བོད་ཡིག

e-texts based on the ACIP/ALL Input

/ //rgya gar gyi mkhan po paN+Di ta chen po su ga ta shrI mi tra dang / lo tsA ba dge slong tshul khrims rgyal mtshan gyis sgyur ba'o//[ ]@##/ /rgya gar skad du/ shi Sh+ya le kha br-it+ti/ bod skad du/ slob ma la spring pa'i 'grel pa/ sangs rgyas dang byang chub sems dpa' thams cad la phyag 'tshal lo/ /thub dbang sras bcas bzhugs kun la/ /rab tu gus pas rtag btud nas/ /slob ma rnams la phan don du/ /slob ma'i spring yig rnam par dbye/ /'dir 'phags pa zla ba de ni bdag dang gzhan gyi grub pa'i mtha' rgya mtsho'i pha rol tu son pa/ shes bya thams cad kyi gzugs brnyan shes pa'i me long la rab tu snang ba/ rig pa'i gnas thams cad la chags pa dang thogs pa med par dbang 'byor pa mang du thos pa'i bdud rtsi'i nying khus blo gros kyi dbang po rgyas pa/ sa chen po la yang dag par bzhugs pas bdud kyi 'tshe ba dang bral ba/ gcig tu theg pa chen po lhur len pas theg pa gzhan la 'dod pa med pa/ bdag dang gzhan mnyam par sgom pas 'gro ba thams cad la phan pa dang bde bar zhugs pa/ byang chub sems dpa'i spyod pa mthar byung ba/ brtson 'grus lhod pa med pa/ chos thams cad bdag med par mnyam pa nyid rab tu rtogs pa dang / dkon mchog gsum gyi rigs gong nas gong du rgyas par bya ba'i phyir rab tu gzhol ba/ bdag nyid 'dod pa'i 'dam las brgal nas gzhan yang bsgral bar bzhed pa ste/ rang gi slob ma dge slong gi brtul zhugs dor te rgyal po'i bu mo dang 'dod pa bsten pa las slar bzlog pa'i phyir de la gdams pa spring ba'i thog mar ston pa la bstod pa ni rgyu phun sum tshogs pa gang gis zhes tshigs su bcad pa gcig go/ /sangs rgyas bcom ldan 'das gang gis bdud btul nas mdzad pa shin tu dka' spyad mdzad pa ni ji skad du/ lha chen thig le mchog ma la/ /chags pa skyes pas gdong bzhi byung / /bdud kyi bu mo'i sgeg pa yis/ /khyod kyi ba spu'i rtse ma g.yos/ /zhes bshad pa lta bu'o/ /'o na ston pa'i dka' spyad dpag tu med pa ma yin nam/ 'di kho nas ston pa ji lta bu zhe na/ /gdams pa'i yul slob ma de bud med la chags ba bzlog pa'i phyir ro/ /'bras bu phun sum tshogs pa ni/ /bkra shis zhes pa rkang pa gnyis so/ /bkra shis pa ni sprul pa'i sku'o/ /yid du 'ong ba ni longs spyod rdzogs pa'i sku'o/ /rmad du byung ba ni chos kyi sku'o/ /yang na ston pa'i thugs dang / gsung dang / sku ste rim pa bzhin no/ /yang na spangs pa dang ye shes dang che ba nyid de/ rim pa de la sgrib gnyis ni mi shes pa yin la/de dag spangs pa ni bkra shis pa'o/ /mi shes pa ni yid du mi 'ong ba yin la/ ye shes ni yid du 'ong ba'o/ /che ba nyid ni 'jig rten gsum na gtso bor gyur pa rmad du byung ba'o/ /bsod nams chung ngu'i skye bo ni chos kyi rgyun gyi ting nge 'dzin ma thob pa rnams so/ /mthong ba rnyed par dka' ba ni ji skad du/ ji ltar chu yi snod chag na/ /zla ba'i gzugs brnyan mi snang ba/ /de bzhin sems can ngan pa la/ /sangs rgyas gzugs kyang mi snang ngo / /zhes bshad pa lta bu'o/ /'o na su la snang zhe na/ mos pa spyod pa'i skye bo dang / 'phags pa nyan thos rnams la sprul pa'i sku kho na snang ngo / /mtshan ma med pa'i sar zhugs pa'i byang chub sems dpa' rnams la longs spyod rdzogs pa'i sku kho na'o/ /mtshan ma dang bcas pa'i sar zhugs pa'i byang chub sems dpa' rnams la de gnyis ka snang ngo / /sangs rgyas kyi sa la ni chos kyi sku kho nar zad kyis gnyis po med do/ /de skad du yang / sprul yod longs spyod rdzogs pa med/ / longs spyod rdzogs yod cig shos med/ /longs spyod rdzogs dang cig shos yod/ /longs spyod rdzogs dang cig shos med/ /de la mos pa brtan rnams dang / /mtshan ma med pa'i sa rnams dang / /mtshan ma bcas pa gzhan rnams dang / /sangs rgyas nyid dang go rims bzhin/ /zhes pa lta bu'o/ /byams pa phun sum tshogs pa ni/ /'jig rten zhes rkang pa gnyis so/ /'jig rten pa rnams mngon par 'dod pa'i re ba bsgrubs pa ni de dag mtho ris dang thar pa la bkod pa'o/ /yang na long ba dang phrad pas mig thob pa la sogs pa'o/ /ro gcig ni rgyun ma chad par ro/ /yang na rang don dang ma 'dres pa'o/ /snying rje phun sum tshogs pa ni gang zhig rtag tu zhes tshigs su bcad pa gcig go/ /de nyid rang gi bde ba bsgrubs pa dang sdug bsngal sel ba yang yin te/ srid par gnas kyi bar du mya ngan las mi 'da' bar 'dug pa yin no/ /phrin las phun sum tshogs pa ni gang zhig gzhan gyi zhes tshigs su bcad pa gcig go/ /ston pa ni sngon rgyal po zla 'od du gyur pa gang zhig bram ze'i khyi'u le'u du tsa dbu slong ba gzhan gyi don du dbu nags kyi ljon shing la bcings te bram ze gcod du bcug pa ni shing de'i lhas gegs byas pa'i tshe pad+ma 'dam gyis ma gos pa lta bur lha dang bram ze la chags sdang med par dgyes pa'o/ /ston pa nyid kyi don du gdugs dkar po gcig gis 'dzin pa po'i rang gi lus khebs pa lta bur sa thams cad kyang rang gi rgyal srid kyis khebs kyang / de la ral gri so bdar ba rnon pos yan lag la sogs pa gcod pa ltar dge ba'i bar chad du dgongs so/ /yang na sdug bsngal gyi rgyur dgongs so/ /yon tan phun sum tshogs pa ni/ /zla ba zhes tshigs su bcad pa gcig go/ /zla ba ni tshes gcig nas cher 'phel ba dang / 'od gsal ba dang / bco lnga'i tshe dkyil 'khor rdzogs pa dang / mun pa sel ba dang / gcig tu rgyu ba dang / yid du 'ong ba dang / lta ba po'i mig la phan pa dang / lus la bsil ba dang / nam mkha' la 'char ba dang chos dgu dang ldan pa bzhin du ston pa yang ngo / /de la yon tan ni gsum ste/ sku dang / gsung dang / thugs kyi'o/ /cher 'phel ba ni bcu man chad du'o/ /gsal ba ni shes bya thams cad mngon sum du snang ba'o/ /rdzogs pa ni sangs rgyas kyi sar ro/ /nyes pa'i mun pa sel bar mdzad pa ni gdul bya'i ma rig pa sel ba'o/ /gcig pu ni