can du yid la byed pa las rtogs pa'i rang bzhin can yin pa'i phyir/ phan tshun rang bzhin mi mthun pa'i 'bras bu'i khyad par gyis mtshan nyid mi mthun pa kho na rgyu yin par rtogs par bya'o/ /khyad par de gcig skyed par byed pa las khyad par gzhan med pas so sor nus pa med pa rnams kyi rgyun te/ 'bras bu'i khyad par ni nges pa can gyi khyad par te/ rgyu nges pa can gyi bskyed bya yin la gzugs 'dzin pa'i so sor nges pa la sogs pa med na rtogs byed ma yin pa'i phyir/ tshogs kyang rgyu ma yin pa zhig tu 'gyur ba zhig na nges pa can gyi rgyu'i bskyed bya nges pa can gyi khyad par rjes su 'gro ba dang ldog pa'i rtogs bya yang yod pa yin la/ dbang phyug gi bskyed bya'i khyad par ri la sogs pa la ni/ de ltar rtogs par bya ba ma yin no/ /khyad par skyed par byed pa'i sgo kho na nas shes pa nyid dbang po la sogs pa rnams kyi bskyed bya yin gyi/ de tsam mam/ de'i khyad par gyi khyad par can nyid de'i rgyu nyid du go bar byed pa gzhan ni dbang po la sogs pa nyid la yod par bstan pa ni/ mig dang gzugs kyi khyad par las/ /zhes bya ba ste/ 'di la rnam 'grel du yongs su mi gsal ba yin pa'i dgongs pas 'grel pa mdzad pa'i yongs su gyur pa'i khyad par nyid kyis/ rgyu skyed par byed pa yin pa de'i phyir 'bras bu mi 'byung ba'i dus na med pa yin no zhes bya ba de ltar rgyu nyid yin gyi gzhan du ni ma yin no zhes bya bar/ 'o na te mig phye ba na zhes bya ba la sogs pas 'chad par byed pa yin no/ /yang na gal te ji ltar yul dbang po zhes bya ba ni 'bras bu'i khyad par rgyu nyid du go bar byed par bstan pa ste/ mig dang gzugs kyi khyad par las/ /zhes bya ba ni/ rgyu ni 'bras bu med pa'i dus na med pa sgrub pa'i don du yin gyi/ 'di gnyis kyang rgyu nyid yin pa'i rgyu mtshan dbang phyug la med do zhes bya bar nye bar bsdu ba bstan pa ni/ de'i phyir so sor zhes bya ba ste/ so sor nus pa med pa rnams la ste/ khyad par gzhan gyi nus pa med pa rnams la'ang 'bras bu la yang ste/ so sor nus pa med pa rnams la/ gang dag la yod 'gyur na ste 'bras bu'i yon tan gyi khyad par yod na 'am/ gang dag la ste yul la yang rung yod par 'gyur ba yin na/ tshogs pa ni de dag kho na rgyu nyid du tshad mas grub pa yin gyi/ dbang phyug la sogs pa rnams ni ma yin te/ khyad par med pa'i phyir 'bras bu med pa'i dus na rang la yod pa'i khyad par med pas/ 'bras bu la yod pa'i khyad par med pa'i phyir te/ dpe gnyis kyang yul mang po nyid bstan pas/ bstan par bya ba'i don du'o/ /skad cig ma nyid la sogs par yang dag par gsungs pas kyang / rtogs bzhin pa'i yang dag pa gzigs pa po ni/ skad cig pa sna tshogs pa tsam gyi ngo bo tsam mam/ 'dod chags la sogs pas so sor rig pa ma yin nam/ des gsungs pa'i gnyen po ni de'i rig pa ma yin pas de'i gnyen po'i nus pa mi shes pas bstan par 'gyur te/ de yang de bzhin du 'dod chags dang ldan pa yin la/ las dang 'bras bu shes pa'i stobs ma skyes pas snying rje dang ldan pa yin yang / gang gis 'di ni byang grol gyi don yin/ 'di ni mtho ris kyi don yin zhes shes par 'gyur shes pa'i dus na ni bya ba'i rang gi ngo bo med pa'i phyir mngon sum gyis kyang de rig pa ma yin te/ nye ba tsam 'dzin pa can gyi mngon sum ni de lta bu ma yin pa la tshad ma ma yin te/ 'bras bu'i dus na ni de shes pa med pa yin la de'i tshe nas de 'das pa yin pas 'di las 'di yin no zhes shes pa ni mngon sum ma yin pa'i phyir ro/ /'bras bu las rgyu tsam gyi yul la rjes su dpog pa yang khyad par ram bsod nams sam cig shos kyang yin zhes mi shes te/ de lta bu'i nges pa ni 'jug pa'i rgyu yin pa'i phyir ro/ /shes gang 'jug pa'i yan lag yin/ / de yi rtsa ba brtag bya la/ /ci yang yod pa'i shes pa ni/ /mi rnams la ni ci zhig dgos/ /rtsa ba de yang ji skad bstan pa'i rim pas rig byed ma yin la/ rtag pa nyid 'ga' zhig ni dbang phyug la sogs pa ma yin gyi/ bsgom pa las byung ba'i mngon sum rtsa ba yin zhes bya bar yang mi rigs te/ mthong ba med na bsgom pa mi rigs pa'i phyir ro/ /'ga' zhig tu dngos po mthong ba na bsgom pas gzhan du snang bar 'gyur ba yin no/ /'dod pa dang mya ngan dang 'jigs pa dang myos pa dang rmi lam la sogs pas nye bar bslad pa rnams ni yang dag pa ma yin yang / mdun na gnas pa bzhin du mthong ba yin no zhe na yang / yang dag pa ma yin pa'i yul can ji ltar tshad ma yin yang dag pa'i yul can ni tshad ma yin no zhe na/ de lta na de rang gi ngo bos mthong ba yin na bsgom byar 'gyur ro/ /thos pa yin no zhe na/ thos pa ni tshul gsum pa'i rtags mtshon par byed pa yin gyi rang dbang du yang ma yin la chos la sogs pa la yang / de lta bu'i rtags rig pa ma yin te/ dbang po 'das pa yin pa'i phyir ro/ /bde ba la sogs pa'am 'gro ba sna tshogs pa nyid kyang las las byung ba ma yin nam/ las kyang rjes su sgrub par byed na 'bras bu ster ba yin gyi/ mi shes na rjes su sgrub par byed na yang med do/ /las bzhin du shes pa yang yod pa nyid du nges par rtogs pa yin no/ /de las yang bsgoms pa las byung ba med de/ da ltar bzhin du mngon sum la sogs de rtogs pa med pas de las bsgoms pa mi rigs pa'i phyir ro/ /nyams su myong ba dran pa la goms pas kyang de shes pa ma yin te/ de bzhin du nyams su myong ba med na bsgom pa las kyang de dran pa med pa'i phyir 'jig rten pha rol ni 'jig rten 'di bzhin du nyams su myong ba yin na/ dran pa goms pa las dran par 'gyur ba yin gyi las dang 'bras bu dang 'brel pa ni ma yin no/ /srid pa snga ma la las nyams su myong ba'i 'bras bu 'di la zhes bya ba 'jig rten gnyi ga rig pa po de dag gi de nyid rjes su 'gro ba dang ldog pa dag gis ma rig pa ma yin nam/ du ba'am me ni rang gi ngo bos rig pa yin na rjes su 'gro ba la sogs pas gtan tshigs la sogs pa nyid mi rig pa ma yin no zhe na/ ma yin te/ de'i tshe yang shes pa de'i thabs med pas ma shes pa la rjes su bsgrub pa med pa'i phyir ro/ /'jig rten ni shes pa la rjes su bsgrub pa yin te/ 'di ni bsod nams so/ /'di ni sdig pa'o zhes pa'i tshig gnyis po de la/ rigs ngan mthar thug mi rigs kyi/ /bstan bcos dgos pa chung ba yin/ /zhes bya ba yin no zhe na/ ma yin te/ mngon sum la sogs pa ma gtogs par 'jig rten tshad ma nyid ma yin pa'i phyir/ 'di rnams yongs su dor nas ni/ / logs na 'jig rten tshad ma med/ ces bya ba ste/ gang gi phyir 'jig rten yang de nyid la rtsa bar 'dod pa yin te/ 'jig rten na rtsa ba nyid yin na de bzhin du bdag cag la yang de nyid yod pa yin pa'i phyir/ da ltar thams cad shes pa nyid brtag pa la don med do/ /dran pa goms pa las nyams su myong ba dran pas snga na med pa'i las kyi 'bras bu dang 'brel pa la sogs pa yin na/ snga na med pa'i rgol ba dang lan bzhin du kun tu snang bar ni mi rigs so/ /rgol ba dang lan dag gis bstan bcos kyi don don dang 'brel bas so sor snang ba yin la/ mnyam par gzhag pa'i bye brag las rigs pa yin gyi las dang 'bras bu dang 'brel pa can yin pa ni de bzhin du cung zad nyams su myong ba med do/ /'bras bu 'gro ba sna tshogs pa nyid ni rgyu las sna tshogs pa nyid du rtogs par byed pa yin no zhe na/ ma yin te/ de'i 'bras bu nyid yongs su ma bcad pas rgyu tsam du rtog pa yin na 'byung ba sna tshogs pa nyid kyis kyang rigs pas spangs kyang khyad par spangs pa ma yin no/ /'di skad bstan par 'gyur te 'jig rten pha rol gyi 'bras bu chos dang chos ma yin pa la sogs pa ni/ 'jig rten 'dir 'bras bu ma yin te/ gang gi rjes su 'gro ba dang ldog pas rtogs byar 'gyur/ des na 'bras bu'i dus na de'i ngo bo 'das pa'i phyir/ de'i tshe yang 'bras bu ma 'ongs pa yin pa'i phyir de bsgrub par byed pa nyid kyis chos nyid dam/ de'i 'bras bu nyid yin pa'i phyir/ de'i 'bras bu nyid dam de'i sgrub byed dang 'bras bu dag la dbang byed pa yin la/ de kho na bzhin du dbang po las 'das pa yin pa'i phyir/ ci las de la mngon sum mam rjes su dpag pa 'jug par 'gyur/ de dag med na mthong ba'i rjes su 'brang ba'i sgom pa'i rgyu med do zhes rgyu mi dmigs pa yin pas 'bras bu de'i shes pa yang med do/ /ma 'ongs pa la ni mngon gsum gyi nus pa cung zad kyang ma mthong ngo / /rtags la sogs pa dang bral ba'i rjes su dpag pa la sogs pa yang gang du yang ma yin no/ /bcom ldan 'das dang 'brel pa can gyi mig gi dbang po ni rnam pa de lta bu'i shes pa skyed par byed pa yang ma yin te/ mig gi yin pa'i phyir bdag cag gi mig lta bu'o/ /gang gi rigs kyi tshad mas kyang / /rigs gang gis ni don mthong ba/ /da ltar 'jig rten gyis mthong ba/ /dus gzhan du yang de ltar 'gyur/ /thag ring por mthong ba'i bya rgod la sogs pa rnams dang / thag ring por thos pa'i phag la sogs pa rnams khyad par can du mthong ba las/ shin tu khyad par can gyi tog pa de yang rang gi yul 'khor ba kho nas khyad par can du mthong ba'i phyir ro/ /gang la 'ang bye brag mthong ba ni/ /de yang rang don ma bor bas/ /ring por pa sogs dngos la 'gyur/ /gzugs la rna ba'i 'jug pas min/ /gzugs dang ro la sogs pa rnams/ /'das pa dang ma 'ongs pa dang da ltar byung ba rnams la mig gi dbang po las byung ba'i rnam shes kyis 'ga' yang 'dzin pa yin zhes bya ba'i rtog pa yang ma yin te/ mig gis ni de lta bu'i rnam pa'i rnam shes pa skyed pa la rgyu nyid du ma mthong ba'i phyir/ lce la sogs pa'i rjes su 'gro ba can gyi ro la sogs pa'i mngon du byed pa ni gzhan las byung ba ma yin te/ lan cig kyang de las ma byung bar thal bar 'gyur ba'i phyir ro/ /byung na'ang 'bras bu med pa nyid du thal bar 'gyur te/ gnyi ga yongs su dor nas/ de dbang byed pa ma yin pa'i phyir ro/ /'di nyid ni/ tshad ma nyid ni gcig nyid kyis/ /gang gis kun mkhyen du rtogs byed/ /da ni nges par mig gis ni/ /ro la sogs kun rtog par byed/ /ces bya bas tshig 'khyog pos bstan pa yin no/ /skad cig ma nyid dam rnam par rig pa tsam nyid tshad mar rung ba ma yin nam/ thos pa dang bcas pa la sogs pa'i rim gyis sgom par byed pas de'i yul lam de'i yan lag gi yul gang yang rung ba shes pa dang / de kho na nyid la sogs pa'i 'bras bu nyon mongs pa thams cad rab tu spangs par 'gyur ba kho na yin no/ /de ltar yang sbyin pa la sogs pa rnams ni mtho ris sgrub par byed pa nyid la sogs pa ni shes pa ni tshad mar mi rung ba'i phyir ma yin no/ /de'i phyir ji ltar thams cad shes pa yin/ /de las nyon mongs pa rab tu bcom pa la sogs der 'gyur ba ma yin te/ de ni gzhan las 'ongs pa yin pa'i phyir ro/ /da ltar yang shes pa ches shin tu che ba yin te/ nyon mongs pa ches shin du chen po bzhin du dbang po las 'das pa'i shes pa ma mthong ba'i phyir la/ de bzhin du dbang po las 'das pa nyid kyis chos la sogs pa ni bsgom pa'i yul ma yin pa'i phyir/ de las byung ba ma yin pa'i shes pa ni nye bar bstan pa'i rtsa bar 'gyur ro/ /ji skad du nye bar bstan pa ni rmongs pa las kyang 'byung ba'i phyir nus pa'i yul la mi shes pa rnams kyi nye bar bstan pa yin par brtag par mi bya'o/ /de'i phyir shes pa rtsa ba yin par shes par bya'o/ /mi nus pa'i yul la ni tshad ma nyid rjes su sgrub par 'dod pas btsal bar bya ba yin gyi/ gzhan gyi yul la ni ma yin te/ ltos pa med pa'i phyir ro zhes zer ba ni/ tshad ma lkog gyur don shes yin/ /zhes bya ba ste/ skad cig ma la sogs pa'i rmongs pas ma rtogs pa yin na/ chos la sogs pa bzhin du lkog tu gyur pa kho na yin pa'i phyir/ de'i shes pa yang tshad ma kho na yin la/ de yang nye bar bstan pa la sogs par byed pa yin no/ /nye bar bstan pa ni tshig ma yin nam/ gal te de yid ches pa'i skyes bu las sems dbang po'i yul yang ste log pa ma yin par/ bden par smra ba kho na yid ches pa'i tshig yin par brjod pa yin la dbang po'i yul la yang zhes bya ba 'dis kyang mngon sum la sogs pa nyid du yin no/ /don rtogs par smra ba'i mngon sum la sogs pa'i yul can gyi tshig ni phyi rol gyi don la tshad ma yin gyi/ lkog tu gyur pa'i shes pa la ni ma yin no/ /ji ltar mthong ba don smra nyid/ /gal te yid ches las yin na/ /dbang po zhes bya rtsa ba ste/ /'di ni yod ces de smras yin/ /bsdus pa'i don can gyi yang sgra/ /snga ma la 'am phyi ma 'ang rung / /gnyi ga la yang rtog par brjod/ /so sor slar yang brjod pa yin/ /'on te yid mi ches pa las dang dbang po'i yul ma yin pa yang zhes rnam par rtog pa'i don la/ yang gi sgra yin no zhes bya ba'i don to/ /de bzhin du nus pa'i don la yang brdzun pa nyid du mthong ba ni yod kyang nus pa med na'o/ /'dis yid ches pa las zhes bya bas mi bden par smra ba'i tshig dgag pa yin no/ /dbang po'i yul yang zhes bya bas bden par smra ba'i yang mi nus pa'i yul yang ngo nus pa'i yul la yang bden par smra ba'i ji lta bur mthong ba'i don mi brjod pa'i phyir/ log par smra ba la sogs pa sngon du smra ba can sus dgag par nus/ dbang po'i yul nyid du brjod pa kho na las/ don ji ltar ston pa yin par smra bar mi rigs te yul nges pa la 'khrul pa yin pa'i phyir ro/ /brjod pa yang snga ma de nyid kyi tshig las rtogs par bya ba yin la/ ma rtogs na de la dbang byed pa nyid dang / de bzhin min pa ma yin pa nyid du ma nges pa yin no/ /des na don la shes bskyed la/ nyan ba'i shes pa'ang ngag las ni/ /'di yis nges par shes so zhes/ /smra po'i shes pa la blor 'gyur/ /snga rol tu ni don rtogs kyang / /de la brten nas nges pa yin/ /des na don shes go bya yang / /tshad ma de nyid sngar brten pa'o/ /shes pa ni rtogs bya yin par bden te/ yid ches pa tsam bzhin du de dag gzhan nyid kho na las smra ba po'i rang bzhin dang spyod yul la sogs pa gang las kyang 'ba' zhig rtogs pa yin gyi/ /tshig las ni ma yin te/ don kho na de las rtogs pa'i phyir tshig las don nges pa'i dus su smra ba po'i shes pa rtogs par bya ba yin te/ gzhan du na ma nges pa'i phyir ro zhes bye brag tsam du kho bo cag rnams smra ba yin gyi tshig las sam gzhan las zhes nges pa ni ma yin la/ tshig kyang shes pa'i sgrub byed du 'dod pa yin no/ /mi mkhas pas nye bar bstan pa ni/ brtag bya ma yin zhes bstan nas/ rmongs ba med na rig byed las kyang yin no zhes smra ba pos so/ /de'i phyir yid ches pa las zhes bden par smra ba nyid du brjod bzhin pa'i yul don ji lta bas shes pa ni dbang po'i yul yang zhes bya ba 'dis bstan pa ma yin nam/ de bzhin du gzhung nyams pa 'ba' zhig ma yin te/ 'on kyang skyes bus byas pa'i tshig nyid las skyes bu 'di rig par byed pa yin zhes bya bar shes par 'gyur ba'i phyir 'dis ni byas pa la byed pa'i phyir mi mkhas pa yin no/ /gcig gi shes pa brjod bya yin par bstan pa yin la/ cig shos kyi skyon med pa'i don du yon tan brjod pas tha dad pa yin no zhe na/ ma yin te/ de las shes pa'i sgo nas don nges pa kho na brjod par 'dod pa yin pa'i phyir zhes/ snga rol du ni don rtogs kyang / /de la brten nas nges pa yin/ /zhes bya bas bstan pa yin no/ /gang gi tshe mthong ba po nyid dang bden par smra ba nyid kyang yid ches pa las yin zhes bstan pa de'i tshe yang bden par smra bas dbang po dang dbang po ma yin pa'i yul tha mi dad pas zhes dgag pa spyir bstan nas/ dbang po'i yul la slar yang bskyed pa'i don du dmigs kyis bsal ba ni/ dbang po'i yul la 'am zhes bya ba ste/ 'am zhes bya ni rnam par brtag pa'i don to/ /dmigs kyis bsal ba yod na spyir btang ba rnam par gcod par bstan pa ni/ /'on te yid mi ches pa las dang dbang po'i yul ma yin pa yang zhes bsdus pa'i don ni/ 'am gyi sgra ste yid ches pa'i tshig gam dbang po'i yul ma yin pa ni tshad ma ma yin zhes bya ba'i don to/ /de kho na la brten nas kyang tshig med kyang de skyes bus shes par 'gyur na zhes bya ba la sogs pa sbyar ba yin no/ /de lta yin na 'ga' yang nyams pa med do/ /yid ches pa yang dbang po las 'das pa ma mthong ba yin na/ mi bsgom pa'i phyir rgyu med pas de'i shes pa yang med pa ma yin nam/ ji ltar nye bar bstan pas de rtogs pa yin zhes zer ba ni/ de sgrub byed pa la'ang ste bsgom pa yang ngo / /med pa'i phyir ni mthong ba med pa'i phyir ro/ /dbang po las 'das pa rtogs pa'i don du sbyin pa dang tshul khrims la sogs pas smra ba po'i nan tan byed pa ma yin te/ de shes pa med na nye bar bstan pa ni de sngon du 'gro ba can ma yin pa'i phyir dang / nyan pa po ni de shes pa po ma yin pa'i phyir/ de'i don nan tan du byed pa ma yin no/ /shes pa po med par bsams pa na/ da ltar bdag cag sogs rnams kyis/ /re zhig kun shes mthong ba min/ /zhes bya ba ni yin gyi/ mngon sum log pa ni med pa la tshad mar brjod pa ma yin no/ / thams cad shes pa sngon du 'byung bar 'gyur ro zhes bya ba 'di la yang tshad ma med do/ /thams cad shes pa snga na med pa yin zhes bya ba 'di la ni rjes su dpag pa nyid tshad ma yin te/ 'das pa'i dus su yang thams cad shes pas stong pa yin te/ dus yin pa'i phyir da ltar byung ba'i dus lta bu'i zhes bya ba de lta bu la sogs pa'i gsal ba byed pa bzhin du/ sngon ma byung ngo zhes brtag par nus pa yin no/ /re zhig thams cad shes pa ma yin pa nyid ces bya ba las brtsams nas/ gzhung lugs thams cad la yod pa yin no zhes bya ba'i bar gyis thams cad shes pa'i shes pa ni rgyu med par bstan pa yin no/ /de'i nges pa'i rgyu yang zhes bya ba la sogs pas shes pa po med par yang ngo / /tshad ma gzhan gyi spyod yul gyi don rtogs par byed pa po'i skad cig nyid la sogs pa'i ngag la/ sangs rgyas kyis gsungs pa nyid tshad ma yin gyi khyab pa dang ldan par dmigs pa ma yin nam/ da ltar ni mchod rten la phyag bya ba la sogs pa'i ngag la yang de nye bar dmigs pa ni/ tshad ma nyid kyi sgrub byed yin te/ shes pa de ni ston pa po'i yin par rtogs par byed pa yin no/ /gang yang dbang po la sogs pa dang 'brel pa can gyi yul la/ bden pa smra ba po nyid mthong nas de'i tshig nyid kyi dad pas don la yang rtogs par byed par 'gyur ro/ /smras pa tshad ma gzhan dang mi slu ba dang ldan pa'i skad cig ma la sogs pa'i ngag ni tshad ma yin gyi/ sangs rgyas kyis gsungs pa tsam gyis rab tu sbyor ba ni ma yin no/ /de'i phyir rab tu sbyor bar byed pa ni gtan tshigs yin te/ des na gzhan dbang nyid kyis kyang / /tshad ma nyid du bsgrub pa yin/ de ni rang las tshad nyid na/ /dbang po gzhan sogs la gang ltos/ /de'i phyir gang kho na skad cig ma la sogs pa'i ngag tshad ma gzhan mi slu ba'i ngo bo ni tshad ma nyid du sbyor bar byed pa de kho na mchod rten la phyag bya ba la sogs pa'i ngag rnams la nye bar dmigs bzhin pa'i tshad ma nyid du sgrub par byed pa yin no/ /sangs rgyas kyis gsungs pa ji lta ba kho na 'dir dbang po la sogs pa rnams kyis yongs su gcod pas tshad ma nyid du dad pas kyang de kho na nyid du 'gyur gyi/ rang dbang gis 'thob pa ni ma yin no/ /rab tu sbyor bar byed pa nyid yin na ni/ /mchod rten la phyag bya ba la sogs pa'i ngag 'gal ba yin la/ tshad ma gzhan gyis rtogs pa'i don las sangs rgyas kyis gsungs pa tsam gyis tshad ma ma yin pa skad cig ma la sogs pa'i ngag lta bu'o/ /ji ltar de dag bden pa nyid/ /gtan tshigs 'dis ni grub pa nyid/ /de bzhin gzhan gyis mi rtogs don/ /tshad ma med pa'i sgrub byed yin/ /'di ni gzhan du sgrub par byed pa dang bcas pa'i gtan tshigs yin te/ mchod rten la phyag bya ba la sogs pa'i ngag ni mi bden pa yin te/ dbang po las 'das pa'i don rtogs par byed pa nyid kyis skyes bu'i ngag yin pa'i phyir/ spu btogs pa la sogs pa'i ngag lta bu'o/ /'on te 'jig rten pa min don/ /skyes bu'i ngag ni rgyu yin na/ phan tshun mthun pa'i phyogs yin phyir/ /rig byed ngag rnams brdzun nyid 'gyur/ /gal te sbyor byed ma yin pa'i sangs rgyas kyi gsung yang mchod rten la phyag bya ba la sogs pa'i ngag bden pa'i sgo nas thams cad shes pa nyid sgrub par byed pa yin na de lta na sangs rgyas thams cad shes pa ma yin zhes bya ba'i bdag gi tshig kyang bden par 'gyur te/ bdag gis smras pa yin pa'i phyir dro ba la sogs pa'i ngag lta bu'o/ /sangs rgyas la sogs pa rnams thams cad shes pa ma yin zhes bya ba'i bdag gi tshig ni bden pa yin te/ bdag gis smras pa'i phyir dper na me'i dro ba dang gsal ba lta bu'o/ /mchod rten la phyag bya ba la sogs pa'i ngag rnams sangs rgyas kyis gsungs pa nyid/ thams cad shes pa ma yin no/ /zhes bya ba la the tshom za ba yin no/ /bdag gis smras pa nyid mngon sum yin no/ /zhes bya ba ni bye brag ste/ bdag gis smras pa mngon sum yin/ de phyir bdag ni gtan tshigs 'gyur/ /khyed kyi bsgrub bya des gsungs pa/ /the tshom za ba'i ma grub pa'o/ /gang la yod pa dgag pa'i bsgrub bya la/ gzhal bya nyid la sogs pa'i bsgrub bya thams cad la 'khrul pa can yang mngon sum la sogs pas mi slu ba can du sgrub par byed pa yin la/ de'i yod pa nyid du 'dod pa sgrub par byed ces pa ni/ mngon sum la sogs mi slu can/ /gzhal bya nyid sogs gang gis ni/ /yod pa nyid ni dgag nus pa/ /de las su zhig rtog par 'gyur/ /drang srong brgyad po la sogs pa bzhin du/ dran pa ni thams cad shes pa nyid yod pa nyid la tshad ma ma yin te/ rtsa ba bcad pa'i phyir ro/ /rtsa ba ma bcad pa'i dran pa ni tshad mar nye bar 'jog par byed pas tshad mar 'gyur ro/ /'di ni thams cad shes pa'i dran pa ni shAkya'i dge slong kha cig la grags pa yin te/ yongs su bzung ba'i phyir/ rtsa ba'i rtog pa la nus pa can ma yin no/ /drang srong brgyad po la sogs pa rnams kyi khyad par yin te/ ma lus pa khyed kyi dran pa las bzlog pas rtogs pa'i phyir yin gyi/ dran pa rnam par ma bcad pa las thams cad shes par rtogs pa yang ma yin te/ rtsa ba rnam par bcad pa'i phyir ro/ /'ga' zhig kho nas yongs su 'dzin pa'i phyir zhes bya ba'i bsam pas zhes zer ba ni/ phyogs gcig mi slu ba zhes bya ba ste/ re zhig thams cad mkhyen pa nyid ma yin pa zhes bya bas rgyu med par bstan pa nyid lkog tu gyur pa'i don thams cad ni mngon du byed par srid pa ma yin te zhes bya bas gsal bar byed pa yin te/ kun shes bya ba'i rnam shes ni/ /de yi shes bya shes med par/ / gang las zhes bya ba la sogs pas shes pa po med pa dang / thams cad shes pa med par yang rigs par tshad mas gsal bar byed pa yin te sangs rgyas kyi shes pa'i shes bya skad cig ma dang stong pa dang bdag med pa nyid dang chos dang chos ma yin pa la sogs pa'i yul rnam par rtog pa dang bral bas 'das pa dang ma 'ongs pa dang da ltar byung ba'i skyes bu rnams kyis thams cad shes par bzung ba med pa'i phyir tshad ma thams cad med pas na med par rtogs pa yin no/ /de'i gtan tshigs kyi don ni 'di yin te/ dus gsum gyi skyes bu rnams dus gsum du yang thams cad shes par 'dzin pa ma yin te/ de'i shes pa dang shes bya dag rtog pa dang bral ba'i phyir bdag cag la sogs pa bzhin du'o/ /gang zhig res 'ga' yang mi 'dzin pa de ni med pa yin te ri bong gi rwa lta bu'o/ /'di ni kun shes yin no zhes/ /de'i dus su 'ang rtogs 'dod rnams/ /de yi shes bya rtogs med pas/ ji ltar rtogs par bya ba yin/ zhes bya ba'i don to/ /'on te de 'dzin pa grub pa'i don du thams cad shes pa gzhan 'dod pa yin na/ de las kyang gzhan par rtogs pa yin te/ thug pa med par 'gyur la/ 'di ni 'dod pa yang ma yin no/ /khyed kyis thams cad shes par ni/ /rtogs pa 'ang mang por 'gyur ba yin/ /gang zhig kun shes min 'gyur ba/ /des ni kun shes rtogs pa min/ /de bstan pa ni de'i shes bya/ shes na'ang de nyid kun rig 'gyur/ /zhes bya ba'o/ /thams cad shes pa yin yang de lta na yang de'i 'dod chags dang bral pa nyid yin pa'i phyir nye bar ston pa po yin pas/ slu byed rnams kyis byas pa nyid/ /mchod rten phyag bya sogs bstan pa/ mngon sum la sogs med rnams kyis/ /so sor rtog pa las yin no/ /'di ni 'dod chags bral yin na/ /bya ba med par rnam par gnas/ /so sor rtog pa med pa'i phyir/ gzhan gyis bstan par byas nyid 'gyur/ /zhes zer ba ni/ gang zhig chags sogs dang bral zhing / /zhes bya ba ste/ sangs rgyas kyis gsungs pa'i phyir zhes bya ba'i gtan tshigs 'di ma grub pa nyid du bstan pa yin no/ /thams cad kyi shes pa de yang re zhig thog ma dang tha ma med pa nyid kyis thams cad kyi rim gyis rig pa mi srid pa yin te/ de kho na nyid med par thal bar 'gyur ba'i phyir ro/ /de nyid bstan pa ni/ byung gyur byung dang 'byung 'gyur dngos/ /zhes bya ba ste/ phyogs gcig pa tsam gyis ni thams cad shes pa ma yin te/ thams cad kyang de lta bu nyid du thal pa'i phyir ro zhes zer ba ni/ phyogs gcig yongs su shes pa ni/ su la med ces bya ba ste/ de nyid kyi phyir skad cig ma nyid la phyogs gcig shes pa mi slu bas kyang tha dad par bya ba la sogs pa'i yul gyi shes pa la yod pa srid par bya ba ma yin no zhes zer ba la/ skyes bu mang du rtogs pa la zhes bya ba'o/ /'on te phyogs gcig zos pa dang bsams pa la sogs pa gzhan 'dra ba'i mi slu ba yod na shin tu khyad par can shes par srid pa ni ma yin no snyam du sems pas zer ba ni/ khyad par dad dang ldan zhes bya ba'o/ /'on te de nyid phyogs gcig shes pa tsam nyid la sogs pa gzhan 'dra ba'i shes pa las tha dad par bya ba la sogs pa'i shes pa'i srid pa yin no snyam du sems pas zer ba ni phyogs gcig de nyid shes pa ni zhes bya ba ste/ de nyid shes pa'i shes pa des 'brel pa grub pa med pa'i phyir mi rigs so zhes bya ba'i don to/ / 'on te cig car rig par byed/ /ces pa'i phyogs yin na de la yang smras pa ni/ cig car thams cad rnams shes na/ zhes bya ba'o/ /'on te mi mngon par kho nar thams cad kyi shes pa bstan pas bdag cag la phan btags pa yin no/ /skyes bu de yis nye ba tsam/ /yid bzhin nor bu ji bzhin du/ ji ltar 'dod pa 'byung ba ni/ /rtsig pa la sogs ston par 'gyur/ /zhes bya ba ni mi rigs te/ mi mngon pa de lta bu'i shes pa las byung ba'i bstan pa rnams mi shes pa'i phyir ro/ /de lta la sogs bstan pa ni/ /dad dang ldan na legs gyur na/ /rtsig pa la sogs las byung phyir/ /bstan pa rnams la yid ches med/ /snyam du sems pa la nan tan du byed par 'dod pa rnams kyi ltos pa ste/ nan tan du bya ba'i shes pa ni 'di la mnga' ba yin no zhes bya ba'i tshad ma bstan pa ni/ des gsungs rtogs par bya ba'i phyir/ /zhes bya ba ste shes pa dang ldan pa tshol bar byed pa nan tan du byed pa'i yan lag kho na yin pa ni gal te nan tan du bya ba de'i shes pa dang ldan pa yod na yin te rang gi bzhin du gzhan la shes pa yod kyang de med na nan tan byed pa med pa'i phyir ro/ /de las yang rang gi shes pa med na ji ltar gzhan gyi shes pa go bar byed pa ma yin te/ de yod na 'am de yin du chug kyang mngon sum bzhin du 'jug par byed pa yin na dbang po las 'das pa la yang 'gyur ro/ /de yang 'jug par byed pa yin no zhe na/ gang la de yin pa la ni de bden na gzhan gyi shes pa gzhan la 'jug par byed pa ni ma yin te/ tshig la sogs pa'i sgo nas gzhan la yang de tshad mar gyur pa kho na yin par 'gyur ro/ /de bstan pa ni/ yul thag ring sogs gtam rnams la/ /yid ces smras pa blo gnod min/ /zhes bya ba'o/ /nus pa'i yul la yin na mi nus pa la ji ltar yin/ ma yin te thams cad nus pa yin pa'i phyir ro/ /'di ltar skad cig ma nyid dang shes pa tsam nyid kyi zhes pa ni yan lag bzhin du byang grol sgrub par byed par nus pa yin te/ mngon gsum la sogs pa sgrub byed yin pa'i phyir ro/ /dran pa goms pa'i zin po yin na blo gsal po skyes pas yun ring por brjed pa rnams kyang dran par snang bas/ sngon gyi gnas rjes su dran pa 'byung ba'i phyir mngon par 'byung sgrub par byed pa ni rjes su 'gro ba dang ldog pa rnam par dpyod pa las byung ba ma nyams yin la/ de la yang de shes pa med pa las nan tan byed pa ma yin pa ma yin te/ 'bras bu mthong ba'i phyir ro/ /de yang ji ltar yang 'byung ba yongs su gyur pa'i bye brag can gyi rtog pas 'byung ba ni ma yin te/ rnam par dpyod par 'chad par 'gyur ba'i phyir ro/ /shes pa de yang ji ltar yin zhes rnam par dpyad pa yang ma yin te/ 'bras bu'i shes pa dang 'gal ba'i phyir ro/ /de'i sgrub byed nyid kyis shes pa nyid las 'jug pa'i yan lag kyang ma yin te/ 'dod chags la sogs pas kyang gdungs pa bzhin du 'jug par mthong ba'i phyir ro/ /de ltar yang de kho na bzhin du yin no zhes bya bar yang mi rigs te/ rig byed dang dbang phyug la sogs pa'i tshad ma tshol bas sems 'khrugs pa'i phyir ro// /de bzhin du 'jug pa yin na nges pa can gyi byang grol dang / mngon par 'byung ba la sogs pa'i 'bras bu mngon par 'thob pa'am/ cig shos 'thor ba zhes bya ba ni ma yin te/ ji skad du de ni 'di rnam par ma dpyad pas gang yang rung ba nye bar len pa na rnam par nyams pa nyid dam don med par 'gyur ro zhes bstan pa'o/ /bcom ldan 'das thugs rje dang ldan pa nges pa can sgrub par byed pa'i shes pa ni/ sngon gyi gnas rjes su dran pa'i rim gyis thob nas 'dod pa dang mi 'dod pa'i rnam par dbye bas sgrub byed du ma yan lag dang bcas par ston par mdzad la/ gzhan gyis kyang 'jug par 'dod pas de de bzhin du 'jug pa'i yul la mkhas par 'gyur bar bya ba ma yin no/ /de la yang rang nyid las rig pa med pa yin te/ ji skad gsungs pa'i gdams ngag med pa'i phyir ro/ /de'i phyir shes pa dang ldan pa de btsal bar bya ba yin te/ rang dang gzhan la shes pa med na 'jug par mi rigs pa'i phyir ro/ /de la rang la shes pa'i thabs med ces te/ gzhan la med par shes par bya ba ma yin te/ bra brtags pa la sogs pa bzhin du nyi tshe ba yin pa'i phyir ro/ /srid pa yin na yang de shes pa la yang de sngon du 'gro ba can du bstan pa ni/ 'di kho na yin gyi gzhan ma yin no zhes ci las shes/ gal te bde gshegs kun shes na/ /ser skya mi zhes tshad ma gang / /zhes bya ba'i tshig las so/ /phyogs gcig la mi slu bas shes pa sngon du 'gro ba can gyi shes pa yang ma yin te/ ma nges pa'i phyir dang skyes bu'i don phran tshegs kyi shes pa ni thams cad la rnyed bla ba'i phyir ro/ /byang grol du bstan pa ni skyes bu'i don gyi dam pa thabs dang bcas pa ni mi slu ba can yin pa'i phyir de dang dgongs pa gcig pas gsungs pa'i mtho ris la sogs pa'i skyes bu don phran tshegs ngag gi snga rol nyid du de nyid shes pa yin te/ skyes bu'i don gyi dam pa la mi slu ba yin na cig shos la slu ba yin no zhes the tshom za ba ma yin no/ /bzlog pa la ni de ltar 'gyur ro zhes bya ba'i bsam pa'i dbye ba shes pa ni 'jig pa'i yin la/ 'jig rten gyi thabs dang ldan pa ni gzhan du rnam par gzhag par mi rigs so/ /ser skya la sogs pa la ni 'di med pa yin te de'i phyir slu ba can nyid do/ /gzhan las thos nas smra ba yin par mi rigs te/ gang gis tshad ma yod pa can gyi dngos po'i bsgom pas 'dod pa dang mya ngan las 'das pa bzhin du sngon du byed pa srid pa'i phyir ro/ /gtso bo nye bar ston pa po nyid gzhan yang zhes ci las de lta bu nyid kyi dran pa rnam par gcod pa ma yin pas/ rig byed la sogs pa skyes bus byas pa la ma yin pa la sogs pa bzhin du'o/ /rig byed la sogs pa la ni skyes bu'i don gyi gtso bo la mi snang bar yid ches ba nyid kyi shes pa'i rgyu med do/ /de'i phyir de las gzhan pa la yang yid ches pa nyid du nges pa med par bstan pa ni mi shes pa ni skyes bu'i don gyi gtso bo'i dad par bya ba'i shes pa srid pa med pas so/ /ston par byed pa zhes bya ba ni nye bar bstan par bya ba ste nan tan du bya ba'o/ /de la byed pa ni nan tan du bya ba'o/ /de la/ slu ba yin par dogs rnams kyi/ /zhes bya ba ni skyes bu'i don gyi gtso bo'i shes pa'i rim gyis dad par bya ba'i shes pa kho na tshol bar byed pa yin te/ thabs dang bcas pa'i skad cig ma nyid mthong na cig shos mi mthong ba ma yin te/ mthong ba'i sgrub byed bsgom pa yin pa'i phyir ro/ /gang gi phyir skad cig ma nyid la sogs pa'i bsgom pas sgrib pa ma lus pa'i nyes pa spangs pa yin na dran pa goms pa phun sum tshogs pa las sngon gyi gnas rjes su dran pa'i shes pa thob pa las/ las dang 'bras bu dang 'brel par bde bar rtogs pa'i phyir dran pas goms pa bzhin du gtso bo'i shes pa yang de las mkho ba yin no/ /de'i phyir skyes bu'i don gyi gtso bo rtogs pa sngon du 'gro ba can gyi dran pa goms ba'i blo gsal ba ni nyams su myong ba dran pa'i rgyu yin te/ gegs byed pa med na mthong ba bzhin du snying rje goms pa phul du byung ba las gegs byed pa med par shin tu nges pa yin pa'i phyir gdon mi za bar 'byung ba'i 'bras bu ni rgyu yin la/ ma 'ongs pa'i 'bras bu sngon gyi gnas rjes su dran pa'i 'bras bu yin te/ de med na med pa'i bye brag med pa'i phyir ro/ /'jig rten pa'i yang gtso bo la mi slu bas cig shos la yang mi slu ba'i shes pa las yid ches pa'i shes pa yin par gtso bo'i don la slu min las gzhan la rjes su dpag pa yang zhes bya bas 'chad par 'gyur ro/ /'dir ni de yongs su ma shes pa'i skyon brjod pa yin la/ 'di la yang 'di'i nan tan du bya ba'i shes pa ni rtogs bya yin par bstan pa yin la/ de la ni yul can thams cad dam/ yang na nan tan bya ba dang nan tan byed par rang nyid rtogs pa dang ldan pa yin la/ 'ga' zhig khas blang par bya ba yin no/ / gzhan du shes pa zhes bya ba ni rtogs pa yin la/ gang la de med pa ni 'di'i mi shes par ston pa'o/ /de las byed pa ni byed pa ste/ nan tan tu byed na slu ba srid pa yin te/ mngon sum dang rjes su dpag pa'i rgyab rten dang bral ba'i nye bar bstan pa tsam las ni bcos ma ma yin pa las kyang don dang 'brel pa'i rang bzhin can ma yin pa'i phyir/ de tsam nan tan du byed pa ni rang gi rtog pa tsam nan tan byed pa bzhin du yid ches pa'i gnas ma yin no/ /de'i nye bar bstan pa ni rmongs pa las kyang 'byung ba yin la/ rmongs pa med na rig byed las kyang 'byung zhes pa gsal ba yin te/ don dang 'brel pa skyes bus byas pa nyid kyis rmongs pa srid pa mi ldog pa'i phyir ro/ /de'i phyir de lta bu'i rnam shes bskyed pa la mig la sogs pa rgyu ma yin la/ bsgom pa yang yin par ni mi 'gyur te/ dbang po las 'das pa'i phyir ro/ /cung zad kyang mngon sum gyi nus pas ma mthong ba yin zhes bya ba la sogs pa yang gsal ba yin te/ dran pa goms pa las nyams su myong ba dran pa'i rgyu mtshan yin pa'i phyir ro/ /de lta yin na dran pas shes pa yin gyi mngon sum gyis ni ma yin no zhe na ma yin te/ shin tu goms pa las gsal bar snang ba nyid kyis mngon sum yin pa'i phyir ro/ /de ltar na nye bar bstan pa las shes pa ni pha la sogs pa'i nye bar bstan pa bzhin du/ rtogs bzhin pa yin na khyed kyis ci las shes zhes glags btsal bar bya ba ma yin te/ shin tu goms pa las ni rtogs par ma byas kyang lus dang ngag gi tha snyad mthong ba'i phyir rtog pa med na ji ltar ston pa yin zhes bya ba gsal ba yin no/ /de gal te yid ches pa las dbang po'i yul zhes smra bas/ bden pa smra ba nyid dang dbang po'i yul du smra ba nyid yid ches pa'i mtshan nyid bstan pa yin la/ de yang 'jig rten pha rol pa'i las rjes su sgrub pa la dgongs pa yod pa ma yin la/ de'i don nyid du rtogs pa dang ldan pa rnams rtsom pa'i phyir skyes bus byas pa ma yin pa nyid las sam/ gzhan las kyang de 'byung bar mi 'gyur ba'i phyir dbang po las 'das pa mthong ba des na skal ba dang ldan pa yin par bstan pa ni/ shes ldan tshol byed pa zhes bya ba ste/ 'bras bu dang de'i khyad par mthong ba las rgyu dang / de'i khyad par dag pa yin la/ de las kyang de las gzhan pa yin/ /zhes rjes su dpag pas nges pa yin te/ goms pa khyad par can gyis ches gsal ba la ni ma lus pa mngon sum du 'gyur ba'i phyir ro/ /ji ltar thog ma dang tha ma med pa 'gal pa yin/ rnam par rtog pa bzhin du mngon sum gyi rtogs pas bsgom pa tsam las 'byung ba gsal ba yin pa'i phyir la/ mngon sum nyid nyams pa yang ma yin te/ skad cig ma gzhan la yang de dang 'dra ba kho na'i rgyun gyis 'u bu cag gi shes pa bzhin du 'jug pa'i phyir ro/ /gdul bya mtha' yas pa nyid kyis kyang skad cig ma re re la yang mngon par 'dod par byed pa'i phyir tshad ma yin te de'i phyir khyad par yod do/ /pha rol la yod pa'i 'dod chags la sogs pa rigs pa'i phyir des de dang ldan pa yin zhes bya ba la sogs pa'i rgol ba dang lan rgyas par ni rnal 'byor ba'i mngon sum rnam par bshad pa las shes par bya'o/ /gzugs la sogs pa mngon du byed pa mig la sogs pa rjes su 'jug pa can ni bsgom pa las sam gzhan las kyang ji ltar 'gyur/ glur blang bya ba la sogs pa tsam la sogs pa yang khyad par can gyi dang po'i dbang po dang 'brel pa las 'byung ba ni bsgoms pa'i rjes su 'jug pa'i shes pa gsal bar nye bar dmigs pa ma yin no zhes smra ba rnams kyis bsgoms pa'i bskyed bya brjod pa la 'di tsam zhes bya ba med de/ dbang po rnams lhan cig byed pa nyid kyis rjes su 'jug par byed pa rnams yul so sor nges pa yin na gzhal du med pa'i phyir thams cad shes pa ma yin pa nyid la sngon po dang sngon po ma yin pa'am/ rig pa'am rig par byed pa ma yin zhes bya bar 'gyur te 'gal ba med pa'i phyir ma yin zhes bya bar mtshungs so/ /thams cad mkhyen pa ma yin pa la ni 'gal ba med do/ /thams cad shes pa ma yin pa nyid thams cad mkhyen par 'gyur te dpyod pa pa ma yin pa dpyod pa bar 'gyur ba bzhin du'o/ /thabs yod pa'i phyir te dran pa goms pa ni thabs yin pa'i phyir ro/ /mtho ris dang thar pa'i lam shes pa nyid kyis rjes su sgrub par 'dod pa rnams kyi bsnyen par bya ba 'di yin gyi/ dgos pa med pa thams cad kyi shes pa las ni ma yin no zhes bstan pa ni/ thams cad rig pa zhes bya ba tshad ma gzhan ni 'dod pa ma yin gyi/ 'on kyang zhes bya ba'o/ /thams cad shes pa yin pa'i phyir yang shes pa phul du byung ba dang ldan pa'i phyir bsnyen par bya ba ma yin nam/ de yang thams cad kyi shes pa ches shin tu yin pa'i phyir thams cad kyi shes pa la gus pa ma byas pas skyes bu'i don gyi shes pa nyid ji ltar tshol bar byed snyam du sems pas ci'i phyir zhes zer ba la/ lan du des gsungs zhes bya ba ste/ rtogs par bya ba'i phyir ni nan tan du bya ba'i don du yin gyi/ shes pa khyad par can dang ldan pa nyid tsam kho na las 'di bsnyen par bya ba ni ma yin te/ 'on kyang nan tan du bya ba'i yul shes pa khyad par can dang ldan pa nyid kyi phyir zhes bya ba'i don to/ /yul gzhan shes pa khyad par can dang ldan pa shes pa yin na yang 'jug pa'i yul khyad par can dang ldan pa mi shes na mi 'jug ste/ rang nyid dam gzhan gyis nges par brtags pa la 'jug pa yin par bstan pa ni gzhan rjes su sgrub par 'dod pas zhes bya ba'o/ /yul gzhan shes pa khyad par can dang ldan pa nyid shes kyang / 'jug pa'i yul shes pa khyad par can dang ldan pa srid pa yin na 'jug par 'gyur ba ma yin nam snyam du sems pa la/ de des kyang zhes bya ba ste/ 'jug pa'i yul shes pa la nges pa med na 'ga' yang 'jug par mi 'gyur te/ yul gzhan la nges pa yang yul de la the tshom za ba'i phyir ro/ /the tshom nyid ni 'jug pa'i yan lag ma yin te/ 'jig rten pha rol la sogs pa la slu bar dogs pa yin na/ rtog pa dang ldan pa rnams mi 'jug pa'i phyir ro zhes bya ba'i don to/ /'jug pa'i yul shes par nges pa kho na 'jug pa yin par ni bden te/ de'i nges pa 'ba' zhig bzhin du yul gzhan shes pa la nges pa yang de la yod do zhes bdag smra ba yin no snyam du sems pa ni/ 'on te der yang zhes bya ba'o/ /shes pa de'i shes bya shes pa med na de'i shes pa la ji ltar nges pa yin zhe na/ lan du thams cad du shes pa la zhes smos so/ /nye bar bsdu ba ni de'i phyir zhes bya ba ste/ de nyid ces bya ba de nan tan du bya ba kho na yin par shes par bya ba ste/ slu ba yin par dogs rnams kyis/ /zhes bya ba dang sbyar ro/ /des ni nye bar bstan pa las so/ /ci las the tshom za ba yin zhe na/ mi shes zhes bya ba ni rang nyid la 'jug pa'i yul la nges par rtog pa med par bstan pa yin la/ mi shes pa nye bar ston pa zhes bya ba ni gzhan la nges par rtog pa med par bstan pa'o/ /'di tshad ma nyid do zhes bya ba 'di la yang shes nas zhes bya bar rjes su 'jug pa yin te/ skyes bu'i don shes pa khyad pa can dang ldan pa nyid kyi shes pa la tshad ma yin te/ rjes su 'jug pa'i phyir ro zhes bya ba'i don to/ /gal te yul gzhan shes pa khyad par can la nges pa ma yin pa kho na ci zhig ce na/ srid pa yin par 'gyur bar bstan pa ni/ gzhan la yang de'i zhes bya ba ste/ skyes bu'i don shes pa khyad par can la srid pa ni sgrub par byed pa dang gnod pa can med pa'i phyir the tshom yin la/ 'di 'jug pa'i yan lag ni ma yin te/ 'khrul pa srid par 'gyur ba'i phyir dang / thams cad du yang 'jug par thal bar 'gyur ba'i phyir ro/ /de'i phyir nges pa can gyi skyes bu'i don gyi gtso ba'i shes pa la nges pa ni 'jug pa'i yan lag yin par bstan pa ni skyes bu'i don gyi gtso bo shes pa zhes bya ba ste/ skyes bu'i don kun gyi gtso bo las gzhan pa'i yul shes pa la ji ltar shes pa yin zhes rgol ba ni rig byed dang dbang phyug la sogs pa rnams bsnyen pa la yang mtshungs pa yin la/ de la khyed kyi lan gang yin pa de kho bo cag gi yang yin par mtshungs par bstan pa ni/ lhag ma thams cad ni zhes bya ba'o/ /gal te rig byed dang dbang phyug la sogs pa yang bsnyen par bya ba ma yin du zin kyang bdag la gnod pa ci yod ce na/ ci'i phyir mi gnod pa yin te bsnyen par bya ba thams cad dgag pa/ bsnyen bya gang kho na yin pa de kho na ji ltar shes pa yin zhes bya bar mtshungs so/ /bdag cag gi bsnyen par bya ba ni 'ga' yang med pa kho na yin no zhe na de ltar yin na 'jig rten pa'i tha snyad la rjes su 'jug par byed pas khyod 'jig rten pa yin te/ skyes bu'i don gtso bo shes pa la nges par byed na shes pa gzhan la yang srid par byed pas 'jug par byed pa yin na gzhan la ni ma yin te/ de ltar shes pa med pas slu ba yin par dogs pa yin pa'i phyir zhes bstan pa ni/ gang zhig tshad mas mthong ba zhes bya ba'o/ /shes pa dang nye bar bstan pa dag gis kyang nye bar bstan pa mthong ba las the tshom za ba yin no zhes zer ba ni/ 'on te thams cad yongs su mi shes na zhes bya ba ste/ thams cad ni las kyi 'bras bu'i bdag nyid kyi 'gro ba yin te/ gzhan la med pa'i phyir la gal te de shes na thams cad kyi shes pa kho na tshig gsal ba 'di kho nas brjod pa yin la/ de la yang nus pa med par bstan pa kho na yin no zhes bya ba'i don to/ /lan du las dang 'bras bu 'brel pa mngon du byed pa yod pa las de bzhin du thams cad kyi shes pa 'thob pa yin na 'ga' yang nyams pa med la shes pa med pa yang ma yin no zhes bstan pa ni/ tshad ma med pa'i dngos po las zhes bya ba ste/ rig byed grangs can la sogs pa la tshad ma med pa'i phyir nye bar bstan pa brgyud pa kho na las don gyi gtso bo la slu ba med pa'i don du skyabs su mi 'gro ba yin te/ gzhan las shes pa spangs pa la ni ma yin no zhes bya ba'i don to/ /tshigs su bcad pa'i tshig phyed snga ma rnam par 'grel pa ni/ tshad ma med pa brtag pa nyid la sogs pa la zhes bya ba'o/ /phyed phyi ma bshad pa ni/ tshad ma dngos po zhes bya ba ste/ ma shes pa ste mngon du mi byed pa la/ de la dogs pa ni mngon sum du byed pa ste/ ma nges pa'o/ /tshad mas yongs su bcad pa ni mngon sum gyis yongs su bcad pa la gnyis su med pa'am/ skad cig ma nyid kyi dngos po las dngos po rnams kyi snga ma dang phyi ma dag gis gnyis dang bral ba nyid ni de dang ldan pa nyid du mthong ba 'gal ba las de dang ldan pa nyid du mthong ba 'ongs pa yin na/ /de las kyang de las byung ba'i 'dod chags la sogs pa rnams te/ de'i phyir skad cig ma'am gnyis su med pa mngon du byed pa ni de dang 'gal ba spangs pa mngon du byed pa'i ngo bo yin par 'u bu cag la sogs pa'i yang mngon sum yin par gnyis su med pa la sogs pa mngon du byed pa de yang bsgoms pa khyad par can gyi phul du byung bar 'gro ba yin te/ spangs pa phul du byung ba dang ldan pa zhes bya ba yang mngon sum yin no/ /gnyis kyis dben pa'i bsgom pa ni gnyis kyi ngo bor 'gyur ba ni ma yin no/ /bde ba dang 'dod chags la sogs pa gzhan las thos nas sam/ rang nyid kyis rig pa bsgom bzhin pa phul du byung bar 'gro ba ni gzung ba la sogs pa'i ngo bor 'gyur ba ma yin no/ /de bzhin du gnyis su med pa la sogs pa bsgoms pas 'dod chags dang bral ba ma bslus pa yin te/ dran pa goms pa phul du byung bas blo phul du byung ba skyes pa yin na/ nyams su myong ba thams cad dran pa'i thams cad kyi shes par 'gyur ba yin no zhes rtogs pa nye bar ston pa pos bstan pa las rtogs pa yin no/ /nye bar bstan pa gcig pu'i yul la shes pa ni nye bar bstan pa las yin te/ nye bar bstan pa sngon du 'gro ba can du rtogs pa yin gyi mngon sum gyi yul la ni ma yin no/ /de'i phyir mngon sum gyi yul gyi khyad par can gyis nye bar ston pa pos bstan pa las mngon sum kho nar rtogs bzhin pa ni nye bar bstan pa tsam gyi shes pa dang 'gal ba dgag par byed pa yin pa'i phyir nye bar bstan pa brgyud pa yin na mngon sum gyi yul khyad par can nye bar bstan pa ni/ 'gal ba khyab pa yin no zhes bya ba'i don to/ /rang nyid mngon sum gyi yul yin na de nyid kho na 'jug pa ma yin nam/ mngon sum gyis ci dgos/ de ni de'i 'jug par byed pa yang ma yin la/ slu bar dogs pa yang ma yin te/ rang nyid mngon sum yin pa'i phyir ro snyam du sems pa la/ dogs su chug pa de lta na yang zhes bya ba ste/ rang nyid mngon du byed pa kho nas mgu ba yin pa'i phyir nye bar ston pa po ni de mngon du byed par nges par 'gyur ba yin gyi/ med pa las sam tshad ma med pa las ma yin zhes bya ba'i don to/ /da ltar byung ba'i shes pa dang spangs pa dag phul du byung ba ni bdag cag la sogs pa bzhin du nye bar ston pa po yin du zin kyang / de'i khyad par 'gog pa mngon du byed pa la sogs pa bdag gi ni 'byung bar 'gyur ba yin la/ de'i ni byung bar 'gyur ba yin par ci las shes snyam du sems pa ni 'on te tshad mas mthong ba yin yang zhes bya ba ste/ 'dir mngon du byed pa zhes bya ba ni 'gog pa yin zhes bya ba ltos pa yin no/ /lan ni de ni 'dir 'gyur te zhes bya ba ste/ re zhig rang nyid la shes rab dang spangs pa dag phul du byung ba med pas 'byung bar 'gyur ba de'i phul du byung bar nges pa ma yin te/ rigs pa mtshungs pa nyid kyis ston pa po'i yang 'byung bar 'gyur ba las nges pa ma yin no zhes tshad mas mthong bar ston pa ni go byed yin pa'i phyir ltos pa dang bcas pa'i bsdu ba yin no/ /tshad mas mthong ba ston pa'am de ltar bstan pa yin no/ /nye bar bstan pa yang shes pa sngon du 'gro ba can gyi mthong ba yin na shes pa go byed yin la mngon sum gyi yul nyid kyi rang gi bye brag gis rtogs bya'i shes pa'i khyad par mngon du byed par rtogs par byed pa yin par bstan pa ni/ bcom ldan 'das de bzhin gshegs pa ni tshad mas mthong ba gsung ba yin zhes bya ba'o/ / de bzhin du nye bar bstan pa'i khyad par gyi shes pa'i khyad par ni mngon du byed pa yin no zhes nye bar bsdu ba ni/ bcom ldan 'das ni tshad ma nyid do zhes bya ba'o/ /mtho ris dang ni byang grol lam/ /zhes bya ba ni bsdu ba'i tshigs su bcad pa'o/ /de bzhin du zhes bya ba ni skyes bu'i don las gzhan gyi yul can gyi shes pa'o/ /byung gyur byung dang 'byung 'gyur dngos/ /thog mtha' med par rim gyis ni/ /so so re re rtog pa ni/ /bskal ba'i bar du'ang nus ma yin/ /zhes bya ba la sogs pa yul gzhan gyi shes pa bkag pa ni shes pa de khas blangs pa kho nas gsal ba yin par bstan pa ni/ 'dir ni chos mkhyen 'gog pa nyid/ /ces bya ba ste/ phyogs gcig mkhyen pa zhes bya ba ni skyes bu'i don gyi ngo bo phyogs gcig yongs su mkhyen pa yin par srid na'o/ /me ni grang ba'i sman yin pa'i phyir/ nye bar blang bya yin par bstan pa ni me ni zhes bya ba la sogs pa'o/ /skyes bu'i don ma yin pa'i mtshan nyid ces bya ba ni skyes bu'i don gyi gtso bo las gzhan pa'i skyes bu'i don nyid ma yin pa'o/ /las dang 'bras bu 'brel ba'i shes pa ni dran pa goms pas blo gsal ba yin na/ 'di 'byung ngo zhes 'di dag bstan pa ma yin nam/ de ni mi shes te de ci me'i sbyin sreg la sogs pa'am/ sbyin pa la sogs pa yin no snyam du sems pa la/ des pa'i las bstan pa'i phyir/ mtho ris dang ni byang grol lam/ /zhes bya ba smos te/ yul rnam par dag pa gnyis la mngon sum dang rjes su dpag pa rnam par gzhag pa yin la/ skyes bu'i don thar pa'i lam gyi ngo bo la ni bstan bcos de'i phyogs gcig bstan pa dang 'gal ba can gzhan tshad mas yongs su dpyad bya nyid ma yin pa'i las me'i sbyin sreg la sogs pa ni ma yin no zhes bya ba'i don to/ /gzhan yang zhes bya ba ni dngul chu dang bcud kyis len dang dbang du byed pa la sogs pa'i rnam par dbye bas mi shes pas mgu bar bstan pa ni thams cad shes pa ma yin zhes bya bas ni thams cad mkhyen pa'i shes pa ma yin zhes bya ba ste/ mi slu ba de ni shes pa srid pa dang mi 'gal ba'i phyir nye bar bstan pa brgyud pa dor bya ma yin par bstan pa ni/ de'i phyir tshad ma can gyi don gsungs pa'i phyir zhes bya ba ste/ gang gi phyir shes pa dang ldan pa nan tan bya ba'i don du btsal ba ni/ de phyir de yi ye shes ni/ /nan tan bya rtogs rnam dpyad bya'o/ /zhes bya ba'o/ /yul gzhan ni ma yin te dgos pa med pa'i phyir dang mi nus pa'i phyir ro/ /las dang 'bras bu'i 'brel pa shes pa srid pa bzhin du yul gzhan shes pa srid pa ni don gyi gtso bo la mi slu bar khyad par med pas so/ /de'i shes pa'i shes bya rnam par rig pa dang bral ba rnams kyis ji ltar go ba yin zhe na/ las dang 'bras bu la sogs pa shes par mtshungs pa yin no/ / 'on te rgyu yod pa las de la mi slu ba'i phyir de yod pa yin no zhe na/ de ni gzhan la yang mtshungs so/ /'di la rnam par dbye bas shes pa med do zhe na la sogs pa la yang ngo / /de'i phyir yul gzhan shes pa dgos pa med pa nyid kyi phyir brtag bya ma yin par bstan pa ni/ de yis srin po'i grangs mkhyen pa/ /nged la 'ga' yang nyer mkho med/ /ces bya ba'o/ /de lta yin na las dang 'bras bu la sogs pa'i shes pa dang shes pa gzhan yang gang gi srid par byed pa ste/ phyogs gcig shes pa tsam du mi 'gyur ba yin gyi thal ches pa'i phyir ro snyam du sems pa la rgyu mtshan gyi khyad par bstan pa ni/ dor dang blang bya'i de nyid ni/ /zhes bya ba ste/ don gyi gtso bo la mi slu ba'i phyir zhes bya ba'i don to/ /nan tan du bya ba'i shes pa rtogs pa la don gyi gtso bo mi slu ba bzhin du thams cad shes pa nyid kyang rgyu mtshan ma yin par gang gis shes par bya bar 'gyur bar bstan pa ni/ ring por mthong ngam min yang rung / /'dod pa'i de nyid mthong ba yin/ /zhes bya ba ste thag ring por mthong ba po'i rtogs pa la yang don gyi gtso bo la mi slu ba med na nan tan bya ba shes pa srid pa ji skad bstan pa'i rim pas med pa'i phyir ro/ /de bstan pa ni/ gal te ring mthong tshad yin na/ / tshur shog bya rgod bsnyen bkur gyis/ /zhes bya ba'o/ /de ltar rnam par 'grel par ni/ /ring po mthong ba yod do zhes bya ba ste/ de de bzhin du rtogs par 'dod pa po'i thams cad kyi shes pa dgos pa can ma yin la mthong ba po dang ston pa bo'i ni dgos pa yod pa kho na yin te/ gcig kyang yongs su mi shes na bsgrub pa ma nyams pa mi rigs pa'i phyir zhes brjod pas yod pa yang yin par bstan pa ni/ thams cad rig par mdzad pa yi/ thams cad mkhyen pa 'gog pa min/ zhes bya ba ste/ nged kyis shes par mi nus pas te dgos pa yod pa nyid kyis zhes bya ba la ltos pa yin te/ la sogs pa'i shes pa srid pa bzhin du de'i srid par yang nus pa'i phyir ro/ /mtho ris dang byang grol gyi lam gyis shes pa'i ngo bo'i lkog tu gyur pa'i don shes pa po nyid tshad ma nyid yin gyi thams cad ni ma yin te nan tan du bya ba'i yul yin pa'i phyir dang / don gyi gtso bo la mi slu ba'i 'bras bus shes par bya ba yang yin no zhes tshad ma nyid kyis rang gi ngo bo go bar byed pa yang rtogs par byas nas da ni rgyu bstan pa ni/ sgrub byed thugs rje bsgoms las de/ /zhes bya ba ste thugs rje la sogs pa bsgom pa'i rim gyis dran pa goms pa ni dbang po las 'das pa shes pa'i rgyu yin zhes bya ba'i don to/ /gnyi ga'i mtshan nyid la yang zhes bya ba ni skyes bu'i don gyi gtso bo shes pa dang thams cad kyi shes pa yang ngo / /sgrub pa gang las zhes bya ba ni rdzogs pa'o/ /rgyu yang gang yin zhes bya ba ni de ltar rdzogs pa yang gzhan gyi don la 'jug pa med na tshad ma nyid ma yin pa'i phyir de la 'jug pa'i rgyu yin no zhes bya ba'i don to/ /rgyu yang gang yin zhes bya ba 'di la sbyor bar byed pa yin no/ /yang na sgrub pa zhes bya ba thugs rje bsgoms pa'i sgo nas blo tsam ni lus la brten pa nyid kyis dran pa goms pa las kyang sngon gyi gnas shes pa med pa kho na yin no snyam du sems pa ni/ blo ni lus la brten pa'i phyir/ /zhes bya ba ste 'jig rten 'di ni 'jig rten gzhan gyi 'bras bu yin na/ dran pa goms pa las las dang 'bras bu 'brel pa'i khyad par shes pa ni sngon gyi gnas shes pa'i rim gyis 'gyur ba yin gyi/ 'di srid pa ni ma yin te/ 'jig rten 'di ni 'jig rten gzhan tsam gyi 'bras bu yin pa'i phyir ro zhes bya ba'i don to/ /rten ni bkag phyir ro zhes bya ba ni blo'i rten nyid rang gi ngo bo rig pa las gzhan pa rig pa ma yin te/ gang gi phyir dkar po la sogs pa'i ngo bo lta bur de srog la sogs pa bzhin du rdzas la brten par dmigs pa ma yin no/ /shes pa dang ldan pa ni srog dang ldan par dmigs pa yin no zhe na/ ma yin te lus ni yul mtshungs pa nyid kyis de ltar sgro btags pa'i phyir ro/ /'on te lus las gzhan po shes pa can dang srog can du 'gyur ba de lta na yang 'jig rten pha rol po yod pa'i phyir thog ma med pa'i skye ba brgyud pa goms pa las gsal bar 'gyur ba yin no/ /'ba' zhig pa gzhan po 'di dag gang kho na yin pa kho bo cag la nges pa med do/ /dbugs rngub pa dang 'byin par byed pa gang yin pa de yin no zhe na/ lus nyid dbugs 'byung rngub byed pa ma yin nam gzhan ni ma yin te/ mi rtog pa'i phyir ro/ /gang gi phyir srog la sogs pa rnams ni gzhan ba'i chos nyid dang 'bras bu nyid du dmigs pa ni ma yin la/ lus kyi ni yin te/ de yang yod pa nyid du dmigs pa'i phyir ro lus kyi yon tan dang chos mi mthun pa yang ma yin te/ ji srid rdzas yod pa nyid kyis de'i yon tan rnam pa gnyis yin pa'i phyir lus ji srid pa de srid du 'di'i yon tan gzugs la sogs pa rnams yin la/ ji srid rdzas yod pa nyid du ring ba la sogs pa yang yin/ tsho ba nyid la sogs pa'i gnas skabs gzhan bskyed pas rid pa med par byed pa yin te/ gzugs la sogs pa'am gzugs la sogs pa gzhan skyed pa'i phyir mi mthun pa ma yin no/ /de lta yin na de srog la sogs pa'i yon tan rnams kyang zhig pa'i rgyu ni de'i bral ba nye bar mtshon pa gnas skabs gzhan skye ba yod pa'i phyir/ chos mi mthun pa nyid ma yin no/ /de yang 'on te de la gnas skabs gzhan de bzhin du 'chi ba la yang 'dod ces smos pa'o/ /de lta yin na gang gi tshe lus gnas skabs de kho na yin na/ srog la sogs pa dang bral bar gyur pa ji ltar yin/ re zhig gnas skabs gzhan ni de med pa ma rtogs pa dmigs pa ma yin la/ gang gi tshe bral ba kho na bral ba'i rgyu ni ma yin no/ /de bstan pa ni 'di la dbye ba 'di tsam ste/ lus la brtan po nyid yin ba'i/ /tshad yod de dang bral ba yin/ /rgyu mtshan shes pa ma yin no/ /zhes bya ba'o/ /dmigs bya ma yin pa'i gnas skabs gzhan ni brtag par 'os pa ma yin te/ dmigs bya lus la dmigs bya ma yin pa'i gnas skabs mi rigs pa'i phyir ro/ /gzugs la sogs pa la ni me dang phrad pa bzhin du 'di'i rgyu gzhan du rtogs pa ma yin te/ rdzas ma zhig na de'i yon tan gzhig par mi nus pa'i phyir ro/ /nus na ni yon tan gzhan skyed par mi nus te/ de gnyi ga yang lus la dmigs pa ma yin la/ yon tan ni rdzas zhig pa las sam rdzas gzhan gyi gnod pas 'jig par nye bar 'gro ba ma yin no/ /de'i phyir gtugs pas zhig par byed pa yin no/ /re zhig thams cad kyi 'chi ba la ni de gnyis mthong ba ma yin te/ ma nyams pa'i lus las srog la sogs pa bral ba yin te/ rang dang gzhan gyi mngon sum ma yin pa'i phyir 'dod pa dang sdang ba dang 'bad pa dang dge ba dang sdug bsngal gyi shes pa rnams ni lus kyi ma yin te/ gzugs la sogs pa de'i chos rnams gzhan gyi dbang po rnams kyis mi 'dzin pa'i phyir ro/ /bde ba la sogs pa ni de ma thag pa yin pa'i phyir rtogs pa yin te/ rtag tu rab tu dga' ba'i rang bzhin can yin pa la sogs pa'i rtags las go ba yin no/ /lus la ni de rnams kyi dmigs pa longs spyod pa'i gnas 'di yin pa'i phyir ro/ /de rnams gang gi yin pa de'i longs spyod kyi gnas ni lus dang yon tan nyid kyang yin te/ de rnams kyi spyi dang khyad par dang ldan pa nyid yin na ro la sogs pa bzhin du mig gi mngon sum ma yin pa'i phyir ro/ /yon tan rnams kyang yon tan gyi rten du bya ba ma yin pa go bar byed pa yin gyi lus la sogs pa ni gnas ma yin te/ de'i yon tan dang chos dang chos can mi mthun pa'i phyir ro/ /gnas skabs kyi dgag pa la yang lhag pa cig shos rtogs pa yin pa'i phyir 'dod pa la sogs pa rnams las bdag grub pa yin no/ /yon tan nyid yin pa'i phyir bde ba la sogs pa ni ro la sogs pa bzhin du brten pa nyid yin la/ gang la brten pa de yang bdag yin no zhes zer ba la/ de'i lan du brten pa nyid du dmigs pa'i rgyu mtshan ni yon tan nyid yin te/ rang gi ngo bo dmigs pa ni rgyu mtshan ma yin te thal ches pa'i phyir ro/ /mig gis sam gzhan gyis kyang nye bar dmigs pa la ni bye brag ci yang med do/ /bde ba can zhes bya ba dang dbyig pa can zhes bya ba'i shes pa'i rgyu mtshan ni de dang 'brel pa yin gyi yon tan nyid ni rgyu mtshan ma yin pa'i phyir dang / yon tan rnams ni gzhan dbang yin pa'i phyir yon tan dang ldan pa rjes su dpag par bya ba yin pa ni/ yon tan nyid du grub na'o/ /de'i phyir de ni/ bde ba la sogs pa rnams la ma grub po/ /srog can dang bde ba can dang shes pa can la sogs pa bde ba la sogs pa dang 'brel pa can ni lus las gzhan ma yin no/ /nga ni bde ba can no zhes bya ba ni gzhan yin no zhe na/ ma yin te nga 'gro zhes bya ba ni lus yin par rtogs pa'i phyir ro/ bdag gi lus bya ba yang bdag gi bdag nyid de gnas skabs ni de'i rgyu mtshan yin no/ /shes pa ni shes bya re re la tha dad pa yin la/ tha mi dad pa'i bdag gi gnas skabs yin zhes rgol ba dang ma mthong ba'i dbye ba yang shes pa'i rgyu can yin zhes bya ba'i tshig las yin la/ de bzhin du bong tshod dang gdong dang dbang po la sogs pa'i tshogs pa ni bdag yin zhes bya bar lta ba la ni de'i lus zhes bya bar 'gyur ba kho na yin gyi/ 'khrul pa nyid kyang ma yin te/ gzhan la bdag ma grub pa'i phyir ro/ /gzhan gyis mthong ba yin na dran pa mi 'grub pa'i phyir/ dran pa po nye bar dmigs pa yin no/ zhes bya bar yang mi rigs te/ nye bar dmigs pa tsam gyi 'bras bu nyid ni dran pa yin pa'i phyir/ de tsam gyis 'bras bu nyid ni 'dod pa yin no/ /dmigs pa la mi brten par dran pa kho nas 'dod pa 'jug pa yin te/ dmigs pa mtshungs pa 'di'i byed pa por nges pa ma yin te/ nye bar dmigs pa'i rjes su 'brangs nas dran pa'i bdag nyid du mtshungs par 'dod pa yin no/ /des na byed pa po yod pa yin te/ de ni don gnyis par brjod pa yin no/ /nye bar dmigs pa de yang shu kra dang rak+ta la sogs pa 'byung ba'i 'bras bu ni de yon tan yin nam/ rang dbang yang rung ste thal ches pa ma yin no/ /'byung ba rnams nyid rang bzhin kho nas gcig la gcig nyid kyis tha dad pa yin pa'i phyir gcig gi ngo bo nyid la yongs su 'gyur ba'i khyad par gyis/ de rnams las sems pa can du 'gyur ba yin la/ yongs su gyur pa'i dbye ba las nus pa dang mngon par gsal ba dang rjes su 'dzin pa gang yin pa de rnams kho na las 'byung ba'i blo yin gyi/ blo gzhan sngon du 'gro ba can ni ma yin no/ /'byung ba'i bskyed bya ba yang dbang po dang bcas pa'i 'byung ba'i bskyed bya ma yin nam/ gzhan ni bskyed bya ma yin no/ /de lta yin na nur nur po la sogs pa rnams la de med pa'i phyir mi 'byung ngo / /med na mngal du 'phel bar mi 'gyur ro/ /'on te dbang po med par yang sems pa can tsam du skye ba yin no/ /yin na yang gzugs la sogs pa'i ngo bo nyid yin te/ dbang po la gzugs 'dzin par so sor nges pa yin zhes brjod pa'i phyir ro/ /ma yin te sems tsam ni sems tsam rtsom par byed pa ma mthong ba'i phyir ro/ /gnyid stug pos non pa dang brgyal ba la sogs pa'i dus su yang sems pa can rnam par chad pas bdag ni sems dang mi ldan par rab tu gnyid log pa yin no zhes dran pa yin te/ gnyid log par rtsom pa'i sems kyis de'i dus kyi rang gi ngo bo rig pas dus phyi ma la dngos po mi rig pa'i phyir/ gzugs la sogs pa rtogs pa kho na blo yin pa'i phyir ro/ /gzhan du na blo gzhan las skyes pa 'byung ba dang sems pa can ma yin par thal bar 'gyur ba'i phyir ro/ / nur nur po la sogs pa rnams la rnam shes yod do zhes bya ba de yang gya tshom du smra ba yin te/ dbang po ma dod pa'i phyir de la don rtogs pa med pa yin la/ don rtogs pa las gzhan pa'i ngo bo ni/ shes pa yin par mi rigs so/ /des na brgyal sogs na yang 'di/ /yod pa nyid du mi 'thad do/ /'di la smras pa ma dang pa'i sems las nur nur po la sogs pa'i lus su rim gyis yongs su gyur pa las sems nye bar dmigs bzhin pa na de kho na bzhin du khas blang bar 'os pa yin gyi/ sems gzhan nam bdag ni ma yin te tshad ma med pa'i phyir ro/ /bdag go zhes kyang rig pa'i dran pa yin gyi 'di nyid kho na rig pa ni ma yin te/ rta'o zhes rnam par rtog pa na ba glang mthong na 'gal ba dang rnam par rtog pa med pa nyid dag tu mi srid pa'i phyir ro/ /nur nur po la sogs pa'i gnas skabs na rig pa med na khyed kyi ji ltar de dmigs pa yin zhe na yang de nyid dmigs pa yod pa yin te/ de kho na las skye ba yin pa'i phyir ro/ /de yang snga rol na yod pa yin no zhe na/ yang lus med pa la bdag go zhes pa yod par gyur pa yin no zhes bya ba 'di la ni tshad ma gang yang med do/ /byung bar gyur pa rnams kyi sems pa can la rang dbang yin na/ phan tshun yan lag can dang yan lag can nyid kyis mi dbye bar mi 'gyur ba ma yin nam/ sems pa can ni gcig kho na yin gyi cig shos ma yin pa ni ma yin te/ bye brag med pa'i phyir ro/ /sems pa can nyid la ni thams cad kyi phan tshun 'brel pa ma yin te/ sems pa can gcig dang 'brel pa las gzhan gang yang rung ba'i yan lag yin par ni 'gal ba yin no/ /'di la zer ba ni byung bar gyur pa'i khyad par ram/ de yongs su gyur pa'i khyad par yang sems pa can las yin no/ /'di ni bdag gi lus so zhes bya ba la sogs pa la tha mi dad pa 'di'i shes pa'i bdag tu shes pa ni/ rang la dmigs pa ma yin nam/ bdag gi bdag nyid ces bya ba ni sgra gcan gyi mgo bo zhes bya ba bzhin du brtags pa pa yin no/ /bdag gzhan la dmigs pa yin na yang thams cad du ldog pa grub pa ma yin no/ /'dis ni/ bdag tu 'dzin pa'i rnam shes ni/ rang nyid bdag tu 'thad pa yin/ /zhes bya ba bstan pa yin no/ /re zhig de ltar/ bdag tu shes pa'i rnam shes nyid/ /ces bya ba'i lan blan pa yin no/ /gang gi tshe yang rig pa dang ldan pa'i rig pa gcig nyid rnam par 'jog par byed pa skyes pa de'i tshe/ bdag lkog tu ma gyur pa kho na yin gyi gzung bya ni ma yin no/ /ji skad du/ lkog gyur min pa mngon sum yin/ zhes smos te/ ji ltar rig pa ni rig pa gzhan la mi ltos pas lkog tu ma gyur pa yin pa de bzhin du/ shes pa la gzhan mi ltos pas bdag mngon sum yin te/ de bstan pa ni rang nyid rig byar grub pa yin zhes bya ba'o/ /bdag shes pa 'di ni bdag mthong bar 'gyur ba yin no zhes nye bar dgod pa yin te/ bdag bdag ces ni ma yin no/ /sngon por nyams su myong ba yod na gsum car lkog tu ma gyur pa yin gyi bdag nyams su myong ba la ni shes pa gzhan cung zad kyang yod pa ma yin zhes bya ba'i don to/ /gang gi tshe bdag gi shes pa yang ma skyes na don nyams su myong ba gsum char yang lkog tu ma gyur ba yin pa de'i tshe rnal 'byor pa'i gnas skabs dang / shi ba dang brgyal ba la sogs pa rnams la de ji ltar yin zhe na yang bden te gang gi tshe sngar mthong ba ngo shes pa'i stobs kyis bdag rtag pa yin pa de'i tshe don nyams su myong ba med kyang bdag shes pa yod na 'gyur ba kho na yin no/ /gnas skabs 'di res 'ga' gnyid ma log pa la yang yod pa yin te/ don rig pa ma yin zhing bdag tu 'dzin pa ma yin la/ gnyid stug pos non pa yang ma yin par yang ngo / /de lta na yang bdag ni rang nyid gsal ba yin te/ de 'di ni tshangs pa'i gnas skabs yin gyi de la ni byed pa po nyid dam za ba po nyid du rtogs pa yang ma yin la/ de dag tsam ni zhing shes pa'i gnas skabs byed pa po nyid la sogs pa mi bden pa yang ma yin te/ bya ba rgyu mtshan yin pa'i phyir bya ba med na tshangs pa'i gnas skabs la med pa yin gyi mi bden pa'i phyir med pa ni ma yin te/ gnod pa can med pa'i phyir ro/ /de ni de bzhin du/ res 'ga' bdag tu shes pas dmigs/ / res 'ga' don rig pa po nyid kyis lkog tu ma gyur pa yin zhing res 'ga' don nyams su myong ba dang bdag tu shes pa la yang ma ltos par rtag par bdag nyid kyi rang gi ngo bo la gnas pa kho na yin zhes bya ba'i gnas skabs gsum char bdag gi yin no/ /de yang gnas skabs gsum pa 'di ni lus kyi gnas skabs la mi dgos pa'i phyir 'grel pa mdzad pa la sogs pas ma spros te/ las dang 'brel pa mi shes pa rnam gyi blo'i dbye ba skye bar byed pa ma yin zhes bya ba'i rigs pas so/ /'di skad bstan par 'gyur te/ nyin zhag gzhan la mthong ba rnams la nyin zhag phyi ma la bdag 'di ltar mthong bar gyur to zhes bya bar 'gyur ba 'di la bdag ces bya ba'i dngos po ni sngon po'o zhes sngon po la sogs pa rnams kyi mthong ba po brjod pa yin gyi/ lus sam dbang po ni ma yin la/ de bzhin du bsdu ba dang dbye ba la sogs pa'i rnam par rtog pa mi rigs pas bdag gi lus sam dbang po zhes tha dad par snang ba ni bdag gi lus sam zhes bya ba bzhin du/ gnas skabs kyi dbye ba'i rgyu mtshan nyid la mi brten pa'i phyir ro/ /shes pa ni bdag gi gnas skabs ni bdag ces bya ba yin pa de bzhin du lus kyi gnas skabs gzhan gyi ngo bo ni lus yin zhes bya bar rigs te/ ji skad du bdag gi zhes bya ba'i don gtso bo 'dis/ bdag la gzhan du shes pa min/ /des 'di dbye ba'i rgyur 'gyur ro/ /zhes smos so/ /bdag gi bdag ni de lta ma yin no zhes zer ba ni/ dbye ba shes pa'i rgyu can yin/ / zhes bya ba ste/ shes pa nyid mthong ba po yang ma yin la/ khar rtsang dang deng gi dus kyi dbye ba la yang 'di mthong bar 'gyur ba yin no zhes tha mi dad par snang ba'i phyir te/ bdag nyid 'di ni mngon shes gyur/ /da lta'ang bdag rig byed yin pa'i/ /skad cig de ni shes pa'i yul/ / gang yin dpyad par bya ba yin/ /sngar 'jug pa yi yul la ni/ /shes gyur yin par srid pa yin/ /de ltar 'di med pa gang las/ /shes zhes bya 'di mi bden 'gyur/ /da ltar ba yi gzung bya gang / /shes zhes bya ba 'thad pa yin/ /de phyir shes gyur bden min te/ /gang las shes gyur 'di min phyir/ /rgyun ma gtogs pa'i rgyud gcig yod pa ma yin la/ shes pa nyid dang 'dra ba nyid kyang bdag tu shes pa'i yul ma yin te/ gzhan la yang thal bar 'gyur ba'i phyir ro/ /'on te shes po nyid 'dra na/ /lus gzhan rnams la'ang der 'gyur te/ /de la thams cad kyis shes na/ /bdag go zhes kyang dran par 'gyur/ /'on te tha dad pa nyid yin na rgyud gcig la yang snga ma dang phyi ma dag tha dad pa nyid kho na yin no/ /rgyud gcig la ni skyes pa yang / /skad cig la de zhes blor 'gyur/ /ji ltar lus gzhan shes pa bzhin/ /bum sogs phyi la'ang gnas pa na'o/ /skad cig gzhan re re la shes pa'am shes byar dmigs nas nyams su myong ba snga ma snga ma'i bag chags kyi dbang gis bdag ces bya ba'am/ 'di zhes bya ba'i snga ma dang phyi ma'i shes pa dang shes bya dag gcig pa nyid du nges par byed pa yin te/ sna tshogs pa nyid du ma mtshon pa'i phyir ro zhes bya bar rtogs pa ni mi rigs te/ skad cig re re la shes pa'am shes bya dag tha dad par nyams su myong ba'i phyir ro/ /'di nyid kyi phyir mthong ba la yang mthong ba yin na/ tha dad pa'i shes pa nyams su myong bar byed pa ni bag chags yin no/ / de nyid kyis na yul de la sngar mthong ba ngo shes pa ma yin te/ yul gang yin pa nyams su myong ba ma yin pa'i phyir/ bag chags ni 'khrul pa'i rgyu mtshan yin la/ shes pa po la ni sngar mthong ba ngo shes pa la yang bag chags byed pa por 'os pa ma yin no/ /ma yin te/ de min la de zhes shes pa/ /'di ni 'khrul pa'i rgyu yin te/ /bdag ces ba nyid sngon 'gro ba'i/ /nyams myong bag chags rgyu yin la/ /de yang bag chags kyi rgyu yin zhes bya ba de ltar bdag ces pa'i shes pa rnams sam/ thog ma med pa'i bag chags kyi rgyu dang 'bras bu nyid yin no/ / bdag ces bya ba'i rnam par rtog pa la sngon po'i rnam par rtog pa bzhin du nyams su myong ba dbang byed pa ma yin nam/ dbang byed pa ma yin na gtso bo la sogs pa'i rnam par rtog pa bzhin du bag chags tsam 'byung ba nyid kyis rigs pa ma yin pa nyid du thal par 'gyur ba'i phyir ro/ / bdag gi bdag ces bya pa'i shes pa la yang bdag ces bya ba dang tha dad pa yang shes pa'i rgyu can yin zhes bstan pa yin no/ /de'i phyir rang rig pa'i shes pa yin na bdag go zhes bya ba 'byung ba yin gyi/ sngon po la sogs pa rig pa'i gzhan rig yin pa la ni ma yin no/ / de'i phyir bdag go zhes pa'i shes pa ni rang rig pa'i bya ba'i rjes su 'brang ba yin no/ /de'i skye mched nyid kyis nye bar 'brel ba yin la/ lus dang dbang po'i sgrub byed nyid kyis rang rig pa ma yin pa la bdag go zhes nye bar btags pa yin no/ /bdag gi lus zhes bya ba ni bzlog pa ste gtso bo yin te/ rang rig pa dang cig shos kyis phye ba yin pa'i phyir ro/ /bdag gi shes pa zhes bya ba yang shes pa'i rgyun yin te de'i skad cig dang 'brel pa can de yin par brjod pa yin no/ /bdag ni 'di mthong bar gyur pa yin no zhes bya ba yang mthong ba'i gzhi la bdag ces pa nye bar bkod pa yin gyi gzhi gzhan la ni ma yin no/ /snang ba la ni snang ba kho na byed pa po yin gyi/ gzhan ni ma yin no/ /de'i phyir mthong ba'i bdag nyid kho na bdag yin gyi 'das pa dang da ltar ba'i dus kyi rjes su 'gro ba'i gcig pu yin par ni mi rigs te/ skad cig re re la snang ba dang mthong ba dag tha dad par nyams su myong ba'i phyir ro/ /de bdag go de 'di'i zhes dbye ba med par yang rtogs pa yin no zhe na/ bden te 'di dbye ba med par mngon pa nga rgyal ba yin te/ chang dang phyi rol du yang dmigs pa dang ma dmigs par dbye ba ma yin pa'i phyir dang 'dra ba gzhan 'byung ba'i phyir/ rnam par rtog pa'i bag chags bslad pas zhes bstan pa ni rtag tu yod pa ste/ dmigs pa'i nye bar dmigs pa zhes bya ba 'dis rang rig pa'i shes par bya ba'i rjes su 'jug pa ni/ bdag go zhes pa'i shes pa bstan pa yin no/ /de'i tshe yang shes pa thams cad du yod na de'i thams cad du 'byung ba yin no/ /de'i phyir de nyid da ltar yang rjes su 'jug pa'i phyir/ de yod par ni sngar gyi bdag kho na yin no zhes dogs pa dang srid par byed pa yin no/ /des te de lta bu'i rnam pa des bslus pa ni skad cig gi bde pas nyams su myong ba yang mchog tu mi 'dzin te thams cad du 'byung ba'i shes pa la ji srid shes pa yod par de'i bya ba dmigs nas sngar gyi yang bdag kho na yin no zhes 'khrul pas de nyid srid par byed do zhes bya ba'i don to/ /de kho na skad cig re re la mthong ba'i dbye ba la snang ba'i dbye ba nyams su myong ba yin yang 'dra ba gzhan byung ba de 'di kho na yin no zhes 'khrul pas tha dad par mi 'dzin to zhes bya ba snga ma bzhin no/ /mthong ba de nyid snang ba yang yin par 'khrul pas bdag ni 'di mthong bar gyur te zhes rlom sems par bstan pa yin no/ /yang na bdag ces bya ba'i shes pa 'di lus la sogs pa 'dus pa nye bar dmigs bzhin par 'byung ba yin na de la dmigs pa yin no/ /de ltar yang don rig pa gzhan sgrub pa ma yin pa ni bdag gi ngo bor brjod do/ /de yang skad cig re re la gzhan dang gzhan yin te/ brgyal ba la sogs pa'i gnas skabs na ldog pa yin pa'i phyir/ /'dzin par byed pa yod pa las rig pa ma yin pa yang ma yin te/ lkog tu ma gyur pa nyid du khas len pa'i phyir ro/ /brgyal ba dang bral ba na lus 'ba' zhig kho na las 'byung bar dmigs pa yin te/ rig pa ma yin pa'i bdag nam mkha' dang mtshungs par gyur nas gnas pa yin par ni mi rigs te/ bdag ni gsal zhing 'bar ba nyid yin zhes zer ba'i phyir te/ bdag ni 'bar ba yang dag par gsal ba yin pa'i phyir de kho na rig pa yin te/ rtogs par byed pa nyid kyis 'brel pa yin la/ de yi ngo bo gtso yang lus la bdag / ces pa 'byung ba yin no/ /'brel pa'i rgyu mtshan can tha mi dad pa'i blo 'khrul pa yin la/ 'dus pa nyid la dmigs pa'i phyir gtso bo yin no/ /bdag gi zhes bya ba ni rig pa'i bdag nyid la'am 'dus pa la ltos nas tha dad pa yin du zin kyang de bzhin du bdag grub pa ni ma yin la/ bdag ces bya ba rig pa las gzhan bdag gi gnas skabs gsum dmigs pa ni ma yin te/ 'gal ba'i phyir ro/ /skad cig par yang rig pa ni gcig nyid du rjes su 'brel pa'i don byed pa la mngon sum du dmigs pa yin te/ ba lang khro bo mthong ba na khu yu la ba glang nyid du rjes su sbyor ba bzhin du rnam par 'jog par byed pa yin gyi rang gi ngo bo la ni ma yin te/ mngon gsum dang 'gal ba'i phyir ro/ /skyes pa nas brtsams nas 'chi ba'i bar du rjes su 'jug pas bdag gcig pu yin yang / snga rol du dang phyis kyang de yod pa la ni tshad ma cung zad kyang yod pa ma yin no/ /skye ba dran pa la sogs pa mthong ba yin na de nyid yin gyi/ de bzhin du gzhan ni ma yin no/ /smras pa bdag ces bya ba 'dis de 'dzin pa ni yi ge ga la sogs pa bzhin du yul ma nges pa yin no/ /de'i phyir khyab bdag dang / dus nges pa med pa nyid kyis brtag pa yin no/ / ji skad du/ ma bcad pa yin yod pa can/ /dngos gang yul dang dus dag las/ de bzhin du yod pa yin no zhes de dag tsam du bstan par nus kyi/ skyes pa dang 'jig pa zhes ni ma yin no/ /mtho ris 'dod pas sbyin sreg gyis shig ces bya'i/ rgyu ni 'jig rten pha rol gyi 'bras bu dang 'brel pa can du 'phangs pa yin la/ de bzhin du rnyings pa med pa zhes bya ba ni ma rnyings pa'o zhes don du smra ba yin no/ /bdag gi gzugs lta bu'i lus kyi chos sam/ cha shas can ni ma yin te/ de ltar ma rtogs pa'i phyir ro/ /de'i phyir de zhig pa yin na yang nam mkha' bzhin du 'jig pa ma yin no/ /ba lang dang rta zhes bya ba'i rnam par rtog pa nges pa can ma yin par snang ba yang nges pa can mthong ba'i stobs kyis 'byung ba yin gyi/ de lta bu ma yin pa'i phyir khyab bdag ni ma yin no/ /de lta na yul sna tshogs pa la de la nges pa'i sgra dmigs pa ni rjes su 'brel pa las rtag pa nyid du shes par gyur gyi khyab bdag nyid du ni ma yin no/ /bum pa la sogs pa mthong ba bzhin du yi ge ga la sogs pa mthong ba yul nges pa can kho na yin te/ cha shas med pa nyid kyis 'jig par byed pa med pa'i phyir rjes su 'brel bas rtag pa nyid yin na/ khyab bdag nyid yin no/ /yul nges pa can yang ji ltar yang gsal byed 'khrul pa las byung ba 'khrul pa yin no zhe na/ cha shas dang bcas pa'i thob la sogs pa yod na 'jig pa yin zhes bya ba ma mthong ba'i phyir 'di ci las shes/ cha shas med pa la yang khyad par med do/ /gyo mo ro zhe na/ 'di la yang de dang bral ba'i yul yod do/ /yul ni ma nges pa yin no zhe na/ gyo mo la yang bum pa la rtsom pa ma yin pa can bzhin du yin pa'i phyir khyad par mthong ba ma yin no/ /sngar mthong ba ngo shes pa yang de dang gcig par 'dzin pa'i don byed pa'i rgyu mtshan yin par brjod do/ / 'dis ni lkog tu ma gyur pa rig par dmigs nas bdag ces bya ba 'byung bas yul nges pa can la sogs pa dang / bdag med pa ma yin par lung dang 'brel pa can gyi lung las brtag pa la sogs pa rigs pa yang bshad pa yin la/ skyes bus byas pa ma yin pa nyid la yang bstan pa yin no/ /de ni de bzhin du lkog tu ma gyur pa rig pa por nas/ bdag tu byed pa'i yul gzhan ston pa yin zhes pa'i thabs las byung ba gzhan 'phen ba'i gnas skabs gzhan yin gyi/ gal te thabs nyid 'geg par byed na thabs med na thabs las byung ba grub par mi nus pa ni ma yin te/ de thabs yongs su 'dor bar byed pa ni ma yin no bdag tu shes pa kho na/ bdag rig pa bdag ma yin nam/ 'di las nyid yod pa yang ma yin te/ mngon sum yin pa'i phyir rang rig par bya ba de yod ces bya ba'i tshig las so/ /de ni gzhan gyis mthong bar mi nus te/ bdag gis mthong ba yin no zhe na/ ma yin te 'di ni bum pa bzhin du las nyid khas len pa'i phyir dang / byed pa po nyid mngon sum yin pa'i phyir ro/ /bdag tu shes pa'i shes bya ni/ /rang nyid bdag tu 'thad pa yin/ /zhes bya ba yang / 'di shes pa yang yin la bum pa la sogs pa rig pa can yang yin pa'i phyir rig pa'o/ /de ni de lta bu'i bdag tu 'thad pa yin no/ /de sus shes she na/ bdag rang nyid kyi shes bya yin te/ rang rig par bya ba bdag gi mngon sum yin zhes bya ba'i don to/ /gang zhig dang po yin pa las kyi shes pa ni phyi rol du gtso bo yin te/ ji ltar yang 'di la sgro 'dogs pa'i yul du rnam par gnas pa yin la/ de 'di dang mngon par 'brel bas 'di las byed pa po dam pa yin te/ rang nyid rang gis shes zhes bya ba'i tshig yin no/ /gzhan du na dam pa zhes bstan par mi 'gyur te/ phyi rol gyi las byed pa po nyid dang mtshan nyid mi mthun pa nyid 'di ni dam pa nyid yin no/ /de ltar yang shes pa po las gzhan pa'i yul yang der mi 'gyur te/ rang bzhin gyis shes pa po yin pa'i phyir 'di'i las nyid gzhan rang bzhin gyis yod pa ma yin pa ni brtags pa'i dngos po las gzhan zhes bya ba'i don to/ /shes pa por ci las 'gyur ba yin zhe na yang / yang / bdag tu shes pa'i rnam shes ni/ /thams cad nyid du shes par bya/ /zhes smos pa'o/ /thams cad ces smos pas shes pa po gzung bar yin no zhe na/ ma yin te mi srid pa'i phyir ro/ /de'i phyir gzhan thams cad kho na zhes bya ba yang mi 'gal pa'i phyir ro/ /shes par bya ba zhes bya ba ni khyad par yin gyi bdag 'di shes par bya ba ni ma yin te/ shes pa po yin pa'i phyir ro/ /bdag 'di zhes bya ba'i shes pa de yang bdag 'di shes par gyur zhes rjes su sbyor bzhin pa'i rnam par shes pas 'byed pa yin la/ rnam shes 'di sngar mthong ba ni ma yin te/ gang gis dran par byed pa'am/ /rjes su sbyor bar byed par 'gyur/ /dran dang sngar mthong ngo shes dag /bag chags dbang gis byung ba nyid/ /shes pa po yi yul gzhan la/ /sngar mthong ngo shes rnyed par dka'/ / de lta yin na rtar rnam par rtog par byed pa na ba glang mthong ba ji ltar yin/ bdag tu shes pa med pa'i phyir ro/ /rtog pa 'di rnams so sor mi rigs pa kho na skye ba dang 'jig pa ni ma yin no/ /rtag pa'i phyir yod pa yin no zhe na/ ma yin te shes pa las gzhan ma dmigs pa'i phyir ro/ /bdag shes par gyur pa yin no zhes bdag tu shes pa'i shes pa po nyid rjes su sbyor ba de la yang yin no zhe na/ ma yin te shes pa las gzhan pa'i ma dmigs pas gnod pa'i phyir ro/ /shes pa nyid bdag ni ma yin te/ khas mi len pa'i phyir dang / rang rig pa nyid kyis lkog tu gyur pa nyid khas mi len pa'i phyir ro/ /ka ba la yang de rig pa las gzhan du 'dzin pa por nyams su myong ba ma yin la/ de ltar rtog pa yin na mthong ba nyams pa dang ma mthong ba'i rtog pa dang / rig pa 'gal bar yang 'gyur ro/ /'on te ka ba la sogs pa'i ngo bos dmigs bya med pa nyid du brjod pa yin na/ rig par mthong ba'i phyir de dang 'gal bar yang thal bar 'gyur ro/ /ka ba rig pa'i bdag nyid can gyi rnam shes ni rig pa ma yin pa'i bdag nyid dmigs bya med pa nyid de rig pa dang 'gal ba kho nar 'gyur ro zhes bya ba'i don to/ /shes pa nyid shes pa po yin par ni bden mod kyi/ 'ba' zhig po ni rtag pa yin te/ de'i phyir bdag tu byed pa'i yul yang bdag tu 'gyur ro/ /ka ba'i shes pa po nyid ka bar nyams su myong ba'i sgo nas de zhes bya ba'am/ ka ba zhes bya bar ji ltar rnam par rtog par byed pa de bzhin du/ shes pa po nyid kyis nyams su myong ba las bdag go ces 'jug pa yin te/ ji ltar goms pa'i las yin gyi/ nyams su myong ba med pa ni ma yin no/ /des 'on te shes pa po nyid 'dra na/ lus gzhan rnams la'ang der 'gyur te/ de la thams cad kyis shes na/ /bdag po zhes kyang dran par 'gyur/ /zhes bya ba 'dis gsal ba yin no/ /shes pa po nyid la sogs pa 'dra ba la sogs pa bdag tu byed pa'i rgyu mtshan ma yin te/ 'on kyang bdag rig pa rgyu mtshan yin 'on te bdag shes pa por gyur pa zhes bya bas snga ma dang phyi ma'i shes pa po dag cha gcig pa yin no zhe na/ de gcig pa nyid yin na bum pa'i shes pa'i dus su de'i gyo mo shes par gyur la/ de shes pa'i dus su yang bum pa shes par 'gyur ro/ /shes pa gcig nyid kyang gnas skabs tha dad pa'i phyir skyon med do zhe na de lta yin na nyams su myong ba tha dad pa ni gnas skabs tha dad pas rjes su byed pa yin gyi/ de gcig pa nyid rjes su byed pa ni ma yin no/ /de'i gnas skabs yin no zhe na/ ma yin te de las 'gyur ba med pa'i phyir la/ 'gyur ba yin na yang gnas skabs kho nar 'gyur ro/ /snga ma'i gnas skabs su shi ba phyis yod par ngo shes pa yin no zhe na/ bden te/ bregs pa'i skra dang sen mo la sogs pa bzhin du shi ba yang ngo shes pa ni 'khrul pa yin no/ /gnod pa can med na ji ltar 'khrul pa yin/ shi ba nyid du shes pa kho na gnod pa can yin no/ /'dis ni gcig pu byed pa po dang za ba po nyid du bshad pa yin no/ /gnas skabs tha dad pa dang tha mi dad pa dag gis byed pa dang / za ba dag gis tha dad pa'am tha mi dad pa yin gyi gnas skabs thams cad pa'am/ nam mkha'i ni ma yin te/ /de dag la gnas skabs thams cad pa ni rgyu yin gyi nam mkha'i ni ma yin no zhes bya ba 'di su'i rigs pa yin/ ji skad du/ tshangs pa shes pas// ji ltar dngos de rgyu yin pa/ /de ltar de nyid gang gi tshe/ /rgyu min de ni gang gi rgyur/ /'dod la rgyu ma yin mi 'dod/ /ces gang smras ba'o/ /'jig rten pa yang gnas skabs kho na yin par smra ba ni/ gnas skabs gzhan las byung ba'i bdag gi dge ba dang mi dge ba'i 'bras bu yin no zhes shes nas kyang 'gro ba rnams 'jug pa dang 'dor ba yang mthong ba yin no/ /gang yang sems pa can dang yod pa'i rdzas nyid ni gnas skabs tha dad kyang dbye ba ma yin pa'i phyir/ gnas skabs thams cad par 'gyur ba yin la/ bde ba dang sdug bsngal ba la sogs pa'i gnas skabs kyang mi rnams 'gro yang rung ba na/ bdag gi sems pa can gyi rdzas yod pa la sogs pa'i ngo bo grol ba ma yin no zhes bya ba gang yin pa de yang snga ma dang phyi ma'i gnas skabs tha dad pa la/ de mi dad pa'i sems pa can la sogs pa'i bye brag las mi rigs so/ /'dis ni tha dad pa la yang rgyu nyid du bstan pa yin te/ gnas skabs rnams kyi med pa la sogs pa bzhin du/ rgyu nyid du brjod pa yin no/ /'on te gnas skabs nyid snga ma dang phyi ma'i dus rjes su sbyor bar byed pa yin na/ de'i tshe 'di med pa yin na ji ltar rjes su sbyor bar byed/ shi ba la rjes su sbyor bar byed pa yin na/ bregs pa'i skra la rjes su sbyor ba bzhin du 'khrul pa yin no/ /nang dang phyi yang skad cig re re la tha dad pa yin na de nyid la rjes su sbyor ba ni 'khrul pa yin na ji ltar 'jug pa yin/ rab tu grub pa nyid med na tha snyad thams cad mi 'dod pa yin te/ ther zug tu gnas pa'i rtag pa gcig pu 'dod pa dang / 'brel pa can mthong ba dang snang bzhin pa ni tha snyad kyi rgyu mtshan du 'dod pa ma yin no/ /rgyun ni rgyu mtshan yin no zhe na/ rgyun yin yang de ni snga ma nyid kyis rjes su sbyor ba med na ji ltar tha snyad kyi rgyu mtshan yin/ bdag dang 'di zhes bya ba yang rjes su sbyor ba yin na tha snyad kyi yan lag yin par ni bden te/ de gcig pu 'dzin pa skyed par byed pa 'ba' zhig ni de mi byed par rnam par gcod par byed pa'i ngo bos yin la/ des na 'dzin bzhin pa ni tha snyad kyi rgyu mtshan yin par ni/ de mthong ba ni mthong rnams la/ /rig pa'i nus pas byung ba yin/ /dran las byung ba 'dod pa las/ /tha snyad 'jug par 'gyur ba yin/ / zhes bya bas bstan pa yin no/ /'dis ni bdag ces te gcig tu 'dzin par nges pa ni byed pa po dang za ba por 'gyur gyi cig shos ni ma yin no zhes rnam par dbye ba las/ las byas pa yin na byed pa po zhig pa yin la/ byas pa'i las kyi byed pa po med na 'bras bu ster ba'i phyir ma byas pa'i las la za ba po 'bras bu dang ldan pa 'ongs pa yin no zhes bya ba'i skyon bsal ba yin la/ byas pa'i las la ni 'ga' yang zhig pa ma yin te/ bdag tu shes pa'i yul sems kyi rgyud mi 'chad pa'i chos can yin pa'i phyir ro/ /gnyid log pa dang brgyal ba la sogs pa'i dus na tshang pa yang skye ba'i phyir/ za ba po'i gzhan nyid ni bdag tu mi byed pa'i yul 'bras bu yin na ni 'gyur gyi/ snga ma dang phyi ma'i sems kyi skad cig dag la ni de yod pa ni ma yin no/ /skad cig ma tha dad pa'i skyon yod do zhe na ni/ gnas skabs tha dad pa yin yang gnas skabs pa ni ma yin no nam mkha' bzhin du byed pa po'am/ za ba po ni gnas skabs kyi sgo nas de nyid byed pa ni ma yin la/ byed pa po dang za ba po nyid dag skyes bu'i gnas skabs la brten pa ni ma yin no/ /des na gnas skabs dang ldan pa de nyid kyi phyir byed pa po kho na 'bras bu thob pa yin no zhe na/ 'di la gnas skabs tha dad pa'i rjes su byed pa'i 'bras bu ni gnas skabs can las 'gyur ba ma yin te/ gzhan du na nam mkha' las kyang 'gyur ro zhes bstan pa yin no/ /de'i gnas skabs yin no zhe na/ khyad par med na nam mkha' las kyang 'gyur ro/ / de dang gcig par tha snyad 'dogs pa'i rgyu mtshan ni gnas skabs can yin gyi nam mkha' ni ma yin no zhe na/ bden mod kyi de gcig tu 'dzin pa kho na de mi byed par rnam par gcod pa'i rgyu mtshan med pa'i phyir ji ltar byed pa po nyid yin/ de gcig tu tha snyad 'dogs pa grub pa la gnas skabs can ni grub pa la nye bar gnas pa yin na/ dgos pa med pa ci'i phyir skyong ba yin/ de'i phyir 'bras bu dang rgyu nyid du ma rgyud gcig tu byas pa zhig par smra ba ni sna tshogs pa nyid ma bor na/ de'i skyon yang ma bor ba gsal ba yin no/ /rgyud gzhan gyis byas pa'i 'bras bu de las gzhan pas zos pa yin na/ byas pa zhig pa la sogs par 'gyur gyi de nyid kyi yin na ni zhig pa ma yin no/ /'bras bu dang rgyu'i rgyun gyi yul la de nyid kyi tha snyad 'di 'jig rten du mthong ba yin no/ /de'i phyir rgyu la sogs pa yod pa las byed pa dang za ba la sogs pa ma nges pa yin par smra ba po ni klan ka btsal bya ma yin no/ /de'i phyir/ 'jig rten pha rol khas len kyang / /rnam rig tsam nyid bdag smra bas/ /shes rnams skad cig pa nyid phyir/ /byed po za po gzhan nyid 'gyur/ /zhes bya ba ni mi bden pa yin no/ /gang gi phyir de kho na nyid rig pa po rnams skad cig ma'i dbye ba la dpyod par byed pa yin gyi 'jig rten ni rgyu med pa'i phyir/ rnam par dpyod par byed pa ma yin no/ /stobs dang stobs ma yin pa la sogs pa grub pa'i don du de kho na nyid shes pa rnams/ rnam par dpyod par byed pa yin la/ 'jig rten ni de mngon sum gyis mthong yang dgos pa med pa'i phyir dang / 'dra ba gzhan byung ba'i phyir/ /don byed pa don du ni gnyer ba ni 'di'o/ /bdag go zhes de ltar nges par byed pa yin no/ /de bzhin du nges pa dang ldan pa yang 'jug pa kho na yin no/ /de'i phyir bdag med par smra ba'i phyogs la ni/ /bdag shi'i 'og tu 'bras bdag gir/ /mi 'gyur na yang gzhan gyir 'gyur/ /zhes ni sngar nyid shes pa yin/ /de phyir 'jug par mi 'gyur yin/ /zhes bya ba ni ngan par smra ba yin te/ /rig par bya ba thams cad mkhyen pa ni nyes pa ma lus pa zad pa ni gzhan ni sdug bsngal btsal bar bzhed pa kho nas 'jug pa'i phyir/ sems 'jig rten pha rol pa yin pa'i phyogs la thams cad kha na ma tho ba med pa yin no/ /sems de nyid kho na 'ba' zhig skye ba'i dang por lus tsam las sam/ pha'i sems las byung bar mthong ba yin gyi skye ba snga ma'i sems las ma yin zhing / 'chi ba'i sems bzhin du 'byung bar 'gyur ba'i sems gzhan yang ma yin no snyam du sems pa la/ skye ba yongs su len pa na/ /'byung rngub dbang po blo dag ni/ /rang gi rigs la ltos med can/ /lus nyid 'ba' zhig las skye min/ /ha cang thal phyir zhes bya ba smos te/ dbugs 'byung ba la sogs pa dang sems dang dbang po rnams kyang brtan pa nyid dang / g.yo ba po nyid la sogs pa'i goms pas de lta de lta bur 'gyur ba yin te/ dang po skye ba la yang de bzhin de rnams su snang ba yin gyi pha la sogs pa ni de ltar goms pa ma yin te/ glen pa'i bu yang mkhas par mthong ba'i phyir ro/ /de'i skye ba 'di la goms pa yang ma yin no/ /mes po'i goms pa las byung ba yin no zhe na/ ma yin te/ byis pa rang nyid goms pa bzhin du mtshams sbyor ba 'gyur ro/ /rang gi goms pa ni ma yin te/ mngal na 'dug pa la sogs pa'i sdug bsngal mang pos brjed pa srid pa'i phyir ro/ /grub pa'i dngos po ni goms pas pogs byung ba ma yin nam/ brtan po dang g.yo ba po yang grub pa yin te/ goms pa gzhan kho na las bye brag thams cad de las byung ba nyid shes pa'i phyir bye brag med pa'i dngos po tsam ni lus las dang por grub pa yin la/ goms pas ni khyad par du gyur pa yin te/ glen pa yang goms pa las mkhas par 'gyur ro zhe na/ ma yin te glen pa rnams kyi ni goms pa dman pa las byung ba nyid yin pa'i phyir ro/ /ji ltar bum pa rdza mkhan las byung ba la med kyang phrang pa las khyad par yin la/ de bzhin du lus las byung ba la goms pa las khyad par du 'gyur ba ma yin nam/ 'on te me dang phrad pa las bum pa gzhan kho na yin na/ dbang po la sogs pa goms pa las kyang gzhan kho na yin par mtshungs so/ /mtshungs pa ma yin te/ me dang phrad pa'i snga rol gyi rdza mkhan gyi bskyed bya'i bum pa ni gzhan kho nar mthong ba yin la/ 'di la ni goms pa'i snga rol du de'i bskyed bya ma yin pa ni de'i khyad par ma yin la dngos po tsam ni nye bar dmigs pa yang ma yin no/ /rjes su dpog par byed do zhe na/ de ltar yin na goms pa kho na mthong ba la rjes su dpog par 'gyur te/ ma mthong ba la rjes su dpog pa med pa'i phyir ro/ /ut+pa la'i rtsa ba ni ba lang gi lci ba las skye ba dang / ut+pa la'i rtsa ba las kyang skye bar mthong la/ de bzhin du lus las skyes pa ni goms pa las kyang 'di skye bar 'gyur ba'i phyir 'di skye ba yin no zhes rjes su dpog par mi rigs so/ /gang gi phyir ba lang gi lci ba las skye ba'i ut+pa la'i rtsa ba dang / me las du ba ni rgyun gyi 'jug pa yin gyi/ 'di la ni skye ba'i dang po la goms pa las ma byung ba'i khyad par gang yang med do/ /du ba'i bskyed bya'i du ba bzhin du me la yang du ba yin no zhes bya ba 'di la yang goms pa'i bskyed bya'i khyad par bzhin du khyad par yin no zhe na/ de lta yin na du ba las du ba'i bskyed bya dang 'dra ba'i me rjes su dpog par mi 'gyur la/ de dang 'dra ba las de'i rjes su dpog pa ma nyams pa yin no/ /de'i bskyed bya'i yang rtsa ba yang me yin no zhe na/ 'di la yang goms pa'i bskyed bya'i khyad par 'dra ba'i rtsa ba goms pa yin pa'i phyir/ rjes su dpag pa ma nyams pa yin no/ /goms pa'i bskyed bya'i khyad par ni khyad par gzhan gyi rgyun byed pa yin pa ni me'i bskyed bya'i du ba las du ba gzhan lta bu'o/ /de'i rgyun 'jug par byed pa tsam goms pa ni ma yin la/ nur nur po la sogs pa'i lus kyi bskyed bya nyid ni khyad par de ma yin te/ du ba yang ri bo tsam gyi bskyed byar 'gyur ro/ /ri bo'i bskyed bya nyid yin na/ thams cad du thams cad la yang 'gyur ro zhe na/ 'di la yang 'byung ba'i bskyed bya nyid yin na/ bong ba la sogs pa la yang 'gyur ro/ /bye brag can rnams kyi ni sems pa can yin gyi bong ba la sogs pa ni ma yin te/ yongs su gyur pa'i khyad par yang nges par byed pa yin no zhe na/ shi ba la 'di thams cad yod pa'i phyir phal ches pa las thar pa ma yin no/ /goms pa'i bskyed bya nyid yin yang shi ba la cis mi 'gyur/ gnas pa 'phen par byed pa'i las zad pa'i phyir ro zhes 'chad par 'gyur ba'o/ /las kyi nus pa sna tshogs pa nyid bzhin du 'byung ba'i nus pa sna tshogs pa nyid du brtag pa ma yin te/ 'byung ba rnams ni dpag tu yod pa'i phyir ro/ /sa nyid la sogs pa'i nus pa sna tshogs pa de rnams kyi nus pa ma mthong bar rtag pa yin no zhe na/ ma mthong ba'i nus pa de nyid las yin pa'i phyir log par rtogs pa ma yin no/ /skye ba snga ma'i lus las skye ba 'di'i lus la dbang po la sogs pa ji ltar 'pho ba yin/ sprul gyi dug gi nus pa 'pho ba kho na bzhin du blta bar bya'o/ /sngags la sogs pa'i stobs kyis dug gzhan du 'pho ba ma yin nam/ las kyi stobs kyis 'di la yang dbang po la sogs pa gzhan du 'pho ba yin par mtshungs so/ /gang gi tshe dbang po la sogs pa 'pho ba de nyid kyi tshe sems kyang yin te/ tshogs pa gcig pa'i phyir ro/ /de'i phyir nur nur po la sogs pa rnams la rnam shes yod ces bya ba 'di yang gya tshom yin par mthun pa yin no/ /de'i tshe ni dbang po las skyes pa ma yin te/ rang yod pa'i dus su byung ba ni de las 'byung ba'i phyir ro/ / bdag go zhes bya ba byung ba ni dbang po dang bde ba la sogs pa nga rgyal dang bcas pa kho nar mthong la de kho na bzhin du rgyu zhes bya ba'i don to/ /rang dbang yod na lus med pa'i phyir nam mkha' bzhin du ji ltar sems kun rgyu ba yin zhe na/ rgyal po'i bsnyen bkur ba bzhin du re ba la gzhan dbang yin pa'i phyir rlung gis bskyod bzhin pa'i me/ gzhan du 'gro ba yod srid kyi/ /blo ni rgyur gyur lus nyid las/ /'gas kyang skyod par byed pa min/ /lus med phyir na 'di rang nyid/ /'phags nas 'gro ba'ang ma yin no/ /zhes bya ba 'di ma grub pa yin no/ /de skad du yang / bdag la chags pa dang ldan pa/ sems can gzhan gyis bkri min pa/ /bde sdug dor 'thob 'dod pas na/ /dman pa'i gnas ni yongs su len/ /zhes 'chad par 'gyur ba'o/ /ji ltar yang sad pa'i lus la dbang po la sogs pa rmi lam rmi ba'i lus la kun du rgyu bar mthong ba lta bu'o/ /de las kyang sad pa'i lus la'o/ /de bzhin du skye ba snga ma'i lus las srid pa bar ma do'i lus la'o/ /de las kyang lus 'di la yin pa'i phyir gnod par byed pa la lan gdab par dka' ba cung zad kyang med do/ /de ni rmi lam rmi ba'i lus la ni mi bden pa yin no zhe na/ ma yin te so sor snang ba la mi bden pa nyid du mi rigs pa'i phyir ro/ /phyi rol gyi mi bden pa nyid ni sad pa la yang mtshungs so/ /gnod pa can med pa ci las yin zhe na/ gnod pa zhes bya ba yang so sor snang ba tsam nyid du nges pa phyi rol ma yin pa'i so sor snang ba'i rgyu mtshan du brjod pa la/ phyi rol tu zhen pa'i gnod pa nyid ni bag chags brtan po nyid dang / brtan po ma yin pa nyid bdag gis kha cig tu 'byung la/ gzhan la ni ma yin no zhes bya ba ni rnam par dbye ba yin no/ /de'i phyir dang por skyes pa la dbang po la sogs pa ni skye ba snga ma'i lus las 'ongs pa yin na/ ji ltar 'ongs pa yin zhes bya ba ltos pa la ma mthong ba'i rtog pa la ni tshad ma med pa'i phyir/ mthong ba'i rmi lam rmi ba'i lus bzhin du srid pa bar ma do'i lus las zhes smra ba na/ snyan dngags mkhan gyis byas pa'i lus la rtsom pa dang 'jig pa'i rgyu med na/ ji ltar skye ba'am 'jig pa yin zhing ji ltar yang ma mthong ba yin zhes bya ba'i rgol ba 'di ci las yin/ bab chol du skye zhing de yang bab chol kho nar 'jig pa yin la/ phra ba'i ngo bo la sogs pa dang ldan pa zhes bya ba de ni nye bar rtog pa tsam nyid/ shes pa'i rgyu ba yod pa yang / /de la tshad ma can min 'gyur/ /de yi lus gzhan rnams la ni/ /slar yang rnam g.yeng rtog pa yin/ /zhes bya ba de ni mi rigs te/ 'di 'dra ba nyid ni rmi lam gyis lus la yang mthong ba'i phyir ro/ /sbyor ba dang / dngos gzhi dang / rjes kyi rnams la shes pa gzhan dang gzhan ma yin nam/ de la yang gnas par 'dod pa gcig med na 'bras bu 'byung ba ni rigs kyi rtog pa lta bu yin te/ bu dang tsha bo la sogs pa 'gyur bar bya ba'i rigs dang 'dra ba'i byed pa po nyid kho na sgrub par dka' ba yin te/ dus yun ring por las rnams la skye bar 'dod pa'i shes pa stong phrag rnams la de ni rigs dang 'dra ba lta bu yin no/ /'di la smras pa'i rigs dang 'dra ba bzhin du nyin gcig gi shes pa'i yul nyid kyis dbye ba mi rtogs pa'i phyir/ dka' ba nyid yin pas dam pa'i don la nges par rtogs pa yang 'bras bu nyid shes pa mi dgos pa'i phyir dang 'bras bu nyid kyi shes pa 'jig rten pa'i phyir zhes bya ba'o/ /mthong ba yang rim gyis 'byung ba dus gcig la ma tshogs pa dar sha dang po'u rna mA sa la sogs pa'i yi ge rnams sam/ bsgor ba'i cha shas la sogs pa'i rang gi dus tsam la yod pa rnams/ don gcig tu byed pa'i byed pa po nyid mthong ba yin gyi/ rigs dang 'dra ba lta bu rtogs pa ni ma yin no/ /de bzhin du dbang po la sogs pa rnams 'jig rten pha rol nyid du brjod pa ni/ sems 'jig rten pha rol po nyid yin pa'i dpe don nam/ bdag tu byed pa'i sems 'jig rten pha rol po'i yul bstan pa yin no/ /gang gi tshe ri mo dang glur blang bar bya ba la sogs pa bzhin du dbang po'i shes pa yang goms pa'i bskyed bya ni de'i bskyed bya'i khyad par yin pa'i phyir/ 'jig rten pha rol por brjod pa de'i tshe yang / goms pa las byung ba'i rjes su 'jug pa can gyi dbang po yin gyi/ de med na de bzhin du 'byung ba yang ri mo la sogs pa'i shes par 'gyur ba ma yin no/ /ji ltar dbang po de'i ngo bo ma yin pa'i 'byung ba tsam las kyang 'byung ba yin te/ sna dang lce dang mig dang pags pa dang rna ba la sogs pa dbang pa rnams ni 'byung ba rnams las bya ba'i tshig las so/ /goms pas kyang khyad par du byed pa la de bzhin du sems pa yang 'gyur ro snyam du dogs pa bzlog pa'i don du dbang po ni 'jig rten pha rol nyid du mngon par brjod pa yin no/ /dbang po 'jig rten pha rol pa ma yin zhing 'byung ba'i bskyed bya yang ma yin du zin kyang gang gis dper mi 'gyur/ 'on kyang ji skad bstan pa'i yid kyi rnam par shes par 'gyur ba'i 'gyur ba can yin pa'i phyir de'i bskyed bya yin no/ /de ltar na sems ni de 'dra ba'i sems goms pa'i bskyed bya yin te/ de'i khyad par gyi khyad par can yin pa'i phyir dbang po lta bu'o/ /de'i phyir 'jig rten pha rol la skur pa 'debs pa la gnod pa yin no/ /yang na dbang po'i rgyu nyid kyis nur nur po la sogs pa la'am/ skye ba snga ma'i yid kyi rnam par shes pa yin par rtogs pa yin gyi/ 'byung ba ni ma yin te/ ma mthong ba'i phyir ro zhes bya ba'i dgongs pas 'chad par 'gyur ba ni/ /'di 'gyur na ni de dag kyang / /'gyur ba dag tu mthong ba yin/ /yid kyi rnam par shes pa'i 'gyur bas 'gyur bar bya ba yin pa'i phyir/ de'i 'bras bu dbang po rnams yin la/ de kho nar rtogs par byed pa yin zhes bya ba'i don to/ /bdag ces bya ba'i blo ni de'i bskyed bya rnam shes kyis rtogs pa'i dbang po rnams su nges par byed pa yin gyi/ ma rtogs pa ni ma yin nam/ ma mthong ba'i sngon po la 'di sngon po'o zhes nges pa ni ma yin no/ /'on te dbang po las skyes pa'i shes pa rnams la bdag go zhes nges par byed pa de lta na yang rim gyis dbang po bskyed bya nyid du thal bar 'gyur ro/ /'on te yid kyi rnam shes tsam ni nye bar rtogs pa la sogs pa'i rnam pa can yin na/ de yang ji ltar dbang pos mthong ba'i rjes su 'brang ba ni rim gyis dbang po las skye ba kho na yin no/ /'on te bdag ces bya ba'i shes pa bdag nyid kho nar nges par byed pa yin gyi dbang po dang de'i bskyed bya'i shes pa yang ma yin no/ /ji skad du ma bor ba'i bdag nyid la 'dir 'gyur gyi gzhan la ni ma yin no zhes smos pa ni/ bdag nyid la son pa'i bdag la yod pa yin no zhes bya ba'i don to/ /gzhan yang 'dir dbang po'i shes pa bstan pa ni ka ba'i rig pa po yin gyi gzhan gyi ni ma yin te/ mngon sum dang 'gal ba'i phyir ro/ /dbang po las skyes pa de yang de'i 'og tu bdag go zhes 'byung ba yin la/ de'i rang rig pa'i bya ba'i rjes su 'brang ba yin no/ /de ltar yang / gcig dmigs pa ni nyams myong las/ /'di zhes nyams su myong ba min/ /zhes gsungs pa'o/ /dmigs pa nyams su myong ba ni bdag nyid kyis rtogs pa la de bzhin du nges pa'i yul yin gyi/ rang gi bdag nyid ni ma yin te/ de la rtog pa med pa'i phyir dang / phyi rol la yang rnam par rtog pa'i phyir dang / bdag ni sngon po shes pa yin no zhes rig pa dang gzhi mthun pa nyid kyi phyir ro/ /gzhan rig par byed pa ni bya ba yin la de'i byed pa po ni rkyen gyi brjod bya bdag go zhes bya ba yin no zhe na/ sngon po rig pa kho na de la byed pa po yin gyi gzhan ni ma yin la/ de'i yang nyams su myong ba yin na sngon por shes par 'gyur ro/ /de'i phyir de ni de la byed pa po nyid kyi bdag go zhes 'dzin pa yin no/ /de'i phyir yang ji ltar yid kyi rnam shes goms pa'i rjes su 'brang ba'i khyad par can dbang po'i bskyed bya yin gyi rang gi rigs kyi bskyed bya ni ma yin no/ /de bzhin du de'i rjes su 'brang ba'i khyad par can gyi dbang po yang 'byung ba'i bskyed bya yin gyi/ dbang po gzhan gyi bskyed byar 'gyur ba ni ma yin la/ dbang po rnams yid kyi bskyed bya nyid yin pas kyang ma yin no/ /de rnams las de'i shes pa yin pa las bdag gzhan dbang po grub pa yin no snyam du sems pa la/ dbang rnams re re la gnod kyang / /yid blo la gnod yod ma yin/ /zhes bya ba smos te/ dbang po rnams ni yid kyi bskyed bya nyid du bsgrub pas 'di 'gyur na ni zhes bya ba la sogs pas skye ba phyi ma la sgrub byed gzhan bstan pa yin no/ /re re la zhes bya ba la sogs pas ni gong du bstan pa'i sgrub byed la goms pa'i rjes su 'brang ba'i khyad par nyid/ rang gi rigs sgrub pa la ma nges pa yin par dogs pa bsal ba yin no/ /de ltar thos pa dang bsam pa la sogs pa'i shes pa dpyod pa dang sel ba dang nye bar rtogs pa la sogs pa'i ngo bo rnam pa du ma yid tsam las byung ba ni dbang po'i bya ba ma lus pa bsdus pa las yin gyi/ bya ba byed pa'i dbang po dang ldan pa ni ma yin no/ /yid kyi rgyal srid byed pa ni dbang po'i bya ba la mi gnod pa ma yin te/ /ji skad du mig gnyis btsums nas re zhig soms dang zhes gsungs pa'o/ /gang yang gang gi bya ba phul du byung ba yin na 'grib par 'gyur gyi/ de'i 'bras bu ni ma yin te/ tsha ba dang bska ba la sogs pa'i nye bar sbyor bas bad kan lta bu'o/ /'grib par 'gyur ba yang dbang po'i bya ba phul du byung ba yin na/ yid kyis shes pa bdag gir byed pa dang bcas pa yang / rang rig pa yin pa'i phyir ro/ /de nyid kyi phyir yid kyi blo bdag ces bya ba de lta bu'i bdag nyid kyi rtog pa'i ngo bo zhes bshad pa la 'gal ba med do/ /ji skad du/ nga rgyal dang bcas yid yin na/ skye ba'i rgyun ni zhi mi 'gyur/ /zhes smos pa'o/ /gzhan yang yid kyi rnam par shes pa la brten pa'i zhes bya ba la sogs pas/ dbang po rnams ni yid kyi bskyed bya yin pa nyid kyis de'i thabs ma yin pa nyid kyi phyir/ sgrub pa gzhan gyi yul nyid brjod pa yin no/ /yang na re zhig yid kyi rnam par shes pa zhes bya ba la sogs pas yid kyi goms pa'i rjes su 'brang ba'i khyad par ni dbang po las skyes pa ma yin pa nyid du brjod pa yin na/ dbang po rnams rang gi rigs kyi rjes su dpag pa la ma nges pa nyid du lan bstan pa yin no/ /bdag blo de ltar yin gzhan ni/ /de rig pa yi 'gro ba shes/ 'di de bzhin du yin nam min/ /de la bdag 'dra ga la dbang / /byed pa po dang za ba'i zhes pa ni sems pa'i ngo bo las byed pa ma yin te/ bsams nas ni lus med pa nam mkha' lta bur byed pa med pa'i phyir ji ltar byed pa yin/ sems pa'i las dang bsams pa yang las yin zhes bya ba ni grub mtha' yin pa'i phyir shes pa ste/ sems pa byin gyis brlabs pa las 'byung ba yongs su bskyod pa byung ba ni shes pa kho na yin la/ 'di sems pas byin gyis brlabs pa tsam dang / bdag pos byin gyis brlabs pa'i g.yog po dang rgyal po nye ba na gnas pa tsam gyis/ res 'ga' mngags pas g.yo bar mthong ba yin no/ / de'i phyir rang nyid mi g.yo ba yin yang / g.yo ba'i byed pa po nyid du 'gyur te/ sems pa yang de lta de ltar zhes bya ba'i bdag can gyi kun du rtog pa kho na yin gyi/ shes pa nye ba tsam gyis sam/ de'i las zin pa nyid kyis 'byung ba rnams kyis byas pa ni des byas pa ma yin te/ kun du rtogs pa'i phyir ro/ /nad bsal bar bya ba'i don tu sman byin pa las bram ze shi ba yin na/ bram ze gsod pa yin par thal bar 'gyur ba'i phyir dang / shi ba'i ro zos pa las ma zhu ba'i skyon gyis mkha' 'gro ma shi ba yin na yang / shi ba po'i skyon du thal bar 'gyur ba'i phyir ro/ de'i phyir yod pa dang med pa'i kun du rtog pa dag gis skyes bu'i 'dod pa la sbyor bar byed pa yin la/ kun du rtog pa rnams kyi dbye bas 'di las re re'i byed pa po nyid yin zhes bya ba de kho na rigs pa yin no/ /kun du rtog pa ji lta ba las rdzogs pa yin na/ gang ba nyid yin la de ma rdzogs pa na nyung ba nyid yin zhes bya ba la sogs pa yang bshad par