བོད་ཡིག

e-texts based on the ACIP/ALL Input

lo tsA ba dge slong tshul khrims rgyal bas bsgyur cing zhus te gtan la phab pa/ / @#/ /rgya gar skad du/ bi na ya prashA kA ri kA/ bod skad du/ 'dul ba dri ba'i tshig le'ur byas pa/ thams cad mkhyen pa'i nyi ma the tshom gyi mun pa mang po mi bzad pa bsal ba la phyag 'tshal lo/ /rgyal ba nyi ma the tshom gye/ /mun 'joms yun rings phyag 'tshal nas/ /'dul ba las ni legs btus te/ /dri ba kun las btus pa bshad/ /gang zhig 'dul ba la brnyas zhing / /de rig pa la rnam smod pa/ /bdag nyid la yang snyems 'chang ba/ /de yi ched du 'di brjod do/ /sems can mi yi 'gro ba yin/ /bar chad rnams kyang spangs pa la/ /sdom pa mi 'chags par gsungs pa/ /ji lta bu yin bsgrims te smros/ /pha ma ched du bsams gsod dang / /dge slong ma ni sun phyung dang / /dge 'dun dbyen byed sdom pa yi/ /zhing du gsungs pa ji lta bu/ /sngon du pham pa byas gyur la/ /dge slong rnams la rab bsgrims te/ /bsnyen rdzogs gsol ba gang yin pa/ /de la ji ltar 'chags 'gyur smros/ /bsam pa thag pas dkon mchog gsum/ /phyir spong bar ni byed pa la/ /sdom pa med par mi 'gyur ba/ /ci phyir 'di la lan brjod cig /sngon du las kyi cho ga yis/ /legs par bsnyen par rdzogs byas te/ /'khrig pa bsten pa byas nas phyis/ /ci phyir dge slong ming mi 'dor/ /gang zhig dge slong nyid gnas shing / /'dod pa la yang sten byed pa/ /de la mthar ma gsungs ci phyir/ /dri yis de ni bdag la smros/ /dge slong gcig pu zla med par/ /gnas na 'dug par gyur pa la/ /phas pham 'gyur ba ji lta bu/ /sdom brtson soms te smra bar gyis/ /gang gis yan lag lnga ldan pas/ /gzhan gyi nor ni brku byas pas/ /de la pham par ma gsungs pa/ /de ni ci phyir gsal bar smros/ /sdom brtson blo ldan gang zhig gis/ /gzhan rdzas 'grang 'das brkus pa de/ /ci phyir pham par ma gsungs pa/ /de ni bdag la myur du smros/ /sdom brtson rin thang tshang ba yi/ /yo byad gnas nas ma spangs par/ /mthar 'gyur ba ni ci phyir kye/ /bdag la nges par legs par smros/ /sdom brtson rku ba'i sems kyis ni/ /ma byin gnas nas spags pa la/ /phas pham mi gsung ji lta bu/ /khyod kyis bdag la rgyu smros shig / dge slong tshul khrims ldan pa yis/ /ma byin yan lag lnga ldan par/ /brkus na ltung ba med gsungs pa/ /ci phyir khyod kyis the tshom chod/ /dud 'gro'i mngal na gnas pa yi/ /bu ni gsad sems kyis bsad na/ /thub pa de nyid mkhyen pa yis/ /pham 'gyur gsungs pa ji lta bu/ /sdom brtson gsad pa'i sems ldan gyis/ /mi yi mngal nas ltung byed pa/ /pham byed min gsungs ji lta bu/ /gal te khyod la mthu yod smros/ /pha ma bsams bzhin gsad pa la/ /pham 'gyur min zhing mnar med pa'ang / / min zhes gsungs pa ci yi phyir/ /de dris bdag gi mdun du smros/ /brda phrad mdun du bdag sangs rgyas/ /dgra bcom ston pa zhes smras pa/ /pham par ma gsungs ci yi phyir/ /kho bo don du gnyer gyis smos/ /khyod 'bras thob ces de skad 'dris/ /de bzhin no zhes gsal smras na/ /pham 'gyur byed pa yin gsungs pa/ /ci phyir don bzhin smra bar gyis/ /brda phrad pa yi mi'i mdun du/ /'bras bu rnam pa bzhi smras pa/ /de nyid gzigs pas mthar 'gyur ba/ /ci yi phyir na gsungs pa yin/ /dge slong 'bras cig smra bya las/ /gal te 