zhing gcig tu sangs rgyas gnyis mi 'byung ba'o/ /de ci'i phyir zhe na/ /'gran zla med pa'i las bsags pa dang / gdul bya rnams ston pa la blang dor ldog pa dang / bdag 'dren pa med pa rnams kyi 'dren pa byed par gyur cig /ces smon lam grub pa'i phyir ro/ /de skad du yang / lhan cig gnyis min sangs rgyas bzhin/ /zhes bshad do/ /yid du 'ong ba ni sku byad lta bas chog mi shes pa'i phyir ro/ /de skad du/ nye bar zhi la yid du 'ong / /'bar la gnod pa mdzad mi mnga'/ /dul la rngom brjid che ba yi/ /sku 'dis su zhig dad mi mdzad/ /khyod kyi sku ni gang gis ni/ /lan brgyar mthong dang gang zhig gis/ /dang po mthong ba de gnyis ka /'dra bar mig ni mgu bar mdzad/ /khyod kyi sku ni mdzes pa'i phyir/ /lta bas mi ngoms rang bzhin pas/ /mthong ngo cog ni phyi phyir zhing / /dga' ba skyed par mdzad pa lags/ /zhes bshad pa lta bu'o/ /'jig rten ni khams gsum mo/ /phan par brtson pa ni de dag sdug bsngal rgyu dang bcas pa las bzlog nas/ bde ba rgyu dang bcas pa la dgod pas na le lo med pa'o/ /bsal ba byung ba ni de skad du yang / /khyod thos pas ni spro ba skye/ /mthong bas dad pa skye bar 'gyur/ /khyod gsung thos pas dga' 'gyur te/ bsten pas rnam par grol bar mdzad/ /ces pa dang / bsgrags pas sdig pa 'phrog par mdzad/ /khyod dran pas ni rangs par 'gyur/ /bsal bas blo gros skye 'gyur te/ /yongs su shes pas rnam par 'dag /khyod la bsu bas dpal du byed/ / bsten pas blo gros mchog tu 'gyur/ /brten na 'jigs pa med par mdzad/ /bsnyen bkur bgyis pas bde bar 'gyur/ /zhes bshad pa lta bu'o/ /de shar ba ni sangs rgyas 'jig rten du byon pa'o/ /bsil bar mdzad pa ni gdul bya rnams kyi me gsum zhi bar mdzad pa ste/ de skad du yang / re zhig dang por khyod kyi gsung / /nyan pa rnams kyi yid 'phrog mdzad/ /de nas yid la bsam bgyis na/ /chags dang gti mug rnams kyang sel/ /zhes bshad pa lta bu'o/ /de ltar sangs rgyas la bstod nas/ chos la bstod pas nyes pa 'joms pa ni/ bstan pa zhes tshigs su bcad pa gcig go/ /rin chen mchog bai DUr+ya ni bzang ba dang / 'phan med pa dang / mching bu rnam par dag pa dang / klu'i gtsug gi rgyan du gyur pa dang / klu'i gnas sa 'og gi mun pa rab rib sel ba ste/ /chos lnga dang ldan pa de bzhin du bstan pa yang ngo / /de la bstan pa ni gnyis las rtogs pa'i chos dang sbyar na bzang ba ni ting nge 'dzin no/ /'phan med pa ni tshul khrims te/ ji skad du/ rnam dag yon tan bzhi ldan no/ /'chal khrims de rgyus 'phan ma byung / /de yi gnyen po zhi la brten/ /zhes bshad pa lta bu'o/ /rnam par dag pa ni shes rab bo/ /lung gi chos dang sbyar na mdo sde dang / 'dul ba dang / mngon pa ste go rims bzhin no/ /chen po ni rigs can gsum mo/ /mnos pa ni thos pa la sogs pa byed pa'o/ /sa'i steng na gnas pa ni bsam gtan dgu na spyod pa rnams kyi yid la gnas pa'o/ /rab rib ni mi shes pa gnyis pa'o/ /legs par sgrub pa ni chos kyi sprin de zhes tshigs su bcad pa gcig go/ /char sprin ni nam mkha' la g.yos pa dang / char gyi rgyur gyur pa dang / char chu de yang ro gcig pa dang / tsha ba'i gdung ba sel ba dang / snod kyi dbang gis ro du mar 'gyur ba ste/ chos lnga dang ldan pa bzhin du bstan pa yang ngo / /phan pa mdzad pa ni snga ma ltar ro/ /mya ngan ni 'khor ba pa'i/ /'das pa ni de las brgal bar ro/ /mchog ni nges pa don dam par dge ba yin pa'i phyir ram/ 'dus ma byas pa'i phyir ro/ /de'i rgyu ni des de thob par byed pa'o/ /ro gcig pa ni chos thams cad bdag med pa/ tha mi dad pa'o/ /yang na theg pa gcig tu tha mi dad pa ste/ ji skad du/ shA ri'i bu nga la dad par gyis shig nges par zung shig /shA ri'i bu de bzhin gshegs pa la ni brdzun gsung ba mi mnga' 'o/ /shA ri'i bu theg pa ni 'di gcig pu kho nar zad de/'di lta ste/ sangs rgyas kyi theg pa'o zhes gsungs pa lta bu'o/ /gdung ba sel ba ni sdug bsngal ba dang nyon mongs pa spong ba'o/ /snod ni nyan po'i dbang po tha dad pa'am/ rigs tha dad pa'o/ /ro rnams du mar 'gyur ba ni theg pa gnyis sam gsum mam bzhir 'gyur ba'o/ /de skad du yang / lha yi theg dang tshangs pa'i theg /bde gshegs nyan thos rang rgyal gyi/ /theg pa tha dad ngas bshad do/ /zhes gsungs pa lta bu'o/ /'o na sngar ro gcig tu zhes theg pa gcig tu bshad pa dang 'gal lo zhe na/ mi 'gal te/ go rims bzhin du nges pa'i don dang / drang ba'i don gyi dbang du byas pa'i phyir ro/ /de ltar chos la bstod nas/ dge 'dun la bstod pa'i bsam pa phun sum tshogs pa la bstod pa ni/ snod yangs zhes rkang pa phyed dang gnyis so/ /rgya mtsho chen po ni 'bab chu'i snod du gyur pa dang / rgya che ba dang / zab pa dang / dri ma med pa dang / bla 'og gsal ba dang / gru gzings la sogs pa 'debs pa na khur bzod pa dang / khrus dang btung ba la sogs pa nye bar spyad pa dang /nya dang rus sbal la sogs pa'i gnas su gyur pa ste/ chos brgyad dang ldan pa bzhin du dge 'dun rnams kyang ngo / /de la dge 'dun ni rgyud yon tan gyi snod du gyur pa dang / yangs pa'i bsam pa ni tshad med pa bzhi yid la byed pa ste/ sems can thams cad la dmigs pa'i phyir ro/ /zab pa'i bsam pa ni bdag med pa gnyis yid la byed pa ste gting dpag dka' ba'i phyir ro/ /dri ma med pa'i bsam pa ni dri ma drug dang bral ba'i phyir ro/ /ji skad du/ gzhan yang nyon mongs dri ma drug /sgyu dang g.yo dang rgyags pa dang / /de bzhin 'tshig dang khon 'dzin dang / /rnam 'tshe'o zhes bshad pa lta bu'o/ /gsal ba'i bsam pa ni nyon mongs pa'i mun pa sel ba'i phyir ro/ /sbyor ba phun sum tshogs pa ni/ /khur kun bzod ba zhes rkang pa phyed dang gsum mo/ /de la khur bzod pa ni gzhan gyi don byed pa na skyo ba med pa'o/ /de skad du yang / dper na rab dul stobs ldan glang po che/ /khal rnams khyer kyang skyo bar 