bya'o/ /las gzhan rnams kyis gang len pa/ /rang gi rang gi bya ba yin/ /zhes bya ba la sogs pa byed pa po nyid kyi rnam pa rnams la dad par bya ba ma yin te/ las zad pa'i phyir ro/ /bdag nyid mi shes pa rnams kyis byas pa'i las ni dgod par byed pa ma yin no zhe na/ las ma zad pa la yang de'i 'dzud byed ma yin pa rnams kyis byas pa ni dgod byed ma yin pa kho na yin te 'phen byed med pa'i ral gris mi gcod pa bzhin du/ btsud pa nyid yin na 'gyur pa kho na yin pa'i phyir/ kun du rtog pas 'dzud byed kho na byed pa po nyid/ /yin pa'i 'byung rngub dbang po blo dang ni/ /zhes bya ba ni grub pa yin no/ /gzugs la sogs pa bzhin du gzhan la brten par ma dmigs pa'i phyir/ gzhan dbang ngam/ de brten nyid kyi blo ni ma yin no zhes bstan pa ni/ rten ni bkag phyir ro zhes bya ba'o/ /blo ni gzugs la sogs pa bzhin du 'byung ba la brten pa ma yin du chug kyang me la du ba bzhin du 'byung ba rnams kyi rgyu yin no snyam du sems pa las 'di snga ma yang yin la rjes su 'gro ba'i blo yang yin pa ni rgyu'i blo yin te/ de dang bral ba ni brten pa'i 'bras bu nyid kyi yin la/ gang 'di 'bras bu nyid la 'ba' zhig rten ma yin par rigs pa ni/ yon tan nyid la sogs pa la yang sbyar bar nus pa yin par bstan pa ni/ 'bras bu nyid la 'am zhes bya ba'o/ /gzhan du yin yang zhes bya ba ni de bdag nyid kyis snga ma'i rjes su 'gro ba'i blo dang bcas pa'i lus ni rten nyid yin no zhes bya bar mi rigs so/ /ma mthong ba'i phyir ro/ /ma la sogs pa'i blo las nur nur po la sogs pa 'byung ba las skyes ba'i blo ni gzhan las 'byung ba ma yin te/ thal ches pa'i phyir ro/ /ji skad du/ gang dag yod na gang gyur nyid/ /de las gzhan pa rtogs pa na/ /de rgyu nyid du thams cad la/ /rgyu rnams thug pa med par 'gyur/ /snyam du sems pa ni/ gal te pha ma'i lus la brten par zhes bya ba'o/ /ri mo la sogs pa bzhin no zhes bya ba ni de'i dpe'o/ /ri mo ni rtsig pa la brten pa can yin te/ smin pa la sogs pa'i gzugs bzhin no zhes bya ba can gyi 'bras bu yang zhes bya ba tha dad pa ni du ba gzhan las me zhes 'don par blta bar bya'i/ me gzhan las zhes bya ba ni bag med par 'don pa yin no/ /myos pa'i nus pa ni de'i bdag nyid do/ /snga na med pa zhes bya ba ni nus pa gzhan las 'byung ba ma yin zhes bya ba'i don to/ /de bzhin du blo yang lus dang phrad pa can dang 'du ba can ni 'bras bu 'am tha mi dad pa yin gyi/ sngon gyi rigs mthun pa las mi ltos pa'am rgyud gzhan du byed pa yang ma yin zhes bya ba'i dpe can la sbyor bar byed pa ni/ de bzhin dbang po dang sems pa zhes bya ba ste/ dbang po'i khyad par dang sems pa'i khyad par las kyang zhes bya ba'i don to/ /de skad du bshad pa yang zhes bya ba ni pha rol po khas len pa 'di nyid la bshad pa yin no/ /'di la ni de rnams las sems pa can dang myos pa'i nus pa bzhin du rnam par shes pa yin zhes bya ba de dag tsam la dgongs pa yin gyi lhag ma rgyas pa ni gang yang nges par brtag par bya ba yin mod kyi zhar la 'di nyid du nges par brtag pa yin pa'i phyir bzhi kho na zhes bya bar grangs nges par gzung ba yin no/ /'byung ba chen po rnams ni gzugs la sogs pa lnga la yod pa yin te/ gzhan 'jig rten gyi ma dmigs pas de skad du tha snyad du byed pa'i phyir gtso bo nyid ma yin pa la yang ma yin te/ /gtso bo gzhan la mthong ba'i phyir ro/ /gzhan du dmigs pa med pa'i phyir ro zhes bya ba ni brda las byung ba'i ming rjes su sbyor ba rnams gcig tu shes pa las gzhan du mi rtog pa'i shes pas cha shas bzhin du'am/ yon tan bzhin du yon tan can dmigs pa med pas shes pa gcig la gnod pa'i phyir ro/ /rnam par rtog pa ni de bzhin du bdag gi rjes su 'brang ba can tha dad pa la/ tha mi dad par rtogs par byed pa'i bya ba can gyi rtogs bya ni tha dad pa las gzhan yin zhes bya ba'i don to/ /'on te ro ni zhes bya ba ni reg bya'i khyad par gyi ro ste/ lce yang reg pa'i khyad par yin zhes bya ba'i don to/ /de nyid kyi phyir bzhi po kho na'o zhes bya ba'i rnam grangs bsal nas rnam par bcad par bya ba med pa'i phyir nges par gzung bar gsal bar byed pa ni/ skad cig pa nyid la sogs pa zhes bya'o/ /bzhi kho na zhes bya ba grangs ma yin nam/ de yang bsdus pa'i bsam pas ma yin la/ rgyal ba'i bsam pas kyang mi rigs par bstan pa ni/ thams cad pa lta bya zhes pa'o/ /khyed kyi yang gzugs la sog pa lnga zhes bya ba'i grangs ji ltar yin/ bsdus pa dang rgyas pa'i rnam par rtog pa srid pa med pa'i phyir ro snyam du sems pa la/ de'i phyir rten lnga'i zhes bya'o/ /nyid de nyid ces bya ba nges par gzung ba gnyis pa ni rnam par bcad par bya ba med par mi rigs par bstan pa ni/ thams cad stong par gang brjod pa/ /zhes bya ba ste/ gal te stong nyid ces bya ba ste/ 'jal byed dang gzhal bya thams cad med pa yin no/ /thams cad stong nyid ci 'dra dang / /zhes bya ba ni gzung ba dang 'dzin pa'i rnam pa dang bral ba lkog tu ma gyur pa rig pa ni/ stong pa nyid yin no zhes 'chad par 'gyur ro zhes bya ba'i don to/ /gal te gzugs la sogs pa kho na 'byung ba chen po lnga yin du zin pa de lta na yang / de dag 'dus pa'i ngo bo lus kyi bskyed bya blo yin gyi/ 'jig rten pha rol pa ni ma yin no snyam du sems pa ni/ ma dang pha'i lus kyi bya ba'o zhes gzhan du ma yin zhes bya ba ni rang dbang nyid du'o/ /gal te yang me las byung ba'i du ba ni du ba gzhan las 'ongs pa nyid du rtogs pa ma yin te/ de lta mod kyi dbang po dang blo la sogs pa'i goms pa'i bskyed bya'i khyad par las rang gi rigs la ltos pa dang bcas pa kho na'i lus las 'byung ba yin par bstan pa ni/ 'byung rngub la sogs pa zhes bya ba ste/ du ba la sogs pa ni ma yin no zhes bya ba'i don to/ /g.yo ba la sogs pa yang zhes bya ba'i g.yo ba la sogs pa ni rang goms pa las byung ba nyid de/ dam pa ma yin pa dang 'grogs pa la sogs pa la mthong ba yin na/ ji ltar ma la sogs pa'i goms pa las 'byung ba yin/ ji ltar byis pa rang nyid goms pa ni rgan po'i gnas skabs na yang dran pa yin la/ /de bzhin du ma la sogs pa'i goms pa yang rjes su dran pa yin yang skye ba snga ma'i goms pa ni/ 'du byed pa thams cad gcod par byed pa'i 'chi ba'i 'chi ba dang / mngal na gnas pa'i sdug bsngal gyis bar du bcad pa'i phyir/ mi dran pa yin zhes bya ba'i don to/ /pha dang ma smos pa ni mes po la sogs pa nye bar mtshon pa'i don du'o/ /lus nyid las skye ba ma yin par mi rigs pa ma yin nam/ ma la sogs pa'i rjes su byed pa'i sgrin po la sogs pa skye ba snga ma'i goms pa sngon du 'gro ba nyid la tshad ma med do snyam du sems pa la/ ma dang pha yi lus tsam las/ /zhes bya ba ma yin te zhes bya ba'i rjes su 'jug pa yin te/ rang goms pa las byung ba ni khyad par med la/ de med na de la yang ji ltar 'byung ba yin zhes bya ba'i don to/ /de nyid bstan pa ni gal te 'dod pa la sogs pa zhes bya ba'o/ /de yang rjes su dpag pa'i zhes bya ba ste 'bras bu dang rgyu nyid du 'jig pa'i mtshan nyid du thal bar 'gyur te/ lan cig goms pa'i bskyed bya nyid du mthong ba'i khyad par ni/ gal te de med kyang 'byung ba na rgyu med pa can du 'gyur ro/ /de lta yid yin na yang chos can yang de ltar 'gyur ba'i phyir sna tshogs pa rgyu med pa can du 'gyur ro zhes bya'i rigs pa ni rjes su dpag pa'i le'u las so zhes bya ba'i don to/ /'on te 'bras bu 'am rgyu yang rung ba cung zad khas len pa de lta yin na/ rigs pa mtshungs pa'i phyir 'di yang khas blang bya yin no zhes bstan pa ni/ gal te 'byung rngub la sogs pa/ /zhes bya ba ste/ skye ba snga ma'i goms pa khas len pa yin na/ rigs pa de la gnod par 'gyur te/ gang gi phyir 'bras bu dang rgyu nyid du yang 'gyur la/ 'jig rten pha rol med par yang mi rigs te/ 'gal ba'i phyir ro zhes bstan pa ni/ rang gi goms pa dang bral ba zhes bya ba'o/ /de lta ma yin na zhes bya ba ni gal te goms pa'i bskyed bya'i khyad par lus las kyang 'byung ba yin pa de lta na/ gzhan gyi bskyed bya nyid kyi dus su rgyu de nyid bor ba'i phyir/ de'i tshe na yang de rgyu nyid du mi 'gyur ro zhes bya ba'i don to/ /de dang de ma yin pa yod na 'byung ba'i phyir/ de'i bskyed bya nyid du go bar bya ba ma yin snyam du sems pa la/ bskyed bya skyed byed kyi zhes bya ba ste/ yod na 'byung ba tsam las ni de'i 'bras bu nyid ma yin te/ 'on kyang de med na med pa'i khyad par can yod na 'byung ba yin zhes bya ba'i don to/ /de'i phyir zhes bya ba ste nye bar bsdu ba yin te/ goms pa'i bskyed bya nyid kyi khyad par yin pa'i phyir/ rigs mthun pa'i mig la sogs sngon du 'gro ba can gyi yang mig la sogs pa yin gyi/ ma la sogs pa'i rigs mthun pa'i sngon du 'gro ba can ni ma yin no/ /'o na ci zhe na/ rang goms pa sngon du 'gro ba can gyi rigs mthun pa la sogs pa sngon du 'gro ba can yin no zhes bya ba'i don to/ /gzhan skyed bya nyid yin pa'i dus su de'i bskyed bya nyid 'dor bar byed pa mi rigs pa ma yin nam/ du ba la sogs pa yang ma mthong ba'i phyir ro/ /gang gi phyir du ba ni du ba las dang ba lang rdzi'i bum pa la yang 'byung ba ni me las kyang 'byung ba yin no/ /de bzhin du mig la sogs pa la yang de gzhan las kyang 'byung ba ni lus las kyang 'byung ba yin no snyam du sems pa ni/ du ba du ba las skye ba zhes bya ba'o/ /'di la lan ni/ du ba las byung du ba ni/ /zhes bya ba ste/ ba lang rdzi'i bum pa'i du ba ni me'i bskyed bya'i du ba'i rgyun las rigs gzhan pa yin gyi/ skye ba'i dang po'i mig la sogs pa'i khyad par rnams ni ma yin te/ de las gzhan ba'i goms pa'i bskyed bya las rigs bzhan pa yin no/ /de bzhin du ri mo la sogs pa yang bshad par bya ba'o zhes bya ba'i don to/ /de nyid ces bya ba ni chos can gyi tshig go/ /de lta bur gyur pas zhes bya ba ni/ khyad par gyi tshig ste/ chos can dang de'i khyad par yang de kho na yin la/ de lta yin dang de'i 'og tu goms pa yod na de nyid 'byung ba yin no zhes bya ba'i don to/ /goms pa'i 'bras bu yang skye ba la sogs pa'i 'byung ba'i khyad par ma yin nam/ ji ltar 'das pa'i skye ba la goms par go bar byed pa yin/ 'di la skye ba 'di'i zhes bya ba smos te/ mthong ba goms pa las byung ba'i khyad par dang ldan pa'i khyad par ni/ 'das pa'i goms par go bar byed pa yin gyi 'ga' zhig ni ma yin no zhes bya ba'i don to/ /skye ba'i dngos po la khyad par de 'ba' zhig nye bar dmigs pa ma yin nam/ ji ltar goms pa'i bskyed bya yin/ /de dang lhan cig ma dmigs na de'i bskyed bya 'gar yang rtogs pa ma yin zhes bya ba 'di la/ de goms pa dang 'brel ba la zhes bya ba smos te/ skye ba 'di la yang yul gzhan nas 'ongs pa'i mkhas pa de'i blo la sogs pa'i khyad par goms pa'i bskyed bya rnams rtogs pa yin te/ 'das pa kho na'i goms pa la ltos nas yin par bstan pa ni/ 'das par goms pa de'i tshe zhes bya ba'o/ /'di la yang skye ba snga ma'i goms pa sngon du 'gro ba can du sgrub pa yin na de las bzlog pa skye ba 'di pa'i goms pa sngon du 'gro ba can nyid du sgrub par byed pa'i phyir 'gal ba yin no zhes zer ba gang yin pa de bsal ba yin no/ /de nyid kyi phyir 'di la goms pa med pa'i khyad par las goms pa'i bskyed bya nyid kho na yin par bstan pa ni de nyid kyi phyir zhes bya ba ste/ de'i bskyed bya las 'di rtogs pa de ji lta ba bzhin du de'i bskyed bya'i khyad par las de'i khyad par rtogs pa yang yin no zhes bya ba'i don to/ /skye ba gzhan las byung ba res 'ga' yang mi dmigs pa ma yin na ji ltar rtogs pa yin zhes bya ba 'di la/ 'bras bu ni rgyu dang lhan cig ces bya ba smos te/ de'i 'bras bu nyid du gzhan la dmigs pa'i phyir ro zhes bya ba'i don to/ /de dang lhan cig dmigs pa'i phyir/ de'i 'bras bu nyid du gzhan la mthong ba ma yin/ gzhan la ni ma yin no zhe na/ 'ba' zhig kyang de'i 'bras bu nyid kho na yin par lan cig de'i 'bras bu nyid du dmigs pa'i phyir du ba lta bu'o zhes bstan pa ni/ rgyu ma mthong ba yang zhes bya ba'o/ /kye sam pa zhes bos nas/ ji ltar gnas pa yin zhes bya ba ni/ lto ba na zhes pa dang sbyar ro/ /ma yi lto nas skyes min gyi/ /zhes bya ba dang yang sbyar ro/ / 'di ni skye ba snga ma las ma 'ongs pa nyid kyi dpe yin no/ /ma he 'di dag ces bya ba ni goms pa'i bskyed bya skye ba la sogs pa las byung ba'i dbye ba'i dpe yin no/ /tshong dus nas 'ongs pa zhes bya ba ni goms pa dang lhan cig yod pas de'i bskyed bya nyid ma yin pa'i phyir/ 'byung ba tsam gyis bskyed bya nyid kyi dpe yin no/ /gal te lus kyi rnam pa yongs su 'gyur ba'i 'byung ba rnams las sems pa can yin na/ shi ba'i lus la yang 'gyur ro zhes bstan pa ni/ mtha' dag srog chags kyi rang bzhin du ci ste mi 'gyur zhes bya ste/ mtha' dag ces bya ba ni shi ba yang ngo / /gson po'i lus sa la sogs pa rnams nyid 'ga' zhig yongs su gyur pa'am nang gi khyad par ram/ sems can gyi gzhi gzhan sa la sogs pa kho na yin la/ shi ba ni de dang bral ba yin no/ /de'i phyir de las sems pa can ma yin no snyam du sems pa ni/ yongs su gyur pa'i rnam pa'i bye brag ces bya ba'o/ /yongs su gyur pa de'am/ de'i khyad par ni lus yongs su gyur pa'i khyad par ma yin nam/ gson po'i lus bzhin du shi ba la yang 'gyur ro zhes bstan pa ni yongs su gyur pa'i bye brag de nyid ces bya ba'o/ /'on te de'i 'bras bu'i bskyed bya ma yin pa de lta na yang thog ma med pa snga ma snga ma'i rang gi rgyu tsam las byung ba 'ba' zhig lus las 'byung ba yin la/ lus yod kyang res 'ga' mi 'byung ba yin no snyam du sems pa ni/ 'on te gang las 'ga' zhig ces bya ba ni gson po'i lus so/ /gzhan ma yin pa zhes bya ba ni shi ba'i lus so/ /lan ni gal te yongs su gyur ba'i khyad par zhes bya ba ste/ gal te yongs su gyur pa'am/ gzhan yang rang gi rgyu las byung ba'i khyad par ni phul du byung ba'i ngo bo yin pa'i phyir/ snang ba yin te/ mi dmigs pa ma yin no zhes bya bar 'gyur te/ ji ltar rtog par byed pa ma yin pa ni rtog pa dang mngon sum 'gal ba'i phyir ro zhes bya ba'i don to/ /mthong ba'i khyad par gyi rgyu ni goms pa yin na/ mthong ba yang rtog pa'i yul ma yin par bstan pa ni/ 'on te 'bras bu mthong ba nyid las zhes bya ba'o/ /de'i phyir zhes bya ba ni goms pa'i rgyu grub pa'o/ /'byung bar 'gyur ba'i 'jig rten pha rol sgrub pa la 'bras bu'am/ rang bzhin gyi gtan tshigs yod pa ma yin te/ nges pa med pa'i phyir 'jug pa med do zhes zer ba ni/ 'bras bu las skye ba snga ma'i rgyu grub mod ces bya ba'o/ /'bras bu'am rang bzhin gyi gtan tshigs de'i nges pa la ma yin du zin kyang 'gal ba dmigs pa can yin no/ /de ltar yang mtshams sbyor ba'i gcig gi rang bzhin gyi sems dang dbang po la sogs skye ba snga ma la dmigs pa ni de'i med pa mtshams sbyor ba ma yin pa dang / 'gal ba yin par bstan pa ni mthong ba gang zhes bya ba ste/ mtshams sbyor ba zhes bya ba ni skye ba 'di'i ngo bo mngon sum mo/ /skye ba snga ma'i ji ltar yin pa bstan pa ni/ rjes su dpag pas zhes bya ba'o/ /g.yer bag can gyi rang bzhin 'byung ba ni de dang mi 'gal ba ma yin nam/ du ba skyed par byed pa'i me ni de'i med pa skyed par byed pa ma yin te/ me las byung ba'i du ba me ma yin pa yongs su gcod pas ji ltar 'byung ba de bzhin du/ du ba skyed par byed pa'i me yang du ba ma yin pa yongs su gcod pas skyed par byed pa yin no snyam du sems pa ni/ gal te g.yer bag can la sogs pa zhes bya ba ste/ de goms pa zhes bya ba ni g.yer bag la goms pa las so/ /g.yer bag med pa las zhes bya ba rnam par 'brel ba ni mi gsal ba dang zhan pa zhes bya ba'o/ /de ni zhes bya ba ni mi gsal ba dang zhan pa nyid do/ /gal te yang thog ma med pa nyid ma grub kyang mtha'i gnas skabs la ji ltar mtshams mi sbyor ba yin no/ /bar ma'i gnas skabs la mtshams sbyor ba med pa'i phyir ro snyam du sems pa ni/ thog ma med pa nyid ma yin nam zhes bya ba ste/ yod pa ma yin pa kho na 'byung ba ji lta ba yod pa de bzhin du yod pa nyid ni 'byung ba ma yin te du ba lta bu yin no/ /thog ma med pa nyid yin na rtag tu yod pa kho na yin pa'i phyir/ mi gcod pa'i chos can nyid du nges par bzung ba'i phyir mtshams mi sbyor ba bkag pa yin no zhes bya ba'i don to/ /snga na med pa'i sems can yin zhes khas len pa dang 'gal ba yin no/ /zhan pa nyid kyang goms pa'i bskyed byar mthong ba de'i tshe/ skye ba dang po la yang de bzhin du 'gyur ba'i phyir/ thog ma med pa kho na yin par bstan pa ni/ zhan 'jug ces bya ba ste/ de sngon du 'gro ba can zhes bya ba ni goms pa sngon du 'gro ba can no/ /'di mthong ba yin par bstan pa ni/ mig la sogs pa zhan pa ni/ /zhes bya ba ste/ de las zhes bya ba ni zhan pa nyid las te/ goms pa las g.yer bag can nyid du 'gyur ba yin zhes bya ba'i don to/ /goms pa las g.yer bag nyid gang gi tshe yin par bstan pa ni/ gnyid sad pa zhes bya ba'o/ / yang na gal te gnyid log pa la sogs pa goms pa las zhan pa nyid dang / sad pa goms pa las g.yer bag nyid yin pa de'i tshe/ gnyid log pa rtsom pa dang sad pa rtsom pa la ji ltar zhan pa nyid dang g.yer bag nyid yin/ de goms pa yang ma yin te/ de'i gnas skabs rtsom pas de las 'byung ba'i bag chags ni/ de'i rtsom pa po sad pa yin pa'i phyir zhes bstan pa ni/ gnyid log pa las sad pa zhes bya ba ste/ skye ba'i dang po la yang ji lta ba'i bag chags sad pa las zhan pa nyid dang / g.yer bag nyid kyi mig la sogs par 'gyur ba'i phyir/ 'byung ba las byung ba nyid kyis thog ma med pa nyid nyams pa ni/ ma yin no zhes gnas skabs la sbyor bar byed pa ni/ des na skye ba dang por yang / /zhes bya ba ste/ gnyid log pa dang sad pa bzhin du zhan pa nyid dang g.yer bag nyid du skye ba'i dang po la 'gyur ba yin no zhes bya ba'i don to/ /lus gcig la kun du rgyu bar mthong ba las lus gzhan kun du rgyu ba yin par sgrub pa la phyin ci log tu sgrub par byed pas 'gal ba ma yin par/ ji ltar lus gzhan la brten pa/ /zhes bya ba'o/ /lan ni/ ji ltar rdzas gzhan la brten pa/ /zhes bya ba ste/ lus gcig bzhin du lus gzhan la kun du rgyu bar mthong ba/ de la lus gcig la kun du rgyu ba med na lus gzhan la 'byung ba yin zhes rtogs pa yin no zhes bya ba'i don to/ /bde ba'i lus la kun du rgyu bar sgrub pa 'di las bzlog par sgrub par byed pa 'gal ba ma yin nam snyam du sems pa la/ dper na rmi lam rmi ba'i lus la yang mngon du byed pa yin na bden pa kho na yin no/ /rnam par dbye ba ni 'jig rten pa'i rnam par rtog pas sprul pa kho na yin par bstan pa ni/ rang bzhin mngon du byed pa la zhes bya ba ste/ des na de bzhin du thog ma med pa nyid kyis mi gcod pa'i chos can nyid du rab tu bsgrubs nas gcod pa ni 'gal ba dmigs pa yin par bstan pa ni/ de'i phyir snga ma dang phyi ma mtshams sbyor nus pa zhes bya ba ste/ tshogs pa med pa nyid kyis 'bras bu mi 'byung ba la khyab pa yin na/ rgyu rnams tshogs pa nyid ni 'gal ba khyab pa yin par bstan pa ni/ rgyu ma tshang na zhes bya ba'o/ /ma tshang ba nyid kyis med pa la khyab pa yin pa ma yin nam/ tshang ba la yang yod pa'i phyir ro/ /'bras bu nyid ni de las res 'ga' 'byung ba'i phyir te/ de'i phyir tshogs pa nyid ni khyab par byed pa 'gal ba ma yin no snyam du sems pa ni/ 'on te 'di la 'gal ba ci zhig yod ce na zhes bya ba'o/ /de la res 'ga' 'byung ba tsam ni 'bras bu ma yin te/ rgyu ma yin pa la yang de tsam yod pa'i phyir ro/ /'on te de yod kyang kha cig tu mi 'byung ba'i phyir rgyu nyid ma yin zhing 'bras bu nyid kyang ma yin la de 'di ni/ 'di yang mtshungs pa yin par bstan pa ni/ rgyu dang 'bras bu'i dngos po med pa zhes bya ba ste/ tshang ba la yang 'bras bu med na/ de ni rgyu dang 'bras bu ma yin no zhes shes pa kho na yin no zhes bya ba'i don to/ /de'i phyir rgyu ma yin pa las 'bras bu 'di'i khyad par gdon mi za bar 'byung ba kho na yin par bstan pa ni/ 'bras bu ni rgyu'i gzhan dbang yin par zhes bya'o/ /de med na mi 'byung bas zhes bya ba ni/ rgyu ma yin pa 'di'i khyad par ma yin nam/ de med na 'bras bu 'byung ba ma yin no snyam du sems pa ni/ 'on te de med na zhes bya ba'o/ /res 'ga' 'byung ba tsam ni 'khrul pa nyid yin pa'i rgyu nyid du ma grub pa yin la/ de'i med pas sbyar ba'i med pa mi 'grub par bstan pa ni de med na zhes bya ba'o/ /gal te res 'ga' 'byung ba 'khrul pa yin na/ de yod na gdon mi za bar 'byung ba yin zhes ji ltar shes pa yin snyam du sems pa ni/ gal te de yod na zhes bya ba'o/ /lan ni de ltar yongs su dpyad pa'i phyir ro zhes bya ba ste/ gang gi byed pa de'i tshe de la de byed pa po nyid kyi rang bzhin nyid du go ba yin zhes bya ba'i don to/ / rgyu ma yin pa la yang de bzhin du go bar gyur pa ma yin nam/ res 'ga' byung ba ni de la yang 'byung ba'i phyir ro snyam du sems pa la de med na mi 'byung ngo zhes bya ba ste/ de yod na 'byung ba dang de med na mi 'byung ba zhes bya ba 'dis/ nges par khyad par can du 'byung bar byed pa yin no zhes shes par byed pa yin la/ de lta yin na rgyu yod na gdon mi za bar 'byung ba'i 'bras bu ni khyab par byed pa yin gyi/ 'byung ba la sogs pa gzhan las kyang 'gyur ro zhes bsal ba yin te/ de med na mi 'byung ba zhes bya bas ni gnyi ga khyab byed nyid du rtogs pa'i phyir ro/ /'di nyid ni rgyu tshogs pa'i ste/ mtha'i gnas skabs thob pas gzhan la mi ltos pa'i nus pa yongs su gyur pas 'bras bu skye bar te/ gdon mi za bar skye bar rjes su dpog pa'o/ /de ni zhes bya ba ni 'bras bu skye ba'o/ /rang yang 'di yin la gzhan yang 'di yin pa ni rang bzhin te rgyu yin la de med na mi 'byung ba'i phyir 'bras bu yang khyab byed yin pa'i phyir/ rgyu yang yin no/ /'brel pa rjes su dran pa la sogs par ji srid du byed par de srid kho na 'bras bu mngon sum nyid ma yin nam zhes rjes su dpog pa yin/ bden te thams cad la mngon sum skye ba ma yin la/ dbang po las 'das pa'am/ de ma thag tu nus pa yongs su gyur pas 'brel pa can la yang rjes su dpag pa 'jug pa yin pa'i phyir ro/ /yang na rang bzhin 'gal ba dmigs pa'am/ khyab par byed pa 'gal ba dmigs pa yin no/ /de ma thag tu zhes ji skad bstan pa yin no/ /gnyi ga la yang zhes bya ba ni de med na mi 'byung ba dang / de yod na gdon mi za bar 'byung ba las rgyu nyid yin par ro/ /des na de bzhin du ma tshang bas khyab pa'i 'bras bu mi 'byung ba yin la tshang ba yang ma tshang ba dang 'gal ba'i phyir mi 'byung bas khyab par byed pa 'gal ba'am/ 'gal ba khyab par grub pa yin no zhes nye bar bsdu ba ni de'i phyir/ ji ltar mthong ba zhes bya ba'o/ /mngon sum nye ba'i yul yin pa'i phyir khyab bya nyid du 'dzin pa'i bya ba can ma yin pa ma yin nam/ rnam par rtog pas nye bar bslad pa yin gyi dngos po 'jog par byed pa ni ma yin no snyam du sems pa ni/ de ltar mthong ba med pa'i phyir/ /zhes bya ba nas/ 'di yod par ni ji ltar mthong / /zhes bya ba'i bar du ste/ khyab pa can gyi rjes su 'gro ba la sogs pa can kho na 'bras bu nyid la sogs pa yin zhes bya ba'i don to/ /lan du zer ba ni/ gal te khyab par ma mthong ba'i phyir zhes bya ba'o/ /'di tha snyad du yin zhes bya ba ni rnam par rtog pas brdzun pa 'dzin pa'i nus pa las/ de 'dra ba'i bag chags las byung ba ci las nyams su myong ba dang 'brel pa 'ga' zhig gi 'bras bu dang 'brel pa dang / de med pa yang gzhan du 'jog par byed pa'i tha snyad dang ldan pa rnams yin no/ /gnyis su med par lta ba nyid ni 'jig rten pha rol la skur pa 'debs pa'i phyir ro/ /med par smra ba rnams ni lta ba ma yin nam/ de lta ma yin te/ 'jig rten pha rol sgrub pa la 'bad pas bsgrub par bya ba mya ngan las 'das pa gang yin pa de gnyis su med pa yod na/ 'bad pa med pas 'grub pa'i phyir 'di ni yod par smra ba'i lta ba dam pa yin la/ skyes bu'i don mtho ris dang byang grol la skur pa 'debs pa'i lta ba ni med par smra ba'i lta ba yin par bstan pa ni/ gal te gnyis med kyis tshim na/ /zhes bya ba ste/ gang gi phyir gnyis su med pa'i lta ba ni phyin ci log pa dang 'gal ba'i phyir/ de'i bskyed bya skye ba la sogs pa ldog par byed pa dang / gnas pa'i rgyu zhig na zin ba ldog pa yin no/ /yang na 'das pa'i bde ba'i sgrub byed dang ma 'ongs pa'i yang dran pa'i kun tu rtog pa dag gis rtog bzhin pa ni bag chags sad pas sdug bsngal gyi rgyu yin la/ de bzhin du da ltar ba yang yin te/ mi shes pa ni don gyi sgo nas byed pa ma yin zhes brjod pas so/ /gnyis su med pa la gang la la gang gis 'dzin pa las bag chag sad pa'am sdug bsngal ba yang ma yin te/ bde ba mang du bsgoms pas de'i bag chags sad pa la gegs byas pa'i phyir ro/ /dbang po las byung ba'i sdug bsngal nyid kyang ma yin te/ bsgom pas khyad par can du 'gyur ba'i phyir ro/ /gzugs la sogs pa ni de'i khyad par las khyad par can du 'gyur pa ma yin no/ /'o na ni phyi rol dang nang zhes bya ba la sogs pa'i rnam par rtog pa la brten nas/ de las bzlog pa'i gnyis su med pa la skur pa 'debs par byed pa yin no/ /de lta yin na 'jig rten sgrub par byed pa la sogs pa'i rnam par rtog pa las de rjes su bsgrub par 'gyur ba yin gyi 'dod chags la sogs pa ni ma yin no zhes bstan pa ni/ tha snyad 'jug par byed na ni/ /zhes bya ba phyed phyi ma rnam par 'brel pa ni nye bar bslad pa yin gyi 'og tu zhes bya ba ste/ rab tu zhi ba ni thar pa'o/ / 'dod chags kyi rjes su sgrub pa ni mthong ba'i chos la yang smad pa yin par bstan pa ni/ 'dod chags la sogs pas nye bar bslad pa ni zhes bya ba ste/ rnam par rtog pa la brten nas 'jig rten pha rol pa la dpyod pa ni de'i yul gzung ba dang 'dzin pa dang yan lag can dang / bdag dang bdag gi rnams rjes su bsgrub pa ni 'jig rten pha rol la yin gyi/ dgra la sogs pa rjes su sgrub pa ni mi 'gyur ro snyam du sems pa la/ 'di ltar zhes bya ba smos te mthong ba'i rjes su 'brang ba'i rnam par rtog pa ni/ tha snyad kyi mtshan ma yin gyi cig shos ni ma yin no/ /de'i phyir gnyis su med pa la sogs pa las ldog pa ni ma yin no zhes mthong ba'i rjes su 'brang ba'i dgos pa bstan pa ni/ nges na zhes bya ba ste rnam par rig pa tsam du smra ba la mig la sogs pa la ni rmi lam bzhin du mngon du byed pa tsam gyis mi bden pa yin la/ don byed pa la mi slu ba ni bden pa yin te/ goms pa'i khyad par gyi khyad par can yin pa'i phyir/ rnam par shes pa tsam phyi rol yin yang 'dod pa tsam 'byung ba yin te/ goms pa'i bskyed bya yin pa'i phyir ro/ /phyi rol gzhan dang mtshan nyid mi mthun pa ni rnam par shes pa kho na bzhin du 'jig rten pha rol pa yin zhes nye bar bsdu ba ni/ mig la sogs pa bden pa nyid dam zhes bya ba'o/ /'bras bu'i khyad par mthong ba las ma mthong ba'i khyad par rtogs pa yin na nus pa can nyid kyis mthong ba kho na goms pa'i brtag bya yin zhes bya ba ni mi rigs te/ 'byung ba'i khyad par yang sra ba nyid la sogs pa mthong ba'i phyir ro snyam du sems pa ni/ gal te 'byung ba chen po'i khyad par zhes bya ba'o/ /lan ni/ gang du drod gsher sogs skye ba'i/ /zhes bya ba ste/ sra ba nyid la sogs pa'i khyad par gyi srog la sogs pa ni nges pa ni ma yin te/ de med kyang khyad par gzhan la mthong ba'i phyir ro/ /de bzhin du shi ba'i lus dang / gzhan la yang srog chags mthong ba yin la/ des na 'byung ba yongs su gyur ba thams cad srog la sogs pa skyed par byed pa yin pa'i phyir shi ba'i lus dang bong ba la sogs pa la yang de dang 'dra bar thal bar 'gyur ro zhes bya ba'i don to/ /rnam par dbye ba zhes bya ba ni ni nges pa'o/ /de'i phyir nges pa can ni de'i phyir nges par byed pa gzhan brtag par bya ba yin par bstan pa ni/ sems pa'i mtshan nyid kyis las tsam zhes bya ba ste/ nges pa can dang nges pa can ma yin pa'i 'bras bu chu la sogs pa las snang bzhin pa ni ma nges pa can ma mthong bar go bar byed pa yin la/ nges pa can dang nges pa can ma yin pa la yang de nyid sbyor bar byed pa bstan pa ni de'i tshe rigs mtshungs pa thams cad ces bya ba ni nges pa'o/ /btsags nas ni chu tshags kyis so/ /mi 'dra ba zhes bya ba ni nges pa med pa'o/ /de nyid bstan pa ni mgo dmar ba zhes bya ba'o/ / nges pa can la nges pa can ma yin par snang ba nyid ma yin par bstan pa ni/ de dngos zhes bya ba'o/ /mthong 'dod dam ci zhes bya ba la/ nges med las zhes bya ba smos so/ /srog chags kyi khyad par ni mthong ba'i sa bon las nges pa can dang / nges pa can ma yin par nam yang snang ba ma yin par bstan pa ni/ nam yang zhes bya ba'o/ /de'i phyir mthong bar bye brag med pa la yang khyad par dang ldan pa'i 'bras bu ni/ khyad par dang ldan par ma mthong bar go bar byed pa yin par bstan pa ni/ las nyid nges par byed pa yin zhes bya ba'o/ /don med pa'i skye bo dang 'dra ba dang / ma la sogs pa'i rang bzhin phyin ci log par mthong ba las/ de'i bskyed bya nyid ma yin la phyin ci ma log par mthong ba yin na/ de'i bskyed bya nyid du mthong ba yin no zhe na/ gal te 'dod pa la sogs pa pha ma'i rang bzhin zhes bya ba'o/ /goms pa'i rjes su 'brang ba'i khyad par ni srid pa la yod pa yin la/ 'dod pa la sogs pa ni goms pa'i rgyu mtshan yin te/ gang gis gang kho na dor ba dang len par 'dod pa dang goms par byed pa de 'di'i goms pa ji lta ba bzhin du 'gyur ba yin la/ ma la sogs pa rang bzhin yang 'dis brjod pa sngon du 'gro ba can gyi goms par gyur pa de'i phyir/ 'di 'byung ba yin gyi de bzhin du du ba la sogs pa goms pa sngon du 'gro ba can ma yin te/ rang gi rgyu la rag las pa'i phyir ro/ /'dod pa rag las pa dang / cig shos dag la dbye ba med par khas blangs pa yin na/ rnam par dbye ba dang ldan pa'i 'bras bu'i spyi la sogs pa nyid du mi 'gyur te/ de'i khyad par 'jig par byed pa'i tshad mas spyi 'jog par byed pa ma yin pa'i phyir ro zhes bstan pa ni/ 'bras bu'i chos ni 'di yin te/ zhes bya ba'o/ /du ba la sogs pa yang rang gi rgyu la rag las pa yin na/ de las gzhan pa las 'byung bar mi 'gyur ba zhig na/ bsrub shing bsrubs pa dang / me gzhan las kyang mi 'byung bar mthong la/ ut+pa la'i rtsa ba dang ba lang gi lci ba las kyang ut+pa la'i rtsa ba 'byung ba de'i phyir goms pa las khyad par gang yin par bstan pa de yang gzhan du yin no/ /'dod pa la rag las pa ni ma yin te/ 'on kyang rang gi rgyu la rag las pa yin pa'i phyir thal ches pa ma yin no/ /yang na du ba la sogs pa yang 'dod pa la rag las pa yin gyi/ rang gi rgyu la rag las pa ni ma yin te/ gang gi phyir khyad par gang yin pa gzhan du yang gzhan gyi bskyed byar yang 'gyur ba de goms pa las byung ba yin par brjod pa yin na/ du ba la sogs pa yang de bzhin du yin no snyam du sems pa ni/ du ba du ba las zhes bya ba'o/ /lan du/ du ba las byung du ba ni/ ci 'dra/ zhes bya ba ste/ rang gi rgyu la rag las pa'i khyad par ni goms pa dang / gzhan las khyad par can du 'gyur ba ni ma yin te/ de yang skye ba'i dang por de kho na bzhin du mthong ba yin gyi/ 'dod pa la rag las pa ni ma yin te/ de goms pas khyad par du mi 'gyur ba ma yin la/ me'i bskyed bya du ba la sogs pa me'i khyad par gyis khyad par du 'gyur ba ma yin no/ /'on te du ba yang khyad par dang ldan pa'i 'dod pa la rag las pa kho na yin pa'i phyogs yin pa de lta na yang thal ches pa yin te/ 'jig rten pha rol la skur pa 'debs pa rnams de lta bu khas mi len pa'i phyir ro/ /de smra ba rnams ni 'dod pa kho na sgrub par byed pa'i phyir ro/ /de dang 'dra ba kho na yin te/ 'ba' zhig tshad ma med pa'i phyir khas len pa ma yin no zhes bya ba'i dgongs pa bstan pa ni/ du ba zhes bya ba ste/ du ba de gzhan las kyang ste/ goms pa las kyang skye ba min te/ khyad par du 'gyur ba ma yin kyang / me las kyang skye ba ma yin zhes bya ba'i don to/ /de bzhin gnas pa ni goms pa'i khyad par can du 'gyur te/ goms pa'i bskyed bya yang zhes bya ba'i don to/ /me'i bskyed bya'i me bsrubs pa'i me ni nus pa las khyad par yin te/ me de la bsregs pa'i lcags kyi reng bu dang bsregs pa'i rma la/ de'i mod la sha sar skye ba thos pa yin no/ /sa bon dang rtsa ba las skyes pa shing ka da li la sogs pa'i rang gi ngo bo las khyad par yin zhes bya ba la sogs pa thams cad la yang go bar bya'o/ /de'i phyir lus nyid dbugs 'byin par byed pa ma yin nam zhes bya ba la sogs par gang smras pa/ rang gi rigs la ltos pa med par mi rig pa kho na yin no zhes nye bar bstan pa ni/ rigs mtshungs pa yin no zhes bya ba ni legs par brjod pa yin no zhes bya'o/ /rang bzhin dang 'bras bu yang yod pa'i sgrub byed yin te/ 'di la gnyis ni dngos po sgrub par byed pa dag yin no zhes bya ba'i tshig las so/ /bdag nyid ma yin pa'i dngos po'i ngo bo la rang bzhin gyis 'brel pa yin pa'i phyir/ 'bras bu go byed yin gyi rgyu ni ma yin te/ 'brel pa med pa'i phyir ro/ /rgyu rnams ni gdon mi za bar de dang ldan par 'gyur ba ma yin/ tshogs pa rnams yin na 'gyur ro zhe na ma yin te/ bar du chod pa srid pa'i phyir ro/ /de med na yin no zhe na/ 'di la bar du gcod pa 'byung bar mi 'gyur ro zhes bya ba 'di ni shes par dka' ba yin te/ res 'ga' ma mthong ba rnams kyang yang yod par mthong bas the tshom za ba'i phyir ro/ /'bras bu la rung ba nyid kyi rjes su dpog pa yin no zhe na/ rung ba nyid kyang 'bras bu la bar du gcod pa med na/ 'di nyid stobs dang ldan pa kho na yin la/ de'i phyir med par nges pa yin na nus pa can kho na yin no/ /de'i phyir med pa la the tshom za ba kho na yin gyi/ 'das pa la nges par byed pa'i 'bras bus kyang dgos pa ci yang med pa yin te/ 'ga' yang 'das pa la 'jug par byed pa ma yin la/ 'jug pa'i yul nye bar mthong ba yin na tshad ma yin gyi/ srid pa grub pa tsam ni dgos pa med pa'i rgyu mtshan ma yin no/ /de yi srin bu'i grangs mkhyen pa/ nged la mgar yang nyer mkho med/ /ces bya bas kyang bkag pa'i phyir ro/ /du ba las sam tshig las me'am/ smra ba po de'i tshe rjes su dpog pa ni ma yin te/ 'brel pa med pa'i phyir ro/ / 'das pa nyid kyang de'i dus su dpog pa ma yin te/ ltos pa med pa nyid kyi rgyu ma yin pa'i phyir ro/ /gang gi phyir yod pa ma yin pa'i 'bras bu ni rang sgrub pa la gzhan la ltos pa yin gyi yod pa ni ma yin no/ /de dang tshogs pa gcig pa la rag las pa'i phyir/ /du bas rang gi dus kyi me rjes su dpog par byed pa yin no zhe na/ 'bras bu smra ba don med par 'gyur ro/ /de'i ched kho na la de smra ba yin no zhe na/ de yang 'das pa'i byed pa po'i tshig la 'am dbugs 'byung ba la sogs pa la nus pa med pa yin la des rang gi dus kyi byed pa po'am dbugs 'byin pa la sogs pa rjes su dpog par byed pa ma yin la/ du ba la sogs pa gang la dpog ba de yang / du ba bzhin du 'jug pa'i yul ma yin la/ 'das pa yang 'jug pa'i yul ma yin te/ tshad mar mi nus pa'i phyir ro zhes bstan zin to/ /rung ba tsam gyi the tshom kho na las 'jug pa yin no zhe na/ de lta na/ 'jig rten pha rol the tshom yang / mkhas rnams mi dge nyid spong ste/ /zhes bya ba ni de nyid brjod bya yin no/ /mtshams sbyor bar/ /nus ldan mthong ba gang de la/ /zhes bya ba la sogs pa ci'i phyir brjod/ tshad ma can rnams the tshom la 'jug pa yin zhes bya ba ni legs par byed pa ma yin no/ /de'i phyir 'di dang pha rol la yang rjes su dpag pa las 'jug pa'i yul la the tshom za ba kho na yin no snyam du sems pa ni/ 'bras bu las rgyu grub mod ces bya ba'o/ /lan ni de bshad pa ni zhes bya ba la sogs pa'o/ /snga ma snga ma ni zhes bya ba la sogs pa nas/ mi bden sogs pa 'thad par dka'/ /zhes bya ba'i bar gyis/ mtshams sbyor bar nus pa dang ldan par mthong ba gang zhes bya ba de tsam rjes su brjod par bya ba nyid grub pa'i don du/ skye ba'i dang por de bzhin gnas/ /zhes bya ba la sogs pas bsgrubs pa nyid spros par byed pa ste/ gnas skabs grub pa'i de ma thag pa yin pa'i phyir rgyu ma tshang pa med pa ni mngon sum mam rjes su dpag pa las rtogs pa ni/ 'jig par byed pa ma byung gi bar du gnas pa yin par rtogs pa ni bum pa bzhin du ste/ bum par byung ba ni rgyun yod pa yin la/ de bzhin du bdag du byed pa dang bcas pa'i sems la sogs pa la yod pa yang rgyun nyid du dmigs pa yin no/ /bum pa ni ji srid du 'jig pa'i rgyu ma byung ba de srid du rgyun gnas pa yin no zhe na/ 'di la ni 'jig par byed pa med pa'i phyir phyi mar yang yin no/ /shi ba 'jig par byed pa yin no zhe na/ shi ba'i 'jig byed mthong ba ni/ de nyid las 'dir 'das pa la'o/ /mthong ba la sogs pa med kyang ji ltar lan tshwa la sogs pa'i gnod pas bum pa rang nyid rgyun chad par 'gyur ba ni ma yin nam/ de bzhin du sems la sogs pa yang ngo / /de la phan par byed pa'i nga rgyal la sogs pa bdag med ba mthong bas nye bar mthong ba yin no de ltar 'gyur ba zhig na ni/ so so'i skye bo ni de ltar 'gyur ba ma yin no/ /de'i phyir de ni rang nyid rgyun chad pa ma yin no/ /bum pa zhes bya ba'am sngon po zhes bya ba ni mthong ba'i rjes su 'brang ba'i rnam par rtog pa yin te/ thob par bya ba'i 'bras bur mthong ba la de nyid kyis nges par byed pa yin zhes/ tshad ma nyid sems pa zhes bya bar rnam par dpyad par bya ba yin no/ /ji skad du dngul du 'dzin pa ni yun ring por gnas par 'dzin pa yin te/ ji srid du ma 'ongs pa'i nya phyis kyi shes pa'i dus kyi bar du khyab pa yin la/ de bzhin du de lta bu'i du ba las kyang me shes pa la yang 'jug pa'i dus na yod pa khyab pa nyid yin no/ /de'i bar du 'jig par byed pa nye bar 'ongs pa the tshom za ba ma yin nam/ ji ltar tshad ma nyid yin/ 'jog par byed pa yin du zin kyang / yod pa nyid ces da ltar ba bzhin du tshad ma nyid ma nyams pa nyid yin te/ thob par byed pa'i nus pas tshad ma nyid yin pa'i phyir ro/ /yang na shes pa gang la bar du chod pa de med par nges pa'i shes pa de ni thob par byed pa yin gyi/ gzhan ni ma yin no/ /'di 'dra ba'i nges pa ni 'jig rten du rnyed bla ba yin gyi yang dag par gsungs pa las/ thams cad mkhyen pa brten pa nyid du rtogs pa la/ 'di 'dra ba'i the tshom yang med do/ /de ni de 'dra ba'i gsung las mdzad pa chen po las 'gro ba ma lus pa'i de kho na nyid thugs su chud pas/ 'gro ba'i bya ba mi zad pa dang bsod nams la sogs pa'i tshogs chen po rdzogs pa rnams rgyun chad pa'i rgyu med pa'i phyir/ shin du rgyun mi 'chad pa'i chos can du nges pa/ da ltar yang bsnyen bkur bya ba kho na yin la/ de bzhin du 'jig rten pha rol tu rgyun du yang yin no/ /'jig rten 'di pa'i rjes su dpag par yod du zin kyang / 'jig rten pha rol po ni nges pa'i 'bras bu can ma yin te/ ma mthong ba'i yul yin pa'i phyir ro zhes gang smras pa de bsal ba yin te/ rgyun gyi rgyu rtog pa ma yin pa nges pa'i phyir ro/ /mtshams sbyor bar/ nus ldan mthong ba gang de la/ /ci zhig yod ces bya bas/ rgyu ni gdon mi za bar 'byung ba'i 'bras bu can nyid du bstan pa yin zhing / de yang de med na mi 'byung ba'i 'bras bu kho na yin par yang ngo / /de ni de'i tshe mtshams sbyor bar nus pa dang ldan pa gang yin pa ni snga ma snga ma ni zhes bya ba la sogs pa nas/ mig la sogs pa bden pa nyid dam/ phyi rol gyi don yin pa de lta na yang / /rang bzhin 'di thog ma med pa yin pa'i phyir/ 'khor ba thog mtha' med pa nyid yin no zhes bya ba'i bar gyis bstan pa yin no/ /de yod pa nyid ni 'byung ba'i phyir/ 'bras bu ni nges pa can yin la/ rgyu ni nges par byed pa yin par bstan pa yin gyi/ 'byung ba kho na zhes bya ba gang du dgos pa yin te/ nges par byed pa yin pa la ni de bzhin du 'gyur gyi/ de lta bu nyid rtogs pa'i yan lag kyang ma yin la/ nges pa can nyid gzhan du mi 'gyur ba yang ma yin te/ de yod na res 'ga' 'byung bas nges pa can nyid du rtogs pa'i phyir ro/ /mi rigs te thal ches pa'i phyir ro/ /rgyu ma yin pa la yang res 'ga' 'byung ba yod pa yin no/ /de la ni de yod pa nyid na zhes bya ba med pa yin no zhe na/ /de yod pa nyid na zhes bya ba 'di yang 'bras bu ni de'i dbang nyid yin par brjod pa yin no/ /gang gi tshe ma tshang ba med pa'i rgyu mtshan de yod kyang / rang nyid kho na mi 'byung ba yin no/ /de'i tshe de'i dbang du 'gyur ba ma yin no/ /gang gi phyir de yod pa la dbang ba ni de yod na mi 'byung ba ma yin la/ de'i tshe rgyu med pa nyid du shes pa yin no/ 'bras bu'i dus su yang de nyid yin pa'i phyir rgyu ma yin pa nyid du 'gyur zhing / 'bras bu ni rang dbang du 'gyur te/ rang nyid kho na res 'ga' 'byung ba'am mi 'byung ba yin no/ /gal te rang dbang yin na de med kyang ci ste 'byung bar mi 'gyur ji ltar mthong ba de kho na bzhin du 'gyur ba yin la/ nges pa can du mthong ba dang rang dbang nyid ni 'gal ba yin no/ /de'i phyir nges pa can mthong ba las de'i dbang du 'gyur ba yin no/ /de la yang res 'ga' mi 'byung na gzhan la ni smos kyang ci dgos/ de med pa ni rang dbang yin pa ni de med kyang yod la/ yod kyang res 'ga' yod pa'i thams cad du cis med pa yin zhe na/ 'bras bus gegs byas pa'i phyir ro/ /de yang yod na gegs byed kyi med na ni ma yin no/ /med pa nyid la ci'i phyir ma yin zhe na rgyu med na de med pa'i phyir zhes bya ba yin gyi yod na ni ma yin no/ /snga na yod pa med pas bar du bcad pa'i phyir zhes bstan pa yin no zhe na/ de lta na gang gi tshe 'bras bu yin pa de'i tshe yang rgyu tsam gyi gnas skabs na de med pa yod pa'i phyir bar du chod par 'gyur ro/ /rgyu ni med pas bsgribs nas nan gyis 'bras bu bskyed pa yin zhe na/ gzhan gyi tshe yang de dang 'dra ba la nan gyis skyed par byed par 'gyur ba'i phyir med pas bar du bcad pa ni ma yin no/ /'bras bu ni rang nyid kho na mi 'byung ba yin no zhe na/ rang nyid kho na 'byung bar yang 'gyur ro/ /gzhan dbang nyid du rtogs pa yin no zhe na/ gdon mi za bar 'byung ba yang de'i khyab byed du 'gyur la/ rgyu rnams ni gdon mi za bar de dang ldan par mi 'gyur ro zhes ma tshang ba'i gnas skabs la ltos nas yin la/ gdon mi za bar 'byung ba yang yod pa tsam las ni ma yin gyi/ 'on kyang nges pa can nyid ni rgyu mtshan yin la/ de med na rang dbang nyid kyis nges pa can med pa nyid du 'gyur ro/ /nges pa can nyid ni 'bras bu nyid ma yin pa ma yin nam/ shing sha pa yang shing gi de nyid du thal bar 'gyur ba'i phyir ro/ /ldog pa nges pa nyid kho na 'bras bu nyid yin te/ de las mi skye na de la mi 'khrul par nges pa med pa'i phyir ro/ /smin drug shar ba la sogs pa las snar ma yang nye ba la sogs pa yin par 'dis bshad pa yin no/ /de med na mi 'byung bar nges pa yin gyi/ gdon mi za bar 'byung ba ni ma yin no/ /de dang 'dra ba kho na yin pa de las mi 'byung na de ji ltar nges par byed pa yin zhing / de nges par byed pa ma yin na de la ji ltar nges pa zhes bya ba yin/ shing ni shing sha pa gdon mi za bar yod pa kho nar nges par byed pa kho na yin te/ de dang ldan pa ma yin pa de ni de'i nges par byed pa ma yin pa'i phyir ro/ /shing ma yin pa rnam par gcod pa 'ba' zhig gis sam/ me ma yin pa rnam par gcod pas nges bzhin pa na/ de dang de ma yin pa rgyud kyis so sor snang ba yin te/ gzhan du na nges par bya bar mi nus pa'i phyir ro/ /du ba la sogs pa ni nges pa la yang nges pa can kho na yin te/ nges pa can de kho na rjes su 'brangs ba rnams ni de yod pa nyid na 'byung la/ de med na mi 'byung ba kho na yin zhes bya ba la sogs par tha snyad du byed kyi/ de med na mi 'byung ba ni de la nges par byed pa ma yin no/ /de dag tsam ni nges par byed pa ma yin pa'i phyir ro/ /'bras bu bzhin du rgyu yang de med na mi 'byung ba'i phyir khyad par med pas rtogs par byed par 'gyur ro/ /de'i phyir 'bras bu'am rang bzhin gyi gtan tshigs yin zhes bya ba'i phyag rgya chad par 'gyur ro/ /de ltar rtogs pa yin na de yang 'bras bu nyid yin pas khyad par med pa kho na yin pa'i phyir phyag rgya gcad pa ma yin no/ /de lta yin na da ltar rgyu nyid bor ba yin pa la ma bor na ni de yang go bar byed pa nyid yin pa'i phyir de dang 'dra bar phyag rgya gcad pa yin no/ /bden te 'ba' zhig de bzhin na 'byung ba kho na yin zhe na de nyid kho na nges par bya ba yin no/ /'byung bar byed pa kho na bdag nyid kyi yang de dang bral ba'i gnas skabs la gnod par byed pa yin no/ /de'i phyir khongs su gtogs pa'i bskyed bya nyid kho na skyed par byed pa nyid yin pa'i phyir skyon med do/ /re zhig 'bras bu de ltar rtogs pa ni go byed yin la/ rgyu yang de nyid du rtogs bzhin pa ni 'bras bu kho na yin gyi/ 'ba' zhig ni ma yin te gang gis gtan tshigs gsum par 'gyur zhes bya ba'i don to/ /gal te yang goms pa las byung ba yin na de'i khyad par can du byas pa'i dbugs la sogs pa lus sam/ 'byung ba rnams yongs su gyur pa'i khyad par yang rung ba/ dbye ba du ma las cis ltos pa yin/ /de'i phyir yongs su gyur pa'am khyad par las 'byung ba goms pas khyad par du byed pa yin te/ me la sogs pa dang phrad pas gzugs la sogs pa lta bu yin gyi/ goms pa'i bskyed bya yang khyad par las sam/ yongs su gyur pa las gcig gi rnam par 'gyur ba can ma yin te/ sna tshogs nyid du mthong ba'i phyir ro/ /sna tshogs pa de nyid yongs su gyur ba'am/ gzhan yang 'gro ba sna tshogs ba nyid kyi rgyu yod pa yin na/ cis rang gi rigs kyi rgyur rtog pa yin/ 'bras bu dang rgyu nyid med pa yang ma yin te/ yongs su gyur pa la sogs pa sna tshogs pa nyid rgyu nyid du mthong ba'i phyir ro/ /da ltar ni goms pa las yongs su gyur pa la sogs pa las 'byung ba'i phyir skye ba dang po la de bzhin du bstan pa yin na/ /zhe na yang / me dang phrad pa las snga rol du yang gzugs la sogs pa kho na yin pa'i phyir phyis kyi bzhin du de las 'byung ba nyid du 'gyur ro/ /sngon po nyid dang dmar po la sogs pa'i dbye ba yin na ni mtshungs pa yin te/ 'di la yang ji ltar yang dbye ba mthong ba'i phyir ro/ / de'i phyir dang po yongs su gyur pa'i bye brag las 'byung ba ni dbugs la sogs pa yin la yongs su gyur pa la sogs pa yang snang ba'am/ gzhan yang ma yin te/ khyad par du rtogs pa dogs pa med pa'i phyir ro snyam du sems pa la/ gang du drod gsher la sogs skye ba'i zhes bya ba smos te/ re zhig 'byung ba rnams kyi sems pa dang / cig shos la sogs pa rnams kyis 'di rnam par dbye ba ni ma yin te/ thams cad la srog chags skye ba mthong bas sra ba la sogs pa'i khyad par ni nges par byed pa ma yin pa'i phyir ro/ /khyad par can yongs su gyur pa yang ma yin te/ 'byung ba rnams kyi khyad par du mi 'thad pa'i phyir ro/ /'phel ba dang 'grib pa dag 'dres pa'i khyad par can du gyur pa yin no zhe na/ 'byung ba las khyad par med na 'dres pa'i 'phel ba dang 'grib pa dag gi gzhan sems pa can la sogs pa yongs su gyur pa ni mi rigs te/ ba glang dang rta la sogs pa pa'i 'dres pa'i khyad par gyis/ de'i rang bzhin ma yin pa'i dngos po skye bar mthong ba ma yin no/ /chang la sogs pa ni de ma yin pa'i ngo bo yin no zhe na/ ma yin te de la yang log par rtogs pa'i phyir ro/ /gang gi phyir 'gro ba yongs su gyur pa thams cad kho na rtsod pa'i gzhi yin la/ de'i phyir yongs su gyur pa yang sems pa dang cig shos nyid las rnam par dbye ba ma yin te/ sa la sogs pa'i cha shas yongs su gyur pa 'ga' yang med de/ gang du drod gsher sogs skye ba'i skye bo zhes bya ba la sogs pa'i dbye ba med do zhes bya ba'i don to/ /skye bo zhes bya ba ni nye bar mtshon pa ste/ shing dang chang la sogs pa'i dbye ba med par yang 'byung ba la sogs pa'i sems pa dang / cig shos la sogs pa'i rnam par dbye ba'i rgyu med na mi rigs so zhes bya ba'i don to/ /de 'ga' yang med ces bya bas ni rnam par dbye ba med pa'i 'byung ba rnams bstan pa yin no/ /rgyu'i rnam par dbye ba med na 'bras bu'i rnam par dbye ba legs pa ma yin te/ de dngos sa bon las zhes bya ba ni tha mi dad pa las so/ /ma nges pa ni tha dad pa'o/ /nges pa med pa ni nges pa can gyi nges par byed pa ma yin par ni bden mod kyi nges pa can la nges par byed par brtags pa yin no/ /de yang 'byung ba la yod pa nyid kyi sna tshogs pa la las rnams nges par byed pa yin zhes ci las yin/ chos can gyi rnam par rtog pa bas chos su rnam par rtog pa spang ba'i phyir mchog yin no/ /chos can du brtogs pa'i nus pa sna tshogs pa tsam ni chos yin no snyam du sems pa la/ de phyir dbang sogs rang rig la/ /ltos pa med par ni zhes bya ba smos te/ gang dag kho na goms pa las byung ba'i shes rab dang / mi brjod pa la sogs pa rnams dang dbugs la sogs pa rnams kyang mthong ba de rnams kho na skye ba'i dbang po la yang dmigs pa yin gyi me dang phrad pa las byung ba'i tshogs pa las ni ma yin gyi/ snga rol du yang rigs kyi dbye ba yongs su gsal ba'i phyir ro/ /de de bzhin du skye pa'i dang po'i dbugs la sogs pa ni rang gi rigs kyi goms pa sngon du 'gro ba can nyid kyis skye ba snga mar grub pa yin la/ 'gro ba'i sna tshogs pa'i rgyu 'byung ba'i chos nyid kyi rtogs pa'i khyad par byed pa'i dgos pa ni 'jig rten pha rol med pa ni de dang 'gal ba'i phyir bkag pa yin no/ /rang gi rigs kyi goms pa las byung ba nyid la thal ches pa'i sgo nas 'jig rten pha rol yod pas khyab pa yin te/ khyab par byed pa 'gal bas khyab pa yin par bstan pa yin no zhes bya ba'i don to/ /'bras bu med pa'i rtogs pa ni/ /'thad par bya ba ma yin te/ /nus pa du ma can gyi 'byung ba 'bras bu gcig byed pa can yin na/ nus pa gzhan gyi bskyed bya'i 'bras bu gzhan du yang de'i tshe kho nar 'gyur ro/ /de bzhin du skyed byed ma yin na rim gyis kyang mi 'gyur te/ ltos pa med pa'i phyir ro/ /las su smra ba la ni de las gzhan byas pa yin la ltos pa gzhan yang yod pa de'i phyir skyon med do/ /de'i phyir 'gro ba sna tshogs pa'i rgyu 'byung ba'i chos rnams nyid nus pa'i khyad par du brtag pa ma yin te/ gang gi phyir shes rab dang mi brjed pa'i blo la sogs pa rnams skye ba'i dang po la rang gi rigs la mi ltos pa rnams 'byung bar khas len pa yin na/ ji ltar skye ba'i dang por 'byung pa shes rab dang mi brjed pa'i blo la sogs pa dang ldan pa'i yongs su gyur pa rang gi rigs la ltos pa med pa de kho na bzhin du/ de las gzhan yang 'gyur ba la ci las yin zhe na/ /byang par med pas skye ba'i dngos po las 'byung ba rnams dang goms pa las byung ba rnams kyang tha dad par nye bar ma mtshon pa'i phyir ro/ /'di la yang yod pa ma yin te/ de'i bskyed ba ni/ goms pa la rag las par mthong ba'i phyir/ de'i nus pa mthong ba yin gyi 'byung ba'i nus pa ni de lta ma yin te/ gzhan las byung ba yang ri la du ba bzhin du de la mthong ba 'gal ba med pa'i phyir ro/ /bum pa ni me dang phrad pa'i sngon rol du khyad par can yongs su gyur pa ni de lta ma yin te/ sngon po dang dmar po la sogs pa tha dad par yongs su gsal ba yin no zhes gzhung dang sbyar ro/ /yang na 'byung ba rnams kyi tha mi dad pa'am yongs su gyur pa'am/ yongs su gyur pa yang khyad par med pa'i phyir/ khyad par med pas dmigs la sogs pa dang ldan pa'i yongs su gyur pa bong ba dang rtsig pa la sogs pa dang 'gyur te/ sna tshogs pa gcig gi ngo bor 'gyur gyi sna tshogs pa nyid du ma yin no zhes bya ba'i don to/ /dbang rnams re re la gnod kyang / /zhes bya ba'i tshigs su bcad pa'i/ /skye ba yongs su len pa na/ /zhes bya ba 'di bshad pas de la gtad pas bshad pa yin no/ /da ni de'i 'grel pa bshad par bya ste/ de la bum pa me dang phrad pa'i bskyed bya rnam par 'gyur ba yang de kho na las skye ba ma yin te/ rdza mkhan las skye bar mthong ba'i phyir ro/ /dbang po rnams ni yid kyi bsgyur bya yin la/ de gsal ba yin na dbang po rnams gsal ba yin te/ bzlog pa yin na log pa yin gyi gzhan las skye bar mthong ba yang ma yin no/ /de'i phyir de kho na las skye ba yin par shes par bya'o/ /bum pa la sogs pa mes byas pa'i rnam par 'gyur ba kho na yin pa'i phyir dpe ma yin par mi rigs te/ skye ba'i dang po'i dbang po yang yid kyi rnam par 'gyur ba nyid las ma mthong ba yin par 'gyur ba'i phyir ro/ /phyogs la 'khrul pa yin zhes bya ba yang ma yin no/ /de lta na ni gang yang ma nges pa zhes bya bar mi 'gyur ba ni bum pa la sogs pa yang rdza mkhan gyi bskyed byar mi 'gyur te/ de yang phyogs su phyed pa'i phyir ro/ /de la ni rdza mkhan gyi bskyed byar mthong ba yin la/ des na me'i bskyed bya nyid ma yin no/ /de'i phyir me ni rnam par 'gyur ba skyed pa yin gyi/ rang gi ngo bo ni skyed byed ma yin no/ /dbang po yang skye ba'i dang po 'byung ba'i bskyed bya yin te/ de ltar ma mthong ba'i phyir ro/ /de'i tshe yid kyi bskyed bya nyid du nye bar mtshon pa ni ma yin te/ gzhan gyi tshe'i yid kyi bsgyur bya lta bu'o/ /de'i tshe yang de'i bskyed bya nyid ma yin te/ gzhan du de'i bsgyur bya yin pa'i phyir ro/ /gzhan med kyang mes bum pa bzhin du yin la/ de'i phyir mthong ba kho na de'i 'bras bu nyid yin gyi de bzhin du du ba yang de'i bskyed bya nyid du 'gyur ba ma yin te/ me'i bskyed bya nyid du tshang ba la sogs par mthong ba'i phyir ro/ /de bzhin du dbang po yid kyi bskyed bya nyid yin par 'gar yang mthong ba ma yin te/ rnam par rtog pa thams cad bsdus kyang dbang po yod pas mthong ba yod par brjod pa'i phyir ro/ /'on te snga rol du yod pa las skyes pa'i dbang po ni rdza mkhan las bum pa bzhin du phyis rgyun du byed pa yin no/ /de'i gnas skabs kyang rnam par rtog pa gzhan med kyang bdag go zhes bya ba'i blo med pa ma yin te/ nga rgyal dang bcas pa'i rgyu yin pa'i phyir ram/ de'i bag chags rjes su 'jug pa'i phyir te/ des na skyon med do/ /gnyid mthug pos non na sems nyid chad pa'i phyir dbang po yang chad pa yin la/ sad pa'i dus su ni gnyid rtsom pa'i sems kho na las sems dang / dbang po yang 'byung ba yin no/ /de 'di yid kyi rnam par shes pa'i 'bras bu nyid du grub na rtog par byed par rigs kyi gzhan du nye bar rtogs pa tsam ni rtog pa dang ldan pa rnams kyi btang snyoms su bya ba yin no/ /de grub pa ni ma yin te/ phyin ci log tu mthong ba'i phyir ro/ /de ltar bstan pa ni 'on te de'i rnam par bsgyur bya nyid ces brjod pas/ de'i bskyed bya nyid kho na yin par bsams pa yin na/ de ma grub pa yin te mes bum pa lta bu'o/ /rnam par bsgyur bya nyid tsam la rgyun ni de'i 'bras bu nyid du brjod pa ma yin te/ lus dang dbang po la sogs pa srid par rtogs pa thams cad yid kyi rnam par 'gyur ba'i rjes su byed pa'i rnam par 'gyur ba nyid du mthong ba yin la/ skye ba'i dbang po la yang de'i rnam par 'gyur ba dang ldan pa de sngon du 'gro ba can du rtogs pa yin no/ /rgyun ni de'i bskyed bya'am gzhan gyis bskyed bya yin zhes bya ba gang du dgos pa yin/ rnam par 'gyur ba rnams gzhan nyid kyang ma yin te/ de nyid ngo shes pa'i phyir ro/ /de dag tsam las kyang skye ba gzhan grub pa yin te/ rnam par 'gyur ba la brten pa nyid kyis thams cad du yang nye bar gnas pa yin la/ de'i sgo nas rgyun yang yin pa'i phyir de rten nyid du brjod pa yin par shes par bya'o/ /dbang po rnams ni skye ba'i dang po rnams las byung ba rnams so/ /yid kyi shes pa las te 'das pa'i skye ba las byung ba las 'byung ba'i phyir/ thog ma med pa nyid yin la de las kyang zhes bya ba skye ba'i dang por las byung ba'i dbang po las byung ba rnams las/ rang gi shes pa lnga po'i rim gyis yid kyi rnam shes 'byung ba yin la/ skye ba la ni de las kyang yang gzhan yin la de las kyang gzhan rnams te/ ma 'ongs pa'i srid pa las byung ba rnams 'byung ba yin te/ nga rgyal dang bcas pa nyid kyis gdon mi za bar 'byung ba'i 'bras bu dang ldan pa nyid 'phen byed yin pa'i phyir ro/ /gnyen po bsgoms pa med pa las ni mtha' med pa yin pa de lta bu ni 'grel pa'i dgos pa yin no/ /lhag ma ni tshigs su bcad pa'i phyi ma'i phyed snga mas gtan tshigs gzhan dang / phyed phyi mas gtan tshigs ma nges pa nyid kyis lan btab pas bshad nas tshig gi don bshad pas kyang / don 'di kho na 'chad pa ni gang gi phyir zhes bya ba la sogs pa'o/ /phyed snga ma 'chad pa ni de bzhin du yid kyi rnam par shes pa ni zhes bya ba ste/ goms pa'i bskyed bya'i khyad par ni yid kyi rnam par shes pa yin la/ dbang po bstan pa lus la brtan pa ji ltar yin/ yid kyi rnam par shes pas bsgyur zhes bya ba ni gtan tshigs so/ /gang kho na las yin pa de las de'i tshogs pa ni de'i rten ma yin te/ dbang po lnga tshogs pa ni de'i 'bras bu la/ gzugs dang ro la sogs pa'i rnam shes lnga po de la brten pa yin la/ de'i rang rig pa'i bya ba'i rjes su 'brang bar byed pa bdag go zhes bya ba'i rnam pa zhes gang smras pa de ma yin no zhes bya bar sbyar ro/ /yid kyi rnam shes ni dbang po'i shes pa'i rjes su 'brang ba ma yin no/ /de lta yin na 'jig rten phyi ma'i yid kyi rgyal srid byed pa'i nga rgyal dang bcas pa yang yin pa'i phyir ro/ /de yang dbang po la brtan pa ma yin te/ dbang po'i bya ba 'phel ba yin na 'di'i 'grib bar 'gyur ba'i phyir dang / de 'grib na 'phel bar 'gyur ba'i phyir bstan pa yin no/ /yid kyi blor 'gyur na zhes bya ba la sogs pas gtan tshigs gzhan 'chad par byed pas dbang po rnams kyi 'gyur bar byed pa po yin pa'i phyir/ yid kyi rnam par shes pa byed pa po yin zhes bya bar mi rigs te/ me ni bum pa'i rnam par 'gyur bar byed pa yin yang byed pa por 'gyur ba ni ma yin no snyam du sems pa ni gal te mig la sogs pa zhes bya ba'o/ /bum pa ni me'i bskyed bya'i rnam par 'gyur ba kho na ma yin gyi// dbang po ni yid kyi rnam shes kyi bskyed bya'i rnam par 'gyur ba kho na yin no zhes bya bar bye brag tu bstan pa ni/ bum pa la sogs gzhan du mthong ba yin pa zhes bya ba'o/ /skye ba'i dang po la 'jig pa dang mya ngan la sogs pa rnam par 'gyur ba'i yid kyi rnam shes kyi bsgyur bya nyid dbang po rnams ma yin pa ma yin nam/ dang po nyid la sogs par mthong ba'i phyir ro snyam du sems pas/ dang po nyid kyang nyid kyi rnam par 'gyur ba yin par bstan pa ni/ dang po la sogs pa'i zhes bya ba'o/ /gal te skye ba'i dang po la dbang po rnams yid kyi bsgyur bya yin na de bzhin du rang nyid kyi'am/ gzhan gyi mngon sum gyi nges par ci ste mi 'gyur me'i bskyed bya du ba ni rjes su dpag bya thams cad du de nyid kyis mngon sum ma yin pa ma yin no snyam du sems pa ni 'on te/ gal te yang zhes bya ba'o/ /lan ni/ gal te me las zhes bya ba ste/ du ba ni rjes su dpag par bya ba la me las byung ba nyid du mngon sum yin pa'i phyir dang go byed ma yin no/ /'on kyang de'i 'bras bu nyid kyi mngon sum yin pa'i phyir ro/ /gang gi phyir de ma yin pa las log pas du ba'i ngo bor nges pa kho na de'i 'bras bu nyid du nges pa yin gyi me'i nges pa ni ma yin no zhes bya ba'i don to/ /rigs pa brjod nas rnal ma la sbyor ba ni de'i phyir/ dper na zhes bya ba ste skye ba'i dang po la yang / dbang po rnams la rjes su dpag pa'i yan lag ni/ de'i 'bras bu nyid du nges pa yod pa yin gyi/ de lta mod kyi mngon sum nyid kyis yin zhes bya ba'i don to/ /da sngon du 'gro ba can nyid du zhes bya ba ni mtshungs pas so/ / gzhan du zhes bya ba ni khyad par las te/ dus dang yul 'di ni dus dang yul gzhan gyi dngos pos bskyed bya ma yin pa'i phyir khyad par ma yin zhes bya ba'i don to/ /ji ltar skye ba'i dang po 'di la dbang po ni skye ba snga ma las byung ba'i yid du go bar byed pa de bzhin du skye ba gzhan la yang / skye ba gzhan las byung ba'i yid du go bar byed pa yin no zhes slar yang bshad pa yin no/ /dbang po rnams zhes bya ba ni 'di yang dbang po dang yid kyi rnam par shes pa dag gi 'bras bu nyid du brjod pa'i shugs kyis go bya go byed du bstan pa yin te/ 'di ni de'i rgyu mtshan yin pa'i phyir/ de las zhes bya ba ni dbang po rnams las so/ /dbang po'i bskyed bya ni yid ma yin la/ yid kyi bskyed bya ni yin zhes 'das ma thag kho na smras pa ma yin nam/ bden te yid kyi rnam shes nyid dbang po la sred pa dang bcas pa nyid kyi de las yin zhes brjod pa yin no/ /de las kyang zhes bya ba yid kyi rnam shes las zhes bya ba 'dis thog ma med pa dang tha ma med pa zhes bstan pa ni/ yid kyi shes ba las zhes bya ba ste/ skye ba gzhan las byung ba las dbang po la sred pa dang bcas pa nyid kyis de bzhin skyed par byed pa'i ngo bor shes pa'i phyir ro/ /de las zhes bya ba rjes su dpag pa'i dbang po rnams las/ dbang po la sred pa la sogs par rjes su dpag pa las grub pa yin par bstan pa ni/ de las kyang yang zhes bya ba ste/ yid kyi rnam shes las dbang po rnams zhes bya ba'i don to/ /de'i rnam par 'gyur bas bsgyur bya yin pa'i phyir/ de'i bskyed bya nyid du bsgrub par bya ba yin na de'i bskyed bya nyid ma yin pa'i yid kyi rnam par shes pa yang yod pa'i phyir/ ma nges pa yin nam snyam du sems pa ni/ gal te yid kyi blo yang zhes bya ba'o/ /rnam par 'gyur ba gang gis bsgyur bar bya ba gang yin pa de kho na de'i 'bras bu ma yin nam/ ji ltar dbang po ni yid kyi rnam shes kyi 'bras bu yin pa de bzhin du/ bum pa ni me'i ma yin te/ nges pa med pa'i phyir ro zhes bstan pas de lta bu'i rigs can thams cad gsal ba kho na yin la/ ci'i phyir yang the tshom byed ces bstan pa ni bsgyur bya nyid ces bya bar nges par kho na bsgyur bya nyid yin no/ /ma nges pa yin no snyam du sems pa ni yid kyi rnam shes kyi rnam par 'gyur ba kho na dbang po yin te/ dang po la sogs pa la yang de'i rnam par 'gyur ba'i phyir la/ de bzhin du yid kyi rnam shes kyang mig la sogs par 'gyur ba kho na yin te/ dang ba la sogs pa yang de rnam par 'gyur ba'i phyir ro zhes bya ba ni the tshom gyi don yin no/ /lan gyi don ni nges pa med pa yin te/ de skad du yang / nges pa gnyi ga yang med ces bstan to/ /gal te dbang po rnams blo la brten pa yin na/ de lta ma yin na brten pa dang rten ltos pa med pa yin pa'i phyir/ de'i rang bzhin thob pa med pas lan cig skyes pa'i sna tshogs pa ni mi 'jigs pa thob par 'gyur ba ma yin nam/ de'i phyir skye ba dang 'chi ba'i rgyun mthong ba nub par 'gyur ro/ /'on te 'di'i rgyu mtshan de dang 'dra ba gzhan du rtog par byed pa de lta yin na de 'jig rten pha rol pa ma yin na de'i 'byung ba'i chos 'ongs pa yin no/ / snyam du sems pa la/ de phyir blo gnas ba'i rten zhes bya ba smos te/ 'grel par ni yid rten med par thal lo zhes bya ba la sogs pa kho na la yid kyi 'bras bu ni rten med pa nyid kyis 'jig pa med pa nyid du mtshon par byed pa yin te/ 'bras bu dbang po la sogs pa 'jig par mi 'gyur ro zhes bya ba'i don to/ /yid kyi rnam shes kyi bskyed bya dbang po la sogs pa rnams kyi khyad par ni yid kyi rnam shes kyi bskyed bya'am rang gi rigs goms pa'i bskyed bya yin la/ yid kyi rnam shes ni rang gi rigs go bar byed pa yin pa'i phyir 'byung ba'i chos ni dbang po rnams kyi rgyu mtshan ma yin te/ 'on kyang blo kho na la brten pa'i blo'i chos yin no/ /dbang po la sred pa dang bcas pa'i las sems pa'i ngo bo sems pa yid kyi yang zhes bya ba de yang / dbang po rnams kyi rgyu mtshan ni de la brten pa'i blo 'phen pa'i sgo nas yin pas/ blo yang brten pa'i gnas su 'gyur ro/ /'byung ba'i chos nyid yin na rten dang ldan pa'i dbang po rnams kyi rnam par 'gyur ba ni yid kyi bskyed bya'am/ / rang gi rigs kyi bskyed byar mi 'gyur ro/ /blo'i rten gang yin ba'i rgyu mtshan ma nyams pa yin par bshad pa ni gnas skabs 'dir dgos pa med do/ /blo'i rten ni 'byung ba'i chos nyid du grub pa yang ma yin la/ gang gi 'byung ba'i chos ma yin pa'i rgyu mtshan yin pa de lta bur tshig nyid las 'grub par 'gyur ro/ /gnas skabs kyi dbang po'i rgyu mtshan gyi chos nyid sgrub par byed pa yin na/ blo rten du grub pa yin na gnas skabs la mi dgos pa'i skyon med pa yin te/ dbang po la sred pa dang bcas pa'i las brjod pa'i phyir ro/ /blo rten yin pas gdon mi za bar 'byung bar 'gyur pa yang ma yin te/ gzugs med pa'i khams pa rnams la med pa'i phyir ro/ /gang gi phyir blo'i chos rgyu mtshan yin pa de'i phyir te/ blo'i bskyed bya rnam par 'gyur ba yin pa'i phyir/ de phyir blo las dbang po yin/ /zhes bya ba skye ba snga ma las byung ba'i blo las so/ /mtshams sbyor bar/ nus ldan mthong ba gang de la/ /zhes bya ba la sogs pa dbugs la sogs pa 'byung bar 'gyur ba'i skye ba la mtshams sbyor ba'i rigs pa nyid blo yang zhes bya ba rjes su bstan pa ni/ de ci 'dra zhig 'phen byed 'gyur/ /zhes bya ba ste/ skye ba snga ma las byung ba'i ji skad gsungs pa'i tshad mas grub pa yin pa/ de 'dra phyis kyang 'gyur ba yin te/ nga rgyal dang bcas pa nyid kyis gdon mi za bar 'byung ba'i 'bras bu nyid yin pa'i phyir ro/ /rigs pa bstan nas/ lung gi rjes su 'brang ba'i 'gro ba rnams tshim par bya ba'i don du/ de dang mi 'gal bar bstan pa ni de'i shes pas te/ dbang po'i ngo bo'i 'bras bu'i shes pa dmigs pa'i ngo bos bdag go zhes pa'i blo la phan 'dogs par byed pa ste/ sngon pos de'i shes pa la bzhin du tshim pa la sogs pa dang ldan pa rnams kyis kyang yin pa'i phyir/ de la brten pa ste lus dang sems dag phan tshun rjes su byed pa can nyid yin par bcom ldan 'das kyis gsungs pa'o/ /bdag go zhes bya ba ni de'i bskyed bya yin pa'i phyir/ shes pa rnams kyi rang rig pa'i rjes su 'brang bar byed pa ma yin nam/ des na de la dmigs pa yin te/ lus med na de'i shes pa med pa'i phyir gzugs med pa'i khams na chos la dmigs pa'i shes pa'i rjes su 'brangs nas byung ba yin par khas blangs pa'i phyir dang / nga rgyal dang bcas pa'i yid kyi rnam shes lus dang lhan cig pa nyid du mthong ba'i phyir dang / de dang bral ba'i gnas skabs ma mthong bas/ yod par mi rigs pa'i phyir de'i 'bras bu nyid yin no/ /de lta na 'o na dbang po dang bcas pa'i lus kyang yid kyi bskyed bya'i khyad par du mthong bas de'i bskyed bya nyid yin no/ /de ltar na de yang lus gzhan gyi bskyed bya nyid yin la/ de yang sems gzhan gyi bskyed bya nyid yin pa'i phyir/ skye ba thog ma med par brgyud pa yin par grub pa kho na yin par bstan pa ni/ gal te dbang po med par blo ma yin/ /zhes bya bas skye ba 'di'i gnas skabs dang / de yang de med par zhes bya ba dang 'brel pas skye ba snga ma'i gnas skabs dang / de'i yang 'og tu yid kyi rnam shes dang dbang po dag phan tshun rgyu can yin no zhes bya bas/ 'byung bar 'gyur pa'i skye ba'i gnas skabs bstan pa yin no/ /de las ci grub ce na/ de ltar phan tshun rgyu mtshan nyid yin gyi lus tsam ni rgyu nyid ma yin na/ /de bstan pa ni/ dbang po med par blo mi 'byung mod ces bya ba la sogs pa ste/ re zhig dbang pa dang bcas pa'i lus ni dbang po'i shes pa bzhin du yid kyi rnam shes kyi rgyu ma yin gyi 'on kyang rang gi rgyu las byung ba'i rten yin te/ de med na 'dam bu'i bam po bzhin du de las gzhan med na gnas bar mi 'gyur zhes pa de'i yid kyi rnam shes med na/ lus kyang rul bar 'gyur bar gnas pa ma yin pa kho na yin pa'i phyir ro/ /de dag rten nyid du mtshungs pa yin te/ goms pa'i yid kyi rnam shes kyi bskyed bya yin pa'i phyir 'jig rten pha rol yin zhes bya ba'i don to/ /de ltar gyur na dbang po'i shes pa ni dbang po las skyes pa kho na goms pas khyad par du 'gyur ba yin la/ de bzhin du yid kyi rnam shes dbang po las sam de'i shes pa las 'byung ba ni khyad par can du 'gyur ro/ /de bzhin du dbang po yang 'byung ba rnams las kun nas ldang bzhin pa shes pas khyad par can du 'gyur ro/ /de'i phyir dbang po dang bcas pa'i lus nyid kyi rnam shes sam cig shos kyi rgyu yin gyi de ni lus kyi ma yin no/ /'di la brjod pa dbang po'i shes pa rnams dang po'i goms pa bskyed bya ma yin te/ glur blangs pa la sogs pa'i shes pa bzhin du de'i bskyed bya'i khyad par du ma mthong ba'i phyir ro/ /mthong ba yin no de'i bskyed bya nyid yin pa la su zhig 'gog par byed/ dbang po dang yid kyi rnam shes dag yid kyi bskyed bya'am/ goms pa'i bskyed bya yang rung ba'i khyad par yin na ni/ de'i tshe yang de bzhin du yod pa'i phyir ji ltar 'jig rten pha rol med pa yin na/ 'di ltar re zhig rtag pa'i lus kyang rgyu ma yin te/ tshad ma dang 'gal pa'i phyir ro/ /mi rtag pa nyid yin na de nyid phan tshun rgyu nyid du 'gyur ro snyam pa'i dgongs pas/ rim bzhin skye ba can dag ni/ /rtag las skye ba mi 'thad phyir/ /ltos par mi rung ba yi phyir/ /zhes bya ba ni rtag pa tshad ma yin pa'i rigs pa ste/ yid rtag pa'i lus kyi bskyed bya nyid yin pa dgag pa la yang rjes su bstan pa ni/ rim can min las rim can min/ zhes bya ba ste/ rtag pa nyid kyang yul dang dus ma chad pa'i yod pa can gyi dngos po yin zhes bya ba'i rigs pas/ dus gsum ma chad pa dang / yul ma chad pa las kyang mngon sum la sogs pa rnams kyi nges na nges pas rjes su dpog par byed pa'i bya ba can mthong ba ni/ ma bcad pa kho na yul du byed pa'i phyir rim pa ma yin pa ste/ dus chad pa po yod pa ma yin pa nye bar mtshon pa'i phyir/ yul yang ma bcad pa'i dngos po rgyu nyid du brtags pa de sel bar byed pa ni/ rim can min las zhes bya ba ste/ rim can zhes bya ba rim pa can gyi 'bras bu nyid ni rgyu'i dus na med pa yin gyi/ rgyu bzhin du yul dang dus kyi nges pa med pa ni 'bras bu zhes bya ba ma yin la/ lus la de bzhin du nges pa yang ma yin zhing de bzhin du de lta bu'i rgyu nyid ma yin te/ rang yod pas gzhan gang du yang nam yang yod pa ma yin par byed na/ de lta bu nyid du smra ba yin la de de ltar khas len pa yin na/ rgyu ma yin zhing / 'bras bu yang ma yin te/ rnam par dbye ba med pa'i phyir 'gro ba rnams len pa dang 'dor ba med par 'gyur te/ de'i phyir/ ji ltar blo lus la rten par 'gyur/ de lta yin du zad mod ces bya bar yang tshangs pa rigs pa ma yin par brjod byar byed pa ma yin no/ /de ltar rtogs pa yang ma yin te/ mthong ba'i rjes su 'brang ba'i nges pa las yul nges pa la sogs pa'i dngos po kho nar nges pa'i phyir ro/ /ma bcad pa'i rtogs pas yang khyab pa yang ma yin te/ de la yang gzhan la yang rtogs pa ni khyab pa yin pa'i phyir ro/ /so sor snang ba nges pa nyid kyang mthong ba las 'byung bar nges pa ni/ de kho na bzhin yin la/ de kho na las khyab par nges pa yin te/ gzhan du mi rigs pa'i phyir ro/ /de bzhin du dus du ma la sogs pa nyid du ma nges pa nyid du snang ba ni rtag pa nyid yin la/ de khas len pa yang rjes su dpag pa la sogs par smra ba khyab pa nges la sogs pa khas len pa dang 'gal ba yin pa'i phyir/ dgag pa ni/ khyad par can min ltos pa'ang med/ /ces bya ba'o/ /de de lta yin na yul lam dus gcig la khyad par can ma yin pa rtogs pa ste/ cha dang bral ba yin na ji ltar dus dang yul gzhan la sogs pa la ltos pa yin rtogs pa'i 'bras bu'i khyad par nyid kyis rtogs pa'i mthar thug pa'i phyir/ rtogs pa'i mthar thug pa ma yin na/ ji srid rtogs pa de srid du yod pa yin no/ /de srid du ni ma yin te/ gzhan du de nyid nges pa'i phyir ro zhe na/ ma yin te de nyid kyi nges pa ni de'i 'bras bu ma yin pa rnam par gcod pa yul yin pa'i phyir la/ de lta bu'i dgongs pas kyang rjes su dpag pa'i khyab pa brjod pa yin no/ /de bzhin du 'grel par yang de'i tshe ma rtogs pa ni de'i rgyu ma yin no/ /gal te rtogs na ni de dang gcig yin pa'i phyir/ 'jig pa'i mthar thug pa rtogs pa'i phyir de nyid kyi tshe zhig par 'gyur te zhes bshad pa yin no/ /nges pa rnam par gcod pa med na 'bras bu nyid la sogs pa khyab pa nges pa med pa'i phyir dang / gzhan gyis rtogs pa'i phyir ram/ de srid dang de srid ma yin pa zhes 'dzin par 'gyur ba yang ma yin te/ rnam par shes pa ni gzhan rig pa ma yin pa nyid kyis ni ma yin te/ ma rtogs pa thams cad kyis dogs pa ring du nus pa'i phyir dang / rim pa nges pa'i phyir/ rgyu'i rim pa nges pa kho nar yin par bstan pa ni/ rim gyis blo 'byung na zhes bya ba'o/ /rig pa ni nye ba nyid yin la rig pa ma yin pa na de dang tha dad pa yin te/ de dang tha mi dad pa yin na de'i rig pas de rig pa ma yin par mi rigs pa'i phyir ro zhes bstan pa ni/ yid kyi blo 'di ni rim pa dang ldan pa zhes bya ba la sogs pa'o/ /tha mi dad pa nyid ni 'dra ba nyid yin la de'i tshe yang yod pa yin na gzhan gyi tshe yang ji ltar yin/ gzhan gyi tshe ni de med nyid/ /ces bya ba ci las yin zhe na/ de lta na de 'bras bu byed par 'gyur ro zhes bya ba smos te srid pa ni ji ltar rtogs pa bzhin 'byung ba'i phyir/ rtogs pa yang mthong ba'i ngo bo yin te/ rang gi dus tsam yul yin pa'i phyir ro/ /de nyid ngo shes pa yang mthong ba dang 'gal bas don byed pa'i yul ma yin pa'i phyir ro/ /rim pa med pa kho na rtag pa nyid rgyu yin no/ /de'i phyir de'i 'bras bu yang de'i tshe kho na 'byung gi/ dus gzhan gyi tshe ni ma yin te/ rgyu med pa'i phyir ro zhes bya ba'i don to/ /gang gi 'bras bu gang yin pa de de dang nye ba yin na/ 'bras bu gzhan bzhin du 'byung ba kho na yin te/ gzhan du na rjes su 'gro ba med na ldog pa yang med pas rgyu ma yin pa nyid thob pa yin par bstan pa ni/ yang na rgyu las 'bras bu de'i zhes bya ba ste/ 'grel pa mdzad pa'i bshad pa ni/ re zhig rim pa can mi rtag pa ni/ 'bras bu'i rgyu nyid kho na ma yin te/ phan tshun rgyu nyid du thal ba'i phyir ro/ /'bras bu ma yin pa'i phyir rtag pa nyid du 'gyur grang na/ rtag pa ni dus gcig pa'i mthar thug pas rim pa ma yin pa dus gzhan na 'byung ba'i 'bras bu'i rgyu ni ma yin te/ de'i tshe med par 'gyur ro zhes bstan pa ni/ gal te lus nyid ces bya ba'o/ /yid kyi rnam shes ni rim pa ma yin pa ma yin te/ dus gzhan du rjes su 'jug pa'i phyir ro/ /dang po 'das pa nyid dus phyi ma la rtogs pa yang ma yin te/ dang po rtogs pa la nye ba ma yin pa'i phyir/ yid kyi rnam shes gzhan dang rim pa dang ldan pa kho na yin par bstan pa ni/ yid kyi blo 'di ni zhes bya ba'o/ /nye ba la skyon bstan pa ni/ de lta ma yin na zhes bya ba'o/ /gnas skabs kyi nye bar bsgyur ba'i ngo bo'i gnas skabs mi 'dzin pas gnas skabs bzung ba kho na yin la/ de nyid thams cad la yang yod pa'i phyir ro snyam du sems pa ni/ 'on te gnas skabs mi 'dzin pas zhes bya ba'o/ /gnas skabs kyis nye bar bsgyur ba'i ngo bo ni gnas skabs can yin la/ de mi 'dzin na ma bzung ba yin zhes bya ba'i don bstan pa ni/ gnas skabs bzung ba ma yin na zhes bya'o/ /gnas skabs kyi nye bar bsgyur ba ni rjes su byed pa ma yin te/ 'on kyang de dang 'brel ba'i ngo bo yin no snyam du sems pa la/ rang gi ngo bo tsam ni 'brel pa ma yin par bstan pa ni/ gal te byung ba dang zhes bya ba'o/ /gal te rtogs pa'i nus pa med pa'i phyir de ltar ma rtogs pa yin na/ dngos su ba'i ngo bo yang de kho na bzhin du 'gyur ro snyam du sems pa la/ rtogs pas mthong ba mngon sum pa'am/ cig shos dngos sum yin pa ste/ gzhan la tshad ma med do zhes bstan pa ni/ rtogs pa nyid yin no zhes bya ba'o/ /gzhan rtogs pa ni shes pa gzhan no/ /dngos po ni dngos po gzhan las skye ba yin la/ dus la sogs pa'i dngos po gzhan gyis nye bar bsgyur ba dang / cig shos dag gi rim pa can nam/ cig shos su yang 'gyur ba yin gyi de dag tsam gyi khyad par gyis 'bras bu nyid dam cig shos ni ma yin te/ rang bzhin tha mi dad pa'i phyir ro snyam du sems pa la/ gal te rgyu'i rim pa can ma yin mod ces bya ba'o/ /rim pa'am gzhan du dus la sogs pas nye bar bsgyur ba ma yin te/ 'o na ci zhe na/ dngos po rnams nyid kyi rang bzhin gyi khyad par nye ba rim pa ma yin pa yin la/ nye ba dang nye ba ma yin pa ni rim pa yin no/ /de bstan pa ni/ gal te rim min zhes bya ba'o/ /'bras bu ni nye ba ma yin pa ma yin nam/ de kho na'i tshe ji ltar 'byung ba yin de'i ngo bo gzhan gyi ngo bor 'gyur ba ni ma yin no de lta yin na rgyu yang nye ba gcig pu'i rang bzhin yin la/ nye ba ma yin pa'i rang bzhin gyis nye ba ma yin pa'i 'bras bur mi 'gyur ba kho nar bstan pa ni/ gzhan gyi tshe ni zhes bya ba'o/ /rgyu yang nye ba dang mi nye ba ma yin nam/ de lta bu'i ngo bo 'bras bu ni tha dad pa yin gyi rgyu ni ma yin pa'i phyir de dag de'i ngo bos 'brel pa yin no snyam du sems pa la/ de lta na de 'bras bu byed par 'gyur zhes bya ba ste/ nye bar dmigs pa'i rgyu dang nye bar dmigs pa dag gis de nyid rtogs pa'i dmigs pa yang nye ba'i dngos po kho na yin gyi/ cig shos ni ma yin no zhes bya ba'i don to/ /gang kho na nye ba yin par rtogs pa de rtogs pa gzhan gyis rtogs bzhin pa ni nye ba ma yin zhes bya ba 'di la 'gal ba med pa ma yin nam snyam du sems pa la 'on te rim gyis zhes bya ba ste/ rgyu gzhan dang gzhan yod pas gzhan dang gzhan du rtogs pa'i yul nyid ni gcig pu la skyes bu'i dbye ba bzhin du 'gal ba med do zhes bya ba'i don to/ /gzhan yang gzhan nye ba ma yin par dmigs pas ji lta ba kho nar rtogs pa de bzhin du rtogs bzhin pa yang yin te/ khyad par med pa'i phyir ro zhes bstan pa ni/ de lta na rim pa med pa ma yin no zhes bya ba ste/ de ltar res 'ga' ba'i rgyu las res 'ga' ba ma yin pa'i 'bras bu mi 'byung zhes bya ba'i don bshad nas/ res 'ga' ma yin pa las res 'ga' mi 'byung ba'i don 'chad pa ni/ yang na rgyu las 'bras bu zhes bya ba ste/ rim pa ma yin te/ rtag pa las te res 'ga' ma yin pa'i rgyu la/ res 'ga' ba'i 'bras bu rjes su 'gro ba ni ma yin te/ de yod kyang res 'ga' mi 'byung ba'i phyir ro zhes bstan pa ni/ rgyu dang mi 'dra ba yang zhes bya ba'o/ /res 'ga' de las 'byung ba'i phyir/ de'i rjes su 'gro ba yod pa ma yin nam snyam du sems pa la/ gang yang de lta bu zhes bya ba smos te/ res 'ga' 'byung ba'i rjes su 'gro ba ma yin te/ 'on te de yod na yang yang du 'byung bas rjes su byed pa ma yin zhes bya ba'i don to/ /rjes su byed pa rjes su 'gro ba ma yin nam/ med na mi 'byung zhes bya bar yang 'gyur la/ de ltar yod na 'byung ba zhes bya ba 'di med na mi 'byung ba zhes bya ba kho nar rtogs pa yin la/ de bzhin du khyab bya med pa ni khyab byed yin la/ de bzlog pa yin na khyab bya yod cing / khyab byed yod pa kho nar grub pa yin gyi/ yod pa gdon mi za bar 'byung zhes bya bar rtogs pa ma yin zhing rjes su dpag pa'i yan lag kyang ma yin no snyam du sems pa ni/ gal te de med na mi 'byung ba zhes bya ba'o/ /'byung ba ni de'i ngo bos rab tu sbyar ba yin te/ de med na mi 'byung zhes bya ba yin la/ de'i ngo bos rab tu sbyar ba nyid kyang / de'i ngo bo yod na 'byung ba'i phyir/ res 'ga' 'byung ba ma yin par bstan pa ni/ gal te de yod kyang med na zhes bya ba ste/ gal te yang med pa dag rtogs na sbyar bya dang sbyor byed nyid rtogs pa ma yin la/ 'byung ba dang 'brel pa sngon du 'gro ba can nyid med pa dang 'brel ba yin te/ de med na med pa'i phyir ro zhes bstan pa ni/ de med pa 'di de med pas/ /zhes bya ba'o/ /ji ltar yod pa dag gi dngos po dag gi rang nyid kho na 'brel pa ji lta ba de bzhin du/ med pa dag gis ma yin nam/ gang gzhan la yang ltos pa yin te/ rgyu med pa la 'brel pa can gyi 'bras bu med par cis mi 'gyur la/ rgyu 'bras bu dang 'brel pa can du cis mi 'gyur te/ rtogs pa med par khyad par med pa'i phyir ro snyam du sems pa la/ med pa dag rang nyid kyi 'brel pa yin na/ yod pa dag kyang yin pa'i phyir gnas skabs pa'i rgyu nyid dam cig shos dag kyang dor bar 'gyur la/ de yang khas blangs pas nges byas pas med pa dang 'brel pa nyid brjod bya yin par bstan pa ni/ gal te 'di zhes bya ba ste de'i ngo bo yod kyang mi 'byung na 'byung ba yang de las mi 'grub po zhes bya ba'i don to/ /de la cir 'gyur zhe na/ ji lta ba de'i gnas skabs zhes bya ba smos te/ de med kyang rang nyid kho na 'byung bar 'gyur ba ni de med na mi 'byung ngo zhes bya ba mi 'grub bo zhes bya ba'i don to/ /med pa ni rgyu ma yin pa yin na/ rang nyid kho na mi 'byung zhes bya ba 'di rigs pa yin par bstan pa ni/ don rnams dngos po med pa ni/ zhes bya ba ste/ med pa ni rang dbang nyid kyi phyir/ de yang bar du gcod pa med na des byas pa'i yod pa la bar du gcod pa med do zhes bya'i don to/ /'byung ba ni gzhan dbang nyid kyi phyir/ rang nyid kho na 'byung bar mi rigs pa'i phyir med pas gegs byas pa yin pa ni de'i ngo bo yod kyang mi 'byung ba'i phyir mi rigs pa yin par bstan pa ni/ yod pa ni rgyu'i gzhan gyi dbang yin pa'i phyir zhes bya ba'o/ /yod pa yin na 'byung ba'i med pa ni rgyu med pa can du mi rigs pa ma yin nam/ gzhan du na yod pa'i gnas su yang 'gyur ba'i phyir sna tshogs pa rtogs pa med pa kho nar 'gyur ro snyam du sems pa la/ dngos po'i yul gzhan la sogs pa ma dmigs pa nyid ni ma yin la/ de ltar na 'di thal bar 'gyur ba ma yin par bstan pa ni/ med pa ni zhes bya ba'o/ /gal te ma dmigs pa kho na med pa yin na/ de yang rgyu med pa yin la rgyu nus pa can yod kyang dmigs pa'i ngo bor mi 'gyur pa'i phyir ji ltar 'byung ba la gegs byed pa yang yin snyam du sems pa ni/ gal te 'bras bu med pa zhes bya ba'o/ /gal te rgyu nus pa can yod kyang med pa yin na/ rgyu med pas 'bras bu med pa yin zhes bya bar mi 'gyur ro/ /des na med pas bar du bcad pa ma yin pa'i phyir/ yod pa dang 'brel pa yin par mi 'gyur bar bstan pa ni/ de lta na 'o na zhes bya ba ste/ rang nyid mi 'byung ba zhes bya bas med pa la bar du gcod pa med par bstan pa yin no/ /des nges par byas pa ma yin pa zhes bya bas de sngon du 'gro ba can gyi yod pa la bar du gcod pa med par bstan to/ /nges pa med pa nyid rnam grangs kyis bstan pa ni/ des na 'bras bu ma yin no zhes ba ste/ yod pa'i bar du gcod pa rang dbang yin na/ dngos pos nan gyis dngos po bskyed pa yin na rgyu med pa can gyi/ med pa yang yod pa'i 'og tu 'byung ba yin par bstan pa ni/ gang gi tshe rgyu yod na 'byung ba zhes bya ba ste/ rang gi ngang gis 'gag pa yin yang 'byung ba yin no zhes skabs dang sbyar ro/ /ci las shes she na/ gzhan dang gzhan zhes bya ba'o/ /gal te 'byung ba rang gi ngang gis 'gag pa med pa yin na/ 'di de med par rab tu sbyar ba ma yin te/ de med kyang yod pa'i phyir ro/ /rang gi ngang gis 'gag pa de'i med pas rab tu sbyar ba yin zhes de skad du zer/ 'on kyang rgyu'i rgyun med na 'bras bu'i rgyun med pa yin par rtogs pa bstan pa ni/ de med pa nyid na zhes bya ba'o/ /de ltar yang rgyu yod na 'byung ba kho na'i phyir/ 'bras bu khyab par byed pa yin pas/ rgyu med kyang 'byung ba yin par bstan pa ni/ de'i phyir rgyu dang 'brel pa can nyid ni nges pa can nyid du 'gyur ba kho na yin pa'i phyir rgyu nges pa can kho na 'bras bu yin no zhes bstan pa'i don to/ /rim can ma yin pa las te/ res 'ga' ba ma yin pa las rim pa can te res 'ga' ba yin no/ /lhan cig byed pas bsgrub par bya ba'i phul du byung ba ni khyad par yin la/ de ma yin pa gang la yod pa de ni khyad par can yin te/ de'i ltos pa med par khyad par can dang tha mi dad pa phul du byung bar byed pa'i lhan cig byed pa yin par bstan pa ni/ khyad par sgrub tu med pa ni zhes bya ba'o/ /'on te lhan cig byed pa po nyid mtha'i gnas skabs bzhin du lhan cig byed pa yin na/ de lta yin na de'i gnas skabs rnams kyi re re'i nus pa yin pa'i phyir/ de kho na lhan cig byed pa'i rgyur 'gyur ba yin la/ rtag pa de la nye bar ma bor ba'i phyir/ rgyu nyid kyi phyir ni ma yin par bstan pa ni/ khyad par tha dad par khas len na yang zhes bya ba'o/ /rtag pa nyid yang mi byed na mtha'i gnas skabs bzhin du lhan cig byed pa'i don du mi 'gyur ro/ /des na mtha'i gnas skabs bzhin du rtag pa yang byed pa yin no snyam du sems pa ni/ khyad par de de'i yin no zhe na zhes bya ba'o/ /bden te/ re zhig khyad bar du byed pas lhan cig byed pa ni ma yin te/ rtag pa nyid med par thal bar 'gyur ro zhes bstan pa ni/ ma yin te khyad par zhes bya ba'o/ /khyad par las ni lhan cig byed pa'i'o/ /khyad par zhes bya ba ni khyad par las lhan cig byed pa las khyad par du byed pa yin zhes bsgrubs pas khyad par ni phul du byung ba'o/ /don med do zhes bya ba ni snga ma bzhin du byed pa po nyid ma spangs pa'i phyir zhes bya ba'i don to/ /khyad par rtogs pa kho na thams cad du yin na rtag pa la yang tshad ma yod par 'gyur ba zhig na/ de ni med pa kho na ste res 'ga' khyad par med par yang rtogs pa'i phyir ro snyam du sems pa ni/ gal te khyad par mi rtogs na zhes bya'o/ /gal te lhan cig byed pa'i dus dus su yang khyad par med pa nyid yin no/ /de snga ma'i ngo bo kho na ma bor ba yin na/ ji ltar glo bur pa de la ltos pa yin/ nus pa med pa byed pa po la ma yin pa la ltos pa ni ma yin te/ de byed pa yin na de'i lhan cig byed pa la ltos pa yin par bstan pa ni/ de lta na ltos ji ltar 'gyur/ gang gi phyir zhes bya bas khyad par du skye ba bsal ba yin par bstan pa ni/ de la ni/ khyad par yang ni yod pa ma yin zhes bya ba'o/ /khyad par can gyis byed pa yin la/ byed pa nyid kyang gzhan byed pa por lhan cig byed pa la ltos pa yin gyi/ mi byed pa la ni ma yin par bstan pa ni khyad par yod na ni zhes bya ba'o/ /ltos pa khyad par du byed pa po la khyad par dang ldan pa ltos pa yin pa 'di la 'jig rten na grags pa'i tshad mas yod par bstan pa ni 'di'i don du zhes bya ba ni khyad par gyi don du'am/ 'bras bu'i don du yin no/ /nye bar bsdu ba ni de'i phyir zhes bya ba ste/ khyad par med pa la ste khyad par bsgrub tu med pa ni lhan cig byed pa ltos pa med pa'o/ /mi byed pa'i ngo bo las gzhan pa de byed pa'i ngo bo ni khyad par yin la/ de dang bral ba khyad med pa/ /'bras bu mi byed pa ni de byed pa'i lhan cig byed pa la mi ltos pa yin no snyam du sems pa la/ gal te yang de khyad par med pa'am rim pa med pa na de las skye ba'i 'bras bu ni lhan cig byed pa las sam/ gzhan las rim pa dang ldan par skye ba ni ma bsregs pa'i bum pa las bsregs pa'i bum pa lta bu yin no snyam du sems pa la/ lus las zhes bya ba smos te/ bum pa gzhan las skye ba yin par mthong ba ni/ gzhan te me dang phrad pa las khyad par can yin par ni rigs kyi blo ni de lta ma yin te/ gzhan las skye bar ma mthong ba'i phyir ro/ /mthong ba ni yin yang lus ni rgyu ma yin no/ /des na rim pa'i ngo bo ni khyad par du byed pa kho na de byed pa yin no/ /de bzhin du blo gzhan yang yin pa'i phyir blo ni des byas pa kho na yin te/ rtag pa'i lus kyis byas pa ni ma yin te/ rjes su 'gro ba la sogs pa med pa'i phyir ro zhes bya ba'i don to/ /sngar gyi blo ni bya ba ni 'bras bu yod pa yin na/ de'i phyir de yang rim pa dang ldan pa'i 'bras bu'i rgyu ma yin nam/ de lta yin te rim gyis byed pa rim pa dang ldan pa'i khyad par de yin no/ /rim pa can ma yin pa'i khyad par can nyid yin na 'bras bu cig car ba'i skyon yin par bstan pa ni 'on te blo snga ma snga ma zhes bya ba ste/ khyad par du 'gyur ba zhes bya ba ste/ khyad par gyis sam rim gyis kho nas so/ /rtag pa ni 'jig pa'i mthar thug par snang ba ni gcig yin pa'i phyir/ gcig gi tshe snang ba ni skad cig ma gzhan la mi 'byung bas rgyu med pa'i phyir de'i tshe 'bras bu mi 'byung ngo zhes sun 'don pa ni skad cig ma la yang mtshungs pa ma yin nam/ de yang skad cig ma gzhan la yod pa ma yin te/ gzhan du na skad cig ma nyid du 'gal bar 'gyur ba'i phyir ro/ /skad cig ma gzhan nges pa'i yul yod pa'i phyir skyon med do/ de dang lhan cig nyid yin na de yang dam pa'i khongs su gtogs pas dus phyi ma nyid ma yin pa'i phyir rtag pa nyid rim gyis ma yin no/ /de'i tshe bdag nyid thams cad rtogs pa yang dus gzhan du kun du rgyu ba ni ma yin te/ ji srid du 'jig byed med pa de srid gnas pa yin par ni mi rigs te/ mtha' ma bzhin du dang po la yang 'jig pa'i mthar thug pa can du snang bar khyad par med pa'i phyir ro/ /de'i tshe 'jig par byed pa'i rgyu med pa'i phyir 'jig pa ma yin te/ dngos po ni bdag nyid thams cad kyis snang ba yin no zhe na/ 'jig pa'i rgyu med du zin kyang de'i mthar thug par yang rtogs pa yin na/ mtha'i gnas skabs bzhin du ji ltar phyi ma'i dus su yod pa yin mi rtag pa nyid ni skad cig re re zhing gzhan dang gzhan pa'i phyir snga ma nyid phyis yod pa ni ma yin no/ /de'i phyir snga ma ni phyi ma las rim pa dang rgyu nyid kyang yin te/ de ltar mthong pa'i phyir dang / gzhan du ma mthong ba'i phyir ro/ /gang gi tshe de dang de las 'byung ba ni de las gzhan pa las yin par ma dmigs pa'i phyir de'i bskyed bya nyid yin no/ /'jig rten gsum po yang rgyu dus mtshungs pa yin na/ rgyu las ji ltar ma byung / de nyid du ma rtogs pa'i phyir la 'di la ni de nyid du nges pas dbye ba yin na/ de'i 'bras bu nyid yul du byed pa yin pa'i phyir rgyu nyid du yod par rtogs pa yin no/ /de nyid kyi phyir de kho na rim gyis byed pa yin par yang grub par bstan pa ni/ sngon med skad cig re re yi ste/ de dang de'i/ snga ma snga ma'i skad cig ni rgyu yin no/ /'bras bu 'das pa rgyu 'da' bar rtogs pa'i phyir 'bras bu yang snga ma'am phyi ma yang nga rgyal dang bcas pa'i blo dang lhan cig pa ma yin pas de dang lhan cig pa'i rnam par 'gyur ba yin la/ de kho na bzhin du rgyu yang yin te/ de la yang de kho na bzhin du mthong ba'i phyir ro/ /me dang du ba dag gi phan tshun phan 'dogs byed dang phan gdags bya yin pa bzhin du lhan cig pa ma yin no/ /de'i phyir tshogs pa las tshogs pa skye ba ma yin la 'di la bzlog pa yin pa'i phyir/ ci'i phyir de bzhin du skye ba ma yin zhes bya ba'i don to/ /skye ba 'di la ni de bzhin du 'gyur na skye ba phyi ma la ji ltar yin snyam du sems pa la/ de la yang skye ba dang po la blo dang lhan cig pa'i lus su dmigs pa'i phyir/ de lta bu'i rnam pa can kho na'i lus ni du ba las me bzhin nam/ yan lag gi rnam par 'gyur ba la sogs pa'i mngon par 'byung ba las bzhin du de'i rgyu yin par rjes su dpog pa yin par bstan pa ni/ des na blo dang lhan cig pa'i lus zhes bya ba ste/ de'i de ma thag pa'i rgyu nyid du mthong ba'i phyir sngon dang phyi ma'i de kho na 'dra ba'i lus ni rgyu yin par rjes su dpog pa yin pa'i phyir 'jig rten grub pa yin no/ /lus kyi bskyed bya'i lus ni blo'i rgyur skad cig re re la dmigs pa ni sred pa'i thog ma dang tha ma la yang yod pa rang gi rgyu mtshan lus gzhan gyis 'phags pa yin la des na srid pa gzhan 'grub pa yin no zhes bya ba'i don to/ /skad cig ma'i dngos po rnams la dus gzhan gyi rjes su 'brang ba med pa'i phyir ci 'dra ba'i rim pa yin/ gang gi phyir dus kyi dbye bas bya ba dang ldan pa tha dad pa yin na/ rim par 'gyur gyi gzhan du ni ma yin no snyam du sems pa la/ skad cig ma'i dngos po las skad cig snga ma snga ma las phyi ma phyi ma 'byung ba kho nar rim pa'i tha snyad kyi yul yin gyi/ gzhan du ni ma yin par bstan pa ni/ sngon med skad cig re re yi/ /zhes bya ba ste/ gang gi phyir skad cig ma la yang rim pa dang ldan pa'i yul ni blo'i rgyu yin la/ de lta bu'i 'bras bu 'byung bar byed pa srid pa'i dang po la mthong ba ji lta ba de bzhin du mtha' ma la yang de kho na ltar mthong ba de lta bu kho na rang las byung ba'i lus gzhan 'phen par 'dod pa'i phyir skye ba phyi ma grub pa yin par bstan pa ni/ de'i phyir na dus kun du rgyur mthong ba nyid ces bya ba ste/ blo'i rgyu lus kyi bskyed bya yin pa'i phyir/ skye ba dang po la de lta bu'i lus gzhan 'phen par byed pa yin zhes bya ba'i don to/ /yang na skad cig ma nyid yin yang skad cig ma snga ma nyid thams cad kyi byed pa po yin pas ci'i phyir 'bras bu cig car ma yin zhe na/ sngon med skad cig re re ni 'bras bu'o/ /snga ma snga ma ni rgyu gzhan dang gzhan yin la de bzhin nyid re re ni ma yin na gang gis cig car ba'i skyon du 'gyur/ de'i phyir rgyu min pa nyid de rtag pa nyid yin la/ rtag pa nyid ni dus kun du ste/ dus thams cad khyab par byed pa nyid du cig car mthong bar 'gyur/ gzhan ni ma yin no zhes bya bar sbyar ro/ /yang na rgyu'i zhig pa ni rgyu las gzhan ma yin la des na de dang lhan cig 'byung ba'i 'bras bu dang rgyu dang lhan cig 'byung ba yin pa'i phyir skad cig ma nyid la yang 'bras bu cig car bar 'gyur te/ de dang de ni 'di kho na las 'byung ngo snyam du sems pa la/ sngon med skad cig re re zhes bya ba ste/ dus nges pa'i dngos po ni yul nges pa bzhin du yul gzhan dang gzhan nyid las ldog pa yin gyi rang gi dus la ni ma yin te/ rang nyid med par thal bar 'gyur ba'i phyir ro/ /ldog pa ni ldog pa po las gzhan ma yin te/ de lta yin na ni dngos po mi 'jig par thal bar 'gyur ba'i phyir ro/ /de'i phyir gnyis pa kho na snga ma zhig pa yin no/ /zhig pa dang phyed zhig pa dang ma zhig pa la sogs pa'i rnam par rtog pa rnams skad cig ma'i phyogs la skyon ma yin te/ 'bras bu'i snga rol na med par khas len pa'i phyir ro/ /skad cig ma dang skad cig ma ma yin pa nyid la 'bras bu'i skye pa dgos pa ma yin te/ de lta mod kyi des kyang rang nyid thob pa'i don du yod pa la ltos pa yin la/ de yang gang gi tshe ltos pa kho na yin gyi de'i tshe 'bras bu ni ma yin te/ ltos pa med par thal bar 'gyur ba'i phyir ro/ /gang gi phyir ltos pa zhes bya ba ni de las rang nyid 'thob pa yin gyi thob pa'i bdag nyid can la ni de mi srid pa yin te/ mi ltos pa'i phyir ro zhes bya ba'i don to/ /yod pa'i yang snga na yod pa nyid ni 'bras bu'i ltos pa yin te/ des 'phangs pa nyid du rtogs pa'i phyir ro/ /cig shos ni ma yin te/ de'i phyir de kho na rgyu nyid kyi rgyu mtshan yin te/ 'bras bu'i dus na mi gnas pa la yang mtshungs pa yin par bstan pa ni/ de'i phyir na dus kun du rgyur mthong bar 'gyur ba ni/ dus kun du ste thams cad la zhes bya ba la ltos pa yin no/ /rtag pa nyid la ni tshad ma ci yang yod pa ma yin no zhes bya ba'i don du'o/ /blo'i rim pa ni/ rgyu lus kyi yang rim par rtogs par byed pa'i phyir ro/ /blo dang lhan cig pa'i lus kho na gnas skabs pa yin no/ /de'i phyir lus kyi bskyed bya'i blo ni lus dang lhan cig pa kho na yin la/ blo'i rgyu lus ni de yang blo dang lhan cig pa kho nar bstan pa yin no/ /des na blo dang lhan cig pa'i lus kyi rgyu yang skye ba dang po la de lta bu kho na yin par 'di las go bar byed pa yin la/ skye ba phyi ma la yang de lta bu'i rgyu mthong ba las 'bras bu yang de lta bu kho na yin par ji ltar mthong bas rtogs par bya ba la yin zhes bya ba'i thob pa yin no zhes bstan pa ni/ gang kho na blo'i lhan cig byed pa'i lus zhes bya ba'o/ /'on te 'brel pa 'dzin pa'i thabs gang yin zhe na/ de'i phyir lhan cig ces bya ba'o/ /lan cig kyang rang gi dus su 'dzin par mthong bas 'di'i 'bras bu yin zhes bya ba la sogs pa snga ma dang phyi ma la ltos pa'i ngo bo mi 'dzin pa kho na ma yin nam snyam du sems pa la/ rgyu dang 'bras bu nyid ces bya ba ste/ 'bras bu la sogs pa ni tha snyad du grub pa yin no/ /ji skad rtogs pas 'brel par byed pa yin zhes gsungs pa'o/ /de'i phyir rjes su 'gro ba dang ldog pa'i ngo bo'i rnam par rtog pas go bar bya ba ni/ 'bras bu nyid la sogs pa yin gyi gzhan ni ma yin no zhes bya ba'i don to/ /gal te yang blo dang lhan cig pa'i lus ni de dang 'dra ba'i 'bras bu yin pa'i phyir dang / rgyu yin pa'i phyir rtogs byed du 'dod pa yin na/ 'gal ba can 'chi ba mthong ba'i phyir dro ba mthong ba las grang ba bzhin du med par yang rtogs par 'gyur ro/ /rgyu ma tshang ba med pa'i sems rgyun du yod pa ni 'chi ba yod na med pa'i phyir 'gal ba yin no/ /dgra bcom pa'i rgyun la khyed kyang 'di khas len pa yin gyi/ ma rig pa dang srid pa med pa'i phyir dgra bcom pa la 'bras bu nyid mtshams sbyor ba med pa ma yin la/ de dag med kyang 'tsho ba'i gnas skabs la yang mtshams sbyor ba mthong ba'i phyir ro/ /skad cig ma zhig pa ni 'chi ba ma yin te/ de yod kyang 'tsho'i gnas skabs na mtshams sbyor bar mthong ba'i 'gal ba med par thal bar 'gyur ro/ /rgyun chad pa yang ma yin te/ de'i bsgrub bya yin pa'i phyir ro/ /'on kyang de'i rgyu'i dngos po ni gnyid log pa bzhin nam/ 'gog pa'i snyoms par 'jug pa lta bu'i rgyun chad pa las gzhan pa'i rgyun chad pa ni/ gzhan du mi 'thad par go bar byed pa yin gyi/ der rgyun chad pa mtshams sbyor bar rigs pa ni ma yin to/ /gang gi phyir gnyid log pa la sogs pa na 'gag pa'i sems ni/ de nyid kyi tshe gzhan du mtshams sbyor ba ma yin la/ gnas pas 'phangs pa'i las med pa tsam ni 'chi ba ma yin te/ gnyid log pa la sogs pa ma mthong ba'i phyir ro/ /de'i dus su byung ba rgyun chad pa yang ma yin 'chi ba yang ma yin te/ ma mthong ba'i phyir ro/ /rnam shes dang tshe 'gag pa'i mtshan nyid ni 'chi ba yin no zhe na/ yang de lta yin du zin kyang 'gal ba gnyid log pa bzhin du ji ltar mtshams sbyor bar byed ces smras pa yin no/ /rgyun chad pa'i 'gag pa ni rgyun mi 'chad pa dang 'gal ba'i phyir mtshams sbyor ba med pa yin no/ /gnyid log pa'i 'gag pa bzhin du mtshams sbyor ba dang 'brel pa can gyi 'chi ba ni 'gag pa ma yin te/ de ltar ma mthong ba'i phyir ro/ /tshad ma thams cad nub pa na yod pa srid par yang nus pa ma yin te/ gtan tshigs kyi 'gran zla rnyed bla ba'i phyir rgyun chad pa dang mtshams nyid mi mthun par tshad mas grub pa'i phyir ro/ /de'i phyir rgyu las sam 'bras bu las 'chi ba'i 'og tu 'bras bu dang rgyu dag shes pa ma yin la/ 'chi bas bar du bcad pas ma skyes pa'i phyir ro/ /bar du gcod pa med na skye ba yin pa ni/ de lta'i gnas skabs ji lta ba bzhin du'o zhes bya ba ni rnam par dbye ba yin no snyam du sems pa la/ tha ma'i sems ni sems gzhan dang mtshams sbyor zhes bya ba ste/ re zhig gnyid log pa la sogs pa bzhin du rnam shes la sogs pa 'gag pa ni/ gnas pa 'phen par byed pa'i las 'gag pa kho na las gzhan pa yang ma yin te/ 'di yod na gzhan shugs kyis mi 'thob pa'i phyir la/ gnas pa'i 'phen byed yod pas 'gag pa ni gzhan du mi mthad pa yin te/ rgyu mtshan gzhan 'phen byed yin no/ /de la yang gnyid log pa yin no zhes zer ro/ /rgyu mtshan gzhan yod du chug kyang de yang mtshams sbyor ba dang 'gal ba ma yin te/ gnyid log pa kho na bzhin du dus nyung zad cig 'gag pa yang skye bar mthong ba'i phyir ro/ /'di la yang ma mthong ngo zhe na/ ma yin te/ skye ba dang po'i sems dang lus kyang goms pa la sogs pa'i bskyed bya'i khyad par du mthong ba las skye ba snga ma'i mtha'i sems mtshams sbyor ba ni rjes su dpag pa'i phyir ro/ /dgra bcom pa'i sems kyang de bzhin du 'gyur ro zhe na/ 'gyur ba yang skyon ci yod rgyu ma tshang ba las de mtshams sbyor ba ma yin pa'i phyir thams cad 'thad pa yin no/ /sems gzhan dang mtshams sbyor ba ni yul la'o/ / tha ma'i sems ni 'chi ba'i sems so/ /'gal ci yod ni med pa ste 'gegs par byed pa med pa zhes bya ba'i don to/ /'gal ba can nyid ni 'gegs par byed pa yin par brjod do/ /'bras bu'i gtan tshigs las snga ma dang phyi ma'i skye ba 'grub pa dang 'gal ba dmigs pa yin pas de mi 'grub pa'i phyir/ 'gal ba mi 'khrul pa can ni the tshom gyi rgyu yin no snyam du sems pa ni/ gal te ji ltar dbus kyi gnas shes par bya ba'o/ /'dod chags bral ba'i 'chi ba'i sems dang nying mtshams sbyor ba ni dro ba dang grang ba bzhin du 'gal bar mthong ba yin par bstan pa ni/ gang gang 'chi sems de dang de/ /zhes bya'o/ /'chi ba ni sems skad cig phyi ma la med pa ma yin nam/ de ni mtshams sbyor ba dang 'gal ba can ma yin te/ 'tsho ba'i gnas skabs na 'gal bar ma mthong ba'i phyir ro/ /'dis ni skyon med par yang bshad pa yin no snyam du sems pas zer ba ni/ 'chi ba'i sems gang yin pa de ni zhes bya ba ste/ rnam shes med pa tsam ni 'chi ba ma yin te/ 'tsho ba'i gnas skabs bzhin du de nyid kyi tshe mtshams sbyor bar thal bar 'gyur ba'i phyir ro/ /rgyun med pa la yang 'chi ba ma yin te/ rgyun med pa ni mtshams sbyor ba med pa'i ngo bo nyid kyis 'dod pa grub pa kho na yin pa'i phyir ro/ /gnyid log pa la sogs pa dang mtshungs pa yang ma yin te/ de nyid kyi tshe mtshams sbyor bar thal bar 'gyur ba'i zhes bya ba'i don to/ /'gal ba'i bsgrub bya dag gis khyab pa yod kyang chos can gcig la bsgrub bya gnyis ma yin te/ mi rigs pa'i phyir gnod pa dang bar du gcod pa yang ma yin te stobs mtshungs pa'i phyir dang / khyab pa yod pa'i phyir ro snyam du sems pa la sgrub byed dang gnod byed dag ni 'gal ba yin la/ bar du gcod pa ni khyab pa kho na yin na rigs pa yin gyi gzhan du na gnod pa yin par bstan pa ni/ 'on te bzlog pas zhes bya ba nas mtshungs so zhes bya ba'i bar du'o/ /'gal ba'am bar du chod pa'am yod pa dang med pa yang rung ba khas blangs pa kho na 'di sgrub par byed pa bstan pa ni/ gang gi phyir zhes bya ba ste/ 'on kyang 'chi ba ni mtshams sbyor ba dang 'gal ba ma yin te/ gnas pa'i rgyun 'gag pa yin na rnam shes 'gag pa'i ngo bo yin pa'i phyir ro/ /'gal ba zhes bya ba kho nas mtshams sbyor ba ni ma yin te/ rgyu gzhan gyis 'phangs pas mtshams sbyor ba yin pa'i phyir ro/ /de bzhin du skye ba'i dang po'i sems goms pa'i bskyed bya'i khyad par ni/ de dang 'dra ba'i sems gzhan gyis 'phangs pa yin par rtogs pa yin par bstan pa ni/ 'chi ba'i sems ni zhes bya ba ste/ dgag bya mtshams sbyor ba la de bzhin du de'i yul la yang yin par rnam par 'grel pa ni/ re zhig sems ni sems gzhan dang 'gal ba ma yin la/ de bzhin du 'chi ba yang de med pa'i ngo bo 'tsho ba'i gnas skabs lta bu'o/ /gnyid log pa bzhin du rtog pa yang ma yin te/ tshad ma med pa'i phyir ro/ /gnas pa'i rgyu yod kyang sems 'gags pas de'i rtog pa yin no/ /dus ma yin par 'chi ba 'di la yang gnas pa'i rgyu ni yod pa kho na yin no zhe na/ ma yin te/ yang ba ma spangs pa kho nas der sems 'gag pa la 'gag byed gzhan du rtog pa la ni/ tshad ma med do zhes bstan pa ni lhan cig mi gnas pa'i mtshan nyid dam zhes bya ba rgyu ma tshang ba med pa yin pa ni gzhan yod na med pa zhes bya ba'i 'gal ba'i mtshan nyid dam zhes bya bas mtshon pa yin no/ /'chi ba'i sems nyid 'ongs na zhes bya ba ni 'chi ba'i sems nyid dang mtshams sbyor bar byed pa nyid dang 'gal ba med do zhes bya ba'i don to/ /re zhig sems ni rang nyid kyi rang rig par bya ba yin la gzhan gyi tha snyad rjes su dpag bya ma yin nam/ de 'gag par yang nges pa kho na yin te/ de lta bu'i sems yod na de'i 'bras bu med par mi rigs la de lta bu'i 'gag pa gzhan lta bu'i mtshams sbyor ba yin par yang mi rigs te/ gnyid log pa la sogs pa la ma mthong ba'i phyir ro/ /de'i phyir 'chi ba la sogs pa yin na de lta bu'i sems kyi rgyun nub pa'i phyir/ snang ba bzhin du mun pa 'gal bar rtogs pa yod pa kho na yin na de'i phyir de ji ltar mtshams sbyor ba las bzlog pa mthong ba med pa yin snyam du sems pa la/ gnyid log pa'i dus bzhin du 'chi ba'i dus na 'gag pa yang rmi lam gyi yul bzhin du skye ba phyi ma'i lus mtshams sbyor ba bsgrub bya yin pa'i phyir/ de dang 'gal bar rtogs pa yang ma yin te/ 'chi ba'i 'og tu de bzlog pa rtogs pa med pa'i phyir dang / de'i tshe de ma 'ongs pa nyid kyis dbang po las 'das pa'i phyir ro/ /me dang dus phyis 'byung ba'i grang ba'i rgyun 'gal ba ni ma yin te/ rgyu ma tshang ba yod na gzhan yod pas med pa 'gal bar rtogs pa'i phyir ro zhes bya ba'i dgongs pas/ skye ba gzhan mtshams sbyor ba ni/ snang du rung ba ma yin no/ /zhes bya ba'o/ /rmi lam bzhin du 'chi ba na dus gzhan du mtshams sbyor ba ma mthong ba yin na/ ji ltar khas len pa yin zhe na/ ma yin te skye ba dang po'i lus dang sems dag rang gi rigs pa'i bskyed bya'i khyad par can ni de'i 'bras bu yin par go ba yin na/ ji ltar mtshams mi sbyor ba yin te/ bzlog par mthong ba'i phyir ro/ zhes bstan pa ni/ 'bras bu nyid ni mtshams sbyor ba med pa dang 'gal ba yin te zhes bya ba ste/ de nyid kyi phyir rgyu mtshan nub na/ rgyu mtshan can nad zhi ba bzhin du 'chi ba yin na/ rgyu sems med pa'i phyir mtshams sbyor ba med pa gsal ba yin no/ /'chi ba yod na rgyu nub pa'i phyir 'byung bar 'gyur ba la mtshams sbyor ba dang 'bras bu med par grub pa kho na dgra bcom pa'i ma yin nam/ de ltar 'gal ba yin/ 'di la bstan pa/ dgra bcom sems gang yin de yang / /gang las mtshams sbyor med pa ste/ /mtshams sbyor dang bral ba yin par gang las te/ tshad ma gang las 'dod par te shes pa ma yin pa'o/ /de yang 'gog pa la snyoms par 'jug pa lta bur mtshams sbyor ba can du tshad mas rtogs pa yin te/ sems la ni shin tu rnam par gcod par byed pa cung zad kyang yod pa ma yin no/ /mya ngan las 'das pa yin no zhe na/ ma yin te de ni zag pa dang bral ba tsam yin pa'i phyir ro/ /lhag ma dang bcas pas de thob pa yin pa'i phyir lhag ma dang bcas pa'i mya ngan las 'das par brjod do/ /zag pa thams cad zad pa yin na de nye bar brten par byed pa med pa'i phyir/ rnam pa yin par mi rigs te/ sems nyid snga ma'i nye bar brten par byed pa'i phyir ro/ /nyes pa thams cad zad kyang skyon can ma yin pa'i sems ni rnam par chad par 'os pa ma yin te/ gcad bya gcod byed nyid dag ni/ /phyi rol gyi ni khams bzhi po/ /zhes bstan pa'i phyir ro/ /de yang de lta bu'i dge ba'i bshes gnyen dang phrad nas snying rje la sogs pa goms pas sangs rgyas kyi rjes su nod par byed pa yin la/ de med na/ srid par mtshams sbyor ba'i rgyun zad pas mtshams sbyor bar byed pa kho na yin zhes bya ba 'di nyid rigs pa ma yin par 'phags pa rnam pa'i chos pad+ma dkar po la sogs pa'i rjes su 'brang bar bya'o/ /mar me shi ba lta bur ni/ /de yi sems ni rnam grol yin/ /zhes bya ba'i lung las mtshams sbyor ba med par rtogs pa yin no zhe na/ tshad mas ma grub don can gyi/ /zhes bya ba smos te/ dgra bcom pa'i sems kyang tshad mas mtshams sbyor ba 'dzin pa'i rigs pas ma grub pa yul yin no/ /dgra bcom pa'i 'tsho ba'i gnas skabs kyi sems ni de las gzhan par mtshams sbyor bar mthong ba yin la/ so so'i skye bo'i sems kyang sems gzhan gyi rjes su mtshams sbyor bar byed pa yin la/ de ltar mthong ba kho na'i phyir ro/ /skyon can ma yin pa'i phyir dor bya ma yin te/ gzhan du na mya ngan las 'das pa yang de lta bur thal bar 'gyur ro zhes bya ba la sogs pa'i rigs pa ni/ mdo sde ji lta ba bzhin du blta bar bya'o/ /grub mtha'i rjes su 'brang ngam ci/ /zhes bya ba ni ma yin pa nyid do/ /rigs pa dang 'gal ba'i grub mtha' ni rtog pa'i skul byed bzhin du rjes su 'brang bar 'os pa ma yin no/ /'on te so so'i skye bo'i sems ni mi rig pa dang sred pa la sogs pa'i nyon mongs pa'i dbang gis mtshams sbyor ba can du mthong ba yin la/ dgra bcom pa la ni de med pa'i phyir ji ltar mtshams sbyor ba can yin snyam du sems pa ni/ gal te de rgyu bral phyir na/ /zhes bya ba ste/ de ste dgra bcom pa'i sems mtshams sbyor ba med pa'i phyir/ rgyu ser sna la sogs pa ma tshang ba'i phyir zhes brjod pa yin na/ tshang ba la ni mtshams sbyor ba dang bcas par bstan par 'gyur ro/ /khyad par dgag pa na lhag ma yang khas len pa gtso bo'i phyir de yang sngar mtshams sbyor ba med par khas blangs pa dang 'gal ba yin par bstan pa ni de nyid ces bya ba tshang ba yin na/ mtshams sbyor ba can yin zhes bya ba'i kho bo cag gi 'dod pa kho na yin par mtshams sbyor ba med pa bzhin du brjod pa yin te/ 'on kyang brjod pa yin no zhes bya ba'i don to/ /'on te dgra bcom pa'i sems mtshams sbyor ba ma yin pa ni/ rgyu ma tshang ba ste med pa'i phyir zhes bya ba ni dogs pa'i don yin na/ 'di la de nyid dgra bcom pa'i sems 'dir de/ mya ngan las 'das pa thob pa yin par ma brjod pa ste/ ma byung ba yin na gang gis rgyu med par 'gyur/ de bzhin du rim pa ji ltar bya ba'i dor bya la sogs pa la goms par gyur pa yal bar 'dug pa dang po nyid nas ma lus pa la btang snyoms pa'i yang sems pa ni/ rgyun du byed pa kho na yin te/ legs par spyad pa dang / nyes par spyad pa dag gis bde 'gro dang ngan 'gro rnams su mtshams sbyor bar byed pa yin la/ de med na bde 'gro dang ngan 'gro yang mtshams sbyor ba med pas sems 'ba' zhig tsam gyis mtshams sbyor bar byed pa yin te/ bsod nams kyi tshogs bskyed pas sam las dang nyon mongs pa la dbang thob pa nyid ni 'dod bzhin du srid par 'jug pa yin pa'i phyir nyes pas goms pa ma yin par rigs pa yin par kho bos mthong ngo / /'grel pa mdzad pas bshad pa ni/ dgra bcom sems gang yin de yang / /gang las mtshams sbyor med par 'dod/ /ces bya ba nas brtsams nas yongs su gsal ba kho nar rnam par phye ba ni/ dgra bcom pa 'chi ba mtshams sbyor ba med pa ni yod pa dang med pa bzhin du/ mtshams sbyor ba nyid dang 'gal bar 'gyur ba kho na ma yin nam snyam du sems pa ni/ gal te 'dir zhes bya ba'o/ /mtshams sbyor med pa'i bsgrub bya dang / dgra bcom pa'i 'chi ba mya ngan las 'das pa'i ming can 'gal ba can yin zhes zer ba ni/ mar me zhi bar 'gyur ba ltar zhes bya ba'o/ /las dang nyon mongs pa las byung pa'i skye ba bde 'gro la sogs pa ma yin pa'i phyir/ de la ltos nas mar me bzhin du zhes gsungs pa yin no/ /'gro ba ma gtogs par yang sems cis rgyun byed pa ma yin snyam du sems pa ni/ 'gro ba ma gtogs pa'i rgyun ma mthong ba'i phyir khas blangs pa ma yin par bstan pa ni/ mar me bzhin du zhes bya ba'o/ /dgra bcom pa'i sems ngo bo gang gis mtshams sbyor ba med par tshad ma gang gis 'dod pa ste/ gzhung lugs yin te/ de lta bu'i sems kyi khyad par grub pa la khyed la tshad ma yod pa ma yin te/ thar pa la sogs pa'i skyes bu'i don gyis gtso bo gnod pa can yin zhes bya ba'i don bstan pa ni/ de yang zhes bya ba ste/ mtshams sbyor ba med pa ni mtshams sbyor bar byed pa ma yin pa nyid do/ /mtshams sbyor ba dang ni mtshams sbyor bar byed pa nyid dang ste/ dngos po sgrub par byed pa'i phyir ro/ /de yang zhes bya ba ni nyon mongs pa dang bral ba ste thar pa'o/ /grub mtha' thams cad 'gal bar ni/ /zhes bya ba ni so so'i skye bo'i yang ngo / / mtshams sbyor ba ni mtshams sbyor bar byed pa nyid du'o/ /de la so so'i skye bo 'chi ba'i sems la ni lung tshad ma ma yin pa'i phyir nye bar brten pa'i tshad ma med pa de lta na tshad ma med pa nyid ni so so'i skye bo 'chi ba'i mtshams sbyor ba bzhin du/ dgra bcom pa 'chi ba'i sems mtshams sbyor ba med pa la yang tshad ma med pa kho na yin no/ /thams cad du zhes bya ba ni so so'i skye bo 'chi ba'i sems mtshams sbyor ba la yang ngo / /bzlog pa grub pa ni mtshams sbyor ba med par grub pa la mtshams sbyor ba yod par 'grub pa yin no/ /ma nges pa'i gtan tshigs zhes bya ba ni mtshams sbyor ba med par sgrub pa la 'chi ba'i sems nyid ni/ so so'i skye bo'i sems kyi mtshams sbyor ba'i phyogs kho na la mi mthun pa'i phyogs la 'jug pa yin no/ /rang rtogs pa yin na de nyid gnyi ga la zhugs par mthong bas phyogs su byed pa las ldog pa yin te/ dngos su ba yin pa'i phyir ro/ /de nyid ces bya ba ni de nyid gtan tshigs ltar snang ba ngo shes pa yin par bstan pa ni/ 'di yang gtan tshigs ltar snang ba nyid do zhes bya bas so/ /de nyid ces bya ba ni ma nges par bzung ba ni gnas skabs yin pa'i phyir mi srid pa nyid kyis gtan tshigs ltar snang ba tsam gyis mtshon pa yin no/ /khyad par de yang ma grub pa yin pa'i phyir/ rtag pa cis te yin pas ma mgu nas bshad pa gzhan bstan pa ni/ yang na de nyid ces bya ba ste/ 'on te yang dgra bcom pa'i 'chi ba'i sems mtshams sbyor ba med par 'dod pa ni mtshams sbyor bar sgrub par byed pa'i tshad ma med pa'i phyir ro zhes bya ba phyogs snga ma'i don yin na de la gang kho na dbugs 'byung rngub dang / dbang po dang / blo rnams zhes bya ba nas brtsams nas/ sngon med skad cig re re yi/ /zhes bya ba'i bar gyi mtshams sbyor ba grub par byed pa de nyid 'dir yang kho bos cis ma brjod de cis ma bstan/ khyed kyis kyang cis rjes su mi 'brang de nyid ni sgrub byed ma tshang ba'am/ no di tam ste ma nyams pa zhes bya ba la sogs pa grub pa yin no/ /de'i phyir lus kyis sam/ blo yis sam/ de gnyi gas kyang rung ba skye ba gzhan la blo mtshams sbyor ba la 'chi ba'am gzhan yang bar du gcod par byed pa med pa'i phyir/ sngon med skad cig re re yi/ /zhes bya ba la sogs pa grub pa yin no/ /des na de bzhin du/ gal te yang dbang med par blo/ /ma yin de yang de med par/ /zhes bya ba nas/ de nyid 'dir ni cis ma brjod ces bya ba'i bar gyis blo bzhin du lus kyi yang blo rgyu nyid yin na lus kyang blo'i bskyed bya yin te/ rigs pa mtshungs pa'i phyir ro/ /de'i phyir phan tshun rgyu nyid thob pa yin par bstan nas/ da ni blo nyid blo'i rgyu yin gyi lus ni ma yin no zhes rtogs par byed pas/ dbang rnams re re la gnod kyang / /zhes bya ba 'dis lus dang blo dag ni/ blo dang lus dag gis bskyed bya'i rnam par 'gyur ba'i yod pa dang med pa dag gis de'i bskyed bya dang bskyed bya ma yin pa nyid rgyas par brjod nas/ de'i bskyed bya nyid rnam pa gzhan gyis rab tu sgrub par byed pa bstan pa yang / de blo bzhin du zhes bya ba ste/ 'grel par yang gtan tshigs 'di ni ma grub pa ma yin te zhes bya ba la sogs pa dang / snying gi mtshan nyid dam gzhan pa'o/ /lus nyid las skye ba zhes bya ba'am/ gzhan yang de ltar dgongs pa kho na yin par shes par bya ste/ lus kyi bya ba'i rjes su 'brangs nas de'i bskyed bya nyid re re'i zhes bya ba nyid kyis gsal ba'i phyir ro/ /de'i bya ba'i rjes su 'brang ba ma yin par bden na de med na dmigs pa yang ma yin la lus med na yid kyi rnam shes kyang yod pa ma yin te/ de'i phyir de bskyed bya yin no/ /ma yin te de rang gi rigs goms pa'i rjes su 'brang ba'i khyad par nyid kyis de las 'byung ba'i phyir/ de ltar gong du rnam par dpyad zin to/ /de'i phyir me ni du ba dang thal ba bskyed pa bzhin du/ lus ni de 'dzin pa dang mi 'dzin pa dang shes pa dang lus dang mtshan nyid mi mthun par smra ba ni/ 'brel pa can ma yin no/ /de'i bya ba las mi skye ba nyid kyang de las skye ba srid pa yang de las byung ba'i 'bras bu'i ngo bor mthong bar sgro btags pas yin no/ /sgro btags pa ma yin na de'i rgyu mtshan de las byung ba nyid srid pa yang ldog par 'gyur ro/ /de'i yul bzhin du 'dzin pa yang rang gi yul gyi bya ba yin pa de ni thal bar 'gyur te/ de las byung ba nyid des khyab par khas len pa'i phyir ro/ /de bzhin du 'dzin pa med na de las byung ba nyid la/ des khyab pa yang med par 'gyur te/ de nyid srid pa ni de'i rgyu mtshan yin pa'i phyir ro/ /de'i yul bzhin du 'dzin par dmigs pa ni de'i bya ba'i rjes su 'brang ba can nyid yin no zhes bya ba'i bshad pa ni/ dbang rnams re re la zhes bya ba la sogs pas zlos pa yin no/ /'dis ni/ shes bskyed nus pa tha dad phyir/ /kun nas kyang ni ma yin no/ /zhes bshad pa yin no/ /de las byung ba nyid kyi tha snyad kyi rgyu mtshan ni de'i bya ba'i rjes su 'brang ba'am/ de'i 'bras bu gzhan gyi ngo bo'i rjes su 'jug pa las yin grang na/ re zhig dang po ni ma yin te/ dbang rnams re re la zhes bya ba la sogs pas bkag pa'i phyir ro/ /gnyis pa yang ma yin te/ cig car 'bras bu gzhan byed pa dmigs pa'i phyir ro/ /de ltar yang blo bzhin du 'dzin pa yod pa ma yin no zhes bya ba'i yang gi sgra ni re re'i phyogs nye bar bsdu ba'i don du yin gyi de'i rgyu bsdu ba'i don du ni ma yin te/ tshang ba yin yang 'bras bu mi 'byung ba'i phyir ro/ /'byung ba yin na ni de bzhin du 'byung ba yin gyi/ gzhan gyi ni ma yin no/ /de ltar yang skyed par byed pa'i nus pa tha dad par smras pas tshang ba yin yang 'bras bu mi 'byung bar smra ba yin no/ /de'i rnam par 'gyur bas 'gyur ba can gyi rnam shes 'thob pa'i phyir zhes bya ba yang / dbang rnams re re la zhes bya ba 'dis zlos pa yin te/ dbang po rnams kyi nus pa yin gyi rnam shes la yin la/ des ni thams cad du gsal ba yin pa'i phyir ro/ /de'i phyir de nyid de'i bya ba'i rjes su 'jug pa thams cad du gsal ba yin na/ de'i 'bras bu nyid du brjod pa ni de las gzhan pa'i 'bras bu bzhin du rgyu nyid kyang de rnams kyi go rims ji lta ba bzhin du re re zhing tshang ba'i phyogs kyi rnam par rtog par mi 'gyur bar ni/ khyab bya'i chos khas blangs na khyab byed kyi chos khas len pa'i mtshan nyid du thal bar 'gyur bar brjod pa'i phyir/ 'grel par ci'i phyir zlas pa ma yin/ 'di la bstan pa dbang po'i blo bzhin du/ yul so sor 'dzin pa zhes bya ba nas/ rgyu med par 'gyur ro zhes bya ba'i bar gyis yid kyi rnam shes dbang po'i bskyed bya nyid du khas len pa yin na/ de las gzhan pa'i 'bras bu nyid du 'dra bar 'gyur ro zhes thal 'gyur du byas pa las/ rgyu gcig yin na yang zhes bya ba nas/ de bzhin du snang ba la sogs par yang brjod do zhes bya ba'i bar gyis rgol ba yin te/ gcig yin yang du ma med do zhes bya ba'i don to/ /de la lan ni dbang po'i bya ba la brten nas zhes bya ba ste/ dbang rnams re re la yang gnod kyang zhes bya bas gsungs pa nyid dran nas de nyid la brgal ba dang lan yang btab zin zhes bya ba'i don to/ /'dir ni de'i bya ba'i rjes su 'brang ba med kyang lhan cig pa tsam du mthong ba las de'i 'bras bu nyid du sgro 'dogs pa ni/ de'i 'bras bu gzhan bzhin du 'gyur bar brjod pa yin no/ /'di yi don ni 'di yin te/ /zhes bya ba 'di ni bzlas nas 'di'i don du yang sbyor bar byed nus so zhes bya ba'i dgongs pas de'i bya ba'i rjes su 'brangs nas 'dzin pa nyid du 'gyur ro zhes bya ba dang sbyar ba ni/ blo bzhin du zhes bya bas thob pa yin no/ /dbang po las skyes pa nyid yin na de'i 'bras bu gzhan bzhin du yid kyi rnam shes kyis 'dzin par gsal bar snang bar 'gyur zhes bya ba'i grub mtha' la brgal ba ni gsal bar snang ba nyid ni dbang po'i don gyi bskyed bya yin par mi rigs te/ don med na yang 'byung ba'i phyir ro zhes zer ba ni/ dbang po las kyang zhes bya ba'o/ /dbang po med kyang rmi lam la sogs par 'byung ba yin no zhes zer ba ni/ mig btsums kyang zhes bya ba'o/ /lan ni gang rnam par 'gyur yang zhes bya ba ste/ gsal bar snang ba'i khyad par ni dbang po'i don gyi bskyed bya yin no zhes bya ba'i don to/ /bzlas nas bshad pa gzhan bstan pa ni/ de la de blo bzhin du'o/ /zhes bya ba ste/ gong ma la 'dzin pa'i bya ba yin pa phyi ma la rnam shes yin zhes bya ba ni khyad par ro/ /lan 'di nyid yin no zhes bya ba ni de 'gyur bas rnam par shes par 'gyur ro zhes bya ba 'di'o/ /lan gzhan zhes bya ba ni 'dus pa las kyang zhes bya ba 'di la snga ma'i gtan tshigs ni bskyar nas bshad pa ni grub mtha' la yin la/ tshang ba skyed byed nyid ma yin no/ shes pa de med pas de'i blo bzhin du 'dzin par thal bar 'gyur ba med par 'gyur ro/ /dbang po dang bcas pa las yid kyi rnam shes mi 'byung mi zin kyang / dbang po med pa las ni 'gyur la/ de la ji skad bstan pa'i skyon yang med do/ /shes pa'i ngo bo'i 'bras bu gzhan ma mthong ba yin na/ /de bzhin du 'bras bu'i ngo bo dang rgyu nyid dag tu sgro btags pas 'bras bu nyid dam/ rgyu nyid du srid pa yin gyi/ gzhan du ni ma yin te/ thal 'gyur mi rigs pa'i phyir ro/ /ji ltar mthong ba'i yid kyi rnam shes ni/ skra dang sen mo la sogs pa'i 'bras bu yin pa de yang de'i rgyu yin par 'gyur ba zhig na/ de dang 'dra ba'i 'bras bu gzhan skyed par mi byed pas de kho na bskyed bya ma yin pa ma yin no/ /de lta yin na du ba yang me'i bskyed byar mi 'gyur ro/ /dbang rnams re re zhes bya bas bzlas pa yang ma yin te/ des dbang po rnams kyi skyed byed nyid bkag pa'i phyir ro snyam du sems pa la/ sems med nyid phyir te phyi rol gyi 'byung ba bzhin du sems pa can dang lhan cig pa ma yin ba'i phyir/ lhan cig pa yin pa'i nges pa yod na sems dang dbang po dag gi 'di dag la gang zhig gang gis 'bras bu yin par dpyod par 'gyur gyi/ shi ba'i lus la ni sems ldog pa na dbang po ldog pa bzhin du skra dang sen mo la sogs pa ldog pa ni ma yin la/ dbang po bzhin du 'di la yang nus pa dang / byin gyis rlob ba zhes bya ba'i rnam par dbye ba yang yod pa ma yin te/ dbang po'i nus pa bzhin du de'i nus par rtog pa yang nus pa med pa'i phyir de rnams sems pa can dang lhan cig pa ma yin pa'i mtshan nyid kyi sems nyid du grub po/ /de dag gi lhan cig pa ma yin pa'i nges pa grub na rgyu mtshan ma med pas de la rag las pa'i 'bras bu nyid la sogs pa'i rnam par dpyad pa mi 'jug pa'i phyir ro/ /'grel bar yang / gang tshe skra dang sen mo sogs/ /sems ldan nyid ni ma mthong ba/ /zhes bya ba la sogs pa la/ don 'di nyid yin par shes par bya'o/ /de dang 'brel pa nyid yin na ni/ de med par yid kyis shes par mi 'gyur zhes bya ba 'dis lhan cig par med pa kho nar gsal bar byas pa yin zhing / sems ldan nyid du zhes bya ba sems pa dang lhan cig pa'i 'bras bu nyid du sgro btags pa'i rgyu mtshan yang ngo / /reg pa la sogs pa dag na reg pa'i dbang po la sogs pa dag go/ /ji ltar lhan cig gnas zhes bya ba ni 'bras bu dang rgyu nyid med na lhan cig gnas pa'i nges pa med do/ zhes bya ba'i don to/ /dbang po'i nus pa dang lhan cig pa'i las dang / sems ji ltar lhan cig gnas pa nges pa yin/ nur nur po la sogs pa dbang po med pa la yang bdag go zhes bya ba'i yid yod pa ma yin te/ de'i bskyed bya rnam shes kyi byed pa'i rjes su 'brangs pa nyid kyis bar du chod pa'i phyir ro/ /rang rig pa'i bya ba'i rnam shes rnams ni bdag go zhes brjod pa yin te/ shes pa'i bdag la ni 'di ltar 'gyur ro zhes bya ba'i tshig gis te/ nges pa yang bdag nyid kyi yul ma yin pa'i phyir la/ dbang po dang dus mtshungs pa'i shes pa de yang ma yin no/ /yid kyi rnam shes gzhan ni de sgrub par byed pa'i dus su yin no zhe na/ de ni 'jig rten pha rol po ma yin te/ nga rgyal dang bcas pa'i sems la de nyid du khas len pa'i phyir ro/ /'on te yid kyi rnam shes gzhan kho na yid kyi rgyal srid la sogs pa bzhin du goms pa las byung ba dbang po dang dus mtshungs pa'i phyir rang rig pa'i bya ba las/ nga rgyal dang bcas pa yang 'jig rten pha rol po yin no de lta na de ni dbang po'i nges pa ma yin te/ de las ma byung ba'i phyir skad cig ma ma yin pa yin no/ /lhan cig pa yin na ni nges pa can yin te dbang po med na mi 'byung ba'i phyir ro/ /de'i phyir de las byung ba nyid ni khyab byed yin la/ khyab bya las de dang lhan cig pa nyid du nges pa rtogs pa yin no zhes bya ba 'di ni rigs pa yin no/ /de blo bzhin du zhes bya ba ni ma nges pa yin zhing de'i 'bras bu thams cad de kho na bzhin du 'gyur bar bya ba ma yin la/ de'i bu yin pas sngo bsangs kho nar nges par 'gyur bar bya ba ma yin te/ 'di la yang mtshungs pa yin par mthong ba ni gnod pa can yin no snyam du sems pa la mthong ba gzhan du grub pa nyid yin par bstan pa ni/ lhan cig gnas par nges par byed pa nus pa las kyi ming can gyis rgyu tha mi dad pa'i phyir/ dbang po la srid pa dang bcas pa'i las kyi dbang po 'phangs pas de'am/ bdag gi yang rten nyid kyis nga rgyal dang bcas pa'i yid kyi rnam shes gzhan ni bdag go zhes bya ba kho nas dbang po'i shes pas rjes su byed pas 'phangs pa yin la dbang po'i shes pa yang goms pa'i bskyed bya nyid kyis yid gzhan bzhin du bdag gi blo 'jig rten pha rol po nyid du bye brag med pa'i phyir dang / goms pa'i bskyed bya'i khyad par nyid yin pa'i phyir/ lhan cig gnas pa yin te/ lus kyi bskyed bya yin pa'i phyir ram rgyu tha mi dad pa'i phyir ro/ /de'i phyir the tshom med pa'i phyir ro/ /yang na lus dang yid kyi rnam shes dag nges par lhan cig par dmigs pa ni/ de lta bu'i tshogs pas 'phangs pa yin gyi phan tshun 'bras bu nyid ni ma yin te/ de lta bu kho nar 'tsho ba'i gnas skabs su mthong ba'i phyir dang / ji lta ba ma yin pa'i rtog pa mi rigs pa'i phyir ro/ /de'i phyir dus kun du rgyur mthong ba nyid yin zhes brjod pas so/ /tshogs pa gcig la rag las pa nyid kyis lhan cig pa'i yul phyi rol lam/ cig shos kyi dbye bas bstan pa ni/ dbang po bzhin du gzugs dang ro bzhin no zhes bya ba ste/ dbang rnams re re la gnod kyang zhes bya ba 'di la/ dbang po'i rnam par 'gyur ba las kyang yid kyi rnam shes 'gyur ba yin no zhes rgol ba las/ de'i lan ni bsgyur bya nyid gang yin pa de 'bras bu yin gyi dbang po'i rnam par 'gyur ba las yid kyi rnam shes dbang po bzhin du bsgyur bya kho na ma yin te/ rnam par 'gyur ba nges pa med pa'i phyir 'bras bu ma yin pa nyid du bstan nas/ da ni yid kyi rnam shes kyi 'gyur ba nyid ni dbang pos byas pa ma yin te/ dmigs par byas pa nyid kyis gzhan du grub pa'i phyir ro zhes phyogs snga phyi dbye ba bstan pa ni/ de 'gyur na 'gyur ba'i phyir zhes bya ba ste gang gi phyir nyon mongs pa can gyi yid ni lus la brten pa ma yin la/ de'i phyir de'i rten ni gzhan yin par brtag par bya ba yin te/ 'di ni/ gang zhig yod pas phan 'dogs byed/ /ces 'chad par 'gyur ro/ /gal te yang phyi rol ni don byed pa yin la dmigs pa med pa'i yid kyang phyi rol de dang nang du de dmigs pa ni rnam par 'gyur bar byed par dmigs pa ma yin no snyam du sems pa la/ snga phyi zhes bya ba ste sgro btags pa tsam ste/ sgro btags pa nyid kyi rnam par rtog pa'i bya ba tsam yin par zad pa yin gyi/ nang dang phyi rol las gzhan pa yod pa ma yin la/ de yang mi snang ba yin pa'i phyir dmigs pa med pa yin zhing mig la sogs pa'i rnam shes ni dbang po'i rnam pa'i lus la brten pa yang ma yin te/ de bstan pa ni rten med pa zhes bya ba'o/ /tha ma'i sems ni sems gzhan dang / /mtshams sbyor ba la 'gal ci yod/ /ces bya bas 'chi ba ni nad dang dug dang mtshon la sogs pa las gal te yang sems dngos su gcod par byed pa nyid bkag pa yin na de lta na yang lus ldog pas de yang ldog pa dang / lus rnam par 'gyur bas rnam par 'gyur ba yang ma yin nam/ dbang rnams re re la gnod kyang zhes bya ba 'dis kyang dbang po rnam par 'gyur bas rnam par 'gyur ba nyid bsal ba yin no snyam du sems pa la/ don gyi sgo nas te yul gyi sgo nas dug dang mtshon la sogs pas ni/ lus ldog pa'i sgo nas sems ldog par byed pa'am/ de rnam par 'gyur ba'i sgo nas rnam par 'gyur bar byed pa yang ma yin te/ 'on kyang gdungs par byed pa nyid kyis sam/ gzhan du yang dmigs par byed na'o/ /'dod pa sgrub par byed pa bzhin du lus la yang rnam par 'gyur ba yod pa yin no zhe na/ yod du chug kyang des sems rnam par 'gyur ba ni ma yin te/ de med kyang dmigs pa las rnam par 'gyur ba grub pa'i phyir ro/ /gzhan gyi las tshogs kyis kyang / de'i byas pa'i rnam par 'gyur ba mthong bas de la dmigs pa'i phyir dang / de nyid la mtshams sbyor bar cis mi byed pa yin zhe na/ tshe zad pa la gnas pa'i 'phen byed med pa'i phyir ro/ /yod kyang dug la sogs pa'i gnod pas lus la rang gi rnam shes med pas/ de phan mi thogs pa'i phyir/ de yi shes pas phan 'dogs phyir/ /yid kyi lus la brten par bshad/ /ces gsungs pa'o/ /sa bon las byung ba'i 'bru yang char la sogs pas phan ma btags pas na phun sum tshogs par mi 'gyur la/ phan 'dogs byed pa'ang yin bla ste/ /zhes bya ba ni/ dngos su rten yin pa nyid kyis sam/ ma yin yang zlos pa ma yin la/ lus la sred pa dang bcas pa'i yid dam/ las kyang des phan 'dogs par mi byed na mi 'gyur zhes bya ba 'di la dgongs pa ni/ de la sred pas der 'dren pa'i phyir dang / phan 'dogs par mi byed pa la yang mi ltos pa'i phyir dang / de dang de ma yin pa'i rten nyid kyang rang gi rigs goms pa'i bskyed bya yin par skye ba'i dang po la mthong ba'i phyir ro zhes bya ba la sogs pa rjes su rtogs pa'i phyir de ldog pa yin yang mi ldog pa yin no/ /yang na don ni don du gnyer bar bya ba ste/ blang bya'am dor bya ste bde ba dang sdug bsngal dang de'i sgrub byed rnams yin la/ de yang 'di'i sgo nas te/ des don nyid rnam par 'gyur bar sgrub par byed ces bya ba'i don to/ /de yang dmigs par bya ba nyid de bzhin du 'gyur ba'i phyir de yang shugs kyis bstan pa yin no/ /de'i shes pas phan 'dogs pa'i phyir zhes bya ba dang / shes pa dang shes pa ma yin pa dag gi dbye ba la yang dgongs pa 'di yin no/ /lus rnam par 'gyur ba yin na sems rnam par 'gyur ba'i phyir 'gyur ba can gyi sems ni sems kho na las skyes par mi rigs pa ma yin nam sems ni lus dang bral bar ma mthong ba'i phyir ro/ /de'i phyir lus kho na las skyes pa'i sems ni sems 'gyur bas 'gyur ba can du 'gyur snyam du sems pa las/ lus yod pa ni rtag tu zhes bya ba ste/ gal te yang lus ni sems dang mi 'bral bar mthong ba de lta na yang sems kyi snga rol tu med par mi 'grub po zhes bya ba'i don to/ /de ltar na ma grub pa kho na yin par bstan pa ni/ rig pa rang ngam zhes bya ba bdag nyid kyis skye bzhin par rig pas sam gzhan gyis te sems kyis sam skyes bus so/ /re zhig 'bras bu'i shes pas ma yin te rang gi dus 'dzin pa'i phyir/ snga rol du byung ba'i 'bras bu 'am rgyu'am gzhan yang rung ba rigs pa ma yin zhes bya ba'i don to/ /mig la sogs pa bya ba'i dus su de'i shes pa rnams med pa'i phyir/ de rgyu nyid du ji ltar rtogs pa yin snyam du sems pa ni/ mig la sogs pa'i rnam par shes pa rnams zhes bya ba'o/ /lan ni ma yin te/ de dag la rjes su 'gro ba dang ldog pa zhes bya ba ste/ mig la sogs pa bya ba'i dus kho na'i tshe shes pa gzhan rjes su 'gro ba dang ldog par 'dzin par byed pa yod ces bya ba'i don to/ /de 'di nyid nyams su myong bar 'dzin pas sgrub par byed pa ni mig phye ba nyid ni zhes bya ba ste/ de bzhin du skye ba'i dang por 'byung pa'i lus ni lus kyi shes pa skye pa'i snga rol du shes pa ma yin te/ shes pa med pa'i phyir ro/ /yod du zin kyang de las skye ba'i phyir lus bsgyur mi 'gyur bar bstan pa ni/ skye ba'i dang po'i phyogs pa'i lus zhes bya ba'o/ /mig la sogs pa bzhin du shes pa la lus kyang rgyu yin par shes pa gzhan gyis rtogs pa ma yin nam snyam du sems pa ni/ gal te gzhan gyis rtogs she na zhes bya ba'o/ /lan ni snga na med pa ga las rtogs zhes bya ba ste/ mig la sogs pa bya ba'i dus su ni/ de'i bya ba 'dzin pa'i shes pa ni gzhan rang gi rig bya ni de shes pa dang bral ba'i phyir de med par tha snyad byed pa yin gyi/ de bzhin du lus kyi bya ba 'dzin pa'i shes pa gzhan ni/ de shes pa med pa'i 'dzin pa po yod pa ni ma yin no/ /yod pa yin na yang de kho na las de skye bar 'gyur te/ ma mthong ba tsam ni the tshom gyi rgyu yin zhes bya ba'i don to/ /'on te dus phyis 'byung ba'i shes pa ni sngar shes pa ni sngar shes pa med par rtogs pa yin la/ de yang rang gi dus kyi shes pa med par rtogs pa yin gyi/ sngar shes pa med pa ma yin par bstan pa ni/ ltar rung ma yin zhes bya ba'o/ /'di la dper bya ba ni gnyid log pa la'ang zhes bya ba ste/ ji lta ba kho na'i gnyid log pa'i gnas skabs kyi shes pa ni dmigs pa med pa kho na yin yang dus phyis sad pa yin gyi de dag tsam gyis med par nges pa ni ma yin no/ /lus skye ba'i dus na sems kyang yod na rang rig par 'gyur la/ dus phyis kyang dran par 'gyur ro snyam du sems pa ni/ 'on te gal te zhes bya ba ste/ 'di la dper byed pa ni/ gang phyir sad pas zhes bya ba'o/ /lan ni rtog pa med pa yin nam ci zhes bya ba ste lus skye ba'i dus na sems nyams su myong ba med pa med pa'i tha snyad kyi yul yin par ni mi rigs te/ nyams su myong ba yod kyang dran pa med pas nyams su myong ba med par mngon par sems ba'i phyir te/ rmi lam du yang sad pa'i tshe nyams su myong ba bzhin du'o zhes bya ba'i don to/ /phyed phyi ma rnam par 'grel pa ni/ rmi lam gyi rig pa ni zhes bya ba'o/ /gal te sad pa'i shes pa bskyed bya nyid kyis gnyid log pa'i shes pa rtogs pa ma yin na/ de kho na las de yin zhes ci las shes she na/ de'i bskyed bya'i khyad par mthong ba'i phyir ro zhes bstan pa ni/ de lta na yang de lta bu nyid do zhes bya ba'o/ /de la de'i bskyed bya'i khyad par nyid rtogs pa'i phyir de'i bskyed bya nyid du mi rtogs pa ma yin nam/ 'on kyang sad pa'i gnas skabs na de'i bskyed bya nyid rtogs pa kho na yin no snyam du sems pa ni/ 'on te sad na zhes bya ba ste/ de zhes bya ba ni sad pa'i shes pa las rmi lam gyi shes pa'o/ /'di yang zhes bya ba ni skye ba snga ma'i shes pa las skye ba 'di la sogs pa'i shes pa yod pa la'o/ /mi rtogs so zhes bya ba ni sad pa yin na rung ba'i gnas skabs su 'di yang 'brel pa can du rtogs pa med pa 'di ci las shes/ 'o thug rnams kyi 'thung pa dang 'jig rten gyi phan pa zhes bya ba bzhin du 'di yang 'brel pa can tsam gyi drug pa yin no/ /gang gi phyir lus dang mtshungs pa'i dus su byung ba'i shes pa'i med pa ni rang nyid dam gzhan gyis kyang rtogs pa ma yin no/ /de'i phyir lus nyid shes pa'i rgyur mi 'grub pa yin par nye bar bsdu ba ni/ de'i phyir zhes bya ba'o/ /gang las skyes pa de byas pa'i rnam par 'gyur ba can kho na der 'gyur ba yin zhes bya ba 'di ni ma nges pa yin te/ gang gi phyir ba lang gi lci ba las skyes pa'i ut+pa la'i rtsa ba ni ut+pa la'i rtsa ba gzhan gyis rnam par 'gyur ba ma yin la/ de lta yin dang lus las skyes pa yin pa'i sems yin pa ni/ sems gzhan gyis rnam par 'gyur bar byed pa yin no snyam du sems pa ni 'on te lci ba las zhes bya ba'o/ /ut+pa la'i rtsa ba'i bsgyur bya kho na ba lang gi lci ba las mthong ba ni ma yin la/ sems kyi bsgyur bya ni sems kho na yin te/ skye ba'i dang po la goms pa'i bskyed bya'i khyad par yin pa'i phyir ro/ /de'i phyir de kho na de'i rgyu yin gyi ut+pa la'i rtsa ba ni ma yin no zhe na/ lan 'debs pa ni/ dang po lci ba las skyes pa zhes bya ba'o/ /gang zhig yod pas phan 'dogs byed de rgyu zhes bya ba ni bcom ldan 'das kyis rgyu'i mtshan nyid du ma gsungs pa ma yin nam/ thams cad mkhyen pa nyid kyis mi mkhyen pa'am bag med pa'am le lo yin par yang mi srid pa'i phyir la/ 'di mi srid pa nyid yin par ni thams cad mkhyen pa'i ming can gyi tshad mas gnod pa'i phyir ro snyam du sems pa ni/ 'di yod na 'di 'byung zhes bya ba ni bcom ldan 'das nyid ces bya bas mi shes pa bsal ba yin zhing / yod cing zhes bya ba la sogs pas bag med pa dang le lo dag bsal ba yin no/ / kho bo cag gis bshad pa'i rgyu mtshan nyid las ji ltar bstan pas rtag tu phan 'dogs par byed pa nyid kyis so/ /gang gi phyir 'di nyid rgyu'i mtshan nyid yin pa de nyid kyi phyir don 'di rtogs par byed pa'i bdun pa'am/ lnga pa ni 'di yod na dang / 'di 'byung ba las zhes bcom ldan 'das kyis gsungs pa yin no/ /des na lung dang 'gal ba ma yin no zhes bya ba'i don to/ /rgyu mtshan gyi bdun pa zhes bya ba ni rgyu mtshan dang skyed byed dang rgyu rnams la thams cad kyis mang por mthong ba yin no zhes bya bas bdun pa yin te/ rnam grangs kyi tshig ni rang gi ngo bo 'gegs pa ma yin pas/ don 'dzin pa'i don du yin pa'i phyir skyed par byed pa po'i shes pa'i rang bzhin ni/ rgyu dang 'byung gnas zhes brjod do/ /ji ltar lus sems kyi rten ma yin zhes brjod pa dang / de'i rten yin par brjod pa 'gal ba yin no snyam du sems pa la/ de yi shes pas phan 'dogs phyir/ /yid ni lus la brten par bshad/ /ces bya bas 'gal bar bshad pa yin gyi 'di la ni de lta bu'i 'gal bar dogs pa'i sa bon yang yod pa ma yin te/ bdun pa dang lnga pa dag gis don gzhan rtogs par byed pa ma yin pa'i phyir zhes bya bas chog mi shes pa la bshad pa gzhan bstan pa ni/ yang na bdag cag gis gzhan du bshad par bya ste zhes bya ba ste/ de nyid ni gal te rnam par shes pa sngon du 'gro ba can zhes bya ba la sogs pa'i rgol ba sngon du 'gro ba'i bshad pa yin no/ /rgyu tsam 'khrul pa can yin la/ de'i phyir nus pa zhes bya ba ni khyad par yin no/ /rgyu gzhan du thal ba zhes bya ba ni don gzhan rtogs par bya ba la 'bras bu nyid ces bya ba dang 'gal ba yin no/ /gang gi phyir mtha' rgyu tshogs pa ni 'bras bu skye ba ni gzhan la mi ltos par lan cig mthong ba las rtogs pa yin la/ de yod kyang 'bras bu mi 'byung na ltos pa dang bcas par 'gyur ro zhes bya ba 'dis ltos pa med pa nyid de/ tshang ba dang ltos pa dang bcas pa nyid de/ ma tshang ba 'gal ba yin la/ des khyab pa'i res 'ga' ba'i mi 'byung ba dang yang 'gal ba'i phyir/ khyab par byed pa 'gal ba yin na ni rgyu nus pa can ni 'bras bu la ma 'khrul ba yin no zhes bya ba'i don to/ /de lta na 'o na rgyu'i mtshan nyid kyi zhes bya ba 'di la nus ba'i khyad par rjes su 'jug pa la ltos pa yin no/ /nus pa can gyi rgyu mthong na 'bras bu la mi 'khrul pa dran pa'i dus kho na la bar du gcod pa med pa'i 'bras bu mngon sum du 'gyur ba ma yin nam/ rjes su dpag pas ci dgos/ gang du 'bras bu dbang po las 'das pa yin pa de la rjes su dpag pa don med pa can ma yin no/ /de'i phyir 'bras bu kho na yin zhes bya ba ni 'gal ba'i skyon kho na yin no/ /rgyu tshogs pa yang bar du chod pa srid pa'i phyir 'bras bu la nges pa'i rtags ma yin nam/ de lta mod kyi 'bras bur rung ba nyid du nges pa la yin gyi 'bras bu ma nges pas rung ba nyid du nges pa las rjes su dpog pa nyid ma yin te/ rung ba nyid du nges pa ma yin pas zlog par byed pa nyid kyis tshad ma nyid ma yin pa'i phyir ro snyam du sems pa ni/ 'on te 'bras bu la the tshom za bas zhes bya ba'o/ / lan ni ma yin te 'byung bar 'gyur ba'i zhes bya ba ste re zhig 'bras bu 'das pa'i rung ba nyid rjes su dpog pa ni ma yin te/ de rig pa po'i mngon sum yin pa'i phyir ro/ /de rig pa ma yin pa yang 'brel pa ma bzung ba'i rjes su dpag pa mi skye ba'i phyir ro/ /'byung bar 'gyur ba'i 'bras bu'i rung ba nyid kyang de ma nges na mi nges pa yin no/ /'dis ni rung ba nyid kyi spyi bshad pa yin no/ /rung ba nyid ma yin pa'i nges pa yang mngon sum kho na las mthong ba'i 'bras bu'i rung ba nyid grub pa'i phyir 'byung bar 'gyur ba'i 'bras bu la nges pa med na/ rjes su dpag pa'i yul ma mthong ste/ nges pa can gyi rung ba nyid ni res 'ga' nges pa dang 'brel pa med pa'i phyir ro/ /gal te yang yul dang dus la sogs pa'i khyad par med pas 'brel pa 'dzin pa yin yang / rjes su dpag pa ni de'i khyad par gyis mi ldan pa rnam par gcod pa'i yul can yin na/ khyad par gyi yul kho na yin no zhes zer ba ni 'byung bar 'gyur ba'i 'jig rten pha rol rjes su dpog na ni zhes bya ba'o/ /re zhig rung ba nyid rjes su dpog pa nyid rgyu tsam la ma yin pa ma yin nam/ 'o na ci zhe na/ tshogs pa yin la/ de yang ltos pa med pa yin te/ 'bras bu med na khyab par byed pa 'gal ba yin pa'i phyir/ de ji ltar 'bras bu la the tshom za ba yin/ de lta yin na de rgyu mthong ba las 'bras bu rjes su dpog pa ni/ don gzhan rtogs par bya ba la 'bras bu kho na zhes bya ba dang 'gal ba yin no/ /'di la bshad pa ni/ rgyu nyid yin la zhes bya ba ste/ 'bras bu med na mi 'byung ba'i rgyu ni med na mi 'byung ba kho na'i phyir/ 'bras bu yin zhes bya ba'i don to/ /'byung bar 'gyur ba'i 'bras bu yang rgyu yin par ci las shes she na/ rtag tu zhes bya ba ste/ gang yod na de gdon mi za bar 'byung ba ste/ rjes su 'brel pa ni khyab par byed pa nyid du brjod pa yin te/ rjes su brjod par bya ba la bsgrub pa khyab byed yin pa'i phyir ro/ /'di la 'khrul pas ci phan zhe na/ de yod na 'byung ba ste/ de ltar yang 'bras bu nyid gtan tshigs yin pa la 'gal ba med do zhes bstan pa ni/ don gzhan go bar bya ba la zhes bya ba'o/ /rgyu yin pa kho na go bar byed pa ci ste/ ma yin snyam du sems pa la/ ma nges pa nyid ni 'bras bu la 'khrul pa'i phyir ro zhes bstan pa ni/ gang zhig don gzhan gyis go byed ces bya ba'o/ /nus pa can gyi rgyu gang yin pa de 'bras bus khyab pa'i go byed ma yin snyam du sems pa la/ de lta yin na 'bras bus khyab pa yin te/ de la ma 'khrul pa'i phyir/ rgyu kho na 'bras bu yin par bstan pa ni/ gang zhig gang med par zhes bya ba'o/ /rgyu ni rang nyid grub pa'i don du med pa'i 'bras bu la gang gi tshe ltos pa de'i tshe/ de rgyu la ltos pa ma yin te/ 'di med pa'i phyir ro/ /yang na rang gi rgyu las skyes pa'i rgyu ni rgyur 'gyur gyi de yod bzhin pa ma yin pa'i 'bras bu la ltos pa ni ma yin no snyam du sems pa ni/ rgyu ji ltar 'bras bu yin zhes bya ba'o/ /rang gi rgyu las skye ba'i rgyu ni 'byung bar 'gyur ba'i 'bras bu la ltos pa kho na'i phyir/ de rgyu yin yang 'bras bu kho na yin te/ phan tshun ma 'khrul pa nyid du rtogs pas grub pa'i phyir dang / de tsam kho nas 'bras bu yin pa'i phyir ro zhes lan du bstan pa ni/ ma yin te de 'bras bu yin pa'i phyir ro/ /de la gang zhig 'byung bar 'gyur ba la ltos pa'i 'bras bu yin pa kho na de'i bar bstan pa ni/ sems sogs rnam par 'gyur ba ni/ /zhes bya ba ste/ sogs pa'i sgras mig la sogs pa bzung ba yin no/ /gang smras pa ji skad du/ si ta spre'u dbang mtshan mo rgyu ba rnams/ /pad+ma gser dang 'bar ba'i dpe rnams ni/ /mgrin bzangs ra ma na dag mdza' dus su/ /g.yon pa'i mig rnams mtshungs par 'gul ba yin/ /zhes smos pa'o/ /rnam par 'gyur ba'i rgyu nyid ni kha cig 'byung ba can yongs su gyur pa mngon par 'byung bar 'gyur ba'i rgyu ma yin nam/ de'i phyir/ tshogs pa gcig la rag las pa'i gzugs la sogs pa ros rtogs pa/ rgyu chos rjes su dpog pa ste/ du bas bud shing 'gyur ba bzhin/ / zhes sems pa la/ rnam par 'gyur ba 'di ni zhes bya ba ste/ tshogs pa gcig la rag las pa nyid ni gzugs dang ro bzhin du dus gcig pa nyid du 'gyur la/ rgyus rjes su dpog pa las kyang 'bras bu rjes su dpog pa la de nyid ma nges pa'i gtan tshigs yin no/ /de'i phyir nus pa can gyi rgyu mthong ba las rjes su dpog pa ma yin pa'i yul can ni rgyu'i chos rjes su dpag pas rjes su gsal ba ma yin no/ /'o na ci zhe na/ lhan cig 'byung ba'i rgyu gsal ba yin no/ /gal te ma 'khrul pa yin na de yang ji ltar gsal bar byed pa yin/ tshogs pa gcig la rag las pa nyid na 'khrul ba nyid yin pas don rdzogs pa'i phyir zhes bya ba'i don to/ /'jig rten thams cad kyi tha snyad ces bya ba ni 'bras bu dang rgyu nyid 'dzin par byed pa'i tshad ma nye bar bsten pa yin no/ /bud shing rlon pa la sogs pa yod kyang me med na mi 'byung ba yin la/ me yod kyang dang po ma mthong ba me yod na 'byung ba'i du ba ni mes drangs par rtogs pa'i phyir de'i 'bras bu nyid yin gyi ma 'khrul pa tsam las ni ma yin no snyam du sems pa la/ gzhan du yang 'di tsam nyid kyis zhes bya ba ste/ mes drangs pa nyid ces bya ba 'dis kyang ma 'khrul ba yin zhes bya bar bstan pa'i don to// /de yod pa nyid na 'byung ba zhes bya ba ni rgyu nyid ma yin nam/ 'byung bar 'gyur ba yod pa kho na ni ma yin te/ ma 'ongs pa nyid yin no snyam du sems pa ni/ 'byung bar 'gyur ba ji ltar rgyu yin zhes bya ba'o/ /de yod pa kho na ni zhes bya bas ma 'khrul pa'i yul nyid kho na brjod pa yin par bstan pa ni/ de la ste 'bras bu la mi 'khrul pa'i phyir te/ de la mi 'khrul pa'i yul nyid yin zhes bya ba'i don to/ /de la mi 'khrul pa'i yul nyid ni rgyu nyid ma yin te/ 'o na ci zhe na/ phan 'dogs pa yin la phan 'dogs pa ni/ gang zhig yod pas phan 'dogs byed/ /ces bstan pas ltos par 'gyur ba ma yin nam snyam du sems pa ni/ gal te gang phan 'dogs pa zhes bya ba ste/ 'bras bu'i ngo bo phan 'dogs pa yod pa ma yin pa ste/ med pa zhes bya ba'i don to/ /snga na yod pa yang 'bras bu'i ngo bo'i dus na med pa ni rgyu ma yin te/ phan mi 'dogs pa'i phyir ro zhes bstan pa ni/ 'o na 'das pa yang zhes bya ba'o/ /'bras bu ni rang snga na med pa'i dus na bdag nyid 'thob pa'i don du rgyu la ltos pa ma yin nam/ 'byung bar 'gyur ba ni de'i tshe yod pa ma yin no/ /'bras bu'i ngo bo la ltos nas de las 'byung bar 'gyur ba zhes brjod pa yin gyi yod pa yin na ni rgyu'i don yod par ma mthong ste/ yod pa'i ngo bo thams cad la/ /ltos med ji ltar ltos pa yin/ /zhes gsungs pas so/ /de la de bskyed pa'i dus na yod pa'i phyir ro zhes zer ba la/ lan ni/ bskyed pa'i dus de gang yin zhes bya ba ste/ 'bras bu yod pa la ltos nas 'byung bar 'gyur ba de nyid kyi phyir/ ji ltar rgyu ma yin pa de bzhin du/ de yod pa kho na la ltos nas snga na yod pa yang ji ltar rgyu yin/ 'on te de'i dus na de med pa'i phyir rgyu yin no/ /'byung bar 'gyur ba la ltos nas kyang de med pa kho na yin no/ /rgyu'i byed pa'i dus ni 'bras bu 'byung ba'i snga rol gyi dus ma yin nam/ de yang 'bras bu 'byung bar 'gyur ba'i dus las thag ring ba yin no/ /rgyu'i byed pa dang 'bras bu'i yod pa zhes bya ba 'gal ba ma yin nam/ de'i dus na yang 'bras bu yod na dus mtshungs par 'gyur ro/ /dus phyis yin no zhe na/ 'bras bu'i dus nyid na rgyu'i byed pa'i dus yin pa'i phyir/ 'byung bar 'gyur ba las thag ring ba ma yin nam/ rgyu'i byed pa ni rang gi dus kho na yin la 'bras bu ni de'i phyis yin no zhe na/ de 'di ni 'byung bar 'gyur ba la yang mtshungs so/ /'on te snga na med pa 'bras bu mi 'byung ngo zhe na/ 'di yang phyis med pa yin na mi 'byung bar mtshungs so/ /snga rol gyi byed pa rgyu yin la snga rol pas byas pa 'bras bu ma yin nam/ 'byung bar 'gyur ba la ni 'di mi srid do/ /de lta ma yin te/ bya ba la nye bar phyogs pa nyid ni snga rol du byas pa nyid yin la/ de la nye bar phyogs pa'i byed pa nyid kyang snga rol gyi byed pa yin pa'i phyir bye brag ci yang med do zhes bya ba'i don to/ /gal te 'bras bu las sngar zhes bya ba nas ji ltar med pa la phan 'dogs zhes bya ba'i bar gyis byed pa po dus na yod pa nyid kyi 'bras bu ni de dang mtshungs pa nyid du 'gyur bar bstan pa de nyid kyi phyir zhes bya ba 'dis dus tha dad pa nyid du'o/ /'bras bu'i ngo bo yin pa'i phyir bya ba yin la/ bar chad ni rigs mthun pas bar du chod pa yin te/ de med pa ni de ma thag pa'o/ /de la yod pa'i tshul dang ldan pa ni de ma thag tu yod pa'o/ /'bras bu'i ngo bo'i bya ba'i dus su gnyis ka yang med pa yin par mtshungs pa yin par bstan pa ni/ de ni gnyis ka la yang zhes bya ba'o/ /sngar yod pa'i rgyu ni de ma thag tu 'das pa'i de ma thag pa ma yin nam/ 'byung bar 'gyur ba ni cung zad ni yun ring mo nas kyang yin pa'i phyir/ de ma thag kho na ma yin no snyam du sems pa la/ 'das pa cung zad kyang yun ring mo nyid yin par mtshungs par bstan pa ni/ de ma thag pa nyid ni zhes bya ba'o/ /gnyid stug pos non pa las sad pa'i shes pa ni dus kyis bar du chod pas sngar gyi shes pa las byung bar ci las shes/ gnyid log pa na rnam shes med pa'i phyir ro/ /de lta mod kyi bdag ni sems med par gnyid log go zhes shes pa med par dran pa yin no/ /nyams su myong ba yod na dran pa'i phyir de'i tshe yang nyams su myong ba yod pa ma yin nam zhe na/ ma yin te/ gnyid log par rtsom pa'i sems rang rig pas rang gi dus tsam rig pa dang gnyid log pa'i dus na med pa ni sad pa'i rtsom pa'i dus na 'byung bas kyang nyams su myong ba'i phyir ro/ /de gnyis ni rang nyid med par nyams su myong ba ma yin nam zhes bya ba gzhan med pa ji ltar yin/ de yang de tshe yod na rtog pa dang bcas pa'am cig shos kyang rang rig pa yin na rmi lam gzhan bzhin du ci'i phyir dran par mi 'gyur/ gnyid kyis phra mor byas pa'i phyir mi rigs pa yin no zhes bya ba 'di yang rang rig pa dang 'gal ba yin no/ /gang gi phyir ma rtogs pa yin na ni de skad du brjod do/ /rnam par nges zhes bya ba ni skad cig gis 'jig par rab tu byed pa ni/ rgyas par rnam par dpyad pa yin no zhes bya ba'i don to/ /de'i tshe na yang khyad par ma lus pa'i sems tsam ni de ma thag pa sad pa'i blo'i rgyu gang yin pa yod pa ma yin nam snyam du sems pa la/ de la lus ni rgyu ma yin te zhes bya ba smos te/ goms pas 'byung ba'i khyad par gyi yid kyi rnam shes ni rgyu lus las bzhin du de las kyang mi 'byung ba yin no zhes bya ba'i don to/ / snga ma'i rnam shes dang 'dra ba nyid de las byung ba'i khyad par nyid yin gyi de'i bskyed bya nyid ni ma yin pa ma yin nam/ de'i phyir sems tsam las skyes pa la ni sngon gyi shes pa las sems de'i bag chags las khyad par can du skyes pa yin no snyam du sems pa la du ba la me bzhin du khyad par skyed bar byed pa nyid skyed byed yin pa'i phyir sems tsam ni skyed byed ma yin no/ /shes bzhin pa ma yin pa de la de'i bag chags kyi lus can du rtogs par 'gyur te yang ba'i phyir ro/ /de yang bkag pa yin te thal ches pa yin no zhes bya ba la sogs pa bstan pa ni/ de'i phyir rjes su 'gro ba dang ldog pa'i rjes su byed pa yin la zhes bya ba ste/ de'i bskyed bya'i khyad par nyid ni de'i khyad par gyis khyad par can nyid yin la de la ma 'khrul pa can nyid yin zhes bya ba'i don to/ /dmigs bya ma yin pa'i sems tsam la de la ma 'khrul pa can nyid du 'dzin pa yang ma yin no/ /nye bar ma dmigs pa'i 'byung bar 'gyur ba la ji ltar ma 'khrul pa can gyis shes pa yin te mi shes pa de ltar na 'di'i yang rgyu nyid mi shes pa'i phyir de nyid thams cad du nub par 'gyur de'i phyir rim gyis dmigs pa dag gi de nyid dmigs pa yin na 'byung bar 'gyur ba la ji ltar ma 'khrul pa can nyid kyis shes pa bzhin du ma 'khrul ba'i yul nyid kyis shes pa ma nyams par bstan pa ni/ des na 'byung bar 'gyur ba la yang zhes bya ba'o/ /ma 'khrul pa can nyid bzhin du 'di'i ma 'khrul pa'i yul nyid rtogs par mi nus pa ma yin nam de dag tsam gyis sngar byung ba'i rgyud nyid ni 'jig rten la rgyu nyid du rtogs pa'i phyir ro snyam du sems pa la/ de yang ma 'khrul pa'i yul nyid kho na rgyu yin gyi sngar byung ba nyid du ma yin par bstan pa ni/ gang zhig gang gis zhes bya ba ste/ de dag tsam ni 'jig rten pa yin no zhes bya ba'i don to/ /rgyu mtshan ma 'khrul pa'i yul nyid ma yin nam de yang gong du bdun pas rnam par gzhag pa yang rtogs pa yin la de dang 'brel pa can gyi 'bras bu ni phyis 'byung ba kho na yin no snyam du sems pa ni/ 'on te yang 'di yod na 'di 'byung zhes bya ba ni/ de nas kyang ni bstan pa yin/ /zhes bya ba'i bar kyis so/ /bdun pa ni rgyu mtshan tsam las yin gyi snga ma nyid rnam par 'jog pa ni ma yin nam rgyu mtshan dang byed pa dang rgyu rnams la zhes brjod pa'i phyir ro/ /bdun pas rgyu mtshan nyid du rtogs pa ni snga ma nyid la sgro btags pa ni ma yin te/ dbye ba ma dmigs pa'i phyir ro zhes bya ba 'di la smra ba ni/ de yi rjes su 'gro ldog ni/ /zhes bya ba ste/ yod pa dag skye ba med na rgyu mtshan nyid yin pas mi srid la de lta yin na snga ma nyid yin no zhes bya ba'i don to/ /gal te yod pa dang skye ba dag gis sam nyid 'phangs pa yin na gzhan rgyu mtshan ma yin pa'i phyir ro/ /de lta yin na rgyu mtshan can yang yod pa dang skye ba zhes bya ba'i tshig gis snga ma nyid du 'gyur bar bstan pa ni/ de ni mi bden te zhes bya ba'o/ /rgyu mtshan dang rgyu mtshan ma yin pa 'di las 'di'o zhes rtogs pa ni sngar gzhag pa kho na rtogs pa ma yin nam snyam du sems pa ni/ gal te yod na zhes bya bas zhes bya ba ste/ 'byung bar 'gyur ba yod pa ma yin pa las de ltar rtogs par mi nus so zhes bya ba'i don to/ /snga ma'i mngon par 'dod pa yang 'bras bu'i bdag nyid thob pa'i dus su med pa kho na ma yin na/ de nyid de'i bya ba'i dus su'o zhe na/ yang dngos po'i rang gi dus ni bya ba'i dus ma yin te dngos pos stong pa'i phyir ro/ /de'i tshe yang med pa'i phyir ji ltar snga ma nyid kyis chos nyid yin zhes bstan pa ni/ 'das pa yang ji ltar yod pa ma yin zhes bya ba ste/ dngos po'i rang gi ngo bo kho na bya ba ni ma yin te/ de'i tshe nyid 'bras bu 'byung bar thal bas snga ma nyid med par thal bar 'gyur ro zhes bya ba'i don to/ /'bras bu'i dus su rang gi dus na yod pa'i rgyu yod pa yin pa'i phyir snga ma nyid dngos po'i chos su 'gyur ba ma yin nam snyam du sems pa ni 'gyur ba yin no zhe na zhes bya ba'o/ /gzhan yang 'byung bar 'gyur ba rang gi dus na byung bas yod pa dang skye ba dag tu 'gyur ba'i phyir la de yang blos snga ma nyid du rnam par gzhag pa rtogs pa kho na yin par bstan pa ni/ gzhan yang zhes bya ba'o/ /gang gi tshe yang mtshon byed tsam gyis bdun pa ni de'i tshe snga ma nyid dam phyi ma nyid dam de'i tshe yod pa nyid rnams ni brjod par 'dod pa ma yin par bstan pa ni/ des na yod na zhes bya ba'o/ /de lta yin na brjod par 'dod pa ni gang yin zhe na de yod pas zhes bya ba smos so/ /'byung bar 'gyur pa'i yod pa yang ji ltar yin zhe na/ yod pas kyang zhes bya ba smos te/ de ltar yang 'jig rten gyi tha snyad yin par bstan pa ni 'chi ltas ni zhes bya ba'o/ /dus kyi dbye ba la bdun pa ma yin du zin kyang lnga pa dus kyi rnam par dbye ba kho na la 'jug pa yin te/ dus la sogs pa'i dbye ba can ma yin pa ni dngos po ma yin pa nyid kyis byed pa po nyid ma yin pa'i phyir ro snyam du sems pa la skyes pa'i phyir zhes bya bas kyang zhes bya ba'i byed pa po nyid ni byed pa po dang las nyid la sogs pa blos sgro btags pa'i yul can la ni 'byung bar 'gyur ba dang 'das pa la yang mtshungs par bstan pa ni/ ji ltar myu gu skye zhes bya ba ste/ sngar dmigs pa kho na rgyu nyid yin par ni mi rigs te ma dmigs pa yang rgyu yin pa'i phyir ro zhes bstan pa ni/ gang gi dang por dmigs gyur pa/ /zhes bya ba ste/ dmigs pa dang mi dmigs pa dag gis 'bras bu dang rgyu nyid yin no zhes tshad mas dmigs pas gzhal bya yod pa yin par brjod pa yin par bstan pa ni des na dmigs pas ni zhes bya ba'o/ /yod par ma 'khrul pa'i yul ni rgyu yin la ma 'khrul pa can ni 'bras bu yin zhes dmigs pas mtshon pa yin par bstan pa ni de yang mi 'khrul pa'i yul can yin zhes bya ba'o/ /ma 'khrul pa nyid ni de yod na 'byung ba nyid ma yin nam de yang snga ma nyid kyis khyad par gyi rgyu nyid yin gyi de yod na 'byung ba tsam 'ba' zhig ni ma yin no/ /snga ma dang phyi ma nyid ma yin pa'i 'bras bu dang rgyu mtshan nyid yin par rgyur 'dod pa rnams kyis smras pa ma yin no snyam du sems pa ni/ 'on te mi 'khrul pa'i yul can du gyur pa na zhes bya ba'o/ /ma 'khrul pa'i yul can nyid ni rgyu nyid yin pa la ma 'khrul pa can nyid ni 'bras bu nyid yin gyi snga ma nyid dag khongs su gtogs pa ma yin par bstan pa ni/ de yod na 'byung nyid tsam gyis/ /zhes bya ba'o/ /gal te yang ma 'khrul pa'i yul nyid de/ rgyu nyid de rgyu nyid la sngon nyid khongs su gtogs pa ma yin pa de ltar na yang de dang ldan pa kho na rgyur btsal bar bya ba yin te/ 'jug pa'i yul yin pa'i phyir ro/ / gzhan ni de lta bur gyur pa yin yang rgyur tha snyad gdags pa'i yul ma yin no snyam du sems pa ni/ 'on te dang po nyid ni zhes bya ba'o/ /gal te rgyu snga ma ni 'byung bar 'gyur ba'i 'jig rten pha rol ma mthong ba'i phyir rjes su dpag pa ma yin te/ 'khrul pa'i phyir 'bras bu la ma nges pa nyid yin te/ 'khrul pa nyid du srid pa'i phyir ro/ /de'i phyir rjes su dpag pa'i don la 'byung bar 'gyur ba'i rgyu brjod bya yin no zhes bya ba 'di la gzhan smra ba ni phyi ma nyid ni rjes su dpog pa gang zhes bya ba ste/ rgyu yin pa'i nus pa las yin te/ 'bras bu'i ni ma yin zhes bya ba'i don to/ /rgyu las phyi nyid yin par rjes su dpog pa gang yin pa de ni rgyu'i nus pa las yin no zhes bya bar sbyar ro/ /lan du de la rgyu nyid kyang zhes bya ba ste/ rgyu yin yang ma 'khrul pas 'bras bu nyid yin no/ /'bras bu nyid ma nyams pa yin zhes bya ba'i don to/ /grogs mo bu dang bcas par bros pa la sogs pa ni 'bras bu nyid kho na yin te de las rjes su dpag pa las gzhan nye bar len pa ma yin no zhes bya ba'i don to/ /yang na nye bar len pa'i rgyu yang dgos pa la ma grub pa kho na yin te 'khrul pa yin na de mi rigs pa'i phyir ro/ /de lta yin na de nyid 'bras bu yin pa'i phyir 'bras bu nyid kho na rjes su dpag pa bzhin du nye bar len pa yin yang rgyu mtshan yin par bstan pa ni/ gang yang rgyu nus pa can nyid las zhes bya ba'o/ /lag tu thob pa ni thob par nges pa yin te de ni 'bras bu nyid dang mtshungs pa yin no/ /rkang gis bgrod pa ni thob par nges par med pa yin te/ rgyu nyid dang mtshungs pa yin no/ /sen mos bcad par bya ba ni 'bad pa med pa'i bsgrub bya yin la de ni 'bras bu nyid kyis rjes su dpag pa yin te/ ltos pa med pa'i phyir ro/ /sta res bcad par bya ba ni 'bad pas bsgrub par bya ba yin la de ni rgyu yin te/ ma nges pa nyid spangs pa ni 'bad pa la ltos pa'i phyir ro/ /drang po zhes bya ni rgyu nyid bzhin tu ma nges spang pa la ltos pa ni 'khyog po nyid yin pa'i phyir ro/ /don med yin zhes bya ba ni 'bad pa med par grub pa la 'bad pa la brtson par byed pa ni mkhas pa rnams kyis smad pa yin no/ /arka'i shing las sprang thob nas/ /gang gi don du ri la 'dzeg /ces bya ba ni don yin no/ /de skad du yang / de ci 'dra zhig 'phen byed 'gyur/ /de 'dra phyis kyang 'gyur ba yin/ /zhes bya ba dang / lus ni gnas pa yin na sems/ /ldog pa med par thal bar 'gyur/ /zhes bya ba la sogs pa ni rgyu ma 'ongs pa yin par rjod par byed pa yin no zhes nye bar bsdu ba ni/ de'i phyir mi 'khrul pas na zhes bya ba'o/ /mi shes bzhin pa ni yod pa tsam gyis skye ba nyid nas brtsams nas lus ji srid yod par bdag nyid nye bar phan 'dogs par byed pa rten yin par bstan pa ni gang zhig yod pas phan 'dogs pa yod ces bya ba ste/ de'i rgyu ni yin te las kyi ming can no/ /'bras bu las sngar ram phyis kyang nges par yod pa ni rjes su 'jug pa'o/ /de'i phyir ma 'ongs pa'i yid dam snga ma yang rung 'di'i rgyu yin par bstan pa yin no/ /de lta yin dang lus ni rten du 'gyur ba ma yin no/ /de'i phyir gnas skabs su dgos pa yin no zhes bya ba ni 'grel pa'i don yin no/ /skye ba'i dang po la'am tha ma la'am lus la'am sems kyi 'bras bu la'am snga ma'am phyi ma yang rung ba'i sems ni shes pa nyid phan 'dogs pa yang ma yin la/ 'tsho ba'i gnas skabs su shes pa nyid yin yang de'i rgyu mtshan gyi phan 'dogs pa ni ma yin te/ rang gi ngo bo tsam la rag las pa'i phyir ro/ /sems kyi chos kyang las kyi sems ni rgyus brjod pas rten yin par brjod pa'i phyir skyon med do/ /de phyir blo gnas pa yi rten/ /blo nyid la ni brten pa 'gal/ /zhes bya ba la sogs pas lus 'phen par byed pa de la sred pa dang bcas pa'i las ni de'i rten yin pa nyid kyis sam bdag nyid rten yin pa nyid kyis blo 'phen par byed pas blo'i rten du 'gyur bar bstan pa'i phyir sngar gyi bshad pa las 'di la khyad par ci zhig yod ce na/ snga mas ni skye ba'i dang po'i sems kyi rten yin par brjod kyi nam mkha'i ma yin te/ des sems tsam du 'phen pa'i phyir ro/ /'dis ni tha ma'i yang yin pa'i phyir khyad par che'o/ /snga ma la ni rgyu snga na yod pa'i phyir 'di yod na dang 'di 'byung ba las shes kyang 'bras bu la bdun pa dang ldan pa dang rgyu mtshan dang rgyu yin par gsal bar byed par rigs pa ma yin nam gzhan la ni ma yin te/ de'i tshe de ma skyes pa'i phyir ro/ /snga ma ni 'bras bu'i dus na med kyang skyes pa yin pas rgyu mtshan dang rgyur yang 'gyur ro snyam du sems pa la/ de'i phyir bdun pa dang zhes bya ba ste/ rgyu mtshan dang rgyu nyid tsam ni bdun pa dang ldan pa dag gi rgyu mtshan yin la 'byung bar 'gyur ba la yang de yod pa'i phyir ma nyams pa yin te de ltar rtogs pa'i phyir ro/ /'chi ltas sam yan lag rnam par 'gyur ba ni 'chi ba'am/ mngon par 'byung ba'i ma 'ongs pa'i rgyu med na mi 'byung ba ni de'i 'bras bu rtogs pa kho na yin la rtogs par rnam par bzhag pa yang yod pa'am rgyu mtshan yin no/ /'byung bar 'gyur ba yang tshad mas rnam par bzhag pa ma yin te/ de'i tshe rang gi ngo bo med pa'i phyir ro/ /'das pa yod pa yin no zhe na/ 'gal ba yin no/ /de'i tshe yin no zhe na/ de'i tshe ni ma yin te/ de'i tshe na yang med pa'i phyir ro/ /de'i phyir 'das pa dang ma 'ongs pa'i dus gang la med kyang cung zad rnam par bzhag nas rgyu mtshan nam rgyur de rtogs pas tha snyad du byed pa yin la de nyid de'i bya ba'i rjes su 'brangs nas 'jig rten pa rnams dngos po'i de kho na nyid la de ltar tha snyad 'dogs pa yin zhes bya ba'i don to/ /khyad par du bya ba la rjes su dpag pa la sogs pa'i shes pa'am rnam par rtog pa'i shes pa rung khyad par gyi rtags la sogs pa'i shes pa cung zad dam rtogs pa med pa can yang rung ba med na mi srid pa'i phyir de la brten par ni rigs kyi thams cad ni ma yin no/ /'di la smras pa rnam par g.yeng ba la sogs pas snga ma'i sems yon tan dam pa can nyid ma yin na phyi ma mi 'byung ba'i phyir sems can thams cad kho na sems gzhan la brten pa yin na nga rgyal dang bcas pa'i yid kyi rnam shes nyid ni char yang sems la brten pa yin te phyi rol gyi nyams su myong ba las byung ba ma yin pa dang goms pa las byung ba'i khyad par yin pa'i phyir ro/ /rgya shug gi 'bras bu dang kham phor bzhin du lhan cig yod pa'i rten ma yin nam de bzhin du phyi ma ni skye ba snga ma'i sems kyi rten ma yin la kun gzhi'i bdag nyid kyi sems rten nyid du brjod pas de'i chos kyi las rjod par byed pa yang ma yin no/ /de yang de'i tshe nyid nye ba kho na yin pa'i phyir skyon med do/ /'bras bu'i sems kyi dus su yang rgyu'i sems thams cad du nye ba yin pas rten nyid ni rtag tu de'i rjes su 'jug pas zhes brjod pa yin no/ /goms pa las byung ba'i rnam par rtog pa'i tshogs ni bsal bar dka' ba yin te/ phyi rol dang nang gi nyams su myong ba rnams lhan cig ma yin pa'am gzhan pa'i nga rgyal dang bcas pa rtogs bzhin pa'i 'jig rten pha rol po ni brnyas par 'os pa ma yin pa'i phyir thams cad kha na ma tho ba med pa yin no/ /'o na lus kyang sems kyi rten yin te phan byed pa'i phyir 'dod pa yin no/ /de lta yin na de sems bzhin du rtag tu rjes su 'jug pas phan 'dogs pa yin pa'am gzhan du yang 'gyur grang na gal te sems bzhin gzhan du yin na sems kyang de'i rten du 'gyur bar gal te yang dbang po med par blo ma yin zhes bya ba la sogs pas phan tshun rgyu nyid du brjod pas bstan pa yin no/ /dbang po dang bcas pa'i lus su bstan pa'i rigs pa ni lus tsam la yang mtshungs pa yin pa'i phyir rtogs bya kho na yin no/ /gzhan du na de lta bu'i rten ma yin/ ma yin pa nyid du bstan pa ni phan 'dogs byed pa yang yin bla ste zhes bya'o/ /yang na res 'ga'i phan 'dogs pa'i phyogs la phan 'dogs byed pa yang yin bla ste zhes bya bas skyon brjod nas dus thams cad du phan 'dogs par byed pa'i phyogs la ldog pa med par thal bar 'gyur bar bstan pa ni/ 'gal ba brjod do zhes bya ba ni thal ches pa las so/ /gal te yang zhes rgol ba'i bsam pa'i rigs pa ni de lta bu nyid du yin zhes bya ba la ltos nas gzhan du yang zhes bya ba ste/ de'i gnas skabs sam gzhan du yang zhes bya ba'i don to/ /yang na ldog pa mi 'thad pa ma yin zhes bya bar sbyar nas ldog pa dang mi ldog pa dag bsdus nas bkag pa yin te/ gnas skabs thams cad du 'bras bu dang ldan pa'i phyir rten nyid yin zhes bya ba'i don to/ /de dag gi rgyu ni sems las gzhan pa ste sems ni lhan cig byed pa can yin la 'di'i rgyu de nyid yin pas de'i rgyu can te 'bras bu'o/ / dal ba nyid ni dbugs 'dren zhes bya bar mtshams bcad do/ /gzhan du gyur ba las ni dbugs ring du rngub pa la sogs pa las so/ /lus kyang sems kyi rten yin na/ gzugs la sogs pa bzhin du'am rid pa la sogs pa'i gnas skabs bzhin du yin grang na gzugs la sogs bzhin yin na ni de bzhin du de yang de yod kyang ldog pa med par thal bar 'gyur ba'o/ /ci las she na/ de yod na ste de nyid yod na 'byung ba ste/ de tsam bskyed bya yin pa'i phyir ro/ /dbang 'gyur phyir zhes bya ba ni de rnam par 'gyur ba ma yin na 'di bsgyur bya ma yin pa'i phyir ro/ /yang na rtag tu de'i rjes su 'jug pas de snga mas ldog pas khyab pa'i med pa yin pa bzhin du phyi mas rjes su 'gro bas khyab pa yod pa kho na yin no/ /de ltar na de ni de la brten pa yin gyi gzhan du ni ma yin no/ /'on te rid pa la sogs pa bzhin du yin na de lta na yang res 'ga' ba ni de tsam las mi 'byung bas de lta bu'i dbugs la sogs pa la ltos pa las 'byung ba ma yin no snyam du sems pa la/ de las 'byung rngub ces byas pa ste de las ni sems nyid las so/ /de ma yin na sems te las ni 'byung rngub dag las so zhes bya bar sbyar ro/ /ci las yin zhes bya ba la ltos pa yin na gnas skabs kyi gtan tshigs dang sbyar bar bya'o/ /ji ltar zhe na/ dbang 'gyur phyir te sems kyi dbang du 'gyur ba'i phyir ro/ /sems kyi de dag gi rgyun du 'jug pa dang ldog pa dag dang phul du byung ba dang phul du byung ba ma yin pa dag kyang yin no/ /rgyal pos bran bzhin du gzhan gyi bskyed bya nyid des dbang du byed pa yin no zhe na/ de yod pa nyid na 'byung bas gzhan las skye bar ma mthong ba'i phyir ro/ /bran ni de las bzlog pa yin no/ /de'i phyir gzhan las skye bar ma mthong ba yin na dbang du 'gyur ba nyid gtan tshigs yin no zhes bya ba'i don to/ /'grel pa mdzad pas ni so so'i gtan tshigs gnyis las brtsams nas/ bran ni gzhan las skye nyid du/ /mthong ba yin gyi de dag min/ /zhes bya ba ni dbang du 'gyur ba'i khyad par kho na yin te de yod na 'byung ba nyid du nye bar bsdus pa yin no/ /gal te yang de las 'byung rngub byed ces bya ba 'di nyid kyis gtan tshigs dag tu nges sbyar ba yin yang ldog pa med par thal bar 'gyur ro zhes bya ba la'ang rtogs pa'i phyir sbyar bar bya ba dag kho na yin te/ gzhan du ni mi 'grub pa'i phyir de la gnas pa dag 'di la dbang byed pa kho na yin par rigs so/ /de bzhin du 'byung ba tsam mam de y ongs su gyur pa'i khyad par yang lus tsam mam dbugs la sogs pa'i khyad par yang sems kyi rten nyid yin pa bkag pa na gnas pa'i rlung ngam de'i khyad par can gyi lus de ci las thob pa yin de'i phyir ldog pa'i don du 'byin pa dang 'dren pa zhes bya ba nye bar sbyor bar mi rigs so/ /de'i phyir dbugs 'byung ba la sogs pa ni sems kyi bskyed bya nyid du bsgrubs nas de las de ma yin zhes bya ba'i dam bca' ba la gnas skabs kyi gtan tshigs las bzlog pa gtan tshigs ma yin pa dang de med kyang 'byung ba'i phyir dang dbang du 'gyur ba ma yin pa'i phyir zhes bya ba la sogs pa la ltos pa yin no/ /dbugs 'byung ba dang rngub pa la sogs pa'i gnas skabs na de med na/ sems yod pa ma yin pa ma yin zhing de'i dbang yin par rtogs pa ni ma yin no/ /de ltar yin na dbugs 'byung ba la sogs pa yang gnyid stug pos non pa'i gnas skabs na de med kyang 'byung ba yin na dbang du gyur pa yang ma yin par mtshungs so/ /'on te sems kyi 'du byed pa la dbugs 'byung ba la sogs pa 'byung ba yin na ni de ltar na de sems bskyed bya'i 'du byed pa yin gyi lus kyi ma yin te/ de rgyu ma yin pa'i phyir ro/ /dbugs 'byung ba la sogs pa ' bras bu nyid la de dang de las gzhan pa'i rgyus sgro btags pa yin no zhe na yang 'di la yang sems la sems gzhan gyi rgyu yin na 'bras bu la dbugs 'byung ba la sogs par 'du byed par sgro btags pa yin la de na de'i rgyu yin pa'i phyir gtan tshigs las bzlog pa yin pa dang de med kyang 'byung bar ma grub pa yin no snyam du sems pa la/ dbugs 'byung ba la sogs pa'i sems kyi bskyed bya'i khyad par ji lta bu'i ngo bo nyid yin pa de lta bu'i sems kyi bskyed bya'i khyad par ni ma yin te/ rang gi rigs goms pa'i bskyed bya'i khyad par nyid rtogs pa'i phyir ro zhes bstan pa ni rlung 'byin pa dang 'dren pa ni zhes bya ba ste/ de'i ngo bo yang sems kyi bskyed bya nyid du nges par gzung ba yin pa'i phyir rmi lam la sogs pa na de med kyang de'i 'du byed pa las der nges pa yin no zhes bya bar yang ma grub po/ /ji ltar yang sems phul du byung ba dang 'grib pa yin na/ de dag gi phul byung 'grib pa thob par 'gyur ba'o/ /de bzhin du de dag gi phul du byung ba dang 'grib pa yin na sems ni de 'thob par 'gyur ba ma yin no/ /de med na dbugs 'byung ba la sogs pa yod kyang gang las yin zhes bya ba'i dbang du byas nas sems kyi bskyed bya'i ngo bo yang de med kyang de'i 'du byed pa yin no zhes bya bar yang sbyar bar bya'o/ /'du byed pa'i sgo nas de'i gnas skabs na yang de nyid yod pa'i phyir ro zhes bya ba'i don to// /de'i phyir sems kyi bskyed bya dbugs 'byung ba la sogs pa bzhin du sems ni de dag gi bskyed bya yin par rtogs pa ma yin te// de'i bskyed bya ma yin pa'i khyad par yin pa'i phyir/ de'i phyir de de las ma yin par dam bcas pa grub pa yin no/ /dbugs 'byung ba la sogs pa sems pa yin na sems phul du byung ba dang bskyed bya'i khyad par ni dbugs 'byung ba la sogs pa de'i bskyed bya ma yin la/ de'i skyed byed med na gang las 'byung ste/ de'i bskyed byar gyur pa ma yin no zhes bya ba'i don to/ /bskyed bya ni skyed byed la phul du byung ba can ma yin la de bzhin du dbugs 'byung la sogs pa la yin pa'i phyir de dbugs 'byung ba la sogs pa ni ma yin te/ skyed byed kyi chos kyi rjes su byed pa'i phyir ro/ / yang na de dag sems kyi bskyed bya nyid ma yin la sems kyi bskyed bya'i khyad par nyid ni gnod pa can 'phel ba yin par phyed snga mas bstan nas phyed phyi mas sems dbugs 'byung ba la sogs pa'i bskyed bya yin na/ sems la dbugs 'byung ba la sogs pa bzhin du de'i bskyed bya'i khyad par nyid du thal bar 'gyur bar sgrub pa yin no/ /de yod pa ma yin pa'i phyir de de las ma yin zhes bya bar grub po/ /dbugs 'byung ba la sogs pa rnams sems las byung ba nyid ji ltar yin/ rmi lam la sogs pa na de med pa'i phyir ro snyam du sems pa la de la yang sems kyi 'bras bu'i khyad par du mthong ba'i phyir de rjes su dpag pa ni rang gi ngo bo med kyang 'du byed pa'i sgo nas yod par shes pa yin par bstan pa ni/ rlung 'byin pa dang 'dren pa ni/ /zhes bya ba ste/ sems phul du byung ba dang 'grib pa yin na dbugs 'byung ba la sogs pas phul du byung ba dang 'grib pa med pa gang las yin zhes gnas skabs dang sbyar ro/ /gnas skabs su bshad pa rnams la ci rigs par mtshungs par thal bar 'gyur ba dang yang sbyor bar bya'o/ /sems dbugs 'byung ba la sogs pa'i bskyed bya yin na de'i khyad par gyis khyad par thob pa yin gyi khyad par thob pa 'ba' zhig ni ma yin no/ /'o na ci zhe na/ de ma log na lus rgyu yin pas 'chi ba'i gnas skabs su yang mi ldog par 'gyur ro zhes thal bar 'gyur yang lus rgyu yin par bstan pa la mtshungs par 'gyur la de bzhin du sems skyed byed nyid du 'gyur ba'i phyir de dag bskyed bya nyid med pa 'ba' zhig ni ma yin te/ snga ma bzhin du thal bar 'gyur ba yang mtshungs so/ /yang na sems kyi bskyed bya phul du byung ba dang 'grib pa yin la de med na dbugs 'byung ba la sogs pa'i yul yin na yang sems kyi gang las yin te/ ma yin pa kho na'o zhes bya ba 'di la yang thal bar 'gyur ba mtshungs pa yang dbugs dbyung ba la sogs pa rgyu gnas pa yin na sems ldog pa med par thal bar 'gyur ba'o/ /yang na ji ltar rmi lam la sogs pa na sems kyi bskyed bya nyid yin na dbugs 'byung ba la sogs pa la/ sems kyi bskyed bya'i ngo bo'i sems med na mi 'gyur ro zhes thal bar 'gyur ba de bzhin du sems kyi bskyed bya ma yin na lus kyi bskyed bya yin pa'i phyir shi ba'i gnas skabs na sems log kyang mi ldog par 'gyur la dbugs 'byung ba la sogs pa'i bskyed bya yin na/ sems phul du byung ba dang 'grib pa'i bskyed bya phul du byung ba'am 'grib pa'am gzhan yang rung ba dbugs 'byung ba la sogs pa de'i bskyed bya ma yin pa la/ gang las yin zhes bya ba 'di la yang dbugs 'byung ba la sogs pa'i bskyed bya'i sems dang sems kyi bskyed bya ma yin pa de la yang sems log pa yin na/ ldog pa sems kyi bskyed bya nyid med na/ gang las yin zhes bzlog pa med par thal bar 'gyur te/ sems log kyang sems la bshad pa'i thal 'gyur dang de dag gi mtshungs pa yin te/ 'bras bu log na rgyu ldog pa ma yin te/ khas ma blangs pa'i phyir ro/ /'on te de dag gi phul du byung ba dang 'grib pa yin na de'i bskyed bya sems la yang phul du byung ba 'grib pa thob par 'gyur ro zhes bya ba dag gi don yin na/ de ltar na de dag rgyu yin pas de dag gi 'bras bu sems la ldog par thal bar 'gyur ba ni rmi lam la sogs pa dang gzhan la yang lus rgyu yin par mtshungs pa yin te rmi lam bzhin du gzhan la yang lus yod na dbugs 'byung ba la sogs pa yod pa dang rjes su 'jug pa'i phyir ro/ /sems rgyu yin na rmi lam bzhin du gzhan la yang sems de'i 'du byed pa las yin pa'i phyir thal 'gyur 'di ni mtshungs pa ma yin no/ /rgyu gzhan yang lhan cig byed pa'am rang dbang ngam las kyi ming can du khas blangs pa'i phyir de med na sems med pa'i phyir de'i 'bras bu dbugs 'byung ba la sogs pa ni lus gnas kyang med pa mi srid pa ma yin te/ lus gnas kyang sems med pa la sogs pa'i 'bras bu sna tshogs pa mthong ba'i phyir brtag bya sna tshogs pa'i bag chags kyi ngo bo ni sems kyi chos yin gyi 'byung ba'i chos ma yin te/ thams cad du 'byung ba rnams dbugs 'byung ba la sogs pa dang thun mong ba nyid kyis sna tshogs pa ma yin par thal bar 'gyur ro/ /gnas pa'i 'phen byed gzhan dag kyang / /mtshungs ma yin ni mtshungs pa ma yin pa ste lus kyi rgyu dang ngo / /sems kyi chos kyi bag chags sna tshogs pa las lus dang sems la sogs pa sna tshogs pa nyid du mthong ba yin par bstan pa ni/ gnyid dang 'brel pa tsam gyis ni/ /zhes bya ba'o/ /sems la sogs pa sna tshogs pa de nyid kyang skye ba'i dang po la bag chags kyi bskyed bya yod pa'i phyir ji ltar skye ba snga ma snga ma yin zhes bstan pa ni/ de phyir sems can thams cad nyid/ /ces bya ba ste/ 'bras bu'i shugs kyis kyang rgyu skye ba snga ma la gang zhig med na mi 'grub pa de thams cad de kho na bzhin du brtag par bya ba yin par bstan pa ni/ bag chags stobs las byung gyur kyang / /zhes bya ba'o/ /skye ba snga ma las skye ba 'di'i 'pho ba yin par tshad ma'i nus pas grub pa la dpe la ltos pa gsal ba yin yang nus pa chen por khas blangs nas bstan pa ni lus gzhan du 'pho ba ji ltar yin zhes bya ba nas ltag chod yin par bsal zhes bya ba'i bar gyis bstan pa yin no/ /sad pa dang rmi lam gyi sems la sogs pa'i rgyun la bden pa dang cig shos kyi rnam par dbye ba med pas bag chags kyi bskyed bya nyid yin pa la/ gnod pa med pas 'bras bu las rgyu rjes su dpog pa'i phyir 'jig rten pha rol grub pa la gnod pa ci yang med do zhes bya ba'i don to/ /nye bar len pa gcig las byung ba'i gnas kyi sa bon chu la sogs pa dang phrad pa che ba dang ches che ba la sogs gnas skabs su son pa yang dbye ba med par ma yin nam de bzhin du lus kyang byis pa dang gzhon nu la sogs pa'i gnas skabs dag la tha dad pa ma yin no snyam du sems pa ni/ nyer len gcig gi dngos po las/ /zhes bya ba'o/ /lan ni de ltar na yang lus gzhan nyid ldog par 'gyur ba ni med ces bya bar mtshams sbyor ro/ /ci'i phyir zhe na/ mtshan nyid mi mthun pa nyid ni tha dad pa nyid do/ /de nyid ni gcig nyid do/ /sa bon yang cher skyes ba la sogs pa'i dbye bas bstan pa ni/ gzhon nu la sogs pa'i lus zhes bya ba'o/ /lus bzhin du sems kyang tha dad pa ma yin nam/ ji ltar 'pho ba yin zhe na/ de dang lhan cig spyod par zhes smos so/ /snga ma snga ma'i sems tsam las 'byung ba'i sems kyang lus de la sred pa'i bag chags snying po can yin pa'i phyir lus dang lhan cig 'byung ba yin par bstan pa ni/ bag chags kyi stobs kyis zhes bya ba'o/ /mthong ba ni zhes bya ba ni nye bar dmigs pa yod pa'o/ /de ji ltar yin gzhan du na sad pa na dmigs pa bzhin du dmigs pa thams cad yod pa ni ma yin te/ 'o na ci zhe na/ bden pa yin na'o snyam du sems pa ni ji ltar mi bden pa bzhin du zhes bya ba'o/ /phyin ci log tu dmigs pa ni gnod pa can ma yin no/ gnod bya gnod byed dag la bye brag med do zhes bstan pa ni/ gang gi tshe rtogs pa de zhes bya ba'o/ /'on te snga ma la gnod pas shes pa phyi ma skyes pa yin la de nyid gnod pa can yin no/ /phyi ma ni snga ma la gnod pa ma yin te ma byung ba'i phyir ro/ /snga ma la gnod pa med na phyi ma'i skye ba mi 'grub po snyam du sems pa ni/ ji ste sad na ma dmigs so zhe na zhes bya ba'o/ /phyi mas snga ma la gnod pa ni rmi lam la yang yod pa'i phyir de yang khyad par ma yin par bstan pa ni/ sad pa dang ma sad pa dag ces bya ba'o/ /sad pa'i sems ni gnyid dang bral ba'i bdag nyid rig par byed pa ma yin nam snyam du sems pa ni/ nga sad do snyam du zhes bya ba'o/ /rmi lam gyi sems kyang de bzhin du bdag nyid rig pa yin par bstan pa ni/ nga sad do snyam pa zhes bya ba'o/ /med pa ni gzhal bya'i'o/ /mi bden pa nyid ni tshad ma'i'o/ /'on te sad pa na bza' btung dmigs pa'i don byed pa rmi lam na rjes su 'jug pa yin te/ sad pa na bshang ba la sogs pa dmigs pa'i phyir de'i phyir bden pa nyid yin no/ /rmi lam du dmigs pa'i gnas skabs na rjes su 'gro ba ma yin te/ de'i phyir mi bden pa nyid yin no snyam du sems pa ni/ 'on te bag chags stobs chung ba'i phyir zhes bya ba'o/ /de lta yin na ma 'ongs pa'i dngos pos mi bden pa yin gyi rang gi ngo bos ma yin par bstan pa ni/ 'o na gang la bag chags bstan pa yod par zhes bya ba'o/ /rang gi ngo bo nyid kyis bden pa la ltos nas 'pho ba bden pa nyid du bstan pa nye bar bsdu ba ni/ de ni rang gi ngo bor yod pa nyid ces bya ba'o/ /rmi lam du dmigs pa thun mong ba nyid la'ang bden pa'i rgyu mtshan yod par bstan pa ni/ gang du lhas bstan pas zhes bya ba'o/ /de 'di ltar rmi lam du dmigs pa yod pa'i phyir 'pho ba yod pa kho nar grub na yun ring por gnas pa dang cig shos nyid kyis bden pa dang mi bden pa nyid kyis khyad par du rtogs pas de dgag pa rnam rtog dang mtshungs pa yin par bstan pa ni/ 'pho ba rab tu grub pas na/ /zhes bya ba'o/ /yul gzhan bzhin du goms pa'i khyad par gyi bskyed byar 'dod pa yin te/ shin tu cher mthong ba'i phyir skye ba snga ma las 'phos pa rjes su dpag pa'i yul yin par bstan pa ni/ skye ba dang po'i sems kyi 'du byed pa'i 'bras bu zhes bya ba'o/ /yun ring por mi gnas pas gzung ba la 'khrul pa yin yang bag chags kyi bskyed bya nyid la mi gnod pa'i phyir dpe yin par sngar bstan nas da ltar ni/ gzung ba la yang 'khrul pa ma yin no zhes bya ba'i khyad par yin no/ /gsal ba zhes bya ba ni mngon par 'dod pa'i khyad par te goms pa'i bskyed bya'i mngon par 'dod pa'i khyad par dang ldan pa ni skye ba 'di la goms pa med pa'i phyir skye ba snga ma'i goms pa dang ldan pa yin par rtogs pa yin la de'i phyir 'pho ba yin par rtogs pa'i don bstan pa ni/ lus la kun du 'dzin zhes bya ba ste/ re zhig dang por zhes bya ba ni 'bras bu ste/ phyogs kyi chos so/ /sngon gyi lus kyi goms pa'i zhes bya ba ni bsgrub bya ste de 'dzin par byed pa yang yin par bstan la de ni 'di ltar phyis khyab par grub pa yin na khyad par 'grub pa rjes su dpag pa'i 'bras bu yin par bstan pa yin/ sngon gyi lus la kun du 'dzin pa goms pa zhes bya ba'o/ /ldog pa bstan nas rjes su 'gro ba bstan pa ni/ de'i shugs kyis zhes bya ba ste/ skye ba 'di la goms pa med pa yin na goms pa'i bskyed bya'i khyad par skye ba gzhan la goms pa yin par sgrub par byed pas 'pho ba sgrub par byed pa yin no zhes bya ba'i don to/ /khyad par nye bar ma bzhag pas rjes su dpag pa mi 'jug par bstan pa ni/ de lta ma yin na ni zhes bya ba'o/ /'bras bu las rgyu rtogs pa bzhin pa ni/ yul dang dus de las yid kyi yul dang dus gzhan las ni ma yin no zhes bya ba de tsam gyi rjes su dpag pa 'jug pa ma yin nam/ de nyid 'dir 'phos pa ni ma yin no snyam du sems pa ni/ 'on te 'pho ba la mngon sum med pas zhes bya ba ste/ 'pho ba la khyab pa 'dzin pa med do zhes bya ba'i don to/ /'bras bu la rgyu tsam du rtogs pa la ni 'pho ba ma yin te/ rgyu tha dad pa'i yul yin pa'i phyir ro/ /rgyud gcig yin na skyon de med par bstan pa ni/ rjes dpag bya la mngon sum ni/ /zhes bya ba ste/ 'bras bu'i sems las rgyu'i sems rtogs bzhin ba ni de kho na 'di yin zhes rgyud gcig 'dzin pa'i yul yin pa'i phyir 'pho ba kho na yul yin zhes bya ba'i don to/ /'pho ba'i 'bras bu nyid du 'gar yang cung zad nye bar dmigs pa gzhan du yang / dmigs na 'pho ba yin par rtogs par byed pa ma yin nam zhes thun mong pas yin no snyam du sems pa ni/ 'on te de'i rigs la zhes bya ba'o/ /mngon par 'dod pa'i khyad par ni lus sam de la phan byed pa yang rung goms pa sngon du 'gro ba can nyid du dmigs pa la rjes su dpag pa 'jug par byed pa'i phyir de'i rigs la mngon sum du 'jug pa med pa ma yin par bstan pa ni/ re zhig lus sam zhes bya ba'i lus gcig nyid la mngon par 'dod pa'i bye brag ni goms pa'i sems sngon du 'gro ba can du dmigs pa yin gyi lus gzhan la ni ma yin pa ma yin nam de la ni 'pho bar 'dod pa yin no snyam du sems pa ni/ ji ltar de'i rigs la zhes bya ba'o/ /lan ni gal te mngon sum gyis 'pho ba ma mthong yang 'pho ba dang rjes su mthun pa'i zhes bya ba ste/ goms pa'i bskyed bya'i dngos po ni lus 'di la goms pa med pas skye ba snga ma'i lus kyi goms pa yin par rtogs pas 'pho bar rtogs pa yin par brjod do zhes bya ba'i don to/ /rjes su dpag pa thams cad la spyis rjes su 'gro ba yin la khyad par ni ji lta ba bzhin ma yin pa'i 'brel pa 'dzin pa'i yul ma yin par bstan pa ni du ba las zhes bya ba'o/ /lus gzhan las lus gzhan du 'pho ba sgrub pa la de las bzlog pa'i lus gzhan la 'pho bar sgrub par byed par 'gal ba ma yin nam/ rmi lam gyi lus la 'pho bar mthong ba'i phyir zhes bya ba 'di la yang bden pa'i lus gzhan la 'pho ba sgrub pa la de las bzlog pa mi bden pa'i lus gzhan la 'pho bar sgrub par byed pa'i phyir 'gal ba yin no snyam du sems pa ni/ 'on te yang dper na zhes bya ba la sogs pa'o/ /de'i phyir 'jig rten pha rol ni bden par zhes bya ba ni ji ltar mthong ba'i rjes su dpag pa 'jug pa yin na de lta na yang 'gal ba kho na yin zhes bya ba'i don to/ /rmi lam bzhin du yang 'pho bar sgrub pa yin na de kho na bzhin du 'pho ba'i 'gal ba rnam par bcad pa ni 'dod pa dang 'gal ba grub par 'gyur ro zhes zer ba ni/ yang ji ltar zhes bya ba'o/ /lus gzhan la 'pho ba dor ba ni lus de nyid du 'pho ba yin na 'gal ba yin par lan gdab par 'dod pas lus de nyid kyis zhes bya ba smos so/ /mi bden pa las 'ongs par 'gyur na zhes bya ba'i lan ni/ rmi lam rig pa thams cad ni zhes bya ba'o/ /gtan du rnam chad pa zhes bya ba'i lan ni/ sad pa dag dang 'brel par dmigs/ /zhes bya ba'o/ /gal te lus de nyid la 'pho ba la ni mngon sum gyis gnod pa yin la lus gzhan la yang ma mthong ba'i phyir 'pho ba nyid du mi 'gyur ro snyam du sems pa la de rnam par 'grel pa ni bshad zin te/ goms pa'i bskyed bya'i khyad par ni de med na mi 'byung la 'di la ni de med pa'i phyir srid pa snga ma la nges pas lus de dang 'brel pa yin no zhes bya ba'i don to/ /yongs su btang ba zhes bya ba rnam par 'grel pa ni sngon gyi lus mthong ba nyid ces bya ba'o/ /skye ba snga ma'i lus ni dus la sogs pas bskal pa yin pa'i phyir mi snang ba yin la/ ji ltar ma mthong bas med par 'gyur zhes zer ba ni/ sngon gyi lus ma grub par zhes bya ba'o/ /mi snang ba yang rjes su dpag pa las 'grub par bstan pa ni/ ma yin te gang gi tshe lus la sogs zhes bya ba'o/ /rjes su dpag bya la ma mthong ba tsam las med pa ji ltar 'grub pa yin snyam du sems pa la de la da ltar lus nyid med pa la mi dmigs pa tshad ma kho na yin te/ de'i bdag nyid kyi khyad par yin pa'i phyir ro zhes bstan pa ni/ lus de da ltar dmigs pa ni ma yin no zhes bya ba'o/ /tha dad pa dgag par bya ba la gzhan gyi mi snang ba mi dmigs pa sgrub par byed pa ma yin par bstan pa ni/ 'das pa ma dmigs pas zhes bya ba'o/ /de'i bdag nyid dgag pa nye bar bsdu ba ni/ de nas sngon gyi lus zhes bya ba'o/ /rmi lam du rig pa thams cad ces bya ba ni/ ji skad du ji ltar zhes bya ba la sogs pa nas 'chad par 'gyur ro zhes bya ba'i bar gyi bshad pa yin no/ /rmi lam bzhin du thams cad rig pa tsam ni 'bras bu dang cig shos nyid du bden pa yin gyi gzung ba dang 'dzin pas ma yin te rnam par rtog pa tsam yin pa'i phyir ro zhes bstan pa ni yang na zhes bya ba'o/ /gal te thams cad rmi lam dang mtshungs pa nyid yin na thogs pa dang bcas pa ni sad pa na yin gyi gzhan la ni de las bzlog pa yin no zhes rnam par dbye ba ji ltar yin/ bag chags kyi rnam par dbye ba las yin par bstan pa ni/ de'i phyir gzhan nas zhes bya ba ste/ thogs pa dang bcas pa nyid la sogs pa yang rig pa'i bdag nyid yin gyi phyi rol du rnam par 'jog pa'i rgyu mtshan ni ma yin no zhes bya ba'i don to/ /gnas dang 'chi ba la sogs pa yang las kyi bag chags sna tshogs pa kho na yin par bstan pa ni/ 'chi ba la sogs pa ni gnas pa'i zhes bya ba ste/ dpe la lus la ma bor na 'pho ba'am mi bden pa nyid kyi khyad par ni mngon par 'dod pa ma yin pa'i khyad par la sogs pa'i 'bras bu'i khyab byed ma yin pa'i phyir 'pho ba tsam sgrub par byed pa dang 'gal ba ma yin la bum pa la tshos par bya ba nyid kyi khyad par ni mi rtag pa nyid du gsal bar byed pa'i khyab byed ma yin te/ de lta mod kyi de tsam gyi ni ma yin no/ /'di la yang 'pho ba tsam khyab byed yin gyi cig shos ni ma yin te/ de kho na bzhin du dmigs pa'i phyir ro zhes bstan pa ni lus de nyid 'pho ba la zhes bya ba'o/ /bskyed pa'i khyad par can sems pa ma yin pa'i nye bar len pa nyid la nges pa can tsam gyis khyab pa ni blo dang ldan pa rnams kyi de'i khyad par ma yin pa'i phyir de tsam la dmigs pa dang ldan pa'i rgyu nyid du grub pa ni ma yin no zhes bya ba'i don to/ /rmi lam gyi shes pa yang mngon par 'dod pa'i khyad par dang 'brel pa'i phyir phyi rol nyid la gnod pa yin yang rang gi ngo bo med pa ma yin pas rgyu nyid ma nyams pa yin par bstan pa ni/ rmi lam rig pa thams cad ni/ /zhes bya ba ste/ bden pa dang mi bden pa nyid ni yul gyi gnod pa dang gnod pa ma yin pa dag gis yin gyi rang gi ngo bo sgrub par byed pa las ni ma yin zhing rmi lam nyid la'ang rjes su 'brel pa nyid mthong bas na gzhan la yang de kho na bzhan du sgrub par byed pa yin zhes bya ba'i don to/ /de'i phyir de bzhin du lus kyi 'bras bu sems yin na lus kho na gnas pa sgrub par byed pa yin gyi dbugs la sogs pa ni ma yin te/ de yang gzhan gyi bskyed bya nyid yin na/ sems kyi dbang nyid la sogs pas de'i bskyed bya nyid yin pa'i phyir ro/ /'on te dang po la lus kyis sma des bskyed pa'i sems kyis dbugs la sogs pa bskyed pa yin la de'i 'og tu rgyu tsam dang 'brel pa can gyi sems kyi gnas pa sgrub par byed par 'gyur ro/ /de ni de lta ma yin te/ dbugs la sogs pa dang 'brel ba nyid sems kyi bskyed bya nyid du shes pa'i phyir te de yang rlung 'byin pa dang 'dren pa ni 'bad rtsol med par gang las yin zhes gsungs pa ste/ 'bad pa dang ldan pa'i sems kyi rgyun gyis brjod pa la sogs pa bzhin du rlung 'byin pa 'dren pa 'phangs pa yin te/ goms pas gsal po yin pa des dus byas pa yin pa'i phyir de med kyang rjes su 'jug pa kho na yin la de bzhin du 'bras bu gzhan skyed par byed pa la lhun gyis grub pa ma yin pa'i 'bad pa dang ldan pas 'bad pa snga ma'i 'du byed pa la bar du gcod pa'i phyir rlung 'byin pa la sogs pa bkag par 'gyur la de log na yang snga ma kho na las 'phel bar byed pa yin no/ /de'i phyir sems kho na dbugs la sogs pa'i gnas pa sgrub par byed pa yin gyi de dag ni sems kyi ma yin pa'i phyir lus kho na bskyed pa'am gnas pa la de'i sgrub byed yin gyi gzhan ni ma yin no/ /de'i phyir lus yod na sems ldog par mi 'gyur ba kho nar thal bar 'gyur ba grub pa yin no/ /sems kyi rgyu sems yin na de gnas pa sgrub par byed pa de la srid pa dang bcas pa'i las ni lus la mngon par chags pa'i khyad par bzhin du sems kyi ngo bo gzhan yod pa'i phyir de yod pa dang med pa dag gis lus yod kyang sems yod pa dang med par 'gal ba med do/ /lus yod kyang sems ldog pa'i phyir gzhan sgrub byed yin gyi lus ni ma yin no zhes bya ba de dag tsam du go ba ma yin nam de ni las sam gzhan yin par ci las shes/ re zhig mthong ba ni ma yin te/ de ni dbang po las 'das pa yin pa'i phyir ro/ /gzhan du snang pa yin pa la der rtogs pa ma yin no/ /lus kyi gnas skabs kyi khyad par las rlung la sogs pa'i skyon mtshungs pa nyid du 'jig rten thams cad la grub na sems gnas pa yin la de dang mi mnyam pa yin na lus dang mi mthun pa'i phyir ldog pa yin no/ /mi mnyam pa la sogs pa yang rims la sogs pa'i rnam par 'gyur pa yod pa dang med pa dag gis shes pa yin no/ /gang gi tshe rnam par mi 'gyur ba de'i tshe yang de'i mi mnyam pa kho na sems ldog pa'i sgrub byed yin par mthong ba'i shugs kyis rtogs pa yin no/ /rnam par 'gyur ba las rjes su dpag pa'i mi mnyam pa ni ldog bya sems ldog pa de lta bu'i phul du byung ba yin par lus la sgro btags pa yin la ji ltar der yang skye bar mi 'gyur bar ro/ /sems ni sems gzhan gyi bskyed bya ma yin te/ lus kyi bskyed bya yin pa'i phyir ro/ /lus dang sems kyi rgyun gnyis rjes su 'jug pa ni me dang du ba'i rgyun gnyis su 'jug pa lta bu'o/ /de dag tsam gyis sems ni skyed byed ma yin la lus las kyang lan cig skyes pa skyon gyis mi mthun pa skyes kyi bar du rjes su 'jug pa yin la mnyam pa ni gnas pa sgrub par byed pa yin no/ /de bzhin du goms pa yang gzhan las skye ba'i sems nyid la bum pa me dang phrad pa bzhin du phan 'dogs par byed pa yin no snyam du sems pa ni/ gal te sdong bu la sogs bzhin/ /nyes pas mi mthun lus rgyu min/ /zhes bya ba ste/ mar me'i sdong bu ni chu la sogs pa'i nye bar gnod pas ni mar me'i rtse mo'i rgyun gyis sgrub byed ma yin la skyon de dang bral na yang mi ldog par gnas pa ma yin te/ 'di la mthong ba las gzhan pa'i rgyur rtogs pa yang ma yin no zhes bya ba'i don to/ /'di la lan du/ shi ba nyes pa mnyam 'gyur tshe/ /slar yang 'tsho ba dag tu 'gyur/ /zhes bya ba smos te goms pa las byung ba'i shes rab dang / mi brjed pa'i blo la sogs pa dang yang dag par ldan pa'i sems yin par skye ba'i dang po la snang ba yin gyi de dang 'dra ba ni ma yin te/ rtsa ba dang sa bon las byung ba'i chu shing bzhin du de nyid du rtogs pa yin pa'i phyir bsrub shing bsrubs pa las byung ba'i me'i bskyed bya me yin pa bzhin du de nyid du shes pa yang ma yin te/ gnod pa can med pa'i phyir ro/ /de dag la brtson 'grus kyi dbye ba gnod pa can yin no/ /bsrub shing bsrubs pa las byung ba'i me la bsregs pa'i lcags kyi gar bu ni de'i mod la rma 'drubs par byed par thos pa yin no/ /de bzhin du gzhan la yang ji ltar srid pa'i gnod pa can du go bar bya'o/ /'di la yul gzhan nas 'ongs pa'i mi shes pa la sogs pa bzhin du goms pa'i sngon du 'gro ba can nyid la ni gnod pa can cung zad kyang med pa yin te/ de'i bskyed bya nyid kyi khyad par mthong ba'i phyir ro/ /de bzhin du rang gi rigs kyi bskyed bya'i sems ni lus dang lhan cig gnas pa yin te mngon par 'dod pa'i rang bzhin pa'i phyir la mngon par 'dod pa'i rang bzhin yang lhan cig pa'i rgyu mtshan du mthong ba kho na yin no/ /de med na gang dag dang yang gar yang lhan cig gnas pa ma yin no/ /de med na de las bzlog pa la ji ltar 'dod pa bzhin 'jug pa kho na yin par 'di yang mthong ba kho na yin na/ de dag tsam gyis kyang 'di'i ji ltar 'dod pa phun sum tshogs pa ma yin pa'i phyir de la mngon par 'dod pa'i snying po can ni sbyin pa la sogs pa'i rgyu mtshan kun du spyod pa byed pa yin no/ /de'i tshe yang ji ltar 'dod pa phun sum tshogs par 'gyur te/ bsnyen bkur dang 'dod pa la sogs pa lta bu yin par brjod de bsnyen bkur la sogs pa tsam gyis 'bras bu 'grub pa ma yin te/ da ltar ba'i mngon par 'dod pa ni 'di'i 'phen byed ma yin pa'i phyir ro/ /de'i phyir 'di ltar rang gi rigs las skyes pa'i sems mngon par 'dod pa'i snying po can gnas pa ni des drangs pa'i skyon mnyam pa'i rgyu mtshan tsam yin gyi/ gzhan du na de dag gi rims la sogs pa'i rnam par 'gyur ba yod pa dang med pa go bya yin pa'i phyir ro/ /sems yod pa dang med pa dag kyang ji skad bstan pa'i rigs pas gzhan du yang grub pa yin te go byed ma yin pa'i phyir ro/ /rnam par 'gyur ba med na gang la yang mi mthun pa med pas mnyam pa'i de'i bskyed bya sems gnas pa yin pa bzlog par sus nus par 'gyur te/ rnam par 'gyur ba phra mo yod pa yang ma yin te/ de rtogs pa'i tshad ma med pa'i phyir ro/ /lan cig rjes su dpag pa'i mi mthun pa nyid ldog pa ni sems kyi gnyen po 'du byed par sgro btags pa yang ma yin te/ rims nad can thams cad 'chi bar thal bar 'gyur bas gso bar rtsom pa 'bras bu med pa thal bar 'gyur bar smra ba'i phyir ro/ /las ni nges par sbyor ba la 'jog par byed dam zlog byed ma yin te/ shes pa mnyam pa dang mi mnyam par sgro btags pa'i sgo nas bdag nyid 'jug pa dang ldog pa tsam gyi rgyu mtshan yin pa'i phyir de'i 'jug pa dang ldog pa dag yin no/ /lus kyi 'jug pa'am ldog pa yang sna tshogs pa yin te/ mnyam pa dang mi mnyam pa dang gnyi ga la yang yod pa'i phyir de dag ni gar yang gnas pa ma yin no/ /de'i phyir mnyam pa dang mi mnyam pa dag ni de dag gi sgrub byed ma yin te/ 'khrul pa'i phyir dang nges pa can ma yin pa ni sgrub byed ma yin pa'i phyir dang rnam par 'gyur ba'i rgyu ma yin pa yang mi mnyam pa med par mi byed pa'i phyir ro/ /byed pa nyid yin yang ji ltar yang rnam par 'gyur ba thob pa'i phyir 'u bu cag la mtshungs pa nyid ma yin no/ /las zad pa kho na las 'chi ba yin pa'i phyir gso bar nus pa ma yin pa las yod na rnam par 'gyur ba dang tshor ba ldog pa yin pa'i phyir ro/ /mi mthun pa med pas mnyam pa yin na de mi skye ba yin pa'i phyir las yod na skyes bu'i byed pa lta bu yin gyi/ gzhan du na gso ba thams cad 'bras bu med pa nyid kyis de lta bu'i rnam pa kho na'i rnam par 'gyur ba yod kyang 'ga' yang 'chi ba med par thal bar 'gyur ba'i phyir ro/ /bcud kyis len yang las yod pa kho na yin na snang ba yin te/ lo stong la sogs par 'tsho ba'i rgyu mtshan gyis las 'khor ba thog ma med par bsags par gyur pa bcud kyis len pa la sogs pa'i sbyor bas bsgrub par bya ba 'byung ba yongs su gyur pa phan 'dogs par byed pa'i khyad par la ltos nas tshe'i 'du byed mtshams sbyor bar byed pa yin no/ /ting nge 'dzin ni de yongs su gyur pa skyed par byed pa'i sgo nas rang nyid kho na tshe dang mtshams sbyor ba yin te las kyi ngo bo yin pa'i phyir las gzhan 'ga' la yang de ltos pa ma yin no zhes bya ba'i don to/ /lus 'di de lta bu kho na'i gnas pa sgrub par byed pa yin zhes gnas bsgrub par byed par mtshungs pa'i gnas skabs dang ldan pa yin no/ /gang gi phyir rgyu tshogs pa ni 'bras bu la mi slu ba yin no zhes bstan pa yin la mnyam pa yang gnas pa'i tshogs pa sgrub par byed pa yin la 'chi ba la ni mi mnyam pa yin no/ /de dag kyang 'dod pa'i rjes su 'jug pa ma yin par bstan pa ni lus rgyu nyid yin na ni zhes bya ba'o/ /de nyid kyis na de dag gi 'bras bu yang gnas pa la sogs pa 'khrul pa can yin par bstan pa ni/ nyes pa nye bar zhi bar gyur kyang zhes bya ba'o/ /nyes pas skyon can yin pa'i 'bras bu 'chi ba ma yin nam/ de ldog pa yin na rnam par 'gyur ba med par rigs pa yin na mi rigs pa ji ltar yin/ de log kyang de'i bskyed bya'i 'du byed ni me'i bskyed bya shing bzhin du mi ldog pa yin la de'i phyir 'khrul pa ma yin no/ /rgyu lus kyi mnyam pa'i 'bras bu la 'khrul pa yin pa ni 'dis bsal ba yin no/ /de la yang mi mnyam pa'i bskyed bya 'du byed phra mo mi ldog pa'i phyir ro snyam du sems pa ni/ gal te me ni ldog na yang / /shing gi 'gyur ba mi ldog bzhin/ /de ni ldog pa med ce na/ /zhes bya ba ste/ 'chi ba'i don gyi rnam par 'gyur ba ni 'chi ba'i rnam par 'gyur ba'o/ /'chi ba kho na ni ma yin te/ gnas pa dang 'chi ba dag gi 'bras bu yin pa'i phyir dang rtsod pa'i gzhi yin pa'i phyir yang ngo / /lan ni/ ma yin gso sbyor yod phyir ro/ /zhes bya ba ste/ shing las me'i bskyed bya'i rnam par 'gyur ba bzhin du mi mnyam pa'i bskyed bya'i rnam par 'gyur ba ni ma yin te/ gso sbyor 'bras bu med par thal bar 'gyur ba'i phyir ro/ /gang gi phyir 'bras bu cung zad kyang med pa la ni su yang sbyor bar byed par mi 'gyur ro/ /de'i phyir mi mnyam pa las skyes pa'i rnam par 'gyur ba ni bzlog bya yin no/ /de'i bskyed bya rims la sogs pa gso ba'i sbyor ba la sogs pas bzlog bya yin par ni bden na rims la sogs pa'i sgo nas 'du byed pa ni ma yin te/ de mi ldog pa las kyang 'chi ba yin zhes bya ba 'di la yang / ma yin gso sbyor yod phyir ro/ /zhes bya ba de kho na rjes su 'jug pa yin no/ /gal te gso ba la sogs pas rims la sogs pa ldog pa yang de'i sgo nas 'du byed pa ldog pa ma yin na de las kyang 'chi ba kho na yin na de'i tshe yang gso ba la sbyor bar mi byed de gang gi phyir ji ltar 'di 'tsho bar 'gyur zhing 'chi bar mi 'gyur zhes de la sbyor bar byed/ de'i sbyor ba ma byas kyang shi ba yin na rims la sogs pa yang zhi bar 'gyur ba'i phyir de'i don du gso ba ma yin no/ /'on te 'ga' zhig rims la sogs pa'i sgo nas byung ba'i rnam par 'gyur ba ni gso ba'i sbyor bas de log na ldog pa yin la des na 'tsho ba'i phyir de ni 'bras bu dang bcas pa yin la 'ga' zhig gi spyi ldog pa yin pa des na 'chi ba yin no/ /ma yin te/ rnam pa gnyis kyi rgyu med pa'i phyir des bskyed pa'i mi mnyam pa'am rigs la sogs par mnyam pa yin na de'i bskyed bya 'du byed pa glo bur du ji ltar tha dad par 'gyur te/ de dang de min dngos po can/ /de dang de min dngos rgyu skyes/ /zhes bstan pas so/ /me dang phrad par gcig kyang shing dang gser yul tha dad pa yin pas bzlog bya ma yin pa dang / cig shos rnam par 'gyur ba'i skyed byed du mthong ba ma yin no snyam du sems pa la yul tha dad pa las 'bras bu tha dad pa yul gcig la mi rigs par bstan pa ni/ sngar mi 'byung bas rnam par 'gyur ba skyed par byed pa 'ga' ni me dang phrad pa la sogs pa'o/ /'ga' zhig ni shing la sogs pa'i yul la'o/ /'ga' zhig ni de nyid yul gzhan gser la sogs pa la ste/ 'ga' zhig ces bya ba ni dbang du byas pa'i phyir ro/ /bzlog pa yin pa ni slar 'byung ba ste/ 'gyur ba skyed par byed ces bya ba dang 'brel pa yin te de'i tshe nyid kho na la de bzhin du'am/ gzhan du rnam par 'gyur ba skyed par byed pa ni ma yin no zhes bya ba'i don to/ /de nyid de kho na las bzlog bya rnam par 'gyur ba chung ngu yin gyi chen po ni ma yin no zhe na/ gang gi chung ngu bzlog bya yin pa de'i chen po yang yin te/ dper na gser me dang phrad pa las zhu ba nyid lta bu'o/ /de nyid sman gyi khyad par las gzhan du yin no/ /gang gi rnam par 'gyur ba chen po bzlog bya ma yin pa'i de'i chung ngu yang yin te/ dper na shing me dang phrad pa las lta bu'o zhes dgongs pas gsungs pa ni dang po'i zhes bya ba ste/ slar 'byung ba'i rnam par 'gyur ba bskyed par byas pa gang yin pa chung yang zhes bya ba dang 'brel pa yin te/ las kyi ming can gyi tshogs tha dad pa'i bskyed bya ni sman gyi bskyed bya gser zhu ba nyid yin bzhin du bzlog bya ma yin par yang 'gyur ba yin gyi/ mi mnyam pa tsam gyis bskyed bya ni de bzhin du'am gzhan du yang 'gyur ba ma yin te/ rgyu tha mi dad pa'i phyir ro zhes bya ba'i don to/ /gang la tshogs pa gzhan gyi bskyed bya'i rnam par 'gyur ba yang slar bzlog par rung ba de la mi mnyam pa tsam gyis bskyed byar 'gyur ba lta ci smos zhes bstan pa ni/ 'di ltar gnyid kyi sems pa dang bral ba zhes bya ba'o/ /dug dang rmongs pa dang brgyal ba rnams la dbugs 'byin pa med kyang sems skye ba mthong ba'i phyir ro/ /dbugs 'byung ba la sogs pa rgyu ma yin no zhes bstan nas sna tshogs pa ma yin yang de sngar gyi sems sna tshogs pa'i chos kyi rjes su byed pa'i phyir 'bras bu sems tha dad pa ma yin pa la sogs pa 'bras bu yin par bstan pa ni/ gnyid dang bral bar gyur na blo/ /shes pa snga ma'i 'du byed las/ /lus mtshungs pa zhes bya ba ni/ 'byung ba chen po yongs su gyur pa nyid kyis srog chags thams cad kyi lus mtshungs pa'o/ /blo rnams ni snga ma snga ma'i blo'i bag chags tha dad pa las tha dad bar snang ba yin no zhes bya ba'i don to/ /mnyam par gzhag pa'i sems la yod pa'i bag chags rmi lam gyi dus su rjes su 'jug pa ma yin snyam du sems pa la/ sad pa'i gnas skabs na zhes bya ba smos te/ sad pa ni nang gi rig pa'i rnam shes yin te lus kho na'i sems med pa dang sems pa can zhes bya bar sbyar bar bya'o/ /mnyam par gzhag pa'i sems la yod pa la tshad ma med de rang rig pa nyid kyi don shugs kyis yul ma yin pa'i phyir ro zhes bya ba'i don to/ /'byung bar ba'i rgyu 'das pa dang lhan cig byed par khyed 'dod pa ma yin snyam du sems pa la/ khyed la yod pa kho na lhan cig byed pa yin gyi gzhan ma yin par bstan pa ni/ med pa ni lan cig byed pa ma yin no zhes bya ba'o/ /byed pa'i bya ba ni dngos po rnams kyi ngo bo kho na yin par bstan pa ni/ yod pa dang med pa ni zhes bya ba'o/ /gal te rmi lam la mnyam par gzhag pa ni sems sam lus kyang sad pa'i rgyu ma yin na lus kyi gnas su shas che bar bsnun pa'i bzod pa dka' ba'i reg pa la sogs pa zhes sad pa'i rgyu ji ltar yin snyam du sems pa ni/ 'o na ji ltar bsnun pa zhes bya ba ste/ lus rgyu nyid ma yin na de'i gnas su bsnun pa sad par byed par mi rigs so zhes bya ba'i don to/ /'di ni sad pa'i rgyu ma yin te de med kyang 'byung ba yin par bstan pa ni/ sad pa gdon mi za bar ni zhes bya ba'o/ /sad pa ni nang gi reg pa'i zhes pa yin la de'i 'og tu mthong bar bya ba'i dngos po nye ba gang yin pa de dang sngar gyi 'du byed pa'i sems dag dus tha dad pa yin pa ni ji ltar sad pa'i 'bras bu la lhan cig byed pa de bzhin du lus kyang sngar gyi 'du byed pa dang lhan cig byed pa yin no snyam du sems pa ni/ gal te sad ma thag tu mthong ba ni zhes bya ba ste/ mthong bya'i dngos po yin la de dang 'brel ba ni nye ba ste sngar gyi shes pa dang lhan cig byed pa nyid do/ /de las rnam par rtog pa ste/ 'jigs pa dang mya ngan la sogs pa'i rgyu yin pa'i phyir/ de dang yang dag par ldan pa'i shes pa skye ba yin na/ de la ji ltar mthong ba yin snang ba yin par bsgrubs pas blta bya yin par brjod la/ de yang snga ma'i shes pa yang 'du byed pa'i ngo bo yin la de dag gi lhan cig byed ba nyid ni dus kyi dbye ba las yin no zhes bya ba'i don to/ /nye bar gnas pa'i dngos po yang yid smon tsam las byung ba'i sad pa la nges pa med pas bsgoms pa las byung ba'i gsal bar snang ba la dbang po bzhin du rgyu ma yin par bstan pa ni 'di la yang nges pa yod min te zhes bya ba ste/ nye bar gnas pa zhes bya bas ni/ dngos po la yid smon rgyu nyid yin la gang zhig ces bya bas nye ba na gnas pa'i rgyu nyid du bstan pa yin gyi sad pa ni ma yin no/ /gnyid log pa kha cig la yid smon med kyang sems rgyun chad pa las sad par mthong ba ma yin nam/ de yang ji ltar rgyu yin snyam du sems pa la/ gang ji ltar goms pa zhes bya ba'o/ /goms pa 'khrul pa ma yin par bstan pa ni/ gzhan du ni ma yin no zhes bya ba'o/ /gnyid log pa na rgyun chad pa sad pa na 'das pa kho na las 'byung ba yin na de lta na de ma thag kho na 'byung bar 'gyur ro/ /de'i phyir gnyid med do/ /de'i tshe med na dus phyis kyang mi 'byung ste ltos pa med pa'i phyir ro zhes bya ba ste 'di kho nas gsal ba yin te/ goms pa sna tshogs pa nyid kyis ji ltar goms pa'i sad pa sna tshogs pa'i phyir zhes bya ba'i don to/ / gnyid log pa'i dus na shes pa snga ma shos las kyang dbang po'i bya ba med na/ phyi rol gyi yul ji ltar shes pa yin rnam par rtog pa can ni ma yin te/ mthong ba med na ldang ba'i phyir ro/ /bdag go zhes bya ba'i phung po nyams su myong ba med na mi 'byung ba yin te yul ma rtogs na mi 'byung ba'i phyir ro snyam du sems pa la/ bsdad pa ni zhes bya ba smos te/ mun khung du nga'i lag nom yin zhes bya ba bzhin du nang gi reg pa'i shes pa ji ltar goms pa'i 'jigs pa dang brtan pa la sogs pa dang ldan pa'i bde ba'i tshor ba ni gzhan sgrub par byed pa ma yin pa kho na sad pa yin gyi dbang po'i shes pa ni ma yin no zhes bya ba'i don to/ /snga ma'i sems las 'byung ba sngar 'jug pa goms pa'i bag chags yin gyi gnyid kyi dus su 'byung ba ni ma yin la de'i sad pa yang de dang de rjes su mthun pa'i lus kyi rnam shes kho na yin par bstan pa ni/ 'jigs dang brtan sogs 'du byed las/ /zhes bya ba'o/ /des na lus dang zhes bya ba de la de nas zhes bya ba 'dis snga ma snga ma'i sems kyi 'du byed kyi rjes su 'gro ba nyid rgyu nyid du bstan pa yin no/ /de lta yin pa ni bden na gang gis chung ngu bsal bya yin pa de'i tshe chen po yang gso bas bsal bar bya ba yin no/ /gang gi tshe chen po ma yin pa de'i chung ngu yang ma yin te/ nyes pa rnams kyis yongs su gyur pa tha dad pa las gso byed dang gso bya ma yin pa mi mnyam pas tha dad pa'i phyir me dang phrad pa tsam gyis sman gyi bskyed bya'i gser zhu ba nyid bzhin du tshogs pa'i dbye bas 'bras bu tha dad par khas blangs pa'i phyir skyon gcig 'phel bar gyur pa las thams cad kyang 'phel bar byed pa'i phyir thams cad kyang skyed byed nyid du thams cad la bye brag med pa ma yin te thams cad las skyes pa yin yang dbang byed pa'i khyad par du rnam par gzhag pa'i phyir ro/ /ji skad du mdze nad thams cad dang rlung nad thams cad dang mkhris nad thams cad dang bad kan thams cad dang 'bu srin dang bcas pa rnams kyi nang nas gang shas che ba de 'dzin pa yin no/ /lan ni nang dang de'i bskyed bya'i rnam par 'gyur ba 'chos par byed pa ni/ slar gso bar byed pa'i sman la sogs pa med pa'i phyir gso bya min par brjod pa yin la khyed kyi 'dod pa la ni de mi srid do/ /shi na nyes pa mnyam par byed pas 'bad pa med par 'chos par byed pa grub pa yin no zhes bstan pa yin no/ /rnyed par dka' phyir zhes bya ba ste/ kho bo'i phyogs la ni gnas pa sgrub par byed pa'i las zad pa yin na tshe zad pa'i phyir nad de'i rnam par 'gyur ba yang gso bya ma yin par 'gyur te las zad pa yin na 'chos par mi srid pa'i phyir ro/ /'di ltar gal te las ma zad pa yin na 'chi ba las gzhan du yang 'chos par 'gyur ba zhig na de yang mi srid par bstan pa ni/ tshe zad phyir zhes bya ba'o/ /rnam par 'gyur ba ni rgyu shi ba la sogs pa yin du zin kyang gso bya ma yin par bstan pa ni/ nyes pa 'ba' zhig yin na gso ba med pa nyid ces bya ba'o/ /nyes pa mi mnyam pa la sogs pa rnam par 'gyur ba'i rgyus sems kyi rgyun chad pa ma yin nam rgyu 'jig na yang ji ltar 'byung ba yin tho ba la sogs pa 'jig byed kyis bshig pa'i bum pa ni des bshig pa yin na yang 'byung ba ma yin no snyam pa'i khyad par can gyi lus ni sems gnas pa'i sgrub byed du 'dod pa yin no zhe na yang / bden mod kyi yod pa'i sems de ni de ltar 'gyur gyi med pa ni ma yin no/ /rgyu yang de bzhin du yin no zhe na yang ma yin te/ khu ba la sogs pa rim gyis skyes pa'i sems kyi bskyed bya'i rgyu yin gyi de bzhin du skye ba nas 'jig pa gnyid log pa na rnam par chad pa'i 'bras bu ni ma yin no/ /ji ltar rgyu yin zhe na yang ma yin te/ de'i tshe 'bras bu dbugs 'byin pa mthong bas sems gtan rgyun chad par rtogs pa ma yin pa'i phyir yin gyi/ de'i tshe rig par khas blangs pa'i phyir ni ma yin no snyam du sems pa la shi bar zhes bya ba smos te/ 'ang gi sgras ni rim pa las bzlog pa'o/ /dug sogs kyi sogs pa'i sgra ni brgyal ba la sogs pa'i rgyu mtshan gang gi yin pa de de ltar yin te/ log pa'i sngags dang sman la sogs pas so/ /de yi sos zin bcad las kyang / /zhes bya ba'i yang gi sgra ni ldog pa'i rgyu gzhan te rnam grangs kyi don to/ /rnam par 'gyur ba ni lus la yod pa'i sems rgyun chad pa'i 'du byed yin la de'i rgyu ni dug la sogs pa'i bskyed bya mi mnyam pa yin te/ de dang bral na rgyu log na de'i yang rgyu sos bcad pa yin no/ /de bzhin du rnam par 'gyur ba'i rgyu dang bral ba yin na de ste shi ba zhes slar yang 'tsho bar mi 'gyur ba ni cis slar mi 'tsho ste 'tsho ba kho nar 'gyur ro zhes bya ba'i don to/ /ci zhes bya ba ni slar ldog pa'i don yin pa'i phyir ro/ /cis zhes 'dri ba'i don nyid khas blangs nas cis 'tsho bar mi 'gyur zhes 'chad pa la/ shi ba nyes pa mnyam gyur tshe/ /zhes bya ba 'dis don rtogs par 'gyur ro/ /'di skad bstan par 'gyur te/ bral ba'i sems kyang 'jig pa'i rgyu dang bral na/ lus de nyid la slar skye bar mthong ba yin gyi bum pa la sogs pa ni ma yin na/ de'i phyir ji ltar lus sems kyi mnyam pa'i khyad pa can ni gnas pa grub par byed pa de ltar mthong ba'i phyir ro/ /de bzhin du rgyu yang ma yin te/ de ltar mthong ba'i khyad par med pa'i phyir ro/ /nyes pa 'ba' zhig ni sems rgyun chad par byed pa khas blangs pa yin na gso min med pa nyid de sems slar mi 'byung ba ma yin pa'i phyir rnal ma 'grub pa'i phyir ro/ /las zad pa rgyu mtshan yin pa la ni skyon 'di med do/ /lus nye bar len pa'i sems kyang 'jigs pa dang mya ngan dang 'chi ba la sogs pa cis kyang de rnam par 'gyur ba zhes ma yin yang bsgyur bya'am 'jig par 'gyur ba ma yin nam/ dper na rtsig pa la sogs pa mi 'gyur yang ri mo la sogs pa lag pa la sogs pa dang myu gu la gnod pa can la sogs pa dang / gzugs la sogs pa me dang phrad pa lta bu'o/ /rtsig pa dang bum pa la sogs pa ni rnam par bsgyur bya'am bshig bya ma yin te/ de