'bras bu gzhan smras na/ /mthar 'gyur byed pa min gsungs pa/ /ci phyir rgyu 'di smra bar gyis/ /'dul ba dri ba'i tshig le'ur byas pa las le'u dang po'o// //yan lag bcu ldan 'byin byed pa/ /dge 'dun lhag ma byed pa zhes/ /bde bar gshegs pas ma gsungs pa/ / ji ltar rgyu ni bdag mdun smros/ /'dod chags la sogs mtshungs ldan pa'i/ /sems kyis bud med bzod pa la/ /reg pa dge 'dun lhag ma zhes/ /thub pas ma gsungs ji lta bu/ /sdom brtson bsams bzhin dge 'dun gyi/ /lhag ma byas nas cho ga bzhin/ /bshags pa la sogs ma byas par/ /ngag gsung ci phyir nges par smros/ /gang zag gcig la spo ba dang / /spyad pa nyid de bzhi po dag /gang gis srid par smra bar gyis/ /ji srid 'tsho bar rang gi gos/ /rab tu mang po ma bsngos shing / /byin ma brlabs par 'chang yang ni/ /dri ma med par ji ltar bzhed/ /tha dad gnas ni spangs pa'i gnas/ /gcig na gnas pa'i dge slong la/ /'brel ba'i dri mas dri ma dang / /bcas par gyur pa ji lta bu/ /zla bas spang gos dge slong gis/ /ji srid 'tsho bar ma spangs na/ /ci phyir ltung ba med pa zhes/ /gsungs pa dri yis gsal bar smros/ /sdom brtson can ni pha ma las/ /chos gos rung ba blangs byas nas/ /ci phyir spangs pa'i nyes pa yis/ /dri ma can du gyur par gsungs/ /zhag bdun pa yi sman dag ni/ /ji srid 'tsho ba'i bar bcangs na/ /ji ltar sdom brtson ltung med par/ / gsungs pa'i don de smra bar gyis/ /shes bzhin du ni brdzun gyi tshig /smras na ltung byed me yis ni/ /ci yi phyir na sdom brtson can/ /shin tu sreg min gsal por smros/ /dge slong gis ni dge slong la/ /skyon nas smra bar byed pa la/ /kun mkhyen thub pas ci yi phyir/ /ltung byed ma gsungs nges par smros/ /dge slong nyon mongs can sems kyis/ /dge slong gis smras phra ma ni/ /dge slong la byas thub pa yis/ /ji ltar dag gsungs khyod bcol smros/ /sdom brtson gyis ni rung ba yi/ /sa bon rnam pa lnga zos na/ /ji ltar ltung byed byed par gsungs/ sdom brtson gyis ni bsgrims te smros/ /g.yogs ma med par dge 'dun gyis/ /gnas mal rung ba bshams nas ni/ /ma brubs ma bltabs par song na/ /ji ltar bur na dag pa gsungs/ /sdom brtson gyi ni rung ba'i gos/ /nye du min pa'i dge slong ma/ /byin la ltung ba med pa zhes/ /gsungs pa ci phyir nges par smros/ /mtshan gcig gnas pa'i dge slong dag /mang po kha zas ma bsrul dang / /tha dad za ba ci yi phyir/ /dag par gsungs pa gsal bar smros/ /kha zas bca' bar bya la sogs/ /rung ba dus min za byed pa/ /ji ltar dag pa zhes gsungs pa/ /the tshom gtan la dbab par gyis/ /dge slong cho ga sngon 'gro ba'i/ /byin len byas nas za byed pa/ /ji ltar ltung dang bcas zhes gsungs/ /khyod la mthu yod gsal bar smros/ /dge slong gis ni dge slong la/ /nyon mongs sems kyis rdeg byed pa/ /thub pas ji ltar nyes byas gsungs/ /khyod kyis gsal bar lan thob cig /sdom brtson me la reg byed pa/ /kun mkhyen thugs rje ldan pa yis/ /ci phyir ltung ba nyes byas gsungs/ /dri yis nges par smra bar gyis/ /dge slong nub gnyis las lhag par/ /bsnyen par rdzogs dang bral ba dang / /nyal bar byed pa ji lta bur/ /nyes byas ltung bar byed par 'gyur/ /sdom brtson tshon rtsi sna gsum gyis/ /kha ma bsgyur ba'i gos gyon pa/ /ci phyir ltung ba med gsungs