'gyur ba med/ /de bzhin byang chub sems dpa' rab dul ba/ /sems can khur gyis skyo bar 'gyur ba med/ /ces pa dang / yang / sems can khur chen mgo la khyer ba yi/ /sems pa mchog ni dal gyis 'gro mi mdzes/ /bdag gzhan 'ching ba sna tshogs rab bcings pas/ /brtson pa brgya 'gyur gyis ni bya bar rigs/ /zhes bshad pa lta bu'o/ /skye bo kun gyis dge 'dun la legs par sgrub pa thams cad do/ /nye bar spyad bya ni mtho ris dang thar pa'o/ /de gnas pa ni de thob pa'i rten byed pa'o/ /'o na dge 'dun ni 'gro ba gzhan gyi rten can yang ma yin nam/ mi'i gzugs can kho nar brjod pa ji lta bu zhe na/ phal che ba'i phyir ro/ /de ltar mchod par brjod nas/ gdams ngag brjod pa'i dam pa'i chos mi 'dzin pa'i nyes pa ni/ gang dag ces tshigs su bcad pa gcig go/ /bstan pa 'dir mi 'jug pa gang dag skye ba ni mngal la sogs pa nas 'byung ba'o/ / rga ba ni na tshod gyur pa'o/ /shi ba ni srog gyur pa'o/ /bdud rtsi ni dam pa'i chos so/ /de thos pas thob par mi phyed/ bsam pas mi spyod/ sgom pas 'dzin par mi byed pa'o/ /yang na bslab pa gsum dang rim pa bzhin no/ /yang na theg pa gsum dang ngo / /de la nyes pa ci yod ce na/ /de dag nyes mang zhes rkang pa gnyis so/ /bzung nas btang ba'i nyes pa ni/ /'gro ba kun gyi zhes tshigs su bcad pa gcig go/ /mig ni chos te/ lam dang lam ma yin pa mthong bar byed pa'i phyir ro/ /dri ma med pa'i lung ni dri ma med pa'i rjod byed yin la/ rtogs pa ni de'i rgyu yin pa'i phyir ro/ /sa gsum ni khams gsum mo/ /bzung nas ma btang ba'i phan yon ni/ byang chub ces rkang pa bzhi'o/ /bslab pa'i gzhi bcas pa ni sgrub pa dang spang bar khas blangs pa rnams so/ /rkang tshugs rton pa ni khas blangs pa rnams mi nyams par byed pa'o/ /go 'phang chen po ni mtho ris so/ /go 'phong mtho ba ni thar pa'o/ /sa gnyug mar ltung ba ni mi khom par skye ba'o/ /tshul khrims ni srid pa'i rgya mtsho las rgal ba'i rten byed pa'i gzings su gyur pa'o/ /lag tu 'ong ba ni de thob pa'o/ / spong ba ni de stong pa'am nyams par byed pa'o/ /sbong mod nyes pa cir 'gyur zhe na/ 'phags pa'i zhes rkang pa gnyis so/ /g.yang sa ni ngan 'gror 'gro ba ste/ bde 'gro nas thur du ltung ba'i phyir ro/ /de skad du yang / 'di 'og stong phrag nyi shu na/ mnar med pa'o/ /de tsam zhes pa pa dang / yang dpag tshad stong du ltung ba yis/ /yun rings g.yang sa smos ci dgos/ /zhes bshad pa lta bu'o/ /ldang bar brtson pa ni g.yang sa dang mun pa nas thar par 'dod pa'o/ /tshul khrims la sogs pa'i yon tan rgyun mi 'chad par smyug ma'am/ nar mar bstan par bya ba'i 'dren pa ste/ dpyang thag gam zhags pa lta bu'o/ /bar ma dor 'dor ba ni de spong ba'o/ /dor mod nyes pa cir 'gyur zhe na/ de dag ces rkang pa gcig go/ /lam ji ltar bsgrub pa'i thabs ston pa na tshul bzhin yid la byed pa ni/ gang dag ces tshigs su bcad pa gcig go/ /thar pa chol ba gang dag gcig pur gnas sam/ 'ang gi sgras mang po'i tshogs na gnas kyang rung / yid kyis rab brtags ni 'di snyam du bdag gi sgo gsum las gsum po gang la 'jug snyam du dpyod pa'o/ /de ltar dpyad pas sgo gsum dge ba la 'jug na de la sbyor zhing gnyis la 'jug na de dag las bzlog par bya'o zhes ston pa ni yang dag las dang zhes rkang pa gcig go/ /yang dag pa'i las ni dge ba'o/ /lhan cig ni yul dang dus kun du'o/ /mnyam par 'grogs pa ni de lus dang srog gi phyir yang mi 'dor ba'o/ /yang na de la 'jug par slob pa'o/ /des phan yon ci thob ce na/ /sa steng zhes rkang pa gnyis so/ /sa steng dkyil na ste mi rnams kyi dbus na'o/ /gtso bor gyur pa ni dge ba sgrub pa'o/ /dam pa ni mi dge ba spong ba'o/ /yang na tshul khrims ni ma thob pa thob par byed pa dang / /thob pa mi nyams par byed pa ste tshig gnyis dang rim pa bzhin no/ /slob ma mchog ni de len pa'o/ /bla ma ni de sbyin pa'o/ /bkur ba nyid du 'gyur te/ des de la sgrub pa'i mchod pa phul ba'i phyir ro/ /ngo tsha shes pa ni ngo tsha zhes tshigs su bcad pa gcig go/ /dper na ma ni bu'i lus skyed pa dang / rigs btsun pa dang / bu la g.yo mi byed pa dang / bu la byams pa dang / bu'i rjes su 'brang ba dang / bu la bden par smra ba dang / bu la gzhung lugs che ba dang / bu skyong ba la dga' ba dang / bran mo la sogs pa zil gyis gnon pa'i gzi brjid che ba dang / rang gi srog gtong gi bu mi gtong ba ste/ chos bcu dang ldan pa bzhin du ngo tsha shes pa yang ngo / /ngo tsha shes pa rnams ni rang gi srog bde blag tu gtong bar byed kyi dam bcas pa'i bslab pa rnams mi gtong ba yin te/ mdo las dge tshul pha la bu mos gsol ba btab pa na tshul khrims kyi don du rang gi srog dor ba'i gtam rgya cher gsungs ba lta bu'o/ /khrel yod pa ni re zhig ces tshigs su bcad pa gcig go/ /dam bca' ba btang mod nyes pa cir 'gyur zhe na/ re zhig skye bo kun gyi dpyas dang zhes smos te/ mdza' ba dang mi mdza' ba dang bar ma thams cad kyis nyes pa sgrogs pa'am/ sdig pa'i 'gro ba ni ngan song rnams te de dag ni mi dge ba las skyes pa'i phyir ro/ /rang bzhin rnal ma bor ba ni sngon gyi grol so dang chos dang zang zing gi longs spyod las nyams pa'o/ /mkhas la sa steng ni tshul khrims nyams pa de kho na sdug bsngal che'o/ /de las ma gtogs pa'i sdug bsngal gzhan ci yod/ lam mi sgrub pa'i nyes pa ston pa'i sred pas slu bar 'gyur ba ni/ gang zhig ces tshigs su bcad pa gcig go/ /chos kyi lam ni theg pa gsum ste/ rigs can gsum gyis bgrod par bya ba'i phyir ro/ /rgya chen po ni phan yon shin tu rgya che pa'o/ / yang na theg pa chen po'o/ /dor mod nyes pa cir 'gyur zhe na/ 'khor ba'i rgya mtsho zhes rkang pa gnyis so/ /gar mkhan gyi lus kyi byed pa mi rtag pa dang 'dra bar ro/ /dga' ba ni rjes su chags pa'o/ bslus pa ni mtho ris dang thar pa