བོད་ཡིག

e-texts based on the ACIP/ALL Input

/ //rgya gar gyi mkhan po ru dra dang / dge slong shAkya 'od kyis bsgyur/ /[ ]@##/ /rgya gar skad du/ tsa tu rbi paR+Ya ka thA/ bod skad du/ phyin ci log bzhi spang ba'i gtam/ 'jam dpal gzhon nur gyur pa la phyag 'tshal lo/ /skyes bu dam pa yid 'ong yul rnams yongs smod smra bar gyur pa na/ /de la yid 'byung skyo bar byed na khyed yid skyo bar cis mi byed/ /khyed kyi lus sdug de yang nyes mang de la smad par byas pa ni/ /yon tan mang yod de phyir bdag gi tshig ni cung zad mnyan par gyis/ /'di ni rtag par gyur tam mi rtag gyur kyang ji srid gyur pa 'di ni bde ba'i don gyur tam/ /der ma gyur kyang gtsang bar gyur tam de med gyur kyang dbang yod gyur/ /rtag min bde ba'i rgyu min gtsang ba ma yin rang dbang can min na/ /ci phyir blo gros rab nyams khyed lus nyes brgyar bcas la chags byed smros/ /ri bo mthon po'i rtse mo'i steng nas sa la lhung bar gyur pa yis/ /zhig par gyur tshe ci 'di bar snang la ni bde ba myong gyur ram/ /skyes nas brtsams te 'chi ba nyid phyir rtag tu rab tu rgyugs pa na/ /sems can rnams ni bar skabs gang du bde ba ji ltar thob par 'gyur/ /gang gis sa 'og 'dzul te klu yi dbang po pad+ma'i rtsa ba ltar 'byin byed/ /gang gis mtho ris 'dzegs te dbang por bcas pa'i lha tshogs med par byed pa dang / /gang gis sa stengs 'phyan 'phyan ni ga dang ni ra gu na la btus 'gyur ba'i/ /'chi bdag des mi tshugs par gang du gnas nas khyed ni 'jigs med 'gyur/ /yun ring 'tsho yang lus ni rgas pas rab tu rnyings pa nyid du 'gyur/ /tshe ni thung 'gyur tshe ni mod la 'chi bdag khar ni 'gro bar 'gyur/ /rga dang 'chi ba'i bar na phongs par bcas par gnas par gyur pa'i mi/ /nyam ngar lhung bas 'di dang 'di las bde ba thob par yod mi 'gyur/ /byis pa rnams la brtse med rgan la gus par gyur pa cung zad med/ /gzhon nu ma la ngor lta phra mo med cing nyam thag rnams la brtse med pa/ /de ltar gzhung lugs med pa'i 'chi bdag gang yin de ni bdag la ni/ /dus la sdod ces gzhon lus sha rgyas sra bar khyed yid ma sems cig / khyim drung gnas pa'i nor ni cung zad rkus zhes thos par gyur pa na/ /rang gi khyim dag bsrung bar bya snyam sems pa 'di ni rigs pa yin/ /mi ni khyem khyem dag nas nyin re drangs te khyer bar byed pa na/ /gshin rje la ci dogs med gyur tam 'gro ba mel tshe cis mi byed/ /ji ltar gsad bya'i me tog phreng btags sil krol mis bskor te/ /gsod sar khrid la gom pa re re bor bas 'chi nye'i sdug bsngal 'gyur/ /de bzhin longs spyod la gnas nyin re 'chi bdag drung du 'gro byed kyis/ /kye khyed 'byor pa dag gis yid ni dregs pa dag tu ma byed cig /'di ni mi rnams tshe ni mchog tu ring yang lo brgya kho nar zad/ /de las kyang ni dang po byis pa tha mar rgas pas don mi byed/ /gnyid dang nad sogs dag gis de dus med par kun nas re ba 'joms/ /bde bar gnas pa'i mi nang 'gro ba'i tshe yi lhag ma ji tsam yod/ /sum cu rtsa gsum bdag po'i g.yul las rgyal ba'i rgyal po de rnams ni/ / shes pa'i snang bas mun pa zad byas drang srong de yang shi bar 'gyur/ /gshin rjes zin par gyur tshe longs spyod kyis min bshes pa dag gis min/ /skyes bu rtsol bas zlog mi byed na 'dir ni mi rnams su la ji ltar skyabs su 'gro/ /bstan bcos klags dang bcas