pa/ /kho bos bcol gyi khyod smros shig /sdom brtson tshon rtsi sna gsum gyis/ /legs par kha bsgyur gos gyon pa/ /ci phyir ltung ba bcas gsungs pa/ /the tshom gyi ni mchog chod cig /sdom brtson rin chen la reg na/ /ji ltar dge 'dun lhag ma dang / /sbom gsungs mdza' bo kho bo yi/ /the tshom brtan po myur du chod/ /rin po che dang de smos la/ /reg pa'i dge slong ji lta bur/ /nyes byas gsungs pa kho bo yi/ /the tshom bsal bas rangs par gyis/ /dge slong rin chen la reg pa/ /thub pas ji ltar ltung med ces/ /gsungs pa kho bo don gnyer khyod/ /myur du gsal bar smra bar gyis/ /sdom brtson rtag tu khrus byed pa/ /bde bar gshegs pas ji lta bur/ /nyes pa cir yang ma gsungs khyod/ /gal te 'dul don shes na smros/ /gal te sdom can gyis ni dus/ /byin gyis brlabs nas brtag byed na/ /thub pa thams cad gzigs pa yis/ /ji ltar ltung dang bcas par gsungs/ /dge slong gis ni dge slong la/ /g.ya' bsgag bsam pas ga ga tshil/ /byed pa ci phyir thub pa yis/ /nyes byas ltung gsungs bcol gyis smros/ /lo ni nyi shu ma lon pa/ /bsnyen par rdzogs par byed pa la/ /ji ltar ltung ba med pa dang / /de don gnyer la'ang chags par gsungs/ /sdom brtson myos 'gyur 'du shes kyis/ /chang 'thungs ji ltar nyes byas kyi/ /ltung bar gsungs ba gal te mthu/ /yod na dogs pa med pas smros/ /sdom brtson mtshan mo rin chen dag /'dug bzhin du ni rgyal po yis/ /gtan brten btsun mo'i gnas yod la/ /gtugs na ji ltar ltung ba med/ / grong gnas dge slong ma la ni/ /sdom brtson de na gnas dag gis/ /kha zas blangs na ji lta bur/ /so sor bshags bya'i nyes byas gsungs/ /'dul ba dri ba'i tshig le'ur byas pa las le'u gnyis pa'o// //dge slong so sor thar pa yi/ /gdon pa lnga char ma bton par/ / ji ltar de yi gso sbyong byas/ /dri yi kho bo la smos shig /so sor thar pa mi 'don cing / /gzhan gyi drung du byin mi rlob/ /ci phyir gso sbyong byas 'gyur 'dir/ /bdag la the tshom yod kyis smros/ /dge 'dun rnyed pa dge slong ni/ /gcig pus blangs na ji lta bur/ /nyes med gsungs pa kho bo yis/ /don du gnyer gyis khyod gsal smos/ /sdom brtson can gyis dge 'dun gyi/ /rnyed pa rung ba bdag gir byas/ /ltung bcas zhes gsungs rgyu ci yod/ /'bad de bdag la smra bar gyis/ /mchod rten la phul rnyed pa gang / /de las dge slong gis blangs na/ / ji ltar ltung ba med pa zhes/ /rgyal bas gsungs pa sdom brtson smros/ /nyan thos kyi la bsngos pa'i rdzas/ sdom brtson mchod rten las blangs na/ /ji ltar ltung ba dang bcas par/ /thub pas gsungs pa sdom brtson smros/ /spo ba spyod gnyis gnas gcig na/ /gnas byed ci phyir nyes med nyid/ /khyod la nus pa yod ce na/ /kho bo la ni shin tu smros/ /nam yang ltung ba med ces pa/ /ci yi phyir na thub pa yis/ /spo bar 'os pa yin par gsungs/ /brtse ldan khyod ni gsal bar smros/ /ltung ba yod pa ma yin la/ /gal te spo ba sbyin byed na/ /ci phyir thub pas ltung med gsungs/ /kho bo la ni nges par smros/ /gsar bus rgan po las 'das na/ /gnas mal len par byed pa la/ /ci phyir ltung ba med par gsungs/ /kho bo the tshom bzlog par gyis/ /gnas mal de nyid spyod pa la/ /ci yi phyir na thub pa yis/ / nyes pa med dang nyes byas gsungs/ /'bod de gsal bar smra bar gyis/ /dge 'dun gyi ni gnas mal la/ /rang gi gos kyis ma g.yogs par/ /spyod pa ci ltar ltung med gsungs/ /brtul zhugs can gyis bdag la smros/ /'dul ba dri ba'i tshig le'ur byas pa las le'u gsum pa'o/ / //ltung ba rnam par rig byed dam/ /ci zhig gzugs can bstan yod dam/ /thogs dang bcas sam zag bcas sam/ /'dus byas yin nam 'on te ci/ /'jig rten pa'am phung por ldan/ /khams dang skye mched ldan pa'am/ /zin pa'am lung bstan 'byung bar ldan/ /de bzhin 'byung ba las gyur pa'am/ /kun sbyor sgrib pa'am nyon mongs can/ /zang zing bcas pa'am 'on te na/ /zhen pa brten pa'am 'thab bcas sam/ /dmigs pa dang bcas yin nam ci/ /sems sam las sam 'on te na/ /rnam smin bcas sam de las gzhan/ /'das pa'am ma 'ongs da ltar yin/ /dge ba'am 'dod dang gzugs khams ldan/ /slob pa'am 'on te mi slob bam/ /ci zhig de nyid spang bya'am/ /ci zhig bsgom pas spang bya'am/ /'on te mthong bas bya ba yin/ /lus kyi 'am 'on te ngag gi 'am/ /'on te ci zhig sems kyi yin/ /dge slong bdag la myur du ni/ /don bzhin dag tu smra bar gyis/ /ci dngos de nyid byed pa la/ /ltung ba dang ni ltung ba med/ /gnyis su 'gyur ba srid yod dam/ /khyod la dri yis myur du smros/ /ci zhig gang gis lhag med par/ /'gyur ba'i gzhi ni de nyid kyis/ /lhag ma dang bcas ltung 'gyur ram/ /dri yis bdag la gsal por smros/ /ci zhig gang gis phas pham pa'i/ /ltung 'gyur gzhi ni de nyid kyis/ /dge 'dun lhag 'gyur de bzhin ltung / /'gyur ram ji ltar bdag la smros/ /gang gis dge 'dun lhag 'gyur ba'i/ /gzhi de nyid kyis dge slong la/ /ltung byed dang ni de bzhin du/ /nyes byas su yang ci phyir 'gyur/ /ci zhig gang gis ltung byed pa'i/ /ltung bar 'gyur ba de nyid kyis/ /so sor bshags 'gyur ci yi phyir/ /dge slong ji ltar 'dod bzhin smros/ /gzhi ci gang gi ltung byed kyi/ /ltung bar 'gyur ba de nyid kyis/ /nyes par 'gyur ram dge slong khyod/ /gal te nus pa yod bdag smros/ /gang gis so sor bshags pa yi/ /ltung bar 'gyur ba'i gzhi de ci/ /nyes byas srid dam mthu yod na/ /dri yis bdag gi mdun du smros/ /ji ltar dge lung ma bstan pa'i/ /sems gnas pa la gsod byed pa/ /mnar bar gsungs mi dge ba yi/ /sems la gnas pa las ma gsungs/ /dge slong rung ba gnas gcig dang / /mtshams gcig gnas bzhin de yi tshig /med par dge 'dun las byas na/ /nyes byas min gsungs ci 'dra smros/ /khyim pa gnas bzhin dge 'dun gyis/ /las shig byas na ji lta bur/ /de yis las kyang byas 'gyur zhing / /ltung ba med par 'gyur ba smros/ /dge dang lung ma bstan sems la/ /gnas pa la ni ji lta bur/ /ltung dang bcas pa zhes gsungs srid/ /bdag mdun ji ltar 'dod pa smros/ /ci dgra bcom la ltung 'byung ngam/ /'di la bdag la the tshom ni/ /brtan po yod kyis 'bod de khyod/ /dogs pa med par bdag mdun smros/ /dge 'dun dbyen byed gang yang rung / /de kun bskal par gnas sam ci/ /dge slong gal te khyod byams na/ / kho bo'i the tshom myur du sol/ /dge slong gyur nas ltung 'gyur dang / /bzlog pa yang ni ji lta bur/ /bdag gi the tshom myur du chod/ /dge slong gnyid ma log pa'i tshe/ /ltung ba byas nas gnyid log na/ /ltung bar 'gyur dang bzlog pa yang / /ji ltar dri yis gsal bar smros/ /stan gcig la ni 'dug pa yi/ /dge slong la ni rgyu gang