las nyams pa'o/ /'khor bar 'khyams par 'gyur ba ste/ gang zhig 'khor ba'i zhes tshigs su bcad pa gcig go/ /rtag tu 'gyur ba ni 'gro ba gcig nas gcig tu 'pho ba'o/ /bsti ba tsam ni 'dod pa'i yul lnga thob pa'o/ /mnyam pa ni lha dang mi rnams so/ /mi mnyam pa ni ngan 'gro rnams so/ /'khyams mod nyes pa cir 'gyur zhe na/ sdug bsngal gyis gzir bar 'gyur zhes ston pa na/ thog mar mi'i dbang du byas nas mngal gyi sdug bsngal ni/ shin tu mi bzod ces tshigs su bcad pa gcig go/ /skye ba'i sdug bsngal ston pa'i shin tu dog pa ni/ de ni zhes rkang pa gnyis so/ / srog mi spang ba ni/ 'on kyang zhes pa rkang pa gnyis so/ /mi gtsang bas gzir ba ni mi gtsang zhes rkang pa gnyis so/ /lus dang sems nyams par 'gyur ba ni gnod pa zhes pa rkang pa gnyis so/ /sngon gyi dran pa spong ba ni mngal gyi sdug bsngal rnams brjed pa'o/ /byis pa'i sdug bsngal ni lus zhes rkang pa gnyis so/ /nye bar spyod pa kun la mi 'bongs pa ni des sgo gsum gyi las yongs su rdzogs par mi nus pa'o/ /dar la bab pa'i sdug bsngal ston pa'i sbyor ba nyams pa ni dar la bab ces rkang pa gnyis so/ /sbrul gdug ni 'dod chags la sogs pa'o/ /gnas gyur ni rten byed pa'o/ /mu ni mtha' ste 'dod pa lnga'o/ /bag rkyong ba ni ngo tsha ba dang 'jigs pa med par ro/ /spyod mod nyes pa cir 'gyur zhe na/ bsam pa nyams pa ni/ bsam brlag ces tshigs su bcad pa gcig go/ /dge ba'i bsam pa brlag pa de ni dar la bab pa de nas kyang rgan por lhung ngo / /mi gtsigs spyod pa mi 'dor ba ni sgo gsum zhi bar spyod pa'o/ /de mi 'dor ci'i phyir zhe na/ rga shi med par lta ba'i phyir zhes ston pa ni/ byis pa bdag lus zhes rkang pa gnyis so/ /lam las nyams pa ni rmongs pa zhes tshigs su bcad pa gcig go/ /de ltar sems pa med na nyes pa cir 'gyur zhe na/ rmongs pa zhes smos te/ blang bya dang dor bya mi shes pa'o/ /lam bzang ni sbyin pa la sogs pa ste 'bras bu yid du 'ong ba 'byin pa'i phyir ro/ /lam min ni mi dge ba srog gcod pa la sogs pa ste 'bras bu yid du mi 'ong ba 'byin pa'i phyir ro/ /bab dgu ni rtswa shing la sogs pa glang po'i lam du bab pa thams cad phye mar rlog cing 'gro ba bzhin du mtho ris dang thar pa phye mar rlog cing ngan song 'khor bar 'gro ba'o/ /rga ba'i sdug bsngal ston pa'i dga' bas lus dbang sgyur ba ni/ de nas de ni zhes tshigs su bcad pa gcig go/ /dar la bab pa ni de nas mi gtsigs pa de ni'o/ /dge ba'i chos 'grib par 'gyur ba ni/ 'on kyang zhes rkang pa gnyis so/ /mi dge ba 'phel bar 'gyur ba ni/ rmongs pa zhes rkang pa gnyis so/ /rang gi phun sum tshogs pa nyams par 'gyur ba ston pa na skra nyams pa ni de nas de ni zhes tshigs su bcad pa gcig go/ /dgod pa bzhin du zhes pa ni skye bo rnams dgod pa'i tshe so dkar po snang ba bzhin du rgas pas skra dkar po snang ba'o/ /lus dang bsam pa nyams pa ni de nas de'i lhu tshigs zhes tshigs su bcad pa gcig go/ /blo bslad pa ni sems 'khrugs shing dran pa nyams pa'o/ /'gro ba nyams pa ni yul gzhan du 'gro ba na 'khar ba 'am bzhon pa med na 'gro mi nus pa'o/ /de skad du yang / kha lo sgyur ba mi rid nyam chung zhing / /sha khrag bskams shing rgyus lpags nyi tshes dkris/ /mgo dkar so rgal lus ni rab skem la/ /'khar bar brten cing mi bde khyogs 'gro su/ /zhes gsungs so/ /dengs pa ni mdangs yal ba'o/ /shig shig po ni tshigs rnams 'khrul pa'o/ /dbang po nyams pa ni dbang po zhes rkang pa gcig go/ /'dod pa bsten pa nyams pa ni/ yul la zhes rkang pa gcig go/ /'jigs pa skyed pa ni/ gnas skabs zhes rkang pa gnyis so/ /rga ba'i gnas skabs gang du dar la bab pa 'di 'gro bar 'gyur ba'o/ /'chi ba'i sdug bsngal ston pa ni 'gyod pa'i sdug bsngal ba ni/ bdag gis zhes tshigs su bcad pa gcig go/ /'di ma byas ba ni dge ba ma byas pa'o/ /de la byas pa ni sdig pa de spyad pa'o/ /'gro ba nyams pa ni bde 'gro nas ltung ba'o/ /'phrigs par ma gyur pa ni de ltar ma shes pa'o/ /mya ngan gyis sdug bsngal ba ni mya ngan zhes tshigs su bcad pa gcig go/ /rdo rje bsnun pas lus la gnod pa de lta bur mya ngan skye bas sems la gnod pa'o/ /gnad gcod pas sdug bsngal ba ni/ gnad kyi gshis su zhes pa'i tshigs su bcad pa gcig go/ /zas dang gos la sogs pas bde ba lhur byas nas bkres skom dang tsha grang la sogs pa bsrung bar byas pa'o/ /yid du 'ong ba ni gces phangs su 'dzin pa'o/ /'dris pa ni thog ma med pa nas nga'i lus snyam du zhen pa'o/ /gshin rjes bzung bas sdug bsngal ba ni/ gshin rje'i zhags pas zhes tshigs su bcad pa gnyis so/ /cho nges 'debs na de nye du rnams kyis thos pas grogs byed par 'gyur ro zhe na/ de yis zhes rkang pa gnyis so/ /gshin rjes bzung mod nyes pa cir 'gyur zhe na/ bgrod dka' zhes rkang pa bzhi'o/ /dus kyi zhags pa ni 'chi ba'i dus kyi che'o/ /de ltar mi'i sdug bsngal bstan nas/ ngan 'gro'i sdug bsngal ston pa'i yi dgas zas la sgrib pa can gyi sdug bsngal ni/ mi bzad pa skom pas zhes tshigs su bcad pa gcig go/ /phyi'i sgrib pa can gyi sdug bsngal ston pa'i ri bo phyin ci log tu snang ba ni/ dus rlabs zhes tshigs su bcad pa gcig go/ /rlung gis chu bskyod pa'i dus su rlabs chen po langs nas chu gyen du 'thor bas ri rtse bsel ba'o/ /chu bo phyin ci log tu snang ba ni/ /chu gter zhes tshigs su bcad pa gcig go/ /chu gter ni rgya mtsho ste chu mi zad pa'i 'byung gnas su gyur pa'i phyir ro/ /char sprin phyin ci log tu snang ba ni/ /'di ni zhes tshigs su bcad pa gcig go/ /tsha grang phyin ci log tu snang ba ni/ tsha bas nyen la zhes rkang pa gnyis so/ /de ltar phyin ci log tu snang ba'i rgyu ni shin tu zhes rkang pa gnyis so/ /nang gi sgrib pa can gyi sdug bsngal ni/ khab mig tsam zhes tshigs su bcad pa gcig go/ /de ltar yi dgas kyi sdug bsngal brjod nas/ dmyal ba'i sdug bsngal ston pa'i khyis 'tshe ba ni ral pa'i zhes tshigs su bcad pa gcig go/ /spu gris smas pa ni spu gri zhes rkang pa gnyis so/ /khron par ltung ba ni/ rtse gsum zhes rkang pa gnyis so/ /gshin rje'i kha bas thu ba ni/ /de bas das 'jigs pa'o/ /lo ma'i ral gris gshags pa ni/ nyin mtshan zhes tshigs su bcad pa gcig go/ /de'i tshe dud mo khon bshes yin gyi de las gzhan pa'i bshes med pas de brlag par gnas so/ /bud med 'bar bas 'khyud pa ni/ bud med ces tshigs su bcad pa gcig go/ /'khrigs pa ni snga ma shi bar phyi ma skye ba'o/ /lug gis 'joms pa ni ri dang zhes tshigs su bcad pa gcig go/ /shal+ma li'i gnod pa'i yar 'dzegs pa'i tshe tsher mas gnod pa ni/ bse khyi zhes tshigs su bcad pa gcig go/ /sbrul gyis gnod pa ni gshin rje'i zhes rkang pa gnyis so/ /byas gnod pa ni/ gson por zhes tshigs su bcad pa gcig go/ /mar 'bab pa'i tshe tsher mas gnod pa ni/ thur du zhes rkang pa gnyis so/ /mtshon gyis gnod pa ni/ /de na zhes rkang pa gnyis so/ /byas 'tshe ba ni/ de tshe zhes rkang pa gnyis so/ /g.yang sar lhung ba ni/ kha cig ri bo'i zhes rkang pa gcig go/ /zangs su btsos pa ni/ kha cig 'bru mar zhes rkang pa gcig go/ /sa gzhi 'bar bar ltung ba ni gzhan dag ces rkang pa gnyis so/ /'bu sbrang gis za ba ni/ kha cig 'bu sbrang zhes rkang pa gnyis so/ /'o na de ltar sdug bsngal chen pos bcom pa rnams 'chi 'pho bar mi 'gyur ba ci ste zhe na/ de dag gson pa'i rgyu ni/ las kyi zhes rkang pa gnyis so/ /las ni mi dge ba'o/ /'tsho ba ni srog go/ /thogs pa ni des gzung ba'o/ /rang gi yan lag bskyod pa tsam yang ngo / /gson pa ni bdag nyid 'chi bar smon kyang mi 'chi ba'o/ /de ltar tsha ba'i dmyal ba bstan nas/ grang ba'i dmyal ba ston pa'i chu bur can ni lhags pa zhes rkang pa phyed dang gsum mo/ /chu bur rdol ba ni/ rdol ba zhes rkang pa phyed dang gnyis so/ /so tham tham pa ni kos thag ces tshigs su bcad pa gcig go/ /da ni rab tu tsha ba bye brag tu ston pa'i me'i gnod pa ni/ dmyal mes zhes rkang pa gnyis so/ /dmyal ba'i srung mas 'tshe ba ni/ rus gong zhes rkang pa gnyis so/ /mnar med pa'i sdug bsngal ston pa'i mdor bstan pa ni/ gnyis las phyi'i gnod pa ni/ la lar zhes rkang pa gnyis so/ /nang gi gnod pa ni brang gi zhes rkang pa gnyis so/ /rgyas par bshad pa yang gnyis las nang gi gnod pa ni/ glo nas zhes tshigs su bcad pa gcig go/ /phyi'i gnod pa ni/ sdug bsngal zhes tshigs su bcad pa gsum mo/ /de las gnas khang gi gnod pa ni/ sdug bsngal zhes tshigs su bcad pa gcig go/ mda'i gnod pa ni/ mda' chen zhes rkang pa gcig go/ /dbyug pas gnod pa ni dmyal ba'i srung mas zhes rkang pa gcig go/ /khu ba 'bar ba'i gnod pa ni/ lcags zhun zhes rkang pa drug go/ /spyi'i don bsdu ba ni/ skye bo zhes tshigs su bcad pa gcig go/ /de ltar dmyal ba'i sdug bsngal bstan nas/ dud 'gro'i sdug bsngal ston pa/ des ngal 'byor rnyed par dka' ba ni/ skye bo zhes tshigs su bcad pa gcig go/ /'chal spyod pa ni mi dge ba byed pa'o/ /de nyes pa cir 'gyur zhe na/ brgyal zhe na/ 'jig rten 'gro ba mtha' yas bye ba 'phyes rnams su dud 'gror skye'i/ mi'i dngos po shin tu rnyed par dka' ba nyid/ mi'i nang na yang smad par skye ba ni/ gal te zhes rkang pa gcig go/ /dud 'gro gcig nas gcig tu brgyud pa ni/ dud 'gro zhes rkang pa byed dang gnyis so/ /de nas dmyal bar ltung ba ni/ gang gis zhes rkang pa phyed dang gnyis so/ /de ltar theg pa thun mong gi lam sgrub pa gdams nas theg pa chen po'i lam sgrub pa la gdams pa brjod pa na sgrub pa'i rten ni gang zhig ces tshigs su bcad pa gcig go/ /gang zhig ni dal 'byor ro/ /skye ba ni sems can rnams der bying ba dang de las brgal dka' bas rgya mtsho'o/ /byang chub mchog gi sa bon dge ba ni de skyed pa ste/ /ji skad du/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o zhes gsungs pa lta bu'o/ / dge ba ni de ma bskyed pa skyed cing mi nyams par byed pa'o/ /bsgrub par bya ba'i lam ston pa ni/ bde gshegs zhes rkang pa gnyis so/ /mi ma yin pas bsgrub par mi nus pa ni/ lam de zhes rkang pa gnyis so/ /mi rnams lam bsgrub pa la sbyar ba ni/ mi'i dngos po zhes rkang pa gnyis so/ /lam la 'jug pa'i sgo mi rtag pa yid la byed pa na skad cig gi mi rtag pa ni/ mar me zhes rkang pa gnyis so/ /glo bur gyi mi rtag pa ni/ 'di ni zhes pa'i tshigs su bcad pa gcig go/ /rgyun gyi mi rtag pa ni/ so ga zhes tshigs su bcad pa gcig go/ /sgrub pa'i gnas ni/ zla ba'i zhes tshigs su bcad pa gcig go/ /sgrub pa'i grogs ni/ nags mthongs zhes tshigs su bcad pa gcig go/ /dga' ba'i nags tshal ni sum cu rtsa gsum pa rnams la yod pa'o/ /sgrub pa'i cha rkyen chu phun sum tshogs pa ston pa ni nags rlung zhes tshigs su bcad pa gcig go/ /chu gtsang ni dri rnyog pa dang / srog chags med pa'o/ /dogs bde ba ni 'gram gnyis kyang ngo / /dben pa ni 'du 'dzi nyung ba'o/ /de na skyid pa gang yin pa de ni sum cu rtsa gsum pa'i lha'i bu mo'i lus lha'i spos dang sman dri zhim pos byugs pa'i mgo bo'i lan bu'i rgyan du thogs pa me tog gi tshogs mdzes pa zil gyis gnon pa'i rgyun dang ldan pa lha'i chu la'ang yod par 'gyur ram/ rgyun dang ldan pa'i lha'i chu ni sum cu rtsa gsum pa'i mtshe'u dal gyis 'bab pa yin no/ /shing phun sum tshogs pa rtsa ba 'bras bu zhes tshigs su bcad pa gcig go/ /nyams dga' ni yid du 'ong ba'o/ /bas mtha' ni grong zad pa'i mur thug pa'o/ /gcig pu ni grogs med par ro/ /dmyal sdong ni khyim gyi grong 'dab bam chung ma ste 'bras bu'i ming rgyu la btags pa'i/ /bslus med gnas pa ni nges brid par mi nus pa'o/ /de dag gi don bsdus pa ni ri sul zhes tshigs su bcad pa gcig go/ /de la gnas kyi don bsdu ba ni ri sul zhes rkang pa gcig go/ /shing gi