བོད་ཡིག

e-texts based on the ACIP/ALL Input

@#/ /tshad ma kun las btus pa zhes bya ba'i rab tu byed pa/ @##/ /rgya gar skad du/ pra mA Na sa mu ts+tsha ya nA ma pra ka ra Na/ bod skad du/ tshad ma kun las btus pa zhes bya ba'i rab tu byed pa/ sangs rgyas la phyag 'tshal lo/ / tshad mar gyur pa 'gro la phan bzhed pa/ /ston pa bde gshegs skyob la phyag 'tshal nas/ /tshad ma bsgrub phyir rang gi gzhung kun las/ /btus te sna tshogs 'thor rnams 'dir gcig bya/ /mngon sum dang ni rjes su dpag /tshad ma'o mtshan nyid gnyis gzhal bya/ /de la rab sbyor phyir tshad ma/ /gzhan ni yod pa ma yin no/ /yang yang shes pa'ang ma yin te/ /thug pa med 'gyur dran sogs bzhin/ /ming dang rus sogs su sbyor ba'i/ /rtog pa dang bral mngon sum mo/ /thun mong min pa'i rgyu yi phyir/ /de yi tha snyad dbang pos byas/ /der don du mas bskyed pa'i phyir/ /rang don spyi yi spyod yul can/ /du ma'i ngo bo'i chos can ni/ /dbang po las rtogs srid ma yin/ /rang rang rig bya tha snyad kyis/ /bstan min ngo bo dbang po'i yul/ / yid kyang don dang chags la sogs/ /rang rig rtog pa med pa yin/ /rnal 'byor rnams kyi bla mas bstan/ /ma 'dres pa yi don tsam mthong / /rtag pa'ang rang rig nyid du 'dod/ /don la ma yin de rtog phyir/ /'khrul dang kun rdzob shes pa dang / /rjes dpag rjes su dpag las byung / /dran dang mngon 'dod ces bya ba'o/ /mngon sum ltar snang rab rib bcas/ /bya dang bcas par rtogs pa'i phyir/ /'bras bu nyid yin 'jal byed la/ /tshad ma nyid du 'dogs pa ste/ /dbye ba med pa'ang ma yin no/ /yang na rang rig 'bras bu ste/ /de yi ngo bo las don nges/ /yul gyi snang ba nyid de 'di'i/ /tshad ma de yis 'jal bar byed/ /smras pa/ gang tshe snang ba de gzhal bya/ /tshad ma dang ni de'i 'bras bu/ /'dzin dang rnam rig de yi phyir/ /de gsum tha dad du ma byas/ /yul shes pa dang de shes pa'i/ /dbye bas blo yi tshul gnyis nyid/ /dus phyis dran pa las kyang ste/ /tshul gnyis dang ni rang rig grub/ /ma myong bar 'di med phyir ro/ /shes pa gzhan gyis nyams myong na/ /thug med de la 'ang dran pa ste/ /de bzhin yul gzhan la 'pho ba/ /med 'gyur de yang mthong phyir ro/ / rtsod sgrub slob dpon gyi ma yin/ /nges par snying po med par dgongs/ /gzhan du cha shas su gsung 'gyur/ /des na kho bos brtag par bya/ /don de las skyes rnam par shes/ /mngon sum yin zhes bya ba 'dir/ /don de zhes pas kun brjod na/ / gang de de 'ba' zhig las min/ /dmigs pa'o zhe na dran sogs kyi/ /shes pa'ang gzhan la ltos ma yin/ /yang smras pa/ ji ltar snang ba de yod min/ /de yi phyir na don dam du/ /lnga po bsags la dmigs pa'i phyir/ /de la tha snyad du ma byas/ / bar skabs kyi tshigs bcad do/ /don gyi tshul gyis dben pa yang / /brjod bya ma yin yul 'di'i yang / /spyi yi tshul gyis bstan par bya/ /des na tha snyad du mi bya/ /rigs pa can rnams dbang po dang don phrad pa las skyes pa'i shes pa tha snyad du bya ba ma yin pa 'khrul pa med pa zhen pa'i bdag nyid ni mngon sum mo zhes zer ro/ /de yang rigs pa ma yin te/ /dbang don las byung blo la ni/ /tha snyad la sogs srid ma yin/ /bar dang bcas pa 'dzin pa dang / /shes pa lhag pa'ang thob mi 'gyur/ /dbang po rten las phyir mi 'pho/ /yul la 'dzin par nus ma yin/ /bde sogs gzhal bya min pa'am/ /dbang po gzhan yod yid dbang po/ /bkag pa med phyir thob ce na/ /dbang po gzhan gyi sgra don med/ /nges pa'i don la 'bras bu med/ /shes pa yi yang mtshan nyid las/ /don gzhan 'bras bur smra bar 'gyur/ /khyad par la min tha dad phyir/ /de la yod min gnyis zhe na/ /ma yin khyad par bya la 'ang 'gyur/ /ma rtogs la sogs kun la min/ /ldog pa med phyir 'bras bu min/ /bye brag pa rnams ni bdag dang dbang po dang yid dang don du phrad pa las gang grub pa de gzhan yin no zhes so/ /spyi dang khyad par la ltos pa dang / rdzas dang yon tan dang las la ltos pa ni mngon sum mo zhes sbyar bar mi bya ste/ /yul la lta ba'i don can phyir/ /khyad par rnams dang sbyar mi bya/ /gcig min gzugs sogs kyang gcig 'gyur/ /mthong na dbang po la de min/ /dbang gzhan don med 'gyur phyir ro/ /rang yul tha dad kyang 'dzin nub/ /dbang po kun gyis 'dzin par 'gyur/ /rdzas sogs la min de lta na/ /med phyir gzhan gyi spyod yul min/ /yul mtshungs nyid du 'dod ce na/ /mi 'dod pa la'ang thal bar 'gyur/ /ma nges de ni gzhan du brjod/ /thams cad bsgrub byar brjod ma yin/ /dbang po tha dad med kyang blo/ /tha dad phyir ni tha dad na/ /gzhan du tha dad med gang las/ /ser skya pa rnams ni rna ba la sogs pa'i 'jug pa mngon sum du 'dod do/ /thug pa med pa'am dbang gcig 'gyur/ /gnyis bzung gsum gyi yul ma yin/ /yul gcig nyid thob dbyer med 'gyur/ /de las rang bzhin 'dzin ma yin/ /don gyi bye brag 'dzin mi 'gyur/ / 'dzin na'ang yid bzhin rnam rtog 'gyur/ /gnas skabs der 'gyur snying stobs sogs/ /ma yin gzhan ma yin pa'i phyir/ /gzhan min zhe na 'bras min pa'am/ /gzhan nyid min na gzung bya min/ /sna tshogs rnam 'gyur don mtshungs 'gyur/ /du mar 'dzin phyir grangs can gyi/ /bye brag kha cig mi 'dod do/ /re re'i ngo bor thams cad na/ /gtso bo rdul phran so sor yod/ /rab tu sbyor ba'i bye brag las/ /'bras