nyid yin par rtogs pa'i phyir ro snyam du sems pa la/ nyer len 'gyur ba med par ni ste gang zhig gang gi nye bar len pa yin de rnam par 'gyur ba ma yin pas so/ /nye bar len pa ni rnam pa gnyis te gnas skabs pa'i dang rgyun gyi'o/ /nye bar len par bya ba rnam par bsgyur ba'am gzhig par byed par mi nus so/ /re zhig rtsig pa la sogs pa'i ri mo'i nye bar len pa ma yin te/ de lta mod kyi tha mi dad pa'i ljang gu la sogs pa yin te bum pa'i 'jim pa lta bu yin la de yang lag pa la sogs pas 'jig par byed pa rtsig pa ni rten tsam yin no/ /de bzhin du me dang phrad par gyur ba'i bum pa las bum pa gzhan dmar por gyur pa bshad pa yin no/ /thams cad la yang tha mi dad pa'i nye bar len pa yin te nye bar blangs pa'i ngo bo yin pa'i phyir te/ cig shos rgyu mtshan tsam mam rgyu yang yin la re zhig sems kyi rgyu lus ma yin te/ tha mi dad par khas len pa'i phyir ro/ /tha dad pa ni rgyu yin te rtag tu de'i rjes su 'jug pas/ /gang zhig yod pa phan 'dogs byed/ /ces pa bstan pas so/ /rgyu mtshan yang ma yin te/ tha mi dad pa'i phyir ro/ /lus dang sems dag ni 'jim pa dang bum pa dang gzugs bzhin du'am tha mi dad pa yin no/ /tha dad pa la ni/ /gang zhig yod pas phan 'dogs byed/ /ces bstan pa yin zhing lus kyi rjes su byed pa nyid ma yin te/ rang rigs goms pa'i rjes 'jug phyir/ /zhes kyang bstan pa yin no/ /myu gu la sogs pa las tha mi dad pa'i chu ni nye bar len pa yin gyi tha dad pa ni de'i gnas pa'i rgyu yin no/ /lus ni mnyam pa'i khyad par gyi shi ba'i gnas skabs dang 'tsho ba'i gnas skabs kyi lus la bye brag ci yang med pa'i phyir sems mi ldog par thal bar 'gyur ro/ /'di skad bstan par 'gyur te nye bar blang bya ni nye bar len pa'i rnam par 'gyur ba'am rgyu'i rnam par 'gyur ba las yin grang na re zhig rgyu'i rnam par 'gyur ba las ni ma yin te/ nye bar len pa'i 'gyur ba las de 'gyur ba yin par yod pas phan 'dogs byed ces bya bas bstan pa yin la da ltar ni dngos su nye bar len pa'i 'gyur ba las rnam par 'gyur ba yin gyi gzhan du ni ma yin no zhes so/ /gang zhig gang gi 'gyur ba kho nar rnam par 'gyur de de'i nye bar len pa yin gyi lus ni sems kyi de lta bur ma yin te/ 'jigs pa dang mya ngan la sogs pas kyang rnam par 'gyur ba'i phyir ro/ /nye bar len pa'i mtshan nyid la gnod pa med pa'i phyir bshad pa 'di'i dbang du byas nas bstan pa ni// dngos gang zhes bya ba 'dis don rtogs pa'i phyir mi rigs so/ /de'i phyir sems lus kyi nye bar blang bya nyid khas blangs pas de rnam par 'gyur ba ma yin na mi 'gyur te mi 'jigs pa yin no zhes bya ba kho na legs pa yin te/ gnas skabs kyi rjes su 'jug pa'i phyir ro/ /'on te lus mi 'gyur yang sems 'gyur ba yin na de lta na de de'i nye bar len pa ma yin te/ ba men la ba lang bzhin no/ /de'i phyir lus nye bar len pa nyid du khas blangs pa spangs par 'gyur bar bstan pa ni/ 'gyur ba med par ni zhes bya ba'o/ /ba me na ni ba lang gi nye bar len pa ma yin te/ tha dad pa'i phyir ro/ /sems kyi yang lus de bzhin du yin te tha dad par sgrub par byed pa'i so sor snang ba'i dbye ba la sogs pa la khyad par med do zhes bstan pa ni sems dang lus kyang de bzhin de tha dad pa yin zhes bya ba'i don to/ /de lta yin na tha dad pa dag la nye bar len pa la sogs pa nyid med pas ji ltar nges pas lhan cig gnas par byed pa yin/ /de rgyu ste lus kyi rgyu ste lus kyi rgyu ni sems kyi rgyu sems gzhan dang lhan cig byed pa las sam/ sems kyi rgyu yang rung de'i rgyu las kyi ming can gyi nur nur po la sogs pa skye ba'i 'bras bu lus dang sems kyi bdag nyid can dang lhan cig gnas pa tsam gyi de kho na nyid du ni tha dad pa yin no/ /rgyu dbye med phyir lhan cig gnas/ /zhes bya ba 'di ni 'bras bu sems dang rgyu lus yin par khas blangs pa yin la 'di ni tha dad par khas blangs pas so/ /gang gi phyir tha mi dad pa nyid dag gi nye par len pa la sogs pa nyid yin pa ni 'byung ba dang 'byung ba las gyur pa lta bu'o/ /phyogs snga ma dang grub pa'i mtha' la yang zangs ma'i zhu ba bdag nyid can gyi me rjes su 'gro ba dang ldog pa dag gis blangs pa'i tha dad pa ni de nye bar 'tsho ba nyid du bstan pa yin gyi dus tha dad pa ni gnas skabs pa'i rgyu'am rgyun gyi yang rgyu yin gyi nye bar len pa ni ma yin no/ /de ltar yang / gang zhig yod pas phan 'dogs byed/ / ces bya ba la sogs pas bstan pa yin no/ /de yang nye bar len pa 'ba' zhig ma yin yang de ltar nye bar btags pa yin gyi gnas skabs 'di la tha snyad gdags par 'os pa ma yin no/ /de'i phyir gnas skabs pa'i rgyu'i dngos po ni nye bar len pa'i rgyu nyid ma yin no zhes bya ba la sogs pa ni gnas skabs pa dang rgyun gyi rgyu'i rnam par dbye ba'i tshig yin par/ gang zhig yod pas phan 'dogs byed/ /ces bya ba 'di'i gnas skabs su bstan par bya'o/ /yang na 'bras bu'i bdag nyid kho na gnas skabs pa dang rgyun gyi rgyu me dang 'ji ba la sogs pa nye bar len pa yin pa'i phyir zhes brjod kyi dus tha dad pa ni ma yin te/ de'i rgyu yin pa'i phyir ro/ /ji skad du 'ji bar 'gyur ba med par bum pa la sogs bzhin dang me dang zangs ma'i zhu nyid yin zhes bya bar yang bstan pa yin no/ /des na skyon med do/ /sems kyi nye bar len pa ci zhig yin rang gi ngo bo kho na yin te 'byung ba bzhin no/ /nye bar len pa gzhan ni thams cad du srid pa ma yin la rgyu ni sems snga ma nyid do/ /de'i rgyun gyi rgyu'am nye bar len pa la rang gi 'bras bu dang mtshams sbyor ba la gnod pa'i rgyu gang yang med pa kho nar/ tha ma'i sems ni sems gzhan dang / /mtshams sbyor ba la 'gal ci yod/ /ces bya ba la sogs pas bstan pa yin no/ /de nyid kyang 'on te yang ji ltar chu la sogs pa las 'bras bu'i rgyun gyi khyad par zhes bya ba nas brtsams nas rgol ba dang lan yang brjod pa yin no/ /'gyur ba'i rgyu dang 'bral bas na/ /de cis slar yang 'tsho mi 'gyur/ /zhes bya ba la sogs pas lus kyi tshogs pa la dgongs nas de bstan pa yin la da ni rgyu tsam ldog na 'bras bu ldog par byed pa ma yin gyi 'o na ci zhe na/ nye bar len pa'o/ /lus ni nye bar len pa ma yin te/ nye bar len pa'i mtshan nyid dang mi ldan par bstan pa ni/ nye bar len pa'i rgyu ma yin par log na zhes bya ba'o/ /'on te mtshan nyid de dang ldan pa'i lus yin pa de lta na ni de'i rnam par 'gyur ba kho nas sems 'gyur bar bstan pa ni/ gal te yin na zhes bya ba'o/ /don 'di nyid tshigs su bcad pas bstan pa ni/ gang gi phyir zhes bya ba'o/ /gal te tha dad pa'i l us nye bar len pa yin pa'i dbang du byas nas lus mi 'gyur ba la ni 'chi ba'i gnas skabs na yang sems bsgrub bya ma yin zhes brjod pa yin na ni 'ji ba'i rnam par 'gyur ba med na bum pa'i rnam pa'i rnam par 'gyur ba zhes bya ba ji ltar tha dad pa'i 'ji ba'i 'gyur bas bum par 'gyur ba ma yin te/ de bum pa'i dus na med pa'i phyir de 'gyur ba med pa nyid kyis bum pa 'jig pa yin no/ /'on te 'ji ba zhig pa med na bum pa'i 'gyur ba ste skye ba ma yin na zhes bya ba don yin na de lta na yang don la 'brel pa med pa yin te lus ma zhig na sems mi skye ba ni ma yin no/ /des na nye bar len pa dang cig shos dag ni de dag gi ma yin no zhes bya ba'i don yin te/ gnas skabs dang mi 'brel ba yin la/ lus ni gnas pa yin na sems ldog pa med par thal bar 'gyur zhes bya ba ni gnas skabs yin zhing don dam dang yang ma 'brel ba'i phyir sngar gyi lus ldog pa med na sems mi skye ba ma yin no/ /de'i phyir 'byung ba dang 'byung ba las gyur pa bzhin du tha mi dad pa'i nye bar len pa la dgongs nas bum pa nye bar blang byar bstan pa yin no/ /rnam par 'gyur ba yang zhig pa kho na yin pa'i phyir gdon mi za bar lus 'gyur ba kho nas sems 'gyur ba ma yin no zhes bya ba la sogs pa yang tha mi dad pa la dgongs pa kho na yin te/ de zhig kyang mi 'jig pa'i phyir de ni de'i nye bar blang bya ma yin par bstan pa ni/ gnas skabs rgyu yi dngos po ni/ /zhes bya ba ste/ myu gu la chu bzhin du gnas skabs pa'i rgyu log na des byas pa'i gnas skabs nyid ldog pa yin no zhes bya ba'i don to/ /des na de ltar de'i mi 'jig pa dang 'jig pa dag gis 'jig pa can dang mi 'jig pa'i nye bar blang bya yin par brjod pa de las bzlog pa'i nye bar blang bya dang cig shos su 'gyur ba'i phyir tha mi dad pa la dgongs pa yin par bstan pa ni/ rgyun gyi rgyu zhes bya ba ste bum pa'i khongs su gtogs pa'i 'ji ba ni bum pa'i rgyun gyi rgyu yin la de ldog pa ni rgyu log par byed pa yin no/ /de bzhin du sngon po la sogs pa rnam pa'i sems la ni sems kyi ngo bo rgyun gyi rgyu yin no/ /tha dad pa yin na ni rgyu kho na yin te/ ji skad du/ gang zhig yod pas phan 'dogs byed/ /ces bstan pa'o/ /gnas skabs pa'i rgyu'i dngos po ni zhes bya ba 'di la dpe brjod pa ni/ me dang zangs mi'i zhes bya ba'o/ /gal te lus sems kyi nye bar len pa ma yin na 'ji ba dang bum pa bzhin du ji ltar lhan cig gnas pa yin/ de'i sems ni lus dang lhan cig gnas pa'i phyir nye bar len pa dag cig shos nyid las ni ma yin pa'i phyir ro/ /zangs ma dang lhan cig 'byung ba'i me bzhin du tha dad pa dang tha dad pa ma yin pa yang rjes su 'gro ba dang ldog pas tha dad pa ma yin par bstan pa ni/ sems ni lus dang lhan cig tu/ /zhes bya ba ste de dag gi rgyu dag lhan cig byed pa'i phyir ro zhes bya bar sbyar ro/ /lhan cig byed pa nyid kyang lhan cig gnas pas rang gi 'bras bu'i byed pa po nyid yin gyi rgyu lus kyi 'bras bu sems ma yin par bstan pa ni/ 'bras min na ni sems nyid ces bya ba ste/ /sems dang ma bral ba'i lus kyi rgyu lus la srid pa dang bcas pa'i las kyi bag chags dang 'byung ba chen po yongs su gyur pa'i nur nur po la sogs pa yin par bstan pa ni/ lus kyi rgyu nur nur po zhes bya ba ste/ lus kyi rgyu ni sems kyi rgyu la brten nas bag chags dang bcas pa'i sems kho na yin no/ /de'i phyir lus kho na sems kyi rgyu'i bskyed bya yin pa'i phyir sems kyi bskyed bya yin gyi/ sems ni lus kyi rgyu'i bskyed bya ma yin zhes bya ba'i don to/ /lus kyi rgyu la mi brten pa'i sems rang gi rgyu las byung ba ni lus med kyang 'byung ba yin par bstan pa ni lus log na ni zhes bya ba'o/ /gnas skabs pa'i rgyu log na gnas skabs nyid ldog pa yin zhes bya ba ni ma nges pa yin te/ me dang phrad ba ldog kyang des byas pa'i rnam par 'gyur ba mi ldog pa'i phyir ro zhes zer ba ni 'on te de yang zhes bya ba ste/ de zhes bya ba ni myu gu rnam par 'phel ba la sogs pa'i mtshan nyid de ldog pa yin zhes bya ba dang sbyar ro/ /ji ltar lus ni rang gi nye bar len pa la gnod pa gang las ldog pa de bzhin du sems kyang rang gi nye bar len pa la gnod par byed pa las ldog par 'gyur ba bzhin du ldog par 'gyur pa'i phyir/ lus kho na bzhin du rgyun chad par 'gyur ro zhes zer ba ni me la sogs pas zhes bya ba'o/ / gal te sems nye bar chad pa yin na skye pa'i dang por ci las skye bar 'gyur ba yin zhe na yang / ji lta ut+pa la'i rtsa ba ba lang gi lci ba las 'byung ba bzhin du 'byung ba chen po yongs su gyur pa'i nur nur po la sogs pa kho na las skye ba yin no zhes zer ba ni/ yang ji ltar zhes bya ba'o/ /lan ni 'bru la sogs pa'i zhes bya ba ste/ lus la sogs pa'i nye bar len pa ni me la sogs pas gnod par nus pa yin gyi rgyu'i ngo bo sems kyi nye bar len pa ni ma yin te/ thag ring ba yang de'i 'du byed pa'i rjes su byed pa'i 'bras bu la goms pa ji lta ba bzhin nus pa'i phyir gnod par byed pa ma yin zhes bya ba ni yod pa'i phyir yang nye bar gnas pa yin zhes bya ba'i don to/ /de'i 'du byed pa'i rjes su byed pa nyid kyi phyir sems ni dang por lus las skye ba ma yin te/ ba lang gi lci ba las ut+pa la'i rtsa ba lta bur ro zhes bstan pa ni lus las zhes bya ba'o/ /rgyu ma nyams pa yin na sems kyi ngo bo 'bras bu'i bdag nyid kyi nye bar len pa yang ma nyams pa kho na yin par bstan pa ni/ nyer len gnod pa med par ni/ /zhes bya ba ni/ sems snga ma pa nyid ji ltar goms pa'i skyed byed ni bar du chad pa nyid kyang skyed par byed pa'i phyir gnyid log pa'am gzhan yang de la gnod pa byed par nus pa ma yin par bstan pa ni/ sngon gyi 'du byed la ltos can/ /zhes bya ba'o/ /de de ltar sems pa la gnod par byed pa mi srid pa'i shes pa yin pa'i phyir shi ba la yang gnyid log pa bzhin du skyed par byed pa kho na yin par bstan pa ni/ bar du chod pa las kyang zhes bya ba'o// / gnyid log pa na chad pa goms pa kho na las ji ltar yin pa de kho na bzhin du shi ba la yang yin pa'i phyir khyad par med par bstan pa na/ shi ba dang gnyid log pa dag la zhes bya ba'o/ /gal te goms pa las kyang sems chad pa yin na gtan rnam par chad par 'gyur te/ de ltar goms pa srid pa'i phyir ro snyam du sems pa ni/ 'on te res 'ga' zhes bya ba'o/ /re zhig goms pa las byung ba'i rnam par chad pa'i sems ni mtshams sbyor ba kho nar mthong bar bstan pa ni/ sad pa med pa'i zhes bya ba ste/ nus pa can gyi tshogs pa mthong ba'i phyir srid pa las bzlog pa nyid yin te/ de 'dra phyis kyang 'gyur ba yin/ /zhes bya ba'i rigs pas bstan pa ni/ rang gi bdag nyid kyis so/ /gzhan ni rgyud gzhan gyis so/ /gzhan zhes bya ba ni zhes bya ba'o/ /'tsho ba'i sems ni snga ma dang phyi ma'i mtha' dang bral ba gtan rnam par chad pa kho nar dmigs pa yin zhes bya ba yang 'gal ba'i 'bras bu dmigs pa yin pa'i phyir mi rigs par bstan pa ni/ sngon gyi mtha' can la ltos can/ /zhes bya ba'o/ /skyon dang bcas pa'i sems sems gzhan dang mtshams sbyor bar byed pa/ de ci 'dra zhig 'phen byed 'gyur/ /zhes bya bas bstan pa ma yin nam/ dgra bcom pa la ni de med pas rgyu ma tshang ba'i phyir rnam par chad par 'gyur ba kho na yin no snyam du sems pa la/ 'dod chags dang bral bas zhes bya ba smos te/ gzhan la mi phyogs pas yongs su 'dor ba'i ngo bo'i sdang ba'i phyogs yod pa'i phyir dgra bcom pa la yang ji ltar rgyu ma tshang ba yin/ ji ltar gzhan la mi phyogs pa ma yin pa ni bdag dang bdag gir mngon par zhen pa ma yin pa'i snying po can yin pa'i phyir 'dod chags ma yin gyi snying rje ma yin nam de bzhin du mi phyogs pa ni zhe sdang ma yin no snyam du sems pa la/ thams cad du yongs su 'dor ba'i ngo bo'i zhe sdang ni pha rol gyi yul can yin pa'i phyir la mi phyogs pa ni de'i phyogs kho na yin par bstan pa ni gzhan gyi don la dga' ba med pas zhes bya ba'o/ /gal te yang dgra bcom pa la ni rgyu ma tshang ba'i phyir rnam par chad pa yin la de med pas rnam par ma chad pa kho na srid pa'i yul yin par bstan pa ni/ yang na zhes bya ba ste/ 'dod chags dang bral ba nyid kyi shes pa la kho na zhes bya bar rim pa ma yin pa'i nges par bzung ba yin no/ /thams cad du rnam par chad pa ni rtag tu rnam par chad pa yin la da ltar ba'i shes pa'i skad cig la dmigs pa ni snga ma dang phyi mas dben pa nyid kho na de rnam par chad par dmigs pa yin zhes bya ba ni bdag cag gi 'dod pa yin no/ /de'i phyir 'jig rten pha rol med pa de kho nar khyer 'dod pa yang bdag gi 'dod par 'os pa yin pa'i phyir lan gdab par dka' ba ni rgol ba 'di la lan med pa kho na yin no zhes bya ba'i don to/ /lan ni/ sngon gyi 'du byed la ltos can/ /zhes bya ba ste/ snga ma dang phyi ma'i mtha' dag la sems gcig kho na yang ma yin la gzhan dang gzhan yang ma yin zhes bya ba ni kho bo'i 'dod pa yin gyi gzhan dang gzhan yang ma dmigs pa yin zhes bya ba de ltar ni ma yin te/ ma mthong ba ni med pa'i sgrub byed ma yin pa'i phyir zhes bya ba'i don to/ /de'i phyir blo gnas pa yi rten/ /blo nyid la ni brten pa 'ga'/ /zhes bya ba dang / de yi shes pas phan 'dogs phyir/ /yod na lus la brten par bshad/ /ces kyang gsungs pa kho na yin par bstan pa ni/ rten ldog pas ldog pa ni bzlog du med pa yin no zhes bya ba la sogs pa ste/ gal te lus kyi nye bar blang bya sems yin na lus rnam par 'gyur ba ma yin pa/ shi ba'i gnas skabs na yang mi ldog par 'gyur ro/ /'on te ldog na ni lus kyi nye bar blang bya ma yin te/ tha dad pa'i phyir ro zhes bya ba ni/ tshigs su bcad pa gnyis kyi don yin no/ /'on te sems tha dad pa yin yang de 'di'i rten yin gyi ba lang la sogs pa bzhin du rang dbang ni ma yin no/ /de'i phyir ri mo bzhin du rten log na'am gzhan du yang ldog par byed pa nye bar zhugs pas ldog par 'gyur ro/ /de'i phyir lus med na ldog par thal bar 'gyur ro snyam du sems pa la/ rten ni bkag pa yin pa'i phyir ro zhes gang gsungs pa de nyid rnam par 'grel pa ni/ yod med dag la rten med phyir/ /zhes bya ba ste/ re zhig tha mi dad pa'i dngos po ni rten ma yin te/ nye bar len pa yin pa'i phyir ro/ /tha dad par ni 'gyur na de yang yod pa'i ni ma yin te/ bskyed bya'i dus bzhin du rten dang brten pa ma yin pa kho na skye bar 'gyur ro/ /ri mo bzhin du yin no zhe na/ tha dad pa ma yin pa ni nye bar len pa yin no/ /tha dad pa yin na me dang zangs ma'i zhu ba nyid bzhin du lhan cig skye ba yin no/ /rgyu lhan cig yod pa'i phyir med pa'i yang rten ma yin no/ /'du bar rtogs pa yang nye bar len pa dang nye bar blang bya nyid kyi rgyu mtshan nam/ lhan cig skye ba'i rgyu mtshan yang yin no/ /nye bar len pa dang nye bar blang bya'i 'brel pa ni 'du ba yin zhes bya ba yang gtam tsam yin la tha mi dad pa dag gi'am tha dad pa dag gi tha mi dad pa na lhan cig skye ba tsam nyid kyis de rtogs pa 'byung ba'i phyir tha mi dad pa'am lhan cig skye ba yang rung de lta bu'i 'du ba yin gyi gzhan ni ma yin te ma mthong ba'i phyir ro/ /gang gi phyir so sor ma yin par grub pa rnams kyi 'brel pa ni 'du ba yin la so so bar grub pa ni 'byung ba dang ri dwags rten dang rten can so so pa ni rang gi cha shas 'du ba yin no/ /de nyid kyang mtshon cha yin gyi mtshan nyid ni ma yin te/ so so bar rtogs pa dang ldan pa ni ma yin no/ /de las kyang so so ma yin pa grub pas ni so so ma yin pa rtogs pa nyid yin te gzhan du na mtshan nyid du mi rigs pa'i phyir ro/ /de la yang brda ji lta ba bzhin du 'du ba'i shes pa yang yin te de yod na 'byung ba nyid yin na 'bras bu rtogs pa lta bu'o/ /de ni du ba las me'i shes pa bzhin du de'i shes pa'i rgyu mtshan yang ma yin te/ de ltar rtogs pa med pa'i phyir ro/ /de dag gi du ba dag las me la sogs pa bzhin du nges par rtogs pa ma yin la don gyis go ba yang ma yin no/ /bsreg pa'i nus pa 'brum bu la sogs pa bzhin du so so bar ma rtogs pa 'ba' zhig tsam gyis tha mi dad par dmigs pas brda'i dbang gis 'du ba yin par mngon par sems par byed pa yin gyi de las gzhan pa'i shes pa ni ma yin no/ /so so bar rtogs pa dang ldan pa nyid yin na phrad pa yin la/ dbye ba ni de lta bu'i phrad pa las so so bar gyur pa yin zhes bya ba ni rnam par dbye ba yin no/ /de bzhin du rgyu'i dbang gis steng ma dang 'og ma nyid du skye ba tsam ni rten la sogs pa nyid yin no/ /ltung ba la de dag yod na mi ltung ba de gnas pa ni de'i rgyu yin na dngos po'i rten du 'gyur ba'i phyir gzhi yin par brjod pa ma yin nam de ltar skye ba tsam ni ma yin te/ de bstan pa ni/ rten yod pa gnas pa'i rgyu yin zhe na zhes bya ba'o/ /lan ni/ dngos po pa las gzhan ma ni phyir/ /zhes bya ba'o/ /gang gi phyir ltung ba'i dngos po kho na ltung ba yin gyi gzhan ni ma yin zhing de nyid ltung ba yang yin par 'gyur ro zhes bya bar mi rigs te de gzhan yin pa'i phyir ro/ /ltung ba dang gcig ma yin te/ snang ba tha dad pa'i phyir ro/ /de'i phyir de ltar skye ba tsam ni rten la sogs pa yin gyi gzhan ni ma yin no/ /de lta bur skye ba la de rgyu mtshan yin no zhe na ma yin te/ de rgyu dang lhan cig pa'i snga ma shos de'i rgyu mtshan yin pa'i phyir ro/ /de'i dus su 'byung ba tsam ni ma yin te/ rgyu mtshan ma yin pa'i phyir ro/ /khyad par la yang cung zad 'ga' kho na rten nyid du rtogs pa yin te/ brda'i dbang du byas pa'i phyir ro/ /yang na de'i rgyu dang rgyu'i lhan cig byed pas rgyu mtshan yin te/ rang gi 'bras bu dang gcig tu byed pa'i phyir de nyid du gyur bar rten du nye bar btags pa yin no/ /tha dad pa yin yang snga ma dang phyi ma nyid kyis dngos po gcig nyid du gnas pa'i phyir ro/ /res 'ga' ba nyid kyis dngos po las tha dad par yin yang so sor snang ba tha dad pa dang 'gal bas de nyid kyis shes pa ni de mi byed pa'i dngos po rnam par gcod pa'i yul yin pa'i gcig nyid yin gyi pha rol po gzhan gyis mngon par 'dod pa med do zhes srid pa'i don la'am khas len pa'i don la yang gi sgra yin te/ gal te 'di ltar srid pa'am khas len pa yin na des ni snga ma dang phyi ma dag gi gcig pa nyid yin yang gnas pa dang g.yo ba yang tshad mas grub ba yin par 'thad pa kho na yin no zhes bya ba 'di bsal ba yin no/ /byed par nub par byed pa'i rgyu mtshan skad cig par smra ba yang ma yin te/ so sor snang bas grub pa'i phyir ro/ /de'i phyir byed pa nub pa ni ma yin no/ /de'i rgyu ni de kho na'i rgyu kho na ste dngos po'i rten ni ma yin no zhes bya ba'i don to/ /de kho na'i byed pa ma yin pa'i phyir dngos po'i rten ni ma yin te/ de lta yin na khams gsum po rten du thal bar 'gyur ro/ /des ni dngos po ste/ sems la ci zhig bya ste rten ma yin pa'i lus kyis ni phan byas pa med pa ste rang gi rgyu'i dbang gis 'byung ba'am mi 'byung ba yin zhes bya ba'i don to/ /nye bar len pa ma yin pa'i lus ni sems kyi rten du 'gyur ro zhes rgol ba la brten pa nyid yin du chug kyang rtsig pa la ri mo bzhin du lus la sems ni ma yin te 'pho ba'i phyir ro zhes rang nyid kyis lan 'debs pa ni/ de yang mi bden ri mo la/ /zhes bya ba la sogs pas so/ /lus dang sems tha mi dad na gang zhig gang la brten pa yin zhes bya ba ni/ gzhan yang rten nyid ni zhes bya ba ste/ lus grub pa yin yang sems kyi dbye ba la the tshom za ba'i phyir de dag tha dad pa ma yin par zer ba ni ma yin mod ces bya ba'o/ /snga ma'i rgyu las de bzhin du skye ba'i phyir me dang zangs ma'i zhu ba nyid bzhin du lhan cig skye ba tsam yin gyi rten dang brten pa'i dngos por mi rigs pa ma yin nam rnam shes skye bzhin pa'i tshad ma dang ldan pa nyid kyis shes bzhin pa ni rten dang brten pa nyid du 'thad pa yin snyam du sems pa la/ re zhig med pa la ni zhes bya ba ste/ rnam par shes pa ni skye bzhin pa na rtogs pa'i ngo bo yin pa'i phyir tshad ma nyid du skye bzhin pa yin par ni rigs na brten pa ni rten gyis phan btags pa yin gyi dus tha mi dad pa la ni mi rigs te/ gzhan phan gdags bya dang phan 'dogs byed dag 'bras bu dang rgyu'i khyad par nyid kyi gzhi yin la dus phyis de gang gis bar du bcad pa ni de las gzhan pa yin no/ /bong bu'i rwa la ni rten gang yang med pa'i phyir dus tha dad pa ni gdon mi za bar brten par bya ba yin no zhes dgongs pas rang gi rgyu las skyes pa ni rang gi ngo bo tsam du de las khyad par ci yang med do/ /khyad par yod na de nyid las de yin pa'i phyir de kho na rten yin gyi dus mtshungs pa la ni yin par bstan pa ni/ med pa ni rgyu las skye bar 'dod pa 'ba' zhig tu ma zad de zhes bya ba'o/ /ji ltar skye ba'i dus su yod pa'i rten ma yin pa ni de bzhin du dus phyis kyang yod par khyad par med pa'i phyir brten pa ma yin no zhes bya ba ni mi rigs te/ skyes pa ni bya ba'i yul nyid kyis rten yin pa'i phyir sta re'i shing lta bu yin no snyam du sems pa la/ yod pa la yang zhes bya ba ste/ sta re dang me la sogs pa'i 'bras bu kho na shing yin te/ dus kyi dbye ba las rnam par 'gyur ba 'byung ba yin zhes bya ba'i don to/ /'on te de yod pa'i rten te bya ba byed pa yin te ltung ba la sogs pa bkag pas de la phan 'dogs pa'i phyir ro/ /ma yin te/ ltung ba bkag pa ni rang gi rgyu kho na las yin par 'dod par bstan pa ni yod pa yang zhes bya ba'o/ /rang gi rgyu las dngos po'i rang gi ngo bos mi ltung ba yin te rten yin no snyam du sems pa ni/ 'on te skyes pa la yang zhes bya ba ste/ bdag nyid thams cad ces bya ba ni rang gi ngo bos so/ /gnas pa rang gi ngo bo dag gi dbye ba rjes su 'gro ba dang ldog pa grub pa yin no zhes zer ba ni/ gnas pa ni zhes bya ba ste/ gnas pa dang tha dad pa med pa zhes bya ba ni tha mi dad par bye brag med pa'i phyir bye brag la gnas pa med pa'i phyir ro zhes bya bar sbyar bar bya ba'o/ /shing la sogs pa'i yan lag ces bya ba ni yan lag dag kyang so so ma yin par grub pa'i phyir 'du ba'i 'brel ba yin no/ /'o na te yan lag gi rten dang rten can so so yin pa'i phyir so so bar grub yin na/ 'di la yang brjod pa ni/ shing la sogs pa zhes bya ba'o/ /shing ni rang gi yan lag la 'jug pa yin la rang gi yan lag de yang yin zhes so so ba grub pa nyid du 'gyur ro/ /'du ba khas len pa yin na ni so so ba grub pa nyid du thal bar 'gyur ro zhes 'brel pa yin no/ /'du ba can gyi rang gi yan lag la 'dus pa nyid ni tha mi dad pa grub pa nyid yin pa 'di la brjod pa ni/ de lta na yang zhes bya ba ste/ so so ba ma yin pa grub pa nyid kyis 'du ba mtshon bar bya ba yin la/ des kyang so so ba ma yin pa nyid grub pa yin pas pan tshun ltos pa'i phyir gnyi ga ma grub pa yin la/ de yang mtshan nyid dang mtshon byar mi rigs te mtshon bya dang mtshan nyid dag tha dad par rtogs pas 'du ba gang yin pa de ni ma yin no zhes bya bar sbyar ro/ /'du ba can dag gi yang phyogs gcig gis 'byar ba ni/ bil ba dang skyu ru ra dag bzhin du phrad pa yin gyi 'du ba ni ma yin no zhes bstan ba ni/ yan lag med pa'i dngos po zhes bya ba'o/ /de lta mod kyi yan lag gis yin no/ /de lta na yang 'du ba ni ma yin te/ 'du ba can dag gi dbye ba ma mthong bas med pa'i phyir ro zhes bya ba'i don to/ /dbye ba mthong yang yan lag dang phrad pas 'du ba ma yin par 'gyur ro zhes bstan ba ni/ yan lag can dang zhes bya ba'o/ /yan lag ma yin pa dang 'byar ba yang de dag gis dbye ba dmigs pa yin pa kho na yin la yan lag thams cad dang ldan ba ni yan lag can yin la rnam par dbye ba dmigs pa ni yan lag rnams yin no snyam du sems pa ni/ rjes su zhugs pa dang ma zhugs ba zhes bya ba'o/ /rnam par dbye ba 'dod pa rnams shes ba gcig tu snang ba rnams la rnam par dbye ba nye bar mtshon par ma byas pas dbye ba med par mchog tu 'dzin pa yin gyi shes pa gcig po de'i bya ba'i rjes su 'jug pa 'dzin pa ma gtogs par dbye ba med par 'dzin pa ni ma yin no zhes bstan ba ni/ 'thad pa ma yin te zhes bya ba'o/ /sems kyi rten dang brten pa nyid kyang bkag ba'i nye bar bsdu bas rgyu dang lhan cig pas 'bras bu dang lhan cig gnas pa de'i tha snyad kyi yul yin par bstan pa ni/ de'i phyir zhes bya ba'o/ /lus nye bar len pa nyid yin pa yang gong du bkag pa kho na yin par bstan pa ni lus ni zhes bya ba'o/ /gal te yang sems gnas par byed pa'i phyir lus rten pa yin na/ lus ni gnas pa yin na sems/ /ldog pa med par thal bar 'gyur/ /zhes bya ba 'di nyid bzlas nas bstan pa ni/ 'jig pa med par thal bar 'gyur te zhes bya ba'o/ /'on te lus yod kyang mi mnyam pa la sogs pas sems 'jig par 'dod pa yin zhes zer ba ni/ gal te 'jig rgyu las 'dod na/ /zhes bya ba'o/ /lan ni de las thal bar mtshungs pa yin zhes bya ba la thal 'gyur ni/ shi ba nyes pa mnyam gyur tshe/ /slar yang 'tsho ba dag tu 'gyur/ /zhes bya ba'o/ /'on te rang gi rgyu las byung ba'i 'jig pa'i rgyus 'jig par 'gyur ba kho na yin na/ de la yang gnas pa'i rgyus kyang ci zhig bya zhes bya ba ste/ 'jig pa'i rgyu'i sngon rol na de med pa'i phyir rang nyid kho na gnas pa yin te/ 'jig pa 'ba' zhig las kyang zad kyang mi byed pa kho na ma yin gyi gnas pa'i rgyu 'di la yang ngo / /'on te 'jig pa'i rgyu'i snga rol na yang gnas pa'i rgyu med na mi gnas pa yin te/ 'jig pa yin no zhes bya ba'i don ni/ gal te 'jig rgyu khyad par du nges gnas zhes bya ba'o/ /lan ni/ 'jig pa dngos chos nyid ces bya ba ste/ dngos po'i chos ni de tsam dang rjes su 'brel par byed pas gang gis kyang bar du bcad par mi nus te rang bzhin gyis mi ldog pa'i phyir ro zhes bstan pa ni dngos po yod na de tsam dang rjes su 'brel pa can yin pa'i phyir/ gnod med de 'jig pa 'di gzhan du byed par mi nus so/ /'dis ni 'jig pa rgyu med pa can yin na skad cig gnyis pa bzhin du skad cig dang po la yang 'gyur ro zhes bya ba bsal ba yin no/ /gang gi phyir dngos po yod na de'i chos su 'gyur la rang nyid 'jig pa dang cig shos kyi phyogs dag la gnas pa'i rgyu cung zad kyang byed pa ma yin no zhes bya ba'i don to/ /'grel pa mdzad pas ni/ thal 'gyur mtshungs pa de la yang / /zhes ngag gcig gis de la yang ste 'jig pa la yang yin gyi gnas pa'i rgyu 'ba' zhig la ni ma yin no/ /de dngos po las tha mi dad pa yin na/ dngos po kho na yin la rgyu des byas pa'i tha dad yin na des dngos po la ci zhig byas zhes sbyor bar byed pa yin no/ /me las don gzhan 'byung na ni/ yang na gal te zhes bya ba ste/ rang gi rgyu las 'jig pa 'byung na gnas par byed pa las mi 'jig par 'gyur ro zhes bya bar nus pa ma yin te/ de las skyes pa ni rtag pa nyid du mi rigs pa'i phyir ro/ /mi rtag pa nyid kyi rgyus 'jig pa ni tha dad pa dang tha mi dad pa dag tu mi rigs pa'i phyir rgyu gzhan med pa ni dngos po'i chos kho na yin par bstan pa ni/ de'i phyir 'jig pa yang zhes bya ba ste/ rtsod pa ni don 'di dag dngos po'i chos nyid ces bya ba de kho na lan bzlas pa yin no/ /phyogs 'di la yang gnas pa'i rgyus kyang ci zhig bya zhes bya ba rgyu kho na 'jog byed ma yin no zhes bya ba'i don to/ /yang na dus gcig kho na des de ltar bskyed pa yin na yang des ci dgos zhes bstan pa ni/ yang na gal te zhes bya ba'o/ /dus tha dad pa'i chu la sogs pa'i rten bum pa la sogs ma yin pa ma yin nam/ de'i tshe 'bo ba'i phyir bo ba la ni rten yod pa ma yin na ji ltar mi 'bo ba bo ba'i rten yin/ dngos po gzhan lhan cig byed pa las de nyid la de dang lhan cig byed pa nyid ni lhan cig pa nyid yin te/ lhan cig pa ni mi ltung ba yin pa'i phyir rten nyid rgyu ma yin par grub pa yin no/ /'on te lhan cig pa ma yin pa yang lhan cig byed pa nyid yin na ni de rtag tu yod pa'i phyir rtag tu mi ltung par 'gyur ro/ /rung ba'i yul na gnas pa yin no zhe na yang ji tsam la rung ba nyid rgyu shes par dka'o/ /de'i phyir rang nyid nye bar len pa las skye ba ni de yod na mi ltung ba yin pa'i phyir rten nyid yin gyi de de ltar skye ba tsam ni ma yin la/ lus kyi 'di yang sems re re la yod pa'i phyir de yang de'i rten du 'gyur ro snyam du sems pa ni/ gal te dper na chu sogs kyi/ /zhes bya ba ste/ ltung ba bkag pas rgyu nyid ma yin no zhes bya ba'i don to/ /lan ni 'di la'ang mtshungs pa ste/ sems dang lus dag la/ yod med dag la rten med phyir/ /zhes bya ba la sogs pa gang gsungs pa ste/ 'di la yang chu dang don gzhan dag tu mtshungs pa yin te chu dang cig shos kyang nye bar len pa dang nye bar 'gro ba dag gi yul mtshungs par skyed par byed pa la phan tshun phan 'dogs pa med pa ni rten dang brten pa nyid ma yin zhing skyes pa de gnyis kyi de dang 'dra ba gzhan gnyis yin la des kyang de dang 'dra ba gzhan yin pa'i phyir gang la yang phan 'dogs pa med do/ / /snga ma dang mtshan nyid mi mthun pa 'bras bu'i rgyun 'ba' zhig gzhan yod na yang dag par dmigs pa snga ma dang phyi ma gcig pa nyid du mngon par sems pa ni rten nam cig shos su shes pa yin no/ /snga mas phyi ma la phan byed pa ni de'i dus su ma yin la/ de ma yin pa'i dus su yang ma yin te/ de'i 'bras bu yin pa'i phyir de nyid du sgro 'dogs pa'i yul yin par de ltar brjod pa yin par bstan pa ni/ dngos rnams skad cig re rer ni/ /zhes bya ba ste/ skad cig gcig la 'gro ba srid pa ma yin te/ skad cig gzhan na med pa'i phyir gang gegs byed pas rten du 'gyur/ nye bar len pa dang / yul tha dad pa'i 'bras bu kho na 'gro ba yin la/ de yod na mi 'byung ba'i phyir ji ltar de la de'i dus su gegs mi byed pa yin/ 'di lta bu'i rten nyid ni de'i dus kyi chu la sogs pa la srid pa yin gyi sems la ni ma yin te/ lus la gnas pa'i 'bras bu ma yin pa'i phyir dang / sems dang sems las byung ba rnams ni yul na mi gnas par khas blangs pa'i phyir ro/ /yon tan dang spyi dang las rnams kyang 'gro ba med pa nyid yin la/ las dang ldan pa dang / yon tan dang ldan pa dang / 'du ba can gyi rgyu yang rdzas yin par khas blangs pa yin par bstan pa ni/ chu sogs kyi ni rten 'gyur gyi/ /zhes bya ba'o/ /chu dang cig shos kyang lhan cig pa ma yin pa de lta bu'i 'bras bu skyed par byed pa yin la/ lhan cig pa nyid kyang rgyu ma yin pa'i rten nyid yin te/ de yang snang ba nyid kho na yin no zhes zer ba ni/ gal te rten gyi dngos po mthong ba'i phyir ji ltar ma mthong zhe na zhes bya ba'o/ /nye bar len pa dang nye bar 'gro ba dag gis skad cig de dag gi lhan cig skye ba tsam yin gyi phan tshun bya ba ci yang med la brtog pa'i rgyu'i stobs kyis de bzhin du skye ba tsam las 'dod pa grub pa yang ma yin te/ bya ba'i dus na med pa'i phyir ro zhes bstan pa ni/ ma mthong ba nyid la mthong bar mngon par rlom pa yin no/ /de'i dus na bya ba med pa kho na yin par bstan pa ni/ 'dzin pa'i phyir brten pa yin no zhes bya ba'o/ /de dag skye ba'i rgyu nyid kyi rten nyid ni sems la sogs pa'i rgyun ldog par byed pa ma yin te/ de log na de bzhin du skyes pa nyid ldog pa'i phyir dang / nye bar len pa la sogs pa las gzhan du skye ba yod pa'i phyir ro/ /de'i dus kyi rten nyid la sems lus kyi nye bar len pa'am/ de dang 'du ba can yang de log na ldog par 'gyur ro/ /sems dang yon tan nyid du phrad pa med pa'i phyir ji ltar bsams pa yin zhe na/ dngos po dang dngos po med pa nyid ces bya ba ste/ med pa ni snga na med pa yin gyi/ gcig la gcig med pa ni ma yin te/ cig car ba yin pa'i phyir la de yang rgyu yod na yod pa kho nas de nyid yin pa'i phyir ro/ /'dis ni med pa 'joms pa bshad pa yin no/ /gang gi tshe 'dzin par byed pa'i rim pa dang / de'i rtogs bya gzung ba yang de bzhin du snang ba ni rim pa ma yin pa mi rigs pa kho na'o zhes bstan pa ni/ 'dzin par byed pa zhes bya ba'o/ /'di'i bar du rten la sogs pa nyid 'bad pas bkag pa yin te de'i rtogs pa yin na bag chags tsam 'byung ba nyid kyis thog ma med pa nyid du gsal ba'i phyir 'jig rten pha rol grub pa la gtan tshigs gzhan nyid yang dag par bstan pa'i don du/ 'di ni rnam par rtog pa tsam du zad do zhes bya ba smos so/ /bag chags tsam las byung ba nyid yin na yid kyis rgyal srid kyi rnam par rtog pa bzhin du nges pa med par 'gyur ba ma yin nam snyam du sems pa la/ yul nges pa'i rgyu mtshan ni rten la sogs pa nyid kyi yin par bstan pa ni/ skad cig re rer 'jig pa rnams kyi zhes bya ba'o/ /gal te rgyu nyid rten yin na de'i yul du rtog pa dngos po'i yul du 'gyur pa bstan pa ni/ snga ma dang phyi ma dag ces bya ba ste/ de la gcig pa nyid du sgro 'dogs pa ni thog ma med pa'i bag chags kyis byas pa yin zhes bya ba'i don to/ /de'i dus kyi rten nyid yin na dngos su yin pa'i phyir de 'dzin pa'i shes pa gzhan bzhin du/ bag chags las 'byung ba ma yin pa'i phyir ro/ /de'i phyir rgyu nyid kyi ngo bo'i dngos po kho na 'jig rten pha rol 'grub par byed par mi 'gyur ro/ /bden te/ rgyu'i ngo bo'i rten la de nyid du sgro gtags pa ni de'i dus su rgyu ma yin pa la yang yin pa'i phyir bag chags kyi nus pa bsal bar byed pa yin no/ /de ltar na 'jig rten pha rol grub pa yin par bstan pa ni/ yid kyi rtog pa thams cad ni/ /zhes bya ba'o/ /rtog pa ni snang bzhin pa can gyi yul can ma yin nam khyad par can tsam yul yin pa'i phyir ro snyam du sems pa ni/ dngos po du ma nyid las zhes bya ba ste/ dran bzhin pa dang mthong bzhin pa gcig pa nyid du sgro 'dogs pa ni nyams su myong ba tsam las 'byung ba ma yin te/ dran pa dang nyams su myong ba dag tha dad pa'i phyir zhes bya ba'i don to/ /ji ltar gcig la dran pa dang nyams su myong ba nyid du ma nyid yin pas rjes su 'brel pa ma yin pa'i phyir/ rjes su 'brel pa can gyi bag chags kyi rtog pa yin pa de bzhin snga ma la yin la/ de las kyang snga ma'i yul gzhan yin la yul de la rjes su 'brel par mi 'gyur ba yin no zhes zer ba la 'gyur ba yin par bstan pa ni/ gcig ni sngar yang ma dmigs pa/ /zhes bya ba'o/ /skye ba gcig la mthong ba nyid la/ rjes su 'brel pa yin pa'i phyir de tsam kho na la 'byung ba'i bag chags yin gyi skye ba gzhan la 'byung ba ni ma yin pa'i phyir ji ltar thog ma med pa nyid yin snyam du sems pa la/ skye ba dang po la mthong ba la gnyis pa mthong ba yin na rjes su 'brel ba ni skye ba snga ma las byung ba'i bag chags med na mi 'byung bar bstan pa ni/ des na skye ba gzhan du yang zhes bya ba'o/ /bdag ni snga ma dang phyi ma dag la rjes su 'jug pa yin yang de lta na ni ma yin te/ rjes su 'brel par nus pa'i don rnams la nyams su myang ba dang dran pa dang de'i 'du byed pa rnams la ltos pa'i phyir ro/ /snga ma dang phyi ma dag gcig pa nyid du nyams su myong ba las de'i rgyu la ltos pa nyid kyis de grub pa yang ma yin te/ de tsam las skye ba'i phyir ro zhes bstan pa ni/ de bzhin du zhes bya ba'o/ /'du ba can gyi rgyus yon tan mi 'jig ces bya ba ni/ gal te ji ltar 'gro ba can nyid ces bya ba la sogs pa nas/ 'jig pa nyid yin no zhes bya ba'i bar gyis the tshom za ba la rgyu las sam thob pa'i bdag nyid can gyi dngos po ji ltar 'jig par byed pa yin/ skad cig gnyis pa la rgyu'am rigs pas 'jig par byed pa yin par ni mi rigs te de ma mthong ba'i phyir ro/ /de'i phyir skad cig ma gnyis pa la dngos po ni rgyu med pas med pa'i phyir rgyu ni skad cig re re zhing yon tan gyi skyed byed yin par grub par bstan pa ni/ 'gro ba la sogs pa'i zhes bya ba ste/ gang du 'gro ba la sogs pa yin pa der gnas par byed pas rten yin la de med na skad cig re re zhing skyed byed yin no zhes bya ba'i don to/ /ji ltar rgyu'i dbang gi de nyid du sgro btags pa'i yul gyi lhan cig skye ba tsam ni rten yin gyi gzhan ni ma yin pa de bzhin du so so bar shes pa dang ldan pa'i de bzhin du skye ba tsam ni 'du ba yin te ji ltar brdar byas pa de bzhin du rtogs pa'i phyir gzhan 'ga' zhig kho na ni ma yin la de ltar skye ba tsam gyis byed pa po nyid dam 'bras bu nyid gzhan ni ma yin zhing de ltar skyes pa ni rgyu'i dbang gis de ldog pas gzhan du mi 'gyur ba yang ma yin par bstan pa ni/ 'dis ni 'phrod pa 'du ba dang zhes bya ba'o/ /'grel par ni/ rnam par gnas pa rgyu nyid ma yin yang der gnas pa'am 'du ba can nyid du yang de nyid la 'gyur ba yin gyi de la'am gzhan la yang zhes bya ni ma yin no/ /'du ba can gyi rgyu ni mi rtag pa la ltos nas bshad pa/ rnam gnas nyid ni rtag pa la ltos nas bshad pa yin no/ /'dus pa yang rigs bzhin du rgyu nyid kyis rten gzhan la rnam par gnas pa ma yin nam/ rten 'jig na sems mi 'jig pa'i 'du ba ci'i phyir bsal bar byed pa yin snyam du sems pa ni/ 'dus pa yin yang zhes bya ba'o/ /rten dang brten pa sngon du 'gro ba can gyi 'du ba ni de bkag na bkag pa kho na yin par bstan pa ni/ rten dang brten pa'i dngos po zhes bya ba'o/ /rang gi ngo bo gnyis su mthong ba sngon du 'gro ba can 'du ba'i shes pa yin na so so ba grub pa nyid du 'gyur bar bstan pa ni/ rigs pa sogs pa rgyu med par rnam par gnas pa zhes bya ba'o/ /gzhan yang 'dis du ba khas blangs pa yin yang 'jig rten pha rol 'grub pa yin par bstan pa ni/ yang na zhes bya ba'o/ /gal te 'jig rgyu las 'dod na zhes bya ba 'di la thal ba mtshungs pa dang / slar yang 'tsho bar 'gyur zhes bya ba dang gang gi tshe yang 'jig byed med pa de'i tshe yang de med pa nyid kyis gnas pa yin pa'i phyir de'i rgyus kyang ci zhig bya zhes bya ba 'dis kyang sngar dang phyis kyang nye bar dgos pa med par lan btab zin pa yin no/ /gal te 'gyur na 'jig byed ma byung ba'i dus su yang 'gyur la de'i tshe ltos pa yin yang bya ba byed pa ma yin te/ dbang med du 'jig pa yin pa'i phyir la de'i phyir gnas par byed pas ni/ rten ma yin par bstan pa ni/ /gzhan las te/ 'jig pa'i rgyu las dngos po 'jig par gal te 'gyur na/ gnas par byed pas ci zhig med pa gnas par byed pa nyid dang bdag nyid 'brel pa ci zhig byed pa yin te/ 'jig pa la 'di 'ba' zhig dbang du gyur pa kho na yin zhes bya ba'i don to/ /dbang po la ni dgos pa ci yang med pa yin te/ gang gi phyir de med na yang 'jig pa'i rgyu gzhan rnams kho nas nges te dngos po'i 'jig par 'gyur te 'jig pa la yang de rnams nus pa med pa yin zhes bya ba phul du byung ba'i tshig ni bzhad gad kyi tshig yin no/ /de'i phyir nus med yin zhes bya ba ni nye bar bsdu ba'o/ /yang na dngos po ni skad cig ma ma yin pa kho na yin te/ de la 'jig pa'i rgyu nus pa can ma yin la gnas pa'i rgyu med na mi gnas pa kho na yin pa'i phyir de'i rgyu tshol ba yin la de yang gang gi tshe nye bar gnod pa yod pa'am med pa de'i tshe gnas par byed pa ma yin no/ /des na rang nyid kho na 'jig pa yin no/ /'jig pa ni dngos po'i chos yin yang gnas par byed pa med pa dang nye bar gnod pa yod pa dag la de ltar 'gyur gyi thams cad du ni ma yin te/ ji ltar mthong ba'i dngos po rnam par gzhag pa la sogs pa yin par sems par dogs pa la/ de 'jig 'gyur zhes bya ba ste/ lus sam gzhan yang rung ba rten ni sems la sogs pa'i las gzhan pa nye bar gnod pa'i rgyu rnams kyis gnod pa ma yin pa kho na yin te/ sems dang mtshungs pa'i chos gzhan gzugs dang ro la sogs pa dang rid pa la sogs par mthong ba'i phyir rang gi ngo bo gang kho nas de rnams kyi rten yin pa de kho nas sems kyi yan lag gzhan du ni ma yin no/ /rang gi ngo bo tha dad pas dngos po tha dad pa yin te de tha dad pa ni de'i mtshan nyid yin pa'i phyir ro/ /de lta yin na gzhan gyi 'dod par ltung ba yin te lus las gzhan pa de'i rigs de'i rten nyid du khas blangs pa'i phyir ro/ /thal bar mtshungs pa yin zhes bya ba ni/ shi ba nyes pa mnyam 'gyur tshe/ /zhes bya bas shin tu bshad pa yin pa'i phyir zlos pa nyid ma yin no/ /de ni sems la sogs pa'i dngos po'o/ /'jig par 'gyur ba ni gzhan med na de nye bar gnod pa med na yang ngo / /de'i med par yang de dang mthun pa'i chos gzhan mthong ba las shes pa yin no/ /de'i phyir sems la ni gnas pa'i rgyur mngon par 'dod pa'i lus la sogs pa rnams la nus pa med pa yin te/ snga rol du yang de yod kyang de med pa'i phyir zhes bya ba'i don to/ /'on te shi ba'i gnas skabs na yang sems yod pa kho na yin te gnas pa'i rgyu ma nyams par yod pa'i phyir ro/ /nad la sogs pas phra mo nyid du 'gyur ba 'ba' zhig ni ma dmigs pa yin la rang gi bya ba mi byed pa thal bar 'gyur ba la sogs pa na/ de'i rgyu log na ldog pa yin no snyam du sems pa la gnas pa sgrub par byed pa'i rten yang rten gzhan gyis mi gnod pa'i phyir 'jig pa ma yin la de'i tshe yang mi ldog par 'gyur bar bstan pa ni/ rten bcas thams cad gnas ldan dang / /zhes bya ba ste/ rten la nye bar gnod pas sam rten log pas brten pa ldog pa yin la de yang de'i rten la nye bar gnod pas sam/ rten log pas de yang de bzhin du yin no/ /mtha'i rdul phra rab rnams kyi nye bar gnod pa'am 'jig pa yang ma yin pa'i phyir skye ba can ma lus pa'i rjes su 'jug pa kho nar thal bar 'gyur ro zhes bya ba'i don to/ /gnas pa dang ldan pa gang yin pa de rten dang bcas par khas blangs pa yin zhes sbyar bar bya ste/ rten la nye bar gnod pa kho nar byed par mi nus so zhes bya ba'i don to/ /tshigs su bcad pa dang pos ni de yod pas sbyar ba'i de'i yod pa ma yin par bstan pa yin la/ gnyis pas ni de'i med pas sbyar ba'i de'i med pa ma yin par ro/ /de'i phyir gnas par byed pa'i nus pa ma yin no/ /da ltar ni gnas bya'i rang gi ngo bo kho na 'jig pa dang 'jig pa ma yin pa'i bdag nyid du brtags nas gnas par byed pa'i nus pa mi srid pa yin par bstan pa ni/ gal te rang 'jig ngang tshul bdag ces bya ba ste/ 'jig pa nyid ni skad cig ma nyid ma yin te/ 'jig pa dngos chos nyid ces bstan pa'i phyir ro/ /'o na ci zhe na dus ji srid pa yin pa pha rol po 'dod pa'i phyir gang yang zlos pa ma yin no/ /'grel pa mdzad pas ni 'di rnams bsdu ba'i tshigs su bcad pas bstan pa yin no/ / mar me la sogs pa rten yin pa dang / 'od la sogs pa brten pa yin par 'dis bshad pa yin no/ /gang la 'gro ba'i gegs srid pa yin yang / 'bras bu dang rgyu nyid ma gtogs pa'i rten dang rten can nyid ma yin na/ de la srid pa med pa lta ci smos/ mar me dang 'od gnyis po 'di ni de'i 'am gnyis las 'byung ba yin gyi/ phan tshun phan pa byed pa ni ma yin no zhes bya ba de dag tsam ni tshad ma'i yul ma yin no/ /de'i phyir/ sems dang lus kyang de bzhin no/ /de rgyu lhan cig byed pa las/ /skye ba'i 'bras bu lhan cig gnas/ /me dang zangs ma'i zhu nyid bzhin/ /zhes bya ba 'di grub pa yin no/ /de'i dus su mar me 'od kyi rten yin du zin kyang de yod na yod pa'i phyir te de sbrul la sogs pa'i rnam par 'gyur ba yin yang de la brtan pa ma yin te/ mar me med na de yod kyang med pa'i phyir te/ lus ni sems kyi de lta ma yin no/ /lus yod kyang mar me la 'od bzhin du sems ma yin pa ma yin nam/ smras pa/ lus kyi phul byung 'grib med par/ /zhes bya ba ste/ ma mthong ba tsam yin pa kho na las de'i 'bras bu nyid 'ba' zhig ni ma yin te/ ma bag mar len pa rigs pa'i yul du byung ba'i paN+Di khar rdzur ma bag mar len par rigs pa nyid med na ma mthong ba yang de'i 'bras bu nyid du mi shes pa'i phyir ro/ /'o na ci zhe na/ de'i bya ba'i khyad par gyis khyad par can yin pa'i phyir ro/ /de lta mod kyi de nyid la the tshom za na de la dpyod pa ni shes rab yin la shes rab can yin pa'i phyir de nyid las rig pa yin zhes bstan pas so/ /ji ltar bzung ba rnams de kho na bzhin du nye bar ston pa ni yid gzhungs pa yin la de yang blo 'di 'dzin pa dang dran pa'i ngo bo nyid yin pa'i phyir rang gi rigs goms pa'i 'grib pa dang phul du byung ba'i bdag nyid kyi khyad pa can yin na 'grib pa dang phul du byung ba dang ldan par 'gyur ro/ / lus kyi khyad par gyi bskyed bya blo ma yin nam/ de lta yin na lus med na med pa'i phyir mar me la brten pa'i 'od bzhin du de la brten pa yin par 'gyur ro snyam du sems pa la/ 'di ni mar me'i 'od la sogs/ /brten pa rnams la yod ma yin/ /zhes bya ba smos te/ 'od ni mar me'i byed pa'i dbye ba'i rjes su 'brang bar byed pas de nyid la brten pa yin gyi gzhan la ni ma yin no/ /de bzhin du blo yang shes rab la sogs pa'i ngo bo ni blo'i bde pa'i khyad par gyi rjes su byed pas de la brten pa kho nar shes pa yin gyi lus la brten pa ni ma yin te/ 'di ni gzhan la ma brten pa yin no/ /gal te dus tha dad pa'i blo ji ltar blo gzhan gyi rten yin zhe na/ bag chags kyi sgo nas blo phyi ma la nye ba yin pa'i phyir skyon med do/ /de'i dus su byung ba'i sems las byung ba la ni sems de nyid yod pa yin la de ltar bshad pa ni/ /gang zhig yod pas phan 'dogs byed/ /ces bya ba 'dis rtogs pa'i don yin no/ /de la yang sems kho na sems gzhan gyi rgyu yin te/ de'i bya ba'i rjes su 'brang pa'i phyir ro/ /lus ni ma yin no zhes bya ba 'di kho na don yin no/ /de'i phyir gzhan du brjod pa ni gal te dngos po'i rgyun de ltar skye ba ni rgyu dang bcas pa'i phyir rten yin na lus kyang sems kyi rgyu yin pa'i phyir rten yin par 'gyur ro/ /de rgyu nyid yin par ni/ de rgyu lhan cig byad pa las/ /skye ba'i 'bras bu lhan cig gnas/ /zhes bya ba 'dis smras pa yin no snyam du sems pa la/ blo yi byed pa'i khyad par gyis/ /zhes bya ba smos te/ lus kyi rgyu ni de la sred ba dang bcas pa'i las kyi ming can sems kyi rgyu sems gzhan rang gi 'bras bu la bya ba byed pa po dang lhan cig tu rang gi 'bras bu la bya ba byed pa po yin te de la brten pa yin pa'i phyir ro/ /de'i phyir lus dang lhan cig pa yin gyi des sam de'i rgyus sems byed pa las ni ma yin no/ /gang gi phyir sems ni shes rab la sogs pa yin la sems nyid kyi khyad par la rang gi khyad par gyi rjes su byed pa yin gyi lus la sogs pa ni ma yin no/ /de'i phyir de la brten pa kho na yin gyi lus la sogs pa la brten pa ni ma yin no/ /ri mo la sogs pa la yang shes rab la sogs pa'i sems kyi khyad par la rang gi khyad par gyi rjes su byed pa ma yin no/ /de la brten pa yang ma yin te rtsig pa la brten pa'i phyir ro/ /de bzhin du mar me la mar me'i 'od yin no/ /de bzhin du sems kyang sems gzhan gyi rjes su byed pa ni lus la brten par 'gyur ro snyam du sems pa la 'di ni mar me'i 'od la la sogs zhes bya ba smos te/ gal te yang ri mo dang mar me dang mar me'i 'od la sogs pa yang sems kyi khyad par byed pa yin yang de bzhin du rtsig pa la sogs pa legs par sbyangs pa'i khyad par yang yin no/ /legs par sbyar ba'i rtsig pa la ni mkhas pa yang ri mo phun sum tshogs pa la dbang byed pa med do/ /de'i phyir sems kho na rten byed pa ni ma yin no/ /sems ni ji skad bstan pa'i rigs pas sems gzhan yin gyi lus ni ma yin no/ /brten pa rnams la zhes bya ba ni sems las tha dad par rjes su sgrub par byed pa nyid du bstan pa yin no/ /gang gi phyir gzhan la mi rten pa 'di de rnams la yod pa ma yin te de nyid du dmigs pa'i phyir ro/ /de ma yin pa gzhan du yang zhes bya ba ni mar me gzhan las gzhan pa ni bum pa la sogs pa'o/ /blo rten du gyur pa la rten shes rab la sogs pa brten pa yin te de rnams rten dang brten can nyid yin zhes bya bar sbyar ro/ /ji ltar mar me la brten pa yin yang sbrul gyis 'od rnam par 'gyur ba ma yin nam/ lus la brten pa'i sems kyang sems kyi 'gyur bas 'gyur ba yin no snyam du sems pa ni/ gal te mar me'i 'od kyang zhes bya'o/ /sprul las 'od rnam par 'gyur ba yin pas/ mar me'i 'gyur ba rtogs pa bzhin du sems 'gyur ba las de'i 'gyur bas lus kyi 'gyur ba rtogs pa ma yin par bstan pa ni/ blo'i byed pa tha dad pa'i zhes bya ba'o/ /bcud kyis len pa dang bza' ba'i khyad par nye bar mkho ba las ji ltar goms pa nyid kyi shes rab la sogs pa rnams brjod nas de las bzlog pa la skyon bstan pa ni/ bcud kyis len pa la sogs pas zhes bya ba'o/ /'on te blo tsam ni bcud kyis len pa la sogs pa nye bar mkho ba las byas pa'i lus las 'byung ba yin pa/ de'i khyad par ni goms pa las yin no snyam du sems pa la/ mngon sum dran pa ma gtogs pa/ /zhes bya ba'o/ /de bzhin mngon spyod pa zhes bya ba ni/ dran pa'i rjes su 'jug pa med kyang zhes bya ba'i don to/ /shes rab dang yid gzhungs pa dag gi mtshan nyid gzhan bstan pa ni/ so so so sor zhes bya ba ste/ de'i rigs kyi don yin pas te goms pa'i bskyed bya'i khyad par gyi rigs kyi don las so/ /de ltar 'gyur na dbang po'i rnam shes ni dbang po'i bdag nyid kyi lus kyi khyad par gyi rjes su byed pa yin la/ de las byung ba nyid kyis yid kyi rnam shes bskyed pa yin no/ /de'i phyir de yang brgyud pas lus la brten pa yin la de log na ldog par 'gyur ba ni dbang po'i rnam shes bzhin du 'jig rten pha rol ni ma yin no snyam du sems pa la/ de las kyang ste lus las 'di ste sems kyi khyad par gyi sems nyid las ni ma yin no zhes bya ba ni gzhan gyi 'dod pa yin la de ltar na 'jig rten pha rol nges pa can du mi 'gyur ro/ /kyang gi sgra ni rang kho na'i don yang yin te des na rang kho na las zhes bya ba yin no/ /re zhig yid gzhungs pa ni ji ltar gzung ba dran pa yin la/ 'dzin pa yang dbang po'i las yin la shes rab ni 'dzin pa'am dran pa yang yin rung thams cad du de kho na las yin la goms pa ni de sngon du 'gro bas 'jug pa yin zhes bya ba 'di phan 'dogs med par min zhes bya ba dang sbyar ro/ /gang gi tshe yin zhe na/ sems la phan 'dogs pa med pa'i ngang tshul gang gis yin pa de'i tshe ste phan 'dogs pa'i sems kho na la dbang po'i shes pa yang yin te/ snga ma'i rnam shes rnam par g.yeng ba dang cig shos dag las phyi ma'i rnam shes rnam par g.yeng ba dang cig shos mthong ba'i phyir ro/ /snga ma yang de bzhin du yin la de las kyang de bzhin yin pa'i phyir 'jig rten pha rol grub pa yin no/ /yang na de las kyang ste dbang po'i ngo bo'i lus las khyad par te rnam shes ni gzugs la sogs pa 'dzin pa la nges pa'i ngo bo ni rjes su byed pa'i sems la 'gyur ba min pa kho na ste/ sems dang dbang po la sogs pa las rnam par shes pa'i khyad par du 'gyur ba yin gyi gcig las ma yin te/ chos can med pa'i phyir ro zhes bya ba'i don to/ /blo dang dbang po la sogs pa'i bskyed byar mngon par 'dod pa'i khyad par yin la de yang de la goms pa'i khyad par las dbang po la sogs pa'i bya ba la yang gnyid log pa la sogs pa dang sad pa la yang ri la sogs pa sna tshogs par 'gyur la sems la ni phan 'dogs pa ma yin pas goms pa'i sgo nas dbang po las kyang mi 'byung la phan pa byed pa yin na de la dbang po yang phul du byung bar 'gyur te de kho na las byung ba'i phyir ro/ /nye bar mkho ba'i bcud kyis len pa las sam ting nge 'dzin gyi khyad par las nang gi lus khyad par can du 'byung ba ma yin du zin kyang rgyas pa la sogs pas chags pa la sogs pa dang / shes rab la sogs pa yang rung ba snga na med pa de yod na 'byung ba'i phyir de'i bskyed bya nyid du shes pa ma yin nam/ de'i tshe bde ba la sogs pa'i bskyed bya nyid kyis sems kyi bskyed bya nyid kho na yin no zhes zer na yang lan ma yin te/ rang gi rigs goms pa las byung ba nyid kyis sems kyi bskyed bya nyid du khas len pa yin na de yang yod pa ma yin no/ /'di la brjod pa ni chags sogs 'phel ba zhes bya ba ste/ bcud kyis len la sogs pas rgyas ba yin na/ rgyas pa'am gzhan gyis kyang chags pa dang / shes rab sogs pa 'phel ba ni res 'ga' yin gyi thams cad du ma yin te/ rgyas pa yod kyang res 'ga' 'bras bu mthong ba las de'i skyed par byed pa'i rgyu rtogs pa mthong ba'i phyir de rang gi rigs goms pa kho na chags pa dang shes rab la sogs pa rtogs pa yin la/ rang gi rigs goms pa yang bcud kyis len la sogs pas bskyed pa'i 'byung ba'i khyad par 'dzin par byed pa'i bde ba la sogs pa'i dbang gis shes rab la sogs pa'i ngo bos bag chags sad pa yin pa'i phyir de tsam gyi bskyed bya nyid yin na thams cad de rten par bye brag med par 'gyur ro/ /'dis ni sman gyi bye brag las nad zhi ba la sogs pa'i 'bras bu res 'ga' ba ni ma mthong ba'i rgyu gzhan go bar byed par bshad pa yin te 'bras bu thams cad de tsam las yin par mi srid pa'i phyir rgyu gzhan du rtogs par byed pa yin no/ /yang na bcud kyis len pa la sogs pas 'byung ba'i khyad par nang gi reg bya'i ngo bo skye ba yin la phyi rol bzhin du shes pa la yang bag chags sad pa'i dbang gis bde ba la sogs pa 'byung ba na chags pa dang shes rab la sogs pa ni rang gi sa bon smin pa las byung ba ma yin pa'i phyir khams mnyam pa la sogs pa'i rgyas pa la sogs pa nyid kyi rgyu mtshan ni de yin no/ /nang gi reg bya de yang reg pa'i dbang po las skyes pa'i shes pa bzung ba yin la de las kyang bde ba la sogs pa de nyid yin no/ /don ni dmigs pa yin la de log kyang shes pa ldog pa ma yin no/ /rten yin no zhe na/ don gyi sgo nas 'gyur ba yin/ /zhes bya ba dar go bar byed pa kho na yin no/ /de yang khams mnyam pa la sogs pa zhes bya ba'i sogs pa'i sgras mi mnyam pa yin la nges kyang rang gi shes pa yin zhing de las kyang sdug bsngal yin te de'i bag chags sad pa'i las de kho na mi mnyam pa'i 'dzin byed yin la 'dzin byed kyang thams cad sngar goms pa kho na las 'byung ba yin la dbang po ni de'i rjes su 'jug par byed pa yin te/ yul 'dzin pa la so sor nges pa tsam gyis bya ba yin pa'i phyir zhes bya ba la sogs par sbyar bar bya'o/ /rang gi sdug bsngal las rjes su dpag pa las gzhan sdug bsngal ba yin par shugs kyis go pa yin la/ de'i phyir gzhi la rgyu ni zhe sdang phyir gzhil pa'i rgyu yin no/ /phyi rol gyi ches yid du 'ong pa'i yul na dmigs pa na nang gi don nye ba las bde ba skye ba ma yin nam/ de de la dmigs pa ni ma yin no/ /bden te rten kho na de 'di'i yin par bstan pa ni/ gang gi tshe zhes bya ba'o/ /gang gi tshe dmigs pa de'i tshe rten ma yin par bstan pa ni/ de log pas ldog pa yang ma yin no zhes bya ba'o/ /'dus pa la sogs pa mi mnyam pa ni khyad par nyid yin la de nas ni reg pa'i bskyed pa de'i shes pa yin la de las kyang bag chags sad pa las sam/ gti mug la sogs pa kho na las sam/ reg pa'i dbang po las 'dus pa'i yul 'dzin par byed pa ni/ ri mo dang glur bya ba la sogs pa'i dran shes bzhin du/ goms pa las byung ba yin zhes bya ba la sogs pa dang sbyar bar bya ba yin par bstan pa ni/ 'dis ni 'dus pa la sogs pas zhes bya ba ste/ 'dus pa la sogs pa'i sgras bzung ba'i phyir bcud kyis len la sogs pa dran pa nyams pa la sogs pa'i sgrub byed yin par bshad pa ni/ der yang zhes bya ba ste/ bcud kyis len la sogs pa'i dbang gis nang gi don khams mnyam pa la sogs pa'i ngo bor dmigs pa'o/ /'di su zhig ce na/ bag chags las byung ba'i dran pa nyams pa ni/ rang dang gzhan gyi rnam par dbye ba mi shes pa'o/ /lus kyi rnam par 'gyur ba ni/ nang gi 'byung ba yongs su gyur pa'o/ /ma yin no zhes bya ba ni rten nyid dgag pa'o/ /ji ltar mig la sogs pa zhes bya ba ni mi mnyam pa'i dpe'o/ /thams cad rgyu yin par thal lo zhes bya ba ni sngon gyi goms pa sad par byed pa nyid khas mi len na thams cad kyi byed pa po shes rab la sogs pa thams cad du byed par 'gyur ro zhes bya ba'i don to/ /de bzhin du zhes bya ba ni gnas skabs kyi nye bar bsdu ba yin no/ /bzung ba'i dngos po yang bde ba dang rmongs pa la sogs pa skyed par byed par mthong ba kho na yin par bstan pa ni/ dper rgyud khyad par la la la zhes bya ba'o/ /phan pa byed pa'i sems kho na la sems kyi dbang po las sam goms pa las khyad par yin par ni bden na/ de ni ma la sogs pa'i rgyud las dang po skyes pa ni phyi ma phyi ma'i rgyur 'gyur ba las goms pa las sam dbang po las khyad par du 'gyur ro/ /gang la yang dang po nyid du khyad par can gyi shes rab la sogs pa'am nga rgyal dang bcas pa'i yid kyi rnam shes yin la/ de la yang ma la sogs pa goms pa kho na rgyu yin te/ de ni de med na mes po'i yin la de'i yang de med na yang mes kyi yin par rtogs par bya ba yin te/ thag ring ba la rgyu yin pa sngon po'i shes pa'i ser po'i shes pa la sogs pa thag ring po sngon po'i shes pa bzhin du 'dod pa kho na yin no/ /drod gsher las skyes pa ma la sogs pa med pa'i phyir ji ltar yin na zhes bya ba 'di ni khyed la yang mtshungs so/ /lus gzhan la yod pa rang gi rgyud kyis bskyed pa yin no zhe na yang bdag gi yang de kho na yin pa'i phyir bye brag med do zhes snyam du sems pa la/ de phyir nges par gang nyid kyi/ /zhes bya ba ste/ de'i phyir sems lus la brten pa ma yin te/ de'i khyad par rjes su 'jug pa ma yin pa'i phyir ro/ /de'i nyid kyi phyir rgyud gzhan gyi sems la brten pa ma yin no/ /gang gi phyir de'i khyad par yang nges pas rjes su 'jug pa ma yin no/ /de bzhin du rgyud gcig la byis pa'i nyams su myong ba lang tsho la sogs pa na lus tha dad kyang dran pa yin gyi de'i tha dad pa dang tha dad pa ma yin pa dag ni ji skad bstan pa'i rigs pas sems la phan 'dogs par byed pa ma yin no/ /rgyud gzhan gyi sems kyi bskyed bya'i 'du byed pa'i rjes su 'brang pas der nyams su myong ba lang tsho la sogs pa'i gnas skabs su nyams su myong ba bzhin dran pa dang gnyid log pa la sogs pa'i gnas skabs kyi lus kyi dbye ba nyams su myong ba lta bu'o/ /skye ba'i dang por rang nyid rgyud kyi 'du byed pa rjes su 'jug pa yang med pa nyid ma yin nam/ der nyams su myong ba yang mi dran pa'i phyir ro/ /mngal gyi gnas su khyad par can gyi sdug bsngal gyi 'du byed pa nyid nyams pa'i phyir de'i tshe mi dran pa yin la 'di la ni de mi srid pa yin no/ /'di la yang gang nyid kyi zhes bya ba nges pa'i don la nyid kyi sgra yin no/ /gang kho na tshig brjod pa de'i kho na rtog gi ngan pa bzhin du nges pas zhes rjes su 'jug pa'i khyad par can gyi de yang ma yin pa las log pa'i tshig yin no/ /yang na bsgom par bstan pa'i 'du byed gang gi rgyud yin pa'i bsgom pa las sems kyang rjes su 'jug par byed pa de'i khyad par gyi khyad par can nyid kyis yin gyi mkhas pa'i rgyud kyis goms pa la de'i sems bzhin du bu'i sems kyang rjes su 'jug pa ma yin te/ res 'ga' ba'i rjes su 'jug pa cig shos kyi 'du byed pa 'byung ba bkag pa ma yin pa ni de'i 'du byed pa'i bskyed bya'i bdag nyid du nges par byed pa ma yin no/ /de'i phyir ma la sogs pa'i sems kyang lus bzhin du rten ma yin te/ de la khyad par med kyang khyad par yod pa'i phyir ro zhes bstan pa ni/ blo yi byed pa'i khyad par gyis/ /zhes bya ba'o/ /de'i phyir nges pa gang nyid kyi/ 'du byed ces bya ba ni de'i khyad par la yang khyad par yin pa'i phyir zhes bya ba'o/ /sngon po la sogs pa dang bde ba la sogs pa'i shes pa bzhin du 'am bkres pa la sogs pa bzhin du thag ring po'i goms pa las byung ba nyid yin na'ang sems pa la sogs pa'i goms pa'i bskyed bya nyid du shes pa ni ma yin te/ pha'i goms pa yin na yang bu'i ni de las bzlog pa yin pa'i phyir ro/ /rjes su dpag pa yang goms pa tsam las mthong ba'i phyir rang goms pa kho nar gnas pa yin no/ /sngon po la sogs pa'i shes pa dang bkres pa la sogs pa rnams kyang 'di kho nar rtogs pa yin te/ de rnams kyi rgyu yang bdag nyid goms pa kho na yin pa'i phyir ro/ /mes po'i goms pa kho na 'di'i goms pa yang ma yin te/ mes po gson pa na yang de'i goms pa'i khyad par gyis/ 'di'i sems khyad par du ma mthong pa'i phyir ro/ /rang gi goms pa ni khyad par gyi rgyur la lar mthong ba yin no/ /yang na lus bzhin du gzhan gyi sems kyang rten ma yin te de la khyad par med kyang rang goms pa'i khyad par gyis khyad par ma yin pa'i phyir ro/ /blo'i byed pa'i khyad par gyis zhes bya ba ni 'di kho nas bstan pa yin par rgyud gcig la yang blo rnams mtshungs pa'i phyir ro zhes lhag par bstan pa ni/ de'i phyir nges pa gang nyid kyis/ /zhes bya ba ste/ gang dang gang gi sems dang sems gang dang gang yin par sngon po la sogs pa nyid du 'du byed kyi rjes su 'jug pa de dang de ni de dang de'i rten yin te/ thams cad kyi thams cad ni ma yin no zhes bya ba'i don to/ /gang gi phyir lus dang gzhan gyi sems dang sems gzhan rnams la bye brag med kyang khyad par can gyi sems gang phul du byung na gang phul du byung bar 'gro ba de ni de la brten pa yin zhes nye bar bsdu ba ni/ de'i phyir sems la brten pa yin zhes bya ba'o/ /de'i phyir sems la brten pa yin no zhes bya bar rnam par 'grel pa ni/ de phyir sems nyid log na sems ldog go zhes bya ba'o/ /gong du lus de dang de la brten pa dang dbang po tsam la brten pa nyid kyang bkag pa yin la gal te dbang po la sogs pa zhes bya ba la sogs pas ni dbang po'i shes pa nyid kyis brgyud pa yin no zhes bya ba ni khyad par yin no/ /brgyud pas 'byung ba dngos su 'byung ba kho na yin te de nyid du ngo shes pa'i phyir ro zhes zer ba ni/ me gzhan dang gzhan las zhes bya ba ste/ snga na med pa ni phyi ma'o/ /ma yin te zhes bya ba ni rgol ba la sel bar byed pa yin te dbang po'i shes pa ma gtogs par yid kyi rgyal srid dang dbang phyug dang gtso bo la sogs pa'i nga rgyal dang bcas pa'i rang rig pa'i rtog pa rab 'byams dgag par mi nus so/ /don yul ma yin pa'i phyir sel ba'i yul la yin te/ rung ba po rnams kyis ma shes pa rang gis shes pa'i phyir shes pa tsam ni snga ma snga ma las byung ba nyid kyi phyir 'jig rten pha rol po yin no zhes bya ba'i don to/ /du ba'i bskyed bya kho na de nyid du gtogs pa'i phyir me'i bskyed bya yin no zhes bya ba la/ du ba me las ci 'dra ba zhes bya ba ste/ yid ni shes rab la sogs pa'o/ /thams cad la khyab pa zhes bya ba ni/ rang rig pa tsam las byung ba'i phyir ro/ /me'i bskyed bya yin pa'i du ba ni rgyun yin la shes rab la sogs pa yang lus kyi bskyed bya yin pas rgyun yin par 'gyur ro snyam du sems pa la/ du ba ni zhes bya ba smos te/ me'i bskyed bya'i du ba bzhin du lus kyi bskyed bya shes rab la sogs pa'i rgyun ma yin te/ 'on kyang goms pa'i bskyed bya nyid do/ /dbang po'i shes pa'i bskyed bya nyid kyi rnam shes yin du zin kyang dbang po nyid las dbang po'i rnam shes ni ma yin no/ /'o na ci zhe na/ snga ma pa'i rnam shes nyid las yin te de'i bya ba'i rjes su byed pa'i phyir yin la/ dbang po ni nges pa tsam gyis de'i rjes su 'jug par byed pa yin par bstan pa ni/ gal te rnam shes 'ga' zhig ni/ /zhes bya ba'o/ /rnam shes snga ma'i bya ba dang rjes su mthun pa nyid yang ste/ dbang po dang snang ba dang yul tsam nyid las de skye ba yin yang ma nges pa'i phyir ma skyes pa bzhin du tha snyad byed pa ma yin nam/ ji ltar sngon po'i rnam par rig pa yang ma nges pa'i phyir sngon po zhes brjod pa ma yin la nges par yin na ni de ltar 'gyur ro snyam du sems pa ni/ de ni skyes mod kyi zhes bya ba'o/ /de ltar na thams cad du rig pa med pa ni nges pa med pa kho na'i phyir zhes tha snyad du byed pa yin gyi/ rang med pas ni ma yin pa de lta min na/ rig pa la the tshom za bas 'gar yang bum pa la sogs pa med par mi 'gyur bar bstan pa ni/ gal te rnam shes zhes bya ba ste/ de yang zhes bya ba ni rnam shes so/ /de zhes bya ba ni nges pa'i rgyu rig pa'o/ /de bzhin du rig pa'i rgyu dbang po la sogs pa nyams pa yin no/ /de de ltar snga ma'i rnam shes dang lhan cig pa'i dbang po ni rang gi shes pa'i rgyu yin par bstan nas da ltar ni snga ma'i rnam shes nyid las 'dir 'byung ba yin pa'i phyir dbang po'i rgyu ma yin par bstan pa ni/ goms pa'i stobs las byung ba yin zhes bya ba ste mi 'khrul ba nyid ni mi slu ba yin te/ don yod pa'i phyir dang / 'khrul pa nyid la ni de med pa'i phyir dbang po yod pa dang med pas byas pa ni ma yin te/ dbang po yod kyang rab rib can gyis slu ba yod pa'i phyir ro zhes bstan pa ni/ don yod pa dang med pa las zhes bya ba ste sad pa zhes bya ba ni dbang po 'di'i khyad par ro/ /gnyid log pa'i dbang po ni goms pa las byung ba yin yang sad pa ni ma yin pa ma yin nam/ rang gi rgyu med pa'i phyir ro snyam du sems pa la/ 'bras bu dbang po tha mi dad pa'i phyir dang / goms pa'i bskyed bya'i khyad par nyid ni sad pa'i dbang po la yang yod pa'i phyir goms pa'i bskyed bya nyid kho na yin par bstan pa ni/ 'bras dngos zhes bya ba ste/ goms pa las byung ba'i dbang po la ni ma la sogs pa'i rgyu lhan cig byed pa yin zhes bya ba'i don to/ /rnam shes 'ba' zhig ni ma yin te/ dbang po yang goms pa'i bskyed bya yin pa'i phyir/ rnam shes kyi bskyed bya yin par nye bar bsdu pa ni/ des na dbang po nyid ces bya ba'o/ /de yang 'di ltar sems 'byung ba la brten pa nyid kyi 'jig rten pha rol po ma yin pa'i sems kyi rten nyid du sgrub pa la gtan tshigs dbang po'i bskyed bya nyid ma grub pa yin la 'gal bar yang bstan nas da ni skye ba snga ma pa'i rang gi sems rten nyid du sgrub pa la/ 'du byed pa tsam gyi rjes su byed pa can nyid ni ma nges pa yin te/ skye ba 'di pa tsam la sogs pa'i sems kyi rten nyid la yang yod pa'i phyir la de'i 'du byed pa'i rjes su byed pa can nyid du ma grub par bstan pa ni/ 'jig rten pha rol po'i zhes bya ba'o/ /de'i 'du byed pa'i rjes su 'jug pa nyid gtan tshigs yin pas ma grub pa yang ma yin te/ nges pas sems kyi 'du byed pa'i rjes su 'jug pa'i phyir mthong ba yin par bstan pa ni/ pha dang ma yi rang bzhin gyis/ /zhes bya ba'o/ /de 'gyur yang zhes bya ba 'di las bzlog pa'i skyon bstan pa ni gal te de'i zhes bya ba'o/ /pha dang ma'i sems kyi 'du byed pa 'ba' zhig las ni bu'i sems kyi 'du byed pa ma yin pa ma yin nam/ de lta mod kyi der sgro 'dogs par byed pa'i lhan cig byed pa las yin no/ /ji ltar de dag nyid de las gzhan pa'i lhan cig byed pa las yin no snyam du sems pa ni/ 'on te ji ltar zhes bya ba ste/ de dag gi 'du byed pa gang yin pa der sgro 'dogs pa 'don pa po'am 'chad pa po lhan cig byed pa'i rgyu gang yin pa de de'i rang bzhin nyid ni/ de ste pha dang / de'i ste ma dang 'brel pa can du 'gyur ro/ /'don pa po ni ma la sogs pa'i lhan cig byed pa'i rgyu yin te de'i ngo bo nyid kyis ni ma yin no zhe na ma yin te/ de yang de'i rgyu yin par bye brag med pa'i phyir ro zhes bya ba'i don to/ /'du byed pa yang zhes bya ba ni/ 'don pa bos rag las par bya ba la'o/ /res 'ga' ni mngon pa 'dod pa med na'o/ /de rnam par 'gyur ba med kyang 'gyur ba/ /zhes bya ba'i rnam par 'grel pa ni/ de lta ma yin par zhes bya ba'o/ /ma la sogs pa'i rang bzhin gyi rjes su 'jug pa ma yin du zin kyang mkhan po'i 'du byed pa'i rjes su 'jug pa yang rang gi 'du byed pa'i rjes su 'jug pa la 'gal ba med pa kho na yin no snyam du sems pa ni/ mkhan po'i zhes bya ba'o/ /rang gi rnam shes sngon du 'gro ba mngon par 'dod pa'i khyad par kho na las de 'byung ba'i phyir skyon med pa yin par bstan pa ni/ ma yin te/ de med na zhes bya ba'o/ /de rnam par 'gyur ba med kyang 'gyur ba'i phyir zhes bya ba 'di ni 'jig rten pha rol sgrub par byed pa'i mchog yin par bstan pa ni/ des na 'jig rten pha rol med par ni zhes bya ba'o/ /'du byed rjes su 'jug ces bya ba ni/ pha'i'o zhes bya ba la ltos pa yin no/ /ci las shes she na/ pha'i rang bzhin rjes su 'jug par zhes bya ba'o/ /'on te ji ltar zhes bya ba 'di res 'ga' zhes bya ba la ltos pa yin te de rgyu ma yin na res 'ga' yang mi 'byung ngo zhes bya ba'i don to/ /de bzhin du rgyu de'i 'bras bu gzhan las kyang ji ltar 'byung bar bstan pa ni pha'i rang bzhin thams cad ces bya ba'o/ /rang gi sems kyi bskyed bya kho na yin na/ ji ltar res 'ga' pha'i rang bzhin gyi rjes su 'jug par byed ces pa sel ba bstan pa ni/ de'i rang bzhin zhes bya ba ste pha'i rang bzhin no/ /de'i phyir sems can thams cad rang gi rgyud kho na'i 'du byed pa'i rjes su 'jug pa yin gyi gzhan ni ma yin no zhes bstan pa yin no/ /de skad du yang de'i phyir nges par bdag nyid kyi 'du byed kyi ni rjes su 'jug pa zhes gsungs pa'o/ /'di kho nas rang gi rgyud kyi 'du byed pa'i rjes su 'jug pa'i nges pas rnam shes gcig srog chags thams cad kyi rnam shes rnams kyi skye gnas yin no zhes ma la sogs pa'i rnam shes bzhin du gsal ba yin par bstan pa ni/ 'on te ji ltar zhes bya ba'o/ /gal te 'du byed pa'i rjes su 'jug pa yin na bdag nyid thams cad kyis 'gyur grang na de'i rang bzhin bzhin du cig shos kyang mi 'gyur bar bstan pa ni/ 'jig rten pha rol tu smra ba la yang zhes bya ba'o/ /sngon gyi 'du byed pa'i rjes su byed pa'i mngon par 'dod pa'i khyad par la sogs pa re zhig rjes su 'jug pa yin la/ des de'i bskyed bya yin par shes pas rang bzhin gzhan gyi rjes su 'jug pa la rgyu mtshan gzhan yin par brtag par bya ba yin par bstan pa ni ma yin te/ rnam par g.yeng ba'am zhes bya ba ste/ ma la sogs pa dang rgyud gcig yin na bu'i rang gi nyams su myong ba'i nyams su myong ba dran pa ni de'i lus la yang 'gyur ro zhes de'i rgyud nyid la 'bras bu med par bstan pa ni/ de nyid kyi lus bzhin du ces bya ba'o/ /dug gi srin bu bzhin no zhes bya ba ni/ pha rol po'i bsam pa'i dpe yin la de'i ni sems thams cad de kho na'i tshe 'byung ba yin gyi skye ba gzhan la ni de 'byung ba ma yin no zhes bya ba'i don to/ /byis pa nyid la 'bras bu'i khyad par med pas sems gsal por ma gyur pa yin la de khyad par yin na ni/ lang tsho la sogs pa na gsal por 'gyur ba ma yin nam bza' ba'i khyad par las 'byung ba chen po khyad par skye ba'i phyir lus kyi khyad par las khyad par yang ma yin te/ bcud kyis len bzhin du 'byung ba'i khyad par gyis bskyed pa'i bde ba'i reg pa'i khyad par gyis bag chags kyi khyad par sad pa las sems kyi khyad par 'byung bar mngon par brjod pa'i phyir/ 'ga' cho chags sogs rgyas sogs kyis/ /'phel pa bde sdug las skyes yin/ /zhes gsungs pas so/ /de'i phyir bza' ba'i bye brag med kyang lus yongs su gyur pa'i khyad par kho na las blo'i khyad par skye bar mthong ba'i phyir/ de'i bskyed bya yin pa ni goms pas khyad par du yin yin no snyam du sems pa la ji ltar thos sogs kyi yul du byed pa ni goms pa'o/ /sems la byas pa ni shes rab la sogs pa'i sems kyi bdag nyid kyis gsal bar byed pa yin la de bzhin du lus kyi bdag nyid kyis kyang gsal bar 'gyur te/ de'i rjes su 'brang ba'i sems las tha dad pa med pa'i phyir dbye ba phul du byung ba las byung ba'i shes pa la goms pa las 'byung ba tha dad pa ma yin no/ /de'i phyir de yang de bzhin du lus phul du byung ba'i rjes su byed pa kho nar 'gyur ba yin gyi byis pa nyid la sogs pa la ni ma yin te/ goms pas phul du byung ba med pa'i phyir ro/ /'on te sems tsam ni lus las yin la goms pa las ni de'i khyad par yin no/ /ma yin te/ khyad par las gzhan pa'i de tsam ni ma mthong pa'i phyir dang khyad par thams cad kyang goms pa las byung ba'i phyir/ lus las byung ba ma yin pa nyid kyi shes pa kho na yin te/ goms pa'i bskyed byar mngon par 'dod pa las 'di khyad par med pa'i phyir ro/ /yon tan zhes bya ba ni gzhan gyi 'dod pas yon tan nyid du mngon par 'dod pa yang de bzhin du 'gyur ro zhes bya ba'i don to/ /'grel pa mdzad pas ni sems bzhin du lus kyang gsal bar 'gyur ba ste dmigs par 'gyur ba ni lus las tha mi dad pa'i phyir te yon tan nyid kyis de'i dmigs pa yin na/ gzugs la sogs pa bzhin du dmigs par 'gyur ba zhig na dmigs pa ni ma yin no/ /de'i phyir lus nyid blo ma yin no zhes bstan pa yin no/ /ji ltar thos sogs 'du byed pa/ /sems la byas ba zhes bya ba 'dis ni blo'i khyad par the tshom gyi yul yin par bstan pa ni tha dad pa sgrub par byed pa yin no/ /de yang de grub na yang blo'i khyad par la the tshom za ba'i phyir ro zhes smos so/ /dngos po grub kyang mi rtag pa nyid du ma grub pa ma yin nam/ ma yin te/ snga ma dang phyi ma'i rnam par dbye ba dang bral ba'i dngos po dmigs pa kho na mi rtag pa nyid mngon bar brjod pa'i phyir ro/ /de ltar lus rig pas gzugs la sogs pa rig pa bzhin du blo'i khongs su gtogs pa ma yin no zhes bshad pa yin no/ /thos pa la sogs pa'i 'du byed pa'i bskyed bya lus kyi gnas skabs las phul du byung ba'am/ skye ba'i dang po la byung ba'i khyad par gyi khyad par las de'i bskyed byar 'gyur ba ma yin nam/ 'di las gzhan nam gzhan ma yin pa'i sems pa can tsam byung ba tsam las byung ba yod pa ma yin la khyad par yang goms pa las gzhan pa las mi 'byung ba'i phyir skye ba snga ma las 'dir 'ongs par 'gyur ba yin no/ /blo dang ldan pa 'di rang dbang du 'di yin par mi rigs te gang gi phyir blo dang ldan pa ni sdug bsngal du ma can gyi skye ba'i rgyun rang dbang du mngon par 'dod pa ma yin te/ las kyi dbang gis yin no zhe na/ las sam de'i rgyu las yang ji ltar 'jug pa yin 'di ni dpyad par bya ba yin no/ /de'i phyir de bzhin du skye ba'i 'chi ba khas len pa la de'i rgyu ni da ltar ba bzhin du dbang phyug yin par 'gyur te/ 'dzud byed yin pa'i phyir ro/ /khyad par ni 'di tsam yin te de da ltar ba ni ma nyes pa yin na de'i rgyu yin/ gzhan ni gzhan du yin no/ /'chi ba gang yang la la'i thabs kyis yin gyi gzhan gyi ni gzhan du yin te/ las tha dad pa'i phyir ro/ /de'i dbye ba yang de'i bka' drin dang cig shos kyi dbye ba las so/ /de yang 'dod pa'i dbye ba las yin la 'dod pa yang de'i de bzhin du goms pa'i dbye ba las yin gyi rang bzhin gyi dbye ba las ni ma yin te/ 'bras bu'i dbye ba mtha' yas pa la dngos po tha dad thal bar 'gyur ba'i phyir ro/ /de tha dad pa yang rang bzhin tha dad pa'i mtshan nyid yin pa'i phyir ro/ /srog chags rnams kho na rang bzhin gyi dbye bas mtha' yas pa yin na dbang phyug kyang mtha' yas shugs kyis thob pa ma yin te/ de rnams kho na de lta bu'i rang bzhin du 'gyur ro/ /de'i phyir dbang phyug gcig bu kho na ji ltar goms pa'i 'dod pa'i dbye bas bka' drin dang cig shos la sogs pa ni dbye ba dang ldan pa ni sna tshogs pa'i skye ba'i 'chi ba sgrub par byed pa yin par grub pa yin te 'bras bu'i khyad par gyi dman pa'i gnas yongs su len pa ni/ gzhan dbang ma yin pa nyid dang 'gal bas khyad par gyi rgyu sgrub pa'i phyir ro/ /de yang / dbang med shes med skye bo 'di/ /rang gi bde sdug gang yin pa/ /dbang phyug gis 'phangs mtho ris sam/ /ngan 'gro nyid du 'gro ba yin/ /zhes smos pa ni/ gong du ni blo dang ldan pa sngon du 'gro ba'i ngo bo ni tshig la sogs pa yod pa ma yin la 'bras bu'i nges pa yang rgyu tsam la tshad ma yin gyi/ khyad par la ma yin no zhes bstan pa yin la da ltar ni skye ba dang ldan pa nyid goms pa'i bskyed bya'i khyad par gyi sems dang khyad par med pa'i phyir 'jig rten pha rol rjes su dpag pa bzhin gzhan gyis btsud par khyad par med pa'i phyir sbyor byed dbang phyug rjes su dpag pa yin par bsams pa ni 'di'i bye brag yin no lan ni bdag la chags pa dang ldan pa zhes bya ba'o/ /bden mod kyi goms pa'i bskyed bya'i sems 'ching ba'i ming can las 'dzud byed rjes su dpog pa yin no mngon par 'dod pa'i khyad par can kho na yin pa ni thos pa goms pa bzhin du mthong bar rjes su dpog pa yin gyi gzhan ni ma yin te/ goms pa'i bskyed bya'i khyad par yin pa'i phyir rjes su dpag pa yin te/ phan tshun 'ching ba yin pa'i phyir zhes bya ba'i don to/ /sems can gzhan gyis bkri min pa/ /zhes bya bas ni/ gzhan gyis khas blangs pa'i 'dzud byed bkag pa yin te/ des goms pa'i bskyed bya'i khyad pa nyid la ma khyab pa'i phyir dang / mngon par 'dod pa'i khyad par gyis khyad par de grub ba yin par bstan pa ni/ bdag la chags pa dang ldan pa zhes bya ba ste/ ji ltar bdag la chags pa 'dzud byed yin par bstan pa ni/ bde sdug 'dor thub ces bya ba ste/ bdag la mngon par 'dod pa ni/ bdag la phan pa byed pa'i phreng ba dang tsan dan la sogs pa la'am/ sbyin pa la sogs pa la 'bras bu mthong ba dang / cig shos la mngon par dga' bar byed pa yin la/ de la mngon bar dga' bar byed pa ni/ /de don du mi gnyer ba 'joms pa yin la mngon par 'dod pa dang / slar gnod pa dag rab tu sbyor bas de dang rjes su mthun pa'i las rnams 'phel bar byed pa yin la/ de rnams kyi bde 'gro'am ngan 'gror skye ba yin no/ /bdag nyid shes na gnod pa byed pa de la mngon par 'dod par mi 'gyur la sgrub byed sbyin pa la sogs pa la mngon par dga' bar 'gyur gyi ngan 'gro la ni ma yin te/ gnod pa byed pa'i phyir la gnod pa byed pa la ni mngon par dga' ba ma yin no/ /'dir brjod pa ni/ ngan 'gro la yang bdag la chags pas bde ba dang sdug bsngal la sogs pa dang sngon po la sogs par snang ba rnams goms pa'i bskyed bya'i khyad par yin pa'i phyir rang gi rigs goms pa la ltos pa kho na yin par shes par bya'o/ /gnod pa byed pa de rnams bdag nyid dang ldan pa ji ltar goms par byed ce na/ bdag la chags pa'i phyir ro/ /de ni de ltar chags par 'gyur bas gnod pa byed pa la gnod pas bsod nams ma yin pa 'phel bar byed la 'phel ba de rnams kyis kyang de bzhin du de de lta bu'i srid pa yin bar lung las go ba yin no/ /goms pa'i bskyed bya nyid yin na/ ji ltar las rgyu mtshan yin de lta yin na dbang phyug kyang 'gyur ba ni ma yin te/ dbang po rnams sam shes pa'am shes rab la sogs pa rnams goms pa'i bskyed bya'i khyad par yin pa'i phyir ro/ /dge ba'i sems pa la dang pa'i rjes su 'jug pa las byung ba rnams bde bar gshegs pa rnams la mngon par gsal bar 'gyur la/ mi dge ba'i sems la ni de las bzlog pa yin pa'i phyir goms pa las byung ba nyid dge ba dang cig shos kyi bsgom pa las byung ba rnams la khyad par med pa yin te de 'dra ba dang mthun pa yin zhes byas nas so/ /gzhan ni yul te snod yongs su gyur pa la sogs pa phyi rol gyi rgyu mthun pa dang lhan cig pa'i dus su rgyu de las byung ba yin par brjod pa yin gyi/ de tsam gyis grub pa'i phyir ro/ /dbang phyug la sogs par rtogs pa ni mi rigs te mi 'dra bar smin pa ni rnam par smin pa yin pa'i phyir zhes byas nas rgyu mthun pa sgrub par byed pa nyid de dang lhan cig byung ba'i rnam par smin pa sgrub par byed pa nyid du rigs pa yin gyi dbang phyug la sogs pa ni ma yin te/ phyogs gcig la yang nus pa yongs su mi shes pa'i phyir zhes bya ba'i don to/ /dman pa'i gnas yongs su 'dzin pas ni ma yin no/ /'byung ba'i bskyed bya nyid du 'gyur ro zhes bya ba'i phyogs snga ma ni/ ji ltar thos sogs 'du byed dang / /zhes bya ba la sogs pas goms pa'i bskyed bya'i khyad par nyid bsal nas/ 'dis bsal bar bya ba ni/ de phyir 'o na gal te 'byung ba chen po tsam las byung ba ma yin gyi zhes bya ba nas brtsams nas mi 'dod do zhes bya ba'i bar gyis bstan pa'i rjes su brjod pa yin no/ /dbang phyug gis bskul bar yang mi 'dod do zhes bya ba'i phyogs snga ma yin par shes par bya'o/ /bdag tu lta ba yin yang chags par ma byas na mi 'ching pa yin no zhe na/ brjod pa/ sdug bsngal dang mi rtag pa la rgyu mtshan las byung ba la rgyu mtshan du tha snyad 'dogs pa'i phyir sdug bsngal ni rang bzhin gyis mi rtag pa yin la de las bzlog pa ni rtag pa yin te/ de yang bde ba'i ngo bo'i khongs su gtogs pa yin la de la blo gros te bdag go zhes bya ba ni blo yin la de kho na chags pa yin te/ mngon par 'dod pa'i rang bzhin yin pa'i phyir ro/ /bdag tu lta ba ni rtag pa dang bde ba bdag nyid kyi yul yin pa nyid kyis mngon par 'dod pa'i rang bzhin yin gyi gzhan ni ma yin no zhes bya ba'i don to/ /bdag la phan 'dogs par byed pa la skye ba'i dang po la sred pa yang de la chags pa las 'gyur ba'i phyir gnyis po de 'ching ba'i rgyu yin gyi dbang phyug ni ma yin te/ nus pa mi shes pa'i phyir ro/ /'das pa'i srid pa las 'dir 'ongs pa dang 'di las kyang ma 'ongs par 'gro ba ni yul nas yul gzhan bzhin du 'byung ba'i bskyed bya ma yin na rtogs bar 'gyur la dmigs pa'i yul yin yang ma dmigs pa'i phyir 'byung bya bskyed bya kho na nyid yin te de yod na 'byung ba'i phyir zhes zer ba ni/ gal te 'gro 'ong ma mthong na/ /zhes bya ba'o/ /de 'di ni mi rigs te/ snga ma bzhin du goms pa'i bskyed bya'i khyad pa nyid la sogs pa las 'byung ba'i bskyed bya nyid yin pa gsal ba'i phyir ro/ /de'i phyir 'jig rten pha rol gyi 'gro ba la sogs pa ma mthong pa ni nus pa dang ldan pa'i skyes bus btsud pas myur du 'phangs pa'i bong ba la sogs pa'am/ dbugs 'byin par byed pa bzhin du shugs dang ldan pa kho na'i phyir nye bar mtshon par mi 'gyur ro/ /bdag la chags pa dang srid pa dag kho na 'dzud byed nyid du brjod pa yin no zhe na/ bden te/ de gnyis kyang 'gro ba la sogs par nye bar mtshon pa ma yin par mtshon pa yin te/ skul byed kyang zhes bya ba ni/ 'gro ba dang 'ong bar mthong ba'i shugs dang ldan pa'i 'dzud byed sngon du 'gro ba can ni phan byed kyi khyad par 'phen par byed pa yin no zhes bya ba'i don to/ /yang na ma rig pa dang sred pa dag gis btsud pas 'gro ba ni mthong ba'i lus la yod pa'i phyir de med na skye ba snga ma las 'jig rten 'di dang 'di las kyang pha rol du ji ltar 'ongs pa dang 'gro ba yang yin rnam shes las gzhan nye bar brten pa med na 'gro ba'am/ gzhan yang ma yin te/ skad cig ma yin pa'i phyir dang lus la sred pa dang bcas pa ni nge med na skye ba snga ma mi gnas pa'i phyir ro/ / de'i phyir 'gro ba dang 'ong ba dag mthong ba'i phyir rnam shes 'jig rten pha rol pa ma yin no/ /'on kyang bdag ni ma yin te/ rtag pa dang khyab bdag nyid dag gi lus gzhan dang 'brel pa'i phyir la de yang nyin zhag gzhan la mthong ba nyin zhag gzhan la bdag 'di mthong bar 'gyur ba yin no zhes shes pa las yod pa ma yin no/ /skad cig ma'i shes pa rnams la ni de lta bu mi srid do/ /de'i phyir de rnams ni gcig ma yin la bdag de ni 'jig rten pha rol pa yin no zhes zer ba ni/ gal te 'gro 'ong zhes bya ba'o/ /lan ni/ dbang po mi gsal phyir mi mthong / /zhes bya ba'o/ /'gro ba dang 'ong ba dag gi ma mthong ba ni shugs sam 'phen byed yin par go bar byed pa ma yin gyi 'gro ba dang 'ong ba yang bdag la chags pas 'phangs pa 'ba' zhig kho na yin gyi dbang pos rtogs pa ni ma yin te/ gsal po ma yin pa'i phyir zhes bya ba ni 'di yod na don gyis go ba la nus pa med do/ /'dzud byed gzhan yin par smra ba po yang gsal po nyid la skur pa 'debs pa yang ma yin no/ /lus 'di bsregs pa'am bor ba ma yin nam/ de ji ltar 'gro ba dang 'ong ba yin/ /lus gzhan kho na ma 'ongs pa'i srid pa'i rnam pa can ni de'i tshe 'byung ba'i phyir skyon med do/ /'di ni sad pa'i lus las gzhan pa'i lus rmi lam na mthong ba yin no/ /de kho na la ji ltar 'pho ba yin zhe na/ rmi lam lus kho na lta bu yin pa'i phyir skyon med do/ /'di skad bstan par 'gyur te/ skad cig ma'i rnam shes ni snga ma dang phyi ma'i rnam pas dben pa'i dmigs pa ni de dang lhan cig pa nyid du 'dzin pa'i don byed par rnam par gzhag par byed pa yin gyi rang gi ngo bo dang 'gal bas ni ma yin no/ /goms pas nye bar bskyed pa'i khyad par ni rang gi rigs la ltos pa ni de med pas dus gzhan la ltos pa yin te/ de ji ltar rgyur gyur pa de bzhin du brtag par bya ba yin pa'i phyir rtog pa ni mthong ba'i rjes su 'brang ba yin la/ mthong ba yang nyin zhag re re la rmi lam gyi lus kyang lus kyi bar du chod pa'i sad pa'i lus so/ / de bzhin du 'di la yang 'jig rten 'di dang pha rol tu byung ba'i lus dag gi bar du 'byung ba ni yul gzhan yin no/ /ji ltar yang gnyid log pa na dgag pa'i sems ni lus gzhan na sad pa'i sems la gzhan med kyang skyed byed yin pa de bzhin du skye ba gzhan gyi sems ni yul dang dus kyis bar du chod pa'i sems kyi'o/ /de ltar yang yul thag ring po'i zla ba ni/ chu snod rnams kyi chu la bdag nyid snang bar byed la de ni gzugs brnyan yin par brjod kyi chu las gzhan pa nyid gzugs brnyan gyi ngo bo ni ma yin te/ thogs pa dang bcas pa dag ni gcig la mi 'jug pa'i phyir ro/ /yang na thogs pa dang bcas pa nyid gser la dngul chu bzhin du dngos po gzhan yin la rang gi yul la gzugs 'dzin pa ni so sor snang ba dang 'gal ba yin gyi/ gzhan dang gzhan pa tsam gyis khas blangs par 'os pa ni ma yin no/ /de la dbang po las 'das pa'i du ba 'ba' zhig ni ma yin te/ 'o na ci zhe na/ thogs pa med pa ni/ ri la sogs pa gang la yang thogs pa med pa yin te/ gser la dngul chu lta bu ni phra ba'i phyir ro/ /'gro ba dang 'ong ba ma mthong ba ma yin te/ gang gi phyir srid pa bar do'i lus ni med pa kho na yin no/ /de lta yin yang skye ba snga ma'i mtha'i sems kyis skye ba 'di'i dang po'i sems thag ring ba yin yang gnyid log par rtsom pa'i sems kyis sad pa'i sems bzhin dang zla bas gzugs brnyan bzhin du bskyed pa kho na yin no zhes bya ba'i don to/ /yang na lus la me long la sogs pa la/ lus kyi gzugs brnyan yod pa 'di/ /gzhan la yang de bzhin du mthong ba yin no/ /gang gi phyir lus can yin yang phra ba'i phyir/ 'ga' zhig la lar thogs med de/ /ji ltar bum par chu bzhin dang / gser la dngul chu bzhin mthong ba yin no/ /'grel pa mdzad pas ni phra ba'i phyir zhes bya ba la sogs pas srid pa bar ma do ma mthong ba'i rgyu yin no zhes zer ba la/ ma yin zhes bya bas 'gegs par byed pa yin te gang gi phyir ma mthong ba'i phyir te gzhan du yang rmi lam bzhin dang gzugs brnyan bzhin du srid pa gzhan mtshams sbyor ba rigs pa nyid kyis med pa'am ni srid pa bar ma'i lus yin par bstan pa ni/ 'on kyang zhes bya ba'o/ /'ga' zhig tu 'gro bar 'dod pa'i sems lus med na 'gro ba'i yul thag ring por ji ltar 'gro ba yin/ lus med pa nyid du 'gro ba mi srid pa'i phyir ro/ /lus yod pa yin na thag ring por yang de 'gro ba kho nas/ yul pa Ta li pu tra nas/ yul pA Na Di dang / ma thu rar 'gro ba lta bu yin no snyam du sems pa la/ de ltar 'dir ni ma yin te zhes bya ba ste/ dus kyis bar du chod pa ni gnyid kyis chod kyang sang ba na 'byung ba'o/ /'di la yul gyis bar du chod pa bstan pa ni/ gang zhig ni grong dang zhes bya ba'o/ /yul gyis bar du chod pa bstan pa ni/ 'ga' zhig ni 'di na 'dug pa nyid ces bya ba ste rgyun gyis so/ /rmi lam na ni de lta ma yin te/ gang las gang du 'di 'gro ba de dag gi bar na lus dang sems kyi rgyud dmigs pa ma yin te/ de med pa'i phyir te/ bag chags brtan po med pa'i phyir ro/ /so sor snang bzhin pa'i gzugs brnyan med pa'i phyir ni ma yin te/ dmigs pa ni yod par brjod pa yin par bstan pa'i phyir ro/ /de'i phyir rmi lam bzhin du 'pho ba ni 'jig rten pha rol tu 'byung ba mi bden pa ma yin no/ /'on te sad pa'i shes pa ni rmi lam du mthong ba las bzlog par 'dzin pa yin pa'i phyir des rtogs pa med pa'i bdag nyid gsal bar byed pa ni rnam shes kyi nus pa yin pa'i phyir de snang ba yin no snyam du sems pa la/ sad pa'i so sor snang ba yang bdag nyid kho na'i ma yin te/ mi bden pa'i rmi lam du de las bzlog par 'dzin par snang ba'i phyir ro zhes bstan pa ni/ gal te snang ba gzhan thob pas/ /zhes bya ba'o/ /des na skye ba gzhan pa yang / /zhes bya ba ste/ sad pa na mthong ba'o/ /gal te bzung ba nyid du snang bzhin pa yang mi bden pa yin no/ /bye brag med par 'gyur te khyad par med pa'i phyir ro/ /gnyi ga yang gnyis ka la ltos pas bzlog pa nyid kyis phan tshun gegs byed pa'i phyir ro/ /gegs byed pa stobs mnyam pa dag ma yin nam/ rmi lam du mthong ba ni rgyu med pa yin te skyed byed med pa'i phyir ro/ /dmigs par byed pa'i dbang po la sogs pa med pa'i phyir glo bur du dmigs bzhin pa ni/ sad pa na mthong ba dang ldan pas mnyam pa ni ma yin no snyam du sems pa ni/ 'on te rmi lam gyi zhes bya ba'o/ /lan ni/ sad pa'i bum pa la sogs kyang / /zhes bya ba ste/ skyed byed kyang ngo / /de med kyang dmigs byed yod pa'i phyir/ de la dmigs pa yin no zhe na/ rmi lam na yang bag chags la sogs pa dmigs byed yod pa kho na yin te de med na mi 'byung ba'i phyir ro zhes bstan pa ni/ 'on te tshogs pa las ni 'byung bar mthong ba zhes bya ba ste/ skyed byed med par gnyis ka la yang mtshungs so zhes bya ba'i don to/ /de la skyed byed du rtogs pa'i rgyu mtshan res 'ga' ba'i dmigs pa ni/ rmi lam na yang zhes bya ba'o/ /thun mong ma yin pa gnyid log kyang rmi lam bzhin du de rnams la khyad par med par bstan pa ni/ gzhan gyis zhes bya ba'o/ /thun mong pa kho na ri la sogs pa rnams ma yin nam/ dmigs byed kyi tshogs pa dang bral bas long ba bzhin du 'ba' zhig dmigs pa ma yin no snyam du sems pa la/ rmi lam du mthong ba yang thun mong ba yin te/ rmi lam gyi tshogs pa dang bral bas 'ba' zhig ni ma yin no/ /de'i phyir de yang bden pa kho na yin par bstan pa ni/ ji ltar 'khor ba'i zhes bya ba'o/ /rmi lam du mthong ba nyid kyis rgyu'i skyon gyis 'byung ba yin la des na mi bden pa ma yin nam/ sad pa na mthong ba ni ma yin te/ gang gi phyir gnyid dang bral ba'i sems ni rang rig pa yin par bdag nyid rig pa ni sad pa'i gnas skas su brjod do/ /de'i phyir de ni de'i gnod byed yin no snyam du sems pa ni sad par rtogs pa zhes bya ba'o/ /gnyid dang bral ba rang nyid rig pa de ni rmi lam du mngon par 'dod pa la yang mtshungs par bstan pa ni/ rmi lam du yang sad pa'i blo/ /zhes bya ba'o/ / bden pa dang / cig shos nyid ni da ltar yang gnyis ka la gnas pa ma yin te/ gsal bar snang ba'i khyad par gyis/ /zhes bstan pa ni/ sad par 'dod pa'i zhes bya ba'o/ /sad par 'dod pa'i gnas skabs la rmi lam du mthong ba med do zhes bya bar shes pa yin te/ des na mi bden pa yin no/ /de'i phyir khyad par med pa ma grub po/ /snga ma la ni gnod med na/ phyi ma skye ba grub pa ni snyam du sems pa ni/ 'on te 'di ni mi bden no zhes bya ba'o/ /gang gi phyir 'di med do zhes bya ba'i shes pa de ni de'i rmi lam na yang de dang bral ba'i dmigs pa yod pa yin te/ goms pa med pa 'ba' zhig las ni de las byung ba de ma yin la/ de'i phyir 'di la yang khyad par med pa kho na yin par bstan pa ni/ sad pa'i rtog pa la yang zhes bya ba ste/ / de ltar rtogs pa nyid kyis ni med do zhes bya bar rtogs pa kho nas so/ /de nyid ces bya ba ni med pa nyid do/ /de'i mtshan nyid kyis kyang zhes bya ba ni de'i ngo bo nyid de med pa nyid shes byar gnas pa yin na/ de'i shes pa rgyu nyid las de 'byung ba ma yin te/ thal ches pa'i phyir ro zhes bya ba'i don to/ /'on te med do zhes bya ba'i shes pa las de nyid du mi 'gyur te/ so sor snang ba gsal ba'i phyir ro zhes zer pa la gzhan yang mi bden no snyam pa'i bya ba ste/ bden las zhes bya ba ni ma yin par dgag pa yin la bden med de 'dir dgag pa yin zhes bya ba ni med par dgag pa'o/ /de'i rang bzhin te/ rmi lam du mthong ba'i gsal ba ni de dang 'gal ba ni dmigs pa'i phyir gnyis ka yang mi rigs so/ /'thad pa ma yin zhes bya ba ni ma yin par dgag pa bstan pa yin la zhes bya bar mi 'thad do zhes bya bas ni med par dgag pa yin no/ /snga ma la 'thad pa ni de las gzhan nyid ces bya ba'o/ /phyi ma la ni/ med pa yang ma yin te zhes bya ba'o/ /yun ring nas dmigs pa'i ltos pa tsam khyad par ma yin par bstan pa ni/ skyed mos tshal gyis zhes bya ba'i ste rang gi rnam pa nyid la phyi rol tu mngon par sems pa ni rtog pa yin no zhes bya ba'i don to/ /ji ltar mngon par sems pa la mi slu ba can yin pa'i phyir/ gnod pa med par bstan pa ma yin nam/ rmi lam du mthong bas gnod pa ni ma yin no zhes bya ba'i don yin no zhes zer ba ni/ gal te rmi lam du dmigs pa'i bum pa zhes bya ba'o/ /mi slu ba can nyid kho na yin zhes zer ba ni bkrus ma thag tu zhes bya ba'o/ /lan ni/ rmi lam mthong ba bag chags pa'i/ /zhes bya ba ste/ rab tu dga' ba la longs spyod pa'o/ / de la mi slu ba la gnod pa can med pa ni rnal ma yin no/ /ci las she no/ rmi lam du slar yang de nyid la'am gzhan la yang ngo / /'di ni zhes bya ba ni/ rab tu dga' ba la longs spyod pa'o/ /rig phyir ro zhes bya ba ni de'i tshe kho na don byed par nyams su myong bas mi slu ba'i phyir ro/ /de'i phyir sad pa dang rmi lam yang mi slu ba dang cig shos dag gis tshad ma dang cig shos dag yin zhes bya ba'i don to/ /rmi lam dang cig shos nyid la mthong ba nyid kyis de dag gis mi bden pa dang cig shos nyid du rnam par phye ba kho na yin na rnam par dbye ba'i rgyu gzhan ci dgos snyam du sems pa la/ rmi lam cig shos zhes bya ba ste/ so sor snang ba nyid ni de nyid dang cig shos kyi rnam par dbye ba byed pa ma yin te/ khyad par med pa'i phyir ro/ /slu ba dang cig shos kyi rnam par dbye ba ma grub pa yin zhes bya ba'i don to/ /skyes mos kyis 'di la dmigs pa med pa'i phyir zhes bya ba mi rigs pa ma yin nam/ gang gi phyir med pa'i phyir zhes bya ba 'di ni dmigs pa ma yin te/ /med do zhes bya ba 'di dmigs pa yin pa'i phyir ro/ /nye bar brten pa dang bral na shes na cung zad skye mi 'gyur snyam du sems pa la/ 'di ni med ces shes pa ni zhes bya ba ni ste/ gzhan gyis rtogs par zhes bya ba ni mngon sum na ma rjes su dpag pas so/ /gzugs dang ro la sogs pa ni der snang ba'i mngon sum gyis rtogs pa yin te/ des na yod pa nyid ni gzhan las dben pa dang bral bas mi snang ba'i phyir ro/ /de des dben pa'i ngo bo kho na yin pa'i phyir shes pa yin te de la rung ba'i yul can rnams kyis mi shes kyang rang nyid shes pa'i phyir ro/ /de dang bral ba'i ngo bo 'ba' zhig ni mngon sum gyi rjes su 'brang bas shes pa ni bdag gi rnam pa'i skyed byed du mngon par sems pa yin no/ /des na 'di'i dmigs bya ni mngon par sems pa ma gtogs pa gzhan ma yin par bstan pa ni/ de lta bur gyur pa zhes bya ba'o/ /bag chags las byung ba yang de khyad par gang gis nges pa can gyi phyi rol gyi ngo bo la mngon par rlom pa yin no snyam du sems pa ni/ khyad par gang gis zhes bya ba ste/ 'di'i mngon par rlom pa'i bya ba 'di phyi rol gyis byas pa'i phyir rol yul yin pas de la dmigs pa med pa yin zhes bya ba'i don to/ / lan ni de la sems gtad pa zhes bya ba ste/ dran bzhin pa'i dgag bya la gtad pas ma rmongs par dran pa'i 'du byed kyi dmigs pa med pa ste/ /gzhan dmigs pas rmi lam las khyad par du byed pa yin no/ /'di sad pa yang yin la bdag nyid kyang yin pa de la mngon par rlom pa de 'di la yod pa des rmi lam gyis so/ /de lta bu'i dmigs pa'i bskyed bya shes pa de ni der rlom pa yin la de 'dzin byed ni ma yin la/ de'i med pa nyid 'dzin pa ni ma yin no/ /de'i ngo bo snang ba bzhin du snang ba ma yin pa'i phyir zhes bya ba'i don to/ /de nyid sad pa yin par dbye ba gang gis mngon par 'dod pa yin zhes bya ba la sad par mngon par rlom pa zhes bya ba smos te/ nyal ba'i lus ni rmi lam na'o/ /gzhan la ni gzhan du zhes bya ba'i khyad par yin no/ /ma nges pa nyid ni ma nges pa can no/ /rjes su sgrub pa med pa ni rnam par rtog pa med kyang de'i rtsa ba dben pa dmigs pa yod pas/ de'i 'bras bu the tshom med par 'gro ba'i tha snyad ni/ mi dmigs pa'i mtshan nyid yin pa'i phyir gtso bo ni rtsa ba yin te/ med ces bya ba'i rnam par rtog pa yang de'i rjes su 'brang ba nyid kyis tshad ma yin pa'i phyir ro/ /de dang bral ba tshad ma ma yin nam zhes zer ba la/ rnam par rtog pa zhes bya ba'o/ /phan tshun 'gal ba ni skad cig ma dang / de ma yin pa dang rnam par rig pa tsam dang de ma yin pa dag go/ /de'i phyir so sor snang bzhin pa ni rmi lam mam gzhan du yang brdzun pa ma yin no/ /de lta yin na mi bden pa nyid ji ltar yin/ tha snyad pa rnams ni rmi lam du mthong ba la mngon par rlom pa yin par bstan pa ni/ de'i phyir zhes bya ba ste/ 'dis ni ma nges pa nyid mi snang ba mi dmigs pa yin no zhes bya ba'i don to/ /sems kyi nye bar len pa nyid lus yin la shi ba lus la yang yod pas/ lus ni gnas pa yin par sems/ /ldog pa med par thal bar 'gyur/ /zhes bya ba la sogs pas bstan nas da ltar ni gang gi tshe yang yod pa de'i tshe yang de nye bar len pa ma yin te/ bzlog par dmigs pa ma yin zhes bstan pa ni/ gzhan yang rig pa lus las tha mi dad pa dang zhes bya ba'o/ /lus nye bar len pa ni tha mi dad pa yin na 'ji ba dang bum pa dag gis nye bar len pa dang nye bar blang bya bzhin du mngon par gsal ba'i sems pa can du smra ba po'i mngon par 'dod pa zhes bya ba rdul phra rab kyis lus kyi phyogs kyi skyon ni yan lag can gyi phyogs la yang mtshungs pa yin par bstan pa ni/ 'on te yan lan can zhes bya ba ste/ rdul phra rab rnams yod na yan lag can rdul phra rab gnyis pa la sogs pa rim gyis 'byung ba'i phyir ro/ /re zhig rdul phra rab gnyis pa ni rdul phra rab la gnas pa yin la rgyu la yon tan gyi rim gyi yon tan dang ldan pa'i sems pa rdul phra rab kyi sems pa can du 'gyur ba'i 'bras bu las sA lu'i khyad par bzhin du med pa kho na ni ma yin te/ de mi mthong ba'i dbang gis 'byung ba yin par ni mi rigs te mi mthong ba khas mi len pa'i phyir ro/ /de nyid kyis na myos pa'i nus pa bzhin du rnam shes ni ma yin te/ de bzhin du 'bras bu 'og ma rnams la yang rgyu'i rim gyis rdul phra rab 'dzin pa'i nye bar mtshon pa'i don nyid kyi phyir sems pa can brjod bya yin no/ /'o na te de dag las skyes pa zhes bya ba 'dis lus las sems pa can tha dad pa yin la/ rgyu'i don ni nye bar len pa'i don du yin te sems pa can gyi lus yin zhes bya ba'i don to/ /phyogs 'di la yang de'i 'dzin byed med pa'i phyir de dag las so zhes 'dzin pa yin par bstan pa ni/ de lta yin na zhes bya ba'o/ /shes pa ni rang dang gzhan gyi rig pa ma yin nam zhe na/ rang rig pa ni gzhan rig pa ma yin no zhes bya ba ste/ shes pa ni rang la yod par rig pa'i bya ba yin na/ ji ltar phyi rol la rnam par gcod pa yin tha dad par thal bar 'gyur ba'i phyir ro/ /gal te shes pa rang nyid kho na rig bya yin na gzhal bya yang de bzhin du 'gyur ro/ /de'i phyir 'di ni rig byed gzhan yin pa kho nar rig pa yin te/ gsal byed mar me la yang de yod do snyam du sems pa ni/ 'on te gzhan rig pa nyid ni gzugs la sogs pa lta bu'o/ /bde ba nyid kyang rig bya yin pa'i phyir gzhan kho nas yin no zhes zer ba ni/ gzhan du gyur pa nyid ces bya ba'o/ /lan ni gzhan du gyur pa zhes bya ba ste/ sngon po dang bde ba la sogs pa thams cad gzhan du gyur pa kho na rig pa yin pa'i phyir rnam shes med par 'gyur ro/ /bde ba la sogs pa 'dzin par byed pa gzhan don gyis go bas sam/ bdag dang yid phrad pa las byung ba'i mngon sum gyis rig pa kho na ma yin nam snyam du sems pa la/ gang la rig pa zhes bya ba smos te/ rig bya nyid du thams cad snang ba yin na rig byed nyid du 'gal ba yin no zhes bya ba'i don to/ /'on te reg par byed pa nyid kyis rig par byed pa ni de gang yin lus la sogs pa yang ma yin la bde ba yang ma yin te/ rig bya yin te/ rig bya yin pa'i phyir ro/ /gzhan yang ma yin te/ mi snang ba'i phyir ro zhes bstan pa ni/ bde ba dang sngo sogs zhes bya ba'o/ /snang ba ma yin par ni bden mod kyi rtogs pa yin no zhe na/ rtogs bzhin pa ni ri bong gi rwa bzhin du rtags ma yin pa'i phyir ro/ /med pa yin par bstan pa ni/ mig sogs zhes bya ba'o/ /bde ba la sogs pa'i shes pa ni gzhan du mi 'thad pas mig la sogs pa'i byed pa'i ngo bo bdag gi rnam par 'gyur ba'i blor brtags pa yin pa'i phyir rtags med pa yin par bstan pa yin no snyam du sems pa la/ 'bras bu'i sgo nas zhes bya ba'o/ /gang kho na 'bras bu'i shes pa'i rtags yin pa de kho na bsgrub byar ji ltar 'gyur zhes bstan pa ni/ de yang nus pa nyid ces bya ba'o/ /gzugs la sogs pa rnams kyi mig la sogs pa'i bya ba yin na/ res 'ga'i ngo bo yin la shes pa de phyis kyang mi 'byung ba des na dbang po la yod pa'am/ bdag la yod pa'i rnam par 'gyur ba'i ngo bor rtogs pa yin la de ni nus pa yin no snyam du sems pa ni dmigs pa'i gnas skabs zhes bya ba'o/ /dbang po la sogs pa'i 'gyur ba'i dbang gis dmigs bya'i ngo bo rdul phra rab re rer 'gyur bar bstan pa ni/ rdul phra rab re rer zhes bya ba'o/ /dbang po la sogs pa'i dbang gis shes pa 'byung ba kho nar dbang po rtogs pa nyid ma yin nam/ gzhan ni ma yin no/ /de'i phyir sngar ji lta ba'i ngo bo yin pa de lta bu kho na yin gyi de la khyad par ni med do snyam du sems pa la khyad par med par ni zhes bya ba'o/ /khyad par med na shes pa yod kyang ci las gzugs rtogs pa yin/ gang gi phyir gzugs ni gzugs so zhes bya ba'i long ba'i rnam par rtog pa yang sngon po la sogs pa mthong ba ni ma yin no/ /gzugs dang shes pa dag lhan cig pas skye ba kho na khyad par yin zhes bya bar ni mi rigs te/ lhan cig pa yin pa bzhin du lhan cig pa la yang khyad par med pa'i phyir ro/ /rang nyid la yod pa'i khyad par med na de rig pa zhes bya ba ma yin no/ /de bstan pa ni/ lhan cig nyid na nus dpog cing / /zhes bya ste/ rjes su dpog par bya ba yin pa'i phyir nus pa dmigs pa ni ma yin la khyad par med pa'i ngo bo yin pa'i phyir ma grub pa'i lhan cig pa ni gtan tshigs ma yin pa zhes bya ba'i don to/ /gang gi phyir de bzhin du rig bya nyid yin na rig byed med pa de'i phyir rang rig pa kho na rig par byed pa yin gyi sngon po dang bde ba la sogs pa ni rig pa las gzhan pa ma yin la de nyid rig pa'i bdag nyid yin pa'i phyir rnam par shes pa yin par bstan pa ni/ de'i phyir zhes bya ba ste/ de ni sems tsam yang yin la rang rig pa yang yin pa'o/ /rnam shes kyi bde ba la sogs pa zhes bya ba'i gzhi mthun pa ni rig pa can gyis ma rtogs pa ma yin nam/ sangs rgyas pas ni rtogs pa yin par de dag tsam gyis brjod pa yin no/ /gsor mdung rnams khyer la shog ces bya ba bzhin du shes pa ni bde ba zhes bya bar nye bar btags par 'gyur ro snyam du sems pa la gzhi mthun pa ni gtso bo dang zhes bya ba ste/ skyes bu sems pa zhes bya ba bzhin du gtso bo kho na yin te/ dbye ba ma dmigs pas gsor mdung can bzhin du nye bar btags par mi rigs pa'i phyir ro zhes bya ba'i don to/ /gal te zhes bya ba ni gtso bo dang cig shos kyi rnam par dbye ba ste rgyu'i rjes su 'brangs nas khas blang bya yin gyi phan tshun bsres pa'i 'bras bu ni ma yin zhes bya ba'i don to/ /me long gzhag pa la bzhin du blo gcig pu la sngon po la sogs pa gzhan gyi gzugs brnyan 'pho ba nyid du snang ba ma yin nam/ de'i phyir 'dzin pa dang tha dad pa kho na yin no snyam du sems pa la/ goms las de lta bur gyur pa'i zhes bya ba ste/ sngon po la sogs