don bsdu ba ni/ nyer spyod ces rkang pa gcig go/ /chu'i don bsdu ba ni chu ngogs zhes rkang pa gnyis so/ /ri sul yangs pa ni gcong rong dang ngam grog la sogs pa med pa'o/ /nyer spyod rgya che ba ni der 'chag pa dang 'dug pa la sogs pa bag yangs su spyod pa'o/ /nyan pa ni thos pa'i tshe rna bar 'phrod pa'o/ /ji ltar snyan zhe na rnga ltar ro/ /phu chu bdag cag skom pas nyon mongs shing sdug bsngal ba'i yul min te/ 'thungs na ngoms pas bde zhing skyid pa'i yul yin zhes 'gron la sgrogs pa bzhin chu sgra 'byin pa'o/ /sgrub pa'i bar chad spong ba na/ 'dod pa'i nyes pa yid la byed pa ni/ 'dod pa rnams zhes bya ba la sogs pa'o/ /de la 'dod pa rnams snang la rang bzhin med pa ni/ 'dod pa rnams 'byor dang zhes rkang pa gnyis so/ /'dod pa'i 'bras bu yid du mi 'ong ba ni rmi lam lta bu zhes rkang pa gnyis so/ /ngan spyod 'khrul pa ni mi dge ba bcu byed pa'o/ /de la chags pa ni 'dod pa la sred pa'o/ /'dod pa'i bde ba yid du mi 'ong ba ni/ yul dang zhes tshigs su bcad pa gcig go/ /dug pas 'dod pa nyes dmigs che ba ni dug dang zhes rkang pa gnyis so/ /de'i gtan tshigs ni dug ni zhes rkang pa drug go/ /de ltar 'dod pa dang yul gyi nyes pa brjod nas/ 'dod byed yul can gyi nyes pa ston pa ni/ ji ltar zhes tshigs su bcad pa gcig go/ /rnyed pa grub pa med pa ni rtswa lo ma zos pa'o/ /de dang 'dra bar bde 'gror grub pa med par ngan 'gror ltung ba'o/ /de ltar 'dod pa spyi'i nyes pa bstan nas khyad par du lha'i 'dod pa'i nyes dmigs ston pa'i mtshe'u la chags pa'i nyes pa ni lha'i bu mo zhes tshigs su bcad pa gcig go/ /'phral thabs glong ba ni rang gi phun sum tshogs pas dregs pa'o/ /ljon shing la chags pa'i nyes pa ni dga' tshal zhes tshigs su bcad pa gcig go/ /dpag bsam gyi shing ni bzhi ste/ bza' btung dang / gos dang / rgyan dang / rol mo'i dpag bsam gyi shing ngo / /sa la chags pa'i nyes pa ni/ /rkang gzhag ces tshigs su bcad pa gcig go/ /de la rkang pa gzhag nems zhes sor bzhis dma' bar 'gyur zhing bteg na par zhes sor bzhis mtho bar 'gyur ba'o/ /reg na bde ba ni lus la phan 'dogs pa'o/ /khang bzangs la chags pa'i nyes pa ni/ dril bu zhes tshigs su bcad pa gcig go/ /khang pa de'i steng g.yogs nas dril bu mdzes pa 'khrol zhing mu tig gi phreng ba'i tshogs 'phyang ba 'od lhag ge ba'i gzhal med khang du zhugs te/ /lha yul der 'dod pa lnga bgrod nas te longs spyod byas nas kyang ngo / /pha mtha' ste thar thabs med pa'i nang du'o/ /dbang phyug la chags pa'i nyes pa ni/ gang du zhes tshigs su bcad pa gcig go/ /rnam par rgyal byed kyi khang bzangs gang du rgyal chen ris bzhi dang / /sum cu rtsa gsum pa'i lha dang / klu dang / mi'am ci'i spyi bos brgya byin gyi rkang pa la gtugs nas/ de dag gi mgo bo'i rgyan gtsug gi nor bu mar gad kyi 'od kyi tshogs kyis rkang rten te gdan khri dmar por gyur pa'o/ /de yang 'gro ba ngan par 'gro bar 'gyur ba ni ngan song du lhung ba ste/ ji skad du/ brgya byin 'jig rten mchod 'os gyur nas ni/ /las kyi dbang gis phyir yang sa stengs ltung / /zhes bshad pa lta bu'o/ /srog la chags pa'i nyes pa ni me tog ces tshigs su bcad pa gcig go/ / 'tsho ba ni srog go/ /de ma 'gags bar du sems can gson por 'tsho ba'o/ /sdug bsngal ba la bde bar rlom pa'i nyes pa ni sdug bsngal zhes tshigs su bcad pa gcig go/ /nga rgyal byed mod nyes pa cir 'gyur zhe na/ de ni zhes rkang pa gnyis so/ /'khor ba la chags pa'i nyes pa ni/ de na gshin rjes zhes tshigs su bcad pa gcig go/ /log par smon pa ni srid pa dang srid pa'i yo byad thob par 'dod pa'o/ /de nyid 'jig pa'i rgyu yin pas 'jig pa zhes bya'o/ /sdug bsngal ba la bde bar rlom pa'i dpe dgod pa ni dmyal rnams zhes tshigs su bcad pa gcig go/ /dmyal ba de nyid shin ci ma rung snyam pas tho ba bsnun pas mchog tu bde ba yin par sems so/ /don de dang 'dra bar sbyar ba ni/ de bzhin zhes tshigs su bcad pa gcig go/ /rtag tu ni mya ngan las 'das pa ma thob kyi bar du'o/ /re zhig tsam zhig ni lha dang mir skyes pa na'o/ /ji zhig ltar bsod nams bsags pa'i dbang gis ngan 'gro'i skye shi'i 'khrul 'khor med nas skad cig ste/ bde 'gro nas ma lhung bar du ngan 'gro'i sdug bsngal gnyug mar bzod dka' me lce lta bu zhi 'gyur na/ lha dang mi'i 'jig rten thams cad bde ba kham 'ga' ste/ lha dang mi'i 'dod pa lnga la yang sred par byed do/ /lam sgrub pa'i rang bzhin gnyen po sgom pa na 'khor ba sdug bsngal du yid la byed pa ni/ ji lta ji ltar 'gro ba kun na zhes tshigs su bcad pa gcig go/ /stug po ni shas che ba'o/ /srab mo ni shas chung ba'o/ /mi sdug par yid la bya ba ni ji lta ji ltar sdug pa zhes tshigs su bcad pa gcig go/ /mched pa ni 'phel ba'o/ /zhil ba ni 'grib pa'o/ /zhar la bud med sdug par smra ba'i 'bras bu ni/ bud med ces tshigs su bcad pa gcig go/ /lus ni pad+ma ltar 'jam/ byad bzhin zla ba ltar mdzes/ mig ni ut+pal ltar dkar gnag phyed ces mgo snyoms pa'o/ /snyoms mod nyes pa cir 'gyur zhe na/ snyan dngags mkhan gyi brdzun de'i zhes rkang pa gcig go/ /mi bzad pa de gang zhig ce na/ de dag ces rkang pa gcig go/ /mi rtag par yid la byed pa ni sems can mi rtag pa ni/ 'gro ba zhes tshigs su bcad pa gcig go/ /snod mi rtag pa ni gang gi zhes tshigs su bcad pa gcig go/ /longs spyod mi rtag pa ni sdug bsngal ba dang / bde ba dang / skye gnas la longs spyod pa ste/ rim pa bzhin sngon chad ces pa rkang pa gcig dang gcig dang gnyis so/ /byams pa dang snying rje yid la byed pas nye du la byams pa sgom pa ni/ skye ba zhes tshigs su bcad pa gcig go/ /grogs la byams pa sgom pa ni/ gang dag ces tshigs su bcad pa gcig go/ /dus kyi rim pa ni so ga la sogs pa'o/ /mnyam pa ni rigs la sogs pas mtshungs pa