bu'i ngo bor mtshon par byed/ /rdul phran rang bzhin gsum nyid na/ /'bras bu gcig par gang gis rtogs/ /rigs mi mthun par sbyar na yang / /yongs su 'gyur bar mi 'dod do/ /ngo bo gnyis nyid mi 'dod na/ /'bras bu ngo bo gcig nyid thob/ /don gyi rang bzhin du ma la/ /dbang po'i yul ni khyad par can/ /de'i phyir grangs can lugs dor te/ /re re'i ngo bo nyid mchog yin/ /yul gcig ma yin 'jug pa ste/ /tshad mar brjod pa ma yin no/ /dran pa ma yin ma myong phyir/ /gnyis ka cig car 'byung zhe na/ /de ni tshad min gzhan lta la/ /nyams pa'am yang na dran pa yin/ /dran pa lhag par brjod phyir na/ /rnam gsal dbang gzhan don med 'gyur/ /spyod pa pa rnams ni yod pa dang yang dag par sbyar nas skyes bu'i dbang po'i blo skyes pa de ni mngon sum mo zhes zer ro/ /de la/ yod pa'i gsal bya med pa ste/ /sbyor zhes bya las de rtogs 'gyur/ /yang dag sbyor ba nges par ni/ /yod nyid la ni bstan ce na/ /ci ste zla ba bstan phyir yin/ /dbang po'i khyad par can brjod kyis/ /yod tsam ldan pas mi rtogs pa/ /ma yin gang zhig sgrub par byed/ /ci ste dbang po gang zhig la/ /thim dang shis par 'dod ce na/ /de thim pa de gzhan las kyang / /shes pa mig sman sogs pa'ang yod/ /grags la de ltar brtag grang na/ /sgra de dbang po'i yul la min/ /kun tu don dang phrad grang na/ /gzugs sgra bar du chod pa dang / /chen po'ang 'dzin par mthong bas na/ /bar ma chad la de gnod byed/ /blo yi rgyu yi tshogs pa dag /brjod pa bor nas tshad ma gang / /tshad ma ji ltar don yin pa'am/ /blo yi skye ba zhes ci bsnan/ /don dang dbang po yid skyes bu/ /sbyor dang 'du byed pa las gzhan/ /mngon sum gyi blo skyed pa yi/ /tshogs pa brjod pa de ci ltar/ /ba lang nyid sogs sbyor las don/ /ba lang la sogs su 'jal byed/ /don dang yang dag 'brel ba la/ /dbang po'i blo ni nus yod min/ /rig byar rang nyid bstan med pas/ /gzugs don dbang po'i spyod yul lo/ /don min shes pa'ang rnam kun tu/ /mngon sum blo rung gnas par 'gyur/ /ci ste blo yi skye ba 'dod/ /don gzhan 'bras bur smra ba na/ /don gzhan thob par 'gyur ma yin/ /don gyi blo shar 'bras min na/ /de las gzhan 'bras med pas so/ /blo yi skye ba gzhan yin na/ / 'phro 'du rang gi rgyu las te/ /tshad ma'i 'phrod pa 'du ba las/ /ci ste gzhan min de don med/ /skyes bu rnam par 'gyur nas blo/ /skyed na mi rtag pa ru 'gyur/ /ci ste bdag de mi 'gyur na/ /de la tshad ma zhes mi sbyar/ /tshad ma kun las btus pa las mngon sum gyi le'u ste dang po'o/ / //rjes dpag rnam gnyis rang don ni/ /tshul gsum rtags las don mthong ba'o/ /'bras bu sngar bzhin yul dang ni/ /ngo bo mtshungs min de gnyis kyi/ /rang gi mtshan nyid bstan bya min/ /gzung tha dad phyir de las gzhan/ /mthong sogs nyid sgo nas bstan to/ /rang gi ngo bo brjod pa min/ /ming las shes phyir rnam pa gzhan/ /bstan bya yid kyi rnam pa gnyis/ /spyi ma yin la'ang mthong ba'i phyir/ /de min mtshon bya spyi yin phyir/ /yid ches tshig gi sgrub byed kyis/ /de las gzhan la 'gegs par byed/ /tha mi dad du grub ce na/ /ma yin tha dad kyang srid phyir/ /yid ches tshig kyang mi slu bar/ /mtshungs phyir rjes su dpag pa nyid/ /rjes dpag bya dang de mthun la/ /yod dang med nyid la med pa'o/ / 'di ru shes pa'ang thob pa nyid/ /shes byed skabs kyi dbang byas phyir/ /tshul re re dang gnyis gnyis pa/ /rtags don min par don gyis byas/ /sgra rtag byas pa'i phyir lus can/ /phyir dang gzhal bya min phyir ro/ /lus can min phyir mnyan bya'i phyir/ /mig gis gzung bya phyir mi rtag / kha cig gtan tshigs mi 'khrul bas/ /chos gzhan dpag par bya bar 'dod/ /chos dang chos can dag grub phyir/ /'brel ba dpag byar kha cig 'dod/ /chos la gtan tshigs grub na ni/ /de yis de las gzhan ci dpag /de ltar chos can de nyid la/ /dpag bya ci yi phyir mi 'dod/ /'brel ba'ang gnyis yod ma yin na/ /de bzhin drug pa'i sgra ru 'gyur/ /brjod par mi bya don smos phyir/ /gtan tshigs 'di dang 'brel pa yin/ /rtags kyi 'khrul pa med pa ni/ /chos la gzhan du ston par byed/ /der grub de dang ldan pa yi/ /chos can go bar byed pa yin/ /rtags kyi rjes su bstan bya ba'i/ /chos la dpyad pa gzhan yang 'jug /chos don du ma gtan tshigs kyis/ /rnam pa thams cad du rtogs min/ /gang dang 'brel pa yongs bcad nas/ /chos gzhan dang bral thob par byed/ /yon tan dri dang dri bsung sogs/ /de yi bye brag gi rim pas/ /rdzas min la sogs rnam bcad nas/ /ut+pal la sogs re re rtogs/ /gal te mthong ba bzhin gtan tshigs/ /sgrub pa'i sgo nas 'jug na ni/ /thams cad rtogs par mi 'gyur ba'am/ /yang na thams cad rtogs par 'gyur/ /gal te spyi las yin grang na/ /de ni de las gzhan du 'gyur/ /rten rnams ma mthong ba yi phyir/ /tha dad min gcig mthong mi 'gyur/ /cha shas 'di lta bu'i tshul nas/ /rtags can la ni mi 'gyur zhing / /de nyid kyi chos du ma na'ang / /cig shos thob par byed pa yin/ /rtags can gang dang rjes 'brel ba'i/ /rtags can de 'dir rtogs bya yin/ /bye brag rtogs bya ma yin te/ /de dag nyid la 'khrul phyir ro/ /rtags dang rjes su 'brel ba'i don/ / rtogs bya rtags can bye brag gi/ /ma yin de la rtogs pa'o/ /rtogs par rab tu 'khrul pa'i phyir/ /zhes bya ba ni bar skabs