pa nyid sngon gyi bag chags kyi dbang gis rmi lam du rtogs pa'i bdag nyid ni gzhan dang gzhan du yang 'gyur gyi rtogs pa'i ngo bo ni gzhan ma yin te/ de yod kyang sngon po la sogs pa'i rang gi ngo bo la khyad par med pa'i phyir ro/ /khyad par yod na yang dmigs pa las gzhan med pa'i phyir ro zhes bya'i don to/ /gal te sngon po'i khongs su gtogs pa yin pa de lta na ser po ni de ma yin pa'i phyir de rig pa ma yin la ngo bo gcig pa nyid kyi blo'i phreng ba yin no snyam du sems pa la/ gzugs sogs gzhan dang gzhan dag tu/ /zhes bya ba ste/ sngon po rig pa bzhin du ser po rig pa yang bag chags ji lta ba bzhin du 'byung ba kho na yin no zhes bya ba'i don to/ /dmigs pa med pa'i shes pa kho na lus la brten pa ma yin nam snyam du sems pa la/ rnam par shes pa ni zhes bya ba ste/ gzhan de rten dang ngo / /de las cir 'gyur zhe na/ des na bde ba zhes bya ba ste/ nye ba las bag chags sad pa ni bde ba la sogs pa'i shes pa dang 'dres pa yang dang po de ltar skyes pa kho na yin no/ /gzhan gyi bde ba la sogs pa dang 'dres par 'gyur bar mi rigs pa ma yin nam/ gang gi phyir mngon du ma byas pa'i shes pa dang 'dres par 'gyur bar mi rigs pa ma yin no snyam du sems pa la/ gang gi tshe rnam pa thams cad kyi rtags 'dzin pas rnam pa thams cad rig pa yin la goms pas ni gsal ba yin zhing de'i tshe mngon du byed pas na mngon sum gyi shes pa ni gzhan gyi bde ba dang / sngon po bzhin du 'dre bar byed par brjod pa yin par bstan pa ni goms pa las zhes bya ba'o/ /rnam par dbye ba 'di ci las yin zhes bya ba ni rig pa las ni ma yin la rig bya tha dad pa ma yin no/ /khyad par ni gzhan khyad par du byed pa yin no/ /de'i phyir phyi rol zhes 'dzin pa las tha dad par 'dzin pa yin no zhes bya ba'i don to/ /med par zhes bya ba ni/ rig pa zhes bya ba'i byed pa 'di dang sbyar bar bya'o/ /ltos pa yod min na zhes bya ba ni/ de'i ngo bo'i ltos pa'o/ / /don dam du ste/ mngon sum du snang bas so/ /kun rdzob ni rtag pa can gyi mngon pa'i nga rgyal gyis rnam par dpyod pa ste rnam par rtog pa'i byed pa kho na rang gi rnam pa la phyi rol ba nyid du 'dzin pa yin gyi 'di la gzung ba ni med do/ /yod kyang rang gi mtshan nyid las khyad bar med par thal bar 'gyur te/ brjod bya ma yin pa'i phyir ro zhes bya ba'i don to/ /khu khrag gi lus ni nur nur po la sogs pa yin gyi myos pa'i nus pa bzhin du nus pa ni nus pa ma yin no/ /rnam shes lus la brten pa'i phyir shes pa'i nus pas rten lus g.yo ba yin gyi/ de med na shi ba'i lus ni ma yin no zhes bya ba ni mi rigs so/ /reg pa'i rnam shes khyad par can ni 'bad pa ste nang gi reg bya'i rnam pa'i rnam shes nyid yin la de yang ka ba la sogs pa la med do zhes ba'i don to/ /shes pa ni bde ba la sogs pa dang sdug bsngal la sogs pa tsam rig bya yin pa'i phyir khyed kyi la yang skyon mtshungs pa ma yin nam 'dod chags dang bral ba yang gzhan gyi 'dod chags rig pas 'dod chags can du 'gyur ro snyam du sems pa ni/ khyed la yang zhes bya ba'o/ /phyi rol nyid shes pa'i bdag nyid yin par ni kho bo cag 'dod pa ma yin gyi 'o na ci zhe na/ phyi rol la sogs pa'i tshogs pa las de dang 'dra ba'i shes pa skye ba yin no/ /de'i phyir de nyid yin par mi 'gyur la bdag nyid thams cad kyis 'dra ba yang ma yin te/ phyi rol dang cig shos la sogs pa bzhin du khyad par yod pa yin no zhes bstan pa ni/ de'i rnam pa can gyis zhes bya ba'o/ /'on te yan lag can nyid shes pa las tha mi dad pa'i phyir dmigs pa nyid kyi rten yin gyi rdul phra rab dag ni zhes bya ba'o/ /shes pa'i dmigs pa'i 'bras bu las tha dad pas de rtogs bya ma yin pa'i phyir dang rtogs pa gzhan med pa'i phyir de'i phyed de rnams rdul phra rab rnams med pa nyid du 'gyur bar bstan pa ni med pa nyid ces bya ba'o/ /mi shes pa'i bdag nyid yin pa'i phyir shes pa'i bdag nyid kyi lus ni gzhan du mi 'thad pas kyang brtag bya ma yin par rtogs par 'dod pas de bstan pa ni/ phra rab rdul rnams lus kyi ni/ /zhes bya ba ste/ lus kyi de'i rigs su rtogs pa yin na/ rdul phra rab re re nas rig par byed par 'gyur ba yin te/ rnam shes kyi bdag nyid yin pa'i phyir ro/ /de lta bu'i lus kyi de 'dra ba'i rigs su ci'i phyir rtog pa yin zhes bstan pa ni/ phra rab rdul rnams kyi ngo bo nyid du zhes bya ba ste/ phyed snga mas ni rnam shes kyi bdag nyid kyi rdul phra rab kyis byas pa'i phyir zhes rdul phra rab rnams rtogs bya nyid du brjod la phyi mas ni byed pa po rnams so/ /de'i phyir de ltar rdul phra rab bkag pas yan lag ma lus pa bkag nas de'i phyir zhes bya ba smos so/ /g.yo ba dang mi g.yo ba'i skyon kho nas sun 'byin pa yin na bsgribs pa dang ma bsgribs pa la sogs pas ci dgos snyam du sems pa la/ yan lag can gyi rang bzhin gyi rdzas zhes bya ba smos so/ /phrad pa la sogs pa'i rgyu yin pa'i 'du ba'i rgyur 'gyur ro zhes bya ba'i don to/ /bya ba can zhes bya ba ni yan lag can bsgribs pa na zhes bya ba'o/ /yon tan can zhes bya ba ni gcig tshon gyis bsgyur na zhes bya bas sun phyung bar bstan ba ni/ tshon gyis bsgyur ba la yang zhes bya ba'o/ /yang na gal te sems kyi nye bar len pa lus yin na shi ba la yang 'gyur te nye bar len pa yod pa'i phyir ro zhes bya bar rigs la nye bar len pa yan lag can ni nyes pa mi mnyam ba la sogs pas ldog pa yin pa'i phyir zhes bya ba ni mi rigs te 'tsho ba'i gnas skabs na yang tsher mas phug pa la sogs pas lus kyi yan lag can ldog pas 'chi bar thal bar 'gyur ba'i phyir ro/ /snang bar mngon par 'dod pa'i yan lag can khyab byed ni nye bar dmigs pa yod pa ni ma yin la de'i yod par tha snyad byed pa yang nye bar dmigs par byed pa ma yin gyi 'di yod do zhes bya ba bkag pa yin no/ /gcig tu 'dzin par yul rags pa rnams ma yin nam/ ji ltar nye bar dmigs pa snang ba yin/ 'phen sel med pa ni steng 'og la sogs pa'i cha tha dad kyang gcig tu snang ba yin gyi du mar ni ma yin te/ rgya khyon che bar dmigs pa'i rgyu mtshan ni che ba nyid yin pa'i phyir ro/ /ji ltar nags kyi phreng ba rgyu mtshan ma yin pa ni so so bar mi 'dzin ba ma yin nam de bzhin rdul phra rab kyi rgyu mtshan las sna tshogs pa nyid du mtshon pa'i tha dad pa rnams kho na gcig tu 'dzin pa'i yul yin par mi rigs te/ sna tshogs pa nyid du 'dzin pa'i phyir ro/ /nags la sogs pa la ni nye ba na gnas pas de 'dzin par yin no snyam du sems pa la yan lag can 'dzin pa yin pa la gnod pa can bstan pa ni/ lag sogs g.yo na zhes bya ba ste/ gang la dmigs pas sna tshogs pa nyid du nye bar mtshon pa de la dmigs pas tha mi dad par shes pa yin la de'i dmigs pa yang yan lag rnams kho na yin gyi gzhan ma yin pa'i phyir lag pa la sogs pa tha dad pa g.yo ba yin na thams cad g.yo bar 'gyur te de dang tha mi dad pa'i phyir ro/ /khyab bya las tha mi dad pas khas blangs pa yin pas khyab byed du khas len pa yin no/ /g.yo bzhin pa las tha mi dad pa g.yo ba kho nar snang bar 'gyur ba de ltar mi snang na tha dad pa yin pa'i phyir khyab par byed pa med do/ /phyogs gcig 'dzin pas kyang yan lag can 'dzin pa kho na yin par dgongs pa yin par nye bar mtshon par byed pa g.yo ba dang cig shos mthong bas dmigs pa ni de bzhin du tha mi dad pa la yang gcig tu ma dmigs na thams cad ma dmigs par 'gyur ro/ /nye bar dmigs pa yang yin na tha dad pa'i phyir khyab par byed pa med par bstan pa ni gcig ces bya ba ni g.yo ba'o/ /snga ma dang phyi ma'i ngo bos gcig pa yin pa'i phyir so sor snang ba tha dad par nye bar mtshon par byed pa rang gi 'dod pas bstan pa ni/ tshon gyis zhes bya ba ste tshon gyis bsgyur ba gcig snang ba na de dang tha mi dad pa yang ma yin pa bzhin du snang bar 'gyur te/ tha mi dad pa khyab bya yin na ni der snang ba yod na ni snang ba'i khyab byed du 'gyur ro/ / de med na yang khyab bya dang tha dad pa med par 'gyur ro/ /'on te yan lag rnams nyid g.yo ba la sogs pa dang ldan pa yin gyi yan lag can ni ma yin na gzhan dmigs pa ma yin la sna tshogs pa nyid du dmigs pa'i mtshan nyid kyi yul la tha dad pa med par shes pa ma yin no/ / g.yo ba dang bsgribs pa la sogs pa ni khyab bya la 'jug pa'i phyir de dang ldan pa nyid du cig shos tha dad pa las ma yin pa ma yin nam/ bdag dang nam mkha' la sogs pa bzhin du blo dang sgra la sogs pa zhes bya bar ni mi rigs te/ gcig nyid yin na ma khyab par mi rigs pa'i phyir dang ngo bo gzhan med pa'i phyir de'i phyir so sor snang ba phan tshun rjes su 'jug pa ma yin pas rgya che ba ni tha dad pa nyid ces bya ba'i don to/ /so sor snang ba tha dad pa'i rigs pa 'di kho na las tshogs pa gcig pa ste phrad pa ni tshogs pa can ma rtogs pa gsal ba yin par bstan pa ni/ gcig yod min zhes bya ba'o/ rdul phra rab re re rig par thal bar 'gyur ba ni/ re re nus pa nyid yin na/ cig car mang po 'byung bar 'gyur/ /zhes 'chad par 'gyur ba ma yin nam/ ji ltar snga ma bzhin zhes rjod par byed ce na/ skyon med de/ de'i phyir thams cad sa bon dngos shes par bstan pa'i phyir ro/ /rdul phra rab rnams re re nas dmigs pa ma yin te/ ches phra ba'i phyir ro 'dus pa la yang de rnams nyid 'di dag yin pa'i phyir phul du byung ba med pas dmigs pa med pa nyid yin la rten nyid ni de'i nye bar len pa nyid yin no snyam du sems pa ni/ khyad par med pa'i phyir zhes bya ba ste/ dmigs bya ma yin pa sha za la sogs pa rnams 'dus nas yang dmigs byar mi rung zhes bya ba'i don to/ /khyad par can rnams zhes bshad pa ni rigs pa'i gnas skabs na yang zhes bya ba'o/ /dbang yul zhes bya ba'i bshad pa ni/ dmigs pa yin pa'i phyir ro zhes bya ba'o/ /khyad par med pa'i phyir mi dmigs pa nyid ma yin no zhes bya bas pha rol pos smras pa bkag pa yin no/ /'dus ba'i gnas skabs na ni rdul phra rab kyi yul ma yin te/ snam bu la snal ma'i tha snyad bzhin du'o zhes bya ba lta bu'o zhes slar sel ba bstan pa ni/ de nyid kyi phyir zhes bya ba ste/ rdul phra rab kyi tha snyad kyi yul nyid ni 'di kho na yin te gzhan med pa'i phyir ro/ /tha snyad gzhan med na de nyid kho na 'dor ba yang ma yin no/ /de'i phyir nye bar dmigs pa la gegs mi byed pa nyid 'o na rdul phra rab yin zhes bya ba'i don to/ /yang na sems kyi nye bar len pa 'byung ba yin na phyi rol gyi 'byung ba rnams la yang thal bar 'gyur te thal ches ba'i phyir ro zhes bya ba la sogs pa 'gyur ba yin par bstan pa ni snga ma bzhin zhes bya ba'o/ /'on te lus kyi rnam pa'i khyad par med pa'i phyir phyi rol la sems pa can med de khyad par med pa las kyang rdul phra rab nyid yin no/ /de'i phyir yang rtogs pa ma yin te/ sems rten pa 'dzin par byed pa nyid kyis yin no snyam du sems pa ni/ khyad par med pa'i phyir zhes bya ba'o/ /lus kyi rnam pa ni shi ba'i lus la yang yod pa'i phyir sems su thal bar 'gyur bar bstan pa ni/ shi ba'i lus la yang lus kyi rnam pa'i khyad par med par ma grub pa'i phyir gang la de'i khyad par med pa kho nas rdul phra rab nyid yin la de'i phyir sems kyi dmigs pa kho na nyid kyis brten pa nyid ces bya ba ni ma yin no zhes bya ba de la/ khyad par can rnams zhes bya ba smos te/ phul du byung ba can rnams med kyang phyi rol gyi 'dus pa rnams dbang yul nyid de dbang po'i gzung ba nyid dmigs bya nyid yin no/ de'i phyir shes pa'i dmigs pa nyid du rdul phra rab nyid ma yin no zhes bya ba'i don to/ /dbang po'i gzung ba nyid rdul phra rab rnams so so la med kyang 'dus pa nyid la sgra la sogs pa bzhin du yod pa ma yin nam snyam du thogs pa ni ma yin te/ chen po'i 'bras bu ma yin pa'i phyir ro/ /chen po gcig ni de ltar 'gyur ba ma yin te/ gseng med pa'i phyir ro snyam du sems pa ni/ gal te rdul phra rab tsam yin na zhes bya ba'o/ /snang ba nyid las tha dad pa phul du phyung ba gzhan la sgrib pa la sogs pa rgyu ma yin par bstan pa ni/ 'dis ni sgrib byed ces bya ba'o/ /snang ba nyid phul du byung ba kho nas thogs pa la sogs pa'i 'bras bu 'byung ba gzhan med kyang mthong ba yin par bstan pa ni/ dngul chu gser sogs zhes bya ba ste/ dngul chu gser la zhugs pa ni rdul phra rab kyi bar du tha dad pa ma yin pa'i yan lag can yin la gser yang rdzas su ma brtsams pa yin te/ rigs mthun pa ma yin pa'i phyir thogs pa dang bcas pa'i dmigs byar mthong ba ma yin te/ de la phul du byung ba yod pa'i phyir ro/ /de bzhin du rdo bsregs pa yang yin no/ /de 'dis ni rdo dang 'bar ba'i rdzas nyid ma zhig pa thogs pa dang bcas pa 'dres pa yin zhes bya ba gsal ba yin no/ /yan lag so so ba yin no yan lag re re 'dres pa ma yin te khab la sogs pas bzhin du yan lag rnams drub pa ma yin pa'i phyir thogs pa med par brjod du gal te rdul phra rab tsam so sor ni dbang po las 'das pa yin na 'dus pa ji ltar dbang yul yin zhe na/ dbang sogs so sor zhes bya ba ste/ dbang po las 'das pa'i dbang po yang dmigs bya'i shes pa skyed par byed pa mthong ba yin zhes bya ba'i don to/ /'on te dbang po la sogs pa so sor nus pa med kyi/ dngos po gzhan phrad pa yod na nus par 'gyur ro zhe na/ 'dir thal mtshungs zhes bya ba ste/ phul du byung ba ma skyes na phrad pa nyid du mi byed la gzhan ni de rgyu ma yin te/ des byas pa nyid yin na 'di'i zhes bya ba'i 'brel pa med pa'i phyir ro/ /de dang 'du ba las yin no zhe na/ de nyid 'di rgyu nyid yin ba'i phyir rtogs pa bzhin du de yang mi 'gyur ro zhes bya ba'i don to/ /gser dang dngul chu la sogs pa phan tshun tha dad pas rdul phra rab rnams ni 'bras bu rtsom pa ma yin pa'i phyir dbang po las 'das pa ma yin nam mngon sum pa ni don gzhan phrad pa yin la des khas mi len na rig pa med par thal bar 'gyur ro snyam du sems pa ni/ phrad pa snang ba zhes bya ba ste/ mthong ba'i yul phrad pa med na gang yang med pa'i phyir de rnams la de'i nus pa rjes su dpog pa yin te dbang po'i yul nyid kyi nus pa zhes bya ba'i don to/ /dbang po'i yul nyid kyi nus pa med na phrad pa med la rlung dang nags phrad pa bzhin pa de rnams mngon sum du 'gyur ba yin par bstan pa ni/ ga la rtogs zhes bya ba ste/ mi snang ba nyid ni don gzhan phrad pa nyid la gtan tshigs ma yin no/ /'on kyang de rnams kyi de la nus pa bskyed pa la zhes bya ba'i don to/ /dngul chu dang gser la sogs pa'i ngo bo snang ba gzugs dang ro la sogs par snang ba phrad pa dang 'gal bar bstan pa ni/ ro gzugs la sogs phrad pa 'ga'/ /zhes bya ba ste/ gzugs la sogs pa dang ldan par snang ba ni/ yongs su brtags ba'i phrad pa dang 'gal ba yin te/ dro ba dang grang ba lta bu'o zhes bya ba'i don to/ /'on te rten la yod pa de'i brten pa phrad pa la nye bar brtags pa yin te/ khri la 'dug pa la khri'i sgra lta bu'o zhes zer ba na/ nye bar btags pa las zhes bya ba'o/ /khri dang de la 'dug pa kho na bzhin du rdul phra rab dang de'i phrad pa dag so sor snang ba tha dad par 'gyur la de rnams rtag tu ma dmigs pa yin na gzugs bzhin du dmigs bya yin par nye bar btags pa ma yin no/ /nya phyis la dngul bzhin du lhag par sgro 'dogs pa yang 'dis bsal ba yin no/ /dkar po la ser po'i shes pa'i rigs pa yang tha dad par mthong ba med na mi rigs so zhes bya ba'i don bstan pa ni/ blo tha dad par zhes bya ba ste/ gzugs bzhin du gcig ni bsags pa yin pa'i phyir rdul phra rab 'dus pa tsam phul du byung ba skyes pa'i dbang po'i yul yin zhes bya ba'i don to/ /gzugs la sogs pa dang ldan pa snang ba min pa'i phyir phrad pa ni/ snang ba 'ba' zhig ma yin te/ de las gzhan pa phreng ba la sogs pa'i tshad kyi yon tan gzhan mthong ba'i phyir zhes bya ba la/ phreng ring zhes bya ba smos te/ nges pa can gyi phyogs dang yul rnams la dngos po rnams ma phrad pa yin yang phreng zhes bya ba ni grangs mang po nyid yin yang tshad dang ldan pa ma yin la nye bar btags pa yang ma yin te/ ji skad bstan pa'i rigs pa las so/ /de 'di phrad pa la sogs pa khas blangs nas gzugs la sogs pa'i yon tan dang 'brel pa med pas de dang ldan pa'i shes bya gzhan min par yin lag can spangs pa brjod nas da ni gzugs dang ro la sogs pa'i nges par snang bas gzhan gyi snang ba med pa ni med pa'i tha snyad du brjod pa yin no/ /grangs dang phrad dang zhes bya ba ste/ thag nye ba'i dngos po gnyis dang de'i brda las byung ba'i sgra yang snang ba yin gyi phrad pa gzhan nam de'i sgra yang ma yin no/ / dbang po'i yul nyid kyi nus pa las nus pa gzhan ni sgrib pa la sogs pa'i 'bras bu yin no zhes bya ba pha rol po'i gzhung spong bar byed par bstan pa ni/ rdul phra rab rnams zhes bya ba ste/ yan lag can gyi nus pa gzhan dang 'brel pa ni de nyid med pa ste/ yan lag can gyi nus pa gzhan med na'o/ gser dang bcas phyir zhes bya ba ste/ phan tshun 'dres pa yin na gong bu rdul phra rab tsam thal bar 'gyur ba'i phyir rdul phra rab rnams ma 'dres pa yin par khas blangs pas rlung la sogs pa'i sgrib par byed pa'i snam bu la sogs skar khung lta bur 'gyur ro/ /gegs med pa ni phan tshun nang du ste khung du rlung la sogs pa 'jug pa gang dag gis de rnams de lta bur ro/ /gang dag gis yan lag can skyed par byed pa yang phul du byung ba skye bar mi byed na mi srid par bstan pa ni/ reg pa med par zhes bya ba ste/ gang gi tshe yang phan tshun ma reg pa kho na ma mthong ba las nye bar gnas pa'i rdul phra rab rnams don gzhan bzhin du sgrib pa la sogs par byed pa yin la de'i tshe yang so so yin pa ni tshang ba'i phub ma gtor ba bzhin du mi 'gyur ba kho nar bstan pa ni/ rdul phran rnams ni 'dres min yang / /zhes bya ba ste/ mthong ba 'di yang thag ring ba'i rgyu mtshan gyi so so ba nyid mi 'dzin gyi bar mtshams med par snang bar bstan pa ni/ ji lta bar mtshams dang bcas pa/ /zhes bya ba ste/ rab rib can gyis skra nyag re re mi 'dzin yang 'dus pa mi 'dzin pa ni ma yin no/ /de bzhin du rdul phra rab kyang mi snang ba kho na snang bar 'gyur zhes rgol bas gnod pa yang ma yin la dbang po rnams yul ma yin pa la 'jug pa'i skyon yang med do/ /rab rib can la ni skra rnams dbang po'i yul nyid du dgos pa can ma yin no/ /rdul phra rab rnams kyang rnal 'byor pa'i dbang po'i yul yin zhes tshig yod pa'i phyir ro/ /de'i phyir gang gis 'dus pa 'dzin pa des gcig 'dzin pa ma yin zhes bya ba'i dgos pa can ma yin no/ /rdul phra rab kyi tshogs la brten nas yan lag can la 'dus pa'i mtshan nyid du sgrub pa ni/ de la gnod pa'i rgyu mtshan ma yin zhe na/ bya ba dang 'gal ba'i phyir sun 'don pa ma yin pa ma yin nam/ rag las pa gzhan du mi 'thad pas rtogs bzhin pa ni de nyid la gnod par byed pa ma yin no/ /de med na rang nyid med pa'i phyir ro/ /rigs pa brgya byin che ba yin gyi gcig ni rgya che ba ma yin pa ma yin nam/ yul sna tshogs pa la phan tshun rjes su mthun pa ni gcig ma yin no/ /de ltar 'ga' yang rtog par byed pa yang ma yin te/ so sor snang ba nyid de lta bu'i rnam pa yin pa'i phyir ro/ /des na 'jig pa ni blo la brten pa'i phyir mi rigs te/ rdul phra rab rnams kho na snang ba'i phyir/ mi snang na de la 'du ba can gyi rdzas snang ba yin par ci las yin/ yan lag 'dzin pa ma yin te/ mi gsal ba'i snang ba la yang chu skyar du 'dzin pa la rgya che ba dmigs pas yan lag rnams 'dzin pa'i phyir ro/ /des na mtha'i snang ba la yang yan lag snang ba nyid yin pa'i phyir rdul phra rab rnams ji ltar dbang po las 'das pa yin/ 'on te snang bas bzhin du de yan lag rnams kyang snang ba kho na'i phyir dbye ba yin no/ / de lta ma yin te/ de la yang yan lag yod na snang ba nyid du thal bar 'gyur ro/ /mi snang ba nyid yin yang dbye ba nyid ma gtogs pa'i phyir de kho na rdul phra rab rnams kyang dbang po'i yul nyid yin par ma nyams pa yin no/ /gseng med pa'i shes pa bzhin du gseng med pa'i 'bras bu bsgribs pa la sogs pa'i 'bras bu 'di nyid kyi yin par bstan pa ni/ de bzhin du 'bras bu gzhan yang zhes bya ba smos te/ rdul phra rab rnams kyang phra ba nyid kyis dbye ba ma nges pas de ltar snang ba ni thams cad yul gcig la 'dres na gong bu rdul phra rab tsam du thal bar 'gyur ba dang / rdul phra rab cha shas can du thal bar 'gyur bar rtogs pa yin par bstan pa ni/ 'di la yang zhes bya ba ste/ bu ga can rnams kyi rgyu mtshan can gyi dbang gis bu ga med par mthong ba ma yin gyi sgrib pa la sogs pa 'bras bu yang mthong ba yin par bstan pa ni/ dper na zhes bya ba ste yan lag can med kyang gnyi gas dngul chu dang gser la sogs pa sgrib pa la sogs pa byed par mthong bar bstan pa ni/ yang na zhes bya ba'o/ /gal te ma mthong ba'i dbang gis rdul phra rab 'dus pa ni ma 'byar ba yin yang so so ba ma yin na/ phub ma phye ma chang pa la sogs pas 'phangs pa yang de nyid du 'gyur ro/ / 'di la brjod pa ni/ rtogs pa la sogs pa zhes bya ba ste/ ma mthong bas sbyar ba'i rdul phra rab rnams ji ltar mthong ba kho nar rigs pa yin no zhes bya ba'i don to/ /gtor ba dang cig shos la sogs pa'i 'bras bu sna tshogs pa can nyid kho na rtogs pa yin par bstan pa ni/ 'di ltar gzugs la sogs pa zhes bya ba'o/ /'on te rten dang phrad pa las dbang po phrad par rtogs pa ni ma yin no/ /'on kyang phrad pa kho na las yin no/ /'di la brjod pa ni 'o na rten mthong ba med par zhes bya ba'o/ /rdzas dang dbang po dang dngul chu dang gser dag gi phrad pa ni phrad pa ma yin te/ gang gi phyir rdzas dang yon tan dag la 'dir rtog pa ni ma yin no/ /de lta yin na khas blangs pa yin par bstan pa ni/ de'i tshe zhes bya ba ste/ rgyu ma yin pa ni 'du ba can gyi rgyu ma yin pa'o/ /dbang po dang ldan pa'i rdul phra rab rnams la 'du ba las phrad pa 'dzin pa yin na/ de'i khyad par dang ldan pa'i rdul phra rab rnams snang ba'am 'bras bu gzhan byed par 'gyur ba'i phyir yan lag ni rtogs pa'i yul ma yin par bstan pa ni/ de lta na ni 'o na zhes bya ba'o/ /ldan pa'i 'du ba 'dzin par byed pa nyid yin na/ phra ba'i yan lag gi phrad pa yang 'dzin par 'gyur ba yin par bstan pa ni/ phrad pa thams cad ces bya ba'o/ /thag ring ba la yang rags pa mthong ba'i rjes su dpog pa ni dbang po dang phrad pa yin par bstan pa ni/ ma yin te rags pa rnams kyang zhes bya ba'o/ /rgyu mtshan gyi rgyu nyid khas blangs pa dang 'gal ba sel bar byed pa ni/ 'on te phrad pa zhes bya ba ste/ dbang po dang phrad pa la dngul chu dang gser phrad pa'i rgyu mtshan yin pa de ci las yin pa bsams na/ gzhan med pas de kho na yin pa'i phyir de nyid skyon yin par bstan pa ma yin te/ 'du ba ni 'di la'o zhes bya ba'o/ /gal te 'bras bu rdzas yod pa yin na/ de dang dbang po'i dngos su 'brel pa yin pas brgyud pa'i ldan pa 'du bar rtogs pa la don med do/ /de lta yin na de bzhin rdul phra rab phrad pa yod na yan lag can du brtag pa des ci zhig bya/ de rnams kho na phrad pa'i khyad par dang ldan pa'i mngon sum pa rnams su 'gyur ro zhes zer ba ni/ 'on te 'bras bu'i rdzas zhes bya ba ste/ bzlog pa la yang zhes bya ba ni rdul phra rab rnams med na yang yan lag can du rtog pa yin te/ rnam par dbye ba'i rgyu med ces bya ba'i don to/ /gang yang yan lag can yod pa yin na rdul phra rab dang phrad pa dbang bo la mi srid do zhes bya ba de mi rigs te/ yan lag can dang phrad pa la yang de rnams dang yul tha mi dad pa nyid kyis de yod pa'i phyir ro zhes bstan pa ni/ yan lag can dang phrad pa ni/ /zhes bya ba ste/ yan lag can dang phrad par smra bas kyang rdul phra rab dang phrad par dgag par byed pa ma yin no/ /de'i phyir ldan pa'i dus kho na 'dzin par rgyu ma yin no/ /drug po 'byar ba yin pa'i phyir yan lag can bzhin du rdul phra rab dang phrad pas kyang dbang po dang phrad pa yin du chug kyang mthong ba la mi 'thad pa lung las sam gzhan las kyang ma yin par bstan pa ni/ yang na rtogs pa'i zhes bya ba ste/ phrad pa las yang dbang po'i phrad pas ro dang gzugs la sogs pa rnams kyang de'i ldan pa'i 'du pa las dmigs byar 'gyur ro/ /de ma mthong na de rnams la dbang po dang phrad pa med pa'i phyir de rnams ldan pa'i 'du ba las 'dzin par mi 'gyur ro/ /de bstan pa ni gzhan yang zhes bya ba'o/ /blo tha dad par zhes bya ba ni de yod pa dang med pa dag gis so sor snang ba tha dad pa'o/ / gzhan gyi ni de las gzhan pa la nye bar btags pa yang de kho na bzhin du 'gyur gyi gzhan du ni ma yin no/ /gzhan du yang snang bar bstan pa ni/ gzugs sam ro gang yin pa de nyid ces bya'o/ /gal te shin tu 'dres pa ni sna tshogs par mtshon pa nyid la gzhan du rtogs pa gang yin na rdul phra rab rnams kho na phra ba yin pa'i phyir de ltar 'gyur ro zhes bstan pa ni/ de lta na ni 'o na zhes bya ba ste/ rdul phra rab rnams dngar ba'i khyad par las phreng ba la sogs la de ltar rtogs pa'i rgyu nyid mthong ba yang yin te gzhan med pa'i phyir ro zhes bstan pa ni/ gal te rdul phra rab ces bya ba'o/ /dngar ba zhes bya ba 'di'i bshad pa ni/ dngar ba'i khyad par tsam nyid kyi/ /zhes bya ba'o/ /de'i na de lta'i zhes bya ba'i bshad pa ni/ de bzhin du zhes bya ba la sogs pa'o/ /rtsod pa ni rab tu rtsod pa'o/ /gzhi ni gang gi yan lag can gyi yul du mngon par 'dod pa dngar ba tsam nyid la rab tu rtsod pa tsam du rtogs pa nyid kyis mngon sum la sogs pa rtsa ba med pa nyid gtan tshigs su brjod pa yin la de'i phyir de bzhin du phrad par khas blangs pas de dang der bstan nas da ni phrad pa nyid de la rung bar mngon par 'dod pa dang tha dad pas ma dmigs par bstan pa ni/ gang yang brjod pa zhes bya ba ni phrad las shes na 'dir thal mtshungs zhes bya ba der ro/ /phrad pa can 'ba' zhig ni nye ba nyid kyis phrad pa can gyi shes pa'i yul kho na yin no/ /gnod pa med pa'i rnam rtog gi blo ni tha dad pa'i yul can yin la de'i phyir mngon sum yang tha dad par 'dzin pa yin no/ /gang gi phyir de ni gzhan d u mthong ba las skyes pa ma yin la des ma skyes pa ni de lta yin yang 'di yang de ltar 'gyur ba ni ma yin no snyam du sems pa la dngos po'i gnas skabs kyi khyad par mthong ba las skyes pa'i phyir de dngos po'i dbye ba'i phan byed ma ma yin no zhes bya ba'i don 'di sgra zhes dngos po zhes bya ba 'di'i rtogs bya bstan pa ni/ ldan pa yin no zhes blos bzung ba zhes bya ba'o/ /gnas skabs kyi khyad par bstan pa ni/ der ni nye bar skye bar gyur pa zhes bya ba'o/ /gnas skabs de ma gtogs par de byung na de dang ldan pa bzhin du so sor snang bar 'gyur bar bstan pa ni/ ji ltar don de mdun gnas pa/ /zhes bya ba'o/ /gnas skabs kyi khyad par yang de ma gtogs par med par bstan pa ni/ rjes 'gro'i ldog pa dag las ni/ /zhes bya ba'o/ /rjes su 'gro ba dang ldog pa nyid bstan pa ni/ 'ba' zhig pa zhes bya ba'o/ /'byor pa las ma 'byor pa gzhan nyid yin par mngon sum gyis rtogs pa ma yin nam/ de yang gnas skabs yin la de mngon sum pa yin pa kho nar bstan pa ni/ mngon sum gyis zhes bya ba ste/ dngos po gzhan kho na mngon sum gyis rtogs pa yin gyi/ gnas skabs gzhan ni ma yin no zhe na/ dngos po nyid gnas skabs gzhan dang phrad pa yang yin par brjod pa yin no/ /de nyid kyi phyir zhes bya ba ni/ gcig nyid dang phrad pa la sogs pa can phyi rol gyi bsdus pa las ldog pa'i nus pa can nye ba dang bskyed pa yang bor nas gzhan ni ma yin no/ /de yang rang dbang du rnam rtog gi shes pas 'dzin pa ma yin te/ 'o na ci zhe na/ rnam par rtog pa'i don yin no/ /ji ltar yin zhe na/ rnam rtog gis te tha dad pas so/ /dngos po tha dad pa ni med pa nye ba las ldog pa ni dngos po'i rjes su 'brang bas zhes bya ba ni rnam pa 'dis so/ /rnam rtog gi don la yang de ltar yin no/ /bag chags las dngos po tha dad pa'i rjes su 'brang ba'i phyir tha dad par rnam par brtag pa'i don la rnam rtog gi shes pa yin gyi phyi rol gyi dbye ba rnam par 'jog par byed pa ni ma yin la gzugs gcig dang ro gcig ces bya ba lta bu dang / rdza ma chag go zhes mya ngan byed pa dang / ma skyes pa'i bu rnams rgan por gyur pa bzhin du yang mthong ba yin no zhes bstan pa ni/ yon tan la sogs pa'am zhes bya ba'o/ /dngos po la med kyang rnam rtog gi tha dad par mthong bar byed par bstan pa ni/ sgra dang shes pa zhes bya ba nas gnas par 'gyur ba ma yin no zhes bya ba'i bar du'o/ / gal te bag chags kyi dbang gis de lta bu'i rnam par rtog pa don gyi yul la ma yin na 'on te de lta na/ ji ltar don mchog tu 'dzin pa yin/ bral ba dang ma bral ba la yang de nyid de la med kyang de kho na bral ba de la yod kyang med pa yin la zhes rjes su 'gro ba dang ldog pas bzung ba yin la tha dad pa'i shes pa de lta bu'i bag chags las byung ba ni de ltar gyur pa ma yin pa'i don de nyid de lta bu byed pa yin par bstan pa ni/ de la rjes su 'gro ba dang ldog pas zhes bya ba'o/ /rnam par rtog pa ni de lta bur gyur pa ma yin pa'i dngos po kho na de lta bur mngon par 'dod pa yin par bstan pa ni/ brtags pa nyid ces bya ba'o/ /rnam par brtags pa nyid ni don ma yin la skad cig ma dang skad cig ma ma yin pa nyid la sogs pa'i tha dad par 'dzin pa'i dbye bas dngos po yod na yul gyi rnam par dbye bas 'jug pa dang ldog pa dag tu mi 'gyur bar bstan pa ni/ rnam par rtog pa'i don tha dad pa ni zhes bya ba ste/ rjes su 'gro ba dang ldog pa dag gi bag chags gang yin pa de las rnam par rtog pa yin la de'i yul yang sgra yin no/ /gal te ldog pa yang dngos po las gzhan pa yin na de la dmigs pa'i rnam par rtog pa yang tha dad pa kho nas dmigs par 'gyur zhes bya ba 'di la ldog pa yang log pa las zhes bya ba smos te/ de nyid ni gseng gi dbye ba bsdus pa ma yin pa dang / mi ldan pa las ldog pa ni bsdus pa dang cig shos kyang de nyid yin pa'i phyir mi ldan pa las tha dad pa las rnam rtog gi yul yin no/ /de bzhin du mi ldan pa dang cig shos la yang sbyar bar bya'o zhes mjug sdud par byed pa ni/ de las kyang zhes bya ba'o/ /gzugs gcig ro gcig ces bsdus pa las bzlog pa ni rdzas kyi thun mong ba nyid dmigs nas de'i yon tan grangs su nye bar btags pa ma yin nam/ de bzhin du rdza ma chag pa rjes su dran pas bzung ba yin na/ mya ngan ni las yin pas nye bar btags pa yin no/ /nges par brtags pas bzung ba'i bul ni rgas pa byed pa po nyid yin no/ /de bstan pa ni/ gal te 'dir ni btags 'dod na/ /zhes bya ba'o/ /de lta yin na bsdus pa las ldog pa las gcig nyid yin na ni/ gzhan ma dmigs pa'i phyir yin la gnyi ga ni ma yin no/ /de lta yin na/ bsdus pa las ldog pa yin pas gcig pa nyid du nges par 'gyur te/ 'di ni de tsam yin pa'i phyir gsum nyid dam gcig nyid dag tu the tshom za bar mi 'gyur ro/ /de lta ma yin te/ bsdus pa ldog pa tsam gcig nyid yin la de'i khyad par ldog pa ni ma yin no/ /gnyis pa ma yin zhes bya ba 'di yang khyad par ldog pa yin pa ni/ gsum nyid la sogs pa'i bsdus pa gzhan dang thun mong ba yin no/ /de'i phyir the tshom ni yon tan nam gzhan yang rung ba ldog par byed pa ma yin par bstan pa ni/ de 'dod pa zhes bya ba ste/ zhig pa dang ma skyes pa dag bzhin du nges par rtog pa dang rjes su dran pa dag gis bzung ba'i dngos po thams cad la sgra dang shes pa ni chos can yod kyang bsdus pa ldog pa la sogs pa rgyu mtshan yin te/ gzugs la sogs pa bzhin du rdzas la yang gcig nyid du 'dzin par byed ces bya ba'i don to/ /rgyu mtshan gang gis zhes bya ba ni zhig pa dang ma skyes pa'i bum pa dang bu la sogs pa rnams la nges par rtog pa dang rjes su dran pas bzung thu ba nyid ni nye bar gdags pa'i rgyu mtshan yin no/ /nye bar btags pa ste de nyid yin par sgro gdags pa ni/ sgra dang shes pa'i rgyu mtshan gang gis shes pa de las gzhan sgro 'dogs pa ni ma yin te/ de dang 'dra ba nyid 'ba' zhig las de nyid las sgro 'dogs pa yin la de shes pa'i ngo bo dang de'i rjes su 'brang bar byed pa yang de'i sgra yin no/ /de bzhin du gzugs la sogs pa rnams la yang bsdus pa las bzlog pa'i rgyu mtshan las gcig nyid du sgro 'dogs pa dang de'i sgra yin no/ /de nyid du sgro 'dogs pa dang de'i shes pa dag la tha dad pa med kyang tha dad par brjod par sbyar bar bya'o/ /de nyid ces bya ba ni de rgyu mtshan nyid du nye bar btags pa de dag gi rgyu yin zhes bshad pa ni/ gal te zhig pa dang ma skyes pa dag la zhes bya ba'o/ /gzhan dag ni gang gi sgrar bstan pa'i rgyu mtshan kho na de nyid yin zhes mchog tu 'dzin par byed de rgyu ni rtags su bzung nas de rjes su dpag pa'i yul yin no zhes bya ba bzhin du pho rtags nyid yin la rgyu ni rgyu mtshan kho na yin no/ /zhig pa la sogs pa rnams la de'i sgra dang shes pa dag tu nye bar btags pa yin la gang zhig de la de'i rgyu mtshan yin pa de kho na thams cad la 'gyur la ma mthong ba'i rgyu mtshan gzhan btags pas ci zhig bya zhes bya ba'i don yin par 'chad do/ /btags pa ni de'i shes pa dag la tha dad pa med kyang rgyu dang de dang ldan pa nyid du brjod pa yin no bya ba dang de dang ldan pa dag gi tha dad par yongs su btags pas yin par bstan pa ni/ thog ma med pa'i rtog pa ste thog ma med pa'i bag chags gang yin pa de la sgro btags pa ni byed pa yin no/ /gzhan las mthong ba rgyu mtshan gang gis kyang gzhan du shes bzhin pa'i sgro 'dogs pa ni nye bar gtags pa yin par tha snyad 'dogs pa yin no/ gal te de 'di la bzhin du gzhan la yang mi 'gyur na de'i shes pa nyid du yang mi 'gyur bar bstan pa ni/ gal te kun la nyer btags min/ /zhes bya ba ste/ kun la ni gtso bo dang phal pa la yang ngo / /rgyu mtshan gang las phal bar mngon par 'dod pa de'i shes pa de kho na las gtso bor mngon par 'dod pa la yang der 'gyur te/ rgyu mtshan gzhan la mthong ba'i phyir ro/ /mthong na yang rmo bar 'dod pa'i mi la ba lang zhes bya ba la sogs pa kho na phal pa dang cig shos yin par bstan pa ni/ tha dad par ni ba lang gi lkog shal la yin la rmo byed kyi mi la sogs pa ni gtso bo'i tha dad khyad par yin no/ /gal te ga las ni ma yin pa ste/ gtso bo thams cad tha dad pa'i khyad par ma yin te/ kha cig yin no zhes bya ba'i don to/ /tha dad pa'i khyad par nyid med na gtso bo dang cig shos kyi dbye ba ji ltar yin ji ltar yang ma yin te/ gang gi phyir tha mi dad pa'i rgyu mtshan las tha snyad dag la de ltar dbye bar byed pa ni ma yin no/ /bsdus pa las rtog pa tsam la tha snyad 'dogs pa ni gzugs la sogs pa'am de dang ldan pa la yang mtshungs pa ma yin nam zhe na/ de'i sgra dag la bum pa dang rtsig pa'i sgra dag bzhin du tha mi dad pa'i don nyid kyi yon tan dang yon tan can gyi sgra nyid du mi 'gyur ro zhes bstan pa ni/ tha dad pa med pa zhes bya bas so/ /khyed kyis gcig pa nyid kyi grangs rjod par byed pa'i gcig gi sgra'i rdzas la de med kyang gzugs la sogs pa la yin yang gzugs la sogs pa'i sgra'i rnam grangs ni ma yin te/ rgyu mtshan gang las kyang ji lta ba bzhin du kho'i yang gzugs po dang bum pa la sogs pa'i sgra rnams mtshungs pa'i don la ma yin te/ rgyu mtshan tha dad pa'i phyir zhes bstan pa ni/ don gzhan rgyu mtshan can min yang / /zhes bya ba'o/ /gzugs la sogs pa la yang rdzas bzhin du grangs gcig pa nyid ni khyed kyi yang yon tan dang ldan pa nyid kyi rdzas las tha mi dad pa'i don nyid du thal bar 'gyur bar bstan pa ni/ gal te der yang don gzhan na/ /zhes bya ba'o/ /gzugs la sogs pa dang bum pa la sogs pa'i sgra dag gi rgyu mtshan gang yin gang gis tha dad ma yin pa'i rgyu mtshan du bstan pa ni/ ldog pa'i dbye bas tha dad pa yin te zhes bya ba ste/ gzugs la sogs pa'i sgra ni khyad par gyi nus pa'i yul yin la bum pa'i sgra ni spyi'i nus pa'i yul la yin no zhes bya ba'i don to/ /de ma yin pa las ldog pa kho na'i ngo bo ni nus pa yin te las ma yin pa la sogs pa bzhin du gzhan ma yin par bstan pa ni/ las rdzas min pa zhes bya ba ste/ gtso ba'i rgyu mtshan zhes bya ba ni der sgro 'dogs pa'i ngo bo yin pa'i phyir te/ de med na gang la sgro 'dogs pa yin des na nye bar btags pa ma yin zhes bya ba'i don to/ /mthong ba med na ji ltar sgro 'dogs par byed pa yin zhes bya bar ni mi rigs te/ mthong ba med kyang dbang phyug rtag pa la sogs pa bzhin du rtog pa tsam gyis dmigs pa la sgro 'dogs pa srid pa'i phyir ro zhes bstan pa ni/ rtog pas byas pa'i khyad par tha dad pa zhes bya ba ste/ tha dad pa'i khyad par nyid gtso bo yin no zhes rim pa gzhan du nges par bzung ba'i don du brjod nas gnas ji lta bzhin bstan pa ni/ gzhan yang gal te zhes bya ba'o/ /tha dad pa'i khyad par gtso bo yin no zhes bya ba nyid ci las gcig tu nges pa kho na yin te ma yin pa nyid do/ /'on kyang tha mi dad pa'i khyad par gtso bo ma yin zhes bya ba 'di yang mtha' yod pa'i phyir snga ma snga mar nye bar btags pa zhes phyi ma phyi ma las gtso bo yin zhes bya ba'i don to/ /yon tan la sogs pa la'am zhes bya ba 'dis med pa'i khyad par dang ldan pa zhig pa la'am skyes la zhes bya bas med pa'i khyad par can brjod pa yin par bstan pa ni/ zhig pa dang ma skyes pa la ni zhes bya ba'o/ /gal te med pa'i khyad par la yang gtso bo yin yang khyad par dang khyad par can gyi sgra dag rnam grangs nyid du 'gyur te/ khyad par can tsam yod pa'i phyir zhes bya ba'i don dang tha dad pa med pa tha dad don zhes bya ba 'di 'chad par bstan pa ni gal te khyad par zhes bya ba'o/ /gal te sgra dag gi 'jug pa'i rgyu mtshan tha dad pa yin na 'di dag la gnas pa dag la ba lang dang rta zhes bya ba bzhin du gzhi mthun par mi 'gyur zhes zer ba ni tha dad par 'gyur ba'i phyir tha snyad pa yin la 'jug pa'i rgyu mtshan tha dad pa sgra gang gi yin pa de de ltar 'gyur ro/ /de'i ngo bo ni de tsam mo/ /snang ba ni snang bar byed pa nyid yin pa'o/ /gzhi mthun pa nyid ni sgra las byung ba yin yang don la byung bar 'gyur ba ma yin no/ /sngon po'i sgra ni yon tan tsam la 'jug pa yin gyi yon tan can la 'jug pa ni ma yin gyi/ at+pa la'i sgra yang rig pa tsam la 'jug pa yin gyi de dang ldan pa la ni ma yin no zhe na/ 'on te yon tan gyis mtshon pa'i yon tan la 'jug pa yin na ni/ de lta na yon tan can te spyi nyid du mtshon pa ma yin te/ gzhi mthun pa med par thal bar 'gyur ba'i phyir ro/ /khyad par las yin no zhe na/ de'i phyir brjod pa gcig nyid dang ni zhes bya ba ste/ 'brel pa na zhes bya ba ni rgyu mtshan gyi bdun pa ste rgyu mtshan dang byed pa dang rgyu rnams la thams cad la mang por mthong ba yin zhes bya ba'i tshig las so/ /'du ba'i 'brel pa ni de ltar mtshon pa'i rgyu mtshan yin pa'i phyir gcig nyid kyis thams cad mtshon pa ni don gyi sgo kho na las yin no/ /de'i phyir dpyod pa kho nas de yang dpyad pa yin par bstan pa ni/ don rnams gzhi mthun pa nyid kyang zhes bya ba'o/ /yon tan ni yon tan can gyi khyad par mtshon par byed pa yang rang yongs su gcod pas mtshon par byed pa yin gyi gzhan mtshon par byed pa ni ma yin te/ de'i phyir gnyis pa'i sbyor ba yin no snyam du sems pa ni 'brel pa yod pa yin na yang zhes bya ba ste/ gang las zhes bya ba 'di'i lan ni/ 'du ba'i stobs kyis ni zhes bya ba ste/ gzhan mi srid pa'i phyir ro/ /ji ltar zhes bya ba 'di la ni tha mi dad par zhes bya ba'o/ /'du ba la ni phrad pa bzhin du don dmigs pa ma yin te/ /so so bar grub par thal bar 'gyur ba'i phyir ro/ /de'i phyir yon tan dang yon tan can yang tha mi dad par dmigs pa yin na de dag la 'dus pa dag gi yon tan dang rigs dag la de ltar dmigs pa yin pa'i phyir gcig gi sgra don med pa kho na yin par bstan pa ni/ gcig nyid las ni zhes bya ba'o/ /'on te sngon po dang ut+pa la'i sgra dag la phan tshun yongs su gcod pa'i chos can la khyab pa ni ma yin te/ rang gi brjod bya yongs su gcod pa tsam la mthar thug pa yin no snyam du sems pa ni/ 'on te sngo sogs zhes bya ba'o/ /ut+pa la nyid 'du ba can gyi chos can sngon po'i sgra las rtogs pa yin na/ ji ltar dbye ba 'di yin zhes zer ba la 'du ba can te/ chos can ni ut+pa la nyid kyis so/ /rtogs pa ni sngon po'i sgra las so/ /de'i mngon sum gyis sngon po'i chos rtogs pa na de'i 'du ba can ut+pa la nyid kyang rtogs bya nyid du mthong bar bstan pa ni/ ji ltar sngon po mngon sum gyis zhes bya ba'o/ /khyad par gyi mthar thug pa yin na yang sgra ngag gi gzhi mthun pa nyid du mi 'gyur ba yin no zhes bya ba ni/ sgras ni nges pa nyid kyi don/ /zhes bya ba'o/ /blangs pa'i sngon po nyid chos can las gzhan yod pa ma yin te/ mngon sum gyis ma dmigs pa'i phyir ro zhes bstan pa ni/ in+d+ra nI la ut+pa la sogs zhes bya ba'o/ /de'i phyir cha tsam gsal ba ma yin no zhes bya ba gsal ba yin te me bzhin pa'i cha nyid len pa yin na sgra don dang reg par mi 'gyur ro zhes bya ba'i don to/ /sngon po'i sgra las ut+pa lar yang nye bar 'jog par byed pa na ut+pa la'i sgra bzhin yod na ut+pa la ma yin pa las ldog pa ma yin nam/ de bzhin du ut+pa la'i sgra la yang sngon po'i sgra yod na/ sngon po ma yin pa las ldog pa yin pa'i phyir gnyi ga'i nus pa yin no snyam du sems pa la/ gal te sngo nyid ces bya ba ste/ gal te sngon po'i sgra ut+pa la tsam gyis nus pa can bzhin no/ /sngon po'i sgra don med par 'gyur la/ 'on te de dang de ma yin pa la nus pa can yin na ji ltar ut+pa la'i sgra nye ba na ldog par 'gyur/ 'on te de nye ba dang ma 'brel ba yang skyes bus de ltar rnam par gzhag par bya ba yin no/ /de lta yin na skyes bu'i blo las byung ba'i khyad par la sogs pa nyid yin gyi sgra las byung ba ni ma yin no/ /'on te sgra yang blo de'i rjes su 'jug pa yin na de lta yin na blo sgrub pa ni 'di brjod bya yin pa'i phyir phyi rol gyi don nyid ni ma yin no/ /'on te khyad par la yang sgra nyid nus pa can yin na thams cad la de bzhin du 'gyur ro/ /'on te gzhan la yang nus na 'di la yang de bzhin du 'gyur te/ nus pa de dang ma bral ba'i phyir ro/ /gnas skabs la sogs pa yang 'dis bshad pa yin no/ /gang gi phyir skyes bu ni gnas skabs pas de la med pa'i khyad par yang rtogs pa yang yin no zhes bya ba'i don to/ /gang gi la yang sngon po ma yin pa log pas sngon po'i sgras rtogs par bya ba de nyid ut+pa la'i sgra yang ut+pa la ma yin pa las so ldog pa phan tshun khyad par med pas gzhi mthun pa med pa yin te/ khyad par dang cig shos yod pa dang med par thal bar 'gyur ro snyam du sems pa la de'i phyir rang gi bag chags kyi dbang gis skyes pa'i blo nyid ces bya ba ste/ bag chags las byung ba'i rtog pa sngon po nyid dang cig shos tha dad par byed cing slar yang tha mi dad par byed pa de'i phyir gzhi mthun pa nyid dam cig shos su 'gyur gyi dngos po tha mi dad pa las ni ma yin no/ /rdzas lhung na de'i gzugs la sogs pa ltung ba yin gyi gzhan ma ltung bar mthong ba la gzhan du rdzas dang ldan par snang ba ni ma yin la gzhan lci ba nyid ni gzhan gyi ltung ba'i rgyu mtshan ma yin te/ thal ches pa'i phyir ro/ /de'i phyir lci ba nyid kyi phyir ltung ba yin pas gzugs la sogs pa byed pa dang ldan par bstan pa ni/ lci ba nyid yod pas na zhes bya ba'o/ /gal te lci ba nyid bzhin du gzugs la sogs pa ltung ba las lci ba nyid kyi kyang de ltar 'gyur na de ltar na thug pa med pa yin no/ /rang gi ngo bo ni de ltar ltung ba zhes ma yin la de'i bar gyis gzhan de lta bur gyur pa ma yin yang ltung bar byed pa ni ma yin no/ /de la rang nyid de ltar gyur pa yang ma yin pa'i phyir cher dpyod pa yin no/ /yon tan ltung ba yin zhes 'dis mthong ba yin par bstan pa ni btung ba la sogs pa zhes bya ba'o/ /gal te bag chags las byung ba'i rtog pa ni/ tha dad pa dang tha mi dad par yang byed na/ ji ltar dngos po'i ngo bo gzhan du 'gyur de'i dbang du byas pa yin na/ de nyid rnam grangs nyid yin no snyam du sems pa la/ dngos po tha mi dad kyang ldog pa'i bya ba'i dbang gis rtog pa bag chags byung ba yin par bstan pa ni/ de'i phyir ldog pa'i khyad par gyis zhes bya ba ste/ tha dad pa zhes bya ba ste/ pho rtags yin te/ sgra dang shes pa'i bsams pas yin par bstan pa ni/ sgra dang rtogs pa tha dad pa yin te zhes bya ba'o/ / gal te ldog pa'i yul la rtog pa yin na ba lang gi ba lang nyid ces bya ba bzhin du/ ba yang thu yu zhes bya bar yang 'gyur gyi gzhi mthun par ni mi 'gyur ro snyam du sems pa ni/ 'o na ci ltar zhes bya ba'o/ /de la re zhig ba lang gi ba lang nyid ces bya ba la sogs pa dngos po brjod pa nyid kyi rta dang rta la sogs pa rnams kyis tha dad bzhin du ste/ yan 'gar bzhin du mtshon pa yin no/ /gang de la chos gzhan rnams kyis te dkar po nyid la sogs pa rnams kyi'o/ /khyad par byed pa ni rnam par gcod par byed pa nyid do/ /de'i phyir de las gzhi mthun pa ma yin no/ /'di lta bu'i sbyor ba 'di ni tha snyad pa'i ma yin pa ma yin nam don byed par mi ston pa'i phyir ro/ /de rnams don med pa can la tha snyad du byed pa ni ma yin te tha snyad du byed pa'i phyir ro/ /rtog pa dang ldan pa'i phyir ro zhes bstan pa ni/ thos pa de tsam zhes bya ba ste/ tha snyad 'di yang don gyi mthar thug pa kho na yin gyi/ ji ltar thu yu la 'jug pa'i ba lang gi brda ni khra mo la ba lang nyid kyi tha snyad mi byed kyang / ba lang gi sgra'i yul yod pa yin la de 'di la yang des tha snyad la 'di'i go skabs yod pa yin no zhes bya ba'i don to/ /'phangs pa med pa ni khongs su gtogs pa ma yin pa ste/ gzhan kun ni chos gzhan te dkar po la sogs pa gang gis de de ltar yin pa'o/ /mngon sum gyis bzung ba'i dngos por tha mi dad pa yin yang rtog pas bslang ba'i bsam pa kho nas tha dad pa yin te/ 'di la dpe ni/ sor mo'i ldan pa zhes bya ba'o/ /gzhi mthun pa'i yul nye bar bstan pa ni/ sor mo ldan gyur zhes bya ba ste/ mi ldan pa las log pa tsam yul nyid yin pa'i phyir ro/ /de dang mthun pa yang chos gzhan dang ma bral ba yin par brjod pa'i phyir de las gzhan pa rjod par byed pa de lta bu rnams kyis gzhi mthun pa 'thob pa yin la chos can brjod par grags pa yin no/ /des thams cad khongs su gtogs par brjod na chos gzhan dang brjod pa rnams kyis rnam grangs su 'gyur ba ma yin nam zhes zer ba la don gcig brjod kyang zhes bya ba smos te/ tha dad pa dang tha mi dad pa dag la/ brjod bya gcig kho na yin la bral ba dang ma bral ba dag kho na yin no/ /gal te 'di kho na ci las she na/ de ltar te rnam pa de nyid kyis byas pa ni rgan po rnams kyis so/ /brda ni rnam par gzhag pa ste/ gang gi yin pa de de bzhin te gang gi phyir yin pa de'i phyir 'di khyad par yin no zhes bya ba'i don to/ /'grel pa mdzad pa ni ldog pa'i yul la chos dang chos can brjod pa'i sgra dag gi tha dad pa dang tha mi dad pa yang rtog pas sprul pa yin par bstan nas ldog pa'i tha dad med kyang rtog pas byas pa'i tha dad pa'i 'jig rten gyi brda la brten nas go bar bya'o zhes bya ba'i don don gcig brjod pa'i zhes bya bas bshad pa yin no/ /de bzhin du ba lang gi zhes bya ba la sogs pas tha dad bzhin du zhes bya ba la sogs pa ldog pa'i tha dad yod pa can gyi yul zhes bya ba ni rnam par dbye ba'o/ /de bzhin du zhes bya bas kyang brtags pa'i tha dad pas zhes 'dzin pa yin no/ /ril zhes bya ba ni chos bsdus pa dang chos gzhan yang brjod pa yin no/ /'dzin pa gzhan zhes bya bas ni ji lta ba'i rnam grangs gsal ba yin no/ /tha dad pa ni zhes bya bas ni dngos su ba'i tha dad gsal ba yin no/ /gang gi tshe ba lang gi rnam pa zhes bya ba la sogs pas ni tha dad par mngon par brjod pa ni ma yin la dgongs pa can nyid du bstan pas thos pa de tsam zhes bya ba'i tshigs bcad bshad pa yin no/ /de'i bdag nyid kyi 'brel pa nyid ces bya ba ni mngon sum gyis de nyid mthong ba'i phyir ro/ /'ba' zhig ces bya ba ni yul thag ring po la ba lang dang rta'i bye brag la rnam par dpyod pa med pa'i phyir ro/ /ba lang dkar po zhes bya bas tha dad pa'i tha snyad kyi yul bstan pa ni/ sor mo ldan gyur pa zhes bya ba'o/ /gang gi tshe zhes bya ba la sogs pas tshigs su bcad pa'i phyed bshad pa yin no/ /mkhas pa zhes bya ba la sogs pas ni ji skad bstan pa sdud par byed pa yin no/ /'di rnams tshigs su bcad pa dang pos ni gang gi tshe ba lang gi rnam pa zhes bstan pa'i dri ba bsdus pa yin no/ /gnyis pas ni de'i tshe ba lang gi'o zhes sngar mthong ba las zhes bya ba bsdus pa yin no/ /gang gi tshe gal te mthong ba dman pa zhes bya ba bstan pa ni/ gal te tshad ma'i 'jug pa la zhes bya ba 'dis bsdus pa yin no/ /de'i tshe ni lan du zhes bstan pa ni de'i tshe dngos rig pa de zhes bya ba 'dis bsdus pa yin no/ /gzhan du na tha dad pa dang tha mi dad pa'i tha snyad mi rigs par bstan pa ni/ tshul lugs gzhan gyi go skabs ni/ /zhes bya ba'o/ /ci las yin zhe na/ mngon sum nyid dam zhes bya ba ste/ chos can gyi tha dad pa'am tha mi dad pa yang rung mngon sum gyis 'dzin pa ma yin no zhes bya ba'i don to/ /nges par bzung ba yang chos dang chos can dag la mngon sum med na ma yin pa ma yin nam ji ltar thog ma med pa'i bag chags rtsa ba yin zhes zer ba la/ gang tshe rjes 'gro ldog pa dag/ /ces bya ba'o/ / tha snyad de ni de lta nyid/ /ces bya ba ni thog ma med pa'i bag chags kyi rgyu mtshan las nges par bzung ba yin no/ /gang gi phyir sgra dang shes pa ni thog ma med pa'i bag chags las byung ba'i rnam par rtog pa'i don gyi yul yin pa de'i phyir de las yan lag can la sogs pa mi 'grub po zhes bya ba nye bar bsdu ba ni/ de'i phyir yan lag nyid ces bya ba'o/ /gal te chos can gyi sgra ldog pa'i dngos po'i yul la chos gzhan ma spangs ba'i phyir de'i brjod pa rnams kyis gzhi mthun pa yin pa gzugs ni bum pa'o zhes bya bar yang 'gyur ro/ /gzugs la sogs pa'i sgra'i brjod bya las gzhan la yan lag can dang 'dus pa la sogs pa de'i yul ma yin na gang gis 'di skyon ma yin snyam du sems pa ni/ gal te yan lag can ni zhes bya ba'o/ /gal te yang gzugs la sogs pa tha dad pa cung zad kyang med pa la gzugs la sogs pa rnams mthun pa'i 'bras bu de la mi byed par rnam par gcod pa'i ngo bo'i nus pa ni bum sgra brjod pa ni gzugs la sogs pa'i nus pas blangs pa ma yin la dkar po la sogs pa'i nus pa ni blangs pa yin no/ /blangs pa dang ma blangs pa de dag ni gzhi mthun pa nyid dang mi mthun pa nyid la yang 'dus pa'i sgra nyid dang gzhan la ni rigs kyi sgra nyid yin par bstan pa ni gzugs la sogs zhes bya ba ste/ gzugs la sogs pa rnams kyi nus pa tha dad pa ni khyad par te nges pa'i 'bras bu la thun mong ma yin pa'i 'bras bu yin la de rnams 'phen pa ma yin pa ste/ blangs pas 'jug pa zhes bya ba ni sgra'i nus pa yin par 'jig rten gyi tha snyad kyi rjes su 'gro bar brjod pa yin na/ de'i phyir 'di lta bur nus pa'i khyad par te nges pa'i mi 'phen par bstan pas nus pa'i spyi'i yul bstan pa yin no/ /de lta yin na nus pa'i spyi nyid kyi dngos po nyid brjod bya yin pa'i phyir yan lag can la sogs pa ji ltar spangs pa yin zhes zer ba la/ de mtshungs zhes bya ba smos te/ /des te gzugs la sogs pa rnams de mtshungs pa yang yin la/ 'bras bu yang yin pa ni chu 'dzin pa la sogs pa'i 'bras bu'o/ /de'i rgyu ma yin pa ni byed pa ma yin pa ste/ snam bu la sogs pa'i gzugs la de rnam par gcod pa'i ngo bo ste/ byed pa po la yod pa'i bya ba yin par khas blangs pa'i phyir ro/ /gang gi phyir nus pa ni nus pa ma yin pa las log pa'i ngo bo yin gyi gzhan ni ma yin no/ /gal te gzugs la sogs pa'i nus pa'i spyi bum pa'i sgras brjod pa yin na/ de nyid 'dus pa'i sgra kho na yin gyi rigs kyi sgrar mi 'gyur zhes zer ba la/ des na 'di'i zhes bya ba smos te/ bum pa'i sgra kho na nus pa'i spyi la ltos nas 'dus pa yin te/ khyad par gyi nus pa la mi 'phen pa'i phyir ro/ /de 'phen pa las ni dkar po bzhin du rigs kyi sgra yin no/ /nus pa'i khyad par mi 'phen pa kho nas nus pa'i spyi las de de'i zhes bya bar tha dad par rnam par dbye ba bstan pa ni/ bum pa yi ni gzugs sogs zhes bya ba ste/ tsan dan gyi dri zhes tha snyad 'dogs pa ni yon tan dang yon tan can tha dad par byed pa ma yin te/ gzhan du yang yod pa'i phyir ro/ /nus pa'i spyis khyad par can du gyur pa rnams ni de las gzhan pas khyad par can du byas pa'i gzugs la sogs pa rnams las gzhan pa 'jug pa'i yul du 'gyur bar bstan pa ni/ de spyi yan lag tu byas pa gang dag gi yin pa de dag gi yin gyi gzugs la sogs pa tsam gyis ni ma yin te/ bum pa la nges pa'i don byed nus pa'i spyi'i yan lag dbye ba yin pa'i phyir/ sna tshogs pa nyid kyis ngo bo la nye bar gnod pa yin zhes bya ba'i don to/ /de de ltar bum pa la sogs pa'i ming gi tshig ni thog ma med pa'i bag chags las byung ba'i rnam rtog gis sprul pa'i don gyi dbye ba la gnas pa'i don dang 'jig rten gyi lugs la yang brten nas rnam grangs ma yin pa la sogs par bstan nas/ da ni nye bar bsgyur ba dang / tshig phrad dang A khya ta la sogs pa rnams kyang brtags pa'i don gyi dbye bas gzhi mthun pa nyid dang cig shos la sogs pa 'jig rten gyi rnam gzhag la brten nas yang bshad par bya'o zhes bstan pa ni/ phyogs 'dis gzhan la yang brjod par bya zhes bya ba ste/ 'dis te brtags pa'i dngos po'i dbye ba dang 'jig rten gyi rnam gzhag dang / sgra'i nus pa'i ngo bos 'di kho nas sel ba rnams khyad par med pa nyid kyis rang la yod pa'i dbye ba med pa'i phyir sgra ma lus pa'i rnam grangs nyid gsal ba yin te/ brtags pa rnams kyi dbye ba ma rtogs pa'i phyir ro/ /rigs kyi sgra ni zhes bya ba ni 'di zhes bya ba la ltos pa yin la tshogs pa'i sgra 'di nyid ces bya ba ni rigs kyi sgrar 'gyur te/ nus pa de'i spyi ni gsal bya so so la nges pa gang gi tshe rjod par byed/ chos gzhan ma spangs pas zhes bya ba 'di la bsams pa'o/ /tshogs pa'i sgra ni 'di la dpe ni/ dper na nags zhes bya ba'o/ /rigs kyi sgra zhes bya ba 'di la/ dpe ni/ dper na shing zhes bya ba'o/ /nus pa'i spyi'i rjod byed kyang nus pa'i khyad par gyi rjod byed rnams kyi res 'ga' zhig mthun pa ni shing dang nags zhes bya ba bzhin du/ 'jig rten la sbyor ba kho na ma yin snyam du sems pa ni/ 'on te ji ltar zhes bya ba'o/ /shing dang nags zhes bya ba ni 'jig rten gyi rnam gzhag las de ltar yod pa las 'gyur ba yin gyi gzugs bum pa zhes bya ba ni ma yin te/ de med pa'i phyir ro zhes bstan pa ni/ gal te bstan bcos zhes bya ba ste/ bstan bcos gzhan ni/ rkang mig la sogs pa'i rig pa'i rjes su 'brang ba'o/ /'jig rten rnam gzhag gi rjes su 'jug pa yin na/ gzugs la sogs pa rnams bum par 'gyur bar bstan pa kho na ni dngos po yang dag par zhes bya ba ste/ de mtshungs pa ni 'bras bu yi/ /rgyu min pa ni rnam dpyod pa/ /zhes bya ba 'di la dbyibs kyi khyad par du mngon par 'dod pa bzhin no gzhan du na spyi'i 'bras bu la nus pa med par thal bar 'gyur zhes bstan pa ni/ dbyibs kyi khyad par gang las zhes bya ba'o/ /dbyibs dang ldan pa las tha dad pa de'i dbyibs ni ma yin no/ /de rnams de ltar 'byung ba 'ba' zhig ni de lta bu'i tha snyad kyi yul yin pa'i phyir gzugs la sogs pa rnams bum pa bzhin du rigs pa shes pa po la gzugs dang bum pa zhes bya bar ni mi 'gyur ro/ /phyogs gcig la bsdus pa'i tshig med pa'i phyir ro zhes bya ba ni gzugs la bum pa zhes bya'o/ /gal te phan tshun khyab pa med pa'i phyir gzugs ni bum pa zhes bya bar gzhi mthun pa ma yin na de bzhin du 'dir yang shing ni shing sha pa zhes bya bar mi 'gyur ro/ /shing sha pas shing la khyab pa ni ma yin te/ seng ldeng la yang yod pa'i phyir ro snyam du sems pa ni/ gal te shing dang zhes bya ba'o/ /de yang yod pa kho nas yod pa la khyab pa ni ma yin no/ /'on kyang rtogs pa 'phen pa ni ma yin la/ de mi 'phen pa khyab bya yin par bstan pa ni/ shing blo zhes bya ba'o/ /'dir yang zhes bya ba ni khyad par can gyi nus pa dang ldan pa yang 'phangs pa yin zhes bya ba 'di la yang ngo / /gna'i tha snyad ni 'jig rten gyi tha snyad do/ /rgyu mtshan de las kyang sgra'i nus pa yin gyis rang bzhin gyi ni ma yin te/ brda ma bzung na mi rtogs pa'i phyir ro/ /'di shing rtog pa nas zhes bya bas sgra las rtogs pa ni ma yin te/ don mngon sum pa yin pa'i phyir 'di zhes bya bar rab tu grub par rjes su brjod nas shing rtog pa nas zhes pa sa'i sgra brjod par bya ba nyid du grub par byed pa yin no/ /de'i phyir sgra ma bzung ba las gnyi ga las byung ba'i shes pa yod pa yin te brda can ma yin pa nyid du thal bar 'gyur ba'i phyir ro/ /gal te ba lang dag ni nyi shu'o zhes bya ba la sogs pa'i 'dri ba yang grangs la ji lta ba bzhin du nye bar bsgyur ba dang tshig phrad dang A khya ta dag la yang mtshungs pa bcu 'dus pa ste/ bcu phrag gnyis kyi ngo bo gzhan kho na yin par bstan pa ni/ bstan pa'i nus pa zhes bya ba ste/ rab tu gnas pa dang mngon par 'gro ba zhes bya ba ni nye bar bsgyur ba'o/ /yod pa'am med pa zhes bya ba ni tshig phrad do/ /'tshed par byed ces bya ba ni/ A khya ta rnams kyi bya ba byed pa po'i gnas skabs kyi tshig las don gyi bye brag gsal ba yin no/ /de bzhin du don gyi dbye ba'i rjes su 'brang ba'i rnam rtog gi go bya'i don gyi bye brag la tha snyad du byed pa ni sgra las chung ba yin gyi/ sgrub pa smra ba ni ma yin te/ sgrub pa smra ba po rnams kyis kyang ma bor ba'i phyir ro/ /yan lag can nam spyi la yang yan lag gi dbyibs kyi khyad par de las gzhan pa las log pa ma rtogs pas rtogs par mi nus te rjes su 'jug pa tsam yin pa'i phyir ro/ /bag chags ji lta ba bzhin dang brda ji lta ba bzhin du rtog pa don gyi dbye ba rjes su sgrub pa bzhin ba ni yul de kho na la rigs kyi dmigs bzhin pa ma yin pa yan lag can dang spyi la sogs pa'i yul la ni ma yin no/ /de ltar spyi'i don gyi dbye ba yul la brten nas sgra'i tha snyad rnam par dbye ba byas nas/ da ni der gtod pa ma byas pas thog ma med pa'i bag chags tsam gyi rnam rtog gis brtags pa'i don gyi dbye ba la brten nas rnam grangs ma yin pa nyid du brjod pa ni/ yang na thog ma med pa'i zhes bya ba'o/ /phyi rol gyi don la yang de lta bu'i bag chags yod pa'i phyir brtag par bya ba dang gcig tu byas nas tha snyad du byed pa ni sgrub pa'i yul kho na la yin du zin kyang de bzhin du spyi dang yan lag can la sogs par 'gyur ba'i skyon med par bstan pa ni/ gal te sgra don de lta bu yin yang zhes bya ba ste/ de la ste sgrub pa'i ngo bo'i brjod bya la rtsod byed ni sgrub byed rtogs par byed pa yin te/ des kyang gzhan gyi 'dod pa cung zad kyang mi 'grub po zhes bya ba'i don to/ /de ltar brjod bya'i rnam par dbye ba ni rtog pa tsam gyi rgyu mtshan las yin par bstan nas brjod kyi rnam par dbye ba yang legs pa'am ma legs pa'i ngo bo bag chags tsam las byung ba yin te/ rnam par rtog pa'i rgyu mtshan can kho na yin no/ /'di ltar don gyi rnam par dbye ba nyid ni legs pa nyid kyi rgyu mtshan ma yin te/ mi legs par 'dod pa la yang yod pa'i phyir ro zhes bstan pa ni/ tha mal pa'i sgra zhes bya ba'o/ /'du byed dang ldan pas 'dus byas pa nyid ni tha mal pa la yang yod pa 'di yang mi rigs par bstan pa ni/ mtshan nyid kyis ni 'dod pa ni mngon par 'dod pa'o/ /'on te legs pa nyid dang cig shos nyid 'dus byas dang cig shos nyid yin na de yang rab tu grags pa med na rtogs pa ma yin no/ /rtogs pa ma yin par bstan pa ni/ legs par sbyar dang legs min zhes bya ba ste/ chos dang cig shos kyi rgyu mtshan las ni legs pa dang mi legs pa nyid kyi ngo bo legs par sbyar ba dang cig shos nyid tshad ma go bar bya ba ma yin no zhes bya ba'i don to/ /tshad ma'i rjes su 'jug pa med na grags pa ni med par smra ba'i tshig bzhin du phyin ci log tu go bar bstan pa ni/ rnam par gzhag pa tsam du zad ces bya ba'o/ /yan lag drug pa'i rig byed rgyu med par 'don par byed pa yin no zhes bya ba'i lung ni byA ka ra na'i rtsa ba yin no/ /lung yang tshad ma kho na yin snyam du sems pa la/ ma mthong ba'i don brjod ni zhes bya ba ste/ lung ni bag chags las byung ba'i rnam par rtog pa tsam gyis mthong ba'i don gyi yul la yin gyi dngos po la brten pa ni ma yin no/ /de la brten pa yin na ni de sgrub pa yin no/ /ma mthong ba'i don la ma yin du zin kyang 'bras bur rtogs pa na chos kyi 'bras bur 'gyur ro zhes bya ba'i don to/ /de la yid ches yod min te/ zhes bya ba ni/ mngon sum la sogs pa'i tshad ma med pa'o/ /de bzhin du tha mi dad pa'i yan lag can dang spyi la sogs pa rnams shes pa'i rgyu ni mngon sum la sogs pas sam tha snyad las kyang rtogs bya ma yin no zhes bstan pa yin no/ /so sor snang ba'i dbye bas tha dad par ni 'gyur na rgya chen por dmigs pas phan tshun rjes su mi 'gro bar 'gyur ba'i phyir ro snyam du sems pa ni/ gal te lus kyi zhes bya ba ste/ gal te zhes bya ba ni khas blangs pa zhes bya ba'i don 'di la'am de bzhin gyi don la yin te/ yan lag can la sogs pa med par byas pa yin no/ /de la zhes bya ba ni khas blangs pa la phyogs gnyi ga la yang go rims bzhin du skyon bstan pa ni/ ma lus rgyu nyid ces bya ba ste/ rgyu ma lus can ni yan lag gcig ma tshang na rgyu med pa'i phyir mi 'byung ngo / /de med kyang 'byung ba yin na ni rgyu de nyid dang 'gal ba'i phyir rgyu gzhan nyid khyab byed du rtogs par byed pas 'gal ba khyab par 'gyur ro/ /re re'i rgyu nyid yin na yang khyab byed mang po 'byung ba yin la de dang 'gal ba gcig nyid ni khyab par byed pa 'gal bar 'gyur bar bstan pa ni/ re re nus pa nyid yin na/ /zhes bya ba'o/ /lus kyi yan lag gi bskyed bya'i yang shes pa ni dbugs 'byung ba la sogs pa rgyu gcig gis nges par gyur pa ni gcig kho nar 'gyur ba ma yin nam de'i phyir rgyu re re nyid la mang po nyid skyon ma yin no snyam du sems pa la/ du ma nyid du zhes bya ba smos so/ /dbugs dbyung ba la sogs pa la yang du ma nyid kyi phyir du ma nyid kyi skyon spangs pa ma yin no zhes bya ba'i don to/ /phyogs dang po 'chad pa ni/ 'bras bu gang la zhes bya ba'o/ /gnyis pa 'chad pa ni/ 'on te yan lag rnams zhes bya ba'o/ /dbugs 'byung rngub dag gi du ma nyid du khas len pa la skyon brjod nas gcig pa nyid khas len pa la yang phyogs gnyis pa'i skyon gzhan la thal 'gyur yin pa bstan pa ni/ gcig nyid yin na yang zhes bya ba ste/ nus pa'i rgyu ni rang gi 'bras bu la ltos pa dang bcas pa yin la des na khyab pa yin te de'i khyab byed 'bras bu nye bar byed pa yin no/ /de yod kyang med na ni khyab byed ma yin pa'i phyir de'i phyir shing nyid la shing sha pa nyid bzhin du rtag tu nye ba yin no zhes bya bas dang po'i 'bras bu'i dus su gnyis pa la sogs pa'i byed pa po nye ba yin par mtshon pa yin no/ /rtag tu nye ba de de'i tshe mi nye bar gyur pa ni ma yin no/ /'on te rgyu'i chos yin pa'i phyir ram gzhan las kyang rung 'bras bu de'i dus su 'bras bu gzhan byed pa ma yin la de lta bu yin na dus gzhan la yang de nyid khyab par mi 'gyur ba'i phyir mi 'byung ba yin no snyam du sems pa la gal te du ma'i rgyu min na zhes bya ba'o/ /dbugs 'byung rngub la sogs pa'i sgras ni lus gzung ngo / /nus pa'i rgyu ni rang yod pas 'bras bu yod par go bar byed pa yin te/ des khyab pa'i phyir ro zhes bstan pa ni/ rgyu nye yang ngo zhes bya ba'o/ /bden te 'bras bu skyed par byed pa'i rang bzhin ni lhan cig byed pa la ltos pa yin gyi 'ba' zhig ni ma yin la des kyang 'di'i bdag nyid du gyur pa'am gzhan yang phul du byung bar byed pa ni ma yin no/ /'o na ci zhe na/ 'bras bu yin no snyam du sems pa ni/ gzhan dang gzhan zhes bya ba'o/ /gzhan la ltos pa'i byed pa rang bzhin yin pa'i phyir/ a ru ra la ltos nas lha 'khru bar byed pa yin pa bzhin du rigs pa shes pa rnams kyis mnyan par bya ba ma yin no/ /'bras bu'i rang bzhin ltos pa kho na las yin te/ gzhan ni de'i 'bras bu nyid du ma rtogs pa'i phyir ro/ /sad par byed pa rnams kyang dbugs la sogs pa kho na bzhin du sems kyi rgyu nyid ma yin te/ de med kyang 'byung ba'i phyir ro zhes bstan pa ni/ sad par byed pa'i rkyen kyang zhes bya ba'o/ /de lta yin na de'i nges pa gang na yod ce na/ sngon gyi 'du byed pa zhes bya ba smos so/ /'du byed pa 'bras bu la mi 'khrul par rtogs pa yin na/ dbugs la sogs pa'i nus pa ni ma yin no zhes bstan pa ni/ des na gal te zhes bya ba'o/ /dbugs 'byung ba la sogs pa gcig nyid ces bya ba 'di nges pa nyid ces bya ba 'di dang sbyar bar bya'o/ /dbugs 'byung ba la sogs pa gcig nyid du nges par byed par gzhan 'dod par khas blangs nas de mi rigs par bstan pa yin no/ /da ni rtogs pa dang 'gal bar brjod pa yin par bstan pa ni/ gcig nyid du 'thad pa ni ma yin te zhes bya ba ste/ dbugs 'byung ba gcig gi dus su yang don du mi shes pa cig car skyes par mthong ba'i phyir dbugs 'byung ba de las nges par 'byung ba ni ma yin te/ de lta mod kyi gang du yang 'gro ba na bgrod bya dran pa kho na'i tshe mdun na gnas pa'i shing mthong ba dang de'i me tog gi dri bsnams pa dang / so rtsi la sogs pa'i ro myong bar byed pa dang mkhrang ba la reg pa'i rlung la sogs pas reg par yang byed pa la sogs pa rnams la rim gyis rtogs pa ma yin la cig car rtogs kyang ma 'khrul pa yin te/ gnod pa can med pa'i phyir ro/ /res 'ga' rim gyis rtogs pas rtogs pa la nges par byed pa cig car bar mngon par rlom pa'i 'khrul pa ni ma yin te/ de kho na'i 'gor ba dang cig shos dag gi rim gyis dang cig shos su yang legs pa yin pa'i phyir ro/ /dbugs 'byung ba gcig gi dus gcig nyid kyi blo skye bzhin pa ni don du ma 'dzin pa'i bdag nyid can ma yin nam/ du ma nyid ni ma yin no snyam du sems pa la/ du ma blo gcig gis shes na/ /zhes smos so/ /rnam pa med pa nyid kyis nye ba dang lkog tu gyur pa med pa'i phyir de dag tsam 'dzin pa bzhin du don ma lus par 'dzin par 'gyur ro/ /skyed par byed pa nyid dam nye ba ni nges pa'i rgyu ma yin no zhe na/ / /'gal ba med phyir zhes bya ba smos so/ /skyes par byed pa ni shes pa'i bdag nyid thob par byed pa dang bya ba nges pas kyang nye ba'am dbang po yang rung yul 'dzin pa la nges par byed pa yin te/ nges pa med par 'dzin pa ni/ gcig yin zhes khas blangs pa'i phyir ro/ /'dzin par 'dod pa yang nges par byed pa ma yin te/ tha dad pa'i phyir dang skyed byed ma yin pa'i phyir dang ngo / /de shes pa'i khongs su gtogs pa yang ma yin no/ /de'i phyir 'gal ba med phyir te/ mi mthun pa ma yin pa'i phyir rnam shes thams cad 'byung 'gyur ro/ gang gi tshe rjes su mthun pa ma yin pa'i blo yang dus gcig gi tshe byung ba ni thams cad 'dzin par byed pa ma yin la de'i rim gyis kyang yul de dang de 'dzin pa ma yin te/ mi mthun pa ma yin pa nyid kyi khyad par dang mtshan nyid mi mthun pa med pa'i phyir ro/ /mi mthun pa ma yin pa nyid tsam rgyu mtshan can khyab byed yin na de yod na nges par 'gyur la mi 'gyur na ni de'i tshe rgyu mtshan can ma yin gyi gzhan gyi rgyu mtshan can du 'gyur ba'i phyir 'gal ba khyab pa yin no/ /de'i phyir gcig la yang mi 'gyur ro/ /rim gyis kyang zhes bya ba ni re res kyang zhes bya ba'i don to/ /dbugs gcig kyang nges pa med pa kho nar 'gyur na nges pa dang 'gal ba khyab pa yin no zhes bstan pa yin yang dbugs de las rtogs pa yin na de las shes yang brjod pa don gzhan du 'gyur bar bstan pa ni/ 'dzin pa de nyid ces bya ba ste/ 'di yang rnam shes nus pa nges pa'i phyir zhes bya ba 'dis rnam par dpyad pa kho na yin par bsam par bya'o/ /du ma blo gcig gis shes na/ /zhes bya ba 'di yang gnas skabs pa'i tshad ma la mi ltos pa me long dri ma med pa lta bu'i blo gcig pu rtag pa'i sems kyi ngo bor gzhan gyis khas blangs pa la brten nas bshad pa ni/ 'on te yid kyi rnam par shes pa zhes bya ba'o/ /'dis ni rgyal dpog pa'i gzhung bsal ba yin gyi/ rgyang 'phen pa'i bsal ba ni ma yin te/ de ni blo rtag par khas len pa ma yin te/ 'jig rten pha rol med par 'dod pa'i phyir ro/ /de'i gzhung las dbugs gcig po las skyes pa'i blo gcig kho na rim gyis don du ma shes pa yin zhes bya ba kho nar bshad par bya ba yin no/ /gal te rnam par shes pa zhes bya ba med pa nyid thob nas te/ thob par byas nas so/ /nye ba'i rim pa khyad par can med pa'i phyir zhes bya ba ni rtag pa'i blo la don gyi khyad par bskyed bya dang cig shos med pas don nye ba dang nye ba ma yin pa dag la khyad par med pa'i phyir ro zhes bya ba'o/ /nye ba'i don 'dzin pa la rgyu rnam shes kyi bdag nyid du gnas pa ni nye ba ma yin pa'i yang mtshungs so/ /mtshungs pa'i phyir 'gal ba'i don ma yin par bstan pa ni/ me long rnam par gnas pa'i zhes bya ba ni nye ba 'dzin pa'i rgyu mtshan nye ba ma yin pa la yang mtshungs so zhes bya ba'i don to/ /rgyu mtshan la khyad par med kyang gal te nye ba med pa mi 'dzin na nye ba la yang der mi 'gyur bar bstan pa ni/ 'on te de'i tshe nus pa med na zhes bya ba'o/ /blo rtag pa'i phyogs zhar la byung ba yongs su rdzogs par byas nas dbugs 'byung ba nges pa can gyi phyogs nyid rjes su 'brel pa yin par bstan pa ni/ 'on te 'di snyam du sems zhes bya ba ste/ de la yang zhes pa ni dbugs nges par byed pa'i phyogs la yang ngo / /dbugs la sogs pa gcig nyid yin yang rtag pa'i phyir 'bras bu phyi ma byed pa'i ngo bo snga na med pa'i phyir de'i tshe de kho na de yang 'byung bar 'gyur ro/ /shes pa gsal ba mang po'i yin par ni mi rigs te/ dbugs gcig pa nyid yin pa'i phyir ro/ /skad cig ma'i dbugs mang po zhes bya ba'o/ /dus gcig pa rnams kyang yod pa'i phyir de kho na gsal ba mang po'i yin no zhe na yang zhes bya ba la zer ba ni/ rang rig min pa'i dus can gyi ste rim gyis 'byung ba zhes bya ba'o/ /de 'dra ba'i zhes bya ba ni rim gyis 'byung ba rnams kyi ste sems re re'i skyed byed kho na dbugs re re'i skyed byed yin no zhes bya ba'i don to/ /de lta yin yang dbugs de rnams nyid rim pa dang ldan par mi 'grub ste rgyu med pa'i phyir ro/ /lus ni ma yin te/ du ma nyid yin pas rnam shes bzhin du de la yang thal bar 'gyur ro/ /go rims ldan pa'i rgyu med phyir/ /zhes bya ba'o/ /da ltar ba bzhin du snga ma snga ma'i rang gi rigs rgyu nyid yin yang skye ba'i dang po la 'byung bar mi 'gyur te/ 'jig rten pha rol khas mi len pas rang gi rigs kyi snga ma med pa'i phyir ro zhes bstan pa ni/ rang rigs snga ma rgyu nyid ni/ /zhes bya ba'o/ /skye ba'i dang po'i dbugs ni res 'ga' ba ma yin pa'i phyir 'bras bu yin gyi rgyu ci yin par rtogs par byed pa ma yin nam snyam du sems pa la/ des de dbugs de 'dra ba zhes bya ba rang gi rigs yod pa ma yin te/ 'jig rten pha rol khas mi len pa'i phyir ro/ /rigs tha dad pa yang rgyu ma yin te/ 'tsho ba'i gnas skabs na ma mthong ba'i phyir ro/ /de'i bskyed bya gzhan gyi tshe gzhan gyi bskyed bya ni ma yin te/ 'bras bu nyid ma yin par thal bar 'gyur ba'i phyir ro/ /gzhan gyi bskyed bya ba nyid du khas len pa yin na de yang gzhan gyi lus yin te gzhan ma mthong ba'i phyir ro/ /de yang du ma yin pa'i phyir dbugs kyang du ma yin no/ /de'i phyir de'i 'bras bu yang dus gcig la du mar 'gyur ro/ /de'i phyir de kho na ma nges pa nyid yin par bstan pa ni/ du ma nyid yod kyang zhes bya ba'o/ /rgyu du ma nyid ma yin gyi so so snang ba las kyang tha dad pa yul can phyir zhes bya ba ni/ rgya che bar dmigs pa'i phyir ro/ /khas blangs pa dang 'gal ba yin par bstan pa ni/ khyed la ni zhes bya'o/ /pha'i dbugs sngon du 'gro ba can yin yang rang gi rigs snga ma dang ldan pa nyid kyi rang gi goms pa'i 'bras bu la dbye ba med pa'i phyir gcig gi ngo bo'i dbugs su 'gyur zhes bstan pa ni/ de lta bu'i bdag nyid du gyur pa zhes bya ba ste/ thal ba snga ma'i zhes bya ba ni rang gi goms pa'i 'bras bu'i dbye byed med pa'i phyir gcig gi ngo bor 'gyur te/ pha dang ma'i dbugs rgyu nyid yin par khas blangs kyang ngo / /brdar rtogs par byed pa na yang ba lang mthong ba las zhes bya ba'i rigs pas rnam shes du ma skye bar 'dod pa kho na yin no snyam du sems pa la/ rigs mthun pa'i zhes bya ba ste/ gal te rigs tha dad pa cig car skye ba yang mtshungs par ni ma yin te/ ma mthong ba'i phyir ro/ /gal te yang dbugs kyi skad cig ma mang po rnams cig car skye ba yin na de rnams kho na shes pa re re skyed par byed pa yin te tha dad pa'i phyir rigs tha dad pa skyed par byed pa yin gyi rigs mtshungs pa'i skyed byed ni ma yin no snyam du sems pa la/ skad cig tha dad pa nyid kyis zhes bya ba'o/ /dbugs lus bzhin du du ma nyid yin na/ re re rgyu nyid yin pas cig car mang po 'byung bar 'gyur ba'i skyon la de'i phyir blo ni cig car skye ba zhes bya ba 'dis bstan nas/ lus rgyu nyid yin na ni/ yan lag gcig dang bral na'ang min/ /zhes bya ba bzlas nas brjod pas bstan pa ni/ gal te du ma'ang gcig dus can/ / zhes bya ba'o/ /'on te gang dang gang dbugs kyi nye ba'i yan lag yin pa de dang de shes pa'i rgyur 'gyur ro snyam du sems pa ni/ ji ste ji ltar yod rgyu yin/ /zhes bya ba ste/ ji ltar yod pa ni ji ltar srid pa yin la/ dbugs ni phul du byung ba'i yan lag dang 'grib pa'i yan lag kyang rgyu yin no zhes bya ba'i don to/ /lan ni/ shes pa la yang khyad par yod 'gyur te phul du byung ba dang 'gro ba nyid do/ /rgyu rnam par 'gyur ba yin yang de'i 'bras bu rnam par 'gyur ba ma yin par bstan pa ni/ de de'i 'bras bu min zhes bya ba ste/ tha dad par khyad par med pas tha dad min te/ khyad par du mi 'gyur ba ste/ de'i khyad par gyi khyad par can nyid yin na de'i 'bras bu nyid rtogs pa yin zhes bya ba'i don to/ /tshogs pa dang ma tshogs pa dag zad pa dbugs zhan par rgyu ba la sogs pa rnams la ste/ nyung ba nyid la ma tshang ba nyid ni med pa'o/ /de lta bu'i de ni gnyi ga la yang tshogs pa med pa kho na ma yin par bstan pa ni de med par 'byung ba zhes bya ba'o/ /ji ltar yod rgyu zhes bya ba'i bshad pa ni ji ltar gnas pa zhes bya ba'o/ /gal te ji ltar yod pa'i rgyu yin na nye ba na gnas pa ma yin pa yang rgyur 'gyur ro zhes bstan pa ni/ de lta na 'o na zhes bya ba'o/ /de ltar ni ma yin te zhes bya ba ni yul la sogs pas gsal ba ni/ rgyu yin pa mi srid de rjes su 'gro ba dang ldog pa med do zhes bya ba'i don to/ /de'i phyir rgyu'i khyad par gyis khyad par can 'bras bu yin par bstan pa ni de'i phyir tshogs pa las zhes bya ba'o/ /gzhan du gyur pa las zhes bya ni mi nye ba las so/ /gang zhig gang gi rnam par 'gyur bar byed pa ni/ yod na 'byung ba yin par shes pa yin no zhes bstan pa ni/ ma yin te/ de 'gyur na 'gyur ba nyid las zhes bya ba'o/ /de 'gyur na 'gyur ba nyid med na yang de'i chos kyi ngo bo ni de med na med pa'i phyir ci las de'i 'bras bur ma gyur snyam du sems pa la de yod na ni yod tsam gyis zhes bya ba smos te/ de'i 'gyur ba dag rgyu dang ldan pa dag ma yin na/ de'i chos can dag gi yang de lta bu nyid kho nar rtogs par 'gyur te rgyu med pa'i shes pa yin par khyad par med pa'i phyir ro zhes bya ba'i don to/ /yongs su gyur pa'i khyad par la ltos pa'i lus ni sems kyi rgyu yin la yongs su gyur pa gcig pa'i phyir skyed par byed pa yin te/ shi ba la de med pa'i phyir skyed byed ma yin no snyam du sems pa la/ 'dis ni yongs su gyur pa zhes bya ba'o/ / dbugs bzhin du yongs su gyur pa yang 'jig rten pha rol med na dang po yang mi 'gyur ba kho na yin te/ rgyu med pa'i phyir ro zhes bstan pa ni/ yongs su gyur pa'i rim pa de'ang zhes bya ba ste/ de bzhin du de'i khyad par med pa yang rnam shes kyi khyad par gyi rgyur mi 'gyur te/ lus la khyad par med pa'i phyir ro khyad par yin na yang lus tsam las mi 'byung ba'i phyir slar yang khyad par rtogs pa yin na thug pa med par 'gyur bar bstan pa ni/ lus khyad med phyir de yi yang / /zhes bya ba'o/ /yongs su gyur pa'i khyad par med na rnam shes kyi khyad par 'dod pa ma yin te/ de rgyu med pa nyid yin na/ rnam shes kyang rgyu med pa can nyid du thal bar 'gyur ba'i phyir ro/ /de bzhin du yongs su gyur pa'i khyad par yang lus kyi khyad par med na mi 'byung bar bstan pa ni/ ji ltar yongs su gyur pa'i khyad par med kyang zhes bya ba la sogs pa'i yongs su gyur pa la khyad par yin na ni/ rtsub pa dang cig shos nyid du mthong ba yin la de bzhin du lus la khyad par med kyang de'i yongs su gyur par 'gyur ba ma yin nam snyam du sems pa ni/ gal te 'o ma la sogs pa'i zhes bya ba'o/ /'o ma gnyis dus mtshungs par gzhag pa kha bas dro bar mtshungs pa ni yongs su gyur par mtshungs par 'gyur ba yin gyi lus gnyis dus mtshungs par gnas pa la sogs pa yin yang rnam shes yongs su gyur pa mtshungs par 'gyur ba ma yin te/ mtshan nyid mi mthun pa gzhan dang gzhan pa'i rnam shes mthong ba'i phyir ro/ /de'i mi mnyam pa'i dpe yin par bstan pa ni/ 'o ma mtshungs pa zhes bya ba la sogs pa nas mtshungs pa nyid do zhes bya ba'i bar gyi ngag gcig yin no/ /lus nyid ni zhes bya ba ni yongs su gyur pa'i zhes blta bar bya'o/ /gal te lus rnam shes yongs su gyur pa'i rgyu ma yin na gzhan gang yin zhes zer ba la/ lus mtshungs pa dang mi mtshungs pa dag la rjes su mthun pa goms pa'i bag chags ni rgyu mtshan yin zhes bya bar sbyar ro/ /de'i phyir ji ltar srid pa'i rgyu la de'i khyad par yin na 'bras bu'i khyad par kho na yin par nye bar bsdu ba ni de'i tshogs pa'i 'bras bu nyid ces bya ba ste/ ji ltar yod pa'i 'bras bu nyid la ste/ phul du byung ba dang 'grib pa nyid la yod pa'o/ /de lta ma yin na zhes bya ba ni re re'i nus pa nyid yin na'ang ngo / /du ma nyid do zhes bya ba ni cig car mang po 'byung bar 'gyur ba'o/ /de lta na rgyu mtshan gang las rnam shes rim gyis 'byung bar 'gyur snyam du sems pa ni/ gang gi zhes bya ba'o/ /rgyu rnam shes ni gcig yin la/ de la bsdus pa dang re re'i rnam par rtog pa med pa'i phyir de'i phyogs la 'byung ba'i skyon ma yin no/ /gcig po de yang gcig gi rgyu yin la dus gzhan la 'byung ba'i rnam shes ni de'i bskyed bya ma yin no/ /gang gi phyir de yod pa las skad cig ma dang po kho na la 'byung ba yin skad cig ma gcig la yod pa gcig po kho na du ma la nus pa can ni ma yin te/ rjes su 'gro ba dang ldog pa dag gis ma rtogs pa'i phyir ro/ / rgyu gcig pa'i 'bras bu ni rgyu yod par gdon mi za ba ma yin nam de'i phyir snga na med pa'i phyir rtag tu bar 'gyur ro/ /'di ci mig gnyis btsums nas rgol ba yin nam gang gi phyir 'bras bu'i shes pa ma skyes pa nus pa can gzhan las skye ba yin la de'i gnas skabs su 'di'i 'bras bu yang ma yin te/ rgyu med pa'i phyir ro/ /de'i phyir ji ltar snga na med pa ma yin de skyes na de las skye ba yin pa'i phyir ji ltar rtag tu bar 'gyur zhes bstan pa ni/ rnam shes nus pa nges pa'i phyir/ /zhes bya ba ste/ skad cig ma'i rnam shes gcig ni shes pa gcig skyed pa kho na la nus pa can du rjes su 'gro ba dang ldog pa dag rtogs pa yin te/ gzhan gyi skyed byed ma yin no zhes bya bar nges pa'o/ /'grel pa mdzad pa ni me la sogs pa bzhin du 'bras bu gzhan du mi 'thad par rtogs pa'i nus pas rjes su mthun pa'i bag chags kyi rnam shes mthong ba kho na yin par bstan pa ni/ nus pa nges pa'i zhes bya ba'o/ /nus pa'i mtshan nyid gnyis pa bstan pa ni/ chags pa'i khyad par zhes bya ba ste/ de yang shes pa gzhan 'byung ba la gnod pa kho nar mthong ba yin no/ /bag chags dang rjes su mthun pa zhes bya ba bshad pa ni/ bag chags brtan pa zhes bya ba'o/ /'ba' zhig gam zhes bya ba ni/ gnyid log pa la sogs pas sems rgyun chad pa yin no/ /de'i tshe rnam rtog kho na sad pa yin gyi gzhan ni ma yin no/ /chags pa'i khyad par ram gnas pa'i nges pa zhes bya ba 'di'i yul bstan pa ni/ sngon por mthong ba'i mtshungs pa de ma thag pa'i rkyen ni/ sngon po'i rnam par rtog pa 'byung ba la rjes su mthun pa'i bag chags sad pa ni de la chags pas de las 'byung ba yin no/ /'ba' zhig gam zhes bya ba 'di la nyams su myong bar 'dzin pa ni/ 'di ltar zhes bya ba'o/ /mtshungs pa de ma thag pa'i rkyen nam rjes su mthun pa sad pa zhes bya ba 'di la spyod pa ni mtshungs pa de ma thag rkyen las zhes bya ba ste/ nye ba nyid du zhes bya ba ni/ sngon po mthong ba ni sngon po ni rnam rtog dang nye ba zhes bya bas chags pa'i khyad par bstan pa yin no/ bar du gcod pa ni bar chad la sogs 'di nyid 'chad pa ni/ rnam par shes pa la bar du gcod pa'i bag chags gang dag yin pa de dag gi rnam par rtog pa'o/ /gzhan gyi shes bya gnas skabs yin pa'i phyir rnam rtog las so/ /ci las shes she na/ chags pa'i yul yin pas des bar du chod pa'i phyir de rnams skye ba min zhes par sbyar ro/ /de'i phyir de ltar chags pa'i khyad par gyi nges pa las gcig gam de med na du ma yang sems gcig las kyang sems skye bar 'gyur ba yin gyi nus pa nyid kyi ngo bo'i nus pa la ni ma yin no zhes bya ba nye bar bsdu ba ni/ de bas na rnam par shes pa las zhes bya ba'o/ / shes pa gcig lan cig skye bzhin pa ni/ rgyu gcig par go bar byed na du ma'i ngo bo'i lus la mtshan nyid mi mthun pa'i go bar byed pa yin zhes bya ba de dag tsam la tshad ma 'jug pa ma yin nam de rnam par shes pa zhes bya ba ci las yin/ yod kyang yod pa kho na yin te cig car shes pa mi skye ba ni yid kyi rtags yin gyi nang gi chos bde ba la sogs pa rnams la ni rgyu med par skyes pa skye ba ma yin no snyam du sems pa la/ don gzhan chags pas nus pa med/ /ces bya ba ste/ snga ma'i shes pa kho na shes pa gcig gi dus na shes pa gzhan mi 'byung bar nus par rtogs pa yin gyi yid kyi ni ma yin zhes bya ba'i don to/ /shes pa gcig dus gcig gi tshe 'byung ba nges pa can de ma thag pa gcig gi ngo bo'i rnam shes go bar byed pa ma yin nam de yang rang gi rgyu de lta bu yin la de yang de lta bu'i yin la de yang de lta bu'i yin pa ni ji srid dang po'i rnam shes ni lus gcig las sam du ma las kyang rung tshogs pa'i ngo bo las skye ba de skye ba de srid du go ba yin gyi dus gzhan na 'byung ba ni ma yin te/ de la ltos nas de skyed byed ma yin pa'i phyir dang dang po shes pa skye ba kho na la nus pa yin pa'i phyir ro/ /de'i phyir shes pa thams cad de kho na bzhin 'gyur te/ nus pa'i khyad par med pa'i phyir ro zhes bya bar thal bar 'gyur ro snyam du sems pa ni/ gal te lus nyid las zhes bya ba ste yang gi sgras ni shes pa gcig skye ba yang ngo / /gal te shes pa du ma yin na ji ltar shes pa gcig yin rgyu du ma nyid la 'bras bu mang po mthong ba'i phyir ro snyam du sems na/ yang de la zer ba ni/ dper na dbang po'i rnam par shes pa du ma zhes bya ba ste/ de zer ba ni/ gal te lus las zhes bya ba'o/ /lan cig ces bya ba ni/ dus gzhan na mi skye ba zhes bya ba ni don to/ /'di yang rang yin la rigs kyang yin la zhes bya ba'i shes pa'i nus pa zhes bya ba'i don to/ /dang po skyed byed kyi lus dus phyis ngo shes pa las rjes su 'jug par mthong ba'i phyir ro/ /ji ltar skyed byed ma yin pa'am de'i tshe kho na de'i bskyed bya med pa ji ltar yin te bstan pa ni/ des na lus kyi nus pa ni/ des na lus kyi nus pa ni/ /zhes bya ba ste/ lus kyang skyed byed yin la rnam shes kyang yin zhes bya ba rnam par 'grel ba ni/ gal te lus las zhes bya ba ste/ gang gi tshe yang dang yang du skyed par byed pa de'i tshe khyad par med pa'i phyir dang po'i tshe kho na skyed par byed pa kho na zhes bya ba'i don to/ /'on te yang dang yang du skyed par byed pa yin te/ bskyed bya'i shes pas nye bar gnod pa'i phyir ro snyam du sems pa ni/ 'on te rnam par shes pa des zhes bya ba ste/ shes pa gcig kho na las nus pa'i phyir dang dus gzhan gyi bskyed bya med pa'i phyir khyad par med par shes pa du ma cig car skyed pa ma yin no zhes bya ba'i don to/ /lan ni don 'di zhes bya ba ste/ 'bras bu'i rgyu'i nus pa la nye bar gnod pa'i 'o/ /gang yul du byas pa yin zhe na/ rnam shes nyid las zhes bya ba'o/ /tshad ma gnyi ga las grub pa'i rnam shes ni rnam shes nyid las so/ /dper na 'tsho ba'i gnas skabs na rnam shes nyid las rnam shes yin pa ni de'i 'du byed kyi rjes su byed pa'i phyir yin la/ de bzhin du dang po'i gnas skabs la yang yin gyi lus las ni ma yin te 'gal ba'i 'bras bu yin no zhes bstan pa'i phyir rnam par shes pa dang bral ba'i lus nyid las zhes bya ba ste/ rnam par shes pa du ma skye zhing zhes bya ba ni/ gcig gam du ma la yang ma gus pa'i bsam pas so/ /shes pa du ma gzhan dang gzhan skyed par byed pa ni nus pa la khyad par med pa'i phyir dus gcig las shes pa du ma skyed par byed pa yin par dgongs pa'o/ /'bras bu rgyu rnams kyi nus pa la nye bar gnod pa ma byas kyang gcig gis byas pa la gzhan yal bar 'dug par mthong ba yin no snyam du sems pa la rgyu rnams rtog pa dang ldan pa ni 'ga' yang med do zhes bya ba ste/ gang gi gang las zhes bya ba ni rgyu'i lnga pa yin no/ /gal te yang 'bras bus nye bar gnod pa ni gzhan la mi snang yang 'di nyid la cis mi srid pa yin snyam du sems pa ni/ 'on te brgya la zhes bya ba ni/ lan ni lus las zhes bya ba ste/ lus ni shes pa las skyed byed nyid du nges ba yin na phyi ma'i dus su skyed par mi byed pas nye bar gnod pa srid par 'gyur ro/ /rnam shes du ma zhes bya ba ni skyed byed nyid tsam du dgongs pas so/ /du ma 'dzin pa ni gtso bo mi byed pas so/ /dogs par 'gyur ba la/ la lar zhes bya ba ni dus phyis shes pa nyid la shes pa yin no/ /rgyu mtshan ni lus skyed par byed pa'i nus pa can du nges pa'o/ /lus bzhin du rnam shes kyi yang ci las de nges pa yin zhes pa la/ de'i phyogs su lhung ba'i zhes bya ba smos te/ goms pa'i 'du byed pa'i khyad par gyis nges par rnam shes kyi skyed byed yin la gcig skyed par byed pa 'di yin par nyams su myong ba yin no zhes bya ba'i don to/ /dbang po du ma'i bskyed bya shes pa du ma yin par mthong ba ma yin nam/ de bzhin du lus kyi bskyed byar yang 'gyur snyam du sems pa ni/ brjod bya ma yin nam zhes bya ba'o/ /dbang po yang snga ma'i rnam shes dang bral na rnam shes kyi rgyu ma yin te rnam shes kyi 'du byed pa med na med pa'i phyir ro/ /de ni gcig gam du 'am yang rung nus pa yod pa dang med pa dag gis rnam shes skyed par byed pa yin par brjod pa ni/ bden te zhes bya ba la sogs pa'o/ /de de ltar rnam shes kyi nges par rnam shes gzhan gyi 'du byed pa'i rjes su byed na/ 'jig rten pha rol med na mi srid pa yin par bstan pa ni/ gzhan la zhes bya ba'o/ / lus rgyu nyid yin na gsal ba mang po kho na yin te/ de'i rtag tu nye ba yin no zhes bstan pa ni/ des na lus de zhes bya ba'o/ /nur nur po'i ngo bo'i lus shes pa'i skyed byed ma yin nam/ gzhan ni de dang mtshan nyid mi mthun pa ni de'i skyed byed ma yin no/ /de'i phyir nus pa dang ldan pa'i lus ni ldog pa ci las yin zhes bya ba mi rigs pa yin snyam du sems pa ni/ 'on te lus de'i zhes bya ba'o/ /nur nur po dang / mtshan nyid mi mthun pa skyed byed ma yin na/ de dang lhan cig ma bral ba'i rnam shes su mi 'gyur bar bstan pa ni/ gal te dang po'i lus nyid kyi zhes bya ba la sogs pa ste/ lan cig nye bar len pa nyid du 'bras bu'i khyad par la nges na de nyid la lhan cig byed pa nyid ni de dang 'gal ba nyid du mi 'gyur bar bstan pa ni/ gal te lus zhes bya ba'o/ /ba lang gi lci ba dang ut+pa la'i rtsa ba'i dbye ba bzhin du lus dang rnam shes las byung ba'i rnam shes kyi dbye ba yin no snyam du sems pa la/ rnam shes dag gi dbye ba ni goms pa'i bskyed bya'i khyad par nyid du bye brag med pa'i phyir ro zhes bstan pa ni/ gsal ba la sogs pa zhes bya ba'o/ /sems la lus ni nye bar len pa nyid ma yin na sems kyi 'du byed pa'i rjes su 'jug par nges pas lhan cig byed pa nyid med pa la yang rgyu mtshan mtshungs pa yin no zhes zer ba ni/ khyed kyi ltar na yang ngo zhes bya ba'o/ /rten min phyir ni nye bar len pa ma yin pa'i phyir ro/ /lhan cig byed pa ma yin pa'i phyir lus la brten pa ma yin pa'i sems ni lus med kyang rnam par gnas par 'gyur ro zhes bya ba'i phyogs la khas len pa yin par bstan pa ni/ sems kyi rgyu ni gnas pa'i rgyu ste/ gnas pa ni rgyun ma chad pa yin pa de'i rgyu ni las kyi ming can te de ni lus kyi rgyu yin no/ /de'i lus kyi rgyu ni skye mched lnga'o/ /de'i 'jug pa thob pa ni lus gzhan bskyed pa'i bya ba'o/ /de'i don du yan lag nyid de rgyu mtshan du gang gi tshe mi 'gyur na ste lus la sred pa dang bcas pa'o/ /de'i tshe rgol ba khas blangs pa yin no zhes gnas skabs la ltos nas lhag ma'i don yin no/ /de'i rgyu 'jug pa na thob don du zhes bstan pa de'i rgyu gang yin pa zhes bya ba de la bstan pa ni/ tshe 'di nyid skye mched lnga'i srid pa 'di las gzhan pa'i lus skye ba gzhan la 'byung bar 'gyur ba ni lus gzhan yin la de'i bskyed pa'i lus la rgyu yin no/ /yang na yan lag can nyid du mi 'gyur ba'i phyogs la 'ba' zhig gnas par dam bcas nas phyogs gzhan la de med par bstan pa ni/ de nyid kyi phyir gang gi tshe yang zhes bya ba ste/ yang gi sgra ni khyad par gyi tshig go/ /'di la yang bag chags la gnas pa'i lam gyi ngo bo ni/ de dang lhan cig brjod pa can du byed pa yin no/ /nur nur po ni srid pa gzhan la 'byung ba'o/ /sogs pa'i sgras ni tshe 'di pa'i skye mched lnga bstan pa yin te/ 'byung rngub dbang po blo dag ni/ /lus nyid 'ba' zhig las skyes min/ /zhes gsungs pa'i phyir ro/ /mngon par phyogs pa'i bya ba'i dngos po bstan nas der gtod pa bstan pa ni/ de thob pa ni lus kyi rgyu 'ba' zhig la zhes bya ba'o/ /dgag bya bstan nas/ dgag pa bstan pa ni/ de yan lag du mi 'gyur na zhes bya ba'o/ /'ba' zhig gnas pa'i sems bag chags la gnas pa'i skye mched lnga'i dbang gis dus phyis lus dang bcas par 'byung bar bstan pa ni/ lus gzhan skye ba la ni zhes bya ba'o/ /sems kyi ngo bo'i las kyang skye ba phyi ma'i lus ma mthong na ji ltar rgyu yin par rtogs snyam du sems pa ni/ de'i yan lag gi zhes bya ba'o/ /'di ni las kyi'o/ /yan lag dngos po ni skye mched lnga po rgyu nyid do/ /de dag dgag pa la mi dmigs pa ni 'bras bu mi dmigs pa'o/ /des 'byed min pa ni khyad par med pa nyid kyis ma nges pa yin pa'i phyir ro/ /tshe 'di pa'i skye mched lnga ni skye ba phyi ma 'bras bu'i lus la bzlog pas khyab pas 'gal ba yin zhes bya bar yang 'gyur ba'i phyir mi dmigs pa nyid rtogs bya yin pa'i phyir mi mthun pa'i phyogs las bzlog pa la the tshom za ba nyid kyis 'gal bar ma rtogs pas ma nges pa kho na yin par bstan pa ni/ de yi yan lag dngos po dang / /zhes bya ba'o/ /gal te yang skye mched lnga mngon sum pa yin yang de'i 'bras bu skye ba phyi ma'i lus dbang po las 'das pa yin pa'i phyir de'i rgyu nyid dbang po las 'das pa kho na yin no/ /de lta yin yang khas blangs pa yin par bstan pa ni/ gal te yang zhes bya ba ste/ de ltar med do zhes bya ba ni ma dmigs pa'i khyad par te nus pa'i ngo bo'i las kyang dbang po las 'das pa yin pa'i phyir zhes bya ba'i don to/ /khyab pa sngon du 'gro ba can zhes bya ba ni/ dbang po mtshams sbyor ba las bzlog pas khyab ste/ 'gal bas khyab pa zhes bya ba'i don to zhes bshad pa zhes bya ba ni/ 'bras bu'i 'dod pas sngags rnams ni/ /byas dang skyes bus byas brjod bya/ /blo dbang smra dang skyes bu nyid/ /la sogs sgrub byed gang brjod pa/ /tshad ltar snang yin lhag ldan pas/ /ji bzhin don rtogs yod ma yin/ /zhes gsungs pa'o/ /de dang mtshams sbyor ba zhes bya ba ni/ 'di ba'i lus su gyur pa'i dbang po dang mtshams sbyor ba'o/ /de yang ni/ 'jig rten pha rol du 'byung ba'i mtshams sbyor ba'o/ /de'i tshe ni de'i dus su 'di pa yin pa'i phyir ro/ /khu khrag gzhan gyis bskyed pa'i dbang po zhes bya ba ni/ las kyi mtshams sbyor bar byed pa la ltos nas mi dmigs pa tsam ni mi snang ba mi dmigs pa'o/ /mi dmigs par zhes bya ba ni/ gzhan gyis te snang ba mi dmigs pas rtogs pa ma yin no zhes bya bar sbyar ro/ /ji ltar bsgrub bya'i thun mong ba'i yul ni/ khyad par ma yin pa de bzhin du rgyu'i khyad par las byung ba nyid kyang / rtsa ba'i med bzhin du khyad par ma yin pa kho nar bstan pa ni/ khu khrag gzhan nyid kyis zhes bya ba'o/ /dpe dang don gyis yul gyi khyad par gyi dpe brjod pa ni bum pa dang sgra'i zhes bya bya'o/ /yul dang rgyu'i khyad par la sogs pa rnams ni/ khyad par byed pa nyid la gtan tshigs nyid yin te/ dbang po gzhan dang mtshams sbyor ba la gegs med pa'i phyir ro zhes bstan pa ni/ dbang po snga ma zhes bya ba ste/ rang rigs la ni rang gi rgyud las byung ba rnams la ste/ rgyud gzhan gyi dbang po la mtshams sbyor ba ma yin na rang gi rgyud la mtshams kyi sbyor ba ma yin no/ /gang gi phyir me ni me gzhan gyi bskyed bya'i du ba skyed par mi byed pa ma yin no/ /'jig rten pha rol du byung ba'i dbang po ni 'jig rten pha rol gzhan las 'byung ba'i rang gi rgyud kyi skyed byed du ma yin no zhe na/ 'gyur ba mthong ba'i phyir zhes bya ba smos te/ goms pa'i bskyed bya'i dbang po rnams kyi 'gyur ba ste/ g.yer bag can la sogs pa'i khyad par du skye ba dang po la mthong ba'i phyir gzhan las te skye ba snga ma las gzhan te skye ba phyi ma gzhan gyi dbang po rnams 'grub pa nyid ces bya ba gnas skabs yin pa'i phyir 'tsho ba'i gnas skabs su 'brel pa 'dzin pa las skye ba'i dang po la rjes su dpog pa yin no zhes bya ba'i don to/ /gsal ba'i khyad par las 'brel pa 'dzin pa na de dang 'dra ba la yang 'dzin pa yin gyi/ gzhan du na 'bras bu mthong ba nyid la rgyur rtogs par bya ba yin pa'i phyir 'bras bu mi mthong ba ni nye bar len par mi byed do/ /de lta yin na tha snyad chad par 'gyur ba yin par bstan pa ni/ gsal ba'i khyad par zhes bya ba'o/ /de ltar na g.yo ba zhes bya ba la sogs pa nas skyes pa ni de lta bur gyur pa'i bar gyis 'brel pa 'dzin pa yin par bstan pa yin no/ /de lta bur gyur pa mthong ba las zhes bya ba ni rjes su dpag pa'o/ /'on te dbang po ni zhes bya ba ni dbang po gzhan dang mtshams sbyor ba nyid kyis gzung ba yin no zhes zer ba la/ gal te de lta na zhes bya ba ste/ gal te yang dbang po chos can cig yin yang de'i khyad par g.yo ba la sogs pa rnams te/ goms pa'i bskyed bya ni/ skad cig re re zhing tha dad pa kho na yin par bstan pa ni/ g.yo ba la sogs pa goms pa sngon du 'gro ba can zhes bya ba ste/ des na dbugs kyi gnas skabs su zhes bya ba ni g.yo ba la sogs pa'i mtshan nyid kyi rang bzhin du gyur pa las te/ rang bzhin ma yin na skye ba gzhan dang gzhan gyi dbang po rnams mi 'grub po zhes bya ba'i don to/ /skye ba gzhan dang gzhan yang skad cig re re zhing gzhan dang gzhan nyid du 'grel pa mdzad pa bzhed pa yin no/ /sa la sogs pa bzhin zhes bya ba ni sa la sogs pa'i rang bzhin du gyur pa'i kham phor la sogs pa'i 'gyur ba tha dad pa yin pa ni/ sa la sogs pa nyid tha dad pa yin gyi shes pa ni ma yin no/ /gal te lus las lan cig blo/ /skye zhing phyis ni rang rig las nges pa na zhes rgol ba dang / lus kyi nus pa ni ci'i phyir na ldog pa yin zhes bya ba la de'i ngo bor khyad par med pa las skyed byed yin na cig car du ma'i skyed byed nyid du thal bar 'gyur bar yang ngo / /dbang po la yang lhag par bstan pa ni/ gal te lus las de skye na/ /zhes bya ba'o/ /de nyid rnam par 'grel pa ni/ /'on kyang dang po zhes bya ba'o/ /lan lhag par bstan pa ni/ snga ma bzhin du thal bar 'gyur/ /zhes bya ba der rnam par 'chad pa ste/ gal te lus las zhes bya ba'o/ /yang na lus las dbang po skye bar khas len pa yin na gnas skabs la sogs pa thal ches pa yin par skye ba yongs su 'dzin pa la thal ches pa'i phyir zhes gsungs pa lhag par bstan pa ni/ snga ma bzhin du thal bar 'gyur/ /zhes bya ba'o/ /snga ma de nyid gtso bo yin te rtsig pa dang bum pa la sogs pa dang / shi ba'i lus la yang sems med pa'i phyir dbang po med na de'i rgyu de nyid yin te/ 'bras bu de la nges pa'i phyir ro zhes bya ba'i dogs pa sngon du song bas bstan pa ni/ sems las kyang zhes bya ba ste/ kyang gi sgras sems kyi zhes bya ba bsdus pa yin par bstan pa ni/ sems kyi yang zhes bya ba'o/ /gang gi phyir goms pa'i bskyed bya'i rnam pa mthong ba las dbang po rnams skye ba'i dang po la skye ba snga ma'i dbang po'i sems rgyu'i khyad par du grub pa yin gyi 'bras bu'i khyad par ni de med na grub pa ma yin la/ de las gzhan pa lus la sogs pa yang rgyu ma yin no/ /de'i phyir rgyu ma tshang ba las shi ba skye ba gzhan du mtshams sbyor ba ma yin pa mi rigs par bstan pa ni/ des ni rgyu dang bral ba'i phyir/ /zhes bya ba ste med pa'i phyir ro/ /kun zhes bya ba ni dgra bcom pa 'ba' zhig kho na ma yin te/ so so'i skye bo rnams kyi yang zhes bya bar dgongs bas dgag pa'i dag gcig yin pa'am/ so so'i skye bo rnams su ma zad kyi dgra bcom pa rnams kyi yang yin no/ /gang gi phyir nyon mongs pa med pa'i sems sam dbang po yang rung de'i yang rgyun du byed pa bkag pa ni ma yin no/ /'on te dbang po'i sems kyang mtshams sbyor bar byed pa ma mthong ba'i phyir bzlog pas khyab pa yin na ma mthong ba la khyad par med pa nyid kyis ma nges pa'i phyir mi rigs pa yin par bstan pa ni/ de'i phyir 'di 'dra zhes bya ba'o/ /'chi ba sems nyid yin pa'i phyir/ /zhes bya ba nye bar mtshon pa ni dbang po nyid la sogs par ro/ /nang gi rig pa'i khyad par gyis ni lus kyi zhes bya ba dang sbyar bar bya'o/ /ji ltar lus tha dad pa la 'jug pa nyid lus tha dad pa la dmigs pa nyid yin pa de bzhin du lus gzhan la mtshams sbyor ba can nyid kyang lus gzhan la dmigs pa ni sems gzhan skyed par byed pa nyid yin no/ /de'i phyir yang ma nges pa'i gtan tshigs su 'gyur bar bstan pa ni/ des na ma nges pa yin no zhes bya ba'o/ /rab tu grub pa ma yin pa'i khyad par yang gtan tshigs yin par bstan pa ni/ lus gzhan pa nyid kyang ma yin te/ de'i phyir lus ni yid kyi rnam shes kyi rgyun la phan byed pa'i phyir rten yin gyi skyed par byed pa'i phyir ni ma yin no/ /de yi shes pas phan 'dogs phyir/ /yid ni lus la brten par bshad/ /'ga' zhig tshe na sems rgyun gyi/ /phan 'dogs byed pa'ang yin bla ste/ /zhes gsungs pa yin pa'i phyir zhes bstan pa ni/ de'i phyir yid kyi rgyun la zhes bya ba'o/ /'bru'i rgyun bzhin zhes bya ba ni sa bon las skyed pa ni chu la sogs pas phan byed pa yin no/ /de lta bu de yang sems skye ba brgyud par rgyun mi 'chad par rjes su 'jug pa yin la/ snying rje la sogs pa de'i chos rnams phul du byung bar 'gyur ba yin no/ /de'i phyir/ sgrub byed snying rje goms las de/ /zhes bya ba 'di'i gnyen po 'di grub pa yin par bstan pa ni/ des na sems kyi rgyun thog ma med pa zhes bya ba'o/ /de'i phyir gang gi 'du byed nyid nges pa yin pa ni rjes su 'jug pa zhes bya ba la sogs pas sems ni sems las yin te/ skye ba dang po la lus la sogs pa 'gyur ba ma yin yang de 'gyur na 'gyur ba'i phyir ro/ /sems ni lus 'dzin pa'i bdag nyid yin la 'bad pa med pa'i rgyun nyid kyis brtan pa yin yang snying la de'i chos rnams goms pa las 'byung ba nyid kyis 'bad pa la ltos pa yin pa'i phyir gdon mi za bar byung ba'am phul du byung ba yang ma yin te/ mchongs pa la sogs pa lta bu yin par bstan pa ni/ gal te goms pa yod med ces bya ba ste/ rab kyi ni yul ma yin pa dang ldan pa'o/ /mthar phyin pa ni mthar thug pa gang yin pa der cung zad tsam ni dpag tu yod pa phul du byung ba ma yin no/ /khyad par ni phul du byung bar snang ba'o/ /khyad par 'gyur na yang zhes bya ba ni phul du byung bar 'gyur na yang ngo / /rang bzhin ni dus ji tsam pa nyid dang khyad par ji tsam pa nyid kyang ngo / /de las 'da' min ni 'bad pa med pa'i rgyun nyid dang tshad med pa'i phul du byung ba nyid kyang ngo / /shin tu goms pa'i mchongs pa yang dpag tshad dam dpag tshad phyed du mi 'gyur ro/ /chu khyad par can du bskol ba yin yang 'bar ba'i mthar thug par mi 'gyur te/ rten chu nyid med pa'i phyir ro/ /goms pa ni rang bzhin la khyad par gyi rgyu ma yin te/ de med na rgyu ni de'i rgyu ma yin par thal bar 'gyur ba'i phyir te shin tu phul du byung ba nyid dang phul du byung ba'i rgyu nyid 'gal ba'i phyir ro/ /mchongs pa phul du byung ba tsam dang ldan pa ni shin tu phul du byung ba yin yang mchongs pa'i bdag nyid las ldog pa ma yin na gang gis 'gal bar 'gyur phul du byung bar lan cig sgro btags pas kyang rang bzhin las ldog pa ma yin te/ mchongs pa dang snying rje ba la sogs pa dang khyad par ci yod snyam du sems pa la/ byas te gal te zhes bya ba ste/ goms pas byas pa'i khyad par ro/ /rang yod pa la 'bad rtsol gzhan la ltos pa ni mchongs ba 'phel ba ma yin te/ phul du byung ba gzhan la rten med pa'i phyir/ khyad par dag ni med 'phel zhing / /zhes bya ba'o/ /yang 'bad pa la sogs pa yin yang chu shin tu cher bskol ba la sogs pa'i dbye bas 'phel ba kho na yin no snyam du sems pa la khyad par dang rten dngos su 'gal ba ma yin yang khyad par byed pa dang 'gal ba'i phyir 'gal ba'i 'bras bu nyid kyis 'di rang bzhin yin par bstan pa ni/ rang bzhin de 'dra ma yin te/ /zhes bya ba'o/ /slar yang 'bad pa la brten pa dang rten mi brten pa nyid dag la go rims bzhin du mi 'phel ba dang / rang bzhin ma yin pa'i skyon yin no/ /ci las yin snyam du sems pa la dang po la gtan tshigs bstan pa ni/ de la zhes bya ba la/ de la ni snga ma'i rgyus rdzogs pa'i khyad par la phan 'dogs pa'i nus pa yongs su rdzogs pa gang dag gi yin pa de dag gi'o/ /phyogs gnyis pa la yang rtag tu zhes bya ba la sogs pa nas khyad par 'phel yang zhes bya ba'i bar te/ rten gnas ma yin pa ni/ rten gnas pa med pas rang bzhin ma yin pa'i phyir/ khyad par dag ni mi 'phel zhing / 'phel yang phul du byung ba ma yin zhes bya bar sbyar ro/ /phul du byung ba'i 'phel ba ma yin pa ni/ slar yang 'bad pa la ltos pa dang / rten brtan pa nyid med na mi 'byung ba'i phyir des khyab pa ni de las bzlog pa la mi 'gyur ro zhes bzlog pa bstan pa ni/ gang tshe byas 'gyur ba zhes bya ba ste/ rten mi brtan pa nyid log na rang bzhin ma yin pa nyid ldog pa yin no zhes bya ba'i don to/ /'grel par yang de lta bu'i don go bar bya'o/ /khyad par ni phul du byung ba ste de tsam du byung bar rnam par gnas pa phul du byung ba nyid khyad par de la 'byung ba 'phel bar ci ste mi 'gyur/ de bstan pa ni/ khyad par yin no cog ces bya ba'o/ /rang gi rgyun du gyur pa tsam gyis ni khyad par ni rang gi ngo bo tsam du gyur pa de ltar rnam par gzhag pa phul du byung ba ma yin no/ /'on kyang zhes bya bas khyad par bstan pa ni/ mchongs pa'i yul snga ma nyid la slar yang 'bad rtsol la ltos pa yang chu bskol ba 'phel pa yang mi brtan pa nyid kyis phul du byung bar 'phel ba ma yin par bstan pa ni/ 'di dang me dang 'brel pa med kyang yod pa ni ma yin no zhes bya ba'i de ma thag tu rten yang ma yin zhes bya bar blta bar bya'o/ /gang gi phyir yod pa las 'phel ba mthar thug par mi 'gyur ba ni phul du byung bar mi 'phel ba'o/ /khyab pa zhes bya ba ni de nyid la yod pa'i phyir ro/ /de med pa'i phyir ni khyab par byed pa med pa'i phyir ro/ /de las bzlog pa srid pa'i phyir/ /zhes bya ba ni khyab par byed pa 'gal ba yin no/ /'dis ni gang tshe byas gyur pa/ /zhes bya ba bshad pa yin no/ /rten mi brtan pa nyid gyur na/ /rang bzhin de 'dra 'ang ma yin te/ /zhes bya ba 'ba' zhig ma yin te/ 'on kyang slar yang 'bad rtsol la ltos pa la yang sbyar bar nus pa yin no zhes bstan pa ni/ yang rtsol ba la ltos pa gang yin pa zhes bya ba'o/ /khyad par byed pa dang bcas pa zhes bya ba ni khyab par byed pa med pa'am khyab par byed pa dang 'gal ba'o/ / gang zhig yang rtsol ba zhes bya ba la sogs pa yang 'bad rtsol la ltos pa la yang phul du byung bar 'phel ba ni/ rten dang 'gal ba'i 'bras bu yin pa'i phyir/ rang bzhin med pa yin no zhes dgongs pa yin te/ rang bzhin med pa nyid ces bya ba ni rten mi brtan pa nyid kyi phyir ro/ /rgyu nye ba la ltos ba zhes bya ba ni 'bras bu 'byung ba'i 'phel ba dang ldan pa'i rten la dgongs nas 'gal ba'i 'bras bu yin pa'i phyir ro/ /rang gi ngang gis 'jug pa zhes bya ba ni/ 'gal ba med pa'i 'bras bu yin no/ /mchongs pa dang chu bskol ba bzhin zhes bya ba 'di la/ chu bskol ba ni dpe yin te mchongs ba la ni sbyor bar nus pa yin no zhes dgongs pas so/ /gang tshe byas gyur pa zhes bya ba de 'chad pa yin/ brtse ba la sogs pa'i yid kyi yon tan zhes bya ba ste/ 'di la dpe ni shing dag