dang 'grogs pa'o/ /mi mnyam pa ni mtho ba'am dma' pa dang 'grogs pa'o/ /gnyen bshes la snying rje bsgom pa ni/ nye du zhes tshigs su bcad pa gcig go/ /sems can thams cad nye du yin na dgra dang bar ma la nye dur ngo ma shes pa ji lta bu zhe na/ skye shis zhes rkang pa gnyis so/ /ma la byams pa sgom pa ni/ byis pa zhes tshigs su bcad pa gnyis so/ /bu'i ched du las kyi mtha' sna tshogs la 'bad pas ngal ba mang po bsten kyang bu la byams pa bsten pa de dag rang bzhin gyi don byed pa'i skabs 'dir bu shin tu ma rabs shig yod du zin na'ang ma de spong zhing 'dor bar su zhig spro ste spro bar mi bya'o/ /de ltar byams pa dang snying rje sgom pa'i thabs bstan nas/ goms pa'i phan yon ston pa'i snying rje'i phan yon ni/ 'gro ba sdug bsngal zhes tshigs su bcad pa gcig go/ /sdug bsngal mi bzad pa mang po ni sdug bsngal chen po gsum mam/ brgyad dam/ brgya rtsa bcu la sogs pa'o/ /dbang med pa ni mi 'dod bzhin du 'byung ba'o/ /skyabs med pa ni sdug bsngal sel ba'i grogs med pa'o/ /gzhan sdug bsngal ba'i don du bdag gi sdug bsngal bzod pa gang yin pa de bde ba'i rgyu la gnas pas bde zhes skyes mchog gsung ngo / /tha na skad cig tsam yang gzhan la bza' btung byin pas des bkres skom dang bral ba dang / gos byin pas tsha grang dang bral bas de mgu zhing rangs par byas pa des bdag dga' ba gang yin pa de dang 'dra bar snying rje goms pa 'di na gang zhig yod de med do/ /byams pa'i phan yon ni gzhan phan zhes tshigs su bcad pa gcig go/ /gzhan la mya ngan las 'das pa'i phan yon dang / lha mi'i bde ba bskyed par brtson pas bdag dga' ba rnyed pa gang yin pa de ni ste/de dang mnyam pa yul lnga'i bde ba'i longs spyod lhur len pa rnams kyis ji ltar thob ces 'og ma dang sbyar ro/ /de ltar phan yon bstan nas/ spyod pa ston pa'i byams pa'i spyod pa gzhan bde ba sgrub pa la brtson pa ni shin tu rnyed sla zhes tshigs su bcad pa gcig go/ /byam pa'i spyod pa byed pa 'di kho na'o/ /'phags pa ni rang gi don lhur len pa rnams pas de mchog tu gyur pa'o/ /gzhan bde ba sgrub pa la gzhol ba ni/ nyi ma rlabs chen zhes tshigs su bcad pa gcig go/ /de 'dra zhes bya ba ni nyi ma dngas dang mtshungs pa'o/ /gcig tu gzhol ba ni rang don dang 'dren mas ma yin pa'o/ /yang na gcig pu gzhol te grogs la mi ltos par ro/ /snying rje'i spyod pa ston pa'i gzhan gyi sdug bsngal sel ba la brtson pa ni/ 'jig rten zhes tshigs su bcad pa gcig go/ /gzhan gyi sdug bsngal sel bar dga' ba ni/ gzhan gyi don du tshigs su bcad pa gcig go/ /gzhan gyi sdug bsngal sel ba na bde ba ni/ gzhan la phan par zhes tshigs su bcad pa gcig go/ /rang smin nas gzhan smin par byed pa ni/ rgal bar 'gyur zhes tshigs su bcad pa gcig go/ /de ltar byams pa dang snying rje yid la byed pa bshad nas/ bslab pa gsum brtan par byed pa 'chad pa ni de ltar zhes bya ba la sogs pa'o/ /tshul khrims bsngags pa ni/ de ltar zhes rkang pa gcig go/ /rwa dang / ba so la sogs pa'i rgyan pas gser dang / dngul la sogs pa'i rin po che'i rgyan mchog tu gyur pa ltar legs spyad de/ tshul khrims ni rgyan gyi mchog go/ /de skad du yang / tshul khrims ldan pa rgyan rnams kun gyi mchog/ / ces gsungs so/ /shes rab bsngags pa ni/ gsal ba'i zhes rkang pa gcig go/ /nor bu dang mar me la sogs pa'i gsal ba'i nang na nyi zla'i gsal ba mchog yin pa ltar shes rab ni shes bya gsal bar byed pas mchog go/ /de la phan yon ci yod ce na/ zhi ba bdud rtsi yangs zhes smos te/ mya ngan las 'das pa chen po 'thob ces bya ba'i tha tshig go/ /de skad du yang / thub pa khyed kyi ye shes kyis/ /snang bas mi shes rab rib dag /'joms pa'i tha na nyi ma yang / /me khyer tsam yang mi po da do/ /zhes bshad do/ /ting 'dzin bsngags pa ni/ dga' ba'i zhes rkang pa gcig go/ /mi rnams kyi dga' ba'i nang na 'khor los sgyur ba'i dga' ba mchog yin pa ltar/ /ting nge 'dzin ni shin tu sbyangs pa'i dga' ba dang ldan pas mchog go/ /'o na de sus rnyed par 'gyur zhe na/ byas pa gzo ba rnams kyis rnyed par sla'i/ byas pa mi gzo bas rnyed par dka' ba'o/ /de gsum gyis 'bras bu mya ngan las 'das pa'i bsngags pa ni/ bkra shis zhes rkang pa gcig go/ /gza' dang rgyu skar dang tshes grangs bzang po la sogs pa bkra shis pa rnams kyi nang na gang gis 'dod pa'i don grub pa'i bkra shis mchog yin pa ltar zhi ba ste mya ngan las 'das pa ni sdug bsngal dang / nyon mongs pa dang bral bas mchog go/ /'on te sdug bsngal dang bral ba tsam yin gyi bde ba ma yin nam zhe na/ bde rgyun sten zhes smos te bde ba'i rgyun mi 'chad pas so/ /de ltar rtogs pa'i chos bsngags nas/ lung gi chos bsngags pa ni/ bde bar gshegs pa'i zhes tshigs su bcad pa gcig go/ /de la brten na phan yon ci yod ce na/ ljon shing zhes rkang pa gcig go/ /'bras bu rgya chen ni mtho ris dang thar pa'o/ /'o na gsung gi don nam tshig gang bsten zhe na/ bde gshegs zhes rkang pa gnyis so/ /sbrang ma me tog bzhag nas sbrang rtsi len pa ltar ro/ /de ltar gdams ngag rgyas par brjod nas/ mdor bsdus te bshad pa'i 'gro ba spyil gdams pa ni/ skad cig ces tshigs su bcad pa gcig go/ /skad cig la lus 'jig longs spyod zad cing rtag tu ste/ gnyen po skyes kyi bar du sems g.yeng zhing 'khrugs par byed pa'i yul lnga po rnams spongs/ zhi ba'i bde 'bras thob par byed cing 'ching ba'i 'tshe ba med par byed pa gcig pu grogs la mi ltos par dben pa ste 'du 'dzi med pa bsten/ bdag dang gzhan 'khor ba las rnam par thar pa mya ngan las 'das pa'i sgo mo dbye ba'i gegs bstan pa lta bu'i gti mug ste rmongs pa dang / 'khrugs pa ste ldongs pa dang / rab rib ste chags pa sol te spongs/ spyir rta rnams rang bzhin gyis gnyid che yang rta'i mchog cang shes ni rte'u ste