kyi tshigs su bcad pa dag go/ /'brel ba gnyis la gnas mod kyang / /rtags dang rtags can lhan cig pa/ /rten dang brten pa nyid yin gyi/ /yang dag 'phrod pa bzhin ma yin/ /rtags la rtags can yod pa nyid/ /cig shos rtags can nyid la yod/ /rtags dang rtags can dag 'brel ba'i/ /nges pa bzlog na gnas pa yin/ /rtags kyi khyab par 'dod pa ste/ /de yi cha nas rtags can yin/ /khyab byed cha nas de'i go byed/ /ma yin rwa can las glang bzhin/ /dgag bya so sor mi 'khrul ba/ /gang phyir 'brel ba la ltos yin/ /de phyir rtags ni rtags can la/ /khyab pa bden yang byed po min/ /byas pa nyid kyis 'jig pa la/ / khyab kyi ma byas pa yi min/ /rtag pa min la khyab min par/ /ma byas pa yi don gyis ston/ /rwa can nyid kyis ba lang la/ /khyab pas rwa can min las ldog /glang la rwa can gyis khyab bzhin/ /ba lang gi don zlog byed yin/ /zhes bya ba bar skabs kyi tshigs su bcad pa dag go/ /brtsad pa bsgrub pa nas ni med na mi 'byung ba'i don mthong ba rig pa rjes su dpag pa'o zhes brjod do/ /med na mi 'byung mthong ba yi/ /rang gi rnam pa tsam 'dod na/ /de rig mi brjod gzhan nyid du/ /brjod na ji lta bu gang la/ /don 'di bsgrub bya la zhe na/ /med na mi 'byung zhe ci dgos/ /du sogs me sogs la mthong las/ /gzhan pa'i dpag bya de rig gang / /chos can du ma yod pa las/ /de rig pa zhes ji ltar brjod/ /rigs pa can rnams na re de sngon du song ba can gyi rjes su dpag pa ni rnam pa gsum ste/ snga ma dang ldan pa dang / lhag ma dang ldan pa dang / spyir mthong ba can no zhes zer ro/ /'brel ba dbang po'i gzung bya min/ /snga ma dang ldan zhes 'di la/ /thams cad srid phyir lta bur med/ /'khrul pa'i phyir na ldan pa min/ /lhag ldan la yang lta bur ram/ /'brel gzhan las kyang rtogs mi 'gyur/ /lhag ma dang ldan las 'gyur phyir/ /'brel gzhan las kyang rtogs mi 'gyur/ /spyir mthong ba yang de bzhin no/ /'bras bu gzhan la nyid mi 'thob/ /rtags shes tshad ma yin zhe na/ /rnam par dbye ba'ang grub mi 'gyur/ /bye brag pa rnams na re/ 'di ni 'di'i 'bras bu dang rgyu dang 'brel ba dang / don gcig la 'du ba dang 'gal ba can yin no zhes bya ba de dag ni rtags las byung ba'o/ /zhes zer ro/ /rgyu la 'bras bu bkag pa med/ /ldan pa'i rtogs pa grub pa med/ /gnyis dang ldan phyir tha dad min/ /me dang du ba'i ldan pa ni/ /cha 'ga' zhig las ma yin pas/ /du ba thams cad go byed dam/ /me yi gsal ba go byar 'gyur/ /de bzhin du ba la sogs pa'ang / /'gal pa la yang srid pa'i phyir/ /rtags kyi spyi gzhan rtags min zhing / /bye brag rnams kyang rtags can min/ /gzhan gyi ltar na thams cad nas/ /go bya go byed du thal 'gyur/ /zhes bya ba bsdu ba'i tshigs su bcad pa'o/ /yul dang dus la ltos su chug / rgyu ni khong du chud mi 'gyur/ /'brel ba khyad par med pa'i phyir/ /gzhan yang srid phyir gnyis ma yin/ /gang zhig 'gal ba de rtags min/ /'brel pa med phyir rtags blo min/ /rtags las byung bar bstan pa'i phyir/ /thams cad rtags su brjod ma yin/ /dran pas 'brel can du grub 'gyur/ /'bras bu la sogs mdor ma mtshon/ /tha ma gsal byed du mi 'gyur/ /don med gzhan las kyang de grub/ /grangs can pa rnams na re/ 'brel pa mngon sum pa gcig las lhag par grub pa'i rjes su dpag pa'o zhes zer ro/ /de la mngon sum pa gcig las zhes pa rigs pa ma yin te/ rang don tsam la lta ba'i phyir/ /de ma shes par de rtogs phyir/ /khyad par med phyir gnyis nas min/ /de la rtags dang rtags can med/ /so sor ma sbyor tha dad las/ /rjes su 'gro ba gzhan min phyir/ /gal te gzhan min rnam lnga min/ /gtso bo'i cha nas brgya lam na'ang / /skyed byed nyid du 'gyur ma yin/ /tha dad na yang skyed byed min/ /de las kun tu thob 'gyur phyir/ /gtso bo la sogs kyi gcig sogs/ / tha dad rnams kyi rjes 'gro nyid/ /la sogs gang las yongs su 'dzin/ /de yi phyir 'di gsal byed min/ /de bzhin nor dang nor can la/ /sogs pa'ang gsal byed ma yin zhing / /'brel gzhan las kyang de mtshon phyir/ /'brel med nyid du yang dag brjod/ / nor dang nor can la sogs tsam/ /rtags can 'dzin pa yin na ni/ /'brel pa la yang gzhan shes pa/ /rnam pa kun tu 'dzin par 'gyur/ /gsal bya gsal byed kyi dngos po/ /gal te gcig yin rnam bdun min/ /rjes dpag ma yin dran par 'dod/ / nges par bzung bar rig pa min/ /yang smras pa/ 'brel pa bdun du bstan pa dang / /rjes su dpag pa gnyis nyid dang / /de sngon song ba'i rjes dpag ni/ /gsum ste 'di rnams gang du bsdu/ /'bras bu med phyir de rtags min/ /'brel pa gzhan dag 'os ma yin/ /dpyod dang bcas par brjod par bya/ /yod pa'ang dpyod pa dang bcas phyir/ /gzhan pa las kyang rab tu grub/ /gtsug phud can don gcig rtogs des/ /tha dad tha snyad yod min pa'am/ /skyes bu'i rnam kun rtogs par 'gyur/ /dpyod pa bas brjod pa/ mngon sum sngon 'gro can yin phyir/ /rjes dpag la sogs mdor ma mtshon/ /zhe na dran 'dod zhe sdang dang / /rtsol ba la sogs tshad mar gyur/ /'brel pa med las gzhan gzhung las/ /bton te gcig tu bsdus nas ni/ /rjes dpag la sogs bstan pa ste/ /mngon sum sngon 'gro can ma yin/ /ldan sogs yul la dbang blo med/ /yul la'ang de dag yod ma yin/ /ldan pa rjes dpag gi rtags min/ /ldan pa can ni rang ngo bos/ /khong du chud