dang dngul chu zhes bya ba ste/ de rnam par 'grel pa ni/ phyi rol gyi yon tan 'ga' zhig ces bya ba'o/ /yang 'bad rtsol la mi ltos pa kho na'i phyir goms pa las byung ba'i snying rje la sogs pa yang / goms pa yang rang gi ngang gis te/ rang gi rgyu mtshan gyis yin par nye bar bsdu ba ni/ sems la zhes bya ba ste/ bde sogs zhes bya bas chos can rnams chos kyi khyad par dang ldan par bstan pa yin no/ /de bzhin du 'bad rtsol gzhan gyis bskyed bya'i khyad par gzhan ni rang gi ngang gis 'jug pa'i brjod bya yin par bstan pa ni/ yang nas yang du zhes bya ba ste/ de goms pas ni de'i rjes su 'jug pa ste/ byas pa'i khyad par ni phul du byung ba gang dag yin pa de dag yin no/ de rjes su 'jug pa'i khyad par yin yang / mchongs pa la sogs pa rnam par ldog pa kho na yin nam de las bstan pa ni/ de'i tshe snying rje la sogs pa'i khyad par byas zin par brjod pa ni/ gang gi tshe yang 'bad rtsol la mi ltos pa mchongs pa la sogs pa'i khyad par dang mtshan nyid mi mthun pa'i khyad par bstan pa yin gyi/ khyad par tsam ni ma yin no zhes bya ba'i don to/ /khyad par 'di la ltos pa yin na 'dir 'gyur ro zhes bstan pa ni/ rtsol ba gzhan zhes bya ba'o/ /gal te khyad par 'di nyid goms pa'i bskyed bya la khyad par med na/ 'di ji ltar yin/ rgyu la khyad par med na 'bras bu la khyad par med do snyam du sems pa ni/ gal te mchongs pa yang zhes bya ba ste/ goms pa'i bskyed bya'i khyad par yin yang / khyad par dag la yang 'bad rtsol la ltos pa dang mi ltos pa chos can la gnas pa nyid kyis khyad par che ba yin par bstan pa ni/ 'di la bshad zin to zhes bya ba ste/ yang 'bad rtsol la ltos pa'i khyad par ni 'phel ba yin yang chu bskol ba bzhin du shin tu 'phel ba ma yin te/ rten dang 'gal ba'i 'bras bu nyid kyis rang nyid kho na med pa'i phyir ro zhes bstan pa nye bar bsdu ba ni/ de'i phyir zhes bya ba ste/ rten brtan pa'i phyir 'phel ba'i khyad par ni rten dang 'gal ba'i 'bras bu ma yin no/ /de'i phyir shin tu 'phel ba kho na yin te/ khyad par gyi rgyu dang rten ma 'gal ba'i phyir dang / khyad par la yang 'bad rtsol la ltos pa med pa'i phyir ro/ /da ni snying rje la sogs pa'i chos kho na phul du byung ba'i ming can ni goms pa'i bskyed bya yin gyi chos can ni ma yin te/ rang gi rgyud las byung ba'i phyir dang de kho na nyid bzhin du phul du byung ba'i gnas skabs mthong ba'i phyir ro/ /mchongs pa la sogs pa'i chos can yang 'bad rtsol med na mi srid par bstan pa ni gang phyir zhes bya ba ste/ rigs mthun pa'i sngar gyi sa bon las byung ba nyid kyi 'bad rtsol nyid kyis bskyed bya nyid sel bar byed pas yul gyi phan 'dogs pa la sogs pa la ltos pa'i yin no/ /de'i phyir chos la mi dmigs pa la sogs pa nyid kyis snying rje la sogs pa rab tu 'jug pa brjod pa yin par bstan pa ni/ yul nye ba zhes bya ba la sogs pa'o/ /de la dmigs pa nyid ni da dung yang snang ba nyid kho na yin par bstan pa ni/ dran pa dang thos sogs kyis kyang zhes bya ba ste/ dran pa la sogs pa'i mi dmigs pa ni/ dngos por mi snang phyir rnam rtog ces bstan pa yin no/ /yul la sogs pa la ltos pa med pa 'ba' zhig ni ma yin te/ mi mthun pa'i phyogs kyis kyang bzlog bya ma yin par bstan pa ni/ de'i zhing du byas pa dag ces bya ba'o/ /rgyas pa las gzhan pa ni/ rgyas pa la ma yin pa ste gzhan pa'o/ /de kho na gzhan pa nyid yin te/ mi mthun pa'i phyogs kyis mi gsal bar byas pa'i phyir dang / goms pa'i yul la sogs pa la mi ltos pa'i phyir zhan pa nyid ma yin no/ /'di ltar sems can dang chos dang mi dmigs pa'i snying rje rnams ni so so'i skye bo dang / 'phags pa dang byang chub sems dpa' rnams kyi yin par 'grub ces bya ba'i don to/ /mchongs pa yang rang gi sa bon las byung ba nyid ma yin nam/ goms pa ni phul du byung ba kho na la snying rje la sogs pa bzhin du byed pa yin pa'i phyir ro snyam du sems pa ni/ ji ste zhes bya ba la sogs pa'o/ /mchongs pa ni mchongs pas byung ba ni yin te stobs dang 'bad rtsol las byung ba yin no zhes bya bar bstan pa ni/ de ltar mchong nyid las mchongs min/ /zhes bya ba'o/ /stobs las sam 'bad rtsol las byung ba ni goms pas shin tu phul du byung bar 'gyur ba ma yin nam snyam du sems pa ni/ de rgyu zhes bya ba ste gnas pa'i nus nyid yin pa'i phyir gnas pa'i 'bras bu nyid yin gyi/ goms pa'am gzhan yang rung de'i rang bzhin gyis mchong ba ni ma yin no/ /goms pa ni stobs kyi rang bzhin kho na la brten pa yin par bstan pa ni/ rang gis mchongs pa goms par zhes bya ba'o/ /goms pa yod pa'i mchongs pa gang yin pa ni/ snga rol na de stobs yod kyang med pa ma yin nam snyam du sems pa ni ji ste yang zhes bya ba la sogs pa'o/ /sngar gyi stobs bad kan la sogs pas lus lci ba la sogs pas nye bar gnod pa yin la goms pas ni nye bar gnod pa med par byed pa bstan pa ni/ de ni dang po zhes bya ba'o/ /gal te stobs rang gi sa bon tsam las byung bar 'bad rtsol med par phul du byung ba'i snying rjer 'gyur ro/ /gang gi phyir 'bras bu mi dmigs pa ni/ rgyu'i tshogs pa med par go bar byed pa yin no snyam du sems pa ni/ gal te brtse ba la sogs pa zhes bya ba'o/ /de'i tshe de'i bdag nyid du yang zhes yang gi sgra rim las bzlog pa yin te/ gang gi tshe zhe na/ rten brtan pa yang yin na yin gyi gzhan gyi tshe ni ma yin pa'o/ /mi mthun pa'i phyogs su byed pa la goms pa las rtogs pa yin gyi rang gi ngo bo las ni ma yin zhes ci las rtogs pa yin zhes/ 'di ltar goms pa zhes bya ba la sogs pa smos so/ /gsal ba ni bya ba la phul du byung ba goms pa gang yin pa de snga ma snga ma ni phyi ma phyi ma'i snying rje la sogs pa'i rtsa ba yin te snga ma'i rang gi rigs kyi sa bon nyid med na/ goms pa nyid du mi 'gyur ro zhes bya ba'i don to/ /snga ma'i rang gi rigs las byung ba yin na goms par 'gyur bar bstan pa ni/ brtse ba la sogs pa zhes bya ba la sogs pa'o/ /de yang gang la 'gyur zhe na/ gsal ba zhes bya ba'o/ /skye ba la ni ma yin no/ /de'i phyir 'di ltar rang gi sa bon las byung ba'i goms pa phul du byung ba yin pa'i phyir/ snying rje ni sems kyi rang bzhin kho na yin par bstan pa ni/ des na zhes bya ba ste/ rang gi don zhes bya bas gegs byed pa med pa la mchog tu 'dzin pa yin no/ /rang gi sa bon las byung ba nyid ces bya bas goms pas phul du byung ba nyid du bstan pa yin no/ /'di nyid ni tshad ma kun las btus pa la sogs pa la 'gro ba la phan par bzhed pa nyid kyi bsam pas dgongs pa phun sum tshogs pa yin par bstan to/ /shin tu goms pa ni bsam pa ji lta ba bzhin du sbyor bar bstan pa ni/ de ltar na zhes bya ba'o/ /thugs rje phul byung zhes bya ba la sogs pa ni brtse ba dang ldan pa zhes bya ba 'di bshad pa'o/ /sdug bsngal gzhom pa'i phyir zhes bya ba ni rang dang gzhan gyi sdug bsngal gzhom par bya ba'i don du'o/ /gzhan gyi sdug bsngal gzhom pa sngon du byed pa kho na snying rje dang ldan pa'i rjes su mthun pa ma yin nam/ rang gi sdug bsngal gzhom pa mngon du byed pa ni/ de lta bu'i bsam pa med pa'i phyir ro/ /rang gi sdug bsngal gzhom pa mngon du byed pa yang / gzhan gyi sdug bsngal gzhom pa mngon du byed pa'i thabs yin pa'i phyir gdon mi za bar dgongs pa yin te/ de med na de nyid med pa'i phyir ro zhes bstan pa ni/ lkog tu gyur pa zhes bya ba ste/ thabs dang de'i rgyu mngon du byed pa pos de bshad pa ni shin tu bla bar mtho ris dang byang grol zhes bya ba'o/ /mtho ris kyi lam mngon du ma byas pa ni/ chad par nus pa ma yin te/ rjes su dpag pa'i yul yin pa'i phyir ro zhes bstan pa ni/ de la ni des zhes bya ba'o/ /rjes su dpag pas yongs su nges pa'i de kho na nyid yod pa la sogs pas skad cig ma nyid la sogs par nges pa yin na/ rang gi don ni rjes su dpag pa'o/ /'dod pa ni byed pa ste de'i dus na med pa ni ston pa med pa'o/ /ji tsam du zhe na/ thams cad kyi tshe ni ma yin zhes bya bar sbyar ro/ /gzhan gyi don gyi rjes su dpag pa'i ngo bo ston pa ni/ rang gi sngon du 'gro ba can yin na/ de'i tshe gdul bya nye ba yang yod pa ma yin te/ rang nyid ma nges pa'i phyir ro/ /lkog tu ma gyur pa'i thabs las byung ba dang / de'i rgyu'i skyon ni 'di ma yin te/ nges par 'byed pa'i cha las brtsams nas khyad par thams cad mngon sum yin pa'i phyir ro/ /rjes su dpag pas khyad par thams cad nges ba yang ma yin te/ mngon sum nyid du thal bar 'gyur ba'i phyir ro/ /thabs byung de rgyu lkog tu gyur pa la skyon gzhan bstan pa ni/ dmyal ba la sogs par skyes pa na med pa'i phyir ro/ /'bras bu mngon du byed pa ni dmyal ba la sogs par 'gro ba med pa'i phyir dus thams cad du ston par byed par 'gyur gyi/ gzhan du ni ma yin no zhes bya ba'i don to/ /de bzhin du sdug bsngal gzhom pa mngon du byed pas 'khrugs pa ma yin pa nyid med na dran pa goms pa'i yid kyi gsal ba nyid dang bral ba'i phyir sngon gyi gnas rjes su dran pa'i shes pa med pa yin na so sor nges pa'i las kyi 'bras bu ston pa ma yin la 'bras bu dang rgyu'i rang gi ngo bo'i khyad par ma nges pas rnam pa thams cad pa'i dngos po thams cad mngon du byed pa mi srid pa'i phyir 'od zer can gyi 'jig rten gyi khams la sogs pa'i srung gtam ston par mi 'gyur ro/ /bstan pa ni 'jig rten gyi khams zhes bya ba'o/ /de bas na thams cad ces bya ba ni gzhan gyi sdug bsngal gzhom pa bzhin du rang gi sdug bsngal gzhom pa yang zhes bya ba'o/ /de la zhes bya ba ni/ sdug bsngal gzhom pa dang de'i rgyu mngon du byed pa dag go/ /rgyu ni thabs yin te de bzhin du sdug bsngal gzhom pa'i phyir zhes bya ba ni sdug bsngal gzhom pa de'i rgyu mngon du byed pa'i rgyu'i phyir zhes bya bas bshad pa yin te sdug bsngal gzhom pa ni nye bar mtshon pa'i don yin pa'i phyir ro/ /de nyid ces bya ba ni rgyu dang yul las so/ /de la rgyu ni lung dang rigs pas zhes bya ba ste/ rigs pas ni rigs pa dang mi rigs pa nyid shes pa yin la/ lung gis ni las kyi lam ste/ 'di byas nas 'di byas pa yin zhes bya ba'o/ /rigs pa las gzhan pa ni lung yin te de 'dzin par bstan pas sgra rnams ni don la mi rigs pa nyid du yang 'dis bstan pa yin no/ /lam yang rigs pa kho na ma yin nam ma mthong ba de'i chos yod pas go bar mi nus pa'i phyir/ de yang de la tshad ma ma yin no/ /de 'di ltar rigs pa dang lung dang lhan cig pa 'jug pa'i yul du nges par byed pa yin gyi re re ni ma yin no/ /gang gi phyir yul med pa ni rigs pa ma yin la yul yang rigs pa dang bral ba yang ma yin no/ /des de ltar spyi nyid la 'dzin pa rnam par dpyad pa bstan nas snga ma gang yin pa dang / phyi ma gang yin pa zhes bya ba'i khyad par gyis bstan pa ni/ sdug bsngal rgyu dang zhes bya ba ste/ de med na rgyu med pa can gyi sdug bsngal de gzhom pa'i don gyi 'bad rtsol nyid du mi 'gyur ba'i phyir 'jug pa'i yan lag tu dang po rgyu yongs su rtogs pa yin no/ /de'i rjes la yongs su rtogs pa ni/ de'i zhes bya ba'i rgyu'i'o/ /mi rtag pa nyid la snga ma bzhin du phyin ci log pas rgyu ma tshang ba med pa la gzhom pa nyid du mi nus pas mi 'jug par thal bar 'gyur ro/ /gnyis po ci las rtogs pa yin zhe na/ sdug bsngal nyid kyis zhes bya ba smos te/ res 'ga' ba'i sdug bsngal ni/ rgyu dang de'i mi rtag pa yang go bar byed pa yin te/ de ma thag pa shin tu sbyor bar byed pa ma yin par bstan pa ni/ 'di thams cad kyang zhes bya ba'o/ /tshad ma can gyi lus la yang tshad ma de yin pa'i phyir ro/ /'grel bar ni rigs pa'i yul ma yin pa bsdu ba'i don du lung 'dzin pa yin/ lung 'dzin pa ni rigs pa las 'jug pa'i don du'am zhes bya ba la sogs par rjod par byed par gsal ba yin no/ /rnam par dpyod pa la mngon du phyogs pa ma yin pa ni rigs pa mthong yang shin tu sbyor bar byed pa ma yin par bstan pa ni/ 'di thams cad kyang zhes bya ba'o/ /tshad ma can gyi yul la yang tshad ma de mi 'thob na go bar byed pa ma yin no snyam du sems pa la ma rmongs pa la ni ma yin no zhes bya bar sbyar ro/ /ci sngar ram phyis kyang yongs su rtog pa zhes bya ba la/ khyad par du yongs su rtog pa yin par bstan pa ni/ de la re zhig ces bya ba'o/ /rgyu'am de'i mi rtag pa yongs su ma brtags na 'di ldog par rung ba ni 'jug pa la khyab par bya ba 'gal ba yin la mi 'jug par rung ba nyid rgyu med pa yin no/ /rgyu med pa nyid kyi ngo bo dmigs pa yin par bstan pa ni/ rgyu med pa zhes bya ba'o/ /gal te dngos po skad cig ma rang gi ngang gis 'jig pa can yin gyi de bzhin du rgyun ni ma yin par bstan pa ni/ rgyu dang bral ba med par ni zhes bya ba'o/ /rgyu rtag pa las kyang lan cig skyes pa ni rang gi ngo bo kho na 'jig pa ma yin nam gang gi phyir rtag pa yang 'di de kho na'i skyed byed ma yin te/ skyes par bya ba'i phyir ro snyam du sems pa la/ rgyu yis byas pa'i zhes bya ba ste/ gal te skyes pa yin yang de dang 'dra ba gzhan ni rgyu yod na 'jug pa kho na yin no/ /gal te med pa kho nas de med par 'gyur zhes ci las yin/ rdza mkhan la sogs pa med kyang bum pa med pa ni ma yin no/ /'di la brjod pa ni/ gal te de med kyang yod na zhes bya ba ste/ rdza mkhan gyi de ma thag tu 'byung ba'i skad cig ma yin gyi/ phyi ma ni ma yin te/ skad cig ma snga ma rgyu yin no zhes bya ba'i don to/ /rgyu med pa nyid ces bya ba la sogs pa las bzlog pa'i yon tan bstan pa ni mi rtag pa'i rgyu can zhes bya ba la sogs pa'o/ /rtag pa'i rgyu can la rgyu med par bstan pa ni/ rtag tu rgyu can la zhes bya ba'o/ /de las cir 'gyur zhe na/ ldog pa yod ma yin zhes bya ba smos te/ ldog pa yod pa ma yin te/ ma bral ba yin zhes bya ba'i don to/ /rtag tu rgyu can la zhes bya ba 'dis yin pa de'i yang rgyu gang yin/ de la ni med pa med do zhes sbyar ro/ /mi rtag pa'i rgyu can yin yang rgyu rang nyid kho nas 'jig pa'i phyir de'i don du rtog pa dang ldan pa rnams kyi bya ba 'bras bu med pa kho na yin no snyam du sems pa la/ gang phyir de ltar rgyu gnas na/ / zhes bya ba ste/ de ltar gnas pa ni rgyun gyis 'jug pa'am bag chags kyi ngo bos gnas pa na'o/ /'bras bu ni sdug bsngal lo/ /log pa med ces bya bar dgongs nas rgyu'i rgyun nam bag chags ldog pa'i don du 'bad rtsol ni rigs pa kho na'o/ /'grel pa mdzad pas ni de ltar gnas na zhes bya ba rgyu rtag pa yin na'o zhes bstan to/ /de yang rgyu'i rgyun nam bag chags kyang rung ba 'gal ba can gyi lam med na/ mi ldog pa yin pa'i phyir de'i 'gal ba'i phyogs kyi lam shes pa yin la de yang rgyu'i rang gi ngo bo kho na rtog pa las shes par bla bar bstan pa ni/ de rgyu zhes bya ba smos te/ snyam pa'i blo dang ldan pa zhes bya ba ni/ de lta'i rigs pa dang ldan par 'gyur ba'o/ /rtag pa'i rgyu can gyi sdug bsngal la de ltar dgongs pa yin gyi mi rtag pa'i rgyu can la ni ma yin zhes bya ba'i don to/ /rgyu 'jig pa ni 'gal ba can med na ma yin par bstan pa ni/ byung ba zhes bya ba rgyun gyis 'jug pa yin te/ grang ba la dro ba bzhin no/ /'di'i yang phyi rol nyid du cung zad 'gal ba can du 'gyur ro snyam du sems pa la/ rgyu med par mi 'gyur ro zhes bya ba'o/ /skye ba'i rgyu ni las dge ba dang mi dge ba'i rgyu ma yin nam de yang 'dod chags dang zhe sdang gis byas pa yin la/ rgod par byed pa la sogs pa'i rnam rtog gis byas pa yin na/ kun tu rtog pa de ldog na de las byung ba'i chags pa la sogs pa ldog pa yin la de las kyang / de'i las ldog pa yin no/ /de ltar ba'i las kyang 'bras bu byung na zad pa yin pa'i phyir las zad bas ni sdug bsngal thams cad las rnam par grol bar brjod pa yin no snyam du sems pa ni/ gal te rgyu med pa nyid las zhes bya ba'o/ /bdag tu lta ba yod na rang la chags pa dang ldan pa ni bdag gi lus la sogs pa la chags par byed pa'i byir chags pa de nyid rgod par byed pa'i kun tu rtog pa ma yin pa dang las kyi rgyu can ni/ bdag tu rtog pa dang ma bral ba yin no/ /de'i tshe las gzhan dang gzhan yin gyi sdug bsngal grol ba ma yin par bstan pa ni/ ma yin te/ ma rig pa las zhes bya ba'o/ /sdug bsngal phyin ci log blo dang / /sred pa kun nas 'ching ba ni/ /zhes bya ba la sogs ba'i rigs pa bstan pa ni/ las dang sdug bsngal gyi rgyu ni ma rig pa zhes bya ba'o/ /bde ba dang dge ba la sogs pa mthong ba ni/ ma rig pa dang las kyi sgo nas sdug bsngal gyi rgyu ma yin par bde ba las bzlog ba sdug bsngal la sogs par mthong ba ni/ gnyen po yin no zhes bya ba ni kha cig gi'o/ /gzhan dag na re rang bzhin dang skyes bu dag gzhan yin par ma mthong ba ni/ las las yin pas sdug bsngal gyi rgyu yin zhing bdag dang bdag ma yin pa dag gi rnam par dbye ba dag la mthong ba ni 'ching ba yin la/ dbye ba mthong ba ni de'i gnyen po yin no zhes zer ro/ /de ltar rgyu'i ngo bo la log par rtogs pa yin na/ de'i gnyen po yang nges par gnas pa ma yin no snyam du sems pa ni/ gal te sdug bsngal gyi rgyu zhes bya ba ste/ mthong ba yang sna tshogs par mthong ba nyid kyang sdug bsngal gyi rgyu sna tshogs pa las yin no zhes zer ba ni/ sdug pa dang bral ba zhes bya ba la sogs pa ste bzlog par bya ba ni rgyu zhes bya ba dang sbyar ro/ /bdag ces bya ba nyid dang / bdag gi zhes bya ba nyid kyang chags pa'i gzhi nyid yin te/ gzhan du na bde ba dang dge ba'i 'du shes yin yang blang bya nyid med pas nye bar len pa med pa'i phyir ro/ /de bzhin du sdug bsngal gyi 'du shes la yang dor bya nyid med pas gzhom bya ma yin par bshad pa yin no/ /de ltar na gzhom pa dang nye bar len pa yang bdag go zhes bya ba la sogs pa chags pa'i rgyu mtshan ni de'i 'gal ba bdag med pa mthong bas ldog pa yin no/ /de kho na yang bdag nyid thams cad kyis gzhom pa dang nye bar ldog par byed pa yin la/ de'i bdag nyid kyi sdug bsngal bzlog pa dang sdug bsngal gzhom pa yin par brjod pa yin no/ /de bzhin du bdag dang bdag ma yin pa'i rnam par dbye ba ma mthong ba ni/ bdag dang bdag gir chags pa'i rtsa ba ni/ gzhom pa dang nye bar len pa'i rgyu mtshan du rig par bya ba yin par bstan pa ni/ bdag dang bdag gir 'dzin pa zhes bya ba'o/ /bdag kho na la bdag tu lta ba sel ba ni/ 'dus byas spyod yul can zhes bya ba ste/ ji ltar lus dang dbang po dang blo dang tshor ba la sogs pa rnams bdag ma yin pa la bdag tu lta bas chags par byed pa yin te/ yongs su mi 'dor zhing len par byed pa de bzhin du bdag gi ba yang sdug bsngal ba'am sdug bsngal dang 'brel ba ni/ nye bar len par mi byed cing yongs su 'dor bar byed do/ /de bzhin du gcig pu mi dga' na/ de gnyis pa 'dod pa yin zhes bya ba la sogs pa'i rigs pas re zhig bdag dang bdag gir lta ba ni skye ba'i rgyu yin no zhes bya bar gnas pa yin no/ /bde ba dang de'i rgyu nyid la sogs pa mthong ba yang bdag med par rig pa'i 'ching ba'i rgyu ma yin no zhes bstan to/ /de ltar rgyu'i ngo bo nges par brtags pas de las bzlog pas bdag med par 'dzin pa la ma yin no zhes bya ba shes par bla ba yin par bstan pa ni/ bdag med mthong ba 'gal ba yin/ /zhes bya ba ste/ /yid kyi sdug bsngal bdag dang bdag gir kun tu rtog pa las byung ba ni kun rtog med na mi 'byung ngo / /rtsub mo la reg pa la sogs pa'i yul gyi bskyed bya'i dmigs pa ni/ tshogs pa las byung ba yin pa'i phyir dmigs pa kho na bzhin du 'byung bar 'gyur ro snyam du sems pa ni/ gal te chags pa dang bral na/ /zhes bya ba'o/ /gal te dmigs pa bzhin du sdug bsngal lam cig shos de'i bskyed bya yin na/ de gcig gi ngo bor 'gyur gyi cig shos ni ma yin no/ /'gyur na yang des rtogs pa ni yul la sogs pa'i tshogs pa bde ba la sogs pa'i bag chags dang lhan cig pa nyid bde ba'i rgyu yin no/ /gang yang gzhan sdug bsngal dang bral bar 'dod pa phul du byung ba'i bag chags kyis rang gi bde ba la sogs pa'i bag chags bsgribs pa de'i yul la dmigs pa de'i tshogs pa yod pas dmigs pa yod na bde ba la sogs pa 'byung ba ma yin te/ rgyu med pa'i phyir ro zhes bstan pa ni/ gzhan sdug bsngal bas zhes bya ba'o/ /gal te gzhan bde bar byed pa'am sdug bsngal gzhom pas kyang rang la 'bras bu ci zhig 'byung ba yin/ de med na rtog pa dang ldan pa rnams gang la yang 'jug pa ma yin snyam du sems pa la/ gzhan gyi bde ba la'am/ gzhan gyi sdug bsngal gzhom pa la bdag nyid du mngon par zhen pa yin na/ rang gi bde ba la sogs pa la ltos pa med pas bdag la chags pa bsgribs bzhin pa la 'jug pa ni/ bdag la yod pa'i 'bras bu med na ji ltar 'jug pa yin zhes glags btsal bar bya ba ma yin no/ /bdag gi ba'i 'bras bu yang de nyid la mngon par zhen pa med na 'jug par byed pa ma yin par bstan pa// bdag gi ba la mngon par zhen pas zhes bya ba ste/ gzhan la rang nyid kyi bla yin na rang la chags pas ldog pa kho na yin te/ mngon par 'dod pa'i yang khyad par las zhes bya ba'i don to/ /'di mthong ba yin par bstan pa ni/ bu la chags pas zhes bya ba'o/ /kha cig ni gzhan la rang nyid du mngon par zhen pa phul du byung ba med kyang bdag med pa bsgom pa phul du byung bas bdag dang bdag gir mngon par zhen pa ldog pa phul du byung ba yin na de'i snying po can gyi bag chags kyi ngo bo'i rgyu spangs pa'i phyir dmigs pa'i tshogs pa las dmigs pa 'byung ba yin yang / bde ba dang sdug bsngal ba la sogs pa'i 'bras bu 'byung ba ma yin par bstan pa ni/ des na bdag med pa de'i bdag tu gyur pa zhes bya ba nas/ de la gnod pa ci zhig yod ces bya ba'i bar du'o/ /'di las kyang bdag med pa mthong ba goms par mngon par 'dod pa'i bag chags phul du byung ba las kyang sdug bsngal gyi bag chags bsgribs pas de'i 'bras bu sdug bsngal ni yul la dmigs pa bzhin du skye ba ma yin par bstan pa ni/ gang la kho na la goms pa zhes bya ba ste/ bdag dang bdag gir 'dzin pa med na/ 'du byed pa tsam mthong ba'i yal bar 'dug pa ni phul du byung ba dang ldan pa yin te bsgom pa phul du byung ba'i phyir ro/ /sdug bsngal ni bdag la sogs par mngon par zhen pa'i snying po can gyi bag chags kyi bskyed bya yin la/ de med na mi 'byung ngo zhes sngar bstan pa nye bar sdud pa ni shin tu zhes bya ba'o/ /mang po zhes bya ba ni sbyor ba phal che ba nyid de/ rtsa ba'i sems bsdus pa'o/ / rnam pa du mar zhes bya ba ni/ de'i rjes su spyod pa'i sems kyi phung po dang khams dang skye mched la sogs par gnas pa'i rnam par dbye ba yin la/ rnam par dbye ba bsdus pa yin te/ bsdus pa'i sems kyis dus mang po nyid du bsgoms pa la sbyor ba mang po nyid 'thob pa yin pas rnam pa thams cad gsal bar 'gyur zhes bya ba'i don to/ /'grel bar ni bdag med pa mthong ba zhes bya ba ni spangs pa'i khyad par yod na'o/ /rtogs pa zhes bya ba ni shes rab 'phel ba'o/ /thabs rnam pa mang po zhes bya ba ni/ rdzu 'phrul dang mngon par shes pa la sogs pa'i yon tan yin la/ de med pa ni skyon yin pa ste/ yid kyi nyes par spyod pa la sogs pa'o/ /nyes pa phra mo dang rags pa nang na gnas pa ni bdag med par mthong ba'i bsgom pa phul du byung bas 'das pa dang ma 'ongs pa'i skyon phra mor 'gyur ba yang de'i nang na gnas pa'i rigs mthun pa bsgoms pas shin tu phra ba'i phyir shin tu mtshon par dka' ba yang mtshon par byed pa yin zhes bya bas rtog pa phul du byung bar bstan pa yin no/ /bag chags ni ngag ma dag pa khol mo zhes zer ba lta bu dang / lus ma dag pa mchongs bas 'gro ba lta bu dang / yid ma dag pa rtag tu mnyam par gzhag pa med pas lung du ma bstan pa sems mngon du rgyu ba yin te/ bdag tu nga rgyal ba la sogs pa'i nyon mongs pa'i 'bras bu'i khyad par ni nyon mongs pa med kyang 'phags pa nyan thos la sogs pa rnams la 'byung ba yin no/ /gzhan gyi don la 'jug pa gang gi yin pa de'i ste/ thub pa chen po'i 'di bse ru lta bu la sogs pa'i rang sangs rgyas la sogs pa las khyad par ni bag chags spangs pa'i mtshan nyid yin no/ /lus dang dbang po dang blo dang tshor ba la sogs pa rnams la bdag dang bdag gir 'dzin pa ni sdug bsngal gyi yin par nges pa la de las bzlog pa bdag med par mthong ba ni gnyen po yin gyi/ /sdug bsngal gyi 'du shes med pa'i phyir bdag dang bdag gir 'dzin pas byas pa'o/ /rnam pa mang po thabs mang po zhes bya ba la sogs pa la ni de las bsgom pa la sogs pas ni de la bsgoms pa cig phul du byung bas rnam pa thams cad mthong ba yin na/ rgyu 'joms pa phul du byung ba yin la/ de las kyang mngon par shes pa la sogs pa'i yon tan gyi thabs goms pas de yon tan phun sum tshogs pa dang ldan pa yin no zhes de dag tsam bstan pa yin gyi de dag tsam gyis thams cad mkhyen pa nyid ni ma yin te/ nyan thos la sogs pas rnam par dbye ba med pas thal bar 'gyur ro snyam du sems pa ni/ yang na gal te zhes bya ba'o/ /rgol ba 'di la yang dang yang du lan btab pa yin par bstan pa ni/ 'di la bshad pa ni zhes bya ba'o/ /'khor ba pa'i skyon yon mtha' dag gsal lo zhes bya ba ni/ sna tshogs pa rnam pa gnyis te/ yon tan gyi phyogs dang skyon gyis kyang ngo zhes bya ba ste/ rnam pa gzhan med pa'i phyir ro/ /btang snyoms su bya ba yang blang bya ma yin te/ dor bya yin pa'i phyir ro/ /rnam pa du mar thabs mang po ni spros pa ste/ de la re zhig las dang 'bras bu dang 'brel pa yongs su shes pa'i thabs bstan pa ni dran pa ste/ goms pa dang bcas pa'i dran pas yid kyi gsal ba nyid 'di la mthong ba'i nus pa nyid yin no/ /de'i tshe nyams su myong ba gsal ba ni dran pa'i gsal ba'i sgrub byed ma yin te/ yid gsal po med pa 'dod pa yin na de yod na skye ba snga ma la nyams su myong ba dran pa yin la/ gang gi phyir gang zhig dran par 'dod pas sems kyi 'bad rtsol lam/ chu tshod dang thun phyed dang thun la sogs par nyams su myong ba dran pa yin na/ nyin zhag la byung ba la yang dran la/ de bzhin du zla ba phyed pa dang zla ba dang po la sogs pa'i rim gyes byis pa'i bar du dran pa yin zhing / yid kyi dran pa'i nus pa dang ldan pa yin na skye ba gzhan la nyams su myong ba yang dran pa la yin par srid pa yin te/ goms pa dang ldan pa phul du byung ba ni gcig tu mi gnas pa'i ngo bo yin pa'i phyir ro/ /de las kyang de las gzhan pa yin pa'i phyir skye ba thog ma med pa nas brgyud pa dran pa yin na de'i rgyu dang de'i 'bras bu dang de'i khyad par yang de'i khyad par skyed par byed pa nyid la rjes su 'gro ba dang ldog pa nyams su myong ba la rtogs pa yin par bstan pa ni/ de'i tshe de'i rjes su 'brang bas zhes bya ba'o/ /de bzhin du rang gi rgyud la 'brel pa bzung ba'i 'bras bu dang / de'i khyad par yang gzhan la rtogs pa yin na/ de'i rgyu dang de'i 'bras bu yang mngon par rtogs pa yin par bstan pa ni/ ji ltar grong gzhan nas 'ongs pa zhes bya ba shes 'gyur ba zhes bya ba dang sbyor ba'i rgyu bstan pa ni/ de dang brten pa zhes bya ba'o/ /de rig pa ni/ de dang 'brel pa rig pa'o/ /gnas skabs dang sbyor ba ni de bzhin du zhes bya ba ste/ rang gi rgyud la las dang 'bras bu'i 'brel pa shes pas gzhan la yang las dang 'bras bu'i 'brel pa shes pa'i don to/ /de dang brten pa zhes bya ba ni grong gzhan bsten pa'o/ /lkog tu gyur pa zhes bya ba ni gzhan gyi rgyud la yod pa'o/ /des na zhes bya ba ni rang gi rgyud la mngon sum gyis so/ /gzhan gyi rgyud la ni rjes su dpag pas so/ /so sor nges pa ni khyad par can gyi yul la sogs pa'o/ /de dang 'brel pa ni las la yod pa'o/ /de'i 'bras bu ni bya ba'o/ /de dag gi khyad par de la nges par rtog pa na rang gi rgyud la yid gsal ba las byung ba'i mngon sum gyis yin la/ de'i tshe yang de'i rgyu dang 'bras bu dang rang bzhin dang dbye ba rnams kyi 'brel pa ni 'bras bu dang rgyu nyid de rigs pa yin par bstan pa ni/ rgyu'i rang bzhin dang zhes bya'o/ /de ltar 'brel pa rigs pa yin na gzhan la yang rjes su 'jug pa yin par bstan pas rigs pa yin pa'i phyir zhes bya ba ni gtan tshigs yin la/ so sor nges pa ni las so/ /rang bzhin thams cad rjes su dpog pa zhes bya ba ni rim pa'o/ /las dang 'bras bu zhes bya ba ni rang dang gzhan gyi rgyud la yod pa ste/ sogs pa'i sgras bye brag gzung ngo / /de ltar gzhan gyis smras pa la/ 'dir chos mkhyen pa 'ba' zhig 'gegs par sbyor bar byed pa'i phyir/ de dgag par bstan pa ni/ mtho ris dang ni byang grol lam/ tsam gyis ni zhes bya ba ni thams cad mkhyen pa nyid med kyang ngo / /thams cad mkhyen ba nyid yang thabs yod par bstan pa ni/ 'gro ba mtha' dag ces bya ste/ phan tshun zhes bya ba ni rgyu la ltos pa'i 'bras bu dang / de la yang ltos pa'i rgyu yang rgyu yin gyi rgyu nyid la ltos nas 'bras bu'am rgyu'am cig shos ni ma yin no zhes bya ba'i don to/ /de las cir 'gyur zhe na/ des na rgyu dang 'bras bu zhes bya ba smos te/ rnam pa du ma zhes bya ba ni 'bras bu dang rgyu dag gi rang gi ngo bo dang de'i khyad par rnams kyi dngos po ni 'brel pa'o/ /de bsgoms pa ni shes pa ste/ de dang rjes su 'brel pa ni yang dang yang du 'byung ba'o/ /des na de'i bskyed bya'i khyad par 'dzin na mngon par 'dod pa'i phyir ro zhes bya ba'i rigs pas 'gro ba thams cad kyi shes pa yin no/ /ji lta bu'i rnam par mthong ba de lta bu'i rnam par nye ba yin par mtshon par byed pa'i phyir mthong ba dang thun mong ba de ma yin pa las ldog pa'i ngo bos 'jug pa'i yul rtogs par byed pa rjes su dpag pa ma yin nam/ khyad par gyi rnam pa dang 'brel pa yin yang rnam par rtog pa yin pa'i phyir/ spyi'i yul can yin gyi mngon sum gyi ni ma yin no/ /mngon sum ni gang gi skad cig ma mthong ba de'i rgyun la rgyun gzhan las ldog pas rnam par gzhag par byed na/ 'jug pa'i yul la ltos nas kyang khyad par gyi yul mngon du byed pa yin gyi rjes su dpag pa ni ma yin te/ spyi'i yul can ni ma yin no snyam du sems pa ni/ 'on te rjes su dpag pas zhes bya ba'o/ /mngon sum ni rang gi ngo bos dngos po mthong ba yin la/ rjes su dpag pa ni dngos su ma mthong yang nges pa can mthong ba las rnam par 'jog pa yin no nges pa can mthong bas khyad par du byed pa ni 'jug pa'i yul la skad cig gi khyad par gyis khyad par du mi byed pa ni ma yin no/ /'di spyi'i yul can yin pa ni khyad par ma mthong bas byas pa yin te/ rtags ni spyi'i yul can du brjod pa khyad par mi gnas zhes gsungs pas so/ /tha snyad pa'i tshad ma'i mtshan nyid 'chad pa pos gzung ba dang 'jug pa'i yul la sogs pa'i yul gyi dbye ba byas pas bstan par bya ba ma yin te/ 'gal ba'i phyir ro/ /rnam 'grel mdzad pa po'i de lta bu'i sgrogs pa rnams ni don dam pa'i lus la yin gyi tha snyad du gdon par 'os pa ni ma yin no/ /de la ni mthong ba'am nges pa can mthong ba ni 'jug pa'i yul du rnam par 'jog par byed pa 'di nyid rigs pa yin par bstan pa ni/ rnam kun rjes dpog gang yin pa'o/ /rnam pa thams cad rjes su dpog pa ni goms pa dang bcas pa yin la/ mngon sum nyid ni mngon du byed pa ma yin nam zhes bya ba mi rigs pa ma yin nam/ dbang po dang don du phrad pa'i shes pa ni mngon sum yin te/ dbang po las byung ba'i phyir ro snyam du sems pa la/ dbang po dang ni phrad pas kyang / /zhes bya ba ste/ /mngon sum du dbang po tshol ba ni mngon du byed pa'i don kho nas yin gyi ma mthong ba'i don ni ma yin no zhes bya ba'i don to/ /don thams cad zlos pa'i tshig gi dbang po la 'bras bu nyid du brjod pas mtshan nyid kho nas ldan pa ni ma yin te/ sbyor bar byed pa ma yin pa'i phyir ro zhes bstan pa ni/ 'di ni mngon sum gyi mtshan nyid ma yin te/ sbyor bar byed pa yin par bstan pa ni/ 'on kyang zhes bya ba'o/ /dbang po ni 'di nyid kyi ming la nye bar mtshon pa yin te/ don gcig la tshogs pa'i phyir ro zhes bstan pa ni dbang po ni zhes bya ba'o/ /mngon sum du tha snyad 'dogs pa la dbang po sbyor ba ma yin du zin kyang / /sbyor bar byed pa'i rang gi ngo bor snang ba ni sbyor byed kho na yin no snyam du sems pa la/ gzhan yang gang zhig ces bya ba smos te/ mngon du byed pa ni dbang po'i skyed byed ma yin te/ de yod kyang gzhan gyi rnam rtog gi gnas skabs dang / gnyi ga rab rib can gyis shes pa'i gnas skabs na don mngon du mi byed pa'i phyir ro/ /'on te dbang po la nyams pa 'di'i rgyu yin pa'i phyir/ khyad par dang bcas pa 'khrul pa can ma yin no zhes zer ba ni/ de ni dbang po nyid ma yin te zhes bya ba'o/ /mngon du mi byed pa ni dbang po ma yin te zhes bya ba'i ngag yin la/ de las bzlog pa rjes su shes pa yin te/ gzhan du na khyad par don med pa yin par bstan pa ni/ mngon du byed rgyu zhes bya ba'o/ /dbang po la sogs pa'i bskyed bya yang mngon du byed pa ni/ yid gsal ba'i rjes su 'gro ba dang ldog pa'i rjes su byed pa'i phyir dbang pos byas pa ma yin no zhes bstan pa ni/ gzhan yang zhes bya ba'o/ /mnyam par gzhag pa dang 'grel pa las ni rnam par 'khrugs pa nyid dang bral ba las te/ dbang po la sogs pa rnams yod na zhes bya ba'o/ /de bstan pa ni/ dbang po'i shes pa yang zhes bya ba ste/ de'i phyir yid tsam gyi rnam rtog tsam la ni mi 'byung ngo zhes bya ba'i don to/ /gal te 'das pa la sogs pa zhes bya ba ni lkog tu gyur pa'i don rtogs pa rjes su dpag pa la brten pa'i phyir ro zhes bsams pa'o/ /mngon du byed pa yod pas na/ /zhes bya ba ni rang gi ngo bo snang ba yin na'o/ /lkog gyur ma yin med par 'gyur/ /zhes bya ba ni da ltar ba la yang lkog tu gyur pa ma yin pa med par 'gyur ro zhes bya ba'i don to/ /'on te dbang po'i byed pa las zhes bya ba ni da ltar ba la'o/ /rnam pa thams cad ces bya ba ni da ltar bzhin du 'das pa la sogs pa la yang rtags yod pas rtogs pa zhes bya ba'i don to/ / mig la sogs pa'i byed pa yang / /zhes bya ba ni da ltar ba'o/ /gal te 'das pa la sogs pa'i dngos po mngon du byed pa la dbang po'i bya ba ji ltar 'gyur/ dbang po dang lhan cig byed pa ni ma yin no snyam du sems pa la/ 'das pa'i dngos po la ni 'das pa kho na dbang po'i bya ba yin la/ 'byung bar 'gyur ba la ni 'byung bar 'gyur ba lhan cig byed pa yin te/ de lta bu nyid du rjes su dpag par bya ba nyid yin no zhes bstan pa ni/ rnam pa thams cad rjes su dpog pa la zhes bya ba'o/ /de'i tshe nyid skyes pa zhes bya ba ni mngon sum ma yin pa'o/ / mngon sum ma yin na ni de yang mngon sum ma yin pa'o/ /lkog tu ma gyur pa nyid yin na da ltar ba nyid kho na yin te/ de des khyab pa'i phyir ro snyam du sems pa ni/ gal te byung ba dang zhes bya ba'o/ /de ni de'i tshe 'das pa la sogs pa yin no zhes de skad du smra ba su yin zhes bstan pa ni/ mngon du byed pa nyid ces bya ba ste/ thams cad du ni da ltar ba la yang ngo / /mngon du byed pa med kyang mi slu ba can yin pa'i phyir rjes su / dpag pa la yod pa ni de'i phyir de las gzhan pa kho na yod pa yin no zhes zer ba ni/ gal te me la sogs pa mngon du ma byas pa zhes bya ba'o/ /rjes su dpag pa la yang snang ba kho nar brtag par bya ba yin te/ de ltar nges pa'i phyir ro zhes bstan pa ni ma yin te/ der yang zhes bya ba ste/ snang ba dang rnam par brtags pa dag gcig pa nyid du zhen pa kho na rjes su dpag pa yin par bstan to/ /gzhan du na rjes su dpag pa mi 'jug pa'i phyir ro/ / snang ba ni mthong du rung ba ma yin nam/ mthong ba'i yul ma yin par ci'i phyir mi 'gyur zhe na/ mi 'gyur ba yin par bstan pa ni mthong ba'i rjes su 'brang ba na zhes bya ba'o/ /ci las yin zhe na/ gzhan du mi 'thad pa ste ma 'brel pa'i phyir ro/ /snang ba nyid khyab byed du gzung ba ni rjes su dpag par bya ba yin la/ mi snang ba nyid yin na mig la sogs pa gzhan gyi don byed pa yin zhes bya bas mi snang ba'i 'dus pa can ma yin pa gzhan gyi don nyid du 'grub par 'gyur ro/ /de'i phyir snang ba zhes bya ba ni yod pa'i mtshon byed ma yin no/ /'on kyang yod pa kho na yin no/ / gang du rtags kho na mngon sum yin gyi rtags can gang gi yang ma yin te/ de lta bu'i yul la ma mthong zhing mi snang la/ mthong bar mi 'gyur ba rjes su dpag par bya ba ma yin nam/ mngon du byed pa las yod pa gzhan ji ltar ma yin snyam du sems pa la/ de la yang 'brel pa can kho na mthong ba ni gzhan du mi 'thad pas mthong bar 'gyur ba kho na rjes su dpag par bya ba yin te/ mi slu ba'i phyir ro/ /mi snang ba la ni slu ba ma yin no/ /gal te da ltar ba med pa na ma 'ongs pa ji ltar 'byung / 'di gzhan las kyang 'byung ba ni ma yin no/ /bden te/ de'i bskyed bya'am des 'dus byas pa las yin pa'i phyir rgyu ma nges par bstan pa na ni/ gal te 'gas kyang zhes bya ba'o/ /snang ba nyid yod pa nyid yin na 'u bu cag la sogs pas mthong ba dang mthong bar gyur pa la sogs pa'i rnam par dbye ba las 'das pa dang ma 'ongs pa'i dbye ba ma yin nam/ rnal 'byor pa'i ni ma yin te/ thams cad snang bzhin pa nyid kyis da ltar ba yin pa'i phyir ro snyam du sems pa ni/ gal te da ltar ba'i zhes bya ba'o/ /gzugs la sogs pa bzhin du dus la mngon sum ma yin pa ni me la bzhin du ma yin te/ mi snang ba'i phyir ro zhes bstan pa ni/ dus ni tshad ma gang gis kyang zhes bya ba'o/ /dngos pos nye bar mngon du byed pa'i phyir rang bzhin mngon sum gyis bdag gir byas pa yin na/ don nye bar snang bar byed pa yin gyi rnam pa gzhan gyis ni ma yin no zhes bstan pa ni/ mdun na gnas pa'i rnam pa'i zhes bya ba'o/ /bum pa zhes sam/ g.yo ba zhes bya ba'i rnam pa gzhan du yang snang ba kho na ma yin nam snyam du sems pa la/ de ltar ma yin na zhes bya ba ste/ mdun na gnas pa ma yin pa'i rnam pa 'dzin pa dang khyad par med pa'i phyir ro zhes bya ba'i don to/ /cig car ma yin par byas pa zhes bya ba la sogs pa la rdzas dang bya ba las tha dad pas de'i khyad par cig car ba la sogs pa'i shes pas rtogs par bya ba ma yin nam/ de la rtags cung zad kyang 'brel pa can du dmigs pa ma yin/ gzugs med pa dang 'du ba las nam mkha' bzhin du mngon sum pa ma yin pa yang ma yin te/ rtags las ma byung ba nyid dang / gnod pa med pa nyid kyis mngon sum tshad ma nyid yin pa'i phyir ro/ /gzugs med pa dang 'du ba las zhes bya bar rjes su dpag pa ni mngon sum dang 'gal ba yin na tshad ma ma yin no/ /nam mkha' ni mngon sum gyi shes pa'i yul ma yin pa'i phyir mngon sum pa ma yin no/ /gzugs dang 'du ba med pa las ni ma yin no/ /de lta yin na cig car dang cig car ma yin pa'i shes pa'i dbye bas dus gcig ma yin no/ /de lta ma yin te/ 'bras bu gcig la de gnyis med pa'i phyir la/ de lta yin na ni shes pa gnyis su thal ba'i phyir ro/ /de lta yin na de lta bu'i dbye bas gcig tu yang ji ltar rtogs par 'gyur/ gsal byed rdzas la sogs pa gnyis yod pa'i phyir mig btsums gcig dang / chu tshod la sogs pas gnyis gcod pa ni dngos po cig car mngon par gsal bar byed pa yin gyi/ de las bzlog pa ni cig shos kyi gsal byed yin no snyam du sems pa ni/ 'on te myur ba dang zhes bya ba'o/ /dus kyi dbye ba ni gsal byed kyi rdzas la sogs pa'i dbye ba tsam yin te/ de ltar brdar byas pa'i phyir/ dus kyi shes pa'i yul ni/ dngos po gzhan ma yin no/ /bum pa la sogs pa'i shes gzugs la sogs pa'i dbyibs kyi khyad par lta bu'o zhes bya ba'i don 'di bstan pa ni/ dus ni yun ring po zhes bya ba'o/ /bden te/ dngos po'i khyad par kho na de lta bu'i brda las de ltar shes pa'i yul yin la/ gang gis de ltar 'gyur ba de ni dus yin no snyam du sems pa ni/ gal te dus med na zhes bya ba'o/ /'bras bu la yod pa'i dal ba la sogs pa'i khyad par gyi skyed byed nyid rang gi ngo bo'i skyed byed yin pa'i phyir dus nyid dngos po rnams kyi rgyu yin gyi dngos po rnams ni ma yin no/ /de de'i 'bras bu ma yin pa ni gang zhig gang gi dbye bas byed pa ma yin no zhes zer ba ni/ 'on te 'bras bu'i zhes bya ba'o/ /rtag pa dang khyab pa can gyi dus ni bzlog pa med pa yin te/ nye ba ma btang ba'i phyir ro zhes bya ba ni dus ni med pa ma yin te zhes bya ba'o/ /mi rtag pa dang khyab pa ma yin pa'i dus ni rkyen gyi dbang gis gsal ba yin zhes bya ba'i phyogs su sems pa ni/ 'on te dus zhes bya ba'o/ /gang kho na las dus kyi rim pa yin pa de kho na las 'bras bu'i rim pa yin du zin kyang gzhan dbang gi rim pa can gyi dus las ma yin par bstan pa ni/ 'on te de nyid las zhes bya ba ste/ rang la yod pa'i rim pa yod pa'i phyir 'di ni rang nyid byed pa ma yin zhes bya ba'i don to/ /dngos po dag gi lhan cig byed pa nyid cig car ba kho na ma yin nam/ nye ba ma yin pa nyid ni cig car ba ma yin la/ de dngos po tsam ni ma yin te/ nye ba ma yin pa yin bzhin du lhan cig pa nyid la yang dngos po yod pas rim par thal bar 'gyur ba'i phyir 'dis ni/ rim pa ma yin pa yang thal ches pa nyid du bstan par bya ba yin no snyam du sems pa ni/ rim pa nyid dus yin no zhes bya ba ni rim pa ma yin pa kho na zhes bya ba'i nye bar mtshon pa yin no/ /ma yin te rim pa ni lhan cig pa dang lhan cig pa ma yin pa zhes bya ba la lhan cig pa dmigs pa ma yin pa las lhan cig par dmigs pa gzhan kho na yin te/ dngos po'i dbye ba la gnas skabs kyi dbye bas rgyu mtshan yin pa'i phyir ro zhes bya ba'i don to/ /rang gi ngo bo las tha dad pa zhes bya ba ni gnas skabs kyi dbye bas khyad par du byas pa'i rang gi ngo bo las tha dad pa zhes bya ba'i don to/ /da ni dus gsum du rnam par gzhag pa ji ltar yin snyam du sems pa la/ da ltar ba dang bya ba'i 'brel pa yod pa na da ltar ba yin la/ 'das pa dang yin na 'das pa nyid yin zhing / ma 'ongs pa dang yin na ma 'ongs pa nyid do zhes bstan pa ni/ mthong 'gyur zhes bya ba ste/ dus med na mthong bar 'gyur ba nyid la sogs pa ji ltar zhes zer ba ni mi rigs so/ /dmigs par gyur pa gang gi tshe ma dmigs pa de 'das pa yin zhes bya ba la sogs pa ni re re'i bdag nyid du rig par bya ba'i dbye ba'o/ /de khas mi len na dus su smra bas gsal gyi dbye ba ma rtogs pas ji ltar smra bar byed/ khyed kyis dus gang gi tshe grong la sogs pa'i dus gang byung ba zhes grong la sogs pa'i rang gi ngo bo nyid kho na bde bar gnas sam/ mi bde bar gnas zhes 'jig rten gyi dri ba'i yul yin gyi tha dad pa can ni ma yin no zhes bstan pa ni/ dus gang yin zhes bya ba'o/ /'dri na zhes bya ba ni 'dri ba'i yul la'o/ /rnal 'byor pa la ni thams cad snang bzhin pa kho na yin pa'i phyir 'das pa la sogs pa'i rnam par dbye ba med pas de ji ltar rig pa yin zhes pa las gzhan gyis zhes bya ba ste/ des mthong ba nyid kyis zhes bya ba ni rnal 'byor pas mthong ba nyid kyis so/ /de la ltos nas dbye ba yod pa ma yin te/ mthong bzhin pa nyid tsam da ltar ba'i tha snyad kyi rgyu ma yin pa'i don to/ /de'i phyir de ltar 'u bu cag la sogs pa la ltos nas rnal 'byor pa la 'das pa la sogs pa'i rnam par dbye ba yin gyi rang nyid ni ma yin no zhes bstan nas lkog tu ma gyur pa nyid kyis dngos po rnams ni rang gi ngo bor snang ba 'das pa la sogs pa la yang 'gyur ba yin la/ da ltar ba nyid la sogs pa ni dus kyi khyad par yin la/ shes pa dang de'i nges par bya ba ni rnal 'byor pa rang nyid la yang 'gyur ba yin par bstan pa ni/ gzhan yang dus de dang 'brel pas zhes bya ba'o/ /da ltar ba nyid dang 'das pa la sogs pa rang gi ngo bos gsal ba yin na de ltar 'das pa dang cig shos ji ltar tha dad pa yin snyam du sems pa la 'u bu cag la sogs pa dang rnal 'byor pa'i sems da ltar ba rang gi rgyu'i dbang gis dmigs pa yin gyi snang ba ni ma yin no/ /de'i phyir de'i rnam par gzhag pa bstan pa ni/ 'o na de ji ltar zhes bya ba'o/ /mi 'dzin pa'i phyir zhes bya ba ni snang ba zhes bya ba dang sbyar bar bya'o/ /gal te yang da ltar mthong ba 'di de nyid mthong ba yin no zhes bstan pa ni/ da ltar ba'i zhes bya ba ste/ gzhan gyi ni snang ba'i 'o/ /gang zhig gang gi zhes bya ba ni skyes bu'i'o/ /de'i tshe ste de'i dus dang 'brel bas sam/ de'i dus ma yin pa dang 'brel pa can ni gang gi ngo bor rig pa ni de'i ste skyes bu'i 'o/ /de'i ngo bo nyid ni de'i dus kho na la'o zhes sbyar ro/ /de'i ming zhes bya ba ni don gyi dus gzhan dang 'brel pa can gyi gzhal bya ni mthong ba po'i rjes su byed bzhin pa'i dus dang 'brel pa can ni rang gi rgyu'i gzhan dbang yin par bstan nas/ da ni mthong ba po dang snang ba dag da ltar ba nyid mnyam par gzhag pa'i gnas skabs la yin la/ dus phyis ni dus tha dad pa nyid yin te/ da ltar ba dang cig shos nyid kyis so zhes bstan pa ni/ gzhan yang de'i tshe ni byed pa po yang zhes bya ba ste/ yang gi sgras ni gzhal bya yang zhes bya ba sdud par byed pa yin no/ /de'i dus nyid du ni rtogs pa'i dus nyid du'o/ /da ltar ba'i dus nyid yin no/ /phyis ni ldang ba'i dus su'o/ /dus gzhan nyid du ni mthong ba po'i da ltar ba nyid dang 'das pa nyid dang snang ba yin no/ /gzhan nyid du zhes bya ba ni phyogs par ma rgyas par bya ba'i phyir dran par byed pa yin la/ de nyid rgyas par bstan pa ni/ de'i phyir zhes bya ba ste/ de'i dus nyid du ni 'das pa'i dus nyid do/ /de la zhes bya ba ni da ltar ba'i dus kyis gzhal bya nyid la ste/ lkog tu ma gyur pa nyid tsam gyi yul nyid kyis mngon sum 'jug pa ma yin no/ /bu dang ldan pa ni ma 'ongs pa'i bu dang 'brel pa can nyid ni rnal 'byor pa'i mngon sum du byed pa bzhin pa de'i mngon sum du yang cis mi 'gyur/ rung ba ma dmigs bzhin pa ni yod pa ma yin no snyam du sems pa ni/ 'on te yang zhes bya ba'o/ /de dang lhan cig pa'i mtshan nyid ni 'byung bar 'gyur ba kho na yin no/ /de'i phyir bu dang ldan pa'i mi rung ba ma dmigs pa med pa sgrub par byed pa ma yin la/ rnal 'byor pas ni rtags kyi khyad par ma lus pa la nges pa can ni mngon sum dang ldan pa yin la/ ji ltar ston sogs zhes bya ba ste/ dus der ldan ni da ltar gyi dus su ldan pa'o/ /de yis mthong med ni rnal 'byor pas so/ /de ltar ma rtogs na yang zhes bya bas ni rnal 'byor pas ma 'ongs pa'i dus nyid yin pas na/ ma dmigs pa yang skyon yod min/ /zhes bya ba ni rung ba ma yin pa ma dmigs pa'i phyir te/ gnod pa nyid med pa'i mtshan nyid med par nges pa bskal pa rnams kyi ni ma yin no zhes bstan pa'i phyir ro/ /gal te de'i tshe yang zhes bya ba ni ston la sogs pa'i dus su yang ngo / /rnal 'byor pa ma yin pas ma dmigs pa dang / rnal 'byor pas dmigs pa kho na la dngos po 'di yod pa yin zhes bya ba'i phyogs 'di la gnod pa can cis med pa yin/ yul mtshungs pa'i phyir ro snyam du sems pa ni/ 'on te ji ltar des zhes bya ba'o/ /gal te yang ring po ma yin pa na gnas pas ches shin tu chung ba la sogs pa'i khyad par la yod pa'i dngos po rtogs pa yin no/ /thag ring po na gnas pas ni ma yin te/ nye bar rung ba nyid med pa'i phyir ro zhes bya ba'i dpe bstan pa ni/ ji ltar gzhan gyis zhes bya ba ste/ ring po ma yin pa'i zhes bya ba'i dbang du byas pa dang 'brel pa yin no/ /phra mo la sogs pa ni ches shin tu chung ba la sogs pa'i khyad par ro/ /rung ba'i yul na gnas pa yang thams cad kyis ni mtshungs par rtogs pa ni ma yin te/ skad cig ma nyid la sogs pas bsgribs pa dang zhen pa nyid kyis dbang po rnams kho na tha dad pa yin par bstan pa ni/ gang la gcig gi nus yod pa/ /zhes bya ba ste/ rnal 'byor pa ni dbang po gsal ba yin pa'i phyir dang / rjes su dpag par bya ba nyid kyis kyang nye ba'i phyir mthong ba kho na zhes bya ba'i don to/ /de de ltar slob dpon rnams kyi bzhed gzhung bstan nas mi 'dod pa nyid ston pa yin la/ de la yang rnal 'byor pa la snang bzhin pa nyid kyis da ltar ba kho na yin la/ gzhan gyis ni snang bzhin pa ma yin pa'i phyir 'das pa dang ma 'ongs pa yang brjod pa yin no zhes bya ba'i phyogs mi 'dod par bstan pa ni/ 'on te yang gal te zhes bya ba la sogs pas nye ba ma yin pa thag ring ba na gnas pas snang bzhin pa ma yin pa ni/ 'das pa dang ma 'ongs par yang mi 'gyur ro zhes bya ba'i don to/ /de nyid ni da ltar ba'i mtshan nyid yin par bstan pa ni/ gang phyir dmigs pa zhes bya ba ste/ rtogs pa dang ma rtogs pa dag ni yod pa dang med pa dag dang da ltar ba dang cig shos dag kyang ngo zhes bya ba'i don to/ /dngos po ni 'das pa la sogs pa'i dus kho na la rnam pa thams cad dang rjes su dpag pas lkog tu gyur pa ma yin pa can du byed la lkog tu ma gyur pa nyid kho nar da ltar ba la yang da ltar ba nyid ma yin te/ shes pas dmigs pa ni dngos po dang dus kyi 'brel pa dag gi dbye ba yin pa'i phyir ro zhes bya ba'i phyogs 'di la yang skyon brjod par dogs pa yin snyam du sems pa ni/ ji ste dus gang du zhes bya ba'o/ /dpyid kyi dus la sogs pa rnams la yang dngos po'i khyad par tha dad pa med pa'i phyir dus 'ga' yang med par bstan pa ni/ dngos po las ni tha dad par/ /zhes bya ba'o/ /dus ni 'ga' yang zhes bya ba ni rnam par dbye ba'i yan lag gi rdzas ni grang ba'i dus yin la/ de bzhin du rab tu snyi ba'i yan lag me'i rdzas kyi dpyid kyi dus la sogs par blta bar bya'o/ /dus med kyang mthong bar 'gyur ba 'das pa'i dus nyid dang / snang ba'i dus da ltar ba nyid dang / ma 'ongs pa mthong bar 'gyur ba nyid ces bya bar dus rnam par gnas pa yin zhes bya ba'i rnam par dbye ba yin pa ma yin nam snyam du sems pa la/ de dag ni zhes bya ba'o/ /thams cad mngon du byed pa'i rnal 'byor pa la ni mthong bar gyur pa nyid dang / mthong bar 'gyur ba nyid kyang yod pa ma yin no/ /rnal 'byor pa'i mthong ba la ni 'das pa la sogs pa yod pa ma yin pa kho nar gsal bar byed pa ni dpyid sogs pa ni zhes bya ba'o/ /rnal 'byor pa la de lta bu'i dbye ba med du zin kyang tshu rol mthong ba la ltos nas 'gyur ro snyam du sems pa la/ gnyis po zhes bya ba smos pa ni 'das pa dang ma 'ongs pa dag go/ /de ltar slob dpon rnams kyi bzhed gzhung rnams mngon par 'dod pa ma yin par bstan nas/ rang gi 'dod pa bstan pa ni/ ji ltar rjes su dpag pa ni/ /zhes bya ba'o/ /rjes su dpag pas de rtogs bzhin pa ni de ltar 'gyur gyi mngon sum gyis ni ma yin pa ma yin nam/ lkog tu ma gyur pa nyid la 'das pa nyid la sogs pa mi srid pa'i phyir ro snyam du sems pa ni/ mngon sum yang ni zhes bya ba smos te/ /ci las yin zhe na/ rjes su dpag pa des zhes bya ba smos so/ /'das pa'i rgyus skyed pa'i 'bras bu gang las 'das par 'gyur zhes zer ba la/ /rjes su dpag pa des zhes bya ba smos so/ /de ltar mngon sum gyis mthong ba rjes su rtogs pa de bzhin du rjes su dpag pas mthong ba mngon sum gyis yin gyi 'bras bu dang rgyu dag la ni rigs pa 'di ma yin no/ /rjes su dpag pas bskyed pa'i mngon sum ni rjes su dpag pa'i rtags dang rtags can 'dzin pa'i rim pas rim gyis 'jug par 'gyur la/ 'khrul pas dngos po mi snang ba'i phyir dang / spyi'i rnam pa nyid kyi phyir de lta bur 'gyur ba yin no snyam du sems pa ni/ gal te mngon sum rjes su dpag pas bskyed pa nyid yin na zhes bya ba'o/ /rim gyis rtogs pa ni goms pa phul du byung ba sna tshogs pa'i rnam rtog dang sgra'i don gyi bdag nyid can gyi bstan bcos kyi rnam rtog bzhin du rim pa ma yin pas snang ba bstan pa ni/ de ni shin tu goms pa la/ /zhes bya ba'o/ /shin tu goms pa las du ma shes pa gcig la snang ba ma yin nam/ shes pa du ma gcig la ni ma yin no/ /de'i phyir ji ltar glo bur du du ba mthong ba dang dus mtshungs par me'i shes pa yin/ cig car bar mngon par 'dod pa ni yid myur du rgyu ba yin pas rim par mtshon pa'i phyir mgal me la 'khor lor mthong ba lta bu'o/ /de lta yin na rdzu 'phrul gyi chos can gyi rnal 'byor pas sprul pa'i lus dang dbang po rnams la yid gcig dbang po'i rnam shes du ma'i skyed byed du mi 'gyur ro/ /de'i phyir don du ma bzhin du gcig du ma la yang rgyu gzhan tshang ba yin na/ du mar yang byed pa yin te/ ma chags pa'i phyir ro/ /ma tshang ba ni rim pa yin no zhes bya ba ni rigs pa mthong ba yin no/ /'khrul pa nyid ni mngon sum la yang mtshungs te so sor snang ba la rnam rtog gi don gyi phyogs la 'dzud pa'i phyir ro/ /'on te de la rnam rtog nyid ni 'khrul pa yin gyi mngon sum ni ma yin no/ /de lta ma yin te gang gi phyir mngon sum gyi bya ba la rnam rtog ni rang gi byed pa'i sgrib par byed pa 'di mthong ngo zhes rjes su 'brang bar byed pa yin no/ /de'i phyir de yang de lta bu nyid la 'jug pa yin la/ so sor snang ba ma yin pa nyid de/ dngos por snang ba ma yin pa nyid ni rnam pa ma lus pa yongs su 'dzin pa ma yin no/ /'dis ni spyi'i rnam pa nyid gsal ba yin no/ /gang la gnyis ka'i skyon mtshungs pa/ de la lan yang mtshungs pa yin/ /de 'dra'i don ni rnam dpyad la/ /gcig la brgal zhing brtag bya min/ /zhes bya ba'i rigs pa bstan pa ni/ thog med gal te rig byed kyang / /zhes bya ba ste/ de las te rig byed las rtogs pa ni/ 'jug par byed par rjod par byed pa nyid kyis de 'dzin par byed pa ji ltar yin te/ ma yin pa kho na'o/ /da ltar 'dod bzhin pa ni thog ma med pa nyid du rtogs pa ma yin te/ ji srid ji srid du rtogs pa de srid de srid du nye ba kho na yin zhes bya ba'i don to/ /de ltar ba bzhin du dus gzhan la yang 'jug par byed par rjod par byed pa nyid du ma yin na rig byed ji srid yod kyi bar du don dang 'brel pa ma yin par bstan pa ni/ gal te 'di zhes bya ba'o/ /de ltar ni de lta bu'i rang bzhin rtogs pa na dus thams cad du de'i rang bzhin kho na ma yin nam/ byed pa po ma yin pa nyid dran pa'i phyir ro snyam du sems pa ni/ gal te sngon yang zhes bya ba'o/ /spyi ni phan tshun tha dad pas ma rtogs bzhin pa ni khyad par rnams kho na yin no/ /rang rgyud yongs su bcad pa na/ /zhes bya ba ni gnas skabs kyi don nye bar bsdu ba yin no/ /yongs su shes su zin kyang zhes bya ba ni thog ma med pa nyid kyis thabs ma yin pa zhes bya ba'i don to/ /'brel pa ni rang bzhin pa ma yin pa'i phyir dang / du ba'i 'brel pa bzhin du rtogs pa mngon sum ma yin pa'i phyir 'brel pa can nyid tsam 'dzin pa'i rgyu mtshan can yin pa nyid kyis rang bzhin ma yin pa'i 'brel pa sngon du 'gro ba can yin pa'i phyir/ rtogs pa tsam ni tshad ma ma yin no/ /gnod pa can ma dmigs pa yang the tshom yin te/ gang gi phyir ma 'ongs pa'i 'bras bu la 'byung bar 'gyur ba'i gnod pa can ni da ltar nye ba ma yin pa'i phyir/ rtogs pa ma yin no/ /skyes bu med pas de las 'byung ba'i skyon du 'gyur ba ni ma yin te/ rab rib can bzhin du skyon gzhan yin zhes bya bas bstan pa yin par brjod pa ni/ sngar bstan pa nyid don zhes bya ba'o/ /gal te yang 'dod chags la sogs pa rnams mi shes pa gzhan nyid du ston pa'i rgyu ma yin du zin kyang bag chags kyi gnas ngan len nyid gzhan du rig pa yin yang gzhan du brjod par 'dod pa yin zhes bya ba'i rigs pa'am/ bkres pa la sogs pas ting nge 'dzin la gnod par byed pa cis mi srid pa yin snyam du sems pa ni/ gal te thabs goms pa las zhes bya ba'o/ /rgan pos sgra thos nas tha snyad du byed pa byis pas mthong ba ni de dang 'brel pa'i shes pa rtogs pa ma yin nam/ de yang de bzhin du gzhan gyi yin la/ de yang de bzhin kho na yin no snyam du sems pa la/ des na dmus long brgyud pa zhes bya ba'o/ tha snyad byed pa po'i rgyud pa ni snga mas snga ma'i 'brel pa yin gyi me dang du ba bzhin du 'brel pa ni ma yin te/ mngon sum pa ma yin no zhes zer ba'i don to/ /gzhan la yang zhes bya ba ni skyes bus byas pa la yang ngo / /'di la ni zhes bya ba ni thams cad mkhyen pa rjes su dpag pa la rtsa ba yin pa'i phyir/ don dang 'brel pa rang bzhin gyis shes pa kho na yin no zhes bya ba'i don to/ /'dis ni 'di rang nyid don dang 'brel pa la bag chags ni gnod byed ma yin par bstan la/ gzhan la yang ma yin te/ rang nyid kho na med pa'i phyir ro zhes bstan pa ni/ gzhan yang des na thugs kyang zhes bya ba ni des na gsal ba'i phyir zhes bya bar sbyar ro/ /thabs goms pa phul du byung ba las byung ba'i gsal ba des zhes bya ba la ltos pa yin no/ /de yod kyang rang gi don rgyas pa'i phyir de spangs pa'i don du ci'i phyir 'bad rtsol byed ces zer ba la bstan pa ni/ gzhan don la 'jug pa can gang yin pa de'i gzhan gyi don la gnod par byed pa'i phyir 'di ni nges par spang bar bya ba kho na yin no/ /khyad par 'di yin zhes bya ba ni rang gi don la 'jug pa bse ru lta bu la sogs pa mtshan nyid mi mthun pa nyid do/ /bkres pa la sogs pa'i sdug bsngal yang bdag dang bdag gir 'dzin pas chags pa'i snying po can ni bag chags dang ldan pa rnams kho na yin gyi dmigs pa'i tshogs pa can tsam las ni ma yin te/ gcig gi rnam pa'i bde ba la sogs par thal bar 'gyur ba'i phyir ro zhes bstan pa ni/ bru ba tsha ba la sogs pa yang zhes bya ba'o/ /de bzhin du kham gyi zas dang 'gal ba can gzugs na spyod pa'i dge ba bsags pa las kyang skye ba snga ma las byung ba'i skye ba dran pas sam/ las la dbang du gyur pa nyid kyis 'jug pa'i phyir/ bkres pa la sogs pa rnams shin tu mi srid par bstan pa ni/ gal te skye ba dran pa yis/ /zhes bya ba'o/ /lha sogs ngo bo yis zhes bya ba ni gzugs na spyod pa'i lha nyid thob pas so/ /mig la sogs pa ni sa bon dang myu gu la sogs pa bzhin du phyi rol gyi rgyu tsam las byung ba ma yin te/ 'o na ci zhe na/ goms pa las byung ba yin la/ yod pa dang med pa ni 'dod pa'i gzhan dbang kho na yin par bstan pa ni/ lan gsum za ba goms pa las/ /zhes bya ba ste/ gtan med par 'gyur zhes bya ba ni gnas skabs kyi bcom ldan 'das so/ /yang na phyi rol bzhin du rgyu tsam las byung ba 'di ni yod pa ma yin te/ 'dod pa las byung ba'i goms pa las byung ba nyid yin par bstan pa ni/ gal te 'di zhes bya ba ste/ 'di gzhan gyi don la 'jug pa'i phyir/ bkres pa la sogs pa'i skyon las ldog pa kho na goms par rtogs pa yin par bstan pa ni/ de'i phyir/ thams cad goms pa'i rtsa ba can/ /zhes bya ba'o/ /sngon gyi slob dpon gyi bzhed gzhung dang 'gal ba nyid kyis gdams kyi de kho na nyid med do snyam du sems pa ni/ gal te slob dpon gyis zhes bya ba ste/ sbyor ba ni thabs ston pa po nyid yin gyi gzhan ni ma yin no/ /gzhan thabs goms pa ma yin pa'i phyir 'gal ba yin no/ /thabs goms pa 'di nyid sngon gyi slob dpon rnams kyis nye bar btags pas bstan par brjod pa yin no/ /bstan pa ni/ de don phyir na thabs goms pa/ /zhes bya ba ste/ 'di nyid ces bya ba ni rim pa las bzlog pas nges par gzung bas bdag mthong ba kho na'i lus dang dbang po la sogs pa la bdag tu lta bas sam/ khams gsum po la yang sdug bsngal ba'i 'du shes 'dor ba'i rgyu yin pa'i phyir/ thabs yin zhes bya ba'i gzhan gyi 'dod pa bsal ba yin no/ /bdag tu lta ba ni lus la sogs pa la yang de ma mthong yang bdag gir mthong bas chags pa skye ba'i phyir/ sdug bsngal gyi 'du shes nyid mi 'jug pa'i phyir ro/ /res 'ga' 'jug pa yin yang chags pa las bzlog pa yin no/ /'di nyid thabs goms pa yin par ci las shes she na/ de don phyir zhes bya ba smos te/ bstan pa ni 'bras bu yin gyi thabs ma yin pa ma yin nam zhes zer ba la/ de don phyir ni bstan pa'i don yin pa'i phyir bstan pa'i rgyu'i phyir ro/ /'di nyid kho na las thabs goms pa yin gyi gzhan ni ma yin te/ de'i de rgyu yin no/ /'di ci las nges pa yin zhe na/ thub las te bde bar gshegs pa nyid las dang po 'byung ba'i phyir/ de nyid grub pa'i ngo bo bstan pa'i sgrar gdags par rung ba yin gyi gzhan ni ma yin no/ /'di la yang rgyu nyid bsgrub bya kho na yin nam snyam du sems pa la/ rgyu gnyis po 'di ji lta ba de ltar bshad pa ni de ma thag tu'o/ /'grel par ni gsal ba kho na yin no/ /de ci mngon zhe na zhes bya ba ni bstan pa'i rgyu nyid kyi phyir bstan pa yin gyi de nyid ma yin zhes ci las shes pa'o/ /'di ni rgyu ru bshad ces bya ba ni rgyu phun sum tshogs pa'i dbang du byas nas 'gro ba la phan par bzhed pa nyid dang / ston pa nyid du bstan pa yin gyi 'bras bu phun sum tshogs pa'i dbang du byas pa ni ma yin no/ /de'i phyir gtso bo ma yin par shes pa yin no/ /dang po brjod pa nyid kyi phyir zhes bya ba ni tshad mar gyur pa la zhes bya ba'i tshigs su bcad pa der ro/ /grub pa'i ngo bo ni bde bar gshegs pa nyid yin pa de ji lta bu yin par bstan pa ni/ rgyu spangs zhes bya ba'o/ /dogs pa med pa yul med pa ni gcig pu mi dga' na gnyis pa 'dod pa yin zhes bya ba'i rigs pa las so/ /bdag med pa mthong bar rigs pas tha dad pa yin no/ /de bden tha dad bdag nyid kyis/ /zhes bya bas brjod bya bzlog pa ma yin par dgongs pas mthong ba dang rigs pa'i sgra dag gi mthong ba dang bsgom pa'i lam rjod par byed pa nyid du bstan pa ni/ sbyor ba ni goms pa ste/ bsgom pas zhes bya ba ni rnal 'byor la mnyam par 'jog par byed pa zhes mdo sde las gsungs pa'i phyir ro/ /yang na bdag med pa mthong ba zhes bya ba ni pha rol po mngon par 'dod pa'i sems can yod pa tsam ni dngos su gnod par byed pa nyid kyis chos la bdag med pa ma bsdus pas de mngon par brjod pa'i don du bstan pa ni/ yang na sbyor ba ni zhes bya ba'o/ /gnyis su med par ni tha dad pa ma yin te/ gcig gi rnam pa 'di shes pa la yod pa zhes gsungs pas so/ /yang na gcig ces bya ba rgya che ba la dmigs pas phan tshun mi rigs pa'i phyir dbye ba ma rtogs par dgongs pas so/ /de de ltar yin na gzhan dmigs par rigs pa ni mi dmigs pa yin no/ / phan tshun ma 'dres par ji ltar 'gyur/ de ltar nyams su myong ba yin na de ltar 'dzin pa'i rnam rtog ma yin la/ yin na yang de yang de ltar rtogs pa las ma 'das pa'i phyir/ ma lus pa ma rtogs par gyur pa yin grang na de de lta ni ma yin no/ /de'i phyir gnyis su med pa nyid phan tshun rjes su 'jug par rig pa yin no/ /yang na bdag med pa mthong na zhes bya ba ni bdag med pa gnyis mngon du byed pa ni 'phags pa nyan thos la sogs par brjod pa yin la/ byang chub sems dpa' rnams ni bdag med pa de la sbyor ba ni ldan pa ste/ yongs su 'dris pa yin gyi mngon du byed pa ni ma yin te/ sangs rgyas kyi chos rnams ma thob par bar ma dor mya ngan las 'das par 'gyur bar thal ba'i phyir ro/ /de 'dis khyab 'jug gi 'jig rten la sogs par 'gro bas grol bar 'gyur ba yin zhes bya ba gsal bar bstan pa ni thams cad du bdag med pa mthong ba las zhes bya ba'o/ /gang gi tshe bdag mthong ba can la bde ba ni skyes bu'i don yin la/ bde ba thob na bya ba byas par 'gyur ba yin par lta na bde ba'i 'du shes la nye bar gnas pa ni chags par bya ba'am/ khro bar bya ba'i kun tu rtog par gyur nas 'khor bar kun du rgyug par byed kyi ldog par mi byed do/ /de'i tshe 'di drang srong rnams kyis skye ba ni sdug bsngal kho na yin no zhes sdug bsngal bsgom pa las sad pa yin na yongs su tshol ba'i skyon rnams rig par byed pa yin la/ 'di gang yongs su tshol bar byed pa ste dgra mang po can ni rnyed na yang nyung ba yin la/ de'i rgyu mtshan las kyang lus dang yid la yal ga mang po can gyi gdung ba skye bar byed na chags par mi byed cing / yang srid kyi rgyu 'khor ba rnams sogs par mi byed do/ /des na sdug bsngal thams cad las grol bar 'gyur ba'i phyir dang / bdag tu yang yod pa'i phyir su zhig bdag med pa mthong ba'i rnam par grol bar 'gyur te/ mi srid pa kho na yin no snyam du sems pa ni/ phyir mi ldog pa de gang zhe na zhes bya ba'o/ /de la re zhig bdag tu lta ba yin na sdug bsngal bsgom pas nyes pa dang las med pa mi srid pa yin te/ sdug bsngal gyi 'du shes med pa'i phyir ro zhes bstan pa ni/ slar yang ldog ces bshad pa yin zhes bya ba ste/ slar yang mi ldog pa'i rgyu ni bdag tu lta ba bcom pa las ldog pa'i bdag tu lta ba yod pa thob pa yin la/ de'i phyir bdag tu lta ba'i sa bon yod pa na'ang // lus la sogs pa bdag gir lta ba'i sa bon yod na 'di chags pa'i snying po can yin pa'i phyir/ sdug bsngal gyi 'du shes nyid 'dor ba'i yan lag la 'jug par mi 'gyur te/ sdug bsngal lta bur ro/ /lus la sogs pa la yang sdug bsngal mang bas bdag gi ba nyid kyang 'dor ba'i sems su 'gyur ro zhe na de'i rgyu yod pa yin na/ de nyid 'di la sdang ba yin zhing / de las bzlog pa la chags pa yin pa'i phyir de las byung ba'i las ni skye ba'i rgyu yin pa'i phyir skye ba yin par brjod do/ /de'i phyir bdag gi la sogs par lta ba chags pa'i snying po can yin pa'i phyir/ phan byed pa la ltos nas chags par bya ba'i kun du rtog pa yin la/ gnod par byed pa la ltos nas ni sdang bar bya ba yin no/ /de'i phyir chags par bya ba'i kun du rtog pa rnams dang / sdang bar bya ba rnams kyang brdzun par rtogs pa'i ngo bo yin pa'i phyir bdag tu lta ba ni gti mug yin no/ /de dag kyang de mthong ba nyid kho na bde ba dang sdug bsngal ba bsgom pas rtogs pa yin zhes gnyi ga mi 'thad pa'i phyir rgol ba de ni gyi na'o/ /de lta na de ci'i phyir spangs pa yin zhes bstan pa ni/ bdag lta'i sa bon spangs pa'i phyir/ /zhes bya ba ste/ bdag tu lta ba la sogs pa'i snying po can gyi rtog pa rnams bcom pa ni yang 'byung ba ma yin te/ sa bon med pa'i phyir ro zhes bya ba'i don to/ /skye dang zhes bya ba ni las so/ / skyon med pa'i gnas skabs dang yang skye ba med pa'i phyir zhes bya bar sbyar ro/ /de yang byang chub sems dpa' rnams la dge ba'i las dang skye ba dag yod pa'i phyir ro/ /nyan thos rnams la ni de med pa'i phyir/ skye ba med pa yin no/ /so so'i skye bo rnams la ni de gnyi ga med pa'i phyir nyes pa dang / skye ba yod pa yin par bstan pa ni/ nyes pa dang zhes bya ba'o/ /de yang nyes pa med pa'i gnas skabs ci las byung ba yin zhe na/ des na zhes bya ba smos so/ /gnas skabs gnyis pa'i rgyu bstan pa ni/ skye ba yang zhes bya ba'o/ /bdag dang bdag gi ba dag ni rang gi ngo bos mthong ba 'dod chags la sogs pa'i rgyu ma yin pa ma yin nam/ 'o na ci zhe na/ bde ba sgrub pa la sogs pa'i shes pa nyid kyis chags pa'i yul nyid kyis sam/ chags pa'i snying po can nyid kyis yin no/ /de'i phyir de nyid 'di'i spang bya yin gyi rang gi ngo bos ni ma yin no snyam du sems pa la bstan pa ni/ bdag tu lta ba med pa'i phyir ldog pas so/ /gzhan ci las nyon mongs pa yod pa yin/ bdag la sogs par lta ba kho na chags pa'i ngo bo yin zhes bya ba'i don to/ /bdag tu lta ba'i ngo bo'i chags pa dang phan 'dogs pa dran pa yin na chags par bya ba'i rtog pas 'dod chags yin/ /de bzhin du gzhan dran pa yin na 'khrugs pa'i rtog pas zhe sdang yin no/ /bdag tu lta ba'i chags pa phan byed pa dang / gcig ltos pa'i ngo bo yod na de la ltos pa nyid kho na gzhom par mi nus so/ /nus na yang rang gi ngo bo 'joms par thal bar 'gyur ro/ /de de las tha dad par 'gyur yang byang grol 'dod pa'i don gang yin pa rgyas par byed pa yin/ sngon po la sogs pa'i rang gi ngo bos ni tha dad pa can nyid kho nas dgos pa dang ldan pa ma yin la/ de ni bdag go zhes byas nas tshol ba'i sdug bsngal yin la/ de ni med pa kho na la ltos pa yin gyi yod pa la ni ma yin no/ /'dis ni bdag ni 'di rnams kyi'o/ /'di rnams ni bdag gi'o zhes 'brel pa'i blo'i rgyu'i mtshan gyi de'i ngo bo ni ma yin no zhes bya ba gsal ba yin no/ /bdag med pa dang bdag tu lta ba dag mtshungs pa nyid stobs mtshungs pa 'gal bar rnam par rtog pa yin no snyam du sems pa ni/ gal te bdag med pa mthong ba zhes bya ba'o/ /bden pa dang bden pa ma yin pa'i yul nyid kyis stobs mtshungs pa ma yin par bstan pa ni/ de bden zhes bya ba ste/ phyin ci log tu gyur pa zhes bya ba ni 'gal ba can yin pa'i phyir ro/ /de las bzlog pa yin pa'i phyir zhes bya ba ni bden par yod pa dang 'gal ba can nyid med pa'i phyir ro/ /de ltar bden pa dang tha dad pa'i sgra dag bshad nas/ bdag nyid kyi sgra bshad pa ni/ tha dad pa'i bdag nyid kyang zhes bya ba ste/ bsdu ba byas pa yin pa'i phyir tha dad pa'i sgra dang lhan cig par rjes su brjod pa yin no/ /rang bzhin rjod par byed pa 'di ni gtan tshigs kyi tshig kyang yin no/ / bdag med par lta ba ni bden pa dang 'gal ba can yin te/ ci las she na/ rang yul yin pa'i phyir ro/ /gang gi tshe tshad ma dang lhan cig pa yin pa'i phyir bden pa dang 'gal ba can yin no zhes rtogs pa de'i tshe bdag nyid kyi sgra ni rang bzhin rjod par byed pa yin pa'i phyir/ gtsang sbra can thod pa can du gyur pa'i rang bzhin du 'bad pas ldog bya nyid yin zhes zer ba ni/ gtan tshigs kyi nyid med pa la blta bar bya'o/ /de'i tshe yang dngos po'i ngo bor rjod byed nyid yin no/ /phyir ldog pa med pa'i phyir ro zhes bya ba ni phyir ldog pa med pas so/ /nad med pa ni nyon mongs pa med pa ste/ yongs su bzung ba med pa ni 'khor ba'i sdug bsngal gyis gdungs pa med pa'i phyir ro/ /lam bshad pa la mi gsal ba ni 'bras bu'am rgyu yang rung rnam pa thams cad pa'i lam bstan pa la mi gsal bar mtshon par byed par bstan pa ni/ nges pa'i tshig la mi gsal ba/ /zhes bya ba ni gtso bo nyid kyang ngo / /bdag med bas ma spangs pa la zhes bya ba ni 'phags pa nyan thos la sogs pa la ni bdag med pa 'gal ba can ma yin la/ lam gzhan yod pa ma yin no zhes bya ba ni yon tan gsum pa med pa'i phyir ro zhes bya ba'i don to/ /ji srid smra ba zhes bya ba ni smra ba po nyid do/ /nyes pa dang ldan pa nyid kyis 'u bu cag la sogs pa rnams la khyab pa yin te/ 'dod chags dang bral ba ma mthong ba yin la ma mthong ba de la ldog pa med pa'i phyir ro/ /yang na smra ba ni 'bras bu dang rgyu'i rnam par rtog pa'i go byed yin zhes zer ba ni/ /smra ba ni zhes bya ba ste/ rnam par rtog pa ni rang gi rnam pa la don du zhen pa'i 'khrul pa yin te/ de ma yin pa la der zhen pa'i phyir ro/ /gal te yang lus pa ni lam tsam las ma nyams pa yin la/ de la yod pa'i khyad par gyi rnam pa mthong ba kho na las 'di ni lam gzhan la sbyor bar byed pa ma yin no zhes zer ba ni 'di las lhag mar yod pa ma yin pas ma lus pa'o/ /goms phyir ni zhes bya ba ni khyad par gyi rnam pa'i yul las so/ /the tshom za ba zhes bya ba ni mi 'gal ba'i bsgrub pa las ldog pa ma grub pa'i phyir ro/ /rnam par rtog pa bsgrub pa la yang zhes bya ba ni de med kyang shin tu goms pa yin na tshig re re dang ngag re re rjod par byed pa rnams la rnam par rtog pa med kyang smra bar mthong ba'i phyir mi shes kyang de rnams yod pa ni ma yin te/ rang rig par bya ba nyid kyis rnam par rtog pa gzhan med pa'i phyir ro/ /'phen pa ste goms pa'i shugs kyis gdul bya de'i bsam pa can la de'i lam dngos su mthong ba kho na las rnal 'byor pa'i tshig 'jug pa yin no/ /ji ltar 'u bu cag la sogs pas ka ba la sogs pa mthong ba na 'di ka ba'o zhes bya ba'o/ /bshad zin zhes bya ba ni rtog pa 'di rnams so sor ma rig pa kho na skye ba'am zhig pa yang ma yin no zhes gsungs pa yin te/ de'i tshe rnam rtog ni ma yin no zhes bya ba'i don to/ /don gang blo la rab gsal ba/ /sgra ni de la tshad ma nyid/ /don gyi de nyid rgyu can min/ /zhes bya ba la sogs pa ni rna ba'i rnam shes la don gang gsal ba ni smra ba po'i blo'i yul la don de ltar yin pa'i phyir/ skyon med par bstan pa'i phyir skyon med par bstan pa ni 'dir ni shes pa mi gsal bar zhes bya ba'o/ de ltar rjes su dpag pa bzhin du mngon sum gyis kyang gzhan gyi don thob par bstan pa ni/ mngon sum gyis mthong ba zhes bya ba ste/ tshul gsum pa'i rtags su bstan pa ni gzhan gyi don gyi rjes su dpag pa mngon sum pa ma yin pa la yin gyi bum pa la ni ma yin no/ /de lta yin na ji ltar rjes su dpag pa yin/ rtags bzhin du gzhan gyi rjes su dpag par bya ba'i shes pa skyed par byed pa'i phyir ro/ /de lta yin na de'i de rang don kho na yin no/ /de lta yin na yang smra ba po'i de de lta yin pa'i phyir de ltar brjod do/ /gzhan du rjes su dpag par bya ba'i tshig rjes su dpag par 'gyur ro/ /gal te mngon sum gyi yul gyi shes pa skyed par byed pa'i phyir/ mngon sum yang gzhan gyi don du cis mi 'gyur/ ma yin te/ de de la 'brel pa'i rang bzhin can ma yin pa nyid kyis tshad ma nyid ma yin pa'i phyir/ don rtogs pa la brda can yin pa'i phyir ro/ /ji ltar yang tshul gsum par bstan pa ni de rig pa po la rjes su dpag par bya ba'i shes pa'i rgyu yin pa nyid kyis rjes su dpag par nye bar gdags su rung ba'i phyir sgra tshad ma yin no/ /gzhan du ni ma yin no zhes bstan par 'dod nas de ltar tha snyad 'dogs pa yin te/ nus pa mtshon par byed pa'i rgyu tshig ni zhes gsungs pa'i phyir/ de ltar rnam par rtog pa med pa'i tshig yod pa min na rnam par nges pa med pa'i phyir smra ba po nyid ma nges pa yin no/ /'dod chags la sogs pa dang ldan pa nyid du ni 'gal ba med par sgrub pa'i phyir/ ldog pa la the tshom za ba yin par nye bar bsdu ba ni/ de phyir sgra yang zhes bya ba'o/ /lus la'am gzugs la sogs pa la yang bdag ces bya ba dang / bdag gi zhes bya bar yang thun mong ma yin pa nyid du 'dzin pa yin la/ bdag dang bdag gir lta ba nyon mongs pa'i rgyu ma yin pa ma yin nam/ 'on kyang gtso bo dang cig shos ni sgrub par byed pa nyid du 'dzin pa yin no/ /dran pa yang bdag la sogs par lta ba spangs pa yin yang / nyon mongs pa'i rgyun la ni thog ma med pa'i rgyu yod pa'i phyir sems kyi rgyun las nyams pa ma yin no/ /de'i phyir mi mthun pa'i phyogs med pas 'dod chags la sogs pa la smra ba por ldog pa la the tshom za ba ma yin no/ /yod pa la mi rtag pa nyid lta bu'o snyam du sems pa ni/ gal te gzhan las zhes bya ba ste/ bde ba la sogs pa sgrub par byed pa nyid 'dzin pa dang / dran pa'i rgyud las nyes pa rnams zad pa ma yin la/ de'i phyir med pa sgrub pa ma yin no/ /'on te bdag la sogs par lta ba spangs pa la ni nyon mongs pa'i rgyu mthong ba ma yin snyam na yang / ma yin te/ de ma dmigs pa ni 'dod chags med pa las ma dmigs pa bzhin du rung ba ma yin pa'i yul can la ni med pa sgrub par byed pa ma yin no zhes zer ba ni/ nyes pa zad pa med pa zhes bya ba'o/ /bde ba la sogs pa sgrub par byed pa nyid kyi shes pa bdag dang 'brel pa med pas 'dod chags la sogs pa'i rgyu ma yin te/ thal ches pa'i phyir ro zhes bstan pa ni/ /ma mthong ba ji ltar zhes bya ba'o/ /de lta yin na zhig pa nyid du ji ltar rtog ce na/ skyon rnams mi zad pa nyid ces bya ba smos te/ gang las bsgrub bya la sbyor bar byed pa rtogs pa yin gyi sbyor bar mi byed pa la ni ma yin la/ de yang 'jigs pa med na rtag pa nyid yin na mi rtag pa la yang rgyun dang ldan pa la sems bzhin du rgyud gcod par byed pa'i thabs med pa yin la/ yod kyang so so'i skye bo bzhin du yongs su mi shes pa yin na'o/ /'on kyang rgyu zhes bya ba sbyor bar byed pa'o/ /rtag pa nyid ma grub pa yin te/ 'dod chags la sogs pa skye ba dang ldan pa la sogs pa'i gtan tshigs kyis rnam par bcad pa'i phyir/ mi mthun pa'i phyogs ma bcad pa ni sgrub byed ma yin pa'i phyir zhes bstan pa ni/ rgyu yod phyir dang zhes bya ba'o/ /rgyu ma tshang ba med pa'i phyir/ /yod kyang grang ba bzhin du rgyu la mi mthun pa'i phyogs yod na rtsa ba dang bcas pa chad par 'gyur bar bstan pa ni/ gnyen po zhes bya ba ste/ gnyen po yang rgyu'i ngo bo shes na de dang 'gal ba can du mkhas pas shes pa kho na yin par bstan pa ni/ rgyu'i rang bzhin zhes bya ba'o/ /'grel par ni rgyu yod pa ni rgyu dang ldan pa nyid du bzhed de/ rgyu dang ldan pa zhes bya ba'o/ /phyi rol ni mar khu la sogs pa'o/ /phyi rol gyi ni rlung la sogs pa'o/ /nus mthu la sogs pa'i khyad par med pa ni sman gyi rdzas rnams nye bar 'joms pa'i phyir ro/ /bdag med par lta ba ni zhes bya ba ni yul lhan cig byed pa can nyid kyi phyir 'joms pa ma yin/ log par rtog pa med pa nyid ni bdag med pa'i yul la sogs pa dang / thun mong ma yin pa'i gzugs la sogs pa la yang bdag dang bdag gi zhes bya ba'i bdag tu'am/ thun mong ma yin par 'dzin par byed na de chad pa la bdag chad par sems par byed pa ni mi 'chad par sred pa dang ma bral ba yang dang yang du de nye bar len pas rnam par bcom par 'gyur ro zhes bya ba la sogs par ni pha rol pos kyang khas blangs pa kho na yin no/ /bde bar gshegs pa bcom ldan 'das ni skyes pa gzhan bzhin tshad ma yin gyi/ bdag cag rig byed 'don pa rnams kyi ni ma yin te/ gang gi phyir gzhan la tshad ma ma yin te/ nye bar ston par mi byed pa'i phyir ro/ /rig byed ni de dang ldan pa'i mig la sogs pa kho na lta bu yin gyi bcom ldan 'das ni ma yin te/ tha dad pa'i phyir ro snyam du sems pa ni/ gal te yang zhes bya ba'o/ /'on te gzhan yang tshig gi sgo nas tshad ma yin zhe na yang bden te/ phyin ci ma log par smra ba yin na de lta yin gyi bcom ldan 'das ni ma yin te/ rig byed tshad mas gnod pa'i yul yin pa'i phyir zhes zer ba ni/ tshad ma ni phyin ci ma log pa yin zhes bya ba ste/ thog ma dang tha ma med par rtogs na phyin ci log la dga' ba byed pa ma yin no/ /ma yin te/ rig byed la ni skyob pa med pas dor ba'i yan lag yin pa'i phyir/ bcom ldan 'das ni de las bzlog pa yin no/ /nya phyis la dngul gyi shes pa ni zin pa kho na'i phyir mi 'dod par thugs rje'i dbang gis zhes bya ba ste/ bcom ldan 'das ni skyob pa mngal ba'i phyir/ phyin ci log la gnod par byed pa yin te/ de la tshad ma med pa'i phyir ro zhes bstan pa ni skyob pa zhes bya ba'o/ /de rnam par 'chad pa ni/ nyid gzigs zhes bya ba ste/ mthong ba sngon du 'gro ba can ni rang gi tshig mthong ba'i phyir/ bcom ldan 'das kyang de ltar 'gyur ba yin no/ /gzhan du yang slu ba'i bsam pa ma mthong ba ma yin nam/ 'bras med phyir zhes bya ba ste/ thob par bya ba ma lus pa brnyes pa ni gzhan du gsungs pa la dgos pa med do/ /thob par bya ba ma thob pa'i ched du bdag tu lta ba can ni gzhan du yang smra ba yin te/ spangs pa phun sum tshogs pa med pa'i phyir zhes bya ba'i don to/ /thob par bya ba thob kyang 'phags pa nyan thos bzhin du dgos pa med pa'i phyir/ nye bar mi ston pa kho na ma yin nam/ ma yin te/ thugs rje dang ldan pa ni gzhan gyi don 'ba' zhig la 'jug par ston par mdzad pa ni thugs brtser ldan phyir zhes bya ba ste/ gzhan gyi don du ni rang la dgos pa med kyang gzhan gyi don gyi dgos pa tshig gi byed pa gang la yin pa zhes bya ba'i khyad par gyis gsungs pa yin zhes bya bar sbyar ro/ /thugs rje dang ldan pa yang dbang po las 'das pa shes par mi nus pa mi mkhyen na rmongs pas ston par byed par rtogs pa ma yin nam zhe na/ rtsom kun yang zhes bya ba ste/ thams cad mkhyen pa'i don du rtsom pa ni rtsom kun no/ /de la mngon par sbyor ba ni goms pa las so/ /de'i phyir dran pa goms pas yid gsal ba yin pa'i phyir/ skye ba snga ma la sogs pa dran pa yin na chos dang chos ma yin pa shes pa dang / 'bras bu dang rgyu'i rang gi ngo bo'i khyad par gyi de nyid shes pa yin na/ khyad par ma lus pa'i rnam pa'i rjes su dpag pa goms pa yin pa'i phyir dbang po las 'das par shes par nus pa ma yin no zhes bya ba'i don to/ /'bras bu med phyir zhes bya ba 'di kho nas dgos pa med pa bzhin du des dpog pa'i rgyu med pa yin par yang bstan pa ni/ rgyu med pa'i phyir zhes bya ba'o/ /thugs ni brtse bar ldan phyir dang / /rtsom pa kun la sbyor ba'i phyir/ /zhes bya ba dag gis ston pa'i rgyu mtshan brjod pa yin par bstan pa ni/ thugs rje ldan pa'i phyir zhes bya ba'o/ /'phel ba'i shugs las zhes bya ba ni goms pa phul du byung bas rnam par rtog pa mi mnga' bas ston pa yin par brjod do/ /de'i phyir de ltar bcom ldan 'das ni mi slu ba yin pa'i phyir/ mngon sum dang rjes su dpag pa bzhin du tshad ma yin par bstan pa ni/ des na skyob pa ni zhes bya ba'o/ /ston pa ni gsal bar mdzad pa yin la/ de 'phen pa las yod pa'i 'bras bu med phyir zhes bya ba la sogs pa'i khyad par rnam pa gsum gyis rnam par dpyad par bya ba mu stegs dang / 'phags pa nyan thos dang byang chub sems dpa' rnams la rnam grangs ji lta ba bzhin du dogs pa sngon du 'gro ba can du bstan pa ni/ gal te rang gis zhes bya ba'o/ / 'di yang de lta bu'i rnam pa can kho nar cis mi 'gyur snyam du sems pa ni/ 'o na 'di la yang zhes bya ba'o/ /don gyi gtso bo la mi slu bas de'i shes pa bzhin du de dang mtshungs pa'i bsgom pa'i tshogs pa las byung ba'i rnam par shes pa gzhan ni chos la sogs pa'i yul can du rtogs pa yin no/ / de'i phyir de'i rnam pa can gyi shes pa dgag pa'i rgyu dang ldan par bstan pa ni/ 'di la bshad zin te/ de ni bdag med pa mthong ba'am zhes bya ba'o/ /mi slu ba nyid tshad ma nyid du yongs su gcod pa yin na/ 'di yongs su gcod par byed pa yang yongs su shes pa kho na yin la/ de yongs su ma shes na de nyid shes par mi nus so zhes bstan pa ni/ bcom ldan 'das ni zhes bya ba'o/ /skyob pa'am zhes bya ba'i rnam grangs gzhan gyis mi slu ba can nyid kho nar brtag pa yin par bstan pa ni/ yang na bden pa zhes bya ba'o/ /chos dang chos ma yin pa dang / bden pa bzhi la sogs pa ston pa ni lci bar rtogs pa yin pa de la skyob pa yin par bstan pa yin la/ 'dir ni tshad mar 'thad pa bden pa tsam yul yin no/ /de'i phyir phyin ci log dgag par bya ba la ltos bya nyung ba yin pa'i phyir rtogs pa yang ma yin no zhes bya ba ni khyad par ro/ /rigs pa'i bstan bcos la sogs pa gzhan la yang bdag la'am lus la sogs pa la bdag tu lta ba dang / gzugs la sogs pa thun mong ba la bdag gi'o zhes thun mong ma yin pa nyid du bdag gir lta ba ni sdug bsngal gyi rgyu yin la/ de las bzlog par mthong ba ni byang grol gyi yan lag yin zhes bya ba la sogs pas bstan pa kho na ma yin nam/ de'i phyir bden par ston pa thun mong ma yin pa ji ltar yin snyam du sems pa la/ gal te yang zhes bya ba ste/ ston par byed pa ni gsal bar byed pa'o/ /bdag tu smra ba rnams kyang lus la sogs pa la bdag med par lta ba kho na yin gyi bdag tu lta ba ni ma yin te 'gal ba med pa'i phyir ro zhes bstan pa ni/ rigs pa dang bral yang zhes bya ba'o/ /sdug bsngal ni mi rtag pa dang / sdug bsngal ba dang / stong pa dang / bdag med pa las zhes bya ba rnam pa bzhi la yang sdug bsngal gyi rnam par tha snyad 'dogs pa ni gzhan gyi rnam pa sdud par byed pa yin pa'i phyir/ de 'di rnam pa gzhan la yang mtshungs pa yin no snyam du sems pa la/ de ltar bstan pa yin no/ kun 'byung ba'i rnam pa la rgyu dang / kun 'byung ba dang / rkyen dang / rab tu bskyed pa'i rnam pa rnams dang / 'gog pa'i rnam pa la 'gog pa dang / zhi ba dang / gya nom pa dang / nges par 'byung ba'i rnam pa rnams dang / lam gyi rnam pa la yang lam dang / rigs pa dang / sgrub pa dang / nges par 'byin pa'i rnam pa rnams sdud pa yin no/ /de la sdug bsngal gyi bden pa bstan pa ni/ sdug bsngal zhes bya ba ni bsgrub bya'o/ /kun 'byung rgyu ni 'khor ba ste/ skye ba dang 'chi ba'i rgyun no/ /de gang dag gi yin pa de dag ces bya ba ni gtan tshigs so/ /phung po zhes bya ba ni chos can no/ /skye ba snga ma las 'dir 'ongs pa dang / 'di nas de'i phyi mar 'gro ba 'khor ba ma yin nam/ de yang grub pa ma yin no snyam du sems pa la/ goms las zhes bya ba'o/ /de yang ci las yin/ 'dod chags la sogs pa ni phung po kun tu 'dzin pa'i yid kyi chos te/ de las gsal ba khyab par mthong ba'i phyir ro/ /gzhan las byung ba ni de las khyad par du nges pas ma yin la// 'dod rgyal nyid kyang ma yin no/ /ci las she na/ skyes pa'i phyir skye ba ste 'bras bu yin la/ de dang 'gal ba'i phyir ni med pa'i phyir te/ rgyu med na 'bras bu 'byung ba ma yin te/ rtag tu med par 'gyur ro/ /rgyu med de rgyu med pa'i phyir/ skye ba ma yin te/ skye bar 'gal ba'i phyir ni med pa'i phyir rtag tu yod par 'gyur ro/ /'grel pa mdzad pas ni 'khor ba can nyid ni sdug bsngal dang 'gal ba yin te/ de las bzlog pa khyab pa'i phyir/ / zhes bstan pa ni/ gal te 'dod chags zhes bya ba'o/ /de la bde ba'i rnam pa nyid bzhin du sdug bsngal gyi rnam pa nyid kyang yod pa'i phyir/ 'gal ba nyid ma yin la/ ma nges pa nyid kyang ma yin no/ /dug dang bcas pa'i bza' ba bzhin du sdug bsngal du ro gcig pa nyid kyis blang bya ma yin pa'i phyir ro zhes bstan pa ni/ 'khor ba'i lam du zhes bya ba ste/ gzhan du ni bde ba nyid du'o/ /bde ba'i rnam pa nyid ni dngos su ba ma yin te/ phung po rnams goms pa las byung ba nyid kyi phyir ri dwags 'chor ba po la sogs pa lta bu'o zhes bya ba'i don to/ /'dod chags la sogs pa zhes bya ba la sogs pa ni/ 'dod chags goms pa'i rgyu can te// /zhes bya ba'o/ /ngo bo nyid du zhes bya ba ni sa bon la sogs pa la yang myu gu la sogs pa bzhin du goms pa la mi ltos par skye ba ma yin pa ma yin nam/ de ltar skye ba ni dbang med pa nyid kyis dor bar mi nus pa yin la/ 'gro ba gzhan ni med pa'i phyir bde bar yang srid pa yin no zhes bstan pa ni/ gal te 'dod chags zhes bya ba'o/ /bde ba zhes bya ba ni goms pa las byung ba nyid kyang gcig tu bde ba nyid ces bya bar sbyar ro/ /goms pa las byung ba nyid kyi phyir dbang yod pa nyid kyis dor bar mi nus pa yin la 'gro ba gzhan 'dod chags la sogs pa spong bar mi nus pa nyid du bstan pa ni/ gang gi tshe de nyid las zhes bya ba'o/ /yang dag pa ma yin pa'i kun tu rtog pa dang 'dra bas yang dag pa ma yin pa'i kun tu rtog pa ste/ 'dod pa tsam gyi gzhi can nyid du mtshungs pa'i phyir ro/ /mngon par dga' ba'i ngo bo ni yid kyi bde ba yin gyi gzhan ni ma yin no/ /de'i phyir goms pa las byung ba yin gyi dngos su ma yin par bstan pa ni/ bde ba ni sems mngon par dga' ba zhes bya ba'o/ /gzir pa'i gnyen po yin pa'i phyir bde ba yin gyi rang gi ngo bos ni ma yin par bstan pa ni/ de lta yin dang zhes bya ba'o/ /de nyid dang cig shos la mngon par dga' ba ni goms pa la mngon par dga' bas dngos su ba nyid du khyad par med na de kho na la goms pa nyid mchog yin zhes bya ba 'di la bye brag ci zhig yod ces zer ba la/ gal te de ni 'gyur med na/ /zhes bya ba ste/ de kho na nyid la mngon par dga' ba ni 'dor ba ma yin te/ gnod pa can med par rtag tu yod pa'i phyir yin gyi/ cig shos ni ma yin te/ yul la gnod pas ldog pa'i phyir ro zhes bya ba'i don to/ /rgyu de nyid kyis de kho na nyid ni 'dod pa la gnod pa byed par bstan pa ni/ ji ltar 'dod chags la sogs pa'i zhes bya ba'o/ /goms pa las byung bas thog ma med pa'i phyir/ 'dus byas pa'i sdug bsngal nyid kyang 'dod chags la sogs pa yin par bstan pa ni/ gang gi phyir zhes bya ba ste/ bde ba nyid ces bya ba ni sdug bsngal don dam pa nyid ma yin no/ /thams cad nyid la zhes bya ba ni yul la'o/ /bzlog pa ni ma yin no zhes bya ba ni sdug bsngal 'bad pas bsgrub par bya ba yin la/ bde ba ni de med pas rang bzhin gyis grub pa'o/ /de la zhes bya ba ni bde ba med pa la ste/ 'dod pa 'gal ba nyid kyis skrag pa yin la/ de goms pa ni rjes su 'jug pa yin no/ /des na de med pa'i phyir ni skrag pa goms pa med pa'i phyir ro/ /sdug bsngal de nyid la'am ni mi 'dod pa la'o/ /de med pa'i phyir sdug bsngal zhes bya ba de la/ bde ba ni sdug bsngal gyi rgyu nyid 'dor ba'i yan lag tu brjod pa nye bar bsdu ba ni/ de'i phyir goms pa zhes bya ba'o/ /dpe bstan pa ni bu la chags pa la zhes bya ba ste/ yod pa'i bu la mngon par chags pa dang ldan pa ni de med pa las sdug bsngal bar 'gyur te/ de la skrag pa goms pa'i phyir ro/ /de goms pa med na sdug bsngal gyi rgyu bu de nyid la bde ba yin par bstan pa ni/ bu skyes na zhes bya ba ste/ sdug bsngal gzhom par 'dod pas bde ba nyid gzhom par bya ba yin no zhes bya ba'i don to/ /de lta yin na ma spangs pa'i bde ba dang de'i rgyu la goms par bya ba yin gyi sdug bsngal ni ma yin no zhe na/ rtag tu 'dod pa dag dang ni/ /zhes bya ba ste/ sdug bsngal gyi don du ni 'gyur ba'i sdug bsngal gyi don du'o/ /sdug bsngal bskyed ces bya ba ni sdug bsngal gyi sdug bsngal bstan pa yin no/ /rtog pa dang ldan pa ni bskyed par bya ba'i bde bas skyes pa'i sdug bsngal bzlog pa'i don du ma yin no zhes 'di la 'jig rten pa'i dpe bsten pa ni 'dam rdzab ces bya ba'o/ /gang yang bde ba kho na skyes bu'i don yin gyi gzhan ni ma yin la/ de yang sdug bsngal dang spel ma kho nar 'thob pa yin no zhes dgongs pa yin no/ /de'i phyir dmyal ba la sogs pa'i sdug bsngal yang dor bya ma yin te/ bde ba thob pa'i rgyu yin pa'i phyir ro/ /'on te bde ba thams cad ni zhes bya ba la sogs pa tshigs su bcad pa gnyis te/ dmyal ba bzhin du sdug bsngal la yang bde bar 'gyur ba ni bsnyen bkur la sogs pa sdug bsngal chen po las zhes bya bar sbyar ro/ /yang na 'khor ba pa'i dngos po gang dag 'byung ba dang 'jig pa la yang phung po ste/ spungs pa'i ngo bo yin gyi gcig gi ngo bo ma yin la/ gzugs la sogs pa tha snyad kyi yul ni rdul phra rab 'dus pa la sogs pa las gzhan ma yin pas ni re re nas mi snang ba yin gyi 'dus pa yang mi snang ba ni ma yin no/ /rab rib can gyi skra shad bzhin du rab rib can ma yin pas ni re rer yang snang ba kho na yin no zhe na/ rnal 'byor pas kyang rdul phra rab ba re re nas mthong ba yin pa'i phyir mtshungs pa yin/ 'on te bdag cag la sogs pa'i dbang po las 'das pa yin no zhe na/ rab rib can gyis skra shad rnams kyang re re ni dbang po las 'das pa yin na/ 'dus pa la yang ji ltar phyin ci log yin/ de'i tshe ni de rnams ma yin pa ma yin no/ /ji ltar yang dbang po las 'das pa re re zhing rtsom byed ma yin pa yin na/ dbang po'i rdzas rtsom byed ji ltar yin/ de'i phyir de nyid shin tu mi 'thad pa chen po yin no/ / 'dis ni thag ring po'i sbrang bu'i phung po la sogs pa 'dzin pa ni re rer 'dzin pa med na ji ltar yin zhes bya bar mtshungs pa yin te/ rab rib can gyis kyang spyi'i ngo bor skra mthong ba yin gyi bye brag tu ni ma yin la/ gzhan la ni gnyis kar yin zhes bya bar mi rigs te/ de lta yin yang skra nyag re re ni yul ma yin pa'i phyir ro/ /'on te mi snang ba yang phan tshun nye bas phul du byung ba skyed par byed pas de ltar snang ba yin no zhe na/ de lta bur ni rdul phra rab la yang mtshungs so/ /rtag pa phul du byung ba ji ltar yin 'di yang gtan tsam yin te/ gnas skabs thams cad pa ma yin pa'i phyir rnam par 'byed pa nyams pa'i phyir mi 'thad pa yin no/ /rdul phra rab ni 'jig pa ma yin te/ cha shas med pa'i phyir ro zhe na/ ma yin te/ sgra dang blo la sogs pa cha shas med kyang 'jig pa'i phyir ro/ /dbyibs dang ldan pa nyid kyis cha shas can yin na 'gal ba ci yod/ /steng dang 'og gi rdul phra rab dag gi bar na yod pa thogs pa dang bcas pa nyid kyis bar du gcod par byed pa dang 'brel pa yin na phyogs gcig gis 'brel par mi 'gyur ba ni ma yin no/ /cha'i shes pa 'di ni gnod pa can med pa'i phyir btags pa yang ma yin no/ /cha la yang cha dang ldan pa nyid du gzhag pa ni cha shas rnams ni mtha' yas pa'i phyir dngos po thams cad kyi bong tshod dang lci ba nyid dag gi dbye ba med par 'gyur ro zhe na/ ma yin te/ zhig pa'i mtha'i yin na mtha' yas pa mi 'thad do/ /ras bal la sogs pa tshig pa la sogs pas zhig na cha shas pa ma yin no/ /de zhig pa la yang de lta bu'i rigs gzhan ni de lta bu'i rigs gzhan las byung ba yin pa'i phyir gong bu med pas 'du byed kyi sdug bsngal nyid kyis yul sun phyung bas chags pa med pa nye bar len pa ma yin pa'i sems ni sdug bsngal ma lus pa las grol bar 'gyur ba yin no/ /gong bu yod kyang sdug bsngal goms pa dang 'dzin par byed pa'i 'bad pas dbang po yul la sogs pas yid kyi bzung ba las ni ma yin no/ /'jig pa'i rgyu yul sun ma phyung na the tshom med par sdug bsngal gyi 'du shes goms pa'am 'dzin pa yang yid ni dka' ba byed pa yin no/ /ril por 'dzin pa ni 'dod chags kyi rgyu ma yin te/ nam mkha' dang rtswa dang rdo ba la sogs pa la ma mthong ba'i phyir ro/ /dgos pa gang gi dbang gis dum bur byas pa zhes bya ba la sogs par cis mi 'gyur/ de'i tshe 'dod pa can med do zhe na/ de lta yin na gong bur bye brag tu 'dzin pa kho na rgyu yin no/ /rtog pa ma yin pa'i yul ni rgyu ma yin no zhe na/ bud med dang skyes pa 'dis zhes bya ba ni rnam rtog yin la/ de yang ril por 'dzin pa kho na yin no/ /'dis ni bzang po la sogs par 'dzin par bshad pa yin la/ chags par bya ba la sogs pa'i rnam rtog gi bag chags kyang ril por 'dzin pa'i bye brag gi bag chags yin no/ /sdug bsngal gyi rnam par rtog pa la bde bar mngon par 'dod pa sdug bsngal goms pa yin par bstan pa zhes bya bar yang mi rigs so/ /bya ba la sbyor bzhin pa'i 'dod chags can ni bsnyen bkur dang 'dod pa la sogs pa'i sdug bsngal kho nar rig pa yin yang bde ba'i rgyu nyid du len pa yin la/ de la nye bar ston par byed na des bsams pa'i bde ba la sdug bsngal du ston par byed pa yin te/ gzhan du na mi mthun pa'i phyir la/ de lta yin na ni de ma yin pa la de 'di zhes nye bar bstan pa yang brdzun par 'gyur ro/ /brdzun ni ma'i ming bzhin du yul sun phyung bas byang grol dang rjes su mthun pa yin pa'i phyir gzhan ni ma yin no/ /de lta yin na de sun phyung ba 'dra ba'i yon tan ni byang grol du rigs pas sam/ gzhan du yang rjes su gnang bar bya ba yin gyi gzhan ni des byed pa tsam gyis gsal bar bya ba ma yin no/ /de'i phyir phung po tsam 'di ni 'khor ba can yin la/ des na sdug bsngal lo zhes bsgom pa bstan pa ni/ legs pa yin te/ 'khor ba'i rtsa ba nas 'don pa yin pa'i phyir/ pha rol po'i ni ma yin no/ /de'i phyir yan lag dang yan lag can dang / yon tan dang yon tan can dang / skad cig ma drug gnas pa dang / rtag pa dang / spyi dang / khyad par dang / 'du ba la sogs pa dgos pa med pa can dam pa ma yin pa'i rtogs pas sbyar ba'i 'khrugs pa ni ci nas kyang rjes su gnang ba thob pa ma yin no/ /gnyid log pa na 'di yang 'di mthong ngo zhes spyad pa na mtshams sbyor bar byed pa ma yin nam/ 'di ni bdag med pa can gyi phung po rnams la 'thad pa ma yin no/ /de'i phyir gnyid dang sad pa'i dus kyi rjes su 'jug pa yin par rtogs pa yin no/ /de yang sgrub byed kyi shes pas rtogs par byed pa ma yin nam/ mtshams sbyor ba'i shes pa rnams kyang snga ma'i shes pa'i bag chags ni shes pa phyi ma la mtshams sbyor bar byed pa yin no/ /bsdus pa can mal cha la sogs pa ni gzhan gyi don mthong bar byed pa yin la/ lus dang dbang po la sogs pa yang 'dus pa can yin pa'i phyir/ gzhan gyi don byed pa yin na 'dus pa can ma yin par 'gyur te/ 'dus pa can nyid yin na de yang gzhan gyi don byed pa nyid yin pa'i phyir thug pa med pa yin zhing sgrub byed ma yin par 'gyur ba'i phyir 'dus pa can ma yin pa ni bdag yin te rnam par dbye ba med pa'i phyir/ 'jig pa ma yin pa dang chags pa la yul yin pa'i dor bya ma yin te/ don dam pa las bde ba kho na yin no snyam du sems pa la bde ba yang de las bzlog pas zhes bya ba ste/ 'du byed pa dang ldan pa ni shes pa snga ma dran pa kho na yin na/ ji ltar mtshams sbyor bar byed pa ma yin/ shes pa snga ma'i 'du byed pa dang ldan pa kho na las shes pa phyi ma zhes mtshams sbyor bar byed pa ni ma yin te/ de nyid de'i ngo bo nyid du thal ba'i phyir ro/ /phyi ma de nyid du 'du byed pa dang ldan pa'i phyir mtshams sbyor ba'i rgyu mtshan yin na/ da ltar de'i rgyu mtshan gzhan gyis ci zhig bya/ 'dus pa can rnam par gzhag pa ma yin na ji ltar 'dus pa can yin zhes de yang rtog pa tsam yin te/ gang gi phyir 'bras bu la rgyu 'bras bu ma yin pa nyid du rtogs pa ma yin la/ de yang 'bras bu nyid kyis rgyu gzhan du rtogs pa yin na yang thug pa med pa'i skyon ma yin zhing / bdag go zhes bya ba ni lus dang dbang po dang blo'i rig pa las tha dad pa yang ma yin/ bstan bcos la mi rten pa'i 'jig rten pa'i nges pa'i yul yang ma yin no/ /de'i phyir 'di ni lus dang dbang po la sogs pa'i 'dus pa la bdag go zhes goms pa'i phyir nges par byed la/ 'dus pa ma yin pa gzhan dmigs pa la sogs pa'i yon tan dang ldan pa ma lus pa la khyab par byed pa la don dam pa'i bdag la sogs pa dmigs pa med bzhin pa ni de'i rtogs pas bdag nyid ji ltar 'khrugs par byed par 'gyur/ rlung la sogs pa'i skyon las byung ba'i rmongs pa la sogs pa rnams kho na goms pa las gsal ba tsam yin gyi rang gi ngo bo ni ma yin pa ma yin nam/ rlung la sogs pa med na bong ba la sogs pa la rmongs pa la sogs pa rnams ma yin no snyam du sems pa ni/ 'on te yang 'dod chags la sogs pa goms pa las skyes pa zhes bya ba'o/ /lus dang bdag yongs su gyur pa rnams sam/ gzhan rnams kyi'am/ 'byung ba rnams kyi ni 'dod chags la sogs pa rnams yon tan ma yin par bstan zin nas/ da ni rlung dang mkhris pa dang bad kan gyi bdag nyid kyi khyad par yongs su gyur pa'i lus kyi rang bzhin 'dod chags la sogs pa'i rgyu rnam pa gzhan gyis bkag pa yin pa'i phyir zlos pa ma yin no/ /dus min skra dkar she ser dang / /blo gsal rdul mang blo 'khrug dang / /rmi lam du ni 'od 'bar mthong / /mkhris pa'i rang bzhin can gyi mi'o/ /zhes mkhris pa'i rang bzhin zhe sdang yin pa ni 'khrul pa yin pa ste/ rlung la sogs pa'i rang bzhin can la yang yod pa'i phyir ro zhes ldog pa med par bstan pa ni/ 'khrul phyir zhes bya ba'o/ /'bras bu mthong ba las rlung gi rang bzhin can la mkhris pa'i rang bzhin yang yod pa'i phyir 'khrul pa ma yin snyam du sems pa ni rang bzhin 'dres pa zhes bya ba'o/ /mkhris pa ni ngo bo gang kho nas zhe sdang skyed par byed pa de kho nas dus ma yin pa'i skra dkar la sogs pa'i chos kyang skyed par byed pa'i phyir tshogs pa gcig las byung ba'i gzugs la ro bzhin du de yang 'gyur ba zhig na/ mi 'gyur te/ 'bras bu med pa las kyang mkhris pa'i rang bzhin ni zhe sdang gi tshogs pa ma yin par go ba yin par bstan pa ni/ de las gzhan yang zhes bya ba'o/ /de ni zhes bya ba ni 'bras bu'o/ /de la ni rgyu la'o/ /'khrul pa zhes bya ba ni rlung la sogs pa'i chos ma yin pa'o/ /thal 'gyur las ldog par bstan pa ni/ de'i 'bras bu med na zhi/ /zhes bya ba ste/ rgyu zhes bya ba ni tshogs pa'i'o/ /gzhan zhes bya ba ni dus ma yin pa'i skra dkar la sogs pa'o/ /'dir zhes bya ba ni zhe sdang las dpag pa'i mkhris pa la'o/ /bden te 'bras bus dus ma yin pa'i skra dkar la sogs pa med pa'i phyir mkhris pa'i rang bzhin med pa yin no/ /de la zhe sdang ni de med kyang 'byung ba 'khrul pa can yin par bstan pa la/ gal te 'bras bu de zhes bya ba ni zhe sdang ngo / /ji ltar 'bras bu las zhes bya ba ni de bzhin du brtags pa'i rgyu tshogs pa nyid ni 'bras bu ma rtogs par bstan pa ni/ de bzhin du 'bras bus yang rgyu nus pa thogs pa med pa zhes bya ba'o/ /'bras bu las bad kan gyi rang bzhin can du dpag pa las 'bras bu zhe sdang mthong ba'i phyir/ mkhris pa ni rang bzhin gzhan du brtag par mi nus te/ thal ches pa'i phyir ro zhes bstan pa ni/ gal te mthong ba'i rgyu spangs nas/ /zhes bya ba'o/ /rlung la sogs pa rnams kyang ji ltar yod pa bzhin du 'dod chags la sogs pa'i rgyu ma yin no/ /yin na ni gang kho na'i tshe 'dod chags yin pa de kho na'i tshe zhe sdang la sogs pa rnams su 'gyur ro/ / de bstan pa ni/ thams cad 'dod chags mtshungs par ni/ /thal phyir kun gyi chos ma yin/ /zhe sdang la sogs pa'i dus su yang dus mtshungs par 'dod chags mtshungs par thal bar 'gyur ro/ /de bzhin du zhe sdang mtshungs par thal bar 'gyur ba la sogs par brjod par bya ba yin no/ /rgyu ni 'bras bu skyed par byed pa de nyid gzhan yang byed pa'i phyir 'bras bu rnams lhan cig par 'gyur ba'am/ 'dod chags la sogs pa yang mtshungs par thal bar 'gyur ba yin te/ rgyu mtshungs pa'i phyir 'dod chags can dang / 'dod chags shas che ba la sogs par mi 'gyur ro zhes bya ba'i don to/ /'byung ba tsam gyi bskyed bya nyid yin pa yang dri la sogs pa reg bya'i mthar thug pa ni sa'i ni dri dang reg bya dag go/ /chu'i ni ro dang reg bya dag go/ /me'i ni gzugs dang reg bya dag go/ /rlung gi ni reg bya'o zhes bya bar nges pa ma yin nam/ dkar po dang ser po la sogs pa'i nges pa bzhin du 'am/ 'dod chags la sogs pa'i nges par 'gyur ro snyam du sems pa ni/ gzugs sogs bzhin zhes bya ba'o/ /'byung ba la khyad par med kyang khyad par dang ldan pa'i gzugs la sogs pa ni khyad par can gyi rgyu gzhan du rtogs par byed par bstan pa ni/ der yang brtsad pa mtshungs pa yin/ /zhes bya ba'o/ /de khas mi len na ni skyon yin no/ /nus med rang bzhin med pas na/ /zhes bya ba ni 'grib pa dang phul du byung ba dag kyang khyad par du byed pa ma yin te/ gang gi phyir khyad par thams cad kho na thams cad la 'byung ba yin zhes bya ba'i don to/ /khyad par gzhan yod pa'i phyir zhes bya ba ni skyes bu re re la rlung la sogs pa'i rang bzhin las 'byung ba'i khyad par yod pa'i phyir ro/ /thams cad ni rlung la sogs pa'o/ /rgyu gang gi yin pa'i khyad par de de lta bu yin gyi skyes bu thams cad kyi ni thams cad kyi chos ma yin no/ /thams cad 'dod chags la sogs pa shin tu shas che ba dang ldan par 'gyur ba zhig na 'gyur ba ni ma yin no/ /ji ltar zhes bya ba ni 'dod chags skyed par byed pa'am/ gzhan yang rung ba'i khyad par ro/ /de la yang zhes bya ba ni khyad par 'khrul pa nyid yin te/ 'bras bu 'dod chags la sogs pa ni zhe sdang la yod pa'o/ /yang dag par ni bstan pa yin/ /zhes bya ba ni bzhad gad yin te/ yang dag pa ma yin zhes bya ba'i don to/ /gtan tshigs gang las zhes bya ba ni go byed las so/ /thams cad kyi chos zhes bya ba ni 'dod chags la sogs pa ste/ thams cad kyi rang bzhin yin na de la yod pa'i khyad par yang thams cad kyi rang bzhin kho nar 'gyur te/ 'khrul par mtshungs pa'i phyir ro/ /gal te rlung la sogs pa gang yang rung rgyu nyid yin yang thams cad 'dod chags la sogs pa thams cad dang ldan pa ma yin te/ thams cad du nges pa mthong ba pas rjes su dpag pa'i nges pa'i khyad par lhan cig byed pa'i phyir ro snyam du sems pa ni/ 'on te 'bras bu'i khyad par gyis/ /zhes bya ba'o/ /de lta yin na lhan cig byed pa'i khyad par de nges pa'i rgyu goms pa yin te/ de'i dbye bas 'dod chags la sogs pa'i dbye ba mthong ba'i phyir/ rtog pa gzhan yin na du ba yang me'i rgyu can du mi 'grub par bstan pa ni/ me ma mthong ba'i du ba gang zhes bya ba'o/ /me dang ldan pa'i yul ni me'i yul te de la'o/ /gzhan las zhes bya ba ni me dang bral ba'o/ /rgyu'i khyad par gyis khyad par du byed pa nyid kyis 'bras bu nyid la khyab par byed pa yin no/ /bad kan gyi khyad par la yang khyad par can du mi 'gyur ba'i 'dod chags ni khyad par byed pa med pa'i phyir mi 'gyur bar bstan pa ni/ khyad par dang bral bas zhes bya ba'o/ /mkhris pa'i khyad par yin na zhe sdang gi khyad par mthong ba'i phyir/ khyab par byed pa med par ma grub pa yin zhes zer ba ni/ ma grub pa nyid ces bya ba'o/ /ma yin zhes bya ba ni ma grub pa nyid dgag pa'o/ /ci las she na/ 'gyur ba yis zhes bya ba ni khyad par gyis so/ /thams cad ni rlung la sogs pa rnams kyi'o/ /'gyur ba yis zhes bya ba ni zhe sdang gi zhes bya bar sbyar ro/ /thams cad kyi 'gyur bas 'gyur ba can ni gang kho na'i yang ma yin no/ /thams cad kyi 'bras bu nyid kyang kun gyi chos ma yin zhes bya bar bkag par bstan pa ni/ kun las skye ba'ang zhes bstan pa'o/ /gal te yang rgyu la khyad par yod kyang 'bras bu khyad par can du mi 'gyur te/ de lta na yang rang gi ngo bos 'grub ste/ 'di med par mi 'thad pa kho na yin par bstan pa ni/ rgyu ni zhes bya ba ste/ slar yang 'phel ba kho nas mkhris pa 'phel ba la tsha ba la sogs pa 'phel ba lta bu'o zhes bstan pa ni tsha ba la sogs pa bzhin zhes bstan pa'o/ /bcud kyis len pa la sogs pas chags pa 'phel ba la dgos pa dag gis bad kan 'phel na 'dod chags 'phel ba ma yin nam/ de'i tshe bde ba'i khyad par 'byung bas rang gi bag chags yongs su smin pa las byung ba yin par bstan pa ni/ chags sogs zhes bya ba'o/ /rgyu gzhan yod na yang zhes bya ba ni bad kan yod na yang ngo / /'bras pu gzhan ni zhe sdang mthong ba yin la/ de ni zhes bya ba ni 'bras bu gzhan te/ ma mthong ba'i khyad par ni rgyu la yod pa'o/ /khyad par gzhan ni der zhes bya ba ste/ rgyu la'o/ /de'i 'bras bu gzhan zhes bya ba dang sbyar ro/ /ji ltar 'dod chags kyi rang bzhin las zhe sdang gi rgyu gzhan dang ldan pa yin pa'i phyir/ khyad par gzhan du rtogs pa de bzhin du 'dod chags kyi khyad par yang de las gzhan pa'i khyad par gyi rgyu can yin snyam du sems pa ni/ der yang de las gzhan pa'i zhes bya ba'o/ /khyad par de zhes bya ba ni 'dod chags kyi rang bzhin la yod pa'o/ /snang ba zhes bya ba ni snang ba'i khyad par gyi bskyed bya'o/ /ma mthong ba'i khyad par rgyu gang gis yin pa de'i ma mthong ba'i khyad par nyid do/ /thal 'gyur dang de las bzlog pa dag bde ba'i khyad par las zhes bya ba'o/ /'dod chags kyi rang bzhin gyi khyad par yin na 'dod chags kyi khyad par la khyad par gzhan med pa'i phyir ro/ / ma yin du zin kyang rang gi ngo bo ji ltar mi 'gyur/ gal te khyad par zhes bya ba'o/ /'grib pa zhes bya ba ni med pa'o/ /gang gi phyir zhes bya ba