phru gu nas bag zon che bas shin tu yun ring por gnyid log par 'gyur ba ma yin te/ cung zad gnyid log nas rtswa chu la spyod do/ /de bzhin du sangs rgyas kyi slob ma rnams kyang 'dod pa la yun ring por sten par mi byed de/ cung zad bsten kyang des skyo bar byas nas dge ba spyod do/ /de ltar skye dgu spyi la gdams nas slob ma la bye brag tu 'doms pa ni shing chen po lta bur chos dgu dang ldan par gyis shig ces brjod pa ni/ khyod gcig ces tshigs su bcad pa gcig go/ /dper na shing chen po sdong po lta bu ni brtan pa'o/ /gel pa lta bu bzod pa'o/ /dul ba ni lo ma lta bu'o/ /zhi gnas ni me tog lta bu'o/ /shes rab ni yal ga lta bu'o/ /rgyu rab tu smin pa ni lo bran myu gu lta bu'o/ /smon lam ni rtse mo lta bu'o/ /tshul khrims ni grib ma lta bu'o/ /rab zhi ste mya ngan las 'das pa ni 'bras bu lta bu'o/ /mtsho chen lta bur chos bcu gcig dang ldan par gyis shig ces brjod pa ni/ khyod gcig ces tshigs su bcad pa gcig go/ /dper na mtsho chen po yangs pa ltar shes rab rgya che ba dang / gsal ba ltar shes bya gsal ba dang / byin gyis gzhol ba ltar dge ba la gzhol ba dang / gting zab pa ltar chos zab mo rtogs pa dang / rab tu dang ba ltar dang ba'i dad pa dang ldan pa dang / rtag tu bsil ba ltar nyon mongs pa'i gdung ba las bsil ba dang /sbrul gdug pa'i rnyi yis bag zhad med pa ltar dug gsum med pa dang / me'i 'jigs pa spangs pa ltar ngan 'gro'i 'jigs pa spangs pa dang / rang bzhin gyis rab tu gtsang ba ltar tshul khrims kyi sa gtsang ba dang / skom pa gcod pa ltar sred pa gcod pa dang / gru gzings 'degs pa'i khur bzod pa ltar gzhan don byed pa'i khur bzod pa'o/ /char sprin chen po lta bur chos drug dang ldan par gyis shig ces brjod pa ni/ khyod gcig ces tshigs su bcad pa gcig go/ /dper na char sprin chen po des me tog la sogs pa la phan 'dogs pa ltar skye bo mang po sdig pa las bzlog ste/ dge ba la bkod nas phan 'dogs pa dang / 'brug gi sgra sgrogs pa ltar 'khor ba'i sdug bsngal gyis mi 'jigs pa dam pa'i chos smra ba'i sgra chen sgrogs pa dang / char chen po 'bab pa ltar grags pa rgya chen pos khyab pa dang / char de rlung gi shugs drag pos bskyod pa ltar sems snying rje'i rlung gis bskyod pa dang / sa'i rdul ldang ba zhi ba ltar nyon mongs pa'i rdul rab tu zhi bar byed pa dang / grib mas sa stengs brgyan pa ltar tshul khrims kyis sgo gsum brgyan pa'o/ /de ltar gdams ngag brjod nas/ de las byung ba'i dge ba bsngo ba'i legs pa grub par bsngo ba ni/ bdag gis zhes tshigs su bcad pa gcig go/ /bde gshegs spyod pa ni dang po sems bskyed pa nas tha ma mya ngan las 'das pa'i bar ro/ /rtag tu bde ba ni ji srid 'tsho'i bar du nad med pa'o/ /longs spyod bzang po ni log par 'tsho ba med pa'o/ /yid la re ba 'byor pa ni 'dod pa'i don thams cad grub pa'o/ /gzhan la phan par dga' ba ni/ sems can thams cad sdug bsngal las bsgral nas bde ba la 'god par spro ba'o/ /kun mkhyen ni shes bya thams cad thugs su chud pa'o/ /bgrod par shog ces pa ni de thob par smon pa'o/ /nyes pa zhi bar bsngo ba ni dmyal ba zhes tshigs su bcad pa gcig go/ /dmyal ba'i ngam grog dang g.yang sa lag mthil ltar mnyam mun nag rnam bsal lus la me 'bar ba rab tu zhi ba dang / ro myags btsog pa'i 'dam rdzab bskams nas der 'khrungs shing skyes pa'i pad+ma'i lo mas khebs shing rtsa ba'i khye'u so thon pa dang / ro myags kyi 'dam de gtsang zhing dri zhim gyur nas/ phyogs der pad+ma kha bye bas sa rnams rnam par brgyan pa dang / dmyal ba rnams bde ba rgyas shing bsam pa bzang la rlung ser bu'i ngad bcas char zim 'bab pas tsha ba'i gdung ba zhi bar shog /ston pa 'byung bar bsngo ba ni/ bdud dpung zhes tshigs su bcad pa gcig go/ /sgrogs pa ni dam pa'i chos ston pa'o/ /lha'i chu ni mtshe'u dal gyis 'bab pa'i/ /rtse mo ni der lha dang lha mo rnams rtse bas nang phan tshun dga' ba byed pa bas kyang gdul bya rnams dga' bar mdzad pa'o/ /gdul bya de dag kyang gang zhe na/ lha dang mi 'dul ba zhes smos so/ /gang gi phyir gdul zhe na/ skye shi zhes rkang pa phyed do/ /gang gis 'dul zhe na/ sangs rgyas dag ces rkang pa phyed dang gnyis so/ /brnag pa bzhin du zhes bya ba ni gdul bya rnams gang la mos pa'i skur ro/ /nam zhar zhes bya ba ni rtag tu'o/ /bstan pa rgyas par bsngo ba ni/ 'gro ba zhes rkang pa gcig go/ /de'i 'gal rkyen med par bsngo ba ni/ /'chi bdag ces rkang pa gcig go/ /mthun rkyen tshogs par bsngo ba ni 'phags pa'i zhes rkang pa gnyis so/ /'phags pa'i skye bo ni sangs rgyas dang byang chub sems dpa' dang / nyan thos rnams so/ /'o na rang sangs rgyas 'phags pa'i skye bo ma yin nam zhe na/ yin mod kyi/ de ni lus kyis chos ston gyi ngag gis mi ston pas gtam tshogs med do/ /gtam tshogs ni theg pa gsum mo/ /spel ba ni gong nas gong du rgyas pa'o/ /de la phan yon ci yod ce na/ zhi ba'i bdud rtsi zhes bya'o/ /zhi ba'i bdud rtsi'i char gyis bsil bas don byas shog /zhi ba'i bdud rtsi'i zla ba'i snang ba rab bzang don byas shog /ces tshig rnam par sbyar ro/ /bdag gis slob ma'i spring yig 'di/ /rtogs shing cung zad bshad pa las/ /dge ba dri med gang thob des/ /'gro kun rnam par grol bar shog /slob ma la spring ba'i 'grel pa/ /slob dpon mkhas pa chen po shes rab 'byung gnas blo gros kyis rang gi slob ma rnams la phan pa'i don du mdzad pa rdzogs so// //rgya gar gyi mkhan po bi nA ya tsan dra dang / bod kyi lo tsA ba dge slong chos kyi shes rab kyis sgyur cing zhus te gtan la phab pa'o/ /[ ]@/ /lho za mo tshangs dbyangs la sdug bsngal gyi bye brag bstan pa bzhugs so// @##/ /slom ma lho za tshangs ba'i dbyangs zhes bya ba zhig gis me tog gtor/ gung skyems drangs gus pa bgyis nas/

CLOSE WINDOW