par byed ma yin/ /gzhan min mngon sum yang ma yin/ /gang du rjes dpag la sogs 'di/ /bkag pas de bzhin 'di yang 'gog /don ni rnam gnyis mtha' gcig tu/ /nges te rjes dpag cig shos brdzun/ /nag pa khyim na med pa la/ /phyi na yod par mtshon pa min/ /khyim gyi sgra yi don las 'di/ /phyi na yod par rab tu rtogs/ /tshad ma kun las btus pa las rang don gyi rjes su dpag pa'i le'u ste gnyis pa'o// //gzhan don rjes su dpag pa ni/ /rang gis mthong don rab gsal byed/ /de la dpag bya bstan pa ni/ /rtags kyi don gyi yul du 'dod/ /rang gi ngo bo nyid dang bstan/ /rang dang 'dod 'gyur ma gsal ba/ /mngon sum don dang rjes dpag dang / /yid ches grags pas rang brtan la'o/ /rigs pa can rnams na re/ bsgrub bya ston zhes pa 'di la/ /sgrub byed tsam du don gyis byas/ /de ltar na ni rtags dang dpe/ /ma grub pa yang bsgrub byar 'gyur/ /sgrub chos yin na chos mthun med/ /chos can bsgrub bya rtags don med/ /gang du nges gzung don med 'gyur/ /cig shos ltar na 'dod min 'gyur/ / rtsod pa bsgrub pa la brjod pa/ /de bzhin bsgrub byar brjod pa la/ /phyogs nyid phyir na srid ma yin/ /rnam par dpyod pa'i 'dod pa 'di/ /mi 'dod pa las log pa tsam/ /rigs pa can pa la brjod pa/ /dam bca' gtan tshigs dang 'gal bas/ /dam bca'i skyon zhes rigs pa min/ /legs par ma bslabs pa rnams kyi/ /de ni chos mi mthun dper brjod/ /rtags nye 'jal gyis 'di bsgrub bya/ /ma yin 'gal ba dang ldan min/ /gang zhig bsgrub bya'i chos kyi rtags/ /de ltar snang ba phal che bas/ / des na gtan tshigs sogs don gyi/ /sngon du rgyas par de bstan bya/ /mthun phyogs la yod med rnam gnyis/ /phyogs kyi chos la'ang rnam pa gsum/ /mi mthun phyogs la'ang so sor ni/ /yod med gnyis ka'i bye brag phyir/ /bsgrub pa bsgrub bya yin pa'i phyir/ /chos dang chos can kha yar ba/ /dngos su min yang de'i phyogs gcig /yin phyir bsgrub byar brtags brjod pa/ /gnyis ka la grub chos de las/ /tha snyad yin phyir gnyis ka la'am/ /gang yang rung la bzlog pa yi/ /the tshom chos grub 'dod ma yin/ /mi 'dod thams cad sun 'byin du'ang / /gnyis kar rab tu grub na ni/ /sun 'byin pa yang sgrub par byed/ /gzhan gyis slar yang sgrub na 'dod/ /chos can chos can gyis bsgrub min/ /chos des chos kyang ma yin gyi/ /'di ltar chos kyis chos sgrub cing / /sgrub phyir chos can yang de bzhin/ /dam bca' rtags kyi ngag gis gang / /mi 'dod pa la thal ba rtsom/ /de ni len zhes shes bya ste/ /de yi sgo nas sbyor phyir ro/ /gtan tshigs bsgrub bya'i rjes 'gro gang / /med las med par brjod par bya/ /der ni lnga pa'i mtha' can dpe/ /rtags kyis nye bar sbyar la 'dod/ /gang du gsal 'ongs kyis brjod pa/ /gtan tshigs med par 'gyur ba ni/ /dpe gnyis las ni grub phyir ro/ /des na rnam ldan gzhan las min/ /thal 'gyur phyogs chos can min phyir/ /khas blangs sngon du song ba las/ /de bzhin rtags dang dam bca' yis/ /skyon brjod sun 'byin du shes bya/ /tha dad med pa de nyid ces/ /byas nas gzhan la ston par byed/ /mthun phyogs zhes pa phyogs la ste/ /'di la'ang tha dad ces mi 'dod/ /de gzhan dang ni de 'gal te/ /mi mthun phyogs rnams gnyis la yang / /rtags med pas na 'gal ba med/ /rnam pa bcad pa las gyur yin/ /mthun phyogs la yod min pa nyid/ /mtshan nyid gcig nyid yin mod kyang / /don du ma la 'jug pa'i rigs/ /spyi la nges 'gro blon po yin/ /gzhal bya byas dang mi rtag dang / /byas dang mnyan bya rtsol las byung / /mi rtag rtsol byung reg bya min/ /de dgu rtag pa la sogs pa'o/ /de gang mthun phyogs la yod gnyis/ /de med pa la med pa ste/ /de rtags 'di las bzlog pa ste/ /'gal ba gzhan rnams ma nges pa'o/ /brjod par 'dod pa'i grangs gcig nyid/ /'gal ba dag la the tshom phyir/ /de bzhin the tshom rtags gnyis las/ /gcig tu nges pa mthong ba yin/ /mtshan nyid gnyis dang ldan pa ni/ /gnyis gnyis su 'dod re re min/ /du ma yin yang mi 'gal na/ /shin tu bar yang gcig la 'jug /gang dag thun mong min pa dang / /spyi dang 'gal ba mi 'khrul ba'i/ /chos rnams thams cad du de la/ /the tshom skyed pa'i rtags rnams yin/ /phyogs kyi chos dang ldan gang la/ /shes 'dod bzlog pas gnod pa dang / /the tshom nyid du 'gyur las gzhan/ /gtan tshigs ltar snang yod ma yin/ /chos dang chos can rang ngo'am/ /de yi bye brag yin yang rung / /phyin ci log tu grub pa'i phyir/ /de la gnod pas 'gal ba yin/ /thun mong dang ni khyad par gyi/ /chos dang bsgrub bya la gnyis so/ /de la dang po gnyis the tshom/ /lhag ma ltos nas gsum du phye/ /rjes su zhugs dang ma zhugs las/ /ldog dang rjes 'gro grub min phyir/ /gcig la nges par zhugs pa dang / /log pa min pa rtags su 'gyur/ /gnyis kar gyur pa srid pa yin/ /yod pa gnyis ka min pa'ang min/ /gang du med de rnam bcad du/ /grub don don gzhan sgrub par byed/ /gcig de gzhan la gnyis su grub/ /gal te zhugs pa bzhin grub na/ /dkar gzugs yon tan rten pa las/ /rim pa rim du bzlog rim la/ /gsum gnyis gcig tu rtogs par 'gyur/ /gcig gi tshig tu bstan pa'i phyir/ /de yi bsgrub bya bzlog pa las/ /'gal ba gang du zhugs pa ni/ /de yi bye brag la rmongs pa'o/ /rtsod pa sgrub pa la brjod pa/ /de mthun med la med pa yi/ /chos bstan rtags shes pa de la/ /de mthun