la sogs pas thun mong gi rigs pas bstan pa yin no/ /de ltar rgyu ni 'phel bar gyur pa na zhes bya ba dang / skyon rnams yod na yang zhes bya ba 'dis zlos pa ma yin zhing / rnam par 'grel pa nyid kyang ma yin zhes bya ba'i don to/ /bad kan gyi khyad par yin yang khyad par med pa las sam/ med pa las rgyu 'dod chags kyi 'bras bu nyid ma yin te/ khyab par byed pa med pa'i phyir mi rigs te/ khams mnyam pa las byung ba bde ba lhan cig byed pa ni rgyu nyid du khas blangs pa'i phyir ro/ /de dang lhan cig pa'i bad kan ni 'dod chags la 'khrul pa ma yin no snyam du sems pa ni/ gal te bad kan 'phel na zhes bya ba'o/ /gzhan gyis gegs byas nas zhes bya ba ni/ lhan cig byed pa ma tshang na'o/ /cha mnyam las zhes bya ba ni mnyam pa las byung ba'i lhan cig pa'i bde ba las so/ /bde ba yang rang skyes pa tsam gyis skyed byed ma yin gyi/ 'on kyang khu ba 'phel ba'i rim gyis yin par bstan pa ni/ khu ba 'phel zhes bya ba ste/ de las ni 'dod chags so/ /khyad par yod na yang zhes bya bas bad kan ni 'dod chags la 'khrul par bstan nas/ thun mong ba brjod pa ni/ cha mi mnyam pa la'ang zhes bya ba ste/ de med kyang yod pa yin no/ /gzhan ni zhes bya ba ni yon na'ang med pa'o/ /gzhan ni mi gtsang ba bsgom pa la mngon par dga' ba'o/ /zad nas zhes bya ba ni zhu ba'o/ /de med kyang yod pa'i phyir ldog pa med pa yin no/ /rjes su 'gro ba med par bstan par 'dod nas rang gi ngo bo bstan pa ni/ bud med gcig la zhes bya ba'o/ /de med pa bstan pa ni/ de gcig la zhes bya ba'o/ /khu ba 'ba' zhig rgyu ma yin te/ gang gis thams cad du 'dod chags yin pa'i phyir rjes su 'gro bar 'gyur ro/ /'on kyang gzugs dang spyod tshul la sogs pa'i lhan cig byed pa yin la/ bud med gcig la rjes su 'gro ba nges pa kho na ma yin no snyam du sems pa ni/ gal te gzugs sogs kyang yan lag /ces bya ba'o/ /nges pa med par zhes bya ba ni gzugs la sogs pa yang 'dod chags la 'khrul pa yin pa'i phyir rjes su 'gro ba med pa yin no/ /gzugs la sogs pa med kyang khu ba yod na yod pa'i phyir ldog pa med par bstan pa ni/ nges pa med par 'byung ba'ang min/ /zhes bya ba'o/ /gzugs la sogs pa'i lhan cig byed pa'i khu ba ni 'dod chags la sogs pa med par bstan pas rjes su 'gro ba la sogs pa med pa kho nar bstan par byed pa ni/ yon tan ma bzung zhes bya ba ste/ mi gtsang ba bsgom pa la sogs pas mi gtsang ba la sogs par 'dzin pa yin no/ /gzugs la sogs pa tsam 'dzin pa ni lhan cig byed pa ma yin te/ 'on kyang gtsang ba la sogs par 'dzin pa yin par bstan pa ni/ de'ang yan lag yin na zhes bya ba'o/ /yon tan 'dzin pa ni mi gtsang ba la sogs pa bsgom pa med pa'i phyir bag chags gzhan yod pa yin no/ /de nyid re zhig yon tan 'dzin pa'i lhan cig byed pa ci las yin zhe na/ gzugs la sogs pa'i lhan cig byed pa thams cad ni mi gtsang ba bsgom pa ldan pa yang cig shos bzhin du de dang ldan par 'gyur ba'i phyir de yang 'dod chags can du 'gyur ro/ /ci las yin zhe na/ rgyu las te 'dod chags kyi rgyu mi gtsang bar mthong ba las bzlog pa bzhin du khyad par med pa las so/ /so sor nges pa'i rang gi rgyu las byung ba'i yon tan 'dzin pa'i bag chags ni 'jig rten pha rol 'grub pa'i 'jigs pas khas mi len pa'i phyir ro/ /'dis yon tan mi 'dzin pa yang yon tan 'dzin par 'gyur ro zhes bya ba'i thal 'gyur 'di nyid bstan par byas nas/ da ni grang ba dang dro ba'i reg pa bzhin du 'gal ba dag ni 'dod chags dang zhe sdang dag gam/ bde ba dang sdug bsngal dag la mtshungs pa'i tshogs pa'i bskyed bya nyid du mi rigs pas bad kan gyi rang bzhin la 'dod chags yin pa bzhin du zhe sdang yang yin par bstan pa ni/ gnas skabs gang zhes bya ba'o/ /'bras bu bzhin du de'i rang bzhin dag kyang 'gal ba kho na yin la 'gal ba ma yin na/ 'bras bu la yang der mi 'gyur bar bstan pa ni/ de gnyis zhes bya ba'o/ /'dod chags la sogs pa rnams bad kan la sogs pa'i rang bzhin las nges pa ma yin na gang gis 'gal ba med par 'gyur zhes bstan pa ni/ 'di la nges pa zhes bya ba'o/ /de 'di rnam 'grel gyi rnam par dbye ba'i khyad par ni 'grel par yang sbyar bar bya ba yin no/ /gzugs la sogs pa yang khu ba bzhin du nus pa can yin no zhes zer ba ni/ khyad par can gzugs zhags pa yis/ /zhes bya ba ste/ 'dod pa yin zhes bya ba dang sbyar ro/ /gzugs ni skyed byed ma yin zhes bya bar blta bar bya'o/ /thams cad rgyu ma yin zhes bya ba ni gzugs la sogs pa ni yod pa ji lta ba bzhin du rgyu nyid yin pa bkag pa yin no/ /rgyu nges pa med pa nyid ces bya ba ni ldog pa can ma yin na'o/ /gzugs la sogs pa'i yon tan 'khrul pa nyid yin par bstan pa ni/ gcig la nges pa zhes bya ba ste/ gzugs dang 'dod chags dang ldan pa la yang ngo / /yul med par ni yul med na'o zhes bya ba 'dir mtshams bcad do/ / 'on te mi 'byung na kho na zhes rang bzhin nges pa yin na rang bzhin gcig nyid la yang cig car 'bras bu mi 'byung ngo snyam du sems pa ni/ 'on te mkhris pa yis zhes bya ba'o/ /me zhes bya ba ni phyi rol gyi me'o/ /chags sogs la ni zhes bya ba ni phyi rol la ltos pa ma yin no zhes bya ba'i don to// /de bzhin du rlung la sogs pa dang gzugs la sogs pa ni 'dod chags la sogs pa la nges par byed pa ma yin na nges par byed pa gzhan du rtogs pa na mthong ba'i phyir nang gi ni rang gi rgyud la byung ba yin la/ / de yang rang la phan 'dogs pas byed pa'i bag chags gang yin pa de ni phan 'dogs pa'i bag chags so/ /bag chags dang 'brel pa las te sad pa las so/ /nges pa las bzlog pa ni ma nges pa ste/ 'dod chags la sogs pa'i'o/ /de bzhin du gnod pa byed pa'i bag chags la yang brjod par bya'o zhes bstan pa ni/ 'on te nang gi zhes bya ba ste/ bag chags nyid ces bya ba ni phan 'dogs pa'i bag chags nyid do/ /bag chags kyi khyad par gyi rgyu yang gzugs la sogs pa sad par byed pa la ltos pa yin pa'i phyir ma nges pa ma yin nam snyam du sems pa ni/ 'on te yang gang zhig ces bya ba'o/ /'dod chags la sogs pa la nges pa med pa 'di yang rnam pa 'ga' zhig ces bya ba ni rtul po dang 'bring po la sogs pa'i dbye bas so/ /'ga' zhig gi tshe zhes bya ba ni lang tsho la sogs pa'i dus kyi nges pas so/ /'ga' zhig gi zhes bya ba ni phyi rol gyi gzugs la sogs pa'am/ nang gi sems la sogs pa ma mtshon pa khyad par 'bras bu'i nges pa gcig pu la nges pas so/ /gzugs la sogs pa la ltos pa med pa'i phyir zhes bya ba 'di ni nges par ldog pa med pas zhes bya ba la ltos pa yin no/ /de bzhin du 'byung ba la yongs su gyur pa ni bad kan dang rlung la sogs pa 'dod chags la sogs pa'i rang bzhin bsal nas gzhan gyis khas blangs pa'i 'byung pa nyid bsal bar byed pa ni rlung la sogs pa'i chos 'dod chags ma yin mod ces bya ba ste/ 'dis ni zhes bya ba ni rlung la sogs pa rjes su byed pa ma yin pas bag chags kyi rjes su byed pas so/ /blo ni lus la brten pa'i phyir/ /goms pas grub pa med ce na/ /zhes bya ba la sogs pas bkag pa yang gzhan log par rtogs pa srid pa 'gegs par 'gyur ba yin la/ de mthong ba yang yin par bstan pa ni/ 'di dag ni zhes bya ba'o/ /gzugs la sogs pa 'byung ba dag las tha dad par khas blangs pas zhes bya ba ni brten pa nyid tha dad pas byin gyis brlabs pa'i phyir zhes bya ba'i don to/ /'byung ba dang gzugs la sogs pa dag gi rten dang brten pa nyid bkag pas khas blangs pa dang 'gal ba yang med par bstan pa ni/ de rten zhes bya ba ste/ rgyu'i don gyi rten gyi sgra yin pas rten dang brten pa nyid ma yin te/ dus tha dad pa'i phyir ro/ /grub pa'i ngo bo la de nus pa med pa'i phyir/ lhan cig par grub kyang dgos pa med pa yin te/ lhan cig pa'i don la ltos pa med pa'i don yin pa'i phyir ro/ /'byung ba'i ngo bo ni rang byung ba'i don du ltos pa yin na ji srid du yod pa la ltos pa de nyid 'di snga na med pa yin ji srid lhan cig gnas pa de srid du ltos pa med par bstan pa ni/ rang gi rkyen dag dang zhes bya ba ste/ dbyer med pa ni gnas pa'i phyir ni lhan cig gnas pa'i phyir/ 'di kho na rgyu'i don dang rkyen gyi don dag la dus tha dad pa dang tha mi dad pa'i yul nyid kho na gsal bar byed pa ni/ rgyu ni 'bras dang lhan cig tu/ /zhes bya ba'o/ /'di phan tshun med na mi 'byung ba ni dbyer med par gnas pa yin zhes bshad pa ni/ gal te gzugs sogs zhes bya ba'o/ /de'i rten kyang ni brten pa'i rten yin no/ /brten pa la ltos pa'i ngo bo ni brten pa med na med pa kho na yin no/ /mi 'jig pa ni brten pa dang bral bar gnas na'o/ /sngar yang zhes bya ba ni brten pa yin par mngon par 'dod pa'i dus na yang ngo / /de nyid 'di'o zhes ngo shes pa las ni rten nyid ma yin te/ 'brel pa med pa'i phyir ro/ /dbye ba med par gnas pa'i khyad par las rten khyab bya yin par ni mi rigs so/ /dbyer med pa med kyang chang dang myos pa'i nus pa dag rten la sogs par yin pa'i phyir ro zhes zer ba ni/ gal te myos sogs nus pa bzhin/ /zhes bya ba'o/ /lan ni/ dngos po las zhes bya ba ste/ ji ltar 'di dag dbyer med pa ma yin pa de kho na bzhin du rten la sogs pa nyid kyang yin te/ tha mi dad pa'i phyir ro/ /de'i phyir khyab par bya ba nyid nyams pa ma yin zhes bya ba'i don to/ /tha dad kyang brten pas byas pas ngo bo brten pa zhig na 'jig pa yin par bstan pa ni/ rten tshang par gnas na brten pa zhes bya ba'o/ /'dod chags la sogs pa yang lus las tha mi dad pa'i phyir lus nyid zhig na 'jig pa ma yin nam/ de'i phyir rten dang brten pa'i de ma yin zhing / dbyer med par gnas pa nyid kyang ma yin no/ /tha dad pa yin yang rten gnas na brten pa 'jig pa ma yin te/ de 'jig na des byas pa'i rten nyid kyang 'jig pa'i phyir ro/ / des na 'dod chags dang lus la sogs pa rten la sogs pa nyid dang dbye ba med pa yin no snyam du sems pa ni/ de mtshungs zhes bya ba'o/ /tha mi dad pa las khyab pa nyams pa ma yin no zhes bya ba ni mi rigs te/ 'dod chags dang lus dag tha mi dad pa'i phyir ro/ /tha dad na yang brten pa zhig pas rten nyid 'jig pa'i phyir/ rten la sogs pa nyid la gnod pa med do zhes bya ba 'di la tha dad pa ni rten dang brten pa nyid dang bral ba'o/ /snang ba ni nyams su myong ba yin la de rtogs pas ro dang gzugs bzhin du gnyi ga lhan cig rig pa yin yang rten dang brten pa nyid ni ma yin no/ /rten la sogs pa nyid dbyer med pas khyab pa yin zhes zer ba ni/ 'bru'i chang dang bcos pa'i chang la sogs pa zhes bya bar ro/ /rang gi ngo bo ni me'i rang gi ngo bo'o/ /gzhan la ni sngags la sogs pa dang bral ba la ste/ nus pa gzhan gyis sreg pa'i phyir ro zhes bya ba'i don to/ /des zhes bya ba ni nus pa gzhan dang ldan pa'i ngo bo'o/ /nus pa bkag pa la yang ni nus pa gcig nyid rang gi ngo bo bzhin du'o zhes bya ba'i bsam pas rgol ba'o/ /nus pa gcig yin du chug kyang sngags la sogs pas gegs byas pa ma yin te/ de lta mod kyi phyi rol gyi skyes bus bsreg bya ma yin pa'i ngo bo gzhan du byed pa yin no/ /de'i phyir de dang bral ba la sreg pa yin no zhes zer ba ni/ bsreg bya zhes bya ba ste/ gzhan nyid du ni bsreg bya ma yin pa nyid du'o/ /gzhan gyi zhes bya bas gnas skabs pa'i bsreg bya nyid la ltos nas bsreg bya nyid bstan pa yin no/ /gzhan du ni sngags dang bral ba la sogs pa'o/ /gang las byung zhes bya ba ni/ rgyu las sam tshad ma las so/ /'di sreg par byed na de rnams med kyang byed pa yod pa'i phyir/ don gyis go ba nyams par 'gyur bar bstan pa ni/ de dag gis zhes bya ba'o/ /gal te gcig gi ngo bo rgyu yin na 'bras bu yang gcig gi ngo bor 'gyur te/ rgyu'i ngo bor bye brag med pa'i phyir sa bon dang myu gu lta bu'o/ /du ma'i ngo bo yang yul tha dad pa'i mar khu dang sdong bu la sogs pa zad pa'i 'od 'phros pa ni rang gi rgyun dang rang gi shes pa dag gi rgyu zhes bya ba la sogs pa yin la/ de'i phyir don gyi shugs kyis rang gi ngo bo med na don gyi shugs kyis nus pa'i dbye bar rnam par gnas pa zhes rtsod pa byed pa ni/ dngos 'di ltos pa yod min te/ /zhes bya ba'o/ /me las zhes bya ba la sogs pas 'bras bu du mar bstan pa yin no/ /nus pa du ma nyid la tshad ma brjod nas/ khas mi len pa'i skyon brjod pa ni/ rang bzhin gcig pu zhes bya ba'o/ /yod pa ni sngags la sogs pa dang bral ba la'o/ /med ces bya ba ni mi srid pa ste/ de dang ldan par te gnyis ma yin te/ dus gcig pa la gnod pa yin no zhes bya ba'i don to/ /de la sngags dang bral ba la me ni sreg par byed pa nyid du yod pa yin gyi de dang ldan pa la yod pa ma yin te/ 'gal ba'i phyir ro zhes zer ba ni/ yod na thams cad ces bya ba ni thams cad sngags la sogs pa dang ldan pa yin yang bsreg bya nyid yin no/ /lan ni/ ji ltar nus pa sna tshogs 'di/ /zhes bya ba ste/ yul tha dad pa'i 'bras bu du ma mthong ba las nus pa sna tshogs par rtogs pa ni de med na nus pa du ma dang ldan pa yod kyang nus pa sna tshogs pa dang ldan par mngon par 'dod pa yin yang 'byung ba ma yin no/ /de lta bu'i nus pa dang bral ba las de ltar nus pa bzhin du 'bras bu rnams kho na sna tshogs pa'i ngo bo rnams su 'byung ba'i don to/ /'bru sna tshogs pa nyid mthong ba ni rang bzhin med pa tsam gyis 'byung na nus pa sna tshogs pa nyid la gzhan du grub pa yin par bstan pa ni/ gal te 'bras bu sna tshogs pa ni mthong bas zhes bya ba'o/ /sreg byed nyid yod pa dang med par 'gal ba lan du bstan pa ni/ gang gis sngags sogs zhes bya ba ste/ rang gi rgyud las skyes pa'i me ni sa bon bzhin du yod pa dang med pa'i lhan cig byed pa can gyi rgyu las rnam par dbye ba'i 'bras bu byed par 'gyur zhes bya bar sbyar ro/ /sngags la sogs pas bsreg byar byed pa yin par bstan pa ni/ bsreg bya'i rdzas zhes bya ba ste/ gzhan gyis zhes bya ba ni ngo bos so/ /de ni zhes bya ba ni bsreg bya'i ngo bo'o/ /de ni zhes bya ba ni chang dang myos pa'i nus pa'i dpe'o/ /skabs kyi zhes bya ba ni dbyer med pa nyid med kyang rten la sogs pa nyid kyi'o/ /nus pa ltar 'byung ba dang tha mi dad pa zhes bya ba 'di'i de ma thag tu rten dang brten pa gnyis zhes blta bar bya'o/ /de nyid ces bya ba ni gnyis po 'di med pa rnams la tha dad pa med pa ma yin no/ /snang ba'i rnam pa tha dad pa'i phyir rten dang brten pa nyid ma yin no/ /de nyid kyis ni snang ba tha dad pa las tha dad pa yin pa'i phyir ni tha dad pa'i phyir te/ bar mtshams na gnas pas rten med pa la sogs par snang ba'i phyir ro zhes bstan pa ni/ snang ba tha dad pa zhes bya ba'o/ /'di la kha cig na re yul rnams 'di la snang ba'i phyir snang ba ni dbang po yin la/ de tha dad pa yang yin la snang ba yang yin pa des rtogs pa'i tha dad pa yin te/ dbang po tha dad pa'i phyir ro/ /de bzhin du gzhan dag na re snang ba tha dad pa skyes bu gang gi yin pa des rtogs pa'i phyir/ rang dang gzhan gyi bdag nyid can gyi mngon sum pa ni lus yin la/ sems pa ni rang gi mngon sum kho na yin no/ /'di gnyis ka yang snang ba tha dad pa ma yin na/ tha dad par sgrub par byed pa ma yin la/ de yod na de nyid tha dad pa'i sgrub byed nyid yin gyi dbang po dang skyes bu dag ni ma yin no zhes bya ba de bsal ba ni/ dbang po tha dad pa zhes bya ba'o/ /snang ba'i rang bzhin zhes bya ba ni rtogs pa med pa'o/ /lus dang sems pa dag tha mi dad pas rten la sogs pa dang de las bzlog pa'i so sor snang ba bstan pa ni/ der yang snang ba ni tha dad do zhes bya ba'o/ /tha dad pa ma yin no snyam sems pa ni 'on te bde ba la sogs pa ni nang gi reg bya zhes bya ba'o/ /phyi rol rig pa ma yin yang tha dad pa las bzlog pa ma yin par bstan pa ni/ gang zhig gang na zhes bya ba ste/ phyi rol gyi shing bzhin du rig pa ma yin pa ni/ gzhan gyis zhes bya bar sbyar bar bya'o/ /gzhan gyis zhes bya ba ni shes pas so/ /gzhan gyis ci phyir zhes bya ba ni skyes bus so/ /gnyis po phan tshun reg pa ni 'khyud pa na'o/ /gnyi gas kyang ni zhes bya ba ni reg bya dag ste gzhan la gnas pa gzhan gyis rig pa bzhin du rang la yang gnas par rig par 'gyur ro zhes bya ba'i don to/ /bdag gi rang bzhin ni bdag gi reg pa'i ngo bo'o/ /de lta yin na zhes bya ba ni gzhan la yod pa dang / rang la yod pa gnyis kyis cig car kho nar rtogs par 'gyur ro zhes bya ba'i don to/ /rnam pa thams cad ces bya ba rnam pa gzhan kho na cha shas med pa nyid kyis med pa'i phyir ro/ /du ma zhes bya ba ni cha shas dang bcas pa'o/ / rang nyid ces bya ba ni rang rig pa rnams kyi bde ba'i rdul phra rab rnams kyi'o/ /gcig nyid ces bya ba ni rdul phra rab po/ /rdul phra rab re re nas rig pa med pa'i phyir rdul phra rab de rnams kyi 'byar ba yang dbye bas rtogs par 'gyur ro zhes bstan pa ni/ yod kyang zhes bya ba ni 'byar ba zhes bya ba dang sbyar ro/ / 'byar bas zhes bya ba ni rdul phra rab rnams reg pa'o/ /de dag gi zhes bya ba ni rdul phra rab rnams kyi rang gi ngo bo tha dad par rtogs pa ma yin no/ /'byung ba dag las te ma rtogs pa'i rdul phra rab rnams las sems pa tha dad par rtogs pa yin te/ rtogs pa dang ma rtogs pa tha dad pa'i phyir ro/ / gzhan gyis zhes bya ba ni reg bya'o/ /de'i phyir zhes bya ba ni bsdu ba'o/ /ji ltar gnas zhes bya ba ni bde ba nyid de/ gang du yang rung bas reg pa na de lta bu nyid du 'gyur ro zhes bya ba'i don to/ /gzhan med kyang zhes bya ba ni lus las so/ /sems pa ni yid du 'ong ba ngo bo nyid kyi'o/ /gnas zhes bya ba ni las kyi ngo bo'i rgyu'i khyad par las de 'di pa la med pa'i phyir/ yid du 'ong ba nyid ni lus kyi chos ma yin gyi/ 'on kyang shes pa po'i shes pa'i chos yin te/ rung ba'i yul na yod pa rnams mi shes kyang rang nyid shes pa'i phyir ro zhes bstan pa ni/ gal te de yi yid 'ong nyid/ /ces bya ba ste/ de lta bu'i ngo bor snang ba mthong ba nyid kyi ming can skyes bu re re zhing nges pa rig pa'i shes pa kho na yin par bstan pa ni/ gzugs ni snang bar gyur na yang / /zhes bya ba'o/ /lus kyi nang du chud nyid na/ /zhes bya ba ni lus las tha mi dad na ste/ lus 'ba' zhig gzhan gyis ji ltar rig par 'gyur zhes bya bar sbyar ro/ /lus ma rtogs kyang shes pa rtogs par bstan pa ni/ mun gnag gnas pa zhes bya ba'o/ /lus kyi khongs su gtogs pa nyid/ /ces bya ba'i nges pa bstan pa ni/ rnam par rtog pa med par ni/ /zhes bya ba'o/ /mun gnag gnas pa zhes bya ba 'di'i bshad pa ni/ des na zhes bya ba ni lus kyis so/ /de med par ni rtog pa med par te rig par zhes bya bar sbyar ro/ /lhan cig dmigs par nges pa zhes bya ba ni yod pa zhes bya ba'i don to/ /lus kyi 'bras bu'am lus kyi bdag nyid yin na lus rnam par 'gyur na rnam rtog tu gcig pa'i rnam pa kho nar 'gyur ba yin par bstan pa ni/ ji srid lus ni 'gyur bar zhes bya ba ste/ de'i 'gyur bas 'gyur ba nyid kyis de'i 'bras bu nyid la khyab pa yin la/ de dang 'gal ba la ni de rnam par 'gyur ba ma yin pas rnam par 'gyur ba nyid yin na ni mi 'gyur ro/ /lus 'ba' zhig gi 'bras bu nyid yin na de ltar 'gyur ba zhig na/ 'o na ci zhe na/ yid kyi rnam shes ni don dang lhan cig byed pa'i lus kyi 'bras bu yin la/ lus la dbye ba med kyang don gyi dbye bas phye ba yin no/ /de'i phyir de'i tshogs pa'i dbye bas phye ba yin te/ de'i 'bras bu kho na de yin no snyam du sems pa la/ rnam par rtog pa ni zhes bya ba ste/ rnam par rtog pa ni don la mi ltos pa'i phyir te/ lus tsam rgyu nyid du khas len na khyab par byed pa 'gal bar grub pa kho na yin no zhes bya ba'i don to/ /yid kyi rnam shes kyi rgyu lus nyid yin na lus tha mi dad na yid la snang bzhin pa tha mi dad par bstan nas/ bag chags sad pa'i rgyu nyid yin na lus la dbye ba med kyang de'i dbye bas phye bar 'thad pa kho nar bstan pa ni/ gang tshe ltos pa med pa ni lus kyi bye brag la ste/ gang gi tshe bag chags sad pa kho na shes pa gang gis rgyu yin pa'i shes pa de 'ga' zhig tu 'gyur/ gang dang de rtag tu 'brel pa'i phyir de'i tshe des na skye rgyus so/ /'ga' zhig gi skyes bu'i'o/ /res 'ga' 'ga' zhig tu 'gyur gyi gcig gi ngo bo ni ma yin zhes bya bar sbyar ro/ /gang gi tshe bag chags sad pa'i rgyu shes pa 'ga' zhig ni 'byung bar 'gyur ba zhig gi yin la de'i tshe des te/ rgyus res 'ga' zhig 'ga' kho nar 'gyur zhes bya ba ni gzhan gyi 'dod pa'o/ /'grel ba mdzad pa ni lus la ltos pa med par zhes bya bas khyad par bkag nas lhag ma khas blangs pas bag chags sad pa'i rgyu cung zad la ltos nas des te rgyus skyes bu gang la la'i nam zhig gi dus su shes pa cung zad du 'gyur zhes 'chad ba ni/ lus rgyu yin na ni zhes bya ba la sogs pas bshad pa yin lus kyi lhan cig byed pa nyid kyis rgyu nyid du 'gyur du zin kyang / gang gis 'gyur bas nges par 'gyur ba de nye bar len pa'i shes pa btsal bar bya ba kho na yin pa'i phyir/ shes pa rgyu nyid yin pa la gtan tshigs gzhan bstan pa ni/ rnam shes min pa zhes bya ba'o/ /gal te lus kyi lhan cig byed pa yin na/ de nyid kyi shes pa nus pa'i ngo bor 'gyur la/ chos can gzhan du rtogs pa min na de dang nus pa'i rtogs par yang 'gyur ba'i phyir/ rtogs pa lci bar 'gyur ro snyam du sems pa ni/ gal te dngos po thams cad ni zhes bya ba'o/ 'dod pa 'di ni grangs can gyi yin gyi/ rgyang pan pa'i ma yin zhes bstan pa ni/ de skad grangs can zhes bya ba'o/ /'di mi rigs par bstan pa ni/ ngo bo gang zhig ni rnam shes kyi snang ba yin la/ de nus pa'i gnas skabs kyi shes pa la med pa'i phyir tha dad pa yin no/ /de'i phyir snang ba nye bar len pa ni snang ba rtogs pa yin gyi gzhan ni ma yin no zhes bya ba'i don to/ /rgyu ni rnam brgyar rnam phye yang / /tha dad par ro zhes bya ba ni bzhad gad yin pas mi dmigs pa bstan pa yin no/ /snang ba'i rnam shes nye bar len pa nyid rnam shes yin par bstan pa ni/ rnam par shes pa mthun pa dang mi mthun pa zhes bya ba'o/ /rtswa mchog gi rtse mo na glang po che brgya bzhin du 'o ma la ma mthong ba'i zho khas len pa dang 'dra ba yin par bstan pa ni/ zho sogs rnams kyi zhes bya ba'o/ /rang bzhin gzhan gyis ni yul 'dzin pa'i rang bzhin las gzhan pa'i rang bzhin ni rang bzhin gzhan no/ /des de nyid yul 'dzin pa'i rang bzhin yin no/ / rnam shes las zhes bya ba ni yul 'dzin pa las so/ /'du byed mngon phyogs pa ni mkhas pa nyid la sogs pa'o/ /ma yin zhes bya ba ni sa bon las byung ba yang slar yang rtsa ba las 'phros pa'i rim gyis rtsa ba las skyes pa gzhan las tha dad pa ma yin no/ /de'i phyir de ma thag pa'i rgyu ni 'bras bu'i dbye bas byed pa yin gyi/ bar du chod pa ni ma yin no/ /rnam par shes pa las zhes bya ba ni yul 'dzin pa'i bdag nyid las so/ /re zhig 'byung ba rnams kyi so so ni 'dod chags la sogs pa ma yin te/ 'dod chags la sogs pa med kyang shing dang rdo ba la sogs pa'i 'byung ba mthong ba'i phyir/ lus kyang rgyu ma yin te/ de yod kyang res 'ga' med pa'i phyir dang / 'tsho ba yang btang snyoms kyi dus na de med kyang 'byung ba'i ngo bo mthong ba'i phyir la/ de nyid kyis na 'byung ba tsam gyi bskyed bya ma yin te/ snga na med pa'i sems can 'byung ba sngon du 'gro ba las byung ba ma yin no/ /de ltan shing la sogs pa bzhin du lus yongs su gyur pa yang 'tsho ba na 'dod chags la sogs pa dang ldan pa ji lta ba bzhin zhes nges pa med par 'gyur/ gang gi phyir rang bzhin gyis nges pa la khyab pa yin la/ rang bzhin ma yin pa nyid ni de dang 'gal ba yin pas khyab par byed pa 'gal ba yin par bstan pa ni/ snga na med pa 'byung ba la/ /zhes bya ba'o/ /gal te 'jig rten pha rol tu 'byung ba nges pa can du khas mi len/ 'byung bar rtogs pa yang med pa'i phyir ji ltar nges pa yin zhes rnam par 'grel pa ni/ gal te 'jig rten pha rol zhes bya ba'o/ /'jig rten pha rol yod na skye ba snga ma las byung ba'i sred pa la sogs pa'i nges pa can yin pa'i phyir/ nges pa med pa ma yin no/ /zhes bya ba ma yin par bstan pa ni/ gang gi tshe zhes bya ba'o/ /ci las she na/ sred pa nyid yod pa'i srog chags skye ba yin pa de'i phyir/ srid pa nyid rgyu yin zhes bya bar sbyar ro/ /de ltar na zhes bya ba ste/ 'jig rten pha rol gyi rgyu yin pa'i phyir/ skye ba can 'dod chags dang bral bar mi 'gyur zhes bya ba ni 'dod chags can nyid skye ba yin zhes bya ba ni nges pa'o/ /'byung ba tsam gyi bdag nyid ni 'dod chags ma yin no/ /de lta mod kyi lus kyi rnam pa yin no snyam du sems pa ni/ 'byung ba'i bdag las ma 'das phyir/ /zhes bya ba ste/ kun zhes bya ba ni lus kyi rnam pa'o/ /rgyu de nyid kyis zhes bya ba ni/ lus kyi rnam pa'i 'byung ba'i bdag nyid yin pa'i phyir ro/ /rgyu la khyad par med na 'bras bu la khyad par med de des khyab pa'i phyir srog chags nyid lta bu'o/ /'on te lus kyi rnam pa can gyi 'byung ba rnams las 'dod chags la sogs pa phul du byung bas rjes su dpag pa'i phul du byung ba dang / 'dod chags nyid mtshungs pa ma yin no snyam du sems pa la/ gal te 'byung 'chad las min na/ /zhes bya ba'o/ /lus kyi rnam pa can rnams kyi srog chags nyid la 'bras bu'i khyad par med pa yin te/ de tsam pa bskyed bya yin pa'i phyir ro/ / 'dod chags la sogs pa ni de lta ma yin pa'i phyir de tsam gyi bskyed bya ma yin pas khyad par gyi rim pa skye bar byed par rtogs par byed pa yin la/ de yang de ltar rtogs pa ni de zhes bya ba ni lus kyi rnam pa'i 'byung ba rnams te/ de 'gyur ba las ni 'dod chags la sogs pa nyid las so/ /med par byed pa las ni 'dor bar byed pa'o/ /ci las yin zhe na/ phul byung 'grib par ldan te phul du byung ba dang ldan pa 'grib pa dang ldan pa yang gang tshe 'grib pa dang ldan pa nyid kyis skyed byed ma yin pa de'i tshe 'dod chags dang bral ba nyid du 'gyur zhes bya ba'i don to/ /snga na med pa zhes bya ba la sogs pa tshigs su bcad pa phyed dang gsum gyi bsdus pa'i don ni/ /chags sogs nges med ces bya ba la sogs pas bstan pa yin no/ /ji srid srog chags ma yin pa/ /zhes bya ba ni shing la sogs pa'i bye brag khyad par gyi rim pa tha dad pa dang ldan pa'o/ /tha dad pa ni khyad par gyi rim pa'o/ /tha dad pa la yang ni 'grib pa dang phul du byung ba dang ldan pa la yang ngo / /'dod chags la sogs pa'i rgyu'i mtshungs pa'i bdag nyid ni spyi'i rgyu nyid yin la/ de mi ldog pa ni rtag pa'i phyir ro/ /de'i phyir 'dod chags la sogs pa zad pa ma yin no snyam du sems pa'i don to/ /'dod chags la sogs pa'i rgyu'i khyad par med na spyi ji ltar yin/ rgyud gzhan la yod pa ni rgyud gzhan la 'dod chags kyi rgyu yang ma yin no/ /brjod pa 'dod chags ni lus kyi rnam pa kho na'i 'byung ba las byung ba yin la/ de nyid rgyu'i spyi yin par brjod do/ /de la yod na 'dod chags 'byung ba'i phyir ro/ /'byung ba'i bdag las ma 'das phyir/ /zhes dogs par gyur pa ma yin nam/ bden mod kyi byung ba tsam las 'dod chags yin la/ de phul du byung ba las 'dod chags phul du byung ba yin gyi/ de med pa las ni 'byung ba ma yin la/ 'dod chags tsam ni 'byung ba tsam las byung ba yin zhes bya ba ni khyad par yin no/ /'dra ba'i rgyu can gyi zhes bya ba ni lus kyi rnam pa'i 'byung ba tsam las so/ /mtshungs pa nyid ces bya ba ni 'byung ba tsam du'o/ /'byung ba la khyad par med kyang khyad par dang ldan pa gzhan gyi 'bras bu yin gyi 'byung ba'i 'bras bu ma yin no zhes bstan pa ni/ gal te zhes bya ba'o/ /gang la zhes bya ba ni byung ba'i khyad par la'o/ /mtshungs pa las zhes bya ba ni 'byung ba tsam gyi bskyed bya nyid las so/ /'di nyid kyis dpe bstan pa ni/ ba lang gi shes pa zhes bya ba'o/ /ba lang gi shes pa ni mtshungs pa'i bdag nyid kyi ba lang nyid las sam/ ba lang ma yin pa la sogs pa las 'byung ba la khyad par med par bstan pa ni/ 'dir yang zhes bya ba'o/ /gnas skabs kyi 'byung ba tsam gyi bskyed bya'i srog chags nyid la sogs pa zhes bya ba'i yul 'di la 'byung ba tsam gyis bskyed bya srog chags nyid la khyad par med pa'i phyir dpe gzhan yin no/ /'jig rten rgyang pan pa'i lta ba la ltos nas gnas skabs kyi dpe yin no zhes bya ba'i don to/ /chad par yang zhes bya ba ni phyogs gzhan med par dgongs pa'o/ /khyad par gyi rim pa dang ldan pa'i chos ni chos can yod na shin tu ldog pa ma yin no/ /me yod pa kho na yin na dro ba nyid ldog pa ma yin pa'i phyir khyad par gyi rim pa dang ldan pa ni shin tu med pas khyab pa ma yin te/ de med kyang yod pa'i phyir ro snyam du sems pa ni/ dro rim khyad par zhes bya ba'o/ /chos can gnas na khyad par gyi rim pa dang ldan pa gang yin par de ldog pa yin te/ de de la res 'ga' snga na med pa yang yin pa'i phyir bsgrub par bya ba yin gyi/ de bzhin du dro ba nyid ni me yod na ldog pa ma yin no/ / ma yin te/ de med na me nyid med pa'i phyir ro/ /de nyid kyi phyir me las dro ba'i tha dad pa bkag pas tha mi dad pa'i tha snyad kyi yul nyid du brjod pa yin te/ nges pa dmigs pa dang ma dmigs pa dag kho na tha mi dad par rtogs pa'i yul nyid rtogs par bstan pa ni min/ dro las me zhes bya ba ste/ thams cad snga na yang yod pa ma yin pa ma yin nam zhes bya bar sbyar ro/ /lus la tha dad pa'i phyir zhes bya ba ni lus yod kyang med pa'i phyir ro/ /de bzhin du me yod kyang dro ba med pa ni ma yin no zhes bstan pa ni/ 'dir me ni zhes bya ba'o/ /'di nyid me ma yin zhes bya ba nyid kyi sgra ni rim pa gzhan du sbyar ba yin te/ lus kyi rnam pa'i 'byung ba nyid yal bar 'dug pa'i gnas skabs na 'dod chags la sogs pa med pa ni mi 'byung ba ma yin zhes bya bar sbyar ro/ /de bzhin du thal ba'i gnas skabs su dro ba med pa na me yod pa ma yin par bstan pa ni/ gal te 'byung ba 'dus pa zhes bya ba ste/ rgyun chad pa nyid snga na med par ma 'khrul pa yin par thal bar 'gyur grang na/ 'gyur ba ma yin zhes bya bar bzlog par go bar bya ba'o/ /dro ba nyid la mi 'khrul ba can gyi chos can ni me yin gyi de bzhin du 'bar ba tsam ni ma yin no zhes bstan pa ni/ sngags rgyud la sogs zhes bya ba ste/ dro ba la mi 'khrul pa can gyi 'bar ba ni de med pa kho na yin pa'i phyir 'bar ba yod kyang khyad par gyi rim pa dang ldan pa'i dro ba nyid med pa ma yin na gang gis snga na yang med par rtogs par 'gyur zhes bstan pa ni/ 'bar ba las zhes bya ba ste/ phyis 'bral bar 'gyur ba ni/ snga na yang yin zhes bya ba'i don to/ / sngags la sogs pa'i nus pas dro ba nyid med kyang 'bar ba yod pa yin na/ 'on te 'bar ba de gang yin zhe na/ dbyibs dang kha dog yin par bstan pa ni/ mdog dang dbyibs kyi 'bar ba'o/ /zhes bya ba'o/ kha dog dang dbyibs su 'gyur ba de ji ltar yin zhe na/ dro ba nyid yod pa ma yin zhes bya bar sbyar ro/ /dpe ma yin zhes bya ba ni mi mthun pa'i phyogs la gtan tshigs ma nges pa nyid mthong bar byed pa ma yin te/ byung ba byung nas 'jig pa yin la/ snga na yang res 'ga' ma byung bar rtogs pa yin no zhes bya ba'i don to/ /sngags dang rgyud sogs zhes bya ba'i 'grel pa ni 'bar ba ni dro ba med par mi 'byung la zhes bya bar sbyar ro/ /'o na ci zhe na/ 'gyur ba yin no/ /dro ba la zhes bya ba'i 'grel pa ni gtan mi bral ba'i zhes bya ba'o/ /de'i phyir khyad par dang bcas pa zhes bya ba ni byung ba byung nas zhig pa ni khyad par gyi rim pa dang ldan pa yin la snga na yang kha cig tu gtan med par yin pa ni bsgrub bya yin zhes bya ba'i don to/ /khyad par rim pa dang ldan pa yon tan dang ldan pa zhes bya bar sbyar ro/ /gzhan zhes bya ba ni de rnams med kyang 'byung ba de med kyang 'byung ba'o/ /de khyad par ni de'i khyad par ro/ /gang zhig ces bya ba ni spyi'i chos can du bstan pa'o/ /khyad par ni dbye ba yin la/ de lta bu'i yon tan de rnams la lar chad pa ni snga na med pa ste/ dkar po la sogs pa'i yon tan bzhin du nag po la sogs pa'i yon tan yin na/ dkar po dang shin tu dkar po la sogs pa'i yon tan dang ldan pa ma yin pa kho na ste/ mngon par gyur pa dang mi mngon par gyur pa'i chos can rnams la rjes su 'jug pa gang yin pa de chos can yin zhes bya ba'i rigs pas chos can yod pa na khyad par gyi rim pa dang ldan pa'i yon tan rang nyid kho na ldog pa yin na/ kha cig tu snga na yang rang nyid kho na med pa yin te/ de la dbang med pa'i phyir ro zhes bya ba'i don to/ /ji ltar dro ba nyid kho na me yin pa de bzhin du dkar po la sogs pa kho na sa la sogs pa lta bu yin na/ de log na ldog pa kho na yin no snyam du sems pa ni/ de la dkar po la sogs pa zhes bya ba'o/ /de lta yin na lus kyi rnam pa'i 'byung ba ni 'dod chags dang blo dang dbyibs la sogs pa ma gtogs par 'dod chags la sogs pa'i yon tan ma yin te/ 'dod chags la sogs pa skye ba dang 'jig pa yin yang lus so lus so zhes bya ba'i shes pa rab tu 'jug pas rjes su 'jug pa ni chos can yin gyi dro ba med pa la ni de lta bu'i shes pa'i yul rjes su 'jug pa ni ma yin no/ /gzhan la dkar po nyid la sogs pa ldog pa yin yang dngos po gzhan 'byung bas reg bya la sogs pa'i ngo bo rjes su 'jug par bstan pa ni/ snam bu la sogs pa zhes bya ba ste/ de med kyang zhes bya ba ni nag po'i ngo bor gyur na dkar po nyid med pa'o/ /des na zhes bya ba ni de dag la bstod pa brjod pa yin no/ /'byung ba 'gyur ba ma yin yang / /'gyur ba can ni de la dbang med pa yin la/ de yod kyang kha cig tu 'byung ba ma yin zhes dgongs pa'o/ /me tha dad pa yin na yang dro ba ni khyad par gyi rim pa dang ldan pa yin te/ de yod na gtan ldog pa ma yin no/ /de las dbye ba med pas lhan cig skye ba dang 'jig pa yin pa'i phyir ro/ /de bzhin du 'dod chags la sogs pa lus las tha mi dad pa ma yin te/ de yod kyang med pa'i phyir ro/ /de'i phyir lus 'ga' ni 'dod chags dang bral bar yang 'gyur te/ dbye ba dang ldan pa nyid yin na/ khyad par gyi rim pa dang ldan pa'i phyir gos la tshon bzhin no zhes bya ba'i don to/ /gzugs sogs bzhin du nges min te/ /zhes bya ba'i tshigs su bcad pa ni/ yang na/ me nyid rjes su 'jug pa ni/ /zhes bya ba'o/ /yang na dkar po la sogs pa gang yang rung ba chad kyang gdon mi za bar gzhan zhig tu 'gyur ba yin no/ /de bzhin 'dod chags la sogs pa yang 'gyur ro snyam du sems pa la/ gzugs sogs bzhin du nges min te/ /zhes bya ba smos te/ nges pa ni gang yang rung ba med kyang gang yang rung bar 'byung ba'i ngo bo'o/ /ci las yin zhe na/ de dag ni gzugs la sogs pa rnams so/ /'byung ba las ni lus kyi rnam pa'i las so/ /dbyer med phyir ni phan tshun med na mi 'byung ba'i phyir ro/ /gzugs la sogs pa med na 'byung ba rnams ma yin la/ de rnams kyang de rnams med na ma yin no/ /'dod chags la sogs pa med na mi 'byung ba'i lus kyang ngo snyam du sems pa ni/ de mtshungs she na zhes bya ba'o/ /min zhes bya ba ni 'di dgag pa'o/ /ci las yin zhe na/ gang la 'dod chags la sogs pa'i lhan cig pa'i yul tsam 'byung ba rnams kyi bskyed pa gang yin pa de thal bar 'gyur ro/ /'di yang / rgyu ni nye phyir blo rnams kun/ /thams cad tshe na skye bar 'gyur/ /zhes bya ba rtogs pa'i don la dgongs nas lhan cig rnams lus dang ngo / /skye ba ni gnas skabs kyi yod pa ste/ de thal bar 'gyur ba de lus dang lhan cig yod par nges pas 'dod chags la sogs pa rnams su 'gyur ba zhes bya ba'i don du bshad pa ni/ 'dod chags la sogs pa rnams zhes bya ba'o/ /thams cad kyi tshe zhes bya ba ni bdag med pa la sogs pa bsgom pas yal bar 'dug pa yod pa na'o/ /da ni don tha mi dad par mi 'byed pa'i don du bshad pa ni/ 'byung ba chen po tsam zhes bya ba'o/ /yul dang dbang po la sogs pa nye ba yin pas lus lhan cig byed pa ma yin nam/ rnam shes bzhin du 'dod chags la sogs pa rgyu ni yal bar 'dug pa'i gnas skabs na lhan cig byed pa ma yin no snyam du sems pa ni/ yul gyi rgyu can yin pa'i phyir/ /zhes bya ba'o/ / bud med dang skyes pa zhes bya ba 'dis rnam rtog gi rnam shes kyi yul rnams la 'dod chags la sogs pa yin gyi/ mthong ba tsam rnams la ni ma yin la/ rnam par rtog pa'i bag chags las byung ba rnams yul la brten pa ni ma yin no zhes bstan pa ni/ rnam par rtog pa yul yin phyir/ /zhes bya ba'o/ /de lta yin na bag chags de'i skye gnas bdag dang bdag gi yin la/ nus pa dang lhan cig byed pa yin no snyam du sems pa la/ skal mnyam zhes bya ba smos te/ skal mnyam ni 'dra ba'i tshul bzhin ma yin pa yid la byed pa'i sa bon rgyu yin te/ 'jig rten pha rol la skur pa 'debs pa'i phyogs la med pa'i phyir ro/ /'dod chags la sogs pa lus tsam las byung ba yin na nges pa'am re rer yang 'gyur bar bstan pa ni/ nges pa zhes bya ba'o/ /cig car yang 'byung ba yin par bstan pa ni/ thams cad tshe na zhes bya ba ste/ 'dod chags kyi dus su zhe sdang dang de'i dus su 'dod chags su 'gyur ro/ /rnam par rtog pa med par bstan pa ni/ 'dod chags la sogs pa yi rgyun/ /zhes bya ba'o/ /gal te yongs su gyur pa'i khyad par lus tsam las 'byung ba yin na/ lus bzhin du dus thams cad du gnas pa'i phyir cig car ba kho na yin par bstan pa ni/ gal te de lta na zhes bya ba'o/ /'bras bu'i rim pa mthong ba las rgyu'am rgyu yis rgyu yang rung / gang yin par yang rtogs pa yin no snyam du sems pa ni/ gang yang rung ba la zhe na zhes bya ba'o/ /ma yin zhes bya bar mtshams bcad pas 'di nyid bkag pa yin no/ / gang zhig gang la lar thams cad du yod pa de'i rgyu can du dus thams cad du 'gyur ba bstan pa ni/ thams cad tshe na 'ang 'gyur zhes bya ba'o/ /rgyu thams cad pa ni dus thams cad par 'gyur ro/ /gal te ma mthong ba med pa'i phyir zhes zer na/ rgyu med pa can thams cad dus thams cad par mi 'gyur te/ ma mthong ba'i phyir ro zhes bya ba'ang 'gyur bar bstan pa ni/ 'ga' yang rgyu dang zhes bya ba'o/ /gal te yang tshul ma yin pa yid la byed pa sa bon du mthong ba bor nas 'dod chags la sogs par nges pa'i rgyu yongs su gyur pa'i khyad par yin pa khas len pa yin pa de lta na du ba yang me'i bskyed byar mi 'gyur ba zhig na/ thams cad las 'gyur ba ma yin te/ yongs su gyur pa'i khyad par med par bstan pa ni/ me med par yang zhes bya ba ste/ yul la sogs pa las kyang ngo / /rgyu med pa can las kyang du ba mthong ba'i stobs kyis yul la sogs pa nges par 'gyur ba kho nar bstan pa ni/ dngos po rgyu med pa la yang zhes bya ba'o/ /de bzhin du 'dod chags la sogs pa rgyu thams cad pa'am/ rgyu med pa yang rung / lus kyi rgyu can ma yin pa yang nges pa ni yongs su gyur pa'i khyad par las sam mthong ba las 'gyur zhes bya ba'i don to/ /lus kyi rgyu can ni mthong ba'i rgyu thams cad nyid dam rgyu med pa nyid dam rung ba ma mthong ba ma yin nam/ nges pa can ni yongs su gyur pa'i khyad par tsam ma mthong ba yin yang de ni gcig tu ma mthong ba ma yin te/ ma mthong ba'i lus las ma log pa'i phyir ro snyam du sems pa la/ mthong ba'i brtag bya rnam pa gnyis te/ rgyu nyid du'ang khyad par med par 'gyur grang na/ gal te khyad par med pa mthong ba yin na/ lus kyi rgyu can nyid kyang mi 'grub ste/ rang rig pas rgyu dang rgyu can dang / bdag dang gzhan dang / rim pa gcig dang cig shos ma gtogs pa'i phyir ro zhes bstan pa ni/ mthong ba tsam la rten byed na/ /zhes bya ba'o/ / 'on te rgyu nyid du mthong na rjes su 'gro ba dang / ldog pa'i khyad par gyis rang rig pas rgyu dang de dang ldan pa la sogs pa'i rnam par rtog pa tha snyad kyi ming can yin la/ des rgyu nyid la sogs pa grub pa yin pa de lta na/ bdag dang bdag gir 'dzin pa'i chags pa'i rgyu can 'dod chags la sogs pa rnams yin gyi lus kyi rgyu can ni ma yin te/ de ltar ma rtogs pa'i phyir ro zhes bstan pa ni/ tha snyad 'jig par zhes bya ba'o/ /gzhan du zhes bya ba ni 'dor bar nus pa'o/ /skye ba'i dang po la 'dod chags la sogs pa'i rgyu lus ni/ rang rig pa las byung ba'i rtog par rtogs pa ma yin nam/ 'das pa'i bdag dang bdag gir 'dzin pa'i chags pa rgyu nyid ma yin snyam du sems pa ni dper na kha cig tu me'i rgyu rkyen nyid du du ba mthong ba yin la/ ma mthong yang de'i rgyu nyid du rig pa yin la de bzhin du 'di la yang blta bar bya ba yin te/ de ltar nges par gnas pa'i phyir zhes bstan pa ni/ /ji ltar rjes su dpag pa yis/ /tha snyad ces bya ba'o/ /med na mi 'byung bar khyab pa can ni mngon sum pa ma yin pa'i phyir ma mthong ba bzhin du mthong ba la yang rjes su dpag pa yang tshad ma ma yin pa ma yin nam/ de'i tshad ma nyid de tsam rtsa ba can yin pa'i phyir ro snyam du sems pa la/ tha dad shes dang zhes bya ba smos te/ rjes su 'gro ba dang ldog pa dang ldan pa'i rang rig pa las byung ba'i rnam par rtog pa'i rtogs bya med na mi 'byung ba yin la/ de'i rtogs bya kho na yin no zhes mngon par 'dod pa yin pa khas mi len na/ khyad par med pa'i bdag nyid rig pa tsam yin gyi/ de la gzung ba dang 'dzin pa dang sngon po dang cig shos la sogs pa'i rnam par dbye ba med pa yin na/ cis rnam par 'byed pa yin zhes bstan pa ni/ des na tha snyad dbye bar ni/ /zhes bya ba ste/ rang rig pa las 'dis phyis dpog par byed pa yin pa'i phyir/ rjes su dpag pa yin pa de las te/ rang gi 'dod pa tsam las byung ba'i rnam rtog las tha snyad byed pa ni ma yin no zhes bya ba'i don to/ /blang ba dang dor ba yongs su rtogs bya'i ngo bo yin gyi gzhan ma yin pa ma yin nam/ de ji ltar de la mngon sum las dbye ba med pa yin snyam du sems pa la dor bya zhes bya ba smos te/ sdug bsngal sgrub par byed pa'i lus la gnas pa'i ngo bo ni rang gi ngo bo tsam gyi yul can gyis mngon sum gyis rtogs pa ma yin no/ /de'i phyir de las gzhan pa'i blang bya bde ba'i sgrub byed yin par rtog par bstan pa ni ma yin no zhes bya ba ste/ 'di ni zhes bya ba dang sbyar ro/ /ji ltar lus la gnas pa'i ngo bo la mngon sum du mi 'jug pa de ltar spros nas de bstan pa ni/ blang bya nyid ni yod phyir yang / /zhes bya ba ste/ bde ba sgrub pa yod pa'i phyir ram/ dor bya nyid la ni sdug bsngal sgrub par byed pa nyid med pa'i phyir ram zhes brtag grang na/ dor bya nyid du rnam par gzhag pa ni blang bya nyid du rnam par gzhag pa las bzlog pas sdug bsngal sgrub par byed pa yin pa'i phyir dang / bde ba sgrub par byed pa nyid med pa'i phyir ro zhes bstan pa ni/ dor bya las ni zhes bya ba'o/ /re zhig bde ba'i sgrub byed nyid ni bde ba la mngon sum pa ma yin na/ dngos po la mngon sum gyi rtogs bya ma yin no zhes bstan pa ni/ don byed don du gnyer rnams kyi/ /zhes bya ba ste/ don ni sreg pa la sogs pa'i dgos pa yin la/ byed pa ni byed pa po nyid de/ blang bya nyid yin la nye ba'i ngo bo'i 'dzin pa'i mngon sum gyis 'dzin pa ma yin no zhes bya ba'i don to/ /byed pa po nyid ni byed pa po las tha mi dad pa yin gyi de'i 'dzin par gzung ba kho na ma yin nam/ de lta na yul gyi yang me dang 'brel pa can nyid mngon sum gyis bzung ba kho na yin te/ tha mi dad pa'i phyir ro/ /de la rjes su dpag pa ci zhig bya/ /zhes bzung ba yin yang ma nges pa nges par bya ba'i don du rjes su dpag pa yin no zhe na/ ma yin te/ nges pa yin yang du ba'i yul las tha dad pas yul gzhan bzhin du mi snang ba'i phyir ro/ /de mi snang na de dang 'brel pa can nyid snang ba ma yin par bstan pa ni/ 'byung 'gyur don byed ni zhes bya ba ste/ don byed pa dang lhan cig 'byung ba'i ngo bo 'dzin par byed pa'i mngon sum ni don byed pa'i mngon sum bzhin du rtogs pa med pa yin te/ 'jug par byed pa ma yin pa'i phyir la/ 'jug par byed pa nyid ni sgrub byed snang ba can yin te/ de ni sgrub byed nyid du rtogs par byed par nus pa ma yin no zhes bya ba'i don to/ /de ltar na blang bya nyid ni dmigs la/ bzlog pa dgag pa ni ma mthong ba tsam las mi 'grub par bstan pa ni/ spang bya bkag pa 'ang zhes bya ba'o/ /rtogs 'di mngon sum las ma yin/ /zhes bya ba ni 'gal ba dmigs pa med pa'i phyir ro zhes bya ba'i don to/ /rim gyis 'byung ba'i mngon sum gnyis po 'das ma thag tu bstan pa'i rigs pas rang gi dus la yod pa tsam 'dzin pa'i phyir/ sgrub byed dang bsgrub bya nyid mi 'dzin par bstan pa ni/ mngon sum gnyi ga zhes bya ba'o/ /don byed pa dang lhan cig 'byung ba'i ngo bo lan cig ma yin par nyams su myong bar mtshon pa ni 'khrul pa med pa'i mngon sum ni don byed pa med kyang 'jug pa'i yul ma yin nam snyam du sems la gal te shin tu goms pa'i zhes bya ba'o/ /re zhig don byed pa dang lhan cig 'byung ba'i goms pa dmigs pa ma yin no/ /'ba' zhig ni snga ma dang mtshan nyid de la dmigs pa med na de la rung bar yang mi 'gyur zhing / nye ba la dmigs pa'i mngon sum ni de nyid dam/ mthong ba nyid kyang ma rtogs pa yin gyi 'dra ba la ni yin no/ /'dra ba yang rig pa ma yin no/ /'ba' zhig ni snga ma dang mtshan nyid mi mthun pa nyid gzung ba yang nges par 'dzin pa ma yin no/ /de'i phyir de nyid la dran pa ni sgro 'dogs pa yin no/ /'jug pa yang tha dad pa la lhan cig pa dang lhan cig pa dag tu dmigs pa yin gyi lhan cig pa dmigs pa goms pa yin na lhan cig pa ma yin par dmigs pa ni lhan cig pa la tshad ma ma yin no/ /gang gi tshe lhan cig pa ma yin pa dang rung ba ma yin pa yang dmigs bzhin pa yin na/ goms pa yang de kho na bzhin du bzlog pa yin la de goms pas de'i ngo bor 'dzin pa dang / sngon du de'i tshe ngo bo gzung ba la goms pa yin pa'i phyir/ phan tshun ltos pa yin par bstan pa ni/ ma rtogs pa la goms par byed/ /ces bya ba ste/ don byed pa'i sgrub byed dang dmigs pa rim gyis 'byung ba dag phan tshun mi rigs pas rung ba nyid du nyams su myong ba'i phyir phan tshun bstan par gsal ba yin no zhes bya ba'i don to/ /mngon sum nyid ni rung ba nyid la sogs pa skyes pa goms pa gang gi 'bras bu yin pa de de lta ma yin zhes bya bar sbyar ro/ /dor ba dang blang bar mthong ba ma yin par bstan pa sdud pa ni/ mngon sum tsam zhes bya ba ste/ tsam smos pa ni/ de'i rjes la 'byung ba'i rnam par rtog pa bsal ba'i don du'o/ /gal te dor ba de dang blang ba yang mngon sum gyi yul ma yin pa de lta na/ gang yin pa bstan pa ni/ rang gi rang bzhin tsam zhes bya ba ste/ tsam smos pa ni rnam par shes pa rang gi ngo bo yang bsgrub bya'i shes pa la gnas pa'i mngon sum ma yin nam zhes bstan pa'i phyir ro/ /de lta yin na gang las dor ba la sogs pa rtogs pa yin zhe na/ rjes su dpag pa zhes bya ba smos te/ de dang 'dra ba mthong ba las de'i don byed pa'i shes pa no/ /gnyi ga rig par byed pa ma yin pa'i mngon sum ni 'brel pa mi 'dzin pa ma yin nam snyam du sems pa la mngon sum gnyis po las byung ba'i rnam par rtog pas 'brel pa grub pa ni mngon sum du grub pa kho na yin te/ tha snyad pa rnams kyis de ltar nges par byed pa'i phyir ro zhes bstan pa ni/ tha snyad 'dogs pas zhes bya ba ste/ rnam par rtog pa'o/ /dor bya la sogs pa mngon sum gyis mthong ba ma yin nam/ 'di ni khyad par gyi yul can yin pa'i phyir ro/ /'on kyang tha mi dad pa'i rang gi ngo bo gzhan sgrub byed ma yin pa lkog tu ma gyur pa la bsams la/ gnas ma mthong ba'i don bzhag nas zhes bya ba la sogs pa 'jig rten pha rol la skur pa gdab par sems pa ni 'on te gnyis med ces bya ba'o/ / /'di yang ni 'jig rten 'di yang ngo / /'di ni mngon sum ste/ 'jig rten pha rol la ltos nas rang rig pa 'ba' zhig ma yin te/ 'on kyang 'jig rten 'di la ltos nas kyang yin zhes bya ba'i don to/ /'jig rten gnyi ga'i 'bras bu med par smra ba la/ ches shin tu med pa can yin pa'i phyir ji ltar med pa la yang med pa nyid yin snyam du sems pa la/ sems ni zhes bya ba smos te/ thams cad las ni dor bya dang blang bya las so/ /spang phyir ni nye bar bsdus pa'i phyir te bya ba nus pa'o/ /gtan tshigs de'i phyir rang rig pa'i gnas skabs bstan pa la grol ba nyid de/ sems thar pa thob pa kho nar 'gyur ba yin no zhes 'dod pa ni med pa ma yin te/ skyes bu'i don gyi gtso bo la skur ba mi 'debs pa'i phyir la/ de la skur ba 'debs pa ni med par smra ba yin no zhes bya ba'i don to/ /rang rig pa'i mngon sum 'jig rten pha rol sgrub par byed pa ma yin la/ 'jig rten 'di yang ma yin pa ni bden mod kyi/ sa la sogs pa de nyid gzhi/ /zhes zer ba'i dpe'i don du yin la/ rnam par dpyad na de la rab tu grags pa'i sa la sogs pa yang de nyid ma yin la/ 'jig rten pha rol lta ci smos/ de dag tsam ni skyes bu'i don thar pa ma yin te/ rnam par rtog pa yang 'jig rten 'di'i yul can yin te/ rang rig pa bzhin du rang bzhin yin pa'i phyir ro snyam du sems pa ni/ 'on te 'jig rten 'di la zhes bya ba ste/ rmongs pa gzhan zhes bya ba ni rnam par rtog pa gzhan te/ 'jig rten pha rol la sogs pa'i yul du ma grags pa kho na'i phyir mi 'dod pa yin zhes bya ba'i don to/ /'di yang zhes bya ba ni yul 'jig rten 'di'o/ /gang las zhes bya ba ni ma yin pa'o/ /gal te rang rig pa tsam gyi ngo bo thar pa yin na 'dod pa can du mi 'gyur zhes bstan pa'o/ /de phyir nges pa gang nyid kyis/ /'du byed kyis ni rjes 'jug pa/ /sems ni de med mi 'byung ba/ /de phyir sems la rten pa yin/ / zhes bya ba'i rigs pas gang gi tshe thog ma dang tha ma med pa'i rnam rtog ni rang gi rigs tsam las grub pa de'i tshe/ 'jig rten pha rol grub pa kho na yin te/ thog ma dang tha ma med pa nyid la de ltar brjod pa'i phyir ro zhes bstan pa ni/ gal te thog mtha' med 'grub na/ /zhes bya ba'o/ /snga ma snga ma'i rnam par rtog pa'i bag chags kyi rjes su byed pa'i rnam par rtog pa yang de'i bskyed bya ma yin na/ 'byung ba'i bskyed bya ma yin pa lta ci smos te/ de'i khyad par ma yin pa'i khyad par can yin pa'i phyir ro/ /de'i phyir 'di rgyu med pa nyid yin na 'bras bu thams cad rgyu med pa can nyid du 'gyur te/ 'di rgyu med pa can du bsgrubs nas/ rgyu med nyid ni rgyu med pa'o/ /rgyu med pa can ni ming yin pa'i phyir bstan pa ni/ thams cad rgyu med nyid du zhes bya ba ste khyod kyis smras pa yang gzhan gyis go ba'i phyir ma yin no zhes bya ba'i don to/ /ci don nyid ni khyed don gang la yin pa'am/ 'di don yang yin la gang yang yin pa'i phyir ci don no/ /de gang la yod pa ni de nyid do/ /smra ba po khyod la dgos pa ci yod ces dgongs pa'o/ /'on te 'di la zhes bya ba ni don ni dgos pa ste 'bras bu'o/ /des zhes bya ba ni gzhan gyis brgal zhing brtag pas so/ /brgal zhing brtag pa la dgos pa cung zad bsgrub par bya ba med pa ma yin nam/ de nyid ni ma rig pa 'ba' zhig gis 'gyur ba yin par bstan pa ni/ ma rig pas byas pa nyid ces bya ba'o/ /don med pa ni tshig tsam mo/ /de nyid kyi skyon bstan pa ni/ gzhan gyi bshad pa zhes bya ba'o/ /gal te ma rig chad min na/ /zhes bya ba ste/ rtogs su gzhug bya'i ma rig pa gal te ma chad na tshig tsam ni don med pa yin no/ /'on te chad na yang de ltar chad par byed pa'i tshig rgyu kho na yin pa'i phyir/ rgyu med pa smra ba ji ltar yin/ 'on te ma rig chad na yang / /ji ltar thog ma med par grub pas 'khor ba grub pa yin zhe na/ ma rig rnam rtog las zhes bya'o/ /'di thog ma med pa yin bag chags goms pa yang yin la/ de'i yongs su smin pa ni sad pa yin la/ des byas pa ni bskyed pa nyid yin pa'i phyir 'dod chags dang bde ba la sogs pa rnams goms pa las byung ba nyid du nye bar bsdu ba yin no/ /rgyu med pa ni skye ba dang 'gal ba'i phyir goms pa las sdug bsngal skye ba yin zhes bya bar ni mi rigs pa ma yin nam/ rgyu med pa nyid rtag pa goms pas mngon par gsal ba yin no zhes zer ba la/ de ni res 'ga' zhes bya ba smos te/ dmigs bya ma yin pa la dmigs bya nyid kyang snga na med pa kho na byung na de nyid yod pa yin gyi/ de yang mi rtag pa zhes bya ba kho nas sdug bsngal te/ gnod pa ma yin la zag pa med pa rnams kyang de lta bu nyid du 'gyur zhes thal bar 'gyur ba'i phyir ro zhes bstan pa ni/ nyes pa rnams te/ bdag tu 'dzin pa dang / 'dod chags la sogs pa goms pa las byung ba rnams kyi rten yin pa'i phyir/ zag pa dang bcas pa yin pa'i phyir zhes dgongs pa'o/ /rgyu ni bdag dang bdag gir 'dzin pa'i chags pa'i snying po can yin gyi/ rgyu tsam ma yin te/ snga ma bzhin du thal ches pa'i phyir la/ de'i dbang ni de la rag las pa'o/ /de'i dngos po ni de nyid do/ /yang gi sgra ni sdug bsngal zhes bya ba'i rjes su 'jug pa'i don dang goms pa can nyid bsdu ba yin no/ /'grel par ni goms pa las byung ba ni 'dod pa la rag las pa'o/ /bdag tu 'dzin pa la sogs pa la ma goms pa ni mchog yin te/ sdug bsngal gyi rgyu yin pa'i phyir ro/ /de las bzlog pa las goms pa nyid kyang mchog yin te/ mi mthun pa yin pa'i phyir ro zhes bstan pa yin no/ /gal te bdag go zhes bya ba bdag tu 'dzin pa rgyu yin na/ bdag tu 'dzin pa 'di ni goms pa las byung ba ma yin te/ lus dang dbang po dang tha dad pa'i yul can yin pa'i phyir sems la sogs pa'i gnas skabs rnams la dbang po bya ba byed pa med pas lus ma dmigs kyang bdag go zhes nyams su myong ba yin no/ /de ltar yang re re'i bdag nyid la de ltar 'gyur ba la yin no zhes smos pa yin no snyam du sems pa la/ bdag min zhes bya ba ste/ bdag tu dmigs pa ma yin te/ re zhig rang rig pas ma yin te/ yul nye ba yin pa'i phyir ro/ /yul dang dus la sogs pas mchod pa'i yul ni nges pa las kyang ma yin no/ /mthong ba'i rjes su 'brang ba nyid kyi phyir dang mthong ba'i lus la sogs pa nyid phyi rol dang tha dad pa yul dang dus la sogs pa tha dad pas 'dzin pa'i phyir dang / rgyun mi 'chad par yod pa'i phyir/ /dngos gang yul dang dus dag las/ /de ni rtag pa'i khyab bdag 'dod/ /de phyir bdag ni khyab bdag brjod/ /ces bya ba ji ltar yin/ bdag mngon sum pa ma yin pa de ni bden te/ nye ba tsam nyid kyis skad cig ma nyid du thal bar 'gyur ba'i phyir ro/ / 'on kyang rjes su dpag par bya ba ni yin no/ /'dod pa dang / zhe sdang dang / 'bad pa dang / bde ba dang / sdug bsngal gyi shes pa rnams ni 'bras bu yin pa nyid kyis rgyu rnams las lus pa'i bdag rten du gyur par go bar byed pa yin gyi/ bdag ni nyams su ma myong ba'am ma dran pa 'dod pa 'am/ sdang ba yang ma yin pa'i phyir nyams su myong ba dang dran pa dang 'dod pa dus tha dad pa rnams de'i dus su yod pa'i dngos po med na 'byung ba ma yin no snyam du sems pa la/ byin gyis brlabs pa'ang ma yin pa ni 'dod pa la sogs pa'i rten du gyur pa'i bdag gis so/ /brten pa nyid du ma dmigs pa'i phyir nyams su myong ba'i bag chags tsam las byung ba'i phyir de dag ma yin zhing / byin gyis brlabs pa yang ma yin no zhes bya ba dang 'brel pa'i phyir sdug bsngal dang gzhi mthun pa nyid yin no/ /'grel par ni bag chags las byung ba nyid kyis gzhan du yang 'thad pa bstan pa ni/ rgyu min zhes bya ba'o/ /de la brten pa nyid du ma mthong bar bstan pa ni/ rtag pa'ang zhes bya ba'o/ /rtag pa nyid du khas blangs kyang mi sdod pa dang / rim gyis byed pa nyid 'gal bar bstan pa ni/ de'i phyir gcig las zhes bya ba'o/ /dgongs pa'i 'di nyid kyis bcom ldan 'das kyis rnam pa bzhi ba'i sdug bsngal gsungs pa yin par bstan pa ni/ mi rtag pa nyid ces bya ba'o/ /de zhes bya ba ni sdug bsngal 'khor ba'i zhes bstan pa dang sbyor ba yin no/ /de'i phyir zag pa med pa rnams las thal ba ma yin no/ /rtag pa kho na las goms pa la sogs pa'i dbang gis dmigs bya gzhan dang gzhan du 'gyur ba ma yin nam/ ngo bo ni rtag pa kho na yin no snyam du sems pa la/ dmigs par bya ba nyid ni zhes bya ba smos so/ /rtag pa nyid yin na dmigs bya nyid mi dmigs pa'i dus su yod par 'gyur zhes bstan pa ni/ thams cad kyi tshe zhes bya ba ste/ rgyu ni bdag dang bdag gir 'dzin pa yin la/ 'grel pa'i phyir ni dbang du 'gyur ba'i phyir ro/ /skyed par byed pa ma yin pa zhes bya ba ni rjes su 'gro ba dang ldog par dmigs pa med pa'i phyir ro zhes bya ba'i don to/ /byin gyis brlabs pa'ang min/ /zhes bya ba 'di la mi dmigs pa'i tshad ma bstan pa ni/ bdag gis byin gyis brlabs pa can/ zhes bya ba'o/ /bdag min zhes bya ba 'di la yang de kho na yin par bstan pa ni/ gang yin pa zhes bya ba'o/ /dbang po las 'das pa byin gyis rlob par smra ba po zhes zer ba ni/ gal te byin gyis ma brlabs pa'i zhes bya ba'o/ /mi rtag pa'i sems can gyis byin gyi brlabs pa yin na gzhan du mi 'thad pas don mi rtag par sems pas byin gyis rlob pa thob pa yin no zhes bstan pa ni/ ma yin te/ mi rtag pa'i sems pas zhes bya ba'o/ /gal te yang nyams su myong ba'i bag chags las byung ba'i 'bras bu yin la/ 'di la gzhan mi rten pa ci las yin/ /dbang po las 'das pa la sogs par byed pa yod pa ma yin no snyam du sems pa la dbang po las 'das pa spong bar byed pa ni ma yin gyi/ 'on kyang 'di'i rgyu nyid la mthong ba tsam las byung ba'i 'bras bu ni khyab par byed pa 'gal ba yin par bstan pa ni/ 'bras bu'i skye ba med pa'i phyir/ /zhes bya ba ste/ de tsam las mi 'byung ba ni rgyu gzhan nyid khyab par byed pa nyid kyis khyab par byed pa yin la/ 'di yang 'gal ba 'byung ba yin la/ yod kyang khyab par byed pa med pa yin na ci ltar khyab bya nus pa yod pa yin zhes bya ba'i don to/ /rung ba'i khyad par ni bag chags kyi khyad par ro/ / gang gis de med par zhes bya ba ni khyab par byed pa med pas so/ /khyab par byed pa med kyang khyab bya srid pa yin na rgyu rnams la 'di tsam zhes med par 'gyur bar bstan pa ni/ rjes su 'gro ba med pa tsam/ /zhes bya ba'o/ /yul la khyab pa med pa'i phyir de la med pas khyab par byed pa med pa yin no snyam du sems pa la/ rtag pa khyab pa ma yin yang / /zhes bya ba ste/ rtag pa nyid kyis skyed byed gcig gi ngo bo yin zhes bya'i don to/ /de'i phyir skad cig ma yang cis thams cad kyi skyed byed ma yin zhes bya ba ni thal 'gyur ma yin no/ /gang kho na'i phyir sdug bsngal ther zug pa ma yin pa ni res 'ga' ba yin pa de'i phyir rang nyid grub pa la bag chags la sogs pa can ni rjes su 'gro ba dang ldog pa dang ldan pa'i phyir rgyur go bar byed pa yin pa'i phyir/ rtag pa bzhin du mi rtag pa yang ji ltar rgyu yin zhes zer ba mi rigs par bstan pa ni/ nges 'ga' ba nyid ces bya ba'o/ /rgyu med pa can gyi sdug bsngal ni rtag tu ba yin la/ mi rtag pa ni med pa kho na yin te/ sngar bzhin du phyis kyang skye ba'i rgyu med pa yin na/ med pa'i phyir ro zhes bstan pa ni/ rtag tu yod pa'am zhes bya ba'o/ /yod pa ma yin pa ni/ rang nyid 'grub pa la gzhan la ltos pa yin na/ phyis kyang de bzhin du 'gyur ro/ /zhes de bzhin du yod pa yang sngar nyid ngo bo yod pas rang bzhin las ma log pa'i phyir ltos pa med pa kho na yin par bstan pa ni/ gzhan las mi ltos phyir zhes bstan pa'o/ /dgongs pa 'di nyid kyis kun 'byung gi bden pa ston par bstan pa ni/ kun 'byung ba'i bden pa la yang zhes bya ba'o/ /sdug bsngal la rgyu med ces zer ba dgag pa'i phyir/ rgyu nyid ces bya ba'i rnam par bstan pa ni/ de la rgyu ni zhes bstan pa'o/ /rgyu gcig ni gtso bo la sogs pa'o/ /gtso bo la sogs pa bzhin du sred pa mi nus pa ma yin par bstan pa ni/ mi nus pa spangs pas zhes bya ba'o/ /de la rnam pa dang po'i bshad pa ni/ res 'ga' ba nyid ces bya ba'i tshigs su bcad pa yin par bstan pa ni/ sdug bsngal gyi ni rgyu yod ces bya ba'o/ /gzhan ni zhes bya ba ni rgyu ma yin pa'o/ /gzhan du zhes bya ba ni rgyu dang 'brel pa med pa'o/ /yang na snang bzhin pa'i yod pa ni mi rtag pa yin la/ de la ltos nas gzhan du ni rtag pa yin no zhes bya ba'i don to/ /rtag tu yod pa 'am zhes bya ba 'di nyid la bshad pa gzhan bstan pa ni yang na zhes bya ba'o/ /rtag pa zhes bya ba ther zug tu gnas pa ni ma yin no/ /'on kyang yul thams cad du yang 'byung ba yin no/ /dper na rab rib can gyi yul gyi rgyu med pa'i skra la sogs pa'i shes pa dbang po mngon par phyogs pa tsam las byung ba ni thams cad du 'byung ba yin la/ sdug bsngal yang rgyu med na de ltar 'gyur bar bstan pa ni/ ji lta ji ltar zhes bya ba'o/ /rang rig bas ni zhes bya bas tshad ma bstan pa yin la/ de'i phyir stong pa nyid tsam dmigs pa rtog pa med pa'i shes pa ni rmi lam bzhin du ste/ rmi lam la yang rang gi ngo bo tshad ma'i yul yin pa'i phyir ro zhes bya ba'i don to/ /rtag tu ba ni ther zug tu gnas pa ma yin par bstan pa ni/ res 'ga' ba min mtshan nyid can/ /zhes bya ba'o/ /med par zhes bya ba bshad pa ni/ mo gsham bu sogs zhes bya ba ni 'dir yang / yang na zhes bya ba'i bshad pa gzhan ni rgyu med na 'bras bu nyid don dam par med do zhes bya ba'i dbu ma pa'i lta ba slar yang brjod bya yin pa'o/ /sdug bsngal gyi rgyu res 'ga' ba yin du zin kyang de 'byung ba chen po'i bdag nyid kho na ma yin nam/ ma rig pa dang / sred pa dang / las kyi ngo bo ma yin zhing / /dbang phyug la sogs pa'i ngo bo yang ma yin no/ /'jig rten pha rol grub pa la 'byung ba chen po rgyu nyid yin pa bkag pa ma yin nam/ brjod pa/ srid pa dang po'i sems ni ma la sogs pa dang / mtshan nyid mi mthun pa'i sems kyi 'du byed pa'i rjes su byed pa nyid kyis sems gzhan rtogs par byed pa yin pa'i phyir/ sems kyi ngo bo'i 'jig rten pha rol grub kyang sdug bsngal la sogs pa'i gnas skabs kyi ngo bo rnams la sogs pa sems pa can gyi rgyu can ni ma yin te/ rgyu 'byung ba chen po tsam yod na grub pa yin no zhes rgol bar byed pa ni/ ji ltar tsher ma zhes bya ba la sogs pa ste/ 'byung ba chen po tsam kho na chos can skyed byed las yin pa'i phyir/ rgyu zhes bya ba ni sems pa can yin la/ de bzhin du srid pa'i ngo bo 'di yang bde ba dang sdug bsngal can la sogs pa yul la yod pa ni/ 'jig rten pha rol du 'byung ba'i sems can gyi yang rgyu med pa ni yod pa ma yin pa'i sems pa dang ldan pa'i rgyur 'gyur zhes rgyu med pa can smra ba 'ga' zer ba yin no/ /rang bzhin nyid kyis zhes bya ba la sogs pa ni 'phang zhes bya ba la sogs pas bshad pa yin no/ /de la khyad par dag kyang zhes bya ba la sogs pa ni mgar ba la sogs pa med kyang zhes bya ba la sogs pas so/ /de la don ni 'di yin te/ 'byung ba chen po'i ngo bo ni 'byung ba chen po kho na las 'byung ba'i phyir/ sems pa can gyis byas pa ma yin la/ bde ba can dang sdug bsngal can la sogs pa'i ngo bo'i khyad par yin la/ de rnams kyang tsher ma'i rno ba la sogs pa'i ngo bo chos can gyi rgyu'i bskyed bya kho nar snang ba yin gyi sems pa dang ldan pa'i rgyu can ni ma yin no/ /de med kyang ste sems pa dang ldan pa'i rgyu med kyang ngo / / yod pa'i phyir zhes bya ba ni rno ba dang zhes bya bar sbyar ro/ /gang gi tshe snyam du sems na khyad par ni/ mgar ba la sogs pa med kyang ngo / /gal te res 'ga' mgar ba las 'di yang 'byung ba yin no snyam du sems pa la/ rgyu nges pa med pa can 'di nyid da gang gi rgyu nges pa med pa de ni rgyu med pa can yin no/ /gal te ma nges pa'i rgyu can du 'gyur na yang rgyu med pa can du ci ltar 'gyur/ brjod pa/ ma nges pa'i rgyu can ni de'i rgyu nyid kyi dus su gzhan gyi rgyu nyid spangs pa yin la/ gzhan gyi rgyu nyid kyi dus su yang de'i rgyu nyid yin pa'i phyir/ rgyu med pa can nyid du tsher ma la sogs pa'i rno ba'i khyad par yang 'byung ba tsam gyi bskyed bya ma yin te/ khyab par med par mi 'byung ba'i phyir ro/ /rgyu shug gi sa bon la sogs pa'i ngo bo yongs su gyur pa la ltos nas kha cig tu 'gyur ba kho na yin zhe na/ yongs su gyur pa nyid kyang 'byung ba tsam las byung ba yin gyi cis thams cad la ma yin/ de'i phyir 'byung ba tsam las mi srid pa'i khyad par ni rgyu gzhan las ji ltar rang gi dbye bas tha dad pa'i las dang sems pa'i ngo bor rtogs par byed pa'i phyir/ rgyu med pa can nyid bstan pa ni/ gang yod nyid ni zhes bya ba'o/ /'on te rgyu shug gi sa bon gzhan las de'i skyed byed ni de yongs su 'gyur ba yin la/ de yang de las gzhan pa las de'i skyed byed yongs su gyur pa yin zhes thog ma med pa'i yongs su gyur pa'i khyad par yin na/ shugs kyis las 'thob pa yin zhes zer na/ de la yang gang yod nyid na zhes bya ba la sogs pa slar 'khor ba yin no/ /snga ma snga ma'i khyad par ji lta ba kho na bzhin du khyad par gyi skyed byed rgyu shug gi tsher ma la sogs pa rnams la/ de kho na bzhin du ma rig pa dang sred pa dang las kyi ngo bo dag 'gegs pa dang khyer ba la sogs pa'i bya ba ni sred pa skyed byed du mthong ba'i phyir thog ma med pa'i yongs su gyur pa'i khyad par ni rgyu nyid du brtag par mi nus so zhes bya ba'i don to/ /thog ma med pa'i yongs su gyur pa'i khyad par la dgongs nas bstan pa ni/ rgya shug gi tsher ma'i zhes bya ba'o/ /las kyi ngo bo'i sems pas skyed byed yin pa la dgongs nas bstan pa ni/ blo sngon byed pa dmigs pa'i phyir/ /zhes bya ba'o/ /de nyid las ni zhes bya ba lcags kyi tsher ma las so/ /khyad par yod mod ces bya ba ni lcags kyi tsher ma la yod pa'o/ /rgyu bcas nyid ni sems pa dang ldan pa'i rgyu can te/ snga ma snga ma'i sems pa'i khyad par gyi rjes su 'gro ba dang ldog pa'i rjes su byed pa ni sems dang dbang po la sogs pa bzhin du de'i rgyu can du 'gyur ro zhes bya ba'i don to/ /de'i phyir gzhan yang snga ma snga ma'i yongs su gyur pa'i khyad par las mngon par 'byung ba yin yang yul dang dus la sogs pa nges pa'i dbang gis nges par byed pa 'phangs pa kho na yin par bstan pa ni/ 'ga' zhig rgya shug sa bon las/ /zhes bya ba'o/ /las kyi sbyor ba las byas pa'i gser yang ma byas pa lta bur snang ba ma yin nam/ de'i phyir byas pa dang ma byas pa dag la khyad par med do/ /de lta yin na bden pa'i so sor snang bar mngon par 'dod pa yang mi bden par 'gyur te/ mi bden pa'i rmi lam na so sor snang ba dang khyad par med pa'i phyir ro zhes bstan pa ni/ khyad par med pa kho na zhes bya ba'o/ /de lta yin na khyad par med pa'i so sor snang ba tsam 'gyur bar bstan pa ni/ gnyis med de nyid ces bya ba'o/ /de'i phyir kha cig tu the tshom can du mthong ba las thams cad the tshom za bar bya ba ma yin pa ni/ de'i phyir gang las zhes bya ba'o/ /'di ltar rgyu dang bral ba'i zhes bya ba ni rab rib can gyi skra'i shes pa bzhin du yul dang dus la sogs pa'i khyad par ni ma yin na/ gang yod nyid na zhes bya ba de med na med pas de 'bras bu nyid dam/ de'i rgyu nyid du mi rig pa ma yin nam/ 'bras bu dang rgyu ma yin pa dag gi reg bya dang gzugs kyi shes pa dag ni de med na med pa yin pa'i phyir ro snyam du sems pa ni/ gal te gang yod pa nyid na zhes bya ba'o/ /mthong ba ni mig gi bskyed bya gzugs kyi shes pa yin zhing / gzugs kyi rgyu can ni mthong ba yin la/ reg pa'i rjes su 'gro ba dang ldog pa gzhan du grub pa yin na rgyu med pa'i sna tshogs pa ni tshogs pa gcig la rag las pa nyid ma yin te/ gzhan du grub pa nyid la rgyu mtshan yod par bstan pa ni/ tshogs gcig la rag las zhes bya ba'o/ /de lta bu'i rnam pa can gyi ldog pa ni sdug bsngal gyi rgyu las rgyu nyid kyis rgyu mtshan brjod pa ma yin par bstan pa ni/ rnam pa 'di lta bu'i ldog pa las zhes bya ba'o/ /reg pa med na med pa ni/ gzugs med na med pa kho na 'ba' zhig ni ma yin gyi 'ba' zhig ni rgyu nyid kyi rgyu mtshan yin par bstan pa ni/ 'on kyang gal te gzugs zhes bya ba'o/ /'ba' zhig ni dngos su rgyu nyid kyi rgyu mtshan yin la/ brgyud pas ni 'ba' zhig ma yin pa yang ngo zhes bstan pa ni/ yang na zhes bya ba'o/ /lhan cig 'byung ba'i rgyu nyid khas len par byed pas brgyud pa yin gyi snga ma dang phyi ma nyid kyis ma yin par bstan pa ni/ phan tshun mi bral ba nyid kyis shes par bya ba'o/ /rgyu yin pa'i phyir zhes bya ba ste/ rgyu nyid du sgrub pa la rang nyid med na med par byed pa nyid kyi'o/ /rnam pa gnyis pa zhes bya ba ni rgyu gcig bkag pas so/ /rgyu dang bcas pa nyid ces bya ba ni rnam pa dang po dang 'brel pa yang rgyu gcig nyid mi 'dod pa'i phyir de dgag pa'i don du rnam pa gnyis pa yin zhes bya ba'i don to/ /rtag pa nyid du 'gyur zhes bya ba ni dus thams cad par 'gyur te/ dus gcig kho nar 'gyur zhes bya ba'i don to/ /ltos pa med pas zhes bya ba ni gcig nyid yin na ltos par bya ba med pas rim pa can du 'gal ba'i phyir dang / cig car ba nyid kyang ma yin par bstan pa ni/ de dag ces bya ba'o/ /de nyid bkag pa'i rgyu mtshan rim pa dang rim pa ma yin pa ma tshang ba nyid la/ de dag las zhes bya ba la sogs pa'i 'dra ba sngon du 'gro ba can gyi gsal bar byed pa yin no/ /de nyid kyi phyir de rnams kyi bar du skye ba nyid rnam pa gsum pa ma yin par bstan pa ni/ rnam pa gsum pa rab tu skye ba ma yin zhes bya ba'o/ /de lta yin na de gang gi yin zhe na/ sred pa nyid kyi ste/ nus pa med cing zhes bya ba dang sbyar ro/ /yul gyi khyad par na mtho ris la sogs pa'i ris kyi khyad par can yin la/ de yongs su 'dzin pa ni rang gir byed pa'o/ /de thob pa'i sems pas byas pa ni yul gyi khyad par thob pa'i byas pa'o/ /las dang lus dang ma rig pa rnams rgyu nyid kyang / yul gyi khyad par la sogs pa la 'jug pa'i sred pa kho na yin par bstan pa ni/ rgyu gzhan nam zhes bstan pa'o/ / sred pa ni 'dren pa'i byed pa las rab tu skye ba yin du zin kyang ji ltar srid pa 'dod pa yin snyam du sems pa la de kho na de yin par bstan pa ni/ de ni srid 'dod ces bya ba'o/ /kun 'byung ni yang nus pa sred pa tsam yang ma yin la/ srid pa 'dod pa tsam yang ma yin pa ma yin nam/ 'dod pa'i srid pa la sogs pa gsum kun 'byung ba nyid yin par mdo sde las gsungs pa yin no snyam du sems pa ni/ gal te yul gyi khyad par zhes bya ba'o/ /gang phyir yang zhes bya ba'i yang gi sgras ni bsdus pa'i don dang 'brel pa'i phyir de yang zhes bya bar 'gyur te/ srid pa la srid pa kho na 'ba' zhig sred pa 'dod pa ni ma yin gyi 'on kyang de yang ngo / /de yang gang yin zhe na/ gang gi phyir ni srid pa 'dod pa las so/ /srog chags zhes bya bas ni shes rab dang bral ba bstan to/ /de lta yin na ji ltar 'jug par byed/ ces bstan pa ni/ bde ba dang sdug bsngal dang 'brel pa can 'thob pa dang mi 'thob par 'dod pa zhes bya ba ni phan 'dogs pa'i yul la 'jug pa'i rgyu sred pa yin par brjod na/ de nyid bde ba dang sdug bsngal dag la phrad pa dang bral bar 'dod pa dag gi dbye bas dor ba'i sred pa yang mdo sder gsungs pa yin par bstan pa ni/ 'dod dang 'jig sred ces bya ba ste/ 'thob pa dang mi 'thob par 'dod ces bya bas dbang phyug 'dzud byed yin pa bsal ba yin pa ni kha cig gis 'dod do/ /de yang ji ltar 'dod pa sred pa yin zhe na/ srid pa'i sgra ni 'khor ba'i rnam grangs yin la/ 'khor ba yang gnas dang longs spyod bde ba dang phrad pa dang / sdug bsngal dang bral ba yang yin te/ de la 'dod pa rnam pa gsum 'byung ngo zhes bya ba'i don to/ /sogs pa'i sgras ni bde ba dang phrad pa dang / sdug bsngal dang bral ba dag bzung ngo / /dga' ba ni yid bde ba yin la/ de zhes bya ba ni srid pa 'dod pa'o/ /thams cad ni gcig kho na ma yin pa'i phyir rdzas ma lus par brjod pa'i rnam pa'i dbye ba ni/ 'dod pa'i sred pa zhes bya ba la sogs pa'o/ /phye ba bstan pa ni/ gang zhig gnas la sogs pa zhes bya ba ste/ sogs pa'i sgras ni longs spyod do/ /'di la 'gal ba med pa de bzhin du 'byung bar bstan pa yin no/ / ma rig pa ni sgrib pa'i bdag nyid can ma yin nam/ 'dren pa yang / rnam shes kyis bsgribs pa las yin te/ sgro 'dogs pa nyid dang / 'dren pa las zhes gsungs pa'i phyir sred pa las ni ma yin te/ 'gugs pa'i bdag nyid yin no snyam du sems pa la sred pa'i yan lag thams cad la sred pa'i bya ba yod pa yin te/ chags pa'i bdag nyid yin pa'i phyir ro zhes bstan pa ni/ bdag tu chags pa'i zhes bya ba ste/ kun la rab tu 'jug pa ste/ 'khor ba 'dis yin pa'i phyir 'jug pa ni ma rig pa la sogs pa rten 'brel gyi yan lag yin la/ de thams cad de la bdag tu lta ba'i ma rig pa yod pa yin te/ de med na mi 'jug par thal bar 'gyur ba'i phyir ro/ /de yang chags pa'i snying po can yin pa'i phyir sred pa yin no/ /de bzhin du bdag gir lta bar yang chags pa'i snying po can du brjod par bya ba yin la/ de med kyang med par thal bar 'gyur ba'i phyir ro zhes bstan pa ni/ bde min ni bdag gi bar mngon par 'dod pa'o/ /bde bar 'du zhes pa ni bdag gi ba nyid kyis 'khyud pa nyid las te/ 'gro ba'i yul la sogs pa bde ba yin pa'i phyir chags pa'i yul nyid du brjod do/ /de ni zhes bya ba ni ming gzhan sred pa zhes bya ba'i chags pa ste rgyu nyid ces bya bar sbyar ro/ /rab tu 'jug pa ni yan lag la'o/ /yan lag gi yul bstan pa ni gnas dang longs spyod la sogs pa bdag gi bar mngon par 'dod pa la'o/ /phyin ci log bzhis nyams pa zhes bya ba ni bde bar 'du shes pa zhes bya ba 'grel pa'o/ /bdag gir lta ba'i chags pa'i snying po can du bstan pa yin la/ 'di'i rgyu nyid kyi lhan cig byed pa nyid kyis phan 'dogs par byed pa nyid kyi yan lag yin pa'i phyir snying rje dang ldan pa yin no/ /'di nyid las bya ba ni chags pa'i ngo bo'i sred pa ni thams cad la phan 'dogs par byed pa nyid kyis lhan cig byed pa nyid du brjod pa'i phyir ro/ /gal te sred pa med pas med pa'i phyir/ rten 'brel nyid yin na lus med na yang skye ba med par 'gyur ro/ /ji skad du/ 'byung rngub dbang po blo zhes bya ba'i tshigs su bcad pa'i don bstan pa ni/ gal te rkyen nyid kyang zhes bya ba'o/ /ji ltar 'dod chags dang bral ba zhes bya ba ni tshig gi don bshad pa yin no/ /rigs pa 'di nyid ni zhes bya ba ni de med na med pa'o/ /rgyu mtshan khas blangs phyir zhes bya ba'i don bstan pa ni/ 'dod chags med kyang zhes bstan pa'o/ /'di zhes bya ba ni lus rgyu mtshan nyid ces bya ba'i tshig ni nye bar len pa nyid kyi tshig la gnod pa yin no/ /zos pa ni gsol pa'o/ /dpyad pa ni nges par brtag pa'o/ /blo gros 'bar bas ni khyed kyis so/ /skye ba ste lus dang lhan cig 'byung ba ni 'dod chags dang dus mtshungs par 'byung ba'i phyir rgyu nyid ma yin te/ sngar yod pa nyid rgyu yin pa'i phyir ro zhe na/ lhan cig 'byung ba'i nges pa bshad pa'i don du/ rdzas yon tan dang bcas pa nyid rgyu mtshan yin no zhes zer ba ni/ gal te yon tan dang bcas pa zhes bya ba ste/ 'di nyid bshad pa ni/ gal te skye ba zhes bya ba ste/ skye ba'i snga rol ma mthong ba'i phyir da ltar mthong ba las lhan cig 'byung bar nges pa yin la/ de las kyang yon tan dang bcas pa'i rdzas skye ba'i rgyu mtshan yin no zhes bya ba'i don to/ /'di la brjod pa ni/ skal mnyam skye las zhes bya ba ste/ ji ltar lhan cig 'byung ba'i 'dod chags skye ba'i rgyu ma yin pa de bzhin du skye ba yang lhan cig 'byung ba'i phyir 'dod chags kyi rgyu ma yin pa'i phyir rgyu sngar byung bar rtogs pa na/ 'tsho ba'i gnas skabs su mthong ba'i phyir skal pa mnyam pa nyid de/ 'dra ba nyid tshul bzhin ma yin pa yid la byed pa nyid rgyur btags pa yin no zhes bya ba'i don to/ /bdag dang bdag gir lta ba'i chags pa'i snying po can rgyu ma yin nam/ chags pa ni ma yin no/ / 'di bstan pa ni bdag dang bdag gir 'dzin pas byas pa'i chags pas zhes bya ba la sogs pa yin no/ /de'i phyir der lta ba yang rgyu kho na yin gyi sred pa ni ma yin no snyam du sems pa la/ rgyu yin yang zhes bya ba ste/ sgrib par byed pa'i bdag nyid yin pas 'dzud byed ma yin pa'i phyir ro/ / de'i phyir mi shes pa ste ma rig pa ni kun 'byung ba'i bden pa la ma brjod pa yin no/ /sred pa ni 'dzud byed yin pa'i phyir brjod pa yin par bstan pa ni/ bshad pa zhes bya ba'o/ /gsum rgyu yin pa'i phyir zhes bya ba ni rten cing 'brel par 'byung ba'i yan lag rnams la ma rig pa dang las dag kyang brjod pa'i phyir zhes bya ba'i don to/ /bar du ma chod pas zhes bya ba ni nyes byas so/ /de ma thag nyid du sgrub par byed pa ni gti mug dang las dag ces bya ba'o/ /sred pa med na las la nus pa med par bstan pa ni/ de yod pa na zhes bya ba'o/ /las kyis sbyar ba zhes bya ba ni 'di nyid kyi bshad pa yin no/ /sred pa med pas yongs su 'dor ba ma yan gyi/ 'on kyang las gzhan gyis byas pa kho na de yang yin pa'i phyir grol ba'i bdag nyid can rnams kyi skye ba med pa yang las med pas byas pa kho na yin gyi sred pa med pa nyid kyis byas pa ma yin par bstan pa ni/ gal te blo zhes bya ba'o/ /re zhig srid pa med na 'byung ba yongs su 'dor ba ni las gzhan gyi nus pas 'phangs pa ma yin te/ gzhan du yang yin pa'i phyir ro/ /'on te sred pa med na las nyid mi 'byung ba de'i phyir las med pas byas pa'i yongs su 'dor ba yin gyi las gzhan gyis byas pa ma yin no/ /'di la yang brjod pa/ sred pa dang ni rnam bral na/ /zhes bya ba ni las med pa'i sgo nas sred pa nyid der bya ba byed pa yin no/ /de'i phyir srid pa gtso bo yin te med pa kho na la sbyor bar byed pa'i phyir ro/ /'on te las med pa nyid sbyor byed yin te/ sred pa yod kyang de med na yod pa'i phyir ro/ /de ma grub pa yin te/ de yod na de med pa nyid 'grub pa'i phyir ro zhes bstan pa ni/ 'on te 'di la sred yod na/ /zhes bya ba'o/ /sdug bsngal de gtan du ba ma yin pa dang mi brtan pa yin te/ res 'ga' dmigs pa'i phyir zhes bstan pa de ci las yin zhes zer ba la/ de ni gtan du ba yin te/ rgyu la ste kun 'byung ba'o/ /gegs byed pa ni 'gal ba can gyi lam mo/ /sogs pa'i sgras ni lhan cig byed pa ma tshang ba bsdu ba'o/ /'dis ni rgyu med pa bstan pa yin no/ /de ltar na 'gog pa'i bden pa yang 'gog pa nyid ces bstan par 'gyur bar bstan pa ni da ni zhes bya ba'o/ /'dus byas pa can gyi phung po'i ngo bo gang yin pa de rgyu tshang ba la sogs pa dang ldan pa ma yin nam/ ji ltar 'di 'gog pa yin/ 'gog pa yin no/ ji ltar 'khor ba pa yin snyam du sems pa ni 'khor phyir zhes bya ba'o/ /ma yin zhes bya ba ni phyogs snga ma 'gegs pa'o/ /ci las yin zhe na/ 'dod pa'i phyir te 'khor ba pa gang yin pa de grol ba ma yin zhes bya ba 'di ni 'dod pa yin no/ /'khor ba pa dang 'gog pa yin pa ni skad cig ma la ltos nas 'gal ba yin la/ rgyun la ltos nas 'gal ba ma grub par bstan pa ni/ ma grub phyir zhes bya ba'o/ /bdag ces bya ba ni snga ma dang phyi ma can du gyur pa ni 'khor ba pa yin te/ rgyu dang ldan pa'i phyir ro/ /'khor ba pa ma yin pa ni de dang bral ba'i phyir zhes bya ba grub po/ /'gar yang yod pa ma yin no/ /zhes bya ba ni 'di skad cig ma la ltos nas 'gal ba nyid bshad pa yin no/ /'on kyang sems kyi rgyun zhes bya ba la sogs pas 'gal ba nyid rgyun la ltos nas ni 'gal ba mi 'grub po zhes bstan pa yin no/ /ma grub phyir zhes bya ba nyid kyi don yang bstan pa ni/ don dam par ni zhes bya ba ste/ don dam par yongs su dpyad pa 'khor ba pa nyid ma grub pa yin la/ kun rdzob tu ni 'khor ba pa'i phung po ni sdug bsngal nyid yin pa la 'gal ba med do/ /gal te gzhan bcings pa yin la gzhan grol ba yin na gzhan 'ga' zhig gi rgyud dam/ gzhan yang bcings pa dang grol ba dag la gnas pa ma yin pa de lta na chad pa dang rgyu med par smra ba dag yin te/ skad cig snga ma ni bdag nyid thams cad kyis 'gags pa yin la/ phyi ma yang rgyu med pas mi 'byung ba'i phyir ro/ /de ltar yongs su shes na rtogs pa dang ldan pa ni tshangs par spyod pa la gnas pa ma yin pa de lta na chad pa dang rgyu med par smra bar mi 'gyur zhing / drang srong chen pos gsungs pa yang don med par 'gyur bar bstan pa ni gal te bcings pa zhes bya ba ste/ 'jig rten pa'i bzang po mang po bdag mi 'dod pa la nub par 'gyur te/ rgyu mtshan gang gis gang la yang 'jug pa med pa'i phyir ro zhes dpe mang po bstan pa yin no/ /bdag tu smra ba yang bdag yod pa kho nas 'jug pa dang ldog par byed pa ma yin no/ /'o na ci zhe na/ de'i bskyed pa yin na de 'di ni bdag med par smra ba la mtshungs par bstan pa ni/ ji srid bdag chags te/ chags pa'i snying po can gyi shes pa ji srid du bcom par ma gyur pa de srid du bdag sdug bsngal can 'khor ba par sgro btags nas ni kun du btags nas so/ /yongs su gdung ba ni sdug bsngal bas gnas pa dang ldan par 'gyur la/ de nas sdug bsngal de gzhom pa'i don du thabs rjes su sgrub pas dkrigs pa ni bde bar gnas pa nyid 'thob pa ma yin no/ /de'i phyir bdag la chags pa'i mtshan nyid de kho na log par sgro 'dogs pa gzhom pa'i phyir rtsom pa ni drang srong chen pos gsungs pa'i rjes su bsgrub pa yang yin te/ grol po med na yang zhes bya ba ni bdag med kyang ngo / /de'i phyir tshangs par spyod pa la gnas pa 'bras bu med pa ma yin no/ /'di nyid bstan pa ni/ 'on te de lta bu zhes bya ba'o/ /gal te de kho na nyid mthong ba po ni don byas pa yin pa'i phyir/ rang gi don la 'jug pa ma yin gyi gzhan gyi don kho na la 'jug pa yin na/ 'di'i ched du lam 'di kho bos bstan par bya'o zhes rtogs par mi byed na ji ltar 'bad pa byed pa yin snyam du sems pa ni/ 'on te gal te zhes bya ba'o/ /kun rdzob tu tha snyad yod ces bya ba ni/ slob ma la rdzogs pa yin pa'i phyir ro/ ji ltar don dam pa'i tha snyad du 'gyur zhes bya ba ni ston pa po rdzogs pa'i phyir ro/ /re zhig slob ma yang ston pa po bdag nyid la yang gcig yin par bstan pa ni/ gcig nyid kun rdzob pa zhes bya ba'o/ /ston pa po ni rnam par rtog pa med kyang snga ma'i shugs kyis 'jug pa ni de kho na nyid du gcig pa nyid dam/ tha snyad du yang mthong ba ma yin no zhes bstan pa ni/ ji ltar de nyid ces bya ba'o/ /ston pa po la ltos nas 'bad pa po'i rtogs pa yang rang rig pa tsam ni 'dod chags dang bral ba yin par bstan pa ni/ 'bad pa'ang zhes bya ba'o/ /sa bon la sogs pa la rtog pa med kyang myu gu 'byung ba ji lta ba de kho na bzhin du yongs su rdzogs pa rnam par rtog pa mi mnga' ba las kyang sngon gyi 'du byed las tha snyad 'byung ba bstan pa ni/ rgyu dang 'bras bu'i yongs su rdzogs pa ma yin pa yang 'bras bu nyid ni rnam par rtog pa las gzhan pa tshad ma ma yin par rtogs pa ni yod min zhes bya ba ste/ gnod pa zhes bya ba ni rnam rtog go/ /skad cig ma rig pa mngon sum ni rdzogs pa dang ma rdzogs pa'i snying rje dang rnam par rtog pa dag gi 'jug par byed pa yin par bstan pa ni/ khas blangs nas kyang zhes bya ba'o/ /sangs rgyas bcom ldan 'das rnams ni thugs rjes 'gro ba ji srid par bzhugs pa yin la/ nyan thos rnams ni lus kyi dus nyung zad pa yin yang / tshe ring por 'phel ba'i las yod pa kho na yin no/ /tshigs su bcad pa 'di nyid rgol ba ni/ dam pa'i don rtogs pa zhes bya ba'o/ /'di nyid la lan 'debs pa nyid kyis tshigs su bcad pa'i don la sbyor bar byed pa ni dpyod pa'i yul can gyi shes pa de rtogs pa ni rang rig pa'i ngo bo nyid do/ /de las yang bskal pa grangs med pa gsum du bsags pa'i tshe 'phel bar byed pa'i bsod nams kyi tshogs dang ldan pa'i phyir bcom ldan 'das nyid la ltos nas so/ /yang na las kyis zhes rnam par brtag par rigs pa yin pa ni/ ji ltar rgyal po skye dgu la/ /zhes bya ba'o/ /rang rgyud la ni bu la'o/ /brtson ldan ni rjes su ston pa la sogs pas so/ /'dod bzhin pa'i 'bras bu ni bsod nams rnams yin la/ de'i phyir bcom ldan 'das mtha' mi mnga' bar bstan pa ni/ smon lam zhes bya ba ste/ rgyun mtha' med par 'grub pa kho nar 'dod pa nyid ni las kyi 'bras bu yin no zhes bya ba'i don to/ / rnam pa de lta bu'i zhes bya ba ni bdag gi sdug bsngal can no zhes bya ba la sogs pa gcig pa nyid du sgro btags pa'o/ /gal te las kyi zhes bya ba'i rgol ba la lhan cig byed pa zad phyir ro zhes bya ba lan yin la/ 'on te dgra bcom pa'i las la nus pa med na zhes bya ba la ni 'phangs ba ldog med ces bya ba 'dis so/ /gal te brtse ba ni zhes bya ba ni 'dod chags dang bral bas sems can mthong ba sgrub pa las 'bras bu'i gtan tshigs ma yin nam/ brjod pa ni sdug bsngal shes la zhes bya ba ste/ gzhan gyi sdug bsngal shes na zhes bya ba 'dis ni phyi rol gyi rgyu bstan pa yin no/ /'grel pa mdzad pas ni sred pa med par brjod pa yin la/ des na 'gal ba med pa zhes bya ba ni sdang ba can ma yin la/ sred pa dang bcas pa ni 'ga' zhig tu de la gnod par byed pa la sdang bar 'gyur ro/ /'dis ni mi mthun pa'i phyogs mi mnga' bar bstan pa ni snga ma zhes bya ba ste/ nang gi rgyu bstan pa yin no/ /dngos chos zhes bya bas ni 'dod pa dang gti mug la sogs pa la ltos pa med pa nyid du'o/ /sems can rjes 'brel can ma yin/ /zhes bya ba ni sems can du lta ba la brten pa ma yin no/ /sdug bsngal gsum ni sdug bsngal gyi sdug bsngal dang / 'du byed kyi sdug bsngal dang / 'gyur ba'i sdug bsngal gyi ngo bo yin no/ /mnyam pa nyid ces bya ba ni de rnams bdag kho na yin gyi gzhan ni ma yin par ro/ /sems can thams cad la rtag tu byams pa'i sems ni bdag go zhes sam/ 'on te bdag nyid yin pa med kyang bu sdug la ma'i tshig rtsub bzhin du ji ltar 'jug par 'gyur zhes bya ba'o/ /sems can mthong ba ni 'khor ba'i rgyu yin pa'i phyir/ sdug bsngal gyi rgyu ma yin nam zhes zer ba la/ de ltar bur gyur pa zhes bya ba'o/ /brtse ba ni sems can du lta ba dang 'gal ba dmigs pa yin par bstan pa ni/ de yang zhes bya ba'o/ /brtse ba ni chags pa'i bdag nyid yin pa'i phyir bdag la chags pa med kyang sems can rnams la bdag gi bar chags pa yin pa'i phyir de med pa'i ngo bo ni 'di'i 'dod chags dang bral ba nyid ma yin no zhes zer ba ni gal te 'dod chags dang zhes bya ba'o/ /bdag la'am de dang 'brel pa can yang rung ba la chags pa ni 'dod chags yin no zhes bstan pa ni/ de bdag min pa zhes bya ba'o/ /bdag dang 'brel pa can gyi bde ba sgrub pa nyid kyis sems can gyi phung po dang gzur ba la ni ma yin par bstan pa ni/ sdug bsngal gyi rgyu na ni gzhan gyi ste/ reg pa ni 'dzin pa yin la de nyid 'ba' zhig na de tsam ste/ sems can la chags pa tsam ni bdag dang 'brel pa dang bral ba'i brtse ba yin no/ /gal te yang bde ba dang 'brel pa can nyid kyis bdag tu mi 'dzin pa yang byed pa nyid kyis gzhan gyi bde ba rnams la bdag tu sgro 'dogs par 'gyur ba kho na yin no snyam du sems pa ni/ gal te bdag gi zhes bya ba'o/ /bdag la bde ba gnas pa yin na nges par bdag tu sgro 'dogs par 'gyur bar bstan pa ni/ gal te bdag don zhes bya ba'o/ /gzhan la gnas pa yin na cis bdag tu sgro 'dogs pa yin zhes bstan pa ni/ gzhan don tsam la zhes bya ba'o/ /ji ltar ched ka che ba ma yin zhes zer ba la/ rgyal po'i dpe zhes bya ba ste/ gzhan gyi don la 'jug pa yin zhes bya ba'i don to/ /rnam rtog mi mnga' ba yang sngon gyi mdzad pa'i shugs kyis 'jug pa yin par bstan pa ni/ snga ma snga ma las zhes bya ba'o/ /de nyid gsal bar byed pa ni/ yod min zhes bya ba ste/ mngon sum gyi yul ma yin pa'i phyir ro/ /gnas pa ma yin pa ni sems can gyi don gyis stong pa nyid du'o/ /khyed cag ces bya ba ni 'khor ba pa'o/ /'khrul pa zhes bya ba ni rnam par rtog pa kho na ste/ mngon sum ma yin pa'o/ / bdag la gnod pa byed pa la rgyab kyis phyogs pa ni zhe sdang yin pa la bdag dang bdag gir lta ba'i snying po can gyis rgyab kyis phyogs pa ma yin du zin kyang / /phyogs pa tsam yod pa yin no zhes zer ba la bstan pa ni/ mi gtsang ba la sogs pa mthong ba las zhes bya ba'o/ /zhe sdang gi rang bzhin du zhes bya ba ni/ zhe sdang gi yul gcig la kun du sbyor ba'i phyir ro/ /'di la yang / byams sogs rmongs dang 'gal med phyir/ /shin tu nyes pa tshar gcod min/ /zhes 'chad par 'gyur ba'i lan bstan pa ni/ mi sdug pa bsgom pas zhes bya ba'o/ /mi rtag pa la sogs par lta ba la yang ci'i phyir mi 'gyur zhes zer ba la/ bdag yod na ni zhes bya ba'o/ /mi rtag pa nyid du lta bar 'khrul pa dang 'gal bar bstan pa ni/ gang gi tshe rgyu la rag las pa zhes bya ba'o/ /'dod chags dang bral ba rnams la bdag tu lta ba med pa'i phyir/ bdag tu lta ba'i snying po can gyi zhe sdang mi srid de/ /de'i phyir de rnams zhe sdang dang ldan pa can yin gyi snying rje ma yin par bstan pa ni/ gti mug nyes pa'i rtsa ba ste/ zhes bya ba'o/ /nyes rgyu la ni gnod par byed pa la'o/ /nyes med ni nyes pa dang ldan pa ma yin pa'o/ /gal te 'dod chags dang bral ba'i bcom ldan 'das 'khor ba ji srid par bzhugs pa yin na/ lus kyi 'ching ba yod pa'i phyir ma grol bar 'gyur ro snyam du sems pa ni/ gal te 'dod chags dang bral ba zhes bya ba'o/ /thugs rjes 'khor ba ji srid par bzhugs pa'i sku mnga' nas yang 'dod chags la sogs pa'i dri ma spangs pa yin pa'i phyir thugs grol ba kho na yin par bstan pa ni/ nyes pa dang bral ba'i thugs zhes bya ba'o/ /grol med ma yin zhes bya ba ni bcom ldan 'das la ltos nas grol ba med pa ma yin gyi 'on kyang grol ba kho na yin no/ /ma grol ba'i ngo bo ni 'di yin te sngon gyi 'du byed pa'i phung po rnams zad pa yin na gzhan dag mtshams sbyor ba yin la/ 'di yang sangs rgyas bcom ldan 'das la mi mnga'o/ /de'i phyir ma grol ba ma yin no/ /yang byang chub sems dpa' rnams ni mtshams sbyor ba dang ldan pa yin yang / snying rje'i dbang gis nyes pa med pa kho na yin gyi/ 'khor ba ba'i 'gro ba lta bu ma yin par bstan pa ni/ nus pa ma zad pa ste/ snga ma zad kyang gzhan 'byung ba'i phyir bzhugs pa ni 'tsho ba'o/ /yang na snga ma ni nyan thos la ltos pa'o/ /phyi ma ni bcom ldan 'das la ltos pa'o/ /'du byed kyi sgra ni dge ba'i gnas pa yin no/ /'du byed pa yod pa dang med pa dag kho nas gnas pa dang gnas pa ma yin pa 'ba' zhig ni ma yin te/ snying rje yod pa dang med pa dag las kyang 'byung ba yin par bstan pa ni/ dman pa nyid phyir zhes bya ba'o/ /sems can gzhan gyi ngo bor ni gzhan gyi dbang gis so/ /bdag tu lta ba kho na gti mug ma yin te/ rgyun du zhugs pa las de med kyang gti mug khas len pa'i phyir ro snyam du sems pa ni/ gal te lam gyi nus pa yin na zhes bya ba'o/ /'di la rgol ba rjes su brjod nas lan brjod pa ni/ rgyun du zhugs pa la lhan cig skyes pa'i bdag tu lta ba yod kyang / gti mug gzhan du yod par rtog pa la tshad ma med do zhes bstan pa ni/ lhan cig skyes pa ma spangs phyir/ /zhes bya ba ni/ bdag tu lta ba yang mngon par sbyangs pa ni rgyun du zhugs pa'i lam gyis spang bya yin gyi/ lhan cig skyes pas ni ma yin no/ /de'i phyir rnam pa gnyis po 'di ni gti mug gzhan du rtog pa 'joms par byed pa yin no zhes bya ba'i don to/ /dbang po rnon po'i yang rnon po kha cig ni dang po'i lam nyid du gti mug gnyi ga spangs pa nyams su myong ba yin pas sred pa med pa yin par bstan pa ni/ spangs na yang zhes bya ba'o/ /lam gyi dang po la gsal po ma yin par bstan pa ni/ bde ba mthong ba tsam nyid la/ /zhes bya ba'o/ /bzlog pa ni bdag med pa'o/ /bstan pa ni chen por 'gyur ba'o/ /bsgom pa'i lam nyid kyis zhes bya ba ni goms pa las byung ba'i bstan pa nyid kyis so/ /gang gi 'dod pas zhes bya ba ni dbang po rnon po'i yang rnon po ste/ de bstan pa ni/ shes rab rnon po'i zhes bya ba'o/ /mngon par sbyangs pa las lhan cig skyes pa'i dngos po med na rgyu dang rnam pa dag gis tha mi dad pa yin no zhes zer ba ni/ gal te sems can du lta ba lhan cig skyes pa zhes bya ba'o/ /rnam pa tha mi dad kyang bag chags tsam las byung ba nyid kyis rgyu nye bar ston pa po tha dad pa las lhan cig skyes pa tha dad par bstan pa ni/ bde bar gyur ba 'am zhes bstan pa'o/ /de bzhin du mngon par sbyangs pa'i las ni ma yin te/ de med kyang bstan bcos shes pa rnams dang rgyun du zhugs pa'ang yod pa'i phyir ro/ /'on te de rnams nye bar ston pa med pas bdag go zhes bya ba kho nar mi 'gyur ro zhes zer ba la/ ngang zhes mthong ba med par ni de rnams kyi bdag tu lta ba'i rnam pa'i bdag la chags pa nyid nyams su myong ba grub po zhes bya ba'i don to/ /chags pa nyams su myong ba la byed pa ni 'bras bu'i rtags yin par bstan pa ni/ bdag la sred pa med par yang / /zhes bya ba'o/ /rgyu'i dbye ba nyid bstan pa ni/ thog ma med pa'i bag chags kyi dbang gis zhes bya ba'o/ /lam gyi dang po la lhan cig skyes pa ma spangs pas thar pa ma yin zhes zer bas thar pa la nyon mongs pa med par brjod pa yin par bstan pa ni/ 'dis ni zhes bya ba'o/ /bdag tu smra ba yongs su mgu ba med pas gya nom pa ma yin pa'i thar pa yin no/ /de'i phyir bdag khas len pa nyid gya nom pa'i thar pa yin no snyam du sems pa ni/ gal te bdag yod na zhes bya ba'o/ /bdag khas len na thar pa nyid du mi 'gyur ba bstan pa ni/ sdug bsngal skye ba'i zhes bya ba ste/ 'khor ba skye ba'o/ /bcings pa dang thar pa dag gis bdag dang 'brel pa ni rgyu nyid kho na yin la/ de ni rtag pa la mi srid do/ /'du ba dang phrad pa dag kyang de yod pa dang med pa'i dus dag la khyad par med pas med pa kho na yin no zhes bya ba'i don to/ /rtogs pa dang ldan pa yang rmongs pa'i dbang gis byed pa yin no zhes zer ba ni/ 'on te 'di zhes bya ba'o/ /bdag shes pa ni de nyid shes pa yin te/ rmongs pa'i dus na gal te med pa yin na mi dmigs pa nyid 'di'i med pa sgrub pa yin par bstan pa ni/ de'i tshe bdag nyid ces bya ba'o/ /de'i rang bzhin ni gti mug nyid do/ /sdug bsngal ba yang gti mug gis ma yin te/ 'on kyang las kyis bstan pa yin no zhes zer ba ni/ 'on te bdag nyid shes kyang zhes bya ba'o/ /rnam par rtag pa mi 'thad pa'i phyir bcings pa ma yin par bstan pa ni/ gal te 'di zhes bya ba'o/ /gzhan gyi dngos po med kyang zhes bya ba ni sdug bsngal med pa'i rang bzhin med pa ni sdug bsngal gyi rang bzhin nyid do/ /rig pa ma yin pas bdag dang bdag ces bya ba'i 'khrul pa ma gtogs pa'i bdag rigs pa ma yin no/ /gal te yod pa'i bdag nyid kyi mtha' thams cad du rjes su 'jug pa yin no zhes zer ba ni/ de'i rang bzhin rig ce na/ zhes bya ba'o/ /dga' ba'i ngo bo tshangs pa yin/ /zhes bya ba 'di la/ gal te thar kyang bde nyid la/ zhes smos so/ /bdag med pa khas len pa gya nom pa nyid yin par bstan pa ni/ yongs su tshim pa zhes bya ba ste/ non pa med pa ni bdag dang bdag gir sgro 'dogs pa med pa'i phyir ro/ /mi rigs pa med pa ni rtag pa nyid med pa'i phyir ro/ /gal te nga sngon gyur to zhes bya ba ni dper na skye bo la phan pa'i rgyal po zhes bya bar ro/ /rtag pa bzhin du brjod bya ma yin pa yang khas blangs par 'os pa ma yin te/ rigs pa dang 'gal ba'i phyir ro zhes bstan pa ni/ mi rtag pa nyid du zhes bya ba ste/ rtag pa nyid la sogs pa dang 'gal ba'i rim pa dang cig car ba nyid kyis byed pa po la khyab pa ni mi rtag pa nyid du rnam par gnas pa yin pa'i phyir mi rtag pa nyid kyis kyang khyab pa yin zhes bya ba'i don to/ /'on te bcings pa dang thar pa dag ces bya ba la sogs pa ni gnyi ga'i bdag nyid med pa'i rgyu yin no snyam du sems pa'o/ /gnyi ga'i bdag nyid kyis te bzlog pa la ni gzhan du grub pa nyid kyi gtan tshigs bstan pa ni/ rtag dang mi rtag ces bya ba'o/ /mi 'jig pa 'jig pa dang 'gal ba yin par bstan pa ni/ gang gi rang bzhin zhes bya ba'o/ /gal te kho bo cag gi 'dod pa las bzlog pa brjod par bya bar nges pa yin no/ /rtag pa yin zhes bya bar brjod bya yin par bstan pa ni/ de ni rtag pa zhes bya ba'o/ /rtag pa dang cig shos 'gal bar tshad mas grub par byed par 'dod pas bstan pa ni/ zhig pa dang ma dmigs pa zhes bya ba la sogs pa'o/ /gal te sngon mthong ba da ltar snang bzhin ba dang gcig pa nyid du de nyid yin no zhes shes bzhin du ji ltar gzhan du ma yin snyam du sems pa ni/ gcig nyid du rtogs bzhin pa ni zhes bya ba'o/ /gang zhig ces bya ba ni mthong ba'i'o/ /gcig nyid du zhes bya ba ni snang bzhin pa dang / lhan cig rtogs pa de nyid 'di yin zhes bya ba'o/ /de ni mthong ba'o/ /ma rtogs pa zhes bya ba ni med pa dang ma skyes pa'i ngo bo ni 'gal ba yin te/ mthong ba las ma rtogs pa ni mthong ba ni ma rtogs pa yin no zhes zer ba ni/ 'on te gzhan rtogs pa zhes bya ba'o/ /lan ni des na ma rtogs pa ni yod pa ma yin no zhes bya ba ste/ gzhan rtogs pa'i ngo bo yin te/ gcig nyid du rtogs par khas blangs pa'i phyir zhes bya ba'i don to/ /de zhes bya ba ni da ltar ba'o/ /gzhan zhes bya ba ni rtogs pa nyid do/ /de'i mthong ba ma rtogs pa zhes rgol ba'o/ /'di yang da ltar ba nyid mthong ba yin pa zhes bya ba 'dis 'gal ba yin par bstan pa ni/ de ltar na 'o na zhes bya ba ste/ snga ma gang yin pa de nyid 'di yin na/ de la ltos nas kyang gzhan yin pa'i rang nyid kho na la ltos nas de gzhan yin no zhes bya ba'i don to/ /de yang mi rung ngo zhes bya ba ni 'gal ba'o/ /'gal ba nyid bstan pa ni gzhan pa nyid du zhes bya ba ste/ gzhan pa nyid ni dbye ba'o/ /gal te 'di sngar mthong ba las gzhan pa yin na/ gzhan ma yin pa kho nar mi 'gyur zhes bya ba ni dbye ba yin te/ gcig nyid de rtogs pa ni ma yin no/ /gzhan du zhes bya ba ni dmigs pa'o/ /'on te snga ma dang phyi ma dag gi khyad par tha dad pa dag la gcig tu rjes su 'jug pa'i ngo bo ni de dang ma bral bar rtogs pa yin no snyam du sems pa ni/ gcig nyid ces bya ba'o/ /bral ba zhes bya ba ni dus gcig la gzhan med pa'o/ /de nyid kyi zhes bya ba ni rgol ba'o/ /lan ni ji ltar gcig can zhes bya ba'o/ /de bzhin zhes bya ba ni ma bral ba dang bral ba'i ngo bo ste/ snga ma'i ngo bo dang mtshan nyid mi mthun pa'i ngo bo dang ldan pa nyid de dang bral ba yin te/ rim gyis 'byung ba yin pa'i phyir de dag la rim pa med pa rim gyis 'byung bar mi rigs so zhes bya ba'i don to/ /rim pa ma yin pa yang snang bzhin pa ni dus dang yul gcig pa ma yin pa'i phyir/ snga ma dang phyi ma'i ngo bo la khyab par byed pa nyid yin no snyam du sems pa la/ snga phyi'i rang bzhin ma rtogs na/ /zhes bya ba ni snga ma dang phyi ma'i ngo bo dang ldan pa'i bdag nyid dang bral ba'i ngo bo snang ba nyid de las gzhan pa'i snang ba yin te/ nye bar snang ba'i ngo bo yin zhes bya ba'i don to/ /snga ma'i ngo bo dang ldan pa phyi ma'i ngo bo dang ldan par mthong ba'i dus su ma mthong ba ni tha dad pa'i tha snyad kyi yul yin te/ tha snyad de'i rgyu mtshan ni de tsam yin pa'i phyir ro zhes bstan pa ni/ mthong ba dang ma mthong bar zhes bya ba ste/ mthong ba zhes bya ba ni mthong ba'i ngo bo'o/ /mthong ba'i yul gyi dngos po ni bzlog pa dang 'gal ba yin par bstan pa ni/ gcig phyir zhes bya ba ste/ rtag pa med pa la dgongs pa'o/ /de ni 'di yin no zhes bya ba'i rnam par rtog pa ni mthong ba dang / snang bzhin pa dag la gcig tu zhen pa ni dran pa'i mngon sum gyi ngo bo yin la/ dran pa dang dbang po la sogs pa'i tshogs pa las byung ba yin na zhes bya ba'i bsam pas dogs pa ni/ yang nas yang du zhes bya ba'o/ /lan ni/ dran pa tshad ma ma yin pa'i phyir zhes bya ba'o/ /gzung ba tsam 'dzin pa ni dran pa yin la/ 'di ni de lta ma yin te/ ma bzung ba yang snga ma dang phyi ma dag gcig tu 'dzin pa'i phyir ro snyam du sems pa la/ ma rtogs pa ni zhes bya ba ste/ 'di yang sngar mthong ba nyid kyis bzung ba yin te/ gcig yin pa'i phyir ro zhes bya ba'i don to/ /dngos po gcig yin pa dang sngar bzung ba nyid du ni bden mod kyi/ de ni da ltar gyi dus na yod pa nyid sngar bzung ba ma yin te/ de'i dus na med pa'i phyir ro snyam du sems pa ni/ gal te da ltar yod pa nyid/ /ces bya ba'o/ /sngon dang phyis 'byung ba'i dus zhes bya ba 'ga' yang med do/ /'o na ci zhe na/ dpyid dang dgun la sogs pa nyid yin la/ dpyid dang 'brel pa'i dngos po 'dzin pa yin na dgun dang 'brel pa 'dzin pa ma yin te/ cig car ba ma yin pa'i phyir ro/ /'brel pa can ma bzung na 'brel pa 'dzin pa ma yin no zhes bya ba'i don to/ /de dngos po'i cha dran pa'i phyir sngar nyid bzung ba yin pas de la dran pa dang 'brel pa la tshad ma gzhan mngon sum nyid yin pa'i phyir ji ltar sngar mthong ba ngo shes pa'i tshad ma yin no/ /de bstan pa ni/ tha dad med phyir zhes bya ba ste/ dngos po'i cha dran pa kho na yin zhes bya ba'i don to/ /snga ma 'am phyi ma rung ba mthong ba ni dus ring mo yin pas dngos po rtogs pa'i nus pa med pa'i phyir mi rtogs pa ma yin nam/ 'on kyang rang gi dus ni yin te gcig pa nyid du sngar mthong ba ngo shes pa nyid kyis rtogs pa yin no snyam du sems pa la/ mthong zin nyid ces bya ba ste/ sngar dang phyis mthong ba dag gis rang gi dus kyi ngo bo rnam par 'jig pa yin pa'i phyir/ des gnod pa'i sngar mthong ba ngo shes pa ni bag chags kyi nus pa la brten pa yin gyi gcig nyid du sdud pa ma yin no zhes bya ba'i don to/ /sngar mthong ba ngo shes pa ni sngar dang phyis mthong ba dag cig car rtogs pas/ snga ma dang phyi ma dag nyid rtogs pa ma yin nam/ de'i phyir de dag gis 'di la gnod pa ma yin te/ 'gal ba med pa'i phyir ro snyam du sems pa ni/ snga phyi'i shes pa las she na zhes bya ba'o/ /shes bya bzhin du shes pa yang sngar mthong ba ngo shes pa las ngo shes pa gcig nyid yin pa'i phyir/ snga ma dang phyi ma dag tu rtogs pa ni tshad ma las ma yin par bstan pa ni/ de dag ces bya ba'o/ /rang rig pa la ni snga ma dang phyi ma nyid shes pa'am shes bya la mi srid par bstan pa ni rtogs mi 'gyur zhes bya ba'o/ /gzhan gyi zhig pa yin yang nye bar 'dzin pa'i phyir snga mas phyi ma'am/ des snga ma 'dzin pa ma yin par bstan pa ni/ med pa ni zhes bya ba'o/ /med pa ni 'dzin par byed pa'i dus na nye ba ma yin pa'o/ /snga ma'am phyi ma yang rung phan tshun tha dad pa ma yin pa ma yin nam/ gcig nyid yin pa'i phyir ro snyam du sems pa ni/ myong ba de dag gcig yin na/ zhes bya ba'o/ /gal te yang mngon sum byad pa la snga ma dang phyi ma nyid ma yin yang rnam par rtog pa la snang ba kho na yin no snyam du sems pa ni/ gal te snga ma nyid med na/ /zhes bya ba'o/ /rnam par rtog pa ni mngon du byed pa'i ngo bo rtogs pa ma yin la/ dran pa'i ngo bo ni bag chags kyi stobs kho na las dmigs pa yin par bstan pa ni/ mngon du byed nyid ma yin pas/ /zhes bya ba'o/ /zhen pas 'dzin pa ni rnam par rtog pa rnams la yod pa kho na yin no snyam du sems pa la/ lan ni sngon du byed pa nyid/ /ces bya ba ste/ phyin ci log tu zhen pas ni ma yin no/ /rgyu nyid ni gzung ba nyid yin la 'bras bu nyid ni 'dzin pa nyid ma yin nam rig pa shes pa bzung ba ni/ rgyu nyid kho nar rtogs pa yin/ /zhes bya ba'o/ /de 'di ni dran pa la yang ma nyams pa yin no snyam du sems pa la/ don las dran pa zhes bya ba ste/ dran pa la ni myong ba kho na nus pa can yin te/ de'i bag chags dang rjes su 'brel pa yin pa'i phyir zhes bya ba'i don to/ /myong ba nus pa las byung ba'i dran pa de ni de'i bya ba'i yul tsam las zhen pa yin gyi/ / snga ma nyid la sogs pa nyid ni ma yin te/ 'di ni myong bas 'dzin pa yin pa'i phyir ro zhes bstan pa ni de myong ba snga mas zhes bya ba'o/ /de'i phyir snga ma nyid la sogs par thog ma med pa'i bag chags las byung ba'i rnam par rtog pas rtogs par bya ba yin par bstan pa ni/ 'das pa mngon du byas pa zhes bya ba'o/ /'di tsam gyis snga ma dang phyi ma dag gi rjes su 'jug pa gcig gi ngo bo bsal nas/ da ni snga ma dang phyi ma la gnas pa'i gcig nyid du 'dod pa tshad ma can ma yin pa'i phyir sel bar byed pa bstan pa ni/ 'on te skye 'jig ces bya ba'o/ /'di nyid kyi 'brel pa nyid ces bstan pa ni/ gang tshe zhig pa zhes bya ba'o/ /yod pa ni skye ba dang ldan pa yang zhig pa med pa ste/ rab tu nyams par 'gal ba yin zhes bya ba'i don to/ /sngar rtogs pa'i brtan pa dang skye ba dag la yul nye ba'i mngon sum gyis bstan par mi rigs pa kho na ni brtan la'ang zhes bya ba'o/ /lam gyi zhar la zhes bya ba ni lam bstan pas zhar la 'gog pa'i rnam pa bzhi pa ste/ nges par 'byung ba 'di lta bu'i ngo bo bstan pa yin no/ /bstan zin zhes bya ba ni de'i gnod byed ni bdag med mthong ba 'gal ba yin zhes bya ba nges so/ /bdag dang bdag gir 'dzin pas byas pa'i chags pa gzhom par ni gnas gyur pa ni bdag med pa mthong ba goms pa las gyur pa yin par bstan pa ni/ de goms pa las zhes bya ba'o/ /ji ltar bdag dang bdag gir 'dzin pa goms pa bdag tu gyur pa kho na yin yang / bdag med pa dang 'gal ba can yin pa de bzhin du/ 'di bdag tu gyur pa yin yang bdag la sogs pa 'dzin pa dang 'gal bar 'gyur ba kho na yin na/ ji ltar gnas gyur pa yin te 'gal bar khyad par med do snyam du sems pa ni bdag gyur kyang zhes bya ba ste/ lam gyi skyon bdag tu 'dzin pa la sogs pa rnams 'byung ba ni skyon gyi bdag nyid du gyur pa la lam lta bu'o/ /nus pa med pa ni bdag tu 'dzin pa la sogs pa khyab bdag ma yin pa'i phyir ro/ /lam ni de las bzlog pa yin pa'i phyir lam yod na skyon 'byung ba mi rigs so zhes bya ba bzlog pa ni yon tan rnams la skyon yod pas gnod pa'o/ /yon tan rnams ni zhes bya ba ni bdag med pa mthong ba'o/ /dngos po'i rang bzhin yin pa'i phyir ni dngos po'i yul nyid kyis so/ /nyes pa rnams ni zhes bya ba ni bdag tu 'dzin pa la sogs pa rnams so/ /bdag la sogs par 'dzin pa yang rnam par shes pa yin te/ thog ma med pa'i bag chags las byung ba'i phyir rgyu dang bcas pa yin la bdag med par mthong ba'i dmigs pa'i rgyu can las tha mi dad pa ma yin nam/ dmigs pa dang bdag