gis/ /ltung ba ris ni lnga po dag /'byung bar 'gyur ba srid yod dam/ /dge slong sbyor ba gcig gis ni/ /ji ltar ltung ba stong byed 'gyur/ /gal te de nyid rig ce na/ /dri yis khyod ni smra bar gyis/ /bsam gtan dang po la sogs la/ /snyoms par zhugs pa thub pa yis/ /dge 'dun lhag mar ci yi phyir/ /rab tu gsungs pa bdag la smros/ /dge slong tha na nyes byas kyi/ /ltung ba nam du'ang mi 'byin kyang / /'on kyang dge slong ma yin par/ /gsungs pa ci phyir gsal bar smros/ /dge slong ma ni nam du yang / /nyes byas kyang ni mi byed kyang / /'on kyang ji ltar dge slong ma/ /min gsungs bdag don gnyer gyis smros/ /gal te dge slong dgra bcom min/ /pha min bsad na ji lta bur/ /mtshams med pa dang de bzhin du/ /phas pham gsungs par 'gyur ba smros/ /gzhan gyis tshig smras gzhan la ni/ /ji ltar ltung ba ris lnga po/ /'byung bar 'gyur ba bdag la ni/ /sdom brtson myur du smra bar gyis/ /ji ltar dge slong gcig pu la/ /phas pham 'gyur ba bzhi 'byung ba/ /dri yis khyod kyis bdag la ni/ / don bzhin du ni smra bar gyis/ /'dul ba dri ba'i tshig le'ur byas pa las le'u bzhi pa'o// //'di la gsol ba'i las dang ni/ /gsol bar bcas pa du zhig yod/ /legs grags de dang rnam dbye ba/ /khyod ni 'bod de smra bar gyis/ /tshig tu yang ni mi smra la/ /lus kyi rtsol ba mi byed par/ /phas pham ltung ba 'byung 'gyur ba/ /ji lta bur ni khyod smros shig /ltung ba ris lnga byas nas ni/ /'chags par yang ni mi byed cing / /phyir bcos par yang mi byed par/ /ji ltar dag par gsungs par smros/ /gzhan gyis phas pham byas gyur la/ / gzhan zhig pham par 'gyur ba ni/ /thub pas ji ltar gsungs pa dris/ /des na 'di ltar bdag la smros/ /ltung ba kun la gang gis ni/ /bstan pa dang ni bsdu bar 'gyur/ /ngag gis kun nas bslang ba yi/ /kha na ma tho gang che dang / /lus kyi kha na ma tho che/ /gang yin phra mas gang zhig 'gyur/ /dge 'dun gang zag las byung khyed/ /kha na ma tho gang cher 'dod/ /srog gcod rgyu las sdig chen yang / /khyod ni gsal bar smra bar gyis/ /'khrig dang brdzun las gang yin te/ /des ni bdag la smra bar gyis/ /mang du smra lta ci zhig dgos/ /mdor bsdus tshig gcig khyod la ni/ /khro spangs mdza' bor gyur byas nas/ /rab tu bsgrims te smra bar bya/ /sdom pa kun la kun mkhyen gyis/ /skyabs gsum dge slong nyid la ni/ /ji lta bur ni ma gsungs pa/ /de ni bdag la gsal bar smros/ /de ltar 'dul ba rgya mtsho las/ /dri ba thigs pa tsam brgya zhig / bdag gis 'bad de brnyas byed la/ /ma rangs nas ni brgyus pa yin/ /nongs bgyis bla mas thugs rjes kyang / /bcos shing bzod pa mdzad du gsol/ /mthong ba rnams kyis long ba ni/ /dam pa'i lam du cis mi gzung / /'dul ba dri ba rnams byas nas/ / dge ba zla ba lta bur ni/ /dkar po brtsams pa de yis ni/ /'gro ba rtag tu dge legs shog /'dul ba dri ba'i tshig le'ur byas pa le'u lnga pa rdzogs so// //'dul ba dri ba'i tshig le'ur byas pa slob dpon mdo sde 'dzin pa ka l+yA Na mi tras mdzad pa rdzogs so// // rgya gar gyi mkhan po d+harma ka ra dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab pa'o// //[ ]@##/ /rgya gar skad du/ /bi na ya ka pra sh+na TI ka /bod skad du/ 'dul ba dri ba rgya cher 'grel pa/

CLOSE WINDOW