med la med pa nyid/ /ces sbyor thun mong mi rtag 'gyur/ /med pa nyid la zhes nges gzung / /khyab mnyam 'ba' zhig rtags su 'gyur/ /de mthun nyid ces 'dod ma yin/ /gcig la rnam pa du ma mthong / /de'i bdag nyid ces ston ce na/ /gtan tshigs brjod pas nus ma yin/ /yang dag don bzhin na rnam pa/ /gang zhig gang la zhes ma brjod/ /shes par byed las 'das pa bzhin/ /don gyi sgrub byed mthong ma yin/ /mig gis gzung bya nyid sogs sgra/ /mi rtag rtags su thal bar 'gyur/ /ma bstan pa zhes brjod pas de/ /ji ltar gang la zhes ma brjod/ /lhan cig rgyud las bsgrub bya la/ /de min dpe gnyis las 'gyur bas/ /mi rtag nyid sogs mthong ba ste/ /bsgrub byar gzhan dag 'dod dam ci/ /rigs pa can pa rnams na re/ chos mthun pa las dper brjod pa de bsgrub bya bsgrub pa'i gtan tshigs so zhes pa de la/ gal te chos mthun sgrub byed na/ /cha shas dag min lnga pa min/ /ngag ces khyad par can du 'gyur/ /sgrub byed nyid du mi rigs pas/ /gnyis ka'ang gzhan du thob par 'gyur/ /chos mthun gtan tshigs de ma yin/ /ma yin de yang skyon gnyis phyir/ /gnas skabs la yang gzhan mi srid/ /rang rang mtshan nyid kyis gnod phyir/ /rnam par brtags pa srid ma yin/ /de phyir drug par de la yang / /khyad par don med par 'gyur ro/ /ngag kun mi 'dod zhe na gang / /'dod de khyad par can du gyis/ /dgos pa med par dngos kyi ni/ /sgra las brgal bar 'dod ma yin/ /rnam grangs tsam spyir btang ba la/ /dmigs bsal yod par srid ma yin/ /der snang gis stong chos gzhan dang / /mtshungs te gtan tshigs nyid du 'gyur/ /bye brag pa rnams ni de dang ldan pa'i chos gtan tshigs so/ /zhes rjod par byed do/ /de la yang / spyi nyid chos su thal bar 'gyur/ /chos dang chos can bsgrub bya min/ /khyad par bsgrub bya dang ldan pa'i/ /chos thob gzhan gyi ma nges pa/ /mkha' sogs yod nyid bsgrub pa yi/ /sbyor ba'ang dgod par mi byed 'gyur/ /ser skya rnams na re de'i sbyor ba nye bar btags pa'i bye brag gi rjes su dpag pa rnam pa gnyis te/ rnam pa ldan pa dang gsal te 'ongs pa'o zhes pa 'di la/ /tshad ma'i yul mi shes pa'i phyir/ /bsgrub bya'i chos kyang sgrub byed 'gyur/ /rgyas pa'i ngag min brjod ma yin/ /gtso bo rjes 'gro dang ldan min/ /ngag kyang nye bar 'jal mi rigs/ /dam bca'i don dang 'gal bar 'gyur/ /rtsod pa med phyir yod tsam min/ /tha dad shing shun la sogs bzhin/ /rjes 'gro thams cad sgrub ce na/ /rigs gcig rjes su 'gro ba can/ /gzhan du 'bras bu gcig pu nyid/ /nye bar len pa la'ang der 'gyur/ /phyi min gnyis kar skyon yod phyir/ /khas blangs na yang 'gal ba nyid/ /ma nges par yang 'gyur dpe ni/ /bsgrub byas phongs kyang de yod min/ /drug min khyad par las yin no/ /'gegs pa'i gtan tshigs gnyis ma yin/ /sbyor ba gnyis kyang rigs ma yin/ /rjes thogs na ni zlog pa la/ /gcig gsal ba la de mi rigs/ /rnam ldan bzhin du lnga nyid min/ /rgol ba re re bkag pa las/ /gal te rjes thogs mi 'dod na/ /rgol ba'i lan la mtha' med nyid/ /gsal 'ongs rnams su thal bar 'gyur/ /zhes bya ba bar skabs kyi tshigs su bcad pa dag go/ /rtsod pa bsgrub pa nas ni ma grub dbye ba brjod ma yin/ /'khrul pa la yang brjod ma yin/ /de ni thun mong min pa'ang yin/ /'gal ba mi 'khrul pa can yang / /'gal ba gcig ni mtshungs par ro/ /gcig ni ma grub thun mong min/ /bzlog pa yi ni rgyu mtshan dang / /'dod la gnod byed kyang ma brjod/ /rigs pa can rnams kyi 'khrul pa dang bcad pa ni ma nges pa ste/ khyad par yod min/ /grub pa'i mtha' khas blangs pa las 'gal ba can 'gal ba'o zhes pa la/ 'gal ba gzhan yang de bzhin min/ /gang las skabs su bab pa de/ /gtan la dbab pa'i phyir nye bar 'god pa'i skabs dang mtshungs so zhes zer ba 'di la/ ma nges par 'gyur/ bsgrub bya dang khyad par med pa sgrub pa'i phyir bsgrub bya dang mtshungs pa'o/ /zhes pa 'di la ma grub min/ /dus las nur nas brjod pa ni dus las 'das pa'o zhes pa 'di la/ ma tshang bsgrub bya sgrub pa'i phyir/ /bye brag pa'i ltar na/ med pa'am ni 'gal bar 'gyur/ /bzlog pa ma tshang brjod pa yin/ /tshad ma kun las btus pa las gzhan gyi don gyi rjes su dpag pa'i le'u ste gsum pa'o// //tshul gsum rtags shes brjod pa las/ /phyogs kyi chos su legs gnas pa'i/ /lhag ma tshul gnyis su grags pa/ /dpe yis rab tu ston par byed/ /bsgrub bya'i rjes su 'gro ba'i rtags/ /bsgrub bya med na med nyid gang / /chos mthun cig shos dang bcas nyid/ / dpe la rab tu bstan par bya/ /ma yin dgag ni dgag pa dang / /de bzhin mtshan nyid med pa yang / /ma byas pa las rtag pa'am/ /'jig pa las 'dir 'bras nyid du/ /'di ni rjes su brjod byas na/ /ma khyab 'dod min mtshungs zhes 'gro/ /thun mong dang ni khyad par nyid/ /'gal ba'ang sgrub byed nyid du 'gyur/ /re res gnyis ka ma brjod pa/ /des na dpe brjod gnyis su brjod/ /rang gis nges pa bzhin gzhan la/ /nges pa bskyed par 'dod pa yis/ /phyogs chos nyid dang 'brel pa dang / /bsgrub bya brjod bya gzhan rnams spang / /dpe ni rtags las logs pa ru/ /brjod par bya ba ma yin te/ /gtan tshigs kyi don ston pa'i phyir/ /nyer 'jal bzhin du don med min/ /rtags kyi 'brel pa bsgrub pa'i phyir/ /gal te dper brjod gnyis yin na/ /dpe ni logs shig nyid du na/ /logs yin 'jig rten