po'i rkyen dag la khyad par ci yang med na/ gang gis gcig gnod pa can yin la cig shos rgyu dang bcas pa yin yang ma yin zhes 'dri ba ni/ ji ltar zhe na zhes bya ba'o/ /khyad par bstan pa ni rnam shes yul 'dzin pa'i chos ni rang bzhin yin te/ gnod bya ma yin pa'i phyir ro/ /nya phyis 'dzin pa bzhin du yul dang bral ba 'dzin pa'i rgyu dang bcas pa yin yang dngul gyi shes pa bzhin du skyes nas zhig pa yin la rang bzhin 'di ni de lta ma yin no/ /ci las yin zhe na/ ji ltar yod de 'dzin pa dang / /zhes 'chad par 'gyur ba'o zhes bya ba ni gang gi phyir zhes bya ba don du yang sbyar ro/ /'dis kyang rnam shes la yod pa gnod bya ma yin pa nyid kyi rgyu mtshan bstan pa yin no/ /yul la yod pa yang bstan pa ni/ des te yul 'di'i ste rnam shes kyi skyed par byed pa yin no/ /'khrul pa la yang de mtshungs yin pa'i phyir khyad par du byed pa ni yod pa'i ni bdag nyid kyi ste rang gi bdag nyid rang gi rnam pa rgod pas so/ /'khrul pa la skyed byed yin yang rang gi bdag nyid kyi skyed byed ma yin no/ /'ang gi sgra ni shes pa la yod pa'i rgyu mtshan la ltos pa sdud pa'o/ /yin zhes bya ba ni gang gi phyir zhes bya ba'i don to/ /bdag med pa mthong ba la yang rgyu mtshan gnyis yod pa'i phyir rang bzhin kho nar bstan pa ni/ 'di yang zhes bya ba'i yang gi sgrar blta bya'o/ /'grel par yang 'di lta bur gtong ba kho nar sbyar bar bya'o/ /rgyu mtshan 'di gnyis dang bral ba'i 'dzin pa tsam ni gnod bya yin pa'i phyir rang bzhin ma yin par bstan pa ni/ gzhan ni de'i rang bzhin no zhes bya ba dang sbyar ro/ /rkyen gzhan zhes bya ba ni yul la yod pa'i rgyu mtshan med par bstan pa yin no/ /gol 'gyur zhes bya ba ni shes pa rang la yod pa'i rgyu mtshan med par bstan pa yin no/ /bzlog pa la rgyu mtshan 'di gnyis ci las rtogs pa yin zhes zer ba la/ /ldog pa la ni ste/ ldog pa'i rgyu mtshan du'o/ /gang gi phyir gnod pa can gyi rkyen la ltos pa de'i phyir mi brtan pa ni rang bzhin ma yin pa ste ngo bo ma yin pa'o/ /rang bzhin ma yin pa'i dpe ni/ sbrul gyi blo bzhin zhes bya ba'o/ /rtsa ba med pa can yin pa'i phyir zhes bya bas ni rang gi bdag nyid kyis skyed byed kyi yul med par bstan pa'o/ /bdag la sogs par 'dzin pa rang bzhin ma yin na skyed par byed pa med pa'i phyir mi skye ba kho na 'gyur ba yin no zhes zer ba ni/ gal te thag pa la sbrul gyi blo zhes bya ba'o/ /'di la zhes bya ba ni rgol ba la bshad pa ni phyogs gzhan nas bstan pa'i lan te/ mi rtag pa nyid ces bya ba la sogs pa yod pa la dmigs par byed pa'i phyir yod pa dmigs pa ni thog ma med pa'i ma rig pas 'dus byas pa des nang gi 'khrul pa'i rgyu bstan pa yin no// /de ltar ni mthong ba'i yod pa'o/ /de dogs pa ni des bslus pa lam de'i rgyu yul la yod par bstan pa ni/ 'dra ba zhes bya ba'o/ /'am gyi sgra ni dang gi don to/ /kho bo smra ba ni gang gi tshe mig ma btsums pas mthong ba de'i tshe/ 'dra ba gzhan 'byung bas bslus pa ni mi rtag pa nyid du nges par byed pa ma yin no/ /gnas skabs de'i 'og tu da ltar yun ring por 'tsho ba nyid kyi rtags mthong ba bzhin du yod pa la dmigs pa'i phyir yod pa dmigs par des te de yod par dogs pa srid pa ni rjes su dpag pa yin la des bslus pa yin no/ /yod pas ni da ltar ba nyid kyis dmigs pas gzhan du mi 'thad pa'i phyir sngon yang byung bar gyur to zhes bya bas de yod par rjes su dpog par bslus pa yin no/ /rtag tu zhes bya ba ni sngon dang phyis kyang ngo / /yod pa dmigs pa ni da ltar dmigs pas rgyu 'am 'bras bu nyid du srid par byed pas mi rtag pa nyid du nges par byed pa ma yin no/ /'grel pa mdzad pas ni gang gi tshe sngar mthong ba'i dngos po'i bar du ma mthong la yang snang ba de'i tshe bar du yod pa srid pa'i phyir mi rtag pa nyid du nges par byed pa ma yin par bstan pa ni/ gang gi tshe ji srid du zhes bya ba'o/ /tha snyad pa rnams la yang so sor snang ba tha dad pa yod pa ma yin nam/ bden mod kyi yod kyang tha snyad pa rnams mchog tu 'dzin pa ma yin te/ dgos pa med pa'i phyir ro zhes bstan pa ni/ tha snyad pa zhes bya ba smos te/ 'dis ni don byed pa tsam gyis tshim pa'i phyir so sor snang ba tha dad pa mchog tu 'dzin pa ma yin pa ni de kho na nyid ma mtshon pa'i rgyu yin par bstan pa yin no/ /'dra ba gzhan du 'byung ba yang rgyu yin par bstan pa ni/ 'dra ba gzhan zhes bya ba ste/ 'dra ba nyid la gcig la sgro 'dogs pa'i rgyu mtshan gyi dpe ni mtshe ma zhes bya ba'o/ /yod pa las dmigs pas zhes bya ba 'di la yang 'dra ba gzhan 'byung ba yod pa ma yin par bstan pa ni/ snga mar ni zhes bya ba'o/ /'dra ba gzhan 'byung ba med pa nyid 'dod pa'i dbye bas bstan pa ni/ gzhan dang gzhan zhes bya ba'o/ /'dod pa gzhan gyis 'dra ba gzhan byung ba bstan pa ni/ yang na me de nyid ces bya ba ste/ mthong ba'i rjes su 'brang bas rjes su dpag pa'i phyir zhes bya ba'i don to/ /rtswa la sogs pa gzhan dang gzhan nye bar len pa yin pa'i phyogs la me la sogs pa ci las skye ba yin snyam du sems pa ni/ rigs mi mthun pa las zhes bya ba'o/ / 'dod pa 'di gnyis la brten nas 'dra ba gzhan byung bas bslus pa 'am zhes bya ba brtags pa yin par bstan pa ni/ de nyid kyi phyir zhes bya ba'o/ /yang na de ma yin pa med pa zhes bya ba la sogs pa nyams pa dang rtag tu rgyun mi 'chad par dmigs pa zhes bya ba yang yod pa la dmigs pa zhes bya ba de'i khyad par yin la/ dmigs pa ni bar du ma dmigs na gang gi tshe yang dmigs pa de'i tshe/ 'dra ba la zhes bya ba la sogs par blta bar bya ba yin par bstan pa ni/ gang gi tshe bar du zhes bya ba la sogs pa'o/ /shes pa tshad ma ma yin pa'i phyir zhes bya ba ni rgyun chad pa mthong bas rnam par rtog pa'i bag chags tsam las byung ba la gnod pa'i phyir ro/ /don byed par dmigs pa 'ba' zhig gam/ 'dra ba gzhan 'byung ba yang rung ste/ de nyid mi mtshon pa'i rgyu ma yin te/ 'o na ci zhe na/ thog ma med pa'i ma rig pa'i 'du byed nyid kyang yin par nye bar bsdu ba ni/ de'i phyir nang gi zhes bya ba'o/ /bdag tu 'dzin pa yang rang bzhin kho na ma yin nam/ gang gi phyir sems nyid yul dang dus rnam par 'chad pa ma yin pa ni bdag gam gzhan pa'i phung po dang mtshan nyid mi mthun pa yin no snyam du sems pa la/ sems 'di'i zhes bya ba smos te/ snga ma nyid dang phyi ma dang bral ba'o/ /ci las she na/ 'di ni zhes bya ba ni nye ba mngon sum pa'o/ /rang rig pa la ni dus la sogs pa ma chad pa ma yin la/ 'di'i gzung ba de kho na 'dra ba yin te/ gzhan du ni des rtogs par mi nus pa'i phyir/ de lta yin na 'di'i grub pa yin par bstan pa pa ni/ dri ma rnams ni glo bur ba/ /zhes bya ba ste/ rang bzhin ma yin pa'o/ /dri ma ni bdag tu 'dzin pa la sogs pa'o/ /rtsa ba med pa can ni yul med pas so/ /glen pa'i rgya tsam du zad pa yin pa'i phyir ni ma dpyad pa'i mngon par 'dod pa tsam yin pa'i phyir te/ rnam par dpyad na rang rig pa tsam nyid yin pas sgro 'dogs pa med pa'i phyir zhes bya ba'i don to/ /bdag tu gyur pa la yang skyon yod do zhes bya ba la sogs pa'i rgol ba spangs par nye bar bsdu ba ni/ de phyir sngar yang zhes bya ba smos te/ bdag gyur pa'i sngar ni tshu rol mthong ba'i gnas skabs na yang ngo / /bdag tu grub pa'i lam gang la yang kha cig tu skyon yin pa ni de la yang gnas pa can ma yin te/ gang las phul du byung ba thob pa'i lam de nyid kyis gnod pa yin pa'i phyir ro zhes bstan pa ni/ nus yod na yang zhes bya ba ste/ gnod pa can ni lam mo/ /nus pa nyid ni nus mthu ste bag chags kyi 'du byed ces bya ba'i don to/ /de'i snying po can dngos la ni sems la ste/ nus pa yang skyes pa tsam gyis so/ /yun du ni rgyun gyis 'phel ba'i nus pa yin zhes bya bar sbyar ro/ /gal te dad pa zhes bya ba'i rgol ba la tshigs su bcad pa bshad pa ni gal te de yang zhes bya ba'o/ /ji ltar bdag tu 'dzin pa la sogs pa'i dri ma rnams ni goms pa las byung ba yin la/ 'bad pas bzlog par bya ba yin pa de bzhin du goms pas bdag tu gyur pa'i lam yang 'bad pas bzlog byar 'gyur ro zhes zer ba la 'tshe ba med pa zhes bya ba ni skyon med pa'o/ /skyon mthong na gsal ba'i 'bad rtsol 'byung ba yin na de yang yod pa ma yin pa'i phyir rgyu med pa yin no/ /yang dag don dang rang bzhin zhes bya ba'i tshig gnyis ni gsal bar mi nus pa nyid dang 'bad pa med pa la rgyu bstan pa yin no/ /phyin ci log gis ni mi mthun pa'i phyogs kyis te bdag tu 'dzin pa la sogs pa rnams kyis so/ /gsal ba la 'bad pa nyid dgag pa la rgyu 'gal ba'i yon tan mthong ba'i dmigs pa bstan pa ni/ de'i phyogs zhes bya ba'o/ /de bshad pa ni/ phyogs su lhung bas na zhes pa'o/ /bral ba'i chos can gyi dgra bcom pa la sbyor bar byed pa ni/ dngos po ma lus pa zhes bya ba ste/ skyon rnams la 'jug bzhin pa yang de la gnod pa kho na'i phyir 'bad pa med pa yin na/ yon tan rnams la 'jug bzhin pa lta ci smos zhes bya ba'i don to/ /nang gi chos ni 'gal ba can gyi khong khros 'dod chags bzhin du 'gag pa yin yang / yang skye ba yin no/ /bdag tu 'dzin pa yang nang kho na yin no zhes zer ba ni/ gal te 'dod chags dang zhe sdang dag ces bya ba'o/ /'dod chags dang khong khro dag nang gi yin pa'i phyir skyes pa ma yin yang 'on kyang rgyu gcig yin pa'i phyir ro/ /bdag tu 'dzin pa ni 'di dag gis rgyu yin la/ rgyu dang 'bras bu'i dngos po'i phyir yang yin gyi de bzhin du bdag tu 'dzin pa dang / bdag med par mthong ba dag ni rgyu gcig pa'am rgyu dang 'bras bu nyid kyang ma yin no/ /nang nyid dam phyi rol yang 'gal pa la khyad par du byed pa ma yin zhes bya ba'i don bstan pa ni/ bdag 'dzin rgyu gcig can zhes bya ba'o/ /gang kho na'i phyir 'dod chags la sogs pa bdag tu 'dzin pa'i rgyu yin pa de kho na'i phyir bdag tu 'dzin pa dang 'gal ba can bdag med bar mthong ba nyid la ma yin gyi/ de dang 'gal ba can ma yin pa'i byams pa la sogs pa ma yin par bstan pa ni de nyid kyi phyir zhes bya ba'o/ /chags par bya ba dang 'khrug par bya bar kun du rtog pa nyid gti mug ma yin nam/ de yang byams pa la sogs pas ldog pa nyid yin pa'i phyir 'di ji ltar lam ma yin snyam du sems pa la/ de yang zhes bya ba ste/ chags par bya ba kun du rtog pa yang bdag la phan byed pa nyid du 'dzin pa kho na yin la/ de'i phyir bdag tu 'dzin pa nyid ni gti mug yin no zhes bya ba'i don to/ /chos su 'dzin pa yang gti mug kho na ma yin nam de yang ji ltar 'jig tshogs la lta ba yin snyam du sems pa la/ nyon mongs pa can gyi zhes bya ba ste/ 'dod chags dang khong khro dag gi rgyu gti mug ni 'dir gnas skabs yin no/ /ma rig pa'i rkyen gyis 'du byed rnams zhes gsungs pas ma rig pa ni rig pa med pa tsam gyi gti mug ma yin nam/ /'jig tshogs la lta ba ni ma yin no zhes zer ba la/ /rig pa'i zhes bya ba'o/ /dgag pa ni mi bden pa dang chos ma yin pa la sogs pa bzhin du 'gal ba rjod par byed pa yin pa'i phyir med pa gti mug ma yin no/ /so sor rtog pa med pa'i rang bzhin gti mug la mthong ba dang 'gal ba yin no zhes zer ba ni/ so sor rtog med rang bzhin ni shin tu khyab par byed pa yin pa'i phyir mtshan nyid ma yin par bstan pa ni/ 'on te zhes bya ba'o/ /rig pa'i mi mthun phyogs nyid phyir/ / zhes bya ba 'di bshad pa ni/ rigs dang 'gal ba'i phyir zhes bya ba'o/ /mi bden pa nyid du mi 'gyur la zhes bya ba ni ji ltar rtogs par byed pa'i dngos po med pa'i phyir yang dag par rtogs par byed pa la bsam ba gzhan pa nyid kyis mi bden pa nyid 'dod par mi 'gyur ro zhes bya ba'i don to/ /med pa la yod par rlom pa ni yod do zhes rtogs par byed na bsam pa la mi slu ba yin yang / don de bzhin du med pa'i phyir brdzun du smra bar 'gyur ro zhes zer ba ni/ med pa la zhes bya ba'o/ /'di la yang sems pa zhes bya ba'i de ma thag tu yod do zhes bya bar rtogs par byed pa dang sbyar bar bya'o/ / snga mas ni mi 'dod pa thob pa dang / phyi mas ni 'dod pa mi 'thob par bstan pa yin no/ /bsam pa la yod pa nyid ni yang dag pa nyid dam yang dag pa ma yin pa nyid yin gyi don la yod pa ni ma yin no zhes bstan pa ni/ sgra rnams rnam rtag yul can te/ /zhes bya ba'o/ /byang chub sems dpa' rnams ni don ji bzhin pa'i bsam pa ji bzhin pa'i tshig ni bden pa yin la/ cig shos mi bden par bstan pa ni/ byang chub sems dpa' rnams la ni/ /zhes bya ba'o/ /dmigs pa'i phyir ni dmigs pa'i ngo bo yin pa'i phyir ro/ /de ni dbang po'o/ /rnam pa ni blo'i rnam pa'o/ /rdzas ni shes pa gcig go/ mtshungs par ldan pa ni re re zhes bya ba'o/ /shes par ni sgro 'dogs pa dang bral ba'i ngo bo'o/ /de las bzlog pa nyid du rtogs pa ni sgro 'dogs pa kho na yin no/ /gsungs pa gzhan yang bstan pa ni/ de bzhin du zhes bya ba'o/ /lta ba ni 'jig tshogs la lta ba yin la/ de yang bdag tu mngon par zhen pa'o/ /bdag tu mngon par zhen pa las byung ba'i phyir bdag tu mngon par zhen pa'i sgras de dang mtshungs par ldan pa ni ma rig pa nyid du brjod do zhes rgol ba ma rig yan lag ces bya ba ni yan lag bcu gnyis dang ldan pa'i ma rig pa'i yan lag yin la/ de rang gi ngo bor brjod par bya ba yin na nye bar btags pas ci dgos zhes bya ba'i don to/ /bzlog pa la ni tshad ma dag/ /ces bya ba ni 'jig tshogs la lta ba nyid ma rig pa yin zhes bya ba 'di la so sor rtog pa med pa'i skyon tshad ma yin no/ /khyad par gyi sgra zhes bya ba ni 'jig tshogs la lta ba'i sgra'o/ /ma rig pa la lta ba la dbye ba med pa yin na so sor rtog pa'i tshig dbye ba'i yul du mi 'gyur ro snyam du sems pa ni/ de bzhin du gal te zhes bya ba 'di dang 'gal bar byed pa yin pa'i phyir/ 'gal ba ni 'gal ba can gyi tshig yin no/ /bshad bya zhes bya ba ni spyi dang khyad par gyi rtog pas te ma rig pa zhes bya ba ni spyi yin la/ lta ba zhes bya ba ni khyad par yin no/ /gcig la yang tha snyad can nyid kyis tha dad par nye bar btags pa yin zhes bya ba ni gzhan gyi'o/ /de'i bdag nyid kyis kun du sbyor bar 'gyur zhes bya ba ni de las gzhan pa'i'o/ /de bzhin du bdag med pa mthong ba ni yul la sogs pa'i dbang gis stobs dang ldog bya ma yin pa nyid kyang bstan nas/ bdag tu lta ba la yang ldog bya ma yin pa'i rgyu mtshan nam/ srog chags kyi rang bzhin ni/ rang bzhin 'di yin 'di las te/ /rkyen gzhan gyis ni gol 'gyur zhing / /zhes bya bas bkag pa yin par bstan pa ni/ zad min te ldog pa ma yin pa ma yin pa'o/ /srog chags chos nyid phyir zhes bya ba ni srog chags kyi rang bzhin phyir ro/ /bdag tu 'dzin pa ni thog ma med pa'i bag chags tsam las byung ba nyid kyis srog chags kyi rang bzhin nyid du ma grub pa'i phyir ro/ /bdag tu 'dzin pa yang mi ldog pa nyid du dam bca' ba ni me dro ba ma yin no zhes bya ba bzhin du mngon sum dang 'gal ba can yin par bstan pa ni 'brel ba na ni mngon par phyogs pa yin na'o/ /gnyen po'i phyogs dang zhes bya ba ni bdag med par lta ba dang ngo / /bdag med par lta bas bdag tu 'dzin pa ldog kyang me dang phrad pa las zangs kyi sra ba bzhin du yang 'byung bar 'gyur zhes bya ba'i bsam pas dam bca' ba mngon sum dang 'gal ba yin no snyam du sems pa la nges pa ni bdag tu 'dzin pa yin la 'gal ba ni bdag med par lta ba ste/ de'i bdag nyid kyi 'brel pa med pa ni nye ba'i phyir ro/ /me dang phrad pa ni de ltar rtag tu gnas pa ma yin no/ /'brel na yang des ldog par thams cad du slar 'byung ba ma yin te/ me ldog pa'i thal ba bzhin du yang snga mar mi ldog pa'i phyir ro zhes bstan pa ni/ ma nges phyir zhes bya ba'o/ /de ltar bdag med par lta ba'i lam la bdag tu 'dzin pa dgongs pa can ma yin par bstan nas/ lam nyid yin no snyam du sems pa bsal ba ni/ gal te bdag bsgoms pas kyang zhes bya ba'o/ /bdag bsam par bya zhes bya ba la sogs pa'i sgras shes par bya ba dang dmigs par bya ba yin pa'i phyir tshig gnyis smos pa yin no/ /de'i phyir bdag bsam par bya zhes bya ba ni lus dang dbang po la sogs pa 'byung ba chen po ma gtogs pa 'byung ba chen po las tha dad par bsam par bya ba dang / blo la sogs pa las tha dad par dmigs par bya zhes bya bar yang 'dod do/ /yul 'dzin pa'i bdag nyid kyi ngo bo dang bral bas sems dga' ba'i ngo bo gcig pu'i bdag gi de kho na nyid bsgom bya yin par bstan pa yin no/ /gal te re zhig rigs pa can la sogs pa tha dad par smra ba po de skad smra na/ de'i bdag tu lta ba ni bdag gi ba'i rjes su 'jug pa kho na yin te/ chags pa'i ngo bo yin pa'i phyir/ /zhes bstan pa ni/ gang zhig bdag mthong ba zhes bya ba ni de la ni bdag la'o/ /'di zhes bya ba ni smra ba po'o/ /nga zhes bya ba ni chags pa'i bdag nyid kho nar mthong ba'o/ /bdag ni rigs pa nyid dang ma bral ba'i phyir der lta ba yang chags pa'i snying po can dang bral ba ma yin pa kho nar bstan pa ni/ rtag tu zhes bya ba ste chags pa yod na chags pa'i yul phan 'dogs par byed pa rnams la dang / de sgrub par byed pa rnams la yang sred pa yin la/ des de rnams la sdug bsngal dang rjes su 'brel pa'i skyon gyis cha bsgribs pa'i phyir de nyid mthong ba kho na mi 'thob pa ni chags pa dang bral bar mi 'gyur ro zhes bya ba'i don to/ /'on te bdag gnyis su med par smra ba ni bdag mthong ba 'ba' zhig la thar pa'i bdag nyid yin pa'i phyir/ thar pa'i lam de lta bur rtogs par byed na 'khor ba pa'i 'gro bar grub pa'i spros pa thams cad 'khrul pa'i phyir yin na/ 'di la yang gang zhig bdag mthong zhes bya ba nyid rjes su 'jug pa yin no/ /bde ba rnams dang bde ba sgrub par byed pa rnams ji lta ba de lta ba rnams la sred par byed pa yin la/ stobs dang ldan pa'i cha de nyid kyis 'khrul pa nyid kyi ngo bo'i skyon nam/ de'i mthong ba yang ma mthong bas 'dod chags dang bral ba nyid mi thob pa yin zhes bya ba'i don to/ /bdag tu lta ba las gzhan pa'i chags pa'i dbang du byas nas rgol ba ni/ gal te bdag tu mthong ba las/ /zhes bya pa'o/ /'di nyid la lan ni/ tha dad par mthong bas bud med gzhan la sogs pa la bdag la phan 'dogs par byad pa ni chags pa yin la/ gal te bdag la chags pa med na gzhan du mi 'gyur ro zhes bya ba'i don bstan pa ni/ gang zhig gzhan la zhes bya ba'o/ /bdag tu lta ba kho na chags pa'i snying po can yin par bstan pa ni/ gang zhig bdag la zhes bya ba'o/ /bdag tu lta bas bdag las gzhan pa la phan 'dogs par byed pa ni ma brtags pa kho na yin par bstan pa ni/ gal te bdag nyid chen po zhes bya ba'o/ /rang las byung ba'i 'bras bu med na gzhan la phan pa tsam la 'jug pa ni byol song rnams bu la spud pa bzhin du gti mug las byung ba kho na yin zhes bya ba'i don to/ /rang gi don la gnas pa zhes bya ba ni bdag tu lta ba'o/ /bdag kho na dga' ba'i ngo bo nyid kyis nye ba yin pa'i phyir sred pa ni ma 'ongs pa'i bde ba mngon par 'dod pa'i ngo bo ma yin nam snyam du sems pa la/ yon tan mthong ba zhes bya ba ste/ bud med la sogs pa de dang de sgrub par byed pa las byung ba'i bde ba de med na yid tsam gyis ni 'grub pa ma yin la/ mngon par gsal bar bya ba yang gsal bar byed pa med na mi 'byung ba'i phyir gsal byed dam de'i sgrub byed blang bya kho nar 'gyur ro zhes bya ba'i don to/ /bdag tu smra ba rnams la bdag tu lta ba yod na bdag gi ba bzhin du bdag dang gzhan du 'byed pa dang / phye ba las byung ba'i skyon du yang 'gyur ro zhes bstan pa ni/ bdag yod na ni zhes bya ba bdag dang bdag gir lta ba bzhin du rang dang gzhan du 'byed pa yang skyon gyi rgyur 'gyur ba kho na yin no zhes bya ba'i don to/ /'dzin pa ni 'dod chags so/ /bdag tu lta ba ni chags pa'i ngo bo yin par mi rigs pa ma yin nam/ sngon po'i snang ba bzhin du bdag gi dngos po'i snang ba yang chags pa ma gtogs par yod pa'i phyir de'i snang ba yod na de nyid dngos por 'gyur ba ma yin no/ /de bzhin du bdag gi bar chags pa yang ma yin te/ lta ba 'ba' zhig kho na yin la de 'ching ba ma yin no snyam du sems pa ni/ 'on te bdag kho na zhes bya ba'o/ /bdag kho na la chags pa zhes bya ba ni tshig gi la dor ba yin te/ sems rang rig pa ni bdag ma yin te/ skad cig ma nyid yin pa'i phyir ro/ /gzhan yang rnam par mi rtog pa'i shes pa'i rtogs bya ji ltar nyams su myong ba ni skad cig ma kho na yin no/ /'on kyang khar rtsang gi yang bdag nyid kho na yin/ de ring gi bdag nyid yin pa'i rnam par rtog pa'i rtogs bya yin na/ rnam par rtog pa yang de ltar 'jug bzhin pa chags pa las gzhan ma yin par bstan pa ni/ nges par bdag la zhes bya ba'o/ /bdag tu rtog pa nyid bdag la chags pa 'dor ba yin gyi bdag ni ma yin no/ /des na rnam rtog yongs su bor ba'i phyir 'dod chags dang bral ba med pa ma yin la/ bdag yod pas thar pa med pa ni ma yin no snyam du sems pa la/ nyes med bdag la chags pa ni bdag la tshad mas grub pa nyid du blo la yod pa yin na blo de kho na chags pa yin te/ tshad ma la sogs pa med na bdag med pa bzhin du 'gyur ro zhes bya ba'i don to/ /bdag dang bdag gir lta ba las gzhan pa nyid chags par khas len pa ma yin nam/ de yang 'khor ba'i rgyu yin pa'i phyir skyon can dor bya yin no snyam du sems pa ni/ 'on te bdag dang zhes bya ba'o/ /'dir zhes bya ba ni khas len pa la'o/ /gal te chags pa skyon bcas na/ /zhes bya ba'o/ /tha dad pa khas len na yang 'dod pa cung zad kyang grub pa med par bstan pa ni/ de las cir te cung zad kyang med do zhes bya ba'i don to/ /tha dad pa'i chags pa ni dor bar nus pa kho na yin no snyam du sems pa ni de spong ste chags pa'i'o/ /tha dad pa'i chags pa yang yul gyi skyon mthong ba kho na las 'dor ba yin gyi gzhan du ma yin par bstan pa ni/ sngon byung med par zhes bya ba'o/ /skyon gzhan gyis ni skyon gzhan gyis te rang gi skyon gyis zhes bya ba'i shugs kyis skyon can ma yin zhes bya ba ni bdag gi yul la'o/ /bde ba'i rgyu zhes bya ba ni bdag gi ba'i rgyu la'o/ /chags pa ni bum pa la sogs pa'i dngos po bzhin du 'dod pa dang zhe sdang dag gis len par byed pa'am/ 'dor bar byed pa ma yin nam/ de la yul gyi yon tan dang skyon la brten pa yin no snyam du sems pa la/ 'dod dang sdang sogs spangs pa ste/ /yul gyi yon tan dang skyon dang rjes su 'brel pa dang zhes bya bar sbyar ro/ /yul gyi yon tan dang skyon de dag mthong ba med pa ni 'dor ba ni yul gyi yon tan mthong ba la sogs pa dang / skyon mthong ba las zhe sdang mi 'dor ba mi 'byung ba yul gyi yon tan dang skyon mthong ba'i rgyu mi skye ba'i ngo bo ni phyi rol gyi bum pa la sogs pa'i yul rnams la yon tan dang skyon mthong ba las nye bar len pa dang 'joms pa'i chags pa'o/ /yul ni bdag dang bdag gi ste de'i dngos po nyid de yon tan dang ldan pa zhes bya ba dang sbyar ro/ /de med pa'i phyir ni yon tan dang ldan pa med pa'o/ /de'i phyir/ rigs pa 'di chags pa ma yin par bstan pa ni zhen pa zhes bya ba'o/ /phyi tshul gang yin min zhes bya ba 'di gsal bar byed pa ni/ chags yon tan gyi chags min gyi/ /zhes bya ba'o/ / rigs pas brjod nas rnal ma la sbyor bar byed pa ni bdag dang bdag gi ba la ma tshang ba med pa'i yon tan mthong ba yin na bdag tu lta ba'i 'bras bu chags pa mi ldog par bstan pa ni/ ma tshang med rgyu zhes bya ba'o/ /'dod dang sdang sogs spong ba ni/ zhes bya ba 'di dang / de bzhin du/ nyes med bdag la chags pa dang / /bral ba'i rgyu yang yod ma yin/ /zhes bya ba 'dis kyang / chags yon tan gyi chags min gyis/ /zhes bya ba'i don rtogs pa'i phyir/ ma tshang med rgyu de la ni/ /'bras bu gang gis zlog par byed/ /ces bya ba'i dgongs pas bsdu ba'i tshigs su bcad pa'o zhes bya ba'o/ /kho bos ji ltar bshad pas ni des rtogs pa'i don ma yin no/ /nyes med bdag la zhes bya ba 'dis bdag tu lta ba dang chags pa dag tha mi dad par dgongs pa yin la/ ma tshang med rgyu zhes bya ba ni tha dad par dgongs pa yin no/ /chags pa skyon dang ldan pa nyid yin pa ni sdug bsngal gyi rgyu yin pa nyid kyis sdug bsngal gyi rten yin no/ /de 'di bdag la yang sdug bsngal dang 'du ba can nyid min pa'i phyir/ 'dod chags dang bral ba mtshungs pa yin no/ /bdag ni bde ba dang sdug bsngal thams cad sgrub par byed pa'i shes pa dang de'i 'bras bu za ba po yin la/ de'i phyir bdag kho na bzhin du yin la/ chags pa yang bdag gir lta ba'i yul nyid yin pa'i phyir/ 'dod chags dang bral ba'i yul du mi 'gyur bar bstan pa ni/ skyon yang gang zhig mthong zhes bya ba'o/ /bdag kyang sdug bsngal sgrub par byed pa'i shes pa po dang za ba po nyid yin pas 'dod chags dang bral ba'i yul kho nar 'dod pa ma yin nam/ de ltar yin na 'di'i ngo bo gzhan med pa'i phyir thar pa 'dod pas ji ltar bdag shes par bya ba dang 'dod par bya ba dang dmigs par bya ba zhes bya ba yin/ dor bya nyid du shes par bya ba yin na bdag med par lta ba thar pa sgrub par byed pa 'thob par 'gyur ro/ /bdag yod na zhes bya ba ni thams cad kyi shes pa po dang za ba po'i 'du ba can gyi rgyu yod na'o/ /chags pa la sogs pa bskyed bya sdug bsngal gyi bdag dang du ba 'ba' zhig yin gyi bdag ni sdug bsngal gyi rgyu yin te/ de yod na 'byung ba nyid du mi shes pa'i phyir ro snyam du sems pa ni 'on te 'di snyam du bdag gi zhes bya ba'o/ /de nyid zer ba ni/ gal te de med ces bya ba'o/ /'du ba can bdag yod na chags pa la sogs pa sdug bsngal gyi rgyu ji ltar yin/ de'i phyir skyon can du mi 'gyur te/ 'dod chags dang bral ba mi srid pa yin te/ yul med pa'i phyir ro/ /bdag sdug bsngal gyi rgyu yin yang dor bya ma yin pa ma yin nam/ 'dor ba ni sdug bsngal sgrub par byed pa yin la/ sdug bsngal dang 'brel pa ni sdug bsngal bsgoms pas yin te/ de ltar na sdug bsngal mi skye ba'i phyir bdag kyang de dang 'du ba can nyid dang bral ba yin no snyam du sems pa la/ sdug bsngal bsgoms pas zhes bya ba'o/ /bdag gi ba nyid kyi blos byas pa ni bdag mi 'dor ba'i yul nyid yin na bdag gi ba la yang mtshungs pa'i phyir/ sdug bsngal bsgoms pa 'dor ba'i rgyu ji ltar yin zhes bya ba'i don bstan pa ni/ bdag gi ba'i blo bcom pas 'dir 'dor bas zhes bya ba'o/ /de bcom na ji ltar bral ba yin yang len pa kho na yin par bstan pa ni zhes bya ba'o/ /bdag gi nyid kyi blo kho na de la med pa yin par mi rigs te/ de'i longs spyod kyi gnas ni lus yin la/ longs spyod sgrub par byed pa ni dbang po yin zhes smras pa'i phyir ro zhes bstan pa ni/ longs spyod kyi rten nyid du ni gzung ba la zhes bya ba ste/ sdug bsngal bsgom pa dang 'gal ba yin na/ bdag bzhin du bdag gi ba la yang 'gyur ro zhes bya ba'i don to/ /sdug bsngal bsgoms pas cir 'gyur na zhes bya ba 'dri ba'i don zer ba ni/ gal te bde ba'i rgyu nyid ni/ /zhes bya ba'o/ / de las bzlog pa ni sdug bsngal gyi rgyu nyid yod pa las so/ /lus la sogs pa rang nyid kyi blo khas len par grub pa 'ba' zhig ni ma yin gyi mngon sum gyis grub pa yin par bstan pa ni/ mngon sum yin zhes bya ba'o/ /ma'i ming can bzhin du lus dang dbang po la sogs pa rnams la bdag gi yin pa la/ bdag gi ma'i ming can la gnas pas sdug bsngal bsgoms pas sdug bsngal bcom pa thob pa yin no snyam du sems pa la/ 'du sogs 'brel pa las zhes bya ba'o/ /lus dang dbang bo la sogs pa kun du dmigs nas sdug bsngal bsgom pa bsnyad par byed la de la dmigs pa yang longs spyod kyi rten nyid la sogs pa'i ngo bo yin gyi de yang 'du ba la sogs pa dang 'brel pa ni bdag gi ba'i blo'i yul yin pa'i phyir/ sdug bsngal bsgom pa thob bzhin pa ji ltar bdag gir 'dzin pa'i blo dang bral ba yin/ longs spyod kyi rten la sogs pa blo nyid dang 'brel pa'i blo nyid kyis bdag gi ba'i blo yin pa'i phyir mthong du zin kyang ni sdug bsngal gyi rgyu nyid shes kyang ngo / /ma'i 'du shes ni mthong ba'i ma'i ngo bor sgro btags pas yin la/ sdug bsngal ni 'brel ba dang bral ba ma dmigs pa'i phyir sgro btags pa ma yin no/ /'on te phan 'dogs pa nyid kho na lus la sogs pa dang 'brel pa yin la/ phrad pa dang 'du ba la sogs pa nyid ma yin na de lta yin na bdag gi ba'i phan 'dogs pa'i blo'i rgyu mtshan thams cad la yin pa'i phyir de dang bral ba la sdug bsngal nyid ma mthong bas gtso bo nyid med pa'i phyir ro zhes bstan pa ni/ 'du ba la sogs med na yang / /zhes bya ba ste kun la zhes bya ba ni gtso bo med pa'i phyir zhes dgongs pa'o/ /gal te gtso bo gzhan gyis ci zhig bya ba dag gi lus dang dbang po la sogs pa nyid sdug bsngal gyi rgyu yin pa'i phyir bdag gi yin yang bdag gi blo'i yul du mi 'gyur te/ sprul gyis zos pa'i mngar mo bzhin du yin la/ de yang bdag gi blo kho na bdag gi ba ma yin par 'gyur ba yin no snyam du sems pa ni/ sdug bsngal bskyed phyir zhes bya ba'o/ /lus dang dbang po la sogs pa ni de ni gcig tu sdug bsngal ma yin te/ sdug bsngal kho na ma yin zhing phal che ba yang ma yin no/ / dug dang 'dres pa'i bza' ba ji lta ba yin par bstan pa ni/ gcig tu de ni sdug bsngal min/ /sdug bsngal kho na'am sdug bsngal phal che ba kho na ma yin du zin kyang bde ba'i ngo bo kho na phal che bar yod pa'i phyir la/ de lta na yang sdug bsngal gyis sun phyung ba yin pa'i phyir dug dang bcas pa'i bza' ba bzhin du blang bya ma yin pa kho nar 'gyur ro/ /lus mdzes pa yang mdze nad gcig pus skal ba ngan pa yin no zhes bya ba'i rigs pa las so snyam du sems pa la/ khyad par can ni sdug bsngal gyi cha yang med pas lhag pa ni gcig tu bde ba'i ngo bo yod pa'i phyir ro/ / de dang 'gal ba ni sdug bsngal gyi cha dang 'dres pa dang khyad par yod pa la dug dang bcas pa bzhin du chags pa dang bral ba nyid ni rgyab kyis phyogs par 'gyur ro/ /de med na ni bdag chags pa dang ldan pa dag ji ltar rnyed pa la 'jug pa yin par bstan pa ni/ ma rnyed na zhes bya ba ste/ 'dod chags kyis non pa khyad par can gyi bud med ma rnyed na mo tsam la 'jug pa yin no/ /rgyu'i stobs las zhes bya ba ni snga ma snga ma'i bde ba la goms pa'i dbang gis so/ /sdug bsngal gyi cha dang ldan pa kho na bde ba nye bar len pa ma yin nam/ 'gro sa gzhan med pa'i phyir ro/ /bde ba'i khyad par med pa'i phyir de la ltos nas rigs pa yin gyi shin tu ba'i sdug bsngal las grol ba'i bdag gi ngo bo la ltos nas ni mi rigs so/ /shin tu ba'i sdug bsngal las grol ba ni sdug bsngal bsgoms pas de kho na nyid mthong bar 'gyur ba yin no snyam du sems pa la/ bdag bsgom pa ni mi srid pa nyid do zhes bya ba la sogs pa nas/ de ni 'gar yang gzhan 'gyur phyir/ /mir zhes bya ba'i bar du'o// /don 'di kho na la rnam 'grel dang sbyor ba ni/ de nyid kyi phyir zhes bya ba ste/ sdug bsngal gyis byas pa'i ngo bo las gzhan pa kho na de med pas byas pa yin pa'i phyir de la ltos nas snga ma'i zhig pa kho na yin no zhes bya ba'i don to/ /gang gi zhes bya ba ni rnal 'byor pa'i'o/ /'dod pa ni chags pa'i yul lo/ /de zhes bya ba ni bdag go/ /de ni zhes bya ba ni rnal 'byor pa'o/ /gang gi bdag ste bdag gi rang gi ngo bo yin te/ chags pa yul yin la/ de'i ni rang gi ngo bo'i'o/ /de zhes bya ba'i bdag go/ / 'dod chags la sogs pas ni bdag la 'gar yang phan mi 'dogs pa ma yin nam/ 'o na ci zhe na/ /sbyor ba tsam yin la thar pa la ni de dang bral ba tsam yin no/ /de'i phyir bdag zhig pa thar pa ma yin no snyam du sems pa la/ skyon can zhes bya ba ni/ min zhes bya ba dang sbyar ro/ /de ldan bas ni 'dod chags la sogs ba dang ldan pas so/ /rang ni rang gi ngo bos so/ /bdag ni log pa kho na yin te de dang gcig pa nyid du mi 'gyur ba yin zhes bya ba'i don ni/ dbyug pa can ni dbyug pa min/ /zhes bya ba'o/ /gal te/ myong phyir de ni chags bral te/ /zhes bya ba ni rgol ba'o/ /de nyid sgrub par byed pa ni myong ba las ma yin zhes bya ba la sogs pa ste/ bdag gis 'dod chags la sogs par rang rig par yin na 'dod chags la sogs pa nyid kho nar 'gyur ba'i phyir thams cad gzhan rig kho na yin gyi rang rig pa ni ma yin no/ /de ltar bud med la sogs pa rig pas de'i ngo bo nyid du thal bar 'gyur zhes lan du zer ba ni/ bud med ces bya ba la sogs pa'o/ /de ltar na 'dod chags can ji ltar yin zhes zer ba la/ 'brel phyir zhes bya ba'o/ /rigs pa de dang ldan pa nyid yin na rnal 'byor pa yang de dang ldan pa nyid du 'gyur ro/ /de'i phyir rig pa yin yang 'dod chags med pa nyid du 'dod pa 'gal ba yin no zhes zer ba ni/ chags sogs myong bas rnal 'byor pa/ /zhes bya ba'o/ /grub pa'i mtha' bstan pa ni/ tha dad pa ni bdag las 'dod chags la sogs pa rnams 'du ba las 'dod chags can du 'gyur gyi/ phrad pa las ni ldan pa ma yin no/ /de'i bdag ni yid dang ldan pa yin zhing yid ni gzhan gyi bdag nyid yin la de la yod pa'i 'dod chags la sogs pa dang ldan pa dang 'du ba yin no/ /yang na rnal 'byor pa'i bdag gzhan gyi bdag dang ldan pa yin pas mi skye ba'i phrad pas de la yod pa'i 'dod chags la sogs pa dang yang ldan pa'i 'du ba yin no/ /des na khyad par med pa'i phyir khyod kyi rnal 'byor pa yang gzhan gyi 'dod chags dang 'brel ba las 'dod chags can du 'gyur ro/ /'du ba dang phrad pa la khyad par yod ces zer ba ni/ tha dad rtogs med ces bya ba'o/ /bdag gi ngo bo yang rang rig pa dang ma 'khrul ba yin na/ ji ltar tha mi dad par 'gyur ba yin pa bstan pa ni/ bdag ni rang bzhin zhes bya ba'o/ /bdag ni rig pa'i rang bzhin ma yin te/ thams cad kyang thams cad rig par thal bar 'gyur ro snyam du sems pa ni/ 'on te 'di ni zhes bya ba'o/ /lan ni gzung bya zhes bya ba'o/ /longs spyad par bya ba dang longs spyod par byed pa de dag gcig pa'i de nyid yin zhes bya ba 'di la dpe med par bstan pa ni/ ro sogs zhes bya ba ste/ longs spyad par bya ba las gzhan pa nyid longs spyod par byed pa de las kyang gzhan yin na/ de las kyang gzhan yin zhing de las kyang gzhan yin pa'i phyir thug pa med pa yin no zhes bya ba 'di ni skyon ma yin no/ /gang gi phyir 'bras bu dang rgyu nyid bzhin du gzung ba dang 'dzin pa nyid la thug pa med pa'i skyon med do/ /de lta bu'i dgongs pa ni gal te yul nyams su myong ba ma yin na rtags med pa'i phyir ji ltar longs spyod pa por rtogs par byed/ de nyams su myong na yang rang rig pa yin na ji ltar longs spyod par byed par rtogs pa'i thug pa med pa ma yin te/ longs spyod dang 'du ba can longs spyod pa po nyid yin pa'i phyir ro zhes zer ba ni/ /gal te de dang zhes bya ba'o/ /longs spyod kyi gzhi longs spyod pa po yin na gzugs la spyod pa'i yul nyid longs spyod pa por 'gyur bar bstan pa ni/ longs spyod nyams su myong las zhes bya ba'o/ /'jig rten gyi tha snyad ni bdag bzhin du yul nyid la yang blo'i gzhi nyid du mtshungs pa yin par bstan pa ni/ dmyal ba'i zhes bya ba'o/ /longs spyod par bya ba la yod pa'i longs spyod ni gzhan du mi 'thad pas longs spyod pa po rjes su dpog pa po yin no snyam du sems pa kho nas zer ba ni/ ci ste rjes su dpag bya de/ /zhes bya ba'o/ /gzhan gyis rig pa'i longs spyod pa po bsal nas rang rig pa nyid nye bar bsdu ba ni/ de'i phyir bdag ni rang rig pa'i rang bzhin nyid ces bya ba'o/ /ji ltar me long dang ba'am/ /ji ltar shel sgong dag pa la/ /de dang nyer gnas gang dang gang / /de la de'i gzugs brnyan rtogs/ /zhes bya ba'i rigs pas nye ba'i rung ba 'dzin pa'i phyir thams cad kyang thams cad rig par thal bar 'gyur ba ma yin no zhes bya ba'i don to/ /gnas skabs pa sdud pa ni/ gal te nges bdag ces bya ba'o/ /rang rig pa'i bdag nyid shel sgong bzhin du dang ba la/ tshon sngon po la sogs pa gzhan dang gzhan gyi gzugs brnyan nyid 'byung ba dang nub pa dang ldan pa yin gyi rtogs pa'i ngo bo la ni ma yin te/ mngon par shes pa'i yul yin no snyam du sems pa ni/ ji ste yang zhes bya ba'o/ /tshon sngon po la sogs pa dang tha mi dad par rig pa ni de kho na bzhin du tha dad pa mi rtag par 'gyur ro zhes bya ba'i don bstan pa ni/ bde la sogs pa tha dad phyir/ /zhes bya ba'o/ / tha dad pa'i sngon po dang bde ba la sogs pa dang tha mi dad par rig pa yang sngon po dang bde ba la sogs pa bzhin du tha mi dad pa'i bdag tu rig par byed pa ma yin par bstan pa ni/ bdag tu gyur pas ni tha dad pa'i sngon po dang bde ba la sogs pa rnams dang / de kho na bzhin du tha dad pas tha mi dad par rang bzhin gcig tu shes pa ma yin no/ /ci dang 'dra zhe na/ ji ltar de nyid ni tshon sngon po la sogs pa'i tha snyad pa ni khyad par ro/ /gal te rang rig pa tha dad par rig pa ma yin du zin kyang rnam rtog ni rig pa yin zhes zer ba ni/ rig pa rig pa zhes bya ba'o/ /rnam par brtags pa'i gcig pa nyid ni rang gzhan gyi bdag nyid la yang 'gyur ro zhes bstan pa ni/ de'i phyir zhes bya ba'o/ /'on te gzhan gyi bdag gzhan gyis rig pa ma yin pa kho na'o zhe na/ rig pa'i dngos po min na ni/ /zhes smos te/ gzhan gyis gzhan gyi bdag mi rig na gzhan ni bdag med par 'gyur ro/ /rang dang gzhan gyi bdag dag phan tshun 'jug pa ma yin par rig pa'i phyir/ dbye ba yin na rang gi bdag la yang skad cig re re'i rig pa tha dad pas tha dad par 'gyur bar bstan pa ni/ de ni so sor rig ce na/ gang du'ang gcig pa nyid mi 'gyur/ /zhes bya ba ste/ gcig mi 'gyur zhes bya ba ni rgyun gcig la'o/ /snga ma dang phyi ma dag ni 'khor ba dang mya ngan las 'das pa'o/ /bshad pa'i tshigs su bcad pa nye bar bsdu ba ni de lta yin dang zhes bya ba'o/ /bshad pa gzhan bstan pa ni/ ther zug rtag pa nyid yin na/ zhes bya ba'o/ /de nyid la ni 'khor ba nyid la ste yongs su rdzogs pa'i phyir ro/ /der zhes bya ba ni ther zug tu gnas pa nyid de kho na la yongs su rdzogs pa'i phyir ro/ /sngar mthong ba ngo shes pa ni srid pa ma yin la/ srid na yang gang gi tshe dngos po yod pa de kho na'i tshe 'byung bar 'gyur te/ dngos po'i stobs las byung ba'i phyir ro/ /dus phyis ni ma yin te/ dngos po med pa'i phyir ro zhes bstan pa ni/ de'i rang bzhin yod pa la zhes bya ba'o/ /yul gyi stobs la mi rten pa bag chags las byung ba sngar mthong ba ngo shes pa tshad ma ma yin par bstan pa ni/ yul med par ni zhes bya ba'o/ /ther zug tu gnas pa yang 'gyur ba can ma yin pa'i phyir dang / dmigs pa'i rim pa med pa'i phyir mi rtag pa nyid du ma rtogs pa'i phyir rtag pa yin no zhes zer ba ni gal te ther zug rtag nyid ces bya ba'o/ /tshigs su bcad pa 'di nyid bshad pa ni/ /gal te ther zug ces bya ba'o/ /'gyur ba can ma yin pa nyid dang / dmigs pa'i rim pa med pa'i phyir zhes bya ba'i gtan tshigs gnyis po rtag pa nyid du sgrub par byed par 'dod pa ni 'khor ba dang mya ngan las 'das pa'i rim pa'i dmigs par 'dod pa yin na/ mi rtag pa nyid du 'gyur bar bstan pa ni/ de'i phyir dmigs pa rim pa dang ldan pa zhes bya ba'o/ /ma dmigs pa zhes bya ba ni ther zug tu gnas par ro/ /mtshungs pa nyid du dmigs pa yang / /zhes bya ba la sogs pa'i tshigs su bcad ba ni/ yang na mtshungs pa'i rang bzhin dmigs pa las snga ma dang phyi ma dang gcig nyid du zhes bya ba la sogs pas bshad pa yin no/ /bshad pa gzhan bstan pa ni/ yang na rtogs pa'i rang bzhin nyid kyis zhes bya ba ste/ sems kyi bdag nyid du gcig pa yin pa'i phyir rgyu tha dad pa ma yin zhing / sngon po dang bde ba la sogs pas kyang ma yin te/ dbye ba thams cad 'khrul ba can yin pa'i phyir la/ ma 'khrul pa nyid ni yod pa'am sems kyi ngo bo nyid kyang rung thams cad du thogs pa med pa'i phyir ro/ /rnam gcod med pa'i yod pa can/ /yul dad dus su dngos po gang / /rtag pa de ni khyab bdag 'dod/ /de phyir bdag ni khyab bdag brjod/ /ces bya ba'i don to/ /lan ni/ gal te de ltar na zhes bya ba ste/ 'khrug pa'i gnas skabs na tha mi dad par skyes pa'i ngo bo yin pa'i phyir snga ma'i ngo bo dus phyis ni de nyid 'jig pa yin no zhes bya ba'i don to/ /grol ba'i bdag kyang 'khor ba pa'i bdag kyang tha mi dad pa yin na ni 'khor ba pa nyid du 'gyur bar bstan pa ni/ de'i gnas skabs zhes bya ba'o/ /gal te grol ba zhes bya ba'i don la sogs pa'i tshig rkang pa gsum bshad pa ni/ gal te bum pa'i nam mkha' zhes bya ba'o/ /dbye ba med pa'i gnas skabs la bdag tu shes pa'i yul ma yin pa'i phyir bdag med pa'i ngo bo nyid du thal bar 'gyur bar bstan pa ni/ nam mkha' nyid du nye bar son pa zhes bya ba'o/ /'o na ni bdag med pa nyid du zhes bya ba ni bdag tu shes pa'i yul ma yin pa ni bdag ma yin pa'i phyir/ sems kyi ngo bo'i rtag tu'am khyab pa can yang ma yin te snang ba dang nye ba'i phyir ro/ /thag nye ba'i snang bzhin pa ni yul gzhan nam dus gzhan la ma yin no/ /de lta bu nyid ma yin na yang khyad par can du mngon par 'dod pa'i ngo bo yang de ltar 'gyur bar bstan pa ni/ rang gi rang bzhin tsam rig pa/ /zhes bya ba'o/ /gcig la mthong ba'i yod pa'i ngo bo'am sems kyi ngo bo ni gzhan la yang de nyid sngar mthong ba ngo shes pa ma yin nam snyam du sems pa ni/ 'on te bum pa la sogs pa zhes bya ba'o/ /sngar mthong ba ngo shes pa ni grol ba dang 'khor ba dag kyang gcig pa nyid du sgrub par byed pa bstan pa ni shin tu gsal bar bya zhes bya ba ste/ sngar mthong ba ngo shes pa med pa ma yin pa'i phyir ro/ /bdag go zhes bya ba la sogs pa nyams su myong ba'i yul ni yul 'khor ba po'i bdag ni grol ba'i gnas skabs na yang thams cad nyams su myong ba dang bu dang chung ma la sogs pa'i yul gyi tha snyad thams cad dang yon tan kun te shes rab dang yid gzhungs pa la sogs pa ldog pas de la chags pa'i rgyu mtshan med pa'i phyir med pa kho na yin no/ /de'i phyir rtog pa dang ldan pa 'di la don du gnyer bar ji ltar 'gyur zhes bstan pa ni kun ldog pa ni nyams su myong ba dang yon tan dang ngo bo chags pa'i rten zlog pa gang la grol ba'i gnas skabs na ldog pa gang yin pa de la ji ltar 'dod pa ste chags pa ji ltar bdag gir byed/ de chags pa ji ltar bdag gir byed de chags pa'i rgyu mtshan med na ji ltar chags pa yin zhes bya ba'i don yin zhing / chags pa'i yul ni 'di 'dra ba yang ji ltar gzhan 'dra bar 'dod ces bya ba'i don to/ /rdo ba dang ras bal la sogs pa la khyab pa can nam mkha'i bdag nyid de/ rang gi ngo bo gang yin pa de kho na bdag yin la/ tha snyad du thams cad ni dor bya dang blang bya la sogs pa ste/ de las 'das pa ni chags pa'i yul las bzlog pa yin no zhes bya ba'i don to/ /de 'dra ba zhes bya ba ni snga ma'i ngo bo las bzlog pa thar pa'i ngo bo la rtog pa dang ldan pa 'jug pa la bar du gcod pa yin te don du gnyer ba mi 'byung ba'i phyir zhes bya ba'i don to/ /bdag la chags pa ni mngon du byed par 'gyur zhes bya ba dang sbyar ro/ /grol ba'i gnas skabs na bdag nam mkha' bzhin du dngos po med par 'gyur bar mi rigs pa ma yin nam/ bdag tu shes pa'i yul yin pa'i phyir ro/ /'di rnams kyi bdag dang bdag gi 'di rnams zhes bya ba'i 'brel pa'am thun mong ba ma yin pa nyid ni 'ching ba yin pa ni bdag dang bdag gi zhes brjod pa yin la/ de ni thar pa la yod pa ma yin no snyam du sems pa la rnam pa kun du zhes bya ba'o/ /bdag go zhes bya bar rig pa 'di yang / de'i med pa kho na yin no/ /rmi lam mthong ba ma yin pa'i gnyid log pa grol ba'i dper byed do/ /yin na yang bdag go zhes bdag tu lta ba'i rnam pa ni 'brel pa'i rnam pa'am de dang thun mong ma yin pa'i rnam pa yang bdag tu 'dzin pa ni thams cad du chags pa'i ngo bo'i snying po can kho na yin no/ /de'i phyir yang bdag gi ba la mi thun mong ba la'am/ thun mong ma yin pa la yang chags pa 'dren pa yin te de med na rang nyid med pa'i phyir ro zhes bya ba ni kho bo'i bshad pa yin no/ /'grel pa mdzad pa ni gsal ba kho na yin no/ /bdag tu 'dzin pa yongs su 'dor ba yin na 'jug pa'i yan lag med do/ /gang gi phyir de yod na snga ma dang phyi ma gcig pa'i sdug bsngal can sgro btags nas de la sogs pa 'jug pa yin no/ /skad cig mar rig pa'i bdag nyid kyi rig pa ni 'jug pa'i yan lag ma yin pa kho nar bstan pa ni/ gal te 'di la bdag 'dzin zhes bya ba'i tshigs su bcad pa gnyis so/ /bdag tu 'dzin pa med kyang gzhan gyi don la 'jug pa yin no/ / bdag tu smra ba don med par bstan pa ni gzhan gyis phyed pa zhes bya'o/ /yun ring bde ba zhes bya ba ni mya ngan las 'das pa la dga' ba tsam gyis bdag gi ngo bo ni rtag tu gsal ba yin la/ de'i 'bras bu nyid kyis mi rtag pa'i bde ba yongs su 'dor ba yin no/ /med pa yang zhes bya ba ni/ the tshom za ba yod pa dang med pa'i thun mong ba nyid kyis med pa'i phyogs la 'jug pa ni med par yang srid pa'o/ /skad cig ma'i dngos po snang ba tsam la spre'u'i zla ba zhes pa dang sbyar ba yin no/ /de'i phyir de bzhin du bdag tu lta ba can ni bdag gi par chags pa ldog pa la 'bad pa dang bcas pa yin yang yon tan gyi cha mthong bas de la skyon du mthong ba bsgribs pa'i phyir mi rnyed pa kho na yin par bstan pa ni/ brtson yang zhes bya ba ste/ chags pa dang bral ba la 'bad pa yin yang / chags pa dang bral ba la gegs byed pa yin no/ /ci las she na/ yon tan cha brten nas gang la 'jug pa dang ldan pa'o/ /bdag kyang bde ba dang sdug bsngal sgrub par byed pa po'i ngo bo dang de'i 'bras bu'i za ba po'i ngo bos kyang chags pa dang bral ba'i yul yin pas dor bya kho na yin no snyam du sems pa ni/ gal te bdag la'ang zhes bya ba/ ngo bo gang gis bdag dor bya yin pa de kho na 'di'i ngo bo yin gyi/ ngo bo gzhan ma yin pa'i phyir bdag blang bya nyid ma yin par bstan pa ni/ da ni zhes bya ba ste/ ji ltar te rnam pa gang gis bdag 'dor ba ni dor byar byed pa'o/ /de ni zhes bya ba ni smra ba pa'o/ /blang bya la chags pa dang bral ba rnam pa gzhan ni med do/ /gtan tshigs de'i phyir sdug bsngal bsgom par bstan pa don med do/ /'grel pa mdzad pas ni rgal ba'i don/ /ji ltar yod pa de ltar min/ /zhes bya ba la sogs pas bshad do/ /bdag gi bzhin du bdag nyid 'dor ba yin no zhes bya ba'i don to/ /ci zhig 'dor ba yin zhe na/ chags pa 'ba' zhig 'dor ba yin/ / zhes bya ba'o/ /chags pa dang bral ba ni chags pa med pa ste/ bral ba'i sgra ni dgag pa'i don yin pa'i phyir ro/ /bdag la chags pa dang bral ba ni thar pa'i bde ba yin gyi bdag tu 'dzin pa yod pa la mi srid par bstan pa ni/ bde bar gnas pa ni zhes bya ba'o/ /da ni chags bral gang yin med/ / ces bya ba'i don bstan pa ni gal te bdag las zhes bya'o/ /'di la ni rgol ba la'o/ /smras pa ni rnam 'grel lo/ /de ni ji ltar bdag 'dor ba de bzhin du sdug bsngal bsgom pa don med pa ma yin no/ /ci las she na/ de'i phyir de dor ba'i phyir ro zhes bstan pa yin no/ /dor ba ni chags pa dang bral bar 'gyur ba ma yin te/ gzhan yod pa'i phyir ro/ /bdag ni dor ba nyid du mi nus so zhes bya ba brtags pa ni chags pa dang bral ba la yang mtshungs par bstan pa ni bdag la zhes bya ba ste/ ji ltar de med pa dang zhes bya ba dang sbyar ro/ /'on te chags pa nyid chags pa dang bral bar 'gyur ro zhes bya ba 'di la bstan pa ni de ni zhes bya ba ni chags pa'o/ /gzhan yang zhes bya ba ni chags pa dang bral ba'o/ /de ltar ni chags pa'i ngo bos so/ /zad pa dang phyogs gcig ces bya ba'i bdag nyid kun nam zhes bya ba'o/ /gcig ni cha shas med pa'o/ /gcig la yang yan lag can bzhin du phyogs gcig yod pa yin no snyam du sems pa la/ gang zhig ces bya ba ste/ de lta yin na yan lag can de yan lag re re la yongs su rdzogs pas tha dad pa kho na yin no/ /tha dad pa la yang tha mi dad pa'i ngo bo rig pa'i gnas skabs na yod pa yin par bstan pa ni/ de lta yin na zhes bya ba'o/ /ji ltar thug pa med pa yin zhe na/ gzhan dang gzhan brtags pas zhes bya ba'o/ /ngo bo gcig byung ba yin na ngo bo snga ma bor ba dang ngo bo gzhan byung ba zhes bya ba'i rnam pa 'di nyid rigs pa yin no/ /de ni ji ltar bdag 'dor ba/ /zhes bya ba la sogs pas bshad pa yin par bstan pa ni/ de'i phyir des ni zhes bya ba'o/ /rnam pa gang gis kyang zhes bya ba ni chags pa dang bral ba'i rang bzhin gyis so/ /rnam pa gzhan du sbyar ba ni gal te bdag la zhes bya ba'o/ /gang zhig ces bya ba ni de nyid ces bya ba dang sbyar ro/ /gang la chags pa dang bral ba med pa de 'dor ba min zhes bya ba dang sbyar ro/ /yul la ltos nas don med pa yin no/ /rnam pa gzhan gyis kyang byed pa ma yin te/ med pa zhes bya ba'i don to/ /gal te don med pa yin na de las kyang cir 'gyur zhe na/ sdug bsngal bsgoms pas ni zhes bya ba'o/ /sdug bsngal bsgom pa ni mngon du 'dod chags dang bral ba'i phyir ni ma yin te/ 'on kyang sems la dbang du 'gyur bar bya ba'i phyir yin la sems dbang du bya ba yang skyes bu'i gnas skabs thams cad na yod pa'i phyir sdug bsngal bsgom pa bstan pas ci dgos te ma bstan kyang zhes pa'i phyir ro zhes bya ba'i don bstan pa ni/ sdug bsngal bsgoms pas te nye bar bstan pas kyang ngo / /de dag ces bya ba ni skyes bu'o/ /sdug bsngal nyid ni sdug bsngal sgrub par byed pa'o/ /sdug bsngal dang 'dres par rnam par shes par byed pa ni nges par byed pa'o/ /de ni zhes bya ba ni ngo bo'o/ /sngar yang ni bstan pa'i snga rol du yang mngon du byed pa kho na yin gyi de las chags pa dang ma bral na nye bar bstan pa las kyang chags pa dang bral bar mi 'gyur te/ gang gi phyir de yang de'i rjes su smra ba yin no/ /sngar chags pa dang bral ba'i yul med par bstan nas/ da ltar ni chags pa dang bral ba sgrub par byed pa nyid ma yin par bstan pa yin no/ /kho bo cag gis ni 'du byed pa'i sdug bsngal nyid du rtogs nas blang bya dang dor bya dang bral ba'i phyir ste'u dang tsan dan dag gi 'dra ba nyid ni chags pa dang bral bar 'gyur ba'i phyir de'i bsgom pa bstan pa yin no/ /chags pa dang bral pa'i rgyu ma yin pa nyid kho na bstan pa ni/ 'dis ni 'dod chags dang bral bar 'gyur ba ma yin no/ /'di nyid gsal bar byed pa ni sdug bsngal sgom pa zhes bya ba'o/ /sdug bsngal gyi tshogs su mngon sum gyi nges pa yin yang bde ba 'dod pas dbang byas pa'i yid can ni dran pa med pas nye bar zhi ba las mi ldan pa ma yin nam/ dga' ba'i ro yis tshim rnams kyis/ /zhi ba'i sems kyi bde gang yin/ /nor la brkam pa de dang der/ /rgyug pa rnams la ga la yod/ /gzhan yang rgya mtsho'i ska rags can gyi sa gzhi ma lus pa dang / ba lang dang rta la sogs pa thob kyang nor la brkam chags can ni de rnams kyis kyang tshim par mi 'gyur la/ 'on kyang bde ba ni nor rnyed pa yin no/ /bde ba la sbyor bzhin pa ni de tshol ba la sogs pa'i rnam par rtog pas sdug bsngal ba kho na la bde bar mngon par sems pa'i phyir sdug bsngal bsgom pa drang srong rnams kyis bstan pa yin no snyam du sems pa ni/ gal te rab tu zhi ba'i ste/ 'khor ba'i bde ba la sred par mi 'gyur ba ni sdug bsngal bsgoms pas zhes bya ba dang sbyar ro/ /sdug bsngal bsgom pa yin yang bdag tu mngon par zhugs pa can ni bdag gi ba la chags pa ldog par mi 'gyur zhes bstan pa ni/ 'dir ni zhi ba bdag tu lta ba zhes bya ba'o/ /bdag tu lta ba la yang kha cig tu sdug bsngal gyi rgyu nyid du mthong ba las 'dod chags dang bral ba nyid snang ba kho na ma yin nam/ rigs pa de nyid kyis thams cad du de bzhin du 'gyur ba srid do snyam du sems pa la/ /gal te de la nyes pa yis/ /zhes bya ba'o/ /bdag tu lta ba la chags pa dang bral bas ldog par snang ba yin gyi mthong ba dang 'gal ba srid pa ni tshad ma ma yin no zhes dgongs pa'o/ /chags pa'i nus pa ni bdag dang bdag gir 'dzin pa'o/ /bdag tu 'dzin pa dang 'brel pa'i shes rab ldog pa'i don du 'phags pa'i zhes bya ba ni khyad par ro/ /gzhom pa dang nye bar len pa dag 'joms pa'i rgyu dag med par lta ba yin gyi bdag tu lta ba ni ma yin no zhes bya ba'i don to/ /bdag shes pa ni khams gsum po'i skyon mthong ba can gyi chags pa dang bral ba ma yin nam/ de ji ltar gcig la nyes pas blo ldog pa yin snyam du sems pa la/ blang dang dor bya'i khyad yod na/ /zhes bya ba'o/ /bdag tu smra ba ni khams gsum po'i gdon mi za bar dor bya yin yang nye bar blang bar bya ba la brten nas gdon mi za bar blang bya yin zhing / nye bar blang bya yang bdag gam de'i chos rnams kyang yin la/ de 'di yang nye bar blang bya'i nus pa ni byas pa'i phan pa gzhan las de'i nus pa'i sa bon yin zhes brjod de/ de la phan 'dogs par byed pa yin yang rung ma yin yang rung de la ltos pa'i nye bar blang bya'i nus pa de nyid ni gnod pa byed pa po la rgyab kyis phyogs par nye bar 'gro ba'i zhe sdang gi sa bon yin par yang shes par bya'o/ /gal te thams cad du mi 'gyur ba de lta na ji ltar 'gyur zhes zer ba la bstan pa ni/ rnam grangs kyis zhes bya ba'o/ /de'i rgyu can gyi 'dod chags dang zhe sdang dag de kho na bzhin du 'byung ba yin par bstan pa ni/ 'dod pa dang sdang ba zhes bya ba'o/ /bdag med par lta ba po'i blang bya'i ma yin pa'i phyir nus pa ma yin zhing / rgyab kyis phyogs pa yang ma yin pa'i phyir gang zhig gang gi sa bon yin zhes bstan pa ni/ bdag med par lta ba la ni zhes bya'o/ /bdag tu lta ba can yang khams gsum po la chags pa dang bral ba ma yin nam/ yul gzhan yang med na ji ltar 'ga' zhig la ltos pa'am ldang bar byed pa yin snyam du sems pa la/ skyon med yul can zhes bya ba'o/ /bdag la chags pa yod na khams gsum po de la phan 'dogs par byed pa'i cha dang ldan pa la chags pa dang ldan pa nyid mi 'thob pas/ bsam med bdag la chags pa yis/ /ji ltar rnyed bzhin zhes bya ba la sogs pas bstan pa yin no zhes bya ba'o/ /skyon dang ldan pa nyid las rgyab kyis phyogs pa ni bdag gi ba bzhin du bdag la yang yin no zhes zer ba ni/ 'on te skyon bcas zhes bya ba'o/ /bden te/ so so'i skye bos yon tan mthong bas skyon bsgribs nas len par byed la/ sdug bsngal bsgom pa'i gdams ngag dang ldan pa'i mnyam par gzhag pa ni/ skyon mthong nas yon tan len pa yin no snyam du sems pa la/ yon tan mthong ba las byung ba'i/ /zhes bya ba'o/ /nyes pa mthong ba ni bsgom pa las byung bas nyes pa mthong ba'o/ /so so'i skye bo rnams kyi lus dang dbang po la sogs pa rnams la chags pa ni yon tan mthong ba'i bskyed bya ma yin te/ rjes su 'gro ba dang ldog pa med pa'i phyir ro/ / zhes bstan pa ni/ de yang zhes bya ba ni chags pa'o/ /de ltar yon tan mthong ba las skyes pa ni ma yin no/ /byis sogs la yang zhes bya bas ni ldog pa med pa'o/ /yon tan las byung ba yang ma yin te/ ldog pa med pa kho na'i phyir zhes bstan pa ni/ skyon ldan la yang zhes bya ba'o/ /rjes su 'gro ba med par bstan pa ni/ med phyir zhes bstan pa'o/ /gzhan dag la ni gzhan gyi lus dang dbang po la sogs pa'o/ /yon tan dang ldan pa'i bdag gi ba la med pa'i phyir yang rjes su 'gro ba med par bstan pa ni/ bdag gi ba la'ang zhes bya ba'o/ /gal te yon tan mthong ba las byung ba ma yin pa de lta na cis bskyed pa yin snyam du sems pa la bdag gi blo bcom pas 'dir dor ba yin gyi bzlog pa min zhes bya ba'i dgongs pas 'on kyang bdag gi ba zhes bya ba'o/ /chags pa bzhin du bdag gi ba'i blo la yang rjes su 'gro ba dang ldog pa med par sbyor bar byed pa ni/ de nyid kyi phyir na zhes bya ba'o/ /de yang ni bdag gi ba'i blo'o/ /de'i phyir yon tan mi mthong bas ni skyon mthong bas spong ba yin zhes bya bar sbyar te/ bdag med pa mthong ba kho na las spong ba yin no zhes bya ba'i don to/ /bdag gi ba'i blo dang chags pa dag gis slar yang yon tan mthong ba'i bskyed bya nyid yin par bstan pa ni/ gzhan yang yod min yon tan ni/ /sgro 'dogs zhes bya ba'o/ /chags pa'i rgyu ni bdag dang bdag gir 'dzin pa yin la/ de dang 'gal ba ma yin pa sdug bsngal bsgom pa sgrub pa yin gyi de'i 'bras bu chags pa la gnod pa ma yin no zhes nye bar bsdu ba ni/ de'i phyir gcig nyid ces bya ba'o/ /'grel par ni yon tan mthong ba ni skyon mthong ba dang 'gal ba can du bstan pa ni/ zhen pas zhes bya ba'o/ /ldog bya chags pas bzlog bya ma yin pa yang skyon mthong ba ni ldog par byed pas ldog pa kho na yin par bstan pa ni/ gnod byed de nyid ces bya ba ste// ldog bya chags pa'i bskyed bya nyid ldog byed la yang mi 'jug pa'i mtshan nyid yin no/ /de la cir 'gyur zhe na/ de lta yin na zhes bya ba ste/ skyon du lta ba ldog pa yin no zhes bya bar sbyar ro/ /rang bzhin ni bdag ma yin pa'i lus la sogs pa yin la/ skyes bu ni bdag yin zhing / de dang bye brag ni dbye ba ste de yongs su shes pa las grol ba yin te/ de yongs su ma shes pa ni de dang 'gal ba'i phyir ro/ /de yongs su mi shes pa yang chags pa la sogs pa'i sgrub byed yin pa'i phyir 'khor ba'i rgyu nyid yin par bstan pa ni/ rtogs pa dag pa'i zhes bya ba'o/ /'di la lan du/ gzhan dang gzhan don gnyer zhes bya ba la sogs pa ni 'grel pa mkhan gyi'o/ /bden mod kyi bdag tu smra ba rnams kyis sdug bsngal gyi shes pa chags pa dang bral ba ma yin te/ 'on kyang bdag med par lta ba yin no/ /lus dang dbang po la sogs pa 'dus pa bdag ma yin pa la bdag tu 'dzin pas na bcom pa nyid du 'dod pa ma yin no/ /de'i phyir de ni de la bdag ston pa ma yin no/ /'di dag ma yin te/ 'o na ci zhe na/ 'dod pa dang / sdang ba dang / 'bad pa dang bde ba dang / sdug bsngal shes pa ni rtags can yin te/ 'dod pa la sogs pa ni 'bras bu yin pa'i phyir brten pa yin gyi lus ni rten ma yin te/ byis pa la sogs pa'i skabs kyi dbye bas mi rtag pa'i phyir ro/ /gzhan gyis nyams su myong ba gzhan gyis dran pa ma yin la/ ma dran na mtshams sbyor bar byed pa ma yin te/ gang gi phyir snga ma dang phyi ma'i nyams su myong ba dag mtshams sbyor ba ni dran pa dang lhan cig yul gcig nyams su myong ba ste/ rim gyis don du mar mthong ba gcig tu rtogs par 'gyur ba yin la de bzhin du skyes pa'i byis pa'i skye ba'i dang po la skye ba snga ma la goms pa'i bde ba dang sdug bsngal sgrub par byed pa la dran pa'i rgyun gyis dga' ba dang 'jigs pa la sogs pa'i 'bras bu las skye ba gzhan la byung ba rjes su dpog pa yin no zhes bya ba la sogs par sems pa ni ji ltar sdug bsngal gyi shes pa thar pa'i yan lag ma yin pa'i phyir ma bstan pa ni/ shes par sla ba'i phyir yang nye bar bstan par bya ba ma yin la/ de bzhin du bdag dang tha dad pa'i shes pa yang ngo shes pa bstan pa ni/ gzhan dang gzhan zhes bya ba rigs par mthong ste/ gnas skabs kyi rjes su 'jug pa'i phyir ro/ /chags pa ni gcig nyid du mthong bas ma yin gyi/ 'on kyang tha dad pas mthong bas yin par bstan pa ni/ chags min bdag la chags pa ste/ / zhes bya ba ste/ dmigs pa ste longs spyod kyi nang gi yan lag ni nye ba'i sgrub byed dbang po la sogs pa rnams so/ /tha dad par mthong ba ni mi rtag pa nyid du mthong ba'o/ /tha dad pa yin te zhes bya ba ni ldog pa'o/ /de lta yin na thar pa med pa nyid de zhes bya ba ni tha dad par bstan pa tshad ma dang ma 'brel ba kho na yin no zhes bya ba'i don to/ /bde ba don du gnyer ba zhes bya ba ni bdag la chags pa yin pa'i phyir ro/ /gtso bo dang zhes bya ba ni snga na gcig pa yin na spros pa'i 'bras bu la gtso bo dang gcig par sems pa'o/ /rang nyid sems pa'i zhes bya ba'i phyed bshad pa ni/ gtso bo nang du zhugs pa zhes bya ba'o/ /yul nyid du gtso bo rjes su zhugs pa yod pa kho na zhes zer ba ni/ yul nyid du zhes bya ba'o/ /blo med par yang zhes bya ba ni spros pa'i snga rol na'o/ /phyed phyi ma bshad pa ni/ skyes bu rnams kyi 'dod pa yang / /zhes bya ba ste/ 'di yan chad 'di'i blo'i mngon par 'dod pa yang gtso bo las ma yin gyi 'on kyang thog ma med pa'i bag chags las yin no/ /gal te de lta na bde ba dang sdug bsngal la sogs pa yang de ltar 'byung ba'i phyir gtso bo ni mtho ris kyi rgyu ma yin no zhes bstan pa ni/ gal te thog med bag chags las/ /zhes bya ba'o/ /bag chags ni gtso bo'i rnam par 'gyur ba ma yin gyi 'on kyang rang rig pa bdag kho na'i rang bzhin yin no zhe na/ 'di la yang bstan pa ni/ de phyir rang rtogs ngo bo'i phyir/ /zhes bya ba'o/ /da ltar ba'i sdug bsngal rig pa ni kun du skyo ba sgrub par byed par dmigs nas bsgom pa las byung ba la yang de ltar srid par 'gyur ba bstan pa ni gang zhig da ltar zhes bya ba'o/ /zhe sdang yang chags pa dang bral ba sgrub par byed pa yin pa'i phyir skyon ma yin no zhes zer ba la/ chags bral ma yin zhes bya ba smos te/ chags bral ma yin pa ni chags pa med pa ma yin pa'o/ /ci las yin zhe na/ de tshe yang ste gang gi phyir da ltar gyi sdug bsngal gyi dus na yang gnas skabs gzhan gyi bde ba'i sgrub byed du 'dod pa'i phyir ro/ /sdug bsngal skye ba dang bcas pa 'gal ba can gyi rgyud la ji ltar gnas skabs gzhan tshol ba'i phyir/ 'dod chags skye ba yin snyam du sems pa la/ zhe sdang gi rgyu ste skye gnas ni sdug bsngal gang gi yin pa de'i dngos po ni zhe sdang ngo / /de srid tsam du ni sdug bsngal yod pa tsam du'o/ /gnas pa ni kun du gnas pa gang gi yin pa de lta bu ste/ de log na 'gal ba med pa'i phyir chags pa 'byung ba kho na yin no zhes bya ba'i don to/ /chags pa nyid kyis na zhes bya ba'i gang gi phyir gyi sgra ni gtan tshigs kyi don no/ /sdang ba dang ldan pa ni zhes bya ba'i ni'i sgra ni yang gi sgra yin no/ /thar pa 'di ni zhi bar mdzod/ /ces bya bar sbyar ro/ /gang gi phyir 'di ni thar pa ma yin te/ sdug bsngal rjes su 'jug pa'i phyir ro/ /de ni shin tu ba'i sdug bsngal ldog pa'i ngo bo yin pa'i phyir ro zhes bstan pa ni/ sdug bsngal dang ldan pas zhes bya'o/ /gal te sdug bsngal gyi skye bo chags pa dang bral ba ma yin la/ de'i sgrub byed kyang ma yin na de ci zhig ces bstan pa ni/ blang dang dor bya zhes bya ba'o/ /bdag med par lta bas des phan 'dogs par byed pa med pa'i phyir blang bya ma yin la/ gnod pa byed pa ma yin pa'i phyir dor bya ma yin te/ sdug bsngal gyi rgyu ste'u dang / bde ba'i rgyu tsan dan dag las mtshungs pa rnams kyi btang snyoms ni chags pa dang bral ba yin no/ /gnas skabs 'di ni goms pa rang dbang du gyur pa'i thar par 'dod pa yin no/ /'dis kyang phan 'dogs bzhin par ma mthong na ji ltar goms par byed pa yin zhe na/ 'di'i ma goms pa gang yin/ phan gdags bya dang phan 'dogs byed du zhen pa'o/ /ji ltar ma goms pa yin/ 'on te de med pa yin no zhe na/ de lta na yang ji ltar ma goms pa yin/ de'i phyir de ni gyi na'o/ /ji skad du/ bde bar gyur pa'am sdug bsngal bar ma gyur cig ces 'dod pa na/ nga'o snyam pa'i blo gang de/ /zhes gsungs pa'o/ /de ltar mthong na ldog pa ma yin zhing / ma mthong na ni grol ba kho na la gnas pa yin no/ /chos nyid dang bdag med pa dang / mnyam pa nyid ni bdag dang gzhan dag dor bya dang blang bya dag la yang chags pa dang bral ba'i don du ma yin zhing / gal te sdang ba'i don du yin na de lta na ji ltar mdo sde las sdug bsngal gyi sdug bsngal dang / 'du byed kyi sdug bsngal dang / 'gyur ba'i sdug bsngal nyid ces gsungs snyam du sems pa la/ 'du byed kyi sdug bsngal la dgongs nas zhes bya ba ste/ sdug bsngal dang 'gyur ba la yang sdug bsngal du gsungs pa gang yin pa de ni 'du byed kyi sdug bsngal nyid la dgongs pa kho nas yin gyi dgongs pa gzhan gyis ni ma yin no/ /de lta na de nyid ni zhe sdang gi rgyu yin no zhe na/ de yang ste 'du byed kyi sdug bsngal nyid rkyen las skyes pa ste/ rten 'brel yan lag bcu gnyis yin la/ rkyen las skyes pa dang bdag med par lta ba'i rten te dmigs pa'o/ /'du byed kyi sdug bsngal nyid de/ rten cing 'brel par 'byung ba dang bdag med pa la yang gnyis med pa 'di mthong ba ni 'du byed kyi sdug bsngal mthong ba ni sngon rol du yin la/ bdag med pa 'di la don med na byang grol gyi sgrub byed yin par bstan pa ni/ stong nyid lta bas grol bar 'gyur/ /zhes bya ba ste/ bdag med pa kho na grol ba'i nang gi yan lag yin te/ chags pa'i gnyen po yin pa'i phyir ro/ /'du byed kyi sdug bsngal nyid la sogs pa mthong ba ni de nyid kyi skyed byed yin pa'i phyir rten yin par bstan pa ni/ bsgom pa lhag ma de don yin/ /zhes bya ba'o/ /'du byed kyi sdug bsngal nyid sdug bsngal kho na yin pa 'di la shes par byed pa ni mi rtag las zhes bya ba'o/ /bdag med par mthong ba ni grol ba'i nang gi yan lag yin zhes bya ba 'di la/ sdug bsngal ni zhes bya ba smos te/ bdag med par mthar gsungs pa yin pa kho ni'i phyir de nyid kyi yan lag yin no zhes bya ba'i don to/ /'grel pa mdzad pa ni sdug bsngal nyid la dgongs nas bshad pa ni/ rtog gam ni rigs sam zhes bya ba'o/ /rnam par rtog pa'i sdud par byed pa ni/ 'grel pa dang mi mthun par 'chad pa yin par blta'o/ /bdag med pa nyid du mthong ba med na mi rtag pa nyid dang sdug bsngal ba nyid du mthong ba yang grol ba ma yin no zhes ldog pa las nus pa bstan pa ni/ chags bral min dang zhes bya ba ste/ bdag tu lta ba can de 'bras bus rgyu brjod pa'i phyir sred ldan ni chags pa dang ldan pa ste/ bdag la bdag gi ba la 'dor ba dang len par rtsom pa dang ldan pa ni 'khor ba kho na yin gyi grol ba ma yin no/ /skyes bu nyid ni 'di dag thams cad la de ltar lta ba la bdag gi ba med cing de la chags pa yang rtsom pa med pa ma yin no/ /de'i phyir ji ltar bdag tu lta ba can grol ba ma yin par brjod snyams du sems pa ni/ ji ste 'gyur na yang zhes bya ba'o/ /gal te za ba po ma yin na yang de las cir 'gyur zhe na/ bdag kyang med ces bya ba ste/ bya ba la sogs pa'i ngo bo dang bral ba yod pa tsam ni nam mkha' bzhin du bdag gi ngo bor mi 'gyur ba'i don to/ / rig pa yang gzhan yin la rig par bya ba ni bdag yin no zhes lta ba 'di la gzung ba thams cad kyang rig par thal bar 'gyur te/ khyad par med pa'i phyir ro zhes bstan pa ni thams cad rig par thal lo zhes bya ba'o/ /rig par bya ba med par khyad par med pa'i phyir bdag kyang zhes bya ba'o/ /'dzin par byed pa ma yin la gzung bar bya ba yang ma yin zhes bya bar khas len na yang so sor snang ba gsal bar 'gyur ba ma yin te/ mngon sum dang 'gal ba'i phyir ro/ /de'i phyir snang ba ni gnyis su med pa yin gyi med pa yin no zhes bstan pa ni/ de'i tshe sna tshogs gnyis med pa/ /zhes bya ba'o/ / so sor snang ba tsam nyid rtag pa'i phyir bdag gnyis su med pa ma yin te/ nye ba'i rang rig pa la rtag pa mi rigs pa'i phyir ro zhes bstan pa ni bdag ces bya ba yod par mi 'gyur te zhes bya ba'o/ /mngon sum gyis so zhes bya ba ni rang rig pas so/ /gal te bdag med na bdag dang bdag gi zhes bya ba'i 'jig rten la ji ltar gnod pa med pa'i shes pa yin zhe na/ de phyir grol 'dod ces bya ba ste/ gang gi phyir bdag tu lta ba can grol ba ma yin pa de'i phyir/ thog ma med pa'i rgyud de rgyun gang gi yin pa de la thog ma med pa'o/ /rgyud kyang de yin la rigs mthun pa yang de yin no/ /de gang gi sa bon yin pa ni sems can du lta ba'i 'o zhes bya ba 'dis yul med pa la yang khyad par can gyi sa bon yin pa yod par bstan pa yin no/ /bdag med pa bsgom pa la ni gzhan gyi bag chags can gyi rgyud la de'i bag chags 'gal ba'i phyir bdag tu byed pa 'gags pa yin par bstan pa ni/ rtsa ba nyid nas dbyung bar gyis/ /zhes bya ba'o/ /bdag gi shes pa ni byang grol sgrub par byed pa lung las rtogs pa ma yin nam/ mngon sum gyis gnod pa ma yin te/ yul nye ba ma yin pa'i phyir ro/ /lung yang skyes bus byas pa ni don la mi 'khrul bas tshad ma yin te/ yid ches pas bstan pa'i phyir sngags dang tshe'i rig pa lta bu'o/ /de ltar yang dbang po las 'das pa zhes bya ba la sogs pa smra ba'o/ /skyes bus byas pa yang rgyu'i skyon med pa nyid kyis 'khrul pa med pa grub pa yin par bstan pa ni skyes bus ma byas pa yang zhes bya ba'o/ /bdag yod pa nyid du ma dag tu shes pa yin la bdag tu shes pa de yang thabs las byung ba nyid kyis thar pa ni 'brel ba can du 'gyur ro/ /dbang bskur ba la sogs pa'i cho gas dbyig pa gsum 'dzin pa dang / zhi ba ba'i 'dus byas pa'i lung ni de lta'i dngos po ni don la ma 'khrul ba yin la/ de la rgyu ni mngon sum la rang gi ngo bo'i snang ba dang / rjes su dpag pa la 'brel pa rtogs pa'o/ /'di la ni de gnyi ga med do/ /rab rib can gyi shes pa skyes bus ma byas pa yang tshad ma ma yin/ gnod pa can ma dmigs pa ni rung ba ma yin pa'i phyir ro/ /yid ches pas bstan pa yang ma yin te/ sngags dang tshe'i rig pa smra ba pos byas pa nyid la tshad ma med pa'i phyir la de dang 'dra ba gzhan gyis byas pa yin zhes bya ba la yang tshad ma med la/ tshad ma med pa nyid la rgyu mtshan na don dang 'brel pa med pa kho na yin par dgongs pa'o/ /bdag med par bstan pa dang 'dod chags la sogs pa 'gal ba bzhin du dbang bskur ba'i cho ga dang skyes bu'i sa bon la sogs 'ga' yang snang ba ma yin snyam du sems pa la bstan pa ni/ nus min ni nus pa med pa'o/ /sa bon na sogs grub cho ga ni mi skye ba'i chos nyid do/ /gang gi ched du zhe na/ skyes bu rnams mi skyed pa la ste grol ba sgrub byed ma yin par mngon par 'dod pa rnams til mar bskus pa la sogs pa rnams kyis sa bon la sogs pa rnams la mi skyed pa'i chos nyid mthong ba'i phyir ro/ /skyed pa dang 'gal ba can rnams til mar bskus pa la sogs pa la skye ba la 'gal ba med pa'i phyir dbang bskur ba la sogs pa'i cho ga la yang de kho na bzhin du skye ba dang 'gal ba ma yin du zin kyang las dang 'gal ba nyid du 'gyur ba kho na yin no/ /chos dang chos min zad byed pa/ /dbang phyug chen po'i dbang bskur sogs/ /zhes bya ba'o/ /'di ltar skyes bu lcid de yang dbang bskur ba'i de ma thag tu yang bar 'gyur ro snyam du sems pa la bstan pa ni/ sngar lci ba dbang bskur bas phyis yang ba yin pa'i phyir sdig pa 'phrog pa yin te/ sdig pa lci ba'i phyir ro zhes rgol ba yin no/ /dbang bskur bas lci ba nyid bsal ba yin te/ de yod na de med pas 'gal ba rtogs pa'i phyir brkam chags la sogs pa dang de 'du byed pa'i sdig pa yang lci ba yin te/ lus can ma yin pa'i phyir ro/ / yang na dbang bskur ni yang bskyed par byed pa yin la/ de yang lci ba spangs pa yin pa'i phyir de dang 'gal ba yin gyi sdig pa dang ma yin par bstan pa ni/ lci ba dang 'gal ba'i phyir yang ba zhes bya ba'o/ /yang ba ni 'bras bu 'gal ba dang / khyab par byed pa 'gal ba yin no snyam du sems pa ni sdig pa nyid kyis zhes bya ba'o/ /'gal ba khas blangs kyang bstan pa ni/ gzhan yang zhes bya ba ste/ lci ba ni sdig pa'i 'bras bu ma yin te mngon sum dang mi dmigs pa med pa'i phyir ro zhes dgongs pa'o/ /mi skye ba'i chos can gyi yang dbang bskur gyi cho ga dang skye ba 'gal ba ma yin no/ /gang dang 'gal ba yin snyam du sems pa la rgyu dang 'gal bas 'gal ba yin par bstan pa ni/ log shes te tshogs pa'i snying po can gyi bdag tu 'dzin pa yin la/ de las byung ba'i sred pa de nyid sems pa yin la/ de'i nus pa de nyid dman pa'i gnas kyi 'gro ba ni mngal la sogs par thob pa'i ngo bo'i skye bar 'gyur ba'o/ /de'i rgyu log pa'i shes pa des ni ste/ 'gal ba can gyi bdag med par lta ba bcad pa yin te skye ba med pa yin no/ /dbang bskur ba la sogs pa'i cho ga ni de dang 'gal ba can ma yin par zhes dgongs pa'o/ /'grel pa mdzad pas bshad pa ni gsal ba kho na yin no/ /dbang bskur ba la sogs pa dang bral ba 'byung ba chen po rnams skye ba'i rgyu yin la dbang bskur ba la sogs pa'i cho gas sel bar byed pa ma yin nam zhe na/ bstan pa ni de dag nyid ni log pa'i shes pa'i srid pa dang sems pa dag nyid kyi skye ba la nus pa yin no/ /gang gi phyir bdag tu mngon par zhen nas 'dod chags sam zhe sdang las log pa'i shes pa rtsom par byed/ dman pa'i gnas la sogs pa thob par byed pa yin gyi dbang bskur las bzlog pa ma yin la// dbang bskur dang log pa'i shes pa nyid 'gal ba yang ma yin no/ /log pa'i shes pas sred pa dang sems pa dag skye ba'i rgyu yin par mi rigs te/ las rgyu yin pa'i phyir/ las las 'jig rten sna tshogs skyes/ /zhes bya ba yin no snyam du sems pa la sems pa de dag ces bya ba ste/ sems pa'i las dang / bsam pa'i las zhes dgongs pa'o/ /nyams pa med pa ste ma tshang ba med pa'i ma rig pa dang / sred pa dang / las kyang zhes bya ba gsum pa gnyis tsam las 'byung ba'i phyir sred pa'i dbang nyid kyis zhes bya ba ni sred pa'i nus pa'o/ /skye ba snga ma las byas pa'i sbyin pa la sogs pa yang las nyid ma yin nam snyam du sems pa la de yang rang gi 'du byed pa la rag las pa yin la/ 'di nyid kyis kyang 'di dag gi rgyu yin gyi skye ba'i dngos kyi rgyu ma yin par bstan pa ni/ sngar gyi sems pa'i zhes bya ba la sogs pa'o/ /skye ba gzhan la 'byung bar 'dod pa ni byed par 'dod pa'i ngang tshul 'di dag yin pa'i phyir skye ba gzhan la byung ba'o/ /las ni dngos su zhes bya ba ni byed pa po'am/ byed pa yang ste 'dis yin pa'i phyir snga ma dag ni sbyin pa la sogs pa'o/ /de'i rgyu yin pa zhes bya ba ni rgyu'i rgyu yin pa'i phyir ro/ /log pa'i shes pa'i sred pa dang sems pa'i dbang gis 'gro ba yin par mi rigs pa ma yin nam/ 'gro ba ni bgrod par bya ba rtogs pa sngon du 'gro ba yin pa'i phyir la/ rtogs pa yang byed pa sngon du 'gro ba can yin pa'i phyir ro/ /yang na 'gro ba ni bgrod par bya bar ro/ /byed pa ni las kyi dbang po rnams so/ /rtogs pa'i rten ni sgra la sogs pa la dmigs pa la ste longs spyod la blo dang dbang po de ma thag yin pa'i phyir byed pa rnams nyid ni sems pa dag gi'o zhes zer ba ni/ de ni ma mthong ba las te de las gzhan du mi 'thad par rtogs pa las so/ /sems pa de nyid mthong ba ma yin te/ khyad par la tshad ma med pa'i phyir ro/ /bstan bcos kyi rjes su 'jug pas kyang khyad par gyi sems yin na bdag cag gi 'dod pa'i rjes su 'brang ba yin na sems pa de dag ni ma yin te/ 'on kyang dge ba bcu rnams dang mi dge ba rnams kyang bcu kho na yin no zhes zer ba ni/ rnam pa bcu nyid do zhes bya ba ste/ ma mthong ba de yang dbang bskur ba la sogs pa 'gal ba'i cho gas zhig pa'i phyir thar pa yin no/ /'gal bar yang khyad par can gyi lung las grub pa yin no/ /de khas mi len na sems pa de dag kyang mi 'grub po zhes zer ba ni/ ma mthong zhig phyir zhes bya ba'o/ /ma mthong ba de 'du byed pa las thog ma med pa'i byed pas bskyed pa'i bdag gi chos yin zhes bya ba de bzhin du gzhan yang sna tshogs par 'gyur na/ 'di sems pa'i ngo bo nyid du 'phangs pa zhes bya ba'i don to/ /'di la lan ni/ yod dang med pa'i zhes bya ba ste/ byed pa skyed pa la yid kyi blo kho na'i nus pa mthong ba yin no/ /dbang rnams re re la gnod kyang / /yid blo la gnod yod ma yin/ /'di 'gyur na ni de dag kyang / /'gyur ba dag tu mthong ba yin/ /zhes bya ba'i rigs pa ni/ yod dang med pa'i rjes 'jug phyir/ /zhes bya ba 'dis bstan pa yin no/ /ma mthong ba yin na shugs kyis ma mthong ba ma yin par bstan pa ni/ gzhan gyi ma yin zhes bya ba ste/ lung gi stobs kyis khyad par rtogs pa ma yin zhes pa'i don to/ /de dag ni byed pa rnams te dbang bskur ba la yang blo yod pa'i phyir ro/ /yod pa ni rgyun gyis 'jug pa'o/ /cis mi 'gro ba ni mngal gyi gnas su cis mi 'gro ba'am cis ma rtogs pa'o/ /blo'i bskyed bya'i byed pa rnams yin par ni bden mod kyi ma mthong ba de'i lhan cig byed pa ni dbang bskur gyis gnod pa de'i phyir de rnams lhan cig byed pa ma tshang ba'i phyir skye ba gzhan du skyed par byed pa ma yin no snyam du sems pa la/ 'dzin pa ni 'jug pa la 'dzin pa'o/ /'dzud pa ni mi 'jug pa'o/ /'khrugs pa ni rnam par 'gyur ba nyid do/ /'gog pa ni zhig pa'o/ /de dag ni byed pa rnams so/ /sems pa'i dbang gis ni blo'i dbang gis te/ med par 'gyur ba dang sbyar ro/ / gang gi tshe zhe na/ dbang sogs byas ma thag pa kho na'o/ /ma mthong bas lhan cig byed pa'i rgyu la gnod pa byed pa yin zhing blo la nus pa med na skye ba gzhan bzhin du mi 'gyur ro/ /blo nyams pas na zhes bya ba ni mthong ba'i lhan cig byed pa'i gnod pa ste 'di yang rgyu nyid la log par rtogs pa'i phyir/ blo tsam yod kyang byed pa rnams la khyad par med par thal bar 'gyur ro zhes dgongs pa'o/ /zhing dang / chu dang / sa bon gyi 'dus pa bzhin du yongs su gyur pa'i bye brag la ltos nas dbang bskur ba dang blo dang ma mthong ba'i phung po la nye bar gnod pa yin na/ 'bras bu ma yin no snyam du sems pa ni/ shi ma thag tu zhes bya ba'o/ /yongs su gyur pa la ltos pa'i rgyu yang zla ba phyed pa dang zla ba dang po la sogs pa la ltos pa ma yin no zhes bstan pa ni/ gal te de nyid ces bya ba'o/ /ma mthong bas bskyed pa'i lus dang dbang po dang rig pa la sogs pa ni ji ltar yod la/ de med na med pa ma yin nam/ de'i phyir lus dang dbang po la sogs pa kho na bzhin du blo mtshams sbyor ba can ma yin no snyam du sems pa ni/ 'on te de lta na ni blo zhes bya ba'o/ /snga ma ni blo'i bskyed bya de med na mi 'byung ngo zhes sems pa yin la/ da ltar ni ma mthong ba'i bskyed bya de med pas mi 'byung ba yin no snyam du sems pa ni zhes bya ba ni khyad par ro/ / mi 'gyur zhes bya ba ni byed pa rnams su mi 'gyur ba'i phyir grol ba yin no/ /'di la yang lan du dri ma rnams kyi ste/ bdag tu 'dzin pa'i chags pa la sogs pa mtshams sbyor ba'i rgyu rnams dang / ma mthong ba gzhan gyis kyang blo mtshams sbyor bar byed pa kho na yin no/ /de rnams te dri ma rnams sngags dang rgyud la sogs pa'am dbang bskur bas nye bar gnod pa'i phyir nus pa med pa yin na 'tsho ba'i gnas skabs nyid na yang nus pa med par 'gyur bar bstan pa ni de rnams zhes bya ba'o/ /dbang bskur ba yin na yang dri ma rnams kyis mtshams sbyor bar mthong ba yin no/ /de lta na dri ma rnams nyid ma mthong ba las sam ma byung ba yongs su gyur pa'i khyad par las 'byung ba ni shi ba yin na slar mi 'byung ba yin te/ ma mthong ba med pa'i phyir ro snyam du sems pa la/ 'grib pa ni gnyen po'o/ /'phel ba ni rang gi phyogs so/ /'phel na ni skyon rnams so/ /de las cir 'gyur zhe na/ nyes rgyun rang gi sa bon gyi rgyu can ni rigs mthun pa sngon du 'gro ba can yin gyi ma mthong ba'i 'byung ba chen po la sogs pa tsam sngon du 'gro ba can ma yin pa/ dbang bskur ba la yang ldog pa med pa ni gnyen po 'phel na skyon rnams 'grib pas rang gi phyogs rgyas pa ste/ 'phel pa'i phyir rang gi sa bon gyi rgyu can yin zhes bya ba ni 'grel pa mdzad pa'i ste/ tshul bzhin ma yin pa yid la byed pa [(]'phal [,]'phel [)]na zhes bya ba dang sbyar ro/ /dbang bskur ba la sogs pa'i cho gas thar pa yin du zin kyang bdag ni ma yin te/ rtag pa nyid kyis 'khor ba la sogs pa'i 'bras bu'i rim pa mi rigs so zhes bstan pa ni/ rtag pa ltos pa med pa'i phyir/ /zhes bya ba ste/ ltos pa med pa ni 'bras bu gcig skyed par byed pa'i dus nyid na 'bras bu gzhan skyed par rung ba nyid kyang yod pa'i phyir rim gyis bskyed pa 'ba' zhig kho na ni 'gal ba ma yin gyi byed pa dang yang 'gal ba yin no zhes bya bar sbyar ro/ /gang gi zhe na/ 'dra ba'i bdag nyid do/ / gang na zhe na/ mi byed pa dag ces bya ba ste/ mi byed pa'i ngo bo ni byed pa'i dus su yang yin la/ des ni mi byed pa kho nar rigs pa yin no zhes dgongs pa'o/ /don 'di bstan par 'dod nas rtag pa'i phyogs slong par byed pa ni/ gal te bdag med pa mthong ngo zhes bya ba la sogs pa'o/ /bcings pa dang thar pa dag la gzhan nyid du rgol ba khas len pa ni/ dag pa gang yin zhes bya ba'o/ /tha snyad du gcig pa nyid du bstan pa ni/ de lta yin na zhes bya ba'o/ /longs spyod pa'i dus na yod pa kho na byed po'i dus nyid du za ba po nyid du 'gal ba yin par bstan pa ni/ rgyu dang 'bras bu zhes bya ba'o/ /byed pa dang longs spyod pa dag kyang bdag de las tha dad pa yin yang de dang 'brel pa'i phyir byed pa po dang za ba por yang 'gyur ba zhes zer ba la/ de dag las tha dad na zhes bya ba smos te/ tha dad pa ni dbye ba ste de'i bdag nyid med pa'i phyir byed pa po dang / za ba po ma yin te/ de'i rang bzhin ma yin pa la yang de ltar ma rtogs pa'i phyir ro/ /'on te de dag byed pa'i phyir de lta bu nyid yin no zhe na/ nus pa yang zhes bya ba'o/ /byed pa po nyid yin na rim gyis bskyed pa ma yin te/ sdod pa ni mi rigs pa'i phyir ro/ /byed pa po nyid ma yin na yang byed pa po yang ma yin no zhes bkag pa'i phyir nus pa grub pa ma yin no/ / gzhan gyis nyams su myong ba gzhan gyis mi dran pa ma yin nam/ mi mthun pa'i phyogs las ldog pa gcig pa nyid kyis khyab par dran pa ni gcig nyid du rtogs par byed pa yin no/ /de bzhin du gzhan gyis byas pa gzhan za ba ma yin te/ byas pa 'jig cing ma byas pa 'ongs par thal bar 'gyur ba'i phyir byed pa po nyid longs spyod par grub po/ /dbugs la sogs pa yang bdag med pa bum pa la sogs pa gang med pas med pa yin zhing / yod na yang rtogs par byed pa yin la/ mi mthun pa'i phyogs las ldog la mthun pa'i phyogs med pa'i phyir de las ni ma yin no/ /de'i phyir rjes su 'gro ba la ma 'khrul ba bzhin du ldog pa la ma 'khrul bar yang go bar byed pa yin la/ thos pa nyid ni ldog pa la mi 'khrul ba ma yin te/ mthun pa'i phyogs la yang med pa'i phyir ro/ /'dus pa can mal cha dang stan la sogs pa gzhan gyi don du mthong ba yin la/ mig la sogs pa yang 'dus pa can yin pa'i phyir gzhan gyi don yin no/ /gzhan yang 'di las 'dus pa can yin no/ /bzlog pa yin na de yang gzhan gyi don yin la/ de yang de bzhin yin pas thug pa med pa'i phyir sgrub par byed pa'i nus pa ma yin no/ /de'i phyir mi mthun pa'i phyogs la yang med pa la gnod pa can ni bdag dang bcas pa nyid du sgrub par byed pa yin no snyam du sems pa la/ gzhan gyis ni nyams su myong ba can gyis dran pa yin la/ byed pa po gzhan longs spyod pa'o/ /sogs pa'i sgras ni dbugs la sogs pa dang / nus pa can la sogs pa yang gzung ngo / /de rnams ni bdag med pa mi mthun pa'i phyogs la gnod pa can ma yin no/ ci las she na/ 'ga' yang dran pa med pa'i phyir/ /zhes bya ba smos so/ /dran pa ni nyams su myong ba dran pa'i dus na yod pa gcig bus khyab par dmigs pa ni ma yin te/ gang gis rgyud gzhan la ste/ med pas med pa yin par rtogs par 'gyur ba yin/ /med pa dag lhan cig yod pa tsam gyis khyab par grub pa yin te/ yod pa'i rgyun sngon du 'gro ba can yin pa'i phyir ro/ /dran pa'i byed pa po'i cha la nyams su myong bar byed pa po'i cha rjes su 'jug pa ma yin nam zhes zer ba la brten pa ni/ myong las te/ nyams su myong ba'i khyad par la dran pa ste/ ma brjed pa zhes dgongs pa ste/ nyams su myong ba'i bag chags kyis skyed pa dran pa zhes bya ba'i don to/ /bdag tsam yang zhes bya bas mi dran pa ma yin te/ gzhan gyis yang nyams su myong ba thams cad dran par thal bar 'gyur ba'i phyir ro/ /bdag kyang nyams su myong ba'i bag chags kyis dran pa yin la/ nyams su myong ba'i bag chags dang bcas pa'i sems ni skad cig re re 'jig pa'i 'bras bu dang rgyur gyur pa yin na shugs kyis bdag 'thob pa ma yin no/ /dbugs la sogs pa yang thos pa nyid bzhin du ldog pa ma nges pa yin te/ mthun pa'i phyogs la med pa yin na mi mthun pa'i phyogs med pa'i phyir log pa nges par ma yin no/ / de med pa nyid ces bya ba 'di phyogs med pas the tshom mi ldog pa'i phyir ro/ /de yang mthun pa'i phyogs yod pas mi mthun pa'i phyogs yod par khyab par byed pas ldog par byed pa yin gyi mi mthun pa'i phyogs la ma mthong ba can gyis ldog pa ma yin gyi/ 'on kyang bsgrub bya phyin ci log pa'i chos dang 'gal ba yin la/ de yang mi rtag pa yin pa'i phyir bdag las bzlog pas dbugs la sogs pa dang / de bzhin du 'gal ba ni ma yin no/ /'dus pa can mal cha la sogs pa la 'dus pa can gzhan gyi don gyis khyab pa yin gyi the tshom 'dzin par 'dod pas thug pa med pa yang ma yin no/ /gang gi phyir du ba ni 'bras bu nyid kyis me rtogs na 'bras bu ma yin pa yang rtogs byed ma yin zhing thug pa med pa yang ma yin no/ /byed pa dran pa'am longs spyod kyang dran pa po'am longs spyod pa po rten med na mi 'byung ba ma yin nam/ 'byung ba ni 'byung bar byed pa po la ltos pa'i phyir ro snyam du sems pa la/ dran par byed pa po 'ga' zhig ces bya ba smos so/ /rang dang gzhan dag gi nyams su myong ba dang las dag la khyad par med pa na ma yin te/ khyad par gang gis dran pa dang longs spyod par 'gyur/ 'bras bu dang rgyu nyid dang cig shos nyid kyis khyad par yod pa'i phyir ro/ /gzhan nyid kyang bag chags las byung ba'i dran pa la gegs byed pa ma yin te/ gcig nyid yin yang de med na mi 'byung ngo zhes bstan pa ni/ gal te gzhan gyis zhes bya ba ste/ nyams su myong ba gzhan nyid kyang dran pa la ltos pa'i phyir bdag la yod pa zhes gzhan gyis zhes bya ba ni khyad par ro/ /ji ltar rang dang gzhan dag gi nyams su myong ba nyid kyis sam gzhan nyid kyis khyad par med par dran pa yin la/ de bzhin du bdag nyid dang yang khyad par med par 'gyur ro/ /skyes bu re re zhing bdag rnams kyi gcig pa nyid la khyad par med pa yin no/ /nyams su myong ba po dang dran pa po'i ngo bo dag la khyad par yod pa'i phyir dran pa nges pa las nyams su myong ba por nges pa ni rnam par smra ba la gtan tshigs nges pa yin pa'i phyir rigs pa yin la/ bdag tu smra ba la ni ma yin te/ rtag pa nyid du khas len pa'i phyir ro/ /rtag pa nyid ni rgyu med pa nyid kyis rnam par dbye ba dang 'gal ba can gyi dbye ba med pas khyab pa yin par bstan pa ni/ yid la tha dad ces bya ba'o/ /zhag snga ma la dmigs pa'i don rnams la zhag phyi ma la bdag 'di mthong bar 'gyur ro zhes mthong ba po'i dran pa po dag gi gcig pa nyid du rjes su 'brel ba ni de mthong ba med kyang 'gyur ro snyam du sems pa ni/ bdag gis mthong ba zhes bya ba'o/ /bden te/ bdag gcig yod na de ltar mthong bar mi nus pa'i phyir de mthong ba sngon du 'gro ba can dang rjes su 'brel pa ma yin par bstan pa ni/ skyon 'di dag la 'ang zhes bya ba'o/ /'di la ni gcig la'o/ /tshad ma skye ba ni mthong ba yod pa'o/ /bdag yod pa nyid kyi phyir mthong ba med kyang de ltar shes pa ni ma yin no/ /'di yang gzhal bya rnams tshad ma'i dbang yin pa'i phyir de bstan pa ni/ bdag yod kyang zhes bya ba'o/ /rang gi rtogs pa'i ngo bo'i bdag ni nye bar rtogs pa'i ngo bo yin pa'i phyir de lta bu nyid du rig pa ma yin par bstan pa ni/ snga ma'i ngo bor de nyid ces bya'o/ /rjes su 'brel pa kho na tshad ma yin zhes zer ba ni/ dran pas zhes bya ba'o/ /ma yin te zhes bya ba ni rgol ba dgag pa'o/ /ci las she na/ rjes su 'brel pa ni mngon sum gyi tshad ma ma yin te/ nye ba ma yin pa'i yul can yin pa'i phyir ro/ /rjes su dpag pa nyid la yang ma yin te/ rtag pas skyes pa ma yin pa'i phyir ro zhes bstan pa ni/ tshad ma min zhes bya ba'o/ /nye ba nyams su myong bas sad pa'i thog ma med pa la sogs pa'i rjes su 'brel pa'i bag chags ni sems kyi rgyun gyi lhan cig byed par 'gyur/ de'i phyir shugs kyis bdag thob pa ma yin par bstan pa ni/ dran pa nyid ces bya'o/ /ji lta ba kho na'i log pa'i bag chags ni snga ma dang phyi ma'i nyams su myong ba dang dran pa dag gcig pa nyid du mngon par zhen par byed/ de lta bu kho nar da ltar ba dag la yang yin par bstan pa ni/ de dag ces bya'o/ /snang ba'i rgyun bzhin du mthong ba'i rgyun yang gcig tu 'dzin par 'bras bu nyid kyis de ltar mngon par zhen par byed/ de lta bu kho nar da ltar ba dag la yang yin par bstan pa ni/ de dag ces bya ba'o/ /snang ba'i rgyun bzhin du mthong ba'i rgyun yang gcig tu 'dzin pa'i 'bras bu nyid kyis de ltar mngon par zhen pa yin par bstan pa ni/ 'bras bu gcig nyid las zhes bya ba'o/ /'dis ni sna tshogs pa'i dbang po las byung ba mthong ba rnams dang / dran pa rnams kyang bag chags kyi bskyed bya'i rjes su 'brel par bshad pa yin no/ /gal te bdag med pa yin pa de lta na rjes su 'brel pa yang brdzun pa'i bag chags kyi bskyed bya yin pa'i phyir la/ sems kyi snga ma snga ma'i sems kyi dbang gi rgyun yin no zhes bstan pa yin no/ /bdag tu 'dzin pa dang chags pa la sogs pa rnams thog ma nas ma skyes pa'i phyir 'khor bar mi 'gyur ba zhig na yod pa yang yin no/ /de'i phyir 'khor ba ni gzhan du mi 'thad pas bdag grub pa yin no snyam du sems pa na// 'o na ji ltar zhes bya ba'o/ /bdag yod na bdag go zhes bya ba'i bdag tu 'dzin pa thog ma med pa'i bag chags las byung ba ni chags pa 'phel par byed pas 'khor ba'i rgyun byed pa yin par bstan pa ni/ bden pa bzhi la zhes bya ba'o/ /bdag go zhes bya ba ni bdag tu 'dzin pa ni 'khor ba'i rgyu yin nam/ re zhig rgyu med pa can ni ma yin te/ rgyu yang yul lam bag chags kyang yul gyi bskyed bya bzhin du bag chags kyi bskyed bya yang ldog byar mi 'gyur ro zhes bstan pa ni/ de nyid la ni zhes bstan pa'o// /de nyid ni bden bzhi la ste/ de ste de rnams sgro 'dogs pa'i rnam pa rnams so/ /'gal don de nyid ni yul gyi de nyid do/ /rjes su thogs pa can ni bdag gir byed pa gang yin pa de ni yul du ma'i lhan cig byed pa'i phyir stobs dang ldan pa nyid du bstan pa yin no/ /yang dag pa zhes bya ba ni lta ba phyin ci ma log pa ni yul dang bral ba gang las kyang 'byung bar log par lta ba la gnod pa yin te/ dngul du mthong ba la nya phyis su mthong ba lta bu'o/ /legs bsgoms ni shin tu nges par 'gyur ba'o/ /sgro 'dogs pa ni rgyu 'ba' zhig ma yin gyi 'bras bu yang de bzhin du yin par bstan pa ni/ yang dag pa ma yin pa sgro 'dogs pa nyid ces bya ba'o/ /rgyu'i yang dag pa ma yin pa'i sgro 'dogs pa bstan pa ni/ yang dag pa ma yin pa ni rang rig pa las tha dad pa'o/ /mngon sum gyis rig pa ma yin pa yang thar pa ji ltar yin/ de'i phyir bdag tu 'dzin pa dang sred pa dag kho nas dngos su lam brgyud pas kyang bdag med pa mthong ba dang 'gal ba yin la/ las dang lus dag gi nye bar len pa dag gis ni ma yin no/ /de'i phyir yang dag pa'i lta ba can yang de'i bskyed bya srid pa 'byung ba kho na yin snyam du sems pa la/ las dang lus dag gnas na yang / /zhes bya ba'o/ /rgyu gsum ni srid pa'i rgyu rnams te/ las dang lus dang / sred pa'o/ /de'i phyir sred pa med na 'di yod pa rgyu ma tshang ba'i phyir mi 'byung ba ni rgyu ma tshang ba'o/ /sred pa med pa bzhin du las la sogs pa med na 'ang sred pa yod na 'byung ngo zhes zer ba ni/ de lta na ni 'o na zhes bya'o/ /sred pa'i gnyen po ni bdag med par lta ba yin gyi las la sogs pa ni ma yin no zhes bstan pa ni/ gnyen po dag ni med phyir dang / / zhes bya'o/ /yod kyang sred pa'i sa bon ni las gzhan dang gzhan 'byung ba kho na yin par bstan pa ni/ nus pa med phyir ro zhes bstan pa'o/ /'byung bar 'gyur ba'i las la ltos nas bstan pa ni/ sred pa bzlog pa ma gtogs pa/ /zhes bya ba'o/ /las dang lus dang 'gal ba can nyid kyi bdag med pa las gzhan par lung las rtogs pa ma yin par bstan pa ni/ lung yang tshad ma ma yin no zhes bstan pa'o/ /zla ba'i dka' thub dang skra 'bal ba la sogs pa ni mi mthun pa'i phyogs su 'gyur ba ma yin nam zhes zer ba la bstan pa ni/ 'bras bu sna tshogs zhes bya ba ste/ bde ba dang sdug bsngal la sogs pa 'bras bu du ma yod pas gzhan du mi 'thad par brtags pa'i las kyi 'bras bu'i mthar thug pa ni dka' thub las te/ sdug bsngal la nye bar spyod pa'i ngo bo las 'bras bu nyid kyi mthar thug par 'gyur gyi gzhan du ni ma yin no zhes dgongs pa'o/ /nus pa tha dad ni rang gi ngo bo tha dad pa'o/ /shin tu rgal dka'i lam rnams byas pa ni/ bdag nyid rnam par smad pas bsrabs par 'gyur/ /bshags dang sdom par byed pa de dag gi/ /gtan du drungs nas bton pa ma yin no/ /zhes bya ba'i rigs pas byas pa'i las rnams kyang zad par khyed cag 'dod pa kho na ma yin snyam du sems pa la bstan pa ni/ 'bras bu de'i bskyed byar kho bo cag 'dod pa ni rnam 'gas zhes bya ba bdag nyid smad pa dang / bshags pa la sogs pas chung ba 'am gnas skabs kyi zad pa yin la/ rigs mthun pa can ni bskyed bya gzhan du mi 'gyur ro/ /dka' thub nyams su myong ba'i las gang gis bskyed bya'i 'bras bu chung bar 'gyur ba 'am/ zad par 'gyur gyi/ rigs mi mthun pa can ni ma yin no/ /rigs mi mthun pa'i las kyi bskyed bya chung bar gyur pa 'am zad par 'gyur ro zhes bya ba ni 'grel pa mdzad pa'i yin te de bstan pa ni/ las gang gis zhes bya ba'o/ /sdig pa'i 'bras bu skyed par byed pa'i nus pa ni bsod nams kyi nus pa dang 'dres pa yin te/ sdig pa'i 'bras bu nyams su myong ba kho na bsod nams kyi 'bras bu yang zad pas 'di dag gi gsal ba'i dbye ba la ltos nas mang po'i tshig yin no/ /'di rnams ci las yin zhe na/ dka' thub ces bya ba'o/ /dka' thub kyi nus pa kho na yin par ci las shes she na/ nyon mongs 'gas zhes bya ba'o/ /de ltar gyur pa yin yang nus pa 'dres pa rnams zad pas ci zhig bya ba la cha ni phra bar byas pa'o/ /de las kyang cir 'gyur zhe na/ spong 'gyur zhes bya ba'o/ /ci las yin zhe na/ nyon mongs pa med pa las sam/ nyon mongs pa bsrabs pa las spong bar 'gyur ba'o/ /gal te dka' thub ces bya ba la sogs pa bshad pa yang don 'di nyid kyi phyogs snga ma bstan par byed pa yin te/ gal te dka' thub kyi nus pa kho bos khas len pa de lta na de'i 'bras bu'i cha ni nus pa 'dres pa la sogs pa rnams kyis nyon mongs pa med par rtsa ba dang bcas par spong bar 'gyur zhes bya ba ni phyogs snga ma'o/ /gal te skra 'bal ba dang zla ba'i dka' thub la sogs pa'i nyon mongs pas gzhan dka' thub ni sbyin pa dang tshul khrims la sogs pa bsod nams dang ye shes dag rtsom pa dang / bshags pa dang sdom pa la sogs pa yin na khyod kyis smras pa de kho bo cag gi 'dod pa kho na yin te/ 'di nyon mongs pa ma yin pa'i cha'i ngo bo yin pa'i phyir ro zhes bstan pa ni/ gal te dka' thub ces bya ba la sogs pa'o/ /sbyin pa dang tshul khrims la sogs pas nyon mongs pa bzhin du/ me lnga bsten pa la sogs pa'i nyon mongs pa yang dka' thub kho na ma yin nam zhes zer ba ni nyon mongs nyid ce na zhes bya ba'o/ /las kyi 'bras bu 'di las blo sngon du 'gro ba'i rtsom pa'i nyon mongs pas sbyin pa la sogs pa dang bral ba'i las kyi 'bras bu kho na yin no/ /de ni sbyin pa la sogs pa nyid bzhin du las ston pa'i lung las las nyid yin no zhe na/ thar pa ma yin te/ las kyi 'bras bu'i rgyu yin pa'i phyir ro/ /shin tu ba'i bde ba 'di'i 'bras bu yin no zhe na/ 'di yang mi rigs te/ nyon mongs pa bzhin du shin tu ba'i bde ba yin par mi rigs so/ /bde ba bzhin du nyon mongs pa yang rgyun du gnas pa yin no zhe na/ de lta na 'khor ba bzhin du thar pa ma yin te/ nyon mongs pa'i rgyu yin pa'i phyir ro/ /de nyid las zhes bya ba ni sbyin pa la sogs pa can gyi dka' thub las so/ /gzhan gyis zhes bya ba ni bsod nams kyi ming can gyi dka' thub kyis te/ gang byas pa las ma lus pa'i 'bras bu des zhes bya ba ni gzhi mthun pa ma yin pa'i gsum pa'o/ /gzhan gyis zhes bya ba ni nyon mongs pa'o/ /las kyi 'bras bu nyid kho na gnyi ga la grub par bstan pa ni/ nyon mongs pa zhes bya ba'o/ /khas blangs pa dang 'gal bar bstan pa ni/ 'o na ni ci ltar zhes bya ba'o/ /ma nges pa zhes bya ba la skra 'bal ba la sogs pa'i sdug bsngal gyis de ci ste der mi 'gyur/ de'i phyir ma nges pa ni phyugs kyi nyon mongs pas so/ /gal te yang rgyal srid la sogs pa'i bde ba 'dor ba ni 'dod pa med pa nyid la goms pa'i bdag nyid du gyur pa'i phyir gnod pa can med na dmyal ba la sogs pa'i sdug bsngal yal bar 'dug pas goms pas bdag tu gyur pa kho na gnod pa byed pa yin par bstan pa ni/ ji ltar rgyal srid ces bya ba'o/ /btang snyoms kyi bdag nyid kho na thar pa yin gyi bde ba'i bdag nyid ma yin te/ 'dod pa la gnod pa yin no zhes zer ba la/ de'i phyir grol gnas zhes bya ba'o/ /khyod kyi ni yul rnams ldog pa yin te/ mi za ba'i lus can gyis ro langs pa ni ro yang gzhan mthong nas ldog pa yin pa'i phyir/ skyon dang 'gal ba can ni skyon las byung ba'i las ldog par byed par nus pa yin no/ /ci las she na/ bstan pa ni/ skye 'dod nges pa ste/ rgyu la gnod pa byed pas so/ /byas pa'i las ni kun du bsags shing kun du bsten pa ji ltar nyams par 'gyur/ de ni ma byas pa ma yin te/ gang gi phyir rgyu med pas ni 'gyur ba yin/ byas pa'i las ni 'gal bar byed pa med pa'i phyir de nyid shes pa la yang 'khor ba rgyas par byed pa kho na yin no/ /skye ba tha ma la las ma lus pa rnam par smin pa ni/ rdzu 'phrul gyi chos can no zhes gang smras pa yang / de 'di lung ma gtogs pa tshad ma gzhan gyis rtogs par 'gyur ba ma yin te/ skye ba du ma'i bde ba dang sdug bsngal rnam par smin pa khyad par can dang ldan pa'i las kyi 'bras bu lus gcig gis skad cig tsam gyis nye bar spyod par nus pa ma yin no/ /de lta yin na khyed kyi yang las zad pa ma yin te/ bshags pa la sogs pa zad par byed pa rnams nyid kyang lung ma gtogs par rtogs pa ma yin te/ sred pa phra mo yang las yod na yod pa kho na de'i rgyu yin pa'i phyir las las skyes pa phu ron la sogs pa'i 'dod chags dang / sbrul la sogs pa'i zhe sdang dang / phag la sogs pa'i gti mug yin pa'i phyir 'khor ba kho na yin no snyam du sems pa la bstan pa ni/ las las nges pa ma yin te/ 'on kyang tshul bzhin ma yin pa yid la byed pa bdag dang bdag gir 'dzin par mngon par 'dod pa las yin no/ /nyes pa rnams kho na las kyi rgyu yin par bstan pa ni/ skyon ldan zhes bya ba'o/ /'dod chags la sogs pa'i skyon rnams kho na las kyi nus pa can yin te/ 'dod chags can nam zhe sdang can las byed par mthong ba'i phyir ro/ / bdag tu 'dzin pa chags pa la sogs pa med na gzhan yod par byed pa nyid ma yin par bstan pa ni/ bzlog pas min zhes bya ba'o/ /bdag tu nga rgyal ba zad pa yang bde ba skye ba ma yin nam/ lus kyi bde ba ni yul yod na 'byung ba ma yin te/ yid bde ba la sogs pa bzhin du rnam par rtog pa 'byung ba ni gzhan du yang 'byung ba'i phyir ro/ /de la yang rjes su 'dzin pa'i bdag nyid la nges par mngon par 'dod pa'o/ /'dis ni sdug bsngal zhe sdang du bshad pa yin no/ /de lta yin na byed pa po 'gyur ba kho na yin pa'i phyir/ ji ltar thar ba yin snyam pa la/ log pa'i zhes bya ba ste/ 'dod pa ni bdag dang longs spyod par bya ba'i bdag gi ba la chags pa ste/ sred pa yin la de yang de 'dzin pa'i skye gnas yin la/ de med na mi 'byung ba kho na yin no/ /nyams su myong bzhin pa de la 'dod pa ni ma yin te/ ma 'ongs pa don du gnyer ba'i rnam pa can gyi rnam par rtog pa ni rnam rtog spangs pa la mi srid do/ /bsgom pa las byung ba'i bde ba yang rang nyid rig pa ni mngon par 'dod pa'i sgro 'dogs pa'i yul ma yin/ sdug bsngal ni bsgom pa las byung ba yin yang bdag tu 'dzin pa bsgom pa'i snying po can gyi bag chags dang ldan pa'i byed pa ni/ yul gyi bskyed bya yin pa'i phyir bdag tu 'dzin pa spangs pa'i bsgom pa can ni btang snyoms bsgom pa'i bdag nyid du gyur na mi skye ba kho na yin no/ /de'i phyir bde ba la sogs pa nyams su myong ba las byung ba'i skyon rnams ma yin no/ /bde ba nyid ces bya ba yang 'byung bar 'gyur ba la 'dug pa'i yul can du bsams nas bstan pa yin nam/ da ltar ba'i bde ba rang rig pa la ni mngon par 'dod pas don du gnyer ba'i rnam pa can ma yin te/ nye ba ma yin pa'i phyir ro/ /dus kyis 'byung bar 'gyur ba nyid don du gnyer ba yin zhe na/ rnam par brtag par bya bar thal bar bstan pa ni/ bde ba de yang zhes bya ba smos so/ /de'i phyir de bzhin du bdag tu lta ba ma yin pa dang / sdug bsngal bsgom pa dang / dbang bskur ba la sogs pa dang / skra 'bal ba dang / zla ba'i dka' thub la sogs pa yang thar pa sgrub par byed pa ma yin no/ /'on kyang srid pa'i rgyu yin pa'i sred pa'i rgyu bdag tu 'dzin pa dang chags pa la sogs pa yin par nye bar bsdu ba ni de'i phyir 'jig tshogs la lta ba'o zhes bya ba'o/ /skyob pa las te bden pa bzhi ston pa'i ngo bo las yin par ji ltar rtogs she na/ skyob las zhes bya ba smos te/ skyob pa nyid gzigs lam gsung ba zhes bya bas ni gshegs pa'i don la brten nas rang gi don dang gzhan gyi don gyi ngo bo'i 'bras bu phun sum tshogs pa dang / rgyu phun sum tshogs pa yang bstan pa yin la/ da ltar ni rtogs pa'i don la brten nas ye shes phun sum tshogs pa dang / de'i rgyu phun sum tshogs pa bstan pa ni de'i khyad par yin no/ /de kho na nyid mkhyen pa'i cha ni bsngags pa'i don nyid do/ /de'i phyir phyi rol pa rnams las lhag pa yin no/ /slar mi ldog pa'i don nyid la ni brtan pa'i ye shes te/ rgyun du zhugs pa dang / byang chub sems dpa' la sogs pa slob pa rnams las so/ /ma lus pa'i don nyid la dgra bcom pa mi slob pa rnams las kyang ngo / /de'i phyir ni zhes bya ba ni sgrub par byed pa las so/ /de kho na nyid la sogs pa mkhyen pa ni mngon sum yin la/ skyob pa las te bden pa bzhi ston pa'i ngo bo'i rtags kyi khyad par las rtogs pa'o/ /sdug bsngal la chos shes pa'i ngo bo shes pa dang / shes pa de las thob pa rnam par grol ba'i ye shes ni chos shes pa'i bzod pa yin la/ de dag gi bsgrub bya sgrub byed nyid kyis rjes su shes pa'o/ /de yang nga la yod ces shes pa ni rjes su shes pa'i bzod pa yin zhes bya ba'i mthong ba dang bsgom pa'i lam dang / spros pa rnams la the tshom med par ston pa ni khyad par rnams mngon du byed pa med na rjes su dpag pa tsam las 'gyur ba ma yin par bstan pa las ni zhes bya ba'o/ /gzhan dag kyang zhes bya ba'i grangs can la sogs pa yang ngo / /skad cig ma la sogs pa'i shes pa la rtag pa'i shes pa bzhin du 'khrul pa'i rgyu mi srid par bstan pa ni/ rtag pa nyid du zhes bya ba'o/ /de kho na nyid la sogs pa'i shes pa'i sgrub byed ni rdzogs byed yin la/ de bzhin du rang gi don gyi ye shes yongs su rdzogs pa dang ldan pa'i gzhan gyi don mkhyen pa yin la/ de la sbyor bar byed pa yang 'gyur bar bstan pa ni/ gzhan don mkhyen pa'o/ /de'i phyir zhes bya ba ni de kho na nyid la sogs pa'i ye shes sgrub par byed pa'i phyir yin la sbyor ba de nyid ston pa'i rgyu yin pa'i phyir ston pa'o/ /sbyor ba de las kyang brtse ba'o/ /gang yin zhe na/ gnas skabs thams cad du gzhan don ngor te gtso bo nyid do/ /de'i ngo bo'i brtse bas yin par ci las rtogs she na/ don grub ces bya ba'o/ /bde bar gshegs pa yin na 'thob par bya ba gzhan med pa 'jug pa ni gzhan gyi don kho na yin la/ de'i phyir brtse ba dang ldan par rtogs pa yin no/ /grub pa de yang kha cig la yod la/ kha cig la med pa shes par mi nus te/ de'i phyir de'i gzhan dbang nyid yin par bstan pa ni/ brtse bas zhes bya ba'o/ /de bzhin du skyob pa la ye shes dang / de la mdzad pa dang / de la yang brtse ba zhes bya ba dngos dang brgyud pas kyang ye shes la sogs pa rnams rgyu nyid bstan nas/ da ni dngos su ba kho na bstan pa ni/ brtse bas zhes bya ba'o/ /yang na gong du ni 'bras bu'i byed pa bstan pa yin la/ de ltar ni rgyu'i yin no zhes bya ba ni rnam par dbye ba'o/ /rgyu bzhi po zhes bya ba ni 'bras bu tshad ma nyid la brtse ba dang / mdzad pa dang / ye shes dang / skyob pa'i ngo bo'o/ /'dis ni zhes bya ba ni brtse bas zhes bya ba 'dis so/ /dngos po ni brtse ba'o/ /tha ma ni skyob pa'o/ /dang 'og ni mdzad pa las so/ /mtha' dag ni ye shes so/ /bzhi po 'di ni tshad ma nyid la rgyu yin te nges pa'i rgyu yin pa'i phyir ro/ /tshad ma nyid kho na yon tan yin te/ bdag cag la phan 'dogs par byed pa'i phyir zhes bstan pa ni/ de lta'i dngos ston te tshad ma nyid du ston pa'o/ /ci las yin zhe na/ de bstan pa nyid las zhes bya bar smos so/ /rjes su dpag pa'ang ma bzlog phyir ni ma bkag pa'o/ /de la rigs pas grub par bstan pa ni/ rjes su dpag pa'ang zhes bya ba'o/ /yang na mngon sum bzhin du rjes su dpag pa yang phyogs gcig gis gsungs pa yin par bstan pa ni/ sbyor ba'ang mthong phyir ro zhes bya ba ste/ sbyor ba ni gzhan gyi don rjes su dpag pa'o/ /tshul gsum brjod pa ni/ gzhan gyi don gyi phyir rjes su dpag pa yin gyi/ cung zad skye ba'i bdag nyid can la sogs pa la de yod pa ma yin te/ med na mi 'byung ba tsam brjod pa'i phyir ro zhes zer ba la/ rjes dpag rten yin no zhes bya ba ste/ med na mi 'byung ba nyid rjes su dpag pa la gtso bo'i ngo bo yin la/ de brjod na thams cad brjod pa yin zhes bya ba'i don to/ /gang gi phyir bcom ldan 'das kyis tshad ma gsungs pa'i phyir/ gzhan tshad ma ma yin par bstan pa ni/ /gang gi phyir gnyis ldan zhes bya ba'o/ /'di las cir 'gyur zhe na/ de bzhin gshegs pa nyid las thams cad grub ces bya ba'o/ /phrag dog sgregs pa'i rlabs 'jigs rung / /kun rtog chu srin gyis dkrigs pa'i/ /yid kyi rgya mtsho'i dus rlabs la/ /rgyal ba can gyis mdzes pa yin/ /rnam 'grel dang ni de'i rgyan gyi/ /'grel bshad yid kyi dri ma dag /sel byed 'di mthong rgyal 'gyur zhing / /mkhas pa rnams kyi rgyan du 'gyur/ /tshad ma rnam 'grel gyi rgyan gyi 'grel bshad slob dpon rgyal ba can gyis mdzad pa las le'u dang po'o// //

CLOSE WINDOW