shing rig dang bzo yi bya ba dang bcas dang / /yid rton grogs bcas sdug pa'i chung ma dang bcas drung gnas 'khor bcas pa'i/ /mi rnams 'chi bdag snying rje med pas sa stengs 'dir ni khyab 'gyur bas/ /med par byed na kun gyis ci bya ma yongs dge ba legs par gyis/ /e ma'o skyes bu rmongs rnams 'di na bde 'gror skyes pa bzang zhes grags/ /rga dang 'chi dang na rnams kyis kyang 'di la brtse ba med par grags/ /gzhan las skyes pa'i sdug bsngal brgya phrag 'di dag skyes pa nyid byed de/ /rang gis bskyed nas bu ni gsod pa'i don du de dag la stod byed/ /sha ma'i rkyal par shin tu bsdams shing dbugs ma phyin par nyam ngar gnas/ /mi gtsang khron par lto ba'i me yi tsha ba mi bzad pas bsregs nas/ /smra mi nus shing thos min bskyong ba'i dbang med nyal ba ma yin par/ /mi ni mngal du zla bcu nye ba'i bar du sdug bsngal nyams myong 'gyur/ /dka' ba dag gis byung nas nyi ma'i zer rnos mod la sreg pa dang / tshad pa'i rlung gis bud shing sbrang bu mchu sbrang dag gis gnod pa dang / /nye du dgra bo dag gis lte ba bcad pas na tsha skyed byed dang / /mngal na gnas kyang bla yi snang ba dag tu gnas pa 'di mi rung / /lus kyi bya ba lag pa dag dang rkang pa bskyod pa tsam du zad/ /smra ba'i yul gyur thams cad la yang khyad par med par du bar byed/ /nyal ba'i tshe na gan rkyal gnas pas nyin dang mtshan mo 'da' bar byed/ /sa stengs dag na khu 'jo ba ltar sdug bsngal nyam thag ngas ma mthong / /'dug pa dag las ldang bar mi nus nyal dang 'greng dang 'gro bar bskyod mi nus/ / 'dug ste gnas dang lus mi brtan pas gom gcig 'gro bar nus ma yin/ /tshig gis rang don bstan par mi nus byed 'khrul lus dang ngag la ni/ /dbang byar med par srog 'dzin byed pas kyi hud na tshod 'das sdug bsngal/ /mngal na sdug bsngal mang po yun rings rjes myong gyur kyang mi mthong la/ /'chi ba'i dus kyi gnas skabs skye bo 'dris pa'i mig gi yul ma yin/ /dregs ldan dga' bas bcom pa tshogs sar skyes pa bud med brgya phrag gis/ /mig ni 'ben du gyur pa mda' char 'bab pas nyam thag lta bu yin/ /skom pas kha skams tshe na bsil zhing dri zhim chu ni 'thung ba dang / /bkres pas nyam thag pa na 'bras chan sha dang bcas pa za ba dang / /'dod chags me 'bar gyis gdungs tshe na chung ma dam du 'khyud nas byed pa yi/ /nad sel byed pa bde ba yin zhes skye bo phyin ci log par 'gyur/ /skyes bu zas nyung dag gis ring gyur zas mang dag la mngon dga' bas/ /dbugs mi thon cing sdug bsngal gyur la mi mthun zas kyis 'chi bar byed/ /zas mi 'ju bas nad skyed 'gyur zhing zhu bas bkres pa nyid du 'gyur/ /kye ma zas zos gyur na sdug bsngal mi skyed skabs de yod ma yin/ /shing yag dag ni rab tu 'bar ba'i skabs su me las tha dad min/ /de ni 'jig rten dag gis kyi hud me zhes zer zhing yongs su sdong / /de bzhin lus la sdug bsngal shin tu chen po nyams myong gnas skabs su/ /'di ni sdug bsngal lus 'di myong zhes khyad par med la 'jug mi byed/ /mi gtsang snom zhing srin bu'i tshogs ni brgya yis yongs su bskor gyur la/ /slad sa'i drod kyi dugs kyis mtshungs pa med pa'i sdug bsngal nyams myong zhing / /snang ba med pa'i btson ra'i khyim nang lta bu'i ma yi lto na gnas/ /de bskyed pa na de yang de ltar min nam ci phyir khyod rig byed/ /ji ltar khyi