dang mtshungs 'gyur/ /de dag gis ni dpe brjod la/ /chos mthun 'ba' zhig rjod par byed/ /bsgrub bya sgrub byed nyid spangs nas/ /de ltar nyer 'jal tsam por 'gyur/ /chos mi mthun pa de la yang / / nyer 'jal ldog pa min ched du/ /chos mi mthun pa'i sbyor ba des/ /mi mthun phyogs dang stabs gcig ston/ /ldog pa rnam par brjod pa na/ /bsgrub bya sgrub pa'i gtan tshigs sam/ /de yi khyad par yin yang rung / /mtshungs ston thug pa med par 'gyur/ / phyogs kyi chos nyid tsam gtan tshigs/ /yin na 'khrul pa can yang 'gyur/ /gnyis ka brjod la mi 'gyur zhe/ /dgu yi nang nas gnyis srid do/ /dpe bstan to/ /gtan tshigs bsgrub bya gnyis ka med/ /mi mthun phyogs la med ma byas/ /rjes 'gro phyin log rnam pa gnyis/ /ltar snang rjes 'gro med pa min/ /rtags med sogs dang dpe med dang / /rjes 'gro phyin ci log la sogs/ /'brel par ma bstan pa yi phyir/ /nyer 'jal 'brel pa tsam ma yin/ /zhes bya ba bar skabs kyi tshigs su bcad pa dag go/ /rtsod pa bsgrub pa nas ni de dag gi 'brel pa nges par bstan pa ni dpe'o zhes pa la/ de dag gi zhes brjod mi bya/ /phan tshun bsgrub bya nyid min phyir/ /chos mthun tsam gyis lhan cig tu/ /rgyu bar ston pa yang ma yin/ /don gyis gzhan yang brjod ce na/ /mi mthun phyogs de brjod mi bya/ /med mi 'byung gi 'brel pa de/ /mi mthun phyogs kyis bstan pa na/ /bsgrub bya ma bzung 'ga' yod min/ /gzhan ni de yis bsgrub pa'i phyir/ /sgrub pa bstan pa nyid kyis kyang / /mi 'dod pa yi rtag pa thob/ /gcig pa nyid ni dpe yi skyon/ / ma yin no zhes bstan zin to/ /rigs pa can rnams na re/ bsgrub par bya ba'i chos dang mthun pa las chos de rtogs pa'i dpe dper brjod pa dang / de bzlog pa las te phyin ci log las shes zer ro/ /de la/ go byed du de mthong ma yin/ /gnyis ka smos pa don med 'gyur/ /rnam grangs phyir gzhan las grub phyir/ /bsgrub bya'i chos dang sbyar mi bya/ /dper brjod pa la ltos na ni/ /de bzhin nor zhes nyer sbyor ba/ /bsgrub bya la yang de bzhin zhes/ /nye bar sbyor bar rigs ma yin/ /spyi nyid gtan tshigs nyid du brjod/ / bye brag rang la rten rjes 'brang / /gnyen po'i phyogs dang ldan pa yin/ /khyad par sgo nas kyang der 'gyur/ /bye brag pa rnams gnyis ka yi/ /rab tu grub dpe'o zhes zer ro/ /de la yang / mkhas dper brjod pa'i sbyor ba'am/ /ngag ni phyogs gcig nyid kyang min/ /rjes 'gro rjod par mi byed pa/ /de ni dpe yi gzugs brnyan yin/ /sgrub byed nye bar sbyor don du/ /rang rgyud yin yang don med 'gyur/ /tshad ma kun las btus pa las dpe dang dpe ltar snang ba brtag pa'i le'u ste bzhi pa'o// //sgra las byung ba rjes dpag las/ /tshad ma gzhan min 'di lta ste/ /rang gi don la byas sogs bzhin/ /gzhan sel sgo nas ston par byed/ /tha dad rnams kyi rigs sgra med/ /mtha' yod phyir min 'khrul pa'i phyir/ /rigs sam ldan sgra tha dad kyi/ /don la so sor rjod byed min/ /yang brjod pa/ yon tan dang ni yon tan can/ /yang brjod pa'i rnam dbye tha dad du/ /nges phyir gzhi dang mthun pa yi/ /rdzas dang sgra dag rab tu grub/ /bsdu ba'i tshigs su bcad pa'o/ /'brel pa ni 'dir 'grel can gyi/ chos kyis 'phags par brjod bya ste/ /de ltar dngos bya nas brjod kyi/ / dngos po gzhan gyis sbyar mi bya/ /'di yi rigs kyi sgra yis ni/ /brjod par bya ba nyid mi 'thad/ /rang bzhin med phyir de ldan ma ni/ /nye bar btags phyir mi srid phyir/ /'bangs la rgyal po btags pa bzhin/ /blo'i tshul la tha dad phyir ro/ /rim gyis rjod par byed pa ni/ /kun+da dung sogs dkar po bzhin/ /yon tan gyis phan btags dngos la/ /blo med par yang 'jug par 'gyur/ /'dres pa'i tshul nas thams cad du/ /log pa'i shes par thal bar 'gyur/ /spyi sogs mang po nyid dang ni/ / cig car 'dzin pa rnams la yang / /phan 'dogs pa ni 'gal bar 'gyur/ /gzi yi khro bo thams cad mthong / /de dag tha dad rnams la yang / /de dang ldan pa'i skyon de mtshungs/ /rigs rang ngo bo'am de ldan gyi/ /ngo bor gang las sbyor mi byed/ /de ldan tha dad nyid brjod pa/ /de yang sngar nyid gsal zin to/ /de ldan tsam yang 'brel pa'am/ /yod pa yin zhes rnam par dpyad/ /bum pa sogs kyis de ldan don//snam bu sogs la 'jug min na/ /spyi yi don de ji lta bu/ /sgra don 'ba' zhig pa dang mtshungs/ / de yang rgyu mtshan med par 'dod/ /gal te gcig la sngo sogs bzhin/ /de lta'ang ma yin khas blangs kyang / /rigs la rigs med pas de min/ /don gyis 'phangs pa ma nges pa'o/ /des na sgra la'ang gzhan sel byas/ /yang brjod pa/ /brjod par bya ba mang yod kyang / /sgra yis rnam kun rtogs ma yin/ /rang dang rjes su 'brel pa'i don/ /rnam gcod ngag gi 'bras bu yin/ /sgras kyang chos gang du ma yi/ /don la 'jug pa ma yin gyi/ /sbyar bya de nyid la ste sgra'i/ /yon tan nyid sogs kyis ma yin/ /zhes bya ba bsdu ba'i tshigs su bcad pa dag go/ /sel bas tha dad don cha'i phyir/ /rang don tha dad rtogs la rmongs/ /gcig la tha dad 'bras med phyir/ /khyad par byed dang khyad par bya/ /de ni sngon po rkyang pa yin/ /ut+pa la rkyang ma yin te/ /bsdus pa brjod bya yin phyir ro/ /kha dog bzhin du don med 'gyur/ /kha dog gi don cung zad kyang / min na'ang tshig gnyis las de yi/ /brjod bya rtogs na de la yang / /yan gar ba de rtogs pa yin/ /phan tshun gcig par thal 'gyur phyir/ /'dus la gcig nyid yin ma yin/ / 'dus pa du mar thal bar 'gyur/ /sgra dag rang don spong ma yin/ /the tshom za phyir gzhan sel min/ /gcig las rnam grangs su 'gyur ro/ /tha dad na yang gnyis kar min/ /don gyi rdzas dang yon tan dag /gal te don gcig la 'jug na/ /spyi dang bye brag gnyis yod min/ /de ldan gnyis kyang yod ma yin/ /de bzhin du sgra rigs dang ni/ /yon tan tsam zhig brjod par 'gyur/ /de ldan brjod pa nyid la ni/ /mtshungs mi mtshungs su thal bar 'gyur/ /mtshungs phyir brjod par mi 'dod ce/ / ba lang rta la sogs la'ang mtshungs/ /der bye brag tu ma byas zhe/ du mar byas pa 'dus par 'gyur/ /gzhan yang 'dod pa la yang med/ /yon tan rdzas dag gsal min 'gyur/ /tha dad rjod byed tha dad las/ /zhe na rang las khyad med sgra/ / gsal byed gsal ba tha dad las/ /phan tshun rten pa thob par 'gyur/ /rang bzhin du ma dang gcig gi/ /phan tshun gsal ba mang por 'gyur/ /yang brjod pa/ /yon tan nus pa rjod byed kyi/ /dbye bas tha dad rab tu btags/ /gcig mang po dang 'brel pa'i phyir/ /du ma nyid du thal bar 'gyur/ /zhes bya ba bar skabs kyi tshigs su bcad pa'o/ /khyad par byed dang khyad par du/ /bya nyid rang dbang min sngar brjod/ /gzhan nyid du min spyi dang ni/ /tha dad rnam grangs brjod bskul yin/ /'gal med phyir na tshogs pa yang / /de bzhin don gzhan rjod par byed/ /yang brjod pa/ de tsam 'dod pa'i phyir tha dad/ /rang dang spyi yi dor ma yin/ /ma bzung na ni don gcig la/ /'di dag the tshom bskyed par mtshungs/ /du ma yin du zin kyang spyi/ / khas lan tha dad kyis mi 'khrul/ /khyad par byed dang khyad par du/ /bya ba de dag nyid mtshungs min/ /zhes bya ba bsdu ba'i tshigs su bcad pa dag go/ /tha dad tha dad gzhan rnams dang / /'gal ba'i phyir na sel bar byed/ /spyi gzhan tha dad don rnams kyi/ / rang dag spyi dag 'gal ba yin/ /de de'i dngos su gsal bya min/ /spyi ni mtshungs pa nyid ma yin/ /de gzhan khyad par gzhan rnams dang / /de yi sel bar 'gyur ma yin/ /gang zhig gzhi mthun gyur pa de/ /yon tan dang ni yon tan gzhan/ /de rdzas gcig la 'jug pa'i phyir/ /gzhi yis mi 'gal bar byas nyid/ /ma mthong phyir yang sel ba yin/ /rang tha dad la spyi sel 'gyur/ /gzhan mi rigs pas mthong ba'i phyir/ /de lta de snang la the tshom/ /the tshom za par rigs she na/ /nges par yan gar ba la de/ /yan gar tha dad la med ce/ /nyan pa po la ltos pa mthong / /sgra gzhan rnam par bcad nas ni/ /sgra yis spyi rjod byed pa yin/ /don gang la gcig the tshom za/ /du mar the tshom za na yang / /sgra yi don gzhan ma mthong yang / /rang don cha shas ston pa'i phyir/ /sgra yi 'brel pa nyid du sla/ /'khrul pa nyid kyang brjod ma yin/ /yang brjod pa/ shing dang sa las 'byung dang rdzas/ /yod dang gzhal bya rim bzlog las/ /bzhi gsum gnyis gcig the tshom du/ /'gyur gzhan nges pa'i rgyu mtshan yin/ /zhes bya ba bar skabs kyi tshigs su bcad pa dag go/ /gzhan la khyab pa bkag pa'i phyir/ /tha dad don des tha dad min/ /dngos 'jug tha dad min phyir yang / /tha dad thug pa med phyir dang / /rigs kyi chos rnams rnam par gnas/ /gang las gzhan sel nges she na/ /'jig rten grags pa'i rjes mi btsal/ /de ltar gzugs nyid la mtshungs 'gyur/ /mig gzung bya nyid bya bar byas/ /rdzas la sogs la'ang thal bar 'gyur/ /dkar min sogs la khyad med 'gyur/ /rjes 'gro 'ba' zhig las 'grub 'gyur/ /khyab pa dngos su 'dod ma yin/ /thams cad med pa dang 'brel zhes/ /gang zhig khas len du 'gro na/ /yod de du ma'i bdag nyid las/ /yin zhes ci zhig gang gis sbyor/ /'jim pa'i tha dad las kham phor/ /la sogs tha dad blor 'dod na/ /med tha dad las gzhan min yang / /tha dad ci blo ci ste dgag /yon tan rnams kyi rang bzhin mchog /snang ba'i lam du'ang gang ma gyur/ /snang ba'i lam du gang gyur pa/ /de sgyu ma bzhin shin tu stong / /phan tshun tha dad dag yod kyang / /nog la sogs pa mthong ba las/ /de blo dper brjod 'gal ba de/ /khyod kyi lugs la rten pa yin/ /de mi ltos zhes pa 'di ni/ /rang gi rnam rtog spros par zad/ /sel ba min pa'i sgra yis ni/ /rang bzhin 'gal yang brjod mi bya/ /thog ma med phyir 'dod pa grub/ /spyi yi sgo nas sel bar byed/ /bdag gzhan yod par khas len na/ /gcig nyid du nyid kyis btags pa/ /de dag dngos po la mi rigs/ /khyod kyi'ang gsal ba nus par 'gyur/ /sgra yi brjod don la spyod pa/ /'di yang dbang po'i spyod yul min/ /gang zhig sgra la sogs pa 'di'i/ /'jug pa'i dbang po so sor min/ /gang zhig tshig gi brjod pa 'di/ /ngag las don du rnam par brtags/ /ngag don so sor snang brjod gang / /de yis dang po nye bar skyed/ /ji ltar goms pa'i ngag dag las/ /don la med du zin yang skye/ /rang gi rkyen dang rjes 'brel bas/ /rnam pa du ma so sor rtogs/ / de yang ngag gi don gzhan las/ /rnam par bcad pa'i don du 'dod/ /'grel par shes pa'i ngag gi don/ /'di yang rjes dpag las gzhan min/ /gang zhig gang las skyes pa yi/ /rnam rtog sna tshogs shes pa ni/ /de yang rang rig yin pas na/ /mngon sum nyid las gzhan ma yin/ /'dod rgyal la yang don dbye bas/ /la lar dngos su rjod par byed/ /de dper na/ grangs dang tshad nyid kyi ni dbyibs/ /ltos pa med par rab tu 'jug /chu la sogs pa'i thigs pa dang / /'dus pa la yang rjod par byed/ /la lar ni yan lag 'ba' zhig la 'jug pa ma yin te/ dper na/ dbyibs dang kha dog cha shas kyis/ /khyad par byas nas 'jug pa min/ /sgra yis de yi cha shas la/ /rab tu 'jug pa dmigs ma yin/ /rtogs pa'i don ni bstan phyir ro/ /'brel pa ma yin brtags pa'i phyir/ /phyogs 'dis lhag ma rnams la'ang brjod/ /tshad ma kun las btus pa las gzhan sel brtag pa'i le'u ste lnga pa'o// //tshad snang brjod par 'dod rnams la/ /rigs pa'i cha shas smra po bzhin/ /phyogs grub mtshungs pa ma yin zhes/ /bstan phyir ma tshang la sogs brjod/ /de nyid rab tu bstan phyir dang / /de ltar snang ba brjod pa'i phyir/ /lan 'di brjod par rigs ma yin/ /ltag chod la ni rjes mthun lan/ /phrad dang ma phrad dag dang dus/ /gsum la'ang rtags su brjod 'dod min/ /phrad dang ma phrad rtags brjod de/ /ma tshang gtan tshigs rjes mthun yin/ /don rtags ma grub ltar snang yin/ /rtags brjod mi rtag pa'i rjes 'gro/ /de dag mi rtag par nus min/ /phyogs kyi skyon dang rjes mthun brjod/ /sngar brjod gtan tshigs med pa yis/ /bsgrub bya med par thal bar 'gyur/ /ma brjod par mtshungs sgro btags nas/ /smra po'i ngag gis sgrub par byed/ / ma grub ltar snang nyung ltar snang / /brjod pa las sngar sgrub byed na'o/ /brjod pa las sngar rtags min phyir/ /ma grub pa dang 'gal ba'i ngag /ma skyes pa mtshungs rnam pa gnyis/ /gnyis su sgro btags pa las 'dod/ /'bras bu gzhan nyid kyi cha na/ /bsgrub bya mi bsgrub par ston pa/ /de ni 'bras mtshungs de lta bu/ /smra po'i 'dod pas rnam pa gsum/ /nges bsten mi mthun phyogs dag las/ /chos mthun dpe yis gzhan sgrub pa/ /chos mthun par mtshungs bzhin dag ni/ /chos mi mthun pas mtshungs pa nyid/ /gzhan las ma grub bstan pa'i phyir/ /thun mong ltar snang rnam pa gnyis/ /grub par 'dod pa mtshungs pa'i phyir/ /'gal ba mi 'khrul pa can bzhin/ /'di yang rjes 'gro med pa'i phyir/ /dpe ltar snang ba'i skyon brjod yin/ /rjes 'gro phyin ci log nyid las/ /dpe dang bsgrub bya 'dres pa nyid/ /rtags de'i bdag nyid kyi dbye bas/ /'khrul pa ltar snang rnam pa gnyis/ /gtan tshigs phyogs gcig tu nges pa/ /sbyor ba snga ma la yod min/ /bye brag brjod pas chos mthun la'ang / /rnam rtog mtshungs pa 'di la yang / /'khrul pa can gyi bye brag gis/ /rtag par 'gyur ba de ltar snang / /spyi min gyis kyang gcig nyid du/ /thal bar 'gyur phyir bye brag med/ /bsgrub bya rtags khyad med phyir yang / / ma grub pa'i ltar snang bar 'dod/ /yang brjod pa/ bsgrub bya la ni gnod chos kyang / /mtshungs pa nyid kyis bye brag med/ /gtan tshigs skyon la 'gal ltar snang / /skyon yod min te phyogs phyi ma/ /bsgrub bya la gnod sgrub pa'i phyir/ /gnod mi byed pa 'gal nyid yin/ /bsgrub bya la gzhan gtan tshigs kyis/ /bstan na dmigs pa mtshungs pa'o/ /bsgrub bya du ma bkod pa la/ /gtan tshigs de dang rjes mthun nyid/ /gtan tshigs kyis ni ma khyab kyang / /bsgrub bya'i dngos po rtogs pa'i phyir/ /ma grub ltar snang sgra gnas kyi/ /thams cad rab tu sgrub ma yin/ /the tshom brjod don tha dad las/ /gtan tshigs the tshom rtsom par byed/ /bsgrub bya sgro btags ma nges pa/ /ltar snang rtags ma grub ltar snang / /don gyis 'don min mi mthun phyogs/ /bsgrub brjod don go mtshungs 'dir ni/ /'khrul pa gzhan gyis bsgrub bya la/ /de yis sgrub pa de ltar snang / /thal 'gyur mtshungs par 'dod pa yang / /gang yang gnyis ka gtan tshigs lam/ /de ni dpe ltar snang ba bzhin/ / ltag chod kun las phyogs tsam mo/ /ltag chod rnams la rtsod sgrub tu/ /phyin ci log dang brdzun nyid dang / /'gal ba nyid de skyon gsum ste/ /gsum po tha dad dus mtshon min/ /ltag chod rnams kyi mtshan nyid lan/ / dka' bar rigs pa phra mor yang / /shes bya rigs pa rtag par yang / /ltag chod gzhan la de phyogs tsam/ /yang brjod pa/ rtog ge'i phyogs tsam mu stegs kyi/ /de yang mtshan nyid ma bstan cing / /rang gi sbyor ba dang yang 'gal/ /'dod don sgrub par byed pa min/ /gang zhig rtog ge'i lam nas chos nyid la khrid na/ /thub pa'i bstan las cher bsrings nyams par byas ma yin/ /de lta'ang de bzhin gshegs pa'i chos rnams kyi mtshan nyid/ /gal te gzhan du 'gro na dpyad par bya ba'i rigs/ / tshad ma'i phung po skyon dang yon tan rgyas pa ru/ /rab gsal byas la 'di ru dge ba ci bsags des/ /skye ba skye bar yon tan yod min shes pa yi/ /grub mtha' zhi zhing 'gro la rnam thar ster bar shog /tshad ma kun las btus pa las ltag chod brtag pa'i le'u ste drug pa'o/ / //tshad ma kun las btus pa zhes bya ba'i rab tu byed pa slob dpon phyogs kyi glang pos mdzad pa rdzogs so// //rgya gar gyi mkhan po su d+ha na rak+Shi ta dang / /bod kyi lo ts+tsha ba dge bsnyen seng rgyal gyis bsgyur cing zhus pa'o/ / //'jam pa'i mgon po'i bkas bskul phyogs kyi glang po'i bstan bcos rgya mtsho ltar zab 'di/ /rigs ldan rgyal po'i bkas bskul nor bzangs srung mdzad ces bye sde bdun bshad mkhan dang / /gzus chung ston pa'i bkas bskul dge bsnyen seng rgyal zhes bya zha ma lo ts+tshas bsgyur/ /dge gang bsod nams bkas bskul 'gro kun rigs lam la gnas byang chub myur thob shog/ //

CLOSE WINDOW