dag rus skam sra la ro med pa la brkam par 'cha'/ /rang gi kha chu khrag gis gos la rnyi zhing zhim pa yin snyam sems/ /de bzhin lus zhes bya ba shin tu 'jigs su rung ba'i tshogs de la/ /rmongs rnams rang gi rtog pas yon tan brgya yis sgro btags dga' bar byed/ /sha rgyas mtho zhing zlum la nu ma'i blo yis kun nas 'khyud pa dang / /kha ni kha chus gang ba chang bcas snod ltar 'thung bar byed pa dang / reg pa'i sred pas mi gtsang rlan pa'i lam la chags pas na/ /'gro ba rmongs pa chen pos ldongs pa dag la yid du mi 'ong ci zhig yod/ /'khru bas dri mas sbags dang dri zhim skud pas mi ro'i dri 'dra dang / /so rtsi 'cha' la brtson par byed pas kha ni dri mi zhim pa nyid/ /gos kyis kun nas dkris pas shin tu mi sdug yin par 'di byed de/ /lus 'di 'jigs su rung bas bdag ni gzhon nu ma la smra zhing rton/ /yid brtan rung las nyan par mi byed bdag nyid kyis kyang rtog med pas/ /khyed la rna ba dang ni snying med pa zhes bya bar shin tu rigs/ /rlon byed 'jigs su rung zhing mi sdug lus kyi dri ni ma tshor ba/ /khyed la 'gro ba sna med yin zhes kyang ni ci yi phyir mi smra/ /shin tu gtsang ba'i dar dang dri zhim me tog sbrang rtsi gur kum la/ /de dang de ni gang du reg na skad cig gis ni mi gtsang 'gyur/ /rma yi sgo dgu dag nas mi gtsang dri nga'i ljan ljin 'dzag 'gyur gang / /de la khyed ni skal bzang yin zhes 'dir ni rlom sems ji ltar byed/ / phung po lnga po 'di la yul dang yul can nyid du brtags nas ni/ /bdag dang bdag gir med pa dag la nga dang nga yi nges byas pa/ /'jig rten rmongs pa 'di ni 'jig rten skom gyis gdungs pa mya ngam du/ /smig rgyu'i chu yi chu bur las byung snod du 'thung snyam sems dang mtshungs/ /bdag ni rtag pa yin zhing bde dang sdug bsngal nyams su myong 'gyur la/ /lus kyi yul ni gcig pu dag la bdag gi zhes blo bskyed du zad/ /bu dang chung ma phyugs rnams zhes bya 'di dag las gzhan gyis bskyed pa/ /de la ji ltar bdag gi zhes rtsi 'dir ni gti mug stobs can yin/ /de ni rgyu las byung zhing gnas pa'ang rang gi rkyen gyi dbang las byung / /dus kyis rgas shing tshe dang bsod nams zad la sogs pas 'chi bar 'gyur/ /skye la dbang byar ma yin rgas la ma yin shi la dbang med na/ /bdag gi chung ma zhes smra ngo tsha bar ni ji ltar de ma gyur/ /gang zhig rtag tu rang dbang gyur dang gang zhig bde ba nyid gyur pa/ /gang zhig skad cig tsam yang 'dor mi 'gyur ba de ni bdag gir bshad/ /lus 'di dbang byar med cing sdug bsngal dag kyang skyo bar 'dor gyur na/ /'di la rim pa gang zhig mthong na 'di la gang zhig mngon zhen 'gyur/ /mi rtag pa la rtag snyam sems la sdug bsngal ba la bder mngon dga'/ /mi gtsang lus la gtsang ba nyid du shas cher zhen par byed pa dang / /bdag med pa la bdag ces 'dzin pa'i rdul rnams rnam par bsal nas ni/ /skye med 'gag med 'chi ba med cing rtag pa'i gnas ni 'bad pas mngon du gyis/ /phyin ci log bzhi 'gag par byed pa'i gtam/ /'di byas pa las bdag gis dge bsags pa/ / gang yod des ni 'gro gsum ma lus pa/ /phyin ci log bzhi las ni yid grol shog /phyin ci log bzhi spang ba'i gtam slob dpon ma ti tsi tras mdzad pa rdzogs so// //rgya gar gyi mkhan po bud+d+ha b+ha dra dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa'o/ /

CLOSE WINDOW